1

1 Áwáura'a maramá ímbo wéronka'a Maníkóní imáyáama aráátímíwaima wenáwí'a Maníkón-aaigon-iye. Maníkón-aaigo aasiyaasí ména Maníkóe ména wemá Maníkó póna 2 áwáura'a Maníkón-aaigo Maníkóe ména 3 seyaafá-tántáá'á úmarowana Maníkó imáyáa amúwana seyaafá-tántáá'á minkánáá paápé uráin-tantaa'a úmakaiye. 4 Maníkón-aaigo waásimo maé'mae'o íyawini áwáuman-iye. Miyáumai wemá waásifimba sáma kátinkena 5 kumeu'ó in-áémpá'á sáma kaisaná kumeu'ó í-tántáákómá sámo kain-tántáákómbá ímba íyáákena kumeu'á uwánkaraiye. 6 Moóráwigon-awi'a Yóni mérowana Maníkó ai'maréna 7 sámo kain-ááí maimaé seyaafá'-wáásífá'á winasá minááí isésa sésa érai'a Ísu Káráísitima waási sáma kátínkáíwain-iye síwae súwana 8 Yóni wemá ímba sámo kátínkáíwai póna sámo kátinkaindawin-aai maimaéna kuráiye. 9 Maníkón-aaigoma seyaafá'-wáásífímbá sáma kátínkáíwain-iye. Yóni simátímakonka'a Maníkón-aaigo marapá'-wáásífímbá kumpaápé uráiye. 10 Maníkón-aaigo maramá úmakena marapá'á kumbérowasa marapá'-wáásí wení áwáuma ímba kawe'-úmai awánaraawe. 11 Wenamáápa'a kumbérowasa wenamááraa ímba aaweyáá uwánkówasa 12 tuwímbai aaweyáá uwánkesa wenááisafesa timankúnkúmba ésa Maníkómpákémbá kunkáiye suwaná póna miwísáféna séna Maníkóní iyámpóísomban-owe siyáiye. 13 Waási kentí imáyáafinkeni'a úmai wématinkaafo Maníkóní iyámpói ímba miyáumai Maníkóní iyámpóíyaani'a wéowe. Maníkó wení imáyáafinkembo uwátínkáímba pósa Maníkóní iyámpóíyaani'a wéowe. 14 Maníkón-aaigo waási úkéna marapá'á ména kentááfímbá mérowata awánaraumne. Farumó í-tántáá'wárá arupísemo í-tántáá'wárá'á wempímbá sáwífa'a wéron-kwaasi póna sámo kainkwárá'-wáásí úwata awánaraumne. Afowámá ááninkomba kímborawigomba póna sáma amúwana misáwárá'á mérowata awánaraumne. 15 Yóni wentáféna seyaafá'-wáásí simátimena séna kembá ímbo masínkaronka'a kesínaaembo tíndawi wenónkáámbá paápé uréna ména póna kembá íyáákaraiye siyáunda-aai minkwáásísáfé'a siyáumne siyáiye. 16 Farumó í-tántáá'á wempímbá sáwífa'o wéraiwai póna kentáá kawe'á wéuwasinkamaena wéwiye. 17 Naaófá'á Maníkó Mósesemba ai'maréna séna kesí ámáámba simátimiyo siyéna ánaaemba Ísu Káráísitimba ai'maréna séna farumó í-tántáá'é arupísemo í-tántáá'é mútimiyo siyáiye. 18 Naaófá'-naofa'e káfé'e marapá'-wáásí Maníkón-ane'á ímba awánaraambanifo kímborawigo ááninkoma wesé'a ména mimbóráí'a úmai ména póna kentáá wéaraasimiye.

Yóni nombó maitínkaraiwain-aai.

19 Yérúsaremu-naopakemba Yúndaa-kawaa-waasi ámáán-kisau-waasiye Rífáin-andafaken-kwaasiye ti'márówasa Yónimpa'a tésa áísai esa sésa emá nááwa'ono suwaná 20 Yóni ímba umémpa'a tuwómba afora'á séna Maníkómó íyáfasinankaraiwai Káráísiti ímba kemá úne súwasa 21 sésa emá nááwa'o. Íráiyaa naaófá'á Maníkón-aaimo simátímakaiwaiya'ono suwaná Yóni séna ímbaniye súwasa miwí sésa naaófá'á Maníkó séna kesáái simátimindawi Móseseraan-kwaasi ai'máráanana kumíníyemo siyáimba wemá ewá'ónó suwaná Yóni séna ímbaniye súwasa 22 miwí sésa nááwa'ono simásimiyo. Simásímínda-aai si'mákaawisa kosimátimeno suwaná 23 Yóni simátimena séna Maníkón-aai simátímakowin-awi'a Áísáya naaófá'á agaimaréna séna máásai-marafa'a moóráwigo ména aaemáíyakemba séna Fasi'aénkóní aambá wi'ankáíyamba wení aambá arupíse íyana minámpá'á wíno siyáimba mindá kemá úne Yóni súwasa 24 taáísai-un-kwaasifinkemba tuwímbai ámáán-kawaa-waasi miwí 25 Yónimba áísai esa sésa emó sémo Maníkómó íyáfasinankaiwai ímba kemá úne. Ímba kemá Íráiyaa úne. Maníkón-aaimo simátimindawi Móseseraan-kwaasi ímba kemá úne. Emó siyáandanifo nóintafewa nombá wémaitinkaano suwaná 26 Yóni séna kemá non-aantemba wémaitinkaunana kentí afufumpimbó moóráwigomo méraimba ímba wéawanaamba póna 27 ánaaembo kesínaaenka'o tíndawi wemó aaimó síndara'o kemó sendá sáwí'an-iye. Wení kísaumo wémaundasafe'a kemá úwoi-waasi úne Yóni siyáiye. 28 Yóndani-nonkoni menáípá'á Pétáni-naopa'a Yóni nombá wémaitinkowasa áísai uwaná Yóni minááí simátímakaiye.

Ísun-aai Yóni simátímakain-aai.

29 Simátimena aafáyáaraamba Ísumo túmba Yóni awánéna simátimena séna kentí sáwí-imayaasafesa ísámai sipisípi-araa'o tufú'maimo Maníkómbó áméntemba wétin-kwaasi seyaafá'-wáásítí sáwí-imayaasafena ísámai maitiyuwáíndasafena póna puwíníye. Mindásafena Maníkó ai'máráísana kúmímba póna puwíníye. 30 Kembá ímbo masínkaronka'a kesínaaembo tíndawi wendónkáámbá ména kembá íyáákaraiyemo siyáunda-aai minkwáásísáfé'a siyáumne. 31 Maníkómó íyáfasinankaiwain-aai isé'a nááwantafesawa séo siyáunda isa'á nombá wémaitinkaunda pósa Ísareri-waasi wembá kawe'-úmai awánánááwe Yóni siyáiye. 32-34 Yóni awánaron-aai simátimena séna Maníkómó íyáfasinankaraiwaintafe'a sé'a nááwa'iyomo siyáunda wíyómpakemba Maníkóní ámútanko mááufu'-numagoraamba úmaena wenane'á kumbéraisa'a awáné'a sááka'a makáunda póna Maníkó si'mákaiwai séna nombá wémaitinkenana kesí ámútanko moórá-waasigon-ane'á kumbaína emá awáné sé Ufaen-ámútánkó tirumpimbá óraa'o uwátinkaindawin-iye siyáin-aai sááka'o makáundara'a póna miyámó imbá awáné'a simátime'a súne. Wemá Maníkón-ááninkon-iye Yóni siyáiye.

Énduruwe Pítaae'a Ísumbo arááíwakaayan-aai.

35 Simátimena aafáyáaraamba Yóniye wení kísau-waasiyaiye méresa 36 Ísumo kúmba awánésa uwaná Yóni séna minkwáásí Maníkó ai'mákain-kwaasi póna seyaafá'-wáásítí sáwí-imayaasafena ísámai puwíníye. Kentí sáwí-imayaasafesa ísámai sipisípi-araa'o tufú'maimo Maníkómbó áméntemba seyaafá'-wáásítí sáwí-imayaasafena ísámai puwíníye súwasarai 37 mindárai isésarai Ísun-ánaaemba arááíwáúyana 38 Ísu faé'mai métuwanena séna nóintafekaiya'oyo súwasarai miwí tááifinkemba sésarai Raapaiyo nááfara méraano waé'mai sésarai óraakoo nááfara méraano suyaná 39 Ísu séna taawánaakaiyo súwasarai wesé'a kuyambá mindáúmpá'á koméresa aafáúmó taenónka'a koméraawe. 40 Yónimo siyáin-aai iséna Ísumbo arááíwakon-kwaasi moóráwigon-awi'a Énduru wemá Sáímoni Pítaan-áfáko 41 aifa'á awaaó ayaafáí úmai awánéna séna Maníkómó íyáfasinankaraiwai Mésíyaa méraisa'a awánaraumne siyáiye. Mésíyaawe-awi'a waé'mai Kíríki-waasi-taaifinkemba Káráísitiye sembá mináwíkóní áwáuma Maníkómó íyáfasinankaraiwain-iye wésewe. 42 Sáímonimba áí'maena Ísumpa'a tuyaná Ísu awánéna séna Yónin-ááninko óne. Enáwí'a Sáímoniye. Moórá-awi'a Pítaawe simánkaumne Ísu siyáiye. Miwí tááifinkemba Pítaawemo sembá óraa'-ontankowe wésewe. Fírípiye Nátániyeriye Ísumbo arááíwakaayan-aai. 43 Aafáyáaraamba Ísu séna Káríri-aempa'a kónae séna Fírípimba ayaafáí úmai awánéna séna kembá sirááíwauwo siyáiye. 44 Wemá Pétésáítafakemba Éndurunte Pítaanteti naaópaken-kwaasin-iye. 45 Fírípi Nátániyerimba ayaafáí éna séna Mósese Maníkón-aai aúfáífimba agaimarówasa Maníkón-aai simátímakowiye aúfáífimba agaimarésamo siyáan-kwaasigonta awánaraumne. Wemá Násareti-naopakemba Yósepin-ááninkon-awi'a Ísun-iye súwana 46 Nátániyeri séna kesáámó súndasa Násareti-naopakemba ímba kawe'-wáásín-iye wésune súwana Fírípi séna taawánaao súwasarai 47 kuyambá Ísu Nátániyerimba awánéna séna maandá érai'a Ísareri-waasigo éna ímbo karo'-ímáyáámó wéraiwai wétiye súwana 48 Nátániyeri áísai ena séna nóra úmaiya kesí imáyáa suwánéwa sénó súwana Ísu séna Fírípi ímbo áántarainka'a ení naaópa'a piyáí-áwáura'a méraana'a kesí imáyáafinkemba awánaraumne súwana 49 Nátániyeri séna óraakoo emá Maníkón-ááninko e Ísareri-waasi kentáásí kawáágó óne súwana 50 Ísu séna piyáí-áwáura'a méraana'a kesí imáyáafinkemba awánaraumne súndasafe kentáfé sé érai'e Maníkón-ááninko óne wésene. Ení naaópa'a méraana'a imáyáafinkembo awánaraundasafe sénda po mintántáákómbó íyáákainda-tantaa'a ánaaemba awánáínone. 51 Érai'a simátime'a súne. Wíyómpa'a kampúaran-tawaai tuwínkaa'a ínasa wíyómpakemba waási úranko kumpaápé uráundawifa'a wíyómpaken-kisau-waasi iyé-kunke íya'a tuwánánááwe Ísu siyáiye.

2

Ísu non-úramba wáíni-nombo waé'makain-aai.

1 Aúnkáraamba Káríri-aempa'a Kéna-naopa'a túwaandu urésa aaré wéto'waai-esa Ísun-anówa komérowasa 2 Ísune wení kísau-waasiye táántowasa komérowasa 3 ándá-aran-domba nowaná tai'ówana Ísun-anówa Ísuntafena séna ándá-aran-domba taí'áiye súwana 4 Ísu séna kesí kísausafe ímba simásimiyo. Seyaafá'nánká'ó kesí áwáumo suwánáíyan-kanaa ímba tiyáiye súwana 5 Ísun-anówa kísau-waasisafena séna simátimindantemban-oro siyáiye. 6 Yúndaa-waasi tiyáámbo non-kwíyúmba mindásafena afa'móráe óraa-sawema wérowana 7 Ísu kísau-waasisafena séna misáwéfímbá nombá fatímai ówitaaro súwasa fatímai ówitamarowana 8 Ísu séna tuwímbai-nomba umaé'a tónká'ó káráwiyaiwaimba mááméro súwasa miyá uwaná 9 mindómbá ándá-aran-domba urówana tónká'ó káráwiyowi néna séna nááfaken-dona'iyomo súmba kísau-waasi Ísun-aai isésa awánaraawe. Nááfaken-dona'iyo séna aaremó maún-kwaasigomba áántowana túwana séna 10 seyaafá'-wáásí aifa'á kawe'-ándá-árán-dómbá tíméwasa násúwááwasa úwoi-anda-aran-domba wétimewe. Emá ímba miyá óndarakemba ánaaemba kawe'-ándá-árán-dómbá wésimene siyáiye. 11 Káríri-aempa'a Kéna-naopa'a Ísu minkísáú-wáámé'á úmba wení fasi'aémbá aráátimuwasa wení kísau-waasi awánésa timankúnkúmba ésa sésa Maníkómpákémbá kunkáiye siyáawe. 12 Minkákémbá Ísuwe anówawe mináfáráwáínóndaawe wení kísau-waasiye miyáumai-waasi Kápaneamu-naopa'a kárika'a kumbéraawe.

Ísu óraa'-amaan-daumpa'o iyáin-aai.

13 Naaófá'ó Maníkó Yúndaa-waasi tíyótaimo í-tánón-kánáá tóso ún-kanaama ampáámbá wéunka'a Ísu Yérúsaremu-naopa'a wéna 14 óraa'-amaan-daumpa'a iyúmba mifá'á waásisomba mésa Maníkómbó amíyantafesa purumakawé sipisípiye mááufu'-numawe wémeyambaresa ámáán-dankoni óntamba wémeyanesa mérowana Ísu tuwánéna 15 ándásamba ufántuwena mindásamba purumakawé sipisípiye tusú uwásuwena ámáán-dankoni óntambo méyámbárón-kwaasiti taaremá tawísísuwena 16 mááufu'-numamo méyámbárón-kwaasisafena séna maimaé'a kóro. Kesifoní naaúmpa'a ímba maaketí márémba maimaé'a kóro Ísu súwasa 17 wení kísau-waasi awánésa sésa naaófá'á Maníkón-aai aúfáífimba agaimaréna séna Maníkóo ení naambá sáwí'a ofó sé'a óraa'-imayaa wéune agaimaréna siyónka'a pósa minááí wení kísau-waasi tááka'a makáawe. 18 Yúndaa-kawaa-waasi Ísuntafesa sésa nóin-kwaamera inatááwá awánéta séta Maníkó fasi'aémbá ámakaintafema óraa'-amaan-daumpa'a miyá ónesa sénaumne suwaná 19 Ísu séna maanámáán-dámbá tawísísuwewa'a kaumbo-kánáárá'á úmaranaumne súwasa 20 sésa maanámáán-dámbá ayáátááka'a 46 aatai maisuwésa úmakaan-damba isamá emá sé kaumbo-kánáá úmaranaumne wésene sumbánifo 21 mindá ámáán-dantafenamo siyáimba wení áúsafena siyáiye. 22 Ánaaemba pukáimpinkemba Maníkó Ísumba íyáfasinankonka'a wení kísau-waasi minááí tááka'a marésa sésa Ísu siyáin-aai érai'-aai siyáimbaniye sésa Maníkón-aai aúfáífinken-aai érai'-aain-iye siyáawe. 23 Naaófá'ó Maníkómó Yúndaa-waasi tíyótaimo í-tánón-kánáárá'á Yérúsaremufa'a Ísu fí'o-fi'on-kisau kawe-kísáú maúwasa waásisomba awánésa Ísuntafesa sésa érai'a Maníkómpákémbá kunkáiye sumbánifo 24 Ísu waási tirumpimbá awánéna séna minááí kentáfésa ímba tirumpinkémbá wésefo tuwesaraí kembá uwásinkanaawe séna 25 waási ímba simámun-aaifinkenban-ifo wemá waási tirumpimbá awánarontafena Ísu minááí siyáiye.

3

Níkótímási Ísumbo áísai uráin-aai.

1 Moóráwigo ámáán-kawaa-waasi Yúndaa-waasiti kawáágón-áwí'a Níkótímási 2 moórá-no'waamba Ísumpa'a téna séna óraakoo Maníkón-aai simásímíndasafena embá ai'máráísama taméraanata awánaraumne. Maníkómó embó fasi'aémbó ímbo ámakainkakaa fí'o-fi'on-kawe-kisau ímba kanaa'á maésino súwana 3 Ísu séna érai'a simáme'a súne. Ímbo aneka'ó aúraan-úmaimo matinkáíyawimo ésa Maníkóní nombara ímba maénááwe súwana 4 Níkótímási séna óraa'a uwáguraafo nóraumaiya aúí'a ónaao séna tinóisai tirumpimbá ímba aneká komaíyasa matinkánááwe súwana 5-6 Ísu séna érai'a simáme'a súne. Waásimo matínkáámba mindá waásin-ofo Maníkóní ámútankomo uwátínkáímba mindá Maníkóní ámútankowara'a aúí'a wéowe. Ímbo nonkwárá Maníkóní ámútankowara'o aúraani'o úmaimo méraiyani'o uwátínkááwi Maníkómó kawáánipa'a ímba méranaawe. 7 Aneka'á aúraan-úmai matinkáíníyemo súnda-aaisafena ímba áá'a íno. 8 Maarán-ááí imáyáan-uwo. Fiyúndágo wení imáyáafinkemba wéwisasa ane'á ímba wéawanesa sésa nááfakena nááfara wéwiyo wésewe. Miyámó intembá Maníkóní ámútanko miyáráán-úmai waási wéuwatinkaiye súwana 9 Níkótímási séna nóra énawa miyá íníyo súwana 10 Ísu séna Ísareri-waasifimba aaí wésimatimendawi óndanifo minááí ímba isááne. 11 Érai'a simáme'a súne. Kesáámó awánaraunda-tantaa'e ísaraunda-tantaatafeta wésimatimunda isa'á ímba wéisaawe. 12 Miyá wéon-tantaa'e marapá'ó wéon-tantaatafe'o wésimamunda ímba érai'e séndanifo wíyómpaken-tantaatafe'o simáméndamo e nóra séwa érai'e sínono. 13 Ímba wíyómpa'a iyésa kunkáafo keyáá wíyómpakemba kunké'a kumpaápé uráundawi wíyómpaken-tantaa'a kanaa'á aráátimune. 14 Naaófá'á Mósese óntamba iyaankafayaambá úmai taaiya'ó mósá marówasa puwónaesamo un-kwáásí awánésa ímba pukáawe. Miyámó uráintemba kembá waási úranko kumpaápé uráundawimba sínkambai aaraa-táíyá'á mósá maráíyamba pósa 15 kesááisafesamo timankúnkúmbo íyawimo ésa aúí'a úmai aasiyaasí maé'mae'a ónááwe Ísu siyáiye. 16 Maníkó marapá'ó méraan-kwaasisafena áfááraumai aruntaféna éna póna wenáánimba kímborawigomba ai'marówana kunkáimba pósa wenááisafesamo timankúnkúmbo íyawi waásimo méraawini áwáuma Maníkóní némpa'a ímba maé'mae'a ónááfo wení ewaa'á aúí'a úmai maé'mae'a ónááwe. 17 Marapá'-wáásí aaifimbá maitinkaaó séna Maníkó ááninkomba ímba ai'marówana kunkáifo marapá'-wáásí sáwí-imayaafimbo méraawi kuntí'mai kawe'-ámpá'á métinkaao séna Maníkó ááninkomba ai'marówana kunkáiye. 18 Maníkó ááninkon-aaisafesa timankúnkúmbo íyawi ímba aaifimbá maitinkáínífo ímbo timankúnkúmbo íyawi é'a aaifimbá maitínkaraiye. Maníkóní kímbora-aaninkon-aaisafesa ímbo timankúnkúmbo wéiyawisafena é'a aaifimbá maitínkaraiye. 19 Sámo kátínkáíwai marapá'á kunkáimbanifo waási sáwí'a wéesa pósa kumeu'ó in-áémpátáfésa imáyáa ésa sámo kátínkáíwaifa'o ímbo tentáféna aaifimbá maitinkáíníye. 20 Sáwí'o wéowi sámo kátínkáíwaintafesa ímba wétinkaisasa kesí kísau paápé ifo sésa ímba sámo kátínkáíwaifa'a tawémaewe. Sáwí'o owí miyá wéofo 21 arupísemo owí sámo kátínkáíwaifa'a taméraamba pósa Maníkómó sintembó ombá wétuwanaawe.

Yóni Ísun-aaimo simátímakain-aai.

22 Minkákémbá Yúndiyaa-aempa'a Ísuwe wení kísau-waasiye komésa nombá wémaitinkowana 23-24 minkánáárá'á Yónimba ándáfa'a ímba máánkaronka'a Ínóni-aempa'a Sérími-naokoni ewaa'-nónaumpa'a Yóni ména sáwífa'-nomba wéropa'a mérowasa waásisomba tóso uwaná Yóni nombá wémaitinkowasa 25 Yónini kísau-waasisonte moórá Yúndaa-waasigo-iyaise mésa nombó maitínkón-aaisafesa wesimán-kwesiman-esa 26 Yónini kísau-waasisomba wembá tasimámesa sésa óraakoo Yóndani-nonkoni menáípá'ó esé'o máíwaimba wenáwí'o mósá maráándawimba wemá nombá wémaitinkaisasa sáwífa'-waasi wétoso owe suwaná 27 Yóni séna Maníkómó tímísasamo ombá mindá miwínén-iye. 28 Kemó siyáunda Maníkómó íyáfasinankaraiwai ímba kemá úmpo si'marówa'a wení aifa'á tiyáumnemo siyáunda-aai ísaraawe. 29 Maarán-ááí imáyáan-oro. Aú-ininkomo awaaikómpá'ó tisanamá awaaikó amááraasombo aamoimó onten-úmai Ísumpa'a tewa'á aamoí wéune. 30 Wemá óraa'-waasi imbá póna wenáwíko íyáákainifo kemá kári'-waasi únda póna kesúwíko kumíníye Yóni siyáiye. 31 Wíyómpakewi seyaafá'nánká íyáákaraiye. Maankákén-kwáásí marapá'-wáásí pósa marapá'ó wéon-tantaatafesa wésefo wíyómpaken-kwaasi íyáákarain-kwaasi póna 32 awánarain-tantaa ísarain-tantaatafena sisasá ímba ísáámbanifo 33 wenááisafesa érai'e sewí sésa Maníkó érai'-aaigoni áwáun-iye sisasá tuwánésa sésa Maníkó érai'-aaigoni áwáun-iye wésewe. 34 Maníkó ai'mákaiwaimba wení ámútamba ámakaimba póna Maníkón-aai wésisasa minááísáfésamo érai'emo sewí sésa Maníkó érai'-aaigoni áwáun-iye wésewe. 35 Maníkó afowámá éna ááninkomba arumbá aména séna seyaafá-tántáá'á kawáánúmai káráwiyuwo siyáiye. 36 Ááninkon-aaisafesamo timankúnkúmbo ésamo wesé'o kááísamaimo méraiyawi aúí'a úmai maé'mae'a ónááfo wenááimo ímbo ísámaimo kawe'ó íyawi ímba aúí'a úmai mérewana Maníkóní áyánko miwísé'a aasiyaasí waé'wae'a isasá méraawe.

4

Sámériyaafaken-ininkon-aai.

1-3 Yóni nombó maitínkáín-kwaasi Ísumo maitínkáíwai kóyáákaraiye. Énifo Ísu ímba maitínkaraifo wení kísau-waasi maitínkaraawe. Yónimo maitínkáín-kwaasi Ísumo maitínkáímba kóyáákamai-waasi maitínkáín-aai ámáán-kawaa-waasimo ísón-aai Ísu iséna Yúndiyaa-aempa'a tuwéna aneka'á Káríri-aempa'a kónae séna 4 Sámériyaa-ampa'a kónae séna 5 kúmba Sámériyaa-aempa'a Sáíkaa-naopa'a naaófá'ó Yékopumo ááninko Yósepimbo ámakom-barama ewaa'á wéron-daopa'a kúmba 6 Yékopu nombó uwínenamo u'makóm-bai'a wérowana aampa'á kúwana Ísumba awesaraí úwana mimbáíká'á wááwái komérowasa 7-8 wení kísau-waasi tómbá méyánónae sésa naaópa'a kuwaná Sámériyaa-ininko nombá uwínena túwana Ísu séna nombá usimiyó súwana 9 minínínkó séna emá Yúndaa-waasi ómpo kemá Sámériyaa-inimba úmpo ímba nombá usimiyó siyó siyáiye. Yúndaa-waasiye Sámériyaa-waasiye ímba moórá-anafinkemba wénaafo ímba nombá usimiyó siyó súwana 10 Ísu séna Maníkómó kanaán-úmaimo amínda-tantaa'a ímba awánaraane. Nombá usimiyómó súnda-waasigosi áwáuma ímba suwánáánda-waasi úne. Kesí áwáumo suwánáándawiyaantasi aasiyaasimó maé'mae'o on-dómbá simiyó séna'a amúsino súwana 11 minínínkó séna maandómbá káúnkáúmpá'ó kunkwéraimba náán-anafina aasiyaasimó maé'mae'o on-dómbá uwínono. 12 Kentáá síwá'nágo Yékopu maandóm-báí'á u'maréna wení sipisípiye wení akúnté'o tímakaimba isasá maandómbá wénaawe. Kemó súnda emá tímínda-nonko Yékopumo tímakain-donkomba ímba íyáákainiye wésune súwana 13 Ísu séna maandómbó wénaiyawimo éna aneka'á nontáféna tinkáínífo 14 kemó tíménda-nombo náíyawimo éna ímba aneka'á nontáféna tinkáíníye. Kemó tíménda-nombo náíyawimo éna tirumpimbá nonaumpinkémbó íyáúsenamo intenkáámbá ínasa pósa aúí'a úmai maé'mae'a ónááwe súwana 15 minínínkó séna emó sénda-nomba símína'a naananá nontáféna ímba sinkáína'a ímba maampínkémbá tauwóno súwana 16 Ísu séna enawaaikómbá koáántamae tiyó súwana 17 séna kesuwaai'íyaimba úne súwana Ísu séna emá érai'a séndamanifo 18 séfataase-wamba maiyé miwísé'o maénda isamá káfé'o minkwáásígóe'o emó méraanda ímba enawaai'á isamá pó érai'-aai simásimene súwana 19 minínínkó séna kemó imáyáamo únda Maníkón-aai simátimendawi óne. 20 Sámériyaa-waasi kentáá síwá'ná sésa maanómáká'á Maníkón-ímáyáá mósá máráaro siyáawa'a kembiwí Yúndaa-waasi sé'a Yérúsaremu-naopa'a Maníkón-ímáyáá mósá máráaro wésewe súwana 21 Ísu séna kemó sendamá érai'e siyó. Moórá-kanaamo tínda ímba maanómáká'wárá Yérúsaremu-naopa'wara'-aantembanifo seyaafá'-náópá'wárá'á kesifon-ímáyáá mósá maránááwe. 22 Kembiwí Sámériyaa-waasi wen-ímáyáá máráámbanifo wení áwáuma ímba awánare'a wéowe. Yúndaa-waasisa wen-ímáyáá mósá maréta wení áwáusa awánaraumne. Maníkó séna moóráwigo sáwí'o úmaimo méraampinkemba kawe'-ámpá'á métinkanae síndawi Yúndaa-waasifinkemba paápé íníye siyáiye. 23 Kesifo séna ken-ímáyáámó mósá maráíyamba ímba tóikakemba sé'a érai'a tirumpinkémbá ken-ímáyáá mósá máráaro siyáimba miyáumai moórá-kanaa wétisasamo érai'o kesifon-ímáyáámó mósá wémaraiyawi tirumpinkémbá arupíse úmai kesifon-ímáyáá mósá maránááwe. 24 Maníkómbá áúma ímba wéraisana ámútanko méraisasa pósa ímba túrantamba ane'á wéawanaafo miyáráán-úmai Maníkón-ímáyáámó mósá máráámbo ombá wení ámútanko túwa'nai isasá tirumpinkémbá wen-ímáyáá mósá máráaro súwana 25 minínínkó séna Maníkómó íyáfasinankaraiwai Káráísitiyemo sewí kumíníye. Kumíndara'a seyaafá-tántáátáféna simátiminiye sewa'á ísaraumne súwana 26 Ísu séna minááímó séndawi maandá kemá úne Ísu siyáiye. 27 Ísu minááí wésuwasa wení kísau-waasi kouwerésa Ísumo Sámériyaa-ininkontafenamo súmba Yúndaa-waasiti namuro-ínínkóntáféna wésuwana póna táá'a úwasa tirumpin-ímáyáá ésa minínínkóntáféna nóintafenawa wéankaisanawa íyó-imayaa ésa Ísuntafesa nóra sénawa minínínkóe'a wésiyo-imayaa ésa ímba taáísai uwaná 28 minínínkó wení sawe-kúrámá tuwéna naaópa'a wéna simátimena séna 29 seyaafá'ó uráunda-tantaa'a wépaape in-kwaasi méraiye. Maníkómó íyáfasinankaiwaiya'iyo taawánaaro súwasa 30 naaópa'a tuwésa Ísumpa'a tumbá 31 Ísuni kísau-waasi Ísuntafesa sésa óraakoo tómbá naaó suwaná 32 Ísu séna kemá ímbo awánaan-tomba makáumne súwasa 33 wení kísau-waasi keáímbá sésa nááwa tómbá maimaénawa máámakaiyo suwaná 34 Ísu séna tóntáfénamo tááimo taintembá si'mákaiwain-aai isé'a wení kísau maimaé wéwe'a taí'áandasafena wésinkaiye. 35 Kísaufa'a wérain-tontafe'a éíyain-kwiyomba kóínana áfuma káínata fáká'mai túwaandu ónaumne wésefo kemá súne. Awánaaro. Káfé'a maankánáá tómbó áfumo kaintembá miyáráán-úmai waásisomba tí'mai Maníkómpá'á túwaandu ónááwe. 36-37 Waásisombo tí'mai Maníkómpá'ó túwaandu uwátinkaiyan-kwaasimo ésa miwí kawe'-méyámbá maíyasa Maníkómpá'ó tíyan-kwaasi aúí'a úmai maé'mae'a ónááwe súne. Tuwímbai kísau úmaraiyasa fí'owi fakaránááwe wésewe. Miyáumai kísau íyawiwara'e fakaráíyawiwara'e aamoí ónááwe. 38 Fí'owi kísaumo úmakaamba isa'á kemá ti'maráúna'a fí'owiti kísaufaken-tomba wéfakaraawe Ísu waé'mai-aai simátímakaiye. 39 Énifo minínínkó séna seyaafá'ó uráunda-tantaa'a paápé uráiye siyáin-aai isésa pósa Sámériyaa-waasi mindáópaken-kwaasi Ísuntafesa sésa érai'a Maníkómó íyáfasinankaraiwain-iye sésa 40 Ísumpa'a tésa sésa kentáásí naaópa'a taméraao suwaná Ísu kae-kánáá koména 41 aaí simátimuwasa isésa sáwífa'-waasiwara'a sésa érai'a sáwí'o úmaimo méraundafinkenta kawe'-ámpátáámó mésinkaindawin-iye sésa 42 minínínkómbá simámesa sésa ímba enááisafeta aantembanifo wenááimo ísaraundasafeta séta marapá'-wáásí sáwí'o úmaimo méraundafinkemba kawe'-ámpátá mésinkaindawin-iye siyáawe.

Ísu moórá-iyampoimo asófankarain-aai.

43 Ísu kae'-nó'wáámbá waéna mindáópa'a tuwéna Káríri-aempa'a kónae séna wéna 44 séna Maníkón-aai simátímíwain-awi'a wenamááraa ímba mósá máráafo fí'on-daopaken-kwaasi wenáwí'a mósá wémaraawe súwana 45 miyáumai Káríri-aempa'a kúwasa mináémpákén-kwáásí aamoí uwánkaraawe. Ááéma tíyótaimo í-tánón-kánáárá'á miwí Yérúsaremu-naopa'a komésa Ísumo kísaumo maiyáimba awánaraamba pósa aamoí uwánkaraawe. 46 Aamoí uwánkówana Ísu Káríri-aempa'a wénena Kéna-naopa'a non-úranko ándá-aran-dombo úkáin-daopa'o kúmba kámáni-waasi Kápaneamu-naopaken-kwaasigo ááninkomba áí'a wéuwana 47 Ísu Yúndiyaa-aempakemba Káríri-aempa'a tiyáin-aai iséna Ísumpa'a téna séna kesááninko puwíndasafena wéisa'a úmpo kesí naaópa'a kuré koasófankainono súwana 48 Ísu séna ímbo fí'o-fi'on-kisau-waame'o awáné'o é'a ímba kesááisafe'a timankúnkúmba ónááwe súwana 49 óraakoo kesáánimba puwíndasafena wéimba minúwóíyáán-úmai tiyó súwana 50 Ísu séna enáánimba asófawifo waaó súwana Ísun-aaisafena érai'e séna kúmba 51 aampa'á kúmba wení kísau-waasi tésa sésa enáánimba áí'a é'ánkaraiye suwaná 52 tísai ena séna kesáánimba nóin-kanaarara áí'a é'ánkaraiyo súwasa miwí sésa fénáímba wááwái áúiyamo kaimbá é'ánkaraiye suwaná 53 afowámá imáyáa éna séna minkánáá enáánimba asófawiyemo siyáimba érai'a siyáiye súwasa wení akúmpákén-kwáásí seyaafá'á Ísun-aaisafesa timankúnkúmba uráawe. 54 Yúndiyaa-aempakemba Káríri-aempa'a koména moóráma kawe-kísáú-wáámé'á uréna minká'á miníyámpóígómbá asófankowasa wení akúmbá timankúnkúmba uráawe.

5

Nonkwaaúmpá'á Ísu moóráwigombo asófankarain-aai.

1 Ánaaemba Yúndaa-waasi ámáántafesa tanómba kaumakónka'a Ísu Yérúsaremu-naopa'a kurái. 2 Yérúsaremu-naokoni óntan-kusaifa'a ontamá wéromba áwí'a sipisípigoni ontamá miwání ewaa'á nonkwaaúnkón-áwí'a Pétésíta-nonkwaaumba wérowana 3 mindónkón-áwáífa'a wááu-namba séfataase-namba wérowasa mindáúmpátá tí'o ún-kwaasisomba tuwímbai túgafitan-kwaasisone tíyayaambo kararón-kwaasisone mésa nonkómó úwaauwaamo índa amu'makówana 4 moórá-mora-kanaa wíyómpakewi nompímbá kumúwana nonkó úwaauwa úwana aifa'ó nompímbó kumúwaimba áí'a é'ánkaraiye. 5 Tí'o ún-kwaasisompimba moóráwigo ména ayáátááka'a 38 aatai áí'a ún-kwaasi mérowana 6 Ísu awánéna ayáátááka'a áí'a wéiye-imayaa éna áísai ena séna embá asófendasafena wéankaiyo súwana 7 we séna nonkómó úwaauwaamo índara'o sí'maenamo nompímbó sinkáíndawi ímba méraiye. Kemá kumónae'o úndanifo moóráwigo kembá kúwáákena nompímbá aifa'á kúmísana kesí'a úwoi wéraiye súwana 8 Ísu séna íyáfasinaao. Ení tuwaai'á maimaé waaó súwana 9 minúwóíyáán-úmai áí'a é'ankowana wení tuwaai'á maimaéna kuráiye. Yúndaa-waasi ámáán-aaimo ísón-kanaara'a miyá úwasa 10 Yúndaa-kawaa-waasi asófankon-kwaasisafesa sésa káfé'a saagaan-kánáá isa ení tuwaai'á maimaé wégonda aaraamá makáawe suwaná 11 we séna asófasinkaraiwai séna ení tuwaai'á maimaé waaó siyáiye súwasa 12 miwí áísai esa sésa ení tuwaai'á maimaé waaómó siyáiwai nááwa'iyo suwaná 13 sáwífa'-waasifimba Ísu áwiyokuwana póna asófankowi séna áwí'a ímbo isáúnda-waasin-iye siyáiye. 14 Simásuwena ánaaemba óraa'-amaan-daumpa'a iyúwana Ísu ayaafáí úmai awánéna séna áí'a é'ánkaraimba po sáwíyamba sínkáífo sé sáwí-imayaa aneka'á ímba uwó súwana 15 iséna Yúndaa-kawaa-waasi kosimátimena séna asófasinkaraiwai Ísun-iye súwasa 16 Yúndaa-waasi ámáán-aaimo ísón-kanaara'a Ísu asófankarontafesa Yúndaa-kawaa-waasi Ísumba sáwí'a uwánkámae íyúwana 17 Ísu séna kesifo aasiyaasi-kánáá kísau wémaimba pó'a miyáráán-úmai kísau maénaumne súwasa 18 saagon-kánáárá'á asófankarontafenawara Maníkó kesifomán-iyemo siyóntafenawara'a pósa Yúndaa-kawaa-waasi sésa tufuwónae símasima'a umbá Maníkó kesifomán-iyemo siyónten-úmai Maníkóe kesé'a mimbóráí'a úmai mérauye siyóntafesa Yúndaa-kawaa-waasi sésa tufuwónae siyáawe.

Afowán-ááimo Ísumo siyáin-aai.

19 Suwaná Ísu simátimena séna érai'a simátime'a súne. Ááninko pó'a ímba kesí imáyáafinkemba únda kesifomó imbá awáné'a miyá wéune. Kesifomó intembá ááninko wéune. 20 Kesifo ááninkomba arumbá siména seyaafá-tántáá'ó wéimba wéaraasimiye. Íyáákainda-kisaumo aráásimina'a minkísáú máéna'a táátafe'a ónááwe. 21 Kesifomá pukáampinkembo íyáfasintinkaintemba ááninko kesí imáyáafinkemba íyáfasintinkanae'a wéune. 22 Kesifo séna ímba aaifimbá maitinkánaumpo aaifimbó maitinkáínda-kisau kesááninkomba ámakaumne siyáiye. 23 Aaifimbó maitínkáanda-kisau símakaimba pósa kesifon-áwí'o mósá máráántemba ááninko súwí'a mósá maránááwe. Kesúwí'o ímbo mósá maráíyawimo ésa kesifo si'mákaiwain-awi'wara'a ímba mósá maránááwe. 24 Érai'a simátime'a súne. Kesááimo isésamo érai'a ai'mákaiwai Maníkómá iyémó síyawi é'a áwáuma ómbaresa aúí'a úmai maé'mae'a owe. Waási méraawini áwáuma Maníkóní némpa'o maé'ómbanifo Maníkóní ewaa'á taméraamba pó'a ímba aaifimbá maitinkánaumne. 25 Érai'a simátime'a súne. Moórá-kanaa tínasa pukáiyan-kwaasi Maníkón-ááninko-saai isánááwe. Isáíyawi íyáfasinesa maé'mae'a ónááwe. 26 Kesifomá waásimo méraawini áwáun-iye. Fasi'aémbá siména séna miyámó úndantemba waásimo méraawini áwáuma óne siyáiye. 27 Kemá wíyómpakemba waási úranko kumpaápé uráundawi únana póna kesifo kentáféna séna aaifimbó maitínkénda-kisau amúne siyáiye. 28 Minááísáféna ímba táá'a íno. Moórá-kanaamo tínda utaráan-kwaasi seyaafá'á kesáái isésa 29 utarémpinkemba íyáfasinanaawe. Kawe'ó uréwimo íyáfasinesa aúí'a úmai maé'mae'a ónááfo sáwí'o uréwimo íyáfasinaiya'a aaifimbá maitinkánaumne. Minááísáféna ímba táá'a íno Ísu siyáiye.

Ísu wení áwáumo siyáin-aai.

30 Ísu simátimena séna ímba kesí imáyáafinkemba wéumpo si'mákaiwai simásímakaintemba miyá wéune. Ímba kesí imáyáafinkembo ondasáfé'a arupíse úmai aaifimbá maitinkánaumpo kesifo simásímakainten-úmai aaifimbá maitinkánaumne. 31 Kemó kesáfé'o súndarakaa karo'é sewaisinó. 32 Moóráwigowara'o kentáfénamo simbá érai'a wésiye. 33 Kembiwí tuwímbai ti'márówasa Yóni nombó maitínkáíwaimba koáísai uwaná Yóni kentáféna séna érai'-waasin-iye. Kosimátíméro siyáiye. 34 Kesí áwáumo síyantafe'a ímba óraa'-imayaa úndanifo Yóni kentáfénamo siyáin-aaisafe'a érai'e síya'a sáwí'o úmaimo méraampinkemba kawe'-ámpá'á métinkanae-imayaa wée'a minááí simátimune. 35 Ómbó aampa'ó kúra'mae konten-úmai Yóni kentí aampa'ó kúratinkowa'a kárika'a aamoí uráawe. 36 Moórá-tantaako Yóni kentáféna siyáin-aaigomba íyáákaraiye. Kesifomó simásímakain-kisau wémaunana minkísáúgó kesí áwáuma wépaape-iye. Kesifomó siménamo si'mákain-kisau wémaunasa kesí áwáuma wéawanaawe. Mintántáákó Yóni kentáfénamo siyáin-aaigomba íyáákaraiye. 37 Kesifo si'mákaiwai wewárá'á kentáféna simbánifo wenáái ísámai ímba kawe'á é'a wenane'á ímba awánaraawe. 38 Si'marówa'o kunkáundasafe'a ímba timankúnkúmba ombá póna Maníkón-aai ímba tirumpimbá wéraiye. 39 Kembiwí sé'a aúí'a úmai maé'mae'a ónaumne sé'a Maníkón-aai aúfáífimba toráumai awána-awana wéowe. Mináúfáífímbá kesí áwáuma agaimárówa'anifo ímba kawe'-úmai ísaraawe. 40 Kawe'ó úmaimo isé'o kempá'ó tenkakaa aúí'a úmai maé'mae'a owaisinó. 41 Waási kesúwí'a óraa'a uwásinkanaawe-imayaa ímba wéune. 42 Maníkómbó ímbo tirumbó áménka'a wétuwanaumne. 43 Kesifomá simásímakaintafe'a kunkáundanifo ímba kawe'á wéuwasinkaawe. Énifo moóráwigombo kesifomó ímbo simámakaindawimo tína'o é'a kawe'á uwánkanaawe. 44 Kembiwí sé'a waási kentáá súwí'a óraa'a uwásinkanaawe sé'a pó'a kesáái ímba érai'e wésewe. Maníkómá kentáá súwí'a óraa'a uwásinkainiye senkakaa kentáfé'a érai'e sewaisinó. 45 Kesifon-aúranka'a ímba aaifimbá maitinkánaumpo Mósese naaófá'ó ámáán-aaimo agaimakáiwai aaifimbá maitinkáíníye. Mósese súwa'nai iyémó sewímó éna wemá aaifimbá maitinkáíníye. 46 Mósese kesáái agaimakáimba pó'a Mósesen-aaisafe'o timankúnkúmbo onkakaa kesááisafe'a timankúnkúmba owisinó. 47 Mósesemo agaimakáin-aaisafe'a ímba érai'e sembá pó'a kesááisafe'a ímba érai'e sewé Ísu siyáiye.

6

Ísu sáwífa'-waasi tómbó tímakain-aai.

1-4 Naaófá'á Maníkó Yúndaa-waasi tíyótaimo í-tánón-kánáá ampáámbá úwana Káríri-waaunkoni menáípá'á Ísu nompín-táómpimba wéna minkwaaúnkóní moórá-awi'a Táípíriyasi nompá'á kúmba tí'o ún-kwaasisomba asófatinkowasa awánésa pósa wenánaaemba arááíwáúwasa Ísuwe wení kísau-waasiye nompín-táómpinkemba marapá'á kumésa omápa'a imérowasa 5-6 sáwífa'-waasi Ísumpa'a íyúwana tuwánéna imáyáa éna séna ánaaemba miyá ónaumpo aifa'á Fírípimba áísai úmai isánae séna áísai ena séna nááfakena tómbá méyámba'maiya tíménara nánaao súwana 7 Fírípi séna sáwífa'-ontankakemba 200 kinaaraken-tomba méyámba'maisa timúnasasa naawaisinó súwana 8 moórá-kisau-waasigo Sáímoni Pítaan-áfákon-awi'a Énduru 9 séna moórá-iyampoigo séfataase-tonkwara kae'-mófáá'wárá'á makáifo sáwífa'-waasi méraawe súwana 10 Ísu wení kísau-waasisafena séna mara'á méraaro simátíméro súwasa simátímúwasa mara'á mérowana minkwáásísómbá sáwífa'a 5,000 waaima mérowana 11 Ísu mintómbá maisoréna Maníkóntáféna súwiyo simásuwena tómbá tafántafan-úmai wení kísau-waasi timúwasa miwí tímúwana tómbó nontenkáán-úmai mófáá'a miyáumai nowaná tímú'a fówasa miwítí imáyáagomo úni'a uwaná 12 wení kísau-waasisafena séna mintón-ayai ímba úwoifa'a túwáaro súwasa 13 séfataase-tompinkemba nésamo túwón-ayaisomba sísamaifakemba kae'á kumbaimái-unampimba fáítuwana ówitowasa 14 Ísumo úmba awánésa sésa Maníkón-aaimo simátímíwai íntaamo awánáúnda-waame'a isatá awánáúmne sésa amu'maráúndawin-iye sésa 15 kentáásí kawáá-íta íníyemo sumbá Ísu miwí tirumpimbó un-ímáyáá iséna ímba miyá ónaunasa sewé séna tiyuwéna omápa'a iyáiye.

Ísu non-afófora'o kuráin-aai.

16 Ísu omápa'a imérowasa fenómpinka'a wení kísau-waasi nonkwaaúnkóní áwáífa'a kumésa 17 Kápaneamufa'a kónae sésa nompín-táómpimba íyátesa kuwaná Ísu ímba túwana nó'waamba fénkúwana 18 óraa-fiyunda toréna nonkó tufántááfan-úwasa 19 taántámbá nombá tuwíntámaesa ayáátááka'a kuwaná Ísu non-afófora'a maréna nompín-táónkoni ewaa'á túwasa awánésa táátafesa uwaná 20 Ísu séna kemá úmpo ímba táátafe oro. Aáno'a méraaro súwasa 21 aamoí ésa sésa nompín-táómpimba íyátaao suwaná minúwóíyáámbá nompín-táónko nonáwáífa'a kúpa'a kuráiye.

Ísumba ayaafáí uráan-aai.

22 Aafáyáama menáípá'ó koméron-kwaasi sésa fénáímba nompín-táómba kímbora wéraisana Ísu ímba mimpímbá wisasá wení kísau-waasi miwí aantemba kuráafo Ísu nááfara méraiyo siyáawe. 23 Tuwímbai-waasi nompín-táómpimba Táípíriyasifakemba tóso ésa fénáínkaambo Ísumo Maníkóntáfénamo súwiyo súwasamo waásisombo tómbó néwiyopa'a tésa 24 Ísuwe wení kísau-waasiye ímba mérontafesa tiyaafáí ónae sésa mindómpín-táómpimba íyátesa Kápaneamufa'a kuráawe.

Ísu maé'mae'o íyan-tomba únemo siyáin-aai.

25 Kápaneamu-naopa'o kumbá Ísumba awánésa sésa kesí óraakoo emá nóin-kanaawa maafá'á tiyáano suwaná 26 Ísu séna ísáaro. Ímba kawe'-wáámé'ó aráátimundasafe'a wésiyaafai-ofo tómbó naráantafe'a wésiyaafai-owe. 27 Tómbó ímbo aasiyaasimó waé'wae'o índa-tontafe'o é'a ímba kísau maé'a waásimo aasiyaasimó maé'mae'o íyan-tontafe'o é'a kísau máéro. Mintómbó tíménda kemá waási úranko mintómbá timénaumne. Maníkó kesifomá kentáféna séna aamoí uwánkaumne. Kesí kísau mauwó simbá pó'a mintómbá timénaumne súwasa 28 áísai esa sésa nóraumaisaawa Maníkóní kísau maénaumno suwaná 29 Ísu séna kentáfé'o sé'o érai'a Maníkó ai'mákaisana kunkáiwai iyémó sembá mindá Maníkóní kísau maé'a sewé súwasa 30 nóran-kwaamera'ini ímbo awánáúnda-waame'o inatáámó éta awánéta séta érai'a Maníkó embá ai'máráísama kunkáandawi ónesa sénaumne. Nóin-kisau-waamera ínono sésa 31 kentáá síwá'ná máásai-marafa'a mésa wíyómpaken-tonkon-awi'a máána-tomba né'ómbanifo emó uráandawimo éna ímba mindá íyáákaraiye. Naaófá'á Maníkón-aai aúfáífimba agaimaréna séna wíyómpaken-tomba timúwasa naráawe agaimaréna siyáiye suwaná 32 Ísu séna ísáaro. Mósesemo tímakain-tomba ímba wíyómpaken-tomban-ifo kesifomá wíyómpaken-tomba kawe-tómbá wétimiye. 33 Wíyómpakembo marapá'ó kunkáiwai wemá Maníkómó tímín-tomban-iye. Wentáfé'o wée'a maé'mae'a ónááwe súwasa 34 miwí sésa sénda-tomba aasiyaasi-kánáá simiyó suwaná 35 Ísu séna kemá aasiyaasí maé'mae'o íyan-tomba úne. Kempá'ó wétiyawi ímba tááima táíníye. Kenká'ó timankúnkúmbo wéiyawi ímba nontáféna tinkáíníye. 36 É'a simátímakaumne. Kesí kísau-waame'a awánaambanifo kesááisafe'a ímba érai'e sésa ímba kenká'á timankúnkúmba wéowe. 37 Énifo kesifomó símín-kwaasimo é'a kempá'á ténááwe. Kempá'ó tíyan-kwaasisafe'o é'a ímba kóro sénaumne. 38 Kesí imáyáamo arááíwáéndasafe'a wíyómpakemba ímba kunkáumpo si'mákaiwaini imáyáamo arááíwáéndasafe'a kunkáumne. 39 Si'mákaiwai simásimena séna amúnda-waasi sáwí-ampa'a arááíwáéfo sé kawáánuwo. Ánaaen-kanaa pukémpinkemba íyáfasintinkaano. 40 Kesifomá simásimena séna kesááninkoo embá awánésa sésa Maníkón-ááninkoman-iyemo síyawi aúí'a úmai maé'mae'a ónááwe siyáiye. Ánaaen-kanaama pukémpinkemba íyáfasintinkanaumne Ísu siyáiye. 41 Kemá wíyómpaken-tomba úne Ísu súntafesa Yúndaa-oraa'-waasi tirunkó sáwí'a úwasa 42 miwí sésa wemá Ísuma Yósepin-ááninkoman-iye. Anófoi étaamo tuwánáúndanifo nóra sénawa wíyómpakemba kunkáumne wésiyo suwaná 43 Ísu simátimena séna ímba miyá mósimesin-oro séna 44 kesópa'a ímba úwoima ténááfo kesifo kembá si'mákaiwaima táántaina'a kesópa'a tíya'a ánaaen-kanaama pukémpinkemba íyáfasintinkanaumne. 45 Mindásafesa naaófá'á Maníkón-aaimo simátímakowi agaimarésa sésa Maníkó seyaafá'-wáásí símai aráátiminiye siyáawe. Kesifon-aaimo ísámai kawe'ó íyawi kesópa'a ténááwe. 46 Kesifombá ímba awánaraafo kemá Maníkónópakemba kunkáundawi keyááma kesifombá awánaraumpo kesifon-aaimo ísámai kawe'ó íyawi kesópa'a ténááwe. 47 Érai'a simátime'a súne. Kesááisafesa érai'e sésa kenká'á timankúnkúmbo íyawi áwáuma ómbaresa aúí'a úmai maé'mae'a wéowe. 48 Kemá maé'mae'o íyan-tomba úne. 49 Kentíwá'náma máásai-marafa'a mésa máána-tomba némesa úwoi putáráawe. 50 Énifo wíyómpaken-tomba miyán-tómbó náíyawima úwoi maé'mae'a ónááwe. 51 Kemá wíyómpaken-tomba maé'mae'o íyan-tomba úne. Mintómbó nésamo ésa aasiyaasí maé'mae'a ónááwe. Kesúma timúna'o naantafé'a pó'a aasiyaasí maé'mae'a ónááwe Ísu siyáiye. 52 Ísu súwasa Yúndaa-oraa'-waasi tirunkó sáwí'a úwasa keáímbá sésa nóra sénawa miwá wenáúma simínataawa nánaumno suwaná 53 Ísu simátimena séna érai'a súne. Kemá waási úranko pó'a kesúmo ímbo né'o kesí naaemó ímbo né'o é'a ímba maé'mae'a ónááwe. 54 Énifo kesúwe kesí naaewémó naawí áwáuma ómbaresa aúí'a úmai maé'mae'a ombá pó'a ánaaen-kanaama pukémpinkemba íyáfasintinkanaumne. 55 Kesúma kawe-tómbán-iye. Kesí naaemá kawe'-nómbán-iye. 56 Kesúwe kesí naaewémó naawí kesé'a kááísamai méraawa'a kemá miwísé'a kááísamai méraumne. 57 Kesifo si'mákaiwai aasiyaasí maé'mae'a iwáí isa'á pó'a kewárá'á aasiyaasí maé'mae'a wéune. Kemá maé'mae'a úndasafe'a pó'a kesúmo newí aasiyaasí maé'mae'a ónááwe. 58 Kentíwá'ná tómbá némesa úwoi putáráawe. Kemó súnda-tomba wíyómpaken-tomba ímba miyán-tómbán-iye. Kemó súnda-tomba mintómbó newí aasiyaasí maé'mae'a ónááwe Ísu miyámá 59 Kápaneamu-naopa'a ámáán-daumpa'a simátímakaiye. 60-61 Ísu simátimuwasa wembó arááíwáún-kwaasi tirunkó sáwí'a úwasa imáyáa ésa sésa wemó sin-ááígó ínta sínkáín-aai póna umbaí wétaiye suwaná Ísu arumpin-ímáyáá éna simátimena séna minááísáfé'a wégaoraawe. 62 Kemó wíyómpaken-waasi úrankomo kumpaápé uráundawimo kunuweré'o íyóna'o suwáné'o é'a nóran-imayaawa ónaao. 63 Waásiti fasi'aénkó ímba túwa'nai ínífo Maníkóní ámútankoni fasi'aénkó túwa'nai ína'a aúí'a úmai maé'mae'a ónááwe. Miyámó intembá kemó súnda-aai mindá ámútankon-aai aúí'a úmai maé'mae'o íyan-aain-ifo 64 tuwímbai kentáfé'a sé'a karo'á siyé wésewe Ísu súmba Ísu karo'á siyémó sun-kwáásíyé wení pintaru'ó índawiwara'a naaófá'á ísaronka'a póna séna tuwímbai kentáfé'a sé'a karo'á siyé wésewe Ísu simátimena 65 séna mindásafe'a é'a simátime'a súne. Kempá'á ímba úwoi ténááfo kesifomó táántaina'o é'a ténááwe simátímakaiye. 66 Ísu simátimuwasa wembó arááíwáún-kwaasisomba Ísumba ifá'auwesa wesé'a ímba wénuwana 67 Ísu wení kísau-waasi sísamaifakemba kae'á kumbaimái-waasisafena tísai ena séna kewárárá kembá siyuwaaó séna tísai úwana 68 Sáímoni Pítaa séna óraakoo kesáá nááfataawa kónaunawa sénó. Enááigo aúí'a uwátinkainasa aasiyaasí maé'mae'a ónááwe wésendawi óne. 69 Káfé'a entáféta simankúnkúmba éta séta Maníkómpákémbá kawekó ónesa wésune súwana 70 Ísu simátimena séna kemá sísamaifakemba kae'á kumbaimái-waasimo kemparí'a uráundanifo kempínkémbá moórá sáwí-waasigo paápé íníye súmba 71 Sáímoni-Ísakeriotin-ááninkon-awi'a Yúndasintafena séna Yúndasi wení kísau-waasi sísamaifakemba kae'á kumbaimái-waasifinkemba Ísuni pintaru'á maíndawin-iye. Wentáféna minááí siyáiye.

7

Ísun-áfárawaisai-taai.

1 Minkákémbá Yúndiyaa-aempaken-kwaasi Ísumba tufuwónae suntáféna Ísu Yúndiyaa-aempa'a ímba númba Káríri-aempa'a wénuwana 2 Yúndaa-waasimo wááu-nambo ésamo tanómbo kaúfún-kanaa ampáámbá úwasa 3 Ísun-áfárawaisai karaánáá'a ankésa sésa maanáémpá'á tuwéma Yúndiyaa-aempa'a waásimo túwaandu íyapa'a ení kísau komáínasa pósa ení waási ení kawe-kísáú awánaaro. 4 Seyaafá'-wáásí suwánáíwae síyawi ímba aúpá'á kísau maénááfo seyaafá'-wáásí túranka'a kísau komauwó sésa 5 Ísun-áfárawaisai wentáfésa ímba imáyáa ésa sésa Maníkómpákémbá kunkáiye sumbá minááí simámúwana 6 Ísu simátimena séna seyaafá'nánká kesí áwáumo suwánáíyan-kanaa ímba tiyáifo kembiwí úwoi wíyasa tuwánésa 7 marapá'-wáásí kembá ímba aaisambá tíkaafo miwímó on-áwáúsáfé'o súndasafesa kembá aaisambá síkaawe. 8 Tanómbo opa'á ke koró. Seyaafá'nánká kesí áwáumo suwánáíyan-kanaa ímba tiyáifo káfé'a ímba tanómbo opa'á kúmpo kemá koró séna 9 Káríri-aempa'a méraiye.

Ísu Yérúsaremufa'o kuráin-aai.

10 Ísu mérowasa áfárawaisai tanómbo upa'á kuwaná ánaaemba wemá aúpá'á kúwasa 11 Yúndaa-oraa'-waasi Ísumba ayaafáí ésa sésa nááfara méraiyo sésa tísai uwasá 12 Ísuntafesa úwoi-waasi sáwífa'-aai sésa tuwímbai sésa kawe'-wáásín-iye suwasá tuwímbai sésa ímbanifo karo'-wáásín-iye sésa 13 Yúndaa-oraa'-waasi sáwí'a uwásínkáafo sésa ímba afora'á sumbá umémpa'a tukáawe. 14 Yúndaa-waasimo wááu-nambo úmakesamo tanómbo kaúfún-kanaa séfasefa úwana afufuntan-kánáá Ísu óraa'-amaan-daumpa'a iména wenáái simátimuwasa 15 Yúndaa-oraa'-waasi isésa táátafesa ésa tóipimba tiyáámba faafésa sésa ámáán-aaimo uwáítáí'-opa'á ímba koména ísaraimbanifo nááfakena ísaraiyo suwaná 16 Ísu minímáyáámó umbá iséna séna kesí imáyáafinkemba ímba simátimumpo Maníkó si'mákaiwaini imáyáafinkemba simátimune. 17 Kembiwí imáyáama é'a sé'a nááfaken-aaiya simásímakaiyo. Wení imáyáafinkena'i Maníkóní imáyáafinkena'iyo-imayaa wéowe. Maníkómó siyáintemba ónaemo síyawi miwímó ésa simátimunda-aaigoni áwáuma isánááwe. 18 Kentí imáyáafinken-aaimo síyawi kesúwí'a mósá maráíwae sésa kentí imáyáafinkemba wésefo ti'mákaiwain-awi'a mósá maránae síyawi ímba karo'á sembá érai'-aai wésewe. 19 Mósese ámáámba simátímakombanifo ímba ísámai kawe'á uré'e sembá sínkamonae wésewe súwasa 20 úwoi-waasisomba sésa ímba tufuwónae-imayaasa wéumpo enarumpimbá sáwí-amutamba méraisa miyán-ááí séne suwaná 21 Ísu séna ámáán-aai ísáán-kanaara'a ímba awánaraan-kwaame'a uráunda pó'a kemá sáwífa'-imayaan-owe. 22 Kentíwá'nárakemba sésa iyámpói matínkaraawasa afakaumboé-no'waamba waésa túma kárámai araénáémba ónááwe suwaná ánaaemba Mósese minááí agaimakómba pósa tuwímbai-kanaa ámáán-aai ísáán-kanaara'a miyá wéowe. 23 Móseseni ámáámba ímba taráíyaamba pó'a saagaan-kánáárá'á miyán-kísáú iyámpói túra'a wéowe. Énifo saagaan-kánáárá'á moóráwigomba asófankaraunda pó'a kísau maénafo sé'a aaisambá wésiyowe. 24 Ímba awánéraase aaisáfé'a ímba simátínkáaro. Érai'a awánáíyan-aaisafe'a simátínkáaro Ísu siyáiye. 25 Ísu simátimuwasa tuwímbai Yérúsaremu-naopaken-kwaasi sésa minkwáásísáfésawa tufuwónae wéseo sésa 26 wemá afora'á wenáái simátímísa'anifo ímba aaifimbá maiyánkaraawe. Óraa'-waasisomba sésawa wemá Maníkómó íyáfasinankaraiwai Káráísitin-iye miyáwá wése ína wéseo. 27 Maankwáásígóní naaópa'a awánáúndanifo Maníkómó íyáfasinankaraiwaini naaópa'a ímbo awánáúndafakemba tíníye siyáawe. 28 Minkákémbá Ísu óraa'-amaan-daumpa'a simátimena séna kembá éra suwánéra kesi máápa'a éra awánéra miyáwá uráao. Ímba kesí imáyáafinkemba kunkáumpo moóráwigo si'máráísa'a kunkáumne. Wemá éraite'o siwáín-iye. Wembá ímba awánaraafo 29 kemá é'a awánáúndawi si'mákaisa'a wempákémbá kunkáumne súwasa 30 minááímó súnkakemba wembá ta'ótoranae sésa umbánifo wení kanaamá ímba tiyóntafesa ímba ta'ótorowasa 31 úwoi-waasifinkemba tuwímbai sésa Maníkómó íyáfasinankaraiwaimo tíndara'a wení kísau-waameko seyaafá-kísáúgómbá íyáákainiye-imayaa wéeta Ísuni kísaugo miyán-kísáúgó póna Ísu Maníkómó íyáfasinankaraiwain-iye wésune siyáawe.

Ísumba kota'ótoraaro sésamo ti'mákaan-aai.

32 Úwoi-waasisomba minááí sumbá ámáán-kawaa-waasi isésa miwíyé óraa'-amaan-kisau-waasiye i-wáásísáfésa sésa Ísumba kota'ótoraaro sésa ti'márówasa kuwaná 33 Ísu séna kárika'a kembiwísé'a mé'a si'mákaiwaimpa'a íyóna'a 34 siyaafáí uwááe'a ímba suwáné'a iméraandafa'a ímba kanaa'á iyónááwe súwasa 35 Yúndaa-oraa'-waasi keáímbá sésa nááfara wíndasafenawa síyómpo ayaafáí uwááeta ínta awánánaumne. Kíríki-aempara Yúndaa-waasimo méraapara wénawa wenáái simátiminiyo sésa 36 wemá séna siyaafáí uwááe'o é'a ímba suwáné'a iméraandafa'a ímba iyónááwemo simbá minááígóní áwáuma ínta ísaraumne siyáawe.

Maé'mae'o íyan-donkon-aai.

37 Yúndaa-waasi wááu-nambo úmakesamo tanómbo kaúfún-kanaara'a tai'ón-kanaa óraa-kanaa úwana minkánáárá'á Ísu íyáfasinena óraaka séna nontáfénamo tinkáíndawi kempákémbá tamandaaró. 38 Maníkón-aai aúfáífimba agaimaréna siyáintemba nonaumpinkémbó íyáúsenamo intenkáámbá kesááisafesa timankúnkúmbo íyawi tirumpinkémbá nonaumpinkémbó intembá íníye Ísu súmba 39 Maníkóní ámútankontafena siyáiye. Ísu ímba wíyómpa'o kunuwékáintafena Maníkóní ámútanko ímba kunkáiye. Ísu imáyáa éna séna kemá púwóndafinkemba íyáfasine'o kesifompá'ó iyé'a Maníkóní ámútankomba ai'máráanana kuména kesááisafesa timankúnkúmbo íyawi tirumpimbá kumbéíniye-imayaa éna Ísu minááí simátímakaiye.

Ísuntafesa imáyáa tuwínkaa'o uráan-aai.

40 Ísumo simátimumba waásisomba isésa tuwímbai sésa érai'a wemá Maníkón-aaimo simátímíwain-iye suwasá 41 tuwímbai sésa wemá Maníkómó íyáfasinankaraiwai wéamu'maraundawin-iye suwasá tuwímbai sésa Maníkómó íyáfasinankaraiwai ímba Kárírifakemba paápé íníye. 42 Naaófá'á Maníkón-aai aúfáífimba agaimaréna séna Maníkómó íyáfasinankaiwai Téfítin-andafakemba Téfítini naaópa'a Pétaremufa'a ma'ankáíníye agaimaréna siyáiye sésa umbá 43 Ísuntafesa imáyáa tuwínkaa'a ésa 44 tuwímbai sésa ta'ótoranae sumbánifo ímba Ísumba ta'ótokaawe. 45 Ímba ta'ótoresa i-wáásí óraa'-amaan-kisau-waasifa'e ámáán-kawaa-waasifa'e kouwérówasa nóra séra ímba ta'óto'mai áí'mae'a téo suwasá 46 i-wáásí sésa wenááigo seyaafá'-wáásí tááigomba íyáákaraiye suwasá 47 ámáán-kawaa-waasi tísai esa sésa kenkwárárá karo'á simátínkáísara wéseo. 48 Óraa'-waasiye kesáá ámáán-kawaa-waasisaawe ímba érai'a wíyómpakemba kunkáiyesa wésumpo kewárá'á miyá seró. 49 Úwoi-waasi aantemba érai'e wésewe. Miwí Móseseni ámáámba ímba wéisaamba póna Maníkó tínkaminiye suwaná 50 ámáán-kawaa-waasifinkemba moóráwigon-awi'a Níkótímási ááéma Ísumpa'a iyáiwai simátimena séna 51 kentáásí ámáánko séna ímba úwoi sé'a sáwí'a uráiye síyamba wenáái ísare'a wení kísau awáné'a aaifimbá maénkáaro kentáásí ámáánko siyáiye súwasa 52 Níkótímásimba karaánáá'a ankésa sésa Kárírifakewimba arááíwaino. Maníkón-aai aúfáífimba toráumai awánamai kawe'á uréo. Maníkón-aai simátímíwai ímba Kárírifakewin-ifo wemá ímba Maníkón-aai simátímíwain-iye sésa 53 kentí naaó'-nao'a wété uwaná Ísu Órífi-ompa'a iyáiye.

8

Moórá-ininko fí'on-kwaasise'o nín-aai.

1 Órífi-omapa'a Ísu iména 2 aafáyáara'a kuména óraa'-amaan-daumpa'a imérowasa waásisomba wempá'á túwaandu uwaná mara'á ména wenáái simátimuwasa 3 ámáámbo sun-kwáásíyé ámáán-kawaa-waasiye aaregómbá áí'maesa minínínkó fí'on-kwaasise'o nímba pósa áí'mai seyaafá'-wáásítí túranka'a ankésa 4 Ísuntafesa sésa óraakoo minínímbá fí'on-kwaasise'a nísata awánéta ta'óto'maeta áí'maeta túne. 5 Ámáán-aufaifimba Mósese agaimaréna séna miyámó índawimba óntantamba tufúwónanasa puwíníye agaimaréna siyáiye. Nóran-imayaawa ónó sésa 6 Ísumba ma'mái awánánae sésa miyá senanasá paápé ínata wembá aaifimbá maiyankánae sésa suwaná Ísu kífaena ayáánaufitamba marará'á aúfái agaimarówasa 7 áísai aisai uwaná íyáfasinena simátimena séna ímbo aoisaambó uráindawi aifarí'ena óntamba maiyé tufuwó simátimena 8 aneka'á kífaena ayáánaufitamba marará'á aúfái agaimarówasa 9 isésa moórá-mora-waasi kúwákárúwasowana óraa'-waasi aifa'á kumúwasa miwán-ánaaemba arááíwa'maesa kúmúwana minínínkó aantemba Ísuwe'a mérowana 10 íyáfasinena áísai ena séna nááfara seyaafá'á méraao. Seyaafá'nánká ína aaifimbá maenkánaao súwana 11 séna ewé ímba aaifimbá maisinkánááwe súwana we séna kewárá'á ímba aaifimbá maiyankáúna kómpo aneka'á ímba aoisaambá uwó Ísu siyáiye.

Waási sáma kátínkáandawi únemo Ísu siyáin-aai.

12 Aneka'á Ísu wenáái simátimena séna waási sámo kátínkáandawi úne. Kembó sirááíwaiyawi ímba kumeu'á ínífo sáma kátinkaina'a maé'mae'a ónááwe súwasa 13 ámáán-kawaa-waasi sésa eyááríka'a ení áwáuma séndamanifo ímba érai'a wésene suwaná 14 Ísu séna ímbanifo kesááigoni áwáuma érai'a súne. É'a awánáúndafakemba kunkáundasafe'a é'a awánáúndafa'a íyónda pó'a kemó súnda-aai érai'a súne. Kesí áwáuma ímba suwánaraawe. 15 Marapá'-wáásí kentí imáyáafinkemba aaimá maisínkáafo kemá ímba aaimá wémaitinkaumne. 16 Kemó aaimó maitinkáúndarakaa arupíse úsino. Ímba ke aantemba aaifimbá maitinkánaumpo kesé kesifoé'a aaifinkáí maitinkáyauye. Miyáumai kemó aaimó maitinkáúndarakaa arupíse úsino. 17 Kentí ámáán-aufaifimba agaimaréna séna kae'-wáásíyáí moórá-aaimo séyambo ékai minááí érai'a wéseye agaimaréna siyáiye. 18 Miyáumai kemá kesáfé'a simátimunana kesifoé kesé'a mimbórá-ááí wésimatimuyamba póna érai'-aain-iye súwasa 19 enafomá nááfara méraiyo áísai esa suwaná séna kesí áwáumo ímbo suwánaantafe'a kesifombá ímba awánaraawe. Kesí áwáumo suwánaankakaa kesifombá awánaawaisino Ísu súmba 20 óraa'-amaan-daumpa'a óntambo túwón-daumpa'a minááí simátimuwasa ta'ótoranae sésa uwááesa wení kanaamá ímba tiyóntafesa ímba ta'ótokaawe. 21 Minkákémbá Ísu simátimena séna tiyuwé'o íyóna'a siyaafáí uwááe'a ímba suwánánááwe. Puwíyamba kentí sáwí-imayaa wéraina'a puwónááwe. Íyóndafa'a ímba kanaa'á iyónááwe súwasa 22 Yúndaa-oraa'-waasi sésa wemó séna íyóndafa'a ímba kanaa'á iyónááwe simbá póna weyááríkara puwíndasafenawa síyó suwaná 23 Ísu séna kembiwí maankákén-kwáásín-ofo kemá sanaankéwí úne. Kembiwí marapákén-kwáásín-ofo kemá wíyómpakewi úne. 24 Simátime'a súne. Puwíyamba kentí sáwí-imayaa wéraina'a puwónááwe. Kemá wíyómpakewi úmpo kentáfé'o ímbo timankúnkúmbo é'o é'a kentí sáwí-imayaa wéraina'a puwónááwe súwasa 25 minááígóní áwáuma ímba isésa sésa emá nááwawa ónó suwaná Ísu séna aasiyaasi-kánáá é'a simátímakaumne. 26 Kembiwísáfé'a sáwífa'-aai kanaa'á sé'a aaifimbá maitínkáandanifo si'mákaiwain-aai aantemba seyaafá'-wáásísáfé'a wésimatimune. Wemó arupísemo iwáín-áái wésimatimune súwasa 27 Maníkón-aai súmbanifo ímba ísówana 28 mindásafena Ísu séna kemá waási úranko kumpaápé uráundawimba sí'mae'a aaraa-táíyá'á mósinkamiyamba suwáné sé'a wemó siwáí wení imáyáafinkemba ímba sifó afowamá simámakain-aaifinkemba siyáiye miyá sénááwe. 29 Si'mákaiwai aamoí ínkwae-i'a úmae'a wéiyunda póna ímba siyuwéna kesé'a mérainiye súwasa 30 sáwífa'-waasi isésa wentáfésa timankúnkúmba ésa wíyómpakewin-iye siyáawe.

Ta'ótokaawanamo Ísu awátínkáín-aai.

31 Ísu Yúndaa-oraa'-waasi wentáfésa timankúnkúmba ésa wíyómpakewi iyémó siyówisafena séna kesááimo ísámaimo kawe'ó é'o é'a kesí waási-i'a úmai méranaawe. 32 Érai'-aai íséwana ta'ótokaiyampinkemba minéráí'-ááígó awátinkainasa méranaawe súwasa 33 Émbaramun-andafaken-kwaasi únda póta ímba fí'on-kwaasi ta'ótokaawe. Nóra séwa awátinkainiye sénó suwaná 34 Ísu séna érai'a simátime'a súne. Aoisaambó owí mináóísáámbó owí kembá wéta'otoraiye. Kesí kísau úwoi máíwae sésa méyámba'mai tíkaantenkaan-kwaasin-owe. 35 Miyán-kwáásí kawáágóní naaúmpa'a ímba maé'mae'a ónááfo wenáánintomba maé'mae'a ónááwe. 36 Kemó Maníkón-ááninkomo awátínkáana'o é'a awátuwe'a méranaawe. 37 Émbaramun-andafaken-kwaasi ombánifo kesáái ímba tirumpimbá wéraintafe'a tufuwónae wésewe. 38 Kesifomó aráásímín-aai wésumpo kentifomó simátímín-aai wésewe súwasa 39 Émbaramu kentáásifowan-iye suwaná Émbaramun-andafakewimo ékaa Émbaramumo uráintemba miyá owaisinó. 40 Maníkó érai'-aaimo simásímakaimba simátimuna'a tufuwónae wésewe. Émbaramu ímba miyá uráifo 41 kentifomó uráintemba miyá wéowe súwasa miwí sésa ímba kesinó aankaró'ó únkakemba kentáá masínkaraiye. Kentáásifowa mimbóráwígó Maníkón-iye suwaná Ísu séna 42 Maníkómpákémbá kunkáunda pó'a Maníkón-áráá'o ékaa kentirumbá síméwaisino. Ímba kesí imáyáafinkemba kunkáumpo Maníkó si'máráísa'a kunkáumne. 43 Kemó súnda nóra séra ímba wéisaao. Kesááigo umbaí wétiyaiye. 44 Kemá waántáwankon-araa'a pó'a wenarááíma waénae wésewe. Wemá áwáurakemba tínkamisasa waási puwé'ówin-iye. Érai'o sí-tántáá'á ímba wempímbá wéraisana karokaro'-ááígóní afowáí'a wéiwain-iye. 45 Miyáumai érai'-aaimo simátimundasafe'a érai'-aain-iye ímba wésewe. 46 Kemá ímba sáwí'a uráunda wéisaawe. Arupíse-aai simátimuna'a ímba érai'e wésewe. 47 Maníkón-áráá'a pósa wenáái isésa méraafo kembiwí ímba Maníkón-áráá'maarini'a uré'a pó'a wenáái ímba ísaraawe Ísu siyáiye. 48 Ísu simátimuwasa Yúndaa-oraa'-waasi karaánáá'a ankésa sésa éraita súne. Sámériyaa-waasi ónana sáwí-amutanko enarumpimbá méraisampo minááí siyáane suwaná 49 Ísu séna sáwí-amutanko ímba kesirumpimbá méraiye. Kesifon-áwí'a óraa'a úndanifo kesúwí'a sáwí'a uwásínkááwe. 50 Kesúwí'a ímba óraa'-i'a ónae. Maníkó kentáféna séna kawe-kísáú máénda pó'a enáwí'a mósá óraa'a uwánkanaumne siyáiye. 51 Érai'o senda-ááí kesáái ísámai kawe'ó íyawi ímba puwónááwe súwasa 52 Yúndaa-oraa'-waasi sésa sénda-aai sáwí-amutambo enarumpimbó méraimba éta ísaraumne. Émbaramu puwúwasa Maníkón-aai simátímakowi púwúmbanifo emá sé kesáái ísámai kawe'á íyawi ímba puwónááwe wésene. 53 Kentáásifowa Émbaramu puwúwasa Maníkón-aai simátímakowi pukáambanifo miwí íyáákainono. Emó sénda nááfakewiya'ono suwaná 54 Ísu séna kesúwí'o mósá maráúndarakaa úwoisambanifo kesúwí'o mósá maráínda kesifomán-iye. Wentáfé'a sé'a kentáásí Fasi'aénkón-iye wésewe. 55 Kemá wembá wéawanaumpo kembiwí ímba wéawanaawe. Kemó sé'o ímba wéawanaumnemo súndarakaa kembiwímó ontembá karo'-wáásí mérausino. É'a wéawane'a pó'a wenáái mósá wémaraumne. 56 Kentifo Émbaramu kemó marapá'ó kúmónda-aai iséna aamoí éna kembá suwánéna wenarunkó kawe'á uráiye súwasa 57 Yúndaa-oraa'-waasi sésa emá ifó'-wáásígó éma ímba kae'-wááí úmai siyáánkai-aatai maisukáampo emá séma Émbaramumba awánaraumne wésene suwaná 58 Ísu séna érai'a simátime'a súne. Émbaramumbo ímbo ma'ánkaronka'a kemá maé'éúndaniye súwasa 59 minááísáfésa tufuwónae sésa óntamba máúwana Ísu aúpá'á óraa'-amaan-daumpakemba kárúwaguraiye.

9

Ísu aúramba kafíkówimba kawe'ó uwánkarain-aai.

1 Ísu kúmba moóráwigomba anówama aúgafitamba ma'ánkarowimba awánésa 2 wení kísau-waasi áísai esa sésa óraakoo nááwani aoisaankóní anondááwa aúramba kafíkáiyo. Wendégówá'í anófoinegowa'iyo suwaná 3 Ísu séna ímba wení aoisaankówé anófoiti aoisaankówén-ifo Maníkóní kawe-kísáú wenane'á paápé ínasa awánáíyantafena aúramba kafíkáiye. 4 Si'mákaiwaini kísausa máéno. Sámo kainká'ó kísaumo wémaewanamo nó'waambo isanamó kísaumo máén-kanaamo taí'áíntemba miyáumai kísau maúnda-kanaa tai'áínda póta káfé'a Maníkóní kísausa maénaumne. 5 Marapá'ó méraunda waási sáma kátinkaundawi úne séna 6 marará'á awiyááíma wi'maréna mindásamba toiyaambá úmarena aúranka'a a'maréna 7 simámena séna nonkwaaúnkón-áwí'a Síróámu-waaumpimba máperaao súwana miyá uráiye. Síróámuwemo súmba wenááifinkemba waé'mai séna ai'máráín-kwaune súwana mápetuwena aúramba awánamai kawe'á éna túwasa 8 wení naaópaken-kwaasiye fí'on-kwaasiye awánésa sésa wemá aampa'ó ménamo óntantafenamo inaimó símasima'o iwáíyá'iyo suwasá 9 tuwímbai sésa ewé wemán-iye suwasá tuwímbai sésa ímbanifo wen-ói'maisan-kwaasin-iye suwaná wemá séna ímbanifo kemá úne súwasa 10 áísai esa sésa nóra ónanawa aúramba kawe'á uráiyo suwaná 11 moóráwigon-awi'a Ísu wemá awiyáái wi'maréna mindásamba toiyaan-úmarena súranka'a a'maréna simásimena séna Síróámu-waaumpimba máperaao sisa'á isé'a koperáúnana súramba kawe'án-iye súwasa 12 áísai esa sésa nááfara kuráiyo suwaná ímba awánaraumne siyáiye. 13-14 Simátimuwasa áí'maesa ámáán-kawaa-waasifa'a máánkówana Ísu toimá aúranka'a a'maréna aúrambo kawe'ó uwánkon-kanaa Yúndaa-waasi ámáán-aaimo ísón-kanaa kísau aaraamó makón-kanaa úwasa aúramba kawe'ó uwánkarowimba áí'maesa ámáán-kawaa-waasifa'a máánkówasa 15 áísai esa sésa nóra ónanawa aúramba kawe'á uráiyo suwaná séna toimá súranka'a asínkáísa'a máperaunana súramba kawe'á uwásínkaraiye súwasa 16 ámáán-kawaa-waasi tuwímbai sésa saagaan-kánáárá'ó miyámó uráimba ímba Maníkómpákémbá kunkáiye suwasá tuwímbai sésa sáwí-imayaawara'-waasigomo énaraantasi ímba kanaa'á kawe-kísáú-wáámé'á isinó suwasá imáyáa tuwínkaa'a ésa 17 sésa enaúramba kawe'á uwánkaraifo wentáfé nóin-imayaawa ónó áísai esa suwaná Maníkón-aai simátímíwain-iye súwasa 18 énifo minYúndáá-óráá'-wáásí aúrambo kawe'ó uwánkontafesa ímba imáyáa umbá anófoi táántowasa 19 tuyasá tísai esa sésa kenkáítí táánina'iyo. Énifo aúgafitana ma'ánkaraayana'iyo. Nóra énawa aúramba wéawanaiyo suwasaráí 20 sésarai kesáánimban-iye. Ma'ankááwayamba aúgafitamban-iye. 21 Énifo káfé'a nóra isanawá aúramba kawe'-úmai awánáíyómpo wemá óraakon-ifo áísai íyana weyááríka'a simátimino siyááye. 22 Ááéma Yúndaa-oraa'-waasi sésa Ísuntafesa Maníkómó íyáfasinankaraiwai wéamu'maraundawin-iye síyawi ámáán-daumpa'a ímba iyónááwe sumbá póna minánófóí Yúndaa-oraa'-waasisafena táá'a úwasarai 23 sésarai óraakon-ifo wembá áísai oro siyááye. 24 Simátímúyasa aneka'á aúramba kawe'ó uwánkarowimba áántowana túwasa sésa minkwáásígó sáwí-imayaa wéiye sewatá ísaraunda po Maníkón-aúranka'a arupíse úmaisa simásimiyo suwaná 25 séna sáwí-waasiya'i kawe'-wáásíyá'íyo kemá ímba isáúmne. Moórá-tantaatafe'a isáúnda súramba kafíkuraimbanifo káfé'a súramba wéawanaumne súwasa 26 nóraumaiya aúramba kawe'á uwánkaraiyo áísai esa suwaná 27 séna é'a simátímakaumpo ímba ísaraawe. Anekará simátimenara isánááo. Wenaráái waénaemo sé'a wení kísau-waasi-i'a ónááwe súwasa 28 karaánáá'a ankésa sésa emá wenaráái wéwaempo kesáá Mósese arááísa wéwaraumne. 29 Maníkó Mósesemba aaí simámakaifo minkwáásí nááfaken-kwaasiya'iyo suwaná 30 miwá séna fí'onka'ma'mai-tantaa'an-iye. Súramba kawe'á uwásínkaraifo kembiwí sé'a nááfaken-kwaasiya'iyo wésewe. Mindá fí'onka'ma'mai-tantaa'an-iye wésune. 31-33 Wemó ímbo Maníkómpákémbó kunkénaraa ímba miyá uráisino. Maníkó sáwí-imayaamo owí táái ímba wéisaifo wení kísaumo wémaewi-taai wéisaiye. Maníkón-áwí'o mósá márááwi-taai wéisaiye. Maambárámó úmaronkakemba ímba moórá aúgafitan-kwaasi méraisana kawe'á uwánkaraiye sewa'á ísaraumne súwasa 34 enanó aampa'á ma'ánkaraisa po úwoifaken-kwaasi éma enáái kentáá kawe'-wáásísá wésimasimendasaanifo ámáán-daumpakemba kárúwaao suwaná kárúwaguraiye. 35 Minkákémbá ai'mátukon-aai Ísu iséna ayaafáí úmai awánéna áísai ena séna wíyómpakemba waási úrankonka'a amankúnkúmba wéono súwana 36 Ísuntafena séna óraakoo emó sénda nááwawa'iyo. Simásímína'a simankúnkúmba onó súwana 37 Ísu séna é'o suwánáánda kemá úne súwana we séna 38 Fasi'aénkóo enká'á simankúnkúmba úne séna kífaena wen-ímáyáá mósá makáiye. 39 Wen-ímáyáá mósá marówana Ísu séna marapá'á kunkáunda pósa waási afufuntambá tuwínkaa'a ónááwe. Túrambo kafíkáindawi túramba kawe'-úmai awánáíyasa túrambo awánaawi túramba kafiyíníye súwasa 40 ámáán-kawaa-waasi tuwímbaimo mérowi isésa áísai esa sésa ewá kentáásáféwa túramba kafíkáiwai owéwá wéseno suwaná 41 Ísu séna túrambo kafíkáiwaimo méraankakaa kentí sáwí-imayaagoni méyámbá ímba máéwaisino. Éta awánáúmnemo sentáféna kentí sáwí-imayaagoni méyámbá wéraiye Ísu siyáiye.

10

Sipisípigoni kusaifá'ó káráwiyaan-aai.

1 Ísu séna érai'a simátime'a súmpo ísáaro. Sipisípi kusaifá'ó kónae síyawi ímbo sipisípigoni ontafímbó íyáférémbo kusaiyákémbó íyámaatesamo ésa miwí umén-kwáásíyé sénááwe. 2 Sipisípiya'o káráwiyaiwai ontafímbá wéiyaferaiye. 3 Miyáumai ontarákén-káwáágó ontá tiyánkáísana íyáferena wení sipisípi túwí'a itáántaisasa wenáái isésa wempá'á kowaná 4 sipisípi kusaifákémbá tí'maena aifa'á wisasá wenáái isésa wéaraaiwaewe. 5 Énifo fí'on-kwaasi-taai ímba isésa arááíwaiyamba inkaisésa wété wéowe 6 Ísu miyá simátimuwasa minááígóní áwáuma ímba ísaraawe.

Ísu sipisípiya'o káráwiyain-aai.

7 Minááígóní áwáuma ímba ísóntafena Ísu séna érai'a simátime'a súne. Sipisípigoni ontamá kemá úne. 8 Ímbo kunkáundara'o tuwímbaimo tiyáawi umén-kwáásín-owe. Miwí táái sipisípisonko ímba ísaraawe. 9 Kemá ontamá úne. Kempá'ó tíya'o é'a íyáféráaro senasá íyáferaiya'a káráwiyonaumne. Tómbó náíyantafesamo ésa kúwákárúwaresa násuwesa aneka'á íyáferanaawe. 10 Umén-kwáásímó tíyawimo ésa waási tínkambai sáwí'a uwátinkaiyambanifo kemá kunkáunda pósa fí'onka'ma'mai kawe'á úmai maé'mae'a ónááwe. 11 Sipisípiya'a kawe'-úmaimo káráwiyaundawi úne. Sipisípiya'o kawe'-úmaimo káráwiyaiwai séna kesí sipisípi túwa'nai ónaumne séna puwíníye. 12 Énifo óntantafesawe sésa sipisípiya'a káráwiyaawi áwáífiyaa in-íyánkómbá awánésa sipisípi ifátiyuwesa kówana sipisípisomba fámai watúwáísasa kóítawaa'a uwáguraawe. 13 Miwí sipisípiya'o káráwiyi-imayaa tuwésa óntamo maíyan-imayaa wéowe. 14-15 Sipisípiya'a kawe'-úmaimo káráwiyaundawi úne. Kesifo kembá suwíyaisa'a kemá kesifombá awíyáúnana miyámó úndantemba kesí sipisípi seyaafá'á tuwíyáúnasa kembá wésuwiyaawe. Kesí sipisípi túwa'nai ondasáfé'a pó'a kemá puwónaumne. 16 Kesí sipisípi tuwímbai fí'on-kusaifa'a méraamba pó'a kotíyáanasa kesáái isésa tésa mimbóráí'a úmai méraiya'a seyaafá-sípísípíyá'á káráwiyonaumne. 17-18 Púwóndafinkemba íyáfasinaanda-imayaa kesifomá símísa'a kemá ewé súndasafena wenarumbá wésimiye. Kemó ímbo ewémó súndarakaa ímba kanaa'á sínkamowisino. Kesí imáyáafinkemba pó'a kanaa'á puwónaumne. Púwóndafinkemba kanaa'á íyáfasinanaumne. Kesifomá simásimena séna miyán-uwo séna miyámó onda-fásí'áémbá símakaiye Ísu siyáiye. 19 Ísu minááímó súntafesa Yúndaa-oraa'-waasi imáyáa ésa tuwínkaa'-uwasá 20 tuwímbai sésa sáwí-amutamba arumpimbá méraintafena uwó-í'a wéena siyé. Ke nóra séra wenáái wéisaao suwasá 21 tuwímbai sésa sáwí-amutambo arumpimbó mérainkakaa ímba miyán-ááí sisinó. Sáwí-amutambo arumpimbó mérainkakaa ímba aúgafitan-kwaasi aúramba kawe'-úmai awánéna méraisino siyáawe.

Yúndaa-oraa'-waasi tínaaembo uwánkaraan-aai.

22 Yúndaa-waasi óraa'-amaan-dambo uráan-kanaamo túntemba Yérúsaremu-naopa'a tanómba kaúfúnka'a minkánáá táwi-kanaa póna túwana 23 Ísu óraa'-amaan-daumpa'a ména Soromoní áúwimai úmakopa'a kúwasa 24 Yúndaa-oraa'-waasi túwaandu ésa taúkúmaresa áísai esa sésa entáféta sáwífa'-imayaasa wéune. Maníkómó íyáfasinankaraiwai wéamu'maraundawisaama ewá ónómpo arupíse úmai sinatá ísáano suwaná 25 Ísu séna simátimuna'anifo ímba ísaraawe. Kesifo simásímakain-kisau wémaunda póna kesí áwáuma afora'á wépaa'iye. 26 Kembiwí ímba kesí sipisípisomba pó'a kesááisafe'a ímba timankúnkúmba wéowe. 27 Kesí sipisípi tuwíyáúnasa kesáái isésa wésiraaiwaewa'a 28 imáyáa timúnasa aúí'a úmai maé'mae'a ombá pósa ímba tai'ánááwe. Kawáánúndafinkemba ímba kanaa'á tatafisénááwe. 29 Kesifomá símakaimba wení fasi'aénkó seyaafá-fásí'áénkómbá íyáákaisasa kesifomá kawáánimpakemba ímba kanaa'á tatafisénááwe. 30 Kesé kesifoé'a mimbóráí'a wéuye Ísu siyáiye. 31 Súwasa Ísumo sún-aaisafesa Yúndaa-oraa'-waasi aneka'á tufuwónae sésa óntamba máúwana 32 Ísu simátimena séna kesifomá simásímakain-kisau kawe-kísáú wémauna'a wéawanaafo nóin-kisauwa maúndasafera sínkamonaao súwasa 33 ímba kawe-kísáúsáféta tufumónaeta wéumpo Maníkómbá karaánáá'o ankáándasafeta tufuwónaumne. Marapá'-wáásígó séma Maníkó únemo séndasafeta tufuwónaumne suwaná 34-35 Ísu séna Maníkón-aai aúfáífimba ímbo karo'-ááímó wérain-aufai agaimaréna séna Maníkó séna kembiwí maníkón-owe siyáiye moóráwigo agaimaréna siyáiye. Maníkón-aai simátímakowisafena séna maníkón-owe siyáiye. 36 Kesifomá simásinkena si'mákaisa'a marapá'á kunkáumpo Maníkón-ááninko úne súndasafe'a Maníkómbá ímba karaánáá'a wéankaumne. 37 Kesifoní kísaumo ímbo wémaundarakaa kentáfé'a wíyómpakemba ímba kunkáiye sewaisinó. 38 Kesifoní kísau wémaumpo kentáfé'a wíyómpakemba ímba kunkáiye sé'a ímba timankúnkúmba ombánifo kesí kísausafe'a Maníkóní kísau wémaiye sé'o é'a mindásafe'a sé'a wesé afowáe'a mimbóráí'a wéoye sénááwe Ísu súwasa 39 aneka'á ta'ótoranae sésa umbá ta'óto'mai tofíyántuwowana kóuraiye. 40 Ísu miwí tiyuwéna Yóndani-nomba kofaténa ááéma Yónimo nombó maitínkaropa'a komérowasa 41 waásisomba túwaandu ésa sésa Yóni ímbo awánáúnda-kisau maiyáimbanifo minkwáásísáféna simásímakain-aai érai'-aai siyáiye suwasá 42 sáwífa'-waasi Ísuntafesa timankúnkúmba ésa Maníkómpákémbá kunkáiye siyáawe.

11

Rásarasimo pukáin-aai.

1 Moóráwigon-awi'a Rásarasi Pétáni-naopa'a mérowana áí'a úwasarai ámánaakai túwí'a Máríyaae Máátaae'a mimbóráfá'á mésa 2 Máríyaa ááéma ásé-wiyumbo úm-basawemba Ísun-aísamaiya'a fatíyena wena'nóntáusamba uwátukain-ininko éna tuwaawisáwágómbá áí'a wéuwasarai 3 minámánáákáí moóráwigontafesarai sésarai Ísumba kosimáme sé óraakoo emó arumbó ámakaandawimba áí'a wéiye kosimámuwo suyaná kosimámuwana 4 Ísu iséna séna Rásarasimbo áí'o wéimba ímba éka'a puwíndasafena áí'a wéifo Maníkón-áwí'wara ááninko súwí'wara'o mósá maráíyantafena áí'a wéiye Ísu súmba 5 Máátaane Máríyaane Rásarasine wenarumbá tímakomba póna 6 áí'o wéun-aai iséna kae-kánáá aáno'a maéna 7 minká'á wení kísau-waasisafena séna aneka'á Yúndiyaa-aempata kónaumne súwasa 8 sésa óraakoo Yúndaa-oraa'-waasi óntantamba tufuwónae sésa wéopa'a isa aneka'á mináémpá'á kónae wésene suwaná 9-10 Ísu miwí simátimena séna kumeu'ó isasamó kombá ímba sáma kaisasá pósa tanaambá wéfaafo sámo kaisasamó kombá ímba tanaambá wéfaawe. Miyámó ontembá isa'á káfé-kanaa kawe'-úmai kísau maénaumne Ísu simátimena séna 11 kentáásí waásigo Rásarasi aúmá wéraimba pó'a íyáfasinankaandasafe'a kónaumne súmba 12-13 Rásarasi pukóntafena Ísu súmbanifo wení kísau-waasi imáyáa ésa aún-kwéraimba póna íyáfasinainiye-imayaa ésa sésa óraakoo kawe'á imbá póna áí'a é'ankainiye suwaná 14 Ísu afora'á séna Rásarasi pukáiye. 15 Áí'o ipa'á ímba wesé'o méraunda kawe'á imbá póta wempátáámó kondá suwáné'a kentáfé'a timankúnkúmba é'a Maníkómpákémbá kunkáiye simásinkanaawe súwana 16 wení kísau-waasifinkemba moóráwigon-awi'a Tómaasi moórá-awi'a Títímási mináwíkóní áwáuma amáántágae'a wemá simátimena séna Yúndaa-oraa'-waasi Ísumba tufuwónáámba póta weséta puwónaeta mifátá kónaumne Tómaasi siyáiye. Ísu puwíyampinkemba íyáfasinaiyawini áwáuma únemo siyáin-aai. 17 Súwana Ísu Pétáni-naopa'o kúmba Rásarasi puwúwasa utámárówana éíyaimba waúnka'a Ísu koísaraiye. 18 Pétáni-nao'a Yérúsaremufa'a ewaa'á pósa 19 Máátaante Máríyaante tuwaawisáwágó pukóntafesa Yúndaa-waasisomba ifi'á kowétesa mérowana 20 Ísu wétiyemo sumbá Mááta iséna wétupa'a kúwana Máríyaa naaúmpa'a mérowana 21 Mááta Ísuntafena koséna óraakoo emó maanká'ó méraandarakaa kesuwaawisáwágó ímba púwísino. 22 Káfé'o Maníkómpá'ó inaimó sinanamó éna miyá íníye-imayaa wéune súwana 23 Ísu séna enawaawisáwágó pukáimpinkemba íyáfasinainiye súwana 24 Mááta séna ánaaen-kanaa tínda pukáindafinkemba íyáfasinainiye-imayaa wéune súwana 25 Ísu séna puwíyampinkembo wéiyafasinaawemo sewíní áwáuma kemá úne. Aúí'a úmai maé'mae'o íyawini áwáuma kemá úne. Kesááisafesamo érai'emo sésa kenká'á timankúnkúmbo íyawimo ésa puwíyambanifo íyáfasinanaawe. 26 Mésa kesááisafesa érai'e sésa kenká'á timankúnkúmbo íyawimo ésa ímba puwónááwe. Mindásafe emá érai'ewa wéseno Ísu Máátaantafena súwana 27 séna Fasi'aénkóo emá Maníkómó íyáfasinankaraiwai wéamu'maraundawi óne. Maníkón-ááninko óne. Marapá'á kúmíndawi emá óne Mááta siyáiye. 28 Mááta simásuwena wéna áúnkontafena ukutóípínkémbá simámena séna óraako wétena wéaantaiye súwana 29 Máríyaa iséna minúwóíyáán-úmai íyáfasinena wétupa'a kúmba 30 Ísu Máátaamo taawánónka'a ména ímba naaópa'o túmba 31 Máríyaa íyáfasinenamo kúmba Yúndaa-waasi ifi'ó wéton-kwaasi awánésa imáyáa ésa sésa Rásarasimbo utámakaapa'o ifi'ó táíndasafena wiyé sésa arááíwa'maesa kumbá 32 Ísumo méronka'a Máríyaa wéna óraakon-iye séna aísamaifimba kífaena séna Fasi'aénkóo emó maanká'ó méraandarakaa kesuwaawisáwágó ímba púwísino súwasa 33 Máríyaawe wenánaaenka'o arááíwáún-kwaasiye ifi'ó tombá Ísu tuwánówana arumbá éna umbai-tántáákó arumbá sáwí'a úwana 34 tísai ena séna náánkara utámakaao súwasa óraakoo taawánaao suwaná 35 Ísu ifi'á tówasa 36 Yúndaa-waasi awánésa sésa pukáiwaimba aruntaféna uwánkáíye suwasá 37 tuwímbai sésa aúgafitan-kwaasi aúramba kawe'ó uwánkaraimbanifo nóra sénawa ímba asófankaisanawa pukáiyo siyáawe. Ísu Rásarasimbo pukómpinkembo íyáfasinankarain-aai. 38 Suwaná Ísu áfááraumai arumbá úwana utánkaropa'a kúmba óntan-aifimba mámakesa óika'a óntantamba awáá uwásukowana Ísu koawánéna 39 séna óntamba maisúwáaro súwana Mááta pukówin-ámánaako séna Fasi'aénkóo éíyain-kanaara'o wáímba póna ánkúte'a íníye súwana 40 Ísu séna é'a simámakaumne. Kesááisafemo érai'emo sémo kenká'ó amankúnkúmbo émo e Maníkóní kawe-kísáú awánáínone súwasa 41 óntamba maisúwówana Ísu wíyómpa'a awánéna séna kesifóo kesáái isáándasafe'a súwiyo súne. 42 Kesáái isáámpo maanááí súnda pósa maanká'ó méraan-kwaasi kentáfésa érai'a Maníkó ai'mákaisana kunkáiye sénááwe simásuwena 43 óraaka'a séna Rásarasiyo tiyó súwana 44 pukówi íyáfasinenamo túmba ampantasámbá úsúmai ánáan-kwisuwesa aíyayaanka'a kárá'umaresa óika'a káátamaresa miyá úmakon-ampantawara'a túwana Ísu séna awátúwéwana méraino siyáiye.

Óraa'-waasi Ísumba tufuwíyan-aaimo siyáan-aai.

45 Yúndaa-waasisomba Máríyaampa'o kun-kwáásí Ísumo úmba awánésa timankúnkúmba ésa Maníkómpákémbá kunkáiye suwasá 46 tuwímbai ímbaniye sésa ámáán-kawaa-waasifa'a kosésa Ísumo ún-aai simátímúwasa 47 minááí isésa ámáán-kawaa-waasiye óraa'-amaan-kisau-waasiye aaimó ísón-kwaasi táántesa sésa ímbo awánáúnda-kisau wémaimba póta nórasaawa ónaumno. 48 Úwoimo túwáananasaamo éna miyán-kísáú wémainasa pósa seyaafá'nánká wenááisafesa timankúnkúmba ónááwe. Minká'á Rómu-kamani-waasi tésa óraa'-amaan-damba tatawísísuwesa kentáá seyaafá'nánká sáwí'a uwásínkáafonifo nórasaawa ónaumno suwaná 49 moóráwigon-awi'a Káyafaasi minkánáá aifa'-ámáán-káwáágó póna wemá séna ímba kawe'-úmai wéisaawe. 50 Yúndaa-waasi seyaafá'á púwófo séna moóráwigo puwíníye

Káyafaasi siyáiye.

51 Minááímó súmba ímba wení imáyáafinkemba siyáifo minkánáá aifa'-ámáán-káwáágó mérontafena póna Maníkó imáyáa amúwana paápé úmai séna Yúndaa-waasi seyaafá'-wáásísáféna ísámai Ísu puwíníye. 52 Ímba Yúndaa-waasi aantemba Maníkón-áráá'an-ofo fí'o-fi'om-barafaken-kwaasi mimbóráí'a úmai méraiwae séna Ísu puwíníye. 53 Káyafaasi minááí súwasa minkákémbá Yúndaa-oraa'-waasi Ísumbo tufuwíyan-aai suwaná 54 mindásafena Ísu ímba Yúndaa-oraa'-waasi túranka'o númba tiyuwéna máásai-maragoni awáífá'á Éfáráímu-naopa'a kúmba wení kísau-waasise'a koméraawe. 55 Komérowana tíyótaimo í-tánón-kánáá ampáámbá úwasa pósa tirumbó kawe'ó íyanesa naaó'-naokemba Yérúsaremu-naopa'a kotúwaandu ésa 56 Ísuntafesa móawana-meawana ésa óraa'-amaan-daumpa'a túwaandu ésa sésa tanómbo opa'á tíní ína tíníyo siyáawe. 57 Óraa'-amaan-kisau-waasiye ámáán-kawaa-waasiye sésa Ísumbo awánésamo ésa simásimiyata ta'ótóráano sumbá mindásafesa úwoi-waasi sésa tanómbo opa'á tíní ína tíníyo siyáawe.

12

Máríyaa Ísun-aísamaiya'a asaa-wiyúm-básáwémbó a'ánkarain-aai.

1 Tíyótaimo í-tánón-kánáá kárika'a túwana afa'móráe-kanaa úwoi wérowana Ísu Pétáni-naopa'a wéna pukómpinkemba íyáfasinankaraiwain-awi'a Rásarasini naaópa'a kúwasa 2 Ísuni tómbá kúfu'umarowana Ísuwe Rásarasiye'a tómbó náíyapa'a méroyana Mááta mintómbá maimái tíma'maena kúwana 3 Máríyaa asaa-wiyúmbó úm-basawemba óraa'-ontankakemba méyámbakena Ísun-aísamaiya'a sáwífa'a fatímarena wena'nóntáusamba uwátuwowana mimbásáwén-kwíyúnkó óraa'-wiyumba naaúmpa'a iyúwana 4-5 moóráwigon-awi'a Yúndasi-Ísakerioti séna nóra sénawa mimbásáwémbá timénamo óraa'-ontamba 300 kina maiyénamo ímbo óntamo makáan-kwaasi tuwín-timeraane séna minááímó siyáimba Ísuni pintaru'ó maíndawi siyáiye. 6 Ímba ónta-iyain-kwaasi-imayaa éna siyáifo wemá Ísuni waásiti óntanka'a káráwiyowi uménté'o úwai póna minóntámpínkémbá maénae séna minááí súwana 7 Ísu séna minínínkómbá étúwéwana úwoi miyá íno. Púwónanamo asinkáíndasafena miyá wéiye. 8 Ímbo óntamo makáan-kwaasi kesé'a aasiyaasí maé'mae'a íya'a túwa'nai ónááfo kemá kesé'a marapá'á ímba maé'mae'a ónaumne Ísu siyáiye.

Rásarasimba tufuwíyan-aaimo siyáan-aai.

9 Súwasa Pétáni-naopa'a Ísu méraiye sumbá sáwífa'-waasi Yúndaa-waasi isésa Rásarasi pukówana íyáfasinankarowinte'a kotuwánánae sésa kuráa. 10-11 Rásarasimba íyáfasinankarontafesa pósa Yúndaa-waasi miwítí óraa'-waasi tiyuwésa Maníkómpákémbá kunkáiwaimpata kónae sésa suntáfésa óraa'-amaan-kisau-waasi Rásarasimba tufuwíyan-aaiwara'a siyáawe.

Ísu Yérúsaremufa'o kuráin-aai.

12 Fénáíkaamba ásé-masawemba a'ánkaraifo káfékaamba Yérúsaremufa'a Ísu tíníye sumbá waásisomba minááí isésa 13 taaénáma tará'maesa aampakémbá koaiyésa óraaka'-oraaka'a sésa Fasi'aénkó ai'máráísana kunkáiwaimba Maníkó kawe'á wéuwankaiye. Wení Ísareri-waasiti kawáágón-iye wenáwíta mósá maráúmne suwaná 14 moórá-poigon-awi'a tónkigo Ísumba ayáá'maena túmba 15 naaófá'á Maníkón-aai aúfáífimba agaimaréna séna Sáíyóni-naopaken-kwaasi táá'a ifó kentí kawáágó wétiye. Tónki-araako ayáá'maena wétiye agaimarénamo siyóntemba miyáumai Ísu tiyáiye. 16 Minkánáá wení kísau-waasi ímba imáyáa úmai tááka'a makónka'a pósa Ísu pukómpinkemba wíyómpa'o iyúnka'a tááka'a marésa sésa aúfáífimba wérainka'a póna miyán-iye siyáawe. 17 Ísuma Rásarasi pukómpinkembo íyáfasinankomba awánésa tuwímbai-waasi simátímúwasa 18 isésa mindásafesa pósa aampakémbá koaíyówasa 19 óraa'-amaan-kisau-waasi keáímbá sésa seyaafá'nánká kentáá siyuwésa wenarááí-aantemba wéwaefo nórasaawa ónaumno siyáawe. Kíríki-aempaken-kwaasi Ísumba awánánaemo siyáan-aai. 20 Yérúsaremu-naopa'a ámáán-aai isánae sésa Yúndaa-waasi kuwasá Kíríki-waasise'a wésa 21 Fírípi Káríri-aempa'a Pétésáíta-naopaken-kwaasigompa'a tésa sésa Ísumba awánánaeta wétune suwaná 22 Fírípi Éndurumba kosimámena áí'maesarai Ísumba kosimámúyana 23 Ísu séna kemá waási úrankomba kesúwíko óraa'o índasafena káfé'a wépaa'iye. 24 Érai'a simátime'a súne. Ánáuntumbo úwoimo wérenamo éna ímba arambá iyáínífo ánáuntumba u'márááwana aáénkarena áruma wiyéna sáwífa'-aramba imái áfu káíníye. 25 Miyámó ontembá tirááímo táínda-i'o ésa ímba kawe'-úmai méranaafo maambárárákén-ímáyáámó tuwáíyawi aúí'a úmai maé'mae'a ónááwe. 26 Kentáfésa ení kísaumo maénae síyawi kembá sirááíwáéro. Miyámó íyawi kesé'a méranaawe. Kesí kísaumo maíyawi kesifo kentúwí'a mósá maráíníye Ísu siyáiye.

Ísu wemó puwíndasafena siyáin-aai.

27 Ísu simátimena séna kesirunkó umbaisé'a wétaimba pó'a nóra sénaumno. Kesifóo maanúmbáí-tántáá'ó kempá'ó tínda maisiyuwaaó ímba miyá sénaumpo kemá mindásafe'a kunkáumne. 28 Kesifóo enáwíko óraa'a íníye súwana wíyómpakemba aaí séna é'a kesúwí'a óraa'a uráunda pó'a aneka'á ónaumne súwasa 29 méron-kwaasisomba isésa tuwímbai sésa wíyónaai siyé suwasá tuwímbai sésa Maníkóní kísau-waasi wíyómpakewi aaí wésimamiye suwaná 30 Ísu simátimena séna minááímó ísáámba ímba kembó súwa'nai índanifo kembó túwa'nai índaniye. 31 Marapá'-wáásímó aaifimbó maitinkáínda-kanaa wétiye. Marapá'-wáásítí sáwí-kawaagombo watiyuwáínda-kanaa wétiye. 32 Aaraa-táíyá'ó mó tufusíyan-kanaa seyaafá'á imáyáa tíménasa kempátá ténááwe Ísu siyáiye. 33 Miyámó siyáimba aaraa-táíyá'á tufíyana puwíndasafena súwasa 34 waásisomba isésa sésa Maníkón-aai aúfáífimba agaimaréna séna Maníkómó íyáfasinankaraiwai aasiyaasí maé'mae'a íníye siyáifo emó sénda kemá waási úrankomba aaraa-táíyá'á mó tufusíya'a puwónaumne wésempo emá nááwawa sé ewá sénó suwaná 35 Ísu séna waási sáma kátinkaundawi úndanifo kárika'a kesé'a méranaumne. Waásimo kumeu'ó in-áémpá'ó kombá nááfara'i wégowasa pósa ímba wéawanaawe. Kumeu'ó in-tántáákó kempá'á tifó sé'a sámo kátínkáípa'a méraaro. 36 Sáma kaimbá pó'a kentáfé'a sé'a kentáásí ságoma óne sembá pó'a ságoni áráá'marimba ú'mai méranaawe Ísu siyáiye. Yúndaa-oraa'-waasi Ísuntafesa ímba timankúnkúmbo uráan-aai. Ísu simátimena tiyuwéna aúpá'á méraiye. 37 Túranka'a kawe-kísáú ímba awánaraan-kwaame'o uráimbanifo wentáfésa ímba timankúnkúmba ésa Maníkómpákémbá kunkáiye siyáawe. 38 Mindásafena naaófá'á Maníkón-aaimo simátímakowin-awi'a Áísáya siyáin-aai érai'a siyáiye. Fasi'aénkóo kawe'-ááí kosimátimunasa minááísáfésa ímba érai'e wésewe. Ení fasi'aémbá aráátimendanifo ímba awánaraawe Áísáya agaimaréna siyáiye. 39 Ísun-aaisafesa ímba timankúnkúmba untáféna naaófá'á Áísáya agaimaréna séna 40 Maníkó túramba kafítúwáísasa pósa túramba ímba awánaraawe. Maníkó táá'a káúntuwaisasa pósa ímba ísaraawe. Maníkómó simbá miyá uráunda pósa kempá'á ímba tíya'a sáwí-imayaa maitiyuwé'a kawe'á uwátinkanaumne Maníkó siyáiye Áísáya agaimaréna séna 41 Ísuni sáma awánaraimba póna minááí agaimaréna siyáiye. 42 Yúndaa-oraa'-waasi tuwímbai Ísuntafesa timankúnkúmba ésa Maníkómpákémbá kunkáiye sésa ámáán-kawaa-waasi ámáán-daumpa'a íyófo sésa aambá fáí'maraafoniye sésa ímba afora'á sumbá 43 Maníkó kesúwí'a mósá maráínkwae-imayaa ímbanofo waási tuwímbai kesúwíta mósá maráíwae-imayaa ésa miyán-ímáyáá umbá pósa Ísuntafesa érai'e ímba afora'á siyáawe.

Ísu simátimuwasa tuwínkaa'o uráan-aai.

44 Ímba afora'á suwaná Ísu óraaka séna kesááisafesa érai'e sésa kenká'á timankúnkúmbo íyawi ímba kentáfésa aantemba ofo si'mákaiwaintafesawara'a timankúnkúmba wéowe. 45 Kesí áwáumo suwánaawimo ombá ímba ken-aantemba wésuwanaafo si'mákaiwainkwara'a wéawanaawe. 46 Marapá'ó kumúnda waási sáma kátinkaundawi únda pósa kenká'á timankúnkúmbo íyawi ímba kumeu'ó in-áémpá'á méranaawe. 47 Kesááimo ímbo ísámai kawe'ó owí aaifimbó maitinkáí ímba kemá úne. Marapá'-wáásí ímba aaifimbó maitínkáandasafe'a kumúndanifo sáwí'o úmaimo méraampinkemba kawe'-ámpá'á métinkanae'a kunkáumne. 48 Ánaaen-kanaara'a kesáái isésa tínaaembo uwásinkaiyawi sésa kawe'-ááí sínaaemba uwámakaundaniye sénááwe. 49 Ímba kesí imáyáafinkemba súmpo kesifo si'mákaiwai simásímakain-aai súnda pó'a ánaaen-kanaa tínasa sésa kawe'-ááí sínaaemba uwámakaunda ímbo oráámbá uráundaniye sénááwe. 50 Kesifon-aai aúí'a úmai maé'mae'o íyan-aain-iye. Súnda-aai kesifo simásímakain-aai simátimune Ísu siyáiye.

13

Ísu wení waási tísamaimo non-kwitínkarain-aai.

1 Tíyótaimo í-tánón-kánáá aafáyáaraamba úwana káfékaamba Ísu imáyáa éna séna marapá'á tuwé'a kesifompá'ó kunuweré'o íyónda-kanaa tiyé séna marapá'-wáásí wenááimo ísón-kwaasi áfááraumai imáyáa tiména miwísáfénawe séna puwíníye súwana 2 waántáwanko Sáímonin-ááninkomba áwí'a Yúndasi-Ísakeriotimba Ísuni pintaru'á uwó-ímáyáá ámakowasa Ísuwe wení kísau-waasiye tómbá wénowana 3 afowámá seyaafá-fásí'áémbá ámakowana póna Maníkómpákémbá kunkáunda pó'a kunuweré'a iyónaumne-imayaa Ísu éna póna 4 tómbá wénowana íyáfasinena paákákén-únánkwátói faú'marena táúri kárá'umaena 5 táúfapimba nombá fatímarena wení kísau-waasi tísamai non-kwitinkéna táúrisamba uwátuwena 6 Ísuma Sáímoni Pítaampa'a túwana séna Fasi'aénkóo ímba kesísamai non-kwisinkaaó súwana 7 Ísu séna kemó úndama káfé'a ímba wéisaanda po ánaaemba isáínone súwana 8 Pítaa séna kesísamaimo non-kwisínkéndasafe'a a'áo símasima'a ónaumne súwana Ísu séna enaísamaimo ímbo non-kwiyánkáanamo éma kesí waási-i'a ímba ínone súwana 9 Pítaa séna Fasi'aénkóo ení waási-i'a ónae súmpo ímbo sísamai aantemba non-kwínda síyayaankwara si'nónkwárá'á non-kwiyuwó súwana 10 Ísu séna nombó pékáawimo ésa ímba seyaafá-túfá'á non-kwiyónááfo tísamai aantemba non-kwiyónááwe. Kembiwí non-kwisaawaná kímborawigo ímba non-kwiyáiyemo súmba 11 Ísu wení pintaru'-wáásígómbá ísarontafena séna kembiwí non-kwisaawaná kímborawigo ímba non-kwiyáiye siyáiye. 12 Ísu simátimena tísamai non-kwitiyuwéna paákákén-únánkwátóimo faú'maromba maimái úmaena ménamo tómbó némopa'a wéna tísai ena séna kemó úndawini áwáuma éra isaaó. 13 Kentáfé'a sé'a uwáítáí'-iwáí Fasi'aénkó ónemo sembá érai'a miyán-kwáásí úne. 14 Kemá kembó uwáítáí'-úndawi kentí Fasi'aénkó pó'a tísamaimo non-kwitinkáúndasafe'a kemá moórá-mora non-kwitínkáaro. 15 Kemó kembó aráátimundantemba kembiwíwárá'á miyán-oro. 16 Érai'a simátime'a súne. Kísau-waasimo ésa miwítí óraa'-waasigomba ímba íyáákanaawe. Ti'mákaiwain-aai maimaésa kosimátímakaawimo ésa ti'mákaiwaimba ímba íyáákanaawe. 17 Miyáumai kemó únda é'a awánaafo miyámó íyambo íyana tirunkó kawe'á íníye. 18 Kempínkémbá ímba seyaafátáfé'a súmpo kendé-í'o uwátinkaunda-waasi é'a tuwánaraumne. Maníkón-aai aúfáífimba agaimaréna séna kesé'a moóráfinkembo tómbó naráiwai kesí pintaru'-wáásín-iye agaimarénamo siyáimba érai'a siyáiye. 19 Ímba paápé uráisa'a simátimunda póna ánaaemba paápé ína'a kentáfé'a timankúnkúmba é'a Maníkómpákémbá kunkáiye sénááwe. 20 Érai'a simátime'a súne. Ti'máráanasa wíyawi-taai ísámai kawe'ó íyanten-úmai kesáái ísámai kawe'á ónááwe. Kesááimo isáíyanten-úmai si'mákaiwain-aai isánááwe Ísu siyáiye.

Moóráwigo kesí pintaru'á máíníyemo Ísu siyáin-aai.

21 Ísu simátimena wenarunkó umbaí tówana séna érai'a simátime'a súne. Kempínkémbá moóráwigo kembá namuro-wáásímá aráátiminiye súwata 22 wení kísau-waasi moórá-mora wenaúfínayaafimba éta nááwantafenawa síyó séta 23 wení kísau-waasigo Ísu kembá arumbá símakowi Ísuni ewaa'á méraawanana 24 Sáímoni Pítaa kentáféna aúwá'náán-kwaame'a éna séna nááwantafewa sénó sé áísai uwo súwa'a 25 wení ewaa'á kífae'a áísai e'a sé'a Fasi'aénkóo emó sénda nááwa'iyo séwánana 26 Ísu séna kemó tómbó nompín-tu'maimo áménda-waasi wemán-iye séna tómbá maimaéna nompín-tu'mai miwámbá Sáímoni-Ísakeriotin-ááninkon-awi'a Yúndasimba amúwana 27 mintómbá maúwana waántáwanko wenarumpimbá iyúwana Ísu simámena séna emó ónae sinda-í'a maaránka'a uwó Ísu súwasa 28 tómbó wénesamo méron-kwaasi Ísumo sún-aaigoni áwáuma ímba ísámai kawe'á umbá 29 sésa Yúndasi óntanka'o káráwiyowintafena Ísu séna ímbo óntamo makáan-kwaasi tuwímbai timiyó Ísu siyémá sésa tanómbo káúfón-kanaaratafesa sésa tómbá méyánuwo Ísu siyémá suwaná 30 Yúndasi Ísumo amún-tomba maimaéna minúwóíyáán-úmai máápa'a kumúwana kumeu'á uráiye.

Aú-amaambo simátímakain-aai.

31 Yúndasi máápa'a kumúwana Ísu séna káfé'a waási úranko súwí'a óraa'a isaná kesí kísaugo Maníkón-áwí'a óraa'a íníye. 32 Kesí kísaugo Maníkón-áwí'a óraa'o intembá káfé'a Maníkó kesúwí'a óraa'a uwásinkainiye. 33 Kesí iyámpóísono. Kárika'a kesé'a mé'a tiyúwáana'a siyaafáí ónááwe. Yúndaa-waasisafe'o é'o simátime'o súndantemba kentáfé'a sé'a íyóndara'a ímba kanaa'á iyónááwe. 34 Aú-amaamba simátíména'a kesirumbó timúndanten-úmai moórá-mora-waasi kentirumbá tíméro. 35 Moórá-mora kentirumbó timíyasamo ésa tuwánésa sésa Ísuni kísau-waasin-owe sénááwe Ísu siyáiye.

Pítaa ánaaeni'a uwásinkainiyemo siyáin-aai.

36 Ísu simátimuwana Sáímoni Pítaa áísai ena séna Fasi'aénkóo nááfara iyínono súwana séna íyóndara'a káfé'a ímba sirááíwainompo ánaaemba sirááíwainone súwana 37 Pítaa séna Fasi'aénkóo nóra séra káfé'a ímba embá arááíwaenaumno. Ímba pó'a áwa'nai e'a púwónana kawe'á íníye súwana 38 Ísu séna áwa'nai e'a puwónaumnemo sénda kemá érai'a simáme'a súne. Kokórigomo ímbo ááimo siyáindara'a kaumbo-íká'á kentáfé séma ímba awánáúnda-waasin-iye sínone Ísu siyáiye.

14

Maníkómpá'ó íyan-amba kemá únemo Ísu siyáin-aai.

1 Ísu simátimena séna kentirunkó ímba sáwí'a ína'a ímba óraa'-imayaan-oro. Maníkómbá timankúnkúmba é'a kenkwárá'á miyán-oro. 2 Kesifoní naaópa'a sáwífa'-maru'a wéraiye. Ímbo miyámó uráinkakaa ímba simátimusino. 3 Kemó iyúnda kentí maru'á ito'mayaa uwátinkanae'a iyúne. Iyuweré'o kuntí'mae'o íyónda kemó méraundara'a iméranaawe. Miyá ona'á kesé'a méranaawe. 4 Kemó iyúnda-amba é'a awánaraawe súwana 5 Tómaasi simámena séna óraakoo emó iyónda-naopa'a ínta awánaraumne. Nóraumaisaawa aantá awíyánaumno súwana 6 Ísu séna Maníkómpá'ó iyíyan-amba kemá úne. Kemá éraikoni áwáuma úne. Kemá maé'mae'o íyawini áwáuma úne. Kesifoní naaópa'a ímba úwoi iyónááfo kemá minámbá únda pósa iyónááwe. 7 Kesí áwáumo suwánékaa kesifombá awíyaawisino. Káfé'a wéawanaawe súwana 8 Fírípi séna óraakoo enafombá aráásímínanasa kentáá kanaa'á íno súwana 9 Ísu séna ayáátááka'a kesé'a méraundanifo emá kesí áwáuma ímba suwánaraane. Kesí áwáumo suwánaawi kesifombá é'a wéawanaafo nóra isawá enafombá aráásimiyo wéseno. 10 Kemá kesifoé'a kááísamai méraunana kesifomá kesé'a kááísamai méraiye. Minááísáfé'a érai'e seró. Ímba kesí imáyáafinkemba súmpo kesifomá kesé'a ména wení kísau isa'á súne. 11 Kemá kesifoé'a kááísamai méraunana kesifomá kesé'a kááísamai méraimba pó'a minááísáfé'a érai'e seró. Ímbo miyámó sé'o é'a kesí kísau awáné'a sé'a érai'a wíyómpakemba Maníkómpákémbá kunkáiye seró. 12 Érai'a simátime'a súne. Kentáfé'a timankúnkúmba é'a Maníkómpákémbá kunkáiye síyawi kemó úndanten-kisau miwíwárá'á maénááwe. Kesifompá'á iyé'a Maníkóní ámútankomba ai'máráandasafena miwítí kísaugo kesí kísaugomba íyáákainiye. 13 Ken-ímáyáámó é'o sísai íya'o é'a miyá ónaumpo kentáfé'a ísámai kesifon-áwí'a mósá maránááwe. 14 Ken-ímáyáámó é'o sísai íya'o é'a kemá miyá ónaumne Ísu siyáiye.

Maníkóní Ufaen-ámútánkómbá ai'máráanana kumíníyemo siyáin-aai.

15 Ísu minááí simátimena séna kentirumbó simé'o é'a kesáái ísámai kawe'á ónááwe. 16 Kesifombá áísai onaná karáá'á tutinkáíndawimba ai'maráínana kumbéna kesé'a aasiyaasí maé'mae'a íníye. Wemá éraikoni áwáun-iye. 17 Marapá'-wáásí wembá ímba awánésa wenáái ímba wéisaamba pósa ímba kanaa'á sésa kesé'a tamauwó wésefo kesé'a ména kentirumpimbá maé'mae'a imbá pó'a wembá wéawanaawe. 18 Kárika'a tiyúwáandanifo ímba áwíyaraa'-iyampoimo ontembá ónááfo iyuweránaumne. 19 Kári-kanaa marapá'-wáásí kembá ímba suwánánááfo kembiwí aneka'á suwánánááwe. Kesé'a méraunda pó'a kemá aúí'a úmai méranaawe. 20 Minkánáá tína'a sé'a érai'a afowáe'a ména keséta méraisata weséta méraumne miyá sénááwe. 21 Kesááimo taawiyafésamo kawe'ó owí tirumbá siménááwe. Tirumbó simíyawi kesifoé kesé'a sirunkáí timéyauye. Kesirumbó timúndawisafe'a símai afora'á paápé úmai méranaumne súwana 22 Yúndasi-Ísakerioti araámáón-awi'a Yúndasi séna Fasi'aénkóo nóintafewe séwa úwoi-waasisafemase símai ímba afora'á paápé úmai méranaumnewa sénó. Kentáásáfémase símai afora'á paápé úmai méranaumnewa sénó súwana 23 Ísu séna tirumbá simíyawi kesáái ísámai kawe'á íyana kesifomá arumbá miwí timínakai kewé kesifoé miwísé'a kumbéyauye. 24 Kesáái ísámai ímba kawe'ó owí tirumbá ímba símakaawe. Súnda-aai ímba kesí imáyáafinken-aain-ifo kesifo si'mákaiwaini imáyáafinken-aain-iye. 25 Kesé'o méraundara'a minááí simátimune. 26 Énifo kesifomá wení Ufaen-ámútánkómbá kentí karáákómbá ai'maráínana kumbéna ken-ánóndáá éna seyaafá-tántáá'á aráátimena súnda-aai timína'a tááka'a maránááwe. 27 Tiyuwé'a faru uwátinke'a kentirumbó aáno'o uwátínkáandate úmai méraaro. Marapá'-wáásí ímba miyá wéuwatinkaafo kesirumbó aáno'o maráúndantemba miyáumai timúne. Mindásafena kentirunkó ímba sáwí'a éna ímba táá'a íno. 28 Tiyúwáandanifo kentópa'a iyuweránaumnemo súnda é'a wéisaawe. Kentirumbó simé'o é'a kesifompá'á íyóndasafe'a aamoí ónááwe. Kesifomá kembá íyáákaraintafe'a símai aamoí ónááwe. 29 Ímba paápé uráisa'a simátimunda póna paápé ína'a kentáfé'a sé'a érai'a siyáiye sénááwe. 30 Waántáwanko maambáráráké-sáwí-káwáágó wétimba pó'a ímba aaimá ayáátááka'a simátimumpo wení fasi'aénkó ímba kembá ta'ótorainiye. 31 Kesifomó simásímakaimba miyámó únda suwánésa sésa afowámbá arumbá ámakaiye sénááwe. Íyáfasinaiyata konó Ísu siyáiye.

15

Érai'a ándáma kemá únemo Ísu siyáin-aai.

1-5 Ísu simátimena séna érai'a ándáma kemá úne. Kesifomá minándárá'ó káráwiyaiwain-iye. Ándáma kemá úne. Ándágoni amaimá kemán-owe. Ímbo arambó iyáínda-amaimo éna ayááisuwainiye. Arambó iyáínda-amaimo éna ayááimarainana arágásáó agaimái arambá iyáíníye. Ayááímáráíntemba simátímakaunda-aaigo miyá éna tirunkó arupíse wéiye. Kesé'a kááísamai méraiya'a kemá kempá'á kááísamai méraano. Amai aantenkomo éna ímba arambá iyáíníye. Miyámó intembá kesé'o ímbo kááísamaimo méraiyanamo éna ímba arambá iyáíníye. Kemá kesé'a kááísamai méwa'a pó'a kesé'o kááísamaimo méraiyawimo é'a sáwífa'-aramba imái méranaawe. Kembó ifá'ó siyuwésamo ésa ímba arambá imái méranaawe. 6 Amaimó ayááisuwainda-amaimo aáénkáíndamo éna ayáímai agaisuwáíníye. Kesé'o ímbo kááísaiyawi miyá íníye. 7 Kesé'o kááísamaimo méraiyawi kesááimo kentirumpimbó ta'óto'maraiyawi áísai íyana póna miyá uwátinkainiye. 8 Sáwífa'-arambo imáímo méraiyan-kwaasimo tuwánésamo ésa sésa Ísumbo arááíwáén-kwaasin-owe síyana kesifon-áwíkomo éna óraa'a íníye. 9 Kesifomó arumbó símakainten-úmai kesirumbá kembá timúne. Kemó é'a misírúntáfé'e símai méraaro. 10 Kesifoní ámáámba ísámai wenaruntafé'o símaimo méraundantemba kesí ámáámbo isé'o é'a kesiruntafé'a símai méranaawe. 11 Minááí simátímakaunda pó'a kesí aamoigó kentirumpimbá óraa'a wéraina'a aamoí é'a méraaro. 12 Kesirumbó timúndantemba moórá-mora-waasi tirumbá tíméro. Mindá kesí ámáámba timúne. 13 Kentí waásisafesawe símai wétuwa'nai-e'o puwónae sésamo puwíyamba ímba moórá-aai símai íyáákamai tirumbá timénááwe. 14 Kesááimo isémaiyawimo é'a kesí waási-i'a ónááwe. 15 Óraa'-waasigoni kísau-waasi óraakoni kísau ímba awánaraambanifo wenáfárawaisai wení kísau wéawanaraawe. Miyámó ontáfé'a pó'a kesifomó seyaafá'-ááímó simásímakaimba simátimunda pó'a ímba kesí kísau-waasiye sendá kesífárawaisaiye sénaumne. 16 Kembiwí ímba kembá kendé-í'a uwásínkááwa'a kemá kembiwí kendé-í'a uwátinkaunda pó'a wé'a fasi'aén-árámbá koimái sáwífase úmai méraaro. Ken-ímáyáámó é'o kesifompá'ó áísai íyanamo éna miyá uwátinkainiye. 17 Moórá-mora-waasi tirumbá tíméro sé'a miyán-ámáámbá simátimune Ísu siyáiye.

Marapá'-wáásí tíyámbo uwátínkaraan-aai.

18 Ísu minááí simátimena séna marapá'-wáásímó kembiwísáfésamo tíyámbo uwátinkaiya'o é'a tááka'a maré'a sé'a aifa'á kentáásí Fasi'aénkómbá tíyámba uwánkaraawe sénááwe. 19 Kemá marapá'-wáásífínkémbá kembá kendé-í'a uwátinkaunda pósa marapá'-wáásí tíyámba wéuwatinkaawe. Kembó úwoimo marapá'-wáásímó onkakaa kentáfésa sésa kenkáán-kwáásín-owe sésa tirumbá tíméwisino. 20 Kísau-waasi miwítí óraa'-waasigomba ímba íyáákaraawemo súnda imáyáan-oro. Kentí óraako únasa pósa marapá'-wáásí karaánáá'a sinkésa sáwí'o uwásínkáanten-úmai kembiwí karaánáá'a tinkésa sáwí'a uwátinkanaafo kesááimo ísámaimo kawe'ó íyawi kentáái isánááwe. 21 Kembiwí kesí waási-i'a ombá pósa marapá'-wáásí karaánáá'a tinkésa sáwí'a uwátinkanaawe. Si'mákaiwaimba ímba awánaraamba pósa sáwí'a ésa miyá ónááwe. 22 Kemó ímbo kusimátimundarakaa marapá'-wáásítí sáwí-imayaa úwoi aúpá'á wéraisino. Kusimátimunasa miwítí sáwí-imayaa ifá'ó túwááraamba ímba ifá'á túwááwana úwoi wéraiye. 23 Tíyámbo uwásinkewi kesifonkwárá'á tíyámba wéuwankaawe. 24 Kemó fí'owimo íyáákamaimo ímbo fí'o-fi'on-kisaumo maúndarakaa marapá'-wáásítí sáwí-imayaa úwoi aúpá'á wéraisino. Kesí kísau awánésa kené kesifoné tíyánkai wéuwasinkaawe. 25 Maníkón-aai aúfáífimba agaimaréna séna úwoisafesa kembá tíyámba wéuwasinkaawe siyáinka'a póna minááí káfé'a wépaape-iye. 26 Kesifompá'á iyé'a kentí karáá'ó tutinkáíndawimba ai'máráanana kesifompákémbá wenámútanko kembiwísé'a kumbéna wemá éraikoni áwáugo póna kentáféna seyaafá-tántáá'á kusimátiminiye. 27 Kemó kísaumo ómbaraawandarakemba é'a suwánaraamba pó'a kentáfé'wara kesí kísausafe'wara'a simátímapa'a kónááwe.

16

1 Ánaaemba kesááisafe'a ímba fasi'ámai mé'a siyúwáafo sé'a minááí simátimunda imáyáan-oro. 2 Ánaaemba marapá'-wáásímó kembiwísáfésamo ámáán-daumpakemba watuwánaemo síyamba mindásafesa sésa Ísuni kísau-waasi tínkamiyawi Maníkóní kísau wémaewe karo'á sénááwe. 3 Kenté kesifonté'a ímba suwánaraamba pósa miyáumai sáwí'a uwátinkanaawe. 4 Káfé'a minááí simátimunda póna mindá paápé ína'a imáyáa é'a sé'a simásímakaimba wépaape-iye sénááwe. Mindásafe'a simátimune Ísu siyáiye.

Maníkóní Ufaen-ámútánkó kísaumo wémain-aai.

Ísu simátimena séna kesé'a méraunda pó'a minááí ímba simátímake'a 5 si'mákaiwaimpa'o íyóndasafe'a káfé'a simátímakaana'a nááfara iyónó sé'a ímba sísai owe. 6 Iyónaumne súnda-aai ísááwana tirunkó umbaí taisa'á pó'a nááfara iyónó sé'a ímba sísai owe. 7 Érai'a simátime'a súne. Ímbo iyúndarakaa kentí karáá'ó tutinkáíndawi ímba kúmísino. Iyé'a wembá ai'máráanana kembiwísé'a kumbéna kawe'á uwátinkainiye. 8 Kumbéna marapá'ó méraan-kwaasi kentí sáwí-imayaagoni áwáuma aráátiminiye. Arupísemo úmaimo méraiyawini áwáuma aráátiminiye. Maníkómó aaifimbó maitinkáíndawini áwáuma aráátiminiye. 9 Kesááisafesamo ímbo timankúnkúmbo íyawisafena simátimena séna kentí sáwí-imayaa úwoi wéraiye síníye. 10 Kesifompá'ó iyúnda ímba suwánánááfo kentí karáá'ó tutinkáíndawi arupíse úmaimo méraiyamba kunaráátiminiye. 11 Maambáráráké-sáwí-káwáágómbá é'a aaifimbá maiyánkaraimba póna Maníkó aaifimbá maitinkáíníyema simátiminiye. 12 Sáwífa'-aai simátimusina umbai-ááí pó'a káfé'a ímba kanaa'á isánááfo ánaaemba isánááwe. 13 Maníkóní ámútanko kumbéna érai'-amba kawe'-ámbá aráátiminiye. Ímba wení imáyáafinkemba simátiminifo simámakain-aai simátimena aáno'o paápé índa-tantaa'a simátiminiye. 14 Súnda-aai simátiminana kesúwíko óraa'a íníye. 15 Seyaafá'-ááísómbá kesifondé mindá kendén-iye. Miyáumai sé'a simámakaunda-aai Maníkóní ámútanko simátiminiye Ísu siyáiye.

Tirunkó umbaí taréna ánaaemba kawe'á íníyemo siyáin-aai.

16 Ísu simátimena séna kárika'a ímba suwáné'a ánaaenka'a suwánanaawe súwasa 17 wení kísau-waasifinkemba tuwímbai sésa kesifompá'á iyúnda pó'a kárika'a ímba suwáné'a ánaaenka'a suwánanaawemo simbá nóintafenawa síyó. 18 Kárika'emo simbá minááígóní áwáuma ínta isáúmne. Nóintafenawa síyó suwaná 19 Ísu áísai ónaesamo umbá iséna simátimena séna kárika'a ímba suwáné'a ánaaenka'a suwánanaawemo súnda-aaisafe'a kembiwí áfááraumai kemó súnda-aaisafe'a símae wénowe. 20 Érai'a simátime'a súne. Kembiwí ifi'á táíyasa marapá'-wáásí aamoí íyambanifo kentirunkó umbaí taréna ánaaemba kentirunkó fetóí íníye. 21 Moórá-ininkomo iyámpóímo ma'ankáínda-kanaa tínanamo éna áí'a ínana arunkó umbaí táínana ánaaemba miníyámpóí ma'ankéna áíkomba ímba imáyáa éna aamoí íníye. 22 Miyámó ontembá kentirunkó umbaí táína'a ánaaemba suwáné'a aamoí ónááwe. Aamoimó í-tántáá'á ímba maitiyuwánááwe. 23 Minkánáámó tína'a ímba sísai ónááfo kesifompá'ó inaimó síyamba kentáfé'a ísámai áísai íyantafena póna miyá uwátinkainiye. 24 Kesifompá'á ímba inaí siyáafo káfé'a kentáfé'a ísámai inaimó síyamba miyá uwátinkainana kentirunkó óraa'-aamoi ína'a méraaro Ísu siyáiye.

Marapá-tántáá'á Ísu íyáákaraiyemo siyáin-aai.

25 Ísu simátimena séna waé'mai-aai simátimunda pó'a ánaaen-kanaa tína'a kesifon-aai afora'á simátimenaumne. 26 Minkánáámó tína'a ken-ímáyáámó ontáfé'a kesifompá'á inaí síya'a kemá ímba inaí senaná 27 wemá úwoi tiména wenarumbó tímakaintafena póna úwoi timíníye. Kentáfé'a sé'a Maníkómpákémbá kunkáiye sé'a tirumbá símakaantafena kesifomá arumbá tímakaiye. 28 Kesifompákémbá marapá'á kumbéraunda pó'a káfé'a marapá'á tuwé'a kesifompá'á iyónaumne Ísu súwasa 29 wení kísau-waasi sésa káfé'a ímba waé'mai-aaifinkemba sémpo aforatá simásimene. 30 Kesáá séta áísai ónáísaiye ímba súnasaama emá ísaraandawi po afora'á wésene. Miyásá séta Maníkómpákémbá kunkáanesa súne suwaná 31 Ísu séna kentáfé'a Maníkómpákémbá kunkáiye sembánifo 32 kárika'a siyuwé'a kentí naaó'-nao'a wété owa'á keyáá mérausina kesifomá kesé'a méraiye. 33 Minááí simátimunda pó'a kesé'a kááísamai mé'a aáno úmai wempa'á méraaro. Marapá'-wáásí karaánáá'a tinkésa sáwí'a uwátinkanaafo marapá-tántáá'wárá waásiwara'a íyáákaraunda pó'a kentirunkó aamoí ína'a méranaawe Ísu siyáiye.

17

Ísu wení waásisafena ísámai Maníkómpá'á inaimó siyáin-aai.

1 Ísu simátimena wíyómpa'a awánéna séna kesifóo minkánáá wétiye. Kesúwí'a óraa'a ina'á enáwí'a óraa'-i'a uwánkáano. 2 Seyaafá'-wáásí káráwiyaundasafe fasi'aémbá símakaanda pó'a símakaanda-waasi aúí'a úmai maé'mae'a uwátinkaunda mindásafe kesúwí'a óraa'-i'a ina'á enáwí'a óraa'-i'a uwánkáano. 3 Eyáá érai-Fasi'aenko óne. Kembá si'mákaandawi úne. Empá'é kempá'é tésa kenkáísááimo ísááwi aúí'a úmai maé'mae'a wéowe. 4 Marapá'á enáwí'a óraa'a úmai símakaanda-kisau tai'áúmne. 5 Kesifóo maramó ímbo úmakondara'a esé'a méraawanana kesúwíko óraa'-i'o uráinka'a po aneka'á miyá ínkwae'a súne. 6 Marapá'-wáásífínkémbá ení waási-i'a uwátinke símakaana'a entáfé'a miyámó iwáí méraiye símai paápé uwátinkaunasa enáái wéisaawe. 7 Símakaandasafesa sésa mintántáá'á Maníkómó ámakain-tantaa'e wésewe. 8 Símakaanda-aaimo simátimunda wéisaawe. Empákémbá kunkáunda-aai isésa sésa Maníkó ai'mákaisana kunkáiye wésewe. 9 Miwísáfé'a ísámai inaí súne. Marapákén-úwóí-wáásísáfé'a ímba inaí súmpo símakaanda-waasi ení waásisafe'a ísámai inaí súne. 10 Ení waási kesí waásin-owe. Kesí waási ení waási ésa kesúwí'a óraa'-i'a wéowe. 11 Marapá'ó ímbo méraanda empá'á iyónaumpo miwí marapá'á méranaawe. Kawe-késífóo miwíyá'á emá káráwiyinasa pósa Maníkómbó áántaan-kwaasi-i'a úmai méranaawe. Esé kesé'o kááísamaimo mérauyantemba miwí kááísamai méranaawe. 12 Miwísé'a mé'a káráwiyaunasa Maníkómbó áántaan-kwaasi-i'a úmai mésa ímba sáwí-amba arááíwakaawe. Énifo moóráwigo sáwí-amba arááíwainda póna minááí Maníkón-aai aúfáífimba agaimaréna siyáin-aai paápé íníye. 13 Empá'á ímbo iyúnda marapá'á mé'a miwí tirumpimbá kesí aamoigó óraa'o intáfé'a minááí simátimune. 14 Enáái simátímakaumne. Kemó ímbo érai'o marapá'-wáásímó úndantemba miwí ímba érai'a marapá'-wáásí ombá pósa marapá'-wáásí úwoi-waasi tíyámba wéuwatinkaawe. 15 Ímba sé'a miwí marapákémbá kuntiyaaó súmpo waántáwanko sáwí'a uwátínkáífo séma káráwiyuwo súne. 16 Kemó ímbo érai'o marapá'-wáásímó úndantemba miwí ímba érai'a marapá'-wáásín-owe. 17 Enáái érai'-aai póna tirumpimbá wérainasa ení waási-i'a úmai méranaawe. 18 Kembó si'maróna'o marapá'ó kunkáundantemba miwí ti'máráanasa marapá'-wáásífímbá méranaawe. 19 Miwísáfé'e sé'a enarááí aantemba wáúnda pósa enarááí aantemba waránááwe. 20 Ímba maankwáásísáfé'-aantemba inaí súmpo miwí táái isésa kentáfésa timankúnkúmba ésa Maníkómpákémbá kunkáiye síyawisafe'wara'a inaí súne. 21 Kesifóo inaí sé'a esé kesé'o kááísamaimo mérauyantemba miwí enté kenká'é kááísamai méranaawe. Miwí kááísamai méraamba pósa marapá'-wáásí tuwánésa sésa érai'a Maníkó Ísumba ai'mákaisana kunkáiye sénááwe. Mindásafe'a inaifínkémbá simámune. 22 Esé kesé'o mimbóráí'o úmaimo mérauyantemba símakaanda-fasi'aemba tímakaunda pósa mimbóráí'a úmai méranaawe. 23 Emá kesé'a kááísamai méraana'a kemá miwísé'a kááísamai méraunda pósa miwí kááísamai méranaawe. Marapá'-wáásí mindá tuwánésa sésa Maníkó Ísumba ai'mákaisana kunkáiye sénááwe. Enarumbó símakaandantemba miwíwárá'á tímakaanda pósa marapá'-wáásí tuwánésa sésa érai'e sénááwe. 24 Kesifóo maramó ímbo úmakondara'a enarumbá siméma fasi'aémbá símakaane. Símakaanda-waasi kesé'a méraiwae sé'a súnda pósa kesí fasi'aémbá awánánááwe. 25 Kesifóo usukáéwi óne. Marapá'-wáásí embá ímba wéawanaafo kemó awánáúnda símakaanda-waasi kentáfésa sésa Maníkó ai'mákaisana kunkáiwaiye wésewe. 26 Entáfé'a miyámó iwáí méraiye símai paápé uwátimunasa enarumbó símakaandantemba miwí tirumbá simíya'a miwísé'a méranaumne. Entáfé'a miyámó iwáí méraiye símai paápé uwátínkare'a paápé úmai kónaumne Ísu inaifínkémbá miyá siyáiye.

18

Ísumbo ta'ótokaan-aai.

1 Ísu simátimena wení kísau-waasise'a Kíndáróni-nomba kofatésa taai-kanáágúnéfímbá komérowana 2 Ísu wení kísau-waasise'a mintáí-kánáágúnéfá'á kógo upa'á Yúndasi Ísuni pintaru'-wáásígó mintáí-kánáágúnéfá'á awánópa'a 3 mifá'á kúmba ámáán-kawaa-waasiye óraa'-amaan-kisau-waasiye i-wáásíwárá ámáán-danka'-i-waasiwara'a ti'márówana Yúndasi tí'maena taánáínkwara paepáé'wara'a maimaésa ómbá to'maésa mintáí-kánáágúnéfá'á kumbá 4 Ísu wempá'ó tínda-tantaakomba iséna wení waásifinkemba íyáfasinena miwí túranka'a koména tísai ena séna nááwani ayaafáíya wéoo súwasa sésa 5 Ísu Násaretifakewintafeta wéayaafai-une suwaná séna miwántáfé'o sembá kemá úne súwasa Yúndasi Ísuni pintaru'-wáásígó póna miwísé'a méraiye. 6 Kemá úne Ísu súwasa miwí tauwérópa'a tanaambá fowaná 7 Ísu aneka'á tísai ena séna nááwani ayaafáíya wéoo súwasa Ísu Násaretifakewintafeta wéayaafai-une suwaná 8 Ísu séna é'a simátímakaumne. Maandá kemá úne. Kembó siyaafáí ontáfé'a maankwáásí étinkaiyasa koró Ísu súmba 9 Maníkóntáféna siyáimba símakaanda-waasi ímba sáwí-amba arááíwakaawe siyónka'a póna paápé úmai minááí súwana 10 Sáímoni Pítaa paepáé'a awáúfínkémbá taútuwena aifa'-ámáán-káwáágóní kísau-waasigon-áá'a fagáúsuwomba minkísáú-wáásígón-áwí'a Márákáasi wenáá'a fagáúsuwowana 11 Ísu Pítaantafena séna ení paepáé'a awáúfímbá wiyuwó. Sí'o índa-i'a uwásinkaiyambanifo kesifoní kísau ímba tuwánáúmpo miyá ónaumne Ísu siyáiye.

Ísumba áí'maesa Ánásimpa'o kuráan-aai.

12 Ísu súwasa i-wáásíyé miwítí óraa'-waasiye ámáán-danka'-i-waasiye Ísumba ta'óto'mai ayáánka'a kárá'umaesa 13 áí'maesa aifa'á moórá-kawaagon-awi'a Ánásimpa'a tuwaná wemá Káyafaasin-ásáánko éna minkánáá Káyafaasi aifa'-ámáán-káwáágó póna 14 ááéma simátimena séna Yúndaa-waasi seyaafá'á púwófo séna moóráwigo puwíníye siyáiwain-ásáánkompa'a kuráawe.

Pítaa ímba awánáúnda-waasin-iyemo siyáin-aai.

15 Kuwasaráí Ísuni kísau-waasiyai moóráwigo Sáímoni Pítaae moóráwigoe'a Ísumba arááíwa'maesarai kuyambá aifa'-ámáán-káwáágó moóráwigomba awánasuwowana aaimó ísópa'a Ísumbo máánkaropa'a imérowana 16 Pítaa máápa'-ontafimba mérowana aifa'-ámáán-káwáágó awánówi iyuweréna ontará'ó káráwiyon-arasigomba simámuwana ontá tiyankówana Pítaamba áí'maena íyáferowana 17 minárásígó Pítaamba awánéna áísai ena séna minkwáásígóní kísau-waasiya'ono súwana Pítaa séna ímbanifo kemá fí'on-kwaasi úne súwasa 18 táwitafesa ésa kísau-waasiye i-wáásíyé iyamá agaimakésa tiyáámba wégaufuwana Pítaa minááí simásuwena iyará'á koména ayáámba kauráiye.

Aifa'-ámáán-káwáágó Ísumbo áísai uráin-aai.

19 Pítaa iyamá wégaufuwana aifa'-ámáán-káwáágó Ísuntafena séna simátímakaanda-aai simásimiyo. Ení kísau-waasisafewara'a simásimiyo súwana 20 Ísu séna Yúndaa-waasiti óraa'-amaan-daumpa'e kári'-amaan-daumpa'e simáti-simatimbo émaunda afora'ó sémaunda ímba aúpá'á simátímakaumpo 21 nóintafewa wésisai-ono. Kesááimo ísaraawi tísai inasá simátímakaunda-aai ísaraamba pósa sénááwe súwana 22 ámáán-danka'-i-waasigo Ísumba tufuwéna séna aifa'-ámáán-káwáágómó sinká'á ímba miyá siyó súwana 23 Ísu séna sáwí-aaimo súndarakaa misáwí-ááí ááéma afora'á isinó. Kawe'-ááímó súndasafe nóintafewa sínkamono súwana 24 Ánási ai'marówasa ayáámpinken- anda ímba awátuwesa minándáwárá'á áí'maesa Káyafaasi aifa'-ámáán-káwáágómpá'á kuráawe.

Pítaa ímbo awánáúnda-waasin-iyemo siyáin-aai.

25 Aifa'-ámáán-káwáágómpá'á Ísumba kuwaná Pítaa iyará'á ména ayáámba wégaufuwasa iyará'ó máún-kwaasi áísai esa sésa ewárárá minkwáásígóní kísau-waasiya'ono suwaná minááí umémpa'a tuwéna séna ken-ímbaniye súwana 26 aifa'-ámáán-káwáágóní kísau-waasigo Pítaantafena séna emá minkwáásígóe'a taai-kanáágúnéfá'á méraaya'a tuwánérúnda éraira súno séna Pítaamo áá'o fagáúsuwowini akún-ándáfákéwí súwana 27 Pítaa aneka'á séna ken-ímbaniye súwana kokórigo áái siyáiye.

Ísumba Páíratimpa'o áí'mae kuráan-aai.

28 Kokórigo áái súwasa siyarónka'a Káyafaasini naaúmpakemba Ísumba áí'maesa kámáni-oraakoni pááimpa'a máankesa sésa ímba Yúndaa-waasiti naaúmpa'an-ifo fí'on-kwaasiti naaúmpa'a iyéta tíyótaimo í-tánómbá ínta náúnafo sésa ímba íyúwana 29 Rómu-kamani-kawaagon-awi'a Páírati kúwákárúwena kuntísai ena séna minkwáásí nóra inkakena aaifimbá maenkánaera séo súwasa 30 sésa ímbo sáwí'o uráinkakaa ínta áí'maeta túsino suwaná 31 Páírati séna keyááríka'a áí'mae'a kentí ámáámbo makénten-úmai simánkáaro súwasa minYúndáá-óráá'-wáásí sésa Rómu-kamani-waasi moóráwigombo tufú'maimo utáíyantafesa aambá fáí'makaawe sumbá 32 ááéma Ísu simátimena séna aaraa-táíyá'á sínkamiya'a uwónaumne siyáin-aai paápé úwasa áí'maesamo kumbá minááísáfésa uwaná 33 Páírati naaúmpa'a kunuweréna iyéna Ísumba áántena séna emá Yúndaa-waasiti kawáágówá ónó súwana 34 Ísu séna ení imáyáafinkena sísai ó waásiya simámakaawawa sísai ónó súwana 35 Páírati séna kemá ímba Yúndaa-waasi úne. Ení waásiye óraa'-amaan-kisau-waasiye áí'maesa kempá'á tiyáafo nóra ónasawa'iyo súwana 36 Ísu séna kemó kawáá-í'o úndama ímba marapá'á wéraiye. Kemó kawáá-í'o úndamo marapá'ó wérainkakaa kesí kísau-waasi tíyááwaisino. Yúndaa-waasi kembá ta'ótoraafo sésa tíyááwaisino sésa ta'ótokaawe. Kemó kawáá-í'o úndama ímba marapá'á wéraiye súwana 37 Páírati áísai ena séna kawáágówá ónó súwana Ísu séna é'a séne. Mindásafe'a marapá'á kumúnana masínkaraimba pó'a arupíse-aai wésimatimune. Arupíse-aaisafesamo aamoimó owí kesááima wéisaawe súwana 38 Páírati séna nóin-aaiya arupíse-aain-iyo siyáiye.

Ísumba tufuwíyana puwínomo siyáin-aai.

Páírati simásuwena kúwákárúwena Yúndaa-waasisafena séna wemó sáwí'o uráimbo simásímakaamba saafá únana ímbanifo 39 tíyótaimo í-tánón-kánáá tintembá moórá-waasi áántaawa'a ándáfakembo awá'ankaundantemba minkánáámó tinká'á Yúndaa-waasiti kawáágóná awá'ankanaumno tísai ena súwasa 40 óraaka sésa ímbanifo wembá ímba awá'ánkénda Párápásimba awá'ankaao suwaná Párápási tiyéna uménté'a in-kwáásín-iye sésa wembá awá'ankaao siyáawe.

19

1 Suwaná Páírati i-wáásí simátimuwasa Ísumba áwíyandasamba áwiyonku'-nésa 2 óraa'-waasiti kámo'an-iye sésa áwíyandama owepámai Ísu a'nómpímbá kufé'ankesa naae-únánkwátói óraa'-waasiti unáánkwátóin-iye sésa uwánkesa 3 karaánáá'a ankésa moórá-mora wempá'á tésa sésa Yúndaa-waasiti kawáágó óne sésa tiyáántamba tufúto'naamai uráawe. 4 Tufúto'naamai uwaná aneka'á Páírati kúwákárúwena seyaafá'-wáásísáféna séna ísáaro. Ímba sáwí'o uráintafe'a áí'mae'a túranka'a máánkaraana'a awánaaro. Ímba sáwí'a uráiye súwana 5 Ísu kúwákárúwena a'nómpímbá áwíyandawara naae-únánkwátóiwara'a kúwákárúwowana Páírati simátimena séna minkwáásígómbá awánaaro súwasa 6 óraa'-amaan-kisau-waasiye ámáán-danka'-i-waasiye awánésa óraaka'-oraaka'a sésa aaraa-táíyá'á tufíyana puwíno suwaná Páírati séna wemá ímba sáwí'a uráimba pó'a kemá ímba tufuwónaumpo kembiwí áí'mae'a aaraa-táíyá'á mátufuworo súwasa 7 Yúndaa-waasi sésa wemá séna Maníkón-áánimba úne sémáyáímbanifo kentáásí ámáánko séna miyámó síndawimba tufuwíyana puwíno símakaampimba póta tufuwónaumne suwaná 8 Maníkón-ááninko úne siyáin-aai Páírati isówana áfááraumai áá'a úwana 9 naaúmpa'a kunuweréna imaéna Ísumba áísai ena séna nááfakewiya'ono súwana Ísu iséna ímba aaí súwana 10 Páírati séna kemó áísai únda nóra séwa ímba aaí wéseno. Kemó aaimó senasamó ésa awá'ankanaawe. Kemó senasamó ésa aaraa-táíyá'á tufuwíyama puwínone. Mifásí'áémbá tokáumne súwana 11 Ísu séna Maníkómó mifásí'áémbó ímbo ámakainkakaa ímba toráásino. Maníkó ámakaifo sí'maenamo enká'ó másinkaiwaini sáwí-kisaugo ení sáwí-kisaugomba íyáákaraiye siyáiye. 12 Ísu súwana Páírati minááí iséna séna nóra'iyo ke minkwáásí awá'ankanae'a wéune súwasa Yúndaa-waasi óraaka sésa emó awá'ankemo éma ímba Rómu-kamani-aifa-kawaagoni waási-i'a wéone. Ísu séna kemá kawáágó úne siyáintafena Rómu-kamani-aifa-kawaagomba íyáákanaemo siyáintafe mindásafewe séma ímba awá'ankaao suwaná 13-14 Páírati minááí iséna Ísumba áí'maena máápa'a óntan-arumbo akwítukom-barupa'a Yúndaa-waasi-taaifinken-awi'a Kápata-marupa'a kumbéna aaifimbó maitínkáám-barupa'a kumbéna Yúndaa-waasisafena séna kentí kawáágón-iye súwana tíyótaimo í-tánón-kánáá aafáyáaraamba úwana káfékaamba wááwái kárika'a tínena úwana Páírati Yúndaa-waasisafena séna kentí kawáágón-iye súwasa 15 ímbaniye sésa óraaka'-oraaka'a sésa aaraa-táíyá'á tufuwíyana puwíno suwaná Páírati tísai ena séna kentí kawáágómbá aaraa-táíyá'á tufuwónaumno. Mindá tirááíya taíyó súwasa óraa'-amaan-kisau-waasi sésa Rómu-kamani-aifa-kawaago weyáá kentáásí kawáágón-iye suwaná 16 Yúndaa-waasi-taaigo íyáákontafena Páírati séna Ísumba aaraa-táíyá'á tufúwóro séna tímakaiye.

Ísumba aaraa-táíyá'ó tufúkáan-aai.

17 Páírati timúwasa i-wáásí Ísumba áí'maesa tufuwíyan-aaraa-taima wembá ámúwana áúwaata'maena tufuwíyan-aempa'o kúmba mináémpá'-áwí'a a'nónayaantapa Yúndaa-waasi-taaifinkemba Kórígótaafa mináémpá'á kuwasá 18 aaraa-táíyá'á aíyayaanka'a tufúsúmaresa kae'-wáásíyáí Ísuni séfasefa'-arausampa'a aaraa-táíyá'á tufúsúmaresa Ísumba afufumpimbá tufúsúmarowana 19 Páírati wení kísau-waasisafena séna Ísu Násaretifakewi Yúndaa-waasiti kawáágón-iye sé'a agaimái a'nónká-táíyá'á máráaro súwasa 20 kaumbo-wáásí tááifinkemba Yúndaa-waasi-taaifinkene Rómu-waasi-taaifinkene Kíríki-waasi-taaifinkene agaimárówasa sáwífa'-waasi awánomba tufúwún-aempa'a óraa'-naopa'a ewaa'á wérowasa sáwífa'-waasi mináúfáímá awánésa toráumai ísówasa 21 Yúndaa-oraa'-amaan-kisau-waasi Páíratintafesa sésa Yúndaa-waasiti kawáágón-iye ímba miyá símai agáínda wemá séna Yúndaa-waasiti kawáágó úne miyá símai agauwó suwaná 22 Páírati séna é'a agaimakáumne siyáiye. 23 I-wáásí Ísumba aaraa-táíyá'á aíyayaanka'a tufúsúmaresa wení unáánkwátói maimaésa éíyainka'a tuwímbaresa moórá-mora-i-waasi éíyain-kwaasi minúnánkwátói maimaésa moórá-ampanta paákákén-únánkwátói ímbo farúmakon-ampanta maimaésa sésa 24 ínta tafeónaumpo sésa ááfésa tíyáananasa nááwa íyáákenawa máíníyo sumbá Maníkón-aai aúfáífimba agaimaréna séna kesí unáánkwátói tuwímbai maimaésa moórá kesí ampantarátáfésa ááféma tiyaráawe siyónka'a pósa i-wáásí miyá uráawe. 25 I-wáásí miyá uwasá Ísuni waási aaraa-táíyá'ó tufún-taigoni áwáufimba mésa Ísun-anówa úwana wenáúnko Kórópasi awaainínkón-áwí'a Máríyaa úwana Mágátáraa-naopaken-ininkon-awi'a Máríyaa úwasa miyáumai-inimba aaraa-táígóní áwáufimba mérowana 26 Ísu wenanówamba awánéna kembá Yónimba suwánéna anówantafena séna miwá enáánimban-iye séna 27 kentáféna séna miwá enanón-iye súwa'a isé'a kesí naaúmpa'a móankare'a káráwiyaumne.

Ísumo pukáin-aai.

28 Minkákémbá Ísu imáyáa éna séna seyaafá-kísáú tai'áúmne súmba sáwí-imayaagomo ta'ótokaimpinkemba awátinkaunda-kisau seyaafá-kísáú taí'ásuwaumne séna Ísun-aai Maníkóní aúfáífinkemba paápé índasafena Ísu séna nontáféna sínkáíye súwana 29 ándá-aran-domba ika-nómbá anaféúmpímbá wérowasa faru-táénáma mindómpímbá tu'maésa ofiyen-táemopimba sinúfaimaesa náínkwae sésa Ísun-óika'a mósá márówana 30 Ísu néna séna seyaafá-kísáú taí'ásuwaumne séna a'nómbá kífaena afowan-ayáámpimba wenámútamba to'maréna pukáiye. Ísuni awáúfímbá waantáámbó faiyáin-aai. 31 Ísu weyááríka'a puwúwasa Yúndaa-waasimo saagon-kánáá tíyótaimo í-tánón-kánáá aafáyáaraamba úwasa pósa sésa saagaan-kánáárá'á puwíyan-kwaasi aaraa-táíyá'á máéfo sésa Páíratimpa'a tésa sésa puwíyan-kwaasi ímba úwoi tiyúwéwasa aaraa-táíyá'á méraaro. Tísamai ankaisíyasa ááéma puwíyasa taaiyakémbá marapá'á múratuwaaro suwaná 32 Páírati ewé súwasa i-wáásí Ísuni séfasefa'-arausampa'o tufúsúmaron-kwaasi tísamai koankaisésa 33 Ísumba taawánomba é'a pukóntafesa wenaísamai ímba ankáísúwana 34 moórá-i-waasigo Ísuni awáúfímbá waantáántámbá faúwana naaewárá nonkwárá'á kunkáiye. 35 Mindámo awánáúndawi simátímakaumne. Awáné'a érai'-aai súnda pó'a isé'a sé'a érai'e sénááwe. 36 Maníkón-aai aúfáífimba agaimaréna séna wenayáátámba ímba ankaisónááwe agaimaréna siyónka'a pósa i-wáásí miyá uráawe. 37 Moóráfa'a agaimaréna séna waantáántámbó fáíyamba afuwónááwe agaimaréna siyónka'a póna paápé uráiye.

Ísumbo utaráan-aai.

38 Yósepi Árímátíyaa-naopakewi Ísun-aai isówi éna Yúndaa-oraa'-waasi táároi inkaiséna wenáwí'a áwiyotuwena Ísumo puwúnka'a Páíratimpa'a téna séna Ísun-áúma utánáifo simiyó súwana Páírati séna kanaámpó máínone súwana Yósepi Ísun-áúma komaúwana 39 Níkótímási ááéma Ísumpa'o nó'waambo tiyáiwai asaa-wiyúmbó úm-basawemba óraa'-masawemba kae'á maimaéna Yósepimba kóáí'maesarai 40 Ísun-áúma komaimaésarai ampantafímbá minásáá-wíyúm-básáwénkwárá'á kárá'umaesarai tésarai Yúndaa-waasi miyáumaimo utaantembá pósarai miyáumai utarááye. 41 Ísumbo tufúkáan-aempa'a taai-kisáú wérowana utaráan-ontan-aima ímbo waási utarón-ontan-aima wérowasarai 42 saagaan-kánáámá ampáámbán-iye sésarai minóntán-aima ewaa'á wérontafesarai Ísumba mimpímbá máutaraaye.

20

Ísu pukáimpinkembo íyáfasinkain-aai.

1 Sondaará'á siyarónka'a ímba sán-karowana Máríyaa Mágátáraa-naopaken-ininko utámakopa'a wéna koawánómba óntan-aigoni óikaken-ontamba maisukówana koawánéna 2 awaantanténa Sáímoni Pítaante kenté'a tasimásimena séna kentáásí óraakon-áúma óntan-aifinkemba maimaésa nááfara makáao súwakai 3 Pítaae kesé'a utámakon-ontan-aifa'a kónae sékai 4 suwaantantékai kówáyamba kemá Pítaamba kóyááke'a aifa'á óntan-aifimba kówánda 5 kífae'a ampanta aantemba wéromba awáné'a ímba óntan-aifimba íyáferaawanana 6 Sáímoni Pítaa téna óntan-aifimba íyáferena awánómba ampanta aantemba wérowana 7 Ísun-a'nónkákén-ámpántá moórá-aempa'a wérowana awánówa'a 8 óntan-aifimba aifa'ó kówándawi íyáfere'a awáné'a sé'a érai'a pukáimpinkemba íyáfasinkaiye séwándanifo 9 Maníkón-aai aúfáífimba agaimaréna séna pukáindafinkemba íyáfasinainiye siyáimba ímba ísámai kawe'á ówáyamba 10 kenkáísí naaópakai kuráuye.

Ísu paápé úwana Máríyaamo awánarain-aai.

11 Naaópa'a kówáyana Máríyaa óntan-aigoni óika'a ména ifi'á wétena kífaena óntan-aifimba awánómba 12 kae'-wáásí waén-únánkwátóiwara'a Ísumbo utámakom-barupimba mésarai moóráwigo a'nómpá'á maúwana moóráwigo aísamaifa'a méroyana Máríyaa tuwánówasarai 13 sésarai menínínkóo nóintafewa ifi'á wétaano suyaná Máríyaa séna kesí Fasi'aénkómbá maimaésa nááfara makáao sé'a ímba wéraisa'a wéawanaumne 14 simásuwena waeréna awánómba Ísu úmbanifo ímba awánéraase úwana 15 Ísu séna menínínkóo nóin-ifira wétewa nááwan-ayaafaawa wéono súwana Máríyaa séna taai-kisáúrá'ó káráwiyaiwai iyé-ímáyáá éna séna emó maimaémo nááfa'o maké simásimiyo. Komaénae súwana 16 Ísu séna Máríyaao súwana méwaerena wenááifinkemba séna Raaponai súmba maanááífínkémbá waé'mai séna kesí Fasi'aénkóo súwana 17 Ísu séna kesifompá'ó íyóndasafe'a úmpo ímba ta'ótoraao. Kesífárawaisai kosimátime sé kesifoné kentifompá'á iyúne. Kesí Maníkóné kentí Maníkómpá'á iyúne súwana 18 Máríyaa Mágátáraa-naopaken-ininko Ísuni kísau-waasi kosimátimena séna Fasi'aénkómbá awánáúmne séna Fasi'aénkómó sún-aai simátímakaiye.

Ísuni waási wembó awánaraan-aai.

19 Misóndáágóní fenómpinka'a Ísuni kísau-waasi Yúndaa-oraa'-waasisafena táá'a úwasa naaúmpa'a imésa ontá wisukówana Ísu túranka'a paápé éna séna aáno úmai méraaro séna 20 ayáánarumpin-afiwara awáúfín-áfíwárá'á aráátimuwasa miwítí Fasi'aénkómbá awánésa pósa áfááran-aamoi uwánkówana 21 Ísu aneka'á séna aáno úmai méraaro. Kesifomó si'mákaintemba miyáumai kembiwí ti'máráana'a kesí kísau komáéro séna 22 wenááma áútimena séna Maníkóní Ufaen-ámútánkómbá tíménana kesé'a mérainiye. 23 Sáwí-imayaamo maitiyuwáíyanamo éna misáwí-ímáyáá tai'áíníye. Ímbo maitiyuwáíyanamo éna misáwí-ímáyáá úwoi waé'wae'a íníye Ísu siyáiye.

Tómaasi Ísumbo awánarain-aai.

24 Ísu paápé úwasa wení kísau-waasi awánasuwonka'a Tómaasi moórá-awi'a Títímási mináwíkóní áwáuma amáántágae'a wemá fí'opa'o maémomba 25 túwasa simámesa sésa Fasi'aénkó paápé isatá awánáúmne suwaná Tómaasi séna ayáánarumpin-afiwara awáúfín-áfíwárá'ó awáné'o ta'ótorekaa sé'a pukáimpinkemba íyáfasinkaiye súsino súwasa 26 afakaeté-no'waamba maisuwésa Tómaasiwara'-úmai aneka'á wení kísau-waasiye naaúmpa'a imésa ontá wisukówana Ísu túranka'a paápé éna séna aáno úmai méraaro séna 27 Tómaasintafena séna siyáánarumpimba ta'óto'mai awáné suwáúfímbá ta'óto'mai awáné sé kentáfé karo'é sénafainifo érai'e siyó súwana 28 Tómaasi séna kesí Fasi'aénkóo emá kesí Maníkó óne súwana 29 Ísu séna ááéma ímba suwánarempo karo'é siyáandaniye. Káfé'a suwánáánda po érai'e wésene. Ímbo suwánaawimo ésa érai'emo sésamo timankúnkúmbo ésa aamoí isaná tirunkó kawe'á íníye Ísu siyáiye. 30 Ísu wení kísau-waasi súrankata fí'o-fi'on-kisau-waame'a aráásimuwata tuwímbai maankwándááífímbá ímba agaimakáundanifo tuwímbai agaimakáumne. 31 Ísu Maníkón-ááninko póna wemó íyáfasinankaraiwain-iye sé'a maanáúfáí agaimakáumpo Ísun-aaisafesa timankúnkúmba ónááwe. Miyámó timankúnkúmbo ésa Ísuwe'a kááísamai maé'mae'a ónááwe sé'a maanáúfáí agaimaráúmne.

21

Afakaeté-waasi Ísumbo awánaraan-aai.

1 Ánaaemba Táípíriyasi-waaunkoni áwáífa'a Ísu miyáumai paápé úwasa wení kísau-waasi awánaraawe. 2 Wení kísau-waasi túwaandu uwáí miwí túwí'a Sáímoni Pítaawe Tómaasi moórá-awi'a Títímásiye moóráwigo Káríri-aempakemba Kéna-naopaken-kwaasigon-awi'a Nátániyeriye Sépétin-ááninkaiye fí'on-kae'-waasiye miyáumai-waasi túwaandu uwaná 3 Sáímoni Pítaa simátimena séna mófáá'a kotoránae'a kúne súwasa kesááwárá'á montá kónáisaiye sésa nompín-táómpimba íyátesa kumbá nó'waamba mófáá'amai wima'wima'-umbá ímba mófáá'a torówana 4 siyarónka'a Ísu nonáwáífa'a mérowasa ímba awánéraase uwaná 5 Ísu séna iyámpóísono. Mófáá'a tokáao súwasa ímbaniye suwaná 6 Ísu séna mare'mare'-únámbá tiyáánúrapa'-aempa'a nompímbá túwéwana kumína'a mófáá'a tóráaro súwasa wemó súnten-umba sáwífa'-mofaa'a tórówana mindómpín-táómpimba ímba kanaa'á márááraantamba éna ówitowa'a 7 kemá Pítaantafe'a sé'a epínda Fasi'aénkón-iye séwánana Pítaa minááí iséna kísaumo maíndasafena paákákén-únánkwátóimo faú'maromba minúnánkwátói maimái úmaena nompín-táómba tuwéna nompímbá ásáfena nonáwáífa'a kúwana 8 nonáwáí ewaa'á wérowata fí'on-kwaasisa mindómpín-táómba maimaéta mare'mare'-únámbá tafisímaeta kówándasa 9 nonáwáífa'o ásáfaawandasa iyamá wégowana mófáá'wara tónkwárá'á wéagauwata awánááwánanasa 10 Ísu séna tóráám-bofaa'a tuwímbai maimaé'a teró súwana 11 Sáímoni Pítaa nompín-táómpimba íyátena mare'mare'-únámbá tafisímaena nonáwáífa'a mámarowana óraa'-mofaa'a 153 mofaa'a wéna sáwífa'-mofaa'a wérombanifo mare'mare'-únámbá ímba tararówana tafisímaena nonáwáífa'a mámarowana 12 Ísu simásimenasa séna tamandaaró súwata nááwa'ono séta áísai ónae séta ówándasa ímba áísai eta Fasi'aénkó iyé-ímáyáá ówánanasa 13 Ísu mófáá'wara tónkwárá'á maimáísa símakaiye. 14 Ísu pukáimpinkemba íyáfasinkena kae'-í'a paápé uréna kaumbogóntá aneká awánaraumne. Ísu Pítaantafena kesí waásiya'a káráwiyuwomo siyáin-aai. 15 Tómbá násúwówana Ísuma Sáímoni Pítaantafena séna Yónin-ááninko Sáímoniyo. Miwí íyáákewa enarumbá wésimeno súwana séna ewé Fasi'aénkóo en-ímáyáámó únda é'a suwánaraane súwana Ísu séna kesí sipisípi-araaka'a káráwiyuwo séna 16 aneka'á Ísu áísai ena séna Yónin-ááninko Sáímoniyo. Ken-ímáyáá wéono súwana séna ewé Fasi'aénkóo en-ímáyáámó únda é'a suwánaraane súwana Ísu séna kesí sipisípiya'a káráwiyuwo séna 17 kaumbo-í'a Ísu áísai ena séna Yónin-ááninko Sáímoniyo. Ken-ímáyáá wéono súwana kaumbo-í'a áísai ena súntafena Pítaan-arunko umbaí tówana séna Fasi'aénkóo seyaafá-tántáá'á é'a awánaraandasafe en-ímáyáámó úndawara'a é'a suwánaraane súwana Ísu séna kesí sipisípiya'a káráwiyuwo. 18 Érai'a simáme'a súne. Emá aú-waasi méraanda po ení unáánkwátói ane'maké ení imáyáafinkemba úwoi wénompo waurámbó kéma enayáámba fárútuwenasa ímbo embó arááímo táíndafa'a máankanaawe Ísu séna 19 minááímó súmba Pítaamo miyáumai puwéna mindá Maníkón-áwí'a mósá maráínone séna Pítaantafena séna kesirááíma wauwó siyáiye.

Ísunte Yóninte-taai.

20 Ísu Pítaantafena súwana Pítaa kowaeréna moóráwigomba awánarai. Ááéma tómbó nopa'á Ísuni ewaa'á ména séna Fasi'aénkóo nááwa ení pintaru'-wáásí íníyo siyáiwaimba 21 Pítaa kowaeréna awánéna Ísumba áísai ena séna Fasi'aénkóo minkwáásíndó súwana 22 Ísu séna kemó sé'o wemá úwoi maambárárá'á méraina'a kemá kumónaumnemo sendamá ímba endén-ifo kendén-iye. Emá kesirááíma wauwó Ísu súwasa 23 wení kísau-waasi ímba kawe'-úmai ísónkakemba sésa wemá ímba puwíníye sésa simátíma'mae kuwaná Ísu miyán-ááí ímba siyáimbanifo wemá úwoi méraina'a kemó kumónaumnemo sendamá ímba endén-iye Ísu siyáiye. 24 Ímba puwíníyemo siyáan-kwaasi kemá Yóni úne. Minááí simátime'a aúfáífimba agaisuwaúnda minááí érai'-aain-iye. 25 Ísumo maiyáin-kisau tuwímbai agaé'a tuwímbai ímba agaiyáunda pó'a seyaafá'ó agaisuwé'o é'a seyaafá'-márámá faráátasuwaunafo sé'a súne. Kemá Yóni súnda-aai taí'áiye.