Sepinien xa Diamu
1 Vanuvei ak bat minuk Teopolis, Okila xa moletin xil holu di lasak pisi xa ti latis usil naha xa testal mi xir. 2 Ngan xil xa lateti kokot e latepus holesok xil xa Iesu tepol ni, xil latesep usil longeongen hos mi mosav. E xil xa latelonge, latetis usili. 3 Ma vengan xa inou mun nanggusil kuh holesok xil ngasen ak, di nanemi nabit bos tengan nitis mese ni holesok xil ngasen xa di testal minuk, eilep namem, Teopolis. 4 Napol ni mak vengan xa nabit ukil kuh reitinen te holesok xil xa di otelonge.
Masxaxa Tei Bit Kila xa Lipes Sion
5 Melele xa Herot tehe suv toto tahal Sudea, pris tei te Nim Eo teta, hisen Sakaraea, xa temos e vanut pris na Abitsa. Atou nan, hisen Elsavet, xi mun be vatimol tei na pris Eron. 6 Xalu vus lumal e pe met Hi Suv e lunggusil vuol ni Rae nan xil. 7 Sakaraea be momatu ngamu e horamue nalu tovuol vengan xa tovolih nan be lumalum. 8 Vatei, Sakaraea ba tengan vapol vatel vanut pris xa xi mos en e Nim Eo na Hi. 9 Nggusil sexien matu na pris xil, xil latehosei Sakaraea tengan ihe Nim Eo e itin vokon e hor tengan iha mi Hi. 10 E melele xa Sakaraea de nim, moletin sav xil lasoh ladi hale e di lasis. 11 Vatakes, masxaxa tei na Hi Suv mei mistal mi Sakaraea e misoh de ri matu te hor ak. 12 Melele xa Sakaraea miketeh pusi, mesep e ulin mikan xa mikan. 13 E masxaxa bitene mini bitene, "!Sakaraea, ulum nakan ti! Hi milong sisen nam tuei. Atou nam Elsavet, veter mu ihur horamue tei namil, ihe malahos. Uling hisen ihe 'Sion'. 14 Poten nan isak ni xamil mulimaal, e moletin sav holu mun limaal. 15 Natumali ihe moletin xa eilep e pe met Hi Suv. Xi namu ti vari uaen mu oei te xeih sav mun. E melele xa ita tamu e vang ninen, Ninin Eo mei ipolu en. 16 E xi iaxa ileh mol Isrel xil ihe holu litilomun limei visal Hi Suv nae. 17 E xi itiamu ni Hi Suv itel xeihen ixoni ngan xa tete provet Ilaetsa te tiamu. Xi ileh vituei ni tiramue xil itel horamue nae xil. E ihiles ngan xil xa di lalong ras, mei lihusil suse na Hi xa momal. Xi isak ni moletin na Hi xil livue xat xil ve melengien xa Suv nae istal en." 18 Ma Sakaraea misis masxaxa ak bitene, "?Inou nihur horamue itep? Nikil neta xa obiteni minou itep? Ven nabe mometu ngamu e atou navan mun be tovolih." 19 E masxaxa bit rilomun ni mini bitene, "Inou Kavriel xa di nasoh sangas visal Hi. Xi misil nou tengan xa mei nihit mese ni longeongen hos ak minuk. 20 E vengan xa otake reitin ti e neta xa nabiteni, ma uhe vut. Onasepin ti ituxoh melengien xa holesok xil ak mei istal." 21 E melele xa Sakaraea da tamu e Nim Eo, vanut moletin tei ladatili e di lanemi labit, "?Veneh ma ba da be nousav?” 22 Melele xa Sakaraea mistal, misakras vasepin mi xil. Ma lakila xa Hi pisen neta tei mini. Xi misepin pisi mi xil nggo hen vengan xa be vut dat mak. 23 E melele xa polien na Sakaraea bus e Nim Eo, xi dilomun be metimal nan. 24 Tavehi ti, atou nan Elsavet di ni tuvava. Ma xi minggus dat tim ba duxoh aveti nan be lim (5). 25 E biteni mi xi tasen bitene, "Bos xa taxeak Hi Suv dutou ni nou, xi misak ni nou ninave unoun ti pe met moletin xil."
Masxaxa Tei Bit Kila xa Lipes Iesu
26 E melele xa aveti na Elsavet be tei e he sav (6), Hi misil masxaxa Kavriel be taon tahal Nasaret xa de provins tahal Kaleli. 27 Kavriel nggur sepinien tei tengan iha ihit mese ni mi ate maxoe tei, hisen Meri. Meri, latesikoe xole tuei xa ihur moletin tei, hisen Siosep, xa nggo vatimol na Suv Toto Deved te tiamu. 28 Ma masxaxa ak mei mistal mi Meri e bitene mini bitene, "!Bos minuk! !Hi Suv memaal pupu ve xouk e bosei xouk ra atou sav xil tengan ituxol xatuk!" 29 E melele xa Meri milonge mak, minexo pupu e di minem ves koute te sepinien ak. 30 Di, masxaxa biteni mi Meri bitene, "!Ulum nakan ti! Hi memaal pupu ve xouk, Meri. 31 Xouk uti ni tuvava tei e ulingi ihe horamue. Ti, uling hisen ihe 'Iesu'. 32 Xi ihe eilep tei xa likesi ni 'Nat Hi xa de ut nesao". E Hi Suv ipol ni mei ihe suv toto ixoni avu nan Deved xa te tiamu. 33 Mol Isrel xil liti pe hen ha vuma " hoxalite teni ihe tovuol.” 34 Meri biteni mi masxaxa bitene, "!Inou natakil ti mu tiramue! ?Sepinien nam mei istal minou itep?” 35 Ma masxaxa bit rilomun ni mi Meri bitene, "Ninin Eo imei iti e xouk, e xeihen na Hi ikapis xol xouk. Ve rin ak, horamue xa upesi ihe horamue eo, e likesi ni "Nat Hi". 36 ?Okil tumahin Elsavet? Xi mun ihur horamue tei nan, tave ti neta xa xi be tovolih ngamu. !Reitin mak! Elsavet xa moletin xil labit be lumalum, taxeak, aveti nan be tei e he sav (6). 37 Mak, ma neta tovuol xa Hi misakras vapol ni." 38 Ma Meri biteni mi masxaxa bitene, "Namaal tengan nipol ni naha xa Hi Suv bit nipol ni. Bos tang istal minou ixoni ngan taxa osepin ni minou." Di, masxaxa belingi ba.
Meri ba Misao ni Elsavet
39 Tavehi ti, Meri mea e mitemanon be metimal tei e vathu xil tahal Sudea. 40 Melele xa duxoh metimal ak, xi be tim sa Sakeraea xalu e mikes Elsavet. 41 E melele xa Elsavet milong rae Meri, tuvava nan nggelial e vangen. Ninin Eo bemei e Elsavet, 42 misak ni mikei be nesao bitene, "!Tuxolxatien na Hi di minuk mili e atou sav xil e di mun mi tuvava xa de xouk! 43 ?Veneh ma neta xa bos mak mikila vastal e nou, xa nine suv navan mikila bemei visal nou? 44 Vengan melele xa nalong rae nam, tuvava navan memaal e nggelial e nou. 45 Tuxolxatien na Hi di e xouk vengan xa oteneket xa sepinien na Hi istal minuk ixoni ngan xa tesepin ni minuk.
Kikeien te Memesien na Meri
46 Meri bitene, "Inou, napet rat his Hi. 47 Namaal pupu vengan xa Hi navan be Suv xa miteh meulien navan. 48 Xi en tabong ni nou ti xa nabe atou votei tang te polien nan. Xosali iha, moletin xil ngasen ti lihithiteni xa Hi tetuxol xat nou. 49 Xi xa hisen be eo tepol ni holesok xil xa tellep minou texo xeihen nan. 50 Xi en isa e ngan xil xa di lamerere ni, xil xa ladi taxeak e ngan xil xa ti limei itutou. 51 Nggo xeihen nan, Hi pol ni holesok xil tellep, e di nggol rerat valkoai xil xa di laling xat lingxatien nae xil. 52 Xi mileh rerat suv toto xil ra von xeihen nae, e pet rat moletin votei xil sung. 53 Hi misak ni ngan xil xa di mae nggat xil, langga vin xil ni anien xa, e misil rerat ngan xil xa holesok nae holu, laka hon tang laba. 54 Xi bemei misa tutouen mi horamue xil xa langgo Isrel xa labe moletin nan. Xi minem xat naha xa tehit xati, xa ipisen esaeen nan mi xil. 55 Xi di pol nggusil hitxatien xil xa tepol ni mi avu nar xil, mi Ebraham e mi vatimol nan xil, mol Isrel xil. Hitxatien ak misakras vavus." 56 E Meri de visal Elsavet aveti tol. Di, dilomun be tim.
Poten na Sion
57 Melengien bemei pipin xa Elsavet valing horamue nan, ma milingi be malahos. 58 Moletin sav xil xa ladi sangas visali del vatimol nan xil lalonge xa Hi Suv pol ni bos pupu mini, ma xil mun lamaal dela. 59 Melele xa melengien nan be tol e he sav (8), lamei tengan vahe vexaho. E labit laling his tamen, 'Sakaraea', vata en, 60 e Elsavet bit, "E-e! Hisen ihe 'Sion'." 61 E xil labiteni mini labitene, "!His ak tovuol e vatimol nalu!" 62 Misak ni, lasak pisi di lasis Sakaraea ni he xil tang xa xi ien bei liling his eah en. 63 E Sakaraea bit lasa neta tova xa vakila vatis en. Ma midis, "Hisen be Sion." Xil vus lamesep pupu ven. 64 E melele nen tak, Sakeraea mikila vasepin rilomun, e di pet rat his Hi. 65 Moletin xil vus xa ladi sangas latemanin. Ma longeongen usil holesok xil ak mikapis e rute xil xa hu di en e Sudea. 66 Ngan xil vus xa lalong sepinien xil ak di lanemi xa tuvava ak imeul imei itep. Lakila xa xeihen na Hi di e meulien nan.
Ninin Eo Mei Polu e Sakaraea
67 Ninin Eo bemei e Sakaraea ma xi bitehiteni bit, 68 “Rimes Hi Suv na moletin xil tahal Isrel. Xi pol ni suse tengan moletin nan xil mei vexil vamase. 69 Hi isa 'Moletin teteh meulien en' xa nggur xeihen, mi xir. Xi ixo vatimol na Deved xa tehe moletin na Hi. 70 Hi tehit xati texo provet eo xil te tiamu, 71 xa isa 'Moletin teteh meulien en' imei, ileh rat xir ra he moletin xil xa di laketeh misa ni xir. 72 Xi tehit xati mun xa ipisen esaeen nan mi avu nar xil, e minem xat hitxatien eo nan 73 xa tepol ni tetel avu nar Ebraham tetel sepinien tei xa nggeih. 74 Hi tehit xati xa ileh rat xir ra he ngan xil xa di laketeh misa ni xir, tengan melele xa ranggusil Hi, ulixir nakan ti e, 75 e mikila riti e meulien tei xa ihe eo e imal e pe met Hi, e melengien xil vus te meulien nar.” 76 Di, xi biteni mi tuvava nan bitene, “E xouk, natuxuli, likesuk lihit obe provet tei na Hi xa be nesao. E xouk utiamu ni Suv ha ti usak mese ni suse nan. 77 Upisen ni mi moletin nan xil xa Hi iteh meulien nae e naketeh ti mun nasa mi xil. 78 Eheien e esaeen polu en. Xi isa 'moletin te teh meulien en' mei istal mi xir, ixoni eai xa mistal bemei nesao. 79 Xi ileluv xol ngan xil xa ladi ut te maluxoluk e di uli mikan ni maten; e ileluv mun tengan ipisen suse te tomat mi xir tengan rihusili." 80 Horamue ak meul, mei ven nggeih, e xeihen na Ninin Eo mei polu en. E melele xa xi be tiramue, xi da tasen e uruvuol be duxoh melengien xa xi pol kokot ni polien nan del moletin xil tahal Isrel.
Iesu Tepot e Ut Etan
1 Vatei, e melele xa Okastas tehe Sisa tahal Rom, tesa rae nan teha mi moletin xil e ut ngasen xa xi telaxati. Xi misa sepinien bit moletin nan xil lava, lavuli moletin xil ngasen, e latis xat hise vati vanuvei nan. 2 Ngan ak tehe pupuluen kokot vari xa latepol ni e melele xa Karinias tehe eilep te kavmen tahal Siria. 3 Misak ni, moletin xil ngasen latetilomun latehe metimal xati na vatimol nae, be latesa hise en. 4 E melele nen ak, Siosep mea, reling Nasaret, metimal nan xa de provins tahal Kaleli. Di, nggur suse tengan vahe Betlehem xa de provins tahal Sudea, vengan xa Betlehem be metimal xati na Suv Toto Deved, e xi be vatimol tei nan. 5 Siosep minggur Meri lube Betlehem, vengan xa hitxatien tei da xole tuei xa ihuri ihe atou nan. Meri di tuei e navehi ti iling tuvava. 6 Melele xa ludi Betlehem, melengien nan pipin xa valing tuvava. 7 Xalu luteti im ma vongoro xil vengan xa von toen sav tovuol mun xa laloti en. E inggak, Meri miling muimol nan xa be malahos. Pis xole ni kaliko tei, di milingi pat e von anien na vongoro xil.
Moletin Xil xa Di Lalaxat Sipsip Xil Lalong Longeongen Hos
8 E vongien nen tak, rut moletin xil di lalaxat sipsip xil e ut tei xa be valkesao sangas ni Betlehem. 9 Vatakes, masxaxa tei na Hi Suv bemei mistal, e miehen na Hi mileluv xol xil. Xil latemanin e uli mikan. 10 E masxaxa biteni mi xil bitene, "!Ulimim nakan ti! Namei del longeongen hos tei xa isak ni moletin xil ngasen lihesi xil. 11 E xosali tang, e Betlehem, metimal na suv toto Deved, moletin te teh meulien en pot tuei, xi be Suv Kristo xa Hi tehit xati xa isa ni imei. 12 Suse xa mupus kila en imak: mukamet tuvava tei xa lapis xole ni kaliko tei e lalingi pat de von anien na vongoro xil." 13 Vatakes, vanut masxaxa tei na Hi xa mahulong langgo ut nesao mei lastal del xat ngan xa da, e di lapet rat his Hi labitene, 14 "Merereen mi Hi xa de ut nesao, e ut etan tomat iti mi moletin xil ngasen xa Hi memaal ve xil." 15 Melele xa lakikei bus, masxaxa xil laling xil e ladilomun labe ut nesao. Di, moletin xil xa di lalaxat sipsip xil lasemin xil labitene, "Rave Betlehem, rava rapus ti neta xa Hi Suv biteni mi xir." 16 Ma xil latemanon, laba lakamet Meri del Siosep, e lapus tuvava nalu xa lulingi pat de von anien na vongoro xil. 17 Melele xa moletin xil ak lapus tuvava Iesu, labit usil sepinien xa masxaxa tehiteni mi xil usil tuvava ak mi xalu. 18 Moletin xil vus xa lalonge lamesep ni sepinien nae. 19 E Meri miling kuh holesok xil xa di testal di nenemien nan, e vehakut di minem usili. 20 E melele xa moletin xil xa di lalaxat sipsip ladilomun, xil di lamerere ni Hi e lapet rat hisen ve holesok xil xa latelonge e latepusi. Xil ngasen texoni sepinien xa masxaxa tehiteni mi xil.
Laling His Iesu
21 Melengien tol e he sav (8) mitavi, Iesu be vexaho nggusil sexien na Siu xil. Di, luling hisen be 'Iesu' nggoni xa masxaxa tehiteni mi Meri melele xa tehit xati mini xa ita iling tuvava tei.
Siosep xal Meri Lunggur Tuvava Iesu Be Nim Eo na Hi
22-24 Melengien hanutap lu (40) mitavi, Meri mei mese nggoni Rae xil na Mosis tehiteni. Misak ni, xal Siosep, lube Nim Eo e Serusalem, e luleh mae lu tengan ihe sanien nalu mi Hi. E melele nen ak, lunggur tuvava Iesu mun tengan ha lalilingi e pe met Hi Suv ixoni ngan taxa Rae na Hi Suv tehiteni tehitene, “Muimol xil ngasen xa labe horamue, lihe horamue eo na Hi Suv.”
Momatu Simeon Pet Rat His Hi ve Tuvava Iesu
25 E melengien nen ak, moletin tei tete Serusalem, hisen Simeon. Sexien xil nan momal e xi ien bei Hi. Ninin Eo polu en. Xi di datil melengien xa Hi isa tei xa mei ileh rerat mol Isrel xil ra he kavmen sav xil mei vexil imase. 26 Ninin Eo tehiteni mini xa xi namat ti ituxoh melele xa ipus Kristo xa Hi Suv tehosei. 27 E melele xa Meri xal Siosep lunggur Iesu be Nim Eo tengan lalopol ni mini vaxoni naha xa Rae na Hi tehiteni, Ninin Eo mun tehiteni mi Simeon tengan ihe Nim Eo. 28 E melele xa Simeon pus xatel, xi po xat tuvava Iesu e pet rat his Hi bitene, 29 “Suv, inou nabe moletin te polien nam tang. E taxeak, ukila umae ni nou nimat itel tomat, vengan xa hitxatien nam mistal tuei minou. 30 Inou napus horamue ak tuei ni metok xa iteh meulien e moletin nam xil. 31 E upol ni moletin xil tahal ut xil ngasen lipusi. 32 Xi ixoni laet tei xa isak ni ngan xil xa latave Siu ti, lipus kil xouk e limerere ni xouk. E miehen nan ipol ni moletin nam xil tahal Isrel lileluv tengan mosav xil lipusi.” 33 Melele xa Simeon biteni mak, tame Iesu xal ninen lumesep pupu. 34 Di, xi misa tuxolxatien mi xatel e biteni mun mi Meri bitene, “Tuvava nam ak ipol ni moletin hao tahal Isrel likiri, e rute xil lisoh. Tuvava ak xa nggo Hi, rut moletin xil lisep sisin ni. 35 Xi isak ni nenemien nae xa minggus imei kesao. E naha xa istal itutou, isak ni xouk mun ulonge isa, ixoni ngan xa tiei misi vin meulien nam.”
Provet Anna Mitumul Usil Tuvava Iesu
36 E melele nen ak, provet tei de Nim Eo na Hi, hisen Anna. Xi be nat Vanuel xa be vatimol na pris Aser, e be tovolih ngamu. Melele xa tehe ate maxoe, teteli, e huram lu e he sav (7) tang mitavi, tiramue nan mat. 37 Ma xi tehe tunau ba vuma ... huram nan be hanutap hat e hat e he tei (84). E melengien xil ngasen, makoe be duxoh vongien, xi di mot mi Hi e Nim Eo, di misis e di bal ni anien ven. 38 E melele xa Siosep xal Meri ludi tamu e Nim Eo del tuvava Iesu, Anna bemei vis xatel e memes Hi ven. Dutou ni, xi di mitumul usil tuvava ak mi moletin xil ngasen xa di ladatil Hi tengan mei vapol ni Siu xil tahal Serusalem e tahal ut sav xil mun vexil vamase.
Latdilomun Latbe Nasaret
39 Melele xa Siosep xal Meri lupol sen naha xa Rae na Hi Suv tehiteni, xatel latdilomun latbe Nasaret, metimal natel xati, xa de Kaleli. 40 E tuvava Iesu di matu, e ven mei nggeih. Xi di pol del metisouen, e tuxolxatien na Hi di en.
Horamue Iesu Be Nim Eo na Hi
41 E huram xil ngasen, tame Iesu xal ninen di lube Serusalem tengan lalopol ni Anien te Tavien en. 42 Ma melele xa huram na Iesu be lu e le (12), xatel vus, latoba nggoni ngan taxa di latoba vehakut ve anien ak. 43 Melele xa Anien te Tavien mei mitavi, tamen xal ninen lunggur suse ludilomun, e lutakil ti vari xa Iesu da nga Serusalem. 44 Xalu lunemi lubit di nggusil mosav xil e vanut moletin xil xa ludi en. Ma lukakao melengien tevi tei, di, lulang vesi sung. 45 E melele xa lutakameti ti visal vatimol nalu xil, xalu ludilomun lube Serusalem tengan lalolang vesi en. 46 Melengien tol mitavi, lukamet horamue Iesu, dotan de Nim Eo, di miteong ni tisa xil te rute ak, e di misis pilei xil. 47 Xil vus xa lalonge, lamesep ve kilakilen nan e sepinien xa di misa rilomun ni mi tisa xil. 48 Melele xa lukameti, lutemanin. Ma ninen biteni mini bitene, “?Natuxuli, veneh ma opol ni mak mi xamel? Opol ni xamel manexo pupu, e di malang vesuk e ut ngasen.” 49 E Iesu bit rilomun ni mi xalu bitene, “?Mullang ves nou veneh? ?Multakil ti xa inou ti nite nim na Tata navan?” 50 E xalu lutakil ti koute te sepinien nan. 51 Ma Iesu dilomun be Nasaret del xalu, e di miteong ni xalu. E ninen dit minem xat holesok ngasen xa testal mi xatel. 52 Horamue Iesu di matu, e ven mei nggeih, e polu ni metisouen. Ngan ak misak ni Hi, del moletin xil mun, di lamaal ven.
Setutuen na Sion xa Di Mikas Moletin Xil
1 E melele xa Taeberius tehe Sisa tahal Rom duxoh huram le tei bus (15), moletin hat iaxa di latetutou ni lelaxatien nan: Herot Antipas tehe suv toto tahal Kaleli; tunali Pilip, tehe suv toto tahal Ituria tetel Trakonaetas; Lisanias tehe suv toto tahal Abilin; e Pontias Paelet tehe vat te kavmen tahal Sudea. 2 E melele nen ak, Anas xal Kaeapas lunggur polien te Vatixar na pris xil. E melele ak, Hi misa sepinien tei mi Sion, nat Sakaraea, e uruvuol. 3 Ma Sion mikakao e ut ngasen xa di sangas visal Oeisal Sodan e di misetu mi moletin xil bitene, “!Muhiles meulien namim ra tesaen! Ti, mei nikas xamim tengan ipisen ni mi moletin xil xa Hi iketeh ihos mi xamim!” 4 Provet Aesea tetis usil setutuen na Sion e melele xa tehiteni tehit, “E uruvuol, moletin tei di mikei, 'Musak mese ni suse na Hi Suv; muserep suse nan. 5 Mutihin sesale xil, e muhil lelen hu xil. Mumal ni suse xil xa mikavui, e mutihin suse xil xa misa. 6 !E moletin xil vus lipus xeihen na Hi xa mei iteh meulien e xil!'” 7 Moletin xil holu lamei tengan Sion vakas xil e oei, e xi biteni mi xil bitene, “!Xamim munggoni vanut tetal tesa xa di langas vin moletin ni vulonge! ?Visi bit xamim mukila mulesae ra longpangasien xa Hi isa ni imei? 8 Mupol ni sexien xil xa ipisen ni xa mubiles meulien namim reitin. E ti munahiteni ti munahit Ebraham be avu namim, ma Hi ti imaal ve xamim vehakut. !E-e! Nabiteni mi xamim, Hi mikila vahiles hat xil ak mei laxoles xamim e lave vatimol na Ebraham xil. 9 Akis mese tuei da tengan itei amulut vatiei xil ngasen xa tataxao kuhi ti. Hi itei xotehi e iso ni ihe upang.” 10 E moletin xil ak lasis Sion, “?Ma xamem mupol ni naha vari?” 11 Sion biteni mi xil bitene, “Xosxa tei xamim eising nan lu, ma isa tei mi mosav xa nan tovuol. Xosxa anien amim di, ma musa rute mi mosav xil.” 12 Di, moletin xil xa di laleh vatu te takis lamei tengan vakas xil, e xil lasis Sion labit, “?Tisa, xamem muhiles meulien namem itep?" 13 Ma Sion biteni mi xil bitene, “Munaleh vatu te takis ti nali naha xa rae mae ni.” 14 E rut moletin xil te vaeen mun lasisi labit, “?E itep mi xamem? ?Xamem muhiles meulien namem itep?” Ma Sion biteni mi xil bitene, “Munaxeih xat moletin xil ti tengan lasa vatu mi xamim. E munahur ti vatu naxo suse xa muluvos mosav e kot en. Mulonge ihos tang ve vatu xa di mungguri.” 15 Xil ngasen labesi xil, e di lanem vesi labit, “Xos Sion iaxa be Kristo xa Hi tehit xati tehit imei mi xir.” 16 Misak ni Sion bit rilomun ni mi xil bitene, “Nikas xamim ni oei tang. E tei xa itutou imei, ihur xeihen mu ili nou. E inou natapin ti xa nalal rat sandel nan. Xi ikas e xamim ni Ninin Eo e ni upang. 17 Xi bue xat xi tengan valepis moletin xil ngasen, ixoni moletin xa di po savel tengan vaseti utut uit ra valite. Utut uit xa bos, ileh xati iha ihe e nim teni; e valite, iso ni ihe upang xa misakras vamat.” 18 E sexien nen tak, Sion misetu ni longeongen hos mi moletin xil e misel xat xil tengan lihiles meulien nae.
Sion Mikas Iesu ni Oei
21 Melele xa Sion di tamu mikas moletin xil, xi mikas Iesu mun ni oei. E melele xa Iesu di misis, tilang hat misaha. 22 Ninin Eo bemei e tan nggoni mae, mei dotan en. E rae tei nggo ut nesao bitene, “Xouk obe natuxuli reitin e eheien navan di e xouk. Inou, namaal pupu ve xouk.”
Suv Toto Herot Miling Sion e Nim te Xeih
19 Di, Sion sepin nggeih mun mi Suv Toto Herot vengan xa tehur atou na tunali tehe atou nan, hisen Herotias. E Sion di tehithiten holesok hao mun xa tamal ti xa Herot tepol ni. 20 Misak ni, Herot pol ni neta tei xa misa pupu mili sexien sav xil nan, xi biteni mi moletin nan xil tengan lital xat Sion e lilingi e nim te xeih.
Avu Xil te Vatimol na Iesu
23 Melele xa Iesu tepol kokot ni polien nan, huram nan tehe hanutap tei e hexalu mun (30). Xil vus lanemi labit xi be nat Siosep. E avu na vatimol na Siosep xil, hise xil temak: Siosep tehe nat Heli, 24 xa tehe nat Matat, xa tehe nat Livae, xa tehe nat Melki, xa tehe nat Sanae, xa tehe nat Iosep, 25 xa tehe nat Matataeas, xa tehe nat Amos, xa tehe nat Neham, xa tehe nat Esli, xa tehe nat Nanggae. 26 E Nanggae tehe nat Mahat, xa tehe nat Matataeas, xa tehe nat Semein, xa tehe nat Sosek, xa tehe nat Soda, 27 xa tehe nat Soanan, xa tehe nat Resa, xa tehe nat Serubabel, xa tehe nat Seltiel, xa tehe nat Neri. 28 E Neri tehe nat Melki, xa tehe nat Adi, xa tehe nat Kosam, xa tehe nat Elmadam, xa tehe nat Er, 29 xa tehe nat Sosua, xa tehe nat Eliesar, xa tehe nat Sorim, xa tehe nat Matat, xa tehe nat Livae. 30 E Livae tehe nat Simeon, xa tehe nat Sudah, xa tehe nat Siosep, xa tehe nat Sonam, xa tehe nat Eliakim, 31 xa tehe nat Melea, xa tehe nat Mena, xa tehe nat Matataha, xa tehe nat Netan, xa tehe nat Deved. 32 E Deved tehe nat Tiese, xa tehe nat Ovet, xa tehe nat Boas, xa tehe nat Salmon, xa tehe nat Nason, 33 xa tehe nat Aminatap, xa tehe nat Atmin, xa tehe nat Arni, xa tehe nat Hesron, xa tehe nat Peres, xa tehe nat Sudah. 34 E Sudah tehe nat Siakop, xa tehe nat Aesak, xa tehe nat Ebraham, xa tehe nat Terah, xa tehe nat Nahor, 35 xa tehe nat Seruk, xa tehe nat Rehu, xa tehe nat Pelek, xa tehe nat Eber, xa tehe nat Sela. 36 E Sela tehe nat Kenan, xa tehe nat Arpaksat, xa tehe nat Sem, xa tehe nat Noah, xa tehe nat Lamek, 37 xa tehe nat Metusela, xa tehe nat Inok, xa tehe nat Saret, xa tehe nat Mahalalil, xa tehe nat Kenan, 38 E Kenan tehe nat Enos, xa tehe nat Set, xa tehe nat Adam, xa tehe nat Hi.
Temat Misak Pis Iesu
1 Melele xa Iesu dilomun ra Oeisal Sodan, xeihen na Ninin Eo xa tepolu en, midela be uruvuol. 2 E rute ak, Temat di misak pis Iesu melengien be hanutap lu (40). E melele nen ak, xi taxanien ti, ma melele xa melengien xil ak mei mitavi, Iesu mae nggati. 3 Mak, ma Temat biteni mini bitene, “Xosxa xouk obe Nat Hi reitin, ma uhiles hat xil ak mei lihe beret.” 4 E Iesu bit rilomun ni mini bitene, “Vanuvei na Hi biteni bit, 'Moletin misakras vameul e anien kestang.” 5 Di, Temat nggur Iesu be nesao e vat hu tei, e vatei takeres, xi pisen ut xil ngasen te ut etan mini. 6 Temat biteni mini bitene, “Niling xouk uhe suv toto xa ulaxat ut xil ak; e holesok xil vus te ut etan, nisa ni minuk. Vengan xa holesok xil vus ak di e heok, e inou, nikila nisa ni mi moletin eah xa ieok bei nabit nasa ni mini. 7 Xosxa umot minou tang, ma nisa sen holesok xil ak minuk.” 8 E Iesu bit rilomun ni mini bitene, “Vanuvei na Hi biteni bit, 'Umot mi Hi Suv nam, e upol mini kestang.'” 9 Di, Temat nggur Iesu be Serusalem e ba milingi misoh e taep te Nim Eo na Hi xa be nesao pupu. Di, biteni mini bitene, “Xosxa obe Nat Hi reitin, hut he tan. 10 Vengan xa Vanuvei na Hi biteni bit, 'Hi isa masxaxa nan xil limei lihur xolok. 11 Xil lipo xatuk tengan onasip hat ti.'” 12 E Iesu bit rilomun ni mini bitene, “Vanuvei na Hi biteni mun bitene, 'Onasak pis Hi ti xa be Suv nam.'” 13 Melele xa Temat misak pisi e rin xil vus, xi be ling Iesu vuteili.
Polien Kokot na Iesu
14 Iesu dilomun be Kaleli e polu ni xeihen na Ninin Eo. Longeongen teni mikapis e ut ngasen. 15 Xi ba di pispisi mi moletin xil e nim tepispisien na Siu xil, e xil di lamaal ve sepinien nan.
Moletin Xil Tahal Nasaret Lasin Iesu
16 Di, Iesu dilomun be Nasaret e rute xa tematu en. E Sabat, xi be nim tepispisien nggoni ngan taxa di pol vehakut ni. E melele xa mea misoh tengan xa vavuli Vanuvei Eo, 17 xil lasa Vanuvei na provet Aesea mini. Xi vuli bit, 18 “Ninin Eo na Hi Suv bemei e nou, vengan xi tehosei nou tengan nihit longeongen hos nan mi ngan xil xa labe hoeo. Xi misa nou namei tengan mamiteni mi moletin xil xa ladi nim te xeih, ha vexil vamase. Nipol ni ngan xil xa mete bar mei liketeh rilomun. Nileh rerat ngan xil ra he mosav xil xa di lapurun xil. 19 E nihithiteni xa Hi Suv tehosei melele ak tengan itutou ni moletin nan xil en.” 20 Iesu boh xol vanuvei, di misa rilomun ni ba mi moletin xa di dutou e nim ak, e dotan. Moletin xil ngasen xa lateti, lale mah xat Iesu. 21 Di, xi biteni mi xil bitene, “Vanuvei Eo na Hi xa mutelonge inou di nabuli, taxeak tang sepinien teni mei be reitin.” 22 Moletin xil vus lamesep ve pispisien xil xa bos xa di misa ni e lamaal ven. Xil di lasep usili labitene, “!Ei! ?Tave nat Siosep ti tang iaxai?” 23 Iesu bit rilomun ni mi xil bitene, “Nakila xa lihiteni minou sepinien matu tei xa bitene, 'Tokta, uhur rat meseien ra xouk." Iemim bei nipol inggak, e metimal xati navan, holesok xil vus xa mutelonge di natepol ni e metimal tahal Kapaniam tengan muke reitin e nou. 24 E nabiteni reitin mi xamim, provet tovuol tamu xa moletin xil te metimal xati nan ti lavur pilei. 25 Te tiamu, e melele na provet Ilaetsa, us tenamus ti huram tehe tol e rute, e moletin xil vus mae teat xil. E Isrel, tunau xil latehe holu, 26 e Hi misil Ilaetsa mika kes tang ve tunau tei xa tave tahal Isrel ti. Xi de metimal tahal Sarevat sangas ni Saedon. 27 Teimun, e melele na provet sav Elisa, moletin holu tahal Isrel langgur meseien leporsi. E Elisa tenapol ni ti tenbe xil vamemese, xi tepol ni mi Neman tahal Siria kestang xa tave tahal Isrel ti.” 28 Melele xa moletin xil xa ladi nim tepispisien lalong sepinien nan, xil vus iexil mikati ven. 29 Ma latamea, lameru xati e langgol rati ra metimal nae. Lalihi labe seri meteh xa de sangas visal metimal nae, vengan labit litivin rat Iesu vamot vahe tan en. 30 E Iesu mitamea, mikakao nggo hilaep te vanut moletin xil ak, e be reling xil ba.
Moletin Tei xa Ninin Tesa Da En
31 Di, Iesu be metimal tahal Kapaniam xa de Kaleli. E rute ak, Iesu di pispisi mi moletin xil e Sabat. 32 Moletin xil ak lamesep vengan xa sepinien nan momal e lakila xa xeihen da en. 33 E melele nen ak, moletin tei xa ninin tesa da en de e nim te pispisien. Xi mikei nggeih xat Iesu bitene, 34 “!Ei, Iesu ngan Nasaret! ?!Osak ni naha mi xamem!? ?Omei inggak tengan omu vin xamem? !Inou nakilak, xouk obe Moletin Eo na Hi!” 35 Iesu misel nggeih ba ni ninin tesa ak bitene, “!Ta votei, e he reling moletin ak!” Ninin tesa bas tan ni moletin ak pe met moletin xil vus. Di, be lingi e tasa ti mun pangasien mini. 36 Moletin xil vus lamesep e di lasis xil mun labitene, “?Hisit pispisien eah xiak? !Moletin ak di misepin del xeihen, e melele xa misepin nggeih mi ninin tesa xil, lateong ni e labe reling moletin xil!” 37 Ma longeongen usil Iesu mikapis ut ngasen sangas ni Kapaniam.
Iesu Mileh Rerat Meseien ra Moletin Holu
38 Melele xa Iesu be reling nim te pispisien, xi be tim sa moletin tei tahal Kapaniam, hisen Saemon Pita. Melele xa duxoh tim, xil mei labit mese ni mi Iesu xa avu atou kokon na Saemon Pita mesei, ven minggan pupu. 39 Ma Iesu be visali e misel xat meseien bit, “!He relingi!” Vatakes, atou ak milonge bos, ma xi mea, be pol ni anien ae. 40 E mahis, melele xa Sabat bus e moletin xil lakila lapol rilomun, moletin xil hao laleh tua nae xil xa lamesei, lamei vis Iesu. Xi miling hen e xil kekes e xil vus mei lalonge bos. 41 E melele xa Iesu nggol rerat ninin tesa xil ra moletin xil hao, xil di lamuis kei ba ni Iesu labitene, “!Xouk obe Nat Hi reitin!” E xi misep xol xil tengan linasepin ti vengan lakila xa xi be Kristo xa Hi tehosei.
Iesu Di Pispisi e Nim Te Pispisien Xil
42 E visuvong nen, e makoe roroh, Iesu be rute tei xa be uruvuol tengan xa ha vata sen en. E moletin hao te rute ak lamei lalang ni. Melele xa lakameti, xil lasak pisi lake xati tengan nave reling xil ti. 43 E Iesu biteni mi xil bitene, “Moletin xil te rute sav xil mun likila lilong longeongen hos xa Hi imei ihe suv toto te meulien na moletin xil. Ve rin ak iaxa, Hi tesa nou ven namei.” 44 Ma xi nggulehi dit pispisi usil longeongen hos na Hi e nim te pispisien xil e rute xil ngasen e provins tahal Sudea.
Iesu Mikes Kokot ni Moletin Hat xa Ti Lihusili
1 Vatei, Iesu misoh de suhon te Oei Kaleli sangas ni Keneseret e moletin xil labe holu pupu. Lamei lating xati tengan lalong ti sepinien na Hi. 2 Sangas e ut, Iesu mipus tuturil lu na moletin ngan xil te sar meseo en xa lateling xalu ludi. Moletin nen xil laba lakas moten net nae xil. 3 Di, Iesu peou be tuturil tei, xa be na Saemon Pita, e misisi tengan vativini valis luvoluv vahe ling ut. Di, Iesu dotan de tuturil ak, e di mipispisi mi moletin xil xa ladi ut. 4 Melele xa Iesu misetu mi xil bus, di misepin mi Saemon Pita bitene, “Xamitel, tohalis ni tuturil valis vahe huinep, e mutistokovein net namitel ihe tan tengan mutsar ti meseo xil.” 5 E Saemon Pita bit rilomun ni mi Iesu bitene, “Suv, e vongien, matbilao tova tang e mataxur ti meseo vari. E vengan xa obiteni minou mak, ma bos tang, matiso net namatel ihe tan.” 6 E melele xa xatel latso net be tan, meseo xil holu mei laba en vuma ... sangas langgur papas net. 7 Ma latokei ba ni tua natel xil xa ladi e tuturil sav mun tengan mei litutou ni xatel. Ma lamei lase tuturil xalu vus ni meseo vuma ... polu tova tang, sangas xa ti lalomarir. 8 Melele taxa Saemon Pita pusi mak, mot be tan mitingeiril pe met Iesu e biteni mini bitene, “!Suv, onamei ti sangas visal nou! Inou nabe moletin tesa tang.” 9 Pita biteni mak vengan xa xi del ngan xil vus xa ladi visali lamesep ni vanut meseo xa latesar xil. 10 Xalu xa lupol del Saemon Pita, hisealu Temis e Sion xa lube nat Sepeti, xalu mun lumesep. E Iesu biteni mi Saemon Pita bitene, “!Ulum nakan ti! Taxeak iha, onasar kes ti meseo tang, e ti usar moletin xil mun.” 11 Ma lalihi tuturil nae be ut, lastokovein holesok nae xil di, e laba langgusil Iesu.
Iesu Dal Rat Moletin Tei Ra Meseien Leporsi
12 Vatei, Iesu temei tehe taon tei. E rute ak, moletin tei da en, meseien leporsi tehas pupu ni. E melele xa moletin ak pus Iesu, bemei visali e mot mitingeiril be tan pe valnaon. Xi midak kesi bitene, “!Suv, xosxa iem bei, xouk okila opol ni veok vamemese!” 13 Ma Iesu misa hen ba duxoli, e bitene, “Ieok bei napol ni. !Vem imase!” Vatei takes, meseien nan bus, relingi vari. 14 E Iesu misepin nggeih ba ni bitene, “Onahithiteni ti mi mosav xil, e uha mu, upisen xouk mi pris tova xa de Nim Eo tengan ipus kuh tenbom. Ti, usa sanien eo nam mini ihusil naha xa Rae xil na Mosis tehiteni. Imak, ma moletin xil ngasen likila xa meseien nam bus, omemese ngamu.” 15 Mak toma, e longeongen usil naha xa Iesu pol ni di kapis miloh be ut sav xil mun. Ma, vanut moletin xil holu lamei tengan xa ti litaeong ni pispisien nan e ti ileh rerat meseien ra xil. 16 E vehakut, Iesu milang ni ut ngan tengan ha ti ita sen en e ti isis.
Iesu Pol ni Moletin Tei xa Rut Tenben Temat Mikakao
17 Melengien tei, Iesu di mipispisi mi moletin xil, e rut Parasi xil del tisa xil te Rae xil na Mosis mun latexo rut ut ngan xil e provins tahal Kaleli, e hal Serusalem e rut ut ngan mun e provins tahal Sudea. Xil ak mei latotan e di lataeong ni Iesu. E xeihen na Hi Suv bemei nggeih mu e Iesu tengan mikila di mileh rerat meseien ra moletin hao. 18 E melele nen ak, moletin ngan xil lamei lapo tei xa rut tenben mat de von paten nan. Lasak pisi lapoe vahe nim tengan vaha lalingi pe met Iesu. 19 E vengan xa vanut moletin xa de nim nggonaxon pupu, lasakras lave sangas visal Iesu. Mak toma, lapoe lapeou labe hilim nesao, ladal rerat rut hilim ak, e lapol ni mesal en. Di, lasae ni moletin ak del von paten nan nggo en, ba vari de hilaep te moletin xil, momal pe met Iesu. 20 Melele taxa Iesu mile kil neketen na termali, biteni mi moletin ak bitene, “Tua, xosali, nakas moten met Hi ve tesaen nam tengan iketeh ihos rilomun ni xouk.” 21 Melele xa Parasi xil del tisa xil te Rae xil na Mosis lalonge mak, di laseputut ni labitene, “!Ei! ?!Moletin ak di bit xi pipin mi Hi!? Hi kestang mikila ipol ni moletin imeluv ra tesaen xil nan.” 22 E Iesu mikil nenemien nae, ma biteni mi xil bitene, “?Veneh ma di munemi mak? 23 ?Midep? Be temale minou tang tengan xa namiteni mi moletin ak namitene, 'Omeluv ra tesaen xil nam,' mu namiteni mini namit, 'Mea soh e kakao'? 24 E taxeak mupusi xa Nat Moletin minggur xeihen e ut etan tengan vasak ni moletin vameluv ra tesaen xil nan.” Di, Iesu biteni mi moletin ak bitene, “!Mea soh! Po von paten nam e kakao he tim.” 25 Vatakes, moletin ak mitamea misomal e hilaep te moletin xil ak. Mipo von paten nan, e suse nan be tim di misa memesien ba mi Hi. 26 Xil vus latemanin ni e misak ni xil lanem pupu. Lames Hi ven e labitene, “!Xosali, rapus neta tei xa mahulong pupu!”
Iesu Mikes Livae Mei Ti Ihusili
27 Dutou ni ngan nen ak, Iesu mistal nggo nim ba, e pus mol Siu tei xa di pol mi kavmen, hisen Livae. Xi dotan de von polien nan tengan moletin xil ti laxal takis mini. Di, Iesu mikesi bitene, “!Amei, husil nou!” 28 Misak ni Livae be reling holesok nan xil di, e ba nggusil Iesu. 29 Dutou ni ngan ak, Livae pol ni anien tei xa mahulong mi Iesu e tim san. Ma misis moletin te takis xil del rut moletin sav ngan xil mun tengan lamei e lavanien vituei. 30 Parasi xil e rut tisa te Rae xil na Mosis di laseputut ni Iesu mi moletin xil nan labitene, “?Veneh ma di mungganien e di mumun del moletin xil te takis e del rut moletin tesa sav xil ak?” 31 Iesu biteni mi xil bitene, “Moletin xil xa di lanemi xa latamesei ti, iexil tavei ti tokta. E tokta be na ngan xil kestang xa lakila labit lamesei. 32 Inou natamei ti tengan xa ti nikes moletin xil xa labit meulien nae momal ngamu. E-e, natemei tengan ti nikes moletin tesa xil tengan ti lihiles meulien nae.”
Moletin Xil Lasis Pilei Iesu Usil Halen ni Anien ve Sisen
33 E melele Iesu da tamu e nim ma Livae, rut moletin ngan xil labiteni mini labitene, “Vehakut, moletin xil na Sion di lasis e di labal ni anien ven. E moletin na Parasi xil mun mak tang. E mapusi xa moletin nam xil latapol ni ti vamak. Vehakut, dit langganien e di lamun.” 34 Iesu biteni mi xil bitene, “E vong tetelien tei, moletin xil limei ve anien teni. Tamal ti tengan laval ni anien e melele xa moletin xa miteli del xat xil tamu ladi. 35 E melengien imei xa moletin tesa xil lihur rat nou ra moletin navan xil. Itutou ni melele nen ak, xil ti sung lihal ni anien.” 36 Di, Iesu dei vole mi xil bitene, “Moletin tovuol xa vatal pas eising hu tei nan e vahur rute tengan vatil xol eising matu nan xa mahoe ni. Maxani, ipurun eising hu nan, e samulit eising hu ak tamal ti mun ni eising matu. 37 Moletin tovuol xa vateh uaen hu vahe valite matu xa lapol ni ni hilbe sipsip vengan xa nggeih ngamu. Maxani, uaen hu ikaeo vuma ... isak ni valite matu iposou e imahoe. Iti, uaen imie vuma ... ivus, e valite mun isa vari. 38 E-e, uaen hu bos xa litehi ihe valite hu xa mavoh tang. 39 E moletin xil xa di lamu uaen matu, xil iexil tavei ti lamu uaen hu vengan xa xil lanemi labit, 'Uaen matu bos mak mu.'”
Parasi Xil Lasis Pilei Iesu Ve Rin te Sabat
1 Vatei, e Sabat, Iesu del moletin nan xil di lakakao langgo naho tatei te uit. Moletin nan xil di lakixototeh uit xil ak, langgoxo utute, e di langga ni. 2 Rut Parasi xil lasisi labit, "?Veneh ma di mupol ni sexien xa Rae xil na Mosis bit ti rinapol ni ti e Sabat?" 3 Iesu bit rilomun ni mi xil bitene, "?Xamim mutakil ti naha xa Suv Toto Deved tetel moletin nan xil latepol ni e melele xa mae teat xil? 4 Tave ti neta xa Rae bit pris xil kestang lia beret eo, Deved tehe Nim Eo na Hi, tehur beret xa pris xil lasa ni tuei mi Hi e tea ni. Di, tesa rute mi moletin nan xil latea ni.” 5 Di, Iesu biteni mi xil bitene, "Nat Moletin iaxa be eilep mu mili Sabat."
Iesu Pol ni He Moletin Bos e Sabat
6 E Sabat tei mun, Iesu ba di pispisi e nim te pispisien tei. E rute ak, moletin tei xa da en, hen metu mat. 7 Rut tisa xil te Rae xil na Mosis del rut Parasi xil labit lakamet rin tova xa Iesu vapol ni vasa tengan ladal xati ven. Ma di lapus Iesu xa nahe vapol ni he moletin ak vahos e Sabat, mu napol ni ti. 8 E Iesu mikil nenemien nae, ma biteni mi moletin ak bit, "!Amei, soh inggak!" Ma moletin ak mea, ba misoh pe met moletin xil ak. 9 Di, Iesu biteni mi xil bitene, "Nasis xamim, '?Rae xil na Mosis mae ni tengan ti ripol ni naha e Sabat? ?Ripol ihos, mu ripol isa? ?Ritutou ni meulien na mosav, mu rihas vin ni?" 10 Miketeh mikapis e xil, di, biteni mi moletin ak bitene, "Te momal ni hem." Xi pol ni tang, ma hen bos mun. 11 Xil iexil mikat pupu, ma di lasep vesi xa lipol ni naha mi Iesu.
Iesu Miti Moletin Nan Xil xa Labe Lu e Le Tei
12 E melele nen ak, Iesu be nesao e hu tei tengan ha vasis. Xi misis mi Hi e vongien nen ak ba duxoh makoe. 13 Melele xa ut milan, xi ba mikes moletin nan xil vus lamei visali. E xi miti xil labe lu e le tei tang iaxa mei labe eloheoh nan: 14 Saemon (xa Iesu miling hisen tei mun be "Pita") del tunali Andriu; Temis xal Sion; Pilip xal Batalomiu; 15 Matiu e Tomas; Temis nat Alveas; e Saemon (xa lakesi ni Silixin); 16 Sudas nat Temis, e Sudas Eskariot xa imae ni Iesu ihe he xil xa lihasi imat.
Iesu Di Pispisi e Di Mileh Rerat Meseien ra Moletin Xil
17 Melele xa Iesu del moletin nan xil lasuvul e hu lamei e tan, xi misoh de ut tei xa be motan del vanut moletin nan xil xa labe holu. Vanut moletin tei xa be mahulong mun lamei e rute ak. Ngan xil ak langgo hal Serusalem e rut sav xil e provins tahal Sudea; e rut moletin xil mun langgo hal Taer xal hal Saedon xa di sangas visal tas. 18 Xil lamei tengan xa lateong ni Iesu e tengan xa xi valeh rerat meseien ra xil. Ngan xil mun xa ninin tesa xil di purun xil lamei, ma Iesu nggol rerat ninin tesa xil ak ra xil, ma vexil mase. 19 Moletin xil vus lasak labit lituxol ti Iesu, vengan xeihen xa da en misak ni di mileh rerat meseien ra moletin xil ngasen.
Iesu Bit Rut Moletin Xil Lilonge Ihos, e Rut Moletin Xil Lilonge Isa
20 Di, Iesu miketeh pus moletin nan xil e biteni bit, “!Xamim xil xa holesok namim tovuol, mulonge ihos; vengan xa Hi be Suv Toto e meulien namim! 21 !Xamim xa taxeak di mae nggat xamim, mulonge ihos; vengan xa anien amim ihe holu! !Xamim xa taxeak di mudang, mulonge ihos; vengan xa xamim mei ti mumen! 22 “Xamim mumaal tang melele xa moletin xil di iexil mikat xamim, di lasin xamim, di lasep sisil xamim, e di labit mube han tesa vengan xa di munggusil xat Nat Moletin. 23 Mumaal melele xa xil lapol ni mak mi xamim e muhutahut itel sien, vengan xa sanien tei namim xa mahulong de ut nesao. Bos xa mukila xa ngan xil xa di lapol misa ni xamim, avu nae xil mun di latepol ni temak tang mi provet xil tetiamu. 24 “!E isa pupu mi xamim xa taxeak holesok namim holu, vengan xa mupus meulien hos ngamu! 25 “!Isa pupu mi xamim xa taxeak anien amim holu; vengan xa mae ti iat xamim! “!Isa pupu mi xamim xa di mumen taxeak; vengan xa xamim mulonge isa e ti mutang! 26 “Isa pupu mi xamim xa moletin xil di lapet rat hisemi be nesao; vengan xa avu nae xil latepol ni temak tang mi provet xil te luvosen.”
Iemim Ihei Moletin Xil xa Di Laketeh Misa ni Xamim
27 Iesu biteni mi xil bitene, “Nabiteni mi xamim, iemim ihei moletin xil xa di laketeh misa ni xamim. Mupol ihos mi ngan xil xa di lasin xamim. 28 Musis Hi tengan ituxol xat ngan xil xa di lasuhol xamim, e musis ve moletin xil xa lapol misa mi xamim. 29 Xosxa moletin tei basuk di e vim, umae ni ihas ri vim mun. E xosxa moletin tei misil rat eising nam xa mettel, umae ni isil rat ngan mun xa mahin. 30 Xosxa moletin tei dak kesuk ve neta tei, ma usa ni mini. Melele xa moletin tei misen rat neta tei nam, onasisi ti onahit nasa rilomun ni. 31 Upol ni mi mosav xil ixoni ngan xa xouk iem bei xil lipol ni minuk. 32 “?Xosxa iemim bei kes ni moletin xil xa xil mun di iexil bei xamim, veneh ma Hi ituxol xat xamim ven? !Moletin tesa xil mun di lapol ni mak! 33 ?E xosxa xamim di mupol bos mi moletin xil kestang xa di lapol bos mi xamim, veneh ma Hi ituxol xat xamim ven? !Moletin tesa xil mun di lapol ni mak! 34 ?E xosxa mumae ni vatu mi moletin xil kestang xa mukila mubit lisa rilomun ni mi xamim, veneh ma Hi ituxol xat xamim ven? Moletin tesa xil mun di lamae ni vatu mi moletin tesa sav xil tengan ihur rilomun ni vatu nae! 35 !Munapol ni ti namak! !Eheien namim iti e ngan xil xa di laketeh misa ni xamim! !Mupol ihos mi xil! Mumae ni vatu mi mosav e munanemi ti munahit lisa rilomun ni. Xosxa mupol ni imak, ma Hi xa de ut nesao isa huite teni xa ihos pupu mi xamim e muhe horamue nan xil vengan xa xi mun di pol ni bos mi moletin tesa xil xa labe molep. 36 Mak, ma esaeen namim iti e mosav, ixoni esaeen na Hi Tamemim xa di e mosav.”
Munalepis Mosav Xil Ti
37 E Iesu biteni mun bitene, “Xosxa munalepis mosav xil ti, ma Hi nalepis xamim ti. E xosxa munapisen sexien tesa na mosav ti, ma Hi napisen sexien tesa xil namim ti. E xosxa mosav pol misa mi xamim, muketeh ihos tang mi xil. Mak, ma iketeh ihos mun tang mi xamim. 38 Musa tutouen mi mosav, ma Hi isa tutouen mi xamim. E melele xa xi isa tutouen mi xamim, ihe hao mu. Ixoni ngan taxa moletin tei xa minggutih raes amim ni kap tei xa mahulong pupu e polu ma ... dit kiri. Mak, ma sexien te tutouen namim, Hi ipol ni imak tang mi xamim.” 39 Di, Iesu dei vole tei mi xil bitene, “Moletin xa meten bar misakras vatel tei mun xa meten bar. Xosxa ipol ni imak, ma xalu vus lalikiri lalihe vul. 40 Moletin xa nggur pispisien ra moletin tei, nanemi ti navit xi bos mak mu mili tisa nan. E xosxa xi ihur sen sukul en nan, ma xi mei sung ixoni tisa nan. 41 “Veneh ma opus kil saxut liei xa hokorong tang xa de met tumali, e otakil ti vari xa marut liei xa mahulong de metom? 42 ?Veneh ma di obiteni mi tumali obit, 'Tua li, mae ni namit rat saxut liei ra metom', e otapus ti vari xa marut liei dat e metom? !Mube vat luvosen tang! Itiamu, uhur rat merut liei ra metom. Iti, ukila sung uhit rat saxut liei ra met tumali.”
Vatiei Del Huite
43 Iesu biteni mi vanut moletin xil ak bitene, “Vatiei xa bos, taso ti huite vasa; e vatiei xa misa, taso ti huite vahos. 44 Vatiei xil vus, lapus kila nggo huite xil xa laso ni. Misakras oleh huit manggo ra vatit vilu; e misakras oleh huit tavu ra vatit ai. 45 Moletin xa meulien nan polu ni hosien, huit hosien mistal nggo en. E moletin xa meulien nan polu ni tesaen, huit tesaen mistal nggo en. Sepinien na moletin tei di pisen meulien nan polu e naha.”
Iesu Dei Vole Usil Moletin Lu Xa Di Lupol ni Nim
46 Iesu biteni mun mi moletin xil bitene, “?Veneh ma di mukes nou mubit, 'Suv, Suv' e di mutapol ni ti naha xa nabiteni mi xamim? 47 Nitei vole tei usil hisit moletin xa bemei visal nou, di miteong ni sepinien navan, e di pol nggusili. 48 Xi nggoni moletin tei xa bit vakili ni nim man. Ma milang ves liei xil xa nggeih e mahulong. Di, mikili kuhi ni xil, e pol sen nim man. Di, us mus e vatiang nggeih bemei midep, e misakras vahu len ni. Nim man misoh nggeih. 49 E moletin xa miteong ni sepinien navan e di tapol ti vahusili, xi nggoni moletin xa mileh vot liei tesa xil tang, e mikili ni nim man ni. E melele xa us mus e vatiang nggeih bemei, nggulen nim man vari!”
Neketen na Vat na Moletin Xil te Vaeen
1 Melele xa Iesu pispisi mi moletin xil bus, xi be Kapaniam. 2 E taon ak, vat tei na moletin xil te vaeen da. E tim san, moletin tei te polien nan mesei holu, sangas vamat, e vat ak ien bei pupu. 3 E melele xa xi milonge xa Iesu de e taon ak, xi misa rut elda xil na mol Siu xil tengan lava lasis Iesu mei vatutou ni moletin nan ak. 4 Ma elda xil ak labe visal Iesu e ladak kesi tengan vatemanon e labiteni mini labitene, “!Amei, tutou ni moletin ak li! Vengan xa xi be hisit moletin xa xamem ngasen mamerere ni. 5 Xi ien bei Siu xil e xi di tetutou ni xamem matehil nim te pispisien nar.” 6 Ma Iesu be xil laba. E melele xa Iesu di be sangas e tim, vat ak misa tunali vutatei xil lamei e labit sepinien nan mini xa bit, “Suv, onakon ti onamei. Inou natapin ti tengan xouk omei e tim savan 7 mu tengan inou mun, namei visaluk. E usepin tang, nakila xa moletin navan ilonge ihos rilomun. 8 Ixoni inou, melele xa eilep navan misepin tang minou, nanggusil raen. E melele xa inou mun nasepin tang mi moletin tei te vaeen navan, xi mun pol nggusil raeok. Nakila nasemae ni tei nihit, '!Ha!' ma xi iha. Mu nihit, '!Amei!' ma xi imei. E nakila nisemae ni moletin te polien navan nihit, 'Pol ni netak!' ma xi ipol ni.” 9 Melele xa Iesu milong sepinien ak, xi mitemanin ma biles pus vanut moletin xil xa di langgusili e biteni mi xil bitene, “Reitin mak, natapus ti mu hisit neketen ak e moletin tova tahal Isrel.” 10 E melele xa ngan xil xa latexo nim ma vat ladilomun laba, lapusi xa moletin te polien nan milonge bos ngamu.
Iesu Pol ni Horamue na Tunau Tei Meul Rilomun ra Maten
11 Dutou ni ngan ak, Iesu del moletin nan xil langgusil suse laba tengan lave taon tahal Naen, e moletin hao di langgusili. 12 Melele xa xil lamei sangas visal puiteh te vioh te taon ak, xil lapus vanut moletin tei ladel tiei na horam maxoe tei xa mat lava latihin ni. Horamue ak be siskes na tunau tei. 13 Melele xa suv Iesu pus tunau ak di dang, xi en misae en ma biteni mini bit, “Onatang ti.” 14 Di, Iesu ba be sangas visali e misasa dal xat vet ma ngan xa mat. Ma xil xa lapoe lasoh. Di, Iesu biteni mi ngan xa mat bitene, “!Horam maxoe, nabiteni minuk, meul!” 15 Ma horamue ak meul rilomun e mea. Di, misepin mun. Ma Iesu miling rilomun ni mi ninen. 16 Moletin xil vus latemanin e di lapet rat his Hi e di labitene, “!Taxeak, provet tei xa be himetu de visal xir!” E ngan xil labit, “!Hi bemei tuei tengan vatutou ni moletin nan xil!” 17 Ma longeongen usil Iesu mikapis e ut ngasen e Sudea del rute xil vus xa be sangas visali.
Eloheoh Lu na Sion xa Di Mikas Moletin Xil
18 Longeongen usil Iesu duxoh moletin xil na Sion, ma xil ba di lasep usili mini. 19 Xi misil rumali lu luba tengan lalsis suv Iesu lalihit, “?Xouk obe ngan xa Hi tehit xati tehit imei, mu mutatil tova mun tesav?” 20 Melele xa lumei visal Iesu, lusisi lubitene, “Sion xa di mikas moletin xil misil xamel tengan mei malsisuk imak, 'Xouk obe ngan xa Hi tehit xati tehit imei, mu mutatil tova mun tesav?'” 21 Melele nen ak, Iesu di pol ni moletin xil xa lamesei mu ngan xil xa lalong pangas xil, mei lalonge bos. E di nggol rerat ninin tesa xil ra ngan tesav xil. E ngan xil xa mete bar, pol ni xil mei laketeh rilomun. 22 Ma Iesu bit rilomun ni mi moletin xalu na Sion bitene, “Muliha mulihit naha xa mulonge e mupusi mi Sion. Ngan xil xa mete tevar, lakila laketeh rilomun; e ngan xil xa latesakras kakaoen, lakakao. Moletin xil xa lathur meseien leporsi, xil mei vexil memese; e ngan xil xa vurange tevon, lalongeong mun. Ngan xil xa latemat, lameul rilomun; e setuen te longeongen hos di ba mi hoeo xil. 23 Ngan xil xa nenemien nae di tave lu ti usil nou, Hi ituxol xat xil." 24 Melele xa moletin xalu na Sion luba, Iesu misep usil Sion mi vanut moletin xil bitene, “?Melele xa xamim mutehe uruvuol tengan mupus Sion, mutehit mupus hisit moletin eah? ?Muteha tengan ha mupus ngan xa tenaxeih ti nggoni sulut vatiei tei xa misakras vasomal melele xa vatiang bui nggeih? !E-e! 25 ?Moletin eah iaxa muteha tengan ha mupusi? ?Moletin tei xa mising ni eising xil xa bos pupu? !E-e! Xil xa lasing mak e meulien nae polu e holesok holu, xil ladi e tim sa suv toto xil kestang. 26 ?Mak, ma visi iaxa muteha tengan ha mupusi? ?Provet tei? !Io! Xi be provet tei e nabiteni mi xamim, xi be eilep mu ni provet sav xil. 27 Sion be ngan xa Vanuvei na Hi di misep usili bitene, 'Mupusi, nisa eloheoh navan iha itiamu ni xouk, tengan isak mese ni holesok xil itetiluk.' 28 Ngan ak reitin, moletin sav tovuol xa lapesi e ut etan xa vahe eilep mu valeli Sion. E movotei tei xa Hi be suv toto nan be eilep mu mili Sion.” 29 Melele xa moletin xil lateong ni mak, e moletin te takis xil mun, lake reitin xa suse na Hi bos mak mu vengan xa xil latelong sepinien na Sion, latehiles meulien ra tesaen nae, e latemae ni Sion mikas xil. 30 E Parasi xil del tisa xil te Rae xil na Mosis xa latamae ni Sion vakas xil ti, xil lasin polien na Hi e meulien nae. 31 Iesu biteni mun bitene, “?Moletin xil te xosali ak, langgoni naha? ?Sexien nae nggoni naha? 32 Xil langgoni tutut horamue xil xa ladotan ladi e valkesao e di lake xat xil mun tang labitene, 'Di mabas kitar nggoni melele te tetelien, e di mutakikei ti e mutavasias hemim ti vatel xamem. Di, madang nggoni ngan xa madi e maten tei, e mutatang ti vatel xamem.' 33 Nabiteni mak vengan xa melele xa Sion temei, xi di tehal ni anien ve sisen e di tamu ti uaen, ma xamim mubiteni mubit, '!Sion, ninin tesa tei da en!' 34 E melele xa Nat Moletin temei, xi di ngganien e di mumun, ma xamim mubiteni mubit, '!Pus ti mu moletin ak, xi di ngganien e di mumun pupu! Xi di mikei tua e moletin te takis xil e moletin tesa xil mun.' 35 Visi e xir xa bit di nggusil metisouen na Hi, meulien nan ipisen ni.”
Atou Tesa Tei Mideh Vokon Xat Le Iesu
36 Dutou ni ngan ak, Parasi tei misis Iesu tengan vanien vatela, ma Iesu be tim san e dotan e suon tengan vanien. 37 Melele xa moletin xil te rute ak lalonge xa Iesu mei vanien e tim sa Parasi xiak, atou tei te suse minemi bit ha vapusi. Misak ni, minggur valit vokon tei xa vatu teni be nesao, ba. 38 Di, be nim e misoh pe tou Iesu e di muis. Vengan xa Iesu di bulun len be petoun, simeten di mileh e di mikas le Iesu. Di, misihia ni hilin, e pesum ni len e mideh vokon xati. 39 Melele xa Parasi ak pus netak, ma xi di misep tasen bitene, “!Vahit moletin ak vahe provet tei xa be reitin, xi vakila vari xa atou xa di duxoli xiak be hisit atou eah! Xi vakila xa xi be atou tei te suse.” 40 Ma Iesu misepin mi Parasi ak bitene, “Saemon, ieok bei namit sepinien tei minuk.” Ma Saemon misisi bit, “?Tisa, obit ovit neh?” 41 Ma Iesu dei vole ak mini bitene, “Rumali lu luleh vatu ra eilep tei. Tei xalu nggur 500,000 vatu, e tei tisav nggur 50,000 vatu. 42 Dutou ni, rumali xalu ak lusakras lalsa xoles vatu nan. Misak ni eilep en misae e xalu e misep xol xalu tengan lalnasa xoles ti neta mini. Ma nisisuk, ngan xave e xalu iaxa eheien nan iti e eilep ak ili?” 43 Saemon mea e bitene, “Nanemi nabit ihe ngan xa kaon nan mahulong mu, e eilep en misae en.” Ma Iesu biteni mini bitene, “Obiteni momal.” 44 Di, Iesu biles pus atou ak e biteni mi Saemon bitene, “Xouk ole kil atou ak? Melele xa namei e tim sam, xouk otasa ti oei tengan nikas leok ni. E atou ak, tekas leok ni simeten e tesihia tevue ni hilin. 45 Xouk otapesum ni viuk ti tengan ovur pilei nou. E atou ak, melele kokot xa temei nim, xi di tepesum ni leok xa tenangel ni ti. 46 Xouk otasa ti mun oel tengan naxul maxoe ni nou ni; e xi mideh vokon nan ba xat leok. 47 Ma nabiteni mi xamim, atou ak di ien bei nou holu, e ngan ak di pisen ni xa mikila xa naleh rat tesaen holu ra meulien nan. E ngan xa naleh rat tesaen nan hokorong, xi di pisen eheien nan hokorong minou.” 48 Di, Iesu biteni mi atou ak bitene, “!Taxeak, tesaen nam, naleh rati ranuk!” 49 Rut moletin xil xa ladi di labiteni mi xil labitene, “?Hisit moletin eah ak xa mikila ileh rat tesaen ra moletin tei?” 50 E Iesu biteni mi atou ak bitene, “Ve neketen nam e nou, taxeak, Hi miteh meulien e xouk. Ha itel xat tomat na Hi.”
Atou Xil xa Di Langgusil Iesu
1 Dutou ni ngan ak, Iesu ba nggo rut taon e metimal ngan xil, di misetu usil longeongen hos xa Hi imei ihe suv toto te meulien na moletin xil. E melele nen ak, moletin nan xil xa labe lu e le (12) di langgusili. 2 E rut atou xil mun di langgusili: ngan xil xa Iesu tehol rerat ninin tesa latehe reling xil; e ngan xil mun xa teleh rerat meseien tehe reling xil. Tei e xil tehe Meri tahal Makdela xa Iesu tehol rerat ninin tesa xa latehe lu e he sav (7) rani; 3 e rut atou xil mun. E atou xil ak di lateleh vatu nae ba latesa ni tengan vatutou ni Iesu e moletin nan xil. Tei e xil xa tepol ni mak tehe Susana. E tei mun tehe Soana, atou na Xusa xa be vat te polien xil e nim ma Suv Toto Herot.
Iesu Dei Vole Tei Usil Utiei Xil xa Di Meul e Tan Tateisav Xil
4 Moletin xil holu langgo taon ngan xil, lamei vituei tengan xa lalong ti sepinien na Iesu. Melele xa Iesu pus xil, xi dei vole ak mi xil bitene, 5 "Vatei, moletin tei ba tengan vaso utiei e naho nan. E melele xa miso lelen utiei san be tan, rute lakiri be tan e suse, e moletin xil di lapel xat xil e tuman xil mun mei di langga vuol ni. 6 E rute lakiri labe e tan xa mahin e vatihat de pan. Ma lameul vuteili tang, di, tavehi ti lameles vengan xa eai ngga vin xil. 7 E rut utiei ngan xil lakiri be tan e rute xa munae tesa meul en. Utiei xil ak lateh, lameul vituei del munae tesa, misak ni munae xil ak mikutaxol vin xil. 8 E rut utiei sav ngan xil mun, lamot e tan xa bos. Lameul labe nesao, ladaxao bos, ma huite xil kekes mili hanutap lim (100)." Melele xa Iesu dei vole ak bus, biteni mi xil bitene, "Moletin xa vurangen da, bos xa itaeong kuhi ni sepinien xil ak."
Iesu Bit Kil Kout Vole Usil Utiei Xil xa Di Meul e Hisit Tan Sav Xil
9 Dutou ni ngan ak, moletin xil na Iesu lasis pilei kout vole ak mini. 10 Ma xi bit rilomun ni mi xil bitene, "Xamim kestang munggur kilakilen usil rin xa Hi imei ihe suv toto e meulien na moletin xil. E mosav xil di langguri nggo vole kestang. Hisit moletin xil ak langgoni naha xa Vanuvei Eo tehiteni tehit, "Neta sav xa laketeh vuma ... latapus kil ti; e neta sav xa lataeong vuma ... latalong kil ti."" 11 Ma Iesu biteni mi xil bitene, "Koute te vole ak mak: utiei xil be sepinien na Hi. 12 Suse xa miso utiei en nggoni moletin xil xa lataeong ni sepinien na Hi; e dutou ni, Temat bemei, mei mileh rerat sen utut sepinien xil ak ra nenemien nae. Misak ni, lasakras lanesi en, ma latahur ti meulien hu. 13 Tan xa vatihat de pan nggoni moletin xil xa lamaal melele xa lalong utut sepinien na Hi, e di meul e meulien nae. E vengan xa sepinien ak taso litei ti vakeih e meulien nae, nenesien nae tarati en vahehi. Ma melele xa sakpisien xil bemei nggeih, lamot e neketen nae. 14 Tan xa munae tesa meul en nggoni moletin xil xa lalong utut sepinien na Hi e sexien xil te ut etan mikutaxol vin ni. Nenemien nae polu e mani, sexien xil te ut etan, e lanexo ve holesok holu. Misak ni, utut sepinien na Hi misakras vameul vaxeih e meulien nae. 15 E tan xa bos nggoni moletin xil xa lalong utut sepinien na Hi e langgur xati be reitin del nenemien tei xa bos e momal. Sakpisien xil te xeih di bemei, e sepinien ak nggulehi di meul ba vuma " miso huite e meulien nae.”
Iesu Dei Vole Usil Laet xa Pili
16 Iesu dei vole tei mun mi xil bitene, "Moletin tovuol tamu xa vasahan laet nan ti vaha vakutaxole ni pesin mu vaha valingi vate pe vet man. E-e, vehakut, melele xa lasahan laet bus, lasoxole ni de nesao e von nen. Mak, ma melele xa moletin xil limei e vangit nim, lile kil laet xa di mileluv. 17 “Neta xa minggus, Hi ihur rati imei kesao. E sepinien te xuxusen xil, likeikei ni mei moletin xil vus likila. 18 “Mak, ma melele xa mulong sepinien navan, muteong kuhi ni; vengan xa moletin xa nggur xat koute teni, Hi isa metisouen ihe holu mu mini. E moletin xa tahur kuh ti koute teni, vuteili xa xi minemi bit mikila tuei, ikesae rani.”
Iesu Bitehiteni xa Visi be Ninen e Tunali Xil
19 E melele nen ak, nine Iesu del tunali xil lamei tengan xa mei lapusi, e latsakras latohe sangas visali vengan xa vanut moletin ak nggonaxon pupu. 20 Moletin tei pus xatel ma ba bitene mi Iesu bitene, "Ninom del tumali xatel mei latesoh latdi nga hale, latbit latpusuk." 21 E Iesu biteni mi xil bitene, "Nana e tua navan xil labe moletin xil xa lalong sepinien na Hi e di lapol nggusili."
Vatiang e Tehe Lutaeong ni Sepinien na Iesu
22 Vatei, Iesu biteni mi moletin nan xil bitene, "Bos xa rihur xoteh Oei Kaleli rihe rin." Ma labut labe tuturil tei e laba. 23 E melele xa tuturil miloh ba, Iesu ba pat. Tavehi ti, vatiang tei mistal misak ni tehe xil milati hao, e oei bemei vangit tuturil. Lakameti nggeih vengan xa sangas lamarir. 24 Ma labe visal Iesu ba lakes rati ra paten nan e lake xati labit, "!Suv, suv! !Sangas ramarir xiak!" Ma Iesu mitamea, e misel xat vatiang e tehe tengan lalohe tan. Vatei takes, vatiang e tehe lutaeong ni sepinien nan e lube tan, ma an mei bos mun. 25 Di, Iesu misis moletin nan xil bitene, "?Midep, neketen namim di xave?" E xil uli mikan, e lamesep pupu ni naha xa lapus Iesu pol ni. Dit lasis xil mun tang labitene, "?Moletin ak be hisit moletin eah? !Tave ti neta vatiang e tehe, melele xa misel xat xalu, xalu mun lutaeong xat raen!"
Iesu Minggol Rerat Ninin Tesa Xil ra Moletin Tei
26 Iesu del moletin nan xil langgo tuturil langgur xoteh Oei Kaleli, mei labe ut sangas ni taon tahal Nggerasa. 27 Melele xa Iesu but reling tuturil bemei e ut, bisu mi moletin tei xa ti tete taon ak, ninin tesa xil laba xati. Be nousav xa moletin ak ti tenakavuei ti e ti tenapat ti e nim. Be di pat e vangihat xil e von tehinen tang. 28 Melele taxa pus Iesu, muis nggeih be nesao, mei mitingeiril momal pe valnaon. Mikei be nesao ba ni bitene, "!Iesu, Nat Hi te ut nesao! ?Upol ni naha minou? !Onasak ni nou ti li ninalong pangas nou!" 29 Xi biteni mak vengan xa Iesu misepin mi ninin tesa tengan xa vaheling moletin ak. Vehakut, ninin tesa ak misak ni moletin ak mitallang himetu. Moletin sav xil latetal xat pisi tengan nakakao ti. Latevar xat hen xalu e len xalu ni ao te xeih, e dit misen xotehi. Di, ninin tesa di tetivin ni ba tetasen tang e uruvuol. 30 Ma Iesu misisi bitene, "?Hisom visi?" E moletin ak bit rilomun ni bitene, "!Vanute!" Biteni mak vengan xa vanut ninin tesa iaxa ladi xati. 31 Ninin tesa xil ak ladak kes Iesu tengan xa nasil rat xil ti ha linave vangavul xa be von pangasien nae. 32 Sangas ni xil, veili holu di langganien e seri hu. Ninin tesa xil ladak kes Iesu tengan vamae ni xil lava xat veili xil ak, ma Iesu mae ni xil laba. 33 Ninin tesa xil ak, labe reling moletin ak ba, laba xat veili xil ak sung. E xil laloh laba lakiri langgo meteh laba oei, ba lamarir lalel. 34 Melele xa moletin xil xa ti latelaxat veili xil ak lapus neta xa mistal, latemanon laba, labithiteni e taon e rute sav xil mun xa sangas. 35 Di, moletin xil xa lalongeong ni laba labit lapus ti naha xa testal xiak. Ma laba labe visal Iesu, e lapus moletin xa ninin tesa xil latehe relingi. Nenemien nan mei bos ngamu, mising xol xi, e dotan visal Iesu. Mak toma, moletin xil ak latemanin ni. 36 Xil xa latepus holesok xil ak testal latumul del mosav xil xa latemei, usil suse xa Iesu tepol ni moletin ak milonge bos. 37 Ma rut moletin xil xa ladi sangas ni metimal tahal Nggerasa lasis Iesu tengan xa ihe ling xil vengan xa uli xil mikan pupu. Mak toma, Iesu ba mun e tuturil tengan lihe reling xil. 38 E moletin xa ninin tesa xil lateti xati midak kes Iesu tengan vaha vatel xat xil. E Iesu misila ba e biteni mini bitene, 39 "Utilomun uhe tim sam, ti uhithiteni mi moletin sav xil naha xa Hi pol ni e meulien nam." Ma moletin ak ba mikapis e rute xil vus e taon ak e di misep usil neta hos xa Iesu tepol ni mini.
Iesu Dal Rat Atou Tei ra Meseien Nan del Atuli Tei ra Maten
40 Melele xa Iesu dilomun be e ri oei, vanut moletin tei xa latetatili lateti lamaal ven himetu ma langgur pilei. 41 Di, moletin tei bemei e mitingeiril momal pe valnaon, hisen Saeros. Xi be vat tei te nim te pispisien na Siu xil. Xi dak kes Iesu tengan xa vamei laloha mu e nim man, 42 vengan xa atuli xa be tei takeres nan vari tang, sangas vamat xiak. E huram nan be lu e le (12) tang. E melele xa Iesu di ba, moletin xil labe holu langgonaxon e rin xil ngasen. 43 Di maxani, e atou tei bemei. Xi mesei huram lu e le (12) ngamu ni meseien na atou xil xa misakras vavus. Atou ak misa sen mani nan mi dokta xil tengan lipol pilei ven, e lasakras. 44 Misak ni nggo pe tou Iesu, bemei misasa duxol seri eising nan. Vatakes, meseien nan bus vari. 45 Di, Iesu misis moletin xil bitene, "?Visi iaxa duxol nou?" Xil vus labit latakil ti, e Pita biteni mini bitene, "Suv, moletin xil labe holu pupu, langgonaxon e laduxol xouk e rim xil vus." 46 E Iesu bitene, "E-e, moletin tei duxol nou, vengan xa rut xeihen be reling nou.” 47 Ma atou ak pusi taxa misakras vaxus, bemei, e len di mulul, e mitingeiril pe valnao Iesu. Bit rati pe met moletin xil vus, veneh ma duxol eising nan, e midep xa meseien nan be relingi e melele xati xa duxol xati. 48 Di, Iesu biteni mi atou ak bitene, "Hinoxoli, neketen nam misak ni omese ra meseien nam. !Bos! Uha, e tomat iti minuk." 49 Melele xa Iesu di tamu misepin, moletin tei nggo nim ma Saeros bemei e biteni mini bitene, "Atuli nam mikesae tuei. Onasis tisa xai ti mun namei.” 50 Melele taxa Iesu milong sepinien ak, ma biteni mi Saeros bitene, "!Onanexo ti! Usak ni nenesien nam ixeih xa atuli nam imeul, ma imeul rilomun.” 51-53 E melele xa Iesu bemei be nim ma Saeros, moletin xil vus di lamuis e di ladang ve atuli ak. E Iesu biteni mi xil bitene, "!Munatang ti! Atuli ak tamat ti, xi di pat tang." E xil di langue xati vengan xa lakila atuli ak mat tuei. Ma Iesu tamaen ni ti moletin sav mun vahe e vangit nim. Mileh Pita, Sion, Temis, e tame e nine atuli kestang be xatel, e labe ut xa atuli da en. 54 Di, Iesu misasa dal xat hen e misepin mini bitene, "!Atuli, mea!" 55 Vatakes, meulien na atuli dilomun bemei en e mea misoh. Di, Iesu biteni mi xatel bit latihur neta tova latisa ni ia ni. 56 Tamen e ninen lumesep pupu e Iesu mike xat xalu tengan xa lalnahithiteni ti mi mosav naha xi pol ni mi atuli nalu.
Iesu Misil Lelen Moletin Nan Xil xa Labe Lu e Le (12)
1 Iesu mikes vituei ni moletin nan xil xa labe lu e le (12), di, misa xeihen mi xil tengan xa likila ti lihol rerat ninin tesa ra moletin xil e lisak ni ngan xil xa meseien di xat xil, ti lilonge ihos mun. 2 E misil lelen xil tengan xa liha ti lisetu usil Hi xa mei ihe suv toto te meulien na moletin xil, e lisak ni ngan xil xa lamesei, lilonge ihos rilomun. 3 Xi biteni mi xil bitene, "Munaleh ti neta natel xamim melele xa muba: eitingil, ateli, anien, vatu mu munaleh timun eising. 4 Xosxa muba e langgur pilei xamim e nim tei, ma muti kestang en ha vuma " muling taon nen ak. 5 E xosxa moletin xil lataxur pilei xamim ti e taon tei, ma mulaves rerat meas ihe relingi kaelemi melele xa muheling rute ak. Ngan ak ihe selxatien mi xil ve pangasien xa istal mi xil.” 6 Dutou ni sepinien nan, lamea laba labe metimal xil vus e di lasetu usil longeongen hos na Hi. E di lapol ni moletin holu xa latemesei, lalonge bos rilomun.
Herot Milongeong Usil Iesu, e Nenemien Nan Pol Holu Usili
7 E melengien nen ak, suv toto tahal Kaleli, hisen Herot Antipas, milong usil holesok xil xa Iesu di pol ni. Ma misak ni nenemien nan pol holu vengan xa rut moletin ngan xil di labiteni xa xi iaxa be Sion xa tekas moletin xil, e meul rilomun ra maten. 8 Rute ngan xil labit provet Ilaetsa iaxa mistal rilomun xiak, e rut moletin mun di labiteni xa provet tei te tiamu meul rilomun ra maten. 9 Misak ni Herot di minem e bitene, "Inou vari tang iaxa nateta xoteh vat Sion temese. ?E visi vari iaxa di nalongeong usili xiak?" Mak, ma misak bit vapus ti Iesu.
Iesu Bangan Moletin Xil xa Lali Taosen Lim (5000)
10 E melele xa moletin xil na Iesu lapol bus, ladilomun. Lamei lasep mese ni mi Iesu holesok xil xa lateha di latepol ni. Ma Iesu mileh kes ni xil tang, laba ladi e taon tei xa lakesi ni "Betsaeta." 11 E melele xa vanut moletin ngan xil lalongeong ni xatel xa latoba, lamea langgusil xatel. E melele xa Iesu pus xil, nggur pilei xil e di misetu mi xil usil Hi xa mei ihe suv toto te meulien na moletin xil. E xi di pol ni moletin holu xa lamesei, lalonge bos rilomun. 12 Pol vuma " mahis, e moletin nan xil xa labe lu e le (12) lamei visali, e labiteni mini labitene, "Radi e uruvuol. Bos xa usil moletin xil ak lihe metimal xil e rute xil mun xa di sangas, tengan xa ha likamet ti anien e von paten mun en." 13 E Iesu biteni mi xil bitene, "Xamim tang musa ti anien lava ni." E xil labit rilomun ni mini bitene, "Xamem maleh xat beret be lim (5) e meseo be lu (2) tang. ?Midep? ?Iem bei mava maxal ti anien tengan vapin mi vanut moletin ak xa be mahulong pupu?" 14 (Tata xil vus xa lateti e melele nen ak sangas labe taosen lim (5000) del atou e horamue nae xil mun.) Ma Iesu biteni mi moletin nan xil bitene, "Museti moletin xil ha litotan e vanute xil xa moletin xil sangas lihe hanutap lu e hexalu mun (50) e vanute tei. 15 Ma moletin nan xil lapol usil naha xa xi biteni, misak ni moletin xil vus ladotan. 16 Di, Iesu mileh beret xa be lim xiak del meseo nen xa be lu, e miketeh be nesao. Di, misis, memes Hi ven, e di bul papasi. Di, misa ni mi moletin nan xil tengan xa xil laseti mi vanut moletin xil ak. 17 Moletin xil vus langganien ba vuma " langga vin xil. Di, moletin nan xil laleh viton rut beret e meseo xa langga lingi. Lase ni be valeat xil vuma " valeat lu e le (12)iaxa pol ni rut anien xa di.
Pita Bitehiteni xa Iesu be Kristo
18 Vatei, Iesu miling vanut moletin xil e mileh moletin nan xil ba ladi se tengan ti vasis. E melele xa misis bus, xi misis pilei xil bitene, "?Moletin xil di labit inou nabe visi?" 19 E xil labit rilomun ni mini labitene, "Rute ngan xil labit xouk obe Sion xa di tekas moletin xil. Rute ngan xil mun labit xouk obe provet Ilaetsa, e ngan tesav xil mun labit xouk obe provet tei te tiamu xa meul rilomun ra maten." 20 E Iesu misis pilei xil bitene, "?E xamim, ma midep? ?Mubit inou nabe visi?" E Pita bitehiteni bit, "Xouk, obe Kristo xa Hi tehit xati." 21 Ma Iesu misep xol xil tengan xa linavit sepinien ak ti mi moletin sav xil. 22 Di, xi biteni mi xil bitene, "Reitin mak, holesok xil holu mei lisak ni Nat Moletin ti ilong pangas xi. Elda xil na Siu xil, Vat xil na pris xil, e tisa xil te Rae xil na Mosis, xil ngasen ti lisin ni. Vengan xa Hi ling xati xa xil lihasi imat. E melengien tol nen, imeul rilomun ra maten.”
Suse Tengan Moletin Vahusil Iesu Nggeih
23 Di, Iesu biteni mi xil bitene, "Xosxa tei e xamim ihit ihusil nou, ma bos xa isikoe xol xi ra holesok xil xa xi kestang di ien bei. Ti, ipo eivave nan melengien xil ngasen, ti, ihusil nou. 24 Vengan xa xosxa tei e xamim bit vahur xat meulien nan, ma ikesae rani. E xosxa tei maen ni meulien nan mikesae ve nou, ma moletin ak kestang ihur meulien sal. 25 ?Xosxa moletin tei mileh sen holesok xil te ut etan ak be nan, e tahur meulien sal ti, ma itep? Melele xa ikesae, ma itep e huit polien nan? !Ihe tovuol! 26 Xosxa moletin tei be unoun tengan xa vahithiteni xa di nggusil nou e pispisien navan, ma Nat Moletin mun ihe unoun ni. Reitin, ihe unoun ni melele xa imei itel miehen nan xa nggoni miehen na Tamen, e na masxaxa eo xil. 27 Reitin nabiteni mi xamim, rute xamim xa musoh mudi xiak, munamat ti mu ituxoh melele xa mupus Hi mei istal ihe suv toto e meulien na moletin xil."
Tenbe Iesu Mihinehin
28 Melengien tol e he sav (8) mitavi ni melele xa Iesu tehit kil holesok xil ak mi moletin nan xil; xi tehur Pita, Sion e Temis lattehusili lattehe nesao e vathu tei tengan latoha latsis. 29 E melele xa di misis, valnaon bemei biles e eising nan mei mieh vuma " mihinehin pupu. 30 E vatakes, moletin lu mun mei lustal e lusepin del Iesu. E xalu ak, tei be Mosis, e tei mun Ilaetsa, 31 e miehen mikapis xol xatel. Lubit kila mi Iesu xa melengien mei istal tengan polien nan ivus e hal Serusalem, e ihe reling ut etan. 32 E melele nen ak, Pita, Sion e Temis, met xeihen bas xatel. E melele xa latmea e latketeh mikapis, lattemanin xa Iesu di soh del moletin lu mun, e miehen mikapis xol xatel. 33 E melele latopusi xa Mosis e Ilaetsa sangas laloheling Iesu, Pita misep talang mini bitene, "Suv, bos mak mu xa rati tak. Ratiso horao ihe tol: tei ihe mam, tei ihe ma Mosis, e tei mun ihe ma Ilaetsa." 34 Melele xa Pita di tamu misepin, momah tei xa mattel miloh bemei da xol xil, misak ni uliatel mikan pupu. 35 Di, latelong rae tei nggo momah bemei bitene, "Ngan ak be horamue navan xati xa inou natehosei. !Muteong xati!" 36 Melele xa rae ak misepin bus, latepusi xa Iesu misoh da tasen. Holesok xil xa Pita, Sion e Temis lattelonge e lattepusi; latnggur xati be natel tang. Lattavit pas ti mi moletin sav xil, e melele nen xil ak.
Iesu Minggol Rat Ninin Tesa ra Horamue Tei
37 E makoe nen, Iesu del moletin nan xatel, Temis, Sion e Pita, latdilomun latnggo vat hu latemei e tan. E moletin xil holu lamei labit lapus Iesu. 38 Moletin tei xa tete mesal te vanut moletin ak mikei nggeih ba ni Iesu bitene, "!Tisa! Ieok bei xouk li himetu xa omei opus ti mu natuxuli xa be tei takes tang navan. 39 Ninin tesa tei di bemei en e misak ni di mikei nggeih, di malili tova tang, e pol ni rurungon di misol mun. E melele xa ninin tesa bemei en, misak ni malili nggeih xa tave relingi ti. 40 Nadak kes moletin nam xil tengan xa lavol rati relingi e xil lasakrasi.” 41 Iesu biteni mi moletin nan xil bitene, “Xamim moletin xil te xosali, neketen namim tovuol e vatumim nggeih pupu! ?!Nasakras nate visal xamim vehakut e ti nitutou ni xamim!?” Di, misemae ni moletin ak bitene, “Hur horamue nam vamei inggak.” 42 E melele xa horamue ak di kakao bemei visal Iesu, ninin tesa nan nggop tan ni e di mulul ni e tan. Di, Iesu misepin nggeih ba ni ninin tesa ak, ma be relingi. E horamue ak milonge bos mun e Iesu midali ba milingi mi tamen. 43 Moletin xil xa lapusi mak, lamesep tova tang ni xeihen na Hi xa mahulong.
Iesu Misep Usil Maten Nan
Melele xa moletin xil di labesi xil ve naha xa Iesu di pol ni, xi misepin ba ni moletin nan xil bitene, 44 “Xamim, muteong kuhi ni sepinien navan e iemim nabong ni ti naha xa nabit namiteni mi xamim xiak. Veter mu, moletin tei imae ni Nat Moletin ihe e he moletin xil te ut etan.” 45 E moletin nan xil ak latakil ti koute te sepinien nan, vengan xa minggus tamu ra xil. E xil labe unoun pupu tengan lasis kuh koute mini.
Visi be Eilep Mili?
46 Dutou ni, moletin xil na Iesu di langor mi xil mun tang usil visi e xil iaxa imei ihe eilep mu e xil. 47 Iesu mikil nenemien nae, misak ni midali horamue tei xa hokorong tang e pol ni mei misoh e rin. 48 Di, bitene mi xil bitene, “Moletin tei xa minggur pilei movotei xil nggoni horamue ak vengan xa xi di nggusil nou, ixoni ngan xa moletin ak di nggur pilei nou. E tei xa di nggur pilei nou, ixoni ngan xa di nggur pilei ngan xa misa nou namei. Vengan xa visi e xamim xa ling nenemien nan be tan e di dutou ni moletin xa tave ti neta e pe met moletin xil, xi vari iaxa be eilep mu mili teisav e xamim e pe met Hi.”
Moletin xa Di Tavae Ti Vatel Xamim, Xi Be Tei Xamim
49 Sion biteni bit, "Suv, mapus moletin tei di nggol rerat ninin tesa xil e hisom, ma masep pangasi tengan xa napol ni ti mun vengan xa xi tave tei xamem ti.” 50 E Iesu biteni mi Sion del moletin nan xil bitene, “Munasep xole ti vengan xa moletin xa di tavae ti vatel xamim, xi be tei xamim."
Metimal Tei Tahal Sameria Ien Tavei Vahur Pilei Iesu
51 Melele xa melengien bemei sangas tengan Hi vahur rilomun ni Iesu vahe ut nesao, xi pol ni nenemien nan nggeih tengan vahe Serusalem. 52 Ma xi misil rut moletin xil ladiamu ni laba. Xil labe metimal tei na mol Sameria xil tengan lasak mese ni holesok xil en vatatili. 53 E moletin xil te metimal ak labit Iesu nava ti visal xil vengan lakila xa Iesu di nggusil suse tengan vahe Serusalem. 54 Melele xa moletin na Iesu xalu ak, Temis xal Sion, lupus sexien ak, lusis Iesu lubitene, "?Suv, iem bei tengan malokei ve upang vaxo ut nesao mei valen xil?" 55 E Iesu biles e misepin nggeih mi xalu. 56 Di, Iesu del moletin nan xil lakasal labe metimal tei mun tesav.
Moletin Xil xa Labit Lavusil Iesu Linem Kuhi Mu
57 Melele xa di laba, moletin tei biteni mi Iesu bitene, "!Ut xave xa uha en, inou nihusiluk!" 58 E Iesu biteni mini bitene, "Asu xil vangavul tepaten mae di, e tuman xil mun nunum mae di. E inou, Nat Moletin, von pat en navan tovuol xa nakila nangel en.” 59 Iesu biteni mi moletin sav mun bitene, "!Husil nou!" E moletin ak bit rilomun ni mini bitene, "Suv, itiamu umae ni nou nitilomun niha, nitunat ni tata navan ituxoh melele xa nitihin ni." 60 E Iesu biteni mini bitene, "Ling ngan xil xa di lalel ti litihin nae xil xa lalel. Xouk uha usetu ni longeongen hos usil Hi xa imei ihe suv toto te meulien na moletin xil." 61 Tei mun bitene, “Suv, inou nihusiluk. E itiamu, umae ni nou ha nisep ling kor ni vatimol navan xil." 62 E Iesu biteni mini bitene, "Moletin tei xa pol kokot ni polien tei e nenemien nan mili tou usil meulien matu nan, ma xi tapin ti tengan vahur polien na Hi xa be suv toto te moletin xil."
Iesu Misil Rerat Vanut Moletin Tengan Lava Lapol
1 Dutou ni ngan nen ak, Iesu bosei moletin xil xa latehe hanutap tol e lu e le mun (72). Di, misil rerat xil labe lu lu tengan lave metimal xil vus e rute sav xil mun. Iesu bit xil litiamu ni, e navehi, xi mun ha imos e xil. 2 Iesu biteni mi xil bitene, “Anien holu di e naho, e moletin xil xa lava ti laleh rerati latave holu ti. Mak, ma musis Suv te naho tengan xa vasa ti mun moletin xil xa liha ti lipol e naho san. 3 !Muha itel merouen tang! Moletin holu ti lisep pangas xamim ve sepinien namim. Reitin mak, xosali, nasil rerat xamim muva xiak, munggoni sulut sipsip xil xa laba ladi hilaep te kuli reran xil. 4 Muha ihe hem ihon tang. Munaleh ti vatu, mu ateli, mu sandel timun natel xat xamim. Munahas ti melengien natel moletin xil e suse namim. 5 E melele xa ba mube nim ngan, neta xa muhiteni itiamu, muhitene, 'Tomat na Hi iti mi xamim e nim ak.' 6 Xosxa ngan xa de nim be moletin te tomat, ma muling sepinien te tomat ixulehi itel xati. E xosxa tovuol, ma tuxolxatien te tomat ihe relingi, e itilomun imei e xamim. 7 Muti kat tang e nim ma moletin xil xa langgur revi xamim, e anien mu oei eah xa lasa ni mi xamim, muhuri, vengan xa moletin te polien ikila ihur huite xil te polien nan. Munalil ti e nim xil. 8 E melele xa mube taon tei e moletin xil te rute ak langgur pilei xamim, mua anien taxa lasa ni mi xamim. 9 Mupol ni ngan xil xa lamesei ladi e rute ak, lilonge ihos rilomun. E muhiteni mi xil muhitene, 'Hi dat sangas visal xamim e bit vahe suv toto te meulien namim.' 10 “E xosxa mube taon tei e moletin xil te rute ak latahur pilei xamim ti, muha musoh e valkesao e muhiteni, 11 '!Vengan xa mutahur pilei xamel ti, iemel ti tavei meas te vonemi mun xa di xat kaelemel, malevas rati iha xat xamim xa neta xa mupol ni mi xamel, imei rilomun, ia xamim. E mutakil ti vari xa xosali ak, Hi temei sangas ni xamim e tehit imei ihe suv toto e meulien namim, e di musin ni.' 12 Nabiteni mi xamim, melele xa Melengien Kor imei, pangasien xa imei e moletin xil te rute ak ixeih pupu, ili pangasien xa Hi isa ni mi moletin xil xa lateti e hal Sodom te tiamu.
Selxatien Ba mi Xil xa Lasin Moletin Xil na Iesu
13 "?Munem xat rute tol xa moletin xil latake reitin en sepinien nam ti? Naso sepinien ak ba xat xil: Isa tova tang mi xamim, moletin xil tahal Xorasin! Isa mun ve xamim tahal Betsaeta! Xosxa moletin xil tahal Taer mu Saedon, xa latave Siu ti, lava lapus hisit merekel vaxoni ngan xa mistal mi xamim, ma nanemi nabit xil laviles meulien nae ra tesaen. E xos vahit xil lipisen ni xa lalonge vasa vamak: lasing ni talmusu xil, e laxul ni vulmeas. 14 E Melengien Kor, Hi en isae e moletin xil tahal Taer e Saedon ili xamim. 15 ?E xamim, moletin xil tahal Kapaniam munemi mubit muhe ut nesao? !E-e, muhe tan, e von upang!” 16 Di, Iesu biteni mi moletin nan xil bitene, "Moletin xa di miteong ni xamim, ma di miteong ni nou. E tei xa di misin xamim, ma moletin ak di misin nou. E moletin xa di misin nou, xi di misin ngan xa misa nou namei." Di, xil latasil laba.
Moletin Xil xa Iesu Tesil Rerat Xil Ladilomun
17 Melele xa moletin xil na Iesu xa labe hanutap tol e lu e le mun (72) ladilomun, xil lamaal pupu. Labiteni mi Iesu labitene, "!Suv, melele xa masemae mi ninin tesa xil e hisom, mapusi xa xil di lalong xati!" 18 Iesu bit rilomun ni mi xil bitene, "Polien namim misak ni xeihen na Temat mot vari nggoni an xa milangas nggo nesao bemei e tan. 19 !Muteong! Nisa xeihen mi xamim tengan muhe xat uineh, tetal xil xa misa, e holesok xil mun xa ladi e xeihen na Temat, e neta ti naxul xamim. 20 E munamaal ti vengan xa ninin tesa xil lalong xat xamim. Bos mak mu xa ti mumaal vengan xa Hi midis xat hisemi tuei di Vanuvei te Meulien e ut nesao."
Iesu Memes Hi ve Polien na Moletin Nan Xil
21 Iesu di mei polu ni Ninin Eo, misak ni memaal himetu, ma misis bitene, "Tata, xouk obe Suv te holesok xil ngasen e ut nesao e ut etan. Namesuk himetu vengan xa naha xa xouk di ososo ni ra moletin xil xa labe metisou, di opisen ni mi movotei xil xa latasukul kuhi ti. Io Tata, ngan ak di nggusil naha xa xouk di iem bei vastal.” 22 Di, Iesu biteni mi vanut moletin xil bitene, "Tata navan miling holesok xil vus di tuei e heok. Moletin xil latapus kil ti Nat Hi, Tamen kestang pus kila. E moletin xil latakil ti Tamen, Natnali kestang mikila, del ngan xil xa xi ien bei vapisen ni mi xil.” 23 Di, Iesu biles, pus moletin nan xil e misepin ba ni xil tase bitene, "Sien iti mi xamim vus xa di mupus xat holesok xil xa di mistal xiak ni metemim. 24 Nabiteni mak mi xamim, provet xil holu te tiamu e suv toto xil holu mun iexil tehei xa ti lapus ti holesok xil xa xamim di mupusi, e latnapus ti. E iexil tehei xa lalong ti sepinien xil xa xamim di muteong ni, e latnalong ti."
Iesu Dei Vole Tei Usil Moletin Hos Tei Tahal Sameria
25 Vatei, tisa tei te Rae xil na Mosis bemei tengan vasak pis Iesu. Ma misisi bitene, “?Tisa, nipol ni itep ma nihur meulien sal?" 26 Iesu bit rilomun ni mini bitene, "?Rae xil na Mosis di biteni naha? ?Uhiteni minou?" 27 Moletin ak bitene, "'Iem ihei Hi xa be Suv nam ixo tinom tevi, ixo meulien tevi nam, ixo xeihen tevi nam, e ixo nenemien tevi nam.' E 'iem ihei tua nam ixoni ngan xa iem bei xouk tasom.'" 28 Iesu bit rilomun ni bit, "Sepinien nam momal. Xosxa upol ni mak, ma uhur meulien sal." 29 E moletin ak bit vapisen ni xa xi momal tang, ma misisi mun bitene, "?E moletin si vari iaxa be tua navan?" 30 Ma Iesu dei vole tei mini bitene, "Vatei, mol Siu tei mea nggo Serusalem mikakao bit vahe Seriko. Melele xa di nggusil suse ba, moletin tatei xil te kanen lamei ladal xati. Langgur rat eising nan e labasi, di, lalesae. Xil lalingi pat da nga, sangas vamat. 31 E melele nen tak, bos xa pris tei xa be Siu tei xa di nggusil suse bemei sangas visali. E melele xa mei pus moletin ak pat da, xi mitavi tang nggo ri suse. 32 Di, ngan Siu tei mun xa pol e Nim Eo na Hi nggusil suse bemei sangas visali. Xi mun mikakao e ba miketeh pus moletin ak xa pat da. E xi mun mitavi tang nggo ri suse ba. 33 Di, ngan Sameria tei, xa Siu xil di laketeh misa mi xil, bemei sangas visal rute xa moletin ak pat da en. E melele xa miketeh pusi, en misae pupu li en. 34 Misak ni xi bemei visali, e mikas moten menuk nan xil ni uaen, bas oel en, e pis xol xil. Di, po rati, milingi e dongki san, e poe ba di milaxati e nim te ngelen tei. 35 E makoe nen, misa taosen lu (2000) vatu mi moletin te nim ak. Di, biteni mini bitene, "Ulaxat kuh moletin xa xiak. E xosxa mani ak tapin ti, ma nisa rute mun e melele xa nitilomun nimei."" 36 Di, Iesu misis tisa te Rae xil na Mosis bitene, "?Onemi obit naha? ?Visi e moletin xatel ak iaxa pisen sexien hos na tua tei na moletin xa moletin te kanen xil latehasi?" 37 E xi bit rilomun ni mi Iesu bitene, "Moletin xa pisen esaeen nan mini." Ma Iesu bit rilomun ni bit, "Bos, ma xouk mun uha upol ni imak tang."
Iesu Be Nim Ma Merta xal Meri
38 Melele xa Iesu del moletin nan xil di lakakao tengan lave Serusalem, xil lamei e metimal tahal Betani. E metimal ak, atou tei da en, hisen Merta. Xi minggur pilei xil lamei e nim man. 39 Tunahin, hisen Meri, bemei visal Iesu e dotan sangas visal len. Xi di miteong kuhi ni pispisien nan. 40 E Merta misakras vateong kuhi vengan xa xi di misak mese ni anien ae. E vengan xa xi pol pupu, ma mei biteni mi Iesu bitene, "?Suv, midep? ?Onemi bos tang xa tuxahin miling polien xil ak di e bit inou tasok ti nipol ni? !Hiteni mini vamea vatutou ni nou!" 41 E Suv biteni mini bitene, "Merta, onexo pupu ve holesok xil holu. 42 E neta tei takes momal iaxa xamil mulikila mulipol ni. Meri pol ni neta xa momal ngamu, ma inou, ninahur rati ti rani."
Iesu Pispisi Usil Suse te Sisen
1 E melengien tei, Iesu di misis e rute tei. E melele xa misis bus, moletin tei nan biteni mini bitene, "Suv, pispisi mi xamem ni suse te sisen xa momal ixoni ngan taxa Sion xa di tekas moletin xil di tepispisi mi moletin nan xil. 2 Ma Iesu biteni mi xil bitene, "Melele xa musis, muhitene imak: 'Tamemem, mamerere ni hisom xa be Eo. Masis tengan xa umei uhe suv toto te meulien na moletin xil te ut etan. 3 Sa anien mi xamem ipin te melengien xil vus. 4 E uketeh ihos li mi xamem melele xa mapol misa minuk, vengan xa vehakut, xamem mun di maketeh ihos mi ngan xil xa di lapol misa mi xamem. Onamae ni ti sakpisien xa ipol ni mumot e tesaen.'”
Iesu Dei Vole Usil Sexien te Sisen
5 Di, Iesu biteni mi moletin nan xil bitene, "Xosxa tei xamim vahe tim sa tua tei nan e hilaep te vongien e vasisi vahitene, "?Tuak, okila osa ti anien minou? 6 Vengan xa tua tei navan nggo sotin bemei e tim savan, e anien tovuol xa nasa ni mini." 7 “Ma ngan xa de nim vasepin rilomun vamei mi xouk vahitene, "!Ei, onasa polien ti minou! Puiteh mikoe ngamu, e horamue navan xil mun lapat ladel nou tuei. !Ma nasakras namea nasa neta tova minuk!" 8 Nabiteni mi xamim, tave ti neta xa bit namea ti e nasa ti anien minuk vengan xa xouk obe tunali, e vengan xa otave unoun ti e dat osisi, osisi, osisi vuma " xi mikila imea e isa holesok xil vus minuk xa iem bei. 9 “Mak, ma nabiteni mi xamim, xosxa iemim bei neta ngan, musis Hi ven ma mukila muhuri. Xosxa mulang ni, ma mukila mukameti. E xosxa murei puiteh ven, ma mikila isah puiteh mi xamim. 10 Vengan xa ngan xil vus xa di lasis neta langguri; e ngan xil xa lalang ni neta likameti; e mikila isah puiteh mi moletin xil xa di larei. 11 ?Xos xouk xa obe tata tei, e natumali misisuk xa bit va meseo tova, 12 ukila usa tetal xa misa sung mini? ?Mu xosxa misisuk bit va rel tuto, ma ukila usa hat xa minggan mini? 13 Mak, ma tave ti neta xa mube moletin tesa xil, e mukila di musa neta xa bos mi horamue namim xil. Ma, nabiteni mi xamim, Tamemim xa de ut nesao xa bos mu mili, ti isa Ninin Eo nan mi ngan xil xa di lasisi."
Rut Moletin Labit Iesu Pol ni Polien Nan Nggo Xeihen na Temat
14 Vatei, Iesu pus moletin tei xa ninin tesa da en xa misak ni be vut, misakras vasepin. Ma Iesu minggol rati be relingi e moletin ak di misepin. Moletin xil xa lapusi latemanin ni. 15 E rute ngan xil labiteni labitene, "Belsepul xa be suv na ninin tesa xil iaxa di misa xeihen mini, misak ni mikila minggol rerat ninin tesa ra moletin xil." 16 E rut moletin sav ngan xil labit lisak pis Iesu, ma lasisi tengan vapol ni merekel tova vaxo ut nesao mi xil tengan vapisen ni xa xeihen na Hi di mini. 17 E Iesu mikil nenemien nae ma biteni mi xil bitene, "Xosxa moletin xil na suv toto tei di labae mi xil, ma xeihen na suv toto ak mei ihe neta sav tang. E xosxa moletin xil xa labe vatimol tei di labae mi xil, ma his vatimol ak ikesae. 18 Ma xosxa ninin tesa xil na Belsepul di labae mi xil, ma xi ihur xeihen itep? Nasepin ni mak, vengan xa mubitene inou nanggol rerat ninin tesa ra moletin xil nggo xeihen na Belsepul. 19 E xosxa mak, ma midep mi moletin namim xil? ?Xil langgol rerat ninin tesa xil ra moletin xil del xeihen na visi? Xil iaxa di lapisen ni xa neta xa musepin ni tamal ti. 20 ?E xosxa inou di nanggol rerat ninin tesa ra moletin xil nggo xeihen na Hi, ma ngan ak di pisen ni xa Hi mistal tuei e be suv toto te meulien na moletin xil. 21 “Belsepul nggoni moletin te xeih tei xa di bue xat kuh xi del holesok xil nan te vaeen. Mak, ma xi mikila iketeh kuhi xol nim man, e neta ti mei napangei holesok nan xil. 22 E melele xa tei xa nggeih mili mei mistal mini e bas tan ni, xi ileh rerat holesok xil te vaeen itel holesok xil te nim man. Xi ileh rerat vuol ni e iseti mi moletin nan xil. 23 “Mak, ma ngan xil xa latamos ti vatel nou, xil di labae minou; e ngan xil xa latatutou ni nou ti tengan laleh vituei ni moletin vaxoni sipsip xil, xil di langgol rerat xil laloh tasil.”
Ninin Tesa xa Be Reling Moletin Mikila Itilomun
24 Di, Iesu biteni mi xil bitene, "Melele xa ninin tesa be reling moletin tei ba, di mikakao e uruvuol tengan vakamet rute tova xa bos te ngel en. E xosxa takamet ti, ma xi misep tasen bitene, "Nitilomun nihe nim mavan xa natexo en natemei." 25 Ma dilomun ba, e mikameti xa nim ak langgur revi tuei. 26 Mak, ma ba milang ni ninin tesa sav xil xa labe lu e he sav (7) xa lasa mu mili. E ileh xil vus limei liti en. Nim ak be meulien na moletin, e xil lisak ni meulien nan isa mu ili ngan xa teta en te tiamu.”
Moletin xa Pol Nggusil Sepinien na Hi Ihur Tuxolxatien Nan
27 Melele xa Iesu di tamu misepin ni holesok xil ak, atou tei xa de hilaep te moletin xil mikei ba ni bitene, "Nabit Hi misa tuxolxatien mi nana nam xa telinguk e telaxat kuh xouk." 28 E Iesu misa rilomun ni sepinien ba ni atou ak bitene, "E ngan xil xa di lalong sepinien na Hi e di lapol nggusili, xil iaxa, Hi ituxol xat xil."
Moletin Xil Iexil Bei Lapus Merekel Tova
29 Melele xa moletin xil mei labe holu, Iesu misepin mi xil bitene, "Moletin xil te xosali ak lasa tang. Di lasis nou tengan lipus merekel tova, e Hi napol ni ti neta. Xil ak lipus merekel na Siona kestang. 30 Merekel xa testal mi Siona tepisen ni xa sepinien xa Hi tesa ni mini tengan vasa ni mi mol Nineve xil tehe reitin. Mak, ma Hi ipol ni mak mi Nat Moletin tengan ipisen ni mi moletin xil te xosali ak xa sepinien nan be reitin. 31 E Melengien te Lepisien, moletin xil te xosali limeul rilomun ra maten tengan Hi ilepis xil. E melele nen ak, Kuin tahal Siba xa tave Siu ti imeul mun, e isepin ixeih xat xil. Xi ipol ni mak vengan xa tekakao sotin temei tengan valong sepinien te metisouen na Suv Toto Solomon te tiamu. !E taxeak, tei xa mili Suv Toto Solomon da xiak e xil di lasin ni! 32 E moletin xil tahal Nineve mun xa latave Siu ti limei e lisepin ixeih xat moletin xil te xosali ak, vengan xa xil latehiles meulien nae melele xa latelong provet Siona tesetu mi xil. !E taxeak mupusi, tei xa mili provet Siona da xiak e xil di lasin ni!”
Iesu Dei Vole Usil Laet
33 Di, Iesu dei vole tei mi xil bitene, "Moletin tovuol tamu xa vasahan laet nan, ti, ha vasoso ni mu vakutaxole ni pesin tei. !Tamak ti! Melele xa misahan ni bus, poe ba misoxolein ni de kesao. Mak, ma melele xa moletin ngan bemei e nim mikila vapus ut valeluv. 34 Mete xir mun nggoni laet te tenbe xir. Melele xa mete xir di bos, radi e miehen e tenbe xir mikila vapol ni holesok xil ngasen. E melele xa mete xir bar, ma radi e maluxoluken e tenbe xir misakras vapol ni neta vahe holu. 35 Mak, ma mule kil kuh meulien namim, xa mudi e miehen mu maluxoluken. 36 Xosxa meulien namim di e miehen, e maluxoluken tovuol en, ma meulien namim ileluv kuhi ixoni laet tei xa pili e mileluv kuhi xol xamim.”
Iesu Misepin Nggeih ve Sexien na Parasi Xil Del Tisa Xil te Rae xil na Mosis
37 Melele xa Iesu misepin bus, Parasi tei mei misisi tengan ha vanien vatela e tim san. Ma Iesu be xalu luba. 38 E Parasi ak mitemanin melele xa pusi xa Iesu takas hen ti e ba dotan tengan vanien. 39 Ma suv Iesu biteni mini bitene, "O reitin, xamim Parasi xil, munggoni kap e pelet te anien en namim xa di mukas moten ni e hale tang, e vangite mumu minggoni tinemi xa polu ni nenemien te hokanen e tesaen xil. 40 !Mube unu xil! Mutakil ti xa Hi xa pol ni hale te neta, xi mun tang iaxa pol ni vangite? 41 E bos xa musa oei xa de vangit kap e anien xa de vangit pelet mi ngan xil xa labe hoeo. Mak, ma meulien namim imese kuhi pe met Hi. 42 “Isa pupu mi xamim, Parasi xil, ve pangasien xil xa imei e xamim. Di musa taet mi Hi ni tutut uvei xil te kuk en xa pol ni vo anien bos. E di mutapisen eheien namim ti mi Hi mu mi mosav xil usil sexien xa momal xa ti mupol ni. Ti mupisen eheien namim vatiamu, ti, mupol ni tutut taet namim sung vatutou. 43 “Isa pupu mun mi xamim, Parasi xil, vengan xa di mubosei von totanen na eilep xil e nim xil te pispisien. E von maket mun, iemim bei xa moletin xil ti lihur pilei xamim e ti limerere ni xamim. 44 Isa pupu mi xamim, vengan xa xamim, meulien namim tamemese ti. Munggoni von tehinen xil xa latasimele ti vati en, xa moletin xil di lakakao xati e latakil ti xa neta vutei bo di en." 45 Tei e xil xa be tisa te Rae xil na Mosis biteni mi Iesu bitene, "Tisa, melele xa osepin mak, opangei xamem mun vari vengan xa sexien holu namim mak tang." 46 Ma Iesu biteni mini bitene, “Isa pupu mun mi xamim tisa xil te Rae xil na Mosis, vengan xa musa rae xil holu mi moletin xil xa nggoni eipo xa meas pupu. Misak ni, xil lasakras lapoe, e xamim di mutapol ni ti neta tova vatutou ni xil ni eipo xil ak. 47 Isa pupu mun mi xamim, vengan xa di mupol kuhi ni tutut nim xil da xol von tehinen na provet xil xa avu namim xil mun tang te tiamu latehas vin xil. 48 Xil latehas provet xil, e xamim di mupol ni nim tehinen nae. Mak, ma di mupisen ni xa mubit avu namim xil lapol ni sexien tei xa bos. 49 Ngan ak nggoni naha xa Hi xa be metisou pupu tehiteni tehitene, 'Inou nisil provet itel eloheoh navan xil liha mi xil. E xil ak lihas ngan xil lilel e lisak ni ixeih mu mi ngan tesav xil.' 50 Mak, ma ve moletin xil te xosali ak da nga lapol sexien ak, Hi isa pangasien mi moletin xil te xosali ak ve re provet xil xa de he avu namim xil, e melele xa Hi tepeas ni ut etan ma duxoh xosali, re ak de hemim mun. 51 Reitin mak nabitene mi xamim, e melele xa avu namim xil latehas vin Evel duxoh melele xa latehas vin Sakaraea hilaep te hor te sanien del Nim Eo na Hi, Hi isa longpangasien ve maten xil ngasen nae mi xamim vus te xosali ak. 52 “Isa pupu mun mi xamim tisa xil te Rae xil na Mosis, vengan xa moletin xil labit lamei visal Hi e munggur soson ki te puiteh xa xil lava en tengan lakila en. !Xamim iemim ti tavei muve puiteh ak, e musikoe xol moletin sav xil mun xa iexil bei lave en e lamei visal Hi!” 53 E melele xa Iesu be ling nim ak, tisa xil te Rae xil na Mosis del Parasi xil, iexil mikati pupu. Misak ni, e melengien ak ba, xil latesis rovui ni sispileien xil holu xa xeih tengan vasak ni Iesu vasep usil neta holu. 54 Xil lateling xati tengan lasak ni Iesu vamot e sepinien nan.
Iesu Misel Xat Moletin Xil ve Sexien na Parasi Xil
1 E melele nen tak, moletin xil di labe holu xa labe holu, e dit lating lamei tengan xa lapus Iesu. Xil dit lapel xat le xil. E Iesu misepin diamu mi moletin nan xil bitene, “Muketeh kuhi ve pispisien xil na Parasi xil xa labe vat luvosen tang. Nggoni is xa pol ni pulaoa mikaio, pispisien nae di purun xuxus ni nenemien na moletin xil. 2 E neta xa mukutaxole, Hi ital rati imei valkesao. E neta xa moletin misak pisi di misoso ni, Hi isak ni istal imei kesao tengan moletin sav xil ti lipusi. 3 Holesok xil xa di musepin ni e ut te maluxoluk, veter mu, moletin sav xil mei lilonge e melengien tang. E holesok xil xa moletin di misep piao ni e nim taxeak, dutou ni, moletin sav xil ha ti lisoh e hilaep te metimal e likei ni ixeih tengan moletin xil ngasen lilongeong ni.”
Ulum Ikan ni Hi Kestang
4 Iesu biteni mun mi xil bitene, “Nabiteni mi xamim, tua navan xil, ulimim nakan ni moletin xil ti xa likila ti lihas vin tiei namim. Vengan xa dutou ni, misakras lipol ni ti neta mun mi xamim. 5 E inou nipisen ngan xa ti ulimim ikan ni. Ulimim ikan ni Hi kestang, vengan xa melele xa bas vin moletin mat, xi nggur xeihen tengan ikila iso ni ihe Von Upang xa misakras vamat. !Reitin mak, ulimim ikan ni Hi kestang! 6 “Tuholaea xil xa latereli tang, lapos ni vahe selen lu tang e tei, e Hi en tabong ni ti tova vari. 7 Mak iaxa, munanexo ti vengan xa meulien xamim mubos mak mu mili rut tuman xil ak xa latereli tang. Ngan ak reitin mak, Hi mikila mun hilimim kekes tang xa di e vatumi.”
Munahe Unoun ni Iesu Ti
8 Di, Iesu biteni mi xil bitene, “Ngan xil xa di labiteni xa langgusil nou pe met moletin xil, ma Nat Moletin mun ihiteni xa xil labe nan pe met masxaxa xil na Hi. 9 E ngan xil xa labe unoun tengan laviteni xa langgusil nou pe met moletin sav xil, ma Nat Moletin mun ihe unoun tengan ihiteni xa xil labe nan pe met masxaxa xil na Hi. 10 “E ngan xil vus xa lisepin isa e his Nat Moletin, Hi ikila iketeh ihos ni xil tamu. E ngan xil xa lisepin isa e his Ninin Eo, ma Hi naketeh ti navos ni xil vari. 11 “E melele xa moletin xil lital kuvun xamim tengan lisis pilei xamim ni neta ngan pe met eilep te nim te pispisien, mu pe met eilep xil te kavmen, munanexo ti. Munanem ti nahe holu ve sepinien xil xa ti musepin ni, 12 vengan xa, e melele nen ak, Ninin Eo iaxa ipispisi ni xamim ni sepinien eah xa mukila musepin ni.”
Iesu Dei Vole Usil Unu Tei xa Holesok Nan Holu
13 Moletin tei e vanut moletin ak misis Iesu bitene, “Tisa, tata navan mat tuei. Hiteni mi tua navan tengan vaseti holesok xil na tamemel mi xamel.” 14 E Iesu bit rilomun ni mini bitene, “?Ei, visi iaxa miling nou tengan nilepis xamil mu niseti holesok na tamemil xa milingi di mi xamil?” 15 Di, xi biteni mi xil vus bitene, “Muvue xat xamim, muketeh kuhi xol sexien xil ngasen te hokanen. Meulien namim tave ti holesok xil te ut etan. ?Neta sav xa moletin tei holesok nan holu, e ixal rat meulien te reitinen itep? !Misakras!” 16 Di, Iesu dei vole ak mi xil bitene, “Vatei, moletin tei da, e holesok nan holu. E naho nan, anien xil xa di en holu. 17 Ma nenemien tei bemei en xa bitene, '?Nipol ni itep? E nim xil mavan, ut tovuol mun xa nileh anien savan mei naling ni vati en. 18 !Aha nakila! Inou nipol ni imak: nitalelen nim xil xa hokorong tang xiak, e ti, nipol ni rute xil xa lihe neta hu e lihe tellep. Ti, niso anien xil ak itel holesok sav navan xil iti kuhi en. 19 Imak, ma inou nite meulien tei xa bos itel holesok xil navan. Xosali iha, ti ningel kuhi, ti nianien kuhi, e ti nimun kuhi; e ti nihesi nou, vehakut.' 20 “E Hi ihiteni mini ihitene, '!Obe unu tova tang! E vongien ak tang, nihur rat meulien nam. ?Ma di, visi iaxa ileh holesok xil ak sung xa osi revi di ihe mam?' 21 “Hisit sexien ak di mistal mi ngan xil xa be hokan e di lapolu ni holesok nae xil e ut etan, e mi holesok na Hi, xi napol ni ti neta.”
Munanexo Ti Vengan xa Hi Mikila Milaxat Kuh Xamim
22 Di, Iesu biteni mi moletin nan xil bitene, “Mak, ma nabiteni mi xamim, munanexo ti ve meulien namim: ve naha iaxa ti mua ni, mu ve naha iaxa ti musing ni ita xol tenbemim. 23 Meulien xa Hi misa ni mi xamim bos mak mu mili anien xil xa di mungga ni; e tenbemim bos mak mu mili eising xil xa di musing xole xamim ni. 24 Mupus ti tuman xil ak, xil latalih ti naho tengan laleh anien vaxo en. Pavah mae mun tovuol tengan lasi rep xat anien ae vati en. E Hi kestang di bangan xil. E pe met Hi, xamim mubos mak mu mili tuman xil ak. 25 Nenexoen misakras vapol ni meulien na moletin tei vahe teviei luvoluv mu. 26 E vengan xa nenexoen misakras vapol ni neta xa hokorong mak e meulien namim, ma veneh iaxa di munem pupu usil holesok sav xil mun xa iemim bei? 27 Munem pisi usil hungovae xil xa di lameul. Xil di latapol ti, mu di latatil ti eising nae. E nabiteni mi xamim, suv toto Solomon te tiamu, eising nan xil tehos xa tehos; e hungovae xil ak, lasing bos mak mu mili. 28 Hi di mising xol kuh hungovae xil ak mak, xa ladi melengien tei takes, e visuvong meles, mot. Di, moletin miteas viton ni e milehi be upang. ?E xosxa ipol ni mak mi xil, ma munemi mubit Hi misakras vasing xol xamim? !Ei, neketen namim hokorong tova tang! 29 “Tavos ti xa munexo ve naha xa mua ni mu mumu ni. 30 Hisit nenexoen ak be na moletin xil xa latakil ti Hi. E Hi xa be Tamemim mikil naha xa xamim iemim bei. 31 Bos mak mu xa itiamu, ti mumae ni Hi mei ihe suv toto te meulien namim. Ti, holesok xil vus te meulien, Hi ti isa ni mun mi xamim. 32 “Munggoni sulut sipsip savan xil, ma ulimim nakan ti e munanexo ti vengan xa Tamemim memaal himetu tengan imei ihe suv toto te meulien namim e isa holesok xil vus xa di hen mi xamim. 33 Mak, ma mupos vuol ni holesok namim xil e musa vatu teni mi hoeo xil. Misak ni, Hi ipus kil sexien xil namim e iling xat huite teni e ut nesao. E rute ak, huite xil ak lisakras lavo e moletin misakras vakan ni xil. 34 Nabiteni mak vengan xa meulien namim iti sangas ni rute xa ti muling xat huit polien namim iti en.”
Moletin te Polien Xil Ti Livue Xat Xil Vengan xa Navehi Ti, Suv nae Itilomun
35 Iesu biteni mun mi moletin nan xil bitene, “Vehakut, muvue xat meulien namim ve naha xa imei. Ti muxoni moletin te polien xil xa di lasing xol xil ni eising te polien e di lapo laet xa di pili. 36 Moletin te polien hos xil ak ladatil suv nae xa be anien tei te tetelien e latakil ti xa itilomun vilieh. Xil livue xat xil vehakut tang ve melele xa suv nae imei e ikes xil, ma vatakes, xil likila lisah puiteh. 37 Xosxa suv ak bemei e pus moletin xil te polien nan latapat ti e dit laketeh vesi, ma ilonge ihos. Reitin li nabiteni mi xamim, moletin te polien nan xil mun lilonge ihos, vengan xa suv ak kestang imerere ni xil: xi ising ni eising te polien, ikes xil mei lianien, e xi iaxa ihengan xil. 38 Tave ti neta xos suv nae bemei e hilaep te vongien mu e makoe roroh, moletin hos te polien xil xa labue xat xil vehakut lilonge ihos. 39 “Mukil rin ak, xosxa moletin tei mikil melele xati xa moletin te kanen imei en, ma xi ivue xat xi tengan moletin te kanen ak misakras vamei e nim man. 40 Nat Moletin imei istal e melele tei xa xamim munanemi ti muvit xi vamei en. Imak, ma muvue xat xamim vehakut."
Iesu Dei Vole Usil Hisit Moletin te Polien Lu
41 Di, Pita misis Iesu bitene, "Suv, di odei vole ak mi xamem xa mabe moletin nam xil kestang, mu mi moletin xil ngasen?" 42 E suv Iesu bit rilomun ni mini bitene, "Di nasepin mi hisit moletin xil xa langgoni moletin te polien xa vehakut di pol bos e be metisou. Hisit moletin ak, suv nan ilingi ihe vat te nim man melele xa xi be ut sav tei. Suv nan inesi tengan ihe vat e ilaxat moletin sav xil te polien, e tengan iseti kuh anien ae mi xil. 43 Mak, ma xosxa suv nan itilomun e ipusi xa vat te nim man di pol bos, ma vat ak ilonge ihos. 44 Reitin li nabiteni mi xamim, suv ak ipet rat vat ak ihe nesao tengan xa ti ilaxat holesok xil vus nan. 45 “E xosxa vat te nim di minemi bitene, "Ei, suv navan da nousav, e tamei ti mok." Misak ni di bas tiramue e atou sav xil te polien e nim ak, e di ngga vin xi e di mumun vuma mitallang. 46 Ma ti, suv nan itilomun e melele tei xa xi tanemi ti vahit imei en. Isak ni, suv nan mei ihas purun ni e iso rati ihe von longpangasien itel mosav xil xa latepurun naha xa teti he. 47 "Xosxa moletin te polien tei xa mikil kuh naha xa suv nan ien bei vapol ni, e tavue xat xi ti tengan vapol ni; ma suv nan ihas purun ni, e xi ilong pangas pupu ni xi ven. 48 E xosxa moletin tei te polien takil ti naha xa suv nan ien bei xi vapol ni, e di pol misa; ma suv nan ihasi ihe vuteili tang, e pangasien teni ihe hokorong tang. Ngan xil xa Hi miling holesok holu e he, Hi bit vapus holesok holu vaxo he xil. E ngan xil xa Hi miling holesok holu mu e he, Hi bit vapus holesok vahe holu mu vali vaxo he xil.”
Pispisien na Iesu Pol ni Moletin Xil Di Laletasil ra Xil Mun
49 Iesu biteni mi moletin nan xil mun bitene, "Inou namei tengan nasahan upang va moten ut etan. E xosxa upang ak di ngan taxeak, ma inou nimaal pupu ven. 50 Melengien tei xa nggeih di bemei e nou, e di nalong pangas nou ven, ha vuma ... melengien nen ak mei istal. 51 ?Xamim munemi mubit inou namei tengan niling tomat e ut etan? E-e, ninaling tomat ti mu. Nipol ni moletin xil ti liletasil ra xil mun tang. 52 Mak, ma taxeak iha, vatimol tei ti liti pas xil, rute xil liketeh isa ni rute xil mun venou. 53 Tata xil lisel mi horamue nae xil, e horamue xil lisel ni tame xil. Nana xil lisel ni atuli nae xil, e atuli xil lisel ni nine xil. Atou xil lisel ni havnehin xil, e xil lisel ni avu sasa nae xil.”
Moletin Xil Latalekil Ti Kout Polien na Iesu
54 Iesu biteni mun mi moletin xil bitene, "Melele xa mupus vatiang xa mukesi ni 'toio' miting momah xil xa maluxoluk bemei, mukila xa us vamus xiak, ma mus. 55 E melele xa mupus 'aru' mistal mukila xa ut vavue xiak, ma ut bue. 56 !Xamim, mube vat luvosen! Melele xa mupus neta tei xa mistal e ut etan mu e tilang hat, mukil koute teni. ?E veneh sung ma ti mutapus kil ti koute te naha xa di napol ni taxeak?”
Bos xa Radi e Tomat Itel Moletin Sav Xil
57 Di, Iesu biteni mun mi xil bitene, "?Veneh ma di mutanem kil ti suse xa bos e momal tengan xa ti mukakao vahusili? 58 Xosxa xa moletin xa bae del xouk bit valing xouk e kot en, ma bos mak mu xa ha usepin itela tengan xa mulimal ni rin xa nggeih da xat xamil. Vengan xa xosxa otapol ni ti, ma ilinguk e he moletin te lepisien. E xi ilinguk e he polis, di, polis ilinguk e nim te xeih. 59 Nabiteni minuk, osakras ostal ra nim te xeih ak ha vuma ... uxal rerat holesok xil vus xa moletin te lepisien tehiteni.”
Muhiles ra Tesaen Namim, Maxani Mulel
1 E melele nen ak, rut moletin xil lamei latumul mi Iesu usil ngan Kaleli xil xa di latehas vongoro sae xil e Nim Eo xa tehe sanien nae mi Hi. E melele xa di tamu latepol ni, moletin te vaeen xil na Suv Paelet mei latehas xil e re xil teha xat sanien nae xil. 2 Ma Iesu biteni mi xil bitene, "?Midep? ?Munemi mubit ngan Kaleli xil, suse xa latelel xiak di pisen ni xa tesaen nae tehe tellep mu teli na moletin sav xil tahal Kaleli? 3 !Tave reitin ti! Nabiteni mi xamim, xosxa munaviles meulien namim ti ra tesaen namim, ma xamim mun mumak tang. 4 Munem pis moletin tol e le sav (18) xa latelel sangas ni rute tei xa lakesi ni 'Saelom'. ?Midep? ?Munemi mubit nim te keteh en xa tehe teviei tehe nesao temot mei tetaxat xil vengan xa tesaen nae xil tehe tellep mu teli tesaen na moletin sav xil tahal Serusalem? 5 !Tave reitin ti! Nabiteni mi xamim, xosxa munaviles meulien namim ti ra tesaen namim, ma xamim mun mulel."
Iesu Dei Vole Usil Vatit Fik xa Huite Tovuol
6 Di, Iesu dei vole tei mi moletin xil ak bitene, "Moletin tei milih vatit fik tei de urvatiei te grep san, e vehakut xi ba di misao ni, e tapus ti huite. 7 Ma biteni mi moletin xa di milaxat urvatiei san bitene, 'Huram tol tuei iaxa namei nabit napus ti huit fik ak, e natakamet ti vari. !Terati! Di misukoh xol ut votei tang.' 8 “E moletin nan xa pol e urvatiei ak bit rilomun ni mini bitene, "Suv, lingi vata munamun mu vahe huram tova tang. Nikil ikapis xole, ti niso tisok ihe pe vatte tengan imeul ihos. 9 Xosxa iva e huram xor, ma bos; e xosxa nava ti ma nitei rati sung.""
Iesu Pol ni Atou Tei xa Marin Mikavui Mei Bos Mun e Sabat
10 Vatei, e Sabat, Iesu di pispisi mi moletin xil e nim te pispisien tei. 11 E pus atou tei bemei xa ninin tesa tepurun marin huram tehe tol e le sav (18). Misak ni xi misakras vasoh vamal. 12 Melele xa Iesu miketeh pusi, mikei ba ni bitene, "Nana, meseien nam be relinguk ngamu." 13 Iesu miling hen en, ma varinga tang, atou ak misoh mal e di memes Hi ven. 14 Ngan ak misak ni eilep te nim te pispisien ien mikat vengan xa Iesu pol ni mar atou ak bos e Sabat. Ma misel ba ni vanut moletin ak bitene, "Melengien tei e he sav (6) iaxa moletin ikila ipol en. Mumei mumeluv ra meseien namim e melengien xil ak, e nave Sabat ti." 15 E Iesu bit rilomun ni mini bitene, "!Ei, xamim mube vat luvosen tova tang! Xamim di mulal rat buluk samim xil e muleh xil be langganien e Sabat nggoni melengien sav xil mun tang. 16 E midep mi atou ak xa be atuli tei na Ebraham? Temat bar xati huram be tol e le sav (18) xiak. ?Munemi mubit rasakras ralal rati ra meseien nan e Sabat?" 17 Sepinien na Iesu misak ni moletin xil xa laketeh misa ni labe unoun. E moletin sav xil lamaal tova tang ve polien hos xa Iesu pol ni.
Iesu Dei Vole Lu Usil Suse xa Hi Mei Ihe Suv Toto na Moletin Xil
18 Di, Iesu biteni mi xil bitene, "?Hi imei ihe suv toto na moletin xil itep? ?Nisepin ni imese mi xamim itep? 19 Nggoni utut vaak xa hokorong, mot mei de vatiei tei. Utut vaak ak miteh, meul mei be vatiei xa eilep, ma tuman xil, mei langel e halite xil." 20 Rilomun, xi biteni mi xil bitene, "?Hi imei ihe suv toto na moletin xil itep? 21 Nggoni is xa atou tei miso ni vuteili tang ba del pulaoa xa mahulong. Xi bilesi vuma ... is ak pol ni pulaoa xil ak lakaeo, labe mahulong mu."
Iesu Dei Vole Usil Puiteh xa Hokorong xa Be Ut Nesao
22 Melele xa Iesu di pol ni suse nan tengan vahe Serusalem, xi nggo metimal xil e di pispisi mi moletin xil. 23 E vatei, moletin tei misisi bitene, "?Suv, moletin holu iaxa lihur meulien hu e ut nesao, mu rute tang?" 24 E Iesu bit rilomun ni mi xil bitene, "Ti musak pisi vehakut ti muxo puiteh xa hokorong e ut nesao vengan xa moletin holu di lasak pisi e rute xil tang likila lixo en. 25 Xosxa melengien imei xa suv te nim ak imea mei ikoe xol puiteh, ma xamim mumei musoh mutit hale. E ti muti puiteh e mukei iha ni suv ak muhitene, 'Suv, sah puiteh, mavat nim.' “E xi ihiteni mi xamim ihitene, "Inou natakil ti xamim e natakil ti xa xamim tahal ut xave!' 26 “Ma xamim muhiteni mini muhitene, "Xamem di mateanien e di matemun tetel xouk e di otepispisi e metimal namem." 27 “E xi ihiteni mi xamim ihitene, "Inou natakil ti vari xa xamim tahal ut xave. Xamim vus musa. !Muha!" 28 E melele xa xiak, xamim mupus Ebraham, Aesak e Siakop itel provet te tiamu xil liti nim na Hi e ut nesao. !E Hi isin xamim e mutit hale! Isak ni, xamim mutang vengan mulong pangas xamim e metemim ipili vengan iemim ikat. 29 Moletin xil lixo hal sav xil e ut ngasen e ut etan limei vengan xa Hi ihe suv toto nae. Limei nim e litotan e von anien itela. 30 Ngan ak be reitin, ngan xil xa ladutou taxeak, mei litiamu. E ngan xil sung xa ladiamu, mei litutou.”
Iesu Ien Sae Holu Ve Hal Serusalem
31 E melele nen ak, rut Parasi xil lamei labiteni mi Iesu labitene, "!Bos xa umea reling rute ak uha, vengan xa Suv Toto Herot bit vahasuk omat!" 32 Iesu bit rilomun ni mi xil bitene, "Muha rilomun e muhiteni mi kuli reran ak imak: xosali e visuvong, ti nixol rerat ninin tesa xil e nisak ni moletin xil xa lamesei lilonge ihos mun. E melengien tol nen, nipol sen naha xa natemei ven. 33 Io, xosali, visuvong, e hoeis, nihusil suse navan nihe Serusalem vengan xa e rute ak, mol Isrel xil di labas vin provet holu nae xil. 34 "!O moletin xil tahal Serusalem! Xamim xa di mubas vin provet xil e di munggo vin eloheoh xil xa Hi di misa xil mi xamim. Melengien hau, ieok tehei pupu tengan naleh viton xamim mumei visal nou vaxoni toatou xa di mileh viton tuten xil lamei pe aveoun. E xamim iemim tavei. 35 Ma Hi iling xamim muti imak, naxur xol xamim ti mun. Ma musakras mupus nou ha vuma ... muhiteni muhitene, "Hi Suv, utuxol xat xi xa bemei e hisom."
Iesu Dal Rat Moletin Tei ra Meseien Nan e Sabat
1 E Sabat tei, Iesu ba mingganien e tim sa eilep tei na Parasi xil, e Parasi sav xil di lale mah xati. 2 E rute ak, moletin tei xa len e hen mitep da. 3 Ma Iesu misis tisa xil te Rae xil na Mosis e Parasi xil bitene, "?Rae nar maen ni xa radal rat moletin tei ra meseien nan e Sabat, mu tamaen ni ti?” 4 E xil ladit votei, latavit ti neta. Ma Iesu duxoli, pol ni ven bos rilomun, di, misila ba. 5 Di, Iesu biteni mi xil bitene, "Vahit tova xamim xa horamue nan mu buluk san vamot vahe vul e Sabat, ma mukila mutal rat vari ni?" 6 E xil lasakras lasa rilomun ni sepinien nan.
Hi Di Pet Rat Moletin xa Nenemien Nan Be Tan
7 E anien ak, Iesu pus kila xa rut moletin xa lasilasil ni xil di lale kis ni von totanen xil xa bos, ma xi dei vole tei mi xil bitene, 8 "Melele xa moletin tei misilasil ni xouk e anien tei te tetelien, onatotan ti e rute xa bos. Maxani, veter mu, moletin tei xa eilep mu ni xouk namei. 9 Xosxa imak, ma isak ni moletin xa misilasil ni xouk mei ihiteni minuk ihitene, "mae ni eilep ak vahur von toen nam." Imak, xouk uhe unoun vengan uhur von toen xa misa tang. 10 E xosxa lasilasil ni xouk, uha utotan e von toen xa be tan, tengan moletin xa misilasil ni xouk imei visaluk e ihiteni ihitene, "Tua, amei nesao e von toen xa bos." Mak, ma moletin te nim isa merereen minuk pe mete moletin xil vus. 11 Moletin xa di pet rat xi tasen, mei ihe tan; e moletin xa nenemien nan be tan, Hi ipet rati ihe nesao." 12 Di, Iesu bitene mi moletin xa misilasil ni xi bitene, "Xosxa opol ni anien tei, onasilasil ni tua nam xil ti, mu vatimol nam xil ti, mu ngan xil xa holesok nae holu e ladit sangas visaluk. Vengan xa xil likila lisilasil ni xouk mun, ma uhur rilomun ni naha xa otepol ni. 13 !E-e! Xosxa opol ni anien tei, usilasil ni hoeo xil, moletin xil xa lasakras lakakao, ngan xil xa rut tenbe mat, e ngan xil xa mete bar. 14 Mak, ma Hi ituxol xatuk, vengan xa xil lasakras lasa xoles neta xa opol ni mi xil. Hi kestang isa rilomun ni minuk e melengien xa moletin tehos nan xil limeul rilomun ra maten."
Iesu Dei Vole Usil Anien Tei xa Mahulong
15 Melele xa moletin tei xa tete anien ak milong sepinien na Iesu, biteni mini bitene, "!Hi ituxol xat ngan xil xa xi be suv toto e meulien nae melele xa litotan e anien hos e ut nesao itela!" 16 Ma Iesu dei vole ak mini bitene, "Vatei, eilep tei tehit ipol ni anien tei xa eilep, ma tesilasil ni moletin xil holu. 17 Di, e melengien te anien ak, xi misil eloheoh nan tengan vahiteni mi moletin xil xa tesilasil ni xil vahitene, "Mumei, anien mese tuei." 18 “E xil vus lasin ni ve polien sav nae xil. Tei xil bitene, "Inou nanggal tan tei e niha mu nisao ni. Mak, ma nasakras namaat." 19 “Tei mun bitene, "Inou nanggal rohon ni buluk te polien hexalu (10) xa di lalihi aean xa di dei tan, e nabit nama nasak pis xil. Ma nasakras namaat vari." 20 “Tei mun bitene, 'Inou nateli rohon tang, ma nasakras namaat." 21 “Ma di, eloheoh ak dilomun ba bit sen sepinien xil ak mi eilep nan. E xi ien mikat pupu, e biteni mi eloheoh nan bitene, 'Utemanon, uhe suse xil te metimal ak, ha uleh hoeo xil, moletin xil xa lasakras lakakao, ngan xil xa mete bar, e ngan xil xa rut tenbe mat." 22 “Tavehi ti, eloheoh dilomun e biteni mini bitene, "Suv, sepinien nam napol vuol ni tuei, e ut pipin ni moletin holu mu." 23 “Ma eilep te anien ak biteni mini bitene, "Uhe ut xil ngasen e suse xil vus e ukes moletin xil limei, tengan nim mavan ipolu kuhi ni xil. 24 Nabiteni mi xamim, ngan xil xa natesilasil ni xil te tiamu, ti e xil nakar pis ti anien ak!""
Moletin xa Bit Vahusil Iesu, Bos xa Itiamu, Inem Kuhi
25 Vatei, vanut moletin xil di langgusil Iesu, e xi biles e biteni mi xil bitene, 26 “Xosxa moletin tei bit vahusil nou, en ihei nou ili tamen, ninen, atou nan, horamue nan xil, tunali e hineli xil, e xi mun tang. Maxani, misakras vahe moletin navan. 27 Ngan xa tapo eivave te pangasien nan ti tengan vahusil nou, misakras vahe moletin navan. 28 Xosxa tei e xamim di minemi bit vahil nim tei xa mahulong; bos mak mu xa itotan e inem usili xa vatu te nim ituxol mani eah. Di, ipusi xa vatu nan pipin tengan ipol vuol ni nim ak. 29 Maxani, ipol ni rute tang e napol vuol ni ti. Mak, ma moletin xil vus xa lipusi, lisep sisili 30 e lihitene, "!Tavue xat xi ti vapin tengan vapol vuol ni nim man!" 31 Mu ixoni suv toto tei xa mileh moletin nan xil xa labe taosen hexalu (10,000) tengan lavae vatel suv toto sav tei xa bemei del moletin nan xil xa labe taosen hanutap (20,000). Itiamu, xi itotan e inem kuhi xa xi nggur xeihen pipin tengan vavae vatel suv toto ak. 32 E xosxa xi mikila bit tahur ti xeihen vapin, ma isil ti eloheoh nan xil ha, lipus suv toto sav ak tengan lisisi ve suse te tomat e melele xa xi da tamu sotin. 33 Mak, ma itiamu, munem kuhi, tei e xamim xa misakras valing holesok ngasen nan, misakras mei vahe moletin tei navan."
Iesu Dei Vole Usil Sol
34 E Iesu biteni mi xil bitene, "Sol bos. ?E xosxa xa konen teni be relingi, ma konen teni itilomun imei en itep? 35 Sol ak tavos ti ni neta tova, bos xa muso ni tang iha. Xosxa vurangemim di, bos xa muteong!"
Iesu Dei Vole Usil Sipsip Tei xa Tekesae
1 Vatei, moletin te takis xil del moletin tesa sav xil mun lamei e di lateong ni Iesu. 2 E Parasi xil del tisa xil te Rae xil na Mosis di lasep utut ni labitene, "Moletin ak di nggur pilei moletin tesa xil e di mingganien mun del xil." 3 Ma Iesu dei vole ak mi xil bitene, 4 "?Xosxa tei e xamim, sipsip san xil labe handred tei (100) e tei mikesae, ma xi ipol ni itep? Iling ngan tesav xil xa labe hanutap hat e hat e le sav mun (99) liti e munae, e iha ilang ni ngan xa mikesae vuma " ikameti. 5 E melele xa ikameti, ilonge ihos xa ihos, ipoe ite vatuvun, 6 ti, iha mun tim. Ti, ikes viton tua nan xil e ngan xil xa ladi sangas visali, e ihiteni mi xil ihitene, "!Rihesi xir vengan xa nakamet sipsip savan xa tekesae!" 7 Nabiteni mi xamim, e ut nesao imak tang, lihesi xil ve moletin tesa tei xa ihiles meulien nan ili hanutap hat e hat e le sav mun xil (99) xa lataviles meulien nae ti vengan xa xil lanemi labit lamal ngamu."
Iesu Dei Vole Usil Mani Tei xa Tekesae
8 E Iesu dei vole tei mun bitene, "?Xosxa atou tei xa valeh xat tutut vatu duxoh hexalu (10) e vapusi xa tei xil mikesae, ma vapol ni vatep? Isahan laet, itaveas e nim, e ilang kuhi e ut xil vus vuma " mikameti. 9 E melele xa mikameti, mikes viton tua nan xil e ngan xil xa ladi sangas visali e biteni mi xil bitene, "Rihesi xir vengan xa nakamet mani navan xa tekesae." 10 Nabiteni mi xamim, imak tang e pe met Hi e masxaxa xil nan, xil lihesi xil ve moletin tesa tei xa ihiles meulien nan."
Iesu Dei Vole Usil Horamue Tei xa Tekesae
11 Iesu dei vole tei mun bitene, "Vatei, tiramue tei da, horamue nan tehe lu. 12 Ngan te tutou biteni mini bitene, "!Tata, seti holesok nam xil e xamel, ti, usa navan taxeak!' “Ma tiramue ak miseti holesok nan xil mi horamue nan xalu. 13 Melengien vahis mitavi, ngan dutou pos vuol ni holesok nan xil, di, ba be ut tei xa sotin del vatu nan. E rute ak, xi purun vatu nan e meulien xa tamal ti. 14 E melele xa pos vuol ni vatu nan xil, ut bue e anien tovuol e rute ak. Misak ni xi mei be hoeo pupu. 15 Ma xi ba tengan vapol mi moletin tei te rute ak. Moletin ak misila be tan nan tengan valaxat vueili san xil. 16 E nenemien nan, bit dit vahengan xi ni rut anien a vueili xil, e moletin ti tasa ti anien mini tengan va ni. 17 Di, minem kila sung, ma biteni mi xi tasen bitene, "Moletin xil vus te polien na tata, anien ae holu pupu, e inou, navehi ti, mae ikar vin nou inggak. 18 Nimea niha mun nipus tata e nihiteni mini nihitene, "Tata, napol misa li e pe met Hi e pe metom. 19 Natapin ti xa okes nou ni horamue nam. Upol ni minou nixoni moletin tei te polien nam tang."' 20 Ma mea dilomun be tim sa tamen. "E melele xi de sotin vuteili tamu ra tim, tamen pusi. Ien misae en pupu, ma miloh ba, miso hen nggaxol horamue nan, e pesum ni vin. 21 E horamue biteni mi tamen bitene, "Tata, napol misa li e pe met Hi e pe metom. Natapin ti xa okes nou ni horamue nam." 22 “E tamen mikes moletin te polien nan xil lamei e biteni mi xil bitene, "Mutemanon! Muleh eising xil xa bos mei, musing xole ni. Muling ring e vakuhen e musa sandel ihesi. 23 !Ti, muhas sulut buluk tova xa mikaio bos tengan ripol ni anien tei tengan rimaal ven! 24 !Vengan horamue navan ak temat, e taxeak, meul rilomun; xi tekesae, e taxeak, mei mistal mun!" Ma xil lakikei e di labol ven. 25 “Melele nen ak, horamue xa be muimol nan tete naho. E melele xa xi dilomun bemei sangas duxoh tim, milonge xa xil di lakikei e di labol. 26 Ma xi mikes moletin tei te polien bemei, e misisi, "?Naha xiak?" 27 “E xi bit rilomun ni mini bitene, "Tumali dilomun bemei tim e tamom bas sulut buluk tei xa mikaio vengan xa pusi meul teda, e mei del xir mun.' 28 “E melele xa muimol ak milonge mak, ien mikat, e bit nava ti e nim. Ma tamen mistal, mei dak kesi tengan vahe nim. 29 E xi misa rilomun ni sepinien ba mi tamen bitene, "!Uteong ni nou! !Huram holu ngamu napol minuk nggoni moletin te polien nam tang, e natateong ras ni ti xouk! ?Naha tova osa ni minou? !Tovuol! Otasa pas nani tova minou tengan napol ni anien tova vatel tua navan xil. 30 !E melele horamue nam xai, xa tepurun sen holesok nam xil e hoeaso xil, bemei mistal mun e tim, omea obas sulut buluk xa mikaio ven!" 31 “E tamen bit rilomun ni mini bitene, "Horamue navan, vehakut xouk odi visal nou, e holesok xil vus navan be nam. 32 Momal tang tengan ripol ni anien ak ven e rimaal, vengan tumali temat, e taxeak, xi meul rilomun. Xi tekesae, e taxeak, rakameti mun.""
Iesu Dei Vole Usil Vat Tei xa Pol ni Vatin
1 E melele xa Iesu di ngganien del Parasi xil, xi biles e dei vole tei mun mi moletin nan xil bitene, "Vatei, eilep tei xa holesok nan holu nggur moletin tei nan te polien e milingi be vat te holesok nan xil. Xi pol ba vuma ... eilep ak nggur longeongen xa bit vat nan ak di talaxat kuh holesok nan xil ti. 2 Ma mikes vat ak mei biteni mini bitene, "?Naha iaxa di nalonge usiluk? Uha utis usil polien xil navan xa di otepol ni, vengan xa navehi ti, niso nuk ra polien ak." 3 “Ma vat ak misep tasen bitene, "Suv navan vaso nou e polien navan xiak. ?Imak, ma itep xiak? Veok te xeih ti vapin tengan natalen tan, e nabe unoun pupu tengan nasis moletin sav ni vatu. 4 !Aha! Nakila naha xa nipol ni. Ngan ak ipol ni melele xa nivus ra polien ak, tua navan xil liti, e lihur pilei nou nihe tim sae.' 5 “Ma vat mikes kekes ni moletin xil xa laleh hon ni holesok xil e lataxale ti. Xi misis ngan diamu bitene, "?Xouk onggur naha ra eilep navan?" 6 “E moletin ak bit rilomun ni mini bitene, "Naleh tutut teram te oel xa lapol ni nggo huit olip be handred tei (100)." “Ma vat biteni mini bitene, "Utemanon, uhur uvei nam, e utei vatu nen imei etan e hanutap lu e hexalu mun (50) tang." 7 “Di, misis ngan tesav bitene, "E xouk, onggur naha ra eilep navan?" “Xi bitene, "Naleh bak pulaoa be taosen tei (1,000)." “E vat biteni mini bitene, "Uhur uvei nam e utei imei e tan e bak xa be handred tol e he sav (800) kestang." 8 “Misak ni, tave ti neta xa vat pol ni vatin mak, e eilep nan pet rati vengan xa xi pisen ni xa nenemien nan be teviei. Nabiteni mak vengan xa moletin xil te ut etan langgur vatie melele xa lapol del tua nae xil. Sexien nae xil mili sexien na moletin xil xa labit langgusil Hi e ladi e miehen.” 9 Iesu biteni mun bitene, "Ma nabiteni mi xamim, vatu namim misakras vati vahehi. Ma muleh moletin sav xil limei visal xamim e mututou ni xil ni holesok namim xil te ut etan ak. Mak, ma melele xa muling sen holesok namim xil te ut etan, ma Hi ihur pilei xamim e ut nesao. 10 Moletin xa di milaxat kuh neta tei xa hokorong, ma ikila ilaxat kuh neta tei xa mahulong. E moletin tei xa di purun neta tei xa hokorong, xi ikila mun ipurun neta tei xa eilep. 11 Xosxa moletin xil linanesi ti e xouk itel holesok xil te ut etan; Hi mun misakras vanesi e xouk vatel holesok hos nan xil xa tellep mu ili. 12 E xosxa mutalaxat kuh holesok xil na Hi ti xa milingi e hemim e ut etan, ma misakras vasa ti mun neta mi xamim e ut nesao. 13 “Moletin te polien tei misakras vapol mi suv lu. Maxani, en iat tei, e eheien nan iti e tei xalu; mu imerere ni tei, e iketeh isa ni tei xalu. Osakras omot mi Hi vatel vatu." 14 Melele xa Parasi xil lalong sepinien xil ak, lasep pepeas ni Iesu, vengan xa eheien nae di vatu.
Iesu Misep Usil Sexien xa Parasi Xil Langgur Xoteh Rae Xil na Hi
15 E Iesu biteni mi Parasi xil bitene, "Xamim xil ak iaxa mupol ni xamim momal e pe met moletin xil, e Hi mikil nenemien namim. Naha xa moletin di minemi bit bos, ngan ak Hi di misin ni vari tang. 16 “Rae xil na Mosis e tisen na provet xil latepisen suse na Hi mi moletin xil duxoh melele xa Sion mei e di tekas moletin xil. E mei duxoh xosali iha, longeongen hos di pisen suse xa Hi imei ihe suv toto te meulien na moletin xil. Longeongen ak di mikapis e ut xil ngasen, e moletin xil holu di langgeih tengan labit Hi vamei mak. 17 Neta sav xos ut nesao e ut etan lalovus e melengien tei, e mavolut sepinien xa de Rae xil na Mosis, xeihen teni misakras vavus. 18 “Ve rin ak, e pe met Hi, tiramue xa miling atou nan e nggur atou sav, xi di pol ni tesaen dela. E tiramue xa miteli del atou xa tiramue nan milingi, xi mun di pol ni tesaen dela.”
Lasaros e Moletin Tei xa Holesok Nan Holu
19 Iesu mitumul mi moletin xil bitene, “Vatei, moletin tei da xa holesok nan holu, mising ni eising xil xa bos e vatu nen be nesao. Xi mikila vaxal holesok xil ngasen xa xi ien bei. E meulien nan, xi milonge bos vehakut. 20 Moletin tei mun da xa holesok nan tovuol, hisen Lasaros. Xi menuk ba xati e misakras vakakao. Vehakut, tua nan xil lapoe ba, lalingi e hol puiteh te vioh ma moletin xa holesok nan holu tengan mikila ti vasis moletin xil ve vatu. 21 E vehakut, Lasaros bit va saxut anien xa moletin ak di miso ni ba. E rilomun, kuli xil mun lamei di lamumun menuk nan xil. 22 “Ba vuma ... hoeo ak mat, e masxaxa xil ladela ba, lalingi de ri Ebraham e ut nesao. Di, moletin xa holesok nan holu mun mat, ma ladihin ni. 23 E moletin ak be de ut sa Temat, e milong pangas xi pupu. Di, miketeh be nesao, pus Ebraham de sotin, e Lasaros de rin. 24 Ma xi mikei be nesao bitene, '!Tata Ebraham, iem isae li e nou! Sil Lasaros vaha vasa vakuhen vahe oei, e mei vatuxol meok tengan vamarir. !Vengan xa inou, nalong pangas nou pupu e upang ak!' 25 “E Ebraham biteni mini bitene, 'Natuxuli, unem pisi mu. E meulien nam te tiamu, di mak otepus kuh hosien, e Lasaros di telong pangas xi tova tang. E taxeak, xi sung di pus hosien inggak, e xouk, di olong pangasuk. 26 E tei mun, vul tei xa mahulong da xoteh xir, misak ni xamem masakras mavur xotehi mavat visal xamim; e xamim mun, musakras mumei visal xamem.' 27 “Ma moletin xa holesok nan tehe holu biteni mini bitene, 'Tata Ebraham, ieok bei li xa osil Lasaros vahe visal vatimol navan xil. 28 E rute ak, tua navan xil labe lim (5) ladi en, mae ni ha vasel xat xil tengan xil sung linamei ti e ut te longpangasien ak.' 29 “E Ebraham biteni mini bitene, 'Rae xil na Mosis del sepinien na provet xil te tiamu di tuei tengan lisa selxatien mi tua nam xil. Ling xil tengan ti lilong xat naha xa sepinien xil ak di labiteni.' 30 “Moletin ak bit rilomun ni mini bitene, 'E-e, tata Ebraham, ngan ak tapin ti mu! E vahit moletin tova vameul rilomun ra maten e vahe visal xil, ma xil lakila laviles meulien nae ra sexien tesa xil.' 31 “E Ebraham bitene, 'Xosxa linalong xat ti Rae xil na Mosis e sepinien na provet xil, ma misakras lalong xat sepinien na moletin tei xa meul rilomun ra maten.'”
Iesu Misep Usil Tesaen
1 Iesu biteni mi moletin nan xil bitene, “Be reitin, sexien xil xa pol ni moletin mot e tesaen ikila ti imei. !E isa pupu mi moletin xa be suse te tesaen xil ak! 2 Moletin tei xa pol ni tei tesav xa te xeih ti mot e tesaen, bos mak mu vahit lavar hat xa mahulong vate hiraen e laterir ni e tas xa be huinep. Maxani, pangasien xa imei mini ihe mahulong pupu. 3 !Ma ulaxat kuh xouk ve naha xa opol ni! “Xosxa tumali pol misa minuk, ha ma umal ni. E xosxa xi biles meulien nan ra tesaen ak, ma uketeh ihos mini rilomun. 4 E xosxa xi pol misa minuk be valu e he sav (7) e melengien tei; e melele xil ngasen xa xi pol ni mak, xi bemei visaluk biteni minuk bitene, 'Napol misa pupu li minuk e ninapol ni ti mun vari namak.' Ma bos xa uketeh ihos tang mini.”
Iesu Sep Usil Neketen xa Nggeih
5 E moletin nan xil labiteni mi suv Iesu labitene, “Pol ni neketen namem vaxeih mu.” 6 Ma xi biteni mi xil bitene, “Neketen namim hokorong tang, vengan xa xosxa neketen namim pipin ni utut vaak tei, ma mukila muhiteni mi vatit vaak ak muhitene, '!Put ratuk ra tan ak, e ha, ulih xouk ute tas!' Ma xi iteong ni xamim.”
Sexien Na Moletin te Polien
7 Iesu biteni mun mi moletin nan xil bitene, “Mukila ngamu sexien na eilep tei xa misil moletin te polien nan tengan ha vapol e naho nan mu valaxat sipsip san xil. Melele xa pol bus, eilep nan misakras vahiteni mini vahit, '!Amei anien!' 8 !E-e, sexien na eilep xil tamak ti! Xi mikila ihiteni mi moletin te polien nan imak, 'Sak mese ni anien avan, ti, using xoles eising nam e uleh anien avan imei. Utatil nou mu nianien, ti, xouk sung.' 9 ?E eilep ak ikila imes moletin te polien nan ve xi di mipol nggusil sepinien nan? E-e, misakras. 10 Ngan ak nggoni xamim tang. Melele xa mupol sen polien xil xa Hi biteni mi xamim tengan mupol ni, muhiteni tang muhitene, 'Xamem mabe moletin votei te polien, e di mapol nggusil naha tang xa Hi di misa ni mi xamem tengan mapol ni.'”
Iesu Pol ni Moletin Hexalu xa Latemesei ni Leporsi Mei Vexil Memese
11 Melele xa Iesu del moletin nan xil di langgusil suse lave Serusalem, xil ba langgo haxot te provins tahal Sameria xal Kaleli. 12 Melele xa xil lakakao labe metimal tei, labisu ni moletin xil labe hexalu (10) xa lalong pangas xil ve meseien leporsi. Xil ak lasoh ladi sotin 13 e di lakei ba ni Iesu labit, “!Iesu, Suv! !Iem isae li e xamem!” 14 Iesu miketeh pus xil e biteni mi xil bitene, “Muha, mupisen xamim mi pris xil tengan lilepis vemim.” E melele xa langgusil suse labe, meseien nae be reling xil. 15 Melele xa tei e xil pusi xa ven memese, xi dilomun bemei vis Iesu, e di mikei be nesao e di pet rat his Hi ven. 16 Xi mitingeiril e pe met Iesu e misa memesien nan mini. E moletin ak be ngan Sameria, tave ngan Siu ti. 17 E Iesu misisi bitene, “Mutehe hexalu (10) iaxa vemim tememese. ?Ngan xil tesav xa labe hat e he sav (9) ladi xave?” 18 E Iesu misis moletin nan xil bitene, “Xi tave Siu ti. ?Veneh ma xi kestang dilomun bemei tengan misa memesien nan mi Hi?” 19 Ma Iesu biteni mi moletin ak bitene, “Mea, husil suse nam ha. Neketen nam misak ni vem memese.”
Melele xa Nat Moletin Itilomun En
20 Rut Parasi xil lasis Iesu labitene, “?Hi imei ihe suv toto na moletin xil vilieh?” E xi bit rilomun ni mi xil bitene, “Hi misakras vastal e suse tova xa moletin xil lale kila. 21 Moletin ti misakras vahiteni vahitene, '!Hi be suv toto inggak !' mu '! Hi be suv toto inggaxor!' vengan xa Hi bit ihe suv toto e tinemim, e te meulien namim.” 22 Di, Iesu biteni mi moletin nan xil bitene, “Melengien ngan xil xa misa ti imei, e inou natara ti mun visal xamim. E melengien xil ak, iemim ti ihei tengan muti vahos vatel Nat Moletin rilomun, tave ti neta xa melengien vahit vahe tei takes. E musakras vengan xa tave melengien nan ti mu xa vamei rilomun en. 23 E moletin ngan xil lihiteni mi xamim lihitene, '!Mupus ti Nat Moletin iaxor!' mu '!Xi tak!' E xamim munake reitin ti e tumulen nae e munahusil xil ti. 24 Nabiteni mi xamim mak, melengien xa Nat Moletin itilomun en ixoni ngan xa an milangas e mileluv xol ut ngasen nggo rin tei ba duxoh rin tei mun. 25 E itiamu, xi ilong pangas pupu ni xi, e moletin xil te xosali ak lisin ni. 26 “Melengien na Nat Moletin ixoni melengien na Noah xa te tiamu, moletin xil latnavue xat xil ti. 27 E melele nen ak, moletin xil ngasen di langganien, di lamun, e di lateli ba duxoh melengien xa Noah be tuturil nan xa mahulong pupu, e oei mileh bemei pol, e vatakes, bas vin xil vus. 28 “Melengien na Lot mun temak tang. Moletin xil ngasen di langganien e di lamun, di langgal e di lapos ni neta, di lapol ni naho e di lapol ni nim xil mun. 29 E melele xa Lot mea be reling moletin xil tahal Sodom, upang e hat xa minggan nggo nesao bemei e tan, e vatakes, ngga vin xil vus. 30 Ma Melengien xa Nat Moletin istal en vatei takes imak. 31 “E melengien nen ak, moletin tei xa di mingel pe vatiei tei, nava ti mun nim tengan valeh holesok nan xil. E moletin xa de naho, xi nahur ti mesal tengan vatilomun ha tengan vahur neta tova ra tim san. 32 Munem atou na Lot. 33 Xosxa moletin tei bit vahur xat meulien nan, ma ikesae rani. E xosxa imae ni meulien nan ikesae, ma moletin ak ihur meulien. 34 Nabiteni mi xamim, e melele nen ak, tiramue xal atou nan lalipat e rong tei takes, tei xalu Hi ihur rati ihe visali e ut nesao, e tei xalu ita. 35 Atou lu ti lalipol vituei ni anien, tei xalu Hi ihur rati ihe visali e ut nesao, e tei xalu ita. [ 36 Moletin lu ti lalipol e naho, tei xalu Hi ihur rati ihe visali, e tei xalu ita.” ] 37 Sepinien nan misak ni moletin nan xil lasisi labitene, “?Suv, sexien xil ak listal ixo xave?” Ma Iesu bit sepinien matu tei mi xil bitene, “Tuman xil xa lakes xil ni "volsa" di langga xol rute tei xa neta tei mat da en."
Iesu Dei Vole Usil Sexien te Sisen
1 Di, Iesu dei vole tei mi moletin nan xil tengan vapispisi mi xil xa vehakut xil ti lisis e nenemien nae namot ti. 2 Xi biteni mi xil bitene, “E metimal tei, moletin te lepisien tei da en xa di tamerere ni ti Hi mu moletin sav xil mun. 3 E rute ak, tunau tei mun da en xa vehakut bemei di dak kes moletin te lepisien bitene, 'Moletin tei di mipol nggeih pupu ba xat nou. !E rin navan, ulepisi li ihusil naha xa momal!' 4 “Atou ak dak kesi vehakut ba vuma ... moletin te lepisien ak minemi bit, 'Tave ti neta xa inou natamerere ni Hi ti mu moletin xil, 5 e vengan xa vehakut, atou ak di dak kes nou ve tutouen, bos xa nipol ni naha xa xi ien bei. Vengan xa xosxa ninapol ni ti, ma xi tit imei vehakut, isak ni nou veok ivuol ni.'” 6 Di, Iesu biteni mun mi xil bitene, “?Sexien na moletin te lepisien ak tamal ti, e mulong naha xa xi tehiteni? 7 ?Ma Hi midep? ?Mubit Hi misakras valepis e rin na moletin nan xil vamanon xa di ladak kesi ve tutouen melengien e vongien? 8 E-e, nabiteni mi xamim, Hi ilepis e rin nae ihusil sexien xa momal, e ipol ni imanon. ?E melele Nat Moletin itilomun e ut etan, mubit ikila ikamet ti moletin xil xa neketen nae nggeih en, mu misakras?”
Iesu Dei Vole Usil Parasi e Moletin te Takis
9 E melele nen ak, rut moletin xil xa ladi, di lanemi labit lamal ngamu pe met Hi ve polien hos nae. E xil di lanem mele ni mosav xil tang. Ma Iesu dei vole ak mi xil bitene, 10 “Vatei, moletin lu lube Nim Eo na Hi tengan lalsis: tei xalu be Parasi, e tei xalu be moletin te takis. 11 Parasi ak be misoh tasen e misis bitene, 'Hi, namesuk vengan xa inou nataxoni mosav xil ti xa di labe hokan, di lapol misa e di laleh atou na mosav xil. Namesuk mun vengan xa inou nataxoni moletin te takis ti xor. 12 Inou di nabal ni anien ve sisen melengien lu e wik tei, e di nasa taet te rut holesok navan xil minuk.' 13 “E moletin te takis misoh de sotin e bit naketeh ti nave ut nesao. Xi minem meulien tesa nan e simeten mereh, e misis bitene, '!Hi, iem isae li e nou! !Nabe moletin tesa tang!'” 14 Ma Iesu biteni mi xil bitene, “Nabiteni mi xamim, melele xa ludilomun lube tim salu, moletin te takis iaxa momal e pe met Hi, e tave Parasi ti. Vengan xa moletin xil xa di lapet rat xil, Hi ipol ni xil lihe tan. E ngan xil xa nenemien nae be tan, Hi ipet rat xil lihe nesao.”
Iesu Duxol Xat Tutut Horamue Xil
15 E melele nen ak, rut moletin xil di laleh tutut horamue nae xil labe visal Iesu tengan valing hen e xil e vatuxol xat xil. E melele xa moletin xil na Iesu lapus xil, lasikoe xol xil labit linapol ni ti namak. 16 E Iesu mikes tutut horamue xil ak lamei visali e biteni mi moletin nan xil bitene, “Munasikoe xol xil ti, mumae ni xil tang limei visal nou. Vengan xa Hi memaal tengan vahe suv toto te meulien na hisit moletin xil xa langgoni tutut horamue xil ak. 17 !Munem xat sepinien ak! Moletin tei xa misakras vahe tan e nenemien nan vaxoni tutut horamue tei, ma Hi misakras vari vahe suv toto te meulien nan.”
Moletin Tei xa Holesok Nan Xil Holu Ien Bei Vahur Meulien Sal
18 E melele nen ak, eilep tei na mol Siu xil da, e xi bemei misis Iesu bitene, “Tisa, xouk obos li mak. ?Nipol ni itep tengan nikila nihur meulien sal?” 19 E Iesu misis rilomun ni ba mini bitene, “?Veneh ma obit nabos? Moletin ti tavos, Hi kestang bos. 20 Xouk okil xat Rae xil na Hi ngamu, 'Onakan ni atou na mosav ti; onahas vin ti mosav; onakan ti; onaluvos his mosav ti; umerere ni tamom xal ninom.'” 21 Moletin ak bit rilomun ni mini bitene, “E melele xa natehe horamue mei duxoh xosali natahur xoteh ti Rae xil ak.” 22 Melele xa Iesu milonge mak, biteni mini bitene, “Neta tei mun xa otapol ni ti mu, upos vuol ni holesok nam xil e useti vatu teni mi hoeo xil. Imak, ma e ut nesao, holesok nam xil imei ihe holu mu. Ivus, ti, umei uhusil nou.” 23 E melele xa moletin ak milong sepinien na Iesu, xi milonge misa, vengan xa holesok nan holu pupu. 24 Iesu pusi xa moletin ak milonge misa ma biteni mi moletin xil bitene, “Ixeih pupu mi moletin tei xa holesok nan holu tengan Hi vamei vahe suv toto te meulien nan. 25 Minggeih pupu tengan kamel tei vakital vaxo vulut nitil tei. E minggeih mak mu mili mi moletin tei xa holesok nan holu tengan Hi vamei vahe suv toto te meulien nan.” 26 Moletin xil xa lalong sepinien nan lasisi labitene, “?Visi vari ikila ihur meulien sal? !Moletin tovuol!” 27 Ma Iesu bit rilomun ni mi xil bitene, “Nggeih pupu tengan moletin vahiles meulien nan tasen, e be temale tang tengan Hi ihilesi.” 28 Di, Pita biteni mini bitene, “Okila xa xamem maling holesok xil vus namem, ma mei manggusiluk.” 29 E Iesu biteni mini bitene, “Nakila. E reitin mak, xamim e rut moletin sav xil mun muteheling tim samim xil, mu atou namim xil, mu tua namim xil, mu tamemim xil, mu ninemim xil, mu horamue namim xil mun tengan muvusil xat Hi xa be suv toto e meulien namim. 30 Moletin xil ngasen xa lipol ni imak, naha xa xil lilingi, Hi isa rilomun ni mi xil ihe holu mu e ut etan, e lihur meulien sal e ut nesao.”
Iesu Misep Usil Maten Nan Vatei Mun
31 Iesu mileh viton moletin nan xil xa labe lu e le (12) ba ladi se xil, e xi biteni mi xil bitene, “!Muteong ni nou! Taxeak, di raba ve Serusalem. E rute ak, holesok xil vus xa provet xil te tiamu di latehit usil Nat Moletin mei istal ihe reitin. 32 Ngan xil limae ni mei ihe he moletin xil xa latave Siu ti. E ngan xil lisep purun ni, lipol isa mini, e likusa. 33 Limeas pangasi, e lihasi imat. E melengien tol nen, xi imeul rilomun ra maten.” 34 E moletin nan xil latanem kil ti holesok xil ak. Koute te sepinien nan minggus ra xil. Misak ni xil latakil ti naha xa Iesu di misep usili.
Iesu Pol ni Moletin Tei xa Meten Bar Mei Miketeh Rilomun
35 Melele xa Iesu del ngan xil xa di langgusili lamei sangas e Seriko, moletin tei xa meten bar dotan de seri suse e di miram ve tutouen. 36 Melele xa milong vanut moletin xil ak mei langgo visali, xi misis xil bit, “?Naha xiak?” 37 Xil labiteni mini labitene, “Iesu ngan Nasaret iaxa di mikakao bemei xiak.” 38 Ma xi mikei nggeih bitene, “!Iesu! !Nat Suv Toto Deved, iem isae li e nou!” 39 Melele xa xi biteni mak, moletin xil xa ladiamu lasepin nggeih ba ni labitene, “!Tat votei!” E xi mikei nggeih pilei sung bitene, “!Nat Suv Toto Deved! !Iem isae li e nou!” 40 E melele xa Iesu milong keien nan, misoh e biteni mi xil bitene, “Mutel moletin xai vamei.” E melele xa bemei visali, Iesu misisi bit, 41 “?Iem bei napol ni naha minuk?” E xi biteni mini bitene, “Suv, ieok bei naketeh.” 42 Iesu biteni mini bitene, “!Ma bos, keteh! Ve neketen nam, metom bos.” 43 Vatakes, xi mikila miketeh, ma misa memesien ba mi Hi e nggusil Iesu. Melele xa vanut moletin ak lapusi, xil vus lames Hi ven.
Sakias Biles Meulien Nan
1 Iesu nggusil suse ba nggo Seriko tengan itavi iha. 2 E rute ak, eilep tei na moletin te takis xil da, hisen Sakias, e holesok nan xil holu. 3 Xi bit vapus ti xa Iesu be visi, e misakras vengan xa xi be tamure tang e vanut moletin tei xa mahulong pupu di langgusili. 4 Ma miloh diamu ni vanut moletin ak, e ba peou e vatit sabilong tei tengan ipus Iesu mei ixo visali iha. 5 Melele xa Iesu bemei momal ni rute ak, miketeh be nesao e biteni mi Sakias bitene, “Sakias, temanon amei e tan, vengan xa xosali nite e tim sam.” 6 Sakias mitemanon bemei e tan. Xi besi xi e del Iesu lube tim san. 7 Moletin xil vus xa lapusi laseputut ni e labitene, “Moletin ak ba tengan ha vahe tim sa moletin tesa tei.” 8 Melele xa ladi tamu e tim sa Sakias, xi mitamea misoh e biteni mi suv Iesu bitene, “!Suv, uteong ni nou! Niseti holesok xil vus navan ihe vanute lu, e vanute tei, nisa ni mi moletin xil xa labe hoeo. E xosxa nakan ni vatu na moletin tei, ma vatu xil ngasen xa nakan ni rani, nisa rilomun ni mini ihe hat (4) mun.” 9 Ma Iesu biteni mini bitene, “Xosali, Hi miteh meulien e xouk del vatimol xil nam, vengan xa xouk di opisen ni xa oneket nggoni avu nar Ebraham te tiamu. 10 Nat Moletin bemei tengan valang ni hisit moletin xil xa di lakesae, e vateh meulien e xil.”
Iesu Dei Vole Usil Eilep Tei xa Miseti Vatu Nan mi Moletin Nan Xil
11 Melele xa moletin xil di lateong ni Iesu e tim sa Sakias, xi dei vole tei mi xil. Xil di lanemi labit navehi ti, Hi istal mei ihe suv toto te meulien na moletin xil. Lapusi xa xil di lamei sangas e Serusalem, ma lanemi xa Hi iling Iesu mei ihe suv toto inggak. 12 Ma Iesu biteni mi xil bitene, "Vatei, eilep tei di bue xat xi tengan vahe ut tei xa sotin tengan lalingi vahe suv toto tei e ut xati nan. Ti, itilomun imei e von nen. 13 E diamu, xi mikes viton moletin xil te polien nan xa labe hexalu (10) lamei tengan vaseti vatu xa be handred taosen (100,000) mi xil kekes. E xi biteni mi xil bitene, "Muleh vatu xil ak muha, mupol itela ituxoh melele xa nitilomun en." 14 “Eilep ba, e moletin xil te ut nan iexil tavei vari. Misak ni xil lasil eloheoh nae xil tengan ha lihiteni mi moletin xil te kavmen lihitene, "Xamem iemem ti tavei moletin ak vamei vahe suv toto namem." 15 Tave ti neta xa lasin ni, e moletin xil te kavmen ak lapeti be suv toto nae. Di, xi dilomun be von nen. “Melele xa dilomun, mikes moletin te polien nan xil lamei tengan vakil ti xa xil lapol ni midep del mani xa teseti mi xil. 16 Ngan diamu bemei, biteni mini bitene, "Suv, inou napol del vatu nam, ma nakamet vatu be milian tei (1,000,000) mun da xat ngan xa otesa ni minou.' 17 “Eilep biteni mini bitene, "!Bos pupu! Xouk obe moletin te polien tei xa bos. E vengan xa olaxat kuh neta xa hokorong tang, ma nilinguk tengan ti ulaxat taon xil navan ihe hexalu (10). 18 “Tei mun e xil bemei e bitene, "Suv, inou napol del vatu nam, ma nakamet vatu xa be handred taosen lim (500,000) mun da xat ngan xa otesa ni minou.' 19 “Ma eilep ak bitene mini bitene, "Xouk ulaxat taon xil navan ihe lim (5)." 20 “E tei mun bemei e bitene, "Suv, vatu nam xiak, natepis xol kuhi ni kaliko e ba natelingi tang teta. 21 Uluk tekan ni xouk vengan xa xouk obe moletin te xeih. Xouk okila ovur neta xa otapol ti ven, e di onggur pupu ni anien xa moletin sav xil lapol ni e naho xil sam." 22 “Di, eilep biteni mini bitene, "!Xouk obe moletin te polien tei xa osa tang! Nipol ni sepinien nam xil ak ianuk mun tang! Xouk okila xa inou nabe moletin te xeih, di nanggur neta xa di natapol ti ven, e di nanggur anien xa moletin sav xil di lapol ni e naho navan. 23 ?Veneh ma otaling vatu navan ti vaha vate bangk tova? Vamak, ma melele xa nitilomun, mei namuri vatel tuten mun vata xati.' 24 “Di, biteni mi ngan xil xa lasoh ladi sangas bitene, "Muleh rat vatu xil xai rani, e musa ni mi moletin navan xa nggur vatu xa be milian tei (1,000,000).' 25 “E xil labiteni mini labitene, "Suv, xi nggur milian (1,000,000) ngamu!" 26 “E xi bit rilomun ni mi xil bitene, "Reitin mak, ngan xil xa di langgur huite e neta xa nalingi e he, xil likila lihuri ihe mahulong mu. E ngan xil xa di latahur ti vari huite; holesok xil vus xa nalingi e he, nileh rati ra xil.' 27 “Ngan ak bus, eilep ak biteni mun mi moletin nan xil bitene, 'E taxeak, ngan xil xa laketeh misa ni nou, e iexil tavei nou mei namei suv toto nae, muleh xil limei e muhas xil lilel pe metok."" 28 Melele xa Iesu misepin mi moletin xil bus, xi be Serusalem del moletin nan xil.
Iesu Be Serusalem Nggoni Suv Toto Tei
29 Melele xa Iesu bemei sangas ni metimal tahal Betfas e Betani, sangas ni Vathu te Urvatiei te Olip, e misis moletin nan lu tengan lalitiamu laliha. 30 E biteni mi xalu bitene, "Mulhe metimal xor, e melele xa muba en, mulkamet sulut dongki tei xa lasare da, xa moletin tovuol tamu vatotan en. Mullal rati e multeli imei inggak. 31 Xosxa moletin tei isis xamil xa mulal rati veneh, ma mulhiteni mini xa suv ien bei." 32 Xalu luba, e lupus holesok xil vus momal tang nggoni ngan xa Iesu tehiteni mi xalu. 33 E melele xa di lulal rat sulut dongki ak, moletin xil xa sae lasis xalu labitene, "?Veneh ma mubit mullal rati?" 34 E xalu lubiteni mi xil lubit, "Suv ien bei." Ma xil lamae ni mi xalu. 35 Di, ludeli sulut dongki ak be visal Iesu. Luden eising nalu de mar dongki, e ludutou ni Iesu ba dotan da en. 36 E melele xa di ba nggo dongki ak, moletin xil di laden kuh eising nae xil e suse. 37 E melele xa xi bemei sangas Serusalem, momal ni suse xa nggo Vathu te Urvatiei te Olip, vanut moletin nan xil di lames Hi e di lapet rat hisen del meunen ve merekel xil xa di latepusi ti tepol ni e labitene, 38 "!Hi Suv, utuxol xat suv toto xa bemei e hisom! Iling tomat mi moletin xil itel Hi, e xil lipet rat hisen ihe ut nesao.” 39 Di, rut Parasi xa lamos e vanut moletin ak lasepin mi Iesu labitene, "!Tisa, sepin mi moletin nam xil litit votei!" 40 E Iesu bit rilomun ni mi xil bitene, "Nabiteni mi xamim, xosxa xil litit votei, ma hat xil ak sung lixoles e ti likekei ni."
Iesu Des Moletin Xil Tahal Serusalem
41 Melele xa Iesu bemei sangas ni Serusalem, keteh pusi, ma muis 42 e bitene, "O mol-Serusalem xil, vahit mukil suse te tomat, ma mukila muvuri. E taxeak, vengan xa di musin nou, Hi misak ni minggus ra xamim, e mesal tovuol munamun tengan muvur xat tomat. 43 Melengien tei di bemei xa xil xa di labae del xamim limei, lixorelis taon namim, e xamim ngasen musakras mulesae. 44 Xil lihas vin xamim e limulel holesok xil vus namim. Hat te nim xil linavil xat xil ti mun, vengan xa xamim mutapus kil ti melele xa Hi temei tengan vateh meulien e xamim."
Iesu Minggol Rerat Moletin Xil ra Nim Eo na Hi
45 Di, Iesu be Nim Eo na Hi e di minggol rerat ngan xil xa di lapos ni holesok nae xil en. 46 E xi biteni mi xil bitene, "Hi bit xati di e Vanuvei Eo nan bitene, "Nim Eo navan ihe 'nim te sisen'." E xamim mubilesi mei be 'nim te xusen' na moletin xil te kanen." 47 Di, e melengien xil ngasen, Iesu di pispisi e Nim Eo na Hi. E vat xil na pris xil, tisa xil te Rae xil na Mosis, e vat sav ngan xil mun te rute ak lalang ves suse tengan lavasi vamat. 48 E xil lasakras vengan xa, vehakut, vanut moletin xil di lamosos ladela e iexil bei mak mu tengan lateong kuhi ni sepinien xil nan.
Eilep Xil na Siu Xil Labit Lakil ti Visi Iaxa mae ni Iesu Di Pol ni Polien Nan
1 Vatei, melele xa Iesu di pispisi mi moletin xil e di misetu ni longeongen hos e Nim Eo na Hi, vat xil na pris xil, tisa xil te Rae xil na Mosis, e elda xil mun lamei 2 lasisi labitene, "?Hiteni mi xamem, xouk di opol ni mak veneh? ?Visi iaxa misilak, mei di opol ni polien xil ak?” 3 E Iesu bit rilomun ni mi xil bitene, "Itiamu, nisis pilei neta tei mi xamim. ?Muhiteni minou, 4 visi iaxa tesil Sion mei di tekas moletin xil, Hi mu moletin tang?" 5 E xil di lasel mi xil mun tang labitene, "?Rihit itep? Xosxa rihit, "Hi iaxa misila," ma xi ihit rilomun ni ihitene, "?Veneh ma mutake reitin ti e pispisien na Sion?" 6 E xosxa rihit, "Moletin tang tesila," ma vanut moletin xil ak lihop xir vengan xil laneket xa Sion be provet tei." 7 Misak ni xil labit rilomun ni mi Iesu labitene, "Matakil ti visi tesila." 8 Ma Iesu biteni mi xil bitene, "Mak, ma inou mun nasakras namit visi iaxa di misil nou mei di napol ni polien xil ak."
Iesu Dei Vole Usil Moletin Xil xa Lalaxat Urvatiei te Grep
9 Di, Iesu dei vole ak mi moletin xil bitene, "Vatei, moletin tei milih urvatiei tei te grep. Milihi bus, xi milingi de he rut moletin xil tengan ti lilaxati. Di, hortan te urvatiei ak be ut tei xa be sotin, e ba dak be nousav. 10 Melele xa melengien pipin tengan laleh viton huit grep xa men, hortan ak misil eloheoh nan tei ba tengan vasis xil lisa ti huite san mini. E moletin tesa xil ak, xa di lalaxat urvatiei ak, labas purun eloheoh nan. Xil langgol rati ba, e taxur pas huite tova vari. 11 Ma hortan te urvatiei ak misil eloheoh tei mun ba, e moletin tesa xil ak labasi mun e lapol ni unounen mini. Di, latasa ti huite mini e langgol rati ba. 12 Di, misil eloheoh xa be tol nen ba, e moletin tesa xil ak labasi mun, di, langgol rati ba. 13 “Ma hortan te urvatiei ak minemi bit, "?Nipol ni itep sung? !Aha! Nisa natuxuli xati xa eheien navan da en iha. Nanemi nabit xi sung, limerere ni." 14 E melele xa moletin tesa xil ak lapusi bemei, xil lasem xil labitene, "?Mupus ti? Ngan ak be horamue nan xati vari xa urvatiei te grep ak mei ite hen. !Ravasi vamat! !Imak, ma rute ak ihe sar sung!" 15 Misak ni, laso rati ra urvatiei ak, e labasi mat." Di, Iesu misis moletin xil bitene, "?Midep? ?Hortan te urvatiei ipol ni itep mi moletin tesa xil ak? 16 Nabiteni mi xamim, xi ipol ni imak, imei ihas xil lilel, ti, imae ni urvatiei te grep san mi moletin sav xil lilaxati." E melele xa moletin xil lalonge mak labiteni mini labitene, "!Ei, misakras vari tang!" 17 Iesu miketeh pus xil e misis xil bitene, "?Maxani, veneh ma Vanuvei na Hi biteni mak bitene, 'Hat tei xa lapol ni nim ni xa moletin xil te polien labit misa e laso ni ba, xi vari bemei bos mak mu mili hat teisav xil.' 18 Ti, moletin tei xa isavut e imot ita xat hat ak, sin imavul tova tang! E xosxa hat ak imot ita xat moletin tei, ma moletin ak imat vari.” 19 Melele xa tisa xil te Rae xil na Mosis del vat xil na pris xil lalonge mak, vatakes lasak pisi xa ladal xat Iesu vengan xa lakila xa Iesu di misepin misa xat xil nggo vole ak. E uli mikan ni moletin xil xa ladi xorelisi vehakut.
Sispileien ve Rin xa Langgal Takis
20 Ma tisa xil te Rae xil na Mosis del Vat xil na pris xil lalang ves suse tengan lavur xat Iesu vaxo en. Misak ni xil lasil moletin xil te luvosen tengan lihe visal Iesu ixoni moletin hos xil. Xil labit lava lasis Iesu ni neta holu tengan lapol ni vasepin ni neta tova xa vasa, vasak ni xil lakila laling Iesu e he kavmen tahal Rom. 21 Moletin xil ak te luvosen labiteni mi Iesu labitene, "Tisa, xamem makila xa naha xa xouk di obiteni mu di opispisi ni momal tevi. Xamem makila mun xa xouk opus moletin xil ngasen lapin tang, ngan xil xa latellep del moletin votei xil mun. E xouk di opispisi mi xil vus usil suse te reitinen xa Hi ien bei moletin xil lihusili. 22 Mak, ma xamem iemem bei makil ti, e rin xa manggal takis ba mi Sisa tahal Rom, manggur xoteh Rae nar, mu matahur xotehi ti?" 23 E Iesu mile kil luvosen nae, ma biteni mi xil bitene, 24 "!Sa mani tova te takis minou! ?Nanao e his visi iaxa da en?" E xil labitene, "Na Sisa." 25 Ma Iesu biteni mi xil bitene, "Ma naha xa be na Sisa, musa rilomun ni mini. !E naha xa be na Hi, musa rilomun ni mi Hi!" 26 E xil lamesep ni sepinien nan e misak ni ladit votei. E pe met moletin xil, lasakras lapol ni Iesu vamot e sepinien nan.
Satusi Xil Lasis Pilei Iesu Usil Melengien xa Moletin Xil Limeul Rilomun Ra Maten
27 Di, rut moletin xil mun xa lakes xil ni 'Satusi' latemei visal Iesu. Xil lanemi labit moletin misakras vameul rilomun ra maten. Ma labiteni mi Iesu labitene, 28 "Tisa, Mosis tetis rae ak tehe nar: "Xosxa moletin mat reling atou nan e horamue nalu tovuol, ma tunali sav ihur tunau ak ihe atou nan. Mak, ma isa horamue mini xa ihur his tunali xa mat tuei." 29 Ma vatei, tua xil labe lu e he sav (7), e ngan diamu ni xil nggur atou tei. Di, mat e horamue nalu tovuol. 30 Ma tunali xa dutou nggur atou ak. Xi mun mat, e horamue nalu tovuol. 31 Ma di, ngan xa be tol nen ngguri. Xi mun mat, e taling ti horamue. Sexien ak mistal ni tua xil vus ak. Xil ngasen lalel e horamue nae tovuol. 32 E dutou ni, atou ak mun mat. 33 ?Mak, ma e melengien xa Hi isak ni moletin xil limeul rilomun ra maten ixoni rut moletin xil di labiteni, atou ak ihe atou na visi e xil, vengan xa xil vus xa latehe lu e he sav (7) lateteli tetela?" 34 E Iesu bit rilomun ni mi xil bitene, "E ut etan ak, tiramue xil e atou xil likila liteli. 35 E melengien xil xa ti imei, ngan xil xa Hi bit meulien nae pipin e momal pe meten limeul rilomun ra maten e ut nesao, xil linateli ti mun. 36 Xil mei lixoni masxaxa xil xa lasakras lalel. E melele xa xil limeul rilomun ra maten, di pisen ni xa labe horamue xil na Hi. 37 E Mosis mun tesep mese ni tehit moletin xa mat mikila imeul rilomun ra maten. E tumulen te holiei tei xa upang tepili en xa Mosis tetis usili, xi biteni xa Hi Suv "be Hi na Ebraham, be Hi na Aesak, e be Hi na Siakop." 38 Hi meul e be Hi na ngan xil xa lameul; tave Hi na ngan xil ti xa lamat. Hi di pus xir ngasen nggoni ngan taxa rameul radi." 39 Rut tisa te Rae xil na Mosis lakei ba ni labitene, "!Tisa, sepinien xa osa ni mi xil momal tevi!" 40 Misak ni moletin xil, uli xil mikan tengan lasis pilei ti mun neta vaha ni.
Iesu Misis Pilei Moletin Xil Usil Kristo Be Visi
41 Iesu misis pilei moletin xil bitene, "?Midep? Kristo istal ixo vatimol na Suv Toto Deved itep? 42 Vengan xa Deved tasen tehiteni e kikeien tei nan tehitene, 'Hi Suv biteni mi suv navan bitene, "Utotan e riuk metu 43 ituxoh melele xa niling ngan xil xa di labae delak liti pe hem."' 44 Deved mikes Kristo ni "suv nan". ?Mak, ma Kristo istal ixo vatimol nan itep?”
Iesu Misep Pangas Tisa Xil te Rae xil na Mosis
45 Melele xa moletin xil di tamu lateong ni, Iesu biteni mi moletin nan xil bitene, 46 "Muvue xat xamim ve sexien na tisa xil te Rae xil na Mosis. Xil iexil bei ti lasing ni eising xil xa bos e teviei vaxoni eilep xil. Xil di lasing mak e di lakapis e mesal tengan mosav xil lipus xil e likes xil itel merereen. E di lalepis von toen na eilep xil xa bos e nim te pispisien. E melele xa moletin xil lapol ni anien xil xa tellep, lalepis rute xil xa bos mak mu. 47 E suse te xuxusen, moletin xil ak labe hokan, e di laleh holesok holu ra tunau xil. Di, e pe met moletin xil, xil di lapol ni sisen xil xa teviei. !Pangasien xa imei mi xil ihe mahulong mu ili na ngan teisav xil!"
Sanien na Tunau Tei mi Hi
1 Melele xa Iesu da tamu e vioh te Nim Eo na Hi, miketeh e pus moletin xil xa holesok nae xil holu di lasa sanien nae xil tengan vatutou ni polien te Nim Eo. 2 Di, e miketeh mun e pus tunau tei xa be hoeo bemei, miso selen lu tang. 3 Ma Iesu biteni bit, “Nabiteni mi xamim, tunau xa be hoeo iaxai misa sanien nan mili sen ngan tesav xil. 4 Ngan tesav xil di lasa sanien nae xa be rute tang te holesok nae xil, e eilep be nae. E tunau ak xa be hoeo mak, xi misa vuol ni ngan vahe te anien en nan."
Iesu Sep Mese ni xa Melengien Xil te Longpangasien Di Bemei
5 Rut moletin na Iesu di laketeh mikapis e vioh te Nim Eo na Hi. Lapusi xa lasak xati bos xa bos del hat xil xa minehin pupu e del sanien hos sav xil. Misak ni di lasep usili, ma Iesu biteni mi xil bitene, 6 “Melengien tei di bemei xa lihulen sen holesok xil xa di mupusi xiak. Hat ti vari nasoh.” 7 Moletin xil na Iesu lasisi labitene, "?Tisa, melengien ak istal vilieh? ?E naha vari iaxa istal tengan ipisen ni xa bemei sangas?" 8 Iesu biteni mi xil bitene, "Muvue xat xamim. Moletin hao limei, mei lisepin e hisok lihitene, "!Inou nabe Kristo xa Hi tehit xati!" E lihiteni mun lihitene, "Vongkor bemei sangas xiak!" E munake reitin ti e xil e munahusil xil ti. 9 Melele xa mulongeong ni rute tei xa bae del rute sav mun, mu moletin xil di labae mi xil mun tang, ulimim nakan ti. Sexien xil ak istal itiamu, e nave Vongkor ti mu." 10 Xi biteni mun bit, "Ut tei xa eilep ti ivae itel ut sav mun, e suv toto tei ti ivae itel tei mun. 11 Lul ilul ixeih, mae iat moletin xil e ut xil holu, e meseien xil xa nggeih istal. An tesa xil hao istal mun, e neta xil hao listal lixo holesok xil xa di tilang hat xa isak ni moletin xil uli ikan pupu. 12 “Itiamu neta xil ak istal, moletin xil lital xat xamim e lihas pangas xamim. Liling xamim e he eilep xil te nim te pispisien xil e lisa xamim muhe nim te xeih. E musoh mun pe met suv toto xil. Holesok xil ak listal mi xamim vengan xa mube moletin navan xil. 13 Mesal namim vari xiak tengan ti muhithiten longeongen hos mi xil. 14 Ve rin ak, munanexo pupu ti ve sepinien eah xa muvue xat xamim tengan muviteni. 15 Vengan inou iaxa nisa sepinien mi xamim e nipol ni xamim mukilakil tengan moletin xil xa di laketeh misa ni xamim misakras lasa rilomun sepinien vaha xat xamim. 16 Tamemim e ninemim xil, tumim xil e vatimol namim xil mun tang, iaxa limae ni xamim muha tengan ha lihas rut xamim mulel. 17 Xil vus iexil iat xamim vengan mupol del hisok. 18 E xil lasakras lapurun meulien namim. 19 Xosxa musoh ixeih, ma muhur meulien sal.
Iesu Bit Kila xa Lihulen Hal Serusalem
20 Melele xa mupus moletin te vaeen xil mei likapis xol Serusalem, ma mukila xa navehi ti lihulen ni. 21 Ma ngan xil xa ladi hal Sudea lilesae lihe vathu xil. Ngan xil xa ladi hal Serusalem lihe lingi, e ngan xil xa ladi ut sav xil e hal Sudea misakras ladilomun lamei en. 22 Melengien xil ak ihe "Melengien xil te Longpangasien" xa Hi ipol ni mei istal ixoni naha xa tehit xati e Vanuvei nan. 23 E melengien xil ak, isa pupu mi atou xil xa ladi e ngan xil xa di latunat ni tuvava xil. Melengien xil xa nggeih pupu istal e rute ak, e moletin xil ak lilong pangas xil pupu. 24 Litil vin rute xil ni tiei te vaeen. E rute ngan xil livar xat xil e lileh xil ha liti pe he suv te ut sav xil, e ti lipol ni polien xil xa nggeih pupu. E moletin xil xa latave Siu ti, lipel tan e Serusalem ha ituxoh melele xa Hi ihiteni ihit melengien nae ipin. 25 "Holesok xil holu istal ixo meteneai, aveti e hitu xil. E ut etan, tahe xil xa tellep limea e limavul xat ut xil ngasen. Isak ni moletin xil e ut ngasen ti linexo e ulixil ikan e melele xa lilong tahe ivang. 26 Melele xa moletin xil ngasen lipus holesok xil ak mei istal e ut etan e lipusi xa holesok xil te tilang hat di bilhiles, rute xil limermesil ve ulikanen. 27 Ti, itutou ni, lipus Nat Hi mei istal ixo momah e itel xeihen, e miehen iminahin xole. 28 Melele xa holesok xil ak mei istal, musoh mal e mupet rat vatumi ihe nesao vengan xa Hi sangas vamei tengan vateh meulien e moletin nan xil.”
Iesu Dei Vole Usil Vatiei Xil
29 Di, Iesu dei vole ak mi xil bitene, "Munem pis vatit re e vatit homel. 30 Melele xa luso roroh, mukila xa melele bemei sangas tengan lalih naho hu te huram. 31 E suse nen mun tak, melele xa mupus holesok xil ak ti istal, mukila xa melengien bemei sangas xa Hi imei ihe suv toto na moletin xil vus. 32 “Nabiteni reitin mi xamim, moletin xil xa lameul ladi lipus holesok xil vus ak mei listal. 33 Ut nesao e ut etan lalivus, e sepinien eo navan misakras vavus.”
Moletin Na Iesu Xil Livue Xat Xil
34 Iesu misel xat moletin nan xil bitene, “!Muvue xat xamim! Munanem pupu ti ve anien xa muva vin xamim ni vehakut, ve oei xa mumu ni vuma mutallang ni, mu holesok sav xil mun te ut etan ak. Maxani, melengien xa Nat Moletin itilomun en mei nastal nahe te temanin en mi xamim naxoni voh. 35 Vengan melengien ak mei istal mi moletin xil ngasen e ut etan. 36 Ti muvue xat xamim e ti musis vehakut. Mak, ma muhur xeihen tengan muhur xat meulien namim ituxoh xoxalit melengien xil xa nggeih xiak. E munave unoun ti e melele xa muha musoh pe met Nat Moletin.” 37 E vehakut, Iesu di pispisi mi moletin xil e Nim Eo na Hi. E melele xa vongien bemei, xi ba di pat e Vathu te Urvatiei te Olip. 38 E makoe roroh xil ngasen, moletin xil di labe Nim Eo na Hi tengan lateong ni.
Lingxatien Tengan Lavas Iesu Vamat
1 Melele bemei sangas tengan Siu xil lanem rilomun ni 'Melengien xil te Beret xa Is Tovuol En.' Melengien kokot teni vari, xil lapol ni anien xa lakesi ni "Anien te Tavien" en. 2 Vat xil na pris xil del tisa xil te Rae xil na Mosis di lalang ves suse tengan lavas xuxus ni Iesu vamat vaxo en. Xil uli xil mikan xa moletin xil xa di langgusili, linapol ni neta tova mi xil. 3 Di, Temat bemei nggeih e nenemien na Sudas Eskariot, xa be tei e lu e le (12) na Iesu. 4 Ma Sudas be reling xil e ba misepin del Vat xil na pris xil del eilep xil na mereketeh xil te Nim Eo usil suse xa xi mikila iling Iesu e he xil ixo en. 5 Xil lamaal ven e labit xati xa lixale ven. 6 Mak, ma Sudas mae ni. Di, ba di milang ni suse xa bos tengan iling Iesu ihe he xil ixo en e melele xa moletin xil lanave holu ti.
Moletin Lu na Iesu Lalibue Xat Holesok Xil te Anien te Tavien
7 E 'Melengien xil te Beret xa Is Tovuol En', melele xati tengan lapol ni 'Anien te Tavien', moletin xil di labas sulut sipsip xil ven. 8 Ma Iesu misil Pita xal Sion del xat sepinien ak, "Muliha mulsak mese ni Anien te Tavien tengan ha ria vituei ni." 9 Ma xalu lusisi lubit, "?Rute xave iaxa xouk iem bei xa maliha malsak mese ni en?" 10 Xi biteni mi xalu bitene, "Melele xa mulihe hal Serusalem, moletin tei xa po valoei xa pol imei ihisu ni xamil. Mulhusili ha mulhe nim xa xi iha en. 11 Di, mulsis moletin xa nim man mulhitene, 'Tisa bit, "?Von toen xave iaxa nitel moletin navan xil mei mua Anien te Tavien en?"' 12 Xi itel xamil mulhe nesao e nim man e ipisen von toen tei xa mahulong xa langgur revi ngamu datil xamil. Rute ak vari iaxa mulsak mese ni holesok xil vus en." 13 Xalu luba, e lupus holesok xil vus nggoni ngan taxa Iesu tehiteni mi xalu. Ma xalu lusak mese ni anien ak en.
Anien Eo na Suv Iesu
14 E melele te anien en, Iesu ba dotan e von anien en del moletin nan xil. 15 Di, Iesu biteni mi xil bitene, "Ieok tehei pupu xa nama Anien te Tavien ak vatel xamim. Ti, niha sung nilong pangas nou. 16 Nabiteni mi xamim, ninaxa ti mun Anien ak ituxoh melele xa koute teni istal, e melele xa Hi isak ni lelaxatien nan mei istal en.” 17 Di, Iesu nggur kap xa uaen ba en, memes Hi ven e biteni bit, "Muhuri, e xamim vus mumu ni. 18 Nabiteni mi xamim, taxeak iha ninamu ti mun uaen ak ha ituxoh melele xa Hi imei istal ihe suv toto na moletin xil.” 19 Di, Iesu nggur beret, memes Hi ven, bul pasi e misa ni mi xil e biteni, "Ngan ak be tiei navan xa nimae ni ve xamim. Vehakut xa ti mupol ni imak, ti munem xat nou ven." 20 Usil sexien tak, melele xa langganien bus, Iesu nggur kap xa uaen ba en, misa ni mi xil, e biteni bit, "Uaen ak be reok xa ileh tengan muhur meulien ixo en, e isak ni hitxatien hu na Hi mei istal e ihe reitin. 21 “!E muteong ni nou! Ngan xa imae ni nou nihe he moletin tesa xil di dotan del nou e anien ak taxeak. 22 Reitin mak, Nat Moletin imat ixoni ngan taxa Hi tehit xati ngamu. E isa pupu mi moletin xa be suse teni!" 23 Ma xil di lasis xil mun tang xa visi e xil ikila ipol ni rin ak.
Moletin Xil na Iesu Di Langor ve Visi e Xil Be Eilep Mili
24 Melele xa moletin xil na Iesu ladi tamu e von anien en, di langor mi xil mun usil visi e xil iaxa be eilep mili. 25 Ma Iesu biteni mi xil bit, "Suv toto xil na moletin xil xa latakil ti Hi di lapisen xeihen nae mi ngan xil xa ladi pe he. E eilep xil mun nae di labit moletin xil lakes xil ni "Eilep te Tutouen." 26 E rin xa namim, namak ti. E-e. Eilep tei e xamim ipol ni nenemien nan ihe tan ixoni horam maxoe tang. E ngan xa be suv ipol ni nenemien nan ihe tan ixoni moletin te polien tang. 27 ?Visi iaxa be eilep, ngan xa dotan di ngganien, mu ngan xa di miseti anien? Moletin xil vus lanemi labit ngan xa di dotan. E inou, nade vis xamim nanggoni ngan xa di miseti anien. 28 “Xamim mutetel xat inou e sakpisien xil vus xa testal minou. 29 E texoni ngan taxa Tata teling xat nou tengan mei nihe suv toto tei, ma inou mun niling xat xamim muhe suv toto xil. 30 Melele nihe suv toto, nisa von totanen te merereen mi xamim vus, e ti muanien e ti mumun itel nou e voninok. E ti mulaxat vatimol xil tahal Isrel xa labe lu e le (12) e mulepis meulien nae xil.”
Iesu Bit Kila xa Pita Iluvos Ihit Takil Ti
31 Di, Iesu biteni mi Saemon Pita bitene, “!Saemon, Saemon uteong ni nou! Temat tesis Hi tengan isak pis xamim vus, e Hi mae ni tengan ile kil neketen namim. 32 E inou nasis ve xouk Saemon tengan neketen nam navus relinguk ti. E melele xa uhiles meulien nam e neketen nam ixeih mun e nou, ma ututou ni neketen na tumali xil mei ixeih mu.” 33 E Pita mitamea e biteni mini bitene, "!Suv, inou nabue xat nou tengan nihe nim te xeih itelak e nimat itelak!" 34 E Iesu bit rilomun ni mini bitene, "Nabiteni minuk Pita, itiamu xa tuto ikora e makoe roroh tamu, xouk uhiteni ihe vatol xa otakil ti nou.”
Iesu Bit Moletin Nan Xil Livue Xat Xil
35 Di, Iesu misis moletin nan xil bitene, "Melele xa natesil rerat xamim, tenatel xati ti neta vaxoni paos, ateli, mu sandel. ?Mutehe terume ni neta tova?" E labit rilomun ni labitene, "E-e, neta tovuol." 36 Iesu biteni mi xil bitene, “E taxeak, tei xa tiei te vaeen nan tovuol, ma ipos ni eising tova nan e ixal tova. 37 Nabiteni mi xamim, sepinien xa de Vanuvei na Hi imei ihe reitin xa bit, "Lapol nggeih mini nggoni moletin xil xa di langgur xoteh rae xil.' Naha xa latetisi, Hi ling xati xa mei ihe reitin e meulien navan.” 38 Moletin nan xil labiteni mini labitene, "!Suv, pus ti mu! Tiei lu te vaeen xiak." Ma Iesu bit rilomun ni bitene, "!Ei, pipin!"
Iesu Be Vathu te Urvatiei te Olip Tengan Vasis
39 Iesu be reling Serusalem e be Vathu te Urvatiei te Olip nggoni ngan taxa di pol vehakut ni, e moletin nan xil langgusili. 40 Melele xa laba laduxoh rute ak, Iesu biteni mi xil bitene, "Mutit ni sisen tengan Hi namaen ni ti sakpisien xil namei e xamim.” 41 Di, be reling xil be sotin vuteili, di mitingeiril be tan e di misis bitene, 42 "Tata, xosxa omae ni, hur rat longpangasien xa di bemei sangas ranou. E onapol ni ti naxoni ngan xa inou ieok bei; upol ni ixoni ngan xouk kestang iem bei." 43 E masxaxa tei te ut nesao mei mistal mini e misak ni ven e nenemien nan xeih mu. 44 Del nenexoen te longpangasien, xi misis nggeih mu. Misak ni vetin nan xa mileh, mot be tan nggoni ra. 45 Melele xa Iesu misis bus, xi mea, ba rilomun visal moletin nan xil. E mikameti xa xil vus di lapat. Ve buol pupu vengan xa nenexoen di bas xil. 46 Ma Iesu biteni mi xil bitene, "?Veneh ma di mupat? Mutamea, mutit ni sisen tengan Hi namaen ni ti sakpisien xil namei e xamim."
Ladal Xat Iesu
47 Melele xa Iesu di tamu misepin, Sudas xa be tei e lu e le (12) na Iesu bemei del tetit moletin tatei xil. Xi bemei visal Iesu tengan vapesum ni vin. 48 E Iesu biteni mini bitene, "?Sudas, xouk omae ni Nat Moletin nggo pesumen?” 49 Melele xa moletin na Iesu xil lapus naha xa di mistal, lasisi labitene, "?Suv, rakila ravae ni tiei te vaeen?" 50 Tei xil milat tiei tei e miseh xoteh vorang metu na moletin tei te polien na Vatixar na pris xil. 51 E Iesu biteni bit, "!Ei, pipin!" Di, mitang duxol moletin ak e pol ni vurangen bos rilomun. 52 Di, Iesu biteni mi Vat xil na pris xil, mereketeh xil te Nim Eo, del elda xil xa lamei tengan lital xati, bitene, "?Midep ma mumei del tiei te vaeen e homenda tengan mutal xat moletin tova te kanen? 53 Vehakut nade visal xamim e Nim Eo, e mutasak pis ti tengan mutal xat nou. E taxeak be mesal namim, e melele te maluxoluken xa xeihen na Temat di pol.”
Pita Bit Takil Ti Iesu
54 Xil ladal xat Iesu e ladeli ba be nim ma Vatixar na pris xil. E Pita di mile xus e di dutou ni xil. 55 Melele xa laduxoh nim ak, lasahan upang tei di minggan e hilaep te vioh. Ma Pita ba mos del ngan xil xa di ladotan xorelisi. 56 Melele xa atou tei te polien pusi xa Pita dotan de visal upang, miketeh momal ba ni e biteni bit, "Moletin ak mun tevituei tetel Iesu." 57 E Pita miluvosi bit, "!Atou, inou natakil ti moletin xai!" 58 Tave nousav ti, moletin tei pus kil Pita ma biteni mini bitene, "!Xouk mun obe tei e xil!" E Pita misep luvosi mun bitene, "Ei, tiramue, tave nou ti." 59 Di, be nousav vuteili, tiramue sav mun misepin nggeih xati bit, "!Reitin mak! Tiramue ak tevituei tetel Iesu, vengan xa sepinien nan nggoni ngan Kaleli xil tang." 60 E Pita biteni nggeih bit, "!E-e, natakil ti vari naha xa di obiteni iaxai!" Vatakes, melele xa di tamu misepin, tuto tei mikora. 61 E melele nen tak, suv Iesu biles, miketeh momal ba ni Pita, ma Pita minem rilomun ni naha xa suv tehiteni mini tehit, "Itiamu xa tuto ikora e makoe roroh tamu, xouk uhiteni ihe vatol xa otakil ti nou." 62 Ma Pita ba e di midang vengan milonge misa pupu.
Lapol Pepamen mi Iesu e Labas Pangasi
63 Mereketeh xil xa di laketeh xol Iesu lasep pepamen ni e di labas pangasi. 64 Labar xol meten e melele xa tei xil basi, lasisi labit, "?Xosxa obe provet tei, hit pisi, visi iaxa basuk?" 65 E laso sepinien hao mun xa misa ba ni.
Langgur Iesu Be Kot
66 Melele xa ut milan, elda xil, Vat xil na pris xil, del tisa xil te Rae xil na Mosis ba labe vituei e von kot en, e ladel Iesu mei misoh pe met xil. 67 Xil lasisi labitene, "?Hit pisi mi xamem, xouk iaxa obe Kristo xa Hi tehosei?" E xi bit rilomun ni mi xil bitene, "Xosxa nihiteni mi xamim, ma munake reitin ti e nou. 68 E xosxa nisis xamim xa veneh ma mutaneket ti, ma musakras muvit kuhi minou. 69 E nihiteni imak, taxeak iha, Nat Moletin itotan e von xeihen e ri metu na Hi." 70 Ma xil vus lasisi labit, "?Xouk iaxa obit obe Nat Hi?" Ma Iesu bit rilomun ni mi xil bitene, "Nggoni ngan taxa di mubiteni iaxai." 71 E xil labiteni labit, "Veneh ma rilang ves moletin tova tengan isa sepinien iha xati? Xir vus ralong sepinien tesa xil xa mistal nggo valongon e be an mun tang."
Iesu Misoh Pe Met Paelet
1 Eilep xil ngasen xa ladi kot en, lamea, e ladel Iesu ba misoh pe met Paelet, xa be Vat tahal Sudea. 2 Di, xil lasepin holu ba xat Iesu e pe met Paelet labitene, "Xamem makameti xa moletin ak iaxa di miling nenemien xil xa misa mi mol Siu xil tengan laketeh vasa ni kavmen tahal Rom. Di misep xol xil bit linaxal takis ti nava ni Sisa e kavmen nan. E xi biteni mun bitene xi be Kristo xa Hi tehosei, xa be suv toto tei." 3 Ma Paelet misisi bitene, "Midep? ?Xouk iaxa obe suv toto na mol Siu xil?" E Iesu bit rilomun ni mini bitene, "Nggoni ngan taxa obitene." 4 Di, Paelet biteni mi vat xil na pris xil del tetit moletin xil ak bitene, "Natakamet ti rin tova xa misa vata xat moletin ak." 5 E xil lasel nggeih mu labitene, "Pispisien nan misi pe tine moletin xil xa ladi e Sudea tengan lanem misa holu. Tepol kokot ni e provins tahal Kaleli, e taxeak bemei duxoh inggak."
Iesu Misoh Pe Met Suv Toto Herot
6 Melele xa Paelet milonge mak, misis xil bitene, "?Moletin ak be ngan Kaleli?" 7 Ma melele xa labiteni mini labit Iesu be tahal Kaleli, e rute xa Suv Toto Herot di milaxati, xi misa rat Iesu ba mi Herot vengan xa xi mun tete Serusalem e melele nen ak. 8 E Herot besi xi pupu melele xa pus Iesu, vengan di telongeong ni. Be nousav pupu, xi di en tehei vapus ti. Xi di minemi bit ipus Iesu ipol ni merekel tova. 9 Ma Herot misis rovui Iesu ni rin xil holu, e Iesu dat votei. 10 Vat xil na pris xil del tisa xil te Rae xil na Mosis lamei e laso sepinien xil xa nggeih xat Iesu mi Herot. 11 Di, Herot del moletin nan xil te vaeen lasing xol Iesu ni kaliko tei xa bos nggoni suv toto tei, e lapol pepamen mini. Di, lasa rilomun ni be visal Paelet. 12 E melengien ak vari, Herot del Paelet mei lubos mi xalu; e te tiamu ni ngan ak, di luteketeh tesa ni xalu.
Paelet mae ni Iesu Ha Lihasi Imat
13 Paelet mikes viton vat xil na pris xil, eilep xil del moletin sav xil. 14 Di, biteni mi xil bitene, "Mutehur moletin ak temei visal nou e mutehit xi iaxa di teling nenemien tesa xil mi Siu xil tengan laketeh vasa ni kavmen tahal Rom. E taxeak, e pe metemim, napus vuol ni holesok xil xa xi di pol ni. E natakamet ti rin tova xa misa xa xamim mubit xi di pol ni. 15 E Herot mun takamet ti rin tova xa misa vata xati, mak iaxa xi misa rilomun ni bemei visal xir. Neta tovuol xa misa xa moletin ak pol ni tengan ha vamat ven. 16 Mak, ma moletin navan xil liha limeas pangasi, ti, nimae ni ha ven imase. [ 17 Sangas ni Anien te Tavien xil ngasen, Paelet di mae ni vatxeih tei na Siu xil ba di ven mase ra nim te xeih nan.] 18 Vatakes, vanut moletin ak lakei be nesao labitene, "!Has vin moletin xai! !mae ni Barabas ha ven imase!" 19 Barabas tehe nim te xeih vengan tehe vatit vaeen tei e hal Serusalem e tehas vin moletin tei e melele nen ak. 20 Paelet ien bei tengan vamaen ni Iesu ha ven vamase, ma biteni mi vanut moletin xil ak mun bit, "!Nimae ni ha ven imase!" 21 E xil lakei nggeih mu ba ni labit, "!Ti xati e eivave! !Ti xati e eivave!" 22 Paelet bit rilomun ni mi xil be vatol nen bit, "?Xi pol ni naha misa? !Natakamet ti neta tova xa xi pol ni tengan ha vamat ven! Mak, ma moletin navan xil ha limeas pangasi, ti, nimae ni ha ven imase!" 23 E xil lakei nggeih pilei sung xa ha liti xat Iesu e eivave, lapol ni mak vuma ... xi mae ni. 24 Ma Paelet pol ni mi Iesu nggusil nenemien nae. 25 Misak ni, Paelet mae ni Barabas ba ven mase. E Iesu sung, ma xi mae ni ba tengan moletin nan xil liti xati e eivave ihusil naha xa vanut moletin ak iexil tehei.
Ladi Xat Iesu e Eivave
26 Moletin te vaeen xil ladel Iesu laba, e labisu ni moletin tei tahal Saerin, di mikakao bemei vahe hal Serusalem, hisen Saemon. Ladal xati, e laling eivave na Iesu e vatuvun tengan ipoe ihusil xil. 27 Vanut moletin tei xa mahulong mun di langgusil Iesu laba, e rut atou xil di lamuis e di ladang. 28 E Iesu biles, keteh pus xil e biteni mi xil bitene, "Atou xil tahal Serusalem, munates nou ti! Mutes xamim itel horamue namim xil. 29 Melengien tesa xil di bemei xa moletin xil ti lihiteni lihitene, 'Ihos pupu mi atou xil xa labe lumalum: xil xa lataling ti mu horamue mu latatunat ni ti tuvava.' 30 E ti lihiteni mun mi vathu xil lihit, '!Tetu xat xamem!' e mi hu xil lihit, '!Soson xamem!' 31 ?Vengan xosxa holesok xil ak di mistal mak mi moletin tehos tei xa nggoni vatiei tei xa memeas tang, ma melele xa longpangasien imei, ia len moletin tesa xil xa langgoni vatiei xa nggoxu?” 32 E melele nen ak, di ladel moletin lu mun xa lutepol tesa luba tengan ha lihas vin xalu itela. 33 Melele xa laduxoh rute xa lakesi ni "Valvat Moletin," ladi xat Iesu del moletin tesa xalu ak e eivave tol. Tei de rin metu, e tei di rin meil. 34 Iesu biteni bit, "!Tata, unaketeh ti nasa ni xil! Xil latakil ti naha xa di lapol ni." E moletin te vaeen xil laso tais tengan laseti eising nan e xil. 35 Moletin xil hao lasoh ladi, di laketeh. E eilep xil na mol Siu xil di lasep pepamen mini labitene, "Xi miteh meulien e moletin sav xil. !Bos! !E xosxa xi be Kristo reitin xa Hi tehosei, ma vasak pisi vateh meulien e xi tasen!" 36 Moletin te vaeen xil mun, di lasep pepamen mini. Labe visali, e lasa uaen xa mikon mini, 37 e lakei ba ni labitene, "!Xosxa obit obe suv toto na mol Siu xil, teh meulien e xouk tasom!" 38 Di, laling tisen tei de ramut eivave nan xa bitene, “Ngan ak be Suv Toto na Siu Xil." 39 Tei xalu xa lube moletin tesa xa lamurur ludi, misepin misa ba mi Iesu bitene, “!Xosxa xouk obe Kristo, uteh meulien e xouk itel xamel!" 40 E tei mun xalu misepin nggeih ba ni tua nan bitene, "?Midep, xouk ulum takan ni Hi ti? Longpangasien naratel pipin tang. 41 E ralu, momal tang xa ralhur longpangasien ak vengan rupol misa, e xi tapol ni ti neta xa vasa." 42 Di, xi biteni mi Iesu bitene, "Melele xa umei uhe suv toto e uhur xeihen nam, unem xat inou." 43 Ma Iesu bit rilomun ni mini bitene, “Nabit xati minuk, xosali mak, utel xat nou ha ralti rute tei xa bos xa bos.”
Maten na Iesu
44 E piniae xati, ut biles bemei maluxoluk e dat mak duxoh tri klok mahis, 45 vengan xa eai taxan ti mun. E melele nen ak, kaliko xa da xol ut eo e Nim Eo na Hi mesel hilaep. 46 Di, Iesu dak kes Hi bitene, "!Tata, naling meulien navan e hem." Biteni mak, di, mat. 47 Melele xa vat na moletin xil te vaeen pus naha xa mistal, xi pet rat his Hi ven e biteni bit, "Reitin mak, moletin ak temal tevi." 48 Melele xa moletin xil xa lateti vituei lapus naha xa mistal, xil di latang vengan lalonge misa e ladilomun labe tim. 49 E ngan xil xa latekil kuh Iesu, del atou xil xa di latehusili e Kaleli latemei, lasoh ladi nga sotin vuteili, e di lapus holesok xil xa mistal.
Tehinen na Iesu
50-51 Moletin tei da xa be moletin hos e sexien nan momal, hisen Siosep tahal Aramatea. E xi mun di datil melengien xa Hi imei istal ihe suv toto na moletin xil. E koten na vat xil na Siu xil, xi be tei e xil. E xi mun teta e melele xa latepol ni lingxatien nae xil xa lavas Iesu, e xi tenamae ti en. 52 Xi be visal Paelet e misisi tengan vamae ni tiei na Iesu mini. Ma Paelet mae ni. 53 Di, ba po rat tiei na Iesu ra eivave bemei e tan, pis xole ni kaliko tei xa mieh. Di, poe ba, milingi de vangihat hu tei xa ladei ngamu da. 54 Be Fraede mahis, e Sabat bemei sangas xa Siu xil lasakras lapol en. 55 Atou xil xa di latehusil Iesu e latexo Kaleli latemei, xil langgusil Siosep e lapus vangihat. Lapus xat ut xa Siosep miling tiei na Iesu da en. 56 Di, ladilomun labe tim, e labue xat vokon e oel taxul maxoe en nae xil tengan ha lipeleini e tiei na Iesu. E langel e Sabat nggoni ngan Rae xil na Mosis tehit xati.
Iesu Meul Rilomun Ra Maten
1 E Sande makoe roroh, atou xil labe vangihat. Laba del xat valit vokon e oel taxul maxoe en xil xa latevue xati tuei teti. 2 Laba lakameti xa vatihat xa dakoe xol puiteh te vangihat, ladivin rati tuei, 3 ma labe vangite e latapus ti tiei na Suv Iesu. 4 Ma xil lasoh ladi e di lanexo e di lanem ves tiei na Iesu xa ba xave. Vatakes, rumali lu xa eising nalu mihinehin pupu mei lustal visal xil. 5 Uliatel mikan pupu e latingeiril e tan. E rumali xalu ak lubiteni mi xil lubitene, "?Veneh ma di mulang ni ngan xa meul e von maten? 6 Xi tara ti ak, meul rilomun ngamu. ?Munem xat naha xa xi tehiteni mi xamim melele xa xi teta tamu e Kaleli? 7 Xi tehitene xa limae ni Nat Moletin ihe he moletin tesa xil xa ha liti xati e eivave, e melengien tol nen, xi imeul rilomun ra maten." 8 Ma atou xil lanem rilomun ni sepinien nan xil. 9 Xil ladilomun ra vangihat e ba labit mese ni holesok xil vus mi moletin nan xil xa labe tei e le (11) del mosav xil mun. 10 Atou xil ak tehe Meri tahal Makdela, Soana, e Meri xa be nine Temis, del rut atou xil mun. E melele xa atou xil ak laba labit mese ni holesok xil ak mi eloheoh xil, 11 xil lanemi labit tumulen na atou xil ak be luvosen tang, ma latake reitin ti e xil. 12 E Pita mitamea miloh be vangihat, misao be vangite, e pus kaliko xa tetakoe xol tiei na Iesu da tang, e tiei tovuol mun. Di, xi dilomun be tim e di minem ves naha xa mistal.
Moletin Lu Lubisu Ni Iesu e Suse Xa Be Emeas
13 E melengien nen tak, moletin lu na Iesu di lukakao luba ve metimal tei xa hisen Emeas. Metimal ak be sotin mak, kilomita teni be tei e le (11) ra hal Serusalem. 14 Xalu di lutumul ni holesok xil vus xa testal. 15 Melele xa di tamu lutumul mak, Iesu dutou mei mos e xalu latoba. 16 E Hi misikoe xol nenemien nalu, ma lutale kil ti. 17 Iesu biteni mi xalu bitene, "?Xamil di mutumul ni naha e suse namil?" Xalu lusoh kat, e valnao xalu be tan. 18 Tei e xalu xa hisen Kleopas misis Iesu bitene, "?Xouk omei rohon tang e Serusalem iaxa otakil ti holesok xil xa testal en e melengien vahis xa mitavi?" 19 Iesu misis xalu bit, "?Naha xil vari?" E xalu lubit rilomun ni mini lubitene, "Holesok xil xa testal mi Iesu ngan Nasaret. Moletin ak tehe provet tei na Hi xa tesepin e tepol tetel xeihen. Hi tetel xati e moletin xil mun latemerere ni. 20 E vat xil na pris xil del eilep xil na Siu xil lamae ni ba tengan ha vamat, ma moletin te vaeen xil ba lateti xati e eivave. 21 E xamem di matenesi matehit xi iaxa ileh rerat mol Isrel ha vexil imase. E neta tei mun, xosali be melengien tol ngamu da xol holesok xil xa testal. 22 E makoe roroh tamu, rut atou xil xa latemos e xamem latehe vangihat man e latetumul ni neta xa misak ni xamem mamesep. 23 Xil latetilomun latemei latehit mese ni mi xamem xa lattapus ti tiei na Iesu. E latehiteni xa latepus masxaxa lu lutestal mi xil xa mei lutehiteni mi xil lutehitene Iesu meul rilomun. 24 E rut xamem latehe vangihat e latkameti xa holesok xil vus momal tehusil naha xa atou xil ak latehiteni. E tiei nan lattapus ti.” 25 E Iesu biteni mi xalu bitene, "!Xamim mube varu! !Muraru pupu tengan muneket e holesok xil xa provet xil latehiteni! 26 Xil latehitene xa itiamu, Kristo ha mak ilong pangas xi. Ti, ha ihur his xa mahulong e ut te merereen." 27 Di, Iesu bit kil holesok xil vus e Vanuvei na Hi xa misep usil xi. Misep kokot ni nggo tisen xil na Mosis mei duxoh ngan xil xa provet xil latetisi. 28 Melele xa latemei sangas visal metimal tahal Emeas, Iesu bit ha ihur sal ni suse iha. 29 E xalu luke xati lubit, "Uta tamu visal xamel, meteneai ba tu xiak, navehi ut imaluxoluk." Ma xi be xatel latodi. 30 E melele xa xi dotan tengan vanien vatel xalu, nggur beret, memes Hi ven, di bul pasi e misa ni mi xalu. 31 Di, nenemien nalu miluv e lupus kila xa xi be Iesu. E vatakes, xi mikesae ra xalu. 32 E xalu lusepin ni mi xalu mun tang lubitene, "!Xi vari tang xiak! Melele xa xi di tamu e tehit kil sepinien xil xa di Vanuvei na Hi mi ralu, e tineralu, ruthesi ralu pupu." 33 Ma vatakes, lutamea ludilomun lube Serusalem. Melele xa luduxoh Serusalem, lukamet moletin na Iesu xil xa labe tei e le (11) ladi vituei del rute ngan xil mun. 34 E xil labiteni mi xalu labitene, “!Be reitin! !Suv Iesu temeul rilomun ra maten, mei testal ni Saemon Pita!" 35 Di, moletin xalu ak sung lusep kil naha xa testal mi xalu e suse. Di, lubiteni mun xa melele Iesu tevul pas beret, lutele kila.
Iesu Mei Mistal ni Moletin Nan Xil
36 Melele xa rumali lu di tamu lusep usil holesok xil ak mi xil, Iesu vari mei misoh e hilaep te xil e biteni mi xil bitene, "Tomat iti mi xamim." 37 E xil lamesep pupu e ulixil mikan ni. Lanemi labit lapus temat tei. 38 E xi biteni mi xil bitene, "?Veneh ma di tamu munem mele? ?E veneh ma munake reitin ti xa inou vari tang xiak? 39 Muketeh mupus kaeheok xalu e tavaleok xalu. Inou mak xiak. Mutang mei mutuxol nou, ma muteong kila xa husi e siuk da, vengan xa temat, husi e sin tovuol." 40 E melele xa biteni mak, pisen kaehen del tavalen xalu mi xil. 41 Neta sav xa lapolu e sien, xil di tamu lanem usil holesok xil ak e latake reitin ti mu en. Ma xi misis xil bitene, "?Anien ti dit ak tengan nama ni?" 42 Ma xil lasa rut meseo tei xa meses mini. 43 Di, ngguri e ngga ni pe met xil. 44 Di, biteni mi xil bitene, "Ngan ak natehiteni mi xamim melele xa nateti tamu visal xamim. Holesok xil vus xa testal minou, temei tengan ipol ni naha xa latetisi e Vanuvei Matu na Hi mei ihe reitin." 45 Di, milal nenemien nae tengan lalong kil sepinien xil xa di Vanuvei na Hi. 46 E biteni mi xil bitene, "Ngan ak be sepinien xa de Vanuvei na Hi; Kristo xa Hi tehosei ha ilong pangas xi, e ha imat. E melengien tol nen, xi imeul rilomun. 47 Di, e hisen, moletin xil ti lisetu ni xa melele xa moletin ihiles ra tesaen nan, Hi iketeh ihos ni. Sepinien ak iha itiamu mi moletin xil tahal Serusalem, ti, ikapis ut ngasen e ut etan. 48 Xamim xa mupus holesok xil ak, ha ti muhithiteni mi mosav xil. 49 !Muteong! Inou nisa Ninin Eo xa Hi Tamer tehit xati tehit isa ni mi xamim. Mak, ma xamim muha, mutatili e Serusalem ituxoh melele xa xeihen na Hi imei iti mi xamim."
Iesu Be Ut Nesao
50 Di, Iesu del moletin nan xil labe reling Serusalem e labe Betani. E rute ak, misa hen be nesao e duxol xat xil. 51 Melele xa di tamu mipol ni mak, Hi nggur rati be reling xil be ut nesao. 52 Ma xil lapet rat hisen. Di, ladilomun labe Serusalem e lapolu ni sien. 53 E vehakut, di labe Nim Eo e di lasa memesien ba mi Hi.