The New Testament of our Lord and Saviour Jesus Christ
1:1 Songon on ma tarombo ni angka ompu na umpompar Jesus Kristus, pomparan ni si Daud, pomparan ni si Abraham. Sian si Abraham lalu tu si Daud dapot ma angka goar na di toru on: 1:2 Abraham, Ishak, Jakob, Juda dohot angka kahanggina, 1:3 si Peres dohot si Zerah (inangna margoar si Tamar), si Hesron, si Ram, 1:4 si Aminadab, si Nahason, si Salmon; 1:5 si Boas (inangna margoar si Rahab), si Obed (inangna margoar si Rut), si Isai dohot Raja Daud. 1:6 Sian si Daud lopus tu na tarbuang halak Israel tu Babel dapot ma angka goar-goar na di toru on: Si Salomo (anak ni si Daud, sian dongan saripe ni si Uria hian), 1:7 si Rehabeam, si Abia, si Asa, 1:8 si Josapat, si Joram, si Usia, 1:9 si Jotam, si Ahas, si Hiskia, 1:10 si Manase, si Amon, si Josia, 1:11 si Jekhonya dohot angka kahanggina. 1:12 Sian hatiha habuangan ni bangso Israel tu Babel lopus tu hasosorang ni Jesus dapot ma angka goar na di toru on: Si Jekhonya, si Sealtiel, si Zerubabel, 1:13 si Abihud, si Elyakim, 1:14 si Asor, si Zadok, si Akhim, si Eliud, 1:15 si Eleasar, si Matan, si Jakob, 1:16 si Josep halaklahi ni si Maria, na manubuhon Jesus, na nigoaran muse Kristus. 1:17 Jadi mamungka sian si Abraham lopus tu si Daud, adong ma opat bolas sundut. Sian si Daud lopus tu hatiha na tarbuang halak Israel tu Babel, opat bolas sundut muse. Jana sian habuangan ni halak Israel tu Babel lopus tu hasosorang ni Kristus, laing opat bolas sundut. 1:18 Songon on ma baritana taringot tu hasosorang ni Jesus Kristus. Dompak martunangan dope si Maria dohot si Josep, hape na dung denggan do pamatangnia. I ma sian kuaso ni Tondi Parbadia. Hum na martunangan dope halahi hatiha i, nada marbagas dope. 1:19 Halak na burju do si Josep tunangannia i. Jadi giot antahonnia ma parhataan na tu si Maria. Giot sipsip do ninna rohania baenonnia songon i, angke inda jop rohania laho pailahon si Maria di jolo ni halak na bahat. 1:20 Hatiha manimbangi pangalaho i dope si Josep, marnipi ma ia. Diida ia ma di nipinia i, ro ma sada surusuruan mandok tusia, "Ale Josep, anak ni si Daud, ulang ho mabiar mambuat si Maria gabe dadaborumu. Harana, sian kuaso ni Tondi Parbadia do na di pamatangna i. 1:21 Sorang ma sian ia sada anak halaklahi, angkon Jesus do baenonmu goar ni Dakdanak i. Harana, giot paluaonNia ma bangsoNa sian angka dosa ni halahi be." 1:22 Tulus pe songon i sudena, anso laing tulus do muse sanga aha na nidok ni Tuhan marhite panurirangNa, na mandok songon on, 1:23 "Denggan ma pamatang ni sada bujing-bujing, sorang ma sian ia sada anak halaklahi. Digoari ma Dakdanak i Immanuel." (Di hata Ibrani, Immanuel astuanna "Debata do rap dohot hita".) 1:24 Dung ngot si Josep, dipatulus ia ma na nidok ni surusuruan ni Tuhan tusia. Dibuat ia ma si Maria gabe dadaborunia. 1:25 Tapi salolot di pamatang ni si Maria Dakdanak i, inda unjung rap modom si Josep dohot si Maria. Jadi dung sorang Dakdanak i, dibaen si Josep ma goarna Jesus.
2:1 Di kota Betlehem do hasosorang ni Jesus, i ma kota na di Luat Judea. Si Herodes do raja ni luat i di hatiha i. Jadi ro ma di hatiha i piga-piga halak angka parilmu bintang sian Habincaran tu Jerusalem. 2:2 Disapai halahi ma, "Di dia do Dakdanak na sorang i, i ma na gabe Raja ni halak Jahudi i? Na hami ida do bintangNa bincar di sabola Habincaran, jadi na giot marsomba tuSia do umbaen na ro hami." 2:3 Dung tarbege tu Raja Herodes barita i, tarsonggot situtu ma ia. Laing songon i dohot sude halak na di Jerusalem. 2:4 Disuru ia ma angka kapala ni malim dohot angka Siboto Surat anso marlagut. Dung i disapai ia ma tu halahi sanga na di dia Kristus i giot sorang. 2:5 Dialusi halahi ma, "Di kota Betlehem do, i ma na di Luat Judea. Harana songon on do disuratkon panurirang, 2:6 'Anggo ho ale Betlehem na di Luat Juda, inda bagi na ummenek ho sian angka kota na tarbonggal di Juda. Angke sian ho do ro sahalak Uluan, na manguluhon bangsongKu Israel.' " 2:7 Dung dapot Raja Herodes hatorangan i, disuru ia ma parilmu bintang na sian Habincaran i marsuo dohot ia di na buni. Dung i disapai ia ma halahi satangkas-tangkasna sanga sadihari do mamungka tarida bintang i. 2:8 Dung i disuru ia ma halahi kehe tu Betlehem dung ditonai ia songon on, "Kehe ma hamu, tangkasi hamu ma satorang-torangna taringot tu Dakdanak i. Jadi dung marsuo hamu dohot Dakdanak i, paboa hamu ma tu au, anso dohot muse au ro marsomba tuSia." 2:9 Dung dibege halahi na nidok ni Raja Herodes i, kehe ma, halahi. Di tonga dalan i, diida halahi ma mangulahi bintang i, i ma bintang na niida ni halahi di Habincaran. Mardalan ma bintang i di jolo ni halahi lopus maradian di inganan ni Dakdanak i. 2:10 Jop situtu ma roha ni halahi dung marnida bintang i. 2:11 Masuk ma halahi tu bara i, diida halahi ma Dakdanak i dohot si Maria inangNia i. Dung i dibuat halahi ma panyimpanan ni silua ni halahi, marsomba ma halahi pasahatkon silua, angka sere, hamonyan *HAMONYAN: Arga situtu do on, na nibaen sian sajenis hayu.* dohot miak na huskus. 2:12 Laho mulak halahi tu kotana, inda sian dalan na parjolo i be dibolus halahi. Angke ro do Debata paingotkon halahi markite-hite nipi, anso ulang be mangulahi halahi mandapotkon si Herodes. 2:13 Dung kehe parilmu bintang i, diida si Josep ma sahalak surusuruan di bagasan nipinia. Didok surusuruan i ma tusia, "Jongjong ma ho, boan ma Dakdanak i dohot inangNa i mangungsi tu tano Mesir. Disi ma hamu maringanan lopus ro Au mangulahi mangkatai dohot ho. Harana ditahi roha ni si Herodes do manjalahi Dakdanak i laho mamunusa!" 2:14 Tarsunggul ma si Josep, dioban ma Dakdanak i dohot inangNa i mangungsi tu tano Mesir, laing borngin i. 2:15 Disi ma halahi maringanan lopus mate si Herodes. Songon i ma tarjadi anso laing tulus hata ni Tuhan markite-hite panurirang na mandok, "Sian tano Mesir do Hupio anakKi." 2:16 Dung diboto si Herodes na dung dipaoto-oto ni parilmu bintang na sian Habincaran i ia, gabe muruk sajo ma ia. Diparuar ia ma parenta anso dibunu sude dakdanak halaklahi na marumur dua taon tu toru na adong di kota Betlehem dohot na humaliang i. Dipahombar ma i tu hatorangan na nitangkasannia sian angka parilmu bintang i. 2:17 Tarjadi ma na dung didok ni Panurirang Jeremia songon on: 2:18 "Tarbege ma sora di kota Rama i ma sora ni andung dohot na tangis hara ni parkancitan. Ditangisi si Rahel do angka dakdanaknia; nada ra ia niapoan angke ma mate sude dakdanaknia." 2:19 Dung mate si Herodes, diida si Josep ma mangulahi sahalak surusuruan di bagasan nipinia. 2:20 Didok surusuruan i ma, "Jongjong ma ho! Buat ma Dakdanak i dohot inangNa i, oban ma halahi mulak tu tano Israel. Harana, ma mate angka halak na giot mamunu Dakdanak i." 2:21 Jongjong ma si Josep, dioban ia ma Dakdanak i dohot si Maria mulak tu tano Israel. 2:22 Tapi tarbege muse ma di si Josep, si Arkhelaus anak ni si Herodes i do hape manggonti amangnia gabe raja di Luat Judea, gabe mabiar ma ia kehe tusi. Tapi hara ni na dung dapotan sipaingot ia sian Tuhan di nipinia, gabe tu Luat Galilea ma ia kehe. 2:23 Disi ma ia maringanan di sada kota na margoar Nasaret. Markite na songon i ma tulus na nidok ni angka panurirang, na mandok, "Nigoaran ma Ia halak Nasaret."
3:1 Dompahi, tarida ma si Johannes Pandidi di halongonan na di tano Juda. Disi ma ia mamungka marjamita. 3:2 "Pauba hamu ma rohamunu", ning ia, "harana inda pola lolot be, pungkaon ni Debata ma padalankon pangarajaionNia!" 3:3 Si Johannes on ma na nidok ni Panurirang Jesaya di angka hatania on, "Adong ma sada halak na pio-pio di halongonan, 'Pauli hamu ma dalan ni Tuhan; pahornop hamu ma dalan na giot bolusonNia.' " 3:4 Sian imbulu ni unto do dibaen pakean na nipake ni si Johannes on. Bobatnia sian bobak. Siapor dohot aer ni loba do panganonnia. 3:5 Marroan ma halak Jerusalem, dohot angka halak Judea na asing i dohot halak na donok tu Batang aek Jordan manopot si Johannes. 3:6 Dioku halahi ma angka dosa ni halahi, gabe dididihon si Johannes ma halahi di Batang aek Jordan i. 3:7 Bahat muse do halak Parise dohot Saduse na marroan tu si Johannes, anso tardidi. Dung diida ia halahi marroan, didok ia ma tu halahi, "Hamu angka pomparan ni ulok! Ise do mandok tu hamu, na bisa pasimbilon dirimunu sian muruk ni Debata na giot ro i? 3:8 Baen hamu ma pangalaho na pataridahon na dung muba rohamunu, sian angka dosamunu. 3:9 Dung i ulang didok rohamunu, tarpatigor hamu dirimunu muda didok hamu, 'Ompungnami do si Abraham.' Au ma mandok di hamu, sian batu i pe tarbaen Debata do pomparan di si Abraham! 3:10 Madung singkop kampak laho manaba hayu di uratna i. Sude hayu na so denggan parbatuna, sitabaon ma i, jana niambungkon tu api. 3:11 Anggo au, aek do hudidihon tu hamu. I ma pataridahon na dung muba rohamunu sian angka dosamunu. Tapi anggo na giot ro i di pudingku, Tondi Na Badia dohot api do didihononNia tu hamu. Gumodang dope Ia sian au. Hum mambuka tali ni sipatuNia pe tehe nada tuk dope au. 3:12 DitanganNia do anduri laho mamiari. PiaranNia ma emena i tu talobat, tapi anggo lapung tutungonNia ma tu api na so ra mintop." 3:13 Jadi di hatiha i ro ma Jesus sian Galilea tu Batang aek Jordan mandapotkon si Johannes, anso dididihon si Johannes Ia. 3:14 Tapi ditulak si Johannes do pangidoanNia i. Ning ia ma, "Au do na patut didihononMu! Jana biasi Ho ro tu au?" 3:15 Tapi dialusi Jesus ma, "Padiar ma songon i! Harana patut do oloanta sude aturan na nihalomohon ni Debata." Jadi dididihon si Johannes ma Jesus. 3:16 Dung sidung dididihon, manigor ruar ma Jesus sian batang aek i. Ompot ma mungkap langit, diida Jesus ma Tondi Ni Debata mijur songon darapati, songgop tuSia. 3:17 Dung i tarbege ma sora sian langit na mandok, "On do AnakKu Na Huhaholongi, jop do rohangKu mida Ia."
4:1 Dung i ditogu Tondi i ma Jesus tu halongonan, anso diuji Sibolis Ia. 4:2 Opat pulu ari opat pulu borngin honokna nada mangan Jesus. Gabe male ma Ia. 4:3 Ro ma Sibolis i didok ma tuSia, "Muda Anak Ni Debata do Ho, dokkon ma tu angka batu on anso gabe roti." 4:4 Dialusi Jesus ma, "Adong do tarsurat songon on: Nada hum sian roti sajo hangoluan ni jolma, tapi sian sude hata na nidok ni Debata do." 4:5 Dung i dioban Sibolis i ma Jesus tu Kota Na Badia. Dibaen ma Ia tu bungkulan ni Bagas Ni Debata. 4:6 Dung i didok Sibolis i ma tuSia, "Muda na tutu ma Ho Anak Ni Debata, ambur ma tu toru, harana angke adong do tarsurat songon on, 'Suruon ni Debata ma angka surusuruanNia manjago Ho, tarehonon ni halahi ma tanganna manjagit Ho ulang tombom patMu tu batu.' " 4:7 Dialusi Jesus ma, "Tapi laing tarsurat do, 'Ulang uji Tuhan Debatamu.' " 4:8 Dung i dioban Sibolis ma Jesus mangulahi tu sada dolok na gincat situtu. Dipatidahon Sibolis i ma tuSia sian i sude harajaan na di portibi on dohot sude hasangapanna. 4:9 Dung i ninna Sibolis i ma mandok Jesus, "Sudena i hulehen pe di Ho, muda ra Ho unduk marsomba tu au." 4:10 Dialusi Jesus ma, "Morot ma ho, Sibolis! Angke tarsurat do, 'Sombaonmu do Tuhan Debatamu, hum Ia sajo do oloanmu!' " 4:11 Ujungna, ditinggalkon Sibolis i ma Jesus, marroan muse ma manigor angka surusuruan laho mangoloi Ia. 4:12 Jadi dung dibege Jesus na dung tarhurung si Johannes, dipadao Ia ma diriNia tu Galilea. 4:13 Ditadingkon Ia ma kota Nasaret, kehe ma Ia maringanan tu kota Kapernaum. I ma sada kota di topi ni Dano Galilea na masuk tu Luat Zebulon dohot Naftali. 4:14 Hara ni na nibaen ni Jesus songon i, gabe tulus ma na nidok ni Panurirang Jesaya na mandok, 4:15 "Tano Zebulon dohot Naftali, i ma dalan laho tu laut, di ipar ni Batang aek Jordan, Galilea i ma inganan ni na so halak Jahudi! 4:16 Halak na maringanan di bagasan hagolapan madung marnida sondang na godang! Madung bincar sinondang na torang! Di halak na maringanan di luat na nilinggoman ni hamatean!" 4:17 Sian i ma dipungka Jesus marjamita mandokkon, "Pauba hamu ma rohamunu, dibaen madung donok Harajaan Ni Banua Ginjang." 4:18 Dompak mardalan Jesus di topi ni Dano Galilea, diida Ia ma dua halak parihan. Markaha-maranggi do halahi na dua. I ma si Simon (na margoar muse si Petrus) dohot angginia si Andreas. Hatiha manangkup ihan do halahi, angke marihan do karejo ni halahi. 4:19 Didok Jesus ma tu halahi, "Beta, ihutkon hamu Au, baenonKu ma hamu sijala jolma." 4:20 Manigor ditinggalkon halahi ma jala ni halahi i, diihutkon halahi ma Jesus. 4:21 Didatdati Jesus ma na mardalan i. Diida Ia ma dua halak nari na markaha-maranggi, i ma si Jakobus dohot si Johannes anak ni si Zebedeus. Na topet rap do halahi dohot amang ni halahi paturehon jala di bagasan parau i. Dipiohon Jesus muse ma halahi. 4:22 Laing manigor ditinggalkon halahi ma parau dohot amang ni halahi i diihutkon halahi ma Jesus. 4:23 Dung i dibolus Jesus ma sude Luat Galilea. Mangajari ma Ia di angka bagas paribadatan ni halahi. Dijamitahon Ia ma Jamita Na Denggan taringot tu Harajaan Ni Debata. Dipamalum Ia ma angka na marnyae dohot halak na markahurangan. 4:24 Tarbonggal do Jesus lalu tu tano Siria sude, gabe bahat ma marroan halak tuSia. Diparobani halak ma angka na marnyae dohot halak na marragam rupa hasusaanna. Adong ma i na hona begu, adong na solpoton, adong na pangpangon. Sude halahi dipamalum Jesus. 4:25 Bahat sajo do halahi na mangihutkon Jesus di hatiha i -- adong na ro sian Galilea, adong ma i na ro sian Luat Dekapolis (artina Sampulu Kota), adong na sian Jerusalem dohot sian Judea. Adong dope na ro sian luat na di ipar ni Batang aek Jordan.
5:1 Dung diida Jesus bahat ni halak i, manangkok ma Ia tu sada dolok. Juguk ma Ia disi. Dung i marroan ma anak siseanNia i tu lambungNia. 5:2 Dipungka Ia ma mangajari halahi. 5:3 "Martua ma angka na dangol di tondina, dibaen di halahi do Harajaan Ni Banua Ginjang! 5:4 Martua ma halak na marsak roha; angke na giot apoan do roha ni halahi. 5:5 Martua ma angka na lambok roha; dibaen teanon ni halahi do portibi on. 5:6 Martua ma angka na male dohot na manguas mida hatigoran, angke na giot pabutongon do halahi muse. 5:7 Martua ma angka na marasi ni roha, dibaen dapotan asi ni roha do muse halahi. 5:8 Martua ma halak na ias rohana, angke halahi ma na giot marnida Debata. 5:9 Martua ma angka na mambaen dame, dibaen nigoar do halahi anak ni Debata. 5:10 Martua ma angka na diayak-ayak hara ni hatigoran i, dibaen di halahi do Harajaan Ni Banua Ginjang. 5:11 Martua ma hamu muda diincahi jana diayak-ayak halak hamu, jana dipardok halahi ragam-ragam na jat na so tutu adop hamu hara ni Au. 5:12 Jop ma rohamunu jana marolop-olop ma hamu, angke godang do upamunu di banua ginjang, dibaen laing songon i do diayak-ayak halahi angka panurirang na jumolo sian hamu." 5:13 "Hamu do sira ni portibi on. Muda hambar sira i, tarpaancim dope he i? Nada adong be guna ni i. Siambungkononkon noma i anso didege-dege halak. 5:14 Hamu do sondang ni portibi on. Nada tarbunihon sada kota na di ginjang dolok. 5:15 Nada adong halak na manutung lampu, dung i ditutupi ia dohot belek. Tu inganan ni lampu do i dibaen halak, anso torang sude idaon ni halak na di bagas i. 5:16 Sugari angkon songon i ma nian torangna sinondangmunu di jolo ni halak. Anso diida halak parangemunu na denggan i. Gabe dohot ma halahi mamuji Amangmunu na di banua ginjang i." 5:17 "Ulang ninna rohamunu, na giot mansoadahon angka Tona ni ugamo Jahudi na niajarkon ni si Musa dohot panurirang-panurirang i, umbaen na ro Au. Nada na giot mangagohon i umbaen na ro Au, tapi na giot mambaen sanggam do. 5:18 Ingot ma! Salolot adong langit dohot tano on, satitik sanga sahurup na menek pe nada tola nisesa sian Tona i, lopus tulus sudena i! 5:19 Hara ni i, sanga ise na mangalanggar sada sian angka Tona i, sanga na ummenekna i pe, dung i diajari ia muse halak na asing mambaen songon i, gabe na ummenek do sisongon i di bagasan Harajaan Ni Banua Ginjang. Tapi sabalikna, sanga ise na padalankon angka aturan i, dung i diajari ia muse halak na asing mambaen songon i, halak na godang do sisongon i di bagasan Harajaan Ni Banua Ginjang. 5:20 Jadi Hudok ma tu hamu: Muda nada sumurung hatigoranmu sian hatigoran ni angka Parise dohot Siboto Surat, nada tarbaen hamu masuk tu Harajaan Ni Banua Ginjang." 5:21 "Madung dibege hamu do na diajarkon tu angka na tobang-tobang i: Ulang ho mamunu. Sanga ise na mamunu, angkon hona uhum. 5:22 Tapi anggo saonnari Au mandok di hamu, sanga ise na marmilas ni roha *MARMILAS NI ROHA: Dipiga-piga-piga naskah narobi, didok: Muruk di na so dalanna.* tu donganna, angkon diuhumi do; barang ise na mandok tu donganna, 'Raka' (artina 'Si soada'), hona uhum di jolo ni Mahkamah Ugamo; dung i barang ise na mandok tu donganna, 'Si naoto', tama ma ia diambungkon tu api naroko. 5:23 Hara ni i, muda kehe ho di sada hatiha marsomba laho pasahatkon haulmu tu Debata, hape taringot ho tu sada donganmu na marhancit ni roha tu ho; 5:24 muda songon i ma pangalahona, tinggalkon ma jolo haulmi, kehe ma ho mardame dohot ia. Dung i pe anso tola ho mulak pasahatkon haulmi tu Debata. 5:25 Sugari adong ma halak na mangaduhon ho tu paruhuman, jolo mardame ma ho tusia salolot tarbaen dope. Harana nada lalu dope tu sidang. Anggo so jolo diusahohon ho do pardamean, pasahaton ni bayo i ma ho tu panguhum. Pasahaton ni panguhum i muse ma ho tu soridadu. Baru ma dipamasuk soridadu i ho tu hurungan. 5:26 Situtu do na Hudok tu ho: Nada tarbaen ho ruar sian hurungan i, anggo so jolo margarar sude utangmi." 5:27 "Madung dibege hamu do pangajaran na mandok songon on: Ulang ho markarosuan. 5:28 Tapi anggo saonnari Hudok tu hamu: Muda adong halak na midaan dadaboru, gabe impol rohania, na dung markarosuan do ia dohot anak boru i di bagasan rohania. 5:29 Muda mardosa ho hara ni matamu siamun i, pulsikkon ma i anso ambungkon! Gumonan do mago deba parkokas ni pamatangmi ulang pado sudena niambungkon tu narako. 5:30 Muda hara ni tangan siamunmi do ho mardosa, gotapkon lalu ambungkon sian i! Gumonan do mago sabariba tanganmi, ulang pado sude pamatangmi masuk tu narako." 5:31 "Adong muse do pangajaran songon on: Ganop halak na manyirangkon dadaboruna, angkon lehenonnia do surat sirang tusia. 5:32 Tapi anggo saonnari Au mandok di hamu: Sanga ise na manyirangkon dadaboruna, asing ni na manyimbil dadaborunia i, bayo i do na mambaen gabe markarosuan dadaborunia i, muda marbagas ma anakboru i. Bayo na mambuat anakboru na songon i pe dohot do i markarosuan." 5:33 "Dibege hamu do poda na adong di angka ompunta: ulang porso janjimu. Sanga aha na nijanjihonmu mardongan sumpa tu Debata, angkon patulusonmu do i. 5:34 Tapi saonnari Au mandok tu hamu: Bagi na bia pe, ulang ho marsumpa. Ulang ho marsumpa markite-hite langit. Harana inganan hasangapan ni Debata do langit. 5:35 Sanga markite-hite tano on. Harana sidege-degean ni pat ni Debata do tano on. Sanga markite-hite Jerusalem, angke kota ni Debata do i. 5:36 Ulang ho muse marsumpa markite-hite ulumu, harana nada adong kuasomu mambaen bontar sanga mambaen lomlom sada pe sian obukmi. 5:37 Dok sajo ma 'Olo' sanga 'Nada' -- muda tamba sian i, sian Sibolis do i ro." 5:38 "Dibege hamu do adong muse pangajaran songon on: Mata do gonti ni mata, ipon do gonti ni ipon. 5:39 Tapi saonnari Au mandok di hamu: Ulang ma alo hamu halak na mambaen na so denggan tu hamu. Tapi sabalikna do! Muda ditampeleng halak hurummu siamun, laing tarehon ma ditampeleng ia hurummu siambirang i. 5:40 Muda diaduhon halak hamu tu paruhum laho mambuat bajumu, lehenkon muse ma dohot baju jubami disia. 5:41 Muda adong halak na mamaksa hamu mardalan mandongani ia sakilometer daona, dongani ma ia mardalan dua kilometer. 5:42 Muda adong halak na mangido bagi aha tu ho, lehen sajo ma songon i. Ulang pola tulak halak na giot manginjam sanga aha sian ho." 5:43 "Madung dibege hamu taringot tu pangajaran on: Haholongi ma donganmu, goyak ma rohamu mida alomu. 5:44 Tapi saonnari Au mandok di hamu: Haholongi ma alomu jana tangiangkon ma halak na mamparkanciti ho, 5:45 anso gabe dakdanak ni Amangmunu na di banua ginjang i hamu. Harana dipabincar Debata do mataniari tu halak na burju dohot tu halak na jahat pe. Diparo Ia do udan tu halak na tigor dohot tu halak na geduk roha. 5:46 Harana, muda hum halak na manghaholongi hamu do dihaholongi hamu, aha labo ni i di hamu? Nada he laing songon i do dikarejohon angka sitagi pajak i? 5:47 Muda hum donganmunu do dijalang hamu, aha ma pola surungmunu disi? 5:48 Angkon sanggam do hamu -- sarupa dohot Amangmunu na di banua ginjang i, sanggam."
6:1 "Ingot hamu ma! Unang baen hamu na niwajibkon ni ugamo di jolo ni na bahat, anso diida halak hamu. Muda songon i do dibaen hamu, nada lehenon di hamu upa na sian Amangmunu na di banua ginjang i." 6:2 "Jadi muda dilehen hamu silehenon, ulang paboa-boa hamu i songon na nibaen ni angka halak pangalancap. Anggo halahi, tagi do mambaen na songon i di angka bagas paribadatan dohot di angka dalan godang, anso dipuji halak halahi. Ingot hamu ma! Madung dijagit halahi hian upa ni halahi. 6:3 Tapi anggo hamu muda mangalehen silehenon, ulang pabotohon tu tangan siambirangmi na nilehen ni tangan siamunmi. 6:4 Indangkon pola adong halak na umbotoan i. Diida Amangmunu na di banua ginjang i do sanga aha na nibaenmunu di na so pamotoan ni halak. Jadi, lehenonNia ma upana di hamu." 6:5 "Muda martangiang hamu, ulang ma songon halak pangalancap. Na ringgasan halahi jongjong martangiang di angka bagas paribadatan dohot di sirpang-sirpang ni dalan, anso diida halak. Ingot hamu ma! Madung dijagit halahi upa ni halahi. 6:6 Tapi muda martangiang ho, masuk ma tu bilik, kunci ma pintuna i. Disi ma ho martangiang tu Amangmu na so tarida i. Diida Ia do sanga aha na nibaenmu di na so pamotoan ni halak. LehenonNia ma upa ni i tu ho. 6:7 Muda martangiang ho, ulang pola maradu ginjang songon na nibaen ni halak na so mananda Tuhan. Ninna roha ni halahi, gabe ditangihon ma tangiang ni halahi hara ni ginjangna. 6:8 Ulang songon i hamu. Diboto Amangmunu do na porlu di hamu, dompak so mangido dope hamu. 6:9 Jadi songon on ma dok hamu muda martangiang hamu, 'Ale, Amangnami na di banua ginjang: Pinarbadia ma goarMu, 6:10 ro ma HarajaanMu tulus ma rohaMu di tano on, songon di banua ginjang. 6:11 Lehen ma di hami panganonnami na porlu sadari on, *NA PORLU SADARI ON: Tu ari ancogot sanga pe siganop ari.* 6:12 sesa ma angka dosanami, songon hami manyesa dosa ni angka na mardosa tu hami, 6:13 jana ulang pamasuk hami tu bagasan pandugaan, tapi palua ma hami sian pangago i.' Ho do Raja na markuaso jana na marsangap salolot-lolotna. 6:14 Muda disesa hamu halak na marsala tu hamu, sesaon ni Amangmunu na di banua ginjang i muse ma salamunu. 6:15 Tapi muda nada disesa hamu sala ni halak na asing, Amangmunu na di banua ginjang i pe na da ra Ia manyesa salamunu." 6:16 "Dung i muda puaso hamu, ulang ma markaremut bohimunu songon halak pangalancap. Mardalani ma halahi, gale-gale idaon. Hape anso diboto halak do na puaso halahi. Ingot hamu ma! Madung dijagit halahi do sude upa ni halahi. 6:17 Tapi anggo hamu, muda puaso, paias ma bohimunu, marsuri hamu. 6:18 Anso ulang pola diboto halak na puaso hamu. Tuk ma Amangmunu na so tarida i na umbotosa. Diida Ia do na nibaenmunu i haru pe so diboto halak na asing. Dung i lehenonNia ma upana tu hamu." 6:19 "Ulang ma palagut arta hamu di portibi on. Harana anggo di portibi on adong do ngitngit dohot harat na manyegohon arta i. Dung i muse tarbungkar jana tartangko panangko do i. 6:20 Di banua ginjang ma palagut hamu arta. Harana anggo di banua ginjang i nada tarbaen ngitngit dohot harat manyegohonsa. Panangko pe nada tarbaensa mambungkar dohot manangko. 6:21 Harana sanga di dia inganan ni artamu, disi do dohot rohamu!" 6:22 "Mata i do songon lampu di pamatang. Muda torang matamu, gabe torang do sude pamatangmu. 6:23 Tapi muda rambon do matamu, gabe golap sajo ma sude pamatangmu. Jadi muda golap do torang na di bagasan dirimi, golap gulita noma i." 6:24 "Nada adong sahalak pe na tarbaen mangoloi dua tuan sanoli mangoloi. Muda dibaen ia songon i, goyak ma rohania tu na sada, holong ma rohania tu na sada nari. Sanga burju ma ia tu tuan na sada, tapi na sada nari inda diantureskon. Songon i muse do hamu. Nada tarbaen hamu markarejo tu Debata dohot markarejo tu arta sanoli mangkarejohon. 6:25 Hara ni i, Hudok ma tu hamu! Ulang pola sak rohamunu taringot tu ngolumunu. Sanga aha ma panganon dohot inumonmunu, jala ulang pola sak rohamunu taringot tu pamatangmunu, sanga aha sipakeonmunu. Inda he ummarga hosa sian panganon? Inda he ummarga pamatang sian pakean? 6:26 Ligi hamu ma jolo angka unggas na habang i pahae-pahulu. Nada manyabur same halahi, nada manyabi, nada adong palagutkon suha ni saba halahi tu talobat. Tapi haru pe songon i, dipahan Amangmunu na di banua ginjang i do halahi. Nada he dao dope ummarga hamu sian angka unggas i? 6:27 Ise ma sian hamu na tarbaen paginjangkon umurna, hum saotik pe, hara ni sak ni rohania lakna? 6:28 Biasi pola angkon sai lomos rohamunu taringot tu pakean? Pamanat hamu ma jolo bunga-bunga na di padang-padang i. Nada markarejo halahi, nada martonun. 6:29 Tapi Hudok ma tu hamu, si Salomo na kayo i pe nada jabat dipake ia pakean na jeges songon bunga-bunga i! 6:30 Songon i ma jegesna dihobasi Debata angka duhut na di padang-padang i, i ma na tubu sadari on, tapi ancogot ambungkononkon ma i, dung i nitutung. Muda dihobasi Debata do ruput i songon i, mur ma hamu! Tapi, magaletu do haporsayaanmunu! 6:31 Ulang ma lomos rohamunu! Jana ulang ma dokkon hamu, 'Aha ma naron panganonnami', sanga, 'Aha ma naron inumonnami', sanga, 'Aha ma naron pakeannami?' 6:32 Halak na so mananda Tuhan do na tongtong manggogo manjalahi na songon i. Hape nian diboto Amangmunu na di banua ginjang i do, sude na porlu di hamu. 6:33 Sai jumolo ma jalahi hamu Harajaan Ni Debata dohot hatigoranNa, jadi lehenonNia ma di hamu sasude na songon i. 6:34 Hara ni i ulang pola lomos rohamunu taringot tu ancogot, angke disarihon ari ancogot i do na hasaya disia. Marsiporsan hasusaanna be do angka ari i."
7:1 "Ulang uhumi hamu halak, anso ulang diuhumi hamu. 7:2 Harana songon uhum na niuhumkonmunu, songon i do niuhuman hamu muse; jana parsuhatan na nisuhatkonmunu i do niparsuhatkon tu hamu muse. 7:3 Biasi ma he angkon sai paligi-ligionmunu bancir-bancir na sansilbak di mata ni donganmu, hape hayu na sabalok na di matamu umpe diparrohahon ho? 7:4 Patut ma he puluk ho mandok tu donganmu, 'Dia tuson anso huendat bancir-bancir i sian bagasan matami,' hape di bagasan matamu sandiri adong dope na sabalok na godang? 7:5 O pangalancap! Paruar ma jolo balok na di matami sandiri, baru pe anso tangkas ho mangaligi. Dung i tarparuar ho ma bancir-bancir na di mata ni halak na asing. 7:6 Ulang lehen hamu barang na badia tu anjing. Harana muda dilehen hamu i, marbalik ma anjing i laho manyarbut hamu. Dung i ulang lehen hamu berlian tu babi, angke dilonca-lonca babi i sajo do i." 7:7 "Pangido hamu ma, gabe manjagit ma hamu. Jalahi hamu ma, gabe dapotan ma hamu. Tuktuhi hamu ma pintu, gabe dibuka ma pintu i di hamu. 7:8 Harana, angkon manjagit do halak na torus mangido. Angkon dapotan do halak na torus manjalahi. Jana na torus manuktuk pintu, angkon dibuka do pintu i disia. 7:9 Adong dehe sahalak sian hamu na mangalehen batu tu anakna muda dipangido anakna i roti? 7:10 Sanga na mangalehen ulok, muda mangido ihan anakna i? 7:11 Haru songon i pe jahatmunu, laing diboto hamu do mangalehen na denggan tu dakdanakmunu, mur Amangmunu na di banua ginjang i ma. Tontu lehenonNia do angka na denggan i di halak na mangido tuSia! 7:12 Baen ma tu halak na asing, sanga aha por ni rohamu baenon ni halahi tu hamu. Songon i ma impola ni angka Tona dohot hata ni angka panurirang." 7:13 "Sian pintu na sompit i ma hamu masuk! Harana anggo pintu na godang jana na bidang i, pintu tu narako do i! Na bahatan do halak mamolus sian i. 7:14 Tapi anggo pintu na sompit dohot dalan na hohot i, i ma pamolusan ni halak tu hangoluan. Hum saotik sajo do halak na dapotan i." 7:15 "Jago-jago ma hamu tu angka panurirang pargabus. Songon biri-biri do idaon haroro ni halahi tu hamu, tapi anggo di bagasan satutuna songon sorigala panyoro do halahi. 7:16 Sian parbatuna do tandaonmunu halahi. Bisa dehe lakna halak mamutik batu ni anggur sian tonga-tonga ni sihupi, sanga gala-gala sian tada-tada? 7:17 Laing songon i do hayu na jeges marbatuhon na jeges, jana muda suan-suanan na so jeges, jatjat do parbatu ni i. 7:18 Muda suan-suanan na jeges, nada marbatuhon na jatjat. Suan-suanan na so jeges, nada marbatuhon na denggan. 7:19 Sude suan-suanan na so denggan marbatu, tabaon do i anso nitutung. 7:20 Jadi sian parbatu ni halahi do tandaonmunu halahi." 7:21 "Nada sude halak na mamiohon Au, 'Tuhan, Tuhan', giot masuk tu Harajaan Ni Banua Ginjang. Tapi hum halak na patuluskon hagiot ni Damang na di banua ginjang i do. 7:22 Di ari parpudi bahat ma halak na mandok tu Au, 'Tuhan, Tuhan, nada he mangasahon goarMu do hami manyurirangi? Nada he laing mangasahon goar ni Tuhan i do hami paorot angka setan, jana hami baen angka tanda hahomangan?' 7:23 Tapi anggo alusKu songon on ma, 'Nada Hutanda hamu! Morot ma hamu sian Au, angka na jahat do hamu!' " 7:24 "Antong, sarupa ma tu halak na pistar na pajongjong bagasna di ginjang ni batu, sanga ise na manangihon bope na patuluskon angka hata nangkinan i. 7:25 Haru ro pe udan, magodang dohot aek, ro muse alogo na gogo manondong bagas i, nada ra rumpak bagas i angke di ginjang batu do i dipajongjong. 7:26 Dung i, halak na umbege hatangKu, tapi nada dipatulus ia, sarupa ma i tu halak na bodo na pajongjong bagasna di ginjang ni horsik. 7:27 Muda ro udan, magodang ma aek, ro muse ma alogo na gogo manondong bagas i, marumpak ma bagas i. Hebat sajo ma hasegoanna." 7:28 Dung sidung Jesus mangajarkon hataNa sinangkinan i, homang-homang ma roha ni halahi na umbege pangajaranNia i. 7:29 Harana nada songon pangajari ni angka Siboto Surat ni halahi i pangajar ni Jesus, tapi marsahala do.
8:1 Dung mijur Jesus sian dolok i, bahat do halak mangihutkon Ia. 8:2 Jadi ro ma sada halak na huliton. *NA HULITON: Mangihutkon aturan ni ugamo Jahudi, jolma na marpanyahit songon on, nada patut marsomba tu Debata di bagas paribadatan.* Manungkap ma ia marsomba tu Jesus. Didok ia ma, "O, Tuan! Sugari ra Ho, tarpamalum Ho do au." 8:3 Disurduhon Jesus ma tanganNia laho manjama bayo i. Didok Jesus ma tusia, "Ra do Au, malum ma ho!" Santongkin i mago ma nyaena i jana manigor malum. 8:4 Dung i didok Jesus ma tusia, "Ingot ma! Ulang caritohon na masa on sanga na tu ise pe. Tapi kehe ma ho manopot malim, patidahon ma dirimu. Jadi lehen ma haulmu hombar tu na nidok ni si Musa, anso diboto halak na dung malum ho!" 8:5 Di na masuk Jesus tu kota Kapernaum, ro ma sada halak tentara na marpangkat mandapotkon Jesus mangido tolong tuSia. 8:6 "O, Tuan," ninna tentara na pangkat i, "marnyae do naposongku di bagas. Modom sajo do di podoman. Onyangon hancit sajo." 8:7 "Denggan," ninna Jesus, "Ro pe Au pamalum ia." 8:8 "Inda pola ale Tuan," ninna tentara na pangkat i, "Mabiletu do au manjagit Tuan i di bagasku, hum sahata sajo pe dokkon, manigor malum ma nyae ni naposongki. 8:9 Harana au pe, angkon oloanku do hata ni kapalangku. Ditoru ni pangkatku pe adong do angka tentara, angkon oloan ni halahi do na hudok. Muda hudok tu na sada, 'Kehe ho!', kehe do ia. Husuru na asing, 'Ro tuson!' ro do ia. Huparenta do naposongku, 'Songon on baen!' dibaen ia do i." 8:10 Dung dibege Jesus hata ni tentara na pangkat i, homang ma rohaNia. Gabe didok Ia ma tu halahi na mangihutkon Ia, "Tangihon hamu ma jolo! Nada unjung dope Au marsuo dohot haporsayaan na songon on godangna di tonga-tonga ni halak Israel. 8:11 Tapi ingot hamu ma na Hudok on! Bahat do halak na giot ro sian Habincaran dohot sian Hasundutan anso rap marpesta marjop ni roha dohot si Abraham, si Ishak dohot si Jakob di bagasan Harajaan Ni Banua Ginjang. 8:12 Hape anggo na patut hian gabe parsidohot di Harajaan i, ambungkononkon ma tu hagolapan di balian. Tangis-tangis ma halahi disi jana patungaripon." 8:13 Dung i didok Jesus ma tu tentara na pangkat i, "Mulak ma ho, sanga aha na ni haporsayaanmi, tulus ma i." Santongkin i, manigor malum ma nyae ni naposonia i. 8:14 Kehe ma Jesus tu bagas ni si Petrus. Diida ia ma disi nantulang ni si Petrus topet marun. 8:15 Dijama Jesus ma tanganna i, manigor mago ma arunna i. Jongjong ma ia laho mangoloi Jesus. 8:16 Dung marayak potang, dioban halak ma tu Jesus bahat angka na hona setan. Dohot hata sajo do diusir Jesus angka begu i, dipamalum Ia muse ma sude halak na marnyae i. 8:17 Di na nibaen ni Jesus sudena i gabe hasongtian ma na nidok ni Panurirang Jesaya na mandok songon on, "Diporsan Ia do sude pardangolanta, dipamalum Ia do sude nyaenta." 8:18 Jadi dung diida Jesus bahat halak humaliang Ia, disuru Ia ma kehe halahi marparau tu ipar ni dano i. 8:19 Jadi ro ma sada Siboto Surat tuSia mandok, "Ale, Guru! Rap noma au dohot Ho, sanga tu dia pe Guru i kehe!" 8:20 Dialusi Jesus ma, "Marliang do sorigala, marasar do angka unggas, tapi anggo Anak Ni Jolma i, i ma suruan ni Debata, nada adong inganan hapayahan ni uluNia." 8:21 Dung i ro ma sada halak siseanNia na asing mandok, "Ale Tuhan, loas ma jolo au mulak tu huta manguburkon damang," ninna. 8:22 Tapi dialusi Jesus ma, "Ihutkon ma Au, jana padiar ma halak na mate manguburkon na matena sandiri," ning Ia. 8:23 Masuk ma Jesus tu parau rap dohot anak siseanNia i. 8:24 Tompu ma ro alogo na lobi gogo di dano i gabe ditondong ombak ma parau i. Topet do hatiha modom Jesus di na ro alogo i. 8:25 Jadi disungguli anak siseanNia i ma Ia. Ninna halahi ma, "Ale, Tuhan! Palua ma hita, marmara ma hita!" 8:26 Ninna Jesus ma tu halahi, "Ale hamu na menek haporsayaan, biasi he mabiar hamu?" Dung i jongjong ma Jesus manyonggak alogo dohot ombak i. Gabe so ma manigor alogo i. 8:27 Homang ma roha ni halahi sude na disi. Didok halahi, "Halak na bia dehe Ia on, alogo dohot ombak pe tunduk do tuSia!" 8:28 Lalu ma Jesus tu ipar ni dano i, i ma di Luat Gadara. Jadi ro ma dua halak na hona setan mangalo-alo Ia. Jana manggasa-gasa ma idaon na dua i sian liang ni kuburan na disi. Nada adong halak na puluk mamolus sian i. 8:29 Jadi marsurak ma halahi na dua ninna halahi ma, "O, Anak Ni Debata, na giot bia do baenonMu hami? Betak na giot siksaonMu ma hami? Na he nada dope dapot hatihana?" 8:30 Nada sadia dao sian i, adong ma sahulanan babi na topet mangugei. 8:31 Jadi dipangido setan i ma tu Jesus, "Muda na giot paorotonMu do hami, tu angka babi i ma suru hami masuk." 8:32 "Kehe ma ni tusi!" ninna Jesus. Jadi kehe ma setan i sian bayo na dua i, lalu masuk ma tu angka babi i. Gabe mangamburi ma babi i sian rahis-rahis i lalu tu dano i, gabe mate mogap. 8:33 Marlojong ma angka parmahan babi i tu kota laho paboahon na masa i dohot taringot tu bayo na dua na hona setan i. 8:34 Jadi ro ma halak kota i mandapotkon Jesus. Jadi dung diida halahi Ia, gomos ma dipangido halahi anso kehe Jesus sian luat ni halahi i.
9:1 Marparau ma Jesus laho manaripari dano i, giot mulak tu hutaNia. *GIOT MULAK TU HUTANIA: Kapernaum (Ligi 4:13).* 9:2 Jadi ro ma halak maroban sada bayo na onyangon payak di podomanna. Di na niida ni Jesus godang ni haporsayaan ni halahi, ning Ia ma tu na onyangon i, "Papos ma rohamu, amang! Madung nisesa dosamu." 9:3 Jadi i ma dihata-hatai deba Siboto Surat na adong disi. Angka ninna halahi ma di bagasan rohana, "Na mangalayasi Debata do Bayo on!" 9:4 Diboto Jesus do na nipikiran ni halahi i gabe didok Ia ma, "Biasi he dipikiri hamu na jat di bagasan rohamunu lakna? 9:5 Dia do ummura dohonon 'Madung nisesa dosamu?', ulang pado mandok, 'Jongjong ma ho, anso mardalan?' 9:6 Giot patidahononKu tu hamu na markuaso do di tano on Anak Ni Jolma i laho manyesa dosa." Dung i didok Jesus ma tu na onyangon i, "Jongjong ma ho, oban podomanmi, kehe ma ho mulak!" 9:7 Jongjong ma bayo i, mulak ma ia tu bagasnia. 9:8 Jadi mabiar ma halak na midaan i, gabe dipuji halahi ma Debata hara ni kuaso na songon i godang, na dung dilehen Debata di jolma. 9:9 Jadi kehe ma Jesus sian i. Jadi taran mardalan Ia, diida Ia ma sada bayo na margoar si Mateus juguk di kantor pajakna. Dipiohon Jesus ma bayo i, "Beta ma, ihutkon Au!" Jongjong ma si Mateus mangihutkon Jesus. 9:10 Jadi hatiha mangan Jesus di bagas ni si Mateus *BAGAS NI SI MATEUS: Sanga di bagasNia (bagas ni Jesus).* i, marroan ma angka panjagit pajak dohot angka pardosa. Dohot ma halahi mangan rap dohot Jesus dohot angka anak siseanNia i. 9:11 Diida halak Parise ma halahi na mangan i. Jadi disapai halahi ma anak siseanNia i, ninna halahi ma, "Biasi ma he mangan Gurumunu i rap dohot panjagit pajak dohot angka pardosa?" 9:12 Dibege Jesus do na nisapaan ni halahi i gabe dialusi Ia ma, "Inda adong guna ni pangubati di na torkis. Di na marnyae do i. 9:13 Patangkas hamu ma jolo sanga aha do astuan ni hata on: 'Mida asi ni roha do jop rohangKu, nada mida haul.' Harana nada na giot mamiohon halak sibaen na tigor umbaen na ro Au, tapi na mamiohon pardosa do." 9:14 Dung i ro ma anak sisean ni si Johannes Pandidi manyapai Jesus. Ninna halahi ma, "Biasi muda hami dohot angka Parise jotjot puaso, hape anggo anak siseanMu nada unjung puaso?" 9:15 Dialusi Jesus ma, "Bia do ninna rohamunu? Adong ma he ninna rohamunu tamu na marsak hatiha pesta mangupa na marbagas, salolot rap dohot halahi bayo pangoli i? Tapi muda dung dapot hatihana dibuat bayo pangoli i sian halahi, baru pe anso puaso halahi. 9:16 Nada didungkapkon halak abit na imbaru tu abit na buruk, harana, gabe disibak pandungkap i do abit na buruk i gabe mur bidang ma na masibak i. 9:17 Songon i muse do, nada adong halak na mangusehon anggur na imbaru tu inganan na buruk harana gabe masibak do inganan na buruk i, gabe sabur anggur i. Boti ingananna i pe gabe sego. Muda anggur na imbaru angkon tu inganan na imbaru do i baenon. Anso rap jeges dua-duana." 9:18 Dompak mangkata-hatai dope Jesus dohot anak sisean ni si Johannes i, ro ma sahalak pamimpin ni bagas paribadatan. Marsomba ma bayo i mandok hata tu Jesus, "On dope mate borungku, tapi ro ma jolo Ho manjamasa, anso mangolu ia." 9:19 Jongjong ma Jesus, rap kehe dohot bayo i. Dohot muse ma anak siseanNia i. 9:20 Jadi laing ihut muse ma manigor sada anak boru na marnyae dua bolas taon sai ro pantang ni bulanna. Dipadonok ia ma tu Jesus laho manjama ujung ni baju juba ni Jesus. 9:21 Harana didok rohania, "Hum tarjama au pe baju jubaNia, malum ma huhilala." 9:22 Tapi manaili ma Jesus tu pudi, diida Ia ma anak boru i. Didok Ia ma, "Pos ma rohamu inang! Madung dipalua haporsayaanmi ho!" Santongkin i manigor malum ma nyae ni anak boru i. 9:23 Dung i dipatorus Jesus ma tu bagas ni pamimpin ni bagas paribadatan i. Dung lalu Jesus di bagas i jana diida Ia angka na marsuling jana jolma na gaor, 9:24 didok Ia ma, "Ruar ma jolo hamu sude! Inda na mate dakdanak on. Na modom do i." Dipartatai halahi ma Jesus. 9:25 Dung dipaorot Jesus halahi, masuk ma Jesus tu bilik inganan ni dakdanak i, digolom Ia ma tanganna i. Jadi jongjong ma dakdanak i. 9:26 Jadi tarbonggal ma barita na masa i di na saluat i. 9:27 Di na kehe Jesus sian i, ro ma dua halak na mapitung mangihutkon Ia. Pio-pio ma halahi, "O, anak ni si Daud, ibo ma rohaMu mida hami!" 9:28 Di na masuk Jesus tu sada bagas, manigor ro ma na mapitung na dua i mandapotkon Ia. Jadi ninna Jesus ma manyapai halahi, "Porsaya dehe hamu, tarpamalum Au hamu?" "Porsaya do hami Tuhan!" ninna halahi. 9:29 Gabe dijama Jesus ma mata ni halahi, didok ma, "Tulus ma di hamu marguru tu haporsayaanmunu!" 9:30 Gabe marnida ma mata ni halahi. Jadi dipaingot ma halahi, tangkas digogohon Ia anso ulang dipaboa-boa halahi pangalaho i sanga na tu ise pe. 9:31 Tapi kehe ma halahi paboa-boahon taringot tu Jesus di na saluat i. 9:32 Dung kehe halahi, ro ma halak maroban sada halak na ngungu na hona setan. 9:33 Hum dipaorot Jesus setan i manigor tarbaen ia ma mangkobari mangulahi. Homang ma roha ni halak na disi i. Angke didok halahi ma, "Na so unjung dope hami ida na songon on di Israel on!" 9:34 Tapi anggo halak Parise songon on do didok halahi, "Kapala ni angka setan do mangalehen kuaso diSia laho paorotkon angka setan i." 9:35 Songon i ma Jesus mardalani sian kota na sada tu kota na asing, sian huta na sada tu huta na asing. Mangajari ma Ia di angka bagas paribadatan. Dibaritahon Ia ma Jamita Na Denggan taringot tu Harajaan Ni Debata. Dipamalum Ia ma ragam-ragam ni nyae dohot sitaonon ni halak na mardangol. 9:36 Di na niida ni Jesus halak na bahat i, ibo ma rohaNia marnida halahi, angke lebak boti gale do halahi idaon songon biri-biri na so marparmahan. 9:37 Gabe ninna Jesus ma tu angka anak siseanNia i, "Bahat do na giot sabion, hape hum saotik do panyabi. 9:38 Hara ni i pangido hamu ma tu nampuna sabion i, anso disuru Ia halak laho manyabi sabion i."
10:1 Di na sadari dipiohon Jesus ma anak siseanNia na dua bolas halak i anso marlagut. Dung i dilehen Ia ma kuaso di halahi laho mangusir angka setan dohot pamalum ragam-ragam ni nyae dohot sude pamalum na cacat. 10:2 Angka on ma goar ni halahi na dua bolas i: Parjolo si Simon (na margoar muse si Petrus) dohot anggina si Andreas, dung i si Jakobus dohot anggina si Johannes, i ma anak ni si Zebedeus. 10:3 Dung i muse si Pilipus, si Bartolomeus, si Tomas, si Mateus panjagit pajak i, dung i si Jakobus anak ni si Alfeus, si Tadeus; 10:4 dohot si Simon halak Zelot, baru si Judas Iskariot, i ma na manjehehon Ia. 10:5 Disuruhon Jesus ma rasul na dua bolas halak i dung jolo ditonai Ia halahi songon on, "Ulang kehe hamu tu huta ni halak na asing, dohot tu kota ni halak Samaria. 10:6 Tapi topot hamu ma angka biri-biri na mago sian pomparan ni Israel. 10:7 Kehe ma hamu manjamita, dok hamu ma: Madung donok Harajaan Ni Banua Ginjang. 10:8 Pamalum hamu ma angka na marnyae. Pangolu hamu ma angka na mate. Paias hamu ma angka na puruon. Paorot hamu ma angka na hona setan. Sude kuaso i inda na nigararan umbaen na nijagitmunu i. Jadi laing songon i ma, lehen hamu ma i, ulang pola pangido hamu gararna. 10:9 Ulang maroban sere, sanga perak sanga tumbaga hamu di hohosmunu. 10:10 Indangkon pola maroban kantongan hamu sanga abit duangkibung, sanga sipatu sanga tungkot. Harana, angkon mangan do halak na markarejo. 10:11 Jadi muda lalu do hamu tu sada kota sanga huta, jalahi hamu ma manigor disi sanga ise na ra manjagit hamu. Disi ma hamu manompang lopus kehe hamu sian i." 10:12 Muda masuk hamu tu bagas i jalang hamu ma halahi. Dok hamu ma, "Horas ma di hamu!" 10:13 Muda dijagit halak na di bagas i do hamu, lohot ma tu halahi hata horas-horasmunu i, tapi muda nada tumbuk mulak ma tu hamu hata horas-horasmunu i. 10:14 Muda adong bagas sanga kota na so ra manjagit hamu sanga na so ra manangihon jamitamunu, tinggalkon hamu ma i. Hirpaskon hamu ma abuan ni patmunu i tu halahi. 10:15 Satutuna ma na hudok on! "Numayang do taonon ni isi ni tano Sodom dohot Gomora di ari panguhuman i, ulang kota na songon i!" 10:16 "Parrohahon hamu ma na Hudok on! Husuru do hamu songon biri-biri tu tonga-tonga ni sorigala. Jadi angkon manat do hamu songon ulok tapi ias ma rohamunu songon darapati. 10:17 Jago-jago ma hamu harana adong do halak na giot manangkup hamu laho maroban hamu pajongjongon di rapot pangadilan ni ugamo. Loncingon ni halahi ma hamu di angka bagas paribadatan. 10:18 Boanon ni halahi ma hamu tu jolo ni angka parkuaso dohot tu jolo ni raja-raja hara ni na mangihutkon Au. Jana i ma hatiha hadenggananna di hamu laho manyaksihon Au tu halahi dohot tu halak na so mananda Debata dope. 10:19 Tapi muda dioban hamu anso niadilan, ulang sak rohamunu taringot tu hata sidohononmunu sanga taringot tu pangkataimunu bagi na tarbia. Harana, sanga aha pe na giot sidokkononmunu disi, jolo paboaon do i tu hamu. 10:20 Nada hamu na giot mangkatai disi, Tondi ni Ama na di banua ginjang i do, tapi markite-hite hamu. 10:21 Masa ma disi marsitangkup kahanggina anso dibunu. Laing songon i ma baenon ni ama-ama tu dakdanakna. Dakdanak pe mangalo do tu simatobangna, dipabunuhon angka anakna ma halahi. 10:22 Goyak ma roha ni halak sude mida hamu hara ni Au. Tapi na torus tahan lopus tu ujungna, i do na giot paluaon. 10:23 Muda diparkanciti halahi hamu di sada kota kehe ma hamu tu kota na asing. Hupaboa hian ma di hamu: Inda sidung dope tohapmunu dikarejohon hamu di sude kota na adong di Israel, hape ma ro Anak Ni Jolma i. 10:24 Nada gumodang anak sisean sian guruna jana inda gumodang pangoloi sian tuanna. 10:25 Muda sarupa sada sisean dohot guruna jana sada naposo dohot tuanna, sapatutna madung tuk songon i di halahi. Muda digoari halahi nampuna bagas i si Beelsebul, mur ma halak na sabagas i. Goar na jumatjat noma dokkonon ni halahi." 10:26 "Nada adong bagi aha na buni, na so patar muse, nada adong na simo, na so binoto sogot. 10:27 Sanga aha na Hudok tu hamu di na golap, hobarkon hamu ma i di arian raya. Sanga aha na Huhusipkon tu pinggolmunu, jamitahon hamu ma i sian bungkulan ni bagas! 10:28 Ulang pola mabiar hamu mida halahi sibunu pamatang tapi na so margogo mamunu tondi. Tapi habiari hamu ma Debata na markuaso mamunu pamatang dohot tondi di api narako. 10:29 Nada he nigadis dua amporik arga sasen? Tapi haru songon i pe, inda adong na madabu i tu tano anggo so jolo dipaloas Amangmunu i. 10:30 Salang obuk na di ulumunu i pe na dung nietong do sudena i. 10:31 Jadi hara ni i, ulang mabiar hamu! Ummarga do hamu ulang pado amporik i." 10:32 "Sanga ise na mangoku Au di jolo ni halak, paboa na mangihutkon Au do ia, Au pe okuonKu ma ia di jolo ni Damang na di banua ginjang i. 10:33 Tapi sanga ise na mamorso Au di jolo ni halak, i ma na so paboahon na mangihutkon Au do ia, Au pe porsoonKu ma ia di jolo ni Damang na di banua ginjang i." 10:34 "Ulang ninna rohamunu na maroban pardamean Au tu portibi on. Nada pardamean na Huoban, tapi paraloan do. 10:35 Umbaen na ro pe Au na giot manyirang anakna do sian amangna, boruna sian inangna, parumaen sian namboruna. 10:36 Jana alo ni halak, i ma donganna sabagas. 10:37 Halak na humolongan rohana mida amangna sanga inangna ulang mida Au, nada tumbuk halak sisongon i di Au. Songon i muse halak na humolongan rohana mida anakna sanga boruna ulang mida Au, nada tumbuk halak sisongon i gabe siihutkon Au. 10:38 Dung i, halak na so ra mamorsan silangna laho mangihutkon Au, nada tumbuk halak sisongon i di Au. 10:39 Sanga ise na giot pajolohon haporluan ni ngoluna sandiri, angkon magoan ngolu. Tapi halak na magoan ngolu hara ni Au, halak sisongon i do na dapotan ngolu." 10:40 "Na manjagit hamu, Au do na nijagitna. Halak na manjagit Au, dijagit ia muse do na marsuru Au. 10:41 Barang ise na manjagit sada panurirang songon sada panurirang, dapotan upa ni panurirang do, jana barang ise manjagit halak na tigor songon sada halak na tigor, dapotan upa ni na tigor roha do. 10:42 Sanga ise na mangalehen minum, hum samangkuk aek ngali pe tu sahalak sian angka na menek on hara ni siihutkon Au halahi, angkon dapotan balos do halahi. Songon i ma satutuna!"
11:1 Jadi dung ditonai Jesus angka anak siseanNia na dua bolas i, kehe ma Ia sian i. Mangajari ma Ia paboahon jamita taringot tu Debata di angka kota na donok-donok disi. 11:2 Dibege si Johannes Pandidi na tarhurung i do taringot tu pambaenan ni Jesus Kristus. Gabe disuruhon ia ma angka anak siseannia laho manyapai Jesus songon on, 11:3 "Hamu do lakna Amang na dijanjihon na giot ro i, sanga halak na asing dope sipainteonnami?" 11:4 Dialusi Jesus ma, "Mulak ma hamu, paboa hamu ma tu si Johannes sude na nibege dohot na niidamunu. 11:5 Marnida na mapitung, mardalan na onyangon, malum na huliton, marbinege na maingol, mulak mangolu na mate, dung i dipaboa do Jamita Na Denggan sian Debata tu halak na pogos. 11:6 Martua do halak na so mandele hara ni Au!" 11:7 Dung mulak angka anak sisean ni si Johannes i, ditaringoti Jesus ma tu halak na bahat i salaho tu si Johannes. Ning Ia: "Na giot mangaligi aha do hamu di na kehe tu halongonan? Sanggar na niombus ni alogo do? 11:8 Aha do satutuna na giot ligionmunu? Halak na marpakean na jeges do? Anggo angka na marbaju na jeges di bagas godang do i! 11:9 Antong biasi kehe hamu tu halongonan? Mangaligi panurirang do? Na tutu ma i! Hudok ma di hamu, lobi-lobi sian panurirang dope si Johannes! 11:10 Harana taringot tusia adong do tarsurat songon on, 'On ma suruanKu' ninna Debata, 'Parjolo do ia Husuru sian Ho, laho manotas dalanMu.' 11:11 Ingot hamu ma! Inda adong be jolma na gumodang di tano on sian si Johannes Pandidi. Tapi haru pe songon i, halak na ummenek di Harajaan Ni Banua Ginjang laing gumodang dope i sian si Johannes. 11:12 Sian na mamungka si Johannes marjamita lalu tu sadari on, matua dialo halak do Harajaan Ni Banua Ginjang i jana giot manggomgomisa. 11:13 Sude Tona na nilehen ni si Musa dohot angka panurirang sian narobi lalu tu haroro ni si Johannes, sudena i na paboahon taringot tu angka na giot tarjadi do. 11:14 Jadi muda giot porsaya do hamu di sude barita ni halahi i, angkon botoonmunu do, ia ma si Elia na giot ro i. 11:15 Jadi muda na adong do pinggolmunu laho manangihon, tangihon hamu ma! 11:16 Saonnari, tar tu aha ma ulaning Hupatudos halak na adong saonnari? Tudos tu dakdanak na juguk di poken marsipio-pioan. 11:17 'Madung martulila hami di hamu, tapi nada ra hamu manortor! Madung mangandungi hami, hape nada ra tangis hamu!' 11:18 Ro ma si Johannes -- nada mangan, nada minum ia, hape didok halak ia 'na hona setan!' 11:19 Madung ro Anak Ni Jolma i -- na mangan dohot na minum, jadi didok halahi, 'Ligi ma jolo Bayo i! Na songkalan, hum na minum, didongan-dongani Ia angka sijagit pajak dohot angka pardosa.' Tapi haru pe songon i, na bisuk do Debata. Tarida do habisuhonNia i sian angka pambaenanNia." 11:20 Gabe mamungka ma ditilakoi Jesus angka kota ingananNia mambaen tanda hahomangan na umbahat. Hara ni na so ra angka halak kota i paubahon rohana sian angka dosana. 11:21 "Marjaya situtu ma ho Khorasim, marjaya ma dohot ho ale Betsaida. Sugari di halak Tirus dohot Sidon dibaen tanda hahomangan na nibaen di tonga-tongamunu, ma pola markutondo halahi marsak, marsibaen sirabun tu pamatangna be pataridahon na dung muba roha ni halahi sian angka dosana. 11:22 Tapi Hudok ma tu hamu, 'Numayang do uhuman na tu kota Tirus dohot Sidon di ari panguhuman i, ulang pado tu hamu!' 11:23 Dohot ho, kota Kapernaum! Giot pagincaton ma ho lakna lalu tu banua ginjang? Nada! Tu narako do ho ambungkononkon! Sugari sura di kota Sodom dibaen angka tanda hahomangan na nibaen ditonga-tongami, laing adong dope kota i lopus sadari on! 11:24 Tapi Hudok ma tu hamu, 'Numayang do uhuman na tu tano Sodom di ari panguhuman i, ulang pado tu ho!' " 11:25 Jadi didok Jesus ma hatiha i, "Ale, Amang, Tuhan ni langit dohot tano! Tarimakasi ma Hudok tu Ho dibaen dibunihon Ho do i sude di halak na malo dohot na pistar. Hum tu halak na so pola pistar do dipatidahon Ho i. 11:26 Olo, Amang, dibaen na songon i do hagiot ni rohaMu." 11:27 "Madung dipasahat Damang do tu Au, sandok na adong. Nada adong na mananda Anak i asing sian Damang. Nada adong muse na mananda Ama i asing sian Anak i, dohot tu halak na ra Jesus papatarkonsa." 11:28 "Ro ma hamu tu Au, sude hamu na loja jana na sorat bobanna, Hupasonang pe hamu! 11:29 Ihutkon hamu ma na Hudok, marsiajar ma hamu tu Au! Angke na lambok do Au jana na serep marroha, jadi togar ma tondimunu. 11:30 Angke na pasonangkon do hudahudangKu, jana nayang do boban na Hupaboankon tu hamu."
12:1 Topet di Ari Sabat mamolus ma sanoli Jesus di ladang gandum. Malean ma angka anak siseanNia i. Digotili halahi ma burir ni gandumi, lalu diguguti halahi ma i. 12:2 Jadi dung diida angka halak Parise songon i, didok halahi ma tu Jesus, "Ligi ma, dibaen anak siseanMu do na so tola karejohonon di Ari Sabat." 12:3 Dialusi Jesus ma, "Na so jungada dehe disise hamu taringot tu karejo ni si Daud dompak male ia dohot dongannia sauduran i? 12:4 Masuk do ia tu Bagas Ni Debata. Dipambuati ia dohot dongannia i roti na nihaulkon tu Debata. Na so tola hian do ia bope dongannia mangankon i. Hum malim do na tola mangankon i. 12:5 Sanga na so unjung dope disise hamu di Buku Tona, taringot tu pangalaosion ni angka malim di Ari Sabat di bagasan Bagas Ni Debata i, hape nada marsala halahi? 12:6 Tapi Hudok ma tu hamu, 'Dison adong do sada na gumodang sian Bagas Ni Debata i.' 12:7 Tapi sugari diboto hamu sanga dia do astuan ni hata on: 'Asi ni roha do giotKu, nada anggo na nihaulkon, tontu nada pola uhumonmunu halak na so marsala. 12:8 Angke Anak Ni Jolma i do Tuhan ni Ari Sabat.' " 12:9 Jadi kehe ma Jesus sian i, tu sada bagas paribadatan ni halahi. 12:10 Adong ma disi sada halak na mate tanganna sabariba. Jadi disapai halak na manjalak-jalahi hasalaan ni Jesus ma Ia, "Atehe tola do pamalumon halak di hatiha Ari Sabat?" 12:11 Dialusi Jesus ma, "Sugari ma rupani adong sada biri-birimunu, madabu ma biri-biri i tu godung na bagas topet di Ari Sabat, inda he paruaron ni nampuna i biri-biri i sian godung i? 12:12 On pe, ummarga dope jolma sian biri-biri! Anggo songon i, tola do tolongon halak di Ari Sabat." 12:13 Dung i didok Jesus ma tu partangan na mate sabariba i, "Pahortang ma tanganmi." Jadi dipahortang ia ma antong! Gabe malum ma manigor, sarupa dohot tangannia na sabariba nari. 12:14 Ditinggalkon halak Parise i ma inganan i, martahi ma halahi giot mamunu Jesus. 12:15 Diboto Jesus do na jahat roha ni halak Parise i maradopkon Ia. Dipamalum Ia ma sanga ise sian halahi na marnyae. 12:16 Tapi dilarang Ia ma, anso ulang dipaboa-boa halahi sanga na tu ise taringot tu sude na nibaenNia i. 12:17 Jadi tulus ma na nidok ni Debata marhite Panurirang Jesaya, na mandok, 12:18 "Ligi ma suruanKu na Hutodo i, haholongan ni roha na pajopkon rohangKu. TuSia ma lehenonKu tondingKu, dung i jamitahononNia ma tona tu angka bangso. 12:19 Nada martangkangi Ia sanga marsurahi, nada adong halak na umbege soraNia di angka dalan. 12:20 Nada diponggolkon Ia arong na gale-gale i, nada intopanNia sumbu na medep-edep. Angkon gogohononNia do lopus jongjong hatigoran, 12:21 jana mararop ni roha tuSia ma sude angka bangso." 12:22 Dung i adong ma halak na maroban sahalak na mapitung boti na ngungu muse tu Jesus. Na hona setan do bayo i. Dipamalum Jesus ma ia gabe tarbaen ma mangkatai jana marnida mangulahi. 12:23 Homang ma roha ni halahi sude didokkon halahi ma, "On do ulaning pomparan ni si Daud i?" 12:24 Dung dibege halak Parise songon i, ninna halahi ma, "Nada dipaisir Ia angka setan ia so markite-hite si Beelsebul kapala ni setan i." 12:25 Diboto Jesus do pikiran ni halak Parise i. Gabe didokkon Ia ma tu halahi, "Sanga na harajaan dia pe, nada tarbaen lolot jongjong, muda sai marsalisi do halahi sama halahi. Muda adong sada kota sanga bagas na marsalisi sanga marbadai na sada tu na sada nari gabe masarsar do i. 12:26 Antong, muda dipaisir Sibolis i donganna, jana marsalisi halahi sama halahi, songon dia dehe tarbaen togu harajaanna lakna? 12:27 Didok hamu, hara ni na nilehen ni kapala ni angka setan i do kuaso di Au umbaen na Huusir setan. Antong anggo songon i, sian ise muse do dapotan kuaso angka halak na mangihutkon hamu laho mangusir angka setan i? Angka donganmunu i do na pataridahon na tutu hamu sala! 12:28 Tondi Ni Debata do na mangalehen kuaso anggo di Au laho mangusir setan. I ma tandana madung ro Harajaan Ni Debata tu hamu. 12:29 Bia ma pambaen ni halak masuk tu bagas ni sada halak na gogo laho mangarampas sinadongannia? Inda he jolo diihoti ia do halak na gogo i? Dung diihoti ia pe baru anso tarrampas ia sinadonganna i. 12:30 Na so mandongani Au tontu alongKu. Dung i halak na so dohot palagutkon rap dohot Au, tontu na paserakkon do i! 12:31 Hara ni i, Hudok ma tu hamu, sude dosa dohot hata na jat na nipardok *HATA NA JAT NA NIPARDOK: Sanga hata na jat na nipardok maradopkon Jesus.* ni halak, tarsesa do i! Tapi anggo hata na mangincahi Tondi Parbadia nada tarsesa i! 12:32 Halak na mandok hata laho mangalo Anak Ni Jolma, tarsesa do i. Tapi anggo halak na mandok hatana laho mangalo Tondi Parbadia, bagi na bia pe nada tarsesa be i, bope di portibi on sanga pe di ari na giot ro!" 12:33 "Muda didok hamu na denggan sada hayu, denggan ma antong parbatuna i, jana muda didok hamu sada hayu na jat, jat muse ma parbatuna. Harana, sian parbatuna do tandaon sanga denggan sanga na so denggan hayu. 12:34 O hamu pomparan ni ulok, songon dia dehe tarbaen hamu mandok angka na denggan, angke na jahat do hamu? Angke, sanga aha na manggohi roha, matua i do hobarkonon ni pamangan! 12:35 Muda denggan sada-sada halak, na denggan muse do diparuar ia sian rohania na denggan i. Muda adong halak na jahat, laing na jahat muse do paruaronnia sian rohania na jahat i. 12:36 Tapi Hudok ma tu hamu, 'Angkon dialusi halak i do sogot di ari panguhuman i taringot tu sude hata na so hasaya, na ruar sian pamangan ni halahi. 12:37 Angke mangihutkon hatamu do ho nipatigor, jana mangihutkon hatamu do ho diuhumi." 12:38 Dung i marroan ma angka Siboto Surat dohot halak Parise mandok tuSia, "O Guru, por do rohanami marnida anso dibaen Guru i jolo hahomangan." 12:39 "Pomparan ni na jahat jana na so setia on mangido sada tanda hahomangan, tapi nada lehenon di hamu tanda hahomangan, asing sian tanda hahomangan na tu Panurirang Junus. 12:40 Tolu ari tolu borngin Panurirang Junus di bagasan butuha ni ihan na godang i. Songon i muse ma Anak Ni Jolma i, di bagasan tano. 12:41 Saulahon di Ari Paruhuman i, jongjong ma halak Ninive adop bangso on, mandabu uhuman tu halahi. Harana anggo halahi, marsipauba rohana be do dung marjamita si Junus tu halahi! Hape gumodangan dope nian na dison i sian si Junus! 12:42 Saulahon di Ari Paruhuman i, jongjong do raja dadaboru na sian Selatan i adop bangso on, mandabu uhuman tu halahi. Harana, songon i ma daona na mardalan i ia, ma pola sian ujung ni tano on, laho manangihon pangajaran ni si Salomo na bisuk i sajo do. Hape gumodang dope na dison i sian si Salomo!" 12:43 "Muda ditadingkon tondi na hodar pamatang ni sada halak, mardalani ma tondi i manjalahi inganan na mahiang laho maradian. Tapi nada adong dapot ia paradianan. 12:44 Gabe didokkon ia ma, 'Gumonan ma au mulak tu bagas na hutinggalkon i.' Jadi dung lalu ia tusi, didapot ia ma rumar bagas i, ias taratur sude. 12:45 Dipiohon ia ma pitu nari tondi na asing na jumahat sian ia. Dung i masuk ma halahi tu pamatang ni jolma i, disi ma halahi maringanan. Gabe mur jumahat ma pangalaho ni halakna i sian na parjolo i. Songon i muse ma na masa tu na sasundut na jahat on." 12:46 Dompak na mangkobari Jesus dohot halak na bahat i, ro ma inangNia rap dohot angka kahanggiNa, giot mangkobari dohot Ia. Tapi hara ni na so tarbaen dope laing di ruar ma halahi jongjong. 12:47 Dung i dipaboa sahalak sian na bahat i ma tu Jesus, ning ia, "Di ruar do halak inang dohot kahanggi ni Guru i, giot mangkobari dohot Guru i." *Dipiga-piga naskah narobi, nada adong ayat 47 on.* 12:48 Dung i dialusi Jesus ma, "Ise he inangKu? Ise ma he kahanggingKu?" 12:49 Laing ditudu Ia ma tu angka anak siseanNia i, ning Ia, "Ligi hamu ma, halak on do dainang dohot kahanggingKu. 12:50 Halak na patuluskon na nipangido ni roha ni Damang na di banua ginjang i, i do kahanggingKu, i do ibotongKu, i do dainang."
13:1 Laing di na sadari i, kehe ma Jesus sian bagas i tu topi ni dano. Disi ma Ia juguk. 13:2 Na bahatan halak marlagut mangkaliangi Ia. Gabe masuk ma Ia tu parau, disi noma Ia juguk. Tapi anggo halak na bahat i di topi-topi ma marjongjongan. 13:3 Diajarkon Jesus ma tu halahi marragam-ragam pangalaho. Mardongan umpama do dibaen Ia na mangajari i. "Adong ma sada halak partani, na kehe giot manyabur same." Songon i ma dipungka Jesus caritoNia i. 13:4 "Jadi dompak na manyabur same i ia, adong ma na mangkadabu tu topi ni dalan i, gabe ro ma unggas, dipangan ma i. 13:5 Adong muse ma na madabu tu tano na marbatu-batu, saotik sajo tanona. Manigor tubu do i hara ni na saotik i tanona. 13:6 Tapi dung manaek mataniari, rahar ma i lalu mate hara ni pejet ni uratna i. 13:7 Adong muse ma na madabu tu antara ni duri-duri. Mur magodang ma duri-duri i gabe tarhapit ma same i. 13:8 Tapi adong muse do antong same i na madabu tu tano na napu. Marbatu ma anggo i. Adong na saratus lompit parbatuna. Adong na onom pulu lompit, adong na tolu pulu lompit. 13:9 Sanga ise na marpinggol, ditangihon ia ma!" 13:10 Dung i ro ma anak siseanNia i manyapai tu Jesus, "Biasi mamake umpama Guru i muda mandok hata tu halak na bahat i?" 13:11 Dialusi Jesus ma, "Harana, tu hamu do por roha ni Debata paboahon sitabunian ni harajaanNia. Anggo tu na asing i, nada. 13:12 Tu halak na maradong mur ditambai, anso mur bahat sajo. Tapi anggo tu halak na so maradong, dibuat muse noma sian ia na saotik i. 13:13 Hara ni i do umbaen na mamake umpama Au muda mandok hata tu halak na bahat. Angke haru pe marnida halahi, hape laing songon na so marnida do. Marbinege do halahi, hape songon halak na so marbinege do, jana nada mangastui! 13:14 Tarjadi ma tu halahi na nidok ni Panurirang Jesaya na mandok, 'Sai giot manangihon do nian hamu jana manangihon, hape so diastui hamu. Sai giot mangaligi do nian hamu dohot matamunu jana mangaligi, hape so diida hamu. 13:15 Harana, ma jogal roha ni halak on, ma gabe maingol pinggol ni halahi, dipapitpit halahi muse do mata ni halahi. Tarjadi pe i anso unang marnida do mata ni halahi, jana anso ulang marbinege pinggol ni halahi, jana anso ulang mangastui roha ni halahi, anso ulang ro halahi tu Au, jana gabe pamalumonKu ma halahi.' " 13:16 "Tapi martua ma matamu hara ni na marnida jana pinggolmu hara ni na marbinege. 13:17 Tutu do na Hudok on! Harana bahat do panurirang na jolo dohot halak na burju mangoloi Debata malungun marnida na niidamunu saonnari, hape inda habolasan halahi laho marnidasa. Malungun do halahi manangihon na nibegemunu saonnari, hape inda sanga tarbaen halahi laho manangihon." 13:18 "Tangihon hamu ma astuan ni umpama taringot tu panyabur i. 13:19 Sanga ise na mambege jamita taringot tu Harajaan Ni Banua Ginjang, tapi nada diastui ia, sarupa ma i dohot same na nisaburkon tu dalan i. Ro ma Sibolis parjahat i mangarampas na nisaburkon tu roha ni halahi. 13:20 Same na nisaburkon tu inganan na marbatu-batu i, i ma tarsongon halak na manigor marjop ni roha manjagit jamita i hatiha dibege ia. 13:21 Tapi nada pola sadia gomos di bagasan roha ni halahi, gabe inda sadia honok tahan. Muda ro hasusaan dohot pangayak-ayahan hara ni jamita i, manigor marbalik ma halahi. 13:22 Same na madabu tu tonga-tonga ni duri i, i ma tarsongon halak na mambege jamita i, tapi humolos ma halahi hara ni ngolu ni halahi. Sai giot marlobi-lobi do ngolu ni halahi. Jadi tarhapit ma jamita i di bagasan roha ni halahi, gabe nada marbatu. 13:23 Dung i anggo same na disabur tu tano na napu i, i ma tarsongon halak na umbege jamita i, tangkas diastui ia. Ramos ma parbatuna. Adong ma i na saratus lompit bahatna. Adong na onom pulu lompit bahatna. Adong na tolu pulu lompit bahatna sian same na parjolo i." 13:24 Dung i dipaboa Jesus ma sada hari umpama tu halak na bahat i songon on, "Anggo Harajaan Ni Banua Ginjang tudos do i tu sada halak partani na manyabur same na denggan di ladangnia. 13:25 Jadi di sada borngin, dung marmodoman sude halak, ro alo ni partani i manyabur simareme-eme di tonga-tonga ni eme i. Dung i kehe ia. 13:26 Dung mur magodang eme i, marayak boltok ma, tarida ma dohot simareme-eme i. 13:27 Dung i ro ma angka parkarejo na niupaan disi mandok tu nampuna ladang i, 'O, Tuan! Nada he same na denggan na nisuanmu tu ladangmi? Sian dia dehe ro simareme-eme i?' 13:28 Dialusi parladang i ma, 'Alongki do mambaen i!' Dung i disapai angka na niupaan i dope tu parladang i, 'O, Tuan! Hami baboi ma simareme-eme i?' ning halahi. 13:29 'Indangkon,' ning ia mangalusi. 'Harana muda dibaboi hamu naron simareme-eme i, gabe tarumpat ma dohot eme i. 13:30 Padiar ma songon i rap tubu simareme-eme i dohot eme i lopus tu sabion on. Anggo disi saulahon hudokkon pe tu angka na manyabi i, palagut hamu ma sude duhut-duhut. Rahuti hamu anso nitutungan. Dung i palagut hamu ma eme i anso nipasimpan tu talobat.' " 13:31 Dicaritohon Jesus ma sada nari umpama tu halak na bahat i, "Anggo Harajaan Ni Banua Ginjang tarsongon batu ni sabi *SABI: Sabi na nimaksud dison, i ma sajenis suan-suanan na gincatna bisa hurang lobi tolu meter.* do i. Dibuat halak ma i, disuan ia di ladangnia. 13:32 Na menehan do anggo batu ni sabi. Tapi muda dung tubu i, tardok, ia ma na gumodang sian sude na margoar simarata na dayuk bonana. Gabe songon hayu ma i. Marroan ma angka unggas marasar di dangkana i." 13:33 Adong dope umpama na asing dicaritohon Jesus tu halak na bahat i. "Anggo Harajaan Ni Banua Ginjang tarsongon ragi do i. Dibuat anak boru i ma ragi i, dicampurkon ia ma tu topung tolu tabung, lopus kombang sude!" 13:34 Marumpama do Jesus mangajarkon i sude tu halak na bahat i, nada adong na niajarkonNia ia so marhite umpama. 13:35 Jadi hara ni na songon i, tulus ma tarjadi hata ni panurirang, na mandok songon on, "Marumpama do Au muda mangkatai dohot halahi; giot paboaonKu angka pangalaho na so habotoan dope mamungka sian hajajadi ni portibi on." 13:36 Dung i ditinggalkon Jesus ma halak na bahat i. Mulak ma Ia. Dung i ro ma anak siseanNia i mandapotkon Ia laho manyapai, "Paboa ma tu hami, sanga aha do astuan ni umpama taringot tu simareme-eme na di ladang i." 13:37 Dipatorang Jesus ma, "Anggo na nidok na manyabur same na denggan i, i ma Anak Ni Jolma i. 13:38 Portibi on ma ladang i. Anggo same na denggan i, i ma angka halak na dung gabe parsidohot di Harajaan i. Simareme-eme i, i ma angka halak na mangoloi si Jahat i. 13:39 Alo ni na manyabur simareme-eme i, i ma Sibolis. Sabion i ma ajal ni hasiangan. Angka panyabi i, i ma angka surusuruan. 13:40 Songon simareme-eme na nipalagut i na nitutung di bagasan api, laing songon i muse ma di ari na parpudi. 13:41 Ro ma Anak Ni Jolma i, suruhononNia ma angka surusuruanNia palagutkon sian tonga-tonga ni bangsoNia sude halak na mambaen mardosa halak na asing dohot sude halak na mambaen na jahat. 13:42 Ambungkononkon ma halahi sude tu purunan ni api. Disi ma halahi mangangguhi jana patungaripon. 13:43 Tapi anggo halak na patuluskon na nipangido ni roha ni Debata, marsinondang ma halahi songon mataniari di bagasan Harajaan Ni Ama ni halahi. Sanga ise na marpinggol ditangihon ia ma!" 13:44 "Anggo Harajaan Ni Banua Ginjang, tarsongon arta na arga do i, na tanom di bagasan ladang. Jadi dapot sada halak ma i. Ditabunihon ia ma mangulahi tu bagasan ladang i. Jadi hara ni jop ni rohania, digadis ia ma sude sinadongannia. Mulak ma ia, ditobusi ia ma ladang i." 13:45 "Anggo Harajaan Ni Banua Ginjang tarsongon parjagal muse do i, na manjalahi simata sigodang arga. 13:46 Disi marsuo ia dohot sangkamata simata na jeges situtu, manigor kehe ma ia manggadis nasa na adong disia, anso ditobusi ia simata na sangkamata i." 13:47 "Anggo Harajaan Ni Banua Ginjang laing tarsongon jala na nisampakkon tu laut do i. Gabe dapot ma marragam-ragam ihan. 13:48 Dung gok jala i, disarat parihan i ma i tu darat. Jadi juguk ma halahi mamili i angka ihan i: Muda na denggan, dipamasuk ma i tu ingananna tapi na so denggan diambungkon halahi. 13:49 Songon i ma pangalahona di ari na parpudi. Marroan ma angka surusuruan manyirang halak parjahat sian halak na patuluskon na nipangido ni roha ni Debata. 13:50 Dung i diambungkon ma halak na jahat i tu purunan ni api. Disi ma halahi mangangguhi jana patungaripon." 13:51 "Mangarti do hamu sudena i?" ninna Jesus manyapai. "Madung!" ning halahi mangalusi. 13:52 Dung i ninna Jesus ma, "Hara ni i ma, sude Siboto Surat na dung mangguruhon Harajaan Ni Banua Ginjang i, gabe tarsongon sada halak tuan di sada bagas do i, na paruarkon sian panyimpananna sude barang-barangnia sigodang arga, na imbaru dohot na dung honok." 13:53 Dung sidung dicaritohon Jesus sude angka umpama i, kehe ma Ia sian inganan i. 13:54 Mulak ma Ia tu huta hagodanganNia. Jadi kehe ma Ia mangajari di bagas paribadatan na disi. Homang-homang ma sude halak na manangihon i, hara ni tabona. Didok halahi ma, "Sian dia do dapot Ia hamaloon na songon i? Dung i sian dia do dapot Ia hagogoonNia mambaen angka hahomangan i? 13:55 Nada he anak ni tukang hayu i do Ia? Nada he si Maria do inangNia; dohot si Jakobus, si Josep, si Simon dohot si Judas do angka anggiNia? 13:56 Nada he di kota on do angka ibotoNia rap dohot hita? Sian dia do dapot Ia sudena i?" 13:57 Gabe nada ra halahi manjagit Jesus. Gabe didok Jesus ma tu halahi, "Jadi anggo panurirang, sanga di dia pe dipasangap halak do i. Tapi nada sangap ia anggo di huta hagodangan dohot di bagasnia sandiri." 13:58 Hara ni i, gabe nada bahat hahomangan dibaen Jesus disi. Hara ni na so porsaya i halahi.
14:1 Jadi hatiha i tarbege ma tu si Herodes, gubernur ni Galilea taringot tu Jesus. 14:2 Didokkon ia ma tu angka pagawenia i, "Pasti na dung mulak mangolu do si Johannes on! I do umbaen na adong hagogoon na songon i diSia." 14:3 Tutu do i, na nipatangkupkon ni si Herodes do si Johannes. Diihoti, dipamasuk tu hurungan. Hara ni si Herodias dadaboru ni si Pilipus angginia sandiri. 14:4 Harana jungada do didok si Johannes tu si Herodes, "Nada tola buatonmu si Herodias! Nada denggan i!" 14:5 Jadi, giot bunuon ni si Herodes ma si Johannes, tapi mabiar ia mida halak. Harana, dietong roha ni halak do si Johannes songon panurirang. 14:6 Jadi hatiha marpesta ulang tahun ia, manortor ma boru ni si Herodias di jolo ni halak na ro i. Jop sajo ma roha ni si Herodes marnida na manortor i. 14:7 Gabe dijanjihon ia ma tu anakboru i, pola marsumpa ia, sanga aha pangidoannia, lehenon ma disia. 14:8 Jadi diirang-irangi inangna ma anakboru i gabe didok ia ma pangidoannia, "Lehen ma di au ulu ni si Johannes Pandidi di ginjang talam on!" 14:9 Marsak ma roha ni si Herodes umbege pangidoan i. Tapi hara ni janjinia nangkin dijolo ni halak na ro i, gabe diparentahon ia ma anso nioloan pangidoan ni anakboru i. 14:10 Disuru ia ma halak tu hurungan laho manggotap ulu ni si Johannes. 14:11 Dung i dioban ma ulu ni si Johannes i masuk, dibaen ma i tu talam laho mangalehen tu anak boru i. Dung i dipasahat anakboru i muse ma tu inangnia i. 14:12 Dung i dibuat angka anak sisean ni si Johannes ma bangkenia i laho mananomsa. Kehe ma halahi paboahon pangalaho i tu Jesus. 14:13 Jadi dung dibege Jesus barita ni si Johannes, kehe ma sasada Ia marparau. Dipatorus Ia ma tu sada inganan na lungun. Tapi diboto halak do sanga na tudia Ia kehe. Jadi marroan ma halahi sian kota ni halahi be mandapoti Jesus. Mardalan pat noma halahi sude. 14:14 Jadi di na mijur Jesus sian parau i, diida Ia ma halak na bahat i. Gabe ibo ma rohaNia mida halahi. Dipamalum Ia ma sanga ise na marnyae sian halahi. 14:15 Jadi dung andospotang marroan ma anak siseanNia i. Didok halahi ma tuSia, "Potang ne ma ari, hape na lungunan dison. Sugari, dumenggan ma disuruhon Guru i halahi marsitobusi panganonna be tu angka huta i." 14:16 "Indangkon sai kehe halahi, angkon lehenonmunu do halahi mangan!" 14:17 "Tapi hum lima roti dohot dua ihan do adong di hami," ninna halahi mangalusi Jesus. 14:18 "Boan hamu ma i tuson," ninna Jesus. 14:19 Dung i disuruhon Ia ma halak na bahat i marjuguhan di duhut-duhut i. Dung i dibuat Ia ma roti na lima i dohot ihan na dua i. Manatap ma Ia adop langit, mandok tarimakasi tu Debata. Dipasupasu Ia ma roti i, dung i dilehen Ia ma tu anak siseanNia i anso dibagi-bagihon tu halak na bahat i. 14:20 Mangan ma halahi lopus butong be. Dung i dipalagut anak sisean i ma teba-teba ni roti dohot ihan i. Adong ma dua bolas ampang bahatna. 14:21 Adong do lima ribu halak na mangan i, nada nietong dope angka dadaboru dohot angka dakdanak disi. 14:22 Dung i disuru Jesus ma angka anak siseanNia i marparau anso parjolo halahi taripar tu bariba, jana disuru Ia ma halak na bahat i mulak. 14:23 Dung marmulahan halak na bahat i, manangkok ma Jesus sada Ia tu sada dolok laho martangiang. Ma samon hatiha i, laing disi dope Jesus, hum sasada Ia sajo. 14:24 Parau na nitompang ni angka anak siseanNia i pe ma dao di tonga-tonga ni dano i. Hara ni na maralo haba-haba tu pardalan ni parau i, gabe diompas-ompaskon ombak i ma parau i. 14:25 Jadi hatiha martahuak manuk, ro ma Jesus mardalan di ginjang aek i mandapotkon halahi. 14:26 Jadi dung diida angka anak siseanNia i Ia mardalan di ginjang ni aek i, gabe mabiar ma halahi. "Begu!" ninna halahi mangangguhi. 14:27 Tapi manigor digora Jesus ma mangalusi, "Pasonang hamu ma! Au do i. Ulang mabiar hamu!" 14:28 Dung i didok si Petrus ma, "O, Tuhan, muda tutu Ho do i, suruhon ma anso ro au tu Ho mardalan di ginjang ni aek i." 14:29 "Ro ma ho!" ninna Jesus mangalusi. Jadi mijur ma si Petrus sian parau i, mardalan ma ia di ginjang ni aek i mandapotkon Jesus. 14:30 Tapi di na mardalan i ro ma dihilala ia alogo na gogo di dano i, mabiar ma ia, dung i mamungka ma bonom. "Tolong Tuhan!" ninna si Petrus. 14:31 Jadi manigor disurduhon Jesus ma tanganNia manangkup si Petrus. Dung i ninna Jesus ma, "Na hurang porsaya do ho, Petrus. Biasi pola ganggu rohamu?" 14:32 Dung i gabe rap manaek ma halahi na dua tu parau i. Alogo i pe so ma. 14:33 Gabe unduk ma angka anak siseanNia na di parau i marsomba tu Jesus. "Tutu do Anak Ni Debata Ho, Tuhan!" ninna halahi. 14:34 Dung lalu halahi tu bariba ni dano i, mandarat ma halahi di Genesaret. 14:35 Hum ditanda halak na disi i Jesus do na ro i, manigor dipaboa halahi ma tu sude luat na humaliang i. Gabe diparobani halak ma angka na marnyae tu Jesus. 14:36 Angka dipangido halahi ma, sugari tola halahi hum manjama ujung ni baju jubaNia i sajo pe. Gabe malum do sude na manjama baju jubaNia.
15:1 Di sada hatiha adong ma ro angka halak Parise dohot angka Siboto Surat sian Jerusalem mandapotkon Jesus. Disapai halahi ma Jesus songon on, 15:2 "Biasi ma dilanggar angka anak siseanMu adat dohot uhum na nipasahat ni angka ompunta sijolo-jolo tubu i? Nada jolo marbasu tangan halahi laho mangan songon adat na somal!" 15:3 Dialusi Jesus ma, "Jadi muda hamu, biasi dilanggar hamu parenta ni Debata, hum hara ni na tunduk hamu mangoloi adat hasomalan ni ompungmunu? 15:4 Harana didok Debata do, 'Pantun ma ho tu amangmu dohot tu inangmu.' 'Sanga ise na mandok hata na so ture tu amangna sanga tu inangna, angkon mate do i niuhuman.' " 15:5 Tapi didok hamu, "Muda didok sada halak tu simatobangna: 'Sanga aha na aturan patut baenonku laho paturehon ho, madung huhaulkon i tu Debata,' 15:6 hara ni i nada diwajibkon be pasangaponnia simatobangnia i. Hum hara ni adat hasomalan ni ompungmunu, gabe so mararga be hata ni Debata dibaen hamu. 15:7 O hamu angka pangalancap! Tutu do na nidok ni si Jesaya hian taringot tu hamu, di na nidoknia, 15:8 'Dipasangap bangso on do Au hum di pamangan sajo, hape anggo roha ni halahi dao do sian Au, songon i ma pandok ni Debata. 15:9 Inda adong gunana disomba halahi Au, harana angka aturan ni jolma do diajarhon halahi!' " 15:10 Dung i dipio Jesus ma halahi jana didok Ia ma tu halahi. Didok Ia ma tu halahi, "Tangihon hamu ma jolo! Tangkas parrohahon hamu! 15:11 Nada na masuk tu pamangan na pahodarhon jolma, tapi na haruar sian pamangan i do na pahodarhon." 15:12 Dung i gabe didok anak siseanNia i ma tuSia, "Diboto Guru i dehe na goyak roha ni halak Parise i, umbege hata na nidok ni Guru i?" 15:13 Dialusi Jesus ma, "Sude suan-suanan na so nisuan ni Damang na di banua ginjang i, angkon niumpat dohot urat-uratna. 15:14 Padiar hamu ma halahi. Angke panogu na mapitung do halahi, na manogu na mapitung. Muda di togu na mapitung halak na mapitung, madabu do halahi na dua tu lubang i." 15:15 Didok si Petrus ma, "Patorang ma jolo tu hami astuan ni umpama i, Guru!" 15:16 Dialusi Jesus ma, "Laing na so mangarti dope hamu lakna? 15:17 Inda he diboto hamu? Sude na masuk tu pamangan ni sada-sada halak, tu butuha do kehe ni i. Dung i ruar ma i mangulahi. 15:18 Tapi anggo na ruar sian pamangan ni halak, i ma na ro sian rohana. I do na pahodarkon ia. 15:19 Harana sian roha i do haroroan ni angka pikiran na jat, gabe mamunu jolma, mangalangkup, mambaen na so ture, manangko, margabus, dohot na manilakoi. 15:20 Angka sisongon i ma na pahodar jolma. Tapi anggo na mangan so jolo marbasu, inda gabe hodar halak dibaen i!" 15:21 Sian i kehe ma Jesus tu luat na marbalokkon kota Tirus dohot Sidon. 15:22 Jadi ro ma sahalak boru Kanaan sian luat i mandapotkon Jesus. Pio-pio ma ia, "O, Tuhan anak ni si Daud, ibo ma rohaMu mida au! Hona setan borungku. Ma hancit sajo!" 15:23 Umpe sahata dialusi Jesus. Jadi ning halahi ma, "Paorot ma da anak boru i Guru. Hum na manggaori sajo do ia di pudinta!" 15:24 Dialusi Jesus ma, "Hum tu angka biri-biri na lilu sian tonga-tonga ni Israel do Au disuru." 15:25 Tapi haru pe na dung didok Jesus songon i, laing ro do anak boru i tu Jesus. Marsomba-somba ia mandok hatania, "O, Tuhan, urupi ma au," ning ia. 15:26 Tapi dialusi Jesus ma, "Dia ma denggan nibuat panganon ni dakdanak gabe niambungkon tu anjing." 15:27 "Tutu do nian, Tuhan," ninna anak boru i mangalusi, "tapi laing dipangan anjing do teba-teba na mardabuan sian meja ni morana i." 15:28 Gabe didok Jesus ma tusia, "Godangna i haporsayaanmi, da inang! Tulus ma di ho sanga aha na nihalungunkonmi!" Laing di na santongkin i, malum ma manigor borunia i. 15:29 Ditinggalkon Jesus ma inganan i, mardalan ma Ia manopi-nopi Dano Galilea. Dung i manangkok ma Ia tu sada dolok-dolok, juguk ma Ia disi. 15:30 Marroan ma bahat halak mandapotkon Ia maroban angka na timpang, na mapitung, na onyangon, na ngungu dohot angka na marnyae na asing. Dipayakkon halahi ma angka na marnyae i di lambung pat ni Jesus. Gabe dipamalum Jesus ma halahi. 15:31 Homang ma roha ni halak na bahat na disi i, di na niida ni halahi gabe malo mangakatai na ngungu, malum na timpang, gabe mardalan na onyangon, tarbaen marnida na mapitung. Dipuji halahi ma Debata ni halak Israel. 15:32 Dung i dipiohon Jesus ma angka anak siseanNia i, didok Ia ma tu halahi, "Ibo do rohangKu mida halak na bahat on. Tolu ari ma halahi dison rap dohot Au. Hape so adong be sanga na aha panganon ni halahi. Nada tarpadiar Au halahi mulak anggo so jolo mangan. Gale-gale halahi naron di dalan i hara ni na tangkuraparon." 15:33 Gabe disapai anak siseanNia i ma tuSia, "Di dia ma dapot hita sipanganon di halongonan on di halak na songon on bahatna?" 15:34 "Piga adong roti di hamu?" ninna Jesus manyapai. "Pitu", ning halahi. "Dung i ihan na menek-menek saotik." 15:35 Jadi disuru Jesus ma anso marjuguhan halak na bahat i di tano i. 15:36 Dung i dibuat Ia ma roti na pitu i dohot ihan i. Didok Ia tarimakasi, diponggoli Ia ma roti i dohot ihan i, dileheni Ia ma tu angka anak siseanNia i. Dibagi-bagihon halahi ma tu halak na bahat i. 15:37 Mangan ma halahi sude, lopus butong be. Dung sidung na mangan i, dipalagut ma teba-teba ni roti dohot ihan i. Marlagut ma sude gok pitu ampang. 15:38 Hum halaklahi sajo, adong ma opat ribu halak bahat ni bilangan ni na mangan i. Inda dohot dope dietong disi, angka bagian dadaboru dohot angka dakdanak. 15:39 Dung i disuru Jesus ma halahi marmulahan. Tapi anggo Jesus, marparau ma sada Ia, laho kehe tu Luat Magadan.
16:1 Ro ma halak Parise dohot halak Saduse mandapotkon Jesus. Na giot manjalak-jalahi hasalaan ni Jesus do roha ni halahi. Dipangido halahi ma anso dipataridahon Ia sada tanda sian banua ginjang. 16:2 Tapi dialusi Ia ma halahi, "Muda lusut mataniari, didok hamu, 'Ah, denggan do ari on, angke rara do langit.' 16:3 Dung manyogot didok hamu ma, 'Ah, ro do udan annon, harana rara do langit boti holom.' Anggo manjujur ari sian na mangaligi langit malo do hamu, hape anggo manjujur na masa di hatiha on, nada malo hamu!" 16:4 "Songon on ma jahatna dohot durakona na giot mangido tanda? Hum sada tanda pe nada patuduhonon tu hamu, asing sian tanda na tu si Junus." Dung didokkon Jesus songon i, ditinggalkon Ia ma halahi, lalu kehe Ia. 16:5 Hatiha taripar angka anak sisean ni Jesus i, lupa do halahi maroban roti. 16:6 Didok Jesus ma tu halahi, "Manat-manat jana jamot ma hamu adop ragi ni angka Parise dohot Saduse i." 16:7 Marpikir-pikir ma halahi, marsipandohan ma angka anak sisean ni Jesus i na sada tu na asing, "Hara ni na so taoban i do roti, umbaen na nidokNia songon i." 16:8 Diboto Jesus do sanga aha na nihataan ni halahi i. Gabe didok Ia ma, "Biasi taringot tu na so maroban roti dihatai hamu? Na hurang porsaya do hamu! 16:9 Na so mangarti dope hamu? Adong he na so diingot hamu be roti na lima i, tu na lima ribu halak i? Piga ampang lobi-lobi ni roti na nipalagutmunu i? 16:10 Bia muse dope dohot roti na pitu i di siopat ribu halak i? Na so diingot hamu be dohot i? Piga ampang lobi-lobi na nipalagutmunu i? 16:11 Biasi jabat songon i nada mangarti hamu, na so taringot tu roti do na Hudok? Manat-manat ma hamu mida ragi ni halak Parise dohot Saduse!" 16:12 Ujungna gabe diboto halahi ma astuan ni na nidokNia i. Disuru Jesus pe halahi manat-manat nada na mandok taringot tu ragi na nipake laho mambaen roti. Tapi taringot tu pangajaran ni halak Parise dohot Saduse do. 16:13 Hum lalu Jesus tu luat na mardonokkon Kaisarea Pilippi. Disapai Ia ma disi angka anak siseanNia i, "Ise dehe didok halak, Anak Ni Jolma i?" 16:14 Dialusi halahi ma, "Adong na mandok, si Johannes Pandidi. Deba mandok si Elia. Na asing mandok, si Jeremia sanga sahalak sian angka panurirang i." 16:15 "Tapi mangihutkon pandapotmunu sandiri, ise do Au?" 16:16 Mangalusi ma si Simon Petrus, "Ho ma ibana Kristus, Anak Ni Debata Na Mangolu i." 16:17 "Na martua do ho ale Simon anak ni si Junus!" ninna Jesus, "Harana nada jolma be na paboahon pangalaho i tu ho, tapi Damang na di banua ginjang i do. 16:18 Au pe Hudok ma tu ho, 'Si Petrus' do ho (artina 'Batu na pir'). Di ginjang ni batu on ma pajongjongKu parlagutanKu na so tartaluhon; sanga na hamatean pe na ro i! 16:19 LehenonKu ma di ho kunci ni Harajaan Ni Banua Ginjang. Sanga aha na nilarangmu di ginjang tano on laing larangon ma i lopus tu banua ginjang. Sanga aha na nidokmu tigor di ginjang tano on, laing na tigor ma i lalu tu banua ginjang." 16:20 Dung i ditonai Ia ma angka anak siseanNia i anso ulang dipaboa-boa halahi sanga na tu ise pe, paboa na Ia do Kristus i. 16:21 Mamungka sian i marsitangkas ma Jesus paboahon tu angka anak siseanNia i. Angkon kehe Ia tu Jerusalem jana angkon parkancitan ni angka pamimpin dohot angka Sintua Ni Malim dohot Siboto Surat Jahudi ma Ia disi. Angkon bunuon Ia, tapi mulak mangolu ma Ia di ari patoluhon! 16:22 Dung i ditogu si Petrus ma Jesus tu duru laho manggorahon Ia. Didok si Petrus, "Sai dipadao Debata ma na songon i sian Ho, Tuhan! Sai ulang ma tulus pangalaho na songon i tu Ho!" 16:23 Tapi humusor ma Jesus manaili tu si Petrus, didok Ia ma, "Morot ho sian on, Sibolis! Gabe batu partuktuhan do ho di Au. Pikiran ni jolma do pikiranmi! Inda pikiran ni Debata na songon i!" 16:24 Dung i didok Jesus ma tu anak siseanNia i, "Muda adong halak na giot mangihutkon Au, angkon dihalupahon ia do dirina sandiri, dung i diporsan ia ma silangna dung i pe anso diihutkon Au. 16:25 Harana anggo halak na paluahon ngoluna, angkon gabe agoan ngolu. Tapi halak na agoan ngoluna hara ni Au, gabe dapotan hangoluan do. 16:26 Aha ma he labo ni halak, muda ia nampuna sude na satano on, anggo mago do sian ia ngolunia? Targonti ma he ngolu i sanga na dohot aha? 16:27 Ro ne ma Anak Ni Jolma i, mardongan hasangapan ni AmangNia rap dohot angka surusuruanNia. Anggo disi, baloskononNia ma tu ganop jolma hombar tu pambaenan ni halahi be. 16:28 Hudok ma tu hamu: Sasintongna sian tonga-tongamunu na adong dison, adong do na so giot mate anggo so jolo diida ia Anak Ni Jolma i ro songon raja di bagasan harajaanNia."
17:1 Dung onom ari, dioban Jesus ma si Petrus dohot si Jakobus dohot angginia si Johannes tu puncut ni sada dolok na gincat. Hum halahi sajo do disi. 17:2 Gabe muba ma tompa ni Jesus di jolo ni halahi: Gabe torang songon mataniari bohiNia i. PakeanNia pe gabe marsinondang songon hatorangan. 17:3 Dung i diida halahi ma si Musa dohot si Elia mangkobari dohot Jesus. 17:4 Dung i didok si Petrus ma tu Jesus, "Tuhan, tabona i hita dison! Anggo ra do Ho Tuhan, hupajongjong ma dison tolu undung-undung. Sada ma i di Ho, sada di si Musa, sadanari di si Elia." 17:5 Dompak na mandok hata i si Petrus, dihaliangi ombun na torang situtu ma halahi. Dung i adong ma sada sora sian ombun i na mandok, "On ma AnakKu na Huhaholongi, na pasonangkon rohangKu. Tangihon hamu ma Ia!" 17:6 Dung dibege anak sisean ni Jesus i sora i, mabiar sajo ma halahi jabat tungkap be tu tano i. 17:7 Tapi ro ma Jesus manjama halahi, ning Ia ma, "Jongjong ma hamu, ulang hamu mabiar!" 17:8 Hatiha mangaligi halahi, inda diida halahi be sanga ise, hum Jesus sajo noma. 17:9 Hatiha manuat halahi sian dolok i, dipaingot Jesus ma halahi, "Salolot so dipangot sian na mate dope Anak Ni Jolma i, ulang paboa-boa hamu sanga na tu ise pe sanga aha na niidamunu nangkin." 17:10 Disapai angka anak siseanNia i ma Jesus, "Biasi didok angka Siboto Surat, angkon parjolo ro si Elia?" 17:11 Dialusi Jesus ma, "Tutu do i! Jumolo do ro si Elia laho pasingkopkon sasudena. 17:12 Tapi Hudok ma di hamu, madung ro nian si Elia, tapi nada ditanda halak ia. Gabe roha-roha ni halak ma mambaen sanga aha tusia. Laing songon i muse ma Anak Ni Jolma i manaon parhancitan sian halahi." 17:13 Ujungna mangarti ma angka anak sisean ni Jesus i, hape taringot tu si Johannes Pandidi do na nidok ni Jesus tu halahi. 17:14 Dung diulahi halahi mandapotkon halak na bahat i, ro ma sada bayo marsomba di jolo ni Jesus. 17:15 Didok ia ma hatania, "Ibo ma jolo rohaMu mida anakku! Solpoton do ia jana marhancit situtu. Muda hatiha di panombona i jotjot madabu ia tu api sanga tu aek. 17:16 Madung huoban ia tu angka anak siseanMi, tapi inda tarpamalum halahi ia." 17:17 Dialusi Jesus ma, "O hamu angka angkatan na so porsaya jana na lilu, angkon sadia honok Au rap dohot hamu? Angkon sadia honok nari Au sobar paida-ida hamu? Oban ma tuson dakdanak i!" 17:18 Gabe dipaorot Jesus ma setan i sian dakdanak i. Morot ma setan i, gabe manigor malum ma dihilala dakdanak i. 17:19 Dung i didapotkon angka anak siseanNia i ma Jesus hatiha sada Ia sajo. Disapai halahi ma tuSia, "Biasi nada tarpaorot hami setan i?" ninna halahi. 17:20 Dialusi Jesus ma, "Angke hurang porsaya hamu. Ingot hamu ma! Sugari sagodang ni batu ni sabi pe adong haporsayaanmunu, tardok hamu do tu dolok on, 'Morot ma ho sian on tu sadu!' angkon pinda do dolok i. Jana nada adong sanga aha pe na so tarpatupa hamu! 17:21 Tapi anggo setan na songon on, tangiang dohot puaso sajo do tarbaen paruarkon i." 17:22 Hatiha marlagut sude anak sisean ni Jesus di Galilea didok Jesus ma tu halahi, "Inda pola sadia honok nari, pasahaton ma Anak Ni Jolma i tu kuaso ni hajolmaon. 17:23 Bunuon ni halahi ma Ia, tapi mulak mangolu do Ia di ari patoluhon." Gabe marsak sajo ma angka siseanNia i. 17:24 Jadi dung lalu Jesus rap dohot angka anak siseanNia i tu Kapernaum, ro ma tu si Petrus angka sijagit pajak ni Bagas Ni Debata manyapai ia, "Manggarar pajak na dua dirham i dehe Gurumunu i sanga nada?" 17:25 Dialusi si Petrus ma, "Manggarar!" Jadi dung mulak si Petrus, inda didok ia dope sanga na aha manigor didok Jesus ma tusia, "O, Simon! Bia do ninna rohamu? Ise do sigarar pajak sanga bea tu angka raja na di tano on? Rayat i do sanga halak na asing?" 17:26 "Halak na asing ma antong," ning si Petrus, "Anggo songon i, bebasma rayatna i. 17:27 Tapi anso ulang pola gabe batu partuktuhan di halahi, kehe ma ho jolo mangkail tu dano. Buat ma ihan na parjolo dapot i. Dapot ho ma di baba ni ihan i hepeng satuk ni panggarar ni pajak sian hita na dua. Buat ma hepeng i, gararkon ma tu halahi. I ma pajak sian hita tu Bagas Ni Debata."
18:1 Jadi ro ma sanoli angka anak sisean ni Jesus tuSia manyapai, "Ise do tardok na gumodang di Harajaan Ni Banua Ginjang?" 18:2 Dipiohon Jesus ma sada dakdanak na menek. Disuru Ia ma dakdanak i jongjong di jolo ni halahi. 18:3 Sasintongna do na Hudok on tu hamu, "Muda so muba rohamunu jana mulak songon dakdanak on, nada tarbaen hamu masuk tu Harajaan Ni Banua Ginjang. 18:4 Anggo halak na gumodang di Harajaan Ni Banua Ginjang, i ma halak na patorukkon dirina gabe songon dakdanak on. 18:5 Dung i halak na manjagit dakdanak na songon on di bagasan goarKu, laing na manjagit Au do halak na songon i." 18:6 "Sanga ise na mambaen gabe so porsaya be angka na menek on tu Au, gumonan ma ditambatkon losung batu tu rungkung ni halak sisongon i, anso nibonomkon i tu laut na bagas. 18:7 Marjaya do portibi on hara ni angka pangalaho na di bagasanna, i ma na mambaen halak gabe mardosa. Tutu angkon sai tongtong do adong na songon i. Tapi marjaya ma halak na gabe parbonciranna! 18:8 Muda hara ni tanganmu sanga hara ni patmu mardosa ho, ponggolkon ma i, ambungkon ma tanganmi sanga patmi. Gumonan ma ho mangolu rap dohot tangan sabariba sanga pat sabariba, ulang pado martangan ho dua-dua sanga laing marpat ho dua-dua, hape ho sandiri niambungkon tu api na so ra mintop. 18:9 Dung i muda hara ni matamu do ho gabe mardosa, pulsikkon ma i ambungkon matami. Gumonan do mangolu ho sada mata ulang pado disampakkon ho tu api narako laing disi matami na dua i." 18:10 "Ingot hamu ma, ulang dipalayas hamu sahalak sian angka na menek on. Harana Hudok ma tu hamu: Adong do surusuruan ni halahi di banua ginjang na sai mangaligi bohi ni Damang na di banua ginjang." 18:11 Harana, laho paluahon halak na lilu do umbaen na ro Anak Ni Jolma i! 18:12 "Bia do antong ninna rohamunu? Sugari adong ma sada halak nampuna biri-biri saratus. Dung i lilu ma sada sian biri-biri i. Bia ma baenon ni nampuna i? Tontu ditinggalkon ia ma jolo na sambilan pulu sambilan i di dolok i, gabe kehe ma ia manjalahi na lilu na sada i. Na he songon i do? 18:13 Hudok ma tu hamu, muda dung dapot ia na sada i, tontu jumop ma rohania hara ni biri-biri na sada i ulang pado mida na sambilan pulu sambilan nari angka na so lilu i. 18:14 Laing songon i muse ma Amangmunu *AMANGMUNU: Dipiga-piga-piga naskah narobi, didok: AmangKu.* na di banua ginjang i, nada por rohaNia muda adong na lilu sahalak pe sian angka na menek on." 18:15 "Muda mardosa kahanggimu tu ho, *TU HO: Dipiga-piga-piga naskah narobi, nada adong hata on.* topotkon ma ia. Paboa tangkas salania i. Sip-sip ma langkahon tusia anso hum hamu na dua sajo. Muda ditangihon ia na nidokmi, madung dapot ho ia mangulahi. 18:16 Tapi muda inda ditangihon ia, oban ma sahalak sanga dua halak nari, anso gomos angka hata ni dua sanga tolu halak saksi i. 18:17 Muda laing inda ditangihon ia sipaingot ni halahi i, paboa ma di tonga-tonga ni parlagutan. Muda laing inda ditangihon ia be sipaingot ni parlagutan i, etong hamu ma i songon halak na so mananda Tuhan. Sanga songon sada halak sitagi pajak." 18:18 "Ingot hamu on! Sanga aha na nitambatmunu di tano on, laing na tambat muse ma i di banua ginjang. Dung i sanga aha na nipaluamunu di tano on, laing na nipalua muse ma i di banua ginjang." 18:19 Ingot hamu muse ma on! Muda adong dua halak sian hamu di tano on na saroha manangiangkon sanga aha pe, tulus do tangiang i baenon ni Damang na di banua ginjang i. 18:20 Angke sanga di dia rap marlagut dua sanga tolu halak di bagasan goarKu, disi do Au rap dohot halahi. 18:21 Dung i ro ma si Petrus tu Jesus manyapai, "O, Tuhan! Muda mardosa dongan tu iba, intap ni piga noli do iba mangampuni ia? Tuk ma pitu noli?" 18:22 Dialusi Jesus ma, "Ingot ma! Nada hum pitu noli sajo. Tapi pitu pulu noli pitu! *PITU PULU NOLI PITU: Sanga pitu pulu pitu noli.* 18:23 Harana anggo Harajaan Ni Banua Ginjang tarsongon sada raja na giot pasalosehon angka utang ni naposonia do i. 18:24 Dung dipungka ia na maretong dioban ma mangadop tusia sahalak naposonia i. Marutang ma naposonia i marjuta-juta, 18:25 nada targararsa be utangna i. Jadi didok raja i ma anso nigadis bayo i rap dohot sude halahi na sabagas dohot sude sinadongannia laho manggarar utangnia i. 18:26 Hara ni i, gabe manungkap ma bayo i tu pat ni raja i mangidohon, 'Tuannami, palapang ma jolo rohamu mida au. Hugarar pe sudena utangki,' ning ia. 18:27 Ibo ma roha ni raja i midasa. Gabe dipalua raja i ma ia. Disesa ma sude utangnia i." 18:28 "Tapi di na kehe i haruar naposo i, marsuo ma ia dohot dongannia, rap naposo do halahi. Adong utang ni dongannia i tusia sanga na piga pulu ribu. Hape ditangkup ia ma manigor dongannia i lalu dipingkok ia jana didok ia ma tu dongannia i, 'Garar sude utangmi tu au,' ning ia. 18:29 Gabe manungkap ma dongannia i tusia marsomba-somba, 'Sobar ma ho jolo dongan,' ning ia. 'Hugarar pe sude!' 18:30 Tapi inda diterge ia pangidoan ni dongannia i. Dipahurungkon ia muse dope dongannia i lopus digarar ia sude utangna i. 18:31 Jadi dung diida angka naposo na asing i na masa i, hancit ma roha ni halahi. Diaduhon halahi ma tu raja i. 18:32 Gabe dipiohon raja i ma naposo na jahat i, didok ma tusia, 'Naposo na jahat! Ma husalosehon sude utangmu hara ni na marsomba-somba ho tu au. 18:33 Rap naposo do hamu, inda he patut maribo ni roha ho tu angka donganmu, songon na hubaen i tu ho?' 18:34 Milas sajo ma roha ni raja i dipamasuk ia ma naposo na jahat i tu hurungan. Angkon disi ma ia lopus digarar ia sude utangnia i." 18:35 Laho paujungkon caritoNia i Jesus, didok Ia ma, "Songon i muse ma baenon ni Damang na di banua ginjang i tu hamu, anggo inda ias rohamunu mangampuni donganmunu."
19:1 Dung sidung didok Jesus i sude, ditadingkon Ia ma Galilea, kehe ma Ia tu Luat Judea sabola ipar ni Batang aek Jordan. 19:2 Bahat do halak mangihutkon Ia. Dipamalum Ia do sude halahi disi. 19:3 Jadi ro ma da halak Parise laho manjalak-jalahi hasalaanNia. Disapai halak Parise i ma Ia, "Diisinkon Tona ni ugamonta dehe manyirangkon boru roha-rohaniba sajo?" 19:4 Dialusi Jesus ma, "Na so disise hamu dehe, anggo di mulana i halaklahi dohot dadaboru do halahi ditompa Ia? 19:5 Dung i didok Ia ma, 'Hara ni i angkon tinggalkonon ni halaklahi ma inangna dohot amangna gabe marsada dohot daboruna anso gabe sada na dua i.' 19:6 Jadi nada dua halak be halahi tapi sada noma. Hara ni i do umbaen na so tola sirangon ni jolma, na dung nipadomu ni Debata." 19:7 Dung i disapai halak Parise i ma mangulahi tuSia, "Antong anggo songon i, biasi disuru si Musa halak mangalehen surat sirang tu dadaboru na giot sirangkonon? Na he na manyirangkon dadaboruna do muda na songon i?" 19:8 Dialusi Jesus ma, "Dipatola si Musa pe hamu manyirangkon dadaborumunu, hara ni na mamaoltu do hamu ajaron. Tapi anggo di mulana nada songon i. 19:9 Jadi, tangihon hamu ma on: Halak na manyirangkon dadaboruna, anggo so hara ni na manyimbil dadaborunia i, hape dibuat ia muse boru na asing, na markarosuan do sisongon i." 19:10 Gabe didok anak siseanNia i ma tu Jesus, "Anggo gabe songon i noma halak na marsaripe, gumonan ma indangkon sai mambuat boru." 19:11 Dialusi Jesus ma, "Inda sude halak ra manjagit hata na songon i, hum angka na dung dipasupasu sajo do. 19:12 Harana adong do halak na so bisa marripe, angke songon i hian do halahi sian mulai sorang. Adong muse do halak na so marripe hara ni na nibaen ni halak songon i. Dung i adong muse do halak na so marripe hara ni por ni rohania sandiri jana hara ni Harajaan Ni Banua Ginjang. Sanga ise na sanggup manjagit pangajaran on, halahi sajo ma manjagitsa." 19:13 Adong ma angka na maroban dakdanak tu Jesus anso diampehon Ia tanganNia tu ulu ni angka dakdanak i manangiangkon halahi. Tapi digorahon anak siseanNia i ma halahi. 19:14 Gabe didok Jesus ma tu anak siseanNia i, "Padiar hamu ma marroan dakdanak i tu Au! Ulang larang hamu halahi. Harana angka halak sisongon on do na gabe anggota di Harajaan Ni Banua Ginjang." 19:15 Jadi diampehon Jesus ma tanganNia tu ulu ni angka dakdanak i, dung i kehe ma Ia sian i. 19:16 Di na sadari ro ma sada bayo mandapotkon Jesus, "O, Guru!" ning ia, "Na denggan dia do sibaenonku anso dapot au hangoluan na so mantak?" 19:17 Dialusi Jesus ma, "Biasi tu Au ho manyapai sanga aha na denggan? Hum sada do na denggan, i ma Debata. Muda lungun rohamu dapotan hangoluan na so mantak, angkon oloanmu do angka parenta ni Debata." 19:18 "Parenta na dia ma i?" ning bayo i manyapai. Dialusi Jesus ma, "Ulang ho mamunu, ulang ho markarosuan, ulang ho manangko; ulang ho margabus. 19:19 Pasangap ma amangmu dohot inangmu. Dung i haholongi ma donganmu jolma songon pangkaholongimu di dirimu sandiri." 19:20 "Anggo parenta na songon i do, madung hupatulus do i," ning doli-doli i, "Aha dope na porlu?" 19:21 Didok Jesus ma tusia, "Muda por rohamu gabe sun denggan ho, kehe ma ho manggadis sude sinadonganmu. Lehen ma hepengna i tu angka na pogos, dung i dapot ho ma arta di banua ginjang. Dung i ro ma ho tuson ihutkon ma Au!" 19:22 Dung dibege doli-doli i hata nangkinan i, kehe ma ia mardongan arsak. Angke halak na kayo do ia. 19:23 Jadi didok Jesus ma tu angka anak siseanNia i, "Hudok ma di hamu, na maolan do halak na kayo laho masuk tu Harajaan Ni Banua Ginjang. 19:24 Jana Hupaboa muse dope on di hamu; ummuraan dope unto mamolus sian lubang ni jait, ulang pado halak na kayo laho masuk tu Harajaan Ni Debata." 19:25 Jadi dung dibege angka anak siseanNia i angka hata na nidokNia i, gabe homang ma roha ni halahi. "Anggo songon i, ise noma na bisa dipalua?" ninna halahi. 19:26 Diligi Jesus ma halahi, ning Ia ma, "Anggo di jolma, na so tarbaen do i! Tapi anggo di Debata nada adong na so tarbaen!" 19:27 Jadi didok si Petrus ma, "Ligi ma, ma hami tinggalkon sasudena laho mangihutkon Ho. Gabe aha ma sijagitonnami?" 19:28 Dialusi Jesus ma halahi, "Hudok ma tu hamu, satutuna di hatiha panompaon muse, di hatiha juguk Anak Ni Jolma i, di habangsa hamuliaonNa, hamu angka na mangihutkon Au, giot juguk di ginjang di habangsa na dua bolas i laho manguhumi Israel na dua bolas marga i. 19:29 Angke sanga ise na maninggalkon bagasna, sanga kahanggina, sanga ibotona, sanga pe inangna dohot amangna, sanga dakdanakna, sanga sabana hara ni Au, saratus lompit ma jagiton ni halahi mangulahi. Nilehen muse dope disia hangoluan na so mantak. 19:30 Tapi bahat do na aturan parjolo hape gabe parpudi. Bahat muse do na aturan parpudi hape gabe parjolo."
20:1 "Anggo Harajaan Ni Banua Ginjang, tarsongon sada halak nampuna kobun anggur do i. Manyogot-nyogot i kehe ma ia manjalahi halak na giot markarejo di kobun anggurnia i. 20:2 Jadi dung sada rohania manggarar upa ni parkarejo i sada hepeng perak sadari, disuruhon ia ma halahi markarejo di kobun anggurnia i. 20:3 Dung pukul sambilan manyogot i, kehe ma mangulahi nampuna kobun i, diligi ia ma sanga na piga-piga halak na ngongong marsoan songon i di balerong. 20:4 Jadi didok ia ma tu halahi, 'Dohot ma hamu kehe markarejo di kobun anggurki. Hulehen pe upa na patut di hamu.' 20:5 Markehean ma halahi. Di pukul dua bolas kotu i, laing songon i muse di pukul tolu andospotang, kehe muse ma nampuna kobun i, laing songon i muse dibaen ia. 20:6 Dung hira-hira pukul lima andospotang, kehe muse ma ia. Diligi ia muse, hape laing adong dope halak na jongjong sajo songon i inda adong karejona. Gabe disapai ia ma halahi, 'Biasi he jongjong sajo hamu dison sasadari so adong na niampalmunu?' 20:7 Dialusi halahi ma, 'Inda adong sahalak pe na mangalehen karejo di hami.' 'Anggo songon i, dohot ma hamu markarejo di kobun anggurki,' ninna nampuna kobun i. 20:8 Jadi dung potang ari didok nampuna kobun i ma tu mandurna i. 'Piohon ma angka na karejo i, garar ma upa ni halahi mamungka sian na parpudi ro lopus tu na parjolo ro.' 20:9 Dung i ro ma angka na masuk karejo pukul lima andospotang i. Sada be ma hepeng perak dijagit halahi. 20:10 Dung i ro ma muse na markarejo mamungka sian manyogot. Ninna roha ni halahi umbahat ma jagiton ni halahi. Hape laing sada hepeng perak muse do dijagit halahi. 20:11 Hatiha na manjagit hepeng i halahi, mungut-ungut ma halahi tu nampuna kobun i. 20:12 Didok halahi ma, 'Angka dongan parkarejo na parpudi ro, hum sajom sajo do halahi karejo, jana hami sadari maningting di las ni ari i, hape sarupa ma panggararan dibaen tuan i tu halahi dohot tu hami!' 20:13 Dialusi nampuna kobun i ma tu sahalak sian halahi, 'Ah dongan, nada adong hubaen na so patut tu hamu. Na he na dung jolo dioloi ho do, sada hepeng perak upa ni halak na markarejo sadari? 20:14 Buat upami! Kehe ma ho! Por do rohangku mangalehen tu halak na parpudi ro i upa na sarupa dohot na hulehen di ho. 20:15 Na so tola do lakna hubaen roha-rohangku tu sinadonganku? Sanga na pis do matamu muda burju au tu halak na asing?' " 20:16 Dung i didok Jesus ma mangulahi, "Songon i muse ma angka halak na parpudi, gabe parjolo. Halak na parjolo hian gabe parpudi." 20:17 Di tonga dalan, hatiha kehe Jesus tu Jerusalem, dipiohon Ia ma anak siseanNia sidua bolas halak i marlagut. Dung i didok Ia ma tu halahi, 20:18 "Tangihon hamu ma jolo na Hudok on! Saonnari na giot tu Jerusalem ma hita. Dung lalu disi, pasahaton ma Anak Ni Jolma i tu angka Sintua Ni Malim dohot angka Siboto Surat. Dabuon ni halahi ma uhuman tuSia, angkon mate bunuon, 20:19 dung i pasahaton ni halahi ma Ia tu halak na asing, na so bangso Jahudi. Palayason ni halahi ma Ia, diparkanciti dung i parsilangkonon ni halahi ma Ia. Tapi dipangolu do Ia mangulahi di ari patoluhon." 20:20 Dung i ro ma inang ni si Zebedeus rap dohot angka dakdanaknia tu Jesus. Unduk ma ia manyomba Jesus laho mangido sanga aha. 20:21 "Giot aha di ho inang?" ninna Jesus manyapai. Dialusi ina-ina i ma, "Sugari nian muda dung gabe Raja Ho anso juguk anakku na dua on, sada di siamunMu jana sada di siambirangMu," ning ia. 20:22 "Na so diboto hamu do na nipangidomunu," ning Jesus tu halahi. "Tarinum hamu ma lakna panginuman na giot inumonKi?" "Tarinum hami do i," ninna halahi. 20:23 Didok Jesus ma, "Inumonmunu do nian panginumanKi. Tapi anggo na manontuhon sanga ise na juguk di siambirangKu sanga di siamunKu, inda marguru di Au i. Anggo inganan i, di halak na dung dipatupa ni Damang hian do i." 20:24 Dung tarboto tu anak sisean na sampulu nari pangalaho i muruk ma halahi tu na martinadohon sidua halak i. 20:25 Gabe dipio Jesus ma halahi sude lalu mandok hata ma Ia, "Diboto hamu do taringot tu angka pamimpin ni bangso na asing na mambaen roha-rohana tu rayatna. Diparhanciti angka na marpangkat-pangkat i do rayat i. 20:26 Tapi anggo hamu, nada tama songon i. Muda adong sian hamu na giot godang, angkon gabe pangoloimunu do ia. 20:27 Muda adong na giot sipajoloon sian hamu, angkon gabe naposomunu do ia. 20:28 Sarupa dohot Anak Ni Jolma i muse; nada na giot paolo-oloan umbaen na ro Ia, tapi na giot mangoloi do, jana dilehen Ia dope hosaNia laho paluahon bahat halak." 20:29 Jadi di na laho kehe halahi sian Jeriko, bahat do halak mangihutkon Jesus. 20:30 Adong ma di topi dalan i dua halak na mapitung juguk-juguk. Dung diboto halahi Jesus do na mamolus i, marsurak ma halahi, "O, Tuhan, Anak Ni si Daud, ibo ma rohaMu mida hami!" ning halahi. 20:31 Dimuruhi halak na bahat i ma halahi, anso sip. Tapi mur marsurahi do halahi, "O, Tuhan, Anak Ni si Daud, ibo ma rohaMu mida hami!" 20:32 Dung i maradian ma Jesus, dipiohon Ia ma halahi. "Aha giot baenonKu di hamu dipangido rohamunu?" ninna Jesus manyapai. 20:33 Dialusi halahi ma, "Sugari marnida ma hami, Tuhan!" 20:34 Ibo ma roha ni Jesus mida halahi, gabe dijama Ia ma mata ni halahi i. Manigor marnida ma halahi. Halahi pe antong dohot ma mangihutkon Jesus.
21:1 Dung donok halahi tu Jerusalem, lalu ma halahi tu Betpage na di lambung ni Dolok Zetun. Disuru Jesus ma dua halak siseanNia i parjolo. 21:2 "Kehe ma hamu tu huta na di jolomunu an," ninna Jesus mandok halahi na dua, "Manigor idaonmunu ma disi tambat sada halode dohot anakna. Harkari hamu ma sian panambatanna i, oban hamu tuson. 21:3 Muda adong halak na mandok sanga aha tu hamu, dok sajo ma tusia, 'Porlu di Tuhan *TUHAN: Sanga nampunasa.* i,' manigor paloasonNia do halode i obanonmunu." 21:4 Umbaen na songon i pe i, anso laing tulus do na nidok ni panurirang, na mandok songon on, 21:5 "Dokkon ma tu boru Sion, Ligi ma, ma ro Rajamu manopot ho saonnari. Na serep roha do Ia, jana mangalombut halode, sada halode jara-jara." 21:6 Jadi kehe ma anak siseanNia na dua i patuluskon songon na nidok ni Jesus tu halahi. 21:7 Dioban halahi ma halode i dohot anakna i. Dipalanoi halahi ma halode na dua i dohot angka baju ni halahi. Dilombut Jesus ma tanggurungna i. 21:8 Marsipahembang angka abitna ma halak na bahat na disi di dalan i. Adong ma deba na mambuat angka ranting-ranting ni hayu, diserakkon halahi ma i di tonga dalan i. 21:9 Mamungka ma marsurahi halak na mardalan di jolo dohot na di pudi ni Jesus. Ninna halahi ma, "Hosana ma di Anak Ni si Daud! Dipasupasu ma Ia na ro di bagasan goar ni Tuhan! Puji ma Debata Na Gumincat i!" 21:10 Jadi di na masuk Jesus tu Jerusalem gaor ma na sakota i sude. "Ise dehe on?" ninna halahi ma. 21:11 "On ma ibana panurirang Jesus na sian Nasaret na di Galilea," ninna angka na mangudurkon Jesus. 21:12 Dung i masuk ma Jesus tu alaman ni Bagas Ni Debata. Dipaorot Ia ma sude angka na marjagal disi. Diparbalikkon Ia ma sude meja ni angka panukar hepeng dohot bangku-bangku ni parjagal darapati. 21:13 Didok Ia ma tu halahi, "Adong do tarsurat songon on, 'Angkon bagas partangiangan do goaron BagasKon.' Hape gabe bagas ni panyamunan do dibaen hamu bagas on." 21:14 Marroan ma angka na mapitung dohot na onyangon tu jolo ni Jesus di Bagas Ni Debata i. Sude halahi dipamalum Jesus. 21:15 Tapi muruk-muruk ma angka kapala ni malim dohot angka Siboto Surat Jahudi marnida angka hahomangan na masa i na nipatupa ni Jesus. Muruk muse ma halahi patangi-tangi angka dakdanak na marsurahi dohot na pio-pio di Bagas Ni Debata i, "Hosana ma di Anak Ni si Daud!" 21:16 Didok halahi ma tu Jesus, "Na so dibege Ho do na nidok ni halahi i?" "Olo, Hubege do," ninna Jesus mangalusi, "Na so unjung do dibaca hamu hata na mandok: 'Dakdanak dohot na baru sorang pe na dung Huajari do mandok hata puji-pujian na sun denggan'?" 21:17 Dung i kehe ma Jesus, ditadingkon Ia ma halahi. Kehe ma Ia tu kota Betania disi ma Ia marborngin. 21:18 Ancogotna i manyogot-nyogot dope di tonga dalan i laho mangulahi ro Ia tu kota i, malean ma Jesus. 21:19 Diida Ia ma di topi dalan i sada hayu gala-gala. Kehe ma Ia tu gala-gala i, hape umpe sangkamata batuna pe nada adong diida Ia, hum bulungna sajo do. Gabe didok Jesus ma tu hayu i, "Nada tola be ho marbatu salolotna!" Manigor malos ma bona ni gala-gala i. 21:20 Homang sajo roha ni anak siseanNia i marnida na masa i. "Na tarbia ma parjadina manigor mate sude bona ni gala-gala on?" ning halahi manyapai. 21:21 "Satutuna, Hudok ma tu hamu, anggo porsaya do hamu jana inda adong ganggu ni roha, tarbaen hamu do songon na Hubaen i tu bona ni gala-gala i. Inda hum i sajo, salangkan tu dolok an pe tardokkon hamu do, 'Morot ma ho, ambung ma ho tu laut.' Tulus do i! 21:22 Sanga aha pe pangidoanmunu di bagasan tangiangmunu, jagitonmunu do i, asal ma porsaya hamu." 21:23 Dung i mangulahi ma Jesus tu Bagas Ni Debata. Masuk ma Ia mangajari disi. Jadi hatiha na mangajar i Ia, marroan ma angka kapala-kapala ni malim dohot angka na tobang-tobang ni halak Jahudi manyapai tuSia, "Marhite kuaso dia do dipambaeni Ho sudena on? Ise do na mangalehen kuaso i tu Ho?" 21:24 Dialusi Jesus ma, "Au pe Hubaen jolo sada sapa-sapa tu hamu. Muda dung dialusi hamu naron sapa-sapa on, disi pe anso Hupaboa tu hamu, sanga na sian ise Hujagit kuaso laho mambaen songon i. 21:25 Sian ise do dijagit si Johannes kuasonia laho mandidihon? Sian Debata do sanga sian jolma?" Jadi marpikir ma halahi di bagasan rohana mandok, "Muda tadokkon, 'Sian Debata', gabe dohononNia ma tu hita: 'Anggo songon i biasi inda porsaya hamu tu si Johannes?' 21:26 Tapi muda tadok, 'Sian jolma', angkon hilalaonta do pangkilalaan ni halak na bahat muse. Harana sude halak marpandapot, sada panurirang do si Johannes." 21:27 "Inda hami boto," gabe ninna halahi ma mangalusi. Dung i ninna Jesus ma tu halahi, "Anggo songon i do, Au pe inda ra paboahon tu hamu sanga sian ise Hujagit kuaso laho mambaen sisongon i." 21:28 Saonnari bia do ninna rohamunu taringot tu umpama on, "Adong ma sada ama, dua anaknia. Jadi didok ia ma tu anaknia siangkaan i, 'Kehe ma ho jolo amang markarejo sadari on di kobun anggurta i.' 21:29 Jadi dialusi anaknia i ma, 'Inda ra au,' ning ia. Tapi maruba muse ma roha ni anaknia i gabe kehe ma ia tu kobun anggur i. 21:30 Dung i kehe ma amangna i tu anaknia paduahon i mandokkon hata songon na parjolo i. Dialusi anaknia na paduahon i ma, 'Olo amang,' ning ia. Hape inda kehe ia. 21:31 Antong, ise do sian anaknia na dua i na mangoloi na nidok ni amangna?" "Siangkaan i ma antong," ning halahi. Gabe didok Jesus ma tu halahi, "Satutuna Hudok ma tu hamu: Jumolo do angka sijagit pajak dohot angka anak boru siparkarosuan gabe anggota ni Harajaan Ni Debata ulang pado hamu. 21:32 Haru madung ro si Johannes Pandidi paboahon dalan na tutu tu hamu, hape nada ra hamu manghaporsayai na nidoknia. Hape anggo angka sijagit pajak dohot angka anak boru siparkarosuan, ma pola porsaya disia. Haru pe na dung diida hamu sudena i, hape laing so dipauba hamu dope rohamunu manghaporsayai ia." 21:33 "Tangihon hamu ma jolo umpama na sada nari on," ninna Jesus. "Adong ma sahalak partano na bidang nampuna kobun anggur, dihandang ia ma sude humaliang kobun i, dihuar ia ma lubang inganan pamoroan ni anggur, dibaen ia muse ma tuhu-tuhu inganan ni na manjago. Dung i dipabolahon ia ma kobun anggurnia i tu angka pamola, kehe ma ia mardalanan tu luat na asing. 21:34 Dung dapot hatihana mamutik batu ni anggur i, disuruhon partano na bidang i ma angka naposonia mandapotkon angka na mamola kobun i laho manjagit bolaanna. 21:35 Tapi ditangkupi angka na mamola kobun i ma angka naposo ni partano na bidang i: Na sada dibalbali, na sada nari dibunu halahi, angka na asing i pe didangguri halahi do dohot batu. 21:36 Disuru partano na bidang i muse ma angka naposonia na asing, umbahat sian na parjolo i. Tapi laing sarupa do pambaen ni angka pamola i tu angka naposo i. 21:37 Ujungna disuru partano na bidang i ma anaknia sandiri mandapotkon halahi. 'Tontu mabiar ma halahi mida anakki,' ninna rohania. 21:38 Tapi dung diida angka na mamola kobun i anak ni partano na bidang i martahi ma halahi, 'Ah! Ma ro anak ni partano na bidang i. Aha dope, tabunu ma i anso di hita sude tean-teananna i!' 21:39 Ditangkup halahi ma anak ni partano na bidang i, disarat halahi ma tu duru ni kobun i, dibunu halahi ma disi." 21:40 "Bia do, muda ro nampuna kobun anggur i mulak, aha ma baenonnia tu angka na mamola i?" 21:41 Dialusi halahi ma, "Tontu bunuonnia ma sude angka parjahat i, dung i tu halak na asing noma dipabolahon ia kobun anggurnia i. Tu halak na ra mangalehen bolaan ni tano i tusia muda dapot hatihana," ning halahi. 21:42 Dung i ninna Jesus ma tu halahi, "Na so unjung dope tarsise hamu surat na di Buku Na Badia i? 'Batu na niambungkon ni pande bagas i madung gabe batu parsuhi. Songon i ma pambaen ni Tuhan; sada pambaenan hahomangan di matanta.' " 21:43 "Hara ni i Hudok ma tu hamu: Buaton do Harajaan Ni Debata sian hamu jana nilehen ma i tu sada bangso na marbatuhon parbatu ni Harajaan i. 21:44 Sanga ise na madabu tu batu i, angkon gabe masarsar. Jana sanga ise na didondoni batu i, angkon magopu gabe abu." 21:45 Dung dibege angka kapala ni malim dohot angka halak Parise angka umpama ni Jesus i, diboto halahi ma, halahi do hape na nidok ni Jesus disi. 21:46 Gabe dijalahi halahi ma dalan laho manangkup Ia. Tapi mabiar muse do halahi marnida halak na bahat, angke panurirang do Jesus dietong halahi.
22:1 Dung i didok Jesus ma mangulahi umpama. 22:2 Didok Ia ma, "Anggo Harajaan Ni Banua Ginjang tarsongon sada raja na mambaen horja parbagason ni anakna do i. 22:3 Disuruhon raja i ma angka naposona laho mangalap angka halak na niontangnia tu horja i. Hape inda ra ro angka na niontangna i. 22:4 Dung i disuru raja i ma angka naposonia na asing. Ditonai raja i ma halahi: 'Paboa hamu ma tu angka na niontang i: Madung singkop horja ni anakki. Angka lombu jantan dohot angka pahan-pahanan na jumeges madung nisambolan. Madung rade sude. Ro be ma hamu tu horja parbagason i!' 22:5 Hape inda ditangihon halak na niontang i soso-soso i. Tapi marmorotan do halahi tu karejona. Adong na kehe tu ladangna, na deba tu parusahoanna; 22:6 na asing i ditangkup halahi muse dope angka naposo ni raja i. Dung dibalbali, dibunu ma halahi. 22:7 Dung dibege raja i na songon i, muruk sajo ma ia. Gabe disuruhon ia ma tentarania mambunu angka sibunu jolma i dohot manyurbu kota ni halahi. 22:8 Dung i dipio ia ma angka naposonia didok ia ma, 'Ma rade horja parbagason i hape inda tumbuk angka na niontang i. 22:9 Saonnari, kehe ma hamu tu angka dalan godang. Sanga na sadia bahat halak na marsuo dohot hamu disi, ontang hamu ma halahi tu horja haroan boru on.' 22:10 Gabe kehe ma antong angka naposonia i. Tu angka dalan godang ma halahi kehe palagutkon halak sude na marsuo dohot halahi disi. Halak na burju dohot na jahat pe. Gabe gok ma bagas parhorjaan i dibaen angka tamu i. 22:11 Dung i masuk ma raja i mangaligi angka tamu i. Diida raja i ma sahalak na ro i na so marabit horja. 22:12 Gabe disapai raja i ma tu bayo i, 'O, Dongan! Tar bia do parmasukmu tuson, biasi nada marabit pesta ho?' Tarhohom ma bayo i. 22:13 Gabe didok raja i ma tu angka naposonia, 'Tambat ma pat ni bayo on dohot tanganna i, dung i ambungkon hamu tu balian tu inganan na golap i. Disi ma ia tangis jana patungaripon.' " 22:14 Dung i dipaujung Jesus ma umpama i markite-hite pandohan, "Bahat do nian na niontang tapi hum saotik do na tarpili." 22:15 Dung i kehe ma halak Parise i anso rap martahi manjalahi dalan sanga na bia baenon anso tardapot halahi Jesus di hasalaanna muda disapai halahi. 22:16 Disuruhon halahi ma angka anak sisean ni halahi rap dohot piga-piga halak anggota ni si Herodes. Jadi disuru dokkon halahi ma tu halak na nisuruhon ni halahi i mandok tu Jesus songon on, "Hami boto halak na tigor roha do Guru i. Marsitangkas do diajarkon Ho hagiot ni Debata tu jolma. Nada mabiar Ho sanga na tu ise pe halakna. Angke antong inda siida bohi Ho. 22:17 Jadi hara ni i, paboa ma jolo taringot tuson: Tola dehe mangihutkon Tona ni ugamo Jahudi manggarar pajak tu Kesar Rom sanga nada?" 22:18 Diboto Jesus do na jahat roha ni halahi, jadi didok Ia ma, "Pangalancap do hamu! Biasi ma jalak-jalahanmunu hasalaanKu? 22:19 Patidahon hamu ma jolo tu Au hepeng na nilehenmunu manggarar pajak!" Jadi dilehen halahi ma sada hepeng perak tuSia. 22:20 Dung i disapai Jesus ma tu halahi, "Gambaran ni bohi ni ise do i? Goar ni ise do na tarsurat disi?" 22:21 "Kesar i," ning halahi mangalusi. Dung i didok Jesus ma tu halahi, "Antong garari hamu ma tu Kesar i sanga aha nampuna ni Kesar i, jana garar muse ma tu Debata sanga aha nampuna ni Debata." 22:22 Jadi dung dibege halahi hatorangan i, homang ma roha ni halahi. Gabe ditinggalkon halahi ma Jesus. 22:23 Laing di na sadari i, ro ma halak Saduse mandapotkon Jesus. Halahi ma na mandok, na so mulak mangolu halak na dung mate, jana disapai halahi ma Ia, 22:24 "Guru," ninna halahi, "Anggo si Musa mangajarkon songon on do: Muda mate sada bayo na so adong dope anakna, angkon patugincaton ni anggina do dadaboru na nitinggalkonnia i anso adong na mangalehen pomparan di bayo na dung mate i. 22:25 Jadi, adong ma di hami on pitu halak na martinadohon. Mambuat boru ma siangkaan i. Tapi mate ma ia so mardakdanak. Gabe tinggal ma dadaborunia i di na nitadohonnia i. 22:26 Tapi mate muse ma angginia i laing so mardakdanak. Laing songon i ma na patoluhon i marudut lopus tu na papituhon. 22:27 Ujungna mate muse ma dohot dadaboru i. 22:28 Di bagasan pangalaho na songon on, muda dapot ma hatihana pangoluon mangulahi angka na mate i saulahon, gabe dadaboru ni ise ma dadaboru i? Harana halahi na pitu madung mamake ia." 22:29 Dialusi Jesus ma, "Lilu do hamu! I ma tandana na so diboto hamu Buku Na Badia i. Kuaso ni Debata pe inda diboto hamu. 22:30 Angke muda dung dipangolu mangulahi angka na dung mate, nada marbagas be halahi mangulahi. Tapi songon parngoluon ni angka surusuruan noma ngolu ni halahi di banua ginjang. 22:31 Na so unjung dope disise hamu na nidok ni Debata taringot tu halak na mate na nipangolu mangulahi? Didok Debata do, 22:32 'Au do Debata ni si Abraham, Debata ni si Ishak dohot Debata ni si Jakob.' Inda Debata ni halak na mate anggo Debata, Debata ni halak na mangolu do Ia!" 22:33 Dung dibege halak na bahat i hatorangan ni Jesus i, gabe homang ma roha ni halahi hara ni pangajaranNia i. 22:34 Jadi dung tarboto tu halak Parise, na dung tarhohom halak Saduse dibaen Jesus, gabe marlagut ma halahi. 22:35 Jadi ro ma sahalak sian halahi Siboto Surat mancubo-cubo manjalahi hasalaan ni Jesus markite-hite sapa-sapa. 22:36 "Guru, parenta dia dehe na ummarga sian sude Tona i?" 22:37 Dialusi Jesus ma, "Angkon haholonganmu do Tuhan Debatamu sian sude ate-atemu, dohot sian sude rohamu dohot sian sude pikiranmu. 22:38 I ma tona na parjolo jana na gumodang! 22:39 Tona na ummarga na paduahon, sarupa dohot tona na parjolo nangkin: Angkon haholonganmu do donganmu jolma songon pangkaholongimu di dirimu sandiri. 22:40 Sude Tona ni ugamo na nilehen ni si Musa dohot angka panurirang, marharoroan sian tona na dua on do i." 22:41 Hatiha na marlagut i dope angka halak Parise i disapai Jesus ma halahi, 22:42 "Bia do mangihutkon pandapotmunu taringot tu Kristus i? Pomparan ni ise ma Ia?" "Pomparan ni si Daud," ninna halahi. 22:43 "Antong anggo songon i, hara ni aha do umbaen na disosoi Tondi i si Daud laho manggoari Ia songon Tuanna? Angke didok si Daud, 22:44 'Madung didok Tuhan i do tu Tuanku: Juguk ma Ho di siamunKu, *JUGUK MA HO DI SIAMUNKU: Mangihutkon kebudayaan Junani, halak na nilehen hasangapan dohot hakuasoon do na juguk di sabola siamun.* lopus Hubaen sude angka musuMu tunduk tu Ho.' 22:45 Jadi muda didok si Daud 'Tuan', Kristus i, tarbia muse ma parjadi ni i pomparan ni si Daud Ia?" 22:46 Umpe sahalak na bisa mangalusi Jesus. Mamungka sian na sadari i, nada adong be na puluk manyapai sanga aha tuSia.
23:1 Dung i didok Jesus ma hata tu halak na bahat i rap dohot tu angka anak siseanNia i. 23:2 "Juguk do angka Siboto Surat dohot halak Parise, di juguhan ni si Musa. 23:3 Hara ni i, angkon oloanmu jana ihutkononmunu do sude na nisuruhon ni halahi baenonmunu. Tapi ulang baen hamu songon na nibaen ni halahi. Harana nada didalankon halahi na niajarkon ni halahi. 23:4 Angka karejo na maol-maol do disuru halahi baenon. Disuru halahi ma halak na asing mangoloi parenta ni halahi na borat-borat, hape halahi sandiri inda dohot padalankonsa. 23:5 Sude pambaenan ni halahi, hum anso diida jolma sajo do. Sangajo do dipake halahi angka tali ni abit sumbayang na bidang-bidang dohot rambu ni baju *RAMBU NI BAJU: Angka rambu i dipake songon tanda hapatuon tu Debata.* juba ni halahi! 23:6 Hum na giot di juluan do halahi muda masa pesta. Disi karosi na jumeges di angka bagas paribadatan, ulang so disi halahi juguk. 23:7 Na jopan roha ni halahi ditabi halak di poken, muda didok halak tu halahi 'Gurunami'. 23:8 Tapi anggo hamu, indangkon sai ra hamu dipiohon halak 'Gurunami', angke hum sada do Gurumunu jana markahamaranggi do hamu sude. 23:9 Dung i indangkon piohon hamu halak na di tano on, 'Amang' harana hum sada do Amangmunu, i ma Damang na di banua ginjang i. 23:10 Dung i muse, ulang ra hamu dipio halak 'Kapala', harana hum sada do Kapalamunu i ma Kristus na nijanjihon ni Debata i. 23:11 Halak na sumangap sian hamu angkon gabe pangoloimunu do. 23:12 Halak na patugincat dirina angkon dipatoruk. Dung i halak na patoruk dirina angkon patugincaton." 23:13 "Marjaya ma hamu angka Siboto Surat dohot halak Parise! Angka pangalancap do hamu. Disundati hamu do halak na markagiot gabe rayat di Harajaan Ni Banua Ginjang. Hamu sandiri so ra gabe rayat ni Harajaan i. Muda adong halak na giot masuk tusi, hape dihalang-halangi hamu. 23:14 Marjaya ma hamu angka Siboto Surat dohot hamu halak Parise: Pangalancap do hamu! Dijalahi hamu do akal laho paoto-otohon dohot mambuat bagas ni angka ina na mabalu. Tar dibaen-baen hamu ma martangiang ginjang-ginjang laho manutup-nutupi i. I ma umbaen na angkon umborat uhuman tu hamu! 23:15 Marjaya ma hamu angka Siboto Surat dohot halak Parise! Angka pangalancap do hamu! Kehe do hamu taripar laut tu na dao laho mangelek-elek sada halak anso masuk mangihutkon ugamomunu. Dung diihutkon ia ugamomunu i, hape na giot pamasuhonmunu do ia tu narako, dua noli lompit jahatna sian hamu sandiri! 23:16 Marjaya ma angka pamimpin na mapitung! Diajarkon hamu ma songon on, 'Muda marsumpa halak mangasahon Bagas Ni Debata, gabe inda tarihot ia tu sumpania i, tapi muda marsumpa ia mangasahon sere na di Bagas Ni Debata i, gabe tarihot ma ia tu sumpania i.' 23:17 Na oto do hamu, angka na mapitung ma antong! Dia do ummarga sere i ulang pado Bagas Ni Debata na paiaskon sere i? 23:18 Diajarkon hamu dope songon on, 'Muda marsumpa halak mangasahon sisombahononkon na di ginjang ni langgatan parkaulan i, gabe tarihot ma ia tu sumpania i.' 23:19 Na santak ma antong pitungmunu! Dia do na ummarga? Na nisombahon i do sanga inganan parkaulan i na mambaen ias na nisombahon i? 23:20 Hara ni i, muda marsumpa halak mangasahon inganan parkaulan i sanga mangasahon sude na nisombahon na adong di ginjangna i, na marsumpa mangasahon inganan ni haul do i dohot mangasahon sudena haul na di ginjangna i do i. 23:21 Sanga muda marsumpa halak mangasahon Bagas Ni Debata, sarupa do i dohot na marsumpa mangasahon Debata na maringanan disi. 23:22 Dung i muda adong halak marsumpa mangasahon langit sarupa do i na marsumpa mangasahon habangsa ni Debata, sanga pe mangasahon Debata na juguk di habangsa i. 23:23 Marjaya ma hamu angka Siboto Surat dohot angka Parise! Pangalancap do hamu! Dilehen hamu do parpuluan ni pulungan ni bulung-bulung ni parmasak dohot silalat dohot jintan tu Tuhan. Hape anggo angka pangalaho na ummarga sian angka tona i, umpamana rupani: Hatigoran, asi ni roha, haburjuon, nada diterge hamu be. Angkon i do nian parjolo baenonmunu so pola mangkalupahon na asing-asing i muse. 23:24 Angka pamimpin na mapitung do hamu! Lanok na di panginumanmunu do disaring hamu hape unto dibondut hamu! 23:25 Marjaya ma hamu angka Siboto Surat dohot halak Parise! Pangalancap do hamu! Dibasui sian duru angka mangkuk dohot pingganmunu, hape anggo sian bagasan sun do dursunna dibaen angka na dapot hamu markite-hite gogo dohot gabus. 23:26 Hamu angka Parise na mapitung! Jolo basu ma mangkukmu dohot pingganmu sian bagasan anso ias muse sian duru! 23:27 Marjaya ma hamu angka Siboto Surat dohot angka Parise! Pangalancap do hamu! Songon kuburan na nikapur do hamu. Jeges idaon sian duru hape holi-holi ni jolma na marbusuhan do gok di bagasan. 23:28 Laing songon i ma hamu. Anggo idaon nian sian duru, denggan ma hamu tu halak. Hape anggo di bagasan na so labo do hamu, gok pangalaosion." 23:29 "Marjaya ma hamu angka Siboto Surat dohot halak Parise! Pangalancap do hamu! Jeges-jeges dibaen hamu kuburan ni angka panurirang i, digorgai hamu angka tugu parningotan di halak na denggan ngoluna. 23:30 Didok hamu muse ma, 'Sugari mangolu hami di hatiha ni angka ompunami na jolo, nada pola dohotannami halahi mambunu angka panurirang i.' 23:31 Jadi, dioku hamu sandiri do, pomparan ni angka sibunu panurirang hamu! 23:32 Antong anggo songon i, toruskon hamu ma pasidungkon dosa na nipungka ni angka ompungmunu i! 23:33 O hamu angka ulok, panipu do hamu! Tar bia be baenonmunu paluahon dirimunu sian uhuman na di narako i? 23:34 Antong hara ni i parrohahon hamu ma jolo, tongosonKu ma angka panurirang tu hamu dohot halak na marroha dohot angka Siboto Surat. Angkon bunuonmunu deba sian halahi. Deba nari parsilangkononmunu. Adong ma i balbalonmunu di bagas paribadatan, kojar-kojaronmunu sian kota na sada tu kota na asing. 23:35 Ujungna madabu ma tu hamu uhuman hara ni na nibunumunu sude angka na so marsala i mamungka sian pamunuon na tu si Abel na so marsala i lalu tu pamunuon na tu si Zakaria anak ni si Berekia na giot bunuonmunu di holang-kolang ni bilik na badia dohot inganan ni haul na di Bagas Ni Debata i. 23:36 Tutu do na Hudok on: Angkon tanggungon ni angka halak na saonnari on ma i sudena!" 23:37 "Jerusalem, Jerusalem! Dibunu ho do angka panurirang, didangguri ho do dohot batu angka na nisuru ni Debata tu ho! Ma pola piga noli dihalungunkon rohangKu laho manghaol sude halak na mangingani ho songon pambaen ni inang ni manuk manggobak angka anakna di toru ni habongna, hape nada ra hamu! 23:38 Anggo on angkon tinggalkonon ma angka bagasmu, gabe mamolngit. 23:39 Au mandok tu ho: Mamungka sian on nada idaonmu be Au lopus didok hamu, 'Sai dilehen Debata ma pasupasu di na ro mangasahon goar ni Tuhan.' "
24:1 Ditinggalkon Jesus ma Bagas Ni Debata i. Marroan muse ma mandapotkon ia angka anak siseanNia patuduhon hajegeson ni Bagas Ni Debata i. 24:2 Dung i didok Jesus ma tu halahi, "Parrohahon hamu ma sudena i, harana sada batu pe nada tola tinggal susun di ingananna hian. Angkon hona gargar sude." 24:3 Dung i kehe ma Jesus juguk di Dolok Zetun. Jadi hatiha na juguk i Ia, marroan ma angka anak siseanNia laho mangkatai dohot Ia sajo. "Paboa ma jolo tu hami sanga andigan do tarjadi sudena i," ninna halahi manyapai Ia. "Dung i muse, aha ma tandana paboa na giot dapot ma haroroMu dohot hasidungan ni portibi on?" 24:4 Dialusi Jesus ma, "Angkon manat do hamu. Ulang jabat dipaoto-oto halak hamu. 24:5 Angke bahat do halak na ro mamake goarKu, jana dokkonon ni halahi ma, 'Au do Kristus!' Paoto-otoon ni halahi ma bahat halak. 24:6 Begeonmunu ma angka sora ni porang dohot barita ni angka porang. Tapi ulang gabe mabiar hamu. Harana angkon tarjadi do songon i. Tapi nada podo hatihana ro ari na parpudi. 24:7 Marporang ma bangso na sada maralohon bangso na asing. Sanga di dia pe, masa ma haleon potir dohot lalo. 24:8 Pamungkaan dope sudena i, songon pangkilalaan na hancit na nihilala ni ina na giot manubuhon anakna. 24:9 Dung i ditangkupi ma hamu, dipasahat ma tu parkancitan anso dibunu. Goyak ma roha ni halak na satano on mida hamu hara ni goarKu. 24:10 Jadi anggo disi, bahat ma halak na so burju be tu Au. 24:11 Bahat muse ma marroan angka panurirang pargabus. Paoto-otoon ni halahi ma bahat halak. 24:12 Mangararati ma hajahatan, gabe bahat ma halak inda marholong ni roha be. 24:13 Tapi sanga ise na tahan lopus tu ujungna, gabe paluaon ma ia. 24:14 Dung i muse, Jamita Na Denggan taringot tu Harajaan Ni Debata, dijamitahon ma i tu portibi on sude, anso sude halak umbegesa. Dung i pe anso ro ari na parpudi." 24:15 "Idaonmunu ma masa hajahatan na manyegohon tarjadi di inganan na badia on, songon na nidok ni Panurirang Daniel. (Sanga ise na manyise i: Diparate-atehon ma artina!) 24:16 Muda tulus ma i, angkon marlojongi ma halak na di Judea tu dolok-dolok an. 24:17 Sanga ise na di ginjang tarup ni bagas ulang be ia mijur mambuat barang-barangnia tu bagas i. 24:18 Halak na topet di padang, ulang be mulak laho mambuat abitnia. 24:19 Marjaya ma angka ina na topet denggan pamatangna dohot na topet pasusuhon anakna di hatiha i! 24:20 Tangiangkon hamu ma tu Debata anso ulang topet di ari nonat sanga di Ari Sabat hamu maporus! 24:21 Angke disi ma masa hasusaan na lobi godang na so unjung masa dope mamungka sian mula-mula ni portibi on lopus tu sadari on. Dung salpu i, nada masa muse be na songon i. 24:22 Tapi madung dipapendek Debata hatihana i. Sugari nada, umpe sahalak jolma na tarbaen tahan. Tapi hara ni bangsoNia i, gabe dipapendek Debata do hatihana i. 24:23 Dung i muse, muda adong sanga ise halak na mandok tu hamu, 'Ligi hamu, dison do Kristus!' sanga, 'Disadu do Ia!', -- ulang haporsayai hamu i. 24:24 Harana, marroan do disi angka kristus pargabus dohot angka panurirang pargabus. Patupaon ni halahi ma angka pambaenan na luar biasa dohot angka na pahomang roha laho paoto-otohon halak. Sugari tarbaensa, dohot bangso ni Debata i pe giot paoto-otoon ni halahi muse do. 24:25 Hara ni i, ingot hamu ma i! Madung jolo Hupaboa hian i tu hamu, taran so tarjadi dope. 24:26 Muda didok halak tu hamu, 'Ligi hamu ma, disadu do Ia di halongonan an!' Ulang hamu kehe tusi. Sanga pe muda didok halahi, 'Beta ma taligi, martabuni do Ia dison!' Ulang haporsayai. 24:27 Angke songon sondang ni hilap na sumiksak sian Habincaran marsinondang lalu tu Hasundutan, songon i ma parro ni Anak Ni Jolma i sogot." 24:28 "Sanga di dia adong bangke, marrongom do disi angka unggas sipangan bangke." 24:29 "Nada sadia honok dung ro hasusaan di hatiha i, gabe golap ma mataniari, bulan i pe nada marsinondang be. Mardabuan ma angka bintang sian langit, marsursaran ma sude angka hagogoon na di parlangitan i. 24:30 Dung i pe anso tarida tanda ni Anak Ni Jolma i di langit. Anggo disi tangis ma sude bangso na satano on, marsak. Diida halahi ma Anak Ni Jolma i ro di bagasan ombun mardongan kuaso dohot hasangapan godang. 24:31 Dipalu ma tarompet na godang, suruon ni Anak Ni Jolma i ma angka surusuruanNia tu panjuru na opat i di tano on palagutkon bangsoNia, sian topi ni langit na sada lalu tu topi ni langit na sada nari." 24:32 "Marguru ma hamu sian bona ni gala-gala. Muda rata rantingna i boti loyok, ruar muse ma angka pusukna, botoonmunu ma na giot dapot ne ma musim panas. 24:33 Laing songon i muse ma muda diida hamu tarjadi angka tanda-tanda i, gabe botoonmunu ma na dung donok sajo noma hatihana. *NA DUNG DONOK SAJO NOMA HATIHANA: Madung donok Ia, na giot ro noma.* 24:34 Ingot hamu ma! Dompak so mate dope halak na mangolu sisaonnari on, tulus ma sudena i. 24:35 Anggo langit dohot tano on mago do, tapi anggo hatangKi angkon hot do salolot-lolotna." 24:36 "Umpe sahalak umboto sanga andigan do arina dohot jomna. Angka surusuruan na di banua ginjang i pe nada diboto halahi i. Anak i sandiri *ANAK I SANDIRI: Dipiga-piga-piga naskah narobi nada adong hata on.* pe nada diboto Ia. Hum Damang sajo do na umboto i. 24:37 Songon di hatiha ni si Noak, songon i ma saulahon pangalahona, muda ro Anak Ni Jolma i. 24:38 Taran so ro banjir na godang i, mangan minum do halak, marbagas dohot pabagaskon lopus tu ari parmasuk ni si Noak tu kapal i. 24:39 Jadi di na nitondong ni banjir i halahi sude, disi pe anso tarhalak halahi taringot tu na masa i. Laing songon i muse ma na giot masa, muda ro Anak Ni Jolma i. 24:40 Di hatiha i adong ma dua halak markarejo di saba: Sahalak dioban, na sahalak nari ditinggalkon. 24:41 Adong muse dua dadaboru na manduda. Sahalak dioban, tapi na sada nari ditinggalkon. 24:42 Hara ni i, jonggor ma hamu, angke nada diboto hamu sanga andigan haroro ni Tuhanmunu. 24:43 Ingot hamu ma na Hudok on! Sugari diboto nampuna bagas, sanga tar andigan giot ro panangko, nada ra ia modom. Dung i nada padiaronnia masuk panangko i tu bagasan. 24:44 Hara ni i, angkon tongtong do hamu hobas. Angke ro ma Anak Ni Jolma i, di hatiha na so pamotoanmunu do Ia ro." 24:45 "Antong ise ma naposo na burju jana na marroha, na niangkat ni tuanna gabe kapala ni sude naposonia na asing i; anso dilehen ia mangan angka naposonia i di hatihana? 24:46 Martua ma sada naposo na topet mangkarejohon karejona diharoro ni tuanna. 24:47 Tutu do, pasahaton ni tuan i ma tu naposonia i sude sinadonganna. 24:48 Tapi muda jahat do naposo i, didok ia di bagasan rohania, 24:49 'Honok dope anso mulak tuanki,' gabe dipungka ia ma mambalbali angka naposo na asing i, jana angka mangan dohot minum-minum ia dohot halak na asing. 24:50 Ro ma tuannia i di ari na so diambangnia, dohot di jom na so diboto ni naposo i. 24:51 Tontu balbalon *TONTU BALBALON: Sanga diayak tu ruar.* ni tuan i ma i so mangantarai, sarupahonon ni tuan i muse ma ia tu halak pangalancap. Disi ma adong andung-andung dohot na patungaripon."
25:1 "Muda ro Anak Ni Jolma i songon Tuhan, tarsongon umpama on do pangalahona: Sampulu halak bujing-bujing pandongani ni bayo pangoli na mambuat lampu laho kehe mangalo-alo bayo pangoli i. 25:2 Lima halak ma i na oto, na lima nari na marroha. 25:3 Dioban si lima halak na oto i ma lampu tapi nada dioban halahi miak managam na hurang. 25:4 Dioban si lima halak na marroha i ma lampu ni halahi tapi laing dioban halahi do miak managam betak sai hurang. 25:5 Honok ma bayo pangoli i anso ro, gabe mamungka ma mondohondok bujing-bujing i lopus tarpodom be. 25:6 Dung tonga borngin, tarbege ma sora na pio-pio, 'Ma ro bayo pangoli i! Beta ma taalo-alo!' ninna. 25:7 Ngot ma bujing-bujing na sampulu i marsipagara lampuna be. 25:8 Didok bujing-bujing na oto i ma tu na marroha i, 'Lehen hamu ma di hami saotik miakmunu i, ma giot mintop lampunami.' 25:9 'Inda tola!' ninna bujing-bujing na marroha i mangalusi, 'Harana gabe sude do hita annon hurangan miak. Tu kode ma tobusi hamu!' 25:10 Gabe kehe ma bujing-bujing na oto i manobusi miak. Jadi taran na kehe i halahi, lalu muse ma bayo pangoli i. Masuk ma bujing-bujing na marroha i rap dohot bayo pangoli i tu bagas parpestaan i. Ditutup ma pintu i! 25:11 Dung i lalu ma angka bujing-bujing na oto i. Pio-pio ma halahi, 'Tuan, tuan, buka ma jolo pintu on anso masuk hami.' 25:12 Tapi dialusi bayo pangoli i ma, 'Inda hutanda hamu!' " 25:13 Jadi dipaujung Jesus ma umpamaNia i, ning Ia ma, "Hara ni i, jonggor ma hamu, angke nada diboto hamu arina sanga hatihana." 25:14 "Muda ro Anak Ni Jolma i songon Tuhan, tarsongon sada bayo na giot kehe mardalanan tu na dao do pangalahona. Dipiohon ia ma angka naposonia, laho pasahatkon sinadongannia tu halahi. 25:15 Dipasahat ia ma tu halahi hombar tu hamaloonna be. Tu na sada dilehen ia lima ribu hepeng perak. Tu na sada nari dilehen ia dua ribu hepeng perak. Dung i tu na sahalak nari dilehen ia saribu hepeng perak. Dung i kehe ma ia. 25:16 Jadi kehe ma manigor naposo na manjagit lima ribu i, marjagal. Gabe maruntung muse ma ia lima ribu hepeng perak. 25:17 Laing songon i muse ma na manjagit dua ribu hepeng perak i, maruntung ma ia dua ribu hepeng perak. 25:18 Tapi anggo na manjagit na saribu i kehe ma ia mangkuar lubang di tano. Dionjapkon ia ma hepeng ni tuannia i tusi." 25:19 "Dung honok, mulak ma tuan ni halahi i jana dipungka ia ma mambaen paretongan tu halahi. 25:20 Masuk ma naposo na maniop silima ribu hepeng perak i pasahatkon sampulu ribu hepeng perak tu tuanna i. 'Tuan,' ning ia, 'lima ribu hepeng perak do na nipasahat ni tuan i tu au, saonnari diligi tuan i ma, maruntung do au lima ribu hepeng perak.' 25:21 'Ma denggan i,' ning tuan i, 'ho ma ibana naposo na burju jana na denggan. Angke haposan do ho di na otik, hulehen ma pos ni rohangku tu ho taringot tu na umbahat. Dohot ma ho masuk marsonang-sonang rap dohot au!' 25:22 Dung i masuk muse ma naposo na manjagit sidua ribu hepeng perak i. 'Tuan,' ning ia, 'dua ribu hepeng perak do na nipasahat ni tuan i tu au. Diligi tuan i ma saonnari. Maruntung do au dua ribu nari.' 25:23 'Denggan ma i,' ning tuan i, 'ho ma ibana naposo na denggan jana na burju. Dibaen haposan do ho di na otik, laing pasahaton ma pos ni roha tu ho taringot tu na bahat. Masuk ma ho anso dohot marsonang-sonang rap dohot au!' 25:24 Dung i masuk ma naposo na manjagit sisaribu hepeng perak i. Didok ia ma, 'Tuan, hutanda do halak na mangasahon gogo do tuan i. Dibuat tuan i do suha sian na so nisuan ni tuan i, dung i dibuat tuan i do suha sian na so nisabur ni tuan i. 25:25 Mabiar do au, gabe hubunihon hepeng ni tuan i di bagasan tano. On pe, indon ma hepeng ni tuan i.' 25:26 'Ho ma naposo na jahat jana na losok!' ning tuan i. 'Inda he diboto ho, hubuat do parbatu sian na so husuan, dung i hubuat do suha sian na so husabur? 25:27 Anggo songon i, sapatutna angkon lehenonmu do hepengki tu halak na padalan hepeng. Jadi muda mulak au, anso tarjagit au ma mangulahi hepengki dohot bungana. 25:28 Jadi hara ni i buat ma hepeng i sian ia, lehen ma i tu halak na manjagit sampulu ribu hepeng perak i. 25:29 Angke tu halak na maradong umbahat dope lehenon, lopus marlobi-lobi ia. Tapi anggo halak na so maradong, na adong saotik na disia i, nibuat muse ma i sian ia. 25:30 Ambungkonon ma naposo na so hasaya i tu hagolapan parbalian. Disi ma ia tangis patungaripon!' " 25:31 "Muda ro Anak Ni Jolma i gabe Raja mardongan angka surusuruanNia, juguk ma Ia di habangsa ni hamuliaonNa. 25:32 Sude halak na satano on dipalagut ma di joloNia. Dung i sirangonNa ma halahi gabe dua punguan songon panyirang ni hambeng sian biri-biri. 25:33 Palaguton ma biri-biri sabola siamunNia, hambeng sabola siambirangNia. 25:34 Dung i dohonon ni Raja i ma hata tu angka na di siamunNia i, 'Ro ma hamu angka na nipasupasu ni Damang. Masuk ma hamu tu bagasan harajaan na dung diparade di hamu mamungka sian na manompa portibi on. 25:35 Angke taran malean Au, dilehen hamu do Au mangan. Dompak manguas Au, dilehen hamu do Au minum. Di na tarpunjung Au, dijagit hamu do Au di bagasmunu. 25:36 Di na so marpakean Au, diparabiti hamu do Au. Marnyae Au, diligi hamu do Au, di hatiha na tarhurung Au ro do hamu mangaligi Au.' 25:37 Gabe didok halahi na patuluskon lomo ni roha ni Debata ma, 'Sadihari ma he hami ida Ho Tuhan male gabe hami lehen Ho mangan, sanga manguas gabe hami painum Ho Tuhan? 25:38 Andigan ma hami ida Ho ale Tuhan songon halak dagang di sada inganan, gabe hami jagit Ho di bagasnami? Andigan ma na so marpakean Ho Tuhan gabe hami lehen pakean di ho? 25:39 Andigan ma hami ida Ho Tuhan marnyae sanga tarhurung, gabe hami ligi Ho?' 25:40 Alusan ni Raja i ma, 'Ingot hamu ma on: Hatiha dibaen hamu songon i tu sada halak sian angka kahanggingKu na umdangol i, etongon na tu Au do i dibaen hamu!' 25:41 Dung i didok Raja i ma tu halak na di siambirangNia i, 'Morot ma hamu sian on, hamu angka na hona bura! Masuk ma hamu tu api na so ra mintop na niparade di Sibolis dohot di angka surusuruanna! 25:42 Angke di hatiha male Au nada dilehen hamu Au mangan. Hatiha manguas Au nada dilehen hamu Au minum. 25:43 Hatiha tarpunjung Au di sada-sada inganan, nada dijagit hamu Au di bagasmunu. Hatiha so marpakean Au, nada dilehen hamu pakeanKu. Marnyae Au dohot hatiha tarhurung, nada diligi hamu Au.' 25:44 Dung i dohonon ni halahi ma tuSia, 'Andigan lakna hami ida Ho ale Tuhan male-malean sanga manguas, sanga tarpunjung di sada inganan, sanga na so marpakean, sanga marnyae, sanga tarhurung, jana nada hami urupi Ho Tuhan?' 25:45 Alusan ni Raja i ma, 'Tangkas ma jolo tangihon hamu: Di na so ra hamu mangurupi sahalak sian na umdangol on, etongon na so ra do hamu mangurupi Au.' 25:46 Hara ni i uhumon ma angka halak sisongon i dohot uhuman na manongtong. Hape anggo halak na mambaen lomo ni roha ni Debata mangolu ma halahi jana marjop ni roha dohot Debata."
26:1 Dung sidung diajarkon Jesus sude taringot tusi, didok Ia ma tu angka anak siseanNia i, 26:2 "Diboto hamu do, dua ari nari dapot ma Pesta Paskah. Pasahaton ma Anak Ni Jolma i anso diparsilangkon!" 26:3 Jadi marlagut ma disi angka Sintua Ni Malim dohot angka hatobangon ni halak Jahudi di inganan ni si Kayafas Malim Godang i. 26:4 Martahi ma halahi laho manangkup Jesus anso dibunu halahi Ia. 26:5 "Tapi, ulang ma hatiha pesta i dibaen, harana gabe masa annon hagaoron di tonga-tonga ni rayat i." 26:6 Hatiha di Betania Jesus, i ma di bagas ni si Simon na huliton na hinan, 26:7 ro ma sada anak boru mandapotkon Jesus. Dioban ia do sada botol na marisi miak na huskus, boti sigodang arga. Jadi hatiha juguk Jesus mangan, diduruskon anak boru i ma miak na huskus i tu ulu ni Jesus. 26:8 Gabe muruk ma angka anak sisean ni Jesus marnidasa. "Aha ma angkon sai niparsayang on sude?" ninna halahi. 26:9 "Targadis do miak na huskus on arga sajo, nilehen hepengna i tu halak na pogos!" 26:10 Diboto Jesus do pikiran ni halahi, gabe ning Ia ma tu halahi, "Biasi pola arsahanmunu anak boru on? Na denggan do na nibaennia i tu Au. 26:11 Tongtong do adong na pogos rap dohot hamu, tapi anggo Au nada tongtong rap dohot hamu. 26:12 Di na niduruskonnia miak na huskus i tu Au, na paradehon Au noma i tu hatatanomKu. 26:13 Ingot hamu ma! Sanga na di dia di tano on dipararat Jamita Na Denggan na sian Debata i, angkon dicaritohon muse ma pambaenan ni anak boru on baen parningotan tusia." 26:14 Dung i kehe ma sahalak sian anak sisean ni Jesus na dua bolas i, i ma na margoar si Judas Iskariot mandapotkon angka Sintua Ni Malim. 26:15 Didok ia ma tu halahi, "Aha ma lehenonmunu di au muda hupasahat Jesus tu hamu?" Dung i dietong halahi ma tolu pulu hepeng perak. Dilehenkon halahi ma hepeng i tusia. 26:16 Mamungka sian i, dijalahi si Judas ma hatiha na topet laho pasahatkon Jesus. 26:17 Ari parjolo dung dapot hatihana Parningotan Ni Roti Na So Marragi, ro ma angka anak siseanNia i mandapotkon Jesus. Disapai halahi ma tuSia, "Di dia do dipangido rohamu Tuhan mangankon sipanganon Paskah i? Anso hami parade." 26:18 Dialusi Jesus ma, "Kehe ma hamu tu kota manopot sada halak disi. Dokkon hamu ma tusia, 'Ninna Guru i, ma dapot hatihana di Au. Giot di bagasmon do Au marpaskah rap dohot angka anak siseanKu.' " 26:19 Dioloi angka anak siseanNia i ma songon na nisuruhon ni Jesus tu halahi. Kehe ma halahi paradehon panganon Paskah i. 26:20 Dung borngin, juguk ma Jesus rap dohot angka anak siseanNia i mangan. 26:21 Jadi hatiha na mangan i halahi mandok hata ma Jesus, "Tangihon hamu jolo: Sahalak sian hamu giot manghianat tu Au." 26:22 Dung dibege angka anak siseanNia na nidokNia i, gabe marsak sajo ma halahi. Marsisapai ma halahi tu Jesus, "Na he nada Au na nidokMu Tuhan?" 26:23 Dialusi Jesus ma, "Na manyornopkon tanganna tu mangkuk rap dohot Au, i ma ibana na giot manghianat i tu Au. 26:24 Tutu nian, angkon kehe do Anak Ni Jolma i songon na dung tarsurat hian di Buku Na Badia i paboa na angkon mate Ia. Tapi marjaya ma halakna i na manghianat tu Anak Ni Jolma i! Sugari gumonan hian do indangkon sai jungada ia sorang!" 26:25 Dung i didok si Judas panghianat i ma, "Tontu nada au na nidok ni Guru i?" Dialusi Jesus ma, "Madung didok ho i!" 26:26 Hatiha na mangan i halahi dibuat Jesus ma roti. Dipasahat Ia ma tangiang mandok tarimakasi. Dung i dilehen Ia ma roti i tu angka anak siseanNia i, didok Ia ma dohot hataNa, "Jagit, jana pangan hamu ma, on ma pamatangKu." 26:27 Dung i, dibuat Ia ma sada panginuman ni anggur, didok Ia ma tarimakasi tu Debata. Dung i dilehen Ia ma panginuman i tu angka anak siseanNia i, didok Ia ma dohot hataNa, "Sude ma hamu minum sian on. 26:28 Angke on ma mudarKu na gabe jaminan ni parjanjian ni Debata. Niduruskon do mudarKon hara ni bahat halak, gabe hasesaan ni dosa. 26:29 Ingot hamu ma: Nada inumonKu be parbatu ni hayu anggur lopus tu sada hatiha inumonKu ma anggur na imbaru rap dohot hamu muda dung dipajongjong Damang HarajaanNia." 26:30 Dung diendehon halahi sada ende puji-pujian. Halahi pe kehe ma tu Dolok Zetun. 26:31 Dipaboa Jesus ma tu angka anak siseanNia i, "Borngin on mandao be ma hamu sude, tinggalkononmunu ma Au. Harana tarsurat do di Buku Na Badia i, 'BunuonKu ma parmahan i gabe marserak ma sude pahan-pahanan.' 26:32 Tapi dung dipangolu Au mangulahi, parjolo ma Au kehe tu Galilea ulang hamu." 26:33 Didok si Petrus ma tu Jesus, "Haru sude pe halahi maninggalkon Ho Tuhan, anggo au bagi na bia pe nada hutinggalkon Ho!" 26:34 Dung i ninna Jesus ma tusia, "Tangihon jolo: Borngin on taran so martahuak manuk dope, ma tolu noli dokkononmu na so ditanda ho Au." 26:35 Dialusi si Petrus ma, "Sugari pe angkon tarpaksa mate au rap dohot Ho Tuhan, nada na dohononku na so hutanda Ho Tuhan!" Songon i ma dipandok sude anak sisean na asing i. 26:36 Dung i lalu ma Jesus rap dohot angka anak siseanNia i tu sada inganan na margoar Getsemane. Didok Ia disi tu halahi, "Dison ma jolo hamu juguk painte martangiang Au santongkin." 26:37 Dung i dipiohon Ia ma anso dohot si Petrus rap dohot anak ni si Zebedeus na dua i kehe rap dohot Ia. Mamungka ma idaon marsak Ia disi, susa sajo. 26:38 Didok Ia ma tu anak siseanNia i, "Marsak sajo do Au, songon na giot mate Huhilala. Dison ma jolo hamu, anso dohot hamu marjonggor rap dohot Au." 26:39 Dung i kehe ma Jesus tar dumao saotik, tungkap ma Ia tu tano laho martangiang, "O Amang," ning Ia, "Anggo tarbaen do, padao ma sian Au parkancitan na angkon jagitonKu. Tapi ulang ma hagiotKu na tulus, baen ma songon na dihagiotiMu." 26:40 Dung i mulak ma Jesus mandapotkon anak siseanNia na tolu i. Ma tarpodom halahi didapot Ia. Didok Ia ma tu si Petrus, "Na he tarbaen hamu jonggor rap dohot Au, hum sajom pe? 26:41 Jonggor ma hamu, martangiang bage hamu anso ulang talu hamu dibaen pandugaan i. Denggan do nian anggo roha ni jolma, tapi gale do pamatang." 26:42 Jadi kehe ma Jesus padua-nolihon laho martangiang. Didok Ia ma, "Muda na angkon taononKu ma parkancitan on ale Amang jana nada tarbaen so taononKu, rohaMu ma na tulus." 26:43 Dung i mangulahi ma Jesus ro. Didapot Ia, ma laing modom do angka anak siseanNia i. Songon na so tarbuka be mata ni halahi hara ni nonona dihilala halahi. 26:44 Jadi ditadingkon Jesus ma halahi sanoli nari. Kehe ma Ia martangiang patolu-nolihon. Sarupa do tangiangNia i dohot sinangkinan i. 26:45 Dung i didapotkon Ia ma mangulahi angka anak siseanNia i didok Ia ma tu halahi, "Modom ma hamu huhut maradian. Ligi hamu ma, ma dapot hatihana laho pasahatkon Anak Ni Jolma i tu angka halak pardosa. 26:46 Ngot ma hamu anso kehe hita. Ligi ma! Ma indi halak na manghianat i tu Au!" 26:47 Mangkatai dope Jesus, ro ma si Judas, i ma sahalak sian anak siseanNia na dua bolas i. Ro muse ma rap dohot ia bahat halak maroban podang dohot potuk-potuk. I ma angka na nisuru ni angka kapala ni malim dohot angka hatobangon ni halak Jahudi. 26:48 Ma dipaboa panghianat i hian tu halahi tandana, "Sanga ise na huumma, i ma Ia. Tangkup hamu ma!" 26:49 Disi lalu tu inganan i, manigor didapotkon si Judas ma Jesus. Ning ia ma, "Horas ma di Guru i!" Diumma ia muse ma Jesus. 26:50 Dialusi Jesus ma, "Ale dongan, hara ni i dehe ho ro tuson?" *ALE DONGAN, HARA NI I DEHE HO RO TUSON?:Sanga, Ale dongan sigop ma karejohon sanga aha na giot sikarejohononmu.* Dung i ro ma tu jolo halak na bahat i, ditangkup halahi ma Jesus. 26:51 Ro ma sahalak sian anak sisean ni Jesus na disi i, manyintak podangnia. Ditampul ia ma naposo ni Malim Godang i dohot podangnia i. Ramping pinggol i. 26:52 Didok Jesus ma tu anak siseanNia i, "Pasarung podangmi. Sude halak na mangasahon podang angkon mate do baenon ni podang. 26:53 Ninna rohamu lakna na so tarpangido Au partolongan tu Damang, jana tarsuru Damang do manigor lobi sian dua bolas legion surusuruan? 26:54 Tapi muda songon i, dia ma tulus tarjadi na nipaboa ni Buku Na Badia i hian, na angkon tarjadi songon na masa sadari on?" 26:55 Dung i didok Jesus ma tu halak na bahat i, "Ro hamu laho manangkup Au maroban podang dohot potuk-potuk. Halak na jahat dehe Au lakna? Ganop ari do Au mangajari di Bagas Ni Debata hape nada ditangkup hamu Au! 26:56 Tutu do nian, angkon tarjadi do sude na masa on anso tulus muse sanga aha na nisuratkon ni angka panurirang di Buku Na Badia i." Dung i markehean ma sude anak sisean ni Jesus i maninggalkon Ia. 26:57 Dioban angka na manangkup i ma Jesus tu bagas ni Malim Godang na margoar si Kayafas. Marlagut ma disi angka Siboto Surat ni halak Jahudi dohot angka hatobangon ni halahi. 26:58 Jadi diihutkon si Petrus ma hatiha i Jesus sian na dao lopus lalu tu alaman ni bagas ni Malim Godang i. Masuk ma si Petrus tu alaman i, disi ma ia juguk rap dohot angka panjago i. Sanga songon dia ujungna anso diboto ia. 26:59 Dijalahi angka kapala ni malim i ma dohot sude parrapot i angka hasaksian na so tutu laho mangalo Jesus anso adong dalanna baenon ni halahi mamunu Ia. 26:60 Tapi nada dapot halahi bagi aha haru pe ma bahat na jongjong angka saksi i. Ujungna adong ma dua halak jongjong tu jolo. 26:61 Didok halahi ma, "Didok bayo on do, 'Tarumpakkon Au do Bagas Ni Debata, tapi di bagasan tolu ari tar pajongjong Au mangulahi.' " 26:62 Dung i jongjong ma Malim Godang i mandok hata tu Jesus, "Na so ra do Ho mangalusi sude na ni tuhaskon i tu Ho?" 26:63 Tapi sip sajo do Jesus. Dung i diulahi Malim Godang i ma mandok hata tuSia, "Saonnari mangasahon Debata na mangolu i hupangido tu Ho sumpahon ma tu hami, tutu do Ho Anak Ni Debata Kristus i?" 26:64 Dialusi Jesus ma, "Tutu. Tapi ingot hamu ma: Mamungka saonnari idaonmunu ma Anak Ni Jolma i juguk di siamun ni Na Markuaso i. Dung i ro ma Ia di ginjang ombun na di langit an!" 26:65 Dung i disibakkon *DISIBAKKON: Cara ni halak Jahudi paboa na muruk.* Malim Godang i ma pakeanNia. Didok Ia ma, "Mangalayasi do on! Inda porlu be saksi. Ma dibege hamu sudena hataNia na mangalayasi i. 26:66 Saonnari bia ma pandapotmunu?" Dialusi halahi ma, "Angkon ni pamate ma Ia." 26:67 Dung i ditijuri halahi ma bohi ni Jesus, dibalbali ma Ia. Adong muse ma na manampeleng Ia, 26:68 jana mandok tuSia, "Cubo ma jolo paboa tu hami, ale Kristus! Ise ma na manampeleng Ho i?" 26:69 Juguk-juguk ma si Petrus di ruar, di alaman i. Jadi ro ma sahalak anak boru naposo ni Malim Godang i mandok tu si Petrus, "Dohot do ho dongan ni Jesus halak Galilea i." 26:70 Tapi diporso si Petrus ma di jolo ni halahi sude. "Inda huastui na nidokmi," ning si Petrus mangalusi, 26:71 lalu kehe ia tu horbangan ni alaman i. Jadi ro muse ma sada nari naposo dadaboru, diida ia ma si Petrus, gabe didok ia ma tu angka halak na disi i, "Dohot do bayo indon dongan ni Jesus na sian Nasaret i." 26:72 Diulahi si Petrus ma mamorso jabat marsumpa-sumpa ia, "Bagi na bia pe inda hutanda bayo i!" ning si Petrus. 26:73 Inda sadia honok, ro ma angka halak na marjongjongan disi mandok tu si Petrus, "Tutu do, ho ma sahalak sian halahi. Tanda do sian pangkulingmu." 26:74 Gabe marsumpa-sumpa ma si Petrus, "Sai mate au muda tutu hutanda bayo i!" ning ia. Manigor martahuak ma manuk. 26:75 Jana taringot ma tu roha ni si Petrus hata ni Jesus tusia, "Dompak so martahuak manuk, madung diporso ho Au tolu noli." Kehe ma si Petrus tu balian tangis panguncombopon.
27:1 Dung torang arina i martahi ma sude angka Sintua Ni Malim dohot angka hatobangon ni halak Jahudi manontuhon sanga na bia baenon ni halahi mamunu Jesus. 27:2 Ditambat halahi ma Ia. Dioban ma laho pasahatkon Ia tu si Latus. I ma gubernur ni Harajaan Rom. 27:3 Jadi dung diida si Judas panghianat i, na giot hona uhum noma Jesus gabe manyosal ma ia, dipaulak ma hepeng na tolu pulu perak i tu angka Sintua Ni Malim dohot tu angka hatobangon ni halak Jahudi i. 27:4 Ning ia ma, "Ma mardosa au, manghianat au tu halak na so marsala gabe didabu uhum mamatehon Ia!" Didok halahi ma mangalusi, "Ahana ma i di hami? Urusanmu do i!" 27:5 Gabe disampakkon ia ma hepeng perak i tu Bagas Ni Debata, dung i kehe ma ia manyingkot. 27:6 Dipamuai angka Sintua Ni Malim i ma hepeng i, didok halahi, "Hepeng ni mudar do on. Anggo mangihutkon aturan ni ugamo, nada tola pamasuhon hepeng on tu poti ni haul na di Bagas Ni Debata." 27:7 Dung saroha halahi, dipake halahi ma hepeng i manobusi tano. I ma na margoar Tano Ni Sitopa Hudon. Dipake ma tano i gabe tanoman ni halak dagang. 27:8 I ma umbaen na margoar tano i lopus tu sadari on "Tano Mudar". 27:9 Jadi hara ni i, tulus ma na nidok ni Panurirang Jeremia. Songon on pandoknia, "Dijagit halahi ma hepeng na tolu pulu perak i. I ma bilangan ni hepeng na niolohon ni halak Israel gabe panggararna. 27:10 Dipake halahi ma hepeng i panobusi ni tano ni sitopa hudon songon na nitonahon ni Tuhan tu au." 27:11 Jongjong ma Jesus di adopan ni si Latus, gubernur ni luat i. Disapai si Latus ma, "Raja ni halak Jahudi dehe Ho?" "Olo, tutu ma songon na nidokmi," ninna Jesus mangalusi. 27:12 Tapi anggo di na pajojor pangaduan i angka Sintua Ni Malim dohot angka hatobangon ni halak Jahudi i taringot tu Jesus, sangkababa hata pe nada adong dialusi Jesus. 27:13 Gabe ninna si Latus ma tuSia, "Na so dibege Ho dehe sude pangaduan ni halahi i tu Ho?" 27:14 Saotik pe nada dialusi Jesus. Gabe homang ma roha ni gubernur i mida Ia. 27:15 Ganop Pesta Paskah dipasomal gubernur i do paluahon sahalak na hona uhum sanga ise na nipangido ni roha ni halak na bahat. 27:16 Jadi adong ma hatiha i sahalak di hurungan, na tarbarita jahatna, si Barabbas goarna. 27:17 Jadi hatiha marlagut sude halak na bahat i, disapai si Latus ma halahi, "Ise do dipangido rohamunu paluaonku di hamu? Si Barabbas do sanga Jesus na nigoaran Kristus?" 27:18 Didok gubernur i pe songon i hara ni na dung diboto ia do, na late do roha ni halahi umbaen na dipasahat halahi Jesus tusia. 27:19 Taran juguk si Latus di inganan panguhuman i, ditonahon dadaborunia ma tusia, "Indangkon sai antoi parkaro ni bayo na so marsala i. Harana jatjat do nipingku saborngin on hara ni Ia." 27:20 Tapi torus ma dijajang-jajang angka Sintua Ni Malim dohot angka hatobangon ni halak Jahudi i halak na bahat mangido tu si Latus anso si Barabbas dipalua. Tapi anggo Jesus nibunu ma. 27:21 Dung i disapai gubernur i ma mangulahi halahi, "Ise ma sian na dua halak i paluaonku di hamu?" "Si Barabbas," ninna halahi mangalusi. 27:22 "Antong, aha ma baenonku tu Jesus na margoar Kristus i?" ninna si Latus manyapai halahi. "Parsilangkon ma i!" ninna halahi mangalusi. 27:23 "Aha ma hajahatanNia?" ning si Latus. Tapi mur gogo ma halahi marsurak, "Parsilangkon i!" 27:24 Diida si Latus ma na so marguna be hatania i sude. Aropku mur mambaen gaor ma halahi laho mangalo, ning rohania. Ujungna dibuat ia ma aek. Dibasu ia ma tangannia di jolo ni halak na bahat i. Didok ia ma hatania, "Inda ahana di au muda mate halak na tigor on! Sahat di hamu ma i!" 27:25 Dialusi halak na bahat i ma sude, "Padiar ma manginona tu hami dohot tu pomparannami mudarna i!" 27:26 Gabe dipalua si Latus ma si Barabbas di halahi. Dipaloncingkon ia ma Jesus, dipasahat ia ma anso niparsilangkon! 27:27 Dung i dioban angka parajurit ni si Latus i ma Jesus masuk tu bagas paruhuman ni gubernur i. Marlagut ma tentara i sudena manghaliangi Jesus. 27:28 Dibuka halahi ma pakean ni Jesus, digontihon halahi ma dohot baju juba na ungu. 27:29 Didandan halahi ma duri-duri gabe tuku, dipamasuk halahi ma i tu ulu ni Jesus. Dilehen halahi ma sada tungkot tu tanganNia. Marsomba ma halahi di joloNia palayas-layaskon. "Santabi ma di Ho ale Raja ni halak Jahudi!" 27:30 Dung i ditijuri halahi ma Ia, dibuat ma tungkot i sian tanganNia dilipatkon halahi ma tu uluNia. 27:31 Dung sidung halahi na palayas-layaskon i, dibuka halahi ma mangulahi baju juba i. Dibaen halahi ma mangulahi bajuNia i hian. Dung i dioban halahi ma Ia tu balian anso niparsilangkon. 27:32 Dompak di tonga dalan i halahi, marsuo ma dohot sada bayo halak Kirene na margoar si Simon. Dipaksa halahi ma bayo i mamorsan silang ni Jesus i. 27:33 Dung i lalu ma halahi tu sada inganan na margoar Golgota, astuanna "Partangkurahan". 27:34 Dilehen halahi ma disi Jesus manginum anggur na marcampur pogu. Tapi dung didai Jesus anggur i, inda giot Ia manginumsa. 27:35 Dung i diparsilangkon halahi ma Ia. Mardadu ma halahi laho mambagi-bagi abitNia i. 27:36 Dung i marjuguhan ma halahi disi manjagoi Ia. 27:37 Dilohotkon halahi ma di ginjang uluNia surat paboahon hasalaanNia. Songon on ma hatana, "Indon ma Jesus Raja ni halak Jahudi". 27:38 Laing di hatiha i muse, adong dope dua halak nari panyamun diparsilangkon halahi rap dohot Jesus. Sada di siamun, sada nari di siambirangNia. 27:39 Mopeng-openg *MOPENG-MOPENG-OPENG: Cara ni halak Jahudi mangalayasi halak.* ma ulu ni halak na mamolus disi mangincahi Jesus. 27:40 Ninna halahi ma, "Heh! Ho ma na giot mangarumpakkon Bagas Ni Debata, giot pajongjongonMu ma i di bagasan tolu ari! Muda na tutu ma Ho Anak Ni Debata, antong palua ma diriMu sandiri! Mijur ma Ho sian silang i!" 27:41 Mangincahi ma tu Jesus sude angka Sintua Ni Malim dohot sude angka Siboto Surat ni Jahudi i dohot sude hatobangon ni halak Jahudi. 27:42 "Halak na asing dipaluasa hape Ia sandiri so tarpaluasa! Raja Ni Israel ma Ia ning Ia, anggo mijur ma Ia saonnari sian silang i. Anso porsaya hami diSia. 27:43 Dihaposi Ia do Debata, antong i ma paluahon Ia nuaeng muda na jop do roha ni Debata tuSia! Angke didok Ia do: Anak Ni Debata do Au." 27:44 Angka panyamun na diparsilangkon rap dohot Ia, mangincahi ma songon i tuSia. 27:45 Mamungka kotu, tolu jom honokna, golap ma sude luat i. 27:46 Dung pukul tolu andospotang, gogo ma sora ni Jesus ning Ia ma, "Eli, Eli, lama sabakhtani?" astuanna, "O, DebatangKu, DebatangKu, biasi ditinggalkon Ho Au?" 27:47 Bahat do halak na marjongjongan disi mambege na nidokNia i. Gabe didok halahi ma, "Na mamiohon si Elia do i!" 27:48 Dung i marlojong ma sahalak sian halahi mambuat lumut. Dironjomkon ia ma lumut i tu anggur na mancom. Jadi dilohotkon ia ma lumut i tu ujung ni tolong laho mangalehen tu Jesus anso diinum Ia. 27:49 Tapi didok na deba ma, "Padiar ma songon i. Tapainte ma sanga na ro si Elia paluahon Ia!" 27:50 Dung i mangulahi ma pio-pio Jesus. Dung i tos ma hosaNia. 27:51 Dung i manigor masibak ma tire na di Bagas Ni Debata bola dua sian ginjang lalu tu toru. Humutur ma tano i, mangkabola ma angka dolok batu. 27:52 Marmungkapan ma angka kuburan. Bahat halak ni Debata na dung mate mulak mangolu. 27:53 Dung mulak mangolu Jesus sian hamatean, marruaran ma halahi sian kuburan i masuk tu Kota Na Badia. Bahat do halak na midaan halahi. 27:54 Mabiar ma komandan i rap dohot angka parajurit i na manjagoi Jesus dung diida halahi lalo i dohot sude na masa i. Didok halahi ma, "Tutu do Ia on Anak Ni Debata!" 27:55 Laing adong do disi angka dadaboru na manatap-natap sian na dao. Halahi ma angka dadaboru na dohot mamungka sian Galilea mangihutkon Jesus laho mangurupi Ia. 27:56 I ma angka si Maria Magdalena, si Maria inang ni si Jakobus dohot si Josep dohot inang ni dakdanak ni si Zebedeus. 27:57 Dung potang ari ro ma sada halak na mora sian Arimatea na margoar si Josep. Laing anak sisean ni Jesus do ia. 27:58 Didapotkon ia ma si Latus mangido bangke ni Jesus i. Gabe diparentahon si Latus ma anso dipasahat tusia bangke ni Jesus i. 27:59 Dung i dibuat si Josep ma bangke i. Dibalut ia ma dohot kopen na nibaen sian abit linen na ias. 27:60 Dipayakkon si Josep ma bangke ni Jesus i di bagasan kuburan, ia puna sandiri. Na baru dituhil dope i, i ma di sada dolok batu. Digulang ia ma sada batu na godang tu baba ni kuburan i, kehe ma ia. 27:61 Anggo si Maria Magdalena dohot si Maria na asing i laing juguk do halahi disi paadop-adop kuburan i. 27:62 Ancogotna i, na mangihut tu ari parkobasan i kehe ma angka Sintua Ni Malim dohot angka Parise mangadop tu si Latus. 27:63 Didok halahi ma, "On dope anso hami ingot tuan, taran mangolu pargabus i unjung do didok Ia songon on, 'Dung tolu ari, mulak mangolu ma Au mangulahi.' 27:64 Jadi hara ni i, suru ma halak manjago kuburan i tangkas lalu tu ari patoluhon. Anggo inda songon i, ro ma angka anak siseanNia i manangkosa gabe dohonon ni halahi ma tu halak, 'Ma mulak mangolu Ia mangulahi.' Gabe gumodang dope gabus na parpudi on sian na parjolo." 27:65 "Antong palagut ma angka tentara na manjagoi," ning si Latus tu halahi, "anso kehe halahi manjagoi kuburan i sajago-jagona." 27:66 Jadi kehe ma halahi tu kuburan i. Disegel halahi ma batu panutupna i. Dung i disuru halahi ma angka tentara na manjagoi disi.
28:1 Dung salpu Ari Sabat, andostorang ni Ari Mingguna i kehe ma si Maria Magdalena dohot si Maria na asing mangaligi kuburan i. 28:2 Jadi tompu ma masa lalo na gogo. Na mijur do sada surusuruan sian banua ginjang manggulang batu panutup ni tanoman i. Dung i juguk ma ia diginjang batu i. 28:3 Songon hilap do idaon bohi ni surusuruan i. Pakeanna i pe bontar songon hapas. 28:4 Hara ni biarna angka tentara na manjagoi i, lopus hitir-hitir halahi. Langan be bohi i songon bangke. 28:5 Didok surusuruan i ma tu angka dadaboru i, "Ulang hamu mabiar! Huboto do na manjalahi Jesus na diparsilangkon i do hamu. 28:6 Nada dison be Ia. Madung ngot Ia songon na nidokNia hian tu hamu. Ligi hamu ma inganan hapayahanNa. 28:7 Ompoti hamu ma saonnari kehe paboahon tu angka anak siseanNia. 'Madung mulak mangolu Ia mangulahi. Dijoloi Ia ma hamu tu Galilea. Disi ma Ia idaonmunu!' Ingot hamu ma na hudok on tu hamu." 28:8 Diompoti dadaboru i ma maninggalkon kuburan i. Mabiar marcampur jop ni roha, dilojongi halahi ma laho paboahon pangalaho i tu angka anak sisean ni Jesus. 28:9 Jadi ompot ma ro Jesus mandapotkon dadaboru i. Didok ma tu halahi, "Horas ma di hamu!" Dipadonok halahi ma tuSia, dihaol halahi ma patna i. Disomba halahi ma Ia! 28:10 Jadi didok Jesus ma tu halahi, "Ulang hamu mabiar, kehe ma hamu, baritahon hamu ma i tu angka kahanggingKu anso kehe halahi tu Galilea, disi ma diida halahi Au." 28:11 Dung kehe dadaboru i, kehe muse ma deba angka tentara na manjago kuburan i tu kota paboahon sude na masa i tu angka Sintua Ni Malim. 28:12 Martahi ma angka Sintua Ni Malim i dohot angka bagian hatobangon ni halak Jahudi. Putus ma tahi ni halahi, lehenon ni halahi ma hepeng sanga na sadia tu tentara panjago i. 28:13 Didok halahi ma tu tentara i, "Angkon dokkononmunu ma na ro angka anak siseanNia i borngin-borngin hatiha modom hamu, manangko bangkeNia i. 28:14 Jadi muda diboto gubernur i pangalaho i, hami elek pe ia anso ulang pola adong sanga aha na manyusahon hamu." 28:15 Jadi dijagit tentara i ma hepeng i, dibaen halahi ma songon na nidok ni angka Sintua Ni Malim i dohot hatobangon ni halak Jahudi i. Lopus tu sadari on sar ma barita i di tonga-tonga ni halak Jahudi. 28:16 Kehe ma anak siseanNia na sabolas i tu Galilea. Manangkok ma halahi tu dolok na nipaboa ni Jesus hian tu halahi. 28:17 Dung i diida halahi ma Jesus disi, tungkap ma halahi manyomba Ia. Tapi adong dope deba sian halahi na ganggu dope rohana. 28:18 Gabe dipadonok Jesus ma tu halahi, didok Ia ma hata, "Sude kuaso na di banua ginjang dohot di tano on, madung dipasahat tu Au. 28:19 Jadi hara ni i, kehe ma hamu tu sude bangso, baen hamu ma halahi gabe halak na mangihutkon Au. Didi hamu ma halahi di bagasan goar ni Ama, goar ni Anak dohot goar ni Tondi Parbadia. 28:20 Laing ajari hamu ma halahi anso burju mangoloi sude na Huparentahon tu hamu. Botoonmunu ma. Au ma tongtong rap dohot hamu lopus tu hasidungan ni tano on."
1:1 Songon on do Jamita Na Denggan taringot tu Jesus Kristus, Anak Ni Debata. *ANAK NI DEBATA: Dipiga-piga-piga naskah narobi nada adong hata on.* 1:2 Na mamungka do Jamita Na Denggan i songon na nisuratkon ni Panurirang Jesaya na mandok: "Ligi ma, Husuru do suruanKu manjoloi Ho, paradeonnia ma dalan di Ho. 1:3 Adong ma halak na pio-pio di halongonan, 'Pauli hamu ma dalan di Tuhan. Pahornop hamu ma dalan na giot sibolusonNia.' " 1:4 Songon na tarsurat i, laing songon i ma haidaan si Johannes di halongonan i. Dididihon ia do halak jana dipabolkas ia ma jamita na sian Debata. "Pauba hamu ma rohamunu sian angka dosamunu, dung i angkon nipandidihon do hamu anso diampuni Debata dosamunu," ning si Johannes. 1:5 Markehean ma halak sian Judea dohot sian Jerusalem laho manangihon si Johannes. Dioku halahi ma dosa ni halahi, dung i dididihon si Johannes ma halahi di Batang aek Jordan. 1:6 Sian imbulu ni unto do pakean na nipake ni si Johannes. Bobak do bobatnia. Siapor dohot aer ni loba do panganonnia. 1:7 Dibaritahon ia ma songon on, "Saulahon dung salpu au, ro ma Sahalak na gumodang sian au. Hum unduk pe dijoloNia laho mangkarhari tali ni sipatuNia inda tumbuk dope au. 1:8 Aek do hupake mandidi hamu, tapi anggo Ia didionNia ma hamu dohot Tondi Parbadia." 1:9 Jadi ro ma hatiha i Jesus sian Nasaret na di Luat Galilea, dung i dididi si Johannes ma Ia di Batang aek Jordan. 1:10 Disi haruar Jesus sian batang aek i, diida Ia ma mungkap langit i. Dung i mijur ma Tondi Parbadia tuSia songon sada darapati. 1:11 Dung i tarbege ma sada sora sian langit mandok, "Ho do Anak haholongan ni rohangKu. Tu Ho ma Jop ni rohangKu." 1:12 Dung i torus ma dioban Tondi i Jesus kehe tu halongonan. 1:13 Opat pulu ari ma Ia disi, diuji Sibolis i. Angka binatang riar pe adong do na rap dohot Ia disi, jana ro do angka surusuruan mangoloi Ia. 1:14 Dung tarhurung si Johannes, kehe ma Jesus tu Galilea. Dijamitahon Ia ma disi Jamita Na Denggan na sian Debata. 1:15 Ning Ia ma, "Ma dapot hatihana, pungkaon ni Debata ma padalankon pangarajaionNia. Pauba hamu ma rohamunu sian angka dosamunu. Haporsayai hamu ma Jamita Na Denggan na sian Debata!" 1:16 Jadi dompak mardalan Jesus manopi-nopi Dano Galilea, diida Ia ma dua halak parihan, i ma si Simon dohot anggina si Andreas. Topet do halahi manjala ihan di dano i. 1:17 Didok Jesus ma tu halahi, "Ihutkon ma Au! Anso Hubaen hamu sipanjala jolma." 1:18 Jadi, torus ditinggalkon halahi ma jala ni halahi i, kehe mangihutkon Jesus. 1:19 Dung mardalan Jesus saotik nari, diida Ia ma si Jakobus, anak ni si Zebedeus dohot anggina si Johannes, hatiha mambubuli jala ni halahi di parau i. 1:20 Manigor dipio Jesus ma halahi, jadi ditinggalkon halahi ma si Zebedeus ama ni halahi rap dohot halak na diupaan i, dung i diihutkon halahi ma Ia. 1:21 Dung i lalu ma halahi tu kota Kapernaum. Di Ari Sabatna i, masuk ma Jesus tu bagas paribadatan jana mamungka ma Ia mangajari. 1:22 Homang-homang ma halak na manangihon pangajarNia i. Marsahala idaon Ia na mangajar i. Inda songon angka Siboto Surat i. 1:23 Jadi hatiha i ro ma sahalak na nisonggopan ni tondi na jahat masuk tu bagas paribadatan i. Marsurak ma ia, 1:24 "Na giot mambaen bia do Ho tu hami, o Jesus halak Nasaret? Betak na giot mamatehon hami do Ho? Hutanda do sanga ise Ho: Suruan na badia ni Debata do Ho!" 1:25 Disonggakkon Jesus ma tondi i. Ninna Jesus ma, "Sip, morot ho sian ia!" 1:26 Diparambalkon tondi na jahat i ma na marnyae i gogo-gogo, dung i haruar ma ia sian i huhut marsurak. 1:27 Homang ma roha ni halahi sude jabat marsipandohonan halahi sama halahi, "Aha dehe na masa on? Pangajaran na imbaru do on! Marsahala do Ia jana margogo paorot angka tondi na jahat, jana mangoloi do tuSia!" 1:28 Gabe manigor tarbonggal ma barita taringot tuSia tu sude Luat Galilea. 1:29 Kehe ma Jesus dohot angka anak siseanNia i, torus ma halahi tu bagas ni si Simon dohot si Andreas. Dohot do si Jakobus dohot si Johannes rap dohot halahi. 1:30 Topet do hatiha marun di podoman nantulang ni si Simon. Jadi dung masuk Jesus dohot angka anak siseanNia tu bagas i, dipaboa ma tu Jesus taringot tu na marun i. 1:31 Didapotkon Jesus ma nantulang ni si Simon i. Ditogu Ia ma tanganna i laho mangurupi jongjong. Mago ma arun i, ia pe markobas ma paturehon panganan ni halahi. 1:32 Potang arina i dung lusut mataniari, *DUNG LUSUT MATANIARI: Muda dung lusut mataniari, salpu ma Ari Sabat. Jadi angka halak Jahudi tola ma markarejo.* diparobani halak ma tu Jesus sude halak na marnyae dohot angka na hona setan. 1:33 Marrongoman ma na sakota i di jolo ni bagas i. 1:34 Gabe dipamalum Jesus ma disi marragam-ragam nyae, dipaorot Ia ma angka setan. Umpe dipatola Ia mandok hata setan i. Harana ditanda angka setan i do Ia. 1:35 Ancogotna i taran golap dope ari, ngot ma Jesus. Kehe ma Ia tu balian tu inganan na lungun. Martangiang ma Ia disi. 1:36 Gabe dijalak-jalahi si Simon dohot angka donganna ma Ia. 1:37 Dung marsuo halahi dohot Ia didok halahi ma, "Ma sude halak manjalahi Guru i." 1:38 Tapi dialusi Jesus ma, "Beta ma tatoruskon pardalananta tu angka kota na humaliang on. Harana, tusi pe angkon jamitahononKu do Jamita Na Denggan i, na sian Debata. Angke hara ni i do umbaen na ro Au." 1:39 Gabe diebati Jesus ma sude Galilea. Dipararat Ia ma Jamita Na Denggan i di angka bagas paribadatan jana mangusir angka begu. 1:40 Dung i ro ma sahalak na puruon tu Jesus, tungkap ma ia di joloNia mangido, jana didokkon ia ma, "Muda ra Guru i, tarbaen Guru i do pamalum au." 1:41 Ibo ma roha *IBO MA ROHA: Dipiga-piga-piga naskah narobi, didok: muruk.* ni Jesus mida bayo i. Gabe dipahortang Ia ma tanganNia manjamasa. Didok Ia ma, "Ra do Au. Antong malum ma ho!" 1:42 Manigor mago ma nyaenia i, malum ma dihilala ia. 1:43 Dung i disuru Jesus ma mulak bayo i dung jolo digogohon Ia, 1:44 "Bagi na bia pe nada tola paboaonmu pangalaho on sanga na tu ise pe. Torus tu malim ma ho kehe, pangido ma anso dipareso ia ho. Jadi dung dipareso ia ho, lehen ma haulmu tu Debata mangihutkon sapanjang aturan na nipasahat ni si Musa. I ma tandana na dung malum ho." 1:45 Jadi kehe ma bayo i. Tapi dipupu ia ma na paboa-boahon barita i tu jae tu julu, gabe nada tarbaen Jesus be torang masuk tu kota i. Di balian noma Ia di inganan na lungun-lungun i. Tapi haru songon i pe, laing marroan do halak mandapotkon Ia sanga na sian dia i.
2:1 Dung adong piga-piga ari, mangulahi ma Jesus tu Kapernaum. Tarboto ma tu halak hape na dung di bagasan bagas do Ia. 2:2 Marroan ma bahat halak. Marrongoman halahi sude disi lopus gabe so adong be na hasiatan. Lalu tu pintu i pe sompit sude halak. Dung i dipabolkas Jesus ma tu halahi barita na sian Debata. 2:3 Hatiha mangkobari Jesus, ro ma opat halak tuSia maroban sada halak na onyangon. 2:4 Tapi hara ni bahat ni jolma i, gabe nada tarbaen siopat halak i be maroban na onyangon i donok tu Jesus. Jadi, dibungkar halahi ma tarup ni bagas i di ginjang ni juguhan ni Jesus. Dung i, ditantan halahi ma na onyangon i, di lagena i. 2:5 Dung diida Jesus marsitutu do haporsayaan ni halahi, didok Ia ma tu na onyangon i, "Ale anakKu, madung sesa sude dosami!" 2:6 Jadi adong ma sanga piga-piga halak angka Siboto Surat na topet juguk disi. Mulai ma halahi marpikir-pikir di bagasan roha ni halahi, 2:7 "Na puluk ma antong bayo on mangincahi Debata songon i! Ise ma he na tarbaen manyesa dosa, anggo so Debata sandiri?" ning roha ni halahi. 2:8 Manigor diboto Jesus do pikiran ni halahi i. Didok Ia ma tu halahi, "Biasi songon i pikiranmunu? 2:9 Dia do gumonan mandok tu na onyangon on, 'Madung disesa sude dosamu' sanga mandok, 'Jongjong ma ho, oban lagemi, mardalan ho?' 2:10 Anso Hupatidahon di hamu bahaso na markuaso do Anak Ni Jolma i, laho manyesa dosa di ginjang tano on." Didok Jesus ma tu na onyangon i, 2:11 "Au mandok tu ho, jongjong ma ho, oban ma lagemi, mulak ma ho!" 2:12 Di jolo ni halak na bahat i, jongjong ma manigor halak na onyangon i, dioban ia lagenia i kehe ma ia mardalan. Homang-homang ma sude halak na disi i, dipuji halahi ma Debata. Didok halahi ma, "Inda unjung dope hami ida tarjadi na songon on!" 2:13 Mangulahi ma Jesus tu topi ni Dano Galilea. Marroan ma bahat halak mandapotkon Ia. Diajari Ia ma halahi. 2:14 Hatiha na mardalan i Ia disi, tarpaida Ia ma sahalak sipanjagit pajak na margoar si Levi anak ni si Alfeus. Topet do hatiha juguk si Levi di kantornia. Didok Jesus ma tusia, "Ihutkon ma Au!" Jongjong ma ia, gabe diihutkon Jesus. 2:15 Dung i dijamu si Levi ma Jesus di bagasnia. Bahat do angka sipanjagit pajak dohot angka jolma na so ture dietong roha ni halak, na rap dohot Jesus di hatiha i. Bahat sian halahi na mangan rap dohot Jesus dohot angka anak siseanNia i. 2:16 Jadi adong ma deba angka Siboto Surat na sian halak Parise na marnida Jesus, hatiha na mangan i Ia rap dohot angka sipanjagit pajak i songon i dohot halak na so ture i. Jadi disapai halahi ma angka anak siseanNia i, "Biasi mangan Jesus rap dohot angka sipanjagit pajak dohot angka halak na so ture?" 2:17 Dibege Jesus do sapa-sapa ni halahi i. Gabe dialusi Ia ma, "So na porlu doktor di halak na torkis. Hum di halak na marnyae do i. Ro pe Au, nada bagi na giot mamiohon angka halak na burju, tapi mamiohon halak pardosa do," ning Ia. 2:18 Di sada hatiha topet puaso angka anak sisean ni si Johannes Pandidi dohot halak Parise. Jadi adong ma halak na ro tu Jesus manyapai, "Biasi puaso angka anak sisean ni si Johannes Pandidi dohot angka na mangihutkon halak Parise? Hape anggo angka anak siseanMu inda puaso?" 2:19 Dialusi Jesus ma, "Tarbaen dehe na so mangan angka tamu di pesta parbagason? Sapanjang rap bayo pangoli i dohot halahi, tontu mangan halahi. 2:20 Tapi adong do hatihana dibuat bayo pangoli i sian halahi. Anggo i, baru ma nada mangan be halahi. 2:21 Nada adong halak mambaen abit na imbaru gabe pandungkap tu abit na buruk. Muda songon i dibaen ia, sibakkonon ni pandungkap na imbaru i do abit na buruk i. Mur bidang ma parsibakna i. 2:22 Laing songon i muse do, nada diusehon halak anggur na imbaru tu inganan na buruk. Muda dibaen songon i, puntarkonon ni anggur i do ingananna i. Ujungna gabe dua-dua rap so marguna. Anggo anggur na imbaru angkon tu inganan ni anggur na imbaru do baenon." 2:23 Di na sanoli topet Ari Sabat, mamolus ma Jesus di kobun ni halak. Jadi hatiha na mardalan i Ia, digotili angka anak siseanNia na dohot i ma burir ni gandum i. 2:24 Gabe didok halak Parise ma tuSia, "Ligi ma! Biasi dilanggar angka anak siseanMi Tona ni ugamonta? Dipambaeni halahi do na so tola baenon di Ari Sabat!" 2:25-26 Dialusi Jesus ma, "Na so jungada do disise hamu na nibaen ni si Daud, di hatiha ni si Abyatar gabe Malim Godang. Di na male ia rap dohot parangannia i taran so adong panganon ni halahi. Masuk do ia tu Bagas Ni Debata, dipangankon ia ma roti na dung dihaulkon tu Debata, dilehen ia muse dope di parangannia i. Hape mangihutkon ugamonta, hum malim do na tola mangankon roti i." 2:27 Didok Jesus dope muse, "Dibaen pe Ari Sabat i, na porlu di jolma do i. Nada jolma i dibaen porlu di Ari Sabat. 2:28 Antong, markuaso do Anak Ni Jolma i di ginjang ni Ari Sabat."
3:1 Dung i kehe ma Jesus mangulahi tu bagas paribadatan. Adong ma disi sahalak na mate tanganna sabariba. 3:2 Topet muse adong disi halak na giot manjalahi hasalaan ni Jesus, anso taraduhon halahi Ia. Jadi torus ma sai diparate-atehon halahi Jesus sanga na ra do Ia pamalumkon hatiha Ari Sabat. 3:3 Didok Jesus ma tu na mate i tanganna sabariba, "Di tonga-tonga on ma ho jongjong." 3:4 Jadi disapai Ia ma angka halak na disi i, "Mangihutkon ugamonta, aha do na tola baenonta di Ari Sabat? Mambaen na denggan do sanga mambaen na jahat? Manolong halak do sanga mangago halak?" Tapi sip sajo do halahi. 3:5 Marsak ma Jesus hara ni pir ni roha ni halahi. Jadi muruk ma Jesus marnida halahi na humaliang i, didok Ia ma tu bayo i, "Pahortang ma tanganmi!" Dipahortang ia ma tangannia i dung i gabe malum ma. 3:6 Marmorotan ma angka halak Parise i, ditinggalkon halahi ma bagas paribadatan i. Manigor marpokat ma halahi dohot angka halak na saroha dohot si Herodes laho mamunu Jesus. 3:7 Mandao ma Jesus dohot angka anak siseanNia tu Dano Galilea. Tapi bahat sajo do halak sian Galilea na kehe mangihutkon Jesus. 3:8 Bahat muse do na ro sian Judea, sian Jerusalem, sian Luat Idumea dohot angka na sian ipar ni Batang aek Jordan dohot sian kota Tirus dohot Sidon. Marroan ma halahi tu Jesus hara ni na dung dibege halahi sude taringot tu angka pambaenanNia. 3:9 Hara ni bahat ni jolma i, gabe disuru Jesus ma angka anak siseanNia paradehon parau diSia, anso ulang mur disosak halak na bahat i Ia. 3:10 Ma songon i bahatna dipamalum Ia halak, jana sanga ise na adong nyaena marsiadu ma laho manjama Ia. 3:11 Angka halak na hona setan pe muda marsuo dohot Ia, angkon manigor manungkap marsomba-somba di joloNia mangangguhi, "Anak Ni Debata do Ho!" ninna be. 3:12 Tapi dipaksa Jesus do anso ulang dipaboa-boa tu halak, sanga ise Ia. 3:13 Dung i manangkok ma Jesus tu sada dolok, dipiohon Ia ma sanga ise na giot sipioonNia. Marroan ma halahi, 3:14 dipili Ia ma dua bolas halak sian halahi. Digoari Ia ma halahi angka rasul, "Au do mamili hamu, anso rap hamu dohot Au." Songon i ma pandok ni Jesus tu halahi. "SuruonKu ma hamu laho paboahon Jamita Na Denggan na sian Debata, 3:15 jana dapotan kuaso ma hamu laho mangusir angka setan." 3:16 Angka on ma goar-goar ni halahi na dua bolas, na nitodo ni Jesus i: Si Simon (na nigoar ni Jesus si Petrus). 3:17 Si Jakobus dohot angginia si Johannes, i ma angka anak ni si Zebedeus. (Digoari Jesus do halahi na dua na markaha-maranggi on, Boanerges. Boanerges astuanna "halak na songon ronggur".) 3:18 Si Andreas, si Pilipus, si Bartolomeus, si Mateus, si Tomas, si Jakobus anak ni si Alfeus, si Tadeus, si Simon sian Kana, 3:19 dohot si Judas Iskariot na manjehehon Jesus. 3:20 Dung i masuk ma Jesus tu sada bagas. Tapi laing marlagut dope halak na bahat i, jabat inda sanga mangan Jesus rap dohot angka anak siseanNia i. 3:21 Jadi tarbege ma tu sisolkotNia na masa i, gabe ro ma halahi laho mangalap Ia. Harana didok halahi, "Ma rintik Ia!" 3:22 Didok angka Siboto Surat na sian Jerusalem i ma, "Na susur do sibolis tuSia!" Adong muse na mandok, "Kapala ni setan i do na mangalehen kuaso tuSia laho mangusir setan i." 3:23 Dung i dipiohon Jesus ma halak na bahat i, dicaritohon Ia ma piga-piga umpama tu halahi. "Bia ma pangusir ni Sibolis di Sibolis? 3:24 Muda so adong hasadaon di sada harajaan, sai marbadai rayat sama rayat disi, na giot maronco ma harajaan i. 3:25 Laing songon i muse do, muda so adong hasadaon di tonga-tonga ni na sabagas, sai marmusu na sada tu na sada nari, sego ma na sabagas i. 3:26 Songon i muse ma di bagasan harajaan ni Sibolis i. Muda masa parbolat-bolatan dohot parbadaan disi, paboa na so pola honok be kuaso ni i. Angkon mago noma i. 3:27 Nada tarbaen halak masuk tu bagas ni na gogo laho mangarampas sinadonganna i anggo so jolo ditambat ia na gogo i. Dung i pe, baru tarrampas ia sude sinadonganna i. 3:28 Tutu do na Hudok on! Sude dosa na nibaen ni jolma dohot sude hata na jahat na nipardokkonan, tarsesa do i. 3:29 Tapi anggo na mangalayasi Tondi Parbadia, bagi na bia pe, nada tarsesa i! Angke dosa na manongtong do dosa na nibaennia i." 3:30 Hara ni na nidok ni halak do, adong tondi ni setan di bagasan Jesus umbaen na nidokNia songon i. 3:31 Dung i ro ma inang ni Jesus dohot angka kahanggiNia. Dipainte halahi ma di ruar dung disuru halahi halak na asing mamiohon Jesus. 3:32 Jadi topet hatiha i bahat halak na mangarongomi Jesus. Didok halahi ma tuSia, "Di ruar do inanta dohot angka angginta. Giot marsuo dohot Ho." 3:33 Dialusi Jesus ma, "Ise dehe Dainang? Ise ma he lakna kahanggingKu?" 3:34 Dung i diligi Ia ma tu angka na marjuguhan i na humaliang Ia, ning Ia ma, "On do Dainang dohot angka kahanggingKu! 3:35 Halak na mambaen lomo ni roha ni Damang, angka i do kahanggingKu dohot ibotongKu dohot Dainang."
4:1 Mangajari ma Jesus mangulahi di topi ni Dano Galilea. Na bahatan halak mangarongomi Ia. Hara ni bahat ni jolma i, kehe ma Ia juguk di bagasan sada parau na di aek i. Di topi ma marjongjongan halak na bahat i. 4:2 Bahat do na niajarkon ni Jesus tu halahi mardongan umpama. Angka songon on ma na niajarkonNia i, 4:3 "Tangihon hamu ma! Adong ma sada halak na kehe manyabur same. 4:4 Jadi hatiha na manyabur i ia, adong ma same i na madabu tu topi-topi ni dalan i. Jadi marroan ma angka unggas abis ma dipapangani angka same i. 4:5 Adong muse ma same i na madabu tu tano na marbatu-batu, na so sadia tanona jana sigop sajo do tubu eme i, 4:6 tapi dung mamungka manaek mataniari, gabe malos ma suan-suanan na baru tubu i lopus mahiang. Harana, nada jabat bagas dope uratna boti hara ni na so sadia i tanona. 4:7 Adong muse ma same i na madabu tu tonga-tonga ni duri-duri. Mur magodang ma angka duri i, mur tarhapit ma same na dung tubu i gabe nada ra marbatu. 4:8 Tapi adong muse do na madabu tu tano na napu. Martubuan ma same i, lopus magodang lalu marbatu ramos. Adong na tolu pulu lompit suhana, adong na onom pulu, adong muse dope na saratus lompit." 4:9 Dung sidung dipaboa Jesus umpama i, didok Ia ma, "Sanga ise na marpinggol laho marbinege, ditangihon ia ma!" 4:10 Hatiha punjung Jesus, marroan ma tuSia angka na dung umbege pangajaranNia i rap dohot angka anak siseanNia i. Dipangido halahi ma anso dipatorang Ia astuan ni umpama sinangkinan i. 4:11 Dung i didok Jesus ma tu halahi, "Anggo tu hamu madung dilehen do mangartihon simo-simo ni Harajaan Ni Debata, tapi anggo tu halak na asing sian hamu, markite-hite umpama do i nipaboa. 4:12 Dibaen Debata pe songon i, anso 'Torus do bolnang halahi mangaligi, tapi umpe diidasa, torus do halahi manangihon, tapi umpe mangarti, angke sugari diida jana diastui halahi gabe ro ma halahi tu Debata dung i gabe ampunan ni Debata ma halahi.' " 4:13 Dung i didok Jesus ma tu halahi, "Anggo inda diastui hamu be umpama sinangkin, bia muse ma pangastuimunu di angka umpama na asing? 4:14 Si panyabur i, i do na manyaburkon hata i. 4:15 Huhul mardabuan di topi-topi ni dalan do hata i, tarsongon i ma angka halak na manangihon hata i. Disi dibege halahi manigor jalop ma ro Sibolis i mambuat hata na dung nisabur i di roha ni halahi. 4:16 Same na nisabur tu inganan na marbatu-batu i, tarsongon i ma angka na mambege hata i, manigor sonang roha ni halahi manjagitsa. 4:17 Tapi nada jabat bagas dope di roha ni halahi, gabe nada tahan honok disi. Muda masa hasusaan sanga siksaan hara ni hata i, manigor marbalik ma halahi. 4:18 Same na madabu tu tonga ni duri-duri, i ma tarsongon halak na manangihon hata i, 4:19 tapi disegohon pangkilalaan na humolos ma taringot tu ngolu ni halahi. Sai giot maradong. Marragam ma hagiot na mangganggui roha ni halahi. Gabe mate ma hata i na sian Debata, inda marguna be di roha ni halahi. 4:20 Same na nisabur di tano na napu i, i ma tarsongon angka na manangihon hata i, jana laing dijagit rohana. Tarida ma parbatuna. Adong na tolu pulu lompit, adong muse na onom pulu lompit. Jana adong ma na sampe saratus lompit suhana." 4:21 Dipaudut Jesus ma mangulahi hataNia, "Unjung dehe halak pagara lampu dung i ditutupi dohot ampang sanga dipayakkon ia di toru ni podoman? Inda he di inganan ni lampu do dipayakkon ia i? 4:22 Nada he paruaron do muse barang na nisimpan? Nada he angkon tarboto do muse sudena rahasia? 4:23 Barang ise na marpinggol laho marbinege, ditangihon ia ma!" 4:24 Didok Jesus dope muse. "Parrohahon hamu ma sanga aha na nibegemunu on! Muda bahat do dikarejohon hamu, laing bahat muse ma lehenon ni Debata di hamu. Lobi dope sian na nihalojahonmunu. Tapi muda otik do dikarejohon hamu, otik muse ma jagitonmunu. 4:25 Angke, tu halak na maradong, lehenon dope disia umbahat. Tapi anggo sian halak na so mardiha-diha, hum sisaotik nari na tinggal i disia, dibuat muse dope i sian ia." 4:26 Dipaudut Jesus ma mangulahi pangkataionNia i, "Harajaan Ni Debata, tarumpamahon do i songon sada halak na manyabur same di ladangna. 4:27 Modom ma ia borngin, ngot ma ia arian. Jadi disi ma same i martumbur lopus magodang. Tapi sanga na tarbia partumburna dohot parsimburna magodang same i, nada diboto ia. 4:28 Gogo ni tano i sandiri do na mambaen i tubu. Parjolo ro pusukna, dung i burirna lalu tu batuna. 4:29 Jadi dung masak eme i, aha dope, dipungka bayo i ma manyabisa. Harana ma dapot hatihana manyabi." 4:30 "Tar tu aha ma antong umpamahononta Harajaan Ni Debata?" ninna Jesus manyapai halahi. "Aha ma tabaen tiruan laho patorangkonsa? 4:31 Anggo Harajaan Ni Debata tarsongon batu ni sabi do i na disaburkon tu tano, i ma boni na ummenek sian sude boni na adong di tano on. 4:32 Dung disuan batuna i di tano, tubu ma i jana gabe gumodang sian sude suan-suanan na targoar simarata. Songon i ma rumbun ni angka dangkana i jabat marroan angka unggas jana tarbaensa marasar di toru ni angka dangkana i." 4:33 Songon i ma dibaen Jesus pabolkaskon jamita na sian Debata tu angka jolma i mamake angka umpama na songon i, na mura astuan ni halak. 4:34 Sai marumpama do Jesus muda mangajari Ia tu halak na bahat i. Tapi anggo Ia dohot angka siseanNia i sajo, dipatorang Ia do sude tu halahi. 4:35 Laing andospotangna i didok Jesus ma tu angka anak siseanNia i, "Beta ma marparau hita tu ipar an." 4:36 Gabe marmasuhan ma angka anak siseanNia i tu parau i angke madung parjolo Jesus masuk tu bagasan. Tinggal ma halak na bahat i di darat, di topi ni dano i. Kehe ma halahi na marparau i. Tapi laing adong do disi parau na asing. 4:37 Nada sadia honok, ro ma haba-haba na gogo. Disosak angka ombak ma parau i, mamungka ma masuk aek tu bagasan, jabat giot gok ne ma parau i. 4:38 Tapi anggo Jesus modom do di podoman na di buritan ni parau i. Disungguli angka anak siseanNia i ma Ia. Didok halahi ma, "O, Guru! Na so parduli be Guru i di hita? Mate ma hita on!" 4:39 Ngot ma Jesus, digorahon ia ma alogo i. Didok Ia ma, "So ma ho, pasonang ma!" Jadi so ma alogo i, manigor sonang sajo ma sude. 4:40 Dung i didok Jesus ma tu angka anak siseanNia i, "Biasi mabiar hamu? Adong he laing na so porsaya dope hamu?" 4:41 Gabe mabiar be ma angka anak siseanNia i. Marsipandohonan ma halahi sama halahi, "Ise do satutuna bayo on? Alogo dohot ombak pe mangoloi do tu parentaNia!"
5:1 Dung i lalu ma Jesus rap dohot angka anak siseanNia i tu ipar ni Dano Galilea, i ma tu Gerasa. 5:2 Disi mijur Jesus sian parau i manigor dialo-alo sada bayo na ruar sian liang ni angka kuburan ma Ia. 5:3 Na nisonggopan ni tondi na jahat do bayo i. Hum na di liang ni kuburan do ia tinggal. Inda tartambat be, dohot rante bosi pe inda bisa. 5:4 Ma jotjot dibayangkon ia, dirante patna i dohot tanganna i tapi marpupu do digotapkon ia rante i. Bosi na di patnia i pe ditipulkon ia. Songon i ma gogona gabe umpe sahalak tarbaen patunduk ia. 5:5 Arian na borngin do ia malat-alat di kuburan i dohot di dolok-dolok i jana marsurahi, dibalbali ia pamatangnia i dohot batu. 5:6 Jadi dung diida ia sian na dao ro Jesus, manigor marlojongi ma ia mangalo-alo Jesus marsomba di joloNia. 5:7 Gogo ma didokkon ia, "Jesus, Anak Ni Debata Na Gumincat! Na giot mambaen bia do Ho tu au? Mangasahon Debata, mangido au, ulang ma parkanciti au!" 5:8 (Umbaen na nidok ni bayo i pe songon i, hara ni na dungnidok ni Jesus do tusia, "Ho tondi na jahat, morot ma ho sian bayo on!") 5:9 Dung i disapai Jesus ma tusia, "Ise dehe goarmu?" Dialusi bayo i, " 'Legiun' do goarku, harana na bahatan do hami on!" 5:10 Dung i gomos ma dipangido ia, anso ulang disuru Jesus angka setan i morot sian inganan na humaliang disi. 5:11 Jadi bahat do babi na topet mangugei manjalahi panganonna disi di robean ni dolok i. 5:12 Dipangidohon setan i ma anso dipaloas Jesus halahi masuk tu bagasan angka babi i. 5:13 Gabe dipaloas Jesus ma. Jadi ruar ma angka setan i sian bayo i, masuk ma halahi tu babi i. Gabe mangambur ma babi na sahulanan i sian rahis-rahis i tu dano, gabe marmogapan. Adong ma hira-hira dua ribu sude babi i. 5:14 Marlojong ma na marmahan babi i paboahon barita i tu kota dohot tu halak na humaliang i. Gabe marroan ma halak mangaligi na masa i. 5:15 Didapotkon halahi ma Jesus, diida halahi ma dohot bayo nangkin na nisonggopan ni setan i juguk disi. Ma marpakean ia, pikirannia pe ma denggan. Gabe mabiar ma halahi sude. 5:16 Dicaritohon angka na marnida na masa i ma sasude na tarjadi tu bayo i dohot tu babi na sahulanan i. 5:17 Jadi hara ni i, gabe dipangido halahi ma anso kehe Jesus sian luat i. 5:18 Hatiha masuk Jesus tu parau, dipangidohon bayo na nisonggopan ni setan nangkin ma, anso dipatola ia rap dohot Jesus nian. 5:19 Hape inda dipatola Jesus. Didokkon Jesus dope tusia, "Mulak ma ho tu tonga-tonga ni angka sisolkotmu. Paboa ma tu halahi taringot tu sude na nibaen ni Tuhan tu ho dohot sude hadengganan na nibaenNia tu ho!" 5:20 Jadi kehe ma bayo i. Dipungka ia ma paboahon di Luat Sisampulu Kota, sude sanga aha na nibaen ni Jesus tusia. Homang ma roha ni halak sude na mambegesa. 5:21 Mangulahi ma Jesus manaripari dano i. Dung di topi dano i, bahat ma halak mangarongomi Jesus. 5:22 Ro ma sahalak na margoar si Jairus, i ma sada pamimpin ni bagas paribadatan na di kota i. Dung diida ia Jesus, tungkap ma ia marsomba tu Jesus, 5:23 mangidohon dohot gomos anso ro jolo Jesus pamalum anaknia. Didok ia ma tu Jesus, "Marnyae do borungku. Tolong ma jolo ro Ho mamayakkon tanganMu tusia anso malum ia, jana ulang mate!" 5:24 Kehe ma Jesus rap dohot si Jairus. Na bahatan halak mangihutkon Ia jabat hona sosak Ia dibaen halahi. 5:25 Adong muse ma disi sada anak boru na dung dua bolas taon marnyae hara ni na sai torus ro pantang ni abitna. 5:26 Ma bahat nian angka pangubati na mangubati ia, hartonia pe ma bahat abis hara ni i. Hape inda ra malum, mur martamba noma nyae i. 5:27 Ma bahat dibege anak boru i taringot tu Jesus. Jadi ro ma ia di tonga-tonga ni halak na ribur i masuk laho padonokkon tu Jesus sian pudi. 5:28 Harana ninna rohania, "Muda tarjama au naron pakeanNia sajo pe angkon malum ma huhilala!" 5:29 Dijama ia ma baju juba ni Jesus, manigor mantak ma na marmudar i. Inda adong be dihilala ia nyae di pamatangnia i. 5:30 Laing di hatiha i taraso ma di Jesus, adong gogo na haruar sian pamatangNia. Manaili ma Ia di tonga-tonga ni halak na bahat i manyapai, "Ise nangkin manjama pakeanKu?" 5:31 Dialusi anak siseanNia i ma, "Diida Ho sandiri do songon on ma ribur jolma na marsisosahan hape disapai Ho dope sanga ise na manjama Ho i?" 5:32 Tapi laing torus ma diligi-ligi Jesus manjalahi sanga ise halakna na manjama i. 5:33 Diboto anak boru i ma sanga aha na masa tusia. Humitir ma ia mabiar sajo. Ro ma ia marsomba-somba tu Jesus, dipaboa ia ma sude. 5:34 Gabe didok Jesus ma tu anak boru i, "Ale anakKu, haporsayaanmi do na paluahon ho. Kehe ma ho di bagasan hahorasan, jana malum ma dihilala ho!" 5:35 Taran mangkobari dope Jesus, ro ma angka suruan sian bagas ni si Jairus, mandok tu si Jairus, "Ma jumolo boru ni tuan i." "Aha dope gunana lojaan Guru i?" 5:36 Nada pola ditangihon Jesus na nipardokkonan ni halahi i, didok Ia dope tu si Jairus, "Ulang pola sak rohamu, tapi porsaya sajo ma!" 5:37 Ditoruskon Jesus ma mardalan. Tapi inda dipatola Ia sanga ise mangihutkon Ia asing ni si Petrus, si Jakobus dohot si Johannes anggi ni si Jakobus i. 5:38 Ujungna lalu ma halahi di bagas ni si Jairus pamimpin ni bagas paribadatan i. Diida Jesus ma, ma gaor disi, dibege Ia ma angka na tangis dohot na mangandungi. 5:39 Masuk ma Jesus tu bagasan didok Ia ma tu halahi, "Biasi gaor, jana martangisan hamu? Nada na mate dakdanak i, na modom sajo do i!" 5:40 Dipartatai halahi ma Jesus. Jadi disuru Jesus ma halahi haruar sude. Dipiohon Jesus ma simatobang ni dakdanak i dohot anak siseanNia na tolu halak i anso masuk tu bilik ni dakdanak i. 5:41 Digolom Jesus ma tangan ni dakdanak i, "Talita kum," ning Ia. Talita kum astuanna: "O, Inang, Hudok ma di ho, ngot ma ho!" 5:42 Manigor ngot ma anak boru i, mardalan-dalan ma ia disi. Marumur dua bolas taon ma ia. Gabe homang ma roha ni halak na marnida i sude! 5:43 Tapi gomos ma dipaingot Jesus halahi sude anso ulang dipaboa-boa pangalaho na masa i sanga na tu ise pe. Dung i disuru Ia ma anso dilehen halahi mangan dakdanak i.
6:1 Mulak ma Jesus rap dohot angka anak siseanNia, tu huta hagodanganNia. 6:2 Mamungka ma Ia mangajari di Ari Sabat di bagas paribadatan. Bahat do halak na ro disi. Jadi hatiha na mangajari i Jesus, homang ma roha ni halahi. Didok halahi ma, "Sian dia do diboto Ia sudena i? Hamaloon na bia do na diSia i? Na bia do umbaen na malo Ia mambaen hahomangan i? 6:3 Na he tukang hayu do Ia, i ma anak ni si Maria i? Angka si Jakobus, si Joses, si Judas dohot si Simon na he anggiNia do i? Jana nada he rap dohot hita do angka ibotoNia i?" Hara ni i ma umbaen na so ra halahi manjagit Ia. 6:4 Dung i didok Jesus ma tu halahi, "Sude do panurirang dipasangap sanga na di dia pe, asing sian di huta hagodanganna dohot di tonga-tonga ni kahanggina dohot sisolkotna sandiri." 6:5 Jadi inda tarbaen Jesus disi hahomangan. Hum piga-piga halak do na nipamalumNia na marnyae dung diampehon Ia tanganNia tu halahi. 6:6 Homang ma rohaNia hara ni na so ra i halahi porsaya. Dung i gabe kehe ma Jesus tu angka huta na donok-donok disi mangajari halak. 6:7 Dipiohon Ia ma anak siseanNia na dua bolas i, disuruhon Ia ma halahi mardua-dua. Dilehen Ia muse ma kuaso di halahi mangusir angka setan. 6:8 Ditonai Ia hian ma halahi, "Ulang oban hamu bagi aha na hasaya di pardalanan asing ni sada tungkot. Ulang maroban roti sanga huncang ni sidoka sanga pe hepeng di bobat. 6:9 Marsipatu hamu, tapi ulang pola mardua baju." 6:10 Dung i laing ditonai Jesus dope tehe, "Muda dijagit hamu di sada bagas, laing di bagas i ma hamu lopus kehe hamu sian kota i. 6:11 Tapi muda lalu hamu tu sada inganan hape inda ra halak na disi i manjagit hamu dohot manangihon hamu, morot ma hamu sian inganan i. Paspaskon hamu ma abuan na di palakpak ni patmunu i gabe songon parningotan di halahi!" 6:12 Anak sisean na dua bolas i pe, kehe ma. Dijamitahon halahi ma angkon tinggalkonon ni halak do angka dosana. 6:13 Bahat do angka setan diayak halahi. Laing bahat muse do na marnyae dimiahi halahi gabe malum. 6:14 Lalu do angka barita na songon i tu Raja Herodes. *RAJA HERODES: Herodes Antipas, Gubernur ni Galilea.* Harana ma tarbonggal do goar ni Jesus sanga na di dia. Adong halak na mandok, "Madung mulak mangolu si Johannes Pandidi sian na mate. I do umbaen na margogo Ia mambaen angka tanda hahomangan i." 6:15 Tapi angka na asing mandok si Elia do Ia, deba nari mandok, "Panurirang do Ia, sarupa dohot angka panurirang narobi." 6:16 Hatiha dibege si Herodes barita i didok ia ma, "Aropku si Johannes Pandidi na husuru ponggol uluna i do on. Mulak mangolu ia mangulahi!" 6:17 Angke si Herodes sandiri do marsuru halak manangkup si Johannes anso dipamasuk tu hurungan. Hara ni si Herodias anggi borunia ma dibaen ia songon i. Angke ma dibuat ia si Herodias haru pe dadaboru ni angginia si Pilipus do i. 6:18 Jadi taringot tusi ma, marpupu digorahon si Johannes si Herodes. Ning ia, "Mardosa do ho muda dibuat ho dadaboru ni anggimu!" 6:19 Hara ni i ma umbaen na gabe hosom roha ni si Herodias mida si Johannes. Tapi inda tarbaen ia na di rohania i, angke sai disundati si Herodes. 6:20 Anggo si Herodes disuruhon ia do anso denggan dijagoi ngolu ni si Johannes. Harana, mabiar do ia mida si Johannes. Angke diboto ia na tigor do si Johannes on, i ma suruan ni Debata. Tutu do nian, muda mangkobari si Johannes, sai tabo do dihilala si Herodes manangihon haru pe gabe marhusari sajo rohania hara ni i. 6:21 Ujungna dapot si Herodias ma ari na tumbuk, i ma di ari parningotan hatutubu ni si Herodes. Dibaen raja i ma pesta di angka kapala ni parpangkat na di harajaan i dohot angka komandan dohot di angka harajaon, hatobangon ni halak na di Galilea. 6:22 Manortor ma di pesta i boru ni si Herodias. *BORU NI SI HERODIAS: Dipiga-piga-piga naskah narobi, didok: Borunia (i ma boru ni si Herodes) na margoar si Herodias.* Sonang sajo ma roha ni raja i dohot angka tamu i dibaen panortorna i. Gabe didok raja i ma tu bujing-bujing i, "Pangido ma sanga aha por ni rohamu. Hulehen pe i di ho!" 6:23 Marsumpa ma si Herodes tu anak boru i, ning ia, "Marjanji ma au, lehenonku ma di ho sanga aha na nipangidomu. Sugari harajaanku pe dipangido ho satonga, lehenonku ma i!" 6:24 Dung i haruar ma anak boru i manyapai inangnia i, "Ate he inang! Aha do na dumenggan sipangidoonku?" ning ia. Dialusi inangnia i ma, "Ulu ni si Johannes Pandidi i ma pangido." 6:25 Manigor mangulahi ma anak boru i mandapotkon raja i mandok, "Hupangido ma di raja i anso dilehen di au manigor saonnari ulu ni si Johannes Pandidi, dibaen di ginjang ni sada talam!" 6:26 Marsak situtu ma raja i mambege pangidoan i. Tapi inda tarjua ia be pangidoan i hara ni na dung tarsung marsumpa ia dijolo ni angka tamunia i. 6:27 Jadi manigor disuru ia ma sahalak pangawalnia mangalap ulu ni si Johannes Pandidi. Kehe ma tentara i tu hurungan. Digotapkon ia ma ulu ni si Johannes i. 6:28 Dung i dioban ia ma uluna i di ginjang talam laho pasahatkon tu anak boru i. Dilehen anak boru i muse ma tu inangnia i. 6:29 Dung diboto angka anak sisean ni si Johannes taringot tu pangalaho i, kehe ma halahi mangalap bangke ni si Johannes i, anso dikuburkon halahi. 6:30 Jadi marmulahan ma angka rasul na nisuru ni Jesus i. Marlagut ma halahi rap dohot Jesus. Dipaboa halahi ma tuSia sudena na nibaen ni halahi dohot na niajarkon ni halahi. 6:31 Salaku na bahatan halak na ro jana na kehe. Hum mangan pe inda jabat tarbaen Jesus dohot angka anak siseanNia i. Didokkon Jesus ma tu angka anak siseanNia i, "Beta ma hita, tu inganan na lungun, hita sajo disi jolo, anso tarbaen maradian santongkin." 6:32 Halahi pe kehe ma marparau tu inganan na lungun. 6:33 Tapi sanga do bahat halak marnida halahi kehe sian inganan i, jana ditanda halak do halahi. Diboto halahi muse do sanga na giot tu dia halahi. Gabe markehean ma halak kota na humaliang i sude marlojongi sian darat laho manjoloi Jesus dohot angka anak siseanNia i. 6:34 Jadi dung mijur Jesus sian parau i, diida Ia ma, hape ma disi halak na bahat i. Ibo ma rohaNia mida halahi angke songon biri-biri na so diparmahani do halahi diida Ia. Ia pe antong mamungka ma mangajari halahi. Bahat do na niajarkonNia tu halahi. 6:35 Dung potang ari ro ma anak siseanNia i mandok tu Jesus, "Ma potang ari, hape lungun do inganan on. 6:36 Dumenggan ma sugari disuru halak on kehe tu angka pagaran sanga huta na humaliang on anso marsitobusi panganonna be halahi." 6:37 Tapi dialusi Jesus ma, "Angkon lehenonmunu do halahi mangan!" "Jadi angkon kehe noma hami manobusi roti arga dua ratus hepeng perak *HEPENG PERAK: Sangkoping hepeng perak, i ma upa sadari di halak parkarejo na somal.* baen panganon ni halahi sude?" ninna anak sisean ni Jesus i. 6:38 Jadi ninna Jesus ma tu halahi, "Piga kibung dehe roti adong di hamu? Ligi hamu ma jolo." Dung diligi halahi, didok halahi ma, "Lima roti dohot dua ihan." 6:39 Dung i disuru Jesus ma marjuguhan sude halak na bahat i marturpuk-turpuk di ruput na mangarata i. 6:40 Jadi marjuguhan ma halahi taratur marturpuk-turpuk. Adong na saratus halak santurpuk, adong muse na lima pulu halak. 6:41 Dung i dibuat Jesus ma roti na lima i dohot ihan na dua i. Mandorgak ma Ia adop langit mandok tarimakasi tu Debata. Dung i diponggoli Ia ma roti i diparleheni Ia ma tu angka anak siseanNia i anso dibagi-bagi tu halak na bahat i. Dohot ihan na dua i pe dibagi-bagi Ia muse ma di halahi sude. 6:42 Mangan ma halahi sude lopus butong be. 6:43 Dung sidung halahi na mangan i, dipalagut anak siseanNia i ma lobi-lobi ni roti dohot ihan i, adong ma gok dua bolas ampang sude. 6:44 Hira-hira lima ribu halak ma hum halaklahi sajo na mangan roti i. 6:45 Diompoti Jesus ma marsuru angka anak siseanNia i kehe marparau parjolo sian Ia tu Betsaida na di ipar ni dano i, jana disuru Ia ma halak na bahat i marmulahan. 6:46 Dung dipakehe Ia angka anak siseanNia i, manangkok ma Ia tu dolok i laho martangiang. 6:47 Jadi dung borngin, ma lalu parau i di tonga-tonga ni dano i, hape laing di darat dope Jesus. 6:48 Diida Jesus ma halahi loja sajo mandayung parau i hara ni haroro ni alogo na maralo tu pardalan ni parau i. Jadi gabe ro ma Jesus mandapotkon halahi dompak samon dope ari, mardalan di ginjang ni aek i. Tar dipaula-ula Ia ma songon na giot manyalpui halahi. 6:49 Tapi dung diida halahi Ia na mardalan di ginjang aek i, diambang halahi begu do Ia. 6:50 Gabe manyongkir ma halahi hara ni biarna. Harana sude do halahi marnida Ia, jana sude rap tarsonggot. Tapi manigor dipangkulingkon Jesus ma halahi, "Ulang hamu mabiar! Au do i. 6:51 Dung i masuk ma Ia tu parau i, alogo i pe so ma. Laing homang sajo ma roha ni angka anak sisean ni Jesus i. 6:52 Inda diastui halahi dope taringot tu roti na lima i na gabe hahomangan. Na maolan halahi anso mangarti. 6:53 Jadi dung taripar halahi, bolkas ma halahi tu Luat Genesaret. 6:54 Disi haruar halahi sian parau i manigor ditanda halak do Jesus. 6:55 Manigor marsilojongkon lojongna be do halahi na humaliang luat i. Mamungka ma halahi maroban angka na marnyae di podomanna be mandapotkon Jesus. Sanga na di dia pe Jesus dibege halahi, dioban halahi be ma angka na marnyae tusi. 6:56 Sanga na tu dia pe Ia kehe, tu angka kota, angka huta, sai marroan do halak marobani angka na marnyae. Gomos ma dipangido halahi anso dipatola Ia angka na marnyae i, hum manjama rambu ni baju ni Jesus. Jadi sude na manjama i, malum do.
6:1 Mulak ma Jesus rap dohot angka anak siseanNia, tu huta hagodanganNia. 6:2 Mamungka ma Ia mangajari di Ari Sabat di bagas paribadatan. Bahat do halak na ro disi. Jadi hatiha na mangajari i Jesus, homang ma roha ni halahi. Didok halahi ma, "Sian dia do diboto Ia sudena i? Hamaloon na bia do na diSia i? Na bia do umbaen na malo Ia mambaen hahomangan i? 6:3 Na he tukang hayu do Ia, i ma anak ni si Maria i? Angka si Jakobus, si Joses, si Judas dohot si Simon na he anggiNia do i? Jana nada he rap dohot hita do angka ibotoNia i?" Hara ni i ma umbaen na so ra halahi manjagit Ia. 6:4 Dung i didok Jesus ma tu halahi, "Sude do panurirang dipasangap sanga na di dia pe, asing sian di huta hagodanganna dohot di tonga-tonga ni kahanggina dohot sisolkotna sandiri." 6:5 Jadi inda tarbaen Jesus disi hahomangan. Hum piga-piga halak do na nipamalumNia na marnyae dung diampehon Ia tanganNia tu halahi. 6:6 Homang ma rohaNia hara ni na so ra i halahi porsaya. Dung i gabe kehe ma Jesus tu angka huta na donok-donok disi mangajari halak. 6:7 Dipiohon Ia ma anak siseanNia na dua bolas i, disuruhon Ia ma halahi mardua-dua. Dilehen Ia muse ma kuaso di halahi mangusir angka setan. 6:8 Ditonai Ia hian ma halahi, "Ulang oban hamu bagi aha na hasaya di pardalanan asing ni sada tungkot. Ulang maroban roti sanga huncang ni sidoka sanga pe hepeng di bobat. 6:9 Marsipatu hamu, tapi ulang pola mardua baju." 6:10 Dung i laing ditonai Jesus dope tehe, "Muda dijagit hamu di sada bagas, laing di bagas i ma hamu lopus kehe hamu sian kota i. 6:11 Tapi muda lalu hamu tu sada inganan hape inda ra halak na disi i manjagit hamu dohot manangihon hamu, morot ma hamu sian inganan i. Paspaskon hamu ma abuan na di palakpak ni patmunu i gabe songon parningotan di halahi!" 6:12 Anak sisean na dua bolas i pe, kehe ma. Dijamitahon halahi ma angkon tinggalkonon ni halak do angka dosana. 6:13 Bahat do angka setan diayak halahi. Laing bahat muse do na marnyae dimiahi halahi gabe malum. 6:14 Lalu do angka barita na songon i tu Raja Herodes. *RAJA HERODES: Herodes Antipas, Gubernur ni Galilea.* Harana ma tarbonggal do goar ni Jesus sanga na di dia. Adong halak na mandok, "Madung mulak mangolu si Johannes Pandidi sian na mate. I do umbaen na margogo Ia mambaen angka tanda hahomangan i." 6:15 Tapi angka na asing mandok si Elia do Ia, deba nari mandok, "Panurirang do Ia, sarupa dohot angka panurirang narobi." 6:16 Hatiha dibege si Herodes barita i didok ia ma, "Aropku si Johannes Pandidi na husuru ponggol uluna i do on. Mulak mangolu ia mangulahi!" 6:17 Angke si Herodes sandiri do marsuru halak manangkup si Johannes anso dipamasuk tu hurungan. Hara ni si Herodias anggi borunia ma dibaen ia songon i. Angke ma dibuat ia si Herodias haru pe dadaboru ni angginia si Pilipus do i. 6:18 Jadi taringot tusi ma, marpupu digorahon si Johannes si Herodes. Ning ia, "Mardosa do ho muda dibuat ho dadaboru ni anggimu!" 6:19 Hara ni i ma umbaen na gabe hosom roha ni si Herodias mida si Johannes. Tapi inda tarbaen ia na di rohania i, angke sai disundati si Herodes. 6:20 Anggo si Herodes disuruhon ia do anso denggan dijagoi ngolu ni si Johannes. Harana, mabiar do ia mida si Johannes. Angke diboto ia na tigor do si Johannes on, i ma suruan ni Debata. Tutu do nian, muda mangkobari si Johannes, sai tabo do dihilala si Herodes manangihon haru pe gabe marhusari sajo rohania hara ni i. 6:21 Ujungna dapot si Herodias ma ari na tumbuk, i ma di ari parningotan hatutubu ni si Herodes. Dibaen raja i ma pesta di angka kapala ni parpangkat na di harajaan i dohot angka komandan dohot di angka harajaon, hatobangon ni halak na di Galilea. 6:22 Manortor ma di pesta i boru ni si Herodias. *BORU NI SI HERODIAS: Dipiga-piga-piga naskah narobi, didok: Borunia (i ma boru ni si Herodes) na margoar si Herodias.* Sonang sajo ma roha ni raja i dohot angka tamu i dibaen panortorna i. Gabe didok raja i ma tu bujing-bujing i, "Pangido ma sanga aha por ni rohamu. Hulehen pe i di ho!" 6:23 Marsumpa ma si Herodes tu anak boru i, ning ia, "Marjanji ma au, lehenonku ma di ho sanga aha na nipangidomu. Sugari harajaanku pe dipangido ho satonga, lehenonku ma i!" 6:24 Dung i haruar ma anak boru i manyapai inangnia i, "Ate he inang! Aha do na dumenggan sipangidoonku?" ning ia. Dialusi inangnia i ma, "Ulu ni si Johannes Pandidi i ma pangido." 6:25 Manigor mangulahi ma anak boru i mandapotkon raja i mandok, "Hupangido ma di raja i anso dilehen di au manigor saonnari ulu ni si Johannes Pandidi, dibaen di ginjang ni sada talam!" 6:26 Marsak situtu ma raja i mambege pangidoan i. Tapi inda tarjua ia be pangidoan i hara ni na dung tarsung marsumpa ia dijolo ni angka tamunia i. 6:27 Jadi manigor disuru ia ma sahalak pangawalnia mangalap ulu ni si Johannes Pandidi. Kehe ma tentara i tu hurungan. Digotapkon ia ma ulu ni si Johannes i. 6:28 Dung i dioban ia ma uluna i di ginjang talam laho pasahatkon tu anak boru i. Dilehen anak boru i muse ma tu inangnia i. 6:29 Dung diboto angka anak sisean ni si Johannes taringot tu pangalaho i, kehe ma halahi mangalap bangke ni si Johannes i, anso dikuburkon halahi. 6:30 Jadi marmulahan ma angka rasul na nisuru ni Jesus i. Marlagut ma halahi rap dohot Jesus. Dipaboa halahi ma tuSia sudena na nibaen ni halahi dohot na niajarkon ni halahi. 6:31 Salaku na bahatan halak na ro jana na kehe. Hum mangan pe inda jabat tarbaen Jesus dohot angka anak siseanNia i. Didokkon Jesus ma tu angka anak siseanNia i, "Beta ma hita, tu inganan na lungun, hita sajo disi jolo, anso tarbaen maradian santongkin." 6:32 Halahi pe kehe ma marparau tu inganan na lungun. 6:33 Tapi sanga do bahat halak marnida halahi kehe sian inganan i, jana ditanda halak do halahi. Diboto halahi muse do sanga na giot tu dia halahi. Gabe markehean ma halak kota na humaliang i sude marlojongi sian darat laho manjoloi Jesus dohot angka anak siseanNia i. 6:34 Jadi dung mijur Jesus sian parau i, diida Ia ma, hape ma disi halak na bahat i. Ibo ma rohaNia mida halahi angke songon biri-biri na so diparmahani do halahi diida Ia. Ia pe antong mamungka ma mangajari halahi. Bahat do na niajarkonNia tu halahi. 6:35 Dung potang ari ro ma anak siseanNia i mandok tu Jesus, "Ma potang ari, hape lungun do inganan on. 6:36 Dumenggan ma sugari disuru halak on kehe tu angka pagaran sanga huta na humaliang on anso marsitobusi panganonna be halahi." 6:37 Tapi dialusi Jesus ma, "Angkon lehenonmunu do halahi mangan!" "Jadi angkon kehe noma hami manobusi roti arga dua ratus hepeng perak *HEPENG PERAK: Sangkoping hepeng perak, i ma upa sadari di halak parkarejo na somal.* baen panganon ni halahi sude?" ninna anak sisean ni Jesus i. 6:38 Jadi ninna Jesus ma tu halahi, "Piga kibung dehe roti adong di hamu? Ligi hamu ma jolo." Dung diligi halahi, didok halahi ma, "Lima roti dohot dua ihan." 6:39 Dung i disuru Jesus ma marjuguhan sude halak na bahat i marturpuk-turpuk di ruput na mangarata i. 6:40 Jadi marjuguhan ma halahi taratur marturpuk-turpuk. Adong na saratus halak santurpuk, adong muse na lima pulu halak. 6:41 Dung i dibuat Jesus ma roti na lima i dohot ihan na dua i. Mandorgak ma Ia adop langit mandok tarimakasi tu Debata. Dung i diponggoli Ia ma roti i diparleheni Ia ma tu angka anak siseanNia i anso dibagi-bagi tu halak na bahat i. Dohot ihan na dua i pe dibagi-bagi Ia muse ma di halahi sude. 6:42 Mangan ma halahi sude lopus butong be. 6:43 Dung sidung halahi na mangan i, dipalagut anak siseanNia i ma lobi-lobi ni roti dohot ihan i, adong ma gok dua bolas ampang sude. 6:44 Hira-hira lima ribu halak ma hum halaklahi sajo na mangan roti i. 6:45 Diompoti Jesus ma marsuru angka anak siseanNia i kehe marparau parjolo sian Ia tu Betsaida na di ipar ni dano i, jana disuru Ia ma halak na bahat i marmulahan. 6:46 Dung dipakehe Ia angka anak siseanNia i, manangkok ma Ia tu dolok i laho martangiang. 6:47 Jadi dung borngin, ma lalu parau i di tonga-tonga ni dano i, hape laing di darat dope Jesus. 6:48 Diida Jesus ma halahi loja sajo mandayung parau i hara ni haroro ni alogo na maralo tu pardalan ni parau i. Jadi gabe ro ma Jesus mandapotkon halahi dompak samon dope ari, mardalan di ginjang ni aek i. Tar dipaula-ula Ia ma songon na giot manyalpui halahi. 6:49 Tapi dung diida halahi Ia na mardalan di ginjang aek i, diambang halahi begu do Ia. 6:50 Gabe manyongkir ma halahi hara ni biarna. Harana sude do halahi marnida Ia, jana sude rap tarsonggot. Tapi manigor dipangkulingkon Jesus ma halahi, "Ulang hamu mabiar! Au do i. 6:51 Dung i masuk ma Ia tu parau i, alogo i pe so ma. Laing homang sajo ma roha ni angka anak sisean ni Jesus i. 6:52 Inda diastui halahi dope taringot tu roti na lima i na gabe hahomangan. Na maolan halahi anso mangarti. 6:53 Jadi dung taripar halahi, bolkas ma halahi tu Luat Genesaret. 6:54 Disi haruar halahi sian parau i manigor ditanda halak do Jesus. 6:55 Manigor marsilojongkon lojongna be do halahi na humaliang luat i. Mamungka ma halahi maroban angka na marnyae di podomanna be mandapotkon Jesus. Sanga na di dia pe Jesus dibege halahi, dioban halahi be ma angka na marnyae tusi. 6:56 Sanga na tu dia pe Ia kehe, tu angka kota, angka huta, sai marroan do halak marobani angka na marnyae. Gomos ma dipangido halahi anso dipatola Ia angka na marnyae i, hum manjama rambu ni baju ni Jesus. Jadi sude na manjama i, malum do.
8:1 Nada sadia honok dung i, ro ma sapunguan halak marlagut. Hara ni na so adong panganon ni halahi dipiohon Jesus ma angka anak siseanNia i, didok Ia ma tu halahi, 8:2 "Ibo do rohangKu mida halak on. Ma pola tolu ari halahi dison rap dohot Au, hape saonnari so adong be panganon ni halahi. 8:3 Muda Husuru halahi mulak male-malean, tangkuraparon ma halahi naron di dalan i. Hape adong do i na ro sian huta na dao." 8:4 Dialusi angka anak siseanNia ma, "Sai dao hita di padang-padang on, sian dia ma tarpatuk panganon di halak na songon on bahatna?" 8:5 "Sadia adong roti di hamu?" ninna Jesus manyapai. "Pitu do," ninna halahi. 8:6 Dung i disuru Jesus ma halak na bahat i anso marjuguhan di tano i. Dibuat Ia ma roti na pitu i didok Ia ma tarimakasi tu Debata. Dung i diponggoli Ia ma roti na pitu i anso diparbagihon tu angka halak i. Dioloi anak siseanNia i ma songon i. 8:7 Dapot halahi muse ma sanga na piga ihan na menek-menek. Laing didok Jesus ma tarimakasi hara ni ihan i. Disuru Ia muse ma anak siseanNia i mambagi-bagi ihan i. 8:8 Jadi mangan ma halahi lopus butong. Dung i dipalagut halahi ma teba-teba i gok pitu ampang. 8:9 Adong ma na mangan i hira-hira opat ribu halak. Dung i disuru Jesus ma halahi mulak, 8:10 tapi anggo Ia dohot angka anak siseanNia i torus kehe ma halahi marparau tu Dalmanuta. 8:11 Marroan ma angka Parise mandapotkon Jesus. Dipungka halahi ma marsoal dohot Ia laho manjalahi hasalaanNia. Dipangido halahi ma anso dibaen Jesus jolo hahomangan songon tanda bahaso na tutu jop roha ni Debata diSia. 8:12 Humolos ma Ia, ning Ia ma, "Biasi angkon sai pangidoon ni halak sisaonnari on anso Hubaen tanda hahomangan? Inda! Na so ra do Au mangalehen tanda na songon i di halahi!" 8:13 Ditinggalkon Ia ma halahi, kehe ma Ia masuk tu parau i, torus manyiborangi dano i. 8:14 Lupa anak sisean ni Jesus maroban roti. Gabe hum sangkibung roti do adong di halahi na di bagasan parau i. 8:15 "Manat-manat ma hamu maradopkon ragi ni halak Parise dohot ragi ni si Herodes," ninna Jesus tu halahi. 8:16 Gabe i ma sihataan ni angka anak siseanNia i. Didok halahi, "Hara ni na so taoban i do roti umbaen na nidokNia songon i." 8:17 Diboto Jesus ma na nihataan ni halahi i. Gabe disapai Ia ma halahi, "Biasi na so maroban roti dihatai hamu? Na so diboto hamu dope, jana laing na so mangarti dope hamu? Na dung bia do majal ni pikiranmunu? 8:18 Na he adong do matamunu! Biasi inda marnida hamu? Na he adong do dohot pinggolmunu! Biasi inda marbinege hamu? Na so diingot hamu be 8:19 roti na lima i na Huponggoli di silima ribu halak i? Piga ampang nari na lobi i disi?" "Dua bolas ampang," ninna halahi. 8:20 "Dung i di na Huponggoli roti na pitu i di siopat ribu halak i, piga ampang nari teba-teba na nipalagutmunu i?" "Pitu ampang," ninna halahi mangalusi. 8:21 "Antong, laing na so mangarti dope hamu?" ninna Jesus mangulahi. 8:22 Lalu ma halahi tu Betsaida. Dioban halak ma disi sahalak na mapitung tu Jesus. Dipangidohon halahi ma anso dijama Ia nian na mapitung i. 8:23 Gabe ditiop Jesus ma tangan ni na mapitung i, dung i ditogu Ia ma tu balian ni kota i. Dung i ditijuri Jesus ma mata ni na mapitung i, dipayakkon Ia ma tanganNia tu ginjang ni uluna i. Disapai Ia ma tu bayo i, "Ma adong he diida ho sanga aha saonnari?" 8:24 Diligi bayo i ma adop jolo, didok ia ma, "Olo, adong huida jolma tapi songon hayu na mardalan-dalan do." 8:25 Dung i dipayakkon Jesus ma mangulahi tanganNia tu mata ni bayo i, jadi tutu ma bayo i marnida, jana madung malum, jadi bisa ma ia marnida dohot torang. 8:26 Manigor disuru Ia ma bayo i mulak dung didok Ia, "Ulang mulak ho tu kota." 8:27 Mardalan ma Jesus rap dohot angka anak siseanNia i di angka huta na humaliang Kaisarea Pilippi. Di tonga dalan i disapai Jesus ma halahi, "Ise do Au didok halak?" 8:28 Jadi dialusi halahi ma, "Adong na mandok, si Johannes Pandidi do Ho. Adong muse na mandok si Elia. Tapi deba nari mandok, sahalak sian angka panurirang i do Ho." 8:29 "Tapi mangihutkon pandapotmunu sandiri, tarbia do antong?" ninna Jesus manyapai. "Ise do Au mangihutkon pandokmunu?" Dialusi si Petrus ma, "Kristus do Ho!" 8:30 Dung i dipaingot Ia ma halahi, anso ulang dipaboa-boa halahi sanga na tu ise pe taringot tu diriNia. 8:31 Dung i dipungka Jesus ma mangajarkon tu angka anak siseanNia paboahon angkon bahat parkancitan taonon ni Anak Ni Jolma i. Dialo angka pamimpin dohot angka sintua ni malim dohot angka Siboto Surat i ma Ia. Bunuon ni halahi ma Ia, tapi dung tolu ari, mulak mangolu ma Ia mangulahi. 8:32 Torang sajo dipaboa Jesus tu anak siseanNia i sude taringot tusi. Dung i dipiohon si Petrus ma Jesus hum Ia sajo laho paingot Ia. 8:33 Tapi dihudukkon Jesus ma si Petrus, tu anak siseanNia na asing i ma diligi Ia. Dimuruhi Ia ma si Petrus, ning Ia, "Morot ho sian on, Sibolis do ho! Inda pikiran ni Debata pikiranmi, pikiran ni jolma do i!" 8:34 Dung i dipiohon Jesus ma halak na bahat na disi rap dohot angka anak siseanNia i. Didok Ia ma tu halahi, "Muda adong sanga ise na giot mangihutkon Au, angkon disoadahon ia do dirina. Dung i diporsan ia ma parsilangnia baru pe anso diihutkon ia Au. 8:35 Angke anggo halak na giot mampartahankon ngoluna, gabe agoan ngolu do. Tapi anggo halak na mangalehen ngoluna hara ni Au dohot hara ni Jamita Na Denggan i na sian Debata, i do na paluahonsa. 8:36 Aha ma he labona di halak, muda gabe ia puna sudena tano on hape mago tondinia? Aha muse ma labonia disi! 8:37 Sanga na aha pe inda tarlehen jolma laho manobus tondina muda dung jabat mago. 8:38 Angke sanga ise na maila hara ni Au dohot hatangKu di tonga-tonga ni halak na so setia dohot pardosa, maila muse ma Anak Ni Jolma i mida ia muda ro Ia di bagasan hasangapan ni AmangNia rap dohot surusuruanNia na badia i."
9:1 "Satutuna do na Hudok on tu hamu," ninna Jesus, "Adong do sanga na piga halak na dison on na so jabat mate, anggo so jolo diida halahi Harajaan Ni Debata di bagasan kuaso!" 9:2 Dung adong onom ari, dipiohon Jesus ma si Petrus, si Jakobus dohot si Johannes. Dioban Ia ma halahi rap dohot Ia mamunjung tu sada dolok na gincat. Maruba ma disi diida halahi tompa ni Jesus gabe marsinondang. 9:3 PakeanNia i pe gabe bontar sajo marlinang-linang. Nada adong sahalak pe di tano on na malo mangalantang lopus songon i bontarna. 9:4 Dung i diida angka siseanNia ma mangkobar-kobari Jesus rap dohot si Elia dohot si Musa. 9:5 Gabe didok si Petrus ma tu Jesus, "Tabona i hita na dison on, Guru! Bia hami baen ma tolu undung-undung dison, sada ma di Ho, sada di si Musa, sada nari muse di si Elia." 9:6 Satutuna, na so diboto si Petrus do sanga aha na giot dohononnia, hara ni na dung santak biar ni roha ni halahi. 9:7 Dung i ro ma ombun mangkolipi halahi, jana tarbege muse ma sora sian ombun i mandok, "On ma AnakKu, na Huhaholongi, tangihon ma Ia!" 9:8 Manigor dipamanat halahi ma humaliang halahi. Hape umpe sahalak pe na disi rap dohot halahi asing ni Jesus sandiri. 9:9 Dung i manuat ma halahi sian dolok i. Dompak na manuat i halahi didok Jesus ma songon on tu halahi, "Anggo so mulak mangolu dope Anak Ni Jolma i sian hamatean, ulang paboa hamu sanga na tu ise pe sude na niidamunu nangkin." 9:10 Dioloi halahi do na nidok ni Jesus i. Tapi anggo halahi sama halahi sajo mamungka ma dihata-hatai halahi sanga aha maksud ni Jesus di na nidokNia nangkin, "Mulak mangolu sian hamatean." 9:11 Dung i disapai halahi ma tu Jesus, "Biasi didok angka Siboto Surat i angkon jolo ro do si Elia?" 9:12 Dialusi Jesus ma, "Tutu do i nian, angkon jolo ro do si Elia laho paradehon nasa na porlu. Tapi tarbia ma pangalahona taringot tu Anak Ni Jolma i? Biasi tarsurat di Buku Na Badia i angkon bahat taononNia parkancitan jana dipalayas halak Ia? 9:13 Hudok ma di hamu! Satutuna, ma ro anggo si Elia tapi roha-roha ni halak do dipambaeni tusia. Jadi tutu do na tarsurat di Buku Na Badia i taringot tu si Elia sandiri." 9:14 Jadi dung rap halahi dohot anak sisean na asing i, ma bahat diida halahi halak disi. Martongkari topet angka Siboto Surat dohot angka anak siseanNia i. 9:15 Disi diida halahi Jesus, homang ma roha ni halahi. Manigor marlojong ma halahi mangalo-alo Ia. 9:16 "Aha ma na nihataanmunu dohot angka Siboto Surat i?" ninna Jesus manyapai angka siseanNia i. 9:17 Adong ma sahalak sian halak na bahat i mangalusi, "Songon on do ning Guru i. Na maroban anakku do au tu Guru i. Na hona setan do anggo anakki gabe ngungu. 9:18 Muda hatiha manombo dibaen setan i, dipartombomkon ma songon i pamatangna i tu tano i. Margubo-gubo ma pamanganna i, patutaktak ma iponnia i gabe jogal ma sude pamatangna i. Hupangidohon do nian anso dipaorot angka anak siseanMon setan i, tapi inda tarpaorot halahi." 9:19 Dung i didok Jesus ma tu halahi, "O hamu angka pomparan na so porsaya, angkon sadia honok nari Au rap dohot hamu? Intap ni andigan angkon sobar Au paida-ida hamu? Oban ma dakdanak i tuson!" 9:20 Dung i dioban halahi ma dakdanak i tu Jesus. Hum diida setan i Jesus, manigor martoltolan ma pamatang ni dakdanak i dibaen setan i gabe tinggang ma margiling-giling di tano i. Margubo ma pamanganna i. 9:21 Dung i disapai Jesus ma amangna i, "Ma sadia honok dung songon on dakdanak on?" "Mulai sian na menek do!" ning amangna i. 9:22 "Ma jotjot dicubo setan i laho mamatehon ia. Sai ditinggangkon setan i ia tu api dohot tu aek. Tapi anggo tartolong Ho do, laing ibo ma jolo rohaMu mida hami. Urupi ma jolo hami!" 9:23 "Dialusi Jesus ma: "Didok ho: Anggo tartolong Ho? Nada adong na so tarbaen di halak na porsaya!" 9:24 Manigor mangangguk ma ama-ama i, "Porsaya do au. Urupi ma au na hurang porsaya on!" 9:25 Dung diida Jesus, ma mamungka mur ribur halak, dipaorot Ia ma setan i haruar. Ning Ia ma, "Ho tondi na mambaen maingol jana na mambaen ngungu, Hudok tu ho, haruar ma ho sian dakdanak on, ulang be masuk ho tusia sanga andigan!" 9:26 Mangarar ma setan i, dipatoltol ia ma pamatang ni dakdanak i, haruar ma ia sian dakdanak i. Songon tompa ni bangke noma idaon dakdanak i jabat didok halahi sude, "Ma mate i!" 9:27 Tapi ditogu Jesus ma tanganna i laho pajongjong ia. Jadi jongjong ma dakdanak i. 9:28 Jadi dung di bagas Jesus, disapai angka siseanNia i ma tuSia, "Hara ni aha do ulaning umbaen na so tarpaorot hami setan i?" 9:29 Dialusi Jesus ma, "Nada tarpaorot setan na songon i, bagi na bia pe dibaen dalanna, hum tangiang do na bisa paorot i." 9:30 Jadi kehe ma Jesus rap dohot angka siseanNia i maninggalkon inganan i dipatorus halahi ma mardalan mamolus sian Galilea. Ninna roha ni Jesus, ulang nian diboto halak sanga na di dia Ia, 9:31 hara ni na mangajari anak siseanNia do Ia, jana didok Ia ma tu halahi, "Anggo Anak Ni Jolma i angkon pasahaton ma tu kuaso ni jolma. Bunuon ni halahi ma Ia, tapi mulak mangolu ma Ia dung tolu ari muse!" 9:32 Nada diastui angka sisean ni Jesus i na niajarkonNia i, tapi mabiar halahi marsapa tuSia. 9:33 Lalu ma halahi di Kapernaum. Dung masuk tu bagas, disapai Jesus ma angka siseanNia i, "Aha do na diparsoalkonmunu nangkin di tonga dalan i?" 9:34 Tapi nada dialusi halahi. Harana di tonga dalan i ma martangkangi halahi, taringot tu sanga ise na gumodang sian halahi. 9:35 Juguk ma Jesus. Jadi dipiohon Ia ma anak siseanNia na dua bolas halak i. Didok Ia ma tu halahi, "Sanga ise na giot parjolo, angkon ia ma parpudi jana na gabe pangoloi ni sude halak." 9:36 Dung i dipio Jesus ma sada dakdanak na menek. Disuru Ia ma jongjong dakdanak i di jolo ni halahi sude. Dihaol Jesus ma dakdanak i jana didok Ia ma tu angka siseanNia i, 9:37 "Sanga ise na manjagit dakdanak na songon on hara ni Au, na manjagit Au do i. Dung i, sanga ise na manjagit Au, nada Au sajo na nijagitnia disi tapi dohot muse do dijagit ia Debata na marsuru Au." 9:38 Dung i didok si Johannes ma tu Jesus, "Guru, adong hami ida sada halak na paorot setan mamake goarMu. Hami antahi do halahi harana nada bagi na tarmasuk donganta ia." 9:39 Tapi didok Jesus ma, "Ulang pola antahi hamu ia. Angke anggo halak na baru mambaen hahomangan mamake goarKu, inda ra ia manigor santongkin i mangkobari na jat taringot tu Au. 9:40 Anggo halak na so maralo do tu hita, donganta do i. 9:41 Satutuna do! Sanga ise na mangalehen hamu minum hum hara ni na gabe siihutkon Kristus i hamu, angkon jagitonnia do upania." 9:42 "Sanga ise na mambaen gabe nada porsaya be tu Au sada sian angka halak na menek on, gumonan ma ditambatkon losung batu tu rungkung ni halak sisongon i anso niambungkon i tu laut. 9:43 Muda hara ni tanganmu do gabe mambaen so tama ho masuk tu hangoluan i, gotapkon ma tanganmi! Gumonan do ho mangolu so martangan sabariba, ulang pado mardua tangan ho masuk tu narako, api na manongtong i. 9:44 Anggo disi nada ra mintop api, binga pe disi nada ra mate. 9:45 Dung i, muda hara ni patmu do mambaen ho mardosa, gotapkon ma patmi! Gumonan ma ho mangolu rap dohot Debata na so marpat sabariba, ulang pado mardua pat ho diambungkon tu narako. 9:46 Anggo disi nada ra mintop api, binga pe disi nada ra mate. 9:47 Muda hara ni matamu do gabe mardosa ho, pulsikkon ma mata i! Gumonan ma ho masuk tu Harajaan Ni Debata marmata sada sajo, ulang pado diambungkon ho marmata dua tu narako. 9:48 Nada ra mintop api disi jana binga pe nada mate. 9:49 Ganop halak sipapitaon do dohot api, songon haul na nipaias dohot sira. 9:50 Jeges do sira i, tapi muda hambar daina, bia ma baenon paancimkon sira i? Antong, sai gabe songon sira ma hamu -- rap mardame-dame ma hamu sama hamu."
10:1 Dung i morot ma Jesus sian i, kehe ma Ia tu Luat Judea dohot tu luat na di bariba ni Batang aek Jordan. Marroan ma mangulahi halak na bahat marrongom humaliang Jesus. Dung i diajari Jesus ma halahi songon na somal. 10:2 Jadi ro muse ma halak Parise tusi laho manjalahi hasalaan ni Jesus. Dibaen halahi ma sapa-sapa ni halahi on, "Dokkon ma jolo di hami, tola do halak manyirangkon dadaboruna?" 10:3 Dialusi Jesus ma dohot sapa-sapa muse. Ning Ia ma, "Aha do ditonahon si Musa tu hamu?" 10:4 "Anggo si Musa, dipatola ia do manyirangkon dadaboru, asal ma jolo dibaen surat sirangna," ninna halahi mangalusi. 10:5 "Disurat si Musa pe tona i hara ni maolna do hamu ajaran," ninna Jesus tu halahi. 10:6 "Tapi anggo di mulana di na manompa jolma Debata didok do, 'Halaklahi dohot dadaboru do halahi dibaen Debata. 10:7 Hara ni i ma umbaen na nitinggalkon ni halaklahi amangna dohot inangna, kehe ma ia marsada dohot dadaborunia i, *MARSADA DOHOT DADABORUNIA I: Dipiga-piga-piga naskah narobi, nada adong hata on.* 10:8 anso gabe sada na dua i.' Antong inda dua be halahi. Tapi sada noma. 10:9 Hara ni i ma umbaen na so tola sirangon ni jolma halak na dung dipadomu ni Debata!" 10:10 Jadi dung mulak halahi tu bagas, disapai angka siseanNia i ma tuSia taringot tusi. 10:11 Didok Jesus ma tu halahi, "Sanga ise halaklahi na manyirangkon dadaboruna gabe marbagas ia dohot dadaboru na asing, na markarosuan do ia maradopkon dadaborunia i. *MARADOPKON DADABORUNIA I: Maradopkon dadaborunia na parjolo i.* 10:12 Laing songon i muse do dadaboru na maninggalkon halaklahina gabe marbagas ia tu halaklahi na asing, ia pe na markarosuan do i." 10:13 Jadi adong ma na maroban angka dakdanak mandapotkon Jesus anso dipasupasu Ia angka dakdanak i. Tapi dimuruhi angka sisean ni Jesus i ma halahi. 10:14 Jadi marnida i muruk ma Jesus didok Ia ma tu angka anak siseanNia i, "Padiar hamu ma marroan angka dakdanak i tu Au! Ulang rarang hamu halahi. Angka halak sisongon i do na gabe nampuna Harajaan Ni Debata. 10:15 Tutu do na Hudok on! Sanga ise na so manjagit Harajaan Ni Debata songon panjagit ni sada dakdanak, inda tarbaen halahi gabe anggota ni Harajaan Ni Debata i." 10:16 Dung didok Jesus songon i, dihaol Ia ma angka dakdanak i, diampehon Ia ma tanganNia jana dipasupasu Ia ma halahi. 10:17 Jadi laho patoruskon pardalananNia Jesus, ro ma sada bayo marlojong-lojong mandapotkon Ia. Marsomba ma bayo i di jolo ni Jesus manyapai, "O Guru na burju, angkon aha do sibaenonku anso dohot au manean ngolu na so mantak i?" 10:18 "Biasi didok ho Au na burju? Nada adong sahalak pe na burju, asing sian Debata sandiri. 10:19 Tontu diboto ho do tona ni Debata na mandok, 'Ulang ho mamunu, ulang markarosuan, ulang manangko, ulang margabus, ulang paoto-otohon, pasangap ma amangmu dohot inangmu!' " 10:20 "Anggo i do, sian naposo dope au madung hudalankon do sude tona i." 10:21 Dipanotnoti Jesus ma bayo i hara ni holong ni rohaNia midasa. Didok Ia ma, "Hum sada nari noma pangalaho na porlu di ho. Kehe ma ho manggadis sude sinadonganmu. Lehen ma hepengna i tu angka halak na pogos, dung i gabe adong ma dapot ho arta na di banua ginjang. Dung i ro ma ho mangihutkon Au!" 10:22 Umbege hata ni Jesus na songon i marsak ma pangkilalaan ni bayo i. Ditinggalkon ia ma inganan i kehe ia, marsak sajo rohania angke na kayo situtu do ia. 10:23 Dung i dipanotnoti Jesus ma angka siseanNia i didok Ia ma tu halahi, "Na maol do anggo halak na kayo masuk tu Harajaan Ni Debata!" 10:24 Homang ma roha ni angka siseanNia i umbege na nidok ni Jesus i. Hape didok Jesus muse, "Hamu angka dakdanakKu! Tutu do i, na maol do laho masuk tu Harajaan Ni Debata! 10:25 Ummura dope unto masuk tu lubang ni jait ulang pado halak na kayo masuk tu Harajaan Ni Debata." 10:26 Tarsonggot ma angka sisean ni Jesus i umbege hata na nidokNia i. Gabe marsisapa-sapaan ma halahi sama halahi, "Anggo songon i do, ise noma na tarbaen malua?" 10:27 Jadi dipanotnoti Jesus ma halahi sude, dialusi Ia ma, "Anggo di jolma do, inda tarbaen i. Tapi anggo di Debata tarbaen do i. Angke nada adong sanga aha pe na so tarbaen Debata." 10:28 Dung i didok si Petrus ma, "Madung hami tinggalkon sasudena jana hami ihutkon Ho." 10:29 "Tutu do i," ninna Jesus, "antong ingot hamu ma on: Halak na dung maninggalkon dongan saripena, sanga kahanggina sanga ibotona, sanga inangna bope amangna, sanga dakdanakna, sanga pe sabana, hara ni Au dohot hara ni Jamita Na Denggan na sian Debata, 10:30 jagiton ni halahi ma umbahat sian di hatiha saonnari. Dapot ia ma saratus noli umbahat bagas, kahanggi, iboto, dakdanak, saba dohot ladang, dohot parkancitan. Dung i di hatiha na giot ro jagiton ni halahi ma hangoluan na so mantak. 10:31 Tapi bahat do halak na parjolo saonnari gabe parpudi, jana bahat do na parpudi saonnari gabe parjolo." 10:32 Hatiha di tonga dalan Jesus rap dohot angka siseanNia i laho tu Jerusalem. Di jolo ni angka anak siseanNia i ma Jesus mardalan. Madung songon na adong biar ni angka siseanNia i, jana angka halak na mangihutkon i pe sian pudi madung mabiar. Dung i dipio Jesus ma angka siseanNia i sajo laho paboahon tu halahi sanga aha na giot masa tuSia. 10:33 "Tangihon hamu ma, saonnari manangkok ma hita tu Jerusalem. Pasahaton ma disi Anak Ni Jolma tu angka sintua ni malim dohot angka Siboto Surat. Dabuhonon ni halahi ma uhuman mate tuSia. Dung i pasahaton ni halahi ma Ia tu tangan ni angka halak na so Jahudi. 10:34 Incahan ni halahi ma Ia, tijuranna, loncinganna baru ma dibunu. Tapi dung tolu ari, mulak mangolu ma Ia mangulahi." 10:35 Jadi ro ma si Jakobus dohot si Johannes, i ma angka anak ni si Zebedeus mandapotkon Jesus, "Gurunami! Pangidoan ni rohanami patulusonMu ma na hami pangido sian Ho!" 10:36 "Aha ma por ni rohamunu sibaenonKu di hamu?" ninna Jesus manyapai. 10:37 Dialusi halahi ma, "Muda dung lalu Ho saulahon juguk marsangap di karosi harajaan i di Harajaan Ni Debata, sugari nian patola ma hami rap juguk dohot Ho. Sahalak di siamun, dung i sahalak nari di siambirangMu." 10:38 Tapi didok Jesus ma, "So diboto hamu sanga aha na nipangidomunu. Tarinum hamu ma lakna siinumon parkancitan na giot inumonKi? Tolap hamu do lakna masuk tu sitaonon na giot sitaononKi?" 10:39 "Tarbaen hami do i," ning halahi. Dung i didok Jesus ma mangulahi tu halahi, "Tutu do i nian angkon inumonmunu do siinumon parkancitan na giot inumonKi, jana angkon masuk do hamu tu bagasan sitaonon na giot taononKi. 10:40 Tapi anggo na manontuhon sanga ise na juguk di siamunKu sanga di siambirangKu, inda marguru di Au i. Debata do na manontuhon sanga na ise do na juguk disi." 10:41 Jadi dung tarboto pangalaho i tu anak sisean na sampulu halak nari, dimuruhi halahi ma si Jakobus dohot si Johannes. 10:42 Jadi, gabe dipalagut Jesus ma halahi sude. Didok Ia ma tu halahi, "Diboto hamu do angka na nidok pamarenta ni angka bangso, na mamarenta rayatna marhite tangan bosi, jana angka parkuasona mandalankon karejona marhite hakejamon. 10:43 Tapi anggo hamu, nada tola songon i! Sanga ise na giot godang sian hamu, angkon gabe pangoloimunu ma ia. 10:44 Dung i halak na giot sumangap di tonga-tongamunu, angkon gabe pangoloi ma ia di hamu sude. 10:45 Angke Anak Ni Jolma i pe, nada na giot dioloi Ia umbaen na ro. Tapi na giot mangoloi do, dohot mangalehen hosaNia gabe dalan laho paluahon bahat halak." 10:46 Lalu ma halahi di Jeriko. Jadi dung laho kehe Jesus rap dohot angka anak siseanNia i, songon i dohot halak na bahat i, adong ma sada halak na mapitung juguk di topi dalan i mangido-ido. Si Bartimeus do goarna, i ma anak ni si Timeus. 10:47 Jadi dung dibege ia Jesus halak Nasaret i do na mamolus i, marsurak ma ia, "O Jesus Anak ni si Daud! Ibo ma rohaMu mida au!" 10:48 Digorahon halak ma ia anso sip. Tapi mur dipagogo ia dope marsurahi, "O, Anak ni si Daud, ibo rohaMu di au!" 10:49 Gabe maradian ma Jesus, didok Ia ma, "Piohon hamu jolo ia." Jadi dipiohon halak ma bayo na mapitung i. Didok halahi ma tusia, "Patogu ma rohamu! Madung dipio Jesus ho. Jongjong ma ho!" 10:50 Dung i ditalduskon ia ma gobak-gobaknia i, diompoti ia ma jongjong, kehe ma ia mandapotkon Jesus. 10:51 "Aha do lakna dipangido rohamu baenonKu tu ho?" ninna Jesus manyapai ia. Dialusi bayo na mapitung i ma, "Marnida ma nian au, Guru!" 10:52 "Kehe ma ho," ninna Jesus. "Madung dipamalum haporsayaanmi ho." Manigor marnida ma bayo i. Lalu diihutkon ia ma Jesus di dalan i.
11:1 Jadi dung marayak Jerusalem, kehe ma halahi tu kota Betpage dohot tu kota Betania na di pat ni Dolok Zetun. Disuru Jesus ma dua halak siseanNia i anso parjolo sian Ia. 11:2 "Kehe ma hamu tu huta na di jolo an," ninna Jesus tu halahi. "Disi masuk hamu tu huta i manigor tarpaida hamu ma tambat sada anak ni halode na so unjung dope dilombut halak. Harkari hamu ma halode i, dung i oban hamu ma tuson. 11:3 Ompot adong halak na manyapai hamu sanga hara ni aha umbaen diharkari hamu halode i, dok hamu ma, 'Na porlu di Tuhan i do. Manigor disuru oban ia do i tuson.' " 11:4 Jadi kehe ma anak sisean na dua i, dapot halahi ma tambat sada anak ni halode di topi ni dalan haroroan tu huta i. Diharkari halahi ma talina i. 11:5 Jadi disapai halak na marjongjongan i ma halahi, "Na mahua do hamu! Biasi diharkari hamu tali ni halode i?" 11:6 Dialusi halahi ma songon pandok ni Jesus nangkin tu halahi. Gabe dipadiar angka halak na disi i ma, dioban halahi halode i. 11:7 Dung lalu tu jolo ni Jesus, dilapihi halahi ma tangguru ni halode i dohot pakean ni halahi, jana dilombut Jesus ma. 11:8 Jadi bahat ma halak marsipahembang abitna di dalan i, adong muse ma na manyerakkon angka ranting-ranting ni hayu di tonga dalan i, i ma na niparrampingkon ni halahi sian kobun-kobun i. 11:9 Angka na mardalan di jolo dohot na sian pudi, sude ma halahi marsurak-surak, "Hosana! Dipasupasu ma Ia na ro di bagasan goar ni Tuhan! 11:10 Dipasupasu ma HarajaanNia na giot ro i, i ma harajaan ni si Daud ompunta i! Hosana di Inganan Na Gumincat i!" 11:11 Dung i lalu ma Jesus tu Jerusalem, masuk ma Ia tu Bagas Ni Debata. Dipareso Ia ma disi humaliang. Dung i kehe ma Ia tu Betania rap dohot siseanNia na dua bolas i, harana ma golap ari. 11:12 Ancogotna i dung kehe halahi sian Betania malean ma Jesus. 11:13 Sian na dao dope diida Ia ma sangkambona gala-gala, sarmak bulungna i. Jadi kehe ma Ia mangaligi gala-gala i betak na adong batuna. Hape dung lalu Ia tu bonana i, hum bulungna sajo do. Angke nada musim marbatu gala-gala hatiha i. 11:14 Dung i didok Jesus ma tu gala-gala i, "Mamungka saonnari, umpe sahalak na mangankon batu ni gala-gala sian ho salolot ni lolotna!" Dibege angka anak sisean i ma pandohan i. 11:15 Jadi lalu ma halahi tu Jerusalem. Masuk ma Jesus tu Bagas Ni Debata. Dipaorot Ia ma disi angka halak na marjagal di inganan i. Angka meja ni panukar-nukar hepeng dohot angka bangku-bangku ni parjagal darapati dipartunggalingkon Ia sude. 11:16 Sahalak pe nada dipatola Ia maroban sanga aha pe mamolus sian alaman ni Bagas Ni Debata i. 11:17 Dung i mangajar ma Jesus tu halak na disi i. Didok Ia ma, "Nada he tarsurat do di Buku Na Badia songon on: Didok Debata do, 'Digoari ma BagasKu inganan partangiangan ni sude bangso?' Hape gabe dibaen hamu do i gabe liang ni panyamun!" 11:18 Dibege angka sintua ni malim rap dohot angka Siboto Surat do na nidokNia i. Gabe mamungka ma dijalahi halahi dalan laho mamunu Jesus. Tapi mabiar do halahi mida Ia, angke sude halak na bahat na disi i mangkilala, tabo pangajaranNia i. 11:19 Potangna i kehe ma Jesus rap dohot angka siseanNia sian kota i. 11:20 Manyogotna i di na mamolus halahi sian lambung ni gala-gala i, diida halahi ma hape madung mate gala-gala i lopus tu uratna i. 11:21 Jadi diingot si Petrus ma sanga aha na nidok ni Jesus tu hayu i. Gabe didok si Petrus ma tu Jesus, "Diligi Guru i ma jolo! Ma pungguron gala-gala na niburaanMi!" 11:22 Dialusi Jesus ma, "Ingot hamu ma! Muda porsaya hamu tu Debata 11:23 tardok hamu do tu dolok an, 'Morot ma ho, jana ambung ma ho tu laut!' gabe tulus ma songon i di hamu, asal ma ulang ganggu rohamunu. Dung i pos ma rohamunu angkon tutu situtu tulus na nidokmunu i. 11:24 Antong ingot hamu ma! Muda martangiang hamu mangido sanga na aha pe, pos ma rohamunu na dung dilehen Debata do na nipangidomunu i. 11:25 Dung i muda martangiang hamu, hape inda sonang rohamu mida sada halak, angkon jolo sesaonmu hasalaan ni halakna i anso disesa Amangmunu na di banua ginjang i muse dosamunu." 11:26 Anggo so ra do hamu manyesa hasalaan ni halak na asing, Amangmunu na di banua ginjang i pe nada ra Ia manyesa angka dosamunu. 11:27 Mangulahi ma halahi tu Jerusalem. Hatiha mardalan-dalan Jesus di bagasan Bagas Ni Debata, ro ma mandapotkon Ia angka sintua ni malim, angka Siboto Surat dohot angka bagian hatobangon ni halak Jahudi. 11:28 Disapai halahi ma Jesus, "Markite-hite kuaso dia do lakna dibaen Ho patupahon angka na songon on? Ise do na mangalehen kuaso di Ho laho mambaen songon i?" 11:29 Dialusi Jesus ma, "Adong sada sapaanKu tu hamu. Muda dialusi hamu annon sapa-sapangKon, baru pe anso Hupaboa tu hamu taringot tu kuasongKu mambaen songon i. 11:30 Paboa hamu ma jolo tu Au, ise do na mangalehen kuaso tu si Johannes Pandidi laho mandidihon halak. Sian banua ginjang do sanga sian jolma?" 11:31 Jadi marpokat ma halahi. "Muda tadok, 'Sian banua ginjang' gabe dohononNia ma tu hita, 'Biasi inda porsaya hamu di si Johannes?' 11:32 Tapi songon na so tardok do, 'Sian Jolma.' " Harana, mabiar do halahi mida halak na bahat, angke panurirang do si Johannes dietong roha ni halak na bahat i. 11:33 "Inda hami boto!" gabe ninna halahi ma mangalusi. Dung i didok Jesus ma tu halahi, "Antong anggo songon i, Au pe inda ra paboahon tu hamu sanga na sian ise kuasongKu mambaen songon i."
12:1 Dung i dipungka Jesus ma marumpama laho mandok hata tu angka sintua ni malim i dohot angka Siboto Surat bope tu angka hatobangon ni halak Jahudi i. Ning Ia ma, "Adong ma sada bayo na markobun anggur. Dihandang ia ma kobun anggurnia i humaliang. Dung i dihuar ia ma pamoroan ni anggur i, dipajongjong ia muse ma sada tuhu-tuhu inganan ni panjago. Dung i dipabolahon ia ma kobun anggurnia i, ia pe kehe ma tu luat na asing. 12:2 Jadi dung dapot hatihana mamutik batu ni anggur i, disuruhon nampuna i ma sahalak naposonia mandapotkon angka na markarejo i laho manjagit bagiannia sian suha ni kobun i. 12:3 Tapi ditangkup angka halak na markarejo kobun i ma naposo i. Dibalbali halahi ma ia, dung i disuru halahi ma mulak umpe maroban bagi-aha. 12:4 Gabe disuru nampuna kobun i ma sahalak nari naposonia na asing. Tapi dipotuk angka na markarejo i ma ulu ni naposo i. Jana dipaila halahi. 12:5 Disuru nampuna kobun i ma mangulahi sahalak naposonia na asing. Tapi dibunu halahi ma naposonia i. Laing songon i ma pambaen ni halahi tu angka naposo na asing i muse. Adong ma na dibalbali ni halahi, adong na dibunu. 12:6 Ise noma na tarsuru nampunaan i? Hum sahalak sajo noma, i ma anaknia sandiri haholongan ni rohania i. Jadi ujungna laing disuru ia ma anaknia i mandapotkon angka na markarejo i. 'Tontu argahonon ni halahi do anakki,' ning rohania. 12:7 Tapi marsipandohonan ma angka na markarejo i sama halahi, 'On ma halakna na giot manean i. Tabunu ma on dison anso di hita sude siteanonnia i!' 12:8 Jadi ditangkup halahi ma anaknia i lalu dibunu halahi ma. Diambungkon halahi ma bangkena i tu balian ni kobun i." 12:9 Dung i disapai Jesus ma, "Antong, aha noma sibaenon ni nampuna kobun i? Ro ma ia laho mangabiskon angka na mamola i, anso dipasahat ia kobunnia i tu angka pamola na asing. 12:10 Tontu ma disise hamu ayat on di Buku Na Badia i, 'Batu na niambungkon ni pande bagas, madung gabe batu parsuhi. 12:11 I ma na nibaen ni Tuhan; sada tanda hahomangan di matanta!' " 12:12 Jadi sude angka pangituai ni halak Jahudi na umbege umpama nangkin, rap manjalahi dalan ma laho manangkup Jesus. Harana diboto halahi do, halahi sandiri do na nidok ni Jesus di umpamana i. Tapi mabiar do halahi di halak na bahat i, gabe ditinggalkon halahi ma Jesus. 12:13 Disuru ma sanga na piga halak Parise dohot angka anggota ni si Herodes laho manjalahi hasalaan ni Jesus marhite angka sapa-sapa. 12:14 Didapotkon halahi ma Jesus. Didok halahi ma, "Guru, hami boto do, halak na tigor do Ho. Nada parduli Ho sanga na bia pikiran ni halak tu Ho. Hum na marojahan tu hasintongan do diajarkon Ho, taringot tu sanga aha hagiot ni Debata. Harana inda meol-eol rohaMu sanga na bia pe didok halak. Antong, paboa ma jolo tu hami, 'Muda tagarar pajakta tu Kesar ni halak Rom, sala dehe i tu ugamonta sanga nada? Angkon gararonta dehe pajak i sanga nada?' " 12:15 Diboto Jesus do na mangakali halahi. Dialusi Ia ma, "Biasi pola diuji hamu Au? Patidahon hamu ma jolo tu Au hepeng perak i sada." 12:16 Dilehen halahi ma sada hepeng perak i. Dung i disapai Jesus ma, "Gambar dohot surat ni ise do on?" "Kesar i!" ning halahi mangalusi. 12:17 "Antong anggo songon i do, pasahat hamu ma mangulahi tu Kesar sanga aha nampuna ni Kesar i. Laing pasahat hamu ma mangulahi tu Debata sanga aha nampuna ni Debata!" Jadi homang ma roha ni halahi umbege Ia. 12:18 Adong ma sanga na piga halak sian halak Saduse ro mandapotkon Jesus. (Mangihutkon pandapot ni halak on, anggo jolma nada be mulak mangolu muda dung mate.) 12:19 "Guru, ditonahon si Musa do tu hita: 'Muda mate sada bayo maninggalkon sada dadaboru ia, tapi nada jabat maruntungan halahi, angkon gabe patugincaton ni anggi ni na mate i ma na mabalu i anso mardakdanak ia. I ma na gabe pomparan di na mate i.' 12:20 Jadi jungada ma adong pitu halak na martinadohon. Mambuat boru ma siangkaan i tapi mate ma ia so jolo adong dope untungannia. 12:21 Jadi dipatugincat na paduahon i ma angkangna na mabalu i, tapi ia pe laing mate do so jolo adong dakdanak. Laing songon i ma na masa tu na patoluhon i, 12:22 dohot tu na paopatkon lopus tu na papituhon i. Sude halahi madung rap marbagas tu anak boru i, marmatean be do halahi so jolo adong dakdanakna. Ujungna mate muse ma anak boru i. 12:23 Jadi mulak mangolu ma halahi sude saulahon di ari parpudi, gabe dadaboru ni ise do anak boru i? Harana, halaklahi na pitu i madung mardadaboruhon ia!" 12:24 Dialusi Jesus ma, "Madung lilu hamu hara ni na so diastui hamu Buku Na Badia i dohot kuaso ni Debata. 12:25 Angke anggo dung mulak mangolu do mangulahi angka na mate i, nada marbagas be halahi. Songon ngolu ni surusuruan noma halahi di banua ginjang i. 12:26 Dung i anggo taringot tu angka na mate i na dipangolu mangulahi, adong he na so jungada dope disise hamu di buku ni si Musa taringot tu ramba na gor i? Di angka ayat i adong do tarsurat na nidok ni Debata tu si Musa songon on, 'Au do Debata ni si Abraham, Debata ni si Ishak dohot Debata ni si Jakob.' 12:27 Tapi anggo Debata, nada Debata ni na mate; Debata ni na mangolu do. Na lilu do hamu!" 12:28 Jadi ro ma sahalak Siboto Surat manangihon pangkataion ni Jesus dohot halak Saduse i. Denggan do pangalusi ni Jesus diida ia maradopkon angka halak Saduse i. Dung i disapai ia ma tu Jesus, "Sian sude angka tona na adong, tona dia do na ummarga?" 12:29 Dialusi Jesus ma, "Anggo tona na ummarga, i ma: 'Tangihon hamu ma, hamu halak Israel! Tuhan Debatanta, i ma Tuhan na sada. *TUHAN DEBATANTA, I MA TUHAN NA SADA: Tuhan i ma Debatanta, holan Tuhan sajo.* 12:30 Angkon haholonganmu do Tuhan Debatamu sian sude tondi dohot pamatangmu dohot sude pikiranmu dohot sian sude gogo na adong di ho.' 12:31 Jana na paduahon na ummarga i ma: 'Angkon holong do rohamunu di halak na asing songon panghaholongimu di dirimu sandiri.' Nada adong be tona na ummarga asing sian na dua i." 12:32 Dung i didok Siboto Surat i ma mandok tu Jesus, "Inda adong hurangna alus ni Guru i! Tutu do na nidokMi: Hum sada Debata sajo do Debata, nada adong be Debata na asing. 12:33 Dung i, angkon holong do roha ni jolma mida Debata sian sude rohana, dohot sian sude pikiranna dohot sian sude na adong disia. Dung i muse angkon holong do roha di halak na asing songon na mangkaholongi diri niba sandiri. Dumengganan dope na songon i ulang pado na manghaulkon pahan-pahanan sanga angka haul na asing tu Debata di ginjang ni inganan parkaulan i." 12:34 Diida Jesus, ma denggan sajo do alus ni Siboto Surat i. Didok Jesus ma tusia, "Saotik nari noma anso gabe anggota di Harajaan Ni Debata ho." Dung i inda adong be halak na puluk manyapai tu Jesus. 12:35 Jadi dompak na mangajari i Jesus di Bagas Ni Debata, disapai Ia ma, "Bia do pandok ni angka Siboto Surat i paboa na pinompar ni si Daud do Kristus i? 12:36 Si Daud sandiri, marhite panuturi ni Tondi Parbadia mandok: 'Madung didok Tuhan i do tu Tuanku: Juguk ma Ho di siamunKu lopus Hubaen sude angka musuMu tunduk tu Ho.' 12:37 Si Daud sandiri mamiohon Ia 'Tuanku': Jadi tarbia ma parjadina gabe pomparan ni si Daud muse Ia?" Tabo dihilala halak na marroan i tu Bagas Ni Debata umbege Jesus na mangajar i. 12:38 Didok Ia disi, "Jamot ma hamu adop angka Siboto Surat i. Na torus do halahi mardalan-dalan mamake baju na ginjang. Na jopan do muse roha ni halahi muda ditabi halak di poken. 12:39 Ulang so di juluan halahi juguk muda ro tu bagas paribadatan dohot di angka pesta. 12:40 Angka na mabalu dipaoto-oto halahi muse laho mambuat bagasna i. Ginjang-ginjang dibaen halahi hata ni tangiang ni halahi laho manutup-nutupi hajahatan ni halahi i. Na boratan do saulahon uhuman tu halahi!" 12:41 Dung i juguk ma Jesus satongtang ni poti ni hepeng na di Bagas Ni Debata. Diparrohahon Ia ma angka halak na pamasukkon hepengna tu poti i. Bahat do halak na maradong pamasukkon hepengna bahat-bahat. 12:42 Ro muse ma sada ina na mabalu boti pogos muse. Dipamasuk ia ma dua hepeng tumbaga. I ma tukaran ni hepeng na ummenek argana. 12:43 Dung i dipio Jesus ma angka siseanNia i didok Ia ma tu halahi, "Parrohahon hamu ma jolo on: Umbahat do hepeng na nipamasuk ni ina na mabalu i sian na nipamasuk ni sude angka halak na asing i. 12:44 Angke sian halobian ni halahi do na dilehen i, tapi anggo na mabalu i, sian hahuranganna do, sude na adong disia, i ma na porlu tu hangoluannia."
13:1 Dung i kehe ma Jesus sian Bagas Ni Debata i. Jadi adong ma sahalak sian angka siseanNia i na mandok tuSia, "Guru, ligima togu ni angka batu i jana jeges ni angka bangunan i!" 13:2 Dialusi Jesus ma, "Angka bagas na godang-godang i dehe na niidamu? Umpe sada batu sian angka bagas i sude na tola tarsusun di ingananna humani. Angkon disargehon sude." 13:3 Dung lalu halahi tu Dolok Zetun, juguk ma *JUGUK MA: Ditingki i muda giot mangajar halak Jahudi, somalna juguk do.* Jesus di sada juguhan na topet paadop-adop dohot Bagas Ni Debata. Dung i ro ma si Petrus, si Jakobus, si Johannes dohot si Andreas giot mangkatai dohot Ia. 13:4 "Paboa ma jolo di hami, sanga na andigan ma tulus sudena i! Angka aha ma tandana paboahon na giot dapot hatihana masa sudena i?" 13:5 "Angkon jonggor do hamu anso ulang jabat ditipu halak, ninna Jesus. 13:6 Bahat do halak marroan mamake goarKu. Dohonon ni halahi ma, 'Au do ibana!' Gabe hona tipu ma bahat halak. 13:7 Muda dibege hamu sora ni na marporang dohot angka barita ni porang, ulang mabiar hamu. Angkon masa do sisongon i. Tapi nada podo hasidunganna. 13:8 Marporang ma bangso na sada mangalo bangso na asing, bope sada harajaan dohot harajaan na asing. Masa ma lalo sanga na di dia dohot haleon potir. Tapi sasudena i parmulaan ni parhancitan marayak jaman na imbaru do. 13:9 Angkon jamot do hamu, angke tangkupon do hamu, obanon tu rapot ugamo. Dibalbali halahi ma hamu di angka bagas paribadatan. Obanon ma hamu mangadop tu jolo ni angka parkuaso dohot raja-raja hara ni Au. Anso gabe hasaksian ma i taringot tu goarKu di halahi sude. 13:10 Angke anggo Jamita Na Denggan i na sian Debata angkon jolo dijamitahon do tu sude bangso. 13:11 Jadi muda tartangkup hamu dioban tu paruhuman, ulang pola sak rohamunu taringot tu sidohononmunu. Muda dung dapot hatihana mandok hata hamu, dok hamu ma disi sanga aha na nipaboa tu hamu. Harana nada hatamunu sandiri sidohononmunu. Sian Tondi Parbadia do sude marroan hata sidohononmunu i. 13:12 Jadi pasahaton ni halak ma kahanggina sandiri anso dibunu. Songon i muse ma baenon ni ama tu dakdanakna. Angka dakdanakna pe tuhason ni halahi ma amang ni halahi dohot inangna anso dibunu. 13:13 Sude ma halak margoyak ni roha mida hamu hara ni Au. Tapi sanga ise na tahan lopus tu ujungna, i do na dapotan haluaon." 13:14 "Muda diida hamu 'Hajahatan Na Mangaroncohon' jongjong di inganan na so patut. (Sanga ise na mamasa on: Astui hamu ma sanga aha na nidok on!) Angka halak na di Judea di hatiha i, gumonan ma marlojong tu dolok. 13:15 Sanga ise na topet di tarup ni bagas, indangkon sai mijur ia mambuat sanga aha sian bagas i. 13:16 Sanga ise na topet di ladang, indangkon be sai mulak ia mangalap abitna. 13:17 Marjaya ma di hatiha i angka ina na topet denggan pamatangna sanga na topet patagukkon. 13:18 Tangiangkon hamu ma tu Debata anso ulang di musim ngali ni ari hamamasa ni i. 13:19 Harana anggo di hatiha i masa ma hasusaan na godang situtu na so unjung masa dope i di tano on dung ditompa Debata tano on lopus tu sadari on, jana nada masa be songon i tu pudi on. 13:20 Sugari na so dipapendek Debata na masa i, umpe sahalak na tarbaen malua. Tapi hara ni halak na nitodoNia i, gabe dipapendek Debata ma na masa i." 13:21 "Jadi muda adong halak na mandok tu hamu di hatiha i, 'Beta taligi, ma dison Kristus i!' sanga 'Ma disadu Ia!' -- ulang ma hamu porsaya tu halahi. 13:22 Harana marroan do angka kristus pargabus dohot angka panurirang pargabus. Baenon ni halahi ma angka tanda hahomangan dohot angka na ganjil-ganjil laho paoto-otohon angka halak ni Debata. Salang sugari tarbaen dohot tu angka na ditodo i dope. 13:23 Antong jonggor ma hamu! Madung Hupaboa hian sudena i tu hamu dompak so tulus dope." 13:24 "Dung salpu hasusaan i, manggolap ma mataniari. Bulan i pe nada marsinondang be. 13:25 Mardabuan ma angka bintang sian langit i, gabe sursar ma sude angka pangalaho ni parlangitan. 13:26 Jadi tarida ma disi Anak Ni Jolma i ro di bagasan ombun mardongan kuaso dohot hasangapan. 13:27 SuruhononNia ma angka surusuruanNia laho palagutkon bangso na nipiliNia sian na opat panjuru ni tano on, sian angka ujung ni tano lalu tu angka ujung ni langit." 13:28 "Denggan ma baen hamu parsipodaan sian bona ni gala-gala. Muda rata angka dangkana i boti loyok, mulai ma i martunas, gabe diboto hamu ma na giot dapot ne ma logo ni ari. 13:29 Songon i muse ma muda diida hamu angka pangalaho sinangkinan i tarjadi, gabe botoonmunu ma na dung dapot harorona. 13:30 Situtu do na Hudok on tu hamu! Sude na Hupardokkoni nangkin angkon sanga dope idaon ni angka halak na mangolu saonnari on. 13:31 Sego pe langit dohot tano on, tapi anggo na Hudokkon i inda na mago i." 13:32 "Tapi haru pe songon i, nada adong sahalak pe na umboto sadihari hatihana. Angka surusuruan na di banua ginjang i pe dohot Anak i pe nada diboto i. Hum Ama i sajo do na umboto i. 13:33 Jadi angkon jonggor do hamu tongtong, angke nada diboto hamu sanga andigan hatihana. 13:34 Tarsongon sada halak na kehe tu na dao maninggalkon bagasna do pangalaho ni i. Dipasahat ia ma tu angka naposonia laho mangurus bagasnia. Dipasahat ma karejona be. Tu sijago pintu ditonahon ia hian do anso tangkas ia na manjagoi i. 13:35 Hara ni i angkon jonggor ma hamu angke nada diboto hamu sanga na andigan nampuna bagas i mulak. Sanga na andospotang, betak na tonga borngin, ra do andostorang sanga di hananaek ni mataniari. 13:36 Jadi muda ompot ia ro, ulang sanga tardapot ia hamu hatiha tarpodom. 13:37 Sude na Hudok on tu hamu, laing Hupaboa do tu halak sudena: Jonggor ma hamu!"
14:1 Dua ari nari noma anso Ari Pesta Paskah -- dohot Roti Na So Marragi. Manjalak-jalahi dalan ma angka sintua ni malim dohot angka Siboto Surat laho manangkup Jesus sip-sip anso dibunu halahi Ia. 14:2 "Tapi ulang ma di ari pesta on tabaen, anso ulang masa hagaoron," ninna halahi. 14:3 Hatiha di Betania Jesus, di bagas ni si Simon na huliton i hian do Ia. Dompak mangan Jesus disi, ro ma sada dadaboru mandapotkon Ia maroban sada botol pualam na marisi miak na huskus. Sigodang arga do miak na huskus i, i ma na nitanak ni halak sian urat-urat na huskus. Ditaporkon anak boru i ma botol i laho mangusehon miak na huskus i tu ulu ni Jesus. 14:4 Jadi adong ma halak na disi i muruk-muruk. Didok halahi ma sama halahi, "Aha ma he gunana diparsayang miak na huskus i? 14:5 Harana sugari nigadis miak i, ma mararga i lobi tolu ratus hepeng perak. Madung tarlehen hepengna i tu angka halak na pogos!" Gabe dimuruhi halahi ma anak boru i. 14:6 Tapi didok Jesus ma, "Padiar hamu ma songon i! Biasi diarsahi hamu ia? Na denggan do na nibaennia tu Au. Sipujion do ia disi. 14:7 Anggo halak na pogos tongtong do adong di tonga-tongamunu. Sanga sadihari anggo na ra do hamu, tarurupi hamu do halahi. Tapi anggo Au nada tongtong di lambungmunu. 14:8 Anggo anak boru on, ma dibaen ia intap ni na lobas gogonia. Dompak so dapot dope hatihana ma dihobasi ia hian Au dohot miak na huskus i tu hatiha hatatanomKu. 14:9 Tutu do na Hudok on tu hamu! Sanga na di dia pe di tano on dibaritahon Jamita Na Denggan na sian Debata, angkon dibaritahon muse ma na nibaen ni anak boru on gabe songon parningotan tusia." 14:10 Si Judas Iskariot, i ma sahalak sian sisean ni Jesus sidua bolas halak i. Kehe ma ia mandapotkon angka sintua ni malim laho manghianati Jesus. 14:11 Jadi dung dibege halahi na songon i jop ma roha ni halahi. Marjanji ma halahi mangalehen hepeng tu si Judas. Si Judas pe antong dipungka ia ma manjalahi dalan laho manghianat tu Jesus. 14:12 Ari parjolo di Ari Pesta Ni Roti Na So Marragi, didapotkon angka siseanNia i ma Jesus. Somalna di na sadari i ma disambol halak biri-biri Paskah. Jadi disapai angka siseanNia i ma Jesus, "Di dia do dipangido rohaMu paradeonnami panganon Paskah di Ho?" 14:13 Dung i disuru Jesus ma dua halak sian halahi. "Kehe ma hamu tu kota, marsuo ma hamu annon disi rap dohot sada bayo na maroban gunci. Ihutkon hamu ma bayo i 14:14 sanga tu bagas dia ia masuk. Dok hamu ma tu nampuna bagas i songon on, 'Disapai Guru i, sanga na di dia do ingananNia rap dohot angka siseanNia mangankon sipanganon Paskah i.' 14:15 Patuduhononnia ma tu hamu sada bilik na bidang di loteng parginjang di bagas i. Ma taratur hian disi singkop dohot angka juguhanna. Parade hamu ma sude disi di hita." 14:16 Dung i kehe ma siseanNia sidua halak i tu kota. Dapot halahi ma songon na nidok ni Jesus tu halahi. Diparade halahi ma panganon Paskah i. 14:17 Jadi dung potang ari, ro ma Jesus rap dohot anak siseanNia na dua bolas halak i. 14:18 Jadi hatiha na mangan i halahi di meja na disi didok Jesus ma, "Tangihon hamu ma on! Sahalak sian hamu na rap mangan dohot Au saonnari giot manghianat tu Au." 14:19 Gabe marsak ma angka anak sisean ni Jesus i. Pasada-sada ma halahi marsapa tu Jesus, "Tontu nada au na nidok ni Guru i, atehe?" ninna halahi. 14:20 Dialusi Jesus ma, "Anggo halakna, sahalak sian hamu na dua bolas on. Na mangan sapinggan dohot Au, i ma ibana. 14:21 Tutu do nian, angkon mate do Anak Ni Jolma i songon na dung tarsurat hian di Buku Na Badia i. Tapi na jorbut do hamamago ni halak na manghianat tu Anak Ni Jolma i! Dumenggan hian do sugari indangkon sai jungada ia sorang!" 14:22 Jadi hatiha na mangan i halahi, dibuat Jesus ma roti, didok Ia ma tarimakasi tu Debata. Diponggoli Ia ma roti i, dung i dilehen Ia ma tu angka siseanNia i, didok Ia hataNa, "Pangan hamu ma, on ma pamatangKu." 14:23 Jadi dung sidung i dibuat Ia muse ma sada panginuman ni anggur. Didok Ia ma tarimakasi tu Debata, dilehen Ia muse ma panginuman i tu angka siseanNia i. Dung i sude ma halahi manginum anggur i. 14:24 Dung i didok Jesus ma tu halahi, "On ma mudarKu, na niduruskon di halak na bahat, i ma mudar na mambaen tulus parjanjian ni Debata. 14:25 Tutu do na Hudok di hamu, inda inumonKu be anggur on. Tapi saulahon inumonKu ma anggur na imbaru muda dung dipajongjong Damang HarajaanNia." 14:26 Dung i diendehon halahi ma sada ende puji-pujian. Torus kehe ma halahi tu Dolok Zetun. 14:27 Dung i didok Jesus ma tu halahi, "Ganggu ma haporsayaanmunu sude. Angke adong do tarsurat di Buku Na Badia i, 'BunuonKu ma parmahan i, gabe marserak ma angka biri-birina.' 14:28 Tapi dung dipangolu mangulahi, kehe ma Au tu Galilea manjoloani hamu." 14:29 "Nada!" ning si Petrus, "Haru sude pe halahi maninggalkon Ho anggo au bagi na bia pe inda." 14:30 "Tutu do na Hudok on, laing di borngin on painte so tahuak manuk padua nolihon, ma tolu noli diporso ho na so nitandamu Au," ninna Jesus. 14:31 Ninna si Petrus dope manggogohon mangulahi, "Haru pe angkon gabe mate au rap dohot Ho, bagi na bia pe nada parsoonku Ho!" Jadi sude ma anak siseanNia na asing i mangihut mandok songon i. 14:32 Lalu ma halahi tu sada inganan na margoar Getsemane. Didok Jesus ma disi tu angka anak siseanNia i, "Dison ma hamu juguk anso kehe Au martangiang santongkin." 14:33 Dung i dipiohon Jesus ma si Petrus, si Jakobus dohot si Johannes kehe rap dohot Ia. Mamungka ma digohi biar dohot gamang rohaNia. 14:34 Dung i didok Ia ma, "Marsak sajo do rohangKu, songon na giot mate pangkilalaanKu. Dison ma hamu jolo, jonggor ma hamu!" 14:35 Dipadao Jesus ma kehe saotik, manungkap ma Ia tu tano laho martangiang. Dipangido Ia di bagasan tangiang sugari tarbaen indangkon sai ditaon Ia parkancitan i. 14:36 Didok Ia ma, "Abba, o Amang, inda adong na so tarpatupa Ho ale Amang. Buat ma parkancitan on sian Au. Tapi, ulang ma marguru tu lomo ni rohangKu tapi lomo ni rohaMu ma Amang." 14:37 Dung i mulak ma Jesus, hape didapot Ia ma tarpodom anak siseanNia i. Dung i didok Ia ma tu si Petrus, "O, Simon! Na tarpodom do ho? Hum sajom sajo pe inda tarbaen ho be jonggor?" 14:38 Dung i didok Jesus ma tu halahi, "Jonggor ma hamu, tangiangkon hamu ma anso ulang talu hamu di ujian i. Tutu do nian sai giot mambaen na sintong do anggo tondimunu tapi nada margogo hamu patuluskonsa hara ni bako ni jolma na gale i." 14:39 Kehe ma Jesus sanoli nari martangiang, laing hata ni tangiangNia sinangkinan i do didokkon Ia. 14:40 Dung i mangulahi ma didapotkon Ia angka anak siseanNia i. Laing tarpodom do halahi didapot Ia. Dokdok sajo mata ni halahi na mondok-ondok i. Gabe so diboto halahi be sanga aha sidohonon ni halahi tu Jesus. 14:41 Dung i ro ma Ia patolunolihon, jana didokkon Ia ma tu halahi, "Modom ma hamu santongkin nari jana maradian. Tuk ma i, madung ro hatiha i. Ligi ma nipasahat ma Anak Ni Jolma tu tangan ni halak pardosa. 14:42 Ngot ma hamu anso kehe hita. Ligi ma madung ro indi na manghianat i tu Au!" 14:43 Jadi taran mandok hata dope Jesus, ompot ma si Judas ro. Sahalak sian sisean ni Jesus na dua bolas i do si Judas on. Ro muse do rap dohot ia halak na bahat marsioban podangna dohot umban-umban. I ma angka na nisuruhon ni angka sintua ni malim, angka Siboto Surat dohot hatobangon ni halak Jahudi. 14:44 Madung dipaboa panghianat i hian sanga aha tandana tu halahi. "Sanga ise na huumma, i ma ibana halakna. Tangkup hamu ma manigor, togu oban hamu." 14:45 Jadi hatiha na ro i si Judas, manigor didapotkon ia ma Jesus, didok ia ma, "Gurunami!" dung i diumma ia ma Jesus. 14:46 Dung i ditangkup angka halak na bahat na rap dohot si Judas i ma Jesus, dirante halahi ma Ia. 14:47 Tapi adong ma sahalak na disi i, manyintak podangnia ditampul ia ma pinggol ni naposo ni Malim Godang i lopus ramping. 14:48 Didok Jesus ma tu halahi, "Adong he parjahat Au umbaen na maroban umban-umban hamu ro laho manangkup Au? 14:49 Ganop ari do Au mangajari di Bagas Ni Debata di jolomunu hape inda ditangkup hamu Au. Tapi angkon songon i do anso tulus na tarsurat di bagasan Buku Na Badia i." 14:50 Kehe ma sude martabuni anak siseanNia i. 14:51 Adong ma sahalak doli-doli na paihut-ihut Jesus, na mamake sada abit lenan sajo di pamatangnia i. Jadi giot ditangkup halak ma ia, 14:52 tapi disarsarkon ia ma abitnia i, kehe ia marlojongi marsaemara. 14:53 Dioban ma Jesus tu bagas ni Malim Godang. Madung marlagut hian disi angka sintua ni malim, hatobangon ni halak Jahudi dohot angka Siboto Surat. 14:54 Sian na dao dipaihut-ihut si Petrus ma Jesus lopus tu alaman ni bagas ni Malim Godang i. Disi ma ia marsisudu rap dohot angka na mangawal i. 14:55 Sude angka sintua ni malim dohot angka parrapot godang i, sude ma manggogo be laho padapotkon hasalaan ni Jesus anso bisa didabuhon halahi uhuman mamatehon Ia. Hape inda adong bagi aha dapot halahi. 14:56 Sude saksi na nipiohon i, hum gabus do bahat dipardokkoni halahi taringot tu Jesus. Hasaksian ni halahi i pe marsialoan ma i na sada tu na asing. 14:57 Dung i jongjong ma deba nari saksi na asing na mangalehen hatorangan na so tutu taringot tu Jesus. 14:58 Didok halahi, "Hami bege do didok bayo on, 'Hurumpakkon ma Bagas Ni Debata na nibaen ni jolma on, dung tolu ari Hupajongjong ma mangulahi Bagas Ni Debata na so nibaen ni jolma.' " 14:59 Tapi taringot tusi pe laing marsialoan do hatorangan ni angka saksi i na sada tu na asing. 14:60 Dung i jongjong ma Malim Godang i di jolo ni halahi sude manyapai Jesus, "Na so taralusi Ho dehe hum sandok hata, sude angka na nipardokkoni ni halak i manuhas Ho?" 14:61 Sip sajo Jesus. Sandok inda dialusi Ia. Dung i disapai Malim Godang i ma tuSia sanoli nari, "Tutu dehe Ho Kristus Anak Ni Na Tarpuji i?" 14:62 "Olo!" ninna Jesus. "Sude hamu angkon marnida Anak Ni Jolma i juguk di siamun ni Na Markuaso i. Dung i idaonmunu ma Ia ro di bagasan ombun sian langit an!" 14:63 Manigor disibakkon Malim Godang i ma pakeannia i. Didok ia ma, "Inda pola porlu be saksi. 14:64 Madung sude hamu sandiri umbege hataNia na jahat i. Saonnari, aha ma haputusanna?" Sude halahi mamutuskon bahaso marsala Jesus. Patut mate uhumon. 14:65 Jadi adong ma deba na mamungka manijuri Jesus. Adong muse ma na manutup mataNia, dung i dibalbali ma Ia. Didok ma tuSia, "Cubo ma jolo paboa sanga ise na mamukul Ho?" Angka pangawal i pe dohot do mambalbali Jesus. 14:66 Dompak na di alaman i si Petrus ro ma tusi sahalak anak boru, i ma naposo ni Malim Godang i. 14:67 Jadi dung diida ia si Petrus na marsisudu di lambung api i dipamanat ia ma bohi ni si Petrus. Didok ia ma, "Na he dohot do ho dongan ni Jesus halak Nasaret i?" 14:68 Tapi diporso si Petrus do. "Nada huboto jana nada mangarti au na nidokmi." Dung i jongjong ma si Petrus tu horbangan ni bagas ni Malim Godang i. Jadi martahuak ma manuk disi. 14:69 Dung i diida naposo sinangkinan i ma mangulahi si Petrus disi, didok ia ma tu angka halak na disi, "Tutu do bayo on sahalak sian angka dongan ni Jesus i!" 14:70 Tapi laing diporso si Petrus do mangulahi. Inda sadia honok dung i, didok angka halak na disi i ma mangulahi tu si Petrus, "Tutu do ho sahalak sian halahi. Angke halak Galilea do ho!" 14:71 Si Petrus pe marsumpa-sumpa ma ia. Didok ia, "Sai mate ma au muda tutu hutanda bayo na nidokmunu i!" 14:72 Martahuak muse ma manuk disi paduanolihon. Diingot si Petrus muse ma na jungada didok Jesus tusia, "Dompak so martahuak manuk paduanolihon dope ma tolu noli didok ho, na so ditanda ho Au." Dung i kehe ma si Petrus sian i tangis panguncombopon.
15:1 Jadi sogot dope diompoti parrapot Godang i ma sude, dohot angka sintua ni malim, bagian hatobangon ni halak Jahudi dohot angka Siboto Surat mambaen partahian. Dirante halahi ma Jesus, dung i dioban ma Ia tu si Latus laho pasahatkon Ia tu si Latus. 15:2 Disapai si Latus ma Jesus, "Tutu do Ho Raja ni halak Jahudi?" ning ia. "Olo, tutu do songon na nidokmi," ninna Jesus mangalusi. 15:3 Bahat ma tuhas-tuhas na nipardokkonan ni sintua ni malim i salaho tu Jesus. 15:4 Dung i disapai si Latus ma Jesus mangulahi, "Na so ra dehe Ho mangalusi? Ligi ma, sai bahat angka pangaduan ni halahi taringot tu Ho." 15:5 Tapi sanga na bia pe inda ra be Jesus mangalusi. Gabe homang ma roha ni si Latus. 15:6 Ganop Ari Pesta Paskah, dihasomalkon si Latus do paluahon sada halak na tarhurung hombar tu pangidoan ni halak na bahat. 15:7 Adong do sada bayo di hurungan, na tarhurung rap dohot angka donganna pamberontak, i ma na mamunu jolma laho mambaen gaor, na margoar si Barabbas. 15:8 Marroan ma halak mandapotkon si Latus laho mangidohon tusia anso dipalua ia ma sahalak na tarhurung, songon na somal. 15:9 Disapai si Latus ma halahi, "Ra do hamu muda hupalua Raja ni halak Jahudi i di hamu?" 15:10 Angke diboto si Latus do tangkas, hum hara ni gutgut do umbaen na dipasahat ni angka sintua ni malim i Jesus. 15:11 Tapi dijajang angka sintua ni malim i ma halak na bahat i anso si Barabbas dipangido halahi tu si Latus. 15:12 Dung i mandok hata ma si Latus tu halak na bahat i, "Antong anggo songon i, aha ma sibaenonku tu bayo na nigoaranmunu on, Raja Ni Halak Jahudi?" 15:13 Marsurak ma halahi, "Parsilangkon ma Ia!" 15:14 "Aha ma salaNia lakna?" ning si Latus manyapai. Tapi mur gogo ma halahi marsurak, "Parsilangkon ma Ia!" 15:15 Gabe dipalua si Latus ma si Barabbas di halahi laho pasonangkon roha ni halahi. Dung i disuru ia ma halak mangaloncing Jesus, dipasahat ia ma anso diparsilangkon. 15:16 Dioban angka tentara i ma Jesus tu emper ni bagas godang inganan ni gubernur. Dung i dipio ma marlagut sude pasukan i. 15:17 Dipamasuk halahi ma baju juba na ungu tu Jesus. Dibaen halahi muse ma tuku sian ranting-ranting na marduri, dipamasuk halahi ma i tu ulu ni Jesus. 15:18 Dung i ditabi halahi ma Ia, "Daulat i, Raja ni halak Jahudi!" ninna halahi. 15:19 Dilibaskon halahi ma bulu tu ulu ni Jesus, ditijuri halahi ma Ia. Dung i marsomba ma halahi di joloNia. 15:20 Dung sidung diincahi halahi Jesus, dibuka halahi ma juba na ungu i dibaen halahi ma mangulahi bajuNia humani. Dioban ma Ia tu balian anso diparsilangkon. 15:21 Di tonga dalan i dipaksa halahi ma sada halak maroban hayu parsilang ni Jesus i. Na ro sian huta-huta do bayo i topet giot tu kota. (Si Simon goarna, i ma halak Kirene. Amang ni si Aleksander dohot si Rufus.) 15:22 Dioban ma Jesus tu sada inganan na margoar Golgota astuanna "Partangkurahan". 15:23 Dilehen halahi ma diSia anggur na marcampur mur tapi nada giot Ia manginum i. 15:24 Ujungna diparsilangkon halahi ma Ia. Dibagi-bagi halahi ma pakeanNa i. Diundi halahi ma laho manontuhon sanga na dia bagianna be. 15:25 Pukul sambilan manyogot diparsilangkon halahi ma Jesus. 15:26 Di ginjang ni parsilang i disuratkon do hasalaan na dituhaskon tuSia. On ma na disuratkon disi, "Raja Ni Halak Jahudi." 15:27 Diparsilangkon halahi muse do rap dohot Jesus dua halak panyamun. Sada di siamunNia, na sada nari di siambirangNia. 15:28 Jadi di bagasan ni i tulus ma tarjadi na tarsurat di Buku Na Badia i na mandok: "Nietong ma Ia sarupa tu halak na jahat." 15:29 Sude halak na mamolus sian i, marsiincahi ma tu Jesus, mangalayasi. Mopeng-openg be ma ulu ni halahi mandok, "O, ale Ho na giot mangarumpakkon Bagas Ni Debata jana na giot pajongjongkonna di bagasan tolu ari, 15:30 mijur ma Ho sian parsilang i, palua ma diriMu!" 15:31 Laing songon i ma angka sintua ni malim i dohot angka Siboto Surat na disi, marsiincahi ma tu Jesus. Didok halahi ma sama halahi, "Anggo halak na asing dipalua Ia, hape anggo diriNia sandiri so tarpaluasa! 15:32 Anggo na tutu ma Ia raja ni Israel, Kristus i, mijur ma Ia sugari sian i. Anso porsaya hami diSia!" Halak na diparsilangkon i pe rap dohot Jesus laing mangincahi do tuSia. 15:33 Dung tonga ari gabe golap ma sude luat i tolu jom honokna. 15:34 Di pukul tolu andospotang i mangangguk ma Jesus marsora na gogo, "Eloi, Eloi, lama sabakhtani?" astuanna, "O DebatangKu, DebatangKu biasi ditinggalkon Ho Au?" 15:35 Didok halak na umbege angguk-angguk i ma, "Ligi ma, dipio Ia si Elia!" 15:36 Adong ma sahalak sian halahi mangompoti mambuat lumut. Disornomkon ma lumut i tu anggur na mancom i. Dibaen ia ma lumut i tu ujung ni bulu, disurduhon ia ma tu pamangan ni Jesus. Didok ia ma, "Painte! Taligi ma jolo sanga na ro do si Elia paijurkon Ia sian parsilang i." 15:37 Dung i mangangguk ma Jesus dohot sora na gogo, jana tos ma hosaNia. 15:38 Masibak ma tire na gantung di bagasan Bagas Ni Debata sian ginjang lopus tu toru. 15:39 Dipanotnoti komandan na jongjong di jolo ni parsilang i do sanga tarbia pangangguk ni Jesus dohot parmateNia i. Didok komandan i ma, "Tutu do bayo on Anak Ni Debata!" 15:40 Adong muse do disi angka dadaboru na mangaligi Ia sian na dao. I ma si Salome, si Maria Magdalena dohot si Maria inang ni si Jakobus na poso dohot si Joses. 15:41 Halahi ma angka dadaboru na mangihut-ihut dohot na mangurupi Jesus taran di Galilea Ia, jana bahat dope angka dadaboru na asing disi na ro rap dohot Jesus tu Jerusalem. 15:42-43 Jadi dung potang ari ro ma si Josep na sian Arimatea. Halak na diparsangapi do ia di Rapot Godang ni Ugamo. Laing na tarpainte-inte ma ia sanga andigan do pungkaon ni Debata PangarajaionNa. Ari parkobasan do topet sadari i (i ma ari na mandapotkon Ari Sabat). Jadi dihabaranihon si Josep ma mangadop tu si Latus laho mangido bangke ni Jesus. 15:44 Homang ma roha ni si Latus umbege, na dung mate Jesus. Disuru ia ma sahalak laho marpio komandan i anso disapai ia sanga na dung honok Jesus mate. 15:45 Dung dibege ia hatorangan ni komandan i, diisinkon ia ma si Josep laho mambuat bangke ni Jesus i. 15:46 Dung i ditobusi si Josep ma kopenna linen na halus. Dung dipaijur ia bangke ni Jesus i dibalut ia ma dohot kopen nangkinan i. Dung i dipamasuk ia ma bangke ni Jesus i tu bagasan sada kuburan na imbaru na nituhil di sada dolok batu. Dung i digulang ia ma sada batu na godang tu baba ni tanoman i, panutupna. 15:47 Jadi anggo si Maria Magdalena dohot si Maria inang ni si Joses laing dipardimata halahi do sanga na di dia do dibaen Jesus.
16:1 Dung salpu Ari Sabat kehe ma si Maria Magdalena, si Maria inang ni si Jakobus dohot si Salome manobusi ramu-ramuan na huskus silapuhononkon tu bangke ni Jesus. 16:2 Andostorang dope ari parjolo di minggu i kehe ma halahi tu kuburan i. I dope giot bincar mataniari. 16:3-4 Di tonga dalan i dihatai halahi ma sama halahi, "Ise ma donganta manggulang batu panutup ni kuburan i? Harana na godangan do i." Tapi dung lalu disi, diida halahi ma, hape ma magulang batu i. 16:5 Dung i masuk ma halahi tu bagasan kuburan i. Di bagasan, sabola siamun, diida halahi ma juguk sada doli-doli. Mamake baju juba na bontar bayo i, gabe tarsonggot ma halahi. 16:6 Didok doli-doli i ma, "Ulang mabiar hamu! Huboto do na manjalahi Jesus halak Nasaret na diparsilangkon i do hamu. Inda dison be Ia. Madung dipangolu Ia mangulahi! Ligi hamu ma, disindi hian do bangkeNia dipayakkon. 16:7 Jadi saonnari, kehe ma hamu paboahon barita on tu angka siseanNia i dohot tu si Petrus. Paboa hamu ma, 'JoloananNia ma hamu tu Galilea. Disi ma idaonmunu Ia songon na dung dipaboaNia i hian.' " 16:8 Dung i ruar ma halahi sian tanoman i, manigor dilojongi halahi ma hara ni songgotna dohot biarna. Nada adong dipaboa halahi sanga na tu ise pe, hara ni biarna halahi. 16:9 Dung mulak mangolu Jesus, di Ari Minggu manyogot disi ma parjolo dipatidahon Ia diriNia tu si Maria Magdalena. (Sian si Maria on ma unjung dipaorot Ia pitu setan.) 16:10 Jadi kehe ma si Maria Magdalena paboahon tu angka ale-ale ni Jesus. Topet ma hatiha tangis halahi marsak. 16:11 Tapi dung dibege halahi carito ni si Maria na mangolu do Jesus jana si Maria sandiri madung marnida Jesus, inda porsaya halahi. 16:12 Dung i dipataridahon Jesus ma diriNia tu anak siseanNia dua halak di bagasan pangalaho na asing. I ma na tarjadi dompak mardalan halahi na dua tu sada huta. 16:13 Jadi mulak ma halahi laho paboahon i tu angka na asing i. Tapi halahi pe laing inda ra porsaya. 16:14 Ujungna dipataridahon Jesus ma diriNia tu angka siseanNia na sabolas halak i, hatiha mangan halahi. Digorahon Ia ma halahi hara ni na so pos i roha ni halahi dohot hara ni na so ra i halahi porsaya di na nidok ni angka na dung tangkas midaan, na tutu do Jesus mangolu. 16:15 Dung i didokkon Jesus ma tu halahi, "Kehe ma hamu tu sude portibi on. Baritahon hamu ma Jamita Na Denggan na sian Debata i tu sudena jolma. 16:16 Malua ma angka na porsaya jana na nididi. Tapi anggo halak na so ra porsaya hona uhum do. 16:17 Anggo tu angka na porsaya lehenon ma angka tanda-tanda ni kuaso sisongon on: Usiron ni halahi ma angka setan mamake goarKu. Mangkobari ma halahi dohot hata na so binoto ni halahi. 16:18 Muda ditiop halahi ulok sanga tarinum halahi rasun, inda pola bagi mahua halahi. Muda diampehon halahi tanganna tu ginjang ni halak na marnyae, gabe malum ma dilala halahi." 16:19 Dung sidung Jesus mandok hata tu halahi, manaek ma Jesus tu banua ginjang. Juguk ma Ia disi, di siamun ni Debata. 16:20 Dung i kehe ma angka siseanNia i pararatkon barita na sian Debata i. Tuhan i pe dohot do markarejo rap dohot halahi laho mangurupi parjamitaon ni halahi. Laing dipatupa Tuhan i muse ma angka tanda ni kuaso dohot angka hahomangan sanga na di dia dibaritahon halahi jamita na sian Debata i.
1:1 Ale Teofilus, na niparsangapan! Madung bahat nian angka dongan mangusahohon sadenggan-dengganna laho manyuratkon taringot tu angka na tarjadi di tonga-tonganta. 1:2 Sarupa do na nisurat ni halahi i dohot carito na dung lalu tu hita sian angka na midaan sandiri sude na masa i sian mulana jana na manjamitahon Hata i. 1:3 Tapi saonnari, dibaen madung tangkas hupamanat sudena i sian mulana, gabe laing denggan ninna rohangku laho manyuratkon sada laporan na taratur di ho. 1:4 Nibaen pe songon i, anso singkop do diboto Tuan i sude na sintong na dung diajarkon tu ho. 1:5 Hatiha si Herodes gabe raja di Luat Judea, *JUDEA: Hata on mandok sude Luat Palestina do.* adong ma sada malim na margoar si Zakaria. Masuk tu horong ni Malim Abia do ia. Dadaborunia margoar si Elisabet, laing sian pomparan ni malim muse. 1:6 Jop do roha ni Debata marnida ngolu ni halahi na saripe. Rap sipangoloi do halahi na dua di parenta dohot paraturan ni Tuhan. 1:7 Nada mardakdanak halahi angke na so maruntungan do si Elisabet, boti rap matobang do halahi. 1:8 Jadi di na sanoli, topet ma si Zakaria mandalankon karejo hamalimon di jolo ni Tuhan. 1:9 Jadi songon dia na somal dibaen angka malim, laing dipadalan ma undian. Gabe si Zakaria ma hona undi masuk tu Bagas Ni Debata laho manutung hamonyan disi. 1:10 Jadi dompak na manutung hamonyan i, martangiang ma halak na bahat di ruar, marjongjongan. 1:11 Jadi ro ma hatiha i sahalak surusuruan mandapotkon si Zakaria. Jongjong ma surusuruan i sabola siamun ni meja panutungan ni hamonyan i. 1:12 Jadi dung diida si Zakaria surusuruan i, tarsonggot ma ia boti gabe mabiar. 1:13 Tapi ninna surusuruan i ma tusia, "Ulang ho mabiar Zakaria! Madung dijagit Debata tangiangmi. Sorang ma sada anakmu sian dadaborumu si Elisabet. Angkon si Johannes do goarna baenonmu. 1:14 Gabe jop sajo ma rohamu boti halak pe bahat do na marjop ni roha muda dung sorang dakdanak i sanoli on! 1:15 Gabe halak na godang do dakdanak i mangihutkon parnidaan ni Tuhan. Nada tola ia minum anggur, sanga siinumon na koras. Mamungka di bortian dope ia, Tondi Parbadia do mangarajai ia. 1:16 Toguonnia do bahat halak Israel anso mulak tu Debata, Tuhan ni halahi. 1:17 Angkon gabe suruan ni Debata do ia, na gogo jana markuaso songon si Elia. Padameonnia ma ama tu anakna, toguonnia ma halak na so pangoloi anso mulak tu dalan na sintong. Dibaen ia pe sudena i, na laho paradehon sada bangso do na dung singkop di Tuhan i." 1:18 "Bia do parbinotongku taringot tusi bahaso na tutu do i tarjadi?" ning si Zakaria manyapai surusuruan i. "Ma matobang au, songon i muse dadaborungku na dung matobang muse do." 1:19 Dialusi surusuruan i ma, "Si Gabriel do au. Mangoloi Debata do karejongku. Ia do na marsuru au paboahon Jamita Na Denggan on tu ho. 1:20 Sude na hudokkon on, pasti do angkon tarjadi muda dung dapot hatihana songon na dung ditontuhon Debata. Tapi hara ni na so porsaya ho, nada tarbaen ho be annon mangkatai. Torus noma ho ngungu lopus tu hatihana tulus sude na hupaboa i." 1:21 Jadi laing tarpainte-inte ma halak i di si Zakaria. Homang ma halahi biasi songon i honokna ia di bagasan Bagas Ni Debata. 1:22 Jadi ujungna di na ruar ia, nada malo be ia mangkobari tu halahi. Dohot tangannia sajo noma ia mambaen tanda-tanda, jana laing ngungu. Gabe tarboto ma tu angka halahi na niidania do sanga aha parnidaan di bagasan Bagas Ni Debata. 1:23 Dung abis hatihania markarejo di Bagas Ni Debata, mulak ma si Zakaria tu bagasnia. 1:24 Inda sadia honok nari, denggan ma pamatang ni si Elisabet dadaborunia i. Sai di bagas ma ia lima bulan honokna. 1:25 Didok ia ma, "Ujungna hape ditolong Tuhan do au jana dibuat Ia habileanku." 1:26 Dung onom bulan denggan pamatang ni si Elisabet, disuru Debata ma surusuruan Gabariel kehe tu sada kota na margoar Nasaret di Luat Galilea. 1:27 Na laho maroban barita tu sada bujing-bujing do umbaen na disuru si Gabariel tusi, i ma tu na margoar si Maria. Na dung martunangan do anak boru i tu sada bayo na margoar si Josep sian pomparan ni si Daud. 1:28 Jadi ro ma surusuruan i tu si Maria mandok, "Horas ma di ho, bujing-bujing na nipasupasu ni Tuhan! Sai rap do Tuhan i dohot ho!" 1:29 Tarsonggot ma si Maria umbege hata ni surusuruan i. Gabe sapa-sapa ma si Maria di bagasan rohania sanga aha do arti ni hata horas-horas i. 1:30 Dung i didok surusuruan i ma tusia, "O, Maria, ulang ho mabiar dibaen jop do roha ni Debata mida ho. 1:31 Denggan ma pamatangmu jana sorang ma sada anakmu, jana angkon Jesus do baenonmu goarNa. 1:32 Gabe magodang ma Ia jana digoari ma Ia Anak Ni Debata Na Gumincat. Gabe raja ma Ia baenon ni Debata songon si Daud ompuNa i. 1:33 Jadi gabe raja ma Ia di angka pomparan ni si Jakob ro di salolot ni lolotna. Nada marujung be HarajaanNia." 1:34 "Bia ma tarjadi ni i, salangkan au bujing-bujing dope?" ning si Maria tu surusuruan i. 1:35 Dialusi surusuruan i ma, "Tondi Parbadia do mangarajai ho jana kuaso ni Debata ma manggohi ho. Hara ni i ma da umbaen nigoaran Dakdanak i na Badia i, Anak Ni Debata. 1:36 Jana parate-atehon ma on: Si Elisabet edami pe madung pola onom bulan denggan pamatangnia haru pe didok halak ia na so maruntungan boti umurnia pe madung ginjang. 1:37 Angke nada adong na so tarpatupa anggo di Debata." 1:38 Dung i ninna si Maria ma, "Naposo ni Tuhan do au, sai tulus ma di au songon na nidokmi." Dung i kehe ma surusuruan i maninggalkon ia. 1:39 Dung i manigor kehe ma si Maria manangkok tu sada kota di Luat Juda. 1:40 Kehe ma ia tu bagas ni si Zakaria. Di na masuk ia tu bagas i ditabi ia ma si Elisabet. 1:41 Disi dibege si Elisabet hata horas-horas ni si Maria i, manggulot ma manigor dakdanak na di bagasan pamatangnia i. Gabe digohi Tondi Parbadia ma si Elisabet. 1:42 Dung i mangkuling ma ia marhite sora na gogo, "Dipasupasu do ho sian sude dadaboru jana dipasupasu muse ma parbatu ni butuhamu. 1:43 Ise dehe au on umbaen na ro ina ni Tuhanku mandapotkon au? 1:44 Disi hubege nangkin hata horas-horas na nidokmi, manigor manggulot ma dakdanak na di bagasan pamatangku hara ni mogana. 1:45 Martua ma ho, hara ni na porsaya ho angkon tulus do na nidok ni Tuhan i tu ho!" 1:46 Ning si Maria ma, "Dipuji rohangku do Tuhan i, 1:47 marmoga-moga rohangku hara ni Debata Sipatorkiskonku. 1:48 Angke diingot Ia do au, naposoNa na bile on! Mamungka saonnari sude ma halak mandokkon au na martua, 1:49 hara ni Na Markuaso i, na dung mambaen angka pangalaho na godang tu au. Na Badia do goarNa. 1:50 Sian sundut tu sundut do holong ni rohaNia maradopkon halak na mabiar tuSia. 1:51 Dohot tanganNia na gogo i diparsuakkon Ia angka halak na sombong, jana dipasarsar Ia tahi ni halahi. 1:52 Dipaijur Ia angka raja sian juguhanna jana dipagincat Ia angka halak na bile. 1:53 Dipabutong Ia angka halak na male marhite angka na denggan, tapi anggo halak na kayo dipaorot Ia mardongan tangan na rumar. 1:54 Dilehen Ia pangurupion tu Israel, naposoNia i, angke giot digohi Ia janjiNia tu angka ompunta. 1:55 I ma janji na patuduhon haburjuonNia tu si Abraham dohot tu sude pomparannia sapanjangna." 1:56 Adong tolu bulan si Maria tinggal rap dohot si Elisabet, i pe anso mulak ia tu bagasnia. 1:57 Dapot ma hatihana hipas si Elisabet. Sorang ma sada anaknia. 1:58 Dibege angka hombar bagasnia i ma songon i dohot koum sisolkotnia, songon i ma hape dengganna roha ni Tuhan maradopkon si Elisabet, gabe dohot ma halahi sude marjop ni roha. 1:59 Dung marumur dakdanak i salapan ari ro ma halahi laho pasunatkonsa. Ninna roha ni halahi si Zakaria ma baenon goar ni dakdanak i, mangihutkon goar ni amangna, 1:60 tapi ninna inangna i ma, "Nada le! Angkon si Johannes do goarna baenon." 1:61 "Nada adong koum sisolkotmu na margoar songon i," ning halahi tusia. 1:62 Dung i dihilap halahi ma si Zakaria laho manyapai sanga ise do baenon goar ni dakdanak i. 1:63 Dipangido si Zakaria ma sada batu tulis, disuratkon ia ma disi, "Si Johannes do goarna." Homang ma roha ni halahi sude. 1:64 Laing di hatiha i manigor malo ma si Zakaria mangulahi mangkatai jana dipuji-puji ia ma Debata. 1:65 Gabe mabiar ma sude angka hombar bagasnia, jana sar ma barita i tu sude luat dolok ni Judea. 1:66 Sude halak na umbege pangalaho i mamungka ma marpikir-pikir jana sapa-sapa di bagasan rohana, "Gabe aha ma ulaning dakdanak on saulahon?" Angke tangkas do kuaso ni Tuhan adong disia. 1:67 Digohi Tondi Parbadia ma si Zakaria amang ni dakdanak i gabe dipaboa ia ma tona ni Tuhan. Ning ia ma, 1:68 "Pinuji ma Tuhan Debata ni bangso Israel Madung ro Ia manopot bangsoNa, jana paluahon halahi. 1:69 Dilehen Ia do di hita tanduk haluaan, di bagasan pomparan ni si Daud, naposoNia. 1:70 Songon na dung dihatahonNia narobi markite-hite angka panurirang na nipiliNia, 1:71 Na giot paluaonNia ma hita sian angka musunta dohot sian kuaso ni halak na magigi mida hita. 1:72 Anso markite-hite i ma dipatuduhon Ia haburjuon ni rohaNia tu angka ompunta jana digohi Ia do janjiNia na badia i. 1:73-74 Na dung marsumpa do Ia tu ompunta si Abraham, jana marjanji Ia laho paluahon hita sian musunta, anso taoloi Ia mardongan biar ni roha, 1:75 di bagasan habadiaan dohot hatigoran di adopanNia, salolot ni lolotna. 1:76 O, ale anakku, goaron ma ho panurirang ni Debata Na Gumincat i. Jumolo do ho disuru Tuhan giot manastas dalan sibolusonNia. 1:77 Jana patuduhon tu bangsoNia pangastuion taringot tu haluaan, marhite na dung disesa angka dosa ni halahi, 1:78 hara ni asi dohot holong ni roha na sian Debatanta, jana marhite i do bincar di hita sinondang manyogot sian inganan na gincat. 1:79 Songon i ma dilehen Ia sinondangNia tu sude halak na mangolu di bagasan hagolapan dohot biar. Togu-toguonNia ma hita di dalan hadameon." 1:80 Mur magodang ma anak ni si Zakaria i, tondinia pe mur margogo. Di halongonan do ia tinggal lopus dapot hatihana laho patidahon diri ia tu bangso Israel.
2:1 Diparentahon Kesar Agustus ma hatiha i anso marsidaftarkon dirina be sude rayat na nirajaannia. 2:2 On ma pandaftaran na parjolo dompak si Kirenius na gubernur di Siria. 2:3 Markehean ma hatiha i sude halak tu kotana be laho mandaftar. 2:4 Si Josep pe kehe ma sian Nasaret na di Galilea tu Betlehem na di Judea kota hasorangan ni Raja Daud. Harana pomparan ni si Daud do si Josep. 2:5 Mandaftar ma si Josep rap dohot si Maria tunangannia i na dung denggan pamatangna. 2:6 Jadi dung lalu halahi tu Betlehem, dapot ma hatihana mardiapi si Maria. 2:7 Ditubuhon ia ma sada Anak halaklahi, i ma panggoarannia. Dibalut ia ma Dakdanak i dohot lampin, dipayakkon ia di palangka ni pahan-pahanan, angke nada dapotan inganan be halahi di parbornginan. 2:8 Adong do angka parmahan di humaliangna i, na marborngin manjagoi angka biri-biri ni halahi. 2:9 Ompot ma ro surusuruan tu halahi, jana marsinondang ma hasangapan ni Tuhan manorangi halahi, gabe mabiar ma halahi. 2:10 Tapi didok surusuruan i ma, "Ulang hamu mabiar! Angke na maroban barita na denggan do au di hamu, barita na pajopkon roha ni sude bangso. 2:11 Madung sorang sadari on di Kota Ni si Daud, Sipalua i, i ma Kristus Tuhan i. 2:12 Songon on ma tandana: Dapot hamu ma disi Dakdanak na baru sorang dibungkus dohot lampin, dipapodom di bagasan palangka ni pahan-pahanan." 2:13 Ompot muse ma ro bahat surusuruan na asing mandongani surusuruan i, mamuji Debata. Ninna halahi ma, 2:14 "Hasangapan ma di Debata na di ginjang, dame ma di tano on di angka jolma halomoan i!" 2:15 Dung ditinggalkon surusuruan i angka parmahan i giot mulak halahi tu banua ginjang, marsipandohonan ma angka parmahan i sama halahi, "Beta ma hita tu Betlehem anso taida na masa i, na nipaboa ni Tuhan i tu hita." 2:16 Manigor kehe ma halahi, dapot halahi ma antong si Josep dohot si Maria dohot Dakdanak i na topet hatiha modom di palangka ni pahan-pahanan i. 2:17 Dung diida angka parmahan i Dakdanak i, dicaritohon halahi ma sude na dung dipaboa tu halahi taringot tu Dakdanak i. 2:18 Halak pe homang ma rohana umbege carito ni angka parmahan i. 2:19 Tapi anggo si Maria disimpan ia ma sudena i di bagasan rohania mamikirkon sanga aha arti ni sudena i. 2:20 Mulak ma parmahan i huhut mamuji jana dipasangap halahi ma Debata, hara ni sude na niida dohot na nibege ni halahi, songon na dung dipabotohon tu halahi. 2:21 Dung marumur salapan ari, angkon nisunat ma Dakdanak i. Dibaen halahi ma goarNia Jesus, i ma goar na nilehen ni surusuruan tuSia dompak so di kandungan dope Ia. 2:22 Jadi dung salpu angka ari pangiasan ni halahi, mangihuthon Tona Ni si Musa, dioban halahi ma Dakdanak i tu Jerusalem pasahatkon Ia tu Tuhan. 2:23 Harana tarsurat do antong di Tona Ni Tuhan songon on: "Sude anak halaklahi panggoaran, angkon nipasahat do tu Tuhan." 2:24 Dohot na giot pasahatkon haul songon na dung di Tona Ni Tuhan i ma sapasang balom dohot dua darapati na poso. 2:25 Jadi di hatiha i adong ma sahalak di Jerusalem na margoar si Simeon. Halak na burju do ia, na mabiar tu Debata jana na sai paintehon hatihana paluaon ni Debata halak Israel. Didongani Tondi Parbadia do ia. 2:26 Madung dijagit ia baga-baga sian Tondi Parbadia, na paboahon tusia bahaso na so mate dope ia anggo so jolo diida ia Kristus na nimiahan ni Tuhan. 2:27 Hara ni panyosoi ni Tondi Parbadia ro ma ia tu Bagas Ni Debata. Topet ma hatiha i dioban natorasna Jesus Dakdanak i laho patuluskon tuSia mangihutkon na dung niaturkon ni Tona i. 2:28 Dijagit si Simeon ma Dakdanak i jana diabing ia. Torus dipuji ia ma Debata ning ia ma, 2:29 "Saonnari ma o Tuhan dipatulus Ho baga-bagaMu. Padiar ma mate naposoMon di bagasan sonang. 2:30 Angke madung diida matangku sandiri haluaan na sian Ho. 2:31 Na dung nipasingkopMu hian di sude bangso, 2:32 i ma sinondang na manyondangi angka bangso na asing, jana gabe hamuliaan di bangsoMu, Israel." 2:33 Homang ma roha ni natoras ni Dakdanak i umbege na nidok taringot tu Dakdanak i. 2:34 Dipasupasu si Simeon ma halahi jana didok ia tu si Maria inang ni Dakdanak i, "Na dung ditodo Debata do Dakdanak on laho mangarorak dohot pajongjongkon bahat halak Israel. Baen sada tanda na parohon partangkangan, 2:35 jana sada podang na giot manusuk rohamu sandiri, anso gabe tangkas pikiran ni roha ni halak na bahat." 2:36 Adong muse do sahalak panurirang dadaboru na dung matobang situtu, i ma na margoar si Hanna. Boru ni si Panuel do i Marga Aser. Dung adong pitu taon ia marbagas 2:37 mabalu ma ia torus mardangol salapan pulu opat taon honokna. Nada jungada ditadingkon ia Bagas Ni Debata. Arian na borngin disi sajo ma ia marsomba tu Debata martangiang dohot puaso. 2:38 Topet ma hatiha i laing ro ia mamuji Debata bope mangkobari taringot tu Dakdanak i tu sude halak na sai painte-intehon sanga andigan hatihana paluaon ni Debata Jerusalem. 2:39 Dung sidung dipatulus sude na niaturkon ni Tona Ni Tuhan, mulak ma halahi tu kota Nasaret na di Galilea. 2:40 Mur magodang ma Dakdanak i, jana mur gogo, gok hapistaran, asa didongani asi ni roha ni Debata do Ia. 2:41 Ganop taon sai kehe do simatobang ni Jesus tu Jerusalem laho mamestahon Ari Pesta Paskah. 2:42 Jadi di na marumur dua bolas taon Jesus, laing kehe ma halahi songon na somal tu pesta i. 2:43 Dung abis pesta mulak be ma halahi, tapi anggo Jesus laing tinggal dope Ia di Jerusalem di na so pamotoan ni simatobangNia. 2:44 Diambang halahi madung rap dohot halak na asing i do Ia, i ma rombongan na mulak sian Jerusalem i. Dung parsadarian halahi na mardalan i baru pe anso dijalahi halahi Ia di tonga-tonga ni angka koum dohot sitandaan ni halahi. 2:45 Hape nada marsuo halahi tuSia. Gabe mulak ma halahi tu Jerusalem manjalahi Ia. 2:46 Dung tolu ari dijalahi halahi, dohot halahi ma Ia juguk-juguk manangihon dohot manyapa-nyapai angka Siboto Surat Jahudi di Bagas Ni Debata. 2:47 Homang-homang do sude halak na disi umbege angka alusNia na topet-topet. 2:48 Homang ma roha ni simatobangNia i midasa. Didok inangNia i ma tuSia, "Amang! Biasi songon on dibaen Ho tu hami? Ma jabat sak rohangku dohot amangMu manjalak-jalahi Ho!" 2:49 Dialusi Jesus ma, "Biasi pola jalak-jalahan ni amang dohot inang Au? Inda diboto amang dohot inang lakna paboa na angkon di bagas ni Damang Au?" 2:50 Tapi nada mangarti si Josep dohot si Maria sanga aha maksud ni Jesus. 2:51 Dung i mulak ma Jesus rap dohot halahi tu Nasaret, mangoloi tu halahi. Sudena i disimpan inangNa i ma di bagasan rohania. 2:52 Mur honok mur magodang ma Jesus jana mur marbisuk boti jop roha ni Debata dohot jolma diSia.
3:1 Di taon palima bolaskon dung mamarenta Kesar Tiberius, si Pontius Pilatus ma na gabe gubernur di Judea, jana si Herodes mamarenta di Galilea. Si Pilipus dongan saama ni si Herodes mamarenta di Luat Iturea dohot Trakhonitis, jana si Lisanias mamarenta di Abilene. 3:2 Na gabe Malim Godang, i ma si Hanas dohot si Kayafas. *HANAS DOHOT KAYAFAS: Si Hanas i ma simatua ni si Kayafas. Nada Malim Godang be anggo si Kayafas, tapi laing adong dope pengaruhnia.* Hatiha i ma mangkatai Debata tu si Johannes anak ni si Zakaria di halongonan i. 3:3 Si Johannes pe kehe ma mandalani sude angka luat na di Batang aek Jordan pabolkaskon barita na sian Debata disi. Didok si Johannes ma, "Pauba hamu ma rohamunu sian angka dosamunu, jana lehen ma dirimu nididi anso disesa Debata hamu." 3:4 Tarsurat do di buku ni Panurirang Jesaya songon on: "Adong do sora na pio-pio di halongonan, 'Pahornop hamu ma dalan ni Tuhan, patigor hamu ma dalan diSia. 3:5 Angkon nibuta ma sude holbung, sudena dolok dohot tor nipahornop. Angkon nipatigor ma dalan na so tigor, jana nipahornop ma dalan na manangkok-manuat. 3:6 Idaon ni halak na satano on ma haluaan na sian Tuhan!' " 3:7 Bahat do halak marroan mandapotkon si Johannes anso dididi. Didok si Johannes ma tu halahi, "Hamu angka pomparan ni ulok! Ise ma he na mandok tu hamu laho palua diri sian hamumuruk ni Debata na giot ro i? 3:8 Patidahon hamu ma jolo pangalahomunu paboa na dung muba hamu sian angka dosamunu i! Dung i ulang pola dok hamu di bagasan rohamunu, 'Si Abraham do ompungnami! Angke angkon ingotonmunu do: Sian angka batu on pe tarbaen Debata do pinompar di si Abraham!' 3:9 Madung singkop kampak laho manaba angka hayu lopus tu angka uratna i. Angkon tabaon noma sandok hayu na so marbatu na denggan jana ambungkononkon tu bagasan api." 3:10 "Antong, aha noma sibaenonnami?" ning halahi tu si Johannes. 3:11 Ning si Johannes ma mangalusi, "Halak na marbaju dua angkon lehenonnia ma sada tu halak na so adong bajuna; songon i muse halak nampuna sipanganon, angkon bagihononnia ma i tu halak na asing." 3:12 Ro muse angka sitagi pajak mandapotkon si Johannes anso dipandidihon. Disapai halahi ma si Johannes, "Aha dehe sipatupaonnami ninna guru i?" Ning si Johannes ma mangalusi, 3:13 "Ulang pangido hamu lobi sian na dung diaturkon." 3:14 Adong muse do tentara na manyapai, "Bia do taringot tu hami? Aha do sibaenonnami?" Dialusi si Johannes ma, "Ulang jagiti hamu hepeng sanga sian ise pe hara ni na nipaksa bope markite-hite adu-aduan na so tutu tusia. Gajimi ma hangoluhon!" 3:15 Sai dipainte-inte halak do haroro ni Kristus i. Jadi mamungka ma sapa-sapa roha ni halahi betak na si Johannes on do Kristus i. 3:16 Hara ni i ma umbaen didok si Johannes tu halahi sude, "Dohot aek do hudidi hamu, tapi ro ma sanoli on Sada halak na gumodang sian au. Mangkarhari tali sipatuNa pe nada tarpake dope au. DidihononNia ma tu hamu Tondi Parbadia dohot api. 3:17 Madung rade Ia mamiari, laho paiaskon eme sian lapung. PalagutonNia ma eme tu talobat, tapi anggo lapungNa i tutungonNia ma tu api na so ra mintop!" 3:18 Songon i ma marragam-ragam dalanna dibaen si Johannes paingotkon angka halak, di na nijamitahonnia Jamita Na Denggan na sian Debata tu halahi. 3:19 Bope si Herodes, gubernur ni Galilea i laing digorahon si Johannes do hara ni na nibuatnia si Herodias dadaboru ni anggina bope hara ni sude hajahatannia na asing na nibaennia. 3:20 Hape mur jumahat muse dope si Herodes, dipamasuk ia ma si Johannes tu hurungan. 3:21 Dung dipandidihon sudena halahi, dipandidihon muse ma Jesus. Jadi hatiha martangiang Ia, mungkap ma langit, 3:22 jadi mijur ma Tondi Parbadia tuSia songon darapati. Dung i tarbege ma sora sian banua ginjang na mandok, "Ho do Anak haholonganKu. Jop do rohangKu mida Ho." 3:23 Di na baru mamungka karejoNia Jesus, marumur ma Ia tar tolu pulu taon. Anggo pandok ni halak, anak ni si Josep do ia, i ma anak ni si Eli, 3:24 anak ni si Matat, anak ni si Levi, anak ni si Malkhi, anak ni si Janai, anak ni si Josep, 3:25 anak ni si Mattatia, anak ni si Amos, anak ni si Nahum, anak ni si Hesli, anak ni si Nagai, 3:26 anak ni si Maat, anak ni si Mattatia, anak ni si Simei, anak ni si Josek, anak ni si Joda, 3:27 anak ni si Johanan, anak ni si Resa, anak ni si Zerubabel, anak ni si Sealtiel, anak ni si Neri, 3:28 anak ni si Malkhi, anak ni si Adi, anak ni si Kosam, anak ni si Elmadam, anak ni si Er, 3:29 anak ni si Josua, anak ni si Elieser, anak ni si Jorim, anak ni si Matat, anak ni si Levi, 3:30 anak ni si Simeon, anak ni si Juda, anak ni si Josep, anak ni si Jonam, anak ni si Elyakim, 3:31 anak ni si Melea, anak ni si Mina, anak ni si Matata, anak ni si Natan, anak ni si Daud, 3:32 anak ni si Isai, anak ni si Obed, anak ni si Boas, anak ni si Salmon, anak ni si Nahason, 3:33 anak ni si Aminadab, anak ni si Admin, anak ni si Arni, anak ni si Hesron, anak ni si Peres, anak ni si Juda, 3:34 anak ni si Jakob, anak ni si Ishak, anak ni si Abraham, anak ni si Terah, anak ni si Nahor, 3:35 anak ni si Serug, anak ni si Rehu, anak ni si Peleg, anak ni si Eber, anak ni si Salmon, 3:36 anak ni si Kenan, anak ni si Arpaksad, anak ni si Sem, anak ni si Noak, anak ni si Lamekh, 3:37 anak ni si Metusala, anak ni si Henokh, anak ni si Jaret, anak ni si Mahalalel, anak ni si Kenan, 3:38 anak ni si Enos, anak ni si Set, anak ni si Adam, anak ni Debata.
4:1 Digohi Tondi Parbadia ma Jesus di na mulak Ia sian Batang aek Jordan. Dioban Tondi i ma Ia tu halongonan. 4:2 Diuji Sibolis i ma Ia disi opat pulu ari honokna. Nada mangan bagi aha Ia salolot disi. Jadi gabe male ma dihilala Ia. 4:3 Didok Sibolis i ma tuSia, "Muda Anak Ni Debata do Ho, baen ma batu on anso muba gabe roti." 4:4 Dialusi Jesus ma, "Tarsurat do di Buku Na Badia i, 'Nada hara ni roti sajo umbaen na mangolu jolma.' " 4:5 Dung i dioban Sibolis i ma Jesus tu inganan na gincat. Dipatidahon Sibolis i ma santongkin tu Jesus sude harajaan na di tano on. 4:6 "Sude kuaso dohot hamoraon on hulehen pe di Ho angke madung dipasahat i sude tu au jana marguru di au do mangalehen i sanga na tu ise pe giotku. 4:7 Gabe Ho ma nampuna i sude muda tunduk Ho marsomba tu au." 4:8 Dialusi Jesus ma, "Tarsurat do di Buku Na Badia i, 'Somba ma Tuhan, Debatamu jana Ia sajo do sioloanmu!' " 4:9 Dung i dioban Sibolis i ma Jesus tu Jerusalem, dibaen ia ma Jesus tu bungkulan ni Bagas Ni Debata. Didok Sibolis i ma tu Jesus, "Muda Anak Ni Debata do Ho, mangambur ma Ho sian on. 4:10 Angke tarsurat do di Buku Na Badia i, 'Suruhonon ni Debata do angka surusuruanNia manjagohon Ho.' 4:11 Dung i muse, 'Dijagit angka surusuruan i do Ho dohot tangan ni halahi anso ulang antuk patMi tu batu.' " 4:12 Dialusi Jesus ma, "Tarsurat do di Buku Na Badia i, 'Ulang uji Tuhan Debatamu.' " 4:13 Dung sidung diuji Sibolis i Jesus markite-hite ragam-ragam cobaan, ditadingkon ia ma Jesus painte ro hatiha na denggan muse. 4:14 Dung i mangulahi ma Jesus tu Galilea. Jana gok Tondi do Ia, gabe tarsar ma barita taringot tuSia di luat i sude. 4:15 Mangajari do Ia di angka bagas paribadatan jana sude do halak mamuji Ia. 4:16 Dung i kehe ma Jesus tu Nasaret kota hagodanganNia. Hatiha Ari Sabat songon na somal dohot ma Ia tu bagas paribadatan. Hatiha jongjong Ia laho mamasa Buku Na Badia i, 4:17 dilehen ma tuSia buku ni Panurirang Jesaya. Dibuka Ia ma buku na margulung i gabe dapot Ia ma disi ayat on, 4:18 "Tondi Ni Tuhan do na adong di Au, angke madung dimiahi Ia do Au laho mamaritahon Jamita Na Denggan na sian Debata tu halak na pogos, jana disuru Ia do Au paboahon haluaan tu angka na tartangkup dohot parnidaan tu angka na mapitung; laho paluahon halak na marhancit, 4:19 dohot paboahon taon na denggan na sian Tuhan." 4:20 Dibalun Jesus ma mangulahi buku i laho paulakkon tu parkobas na disi, dung i juguk ma Ia. Sude ma halak na disi marsiligi tuSia. 4:21 Dung i dipungka Ia ma mandok tu halahi, "Sadari on ma hasongtian surat on, taran dibege hamu dope!" 4:22 Di parhatutu halahi do Ia jana homang do roha ni halahi hara ni dengganna sude hata na nidokNia i. Didok halahi ma, "Inda he anak ni si Josep on?" 4:23 Dung i didok Jesus ma tu halahi, "Tontu didok hamu do umpama on tu Au: 'Ale, pangubati, pamalum ma jolo diriMu sandiri. Angka na nipatupaMu di Kapernaum, laing songon i ma jolo baen di huta hagodanganMon.' " 4:24 Dung i didok Jesus dope tu halahi, "Porsaya ma hamu, nada adong sada panurirang na dipasangap di hutana sandiri. 4:25 Tapi ingot hamu ma: Di hatiha ni si Elia, di na so ro udan tolu satonga taon honokna, jabat masa haleon potir di luat i sude, bahat sajo do na mabalu di tonga-tonga ni halak Israel. 4:26 Haru pe songon i nada disuru Debata si Elia tu sada sian angka na mabalu i. Hum tu sahalak na mabalu di kota Sarfat na di Luat Sidon i sajo do disuru Debata si Elia. 4:27 Songon i muse do di hatiha ni Panurirang Elisa, bahat do halak na hona panyakit kusta di Israel, hape umpe sahalak sian halahi na dipamalum; hum si Naaman halak Siria i sajo do." 4:28 Muruk ma sude halak na di bagas paribadatan i umbege hata ni Jesus na songon i. 4:29 Jongjong ma halahi manyarat Jesus tu balian ni kota. Dioban ma Ia tu puncut ni dolok. (Di dolok i do parkotaan ni halahi dibaen.) Umbaen na tusi pe Ia dioban anso dionjarkon do Ia tu rahis godang i. 4:30 Hape kehe ma Ia mamolus sian tonga-tonga ni halak na bahat i. 4:31 Dung i kehe ma Jesus tu Kapernaum na di Galilea. Hatiha Ari Sabat diajari Ia ma halak disi. 4:32 Homang do roha ni halahi mida pangajaranNia i, harana gok kuaso do angka pandohanNia. 4:33 Adong ma di bagas paribadatan i sada halak na hona setan. Sai mangangguhi ma bayo i. 4:34 "O Jesus halak Nasaret, na giot mambaen bia do Ho tu hami? Adong he na giot mangagohon hami do Ho? Huboto do sanga ise Ho: Na Badia do Ho sian Debata!" 4:35 Disonggakkon Jesus ma tondi i. "Sip!" ninna Jesus, "Morot ma sian bayo on!" Dung i diompaskon setan i ma bayo i di jolo ni halahi sude, dung i ruar ma ia sian bayo i. Nada jabat mahua bayo i nian. 4:36 Homang ma halahi sude. Marsipandohonan ma halahi sama halahi, "Marhagogoan do hataNia. Mardongan sahala dohot kuaso, dipaorot Ia angka tondi na jahat i, morot muse do angka tondi i!" 4:37 Gabe sar ma barita ni Jesus di luat i sude. 4:38 Ditinggalkon Jesus ma bagas paribadatan i, kehe ma Ia tu bagas ni si Simon. Topet marun nantulang ni si Simon, jana dipaboa halak ma i tu Jesus. 4:39 Jadi, jongjong ma Ia di lambung ni dadaboru i, jana disonggak Ia ma nyae i. Dung i ditadingkon nyae i ma ia, manigor jongjong ma dadaboru i mangoloi halahi. 4:40 Dung lusut mataniari, sude halak na adong na marnyaena sanga na nyae aha pe, diparobani be ma i tu Jesus. Dipayakkon Jesus ma tanganNia tu halahi pamalumkonsa. 4:41 Angka setan pe marmorotan ma sian pamatang ni bahat halak, huhut marsurak-surak, "Anak Ni Debata do Ho!" Tapi disonggak Jesus ma halahi jana nada dipaloas Ia halahi mangkatai, angke diboto halahi do bahaso Ia do Kristus i. 4:42 Jadi di na mamungka torang ari, kehe ma Jesus sian kota i tu balian, tu sada inganan na lungun. Jalak-jalak ma halak na bahat i diSia. Jadi dung dapot halahi Ia, digogohon halahi ma anso ulang kehe Ia maninggalkon halahi. 4:43 Tapi didok Jesus ma tu halahi, "Tu kota na asing pe angkon pabotohononKu do Jamita Na Denggan taringot tu Harajaan Ni Debata, angke hara ni i do umbaen na disuru Au!" 4:44 Jadi marjamita do Ia di sude bagas paribadatan na di Luat Judea.
5:1 Di sada hatiha dompak jongjong Jesus di topi ni Dano Genesaret marsosak do bahat halak laho manangihon jamita na sian Debata. 5:2 Diida Jesus ma dua parau di topi ni dano i. Madung mandarat nampuna parau i paiaskon jala ni halahi. 5:3 Masuk ma Jesus tu sada parau, i ma parau ni si Simon, laing disuru Ia ma si Simon mangonjar parau i dumao saotik sian topi ni dano i. Juguk ma Jesus di bagasan parau i, gabe sian i ma diajari Ia halak na bahat i. 5:4 Dung sidung Ia mandok hata didok Ia ma tu si Simon, "Oban ma paraumon tu inganan na umbagas jana sampakkon ma jalami manangkup ihan." 5:5 "Saborngin maningting ma hami marloja-loja, umpe bagi aha dapot hami, tapi hara ni hataMi na marsuru, denggan ma, husampakkon pe mangulahi jala i," ning si Simon. 5:6 Dung disampakkon ia jala i dapot halahi ma na lobi bahat ihan, jabat masibak jala ni halahi i. 5:7 Gabe mangido tolong noma halahi hara ni i tu angka dongan ni halahi na di parau na asing i. Ro ma dongan ni halahi i, dipamasuk halahi ma tu parau na dua i lopus bubung jabat giot bonom parau i dua-dua. 5:8 Dung diida si Simon songon i, marsomba ma ia di jolo ni Jesus mandok hata, "Ulang donok Ho tu au, Tuhan! Pardosa do au!" ning ia. 5:9 Homang ma si Simon dohot halak na rap dohot Ia marnida ihan songon i bahatna dapot halahi. 5:10 Laing songon i muse ma angka dongan ni si Simon, i ma si Jakobus dohot si Johannes dakdanak ni si Zebedeus. Didok Jesus ma tu si Simon, "Ulang ho mabiar! Mamungka saonnari gabe sijala jolma noma ho." 5:11 Ditarik halahi ma parau i tu topi, ditinggalkon halahi ma i sude laho mangihutkon Jesus. 5:12 Di sada hatiha, dompak di kota Jesus, adong ma disi sada bayo, sap sude pamatangna i hona huliton. Di na niidania Jesus, ro ma ia manungkap tu joloNia marsomba-somba mangido. Didok ia, "Sugari ra Tuan i tarpamalum Tuan i do au!" 5:13 "Ra do Au: Antong malum ma ho!" ning Jesus manyurduhon tanganNia manjama bayo i. Laing di na santongkin i mago ma manigor panyakit huliton i sian bayo i. 5:14 Dung i dilarang Jesus ma bayo i anso ulang dicaritohon ia taringot tusi sanga na tu ise pe. Torus tu malim do disuru Jesus bayo i. "Pangido ma anso dipareso malim ho, dung i kehe ma ho pasahatkon haul hombar tu na nitontuhon ni si Musa laho patandahon tu halak na bahat, bahaso na dung malum ho." 5:15 Tapi mur tarbarita ma taringot tu Jesus, bahat muse ma halak marroan manangihon Ia, songon i muse na mangido hamalumon sian nyae ni halahi be. 5:16 Dung i kehe ma Jesus tu inganan na buni giot martangiang. 5:17 Di sada hatiha, dompak mangajari Jesus, ro ma halak Parise dohot angka Siboto Surat juguk disi. Sian angka kota na di Galilea, Judea dohot Jerusalem do halahi ro. Adong do kuaso ni Tuhan Jesus laho pamalumkon angka na marnyae. 5:18 Jadi ro ma hatiha i halak maroban sada bayo na pangpangon payak di ginjang ni podomanna. Diusahahon halahi ma maroban na pangpangon i tu bagasan bagas i anso tarpayakkon nian di jolo ni Jesus. 5:19 Tapi hara ni bahat ni halak disi, gabe nada taroban halahi bayo i tu bagasan. Jadi dioban halahi ma ia tu tarup ni bagas i. Diluak halahi ma tarup i, sian i ma ditantan halahi ia rap dohot podomanna i tu jolo ni Jesus di tonga-tonga ni halak na bahat i. 5:20 Marnida godang ni haporsayaan ni halahi, didok Jesus ma tu bayo i, "Madung disesa dosami, dongan!" 5:21 Mamungka ma mangkatai na sada tu na asing angka Siboto Surat dohot angka Parise i, ninna ma, "Ise dehe na mangincahi Debata on? Ise ma he lakna na tarbaen manyesa dosa ia so hum Debata?" 5:22 Diboto Jesus do na di bagasan roha ni halahi. Gabe ning Ia ma, "Aha dehe dipikiri hamu di bagasan rohamunu? 5:23 Dia do ummomo dohonon, 'Madung nisesa dosami', sanga, 'Jongjong ma ho jana mardalan!'? 5:24 Tapi anso diboto hamu, na markuaso do Anak Ni Jolma i di tano on manyesa angka dosa." Dung i didok ma tu na pangpang i, "Au mandok tu ho, jongjong ma ho, oban ma podomanmi, mulak ma ho tu bagasmu!" 5:25 Manigor jongjong ma bayo i di jolo ni halahi sude, diangkat ia podomannia i, mulak ma ia lalu mamuji-muji Debata. 5:26 Homang sajo ma halahi sude hara ni mogana. Mardongan biar ni roha didok halahi ma, "Hahomangan na tutu situtu ma na taida sadari on!" 5:27 Dung i kehe ma Jesus, diida Ia ma sada halak sitagi pajak na margoar si Levi na juguk di parbeoan. Didok Jesus ma tusia, "Ihutkon ma Au." 5:28 Jongjong ma si Levi manadingkon sudena i, torus diihutkon ia ma Jesus. 5:29 Dung i dipatupa si Levi ma pesta di bagasnia hara ni Jesus. Bahat do sitagi pajak songon i dohot halak na asing mangan rap dohot halahi. 5:30 Jadi mungut-ungut ma angka halak Parise dohot angka Siboto Surat, gabe didok halahi ma tu angka anak sisean ni Jesus, "Biasi rap mangan minum hamu sudena dohot sitagi-pajak dohot angka na nietong ni halak jolma na so ture?" 5:31 Dialusi Jesus ma, "Nada diporluhon halak na torkis pangubati; hum halak na marnyae do. 5:32 Nada giot mamiohon halak na tigor umaben na ro Au, tapi mamiohon si pardosa do anso di pauba rohana." 5:33 Didok halahi ma tu Jesus, "Anggo anak sisean si Johannes jotjot do puaso dohot martangiang, songon i muse angka sisean ni Parise. Hape angka anak siseanMu mangan minum do halahi." 5:34 Dialusi Jesus ma, "Tarbaen ma he puaso angka tamu di horja ni na marbagas salolot rap dohot halahi bayo pangoli i? 5:35 Tapi dapot do hatiha ni i, dibuat bayo pangoli i sian tonga-tonga ni halahi. Anggo disi baru ma puaso halahi." 5:36 Dung i dipaboa Jesus ma umpama on tu halahi, "Nada adong sada halak pe na ra mangaribahi abit na imbaru giot mandungkapkonsa tu abit na dung buruk, muda binaen songon i sego ma abit na imbaru i, angke nada mardomu pandungkap na imbaru dohot abit na buruk i. 5:37 Songon i muse do, nada adong halak na mangusehon anggur na imbaru tu bobak na buruk, angke muda songon i sabur ma anggur i boti sego ingananna i. 5:38 Anggo anggur na baru angkon di inganan na imbaru do nisimpan! 5:39 Nada adong muse halak na manigor manginum anggur na baru dung jolo diinum ia anggur na honok. Harana dokkononnia ma, 'Tumabo do na honok i.' "
6:1 Di sada hatiha, dompak Ari Sabat, mamolus ma Jesus di ladang gandum, jadi digotil anak siseanNia ma angka gandum, di puyu-puyu jana dipangan halahi ma i. 6:2 Jadi didokkon deba sian halak Parise ma tu halahi, "Biasi dehe dibaen hamu na so jadi baenon di Ari Sabat i?" 6:3 Dialusi Jesus ma, "Na so unjung dope disise hamu taringot tu na nibaen ni si Daud hatiha malean ia dohot angka dongannia i? 6:4 Masuk ia tu Bagas Ni Debata, dibuat ia roti na dung dihaulkon tu Debata, dipangan ia. Dung i dilehen ia muse do roti i tu angka dongannia i. Hape nian anggo mangihutkon Tona ni ugamonta hum malim sajo do na tola mangankon roti i. Anggo halak na asing, nada tola." 6:5 Dung i didok Jesus ma tu halahi, "Anggo Anak Ni Jolma i Tuhan ni Ari Sabat do!" 6:6 Di Ari Sabat na asing muse, kehe ma Jesus mangajari di bagas paribadatan. Adong ma disi sada halak na mate tangan siamunna. 6:7 Tangkas ma diparrohahon deba Siboto Surat dohot halak Parise sanga na dipamalum Jesus do na marnyae i di Ari Sabat. Angke na manjalahi hasalaan ni Jesus do halahi anso taraduhon halahi Ia. 6:8 Hape diboto Jesus do pikiran ni halahi i. Gabe didok Ia ma tu na mate tanganna sabariba i, "Ngot ma ho jana, jongjong ma ho di tonga-tonga!" Jongjong ma bayo i disi. 6:9 Dung i didok Jesus ma tu halahi, "Saonnari Husapai ma hamu: Aha do na tola baenon di Ari Sabat mangihutkon Tona ni ugamonta i? Mambaen na denggan do sanga mambaen na jat? Paluahon jolma do sanga mangago?" 6:10 Diligi Ia ma halahi sude humaliang, didok Ia ma tu bayo i, "Pahortang tanganmi!" Dipahortang ia tangannia i, gabe malum ma tangannia i. 6:11 Tapi anggo halak Parise i dohot angka Siboto Surat na disi, milas sajo ma roha ni halahi, martahi ma halahi sanga songon dia baenon ni halahi tu Jesus. 6:12 Jadi manangkok ma Jesus hatiha i tu sada dolok laho martangiang. Martangiang ma Ia saborngin i tu Debata. 6:13 Dung torang ari dipiohon Ia ma angka anak siseanNia i, dipili Ia ma sian halahi dua bolas halak. Digoari Ia ma na dua bolas i, rasul. I ma: 6:14 Si Simon (na nigoarannia muse si Petrus), dohot si Andreas anggi ni si Simon; si Jakobus dohot si Johannes, si Pilipus dohot si Bartolomeus, 6:15 si Mateus dohot si Tomas, si Jakobus anak ni si Alfeus dohot si Simon (na nigoaran halak Zelot), 6:16 si Judas anak ni si Jakobus dohot si Judas Iskariot na manghianat i. 6:17 Dung i manuat ma Jesus sian dolok i rap dohot angka rasul i, maradian ma halahi jongjong di sada inganan na hornop. Adong muse do disi angka anak siseanNia na asing songon i muse angka halak na marroan sian Judea, sian Jerusalem dohot na sian Tirus dohot Sidon dohot sian angka kota na di topi laut. 6:18 Marroan ma halahi laho manangihon hata ni Jesus, boti anso dipamalum nyae ni halahi be. Sanga na hona setan pe halahi, laing dipamalum. 6:19 Sude halak na disi marusaho be laho manjama Jesus, harana adong do kuaso na haruar sian pamatangNia na pamalumkon halahi. 6:20 Ditailihon Ia ma angka anak siseanNia i didok Ia ma, "Martua ma hamu angka halak na dangol, harana hamu do nampuna Harajaan Ni Debata! 6:21 Martua ma hamu na male saonnari, harana pabutongon ma hamu muse! Martua ma hamu angka na tangis saonnari, harana gabe martata ma hamu muse! 6:22 Martua ma hamu muda goyak roha ni halak mida hamu jana nada dijagit hamu, boti dipalayas-layas jana didok halak na jahat hamu, hara ni Anak Ni Jolma i! 6:23 Muda masa songon i, angkon jop ma nian rohamunu manortori marmoga-moga, angke adong do upamunu na godang di banua ginjang. Angka panurirang pe najolo songon i do dibaen angka ompung ni halak on. 6:24 Tapi marjaya ma hamu na kayo saonnari on; harana madung didai hamu na tabo! 6:25 Marjaya ma hamu na butong saonnari on; harana, malean ma hamu! Marjaya ma hamu na martata saonnari on; harana, marsak ma rohamunu jana tangis. 6:26 Marjaya ma hamu muda sude halak mamuji hamu; angke songon i do angka panurirang panipu najolo dipapuji-puji angka ompung ni halahi." 6:27 "Tapi anggo tu hamu angka na umbege hatangKu saonnari on, on ma tonangKu tu hamu: Haholongi ma angka musumu, jana denggan ma pangalahomu tu angka na mangkagigihon ho. 6:28 Pasupasu ma na mamurai ho. Jana tangiangkon ma angka na mambaen na so patut tu ho. 6:29 Muda ditampeleng halak sabariba hurummi, padiar muse ma ditampeleng ia hurummu na sabariba nari. Muda dirampas abitmu, lehen muse ma dohot bajumi. 6:30 Muda dipangido halak sanga aha tu ho, lehen ma i disia; muda dirampas sinadonganmu, ulang pola pangido be i mulak. 6:31 Sanga aha por ni rohamu baenon ni halak tu ho, baen ma songon i tu halahi." 6:32 "Muda hum na mangkaholongi hamu sajo do dihaholongi hamu, aha ma he labomu disi? Angke pardosa i pe dihaholongi do angka na mangkaholongi halahi! 6:33 Jana muda hum tu angka na mambaen na denggan tu hamu sajo do denggan dibaen hamu, aha ma he labomu disi? Halak pardosa pe malo do mambaen songon i! 6:34 Muda hum tu halak na tarbaen manggarar sajo do dipainjamkon hamu hepengmunu, aha ma he labomu disi? Halak pardosa pe dipainjamkon do hepengna tu angka pardosa, dung i ditunggu halahi mangulahi! 6:35 Anggo sapatutna nada songon i! Anggo hamu angkon suhar-suhar ni i do. Angkon haholonganmunu do musumunu jana baen hamu ma na denggan tu halahi. Angkon lehenonmunu do manginjam jana ulang pola arop rohamunu dapotan garar mangulahi. Godang do dapot hamu upa ni i jana gabe anak ni Debata Na Gumincat i ma hamu. Angke anggo Debata, denggan do dibaen Ia maradopkon angka na so malo mandok tarimakasi, songon i muse laing denggan do dibaen Debata maradopkon halak na jahat. 6:36 Gabe parasi roha ma hamu, laing songon Amangmunu na marasi roha i!" 6:37 "Ulang ma hamu manguhumi, anso ulang diuhumi Debata hamu muse. Ulang ma pasalahon halak, anso ulang dipasala hamu: Sesa ma, anso disesa hamu. 6:38 Lehen hamu ma tu halak na asing, anso laing dilehen Debata muse tu hamu; jagiton ni tanganmunu ma silehen-lehen maruse-use na dung nisuhat di hamu. Angke parsuhatan na nipakemunu tu halak na asing, laing i do parsuhatan na nipake tu hamu." 6:39 Dung i dicaritohon Jesus ma tu halahi umpama on, "Tarbaen ma he na mapitung manogu na mapitung? Nada he madabu ma halahi na dua tu bagasan lubang? 6:40 Nada adong sisean na gumodang sian guruna. Tapi muda dung tammat marsiajar sisean i, na giot sarupa ma i dohot gurunia i." 6:41 "Biasi sai diparrohahon hamu silbak-silbak na di mata ni donganmu, hape na sabalok na di matamunu sandiri so diida hamu? 6:42 Bia ma pandokkonmu tu donganmu, 'Santabi jolo dongan, anso hubuat na sansilbak na menek na di matami', salang balok na godang na di matami sandiri so diida ho? O, pangalancap! Paruar ma jolo balok na godang na di matami sandiri, i pe anso tangkas diida ho laho mambuat na sansilbak na di mata ni donganmu." 6:43 "Anggo hayu na denggan nada diparbatuhon i parbatu na so hasaya. Songon i muse hayu na jatjat nada diparbatuhon i parbatu na denggan. 6:44 Sude hayu, sian parbatuna do nitanda. Nada diputik halak gala-gala sian tadatada sanga pe anggur sian sihupi. 6:45 Sada halak na denggan sai pangalaho na denggan do ro sian i, i ma simpan-simpanan na adong di bagasan ate-ate na denggan. Tapi sada halak na jahat sai pangalaho na jat do ruar sian i, i ma simpan-simpanan na di bagasan ate-ate na jat i. Angke sanga aha na manggohi roha ni jolma di bagasan ate-atena, sai i do dipardokkoni." 6:46 "Biasi dipio hamu Au, 'Tuhan, Tuhan,' hape so dioloi hamu na Hudok tu hamu? 6:47 Tu ise ma patudoson angka na ro tu Au jana na umbege hatangKu jana na patuluskonsa? Padiar ma Hupatuduhon tu hamu. 6:48 Songon na pajongjong bagas do i: Na mangkuar tano i bagas-bagas jana mambaen ojahanna di batu. Di na ro banjir ditondong aek magodang ma bagas i, nada tarunggalkon banjir bagas i, harana di ginjang ni ojahan na denggan do dipajongjong bagas i. 6:49 Tapi anggo halak na umbege hatangKi hape nada dipatulus ia, tudos ma halak sisongon i tu na pajongjong bagas di ginjang ni tano na so marojahan. Muda masa banjir manondong bagas i, nada pola maol unggal bagas i jana manigor ropuk do parsegona!"
7:1 Dung sidung didok Jesus hataNia sudena i tu halak na bahat i, kehe ma Ia tu Kapernaum. 7:2 Adong ma disi sahalak tentara Rom na pangkat. Adong muse do sahalak naposonia jana holong sajo do rohania midasa. Jadi marnyae ma naposonia i jabat giot mate. 7:3 Jadi dung dibege parpangkat i taringot tu Jesus, disuru ia ma angka hatobangon ni halak Jahudi mandapotkon Jesus laho mangidohon anso ro Jesus pamalumkon naposonia i. 7:4 Ro ma halahi tu Jesus, gomos ma dipangido halahi pangurupion sian Ia, ninna ma, "Tama do urupanMu ia, 7:5 "harana dihaholongi ia do bangsonta jana madung dipajongjong ia bagas paribadatan di hami." 7:6 Jadi kehe ma Jesus rap dohot halahi. Di na marayak lalu Jesus tu bagas i, disuru parpangkat i ma angka dongannia mandapotkon Jesus mandok tuSia, "Ulang pola jabat loja Tuan i! Hurang tama do au dapotkonon ni Tuan i di bagasku. 7:7 Hara ni i au pe nada tama ro manopotkon Tuan i, tapi hum sahata pe dokkon anso malum naposongki. 7:8 Harana au sandiri pe tunduk do tu parenta ni atasan, songon i muse adong do di torungku angka soridadu na tunduk tu parentangku. Muda huparentahon tu sada soridadu, 'Kehe!' angkon kehe do: Jana muda hudok tu soridadu na asing, 'Ro tuson!' ia pe angkon ro do. Jana muda hudok tu naposongku, 'Baen on!' angkon dibaen ia i." 7:9 Homang ma roha ni Jesus umbege i. Ditailihon Ia ma tu halak na bahat i na mangihutkon Ia, ning Ia ma, "Na hebat do bayo on. Salang di halak Israel nada unjung dope marsuo Au tu haporsayaan na songon haporsayaan ni bayo on!" 7:10 Jadi dung lalu angka na disuru i mulak tu bagas ni parpangkat i, madung malum naposo ni parpangkat i. 7:11 Nada sadia honok dung i, *NADA SADIA HONOK DUNG I: Dipiga-piga-piga naskah narobi, didok: Dung ancogotna i.* kehe ma Jesus tu kota Nain. Dohot angka anak siseanNia, songon i muse dohot halak na bahat kehe rap dohot Ia. 7:12 Di na lalu Jesus di horbangan ni kota i, adong ma halak na maroban sada na mate tu balian. Anak sasada ni na mabalu do na jumolo i. Bahat do marroan halak kota i mangudurkon ina na mabalu i. 7:13 Dung diida Jesus anak boru i, gabe ibo ma rohaNia midasa ning Ia ma, "Ulang be sai tangis ho inang!" 7:14 Dung i mangalangka ma Jesus saotik tu jolo manjama poti ni bangke i. Halak na maroban poti i pe gabe so ma halahi. Dung i didok Jesus ma, "O doli-doli, Au marsuru, ngot ma ho!" 7:15 Ngot ma doli-doli na mate i, juguk ia mangkobari. Dung i dipasahat Jesus ma ia tu inangna i. 7:16 Sude ma halak mabiar, dipuji halahi ma Debata. Ninna halahi, "Madung tarida sada panurirang na godang di tonga-tonganta! Madung ro Debata laho paluahon bangsoNia!" 7:17 Tarbonggal ma barita taringot tu Jesus di sude Luat Judea dohot di luat na humaliang i. 7:18 Dipaboa angka sisean ni si Johannes ma sude na masa i tu si Johannes. Gabe dipiohon si Johannes ma dua halak anak siseanNia i, 7:19 disuru ia ma halahi kehe mandapotkon Tuhan Jesus laho manyapai, "Ho do ulaning na giot ro i sanga adong dope halak na asing sipainteonnami?" 7:20 Sisean ni si Johannes na dua i pe kehe ma mandapotkon Jesus, jana didok halahi ma, "Na nisuru ni si Johannes Pandidi do hami manopot Ho, giot manyapai, Ho dehe na giot ro i, sanga halak na asing dope sipainteonnami?" 7:21 Jadi hatiha i topet ma Jesus pamalumkon bahat halak sian nyaena be. Dipaorot Jesus angka tondi na jahat, na mapitung pe gabe marnida dibaen Ia mangulahi. 7:22 Jadi dialusi Jesus ma suruan ni si Johannes i, ning Ia ma, "Kehe ma hamu, paboa hamu ma tu si Johannes sanga aha na niida dohot na nibegemunu: Marnida do angka na mapitung, mardalan na pangpangon, malum na huliton, marbinege na maingol, na dung mate mulak dipangolu jana Jamita Na Denggan dibaritahon tu angka na pogos. 7:23 Jana martua ma halak na so marganggu ni roha marnida Au!" 7:24 Dung kehe suruan ni si Johannes i gabe dipungka Jesus ma marcarito taringot tu si Johannes tu halak na bahat i. Didok Ia ma, "Na giot mangaligi aha dehe dibaen na kehe hamu mandapotkon si Johannes di halongonan? Arung na dumaol-daol na ni ombus ni alogo dehe? 7:25 Na mangaligi aha dehe hamu di balian i? Halak na marpakean na halus dehe? Anggo halak na marpakean na jeges dohot halak na mangolu marsonang-sonang di bagas godang ni raja do i. 7:26 Antong mangaligi aha do hamu umbaen na kehe hamu tu balian i? Sada panurirang do na niligimunu? Tutu, Hudok ma di hamu, na sumurung dope sian panurirang. 7:27 Angke taringot tusia adong do tarsurat, 'Ida ma, suruonKu ma suruanKi patujoloMu, na pauli dalanMu.' " 7:28 "Ingot hamu ma on, sian sude halak na jungada mangolu di tano on, nada adong be na gumodang sian si Johannes Pandidi. Tapi halak na ummenek di bagasan Harajaan Ni Debata, gumodangan dope i sian si Johannes Pandidi." 7:29 Sude halak na disi, na umbege na nidok ni Jesus i, dohot ma i angka sitagi pajak, dihaporsayai halahi do hatigoran ni Debata, harana madung dilehen halahi dirina dipandidihon si Johannes. 7:30 Tapi anggo halak Parise dohot angka Siboto Surat nada ra be halahi manjagit sangkap ni Debata tu halahi. Nada ra halahi dipandidihon si Johannes. 7:31 Dung i mandok hata ma Jesus mangulahi. Ning Ia ma, "Tu aha ma ulaning Hupatudos halak na sasundut on? Tudos tu aha ma halahi? 7:32 Tudos tu angka dakdanak do halahi na juguk di onan jana na pio-pio tu donganna mandok, 'Madung hami endehon ende ni na marbagas di hamu, hape so ra hamu manortori! Hami endehon pe ende ni na matean, hape so ra hamu tangis mangandungi!' 7:33 Ro ma si Johannes Pandidi -- ia ma na puaso -- jana na so minum anggur -- hape didok hamu, 'Na nisonggopan ni Sibolis do ia!' 7:34 Dung i ro ma Anak Ni Jolma i -- mangan do Ia jana minum -- gabe didok hamu, 'Ligi ma jolo Ia, na songkal, parminum, dongan ni sitagi pajak jana dongan ni halak pardosa.' 7:35 Tapi diparhatutu sude halak na manjagitsa do hapistaran i." 7:36 Adong ma sada halak Parise mangontang Jesus tu bagasnia. Kehe ma Jesus tu bagas ni halak Parise i jana juguk Ia jana mangan disi. 7:37 Adong muse do di kota i sada dadaboru pardosa. Jadi dung tarbege tusia ro Jesus jana topet mangan di bagas ni halak Parise, ro ma ia maroban sada galas pualam na marisi miak na huskus. 7:38 Jongjong ma ia di pudi ni Jesus di lambung patNa i, tangis ma ia disi, ditombur ia ma pat ni Jesus dohot ilunia, asa diapusi ia ma i dohot obukna, dung i diumma ia ma i jana diusehon ia ma miak na huskus i. 7:39 Dung diida halak Parise na mangontang Jesus i pangalaho i didok ia ma di bagasan rohania, "Sugari tutu panurirang Ia, tontu angkon diboto Ia do sanga ise satutuna dadaboru na manjama Ia i; tontu diboto Ia muse do ngolu ni dadaboru on, na mardosa sajo!" 7:40 Dung i ninna Jesus ma tu si Simon, "Adong na giot dohononKu tu ho Simon." "Denggan, didok Guru i ma," ning si Simon. 7:41 Ninna Jesus ma, "Adong ma dua halak na marutang tu bayo parutangan. Na sada marutang ma tusia lima ratus hepeng perak, jana na sahalak nari lima pulu hepeng perak. 7:42 Nada targarar halahi na dua utang ni halahi i. Gabe disesa bayo parutangan i ma utang ni halahi na dua. Antong, ise ma sian halahi na dua na humolong rohana mida na painjamkon hepeng i?" 7:43 "Anggo ninna rohangku, bayo na umbahat i utangna!" ning si Simon mangalusi. "Tutu do na nidokmi," ninna Jesus. 7:44 Dung i ditailihon Jesus ma tu dadaboru i, didok Ia ma tu si Simon, "Diida ho dehe anak boru on? Di na ro Au tu bagasmon, umpe adong aek diparade ho parbasuan ni patKu; hape anggo anak boru on madung dibasu ia patKu dohot ilu ni matania, jana dipahiang ia dohot obuknia. 7:45 Nada diumma ho Au, hape anggo anak boru on nada maradian ia mangummai patKu dung do ro Au tuson. 7:46 So adong dibaen ho miak tu ulungKu, hape anggo anak boru on miak na huskus do diusehon ia tu patKu. 7:47 Hudok ma di ho: Holong ni rohania na songon i godang na nipatuduhonnia, i ma tandana bahaso na dung disesa dosania na bahat i! Muda nisesa dosa ni sada halak jana otik sajo do dosania, laing otik muse do holong ni roha tarpatuduhon ia." 7:48 Dung i didok Jesus ma tu dadaboru i, "Madung disesa sude dosami." 7:49 Mamungka marsipandohonan ma angka halak na asing na dohot juguk mangan disi, "Ise dehe Indon jabat tarsesa Ia dosa?" 7:50 Tapi didok Jesus ma tu dadaboru i, "Haporsayaanmu do na paluahon ho, kehe ma ho di bagasan hahorasan!"
8:1 Nada sadia honok dung i, mardalani ma Jesus tu angka kota dohot huta-huta i. Dijamitahon Ia ma disi Jamita Na Denggan taringot tu Harajaan Ni Debata. Dohot ma dua bolas halak siseanNia i laho mandongani Ia. 8:2 Songon i muse angka dadaboru na dung dipamalum sian angka tondi na jahat dohot nyae. I ma si Maria na nigoaran muse si Magdalena (pitu begu dipaorot sian ia); 8:3 dohot si Johanna daboru ni si Khusa, bendahara ni Raja Herodes; si Susanna, bahat dope tehe daboru na asing. Halahi sandiri do na pasingkop na hasaya di Jesus rap dohot angka siseanNia i. 8:4 Torus do marroan halak mandapotkon Jesus sian angka kota na marragam. Dung bahat sajo halak marlagut, dicaritahon Jesus ma umpama on tu halahi. 8:5 Ning Ia ma, "Adong ma sada halak, na kehe manyabur same. Jadi hatiha na manyabur i ia, adong ma same i na madabu di dalan i, gabe didege-dege halak ma i jana dipapangani unggas. 8:6 Adong muse ma na madabu tu tano na marbatu-batu. Di na mamungka haruar tumburna manigor malos ma suan-suanan i, angke mahiang do tanona i. 8:7 Adong muse ma same i na madabu tu tonga-tonga ni angka duri. Mur magodang ma angka duri i rap dohot angka same na tubu i. 8:8 Tapi adong muse do same na madabu tu tano na napu, gabe tubu ma i jana marsuha ma saratus lompit." Dung i dipaujung Jesus ma umpamania i songon on, "Sanga ise na marpinggol laho marbinege, ditangihon ia ma!" 8:9 Disapai angka siseanNia i ma tu Jesus astuan ni umpama i. 8:10 Ninna Jesus ma mangalusi, "Madung dilehen anggo di hamu parbinotoan laho umboto sibunian ni Harajaan Ni Debata. Tapi anggo tu halak na asing mamake umpama do dipaboa taringot tusi, anso ulang diida halahi haru pe nian manaili halahi; haru pe marbinege halahi tapi nada mangarti." 8:11 "Ondo astuan ni umpama i: Same i, i ma hata ni Debata. 8:12 Same na madabu tu dalan i, manggambarkon angka halak na manangihon hata i. Tapi ro ma Sibolis mangarampas hata i sian roha ni halahi anso ulang porsaya jana nipalua halahi. 8:13 Same na madabu tu tano na marbatu i, i ma manggambarkon angka halak na manangihon hata i jana na manjagitsa mardongan sonang ni roha. Tapi nada jabat marurat di bagasan roha ni halahi. Hum santongkin sajo do halahi porsaya hape di na ro pandugaan, marbalik ma halahi. 8:14 Same na madabu tu tonga-tonga ni duri i, manggambarkon angka halak na manangihon hata i tapi ganggu do roha ni halahi jana por roha ni halahi di sinadongan boti lungun roha ni halahi marsonang-sonang di tano on. Sudena ma i mangkapit halahi mambaen halahi nada marbatuhon parbatu na matoras. 8:15 Same na madabu tu tano na napu i, i ma manggambarkon angka halak na umbege hata i, jana na manjagohon sadenggan-dengganna di bagasan roha ni halahi. Burju do halahi jana sobar, gabe tulus ma marbatuhon parbatu na denggan." 8:16 "Nada adong halak manutung lampu, dung i ditungkupi muse dohot ampang, sanga pe dipayakkon di toru ni podoman. Di inganan ni lampu do dibaen lampu, anso diida na ro tu bagas i sondangna i. 8:17 Angke nada adong bagi aha na buni, na so haidaan muse, jana nada adong na simo na so diboto halak muse, angkon tarboto do i jana dipapatar. 8:18 Antong parrohahon hamu ma tangkas sanga songon dia parbinegemunu. Angka halak na dung marnampuna, nitambaan muse dope disia. Tapi halak na so adong diha-dihana, dibuat muse dope sian ia sanga aha na nietongnia adong disia." 8:19 Ro ma inang ni Jesus dohot angka anggiNia mandapotkon Jesus. Tapi nada tarbaen halahi marsuo dohot Ia hara ni bahat ni halak. 8:20 Dung i adong ma sada halak paboahon tu Jesus. "Di ruar an do inaMu dohot anggiMu. Giot marsuo halahi dohot Ho." 8:21 Tapi didok Jesus ma tu halahi sude, "Angka halak na umbege hata ni Debata jana na mamarangehonsa, i do Dainang dohot anggingKu." 8:22 Di na sadari marparau ma Jesus dohot angka siseanNia i. Ning Jesus ma tu halahi, "Taripar ma jolo hita tu bariba ni dano on." Dung i kehe ma halahi marparau. 8:23 Hatiha na marparau i halahi tarpodom ma Jesus, jana mangombus ma alogo na gogo di dano i. Masuk muse ma aek tu bagasan parau i gabe di parmaraan ma halahi sude. 8:24 Kehe ma angka siseanNia i mandapotkon Jesus mangngoti Ia. Ning halahi ma, "O, Guru! Guru! Marmara ma hita on!" Ngot ma Jesus, digorahon Ia ma alogo dohot aek ni dano na marombak i. Alogo i pe dohot aek ni dano i nada marombak be jana gabe so ma sudena. 8:25 Dung i ninna Jesus ma tu angka siseanNia i, "Di dia do haporsayaanmunu?" Mabiar ma halahi boti homang-homang sajo. Didok halahi ma sama halahi, "Ise do ulaning on? Alogo dohot ombak pe tarparenta Ia. Patu muse do alogo dohot ombak i tuSia!" 8:26 Ditoruskon Jesus ma dohot angka siseanNia i marparau lopus tu Luat Gerasa *GERASA: Dipiga-piga-piga naskah narobi, didok: Gadara sanga Gergesa.* di ipar ni Dano Galilea sabola Habincaran. 8:27 Dung mijur Jesus tu darat, didapotkon sada bayo na hona tondi na jahat ma Ia. Na ro sian kota i do bayo i. Honok ma nada ra marpakean jana nada ra tinggal di bagas bayo i. Hum na di liang ni kuburan ma ia. 8:28 Di na niidania Jesus, mangangguhi ma ia jana marsomba di jolo ni Jesus, marsurak ma ia, "O, Jesus Anak Ni Debata Na Guminjang! Na giot mahua do Ho tu au? Gomos ma hupangidohon, ulang ma parkanciti au!" 8:29 Umbaen na nidok ni bayo i pe songon i, hara ni na dung dipaorot Jesus do tondi na jahat i ruar sian ia. Bahat sajo tondi na jahat i na manggosa-gosa bayo i. Jadi haru dirante pe tangannia dohot patna i jana dijagoi dope ia, laing tarruntaskon ia do rante i gabe dioban setan i ma ia tu halongonan. 8:30 Disapai Jesus ma tu bayo i, "Ise goarmu?" " 'Legion' do goarku," ning bayo i -- angke bahat do tondi na jahat na masuk tusia. 8:31 Gomos ma dipangido angka tondi na jahat i, anso ulang dipaisir Jesus halahi tu banua toru. *BANUA TORU: Anggo pandapot ni halak, di banua toru do inganan ni angka tondi na jahat. Disi ma halahi lopus abis masa uhumanna.* 8:32 Donok tu inganan i, adong do babi bahat sajo, na topet mangugei di dolok i. Gomos ma dipangido angka tondi na jahat i anso dipaloas Jesus halahi masuk tu angka babi i. Gabe dipaloas Jesus ma. 8:33 Dung i ruar ma angka tondi na jahat i sian bayo i, masuk ma halahi tu angka babi i. Maturubus ma angka babi i sian rahis-rahis i tu dano an, gabe mate marmogapan sudena. 8:34 Diida angka parmahan babi i ma na masa i. Gabe marlojongi ma halahi tu kota dohot tu huta na humaliang i, dicaritohon halahi ma sudena i. 8:35 Markehean ma halak giot mangaligi sanga aha na masa i. Didapotkon halahi ma Jesus, dung i diida halahi ma disi bayo na nitadingkon ni tondi na jahat i juguk di lambung pat ni Jesus. Madung denggan ia marpakean, pikirannia pe madung torang. Gabe mabiar ma halahi sude. 8:36 Jadi dicaritahon halak na midaan i ma tu angka jolma i pangalahona parmalum ni bayo i. 8:37 Dung i gomos ma dipangido sude halak na di Luat Gerasa i tu Jesus, anso morot Ia sian inganan i, hara ni santakna biar ni halahi sude. Dung i marparau ma Jesus laho mulak. 8:38 Dung i gomos ma dipangido bayo na nitadingkon ni tondi na jahat i anso laing tola ia rap dohot Jesus. Tapi disuru Jesus ma ia kehe, ninna ma, 8:39 "Kehe ma ho mulak tu bagasmu jana baritahon ma sanga aha na dung dipatupa ni Debata tu ho." Jadi kehe ma bayo i paboahon sanga na tudia di kota i sude, taringot tu na nibaen ni Jesus tusia. 8:40 Jadi dung mulak Jesus bahat do halak mangalo-alo Ia, dibaen madung tarpainte-inte halahi diSia. 8:41 Dung i ro ma sahalak kapala ni bagas paribadatan di kota i, si Jairus goarna. Marsomba ma ia di jolo ni Jesus jana dipangido ia ma gomos tu Jesus anso ro nian Jesus tu bagasnia, 8:42 dibaen giot mate ne ma borunia na dung marumur dua bolas taon. Hum sada i muse do borunia. Tapi di na mardalan Jesus laho tu bagas ni si Jairus, marsisosak di ibana ma halak tuSia. 8:43 Adong ma disi sahalak anak boru na sai ro bulanna ma jabat dua bolas taon. Madung abis sinadongannia dipake ia manggarari pangubati *MADUNG ABIS SINADONGANNIA DIPAKE IA MANGGARARI PANGUBATI: Dipiga-piga naskah narobi nada adong hata on.* hape nada adong na tolapsa pamalumkon ia. 8:44 Disolat anak boru i ma sian tonga-tonga ni halak na bahat i lopus lalu ia tu pudi ni Jesus. Jadi dijama ia ma topi ni baju juba ni Jesus. Ompot ma pantan bulanan ni anak boru i. 8:45 Dung i didokkon Jesus ma, "Ise dehe, na manjama Au i?" Dung sude halak mansoadahon, ninna si Petrus ma, "Guru, bahat do halak mangarongomi jana marsisosak be tu Guru i!" 8:46 Ninna Jesus ma, "Tapi adong do halak na manjama Au. Huboto do i, angke adong hagogoon na ruar sian Au." 8:47 Diboto anak boru i ma na dung tarboto pangalahonia i. Jadi ro ma ia tu jolo ni Jesus hitir-hitir marsomba. Dipaboa ia ma di jolo ni halahi sude sanga hara ni aha umbaen dijama ia Jesus, dohot nyaenia sanga tarbia parmalumna manigor santongkin i. 8:48 Didok Jesus ma tusia, "Madung dipamalum haporsayaanmi ho da inang. Kehe ma ho, dibagasan sonang!" 8:49 Dompak na mangkatai i dope Jesus, lalu ma suruan sian bagas ni si Jairus kapala ni bagas paribadatan i. Didok Ia ma tu si Jairus, "Indangkon be nipasusa Guru i, harana madung jumolo dakdanak ni bapa i." 8:50 Dibege Jesus do na nidok ni bayo i. Gabe didok Jesus ma tu si Jairus, "Ulang ho mabiar, salaku porsaya sajo ma ho, malum do dakdanakmi." 8:51 Dung lalu Jesus tu bagas ni si Jairus, nada dipatola Jesus umpe sahalak masuk rap dohot Ia; hum si Petrus, si Johannes, si Jakobus dohot natoras ni dakdanak i sajo ma na dipaloas masuk. 8:52 Martangisan ma sude halak jana marsak be rohana hara ni parmate ni dakdanak i. Mandok hata ma Jesus, "Ulang hamu tangis. Inda na mate dakdanak on. Hum na modom do i!" 8:53 Gabe dipartatai halahi ma Jesus, angke tangkas do diboto halahi na dung mate dakdanak i. 8:54 Dung i digolom Jesus ma tangan ni dakdanak i, ning Ia ma, "Ngot ma ho inang!" 8:55 Mangolu ma dakdanak i, jana manigor jongjong. Dung i disuru Jesus ma halahi mangalehen mangan tu dakdanak i. 8:56 Homang sajo ma roha ni natoras ni dakdanak i. Tapi dirarang Jesus ma halahi anso ulang dipaboa-boa na masa i sanga na tu ise pe.
9:1 Dipiohon Jesus ma siseanNia sidua bolas halak i marlagut. Dilehen Ia ma gogo dohot kuaso tu halahi giot mangusir tondi na jahat dohot pamalum nyae. 9:2 Dung i disuru Ia ma halahi anso kehe pasarkon barita taringot tu Harajaan Ni Debata dohot pamalumkon halak na marnyae. 9:3 Jadi ninna Jesus ma tu halahi, "Ulang oban hamu sanga aha di pardalananmunu, sanga tungkot, sanga huncang, sanga sipanganon, sanga hepeng, sanga dua pakean pe. 9:4 Jana muda dijagit do hamu di sada-sada bagas, tinggal ma hamu disi lopus tu na kehe hamu muse. 9:5 Dung i, muda nada dijagit halak hamu, paspaskon hamu ma abuan na di patmunu i di na laho morot hamu sian kota i anso gabe tanda ma i laho paingotkon halahi." 9:6 Kehe ma halahi mangaliati angka huta laho manjamitahon Jamita Na Denggan, jana pamalum angka na marnyae. 9:7 Dibege si Herodes, gubernur ni Galilea ma taringot tu sude na masa i, gabe sak ma rohania. Harana adong do halak na mandok, "Madung mulak mangolu si Johannes Pandidi!" 9:8 Adong muse halak na asing mandok, madung tarida si Elia mangulahi. Na asing muse mandok, sahalak sian angka panurirang narobi madung mulak mangolu. 9:9 Ning si Herodes ma, "Madung hugotap ulu ni si Johannes. Tapi ise do satutuna Indon? Madung bahat nian na hubege taringot tuSia." Gabe diusahahon ia ma giot marnida Jesus. 9:10 Mulak ma angka rasul ni Jesus i jana dicaritohon halahi ma tu Jesus sude na dung dikarejohon halahi. Dung i dioban Jesus ma halahi tu sada kota na margoar Betsaida. 9:11 Jadi di na tarboto pangalaho i di halak na bahat, diihutkon halahi ma Jesus. Dijagit Jesus ma halahi, lalu dihobarkon Ia ma taringot tu Harajaan Ni Debata tu halahi. Laing dipamalum Ia muse dope angka halak na marnyae. 9:12 Jadi dung marayak borngin ari, ro ma siseanNia sidua bolas halak i tu Jesus jana didok halahi ma, "Suru ma halak na bahat i kehe, anso marsijalahi panganonna dohot parbornginanna be halahi di angka huta dohot pagaran na humaliang on. Angke inganan na lungun do on." 9:13 Didok Ia ma, "Nada, angkon lehenonmunu do halahi mangan." Dialusi sisean ni Jesus sidua bolas halak i ma, "Hum limang kibung roti dohot dua ihan do na adong di hami; lobi sian i inda adong be. Asing ma rupani muda angkon kehe hami manobusi panganon di halak on sude!" 9:14 (Adong do hira-hira lima ribu halaklahi disi.)Didok Jesus ma tu angka siseanNia i, "Suru hamu ma halahi juguk marsasapunguan, lima pulu halak sapunguan." 9:15 Dibaen sisean ni Jesus i ma songon na nidok ni Jesus i. Disuru halahi ma sude angka jolma i marjuguhan. 9:16 Dibuat Jesus ma roti na lima i dohot ihan na dua i, ditatap Ia ma tu langit jana didok Ia ma tarimakasi tu Debata. Dibolai Ia ma dohot tanganNia roti i, songon i dohot ihan i, dung i dilehen Ia ma tu angka siseanNia i anso dibagihon tu halak na bahat i. 9:17 Mangan ma halahi sude lopus butong be. Dung i dipalagut angka siseanNia i ma teba-teba na nitinggalkon ni halak na bahat i. Bubung ma dua bolas ampang sude. 9:18 Di sada ari hatiha martangiang Jesus sada Ia, ro ma angka siseanNia mandapotkon Ia. Disapai Jesus ma tu halahi, "Ise dehe Au, didok halak?" ning Ia. 9:19 Dialusi halahi ma, "Si Johannes Pandidi do Ho. Tapi adong muse do na mandok, si Elia do Ho. Laing adong muse dope na mandok, sahalak sian angka panurirang narobi na mulak mangolu do Ho." 9:20 "Muda pandokmunu ise ma Au?" ning Jesus manyapai. Dialusi si Petrus ma, "Ho do Kristus i na sian Debata!" 9:21 Dung i didok Jesus ma tu angka siseanNia i, "Ulang paboa-boa hamu sanga aha taringot tusi sanga na tu ise pe. 9:22 Anggo Anak Ni Jolma i, tutu do Ia angkon markancit jana dialo angka pamimpin dohot angka sintua ni malim, songon i angka Siboto Surat Jahudi. Dibunu ma Ia, tapi mulak mangolu do Ia di ari patoluhon." 9:23 Dung i mandok hata ma Jesus tu halak na bahat i, ning Ia ma, "Sanga ise na giot mangihutkon Au, angkon porsoonnia do dirina, angkon porsanonnia ma hayu parsilangnia ganop ari, jana torus mangihutkon Au. 9:24 Harana agoan ngolu do sanga ise na giot mampartahankon ngoluna. Tapi halak na agoan ngolu hara ni Au, i do na dapotan ngolu. 9:25 Aha ma he gunana di halak, muda sude portibi on gabe nampunania, hape gabe hararugi jana mambaen mago ia sandiri? 9:26 Muda adong na maila hara ni Au jana maila hara ni pangajaranKu di adopan ni halak na asing, maila muse ma Anak Ni Jolma i mangokui halak sisongon i di haroroNia saulahon mardongan hasangapanNia, jana mardongan hasangapan ni Amangnia, songon i dohot hasangapan ni angka surusuruan na badia! 9:27 Na tutu do na Hudok on tu hamu: Adong do sian angka na jongjong dison na so mate anggo so jolo marnida Harajaan Ni Debata." 9:28 Dung adong tar sapoken dung diajarkon Jesus taringot tusi, dioban Ia ma si Petrus, si Johannes dohot si Jakobus tu ginjang ni sada dolok laho martangiang. 9:29 Dompak na martangiang Jesus disi muba ma tompaNia jana pakeanNia gabe bontar marsinondang. 9:30 Ompot ma tarida dua halak mangkatai dohot Jesus, i ma si Musa dohot si Elia. 9:31 Di bagasan hamuliaonna do halahi na dua mangkatai, i ma taringot tu parkeheNa, na giot patulusonNia di Jerusalem. 9:32 Sinok do modom anggo si Petrus dohot angka dongannia. Jadi dung tarsunggul halahi, diida halahi ma hasangapan ni Jesus dohot bayo sidua halak i na jongjong dohot Ia. 9:33 Dung i di na laho kehe sidua halak i maninggalkon Jesus, didok si Petrus ma tu Jesus, "Gurunami, sonangna i hita dison! Hami baen ma tolu undung-undung; sada di Ho sada di si Musa jana sada nari di si Elia." (Nada diboto si Petrus sanga aha na nidoknia i.) 9:34 Dompak na mangkatai songon i dope si Petrus, tarida ma ro ombun na mangalinggomi si Petrus, si Johannes dohot si Jakobus. Santak biar ni halahi di na nilinggoman ni ombun i halahi. 9:35 Dung i tarbege ma sian ombun i sada sora na mandok, "On ma AnakKu na Hutodo i. Tangihon ma Ia!" 9:36 Jadi, di na tarbege sora i, hum sasada Jesus do tarida. Dipahohom angka anak sisean i ma i, nada dipaboa halahi dompahi tu barang ise pe na niida ni halahi. Dipahohom halahi do taringot tusi. 9:37 Dung torang ari manuat ma halahi sian dolok i, marroan muse ma halak na bahat mandapotkon Jesus. 9:38 Adong ma sian tonga-tonga ni halak na bahat i sada bayo na marsurahi, mandok, "O Guru, tolong ma jolo ligi dakdanakku, angke hum sasada i do anakku! 9:39 Adong do begu manggosa ia, gabe sai ompot ma mangangguhi, martoltolan ma pamatangna i lopus margubo-gubo pamanganna i. Hancit dihilala ia. Nada ra morot begu i sian anakki! 9:40 Madung nian hupangido anso diusir anak siseanMi begu i, tapi nada tolap halahi." 9:41 Dialusi Jesus ma, "O, hamu angka pomparan na so porsaya jana na lilu! Olat ni andigan pe angkon rap Au dohot hamu jana sai sobar tu hamu? Oban ma tuson anakmi!" 9:42 Jadi hatiha mardalan dakdanak i laho mandapotkon Jesus, digosa setan i ma ia, dung i martoltolan ma pamatangna i. Tapi disonggak Jesus ma begu i jana dipamalum Ia ma dakdanak i. Dung i dipasahat ma dakdanak i mangulahi tu amangna i. 9:43 Homang-komang ma sude halak marnida kuaso ni Debata na songon i godangna. Jadi hatiha homang-komang dope halahi marnida sude na nibaen ni Jesus i, didok Jesus ma tu angka siseanNia i, 9:44 "Tangkas ma parrohahon hamu na Hudok on: Pasahaton ma Anak Ni Jolma i tu kuaso ni jolma." 9:45 Nada diastui halahi i sanga aha maksud ni Jesus. Nian na dirahasiahon do tu halahi taringot tusi umbaen na so diastui halahi maksudna. Tapi halahi pe mabiar laho manyapaisa tu Jesus. 9:46 Masa ma partongkaran di sisean ni Jesus taringot tu sanga ise na gumodang sian halahi. 9:47 Diboto Jesus do pikiran ni halahi, jadi dipiohon Ia ma sada dakdanak, dipajongjong Ia ma di lambungNia. 9:48 Dung i didok Ia ma tu halahi, "Sanga ise na manjagit dakdanak on hara ni Au, dos do i dohot na manjagit Au. Dung i, sanga ise na manjagit Au, sarupa do i na manjagit na marsuru Au muse. Angke sanga ise na ummenek sian hamu, ia do na gumodang!" 9:49 Didok si Johannes ma, "Hami ida adong halak na mangusir setan mamake goarMu, dung i hami antahi anso ulang didatdati ia, harana nada donganta ia." 9:50 Didok Jesus ma, "Ulang antahi hamu halahi, angke halak na so mangalo hamu, na mamihak tu hamu do i." 9:51 Dung donok hatihana giot manaek Jesus tu banua ginjang, diadopkon Ia ma bohiNia tu Jerusalem laho kehe tusi. 9:52 Dung i disuru Ia ma angka suruan di joloNia, jadi dung kehe halahi, bolkas ma halahi tu sada huta ni halak Samaria laho mangkobasi sandok na porlu di Jesus. 9:53 Tapi nada ra halak huta i manjagit Jesus, hara ni na giot tu Jerusalem do Ia. 9:54 Jadi dung diboto angka sisean ni Jesus, i ma si Jakobus dohot si Johannes pangalaho na songon i, gabe didok halahi ma, "Bia do Tuhan, ra do Ho muda hami pangido anso madabu api sian langit manyurbu sude halak na sahuta on?" *Dipiga-piga naskah narobi adong dope hata on: Songon na nibaen ni si Elia.* 9:55 Ditailihon Jesus ma tu pudi, dimuruhi Ia ma halahi. *Dipiga-piga naskah narobi adong dope hata on: Jana didok ma, "Nada diboto hamu Tondi dia na mangarajai hamu; harana nada na giot mangago tondi ni jolma umbaen na ro Anak Ni Jolma i, tapi na giot paluahon do."* 9:56 Dung i gabe tu huta na asing ma halahi kehe. 9:57 Dompak na patoruskon sidalanan i Jesus dohot angka siseanNia i, adong ma sada halak na mandok tu Jesus. "Ihutkononku do Guru i, sanga tu dia pe kehe Guru i!" 9:58 Dialusi Jesus ma, "Marliang do sorigala, unggas pe adong do asarna, tapi anggo Anak Ni Jolma i, nada adong inganan hapayahan ni uluNa." 9:59 Dung i didok Jesus ma muse tu sada bayo na asing, "Ihutkon ma Au." Tapi didok bayo i ma, "Paloas ma au jolo mulak, laho mananom damang." 9:60 Dialusi Jesus ma, "Padiar ma halak na mate mananom na matena sandiri. Tapi anggo ho, kehe ma ho pararatkon Harajaan Ni Debata." 9:61 Adong muse ma sahalak na asing mandok, "Au pe ra do mangihutkon Tuan i, tapi paloas ma jolo au markata partinggal tu dongan sabagasku." 9:62 Tapi didok Jesus ma: "Halak na mangaluku, tapi huhut mangaligi tu pudi nada patut ia tu Harajaan Ni Debata."
10:1 Dung i dipili Jesus ma muse pitu pulu *PITU PULU: Dipiga-piga-piga naskah na robi didok: Pitu pulu dua.* halak nari. Disuru Ia ma halahi mardua-dua halak manjoloi Ia tu sude kota dohot inganan na giot topotonNia. 10:2 Jadi didokkon Ia ma tu halahi, "Bahat do nian sisabion, tapi otik do anggo parkarejo, hara ni i pangido hamu ma di Nampuna sabion i anso disuru Ia parkarejo tu sabionNa i. 10:3 Antong kehe ma hamu. Songon biri-biri na nisuru tu tonga-tonga ni sorigala do Husuru hamu. 10:4 Ulang oban hamu huncang sanga inganan ni hepeng, sanga pe sipatu. Ulang pola jalang hamu halak di tonga dalan. 10:5 Muda masuk hamu tu sada bagas manigor dokkononmunu ma, 'Hasonangan ma di bagas on.' 10:6 Jadi muda adong disi na patut manjagit hasonangan i, jadi tinggal ma hata horas-horasmunu i disi. Tapi muda nada, mulak do hata horas-horas i tu hamunu. 10:7 Di bagas i ma hamu tinggal. Jagit hamu ma sanga aha na niparade tu hamu disi, harana angkon dilehen do upa ni halak na markarejo. Ulang kehe hamu sian bagas na sada tu bagas na asing. 10:8 Muda masuk hamu tu sada kota, denggan panjagitonna tu hamu disi, pangan hamu ma sanga aha na diparade tu hamu. 10:9 Pamalum hamu ma angka na marnyae na di kota i, jana dokkon hamu ma tu angka halak na disi, 'Madung donok tu hamu, Harajaan Ni Debata.' 10:10 Tapi muda masuk hamu tu sada kota hape nada dijagit hamu disi, kehe ma hamu tu angka dalan godang na di kota i jana dok hamu ma, 10:11 'Abuan ni hutamunu on pe na lohot di patnami, hami paspaskon ma di jolomunu. Tapi ingot hamu ma bahaso madung donok Harajaan Ni Debata!' 10:12 Hudok ma di hamu: Umnayang do uhum na tu halak Sodom di ari parpudi, ulang pado kota na songon i!" 10:13 "Marjaya do ho Khorasim! Marjaya do ho ale Betsaida! Sugari di kota Tirus dohot Sidon dipamasa angka hahomangan na di pamasa di tonga-tongamunu pasti madung tibu halahi pauba rohana jana marsak angka jolma na disi di hatiha i. 10:14 Tapi umnayang do uhum na tu Tirus dohot Sidon di ari parpudi ulang pado tu hamu. 10:15 Dohot Kapernaum! Ning rohamu paginjangon ma ho lakna lalu tu banua ginjang? Nada! Ambungkonon noma ho tu banua toru!" 10:16 Dung i mandok hata ma Jesus tu angka siseanNia, "Angka halak na manangihon na nidokmunu sarupa do i tu na manangihon sanga aha na Hudok tusia. Halak na so ra manjagit hamu, laing na so ra manjagit Au do i. Jana halak na so ra manjagit Au, sarupa do i tu na so ra manjagit na marsuru Au." 10:17 Mulak ma sisean ni Jesus sipitu pulu halak *SIPITU PULU HALAK: Dipiga-piga-piga naskah narobi didok: Pitu pulu dua.* i marjop ni roha situtu. "Tuhan, sudena, lopus tu angka setan gabe mangoloi do tu hami muda hami parenta halahi mangasahon goarMu!" 10:18 Dialusi Jesus ma, "Huida do madabu Sibolis sian langit songon hilap. 10:19 Ingot hamu ma! Madung dijagit hamu kuaso sian Au laho mandegei ulok dohot hala, songon i muse kuaso laho manaluhon sude kuaso ni musu. Jana umpe sada na tarbaen mangkahua hamu. 10:20 Haru pe songon i, ulang marjop ni roha hamu hara ni na nioloan ni angka tondi na jahat hamu, tapi gumonan ma marjop ni roha hamu hara ni na dung tarsurat goarmunu di banua ginjang." 10:21 Laing di hatiha i muse, marjop ni roha ma Jesus di bagasan Tondi Parbadia, jana mandok, "Hupuji do Ho Amang, Tuhan ni langit dohot tano, dibaen dibunihon Ho do i adop angka na pistar dohot na marroha, tapi dipapatar Ho do i tu angka halak na menek. Olo, ale Amang, songon i ma antong hagiot ni Damang sandiri." 10:22 "Madung dipasahat Damang do sudena tu Au. Jana umpe adong sahalak na mananda Anak i, hum Damang do na manandasa. Songon i muse ma, nada adong na mananda sanga ise Ama i, hum Anak i do na manandaSa; dohot halak na gabe lomo ni roha ni Anak i laho patandahon Damang tu halahi." 10:23 Dung i manaili ma Jesus tu angka siseanNia i lalu didok Ia ma tu halahi sajo, "Martua ma mata na marnida sanga aha angka na dung niidamunu on. 10:24 Hara ni i ingot ma: Bahat do angka panurirang dohot raja na malungun marnida na niidamunu saonnari on hape nada tarbaen halahi marnidasa. Lungun sajo do roha ni halahi umbege on, hape nada tarbaen halahi be umbegesa." 10:25 Dung i jongjong ma sahalak Siboto Surat laho mangunjuni Jesus, ning ia ma manyapai, "Guru, aha ma he sibaenonku anso dapot au ngolu na manongtong?" 10:26 Dialusi Jesus ma, "Bia dehe tarsurat di Buku Na Badia i? Aha do disise ho disi?" 10:27 Mangalusi ma bayo i, "Angkon holong do rohamu di Tuhan Debatamu sian sandok ate-atemu, sian sandok rohamu, sian sude gogomu, dohot sian sandok pikiranmu. Jana, angkon holong do rohamu di donganmu jolma songon pangkaholongimu di dirimu sandiri." 10:28 Didok Jesus ma, "Tutu do alusmi. Baen ma songon i, gabe mangolu ma ho." 10:29 Tapi na giot patigor diri do Siboto Surat i. Marsapa ma ia, "Ise do satutuna na tardok, dongan jolma?" 10:30 Dialusi Jesus ma, "Adong ma sada bayo manuat sian Jerusalem tu Jeriko. Di tongan dalan ro ma panyamun manangkup ia. Dipupusi panyamun i ma ia, dibalbali lopus giot mate, dung i ditinggalkon ma ia songon i sajo. 10:31 Jadi topet ma mamolus sada halak malim disi. Dung diida malim i bayo i, manopi-nopi ma ia jana dilaosi ia. 10:32 Songon i muse ma sada halak Levi. Mamolus muse ma ia sian i jana diida ia do bayo na tarsamun i. Laing dilaosi ia muse do bayo i, dibolus ia sian ipar ni dalan i. 10:33 Tapi adong muse ma sada halak Samaria na mamolus disi. Dung diida ia bayo i gabe ibo ma rohania midasa. 10:34 Dipadonok ia ma tu bayo i, dung i dibaen ia ma miak dohot anggur tu bugang ni bayo i, jana dibaluti ia ma na mabugang i. Dung i dipajuguk ia ma bayo i tu halodenia sandiri, laho maroban tu bagas parbornginan, disi ma dipature-ture ia. 10:35 Ancogotna i diparuar ia ma dua hepeng perak, dilehen ia ma i tu nampuna bagas parbornginan i. 'Pature-ture ma jolo,' ning ia tu nampuna parbornginan i. 'Muda mulak au muse tuson hugarari pe harugian na nipakemu laho pature-ture ia.' " 10:36 Dung i dipaujung Jesus ma carito i songon on, "Sian sitolu halak i, na dia ma ninna rohamu, dongan jolma di bayo na tarsamun i?" 10:37 Dialusi ia ma, "Halak na maribo ni roha tu bayo i." "Antong, kehe ma ho jana baen muse ma songon i!" ninna Jesus tusia. 10:38 Sanoli, hatiha mardalan Jesus rap dohot angka siseanNia i, masuk ma Jesus tu sada huta. Adong ma disi sada anak boru na margoar si Marta mangontang Jesus tu bagasna. 10:39 Adong do anggi ni si Marta, na margoar si Maria. Juguk sajo ma si Maria di lambung pat ni Jesus manangihon pangajaranNia. 10:40 Tapi si Marta bahat sajo karejonia laho mangkobasi angka tamu i. Kehe ma si Marta tu Tuhan Jesus mandok, "O Tuhan, ligi ma jolo anggingkon! Dipadiar ia do sada au sajo karejo. Suru ma anso ditolong ia au!" 10:41 Dialusi Tuhan i ma, "O Marta, Marta! Mabahattu do dipasari-sari rohamu jana sude dihasusahon ho. 10:42 Hape hum sada do na porlu! Jana madung ditodo si Maria na denggan i, na so buaton be sian ia."
11:1 Sanoli di sada inganan martangiang ma Jesus. Dung sidung Ia na martangiang i, didok sahalak sian anak siseanNia i ma tuSia, "Tuhan, ajari ma hami martangiang songon si Johannes diajari Ia do martangiang angka anak siseanNia i." 11:2 Dung i didok Jesus ma tu halahi, "Muda martangiang hamu songon on ma dok hamu, 'Ale Amangnami. Pinarbadia ma goarMu. Ro ma HarajaanMu. 11:3 Lehen ma ganop ari sipanganon na porlu di hami. 11:4 Sesa ma angka dosanami, songon hami manyesa dosa ni sude na marsala di hami. Ulang pamasuk hami tu bagasan pandugaan.' " 11:5 Didok Jesus ma tu halahi, "Sugari adong sian hamu na kehe tu bagas ni donganna tonga borngin, mandok tusia, 'Painjamkon ma jolo dongan tu au tolu kibung roti, 11:6 harana ro do donganku sian pardalanan, on dope lalu di bagasnami, hape nada adong sipanganon lehenonku disia!' 11:7 Sugari didok donganmu na nitopotmi songon on, 'Ulang ho pasusa-susahon tu au! Madung nigoruk pintu jana madung modom au dohot angka dakdanakku. Nada tarbaen au be ngot laho mangalehen sanga na aha di ho.' " 11:8 Hudok ma di hamu: "Haru pe dongannia ho, nada ra be ia ngot laho mangalehen bagi aha di ho. Tapi hara ni sai torus do ho mangido tusia, gabe ngot muse ma ia laho mangalehen tu ho sanga aha na nihaporluhonmi. 11:9 Jadi, Au pe Hudok ma di hamu: Pangido hamu ma, lehenon do di hamu; jalahi hamu ma, dapotan do hamu; tektehi hamu ma, ungkapon do pintu tu hamu. 11:10 Angke sai manjagit do sude halak na mangido; dapotan do halak na manjalahi, jana ungkapon do pintu di na manektek pintu. 11:11 Ise ma he sian hamu angka ama, na mangalehen ulok tu anakmunu, muda dipangido ihan? 11:12 Sanga, ra ma he hamu mangalehen hala tu dakdanakmunu, muda dipangido ia pira? 11:13 Haru na bia pe jahatmunu, laing diboto hamu do patupa na denggan tu dakdanakmunu, mur ma hape Ama na di banua ginjang i. Laing na lehenonNia do tondiNia di halak na mangido diSia!" 11:14 Sanoli dipaorot Jesus ma tondi na jahat na mambaen ngungu sada halak. Dung ruar tondi na jahat i, mamungka ma na ngungu i mangkatai. Homang-komang ma halak, 11:15 tapi adong ma deba mandok, "Umbaen na tarpaorot Ia pe tondi na jahat i, hara ni na dung dilehen si Beelsebul kapala ni angka setan i do kuaso diSia." 11:16 Adong muse do angka jolma i na giot manguji Jesus. Dipangido halahi ma tu Jesus anso dibaen Ia jolo hahomangan tanda na sian banua ginjang. 11:17 Tapi diboto Jesus do maksud ni halahi. Gabe didok Ia ma tu halahi, "Harajaan na marsalisi di bagasan, nada sadia honok tahan i. Songon i muse ma parsaripeon na marbadai sarsar ne ma i. 11:18 Muda masa parbadaan di bagasan harajaan ni Sibolis, na sada tu na asing, tarbia ma partahanna harajaan i? Didok hamu, hara ni pangurupi ni si Beelsebul do Hupaorot begu i. 11:19 Jadi, muda marhite kuaso ni si Beelsebul do Hubaen i, antong mangasahon kuaso na sian ise do angka na mangihutkon hamu paorotkon angka setan i? Hara ni i, halahi do na gabe panguhumimu! 11:20 Tapi muda Huusir tondi na jahat markite-hite kuaso ni Debata, i ma tandana bahaso na dung ro do Harajaan Ni Debata tu hamu. 11:21 Muda dijagoi sada halak na gogo na singkop sinjatana do bagasnia sandiri, nada mahua sinadongannia i. 11:22 Tapi muda adong sada halak na gumogo sian ia jana manaluhon ia, buatonnia ma sandok sinjata na dipakenia i, jana bagi-bagionna ma sude tabanna i. 11:23 Sanga ise na so mandongani Au, alongKu do i, jana sanga ise na so rap dohot Au palagutkon na paserakkon do i." 11:24 "Muda dung ruar tondi na hodar sian sada-sada halak mardalani ma tondi na hodar i di inganan na hiang laho manjalak-jalahi inganan paradianan. Jana muda nada dapot di inganan i, ning ia ma di bagasan rohania, 'Mulak noma au mangulahi tu inganan na hutinggalkon i!' 11:25 Jadi dung mulak ia mangulahi tu bagas i, madung ias jana maratur bagas i didapot ia. 11:26 Dung i dipio ia ma pitu nari tondi na hodar na dao jumahat sian ia. Dung i ro ma halahi jana maringanan di bagasan halakna i mangulahi. Ujungna mur jumatjat ma pangalahona sian na parjolo i." 11:27 Dung didokkon Jesus songon i, mangkatai ma sada anak boru sian halak na bahat i. Didok ia ma tu Jesus, "Martua ma dadaboru na manubuhon dohot na pasusuhon Ho!" 11:28 Tapi dialusi Jesus ma, "Sanga ise na umbege hata ni Debata jana na mandalankonsa, halahi do na martua situtu!" 11:29 Hatiha dirongomi angka jolma i Jesus, laing ditoruskon Jesus ma pangkataionNia. Ning Ia ma, "Na lobi jahat do angka jolma sisaonnari on. Dipangido halahi ma antong giot mida tanda hahomangan. Hape sada tanda hahomangan pe indangkon na lehenon di halahi, asing sian hahomangan ni Panurirang Junus sajo. 11:30 Tarsongon Panurirang Junus na gabe sada hahomangan di halak Ninive, laing songon i muse ma Anak Ni Jolma i angkon gabe sada hahomangan tu angka jolma sisaonnari on. 11:31 Saulahon di na manguhumi tano on Debata, jongjong ma ratu na sian Selatan pajojorkon hasalaan ni angka jolma sisaonnari on; angke na ro do ia sian suhi ni tano on manangihon hapistaran ni si Salomo. Ligi ma, adong do dison na gumodang ulang pado si Salomo! 11:32 Di ari paruhuman i jongjong ma halak kota Ninive patuduhon hasalaanmunu, angke dipauba halahi do rohana hara ni jamita ni si Junus. Ligi ma, adong do dison na gumodang ulang pado si Junus." 11:33 "Nada adong halak na manutung lampu, jana ditabunihon ia lampu i sanga ditutupi dohot ampang. *DITUTUPI DOHOT AMPANG: Dipiga-piga-piga naskah narobi nada adong hata on.* Tontu tu inganan parlampuan do i dibaen anso torang idaon ni halak, muda masuk halahi. 11:34 Mata, i ma na gabe lampu ni pamatang. Muda torang matamu, pamatangmi pe gabe torang do. Tapi muda rambon matamu, gabe golap situtu ma sude pamatangmi. 11:35 Antong hara ni i manat-manat ma hamu anso ulang sanga golap na torang na di bagasan ho i. 11:36 Muda sude pamatangmi hona sinondang jana nada adong be deba na golap, gabe torang sajo ma sude pamatangmi, sarupa ma i tu hatiha na nisondangan ni cahaya ni lampu ho." 11:37 Dung sidung Jesus mandok hata, diontang sada halak Parise ma Ia mangan tu bagasna; dung i masuk ma Ia, juguk jana mangan. 11:38 Homang ma roha ni halak Parise i dung diida Ia manigor mangan Jesus so jolo marbasu tangan. 11:39 Gabe didok Jesus ma tusia, "Tutu do i anggo halak Parise somal do dipaias hamu mangkuk dohot pingganmunu sian duru sajo tapi anggo di bagasan dirimunu sandiri gok dohot na nisamun dohot hajahatan do. 11:40 Na oto do hamu! Nada he Debata do manompa parduru i, jana laing Debata muse do na manompa bagian parbagasan i? 11:41 Na adong di bagasan mangkuk dohot pingganmunu i, i ma nian silehenonmunu tu angka halak na pogos. Di pangalaho na songon i ma gabe ias sudena i di hamu. 11:42 Marjaya ma hamu angka halak Parise, dibaen dilehen hamu do parsampuluan sian angka suan-suanan na menek, inggu dohot ragam-ragaman ni simarata, tapi dilaosi hamu do tona dohot holong ni roha ni Debata. Angkon sikarejohonon do i, tapi ulang nitinggalkon na asing i. 11:43 Marjaya ma hamu halak Parise, harana jop do rohamunu manjuguhi juguhan na sumurung di bagas paribadatan dohot diparsantabi ni halak na di poken. 11:44 Marjaya ma hamu! Songon tanoman na so martanda do hamu, di dege-dege halak sian na so binotona!" 11:45 Jadi adong ma sahalak sian Siboto Surat i na mandok, "Guru, madung diincahi Ho hami markite-hite na nidokMi." 11:46 Dialusi Jesus ma, "Marjaya ma dohot hamu angka Siboto Surat! Dipaporsankon hamu do boban na dokdok tu abara ni halak, hape hamu sandiri umpe ra mangantul boban i, hum mandaiskon jari-jarimunu sajo pe nada. 11:47 Marjaya ma hamu! Dibaen di pauli hamu do tanoman ni angka panurirang na nimatehon ni angka ompungmunu. 11:48 Hamu sandiri pe dioku hamu do na satuju hamu tu angka pambaenan ni angka ompungmunu i. Angke halahi ma antong na mamatehon angka panurirang i jana hamu ma na pajongjong angka tugu di ginjangna. 11:49 Hara ni i didok habisukon ni Debata i ma, 'Husuru ma angka panurirang dohot angka rasul tu halahi, jana deba sian angka panurirang dohot sian angka rasul i bunuon jana parkancitan ni halahi ma.' 11:50 Anso tuntuton ma tu halak sisaonnari on mudar ni sude panurirang, na dung durus mamungka sian parmulaan ni tano on. 11:51 Mamungka sian hamamate ni si Abel lopus tu hamamate ni si Zakaria, na nibunu di holang-kolang ni langgatan dohot Inganan Na Badia. Olo tutu, 'Hudok ma tu hamu angkon tuntuton ma i tu halak sisaonnari on. 11:52 Marjaya ma hamu angka Siboto Surat, angke madung dibuat hamu anak kunci ni parbinotoan, hape hamu sandiri pe nada ra masuk tu bagasan, gariada tehe diolat hamu do angka na giot masuk tu bagasan!' " 11:53 Jadi dung ruar Jesus sian inganan i, disosak angka Siboto Surat dohot halak Parise i ma Ia, marragam do angka sapa-sapa dibaen halahi tuSia. 11:54 Jana manat ma dibaen halahi laho padapotkon sanga aha na sala sian pandohan ni Jesus.
12:1 Marribu halak na marsisohan jabat adong na tardege-dege patna i. Jadi taran marrongoman jolma i mandok hata ma Jesus, lumobi tu angka siseanNia i, "Jago ma hamu maradopkon ragi ni halak Parise, i ma pangalancapon ni halahi. 12:2 Nada adong bagi aha na tutup na so ungkap muse, sanga na buni na so binoto muse. 12:3 Na nihobarkonmunu di na golap, habegean do i di na torang; jana na nihusipkonmunu tu pinggol ni halak di bagasan bilik na nitutup, nibaritahon ma i sian bungkulan ni bagas." 12:4 "Ingot hamu ma ale angka dongan! Ulang pola mabiar hamu mida halahi sibunu pamatang jana na so bisa mambaen sanga aha pe dung i. 12:5 Denggan ma Hupatuduhon di hamu, sanga ise do na angkon sihabiaranmunu. Habiari hamu ma Debata! Angke dung mamunu Ia markuaso muse dope Ia mangambungkon tu narako! Denggan ma ingot hamu; angkon habiaranmunu do Ia! 12:6 Nada he digadis halak do lima amporik arga dua sen? Haru pe songon i, umpe sada sian i na ni halupahon ni Debata. 12:7 Obuk na di ulumunu i pe madung dietong i sude, hara ni i ulang hamu mabiar; dao do ummarga hamu sian angka amporik!" 12:8 "Tapi Hudok ma di hamu: Ganup halak na mangoku Au di adopan ni halak, okuan ni Anak Ni Jolma ma ia di adopan ni angka surusuruan ni Debata. 12:9 Tapi barang ise na mamorso Au di jolo ni jolma, porsoon do ia di adopan ni angka surusuruan ni Debata. 12:10 Halak na mandok sanga aha na maralo tu Anak Ni Jolma i, tarsesa do halakna i; tapi anggo halak na mangincahi Tondi Parbadia nada tarsesa be halahi. 12:11 Muda dioban hamu tu angka bagas paribadatan anso diuhumi di jolo ni pamarenta sanga parkuaso, ulang ma humolos rohamunu taringot tu alusmunu, sanga pe taringot tu hata sidokkononmunu, 12:12 angke ajaran ni Tondi Parbadia do hamu sanga aha sidokkononmunu di hatiha i." 12:13 Adong ma sahalak sian halak na bahat i na mandok tu Jesus, "O Gurunami, dokkon ma jolo tu dangkang anso dilehen ia di au deba arta tean-teanan sian simatobangnami na nitadingkonnia di hami." 12:14 Dialusi Jesus ma, "Ise ma he dongan, na mambaen Au gabe panguhum sanga gabe pambagi arta tean-teanan ni hamu na dua?" 12:15 Dung i didok Jesus ma hata tu sude halak na disi, "Manat jana jagohon hamu ma dirimunu, angke haru bahat sajo pe arta ni halak, nada marguru tu sinadonganna i anggo ngoluna." 12:16 Dung i dipaboa Jesus ma umpama on tu halahi, "Adong ma sada halak na kayo. Adong tanonia na napu na parohon suha bahat sajo. 12:17 Marpikir ma ia di bagasan rohania, 'Aha ma ulaning sibaenonku saonnari? So adong inganan panyimpanan ni sude suha ni artangki. 12:18 Songon on noma hubaen: Hubungkar ma sude angka gudang i jana hupajongjong ma na gumodang. Disi ma husimpan suha ni tanongki dohot sude ni artangku na asing i. 12:19 Dung sidung i hudok ma tu rohangku sandiri: Na maruntung ma da ho! Madung bahat angka na denggan disimpan ho; madung tuk i martaon-taon. Nada pola bahat be sipikiranmu! Aha dope, mangan minum ma ho marsonang-sonang!' 12:20 Tapi didok Debata ma tusia, 'O na oto! Laing borngin on mate ma ho! Jana sude na dung dipasingkopmi giot di ho, gabe ise ma nampuna i?' " 12:21 Laho paujungkon carito i didok Jesus ma, "Songon i ma pangalaho ni halak na sai torus palagut arta tu dirina sandiri sajo, tapi nada mamora di adopan ni Debata." 12:22 Dung i didok Jesus ma tu angka siseanNia, "I do umbaen na Hudok, 'Ulang humolos rohamunu hara ni angka parngoluonmunu, i ma taringot tu sanga aha na giot panganonmunu annon, sanga aha na giot pakeonmunu annon.' 12:23 Umporluan dope ngolu sian sipanganon, jana umporluan dope pamatang sian pakean. 12:24 Parrohahon hamu ma jolo unggas si gawak i! Nada manyabur same halahi, nada manyabi, nada adong muse gudang sanga talobat ni halahi. Hape dijagohon Debata do halahi! Ummargaan dope hamu sian angka unggas! 12:25 Ise ma he sian hamu na tarbaen patamba umurna sadari markite-hite holosna? 12:26 Muda so tarpatupa hamu do salang na songon i menekna, biasi ra hamu mangholoskon angka na asing-asing i? 12:27 Parrohahon hamu ma sanga na bia angka bunga singkut ari na tubu di padang-padang i, inda markarejo angka bunga-bunga i, nada martonun muse. Tapi Hudok ma di hamu, salang si Salomo di bagasan sude hasangapanna nada marabit ia songon jeges ni sada sian angka bunga i. 12:28 Jadi, muda diabiti Debata do angka duhut na di padang i, na jeges sadari on tapi ancogot diambungkon tu api, tarlumobi ma hamu, ale angka na hurang porsaya! 12:29 Antong hara ni i, ulang ganggu rohamunu taringot tu sipanganon sanga siinumonmunu; ulang ma humolos rohamunu taringot tusi. 12:30 (Halak na so mananda Debata do na tongtong parayakkon angkana songon i.) Diboto Amangmunu i do na porlu di hamu angka na songon i. 12:31 Tapi jalahi hamu ma HarajaanNia, dung i tambahononNia do sudena i tu hamu." 12:32 "Ulang hamu mabiar, haru pe hum saotik sajo bilanganmunu! Angke jop do roha ni Amangmunu mangalehen HarajaanNia i tu hamu. 12:33 Gadis ma sude sinadonganmunu, jana lehen hamu ma i gabe asi-asi. Pature hamu ma di hamu angka huncang na so ra buruk, arta parbanua ginjang na so ra abis, na so hadonohan ni panangko jana nada tarpasego ngitngit. 12:34 Angke sanga di dia adong artamunu disi muse do dohot rohamunu!" 12:35 "Marjago-jago ma hamu mangadopi sanga aha na ro. Angkon totop do marhohos gontingmu jana gara palitomunu, 12:36 jana tudos ma hamu tu halak na painte-inte hamumulak ni tuanna sian horja haroan boru. Muda dung mulak tuanna i manektek pintu, manigor dibuka halahi ma pintu i. 12:37 Martua do angka naposo na nidapot ni tuanna sai painte-intehon harorona. Na tutu do na Hudokkon tu hamu, dihohosi ia ma gontingna, dung i dipajuguk ia ma halahi jana ro ma ia mangoloi halahi. 12:38 Jana muda ro ia di tonga borngin, sanga di andostorang, laing tong rade paintehonsa, jadi martua ma halahi. 12:39 Ingot hamu ma i! Anggo diboto nampuna bagas do sanga sadihari ro panangko, jago ma ia di bagasnia i, nada loasonnia buharon bagas i. 12:40 Hamu pe angkon tongtong do hobas, angke di hatiha na so panagamanmunu ro Anak Ni Jolma i, hape disi ma Ia ro." 12:41 "Tu hami do na nidokmu pangajaran i, Tuhan, sanga tu sude halak?" ning si Petrus manyapai. 12:42 Dialusi Jesus ma, "Ise ma he naposo na burju jana na marroha i! I ma da naposo na nisuru ni tuanna gabe pangarajai di angka naposo na asing i laho mangalehen halahi mangan di hatiha na ditontuhon. 12:43 Martua ma antong naposo na patulus karejona didapot tuanna na baru ro i. 12:44 Tutu do na Hudok on tu hamu: Pabangkitonnia ma ia mangarajai artania sasudena. 12:45 Tapi muda didok naposo i do di bagasan rohania, 'Honok dope anso mulak tuanki,' gabe dipungka ia ma mambalbali angka naposo halaklahi dohot dadaboru, gabe mangan minum ma ia lopus mabuk. 12:46 Di na sadari, hatiha na so ditagam roha ni naposo i, ompot ma mulak tuannia i. Gabe sijaljalan ni tuanna noma naposo i jana sarupa do bagiannia dibaen dohot angka halak na so porsaya. 12:47 Naposo na umboto hagiot ni tuanna, hape nada hobas ia jana nada dibaen ia hagiot ni tuannia i, sisambohon do i sagogona. 12:48 Tapi anggo naposo na so umboto hagiot ni tuanna, dung i dibaen ia na sala mambaen angkon nisambok ia, asok do panyambokna tu naposo i. Angke halak na dung dilehen bahat, bahat muse do dituntut sian ia. Jana halak na dung gabe hasahatan ni bahat pos ni roha, bahat muse do dituntut sian ia." 12:49 "Madung ro Au maroban api tu portibi on, giot ni rohangKu nian gara ma apina i! 12:50 Laing adong dope pandidion na angkon sidalananKu. Jana susa sajo dope rohangKu salolot so tulus dope i. 12:51 Ning rohamunu lakna na giot maroban dame Au tu tano on? Nada! Parbadaan do. 12:52 Mulai saonnari, muda adong lima halak di sada bagas, maralo ma na sada dohot na asing; tolu mangalo dua, sanga dua mangalo tolu. 12:53 Aloon ni amangna ma anakna jana anakna maralo tu amangna. Inangna maralo tu boruna jana boruna maralo tu inangna. Namboruna maralo tu parumaenna jana parumaenna maralo tu namboruna." 12:54 Didok Jesus muse ma tu halak na bahat i, "Muda diida hamu ombun i manaek sabola Hasundutan, manigor didok hamu ma, 'Na giot ro ma udan.' Jana tutu do ro udan i. 12:55 Muda dihilala hamu ro alogo sian sabola Selatan, didok hamu do, 'Milas ma ari.' Jana tutu do malogo. 12:56 Hamu angka pangalancap! Diboto hamu do mangaligi tanda-tanda di langit an dohot di tano on. Biasi nada tarbaen hamu marnida angka tanda ni hatiha on?" 12:57 "Biasi nada ditontuhon hamu sandiri sanga aha na tutu? 12:58 Muda adong halak na mangaduhon hamu jana maroban hamu tu pangadilan, usahahon hamu ma da manyalosehon parkaro i dohot ia taran di tonga dalan hamu. Anggo inda songon i, saratonnia ma hamu tu jolo ni panguhum jana pasahatonnia ma hamu tu bagasan hurungan. 12:59 Porsaya ma hamu! Nada tarbaen hamu ruar sian hurungan i salolot so digarar hamu dope sudena."
13:1 Hatiha i, ro ma piga-piga halak mandapotkon Jesus, paboahon taringot tu halak Galilea, i ma na nicampur ni si Latus mudar ni halahi tu mudar na giot sihaulkonon. 13:2 Umbege carito i didok Jesus ma, "Hara ni na nibunu songon i halak Galilea i, diambang hamu ma i gabe tanda paboahon na bahatan dosa ni halahi sian halak Galilea na asing i? 13:3 Nada! Tapi ingot hamu ma, anggo so muba do hamu sian angka dosamunu, hamu pe laing mate do sude songon halahi. 13:4 Bia muse ma sisalapan bolas halak na mate di Siloam, na nitinggang ni palas-palas halahi? Ning rohamunu i ma patuduhon na bahatan dosa ni halahi sian pado sude angka halak na asing na maringanan di Jerusalem? 13:5 Nada! Tapi ingot hamu ma, hamu pe angkon laing mate do sude sarupa dohot halahi, muda so muba hamu sian angka dosamunu i." 13:6 Dung i didokkon Jesus ma umpama on tu halahi, "Adong ma sada halak nampuna gala-gala di kobunnia. Ro ma nampuna i manjalahi batu ni hayu i hape umpe sada dapot ia. 13:7 Jadi didok ia ma tu panjago kobun i, 'Ligi ma, madung tolu taon honokna ro au tuson laho manjalahi batu ni gala-gala on, hape sada pe nada adong dapot au. Aha dope, taba ma bonana i. Aha gunana laing torus ia disi mangolu mangabiskon napu ni tano i!' 13:8 Tapi dialusi tukang kobun i ma, 'Tuan, padiar ma jolo sataon on laing mangolu hayu i. Huhuar ma jolo lubang humaliang bonana i anso ninapuan. 13:9 Betak marbatu ia di taon na ro. Tapi muda nada be, taba ma.' " 13:10 Di sada hatiha mangajari ma Jesus di bagasan Sinagoge, topet di Ari Sabat. 13:11 Adong ma disi sada dadaboru na jabat salapan bolas taon honokna marnyae hara ni tondi na jahat ro tusia. Puhung noma pamatangna i jana nada tarbaen ia be tigor jongjong. 13:12 Dung diida Jesus anak boru i, dipiohon ma ia. Didok Jesus ma tusia, "O inang, malum ma ho saonnari!" 13:13 Dung i dipayakkon Jesus ma tanganNia tu anak boru i, jana laing di na santongkin i manigor tigor ma pamatang ni anak boru i, jana dipuji-puji ia ma Debata. 13:14 Muruk ma kapala ni bagas paribadatan i, hara ni na nipamalum ni Jesus halak di Ari Sabat. Didok ia ma tu angka halak na disi, "Onom ari honokna markarejo hita, marroan ma di angka ari i na giot sipamalumon, ulang ma hatiha di Ari Sabat!" 13:15 Dialusi Tuhan i ma kapala ni bagas paribadatan i songon on, "Angka pangalancap do hamu! Nada he dipalua hamu do lombu dohot halodemunu sian barana di Ari Sabat jana dioban hamu tu balian, mangaleheni minum? 13:16 Antong, saonnari dison adong sada halak anak boru pinompar ni si Abraham, na dung pola salapan bolas taon honokna dirahuti Sibolis i. Na so tola dehe ia dipalua sian ihot-ihotnia di Ari Sabat?" 13:17 Gabe maila ma sude angka alo ni Jesus hara ni alusNia i, tapi anggo halak na asing i jop do rohana mida sude hahomangan na nibaen ni Jesus i. 13:18 Dung i didokkon Jesus ma, "Tudos tu aha ma Harajaan Ni Debata i? Tu aha ma patudosonKu? 13:19 Songon batu ni sabi do i na nibuat ni sada halak jana disuan ia di ladangnia. Jadi tubu ma i gabe hayu na godang, dung i ro ma angka pidong marasar di ginjang ni dangkana i." 13:20 Dung i didokkon Ia ma mangulahi, "Tu aha ma Hupatudos Harajaan Ni Debata? 13:21 Tudos ma i songon ragi na nibuat ni sada dadaboru jana digaorkon ia ma i dohot opat pulu liter topung, lopus nipamancom sudena." 13:22 Di pardalanan laho tu Jerusalem dibolusi Jesus do angka kota dohot angka huta jana mangajari disi. 13:23 Jadi adong ma halak na manyapai tuSia, "Otik dehe Tuhan halak na giot paluaon i?" Dialusi Jesus ma, 13:24 "Angkon usahahononmunu do masuk mamolus sian pintu na sompit. Angke ingot hamu ma! Bahat do halak na marusaho giot masuk mamolus pintu i tapi nada tarbaensa. 13:25 Sada hatiha jongjong ma nampuna bagas i jana ditutup ia ma pintuna i. Dung i jongjong ma hamu di ruar manektehi pintu i jana mandok, 'Dibuka Tuan i ma jolo di hami pintu on!' Alusan ni Tuan i ma, 'Nada Huboto sanga sian dia hamu ro!' 13:26 Alusanmunu ma, 'Madung mangan dohot minum do hami rap dohot Tuan i. Jana madung mangajari do Tuan i di kotanami!' 13:27 Tapi ulahan ni Tuan i ma mandok, 'Nada Huboto sanga na sian dia hamu. Kehe ma hamu sian on, sude hamu na mambaen hajahatan!' 13:28 Dung diida hamu si Abraham dohot si Ishak dohot si Jakob dohot sude angka panurirang marsonang-sonang di Harajaan Ni Debata, gabe tangis ma hamu jana mardangol situtu angke anggo hamu sandiri ambungkonon do tu ruar! 13:29 Marroan ma halak sian Habincaran dohot Hasundutan, sian Utara dohot sian Selatan jana juguk ma halahi marsipanganon di Harajaan Ni Debata. 13:30 Angka halak na parpudi i ma na gabe na parjolo. Jana halak na parjolo saonnari, i ma na gabe parpudi." 13:31 Laing di hatiha i, adong ma marroan angka halak Parise tu Jesus, mandok, "Ulang Ho maringanan dison! Morot ma Ho tu inganan na asing, angke giot bunuon ni si Herodes ma Ho." 13:32 Dialusi Jesus ma, "Kehe ma ho paboahon tu sorigala i, 'Sadari on lopus tu ancogot mangusir setan do Au dohot pamalum angka na marnyae, tapi pasidungonKu ma i di ari patoluhon.' 13:33 Haru pe songon i angkon laing patorusonKu do pardalananKu sadari on, ancogot dohot haduan, angke nada denggan sada panurirang dibunu di ruar ni kota Jerusalem. 13:34 O ale Jerusalem, Jerusalem! Dibunu ho do angka panurirang dohot angka na nisuru tu ho, didangguri ho dohot batu! Madung jotjot sai giot paluhutonKu sude halak na mangingani ho songon sada inang ni manuk na manggobak angka anakna di toru ni habongna, hape nada ra hamu! 13:35 Angkon tarulang noma sude bagasmunu. Jana nada idaonmunu be Au, lopus tu hatihana dokkononmu, 'Dipasupasu ma na ro markite-hite goar ni Tuhan.' "
14:1 Sanoli topet Ari Sabat, kehe ma Jesus mangan tu bagas ni sada pamimpin ni angka Parise. Sai torus do dipamanat halak Jesus disi. 14:2 Ompot ma ro sada halak na sigurbahon jongjong di adopanNia. 14:3 Marsapa ma Jesus tu angka Siboto Surat dohot angka halak Parise na adong disi, "Mangihutkon ugamo Jahudi, tola dehe halak pamalum na marnyae di Ari Sabat?" 14:4 Nada adong sanga aha pe alus ni angka Siboto Surat dohot halak Parise i. Mangkohom be halahi. Dipio Jesus ma bayo i jana dipamalum Ia, dung i disuru Ia kehe. 14:5 Dung i didok Jesus ma tu halahi, "Muda adong sahalak sian hamu, adong dakdanakna sada, sanga lombuna sada, madabu tu sumur di Ari Sabat, nada he diompoti hamu do mangela tu ruar dakdanak i sanga lombu i laing di ari i muse?" 14:6 Nada haalusan halahi hata i. 14:7 Diida Jesus, adong sian angka na nipio i na marsiadu tu inganan na dumenggan. Jadi marumpama ma Ia tu halahi sude. 14:8 "Muda diontang halak ho tu horja haroan boru, ulang ma kehe ho juguk tu karosi hasangapan. Harana betak na dung diontang halahi do na asing na dao sumangap ulang ho. 14:9 Dung i ro ma tu ho suhut na mangontang hamu na dua mandok, 'Lehen ma inganan on di halak on.' Gabe ila ma rohamu kehe tu inganan na tumoruk. 14:10 Jadi muda diontang halak ho, dumenggan ma juguk di inganan na tumoruk hian ho, jadi muda ro suhutna i mandok tu ho, 'Tu juluan ma ho dongan juguk,' gabe sangap ma ho di jolo ni tamu na asing i sude. 14:11 Angke sude halak na pagincatkon dirina sipatoruhon do, jana sude halak na patutoru dirina sipagincaton do." 14:12 Dung i didok Jesus ma tu suhut i, "Muda diontang ho halak mangan arian sanga mangan borngin, ulang ma ontang angka dongan-donganmunu sanga angka kahanggimunu sanga pe angka koum-koummunu sanga angka hombar bagasmu na kayo-kayo. Angke ontangon ni halahi do ho muse jadi dapotan balos do pambaenanmi muda songon i. 14:13 Tapi muda mambaen pesta ho, halak na pogos ma da ontang, angka na martihas, angka na pangpang dohot halak na mapitung, 14:14 jadi martua ma ho hara ni i. Angke nada tarbalos angka halak na songon i denggan ni rohami. Harana angkon dapotan balosna ma ho di ari hangongot ni angka na tigor roha i." 14:15 Umbege hata i mangkuling ma sahalak sian na niontang i tu Jesus, "Martua ma halak na mangan di Harajaan Ni Debata!" 14:16 Tapi didok Jesus ma tu bayo i, "Sada hatiha adong ma sada halak na mambaen karejo na godang jana diontang ia ma bahat halak. 14:17 Jadi mandapotkon ari na nitontuhon mamungka horja i, disuruhon ia ma angka naposonia mandapotkon angka tamu na niontang i mandok, 'Ro ma hamu, madung singkop sude!' 14:18 Tapi sude halahi, pasada-sada marsibaen sidalianna. Didok na parjolo i ma tu naposo i, 'Na baru manobusi saba dope au. Jadi angkon ligionku jolo tano i. Mangido maap ma jolo au.' 14:19 Na asing mandok, 'Na baru hutobusi dope lima pasang lombu, jana giot mancubo angka lombu i jolo au. Mangido maap ma da au.' 14:20 Na asing muse mandok, 'On dope au mambuat boru, jadi nada tarbaen au ro.' 14:21 Jadi mulak ma naposo i paboahon sudena i tu tuannia. Muruk sajo ma tuan i. Didok ia ma tu naposonia i, 'Antong ompoti ma kehe tu angka dalan dohot tu suhi-suhi ni kota on, oban ma tuson angka halak na pogos, angka na pangpang, angka na mapitung dohot angka na martihas.' 14:22 Didok naposo i ma, 'Madung nipalalu parenta ni tuan i, tapi laing bahat dope inganan na so marisi.' 14:23 Jadi didok tuan i ma tu naposo i, 'Kehe ma ho tu dalan godang dohot tu angka dalan na sompit di ruar ni kota, jana hara ma halak marroan anso gok sude bagaskon. 14:24 Ingot ma! Umpe sahalak sian tamu na dung niontang i hian mandai sipanganon na di horjangkon!' " 14:25 Bahat do halak na rap mangudurkon Jesus. Manaili ma Jesus tu halahi ning Ia ma, 14:26 "Muda adong halak na ro tu Au, hape holongan do rohania mida inangnia, amangnia, dadaborunia, dakdanaknia, kahangginia, angka ibotonia dohot dirinia sandiri pe tehe, nada tarbaen halak na songon i gabe siihutkon Au. 14:27 Barang ise na so mamorsan hayu parsilangna jana mangihutkon Au nada tarbaensa gabe anak siseanKu. 14:28 Muda adong sahalak sian hamu na giot pajongjong palas-palas, tontu jolo juguk do ia maretong harugiannia anso diboto ia sanga na dung tuk hepengnia pasidungkon palas-palas i sanga nada. 14:29 Angke muda inda tulus tarpasidungsa muse, hape madung sidung dibaen ojahanna, gabe sude ma halak mampartatai ia. 14:30 Dokkonon ni halak ma, 'O ale, pajongjong bagas halak on hape so tarpasidungsa!' 14:31 Muda adong sada raja na martentara sampulu ribu halak giot marporang mangalo raja na asing na martentara dua pulu ribu halak, tontu angkon juguk jolo raja i manimbang sanga na tuk do gogonia laho mangalo musunia i. 14:32 Anggo diboto ia do na so margogo ia, tontu tongosonnia do suruannia mangido mardame dompak dao dope musunia i." 14:33 Ujungna ninna Jesus ma, "Laing songon i ma hamu. Umpe sahalak sian hamu tarbaen gabe siihutkon Au, anggo so tartinggalkon ia do sasude na adong disia." 14:34 "Na marguna situtu do sira. Tapi muda hambar sira, nada adong be dalan laho paancimkon sira i mangulahi. 14:35 Nada adong muse be guna ni i. Tu ladang pe nada marguna, jana gabe napu pe nada marguna. Ambungkonon ni halak sajo noma sira na songon i. Barang ise na marpinggol laho marbinege, ditangihon ia ma!"
15:1 Di sada ari, marroan ma bahat angka sitagi pajak dohot angka halak na so ture dietong masarakat manangihon Jesus. 15:2 Jadi mungut-ungut ma halak Parise dohot angka Siboto Surat i. Didok halahi, "Dipardongan Ia do angka halak na so ture, mangan muse dope Ia rap dohot halahi!" 15:3 Jadi hara ni i dicaritohon Jesus ma tu halahi umpama on: 15:4 "Ise dehe sian hamu nampunaan saratus biri-biri, jana muda mago sada sian i nada ditadingkon ia na sambilan pulu sambilan i jana kehe ia manjalahi na lilu i lopus dapot ia? 15:5 Jadi muda dung dapot ia biri-biri i tontu marjop ni roha ma ia jana diporsan ia ma i diabarania, 15:6 marobansa mulak. Dung i dipiohon ia ma angka dongannia, didokkon ia ma tu halahi, 'Majop sajo rohangku dung dapot au mangulahi biri-biringku na mago i. Hara ni i tole ma marjop ni roha hita mamestahonsa!' 15:7 Laing songon i ma pangalahona di banua ginjang i, tangkas ma Hupaboa di hamu! Jumop do roha ni Tuhan hara ni sada halak na jahat na pauba rohana sian angka dosana ulang pado sisambilan pulu sambilan halak na denggan roha na so porlu paubahon roha." 15:8 "Sanga sugari rupani adong ma sahalak dadaboru nampuna sampulu kamata hepeng perak, hape mago sangkamata -- aha ma baenonnia? Tontu tutungonnia ma lampu jana disapu ia bagasnia i laho manjalahi hepeng i tangkas lopus dapot. 15:9 Jadi dung dapot ia hepeng i, pioonnia ma angka dongannia dohot angka hombar bagasnia jana dokkononnia ma tu halahi, 'Jop sajo do rohangku dung dapot au mangulahi hepengku na mago i. Beta ma tapestahon!' 15:10 Hudok ma di hamu! Laing songon i ma angka surusuruan ni Debata. Marjop ni roha ma halahi muda adong sada halak na jahat paubahon rohana." 15:11 Mandok hata ma Jesus muse. Ning Ia ma, "Adong ma sada bayo, dua anaknia. 15:12 Didok sianggian i ma tu amangna, 'Lehen ma tu au saonnari da amang bagianku sian artanta i.' Gabe dibagi amangna i ma arta i tu anakna na dua i. 15:13 Nada sadia honok dung i, digadis sianggian i ma sude arta bagiannia i jana kehe ma ia tu sihadaoan, dioban ia ma sude hepengnia i. Disi ma ia marroha-roha mangabur-aburkon hepengnia i. 15:14 Dung abis sude hepengnia i, masa ma haleon potir di luat i, gabe mamungka ma ia marhancit. 15:15 Jadi kehe ma ia markarejo tu sada halak na di kota i, jana disuru ma ia manjago babi di ladang. 15:16 Dung i por ma rohania mangankon panganon ni babi i, tapi umpe adong halak na mangalehensa. 15:17 Ujungna sadar ma ia, didok ia ma, 'Sai bahat angka parkarejo na lobian sipanganon di jolo ni damang hape anggo au mate tangkuraparon ma dison! 15:18 Jongjong noma au kehe manopot damang jana dokkononku ma tusia: Madung mardosa au adop Debata bope maradopkon damang. 15:19 Na so tama be dohononmu au anakmu. Etong ma au amang songon sada parkarejomu.' 15:20 Dung i jongjong ma ia, torus mulak mandapotkon amangna. Sian na dao dope madung diida amangnia i ia. Ibo sajo ma roha ni amangna i midasa, marlojong ma amangna i mangalo-alo ia, dihaol jana diumma ma ia. 15:21 Didok ia tu amangnia i, 'O amang, madung mardosa au adop Debata bope maradopkon damang. Nada tama be didok au anak ni damang.' 15:22 Tapi dipiohon amangna i ma angka naposona jana didok ma, 'Pasigop buat pakean na dumenggan jana pakehon manigor tusia. Baen tintin tu jari-jarina i dohot sipatu tu patna i. 15:23 Dung i buat ma anak ni lombu na nipamokmok, sambol ma i anso mangan hita jana marjop ni roha. 15:24 Angke madung mate do anakkon, saonnari mulak mangolu, madung lilu ia, hape mulak ia saonnari.' Jadi dipungka halahi ma na marpesta marjop ni roha. 15:25 Topet do di ladang hatiha i anakna siangkaan i. Jadi di na mulak ia, dung donok tu lambung ni bagas i, dibege ia ma na marende dohot angka na manortor. 15:26 Dipiohon ia ma sahalak naposona i manyapai, sanga aha na masa i. 15:27 Dialusi naposo i ma, 'Madung mulak anggi ni tuan i, jadi disamboli simatobangmu do anak ni lombu na nipamokmok i, hara ni na dung dapot ia mangulahi horas anaknia i!' 15:28 I noma murukna anak siangkaan i, gabe nada ra ia masuk tu bagas. Jadi ruar ma simatobangnia i laho mangkatai dohot ia. 15:29 Tapi didok ia ma tu amangnia i, 'Martaon-taon ma honokna huoloi damang, na so jungada dope hulaosi parentamu. Tapi nada unjung dilehon damang di au umpe sada hambeng anso marpesta au dohot angka donganku! 15:30 Anggo anakmi, madung diabiskon ia sude artami rap dohot angka dadaboru na so ture, hape disi mulak ia manigor disambol ho ma lombu na nipamokmok i disia.' 15:31 Dialusi amangna i ma, 'O amang, anggo ho tongtong do dison rap dohot au. Sudena na adong di au, laing ho do nampuna i. 15:32 Tapi anggo saonnari na patut do hita mambaen pesta jop ni roha, angke na dung mate do anggimi, hape saonnari mulak mangolu; madung lilu ia, hape saonnari madung mulak.' "
16:1 Dung i didokkon Jesus ma tu angka siseanNia i, "Adong ma sada halak na kayo, na marbendahara. Jadi adong ma na paboahon tusia, bahaso na marroha-roha do bendahara i laho pangabiskon artonia. 16:2 Jadi dipio ia ma bendahara i jana didok ia ma, 'Aha dehe na hubege taringot tu ho? Saonnari, pasahat ma jolo tu au paretonganmu taringot tu sudena hartongki. Mamungka saonnari nada tola be ho gabe bendahara.' 16:3 Jadi marpikir ma bendahara i, 'Aha do ulaning sibaenonku saonnari? Angke antahon ni tuanki ma au. Muda giot mamangkur, inda margogo be au, dung i mangido-ido maila au. 16:4 Madung huboto sibaenonku saonnari. Muda dung diantak au, angkon bahat ma nian donganku na ra manjagit au di bagas ni halahi!' 16:5 Jadi dipiohon bendahara i ma sude halak na marutang tu tuannia i. Tu na parjolo didok ia ma, 'Sadia utangmu tu tuanki?' 16:6 Dialusi halahi ma, 'Saratus gunci miak zetun.' Didok bendahara i ma tusia, 'Antong, indon ma surat ni utangmi. Juguk ma ho disi jana suratkon ma tibu lima pulu.' 16:7 Dung i didok ia ma tu na paduahon, 'Jadi hamu, sadia ma utangmu?' Dialusi halahi ma, 'Saratus harung eme.' Didok bendahara i ma tusia, 'Indon ma surat ni utangmi, suratkon ma salapan pulu.' 16:8 Dung i dipuji tuan ni bendahara i ma habisuhon ni bendahara na geduk i; angke umbisuk do angka jolma portibi on taringot tu angka urusan ni halahi ulang pado anak ni hatorangan i." 16:9 Dung i mandok hata ma Jesus mangulahi. Didok Ia ma, "Tangihon hamu ma jolo on: Pargunahon hamu ma mammon na geduk laho manjalahi dongan, anso dijagit hamu di inganan na hot muda dung so adong be sinadongan na di tano on. 16:10 Sanga ise haposan di angka pangalaho na menek, haposan muse ma ia di angka pangalaho na godang. Tapi anggo halak na so jujur di angka pangalaho na menek, nada jujur muse i di angka pangalaho na godang. 16:11 Muda so haposan be hamu taringot tu sinadongan na di tano on, ise ma he na ra mangalehen pos ni roha di hamu taringot tu sinadongan na sian banua ginjang? 16:12 Muda tardapot na so haposan hamu taringot tu barang ni halak na asing, ise ma he na ra mangalehen tu hamu nampunamunu sandiri?" 16:13 "Umpe adong sada halak naposo, na bisa gabe naposo ni dua tuan rap sanoli mangoloi; angke goyak do rohania tu tuannia na sada jana dihaholongi ia na sada nari, sanga pe dipasangap ia na sada hape na sada nari diapasi ia. Nada tarbaen jolma gabe pangoloi tu Debata dohot muse pangoloi tu mammon." 16:14 Dibege angka halak Parise do sude na nidok ni Jesus. Tapi dipartatai halahi ma ia hara ni por ni roha ni halahi di hepeng. 16:15 Tapi didok Jesus ma tu halahi, "Hamu ma angka na mandok di jolo ni halak, sai na tigor hamu. Tapi diboto Debata do isi ni rohamunu. Angke sanga aha na nietong ni roha ni jolma na gincat, i ma na toruk di panatapan ni Debata. 16:16 Olat ni si Johannes Pandidi laing margogo do Tona ni ugamo na nipasahat ni si Musa, dohot angka pangajaran na adong di buku ni angka panurirang. Mamungka sian i torus ma dijamitahon Jamita Na Denggan taringot tu Harajaan Ni Debata. 16:17 Tapi ummura dope mago langit dohot tano, ulang pado mago sada hurup sian Tona i. 16:18 Angka halak na manyirangkon dadaboruna jana mambuat boru na asing ia, na mangalangkup do i. Jana halaklahi na mambuat dadaboru na dung disirangkon i pe, na mangalangkup muse do i." 16:19 "Adong ma sada halak na kayo na mamake pakean surto, jana na marsonang-sonang ganop ari. 16:20 Adong muse sada halak na pogos si Lasarus goarna, na baro-baroon sap pamatangna i. Somal do ia dioban tu pintu ni bagas ni na kayo i, 16:21 anso tarbaen ia manggohi butuhana sian teba-teba ni panganon na mardabuan sian meja ni na kayo i. Ro muse ma anjing mandilati angka baronia i. 16:22 Dung i jumolo ma halak na pogos i jana dioban surusuruan ma ia tu inganan na dumenggan di lambung ni si Abraham di banua ginjang i. Halak na kayo i pe jumolo muse ma jana ditanom. 16:23 Mardangol situtu ma ia di inganan ni angka na mate i. Jadi di na manatap ia tu ginjang, diida ia ma si Abraham di sihadaoan, jana di lambung ni si Abraham ma si Lasarus. 16:24 Dung i marsurak ma halak na kayo i, 'Jo amang Abraham! Ibo ma rohamu di au, suruhon ma jolo si Lasarus mangaronjomkon jari-jarinia tu aek anso ro ia palambokkon dilangkon. Markancit sajo do au di bagasan api on!' 16:25 Tapi dialusi si Abraham ma, 'Ingot ma amang: Dompak di ngolumu madung dijagit ho sude angka na denggan, hape anggo si Lasarus hum na jat do. Saonnari sonang ma ia dison, tapi anggo ho markancit ma. 16:26 Tamba ni i, madung dibaen lung na bidang mangkolangi ho dohot hami, anso ulang tarbaen sian hami on kehe tusi, songon i muse halak na sian i nada tarbaen ro tuson!' 16:27 'Anggo songon i do amang, 16:28 gomos ma pangidoanku tu ho, anso suruhon ma si Lasarus kehe tu bagas ni damang, angke adong dope lima nari kahanggingku. Ibo rohana nian, anso ulang ro be halahi tu inganan pardangolan on!' 16:29 Dung i dialusi si Abraham ma, 'Na he adong do angka buku ni si Musa dohot na nidok ni angka panurirang, na tarsurat di buku i ma diihutkon halahi!' 16:30 Tapi dialusi halak na kayo i ma, 'Nada tuk i, amang Abraham. Tapi sugari adong ma halak na mate na mulak mangolu jana ro mandapotkon halahi, baru pe anso muba halahi sian angka dosa ni halahi.' 16:31 Tapi didok si Abraham ma tusia, 'Muda so diampirkon halahi do si Musa dohot angka panurirang i, indangkon na ra halahi porsaya haru pe adong halak na mate mulak mangolu.' "
17:1 Didok Jesus ma tu angka siseanNia i, "Angkon sai adong do angka pangalaho na mambaen jolma gabe mardosa. Tapi marjaya ma na mambaen pangalaho sisongon i! 17:2 Na dumenggan do nitambatkon losung batu tu rungkungna, anso diambungkon tu bagasan laut. Dumenggan ma songon i ulang pado dibaen ia gabe mardosa sahalak sian angka jolma na menek on. 17:3 Manat ma hamu! Muda mardosa donganmu, paingot ia antong. Muda manyosal do ia hara ni na dung mardosa ia, ampuni ma. 17:4 Muda pitu noli ia mardosa tu ho di bagasan sadari jana ganop noli ia ro tu ho mandok, 'Mangido maap ma au,' ampuni ma ia." 17:5 Didok angka rasul i ma tu Tuhan i, "O Tuhan, patogu ma haporsayaannami." 17:6 Dialusi Tuhan i ma, "Muda adong haporsayaanmunu sagodang ni batu ni sabi, tardok hamu ma tu bona ni gala-gala on, 'Mumpat ma ho jana di laut ma panyuananmu,' musti angkon mangoloi hayu i tu parentamunu." 17:7 "Sugari adong sada sian hamu nampuna naposo na mambajak sanga na marmahan biri-biri. Muda muli ma naposo i sian ladang, adong he didok hamu tusia, 'Ompoti ma ro tuson anso mangan hita!' 17:8 Tontu inda! Tapi suhar-suhar ni i do dohononmunu tusia, 'Parade ma pangananku. Pakean na ias ma pake jana jagoi au hatiha mangan minum au; dung sidung, i pe anso mangan ho.' 17:9 Adong ma he mandok tarimakasi ia tu naposo i hara ni na dung dikarejohon ia sikarejohononnia? 17:10 Songon i muse ma hamu. Muda dung dioloi hamu sude na niparentahon tu hamu, dok hamu ma, 'Anggo hami hum naposo na somal-somal i do hami; hum na patut baenon do na hami karejohon i.' " 17:11 Di na patoruskon pardalananNia Jesus tu Jerusalem mamolus ma ia sian parbalohan ni Samaria dohot Galilea. 17:12 Laho masuk tu sada huta, ro ma tuSia sampulu halak na huliton. Jongjong ma halahi sian na dao, 17:13 jana marsurak, "Jesus! Gurunami! Ibo ma rohaMu mida hami!" 17:14 Dung diida Jesus halahi, didok Ia ma, "Kehe ma hamu patidahon dirimunu tu angka malim." Dompak na mardalan i halahi malum ma nyaena i. 17:15 Dung diida sada halak sian halahi na dung malum ia, mulak ma ia, dipuji-puji ia ma Debata marsora na gogo. 17:16 Dung lalu di jolo ni Jesus, marsomba ma ia mandok tarimakasi tuSia. Halak Samaria do bayo i. 17:17 Dung i didok Jesus ma, "Nada he sampulu halak do na nipamalum i? Ma di dia na sambilan halak nari? 17:18 Biasi hum halak na asing on na mulak mandok tarimakasi tu Debata?" 17:19 Dung i didok Jesus ma tu bayo i, "Jongjong ma ho, jana mulak ma ho. Haporsayaanmu do na palua ho." 17:20 Jadi dung disapai halak Parise i Jesus, sanga andigan ma pajongjongon ni Debata HarajaanNia. Jadi dialusi Ia ma, "Nada adong tanda-tanda na bisa idaon ni jolma paboa na dung jongjong Harajaan Ni Debata." 17:21 Nada tarbaen halak mandokkon, "Ligi ma, dison do i sanga disi do i, harana di bagasan hamu do Harajaan Ni Debata." 17:22 Dung i didok Jesus ma tu angka anak siseanNia, "Na ro ma hatihana, na malungun hamu sugari idaonmunu ma sada sian angka ari ni Anak Ni Jolma i, tapi nada idaonmunu i. 17:23 Jana dokkonon ni halak ma tu hamu, 'Ligi da, disadu do i!' sanga, 'Ligi ma, disi do i!', ulang kehe hamu tusi, ulang ihutkon i. 17:24 Songon parsinondang ni hilap di langit, na torang sian ujung tu ujung, songon i ma pangalaho ni Anak Ni Jolma i di ariNa i. 17:25 Tapi anggo mula-mulana angkon bahat do sitaononNia jana nada dijagit halak sisaonnari on Ia. 17:26 Jana songon pangalaho na masa di hatiha ni si Noak narobi, laing songon i muse ma pangalahona saulahon di hatiha ni Anak Ni Jolma i. 17:27 Na mangan minum do halahi, marbagas dohot na pabagaskon lopus di ari hamamasuk ni si Noak tu bagasan parau i; dung i ro ma aek na oto mangagohon halahi sudena. 17:28 Laing songon na tulus di hatiha ni si Lot, na mangan minum do halahi, na manobusi dohot manggadisi, na manyuan dohot pajongjong bagas halahi. 17:29 Tapi di na kehe si Lot manadingkon Sodom, mijur ma di ari i api dohot barerang sian langit manutung halahi sude. 17:30 Songon i ma pangalahona saulahon muda di ari hataridaan ni Anak Ni Jolma i." 17:31 "Jadi anggo di ari i, halak na topet di tarup ni bagasna, indangkon be mijur ia tu bagas i mambuat barang-barangnia na adong disi. Songon i halak na topet di balian, ulang pola mulak be ia tu bagas. 17:32 Ingot hamu ma na masa tu dadaboru ni si Lot! 17:33 Barang ise na manjagohon hosana, na mangago hosana do i; tapi barang ise na magoan di hosana, i do na pangoluhonsa. 17:34 Hudok ma di hamu: Di bornginna i, sian dua halak na sapodoman, sada ma i dioban jana sahalak nari ditadingkon. 17:35 Sian dua halak na rap manduda eme, sada ma halahi dioban, jana sahalak nari ditadingkon. 17:36 Sian dua halak bayo na topet di ladang, sada ma i dioban jana sahalak nari ditadingkon." 17:37 Disapai angka sisean ni Jesus ma, "Di dia ma i Tuhan?" Dialusi Jesus ma, "Sanga na di dia adong bangke, disi do marlagut halihi."
18:1 Dung i dipaboa Jesus muse ma sada umpama laho mangajar angka siseanNia anso tongtong martangiang halahi jana ulang mandele. 18:2 Ninna Jesus ma, "Di sada kota adong ma sada panguhum na so mabiar mida Debata, jana na so mangargahon jolma. 18:3 Di kota i laing adong muse do sada halak ina na mabalu na sai ro tu panguhum i, mangidohon anso dibela parkaronia. 'Tolong ma au maradopkon alongku,' ninna ina na mabalu i. 18:4 Tarhonok do inda ra panguhum i manolong na mabalu i. Tapi ujungna didok panguhum i ma di bagasan rohania, 'Haru so mabiar pe au tu Debata jana inda huargahon jolma, 18:5 tapi dibaen sai ro na mabalu i mangganggu au, dumenggan ma hubela parkaronia i, anso ulang sai ro be ia mangganggu au.' " 18:6 Jadi didok Jesus ma, "Parrohahon hamu ma pandohan ni panguhum na geduk i! 18:7 Anggo sai pio-pio do bangso ni Debata arian dohot borngin tu Debata nada he belaon ni Debata muse parkaro ni bangsoNa i? Adong he dipalolot-lolot Ia laho manolong halahi? 18:8 Hudok ma di hamu! Manigor belaonNia do parkaro ni halahi! Tapi laing adong dope he haporsayaan di portibi on saulahon muda ro Anak Ni Jolma i." 18:9 Dicaritohon Jesus muse dope umpama on tu halak na mangetong hum dirina sajo do na nihalomohon ni Debata jana halak na asing i siapasanna. 18:10 Didok Jesus, "Adong ma dua halak na kehe tu Bagas Ni Debata giot martangiang disi. Halak Parise do sada jana na sada nari sijagit pajak. 18:11 Jadi tanda sajo ma dibaen Parise i parjongjongnia jana martangiang ma ia, 'O ale Debata, mandok tarimakasi ma au tu Ho, angke nada sarupa au dohot angka halak na asing i, na manyamun, na so jujur dohot na mangalangkup. Tarimakasi ma hudok dibaen nada tudos au dohot halak sitagi pajak indi. 18:12 Puaso do au dua noli di bagasan saminggu, jana hulehen do saparsampulu sian pangomoanku.' 18:13 Tapi anggo sitagi pajak i jongjong ma ia mandao-dao jana inda puluk ia mardongak adop langit. Ditompuhi ia andorania i didok ia ma, 'O ale Debata, ibo ma rohaMu mida au pardosa on!' " 18:14 Jadi Hudokkon ma tu hamu: "Mulak ma halak on songon halak na nipatigor ni Debata jana halak na asing i nada. Dibaen barang ise na paginjangkon dirina, nipatutoru do muse; tapi na patutoruhon dirina, dipatuginjang do muse." 18:15 Adong ma halak na maroban dakdanakna be tu Jesus anso diampehon Jesus tanganNia tu angka dakdanak i. Jadi dung diida angka sisean ni Jesus songon i, digorahon halahi ma angka jolma i. 18:16 Tapi dipio Jesus ma angka jolma i didok Ia ma tu halahi, "Padiar hamu ma marroan angka dakdanak i tu Au! Ulang larang hamu halahi, angke halak sisongon on ma na gabe anggota ni Harajaan Ni Debata. 18:17 Tutu do na Hudokkon di hamu: Barang ise na so manjagit Harajaan Ni Debata songon dakdanak on, nada tarbaensa masuk tu bagasanna." 18:18 Ro ma sahalak pamimpin marsapa tu Jesus, "Guru na denggan roha, aha dehe na angkon baenonku anso hutean hangoluan na so mantak i?" 18:19 Disapai Jesus ma tusia, "Biasi didokkon ho Au na denggan roha? Nada adong halak na denggan roha asing sian Debata. 18:20 Madung diboto ho sude parenta ni Debata i: 'Ulang ho markarosuan; ulang ho mamunu; ulang ho manangko; ulang ho margabus mangalo donganmu; jana pasangap ma amangmu dohot inangmu.' " 18:21 Dialusi bayo i ma, "Sian na poso dope, madung huoloi sude parenta i." 18:22 Umbege na songon i, didok Jesus ma tusia, "Laing adong dope sada nari na angkon sibaenonmu: Gadis ma sude na adong di ho, jana lehen ma i tu halak na pogos; anggo i dapot ho ma arta na di banua ginjang. Dung i beta ma ihutkon Au." 18:23 Umbege na songon i, gabe marsak ma bayo i angke halak na kayo situtu do ia. 18:24 Dung i diligi Jesus ma ia, jana didok, "Na maol ma sahalak na mora masuk tu Harajaan Ni Debata! 18:25 Ummomoan do sada unto mamolus sian lubang ni jait ulang pado sada halak na kayo masuk tu Harajaan Ni Debata." 18:26 Disapai angka halak na umbege na nidok ni Jesus i ma, "Anggo songon i, ise ma na tarbaen malua?" 18:27 Dialusi Jesus ma, "Na so tarbaen di jolma, tarbaen do anggo di Debata." 18:28 Dung i didok si Petrus ma, "Madung hami tinggalkon sude na adong di hami; jana mangihutkon Ho." 18:29 "Tutu do i!" ninna Jesus, "Tutu do na Hudok on tu hamu! Ganop halak na manadingkon bagasna sanga dadaboruna, sanga kahanggina sanga natorasna, sanga pe angka dakdanakna hara ni Harajaan Ni Debata, 18:30 angkon baloskonon do tu halahi marlompit ganda saonnari on jana lehenon ma ngolu na so mantak di hatiha na giot ro." 18:31 Dioban Jesus ma siseanNia sidua bolas halak i sajo, jana didok Ia ma tu halahi, "Saonnari manangkok ma hita tu Jerusalem, jana tarjadi ma sudena na nisuratkon ni angka panurirang taringot tu Anak Ni Jolma i. 18:32 Pasahaton ma Ia tu angka halak na so mananda Debata, jana incahan ni halahi ma Ia, pabileonna jana tijurkononna. 18:33 Loncingan ni halahi ma Ia jana bunuonna; tapi di ari patoluhon, mulak mangolu ma Ia mangulahi." 18:34 Tapi sudena i saotik pe nada diastui angka siseanNia i. Nada tardodo halahi angka pandohan ni Jesus i. Nada diboto halahi sanga tudia lapatna na nidokkonNia i. 18:35 Dung lalu Jesus marayak Jeriko, adong ma sada halak na mapitung na juguk mangido-ido di topi dalan i. 18:36 Dung dibege bayo na mapitung i adong mamolus halak na bahat disi, disapai ia ma, "Aha dehe na masa?" ning ia. 18:37 Didok halahi ma, "Mamolus Jesus, halak Nasaret i." 18:38 Dung i marsurak ma ia, "O Jesus Anak Ni si Daud! Ibo ma rohaMu mida au!" 18:39 Tapi digorahon angka halak na di jolo i ma ia, jana di pasip ma ia. Hape mur digogoi ia muse do na marsurahi i, "O Anak Ni si Daud! Ibo ma rohaMu mida au!" 18:40 Dung i maradian ma Jesus jana disuru alap Ia ma bayo na mapitung i tuSia. Dung lalu, disapai Jesus ma tusia, 18:41 "Aha ma he giotmu baenonKu tu ho?" Dialusi bayo na mapitung i ma, "Giotku, sugari marnida ma au nian Amang." 18:42 Didok Jesus ma tusia, "Marnida ma ho! Madung dipamalum haporsayaanmi ho." 18:43 Jadi manigor marnida ma ia, asa diihutkon ia ma Jesus jana dipuji-puji ia ma Debata. Sude halak na midaan pangalaho i dohot muse ma mamuji-muji Debata.
19:1 Lalu ma Jesus tu Jeriko, masuk ma Ia jana torus mardalan manyalpui kota i. 19:2 Adong do di kota i sada halak kapala ni sitagi pajak na kayo, i ma na margoar si Zakeus. 19:3 Sai por rohania mangaligi sanga na ise Jesus. Hape halak na pendek do ia gabe inda tarbaen ia mangaligi Jesus hara ni bahat ni halak. 19:4 Jadi marlojong ma ia manjoloi angka jolma i, dipanaek ia ma sada hayu gala-gala, anso tarida ia Jesus na giot mamolus sian i. 19:5 Dung lalu Jesus disi, ditailihon Ia ma tu ginjang jana didok Ia ma tu si Zakeus, "O Zakeus, pasigop ma mijur! Angke giot ro do Au tu bagasmu sadari on." 19:6 Diompoti si Zakeus ma mijur, jop ma rohania manjagit Jesus. 19:7 Mungut-ungut ma sude halak marnida pangalaho i. Didok halahi ma, "Kehe do Ia masuk tu bagas ni halak pardosa!" 19:8 Jongjong ma si Zakeus didok ia ma tu Tuhan i, "O Tuhan, satonga sian artangku hulehen ma tu halak na pogos; jana sanga ise na unjung hutipu, hugarar pe mangulahi tusia opat noli lompit!" 19:9 Didok Jesus ma tusia, "Mamungka sadari on dapotan haluaon do pangisi ni bagas on, harana pinompar ni si Abraham do ia. 19:10 Angke na giot manjalahi dohot paluahon angka halak na lilu do umbaen na ro Anak Ni Jolma i." 19:11 Dompak manangi-nangihon pangkataion ni Jesus dope halak na bahat i, dicaritohon Jesus ma sada umpama. Jadi hatiha i, marayak lalu ma Ia tu Jerusalem jana ning roha ni halak manigor tarida ma Harajaan Ni Debata. 19:12 Jadi didok Jesus ma tu halahi, "Adong ma sada halak na mora na kehe tu luat na dao manjagit pangangkatannia gabe raja disi, dung i mulak ma ia. 19:13 Tapi dompak so kehe ia, dipiohon ia ma sampulu halak naposonia jana dilehen ia ma tu halahi sada be hepeng sere. 'Marjagal ma hamu, hepeng on ma pake hamu salolot so dison au,' ning ia tu halahi. 19:14 Tapi goyak ma roha ni halak luat i tusia jana dung kehe ia, disuru halahi ma suruan tusia laho paboahon, 'Nada ra hami anggo bayo on do gabe rajanami.' 19:15 Tapi dung diangkat bayo i gabe raja mulak ma ia tu luatnia. Dung i dipiohon ia ma angka naposonia na dung manjagit hepeng i sian ia jana disuru ia ma halahi mangadop, harana giot botoonnia do sanga sadia labo na dapot ni halahi ganop be. 19:16 Ro ma naposonia na parjolo i mandok, 'Tuan dapotan labo do au sampulu hepeng sere sian na nilehenmi.' 19:17 Didok tuan i ma, 'Ma denggan i, ho ma naposo na burju! Angke haposan do ho di bagasan pangalaho na menek pe, hubaen noma ho gabe pangarajai tu sampulu kota.' 19:18 Ro ma naposo na paduahon mandok, 'Tuan, dapotan labo do au lima hepeng sere sian na nilehenmi.' 19:19 Didok pangarajai i ma tu naposona i, 'Gabe pangarajai ma ho di lima kota.' 19:20 Ro ma naposo na asing mandok, 'Tuan indon ma hepengmi, hubungkus do di sapu tangan. 19:21 Mabiar situtu do au di tuan i, angke huboto do tangkas parmuruk do tuan i. Dibuat tuan i do salang na so nampuna ni tuan i, jana disabi ho do na so nisuanmu.' 19:22 Didok raja i ma tusia, 'Naposo na jahat do ho! Hombar tu hata na nipardokkonanmi, uhumanku ma ho. Diboto ho do antong parmuruk au; hubuati do angka na so au puna jana husabi angka na so jongada husuan. 19:23 Antong anggo songon i, biasi nada dilehen ho hepengki tu na padalankon hepeng? Jadi dung mulak au bisa ma i buatonku rap dohot anakna i. 19:24 Dung i didok raja i ma tu angka halak na marjongjongan disi, 'Buat ma hepeng i sian ia jana lehen ma i tu naposo na maniop sampulu hepeng sere i.' 19:25 Didok angka jolma i ma tu raja i, 'Tapi madung sampulu kibung hepeng sere disia.' 19:26 Dialusi raja i ma, 'Hudok ma di hamu: Halak na maradong, lehenon muse dope tusia umbahat. Tapi anggo halak na so maradong, dibuat muse dope sian ia na adong disia. 19:27 Jana oban hamu ma tuson angka musungku na so ra manjagit au gabe raja ni halahi. Sambol hamu ma halahi di jolongku!' " 19:28 Dung didok Jesus sudena i, parjolo ma Ia sian halahi tu Jerusalem. 19:29 Dung marayak Betpage dohot Betania na di Dolok Zetun, disuru Ia ma parjolo dua halak siseanNia. 19:30 Didok Ia ma, "Kehe ma hamu tu huta na di jolomunu an. Muda dung lalu hamu disi, dapotonmunu ma sada anak ni halode na tambat jana na so jungada dope dilombut halak. Harkari hamu ma halode i jana oban hamu ma tuson. 19:31 Muda disapai halak hamu, 'Biasi diharkari hamu halode i?' Dok hamu ma tu na manyapai i, 'Na porlu do i di Tuhan.' " 19:32 Kehe ma sisean sidua halak na disuru parjolo i. Jana didapot halahi ma sudena songon na dung dipaboa ni Jesus. 19:33 Taran na mangharkari tali ni halode i halahi, didok nampuna i ma tu halahi, "Biasi diharkari hamu halode i?" 19:34 Dialusi halahi ma, "Na porlu do di Tuhan i." 19:35 Dung i dioban halahi ma anak ni halode i tu Jesus. Dung i dibaen halahi ma pakean ni halahi tu tanggurung ni halode i jana dipalombutkon halahi ma Jesus tu tanggurungna i. 19:36 Jadi hatiha mamolus Jesus na marhalode i, diparpahembang angka jolma i ma pakean ni halahi di dalan i. 19:37 Jadi dung marayak lalu Jesus tu Jerusalem, di panuatan na di Dolok Zetun, marsurahi ma halak na bahat angka na mangihutkon Jesus mamuji-muji Debata dohot sora na gogo, hara ni sude hahomangon na niida ni halahi. 19:38 Jana didokkon halahi ma, "Dipasupasu ma Raja i na ro markite-hite goar ni Tuhan! Hasonangan ma di banua ginjang jana hamuliaon ma di inganan na gumincat i!" 19:39 Dung i adong ma halak Parise sian tonga-tonga ni halak na bahat i, didok halahi ma tu Jesus, "O Guru, pasip ma da angka siseanMi." 19:40 Tapi dialusi Jesus ma tu halahi, "Hudok ma di hamu, muda sip halahi, marsurahi ma angka batu on." 19:41 Dung mur donok Jesus tu Jerusalem, diligi Ia ma kota i, tangis ma Ia marnidasa. 19:42 Humolos ma Ia, "Dengganna i sugari diboto hamu sadari on sanga aha na porlu di hamu laho manjagit hadameon i! Hape saonnari buni do i di jolo ni matamu. 19:43 Saulahon ro do hatihana, baenon ni angka musumu ma rungga humaliang ho, hobuhon ni halahi ma ho jana sosahanna ma ho humaliang. 19:44 Roncohonon ni halahi ma ho, songon i sude halak na adong di bagasan tembok ni kotami; nada dipadiar halahi umpe sada batu di ginjang ni donganna, hara ni na so diparrohahon ho sanga andigan Debata ro giot paluahon ho!" 19:45 Masuk ma Jesus tu Bagas Ni Debata jana manigor dipaorot Ia ma angka parjagal na disi. 19:46 Didok Ia ma, "Di Buku Na Badia i, adong do tarsurat, 'Anggo bagasKu angkon gabe bagas partangiangan do.' Tapi madung dibaen hamu i gabe inganan ni panyamun!" 19:47 Ganop ari do mangajari Jesus di bagasan Bagas Ni Debata. Tapi anggo kapala ni malim dohot angka Siboto Surat, songon i angka bagian hatobangon ni halak Jahudi i, dijalahi halahi do dalan laho mamunu Jesus. 19:48 Tapi nada dapot halahi sanga songon dia pambaenna, angke sude rayat tuSia do rohana jana por do rohana manangihon Ia.
20:1 Di sada ari dompak mangajari Jesus di Bagas Ni Debata, jana dijamitahon Ia Jamita Na Denggan tu halak na bahat i, ro ma angka kapala ni malim dohot Siboto Surat dohot hatobangon tusi, 20:2 jana didokkon halahi ma tu Jesus, "Paboa ma di hami markite-hite kuaso ni ise do dibaen Ho na songon i? Sanga ise do na mangalehen kuaso i di Ho?" 20:3 Dialusi Jesus ma, "Au pe adong sada sisapaanKu tu hamu. Paboa hamu ma jolo tu Au, 20:4 ise dehe na mangalehen kuaso tu si Johannes Pandidi laho mandidihon halak. Debata do sanga jolma?" 20:5 Dung i rap dihatai halahi ma taringot tusi. "Aha ma alusta tuSia?" ninna halahi sama halahi. "Muda tadok, 'Sian Debata,' dohononNia ma tu hita, 'Antong biasi nada porsaya hamu tu si Johannes?' 20:6 Tapi muda tadok, 'Sian jolma,' sude ma halak na bahat on mandanggur hita, harana dihaporsayai halahi sudena do, sada panurirang do anggo si Johannes." 20:7 Jadi dialusi halahi ma, "Nada hami boto!" 20:8 Dung i didok Jesus ma tu halahi, "Antong anggo songon i do, Au pe nada paboaonKu di hamu sanga dohot kuaso ni ise Hubaen i sudena." 20:9 Dipaboa Jesus dope umpama on tu angka jolma i, "Adong ma sada bayo nampuna kobun anggur. Dipabolahon ia ma kobun i tu piga-piga halak pamola di na laho kehe ia tu inganan na asing jana disi ma ia maringanan honok sajo. 20:10 Dung dapot hatihana mamutik batu ni anggur i, disuru nampuna kobun anggur i ma naposonia mandapotkon angka na mamola kobun i, laho manjagit suha ni kobun i sian halahi. Tapi dibalbal angka na mamola kobun i ma naposo i jana disuru halahi ma ia mulak umpe bagi aha diobansa. 20:11 Dung i disuru nampuna kobun i muse ma sada nari naposonia na asing, tapi laing dibalbali muse do naposo i jana dipabile, dipaila angka pamola i, baru disuru halahi mulak umpe maroban bagi aha. 20:12 Dung i disuru nampuna kobun i ma naposonia na patoluhon. Naposo on pe dibalbali angka pamola i muse dope baru dipamorot halahi sian kobun i. 20:13 Ujungna didok nampuna kobun i ma, 'Bia noma ulaning baenonku tusi? Anak haholongan ni rohangki noma da husuru tusi. Tontu anggo i pasangapon ni halahi ma!' 20:14 Tapi dung diida angka na mamola kobun i anaknia i, didok halahi ma sama halahi, 'On ma da ibana anak ni nampuna kobun on. Tamatehon ma on anso di hita artania i.' 20:15 Dung i disarat halahi ma ia tu balian ni kobun i, dibunu halahi ma." "Antong, aha dope sibaenon ni nampuna kobun anggur i maradopkon angka na mamola i?" ninna Jesus manyapai halak na manangihon umpama i. 20:16 "Tontu ro ma ia, jana matehononnia ma sude angka na mamola i. Jana tu halak na asing noma pabolahononnia kobun i." Dung dibege angka halak i na songon i, didok halahi ma tu Jesus, "Ah, sai dao ma na songon i!" 20:17 Dipamanat Jesus ma halahi, ning Ia ma, "Anggo songon i, aha do astuan ni ayat na di Buku Na Badia on? 'Anggo batu na niambungkon ni angka tukang bagas i, madung gabe batu parsuhi.' 20:18 Sude halak na madabu tu batu i gabe maropuk, jana barang ise na didondoni ni batu i, maropuk ma halakna i baenon ni batu i." 20:19 Diboto angka Siboto Surat ni Jahudi dohot angka kapala ni malim i do na tu halahi tujuan ni Jesus di umpama i. Hara ni i giot tangkupon ni halahi ma Jesus, tapi mabiar halahi mida angka jolma i. 20:20 Jadi sai dijalahi halahi ma hatiha na denggan. Dilehen halahi ma hepeng sogok tu halak na gabe kaki tangan ni halahi jana disuru halahi ma angka kaki tangan i mangalancap songon halak na burju laho mangonjap Jesus markite-hite sapa-sapa, anso tarpasahat halahi Jesus tu toru ni kuaso ni gubernur. 20:21 Jadi disapai halahi ma Ia ninna ma, "Ale Guru, madung hami boto sintong do hataMu dohot pangajaranMu, nada na mangaligi bohi Ho, tapi dipodahon Ho do dalan ni Debata mangihutkon hasintongan i. 20:22 Tola dehe hami manggarar pajak tu Kesar sanga nada?" 20:23 Hape diboto Jesus do tipu akal ni halahi gabe didok Ia ma, 20:24 "Patidahon hamu ma jolo tu Au sangkibung hepeng perak. Gambaran ni bohi ni ise dohot goar ni ise do di hepeng i?" "Kesar i!" ning halahi mangalusi. 20:25 Dung i didok Jesus ma tu halahi, "Anggo songon i, lehen hamu ma tu Kesar i sanga aha na patut lehenon tu Kesar i, jana lehen ma tu Debata sanga aha na patut lehenon tu Debata." 20:26 Jadi tangkas ma di jolo ni halak na bahat i, na so tarbaen halahi padapot hasalaan ni Jesus. Tarkohom jana homang be roha ni halahi hara ni alusNia. 20:27 Jadi ro ma sian golongan Saduse tu Jesus. (Nada porsaya halak Saduse on na mulak mangolu muse halak na dung mate.) Disapai halahi ma tu Jesus, 20:28 "O, Guru! Disuratkon si Musa do tu hita tona on: Muda maninggal sada bayo jana ditadingkon ia ma daborunia, jana nada adong dakdanakna, angkon patugincaton do i anso adong pomparan ni kahangginia i. 20:29 Jadi adong ma pitu halak na martinadohon. Mambuat boru ma siangkaan i hape mate ma ia so jolo mardakdanak. 20:30 Dung i dibuat na nitadohonnia i ma dadaboru na nitadingkon ni angkangnia i hape mate muse ma ia so mardakdanak. 20:31 Dung i angginia na patoluhon pe laing dibuat ma dadaboru i jana laing songon i ma lopus tu na papituhon; sude halahi mambuat dadaboru i, jana mate punu. 20:32 Na parpudi situtu, mate muse ma dadaboru i. 20:33 Antong, di na nipangolu mangulahi halak na mate i, dadaboru ni ise ma anak boru i saulahon? Angke madung pitu-pitu halahi mambuat ia." 20:34 Dialusi Jesus ma, "Anggo halak na mangolu saonnari marbagas do jana dipabagas, 20:35 tapi anggo angka jolma na patut dipangoluon mangulahi dung mate jana na mangolu saulahon, nada marbagas halahi jana nada dipabagas. 20:36 Songon surusuruan noma pangalaho ni halahi jana nada ra be mate. Gabe dakdanak ni Debata ma halahi, angke madung dipangolu halahi mangulahi, sian hamatean. 20:37 Si Musa pe tangkas do dipaboa ia, mulak dipangolu do mangulahi halak na mate. Di suratnia i, i ma taringot tu ramba-ramba na mosok i dipaboa ia do, anggo Tuhan i, i ma, 'Debata ni si Abraham, Debata ni si Ishak dohot Debata ni si Jakob.' 20:38 Nada Debata ni halak na mate Tuhan i tapi Debata ni halak na mangolu do i! Harana anggo di Debata, na mangolu do sude jolma." 20:39 Adong ma deba sian angka Siboto Surat i na mandok, "Denggan sajo do pangalusi ni Guru i." 20:40 Gabe nada puluk be halahi manyapai bagi aha tu Jesus. 20:41 Disapai Jesus ma tu halahi, "Biasi ma he didok halak pinompar ni si Daud Kristus i? 20:42 Hape si Daud sandiri mandok di Buku Masmur i, 'Didok Tuhan do tu Tuanki: Juguk ma Ho di siamunKu, 20:43 lopus Hubaen sude angka musuMu gabe sidegean ni patMu.' 20:44 Muda 'Tuhan' do Ia didok si Daud, tarbia ma parjadina Kristus i pinompar ni si Daud muse?" 20:45 Jadi taran manangihon pangkataion ni Jesus dope angka jolma i, didok Jesus ma tu angka siseanNia i, 20:46 "Manat ma hamu maradopkon angka Siboto Surat. Na jopan roha ni halahi mardalani mamake baju juba na gabar gebur, na jopan muse roha ni halahi ditabi halak di pasar an. Na tagian halahi mamili-mili angka inganan ni halak na godang di angka bagas paribadatan dohot angka karosi ni halak na sangap di angka pesta. 20:47 Dirugii halahi do angka na mabalu jana dirampas halahi angka bagasna i, hape dipaula-ula halahi ma lolot-lolot martangiang! Musti angkon hona uhum na dokdok halahi!"
20:1 Di sada ari dompak mangajari Jesus di Bagas Ni Debata, jana dijamitahon Ia Jamita Na Denggan tu halak na bahat i, ro ma angka kapala ni malim dohot Siboto Surat dohot hatobangon tusi, 20:2 jana didokkon halahi ma tu Jesus, "Paboa ma di hami markite-hite kuaso ni ise do dibaen Ho na songon i? Sanga ise do na mangalehen kuaso i di Ho?" 20:3 Dialusi Jesus ma, "Au pe adong sada sisapaanKu tu hamu. Paboa hamu ma jolo tu Au, 20:4 ise dehe na mangalehen kuaso tu si Johannes Pandidi laho mandidihon halak. Debata do sanga jolma?" 20:5 Dung i rap dihatai halahi ma taringot tusi. "Aha ma alusta tuSia?" ninna halahi sama halahi. "Muda tadok, 'Sian Debata,' dohononNia ma tu hita, 'Antong biasi nada porsaya hamu tu si Johannes?' 20:6 Tapi muda tadok, 'Sian jolma,' sude ma halak na bahat on mandanggur hita, harana dihaporsayai halahi sudena do, sada panurirang do anggo si Johannes." 20:7 Jadi dialusi halahi ma, "Nada hami boto!" 20:8 Dung i didok Jesus ma tu halahi, "Antong anggo songon i do, Au pe nada paboaonKu di hamu sanga dohot kuaso ni ise Hubaen i sudena." 20:9 Dipaboa Jesus dope umpama on tu angka jolma i, "Adong ma sada bayo nampuna kobun anggur. Dipabolahon ia ma kobun i tu piga-piga halak pamola di na laho kehe ia tu inganan na asing jana disi ma ia maringanan honok sajo. 20:10 Dung dapot hatihana mamutik batu ni anggur i, disuru nampuna kobun anggur i ma naposonia mandapotkon angka na mamola kobun i, laho manjagit suha ni kobun i sian halahi. Tapi dibalbal angka na mamola kobun i ma naposo i jana disuru halahi ma ia mulak umpe bagi aha diobansa. 20:11 Dung i disuru nampuna kobun i muse ma sada nari naposonia na asing, tapi laing dibalbali muse do naposo i jana dipabile, dipaila angka pamola i, baru disuru halahi mulak umpe maroban bagi aha. 20:12 Dung i disuru nampuna kobun i ma naposonia na patoluhon. Naposo on pe dibalbali angka pamola i muse dope baru dipamorot halahi sian kobun i. 20:13 Ujungna didok nampuna kobun i ma, 'Bia noma ulaning baenonku tusi? Anak haholongan ni rohangki noma da husuru tusi. Tontu anggo i pasangapon ni halahi ma!' 20:14 Tapi dung diida angka na mamola kobun i anaknia i, didok halahi ma sama halahi, 'On ma da ibana anak ni nampuna kobun on. Tamatehon ma on anso di hita artania i.' 20:15 Dung i disarat halahi ma ia tu balian ni kobun i, dibunu halahi ma." "Antong, aha dope sibaenon ni nampuna kobun anggur i maradopkon angka na mamola i?" ninna Jesus manyapai halak na manangihon umpama i. 20:16 "Tontu ro ma ia, jana matehononnia ma sude angka na mamola i. Jana tu halak na asing noma pabolahononnia kobun i." Dung dibege angka halak i na songon i, didok halahi ma tu Jesus, "Ah, sai dao ma na songon i!" 20:17 Dipamanat Jesus ma halahi, ning Ia ma, "Anggo songon i, aha do astuan ni ayat na di Buku Na Badia on? 'Anggo batu na niambungkon ni angka tukang bagas i, madung gabe batu parsuhi.' 20:18 Sude halak na madabu tu batu i gabe maropuk, jana barang ise na didondoni ni batu i, maropuk ma halakna i baenon ni batu i." 20:19 Diboto angka Siboto Surat ni Jahudi dohot angka kapala ni malim i do na tu halahi tujuan ni Jesus di umpama i. Hara ni i giot tangkupon ni halahi ma Jesus, tapi mabiar halahi mida angka jolma i. 20:20 Jadi sai dijalahi halahi ma hatiha na denggan. Dilehen halahi ma hepeng sogok tu halak na gabe kaki tangan ni halahi jana disuru halahi ma angka kaki tangan i mangalancap songon halak na burju laho mangonjap Jesus markite-hite sapa-sapa, anso tarpasahat halahi Jesus tu toru ni kuaso ni gubernur. 20:21 Jadi disapai halahi ma Ia ninna ma, "Ale Guru, madung hami boto sintong do hataMu dohot pangajaranMu, nada na mangaligi bohi Ho, tapi dipodahon Ho do dalan ni Debata mangihutkon hasintongan i. 20:22 Tola dehe hami manggarar pajak tu Kesar sanga nada?" 20:23 Hape diboto Jesus do tipu akal ni halahi gabe didok Ia ma, 20:24 "Patidahon hamu ma jolo tu Au sangkibung hepeng perak. Gambaran ni bohi ni ise dohot goar ni ise do di hepeng i?" "Kesar i!" ning halahi mangalusi. 20:25 Dung i didok Jesus ma tu halahi, "Anggo songon i, lehen hamu ma tu Kesar i sanga aha na patut lehenon tu Kesar i, jana lehen ma tu Debata sanga aha na patut lehenon tu Debata." 20:26 Jadi tangkas ma di jolo ni halak na bahat i, na so tarbaen halahi padapot hasalaan ni Jesus. Tarkohom jana homang be roha ni halahi hara ni alusNia. 20:27 Jadi ro ma sian golongan Saduse tu Jesus. (Nada porsaya halak Saduse on na mulak mangolu muse halak na dung mate.) Disapai halahi ma tu Jesus, 20:28 "O, Guru! Disuratkon si Musa do tu hita tona on: Muda maninggal sada bayo jana ditadingkon ia ma daborunia, jana nada adong dakdanakna, angkon patugincaton do i anso adong pomparan ni kahangginia i. 20:29 Jadi adong ma pitu halak na martinadohon. Mambuat boru ma siangkaan i hape mate ma ia so jolo mardakdanak. 20:30 Dung i dibuat na nitadohonnia i ma dadaboru na nitadingkon ni angkangnia i hape mate muse ma ia so mardakdanak. 20:31 Dung i angginia na patoluhon pe laing dibuat ma dadaboru i jana laing songon i ma lopus tu na papituhon; sude halahi mambuat dadaboru i, jana mate punu. 20:32 Na parpudi situtu, mate muse ma dadaboru i. 20:33 Antong, di na nipangolu mangulahi halak na mate i, dadaboru ni ise ma anak boru i saulahon? Angke madung pitu-pitu halahi mambuat ia." 20:34 Dialusi Jesus ma, "Anggo halak na mangolu saonnari marbagas do jana dipabagas, 20:35 tapi anggo angka jolma na patut dipangoluon mangulahi dung mate jana na mangolu saulahon, nada marbagas halahi jana nada dipabagas. 20:36 Songon surusuruan noma pangalaho ni halahi jana nada ra be mate. Gabe dakdanak ni Debata ma halahi, angke madung dipangolu halahi mangulahi, sian hamatean. 20:37 Si Musa pe tangkas do dipaboa ia, mulak dipangolu do mangulahi halak na mate. Di suratnia i, i ma taringot tu ramba-ramba na mosok i dipaboa ia do, anggo Tuhan i, i ma, 'Debata ni si Abraham, Debata ni si Ishak dohot Debata ni si Jakob.' 20:38 Nada Debata ni halak na mate Tuhan i tapi Debata ni halak na mangolu do i! Harana anggo di Debata, na mangolu do sude jolma." 20:39 Adong ma deba sian angka Siboto Surat i na mandok, "Denggan sajo do pangalusi ni Guru i." 20:40 Gabe nada puluk be halahi manyapai bagi aha tu Jesus. 20:41 Disapai Jesus ma tu halahi, "Biasi ma he didok halak pinompar ni si Daud Kristus i? 20:42 Hape si Daud sandiri mandok di Buku Masmur i, 'Didok Tuhan do tu Tuanki: Juguk ma Ho di siamunKu, 20:43 lopus Hubaen sude angka musuMu gabe sidegean ni patMu.' 20:44 Muda 'Tuhan' do Ia didok si Daud, tarbia ma parjadina Kristus i pinompar ni si Daud muse?" 20:45 Jadi taran manangihon pangkataion ni Jesus dope angka jolma i, didok Jesus ma tu angka siseanNia i, 20:46 "Manat ma hamu maradopkon angka Siboto Surat. Na jopan roha ni halahi mardalani mamake baju juba na gabar gebur, na jopan muse roha ni halahi ditabi halak di pasar an. Na tagian halahi mamili-mili angka inganan ni halak na godang di angka bagas paribadatan dohot angka karosi ni halak na sangap di angka pesta. 20:47 Dirugii halahi do angka na mabalu jana dirampas halahi angka bagasna i, hape dipaula-ula halahi ma lolot-lolot martangiang! Musti angkon hona uhum na dokdok halahi!"
22:1 Dapot ne ma Pesta Paskah, i ma na manghagodangkon Roti Na So Marragi. 22:2 Sai dijalak-jalahi angka sintua ni malim dohot angka Siboto Surat Jahudi ma dalan mamatehon Jesus; angke mabiar do halahi mida halak na bahat i. 22:3 Dung i disonggopi Sibolis ma si Judas na nigoaran muse si Iskariot, i ma sahalak sian sidua bolas halak sisean ni Jesus. 22:4 Si Judas pe kehe ma martahi dohot angka panjago Bagas Ni Debata, sanga tarsongon dia baenonnia laho pasahatkon Jesus tu halahi. 22:5 I noma jop ni roha ni halahi jana marjanji ma halahi laho mangalehen hepeng tusia. 22:6 Dung dioloi si Judas, dipungka ia ma manjalahi dalan laho pasahatkon Jesus tu halahi, di na so pamotoan ni halak. 22:7 Dapot ma arina parningotan di Roti Na So Marragi angkon nisambol ma biri-biri Paskah. 22:8 Dung i disuru Jesus ma si Petrus dohot si Johannes. Didok Jesus ma tu halahi, "Kehe ma hamu pasingkopkon panganon Paskah di hita." 22:9 "Di dia do dipangido rohaMu hami pasingkop?" ning halahi manyapaisa. 22:10 Dialusi Ia ma, "Tangihon hamu ma jolo! Muda masuk hamu annon tu kota, marsuo ma hamu dohot sada halak na maroban sada gunci na marisi aek. Ihutkon hamu ma ia sanga na tu bagas dia ia masuk, 22:11 dung i dokkon hamu ma tu nampuna bagas i, 'Didok Guru i: Di dia dehe inganan ni angka siseanKi dohot Au na giot mangan sipanganon Paskah i?' 22:12 Dung i dipatuduhon nampuna bagas i ma tu hamu sada kamar na bidang di loteng na dung singkop. Pasingkop hamu ma disi sudena." 22:13 Dung i kehe ma si Petrus dohot si Johannes jana dapot halahi ma sudena songon na dung dipatorang ni Jesus nangkin. Dipasingkop halahi ma panganon Paskah i. 22:14 Dung dapot hatihana mangan sipanganon Paskah i, juguk ma Jesus rap dohot angka siseanNia i. 22:15 Dung i didok Ia ma tu halahi, "Lungun sajo do rohangKu mangankon sipanganon Paskah on rap dohot hamu taran so manaon parkancitan Au! 22:16 Angke Hudok ma di hamu: Nada panganonKu be sipanganon on lopus dipatulus arti ni parjamuan on di na nipajongjong Debata HarajaanNia." 22:17 Jadi dibuat Jesus ma panginuman ni anggur, didokkon Ia ma tarimakasi tu Debata, dung i didok Ia ma, "Buat hamu ma jana parbagihon hamu ma; 22:18 angke Hudok ma di hamu, mulai saonnari nada inumonKu be anggur on lopus di haroro ni Harajaan Ni Debata." 22:19 Dung i dibuat Jesus ma roti. Dung didokkon Ia tarimakasi tu Debata, dibola-bola Ia ma roti i, dung i diparleheni Ia ma tu halahi jana didok Ia ma, "On ma pamatangKu, na nilehen di hamu. Baen hamu ma songon i laho marningot Au." 22:20 Laing songon i ma dung sidung mangan, dilehen Ia ma panginuman i, tu halahi jana didok Ia ma, "Anggo anggur on, i ma parjanjian na imbaru sian Debata, na nicap dohot mudarKu, mudar na niduruskon hara ni hamu." 22:21 "Tapi ligi hamu ma! Anggo halak na manghianat tu Au, dison do ia rap dohot Au di meja on! 22:22 Tutu do i nian, angkon mate hian do Anak Ni Jolma i songon na dung ditontuhon ni Debata hian; tapi marjaya ma halak na manghianat Ia!" 22:23 Jadi mamungka ma halahi marsisapaan sama halahi, sanga ise ibana sian halahi na gabe panghianat i. 22:24 Masa ma partongkaran di angka sisean ni Jesus taringot tu sanga ise sian halahi na nietong angkon gumodang. 22:25 Dung i didok Jesus ma tu halahi, "Anggo angka raja na di tano on di kuasoi do rayatna jana digoari do angka na maniop kuaso i, 'Parlinggoman ni na torop.' 22:26 Tapi anggo hamu ulang ma songon i. Sabalikna do, halak na gumodang sian hamu angkon gabe ummenek do, jana giot gabe pamimpin angkon gabe songon pangoloi. 22:27 Ise ma he na gumodang: Halak na mangan di meja do, sanga halak na mangoloi ia? Tontu na juguk i do. Tapi anggo Au di tonga-tongamunu do gabe songon pangoloi. 22:28 Di bagasan sude hasusaanKu, sai tongtong do hamu rap dohot Au. 22:29 Songon dia pangalehen ni Damang di Au kuaso laho mamarenta, laing songon i ma Hulehen kuaso di hamu laho mamarenta. 22:30 Tola ma hamu rap dohot Au marsonang-sonang di HarajaanKi. Jana juguhanmunu ma dua bolas habangsa laho manguhumi halak Israel sidua bolas marga i." 22:31 "Simon, Simon, tangihon jolo! Madung diisinkon Sibolis i laho manguji hamu sude, songon partani na mamiari dahanon sian guapak. 22:32 Tapi madung martangiang Au hara ni ho Simon, anso ulang hambar haporsayaanmi. Jana muda dung mulak ho mangulahi tu Au, angkon patoguonmu do angka kahanggimu." 22:33 Dialusi si Petrus ma, "Olo Tuhan, rade do au masuk tu hurungan jana mate rap dohot Ho!" 22:34 Tapi didok Jesus ma, "Au ma mandok di ho Petrus, dompak so martahuak dope manuk sadari on, tolu noli ma dokkononmu, na so ditanda ho Au." 22:35 Dung i didok Jesus ma tu halahi, "Nabaruon dompak Husuru hamu na so Hupaloas do maroban dompet, huncang sanga sipatu, adong he bagi aha hurang di hamu?" "Nada adong na hurang," ning halahi mangalusi. 22:36 "Tapi anggo saonnari, sanga ise na adong dompetna sanga huncangna, dioban ma; jana na so adong podangna, digadis ma baju jubana panobusi ni podang. 22:37 Angke Au mandok di hamu! Angkon tulus muse dope tu Au hata na tarsurat di Buku Na Badia na mandok, 'Etongon ma Ia songon sada halak parjahat.' Angke sanga aha na tarsurat di Buku Na Badia i taringot tu Au, saonnari ma tarjadi." 22:38 Ninna halahi ma, "Ligi ma jolo Tuhan, madung adong dison dua podang." "Tuk ma i!" ning Jesus mangalusi. 22:39 Dung i kehe ma Jesus ruar sian kota i songon na somal tu Dolok Zetun, jana dohot do angka siseanNia i kehe rap dohot Ia. 22:40 Dung lalu disi, didok Ia ma tu halahi, "Martangiang ma hamu anso ulang madabu hamu tu pandugaan." 22:41 Dung i dipadao Ia ma saotik sian halahi, hira-hira sandanggur batu daona, marsinggang ma Ia martangiang, 22:42 didok Ia ma, "Ale Amang, sugari ra ma Ho, pasalpu ma panginuman sitaonon on sian Au; tapi nada anggo hagiotKu na tulus, hagiotMu ma patulus!" 22:43 Ro ma sada surusuruan tuSia margogoihon Ia. 22:44 Mabiar situtu do Jesus, gabe mur marsitutu ma Ia na martangiang i. Songon mudar noma hodokNia manetehi tu tano i. 22:45 Dung sidung na martangiang i, mulak ma Ia mandapotkon angka siseanNia i. Didapot Ia madung modom be halahi hara ni marsakna. 22:46 Dung i didok Ia ma tu halahi, "Biasi dehe modom hamu? Ngot ma hamu, martangiang ma anso ulang madabu hamu tu pandugaan." 22:47 Dompak na mandok hata i dope Jesus, ro ma halak sarombongan. Si Judas do na maroban halahi, i ma sahalak sian sisean ni Jesus. Dung i dipadonok ia ma tu Jesus, torus diumma ia ma Jesus. 22:48 Tapi didok Jesus ma tusia, "O Judas, hape markite-hite pangummami ma dihianati ho Anak Ni Jolma i." 22:49 Dung diida angka sisean ni Jesus na adong disi sanga aha na giot masa, didok halahi ma, "Bia do Tuhan, hami rasip ma dohot podang on?" 22:50 Dung i ro ma sahalak sian halahi, ditampul ia ma naposo ni Malim Godang i dohot podang i, lopus ramping pinggol siamun ni naposo i. 22:51 Tapi didok Jesus ma, "Madung i!" Dung i dijama Ia ma pinggolna i jana dipamalum Ia. 22:52 Dung i mandok hata ma Jesus tu angka kapala ni malim i dohot tu angka panjago Bagas Ni Debata, dohot tu angka bagian hatobangon ni halak Jahudi na marroan tusi laho manangkup Ia, ning Ia ma, "Panyamun dehe lakna Au umbaen marpodang dohot marumban-umban hamu ro laho manangkup Au? 22:53 Ganop ari do Au rap dohot hamu di Bagas Ni Debata, hape so ditangkup hamu Au. Tapi on ma lakna hatihana di hamu mambaen sibaenonmunu, jana hatihana ma kuaso hagolapan i mambaen hatontuan." 22:54 Ditangkup halahi ma Jesus jana dioban ma tu bagas ni Malim Godang. Dipaihut-ihut si Petrus ma sian na dao. 22:55 Di tonga-tonga ni alaman i dipagara ma api jana dipadonok si Petrus ma tu lambung ni purunan i rap dohot halak na marjuguhan disi. 22:56 Jadi adong ma sahalak naposo dadaboru disi mida si Petrus na juguk donok tu api i, dimata-matai ia ma jana didok ia ma, "Dohot muse do bayo on nangkin rap dohot Jesus!" 22:57 Tapi diporso si Petrus do i. Didok ia, "Saotik pe nada hutanda Ia!" 22:58 Santongkin nari muse, diida halak na asing ma si Petrus jana didok ma, "Ho pe dohot do sada sian halahi!" Tapi dialusi si Petrus ma, "Nada le, inda au i!" 22:59 Dung adong tar sajom ro muse ma na asing sahalak nari manggogohon hatana, "Tutu do bayo on sisean ni Jesus, harana ia pe halak Galilea do!" 22:60 Tapi dialusi si Petrus ma, "Nada huastui sanga aha na nidokmi!" Laing di hatiha i, di na mandok hata i dope si Petrus martahuak ma manuk. 22:61 Jesus pe humusor ma, manaili ma Ia tu si Petrus. Dung i tarsingot ma si Petrus hata na nidok ni Tuhan i tusia, "Painte so martahuak manuk di ari on, ma pola tolu noli ho mamorso Au." 22:62 Jadi haruar ma si Petrus sian i, jana tangis panguncombopon. 22:63 Dipacia-cia jana dibalbali angka na manjago i ma Jesus. 22:64 Dibulang halahi ma mataNa i jana disapai halahi ma Ia, "Paboa ma jolo sanga ise do na mambalbali Ho?" 22:65 Bahat dope angka hata incak na dipardokkonan ni halahi tuSia. 22:66 Dung torang ari marlagut ma angka hatobangon ni halak Jahudi dohot ma angka sintua ni malim dohot angka Siboto Surat. Dung i dioban ma Jesus tu jolo ni Mahkamah Ugamo ni halahi. 22:67 Ninna halahi ma, "Paboa ma tu hami, sanga na Ho do Kristus i?" Dialusi Jesus ma, "Muda Au do paboahon tu hamu, bagi na bia pe so na ra hamu porsaya. 22:68 Jana muda marsapa pe Au tu hamu, laing na so ra do hamu mangalusi. 22:69 Tapi mamungka saonnari, juguk ma Anak Ni Jolma i di siamun ni Debata Na Markuaso i." 22:70 Sude ma halahi mandok, "Antong anggo songon i, Anak Ni Debata do Ho lakna?" Dialusi Jesus ma, "Madung didokkon hamu, bahaso na Anak Ni Debata do Au." 22:71 Didok halahi ma, "Nada porlu be saksi! Madung tarbege sian pamanganNia sandiri!"
23:1 Jongjong ma sude na marrapot i, dioban halahi ma Jesus tu jolo ni si Latus. 23:2 Dipungka halahi ma disi mangaduhon Ia. Didok halahi ma, "Madung tardapot hami bayo on palilu-liluhon halak. Jana diirangi-irangi Ia do halak anso ulang manggarar pajak tu Kesar; harana pandokNia, Kristus do Ia, sada halak Raja." 23:3 Dung i disapai si Latus ma tu Jesus, "Atehe, tutu do Ho Raja ni halak Jahudi?" Dialusi Jesus ma, "Songon na nidok ni tuan i, tutu do i." 23:4 Dung i didok si Latus ma tu angka sintua ni malim i dohot tu halak na bahat, "Nada adong dapot au sanga aha pe hasalaanNia." 23:5 Tapi laing disosak halahi ma. Ninna halahi, "Sian pangajaranNia i, digaori Ia halak na di Judea sude, mula-mula di Galilea do, hape saonnari madung lalu muse tuson." 23:6 Dung dibege si Latus songon i marsapa ma ia, ning ia, "Halak Galilea dehe Bayo on?" 23:7 Jadi dung diboto ia na marasal sian Luat Galilea do Jesus, i ma luat na masuk tu kuaso ni si Herodes, disuru oban si Latus ma Jesus tu si Herodes na topet di Jerusalem hatiha i. 23:8 Jop sajo do roha ni si Herodes dung diida ia Jesus, harana madung lolot dibege ia taringot tu Jesus jana malungun ia marnidasa. Laing arop muse do rohania tarbaen ia sugari manyaksihon hahomangan na nibaen ni Jesus. 23:9 Jadi gabe bahat do sapa-sapania tu Jesus, hape umpe ra Jesus mangalusi ia. 23:10 Mangadop muse do disi angka kapala ni malim dohot angka Siboto Surat manuhas Jesus dohot angka tuduan na borat-borat. 23:11 Dipacia-cia si Herodes dohot angka tentarana i ma Jesus, diincak-incahi, dung i diabitkon halahi ma tusia pakean hasangapan, dung i ditongos halahi ma Jesus mangulahi tu si Latus. 23:12 Jadi laing di ari i gabe mardongan ma mangulahi si Herodes dohot si Latus na marsalisi hian sahonokna on. 23:13 Dipalagut si Latus ma angka sintua ni malim, angka hatobangon dohot rayat. 23:14 Dung i mandok hata ma ia tu halahi, "Madung dioban hamu Bayo on tu jolongku, jana didok hamu Ia paliluhon halak. Saonnari di jolomunu madung hupareso Ia, hape sada pe nada adong dapot hajahatan bagi aha pe na nituhaskonmunu i tuSia. 23:15 Songon i muse do mangihutkon pandapot ni si Herodes, angke ia pe madung ditongos ia mangulahi Jesus on tu hami. Nada adong dibaen Bayo on sanga aha pe na mambaen Ia angkon niuhum tu hamatean. 23:16 Hara ni i huajar ma jolo Ia, dung i baru hupalua." 23:17 Ganop Pesta Paskah, angkon sai dipalua si Latus do sada halak na tarhurung di rayat i. 23:18 Jadi marsurak ma angka jolma na disi sudena, "Matehon i! Si Barabbas ma palua di hami!" 23:19 (Umbaen na tarhurung pe si Barabbas hara ni hagaoran na dikota bope hara ni na mamunu do.) 23:20 Hara ni na giot paluaon ni si Latus do Jesus, gabe mandok hata ma ia sanoli nari tu halak na bahat i. 23:21 Tapi marsurak muse ma halahi, "Parsilangkon i! Parsilangkon i!" 23:22 Dung i patolu nolihon marsurak ma si Latus tu halahi. Ninna si Latus ma, "Aha ma he hasalaanNia? Nada adong dapot au sada pe hasalaan diSia na patut uhumon Ia tu hamatean! Huajar ma Ia, dung i baru ma anso hupalua." 23:23 Tapi marpupu ma halahi marsurahi sagogo-gogona, angkon laing dipaku Jesus tu hayu parsilang. Ujungna monang ma halahi. 23:24 Jadi didabuhon si Latus ma uhum mate tu Jesus hombar tu na nipangido ni halahi i. 23:25 Jana dipalua si Latus ma bayo na nipangido ni halahi i, i ma bayo na tarhurung hara ni na mambaen gaor dohot hara ni na mamunu. Dung i dipasahat si Latus ma Jesus tu halahi anso dibaen halahi roha-rohana tuSia. 23:26 Dung i dioban ma Jesus tu balian. Di tonga dalan marsuo ma halahi dohot sada halak na margoar si Simon, na marasal sian Kirene na topet laho tu kota. Ditangkup halahi ma ia jana dipaksa ma mamorsan hayu parsilang i dipudi ni Jesus. 23:27 Laing bahat do halak na mangudurkon Jesus, adong ma i deba angka dadaboru. Ditangisi jana diandungi angka dadaboru i ma Jesus. 23:28 Ditailihon Jesus ma tu halahi jana didok Ia ma, "Hamu angka boru Jerusalem! Ulang ma tangisi hamu Au. Dirimunu sandiri dohot angka dakdanakmunu ma tangisi hamu. 23:29 Angke na ro ma hatihana dokkonon ni halak ma, 'Martua ma angka dadaboru na so jungada maruntungan, na so unjung mangae mardakdanak jana na so jungada pasusuhon dakdanak!' 23:30 Dokkonon ni halak ma di hatiha i tu angka dolok, 'Tinggangi ma hami!' Jana tu angka partoran, 'Lingkupkon ma hami!' 23:31 Angke haru tu hayu na mangolu madung dibaen halak na songon on, mur tu hayu na punggur, bia muse noma ulaning baenon ni halahi!" 23:32 Adong muse dope dua halak nari na asing na nioban ni halahi anso diuhum rap dohot Jesus. 23:33 Dung lalu tu inganan na margoar "Partangkurahan", dipaku halahi ma Jesus tu hayu parsilang i. Diparsilangkon muse ma dohot sidua halak na jahat i, sahalak ma i di siamun ni Jesus jana na sada nari di siambirangNia. 23:34 Dung i martangiang ma Jesus, "Ale Amang, sesa ma hasalaan ni halahi! Angke nada diboto halahi sanga aha na nibaen ni halahi." *Dipiga-piga naskah nada adong ayat 34 on.* 23:35 Dibagi-bagi halahi be ma disi pakean ni Jesus, i ma markite-hite lotere. Marjongjongan do angka jolma i disi paida-ida sudena i, jana laing mangincak-incahi ma angka hatobangon ni halak Jahudi tu Jesus. Ninna halahi ma, "Anggo halak na asing madung dipalua Ia; padiar ma dipalua Ia diriNia sandiri, paboa na tutu situtu ma Ia Kristus na nitodo ni Debata i!" 23:36 Angka tentara i pe marsiincahi ma tuSia. Dipadonok halahi ma tu Jesus jana dilehen halahi ma anggur na mancom tuSia. 23:37 Dung i ninna halahi ma, "Muda tutu do Ho Raja ni halak Jahudi, antong palua ma diriMu!" 23:38 Di ginjang ni parsilang ni Jesus tarsurat do angka pandohan on, "On ma Raja Ni Halak Jahudi." 23:39 Sada sian parjahat na diparsilangkon i disi mangincahi do tu Jesus. Didok ia, "Na he Ho do Kristus i? Antong anggo songon i, palua ma diriMu dohot hami!" 23:40 Tapi digorahon parjahat na sahalak nari ma ia. Ning ia ma, "Adong he na so mabiar be ho mida Debata? Rap hamatean do da uhuman i tu hita natolu. 23:41 Anggo hita uhuman na patut do antong, hombar tu pangalahonta. Tapi anggo Bayo on saotik pe inda adong salaNia!" 23:42 Dung i didok ia ma tu Jesus, "O Jesus ingot ma Au, muda ro Ho saulahon dung gabe Raja!" 23:43 Gabe didokkon Jesus ma tusia, "Tutu do na Hudok on tu ho, sadari on rap ma ho dohot Au di Pirdaus." 23:44 Dung hira-hira pukul dua bolas arian, manggolap ma mataniari. Gabe golap sajo ma luat i lopus tu pukul tolu andospotang, 23:45 jana maribak ma tire na di Bagas Ni Debata, gabe bola dua. 23:46 Dung i marsurak ma Jesus gogo, "Ale Amang! Tu bagasan tanganMu ma Hupasahat tondingKu!" Dung didok Ia songon i marujung ma ngoluNia. 23:47 Dung diida komandan ni tentara i na masa i, gabe dipuji ia ma Debata. Ning ia ma, "Tutu do! Halak na tigor do Bayo on!" 23:48 Angka halak na marroan i pe tusi laho marnida na masa i, laing diida halahi do sude na tarjadi i. Gabe marsak sajo ma halahi sude di na marmulahan tu bagasna be. 23:49 Jana mandao-dao ma sude halahi na mananda Jesus, dohot ma disi angka dadaboru na mangihutkon Ia sian Galilea paida-ida na masa i sudena. 23:50-51 Adong ma sada halak na margoar si Josep, sian Arimatea na di Luat Judea. Halak na burju do ia na nipasangap ni halak jana sai dipainte ia do sanga andigan hatihana Debata mamungka mamarenta songon Raja. Haru pe anggota ni Rapot Godang ni Ugamo ia, nada dohot-dohotan ia di haputusan dohot pambaenan ni Rapot Godang i. 23:52 Kehe ma si Josep on mangadop tu si Latus jana dipangido ia ma bangke ni Jesus anso dipasahat tusia. 23:53 Dung i dipaijur ia ma bangke i sian hayu parsilang i jana dikopeni ia ma. Dung i ditaruhon ia ma bangke i tu bagasan kuburan na nituhil di sada dolok batu na so jungada dope dipake kuburan i. 23:54 Ari parkobasan do dompahi; jana nada sadia honok nari mamungka ma Ari Sabat. 23:55 Diihutkon angka dadaboru na ro rap dohot Jesus sian Galilea i ma si Josep mangaligi kuburan i. Laing diida halahi do sanga tarbia parpayak ni bangke ni Jesus di bagasan kuburan i. 23:56 Dung i mulak ma halahi, dipature halahi ma angka parmasak dohot miak na huskus silapuhonon tu bangke ni Jesus. Ancogotna i, di Ari Sabat, maradian be ma halahi markarejo mangoloi angka Tona ni ugamo Jahudi.
24:1 Sogot sajo dope di Ari Minggu i, kehe ma angka dadaboru i tu kuburan maroban angka parmasak na niparade ni halahi. 24:2 Didapot halahi ma di kuburan i madung magulang batu panutup ni kuburan i. 24:3 Jadi dung masuk halahi tu bagasan kuburan i, hape inda diida halahi be disi bangke ni Tuhan Jesus. 24:4 Jadi di na lalap-lalap jongjong halahi disi, ompot ma jongjong dua halak na marpakean na marsirlak di lambung ni halahi. 24:5 Sun ma biar ni halahi, gabe manungkap ma halahi tu tano. Jadi di na songon i, didok sidua halak i ma tu halahi, "Biasi dijalahi hamu na mangolu di inganan ni na mate? 24:6 Inda adong dison Ia; madung mulak mangolu Ia! Ingot hamu ma na nidokNia tu hamu dompak di Galilea dope Ia. 24:7 Didok Ia, 'Angkon dipasahat do Anak Ni Jolma i tu tangan ni angka pardosa lalu dipakuhon ma tu hayu parsilang, dung i mulak mangolu ma Ia mangulahi di ari patoluhon.' " 24:8 Dung i gabe tarsingot ma angka dadaboru i tu angka hata na nidok ni Jesus. 24:9 Dung mulak halahi sian kuburan i, dicaritohon halahi ma i sudena tu rasul si sabolas halak i dohot tu angka sisean na asing i sudena. 24:10 Angka on ma dadaboru na paboahon i sudena tu angka sisean ni Jesus: Si Maria Magdalena, si Johanna, si Maria inang ni si Jakobus dohot angka dadaboru na asing i na rap dohot halahi. 24:11 Tapi ning roha ni angka rasul i, carito na so martontu do na nipaboa ni angka dadaboru i, jana nada porsaya halahi disi. 24:12 Tapi anggo si Petrus jongjong ma ia marlojong tu kuburan. Dipaunduk ia ma mangaligi tu bagasan, diida ia ma, hum kopen i sajo do na disi. Homang ma roha ni si Petrus, jana marragam ma sapa-sapa di bagasan rohania hara ni na masa i di na kehe ia mulak. *Dipiga-piga naskah nada adong ayat 12 on.* 24:13 Laing di na sadari i, mardalan ma dua halak sisean ni Jesus tu sada huta na margoar Emmaus, hira-hira sabolas kilometer ma dao ni i sian Jerusalem. 24:14 Di na mardalan i mangkobar-kobari ma halahi taringot tu sude pangalaho na masa i. 24:15 Jadi dompak mangkata-hatai halahi martukar pikiran, ro ma Jesus mandonohi halahi jana sauduran ma halahi mardalan. 24:16 Diida halahi do nian Jesus, tapi songon na rondaron halahi gabe inda ditanda halahi Ia. 24:17 Didok Jesus ma tu halahi, "Taringot tu aha ma he na nihobaranmunu di na mardalan on?" 24:18 Maradian ma halahi marsak sajo idaon. Jadi marsapa ma sahalak sian halahi tu Jesus, i ma na margoar si Kleopas, ning ia ma, "Hum sasada hamu noma ulaning halak ro di Jerusalem on, na so umboto na masa i di na piga-piga ari on?" 24:19 "Aha na masa?" ninna Jesus. "I ma na masa tu Jesus halak Nasaret i," ning halahi mangalusi. "I ma sada panurirang na markuaso situtu hataNa, dohot pambaenanNa pe margogo situtu -- di jolo ni Debata dohot di jolo ni jolma pe. 24:20 Na dipasahat ni angka kapala ni malim dohot angka hatobangon ni bangsonta do Ia mate diuhum jana madung dipaku halahi Ia di hayu parsilang! 24:21 Hape anggo hami arop hian do rohanami, Ia humani ma na paluahon Israel! Tapi madung salpu tolu ari na masa i! 24:22 Sada muse, madung gabe tarsonggot hami dibaen angka dadaboru dongannami i. Sogot dope nasogot ma kehe halahi tu kuburan, 24:23 hape inda diida halahi be disi bangke ni Jesus. Dung i mulak ma halahi jana dipaboa halahi ma na niida ni halahi surusuruan jana didok angka surusuruan i, na mangolu do Jesus. 24:24 Jadi adong ma sanga na piga halak sian hami na kehe tu kuburan i, hape diida halahi tutu do hape sude na nidok ni angka dadaboru i, hum i tutu, anggo Jesus inda diida halahi." 24:25 Dung i mandok hata ma Jesus tu halahi ning Ia, "Otona i hamu! Na maol ma hamu manghaporsayai na nidok ni angka panurirang i! 24:26 Na he angkon taonon ni Kristus i do sudena parkancitan i, laho masuk tu hamuliaanNia i?" 24:27 Dung i dipatorang Jesus ma tu halahi sanga aha na nidok taringot tuSia di bagasan Buku Na Badia i, mamungka sian Buku Ni si Musa lopus tu buku-buku ni angka panurirang. 24:28 Ujungna lalu ma halahi marayak huta sitopoton ni halahi i. Dipaula-ula Jesus ma songon na giot torus na mardalan i, 24:29 tapi diontang halahi ma Ia, "Rap ma hita jolo, borngin ne ma ari indon madung mamungka golap muse." Dung i masuk ma Jesus laho marborngin disi rap dohot halahi. 24:30 Dung juguk halahi rap mangan, dibuat Jesus ma roti jana didok Ia ma tarimakasi tu Debata, dung i dibola-bola Ia ma roti i dohot tanganNia, dilehen Ia ma tu halahi. 24:31 Hatiha i tarbuka ma mata ni halahi jana ditanda halahi ma Ia, tapi manigor buni do Ia morot sian halahi. 24:32 Jadi ninna halahi ma sama halahi, "Nangkin di dalan i, i noma gurgur ni rohanta, di na nipajojorNia torang isi ni Buku Na Badia i tu hita!" 24:33 Laing di na santongkin i manigor jongjong ma halahi laho mulak tu Jerusalem. Madung marlagut angka sisean ni Jesus sisabolas halak dohot na asing i didapot halahi disi. 24:34 Didok angka sisean i ma, "Tutu do na dung mulak mangolu Tuhanta i! Madung dipataridahon Ia diriNia tu si Simon!" 24:35 Dung i dipatorang sisean ni Jesus na baru ro i ma pangalaman ni halahi di tonga dalan i jana lopus ditanda halahi Tuhan i dung dibola Ia roti i. 24:36 Jadi taran na mangkobari i dope sudena halahi, ompot ma jongjong Jesus di tonga-tonga ni halahi, "Dame ma di hamu!" *DAME MA DI HAMU: Dipiga-piga-piga naskah nada adong hata on.* ning Ia. 24:37 Tarsonggot ma halahi jana mabiar be, angke ning roha ni halahi, begu do na niida ni halahi i. 24:38 Tapi didok Jesus ma tu halahi, "Biasi he mabiar hamu, jana biasi ganggu rohamunu? 24:39 Ligi hamu ma tangankon dohot patkon. Au sandiri do i! Jama hamu ma jana pamanat hamu, angke nada marsibuk sanga marholi-holi anggo begu songon na niidamunu di Au." 24:40 Di na nidok ni Jesus songon i dipatidahon Ia ma tanganNia dohot patNia. *Dipiga-piga naskah nada adong ayat 40 on.* 24:41 Di na laing so porsaya halahi, hara ni jop ni roha ni halahi boti homang-homang be, disapai Jesus ma halahi, "Adong dehe sipanganon bagi aha di hamu dison?" 24:42 Dilehen halahi ma tuSia samponggol ihan. 24:43 Dijagit Jesus ma ihan i, laing di jolo ni halahi ma dipangan Ia. 24:44 Dung i mandok hata ma Ia tu halahi ning Ia ma, "Angka on ma na Hupaboa hian di hamu, dompak rap dope Au dohot hamu, angkon tarjadi do sudena sanga aha na tarsurat taringot tu Au di angka Buku Ni si Musa dohot buku ni angka panurirang dohot Masmur i." 24:45 Dung i dibuka Jesus ma pikiran ni halahi anso diastui halahi na nidok ni Buku Na Badia i. 24:46 Dung i didok Jesus ma tu halahi, "Na dung tarsurat hian do di Buku Na Badia i, angkon manaon parkancitan do Kristus i, jana mulak mangolu Ia sian hamatean di ari patoluhon. 24:47 Sada muse, tarsurat hian do angkon nijamitahon do tu sude bangso markite-hite goar ni Kristus i bahaso na giot ampunan ni Debata ma angka dosa muda dipauba jolma i rohana sian angka dosa ni halahi. Jana mamungka ma barita i sian Jerusalem on. 24:48 Jadi hamu ma na gabe saksi ni sudena i. 24:49 Au sandiri pe tongosonKu do tu hamu sanga aha na dung dijanjihon ni Damang. Tapi angkon laing painteonmunu do di kota on lopus nisolukkon tu hamu hagogoan na sian ginjang i." 24:50 Dung i dioban Jesus ma halahi tu balian, lopus tu Betania. Diangkat Ia ma disi tanganNia mamasumasu halahi. 24:51 Jadi taran na mamasumasu Ia tu halahi, marsirang ma Ia sian halahi, manaek ma Ia tu banua ginjang. *MANAEK IA TU BANUA GINJANG: Dipiga-piga-piga naskah nada adong hata on.* 24:52 Dung i tungkap ma halahi marsomba tuSia, lalu mulak ma halahi tu Jerusalem mardongan jop ni roha situtu. 24:53 Jadi tongtong ma halahi di Bagas Ni Debata dipuji-puji halahi ma Debata disi.
1:1 Di mulana i, madung adong Hata i. Rap dohot Debata do Hata i jana Debata do Hata i. 1:2 Mamungka sian mulana rap dohot Debata do Ia. 1:3 Sasudena do dijadihon markite-hite Ia, jana sian sasude na adong, sangkamata pe nada adong na nijadihon, so marhite sian Ia. 1:4 Mual ni ngolu do Hata i, *MUAL NI NGOLU DO HATA I: Sanga,, sude na nitompa, mangolu dibagasan na sada dohot Hata i.* jana ngolu i ma na mangalehen sinondang tu jolma. 1:5 Marsinondang do na torang i di hagolapan, jana nada tarintopi hagolapan i na torang i. 1:6 Ro ma halak na niutus ni Debata, si Johannes goarna. 1:7 Na manyaksihon taringot tu na torang i do na niharohonnia, anso sudena halak porsaya. 1:8 Nada ia sandiri tutu na torang i, hum na manyaksihon do ia taringot tusi. 1:9 Torang na tutu na manorangi sandok jolma, ro tu portibi on. 1:10 Di portibi on do Hata i, markite-hite Ia do dijadihon portibi on, hape nada ditanda portibi on Ia. 1:11 Ro ma Ia tu luatNia sandiri, hape nada dijagit bangsoNia i Ia. 1:12 Tapi sanga ise na manjagit Ia jana porsaya tuSia, dilehen Ia do hak gabe dakdanak ni Debata, 1:13 i ma angka na so tubu sian mudar, sanga sian roha sibuk, sanga sian hagiot ni halaklahi, tapi na ditubuhon ni Debata. 1:14 Jadi madung gabe sibuk do Hata i, jana maringanan di tonga-tonganta, madung taida hamuliaonNia. Songon hamuliaon ni Anak Sasada na sian Ama i, na gok asi ni roha dohot hasintongan. 1:15 Ro do si Johannes gabe saksina, dipaboa ia ma: "On ma da Ia na hudokkon i: Na giot ro do Ia umpudi sian au, tapi na gumodang ulang au, angke dompak so adong dope au, madung adong hian Ia." 1:16 Angke sian hagogokNia, nada mar na mantak Ia, mamasumasu tu hita sudena. 1:17 Dibaen dilehen do Tona i markite-hite si Musa tapi anggo asi ni roha dohot hasintongan markite-hite Jesus Kristus do. 1:18 Nada adong halak na unjung marnida Debata, asing sian Anak Sasada ni AmaNa, na diampuan ni Ama i, jana Ia do na papatarkonsa tu hita. 1:19 Jana on ma na disaksihon ni si Johannes hatiha na disuru ni halak Jahudi na sian Jerusalem angka malim dohot halak Levi laho manyapai ia, "Ise dehe ho?" 1:20 Nada pola ditabunihon si Johannes taringot tusi. Torus tangkas do dipaboa ia, "Nada au Kristus i." 1:21 "Anggo songon i, ise dehe ho satutuna?" ninna halahi manyapai. "Sanga si Elia dehe ho?" "Nada," ning si Johannes mangalusi. "Betak na ho do panurirang na indohan?" *PANURIRANG NA INDOHAN: Ia ma na niarop ni roha na giot ro laho mambaritahon haroro ni Kristus i.* ning halahi manyapai. "Nada," ning ia. 1:22 Dung i ninna halahi ma tusia, "Ise dehe ho?" Harana angkon adong do alus lehenonnami tu angka na marsuru hami tuson. "Aha do dokkononmu taringot tu dirimu sandiri?" 1:23 Dialusi si Johannes ma dohot hata songon na nidok ni Panurirang Jesaya, "Anggo au, 'Sora ni halak na pio-pio di halongonan do au: Pahornop hamu ma dalan ni Tuhan!' " 1:24 Na nisuru ni halak Parise do angka na manyapai i. *NA NISURU NI HALAK PARISE DO ANGKA NA MANYAPAI I: Sanga: Angka halak Parise do na nisuru i.* 1:25 Disapai halahi ma tu si Johannes, "Anggo so ho do Kristus i, nada si Elia ho, nada panurirang na indohan muse ho, biasi dipandidihon ho halak?" 1:26 Dialusi si Johannes ma, "Dohot aek do hupandidihon halak. Tapi di tonga-tongamunu jongjong do Ia na so nitandamunu. 1:27 Umpudi dope Ia ro ulang au, tapi mangkarhari tali ni sipatuNia pe, nada tama dope au." 1:28 Di Betania na di ipar ni Batang aek Jordan do sudena i tarjadi, angke disi do si Johannes mandidihon halak. 1:29 Ancogotna i diida si Johannes ma ro Jesus mandapotkon ia. Didok si Johannes ma, "Ligi ma! Indi ma ibana Anak Ni Biri-biri Ni Debata na manyesa dosa ni portibi on! 1:30 Ia ma na hudokkon i na umpudi ro ulang au, tapi na gumodang dope Ia sian au; angke na dung adong hian do Ia dompak so sorang dope au. 1:31 Nada hutanda hian sanga na ise Ia, tapi hara ni i do umbaen na ro au mandidihon dohot aek anso ditanda halak Israel Ia." 1:32 Songon on ma hasaksian na nilehen ni si Johannes taringot tuSia, "Huida ma Tondi i mijur songon darapati sian langit lalu songgop tuSia. 1:33 Nada hutanda hian dope Ia. Tapi Debata na marsuru au mandidihon dohot aek i mandok tu au, 'Muda diida ho Tondi Parbadia mijur tu sada halak jana maringanan di bagasan Ia, Ia ma na giot mandidihon dohot Tondi Parbadia.' 1:34 Jadi madung tangkas huida Ia jana madung husaksihon, 'On ma Anak Ni Debata'." 1:35 Ancogotna i laing jongjong ma disi si Johannes rap dohot siseannia dua halak. 1:36 Dung diida ia Jesus mamolus disi, ning ia ma, "Ligi ma, Anak Ni Biri-biri Ni Debata!" 1:37 Dibege sisean ni si Johannes sidua halak i do na nidok ni si Johannes songon i, gabe diihutkon halahi ma Jesus. 1:38 Manaili ma Jesus tu pudi, jadi diida Ia ma halahi na mangihutkon Ia. Ninna Jesus ma, "Manjalahi aha dehe hamu?" Ninna halahi ma mangalusi, "Rabbi, di dia dehe Ho maringanan?" (Rabbi, astuanna 'Guru'.) 1:39 "Beta ma ligi hamu," ninna Jesus. Jadi udur ma halahi dohot Ia mangaligi sanga di dia Ia maringanan. Laing disi ma halahi dohot Ia na sadari i. (Hira-hira pukul opat andospotang ma hatiha i.) 1:40 Sahalak sian na dua i, i ma na umbege na nidok ni si Johannes jana na kehe udur dohot Jesus, i ma na margoar si Andreas, anggi ni si Simon Petrus. 1:41 Manigor diompoti si Andreas ma manjalahi si Simon angkangna i jana didok ia ma tu si Simon, "Madung marsuo hami dohot Mesias i!" (Mesias astuanna Kristus.) 1:42 Dung i ditaruhon si Andreas ma si Simon tu Jesus. Dipamanat Jesus ma si Simon, ning Ia ma, "Si Simon do ho, anak ni si Jona. Si Kepas noma goarmu." (Kepas disaro Ibrani dos dohot Petrus disaro Junani astuanna: dolok batu.) 1:43 Ancogotna i ditontuhon Jesus ma anso kehe Ia tu Galilea. Marsuo ma Ia dohot si Pilipus, dung i ning Ia ma tu si Pilipus, "Beta, ihutkon ma Au!" 1:44 (Sian Betsaida do asal ni si Pilipus, i ma kota ni siAndreas dohot si Petrus.) 1:45 Dung i marsuo muse ma si Pilipus dohot si Natanael jana didok ia ma, "Madung marsuo hami dohot Ia na nidok ni si Musa di bagasan Buku Tona i, dohot na nidok ni angka panurirang, i ma Jesus anak ni si Josep halak Nasaret i." 1:46 Tapi dialusi si Natanael ma, "Adong dehe lakna ro na denggan sian Nasaret?" "Beta ma taligi," ning si Pilipus mangalusi. 1:47 Diida Jesus do si Natanael ro mandapotkon Ia gabe dihatai Jesus ma taringot tuSia. Ninna Jesus ma, "On ma halak Israel na tutu, na so adong lancap disia!" 1:48 "Sian dia diboto Ho taringot tu au?" ninna si Natanael manyapai Jesus. Dialusi Jesus ma, "Taran so dipio si Pilipus ho, dompak di toru ni bona ni hayu ara i dope ho, madung Huida ho." 1:49 Didok si Natanael ma, "Rabbi, Anak Ni Debata do Ho! Ho do Raja ni halak Israel!" 1:50 Dung i didok Jesus ma, "Adong he hara ni na Hudok i, madung Huida ho dompak di toru ni bona ni hayu ara i dope ho umbaen na porsaya ho? Idaonmu dope angka pangalaho na gumodang sian i!" 1:51 Dung i ninna Jesus ma tusia, "Tutu situtu do na Hudok on tu ho, idaonmu ma mungkap langit, jana manaek mijur ma angka surusuruan ni Debata tu Anak Ni Jolma i."
1:1 Di mulana i, madung adong Hata i. Rap dohot Debata do Hata i jana Debata do Hata i. 1:2 Mamungka sian mulana rap dohot Debata do Ia. 1:3 Sasudena do dijadihon markite-hite Ia, jana sian sasude na adong, sangkamata pe nada adong na nijadihon, so marhite sian Ia. 1:4 Mual ni ngolu do Hata i, *MUAL NI NGOLU DO HATA I: Sanga,, sude na nitompa, mangolu dibagasan na sada dohot Hata i.* jana ngolu i ma na mangalehen sinondang tu jolma. 1:5 Marsinondang do na torang i di hagolapan, jana nada tarintopi hagolapan i na torang i. 1:6 Ro ma halak na niutus ni Debata, si Johannes goarna. 1:7 Na manyaksihon taringot tu na torang i do na niharohonnia, anso sudena halak porsaya. 1:8 Nada ia sandiri tutu na torang i, hum na manyaksihon do ia taringot tusi. 1:9 Torang na tutu na manorangi sandok jolma, ro tu portibi on. 1:10 Di portibi on do Hata i, markite-hite Ia do dijadihon portibi on, hape nada ditanda portibi on Ia. 1:11 Ro ma Ia tu luatNia sandiri, hape nada dijagit bangsoNia i Ia. 1:12 Tapi sanga ise na manjagit Ia jana porsaya tuSia, dilehen Ia do hak gabe dakdanak ni Debata, 1:13 i ma angka na so tubu sian mudar, sanga sian roha sibuk, sanga sian hagiot ni halaklahi, tapi na ditubuhon ni Debata. 1:14 Jadi madung gabe sibuk do Hata i, jana maringanan di tonga-tonganta, madung taida hamuliaonNia. Songon hamuliaon ni Anak Sasada na sian Ama i, na gok asi ni roha dohot hasintongan. 1:15 Ro do si Johannes gabe saksina, dipaboa ia ma: "On ma da Ia na hudokkon i: Na giot ro do Ia umpudi sian au, tapi na gumodang ulang au, angke dompak so adong dope au, madung adong hian Ia." 1:16 Angke sian hagogokNia, nada mar na mantak Ia, mamasumasu tu hita sudena. 1:17 Dibaen dilehen do Tona i markite-hite si Musa tapi anggo asi ni roha dohot hasintongan markite-hite Jesus Kristus do. 1:18 Nada adong halak na unjung marnida Debata, asing sian Anak Sasada ni AmaNa, na diampuan ni Ama i, jana Ia do na papatarkonsa tu hita. 1:19 Jana on ma na disaksihon ni si Johannes hatiha na disuru ni halak Jahudi na sian Jerusalem angka malim dohot halak Levi laho manyapai ia, "Ise dehe ho?" 1:20 Nada pola ditabunihon si Johannes taringot tusi. Torus tangkas do dipaboa ia, "Nada au Kristus i." 1:21 "Anggo songon i, ise dehe ho satutuna?" ninna halahi manyapai. "Sanga si Elia dehe ho?" "Nada," ning si Johannes mangalusi. "Betak na ho do panurirang na indohan?" *PANURIRANG NA INDOHAN: Ia ma na niarop ni roha na giot ro laho mambaritahon haroro ni Kristus i.* ning halahi manyapai. "Nada," ning ia. 1:22 Dung i ninna halahi ma tusia, "Ise dehe ho?" Harana angkon adong do alus lehenonnami tu angka na marsuru hami tuson. "Aha do dokkononmu taringot tu dirimu sandiri?" 1:23 Dialusi si Johannes ma dohot hata songon na nidok ni Panurirang Jesaya, "Anggo au, 'Sora ni halak na pio-pio di halongonan do au: Pahornop hamu ma dalan ni Tuhan!' " 1:24 Na nisuru ni halak Parise do angka na manyapai i. *NA NISURU NI HALAK PARISE DO ANGKA NA MANYAPAI I: Sanga: Angka halak Parise do na nisuru i.* 1:25 Disapai halahi ma tu si Johannes, "Anggo so ho do Kristus i, nada si Elia ho, nada panurirang na indohan muse ho, biasi dipandidihon ho halak?" 1:26 Dialusi si Johannes ma, "Dohot aek do hupandidihon halak. Tapi di tonga-tongamunu jongjong do Ia na so nitandamunu. 1:27 Umpudi dope Ia ro ulang au, tapi mangkarhari tali ni sipatuNia pe, nada tama dope au." 1:28 Di Betania na di ipar ni Batang aek Jordan do sudena i tarjadi, angke disi do si Johannes mandidihon halak. 1:29 Ancogotna i diida si Johannes ma ro Jesus mandapotkon ia. Didok si Johannes ma, "Ligi ma! Indi ma ibana Anak Ni Biri-biri Ni Debata na manyesa dosa ni portibi on! 1:30 Ia ma na hudokkon i na umpudi ro ulang au, tapi na gumodang dope Ia sian au; angke na dung adong hian do Ia dompak so sorang dope au. 1:31 Nada hutanda hian sanga na ise Ia, tapi hara ni i do umbaen na ro au mandidihon dohot aek anso ditanda halak Israel Ia." 1:32 Songon on ma hasaksian na nilehen ni si Johannes taringot tuSia, "Huida ma Tondi i mijur songon darapati sian langit lalu songgop tuSia. 1:33 Nada hutanda hian dope Ia. Tapi Debata na marsuru au mandidihon dohot aek i mandok tu au, 'Muda diida ho Tondi Parbadia mijur tu sada halak jana maringanan di bagasan Ia, Ia ma na giot mandidihon dohot Tondi Parbadia.' 1:34 Jadi madung tangkas huida Ia jana madung husaksihon, 'On ma Anak Ni Debata'." 1:35 Ancogotna i laing jongjong ma disi si Johannes rap dohot siseannia dua halak. 1:36 Dung diida ia Jesus mamolus disi, ning ia ma, "Ligi ma, Anak Ni Biri-biri Ni Debata!" 1:37 Dibege sisean ni si Johannes sidua halak i do na nidok ni si Johannes songon i, gabe diihutkon halahi ma Jesus. 1:38 Manaili ma Jesus tu pudi, jadi diida Ia ma halahi na mangihutkon Ia. Ninna Jesus ma, "Manjalahi aha dehe hamu?" Ninna halahi ma mangalusi, "Rabbi, di dia dehe Ho maringanan?" (Rabbi, astuanna 'Guru'.) 1:39 "Beta ma ligi hamu," ninna Jesus. Jadi udur ma halahi dohot Ia mangaligi sanga di dia Ia maringanan. Laing disi ma halahi dohot Ia na sadari i. (Hira-hira pukul opat andospotang ma hatiha i.) 1:40 Sahalak sian na dua i, i ma na umbege na nidok ni si Johannes jana na kehe udur dohot Jesus, i ma na margoar si Andreas, anggi ni si Simon Petrus. 1:41 Manigor diompoti si Andreas ma manjalahi si Simon angkangna i jana didok ia ma tu si Simon, "Madung marsuo hami dohot Mesias i!" (Mesias astuanna Kristus.) 1:42 Dung i ditaruhon si Andreas ma si Simon tu Jesus. Dipamanat Jesus ma si Simon, ning Ia ma, "Si Simon do ho, anak ni si Jona. Si Kepas noma goarmu." (Kepas disaro Ibrani dos dohot Petrus disaro Junani astuanna: dolok batu.) 1:43 Ancogotna i ditontuhon Jesus ma anso kehe Ia tu Galilea. Marsuo ma Ia dohot si Pilipus, dung i ning Ia ma tu si Pilipus, "Beta, ihutkon ma Au!" 1:44 (Sian Betsaida do asal ni si Pilipus, i ma kota ni siAndreas dohot si Petrus.) 1:45 Dung i marsuo muse ma si Pilipus dohot si Natanael jana didok ia ma, "Madung marsuo hami dohot Ia na nidok ni si Musa di bagasan Buku Tona i, dohot na nidok ni angka panurirang, i ma Jesus anak ni si Josep halak Nasaret i." 1:46 Tapi dialusi si Natanael ma, "Adong dehe lakna ro na denggan sian Nasaret?" "Beta ma taligi," ning si Pilipus mangalusi. 1:47 Diida Jesus do si Natanael ro mandapotkon Ia gabe dihatai Jesus ma taringot tuSia. Ninna Jesus ma, "On ma halak Israel na tutu, na so adong lancap disia!" 1:48 "Sian dia diboto Ho taringot tu au?" ninna si Natanael manyapai Jesus. Dialusi Jesus ma, "Taran so dipio si Pilipus ho, dompak di toru ni bona ni hayu ara i dope ho, madung Huida ho." 1:49 Didok si Natanael ma, "Rabbi, Anak Ni Debata do Ho! Ho do Raja ni halak Israel!" 1:50 Dung i didok Jesus ma, "Adong he hara ni na Hudok i, madung Huida ho dompak di toru ni bona ni hayu ara i dope ho umbaen na porsaya ho? Idaonmu dope angka pangalaho na gumodang sian i!" 1:51 Dung i ninna Jesus ma tusia, "Tutu situtu do na Hudok on tu ho, idaonmu ma mungkap langit, jana manaek mijur ma angka surusuruan ni Debata tu Anak Ni Jolma i."
3:1 Adong ma sada halak Parise na margoar si Nikodemus pamimpin ni halak Jahudi. 3:2 Di sada borngin ro ma ia mandapotkon Jesus jana didok ia ma, "Gurunami, hami boto do Guru na nisuruhon ni Debata ho. Angke nada adong halak na bisa mambaen angka hahomangan songon na nibaenMi, anggo so didongani Debata do ia." 3:3 Dialusi Jesus ma, "Tutu do na Hudok on: Nada tarbaen sanga ise pe gabe anggota ni Harajaan Ni Debata, anggo so jolo sorang ia mangulahi." *MANGULAHI: Sanga: Sian ginjang.* 3:4 Didok si Nikodemus ma tu Jesus, "Bia ma he parjadina halak na dung magodang sorang mangulahi? Tarbaen dope lakna masuk mangulahi tu bortian ni inangna anso ditubuhon mangulahi?" 3:5 Dialusi Jesus ma, "Tutu do na Hudok tu ho: Anggo so sorang halak sian aek dohot sian Tondi, nada tarbaen gabe parsidohot di Harajaan Ni Debata. 3:6 Dibaen sibuk do na tubu sian sibuk, jana tondi do na tubu sian Tondi. 3:7 Ulang homang rohamu muda Hudok: Angkon ditubuhon hamu sude mangulahi. 3:8 Na mangombus do alogo sanga na tudia giotnia; tabege do nian husasakna, tapi nada taboto sanga sian dia harorona jana tu dia kehena. Songon i muse ma halak na nitubuhon ni Tondi i." 3:9 "Tarbia ma parjadi ni i?" ning si Nikodemus manyapai. 3:10 Dialusi Jesus ma, "Guru ni halak Israel ma ho, hape hum i pe so diboto ho? 3:11 Tutu do na Hudok di ho: Na hami boto do na hami hatahon, jana na hami ida do na hami patorang; hape nada ra hamu manjagit na hami dok. 3:12 So ra hamu porsaya tu Au muda Hupaboa tu hamu taringot tu angka na di tano on; tarbia muse be pambaenna hamu porsaya tu Au muda Hupaboa tu hamu taringot tu na di banua ginjang? 3:13 So na adong sahalak pe na jungada manaek tu banua ginjang, tapi anggo sian banua ginjang madung adong Sahalak na mijur tu tano on, i ma Anak Ni Jolma i." 3:14 "Songon ulok tumbaga na nipatuginjang ni si Musa di sada hayu di halongonan i, laing songon i muse ma Anak Ni Jolma i angkon dipatuginjang, 3:15 anso sude halak na porsaya tuSia tarbaen maruli ngolu na manongtong. 3:16 Angke songon i ma holong ni roha ni Debata di portibi on jabat dilehen Ia AnakNia na sasada i anso sude halak na porsaya tuSia nada mago, tapi maruli di ngolu na manongtong. 3:17 Harana nada anso manguhumi portibi on umbaen na nitongos ni Debata AnakNia i tu tano on, tapi anso gabe Sipalua ni portibi on do." 3:18 "Sanga ise na porsaya tuSia nada be uhuman ni Debata di adopan ni paruhuman. Tapi anggo na so porsaya madung ditoru ni uhuman ni Debata, hara ni na so porsaya ia tu Anak Ni Debata Na Sasada i. 3:19 Tapi on do panguhuman i: Madung ro hatorangan i tu tano on, tapi humolongan do roha ni jolma i tu hagolapan ulang pado hatorangan i, harana jahat do pangalaho ni halahi. 3:20 Sude halak sibaen na jahat magigi do i tu na torang; nada ra ia ro tu na torang, angke nada jop rohania haidaan pangalahonia na jahat i. 3:21 Tapi anggo halak na mangkarejohon hasintongan, ro do ia tu na torang i; anso tarida angka pambaenna i, angke madung dibaen i markite-hite Debata." 3:22 Dung i kehe ma Jesus dohot angka siseanNia tu Luat Judea. Disi ma halahi sangombas jana mandidihon do halahi disi. 3:23-24 Hatiha i nada tarhurung dope si Johannes Pandidi. Di Ainon do ia mandidihon, nada sadia dao i sian Salim, harana bahat do disi aek. Marroan ma halak mandapotkon ia jana dipandidihon ia ma halahi. 3:25 Jadi adong ma deba sian sisean ni si Johannes i na martongkar dohot halak Jahudi *HALAK JAHUDI: Dipiga-piga-piga naskah narobi didok: Sahalak Jahudi.* taringot tu aturan haiason mangihutkon ugamo Jahudi. 3:26 Didapotkon halahi ma si Johannes jana disapai halahi ma, "Rabbi, jolma na rap dohot ho, na di ipar ni Batang aek Jordan i, na dung nisaksihonmi, mandidihon muse do Ia saonnari, jana marroan sude halak tuSia!" 3:27 Dialusi si Johannes ma, "Nada tarbaen jolma mangkarejohon bagi na aha pe, anggo so dilehen Debata i disia. 3:28 Hamu pe madung dibege hamu hudok, 'Nada au Kristus i. Hum patujolo sajo do au umbaen na disuru parjolo ulang Ia.' 3:29 Bayo pangoli do nampuna boru na niolina. Anggo dongan ni bayo pangoli i hum jongjong sajo do ia mandongani jana manangihon pangoli i jana jop ma rohania umbege sora ni pangoli i. Songon i ma au, saonnari marjop ni roha situtu do au. 3:30 Ia do na angkon mur pagodangon tapi anggo au angkon mur nipamenek do." 3:31 Ise na ro sian ginjang do di ginjang ni sudena. Na ro sian tano on, di tano on do, jana mangkobari do ia taringot tu tano on. Anggo na ro sian ginjang i, di ginjang ni sudena do. 3:32 Angka na niidaNia dohot na nibegeNia do disaksihon Ia, hape umpe sahalak na mangkaporsayai hasaksianNia. 3:33 Sanga ise na porsaya di hasaksianNia i, i do na mangoku bahaso na tigor Debata. 3:34 Sanga ise na nisuru ni Debata, barita sian Debata do dioban Ia, harana madung dilehen Debata TondiNia i, nada hasuhatan bahatna. 3:35 Dihaholongi Damang do AnakNia jana madung dipasahat Damang sasudena tuSia. 3:36 Sanga ise na porsaya tu Anak i, halahi do na maruli ngolu na manongtong. Tapi anggo halak na so ra porsaya tu Anak i indangkon na dapot ni halahi ngolu na manongtong i, jana hamumuruk ni Debata do tongtong adop halahi.
4:1 Dibege halak Parise ma na umbahat sisean ni Jesus, dohot na nididihonNia ulang pado si Johannes. 4:2 (Nian nada Ia na mandidihon halak, tapi angka siseanNia ido.) 4:3 Dung tarboto tu Jesus na dung tarbege na songon i tu halak Parise, gabe kehe ma Ia sian Judea jana mulak tu Galilea. 4:4 Angkon sian Samaria do Ia mamolus di pardalananNia i. 4:5 Dung di Samaria lalu ma Jesus tu sada kota na margoar Sikhar, nada sadia dao sian tano na nilehen ni si Jakob narobi tu anaknia na margoar si Josep. 4:6 Disi ma sumur ni si Jakob i. Loja sajo ma Jesus na mardalan i, gabe kehe Ia juguk maradian di topi ni sumur i. Hira-hira pukul dua bolas ma hatiha i. 4:7 Dung i ro ma sada dadaboru Samaria muhat tusi, jadi didokkon Jesus ma tusia, "Lehen ma Au minum." 4:8 Angke ma kehe tu kota anak siseanNia manobusi panganon. 4:9 Dialusi boru Samaria i ma, "Halak Jahudi do Ho hape au halak Samaria do. Biasi mangido minum Ho tu au?" (Harana na so ra do halak Jahudi mardongan dohot halak Samaria.) *HARANA NA SO RA DO HALAK JAHUDI MARDONGAN DOHOT HALAK SAMARIA: Sanga: Halak Jahudi na so ra do mamake mangkuk na nipake ni halak Samaria.* 4:10 Dialusi Jesus ma, "Sugari ma diboto ho silehen-lehen ni Debata jana ditanda ho na mangido minum sian ho, gabe ho sandiri noma mangido sian Ia, jana lehenonNia ma di ho aek na mangolu." 4:11 Didok anak boru i ma, "Tapi so adong timba di Tuhan i, hape sai bagas sumur on. Sian dia ma dapot Tuhan i aek na mangolu i? 4:12 Ompungnami si Jakob do na mangalehen sumur on di hami. Ia sandiri pe sian sumur on do dibuat ia inumonnia; songon i muse angka dakdanaknia dohot pahan-pahanannia. Gumodang dehe lakna Ho sian ompungnami si Jakob?" 4:13 Didok Jesus ma, "Sude halak na minum sian aek on manguas do mangulahi, 4:14 tapi anggo halak na manginum aek na giot lehenonKi disia, nada manguas be ia salolot-lolotna. Angke anggo aek na giot lehenonKi angkon gabe sada mata mual na marbuldak-buldak do i di dirinia jana mangalehen hangoluan na so mantak." 4:15 Didok anak boru i ma, "Lehen ma di au aek i, anso ulang sai manguas be au, jana anso ulang mulak-ulak au tuson muhat." 4:16 "Kehe ma ho jolo mamiohon halaklahimu, dung i ro ma ho mangulahi tuson," ninna Jesus. 4:17 "So adong halaklahingku," ning anak boru i mangalusi. Didok Jesus ma, "Tutu do na nidokmi, 'Nada adong halaklahimu, 4:18 harana madung lima halaklahimu jana halaklahi na nidongananmu na saonnari i, anggo satutuna nada halaklahimu i. Jadi, tutu do na nidokmi.' " 4:19 "Saonnari pe anso huboto, panurirang do hape Tuhan i," ning anak boru i. 4:20 "Anggo angka ompunami di dolok on do marsomba, tapi anggo Ho mandok hum di Jerusalem sajo do inganan ni halak marsomba." 4:21 Didok Jesus ma, "Porsaya ma ho di Au. Sada hatiha sombaon ni halak ma Damang, nada be di dolok on jana nada muse di Jerusalem. 4:22 Hamu angka halak Samaria disomba hamu do na so ditanda hamu, tapi anggo hami halak Jahudi, na hami tanda do na hami somba; angke sian halak Jahudi do ro haluaan i. 4:23 Tapi na giot ro do hatihana, jana madung ro saonnari, marsomba ma angka parsomba na tutu tu Ama i di bagasan Tondi dohot hasintongan; angke jop do roha ni Debata marnida halak na songon i. 4:24 Tondi do anggo Debata, jana angka na giot marsomba tu Debata, angkon marsomba di bagasan Tondi dohot hasintongan." 4:25 Didok anak boru i ma tu Jesus, "Huboto do na giot ro humani Mesias i (i ma na margoar Kristus). Jadi muda ro Ia, paboaonNia ma sasudena tu hita." 4:26 "Au do Ia, na mangkataion dohot ho," ninna Jesus. 4:27 Disi ma ro angka sisean ni Jesus mangulahi. Homang ma roha ni halahi mida Jesus mangkobari dohot sada anak boru. Tapi umpe sahalak sian halahi na marsapa, "Aha do na nihagiotiMu? Sanga: Aha do na nihataanMu dohot ia?" 4:28 Dung i ditadingkon anak boru i ma guncinia i disi, kehe ma ia marlojong tu kota jana didok ia ma tu angka halak na di kota i, 4:29 "Beta ma taligi halak na paboahon tu au sasudena na dung hubaen. Ia dehe Kristus i?" 4:30 Dung i marruaran ma halak sian kota i kehe mandapotkon Jesus. 4:31 Jadi laing di hatiha i, disuru angka siseanNia i ma anso mangan jolo Jesus, "Mangan ma jolo Rabbi," ning halahi. 4:32 Tapi dialusi Jesus ma, "Adong do di Au sipanganon, tapi nada diboto hamu sanga sipanganon aha i." 4:33 Dung i mamungka ma sisean i marsisapaan sama halahi, "Na adong do halak maroban panganon diSia?" 4:34 Dung i didok Jesus ma, "Anggo sipanganonKi, i ma na mangihutkon hagiot ni na marsuru Au, jana pasidungkon parkarejoan na nilehenNia sikarejohononKu. 4:35 Didok hamu, 'Opat bulan nari sabion ma.' Tapi anggo Au mandok di hamu: tangkas ma ligi hamu tu angka ladang i. Nada he madung tarsabi i? 4:36 Manjagiti upana ma angka na manyabi i; jana dipalagut ma suhana i tu hangoluan na so mantak. Rap marsonang-sonang ma panyabur dohot panyabi. 4:37 Jadi tutu do hata ni pandohan on, 'Halak do manyuan, hape na asing do manyabi.' 4:38 Tu ladang na nikarejohon ni halak do hamu Husuru manyabi; halak do na markarejo disi hape hamu do na mambuat suha ni karejo ni halahi." 4:39 Gabe bahat ma halak Samaria na sian kota i porsaya tu Jesus hara ni na nidok ni anak boru i, 'Madung dipaboa Ia tu au sasudena parkarejoanku nabaruon.' 4:40 Jadi dung marsuo angka halak Samaria i dohot Jesus gomos ma dipangidohon halahi anso tinggal Ia rap dohot halahi. Jadi disi ma Jesus dua ari. 4:41 Dung i umbahat dope halak gabe porsaya tu Jesus hara ni na niajarkonNia sandiri tu halahi. 4:42 Didok halahi ma tu anak boru i, "Saonnari madung porsaya hami, nada hara ni angka na nipaboami be tu hami, tapi hara ni na dung hami bege sandiri sian Ia, jana madung hami boto tutu do Ia Sipalua ni portibi on." 4:43 Dung adong dua ari, kehe ma Jesus tu Galilea. 4:44 Jesus sandiri do manyaksihon, "Nada dipasangapi panurirang, anggo di kota hagodanganna sandiri." 4:45 Tapi dung lalu Ia di Galilea, marjop ni roha ma halak na disi manjagit Ia, harana taran di Jerusalem halahi di Pesta Paskah i, madung diida halahi sude na nibaen ni Jesus hatiha i. 4:46 Jadi bolkas ma Jesus tu Kana di Galilea, di kota i ma na nibaenNia aek gabe anggur. Adong ma sahalak pagawe ni bagas godang na topet marnyae anakna di Kapernaum. 4:47 Dung dibege ia na ro Jesus sian Judea tu Galilea, didapotkon ia ma Jesus jana dipangidohon ia ma anso ro Jesus tu Kapernaum laho pamalumkon anaknia na giot mate. 4:48 Didok Jesus ma tu pagawe ni bagas godang i, "Anggo so jolo diida hamu angka na luar biasa dohot angka hahomangan, laing na so ra do hamu porsaya." 4:49 Didok pagawe ni bagas godang i ma, "Tuhan tibu ma Ho ro dompak so mate anakki." 4:50 Didok Jesus ma, "Kehe ma ho mangolu do anakmi." Jadi porsaya do bayo i di na nidok ni Jesus i, laing kehe ma ia. 4:51 Di tonga dalan i dope di na laho mulak ia, ro ma angka naposonia mandapotkon ia laho paboahon tusia, "Madung mangolu do anakmi!" 4:52 Dung i disapai ia ma tu halahi sanga pukul piga mamungka malum anaknia i. Alus ni halahi, "Natuari hira-hira pukul sada i mondap ma na milas i." 4:53 Dung i diingot amang ni dakdanak i ma laing di jom i ma didok Jesus tusia, "Mangolu do anakmi." Gabe porsaya ma ia dohot halahi na sabagas tu Jesus. 4:54 I ma tanda hahomangan na paduahon dibaen Jesus di Galilea dung ro Ia sian Judea.
5:1 Dung i adong ma pesta ni halak Jahudi, gabe dohot ma Jesus tu Jerusalem. 5:2 Di Jerusalem di lambung ni "Horbangan Biri-biri," adong do sada paridian. *"HORBANGAN BIRI-BIRI", ADONG DO SADA PARIDIAN: Sanga,, "Tobat Biri-biri," adong do sada inganan.* Di hata Ibrani digoar do i Betesda. *PARIDIAN: Sanga,-piga naskah narobi didok: Betsata.* Adong muse do lima sopo-sopo humaliang paridian i. 5:3 Bahat do angka na marnyae marmodoman disi; adong na mapitung, adong na timpang, adong muse na pangpangon. Sudena halahi painte-intehon panggulsak ni aek i. 5:4 Harana sai mijur do huhul surusuruan ni Tuhan tu bagasan paridian i, manggaor aek i. Jana sanga ise sian na marnyae i parjolo masuk tu paridian i hatiha manggulsak aekna i, malum ma nyaena i; sanga na nyae aha pe angkon malum. 5:5 Adong ma disi sada bayo na dung tolu pulu salapan taon honokna marnyae. 5:6 Diida Jesus ma ia modom disi, jana diboto Jesus ma na dung honok bayo i marnyae; gabe didok Jesus ma tusia, "Giot dehe ho malum?" 5:7 Dialusi bayo na marnyae i ma, "Nada adong donganku dison Tuhan na pamasuk au tu paridian i muda hatiha manggulsak aek i. Jadi hatiha giot masuk dope au tu paridian i, hape ma dipajolo halak na asing masuk." 5:8 Gabe didok Jesus ma tusia, "Jongjong ma ho, oban lagemi jana mardalan ma ho." 5:9 Manigor malum ma bayo i. Dung i dioban ia ma lagenia, kehe ma ia mardalan. Topet do Ari Sabat hatiha i. 5:10 Jadi hara ni i didok angka pamimpin ni halak Jahudi ma tu bayo na baru malum i, "Ari Sabat do da sadari on. Nada tola obanonmu lagemi." 5:11 Tapi ning ia ma mangalusi, "Halak na pamalumkon au nangkin do na marsuru au; didok Ia, 'Oban ma lagemi, mardalan ma ho.' " 5:12 "Ise ma he i na marsuru ho mardalan, mangoban lagemi?" ninna halahi manyapai ia. 5:13 Tapi hape na so ditanda bayo na malum i dope sanga ise halakna, hara ni bahat ni jolma disi. Jesus pe nada haidaan be di tonga-tonga ni halak na bahat i jana madung kehe Ia sian inganan i. 5:14 Dung i marsuo ma Jesus dohot bayo i di Bagas Ni Debata. Didok Jesus ma tusia, "Saonnari madung malum ho; ulang be datdati mardosa. Angke muda mambaen dosa dope ho, na jumatjat sian on dope taononmu saulahon." 5:15 Jadi kehe ma bayo i paboahon tu angka pamimpin ni halak Jahudi, Jesus do hape na pamalumkon ia. 5:16 Markite-hite i, dipungka halak Jahudi ma mangaroha-rohai Jesus, hara ni na nipamalumNia halak di Ari Sabat. 5:17 Tapi didok Jesus ma tu halahi, "Tongtong do markarejo Damang; jana Au pe angkon laing markarejo do." 5:18 Angka pandohan ni Jesus i ma mambaen mur dirohai angka pamimpin ni halak Jahudi i giot mamunu Ia. Nada hum hara ni na mangalanggar tona ni ugamo sajo, i ma taringot tu Ari Sabat umbaen na songon i dibaen halahi, tapi dohot do muse hara ni hataNia na mandok AmangNia Debata; astuanna disarupahon Ia ma Ia dohot Debata. 5:19 Dialusi Jesus ma halahi songon on, "Ingot hamu ma na Hudok on: Nada dibaen Anak i sanga na aha pe mangihutkon roha-rohaNia sandiri. Sanga aha na niidaNia dibaen AmangNia, hum i sajo do dibaen Ia. Angke sanga aha na nibaen ni Ama i, laing i muse do dibaen Anak i. 5:20 Angke na holong do roha ni Ama i mida Anak i. Dipatidahon Ia muse do sasude na nibaenNia sandiri tu AnakNia i, dohot angka pambaenan na gumodang, patidahononNia dope tu AnakNia i anso longang hamu. 5:21 Songon Damang na manyungguli halak na mate, jana dilehen Ia hangoluan tu halahi; laing songon i muse ma Anak i mangalehon ngolu tu halak, sanga ise giot ni rohaNia. 5:22 Nada mandabu uhum anggo Ama i sandiri sanga na tu ise pe. Angke anggo kuaso laho mandabu uhum, na dung dipasahat do i di AnakNa i. 5:23 Dibaen Damang pe i anso dipasangap halak do Anak i songon na ni baen ni halak tu Damang. Halak na so pasangapkon Anak i, nada diparsangapi ia muse Ama na marsuru Anak i. 5:24 Hudok ma tu hamu: Satutuna sanga ise na manangihon hata na Hudok jana na porsaya tu na marsuru Au, halahi ma na dapotan hangoluan na so mantak. Nada siuhumon be i; madung malua ia sian hamatean jana dapotan hangoluan. 5:25 Tutu do na Hudok di hamu: Ro ma hatihana, jana tardok madung ro i, begeon ni halak na dung mate i ma sora ni Anak Ni Debata, jana sanga ise na umbegesa dapotan hangoluan. 5:26 Dibaen songon Ama i marhangoluan di bagasan diriNia sandiri, laing songon i ma madung dibaen Ama i do Anak i, gabe marhangoluan di bagasan diriNia sandiri. 5:27 Madung dilehen Ia kuaso tu AnakNia laho manontuhon uhuman, harana Anak Ni Jolma i do Ia. 5:28 Ulang longang rohamunu umbege on; harana ro do hatihana, sude halak na di bagasan kuburan i begeonna ma soraNia, 5:29 jana haruar ma halahi sian kuburan i. Jana sude halak na mambaen na denggan disungguli ma tu hangoluan. Tapi anggo sibaen na jahat disungguli tu hamatean." 5:30 "Nada tarpatupa Au sanga aha pe anggo sian roha-rohangKu sandiri. Sanga aha na niparentahon ni Debata tu Au, hombar tusi do Au manontuhon uhuman. Hara ni i, adil do na Huputuskon i, angke nada na mambaen roha-rohangKu sandiri Au. Hagiot Ni Damang na marsuru Au, i sajo do na Huoloi. 5:31 Anggo Au sandiri do na mangalehen hasaksian taringot tu diringKu sandiri, nada tarjagit hasaksianKi. 5:32 Tapi adong do sada halak na asing mangalehen hasaksian taringot tu Au jana Huboto do bahaso na tutu hasaksianNia i. 5:33 Hamu sandiri pe madung ditongos hamu suruanmunu tu si Johannes jana si Johannes pe madung dilehen ia hasaksian na tutu taringot tu Au. 5:34 Hupajojor pe i sudena, nada hara ni na porlu di Au hasaksian sian jolma, tapi anso dipalua do hamu. 5:35 Songon lampu na gara jana na marsinondang do da anggo si Johannes; jana hamu pe, anggo hum santongkin ra do hamu ditorangi sondang ni lampu i. 5:36 Tapi adong dope di Au hatorangan na ummarga sian na nilehen ni si Johannes. Karejo na nidok ni Damang karejohononKu, i ma karejo na Hubaen saonnari, sudena i patorangkon bahaso Ama i do na marsuru Au. 5:37 Jana Ama na marsuru Au pe madung dilehen Ia hasaksian taringot tu Au. Anggo hamu nada unjung dope umbege sora ni Ama i, sanga marnida bohiNia. 5:38 Nada diargahon hamu di bagasan rohamunu angka hataNia, angke na so porsaya do hamu tu halak na nisuruNia. 5:39 Diparsiajari hamu do nian Buku Na Badia i angke dipikir hamu dapot hamu ma hangoluan na so mantak i muda dung diparsiajari hamu i. Jana Buku Na Badia i sandiri pe disaksihon i do taringot tu Au! 5:40 Hape nada ra hamu ro tu Au laho manjagit hangoluan na so mantak. 5:41 Nada Hujalahi pujian sian jolma. 5:42 Hutanda do hamu. Huboto do na so dihaholongi hamu Debata di bagasan rohamunu. 5:43 Mardongan kuaso na sian Damang do Au ro, hape nada dijagit hamu Au. Hape anggo halak na asing na ro mamake kuasona sandiri, dijagit hamu do. 5:44 Tarbia muse ma pambaenmunu porsaya, harana na manjalahi sangap do hamu sama hamu, anggo sangap sian Debata na sasada i nada dijalahi hamu. 5:45 Ulang ma didok rohamunu na mangaduhon hamu Au tu Damang. Si Musa do na mangaduhon hamu--harana si Musa do na nipainte-intemunu. 5:46 Sugari na tutu hamu porsaya tu si Musa, angkon laing porsaya muse do hamu tu Au, angke taringot tu Au do na nisuratkon ni si Musa. 5:47 Tapi muda nada dihaporsayai hamu sanga aha na nisurat ni si Musa, tarbia ma pangkaporsayaimunu tu na Hudok?"
6:1 Dung i kehe ma Jesus mangulahi tu ipar ni Dano Galilea (na nigoaran muse Dano Tiberias). 6:2 Diihutkon halak na bahat i ma Ia hara ni na dung niida ni halahi angka pangalaho hahomangan na nibaenNia dompak pamalumkon angka na marnyae Ia. 6:3 Manangkok ma Jesus rap dohot angka siseanNia i tu sada dolok-dolok, laing dipajuguk halahi ma disi. 6:4 Hatiha i laho dapot ma Pesta Paskah ni halak Jahudi. 6:5 Di na manaili Jesus humaliang, diida Ia ma bahat sajo halak marroan mandapotkon Ia. Dung i didok Ia ma tu si Pilipus, "Di dia ma tobusanta panganon anso tarlehen hita halak na bahat on mangan?" 6:6 (Didok Jesus pe songon i laho mancubo roha ni si Pilipus doIa; harana anggo Jesus sandiri diboto Ia hian do sanga aha na giot baenonNia.) 6:7 Dialusi si Pilipus ma, "Roti arga dua ratus hepeng perak nada tuk di angka jolma on, harupe hum saotik be sahalak." 6:8 Sahalak sian sisean ni Jesus na asing, i ma si Andreas anggi ni si Simon Petrus, mandok: 6:9 "Adong do dison sada dakdanak na maniop lima roti dohot ihan duakibung. Tapi aha ma arti ni i tu halak na songon on bahatna?" 6:10 "Suru hamu ma sudena halahi juguk," ninna Jesus tu angka siseanNia i. Bahat do ruput-ruput disi, gabe marjuguhan di ruput-ruput i ma sude halak i -- adong ma hira-hira lima ribu halak halaklahi. 6:11 Dung i dibuat Jesus ma roti i, didok Ia ma tarimakasi tu Debata. Lalu diparbagi-bagihon Ia ma roti i tu halak na bahat i. Laing songon i ma dibaen Ia tu ihan i. Mangan ma sudena halahi sabutong-butongna. 6:12 Dung butong na mangan i, didok Jesus ma tu angka siseanNia i, "Palagut hamu ma teba-teba ni panganon i ulang adong na sayang." 6:13 Dipalagut angka siseanNia i ma teba-teba ni panganon i dapot ma dua bolas karanjang gok teba-teba ni roti na lima i na nipangan ni halak na bahat i. 6:14 Dung diida halak na bahat i hahomangan na nibaen ni Jesus i, ninna halahi ma, "On ma tutu panurirang na giot ro i tu tano on!" 6:15 Dung i giot paksaon ni halahi ma Jesus gabe raja ni halahi. Tapi diboto Jesus do na di roha ni halahi i, gabe kehe ma sada Ia tu dolok-dolok i. 6:16 Dung potang ari, manuat ma angka sisean ni Jesus tu dano i. 6:17 Marparau ma halahi manyiborangi dano i tu Kapernaum. Haru madung borngin laing so ro dope Jesus mandapoti halahi. 6:18 Jadi mamungka ma marombak dano i hara ni pangombus ni alogo na gogo. 6:19 Madung hira-hira opat tu lima kilometer daona halahi marparau tu tonga-tonga ni dano i; jadi ompot ma diida halahi ro Jesus mardalan di ginjang aek i mandapotkon parau ni halahi i. Mabiar situtu ma halahi. 6:20 Tapi didok Jesus ma tu halahi, "Ulang hamu mabiar, Au do i!" 6:21 Giot dipamasuk halahi ma Ia tu parau i hape ma lalu halahi tu inganan sitopoton ni halahi i. 6:22 Ancogotna i diida halak na tinggal di siborang ni dano i ma, hum sada do parau disi. Diboto halahi do na dung parjolo kehe anggo sisean ni Jesus jana na so dohot Jesus di bagasan parau i rap dohot angka siseanNia i. 6:23 Adong do angka parau na marroan sian Tiberias maradian donok tu inganan parmanganan ni halak na mangan roti i dung didok Jesus tarimakasi tu Debata. 6:24 Dung diida halahi na so disi Jesus dohot angka siseanNia i, masuk ma halahi tu parau laho kehe tu Kapernaum manjalahi Jesus. 6:25 Dung marsuo halahi dohot Jesus di ipar ni dano i, disapai halahi ma tuSia, "Ale, Rabbi sadihari dehe Ho lalu tuson?" 6:26 Dialusi Jesus ma, "Satutuna do na Hudok tu hamu: Nada hara ni na dung diastui hamu angka hahomangan na Hubaen i umbaen na nijalahanmunu Au, tapi hara ni na dung butongan do hamu mangan roti i. 6:27 Ulang pola marloja-loja hamu markarejo hara ni sipanganon na ra abis dohot na ra busuk. Markarejo ma hamu, anso dapot hamu sipanganon na so ra busuk jana na mangalehen hangoluan na so mantak. Lehenon ni Anak Ni Jolma i do di hamu panganon i; angke madung dilehen Damang, i ma Debata, kuaso i diSia." 6:28 Dung i disapai halahi ma tuSia, "Aha do sibaenonnami anso tarkarejohon hami hagiot ni Debata?" 6:29 Dialusi Jesus ma, "On ma na nipangido ni roha ni Debata sikarejohononmunu diSia: Haporsayai hamu ma na nisuru ni Debata i." 6:30 Didok halahi ma, "Antong anggo songon i, adong dehe tanda hahomangan sibaenonmi Guru siidaonna ni anso porsaya hami tu Ama i? Patidahon ma sanga aha do na tarbaen Ho! 6:31 Anggo angka ompunami mangan manna do di halongonan, songon na adong tarsurat, 'Dilehen Ia do di halahi sipanganon na sian banua ginjang.' " 6:32 Dung i didok Jesus ma tu halahi, "Satutuna Hupaboa ma di hamu: Anggo na nilehen ni si Musa i di hamu, nada sipanganon na sian banua ginjang i; anggo sipanganon na sian banua ginjang i, i ma sipanganon na satutuna lehenon ni Damang di hamu. 6:33 Angke anggo sipanganon na nilehen ni Debata, i ma na mijur sian banua ginjang jana na mangalehen ngolu na so mantak tu portibi on." 6:34 Dung i ninna halahi ma, "Ale Tuhan, lehen ma di hami tontong sipanganon na songon i." 6:35 Jadi didok Jesus ma tu halahi, "Au do roti na mangalehen hangoluan; sanga ise na ro tu Au nada malean be ia, jana sanga ise na porsaya tu Au nada manguas be ia. 6:36 Tapi madung Hudok tu hamu, 'Bope madung diida hamu Au, tapi nada porsaya hamu.' 6:37 Sudena halak na dung dipasahat Damang tu Au, ro ma halahi tu Au. Nada tulahonKu, sanga ise pe na ro tu Au. 6:38 Angke umbaen na mijur pe Au sian banua ginjang, na giot patuluskon hagiot ni na marsuru Au do, nada hagiotKu sandiri. 6:39 Jana songon on ma hagiot ni na marsuru Au; anso ulang Huagohon sahalak pe sian sudena halak na nipasahatNia tu Au; tapi anso Hupangolu do halahi mangulahi dung di Ari Parpudi. 6:40 Harana on do hagiot ni Damang: Sudena halak na marnida Anak i jana porsaya tuSia, i do na marhangoluan na so mantak jana pangoluonKu ma halahi mangulahi dung di Ari Parpudi." 6:41 Mamungka ma mungut-ungut halak Jahudi tu Jesus, hara ni na nidokNia i, "Au do roti na mijur sian banua ginjang i." 6:42 Didok halahi ma, "Na he Jesus anak ni si Josep i do on? Hami tanda do amangNia dohot inangNia! Biasi ma he didokkon Ia na mijur sian banua ginjang Ia?" 6:43 Dung i didok Jesus ma tu halahi, "Ulang marungut-ungut hamu. 6:44 Nada tarbaen sanga ise pe ro tu Au, anggo so disosoi Damang na marsuru Au halakna i tu Au; jana pangoluonKu ma halahi di Ari Parpudi. 6:45 Tarsurat do di buku ni angka panurirang songon on: Ajaran ni Debata ma sudena halak. Jadi sudena halak na manangihon Debata jana na marsiajar sian Ia, angka halahi ma na ro tu Au. 6:46 Nada na mandok na dung adong halak unjung mida Damang i. Anggo na dung unjung mida Damang, hum na ro sian Damang i do. Sasada Ia sajo ma i!" 6:47 "Tutu do na Hudok on tu hamu: Halak na porsaya tu Au, i do na marhangoluan na so mantak. 6:48 Au do roti hangoluan. 6:49 Mangan manna do angka ompumunu di halongonan hape laing marmatean do halahi. 6:50 Tapi asing situtu do anggo sipanganon na mijur sian banua ginjang i; halak na mangankon sipanganon i, nada mate be. 6:51 Au do roti na mijur sian banua ginjang i, i ma sipanganon na mangalehen hangoluan. Halak na mangankon sipanganon on, mangolu ma salolot-lolotna. Anggo sipanganon na giot lehenonKi, i ma pamatangKu. LehenonKu ma pamatangKon anso mangolu portibi on." 6:52 Gabe martongkari ma halak Jahudi sama halahi hara ni hata ni Jesus nangkinan i. "Bia do pangalehen ni Bayo on di pamatangNia i tu hita gabe sipanganon?" ninna halahi. 6:53 Dung i didok Jesus ma tu halahi, "Tutu do na Hudok on di hamu: Anggo so dipangan hamu do pamatang ni Anak Ni Jolma i jana nada diinum hamu mudarNia, nada adong hangoluan na tutu di bagasan hamu. 6:54 Anggo halak na mangankon pamatangKu jana manginum mudarKu marhangoluan na so mantak do jana pangoluonKu ma halahi mangulahi di Ari Parpudi. 6:55 Angke pamatangKu do sipanganon na tutu jana mudarKu do siinumon na tutu. 6:56 Halak na mangankon pamatangKu jana na manginum mudarKu, ngolu ni halahi ma na sada tu Au jana ngolungKu pe sada tu halahi. 6:57 Damang na mangolu i do na marsuru Au jana Au pe na mangolu sian Damang i do. Laing songon i muse ma na mangankon pamatangKu, laing sian Au ma ia mangolu. 6:58 On do roti na mijur sian banua ginjang i: Nada sarupa sipanganon on dohot sipanganon na nipangan ni ompumunu. Angke dung dipangan halahi sipanganon i, laing mate do halahi. Tapi anggo na mangan sipanganon on, mangolu do salolotna." 6:59 Hatiha mangajari ma Jesus di bagas paribadatan na di Kapernaum didokkon Ia sudena i. 6:60 Bahat do angka sisean ni Jesus umbege angka hata na nidok ni Jesus i. Didok halahi ma, "Ma kasartu do pangajaran on. Ise ma he na tahan manangihonsa?" 6:61 Haru pe so jolo adong halak na paboahonsa, madung diboto Jesus do na marungut-ungut angka siseanNia i taringot tusi. Dung i gabe ning Ia ma tu halahi, "Adong he na so sonang rohamunu di pangajaran i? 6:62 Bia do muda diida hamu saulahon Anak Ni Jolma i mulak manaek tu ingananna humani? 6:63 Tondi i do na mangalehen hangoluan, anggo sibuk nada adong guna ni i. Angka hata na Hudokkon, i do tondi dohot hangoluan. 6:64 Hape laing adong dope sian hamu na so porsaya." (Madung diboto Jesus hian do sian mulana sanga ise-ise na so ra porsaya dohot ise na giot manghianat tuSia.) 6:65 Dung i didok Jesus ma mangulahi, "Hara ni i ma umbaen na Hudok tu hamu, umpe sahalak tarbaen ro tu Au anggo so dilehen Damang dalan disia laho mandapotkon Au." 6:66 Mamungka sian i bahat ma sian angka siseanNia i manadingkon Ia, jana nada ra be halahi mangihutkon Ia. 6:67 Dung i disapai Ia ma siseanNia sidua bolas halak i, "Adong he na giot tadingkononmunu muse ma Au?" 6:68 Dialusi si Petrus ma, "O Tuhan, giot tu ise dope hami kehe? Hum hataMi sajo do na mangalehen hangoluan na so mantak. 6:69 Porsaya do hami jana marpos ni roha, Ho do Na Badia na ro sian Debata." 6:70 Dialusi Jesus ma tu halahi, "Au do nian mamili hamu na dua bolas halak on. Tapi haru songon i pe gabe songon Sibolis do sahalak sian hamu!" 6:71 Si Judas anak ni si Simon Iskariot do na nidok ni Jesus disi. Angke haru pe sahalak sian sidua bolas halak i si Judas, ia do na giot manghianat tu Jesus.
7:1 Dung i mardalani ma Jesus di Galilea. Nada ra Ia anggo tu Judea hara ni angka parkuaso ni halak Jahudi na disi, na sai manjalahi dalan giot mamunu Ia. 7:2 Donok ma hatiha i Pesta Undung-undung Bulung Rata ni halak Jahudi. 7:3 Jadi didok angka kahanggiNia ma tuSia, "Kehe ma Ho sian on tu Judea, anso laing diida angka siseanMi parkarejoanMu. 7:4 Nada adong halak na manabunihon sanga aha na nibaennia muda giot tarbonggal goarnia. Muda baenonMu ma na songon i, angkon botoon ni na satano on ma i!" 7:5 (Angke nada porsaya angka kahanggiNia i sandiri tuSia.) 7:6 Jadi dialusi Jesus ma, "Nada hatihana dope anggo di Au, tapi anggo di hamu tongtong do dapot hatihana. 7:7 Nada na ra portibi on mangkagigihon hamu. Tapi anggo Au tutu ma hagigian ni portibi on, hara ni na sai Hudok tu portibi on bahaso na jahat pambaenanna. 7:8 Hamu sajo ma jolo kehe tu pesta i. Anggo Au indangkon ma sai kehe tusi, *INDANGKON MA SAI KEHE TUSI: Sanga: Nada kehe dope Au.* angke nada hatihana dope di Au." 7:9 Songon i ma didok Jesus tu angka kahanggiNia i, jana laing di Galilea ma Ia tading. 7:10 Dung kehe kahanggiNia tu pesta i, kehe muse ma Jesus tusi sip-sip. 7:11 Dijalak-jalahi angka parkuaso ni halak Jahudi ma Jesus di pesta i, sapa-sapa ma halahi, "Di dia do Ia ulaning?" 7:12 Bahat ma hata-hata ni jolma na bahat i taringot tuSia. Adong na mandok, "Na burju do Ia." Adong muse na mandok, "Nada, na paliluhon halak na bahat do Ia." 7:13 Tapi sahalak pe nada adong na puluk sian halahi mandok hatana torus torang taringot tuSia, hara ni na mabiar mida halak Jahudi i. 7:14 Di tonga-tonga ni pesta i masuk ma Jesus tu Bagas Ni Debata mangajari. 7:15 Homang sajo ma roha ni angka halak Jahudi i. Didok halahi ma, "Sian dia do parbinotoan ni Bayo on, hape nada jungada Ia sikola?" 7:16 Dialusi Jesus ma, "Sanga aha na Huajarkon i nada pangajaranKu i, tapi pangajaran ni na marsuru Au do i. 7:17 Sanga ise na ra mangihutkon hagiot ni Debata, botoon ni halahi ma sanga na sian Debata do pangajaranKi, sanga na sian roha-rohangKu sandiri. 7:18 Anggo halak na marroha-roha mandok hatana, na manjalahi sangap tu dirina sajo do i. Tapi anggo halak na manjalahi sangap tu na marsuru ia, i ma halak na tigor; nada adong gabus disia. 7:19 Madung nian dilehen si Musa di hamu angka Parenta Ni Debata. Tapi sahalak pe sian hamu umpe adong na mangoloi angka Parenta i. Biasi ma he giot bunuonmunu Au?" 7:20 Dialusi halak na bahat i ma, "Na marsibolis do Ho, ise he na giot mamunu Ho?" 7:21 Dialusi Jesus ma, "Hum sada dope Hubaen pangalaho na so somal ma longang hamu sude. 7:22 Dibaen si Musa do paraturan di hamu, angkon sunatonmunu sude dakdanakmunu. Jana laing manyunat halak do hamu di Ari Sabat. (Anggo satutuna nada si Musa na parjolo mamungka manyunat halak, tapi angka ompunta na mangolu dompak so si Musa do.) 7:23 Muda disunat hamu halak di Ari Sabat, anso ulang mangalanggar Parenta Ni si Musa, biasi anggo songon i muruk hamu tu Au hara ni na Hupamalum sahalak di Ari Sabat? 7:24 Ulang ma marojahan tu na tarida sajo hamu muda manguhumi halak, tapi uhum na tigor ma baen hamu." 7:25 Dung i adong ma deba halak Jerusalem na mandok, "Na he on do halakna, na giot bunuon ni halahi i? 7:26 Tapi ligi da! Laing marpupu do Ia mangkobari di jolo ni halak na bahat jana nada adong na mangkahua Ia, jana nada adong na mandok bagi aha tuSia! Sanga, betak na dung tangkas do diboto angka parkuasonta, na tutu do Ia Kristus i. 7:27 Hape anggo haroro ni Kristus i nada dong halak na umboto i sanga sian dia asalNa! Anggo Bayo on, inda he taboto do asalNia." 7:28 Hatiha mangajari Jesus di bagasan Bagas Ni Debata, didok Ia ma, "Nian di tanda hamu do sanga ise Au jana diboto hamu sian dia harorongKu? Nada marhite roha-rohangKu sandiri umbaen na ro Au, tapi na nisuru ni Na Tigor i do Au, tapi nada ditanda hamu Ia. 7:29 Anggo Au Hutanda do Ia, harana sian Ia do harorongKu jana Ia do na marsuru Au." 7:30 Jadi dirohahon halahi ma giot manangkup Ia, tapi inda adong na puluk manjama Ia, angke nada dapot dope hatihaNa. 7:31 Tamba ni i, bahat muse do sian angka jolma na bahat i na porsaya tuSia, didok halahi ma, "Muda ro Kristus i tarbaen Ia dope ulaning hahomangan umbahat sian na dung binaenNia on?" 7:32 Dibege halak Parise ma hata-hata ni halak na bahat taringot tu Jesus. Jadi hara ni i, disuru halahi ma dohot angka sintua ni malim, piga-piga halak panjago ni Bagas Ni Debata anso kehe manangkup Jesus. 7:33 Didok Jesus ma, "Hum santongkin nari noma Au rap dohot hamu. Dung i mulak ma Au mandapotkon na marsuru Au. 7:34 Jalahanmunu ma Au tapi nada dapot hamu be: Harana nada tarbaen hamu ro tu ingananKi." 7:35 Dung i didok angka halak Jahudi i ma, "Na giot tudia muse dehe Ia umbaen jabat nada tarbaen hita mandapotkon Ia? Adong he ulaning na giot kehe mandapotkon halak Jahudi na mangaranto di tonga-tonga ni halak Junani i ma Ia jana giot ajaranNia ma angka halak Junani i? 7:36 Aha dehe maksudNia mandok, 'Jalahanmunu ma Au tapi nada dapot hamu Au,' dohot, 'Nada tarbaen hamu ro tu ingananKi?' " 7:37 Ari na parpudi di pesta i, i ma mata ni pesta i. Jongjong ma Jesus disi mandok hata marsora na gogo, ning Ia ma, "Sanga ise na manguas, tu Au ma ro anso minum. 7:38 Tarsurat do di Buku Na Badia i songon on, 'Sanga ise na porsaya di Au, mabaor do angka batang aek na mangalehen ngolu sian bagasan rohana.' " 7:39 (Tondi Ni Debata do na nidok ni Jesus disi, i ma na giotsijagiton ni angka na porsaya tuSia. Harana nada podo ro Tondi Parbadia i, hara ni na so dipasangap dope Jesus.) 7:40 Bahat do halak na manangihon sanga aha na nidok ni Jesus. Jadi adong do sian halahi na mandok, "Na tutu do Ia panurirang!" 7:41 Adong muse na asing na mandok, "On ma Kristus i!" Tapi laing adong muse do na mandok, "Dia ma he sian Galilea haroro ni Kristus i. 7:42 Harana di Buku Na Badia i tarsurat, sian pomparan ni si Daud do Kristus i jana sorang di Betlehem, i ma Kota Ni si Daud i." 7:43 Ujungna gabe martongkari ma halak na bahat i taringot tu Jesus. 7:44 Adong ma na giot manangkup Ia tapi sahalak pe nada adong na puluk manjamaSa. 7:45 Dung i mulak ma angka panjago ni Bagas Ni Debata na nisuru manangkup Jesus, mandapotkon angka sintua ni malim dohot halak Parise. Disapai angka sintua ni malim dohot angka Parise i ma tu angka panjago i, "Biasi inda dioban hamu Ia tuson?" 7:46 Dialusi angka panjago i ma tu halahi, "Nada adong dope pangkatai ni jolma songon i!" 7:47 "Adong he na dung tarpaoto-oto muse dohot hamu?" ninna halak Parise i. 7:48 "Adong dehe sada halak sian angka pamimpin sanga halak Parise na dung porsaya tuSia? 7:49 Tapi anggo halak na bahat na so umboto angka Tona Ni si Musa, hona bura ma halahi." 7:50 Sahalak sian angka Parise i madung unjung kehe mandapotkon Jesus borngin-borngin; si Nikodemus goarna. Didok si Nikodemus on ma tu angka Parise na asing i, 7:51 "Anggo mangihutkon Tona i nada tola hita manguhum-uhumi halak, anggo so jolo nibege dope parkarona, jana anggo so jolo dipareso sanga aha na nibaenNia." 7:52 "Adong he na halak Galilea ho? Pareso jolo di Buku Na Badia i. Nada adong panurirang na ro sian *NADA ADONG PANURIRANG NA RO SIAN: Sada naskah narobi mandok: Panurirang indangkon na ro sian.* Galilea!" 7:53 Dung i mulak be ma halahi sudena tu bagasna.
8:1 Tapi anggo Jesus kehe tu Dolok Zetun do Ia. 8:2 Ancogotna i manyogot dope, kehe ma Ia mangulahi tu Bagas Ni Debata, jana bahat ma marroan halak mandapotkon Ia. Dung i juguk ma Ia, dipungka Ia ma mangajari halahi. 8:3 Jadi laing di hatiha i marroan ma angka Siboto Surat dohot angka Parise maroban tuSia sada anak boru na tardapot markamainan. Dipajongjong halahi ma anak boru i di tonga-tonga, 8:4 jana didok halahi ma tu Jesus, "Na tardapot do Rabbi anak boru on markamainan. 8:5 Anggo di Tona Ni si Musa, adong do Tona na mandok angkon nidangguran do dohot batu dadaboru sisongon on lopus mate. Saonnari bia do pandapotMu?" 8:6 Disapai halahi pe songon i na giot padapotkon hasalaan ni Jesus do halahi. Tapi dipaunduk Jesus do jana disurat Ia tano i dohot jari-jariNia. 8:7 Tapi dung sai disosak halahi, dipadorgak Ia ma uluNia jana didok Ia ma tu halahi, "Sanga ise na so mardosa sian hamu, padiar ma ia parjolo mandanggur anak boru on dohot batu." 8:8 Dung i dipaunduk Jesus ma jana disurati Ia tano i mangulahi. 8:9 Dung dibege halahi songon i pandok ni Jesus, morot ma halahi sian inganan i kehe-kehe sada mamungka sian na tumobang. Ujungna tinggal ma Jesus sajo disi dohot anak boru i na laing jongjong disi. 8:10 Dung i jongjong ma Jesus, didok Ia ma tu anak boru i, "Ma di dia halahi sude? Nada he adong na manguhumi ho nangkin?" 8:11 "Nada adong, Tuhan" ning ia mangalusi. Didok Jesus ma, "Antong denggan, Au pe nada Huuhumi ho. Kehe ma ho saonnari, ulang be datdati na mardosa tu pudi on." *Di bahat naskah dohot terjemahan narobi, nada adong bagian on (8-11). Adong do na mambaen angka ayat on dung Joh. 21:24, adong muse na mambaen dung Luk. 21:38, jana adong sada naskah na mamayakkon on dung Joh. 7:36.* 8:12 Didok Jesus dope mangulahi tu halahi, "Au do sinondang ni portibi on. Dapotan sinondang hangoluan do sanga ise na mangihutkon Au. Nada be mardalan di na golap halahi." 8:13 Didok halak Parise i ma tu Jesus, "Saonnari Ho do na manyaksihon diriMu sandiri, nada tutu na nisaksihonMi!" 8:14 Dialusi Jesus ma, "Haru pe Husaksihon taringot tu diringKu sandiri, tutu do na Husaksihon i; angke Huboto do sanga sian dia Au ro jana tu dia Au kehe. Anggo hamu nada diboto hamu sanga sian dia Au ro jana tu dia Au kehe. 8:15 Diuhumi hamu do halak mangihutkon pambaen ni jolma; anggo Au nada adong sahalak pe na Huuhumi. 8:16 Tapi sugari pe adong halak na Huuhumi, tigor do haputusanKu, harana nada hum Au sandiri, rap do Au dohot Damang i na marsuru Au. 8:17 Tarsurat do di angka Tona i songon on: Na tutu do na ni saksian ni dua halak. 8:18 Adong do dua na mangalehen hasaksian taringot tu diringKu Au dohot Damang na marsuru Au." 8:19 "Di dia ma AmangMi?" ning halahi. Dialusi Jesus ma, "So na ditanda hamu Au. Damang pe nada ditanda hamu i. Sugari ditanda hamu Au, laing ditanda hamu do Damang." 8:20 Sudena i didok Jesus, hatiha mangajari Ia di Bagas Ni Debata di lambung ni poti hepeng. Tapi sahalak pe nada adong na manangkup Ia, angke nada podo dapot hatihana. 8:21 Didok Jesus dope tu halahi, "Kehe ma Au jana jalahanmunu ma Au, tapi mate ma hamu di bagasan dosamunu. Tu inganan hakeheanKu, nada tarbaen hamu ro tusi." 8:22 Dung i didok angka parkuaso ni Jahudi i ma, "AropKu na giot manyingkot ma Ia, harana didok Ia, 'Tu inganan hakeheanKu nada tarbaen hamu ro tusi.' " 8:23 Dung i didok Jesus ma tu halahi, "Sian toru on do hamu ro; tapi anggo Au sian ginjang do. Hamu sian portibi on do; tapi anggo Au nada sian portibi on. 8:24 Hara ni i do umbaen na Hudok tu hamu, angkon mate hamu di bagasan angka dosamunu. Jana tutu do i angkon mate hamu di bagasan angka dosamunu, anggo laing na so porsaya hamu, 'Au do ibana'." 8:25 "Ise do Ho satutuna?" ninna halahi manyapai. Dialusi Jesus ma, "Aha dope gunana mangkobari Au dohot hamu! *AHA DOPE GUNANA MANGKOBARI AU DOHOT HAMU: Sanga: Songon na dung Hudokkon tu hamu sian mulana.* 8:26 Bahat dope na giot dokkononKu dohot uhumanKu taringot tu hamu. Tapi Hum na Hubege sian na marsuru Au, i sajo do paboaonKu tu portibi on -- harana sintong do Ia." 8:27 Nada diboto halahi, taringot tu Ama i do na nihatahonNia. 8:28 Jadi didokkon Jesus ma tu halahi, "Dung dipatuginjang hamu sanoli on Anak Ni Jolma i, botoonmunu ma disi, 'Au do' na nidok ni surat i. Disi pe anso tangkas diboto hamu na so adong sada pe na Hubaen i sian roha-rohangKu sandiri. Sanga aha na niajarkon ni Damang tu Au, hum i sajo do na Huhatahon. 8:29 Jana na marsuru Au, sai rap do Ia dohot Au. Nada jungada dipadiar Ia sasada Au sajo, angke sai Hubaen do sanga aha na pasonangkon rohaNia." 8:30 Dung didokkon Jesus sudena i, bahat ma halak porsaya tuSia. 8:31 Dung i didokkon Jesus ma tu halak Jahudi na dung porsaya tuSia, "Anggo burju hamu mandalankon angka ajaranKi, i pe anso tutu hamu gabe siihutkon Au. 8:32 Botoonmunu ma hasintongan i jana paluaon ni hasintongan i ma hamu." 8:33 Ninna halahi ma, "Pomparan ni si Abraham do hami. Nada jungada dope hami gabe hatoban ni sanga ise pe! Aha do maksudmu umbaen didok Ho, 'Paluaon ma hamu?' " 8:34 Dialusi Jesus ma, "Tutu do na Hudok di hamu. Sude halak na mambaen dosa, i ma da hatoban ni dosa. 8:35 Muda adong sada hatoban di bagas, nada tongtong ia tinggal di bagas i, tapi anggo anak tongtong do tinggal di bagas i. 8:36 Muda dibaen Anak i hamu malua, i pe anso tutu hamu na malua. 8:37 Huboto do, pomparan ni si Abraham do nian hamu. Hape laing giot dibunu hamu do Au, hara ni na so ra hamu manjagit pangajaranKi. 8:38 Na nipatidahon ni Damang tu Au, i do na Huhatahon; jana hamu pe dibaen hamu do sanga aha na nisuruhon ni amangmunu sibaenonmunu." 8:39 Dialusi halahi ma, "Si Abraham do ompunami." Didok Jesus ma, "Anggo na tutu ma hamu pomparan ni si Abraham, tontu baenonmunu do sanga aha na nibaen ni si Abraham. 8:40 Hasintongan na Hubege sian Debata, hum i sajo do na Hupaboa tu hamu, hape mur giot bunuonmunu dope Au. Anggo si Abraham nada dibaen ia songon i! 8:41 Na nibaen ni amangmunu; i do na nibaenmunu." Dialusi halak Jahudi i ma, "Nada anak gampang hami. Hum sada do Amangnami, i ma Debata sandiri." 8:42 Dung i didok Jesus ma tu halahi, "Sugari na tutu Debata Amangmunu, angkon holong do rohamunu tu Au, harana, tutu do Au na ro sian Debata. Nada sian roha-rohangKu umbaen na ro Au. Na nisuruNia do Au. 8:43 Hara ni aha dehe umbaen na so diastui hamu na Hudok i? Angke nada tahan hamu umbege pangajaranKi. 8:44 Angka anak ni Sibolis do hamu. Jadi hagiot ni amangmunu do na nijalahanmunu. Sian mula-mulana do Sibolis i sibunu jolma. Nada mangolu dibagasan hatutuan ia, harana nada adong disia hatutuan. Pargabus do Sibolis, angke songon i hian do bako ni i. Tutu do pargabus Sibolis i, ia do ama ni sandok gabus. 8:45 Tapi hara ni na Hupaboa tu hamu taringot tu Debata, hara ni i muse ma umbaen na so porsaya hamu tu Au. 8:46 Ise ma sian hamu na tarbaen mambuktihon paboa na adong dosa di Au? Muda hupaboa tu hamu taringot tu Debata, biasi inda porsaya hamu tu Au? 8:47 Sanga ise na ro sian Debata ditangihon Ia do na nidok ni Debata. Tapi anggo hamu nada sian Debata hamu, hara ni i ma umbaen na so ra hamu manangihon i." 8:48 Dialusi halak Jahudi i ma, "Nada he tutu do muda hami dokkon halak Samaria do Ho, jana na nisonggopan ni setan?" 8:49 Dialusi Jesus ma, "Nada na nisonggopan ni setan Au! Na pasangapkon Damang do Au, hape nada dipasangap hamu Au. 8:50 Nada manjalahi sangap tu diringKu sandiri Au. Adong do Sada na manjalahisa jana Ia do na manguhumi. 8:51 Tutu do na Hudok tu hamu; sanga ise na mangoloi na Hudok, nada mate be Ia salolot-lolotna." 8:52 Dung i didok angka halak Jahudi i ma tu Jesus, "Saonnari pe anso tangkas sajo di hami, na nisonggopan ni setan do Ho! Si Abraham sandiri madung mate, songon i muse angka panurirang i. Hape didok Ho dope, 'Sanga ise na mangoloi hatangKu, nada mate halahi salolot-lolotna.' 8:53 Madung mate angka panurirang. Dohot ise ma patudosonMu diriMu? Adong he gumodang Ho ulang pado amanami si Abraham na dung mate?" 8:54 Dialusi Jesus ma, "Sugari Au mamuji diringKu sandiri, na so adong do arti ni pujianKi. Damang do na mamuji Au; jana didok hamu, Damang i do Debatamunu, 8:55 hape so ditanda hamu Ia. Tapi anggo Au Hutanda do Ia. Jadi muda Hudok na so Hutanda Ia, gabe pargabus ma Au songon hamu. Hutanda do Ia jana Huoloi do na nidokNia. 8:56 Na jopan do roha ni si Abraham amangmunu i laho marnida aringKu. Madung diida Ia i jana jop rohaNia!" 8:57 Dung i didok halak Jahudi i ma tu Jesus, "So tuk dope lima pulu taon umurMu, na niidaMu ma lakna si Abraham?" *NA NIIDAMU MA LAKNA SI ABRAHAM?:Dipiga-piga naskah narobi didok: Jungada ma he diida si Abraham Ho?* 8:58 Dialusi Jesus ma, "Tutu do na Hudok di hamu: Dompak so sorang dope si Abraham, madung adong hian Au." 8:59 Dung i dibuat angka halak Jahudi i ma batu giot mandanggur Jesus; tapi martabuni ma Jesus, lalu kehe Ia morot sian Bagas Ni Debata i.
9:1 Di na mamolus Jesus, diida Ia ma sada halak na so marnida, na mapitung mamungka sian hatutubuna. 9:2 Disapai angka siseanNia i ma tu Jesus, "Ale Guru, ise do na mardosa, bayo on do sanga simatobangna, dibaen na mapitung ia sorang?" 9:3 Dialusi Jesus ma, "Mapitung pe ia nada hara ni na mardosa ia jana nada hara ni na mardosa simatobangnia. Mapitung pe ia anso diida halak do kuaso ni Debata markarejo di bagasan dirinia. 9:4 Salolot torang dope ari, angkon pupuonta do mangkarejohon karejo ni na marsuru Au. Angke potang ne ma ari jana nada tarbaen sanga ise be markarejo dung di hatiha i. 9:5 Salolot di tano on Au, Au do sinondang ni portibi on." 9:6 Dung didokkon Jesus songon i, marsitijur ma Ia tu tano, jana diluntak Ia ma tano i tu tijurNia. Dung i didaiskon Ia ma bustak i tu mata ni bayo i, 9:7 jana didok Jesus ma tusia, "Kehe ma ho marsuap tu tobat Siloam." (Siloam astuanna "Na nisuru".) Jadi kehe ma bayo i marsuap paiaskon bohinia. Di na mulak ia marnida ma matania i. 9:8 Sude hombar bagasnia dohot sude halak na marnida ia mangido-ido mandok, "Na he bayo on do na somal i juguk mangido-ido?" 9:9 Adong na mandok, "Ia ma da i." Tapi adong muse ma na mandok, "Nada na satompa dohot ia do i." Tapi didok bayo i sandiri ma, "Au ma da i," ning ia. 9:10 "Na tarbia do umbaen na gabe marnida matami?" ninna halahi manyapai ia. 9:11 Dialusi ia ma, "Bayo na margoar Jesus i, dibaen Ia saotik bustak di tano i, dung i didaiskon Ia ma bustak i tu matangku jana ning Ia ma, 'Kehe ma ho marsuap tu tobat Siloam.' Jadi kehe au. Jana disi marsuap au, marnida ma matangkon," ning ia. 9:12 "Di dia ma halakna i?" ning halahi manyapai. "Inda huboto," ning ia mangalusi. 9:13 Dung i dioban ma bayo i tu jolo ni halak Parise. 9:14 Hatiha na mambaen bustak i Jesus dohot tijurNia laho mambaen marnida mata ni na mapitung i topet do hatiha i Ari Sabat. 9:15 Jadi disapai angka halak Parise ma bayo i sanga bia dalanna umbaen na gabe marnida matania. Dialusi bayo i ma, "Diapuskon Ia bustak tu matangku, dung i kehe au marsuap paiaskon matangki, gabe marnida ma au." 9:16 Adong ma deba sian halak Parise i na mandok, "Nada sian Debata asal ni Bayo na mambaen i, harana dilanggar Ia do tona ni ugamo taringot tu Ari Sabat." Tapi didok halak na asing ma, "Dia ma tarbaen halak pardosa patupa angka hahomangan sisongon i?" Paasing-asing pandapot ma halahi. 9:17 Jadi hara ni i disapai halak Parise i ma sanoli nari tu bayo i, "Didok ho nangkin, Ia do na mambaen marnida matamu, antong bia do pandapotmu taringot tuSia?" "Panurirang do Ia!" ning ia mangalusi. 9:18 Tapi laing nada porsaya angka parkuaso ni halak Jahudi i na mapitung hian ia, hape saonnari madung gabe marnida. Nada porsaya halahi anggo so jolo dipiohon halahi simatobangna, 9:19 jana disapai halahi ma, "Tutu dehe na sorang mapitung anakmon? Na bia do umbaen na gabe marnida ia saonnari?" 9:20 Dialusi simatobangna i ma, "Anaknami ma da on; jana mapitung do on sian mamungka sorang. 9:21 Tapi anggo taringot tu na gabe marnida ia saonnari, sanga tarbia dalan ni i nada hami boto. Jana sanga ise na mambaen gabe marnida matania i, i pe nada hami boto. Tusia ma sapai hamu. Madung tuk umurnia; madung tola ia mangalusi sandiri." 9:22 Hara ni na mabiar do simatobang ni bayo i mida angka parkuaso ni halak Jahudi i umbaen na songon i didok halahi; harana madung putus tahi ni angka parkuaso ni Jahudi i, pakaruaron ma sian bagas paribadatan sanga ise na mangoku Ia Kristus i. 9:23 Hara ni i ma umbaen didok simatobang ni bayo i, "Nada dakdanak be ia; tusia ma sapai hamu." 9:24 Dung i dipiohon halahi ma mangulahi na sorang mapitung i hian, jana didok halahi ma tusia, "Oku ma di jolo ni Debata paboa ma dohot tigor, angke hami boto pardosa do Bayo i." 9:25 Didok ia ma, "Sanga pardosa sanga inda, nada huboto i. Tapi sada do na huboto: Na mapitung humani do au, saonnari madung marnida au." 9:26 Dung i didok halahi ma mangulahi tusia, "Bia dibaen Ia tu ho? Bia pambaenNia gabe marnida matamu?" 9:27 Dialusi bayo i ma, "Madung hupaboa di hamu, hape so ra hamu manangihon. Biasi dope disapai hamu i? Adong he na giot siihutkon Ia muse ma hamu?" 9:28 Dung i muruk ma halahi tusia ninna halahi ma, "Ho do sisean ni i; anggo hami nada! Sisean ni si Musa do anggo hami. 9:29 Anggo taringot tu si Musa tangkas do hami boto na dung mangkatai Debata tusia. Tapi taringot tu Bayo i nada hami boto sanga sian dia asal ni i." 9:30 Dialusi bayo i ma, "Hahomangan noma i anggo so diboto hamu be sanga sian dia asal ni Bayo i, hape madung marnida matangku dibaen Ia. 9:31 Taboto do, na so ditangihon Debata do anggo pardosa. Hum halak na pasangap Debata dohot na patuluskon hagiotNia sajo do na nitangihon ni Debata. 9:32 Sian parmulaan ni tano on nada unjung dope tarbege adong halak tarbaensa jolma na sorang mapitung gabe marnida. 9:33 Anggo na so sian Debata do Bayo i, nada tarbaen Ia sanga aha na songon i." 9:34 Dialusi halahi ma, "Himpal do ho halak pardosa mamungka sian ujung ni obukmu lopus tu palampak ni patmu sian hasosorangmu, giot ajaranmu ma he hami?" Dung i dipakaruar halahi ma ia sian bagas paribadatan i. 9:35 Dibege Jesus ma na dung dipakaruar halahi bayo i sian bagas paribadatan. Jadi dung marsuo dohot bayo i didok Jesus ma tusia, "Porsaya dehe ho tu Anak Ni Jolma i?" 9:36 Dialusi bayo i ma, "Ise dehe i Tuhan? Laing paboa ma jolo tu au anso laing porsaya au tuSia!" 9:37 Dialusi Jesus ma, "Madung diida ho Ia. Na manghatai dohot ho saonnari, i ma Ia." 9:38 "Porsaya do au Tuhan!" ninna bayo i, dung i manungkap ma ia marsomba di jolo ni Jesus. 9:39 Didok Jesus ma, "Laho mandalankon uhum do umbaen na ro Au tu portibi on; anso marnida angka na mapitung jana halak na marnida gabe mapitung." 9:40 Jadi dibege halak Parise na adong disi do na nidok ni Jesus songon i, gabe didok halahi ma tuSia, "Na didok rohaMu do na mapitung hami on?" 9:41 Dialusi Jesus ma, "Anggo sugari mapitung hamu, so na mardosa hamu. Tapi hara ni na nidokmunu i, 'Marnida do hami,' i ma patandahon laing na mardosa hamu."
10:1 "Tutu situtu do na Hudok on tu hamu: Sanga ise na masuk tu bara ni biri-biri i nada sian pintu, sipanangko do i jana panyamun. 10:2 Tapi anggo na masuk sian pintu, i ma parmahan ni biri-biri i. 10:3 Jadi diungkap panjago i ma pintu i tu parmahan i, jana ditangihon angka biri-biri i ma sora ni parmahan i di na nipiohonnia angka biri-birinia i hombar tu goar-goarna be; dung i dioban ia ma halahi tu ruar. 10:4 Dung dioban ia angka biri-biri i tu ruar, di jolo ma mardalan parmahan i, jana mangihut ma angka biri-birinia i sian pudinia harana ditanda halahi do sorania. 10:5 Nada ra be halahi mangihut tu halak na asing, marlojong do halahi kehe manadingkon halak na asing, harana nada ditanda halahi sorana i." 10:6 Nada diastui angka halak na umbegean i sanga aha astuan ni umpama na nidok ni Jesus i. 10:7 Didok Jesus ma mangulahi, "Tutu do na Hudokkon tu hamu: 'Au do pintu di biri-biri i. 10:8 Sude halak na parjolo sian Au, panangko do i jana panyamun, jana nada ditangihon angka biri-biri i sora ni i. 10:9 Au do pintu i. Sanga ise na masuk sian Au, dapotan haluaan; dapotan jampalan ma i muda masuk sanga karuar.' 10:10 Anggo panangko, na giot manangko sajo do i muda ro, mamatehon dohot manyegohon. Tapi anggo Au muda ro, anso marhangoluan do halahi -- i ma hangoluan na marlobi-lobi." 10:11 "Au do parmahan na denggan. Rade do mate anggo parmahan na denggan manghopkop biri-birina. 10:12 Anggo parkarejo na mangomo, nada parmahan i, jana nada ia nampuna angka biri-biri i. Muda diida ia sorigala, marlojong ma ia manadingkon angka biri-biri i, lopus disoroi sorigala i angka biri-biri i jana marsitondong dalanna be. 10:13 Marlojong do parkarejo na niupaan i, angke hara ni na niupaan do ia antong umbaen na karejo; nada dipardulihon ia anggo biri-biri i. 10:14 Au do parmahan na denggan. Hutanda do angka biri-biringKu jana ditanda halahi do Au, 10:15 songon Damang na mananda Au jana Au mananda Damang. Jana Hulehen do hosangKu humopkop biri-biringKi. 10:16 Adong dope angka biri-biri na asing laing Au nampunasa, tapi nada sabara dohot angka biri-biri on. Halahi pe angkon obanonKu do jana laing tangihonon ni halahi do sorangKu. Sudena halahi angkon gabe *SUDENA HALAHI ANGKON GABE: Dipiga-piga-piga naskah narobi didok: Jadi giot adong ma.* sapunguan jana sada parmahan." 10:17 "Holong do roha ni Damang tu Au hara ni haradeonKu mangalehen hosangKu, anso jagitonKu i mangulahi. 10:18 Nada tarbaen sanga ise pe mangarampas hosangKu sian Au. Na rade hian do Au mangalehen hosangKi. Guru di Au do mangalehen i jana marguru di Au do muse laho manjagitsa mangulahi. Jana i ma na nisuruhon ni Debata sibaenonKu." 10:19 Hara ni na nidok ni Jesus songon i gabe martongkari ma halak Jahudi i. 10:20 Bahat na mandok, "Na sibolison do i! Na rintik do i! Biasi dipatangi-tangi hamu i?" ning halahi. 10:21 Tapi adong muse do na mandok, "Anggo halak na hona setan, dia ma tarhatahon Ia na songon i! Dia ma tarbaen setan halak na mapitung gabe marnida?" 10:22 Marpesta Parningotan Pangompoion Bagas Ni Debata ma halak di Jerusalem. Hatiha musim ngali ma disi. 10:23 Mardalan-dalan ma Jesus di Emper Ni Si Salomo na di Bagas Ni Debata; 10:24 dirongomi angka parkuaso ni halak Jahudi ma Jesus disi. Ninna halahi ma tuSia, "Sadia honok nari sai pagangguon ni Guru i rohanami? Tangkas ma didokkon Guru i muda na Ho do Kristus i." 10:25 Dialusi Jesus ma, "Madung Hudok di hamu, hape laing nada porsaya hamu. Sude angka karejo na Hukarejohon markite-hite goar ni Damang do i, angka karejongKi ma na manyaksihon taringot tu Au. 10:26 Dibaen nada biri-biringKu hamu, hara ni i nada porsaya hamu. 10:27 Ditangihon biri-biringKu do sorangKu. Hutanda do halahi jana diihutkon halahi do Au. 10:28 Hulehen do di halahi hangoluan na so ra mantak. Bagi na bia pe nada mate halahi, jana nada tarrampas sanga ise pe halahi sian parmahanionKu. 10:29 Gumodangan dope Damang na mangalehen halahi di Au *GUMODANGAN DOPE DAMANG NA MANGALEHEN HALAHI DI AU: Dipiga-piga naskah narobi didok: Aha na dung dilehen ni Damang di Au, gumodang dope sian.* sian sasudena. Jana nada tarrampas sanga ise pe halahi sian parmahanion ni Damang. 10:30 Sada do Au dohot Damang." 10:31 Dung i dibuat angka parkuaso ni Jahudi i ma mangulahi batu laho mandanggur Jesus. 10:32 Tapi didok Jesus ma tu halahi, "Madung diida hamu Au mambaen angka karejo na denggan, na nisuruhon ni Damang karejohononKu; sian sude parkarejoan i, hara ni karejo na dia ma umbaen giot dangguranmunu Au?" 10:33 Dialusi angka parkuaso i ma, "Umbaen na giot danggurannami Ho, nada hara ni angka karejoMu na denggan i, tapi hara ni na nipabileMu do Debata! Jolma humani do Ho antong hape dioku Ho diriMu songon Debata!" 10:34 Dung i didok Jesus ma mangalusi, "Inda he tarsurat di Buku Tona i: Madung Hudok, 'Angka debata do hamu'? 10:35 Jana sude hita rap taoku do anggo na tarsurat di Buku Na Badia i, nada tarbaen sundat i. Antong anggo songon i, muda tu angka na manjagit hata ni Debata i, digoari Debata sandiri halahi angka debata, 10:36 biasi didok hamu na mangincahi Debata hara ni na Hudok Au Anak Ni Debata? Hape nian na diparbadiai ni Ama i do Au jana na nisuruNia tu portibi on? 10:37 Sugari na so Hukarejohon karejo ni Damang, padiar ma indangkon sai porsaya hamu tu Au. 10:38 Tapi muda Hukarejohon karejo ni Damang, haru pe nada porsaya hamu tu Au, saotik-otikna angkon haporsayaanmunu ma nian na Hubaen i, anso diboto jana diastui hamu na sada do Damang dohot Au, jana Au sada dohot Damang." 10:39 Giot ditangkup halahi ma Ia tapi malua do Ia sian tangan ni halahi. 10:40 Mangulahi ma Jesus kehe tu ipar ni Batang aek Jordan, i ma inganan ni si Johannes na salpu i mandidihon halak, jana disi ma Ia jolo tinggal. 10:41 Marroan ma bahat halak mandapotkon Ia. Didok halahi ma, "Nada nian mambaen tanda hahomangan si Johannes, tapi tutu do sude na nidok ni si Johannes taringot tu Bayo on." 10:42 Jadi bahat ma disi halak porsaya tu Jesus.
11:1 Adong ma sada halak na marnyae, si Lasarus goarna. Di Betania do ia maringanan, i ma kota ni si Maria dohot si Marta na martinadohon i. 11:2 (Si Maria ma halakna na manduruskon miak na huskus i tu patni Tuhan i jana mangapusina dohot obuknia. Ibotonia ma si Lasarus na marnyae i.) 11:3 Ditonahon halahi na dua ma barita i tu Jesus, ninna halahi ma di tona i, "Tuhan, marnyae do donganMu haholongan ni rohaMi." 11:4 Dung dibege Jesus barita i didok Ia ma, "Nada pola mate ia baenon ni nyae i. Anso marsangap do Debata umbaen na marnyae si Lasarus; anso laing dohot muse ma dipasangap Anak Ni Debata." 11:5 Tutu do, holong do roha ni Jesus mida si Marta dohot anggina i songon i tu si Lasarus. 11:6 Tapi haru pe na dung lalu tu Jesus barita na paboahon marnyae si Lasarus, disangajo Ia dope dua ari nari laing di inganan i. 11:7 Dung dua ari pe anso didokkon Ia tu angka siseanNia i, "Beta ma hita mulak tu Judea." 11:8 Dialusi angka siseanNia i ma, "Baru dope, na giot didangguri ni halak Jahudi i Guru i dohot batu, hape saonnari giot mangulahi ma Guru i tusi?" 11:9 "Nada he dua bolas jom do sadari?" ninna Jesus. "Anggo arian do halak mardalan nada tartuktuk bagi na tu aha, harana torang do diida ia tano on. 11:10 Tapi muda borngin do halahi mardalan, tartuktuk ma ia, angke nada adong na torang disia." 11:11 Songon i ma pandok ni Jesus. Dung i didok Ia muse dope tehe, "Madung modom si Lasarus donganta i, tapi kehe ma Au manyungguli ia." 11:12 Didok angka sisean ni Jesus i ma, "Muda tarpodom do si Lasarus Tuhan, na giot malum ma i." 11:13 Hape anggo na nidok ni Jesus paboa na dung mate do si Lasarus. Tapi ninna roha ni halahi, na tutu do tarpodom si Lasarus anggo maksud ni Jesus. 11:14 Jadi torus torang ma dipaboa Jesus, "Madung mate si Lasarus. 11:15 Tapi hara ni na porlu tu hamu sude, gabe jop do rohangKu nada disi Au, anso porsaya hamu. Beta ma tadapotkon si Lasarus." 11:16 Didok si Tomas na nigoaran muse "si Linduat" ma tu angka dongannia sisean i, "Beta ma laing dohot hita anso rap mate hita dohot ia!" 11:17 Dung lalu Jesus disi, ma opat ari si Lasarus ditanom. 11:18 Nada jabat tolu kilometer dao ni Betania sian Jerusalem. 11:19 Bahat do halak Jahudi marroan manopot si Maria dohot si Marta laho mangapoi halahi hara ni parmonding ni si Lasarus ibotona i. 11:20 Dung dibege si Marta na ro Jesus, haruar ma ia mangalo-alo Jesus, tapi anggo si Maria di bagas do ia. 11:21 Dung i didok si Marta ma tu Jesus, "Sugari dison Ho Tuhan dompak so mate ibotongki, tontu nada tulus ia mate! 11:22 Tapi haru pe songon i huboto do, sanga aha na nipangidoMu tu Debata, sai na lehenon ni Debata do i di Ho." 11:23 "Mulak mangolu do ibotomi mangulahi," ninna Jesus tu si Marta. 11:24 Dialusi si Marta ma, "Huboto do i angkon mulak mangolu si Lasarus dung disungguli angka na mate i di Ari Parpudi." 11:25 Dialusi Jesus ma, "Au do hangongot dohot hangoluan. Laing mangolu do sanga ise na porsaya tu Au haru pe na dung mate ia. 11:26 Halak na mangolu jana na porsaya tu Au, nada mate be ia salolot-lolotna. Porsaya dehe ho disi?" 11:27 Dialusi si Marta ma, "Olo Tuhan, porsaya do au Kristus i do Ho, Anak Ni Debata na ro tu portibi on." 11:28 Dung didok si Marta songon i, kehe ma ia marpio si Maria angginia i jana dihusipkon ia ma, "Madung dison Guru i, dipiohon Ia do ho." 11:29 Umbege i manigor diompoti si Maria ma jongjong, bulus mandapotkon Jesus. 11:30 (Inda podo masuk Jesus hatiha i tu huta i. Laing di ingananparsuoanNia dohot si Marta nangkin dope Ia.) 11:31 Diida halak Jahudi na marjuguhan na mangapoi si Maria di bagas i ma si Maria jongjong mopop tu ruar, gabe diihutkon halahi ma ia, harana diambang halahi na giot kehe tu kuburan do ia giot mangandungi disi. 11:32 Dung lalu si Maria tu inganan ni Jesus jana diida ia ma Jesus, marsinggang ma ia di jolo ni Jesus mandok, "O Tuhan, sugari dison Tuhan i, nada jabat mate ibotongki!" 11:33 Dung diida Jesus tangis si Maria jana dohot muse ma halak Jahudi na marroan i dohot si Maria tangis muse, gabe marsak jana ibo sajo ma roha ni Jesus. 11:34 Dung i disapai Ia ma tu halahi, "Di dia ditanom hamu ia?" "Beta ma taligi Tuhan," ning halahi. 11:35 Dung i tangis ma Jesus. 11:36 Gabe didok halak Jahudi i ma, "Ligi ma, holong ni rohaNia i tu si Lasarus!" 11:37 Tapi adong muse do sian halahi na mandok, "Madung dibaen Ia gabe marnida na mapitung, biasi nada haantahan Ia anso ulang mate si Lasarus?" 11:38 Di bagasan arsak dohot ibo ni roha, kehe ma Jesus tu kuburan i. Songon liang na ditutup dohot batu na godang do kuburan i. 11:39 "Paorot hamu ma batu i," ninna Jesus. Dialusi si Marta iboto ni na mate i ma, "Tapi ma adong opat ari Tuhan dung ditanom ia. Ma bau i Tuhan!" 11:40 Didok Jesus ma tu si Marta, "Na he madung Hudok tu ho: Anggo porsaya ho, idaonmu do hasangapan ni Debata!" 11:41 Dung i dipaorot halahi ma batu i. Jadi manatap ma Jesus tu langit jana didok Ia ma, "Tarimakasi ma Hudok tu Ho Amang hara ni na nitangihonMu pangidoanKu. 11:42 Huboto do na sai tongtong ditangihon Ho pangidoanKu, tapi Hudok pe songon i hara ni angka jolma na dison on do; anso porsaya halahi, na Ho do marsuru Au." 11:43 Dung didok Jesus songon i, dipagogo Ia ma soraNia pio-pio, "Haruar ma ho Lasarus!" ning Ia. 11:44 Dung i haruar ma bayo na dung mate i. Laing bungkus dope tanganna i dohot patna i dibaen kopenna i, jana bohina i pe laing ditutupi kopen panutup ni bohi i dope. "Buka hamu kopenna i," ninna Jesus tu halak na disi i, "jana padalan hamu ma ia." 11:45 Bahat do halak Jahudi na marroan i manopotkon si Maria gabe porsaya tu Jesus, dung diida halahi na masa i. 11:46 Tapi adong muse do sian halahi na kehe mangulahi tu halak Parise laho paboahon sanga aha na nibaen ni Jesus i. 11:47 Jadi hara ni i, dibaen angka halak Parise dohot angka sintua ni malim ma rapot, i ma rapot godang ni ugamo i. Didok halahi ma disi, "Bia noma baenonta? Bahat do dibaen Bayo i hahomangan! 11:48 Muda tapadiar-diar do Ia sai songon i, gabe sude ma halak porsaya tusia. Ujungna ro muse ma halak Rom na markuaso i mangaroncohon Bagas Ni Debata dohot sude bangsonta on!" 11:49 Adong ma sahalak sian halahi si Kayafas goarna, i ma na gabe Malim Godang di na sataon i, ning ia ma, "So adong diboto hamu sanga na aha. 11:50 Na so diboto hamu do? Gumonanan do mate sada halak humopkop na bahat ulang pado sudena bangso on mago?" 11:51 Satutuna nada sian pikirannia sandiri didok si Kayafas songon i. Tapi songon Malim Godang do ia di na sataon i, madung songon na nibaennia hian boa-boana na angkon mate Jesus humopkop halak Jahudi. 11:52 Jana nada hum hara ni halak Jahudi sajo, tapi dohot muse anso dipalagut sudena gabe sada angka dakdanak ni Debata na marserak i. 11:53 Jadi mamungka sian ari i, martahi-tahi ma halak Jahudi i laho mamunu Jesus. 11:54 Hara ni i nada be mardalani Jesus torang di jolo ni halak Jahudi. Ditadingkon Ia ma Judea, kehe ma Ia tu kota na margoar Efraim na donok tu halongonan. Disi ma Ia tinggal rap dohot angka siseanNia i. 11:55 Jadi hatiha i giot dapot ne ma Pesta Paskah ni halak Jahudi. Ma bahat halak sian angka kota i markehean tu Jerusalem laho paiaskon diri dompak so dapot Pesta Paskah i. 11:56 Jadi taran di Bagas Ni Debata halahi, dijalak-jalahi halahi ma Jesus. Marsisapa-sapaan ma halahi, ninna halahi ma, "Bia do ninna rohamu, na so ro do Ia ulaning tu pesta on?" 11:57 Madung diparentahon angka sintua ni malim dohot angka halak Parise, sanga ise na umbotoan di dia Jesus, angkon paboaon ni na umbotosa i ma i; anso tarbaen manangkup Jesus.
12:1 Onom ari nari dompak so Pesta Paskah i, kehe ma Jesus tu Betania. Disi do tinggal ni si Lasarus na dung jungada mate jana na nipangolu ni Jesus mangulahi. 12:2 Ditamu halahi ma Ia disi, jana dohot ma si Marta mangoloi disi tapi anggo si Lasarus dohot ma ia mangan rap dohot Jesus. 12:3 Dung i ro ma si Maria maroban hira-hira satonga liter narwastu, i ma miak na lobi huskus jana na arga situtu. Diusehon ia ma miak i tu pat ni Jesus jana diapus ia ma dohot obuknia. Gabe huskus ma sude bagas i hara ni uap ni miak na huskus i. 12:4 Sahalak sian sisean ni Jesus na margoar si Judas Iskariot, ia ma muse na manghianat tu Jesus mandok, 12:5 "Biasi ma he inda nigadis miak na huskus i, arga tolu ratus hepeng perak jana nilehen hepengna i tu halak na pogos?" 12:6 (Didok si Judas pe songon i nada na mangarohahon halak napogos ia, tapi hara ni na panangko do ia. Madung somal ia mambuati hepeng sian hepeng ni halak na dipasimpankon disia.) 12:7 Tapi didok Jesus ma, "Padiar ma songon i. Tu ari pananomanKu do i dibaen ia. 12:8 Anggo halak na pogos tongtong do adong di tonga-tongamunu, tapi anggo Au nada tongtong rap dohot hamu." 12:9 Bahat ma halak Jahudi na umbege, na dung di Betania Jesus. Jadi kehe ma halahi tusi. Umbaen na kehe pe halahi tusi nada hum hara ni Jesus, tapi dohot do muse hara ni na giot mangaligi si Lasarus na dung dipangolu ni Jesus mangulahi. 12:10 Hara ni i ma dibaen na giot dohot si Lasarus bunuon ni angka sintua ni malim i; 12:11 angke hara ni ia, gabe bahat halak Jahudi na kehe manadingkon pamimpin ni halahi gabe porsaya muse tu Jesus. 12:12 Ancogotna i tarbege ma tu halak na bahat na marroan manghagodangkon Paskah i, bahaso na dung di tonga dalan Jesus laho tu Jerusalem. 12:13 Dung i diparrampingkon halahi ma mare-mare, kehe ma halahi mangalo-alo Jesus. Marsurahi ma halahi, "Hosana! Dipasupasu ma Ia na ro di bagasan goar ni Tuhan, Raja ni Israel!" 12:14 Jadi adong ma halode na poso dapot Jesus jana dilombut Ia ma i. Laing songon na tarsurat i, 12:15 "Ulang ho mabiar, ale boru kota Sion! Ligi ma Rajamu ro, mangalombut sada halode jara-jara!" 12:16 Anggo di hatiha i nada diastui anak sisean ni Jesus i dope taringot tusi. Tapi dung dipasangap Jesus, i ma dung diparsilangkon jana mulak mangolu Ia, baru pe diingot halahi na dung tarsurat songon i di bagasan Buku Na Badia taringot tuSia jana na dung dipatulus halahi songon i tuSia. 12:17 Anggo angka na midaan Jesus hatiha na mamiohon si Lasarus haruar sian kuburan i jana dipangolu ia mangulahi, sai dipaboa-boa halahi do torus tu angka halak na asing taringot tusi. 12:18 I do umbaen na marroan halak na bahat i mandapotkon Jesus, harana madung dibege halahi na nibaenNia hahomangan i. 12:19 Dung i marsipandohonan ma angka halak Parise i ninna halahi ma, "Nada adong gunana ro hita tuson! Ligi hamu ma, ma gabe sude na satano on mangihutkon Ia!" 12:20 Tapi adong do dohot halak Junani sian angka na manangkok marsomba di ari pesta i. 12:21 Ditopot halahi ma si Pilipus, ninna halahi ma, "Anggo tarbaen do sugari, por do rohanami marsuo dohot Jesus." (Sian Betsaida na di Galilea do anggo asal ni si Pilipus.) 12:22 Dung i kehe ma si Pilipus paboahon i tu si Andreas, gabe rap ma halahi na dua paboahonsa tu Jesus. 12:23 Dung i didok Jesus ma tu halahi, "Madung dapot hatihana pasangapon Anak Ni Jolma i. 12:24 Tutu do na Hudok on tu hamu: Muda so nisuan tu tano jana mate same i, laing tinggal sangkibung i sajo do i. Tapi muda mate same i, baru pe anso bahat eme diparbatuhon. 12:25 Sanga ise na mangkaholongi ngoluna na di tano on, agoan ngolu na so mantak ma halahi. Tapi sanga ise na so mampardulihon ngoluna na di tano on, na mangarade tu hangoluan na so mantak ma halahi. 12:26 Sanga ise na giot mangoloi Au angkon ihutkononnia do Au; anso sai tongtong rap dohot Au angka na mangoloi Au sanga di dia pe Au. Jana pasangapon ni Damang muse ma sanga ise na mangoloi Au." 12:27 "Songon na marsak do rohangKu saonnari. Aha do na giot sidohononKu? DohononKu do, 'O Amang ulang ma padiar Au mamolus partinaonan on!' Hape nian laho manaon partinaonan on do umbaen na ro Au. 12:28 Pasangap ma goarMu da Amang!" Dung i tarbege ma sora sian langit na mandok, "Madung Hupasangap i tapi pasangaponKu dope i mangulahi." 12:29 Dibege halak na bahat na disi do sora i. Didok halahi ma, "Ronggur do i!" Tapi adong muse do mandok, "Nada! Surusuruan do i mangkobari tuSia!" 12:30 Dung i didok Jesus ma tu halahi, "Nada hara ni Au umbaen na tarbege sora i, tapi hara ni haporluanmunu do. 12:31 Saonnari ma hatihana uhuman portibi on; taluhonon ma raja ni portibi on saonnari. 12:32 Anggo Au muda dung dipatuginjang di ginjang ni tano, tarihonKu ma halak sudena tu Au." 12:33 Na paboahon pangalaho ni hamateanNia na di parsilangkon i do na nidokNia songon i. 12:34 Didok halak na bahat i ma tuSia, "Anggo mangihutkon Buku Tona ni ugamonami, salolot-lolotna do mangolu anggo Kristus i. Biasi do didokkon Ho patuginjangon di ginjang tano Anak Ni Jolma i. Ise lakna Anak Ni Jolma i?" 12:35 Dialusi Jesus ma, "Santongkin nari sajo noma hatiuran i di tonga-tongamunu. Jadi dalani hamu ma sidalananmunu salolot laing adong na torang i anso ulang ditutupi hagolapan i hamu. Sanga ise na mardalan di na golap nada diboto ia sanga na giot tu dia ia kehe. 12:36 Haporsayai hamu ma hatiuran i salolot laing di hamu i, anso gabe halak ni hatiuran hamu." Dung didokkon Jesus songon i, morot ma Ia sian i jana nada ra be Ia patidahon diriNa tu halahi. 12:37 Madung bahat sajo angka hahomangan dibaen Jesus di jolo ni halahi. Tapi haru songon i pe nada porsaya halahi tuSia. 12:38 Jadi di na songon i tarjadi ma na didok ni Panurirang Jesaya. Songon on ma pandoknia, "O ale Tuhan, ise ma he na porsaya tu jamitanami? Tu ise dope patidahonon kuaso ni Tuhan?" 12:39 Hara ni i ma umbaen na so tarhaporsayai halahi, angke didok si Jesaya hian do songon on, 12:40 "Hupapitung do mata ni halahi, jana Hupagolap pikiran ni halahi; lopus nada marnida mata ni halahi, jana nada marbuka pikiran ni halahi. Anso ulang mulak halahi tu Au, gabe Hupamalum halahi muse." 12:41 Songon i do didok si Jesaya, harana madung diida ia hasangapanNia jana na mangkobari ia taringot tuSia. 12:42 Tapi haru pe songon i, laing bahat do angka pamimpin ni halak Jahudi i na porsaya tu Jesus. Tapi nada puluk halahi mangoku torang di jolo ni halak; harana mabiar halahi diharuarkon sian bagas paribadatan. 12:43 Harana holongan do roha ni halahi di hasangapan na sian jolma, ulang pado hasangapan na sian Debata. 12:44 Dung i didokkon Jesus ma, "Sanga ise na porsaya tu Au, nada hum tu Au porsaya halahi tapi dohot do tu na marsuru Au. 12:45 Jana sanga ise na marnida Au, diida Ia muse do na marsuru Au. 12:46 Songon sinondang do Au di na ro tu portibi on, anso sude halak na porsaya tu Au ulang be tinggal di na golap. 12:47 Sanga ise na manangihon pangajaranKu tapi nada diihutkon Ia nada Au na manguhumisa. Angke nada na giot manguhumi portibi on umbaen na ro Au, tapi na giot paluahon do. 12:48 Saulahon, adong do na manguhumi sanga ise na so ra manjagit Au jana na so ra patuluskon angka na Hudok. Jamita na Hupalalu i do na gabe panguhum maradopkon halahi di Ari Parpudi. 12:49 Jana songon i do tutu! Harana Au pe nada jungada Au mandok hata sian roha-rohangKu sandiri; Damang na marsuru Au, Ia do na mamarentahon tu Au sanga aha na angkon dokkononKu jana sanga aha sipabotohononKu. 12:50 Jana Huboto do na mangalehen hangoluan na so mantak do parentaNia i. Sanga aha na Hudokkon i, na nisuruhon ni Damang do Au mandokkon i."
13:1 Sadari noma anso Ari Pesta Paskah. Madung diboto Jesus na giot tadingkononNia ma portibi on jana mulak ma Ia tu AmangNia. Dihaholongi Ia do sudena halak na diSia, na adong di tano on jana lopus tu ujungna pe laing holong do rohaNia di halahi. 13:2 Mangan ma Jesus dohot angka siseanNia borngin i. Madung disuan Sibolis i tu bagasan roha ni si Judas anak ni si Simon Iskariot roha na giot manghianat tu Jesus. *MADUNG DISUAN SIBOLIS ... TU JESUS: Sanga: Madung ditontuhon Sibolis hian si Judas anak ni si Simon giot manghianat tu Jesus.* 13:3 Diboto Jesus do na dung dipasahat AmangNia sude kuaso tuSia. Jana diboto Ia muse do na ro sian Debata Ia, jana angkon mulak muse Ia tu Debata. 13:4 Jadi jongjong ma Ia sian meja i, dibuka Ia ma baju jubaNia, dililitkon Ia ma sada anduk di gontingNia. 13:5 Dung i diusehon Ia ma aek tu sada sambong, dibasu Ia ma pat ni angka siseanNia i jana dipahiang Ia dohot anduk na lilit di gontingNia i. 13:6 Dung lalu tu si Simon Petrus, didok si Simon Petrus ma, "Na giot mamasu patku do Ho, ale Tuhan?" 13:7 Dialusi Jesus ma, "Anggo saonnari nada mangarti dope ho sanga aha na Hubaen, tapi botoonmu do i muse." 13:8 Didok si Petrus ma, "Ulang Tuhan. Bagi na bia pe nada tola ho mamasu patkon!" Tapi didok Jesus ma tusia, "Anggo so Hubasu do patmon, nada tola be ho gabe siseanKu." 13:9 Dialusi si Simon Petrus ma, "Anggo songon i do Tuhan, ulang ma hum patKu sajo dibasu, tapi dohot ma tanganKu dohot ulungKu!" 13:10 Didok Jesus ma, "Sanga ise na dung maridi, tontu madung ias ia sude. Nada porlu be nipaias mangulahi; hum patnia *HUM PATNIA: Dipiga-piga-piga naskah narobi nada adong hata on.* sajo noma i sipaiason. Anggo hamu na dung ias hian do, tapi nada sude hamu." 13:11 (Madung diboto Jesus hian sanga ise na giot manghianattuSia. I do umbaen na nidokNia, "Anggo hamu na dung ias hian do, tapi nada sude hamu.") 13:12 Dung sidung dibasu Jesus pat ni halahi sude, dipake Ia ma mangulahi baju jubaNia i, dipajuguk Ia ma tu juguhanNia hian. Dung i didokkon Ia ma tu halahi, "Diboto hamu do sanga aha astuan ni na Hubaen i tu hamu? 13:13 Digoari hamu do Au Guru dohot Tuhan. Tutu do na nidokmunu i; harana Guru do Au tutu jana Tuhan. 13:14 Jadi muda Au Tuhan dohot Gurumunu mamasu patmunu, hamu pe angkon marsibasuan pat ni donganna ma hamu. 13:15 Tiruan do na Hubaen i tu hamu, anso dibaen hamu muse songon na Hubaen i tu hamu. 13:16 Tutu do na Hudok on tu hamu: Nada gumodang naposo sian morana; jana nada gumodang suruan sian na marsurusa. 13:17 Saonnari madung diboto hamu na songon i; jadi muda didalankon hamu songon i, martua situtu ma hamu." 13:18 "Nada tu hamu sudena na Hudokkon on. Huboto do sanga ise na dung Hupili. Tapi angkon laing tarjadi do sanga aha na tarsurat di Buku Na Badia i; songon on do tarsurat disi, 'Sanga ise na mangan rap dohot Au, i ma ibana na giot mangalo Au.' 13:19 Jolo Hupaboa hian do i tu hamu saonnari dompak so tarjadi dope, jadi muda dung tarjadi anso porsaya hamu Au do na nidok ni surat i. 13:20 Tutu do na Hudok on tu hamu: Sanga ise na manjagit suruanKu, na manjagit Au do i. Sanga ise na manjagit Au, Debata na marsuru Au do na nijagitna disi." 13:21 Dung didok Jesus songon i, marsak sajo ma rohaNia di bagasan. Dung i torus torang ma didok Ia, "Tutu do na Hupaboa on tu hamu: Sahalak sian hamu giot manghianati tu Au." 13:22 Marsiligian ma angka siseanNia i di bagasan pangkilalaan na so martontu. Nada diboto halahi sanga ise na nidokNia. 13:23 Tapi adong ma sahalak sisean haholongan ni roha ni Jesus juguk di lambungNia. 13:24 Jadi dihilap si Simon Petrus ma tusia anso disapai ia tu Jesus sanga ise na nidok ni Jesus. 13:25 Dung i dipadonok ia ma tu Jesus laho manyapai ning ia ma, "Ise dehe i, Tuhan?" 13:26 Dialusi Jesus ma, "Sanga tu ise Hulehen roti na Husornomkon on, i ma ibana." Dung i dibuat Jesus ma roti i, disornomkon Ia ma tu mangkuk i; jadi dilehen Ia ma tu si Judas anak ni si Simon Iskariot. 13:27 Disi dijagit si Judas roti i, manigor susur ma Sibolis i tusia. Dung i didok Jesus ma tusia, "Pasigop ma baen sanga na aha giot baenonmu!" 13:28 Nada adong na umboto sian halahi na juguk mangan disi, sanga hara ni aha umbaen na didok Jesus songon i tu si Judas. 13:29 Adong deba na marpikir, na disuru Jesus do si Judas manobusi na porlu tu pesta i sanga betak na nisuru ni Jesus si Judas mangalehen hepeng saotik tu angka na pogos -- harana si Judas do sitiop hepeng kas ni halahi. 13:30 Dung dijagit si Judas roti i, manigor haruar ma ia. Madung borngin hatiha i. 13:31 Dung morot si Judas sian i, didok Jesus ma, "Pasangapon ma saonnari Anak Ni Jolma Suruan ni Debata i. Jana nipasangap muse ma Debata markite-hite Ia. 13:32 Muda dipasangap Debata markite-hite Ia, pasangapon ni Debata muse ma Ia markite-hite diri ni Debata sandiri. Manigor baenon ni Debata ma songon i. 13:33 Hamu angka dakdanakKu, nada sadia honok nari be Au rap dohot hamu. Jalahanmunu ma Au, tapi songon na dung Hudokkon i tu halak Jahudi, laing songon i ma dohononKu tu hamu: Nada tarbaen hamu ro tu inganan hakeheanKi. 13:34 Jagit hamu ma tona na imbaru on sian Au: Angkon marsihaholongan do hamu sama hamu. Songon pangkaholongingKu di hamu, laing songon i ma angkon marsihaholongan hamu. 13:35 Muda marsihaholongan do hamu, gabe botoon ni halak ma sude, na tutu do anak siseanKu hamu." 13:36 "O Tuhan, na giot tu dia do Ho Tuhan?" ning si Simon Petrus manyapai Jesus. Didok Jesus ma, "Na giot kehe do Au tu sada inganan, tapi nada tarihutkon ho Au tusi saonnari. Tu pudi on pe ihutkononmu Au." 13:37 Didok si Petrus ma tuSia, "Biasi nada tarihutkon au Ho saonnari Tuhan? Ra do au mate humopkop Ho Tuhan!" 13:38 Dialusi Jesus ma, "Tutu ma he na ra ho mate humopkop Au? Tutu do na Hudok on tu ho: Painte so martahuak manuk, ma pola tolu noli diporso ho Au!"
14:1 Didok Jesus ma, "Ulang pola marsak rohamunu. Porsaya ma hamu tu Debata jana porsaya ma hamu tu Au. 14:2 Bahat do inganan di bagas ni Damang. Na giot pasingkop ingananmunu do Au kehe tusi. Pola ma Hudok songon i tu hamu, anggo na so tutu do songon i? 14:3 Dung kehe Au pasingkop inganan i di hamu, mulak pe Au anso laing disi muse ma hamu. 14:4 Madung diboto hamu do dalan tu inganan na Hutopot i." 14:5 Dung i didok si Tomas ma tu Jesus, "Nada hami boto Tuhan sanga na giot tu dia Ho kehe, sian dia ma hami boto dalan tusi?" 14:6 Ninna Jesus ma mangalusi, "Au do dalan i dohot hasintongan dohot hangoluan. Nada adong na tarbaen ro tu Ama i anggo so markite-hite Au. 14:7 Sugari ditanda hamu Au, tontu laing tandaonmunu muse *SUGARI DITANDA HAMU AU ... TONTU LAING TANDAONMUNU MUSE: Dipiga-piga naskah narobi didok: Hara ni na dung nitandamunu Au ... tandaonmunu muse.* ma Damang. Mamungka saonnari madung ditanda hamu Ia, jana madung diida hamu." 14:8 Dung i didok si Pilipus ma tu Jesus, "Patidahon ma Ama i tu hami Tuhan, anso sombu rohanami," ning Ia. 14:9 Tapi dialusi Jesus ma, "Sai honok ma Au dung rap dohot hamu sudena, hape laing na so ditanda ho dope Au Pilipus? Sanga ise na marnida Au, madung diida Ia muse Ama i. Biasi dope didokkon ho, 'Patuduhon ma tu hami Ama i'? 14:10 O, ale Pilipus! Adong he laing na so porsaya do ho na sada do Au dohot Ama i jana Ama i sada dohot Au? Sudena na Hudok on tu ho nada sian roha-rohangKu sandiri i. Damang na sai maringanan di bagasan Au, Ia do na mangkarejohon i sudena. 14:11 Porsaya ma hamu di Au, na sada do Au dohot Ama i, jana Ama i dohot Au. Tapi porsaya ma hamu tu Au hara ni sude angka parkarejoan i. 14:12 Hudok ma tu ho: Satutuna sanga ise na porsaya tu Au, tarbaen ia ma mangkarejohon angka karejo songon na Hupambaeni i, salang na gumodang sian i pe tarbaensa -- angke na kehe mandapotkon Ama i do Au. 14:13 Jana sanga aha pe na nipangidomunu di bagasan goarKu, baenonKu ma i di hamu, anso nipasangap Ama i markite-hite Anak i. 14:14 Pangido hamu ma sanga aha sajo markite-hite goarKu; Hupatulus pe i di hamu." 14:15 "Muda holong rohamunu tu Au, dalankononmunu do angka na Huparentahon. 14:16 Dung i Hupangido pe tu Ama i, anso dilehen Ia Pangurupi na asing di hamu, na tinggal rap dohot hamu salolot-lolotna, 14:17 i ma Tondi ni hasintongan. Nada tarjagit portibi on Tondi i, angke nada diida portibi on Ia jana nada ditanda halahi muse. Tapi anggo hamu, ditanda hamu do Tondi i angke rap dohot hamu do Ia tongtong mangolu, jana di bagasan hamu muse do Ia. 14:18 Nada pola padiaronKu hamu mardangol-dangol. Mulak do Au mandapotkon hamu. 14:19 Nada sadia honok nari, nada idaon ni portibi on be Au, tapi anggo hamu laing idaonmunu do Au; jana dibaen na mangolu do Au, hamu pe laing mangolu. 14:20 Di hatiha i tangkas ma botoonmunu, na di bagasan Damang do Au, hamu pe di bagasan Au jana Au di bagasan hamu. 14:21 Sanga ise na manjagit angka parentangKi jana na mangoloisa, i ma na mangkaholongi Au. Haholongan ni Damang ma sanga ise na mangkaholongi Au. Au pe laing haholonganKu ma halahi, jana patidahononKu ma tu halahi sanga ise Au." 14:22 Disapai si Judas (tapi nada si Judas Iskariot) ma Jesus, "O Tuhan! Biasi ma hum tu hami dipatangkas Ho diriMu Tuhan, hape tu portibi on nada?" 14:23 Ninna Jesus ma mangalusi, "Sanga ise na mangkaholongi Au, ihutkononna do angka pangajaranKu. Haholongan ni Damang ma Ia. Ro ma Damang dohot Au sandiri mandapotkon ia jana maringanan ma Hami rap dohot ia. 14:24 Sanga ise na so mangkaholongi Au nada ihutkonon ni i angka pangajaranKu. Angka pangajaran na nibegemunu i, nada pangajaranKu i. Tapi pangajaran ni na marsuru Au do i, i ma Damang. 14:25 Sudena i Hupaboa tu hamu salolot rap dope Au dohot hamu. 14:26 Tapi Tondi Parbadia i ma na mangajarkon sasudena i tu hamu. Ia do Pangurupi na giot suruhonon ni Ama i markite-hite goarKu. Pangurupi i ma paingotkon tu hamu sasudena na dung Hupaboa i tu hamu. 14:27 Hasonangan do Hutadingkon di hamu. Hasonangan na sian Au sandiri do na Hulehen tu hamu. Nada songon pangalehen ni portibi on anggo pangalehenKu hasonangan i tu hamu. Ulang pola susa rohamunu; ulang hamu mabiar. 14:28 Ma dibege hamu Hudok, 'Kehe ma Au, tapi ro do Au mandapotkon hamu mangulahi'. Anggo na holong do rohamunu tu Au, jop do rohamunu di na kehe Au tu Ama i, angke gumodang do Ama i sian Au. 14:29 Jolo Hupaboa hian do i sudena tu hamu dompak so tarjadi dope, anso porsaya hamu muda dung tarjadi i muse. 14:30 Nada pola bahat be Au mandok hata tu hamu angke madung ro raja ni portibi on. Tapi nada markuaso i tu Au. 14:31 Tapi anso diboto portibi on na holong do rohangKu mida Ama i, i do umbaen na Hukarejohon sandok na nisuruhon ni Ama i karejohononKu. I pe, beta ma hita kehe sian on."
15:1 "Au do bona ni anggur na tutu, jana Damang do parkobun i. 15:2 Diambungkon Ia do sude rantingKu na so marbatu; jana sude ranting na ramos dipaias Ia do anso mur ramos muse batuna. 15:3 Madung ias anggo hamu dibaen pangajaran na Hulehen i di hamu. 15:4 Tinggal ma hamu di bagasan Au, jana Au di bagasan hamu. Anggo ranting, nada tarbaen marbatu sian dirina, anggo so tinggal di bona ni anggur i. Laing songon i do muse hamu muda so tinggal di bagasan Au. 15:5 Au do bona ni anggur i, jana hamu ma angka rantingna. Sanga ise na tinggal di bagasan Au jana Au di bagasan ia, ramos ma ia marbatu; angke anggo so rap dohot Au, nada adong bagi aha tarbaen hamu. 15:6 Sanga ise na so tinggal di bagasan Au, ambungkonon ma ia songon ranting i gabe mahiang. Angka ranting na songon i, sipalaguton ma i jana siambungkonon tu bagasan api, anso mosok. 15:7 Muda tinggal do hamu di bagasan Au jana pangajaranKu pe sai tinggal di bagasan rohamunu, tola ma pangidoanmunu sanga na aha pe giotmunu; nigohan ma pangidoanmunu i. 15:8 Muda ramos hamu marbatu, gabe hasangapan ni Ama i do i; songon i ma dalanna baenonmunu patuduhon na tutu situtu hamu siihutkon Au. 15:9 Huhaholongi do hamu songon pangkaholongi ni Damang tu Au. 15:10 Muda diihutkon hamu angka parentangKu, mangolu ma hamu sian holong ni rohangKu, laing songon Au na mangolu hara ni holong ni roha ni Damang, angke Huihutkon do na niparentahonNia. 15:11 Hupaboa pe i sudena tu hamu, anso maringanan do hajojop ni rohangKu di bagasan hamu, jana anso sanggam hajojop ni rohamunu. 15:12 On ma parentangKi; angkon marsihaholongan do hamu sama hamu, songon pangkaholongingKu di hamu. 15:13 Nada adong holong na gumodang sian holong ni sahalak na mangalehen hosana humopkop ale-alena. 15:14 Angka ale-alengKu ma hamu muda dikarejohon hamu sanga aha na Huparentahon tu hamu. 15:15 Anggo hamu nada Hugoari be naposo, harana anggo naposo nada diboto ia sanga aha na nikarejohon ni morana. Dongan do hamu Hugoari, harana sude na Hubege sian Damang madung Hupaboa tu hamu. 15:16 Nada hamu mamili Au. Au do na mamili hamu jana Husuru hamu kehe anso ramos hamu marbatu -- i ma parbatu na denggan. Dung i lehenon ni Damang ma di hamu sanga aha pe na nipangidomunu markite-hite goarKu. 15:17 On ma parentangKi tu hamu: Angkon rap marsihaholongan ma hamu." 15:18 "Muda dihosomi portibi on hamu, ingot hamu ma, na dung parjolo do Au dihosomi portibi on. 15:19 Sugari na sian portibi on hamu, haholongan ni portibi on do hamu songon halaknia. Tapi madung Hupili hamu sian portibi on, jana nada be halak portibi on hamu. Hara ni i do umbaen na hosom roha ni portibi on mida hamu. 15:20 Ingot hamu ma hata na Hudok on tu hamu, 'Nada gumodang naposo sian morana.' Muda diparkanciti halahi Au, hamu pe laing parkancitan ni halahi muse do. Muda diihutkon halahi pangajaranKi, laing ihutkonon ni halahi muse ma angka pangajaranmunu. 15:21 Baenon ni halahi ma sudena i tu hamu, hara ni na siseanKu hamu harana nada ditanda halahi sanga ise na marsuru Au. 15:22 Sugari sura na so jungada Au ro jana nada unjung Huhatahon sudena i tu halahi, nada tarsalahon halahi. Tapi anggo saonnari nada adong be sidalian ni halahi taringot tu dosa ni halahi. 15:23 Sanga ise na mangkosomi Au, dihosomi ia muse do Damang. 15:24 Madung Hubaen di tonga-tonga ni halahi angka pangalaho na so jungada dibaen halak na asing sanga ise pe. Sugari na so Hubaen angka na songon i di tonga-tonga ni halahi, ias do halahi sian hasalaan. Saonnari haru pe madung diida halahi angka pangalaho i, hape laing hosom dope roha ni halahi tu Au dohot tu Damang. 15:25 Jadi madung songon i pangalahona anso laing tulus na tarsurat i di Buku Tona ni halahi na mandok, 'Dihosomi halahi do Au haru so binoto sanga hara ni aha.' 15:26 Jadi ro ma Pangurupi na sian Ama i, na giot suruonKu tu hamu, i ma Tondi ni hasintongan na ro sian Ama i. Ia do na manyaksihon taringot tu Au. 15:27 Tapi hamu pe angkon saksihononmunu do taringot tu Au, harana madung rap hamu dohot Au sian mulana."
16:1 "Hupaboa pe i sudena tu hamu, anso ulang gabe mardandi do hamu. 16:2 Paruaron ni halahi ma hamu sian angka bagas paribadatan. Olo, na ro do hatihana, sanga ise na mamunu hamu, diambang ia na dung mangoloi Debata ma ia, hara ni na dung dibunu ia hamu. 16:3 Dibaen halahi pe songon i tu hamu, hara ni na so ditanda halahi dope Damang dohot Au. 16:4 Tapi madung Hupaboa hian i saonnari tu hamu anso diingot hamu i saulahon muda dung dibaen halahi tu hamu na songon i, madung Hupaboa hian do i tu hamu." "Anggo sian mulana nada pola Hupaboa hian i tu hamu, angke rap dope Au dohot hamu. 16:5 Tapi anggo saonnari, kehe noma Au mandapotkon na marsuru Au; hape haru songon i, umpe sahalak sian hamu na manyapai, 'Giot tu dia de Ho kehe?' 16:6 Mur hancit muse noma rohamunu dung Hupaboa na songon i tu hamu. 16:7 Torus torang ma Hupaboa tu hamu: Maruntungan do hamu muda kehe Au; harana anggo so kehe Au, nada tulus ro Pangurupi i tu hamu. Tapi muda kehe Au, suruhononKu ma Ia ro tu hamu. 16:8 Jana muda dung ro Ia, pabotohononNia ma tu portibi on arti ni dosa na satutuna, arti ni hatigoran dohot arti ni panguhuman. 16:9 PabotohononNia ma bahaso dosa do muda laing so porsaya halahi tu Au, 16:10 hara ni hatigoran jana hara ni na kehe Au mandapotkon Damang, jana nada idaonmunu be Au; 16:11 madung manguhumi Debata, dibaen madung hona uhum parkuaso ni portibi on! 16:12 Bahat dope nian na giot dokkononKu tu hamu, tapi anggo saonnari nada tuk dope gogomunu laho manjagit i. 16:13 Tapi muda dung ro Tondi ni hasintongan i pabotohonNia ma hatutuan salaho tu Debata, Ia ma na manguluhon hamu laho mananda sude hatutuan. Nada dohononNia sanga aha sian roha-rohaNia sandiri; hum taringot tu na nibegeNia do hatahononNia. Jana paboaonNia ma tu hamu sanga angka aha na giot masa tu pudian ni ari. 16:14 PasangaponNia ma Au, angke sanga aha na nipalaluNia tu hamu, sian Au do i dijagit Ia tu hamu. 16:15 Au do nampuna sasude na adong di Ama i. I do umbaen na Hudok, sanga aha na nipasahat ni Tondi i tu hamu, sian Au do i dijagit Ia." 16:16 "Hum santongkin nari noma, nada idaonmunu be Au, tapi santongkin nari muse, idaonmunu ma Au." 16:17 Dung i marsisapa-sapaan ma deba angka sisean ni Jesus i, ninna halahi ma, "Aha dehe astuan ni i sudena? Didok Ia, 'Santongkin nari noma nada idaonmunu be Au, jana santongkin nari idaonmunu ma Au.' Didok muse dope, 'Harana kehe ma Au mandapotkon Damang.' 16:18 Aha do maksudNia mandok 'Santongkin nari'? Nada binoto sanga taringot tu aha na nidokNia!" 16:19 Mangarti do Jesus na giot manyapai halahi tuSia. Jadi ning Ia ma tu halahi, "Hara ni na Hudok i, 'Hum santongkin nari noma nada idaonmunu be Au, tapi santongkin nari muse idaonmunu ma Au.' I dehe na giot sapaanmunu? 16:20 Hudok ma tu hamu: Satutuna martangisan ma hamu jana mangandungi; tapi jop ma roha ni portibi on. Susa ma rohamunu tapi gabe muba ma hasusaanmunu i gabe hajojop ni roha. 16:21 Muda giot sorang anak ni sada ina, marsak ma rohania hara ni na dung dapot hatihana manaon na hancit ia. Tapi disi sorang dakdanak i, manigor lupa ma ina i di na hancit i; marjop ni roha ma ia angke madung sorang sada dakdanak tu tano on. 16:22 Laing songon i ma hamu: Susa ma rohamunu saonnari, tapi marsuo dope Au dohot hamu, gabe jop ma rohamunu; jana nada tarbuat sanga ise hajopjop ni roha i sian hamu. 16:23 Anggo di ari i, nada sapaanmunu be sanga aha tu Au. Tutu do na Hudok on tu hamu; sanga aha na nipangidomunu sian Ama i markite-hite goarKu lehenon ni Damang ma i di hamu. 16:24 Lopus tu hatiha on na so unjung dope dipangido hamu sanga na aha markite-hite goarKu. Torus ma pangido hamu, gabe manjagit ma hamu, anso sanggam jop ni rohamunu." 16:25 "Markite-hite umpama do sudena i Hupatorang tu hamu. Tapi ro do hatihana, nada pola marumpama be Au muda mandok hata tu hamu. Torus tangkas noma dokkononKu tu hamu taringot tu Ama i. 16:26 Anggo disi, pangidoonmunu ma tu Ama i markite-hite goarKu; jana nada Hudok na giot pangidoonKu tu Ama i di hamu, 16:27 harana Ama i sandiri pe holong do rohaNia tu hamu. Holong do rohaNia mida hamu, dibaen holong rohamunu tu Au, jana dihaporsayai hamu na sian Debata do Au ro. 16:28 Tutu do i na ro sian Ama i do Au, jana madung Hudapotkon portibi on. Tapi saonnari, tadingkononKu ma mangulahi portibi on, mulak ma Au tu Damang." 16:29 Dung i didok angka siseanNia i ma tu Jesus, "Saonnari madung marsitangkas Ho Tuhan mandok hata; nada be marumpama Ho. 16:30 Saonnari madung tangkas di hami, diboto Ho do sasudena; jana nada porlu be sapaan ni halak sanga na aha tu Ho. Jadi hara ni i, porsaya ma hami na sian Debata do haroroMu." 16:31 "Saonnari madung porsaya dehe hamu?" ninna Jesus tu halahi. 16:32 "Ligi hamu ma: Ro ma hatihana, jana tardok madung lalu i, paserahon ma hamu. Marmulahan be ma hamu tu bagasmunu jana tinggalkononmunu ma sada Au. Hape nada mamunjung Au, angke rap do Ama i dohot Au. 16:33 Hudok pe i sudena anso marhasonangan do hamu harana di bagasan Au do hamu. Marhancit ma hamu baenon ni portibi on. Tapi sobar ma hamu! Madung Hutaluhon portibi on!"
17:1 Dung sidung didok Ia songon i, manatap ma Jesus tu langit, ning Ia ma, "O ale Amang, saonnari madung dapot hatihana. Pasangap ma AnakMu anso dipasangap AnakMi muse Ho Amang. 17:2 Madung dilehen Damang tu Anak i kuaso mangarajai sude jolma manusia anso dilehen Anak i hangoluan na so mantak tu sudena halak na nipasahat ni Damang tuSia. 17:3 On ma hangoluan na so mantak; anso ditanda halak Ama i, sasada Ia do Debata na tutu, jana mananda Jesus Kristus na nisuruhon ni Ama i. 17:4 Madung Hupasangap Ama i di ginjang tano on; jana madung Hupasidung karejo na nisuru ni Ama i karejohononKu. 17:5 Amang! Pasangap ma Au saonnari markite-hite hasangapan na Hujagit rap dohot Ho dompak so dijadihon dope portibi on. 17:6 Madung Hupatorang Ho Amang tu angka jolma na sian portibi on, i ma na dung nipasahatMu tu Au. Ho do Amang nampuna halahi; jana madung dipasahat Ho halahi tu Au. Madung diihutkon halahi hata na nilehenMi. 17:7 Jana saonnari madung diboto halahi, sudena na nilehenMi tu Au, laing Damang do nampuna i. 17:8 Madung Hupalalu tu halahi barita na nilehen ni Damang i tu Au; jana madung dijagit halahi i. Madung tangkas sajo di halahi, Damang do na marsuru Au. 17:9 Hara ni halahi do umbaen na martangiang Au. Nada Hutangiangkon anggo portibi on; hum tu angka jolma na nipasahat ni Damang i tu Au do na Hutangiangkon; harana Damang do nampuna halahi. 17:10 Sude na adong di Au laing Damang do nampuna i; jana sude sinadongan ni Damang laing Au do nampuna i. Markite-hite halahi do Au dipasangap. 17:11 Saonnari ro ma Au mandapotkon Damang. Nada be di portibi on Au; tapi anggo halahi laing di portibi on dope. Ale Amang na badia! Jagohon ma halahi dohot kuasoMi -- i ma kuaso na nilehen ni Damang i tu Au *JAGOHON MA HALAHI ... DAMANG TU AU: Dipiga-piga-piga naskah narobi didok: Marhite kuaso ni goar ni Damang, jago ma halahi na dung dilehen ni Damang tu Au.* -- anso gabe sada halahi songon Damang na sada dohot Au. 17:12 Salolot rap Au dohot halahi di portibi on, madung Hujagohon halahi markite-hite kuaso ni Damang i -- i ma kuaso na nilehen ni Damang i tu Au. Madung Huondingi halahi na nipasahat ni Damang tu Au, jana umpe sada sian halahi na mago, asing ni anak mago i; anso laing tulus ma na tarsurat di Buku Na Badia i. 17:13 Saonnari ro ma Au mandapotkon Damang. Jadi taran di portibi on Au, Hubaritahon angka na songon i; anso tarkilala situtu hajojop ni rohangKu di bagasan roha ni halahi. 17:14 Madung Hupalalu tu halahi pangajaran ni Damang jana dihosom portibi on do halahi, angke nada portibi on nampuna halahi; laing sarupa ma i tu Au na so nampuna ni portibi on. 17:15 Nada Hupangido anso diparuar Damang halahi sian portibi on tapi on do na Hupangido, anso dijagohon Damang halahi maradopkon si Jahat i. 17:16 Nada portibi on nampuna Au, laing songon i dohot halahi; nada portibi on nampuna halahi. 17:17 Markite-hite hasintongan ni Damang, baen ma halahi gabe angka jolma hapunjungan ni Damang sandiri; hata na nidok ni Damang i do hasintongan i. 17:18 Madung disuru Damang Au tu portibi on, laing songon i muse madung Husuru halahi tu portibi on. 17:19 Hupasahat do diringKu tu Damang laho humopkop halahi, anso halahi pe gabe nampuna ni Damang di bagasan hasintongan. 17:20 Nada hum hara ni halahi sajo umbaen na martangiang Au. Laing Hutangiangkon muse do angka halak na giot porsaya tu Au hara ni hasaksian ni halahi on. 17:21 Hupangido tu Damang anso gabe sada halahi sude, songon Damang na sada dohot Au jana Au sada muse dohot Damang. Sai sada ma nian halahi dohot Hita anso porsaya portibi on na nisuru ni Damang do Au. 17:22 Madung Hupasangap halahi mardongan hasangapan na nilehen ni Damang i di Au, anso gabe sada halahi hara ni i, laing songon parsada ni Damang dohot Au; 17:23 sada Au dohot halahi jana sada Damang dohot Au; anso sada situtu halahi jana hara ni i botoon ni portibi on ma Damang do marsuru Au jana dihaholongi Damang do halahi songon panghaholongi ni Damang tu Au. 17:24 Madung dipasahat Damang halahi tu Au. Saonnari Hupangidohon ma tu Damang anso rap dohot Au halahi sanga di dia pe Au maringanan, anso diida halahi hasangapanKi, i ma hasangapan ni Damang na nilehenMi tu Au, angke na holong do roha ni Damang tu Au mamungka sian dompak so dijadihon dope portibi on. 17:25 Ale Amang na tigor roha! Nada ditanda portibi on Ho, tapi anggo Au Hutanda do Damang, jana halak on pe diboto halahi do, Damang do na marsuru Au. 17:26 Madung Hupabotohon Damang tu halahi; jana sai pupuonKu do mambaen songon i, anso laing dihilala halahi muse holong ni roha ni Damang tu Au jana Au pe sada ma dohot halahi."
18:1 Jadi dung sidung didok Jesus songon i, kehe ma Ia rap dohot angka siseanNia i tu ipar ni Batang aek Kidron. Adong do disi sada kobun, jana masuk ma Jesus tu kobun i dohot angka siseanNia i. 18:2 Diboto si Judas panjehe i do inganan i; dibaen madung jotjot Jesus marlagut disi rap dohot angka siseanNia i. 18:3 Dung i ro ma si Judas tu inganan i, dioban ia ma saparangan tentara dohot angka panjago ni Bagas Ni Debata na nisuru ni angka sintua ni malim dohot halak Parise. Maroban sinjata do halahi, lampu dohot sulu. 18:4 Madung diboto Jesus hian sanga aha na giot masa tuSia. Dung i didapotkon Jesus ma angka jolma na ro i, ning Ia ma, "Ise dehe na nijalahanmunu?" 18:5 Dialusi halahi ma, "Jesus halak Nasaret i." "Au do i," ninna Jesus tu halahi. Laing disi do jongjong si Judas panjehe i rap dohot halahi. 18:6 Di na nidok ni Jesus tu halahi, "Au do i," sumurut ma halahi sude gabe martinggangan tu tano i. 18:7 Dung i disapai Jesus ma halahi sanoli nari, "Ise na nijalahanmunu?" ning Ia. "Jesus halak Nasaret i," ning halahi mangalusi. 18:8 Didok Jesus ma, "Madung Hudok Au do i. Jadi muda Au do na nijalahanmunu, padiar hamu ma anggo songon i kehe na asing on." 18:9 (Di na nidokNia songon i, tulus ma tarjadi na nidokNia hian;songon on, "Ale Amang, sian sude na nipasahat ni Damang i tu Au, umpe sahalak na gabe mago.") 18:10 Jadi ro ma si Simon Petrus na maniop podang hatiha i, disintak ia ma podangnia i ditampul ia ma naposo ni Malim Godang i, lopus ramping pinggol siamunna i. Si Malkus do goar ni bayo i. 18:11 Didok Jesus ma tu si Petrus, "Sarungkon ma podangmi, nada he angkon inumonKu do panginuman parkancitan na nilehen ni Damang i tu Au?" 18:12 Dung i ro ma angka parajurit i dohot komandanna i songon i dohot angka Jahudi panjago i, ditangkup halahi ma Jesus jana ditambat. 18:13 Jadi dioban halahi ma Ia parjolo tu si Hanas, i ma tulang ni si Kayafas. Si Kayafas, i ma Malim Godang di na sataon i. 18:14 Jana ia do paingotkon halak Jahudi i, na dumenggan do mate sada halak manghopkop rayat sudena, ulang pado masarsar sude bangso i. 18:15 Diihutkon si Simon Petrus rap dohot sada halak sisean na sada nari ma Jesus. Ditanda Malim Godang i do anggo sisean na sada nari i; jadi diihutkon ia ma Jesus masuk tu alaman ni bagas ni Malim Godang i, 18:16 tapi anggo si Petrus diruar do ia paintehon di pintu i. Dung i haruar ma sisean na sada nari i, i ma na nitanda ni Malim Godang i, mangkatai ma ia dohot naposo dadaboru na manjago di pintu i, lalu dioban ia ma si Petrus masuk tu bagasan. 18:17 Didok naposo dadaboru sijago pintu i ma tu si Petrus, "Nada he dohot ho sahalak sian angka sisean ni Bayo i?" "Nada," ning si Petrus. 18:18 Ngali do ari hatiha i, jadi dipagara angka naposo i ma dohot angka panjago i api, marsisudu ma halahi humaliang api i. Laing dohot do si Petrus disi marsisudu rap dohot halahi humaliang api i. 18:19 Disapai Malim Godang i ma Jesus taringot tu angka siseanNia i dohot taringot tu pangajaranNia. 18:20 Ninna Jesus ma mangalusi, "Tangkas do Au mandok hata di jolo ni halak na bahat. Sai mangajari do Au di angka bagas paribadatan dohot di Bagas Ni Debata di inganan ni halak Jahudi na somal marlagut. Nada unjung Hudokkon sanga aha di na buni. 18:21 Biasi disapai tuan i Au? Tu halak na dung umbege Au mangajari ma sapai hamu. Sapai ma halahi sanga aha na Hudok tu halahi -- diboto halahi do i." 18:22 Dung didokkon Jesus songon i, ro ma sada halak panjago i manampeleng Ia didok ma tuSia, "Na puluk ma Ho mangkatai songon i tu Malim Godang i!" 18:23 Dialusi Jesus ma, "Muda adong Hudokkon na sala, paboa ma jolo antong dison sanga aha hasalaanKi! Tapi muda tutu do na Hudokkon i, biasi manampelengi ho tu Au?" 18:24 Dung i disuru si Hanas ma dioban Jesus tu Malim Godang Kayafas laing tartambat. 18:25 Anggo si Petrus laing disi dope ia jongjong marsisudu. Didokkon halak ma tusia, "Nada he laing dohot ho sahalak sian angka sisean ni bayo i?" Tapi diporso si Petrus ma. Didok ia, "Nada le!" 18:26 Sahalak sian angka naposo ni Malim Godang i, i ma sisolkot ni bayo na hona tampul ni si Petrus pinggolna i, mandok tu si Petrus, "Nada he ho na huida i di kobun i rap dohot Ia?" 18:27 Dung i didok si Petrus ma mangulahi, "Nada," -- jana manigor martahuak ma manuk disi. 18:28 Dung i dioban halahi ma Jesus sian bagas ni si Kayafas tu inganan ni gubernur. Manyogot dope hatiha i. Anggo halak Jahudi i sandiri nada pola masuk tu bagasan inganan i, anso ulang gabe ramun halahi mangihutkon ugamo, hara ni na giot dohot halahi mangankon sipanganon Paskah. 18:29 Jadi si Latus do haruar mandapotkon halahi laho manyapai, "Aha do pangaduanmunu taringot tu bayo on?" ning ia. 18:30 Dialusi halahi ma, "Nada pola hami oban Ia tu Gubernur i anggo hara ni na so marsala." 18:31 Didok si Latus ma tu halahi, "Hamu ma mamaresoSa dohot mamutuskon uhuman mangihutkon tona ni ugamomunu sandiri!" Tapi dialusi halak Jahudi i ma, "Nada tola bunuonnami sanga ise." 18:32 (Tarjadi pe songon on anso tulus do hata na nidok ni Jesustaringot tu pangalaho ni parmateNia.) 18:33 Masuk ma si Latus mangulahi tu bagasan mamiohon Jesus. Dung i disapai ia ma Jesus ning ia ma, "Adong he Raja Ni halak Jahudi Ho?" 18:34 Dialusi Jesus ma, "Sapa-sapamu sandiri dehe i sanga adong halak na asing paboahon tu ho taringot tu Au?" 18:35 Dialusi si Latus ma, "Halak Jahudi dehe au lakna? BangsoMi sandiri dohot angka sintua ni malim i do na pasahatkon Ho tu au. Aha do lakna na nibaenMu?" 18:36 Ninna Jesus ma mangalusi, "Anggo HarajaanKu nada harajaan portibi on. Sugari na sian portibi on HarajaanKi, aloon ni angka halakKu ma anso ulang jabat nipasahat Au tu halak Jahudi. Tapi nada sian portibi on anggo HarajaanKu!" 18:37 Dung i marsapa ma si Latus tuSia, "Antong anggo songon i, tutu do Ho raja?" Dialusi Jesus ma, "Tutu do Au raja, songon na nidokmi. Sorang pe Au jana ro tu portibi on hum na sada on sajo do maksudna, i ma laho manyaksihon hasintongan. Jana sanga ise na marasal sian hasintongan i dijagit ia do Au." 18:38 Disapai si Latus ma Ia, "Aha dehe arti ni hasintongan?" Dung i marlojong ma si Latus kehe tu ruar mandapotkon halak Jahudi i, didok ia ma tu halahi, "Sada pe nada adong dapot au hasalaanNia. 18:39 Tapi mangihutkon na somal, sai hupalua do sada halak na tarhurung ganop Pesta Paskah. Ra do hamu muda hupalua di hamu Raja Ni halak Jahudi on?" 18:40 Dialusi halahi ma marsurak-surak, "Nada! Indangkon sai palua i! Si Barabbas ma palua!" Panyamun do si Barabbas on.
19:1 Dung i ditogu si Latus ma Jesus, jana diloncingi ma Ia. 19:2 Dibaen angka tentara na disi i ma sada tuku sian angka ranting na marduri-duri. Dipamasuk halahi ma tuku i tu ginjang ni ulu ni Jesus. Dung i dipamasuk halahi ma baju juba na ungu tuSia, 19:3 lalu marroan ma halahi tu joloNia ninna halahi ma, "Horas ma di Raja i, Raja Ni halak Jahudi!" Dung i ditampeleng halahi ma Ia. 19:4 Dung i haruar ma si Latus sanoli nari, didok ia ma tu halak na bahat i, "Ligi hamu ma! Madung huoban Ia saonnari tu ruar anso diboto hamu na so adong dapot au hasalaanNia bagi aha pe." 19:5 Dung i haruar ma Jesus mamake tuku duri dohot baju juba na ungu i. Didok si Latus ma tu halahi, "Ligi hamu ma halak on!" 19:6 Dung diida angka kapala ni malim dohot angka panjago i Jesus, marsurak ma halahi, "Parsilangkon i! Parsilangkon i!" ning halahi. Ninna si Latus ma mandok halahi, "Hamu ma mambuat dohot mamparsilangkonsa. Anggo au nada adong dapot au bagi na aha salaNia." 19:7 Dialusi halak Jahudi i ma, "Mangihutkon tona na adong di hami simatehononkon do i, angke dioku Ia diriNia Anak Ni Debata." 19:8 Jadi dung dibege si Latus songon i pandok ni halahi, mur mabiar ma ia. 19:9 Masuk ma ia mangulahi tu bagasan inganan i, disapai ia ma tu Jesus, "Sian dia dehe asalMu?" Tapi nada dialusi Jesus bagi aha. 19:10 Jadi didok si Latus ma manyapai Ia, "Na so ra do Ho mangalusi au? Na so diboto Ho do lakna na markuaso do au paluahon Ho sanga mamparsilangkon Ho?" 19:11 Dialusi Jesus ma, "Anggo na so dilehen Debata do kuaso di ho, nada adong kuasomu tu Au. Hara ni i gumodang do dosa ni na pasahatkon Au tu ho ulang pado ho." 19:12 Dung dibege si Latus na songon i mur diakalkon ia ma palua Jesus. Tapi marsurak-surak ma halak Jahudi i, "Muda dipalua tuan i do i, na so dongan ni Kesar do tuan i! Sanga ise na mandok diriNa raja, alo ni Kesar do i!" 19:13 Disi dibege si Latus angka pandohan i, dioban ia ma Jesus tu ruar jana juguk ma ia di juguhan paruhuman di inganan na margoar Litostrotos (astuanna: pantar batu; di hata Ibrani digoari do i Gabbata). 19:14 Hira-hira pukul dua bolas ma hatiha i, jana andospotangna i mamungka ma etongon Ari Sabat. Didok si Latus ma tu halak Jahudi i, "Na ma, indon rajamunu on!" 19:15 Marsurak-surak ma halahi, ninna halahi, "Bunu ma i! Bunu ma! Parsilangkon i!" Dung i ninna si Latus ma mandok tu halahi, "Parsilangkononku ma he Rajamunu?" Dialusi angka kapala ni malim i ma, "Hum sasada Kesar i do rajanami!" 19:16 Dung i dipasahat si Latus ma Jesus tu halahi anso dipakuhon tu hayu parsilang i. Dijagit halahi ma Jesus jana dioban halahi. 19:17 Kehe ma Jesus, diporsan Ia sandiri ma hayu parsilangNia tu inganan na margoar "Partangkurahan". (Di saro Ibrani didok Golgota.) 19:18 Dipakuhon ma Ia disi tu hayu parsilang i. Diparsilangkon muse do dua halak nari na asing rap dohot Ia, sahalak di siambirang, sahalak nari di siamunNia, di tonga-tonga ma Jesus. 19:19 Di hayu parsilang ni Jesus, disuru si Latus ma dibaen surat songon on, "Jesus na sian Nasaret Raja Ni halak Jahudi." 19:20 Bahat ma halak na manyise suratna i, harana nada pola sadia dao inganan i sian kota. Disuratkon di hata Ibrani, hata Latin dohot hata Junani do dibaen suratna i. 19:21 Didok angka sintua ni malim ni halak Jahudi i ma tu si Latus, "Ulang ma suratkon 'Raja Ni halak Jahudi,' songon on ma suratkon disi, 'Didok Bayo on, Au do Raja Ni halak Jahudi.' " 19:22 Tapi ninna si Latus ma mangalusi, "Nada uba-ubaon be sanga aha na dung husuratkon i!" 19:23 Dung diparsilangkon angka tentara i Jesus, dibuat halahi ma pakeanNa i. Dibagi opat halahi ma i, sabagian be ma sada halak. Dibuat halahi muse ma baju jubaNia i. Nada adong panjaitan ni baju jubaNia i -- na ditonun do i sian ginjang lalu tu toru. 19:24 Dung i didok angka tentara i ma sama halahi, "Ulang pola tabagi anggo on. Taundi ma manontuhon sanga ise na mandapot on." Anso laing tulus ma tarjadi na tarsurat di Buku Na Badia i na mandok songon on, "Dibagi-bagi halahi ma pakeanKu. Jana diundi halahi ma laho manontuhon bajungKu." I ma na dung nipatulus ni angka tentara i. 19:25 Jongjong ma di lambung ni parsilang ni Jesus i, inangNia, bujingNia, si Maria dadaboru ni si Klopas dohot si Maria Magdalena. 19:26 Diligi Ia ma tu inangNia dohot sisean na nihaholongan ni Jesus na jongjong disi. Dung i didok Jesus ma tu inangNia i, "Ligi ma inang, anakmu do indon." 19:27 Dung i didok Jesus ma tu siseanNia i, "Ligi ma, inangmu do indon!" Mamungka sian i dioban sisean i ma inang ni Jesus tinggal di bagasnia sandiri. 19:28 Dung i diboto Jesus ma na dung sidung sasudena; jadi songon na tarsurat di Buku Na Badia i angkon laing tulus do i, gabe didok Ia ma, "Manguas Au." 19:29 Adong disi sada mangkuk na bubung marisi anggur na mancom. Dironjomkon halahi ma lumut tu bagasan anggur i dibaen halahi ma tu ujung ni bulu. Dung i didaiskon halahi ma lumut i tu pamangan ni Jesus. 19:30 Diincop Jesus ma anggur i, dung i ning Ia ma, "Madung marujung!" Jadi dipaunduk Ia ma uluNia, tos ma hosaNia. 19:31 Ari Jumahat do hatiha i, i ma ari parhobasan tu Ari Pesta Paskah i. Nada tola di halak Jahudi laing gantung bangke ni halak na niparsilangkon di hayu parsilang di Ari Sabat. Tarlobi Ari Sabat na gumodang do Ari Sabat on. Jadi hara ni i dipangido halak Jahudi i ma tu si Latus anso niponggolan holi-holi ni pat ni angka na diparsilangkon i anso nipaijur bangke ni halahi sian hayu parsilang i. 19:32 Jadi kehe ma angka tentara i mamonggoli pat ni na parjolo i, dung i pat ni na sada nari na niparsilangkon rap dohot Jesus. 19:33 Tapi dung lalu halahi tu lambung ni Jesus, diida halahi ma, hape ma mate Jesus. Jadi nada pola diponggol halahi be patNa i. 19:34 Tapi ro ma sada tentara i, disusukkon ia ma hujur tu rusuk ni Jesus; manigor haruar ma mudar na marcampur aek sian rusukNa i. 19:35 Na marnida i sandiri do mamaritahon na masa on, anso laing porsaya *LAING PORSAYA: Dipiga-piga-piga naskah narobi didok: Tongtong porsaya.* hamu. Jana tutu do songon on na nidoknia i; tangkas do diboto ia songon i. 19:36 Umbaen na songon i pe i, anso laing tulus do tarjadi na tarsurat di Buku Na Badia i, i ma, "Umpe sada sian holi-holiNa i na niponggol." 19:37 Di Buku Na Badia i pe laing tarsurat do songon on, "Tatapon ni halak ma Ia, na nihujur ni halahi i." 19:38 Dung i ro ma si Josep halak Arimatea mangido isin tu si Latus laho mambuat bangke ni Jesus. (Na dung gabe sisean ni Jesus do si Josep on di na buni, harana laing mabiar dope ia mida angka parkuaso ni halak Jahudi i.) Dilehen si Latus ma tusia isin, jadi kehe ma ia mambuat bangke i. 19:39 Dohot do si Nikodemus, i ma na ro borngin-borngin nabaruon mandapotkon Jesus, rap dohot si Josep. Dioban si Nikodemus ma angka ramu-ramuan mur dohot aloe marborat-borat tolu pulu kilo. 19:40 Dibuat halahi na dua ma bangke ni Jesus, dibaen halahi ma kopenna dohot angka ramu-ramuan i songon na nihasomalkon ni halak Jahudi laho mananom na mate. 19:41 Adong do di lambung inganan ni hayu panyilangan ni Jesus i sada kobun. Adong do sada kuburan na imbaru na so jungada dope marpake gabe pananoman ni halak. 19:42 Gabe tusi ma dipamasuk halahi bangke ni Jesus hara ni na giot dapot ma Ari Sabat, boti hara ni donokna.
20:1 Andostorang ni Ari Mingguna i kehe ma si Maria Magdalena tu kuburan i. Diida ia ma madung digulang batu panutup ni tanoman i sian baba ni kuburan i. 20:2 Dung i marlojong ma ia manjalahi si Simon Petrus dohot sisean na asing haholongan ni Jesus i, didok ia ma tu halahi, "Madung dibuat halak bangke ni Jesus; nada hami boto sanga di dia dipayakkon bangkeNa i!" 20:3 Torus ma kehe si Petrus dohot sisean na sada nari tu kuburan. 20:4 Rap marlojong ma halahi na dua, tapi humipas do marlojong sisean na sada nari i sian si Petrus; gabe parjolo ma ia lalu tu kuburan i. 20:5 Dung diligi ia tu bagasan kuburan i; diida ia ma angka kopenna i disi tapi nada pola masuk ia tu bagasan. 20:6 Didapoti si Petrus ma sisean i sian pudi, jana torus masuk ma ia tu bagasan kuburan i. Diida ia ma payak disi angka kopen i, 20:7 tapi anggo abit na nililitkon i tu ulu ni Jesus nada pungu disi. Asing do i marlompit. 20:8 Jadi ro ma sisean na sada nari, na parjolo lalu i, masuk ma ia muse. Laing diida ia do i sudena jana dihaporsayai ia. 20:9 (Lopus tu hatiha i laing na so diastui halahi dope natarsurat di Buku Na Badia i, na angkon mulak mangolu Ia mangulahi sian hamatean.) 20:10 Dung i mulak ma sisean ni Jesus i. 20:11 Laing tangis-tangis ma si Maria di jolo ni kuburan i. Di na tangis ia ditailihon ia ma tu bagasan kuburan i, 20:12 jadi diida ia ma disi dua halak surusuruan marbaju na bontar. Di lambung hapayahan ni bangke ni Jesus i ma surusuruan na dua i juguk. Sahalak juguk sabola uluNa i, sahalak nari juguk sabola patNa i. 20:13 Disapai surusuruan i ma tu si Maria, "Biasi tangis ho inang?" ninna halahi. Dialusi si Maria ma, "Madung dibuat halak Tuhanku hape nada huboto sanga na tu dia dibaen halahi." 20:14 Dung didok si Maria songon i, manaili ma ia adop pudi, diida ia ma Jesus jongjong disi. Tapi nada diboto ia, hape Jesus do i. 20:15 Disapai Jesus ma tusia, "Biasi tangis ho inang? Ise na nijalahanmu?" Ning roha ni si Maria, panjago ni kobun i do i. Jadi didok si Maria ma, "Muda hamu do amang paimbarkon sian on, paboa ma jolo tu au sanga di dia dibaen ho Ia. Au pe mambuatsa annon." 20:16 Ninna Jesus ma tu si Maria, "Maria!" Dung i manaili ma si Maria tu Jesus jana didok ia ma di hata Ibrani, "Rabbuni!" (astuanna "Guru"). 20:17 Didok Jesus ma tu si Maria, "Ulang jama Au jolo, harana nada podo manaek Au tu Damang. Kehe ma ho mandapotkon angka kahanggingKu jana paboa ma tu halahi, 'Manaek ma Au tu Damang, i ma Amangmunu muse; tu DebatangKu, i ma Debatamunu muse.' " 20:18 Dung i kehe ma si Maria paboahonsa tu angka sisean ni Jesus, bahaso na dung diida ia Tuhan i jana Tuhan i do mandok tusia sudena i. 20:19 Laing di Ari Minggu i dung borngin marlagut ma anak sisean ni Jesus di sada bagas. Digoruk halahi ma sude pintu ni bagas i; hara ni na mabiar halahi tu angka parkuaso ni halak Jahudi. Jadi tompu ma ro Jesus jongjong di tonga-tonga ni halahi, ning Ia ma, "Hasonangan ma di hamu!" 20:20 Dung didokkon Ia songon i dipatuduhon Ia ma tangan dohot rusukNia tu halahi. Jadi moga sajo ma halahi dung diida halahi Tuhan i. 20:21 Dung i didok Jesus ma tu halahi sanoli nari, "Hasonangan ma di hamu! Songon parsuru ni Damang di Au, laing songon i ma hamu Husuru." 20:22 Dung didok Ia songon i mangombus ma Ia tu halahi jana ning Ia ma, "Jagit hamu ma Tondi Parbadia. 20:23 Muda disesa hamu dosa ni sanga ise, laing tarsesa ma dosana i; muda nada disesa hamu dosa ni halak, laing na so tarsesa ma dosana i." 20:24 Si Tomas (na nigoaran muse si Linduat) i ma sahalak sian sisean ni Jesus na dua bolas halak i. Jadi hatiha na ro i Jesus, nada dohot si Tomas rap dohot sisean ni Jesus na asing i. 20:25 Jadi dipaboa angka sisean ni Jesus na asing i ma tu si Tomas, ninna halahi ma, "Madung hami ida Tuhan i!" Tapi dialusi si Tomas ma, "Anggo so jolo huida pamakuan na di tanganNa i jana hudaiskon jari-jaringkon tu pamakuan i, jana anggo so jolo hubaen tangankon tu rusukNa i, nada porsaya dope au." 20:26 Dung salapan ari, marlagut ma mangulahi angka sisean ni Jesus di bagas i, dohot ma si Tomas disi. Margoruk do sude pintu ni bagas i. Tapi ro ma Jesus jongjong di tonga-tonga ni halahi, ning Ia ma, "Hasonangan ma di hamu!" 20:27 Dung i didok Jesus ma tu si Tomas, "Baen tuson jari-jarimi, ligi ma tanganKon. Surduhon ma tanganmi tu rusukKon. Ulang be ganggu rohamu. Porsaya ma ho!" 20:28 Dung i ninna si Tomas ma tu Jesus, "O Tuhanku! Debatangku!" 20:29 Jadi didok Jesus ma tusia, "Hara ni na dung niidami dehe Au umbaen na porsaya ho? Martua ma sanga ise na porsaya tu Au haru so diidasa pe Au!" 20:30 Laing bahat dope angka hahomangan na nibaen ni Jesus di jolo ni angka siseanNia i, tapi nada pola disuratkon anggo angka hahomangan i di bagasan buku on. 20:31 Umbaen na nisurat pe sudena na tarsurat di bagasan buku on, anso porsaya do hamu bahaso Jesus do Kristus i, i ma Anak Ni Debata; jana anso dapotan hangoluan hamu markite-hite haporsayaan di goarNia.
21:1 Dung i dipatidahon Jesus ma diriNia sanoli nari tu angka siseanNia i di Dano Tiberias. Songon on ma baritana di na nipatidahonNia diriNia: 21:2 Lagut ma hatiha i si Simon Petrus dohot si Tomas na nigoaran muse si Linduat, dohot si Natanael halak Kana na di Galilea, songon i muse angka anak ni si Zebedeus rap dohot dua halak nari sisean ni Jesus na asing. 21:3 Jadi didok si Simon Petrus ma tu halahi, "Kehe ma jolo au manjala!" "Dohot ma hami," ninna donganna na asing i tusia. Jadi kehe ma halahi manigor marparau. Hape umpe sangkibung ihan dapot halahi na saborngin i. 21:4 Jadi dung bincar mataniari, ro ma Jesus, jongjong ma Ia di topi ni dano i; tapi nada diboto halahi dope, bahaso Jesus do i. 21:5 Didok Jesus ma tu halahi, "Adong dehe ihan di hamu, dakdanak?" ning Ia. "Inda," ninna halahi. 21:6 Didok Jesus ma tu halahi, "Sampakkon hamu ma jala i tu siamun ni parau i, dapotan ihan ma hamu annon." Dung i disampakkon halahi ma jala ni halahi tu dano i, hape nada tarsarat halahi be mangulahi hara ni bahat ni ihan di bagasan. 21:7 Didok sisean haholongan ni Jesus i ma tu si Petrus, "Tuhan i do i!" ning ia. Jadi dung dibege si Petrus didok bayo i, "Tuhan i do i," manigor dipake ia ma abitnia mangulahi (harana madung sanga buka baju ia) mangambur ma ia tu aek i. 21:8 Anggo na asing i marparau ma halahi mandapoti tu darat, hara ni na manyarat jala na marisi ihan na gok i. Nada pola sadia dao halahi sian darat, tar hira-hira saratus meter do. 21:9 Dung mijur halahi sian parau i, diida halahi ma adong disi banggar na gara dohot ihan na nipanggang di ginjangna i; adong muse do roti disi. 21:10 Didok Jesus ma tu halahi, "Oban hamu tuson deba ihan na baru dapotmunu i." 21:11 Kehe ma si Simon Petrus tu parau i, manyarat jalannia tu darat. Gok jala i dohot ihan na godang-godang; saratus lima pulu tolu sudena. Haru pe songon i bahat ni ihan i, nada pola jabat masibak jala i. 21:12 Dung i didok Jesus ma tu halahi, "Mangan ma hita jolo!" Tapi nada adong sian angka siseanNia i na puluk manyapai, mandok, "Ise do hamu Amang?" Harana sude do halahi mamboto, Tuhan i do i. 21:13 Dung i dipadonok Jesus ma tu halahi, dibuat Ia ma roti i, lalu dilehen Ia ma tu halahi. Laing songon i ma dibaen Ia ihan i. 21:14 On ma patolu-nolihon dipatidahon Jesus diriNia tu angka siseanNia i dung mulak mangolu Ia sian na mate. 21:15 Dung mangan halahi, didok Jesus ma tu si Simon Petrus, "O Simon, anak ni si Jona, humolong dehe rohamu mida Au, ulang halahon?" ning Ia. Dialusi si Petrus ma, "Olo Tuhan. Diboto Ho do Tuhan holong ni rohangku tu Ho." Didok Jesus ma tusia, "Antong parmahani ma angka biri-biringKu." 21:16 Didok Jesus ma tusia padua-nolihon, "O Simon anak ni si Jona! Holong do rohamu mida Au?" ning Ia. Dialusi si Petrus ma, "Olo Tuhan. Diboto Ho do holong ni rohangku tu Ho." Didok Jesus ma tusia, "Antong parmahani ma biri-biringKu!" 21:17 Patolu-nolihon laing disapai Jesus dope tusia, "O Simon anak ni si Jona. Holong do rohamu mida Au?" ning Ia. Gabe marsak ma si Petrus hara ni na nisapaan ni Jesus i ia jabat tolu noli di na nidok ni Jesus, "Holong dehe rohamu mida Au?" Tapi laing dialusi si Petrus ma, "O Tuhan diboto Ho do Tuhan sasudena. Diboto Ho do Tuhan na holong rohangku mida Ho!" Dung i didok Jesus ma tusia, "Antong parmahani ma angka biri-biringKi. 21:18 Tutu do na Hudok on tu ho: Anggo dompak poso ho, dihobasi ho do dirimu jana mardalani ma ho sanga tu dia pe giotmu. Tapi muda dung matobang ho saulahon, surduhononmu ma tanganmu, jana halak na asing noma manghobasi ho jana maroban ho tu inganan na so giot ni rohamu." 21:19 (Jadi na paboahon sanga na tarbia do parmate ni si Petrussaulahon laho pasangap Debata, i do na nidok ni Jesus disi.) Dung i didok Jesus ma tu si Petrus, "Ihutkon ma Au!" ning Ia. 21:20 Di na manaili si Petrus, diida ia ma sisean haholongan ni Jesus i di pudinia. (I ma na juguk di lambung ni Jesus hatiha na mangan borngin-borngin i, na manyapai tu Jesus, "O Tuhan, ise dehe na giot manghianat i tu Ho?") 21:21 Dung diida si Petrus ia, didok ia ma tu Jesus, "Bia ma halak on saulahon Tuhan?" ning ia. 21:22 Ninna Jesus ma mangalusi, "Muda jop rohangKu laing mangolu ia lopus ro Au mangulahi, ahana ma i di ho. Salaku ihutkon ma Au!" ninna Jesus. 21:23 Jadi sar ma hobar di tonga-tonga ni angka sisean ni Jesus paboa na so mate sisean na sada i. Hape nian nada adong didok Jesus, na so mate ia; anggo na nidok ni Jesus songon on do, "Muda jop rohangKu laing mangolu ia lopus ro Au, aha na ma i di ho!" ning Ia do. 21:24 Jadi sisean on ma na mangalehen hasaksian taringot tu angka na masa on. Laing ia muse do na manyuratkon on. Jana taboto do bahaso na tutu na nidoknia i. 21:25 Bahat dope nian angka pambaenan ni Jesus. Sugari nisuratkon i sudena pasada-sada, ning rohangku na satano on pe nada tuk inganan ni angka buku sisuraton.
1:1 Teofilus na niparsangapan! Madung hupatorang di buku na parjolo sasudena na nikarejohon dohot na niajarkon ni Jesus mulai sian na mamungka Ia markarejo, 1:2 lopus tu ari hananaekNia tu banua ginjang. Dompak so manaek Ia tu banua ginjang, madung dilehen Ia hian markite-hite kuaso ni Tondi Parbadia angka tona tu angka rasul na nipiliNia i. 1:3 Dung mate Ia, adong do opat pulu ari honokna sai marpupu dipatidahon Ia diriNia tangkas di angka rasul i paboa na tutu do Ia mangolu. Diida halahi do Ia tangkas jana dihatahon Ia do tu halahi taringot tu Harajaan Ni Debata. 1:4 Jadi di na marlagut Ia rap dohot halahi *DI NA MARLAGUT IA RAP DOHOT HALAHI: Hatiha marpungu halahi. Sanga: Hatiha mangan Ia rap dohot halahi.* ditonahon Ia ma tu halahi songon on, "Ulang morot hamu sian Jerusalem. Painte hamu ma disi lopus dilehen Damang sanga aha na nijanjihonNia i, i ma na dung Hupaboa hian tu hamu na salpu i. 1:5 Harana anggo si Johannes, aek do dididihon ia tu hamu, tapi nada pola piga ari nari be pandidihonon ma hamu dohot Tondi Parbadia." 1:6 Dompak marlagut angka rasul rap dohot Jesus, disapai halahi ma tuSia, "PajongjongonMu dehe Tuhan di hatiha on harajaan ni Israel i mangulahi?" 1:7 Dialusi Jesus ma, "Damang do na umboto taringot tu ari dohot hatiha ni i. Nada porlu botoonmunu i, angke kuaso ni Damang do i. 1:8 Tapi jagitonmunu ma kuaso muda dung ro Tondi Parbadia tu hamu. Jana gabe saksingKu ma hamu di Jerusalem, di sude Luat Judea, di Samaria lopus tu ujung ni tano on." 1:9 Dung didok Jesus songon i, tarangkat ma Ia tu banua ginjang dipanotnoti halahi, jana diholipi ombun i ma Ia sian parnidaan ni halahi. 1:10 Dompak na manatap tu ginjang i halahi mangaligi parkehe ni Jesus, tompu ma jongjong dua halak na marbaju na bontar di lambung ni halahi. 1:11 Ninna ma, "Ale hamu halak Galilea, biasi jongjong sajo hamu disi mangaligi tu langit i? Anggo Jesus na niidamunu i kehe manaek tu banua ginjang di adopanmunu, mulak do Ia mangulahi laing songon na niidamunu sinangkin." 1:12 Dung i mulak ma angka rasul i tu Jerusalem sian Dolok Zetun. Na donok do dolok i tu Jerusalem, hira-hira sakilometer daona. 1:13 Dung di Jerusalem, masuk ma halahi tu bagas panompangan ni halahi i torus tu kamar na di lotengna i. Angka on ma goar-goar ni rasul i: Si Petrus dohot si Johannes, si Jakobus dohot si Andreas, si Pilipus dohot si Tomas, si Bartolomeus dohot si Mateus, si Jakobus anak ni si Alpeus, si Simon Ulubalang i dohot si Judas anak ni si Jakobus; 1:14 satahi saoloan do halahi na marlagut i laho martangiang. Rap martangiang ma halahi dohot angka dadaboru songon i dohot si Maria inang ni Jesus dohot anggi ni Jesus. 1:15 Disada hatiha marlagut ma halahi, -- hira-hira saratus dua pulu halak ma na ro i -- jongjong ma si Petrus mandok hata. Ning ia ma, 1:16 "Hamu ale angka dongan! Angkon tulus do tarjadi sanga aha na tarsurat di Buku Na Badia i. Najolo madung dipaboa Tondi Parbadia markite-hite si Daud taringot tu si Judas, i ma na manguluhon halak laho manangkup Jesus i. 1:17 Nietong hian do ia donganta jana na dung dipili hian do ia gabe donganta saparkarejoan." 1:18 Anggo si Judas on, madung dapot ia tano kuburannia upa ni hajahatannia na manghianat i. Madabu ma ia jana mate, mapultak butuhana i gabe sarge sude na di butuhana i. 1:19 Sude do halak na di Jerusalem umboto i, gabe digoari halak ma inganan i Hakal-Dama astuanna 'Tano Mudar'. 1:20 "Angke tarsurat muse do di Buku Masmur songon on, 'Gabe halongonan na lungun ma ingananna i; anso ulang adong halak maringanan disi.' Laing tarsurat muse do songon on, 'Halak na asing noma manggonti tohonanna.' " 1:21 "Jadi hara ni i, angkon laing adong ma sada nari donganta na gabe saksi paboahon na dung ngot Tuhan Jesus mangulahi sian na mate. 1:22 Jadi sahalak sian hita na sai rap dohot Tuhan Jesus ma i dompak sai mardalani dope Tuhan Jesus rap dohot hita, mamungka sian na mandidihon si Johannes *SIAN NA MANDIDIHON SI JOHANNES: Sanga: Mamungka sian na nipandidihon ni si Johannes Ia.* lopus tu na manaek Jesus tu banua ginjang sian tonga-tonganta." 1:23 Jadi ditodo halahi ma dua halak, i ma si Josep na margoar muse si Barsabbas (laing digoari muse do i si Justus) dohot si Matias. 1:24-25 Dung i ditangiangkon halahi ma i. Ninna halahi ma, "O Tuhan, Ho do na umboto sude roha ni jolma. Madung ditinggalkon si Judas tohonan harasulonnia. Madung mate ia. Hara ni i patuduhon ma tu hami, sanga ise do sian na dua on na nitodoMu gabe hasahatan ni karejo i manggonti si Judas." 1:26 Dung i diundi halahi ma goar na dua i, jadi madabu ma tu si Matias. Jadi diangkat halahi ma ia gabe rasul anso rap dohot angka rasul na sabolas halak nari i.
2:1 Dung dapot Ari Pentakosta marlagut ma di sada inganan sudena na porsaya i. 2:2 Jadi tompu ma tarbege sora sian langit songon pangombus ni alogo na gogo. Digohi sora i ma sude bagas inganan ni halahi i. 2:3 Dung i diida halahi ma angka dila songon jilam ni api na mangararati songgop tu halahi sude. 2:4 Jadi digohi Tondi Parbadia ma halahi sude jana mamungka ma halahi mangkatai di hata na asing na marragam-ragam. Mangkatai ma halahi hombar tu hata na nilehen ni Tondi i dokkonon ni halahi. 2:5 Jadi hatiha i, bahat do halak Jahudi na sian ragam-ragam ni luat na di portibi on ro tu Jerusalem, i ma angka na mangkabiari Debata. 2:6 Di na tarbege sora i, bahat sajo ma halak ro marlagut disi. Tarsonggot be ma halahi sudena umbege angka rasul i mangkatai di hata ni halahi be. 2:7 Homang-komang jana tartarik ma roha ni halahi jana marsipandohonan ma halahi, "Inda he halak Galilea do sude na mangkatai on? 2:8 Na bia do pangalahona umbaen na tabege halahi mangkatai di hatanta be? 2:9 Angka halak Partia do hita, halak Media, halak Elam; halak Mesopotamia; halak Judea; halak Kapadokia; halak Pontus dohot Asia, 2:10 halak Prigia dohot halak Pamfilia, halak Mesir dohot halak na sian Luat Libia na di lambung Kirene; adong muse do hita on halak Rom, 2:11 adong angka halak Jahudi jana adong do bangso na asing na dung gabe masuk Jahudi; adong muse do halak Kreta dohot halak Arab. Di bagasan hatanta be do tabege halahi mandok hata taringot tu angka hahomangan na nibaen ni Debata!" 2:12 Di na homang halahi sude jana marpikir be, marsisapaan ma halahi sama halahi, "Aha dehe astuan ni on?" ning halahi. 2:13 Tapi adong do sian halahi na mangincahi. Didok halahi ma, "Ah, na mabuk dibaen anggur na tonggi do halak on!" 2:14 Dung i jongjong ma si Petrus rap dohot rasul na sabolas nari i, mandok hata tu halak na bahat i, dipagogo ia ma sorania mandok, "Hamu angka dongan, halak Jahudi bope sude na maringanan di Jerusalem! Tangkas ma parrohahon hamu angke porlu do patorangonku tu hamu pangalaho on. 2:15 Nada na mabuk halak on songon na nidokmunu i, harana pukul sambilan dope saonnari. 2:16 Tapi madung dipaboa Debata hian on markite-hite panurirang Joel: 2:17 Tulus ma di angka ari na parpudi, ninna Debata, usehononKu ma tondingKu tu sude jolma. Jadi manyurirangi ma angka anak dohot borumunu, maruli parnidaan ma angka naposo bulungmunu, marnipi ma angka simatobangmunu. 2:18 Laing usehononKu muse ma tondingKu di hatiha i tu angka naposongKu, dadaboru dohot halaklahi, jana manyurirangi ma halahi. 2:19 BaenonKu ma angka hahomangan di ginjang, di langit, dohot angka tanda di toru, di tano on; adong ma mudar dohot api, uas dohot timus. 2:20 Manggolap ma mataniari, marrara ma bulan i songon mudar dompak so dapot Ari Ni Tuhan i, i ma Ari na godang jana na marmulia i. 2:21 Anggo di hatiha i, dapotan haluaan ma sanga ise na mangido pangurupi ni Tuhan i." 2:22 "Hamu angka halak Israel, tangihon hamu ma hata on: Na humaksud i ma Jesus na sian Nasaret, na dung ditontuhon ni Debata markite-hite hagogoan dohot hahomangan dohot tanda na binaen ni Debata markite-hite Ia di tonga-tongamunu, songon na dung tangkas diboto hamu. 2:23 Ia na dung dilehen ni Debata tudos tu maksud dohot sangkapNa, madung diparsilangkon hamu di hayu na marsilang jana dibunu markite-hite bangso na geduk. 2:24 Tapi dipabangkit Debata do Ia jana dipalua sian bernit ni hamatean, angke nada tarbaen hamatean i torus maniop Ia. 2:25 Taringot tuSia jungada do didok si Daud, 'Sai huida do tongtong Tuhan di jolongku; didongani Ia do au, anso ulang adong sanga aha pe na paganggu rohangku. 2:26 Hara ni i jop do rohangku jana marolop-olop dohot dilangku, pamatangku pe maradian do di bagasan arop ni roha, 2:27 angke nada dipadiar Ho au di inganan ni halak na mate jana nada dipadiar Ho na badiaMi marnida habusuhon i. 2:28 Madung dipatidahon Ho tu au dalan tu hangoluan na so mantak i. Dilehen Ho do di au gok jop ni roha di adopanMu.' 2:29 Hamu ale angka dongan, paloas hamu ma au, pajojorkon satangkas-tangkasna taringot tu si Daud ompunta i. Madung mate ia, jana madung dikuburkon; di hita on do kuburannia lopus tu sadari on. 2:30 Madung dijanjihon Debata tu si Daud mardongan sumpa paboa na adong sahalak sian pomparan ni si Daud baenon ni Debata gabe raja. Hara ni na dung diboto si Daud janji i boti hara ni panurirang do ia, 2:31 laing diboto ia do sanga aha na giot baenon ni Debata. Jadi madung dipaboa ia hian na mulak mangolu do Kristus na nijanjihon ni Debata i. Didok si Daud do, 'Na so padiaron Ia laing tinggal di inganan ni angka jolma na mate; na so jabat abis malangke pamatangNa.' 2:32 Jesus on ma da na nipangolu ni Debata mangulahi sian hamatean. Sude do hami manyaksihon i. 2:33 Dipatuginjang do Ia tu inganan ditangan siamun ni Debata, laing dijagit Ia ma sian Ama i Tondi Parbadia na dung nijanjihon hian. Tondi i ma na niusehon saonnari tu hami, jana i ma na nibege dohot na niidamunu angka dongan saonnari. 2:34 Anggo si Daud sandiri nada manaek ia tu banua ginjang tapi didok ia do, 'Didok Tuhan i do tu Tuanku: Juguk ma Ho di siamunKu, 2:35 lopus Hubaen tunduk tu Ho angka musuMu!' " 2:36 "Hara ni i ma angkon gabe sude halak Israel tangkas umboto bahaso Jesus na niparsilangkonmunu i, laing Jesus i muse do na nibaen ni Debata gabe Tuhan dohot Kristus!" 2:37 Jadi dung dibege angka jolma i na songon i, manorusi ma tu ate-ate ni halahi. Dung i disapai halahi ma tu si Petrus dohot tu angka rasul na asing i, "Hamu angka dongan, aha noma sibaenonnami?" 2:38 Dialusi si Petrus ma, "Pauba hamu ma rohamunu sian angka dosamunu. Jana angkon dipandidihon ma hamu ganop be di bagasan goar ni Jesus Kristus, anso nisesa sude dosamunu i. Dung i jagitonmunu ma silehen-lehen ni Debata, i ma Tondi Parbadia. 2:39 Angke tu hamu do ale angka dongan, dohot tu pomparanmunu, songon i muse tu angka halak na maringanan di na dao do na nijanjihon ni Debata i -- i ma sudena halak na nipiohon ni Debata Tuhanta i anso ro tuSia." 2:40 Songon i ma dipatorang si Petrus tu halahi dohot ragam-ragam pandohan na asing, jana dipaingot ia halahi, ninna ma, "Sai ra ma hamu nipalua sian sundut na jahat on." 2:41 Bahat do halak na porsaya tu na nidok ni si Petrus i, jana tardidi ma halahi. Gabe martamba ma bilangan ni na porsaya di na sadari i, tolu ribu halak. 2:42 Dihaburjuhon halahi do marsiajar sian angka rasul i jana sai tongtong ma halahi rap marlagut. Rap do halahi di na mamonggoli roti, dohot martangiang. 2:43 Na bahatan do angka tanda hahomangan na nibaen ni angka rasul i na mambaen tartarik roha ni halahi sude jana patubu biar di halahi. 2:44 Sai tongtong do sada angka na porsaya i jana sanga aha na adong di halahi rap mamake do halahi sude. 2:45 Digadisi halahi ma angka barang dohot sinadongan ni halahi, jana dibagi-bagihon halahi ma hepengna i di halahi sudena marguru tu haporluanna be. 2:46 Ganop ari marlagut do halahi di Bagas Ni Debata; marmoga-moga jana martoruk ni roha, rap mamonggoli roti halahi di angka bagas ni halahi. Jana rap mangan ma halahi di bagasan jop ni roha dohot toruk ni roha; 2:47 jana sai tongtong do Debata dipuji-puji halahi, jana sai jop do roha ni halak sudena mida halahi. Ganop ari do martamba bilangan ni halahi, harana sai dilehen Tuhan i do tu halahi angka halak na nipalua.
3:1 Sanoli rap kehe ma si Petrus dohot si Johannes tu Bagas Ni Debata pukul tolu andospotang, i ma hatiha ni na martangiang. 3:2 Di pintu na margoar "Pintu Na Jeges", adong ma sada bayo na pangpang hian sian mulai sorang. Ganop ari do bayo on dioban halak tusi mangido-ido sidoka tu angka jolma na marroan tu Bagas Ni Debata. 3:3 Dung diida ia ro si Petrus dohot si Johannes giot masuk tu Bagas Ni Debata i, dipangido ia ma sanga na aha sian halahi silehenonna disia. 3:4 Dipamanat halahi ma bayo i, gabe ninna si Petrus ma tusia, "Ligi ma jolo tu hami!" 3:5 Diparrohahon ia ma antong tu halahi, arop ma rohania dapotan sanga aha ia sian halahi. 3:6 Tapi didok si Petrus ma tusia, "Anggo perak dohot sere nada adong di au. Tapi sanga aha na adong di au, hulehen pe di ho. Mangasahon goar ni Jesus Kristus na sian Nasaret i, mardalan ma ho!" ning ia. 3:7 Dung i ditogu si Petrus ma tangan siamun ni bayo na pangpangon i laho pajongjong ia. Manigor margogo ma pat ni bayo i dohot mataniari ni patna i. 3:8 Dung i mangambur ma ia jongjong jana mamungka ma ia mardalan pahae-pahulu. Dung i masuk ma ia tu Bagas Ni Debata rap dohot halahi, mardalan ma ia mangambur-ambur mamuji-muji Debata. 3:9 Sude halak na disi i marnida ia mardalan mamuji-muji Debata. 3:10 Dung i diingot halahi ma, ia do hape pangido-ido sidoka na sai juguk di "Pintu Na Jeges", na di Bagas Ni Debata i. Homang jana longang ma roha ni halahi marnida na tarjadi i tusia. 3:11 Hara ni na torus dipaihut-ihut bayo i si Petrus dohot si Johannes, jadi sude ma halak na bahat na tarhomang i marroan mangarongomi halahi di emper na margoar "Emper Salomo". 3:12 Di na niida ni si Petrus halak na bahat i, didok ia ma tu halahi, "Hamu ale halak Israel, biasi pola homang rohamunu? Adong he ninna rohamunu hara ni na adong kuaso di hami sanga hara ni haburjuonnami gabe tarbaen bayo on mardalan? 3:13 Debata na nisomba ni si Abraham, si Ishak, si Jakob dohot angka ompunta i, i ma Debata na dung pasangapkon NaposoNia, i ma na margoar Jesus, na nipasahatmunu jana na nitulakmunu di adopan ni si Latus di na giot dipalua si Latus Ia. 3:14 Ditulak hamunu do Na Badia jana Na Tigor i, jana dipangido hamunu do anso dipalua sibunu jolma i. 3:15 Dibunu hamu ma Ia, haru pe nian Ia do haroroan ni ngolu ni sude jolma. Jana madung dipangolu Debata Ia mangulahi sian hamatean. Hami sandiri ma manyaksihon i. 3:16 Haporsayaan di goar ni Jesus madung mangalehen gogo tu jolma na niligi jana na nitandamunu on; jana haporsayaan i ma na mangalehen hamalumon tu bayo on di adopanmunu sudena. 3:17 Hamu ale angka dongan! Saonnari madung huboto hara ni na so diboto hamunu do umbaen na dibaen hamu songon i, laing songon i ma nang angka pamimpinmunu. 3:18 Jana hara ni i ma umbaen na laing tarjadi sanga aha na dung dipabotohon Debata markite-hite angka panurirangNia, paboa na angkon manaon parkancitan do hape Kristus i. 3:19 Hara ni i, pauba hamunu ma rohamunu sian angka dosamunu jana mulak ma hamu tu Debata, anso disesa Ia sude angka dosamunu i. 3:20 Muda songon i, laing diparo Tuhan ma hatiha hajopan, jana anso disuru ma tu hamu Jesus i songon na dung ditontuhon hian gabe Kristus di hamu. 3:21 Laing di banua ginjang do Ia lopus dipaimbaru Debata sasudena songon na nidok ni Debata markite-hite angka panurirangNia na badia di hatiha na robi. 3:22 Angke jungada do didok si Musa, 'Suruhonon ni Tuhan Debatamunu do tu hamu sada panurirang sian bangsomunu sandiri songon parsuruNia di au. *SONGON PARSURUNIA DI AU: Sanga: Songon Au.* Angkon tangihononmunu do sude na nidok ni panurirang i tu hamu. 3:23 Sanga ise na so manangihon na nidok ni panurirang i, angkon dipasiding do ia sian bangso ni Debata jana dibunu.' 3:24 Sudena angka panurirang na dung jungada pabolkaskon barita na sian Debata, mamungka sian Panurirang Samuel dohot angka panurirang na asing di pudi ni si Samuel, dipaboa halahi do taringot tu na masa sisaonnari on. 3:25 Di hamu do angka janji ni Debata na nipabolkas ni angka panurirang i. Di bagasan parjanjian na nibaen ni Debata tu angka ompungmunu pe didok Debata do tu si Abraham songon on, 'PasupasuonKu ma sude bangso na di tano on markite-hite pomparanmu.' 3:26 I do umbaen na nipili ni Debata NaposoNia, jana hamu do na parjolo didapotkon Ia anso dipasupasu Ia hamu, dohot paubahon rohamunu sudena sian ngolumunu na jahat i."
4:1 Taran mangkobari dope si Petrus dohot si Johannes tu halak na bahat i, ompot ma ro angka malim dohot kapala ni panjago ni Bagas Ni Debata dohot angka halak Saduse mandapotkon si Petrus dohot si Johannes. 4:2 Muruk ma halahi hara ni na nidok ni Petrus dohot si Johannes tu halak na bahat i paboa na adong do hangongot di bagasan Kristus. 4:3 Dung i ditangkup halahi ma rasul sidua halak i dipamasuk halahi ma tu hurungan lopus manyogot; dibaen madung potang ari. 4:4 Tapi anggo angka na dung umbege pangajaran ni angka rasul i, bahat do na porsaya. Gabe martamba ma bilangan ni halahi jabat adong hira-hira lima ribu halak. 4:5 Ancogotna i marlagut ma angka pamimpin ni halak Jahudi, angka hatobangon, dohot angka Siboto Surat di Jerusalem. 4:6 Dohot ma disi Malim Godang Hannas, dohot si Kayafas, si Johannes, si Aleksander dohot sudena na masuk horong ni Malim Godang i. 4:7 Dioban ma si Petrus dohot si Johannes mangadop tu halahi, dung i disapai halahi ma, "Markite-hite kuaso sanga markite-hite goar ni ise dehe dibaen hamu na songon i?" ninna halahi. 4:8 Dialusi si Petrus na nigohan ni Tondi Parbadia i ma, "Hamu angka tuan pamimpin ni bangso on, dohot angka hatobangon! 4:9 Muda angkon dipareso ma hami, hara ni pambaenan na denggan tu halak na marnyae, jana angkon patorangkon markite-hite kuaso ni ise bayo i dipamalum, 4:10 antong botoon ni hamu sude ma, dohot sude bangso Israel, bahaso di bagasan goar ni Jesus Kristus, halak Nasaret i do bayo on torkis di adopanmunu. Madung diparsilangkon hamu Jesus i, tapi hape madung dipangolu Debata Ia sian halak na mate. 4:11 Jesus i ma: 'Batu na niambungkon ni angka tukang bagas -- i ma hamu sandiri --, hepengani i do na gabe batu parsuhi.' 4:12 Hum markite-hite Jesus sajo do jolma dipalua. Harana sian sude jolma na satano on, nada adong sahalak pe na dung manjagit kuaso sian Debata laho paluahon hita." 4:13 Homang ma roha ni angka na marlagut i marnida habaranion ni si Petrus dohot si Johannes, jana diboto halahi muse hape halak na somal do rasul na dua i na so pola marsikola. Dung i diboto halahi ma, hape angka na mangihutkon Jesus do rasul na dua i. 4:14 Jadi nada tardokkon halahi be sanga aha, angke laing disi do bayo na nipamalum i jongjong rap dohot si Petrus dohot si Johannes. 4:15 Jadi disuru halahi ma anso haruar rasul na dua i sian bagas parrapotan i, dung i martahi ma halahi. 4:16 Didok halahi ma, "Aha noma sibaenonta tu halahi? Madung diboto sude pangisi ni Jerusalem on hahomangan na so jungada masa on, halahi do mambaen i. Jana nada tarsoadahon hita i. 4:17 Tapi anso ulang mur rarat be barita i tu halak na bahat, taondam jana taancam ma halahi na so tola be mangkatai halahi sanga na tu ise pe anggo mamake Goar i." 4:18 Dung i dipiohon halahi ma rasul na dua i masuk mangulahi, jana dipaksa ma halahi na so tola be mandokkon sanga mangajari mamake goar ni Jesus. 4:19 Tapi dialusi si Petrus dohot si Johannes ma, "Timbang hamu ma jolo sanga dia na tigor di roha ni Debata: mangoloi angka parentamunu do sanga mangoloi parenta ni Debata. 4:20 Harana nada tarhasipkon hami taringot tu angka na dung hami ida dohot na hami bege sandiri." 4:21 Nada adong dapot angka na marrapot i sada dalan pe laho manguhumi si Petrus dohot si Johannes. Jadi diondam halahi ma rasul na dua i, dung i dipalua ma halahi na dua, angke sudena halak na bahat i gabe mamuji-muji Debata do hara ni na masa i. 4:22 Boti pe hara ni bayo na manjagit hamalumon na so jungada masa i, na dung marumur lobi opat pulu taon. 4:23 Dung malua si Petrus dohot si Johannes, mulak ma halahi mandapotkon angka donganna, dibaritahon halahi ma sude na nidok ni angka kapala ni malim dohot angka hatobangon tu halahi. 4:24 Dung dibege dongan ni halahi na masa i, rap martangiang ma halahi saroha tu Debata, ninna halahi ma, "O Tuhan, Ho do na manjadihon langit dohot tano dohot laut dohot sude pangisina. 4:25 Jana hara ni Tondi Parbadia markite-hite naposoMu si Daud; ompunami; madung didok Ho, 'Biasi sai gaor angka bangso, jana biasi sai dipikiri angka bangso partahian na so marguna? 4:26 Markobas do angka raja ni tano on laho marporang, jana satahi angka pamimpin laho mangalo Tuhan jana Na NimiahanNia.' 4:27 Tutu do songon i. Angke marlagut do si Herodes dohot si Pontius Pilatus rap dohot halak na so mananda Tuhan bope halak Israel di kota on. Marlagut do halahi laho mangalo Jesus NaposoMu Na Badia i, na NimiahanMi, 4:28 giot patuluskon sasude na dung ditontuhon Ho hian markite-hite kuaso dohot hagiotMu. 4:29 Saonnari ligi ma ale Tuhan pangondam ni halahi tu hami. Paloas ma hami Tuhan angka naposoMon pararatkon baritaMi so pola mardongan biar. 4:30 Pahortang ma tanganMu mambaen hamalumon, jana baen ma angka tanda hahomangan markite-hite goar ni Jesus, NaposoMu Na Badia i." 4:31 Dung sidung na martangiang i, humutur ma bagas inganan ni halahi i. Digohi Tondi Parbadia ma halahi sude, mamungka ma halahi puluk sajo manjamitahon barita na sian Debata. 4:32 Sudena halahi na dung porsaya i, saroha jana satondi do ngolu ni halahi. Nada adong sian halahi na mangetong sinadonganna gabe nampunania sandiri. Sudena na adong di halahi, rap mamake do halahi. 4:33 Mardongan kuaso na godang, disaksihon angka rasul i ma na dung mangolu Jesus mangulahi. Jadi bahat sajo do pasupasu ni Debata di halahi. 4:34 Jadi umpe sahalak sian halahi na marhahurangan. Harana sanga ise sian halahi na adong tanona sanga bagasna digadis halahi do i; lalu dioban halahi ma hepengna i 4:35 jana dipasahat halahi ma i tu angka rasul i. Dung i dibagi-bagihon ma hepeng i tu halak na mangkaporluhon. 4:36 Laing songon i ma dibaen si Josep, na nigoaran ni angka rasul i si Barnabas (astuanna Si Pangapoi). Marga Levi do i na sorang di Pulo Siprus. 4:37 Digadis ia ma kobunnia, dung i dioban ia ma hepengna i jana dipasahat ia ma i tu angka rasul i.
5:1 Tapi adong ma sada bayo na margoar si Ananias. Madung digadis ia dohot dadaborunia na margoar si Sapira, saladang tano ni halahi. 5:2 Deba sian hepengna i dibunihon ia ma di halahi sandiri jana lobina i ma dipasahat ia tu angka rasul i. Diboto dadaborunia i do na songon i dibaen ia. 5:3 Tapi didok si Petrus ma tusia, "Ale Ananias, biasi dehe dipadiar ho Sibolis mangarajai rohamu, jabat margabus ho tu Tondi Parbadia, jana sip-sip ho manabunihon di ho sandiri deba sian hepeng tuhor ni tano i? 5:4 Nada he tanomu hian do i dompak so digadis ho? Dung digadis ho pe tano i, laing ho do nampuna hepengna i. Antong biasi tubu di bagasan rohamu mambaen songon i? Nada jolma na nigabusanmu. Tapi Debata do!" 5:5 Disi dibege si Ananias hata i, tinggang ma ia lalu mate. Gabe mabiar ma sudena halak na umbege na masa i. 5:6 Jadi marroan ma angka doli-doli mambalut bangke ni si Ananias i, dioban halahi ma tu balian laho manguburkonsa. 5:7 Dung adong hira-hira tolu jom, masuk muse ma dadaborunia i. Nada diboto ia dope sanga aha na masa i. 5:8 Disapai si Petrus ma tusia, "Paboa ma jolo antong tu au: Tutu dehe saon arga ni tano na nigadismi dohot halaklahimi?" Ning dadaboru ni si Ananias ma, "Tutu do sai argana." 5:9 Dung i didok si Petrus ma tusia, "Biasi dehe satahi hamu giot manguji Tondi Ni Tuhan i? Ligi ma indi, ma mulak halahi na mananom halaklahimi. Obanon ni halahi muse ma ho tu balian." 5:10 Laing manigor santongkin i tinggang ma dadaboru ni si Ananias i lalu mate di jolo ni si Petrus. Jadi di na masuk angka doli-doli i, ma mate ia didapot halahi. Dung i ditaruhon halahi muse ma ia tu balian, jana ditanom halahi di lambung ni halaklahinia i. 5:11 Jadi mabiar situtu ma sude parlagutan dohot sude halak na mambege na masa i. 5:12 Hara ni pangkobasion ni angka rasul i, gabe bahat do hahomangan dohot na so unjung masa tarjadi di tonga-tonga ni halak na bahat i. Saroha ma angka na porsaya i marlagut di Emper Salomo. 5:13 Jana nada adong halak na asing na puluk ro marlagut dohot halahi, tapi sangap do diida na torop i halahi. 5:14 Jana mur honok mur bahat do na porsaya tu Tuhan i -- halaklahi bope dadaboru. 5:15 Jana diparobani halak i do angka na marnyae, dibaen ma halahi di podoman sanga di lage, jana dioban ma halahi tu dalan, anso dais nada apala halinu ni si Petrus tu halahi muda mamolus si Petrus disi. 5:16 Salaku mudur-udur noma halak marroan sian angka kota na humaliang Jerusalem. Diparobani halahi be ma na marnyae ni halahi dohot angka na hona tondi na jahat. Dung i dipamalum do halahi sude. 5:17 Ujungna ro ma Malim Godang i dohot sudena dongannia, i ma golongan ni angka Saduse, mangamuk ma halahi hara ni na mangiburu. 5:18 Ditangkup halahi ma angka rasul i, manigor dihurungkon tu hurungan na di kota. 5:19 Tapi bornginna i ro ma sahalak surusuruan ni Tuhan mambuka angka pintu ni hurungan i, dioban ia ma angka rasul i tu ruar. Didok surusuruan i ma tu angka rasul i, 5:20 "Kehe ma hamu tu Bagas Ni Debata, jana disi ma hamu jongjong laho mamaritahon sude hata hangoluan i tu halak na bahat." 5:21 Dioloi halahi ma hata i. Sogot dope manyogot i kehe ma halahi tu Bagas Ni Debata, mangajari ma halahi disi. Jadi ro ma Malim Godang i dohot angka donganna i, dibaen halahi ma rapot pangurus ni ugamo rap dohot hatobangon ni halak Jahudi. Dung i disuru alap halahi ma rasul i sian hurungan. 5:22 Tapi dung lalu angka suruan i di hurungan, hape nada dapot halahi be disi angka rasul i. Jadi mulak boti ma halahi, dipaboa halahi ma songon i tu rapot i. 5:23 Ninna halahi ma, "Di na lalu hami di hurungan i, markunci do dapot hami angka pintu ni hurungan i jana disi do angka panjago i jongjong di jolo ni pintu i. Tapi di na hami buka pintu i, hape umpe sahalak dapot hami disi." 5:24 Jadi dung dibege kapala ni panjago ni Bagas Ni Debata dohot angka kapala ni malim na nipaboa i tu halahi, puntol ma pikiran ni halahi hara ni angka rasul i boti mabiar betak sai adong na masa. 5:25 Tapi ro ma sada halak paboahon tu halahi, "Boto ma, halak na nihurungkonmunu i, madung mangajari halahi saonnari tu halak na bahat di Bagas Ni Debata!" 5:26 Dung i kehe ma kapala ni panjago ni Bagas Ni Debata rap dohot angka pangawalnia mangalap angka rasul i mangulahi. Tapi nada pola mangasahon gogo halahi angke mabiar do halahi mida halak na bahat, betak sai lalu halahi didanggur halak na bahat i dohot batu. 5:27 Dioban ma angka rasul i mangadop tu rapot i. Disapai Malim Godang i ma halahi. 5:28 Ning ia ma, "Nada he hami antahi do hamu, anso ulang be diajarkon hamu taringot tu Goar i. Tapi ligi hamunu ma sanga aha na dung nibaenmunu i! Madung digohi hamu Jerusalem on sude dohot pangajaranmunu, jana giot paporsankononmunu ma mudar ni Bayo i tu hami." 5:29 Dialusi si Petrus dohot rasul na asing i ma, "Angkon Debata do ihutkononta, nada jolma. 5:30 Anggo Jesus na niparsilangkonmunu i, madung dipangolu Debata ni ompunta i sian hamatean. 5:31 Jana madung dipabangkit Debata Ia markite tangan siamunNia gabe Pamimpin dohot Sipalua; anso marhamubaan ni roha dohot manjagit hasesaan ni dosa Israel i. 5:32 Hami ma saksi ni i sude -- hami dohot Tondi Parbadia na nilehen ni Debata tu angka na mangoloi parentaNia." 5:33 Jadi dung dibege halahi na songon i muruk sajo ma halahi, jana martahi ma halahi laho mamatehon angka rasul i. 5:34 Tapi adong ma sahalak Parise sian parrapotan i, na margoar si Gamaliel, Siboto Surat na niparsangapi ni halak na bahat. Jongjong ma ia jana dipangido ia ma anso nioban angka rasul i santongkin tu ruar. 5:35 Dung i didok ia ma tu rapot ni ugamo i, "Hamu angka dongan, halak Israel! Denggan ma timbangi hamu sanga aha na giot baenonta tu halak on. 5:36 Harana ro do najolo si Teudas na mangetong dirina halak na godang, jabat opat ratus halak mangihutkon ia. Hape dibunu do ia jana marserak ma angka na mangihutkon ia, mago boti ma dohot na nihalojahonnia i. 5:37 Jadi dung i, di na masa sensus, ro muse ma si Judas, halak Galilea i. Bahat do halak diela-ela ia giot mambaen hagaoran, hape hona bunu do jana marserak do sude na mangihutkon ia. 5:38 Jadi saonnari taringot tu na masa on, songon on ma sidohononku: Ulang ma hahua hamu halak on, tapadiar ma songon i. Harana anggo na sian jolma do pangajaran dohot na nikarejohon ni halahi, angkon gabe mago sandiri do pangajaran dohot na nikarejohon ni halahi i. 5:39 Tapi muda sian Debata do mula ni i, nada tartaluhon hamunu i. Betak na tardapot muse do hamu angka dongan, na mangalo tu Debata." Dijagit rapot i ma hata ni si Gamaliel i. 5:40 Dung i dipiohon ma angka rasul i, diloncing jana dilarang ma halahi mangajarkon taringot tu Jesus mangulahi. I pe anso dipalua halahi. 5:41 Morot ma halahi sian rapot ugamo i mardongan jop ni roha, harana na dung dietong roha ni halahi do patut marlayas hara ni Jesus. 5:42 Jana torus do halahi ganop ari mangajari di Bagas Ni Debata dohot di angka bagas ni halak, mamaritahon Jamita Na Denggan taringot tu Jesus Kristus.
6:1 Di hatiha i, dung mur martamba angka sisean, ro ma ungut-ungut ni halak Jahudi na marhata Junani tu angka na marhata Ibrani, hara ni pambagian ni pangurupion tu angka na mabalu ni halahi na hurang tigor. 6:2 Jadi hara ni i, dipalagut rasul na dua bolas i ma sudena angka sisean i, jana mandok hata ma rasul i tu halahi, "Nada denggan muda mantak hami manjamitahon hata ni Debata, hara ni na paturehon soal sipanganon. 6:3 Hara ni i, hamu ale angka dongan, pili hamu ma sian tonga-tongamunu sandiri pitu halak na tangkas burju jana na nigohan ni Tondi boti na bisuk, anso hami pabangkit halahi tu karejo na songon i. 6:4 Anggo hami, giot mangkaburjuhon pikirannami di bagasan tangiang dohot manjamitahon hata i." 6:5 Rap manjagit ma halahi sude di na nidok ni angka rasul i. Dung i dipili halahi ma si Stefanus, sada halak na porsaya situtu tu Jesus jana na nirajaan ni Tondi Parbadia. Laing tarpili ma disi si Pilipus, si Prokorus, si Nikanor, si Timon, si Parmenas dohot si Nikolaus na sian Antiokia i; nada nian halak Jahudi ia tapi madung marbalik ia tu ugamo Jahudi. 6:6 Dung i dipajongjong ma halahi di jolo ni angka rasul i, dung i martangiang ma angka rasul i jana diampehon ma tanganna tu halahi. 6:7 Jadi mur rarat ma hata ni Debata, martamba ma bilangan ni angka sisean di Jerusalem, angka malim pe bahat do na gabe porsaya. 6:8 Tapi anggo si Stefanus na gok asi ni roha dohot hagogoon, mambaen angka tanda-tanda dohot hahomangan na godang do di tonga-tonga ni halak na bahat i. 6:9 Tapi laing adong do halak Jahudi na mangalo hatania: I ma angka anggota ni bagas paribadatan na margoar Libertini, tarmasuk ma i angka halak sian Kirene dohot sian Aleksandria. Marsoal-soal ma halahi dohot halak Jahudi na sian Kilikia dohot Asia taringot tu si Stefanus, 6:10 Tapi nada tarsoadahon halahi sanga aha na nidok ni si Stefanus i, harana madung dilehen Tondi Parbadia disia hamaloan mandok hata. 6:11 Jadi hara ni i dijajang halahi ma halak anso ra mandok, "Madung hami bege diincahi ia si Musa dohot Debata!" 6:12 Songon i ma panjajang-jajang ni halahi di jolma i dohot angka hatobangon ni halak Jahudi, songon i dohot angka Siboto Surat i. 6:13 Jana dioban halahi muse ma angka saksi na mangalehen hatorangan na so tutu taringot tu si Stefanus. Didok angka saksi i ma, "Hum na mangincahi do bayo on tu Bagas Ni Debata na badia i jana laing diincahi ia do angka Tona Ni Debata na nipasahat ni si Musa i. 6:14 Hami bege do didokkon ia, na giot rumpakkonon ni Jesus halak Nasaret i adat na denggan na nilehen ni si Musa tu hita!" 6:15 Marsiligi ma sude halak na disi i tu si Stefanus. Jana tarida ma disi bohi ni si Stefanus songon bohi ni surusuruan.
7:1 Disapai Malim Godang i ma tu si Stefanus, "Tutu dehe sude na nidok ni halahi i?" ning ia. 7:2 Dialusi si Stefanus ma, "Hamu ale angka dongan bope angka amanami! Tangihon hamu ma jolo na hudok on! Dompak so bungkas ompunta si Abraham tu Haran, hatiha di Mesopotamia dope ia, ro ma Debata na marmulia i tusia 7:3 mandok, 'Tinggalkon ma luat hagodanganmu dohot koum sisolkotmu. Kehe ma ho tu luat sipatuduhononKu tu ho'. 7:4 Jadi ditadingkon si Abraham ma Luat Kasdim, bungkas ma ia tu Haran. Jadi dung jumolo amang ni si Abraham, dipabungkas Debata muse ma si Abraham tu luat on, i ma na niingananmunu saonnari ale angka dongan bope hamu amanami. 7:5 Anggo di hatiha i, hum saotik pe nada adong dope luat on na nilehen ni Debata di si Abraham gabe nampunania; santompap pe nada adong dilehen disia. Tapi marjanji do Debata paboa na angkon lehenonNia do i tu si Abraham gabe nampunania dohot pomparannia. Nada adong dope dakdanak ni si Abraham hatiha i. 7:6 Tapi songon on ma pandok ni Debata tusia, 'Songon paisolat ma pomparanmu di luat ni halak na asing. Parhatobanon ni halak luat i ma halahi jana parkancitanna opat ratus taon honokna. 7:7 Tapi ro ma Au manguhumi halak na mamparhatobankon halahi i, jana morot ma halahi sian luat i jana sombaon ni halahi ma Au di inganan on.' 7:8 Dung didok Debata songon i, dipudun Debata ma janji i markite-hite sunat. Jadi hara ni i, dung sorang si Ishak anak ni si Abraham disunat ma ia dung marumur salapan ari. Si Ishak pe disunat ia ma anaknia, i ma si Jakob. Si Jakob pe disunat ia muse ma dakdanaknia na dua bolas i, i ma na gabe ompu parsadaan ni halak Israel. 7:9 Tapi mangiburu do angka ompunta i tu si Josep, jabat digadis halahi ia gabe hatoban tu tano Mesir. Tapi Debata do dongannia, 7:10 jana na paluahon ia sian sude parkancitannia. Dilehen ma tusia asi ni roha dohot bisuk di na kehe ia mangadop tu jolo ni raja ni Mesir i; diangkat raja i ma ia gabe kapala di tano Mesir, dohot di bagas godang ni raja i. 7:11 Jadi masa ma haleon potir di sude luat na di tano Mesir i dohot di Kanaan, gabe markancit situtu ma halak sudena. Nada dapotan sipanganon be angka ompunta i. 7:12 Jadi dung dibege si Jakob adong do eme di tano Mesir, disuru ia ma angka dakdanaknia, i ma angka ompunta i kehe tusi parjolo situtu. 7:13 Di na kehe halahi paduanolihon, disi ma dipatandahon si Josep dirina tu angka kahanggina i. I dope anso diboto raja ni Mesir i taringot tu kahanggi ni si Josep. 7:14 Dung i disuru alap si Josep ma amangnia si Jakob dohot sude horongnia anso bungkas tu tano Mesir -- pitu pulu lima halak ma halahi sudena. 7:15 Jadi bungkas ma si Jakob tu tano Mesir jana disi ma marujung ngolunia dohot angka ompunta i. 7:16 Anggo holi-holi ni halahi dioban do muse tu Sikem jana dikuburkon ma di kuburan na nitobusan ni si Abraham dohot hepeng sian angka anak ni si Hemor na di Sikem i. 7:17 Dung marayak dapot ma hatihana patuluson ni Debata janjiNia i tu si Abraham, madung mur martamba bahat bangsonta i di Mesir. 7:18 Ujungna mamarenta ma sada raja na asing na so mananda si Josep. 7:19 Jadi diakal-akali raja i ma halak hita i, diparkanciti ia ma angka ompunta i. Dipaksa ia ma ambungkononkon angka dakdanak ni halak hita na baru sorang anso ulang mur mabahat halahi. 7:20 Di hatiha i ma sorang si Musa; tama do ia di adopan ni Debata. Tolu bulan lolotna sai di bagas ni amangna dope ia dipature-ture, 7:21 jadi dung diambungkon ia, dibuat boru ni raja Mesir ma ia jana dipagodang-godang boru ni raja Mesir i ma ia songon anakna sandiri. 7:22 Sudena parbinotoan ni halak Mesir diajarkon do tusia jana gabe halak na marsahala situtu do ia muda mandok hata dohot mambaen sanga na aha. 7:23 Di na marumur si Musa opat pulu taon, tubu ma di bagasan rohania giot mangaligi sanga tarbia bangsonia Israel i. 7:24 Dung i diida ia ma sahalak na nisiksa ni halak Mesir; diondihon ia ma na hona siksa i, dibunu ia halak Mesir i. 7:25 Ning rohania diastui bangsonia i ma na dung dipake Debata do ia laho paluahon halahi. Hape nada diastui halahi dope. 7:26 Ancogotna i diida ia muse ma marbadai dua halak Israel, dicubo ia muse ma padamehon halahi. Didok ia ma, 'Hamu dongan, na markahamaranggi do da hamu. Biasi marbadai hamu?' ning ia. 7:27 Tapi dionjarkon na mamukul donganna i ma si Musa tu topi, didok ia ma, 'Ise dehe lakna mambaen ho gabe pamimpin dohot panguhum di hami? 7:28 Adong he na giot bunuonmu muse do au songon halak Mesir na nibunumi natuari?' ning ia. 7:29 Dung dibege si Musa na nidok ni bayo i, lari ma ia sian Mesir lalu tu Midian jana disi noma ia maringanan. Dua ma anaknia na sorang disi. 7:30 Jadi dung opat pulu taon, ro ma sada surusuruan mandapotkon si Musa di halongonan na di Dolok Sinai, di bagasan api na marjilam-jilam di tadatada i. 7:31 Homang-homang ma si Musa midasa, gabe dipadonok ia ma laho manangkasi sanga na aha i. Jadi dibege ia ma sora ni Tuhan mandok, 7:32 'Au do Debata ni angka ompungmu; Debata ni si Abraham, si Ishak dohot si Jakob.' Humitir ma si Musa hara ni biarna, nada puluk be ia mangaligina. 7:33 Dung i didok Tuhan i muse ma, 'Buka ma solop na nipakemi, harana tano na badia do inganan hajongjonganmi. 7:34 Madung Huida jana Huparrohahon hapaeton ni parkancitan na nitaon ni bangsongKi di tano Mesir. Madung Hubege holos ni halahi jana mijur ma Au laho paluahon halahi. Beta ma saonnari! SuruonKu ma ho mangulahi tu tano Mesir.' 7:35 Si Musa on ma na nitulak ni halahi, di na nidok ni halahi, 'Ise he na mambaen ho gabe pamimpin dohot panguhum di hami?' Hapengani ia do muse na nisuru ni Debata gabe pamimpin dohot na paluahon, markite-hite pangurupi ni surusuruan na ro mandapotkon ia di tadatada i. 7:36 Si Musa i ma na manguluhon halak Israel haruar sian Mesir jana na mambaen angka hahomangan dohot angka na so jungada masa di Mesir, di Laut Na Rara dohot di parhorsihan i opat pulu taon honokna. 7:37 Laing si Musa on do na mandok tu halak Israel, 'Lehenon ni Debata ma tu hamu sada panurirang na nipiliNia sian tonga-tongamunu sandiri, songon panodoNia di au.' 7:38 Laing si Musa do na gabe panonga-nongai sian bangso Israel di parkorsihan i, maradopkon surusuruan na mangkatai tusia di Dolok Sinai bope tu ompunta i. Ia do na manjagit hata hangoluan sian Debata sipabolkason tu hita. 7:39 Hape haru songon i pe, laing nada ra angka ompunta i mangoloi ia. Ditulak halahi do ia jana giot mulak halahi tu Mesir mangulahi. 7:40 Ninna halahi do tu si Harun, 'Baen ma angka gana-ganaan di hami anso i ma manguluhon hami. Harana nada hami boto be anggo taringot tu si Musa na maroban hami haruar sian Mesir i, sanga na bia ia!' 7:41 Jadi dibaen halahi ma hatiha i sada patung ni anak ni lombu, dung i dipelehon halahi ma haul tu patung i jana marpesta ma halahi pasangapkon barang na nibaen ni tangan ni halahi sandiri. 7:42 Dung i ditadingkon Debata ma halahi jana dipadiar Debata ma halahi manyombai angka bintang na di langit i. Hombar do i tu na tarsurat di buku ni angka panurirang. Songon na tarsurat, 'Ale hamu halak Israel! Jungada dehe dilehen hamu di Au haul na nitutung sanga haul na nisambol salolot na opat pulu taon di halongonan? 7:43 Bandar ni si Molokh do na nipaoban-obanmunu i rap dohot gana-ganaan ni bintang ni debatamunu na margoar Refan; i ma gana-ganaan na nibaenmunu gabe sisombaon. Hara ni i, angkon Huambungkon hamu lopus tu bariba an di Luat Babel.' 7:44 Bandar Hasaksian adong do di tonga-tonga ni jolma ompunta na di halongonan i. Hombar tu parenta ni Debata tu si Musa do dipature, jana mangihutkon gambaran na nipatidahon ni Debata tu si Musa. 7:45 Dung i sai dipaoban-oban angka ompunta i ma undung-undung i di na kehe halahi dohot si Josua mangarampas luatta on sian tangan ni angka bangso na niayak ni Debata di jolo ni halahi. Laing disi ma undung-undung i lopus tu hatiha ni si Daud. 7:46 Jop do roha ni Debata dibaen si Daud. Dipangidohon ia do tu Tuhan anso dipatola ia pajongjongkon sada bagas di Debata ni si Jakob. *DEBATA NI SI JAKOB: Dipiga-piga-piga naskah narobi didok: Debata ni bangso Israel.* 7:47 Hape si Salomo do na pajongjong bagas i di Debata. 7:48 Tapi nada maringanan Na Gumincat i di bagas na nibaen ni tangan ni jolma, songon na nidok ni panurirang i, 7:49 'Langit do habangsa sijuguhanKu jana tano on sidegean ni patKu. Bagas aha ma he na giot pajongjongonmu di Au? Di dia ma he inganan na giot paradiananKu? 7:50 Nada he Au sandiri do na manjadihon sasudena i?' 7:51 O hamu na jogal rungkung, bope na marroha dohot na marpinggol songon halak na so mananda Debata! Tongtong do dialo hamu Tondi Parbadia, songon ompumunu i, laing songon i do hamu muse. 7:52 Adong dehe panurirang na so diparkanciti ni angka ompungmunu i? Dibunu halahi do angka suruan ni Debata na mambaen boa-boa narobi, paboa na angkon ro ma Partigor i. Jana saonnari dihianati jana dibunu hamu do Naposo Ni Debata i. 7:53 Boti pe, madung dipalalu angka surusuruan tu hamu ale angka dongan angka parenta ni Debata, hapengani nada ra hamu mangihutkonsa!" 7:54 Jadi dung dibege angka na ro tu rapot ugamo i na nipajojor ni si Stefanus i, gabe hancit ma roha ni halahi jana patungaripon ma halahi tusia. 7:55 Tapi ditatap si Stefanus na nigohan ni Tondi Parbadia i ma tu langit. Diida ia ma hasangapan ni Debata dohot Jesus na jongjong di siamun ni Debata. 7:56 "Ligi pe da, mungkap do huida langit i jana jongjong Anak Ni Jolma i di siamun ni Debata!" 7:57 Disumpol angka halak na marrapot i ma pinggolna be, marsurahi ma halahi jana tompu ma halahi rap mangarongomi si Stefanus. 7:58 Disarat halahi ma ia tu balian ni kota i, jana didangguri dohot batu. Dipatiopkon halak na manyaksihon i ma pakean ni halahi tu sada doli-doli na margoar si Saulus. 7:59 Di na nidangguran ni halahi si Stefanus, pio-pio ma ia ning ia ma, "Ale Tuhan Jesus, jagit ma tondingku!" 7:60 Marsinggang ma ia, dipagogo ia ma sorania mandok, "Ulang ma dijujur dosa on tu halahi, ale Tuhan!" ning ia. Dung didok ia songon i, marujung ma ngolunia. Si Saulus pe moga ma dihilala ia hara ni na mamunu jolma i.
8:1 Mamungka sian ari i masa ma pangayakayakon na godang di parlagutan na di Jerusalem, jadi marserak ma sude angka na porsaya i, hum angka rasul i noma na tinggal rap. Sarsar ma halahi tu sude Luat Judea dohot tu Samaria bage. 8:2 Jadi ditanom halak na burju roha i ma bangke ni si Stefanus i, tangis ma halahi mangandungi ia. 8:3 Tapi anggo si Saulus sai manggogo ma ia laho manyursari parlagutan i. Masuk ma ia sian bagas na sada tu bagas na asing manyarat halak na porsaya i tu ruar, dipamasuk ia ma halahi tu hurungan. 8:4 Dijamitahon halak na porsaya na marserak i ma Jamita Na Denggan na sian Debata i di sude inganan. 8:5 Si Pilipus, kehe ma ia tu kota *KOTA: Dipiga-piga-piga naskah narobi didok: Kota na umporlu di.* Samaria dijamitahon ia ma disi taringot tu Kristus. 8:6 Dung diida halak na bahat i si Pilipus mandok hata jana diida halahi angka hahomangan na nibaennia, bahat ma halahi na marjop ni roha manangihon na nidoknia i. 8:7 Harana marruaran ma angka tondi na jahat sian bahat halak, mangangguhi marsora na gogo. Halak na onyangon pe dohot na matimpang laing bahat do na dipamalumsa. 8:8 Gabe jop sajo ma roha ni halak na di kota Samaria i. 8:9 Adong ma sada bayo di kota i na margoar si Simon, na dung honok pahomang-homang roha ni halak Samaria hara ni ilmu sihirnia. Pandoknia tu halak, halak na godang do ia. 8:10 Jadi dipaihut-ihut sude halak ma ia, na menek bope na godang, jana didok ma, "On ma gogo ni Debata, Na Godang i." 8:11 Honok ma sai dipahomang-homang ia halak hara ni ilmu-sihirnia i, hara ni i ma umbaen na sai dipatangi-tangi halak ia. 8:12 Tapi dijamitahon si Pilipus ma tu halahi Jamita Na Denggan i, taringot tu Harajaan Ni Debata dohot taringot tu goar ni Jesus Kristus. Gabe porsaya ma halahi tu Jamita na nidok ni si Pilipus i, tardidi ma halahi -- halaklahi dohot dadaboru. 8:13 Si Simon pe gabe porsaya ma. Dung tardidi ia laing torus ma dipaihut-ihut ia si Pilipus. Homang-homang muse ma si Simon paida-ida angka tanda hahomangan na tarjadi i. 8:14 Tarbege ma tu angka rasul na di Jerusalem hape na dung dohot do halak Samaria manjagit hata ni Debata. Gabe disuru halahi ma tusi si Petrus dohot si Johannes. 8:15 Dung lalu si Petrus dohot si Johannes, ditangiangkon halahi ma halak Samaria i anso dapotan Tondi Parbadia halahi, 8:16 angke nada podo adong sian halahi na nigohan ni Tondi i umpe sahalak. Hum tardidi sajo dope halahi tu bagasan goar ni Tuhan Jesus. 8:17 Dung i dipayakkon si Petrus dohot si Johannes ma tangan ni halahi tu ulu ni halak Samaria i; gabe dijagit halahi ma Tondi Parbadia. 8:18 Diida si Simon ma i, hara ni na nipayakkon ni angka rasul tanganna tu ulu ni halak Samaria i gabe dilehen ma Tondi Parbadia tu halahi. Jadi dioban si Simon ma hepeng tu si Petrus dohot si Johannes, 8:19 didok ia ma, "Lehen ma di au kuaso i, anso muda hupayakkon tanganku sanga tu ulu ni ise pe gabe jagiton ni halahi ma Tondi Parbadia." 8:20 Tapi dialusi si Petrus ma, "Tu hamagoan ma ho dohot hepengmi! Diambang ho do lakna tartobusi hepeng, silehen-lehen ni Debata? 8:21 Nada adong tohapmu di bagasan karejonami on, angke na so ias do rohamu maradopkon Debata. 8:22 Jadi hara ni i pauba ma rohamu na jahat i jana pangidohon ma tu Tuhan anso diampuni Ia rohamu na jahat i! 8:23 Huboto do na gok pangiburuan ate-atemu jana dirajai hajahatan." 8:24 Dung i didok si Simon ma tu si Petrus dohot si Johannes, "Tolong ma jolo tangiangkon hamu au tu Tuhan anso ulang tulus tarjadi tu au sanga aha na nidokmunu i." 8:25 Dung dilehen halahi hasaksian dohot jamita na sian hata ni Tuhan i, mulak ma si Petrus dohot si Johannes mangulahi tu Jerusalem. Di tonga dalan i dijamitahon halahi ma Jamita Na Denggan i di angka huta ni halak Samaria. 8:26 Ro ma sada surusuruan ni Tuhan mandok tu si Pilipus, "Jongjong ma ho! Kehe ma ho tu sabola Selatan *TU SABOLA SELATAN: Sanga: Di tonga ni ari.* dalan siboluson sian Jerusalem tu Gasa." Dalan na dung tarulang do i. 8:27 Dung i kehe ma si Pilipus. Jadi adong ma sada halak Etiopia na sangap, pangarajai ni sude arta ni raja dadaboru Kandake na sian Etiopia, na dung ro tu Jerusalem giot marsimoramora. 8:28 Di bagasan pardalanan mulak do ia, juguk ma ia di karetania jana mamasa buku ni Panurirang Jesaya. 8:29 Jadi didok Tondi i ma tu si Pilipus, "Kehe ma ho tusi jana padonok ma tu kareta i!" 8:30 Dung i dipadonok si Pilipus ma mandapotkon kareta i, dibege ia ma bayo i manyise buku ni si Jesaya. Disapai si Pilipus ma tusia, "Mangarti dehe tuan i na nisise ni tuan i?" ning ia. 8:31 Dialusi bayo i ma, "Tarbia ma pangastuingku disi anggo so adong na patorangkonsa tu au?" Dung i disuru ia ma manaek si Pilipus tu kareta i jana rap juguk ma halahi na dua. 8:32 On ma ayat na nisisenia i, "Songon biri-biri na niiring tu panyambolan do Ia, songon anak ni biri-biri na hohom di na nigusting imbuluna, songon i ma Ia umpe sangkababa hata didok Ia. 8:33 Di bagasan halayasonNia do didabu uhum tuSia, ise ma he na tarbaen paboahon sundutNia i? Angke nibuat do hosaNa sian tano on." 8:34 Didok parpangkat na sian Etiopia i ma tu si Pilipus, "Paboa ma jolo tu au, sanga ise do na nidok ni panurirang i. Ia sandiri dehe sanga halak na asing?" 8:35 Dung i dipungka si Pilipus ma mandok hata jana sian ayat-ayat i ma dipungka ia manjamitahon Jamita Na Denggan i tu parpangkat i, i ma taringot tu Jesus. 8:36 Di tonga dalan i lalu ma halahi tu sada inganan na adong aek disi. Didok parpangkat i ma, "Ligi pe da, adong do aek indi! Aha dope na hurang anso tardidi au?" 8:37 Didok si Pilipus ma, "Anggo na dung porsaya do tuan i sian sandok roha, nada pola sala be tardidi tuan i." "Porsaya do au Anak Ni Debata do Jesus Kristus," ning bayo parpangkat na sian Etiopia i. 8:38 Dung i disuru ia ma maradian jolo karetania i; jadi manuat ma si Pilipus dohot parpangkat i tu aek i, dipandidihon si Pilipus ma ia. 8:39 Dung ruar halahi sian aek i, dibuat Tondi Ni Tuhan ma si Pilipus sian i. Nada diida parpangkat na sian Etiopia i be ia. Tapi marjop ni roha ma ia mandalani sidalanannia. 8:40 Na so niambang-ambang hape madung di Asdot si Pilipus. Di na marpupu ia mardalani laing dijamitahon ia ma Jamita Na Denggan i di sude kota lopus lalu tu Kaisarea.
9:1 Tapi anggo si Saulus laing hosom dope rohania jana sai giot bunuonnia do angka anak sisean ni Tuhan. Kehe do ia tu Malim Godang, 9:2 mangido surat kuaso anso tola ia kehe tu angka bagas paribadatan ni halak Jahudi di Damaskus laho manangkupi angka halak na mangihutkon dalan ni Tuhan na dapot ia, halaklahi bope dadaboru, anso dioban ia halahi tu Jerusalem. 9:3 Di tonga dalan i laho tu Damaskus marayak kota i, ompot ma ro sada sinondang na mamincar sian langit humaliang si Saulus. 9:4 Gabe tungkap ma ia tu tano i jana dibege ia ma sada sora na mandok tusia, "Saulus, Saulus! Biasi diparkanciti ho Au?" 9:5 "Ise dehe Ho Tuan?" ning si Saulus manyapai. Mangalusi ma sora i, "Au ma da Jesus, na niparkancitanmi. 9:6 Tapi jongjong ma ho, masuk ma ho tu kota i. Disi ma nipaboa tu ho sanga aha sibaenonmu." 9:7 Anggo angka dongan ni si Saulus i nada malo be mangkuling hara ni biarna; angke dibege halahi do antong sora i, hape nada adong diida halahi sanga ise pe. 9:8 Dung i jongjong ma si Saulus, diungkap ia ma matania hape nada diida ia be bagi aha. Ditogu-togu halahi noma ia lalu tu Damaskus. 9:9 Tolu ari honokna na so marnida i ia jana na tolu ari i umpe adong dipangan sanga diinum ia bagi aha. 9:10 Adong do di Damaskus sada halak anak sisean, na margoar si Ananias. Di bagasan sada parnidaan, diida ia ma Tuhan i mandok hata tusia, "Ananias!" ninna. "Dison do au Tuhan," ning si Ananias mangalusi. 9:11 Dung i didok Tuhan i ma, "Aha dope, kehe ma ho saonnari. Dapotkon ma bagas ni si Judas na di Dalan Lidang i. Sapai ma disi na margoar si Saulus halak Tarsus. Hatiha martangiang do bayo i, 9:12 jana madung diida ia di bagasan sada parnidaan ro sada bayo na margoar si Ananias mandapotkon ia laho mamayakkon tanganna tu ulunia anso marnida ia mangulahi." 9:13 Dialusi si Ananias ma, "Bahat do hubege hata ni halak Tuhan, taringot tu bayo i, tarlobi taringot tu angka parkancitan na nibaennia maradopkon halakMu na badia i di Jerusalem. 9:14 Jana saonnari ro do ia maroban surat isin sian angka sintua ni malim laho manangkupi sanga ise na porsaya tu Ho." 9:15 Tapi didok Tuhan i ma tu si Ananias, "Kehe ma ho! Harana na dung Hupili do ia mangoloi Au, anso dijamitahon ia taringot tu goarKu tu sude angka bangso na asing dohot tu angka raja, songon i dohot tu halak Israel muse. 9:16 Jana patuduhononKu do tusia angka sitaonon na giot taononnia hara ni Au." 9:17 Si Ananias pe antong kehe ma tu bagas i jana dipayakkon ia ma tangannia tu si Saulus. Didok ia ma, "Ale Saulus, kahanggingku, Tuhan Jesus na niidami di tonga dalan laho tuson ho, Ia do na marsuru au mandapotkon ho anso marnida ho mangulahi jana digohi Tondi Parbadia." 9:18 Di na santongkin i manigor adong ma songon sisik ni ihan madabu sian mata ni si Saulus jana gabe marnida ma ia mangulahi. Jongjong ma ia lalu dipandidihon. 9:19 Jadi dung mangan ia, mulak ma gogonia. Laing di Damaskus ma si Saulus rap dohot angka anak sisean i piga-piga ari nari. 9:20 Torus masuk ma ia tu angka bagas paribadatan, jana dipungka ia ma manjamitahon paboa Jesus i do Anak Ni Debata. 9:21 Homang ma sude halak pabege-bege si Saulus. Didok halahi ma, "Nada he on do ibana na di Jerusalem i, na mamunu sude halak na mamio goar ni Jesus? Na niharohonnia pe tuson na giot manangkup halahi do anso obanonnia tu angka sintua ni malim!" 9:22 Tapi mur tamba do sahala ni si Saulus. Homang do roha ni angka halak Jahudi na di Damaskus hara ni na nipapatarnia bahaso Jesus do Kristus i. 9:23 Dung adong sadia honok, marpokat ma halak Jahudi laho mamunu si Saulus. 9:24 Tapi tarboto ma tusia na nitahihon ni halahi i. Dipainte-inte halahi ma arian na borngin di dalan haroroan tu kota i laho mamunu ia. 9:25 Hape ditantan angka anak siseannia i ma si Saulus borngin-borngin di bagasan karanjang sian dingding tembok ni kota i. 9:26 Kehe ma si Saulus tu Jerusalem, jana diusahahon ia ma anso mardomu ia tu angka anak sisean na disi. Tapi mabiar be dope halahi angke nada porsaya dope halahi paboa na dung tutu situtu ia gabe anak sisean. 9:27 Dung i didapotkon si Barnabas ma si Saulus jana dioban ia ma si Saulus mandapotkon angka rasul i. Dicaritohon si Barnabas ma tu halahi sanga na tarbia pangalahona diida si Saulus Tuhan i di tonga dalan, dohot pangkobariNa tusia. Laing dipajojor si Barnabas dope disi na dung puluk si Saulus mangajari di Damaskus di bagasan goar ni Jesus. 9:28 Jadi gabe rap ma si Saulus dohot halahi, jana nada adong biarnia marjamita di Jerusalem mangasahon goar ni Tuhan i. 9:29 Mangkobari ma ia jana marsoal jawab dohot halak Jahudi na marhata Junani, tapi diakalkon halahi do laho mamunu ia. 9:30 Tapi dung tarboto songon i tu angka na asing na dung porsaya i, dioban halahi ma si Saulus tu Kaisarea, sian i ma disuru halahi ia tu Tarsus. 9:31 Jadi sonang ma angka parlagutan na di Judea, na di Galilea dohot na di Samaria. Boti hara ni pangurupi ni Tondi Parbadia gabe mur martamba ma angka parlagutan i, angke sai mabiar do halahi tu Tuhan di ngolu ni halahi. 9:32 Kehe ma si Petrus manopoti angka parlagutan. Di sada ari, ditopot ia ma angka ruas na di Lida. 9:33 Marsuo ma ia disi dohot sada bayo na margoar si Eneas, na sai payak di podomanna hara ni na pangpangon ma pola salapan taon honokna. 9:34 Didok si Petrus ma tu bayo i, "Jesus Kristus do pamalumkon ho, Eneas! Jongjong ma ho, hobasi ma podomanmi," ning ia. Di na santongkin i manigor jongjong ma si Eneas. 9:35 Sude halak Lida dohot halak Saron na midaan si Eneas, gabe porsaya ma halahi sude tu Tuhan. 9:36 Di Jope adong muse do sada anak boru na margoar si Tabita, na porsaya do ia tu Jesus. (Si Dorkas do goarnia di hata Junani, astuanna ursa.) Sai didatdati ia do mambaen na denggan jana sai diurupi ia do angka halak na pogos. 9:37 Jadi marnyae ma ia hatiha i, lalu mate. Dung nididi bangkenia i, dipayakkon ma di bilik na di loteng ni bagas i. 9:38 Nada pola sadia dao dope Jope sian Lida. Jadi dung dibege angka sisean ni Jesus na di Jope, na topet do si Petrus di Lida, disuruhon halahi ma dua halak mandapotkon si Petrus marhite pangidoan, "Patibu ma ro tu inganannami." 9:39 Manigor jongjong ma si Petrus mangihutkon halahi. Jadi dung lalu disi, dioban ma ia tu bilik na di ginjang i. Martangisan ma sude angka ina na mabalu mangarongomi si Petrus, dipatidahon halahi ma tusia angka baju dohot juba na nijait ni si Dorkas di halahi dompak mangolu ia. 9:40 Disuru si Petrus ma halahi sude anso haruar, jana singgang ma ia martangiang. Dung i dipaadop ia ma tu bangke ni si Dorkas jana didok ia ma, "Tabita, ngot ma ho!" Jadi dipabolnang ia ma matania jana dung diida ia si Petrus, juguk ma ia. 9:41 Ditangkup si Petrus ma tanganna i manogu ia laho jongjong. Dung i dipiohon si Petrus ma angka na porsaya i rap dohot angka ina na mabalu i, dipasahat ia ma si Dorkas na mulak mangolu i tu halahi. 9:42 Sar ma barita i di kota Jope, bahat muse ma halak gabe porsaya tu Tuhan. 9:43 Laing disi ma si Petrus sanga na piga-piga ari nari, di bagas ni tukang kulit na margoar si Simon.
10:1 Adong ma sada bayo di Kaisarea na margoar si Kornelius, i ma komandan ni "Tentara Italia". 10:2 Halak na mangkabiari Debata do ia jana sude do halahi sabagas sai marsomba tu Debata. Bahat do ditolong ia halak Jahudi na pogos-pogos jana sai martangiang do ia tu Debata. 10:3 Jadi di sada ari hira-hira pukul tolu arian, tangkas ma diida ia di bagasan sada parnidaan, ro sada surusuruan ni Debata mamiohon ia, "Ale Kornelius!" 10:4 Diligi ia ma tu surusuruan i mardongan biar, didok ia ma, "Aha do ulaning Tuan?" Dialusi surusuruan i ma, "Madung dijagit Debata tangiang dohot denggan ni rohamu jana diingot Debata do ho. 10:5 Saonnari, suruhon ma halak tu Jope mangalap si Simon, na nigoaran muse Simon Petrus. 10:6 Di bagas ni tukang kulit na margoar si Simon muse do ia manompang, di topi ni laut do bagas i." 10:7 Jadi dung kehe surusuruan na mangkobari i dohot si Kornelius, dipiohon ia ma dua halak parkarejo di bagasnia dohot sada halak tentara pangawalnia na mabiar mida Tuhan. 10:8 Dipaboa si Kornelius ma tu halahi na niidania i jana disuru ia ma halahi tu Jope. 10:9 Ancogotna i, di na mardalan halahi marayak lalu tu Jope, manaek ma si Petrus tu tarup ni bagas giot martangiang, hira-hira pukul dua bolas tonga ari. 10:10 Giot mangan ma ia hara ni malena dihilala ia. Dompak na paradehon panganan i ia, ro ma sada parnidaan tusia. 10:11 Diida ia ma mungkap langit jana disurduhon ma tu toru tarsongon abit na bidang, na gantung di suhi-suhina na opat i. 10:12 Adong ma disi sude binatang siopat pat, sude ragam ni binatang na manjurur dohot angka unggas na riar. 10:13 Adong muse ma sora na mandok tusia, "Petrus, jongjong ma ho! Samboli ma i jana pangan!" 10:14 Dialusi si Petrus ma, "Nada le Tuhan! Nada unjung dope hupangan na haram dohot na hodar." 10:15 Didok sora i ma mangulahi tusia, "Sanga aha na nihalalkon ni Debata, ulang ma etong na haram i." 10:16 Jabat tolu noli mulak-ulak sai ro parnidaan i, baru pe diangkat abit i tu langit. 10:17 Sapa-sapa ma si Petrus mamikiri sanga aha arti ni parnidaan i. Dompak marpikir-pikir ia, madung dapot halak na nisuru ni si Kornelius i hape bagas ni si Simon i jana madung di jolo ni pintu ni bagas i halahi jongjong. 10:18 Jadi dipiohon halahi ma halak laho manyapai sanga na adong do di bagas i tamu marborngin na margoar si Simon Petrus. 10:19 Jadi di na mamikiri astuan ni parnidaan i dope si Petrus didok Tondi i ma tusia, "O Petrus, adong ro tolu halak *TOLU HALAK: Dipiga-piga-piga naskah narobi didok: Halak; di sada naskah didok: Dua halak.* manjalahi ho. 10:20 Pasigop ma mijur jana ulang pola ganggu rohamu mangihutkon halahi, na Husuru do halahi." 10:21 Jadi mijur ma si Petrus tu toru, didok ia ma tu sitolu halak i, "Au do na nijalahanmunu i. Aha do ulaning na niharohonmunu?" 10:22 Dialusi halahi ma, "Na nisuru ni kapten Kornelius do hami tuson. Halak na burju do ia jana mabiar mida Debata, boti sangap do ia dibaen halak Jahudi. Na ro do sahalak surusuruan na badia marsuru ia mangidohon anso ro tuan i tu bagasnia, angke giot begeonnia jamita sian ho." 10:23 Jadi disuru si Petrus ma halahi masuk, marborngin disi. Ancogotna i kehe ma si Petrus rap dohot halahi. Dohot muse do deba halak na porsaya sian Jope mangihutkon halahi. 10:24 Dung ancogotna i, lalu ma halahi tu Kaisarea. Madung disi si Kornelius rap dohot angka koum sisolkotnia songon i muse dohot angka aleale haposan ni rohana na nipiohonnia laho painte-intehon. 10:25 Dung masuk si Petrus, dialo-alo si Kornelius ma ia jana unduk ma ia di jolo ni pat ni si Petrus. 10:26 Tapi ditogu si Petrus ma ia jongjong, jana didok ma tusia, "Jongjong ma ho! Au pe laing jolma do." 10:27 Hatiha na mangkobari i, laing masuk ma si Petrus tu bagas i. Madung marlagut bahat halak disi diida ia. 10:28 Dung i mandok hata ma ia tu halahi, "Diboto hamu do, na so tola do halak Jahudi hara ni ugamo ni halahi mardongan dohot angka bangso na asing sanga masuk tu bagas ni halahi. Tapi madung dipatidahon Debata tu au, na so tola dokkononku hodar sanga haram sanga na ise pe. 10:29 Hara ni i, nada dokdok rohangku di na nipio au ro tuson. Jadi saonnari husapai ma hamu, aha ma harana dibaen na nipiomunu au?" 10:30 Dialusi si Kornelius ma, "Tolu ari na salpu, laing tarsongon on ma hatiha i pukul tolu arian, martangiang *MARTANGIANG: Dipiga-piga-piga naskah narobi didok: Martangiang dohot marpuaso.* do au di bagaskon. Na so huambang-ambang ro ma sada bayo jongjong di jolongku. Marlinang noma idaon baju ni bayo i. 10:31 Didok ia ma, 'Kornelius! Madung dijagit Debata tangiangmi jana diingot Ia do denggan ni rohamu. 10:32 Antong suru ma halak tu Jope mangalap bayo na margoar si Simon Petrus, na marborngin di bagas ni tukang kulit na margoar si Simon muse, di topi laut do bagas i.' 10:33 Hara ni i do umbaen na husuru manigor halak mangalap tuan i. Jana songon i ma burju ni rohamu ro tuson. Saonnari madung lagut hami dison, di adopan ni Debata laho umbege sudena na nitonahon ni Tuhan tu ho." 10:34 Dung i mandok hata ma si Petrus, "Saonnari tangkas ma huastui, na sarupa do hape sude jolma diida Debata. 10:35 Sanga ise na mabiar mida Debata jana na mambaen na denggan dijagit Debata do halahi, so pola marimbar sanga sian bangso dia. 10:36 Hamu ale angka dongan, tontu madung diboto hamu isi ni jamita na nipabolkas ni Debata tu halak Israel. Jamita Na Denggan do barita i na paboahon dame markite-hite Jesus Kristus, i ma Tuhan ni sude jolma. 10:37 Tontu diboto hamu muse do ale angka dongan, sanga aha na tarjadi di sude Luat Judea, i ma na mamungka sian Galilea dung hamamasa ni pandidion na nidok ni si Johannes. 10:38 Diboto hamu do, na dung dipili Debata do Jesus halak Nasaret i, jana dilehen tuSia Tondi Parbadia dohot kuaso. Laing diboto hamu do, na dung mardalani Jesus i tudia-tudia mambaen na denggan; dipamalum Ia sudena halak na nitaluhon ni Sibolis, angke didongani Debata do Ia. 10:39 Hami sandiri ma na marnida sasudena na nibaenNia i di luat ni halak Jahudi dohot di Jerusalem. Tapi haru songon i pe diparsilangkon halahi do Ia jana dibunu. 10:40 Hape di ari patoluhon dipangolu Debata ma Ia mangulahi sian hamatean jana patidahon diriNa tu halak; 10:41 nada tu na sabangso on, tapi hum tu hami do, i ma na dung jolo dipili Debata hian gabe saksiNia: Mangan minum do hami rap dohot Ia dung mulak mangolu Ia sian hamatean. 10:42 Jana disuruhon Ia ma hami mamaritahon Jamita Na Denggan i tu bangso on, dohot mangalehen hasaksian paboa Ia do na niangkat ni Debata gabe Panguhum tu angka jolma na mangolu dohot tu angka jolma na dung mate. 10:43 Sude do angka panurirang manaringoti Ia. Didok halahi, dapotan hasesaan ni dosa do sudena halak na porsaya tu Jesus, markite-hite goarNia." 10:44 Dompak na mandok hata i dope si Petrus, mijur ma Tondi Parbadia manggohi sudena halak na umbege barita i. 10:45 Homang ma roha ni halak Jahudi na dung porsaya i tu Jesus, i ma na rap dohot si Petrus i, na marnida bahaso dilehen Debata do muse Tondi Parbadia tu bangso na asing. 10:46 Angke dibege halahi do mangkobari angka bangso na asing i di bagasan hata na marragam-ragam dohot mamuji-muji hagodangan ni Debata. Jadi didok si Petrus ma, 10:47 "Ligi hamu ma! Madung dapotan Tondi Parbadia halak on songon hita. Tarlarang jolma dope he halahi pandidihonon dohot aek?" 10:48 Dung i disuru si Petrus ma halahi nididihon markite-hite goar ni Jesus Kristus. Dung i dipangido halahi ma anso laing tinggal si Petrus rap dohot halahi sanga na piga-piga ari honokna.
11:1 Tarbege ma tu angka rasul dohot tu angka na porsaya di sude Luat Judea hape na dung dohot do angka bangso na asing manjagit hata ni Debata. 11:2 Jadi dung manangkok si Petrus tu Jerusalem hona hata ma ia dibaen halak Jahudi na porsaya i. Didok halahi ma, 11:3 "Biasi kehe ho tu bagas ni halak na so marsunat? Mangan muse dope ho rap dohot halahi!" 11:4 Jadi gabe dipatorang si Petrus ma tu halahi sudena na masa i sian mulana. Ning ia ma, 11:5 "Na martangiang do au di Jope, jadi tompu ma songon na mago rohangku, huida ma sada parnidaan. Huida ma ro tarsongon sada abit na bidang mijur sian langit, na gantung di suhi-suhi na opat i, jana so ma di lambungku. 11:6 Jadi dung huligi tu bagasan, huida ma angka binatang si opat pat, angka binatang na manjurur dohot angka unggas na riar. 11:7 Dung i hubege muse ma sora na mandok tu au, 'Jongjong ma ho, Petrus! Parsamboli ma i jana papangani!' 11:8 Tapi hualusi ma, 'Nada le Tuhan! Nada unjung dope hupangan sipanganon na haram sanga na hodar.' 11:9 Tapi didok sora i ma sian langit mangulahi, 'Sanga aha na dung dihalalkon ni Debata ulang ma didok i na haram.' 11:10 Jabat tolu noli huida pangalaho i jana ujungna diangkat ma sudena i tu langit. 11:11 Jadi hatiha i ma sitolu halak na sian Kaisarea na disuru mandapotkon au *AU: Dipiga-piga-piga naskah narobi didok: Hami.* lalu di bagas parbornginanki. 11:12 Dung i disuru Tondi i ma au rap kehe dohot halahi so pola ganggu rohangku. Dohot do dongan sionom halak on rap dohot au tu Kaisarea, jana rap masuk do hami tu bagas ni si Kornelius. 11:13 Dung i dipajojor si Kornelius ma tu hami na niidania ro sahalak surusuruan jongjong di bagasnia mandok, 'Suruhon ma halak tu Jope mamiohon bayo na margoar si Simon Petrus. 11:14 Paboaonnia ma tu ho barita na paluahon ho rap dohot hamu na sabagas.' 11:15 Jadi di na hupungka mandok hata, ro ma Tondi Parbadia tu halahi tudos tu na masa tu hita nabaruon di mulana i. 11:16 Jadi tarsingot ma tu rohangku, na jungada didok Tuhan i, 'Si Johannes mandidihon dohot aek, tapi anggo hamu nipandidihon dohot Tondi Parbadia.' 11:17 Jadi tangkas do, dilehen Debata muse do tu halak na so marugamo Jahudi silehen-lehen na sarupa songon na nilehenNia tu hita di na tahaporsayai Tuhan Jesus Kristus. Antong, bia ma he pangalarangku di Debata!" 11:18 Jadi dung dibege halahi hata nangkinan i, nada be sai dialo halahi si Petrus. Dung i dipuji halahi ma Debata. Didok halahi ma, "Antong dipadohot Debata do halak na so marugamo Jahudi laho paubahon roha sian angka dosana be anso mangolu halahi." 11:19 Dung hona bunu si Stefanus, mamungka ma diayak-ayak sanga ise na porsaya tu Jesus, jana gabe marserak ma halahi sanga na tu dia. Adong ma na kehe lalu tu Punisia, adong muse ma na lalu tu Siprus dohot Antiokia. Hum tu halak Jahudi do dijamitahon halahi barita na sian Debata i. 11:20 Tapi adong do sian angka na porsaya i na marasal sian Siprus dohot sian Kirene na kehe lopus tu Antiokia. Jana dijamitahon halahi do Jamita Na Denggan bahaso Tuhan do Jesus i dohot tu angka halak Junani. 11:21 Jadi didongani tangan ni Tuhan do halahi mambaen bahat halak gabe porsaya jana pasahatkon dirina tu Tuhan. 11:22 Lalu do angka barita taringot tu angka na masa on lopus tu parlagutan na di Jerusalem. Jadi gabe disuru halahi ma si Barnabas tu Antiokia. 11:23 Jana dung lalu si Barnabas disi, diida ia ma sanga na bia pamasumasu ni Debata di halahi, gabe jop sajo ma rohania. Dung i dipaingot ia ma halahi anso tongtong marsihohot tu Tuhan i. 11:24 Na dengganan do roha ni si Barnabas on jana na nirajaan ni Tondi Parbadia boti porsaya situtu do ia tu Tuhan, jadi gabe bahat do halak na mangihutkon Tuhan i. 11:25 Dung i kehe ma si Barnabas tu Tarsus manjalahi si Saulus. 11:26 Dung marsuo ia dohot si Saulus, dioban ia ma si Saulus tu Antiokia, disi ma halahi sataon rap dohot parlagutan na di kota i, jana laing mangajari ma halahi tu halak na bahat. Di Antiokia on ma halak na porsaya tu Jesus na parjolo situtu digoari halak Kristen. 11:27 Jadi marroan ma angka panurirang sian Jerusalem hatiha i tu Antiokia. 11:28 Jadi jongjong ma sahalak sian halahi na margoar si Agabus. Dipatubu Tondi i ma tu rohania laho paboahon na giot masa haleon potir di tano on sudena. (Jana tutu do masa haleon potir di hatiha ni Kesar Klaudius mamarenta.) 11:29 Jadi saroha ma sudena angka na porsaya i tu Jesus laho manongos pangurupion tu angka dongan na tinggal di Judea; marguru tu gogona be ma ditongos. 11:30 Dipatulus be do tahi i, jana si Barnabas ma dohot si Saulus disuru halahi manaruhon pangurupion i tu angka pangituai ni parlagutan i.
12:1 Di hatiha i mamungka ma Raja Herodes *RAJA HERODES: I ma si Herodes Agripa I, ia ma na mangarajai sude luat ni bangso Jahudi.* mamparkanciti piga-piga halak sian ruas ni parlagutan. 12:2 Hara ni parentania, dibunu ma si Jakobus anggi ni si Johannes dohot podang. 12:3 Dung diida Raja Herodes na sonang do roha ni halak Jahudi mida pambaenannia i, gabe didatdati ia ma mambaen na songon i, disuru ia muse ma ditangkup si Petrus. Hatiha Ari Pesta Roti Na So Marragi ma i dipajadi. 12:4 Dung ditangkup si Petrus, dipamasuk halahi ma ia tu hurungan. Diparentahon ma opat rombongan tentara manjago si Petrus di hurungan i. Opat halak ma tentara i sapunguan. Dung sidung Ari Pesta Paskah pe anso adilan ni Raja Herodes si Petrus di jolo ni halak na bahat. 12:5 Jadi ditahan ma si Petrus di hurungan i; tapi anggo angka anggota ni parlagutan i, sai torus do halahi marsitutu manangiangkon si Petrus tu Tuhan. 12:6 Borngin i andorang so paadopon ni Raja Herodes si Petrus tu jolo ni halak na bahat, modom ma si Petrus laing dirante di antara ni dua halak tentara panjago i. Laing dijagoi tentara na asing i do sude pintu ni hurungan i. 12:7 Jadi ompot ma jongjong Surusuruan Ni Tuhan disi, jana gabe ro ma sinondang na torang di bagasan kamar ni hurungan i. Dihutur-hutur surusuruan i ma si Petrus lopus tarsunggul. Dung i didok surusuruan i ma, "Ompoti ma ngot!" Manigor talgang ma rante i sian tangan ni si Petrus. 12:8 Dung i didok surusuruan i ma tusia, "Hohosi ma ho jana pake ma sipatumi!" Dibaen ia ma songon i. Didok surusuruan i ma muse, "Pake ma bajumu jana ihutkon ma au!" 12:9 Diihutkon si Petrus ma surusuruan i ruar sian hurungan i. Tapi nada diboto si Petrus hape na tutu do tarjadi na nibaen ni surusuruan i. Ning rohania bagi na songon parnidaan sajo do na masa i. 12:10 Dung disalpui halahi panjago na parjolo dohot na paduahon, lalu ma halahi tu pintu bosi, i ma haruaran tu kota i. Mungkap sandiri ma pintu i, haruar ma halahi, dibolus halahi ma sada dalan na sompit. Jadi tompu ma ditadingkon surusuruan i si Petrus. 12:11 Dung i pe anso tarhalak si Petrus jana diboto ia ma aha na tarjadi i tusia, gabe didok ia ma, "Saonnari pe anso tangkas huboto na tutu situtu do hape ditongos Tuhan i surusuruanNia paluahon au sian kuaso ni Raja Herodes dohot sian sasude na giot baenon ni halak Jahudi i tu au." 12:12 Dung diboto si Petrus na songon i pangalahona, kehe ma ia tu bagas ni si Maria, inang ni si Johannes na nigoaran muse si Markus. Madung bahat disi marlagut halak jana martangiang. 12:13 Ditektek si Petrus ma pintu i sian ruar, jana ro ma sahalak naposo dadaboru na margoar si Rode laho mangungkap pintu i. 12:14 Manigor ditanda ia ma sora ni si Petrus. Hara ni jop ni rohania, diompoti ia ma masuk mangulahi so jolo dibuka ia pintu i; dipaboa ia ma tu halak na disi, na di jolo ni pintu i do si Petrus. 12:15 Jadi didok halahi ma tu dadaboru i, "Na lalaen do ho!" Tapi laing digogohon ia do mandok, na tutu do i. Jadi didok halahi ma, "Surusuruannia do da i!" 12:16 Jadi laing dipupu si Petrus ma manektehi pintu i. Jadi dung dibuka halahi pintu i, diida halahi ma tutu si Petrus, homang sajo ma roha ni halahi. 12:17 Jadi dihiap si Petrus ma halahi anso hohom dung i dibaritahon ia ma tu halahi pardalanna na diparuar Tuhan i ia sian hurungan i. Jadi ning ia ma, "Paboa hamu ma jolo on tu si Jakobus dohot tu angka dongan na asing i." Dung i kehe ma si Petrus manadingkon inganan i tu inganan na asing. 12:18 Manyogotna i masa ma hagaoran di tonga-tonga ni angka tentara na manjago i. Sapasapa ma halahi aha do na dung tarjadi tu si Petrus. 12:19 Disuru Raja Herodes ma na manjalahi si Petrus, hape nada dapot halahi be ia. Jadi diparentahon Raja Herodes ma anso nipareso angka tentara panjago i lalu nibunu. Dung i kehe ma Raja Herodes sian Judea tu Kaisarea, disi ma ia maringanan sanga na sadia honok. 12:20 Muruk sajo ma roha ni Raja Herodes mida halak Tirus dohot halak Sidon. Jadi rap kehe ma halahi mangadop tu Raja Herodes. Jolo dielek halahi ma si Blastus kapala ni bagas godang ni raja i, anso mamihak tu halahi ia. Dung i kehe ma halahi mangadop tu si Herodes mangidohon anso mardame, angke sian harajaan ni Raja Herodes do haroroan ni panganon tu luat ni halahi. 12:21 Di sada ari na dung ditontuhon, dipake Raja Herodes ma pakean hasangapannia, juguk ma ia di habangsa ni harajaannia i marpidato di jolo ni rayatnia. 12:22 Marsurahi ma rayat na umbege pidatonia i mandok, "Hata ni debata do on, nada hata ni jolma be da i!" ning halahi. 12:23 Santongkin i manigor ro ma Surusuruan Ni Tuhan manampeleng si Herodes, hara ni na so nihormatannia Debata. Dipapangani binga ma ia lalu mate. 12:24 Mur rarat ma hata ni Debata jana mur gogo. 12:25 Dung sidung tohap na nikarejohon ni si Barnabas dohot si Saulus, mulak ma halahi sian *SIAN: Dipiga-piga-piga naskah narobi didok: Tu.* Jerusalem, dioban halahi ma si Johannes Markus rap dohot halahi.
13:1 Adong do angka panurirang dohot angka guru di parlagutan na di Antiokia. I ma angka si Barnabas, si Simeon na nigoaran muse si Niger (astuanna 'Si Lomlom'), si Lukius halak Kirene, si Menahem, bayo na dipagodang-godang rap dohot Gubernur Herodes *GUBERNUR HERODES: I ma si Herodes Antipas na mamarenta di Galilea.* dohot si Saulus. 13:2 Jadi sanoli dompak marsomba halahi tu Tuhan jana puaso, ro ma Tondi Parbadia tu halahi mandok, "Paasing hamu ma si Barnabas dohot si Saulus di Au, anso markarejo halahi di parkarejoan na Hutontuhon tu halahi." 13:3 Dung jolo puaso jana martangiang, dipayakkon halahi ma tanganna be tu si Barnabas dohot tu si Saulus, jana disuru halahi ma si dua halak i. 13:4 Hara ni parsuru ni Tondi Parbadia, kehe ma si Barnabas dohot si Saulus tu Seleukia. Sian i, markapal ma halahi tu pulo Siprus. 13:5 Dung lalu di Salamis, dijamitahon halahi ma hata ni Debata di angka bagas paribadatan ni halak Jahudi. Diurupi si Johannes Markus ma halahi di pardalanan i. 13:6 Didalani halahi ma sude pulo i lopus tu Papos. Marsuo ma halahi disi dohot sada halak Jahudi na margoar si Barjesus. Parelmu jana panurirang pargabus do ia. 13:7 Maraleale muse do bayo parelmu on tu si Sergius Paulus gubernur ni pulo i. Na pistar do gubernur i boti na malo. Dipio ia do si Barnabas dohot si Saulus, hara ni por ni rohania laho umbege hata ni Debata. 13:8 Hape dialo si Elimas parelmu i ma si Barnabas dohot si Saulus. Diusahohon si Elimas ma (i ma goarnia di hata Junani) anso ulang sanga porsaya gubernur i tu Jesus. 13:9 Tapi digohi Tondi Parbadia ma si Saulus, na nigoaran muse si Paulus, dipanotnoti ia ma bayo parelmu i, 13:10 didok ia ma, "O anak ni Sibolis! Ho ma musu ni sude na denggan. Biasi dope laing so ra mantak ho manyego-nyego Dalan Ni Tuhan na tigor i? 13:11 Ligi ma saonnari uhumon ni Tuhan ma ho, lopus nada idaonmu be sondang ni mataniari piga-piga ari on," ning si Paulus. Manigor taraso ma di si Elimas, songon na adong na golap manutup matania i, gabe gapa-gapa noma ia mardalan manjalahi halak manogu ia. 13:12 Dung diida gubernur i songon i tarjadi, porsaya ma ia; angke na homang situtu do rohania mida pangajaran taringot tu Tuhan i. 13:13 Sian Papos markapal ma si Paulus rap dohot angka dongannia i tu Perga na di kota Pamfilia. Ditadingkon si Johannes ma halahi disi, mulak ia tu Jerusalem. 13:14 Sian Perga didalani halahi ma lalu tu Antiokia na di Pisidia. Dung Ari Sabat kehe ma halahi masuk tu bagas paribadatan. 13:15 Dung disise Buku Ni si Musa dohot Buku Ni angka Panurirang, disuru angka pamimpin ni ibadat na disi i ma betak adong na giot mandok hata di halahi. "Hamu ale angka dongan, betak na adong do sipaingotmunu tu angka halak na bahat on, dok hamu ma." 13:16 Jadi jongjong ma antong si Paulus, dihiap ia ma dohot tangannia, laho mandok hata ia, "Hamu ale angka dongan halak Israel, bope sude angka dongan na asing na mangkabiari Debata na adong dison! Marsitangi-tangian ma jolo hita: 13:17 Madung dipili Debata ni Israel angka ompunta i, jana dibaen Ia gabe bangso na godang bangsonta on hatiha halak dagang halahi di tano Mesir, dung i diparuar Ia ma halahi sian i markite-hite gogoNia. 13:18 Sobar do Ia paida-ida pangalaho ni halahi *SOBAR DO IA PAIDA-IDA PANGALAHO NI HALAHI: Dipiga-piga-piga naskah narobi didok: Diramoti Ia do halahi.* opat pulu taon honokna di halongonan i. 13:19 Dung i dironcohon Ia pitu bangso di tano Kanaan, dilehen Ia ma tano i di halahi gabe teanonna. 13:20 Opat ratus lima pulu taon honok ni i sudena. *OPAT RATUS LIMA PULU TAON HONOK NI I SUDE: Sanga: Hurang lobi opat ratus lima pulu taon dung i.* Dung sidung dibagi-bagi tano Kanaan i, dilehen Debata ma angka panguhum ni halahi, Panurirang Samuel ma panguhum na parpudi. 13:21 Dung i dipangido halahi ma sada raja. Dilehen Debata ma di halahi si Saul anak ni si Kis sian marga ni halak Benyamin gabe raja ni halahi, opat pulu taon honokna. 13:22 Dung i dipaijur Debata ma ia sian juguhannia i, dipabangkit Debata ma si Daud gabe raja ni halahi. Jana on ma na nidok ni Debata tu si Daud, 'Si Daud anak ni si Isai i do na pasonang rohangKu. Ia do na giot patuluskon hagiotKu.' 13:23 Sian pomparan ni si Daud i ma dipabangkit Debata sada Sipalua di halak Israel, laing songon na nijanjihonNia i hian. Jana Jesus do Kristus i. 13:24 Dompak so dipungka Jesus padalan karejoNia, jolo dipaboa si Johannes do tu halak Israel anso muba roha ni halahi manadingkon angka dosa ni halahi be jana nipandidihon. 13:25 Jana marayak sidung angka karejonia i, didok si Johannes do tu angka jolma i, 'Ise do au ninna rohamunu? Nada au na nipainte-intemunu i. Ingot hamu ma, parpudi dope ro i ulang au; mangkarhari tali ni sipatuNia pe nada tama dope au.' 13:26 Hamu ale angka dongan pinompar ni si Abraham, bope sude angka dongan na asing na adong dison, angka na mangkabiari Debata! Madung ditongos Debata tu hita Jamita haluaan i; 13:27 angke na so pamotoan ni halak Jerusalem dohot angka pamimpin ni halahi, hapengani Ia do Jesus i. Na so mangarti do halahi na tarsurat di pangajaran ni angka panurirang haru pe disise halahi i ganop Ari Sabat, gabe diuhumi halahi ma Jesus. Tapi hara ni na nibaen ni halahi songon i gabe tulus ma na nidok ni angka panurirang hian. 13:28 Haru pe so adong dapot halahi sanga aha na patut mambaen hona bunu Ia, hape laing digogohon halahi do tu si Latus anso laing dibunu Ia. 13:29 Jadi dung salose sudena dibaen halahi na tarsurat taringot tuSia, dipaijur halahi ma bangkeNa i sian hayu parsilang i, dipayakkon halahi ma Ia di kuburan. 13:30 Hape dipangolu Debata ma Ia mangulahi sian na mate i. 13:31 Jadi dipataridahon Ia do diriNia sanga na piga-piga ari tu angka donganNia na ro sian Galilea tu Jerusalem. Halahi ma na gabe saksiNia tu halak Israel. 13:32 Jadi saonnari, na pasahatkon Jamita Na Denggan i ma hami tu hamu ale angka dongan: Sanga aha na nijanjihon ni Debata tu angka ompunta, 13:33 madung dipatulus Ia i sude tu hita markite-hite na nipangoluNia Jesus mangulahi sian hamatean. Angke tarsurat do di Masmur paduahon songon on, 'AnakKu do Ho, sadari on ma Au gabe AmangMu.' 13:34 Madung dipangolu Debata Ia mangulahi sian hamatean. Jadi saonnari nada be daionNia hamatean na di kuburan. Taringot tusi pe didok Debata do, 'LehenonKu ma tu hamu janji na badia na angkon patuluson, i ma na dung Hujanjihon tu si Daud.' 13:35 Hara ni i didok Ia di Masmur na asing, 'Nada loasonMu halak na badiaMu marnida habusuhon i.' 13:36 Madung mate si Daud jana ditanom muse rap dohot angka ompunia, dung dibaen ia sanga aha na nisuruhon ni Debata baenonnia. Abis muse do sude malangke pamatang ni si Daud. 13:37 Tapi anggo Jesus na nipangolu ni Debata mangulahi sian hamatean, nada malangke pamatangNa i. 13:38 Antong patut ma botoonmunu, ale angka dongan, markite-hite Jesus do dijamitahon di hamu hasesaan ni dosa, 13:39 jana nipatigor do ganup halak na porsaya diSia. Nada tarpalua hamu markite-hite tona ni si Musa. 13:40 Hara ni i ma umbaen na angkon tangkas parrohahononmunu ale angka dongan, anso ulang jabat tarjadi tu hamu *TU HAMU: Dipiga-piga-piga naskah narobi nada adong hata on.* songon na nidok ni angka panurirang, songon on, 13:41 'Tangkas ma parrohahon hamu, ale angka pangincahi! Homang ma rohamunu, lopus mate! Angke Hubaen do di hatiha on pangalaho na so tarhaporsayai hamu sandiri, haru pe adong halak na patorangkonsa tu hamu.' " 13:42 Di na laho kehe si Paulus dohot si Barnabas sian bagas paribadatan i, dipangido angka halak na maribadat i ma anso laing ro halahi mangulahi di Ari Sabat na mangihut, laho patorangkon na nidok ni halahi i tumangkas. 13:43 Dung haruar halak na bahat i sian bagas paribadatan i, bahat ma halak Jahudi mangihutkon si Paulus dohot si Barnabas. Dipaingot rasul si dua halak i ma halahi anso marpos ni roha tu asi ni roha ni Debata halahi. 13:44 Di Ari Sabat na mangihut i, bolas dohonon, sude halak na di kota i marroan laho umbege hata ni Tuhan. 13:45 Jadi dung diida halak Jahudi songon i, gabe mangiburu ma halahi. Diincahi halahi ma si Paulus jana dialo halahi ma sude hata na nidoknia i. 13:46 Tapi mur barani do si Paulus dohot si Barnabas mandok hata. Didok halahi ma, "Tutu do i angkon jolo paboaon do hata ni Debata tu hamu. Tapi hara ni na so ra hamu manjagitsa disi ma ditontuhon hamu sandiri paboa na so tama hamu manjagit ngolu na so mantak i. Jadi saonnari tadingkononnami ma hamu, kehe ma hami mandapotkon bangso na asing. 13:47 Angke songon on do diparentahon Tuhan tu hami di na nidokNia, 'Madung Hutontuhon hamu gabe sada sondang tu angka bangso na asing na so Jahudi; anso paroonmunu haluaan tu na satano on.' " 13:48 Dung dibege angka bangso na asing na so Jahudi i hata ni halahi i, jop ma roha ni halahi, dipapuji-puji halahi ma hata ni Tuhan i. Gabe porsaya ma angka halak na nitontuhon ni Debata laho manjagit ngolu na so mantak i. 13:49 Sar ma barita taringot tu hata ni Tuhan i di na saluat i. 13:50 Tapi dijajang halak Jahudi i ma angka dadaboru sian halak na sangap angka na mangkabiari Debata. Dipatubu halahi ma goyak ni roha mida si Paulus dohot si Barnabas, jana dipaorot halahi ma halahi na dua sian luat i. 13:51 Dung i dipaspaskon rasul na dua i ma abuan ni pat ni halahi di jolo ni halak na bahat i, i ma na gabe songon sipaingot. Kehe ma halahi tu Ikonium. 13:52 Sai marmoga-moga do angka siihutkon Jesus na di Antiokia boti digohi Tondi Parbadia do halahi.
14:1 Laing songon i ma di Ikonium. Kehe ma si Paulus dohot si Barnabas tu bagas paribadatan jana songon i ma pangkobari ni halahi di kota i mambaen bahat halak Jahudi dohot angka bangso na asing gabe porsaya tu Jesus. 14:2 Tapi dijajang halak Jahudi na so ra porsaya i ma angka bangso na asing na so Jahudi i, anso goyak roha ni halahi mida angka na porsaya i tu Jesus. 14:3 Jadi gabe honok do si Paulus dohot si Barnabas tinggal disi. Jana di bagasan habaranion dihatahon halahi do taringot tu Tuhan i. Dipatanda Tuhan i muse do antong na tutu jamita ni halahi taringot tu holong ni rohana i; dilehen Ia do gogo tu halahi laho mambaen tanda hahomangan dohot angka pangalaho na so jungada masa. 14:4 Tapi marsalisi pandapot ma halak kota i na sada tu na asing; adong na mamihak tu halak Jahudi, adong muse na mamihak tu rasul i. 14:5 Jadi satahi ma halak Jahudi i rap dohot angka hatobangon ni halahi dohot sudena angka bangso na asing na so Jahudi laho mamparkanciti jana mandangguri rasul na dua i dohot batu. 14:6 Diboto rasul na dua i do pangalaho i, gabe martabuni ma halahi tu Listra dohot tu Derbe, i ma kota na di Luat Likaonia, dohot tu luat na humaliang i. 14:7 Dijamitahon halahi ma mangulahi disi Jamita Na Denggan i. 14:8 Di Listra adong ma sada bayo na pangpangon dioban tubu, na so unjung dope malo ia mardalan hara ni galena patnia i. 14:9 Juguk ma bayo i disi manangi-nangihon si Paulus na mandok hata i. Diida si Paulus porsaya do bayo i, jadi tarpamalum do ia. Jadi ditatap si Paulus ma tusia, 14:10 jana dipagogo si Paulus ma sorania mandok hata, "Tigor ma ho jongjong!" ning ia. Mangambur ma bayo i jongjong lalu mardalan. 14:11 Dung diida halak na nibaen ni si Paulus i, marsurahi ma halahi di hata Likaonia, "Ma mijur angka debata tu tano on marrupa jolma," ninna halahi. 14:12 Dung i digoari halahi ma si Barnabas, si Zeus jana si Paulus digoari halahi Hermes, harana ia do antong na sai mangkatai. 14:13 Ro ma malim ni Debata Zeus na sian bagas parsombaan na di jolo ni kota i, dioban ia ma angka lombu dohot bunga-bunga tu lambung horbangan ni kota i. Giot dohot ia marsomba rap dohot halak na bahat i pasahatkon haul tu rasul na dua i. 14:14 Dung dibege si Barnabas dohot si Paulus na giot baenon ni halahi i, diparsibakkon halahi ma pakean ni halahi marlojongi tu tonga-tonga ni halak na bahat i, marsurak ma halahi, 14:15 "Biasi baenonmunu songon i, hamu ale angka dongan? Laing jolma do hami songon hamu! Na giot manjamitahon Jamita Na Denggan i do hami dison tu hamu angka dongan, anso ditadingkon hamu sudena pangalaho na so marguna on boti anso ro hamu mandapotkon Debata na mangolu i, i ma sitompa langit dohot tano on dohot laut dohot sude na adong di bagasanna. 14:16 Anggo na salpu i dipadiar Debata do angka bangso marsibaen rohana be na mangolu i. 14:17 Tapi nada lupa Ia mangalehen angka bukti taringot tu diriNia, markite-hite na mambaen na denggan. Dilehen Ia do udan tu hamu sian langit i dohot suha ni tano marguru tu hatihana. Dilehen Ia do balanjo di hamu jana dipasonang Ia do rohamunu." 14:18 Tapi haru didok rasul i pe hata na songon i, laing maol do hasundatan halahi jolma na bahat i pasahat haul tu halahi. 14:19 Jadi ro ma halak Jahudi tu Listra sian Antiokia na di Pisidia songon i na sian Ikonium mangirang-irangi halak na bahat i anso mamihak tu halahi. Didangguri halahi ma si Paulus dohot batu, dung i disarat halahi ma ia tu balian ni kota i. Diambang halahi na dung mate ia, 14:20 tapi dung jongjong angka na porsaya i disi mangkaliangi ia, jongjong ma ia masuk mangulahi tu kota i. Ancogotna i kehe ma ia dohot si Barnabas tu Derbe. 14:21 Dijamitahon si Paulus ma dohot si Barnabas Jamita Na Denggan i di Derbe jana bahat ma halak gabe porsaya tu Jesus. Dung i mangulahi ma halahi tu Listra, sian i tu Ikonium lopus tu Antiokia na di Pisidia. 14:22 Dipapos halahi ma roha ni angka na mangihutkon Jesus, jana dipaingot halahi ma angka na mangihutkon Jesus i anso tongtong porsaya tu Jesus. "Angkon jolo bahat do taononta parkancitan baru pe anso maruli hita hatuaan ni Harajaan Ni Debata," ninna rasul i mamodai angka na mangihutkon Jesus di angka kota nangkinan i. 14:23 Diangkat si Paulus dohot si Barnabas ma di angka parlagutan i angka pangituai ni ganop parlagutan. Dung jolo martangiang dohot puaso, dipasahat halahi ma angka pangituai i tu Tuhan na nihaporsayaan ni halahi i. 14:24 Dung i didatdati si Paulus ma dohot si Barnabas pardalanan ni halahi i, disalpui halahi ma Pisidia lopus lalu halahi tu Pamfilia. 14:25 Jadi dung dijamitahon halahi hata ni Debata di Perga, kehe ma halahi tu Atalia, 14:26 sian i markapal ma halahi tu Antiokia. Disi ma halahi na salpu i dipasahat tu Debata na mangkaholongi halahi, laho mangkarejohon tohap na dung nipasidung ni halahi saonnari. 14:27 Dung lalu halahi di Antiokia, dipalagut halahi ma angka dongan na di parlagutan i. Dibaritahon halahi ma sude na dung dibaen Debata markite-hite halahi. Laing dipaboa halahi ma sanga na bia dibaen Debata laho mangungkap dalan anso laing dohot halak na asing na so Jahudi mangkaporsayai Jesus. 14:28 Honok do si Paulus dohot si Barnabas tinggal di kota i rap dohot angka na porsaya i.
15:1 Adong ma piga-piga halak sian Judea ro tu Antiokia, mangajari ma halahi tu angka na porsaya na di kota i mandok, "Nada dapotan haluaan hamu, muda so jolo disunat mangihutkon adat na niajarkon ni si Musa." 15:2 Manggogo do si Paulus dohot si Barnabas mangalo halahi. Ujungna ditontuhon ma anso kehe si Paulus dohot si Barnabas rap dohot deba nari na asing tu Jerusalem laho manaringoti salaho tusi tu angka rasul dohot angka pangituai na disi i. 15:3 Dipataru parlagutan na di Antiokia i ma halahi lalu tu balian ni kota i, halahi pe torus ma mardalan mamolus sian Punisia lalu tu Samaria. Dipaboa halahi ma disi sanga tarbia pangalahona angka bangso na asing na so Jahudi na gabe dohot pasahat dirina tu Debata. Moga sajo do roha ni angka halak na porsaya i disi umbege barita i. 15:4 Jadi dung lalu halahi di Jerusalem, denggan do halahi dijagit parlagutan i, songon i dohot angka rasul i bope angka pangituai na disi. Jadi dicaritohon halahi ma tu angka halak na disi sudena na nibaen ni Debata markite-hite halahi. 15:5 Tapi ro ma deba sian halak Parise na dung porsaya, jongjong mandok hata, "Anggo bangso na asing i na dung gabe porsaya angkon laing nisunat do halahi jana aturkonon laho mangihutkon angka tona ni si Musa." 15:6 Dung i marlagut ma angka rasul dohot angka pangituai i laho mangkatai taringot tusi. 15:7 Lolot do halahi na martukar pikiran i. Ujungna jongjong ma si Petrus mandok hata, "Hamu ale angka dongan! Diboto hamu do di hatiha na salpu, dipili Debata do au sian tonga-tongamunu laho manjamitahon Jamita Na Denggan i tu angka halak na asing na so Jahudi, anso dohot halahi umbegesa dohot mangkaporsayai. 15:8 Jana dipatandahon Debata siida roha ni jolma i do na dung nijagitNia halahi; i ma na nipatuduhonNia di na nilehenNia Tondi Parbadia tu halahi laing songon na dung nilehenNia i tu hita muse. 15:9 Nada mardia imbar hita sian halahi dibaen Debata. Dipaias Ia do roha ni halahi, hara ni na porsaya halahi. 15:10 Antong, hara ni aha dehe umbaen na diujimunu Debata saonnari markite-hite na mangalehen boban na dokdok tu angka sisean on, hape salang angka ompunta i pe dohot hita sandiri so tolap padalankon i? 15:11 Di balik ni i tahaporsayai do, hum hara ni ibo ni roha ni Tuhan Jesus sajo do umbaen na malua hita; laing songon i muse ma halahi." 15:12 Gabe tarhohom ma sudena na marlagut i disi. Dung i dibege halahi ma si Barnabas dohot si Paulus mangulahi mambaritahon sudena tanda-tanda dohot hahomangan na nibaen ni Debata markite-hite halahi di tonga-tonga ni bangso na asing na so Jahudi. 15:13 Dung sidung halahi mangkatai didok si Jakobus ma, "Hamu ale angka dongan! Marsitangi-tangian ma jolo hita. 15:14 Madung nipajojor si Simon bahaso sian mulana madung dipatuduhon Debata holongNia tu angka bangso na asing, anso laing dohot sian halahi dipili Debata na gabe bangsoNia. 15:15 Mardomu do i tu hata ni angka panurirang, songon na tarsurat, 15:16 'Dung i mangulahi ma Au ro, pajongjongonKu ma mangulahi bagas ni si Daud na marumpak i, jana patureonKu ma sego-segona i, anso Hupajongjong mangulahi; 15:17 anso sude halak na teba i manjalahi Tuhan, rap dohot angka bangso na asing na so Jahudi, i ma na dung Hupiohon gabe Au puna.' Songon i ma pandok ni Tuhan i, 15:18 na dung paboahon pangalaho i sian na jolo." 15:19 Jadi anggo mangihutkon pandapotku, nada tola be arsahanta angka bangso na asing na so Jahudi i, na dung pauba rohana tu Debata. 15:20 Tapi angkon laing tatongos ma surat tu halahi paingotkon halahi anso ulang dipangan halahi angka sipanganon na hodar na nihaulkon tu gana-ganaan, sanga markarosuan, sanga pe na mangankon pahan-pahanan na nisongkik sanga mangan mudar. Boti anso laing dipadao halahi dirina sian angka pangalaho na jorngang. 15:21 Harana anggo angka Tona Ni si Musa, madung dibaca i sian nabaruon ganop Ari Sabat di angka bagas paribadatan, jana nijamitahon di ganop kota." 15:22 Putus ma tahi ni angka rasul dohot angka pangituai rap dohot sude anggota ni parlagutan i laho mamili sanga na piga-piga halak sian halahi sisuruon tu Antiokia mandongani si Paulus dohot si Barnabas. Jadi ditodo halahi ma si Silas dohot si Judas na nigoaran muse si Barsabbas. Halak na sangap do halahi na dua dietong sian angka na porsaya di Jerusalem. 15:23 Laing maroban surat do halahi na nisuru i, songon on ma hata ni surat i, "Mandapotkon angka dongan na porsaya na marasal sian bangso na asing na so Jahudi, na maringanan di Antiokia, di Siria dohot di Kilikia. Tabe ma di hamu sian donganmunu, i ma angka rasul dohot angka pangituai. 15:24 Hami bege do adong sian hami on na ro mandapotkon hamu jana mambaen gurgar rohamunu jana gaor pikiranmunu hara ni na niajarkon ni halahi i. Hape nada na hami suru halahi. 15:25 Hara ni i gabe marrapot do hami jana saroha do sude mamili piga-piga halak mandapotkon hamu angka dongan. Ro ma halahi mandapotkon hamu rap dohot donganta si Paulus dohot si Barnabas na hami haholongi. 15:26 Na dung dohot do halahi na dua mangalehen hosana hara ni Tuhanta Jesus Kristus. 15:27 Jadi hami suru ma si Judas dohot si Silas mandapotkon hamu. Patangkason ni halahi sandiri ma tu hamu hata ni surat on. 15:28 Madung tumbuk di roha ni Tondi Parbadia -- jana i do na hami ihutkon anso ulang be nilehen boban na dumokdok sian boban na umporlu on: 15:29 Ulang ma pangan hamu sipanganon na nihaulkon tu gana-ganaan, ulang pangan hamu mudar, ulang pangan hamu binatang na nisongkik, jana ulang ma adong sian hamu angka pangalaho na markarosuan. Muda dipadao hamu dirimunu sian angka pangalaho na songon i, na denggan noma baenonmunu. Horas ma di hamu, botima!" 15:30 Jadi dung marsijalangan, kehe ma halahi na nisuru i tu Antiokia. Dung lalu halahi di Antiokia, dipio halahi ma marlagut sude anggota ni parlagutan i laho pasahatkon surat i. 15:31 Di na manyise surat i anggota ni parlagutan i, moga sajo ma halahi hara ni hata ni surat i na mangapoi roha ni halahi. 15:32 Honok do si Judas dohot si Silas panurirang i mangkobari dohot angka dongan na porsaya i di Antiokia laho pagomos roha dohot patoguhon roha ni halahi. 15:33 Dung adong sanga na sadia honok disi si Judas dohot si Silas, dipabuat halahi ma rasul na dua i mulak jana disuru halahi ma anso dipalalu tabe tu angka na marsuru halahi. 15:34 Tapi anggo si Silas laing tinggal dope ia disi. 15:35 Si Paulus pe dohot si Barnabas laing honok dope tinggal di Antiokia. Mangajari do halahi disi jana marjamita taringot tu hata ni Tuhan rap dohot angka dongan na asing i. 15:36 Nada sadia honok dung i, didok si Paulus ma tu si Barnabas, "Beta ma tatopoti mangulahi angka dongan sahaporsayaan di sude kota na dung tatopoti i nabaruon, tajamitahon ma disi hata ni Tuhan i, anso laing taida sanga na tarbia do pangalaho ni halahi," ning ia. 15:37 Sai giot obanon ni si Barnabas do nian si Johannes Markus, 15:38 hape nada tumbuk be tu roha ni si Paulus padohot si Markus, hara ni na so ra ia rap markarejo dohot halahi di na nitadingkonnia halahi di Pamfilia, na salpu i. 15:39 Gabe marbada godang ma si Paulus dohot si Barnabas lopus marsirang halahi: Dioban si Barnabas ma si Markus markapal laut tu Siprus. 15:40 Ditodo si Paulus ma si Silas dongannia, kehe ma halahi dung jolo dipasahat angka dongan na di Antiokia halahi tu Tuhan na manghaholongi halahi. 15:41 Didalani halahi ma Siria dohot Kilikia; dipatogu halahi ma roha ni angka parlagutan na disi.
16:1 Dipatorus si Paulus ma mardalan tu Derbe, lopus tu Listra. Adong do disi sahalak sisean na margoar si Timoteus. Boru Jahudi do inangnia, tapi madung porsaya tu Jesus; tapi anggo amangnia halak Junani do. 16:2 Sian tonga-tonga ni angka na porsaya na adong di Listra dohot Ikonium, tarbarita do na burju si Timoteus on. 16:3 Giot ni si Paulus dohot ma nian si Timoteus rap dohot ia; jadi gabe dipasunatkon ia ma si Timoteus. Angke sude halak Jahudi na di luat i mamboto, halak Junani do amang ni si Timoteus. 16:4 Di sude kota na nitopot ni halahi i, dipasahat halahi ma haputusan na nibaen ni angka rasul dohot angka pangituai na di Jerusalem i. Dipaingot halahi ma angka dongan na porsaya i anso didalankon halahi angka aturan i. 16:5 Jadi mur dipatogu ma haporsayaan ni parlagutan i, jana mur martamba bahat ma ganop ari. 16:6 Nada dipatola Tondi Parbadia pararaton ni si Paulus dohot si Silas hata ni Debata anggo di Asia. Jadi tu Prigia dohot tu Galatia noma dipatorus halahi mardalan. 16:7 Dung lalu halahi di parbalohan ni Misia dirohahon halahi ma anso masuk nian tu Bitinia, hape dilarang Tondi Ni Jesus do halahi tusi. 16:8 Jadi dipatorus *DIPATORUS: Sanga: Dilewati.* halahi ma sian Misia lopus lalu tu Troas. 16:9 Bornginna i di Troas diida si Paulus ma ro sada halak Makedonia jongjong di jolonia mangido dohot gomos anso taripar ia tu Makedonia mangurupi halahi. 16:10 Dung dijagit si Paulus parnidaan i, manigor markobas ma hami anso kehe tu Makedonia. Angke putus do rohanami mandok, na nisuru ni Debata do hami manjamitahon Jamita Na Denggan i tu angka halak na disi. 16:11 Hami tadingkon ma Troas torus ma hami markapal tu Samotrake, ancogotna i tu Neapolis. 16:12 Sian i ma hami tu Pilippi, i ma sada kota di luat na parjolo di Makedonia. *NA PARJOLO DI MAKEDONIA: Dipiga-piga-piga naskah narobi didok: Sada kota na tarbonggal di Makedonia.* Jajahan ni halak Rom do kota i. Disi ma hami piga-piga ari. 16:13 Hatiha Ari Sabat kehe ma hami tu topi ni batang aek na di ruar ni horbangan ni kota i, angke disi do ninna rohanami inganan parsumbayangan ni halak Jahudi. Jadi hami pajuguk ma disi mangkata-hatai rap dohot angka dadaboru na dung marlagut hian disi. 16:14 Adong ma sahalak sian halahi parjagal abit ungu, si Lidia goarna halak Tiatira. Holong do rohania tu Debata, gabe diungkap Debata ma rohania laho manjagit na niajarkon ni si Paulus tusia. 16:15 Tardidi ma si Lidia dohot halahi na sabagas. Dung nididihon ia, diontang ia ma hami. Didok ia ma tu hami, "Muda na dung tutu do au porsaya tu Tuhan i dietong rohamunu ale angka dongan, antong di bagasku ma hamu manompang," ning ia. Digogohon ia ma anso laing hami oloi pangidoannia i. 16:16 Di sada ari hatiha kehe hami tu inganan partangiangan, marsuo ma hami dohot sada hatoban dadaboru. Na hona setan do anak boru i, jana tarpaboa setanna i do sanga aha na giot masa. Hara ni na sai mangaligi nasib ni halak ia, gabe bahat ma parlaboan ni angka tuannia. 16:17 Sai dipaihut-ihut anak boru i ma si Paulus dohot hami, marsurahi ma ia, "Naposo ni Debata na gumogo i do halak on! Ro pe halahi, na giot paboahon dalan haluaan do tu hamu ale angka dongan!" ning ia. 16:18 Sanga na piga ari sai songon i ma dipardokkoni ia. Goyak ma roha ni si Paulus umbegesa, gabe humusor ma ia manaili tu anak boru i didok ia ma tu tondi i, "Mangasahon goar ni Jesus Kristus, huparentahon anso ruar ho sian anak boru i!" ning ia. Manigor ditadingkon tondi i ma anak boru i. 16:19 Jadi dung torang diboto angka tuanna i na so adong be dapot halahi parlaboan sian ia, ditangkup halahi ma si Paulus dohot si Silas, ditarik halahi ma sidua halak i tu balerong mangadop tu na markuaso. 16:20 Dioban halahi ma si Paulus dohot si Silas mangadop tu jolo ni angka panjabat ni pamarenta Rom, dung i didok halahi ma, "Halak Jahudi do halak on. Mambaen gaor halahi di kotanta on. 16:21 Disosoi halahi do halak anso mangihutkon adat na maralo tu aturan na somal di hita halak Rom. Nada tarjagit hita angka adat na songon i!" ninna halahi. 16:22 Halak na bahat pe dohot ma mangaroro rasul na dua i; songon i panjabat ni pamarenta i pe, disibak halahi ma pakean ni si Paulus dohot si Silas jana disuru halahi ma halak mangaloncing halahi na dua. 16:23 Jadi dung digogo halahi mangaloncing na dua i, dipamasuk ma halahi tu hurungan. Disuru ma kapala ni hurungan i, anso dijago ia dohot denggan sidua halak i. 16:24 Jadi hara ni parenta i, dipamasuk kapala ni hurungan i ma halahi na dua tu kamar parbagasan situtu di hurungan i jana dibayangkon ia dope pat ni halahi tu balok. 16:25 Hira-hira tonga borngin, martangiang ma si Paulus dohot si Silas, angka marende bage halahi mamuji Debata. Dibege angka halak na tarhurung na asing i do halahi na marende i. 16:26 Jadi tompu ma ro lalo na lobi gogo, jabat humutur dohot ojahan ni hurungan i. Marbuka ma sude pintu ni hurungan i jana martaldusan muse ma angka rante ni na tarhurung i sude. 16:27 Tarsonggot ma kapala ni hurungan i, ngot ma ia. Dung diida ia na dung marbuka angka pintu ni hurungan i, disintak ia ma podangnia laho maniham dirinia, diambang ia na dung marlojong sude angka na tarhurung i. 16:28 Hape marsurak ma si Paulus sagogonia, "Ulang hahua dirimu! Dison do hami sudena!" ning ia. 16:29 Dipangido kapala ni hurungan i ma sulu, dilojong ia tu bagasan. Humitir ma ia manungkap di jolo ni si Paulus dohot si Silas. 16:30 Dung i dioban ia ma halahi tu ruar, didok ia ma, "Ale tuan, aha do sibaenonku anso dapot au haluaan i?" ning ia. 16:31 Dialusi si Paulus ma dohot si Silas, "Porsaya ma ho tu Tuhan Jesus! Dapotan haluaan ma ho, dohot sude halak na adong di bagasmu!" ninna halahi. 16:32 Dung i dipajojor si Paulus ma dohot si Silas hata ni Tuhan tu kapala ni hurungan i dohot tu sude halak na di bagasna i. 16:33 Laing di tonga borngin i, dioban kapala ni hurungan i ma halahi, dipaias ia ma angka bugang hara ni pangaloncingan i. Gabe manigor dipandidihon ma ia dohot sude halahi na sabagas. 16:34 Dung i dioban ia ma si Paulus dohot si Silas tu bagasnia dihobasi ma panganon di halahi. Jop sajo noma rohania dohot halahi na sabagas hara ni na dung porsaya halahi saonnari tu Debata. 16:35 Ancogotna i, disuru angka panjabat ni pamarenta Rom i ma polisi tu hurungan laho paboahon parenta anso nipalua si Paulus dohot si Silas. 16:36 Dipaboa kapala ni hurungan i ma tu si Paulus, ning ia ma, "Madung ro parenta sian angka panjabat ni pamarenta laho paluahon tuan i. Mulak ma hamu di bagasan hahorasan!" 16:37 Tapi didok si Paulus ma tu angka polisi na ro i, "Warga negara Rom do hami. Haru so jolo diadili, hape manigor diloncingi hami di jolo ni halak na bahat jana dipamasuk tu hurungan. Hape saonnari suruon ni halahi ma hami kehe sajo songon i sip-sip? Inda ra hami songon i! Suru hamu angka panjabat ni pamarenta i ro tuson. Angkon halahi sandiri do ro paluahon hami," ning ia. 16:38 Dilapurkon angka polisi i ma songon i tu angka panjabat ni pamarenta Rom. Dung dibege halahi warga negara Rom do hape si Paulus dohot si Silas, gabe mabiar ma halahi. 16:39 Dung i kehe ma halahi mangido maap tu si Paulus dohot si Silas, jana ditaruhon halahi ma sidua halak i ruar sian hurungan i; dipangidohon halahi muse ma anso laing morot halahi na dua sian kota i. 16:40 Kehe ma si Paulus dohot si Silas sian hurungan i tu bagas ni si Lidia. Dung marsuo bohi halahi rap dohot angka na porsaya disi, diapoi halahi na dua ma roha ni halahi, dung i kehe ma si Paulus dohot si Silas.
16:1 Dipatorus si Paulus ma mardalan tu Derbe, lopus tu Listra. Adong do disi sahalak sisean na margoar si Timoteus. Boru Jahudi do inangnia, tapi madung porsaya tu Jesus; tapi anggo amangnia halak Junani do. 16:2 Sian tonga-tonga ni angka na porsaya na adong di Listra dohot Ikonium, tarbarita do na burju si Timoteus on. 16:3 Giot ni si Paulus dohot ma nian si Timoteus rap dohot ia; jadi gabe dipasunatkon ia ma si Timoteus. Angke sude halak Jahudi na di luat i mamboto, halak Junani do amang ni si Timoteus. 16:4 Di sude kota na nitopot ni halahi i, dipasahat halahi ma haputusan na nibaen ni angka rasul dohot angka pangituai na di Jerusalem i. Dipaingot halahi ma angka dongan na porsaya i anso didalankon halahi angka aturan i. 16:5 Jadi mur dipatogu ma haporsayaan ni parlagutan i, jana mur martamba bahat ma ganop ari. 16:6 Nada dipatola Tondi Parbadia pararaton ni si Paulus dohot si Silas hata ni Debata anggo di Asia. Jadi tu Prigia dohot tu Galatia noma dipatorus halahi mardalan. 16:7 Dung lalu halahi di parbalohan ni Misia dirohahon halahi ma anso masuk nian tu Bitinia, hape dilarang Tondi Ni Jesus do halahi tusi. 16:8 Jadi dipatorus *DIPATORUS: Sanga: Dilewati.* halahi ma sian Misia lopus lalu tu Troas. 16:9 Bornginna i di Troas diida si Paulus ma ro sada halak Makedonia jongjong di jolonia mangido dohot gomos anso taripar ia tu Makedonia mangurupi halahi. 16:10 Dung dijagit si Paulus parnidaan i, manigor markobas ma hami anso kehe tu Makedonia. Angke putus do rohanami mandok, na nisuru ni Debata do hami manjamitahon Jamita Na Denggan i tu angka halak na disi. 16:11 Hami tadingkon ma Troas torus ma hami markapal tu Samotrake, ancogotna i tu Neapolis. 16:12 Sian i ma hami tu Pilippi, i ma sada kota di luat na parjolo di Makedonia. *NA PARJOLO DI MAKEDONIA: Dipiga-piga-piga naskah narobi didok: Sada kota na tarbonggal di Makedonia.* Jajahan ni halak Rom do kota i. Disi ma hami piga-piga ari. 16:13 Hatiha Ari Sabat kehe ma hami tu topi ni batang aek na di ruar ni horbangan ni kota i, angke disi do ninna rohanami inganan parsumbayangan ni halak Jahudi. Jadi hami pajuguk ma disi mangkata-hatai rap dohot angka dadaboru na dung marlagut hian disi. 16:14 Adong ma sahalak sian halahi parjagal abit ungu, si Lidia goarna halak Tiatira. Holong do rohania tu Debata, gabe diungkap Debata ma rohania laho manjagit na niajarkon ni si Paulus tusia. 16:15 Tardidi ma si Lidia dohot halahi na sabagas. Dung nididihon ia, diontang ia ma hami. Didok ia ma tu hami, "Muda na dung tutu do au porsaya tu Tuhan i dietong rohamunu ale angka dongan, antong di bagasku ma hamu manompang," ning ia. Digogohon ia ma anso laing hami oloi pangidoannia i. 16:16 Di sada ari hatiha kehe hami tu inganan partangiangan, marsuo ma hami dohot sada hatoban dadaboru. Na hona setan do anak boru i, jana tarpaboa setanna i do sanga aha na giot masa. Hara ni na sai mangaligi nasib ni halak ia, gabe bahat ma parlaboan ni angka tuannia. 16:17 Sai dipaihut-ihut anak boru i ma si Paulus dohot hami, marsurahi ma ia, "Naposo ni Debata na gumogo i do halak on! Ro pe halahi, na giot paboahon dalan haluaan do tu hamu ale angka dongan!" ning ia. 16:18 Sanga na piga ari sai songon i ma dipardokkoni ia. Goyak ma roha ni si Paulus umbegesa, gabe humusor ma ia manaili tu anak boru i didok ia ma tu tondi i, "Mangasahon goar ni Jesus Kristus, huparentahon anso ruar ho sian anak boru i!" ning ia. Manigor ditadingkon tondi i ma anak boru i. 16:19 Jadi dung torang diboto angka tuanna i na so adong be dapot halahi parlaboan sian ia, ditangkup halahi ma si Paulus dohot si Silas, ditarik halahi ma sidua halak i tu balerong mangadop tu na markuaso. 16:20 Dioban halahi ma si Paulus dohot si Silas mangadop tu jolo ni angka panjabat ni pamarenta Rom, dung i didok halahi ma, "Halak Jahudi do halak on. Mambaen gaor halahi di kotanta on. 16:21 Disosoi halahi do halak anso mangihutkon adat na maralo tu aturan na somal di hita halak Rom. Nada tarjagit hita angka adat na songon i!" ninna halahi. 16:22 Halak na bahat pe dohot ma mangaroro rasul na dua i; songon i panjabat ni pamarenta i pe, disibak halahi ma pakean ni si Paulus dohot si Silas jana disuru halahi ma halak mangaloncing halahi na dua. 16:23 Jadi dung digogo halahi mangaloncing na dua i, dipamasuk ma halahi tu hurungan. Disuru ma kapala ni hurungan i, anso dijago ia dohot denggan sidua halak i. 16:24 Jadi hara ni parenta i, dipamasuk kapala ni hurungan i ma halahi na dua tu kamar parbagasan situtu di hurungan i jana dibayangkon ia dope pat ni halahi tu balok. 16:25 Hira-hira tonga borngin, martangiang ma si Paulus dohot si Silas, angka marende bage halahi mamuji Debata. Dibege angka halak na tarhurung na asing i do halahi na marende i. 16:26 Jadi tompu ma ro lalo na lobi gogo, jabat humutur dohot ojahan ni hurungan i. Marbuka ma sude pintu ni hurungan i jana martaldusan muse ma angka rante ni na tarhurung i sude. 16:27 Tarsonggot ma kapala ni hurungan i, ngot ma ia. Dung diida ia na dung marbuka angka pintu ni hurungan i, disintak ia ma podangnia laho maniham dirinia, diambang ia na dung marlojong sude angka na tarhurung i. 16:28 Hape marsurak ma si Paulus sagogonia, "Ulang hahua dirimu! Dison do hami sudena!" ning ia. 16:29 Dipangido kapala ni hurungan i ma sulu, dilojong ia tu bagasan. Humitir ma ia manungkap di jolo ni si Paulus dohot si Silas. 16:30 Dung i dioban ia ma halahi tu ruar, didok ia ma, "Ale tuan, aha do sibaenonku anso dapot au haluaan i?" ning ia. 16:31 Dialusi si Paulus ma dohot si Silas, "Porsaya ma ho tu Tuhan Jesus! Dapotan haluaan ma ho, dohot sude halak na adong di bagasmu!" ninna halahi. 16:32 Dung i dipajojor si Paulus ma dohot si Silas hata ni Tuhan tu kapala ni hurungan i dohot tu sude halak na di bagasna i. 16:33 Laing di tonga borngin i, dioban kapala ni hurungan i ma halahi, dipaias ia ma angka bugang hara ni pangaloncingan i. Gabe manigor dipandidihon ma ia dohot sude halahi na sabagas. 16:34 Dung i dioban ia ma si Paulus dohot si Silas tu bagasnia dihobasi ma panganon di halahi. Jop sajo noma rohania dohot halahi na sabagas hara ni na dung porsaya halahi saonnari tu Debata. 16:35 Ancogotna i, disuru angka panjabat ni pamarenta Rom i ma polisi tu hurungan laho paboahon parenta anso nipalua si Paulus dohot si Silas. 16:36 Dipaboa kapala ni hurungan i ma tu si Paulus, ning ia ma, "Madung ro parenta sian angka panjabat ni pamarenta laho paluahon tuan i. Mulak ma hamu di bagasan hahorasan!" 16:37 Tapi didok si Paulus ma tu angka polisi na ro i, "Warga negara Rom do hami. Haru so jolo diadili, hape manigor diloncingi hami di jolo ni halak na bahat jana dipamasuk tu hurungan. Hape saonnari suruon ni halahi ma hami kehe sajo songon i sip-sip? Inda ra hami songon i! Suru hamu angka panjabat ni pamarenta i ro tuson. Angkon halahi sandiri do ro paluahon hami," ning ia. 16:38 Dilapurkon angka polisi i ma songon i tu angka panjabat ni pamarenta Rom. Dung dibege halahi warga negara Rom do hape si Paulus dohot si Silas, gabe mabiar ma halahi. 16:39 Dung i kehe ma halahi mangido maap tu si Paulus dohot si Silas, jana ditaruhon halahi ma sidua halak i ruar sian hurungan i; dipangidohon halahi muse ma anso laing morot halahi na dua sian kota i. 16:40 Kehe ma si Paulus dohot si Silas sian hurungan i tu bagas ni si Lidia. Dung marsuo bohi halahi rap dohot angka na porsaya disi, diapoi halahi na dua ma roha ni halahi, dung i kehe ma si Paulus dohot si Silas.
18:1 Dung i kehe ma si Paulus sian Atena, lalu ma ia tu Korintus. 18:2 Marsuo ma ia disi dohot sada halak Jahudi na margoar si Akuila na marasal sian Pontus. Na baru dope si Akuila ro sian Italia dohot daborunia si Priskila. Na niusir ni Raja Godang Klaudius do sandok halak Jahudi sian Rom umbaen na gabe tu Korintus halahi ro. Ditopot si Paulus ma halahi na dua, 18:3 gabe rap ma halahi sainganan jana rap karejo ma halahi, harana sarupa do pangomoan ni halahi dohot si Paulus, i ma pature abit tenda. 18:4 Tapi muda di Ari Sabat sai kehe do si Paulus mangkobar-hobari tu bagas paribadatan laho manyosoi halak Jahudi dohot halak Junani anso porsaya halahi. 18:5 Dung lalu si Silas dohot si Timoteus tu Makedonia, tu halak Jahudi ma sude diabiskon ia ari-arinia laho mamaritahon jamita na sian Debata tu halahi, paboahon bahaso Jesus do Kristus i. 18:6 Tapi hara ni na sai torus dialo angka jolma i boti sai mangincahi halahi, gabe dipaspaskon si Paulus ma abuan na di pakeannia i adop halahi, gabe songon tanda laho paingotkon hasalaan ni halahi sandiri. Didok ia ma, "Muda gabe mago hamu, salamunu sandiri noma i! Nada ahana be i di au! Olat ni on, tu bangso na so Jahudi noma au kehe." 18:7 Morot ma si Paulus manadingkon halahi tu bagas na hombar tu bagas paribadatan i. Goar ni nampuna bagas i, i ma si Titius Justus. Nada halak Jahudi ia, tapi na marsomba tu Debata. Jadi disi ma si Paulus maringanan. 18:8 Nian anggo si Krispus, i ma kapala ni bagas paribadatan i dohot sude halahi na sabagas, porsaya do tu Tuhan Jesus. Jana miduk do sian halak Korintus na umbege jamita i laing porsaya jana lalu tardidi. 18:9 Di na sanoli borngin-borngin didok Tuhan ma tu si Paulus di bagasan sada parnidaan, "Ulang pola mabiar ho! Torus ma ho mangkobari, ulang ho hohom. 18:10 Harana dongananKu do ho. Nada adong sahalak pe na mambaen na jahat tu ho, angke bahat do di kota on halak na gabe punangKu." 18:11 Jadi hara ni i, di Korintus ma si Paulus maringanan adong sada satonga taon honokna jana diajarkon ia hata ni Debata tu angka jolma i. 18:12 Dung si Galio gabe gubernur di Akaya, satahi ma halak Jahudi mangalo si Paulus jana dioban halahi ma ia tu pangadilan. 18:13 Dipajojor halahi ma pangaduan ni halahi songon on, "Dijajang-jajang bayo on do halak na bahat anso marsomba tu Debata sian dalan na maralo tu angka parenta ni Debata na nilehen ni si Musa di hami!" 18:14 Disi giot dialusi si Paulus, manigor mandok hata ma si Galio tu halak Jahudi i, "Hamu angka halak Jahudi! Sugari na mangalanggar sanga taringot tu hajahatan pangaduanmunu on, sobar do au manangihonsa. 18:15 Hape na martangkangi do hamu hara ni angka pandohan dohot angka goar dohot angka aturanmunu sandiri! Anggo soal na songon i hamu do pasidungkon i. Nada ra au laho manguhumi angka pangalaho na songon i!" 18:16 Dung i manigor dipakehe si Galio ma halahi sian inganan i. 18:17 Dung i gabe ditangkup halahi ma si Sostenes, kapala ni bagas paribadatan i, dibalbal halahi ma ia laing di jolo ni paruhuman i. Tapi nada pola diantoi si Galio taringot tusi. 18:18 Anggo si Paulus laing honok dope ia tinggal di Korintus. Dung i marhata partinggal ma ia tu angka halak na porsaya i disi, kehe ma ia markapal dohot si Priskila dohot si Akuila tu Siria. Di Kengkrea ma dipangkas obuk ni si Paulus na ginjang i hara ni haulnia tu Tuhan. *HAULNIA TU TUHAN: Mangihutkon hasomalan ni halak Jahudi, mamangkas obuk, i ma songon tanda bahaso na dung didalankon ia haulnia.* 18:19 Dung lalu di Epesus, ditadingkon si Paulus ma si Priskila dohot si Akuila, masuk ma ia tu bagas paribadatan martukar pikiran disi dohot halak Jahudi. 18:20 Dipangido halahi do nian lumolot ia rap dohot halahi, tapi nada ra ia. 18:21 Tapi haru songon i pe, di na laho kehe ia laing didok ia do, "Muda dipaloas Debata, mangulahi dope au ro tuson." Dung didok ia songon i, kehe ma ia markapal sian Epesus. 18:22 Jadi dung lalu ia di Kaisarea, kehe ma ia tu Jerusalem laho palalu tabenia tu parlagutan na disi i, dung i manigor kehe ma ia tu Antiokia. 18:23 Dung adong sanga sadia honok disi, kehe ma ia mangulahi manopot Luat Galatia dohot Prigia laho patoguhon roha ni angka na porsaya i. 18:24 Jadi laing di hatiha i, ro ma tu Epesus sada halak Jahudi na sorang di Aleksandria, na margoar si Apollos. Na malo do bayo i mandok hata jana na pistar taringot tu isi ni Buku Na Badia i, 18:25 jana na dung diajari do ia laho mananda Dalan Ni Tuhan. Jadi sai marsitutu jana manat do ia mangajari taringot tu Jesus, haru pe hum pandidion ni si Johannes sajo dope na nibotonia. 18:26 Puluk sajo do ia mangkobari di bagas paribadatan i. Jadi dung dibege si Priskila dohot si Akuila pangajarannia i dioban halahi ma ia tu bagas. Dipaboa halahi ma tumangkas tusia taringot tu Dalan Ni Tuhan. 18:27 Dung i ditahi roha ni si Apollos ma giot kehe tu Akaya. Jadi mambaen surat ma angka halak na porsaya i di Epesus tu angka dongan na porsaya di Akaya anso sonang roha ni halahi manjagit si Apollos. Jadi dung lalu si Apollos di Akaya, marguna situtu do hape pangurupinia tu halak na porsaya hara ni asi ni roha ni Debata. 18:28 Angke hara ni sahalania, ditaluhon si Apollos do halak Jahudi di angka na marsoal-soal i di jolo ni halak na bahat. Jana tangkas do dipatuduhon ia angka ayat sian Buku Na Badia i laho mambuktihon bahaso na tutu do Jesus i Kristus.
19:1 Jadi dompak na di Korintus i si Apollos, topet ma hatiha i si Paulus mandalani angka luat pardolok na disi lopus lalu ia tu Epesus. Dapot ia ma disi piga-piga anak sisean. 19:2 Disapai ia ma tu halahi, "Na dung jungada do dijagit hamu Tondi Parbadia dung porsaya hamu?" ning ia. Dialusi halahi ma, "Inda podo. Salang mambege na adong Tondi Parbadia so jungada dope hami," ninna halahi. 19:3 "Antong dohot pandidion ni ise do hamu dipandidihon?" ning si Paulus manyapai. "Dohot pandidion ni si Johannes," ninna halahi mangalusi. 19:4 Dung i didok si Paulus ma, "Anggo si Johannes mandidihon halak laho patandahon na dung muba do roha ni angka jolma i sian dosana be. Tapi laing dipaboa si Johannes do tu halak Israel, angkon porsaya dope halahi tu Sahalak na umpudi ro ulang ia, i ma Jesus," ning ia. 19:5 Dung dibege halahi na songon i, dipandidihon ma halahi mangulahi dibagasan goar ni Tuhan Jesus. 19:6 Jadi hatiha dipayakkon si Paulus tangannia tu ginjang ni halahi, digohi Tondi Parbadia ma halahi jadi mamungka ma halahi mangkobari di angka hata na asing jana dipajojor halahi ma hata ni Debata. 19:7 Adong do halahi hira-hira dua bolas halak. 19:8 Marsitutu ma si Paulus marjamita tu halak na di bagasan paribadatan i adong tolu bulan honokna, jana inda marnaloja ia marsialusan dohot halahi laho paposkon roha ni halahi taringot tu Debata dohot HarajaanNa i. 19:9 Tapi adong do deba sian halahi sijogal roha na so ra porsaya. Dijolo ni halak na bahat i diincahi halahi ma pangajaran taringot tu na giot paluaon ni Debata sude jolma markite-hite Jesus. Jadi gabe ditadingkon si Paulus ma halahi, kehe ma ia rap dohot angka sisean ni Jesus tu sikola Tiranus. Disi ma ia ganop ari marsipatangkasan dohot halak. *Dipiga-piga naskah narobi adong dope hata on: Sian pukul sabolas arian lopus tu pukul opat potang.* 19:10 Adong dua taon sai songon i dibaen ia, lopus sudena halak na maringanan di Asia umbege hata ni Tuhan, bope halak Jahudi bope halak Junani. 19:11 Dipatupa Debata ma angka hahomangan na godang markite-hite si Paulus. 19:12 Hum sapu tangan pe sanga abit pangalilit ni gonting na jungada dipake si Paulus diboan tu angka halak na marnyae, manigor malum ma i jana angka tondi na jahat pe marmorotan ma sian halahi. 19:13 Adong ma deba angka datu ni halak Jahudi mardalani laho paorot angka setan sian halak. Dicubo-cubo angka datu i ma paorot angka begu i mangasahon goar ni Jesus. Didok halahi ma tu angka tondi na jahat i, "Mangasahon goar ni Jesus na nijamitahon ni si Paulus i, hupaorot ma ho!" ning halahi. 19:14 Pitu halak dakdanak ni kapala ni malim ni halak Jahudi na margoar si Skewa ma na mambaen songon i. 19:15 Tapi didok tondi na jahat i ma tu halahi, "Hutanda do Jesus, si Paulus pe hutanda do, tapi ise do hamu?" ninna. 19:16 Jadi mangambur ma haroan ni tondi na jahat i mangaropo halahi sagogona, gabe marlojongi noma halahi sian bagas i mangkabugang jana marsaemara. 19:17 Jadi tarboto ma na songon i tu sude halak Jahudi dohot tu halak Junani na adong di Epesus, gabe mabiar be ma halahi sude. Tapi anggo goar ni Tuhan Jesus mur marsangap ma. 19:18 Bahat do halak na dung porsaya i tu Jesus mangoku angka pangalaho ni halahi di jolo ni angka dongan na bahat. 19:19 Jana angka halak na dung somal padalan hadatuonna, dipalagut halahi ma angka buku ni halahi, ditutung halahi ma i di jolo ni halak na bahat. Sugari dipalagut arga ni buku i sude, mararga ma i hira-hira lima pulu ribu hepeng perak. 19:20 Angka songon i ma pardalanna gabe mur rarat hata ni Tuhan i jana mur markuaso. 19:21 Dung tarjadi sudena i, diputuskon si Paulus ma *DIPUTUSKON SI PAULUS MA: Sanga: Si Paulus marhite panogu-noguon ni Tondi Parbadia mamutuskon.* di bagasan rohania anso kehe ia tu Jerusalem, mamolus sian Makedonia dohot Akaya. Didok ia ma, "Dung sian i angkon torus dope au tu Rom." 19:22 Jadi disuru ia ma dua halak angka dongannia i tu Makedonia, i ma si Timoteus dohot si Erastus, tapi anggo ia sandiri laing tinggal dope santongkin nari di Asia. 19:23 Laing hira-hira di hatiha i ma masa hagaoran na godang di Epesus hara ni pangajaran taringot tu Dalan Ni Tuhan. 19:24 Angke adong do di kota i sahalak tukang perak na margoar si Demetrius na pature angka bagas paribadatan ni Dewi Artemis. Bahat do pangomoan ni angka parkarejonia sian usaho i. 19:25 Jadi dipalagut ia ma angka parkarejonia rap dohot sude halak na asing na songon i karejona. Didok ia ma tu halahi, "Hamu ale angka dongan! Tangkas do diboto hamu, sian usaho on do pangomoanta. 19:26 Saonnari madung tangkas diida jana dibege hamu sandiri sanga aha na nibaen ni si Paulus. Didok ia, anggo angka debata na nibaen ni tangan ni jolma, nada tutu i debata. Jana madung marbalik bahat halak dibaen ia gabe mangkaporsayai na niajarkonnia i. Nada hum di Epesus on sajo, tapi bolas dohonon madung sudena halak na saluat Asia on. 19:27 Hara ni i, sego ma goar ni parusahoanta on. Tapi nada hum i sajo, marlayas muse dope goar ni bagas paribadatan ni Dewi Artemis, jana etongon ni halak ma hasangapannia i songon sisoada; hape nian ia do dewi na nipasomba-somba ni sude halak na di Asia on, dohot na satano on!" ning ia. 19:28 Disi dibege angka jolma i songon i, manigor milas ma roha ni halahi, marsurahi ma halahi mandok, "Na godang do Dewi Artemis ni halak Epesus!" 19:29 Dung i mur gaor ma sude kota i, jana rap marlojong tu stadion, jana disarat halahi ma si Gayus dohot si Aristarkus halak Makedonia, dongan ni si Paulus. 19:30 Giot ihutkonon ni si Paulus do nian halahi, tapi nada dipaloas angka siseannia i. 19:31 Laing songon i deba sian angka halak na marpangkat na di kota i na marale-ale tu si Paulus, disuru paboa halahi ma tu halak anso ulang pola tarida si Paulus di stadion i. 19:32 Jadi anggo angka jolma na ribur i nada martontu be. Salaku na marsidok hatana be noma sude, deba mandok songon on, deba mandok songon i. Angke bahatan do halak na so umboto sanga hara ni aha umbaen na marlagut halahi disi. 19:33 Ninna roha ni na deba, hara ni si Aleksander do boncirna, angke ia do na nionjar-onjar ni halak Jahudi i tu jolo. Gabe martudu ma ia anso mandok hata laho mambela dirinia di jolo ni halak na bahat i. 19:34 Tapi disi diida halak na bahat i, hape na halak Jahudi do ia, manigor rap marsurak ma halahi sagogo-gogona, hira-hira dua jom lolotna, "Na godang do Dewi Artemis ni halak Epesus!" 19:35 Ujungna tarpahohom juarotulis ni kota i do halak na bahat i. Mandok hata ma ia, "Hamu halak Epesus! Sude do halak umboto, kota Epesus on do na pature-turehon bagas paribadatan ni Dewi Artemis na godang dohot patungnia na madabu sian ginjang. 19:36 Nada tarsoadahon sanga ise i. Antong so be ma hamu jana ulang matomputu baen hamu sanga aha. 19:37 Nada hara ni na nitangko ni halak on bagas ni debata sanga dipabile halahi debatanta i umbaen na niobanmunu halahi tuson. 19:38 Muda adong ma antong pangaduan ni si Demetrius rap dohot angka parkarejonia maradopkon halak, tu paruhuman do i pasahaton jana sai disi do angka panggomgomi. 19:39 Tapi betak sai adong dope pangalaho na asing na di rohamunu, angkon di bagasan rapot godang na resmi do i putuskononkon. 19:40 Angke ra do gabe marmara hita hara ni hagaoran na tarjadi sadari on. Taraduhon halak do hita songon panggaori, harana nada tarbaen hita sada alasan pe laho patigorkon hagaoran sinangkinan i," ning ia. 19:41 Dung didok ia songon i, disuru ia ma halak na bahat i marmulahan.
20:1 Jadi dung mantak hagaoron na di Epesus i, dipalagut si Paulus ma sudena parlagutan i, laho paingotkon halahi. Dung i marhata partinggal ma ia tu halahi, didalani ia ma tu Makedonia. 20:2 Ditopoti ia ma angka luat na di Makedonia i jana dilehen ia ma bahat sipaingot tu angka na porsaya na disi laho pajopkon roha ni halahi. Dung i kehe ma ia tu Junani. 20:3 Adong do tolu bulan ia disi. Jadi di na markobas ia laho taripar tu Siria adong ma dapot ia barita, bahaso na dung martahi halak Jahudi laho mamunu ia. Jadi gabe diputuskon ia ma mardalan sian Makedonia mangulahi. 20:4 Rap ma si Sopater anak ni si Pirus halak Berea i dohot ia; songon i muse ma si Aristarkus dohot si Sekundus halak Tessalonika dohot si Gayus halak Derbe. Dohot si Timoteus, si Tikikus dohot si Tropimus halak na sian Asia i. 20:5 Parjolo ma halahi sian hami tu Troas, disi ma halahi painte hami. 20:6 Dung Ari Pesta Ni Roti Na So Marragi, markapal laut ma hami sian Pilippi. Dung lima ari marsuo ma hami mangulahi di Troas. Laing disi ma hami saminggu. 20:7 Di ari na parjolo ni minggu i, dompak marlagut hami giot mamonggoli roti, mangkatai ma si Paulus tu angka dongan na disi, harana marsangkap do ia laho kehe ancogotna i. Lopus tonga borngin laing didatdati si Paulus dope na mangkobari i. 20:8 Di bilik na di ginjang i, i ma inganan parluhutannami, bahat do lampu disi. 20:9 Juguk-juguk ma sahalak doli-doli di jandela i, si Eutikus goarna. Hara ni na so marnamantak si Paulus na mangkobari i lopus songon na dokdok ma mata ni bayo i mondohondok, lopus tarpodom ia di jandela i, gabe madabu ma ia tu toru sian tirket patoluhon. Dung diangkat halahi ia, hape ma mate. 20:10 Tapi mijur ma si Paulus tu toru, tungkap ma ia manghaol doli-doli i. Didok ia ma, "Ulang pola ganggu rohamunu, laing mangolu dope ia!" ning ia. 20:11 Dung i manaek ma mangulahi si Paulus tu ginjang, dibagi-bagi ia ma roti, rap mangan ma halahi. Dung songon i lolotna halahi na mangkatai i lopus tu manyogot, kehe ma si Paulus. 20:12 Ditaruhon halahi ma doli-doli sinangkin laing mangolu tu bagasna. Jadi sonang ma panghilalaan ni halahi jana tarapul. 20:13 Jadi parjolo ma hami markapal tu Asos anso hami aloalo si Paulus disi. Harana na dung nidoknia hian do songon i. Angke giot mardalan pat do ia lalu tu Asos. 20:14 Dung padumpang hami di Asos, manigor masuk ma si Paulus tu kapalnami i, marlayar ma hami lalu tu Metilene. 20:15 Sian i laing torus ma hami marlayar, ancogotna i lalu ma hami ditontang ni Kios. Haduanna i lalu muse ma hami di Samos, sadari nari sian i lalu ma hami tu Miletus. 20:16 Na dung jolo didok si Paulus hian do, na so pola maradian ia di Epesus, anso ulang mabahattu abis ari-ari i di Asia. Diopop ia do anso satibu-tibuna ia lalu tu Jerusalem di Ari Pesta Pentakosta. 20:17 Ditonahon si Paulus ma sian Miletus anso marroan jolo angka pangituai ni parlagutan na di Epesus marsuo dohot ia. 20:18 Jadi dung marroan halahi, mandok hata ma si Paulus tu halahi, "Tangkas do diboto hamu ale angka dongan, sanga na tarsongon dia ngolungku sahonokna on di tonga-tongamunu mamungka sian ari parjolo lalu au tu Asia on. 20:19 Sai markarejo do au mangoloi Tuhan i sian sude rodop ni roha mardongan ilu ni matangku, di tonga-tonga ni parkancitan na hutaon hara ni tahi ni halak Jahudi na giot mangarohai au. 20:20 Diboto hamu do, na so pola maralang-alang au mandok sanga aha na marguna tu hamu. Huajari do hamu di tonga-tonga ni halak na bahat sanga pe na di bagas. 20:21 Sanga na tu halak Jahudi pe sanga na tu bangso na asing, sai tongtong do hupaingot anso dipauba halahi be rohana sian angka dosa ni halahi jana anso ro mandapotkon Debata bope anso porsaya tu Tuhan Jesus. 20:22 Jadi saonnari, hara ni na giot mangoloi na nidok ni Tondi Parbadia, kehe ma au tu Jerusalem. Jana nada huboto dope sanga aha na giot masa tu au disi. 20:23 Hum on ma i na huboto, di ganop kota madung tangkas dipaboa Tondi Parbadia tu au, angkon tarhurung do au jana manaon parkancitan. 20:24 Tapi nada pola hupardulihon ngolungkon, asalkan ma hupasidung karejo na nipasahat ni Tuhan Jesus tu au jana asal ma sai burju au lopus tu ujung ni ngolungku laho manjamitahon Jamita Na Denggan i, i ma taringot tu asi ni roha ni Debata. 20:25 Madung hutogu hamu sudena jana madung hujamitahon muse tu hamu Harajaan Ni Debata. Anggo saonnari ninna rohangku, nada marsuo be au dohot hamu. 20:26 Jadi hara ni i, torang ma hudok tu hamu sadari on, muda laing adong sian hamu na mago sanoli on, nada au be na sala disi. 20:27 Nada unjung hutabunihon diringku maradopkon angka karejongku laho patorangkon tu hamu sude sangkap ni Debata. 20:28 Antong jagohon hamu ma dirimunu dohot sude habanan i, harana madung dipabangkit Tondi Parbadia hamu gabe parmahan. Parmahani hamu ma parlagutan ni Tuhan i, na nibaen gabe nampunaNia markite-hite mudarNia sandiri. 20:29 Angke disi kehe au, marroan ma angka sorigala panyoro tu tonga-tongamunu. Jana halak na nijagoanmunu i, i ma na giot soroon ni angka sorigala i. 20:30 Salang sian tonga-tongamunu sandiri pe, tarida ma angka halak sidok hata na so tutu. Anso gabe lilu sanga ise na dung porsaya tu Jesus jana mangihut tu halahi, i do tujuan ni halahi. 20:31 Jadi hara ni i, marjago-jago ma hamu! Ingot hamu ma, tolu taon honokna arian na borngin mardongan ilu-ilu nada maradian au mangajari hamu pasada-sada. 20:32 Saonnari hupasahat ma hamu tu Debata, anso laing dipature-ture Ia hamu jana anso laing marsitiopan tu jamita na paboahon asi ni roha ni Debata i hamu. Markuaso do Debata laho patoguhon hamu bope laho mangalehen angka pasupasu na dung dipasingkop Ia tu halakNia sudena. 20:33 Nada jungada dipangido rohangku hepeng bope pakean sanga na sian ise pe. 20:34 Hamu pe diboto hamu do i, gogongku sandiri do hupake markarejo laho manjalahi na hasaya di au dohot di angka dongan na mandongani au. 20:35 Sanga taringot tu pasal bagi aha pe, madung hupatidahon di hamu tiruan na patuduhon angkon urupanta do halak na so margogo markite-hite na marsitutu karejo. Angke angkon ingotonta do, na nidok ni hata ni Tuhan i, 'Martuaan do halak na mangalehen sian na manjagit.' " 20:36 Dung sidung si Paulus na mandok hata i, singgang ma ia rap dohot halahi sude martangiang. 20:37 Martangisan ma halahi sude, dihaol halahi ma si Paulus jana diummai halahi laho paborhatkon ia. 20:38 Gabe marsak ma halahi lumobi hara ni na nidok ni si Paulus i na so idaon ni halahi be ia. Dung i dipataru halahi ma ia lopus tu kapal.
21:1 Jadi dung marsijalangan hami dohot angka pamimpin ni parlagutan na sian Epesus i, hami tadingkon ma halahi. Manigor marlayar ma hami torus tu pulo Kos; ancogotna i lalu muse ma hami tu pulo Rodos. Sian i hami patorus ma tu labuan Patara. 21:2 Dapot hami ma di Patara kapal na giot kehe tu Penisia. Gabe masuk ma hami tu kapal i lalu kehe ma, 21:3 jana marlayar lopus hami ida pulo Siprus sabola siambirangnami; tapi laing torus do hami marlayar laho tu Siria. Di Tirus ma hami mandarat, harana giot marbongkar muatan disi kapal na hami tompang i. 21:4 Hami dapotkon ma angka na porsaya tu Jesus disi, jana rap ma hami saminggu dohot halahi. Hara ni boa-boa ni Tondi Parbadia dipaingot halahi ma si Paulus anso ulang kehe ia tu Jerusalem. 21:5 Tapi dung dapot hatihana sai honok hami disi, hami tadingkon ma halahi, hami patorus ma pardalanannami. Sude ma halahi pataru hami, na menek na magodang, ama dohot ina lopus tu ruar ni kota i. Di topi ni laut i marsinggang ma hami martangiang disi. 21:6 Dung i marsijalangan ma hami, lalu masuk tu kapal, jana halahi pe mulak be ma tu bagasna. 21:7 Torus ma hami marlayar sian Tirus lopus tu Ptolomais. Hami topot ma angka na porsaya disi laho manjalangi halahi, jana disi ma hami sadari dohot halahi. 21:8 Ancogotna i kehe muse ma hami, jana lalu ma di Kaisarea. Hami topot ma disi sahalak parjamita na margoar si Pilipus, jana laing di bagasnia ma hami tinggal. Sahalak sian na tarpili na di Jerusalem i do ia. 21:9 Adong do opat halak borunia na dung manjagit gogo sian Debata laho manjamitahon barita na sian Debata. 21:10 Dung adong sanga na sadia honok hami disi ro ma sahalak panurirang sian Judea na margoar si Agabus. 21:11 Ro ma ia mandapotkon hami, lalu dibuat ia ma bobat ni si Paulus. Dirahuti ia ma patnia, songon i muse tangannia sandiri dohot bobat i jana didok ia ma, "On ma na nidok ni Tondi Parbadia: Rahuton ma nampuna bobat on di Jerusalem, songon on ma baenon ni halak Jahudi jana pasahatonna ma ia tu angka bangso na asing na so Jahudi," ning ia. 21:12 Dung hami bege songon i, sude ma hami dohot angka dongan na maringanan di Kaisarea i mangidohon dohot gomos tu si Paulus anso ulang kehe be ia tu Jerusalem. 21:13 Tapi dialusi ia ma, "Aha ma he gunana martangisan hamu songon on, hum mangarsahi ate-atengku do i. Angke nada hum nirahutan au rade, tapi na rade do au mate di Jerusalem humopkop goar ni Tuhan Jesus." 21:14 Umpe ditangihon si Paulus na hami dokkon i, gabe sip noma hami. "Sai roha ni Tuhan i sajo ma na tulus," ning hami noma. 21:15 Dung adong sadia honok hami disi, hami hobasi ma angka barangnami, kehe ma hami tu Jerusalem. 21:16 Adong do deba dongan na sian Kaisarea i rap kehe dohot hami laho pataruhon hami tu bagas ni si Manason, *LAHO PATARUHON HAMI TU BAGAS NI SI MANASON: Sanga: Jana dipadohot ma si Manason.* harana di bagasnia ma hami giot marborngin. (Halak Siprus do si Manason on na dung lolot gabe siihutkon Jesus.) 21:17 Dung lalu hami di Jerusalem, jop do roha ni angka dongan na disi manjagit hami. 21:18 Ancogotna i kehe ma hami dohot si Paulus manopot si Jakobus; laing disi muse ma sude angka pangituai ni parlagutan i. 21:19 Jadi dung marsijalangan dohot halahi, dipajojor si Paulus ma tu halahi sandok na nibaen ni Debata markite-hite ia di tonga-tonga ni bangso na asing na so Jahudi. 21:20 Dung dibege halahi na nipajojor ni si Paulus i, gabe sude ma halahi mamuji Debata. Dung i didok halahi ma tu si Paulus, "Dongannami si Paulus! Angkon botoonmu do na dung marribu-ribu do halak Jahudi na porsaya. Burju-burju do halahi sudena mangoloi Tona i. 21:21 Hape saonnari tarbege do tu halahi, na niajaranmu sude halak Jahudi na mangaranto di tonga-tonga ni bangso na asing, anso dihalupahon halahi angka parenta ni Debata na nipasahat ni si Musa i. Disosoi ho halahi anso ulang pola disunat angka dakdanak ni halahi sanga pe mangoloi adat hasomalan ni halak Jahudi. 21:22 Saonnari tontu botoon ni halak Jahudi na dung porsaya i ma na dung dison ho. Jadi bia noma saonnari? 21:23 Anggo na dumenggan, oloi ma na hami dok. Adong do opat halak dison na mambaen janji tu Tuhan. 21:24 Sugari rap kehe ma hamu mambaen upacara paias diri jana ho ma manggarar na porlu tu halahi, anso tola halahi marpangkas. Jadi muda songon i dibaen hamu, tangkas ma botoon ni halak sudena paboa na so tutu do na nibege ni halahi taringot tu ho, angke ho sandiri pe antong dipatulus ho do sanga aha na niparentahon ni Debata markite-hite si Musa. 21:25 Tapi anggo taringot tu angka bangso na asing na so Jahudi na dung gabe porsaya tu Jesus, madung hami tongos surat paboahon haputusannami tu halahi, na so tola halahi mangankon sipanganon na dung dipelehon tu gana-ganaan, nada tola mangan mudar, sanga mangan binatang na mate dipingkok, jana nada tola mambaen pangalaho na rogon," ning halahi. 21:26 Jadi kehe ma si Paulus dohot si opat halak i mambaen upacara paias diri ancogotna i. Dung i kehe ma halahi masuk tu Bagas Ni Debata laho paboahon sanga na piga ari nari anso salose upacara na paias diri i dohot haul sipasahaton hara ni halahi be. 21:27 Jadi giot abis ma sipitu ari i, adong ma deba halak Jahudi na sian Luat Asia marnida si Paulus di Bagas Ni Debata. Digaori halahi ma roha ni halak na bahat i, dung i ditangkup ma si Paulus 21:28 jana marsurak-surak ma halahi, "Jo hamu halak Israel, tolong hamu jolo! On ma da halakna na pahae pahulu mangajari halak sudena taringot tu poda na maralo tu bangso Israel, na maralo tu angka na niparentahon ni Debata markite-hite si Musa songon i laho mangalo Bagas Ni Debata on. Tamba ni i dioban ia muse dope tuson angka bangso na asing na so Jahudi masuk tu Bagas Ni Debata on mambaen hodar inganan na badia on!" ninna halahi. 21:29 (Hum hara ni na niida ni halahi do si Tropimus halak Epesusi rap dohot si Paulus di pasar; ning roha ni halahi na dung nioban ni si Paulus ia masuk tu bagasan Bagas Ni Debata i.) 21:30 Jadi gabe gaor ma sude na sakota i, marsilojongkon lojongna ma halahi songon i marrongom. Ditangkup halahi ma si Paulus jana disarat halahi ma tu ruar ni Bagas Ni Debata i. Santongkin i manigor ditutup ma pintu ni Bagas Ni Debata. 21:31 Jadi di na giot bunuon ni angka sibaen gaor i si Paulus adong ma halak na paboahon tu komandan ni tentara Rom na disi, na dung gaor sude Jerusalem. 21:32 Manigor ro ma komandan i mangalap angka perwira dohot angka parajurit, diompoti halahi ma manigor tu inganan ni halak na gaor i. Dung diida halak na bahat i na ro komandan i dohot pasukanna i, dipaso halahi ma mambalbali si Paulus. 21:33 Didapotkon komandan i ma si Paulus, ditangkup ma ia jana disuru komandan i ma halak mangarante si Paulus. Dung i disapai komandan i ma sanga ise si Paulus jana sanga aha na nibaennia. 21:34 Deba sian halak na bahat i mangalusi songon on, deba mandok songon i. Hara ni gaorna, gabe nada diboto komandan i be sanga aha satutuna na masa i. Jadi diparentahon ia ma anso dioban manigor si Paulus tu markas. 21:35 Dung lalu ia dioban halahi tu tanggana i, songon i ma pangamuk ni angka na mambaen gaor i, gabe songon na niusung noma paroban ni si Paulus. 21:36 Dipaihut-ihut halahi ma sian pudi marsurahi, "Bunu i!" ninna halahi. 21:37 Jadi di na laho masuk tu markas i, didok si Paulus ma tu komandan i, "Tola do au mandok hata saotik tu komandan i?" ning ia. Didok komandan i ma, "Malo do ho marhata Junani lakna? 21:38 "Anggo songon i nada halak Mesir na mamberontak na salpu i ho, na lalu maroban opat ribu halak panggaori i tu halongonan?" ning ia. 21:39 Dialusi si Paulus ma, "Halak Jahudi do au; penduduk ni Tarsus kota na tarbarita di Kilikia. Tolong ma, paloas au jolo mandok hata tu angka halak on," ning ia. 21:40 Jadi dung dipaloas komandan i si Paulus mandok hata, jongjong ma ia di tangga i, dihiap ia ma dohot tangannia. Gabe sip ma sude halak na disi i. Dung i mandok hata ma ia di hata Ibrani. Didok ia ma,
22:1 "Hamu angka ama maradu angka dongan sudena! Na giot mambela diri do au maradopkon hamu. Marsitangi-tangian ma hita jolo!" ning ia. 22:2 Dung marhata Ibrani si Paulus dibege halahi, mur hohom ma halahi. Dung i dipaudut si Paulus ma hobarnia. 22:3 "Halak Jahudi do au, di Tarsus na di Luat Kilikia do au sorang, tapi di Jerusalem on do au magodang jana tangkas do diajari guru godang Gamaliel au taringot tu Tona na nilehen tu angka ompungta. Songon dia haburjuonmunu dison sadarion hamu ale angka dongan, laing songon i do au burju mangoloi Debata. 22:4 Huparkanciti do lopus mate angka na mangihutkon Dalan Ni Tuhan. Nada marimbar halaklahi sanga dadaboru, hutangkupi do sude sanga ise halak na mangihutkon poda i jana hupahurungkon. 22:5 Malim Godang i pe dohot sude rapot ugamo, tarlehen halahi do hasaksian paboa na so margabus au. Harana halahi do na mangalehen surat jalan di au sipasahaton tu angka halak Jahudi na di Damaskus. Jadi hara ni surat i gabe tola ma au manangkupi halak na porsaya disi, songon i dohot marobansa tu Jerusalem on anso diuhum," ning ia. 22:6 "Di hatiha na mardalan i au, marayak Damaskus hira-hira tonga ari ma hatiha i, tompu ma ro sada sinondang na lobi torang songon na mamincar sian langit humaliang au. 22:7 Jadi tungkap ma au tu tano, jana hubege ma sada sora na mandok tu au, 'Saulus, Saulus! Biasi diparkanciti ho Au?' ninna. 22:8 Jadi husapai ma, 'Ise dehe Ho, Tuhan?' 'Au ma da Jesus Halak Nasaret na niparkancitanmi,' ninna mangalusi. 22:9 Angka donganku na disi i pe diida halahi do sinondang i, tapi anggo sora na mangkatai i tu au nada dibege halahi. 22:10 Dung i marsapa ma au mangulahi, 'Aha do sibaenonku, Tuhan?' ningku. Dialusi Tuhan i ma, 'Jongjong ma ho kehe ma ho tu Damaskus. Disi ma annon paboaon tu ho sanga aha na nipangido ni roha ni Debata sibaenonmu,' ninna. 22:11 Gabe mapitung ma au hara ni sinondang na silo i. Gabe ditogu-togu angka donganki noma au lopus tu Damaskus. 22:12 Adong ma disi sada bayo na margoar si Ananias. Na daulat do bayo i jana na burju do ia mandalankon angka Tona i. Sude do halak Jahudi na di kota Damaskus mamparsangapi ia. 22:13 Ro ma ia mangaligi au, lalu jongjong ma ia di lambungku jana didok ia ma tu au, 'Anggia Saulus, marnida ma ho mangulahi!' ning ia. Laing hupadorgak ma bohingku manigor, jana huida ma ia. 22:14 Dung i didok ia ma tu au, 'Madung dipili Debata ni angka ompunta i ho anso diboto ho hagiotNia boti anso diida ho na tigor i huhut manangihon soraNia sandiri. 22:15 Gabe saksi ma ho laho patorangkon tu sude halak sanga aha na dung niidamu dohot na nibegemi. 22:16 Saonnari pe, ulang be palolot paintehon. Jongjong ma ho anso nipandidihon. Pio-pio ma ho mangido tolong tu Tuhan anso dipalua ho sian angka dosami.' " 22:17 "Jadi mulak ma au tu Jerusalem, jana di hatiha martangiang au di Bagas Ni Debata, digohi kuaso ni Debata ma au. 22:18 Huida ma Tuhan mandok hata tu au, 'Pasigop ma morot sian Jerusalem on, harana nada jagiton ni halak na dison on hasaksianmu taringot tu Au,' ninna Tuhan i. 22:19 Jadi hudok ma, 'Tangkas do diboto halahi Tuhan na dung masuk au tu angka bagas paribadatan laho manangkupi halahi jana mambalbali sanga ise na porsaya tu Ho. 22:20 Laing songon i do di na mamunu si Stefanus, saksiMi laing disi do au jana jop do rohangku na mate i ia dibaen. Salang manjagoi pakean ni halak na mamatehon ia pe laing au do,' ningku. 22:21 Tapi didok Tuhan i ma muse tu au, 'Kehe ma ho, harana suruonKu ma ho kehe tu na dao tu inganan ni halak sian bangso na asing.' " Ninna Tuhan i tu au. 22:22 Laing dipatangi-tangi halak na bahat i dope si Paulus na mandok hata i, tapi di ujung ni pandohannia i, marsurak ma halahi sagogo-gogona, "Gumonan ma nimatehon anggo halak sisongon i. Nada tama be mangolu i!" ninna halahi. 22:23 Di na marsurak-surak i halahi, dihirpas-hirpaskon halahi ma bajuna be, jabat sarsar abuan i tu ginjang. 22:24 Jadi gabe disuru komandan i ma si Paulus dioban masuk tu bagasan markas i anso disiksa ia disi laho mamareso sanga hara ni aha umbaen na pola songon i gogona halak Jahudi marsurak hara ni ia. 22:25 Haru pe na dung dirahut si Paulus laho mangaloncing ia, laing mandok hata dope ia tu perwira na jongjong i disi, "Tola do tehe niloncingan mangihutkon undang-undang sada halak warga negara Rom dompak so nitimbang parkarona?" ning ia. 22:26 Umbege i, gabe kehe ma perwira i tu komandanna i manyapai, "Ia boti aha dehe na giot baenonmon? Warga negara Rom do bayo on!" ning ia. 22:27 Jadi didapotkon komandan i ma si Paulus manyapai, "Paboa ma jolo, sanga na tutu do warga negara Rom ho!" ning ia. "Olo, tutu do i. Warga negara Rom do au," ning ia. 22:28 Dung i didok komandan i ma, "Na argaan do hutabusi hawarganegaraan i." Dialusi si Paulus ma, "Tapi anggo au, adong pe hakku na songon i, hara ni hasosorangku do." 22:29 Gabe manigor sumurut be ma angka tentara na giot manyiksa si Paulus i, komandan i sandiri pe gabe mabiar ma hara ni na dung sanga i ditambat si Paulus, hara ni na warga negara Rom i ia. 22:30 Jadi sai giot botoon ni komandan i ma sanga hara ni aha do satutuna umbaen jabat dipasala halak Jahudi si Paulus. Jadi ancogotna i disuru ia ma marlagut angka sintua ni malim dohot anggota ni Mahkamah Ugamo. Jadi dipalua ma si Paulus sian bayangannia i, dioban ma ia tu jolo ni halahi sude.
23:1 Diligi si Paulus ma jolo anggota ni pangadilan i, lalu didok ia ma, "Hamu angka kahanggingku! Lopus saonnari na so adong dope huhilala marsala au tu Debata di bagasan taroktokku taringot tu pardalan ni ngolungku." 23:2 Di na nidok ni si Paulus songon i, disuru Malim Godang Ananias ma halak na jongjong di lambung ni si Paulus i manampeleng pamangan ni si Paulus. 23:3 Dung i didokkon si Paulus ma mandok ia, "Tampelengon ni Debata ma ho, ale tembok na nihapuran! Umbaen na juguk pe ho dison, na giot manguhumi au do mangihutkon Tona i, tapi madung dilaosi ho Tona i markite-hite na nisurumu manampeleng au." 23:4 Jadi didok angka na jongjong na disi i ma, "Dilayasi ho dehe Malim Godang ni Debata?" 23:5 Dialusi si Paulus ma, "Na so huboto do ia Malim Godang. Tutu do i adong tarsurat, 'Ulang palayas pamimpin ni bangsomu.' " 23:6 Dipamanat si Paulus ma, hape adong do deba anggota ni pangadilan i halak Saduse, jana na deba nari angka halak Parise. Jadi gabe didok ia ma tu pangadilan i, "Hamu ale angka dongan! Halak Parise do au, jana pomparan ni halak Parise. Gabe niuhuman do au dison hara ni na porsaya au angkon mulak mangolu do halak na dung mate i mangulahi," ning ia. 23:7 Jadi dung didok ia songon i gabe mamungka ma martongkari angka halak Parise dohot halak Saduse i, lopus gabe mardua pihak rapot i. 23:8 (Harana anggo mangihutkon pandapot ni halak Saduse i, sadahalak na dung mate nada bisa be i mulak mangolu, surusuruan pe nada adong i jana tondi pe nada adong; hape anggo halak Parise, porsaya do halahi tu na dua i.) 23:9 Jadi gabe gaor sajo ma halahi. Adong ma deba guru na sian pihak ni Parise jongjong mangalo marsitutu. Didok halahi ma, "Anggo mangihutkon pandapotnami nada adong sala ni bayo on! Arongku na adong do ro tondi sanga surusuruan mangkatai dohot ia!" 23:10 Songon i ma jebuna na martongkari i, jabat mabiar komandan i betak sai diparsuakkon halahi lalu si Paulus. Jadi disuru ia ma pasukannia i mambuat si Paulus sian tonga-tonga ni halahi, dioban ma ia tu markas. 23:11 Borngin na mangihut i ro ma Tuhan jongjong di lambung ni si Paulus mandok, "Papos ma rohamu! Madung dilehen ho hasaksian taringot tu Au di Jerusalem. Angkon laing saksihononmu ma songon i di Rom muse." 23:12 Manyogotna i, adong ma halak Jahudi marlagut mambaen kompolotan. Disumpahon halahi ma na so ra halahi mangan sanga minum anggo so jolo dibunu halahi si Paulus. 23:13 Adong do lobi opat pulu halak na mambaen kompolotan i. 23:14 Didapotkon halahi ma angka kapala ni malim dohot angka hatobangon ni halak Jahudi, didok halahi ma, "Madung rap marsumpa hami na so ra hami mangan sanga minum bagi aha, anggo so jolo hami bunu si Paulus. 23:15 Antong hamu angka dongan dohot angka anggota ni Mahkamah Ugamo i, baen hamu ma surat tu komandan ni tentara Rom i mangido anso dioban ia si Paulus mangulahi mangadop tu hamu. Jadi tarsongon na giot paresoonmunu ma parkaronia i tumangkas mangulahi. Tapi anggo hami madung rade laho mamunu ia dompak so lalu dope tuson." 23:16 Tapi tarboto ma tu babere ni si Paulus sangkap ni na sakompolotan i. Jadi kehe ma ia tu markas paboahon i tu si Paulus. 23:17 Manigor dipiohon si Paulus ma sahalak perwira, didok ia ma, "Boan hamu ma jolo bayo on tu komandan i; adong na giot sipaboaonnia tu komandan i." 23:18 Dioban perwira i ma doli-doli i tu komandan i, didok ia, "Na nipiohon ni si Paulus, tahananta i do au jana dipangido ia anso huoban doli-doli on tu jolomu; adong na giot sipaboaonnia," ning perwira i. 23:19 Ditogu komandan i ma tangan ni doli-doli i, kehe ma halahi na dua tu topi-topi, disapai ia ma disi, "Aha do na giot sipaboaonmi tu au?" 23:20 Dialusi doli-doli i ma, "Madung martahi halak Jahudi laho mangido tu tuan i anso dioban si Paulus ancogot mangadop tu Mahkamah Ugamo, tarsongon na giot paresohon parkaronia i tumangkas. 23:21 Tapi ulang ma dioloi tuan i pangidoan ni halahi i, angke adong do lobi opat pulu halak na dung martabuni laho mangadang ia di dalan i. Na dung marsumpa do halahi sude na so mangan sanga minum anggo so jolo dibunu halahi si Paulus. Jadi saonnari pe madung rade halahi; na hum paintehon alus sian tuan i sajo noma halahi." 23:22 Didok komandan i ma, "Ulang jabat dipaboa ho sanga na tu ise na dung nipaboamu pangalaho on tu au," ning ia, lalu disuru ia ma mulak doli-doli i. 23:23 Dung i dipio komandan i ma dua halak perwira, didok ia ma tu halahi, "Pasingkop hamu dua ratus halak parajurit rap dohot pitu pulu halak tentara parkudo dohot dua ratus halak tentara sitiop hujur anso kehe borngin on pukul sambilan tu Kaisarea. 23:24 Laing pasingkop hamu ma kudo tenggeton ni si Paulus jana tangkas ma jagohon hamu ia lopus horas lalu tu Gubernur Peliks." 23:25 Dung i dibaen komandan i ma surat songon on, 23:26 "Na niparsangapan Gubernur Peliks. Tabe ma di hamu sian au Klaudius Lisias! 23:27 Na nitangkup ni halak Jahudi do bayo on jana sugari sura nada ro au maroban pasukan laho paluahon ia, saotik nari noma anso dibunu halahi ia; angke warga negara Rom do ia hubege. 23:28 Jadi anso huboto sanga aha satutuna salania na nituhas ni halak Jahudi gabe huoban ma ia tu Mahkamah Ugamo ni halahi. 23:29 Disi huboto ma bahaso hum hara ni parsasilisian taringot tu Tona ni halahi do, dibaen na niaduhon ia, tapi nada adong dapot hasalaannia na patut mate ia uhumon sanga hurungkonon. 23:30 Madung dipabotohon tu au, na adong tahi ni halak Jahudi laho mamunu ia. I do umbaen na hupasahat ia manigor tu Gubernur i. Jana madung husuru angka na manuhas ia pasahat pangaduan ni halahi tu tuan i." 23:31 Jadi dipatulus angka tentara i ma tugas ni halahi i. Dialap halahi ma si Paulus jana dioban halahi ma ia laing borngin i tu Antipatris. 23:32 Ancogotna i tentara parkudo i sajo noma dipadiar halahi torus kehe rap dohot si Paulus. Anggo halahi mulak noma tu markas. 23:33 Dung lalu tentara na markudo i di Kaisarea, dipasahat halahi ma surat i tu Gubernur i, jana dipasahat halahi muse ma dohot si Paulus tusia. 23:34 Dung disise Gubernur i surat i, disapai ia ma si Paulus sanga halak dia ia. Jadi dung diboto ia na marasal sian Kilikia si Paulus, 23:35 didok ia ma, "Antong denggan ma i! Hupareso pe parkaromon, muda dung lalu tuson angka na mangaduhon ho," ning ia. Dung i diparentahon Gubernur i ma anso dipamasuk si Paulus tu tahanan na di bagas ni si Herodes.
24:1 Dung lima ari, kehe ma Malim Godang Ananias dohot angka pamimpin ni halak Jahudi tu Kaisarea rap dohot sahalak pengacara na margoar si Tertulus. Mangadop ma halahi tu Gubernur Peliks pajojorkon pangaduan ni halahi maradopkon si Paulus. 24:2 Dung disuru si Tertulus jongjong tu jolo, dipajojor ia ma antong pangaduannia songon on, "Tuan Gubernur na niparsangapan! Sonang do sude luatnami hara ni pangarajaion ni tuan i. Songon i muse hara ni habisuhon ni tuan i madung bahat mardalan angka na denggan di tonga-tonga ni bangsonami. 24:3 Mandok tarimakasi do hami hara ni sudena i jana marjop ni roha na sagodang-godangna do i dijagit sanga na di dia pe. 24:4 Tapi anso ulang mabahattu sayang tingki ni tuan i, pangidoan anso laing sobar ma jolo tuan i manangihon pangaduannami na saotik on. 24:5 Na tardapot hami do bayo on mambaen gaor. Sanga na di dia tongtong manggaori ia tu halak Jahudi, jana ia do pamimpin ni golongan Nasrani. 24:6 Salangkon pahodar Bagas Ni Debata pe madung dicubo ia, tapi hami tangkup ia. Adong do nian maksudnami laho manguhumi ia hombar tu aturan ni ugamonami sandiri. 24:7 Tapi ro ma komandan Lisias, jana dirampas ma ia sian tangannami, 24:8 jana diparentahon ia ma angka na mangaduhon i, anso mangadop tu tuan i. Jadi muda dipareso tuan i bayo on, botoon ni tuan i sandiri ma annon sian ia paboa na tutu do sudena na hami aduhon i taringot tusia." 24:9 Dohot do halak Jahudi na disi i mangaduhon si Paulus jana diparhatutu halahi do hata na nidok ni si Tertulus i. 24:10 Dung i dilehen Gubernur i ma tanda tu si Paulus anso mandok hata ia. Si Paulus pe didok ia ma hatania, "Huboto do na dung pola martaon-taon honokna tuan i gabe panguhum di tonga-tonganami. Hara ni i gabe sonang do rohangku laho pasahatkon pambelaanku di adopan ni tuan i. 24:11 Bolas do tangkasan ni tuan i sandiri, nada lobi dope dua bolas ari dung kehe au tu Jerusalem laho maribadat disi. 24:12 Jana na so unjung do dapot halak Jahudi au martangkangi tu halak na asing sanga hupaluhut halak laho manggaori sanga na di Bagas Ni Debata sanga pe di angka bagas paribadatan, sanga di dia pe tehe di kota i. 24:13 Nada tarbuktihon halahi muse angka adu-aduan ni halahi tu tuan i salaho tu au. 24:14 Tapi angkon okuonku do tu tuan i, paboa na husomba do Debata ni angka ompungnami hombar tu Dalan Ni Tuhan, i ma na sala dietong roha ni halahi. Hape nian laing huhaporsayai do sudena na tarsurat di Buku Ni si Musa dohot di Buku Ni angka Panurirang. 24:15 Songon halahi, au pe laing mararop roha do tu Debata paboa angkon mulak mangolu sudena jolma dung marmatean, halak na burju bope halak na jahat! 24:16 Hara ni i do umbaen na tongtong au marsitutu karejo, anso ias taroktokku maradopkon Debata jana ias muse maradopkon jolma. 24:17 Dung adong sanga piga-piga taon ro ma au muse tu Jerusalem, mulak ma au laho pasahatkon hepeng pangurupion tu bangsongku, bope laho pasahatkon haul tu Debata. 24:18 Di na hubaen songon i, tarpaida halahi ma au di Bagas Ni Debata, dung sidung hudalankon upacara paias diri. Nada adong halak na bahat mandongani au, jana nada adong muse na gaor di hatiha i. 24:19 Hum halak Jahudi na marasal sian Asia do na adong disi. Halahi do satutuna na patut dison mangaduhon au tu tuan i, muda na adong ma siaduhonon ni halahi taringot tu au. 24:20 Tapi padiar ma halak on sandiri ma pajojorkon betak na hajahatan dia dapot halahi di au di na nipajongjong au di tonga-tonga ni Mahkamah Ugamo. 24:21 Hum sada do pandohanku na dapot halahi, i ma di na hudok: Niuhum do au sadari on hum hara ni na porsaya au angkon pangoluon mangulahi halak na dung mate," ning si Paulus. 24:22 Anggo Gubernur Peliks madung bahat diboto ia hian taringot tu Dalan Ni Tuhan. Jadi dipaujung ia ma sidang i. Didok ia, "Dung ro pe komandan Lisias tuson anso huputuskon parkaromunu on." 24:23 Dung i diparentahon ia ma perwira na manjago si Paulus i anso laing dipamasuk si Paulus tu tahanan. Tapi nilehen ma saotik halumbangan disia, tola ma angka dongannia ro mangalehen sanga aha na porlu disia. 24:24 Dung piga-piga ari ro ma si Peliks mangulahi rap dohot dadaborunia na margoar si Drusilla; boru Jahudi do i. Dung i disuru si Peliks ma halak mangalap si Paulus jana dipabege-bege si Peliks ma si Paulus mangkobari taringot tu na mangkaporsayai Jesus Kristus. 24:25 Tapi di na nipajojornia taringot tu haburjuon dohot hatomanon songon i dohot taringot tu Ari Parpudi, gabe mabiar ma si Peliks. Didok ia ma tu si Paulus, "Saonnari madung tola ho mulak. Hupio pe ho sanga andigan habolasan," ning ia. 24:26 Hape anggo disi, na dipikir roha ni si Peliks do na giot dapotan hepeng ia sian si Paulus. I do umbaen na marpupu disuru alap ia si Paulus mangkobari dohot ia. 24:27 Dung adong dua taon, ro ma si Perkius Pestus manggontihon si Peliks gabe gubernur disi. Jadi hara ni na giot mambuat roha ia tu halak Jahudi, gabe laing dipadiar ia ma si Paulus tarhurung.
25:1 Patolu arihon dung di luat i si Pestus, manangkok ma ia sian Kaisarea tu Jerusalem. 25:2 Ro ma disi angka sintua ni malim dohot angka pamimpin ni halak Jahudi tusia laho pasahatkon pangaduan ni halahi taringot tu si Paulus. Sai dielek-elek halahi ma si Pestus 25:3 anso ibo jolo rohania tu halahi; sugari ra ma ia nian marsuru oban si Paulus tu Jerusalem, harana madung satahi halahi laho mamunu si Paulus di tonga dalan. 25:4 Hape dialusi si Pestus ma, "Ditahan dope si Paulus di Kaisarea; au sandiri pe nada pola sadia honok dison, tibu do au mulak tusi. 25:5 Jadi dumenggan ma sanga na piga-piga halak sian bagian hatobangonmunu kehe rap dohot au tu Kaisarea laho mambuka parkaro i disi, muda na tutu ma ia sala." 25:6 Dung adong hira-hira salapan tu sampulu ari si Pestus di Jerusalem, mulak ma ia mangulahi tu Kaisarea. Ancogotna i dibuka ia ma sidang pangadilan jana diparentahon ia ma anso dioban si Paulus mangadop tu jolonia. 25:7 Jadi disi lalu si Paulus, marjongjongan ma halak Jahudi na marroan i sian Jerusalem mangkaliangi ia. Dipungka halahi ma pajojorkon angka pangaduan ni halahi na borat adop si Paulus. Hape nada tarbuktihon halahi i. 25:8 Dialusi si Paulus ma, "Sada pe nada adong hubaen na sala, bope maradopkon Tona ni halak Jahudi, bope maradopkon Bagas Ni Debata, sanga pe maradopkon Kesar." 25:9 Tapi giot mambuat roha do si Pestus tu halak Jahudi. Jadi marsapa ma ia tu si Paulus, "Ra do ho sugari nioban tu Jerusalem anso disi niadilan ho di jolongku taringot tu angka pangaduan ni halahi i?" 25:10 Tapi didok si Paulus ma, "Di jolo ni pangadilan ni Kesar Rom do au na jongjong on; jana angkon disi do niadilan au. Tangkas do diboto tuan i na so marsala au tu halak Jahudi. 25:11 Muda na sala ma au tu aturan jana muda na patut ma au mate niuhuman, rade do au mate. Tapi anggo na so tutu do adu-aduan ni halahi i, sanga ise pe nada marhak laho pasahatkon au tu halahi. Hupangido, di jolo ni Kesar i ma au niadilan," ning ia. 25:12 Dung martahi si Pestus dohot angka donganna paruhum, ning si Pestus ma, "Uhum sian Kesar do dipangido ho, jadi angkon kehe do ho mangadop tu Kesar i." 25:13 Jadi dung adong sanga sadia honok, ro ma Raja Agrippa dohot si Bernike tu Kaisarea laho mangkoras-horasi si Pestus. 25:14 Dung piga-piga ari halahi disi, dipajojor si Pestus ma parkaro ni si Paulus i tu Raja Agrippa. Didok si Pestus ma, "Adong dison sahalak tahanan na nitadingkon ni si Peliks. 25:15 Jadi hatiha kehe au tu Jerusalem, ro ma angka kapala ni malim dohot angka hatobangon ni halak Jahudi pasahat pangaduan ni halahi salaho tu bayo on jana dipangido halahi anso hudabu uhuman tusia. 25:16 Tapi hualusi do disi, na so tola do pasahaton ni halak Rom songon i sajo sada halak na hona tudu anso niuhuman, anggo so jolo nipaadop tu angka na mangaduhon i jana dilehen tusia hatiha laho mambela dirinia. 25:17 Jadi dung lalu halahi tuson, nada hupalolot-lolot be. Ancogotna i manigor hubuka ma sidang pangadilan jana huparentahon ma anso dioban bayo i mangadop. 25:18 Dung jongjong angka na mangaduhon i pajojorkon pangaduan ni halahi, hape nada adong sanga aha dibaen bayo i na jahat songon na hupikir hian giot dokkonon ni halahi. 25:19 Hum hara ni na paasing-asing pandapot sajo do halahi taringot tu ugamo ni halahi sandiri dohot hara ni sada halak na margoar Jesus. Anggo Jesus na nidokna i, ma mate do i, tapi digogohon si Paulus mandok laing mangolu. 25:20 Jadi hara ni na so huboto be sanga na tarbia baenonku manjalahi angka hatorangan satontang tu parsalisian i, gabe husapai ma si Paulus sanga na ra ia kehe tu Jerusalem anso disi noma niadilan parkaro i. 25:21 Hape mangido banding ma si Paulus; dipangido ia: padiar ma laing di bagasan tahanan ia lopus sidung diputuskon Kesar parkaronia i. Jadi gabe huparentahon ma anso laing ditahan ia torus, lopus dapot au hatiha na denggan laho marsuru ia tu Kesar i." 25:22 Jadi ninna si Agrippa ma mandok si Pestus, "Au pe por do rohangku umbege bayo i." "Ancogot bisa do tangihononmu ia," ning si Pestus mangalusi. 25:23 Ancogotna i ro ma si Agrippa rap dohot si Bernike di bagasan sada upacara hasangapan. Masuk ma halahi tu bagasan pangadilan i rap dohot angka tentara na pangkat-pangkat dohot angka halak na godang na di kota i. Dung diparentahon si Pestus, disuru ma masuk si Paulus tu bagasan. 25:24 Dung i didok si Pestus ma, "Boti ma da dohonon, di raja i Baginda Agrippa maradu sude dongan na marlagut di inganan on! Madung diaduhon sude halak Jahudi bayo on tu au, sanga pe na di Jerusalem sanga pe na adong dison. Marsurahi do halahi mandok na so tola be ia mangolu. 25:25 Hape nada adong bagi aha dapot au na sala dibaen ia anso mate niuhuman ia. Boti muse hara ni pangidoannia sandiri angkon di jolo ni Kesar i noma ia adilan, gabe hupaputus ma di bagasan rohangku angkon suruon noma ia mandapotkon Kesar i. 25:26 Tapi nada huboto sanga aha na tontu sisuratkononku di Kesar i. Hara ni i ma umbaen huoban ia tu jolomunu tarlobi tu adopan ni Raja Agrippa, anso muda dung sidung ia dipareso adong ma sisuratkononku. 25:27 Harana anggo ninna rohangku, hurang do sumanna suruon sahalak tahanan anggo so nipaboa sanga aha hasalaan na nituhaskon tusia."
26:1 Didok Raja Agrippa ma tu si Paulus, "Saonnari nipatola ma ho mandok hata laho mambela dirimu," ning ia. Dung i diangkat si Paulus ma tangannia laho pajojorkon hata mambela dirina. Songon on ma didok ia, 26:2 "Na niparsangapan Rajai Baginda Agrippa! Maruntung sajo do au hulala di na tola au pajojorkon hatangku tarlobi di jolo ni raja i laho mambela diringku maradopkon sude adu-aduan na nidok ni halak Jahudi tu au; 26:3 lumobi dibaen tangkas sajo do diboto raja i adat na somal, bope angka pangalaho ni halak Jahudi. Jadi hara ni i, nipangido ma dohot sangap anso laing sobar ma jolo raja i umbege na hupajojor on. 26:4 Sude do halak Jahudi tangkas umboto taringot tu ngolungku mamungka sian haposoonku. Diboto halahi do mamungka sian hamenehanku laing na tinggal di tonga-tonga ni bangsongki sandiri do au di Jerusalem. 26:5 Madung honok ditanda halahi au. Sugari ra halahi, tarsaksihon halahi do paboa na halak Parise do au sian mulana jana huihutkon do sude aturan na umborat di ugamonami. 26:6 Hape saonnari jongjong ma au dison anso niadilan hum hara ni na huhaporsayai parjanjian na nibaen ni Debata tu angka ompungnami. 26:7 Laing parjanjian i do na nipainte-inte ni halak Israel na dua bolas marga i umbaen na marsitutu halahi marsomba tu Debata arian dohot borngin. Hape hara ni na huhaporsayai janji i, gabe dipasala halak Jahudi ma au. 26:8 Biasi nada tarhaporsayai angka dongan Jahudi, na nipangolu ni Debata halak na mate i? 26:9 Anggo nabaruon au sandiri pe marpandapot, angkon niputusan do gogoniba laho mangalo Jesus halak Nasaret i. 26:10 Jana hubaen do songon i di Jerusalem. Dung hujagit surat kuaso sian sintua ni malim bahat do hupahurungkon halak na badia. I noma jop ni rohangku muda jabat mate niuhum halahi. 26:11 Jotjot do huparkanciti halahi di angka bagas paribadatan, jana hupaksa halahi mansoadahon na nihaporsayaan ni halahi. Hara ni goyak ni rohangku paida-ida halahi, hukojar-kojar do halahi lopus tu kota na asing." 26:12 "Jana i do maksudku di na huoban surat kuaso sian angka sintua ni malim i tu Damaskus. 26:13 Jadi di tonga dalan i hira-hira kotu ma hatiha i, ale rajanami, huida ma sada sinondang sian langit, tumorang dope sian sinondang ni mataniari humaliang au dohot humaliang dongan-donganki na mardalan rap dohot au. 26:14 Gabe martungkapan ma hami sude tu tano i. Dung i hubege ma sada sora di hata Ibrani na mandok tu au, 'Saulus, Saulus! Biasi dope sai diparkanciti ho Au? Hancit ma hilalaonmu, muda sai dialo ho, pamimpin na gabe tuanmu.' 26:15 Dung i hualusi ma, 'Ise dehe Ho Tuhan?' ningku. Jana dialusi Tuhan i ma, 'Au ma da Jesus na niparkancitanmi. 26:16 Jongjong ma ho! Hupatidahon pe diringKu tu ho na giot mambaen ho do gabe pangoloi di Au. Angkon paboaonmu do sude na niidamu sadari on tu halak na asing, bope taringot tu sude na giot patidahononKu di ho sanoli on. 26:17 Giot paluaonKu ma ho sian bangso on dohot sian bangso na asing. SuruonKu ma ho mandapotkon halahi, 26:18 mangungkap parnidaan ni halahi anso morot halahi sian hagolapan jana masuk tu na torang; anso malua halahi sian gomgoman ni Sibolis gabe dirajai Debata halahi. Jadi dung porsaya halahi tu Au, niampunan ma sude dosa ni halahi jana gabe anggota na tarpili ma halahi songon halak ni Debata.' " 26:19 "Jadi rajanami, Raja Agrippa, huhaburjuhon do tongtong laho mangoloi parnidaan na hujagit i sian Debata. 26:20 Tangkas do hupatorang sanga na tu ise pe anso marsipauba rohana be sian angka dosana jana marsipasahat dirina be ma tu Debata jana angkon tarida ma di ngolu ni halahi be paboa na dung muba rohana sian dosa ni halahi be. Di Damaskus ma parjolo hupatorang songon i, dung i baru di Jerusalem dohot di sude Luat Judea dohot di tonga-tonga ni angka bangso na asing. 26:21 Jadi hara ni i ma da umbaen na nitangkup ni halak Jahudi au di Bagas Ni Debata laho mamunu au. 26:22 Tapi hape laing diondihon Debata do au lopus saonnari, gabe tarbaen au jongjong dison, anso hupatorang hasaksianku tu sude halak -- na magodang dohot na menek. Sude na hupardokkoni on nada asing sian na dung nipaboa ni angka panurirang hian bope si Musa; 26:23 i ma na mandok, angkon markancit do Kristus i na nijanjihon ni Debata i jana Ia ma halak na parjolo mulak mangolu dung jolo mate; jadi hara ni i tarpatidahon Ia ma sinondang tu bangso on bope tu angka bangso na asing." 26:24 Jadi taran na pajojorkon pambelaan i dope si Paulus manggora ma si Pestus, "Madung rintik ho Paulus! Parbinotoanmu na bahat i do mambaen ho rintik!" ning ia. 26:25 Tapi dialusi si Paulus ma, "Nada na rintik au, rajanami. Tutu do na hupardokkoni i. Sian pikiran na torang do i sude. 26:26 Haru raja i sandiri pe tangkas do diboto raja i. Hara ni i do umbaen na puluk au torus torang mandokkon i di jolo ni raja i. Pos do rohangku nada adong be sian angka pangalaho i na so diboto raja i, harana nada di sihabunian masa sudena i. 26:27 Na niparsangapan Raja Agrippa, porsaya dehe ulaning raja i di na nidok ni angka panurirang? Anggo ning rohangku porsaya do raja i disi!" ning si Paulus. 26:28 Dung i didok Raja Agrippa ma tu si Paulus, "Saotik nari noma anso masuk Kristen au dibaen ho!" 26:29 "Sigop sanga na lolot, hutangiangkon do tu Debata anso gabe porsaya hamu sudena na umbege hatangkon sadari on, raja i dohot angka ama na dison anso gabe songon au on -- asing sian rante on!" 26:30 Ujungna jongjong ma raja i, gubernur i dohot si Bernike dohot sude na asing i. 26:31 Dung di ruar, mangkata-hatai ma halahi, "Nada adong dibaen bayo on sanga aha na patut angkon mate niuhuman ia sanga hurungkononkon," ninna halahi. 26:32 Dung i didok Raja Agrippa ma tu si Pestus, "Tarpalua do bayo on saonnari, sugari nada dipangido ia adilan parkaronia i di jolo ni Kesar."
27:1 Dung dipaputus angkon marlayar ma hami tu Italia, dipasahat halahi ma si Paulus dohot deba nari tahanan na asing tu tangan ni si Julius, i ma perwira ni tentara Rom na nigoaran "Resimen Ni Kesar". 27:2 Di Adramitium ma hami manaek kapal, i ma kapal na giot mamolus sian angka kota labuan na di Luat Asia. Adong ma disi sada halak Makedonia na ro sian Tessalonika, na margoar si Aristarkus, rap muse ma hami marlayar dohot ia. 27:3 Ancogotna i lalu ma hami di Sidon. Denggan sajo do roha ni perwira Julius i tu si Paulus. Dipaloas ia do si Paulus kehe mandapotkon angka donganna anso tarlehen halahi sanga aha na porlu disia. 27:4 Sian i, hami patorus ma na marlayar i. Jadi hara ni haroro ni alogo na maralo tu pardalan ni kapal i, gabe songon na manopi-nopi ma pardalan ni kapal i sian lambung ni pulo Siprus anso holip sian alogo i saotik. 27:5 Dung i hami bolus ma laut na bidang tontang ni Kilikia dohot Pampilia lopus lalu tu Mira na di Luat Likia. 27:6 Dapot perwira i ma disi sada kapal na ro sian Aleksandria na giot kehe marlayar tu Italia. Gabe tu kapal i ma hami dipindahon ia. 27:7 Adong do piga-piga ari angkon maradu lambat pardalan ni kapalnami i jana songon i ma lojana lopus lalu hami tu Knidus. Jadi hara ni na laing jatjat dope haroro ni alogo i, gabe nada tarbaen hami be torus marlayar tu tujuannami hian. Gabe torus ma hami tu Selatan ni pulo Kreta, mamolus sian Tanjung Salmone anso holip hami sian alogo i. 27:8 Maol sajo do hami layari topi-topi ni pulo i lopus lalu hami tu sada inganan na margoar Labuan Na Jogi, nada pola sadia dao be i sian Lasea. 27:9 Jadi hatiha i, ma salpu Ari Pesta Pardamean *ARI PESTA PARDAMEAN: Ari pesta on dipestahon marayakkon ujung ni September sanga di mula ni Oktober, i ma di hatiha jatjat sajo ari, na bolas jadi mambaen parmaraan tu angka parkapal.* Ni Halak Jahudi. Satutuna madung salpu hatiha na denggan di hami, nada tarbaen sonang be na marlayar on. Jadi gabe dipaingot si Paulus ma halahi, 27:10 "Hamu ale angka dongan! Anggo ninna rohangku marmara godang do hita muda tapatorus na marlayar on, gabe rugi do hita bahat sajo, nada hum barang-barang muatan ni kapal on dohot kapal on sandiri, tapi dohot do hosanta on," ning ia. 27:11 Tapi porsayaan do perwira i tu juru mudi dohot tu kapiten ni kapal i ulang pado tu na nidok ni si Paulus i. 27:12 Tutu hurang denggan ma nian angka kapal maradian disi lumobi di musim ngali. Jadi gabe satahi ma angka parkapal i torus marlayar manadingkon pulo i anso sanga nian lalu tu Peniks anso disi ma lopus abis musim ngali. Anggo Peniks, i ma sada kota labuan di pulo Kreta na mangadop tu Barat Daya dohot tu Barat Laut. 27:13 Songon na purpur dope hatiha i haroro ni alogo sian sabola Selatan. Ninna roha ni parkapal i, na dung denggan ma tarbaen marlayar mangulahi. Jadi dibuat halahi ma sao i, dipatorus halahi ma marlayar manopi-nopi pulo Kreta. 27:14 Nada sadia honok ro ma alogo na gogo -- i ma alogo na somal digoari halak alogo Timur Laut -- na marhalingsungsung sian darat, 27:15 gabe ditondong ma kapalnami i. Jadi hara ni na so tolap kapal i torus mangalo angin i gabe so sajo noma hami. Hami padiar noma mayup-ayup boti kapal i dioban alogo i. 27:16 Jadi hatiha mamolus hami sabola Selatan ni pulo Kauda na menek i songon na onding ma hami santongkin. Disi pe anso tarrajai hami sikoci ni kapal i dung jolo loja hami dibaensa. 27:17 Dung dipanaekkon sikoci i tu kapal, dipagomos ma kapal i, dirahut ma dohot tali humaliang kapal i. Jadi hara ni na mabiar hami tardampar kapal i tu pasir hara ni pejet ni laut di Laut Libia, nipaijur noma layar anso mardalan songon i sajo kapal i marguru tu paroban ni alogo i. 27:18 Torus do anggo alogo i marsitutu. Jadi ancogotna i mamungka ma niparambungkon angka barang-barang muatan ni kapal i tu laut. 27:19 Di ari na mangihut i diparambungkon parkapal i muse ma angka parkokas ni kapal i tu laut dohot tangan ni halahi sandiri. 27:20 Adong do sanga na piga ari nada hami ida mataniari dohot bintang, jana alogo i pe laing torus do marngongos. Jadi nada adong be arop ni rohanami malua. 27:21 Sanga na piga ari i honokna na so mangan halahi. Jadi jongjong ma si Paulus di tonga-tonga ni halahi mandok hata, "Hamu ale angka dongan! Sugari diihutkon hamu hian ma sipaingotku, ulang sian Kreta hita marlayar, nada pola songon on segona dohot harugianna. 27:22 Tapi saonnari pe gomos ma hupangido tu hita sude anso laing godang rohanta. Sahalak pe nada adong na jabat mate sian hita; hum kapal on sajo ma i na mago. 27:23 Harana napotangin madung disuru Debata na husomba i surusuruanNia tu au, Debata i do nampuna au. 27:24 Didok surusuruan i do tu au songon on, 'Ulang ho mabiar Paulus! Angke tulus do ho mangadop tu Kesar i. Jana hara ni denggan ni roha ni Debata maradopkon ho, gabe malua do sude donganmu sakapal hara ni ho,' ninna. 27:25 Jadi hara ni i hamu ale angka dongan, angkon godang ma rohanta! Angke pos do rohangku di Debata, angkon tulus do sudena na nidokNia i tu au. 27:26 Tapi anggo hita angkon tardampar ma tu topi ni sada pulo," ning si Paulus. 27:27 Di borngin paopat bolaskon mumbang-umbang ma hami di Laut Aderia. Hira-hira tonga borngin taraso ma tu parkapal i na marayak lalu kapal i tu darat. 27:28 Jadi dibonomkon halahi ma batu na nitambat tu bagasan laut i laho mandodo sanga na sadia bagas laut i. Hape nada tuk opat pulu meter bagasna inganan i. Nada sadia honok disuhat halahi ma mangulahi jana diboto halahi ma na so tuk be tolu pulu meter bagasna. 27:29 Mabiar ma halahi ulang jabat tombom kapal i tu karang, gabe dipaijur halahi ma opat sao sian pudi ni kapal i. Hurang tibu noma dilala halahi anso torang ari. 27:30 Tapi marusaho do angka parkapal i giot gilo. Dipaijur halahi sekoci, jana dipaula halahi ma songon na giot madabu sian kapal i. 27:31 Hara ni i, ninna si Paulus ma mandok tu perwira dohot angka soridadu i, "Muda nada tinggal halahi di kapal on, nada tarbaen hamu malua." 27:32 Dung i digotap angka soridadu i ma tali ni sekoci i jana madabu ma i tu laut. 27:33 Jadi painte so torang ari disosohon si Paulus ma anso mangan jolo halahi sude. Didok si Paulus ma, "Ma opat bolas ari honokna marsitutu be hamu na painte-intehon sajo, nada mangan bagi aha. 27:34 Hupangido mangan ma hamu jolo bope hum saotik. Denggan do i anso margogo hamu mangulahi. Harana angkon laing malua do hamu sude jana nada pola hurangan hamu sanga aha," ninna si Paulus. 27:35 Jadi dung didok si Paulus songon i dibuat ia ma roti, didok ia ma tarimakasi tu Tuhan di jolo ni halahi sude. Dung i dibagi-bagihon ia ma roti i, lalu dipangan ia. 27:36 Jadi togar ma halahi sude mangulahi jana dohot ma halahi rap mangan. 27:37 Adong do dua ratus pitu pulu onom *DUA RATUS PITU PULU ONOM: Dipiga-piga-piga naskah narobi didok: Dua ratus pitu pulu lima; adong muse na mandok, hurang lobi pitu pulu onom.* halak sude halahi na sakapal i. 27:38 Dung butong mangan halahi sude, diambungkon halahi ma gandum muatan ni kapal i tu laut anso murnayang kapal i. 27:39 Dung torang ari, adong ma diida parkapal i darat, tapi nada diboto halahi sanga na darat ni dia i. Diida halahi muse ma sada Solok dohot topina i. Jadi didok roha ni halahi tusi ma nipadarat kapal i muda tarbaen. 27:40 Jadi digotap halahi ma tali sao i jana dipadiar ma bonom di laut i angka sao i. Ihut tusi laing diharkari halahi ma tali pangarahut ni amudi. Dipasang halahi muse ma layar di jolo anso mardalan tu jolo kapal i diombus alogo i lopus lalu tu topi. 27:41 Hape mantul ma kapal i tu pasir. Tombom ma kapal i sian jolo, nada targulotkon be, sian pudi pe maropuk ma hara ni panondong ni ombak na gogo-gogo i. 27:42 Tubu ma tu roha ni angka tentara na di kapal i laho mamunu sude angka tahanan na disi harana mabiar halahi betak sai adong na marlange tu darat lalu kehe gilo. 27:43 Tapi diantahi perwira i do maksud ni tentara i hara ni na giot paluahon si Paulus ia. Disuru ia ma marlange sude mangambur sanga na ise na malo marlange anso dilangei halahi manigor tu darat; 27:44 mandapoti ma anggo na deba nari maniop papan-papan sanga hoping-hoping ni kapal i. Jadi songon i ma dalanna gabe horas hami sude lalu tu darat.
28:1 Dung horas hami sude lalu di darat, disi pe anso hami boto, pulo Malta do hape goar ni pulo i. 28:2 Burju-burju do halak pulo i maradopkon hami. Denggan do dijagit halahi hami jana manigor dipagara halahi do api di hami, angke mamungka ma ro muse udan boti hara ni ngali ni ari. 28:3 Dipalagut si Paulus ma hayu-hayu, dibaen ia ma i tu api i. Jadi taran mambaen songon i si Paulus, ruar ma sada ulok hara ni milas ni api i. Diturbing ma tangannia. 28:4 Jadi dung diida halak pulo i laing gantung ulok i di tangannia, marsidokkon hatana ma halahi sama halahi, "Tontu sibunu jolma do bayo on, harana haru pe na dung malua ia sian parmaraan na di laut i, nada dipaloas Dewi Hasintongan i ia mangolu," ninna halahi. 28:5 Tapi dihirpaskon si Paulus ma ulok i tu api i, umpe hancit dilala ia. 28:6 Ninna roha ni halahi marbosar ma tangan ni si Paulus i santongkin nari, sanga manigor tompu ma ia mate. Hape dung honok dipainte-inte nada adong sanga aha na ompot tarjadi tusia, gabe muba muse ma pikiran ni halahi. Didok halahi ma, debata si Paulus. 28:7 Nada pola sadia dao sian inganan i adong do tano ni si Publius, i ma raja di luat i. Denggan sajo do rohania manjagit hami gabe tamunia jabat tolu ari. 28:8 Hatiha i topet do marnyae amangnia. Marun boti baro bunion. Jadi kehe ma si Paulus mangaligi na marnyae i, martangiang ma ia lalu dipayakkon ia tangannia tu uluna i, gabe malum ma nyae i. 28:9 Jadi hara ni i, marroan ma sude halak na marnyae di pulo i mandapotkon si Paulus jana dipamalum ia ma halahi. 28:10 Bahat do dipatupa halahi silehen-lehen di hami, jana dioban halahi ma tu kapal sudena na porlu di hami laho kehe hami marlayar. 28:11 Dung adong tolu bulan honokna disi, kehe ma hami sian pulo i, hami tompang ma sada kapal na ro sian Aleksandria, na maradian di pulo i salolot musim ngali. Dioskuri do goar ni kapal i. 28:12 Marlabu ma hami di kota labuan Sirakusa, disi ma hami tolu ari. 28:13 Sian i marlayar ma hami lalu tu kota Regium, jadi dung salpu sada ari ro ma angin sian Selatan jana lalu ma hami di ari paduahon tu Putioli. 28:14 Disi ma dapot hami angka dongan na mangido anso maradian hami disi pitu ari; dung i kehe ma hami tu Rom. 28:15 Tarboto ma tu angka dongan na porsaya tu Jesus na di Rom; gabe marroan ma halahi lalu tu Pasar Apius dohot tu Pasanggarahan Na Tolu mangalo-alo hami. Dung marsuo halahi dohot si Paulus di Rom, didok ia ma tarimakasi tu Debata jana sabam ma rohania. 28:16 Dung lalu di Rom, dipatola do si Paulus maringanan sandiri, tapi laing adong do sahalak parajurit manjagoi ia. 28:17 Dung tolu ari dipiohon si Paulus ma angka bagian hatobangon ni halak Jahudi na disi. Jadi dung marlagut halahi, mandok hata ma ia tu halahi, "Hamu ale angka dongan! Nada adong salangku maradopkon bangsonta, sanga na mangalanggar adat hasomalan na tajagit sian angka ompunta sijolo-jolo tubu. Tapi haru songon i pe, ditangkup do au di Jerusalem jana dipasahat tu halak Rom. 28:18 Jadi dung dipareso parkarongki, giot paluaon ma au, harana antong nada adong sada hasalaan pe na hubaen na patut mate niuhuman au. 28:19 Tapi hara ni na sai dialo halak Jahudi, gabe tarpaksa ma hupangido anso di jolo ni Kesar ni Rom on parkarongki diadili. Hubaen pe songon i, nada hara ni na adong pangaduanku maradopkon bangsongku sandiri. 28:20 Hara ni i ma da hamu ale angka dongan, umbaen na hupiohon hamu anso mangkobar-hobari au dohot hamu; harana, tarrante pe au hara ni arop ni roha ni halak Israel i do," ning ia. 28:21 Dung i didok halahi ma tusia, "Nada adong dope surat bagi aha hami jagit sian Judea taringot tu ho. Jana nada adong dope sada dongan na ro sian adu maroban barita taringot tu ho sanga na paboahon barita na jat taringot tu ho. 28:22 Tapi hami pe, giot begeonnami do nian taringot tu haporsayaanmunu, harana madung sude hami umbege na so tumbuk do di halak poda na nitiopmu," ninna halahi. 28:23 Jadi ditontuhon halahi ma sada ari parsuoan ni halahi dohot si Paulus. Bahat do halak marroan tu inganan ni si Paulus di ari i. Sian manyogot lalu tu potang dipajojor jana dijamitahon si Paulus ma tu halahi barita taringot tu Harajaan Ni Debata. Didokkoni si Paulus ma angka ayat sian Buku Ni si Musa bope Buku Ni angka Panurirang anso dihaporsayai halahi nian Jesus. 28:24 Adong do nian deba na porsaya tu na nidok ni si Paulus i, tapi deba nada ra porsaya. 28:25 Jadi morot be ma halahi sian inganan i marsioban pandapotna be, dung jolo didok si Paulus songon on, "Tutu ma na nidok ni Tondi Parbadia markite-hite Panurirang Jesaya tu angka ompumunu i! 28:26 Didok Tondi i do songon on, 'Kehe ma paboa tu bangso on: Torus do nian marbinege hamu, tapi umpe mangarti; torus do nian hamu mangaligi, tapi umpe marnida. 28:27 Angke madung jogal roha ni bangso on, disumpol halahi do pinggolna jana dipapitpit matana. Angke sugari nada songon i, tontu marnida do mata ni halahi, marbinege do pinggolna, mangarti muse do roha ni halahi, jana mulak do halahi tu Au, disi ma Hupamalum halahi.' " 28:28 Ujungna didok si Paulus, "Angkon botoonmunu do, saonnari madung dipalalu do barita haluaan na sian Debata tu angka bangso na asing na so Jahudi. Ra do halahi mangihutkon i!" 28:29 Dung didok si Paulus songon i, markehean ma halak Jahudi i sian inganan i martongkari sama-sama halahi. 28:30 Dua taon honokna si Paulus di Rom di sada bagas na niongkosnia sandiri. Tongtong do jop rohania manjagit halak, sanga na ise pe na ro mandapotkon ia. 28:31 Jana nada pola adong biarnia paboahon Harajaan Ni Debata tu halahi, songon i taringot tu Tuhan Jesus Kristus. Bebas do si Paulus mambaen songon i, nada pola adong na mangambat-ambati ia.
1:1 Sian si Paulus, naposo ni Kristus Jesus, na dipio gabe rasul jana disuru laho mambaritahon Jamita Na Denggan na sian Debata. 1:2 I ma na nijanjihon ni Debata najolo markite-hite panurirangNia, songon na tarsurat i di Buku Na Badia. 1:3 Jamita Na Denggan taringot tu Anak Ni Debata i, i ma Tuhanta Jesus Kristus na sorang sian pomparan ni si Daud mangihutkon hajolmaon, 1:4 tapi mangihutkon hadebataon tangkas do ia Anak Ni Debata na gok hagogoan. Tanda sajo do i botoon markite-hite hangongotNia sian na mate i. 1:5 Markite-hite Ia do hami jagit asi ni roha dohot karejo ni rasul laho manogu-nogu angka bangso anso porsaya halahi jana mangoloi goarNia. 1:6 Hamu pe dohot do di tonga-tonga ni halahi, hamu na dung nipio ni Jesus Kristus. 1:7 Tu hamu sude na di Rom, na nihaholongan ni Debata, na nipio jana dibaen gabe halak na badia: Asi ni roha ma di hamu dohot hasonangan na sian Debata Amanta dohot sian Tuhan Jesus Kristus. 1:8 Jumolo ma hudok tarimakasi tu Debatangku markite-hite Jesus Kristus hara ni hamu sudena; harana madung tarbonggal haporsayaanmunu tu sude portibi on. 1:9 Dibaen saksingku do Debata, na huoloi di bagasan tondingku markite-hite Jamita Na Denggan taringot tu AnakNia, jana tongtong do huingot hamu di bagasan tangiangku. 1:10 Tongtong do hupangidohon di bagasan tangiangku, sugari dipaloas Debata ma au nian ro tu hamu on. 1:11 Harana sai malungun do au marsuo dohot hamu anso tarlehen au nian di hamu silehen-lehen partondion laho patoguhon hamu. 1:12 Astuanna na hudok i, dibaen na dung rap porsaya do hita, gabe tarbaen hita ma rap marsipatoguan roha. 1:13 Hamu ale angka dongan! Por do rohangku nian sugari tibu diboto hamu na dung jotjot sai giot ro au mandapotkon hamu, hape sai tongtong dope adong halanganna. Por do rohangku sugari laing dohot ma nian di tonga-tongamunu adong guna ni karejongku, songon na hubaen di tonga-tonga ni angka bangso na asing na dung marsuha di angka inganan na asing. 1:14 Angke utangku do i maradopkon sude ragam ni angka bangso, sanga pe tu bangso na maju bope tu bangso na riar dope, tu halak na sikola bope tu halak na buta hurup. 1:15 Hara ni i ma umbaen na por sajo rohangku mamaritahon Jamita Na Denggan i dohot tu hamu angka dongan na maringanan di Rom on. 1:16 Dibaen nada maila au hara ni Jamita Na Denggan i, angke i do hagogoon ni Debata na markarejo laho paluahon sudena halak na porsaya; na parjolo i ma halak Jahudi, dung i muse angka bangso na asing. 1:17 Harana di bagasan ni i dipapatar do hatigoran ni Debata, na sian haporsayaan tu haporsayaan, songon na dung tarsurat, "Halak na tigor sian haporsayaanna, i do na giot mangolu." 1:18 Dipapatar Debata do sian banua ginjang rimas ni rohaNia maradopkon sude dosa dohot hajahatan ni jolma, angke diambati hageduhon i do jolma laho mananda ajaran na tutu taringot tu Debata. 1:19 Dibaen anggo parbinotoan taringot tu Debata madung tangkas di halahi, angke madung dipatangkas Debata i di halahi. 1:20 Mamungka sian na manjadihon tano on Debata, anggo angka pangalaho ni Debata na so tarida i, i ma bako Hadebataan dohot hagogoanNia na manongtong i, anggo i tangkas do tarastui jolma markite-hite sude na nitompa i. Jadi nada tarbaen jolma i be marsidalian hara ni na so marbinoto. 1:21 Ditanda jolma do nian Debata, hape nada ra jolma i pasangapkon Ia songon Debata, jana nada ra halahi mandok tarimakasi tuSia. Tu angka na so marguna do dipikiri halahi; gabe manggolap ma roha ni halahi. 1:22 Dipikir halahi gabe na bisuk, hape gabe na oto do halahi. 1:23 Dipasambar halahi do hasangapan ni Debata na so muba-uba, tu gambaran na tudos tu jolma na muba-uba, angka unggas, binatang siopat pat dohot angka binatang na manjurur. 1:24 Jadi gabe dipadiar Debata noma halahi dirajai hagiot ni roha ni halahi laho mambaen na jat, gabe dipambaeni halahi ma angka pangalaho na pabilehon pamatang ni halahi sama halahi. 1:25 Dipasambar halahi ma hasintongan ni Debata tu gabus, jana nada be Panompa i, tapi angka na nitompa i noma tehe disomba jana dioloi halahi. Hape nian angkon na Manompa i do sipujion salolot-lolotna! Amen. 1:26 Jadi hara ni na songon i dibaen jolma i, gabe dipadiar Debata noma halahi mangihutkon hagiot na pailahon i. Angka dadaboru nada markagiot be di halaklahi songon na somal di hajolmaon; tu donganna dadaboru noma dihagioti rohana. 1:27 Halaklahi pe laing songon i muse; nada be tu dadaboru roha ni halahi songon na patut, tapi halaklahi noma marsiangkupan. Dibaen halaklahi ma pangalaho na pailahon maradopkon donganna halaklahi, jadi dijagit halahi do upa na hombar tu haliluan ni halahi di bagasan dirina be. 1:28 Jadi hara ni na so diporluhon halahi laho mananda Debata, laing songon i ma dipasahat Debata halahi tu parrohaon na so hasaya, mambaen na so tupa. 1:29 Hum na jat noma sude na manggohi roha ni halahi: Hageduhan, ahut tu diri, gutgut dohot dongki; hum na giot mamunu manggohi roha ni halahi, marbadai, paoto-otohon dohot na jingar. Pahata-hata halak, 1:30 manilakoi halak na asing; angka na mangapasi Debata, mangasahon hagogoanna sajo, jungkat ni roha, mamuji dirina, angka na mangajarkon hajahatan, na so mangoloi natorasna; 1:31 na so marroha, na so setia, na so maribo ni roha. 1:32 Diboto halahi do nian angkon mate hona uhum do halak na songon i mangihutkon uhum na sian Debata, tapi haru songon i pe laing dipambaeni halahi do pangalaho na songon i; jana jop muse do roha ni halahi muda adong sanga ise na mambaen songon i.
2:1 Hara ni i, ale jolma na manguhumi, nada adong sidalianmu; muda diuhumi ho na asing, dirimu do diuhumi ho; angke taran manguhumi ho, laing dikarejohon ho do songon i. 2:2 Tapi taboto do mangihutkon hasintongan do uhuman ni Debata angka na mambaen si songon i. 2:3 Jana ho, ale jolma, na manguhumi halak na mambaen na songon i, tapi laing dohot do ho mangkarejohon na songon i, adong he dipikir ho tarbaen ho malua sian uhuman ni Debata? 2:4 Sanga na marlayas ni roha do ho di godang ni denggan basaNia, lambok dohot burju ni rohaNia? Nada he diboto ho, denggan basa ni Debata do maroban ho tu haubaan ni roha? 2:5 Tapi hara ni jogal ni rohamu na so ra muba, ditamba ho do rimas tu dirimu sandiri di ari haririmas dohot hapataran ni uhuman ni Debata na tigor i. 2:6 Harana baloskononNia do tu sude halak hombar tu pambaenanna be. 2:7 Lehenon ni Debata ma ngolu na manongtong tu sude na mangkaburjuhon na denggan, hasangapan na sanggam jana na manongtong i. 2:8 Tapi haririmas dohot hamumuruk do di halak na manjalahi haporluon di dirina sandiri, na so mangoloi hasintongan i, tapi na mangoloi tu hageduhan. 2:9 Ganop halak na sai mambaen na jahat, markancit ma disi jana mangae; tarlobi-lobi tu halak Jahudi, songon i muse halak Junani. 2:10 Tapi anggo halak na sai mambaen na denggan, lehenon ni Debata ma hasangapan dohot hamuliaon bope hasonangan; talobi-lobi tu halak Jahudi, songon i muse tu halak Junani. 2:11 Harana, nada siida bohi Debata. 2:12 Angke sanga sadia na mardosa na so mamboto Tona Ni Debata, mago ma halahi di ruar ni Tona i; jana sanga sadia na mardosa na mamboto Tona i, markite Tona i do angkon di uhum halahi. 2:13 Harana, nada hara ni na mamboto Tona i umbaen na tigor sada-sada halak adop Debata, tapi na patuluskon na nidok ni Tona i do na tardok tigor. 2:14 Anggo bangso na asing, nada diboto halahi Tona i. Tapi muda dipatulus halahi na nidok di bagasan Tona i sian roha ni halahi sandiri, jadi roha ni halahi sandiri ma na gabe tona ni halahi, haru pe nada diboto halahi dope Tona Ni Debata. 2:15 Pangalaho ni halahi ma na patuduhon paboa na dung tarsurat di ate-ate ni halahi angka aturan i. Dohot muse do taroktok ni halahi manyaksihon i, angke halahi sandiri pe jotjot do huhul dipasala sanga ditudu roha ni halahi. 2:16 Laing songon i ma na giot masa di ari na nitontuhon i. Anggo di ari i hombar tu Jamita Na Denggan na hujamitahon i -- uhuman ni Debata ma markite-hite Jesus Kristus sude sibunian ni roha ni jolma. 2:17 Jadi saonnari, bia noma taringot tu hamu angka halak Jahudi on? Didok hamu, halak Jahudi hamu, na maniop Tona i jana na marjop ni roha di bagasan Debata; 2:18 na umboto hagiotNia, jana na umboto na denggan dohot na so denggan, hara ni na diajar di bagasan Tona i. 2:19 Dihaposi rohamunu do sitogu na mapitung hamu jana sinondang do hamu di halak na maringanan di na golap; 2:20 guru ni halak na oto ma hamu, jana pangajari ni angka na menek. Dihaposi rohamunu do, na diboto hamu do rumang ni sude parbinotoan dohot hasintongan sian Tona i. 2:21 Diajari hamu do halak na asing; antong biasi nada diajari hamu dirimunu sandiri? Diajari hamu do halak anso ulang manangko, hape panangko do apala hamu sandiri. 2:22 Diajari hamu anso ulang markarosuan halak na asing, hape apala ho sandiri markarosuan! Goyak rohamunu mida gana-ganaan, hape dibuat hamu sandiri angka barang-barang sian inganan ni gana-ganaan i. 2:23 Ginjang do rohamunu hara ni na adong di hamu Tona i hape marbile do Debata markite-hite hamu na so patuluskon Tona i. 2:24 Songon na tarsurat, "Hara ni hamu do umbaen na marlayas goar ni Debata di tonga-tonga ni angka bangso na asing." 2:25 Sugari na burju hamu mangoloi Tona i, marguna muse do na marsunat i hamu. Tapi anggo dilanggar hamu do aturan i gabe nada adong be guna ni sunat i. 2:26 Sugari adong halak na asing na so marsunat, mandalani angka pangidoan ni Tona i, inda he dietong Debata i songon halak na dung nisunat? 2:27 Jana salahonon ni angka na so marsunat humani i ma hamu halak Jahudi, angke haru pe adong tarsurat aturan di hamu jana marsunat do hamu, hape dilanggar hamu do aturan i. Anggo halahi nada nisunat, hape halahi do na mangoloi aturan i. 2:28 Harana anggo halak Jahudi na tutu, nada hum na niida ni mata sajo halahi Jahudi; jana halak na tutu-situtu marsunat, nada hum na tarida di pamatangna sajo na marsunat. 2:29 Sabalikna do. Anggo halak Jahudi na tutu, i ma halak na marroha Jahudi; jana sunat na tutu, i ma sunat na di roha i na nibaen ni Tondi i, nada na nibaen marguru tu Tona na tarsurat i sajo. Sian Debata do ro pamujian tu halak na songon i nada sian jolma.
3:1 Antong, aha dehe hasurungan ni halak Jahudi sanga aha guna ni sunat? 3:2 Tontu bahat do i. Parjolo, harana halahi do hasahatan ni angka hata ni Debata. 3:3 Tapi bia ma i, anggo adong do deba halak Jahudi na so setia? Sanga hara ni i ma he dalanna gabe nada setia Debata? 3:4 Dao ma i! Angke anggo Debata sai sintong do tongtong, haru pe pargabus sude jolma. Songon na tarsurat i, "Anso tutu Ho tigor di bagasan angka hataMu, jana monang muda diuhumi Ho." 3:5 Tapi muda mur tarida na tigor Debata hara ni na tabaen na so tigor, aha ma na tardok hita? Na geduk ma he lakna Debata muda diparo Ia rimasNia? (Mangihutkon hata ni jolma do na hudok i.) 3:6 Bagi na bia pe, nada! Angke sugari inda tigor Debata, bia ma he baenonNia manguhumi portibi on? 3:7 Tapi, anggo hara ni gabusku, mur tangkas hasintongan ni Debata, jana dipasangap Ia, biasi dope di uhumi au songon halak pardosa? 3:8 Jana biasi inda tola hita mandok, "Tole ma tabaen na jat, anso ro na denggan sian i?" Tutu nian, adong do halak na pabilehon hami, paboa na dung hudok songon i. Anggo halak na songon i satutuna patut do uhumon ni Debata. 3:9 Jadi bia do na dumenggan dope hita hara ni halak Jahudi i hita, ulang pado halak na asing? Satutuna, nada! *NA DUMENGGAN DOPE HITA HARA NI ... HALAK NA ASING? SATUTUNA NADA!:Na jumatjat dope hita hara ni ... halak na asing? Nada sai tongtong songon i.* Madung tapajojor nangkin, sanga na halak Jahudi, sanga na halak na asing pe, sude do hita di toru ni kuaso ni dosa. 3:10 Songon na tarsurat i, "Nada adong na tigor, sahalak pe nada. 3:11 Umpe sahalak na mangastui jana umpe adong sahalak na manjalahi Debata. 3:12 Madung lilu sude jolma, nada adong be guna ni halahi. Umpe sahalak na mambaen na denggan; sahalak pe nada adong! 3:13 Songon kuburan na talak noma aru-aru ni halahi. Mabaor sipaoto-oto sian dila ni halahi, jana bibir ni halahi marbisa songon ulok. 3:14 Gok bura do pamangan ni halahi dohot gutgut. 3:15 Sai songon na mopop do pangalangka ni halahi muda giot manduruskon mudar. 3:16 Tanda do hasesego dohot tilako di angka dalan ni halahi, 3:17 jana nada ditanda halahi dalan hasonangan. 3:18 Nada adong biar mida Debata di halahi." 3:19 Tapi taboto do sude na tarsurat di Buku Tona dilehen do tu halahi na mangolu di toru ni Tona, anso nada adong sanga na ise be marsidalian jana sude portibi on hona uhuman ni Debata. 3:20 Harana umpe sahalak na tigor di adopanNia hara ni na mangkarejohon Tona, dibaen markite-hite Tona i do ditanda jolma dosa. 3:21 Tapi anggo saonnari nada markite-hite Tona i, madung dipapatar hatigoran ni Debata, songon na nisaksihon ni Tona i dohot angka panurirang, 3:22 i ma hatigoran ni Debata markite-hite haporsayaan di Jesus Kristus, tu sude halak na porsaya. Harana nada adong imbarna: 3:23 madung mardosa sude jolma jana agoan hamuliaan ni Debata. 3:24 Jana nipatigor do halahi songon silehen-lehen hara ni asi ni rohaNia markite-hite haluaan na di bagasan Kristus Jesus. 3:25 Jesus Kristus do na nipatumbuk ni Debata, gabe haul pardengganan markite-hite haporsayaan di mudarNia anso dipatidahon Ia hatigoranNia, angke dipadiar Ia do dosa i di hatiha hasobaranNia. 3:26 Jadi dipatidahon Ia do hatigoranNia di hatiha on, anso tarida na tigor do Ia, jana patigorkon halak na porsaya tu Jesus. 3:27 Antong anggo songon i, aha ma he dalanna giot margincat ni roha? Nada adong. Hara ni aha do? Hara ni pambaenan do? Nada! Tapi hara ni haporsayaan do! 3:28 Antong songon on noma etongon ni rohanta: Markite-hite haporsayaan do jolma i dipatigor, nada hara ni na mangkarejohon Tona i. 3:29 Sanga hum Debata ni halak Jahudi do Ia lakna? Nada he Debata ni bangso na asing do muse? Olo, laing Debata ni bangso na asing do Ia. 3:30 Angke na sasada i do Debata, na patigorkon angka na marsunat markite-hite haporsayaan, laing songon i angka na so marsunat markite-hite haporsayaan. 3:31 Muda songon i, na mangagohon Tona i do lakna hami markite-hite haporsayaan i? Dao ma i! Tapi hami pajongjong do Tona i.
4:1 Antong, aha ma tardok hita taringot tu ompunta si Abraham? Aha ma he na dumpang di hajolmaonnia lakna? 4:2 Angke muda dipatigor do si Abraham hara ni pambaenannia, jadi adong ma dalannia giot marginjang ni roha, tapi nada di adopan ni Debata. 4:3 Tarsurat do di Buku Na Badia i, "Porsaya do si Abraham tu Debata, jana dietong ma i disia gabe hatigoran." 4:4 Muda adong halak na markarejo, nada nietong upania i gabe songon silehen-lehen, harana bagiannia hian do i. 4:5 Tapi muda adong halak na so markarejo, hape porsaya tuSia na patigorkon halak pardosa, diparetongkon ma haporsayaannia i gabe hatigoran. 4:6 Songon na nidok ni si Daud taringot tu hatuaan ni halak, na dapotan hatigoran sian Debata nada hara ni pambaenanna, 4:7 "Martua ma angka na dung nisesa pangalaosionna, jana na nitutupan angka dosana! 4:8 Martua do halak na so nietong ni Tuhan be dosana!" 4:9 Adong dehe hata martua i hum tu halak na marsunat sanga dohot do tu halak na so marsunat? Harana madung hami dokkon, na dietong do tu si Abraham haporsayaan gabe hatigoran. 4:10 Tapi songon dia do nietong i? Dung marsunat do ia, sanga taran so marsunat dope? Nada dung marsunat, tapi taran so marsunat dope. 4:11 Dijagit ia do tanda sunat i songon cap ni hatigoran markite-hite haporsayaan na nipatuduhonnia taran so disunat dope ia. Markite na songon i ma ia gabe ompu ni sude na porsaya na so marsunat, anso diparetongkon ma hatigoran i tu halahi. 4:12 Dohot do ia gabe ompu ni angka na marsunat, i ma na so hum marsunat sajo, tapi na mardalan muse mangihutkon indege ni haporsayaan ni si Abraham, ompunta i, taran so marsunat dope ia. 4:13 Dijanjihon Debata do tu si Abraham dohot tu pomparannia, gabe nampuna ni si Abraham ma tano on. Marjanji pe Debata songon i, nada hara ni si Abraham na mangoloi Tona i, tapi hara ni na porsaya do ia gabe dijagit ma ia songon halak na tigor. 4:14 Angke sugari halak na burju mangoloi Tona i sajo do na giot maruli di na nijanjihon ni Debata i, nada adong gunana haporsayaan i, jana hum hata-hata sajo do janji i. 4:15 Dibaen anggo Tona i manubuhon rimas ni roha; angke barang di dia nada adong Tona, nada adong disi pangalaosion. 4:16 Hara ni i, janji i marondolan tu haporsayaan, anso mangihutkon asi ni roha, gabe marpanginonai ma janji i tu sude pomparan ni si Abraham, nada hum di halak na mangolu sian Tona i, tapi dohot do di halak na mangolu sian haporsayaan ni si Abraham. Ompu ni hita sude do ia, 4:17 songon na tarsurat i, "Madung Hupabangkit ho gabe ompu ni bahat bangso." Songon i ma porsaya si Abraham tu Debata, i ma Debata na pangoluhon halak na mate; jana na mambaen na so adong hian gabe adong hum markite-hite hataNia sajo. 4:18 Porsaya do si Abraham jana mararop ni roha, haru pe so adong ojahan laho mararop ni roha, anso gabe "Ompu ni bahat bangso" ia, songon na nidok, "Songon i ma bahat ni pomparanmu sogot." 4:19 Nada gabe gale haporsayaannia, haru pe diboto ia bahaso madung mansai gale pamatangnia, angke madung saratus taon ne ma umurna; jana bortian ni si Sara pe madung tartutup. 4:20 Laing tongtong do ia porsaya jana nada ganggu rohania di janji ni Debata i. Mur dipargogoi haporsayaannia i muse dope ia laho pasangapkon Debata. 4:21 Pos situtu do rohania paboa na tuk do gogo ni Debata patuluskon sanga aha na nijanjihonNia i. 4:22 Hara ni i muse ma dietong angka na songon i disia gabe hatigoran. 4:23 Nada hum tu si Abraham sajo didok, "Madung dietong i disia," 4:24 tapi dohot do tu hita. Hita pe dohot do etongonNia, harana porsaya do hita tuSia na dung pangoluhon Jesus Tuhanta i sian halak na mate, 4:25 i ma Jesus na dung dipasahat hara ni angka pangalaosionta, jana na nipangolu salaho tu hatigoranta.
5:1 Hara ni i, hita na nipatigor markite-hite haporsayaan, mangolu do hita *MANGOLU DO HITA: Dipiga-piga-piga naskah narobi didok: Beta ma hita mangolu.* di bagasan hasonangan dohot Debata markite-hite Tuhanta Jesus Kristus. 5:2 Markite haporsayaan tuSia muse do hita dapotan dalan masuk tu asi ni roha ni Debata. Di bagasan asi ni roha i do hita mangolu, jana marmoga-moga di bagasan arop ni roha tu hamuliaan ni Debata! 5:3 Tapi nada hum i sajo, di bagasan pardangolan pe laing marmoga-moga ma hita, *MARMOGA-MOGA MA HITA: Sanga: Betama marmoga-moga hita.* angke madung taboto gabe mur sobar do halak dibaen pardangolan, 5:4 jana hasobaron parohon tahan uji, jana tahan uji parohon arop ni roha. 5:5 Nada pailaon be hita hara ni arop ni roha na songon on, harana madung digohi Debata rohanta i dohot holong ni rohaNia. Markite-hite Tondi Parbadia do dibaen Debata songon i, i ma Tondi na nilehenNia tu hita. 5:6 Dibaen di hatiha hagaleonta, madung mate Kristus humopkop hita angka na durako, di hatiha na dung ditontuhon ni Debata. 5:7 Humopkop halak na tigor pe, maol do jolma ra mate. Anggo humopkop halak na burju betak adong dope jolma na puluk mate. 5:8 Hape dipatidahon Debata do holong ni rohaNia mida hita, di na mate i Kristus humopkop hita dompak pardosa dope hita. 5:9 Tarlumobi, hara ni na dung dipatigor hita saonnari di bagasan mudarNia, pasti do hita dipalua sian rimas ni Debata. 5:10 Harana muda hatiha musu dope hita, dipadame hita dohot Debata markite hamamate ni AnakNia, tarlumobi hita na saonnari na dung dipadame, pasti do angkon dipalua markite ngoluNia. 5:11 Tapi nada hum i sajo. Marmoga-moga muse ma hita di bagasan Debata, markite-hite Tuhanta Jesus Kristus, harana markite-hite Ia madung hita jagit saonnari pardamean i. 5:12 Hara ni sada halak do dosa i masuk tu portibi on, jana hara ni dosa i ro muse ma hamatean. Jadi gabe lalu ma hamatean i mangalangkoti tu sasudena jolma manusia, harana madung mardosa sudena. 5:13 Dibaen dompak so adong dope Tona madung adong hian dosa i di portibi on. Tapi nada nietong dosa i, muda so adong Tona i. 5:14 Tapi haru songon i pe madung dirajai hamatean i sudena jolma manusia mamungka sian si Adam lopus tu hatiha ni si Musa, laing dohot do angka halak na so mangalaosi sanga aha pe songon na nibaen ni si Adam i. Gambaran ni jolma na giot ro i do si Adam. 5:15 Tapi silehen-lehen ni Debata nada sarupa dohot pangalaosion ni si Adam. Hara ni pangalaosion ni sisada halak i gabe bahat mate jolma dibaensa. Hape dao gumodang dope akibat ni asi ni roha ni Debata dohot silehen-lehenNia na dung diusehon Ia tu bahat halak hara ni Sada Halak, i ma Jesus Kristus. 5:16 Jana silehen-lehen i nada tudos tu dosa ni sada halak. Harana panguhuman tu sada pangalaosion i madung parohon uhuman, tapi silehen-lehen asi ni roha taringot tu bahat pangalaosion i, parohon hatigoran. 5:17 Hara ni pangalaosion ni sada halak, gabe mangarajai ma hamatean i rarat sian halak na sada i. Hape dao dope gumodang akibat ni na nibaen ni Sada Halak na asing i, i ma Jesus Kristus, maradopkon bahat halak, na manjagit asi ni roha dohot silehen-lehen hatigoran i. Angkon mangolu jana mangarajai halahi markite-hite Kristus i. 5:18 Jadi songon markite-hite sada pangalaosion sude halak manjagit uhuman, laing songon i muse ma markite-hite sada pambaenan na tigor gabe sude halak manjagit hatigoran tu hangoluan. 5:19 Jana hara ni sada halak na so mangoloi gabe bahat halak mardosa; songon i muse ma, markite-hite pangoloion ni sada halak, bahat halak gabe tigor. 5:20 Tapi ditambahon do Tona i, anso gabe mur bahat pangalaosion; jana di dia dosa martamba bahat disi ma asi ni roha mur bahat, 5:21 anso songon dosa na mangarajai di bagasan hamatean, songon i muse mangarajai asi ni roha markite-hite hatigoran tu ngolu na manongtong, markite-hite Jesus Kristus Tuhanta i.
6:1 Antong anggo songon i, aha ma na tardok hita? Angkon tadatdati ma he mambaen dosa anso mur martamba asi ni roha i? 6:2 Tontu nada songon i! Madung mate hita taringot tu dosa i, jadi bia ma hita bisa dope mangolu di bagasanna? 6:3 Sanga nada he diboto hamu hita sude na dung tardidi di bagasan Kristus Jesus, laing na dung tardidi di bagasan hamateanNia? 6:4 Di pandidion i, madung ditanom hita rap dohot Ia, di bagasan hamatean do hita disi rap dohot Ia, anso songon Kristus na mulak mangolu i sian hamatean dibaen Ama na sangap i, laing songon i muse ma hita tarbaen mandalani ngolu na imbaru. 6:5 Harana muda dung sada do hita di bagasan hamateanNia, hita pe gabe sada do di bagasan hangongotNia. 6:6 Dibaen madung taboto, madung diparsilangkon hajolmaonta na honok i, anso mago gogo ni dosa na disi jana ulang diparhatoban dosa i be hita. 6:7 Angke barang ise na mate di bagasan Kristus, madung malua ia sian dosa. 6:8 Jadi muda dung mate hita rap dohot Kristus, tahaporsayai muse ma na mangolu do hita rap dohot Ia. 6:9 Angke taboto do, madung dipangolu anggo Kristus sian hamatean jana nada mate be Ia mangulahi; nada markuaso be hamatean i tuSia. 6:10 Angke hamateanNia, i ma hamatean maradopkon dosa, hum sanoli do tu salolot ni lolotna; jana hangoluanNia i, i ma hangoluan tu Debata. 6:11 Hamu pe angkon etongonmunu do dirimunu na dung mate maradopkon dosa, jana mangolu hamu di Debata markite-hite Kristus Jesus. 6:12 Antong ulang be paloas hamu dosa i mangarajai pamatangmunu na ra mate i, anso ulang dioloi hamu be hagiotna na jahat i. 6:13 Sada muse, ulang be pasahat hamu goar-goaran ni pamatangmunu tu kuaso ni dosa gabe parkokas laho mambaen angka na jahat. Tapi tu Debata ma pasahat hamu dirimunu songon halak na dung nipapinda sian hamatean tu hangoluan. Jana pasahat hamu ma sude goar-goaran ni pamatangmunu i tu Debata gabe parkokas laho mambaen angka na tigor. 6:14 Nada be dosa i mangarajai hamu, angke nada be di toru ni Tona hamu mangolu tapi madung di toru ni asi ni roha. 6:15 Antong, bia noma ujungna? Tola dope hita mardosa, hara ni na so ditoru ni Tona be hita, tapi madung ditoru ni asi ni roha? Nada songon i! 6:16 Diboto hamu dehe muda dipasahat hamu dirimunu tu sada-sada halak laho mangkarejohon hagiotnia, na gabe hatoban ni halak na nioloanmunu i do hamu -- sanga hatoban ni dosa na maroban hamu tu hamatean sanga hatoban na mangoloi Debata na maroban hamu tu hatigoran? 6:17 Tapi tarimakasi ma di Debata! Harana hatoban ni dosa do hamu najolo hape anggo saonnari sian sandok rohamunu dioloi hamu impola ni pangajaran na sintong na dung nipasahat tu hamu. 6:18 Madung dipalua hamu sian dosa jana gabe hatoban ni hatigoran. 6:19 Mangihutkon hasomalan ni jolma do mangkatai au dohot hamu, anso ummura astuanmunu. Songon na dipasahatmunu na jolo goar-goaran ni pamatangmunu tu na mangoloi hahodaran dohot hajahatan na maroban hamu tu hahodaron, laing songon i saonnari pasahat hamu ma goar-goaran ni pamatangmunu gabe hatoban ni hatigoran, jana anso gabe badia ma hamu. 6:20 Dompak diparhatoban dosa i hamu, nada dirajai hatigoran i hamu. 6:21 Antong, parbatu aha ma na dapot hamu sian i? Sudena i mambaen hamu maila saonnari, angke hamatean do ujung ni i. 6:22 Tapi anggo saonnari, dung dipalua hamu sian dosa jana madung gabe naposo ni Debata hamu, dapotan parbatu anso gabe badia ma hamu, jana ngolu na manongtong do ujungna i. 6:23 Angke hamatean do upa ni dosa; tapi silehen-lehen ni Debata i ma ngolu na manongtong di bagasan Kristus Jesus, Tuhanta i.
7:1 Hamu ale angka dongan! Siboto Tona do hamu sude. Jadi nada he diboto hamu na markuaso do Tona i tu jolma hum sapanjang mangolu ia? 7:2 Umpamana, tunduk do sada dadaboru tu halaklahinia mangihutkon Tona salolot mangolu dope halaklahinia i. Tapi muda mate do halaklahinia i, malua ma ia sian ihot-ihot ni Tona na mangihoti ia tu halaklahinia i. 7:3 Muda rap ia dohot bayo na asing taran di ngolu ni halaklahinia i, gabe margoar ma anakboru i siparkarosuan. Tapi anggo dung jumolo halaklahinia i, madung malua ia sian Tona i. Jadi muda marbagas ia mangulahi tu halaklahi na asing, nada dohonon be ia siparkarosuan. 7:4 Hara ni i do ale angka donganku, hamu pe madung mate maradopkon Tona markite-hite pamatang ni Kristus, anso gabe nampuna ni halak na asing hamu, i ma nampuna ni na dung dipangolu sian halak na mate, anso marparbatu hita di Debata. 7:5 Angke taran mangolu di bagasan bako ni jolma dope hita, margogo do hagiot ni dosa na ro markite-hite Tona i, na markarejo di bagasan goar-goaran ni pamatangta i, mamparbatuhon hamatean. 7:6 Tapi anggo saonnari madung dipalua hita sian Tona i na maniopi hita, angke madung mate hita disia, gabe mangoloi do hita di bagasan haimbaruan mangihutkon Tondi, jana nada di bagasan habuburuk ni surat i. 7:7 Antong, aha ma na tardok hita? Dosa dehe lakna Tona i? Nada! Tapi Tona i do na patandahon tu au taringot tu dosa. Nada huboto hian sanga na aha impol ni roha i, sugari nada didok Tona i, "Ulang impol rohamu." 7:8 Hara ni angka parenta i, gabe sai dipasunggul-sunggul dosa i ma di bagasan rohangku ragam-ragam ni hagiot; angke sugari nada adong hian angka Tona i, dosa i pe mate do. 7:9 Najolo mangolu do au di na so hutanda Tona i. Tapi dung ro angka parenta i, tarsunggul ma dosa i 7:10 jana mate ma au. Jadi parenta i na nitontuhon hian laho pangoluhon, hape gabe mamatehon do tu au. 7:11 Harana di bagasan parenta i, dapotan inganan do dosa i giot paoto-otohon au jana markite-hite parenta i dibunu ia au. 7:12 Jadi badia do Tona i, parenta i pe badia do, tigor jana denggan. 7:13 Muda songon i, gabe hamatean do lakna na denggan i di au? Nada! Tapi anso torang, bahaso ia do dosa, jana dosa mampargunahon na denggan parohon hamatean tu au, anso markite parenta i, dosa i mur torang muse songon dosa. 7:14 Angke madung taboto, partondion do Tona i, tapi anggo au pardagingon do, na targadis gabe hatoban ni dosa. 7:15 Harana au sandiri pe nada huastui na hukarejohon; sanga aha por ni rohangku na giot sibaenonku, hape nada hukarejohon; angka na huhagigihon do na hukarejohon. 7:16 Antong, muda hukarejohon do na maralo tu hagiotku, i ma tandana na huoku paboa na denggan do angka Tona i. 7:17 Jadi anggo satutuna nada au be na mangkarejohon i, tapi dosa na maringanan di bagasan au do. 7:18 Huboto do nian, na so adong sanga aha pe na denggan di bagasan diringku; i ma di bagasan bako na adong di au songon jolma na somal. Adong do nian hagiot ni roha di au, tapi nada mambaen na denggan. 7:19 Nada hukarejohon na denggan haru pe por do nian rohangku mangkarejohonsa; balikna do angka pangalaho na jahat do hukarejohon, na so giot ni rohangku. 7:20 Muda hukarejohon na so giot ni rohangku, artina, nada au be na mangkarejohon na songon i, tapi dosa na mangingani au i do. 7:21 Jadi dapot au Tona songon on: Muda huparhagiot mambaen na denggan, na jahat i do ro tu au. 7:22 Anggo di bagasan, jop do rohangku adop Tona Ni Debata; 7:23 tapi tangkas muse do huboto bahaso adong dope tona na asing di bagasan goar-goaran ni pamatangku na maralo tu na nidok ni tona na nioku ni taroktokki. Hara ni i ma umbaen na tarrahut au tu tona ni dosa na adong di bagasan goar-goaran ni pamatangku. 7:24 Jolma na lebak do au. Ise ma he na giot palua au sian pamatang hamatean on? 7:25 Tarimakasi ma di Debata, markite-hite Jesus Kristus Tuhanta i! Jadi na mangoloi Tona Ni Debata do au mangihutkon rohangku, tapi na mangoloi tona ni dosa do au mangihutkon bako ni hajolmaon.
8:1 Saonnari nada adong be siuhumon di halak na mangolu di bagasan Kristus Jesus. 8:2 Harana madung dipalua bako ni Tondi na pangoluhon i au *AU: Dipiga-piga-piga naskah narobi didok: Hamu; Hita.* sian bako ni dosa na mamatehon i. Tona Ni Tondi na mangalehen ngolu madung paluahon hamu di bagasan Kristus Jesus sian tona ni dosa dohot hamatean. 8:3 Sanga aha na so tarpatupa Tona i, hara ni bako ni hajolmaonta na gale, madung dibaen Debata. Madung ditaluhon Debata do kuaso ni dosa na di bagasan bako ni jolma i, i ma markite-hite na marsuru AnakNia sandiri, na ro di bagasan pangalaho na sarupa dohot jolma pardosa, laho manyesa dosa. 8:4 Dibaen Debata pe songon i, anso tardalankon do tuntutan na tigor sian na nidok ni Tona i di bagasan dirinta, na mangolu mangihutkon Tondi Ni Debata jana na so mangihutkon bako ni jolma. 8:5 Anggo halak na mangolu marguru tu bako ni hajolmaonna, sai na tumbuk tu hagiot ni bako ni jolma do dipasari-sari i. Tapi anggo halak na mangolu mangihutkon Tondi Ni Debata, sai jop ni roha ni Tondi i do dipasari-sari halahi. 8:6 Muda bako ni jolma do manggohi rohaniba, hamatean ma ujungna. Tapi muda Tondi Ni Debata do manggohi rohaniba, mandapot hangoluan ma iba jana hasonangan sian Tondi Ni Debata. 8:7 Marsialoan do bako ni jolma tu Debata; angke na so ra do i mangoloi Tona Ni Debata, boti nada tolapsa muse. 8:8 Halak na mangolu mangihutkon bako ni jolma, nada tarbaensa pasonang roha ni Debata. 8:9 Tapi anggo hamu ale angka dongan, nada mangihutkon bako ni jolma hamu mangolu. Mangihutkon Tondi do hamu mangolu, muda tutu Tondi Ni Debata mangingani dirimunu. Sanga ise na so maruli Tondi Ni Kristus, nada Kristus nampuna ia. 8:10 Tapi muda dung nipatigor hamu jana mangolu Kristus di bagasan dirimunu, jadi Tondi i ma gabe hangoluanmunu, haru pe angkon mate pamatangmunu hara ni dosa. 8:11 Muda Tondi Ni Debata na pangoluhon Jesus sian hamatean i do mangolu di bagasan dirimunu, jadi pangoluonNia muse ma pamatangmunu na ra mate i, songon Kristus na nipangoluNia sian hamatean i, markite-hite TondiNia na mangolu i di bagasan hamu. 8:12 Hara ni i ma hamu ale angka dongan, gabe adong tanggung jawabta; tapi nada tanggung jawab maradopkon bako ni jolma; nada pola porlu hita mangolu mangihutkon hagiot ni bako i. 8:13 Harana, muda mangihutkon bako ni jolma do hamu mangolu, ujungna angkon mate ma hamu; tapi anggo mardongan kuaso ni Tondi Parbadia do, matehononmunu ma torus angka pangalahomunu na mardosa i, gabe mangolu ma hamu. 8:14 Sanga ise na nitogu-togu ni Tondi Ni Debata, i do dakdanak ni Debata. 8:15 Harana anggo Tondi na nijagitmunu i ale angka dongan, nada dibaen i hamu gabe hatoban, anso gabe mangulahi mabiar hamu. Sabalikna do, gabe angka dakdanak ni Debata do hamu dibaen. Jana hara ni pangonjar ni kuaso ni Tondi i, pio-pio ma hita tu Debata mandok, "Abba, ale Amang!" 8:16 Rap manyaksihon do Tondi Ni Debata dohot tondinta laho patangkaskon na tutu hita dakdanak ni Debata. 8:17 Antong, muda dakdanak ni Debata hita, gabe panean ma hita na giot manjagit angka pasupasu na nipasingkop ni Debata di angka dakdanakNia. Rap manjagit ma hita dohot Kristus sanga aha na dung nipasingkop ni Debata. Angke muda manaon na hancit hita rap dohot Kristus, laing dipasangap muse ma hita rap dohot Ia. 8:18 Sude sitaonon na tabolus saonnari, anggo ning rohangku, nada tarpatudos dope i tu hasangapan na giot papataron i di hita. 8:19 Hara ni lungunna, sasudena na nitompa i painte-intehon do sanga andigan hatihana patidahonon ni Debata hasangapan ni angka dakdanakNia i. 8:20 Harana madung dipatunduk sude na nitompa i tu na so hasaya, nada nian hara ni por ni rohana, tapi hara ni hagiot ni Debata na patundukkon i do. Tapi laing adong dope arop ni roha on: 8:21 Di sada hatiha paluaon do na nitompa on sian kuaso na manyegohonsa jana laing dohot do paluaon bope pasangapon rap dohot angka dakdanak ni Debata. 8:22 Taboto do, lopus tu hatiha on, rap manaon do na nitompa i hara ni pardangolanna, songon ina na manaon na hancit di na giot sorang dakdanakna. 8:23 Tapi nada hum i sajo, dohot do hita manjagit patumonaan ni Tondi i, humolos muse do hita di bagasan rohanta huhut painte-intehon hadakdanahan i, i ma haluaan ni pamatangta. 8:24 Angke madung dipalua hita, haru pe laing di bagasan arop ni roha. Tapi muda dung taida na niarop ni rohanta i, nada arop ni roha be na songon i. Harana, ise ma he na sai mararop ni roha tu na dung niidana? 8:25 Tapi muda mararop ni roha do hita tu na so taida dope, gabe sobar ma hita painte-intehonsa. 8:26 Laing songon i do Tondi Ni Debata, na ro do i mangurupi hita di hagaleanta. Angke anggo hita nada taboto sanga na tarbia sapatutna hita martangiang. Tapi Tondi i sandiri do mangadop tu Debata laho mangidohon di hita sian lungun ni roha na so tarhatahon jabat nada tuk hata pajojorkonsa. 8:27 Debata na mandodo angka roha mamboto hagiot ni Tondi i; dibaen diondihon Ia do angka halak na badia mangihutkon hagiot ni rohaNia. 8:28 Taboto do, Debata do na mangatur sasudena, anso gabe manjalak tu dengganna di angka halak na mangkaholongi Ia *DEBATA DO NA MANGATUR SASUDENA, ANSO GABE MANJALAK TU DENGGANNA DI ANGKA HALAK NA MANGKAHOLONGI IA: Dipiga-piga-piga naskah narobi didok: Sasudena do parohon hadengganan di halahi na mangkaholongi Debata.* jana na nipiohonNia hombar tu sangkapNia. 8:29 Angka na nipiliNia, madung ditontuhon muse do halahi sian mulana anso sarupa songon tiruan ni AnakNia, anso Anak i ma gabe siangkaan ni bahat kahanggi. 8:30 Jana halahi na nitontuhonNia sian mulana, laing dipio Ia muse ma i. Jana halahi na nipioNia i laing dipatigor Ia muse ma i. Jana na nipatigorNia i, halahi muse ma na nipasangapNia. 8:31 Aha ma he tardok hita taringot tu sudena i? Muda Debata donganta, ise ma he tarbaen mangalo hita? 8:32 Ia na so mangolani anakNia sandiri, tapi dipasahat Ia do anakNa i hara ni hita sude; nada he lehenonNia muse tu hita sasudena na asing i rap dohot AnakNa i? 8:33 Ise ma he giot mangaduhon angka na nipili ni Debata? Debata do na patigorkon! 8:34 Ise dope na tarbaen manguhumi hita? Kristus Jesus do mangondihon hita! Ia ma na dung mate, lobi sian i dope, Ia ma na dung dipangolu mangulahi sian hamatean jana di siamun ni Debata do Ia maringanan. 8:35 Ise ma he na ra manyirang hita sian holong ni roha ni Kristus i? Parkancitan, sanga hagogotan, sanga pangayak-ayakan, sanga tangkuraparon, sanga parsaemaraan, sanga parmaraan, sanga podang lakna? 8:36 Songon na tarsurat i, "Hara ni Ho di bagasan parmaraan do hami sasadari, nietong do hami songon biri-biri sisambolon." 8:37 Tapi di bagasan sasudena i, na monang situtu do hita markite-hite Ia na dung mangkaholongi hita! 8:38 Harana marpos ni roha situtu do au, bahaso hamatean bope hangoluan, sanga surusuruan bope angka parkuaso; sanga na adong saonnari bope na giot ro, sanga angka hagogoan, 8:39 sanga angka pangalaho na di ginjang bope na di toru, sanga pe angka na asing na nitompa, nada tarbaen manyirang hita sian holong ni roha ni Debata, na di bagasan Kristus Jesus Tuhanta i.
9:1 Tutu do na hudok di bagasan Kristus, nada margabus au, disaksihon taroktokki do songon i markite-hite Tondi Parbadia. 9:2 Marsak sajo do au jana magopu ate-atengku 9:3 hara ni angka kahanggingku dongan sabangsongku. Harana, rade do au sandiri diburai Debata jana sirang sian Kristus hara ni halahi. 9:4 Harana halak Israel do halahi, halahi madung dibaen gabe dakdanak, jana madung manjagit hasangapan, angka tona, ugamo dohot angka janji. 9:5 Pomparan ni angka ompunta i do halahi, jana hajolmaon ni Kristus i pe sian bangso ni halahi do asalna. Gumincat dope Ia sian sasudena. Tarpuji ma Debata ro di salolot-lolotna! *TARPUJI MA DEBATA RO DI SALOLOT-SALOLOT-LOLOTNA: Sanga: Ia do Debata na mangarajai sasudena, tarpuji ma Ia ro di salolot-salolotna.* Amen. 9:6 Tapi anggo hata ni Debata nada sundat. Angke nada sasude na topak sian Israel, tutu halak Israel. 9:7 Nada sude pomparan ni si Abraham, tutu dakdanak ni si Abraham. Angke didok Debata do tu si Abraham, "Hum pomparan ni si Ishak sajo do sigoaron pomparanmu." 9:8 Jadi sian i, anggo pomparan ni si Abraham na gabe dakdanak ni Debata, hum pomparannia na sorang hara ni janji ni Debata sajo do; jadi nada sude pomparannia i. *JADI NADA SUDE POMPARANNIA I: Na patuduhon tu pomparan ni si Abraham na sian si Ismael do on, i ma anaknia na nisorangkon ni si Hagar.* 9:9 Angke songon on do janji ni Debata, "Di hatiha na dung ditontuhon, *DI HATIHA NA DUNG DITONTUHON: Sanga: Di hatiha songon on di taon na ro.* mulak ma Au ro jana adong ma sada anak halaklahi ni si Sara." 9:10 Tapi nada hum i: Adong do dua halak anak ni si Ribka sian sada ama, i ma si Ishak ompunta i. 9:11 Angke taran so sorang dope angka dakdanak i, jana nada podo dibaen halahi bagi aha na denggan sanga na jat, anso togu sangkap ni Debata mangihutkon pamilionNia, nada sian pambaenan tapi markite-hite pamioonNia do, 9:12 madung didokkon tu si Ribka, "Oloan ni na gumodang i do na ummenek i." 9:13 Songon na tarsurat i, "Holong do rohangKu mida si Jakob, tapi na goyak do rohangKu mida si Esau." 9:14 Antong bia ma ujungna dokkononta? Na so tigor do Debata? Anggo i, pasti do tigor Debata! 9:15 Angke didok Debata do tu si Musa, "PatuduhononKu ma denggan ni rohangKu sanga na tu ise giot patuduhononKu denggan ni rohangKi, jana patuduhononKu ma asi ni rohangKu sanga tu ise giotku patuduhononKu asi ni rohangKi." 9:16 Antong nada marguru tu hagiot ni jolma, sanga pambaenan ni jolma, tapi tu holong ni roha ni Debata do. 9:17 Angke Buku Na Badia i mandok tu raja ni Mesir, "Hubaen pe ho gabe raja, na adong do sada maksudKu, i ma laho patuduhon kuasongKu markite-hite ho jana mambaen tarbonggal goarKu di portibi on sudena." 9:18 Jadi, maribo ni roha do Ia tu sada-sada halak, muda por rohaNia mambaen songon i. Jana dipapir Ia do roha ni sada-sada halak, muda giot baenonNia songon i. 9:19 Saonnari giot dokkononmunu ma tu au, "Muda songon i, aha dope na dipasalaNia? Angke ise dehe na mangalo hagiotNia?" 9:20 Ise ma he hamu ale jolma, umbaen na dialo hamunu Debata? Bisa ma he na ditopa mandok tu na manopana, "Biasi dehe ditopa ho au gabe songon i?" 9:21 Nada he markuaso sitopa hudon i di tano liatnia, mambaen sian nasa ragam tano i sada hudon na sangap, bope sada na bile? 9:22 Laing tarsongon i muse ma pambaen ni Debata. Por rohaNia palalu rimasNia dohot patuduhon kuasoNia. Haru pe songon i laing dipahapal Ia do sobarNia maradopkon halak siuhuman hara ni na pamilaskon rohaNia. 9:23 Por muse do roha ni Debata patuduhon tu hita hasangapanNia na marlobi-lobi na niusehonNia tu hita angka na nihaholonganNia. Madung dihobasi Ia hian hita laho manjagit hasangapanNia i, 9:24 tarmasuk hita na dung nipioNia, nada hum sian halak Jahudi, tapi dohot do sian angka bangso na asing. 9:25 Angke didok Debata do di buku ni Panurirang Hosea, "Angka halak na so bangsongKu, goaranKu ma 'BangsongKu'. Bangso na so Huhaholongi, goaranKu ma 'Haholongan ni rohangKu'. 9:26 Jana sanga didia inganan na nidok ni halak, 'Nada bangsongKu hamu,' apala disi ma angka jolma i goaran angka dakdanak ni Debata na mangolu i." 9:27 Torang do didok Panurirang Jesaya taringot tu halak Israel, "Haru pe sabahat ni horsik na di topi ni laut bilangan ni bangso Israel, hum saotik do i sipaluaon; 9:28 harana manigor ma dabuhonon ni Tuhan uhuman tu pangisi ni portibi on." 9:29 Didok si Jesaya muse dope songon on, "Sugari sura inda ditadingkon Debata Na Markuaso i angka pomparan di hita, angkon songon Sodom dohot Gomora hita." 9:30 Antong aha ma dohononta saonnari? On do: Angka bangso na asing na so manjalahi hatigoran, madung dapotan hatigoran, i ma hatigoran hara ni haporsayaan. 9:31 Tapi, anggo Israel na manjalahi tona na parohon hatigoran, nada jabat lalu tu tona i. 9:32 Biasi nada? Dibaen nada hara ni haporsayaan halahi mangkarejohonna, tapi hara ni pambaenan do. Tartuktuk do halahi di batu partuktuhan. 9:33 Songon na tarsurat i, "Ligi da, Hupayakkon do di Sion sada batu partuktuhan dohot sada batu pardandian, jana barang ise na porsaya diSia, nada dipaila be."
10:1 Ale angka dongan, anggo pangidoan ni rohangku dohot tangiangku tu Debata anso dipalua halahi nian. 10:2 Dibaen husaksihon do taringot tu halahi, na ringgas do halahi di Debata, tapi nada dohot roha na mangastui. 10:3 Dibaen hara ni na so ditanda halahi do hatigoran ni Debata jana hara ni na nipajongjong halahi hatigoran di dirina sandiri, jadi nada unduk halahi di hatigoran ni Debata. 10:4 Dibaen Kristus do hasidungan ni Tona i, jadi dapotan hatigoran ma sude halak na porsaya. 10:5 Disuratkon si Musa do taringot tu hatigoran na ro sian Tona i, "Halak na mangkarejohon Tona i, mangolu do markite-hite i." 10:6 Tapi songon on do didokkon hatigoran hara ni haporsayaan, "Indangkon pola dok di bagasan rohamu, 'Ise ma he na giot manaek tu banua ginjang?' (astuanna, paijurkon Jesus), 10:7 sanga, 'Ise ma he na giot mijur tu inganan ni halak na mate?' (astuanna, mangalap Kristus ngot sian na mate)." 10:8 Tapi aha do na nidok ni i? On do, "Na donok do Hata i tu ho, i ma di bagasan pamanganmu dohot di bagasan rohamu." 10:9 Angke sugari dioku ho markite-hite pamanganmu, "Ia do Tuhan," jana porsaya ho di bagasan rohamu, na dung dipangolu Debata Jesus sian hamatean, malua ma ho. 10:10 Harana marhite roha do halak porsaya jana dipatigor. Jana marhite pamanganna do halak mangoku, gabe dipalua. 10:11 Di Buku Na Badia i tarsurat do, "Sanga ise na porsaya tuSia nada pailaon." 10:12 Harana nada adong imbarna halak Jahudi bope halak na asing, harana sada do Tuhan ni sasude jolma. Dilehen Ia do pasupasuNa tu halak na mangido tolong tuSia. 10:13 Angke, "Sude halak na mamiohon goar ni Tuhan, i do na giot dipalua." 10:14 Tapi bia ma parpio ni halak tuSia anggo so porsaya dope halahi tuSia? Jana bia ma pangkaporsayai ni halahi di Tuhan i anggo so jolo dibege halahi taringot tuSia? Jana bia ma baenon ni halahi umbege taringot tuSia, anggo so adong halak na manjamitahonsa? 10:15 Tapi songon dia ma he halahi manjamitahon, muda nada disuru? Songon na tarsurat i, "Denggan na i haroro ni sioban Barita Na Denggan i!" 10:16 Tapi nada sudena halak manjagit Jamita Na Denggan i. Angke didok si Jesaya do, "O Tuhan, ise ma he na mangkaporsayai na hami baritahon i?" 10:17 Jadi sian parbinegean do ro haporsayaan, jana parbinegean i markite-hite hata ni Kristus. 10:18 Tapi husapai ma: Nada he dibege halahi do i? Madung dibege halahi do i, "Angke madung lalu do sora ni halahi tu sandok tano on, jana hata ni halahi madung tu liat portibi on." 10:19 Tapi husapai ma: Adong dehe diantoi Israel i? Na parjolo didok si Musa, "Hubaen do hamu gabe mangiburu tu na so bangsongKu jana Hubaen do rimas ni rohamunu hara ni bangso na hurang roha i." 10:20 Umpuluk do si Jesaya mandok, "Madung padumpang dohot Au angka halak na so manjalahi Au; jana madung Hupatidahon diringKu tu halak na so marsapa taringot tu Au." 10:21 Tapi anggo taringot tu halak Israel didok ia do, "Songon on ma pandok ni Debata, 'Husurduhon do tanganKu sasadari tu sada bangso sijogal roha jana na tangkang.' "
11:1 Marsapa ma au: Adong he na dung diambungkon Debata bangsoNia i sandiri? Tontu inda! Au sandiri pe halak Israel do, pomparan ni si Abraham jana sian Marga Benyamin. 11:2 Nada! Nada diambungkon Debata bangso na nipiliNia i sian mulana. Diboto hamu do ale angka dongan na tarsurat di Buku Na Badia i taringot tu si Elia, di na niaduhonNia pangalaho ni halak Israel tu Debata. Didok si Elia, 11:3 "O Tuhan, madung dibunu halak angka panurirangMi jana madung dironcohon halahi angka inganan parkaulan tu Ho. Hum sasada au sajo noma na tinggal, au pe giot bunuon ni halahi ma." 11:4 Tapi bia do alus ni Debata tusia? "Hutinggalkon dope pitu ribu halak di Au, na so unjung marsomba tu Baal." 11:5 Laing songon i ma saonnari dihatiha on, adong do na gabe teba-teba mangihutkon pamilion ni asi ni roha. 11:6 Tapi hara ni asi ni roha do, nada be sian pambaenan; sugari nada songon i nada asi ni roha be dohonon asi ni roha i. 11:7 Antong songon dia noma? Na nijalahan ni halak Israel nada dapot halahi i, tapi angka na nipili i do dapotansa; jana anggo na asing i madung pir songon batu. 11:8 Songon na tarsurat, "Lopus tu ari sadari on madung dilehen Debata di halahi tondi parpodom, mata na so marnida dohot pinggol na so marbinege." 11:9 Si Daud pe didok ia do, "Sai gabe jaring dohot sambil ma meja ni halahi, jana gabe partuktuhan dohot pamaloson di halahi! 11:10 Padiar ma manggolap parnidaan ni halahi anso ulang marnida be halahi; jana padiar ma puhung halahi ro di salolot-lolotna." 11:11 Jadi marsapa ma au: Na tartuktuk dehe halahi jana angkon tinggang? Nada! Tapi markite-hite pangalaosion ni halahi, dapotan haluaan ma angka bangso na asing, anso gabe mangiburu halak Israel. 11:12 Angke muda pangalaosion ni halahi gabe hamoraon di portibi on, jana hahurangan ni halahi gabe hamoraon di angka bangso na asing, mur noma di hamamasuk ni halahi sudena. 11:13 Hudok ma tu hamu, ale angka bangso na so Jahudi. Rasul ni angka bangso na so Jahudi do au, jana huetong do i gabe hasangapan ni pangoloionku. 11:14 Anggo ninna rohangku tarbaen au do mangiburu roha ni dongan sabangsongki, anso tarpalua nanggo apala deba nian sian halahi. 11:15 Dibaen muda panulakon ni halahi gabe pardengganan tu portibi on, nada he gabe songon hangoluan sian na mate ma i, muda dung tulus halahi dijagit? 11:16 Muda badia patumonaan i, na badia do muse sude sipanganon i; jana muda badia urat i, na badia do muse dangkana. 11:17 Diponggolkon deba sian dangka ni hayu i, jana nilohotkon ma ho na dibuat sian hayu harangan i tu inganan ni halahi gontina, anso martohap ho di urat dohot di miak ni hayu zetun i. 11:18 Hara ni i, ulang ma ginjang rohamu maradopkon angka dangka i! Muda ginjang rohamu, ingot ma; nada ho na manogang urat i, tapi na ditogang ni urat i do ho. 11:19 Betak giot dokkononmu do, "Adong do angka dangka na diponggolkon, anso au manggontihon halahi." 11:20 Tutu do nian songon i. Tapi diambungkon pe halahi, hara ni na so porsaya do halahi, jana dijagit pe ho hara ni na porsaya do ho. Jadi ulang pola gabe ginjang rohamu hara ni i; gari ada angkon mabiar do ho. 11:21 Dibaen muda nada di haholongi Debata angka dangka na humani i, Ia pe nada mangkaholongi ho! 11:22 Jadi sian i tarida hita ma sanga na bia denggan ni roha ni Debata dohot pir ni rohaNia. Pir do tindakanNia anggo tu halak pardosa, tapi anggo tu ho denggan do rohaNia -- asal ma laing sian hadengganan ni rohaNia ho mangolu. Anggo inda songon i, ho pe ambungkononNa do muse. 11:23 Jana taringot tu halak Jahudi pe, sugari mantak halahi na so ra porsaya i, dilohotkon do halahi muse, angke tuk do gogo ni Debata mangalohotkon halahi mangulahi. 11:24 Hamu na so halak Jahudi sarupa do hamu tu dangka ni zetun harangan i. Antong, salang hamu tarlohotkon do tu batang ni zetun na polin i na so sarupa hian dohot batangmunu sandiri, mur ma halak Jahudi na nipartudoskon tu angka dangka ni zetun na polin i, tontu ummura dope baenon ni Debata laho mangalohotkon halahi mangulahi tu bona ni zetun ni halahi sandiri. 11:25 Hara ni i ale angka dongan, ulang ma didok rohamunu na dung pistar hamu, giotku nian botoonmunu ma hasimoon on. Madung songgop hatangkangon tu bangso Israel, lopus gok masuk bilangan ni angka bangso na asing. 11:26 Jana i do gabe dalan, anso malua sandok bangso Israel, hombar tu na tarsurat i, "Ro ma sian Sion Sipalua i, sesaonNia ma hajahatan sian pomparan ni si Jakob. 11:27 Jana on ma parjanjianKu maradopkon halahi, muda Husesa angka dosa ni halahi." 11:28 Mangihutkon Jamita Na Denggan i, musu do halahi hara ni hamu, tapi mangihutkon pamilion i haholongan do halahi hara ni angka ompu i. 11:29 Dibaen nada disolsoli Debata rohaNia, taringot tu na nilehen dohot na nipiohonNia. 11:30 Najolo nada mangoloi Debata hamu. Hape saonnari madung dapotan asi ni roha do hamu, hara ni na so ra halak Jahudi mangoloi. 11:31 Laing tarsongon i do bope halak Jahudi. Saonnari nada ra halahi mangoloi, tapi markite asi ni roha na tu hamu, halahi pe dapotan asi ni roha. 11:32 Harana na dung dipadiar Debata do sude jolma na ditano on dirajai hatangkangan, anso tarpatidahon Ia asi ni rohaNia tu halahi sudena. 11:33 Bagasna i antong hamoraon, habisuhon dohot parbinotoan ni Debata! Na so tardodo do angka haputusanNia, jana nada tarastui angka dalanNia. 11:34 "Ise ma he mangastui pikiran ni Tuhan? Ise ma he na tarbaen mangalehen sipaingot tuSia? 11:35 Ise ma halak na jungada mangalehen bagi aha tuSia , jana gabe tarbaensa martunggu balosna?" 11:36 Angke sian Ia, jana markite-hite Ia, jana tuSia do sudena na adong. DiSia ma hasangapan ro di salolot ni lolotna! Amen.
12:1 Hara ni i ale angka dongan, hupaingot ma hamu markite-hite ibo ni roha ni Debata, anso dipasahat hamu dirimunu gabe haul na mangolu, na badia jana na tumbuk di roha ni Debata, i ma na gabe hangoluanmunu na sapatutna. 12:2 Ulang pahombar hamu dirimunu tu hasiangan on, tapi pauba hamu ma dirimunu markite-hite haimbaruon ni rohamunu anso tartimbang hamu sanga dia do hagiot ni Debata: Na denggan, na tumbuk jana na sanggam. 12:3 Markite-hite asi ni roha na nilehen di au, hupaingot ma hamu ganup marsada-sada ulang ma dipikiri hamu taringot tu hamu lobi sian na patut, tapi intap ni na patut ma parrohaonmunu, mangihutkon haporsayaan na diturpukkon ni Debata tu hamunu. 12:4 Songon pamatangta on, bahat do goar-goaranna, tapi nada dos karejo ni sude goar-goaran i. 12:5 Laing songon i do hita. Haru pe bahat hita, laing sada pamatang do hita di bagasan Kristus, tapi laing goar-goaran do na sada tu na asing. 12:6 Laing songon i ma hita manjagit silehen-lehen na marasing-asing mangihutkon asi ni roha na dung dilehen tu hita. Halak na manjagit silehen-lehen anso manyurirangi, angkon karejohonon ma i mangihutkon haporsayaannia. 12:7 Halak na mangurupi halak na asing, angkon marsitutu ma nian mangurupi halak. Halak na mangajari, tutu ma na mangajari i. 12:8 Halak na laho paingotkon dongan, angkon marsitutu ma paingotkon halak na asing. Halak na marsilehen-lehen na adong disia, angkon sian burju ni roha na patut ma i dibaen. Halak na mamimpin, angkon dihaburjuhon ma na mamimpin i. Halak na maribo ni roha tu na asing, angkon sian jop ni rohana do i baenonna. 12:9 Ulang mangalancap-lancap holong ni roha i! Magigi ma hamu mida na jahat, parayak hamu ma na denggan. 12:10 Tangkas ma hamu antong marsihaholongan sama hamu songon halak na martinadohon, jana marsijolo-joloan ma hamu marsipasangapan. 12:11 Ulang ma nian sumurut hariringgasmunu i, marsigorgor ma tondimu laho mangoloi Tuhan i. 12:12 Jop ma rohamunu mararop roha tu Tuhan i, sobar ma hamu muda ro hasusaan, jana haburjuhon hamu ma na martangiang. 12:13 Urupi hamu ma na patukkon haporluan ni angka halak na porsaya tu Debata jana sonang ma rohamunu manjagit haroro ni halahi tu bagasmunu. 12:14 Pasupasu hamu ma sanga ise na mamparkanciti hamu, pasupasu hamu ma jana ulang burai hamu. 12:15 Marjop ni roha ma hamu dohot angka na marjop ni roha, jana tangis ma hamu dohot angka na tangis. 12:16 Saroha ma hamu sama hamu, ulang jalahi hagodangan, tapi patoruk ma rohamunu tu haserepon, ulang ma etong hamu na pistar do hamu. 12:17 Muda jat dibaen halak tu hamu, ulang pola baloskon hamu i dohot na jat. Baen hamu ma aha na denggan tu sude halak. 12:18 Intap ni na tarbaen, mardame ma ngolumunu tu halak sudena. 12:19 Hamu ale angka dongan na nihaholongan! Ulang ma hamu sandiri na mambaen pambaloson, tapi lehen ma inganan tu hamumuruk ni Debata. Angke tarsurat do, "Au do mambaen pambaloson," ninna Tuhan. 12:20 Hara ni i, muda male musumunu, lehen ma ia mangan; jana muda manguas ia, lehen muse ma ia minum. Angke muda songon i dibaen hamu, gabe ila ma rohania dibaen hamu. 12:21 Ulang ma padiar hamu dirimunu ditaluhon na jat i, tapi taluhon hamu ma hajahatan i markite-hite hadengganan.
13:1 Angkon sude do halak mangoloi pamarenta, angke nada adong pamarenta na so manjagit kuasona sian Debata. Jana pamarenta na adong pe, sian parenta ni Debata do i. 13:2 Hara ni i, muda adong halak na mangalo pamarenta, sarupa dohot na mangalo tu hatontuan ni Debata do i. Jana siuhumon do halak na songon i. 13:3 Harana anggo halak na mambaen na denggan, inda pola mabiar ia tu pamarenta. Hum halak sibaen na jahat do na angkon mabiar. Muda por rohamunu anso ulang pola mabiar hamu mida pamarenta, angkon denggan do pangalahomunu, gabe sipujion ma hamu. 13:4 Angke pangoloi ni Debata do pamarenta, na markarejo parohon na denggan tu hamu. Tapi muda dibaen hamu na jat, angkon gabe mabiar ma hamu tu pamarenta, harana nada sayang boti pamarenta i maroban podangna. Suruan ni Debata do i mandabu uhum tu halak na mambaen na jahat. 13:5 Hara ni i patut ma unduk rohanta, nada hum hara ni rimas ni Debata, tapi na dionjar ni taroktok i do. 13:6 Laing hara ni i ma, umbaen na angkon gararonmunu pajak, angke songon parkarejo ni Debata do pamarenta laho mandalankon karejo sisongon i. 13:7 Garari hamu ma tu sude halak sanga aha na patut sigararonmunu: Garar hamu ma pajak di na patut manggarar pajak hamu, garari hamu bea di na patut manggarar bea. Habiari hamu ma na patut sihabiaran jana parsangapi hamu ma na patut sipasangapon. 13:8 Ulang marutang hamu bagi aha tu sanga ise pe, di balik ni utang holong ni roha na sada tu na asing. Harana sanga ise halak na mangkaholongi dongan jolma, madung dipatulus halahi Tona i. 13:9 Angke adong do tarsurat: Ulang markarosuan; ulang mamunu jolma; ulang manangko; ulang impol rohamu di sanga aha pe nampuna ni halak na asing; sudena i bope dohot angka aturan na asing i, nirahut do gabe sada aturan sajo, i ma na mandok, "Haholongi ma donganmu jolma songon pangkaholongimu di dirimu sandiri." 13:10 Sanga ise na mangkaholongi donganna jolma, nada baenonna be na jahat tu halahi. Jadi sanga ise na markolong ni roha, i ma halak na dung patuluskon Tona i. 13:11 Tamba ni sudena i, sude do hamu umbotosa taringot tu hatiha on, on ma hatiha na tama anso tarsunggul hita sian na modom. Angke madung dumonok saonnari hatihana di hita anso malua, sian dompak di na mamungka hita porsaya. 13:12 Salpu ne ma borngin; jana torang ma ari santongkin nari. Antong, taantak ma angka pangalaho na golap. Tapasingkop ma dirinta dohot sinjata na torang. 13:13 Angkon pantun do hita songon na somal dibaen halak di ari na torang, ulang ma marpesta godang marlobi-lobi, sanga mabuk. Ulang rorang, sanga marpangalaho na so ture. Ulang marbada-badai, sanga mangiburu. 13:14 Padiar hamu ma Tuhan Jesus Kristus manontuhon sanga aha sibaenonmunu. Jana ulang be dioloi hamu bakomunu na mardosa i laho papuaskon hagiot ni sibuk.
14:1 Jagit hamu ma halak na gale dope haporsayaanna, ulang ma uhumi hamu pandapot ni halahi. 14:2 Adong do halak na mandok, tola panganonna sanga aha sajo pe. Tapi adong muse do halak na gale dope haporsayaanna; hum angka sayur simarata sajo ma dihilala ia na tola panganonnia. 14:3 Sanga ise na so marimbar panganonna, ulang pola gabe layas rohania mida halak na marimbar sipanganonna; jana halak na marimbar sipanganonna, ulang ma antong disalahon ia angka na mangankon sasudena, angke salang Debata madung manjagit ia. 14:4 Tarbia ma he hajolmaonmu umbaen na jabat diuhumi ho naposo ni halak na asing? Sanga na tungkap naposo i sanga na jongjong, inda he urusan ni tuannia i do i? Jana denggan do ia jongjong angke marguru di Tuhan do mambaen ia jongjong. 14:5 Adong do halak na mangetong sada-sada ari dumenggan ulang angka ari na asing, hape na deba mangkilala sarupa do sudena angka ari i. Padiar ma songon i marsitontuhon pandirianna be angka jolma i. 14:6 Halak na mangkilala umporlu sada-sada ari, laho pasangap Tuhan i do dibaen halahi songon i. Halak na mangankon sanga aha sajo, laho pasangap Tuhan i do i, angke mandok tarimakasi do ia tu Debata hara ni sipanganon i. Laing songon i muse do halak na marimbar sipanganonna; halahi pe dipasangap halahi do Tuhan i jana mandok tarimakasi do halahi tu Debata. 14:7 Sahalak pe nada adong sian hita na mangolu hum di dirina sajo; jana sahalak pe nada adong sian hita na mate di dirina sajo. 14:8 Muda mangolu hita, di Tuhan i do hita mangolu. Jana muda mate pe hita, laing di Tuhan i muse do hita mate. Antong, sanga mangolu sanga na mate, Tuhan i do nampuna hita. 14:9 Madung mate Kristus, jana mulak mangolu. Hara ni i ma umbaen na gabe Tuhan Ia di halak na mangolu dohot muse di angka na dung mate. 14:10 Antong, hamu ale angka dongan! Aha ma gunana muda dipasala hamu dongan sahaporsayaanmunu? Jana aha pola gunana lakna muda layas rohamunu mida halahi? Sasudena hita on, angkon mangadop tu Debata anso diuhumi. 14:11 Angke tarsurat do, "Na mangolu do Au," ninna Tuhan i, "jadi sude halak angkon marsinggang di jolongKu; jana okuon ni ganop halak ma, Au do Debata." 14:12 Jadi angkon patorangonta be do tu jolo ni Debata sudena angka karejo na tapambaeni i. 14:13 Hara ni i ulang marsiuhuman hita sama hita! Gumonan ma ulang tabaen sanga aha na maroban donganta gabe madabu sanga tartuktuk. 14:14 Huboto do jana porsaya do au di bagasan Tuhan Jesus, na so adong sanga aha na hodar sian dirina humani; tapi gabe hodar ma i di sada-sada halak, muda hodar i dihilala ia. 14:15 Tapi muda hara ni sanga aha na nipanganmunu, gabe hancit roha ni donganmu sahaporsayaan, jadi nada marojahan tu holong ni roha be hamu disi. Muda na dung mate Kristus hara ni sada-sada halak, ulang ma padiar hamu sego halahi patunda ni na nipanganmunu. 14:16 Antong angka na denggan na di hamu, ulang ma padiar hamu dilayasi halak. 14:17 Harana anggo di Harajaan Ni Debata, nada sipanganon sanga siinumon na porlu disi, tapi hatigoran dohot hadamean dohot jop ni roha na nilehen ni Tondi Parbadia do. 14:18 Sanga ise na mangoloi Kristus songon i, i ma halak na pasonang roha ni Debata jana diargahon angka dongan na asing. 14:19 Jadi hara ni i, siparayahanta do tongtong angka pangalaho na mambaen hasosonang jana na marsipadengganan. 14:20 Ulang ma hara ni angka sipanganon, gabe disego-sego hamu na nikarejohon ni Debata. Tutu do, ias do sude sipanganon; tapi muda patunda ni na nipanganmunu do gabe mardosa halak na asing, hamu do na sala disi. 14:21 Gumonan ma indangkon sai nipangan juhut sanga niinum anggur sanga aha sajo pe tehe, muda patunda ni i do tartuktuk dongan na asing. 14:22 Anggo haporsayaanmi, urusanmu sandiri ma i tu Debata. Sanga ise na manimbang dirina nada marsala di na nietong ni rohana dirina tigor, martua do halak sisongon i. 14:23 Tapi sanga ise halak na ganggu rohana laho mangankon sanga aha, hape laing dipangan ia muse sipanganon i, hona uhum do, angke nada markite-hite haporsayaan dikarejohon. Angka na so tubu sian haporsayaan, dosa do i.
15:1 Anggo hita na margogo, angkon manaon hagaleon ni angka na so margogo do. Ulang ma tajalahi hasonangan ni dirinta sandiri. 15:2 Gumonan do hita manjalahi hasonangan ni dongan, laho parayakkon hadenggananna jana paulihonsa. 15:3 Harana, Kristus pe nada hasonanganNia sajo dipikirkon Ia. Songon na tarsurat, "Sude incak-incak na tu hamu, gabe tu Au do madabu." 15:4 Harana sanga aha na dung tarsurat na jolo, gabe parsiajaran do i di hita, anso togu hita di panghirimon i, markite-hite hapohomon dohot pangapoion sian Buku Na Badia i. 15:5 Debata do mual ni hapohoman dohot pangapoion. Sai dilehen Ia ma di hamu hasadaon mangihutkon hagiot ni Kristus Jesus, 15:6 anso saroha jana sahata ma hamu mamuji-muji Debata, Ama ni Tuhanta Jesus Kristus. 15:7 Antong marsijagitan ma hamu sama hamu, songon panjagit ni Kristus di hamu sude laho pasangapkon Debata. 15:8 Tapi on do na hudok, na gabe pangoloi ni halak Jahudi do Kristus, hara ni hasintongan ni Debata, anso dipatogu Ia janji na dung nilehenNia di angka ompunta. 15:9 Angke bangso na asing pe dibaen Ia do pasangap Debata hara ni asi ni rohaNia, songon na tarsurat di Buku Na Badia i, "Hara ni i giot pasangaponku noma Ho di tonga-tonga ni angka bangso. jana mangendehon puji-pujian di goarMu." 15:10 Adong muse do tarsurat songon on, "Marjop ni roha ma hamu ale angka bangso na asing, rap dohot bangsoNia." 15:11 Dohot on dope, "Puji hamu ma Debata, hamu ale angka bangso sudena, sai puji hamu ma Ia, o hamu sude jolma manusia!" 15:12 Jana didok si Jesaya dope songon on, "Ro ma sada halak sian pomparan ni si Isai, parentaonNia ma angka bangso; mararop ni roha tuSia angka bangso i." 15:13 Debata do arop ni rohamunu. Sai digohi Ia ma rohamunu dohot jop ni roha bope dohot hasonangan di bagasan haporsayaanmunu tuSia, anso mur mararop roha hamu tu Debata baenon ni gogo ni Tondi Parbadia. 15:14 Hamu ale angka dongan! Pos do rohangku angkon bahat do angka pangalaho na denggan di hamu. Sasude do diboto hamu jana tarbaen hamu muse do marsiajar-ajaran na sada tu na sada nari. 15:15 Tapi haru songon i pe hupulukkon do rohangku mambaen surat tu hamu, songon na paingotkon hamu hara ni asi ni roha na nilehen ni Debata tu au. 15:16 Madung dibaen Ia do au gabe pangoloi ni Kristus Jesus, suruanNia mandapotkon angka bangso na asing. Jana hubaen do au gabe songon malim, manjamitahon Jamita Na Denggan na sian Debata anso gabe haul na tumbuk tu roha ni Debata angka halak na asing i. Sai gabe haul hapunjungan ma di Debata halahi baenon ni Tondi Parbadia. 15:17 Hara ni i tola do au mamuji diringku di bagasan Jesus Kristus taringot tu Debata. 15:18 Angke nada puluk au mangkobari taringot tu bagi aha pe, asing ni na dikarejohon ni Kristus markite-hite au, anso hupatunduk angka bangso na asing tu pangoloion, markite-hite hata dohot pambaenan, 15:19 na nidonganan ni angka tanda hahomangan na sian gogo ni Tondi Parbadia do sudena i. Madung sudena hubaritahon Jamita Na Denggan sian Kristus i tu angka jolma, mamungka sian Jerusalem lopus tu Ilirikum. 15:20 Tapi on do na huharinggaskon, anso hujamitahon Jamita Na Denggan, barang di dia na so tarbarita dope goar ni Kristus i, anso ulang hupajongjong bagas di ginjang ni ojahan na nipayakkon ni halak. 15:21 Tapi songon na tarsurat i, "Angka na so jungada dope manjagit barita taringot tuSia, idaonna ma; jana halak na so jungada manangihon dope, astuan ni halahi ma." 15:22 Hara ni i do umbaen na jotjot au sundat manopot hamu angka dongan. 15:23 Tapi anggo saonnari madung sidung karejongku di angka luat i. Madung martaon-taon honokna sai por rohangku manopot hamu nian. 15:24 Jadi muda mardalan au tu Spanyol, disi ma au ro tu hamu dibaen arop do rohangku idaonku ma hamu, di na mamolus i au, anso didongani hamu ma au tusi, dung jop rohangku marsuo dohot hamu. 15:25 Tapi anggo saonnari giot tu Jerusalem dope au pasahatkon pangurupion tu angka dongan sahaporsayaan na disi. 15:26 Harana madung saroha angka parlagutan na di Makedonia dohot na di Akaya laho mangalehen pangurupion tu angka dongan na pogos sian tonga-tonga ni dongan sahaporsayaan. 15:27 Denggan do na dung diputuskon ni halahi, jana utang do i di halahi. Harana muda taruli angka bangso di arta partondion sian halak Jahudi, jadi patut do ditolongi angka bangso na asing i halak Jahudi i taringot tu arta na di portibi on. 15:28 Muda dung sidung hubaen karejongkon, jana hupasahat pangurupion na nipalagut i tu halahi na di Jerusalem, kehe ma au tu Luat Spanyol mamolus sian kotamunu on. 15:29 Huboto do muda ro au, angkon boanonku do angka pasupasu na sian Kristus di hamu. 15:30 Hara ni Tuhanta Jesus Kristus dohot hara ni holong ni roha na nilehen ni Tondi i, gomos ma hupangido tu hamu angka dongan, anso dohot ma nian hamu marsitutu martangiang rap dohot au tu Debata taringot tu au. 15:31 Anso malua au sian angka na so porsaya na adong di Judea, jana anso tumbuk tu roha ni halak na porsaya na di Jerusalem karejongki. 15:32 Jadi hara ni i, muda tumbuk di roha ni Debata, tarbaen au ma ro mandapotkon hamu angka dongan di bagasan jop ni roha. Jana dapotan apo-apo ma au di tonga-tongamunu. 15:33 Sai di dongani Debata pardenggan basa i ma hamu angka dongan sudena. Amen.
16:1 Hupasahat ma ibotonta si Poibe na mangurupi na saidanna i di parlagutan na di Kenkrea. 16:2 Jagit hamu ma ia di bagasan Tuhan i, songon na tama di angka halak na badia, anso ditolongi hamu ia di sude karejonia muda porlu, harana bahat do diurupi ia angka dongan bope au sandiri. 16:3 Palalu hamu ma tabengku tu si Priskila dohot si Akuila, i ma angka donganku saparkarejoan di bagasan Kristus Jesus. 16:4 Madung martaru hosa halahi humopkop ngolungku, nada hum au sajo na mandok tarimakasi tapi dohot do sude parlagutan na sian bangso na so Jahudi. 16:5 Laing pabolkas hamu ma tabengku tu parlagutan na marpungu di bagas ni halahi i. Tabe tu haholongan ni rohangku si Epenetus. Ia ma na parjolo porsaya tu Kristus di Luat Asia. 16:6 Tabengku muse tu si Maria. Songon i ma lojana dihilala ia na markarejo i di hamu. 16:7 Laing pasahat hamu ma tabengku tu si Andronikus dohot tu si Junias. *JUNIAS: Sanga: Juni jana di piga-piga naskah narobi didok: Julia.* Dongan samargangku do halahi na dua jana unjung do halahi rap tarhurung dohot au. Dompak so porsaya dope au tu Kristus, madung parjolo halahi porsaya. Tarbonggal do halahi di tonga-tonga ni angka rasul. 16:8 Tabe tu si Ampliatus na huhaholongi di bagasan Tuhan i. 16:9 Paboa hamu ma tabengku tu si Urbanus, donganta saparkarejoan na rap dohot hita di bagasan Kristus i. Dohot tu si Stakus na huhaholongi i. 16:10 Tabe tu si Apelles, na polin di bagasan Kristus i. Tabengku muse tu dongan sabagas ni si Aristobulus, 16:11 dohot tu si Herodion. Samarga do i dohot au. Dohot tabe tu angka dongan sabagas ni si Narkisus, na rap porsaya tu Tuhan. 16:12 Tabengku tu si Tripena dohot si Triposa na marsitutu karejo mangoloi Tuhan, dohot tu si Persis na nihaholongan. Ia pe madung marsitutu karejo mangoloi Tuhan i. 16:13 Tabe tu si Rufus dohot inanta i, na gabe songon dainang do i di au sandiri. Halak na tarpuji do si Rufus, na nipili ni Tuhan. 16:14 Palalu ma tabengku tu si Asinkritus, si Plegon, si Hermes, si Patrobas, si Hermas dohot tu sude angka dongan na rap dohot halahi. 16:15 Tabe tu si Pilologus dohot si Julia; tu si Nereus bope tu ibotonia i; tu si Olimpas dohot tu sude angka na porsaya na rap dohot halahi. 16:16 Marsijalangan ma hamu sama hamu sian ias ni roha songon tu dongan Kristen. Palalu tabe do tu hamu, angka parlagutan ni Kristus. 16:17 Tapi hupaingot ma hamu, ale dongan, pardimata hamu ma angka na mangalo pangajaran na niguruhonmunu i, jana na mambaen parsalisian dohot pardandian. Padao hamu ma sian halahi. 16:18 Harana anggo halak sisongon i nada tu Kristus Tuhanta i halahi markarejo, tapi laho palalu na di roha ni halahi sajo do. Markite-hite hata na lambok jana na tabo begeon, dipaoto-oto halahi do angka halak na bulus roha. 16:19 Angke diboto halak do sudena taringot tu pangoloionmunu, jadi jop do rohangku hara ni hamu jana di pangido rohangku, anso pistar hamu tu na denggan, tapi ias maradopkon hajahatan. 16:20 Tapi tibu ma diropukkon Debata mual ni hasonangan i, Sibolis i tu toru ni patmunu! Sai didongani asi ni roha ni Tuhanta Jesus Kristus ma hamu. Sai tongtong ma hamu dipasupasu Jesus Kristus Tuhanta i! *Dipiga-piga naskah narobi nada adong ayat on.* 16:21 Si Timoteus donganki pe palalu tabe do tu hamu angka dongan sahaporsayaan. Songon i dohot sian si Lukius, si Jason dohot si Sosipater donganku samarga. 16:22 Anggo na mambaen surat on, au do si Tertius. Laing pasahat tabe ma au di hamu angka dongan di bagasan Tuhanta i. 16:23 Manongos tabe do si Gayus tu hamu angka dongan. Di bagasnia do au manompang jana laing di bagasnia do hami margareja. Si Erastus kapala ni sitiop hepeng ni pamarenta ni kota i pe laing manongos tabe do tu hamu. Songon i si Kuartus donganta i. 16:24 Sai dipasupasu Tuhanta Jesus Kristus ma hamu angka dongan sudena. Amen. 16:25 Debata do na tarbaen patogu rohamunu mangihutkon Jamita Na Denggan na hujamitahon i, i ma taringot tu Tuhan Jesus Kristus, jana mangihutkon hasimoon na dung dipapatar, dung jolo ditabunihon sian na robi. 16:26 Madung dipatidahon do saonnari hasimoon i markite-hite surat ni angka panurirang i, mangihutkon parenta ni Debata na salolot ni lolotna, jana dipabotohon i di sude bangso, anso porsaya halahi sude jana mangoloi tu Debata. 16:27 Hum sasada Ia sajo do Debata na sun pistar. Sai marsangap situtu ma Ia salolot-lolotna markite-hite Jesus Kristus i! Amen.
1:1 Sian si Paulus, hara ni hagiot ni Debata dipio gabe rasul ni Kristus Jesus, dohot sian si Sostenes donganta; 1:2 tu parlagutan ni Debata na di Korintus, i ma angka na diparbadiai di bagasan Kristus Jesus jana na nipiohon gabe angka halak na badia, dohot tu sude halak di sude ingananna, na mamiohon goar ni Tuhanta Jesus Kristus, i ma Tuhan ni halahi dohot Tuhanta. 1:3 Asi ni roha dohot hasonangan na sian Debata Amanta dohot sian Tuhan Jesus Kristus ma na mandongani hamu. 1:4 Sai tongtong do au mandok tarimakasi tu Debata hara ni hamu, dibaen madung dijagit hamu basa-basa na sian Debata markite-hite Jesus Kristus. 1:5 Gabe mamora do hamu taringot tu sudena pangalaho, dung Kristus nampuna hamu. Parbinotoanmunu pe madung bagas situtu taringot tu sude pangalaho jana malo muse do hamu mangajarkon parbinotoan i. 1:6 I ma tandana paboa na dung tangkas barita taringot tu Kristus mangarajai rohamunu, 1:7 gabe nada adong be na hurang pasupasu di hamu, di na nipainte-intemunu Tuhanta Jesus Kristus ro jana idaon ni halak sudena. 1:8 Patoguon ni Kristus do rohamunu lopus tu ujungna, jadi muda ro Ia mangulahi, nada adong be na martihas di hamu. 1:9 Pos do roha di Debata, nada adong sihagangguhonon diSia. Ia do Debata na mamio hamu gabe sada dohot AnakNa i, i ma Jesus Kristus Tuhanta i. 1:10 Hamu ale angka dongan! Mangasahon goar ni Tuhanta Jesus Kristus hupangido anso saroha hamu sudena di sude pangkataionmunu, anso ulang masa parbolat-bolatan di hamu. Angkon laing sada do hamu di pikiran dohot di angka haputusanmunu. 1:11 Harana madung lalu baritana sian pangisi ni bagas ni si Koloe na adong parsalisian di tonga-tongamunu. 1:12 Na hudok disi, on do: Adong sian hamu na mandok, "Anggo au marpihak tu si Paulus do," adong muse na mandok, "Au marpihak tu si Apollos do," na asing mandok, "Au marpihak tu si Kepas do." Na deba nari mandok, "Anggo au marpihak tu Kristus." 1:13 Adong dehe lakna tarbagi-bagi Kristus i? *TARBAGI-BAGI KRISTUS I?:Dipiga-piga naskah narobi didok: Nada tarbagi-bagi Kristus i.* Adong dehe lakna diparsilangkon si Paulus hara ni hamu, sanga nipandidihon hamu di bagasan goar ni si Paulus? 1:14 Tuani ma inda adong na hudidihon sian hamu asing sian si Krispus dohot si Gayus. 1:15 Ulang adong sahalak pe na jabat mandok na hudidihon sanga ise anso gabe mamihak tu au. 1:16 (Olo tehe! Si Stefanus pe nian dohot dongan sabagasnialaing au do mandidihon halahi. Tapi anggo asing sian i, sapanjang na huingot nada adong be na hupandidihon.) 1:17 Nada na giot mandidihon umbaen na nisuru ni Kristus au, tapi na giot manjamitahon Jamita Na Denggan na sian Debata do. Jana i pe nada tola baenonku hara ni malo-malongku mangkatai, anso ulang sayang boti kuaso ni hamamate ni Kristus i di parsilang i. 1:18 Harana anggo di halak na hona uhum ni Debata, songon haotoan do barita taringot tu hamamate ni Kristus di parsilang i. Tapi anggo di hita na nipalua ni Debata, kuaso ni Debata do barita i. 1:19 Angke didok Debata do di Buku Na Badia i, "SursaranKu ma parbinotoan ni angka na pistar, jana agohononKu ma habisuhon ni angka na malo." 1:20 Di dia dehe angka na bisuk i? Di dia dehe angka Siboto Surat i? Di dia dehe angka pangalo na sian portibi on? Nada he madung dibaen Debata habisuhon ni portibi on gabe hatoon? 1:21 Harana sanga na bia pe malo ni jolma, nada tartandasa Debata markite-hite hamaloanna i sandiri. Tapi hape, hara ni hamaloan ni Debata, gabe jop ma rohaNia paluahon angka na porsaya tuSia markite-hite jamita na nietong ni portibi on songon haotoan. 1:22 Dipangido halak Jahudi do hahomangan gabe songon tanda, jana halak Junani manjalahisa di parbinotoan ni portibi on. 1:23 Hape anggo hita hum taringot tu Kristus na mate di parsilang i do tajamitahon. Hancit do roha ni halak Jahudi dibaen barita i. Jana angka bangso na asing na so Jahudi, dietong halahi do haotoan jamita i. 1:24 Tapi anggo di halak na dung nipiohon ni Debata -- halak Jahudi sanga na so Jahudi -- anggo jamita i hum Kristus do jana Kristus i ma hagogoan ni Debata dohot hamaloan ni Debata. 1:25 Harana pangalaho na niida songon haotoan ni Debata, dao ummalo dope i sian hamaloan ni jolma; jana na niida songon hagalean di Debata, dao gumogo dope i sian hagogoan ni jolma. 1:26 Hamu ale angka dongan! Ligi hamu ma jolo sanga na tarbia pangalahomunu di na nipiohon ni Debata hamu. Hum saotik do sian hamu na malo, sanga na markuaso sanga na marpangkat na gincat mangihutkon panatapan ni jolma. 1:27 Angke sangajo do dipili Debata angka na oto didok portibi on, anso gabe maila angka halak na pistar i. Jana dipili Debata muse do angka na gale ninna portibi on, anso maila angka halak na gogo. 1:28 Dipili Debata do angka na nietong ni portibi on, toruk, na bile dohot na nietong ni portibi on sisoada, anso disego-sego Debata angka na nipasangap ni portibi on. 1:29 Antong anggo songon i, nada adong sahalak pe na tarbaen manggodang diri anggo di jolo ni Debata. 1:30 Hara ni na nibaen ni Debata sandiri do umbaen na gabe mardomu hamu dohot Kristus Jesus. Na nilehen ni Debata do Kristus tu hita, anso marguru tu Kristus hamaloanta. Angke Kristus do na padenggankon hita mangulahi dohot Debata. Laing Kristus do na papitahon hita anso gabe bangso na polin hita di Debata. Kristus muse do na paluahon hita. 1:31 Jadi hara ni i do, tarsurat di Buku Na Badia i, "Sanga ise na giot mamuji diri, angkon hara ni pambaenan ni Debata ma ia mamuji diri."
2:1 Hamu ale angka dongan! Di na ro au mandapotkon hamu jana di na hujamitahon tu hamu taringot tu sangkap ni Debata na so binoto ni portibi on dope, *SANGKAP NI DEBATANA SO BINOTO NI PORTIBI ON DOPE: Dipiga-piga naskah narobi didok: Hasaksian taringot tu Debata.* nada hupake malo-malo ni jolma mangkobari tu hamu. Jana nada hupake parbinotoan ni portibi on. 2:2 Harana madung putus hian di rohangku, salolot rap au dohot hamu, nada pajojoronku bagi aha tu hamu asing sian Jesus Kristus; lumobi ma i taringot tu hamamateNia di parsilang i. 2:3 Dompak rap au dohot hamu, gale jana humitir do au hara ni na mabiar. 2:4 Nada markite-hite habisuhon na paposkon hupalalu hatangku dohot jamitangku tapi markite-hite dalan na patandahon kuaso na sian Tondi i do. 2:5 Hubaen pe songon i, anso ulang marojahan tu hamaloan ni jolma do haporsayaanmunu, tapi anso marojahan tu kuaso ni Debata. 2:6 Haru pe songon i, anggo tu halak na dung togu haporsayaanna, laing huhobarkon do nian taringot tu hamaloan. Tapi nada hamaloan ni portibi on sanga hamaloan ni angka na markuaso di portibi on. Harana mago do kuaso ni halahi i. 2:7 Hamaloan ni Debata do anggo na hupajojor i. Nada diboto portibi on hamaloan i, tapi madung dipasingkop Debata hian i baen hasonanganta dompak so dijadihon Debata dope portibi on. 2:8 Sahalak pe nada adong umboto sangkap na nibaen ni Debata i. Angke sugari na dung diboto halahi i, nada jabat parsilangkonon ni halahi Tuhan na sumangap i. 2:9 Tapi songon na nidok ni surat di Buku Na Badia i do, "Anggo di angka halak na manghaholongi Debata, madung dipasingkop Debata hian angka na so unjung diida mata, sanga dibege jolma, jana na so jungada muse dope tubu di bagasan roha ni jolma." 2:10 Hape madung dipaboa Debata tu hita sangkapNia i markite-hite TondiNia. Didodo Tondi i do sasude, lopus tu angka na buni na dibagasan Debata. 2:11 Angke anggo na umboto sanga aha na di bagasan roha ni sada-sada halak, laing tondinia i sandiri do. Laing songon i do Debata. Anggo na umboto sanga aha na di bagasan roha ni Debata, Tondi Ni Debata sandiri do! 2:12 Jana nada dilehen tu hita tondi ni portibi on, tapi Tondi na sian Debata do, anso taboto sudena na nibasa-basahon ni Debata tu hita. 2:13 Laing i do na hami hatahon, nada markite-hite hata na niajarkon ni habisuhon ni jolma tapi markite-hite hata na niajarkon ni Tondi. Hami pajojor do angka pangalaho partondion tu angka na maruli Tondi. *TU ANGKA NA MARULI TONDI: Sanga: Marhite angka hata na nilehen ni Tondi Ni Debata.* 2:14 Halak na so maruli Tondi Ni Debata, nada tarjagitsa di bagasan rohana sanga aha na nipatorang ni Tondi i. Harana songon haotoan do angka na songon i di halahi. Nada haastuan halahi angka pangalaho na songon i, angke angkon sian partondion do i tarastui. 2:15 Sanga ise na maruli Tondi Ni Debata, i do na mangastui arti ni sasudena i tapi anggo ia sandiri nada tardodo sanga ise pe. 2:16 Harana, "Ise ma he na umboto roha ni Tuhan, sanga ise ma he na mamodai Ia?" Tapi di hita do roha ni Kristus i.
3:1 Anggo au ale angka dongan, nada tarbaen au hatiha i mangkatai dohot hamu songon tu halak na maruli Tondi, tapi songon tu halak na marroha portibi, na poso dope di bagasan Kristus. 3:2 Najolo hum susu dope na tarlehen au di hamu, nada sipanganon na pir; angke nada tuk dope gogomunu manjagit i. Hape lopus saonnari laing so tuk dope gogomunu manjagit i, 3:3 hara ni ngolumunu na laing tongtong dope mangihutkon bako ni jolma portibi. Angke muda laing mangiburui do hamu jana marbadai na sada tu na asing, i ma tandana paboa na laing mangolu mangihutkon bako ni jolma portibi dope hamu, songon angka jolma na di portibi on. 3:4 Muda adong na mandok, "Anggo au di pihak ni si Paulus," jana na asing mandok, "Anggo au mamihak tu si Apollos do," nada he i ma tandana paboa na tutu hamu marpangalaho songon angka jolma portibi on? 3:5 Jolma na bia ma he pola si Apollos? Jana tarbia muse si Paulus? Pangoloi ni Debata sajo do hami na dua, na dung manogu-nogu hamu anso porsaya tu Debata. Karejo na nipasahat ni Tuhan i tu hami be, i sajo do na hami dalankon. 3:6 Au manyuan jana si Apollos ma manyiram, tapi anggo na patubuhon laing Debata do. 3:7 Hara ni i, na umporlu nada na mananom sanga na manyiram, tapi Debata na patubuhon i do. 3:8 Bope na mananom sanga pe na manyiram sarupa do i. 3:9 Rap parkarejo ni Debata do hami na dua; tapi anggo hamu kobun ni Debata do dohot bagas ni Debata. 3:10 Hara ni hamaloon na nilehen ni Debata di au, songon tukang bagas na malo madung sidung hubaen ojahan ni bagas i, jana halak na asing do pajongjongkon bagas di ginjang ni ojahan i. Angkon jolo tangkas do parrohahonon ni tukang i sanga songon dia bagas na giot pajongjongonnia i di ginjang ni ojahan i. 3:11 Harana nada adong sada halak pe na bisa mamayakkon ojahan na asing sian ojahan na dung dipayakkon hian, i ma Jesus Kristus. 3:12 Adong do deba na mambaen di ginjang ni ojahan i sere, perak sanga batu intan, adong muse na mambaen hayu, ruput na hiang sanga pe durame. 3:13 Muda ro saulahon Kristus, disi pe anso tarida parkarejoan ni halahi be. Harana api paruhuman do pataridahon karejo ni ganop be. Api i ma na manguji jana manontuhon hadengganan ni karejo i. 3:14 Muda tahan do bagas na nipajongjong di ginjang ni ojahan i ditutung dohot api i, jagiton ni tukangna i ma upania. 3:15 Tapi muda mosok do karejona i, anggo i rugi ma ia; malua do nian anggo ia sandiri, tapi songon halak na malua sian api noma. 3:16 Diboto hamu dehe, na Bagas Ni Debata do hamu? Songon i muse na maringanan do Tondi Ni Debata di hamu? 3:17 Muda adong halak na manyegohon Bagas Ni Debata, segohonon ni Debata muse ma halakna i. Harana anggo Bagas Ni Debata na badia do, jana hamu ma bagas i. 3:18 Ulang ma adong sanga ise na paoto-oto dirina. Sanga ise sian hamu na mangetong dirina na bisuk mangihutkon parsuhatan ni portibi on, angkon jadi oto do ia, baru pe anso tutu ia na bisuk. 3:19 Angke na nietong ni portibi on bisuk, anggo di parnidaan ni Debata i ma halak na oto. Tarsurat do di Buku Na Badia i, "Dipadapot Debata do angka na bisuk dohot hamaloan ni halahi i sandiri." 3:20 Adong muse do tarsurat songon on, "Diboto Debata do angka tahi ni na bisuk, tutu situtu do na so marguna sudena i." 3:21 Antong anggo songon i, ulang ma adong sanga ise na marmogahon dirina maradopkon jolma, angke madung dilehen sasudena gabe hamu puna: 3:22 Si Paulus, bope si Apollos, bope si Kepas, portibi on, hangoluan dohot hamatean, bope hatiha saonnari dohot hatiha na giot ro, hamu do nampuna i sasudena. 3:23 Tapi hamu nampuna ni Kristus do, jana Kristus nampuna ni Debata.
4:1 Etong hamu ma hami angka pangoloi ni Kristus, na manjagit tanggung jawab laho manjamitahon angka sangkap ni Debata na so diboto portibi on dope. 4:2 Anggo na dipangido sian halak na gabe pangoloi i ma, angkon sihaposan do ia. 4:3 Anggo di au nada marimbar sanga na aha dipikiri hamu taringot tu au, bope pikiran ni halak na asing. Salangkan pikiranku taringot tu au sandiri, nada pola soal i huhilala. 4:4 Sanga taringot tu bagi aha pe, nada adong huhilala salangku, tapi inda na mamastihon au paboa na tutu na so adong hasalaanku. Tuhan i sandiri ma manontuhon sanga na marsala au sanga nada. 4:5 Antong, anggo so dapot dope hatihana, ulang ma matibutu tontuhon hamu marsala sada-sada halak sanga nada. Painte hamu ma lopus tu haroro ni Tuhan i. BukaonNia do sude angka rahasia na buni di na golap. RungkaranNia ma sudena rahasia na buni na di bagasan roha ni jolma. Di hatiha i pe anso jagiton ni halak ganop pujian na patut jagitonna sian Debata. 4:6 Hamu ale angka dongan! Hara ni hamu, gabe tu si Apollos dohot tu au ma huhonahon i. Maksudna, anso sian tudosan na hami baen i, marsiajar hamu sian umpama na mandok, "Ulang ma dipikiri hamu taringot tu hamu lobi sian na tarsurat i." Jadi muda songon i nada adong be sian hamu na ra marmoga-moga, hape halak na asing dilayasi. 4:7 Ise dehe na mambaen hamu marhasurungan sian na asing? Nada he na nijagitmunu do sude sian Debata? Antong biasi ma he manggodang diri hamu songon dia ma na adong di hamu songon na so nilehen i di hamu? 4:8 Nada adong be na hurang di hamu! Madung mamora hamu! Ma gabe raja hamu! Hape hami inda. Denggan ma i, muda tutu do raja hamu, anso tarbaen hami rap dohot hamu mamarenta. 4:9 Harana anggo mangihutkon pandapotku, dilehen Debata do di hami angka rasul inganan na tumoruk, dos songon halak na niuhum tu hamatean, angke madung gabe sitontonan hami diportibi on, dijolo ni jolma dohot angka surusuruan. 4:10 Gabe angka na oto do hami hara ni Kristus jana hamu angka na malo dibagasan Kristus! Hami angka na gale, hamu na gogo! Hami diincahi, anggo hamu dipapuji-puji! 4:11 Lopus tu hatiha on, tangkuraparon do hami jana manguas; pakean pe hum na lohot di pamatang on ma; diparkanciti halak do hami; so adong inganannami; 4:12 angkon loja do hami markarejo anso adong panganonnami. Muda diburai hami, pasupasu do hami baen balosna; muda diloncingi hami, sobar do hami; 4:13 muda dipalayas-layas halak hami lambok do hatanami mangalusi i. Nada tuk hami songon rompak-rompak ni portibi on; lopus tu hatiha on, laing dietong do hami songon na hodar ni portibi on. 4:14 Hubaen pe surat on tu hamu, nada na giot pailahon hamu, tapi na paingotkon hamu do au songon angka dakdanakku sandiri. 4:15 Songon halak Kristen hamu, didok rohangku madung adong sampulu ribu halak gurumunu, tapi nada adong na gabe ama di hamu. Hum au do na gabe ama di hamu sude, harana Jamita Na Denggan taringot tu Kristus Jesus i do na huoban di hamu. 4:16 Hara ni i gomos ma hupangido tu hamu, au ma tiru hamu. 4:17 Ihut tusi madung husuru si Timoteus mandapotkon hamu. Songon halak siihutkon Kristus, songon anakku sandiri do ia na huhaholongi. Anak haposan do i. Paboaonnia ma tu hamu sanga na bia ngolu na hudalankon dung porsaya au tu Kristus, i ma pardalan ni ngolu na huajarkon di ganop parlagutan sanga na di dia pe. 4:18 Madung adong deba sian hamu na marmoga-moga; harana ninna roha ni halahi, nada tulus be au mandapotkon hamu. 4:19 Tapi angkon laing ro do au mandapotkon hamu, nada pola honok be muda dipaloas Tuhan. Jadi muda ro au, disi ma idaonku sanga aha do antong na tarpatupa angka na manggodang diri i; ulang hum mandok hata sajo halahi. 4:20 Harana muda Debata do mamarenta ngolu ni sada-sada halak, angkon tanda do i sian hagogoon ni ngolu ni halahi, nada sian hata-hatana. 4:21 Jadi pili hamu ma sanga dia do giotmunu! Angkon maroban loncing-loncing dehe au ro mangajari hamu sanga mardongan halambohon dohot holong ni roha do?
5:1 Satutuna madung lalu tu au paboahon na adong deba sian hamu marpangalaho na so ture; adong sian hamu na pardadaboruhon na nialap ni amangna. Hape halak na so mananda Tuhan pe nada ra mambaen na songon i! 5:2 Haru ma songon i, hape laing pagodang-godang diri dope hamu. Angkon marsak ma hamu nian, jana paorotonmunu ma halak na marpangalaho sisongon i sian tonga-tongamunu. 5:3 Haru padao-dao pe pamatangta anggo tondingku di tonga-tongamunu do au huhilala. Jadi songon na di tonga-tongamunu do au saonnari laho mambaen haputusan, 5:4 "Mangasahon goar ni Tuhan Jesus Kristus hudok ma di hamu, angkon niuhum do halak na songon i hodar ni pangalahona!" Jadi muda marlagut hamu jana di tonga-tongamunu au markite-hite tondingku, mangasahon kuaso ni Tuhanta Jesus Kristus, 5:5 angkon pasahatonmunu do halak na songon i tu Sibolis anso disegohon pamatangna i jana di na songon i paluaon ma tondina di na ro mangulahi Tuhan i. 5:6 Nada denggan anggo na manggodang diri i hamu! Ning rohangku diboto hamu do pandohan on, "Saotik pe ragi i, gabe kombang do sude adonan i!" 5:7 Jolo ambungkon hamu ma ragi na lolot i, i ma dosa i anso gabe songon adonan ni topung na imbaru boti na ias hamu sian ragi ni dosa na honok i. Harana madung mamungka Ari Pesta Paskah di hita; Kristus na gabe songon biri-biri Paskah di hita, madung dihaulkon. 5:8 Jadi tapestahon ma Paskanta i dohot roti na so marragi, i ma roti na manggambarkon hapolinon bope sasudena na tumbuk di roha ni Debata. Ulang ma tapestahon Paskah i mardongan roti na marragi na honok, i ma dosa dohot hajahatan. 5:9 Di suratku na salpu i madung hudok tu hamu anso ulang mardongan hamu tu halak parhamainan. 5:10 Na humaksud nada halak parhamainan sanga na songkal, sanga panipu, sanga na manyomba gana-ganaan na so mananda Debata saotik pe. Nada i na hudok; harana muda padaoonmunu noma halahi, tontu angkon morot noma hamu sian portibi on. 5:11 Anggo na humaksud songon on do: Ulang pardongan hamu halak na mangoku dirina Kristen hape rorang halahi, sanga songkal, sanga pe sioloi gana-ganaan sanga na sai ra pabusuk-busuk dongan, sanga parmabuk sanga pe panangko. Hum sajuguhan pe mangan dohot halak sisongon i, ulang! 5:12-13 Anggo manguhumi halak na so Kristen, inda karejongku i. Debata sandiri ma mangadili halahi. Tapi angka anggota ni parlagutan, inda he hak ni parlagutan i sandiri do laho manguhumi angka sisongon i? Di Buku Na Badia i tarsurat do songon on, "Paorot hamu ma angka parjahat i sian tonga-tongamunu."
6:1 Biasi adong sian hamu na puluk mandapotkon panguhum na so porsaya tu Tuhan mangaduhon donganna sahaporsayaan muda marbadai hamu dohot donganmunu i? Biasi inda dipangido ia anso angka halak na badia manyalosehon parkaro i? 6:2 Adong he na so diboto hamu do angkon uhuman ni angka halak na badia do portibi on? Jadi anggo uhumanmunu do portibi on, na so tarsalosehon hamu be angka parkaro na songon i menekna? 6:3 Na so diboto hamu do, haru surusuruan pe hita do manguhumi halahi saulahon. Mur ma angka parkaro na mardomu tu ngolu siganop ari on! 6:4 Antong muda masa angka parkaro na songon i, aduhononmunu dope tu angka jolma na so marjohoman bagi aha di parlagutan i? 6:5 Paila-ilahon ma hamu songon i! Sai adong do sada-sada halak sian tonga-tongamunu na malo manyalosehon parsalisian ni angka donganta Kristen! 6:6 Tapi hape kehe do dongan na sada mandapotkon na so Kristen mangaduhon parkarona maradopkon donganna Kristen! 6:7 Ulang be nidok kehe marparkaro tu halak na so Kristen; hum parsalisian di tonga-tongamunu pe madung gabe hataluan i di hamu. Gumonan ma taon hamu pambaenan na jat i sanga dirugihon hamu! 6:8 Hape hamu sandiri dope na mambaen na so tigor tu halak na asing. Rugi do halak dibaen hamu. Jana tu dongan Kristen muse do songon i dibaen hamu! 6:9 Nada he diboto hamu do, anggo angka halak na so tigor nada dapotan bagian di Harajaan Ni Debata? Ulang ma hamu lilu! Halak na markarosuan, sioloi gana-ganaan, si pangalangkup, si pangalukluhi, si pandalus-dalus, 6:10 angka panangko, na mangkaut tu diri dohot parmabuk, angka na sai ra manilakoi halak, dohot angka na mambuat sian halak na so bagianna -- sude halak sisongon i nada dapotan bagian di Harajaan Ni Debata. 6:11 Songon i hian do deba sian hamu najolo. Tapi anggo saonnari madung dipaias hamu sian dosa, madung diparbadiai, jana madung dipatigor hamu di bagasan goar ni Tuhan Jesus Kristus dohot di bagasan Tondi Ni Debatanta. 6:12 Adong do deba na mandok, "Sanga aha pe tola do baenonniba." Tapi anggo di au nada sude marguna. Jadi haru pe tola au mambaen sanga na aha, nada ra au padiarkon diringku dirajai sanga na aha pe. 6:13 Adong muse do deba na mandok, anggo sipanganon tu butuha do i, jana butuha i pe tu panganon do i diparade. Hape dua-duana i giot soadahonon ni Debata do. Nada tola pakeon pamatang ni jolma i tu na so ture, tapi hum tu angka pangalaho na porlu di Tuhan do. Jana Tuhan i pe dibaen Ia do angka pangalaho na porlu tu pamatang i. 6:14 Madung dipangolu Debata Tuhan Jesus sian hamatean, songon i muse ma pangoluon ni Debata hita markite-hite kuasoNia. 6:15 Diboto hamu do, anggo pamatangmunu i anggota ni pamatang ni Kristus do i. Antong, tola ma he buatonku sada anggota ni pamatang ni Kristus i, gabe hubaen anggota ni pamatang ni panggampang? Nada songon i! 6:16 Aropku inda diboto hamu dope, sanga ise na marhamainan dohot sada halak panggampang, na dung gabe sada do ia dohot panggampang i! Harana tarsurat do, "Gabe sada ma na dua halak i." 6:17 Tapi anggo halak na pasada dirina dohot Tuhan, gabe sada ma Tondi Ni Tuhan i dohot tondi ni halakna i. 6:18 Padao hamu ma dirimunu sian hahodaron. Angke sude dosa na asing i na nibaen ni jolma, di ruar ni pamatangna do i tarjadi. Tapi anggo halak na marhamainan, na mambaen dosa tu pamatangna sandiri do i! 6:19 Sanga nada he diboto hamu, pamatangmunu do inganan ni Tondi Parbadia i? Sian Debata do pamatangmunu, jana nada hamu nampuna dirimunu. 6:20 Madung ditobus Debata hamu jana lunas digarari Ia. Hara ni i, denggan ma pake hamu pamatangmunu i anso marsangap Debata.
7:1 Saonnari taringotanku ma angka na nipaboamunu di suratmunu i tu au. Muda nada mambuat boru sada halaklahi, denggan do i. *MUDA NADA MAMBUAT BORU SADA HALAKLAHI, DENGGAN DO I: Sanga: Didok hamu muda nada mambuat boru sada halaklahi, denggan do i.* 7:2 Tapi anso ulang targoda di angka pangalaho na markarosuan, dumenggan do ganop halaklahi adong be dadaboruna, bope dadaboru adong be halaklahina sandiri. 7:3 Angkon gohan ni halaklahi do na tama songon ama-ama maradopkon dadaboruna, jana dadaboru pe angkon gohanna do na tama songon ina tu halaklahina; marsilehenan be ma na tama maradopkon na asing. 7:4 Nada roha-roha ni dadaboru i be di dirina sandiri, halaklahinia noma na markuaso tusia. Songon i muse halaklahi i, nada markuaso be ia di dirinia sandiri; daborunia i noma na markuaso disia. 7:5 Ulang ma marsipadaoan halak na saripe, muda so sian tumbuk ni tahi sanga sadia lolotna, anso bisa hamu rap martangiang. Dung i mardomu ma hamu mangulahi, anso unang diuji Sibolis hamu, harana nada tahan hamu marpuaso. 7:6 Nada gabe parenta, muda hudok pe songon i, tapi songon sipaingot do. 7:7 Anggo satutuna nian, gumonan do didok rohangku sugari songon au on sudena halak. Tapi bia ma baenon, paasing-asing be do silehen-lehen na nijagit sian Debata. Deba songon on do hasurungan na nijagitna, hape na asing nada songon i. 7:8 Tu angka halak na so marripe bope tu angka na dung mabalu, songon on ma sipaingotku: Gumonan ma hamu indangkon marbagas songon au on. 7:9 Tapi anggo inda tartahan hamu pangidoan ni sibukmunu, marbagas ma hamu. Harana dumenggan do hamu marbagas timbang sai gurgur hagiot ni sibukmunu. 7:10 Tu halak na marripe, songon on ma hudok: (Satutuna nada au na mangalehen parenta on, Tuhan i do.) Muda dung marbagas sada dadaboru, ulang be ditadingkon ia halaklahinia i. 7:11 Tapi muda dung ditadingkon ia, angkon laing hot ma ia nada marhalaklahi, muda inda songon i mulak ma ia mangulahi tu halaklahinia i. Jana sada ama nada tola manyirangkon dadaboruna. 7:12 Tu angka na asing i, songon on ma sipaingotku: -- anggo on sipaingotku sandiri do, nada sian Tuhan i -- muda dialap sada bayo na Kristen sada boru na so porsaya tu Kristus, hape ra do daborunia i rap dohot ia, nada tola sirangkonon ni bayo i daborunia i. 7:13 Muda adong pe sada boru Kristen marbagas tu sada bayo na so porsaya tu Kristus, hape ra do bayo i mamake ia, nada tola tadingkonon ni daboru i halaklahina i. 7:14 Harana gabe diparbadiai do halaklahi na so porsaya i markite-hite dadaborunia i, jana dadaboru na so porsaya i pe diparbadiai markite-hite halaklahinia. Sugari nada songon i, gabe ramun do angka dakdanakmunu, tapi anggo saonnari na badia do halahi. 7:15 Tapi muda giot sirang na so porsaya i sian daborunia i, sanga halaklahina na Kristen, sirang ma ia tusi. Anggo di pangalaho na songon on, bebas do hamu, harana ulang so dame hamu, i do hagiot ni Debata. 7:16 Songon sada ina hamu na porsaya tu Tuhan -- bia ma he parbinotoanmunu manontuhon paboa na so tarpalua hamu halaklahimunu? Laing songon i ma angka ama na Kristen, bia ma he parbinotoanmunu manontuhon paboa na so tarpalua hamu dadaborumunu? 7:17 Marsiatur ngoluna be ma nian sugari hombar tu panogu-nogu ni Tuhan songon na dung ditontuhon Debata hian tu ganop be, di na mamungka dipio Debata mangkaporsayai Ia. I do aturan na huajarkon di ganop parlagutan. 7:18 Muda dung marsunat hian sada-sada halak di na mamungka ia porsaya tu Debata, indangkon pola be diakalkon ia mangagohon tihas ni sunat i. Songon i muse muda adong sada-sada halak na so marsunat dope di na mamungka porsaya ia tu Debata indangkon pola dipangido ia anso marsunat ia. 7:19 Rap na so marguna do na mangoloi aturan ni sunat dohot na so mangoloi. Mangoloi parenta ni Debata do na porlu. 7:20 Sanga bia hian iba di na mamungka porsaya tu Debata, laing songon i ma iba tongtong. 7:21 Adong dehe hatoban ho hatiha dipio Debata? Nada pola bia i. Tapi muda adong do di ho hatiha na denggan anso bebas, ulang parsayang hatiha i. *TAPI MUDA ADONG DO DI HO ... HATIHA I: Sanga: Tapi haru pe na dung adong di ho hatiha giot bebas, dengganan do ho marparange songon hatoban.* 7:22 Harana muda adong sada hatoban na porsaya tu Tuhan, i ma na gabe halak na dipalua jana Tuhan nampunasa. Laing songon i do halak na malua na dipio ni Kristus, i do na gabe naposoNia. 7:23 Na nitobus ni Debata do hamu jana madung lunas do dibaen Ia. Hara ni i, ulang be pasahat hamu dirimunu gabe hatoban ni jolma. 7:24 Antong, sanga songon dia pe hamu di na mamungka hamu porsaya tu Debata, gumonan ma laing songon i ngolumunu rap dohot Debata. 7:25 Saonnari taringot tu angka na so marripe noma. Anggo taringot tusi nada adong dope hujagit angka parenta sian Tuhan. Tapi haru songon i pe, songon halak na manjagit asi ni roha ni Tuhan na patut sihaposan, giot lehenonku do sipaingotku. 7:26 Marnida ragam ni hasusaan na ro di hatiha on, anggo ning rohangku gumonan do sugari laing songon na adong sisaonnari on ngolu ni halak. 7:27 Adong dehe tarihot ho tu sada dadaboru? Ulang ma jalahi dalan parsirangan! Adong dehe ho na so tarihot tu sada dadaboru? Unang ma jalahi sada dadaboru. 7:28 Tapi nada mardosa muda dialap hamu boru. Laing songon i ma muda marbagas dadaboru, artina nada mardosa ia disi. Hum on do, angkon adopan ni halak na marbagas i ma bahat hasusaan. Anggo hagiotku malua ma nian hamu sian angka hasusaan i. 7:29 Tapi on do na hudok, hamu ale angka dongan: Otik noma hatiha di hita. Mamungka saonnari, sanga ise na marripe, songon na so marripe ma dibaen ia ngoluna; 7:30 halak na tangis, songon na so marsak ma rohana; halak na martata songon na so marjop ni roha ma ia; halak na manobusi, songon na so marnampuna; 7:31 jana sanga ise na paurus-urus angka pangalaho na di tano on, songon na so karejo di angka na songon i ma nian ngoluna. Angke anggo portibi na adong saonnari on, salpu do i sude! 7:32 Giotku nian, malua ma hamu sian hasusaan. Halaklahi na so marripe, tarpasada ia ma rohania tu angka pangalaho na marpardomuan tu Tuhan, angke sai giot pasonangonnia ma roha ni Tuhan. 7:33 Tapi anggo halaklahi na marripe, bahat ma sipikiranna taringot tu na di tano on, harana sai giot pasonangkon roha ni daborunia i ma ia; 7:34 jadi gabe mardua roha ma ia. Dadaboru na so marbagas, sanga bujing-bujing, taringot tu Tuhan do bahat pikiranna, harana giotnia ulang so Debata nian nampuna sude ngolunia. Tapi anggo dadaboru na marsaripe, dipasada do rohana tu angka na di tano on, harana sai giot pasonangonnia do roha ni halaklahinia. 7:35 Husurat pe songon i sudena, laho padenggankon hamu sandiri do, nada adong rohangku mangalarang on, sanga mangalarang i. Anggo giotku disi, anso tigor dohot na tama sajo sibaenonmunu, boti anso tarpasada hamu rohamunu tu Tuhan. 7:36 Muda dihilala roha ni sada halak nada dibaen ia na sapatutna tu tunanganna, muda so tartahan ia be hagiotnia jana porlu ma dihilala ia marbagas ia dohot si bujing-bujingnia i, dibaen ia ma na nihilalania denggan. *MUDA DIHILALA ROHA NI .. NIHILALANIA DENGGAN: Sanga: Taringot tu sada halaklahi dohot boruna. Muda dihilala ia nada denggan parangenia tu borunia i, jana madung denggan dipabagas borunia i, jadi ingkon baenonnia ma hagiotnia jana dipabagas ia ma borunia i.* Nada mardosa ia muda marbagas halahi. 7:37 Tapi muda adong na mamutuskon di bagasan rohana na so marbagas be ia dohot tunanganna i, *NA SO MARBAGAS BE IA DOHOT TUNANGANNA I: Sanga: Nada pabagason borunia i.* jana nada hara ni na tarpaksa haputusannia i, denggan do na nibaennia songon i, muda tuk do gogonia mambaen songon i. 7:38 Jadi, denggan do pangalaho ni na marripe *MARRIPE: Sanga: Pabagaskon boruna.* tapi laing dumenggan dope pangalaho ni na so marripe *NA SO MARRIPE: Sanga: Nada pabagaskon boruna.* i. 7:39 Muda adong sada dadaboru na marbagas, salolot mangolu halaklahina i tarihot ma ia tusi. Tapi muda dung jumolo halaklahina i, tola do ia marbagas mangulahi tu halaklahi por ni rohania; asal ma parsaripeon ni halak Kristen parsaripeon i. 7:40 Tapi laing maruntungan dope ia muda inda marbagas mangulahi. Pandapotku sandiri do anggo i, tapi huhilala adong do Tondi Ni Debata di au.
8:1 Taringot tu sipanganon na nihaulkon tu gana-ganaan ma saonnari. Jadi tutu do songon na nidok ni halak, "Na dung marparbinotoan do hita sude." Tapi hamaloan laho mambaen anso pagodang diri do halak, hape nian anggo holong ni roha i laho padenggankon parrohaon ni halak do i. 8:2 Sanga ise na mangetong dirina na dung bahat na binotona, anggo satutuna na so binotonia dope i sabagas-bagasna. 8:3 Tapi sanga ise na marsitutu mangkaholongi Debata, ditanda Debata do ia. 8:4 Anggo taringot tu na mangankon sipanganon na dung nihaulkon tu gana-ganaan, taboto do, nada adong satutuna anggo na nigambarkon ni gana-ganaan i. Jana tangkas do taboto, anggo Debata hum sada sajo do; nada adong be na asing. 8:5 Bahat do nian na nidok ni halak debata dohot tuhan; sanga na di langit an pe i, sanga na adong di ginjang tano on pe. 8:6 Tapi anggo di hita, hum sada sajo do Debata. Ia do Ama na manjadihon sasudena na adong. Na giot diSia do ngolunta on. Tuhan pe hum sada sajo do, i ma Jesus Kristus. Markite-hite Ia dijadihon ma sasudena jadi hara ni Ia do umbaen na mangolu hita. 8:7 Tapi nada sude halak umboto i. Adong dope halak na tarihot tu gana-ganaan, mangankon juhut songon na nihaulkon tu gana-ganaan, jana na gale dope panggora ni roha ni halahi. Hara ni i gabe dihodari ma panggora ni roha i. 8:8 Satutuna nada pola mur solkot hita tu Debata hara ni sipanganon i. Haru tapangan pe sipanganon i nada pola maruntung hita bagi aha. So tapangan pe sipanganon i nada pola adong ruginta sanga aha. 8:9 Tapi jamot ma hamu anso ulang jabat gabe batu partuktuhan tu halak na asing hara ni na tola hamu mambaen sanga na aha, hara ni na so togu dope pos ni roha ni halahi. 8:10 Harana muda adong halak na gale panggora ni rohana mangaligi ho na "marparbinotoan" topet juguk mangan di bagas parsombaan tu gana-ganaan, nada he gabe tartarik rohania gabe puluk ia mangankon sipanganon na dihaulkon tu gana-ganaan i? 8:11 Jadi hara ni i gabe mago ma pos ni roha ni dongan na hurang togu i hara ni pos ni rohamunu. Hape nian dohot do hara ni halahi mate Kristus. 8:12 Jana muda dibaen hamu hasalaan na songon i maradopkon angka donganmunu Kristen na asing i, na manyego-nyego pos ni rohana na gale i do hamu disi, jadi sarupa tu na mardosa maradopkon Kristus do i. 8:13 Hara ni i, muda sipanganon do mambaen batu partuktuhan tu donganku, gumonan indangkon mangan juhut be au. Betak sai bia gabe batu partuktuhan i maradopkon donganku.
9:1 Nada he halak na malua au? Nada he rasul au lakna? Nada he madung huida Jesus, Tuhanta i? Nada he suha ni halojaonku do hamu di Tuhan i? 9:2 Muda pe na so rasul au di halak na asing, laing rasul do au di hamu. Angke hamu do tandana paboa na tutu au rasul di bagasan Tuhan i. 9:3 On ma alusku adop angka na manguhumi au. 9:4 Adong he na so tola au manjagit sipanganon dohot siinumon hara ni karejongku? 9:5 Nada he adong do haknami marbagas jana mardongan dadaboru di pardalanannami; laing songon rasul na asing, sanga songon angka anggi ni Tuhan dohot si Kepas? 9:6 Sanga hum si Barnabas dohot au sajo do na angkon manjalahi balanjo sandiri? 9:7 Adong ma he tentara na kehe marporang, angkon laing jalahannia muse balanjonia sandiri? Nada adong halak na manyuan anggur di kobunna hape nada dipangan ia sian suha ni kobunna i! Nada adong parmahan biri-biri na so manginum susu ni pahan-pahananna i! 9:8 Aha na hupajojor on nada hum sian pikiran ni jolma sajo. Nada he didok Tona i do songon i? 9:9 Di buku ni si Musa tarsurat do, "Nada patut nihuntam pamangan ni horbo na mardege!" Hum horbo ma he lakna na diparate-atehon ni Debata? 9:10 Sanga na so dohot dehe hita na nidokna disi? Satutuna tu hita do na nidokna disi. Angke sanga ise na mangkarejohon ladang jana halak na mambaboi emena patut do mararop ni roha halahi sian karejona i. 9:11 Madung hami sabur same partondion di bagasan ngolumunu. Jadi muda hami jagit pasupasu sinadongan sian hamu, pola ma he na mabahattu songon i hami pangido sian hamu? 9:12 Muda adong hak ni halak na asing manjagit sisongon i sian hamu, inda he umbahatan dope haknami ulang halahi? Tapi anggo au nada hupake dope hak na songon i. Gumonan dope hutaonkon sasudena timbang mambaen ambat-ambat laho pararatkon Jamita Na Denggan taringot tu Kristus i. 9:13 Tontu diboto hamu do, anggo halak na markarejo di Bagas Ni Debata, manjagit panganon do halahi sian Bagas Ni Debata. Dohot angka halak na mangurus inganan parkaulan ni haul, dijagit halahi do deba sian haul na nipasahat i disi. 9:14 Laing songon i muse do na dung diaturkon Tuhan, angkon dapotan balanjo do angka na manjamitahon Jamita Na Denggan i sian parjamitaonna i. 9:15 Tapi haru songon i pe nada unjung dope hupargunahon angka hak na songon i. Jana hubaen surat on nada anso dibaen songon i tu au saonnari. Gumonan do au mate ulang pado mago pangalaho na denggan na huhajopkon i. 9:16 Angke, sugari hum hara ni na manjamitahon Jamita Na Denggan na sian Debata i sajo do, nada tola au pagodang diri, harana karejongku do i. Marjaya do au muda nada hujamitahon Jamita Na Denggan i! 9:17 Sugari ma rupani hara ni giot-giotku sandiri sajo na mandalankon karejo i, tontu tola ma au mararop ni roha manjagit upa. Tapi nada hagiotku manjamitahon Jamita Na Denggan i. Debata do marsuru au mandalankon i. 9:18 Antong, aha ma upa di au? On ma upana: Tarjamitahon au do Jamita Na Denggan i so pola adong halak na asing hupadokdok laho mambalanjoi au, hara ni na so ra au manuntut bagianku songon parjamita ni Jamita Na Denggan i au. 9:19 Nada hatoban ni halak au; halak na malua do au. Tapi haru songon i pe, hubaen do au gabe hatoban ni sude halak. Hubaen pe songon i anso tarhamonangkon au do halak sabahat-bahatna di Kristus i. 9:20 Tu halak Jahudi, hubaen au songon halak Jahudi anso dapot au halak Jahudi di Kristus. Tu halak na mangoloi angka parenta ni Debata na nipasahat ni si Musa, hubaen au songon halak na tarihot tu angka aturan i, haru pe nian na so tarihot au tu angka aturan i. Hubaen pe songon i anso dapot au do halahi di Kristus. 9:21 Tu angka halak na so marTona, songon na so marTona do au Haru pe na so diluar ni Tona i au mangolu, angke tona ni Kristus do oloanku. Hubaen songon i anso dapot au do halahi di Kristus. 9:22 Muda di tonga-tonga ni angka na so togu dope pos ni rohana, hubaen do au tarsongon halak na so togu dope pos ni rohana anso dapot au halahi di Kristus. Hara ni i, anggo au gabe songon na marragam-ragam ma pangalahongku tu sudena halak, anso sian dalan na marragam i tarbaen au paluahon halahi deba. 9:23 Hara ni Jamita Na Denggan i do, hubaen songon i sudena, anso laing dohot au muse dipasupasu. 9:24 Tontu sude do hamu mamboto, anggo di na marsiadu hipas marlojong, sude do halak na dohot i marlojong, hape hum sahalak do anggo na manjagit upa. Antong sahipas-hipasna ma lojongi hamu anso dapot hamu upa i. 9:25 Tapi ganop halak na marsiadu, diorom ia do sudena i. Dibaen halahi pe songon i anso dapot halahi do tuku na so manongtong, tapi anggo hita anso dapotan tuku na manongtong i do. 9:26 Hara ni i do umbaen na marlojongi au tu tujuan na tontu. Tarsongon na martanding tenju, nada ra au marnayang ni roha laho manenju. 9:27 Hupadiar do pamatangki dilatik sagogona lopus tarrajai au sudena i. Hubaen pe songon i, anso ulang sanga do tarderet au, dung husosoi halak na asing dohot di parlumbaan i.
10:1 Hamu ale angka dongan! Angkon tangkas do ingotonmunu sanga aha na tarjadi tu angka ompunta di na mangihutkon si Musa halahi. Dilinggomi ombun halahi sude, jana horas do halahi sude manaripari Laut Na Rara i. 10:2 Anso gabe dohot mangihutkon si Musa, angkon dipandidihon do halahi sude di bagasan ombun dohot di bagasan laut i. 10:3 Rap sipanganon partondion do dipangan halahi, 10:4 jana rap siinumon partondion do diinum halahi. Rap minum sian dolok batu partondion do halahi, i ma batu partondion na mandongani halahi; Kristus sandiri do anggo batu partondion i. 10:5 Tapi haru songon i pe nada sonang roha ni Debata mida umbahatan sian halahi jana hara ni i ma umbaen na marragean bangke ni halahi di halongonan i. 10:6 Gabe tiruan do i sude di hita, laho paingotkon hita anso ulang sai tahagioti be angka pangalaho na jat songon na nibaen ni halahi i. 10:7 Boti muse anso ulang tasomba gana-ganaan songon na nibaen ni deba sian halahi, songon na tarsurat, "Jadi juguk ma bangso i mangan dohot minum, dung i jongjong ma halahi jana manortori." 10:8 Nada tola hita marpangalaho na so ture songon na nibaen ni deba sian halahi. Angke hara ni na mambaen songon i, gabe mate dua pulu tolu ribu halak di bagasan sadari. 10:9 Ulang ma tauji Tuhan *TUHAN: Dipiga-piga-piga naskah narobi didok: Kristus.* songon na nibaen ni halahi narobi, gabe marmatean halahi diturbingi ulok na marbisa. 10:10 Ulang ma hamu mungut-ungut songon na nikarejohon ni na deba sian halahi, gabe mago ma halahi dibaen sipangago i. 10:11 Masa pe sudena i, na gabe tiruan do i tu angka halak na asing. Jana nisuratkon do sudena i anso gabe parningotan di hita. Angke di hatiha parpudi noma hita mangolu. 10:12 Sanga ise na mangetong dirina togu jongjong, dijagohon ia ma anso ulang sanga tinggang ia. 10:13 Sanga aha pe cobaan na nibolusmunu, cobaan na somal dialami jolma dope i. Tapi anggo Debata burju do marningot janjiNa. Nada pola dipadiar Ia hamu dicoba lobi sian na tolap gogomunu. Muda hatiha ro cobaan tu hamu, lehenonNia do dalan di hamu anso tahan hamu manaon cobaan i. 10:14 Hara ni i hamu ale angka dongan, padao hamu ma rohamunu sian na marsomba gana-ganaan. 10:15 Songon tu halak na marroha do au na mandok hata on tu hamu. Hamu sandiri ma nian manimbang pandohankon. 10:16 Nada he panginuman hatarimakasion do on, na marhite i tadok tarimakasi, i ma na patuduhon na dung sada do hita hara ni mudar ni Kristus i? Jana nada he roti na tabagi-bagi i do na patuduhon hasadaonta di bagasan pamatang ni Kristus i? 10:17 Dibaen hum sada sajo do roti i, jana rap mangan sian roti na sada i do hita sude, jadi songon na gabe sada pamatang ma hita na bahat on. 10:18 Ligi hamu ma jolo halak Jahudi i. Anggo halak na manghaulkon sipanganon na nihaulkon di ginjang ni parhaulan i, halak na mardomu do i dohot inganan i. 10:19 Aha na hudok disi? Adong dehe arti ni gana-ganaan sanga arti ni sipanganon na nihaulkon tu gana-ganaan i? 10:20 Inda adong i! Na hudok, anggo na nihaulkon tu gana-ganaan i, nada tu Debata i dihaulkon, tapi tu angka setan do. Jana nada giot au anggo mardomu hamu dohot setan. 10:21 Nada tola hamu minum sian anggur ni Tuhan, diinum hamu muse sian panginuman anggur ni tondi na jahat i. Nada tola hamu mangan di meja ni Tuhan dohot muse di meja ni tondi na jahat. 10:22 Anso mangiburu dehe lakna Tuhan baenonta? Gumogo dehe hita lakna sian Tuhan? 10:23 Ninna halak, "Tola do baenonta sanga na aha giotta." Tutu do i! Tapi nada sude giotta i marguna. "Tola do baenonta sanga na aha giotta" -- tapi nada sude na tahagioti i padenggankon ngolunta. 10:24 Ulang ma adong hum na pareso tu dirina sajo. Ganop be ma manggogo patupa haporluan ni dongan na asing. 10:25 Tola do sude panganonmunu sanga juhut aha na digadis di pajak daging. Ulang pola jolo tangkasi hamu, haru adong pe panggora di bagasan rohamunu. 10:26 Angke tarsurat do di Buku Na Badia i, "Tuhan do nampuna tano on dohot sude isina." 10:27 Muda diontang halak na so Kristen ho mangan, jana dioloi ho ontang-ontangnia i, papangani ma sanga aha na nipasahat i tu ho. Ulang pola sapa-sapai sanga sian dia haroro ni sipanganon i, anso ulang pola adong panggora ni rohamunu. 10:28 Tapi muda adong mandok tu hamu, "Anggo sipanganon on, na dung nihaulkon do on tu gana-ganaan," ulang pangan hamu sipanganon i be hara ni haporluan ni halahi bope hara ni sora ni taroktok. 10:29 Nada taroktokmunu na hudok, tapi taroktok ni halahi do na hudok. Aropku adong do deba na marsapa, "Na bia dehe, biasi pola angkon marguru tu taroktok ni halak na asing iba? 10:30 Anggo nidok do tarimakasi tu Debata laho mangan sipanganon iba, biasi pola angkon mangincahi halak tu iba hara ni panganon i, hape hudok do tarimakasi tu Debata hara ni sipanganon i?" 10:31 Sanga aha pe na nibaenmunu -- mangan sanga minum hamu -- pasangapkon Debata ma baen hamu sudena i. 10:32 Denggan ma baen hamu ngolumunu anso ulang jabat mardosa halak na asing hara ni hamu; sanga di halak Jahudi, sanga pe di halak na so Jahudi sanga pe di parlagutan ni Debata. 10:33 Songon ngolungkon ma parngoluonmunu. Sai huparayak do pasonang roha ni sudena halak di bagasan sasude na hukarejohon, so pola giot mambuat untung di au sandiri. Anggo tujuanku hum on do; anso tarpalua nian halahi sudena.
11:1 Ihutkon hamu ma tiruan na hubaen songon pangihutkonku di tiruan ni Kristus. 11:2 Hupuji do hamu angke sai diingot hamu do au jana sai diihutkon hamu do parsiajaran na huajarkon i tu hamu. 11:3 Tapi adong dope sada nari pangalaho na giot paboaonku di hamu; Kristus do anggo Ulu ni sude na margoar halaklahi; na gabe ulu ni dadaboru i, i ma halaklahina jana gabe Ulu Ni Kristus, i ma Debata. 11:4 Muda martangiang sanga manyurirangi sada halaklahi; hape markupia ia, na pabile Kristus do i. 11:5 Jana muda adong dadaboru na martangiang, sanga manyurirangi ia, hape inda marbasaen ulunia, na pabilehon ulunia i do i. Gabe tarsongon na marcukur ma ia muda songon i. 11:6 Angke muda so ra dadaboru marbasaen, gumonan do nipangkas obukna i. Tapi muda marcukur sanga nigusting obukna i, gabe halayasonnia do i. Antong, gumonan do marbasaen dadaboru. 11:7 Anggo halaklahi indangkon pola sai markupia, angke rupa dohot hamuliaan ni Debata do na nigambarkon ni halaklahi, dadaboru gabe hamuliaan ni halaklahi. 11:8 Inda sian dadaboru halaklahi i dijadihon, dadaboru do na nijadihon sian halaklahi. 11:9 Nada tu haporluan ni dadaboru muse umbaen na dijadihon halaklahi i, tapi dadaboru i do na dijadihon tu haporluan ni halaklahi. 11:10 Hara ni i, angkon adong do tanda ni kuaso di ulu ni dadaboru hara ni surusuruan i. 11:11 Tapi haru songon i pe di bagasan ngolunta songon halak Kristen, nada jongjong sandiri dadaboru so pola marpartalian tu halaklahi, jana halaklahi pe nada jongjong sandiri so marpartalian tu dadaboru. 11:12 Angke, haru pe dadaboru na parjoloi dijadihon sian halaklahi, tapi anggo dung i sian dadaboru do sorang halaklahi; jana sasude na adong, sian Debata do asalna. 11:13 Hamu sandiri ma jolo manimbang na hudok on: Denggan dehe ninna rohamunu dadaboru martangiang tu Debata haru so marbasaen ulunia? 11:14 Nada he dipatuduhon bako ni jolma i do tu hamu, paboa hailaan do di sada halaklahi muda ginjang obukna? 11:15 Tapi anggo dadaboru, panutupi ni uluna do dilehen obukna i, jana hasangapanna do muda ginjang obukna. 11:16 Jadi muda adong barang ise na giot manangkang, nada hasomalannami sanga angka parlagutan ni Debata mambaen na songon i. 11:17 Taringot tu na giot dokkononku, nada hupuji hamu. Marlagut pe hamu, nada adong gunana tapi mur jatjat do. 11:18 Na parjolo, muda marlagut hamu, hubege baritana di bagasan na marlagut-lagut i hamu adong na marsalisi sian hamu. Jana tutu do songon i aropku. 11:19 Madung sapatutna masa parsalisian di hamu, anso tarida sanoli on sanga ise Kristen na tahan uji. 11:20 Tapi anggo satutuna nada na mambaen Parjamuan ni Tuhan hamu muda marlagut hamu. 11:21 Harana hatiha mangan hamu, marsiadu do hamu mambuat sipanganon i, jabat adong na so dapotan hape na deba marlobian. 11:22 Biasi songon i? Inda he adong bagasmunu; di bagasmunu be ma mangan minum hamu! Adong he na giot palayaskon parlagutan ni Debata do hamu jana pailahon angka dongan na pogos? Angkon bia do dokkononku tu hamu? Pujionku dope hamu? Anggo taringot tusi, nada pujionku hamu. 11:23 Angke na huajarkon i tu hamu, na hujagit sian Tuhan i sandiri do i: Di borngin i dompak dihianati Tuhanta Jesus, dibuat Ia ma roti, 11:24 jana dung didokkon Ia tarimakasi tu Debata hara ni roti i, diponggoli Ia ma roti i dohot tanganNia, lalu didok Ia ma, "On ma pamatangKu na nipasahat di hamu. Baen hamu ma on laho marningot Au," ning ia. 11:25 Laing songon i ma dung abis mangan, dibuat Ia muse ma panginuman ni anggur lalu didok Ia ma, "Parjanjian Na Imbaru do anggur on, na ditontuhon ni mudarKu. Ganop diinum hamu on, baen hamu ma on marningot Au." 11:26 Angke sanga na piga noli dipangan hamu roti on jana diinum hamu anggur on, jamitahononmunu ma hamamate ni Tuhan i lopus ro Ia. 11:27 Jadi hara ni i, sanga ise na mangan roti ni Tuhan sanga manginum anggurNia di dalan na so patut, mardosa do ia tu pamatang bope tu mudar ni Tuhan i. 11:28 Jadi angkon marsipareso dirina ma jolo, dung i pe anso tola ia mangan roti dohot minum anggur i. 11:29 Angke, barang ise na mangan dohot minum, tapi nada diokui na pamatang ni Tuhan do i, na parohon uhuman do i tu pamatangna sandiri. 11:30 I do umbaen na bahat sian hamu na marnyae jana gale jana adong muse na dung mate. 11:31 Tapi muda jolo tapareso dirinta, nada pola uhumon ni Debata hita. 11:32 Tapi muda diuhumi Tuhan hita, ajaronNia ma hita, anso ulang hona uhum be hita rap dohot portibi on. 11:33 Hara ni i hamu ale angka dongan, muda marlagut hamu giot mangan, angkon marsipaintean do hamu. 11:34 Muda adong na male, jolo mangan ia di bagasnia. Ulang jabat marlagut hamu, hum anso manjagit uhuman ni Debata tu hamu sandiri. Taringot tu angka pangalaho na asing, dung ro pe au anso hupatorang tu hamu.
12:1 Taringot tu angka silehen-lehen ni Tondi ma saonnari. Giotku nian ulang so tangkas diboto hamu sasintongna taringot tusi. 12:2 Ingot hamu ma dompak so ditanda hamu dope Tuhan, tarela-ela do hamu mangoloi gana-ganaan na ngungu. 12:3 Hara ni i hupabotohon ma tu hamu anggo halak na dipimpin ni Tondi Parbadia nada tardok halahi, "Sai hona bura ma Jesus!" Laing songon i muse nada adong sahalak pe na malo mandok, "Jesus do Tuhan!" anggo inda digohi Tondi Parbadia halakna i. 12:4 Marragam rupa do silehen-lehen sian asi ni roha ni Debata, tapi Tondi na sasada i do mangalehen i. 12:5 Marragam rupa do karejo laho mangoloi Tuhan i, tapi Tuhan na sasada i do na nioloan i! 12:6 Marrupa-rupa do dalanna mangkarejohon karejo ni Debata, tapi anggo na mangalehen gogo tusi di ganop halak, laing Debata na sada i do. 12:7 Laho patumbukkon na hasaya di hita sude, markarejo do Tondi Parbadia di ganop hita tapi asing be dalanna. 12:8 Tu na sada dilehen Tondi i do hamaloon mandok hata di bagasan habisuhon, jana tu na asing, dilehen Tondi i do hamaloon mandok hata di bagasan parbinotoan. 12:9 Laing Tondi na sada i muse do mangalehen tu na asing haporsayaan, hape tu na asing dilehen Tondi i do kuaso laho pamalum halak. 12:10 Tu na sada dilehensa kuaso mambaen hahomangan jana tu na asing dilehen muse hasurungan laho manyurirangi. Tu na asing muse dilehen Tondi i do gogo laho patandahon parasingan ni silehen-lehen ni gogo na sian Tondi Parbadia dohot na so sian Tondi Parbadia. Adong do i na nilehen gogo laho mangkobari dohot hata na marragam-ragam boti na so niastuan, jana adong muse do na nilehen gogo laho patorangkon angka hata na marragam i. 12:11 Tondi na sada i sajo do mangkarejohon i sudena; dilehen do hasurungan tu sada-sada be marguru tu giot ni Tondi i sandiri. 12:12 Songon pamatang ni jolma do Kristus i; sada do pamatang i, tapi marbagian-bagian do i. Haru pe bahat bagian-bagian i, laing sada pamatang do sude angka bagian-bagianna i. 12:13 Angke markite-hite sada Tondi, nipandidihon do hita sude gabe sada pamatang, bope halak Jahudi bope halak Junani, bope naposo bope halak na malua. Songon i muse, nipainum do hita dohot Tondi na sada i. 12:14 Harana pamatang i sandiri pe, nada hum sian sada bagian sajo, tapi bahat do bagian-bagianna. 12:15 Muda didok pat i, "Nada tangan au, jadi nada masuk au tu pamatang," astuan ni i, nada tutu pat i na so bagian ni pamatang i. 12:16 Jana muda didok pinggol, "Nada masuk tu bagian ni pamatang au, harana inda mata au," nada gabe so masuk tu bagian ni pamatang pinggol i. 12:17 Sugari antong, hum mata sajo sude pamatang i, bia ma baenon ni pamatang i manangihon? Sanga sugari sude pamatang i gabe pinggol sajo, bia ma baenon ni pamatang i manganggo? 12:18 Taligi ma, Debata do na mangatur parpayak ni angka bagian-bagian i di pamatang i. Diingananna be do dibaen Debata sudena i marguru tu parsumanna mangihutkon parnidaan ni Debata. 12:19 Sugari hum sabagian sajo, dia dope sigoaron pamatang? 12:20 Bahat do tutu angka bagian-bagian i tapi anggo pamatang sada sajo do i. 12:21 Jadi hara ni i, nada tardok mata tu tangan, "Inda porlu ho di au!" sanga ulu i mandok tu pat, "Inda porlu ho di au!" 12:22 Tapi angka bagian na layas didok rohanta, hape apala i do na umporlu di hita; 12:23 jana angka bagian na nidok ni rohanta na so pola mararga, hape apala i ma na ummarga tabaen. Angka bagian na so jeges idaon, hape gabe tusi do na umbahat taparrohahon. 12:24 Angka bagian na dung jeges idaon, inda porlu taparrohahon. Na dung disusun Debata do pamatangta i sadenggan-dengganna anso ummarga tabaen angka bagian na so porlu mararga. 12:25 Jadi muda songon i, nada marbagi-bagi be pamatang i; marsipasari-sarian do i na sada tu na asing. 12:26 Muda markancit sabagian, gabe markancit muse do sude angka bagian na asing; muda dapotan pujian sabagian sude angka bagian na asing i dohot do marjop ni roha. 12:27 Hamu sudena rap pamatang ni Kristus do hamu, jana pasada-sada hamu bagian ni pamatang i do. 12:28 Laing songon i do di bagasan parlagutan i, madung ditontuhon Debata do inganan ni angka dongan i: Parjolo angka rasul; paduahon angka panurirang; patoluhon angka guru, dung i baru ma angka na mambaen tanda hahomangan, dung i angka na manjagit kuaso laho pamalum halak, sanga laho mangurupi halak na asing, sanga mamimpin, sanga mangkobari di bagasan hata na marragam rupa na so niastuan. 12:29 Nada sude halahi rasul, sanga panurirang, sanga pe guru. Nada sude adong kuasona laho mambaen hahomangan, 12:30 sanga laho pamalumkon halak, sanga mangkobari di bagasan hata na marragam-ragam na so niastuan, sanga laho patorangkon angka hata i. 12:31 Antong, mur ruminggas ma hamu manjalahi angka silehen-lehen sian asi ni roha ni Debata. Tapi hupaboa dope di hamu sada nari dalan na dumenggan.
13:1 Sugari tarbaen iba mangkobari di angka hata ni jolma, dohot di hata ni surusuruan, hape inda nihaholongan angka dongan na asing, tudos ma iba songon doal na maruolol sanga songon canang na mangkuling-kuling. 13:2 Sugari malo au manyurirangi, jana huboto sude na buni dohot sude parbinotoan, jana adong di au haporsayaan jabat tarpaorot au angka dolok, tapi nada adong di au holong ni roha, songon na soada do au. 13:3 Sugari sude pe sinadonganniba dilehen tu halak na pogos, jana sugari pe nipadiar pamatangniba hona tutung, *HONA TUTUNG: Dipiga-piga-piga naskah narobi didok: Anso bisa manghagodangkon diri.* tapi anggo so nihaholongan do halak na asing, nada adong guna ni i sudena. 13:4 Sobar do holong ni roha i jana burju. Nada mangiburu anggo holong ni roha i, inda marhata manggang, nada ginjang rohana. 13:5 Nada jais holong ni roha i, jana nada manjalahi labo tu dirina sandiri. Nada parmuruk i jana nada disimpan ia hasalaan ni halak na asing. 13:6 Nada sonang holong ni roha i muda masa hageduhan, hum mida na sintong do marjop ni roha holong i. 13:7 Sanga aha pe na ro, tahan do holong ni roha i jana dihaporsayaisa do sude; anggo holong ni roha i nada unjung mago pangkirimonna jana sai sobar do i manaon sasudena. 13:8 Nada ra luntur holong ni roha i. Anggo hamaloon laho manyurirangi, di sada hatiha abis do i dibaritahon. Taringot tu hamaloon laho mangkobari di hata na marragam-ragam na so niastuan i, di sada hatiha mago do i. Taringot tu hamaloon laho mangastui sasude, sada hatiha mago do i. 13:9 Angke hurang singkop dope parbinotoanta bope panyurirangonta. 13:10 Sanoli on muda dung ro na sanggam i, gabe mago ma disi na so sanggam i. 13:11 Dompak menek au, songon pangkatai ni dakdanak na menek do pangkataingku, songon dakdanak na menek pangkilalaanku, jana marpikir au songon parpikir ni dakdanak na menek. Saonnari madung magodang au; ma hutinggalkon pangalaho sihadakdanahanku. 13:12 Sanga aha na taida saonnari, tarsongon halinu na hurang torang do i di sormin. Tapi anggo saulahon idaonta ma tangkas pangalaho na satutuna. Saonnari hurang tangkas dope parbinotoan na adong di au, tapi anggo saulahon botoonniba ma tangkas, songon tangkas ni parbinoto ni Debata di au. 13:13 Jadi tinggal ma na tolu on: Haporsayaan, arop ni roha, dohot holong ni roha; tapi na gumodang sian na tolu i, holong ni roha do.
14:1 Parayak hamu ma mambaen holong ni roha jana tambori hamu ma angka silehen-lehen ni Tondi, tarlobi anso manyurirangi hamu. 14:2 Sanga ise na mangkobari di hata na so niastuan, nada tu jolma ia mangkobari; tu Debata do ia mangkobari. Nada diastui halak sanga aha na nidokna i, angke Tondi Parbadia do na mambaen ia mandokkon angka pangalaho na binoto ni Debata. 14:3 Tapi sanga ise na manyurirangi, tu jolma do ia mangkobari laho patoguhon roha ni halahi, pajopkon roha dohot mangapoi halahi. 14:4 Sanga ise na mangkobari di hata na so niastuan, hum dirinia sajo do na nipatogunia, hape anggo halak na manyurirangi, i do na mangurupi parlagutan i anso mur tu majuna. 14:5 Denggan sajo do sugari nian malo hamu sude mangkobari di hata na so niastuan. Tapi na dumenggan, sugari nian malo ma hamu sude manyurirangi. Angke gumodang do halak na manyurirangi ulang pado halak na mangkobari di angka hata na so niastuan; asing ma rupani muda adong halak na mangkobari di hata na marragam na so niastuan, tapi laing malo muse ia patorangkon sanga aha na nidoknia i, anso sudena parlagutan i dapotan parsaulian. 14:6 Sugari ro au mandapotkon hamu jana mangkobari au di hata na so niastuan, aha ma he guna ni i! Asing ma, muda hupajojor tu hamu sangkap ni Debata, sanga parbinotoon, sanga panyurirangan, sanga pangajaran sanga hupaboa tu hamu aha na huboto taringot tu Debata, sanga hupaboa taringot tu angka pangalaho na nibaen ni Debata maradopkon jolma manusia, sanga huajari hamu. 14:7 Laing songon alat musik na so marhosa i, isara ni suling dohot hasapi, anggo so torang do mardomu sorana i dibaen na mamalu i, dia ma he diboto halak sanga na ende aha na nibaenna i? 14:8 Tudosan na asing sada nari: Muda sarat na dipalu do sarune, ise ma na ra markobas kehe laho marporang? 14:9 Laing songon i do hamaloanmunu laho mangkobari di hata na marragam na so niastuan i. Anggo hata na so tangkas do dipardokkoni hamu hara ni hamaloanmunu i, nada adong sahalak pe na mangastui sanga aha na nidokmunu i, sayang boti do angka hata na nipardokkonanmunu i. 14:10 Bahat do ragam-ragam ni hata ni halak di portibi on, tapi umpe sada sian angka hata i na so marastuan. 14:11 Tapi muda inda huastui hata na nidok ni sada-sada halak, gabe halak na asing ma di au jolma na mamake hata i; songon i muse ma au tusia. 14:12 Taringot tu hamu sandiri, huboto do na por rohamunu maruli angka hasurungan sian Tondi i. Tapi anggo na dumenggan, angkon marusaho do hamu laho mamake hamaloon i, mangurupi parlagutan i tu hamajuon. 14:13 Hara ni i ma, sanga ise na mangkobari di hata na so niastuan, angkon pangidoonnia ma sian Debata anso laing dilehen muse disia gogo laho patorangkon sanga aha na nipardokkonannia i. 14:14 Angke sugari martangiang iba di hata na so niastuan, martangiang do nian tondiniba, tapi nada markarejo. 14:15 Antong, bia noma? On noma sibaenonniba: Martangiang ma iba dohot tondiniba, tapi martangiang muse ma iba dohot rohaniba. Marende ma iba dohot tondiniba, tapi laing giot marende muse ma iba dohot rohaniba. 14:16 Harana muda mandok tarimakasi hamu tu Debata dohot tondimunu sajo, songon di ma he tarbaen halak na bahat i mandok, "Amen", dung sidung ho mandok tarimakasi, anggo so diboto ia, sanga aha na nidokmi? 14:17 Haru denggan sajo pe tangiang tarimakasimi tu Tuhan, tapi nada adong sanga aha pe guna ni tangiang i anggo tu halak na asing. 14:18 Tarimakasi do hudok tu Debata, angke malo do au mangkobari di hata na marragam-ragam na so niastuan. Ummalo dope au sian hamu. 14:19 Tapi anggo di angka parlagutan, gumonan dope limangkababa hata hudok asal ma diastui halak, ulang pado mandok hata na so niastuan maribu-ribu pandohan. Jopan do rohangku songon i anso tarajari au halak. 14:20 Hamu ale angka dongan! Ulang ma songon dakdanak parrohaonmunu. Taringot tu hajahatan, sugari laing tong ma hamu songon dakdanak na menek. Tapi anggo diparrohaon, gabe songon halak na dung impas godang ma hamu. 14:21 Tarsurat do di Buku Na Badia i, songon on: "Didok Tuhan do, 'Manghatai ma Au tu bangso on markite-hite pamangan ni halak na asing, i ma halak na mangkobari di bagasan hata na asing. Tapi haru songon i pe laing so ditangihon halahi do Au, ninna Tuhan i.' " 14:22 Jadi silehen-lehen laho mangkobari di angka hata na so niastuan, songon tanda do i di angka halak na so porsaya, nada dohot di angka na porsaya. Jana hasurungan laho manyurirangi, tanda do i tu angka na porsaya, nada tu angka halak na so porsaya. 14:23 Jadi muda marlagut hamu, marsidok hatana be ma na marlagut i di hata na so niastuan, hape ro muse ma deba halak na asing, sanga angka halak na so Kristen, tontu na rintik do hamu sudena ninna roha ni halahi! 14:24 Tapi sugari sude hamu manyurirangi masuk muse ma sahalak na so Kristen sanga halak na asing, jadi sude angka na nipajojormunu i patandahon angka dosania ma i jana mambaen ia gabe mangoku angka dosania i. 14:25 Sanga aha na buni di bagasan rohania, dipatandahon ma i, gabe dipatoruk ia ma dirinia marsomba tu Debata. Okuonnia ma na tutu do Debata di tonga-tongamunu. 14:26 Antong hamu ale angka dongan, aha ma he astuan ni i sudena? Muda marlagut hamu laho marsomba tu Tuhan: Adong ma na marende, adong na mangajari, adong na paboahon sanga na aha sian Debata, adong na mangkobari di hata na so niastuan, jana adong na patorangkon sanga aha na nidokna i. Tapi sasudena i, angkon mangajari dohot padenggankon do tu sudena i nibaen. 14:27 Muda adong na giot mangkobari di hata na so niastuan, sabahat-bahatna ma dua sanga tolu halak margonti-gonti, jana angkon adong ma na patorangkon sanga aha na nipajojor ni na mangkobari i. 14:28 Anggo so adong do na patorangkon hata i, angkon sip ma angka na mangkobari di hata na so niastuan i, di parlagutan i. Tuk ma di bagasan roha halahi mangkatai dohot Debata. 14:29 Taringot tu angka panurirang, denggan do dua sanga tolu halak mangkobari, jana laing manangi-nangi ma anggo na asing i manimbang sanga aha na nidoknia i. 14:30 Tapi sugari adong dope ro barita sian Debata tu sada halak na asing na juguk di parlagutan i, maradian ma jolo halak na mandok hata i. 14:31 Jadi songon i ma dalanna anso tarbaen hamu pasada-sada manyurirangi; anso sude tarbaen marsiajar jana sudena dapotan hagogoan. 14:32 Dibaen anggo tondi ni panurirang mangoloi do tu panurirang i. 14:33 Na mangkagioti na taratur do anggo Debata; nada na mangkagioti hagaoron. Angke nada dihagioti Debata anggo hagaoron, tapi hasonangan i do. 14:34 Songon na masa di sude parlagutan ni halak na badia, angkon hohom do angka dadaboru di bagasan parlagutan. Nada tola halahi manghatai, tapi angkon unduk do halahi songon na nidok ni Tona i. 14:35 Muda giot adong botoon ni halahi, tu halaklahi ni halahi ma i disapai halahi di bagasna, harana na so umboto sopan do sada dadaboru na mangkobari di bagasan parpunguan ni parlagutan. 14:36 Sian hamu dehe lakna ro pandohan ni Debata? Sanga hum tu hamu sajo lakna pandohan i dipaboa? 14:37 Betak sai adong halak na mangkilala dirina maruli silehen-lehen laho manyurirangi sanga maruli ia di silehen-lehen na asing sian Tondi i, angkon tangkas ma botoon ni halakna i, parenta ni Tuhan do sanga aha na husuratkon on. 14:38 Tapi betak sai adong na so manjagit on, ulang pola pardulihon hamu halakna i. 14:39 Hara ni i hamu ale angka dongan, parayak hamu ma na manyurirangi i, tapi ulang gabe antahi hamu halak na giot mangkobari di angka hata na so niastuan. 14:40 Tapi angkon marsopan jana maraturan do i nibaen sudena.
15:1 Hamu ale angka dongan! Saonnari giotku, ingot hamu ma mangulahi Jamita Na Denggan na sian Debata na hujamitahon i najolo tu hamu. Madung dijagit hamu i, jana marojahan tu Jamita Na Denggan i do haporsayaanmunu. 15:2 Muda togu do hamu marojahan tu na hujamitahon i, paluaon ni Jamita Na Denggan i ma hamu; asing ma rupani anggo na sayang boti sajo hamu di na porsaya i. 15:3 Harana madung hupasahat tu hamu na umporlu, i ma sian na dung hujagit, na dung mate do Kristus hara ni angka dosanta mangihutkon na tarsurat di Buku Na Badia i. 15:4 Madung ditanom Ia, jana mangulahi Ia dipangolu di ari patoluhon. I pe na dung tarsurat hian do i di Buku Na Badia i. 15:5 Jadi dipataridahon Ia ma diriNa tu si Kepas, dohot tu siseanNia na dua bolas i. 15:6 Dung i dipatidahon Ia muse dope Ia tu lobi lima ratus halak di sada hatiha. Bahatan na mangolu dope halahi saonnari, hum deba dope na jumolo. 15:7 Dung i dipatidahon Kristus i muse dope Ia tu si Jakobus, jana tu sudena angka rasul i. 15:8 Na parpudi situtu, dipatidahon Ia diriNia tu au muse -- tu au na songon dakdanak na sorang taran so ro dope hatihana! *NA SORANG TARAN SO RO DOPE HATIHANA: Sanga: Na sorang di luar ni hasomalan.* 15:9 Harana au ma lumayas sian sude rasul, jana nada patut au nian margoar rasul, dibaen madung huparkanciti parlagutan ni Debata. 15:10 Tapi hara ni asi ni roha ni Debata, madung gabe songon au na adong saonnari on, au. Jana nada parcuma na niampunan ni Debata au. Hape gabe lumoja dope au markarejo sian sude rasul na asing i. Tapi i pe sudena, nada hara ni usahongku i; usaho ni Debata na mangakaholongi au do i jana na markarejo rap dohot au. 15:11 Hara ni i bope au sanga pe halahi laing i do jamitanami jana laing i do dihaporsayai hamu. 15:12 Tapi muda i do na hami jamitahon, i ma Kristus na dung nipangolu i mangulahi sian hamatean, biasi laing adong dope deba sian hamu na mandok, anggo jolma na mate, nada pangoluon be mangulahi? 15:13 Anggo tutu do halak na mate i na so pangoluon be mangulahi, antong Kristus pe nada tutu muse mangolu mangulahi sian hamatean. 15:14 Jana sugari na so tutu mulak mangolu Kristus sian hamatean gabe nada adong gunana be hami manjamitahon sanga aha, jana inda adong muse gunana porsaya hamu. 15:15 Lumobi sian i tardapot muse dope hami songon saksi pargabus taringot tu Debata, angke madung hami jamitahon paboa na dung dipangolu Debata mangulahi Kristus sian hamatean, hape inda tutu dipangolu Debata Ia mangulahi -- muda na tutu ma i na so dipangolu Debata mangulahi halak na mate i! 15:16 Angke muda inda dipangolu mangulahi halak na mate i, Kristus pe nada tutu dipangolu mangulahi sian hamatean. 15:17 Jana muda nada dipangolu Kristus i, sayang boti ma haporsayaanmunu i; jana di bagasan dosamunu dope hamu mangolu. 15:18 Dung i mago muse ma angka na mate di bagasan Kristus i. 15:19 Anggo hum di ngolunta dompak di portibi on sajo do pangkirimon ni rohanta tu Kristus *ANGGO HUM DI NGOLUNTA DOMPAK DI PORTIBI ON SAJO DO PANGKIRIMON NI ROHANTA TU KRISTUS: Sanga: Anggo hum arop ni roha tu Kristus sajo do na dapot hita di hangoluan on.* gabe hita ma halak na lumebak sian sude jolma na di tano on! 15:20 Hape anggo satutuna madung dipangolu mangulahi Kristus sian hamatean, songon siangkaan sian angka halak na dung mate. Jana on ma jaminanna, paboa na pangoluon do mangulahi angka jolma na dung marmatean i. 15:21 Angke hara ni sada halak do masuk hamatean i tu portibi on, laing songon i muse ma na mulak mangolu i sian hamatean, dipasahat tu jolma manusia markite-hite sada halak muse. 15:22 Songon parmate ni sasudena jolma manusia hara ni na sapangalaho dohot si Adam, laing songon i ma pangoluon sudena, hara ni na dung sapangalaho dohot Kristus. 15:23 Tapi marguru tu aturanna be do nipangolu halahi: Na parjolo Kristus; dung i angka na dung nampuna ni Kristus di hatiha haroroNia. 15:24 Dung i ro ma hasisidungna. Taluhonon ni Kristus ma disi sudena pangarajaion, sude kuaso dohot hagogoon; lalu pasahatonNia ma kuaso ni harajaanNia tu Debata Amanta i. 15:25 Mamarenta ma Kristus lopus sude musuNia i tunduk tuSia baenon ni Debata. 15:26 Anggo musu na parpudi patunduhonNia, i ma hamatean. 15:27 "Madung dipatunduk Debata tuSia sasudena na adong." Anggo na nidokna di bagasan pandohan "sasudena na adong" madung torang na so dohot di bagasan ni i Debata sandiri na patundukkon sasudena i tu Kristus. 15:28 Tapi dung dipatunduk sasudena tu toru ni pangarajaion ni Kristus, Ia sandiri pe, i ma Anak Ni Debata i patunduhonNia ma diriNia sandiri tu Debata na dung mambaen tunduk sasudena tuSia. Jadi Debata sandiri noma mamarenta sasudena. 15:29 Anggo so pangoluon do mangulahi halak na mate i, biasi pola nipandidihon halak tu jolma na mate? Aha pola sipainteon sian angka na mate i? Muda na tutu ma na so pangoluon be jolma na mate i, aha ma he gunana nipandidihon halak salaho tu jolma na mate. 15:30 Jana hami pe aha ma gunana hami paadop-adop parmaraan i tongtong? 15:31 Hamu ale angka dongan! Ganop ari do manaon parkancitan au hara ni moga ni rohangku mida ngolumunu na porsaya hamu tu Kristus Jesus Tuhanta i. 15:32 Anggo hum hara ni na somal masa di jolma sajo do pola ma marsiranggut au mangalo angka binatang panyoro di Epesus on, aha ma labongku sian i? Anggo so pangoluon do halak na mate i mangulahi, antong dumenggan ma: "Mangan minum hita jana marsonang-sonang, harana laing na mate do hita ancogot." 15:33 Ulang jabat tarpaoto-oto hamu! Muda dipardongan hamu halak na jahat, gabe jahat muse do parangemunu na denggan i. 15:34 Torang ma rohamunu jana ulang be mambaen dosa hamu. Adong dope sian hamu halak na so tangkas mananda Debata. Hudok pe songon i, anso maila do hamu di dirimunu. 15:35 Betak adong manyapai, "Bia ma he jolma na mate i dipangolu mangulahi? Pamatang na bia ma dilehen tu halahi mangulahi?" 15:36 O ale na oto! Muda disabur hamu eme di tano, nada ra tubu same i anggo so jolo mate. 15:37 Jana na giot sisaburonmu -- same ni gandum sanga sian na asing pe -- nada pamatang ni suan-suanan na giot tubu, tapi hum batuna sajo do. 15:38 Debata sandiri do muse na mangalehen rumang ni suan-suanan i marguru tu dengganna di parnidaanNia. Dilehen Debata do rumang ni suan-suanan i ganop be tu sude ragam ni same i. 15:39 Nada adong na sarupa rumang ni pamatang ni sandok na marhosa. Adong do rumang ni pamatang ni jolma, asing muse rumang ni pamatang ni angka binatang; pamatang ni angka unggas pe asing muse do i sian ihan. 15:40 Laing songon i do angka barang-barang na adong di langit dohot angka na di tano on. Marsioban hajegesonna be do angka na di langit i, angka barang na di tano on pe laing songon i do. 15:41 Marasing do hajegeson ni mataniari sian hajegeson ni bulan. Salangkan angka bintang i pe paasing-asing be do hajegesonna. 15:42 Songon i ma pangalahona sanoli on taringot tu angka na mate mangulahi dipangolu. Anggo pamatang na nitanom i, pamatang na ra busuk do i. Tapi anggo pamatang na mulak mangolu i, pamatang na so marhaujungan do i. 15:43 Na nitanom di bagasan halayason, mulak mangolu ma i di bagasan hasangapan. Na nitanom di bagasan hagaleon mulak mangolu ma i di bagasan hagogoan. 15:44 Pamatang tano on do na nitanom i, tapi na dipangolu pamatang partondion do. Adong do pamatang na sian tano on, adong muse pamatang partondion. 15:45 Tarsurat do i songon on, "Si Adam, jolma na parjolo i gabe halak na mangolu," tapi si Adam na parpudi i do gabe Tondi na mangalehen ngolu. 15:46 Na marrumang pamatang do anggo na parjolo ro, nada na marrumang partondion. Parpudi ro do anggo na marrumang partondion i. 15:47 Sian tano do dijadihon anggo si Adam na parjolo i, tapi anggo si Adam na paduahon sian banua ginjang do i. 15:48 Anggo angka jolma portibi on, songon si Adam na parjolo-jolo i do i na nijadihon sian tano, tapi angka jolma banua ginjang i, sarupa tu na ro sian banua ginjang i do i. 15:49 Songon dia hita saonnari na songon si Adam na nijadihon sian tano i, anggo sanoli on gabe songon na ro sian banua ginjang i muse ma hita. 15:50 Na hudok disi hamu angka dongan, on do: Anggo pamatang na dijadihon sian sibuk dohot sian mudar, nada tarbaen gabe parsidohot di Harajaan Ni Debata; pamatang na ra mate pe nada tarbaen gabe pamatang na manongtong. 15:51 Ligi da, hupaboa ma sada rahasia di hamu: Nada jabat mate hita sude tapi nipauba ma hita sudena. 15:52 Di bagasan sangkidop mata do i sudena tarjadi, di na nipalu sarune na parpudi situtu. Angke dung tarbege sora ni sarune i, pangoluon ma mangulahi angka jolma na mate i marpamatang na manongtong jana paubaon ma hita sudena. 15:53 Pamatangta na ra mate on angkon mamake pamatang na so ra mate noma, jana pamatang na sian portibi on angkon mamake pamatang na sian banua ginjang noma. 15:54 Muda dung dipake pamatang na ra mate do pamatang na so ra mate i jana pamatang na sian portibi on mamake pamatang na sian banua ginjang i, baru ma anso tarjadi disi na tarsurat di bagasan Buku Na Badia i na mandok, "Madung dipangabis hamatean; madung dapot hamonangan!" 15:55 "Jo, hamatean, di dia do hamonanganmi? Jo, hamatean, di dia he corotmi?" 15:56 Anggo corot ni hamatean i, i ma dosa jana kuaso ni dosa i, i ma Tona i. 15:57 Tapi tarimakasi ma di Debata, dilehen Ia do antong hamonangan di hita markite-hite Jesus Kristus Tuhanta i! 15:58 Hara ni i hamu ale angka dongan na nihaholongan, sai togu ma hamu jana hot. Marsitutu ma markarejo di Tuhan, angke diboto hamu do, sude na nikarejohonmunu di Tuhan, nada sayang boti sudena i.
16:1 Saonnari taringot tu hepeng na giot silehononmunu ma tu angka donganta sahaporsayaan, anggo anjuranku tu hamu, baen hamu ma i songon na huanjurkon tu angka parlagutan na di Galatia. 16:2 Ganop Ari Minggu, painding hamu ma ganop be marguru tu pangomoanna be. Simpan hamu ma hepeng i lopus ro au, anso ulang pola papungu-punguhon be muda dung lalu au. 16:3 Jadi muda dung lalu au, suruonku ma angka dongan na dung nisatujuanmunu. Lehenonku ma tu halahi suratna anso halahi noma maroban hepeng i tu Jerusalem. 16:4 Jana muda denggan do rap kehe au dohot halahi, tapi marnida disi noma i, jadi laing rap ma au kehe dohot halahi. 16:5 Giot topotonku do hamu, dung hubolus Makedonia, harana adong do maksudku mamolus sian i. 16:6 Betak na tarbaen do rap au santongkin dohot hamu, aropku salolot musim ngali ma i. Dung i tarbaen hamu ma mangurupi au patoruskon pardalananku tu kota na mangihut. 16:7 Nada ra au manopot hamu hum maradian santongkin sajo. Muda dipaloas Tuhan, por do rohangku tar lumolot rap dohot hamu. 16:8 Tapi dompak so i, di Epesus ma au maringanan lopus tu Ari Pentakosta. 16:9 Topet do hatihana saonnari dison mambaen karejo na mararga, haru pe bahat muse halak na mangalo. 16:10 Muda ro si Timoteus, denggan ma jagit hamu ia anso tahan ia lolot di tonga-tongamunu, harana sarupa dohot au do ia, na markarejo di Tuhan i. 16:11 Ulang jabat adong sanga ise na marlayas ni roha tusia. Urupi hamu ma ia anso tarbaen ia patoruskon pardalanannia horas lopus lalu tu au, harana sai hupainte-inte do haroronia dohot angka dongan na asing i. 16:12 Taringot tu donganta si Apollos, madung piga-piga noli husosoi ia anso ro mandapotkon hamu rap dohot angka dongan na asing i. Tapi nada haru tontu dope di bagasan rohania *TAPI NADA HARU TONTU DOPE DI BAGASAN ROHANIA: Sanga: Muda nada hagiot ni Debata.* sanga na angkon kehe ia saonnari. Tapi haru songon i pe, anggo dung tarbaen ia do bagi andigan, tontu ro do ia. 16:13 Antong jonggor ma hamu jana togu ma haporsayaanmunu. Angkon barani do hamu martindak jana sai margogo ma hamu. 16:14 Sude na nibaenmunu, di bagasan holong ni roha ma i baen hamu. 16:15 Adong dope sada nari pangidoanku tu hamu ale angka dongan. Diboto hamu do, anggo si Stefanus dohot donganna sabagas, i ma angka halak na parjolo porsaya di Akhaya, jana dipasahat do dirina mangoloi angka na porsaya. 16:16 Situtu ni rohangku manyosoi hamu, ihutkon hamu ma pamimpin na songon ia i, bope angka dongan na asing na markarejo dohot mangoloi rap dohot halahi. 16:17 Jop do rohangku di haroro ni si Stefanus, si Portunatus dohot si Akaikus i. Songon gontimunu do huhilala halahi di au. 16:18 Angke diapoi halahi do au dohot hamu. Hara ni i pasangap hamu ma angka halak na songon i. 16:19 Palalu tabe do angka parlagutan na di Asia tu hamu, si Akuila pe dohot si Priskila bope parlagutan na marlagut di bagas ni halahi i, manongos tabe hakristenon na marsitutu do tu hamu. 16:20 Sude angka dongan na dison palalu tabe do di hamu. Marsijalangan ma hamu sama hamu songon tu dongan Kristen. 16:21 Hupalalu muse tambana dison tabe na husuratkon sandiri: Horas ma di hamu, sian au si Paulus. 16:22 Sanga ise na so manghaholongi Tuhan Jesus, padiar ma diuhumi Debata ia. Maranatha -- sigop ma Ho ro, Tuhan! 16:23 Sai dipasupasu Tuhan Jesus ma hamu. 16:24 Ihut ma holong ni rohangku tu hamu sudena di bagasan Jesus Kristus.
1:1 Surat sian si Paulus, rasul ni Kristus Jesus markite-hite hagiot ni Debata, dohot sian donganta si Timoteus, manopotkon parlagutan ni Debata na di Korintus, dohot sude dongan sahaporsayaan na di Akaya. 1:2 Asi ni roha ma di hamu dohot hasonangan sian Debata Amanta dohot sian Tuhanta Jesus Kristus! 1:3 Pinuji ma Debata Ama ni Tuhanta Jesus Kristus. Ia ma Ama na sun denggan rohaNa jana Ia do Debata na mangalehen pangapoion ni roha tu jolma manusia. 1:4 Diapoi Ia do rohanami di bagasan sasudena hasusaan na hami bolus, anso tarapoi hami muse ma roha ni halak na di bagasan hasusaan markite-hite gogo na hami jagit i sian Debata. 1:5 Angka hasusaan na nitaon ni Kristus i pe, madung bahat hami taon. Hara ni i do umbaen na mur togu rohanami markite-hite Kristus. 1:6 Muda hami taon hasusaan, laho patoguhon rohamunu do i, anso malua hamu. Muda mur togu rohanami, gabe dohot do hamu dipatogu jana gabe sobar hamu di bagasan angka hasusaan songon na hami taon i. 1:7 Nada jungada ganggu rohanami taringot tu na hami arop sian hamu, angke hami boto do, na dohot do hamu susa rap dohot hami. Jana hara ni i ma umbaen na gabe dohot hamu dipatogu. 1:8 Hamu ale angka dongan! Giotnami sugari diboto hamu ma nian hasusaan na hami taon di Luat Asia. Madokdoktu do hasusaan na hami tanggung i manyompiti rohanami, jana nada adong be arop ni rohanami tarbaen mangolu; 1:9 songon na dung mate niuhuman do pangkilalaannami. Tapi anso ulang marpangunsandean tu dirinami sandiri do hami umbaen na tarjadi songon i, tapi anso tu Debata na pangolu halak na mate i ma. 1:10 Ia do na palua hami sian parmaraan godang na giot mamatehon i. Jana laing paluaonNia do hami tu angka ari na giot ro, angke tuSia do hami mararop ni roha. 1:11 Dibaen dohot do hamu mangurupi hami markite-hite tangiangmunu, anso bahat halak mandok tarimakasi hara ni pasupasu na hami jagit markite-hite bahat ni tangiangmunu tu hami. 1:12 Anggo na pagodang rohanami on do: Dipapos taroktoknami do rohanami taringot tu sude na hami karejohon di tano on -- lumobi na marpardomuan tu hamu -- sian roha na ias jana na polin na sian Debata do hami baen i sudena, nada sian habisuhon ni portibi, tapi sian asi ni roha ni Debata do. 1:13 Anggo na hami suratkon tu hamu, hum angka na tarsise dohot na haastuan hamu sajo do. Saonnari nada haastuan hamu hami satangkas-tangkasna, tapi laing arop do rohangku muse gabe tangkas botoonmunu taringot tu hami. 1:14 Jadi muda ro Tuhan Jesus muse, moga ma hamu hara ni hami songon moga ni rohanami di hamu. 1:15 Hara ni pos ni roha na songon i ma di mulana i gabe hupasada rohangku laho manopot hamu anso dapotan pasupasu hamu dua lompit. 1:16 Giot topotonku do hamu nian laho kehe au tu Makedonia jana maradian muse ma au di hamu on laho mulak, anso tarurupi hamu au patoruskon pardalananku laho tu Judea. 1:17 Tapi nada tulus songon i; antong, na patuduhon na so hot ma he pikiranku disi? Di na mambaen sangkap i, marguru tu giot-giotku sajo dehe au lakna mambaen i, santongkin, "Olo", santongkin nari, "Inda"? 1:18 Husumpahon ma tu Debata na sintong i, anggo janjingki tu hamu nada, "Olo" sanga "Inda". 1:19 Harana anggo Jesus Kristus, Anak Ni Debata na nijamitahon ni si Silvanus, si Timoteus dohot au sandiri tu hamu nada halak na "Olo" sanga "Inda". Hum alus na "Olo" sajo do diSia. 1:20 Angke markite-hite Ia madung didok Debata, "Olo" taringot tu sude na dung nijanjihonNia. Hara ni i ma umbaen na tardok hita, "Amen" tu Debata hara ni Jesus Kristus. Anso nipasangap ma Debata. 1:21 Debata sandiri do na mambaen hami dohot hamu gabe togu marsada dohot Kristus; laing Ia muse do na mamiahi hita. 1:22 Domu tusi, madung dilehen Ia tu hita tanda paboa na Ia nampuna hita jana dilehen Ia maringanan TondiNia di bagasan rohanta na gabe jaminan ni sasudena na nipasingkopNia i di hita. 1:23 Tapi hupio do Debata gabe saksingku disi -- harana diboto Ia do isi ni rohangku dibaen na so tulus pe au kehe tu Korintus, hara ni na so ra do au paarsak rohamunu. 1:24 Nada pola hupaksahon sanga na aha tu hamu taringot tu sihaporsayaanmunu, harana na dung porsaya situtu do hamu. Hum na rap markarejo do au dohot hamu anso mur marjop ni roha hamu.
2:1 Jadi hara ni i madung huputuskon na so ro be au manopotkon hamu anggo na gabe mangarsahi rohamunu. 2:2 Harana muda marsak hamu hara ni au, gabe ise muse be na mangapoi au, anggo inda halak na hupaarsak i? 2:3 Hara ni i do umbaen na husuratkon songon i tu hamu. Nada ra au ro manopot hamu anso marsak, harana hamu do na sapatutna angkon pajop rohangku. Harana pos do rohangku, muda marjop ni roha au, dohot do hamu sude marjop ni roha. 2:4 Di bagasan arsak dohot dokdok ni pangkilalaan jana mardongan ilu do au mambaen surat on tu hamu. Hudok pe songon i nada anso marsak hamu, tapi anso diboto hamu do holong ni rohangku maradopkon hamu. 2:5 Muda adong sanga ise na dung mambaen arsak ni roha on sudena, nada tu au dibaen ia songon i, tapi tu hamu sude do -- anso ulang marlobian na hudok i -- sanga tu deba sian hamu. 2:6 Anggo tu halak na songon i pangalahona, tuk ma holau uhuman na dung somal na nidalankonmunu i baen hamu tu halakna i. 2:7 Saonnari angkon ampunanmunu ma ia jana sosoanmunu mangulahi anso ulang mamarsaktu ia gabe mandele. 2:8 Hara ni i, hupangido tu hamu, anso patuduhon hamu tu halakna i paboa na tutu do holong rohamunu mida ia. 2:9 Hubaen pe surat i tu hamu, laho manguji rohamunu do au sanga na tongtong do hamu ra mangoloi angka sipaingotku. 2:10 Muda diampuni hamu halak na marsala tu hamu, au pe huampuni ma halakna i. Harana, sanga ise na huampuni -- muda adong ma siampunan -- di adopan ni Kristus do i huampuni laho padenggankon hamu. 2:11 Hubaen pe songon i, anso ulang adong do dalan di Sibolis i laho mangarajai hita, angke taboto do angka sangkap ni Sibolis. 2:12 Dung lalu au di Troas, laho manjamitahon Jamita Na Denggan taringot tu Kristus i do nian maksudku. Madung tarbuka muse dalan dibaen Tuhan i di au laho markarejo di inganan i. 2:13 Tapi inda sonang huhilala, hara ni na so marsuo au dohot donganta si Titus disi. Gabe huparmisihon noma tu halak kota i lalu kehe au tu Makedonia. 2:14 Tapi tarimakasi ma di Debata, tongtong do diuluhon Ia hami mangihutkon uduran ni hamonangan ni Kristus. Dipake Debata do hami anso songon uap na huskus jamita taringot tu Kristus i. 2:15 Dibaen songon uap na huskus ni Kristus do hami adop Debata di tonga-tonga ni angka na dapotan haluaan, bope di tonga-tonga ni angka na giot kehe tu hamagoan i. 2:16 Anggo di halak na giot kehe tu hamagoan, sarupa tu uap ni bangke na mamatehon do hami; tapi anggo di angka na nipalua, songon uap na maroban tu hangoluan do hami. Antong, ise ma na tama tu karejo on? 2:17 Nada songon halak na asing anggo hami, na mambaen jamita na sian Debata i songon barang sigadison sajo. Polin do tujuannami, harana Debata do na marsuru hami markarejo. Jana diida Debata sandiri do hami songon naposo ni Kristus pasahat jamita i.
3:1 Adong he songon na mamuji-muji diri hami idaon mangulahi? Betak na porlu do di hami surat pujian maradopkon hamu, sanga sian hamu, songon angka halak na deba na mamorluhon songon i? 3:2 Hamu sandiri do surat pujiannami na tarsurat di bagasan rohanami jana na bisa botoon dohot siseon ni sude halak. 3:3 Idaon ni halahi sandiri do i paboa na songon surat ni Kristus hamu na nisuratkon markite-hite hami. Nada dohot tinta dibaen surat i, tapi dohot Tondi Parbadia na mangolu i do; nada di ginjang ni batu tulis muse, tapi di ate-ate ni jolma do. 3:4 Hami dok pe songon i, hara ni pos ni rohanami do maradopkon Debata markite-hite Kristus. 3:5 Nada adong sanga aha anggo di bagasan dirinami sipangasahonon na mambaen hami sanggup mambaen karejo on, na nilehen ni Debata do hamaloon i di hami. 3:6 Ia do na mambaen hami sanggup gabe pangoloi di sada parjanjian na imbaru; i ma parjanjian na marguru tu Tondi Parbadia, nada marguru tu angka aturan na tarsurat. Angke mamatehon do anggo na tarsurat i, hape na sian Tondi Parbadia i, na pangoluhon do. 3:7 Dompak na manotopkon parjanjian na mamatehon i dohot na manyuratkon i di batu, marsinondang do hagodangan ni Debata marnyala-nyala. Hara ni torangna jabat inda tartontang halak Israel be bohi ni si Musa, haru pe madung mamungka mondap nian sinondang i di hatiha i. Antong, salangkan pamungkaan ni parjanjian na mamatehon i dirasmihon dohot sinondang na songon i torangna, 3:8 mur ma di na mamungka parjanjian na nilehen ni Tondi i, dao dope tumorang disi. 3:9 Angke muda marhasangapan tohonan na tu hamagoan, mur sumangapan dope hasangapan ni parjanjian ni hatigoran i. 3:10 Tola ma nidok, sanga aha na marsinondang hian najolo nada marsinondang be hara ni torangna na saonnari on. 3:11 Harana muda marsangap do na giot mago i, tontu dao dope tumorang na manongtong i didongani hasangapan. 3:12 Harana sisongon i do na niarop ni rohanami, gabe puluk ma hami mangkatahon na songon i. 3:13 Nada songon si Musa hami na manggupgupi bohinia anso ulang diida halak Israel sinondang na sian Tuhan i, na mur mondap jana na mago sian bohinia. 3:14 Madung digupgupi roha ni halahi. Jana lopus tu sadari on pe laing targupgup dope roha ni halahi dibaen panggupgupina i muda disise halahi angka buku taringot tu parjanjian na honok. Angkon marhasadaon dohot Kristus do, anso tarungkap halak panggupgupi i. 3:15 Saonnari pe muda disise halahi angka buku ni si Musa laing ditutupi panggupgupna i dope roha ni halahi. 3:16 Tapi muda ro mangulahi sanga ise mandapotkon Tuhan, nibuat do panggupgupi i sian bohi ni halakna i. *Ayat 16 on bisa do diterjemahkon gabe songon on: Tapi bisa do diangkat panggupgupi i sian ia, songon na nidok ni Bibel taringot tu si Musa, "Diangkat do panggupgupi i sian ia, hatiha na mangadop i ia tu Tuhan."* 3:17 Harana Tuhan i do Tondi i. Jadi barang di dia pe Tondi Ni Tuhan i, disi do adong haluaan. 3:18 Saonnari nada nigupgupan be bohinta. Songon sormin na nisondangan dohot hatiuran ni Tuhan Jesus do hita. Jadi hara ni i, torus do hita dipauba anso gabe songon Ia, mur honok, mur marsinondang do hita hara ni hatiuran na sian Tondi Ni Tuhanta i.
4:1 Na niurupan ni Debata do hami mangkarejohon karejo on. Na nilehenNia do karejo on di hami. Hara ni i ma umbaen na so mandele hami. 4:2 Nada hami baen dalan na so ture. Nada ra hami markarejo mamake akal-akal sanga na pabalik-balikkon pandohan ni Debata. Torus torang do hami paboa sanga na aha na nipangido ni roha ni Debata. Jadi, marguru tu sada-sada halak ma laho manimbangi hami di bagasan taroktokna be di adopan ni Debata. 4:3 Muda na laing so diastui dope Jamita Na Denggan na hami jamitahon i, hum angka jolma na giot tu hamagoan sajo noma na so mangastui i. 4:4 Na nigupgupan ni Debata na mangarajai portibi on do roha ni halahi na so porsaya i. I do na manyundati halahi anso ulang dohot halahi marnida sinondang na sian Jamita Na Denggan i, i ma taringot tu hasangapan ni Kristus i na gabe songon gambaran ni Debata. 4:5 Anggo Jamita na hami pasahat i nada barita taringot tu dirinami sandiri i. Barita taringot tu Jesus Kristus do i; paboahon na tutu do Ia Tuhan jana hami ma angka naposomunu hara ni Ia. 4:6 Debata do mandok, "Bincar ma na torang sian na golap." Laing Debata na sada i muse do na pabincarkon sinondang i di bagasan rohanta, anso gabe torang rohanta laho mangastui hamuliaon ni Debata na marsinondang di bohi ni Jesus. 4:7 Tapi hami paoban-oban do arta partondion na jeges i di bagasan dirinami na so mararga on, i ma na nibaen sian tano. Jadi muda songon i, torang ma anggo hagodangan ni kuaso i marguru di Debata do, nada marguru di hami. 4:8 Sian sasudena do marrongoman angka na pasusahon i, hape laing inda tarhapit hami. Sompit do hami hilala, hape inda jabat mandele hami. 4:9 Bahat na mangkosomi hami, hape inda jungada tarpunjung hami. Jana haru pe jotjot hami nibalbalan, tapi nada mate hami. 4:10 Sai tongtong do hami oban hamatean ni Jesus di pamatang nami anso tangkas muse hangoluan ni Jesus di pamatang nami. 4:11 Salolot mangolu hami, sai tongtong do mangondam hamatean i tu hami hara ni Jesus, anso tarpataridahon muse ngolu ni Jesus di pamatangnami na ra mate on. 4:12 Jadi sian i, anggo hamatean i hape laing na manggogo do mambaen dalanna di bagasan dirinami, hape anggo di hamu hangoluan do na manggogo. 4:13 Adong do tarsurat songon on, "Porsaya au, gabe hara ni i do mangkobari au." Jadi, hara ni haporsayaan na songon i do mandok hata hami, angke porsaya do hami antong. 4:14 Pos do rohanami di Debata na pangoluhon Tuhan Jesus mangulahi, laing pangoluonNia muse do hami dohot Jesus, jana obanonNia hamu rap dohot hami tu joloNia. 4:15 Mardomu tu na hasaya di hamu do sudena i. Angke muda mur bahat halak mandai holong ni roha ni Debata, mur bahat muse do tangiang tarimakasi na nipasahat tu Debata; jadi muda songon i, marsangap ma Debata. 4:16 Hara ni i ma umbaen na so mandele hami. Haru pe mur sego hajolmaonnami parduru on, tapi anggo hajolmaon parbagasan i mur dipaimbaru do sian ari tu ari. 4:17 Jana anggo hasusaan na so sadia on na hami taon santongkin, lehenon ni i do di hami hasangapan na so tarsuhat jana na manongtong. Dao dope gumodang hasangapan i sugari nipartimbangkon tu hasusaan i sandiri. 4:18 Angke anggo rohanami, tu angka pangalaho na so tarida do hami tujuhon, nada tu angka na tarida. Anggo na tarida, hum santongkin do i tahan, tapi anggo na so tarida i manongtong do i salolot-lolotna.
5:1 Angke hita boto do, muda dibungkar bandar na taingani na saonnari, i ma pamatang na sian tano on, adong do di hita sada bagas na sian Debata, na so dipature ni tangan ni jolma, na salolot ni lolotna di banua ginjang. 5:2 Holsoan do hita anggo di bagasan bandarta na saonnari on, hara ni lungun ni rohanta tu bagasta na sian banua ginjang i anso dipapakehon ma i tu hita. 5:3 Harana muda marpamatang na imbaru do hita, nada tardapot hita di na so marpamatang. 5:4 Salolot di bandar on hita maringanan, sai holsoan do hita hara ni dokdok ni pananggunganta. Nada hara ni na por rohanta malua sian pamatangta na sian tano on, tapi hara ni na lungun do rohanta laho manyolukkon pamatang na sian banua ginjang i tu na parjolo i anso dibondut hangoluan i pamatangta na ra mate on. 5:5 Debata sandiri do na pasingkopkon hita tusi jana dilehen Ia do TondiNia tu hita gabe jaminanna. 5:6 Gabe pos do tongtong rohanami hara ni i. Hami boto do, salolot di bagasan pamatangta on hita tinggal, laing di duru ni bagas ni Tuhan dope hita. 5:7 Harana anggo ngolunta marojahan di haporsayaan do, nada marojahan tu na tarida, 5:8 hara ni i do umbaen na sobar rohanami. Jopan do rohanami sugari malua nian sian bagasan pamatang on, anso tarbaen hami sainganan dohot Tuhan. 5:9 Hara ni i manggogo ma hami parayakkon hasonangan ni rohaNia, sanga dompak di bagasnami on dope hami, sanga pe dung lalu di sadu. 5:10 Harana angkon jongjong do hita sude di jolo ni panguhuman ni Kristus i, jana ganop be angkon manjagit balos satontang tu pambaenanna be taran mangolu, pangalaho na denggan sanga na jat. 5:11 Hami boto do tangkas, sanga songon dia na nidok mangkabiari Debata; i do umbaen na manggogo hami papos roha ni halak na asing. Tangkas sajo do hami ditanda Debata, jana pos muse do rohangku torang muse au di bagasan rohamunu. 5:12 Jadi dison nada na dipangido rohanami anso pujionmunu hami. Hum na mangalehen alasan na denggan do hami tu hamu anso godang rohamunu hara ni hami, anso diboto hamu sanga na bia laho mangalusi halak na sai pajolohon angka pangalaho na tarida sian balian hape nada pajolohon angka na adong di bagasan roha. 5:13 Muda songon na hurang roha ma hami tutu idaon, hara ni haporluan ni Debata do i. Jana muda torang do rohanami idaon, mardomu tu haporluanmunu ma i. 5:14 Holong ni roha ni Kristus do na mangarajai hami. Jana hami boto do: Muda mate sada halak humopkop halak sudena, paboa na dung mate do sudena halahi. 5:15 Mangkopkop sasudena jolma do mate Kristus, anso ulang tu dirina be mangolu angka jolma i, tapi tu Kristus noma, na dung mate jana na nipangolu i mangulahi hara ni haporluan ni halahi. 5:16 Jadi hara ni i, nada marguru tu parsuhatan ni jolma be hami manimbang halak. Najolo jungada do hami parsuhatkon parsuhatan ni jolma tu Kristus, tapi anggo saonnari nada be. 5:17 Sanga ise na dung marsada dohot Kristus, madung gabe na nitompa na imbaru. Madung salpu na honok i -- madung gabe imbaru sasudena. 5:18 Debata do mambaen i sude, anso mardenggan hita dohot Debata markite-hite Kristus. Dung i disuru Ia muse ma hita palaluhon Jamita Na Denggan i anso laing dohot muse halak na asing mardenggan dohot diriNa. 5:19 Markite-hite Kristus dibaen Debata *MARKITE-HITE KRISTUS ... DOHOT DEBATA: Sanga: Debata dibagasan Kristus mambaen jolma gabe mardenggan muse dohot DiriNa.* do lopus mardenggan nian jolma na satano on dohot Debata. Nada dijujur Debata be angka hasalaan na nibaen ni jolma i tuSia, jana hami madung disuru Debata pabolkaskon barita pardengganan i. 5:20 Partonaan ni Kristus do hami. Mandok hata pe hami tu hamu, songon na Debata sandiri do na mangkobari tu hamu. Mangasahon goar ni Kristus gomos ma hami pangido tu hamu, sai ra ma hamu dipadenggan dohot Debata. 5:21 Nada mardosa Kristus i, hape gabe dosa do Ia dibaen Debata jana dipaporsankon do tuSia dosanta i, anso tajagit hatigoran ni Debata hara ni hasadaonta dohot Kristus i.
6:1 Tapi songon dongan saparkarejoan do hami podai hamu, gomos ma hami pangido tu hamu, ulang ma parsayang hamu hadengganan ni roha ni Debata i. 6:2 Didok Debata do di Buku Na Badia i, "Di hatiha na nipatumbuk, madung Hutangihon pio-piomu, jana di ari haluaan madung Huurupi ho." Tangkas ingot hamu! Saonnari ma hatiha na nipatumbuk i. Saonnari ma arina, ari haluaan. 6:3 Nada jungada hami baen batu partuktuhan tu sanga ise pe, anso ulang targora tohonannami i. 6:4 Tapi di bagasan sasudena pangalahonami, hami patuduhon do na tutu do hami pangoloi ni Debata. Sude hasusaan na marragam rupa, sobar do hami manaonkon i: 6:5 hona loncing do hami, dihurung dohot didege halak; loja hami markarejo, jotjot inda modom jana inda adong sipanganon. 6:6 Hami patuduhon do na tutu hami pangoloi ni Debata di habuluson ni rohanami, di parbinotoan di hasobaron dohot di denggan ni rohanami. Di bagasan Tondi Parbadia dohot sian holong ni roha na ias, 6:7 di na manjamitahon jamita na sintong dohot kuaso ni Debata, markite-hite sinjata hatigoran i do hami mangaroro sanga martahan. 6:8 Diparsangapi halak do hami, tapi laing adong do na palayas-layaskon; dipuji do hami tapi laing adong na pabilehon. Haru tigor pe hami, laing didok do hami pargabus. 6:9 Halak na so ditanda do hami ninna, hape sude do halak mananda hami. Na dung mate do hami ning roha ni halak, hape laing mangolu do satutuna. Haru pe hona loncing hami, hape nada jabat mate. 6:10 Haru pe dipaarsak rohanami, hape sai marjop ni roha do hami. Anggo idaon pogos do hami, hape bahat do halak gabe maradong hami baen. Anggo idaon na so adong do sanga na ahanami, tapi anggo satutuna sasudena do adong di hami. 6:11 Hamu ale dongan, na nihaholongan na di Korintus! Madung situlduk mata ni horbo hami tu hamu. Madung hami pajojor sudena na adong di bagasan rohanami. 6:12 Talak do andoranami maradopkon hamu, tapi hum hamu do na pasompit rohamunu maradopkon hami. 6:13 Saonnari anso marsibalosan hita, songon na tu anakku ma hatangkon, buka hamu ma rohamunu maradopkon hami. 6:14 Ulang ma hamu rap sapasangan dohot angka halak na so porsaya. Dia ma he tarbaen marsada hatigoran dohot hageduhan, sanga dia ma lakna pardonganan ni hatorangan dohot hagolapan? 6:15 Nada tarbaen saroha Kristus dohot Sibolis. Sarupa ma he sada halak na porsaya dohot sada halak na so porsaya? 6:16 Aha ma he pardomuan ni Bagas Ni Debata dohot bagas ni gana-ganaan? Bagas Ni Debata na mangolu i do hita on, Debata sandiri pe didok Ia do, "Maringanan ma Au di tonga-tonga ni halahi, jana mangolu rap dohot halahi. Au ma gabe Debata ni halahi, jana gabe bangsongKu ma halahi. 6:17 Hara ni i, morot ma hamu sian angka halak na so mananda Debata i, jana marsirang ma hamu sian halahi. Sandok, ulang ma marpardomuan hamu tu na hodar, dung i jagitonKu ma hamu. 6:18 Au ma gabe Ama di hamu, jana gabe anak dohot boru ma hamu di Au, ninna Tuhan Na Markuaso i."
7:1 Antong hamu ale dongan na nihaholongan! Tu hita do dibaen angka janji i sudena. Tapaias ma dirinta sian sasude na pahodarkon pamatang dohot rohanta. Tahabiari ma Debata, anso sanggam tarbaen hita mangolu mamunjung tu Debata. 7:2 Jagit hamu ma hami denggan mangulahi di bagasan rohamunu. Sanga na tu ise pe nada adong salanami, jana nada adong halak na rugi hami baen. Sanga sian ise pe nada jungada mambuat untung hami. 7:3 Hudok pe songon i, nada na giot pasalahon hamu au. Angke songon na hudok nabaruon, solkot sajo do hamu anggo di rohanami, jana dongan sahangoluan sahamatean do rohangku maradopkon hamu! 7:4 Pos situtu do rohangku di hamu. Moga situtu do pangkilalaanku hara ni hamu. Haru pe bahat hasusaan hami taon, tarapul situtu do rohangku hara ni hamu. Jop sajo do rohangku! 7:5 Di na lalu pe hami tu Makedonia, laing so marnamantak do hasusaan sian hami. Dihaliangi hasusaan do hami; parsalisian sian pihak na asing dohot biar ni roha sian hami sandiri. 7:6 Tapi tuani ma, sai dipagodang Debata do roha ni halak na menek roha; dipatogar Ia do rohanami markite-hite haroro ni si Titus. 7:7 Nada hum hara ni haroro ni si Titus umbaen na tarapul rohanami, tapi dohot do hara ni boa-boania na tarapul ia sandiri hara ni hamu. Pandoknia tu hami: Na lungun sajo do rohamunu marsuo dohot au; na manyosal situtu rohamunu jana saonnari sian sonang ni rohamunu giot urupanmunu ma au. Angka i ma na mambaen mur tamba jop ni rohangku. 7:8 Haru pe gabe marsak hamu hara ni suratki, nada manyosal au na hubaen i surat i. Tutu nian songon na manyosal do au dung huida gabe marsak hamu -- haru pe nian hum parsantongkinan arsak ni rohamunu i. 7:9 Tapi anggo saonnari jop do rohangku nada hara ni na gabe marsak i hamu, tapi hara ni na dung muba do pangalahomunu hara ni arsak ni rohamunu i. Denggan do tutu di Debata arsak ni rohamunu na songon i. Jadi, nada rugi hamu hami baen. 7:10 Angke anggo hamarsahan na tumbuk tu roha ni Debata do, parohon haubaan ni roha na paluahon do i. Jana nada manyosal halak sisongon i. Tapi anggo hamamarsak na sian tano on, arsak na mamatehon do i. 7:11 Ligi hamu ma jolo antong sanga aha do na ro sian hamamarsak na sian Debata i! Gabe diparayak hamu ma laho padenggankon na gaor. I ma suhana! Gabe magigi hamu mida dosa, gabe mabiar hamu, malungun hamu, gabe marsitutu, gabe ra hamu manguhum na sala! Di bagasan sudena parsoalan on madung dipatuduhon hamu na so marsala hamu. 7:12 Jadi haru pe madung hubaen surat i tu hamu, nada hara ni halak na sala i nibaen surat i. Nada muse hara ni angka na dung marnyae dibaen hasalaan i. Hubaen pe surat i anso diboto hamu sandiri do di jolo ni Debata sanga na bia tangkasna diparrohahon hamu hami. 7:13 I do mambaen gabe tarapul rohanami. Jana nada hum tarapul, mur jop dope rohanami marnida jop ni roha ni si Titus; madung diapoi hamu sudena ia. 7:14 Hupuji-puji hian do hamu tusia, tuani ma inda pola dipaila hamu au. Tutu do sude na dung hami paboa i tu hamu. Songon i muse sanga na aha na hami puji-puji i hamu tu si Titus, hape tutu muse do. 7:15 Gabe mur tamba do holong ni rohania tu hamu, angke sai diingot ia do sanga na tarbia pangoloimunu sudena di panogu-noguonnia jana sanga na tarbia panjagitmunu disia mardongan biar dohot hitir. 7:16 I noma jop ni rohangku, hara ni na dung tutu pos rohangku di hamu.
8:1 Hamu ale angka dongan! Giotnami nian, laing porlu do botoonmunu sanga na bia asi ni roha ni Debata maradopkon angka parlagutan na di Makedonia. 8:2 Na dung hona uji do halahi di angka hasusaan na borat situtu. Tapi di tonga-tonga ni hasusaan i pe laing marjop ni roha do halahi jana miduk do silehen-lehen ni halahi laho mangurupi halak na asing, haru pogos sajo pe halahi, tapi na mora do halahi di asi ni roha. 8:3 Huida sandiri do dipasahat halahi intap na adong, deba lobi sian i dope tehe. Indangkon pola adong na marsuru, 8:4 gomos do dipangido jana dinungnungi halahi hami, anso dohot halahi mangalehen silehen-lehen tu angka dongan sahaporsayaan. 8:5 Dilehen halahi pe i, nada hara ni na hami hirim i sian halahi, tapi hara ni na jolo dipasahat halahi do dirina tu Tuhan, dung i tu hami muse, angke i do jop ni roha ni Debata. 8:6 Hara ni i do umbaen na gomos hami sosoi si Titus -- anso laing didatdati ia karejo na denggan i di tonga-tongamunu, songon na dung dipungkana hian. 8:7 Burju do hamu di sude pangalaho. Denggan do hamu di na mangkaporsayai, di na paboahon pandapot, di parbinotoan, di ragam-ragam ni karejo, dohot di bagasan holong ni rohamunu maradopkon hami. *HOLONG NI ROHAMUNU MARADOPKON HAMI: Dipiga-piga-piga naskah narobi didok: Holong nami maradopkon hamunu.* Jadi hara ni i, angkon laing umburju muse ma hamu nian di karejo na denggan on. 8:8 Nada songon parenta husosohon i tu hamu. Tapi na patuduhon haburjuon ni angka dongan na asing do mangalehen sumbangan laho mangurupi halak. Au pe giot ujionku do sanga na intap ni dia holong ni rohamunu. 8:9 Angke tangkas do diboto hamu, holong situtu do roha ni Jesus Kristus Tuhanta i maradopkon hita. Na mora do Ia nian, tapi gabe marpogos do Ia hara ni hamu, anso mamora hamu hara ni hapogosonNia i. 8:10 Anggo pandapotku, madung sapatutna hamu pasidungkon sanga aha tohap na nipungkamunu di taon na salpu i. Harana hamu sandiri do mamungka tohap i. Jana pikiran laho mambaen karejo na songon i pe sian hamu do haroro ni i. 8:11 Tapi anggo saonnari patulus hamu ma parkarejoan i anso songon jop ni rohamunu mangoloi dompak i, laing songon i ma lehen hamu saonnari intap ni na adong di hamu. 8:12 Muda ringgas do rohamunu marsilehen-lehen, jagiton ni Debata do silehen-lehenmunu i marguru tu sinadonganmunu, nada marguru tu na soadamunu. 8:13 Tapi nada hudok songon i anso sonang halak na asing jana anso markancit hamu. Angkon dos do sude. 8:14 Tapi hara ni na tuk do di hamu saonnari jadi patut do hamu paudutkon hahurangan ni halahi. Muda markahurangan hamu bagi andigan, hape di halahi hatiha tuk, tontu halahi ma mangurupi hamu. Jadi rap marsiolo-oloan ma dua-duana. 8:15 Di Buku Na Badia i tarsurat do, "Sanga na ise na bahat pangomoanna, nada marlobi-lobi, jana halak na otik pangomoanna, nada marhahurangan." 8:16 Tarimakasi do hami dok tu Debata hara ni na dung mangalehen ringgas ni roha tu si Titus gabe songon hami laho mangurupi hamu! 8:17 Angke nada hum pangidoannami na nioloan ni si Titus, tapi songon i ma ringgasnia laho mangurupi hamu, jabat sian giotnia sandiri diputuskon ia kehe manopot hamu. 8:18 Laing hami suru do rap dohot si Titus sahalak donganta na tarpuji di sude parlagutan i hara ni parkarejoanna manjamitahon Jamita Na Denggan i na sian Debata. 8:19 Tamba ni i muse, madung dohot donganta i dipili jana diputuskon angka parlagutan i laho mandongani hami di angka pardalanannami. Harana giot mardalani do hami laho pasahatkon sumbangan i, anso marsangap Tuhan i jana anso diida hamu na rade do hami laho mangurupi. 8:20 Hami jagohon do anso ulang adong halak na manyalahon hami mardomu tu na pasahat sumbangan na sabahat on. 8:21 Angkon tigor do hami markarejo, nada hum di jolo ni Tuhan, tapi dohot do di jolo ni jolma. 8:22 Laing hami suruhon do sahalak donganta na asing rap dohot si Titus donganta i. Madung jotjot ia hami uji jana tongtong do sai ra ia mangurupi. Tarlobi-lobi saonnari, ringgas do rohania laho mangurupi hamu hara ni godang ni arop ni rohania di hamu. 8:23 Anggo taringot tu si Titus, ale-alengku do i, donganku saparkarejoan laho mangurupi hamu. Jana taringot tu angka dongan na asing i na rap kehe dohot ia, angka utusan ni parlagutan i do halahi -- gabe sada puji-pujian di Kristus i. 8:24 On pe patidahon hamu ma holong ni rohamunu maradopkon halahi jana sanga aha na hami taringoti gabe pujian salaho tu hamu, sai tutu ma nian songon i.
9:1 Anggo salaho tu bantuan na nitongos i tu angka dongan sahaporsayaan, indangkon pola be mambaen surat au tu hamu. 9:2 Angke huboto do na ringgas hamu mangurupi jana hupuji do hamu tu angka dongan na di Makedonia. Hudok do tu halahi, na dung singkop hamu di Akaya on laho mangalehen pangurupion mamungka sian taon na salpu i. Hara ni situtu ni rohamunu i, madung gabe marsitutu muse bahatan sian halahi. 9:3 Saonnari husuru muse do si Titus dohot dongannia dua halak manopot hamu, anso ulang hum hata-hata sajo pamujinami i taringot tu hamu. Jadi, hobasi hamu hian ma, harana ma hudok tu halahi paboa na dung singkop dibaen hamu sude. 9:4 Harana betak na adong do halak Makedonia rap dohot au sanolion muda ro au mandapotkon hamu. Jadi anggo pola do tardapot halahi hamu laing nada singkop, na pailahon noma i tu hami. Harana ma sanga hami dok, na pos do rohanami tu hamu! Hamu pe tontu gabe maila ma. 9:5 I ma umbaen na porlu huhilala marsuru angka donganta on mandapotkon hamu parjolo laho paturehon angka pangurupion na nijanjihonmunu i. Jadi muda ro au sanoli on, madung singkop nian sude silehen-lehenmunu i. Jadi tarida ma na sian burju ni rohamunu do na mangalehen i, nada hara ni na tarpaksa. 9:6 Timbang hamu ma jolo! Anggo halak na manyuan same saotik, otik muse do suha ni i buatonna. Tapi anggo halak na manyuan bahat same, laing bahat ma muse buatonna suha sian i. 9:7 Angkon marguru tu na nionjar ni rohana be ma mangalehen. Ulang pola hara ni na alang-alangan sanga hara ni na tarpaksa, angke dihaholongi Debata do sanga ise na mangalehen sian jop ni roha. 9:8 Bisa do Debata mangalehen pasupasu mardapot-dapot tu hamu, anso laing singkop sibaenonmunu; marlobian dope tehe tarbaen hamu mangkarejohon na denggan. 9:9 Adong do tarsurat, "Dibagi-bagi Ia do, dilehen Ia tu angka na pogos; hatigoranNia manongtong ro di salolot ni lolotna." 9:10 Debata do na pasingkop same di si panyabur dohot roti sipanganon. Laing Ia muse do na pabahatkon suha ni suan-suananmunu, parbatu ni hatigoranmunu. 9:11 Dipamora do hamu taringot tu sudena i gabe basa ma hamu marsilehen-lehen, anso patubuhon hatarimakasion ni halak tu Debata hara ni angka silehen-lehenmunu i markite-hite hami. 9:12 Harana nada hum na manggohi hahurangan ni angka dongan sahaporsayaan sajo be pambaenanmunu na denggan i, tapi gabe mandok bahat tarimakasi ma halak tu Debata hara ni i. 9:13 Hara ni hadengganan na dipataridahonmunu, gabe bahat halak pasangapkon Debata, angke diida halahi ma antong burju ni rohamunu maradopkon Jamita Na Denggan i na patorangkon Jesus Kristus na niihutkonmunu i. Mardomu muse hara ni habasaonmunu laho mambagi-bagihon sanga aha na adongmunu tu halahi bope tu sude halak na asing. 9:14 Halahi pe dioban do hamu di tangiangna, jana lungun do rohana di hamu hara ni na marningot asi ni roha na sumurung na sian Debata tu hamu. 9:15 Sai mandok tarimakasi ma hita tu Debata hara ni silehen-lehenNia na so tarsuhat i!
10:1 Saonnari, au si Paulus, hupaingot ma hamu markite-hite lambok ni roha dohot habasaron ni Kristus. Anggo ninna halak na parbiar do au di tonga-tongamunu taran marsuo bohi tu bohi, tapi puluk do au muda dao sian hamu. Antong, hara ni halambohon bope hadengganan ni roha ni Kristus, 10:2 gomos hupangido tu hamu, ulang pola baen hamu parbonciran anso karas au maradopkon hamu muda ro au sanoli on. Angkon pir do baenonku hata anggo tu angka na mandok, anggo hami hum na manjalak-jalahi na di portibi on sajo do karejonami. 10:3 Tutu nian laing di portibi on dope hami maringanan, tapi nada sinjata na nipake ni portibi on hami pake na marjuang i. 10:4 Nada hami pake angka sinjata ni portibi on di bagasan paraloannami tapi angka sinjata ni Debata na markuaso i do. Sinjata i do hami baen manaluhon angka partahanan ni jolma. Hami alusi do sude angka parsoalan 10:5 jana hami parrumpakkon do angka benteng haginjangon ni roha na nipajongjong laho mangalo na tutu salaho tu Debata. Hami tangkupi do roha ni angka halak jana hami baen halahi unduk mangoloi Kristus. 10:6 Jana muda dung patu hamu sian sandok roha, madung singkop hami laho manguhumi sude halak na so unduk dope. 10:7 Angkon botoonmunu sugari pangalaho na satutuna. Muda dihaposi roha ni sada halak do nampuna ni Kristus ia, dipareso ia ma mangulahi dirinia jana diboto ia ma, hami pe laing nampuna ni Kristus do songon ia. 10:8 Nada pola ila rohangku muda jotjot pe hupaboa-boa kuaso na nilehen ni Tuhan di hami, harana na giot mambangun hamu do i umbaen na dilehen, nada na giot manyegohon. 10:9 Nada por rohangku, laho mambiar-biari hamu di angka suratku. 10:10 Dokkonon ni halahi ma, "Pir jana marsahala do angka surat ni si Paulus i, hape muda hatiha di tonga-tonganta, gale-gale do ia idaon jana hatania pe so binoto sanga aha astuanna!" 10:11 Anggo angka halak sisongon i angkon botoonna ma, muda ro hami saulahon, angkon songon na hami dok di angka suratnami i do baenonnami tu halahi. 10:12 Harana nada puluk hami patudoskon sanga mambaen dirinami sarupa dohot angka halak na mangetong dirina halak na godang. Na oto do halak na mambaen ukuranna sandiri jana na mangukur dirina sandiri mangihutkon ukuran i. 10:13 Anggo hami nada songon i. Muda pe manggodang diri hami, nada jabat manyalpui ukurannami. Intap ni batas-batas ni karejo na nitontuhon ni Debata do hami ingani. Hamu pe tarmasuk di batas-batas i do. 10:14 Jadi, haru hami dapotkon pe hamu laho maroban Jamita Na Denggan taringot tu Kristus tu hamu, nada hami salpui dope batas ni karejonami disi, angke laing di bagasan batas i dope hamu. 10:15 Astuanna na hami dok disi, nada pagodang diri hami hara ni karejo ni halak na asing na di ruar ni batas na nitontuhon ni Debata di hami. Tapi sai mur martamba ma haporsayaanmunu, anso mur bidang tohap sikarejohonnami di tonga-tongamunu, haru pe laing tong dope di bagasan batas na nitontuhon ni Debata tu hami. 10:16 Jadi laing tarjamitahon hami muse ma Jamita Na Denggan i di angka luat na asing so pola pagodang diri hara ni karejo na dung nikarejohon di inganan parkarejoan ni dongan na asing. 10:17 Di Buku Na Badia i tarsurat do, "Sanga ise na giot manggodang hara ni bagi aha, manggodang ma dibagasan Tuhan i. Tapi barang ise na marmoga, di bagasan Tuhan i ma ia marmoga." 10:18 Dibaen nada haposan dope na mamuji dirina, tapi na nipuji ni Tuhan i do.
11:1 Sugari ra ma hamu sobar di hatoonku na saotik i, arop do rohangku hasobarkononmunu au. 11:2 Malungun do au di hamu, songon dihalungunkon Debata sandiri hamu. Tarsongon bujing-bujing na ias dope hamu, na hupatunangkon tu sada bayo, i ma Kristus. 11:3 Tapi songon na ganggu do rohangku, betak na hona goda do hamu jana nada setia be hamu tu Kristus, sarupa dohot si Hawa narobi na hona goda dibaen habisuhon ni ulok i. 11:4 Harana sai jop do rohamunu manjagit sanga ise na ro mandapotkon hamu jana mangajarkon Jesus na asing -- nada Jesus na hami ajarkon i tu hamu. Jana dijagiti hamu do "Tondi" dohot "Jamita Na Denggan" na tangkas sajo marasing sian Tondi Parbadia dohot sian Jamita Na Denggan na dung nijagitmunu sian hami. 11:5 Nada bagi na tumoruk au huhilala martimbangkon "angka rasulmunu" na luar biasa i! 11:6 Betak na oto pe au mandok hata, tapi anggo taringot tu parbinotoan taringot tu Debata do nada halak na oto au. Hami pataridahon do sudena i tu hamu di sude pangalaho. 11:7 Na mardosa ma he au di na hupatutoru diringku laho patuginjangkon hamu, hara ni na hujamitahon Jamita Na Denggan na sian Debata di hamu songon sada silehen-lehen? 11:8 Jadi huhorus do parlagutan na asing jana hurugii baen balanjongku anso markarejo au di hamu! 11:9 Haru hurangan pe au di hatiha i, nada adong sanga ise pe sian hamu na gabe susa hubaen. Sanga aha na porlu di au, angka dongan na sian Makedonia do pasingkopkon. Tongtong do hujago sadenggan-dengganna anso ulang jabat hususai sanga ise pe sian hamu sanga na bia pe pangalahona jana sai hujagohon do anso laing tongtong songon i. 11:10 Nada haantahan be anggo godang ni rohangkon sanga di dia pe di Akaya, angke pangajaran na tutu na sian Kristus i do na hutiop. 11:11 Biasi hudok songon i? Adong he ulaning na so holong rohangku mida hamu? Debata ma na umboto holong ni rohangku! 11:12 Sanga aha na hukarejohon saonnari, pupuonku do mambaen i, lopus inda tarbaen "angka rasul" na asing i be pagodang diri bope mandok na sarupa karejonami dohot halahi. 11:13 Angka rasul na so tutu do i. Angka parkarejo na paoto-oto halak do i na pasuman-sumankon songon rasul ni Kristus. 11:14 Inda pola homang roha mida pambaenan na songon i, angke haru Sibolis i pe dipasuman-suman halahi do surusuruan ni hatorangan i! 11:15 Jadi nada pola homang be roha muda dipasuman-suman angka pangoloi ni Sibolis i songon angka pangoloi na mambaen hatigoran. Anggo ujungna jagiton ni halahi do na hombar tu sude pangalaho ni halahi. 11:16 Hudok saulak nari: Ulang adong sanga ise na jabat marpikir di bagasan rohana mandok na oto au. Tapi muda laing dipikir hamu na oto au, antong anju hamu ma au na oto on muda pagodang diri au saotik. 11:17 Jadi saonnari paboaonku ma pamujionku di diringku, tapi nada na nisuru ni Tuhan i au mandok i. Songon jolma na oto do au na mandok on. 11:18 Bahat do nian halak na pagodang diri hara ni angka pangalaho na di tano on, jadi au pe por do rohangku mamuji diringku saotik. 11:19 Sobar do hamu paalo-alo halak na oto, hara ni malomunu dihilala hamu! 11:20 Muda diparhatoban halak hamu, sanga muda dipaksa halak jana dibuat untung sian hamu, jana sai gumincat dirina dihilala sian hamu, jana ra manampeleng hamu, sobar do hamu disi. 11:21 Songon na ila do rohangku mandok na magaletu hami laho mambaen songon i. Tapi muda adong halak na puluk pagodang diri, au pe puluk do mambaen songon i. (Songon halak na oto do au mandok on.) 11:22 Adong he halak Ibrani halahi? Au pe halak Ibrani do. Adong he halak Israel halahi? Au pe halak Israel do. Adong he pomparan ni si Abraham halahi? Au pe songon i do! 11:23 Angka naposo ni Kristus dehe halahi? Aropku songon halak na dung lalaen do au, tapi hape dao dumenggan dope au songon pangoloi ulang pado halahi sudena! Marsitutuan dope au karejo, jumotjot dope au tarhurung ulang halahi, umbahat dope parkancitan na hutaon jana jotjot do au giot mate. 11:24 Mapola lima noli au diparhanciti halak Jahudi, dohot sambok-sambok tolu pulu sambilan noli. 11:25 Tolu noli au diloncingi halak Rom; jungada muse dope au didangguri dohot batu. Tolu noli hubolus parmaraan di na harom kapalnami di laut, jana sanoli mayup-ayup au di laut dua pulu opat jom honokna. 11:26 Jotjot do au mamolus pardalanan na gok parmaraan: aek magodang, mangadopi panyamun, parmaraan sian halak Jahudi dohot sian na so Jahudi, parmaraan di kota, parmaraan di halongonan, di laut dohot parmaraan sian halak na mandok dirina Kristen hape inda. 11:27 Mapukpuk holi-holingku, songon na so jungada mida ari na torang na markarejo i, jotjot mangkar mata au, na so mangan na so minum, huhul marpuaso do au, ngalian hara ni na hurang pakean jana nada adong bagas inganan. 11:28 Tamba ni i sudena, sai huarsakkon do ganop ari sude angka na masa di parlagutan i. 11:29 Muda adong na gale, nada he gabe dohot do au gale? Muda adong na madabu tu dosa, nada he magopu do ate-atengku? 11:30 Muda angkon pagodang diri au, hara ni hagaleanku noma pagodang diri au. 11:31 Debata, i ma Ama ni Tuhanta Jesus Kristus, na tarpuji ro di salolot ni lolotna do na umboto na so margabus au. 11:32 Dompak di Damaskus au, adong do sada halak gubernur di kota i na mamarenta di toru ni kuaso ni Raja Aretas. Disuru ia ma angka tentara manjago kota i laho manangkup au. 11:33 Tapi ditantan ma au tu toru di bagasan sada karanjang sian lubang-lubang na di dinding i. Songon i ma umbaen na malua au sian i.
12:1 Angkon manggodang do au, haru pe sudena i nada marguna, tapi giot palaluonku do parnidaan dohot halumbaan na hujagit sian Tuhan. 12:2 Hutanda do sada halak Kristen na niangkat tu banua ginjang tingkat patoluhon, opat bolas taon na salpu. (Nada huboto tangkasna sanga na tutu pamatangna i diangkat, sanga na hum parnidaan sajo i -- Debata ma na umbotosa.) 12:3 Huboto do taringot tusia, tapi nada huboto sanga na pamatangna i do diangkat betak na hum parnidaan sajo do i, Debata ma na umbotosa. 12:4 Huboto do basa dipatuginjang ia lopus tu Pirdaus, jana dibege ia ma hata na so tarpajojor, na so tola hatahonon ni jolma. 12:5 I ma halakna na giot pujionki, nada au sandiri. Anggo au do, hum angka pangalaho na paboa-boahon hagaleanku ma na hupuji diringku. 12:6 Sugari ra au mamuji diringku, nada songon parkata-hata na rumar au; na tutu do dohononku. Tapi huorom do diringku, angke nada por rohangku, anso unang adong halak na mamparetongkon tu au lobi sian na niidana hubaen sanga na dung dibege ia hudok. 12:7 Tapi ulang maginjangtu rohangku hara ni angka parnidaan na luar biasa i, gabe dilehen do saragam nyae di pamatangku na gabe songon parkokas ni Sibolis. Gabe manyonggot rohangku do nyae i, anso ulang ginjang do rohangku umbaen na dilehen i. 12:8 Tolu noli ma hutangiangkon tu Tuhan taringot tusi. Hupangido, sugari dibuat ma nyae i sian pamatangku. 12:9 Hape dialusi Tuhan ma, "Tuk ma asi ni rohangKu mida ho, harana di bagasan hagaleon do kuasongKu gabe singkop." Hara ni i ma umbaen na sai por rohangku mamuji hagaleanku, angke muda gale au, topet ma disi huhilala diondihon hagogoan ni Kristus au. 12:10 Jadi gabe jop do rohangku hara ni angka hagaleanki. Jop do rohangku muda adong na mangalayasi au, muda taruli hasusaan, muda dipakojar-kojar halak au, bope muda hubolus hasusaan hara ni Kristus. Angke muda gale au, hape apala disi ma gabe margogo au. 12:11 Satutuna, ma gabe songon halak na oto au hubaen, tapi hamu do mambaen au gabe songon i. Sapatutna angkon hamu do nian mamuji au. Angke haru songon jolma na so mararti pe au, nada bagi talu au maradopkon "angka rasulmunu" na luar biasa i! 12:12 Sasudena na pataridahon paboa au do rasul na tutu, madung dikarejohon di tonga-tongamunu di bagasan hasobaron ni roha markite-hite tanda hahomangan dohot kuaso. 12:13 Taringot tu aha ma he na hurang nipardulihon hamu, muda nipartimbangkon tu angka parlagutan na asing, asing ni sasada on, i ma bahaso au sandiri nada gabe boban tu hamunu. Anju hamu ma au di hasalaanki! 12:14 Saonnari, patolu noli on ma rade au laho manopot hamu. Jana nada pola susaanku hamu, angke nada sinadonganmunu i na giot di au, tapi dirimunu i do. Harana nada tama muda dakdanakna manjalahi ngolu ni simatobangna, tapi simatobangna do manjalahi balanjo ni angka dakdanakna. 12:15 Jadi hara ni i sudena, sian jop ni rohangku ra do au mangalehen sasudena hara ni hamu, haru diringku sandiri pe ra do au pasahatkon i tu hamu. Muda songon i ma holong ni rohangku tu hamu, tama dope he laing hurang holong ni rohamunu mida au? 12:16 Antong padiar hamu ma songon i, indangkon pola jungada hususai hamu. Hape laing adong muse do na mandok, na mangakal-akali au, bahaso na umbahat untung dapot au sian hamu hara ni dalan na mangakal-akal i. 12:17 Adong he dapotan untung au sian hamu lakna markite-hite angka halak na husuru i mandapotkon hamu? 12:18 Madung husuru si Titus manopot hamu, jana husuru muse do dongan Kristen na deba nari kehe rap dohot ia. Adong dehe untung dibuat si Titus sian hamu lakna? Hape rap markarejo do au dohot ia, sarupa do rohanami, pambaenannami pe sarupa do! 12:19 Betak na dipikir rohamunu do na laho mangabarahon dirinami sandiri hami maradopkon hamu sahonokna on. Di adopan ni Debata dohot Kristus hami dokkon ma: Sasudena i dikarejohon laho patoguhon haporsayaanmunu. 12:20 Sak do rohangku, muda ro au mandapotkon hamu saulahon, nada songon na nipangido ni rohangki dapotonku hamu, jana hamu pe nada songon na nipangido ni rohamunu i dapotonmunu au. Ulang so adong pe na marbadai, marsibunuan, na milas rohana, na marsipalua dirina, marsitilakoan, na pamilas-milas roha ni donganna, na ginjang roha, jana tarjadi hagaoran. 12:21 Songon na biar do rohangku, betak sai dipatoruk Debata au di jolomunu muda hutopot hamu. Sak muse do rohangku, bahat sian hamu na mardosa hian nabaruon, patangiskon au hara ni na laing so ra muba jana laing so mantak halahi marpangalaho na so ture, na hodar dohot na so tama.
13:1 Patolu-nolihonon ma ro au mandapotkon hamu. Di Buku Na Badia i adong do tarsurat, "Sanga na parkaro aha pe na niaduhon, angkon adong do dua sanga tolu saksi na patorangkon, baru pe anso sah parkaro i." 13:2 Madung hupaingot hian sanga ise di hatiha na salpu na mambaen dosa bope sude angka na asing i, i ma di na padua-nolihon ro au mandapotkon hamu. Saonnari dompak padao-dao au sian hamu, hupaingot hamu mangulahi, muda ro au mangulahi sahalak pe nada adong na so hona uhum sian halahi. 13:3 Anggo disi idaonmunu ma buktina paboa na tutu do mandok hata Kristus markite-hite au. Muda baenon ni Kristus tindakan tu hamu, nada gale-gale baenonNia, tapi patidahononNia ma kuasoNia di tonga-tongamunu. 13:4 Nian anggo dompak na niparsilangkon i Ia, gale do Ia tutu, hape anggo saonnari mangolu do Ia hara ni kuaso ni Debata. Hami pe gale do di bagasan Ia, tapi angkon mangolu do hami rap dohot Ia salaho tu hamu hara ni kuaso ni Debata. 13:5 Uji hamu ma dirimunu sanga na togu do haporsayaanmunu! Tangkasi hamu ma dirimunu sanga na so porsaya hamu di dirimunu paboa na tutu do Jesus Kristus maringanan di bagasan hamu! Harana muda nada songon i nada tahan hamu niuji. 13:6 Sugari angkon botoonmunu ma nian, anggo hami nada halak na so tahan hona uji. 13:7 Hami tangiangkon do tu Debata anso diurupi Ia nian hamu ulang mambaen na jat. Nada na giot paboa-boahon na malo hami mandalankon tugasnami, tapi anso dikarejohon hamu do sanga aha na denggan sibaenonmunu -- haru pe idaon songon na gagal hami, nada pola bia i! 13:8 Angke nada tarbaen hami sanga aha pe na maralo tu hagiot ni Debata. Angkon patulusonnami do hagiotNia. 13:9 Jop do rohanami muda gale hami, jana hamu margogo. Laing hami tangiangkon do anso gabe sanggam hamu nian. 13:10 Jadi hara ni i ma umbaen na hutongos surat on, dompak so lalu dope au di tonga-tongamunu. Jadi muda ro au saulahon, indangkon pola nian hubaen pambaenan na karas mamake kuaso na nilehen ni Tuhan i tu au, harana dilehen pe kuaso i tu au na laho paturehon hamu do, nada na laho manyegohon. 13:11 Ujungna hamu ale angka dongan! Sai marjop ni roha ma hamu jana margogo parayakkon na sanggam. Jagit hamu ma sude sipaingotki. Sai saroha ma hamu jana mardame-dame. Donganan ni Debata parholong jana pardame i ma hamu. 13:12 Marsijalangan ma hamu di bagasan umma na badia. Manongos tabe do tu hamu, sude dongan sahaporsayaan. 13:13 Sai dipasupasu Tuhan Jesus Kristus ma hamu tongtong jana sai dihaholongi Debata ma hamu. Jana sai tongtong ma didongani Tondi Parbadia hamu sudena!
1:1-2 Sian Rasul Paulus, dohot sian sude dongan na rap dohot au, tu angka parlagutan na di Galatia. Gabe rasul pe au, nada hara ni na nibaen ni jolma sanga markite-hite jolma, tapi markite-hite Jesus Kristus dohot Debata Ama na dung pangoluhon Ia mangulahi sian hamatean. 1:3 Asi ni roha ma di hamu dohot hasonangan, sian Debata Amanta dohot sian Tuhan Jesus Kristus, 1:4 na dung mangalehen diriNa hara ni dosanta, laho paluahon hita sian hajahatan saonnari, mangihutkon hagiot ni Debata Amanta i. 1:5 Hamuliaon ma di Debata salolot ni lolotna! Amen. 1:6 Homang do rohangku hara ni hamu! Hara ni haburjuon ni roha ni Kristus *HARA NI HABURJUON NI ROHA NI KRISTUS: Dipiga-piga-piga naskah narobi didok: Hara ni haburjuonNia.* do umbaen na dipio Debata hamu, hape manigor dihudukkon hamu do Debata, gabe kehe hamu mangihutkon 'jamita na denggan,' na asing sian Jamita Na Denggan na sian Debata i. 1:7 Anggo satutuna nada adong "jamita na denggan na asing". Umbaen na hudok pe songon i hara ni na adong do halak marroan parundut pikiranmunu jana na giot mamutar-balikkon Jamita Na Denggan taringot tu Kristus i. 1:8 Sanga ise na manjamitahon 'jamita na denggan' na asing sian Jamita Na Denggan na hami jamitahon i, sai diburai Debata ma i -- haru pe sian hami haroro ni i sanga pe sian sada surusuruan na sian banua ginjang! 1:9 Songon na hudok nabaruon, hudok muse saonnari: Sanga ise na manjamitahon tu hamu 'jamita na denggan' na asing sian Jamita Na Denggan na dung dijagit hamu sian hami, buraan ni Debata ma halakna i. 1:10 Adong he anso jop do roha ni jolma mida au? Dao ma i! Na pajopkon roha ni Debata do na huparayak. Adong he na giot mambuat roha au tu jolma anso jop roha ni halak mida au? Sugari laing hubaen dope antong songon i na so tutu do au naposo ni Kristus. 1:11 Angkon botoonmunu do ale dongan, anggo Jamita Na Denggan na hujamitahon i nada sian jolma haroro ni i. 1:12 Nada sian jolma hujagit jamita i, jana nada adong sahalak pe na mangajarkon i tu au. Jesus Kristus sandiri do na patangkaskon i tu au. 1:13 Tontu dibege hamu hian do taringot tu ngolungku na salpu i dompak di hajahudian au. Diboto hamu do sanga na bia kejamna hubaen tu parlagutan ni Debata, jana bia karasna au laho manyarsarkonsa. 1:14 Anggo taringot tu na mandalankon haporsayaan Jahudi do, husalpui dope sude halak Jahudi na sangoncap dohot au. Marsitutu do au anggo taringot tu angka pangalaho na mardomu tu adat ni angka ompungku. 1:15 Tapi hara ni denggan ni roha ni Debata, dipili Ia do au dompak so sorang jana dipiohon Ia do au laho mangoloi Ia. 1:16 Dipatidahon Debata do AnakNia i tu au jana markite-hite au anso nijamitahon Jamita Na Denggan taringot tu AnakNa i tu halak na so Jahudi. Nada pola mangido tahi au sanga na tu ise disi. 1:17 Nada pola kehe muse au tu Jerusalem mandapotkon angka na dung parjolo rasul ulang au. Tapi tu tano Arab do au kehe, sian i mulak au tu Damaskus mangulahi. 1:18 Tolu taon dung muba rohangku baru ma anso manangkok au tu Jerusalem anso marsitandaan dohot si Petrus. Lima bolas ari rap hami disi. 1:19 Anggo dohot angka rasul na asing i nada marsuo au. Hum si Jakobus anggi ni Tuhan i sajo do. 1:20 Tutu do na husuratkon on. Nada margabus au. Di jolo ni Tuhan ma au na mandokkon on! 1:21 Dung i kehe ma au tu angka luat na di Siria dohot na di Kilikia. 1:22 Lopus tu hatiha i, anggo angka parlagutan ni halak Kristen na di Judea do, nada tangkas dope ditanda halahi au. 1:23 Hum hara ni na nibege ni halahi do didok halak, "Bayo na manyiksa hami i na jolo, dijamitahon ia do saonnari haporsayaan na giot abisannia na salpu i." 1:24 Gabe dipuji halahi do Debata hara ni au.
2:1 Dung adong opat bolas taon, manangkok ma au mangulahi tu Jerusalem dohot si Barnabas, jana hami oban muse ma si Titus. 2:2 Huompoti pe kehe tu Jerusalem, hara ni na dung dipatidahon Debata do tu au paboa na angkon kehe au. Jadi di sada pangkataion na buni, jolo mangkobari do au dohot angka halak na idaon songon pamimpin na disi, hupajojor ma tu halahi Jamita Na Denggan na hujamitahon i tu angka halak na so Jahudi. Harana, nada por rohangku gabe sayang boti angka na huhalojahon na salpu i dohot na saonnari. 2:3 Halak Junani do nian anggo si Titus donganki, tapi nada nipaksa ia anso mangihutkon paraturan ni sunat, 2:4 haru pe bahat angka pangalancap na marsuru ia mambaen songon i. Angka halak na manyisip-nyisipi do i tu hita jana dipaula-ula halahi ma songon na donganta halahi. Disisipi halahi ma masuk tu hita laho manangkasi sanga na bia pangalaho ni haluaan na adong di hita hara ni hasadaonta dohot Kristus Jesus. Na giot paulakkon hita do halahi tu pangalaho na parjolo, i ma na gabe hatoban muse, 2:5 tapi nada ra hami mundur jana tunduk santongkin pe tu halahi, harana hami jago do anso polin Jamita Na Denggan i di hamu. 2:6 Nian, nada pola adong be angka pangalaho na imbaru ditambai angka halak na tarpandang i -- anggo di au nada adong imbar ni i sanga halak na tarpandang halahi sanga nada, harana Debata pe nada siida bohi ni jolma Ia. 2:7 Hape dioku angka halak na tarpandang i do, na nipasahat ni Debata do au laho manjamitahon Jamita Na Denggan i tu angka halak na so Jahudi dos dohot si Petrus na nisuruNa laho manjamitahon Jamita Na Denggan i tu halak Jahudi. 2:8 Harana, Debata na mambaen si Petrus i sanggup gabe rasul tu halak Jahudi, madung dilehen Ia muse do tu au hamaloan anso gabe rasul tu bangso na asing. 2:9 Si Jakobus pe, si Petrus, si Johannes, na gabe songon partunggul di parlagutan i, dioku halahi do na dung dilehen Debata do tu au hak na sada on. Dung i dijalang halahi do si Barnabas dohot au songon tanda ni parale-aleonnami. Jadi satahi ma halahi dohot hami, di tonga-tonga ni angka bangso na so Jahudi ma hami markarejo, jana halahi ma markarejo di tonga-tonga ni halak Jahudi. 2:10 Hum on sajo ma i pangidoan ni halahi: Anso hami parrohahon halak na pogos. Jana pangalaho na songon i muse ma jop ni rohangku. 2:11 Tapi sanoli dompak na ro si Petrus tu Antiokia, hualo do ia dohot tangkas, hara ni na sala pangalahonia. 2:12 Mula-mulana sajuguhan ia mangan rap dohot angka dongan na so Jahudi. Hape dung ro angka halak na nisuru ni si Jakobus, dipadao ia ma dirinia sian angka dongan na so Jahudi i. Gabe nada ra be ia mangan rap dohot halahi. Hara ni na mabiar ia maradopkon angka halak na sai mangkagioti anso sude jolma marsunat. 2:13 Dohot muse ma angka halak Jahudi na asing i mangalancap songon pangalaho ni si Petrus i; gabe tarela-ela muse ma salang si Barnabas laho mangalancap-lancap songon halahi i. 2:14 Disi huida na so sadalan be parobankon ni halahi tu hasintongan ni Jamita Na Denggan i, manigor hudok ma tu si Petrus di jolo ni sude halak na adong disi, "Muda na halak Jahudi do ho, hape ngolumu songon na so halak Jahudi, bia ma pamaksamu di angka dongan na so marsunat anso mangolu songon halak Jahudi?" 2:15 Nian halak Jahudi do hami sian hasosorangnami, jana nada sian bangso na asing na indohan "na mardosa i". 2:16 Haru songon i pe hami boto do hum hara ni na mangkaporsayai Jesus Kristus sajo do tarbaen mardenggan mangulahi jolma dohot Debata, jana nada hara ni na mandalankon angka Tona. Hami haporsayai muse do Jesus Kristus, anso mardenggan hami mangulahi tu Debata hara ni haporsayaannami i tu Jesus Kristus; jana nada hara ni na mandalankon angka Tona. Angke anggo hara ni na mandalankon Tona do, sahalak pe nada tarbaen mardenggan mangulahi tu Debata. 2:17 Hara ni hasadaonta dohot Kristus, diarop rohanta do anso gabe mardenggan hita mangulahi tu Debata. Tapi haru pe na dung songon i pangalahona angkon laing tardapot do hami "angka pardosa" songon angka jolma na so Jahudi. Adong he ulaning Kristus i do na manjujui hami anso mardosa? Nada songon i! 2:18 Angke muda hupajongjong mangulahi na dung hurumpakkon, disi ma hupatuduhon paboa na dung mangalanggar au. 2:19 Tapi anggo taringot tu Tona, na mate do au -- dimatehon Tona i sandiri -- anso tarbaen mangolu au di Debata. Madung diparsilangkon au rap dohot Kristus. 2:20 Anggo na mangolu saonnari on, nada au be i, tapi Kristus noma na mangolu di bagasan diringku. Anggo ngolu ni pamatangkon saonnari, na mangolu sian na mangkaporsayai Anak Ni Debata na manghaholongi au noma i, jana na mangalehen diriNa manghopkop au. 2:21 Nada huambungkon silehen-lehen ni Debata. Muda gabe denggan do mangulahi parsambungan ni Debata dohot jolma hara ni na nidalankon ni halahi Tona i, antong nada adong be gunana mate Kristus.
3:1 Hamu ale angka halak Galatia na oto! Ise dehe na mangula-ulai hamu? Madung hupajojor taringot tu hamamate ni Kristus di parsilang i satorang-torangna. 3:2 Paboa hamu ma jolo tu au pangalaho na sada on: Adong he hara ni na mandalankon Tona do umbaen na nijagitmunu Tondi Parbadia nabaruon, sanga hara ni na umbege Jamita Na Denggan na sian Debata dohot hara ni na porsaya tu Kristus do? 3:3 Biasi gabe songon i otomunu! Ngolumunu na imbaru, madung dipungka hamu i markite-hite Tondi Parbadia, na bia do umbaen na giot paujungonmunu i saonnari markite-hite usahomunu sandiri? 3:4 Antong, parcuma noma he sude na nitaonmunu i? Tontu nada! 3:5 Dipasingkop Debata do TondiNa tu hamu jana dibaen do angka hahomangan di tonga-tongamunu. Adong he hara ni na mandalankon Tona umbaen na nipatupa ni Debata songon i, sanga hara ni na umbege Jamita Na Denggan i dohot hara ni na mangkaporsayai Kristus do? 3:6 Anggo i tudos tu na tarsurat di Buku Na Badia i do, na manaringoti si Abraham, songon on didok, "Dihaporsayai si Abraham do Debata, jana hara ni haporsayaannia i, dietong roha ni Debata ma ia songon sada halak na mardenggan tuSia mangulahi." 3:7 Jadi angkon tangkas do botoonmunu, sanga ise na mangolu di bagasan haporsayaan, i do angka pomparan ni si Abraham. 3:8 Madung diida Buku Na Badia i hian do na dung dilehen Debata dalan anso mardenggan mangulahi angka halak na so Jahudi dohot Debata, muda porsaya halahi tu Debata. Tu si Abraham do parjolo dipaboa Jamita Na Denggan i, di bagasan janji on, "Markite-hite ho, pasupasuon ni Debata ma sandok bangso na di ginjang tano on." 3:9 Porsaya do si Abraham disi, gabe dipasupasu ia. Laing songon i muse do sanga ise na porsaya, pasupasuon ma rap dohot si Abraham. 3:10 Sanga ise halak na marguru tu Tona, na mangolu di toru ni bura do halahi sudena. Angke tarsurat do di Buku Na Badia i, "Sanga ise na so burju mandalankon sasudena parenta na tarsurat di Tona i, buraan ni Debata ma halakna i!" 3:11 Sahalak pe nada adong na nipatigor di adopan ni Debata markite na mandalankon Tona i. Dibaen, "Hara ni haporsayaanna do mangolu angka na tigor roha i." 3:12 Tapi anggo angka Tona na nidok nangkin, nada marlahanan tu haporsayaan i. Tapi, "Barang ise na mangkarejohonna, mangolu do ia dibaen i." 3:13 Madung ditobus Kristus hita sian bura ni Tona i, markite-hite na gabe bura hara ni hita, angke tarsurat do, "Na hona bura do sanga ise na hona gantung di hayu parsilang." 3:14 Dibaen Kristus Jesus pe songon i anso laing dilehen do tu angka bangso na asing pasupasu na nijanjihon ni Debata tu si Abraham i. Dung i hita na porsaya tu Debata, tola ma manjagit Tondi na nijanjihon ni Debata i. 3:15 Hamu ale angka dongan! Hubaen ma tudosanna jolo sian na masa siganop ari di hita. Muda adong sanga ise na mambaen parjanjian, jana madung disahkon janji i, jadi sanga ise pe nada tarbaensa be manyundati janji i bagi manamba-nambai sanga aha pe tusi. 3:16 Dibaen Debata do angka janjiNia i tu si Abraham dohot tu angka pomparannia. Nada adong tarsurat di Buku Na Badia i na mandok, "dohot tu angka pomparan ni si Abraham," astuanna bahat bilangan ni halakna. Anggo na tarsurat disi, songon on do, "dohot tu pomparanmu", artina hum sahalak sajo do, i ma Kristus. 3:17 Na hudok disi on do: Madung jolo dibaen jana disahkon parjanjian ni Debata. Anggo Tona i na ro dung opat ratus tolu pulu taon, nada tarbaen i be manyundati sanga aha na dung sah hian dibaen, anso gabe sundat janji ni Debata i. 3:18 Harana muda marguru tu Tona do bagabaga ni Debata na tu si Abraham dohot tu pomparannia i, antong nada marguru tu na nibagahon ni Debata be i. Hape hum hara ni na dung dijanjihon Debata do tu si Abraham umbaen na nilehen ni Debata i tusia. 3:19 Anggo songon i do hape, aha do gunana nilehen Tona i? Anggo alus ni i, songon on do: Songon tamba-tamba do Tona i dilehen laho patuduhon tu jolma sanga aha na margoar dosa. Intap ni haroro ni sahalak sian pomparan ni si Abraham sajo do mardalan anggo Tona i, i ma na dipaboa hian di bagasan janji ni Debata tu si Abraham i. Na nipasahat ni angka surusuruan do Tona i tu jolma markite-hite sada halak. 3:20 Angkon adong do dua pihak, anso porlu adong sahalak na gabe songon panonga-nongai. Hape anggo Debata nada porlu adong diSia na songon panonga-nongai harana langsung do Debata sandiri mangkarejohonsa. *HARANA LANGSUNG DO DEBATA SANDIRI MANGKAREJOHONSA: Sanga: Harana Ia do Debata na sada.* 3:21 Muda songon i, na maralo dehe Tona i tu janji ni Debata? Nada! Harana sugari sura tarbaen Tona i mangalehen hangoluan tu jolma, antong tarbaen do mangulahi mardenggan jolma dohot Debata hara ni Tona i. 3:22 Hape di bagasan Buku Na Badia i tarsurat do bahaso sasudena jolma manusia madung di toru ni kuaso ni dosa. Jadi hara ni haporsayaan tu Jesus Kristus sajo noma tarlehen tu jolma na nijanjihon i, i ma tu halak na porsaya i. 3:23 Salolot so ro dope haporsayaan i, laing torus ma hita dijagoi Tona i; songon na dihurung do hita painte so dipatangkas haporsayaan i. 3:24 Songon parorot na mamodai hita do Tona i lopus lalu tu Kristus, na patigorkon hita markite-hite haporsayaanta i. 3:25 Saonnari dibaen madung dapot hatihana tarbaen jolma mangkaporsayai Kristus, gabe nada be paroroton ni angka Tona i hita. 3:26 Jadi hara ni na nihaporsayaanmunu Kristus Jesus, gabe marsada ma hamu dohot Ia; jadi gabe dakdanak ni Debata muse ma hamu sude. 3:27 Angke, sude hamu na dung nipandidihon di bagasan Jesus madung diparabit hamu Kristus i. 3:28 Anggo taringot tuson, nada adong be dibaen mardia imbar halak Jahudi sanga angka halak Junani, hatoban dohot na mardeka, halaklahi dohot dadaboru. Gabe sada do hamu sudena hara ni Kristus Jesus. 3:29 Muda nampuna ni Kristus do hamu, gabe pomparan ni si Abraham ma hamu. Marhak do hamu manjagit sanga aha na dung nijanjihon ni Debata.
4:1 Astuanna i ma: Salolot so magodang dope panean i, saotik pe nada adong imbarnia dohot sada hatoban, haru pe ia sandiri do nian nampuna sude arta i. 4:2 Tapi adong do halak na manjago i dohot na mangurus sude haporluannia lopus dapot hatiha na nitontuhon ni amangnia i. 4:3 Laing songon i ma hita: Salolot so impas godang dope hita, hita pe laing diparhatoban angka tondi na mangarajai portibi on do. 4:4 Tapi dung dapot hatiha hadenggananna, disuru Debata ma AnakNia i tu portibi on. Na sorang sian sada dadaboru do AnakNa i jana na mangolu di toru ni Tona i. 4:5 Anso laing tartobus Ia muse angka jolma na mangolu di toru ni angka Tona i. Boti anso laing dohot ma hita diangkat Debata gabe dakdanakNia. 4:6 Dibaen dakdanak ni Debata do hamu, disuru Debata muse ma Tondi Ni AnakNia i masuk tu bagasan rohanta, i ma Tondi na pio-pio, "Abba, ale Amang." 4:7 Jadi, nada hatoban be hamu, tapi anak do. Jana dibaen dakdanak ni Debata do hamu, gabe hamu ma panean ni sude sinadongan di Debata. 4:8 Najolo nada ditanda hamu dope Debata, jadi hara ni i ma umbaen na gabe hatoban hamu di angka kuaso na nidok ni halak songon debata hape nian nada tutu Debata. 4:9 Tapi saonnari madung ditanda hamu Debata sanga sumintong dope muda nidok, madung ditanda Debata hamu. Biasi dope laing ra hamu mulak mangulahi mandapotkon angka tondi ni portibi on na gale jana na pogos i? Biasi laing ra dope hamu diparhatoban angka tondi i mangulahi? 4:10 Manjujur-jujur ari hamu, dohot bulan, dohot hatiha na denggan, dohot taon. 4:11 Songon na gamang do au, betak na parcuma do halolojangki dibaen hamu! 4:12 Hamu ale angka dongan! Gomos hupangido tu hamu, gabe songon au ma hamu nian. Harana au pe madung sarupa dohot hamu. Nada adong na sala dibaen hamu tu au. 4:13 Tontu laing diingot hamu do sanga na bia pangalahongku di na hujamitahon tu hamu Jamita Na Denggan i di mulana. I ma hara ni na marnyae au. 4:14 Anggo disi nada pola magigi hamu mida au, haru pe gabe songon cobaan na godang pangalaho ni pamatangku hatiha i di hamu. Songon surusuruan ni Debata do au di panjagitmunu sanga songon na manjagit Kristus Jesus sandiri. 4:15 I noma jop ni rohamunu hatiha i. Hape saonnari, ma di dia hamogaanmunu i? Huoku do anggo di hatiha i salang mangholuk matamunu sandiri rade do hamu anso lehenonmunu di au sugari tarbaen songon i. 4:16 Adong he na gabe musumunu do au dietong hamu saonnari hara ni na mandok na tutu au tu hamu? 4:17 Anggo angka halak na asing i marsiadu be do i laho manjalahi hamu, tapi nada na denggan maksud ni halahi. Na giot manggotap parsambunganmunu sajo do sian hami anggo giot ni halahi, anso ra hamu marsiadu mangihutkon halahi. 4:18 Tutu denggan do nian pangalaho na marsiadu muda di pangalaho na denggan, asal ma tongtong songon i, ulang hum hatiha di tonga-tongamunu au. 4:19 Angka dakdanakku na huhaholongi! Saonnari mangulahi do au markancit hara ni hamu. Songon sada ina na manaon na hancit di na laho manubuhon dakdanakna do huhilala saonnari. Angkon laing i do hilalaonku salolot so marrupa dope angka bako ni Kristus di bagasan dirimunu. 4:20 Lungun sajo do rohangku saonnari sugari di tonga-tongamunu ma au nian anso tarbaen au mandok hata dohot sora na asing tu hamu, angke nada huboto be sanga na bia baenonku tu hamu! 4:21 Tangihon hamu ma jolo na hudok on, hamu angka na giot mangolu di toru ni kuaso ni Tona! Adong he na so jungada do dibege hamu Buku Tona i. 4:22 Didok disi, adong do dua halak anak ni si Abraham: Inang ni dakdanak na sada, hatoban do, jana inang ni dakdanak na sada nari, i ma na mardeka. 4:23 Dakdanak na marina hatoban i, na somal do parsorangna, i ma mangihutkon hagiot ni jolma. Tapi anggo dakdanak na marinahon na mardeka i, na sorang hara ni na nijanjihon ni Debata do i. 4:24 On ma jolo songon tudosanna. Ina-ina na dua i tarsongon dua parjanjian ma i: Na sada marharoroan sian Dolok Sinai -- i ma si Hagar; angka dakdanaknia pe sorang ma i songon hatoban. 4:25 Jadi si Hagar ma Dolok Sinai na di tano Arab, *SI HAGAR MA DOLOK SINAI NA DI TANO ARAB: Dipiga-piga-piga naskah narobi didok: Sinai, i ma dolok na di tano Arab.* jana sarupa do i dohot Jerusalem na saonnari, harana mangolu di bagasan parhatobanan do ia rap dohot angka dakdanaknia. 4:26 Tapi anggo Jerusalem na di banua ginjang i, i ma boru na mardeka, jana i ma ina di hita. 4:27 Angke tarsurat do di Buku Na Badia i, "Marjop ni roha ma ho ale ina na so maruntungan na so jungada manubuhon dakdanak! Marmoga-moga ma ho jana marsurak-surak, ale ho na so jungada mangae manubuhon anak! Harana dadaboru na nitadingkon ni halaklahina umbahat dope dapotsa dakdanak ulang pado dadaboru na rap dohot halaklahina." 4:28 Hamu angka dongan! Hamu sandiri pe dakdanak ni Debata do, na sorang hara ni janji ni Debata; tarsongon si Ishak do hamu. 4:29 Anggo hatiha i, sai diparkanciti anak na tubu songon na somal i do anak na sorang hara ni kuaso ni Tondi Parbadia i. Saonnari pe laing songon i do. 4:30 Tapi bia do tarsurat di Buku Na Badia i? Songon on do tarsurat anggo disi: "Paorot ma boru hatoban i rap dohot anakna i, angke nada tola anak ni boru hatoban i sapanganan rap dohot anak na sian boru na mardeka i." 4:31 Jadi anggo hita, nada angka dakdanak ni sada boru hatoban, dakdanak ni boru na mardeka do hita.
5:1 Saonnari madung bebas hita, hara ni na dung dipalua Kristus hita! Hara ni i partahankon hamu ma habebasonmunu i jana ulang be ra hamu mangulahi diparhatoban. 5:2 Ingot ma, muda dipangido hamu sunaton hamu, na so adong do sanga aha guna ni Kristus di hamu. Au sandiri si Paulus do na mandok on. 5:3 Sanoli nari hupaingot sanga ise na mangido marsunat, angkon dalankononna do sudena Tona i. 5:4 Muda sian na mandalankon Tona do diusahahon hamu mardenggan dohot Debata, gabe digotapkon hamu ma parsambunganmunu sian Kristus. Di balian ni hadengganan ni roha ni Debata noma hamu mangolu. 5:5 Hara ni Tondi dohot haporsayaanta, arop do rohanta di hatigoran i. 5:6 Angke muda dung marsada hita dohot Kristus Jesus, nada pola parsoalan be na mangihutkon paraturan ni sunat sanga na so mangihutkon aturan i. Manghaporsayai Kristus sajo noma na porlu, jana tarida ma i di bagasan holong ni rohanta maradopkon halak na asing. 5:7 Madung denggan nian najolo marjuang hamu! Ise dehe na mangantahi hamu anso ulang dipatulus hamu na tigor? 5:8 Inda Debata na manjajang hamu mambaen songon i! 5:9 "Gabe kombang do sude adonan i hara ni ragi na saotik sajo." 5:10 Haru songon i pe laing pos do rohangku na so marsalisi pandirianmunu, hara ni na dung marsada hita dohot Tuhan i. Jana laing pos do rohangku, sanga na ise pe na manggaori pikiranmunu, angkon uhumon ni Debata do i. 5:11 Salaho tu au hamu ale angka dongan! Biasi sai gabe diayak-ayak au, muda laing hujamitahon na porlu dope paraturan ni sunat i? Angke muda hujamitahon dope songon i, tontu nada pola sihagigian be jamita taringot tu silang ni Kristus i. 5:12 Gumonan dope angka halak na manggaori pikiranmunu i, manigor diharuarkon. 5:13 Na dung dipiohon do hamu angka dongan anso gabe halak na bebas. Tapi ulang ma hara ni na bebas hamu gabe dalan laho mangoloi giot-giotmunu na sai mardosa i. Tapi marsioloan ma hamu sama hamu hara ni holong ni roha. 5:14 Angke sude Tona i dipasada do di bagasan sada parenta na mandok, "Angkon haholonganmu do donganmu jolma songon pangkaholongimu di dirimu sandiri." 5:15 Tapi muda marsisarbutan jana marsipanganan hamu sama hamu, jago ma hamu anso ulang marsipasudean. 5:16 Na hudok songon on: Mangolu ma hamu marguru tu na niajarkon ni Tondi i, anso ulang dipaolo-oloi hamu be bakomunu humani na jat i. 5:17 Harana maralo do bakomunu na jat i tu hagiot ni Tondi Parbadia jana maralo muse do hagiot ni Tondi Parbadia tu bakomunu humani na jat i. Marsialoan do na dua i, gabe inda tarpatulus hamu be sanga aha por ni rohamunu. 5:18 Tapi muda Tondi Parbadia do manogu hamu, tontu inda dirajai Tona be hamu. 5:19 Tangkas do karejo na nibaen ni bako humani na jat i di bagasan angka pangalaho on: Na markarosuan, harorangan, hahodaron; 5:20 na manyomba gana-ganaan, sihir, parbadaan, parsalisian, mamikirkon diri sandiri, tahi-tahi na jat, pamola-mola, 5:21 gutgut; marmabuk-mabuk, marpesta-pesta dohot angka na asing. Salaho tusi sudena, hupaingot ma hamu songon sipaingotku na parjolo i, anggo halak sisongon i nada maruli tean-teanan i sian Harajaan Ni Debata. 5:22 Tapi anggo parbatu ni Tondi i, on do: Holong ni roha, jop ni roha, hasonangan, lambok ni roha, habasaran, lidang ni roha, hatomanan, 5:23 martoruk ni roha jana tarrajaisa dirina. Nada adong uhum na mangalo angka aturan i. 5:24 Angka halak na dung gabe nampuna ni Kristus Jesus, madung dimatehon halahi do bakona humani na jat i. 5:25 Madung dilehen Tondi Parbadia tu hita hangoluan na imbaru, hara ni i marguru tu Tondi i ma pardalan ni ngolunta. 5:26 Ulang ma hita manjalahi pamujion ni diri na so hasaya, mangalap-alapi bada dohot na marsiiburuan roha, na sada tu na asing.
6:1 Hamu ale angka dongan! Muda tardapot sanga ise mambaen dosa, angkon hamu na sai mangolu mangihutkon Tondi Parbadia i ma paulakkon halahi mangulahi tu dalan na sintong. Tapi angkon mardongan halambohon do hamu patupahon na songon i, jana jamot ma hamu anso ulang jabat hamu hona pandugaan muse. 6:2 Marsiurupan ma hamu mamorsan boban na dokdok i, songon i ma baen hamu patuluskon parenta ni Kristus i. 6:3 Muda adong na mamikir dirina halak na gabar ia hape nian sisoada do, na manggabusi dirina do ia songon i. 6:4 Marsipareso pangalahona be ma ganop halak sanga na ture do sanga nada. Baru pe anso tola ia marmoga-moga di bagasan rohania hara ni angka pangalaho na denggan na nibaennia i. Indangkon pola sai dipatudos-tudos tu pambaenan ni halak na asing. 6:5 Harana angkon marsiporsan bobanna be do na mangolu i. 6:6 Sanga ise na manjagit pangajaran sian Hata i angkon bagionna do tu guruna sandok na denggan na adong disia. 6:7 Ulang hamu ra dipaoto-oto! Nada sipargonjakkonon Debata! Sanga aha nisuan angkon laing i do sabion. 6:8 Muda disuan halak sanga aha hombar tu bakona humani na jat i, angkon sabionna ma hamamago sian bakonia i. Tapi muda marguru tu panogu-noguon ni Tondi Parbadia ia manyuan, sabionnia ma ngolu na so mantak sian Tondi Parbadia. 6:9 Hara ni i, ulang ma loja hita mambaen angka na denggan; angke muda inda marnaloja hita mambaen angka pangalaho na songon i angkon sabionta do suha ni i di hadudumpang ni hatihana. 6:10 Jadi salolot adong dope hatiha di hita, angkon sangahononta do mambaen na denggan tu sude halak, lumobi tu angka donganta sahaporsayaan. 6:11 Tangkas ma jolo parrohahon hamu bagian na husurat dison, i ma di bagasan angka surat na godang on! 6:12 Halak na giot patujolohon dirina di angka pangalaho na tarida, halahi do na mamaksa hamu mangihutkon paraturan ni sunat. Tapi dibaen halahi pe songon i, hum anso ulang dimusui halak Jahudi do halahi hara ni silang ni Kristus i. 6:13 Angka halak na mangihutkon paraturan ni sunat i pe, nada didalankon halahi aturan i. Hape giot ni halahi angkon marsunat ma hamu, anso tarbaen halahi mamuji diri paboa na niihutkonmunu paraturan i. 6:14 Tapi anggo au sanga na bia pe nada ra au mamuji-muji sanga aha, asing sian silang ni Tuhanta Jesus Kristus i. Angke hara ni silangNa i madung mate au maradopkon portibi on, jana portibi on pe, madung mate di au. 6:15 Disunat sanga na so disunat, inda adong arti ni i, tapi halak na nitompa gabe imbaru, i sajo do na mararti. 6:16 Di angka na mangolu songon pandiriankon, dohot di sude halak ni Debata, arop do rohangku lehenon ni Debata hasonangan dohot ibo ni rohaNia. 6:17 Dung i muse, ulang be adong nian na mangarsahi au, angke adong do di pamatangku tihas angka tanda na paboahon siihutkon Kristus au. 6:18 Sai didongani denggan ni roha ni Kristus ma tondimunu, ale angka dongan. Amen.
1:1 Sian si Paulus, rasul ni Kristus Jesus, markite-hite hagiot ni Debata, tu angka halak na badia na di Epesus *NA DI EPESUS: Dipiga-piga-piga naskah narobi nada adong hata on.* dohot tu angka na porsaya di Kristus Jesus. 1:2 Asi ni roha dohot hasonangan ma di hamu, sian Debata Amanta dohot sian Tuhan Jesus Kristus. 1:3 Pinuji ma Debata, Ama ni Tuhanta Jesus Kristus! Dipasupasu Ia do hita dohot sude ragam-ragam ni pasupasu partondion sian banua ginjang, hara ni na dung mardomu i hita dohot Kristus. 1:4 Dompak so dijadihon dope portibi on, madung ditodo Debata hian hita markite-hite Kristus anso gabe Debata sandiri nampuna hita jana na so martihas di adopanNia. Hara ni holong ni roha ni Debata, 1:5 madung ditontuhon Ia humani do na giot baenonNia hita gabe dakdanakNia sandiri markite-hite Jesus Kristus. Jana songon i hian ma na giot baenonNia. 1:6 Pinuji ma Debata hara ni hadengganan ni rohaNia na songon i godang na nipabotohonNia tu hita mardapot-dapot markite-hite Anak haholonganNia i. 1:7 Angke di bagasan Ia, dapotan haluaan do hita markite-hite mudarNia, i ma hasesaan ni dosa mangihutkon godang ni asi ni rohaNia, 1:8 na dung dilehen Ia di hita markite-hite ragam ni habisuhon dohot parbinotoan. 1:9 Sian rohaNia sandiri dipaboa Debata do tu hita rahasia ni sangkapNia. I ma sangkap na dung nitontuhonNia humani sian mulana, angkon markite-hite Kristus do i pasidungonNia. 1:10 Isi ni sangkap i, on do: Anso sada sudena na nitompa i, na adong di banua ginjang sanga na di portibi on dohot Kristus na gabe uluna. Jana salosehonon ni Debata ma i muda dung dumpang hatihana. 1:11 Debata do mangkarejohon sasudena hombar tu hagiotNia dohot haputusanNia sandiri. Sian mula ni mulana madung ditodo Ia hian hita hara ni por ni rohaNia anso markite-hite Kristus gabe halakNia hita, 1:12 boti anso hita na dung parjolo mararop ni roha tu Kristus i, mangolu laho mamuji Debata hara ni hagodanganNia i! 1:13 Laing songon i muse do hamu -- hara ni na dung nibegemunu hata hasintongan i, i ma Jamita Na Denggan haluaanmunu i -- di bagasan Ia, dung porsaya hamu, madung dimeteraihon hamu markite-hite Tondi Parbadia na nijanjihonNia i. 1:14 Tondi i ma na gabe jaminan paboa na jagitonta ma sanga aha na nijanjihon ni Debata tu halakNia. Jana on ma na papos rohanta paboa na angkon paluaon ni Debata ma angka halakNia. Sipujion do Debata hara ni hagodanganNia i! 1:15 Hara ni i, mamungka sian na dung hubege hamu porsaya tu Tuhan Jesus, jana dihaholongi hamu do sude halak na porsaya, 1:16 nada marnamantak au mandok tarimakasi tu Debata hara ni hamu sude. Sai tongtong do hugoari hamu muda hatiha martangiang au. 1:17 Hupangido anso dilehen Debata ni Tuhanta Jesus Kristus, i ma Debata na sangap i, TondiNia tu hamu. Gabe marbisuk do hamu baenon ni Tondi i, jana patandahononNia ma Debata tu hamu anso ditanda hamu Ia. 1:18 Hupangidohon anso torang mata ni rohamunu dibaen Ia, anso diastui hamu sanga aha na patut aropon ni rohamunu sian Debata na mamiohon hamu, bope hamoraon ni hasangapan, siteanon na nitontuhonNia di angka halak na porsaya. 1:19 Jana na godang do kuasoNia di hita angka na dung porsaya mangihutkon kuaso hagogoonNia na togu i, 1:20 na nipakeNia di na pangoluhon Kristus mangulahi sian hamatean jana dilehen Debata diSia pangkat na pargincat situtu rap dohot Debata di banua ginjang. 1:21 Dao dope gumincat pangkat ni Kristus i, sian pangkat ni sasudena pamarenta, sian sasude na markuaso, sian sude pamimpin, sian sude angka tuan dohot sian sanga ise pe na dung maruli pangkat na gincat; na adong di hatiha on sanga di hatiha na giot ro. 1:22 Ditaluhon Debata do sasudena tu toru ni kuaso ni Kristus, jana dibaen Ia do Kristus gabe ulu ni sasudena na adong di parlagutan ni Tuhan. 1:23 Pamatang ni Kristus do parlagutan i. Hara ni pamatang i, gabe sanggam ma parlagutan i hara ni Ia na mambaen sasudena gabe sanggam. *HARA NI IA NA MAMBAEN SASUDE GABE SANGGAM: Sanga: Jana Ia sandiri pe madung dipasanggam Debata.*
2:1 Na mate do hamu najolo hara ni na nilaosimunu angka parenta ni Debata jana mardosai hamu. 2:2 Angka hasomalan ni portibi on do dipaolo-oloi hamu hatiha i; astuanna, tunduk tu angka parkuaso ni harajaan na di awang-awang i do hamu, i ma tondi na laing mangela-ela roha ni angka halak na so ra tunduk tu Debata saonnari. 2:3 Anggo najolo sarupa hian do hita sudena dohot halahi; mangolu do hita paolo-oloi bako ni hajolmaonta harana sanga aha na pasonangkon pamatangta dohot pikiranta na jahat i, i do na tabaen. Anggo hatiha i, hita pe halak na hona rimas ni Debata muse do, laing songon halak na asing i. 2:4 Tapi na godang do denggan ni roha ni Debata! Songon i ma holong ni rohaNia tu hita. 2:5 Jadi hatiha mate hita di partondionta, hara ni pangalaosionta dipangolu Ia hita mangulahi rap dohot Kristus. Jadi hum hara ni asi ni roha do umbaen na dipalua hamu. 2:6 Hara ni na mardomu i hita dohot Kristus Jesus dipangolu Debata ma hita mangulahi rap dohot Ia, anso laing rap muse ma hita dohot Ia di banua ginjang. 2:7 Dibaen Debata pe na songon i, anso diida jolma i do sanga na bia godangna hadengganon ni rohaNia di hatiha na giot ro, i ma na nipatidahonNia tu hita markite-hite Kristus Jesus. 2:8 Angke hara ni asi ni roha do malua hamu markite-hite haporsayaan, nada hara ni gogomunu sandiri, tapi silehen-lehen ni Debata do i; 2:9 nada sian angka suha ni pambaenanmunu, anso ulang adong sanga ise pe mamuji dirina. 2:10 Na nitompa ni Debata do hita on, jana markite-hite Jesus Kristus dipauli Debata hita anso tabaen angka pangalaho na denggan na nipasingkopNia humani di hita. 2:11 Ingot hamu ma sanga na bia hamu najolo: "Angka na so marsunat" do hamu didok halak Jahudi na mandok dirina angka na marsunat (na nidokna, i ma na dung maruli tanda na nibaen ni jolma di pamatang ni halahi). 2:12 Nada mardomu hamu dohot Kristus hatiha i, halak na asing do hamu na so tarmasuk halak Israel. Nada masuk hamu tu na manjagit janji na nibaen ni Debata dohot bangsoNia i. Nada adong sanga aha arop ni rohamunu na mangolu i di tano on jana nada marsomba tu Debata na sintong hamu. 2:13 Hape anggo saonnari, hara ni na dung mardomu hamu dohot Kristus Jesus, na dao hian hamu najolo, madung dipasolkot hamatean ni Kristus i. 2:14 Angke Kristus sandiri do na padamehon hita. Dipadomu Ia do angka halak Jahudi dohot angka halak na so Jahudi gabe sada bangso. Parbadaan na songon bolat-bolat na manyirang halahi madung disego-sego Kristus dohot hamamateNia i sandiri. 2:15 Angka Tona ni ugamo Jahudi dohot angka parentana i bope angka paraturanna i madung disesa Kristus i sudena anso gabe sada bangso na dua i hian, gabe sada bangso na imbaru, na mardomu dohot Kristus. Songon i ma dalanna dibaen Jesus laho mambaen pardamean i. 2:16 Hara ni hamamateNia di parsilang i dipasada Kristus ma bangso na dua i jana dipadame Ia ma halahi tu Debata. Gabe mago ma parbadaan i. 2:17 Jadi madung ro Ia manjamitahon hasonangan markite-hite, Jamita Na Denggan i di hamu angka na dao, dohot di angka na donok. 2:18 Markite-hite Kristus tarbaen ma hita sudena solkot tu Ama i -- sanga na halak Jahudi sanga pe angka na so Jahudi. 2:19 Hara ni i, nada etongon be hamu halak na asing sanga halak na dao. Anggo saonnari rap anggota noma hamu dohot angka na porsaya i. Dongan pangisi ni Bagas Ni Debata do hamu. 2:20 Hamu pe di ginjang ni ojahan na nipayakkon ni angka rasul dohot angka panurirang *OJAHAN NA NIPAYAKKON NI ANGKA RASUL DOHOT ANGKA PANURIRANG: Sanga: Ojahan, i ma angka rasul dohot angka panurirang.* do hamu dipajongjong, jana Jesus Kristus ma baen batu parsuhi. 2:21 Ia do na padomu-domuhon sudena parsusun ni bangunan i gabe Bagas Ni Debata na badia, na gabe hapunjungan ni Tuhan. 2:22 Di na mardomu i dohot Kristus, na nipajongjong do hamu rap dohot halak na asing gabe sada Bagas Ni Debata; maringanan do Debata disi dohot TondiNia.
3:1 I ma dalanna umbaen na tarhurung au si Paulus hara ni Jesus Kristus, laho manyarihon haporluanmunu angka dongan na so bangso Jahudi. 3:2 Ninna rohangku madung dibege hamu i, hara ni denggan ni roha ni Debata madung dilehen Ia tu au karejo on hara ni haporluanmunu. 3:3 Diungkap Debata do rahasia ni sangkapNia jana dipajojor Ia i tu au. (Taringot tuson madung husuratkon i saotik nangkin di ginjang, 3:4 jana muda disise hamu i, botoonmunu ma rahasia taringot tu Kristus i songon na huboto i.) 3:5 Anggo najolo na so unjung do dipaboa-boa rahasia i tu jolma, tapi anggo saonnari madung dipatangkas Tondi i tu angka rasul bope tu angka panurirangNia na badia i. 3:6 On ma rahasia i: Hara ni Jamita Na Denggan i tola ma dohot halak na so Jahudi manjagit angka pasupasu sian Debata; gabe rap anggota ni sada pamatang ma halahi, jana tola ma dohot manjagit sanga aha na nijanjihon ni Debata markite-hite Jesus Kristus. 3:7 Dilehen Debata do tu au karejo na gabe hapunjunganku, i ma karejo laho manjamitahon Jamita Na Denggan i. Hujagit do karejo i markite-hite kuaso ni Debata, na marsitutu markarejo di bagasan diringku. 3:8 Sian sudena na margoar halak na porsaya, au ma i tardok na umbile. Hape laing dipasahat Debata do tu au hasurungan on: I ma, anso hujamitahon Jamita Na Denggan on tu angka halak na so Jahudi paboa na adong do bahat sajo sinadongan na so ra abis di Kristus; 3:9 dohot muse, anso marhite sian au botoon ni halak ma sudena sanga na bia Debata na manompa langit dohot tano on patuluskon sangkap na nirahasiahonNia i sian narobi, tu portibi on. 3:10 On do maksud ni Debata disi: anso saonnari, sude na maniop kuaso di awang-awang i mamboto hamaloon ni Debata di sude ragam rupa ni pangalaho markite-hite parlagutan i. 3:11 Mardomu tu sangkapNia na so ra muba i do sudena i dibaen Debata na nipatulusNia markite-hite Jesus Kristus Tuhanta i. 3:12 Dohot dalan mangkaporsayai Kristus bope hara ni na mardomu dohot Ia, dipatola ma hita laho mandonohi Debata mardongan haporsayaan na gok. 3:13 Jadi pangidoanku: Ulang pola ganggu be rohamunu mamikirkon sanga aha pe na hutaon hara ni hamu; laho patamahon na tu hamu do sudena i. 3:14 Hara ni i ma umbaen na marsinggang au di adopan ni Ama i. 3:15 Sian Ia do manjagit goar sudena ripe na di tano on dohot na di banua ginjang. 3:16 Hutangiangkon do anso lomo nian roha ni Debata na sun marmulia i laho patoguhon rohamunu dohot TondiNia i. 3:17 Hara ni na porsaya i hamu tu Kristus, sai maringanan ma nian Kristus di bagasan rohamunu, jana mur togu ma ngolumunu hara ni holong ni roha na dung marurat di bagasan hamu. 3:18 Hutangiangkon do anso rap dohot halak na porsaya, tarsuhat hamu nian sanga na sadia bidangna dohot ginjangna dohot gincatna bope bagasna holong ni roha ni Kristus i, 3:19 na so tarastui sabagas-bagasna anggo marsuhat tu pikiran ni jolma. Sai ditanda hamu ma nian holong ni roha ni Kristus i, anso gok hamu dohot hadirion ni Debata na sanggam i. 3:20 Markite-hite kuaso ni Debata na marsitutu i markarejo di bagasan dirinta, tarpatupa Debata do dao umbahat dope sian angka na hita pangido dohot na tapikirkon. 3:21 Sai dipasangap parlagutan i ma nian Debata marsundut-sundut markite-hite Jesus Kristus. Tarpuji ma Debata salolot-lolotna! Amen.
4:1 Hara ni i ma -- au sada halak na tarhurung, na nihurungkon hara ni na mangoloi Tuhan i -- gomos hupangido tu hamu: Dalani hamu ma ngolumunu marguru tu parobananmunu songon halak na dung dipiohon Debata. 4:2 Angkon martoruk ni roha do hamunu, lambok jana sobar. Patuduhon hamu ma holong ni rohamunu di na marsiurupan na sada tu na asing. 4:3 Marsitutu ma hamu parayakkon anso tongtong denggan mardalan hasadaon na nitompa ni Tondi Parbadia i, hara ni ngolumunu na mardame. 4:4 Hum sada sajo do pamatang i jana sada do Tondi. Laing songon i muse do hamu dipiohon tu sada arop ni roha na sarupa. 4:5 Hum sada sajo do Tuhan, sada haporsayaan, sada pandidion, 4:6 jana sada sajo do Debata na gabe Ama di sude jolma. Ia do Tuhan ni sude na nitompa i, na markarejo markite-hite sasudena jana na markuaso di bagasan sasudena. 4:7 Dilehen do tu hita be pasupasu marguru tu pangalehen ni Kristus i. 4:8 Di Buku Na Badia i tarsurat do, "Dompak na manaek i Ia tu inganan na gumincat, dioban Ia do bahat na tartaban; jana diparbagihon Ia do angka silehen-lehen tu jolma." 4:9 Jadi muda didok "manaek Ia" astuanna na dung mijur hian do Ia lopus tu inganan na partoru situtu di tano on. *INGANAN NA PARTORU SITUTU DI TANO ON: Sanga: Inganan na partoru situtu, i ma tano on.* 4:10 Jana na mijur i, laing Ia muse do na manaek lopus tu inganan na dao gumincat sian langit ni langit an, jabat gabe gok sasudena langit dohot tano on hara ni haroroNia. 4:11 Ia do "na mambagi-bagihon angka silehen-lehen tu jolma," tu na deba dilehen Ia silehen-lehenNia anso gabe rasul, tu na asing anso gabe panurirang; tu na deba nari muse anso gabe parjamita di Jamita Na Denggan i, jana tu na asing muse dilehen Ia silehen-lehenNia anso gabe panjago ni parlagutan dohot angka guru. 4:12 Dibaen Ia sasudena i anso singkop do sudena halak na porsaya laho mangoloi Tuhan bope laho mambangun pamatang ni Kristus i. 4:13 Jadi muda dung songon i gabe sada ma hita sudena hara ni haporsayaan na sada i dohot hara ni pangastuion na sarupa taringot tu Anak Ni Debata i. Jana gabe halak na impas godang ma hita mur honok mur tu sanggamna songon Kristus i. 4:14 Jadi nada be dakdanak hita na so marhatontuan jana na taroban-oban tu jae tu julu baenon ni angka pangajaran na marragam rupa na sian halak na bisuk. Lilu do halak dibaen halahi hara ni malo-malo ni halahi. 4:15 Ulang songon i! Tapi angkon pabotohononta do na sintong hara ni holong ni roha, anso mur honok mur tu sanggamna hita di sude pangalaho songon Kristus na gabe Uluanta i. 4:16 Muda Ia do uluan na mamimpin hita, sude angka bagian ni pamatang i maraturan do sude parsusun ni i, na nipadomu-domu ni angka ruasna be na sada tu na asing. Jadi muda denggan do marsikarejohon karejona be angka anggota i songon na sapatutna, gabe mur magodang ma sude pamatang i jana mur margogo markite-hite holong ni roha. 4:17 Jadi husaksihon di bagasan goar ni Tuhan, on do na giot dokkononku dohot patangkasonku: Ulang be songon halak na so mananda Debata ngolumunu na mamikirkon angka na so haru binoto. 4:18 Madung manggolap pikiran ni halahi. Umpe ditanda halahi be hangoluan na nilehen ni Debata, angke nada adong be parbinotoan di halahi sanga aha taringot tu Debata. Halak si jogal roha do halahi umbaen na songon i. 4:19 Nada adong be hahaila di halahi, gabe dipaolo-oloi halahi do hagiot ni pamatangna jana marroha-roha ma halahi marharorangon. 4:20 Tapi anggo Kristus na nitandamunu i, nada songon i! 4:21 Madung dibege hamu taringot tuSia! Jana hamu angka na mangihutkon Ia, nada he madung niajaran hamu taringot tu hasintongan na adong diSia! 4:22 Ambungkon hamu ma bakomunu na honok i, na mur sego dibaen angka hagiotna na mangaliluhon i. 4:23 Sugari angkon nipaimbaru ma nian sasudena rohamunu. 4:24 Sugari nian angkon marbako na imbaru ma ngolumunu na nitompa mangihutkon rupa ni Debata; i ma bako na sintong, na tigor dohot na badia. 4:25 Hara ni i, angkon burju do hamu sudena na sada tu na asing. Ulang be marsipaoto-otoan, angke rap anggota ni pamatang ni Kristus do hita sudena. 4:26 Muda muruk hamu, ulang oloi hamu gabe jabat mardosa hara ni na muruk i. Ulang ma muruk hamu sasadari. 4:27 Ulang lehen hamu hatiha di Sibolis i. 4:28 Angka panangko, ulang be manangko. Tapi gumonan ma ia markarejo anso dapot ia balanjonia markite-hite dalan na tigor jana anso tarurupi ia halak na hurangan. 4:29 Muda mandok hata hamu, ulang ma pake hamu angka hata na so ture. Angka pandohan na manogu dohot na mangurupi tu dongan na asing ma pake hamu. Angka pandohan na songon i do na padenggankon tu angka dongan na umbegesa. 4:30 Ulang ma pahancit hamu roha ni Tondi Parbadia ni Debata. Madung dimeteraihon Tondi i hamu tu ari haluaan i. 4:31 Salpuhon hamu ma sandok hancit ni roha, hosom dohot muruk. Ulang be manyonggahi hamu sanga panyaor-nyaorkon, ulang be adong na margoyak ni roha sanga pangkilalaan na sarupa dohot i. 4:32 Tapi gumonan ma burju jana lambok hamu sama hamu, bope na marsisesaan sala songon panyesa ni Debata di dosamunu markite-hite Kristus.
5:1 Dakdanak na nihaholongan ni Debata do hamu ale angka dongan. Hara ni i, tiru hamu ma Debata. 5:2 Angkon mardai holong ni roha ma nian ngolumunu, laing songon pangkaholongi ni Kristus di hita. Dihaulkon Ia do diriNia hara ni hita, gabe songon silehen-lehen dohot haul na huskus na pasonangkon roha ni Debata. 5:3 Bangso ni Debata do hamu! Jadi anggo angka na rorang dohot angka parange na so tupa bope na ahut tu diri, nada tama be adong di tonga-tongamunu -- hum tarbortik pe indangkon adong. 5:4 Bope mancaritohon angka carito na rorang bope mandok hata na hodar, sanga pe margonjak-gonjak na so patut, nada patut adong di hamu. Tapi gumonan ma hamu mandok tarimakasi tu Debata. 5:5 Ingot hamu ma on tangkas: Sanga ise na rorang pangalahona, sanga na so ture, sanga na sai ahut tu diri (sarupa tu na marsomba gana-ganaan do pangalaho na songon i), nada tarbaen halak na songon i gabe anggota ni bangso ni Kristus dohot Debata. 5:6 Ulang jabat tarpaoto-oto hamu dibaen angka pangkataion na rumar. Angke angka pangalaho na songon on ma mambaen muruk Debata tu angka halak na so ra mangoloi Ia. 5:7 Jadi, inda tola mardongan hamu dohot angka jolma sisongon i. 5:8 Hamu sandiri pe di hagolapan hian do najolo. Anggo saonnari madung gabe na torang hamu di bagasan Tuhan i. Hara ni i, mangolu ma hamu songon angka dakdanak ni hatorangan i. 5:9 Angke sian na torang *NA TORANG: Dipiga-piga-piga naskah narobi didok: Tondi Ni Debata.* i do haroroan ni sasude ragam ni parange na denggan jana na bonar di panatapan ni Debata. 5:10 Usahohon hamu ma mananda sanga aha na pasonang roha ni Tuhan. 5:11 Ulang dohoti hamu angka jolma na mambaen parange na golap angka na so marguna. Gumonanan do gorahon hamu angka na songon i. 5:12 (Angke anggo angka na nibaen ni halahi di na buni, maila maiba mangkobari i.) 5:13 Sasudena muda dung dipatangkas di na torang, angkon laing tangkas do i tarida. 5:14 Jana sasudena na tarida tangkas, na torang do i. *JANA SASUDENA NA TARIDA TANGKAS, NA TORANG DO I: Sanga: Harana na torang i do na patidahon sasudena dohot tangkas.* Hara ni i do umbaen na didok, "Ngot ma ho na modom i, jana jongjong ma ho sian hamatean! Giot marsinondang ma Kristus di ginjangmu." 5:15 Hara ni i, pamanat hamu ma dohot denggan pardalan ni ngolumunu. Ulang songon halak na oto ngolumunu, songon halak na marroha ma hamu. 5:16 Parkasayahon hamu ma sude hatiha na denggan na adong di hamu, angka na jahat do na masa di hatiha on. 5:17 Ulang hamu maoto, tapi sihiri hamu ma sanga aha giot ni Tuhan i sibaenonmunu. 5:18 Ulang mabuk hamu dibaen anggur, harana mambaen sego do i tu hamu. Tapi gumonan ma gok Tondi Parbadia hamu. 5:19 Pake hamu ma sian hata ni Masmur, angka ende puji-pujian tu Tuhan dohot angka ende partondion di angka pangkobarionmunu. Marjop ni roha ma hamu jana ria marende mamuji-muji Tuhan i. 5:20 Mandok tarimakasi ma hamu tu Debata Ama i markite-hite Jesus Kristus Tuhanta i, sanga hara ni aha pe. 5:21 Dung i marsiolo-oloan ma hamu di bagasan biar ni roha mida Debata. 5:22 Hamu angka dadaboru, oloi hamu ma halaklahimunu be songon pangoloimunu tu Tuhan. 5:23 Angke halaklahi i do uluan ni dadaboru i, laing songon Kristus na gabe uluan ni parlagutan i, jana laing Ia muse do paluahon pamatang i. 5:24 Laing songon parlagutan i na tunduk tu Kristus, songon i muse ma dadaboru i angkon tunduk tu halaklahina di sude pangalaho. 5:25 Hamu angka halaklahi, haholongi hamu ma dadaborumunu be, laing songon pangkaholongi ni Kristus di parlagutan i jana dilehen Ia do gabe haul diriNia hara ni parlagutan i. 5:26 Dibaen Kristus do songon i anso tarpaias Ia parlagutan i dohot ajaranNia bope markite-hite aek pandidion, anso tarpasahat Ia muse parlagutan i tu Debata. 5:27 Jadi songon i ma dibaen Ia anso marsangap parlagutan i jongjong jana polin di adopanNia, nada martihas sanga markerut. 5:28 Laing songon i ma halaklahi i angkon mangkaholongi dadaboruna songon pamatangnia sandiri. Sanga ise na mangkaholongi dadaboruna, i do na mangkaholongi dirina sandiri. 5:29 (Dia ma jungada magigi halak mida pamatangna sandiri. Tapidipature-ture ia do i jana dijagohon ia laing songon Kristus pature-turehon angka parlagutan i; 5:30 angke goar-goaran ni pamatang ni Kristus do hita.) 5:31 Di Buku Na Badia i tarsurat do, "Hara ni i do umbaen ditadingkon halaklahi amangna dohot inangna laho parayakkon dadaboruna, jadi gabe sada ma halahi na dua." 5:32 Bagas do na nidok ni hata i. Tapi domu tu parsambungan ni Kristus dohot parlagutan i do na hudok disi. 5:33 Tapi laing adong do hahonaan ni ayat i tu hamu: Dihaholongi ganop halaklahi ma dadaboruna, songon dia ma rupani dirinia sandiri dadaboruna i, jana ganop dadaboru angkon pasangapkon halaklahina.
6:1 Hamu angka dakdanak! Dibaen siihutkon Kristus *SIIHUTKON KRISTUS: Dipiga-piga-piga naskah narobi nada adong hata on.* do hamu, oloi hamu ma simatobangmunu, angke songon i do na patut baenonmunu. 6:2 "Pasangap ma amangmu dohot inangmu," i do parenta na parjolo na nilehen mardongan janji; 6:3 songon na nidok on, "Anso martua ho jana ginjang umurmu di tano on." 6:4 Hamu angka dongan na dung mardakdanak! Ulang ma baen hamu na so patut tu dakdanakmunu anso ulang gabe muruk halahi. Tapi gumonan do ajari hamu halahi di aturan dohot pangajaran ni Tuhan. 6:5 Hamu angka dongan na gabe hatoban! Oloi hamu ma parenta ni tuanmunu na di tano on. Mardongan sangap dohot biar ni roha jana burju ma baen hamu i songon na mangoloi Tuhan i sandiri. 6:6 Ulang ma hum hatiha dijagoi baen hamu songon i; jana ulang ma hum na giot mambuat roha ni jolma sajo. Tapi angkon gabe songon naposo ni Kristus do hamu na mangoloi hagiot ni Debata sian sandok roha. 6:7 Karejohon hamu ma karejomunu i, jana angkon marjop ni roha do hamu mambaen i songon na patupahon tu Tuhan, jana nada hum tu jolma sajo. 6:8 Angkon ingotonmunu do, angkon jagiton ni ganop halak na denggan roha do, sanga na hatoban sanga na anak mardeka, balos ni angka na denggan na nibaenna sian Tuhan i. 6:9 Hamu dongan na gabe tuan! Angkon laing songon i do hamu maradopkon angka hatobanmunu. Antak hamu ma na mamake ondam-ondam. Angkon ingotonmunu do, rap satuan do hamu dohot angka hatobanmunu i, i ma tu Tuhan na di banua ginjang i. Nada mardia imbar halak diSia. 6:10 Ujungna, sai margogo ma hamu markite-hite gogo na nijagitmunu sian kuaso ni Tuhan, angke madung sada hamu dohot Tuhan i. 6:11 Pake hamu ma sude sinjata na nilehen ni Debata tu hamu, anso tarbaen hamu martahan mangalo angka dalan na buni na sian Sibolis i. 6:12 Angke nada marporang hita mangalo jolma, tapi na laho mangalo gogo ni angka setan na markuaso di hatiha na jahat on do. Angka tondi na jahat na mangkuasoi awang-awang i do na taalo. 6:13 Hara ni i, saonnari pake hamu ma sasudena sinjata na sian Debata anso muda dapot hatihana ro na jahat i, margogo ma hamu mangalo angka serangan ni musu i. Jana anso lopus tu ujungna dung sidung parjuangan i, laing horas torkis hamu. 6:14 Tongtong ma hamu hobas! Pake hamu ma hasintongan songon bobatmunu, dohot hatigoran na songon baju bosimunu. 6:15 Haburjuon manjamitahon Jamita Na Denggan taringot tu hasonangan i, angkon i ma nian na gabe songon sipatumunu. 6:16 Sanga sadihari, paoban-oban hamu ma haporsayaanmunu na gabe parincemunu; haintopan hamu do sudena bisa ni angka na marapi sian na jahat i. 6:17 Jagit hamu ma haluaan na gabe songon kupia baja di hamu, dohot hata ni Debata na songon podang na sian Tondi Parbadia. 6:18 Mardongan tangiang mangido tolong tu Debata ma patulus hamu sudena i. Ulang hamu lupa martangiang ganop adong hatihana sanga hombar tu panogu-noguon ni Tondi Parbadia di hamu. Tongtong ma jonggor hamu. Tongtong ma martangiang hamu, manangiangkon sudena halak na porsaya. 6:19 Jana laing tangiangkon hamu ma dohot au, anso dilehen Debata di au hata na mardai muda hatiha mangkobari au. Boti anso puluk au pajojorkon rahasia ni Jamita Na Denggan i tu angka jolma. 6:20 Gabe utusan do au hara ni Jamita Na Denggan i jana di hurungan saonnari. Tangiangkon hamu ma anso puluk au mangkobari taringot tu Jamita Na Denggan i, songon na patut sidohononku. 6:21 Donganta pangoloi na burju di angka parkarejoan ni Tuhan i, i ma si Tikikus, ia ma paboahon tu hamu sudena pangalaho taringot tu au anso diboto hamu na masa tu au dohot karejongku. 6:22 Hara ni i ma umbaen na husuru ia mandapotkon hamu laho paboahon sanga na bia hami tu hamu sudena laho mangapoi rohamunu. 6:23 Sai dilehen Debata Ama, dohot Tuhan Jesus Kristus ma hasonangan dohot holong mardongan haporsayaan tu sude parlagutan i. 6:24 Sai dipasupasu Debata ma hamu angka dongan sudena na mangkaholongi Tuhanta Jesus Kristus mardongan holong ni roha na so muba-uba.
1:1 Sian si Paulus dohot si Timoteus, angka naposo ni Kristus Jesus, tu sude dongan sahaporsayaan di bagasan Kristus Jesus na di Pilippi, rap dohot di angka pamimpin dohot pangoloi. Hami na dua, si Paulus dohot si Timoteus naposo ni Kristus Jesus. 1:2 Asi ni roha ma di hamu dohot hasonangan sian Debata Amanta, dohot sian Tuhan Jesus Kristus. 1:3 Ganop taringot rohangku tu hamu, tongtong do mandok tarimakasi au tu Debata. 1:4 Jana ganop hutangiangkon hamu sudena, sai di bagasan jop ni roha do au na martangiang i. 1:5 Mandok tarimakasi do au tu Debata angke sian ari parjolo lopus tu saonnari, sai diurupi hamu do au pararatkon Jamita Na Denggan na sian Debata. 1:6 Debata sandiri do na mamungka karejo na denggan i di tonga-tongamunu. Jana pos do rohangku toruskononNia karejo i lopus tu ari haroro ni Kristus Jesus mangulahi. 1:7 Sai tongtong do di bagasan rohangku hamu sude. I do tutu tamana muda pe songon i pangkilalaanku taringot tu hamu. Angke na rap maruli do hamu sudena dohot au di silehen-lehen na nipasahat ni Debata di au; bope saonnari dompak tarhurung au sanga pe hatiha di ruar au laho mambela dohot mampartahankon Jamita Na Denggan i. 1:8 Sai lungun sajo do rohangku tu hamu angka dongan, mardongan pangkilalaan holong ni roha na solkot sian Jesus Kristus sandiri. Debata ma saksina, paboa na tutu na hudok i. 1:9 On do tangiangku salaho tu hamu: Anso nian mur mabagas holong ni rohamunu mardongan parbinotoan na sintong bope dohot panatapan na tumbuk, 1:10 anso malo hamu mamili na dumenggan. Muda songon i do hamu, ias ma ngolumunu sian tihas dohot tilako sanga aha pe di haroro ni ari ni Kristus mangulahi. 1:11 Angka pambaenan na denggan noma mardapot-dapot sian ngolumunu, hum sian Jesus Kristus sajo do na tarbaen pataridahon suha na songon i; gabe nipasangap jana nipuji-puji ma Debata. 1:12 Giotku diboto hamu ma nian, anggo angka pangalaho na masa tu au, i do mambaen mur rarat Jamita Na Denggan i. 1:13 Gabe sude ma angka pangawal ni bagas godang dohot angka halak na asing na dison umbotoan, tarhurung pe au hara ni na gabe sahalak naposo do au di Kristus i. 1:14 Jana dung di bagasan hurungan on au, gabe bahatan ma angka dongan sahaporsayaan gabe mur marpos ni roha tu Tuhan, mambaen halahi gabe mur puluk manjamitahon hata ni Debata so pola mardongan biar. 1:15 Tutu do nian adong deba sian halahi na manjamitahon Kristus hara ni na mangiburu bope hara ni na marsalisi, tapi anggo deba hara ni burju ni roha do manjamitahon Kristus i. 1:16 Anggo halahi hara ni holong ni rohana tu Debata do dibaen halahi songon i, mampartahankon Jamita Na Denggan i. 1:17 Tapi anggo halak na asing, nada denggan maksud ni halahi manjamitahon Kristus i; na patongon tu hagiotna do halahi na marjamita i. Ning roha ni halahi, mur tamba susa ma au di hurungan hara ni halahi. 1:18 Tapi aha ma pola i! Harana sanga na bia pe, denggan sanga na jat maksud ni halahi na manjamitahon i, laing Kristus do na nijamitahon i, jop do rohangku disi. Jana tongtong do songon i pangkilalaanku, 1:19 angke huboto do, hara ni angka tangiangmunu i dohot hara ni pangurupi ni Tondi Ni Jesus Kristus angkon malua do au. 1:20 Hum on ma i na sai hupangidohon dohot na huaropkon: Ulang nian gabe so tulus sidung karejongku. Sai diarop rohangku do tongtong lumobi saonnari anso mur puluk au sian sudena roha bope pamatangku -- sanga mangolu sanga na mate pe au -- laing nipasangap ma Kristus. 1:21 Harana anggo di au na mangolu on, mangolu di Kristus do, ia na mate au labongku do. 1:22 Tapi muda angkon mangolu do au di tano on, angkon karejohononku ma karejo na marparbatu. Gabe nada huboto be sanga na dia sipilionku. 1:23 Angke rap mandasdas do pangalaho na dua i tu au. Lungun sajo do nian rohangku manadingkon portibi on anso rap iba dohot Kristus, angke i do na dumenggan; 1:24 tapi hara ni na pasari-sari hamu gabe dumenggan dope au laing mangolu di tano on. 1:25 Pos do rohangku di na songon i. Hara ni i do umbaen na huboto, na laing dison dope au. Angkon laing rap do au dohot hamu sudena, anso tartolongi au hamu mur margogo jana mur masonang di bagasan haporsayaanmunu tu Tuhan i. 1:26 Hara ni i, muda dung lalu au di tonga-tongamunu, mur bahat ma pamujianmunu di bagasan Kristus Jesus hara ni au. 1:27 Antong parangehon hamu ma parange na tama tu Jamita Na Denggan na sian Kristus, anso muda ro au mangaligi hamu, sanga sian na dao hubege taringot tu hamu, bahaso na togu do hamu jongjong di bagasan sada tondi jana saroha laho marporang humopkop haporsayaan di Jamita Na Denggan i. 1:28 Angkon puluk do hamu tongtong; ulang mabiar hamu mida angka alomunu. I ma tandana di halahi, paboa na angkon talu halahi jana hamu ma na monang. Angke Debata sandiri do na mambaen hamu gabe monang. 1:29 Angke nada hum dalan mangkaporsayai Kristus na nilehen ni Debata tu hamu, tapi dohot do dalan tu parkancitan hara ni Kristus. 1:30 Saonnari dohot muse ma hamu rap dohot au di sada paraloan; i ma paraloan na dung niidamunu na salpu i huparalohon jana na laing huparalohon lopus tu sadari on songon na nibegemunu saonnari.
2:1 Nada he hara ni na mangolu i do hamu di bagasan Kristus umbaen na margogo hamu? Umbaen na tarapul pe hamu hara ni na holong do rohaNia mida hamu! Solkot pe hamu sama hamu, hara ni na nitogu-togu ni Tondi i do hamu, *NITOGU-TOGU NI TONDI DO HAMU: Sanga: Tondi Ni Debata do.* jana marsihaholongan muse do hamu bope marsiasi-asian. 2:2 Hara ni i pasonang hamu ma jolo rohangku di bagasan angka pangalaho sisongon on: Saroha ma hamu na mangolu i di bagasan holong ni roha na sarupa dohot pikiran na sarupa bope dohot tujuan na sarupa. 2:3 Ulang ma marsibaen di ibana laho manyarihon dirina be sanga laho manggodangkon dirina. Tapi gumonan ma sian toruk ni rohana be, etong hamu ma donganmunu na dumenggan sian hamu sandiri. 2:4 Ulang hum na mamikirkon dirina sajo hamu; angkon laing pikirkononmunu do haporluan ni dongan na asing. 2:5 Angkon songon parroha ni Kristus Jesus do hamu: 2:6 Anggo satutuna sarupa do Ia dohot Debata, tapi dihilala Ia nada pola angkon sai partahankononNia haDebataanNia i. *Ayat on bisa do diterjemahkon gabe songon on: Tapi nada porlu dirasa Ia ingkon gabe sarupa Ia dohot Debata.* 2:7 Tapi ditadingkon Ia do sudena i gabe sarupa tu sada hatoban. Gabe songon jolma Ia, jana ngoluNia pe idaon laing songon jolma do. 2:8 Dipatoruk Ia do diriNia jana burju do Ia mangoloi Debata lopus mate -- i ma mate tarsilang. 2:9 Hara ni i ma umbaen na nipatuginjang ni Debata Ia sagincat-gincatna, jana dilehen tuSia goar na gumodang sian sandok goar na asing. 2:10 Anso marsinggang ma di bagasan goar ni Jesus, sandok na di banua ginjang, na di tano on dohot na di toru ni tano on. *NA DITORU NI TANO ON: Mangihutkon pandapot dihatiha i, halak na dung mate, di na golap ditoru ni tano do inganan ni i.* 2:11 Angkon torang ma okuon ni halahi paboa Jesus Kristus do Tuhan; jadi nipasangap ma Debata Ama i muda songon i. 2:12 Hara ni i hamu angka dongan na nihaholongan, songon pangoloimunu tu au dompak di tonga-tongamunu au, saonnari pe haru dung padao-dao, angkon mur olo ma hamu nian tu au. Usahohon hamu ma tongtong anso mur sanggam haluaanmunu i. Mardongan biar dohot hitir ma baen hamu sudena i, 2:13 angke Debata sandiri do na markarejo di bagasan dirimunu, na mambaen hamu gabe ra jana sanggup pasonangkon roha ni Debata. 2:14 Ulang ma marungut-ungut sanga martongkar hamu mangkarejohon sanga na aha. 2:15-16 Di na songon i, patuduhon hamu ma paboa na tutu hamu dakdanak ni Debata, na so martilako, na bulus jana bonar di tonga-tonga ni angka halak na jahat dohot na mardosa. Jana di na palaluhon jamita taringot tu hangoluan i hamu tu halahi, angkon gabe songon sinondang na manorangi portibi on do hamu maradopkon halahi. Muda songon i ngolumunu, gabe adong ma dalan di au saulahon laho mamuji diringku hara ni hamu, di haroro ni Jesus Kristus mangulahi. I ma tandana, na so sayang boti parjuanganki jana marhasil do halolojangki. 2:17 Betak na angkon dohot dope haulkononku pamatangkon pasanggamkon haul na ni haulkonmunu i di bagasan haporsayaanmunu na gok tu Debata. Muda pe angkon songon i, mandok tarimakasi do au tu Debata hara ni i jana dohot ma au marjop ni roha rap dohot hamu. 2:18 Laing songon i ma sugari, mandok tarimakasi muse ma hamu jana dohot marjop ni roha rap dohot au. 2:19 Mardongan pangurupion ni Tuhan Jesus porsaya do au, manigor tarsuruhon au do si Timoteus manopot hamu; anso tarapul rohangku umbege barita taringot tu hamu. 2:20 Hum sada si Timoteus sajo ma i dison na tutu sapangkilalaan dohot au jana na tutu manyarihon hasonanganmunu. 2:21 Anggo na asing i do, hum na pareso tu dirina sandiri be do, jana nada tu haporluan ni Jesus Kristus. 2:22 Hamu sandiri pe madung diida hamu buktina na marguna si Timoteus. Marsitutu do ia na karejo i rap dohot au laho pararatkon Jamita Na Denggan i na sian Debata. Songon ama tu anakna do hami na dua. 2:23 Hara ni i, disi huboto sanga na tarbia ujung ni parkarongku sanoli on, manigor suruonku ma ia manopot hamu. 2:24 Porsaya do au muda ibo roha ni Tuhan, au sandiri pe nada pola sadia honok be, ro ma au manopot hamu. 2:25 Salaho tu donganta si Epafroditus na nisuruhonmunu mangurupi au, ninna rohangku porlu do ia husuru mangulahi tu hamu. Didongani ia do au di angka parkarejoan dohot parjuanganku. 2:26 Malungun situtu do ia mida hamu sudena jana marsak do rohania betak na dung lalu tu hamu barita paboa na marnyae ia. 2:27 Tutu do ia na marnyae, jabat giot mate. Tapi ibo do roha ni Debata disia, jana nada hum tusia sajo, tapi dohot do tu au, anso ulang mur martamba be arsakku. 2:28 Hara ni i muse ma umbaen na mur gogo rohangku marsuru ia mulak tu hamu, anso marjop ni roha hamu mangulahi dung marsuo dohot ia, jana rohangku pe gabe sonang. 2:29 Jadi jagit hamu ma ia di bagasan Tuhan i dohot sude jop ni roha songon dongan sahaporsayaan. Argahon hamu ma sanga ise halak na songon ia. 2:30 Hum hara ni haporluan ni karejo ni Kristus i, saotik nari noma anso mate ia. Martaru hosa do ia di na mangalehen pangurupi tu au hara ni goarmunu.
3:1 Tamba ni i ale dongan, marjop ni roha ma hamu di bagasan Tuhan i. Nada pola alang rohangku mandok mangulahi na dung hudok i di suratku dompak so i; angke na padenggankon do i tu haluaanmunu. 3:2 Jagohon hamu ma dirimunu maradopkon angka anjing i, jagohon hamu ma dirimunu maradopkon angka panyunat na so tutu. 3:3 Hape hita do angka na dung manjagit sunat na tutu, nada halahi. Hombar tu panogu-noguon ni Tondi Ni Debata sandiri do tasomba Debata, jana mandok tarimakasi do hita hara ni na dung mardomu i hita dohot Jesus Kristus. Nada marguru tu angka upacara na tarida hita. 3:4 Nian tarbaen au do marguru tu angka upacara i. Angke sugari adong halak na mandok di bagasan rohana tarbaen ia marguru tu angka upacara i ia, mur au ma. 3:5 Marumur salapan ari, ma disunat au. Halak Israel do au, sian Marga Benyamin; halak Ibrani asli do au. Salaho tu na mangoloi angka Tona ni ugamo Jahudi, au ma sahalak anggota ni golongan Parise. 3:6 Songon i ma situtu ni rohangku jabat do huparkanciti parlagutan i. Muda nitimbang sian angka Tona ni ugamo Jahudi, au ma sada halak na burju na so adong hurangna. 3:7 Tapi hara ni Kristus, sasudena na huetong parlaboan najolo, anggo saonnari gabe hararugi noma i. 3:8 Nada hum i dope, huetong do sasudena i gabe angka na parugi-rugihon au sajo. Ummarga do na adong di au saonnari on: I ma na mananda Jesus Kristus Tuhanki. Hara ni Kristus, gabe hupalua do sasudena. Songon rompak-rompak noma i sude huhilala, anso laing dapot au Kristus, 3:9 jana tutu mardomu dohot Ia. Hadengganan dohot Debata nada be huusahohon sandiri dohot dalan pangoloion tu angka Tona ni ugamo. Denggan pe pardomuanku saonnari dohot Debata, hara ni na huhaporsayai do Kristus. Jadi, sian Debata do haroroan ni pardomuan na denggan i, jana marojahan ma i di haporsayaan tu Jesus Kristus. 3:10 Hum on ma na nipangido ni rohangku; anso hutanda nian Kristus jana hurasoi nian kuaso na pangoluhon Ia sian hamatean i. Por do rohangku markancit dohot Ia jana gabe sarupa dohot Ia di pangalaho ni parmateNia. 3:11 Jana arop do rohangku, nisunggulan ma au sian hamatean anso mangolu mangulahi. 3:12 Nada hudok na dung marhasil au, sanga na dung gabe sanggam. Tapi na torus dope au marusaho manjalahi upa na niparade ni Jesus Kristus i. Hara ni i do umbaen na nitangkupNia au jana dibaen Ia gabe nampunaNia. 3:13 Nada na dung huhilala angka dongan, songon na dung di tanganku upa i. Tapi na adong do sada pangalaho na hubaen disi, huhalupahon na di pudingku jana hugogo parayak na adong di jolongku. 3:14 Hara ni i ma umbaen na torus hulojong manuju tu tujuan na parpudi anso dapot au hamonangan, i ma ngolu na di banua ginjang; hara ni i do umbaen na nipio ni Debata hita markite-hite Jesus Kristus. 3:15 Hara ni i sudena hita na dung impas godang di ngolu partondion, angkon songon i ma nian. Tapi betak sai adong sian hamu na asing pandapotna, laing patangkason ni Debata muse ma i tu hamu. 3:16 Sada nari na porlu parrohahonon: Angkon ihutkononta do tiruan na dung tajagit i lopus tu hatiha on. 3:17 Hamu angka dongan sudena! Tiru hamu ma au. Madung hami patuduhon tiruan na tigor, jadi denggan ma parrohahon hamu sanga ise angka na mangihutkon tiruan na hami baen i. 3:18 Madung jotjot nian hupaboa tu hamu, jana huulahi muse saonnari mardongan ilu; bahat do halak na mangolu songon musu maradopkon hayu parsilang ni Kristus i. 3:19 Anggo ujungna angkon gabe sego do ngolu ni halak sisongon i, angke na martuhankon hagiot ni pamatangna sandiri do halahi. Angka pangalaho sihailahononkon, hape gabe i do na niargahon ni halahi; angke hum angka na mardomu tu tano on sajo do na nisarihonna. 3:20 Tapi anggo hita rayat ni banua ginjang do. Laing sian i muse ma ro Tuhan Jesus Kristus Sipalua i. Ia do na sai tapainte-inte i mardongan lungun ni roha. 3:21 Anggo pamatangta na gale boti na ra madangke on, paubaon ni Kristus do i gabe marsangap songon pamatangNia sandiri. Tarbaen do songon i angke adong do kuasoNia laho manaluhon sasudena.
4:1 Hara ni i hamu ale angka dongan na nihaholongan, sai porsaya situtu ma hamu tu Tuhan i di ngolumunu on. Lungun do rohangku tu hamu! Hamu do na pagodang rohangku, hajopan ni rohangku. 4:2 Hupaingot do si Euodia dohot si Sintike anso saroha halahi di bagasan Tuhan i. 4:3 Laing hupangido dope tu ho, donganku na bonar roha i sai urupi ma halahi, na dung marporang rap dohot au hara ni Jamita Na Denggan i rap dohot si Klemen dohot donganku saparkarejoan na asing i, na tarsurat do goar ni halahi di buku hangoluan i. 4:4 Marjop ni roha ma hamu tongtong di bagasan Tuhan i! Sanoli nari hudok: Marjop ni roha ma hamu! 4:5 Angkon idaon ni halak ma nian pangalahomunu sian roha na denggan. Madung donok Tuhan i. 4:6 Ulang pola holoskon hamu sanga na aha. Sanga dia pe na masa, martangiang ma hamu jana pasahat hamu ma pangidoanmunu tu Debata. Sanga aha na porlu di hamu, paboa hamu ma i tongtong tu Debata mardongan roha na mandok tarimakasi. 4:7 Hasonangan ni Debata na sumurung sian sude roha, manjagahon roha dohot pikiranmunu di bagasan Kristus Jesus. 4:8 Ujungna, ale angka dongan, bagi aha na sintong, na pantun, na tigor, na ias, na jeges, na denggan begeon, angka parange na denggan jana sipujion, i ma pikiri hamu. 4:9 Jana sanga aha na dung niguruhon jana nijagitmunu, dohot sanga aha na dung nibege jana niidamunu sian au, karejohon ma i; gabe donganan ni Debata mual ni hasonangan i ma hamu. 4:10 Marjop ni roha situtu do au di bagasan Tuhan i, dibaen margogo hamu mangulahi manyarihon au. Disarihon hamu do au nian, tapi nada adong hatihamu di hatiha na jolo i. 4:11 Tapi hudok pe songon i nada na mandok adong na hurang di au sanga aha, harana madung huparsiajari mangkasonangkon sanga aha na adong. 4:12 Madung hurasoi do ngolu na marhahurangan, dohot ngolu na marlobi-lobian. Huboto do rahasiana laho mangadopi sude na masa sanga na bia pe: Bope di hatiha butongan sanga hatiha malean, di hatiha marlobi-lobian sanga pe di na hurangan. 4:13 Markite-hite kuaso na nilehen ni Kristus i tu au, taradopi au do sude ragam-ragam ni angka na masa. 4:14 Tapi madung diurupi hamu au di sudena hasusaanku; jana na denggan do pambaenanmunu i. 4:15 Hamu angka dongan na maringanan di Pilippi! Tangkas do diboto hamu di na kehe au sian Makedonia na salpu i, di na pararatkon Jamita Na Denggan i parjolo situtu, hum hamu sajo ma i parlagutan na mangurupi au; hum hamu sajo ma na dohot mandai untung rugina rap dohot au. 4:16 Dompak di Tessalonika au di na porlu pangurupion di au, nada hum sanoli be ditongos hamu bantuan tu au. 4:17 Nada hum silehen-lehenmunu i na giot jagitonku, tapi anso huida do angka suha na patamba hauntunganmunu, i do na huhalungunkon. 4:18 Madung hujagit sasudena -- dohonon marlobi-lobi dope! Sude silehen-lehen na nitongosmunu i tu au, madung hujagit sian si Epafroditus. Saonnari madung tuk di au sanga aha haporluanku. Songon uap na huskus na sian haul na nihaulkon tu Debata jana na nihalomohon ni roha ni Debata, songon i do angka silehen-lehenmunu i. 4:19 Pasingkopon ni Debatangku ma sudena na hasaya di hamu mangihutkon hagabeanNia na so tarsuhat i na adong di Kristus Jesus. 4:20 Sai tapuji ma Debata Amanta i salolot-lolotna! Amen. 4:21 Pabolkas hamu ma tabengku tu sudena halak na badia di bagasan Kristus Jesus. Jana jagit hamu muse ma tabe sian angka dongan na rap dohot au dison. 4:22 Sudena halak na badia dison, lumobi sian halahi na sian bagas godang ni Kesar i, manongos tabe do tu hamu angka dongan. 4:23 Sai ibo ma roha ni Tuhan Jesus Kristus, dipasupasu ma hamu sudena.
1:1 Sian si Paulus, rasul ni Kristus Jesus markite-hite hagiot ni Debata, dohot si Timoteus donganta i, 1:2 tu angka dongan sahaporsayaan di bagasan Kristus na di Kolosse; i ma angka na badia. Asi ni roha ma di hamu dohot hasonangan na sian Debata Amanta, i ma na mandongani hamu. 1:3-4 Madung hami bege, na dihaporsayai hamu Jesus Kristus jana dihaholongi hamu do sudena halak na badia. Jadi muda hatiha hami tangiangkon hamu, gabe tongtong do mandok tarimakasi hami tu Debata, Ama ni Tuhanta Jesus Kristus. 1:5 Hara ni angka na niarop ni rohamunu tu na niparade ni Debata di hamu di banua ginjang i, gabe porsaya jana marholong ni roha do hamu. Madung dibege hamu taringot tusi di na nipasahat tu hamu hatatangkas ni barita taringot tu Jamita Na Denggan i na sian Debata. 1:6 Mur rarat do barita na sian Debata tu portibi on sudena, jana madung dipasupasu ngolu ni jolma hara ni barita i, songon na masa tu ngolumunu. Sian mula-mulana dibege hamu taringot tu asi ni roha ni Debata jana tutu do diauhon hamu, ngolumunu pe madung dipasupasu. 1:7 Si Epafras do na pasahatkon i tu hamu, i ma ale-ale haholongannami i. Parkarejo ni Kristus do ia na sai burju tongtong markarejo laho manyarihon hamu. 1:8 Laing ia muse do na paboahon tu hami taringot tu holongmunu na di bagasan Tondi. 1:9 I do umbaen na hami tangiangkon hamu tongtong mamungka hami bege taringot tu hamu. Hami pangido do tu Debata anso dilehen Tondi Parbadia nian di hamu hamaloan dohot pangastuion anso diboto hamu tangkas sanga aha na nipangido ni roha ni Debata. 1:10 Jadi gabe tarbaen hamu ma mangolu mangihutkon na nipangido ni roha ni Debata bope na pasonangkon rohaNia tongtong, anso sai tarpatidahon hamu angka pangalaho na denggan di sude karejomunu. Jana mur martamba muse ma parbinotoanmunu taringot tu Debata. 1:11 Sai dipatogu kuaso na sian Debata na gumodang i ma nian hamu, anso tahan hamu manaonkon sanga aha pe na ro, di bagasan sobar dohot jop ni roha 1:12 mardongan tarimakasi tu Ama i. Angke Ama i do na patumbukkon hamu gabe rayat di harajaan na tiur. 1:13 Madung dipalua Ia hita sian kuaso ni hagolapan jana dipaimbar Ia hita tu bagasan kuaso ni pangarajaion ni Anak haholonganNia i. 1:14 Di bagasan Ia do adong di hita haluaan, i ma hasesaan ni dosa. 1:15 Ia do gambaran ni Debata na so tarida, siangkaan ni sude na nitompa i. 1:16 Angke markite-hite Ia do ditompa sasudena na adong, di banua ginjang dohot di tano on, i ma sasudena na tarida dohot na so tarida; angka habangsa, angka pangarajai, angka paruhum sanga parkuaso; sasudena i madung nitompa markite-hite Ia jana tuSia. 1:17 Dompak so adong dope sanga na aha, madung jolo adong hian Kristus. Jana hara ni Ia muse do gabe hot diingananna be sasudena na adong i. 1:18 Ia do ulu ni pamatang i, i ma parlagutan i, angke Ia do na mangalehen ngolu tu parlagutan i. Ia do siangkaan na dipangolu mangulahi sian hamatean, hara ni i muse ma umbaen na gabe Ia na umporlu sian sasudena na adong. 1:19 Na nihagiotan ni Debata sandiri do anso sasudena na dapot di bagasan diri ni Debata sandiri adong muse sudena i di diri ni AnakNia i. 1:20 Jana markite-hite Anak i muse do dibaen Debata sasudena mardenggan mangulahi dohot Debata -- sasudena na di tano on, sanga pe na adong di banua ginjang. Markite-hite hamamate ni AnakNia di hayu parsilang i do dibaen Debata sudena i. 1:21 Najolo dao do hamu sian Debata. Marmusu do hamu tuSia di bagasan parange dohot pikiranmunu na jahat i. 1:22 Tapi anggo saonnari madung dipadame Ia hamu di bagasan pamatangNia markite-hite hamatean i, anso badia hamu, nada martihas jana na so sipincangon maradopkon Ia. 1:23 Hara ni i angkon ojak jana togu do hamu di bagasan haporsayaan i, jana nada ra be hamu nipaorot sian arop ni roha ni Jamita Na Denggan na dung binegemunu. Madung dijamitahon jamita i tu sude na nitompa di tano on, jana na dung gabe naposo ni i do au si Paulus. 1:24 Saonnari jop do rohangku manaon parkancitan laho pasari-sari hamu. Angke hara ni sitaonon na adong di pamatangkon, hupaujung do sanga aha dope na angkon taonon ni Kristus hara ni parlagutanNia i, i ma pamatangNia i. 1:25 Debata do marsuru au gabe pangoloi di parlagutan i laho manyarihon hamu. Angkon pabolkasonku do sudena barita na sian Debata; 1:26 i ma jamita na nirahasiahon ni Debata tu sude jolma marribu taon honokna, hape saonnari dijamitahon do i tu angka halakNia na badia. 1:27 Anggo tu bangsoNia i ra do Debata paboahon sanga na bia dengganna dohot godangna rahasiaNia i di sudena jolma manusia. On do rahasia i: Di bagasan dirimunu do Kristus, jadi gabe dohot ma hamu maruli di hagodangan ni Debata. 1:28 Kristus do na hami jamitahon tu ganop halak. Hami paingot do halahi sudena jana hami ajari mardongan sudena hamaloan na adong di hami. Anggo tujuannami, anso sude do jolma taroban tu Debata songon halak na dung impas godang di angka pangalaho partondion, hara ni na dung mardomu dohot Kristus. 1:29 Hugogoi do markarejo anso lalu tu tujuan i. Marjuang do au mamake sude gogo na nipasahat ni Kristus di au jana na markarejo di bagasan diringku.
2:1 Giotku sugari diboto hamu ma nian sanga na bia parjuanganku di bagasan rohangku hara ni hamu bope hara ni halahi na di Laodikea dohot sude na so mananda au sandiri dope. 2:2 Sai margogo ma nian roha ni halahi, jana marsihaholongan ma halahi anso gabe solkot halahi mardomu. Muda tutu halahi mangarti gabe maruli pos ni roha situtu ma halahi. Jadi mur tangkas muse ma tandaon ni halahi rahasia ni Debata; i ma Kristus sandiri. *RAHASIA NI DEBATA; I MA KRISTUS SANDIRI: Dipiga-piga-piga naskah narobi didok: Rahasia ni Debata; adong muse: Rahasia ni Debata, Ama ni Kristus; adong muse: Rahasia ni Debata dohot rahasia ni Kristus.* 2:3 Harana dibagasan Ia do buni sude arta habisuhon dohot hapistaran. 2:4 Hupaboa pe i tu hamu, anso ulang adong do sanga ise na paoto-otohon hamu dohot hata na tabo begeonmunu. 2:5 Angke haru pe dao au sian hamu, anggo tondingku rap do dohot hamu. Jana jop do rohangku mida hamu, di na togu hamu mangkaporsayai Kristus jana marsada roha. 2:6 Madung dijagit hamu Jesus Kristus gabe Tuhan. Hara ni i angkon sahangoluan ma hamu dohot Ia, 2:7 jana marurat tuSia ma hamu. Pajongjong hamu ma ngolumunu jana Kristus ma baen hamu ojahanna. Sugari mur margogo ma nian haporsayaanmunu hombar tu na dung diajarkon tu hamu. Jana sai mur marsigorgor ma rohamunu mandok tarimakasi. 2:8 Manat ma hamu, ulang jabat adong na manarik hamu markite-hite angka hapistaran ni jolma na so marguna, tapi hum na palilu-liluhon sajo. Nada sian Kristus angka hapistaran na songon i, tapi sian angka panurirangon ni jolma sajo do i dohot sian panarik ni angka tondi ni pangarajai ni portibi on. 2:9 Angke sasudena hadirion ni Debata dapot do di Kristus, i ma di bagasan hajolmaonNia. 2:10 Jana di na mardomu dohot Kristus, sanggam ma ngolumunu dibaen Ia. Angke Kristus do uluan ni sude tondi na markuaso dohot na mamarenta. 2:11 Di na mardomu dohot Kristus, madung disunat hamu. Nada dohot sunat na nibaen ni jolma, tapi dohot sunat na nibaen ni Kristus do; i ma markite-hite na paluahon hamu sian bako ni jolma na adong hian di hamu. 2:12 Angke di na nididihon i hamu, ditanom do hamu rap dohot Kristus; jana laing hara ni pandidion i muse, dohot do hamu dipangolu mangulahi rap dohot Kristus angke dihaporsayai hamu do kuaso ni Debata na dung pangoluhon Kristus sian hamatean. 2:13 Najolo madung mate hamu anggo salaho tu partondion hara ni na mardosa hamu, boti hara ni na so marsunat pamatangmunu. Tapi saonnari dipangolu Debata do hamu rap dohot Kristus, dibaen madung diampuni Debata sasudena dosanta, 2:14 jana disoadahon Ia sude surat utang maradopkon hita, i ma na mangancam hita dohot angka sarat na borat. Di na niparsilangkon surat i di hayu parsilang i, disesa Debata ma sudena utang na tu hita i. 2:15 Sude angka tondi na mamarenta dohot na markuaso gabe gale noma di parsilang ni Kristus i. *SUDE ANGKA TONDI NA MAMARENTA DOHOT NA MARKUASO GABE GALE NOMA DI PARSILANG NI KRISTUS I: Sanga: Dipalua Kristus do diriNa sian angka tondi na mamarenta dohot na markuaso.* Gabe sitontonan ni halak na bahat noma halahi dibaen, di na niiring ni Kristus halahi songon halak na tartaban di uduran ni hamonanganNia. 2:16 Jadi hara ni i, ulang ma padiar hamu digorahon halak hamu hara ni sipanganon sanga siinumon sanga hara ni ari pesta ni ugamo, sanga angka pesta poltak ni bulan sanga pe hara ni Ari Sabat. 2:17 Halinu ni angka pangalaho na giot ro do sudena i, tapi anggo na satutuna Kristus do! 2:18 Ulang hamu ra digorahon halak na paula-ula martoruk roha jana na manyomba angka surusuruan. Angka siginjang roha do sudena i hara ni angka pikiran ni halahi na marojahan tu portibi on. Na marguru tu angka parnidaanna do i, 2:19 jana nada ditiop ia Ulu i, pangkal ni pamatang i, na niihotan markite-hite angka urat dohot doldol gabe sada, na tubu markite-hite hangoluan na nilehen ni Debata. 2:20 Madung mate hamu rap dohot Kristus jana madung dipalua hamu sian angka tondi na mangarajai portibi on. Biasi dope laing songon halak na nirajaan ni portibi on ngolumunu? Biasi paolo-oloanmunu dope angka paraturan na songon on, 2:21 "Ulang jama hamu on", "Ulang dai hamu i", "Ulang antul hamu indon dohot indi"? 2:22 Sude angka paraturan na songon i, taringot tu angka pangalaho na so marguna do i sudena muda dung dipake sanoli. Angka paraturan dohot pangajaran na nibaen-baen ni jolma do i. 2:23 Tutu nian anggo idaon songon na tumbuk do i, angka na manganjurkon halak anso manyomba surusuruan, martoruk ni roha dohot na mamparkanciti diri; tapi sudena i nada adong gunana anggo na laho mangatur hagiot ni jolma. *NADA ADONG GUNANA ANGGO NA LAHO MANGATUR HAGIOT NI JOLMA: Sanga: Nada marguna asing sian na giot mamuaskon hagiot ni jolma.*
3:1 Madung dipangolu hamu mangulahi rap dohot Kristus. Hara ni i angkon marusaho be ma hamu anso dapot hamu angka pangalaho na di banua ginjang, di inganan ni Kristus juguk di siamun ni Debata. 3:2 Tu angka pangalaho na disi ma tujuhon hamu pikiranmunu ulang ma tu angka na di tano on. 3:3 Angke madung mate hamu, jana buni do ngolumunu rap dohot Kristus di bagasan Debata. 3:4 Kristus do ngolu na so mantak di hamu jana muda ro Ia saulahon patidahon diriNia, dohot muse ma hamu rap dohot Ia di bagasan hasangapanNa i! 3:5 Hara ni i, matehon hamu ma angka hagiot ni portibi on na manyego-nyego dirimunu, i ma angka na mambaen na so ture, pangalaho na hodar, hisap ni sibuk, parhagiot na jahat, na songkal (halak na songkal sarupa do i dohot na marsomba gana-ganaan). 3:6 Angka pangalaho na songon i ma na pasunggul-sunggul rimas ni Debata maradopkon angka halak na so mangoloi Ia. *MARADOPKON ANGKA HALAK NA SO MANGOLOI IA: Dipiga-piga-piga naskah narobi nada adong hata on.* 3:7 Hamu sandiri pe najolo diihutkon hamu do angka hagiot na songon i, hatiha dirajai ia ngolumunu. 3:8 Tapi anggo saonnari angkon ambungkononmunu do angka pangalaho sisongon on sian dirimunu: Muruk, na manyonggahi dohot na margoyak ni roha mida halak. Ulang jabat ruar hata sian hamu na panyaor-nyaorkon sanga hata na hodar. 3:9 Ulang marsigabusan hamu, harana madung ditadingkon hamu ngolumunu na honok i rap dohot sude bakona i. 3:10 Madung dipapakehon tu hamu ngolu na imbaru, na laing torus dipaimbaru anso dapotan parbinotoan na sintong mangihutkon rupa ni Panompania. 3:11 Hara ni sasudena i gabe mago ma angka parasingan ni halak Jahudi dohot na so Jahudi, halak na marsunat dohot na so marsunat; nada adong be parasingan ni angka bangso; nada adong be hatoban sanga na mardeka; angke hum Kristus noma sasudena. Mardomu do Kristus dohot halahi sudena! 3:12 Antong hamu angka na dung dipuldit ni Debata, na diparbadia i jana na dihaholonginNia, pake hamu ma ibo ni roha, habasaron, toruk ni roha, lambok ni roha dohot hapohomon. 3:13 Angkon sobar do hamu maradopkon dongan jana marsimaapan muda adong na so tabo pangkilalaanna tu donganna. Madung di ampuni Tuhan hamu, jadi hamu pe angkon marsiampunan do sama hamu. 3:14 Jana na umporlu: Angkon marsihaholongan do hamu sama hamu, angke holong i do na pasadahon hamu sudena gabe sanggam. 3:15 Angka haputusan sibaenonmunu, tontuhon hamu ma i mardongan dame na nilehen ni Kristus tu bagasan rohamunu. Angke na nipiohon ni Debata do hamu gabe sada pamatang, anso mangolu hamu sian hadamean na sian Kristus i. Mandok tarimakasi ma hamu. 3:16 Sai mur maringan ma angka pangajaran ni Kristus tu bagasan rohamunu jana dilehen ma pasupasuNa di hamu mardapot-dapot. Marsiajar-ajaran ma hamu jana marsipaingotan samalomunu. Endehon hamu ma Masmur dohot puji-pujian bope angka ende partondion tu Tuhan. Mardongan hatarimakasion sian bagasan rohamunu, marende ma hamu tu Debata. 3:17 Pendekna, sanga aha sikarejohonon sanga sidokkononmunu, angkon mangasahon Tuhan Jesus do karejohonon jana dokkononmunu i. Jana mandok tarimakasi ma hamu tu Debata Ama i markite-hite Jesus. 3:18 Hamu angka ina! Oloi hamu ma halaklahimunu, angke songon i do parange na tama baenonmunu patandahon na Kristen hamu. 3:19 Hamu angka ama! Haholongi hamu ma dadaborumunu. Ulang jungkat hamu tu halahi. 3:20 Hamu angka dakdanak! Tugasmunu do songon halak Kristen hamu, mangoloi simatobangmunu tongtong, angke na songon i do na pajopkon roha ni Debata. 3:21 Hamu angka ama! Ulang ma hanciti hamu roha ni angka dakdanakmunu, anso ulang gabe mandele halahi. 3:22 Hamu angka hatoban! Sanga na bia pe, oloi hamu ma tuanmunu na di tano on. Ulang ma hum hatiha dijagoi halahi hamu, mangoloi hamu tu halahi, anso dapotan pujian hamu sian halahi. Sian rohamunu ma oloi hamu halahi, hara ni biar mida Tuhan. 3:23 Sanga karejo aha pe dipasahat tu hamu, karejohon hamu ma i sian sude rohamunu songon na patupahon tu jolo ni Tuhan, nada songon na patupahon tu jolma. 3:24 Diboto hamu do bahaso sian Tuhan i do jagitonmunu, na dung ditontuhon hian. Kristus do Tuan i jana hamu ma angka hatobanNia. 3:25 Harana sanga ise na marsala, tanggungonna ma angka hasalaanna i; angke sarupa do sudena jolma diida Tuhan i.
4:1 Hamu angka tuan! Baen hamu ma na sintong dohot na tigor tu angka hatobanmu. Ingot hamu ma, hamu pe adong dope tuanmunu di banua ginjang. 4:2 Pupu hamu ma na martangiang jana jonggor ma hamu. Mandok tarimakasi ma hamu tu Debata. 4:3 Laing tangiangkon hamu ma hami anso dilehen Debata di hami hatiha na denggan laho pararatkon rahasia na sian Debata taringot tu Kristus i. Angke hara ni i do umbaen na pola tarhurung au saonnari. 4:4 Tangiangkon hamu ma anso tarpajojor au rahasia i satangkas-tangkasna sanga songon dia na sapatutna. 4:5 Di angka pardomuanmunu tu angka halak na so porsaya malo ma hamu na mangolu i jana ganop adong hatiha na tumbuk, pake hamu ma i sadenggan-dengganna. 4:6 Sanga aha pe na nidokmunu sai na tabo begeon ma, jana sai hata na mardai ma dokkon hamu. Malo ma hamu sanga tarsongon dia sadengganna mangalusi angka sapa-sapa ni halak. 4:7 Si Tikikus donganta i ma paboahon tu hamu sasudena na mardomu tu au. Burju do ia markarejo rap dohot hami tu Tuhan i. 4:8 Husuru do ia manopot hamu anso diboto hamu sanga na bia hami jana anso tarapul rohamunu. 4:9 Rap kehe do si Onesimus dohot si Tikikus; halak hamu on do ia. Ia pe na burju do jana holong do rohanami disia. Paboaonnia ma dohot si Tikikus tu hamu sasudena na masa di inganankon. 4:10 Tarhurung do si Aristarkus rap dohot au. Palalu tabe do ia tu hamu. Songon i si Markus ipar ni si Barnabas i. (Madung dipalalu tona tu hamu laho mangalo-alo ia muda ro ia tu hamu on.) 4:11 Tabe sian Jesus, i ma na nigoaran muse si Justus, sian sude halak Jahudi na mangkaporsayai Tuhan Jesus, hum halahi na tolu sajo noma saonnari na laing rap karejo dohot au laho mandalankon karejo na sian Debata. Tutu do diurupi halahi au. 4:12 Tabe ni si Epafras di hamu. Laing sian hamu on do asalnia. Naposo ni Jesus Kristus do ia, na sai manangiangkon hamu. Marsitutu do ia mangido tu Debata anso margogo hamu nian jana anso tongtong togu; boti muse anso laing mardongan pos ni roha na togu hamu mangoloi hagiot ni Debata. 4:13 Husaksihon sandiri do na dung marsitutu ia karejo manyarihon hamu dohot angka dongan na di Laodikea dohot Hierapolis. 4:14 Dokter Lukas na tahaholongi i, dohot si Demas laing manongos tabe do tu hamu. 4:15 Laing palalu hamu ma tabenami tu angka dongan Kristen na di Laodikea; bope tu si Nimpa dohot tu parlagutan na marsomba di bagasnia i. 4:16 Dung sidung disise surat on di tonga-tongamunu, laing usahohon hamu ma anso laing disise muse di parlagutan na di Laodikea. Laing sise hamu ma di tonga-tongamunu surat na giot tongoson sian Laodikea tu hamu. 4:17 Jana tonahon hamu ma tu si Arkippus, "Pasidung ma karejo na dilehen tu ho laho mangoloi Tuhan." 4:18 Tabe sian au si Paulus. Au sandiri do na manyurat bagian on. Ulang lupa hamu bahaso na tarhurung dope au! Sai dipasupasu Debata ma hamu tongtong.
1:1 Sian si Paulus, Silvanus dohot si Timoteus tu parlagutan ni halak Tessalonika na di bagasan Debata Ama dohot Tuhan Jesus Kristus. Asi ni roha dohot hasonangan ma di hamu! 1:2 Sai tongtong do hami mandok tarimakasi tu Debata hara ni hamu sudena, jana sai hami ingot do hamu di bagasan angka tangiangnami. 1:3 Muda hatiha mangadop hami tu Debata Amanta i, sai tongtong do hami ingot hamu, i ma karejo na nipatupamunu hara ni haporsayaanmunu tu Kristus, bope holong ni rohamunu maradopkon dongan na asing jabat disarihon hamu halahi dohot arop ni rohamunu na togu maradopkon Tuhanta Jesus Kristus. 1:4 Hami boto do ale angka dongan, na tutu holong roha ni Debata tu hamu jana madung dipili Ia hamu anso gabe Ia nampuna hamu. 1:5 Angke di na manjamitahon Jamita Na Denggan i hami tu hamu, nada hum hata-hata sajo na hami jamitahon i, tapi mardongan kuaso na sian Tondi Parbadia do. Jana pos situtu do rohamunu na tutu do Jamita Na Denggan i. Diboto hamu do sanga na bia ngolunami laho manyarihon hamu dompak di tonga-tongamunu hami. 1:6 Madung gabe ditiru hamu tiruannami dohot tiruan ni Tuhan i. Haru pe markancit situtu hamu, laing dijagit hamu do hata i mardongan jop ni roha. Tondi Parbadia do na mangalehen jop ni rohamunu i. 1:7 Di na songon i, gabe tiruan do hamu tu sude angka na porsaya na adong di Makedonia dohot na di Akaya on. 1:8 Angke mamungka sian hamu do rarat barita taringot tu Tuhan Jesus tu Makedonia dohot Akaya. Jana nada hum i sajo; barita ni haporsayaanmunu pe tu Debata, madung tarbonggal sun tu dia, gabe nada adong be pola na porlu sidokkononnami. 1:9 Halahi sandiri do mamaritahon sanga na bia panjagitmunu di hami dompak na ro i hami manopot hamu. Dicaritohon halahi do sanga na bia panadingkonmunu di angka gana-ganaanmunu dohot haroromunu mandapotkon Debata na mangolu jana na tutu i laho marsomba tuSia. 1:10 Laing di hatahon halahi do sanga na bia ngolngolna pangkilalaanmunu painte-intehon haroro ni Anak Ni Debata sian banua ginjang; i ma Jesus na dung dipangolu Debata sian hamatean i. Laing Jesus i do na paluahon hita sian rimas ni Debata na giot ro i.
2:1 Hamu ale angka dongan! Tangkas do diboto hamu nada sayang boti haroronami mandapotkon hamu. 2:2 Diboto hamu do dompak so ro hami mandapotkon hamu tu Tessalonika, na dung jolo marhancit do hami jana marlayas di Pilippi. Hape madung dilehen Debata do tu hami habaranion laho manjamitahon Jamita na Denggan na sian Debata i tu hamu haru bahat pe paraloan tu hami. 2:3 Harana nada tu na paliluhon anggo sipaingotnami maradopkon hamu; nada muse adong disi maksudnami na so ias sanga na giot mangakal-akali. 2:4 Nada! Nada na giot pasonang-sonang roha ni jolma hami manghatai. Na giot pasonang roha ni Debata do hami muda manghatai. Debata do na dung manguji rohanami jana na dung mangangkat hami laho manjamitahon Jamita Na Denggan i. 2:5 Tangkas do diboto hamu na so jungada hami pake hata lancap sanga na hami tipu hamu anso dapotan untung hami. Debata ma saksina! 2:6 Jana nada jungada hami jalahi pujian sian jolma -- sanga sian hamu bope sian halak na asing. Songon rasul ni Kristus anggo satutuna, tola sajo do pangidoonnami sanga aha na porlu sian hamu. 2:7 Tapi lambok do pambaennami tu hamu, songon sada ina *TAPI LAMBOK DO PAMBAENNAMI TU HAMU, SONGON SADA INA: Dipiga-piga naskah narobi didok: Songon dakdanak do hami dompak ditonga-tongamunu; songon sada ina do hami.* na marorot dohot na pature-turehon dakdanaknia. 2:8 Songon i do hami, di bagasan holong ni rohanami na situtu di hamu, nada hum Jamita Na Denggan i, tapi dohot do ngolunami sandiri hami lehen di hamu. 2:9 Tontu laing tangkas dope diingot hamu ale angka dongan, na marsitutu be do hami markarejo. Karejo do hami arian na borngin anso ulang susa hami baen sanga ise sian hamu salolot na mamaritahon Jamita Na Denggan na sian Debata i hami tu hamu. 2:10 Hamu do saksinami, songon i dohot Debata, na ias, tigor, jana na so martihas do pangalahonami adop hamu na porsaya. 2:11 Diboto hamu do, songon sada ama maradopkon angka dakdanakna do pambaennami maradopkon hamu. 2:12 Hami paingot, hami sosoi jana hami jujui do hamu anso mangolu hamu mangihutkon na tumbuk di roha ni Debata, na mamiohon hamu tu bagasan Harajaan bope hasangapanNia. 2:13 Adong dope sada nari pangalaho na mambaen hami angkon tongtong mandok tarimakasi tu Debata. I ma, hara ni panjagitmunu di jamita na sian Debata dompak hami jamitahon tu hamu. Nada songon jamita na sian jolma i dijagit hamu tapi songon jamita na sian Debata do. Jana na sian Debata do i tutu! Na markarejo do hata ni Debata di bagasan dirimunu na mangkaporsayai Kristus. 2:14 Jana hamu pe angka dongan, madung ditiru hamu angka parlagutan ni Debata, arta ni Kristus na di Judea. Hamu pe madung ditaon hamu parkancitan sian dongan sabangsomunu sandiri laing songon na nitaon ni angka parlagutan ni Debata na di Judea sian angka halak Jahudi. 2:15 Halak Jahudi i do na mamunu Tuhan Jesus dohot angka panurirang, hami pe diparkanciti halahi muse do. Sai torus do dialo halahi Debata jana gabe musu ni sude jolma do halahi! 2:16 Dilarang halahi muse dope hami manjamitahon barita haluaan i tu angka bangso na asing. Jadi di na songon i, laing dipupu halak Jahudi do patamba-tamba dosana gabe mur martimbun lalu tu langit. Jana ujungna saonnari dondonan ni rimas ni Debata ma halahi! 2:17 Tapi hamu angka dongan, dung marsirang hami santongkin sian hamu -- holip sian mata tapi nada lupa sian roha -- mur malungun do hami mida hamu jana sai hami usahohon do anso marsuo mangulahi dohot hamu! 2:18 Adong do maksudnami manopot hamu; jana au sandiri si Paulus madung piga-piga noli hucubo, tapi disundati Sibolis do hami. 2:19 Ise dope lakna arop ni rohanami bagi hajojop ni rohanami dohot tuku hasangapannami di adopan ni Jesus Tuhanta i, hatiha haroroNia? Nada he hamu do i? 2:20 Angke hamu do tutu na gabe hagodangan ni roha dohot na pajopkon rohanami!
3:1 Hara ni na so tartaon hami be, jadi gumonan noma ninna rohanami hum hami sajo tinggal di Atena, 3:2 jadi hami suru ma si Timoteus donganta i. Dongan saparkarejoan di Debata do ia na markarejo manjamitahon Jamita Na Denggan taringot tu Kristus i. Hami suru do si Timoteus manopot hamu, anso dipatogu ia rohamunu jana disosoi ia anso mur togu haporsayaanmunu, 3:3 anso ulang adong sahalak pe sian hamu na dumaol-daol hara ni angka parkancitan on. Hamu sandiri pe diboto hamunu do na nitontuhon ni Debata hian do angka parkancitan i gabe bagianta. 3:4 Dompak rap hami dohot hamu, madung hami paboa hian di hamu na angkon taononta parkancitan. Jana madung tulus do i; hamu pe diboto hamu do i. 3:5 Jadi dung so tartaon be lungunna, gabe husuru ma si Timoteus, anso huboto sanga na bia pangalaho ni haporsayaanmunu. Songon na ganggu do rohangku betak na nigoda ni tukang goda i do hamu, gabe sayang sude halojaonnami i. 3:6 Saonnari madung mulak si Timoteus jana madung dipalalu ia barita jop ni roha taringot tu haporsayaan dohot holong ni rohamunu. Pandoknia tu hami, denggan do parningotanmunu taringot tu hami di bagasan rohamunu. Jana por do rohamunu sugari mida hami, laing songon por ni rohanami sugari mida hamu. 3:7 Hara ni i do hamu ale angka dongan, umbaen na tarapul rohanami umbege baritamunu di bagasan sude ragam ni hasusaan dohot parkancitannami. Dipagodang haporsayaanmunu do rohanami, 3:8 gabe mangolu ma pangkilalaannami saonnari, asal ma sai tongtong hamu mangkaporsayai Tuhan i. 3:9 Nada tuk pamangannami laho pajojorkon sanga na bia godang ni hatarimakasionnami tu Debata hara ni sude hamogaan na hami jagit di jolo ni Debata hara ni hamu. 3:10 Arian na borngin hami pangidohon do sian sude rohanami, anso tarbaen hami nian marsuo bohi dohot hamu laho manggohi sanga aha na hurang di haporsayaanmunu. 3:11 Sai dipabulus Debata Amanta i sandiri dohot Tuhanta Jesus ma nian dalan di hami anso marsuo dohot hamu! 3:12 Sai dipabahat, jana dipalobi Tuhanta ma holong ni roha di hamu sama hamu, bope mida ganop halak, laing songon hami mida hamu. 3:13 Jadi muda songon i, tarbaen Tuhan ma patoguhon rohamunu, anso gabe badia hamu jana nada adong sigorahonon di adopan ni Debata Amanta, di haroro ni Tuhanta Jesus rap dohot sudena halak na gabe nampunaNia. *NA GABE NAMPUNANIA: Sanga: Sude surusuruanNia.*
4:1 Dung i muse ale angka dongan, ihutkon hamu ma pangajaran na nijagitmunu sian hami sanga bia na patut ngolumunu laho pasonangkon roha ni Debata. Tutu nian saonnari pe madung songon i ngolumunu. Tapi saonnari mangasahon kuaso ni Tuhan Jesus gomos hami pangido jana hami sosoi hamu anso mur marsitutu hamu mangkaburjuhon i! 4:2 Harana madung diboto hamu angka sipaingot na hami lehen i di hamu mangasahon Tuhan Jesus. 4:3 Angka na songon on ma na nipangido ni roha ni Debata sian hamu: Angkon badia do ngolumunu dipangido roha ni Debata jana nada tola marharorangon. 4:4 Ganop halaklahi sian hamu angkon malo ma mangaririt sada dadaboru na gabe dongan saripena *NA GABE DONGAN SARIPENA: Sanga: Mangarajai pamatangna.* dohot dalan na badia jana na pantun. 4:5 Ulang ma hara ni na mangoloi hagiot ni sibukna songon na nibaen ni angka halak na so mananda Debata. 4:6 Taringot tuson, ulang ma adong na mambaen sala tu donganna sanga na paoto-otohon. Na salpu i madung tangkas hami ondolkon di na hami paboa tu hamu, angkon uhuman ni Debata do angka halak na songon i pangalahona. 4:7 Dipio Debata pe hita, nada anso hodar ngolunta, tapi anso badia do ngolunta i. 4:8 Hara ni i, sanga ise na manulak pangajaran on nada jolma be na nitulakna, tapi na manulak Debata na mangalehen TondiNa na badia i do tu hamu. 4:9 Nada pola porlu be suratkononnami tu hamu anggo taringot tu na manghaholongi dongan sahaporsayaan sanga na bia baenonmunu. Hamu sandiri pe madung diajari Debata anso marsihaholongan. 4:10 Jana taringot tuson madung dipatuduhon hamu i maradopkon angka dongan Kristen na di Makedonia sudena. Tapi hamu ale angka dongan, gomos hami pangido tu hamu, anso laing mur tu dengganna dope i nian. 4:11 Usahohon ma anso sonang hamu, ulang pola anto-antoi hamu parsoalan ni halak na asing. Marsijalahi ngoluna ma hamu mamake tanganna be, songon na dung hami dok na salpu i tu hamu. 4:12 Muda songon i dibaen hamu, nada pola marguru tu halak na asing be ngolumunu, jana pasangapon ni halak na so porsaya tu Kristus ma hamu. 4:13 Hamu angka dongan, giotnami sugari diboto hamu ma nian pangalaho na satutuna taringot tu angka na dung monding; anso ulang marsak hamu songon halak na so mararop ni roha. 4:14 Tahaporsayai do, anggo Jesus madung mate jana mulak mangolu. Hara ni i ma umbaen na gabe tahaporsayai, obanon ni Debata muse do sude angka na monding i na porsaya tu Jesus anso rap dohot Ia. 4:15 Taringot tusi, songon on do na niajarkon ni Tuhan sipasahatonnami tu hamu: Anggo di haroro ni Tuhan Jesus, hita angka na mangolu dope, nada tarbaen manjoloi angka na dung parjolo monding i. 4:16 Saulahon di na mijur Tuhan Jesus sandiri sian banua ginjang, pio-pio ma kapala ni surusuruan i marsora na gogo jana dipalu ma sarune ni Debata songon boa-boana. Jadi angka halak na dung porsaya tu Kristus dompak di ngoluna be, pangoluon ma halahi parjolo. 4:17 Dung i anggo hita na mangolu dope di hatiha i, rap diangkat ma hita dohot halahi tu bagasan ombun lopus marsuo dohot Jesus di awang-awang i. Jadi rap noma hita tongtong dohot Tuhan i salolot-lolotna. 4:18 Antong marsipatoguan roha ma hamu, mardongan angka pandohan on.
5:1 Hamu angka dongan! Sanga sadihari pe taonna sanga ombasna, anggo i indangkon pola hami suratkon di hamu. 5:2 Angke hamu sandiri pe tangkas do i diboto hamu, songon haroro ni panangko borngin do anggo haroro ni Ari Ni Tuhan i. 5:3 Muda hatiha didok halak, "Dame do sude jana marsonang-sonang," jadi disi ma ompot didondoni hamagoan halahi! Nada tarbaen halahi be malua. Songon hancit ni pangkilalaan ni sada ina na giot hipas do hamamasa ni i. 5:4 Tapi anggo hamu angka dongan, nada di hagolapan hamu maringanan; na mambaen hamu gabe tarsonggot do baenon ari i songon na nisonggot ni panangko. 5:5 Halak na mangolu di hatorangan do hamu sudena; jana angka halak arian do hamu. Nada angka halak na sian borngin hita, sanga angka halak ni hagolapan. 5:6 Hara ni i, nada tola tarpodom hita songon angka halak na asing i. Angkon tongtong do hita jonggor jana rohanta pe angkon torang. 5:7 Anggo halak na modom, borngin do ia modom. Halak na mabuk, laing borngin do ia mabuk. 5:8 Tapi anggo hita on, angka halak na sian arian do, jadi angkon torang do rohanta. Angkon pakeonta do haporsayaan dohot holong ni roha songon baju bosi tu parporangan. Jana kupia bajanta, i ma arop ni rohanta di haluaanta i. 5:9 Dipili Debata pe hita nada anso hona rimas ni rohaNia, tapi anso dapot hita do haluaan markite-hite Tuhanta Jesus Kristus. 5:10 Hara ni hita do umbaen na mate Jesus, anso tarbaen mangolu hita rap dohot Ia muda ro Ia muse -- sanga na laing mangolu hita disi sanga pe na dung mate. 5:11 Hara ni i, marsipaingotan ma hamu jana marsipatoguan di haporsayaan, laing songon na nibaenmunu saonnari. 5:12 Pangidoannami tu hamu ale angka dongan, parsangapi hamu ma angka dongan na loja markarejo di tonga-tongamunu; i ma angka dongan na dung nitodo ni Tuhan i mamimpin dohot paingot hamu. 5:13 Patuduhon hamu ma sangap na sagodang-godangna tu halahi. Haholongi hamu ma halahi marningot karejo na nibaen ni halahi. Sai mardame ma hamu na sada tu na asing. 5:14 Laing hami pangido dope, hamu ale angka dongan, anso gorahon hamu angka halak na so maraturan. Apoi hamu ma angka na menek roha; urupi hamu ma angka na gale jana sobar ma hamu maradopkon halak sudena. 5:15 Jagohon hamu ma anso ulang adong sanga ise na mambaloskon hajahatan dohot hajahatan. Usahohon hamu ma anso tarbaen hamu na denggan sama hamu bope tu halak sudena. 5:16 Sai marjop ni roha ma hamu tongtong, 5:17 jana tongtong martangiang. 5:18 Di sude pangalaho na masa, tongtong ma hamu mandok tarimakasi, angke na songon i do dipangido roha ni Debata sian hamu songon angka na mangolu marsada dohot Jesus Kristus. 5:19 Ulang intopi hamu Tondi i. 5:20 Ulang nayang rohamunu di angka panyurirangon, 5:21 tapi tangkasi hamu ma sasudena, jana togu ma tiop hamu na denggan i. 5:22 Mandao ma hamu sian sandok hajahatan. 5:23 Debata pardame i ma paiaskon hamu sasudena, dipaburju Ia ma hamu anso hum tuSia sajo ngolumunu. Sai dijagohon Debata ma nian hamu sudena, di tondi, di roha bope pamatangmunu, anso ulang targora lopus tu ari haroro ni Tuhanta Jesus Kristus mangulahi. 5:24 Haposan do Debata na mamiohon hamu, patulusonNia do songon i tu hamu. 5:25 Tangiangkon hamu ma hami, ale angka dongan! 5:26 Palalu hamu ma tabe tu sude angka dongan markite umma na badia. 5:27 Mangasahon goar ni Tuhan Jesus, gomos nipangido tu hamu, anso laing sisehon hamu surat on tu sudena angka dongan sahaporsayaan. 5:28 Asi ni roha ni Jesus Kristus, Tuhanta, i ma na mandongani hamu.
1:1 Sian si Paulus, Silvanus dohot si Timoteus tu parlagutan ni halak Tessalonika na di bagasan Debata Amanta, dohot Tuhan Jesus Kristus. 1:2 Asi ni roha dohot hasonangan ma di hamu, sian Debata, Amanta, dohot Tuhan Jesus Kristus. 1:3 Angkon sai tongtong do hami mandok tarimakasi tu Debata hara ni hamu ale angka dongan. Jana songon i do na patut baenonnami, angke mur porsaya do hamu tu Kristus jana mur marsihaholongan do hamu sude sama hamu. 1:4 Hara ni i do umbaen na hami puji hamu di tonga-tonga ni sude angka parlagutan ni Debata. Sian godang ni rohanami, hami paboa do sanga na bia togu ni rohamunu dohot haporsayaanmunu tu Kristus i di tonga-tonga ni siksaan dohot parkancitan na nitaonmunu. 1:5 Dison ma tarida sanga na bia tigorna Uhum Ni Debata: Manaon parkancitan do hamu hara ni Harajaan Ni Debata, jadi etongon ma hamu songon halak na patut masuk tusi. 1:6 Patupaon ni Debata do angka pangalaho na tigor. BaloskononNia ma sitaonon tu halak na mambaen sitaonon tu hamu. 1:7 Jana tu hamu angka na manjagit sitaonon saonnari -- laing songon i muse tu hami -- lehenon ni Debata ma halumbangan muda dung tarida Tuhan Jesus mijur sian banua ginjang rap dohot angka surusuruanNia na markuaso i 1:8 bope dohot api na marnyala-nyala. Laho manguhumi halak na so mananda Debata, dohot angka na so mangoloi Jamita Na Denggan taringot tu Jesus Tuhanta i do umbaen na mijur Ia. 1:9 Uhumon ma halahi tu hamagoan na salolot-lolotna, dao sian adopan ni Tuhan i bope sian hasangapan ni hagogoanNia. 1:10 Muda dung ro Ia di ari i giot pasangapon di tonga-tonga ni halak nabadiaNia, jana gabe hahomangan ma Ia di sude halak na porsaya, harana madung di haporsayai hamu hasaksian na hami boan i. 1:11 Hara ni i ma dibaen na tongtong hami tangiangkon hamu. Hami tangiangkon do anso nian halak na tumbuk hamu di pamioon ni Debata. Sai diurupi Debata ma hamu hara ni kuasoNa i, anso tarpatulus hamu sudena na denggan na nihalungunkonmunu hombar tu haporsayaan i. Laing hami tangiangkon do, anso nian hara ni kuaso ni Debata, laing dipaujung Ia ma angka karejo na nikarejohonmunu hombar tu haporsayaanmunu i. 1:12 Jadi muda songon i, marsangap ma goar ni Tuhanta Jesus Kristus di bagasan hamu, jana hamu di bagasan Ia, mangihutkon asi ni roha ni Debatanta dohot Tuhan *DEBATANTA DOHOT TUHAN: Sanga: Debatanta dohot hadengganan ni roha ni Tuhan.* Jesus Kristus.
2:1 Taringot tu haroro ni Tuhanta Jesus Kristus, bope taringot tu hita na giot palagutonNia anso rap dohot Ia, on ma na hupangido dohot gomos sian hamu: 2:2 Ulang ma manigor ganggu sanga tarsonggot rohamunu hara ni angka barita na mandok, na dung ro Ari Ni Tuhan i. Betak sian na hasusuran do haroro ni barita i sanga na nidok halak sajo do; sanga betak na adong do halak na mandok jungada hami suratkon songon i di suratnami. 2:3 Sanga na bia pe i, ulang jabat tartipu hamu dibaen halak. Angke painte so dapot Ari i, angkon jolo masa do na songon on: Bahat ma halak marbalik sian Kristus, jana tangkas ma tarida Jolma Na Jahat na dung ditontuhon hian tu api narako. 2:4 Sian ginjang ni rohana, mangalo ma ia jana pagincat diri di ginjang ni sude na nisomba ni jolma, sanga pe sude na nipardebata ni jolma. Salang Bagas Ni Debata pe juguhannia do jana baenonnia ma boa-boa tu halak na bahat sudena, mandok ia sandiri do Debata. 2:5 Adong he na so niingotmunu be na dung hupaboa sudena i tu hamu dompak rap au dohot hamu? 2:6 Tapi anggo saonnari laing adong dope na mangambat ia; jana diboto hamu do sanga na aha i. Sanoli on di hadudumpang ni hatiha na dung nitontuhon, tangkas ma tarida i. 2:7 Madung mamungka markarejo kuaso ni hajahatan na buni i masuk manyisip-nyisipi, tapi laing adong dope pangambati. Jadi muda dung morot pangambati i, 2:8 disi pe anso tarida Jolma Na Jahat i. Jadi bunuon ni Tuhan Jesus ma Jolma Na Jahat i dohot hosa na sian pamangan ni Tuhan Jesus sandiri. Jana roncohononNia ma i dohot sinondang ni haroroNia. 2:9 Sian parkarejoan ni Sibolis, tarida ma Jolma Na Jahat i di bagasan kuasonia na godang. Baenonnia ma angka tanda hahomangan marragam rupa dohot angka pangalaho na luar biasa mardongan sipaoto-oto. 2:10 Pakeonnia ma sude bisuk na jahat laho paliluhon angka jolma na giot tu hamagoan. Uhumon ma halahi hara ni na so ra manjagit jana nada ringkot roha ni halahi di barita na sintong i na sian Debata, na tuk nian paluahon halahi. 2:11 Hara ni i ma umbaen na niparo ni Debata tu halahi sada hagogoon laho paliluhon halahi, lopus porsaya halahi di gabus i. 2:12 Jadi gabe hona uhum ma sudena halak na mangkagioti dosa dohot na so porsaya tu na tutu i. 2:13 Hamu angka dongan na nihaholongan ni Tuhan! Angkon sai tongtong do mandok tarimakasi hami tu Debata hara ni hamu, angke sian mulana madung dipili Debata hian hamu gabe halak sipaluaon. Sian parkarejoan ni Tondi Parbadia, di tonga-tongamunu do sudena i tarjadi laho mambaen hamu gabe halak na ias di Debata, boti hara ni haporsayaanmunu tu jamita na tutu i na sian Debata. 2:14 Anso tusi ma dibaen hamu na nipiohon ni Debata markite-hite Jamita Na Denggan na hami jamitahon i tu hamu. Dipiohon Debata pe hamu, anso laing dohot do hamu nian marsangap rap dohot Tuhanta Jesus Kristus. 2:15 Antong hamu ale angka dongan, sai tongtong ma hamu burju jana togu marsitiopan tu pangajaran na dung hami pasahat tu hamu markite-hite hata bope dohot suratnami. 2:16-17 Sai diapoi jana dipatogu Tuhanta Jesus Kristus sandiri bope Debata Amanta i ma rohamunu, anso tarpatulus jana tarjamitahon hamu sanga aha na denggan. Angke dihaholongi Debata Amanta i do hita, jadi hara ni denggan ni rohaNia, diapoi Ia do rohanta dohot apo-apo na manongtong jana dilehen Ia do tu hita arop ni roha na denggan.
3:1 Tangiangkon hamu ma hami anso torus rarat barita na sian Tuhan i, jana denggan nian dijagit halak songon na dung tulus tu hamu na salpu i. 3:2 Tangiangkon hamu muse ma anso laing malua hami sian angka halak na jahat dohot na so ture. Angke nada sudena halak ra mangkaporsayai jamita na sian Tuhan i. 3:3 Tapi haposan do anggo Tuhan i. PatoguonNia do hamu jana jagohononNa sian na jahat. 3:4 Jana pos situtu do rohanami tu Tuhan taringot tu hamu, paboa na nipatulusmunu do sanga aha na hami dokkon tu hamu, jana pupuonmunu do patupahon i. 3:5 Sai dituturi Tuhan ma rohamunu tu holong roha ni Debata dohot tu hasobaron na nilehen ni Kristus. 3:6 Mangasahon kuaso ni Tuhan Jesus Kristus hami paingot ma hamu ale angka dongan, paholang hamu ma dirimunu sian angka dongan na losok, jana na so manangihon pangajaran na hami ajarkon tu hamu. 3:7 Hamu pe diboto hamu do, sanga na bia sapatutna baenonmunu maniru hami. Nada jungada losok hami dompak di tonga-tongamunu. 3:8 Nada hami pangan sipanganon ni halak anggo inda hami garari. Tapi arian na borngin do hami markarejo anso ulang adong na susa sanga ise pe sian hamu hami baen. 3:9 Nada na so marhak hami mangido anso diurupi hamu hami, tapi anso gabe tiruan na denggan do hami di hamu anso ihutkononmunu. 3:10 Dompak rap dope hami dohot hamu, anggo aturan on madung hami paboa tu hamu, "Sanga ise na so ra karejo, indangkon ia mangan." 3:11 Hami dok pe songon i, hara ni na adong do hami bege angka halak na losok deba sian hamu. Hum na manganto-antoi karejo ni halak do halahi, hape umpe adong karejo na nibaen ni halahi. 3:12 Mangasahon kuaso ni Tuhan Jesus Kristus, hami sosohon tu angka halak sisongon i jana hami paingotkon tu halahi, anso burju halahi markarejo, marsijalahi balanjona be ma halahi. 3:13 Tapi anggo hamu ale angka dongan, ulang ma nian loja hamu mambaen na denggan. 3:14 Betak adong na so ra mangihutkon na hami dok di bagasan surat on, tanda hamu ma halak na songon i jana ulang pardongan hamu halahi anso maila. 3:15 Tapi ulang ma songon musu baen hamu halak sisongon i; laing paingot hamu ma halahi songon kahanggi. 3:16 Tuhan i do haroroan ni hasonanganta. Sai tongtong ma dilehen Ia hasonangan di hamu markite-hite dalan na marragam. Sai didongani Tuhan ma hamu sudena. 3:17 Tabe sian au, si Paulus. Na nisurat ni tanganku sandiri do on. Songon on ma tandana disude angka suratku. 3:18 Asi ni roha ni Jesus Kristus, Tuhanta, i ma na mandongani hamu sude.
1:1 Sian si Paulus, rasul ni Kristus Jesus, markite-hite tona ni Debata Sipalua hita dohot Kristus Jesus arop ni rohanta i. 1:2 Tu si Timoteus anakku situtu di bagasan haporsayaan. Asi ni roha dohot hasonangan ma di ho sian Debata Amanta dohot sian Kristus Jesus Tuhanta i. 1:3 Giotku laing maringanan di Epesus ma ho tongtong. Nian madung tangkas hian i hudok tu ho dompak na kehe au tu Makedonia. Husuru pe ho anso laing tongtong di Epesus, hara ni na huboto do adong disi piga-piga halak na pararatkon ajaran na so tutu. Jadi angkon antahanmu do halahi. 1:4 Paingot ma halahi, anso ulang sai kehe be roha ni halahi tu angka turi-turian bope angka barita ni asal mula na so marnasidung. Hum parohon partangkangan sajo do i jana nada mambaen maju sangkap ni Debata na bisa taboto hum sian haporsayaan sajo. 1:5 Anggo tujuan ni sipaingot i, i ma laho manyungguli holong ni roha na polin sian roha na ias dohot haporsayaan na tutu situtu. 1:6 Adong do deba halak, na so songon i be ngoluna. Lilu do halahi di angka hata na so marguna. 1:7 Sai giot Siboto Surat do halahi, hape nada diastui halahi angka hata na nipardokkonan ni halahi bope angka pangalaho na nipajojor ni halahi sian situtu ni rohana. 1:8 Taboto do anggo Tona ni ugamo i, na denggan do i muda nidalankon dohot denggan. 1:9 Angkon laing ingoton do, dibaen pe angka Tona ni ugamo i, nada na giot di halak na burju, tapi na giot tu halak pangalanggar Tona do i, tu angka na jahat, tu halak na so mananda Tuhan, tu halak pardosa, tu halak na so marugamo, tu parroha portibi, tu halak sibunu simatobangna, tu angka sibunu jolma, 1:10 tu angka halak na rorang, pandalus-dalus, panyamun, pargabus, tu angka saksi pargabus, dohot tu halak na maralo pangalahona tu ajaran na tutu. 1:11 Anggo pangajaran i, i ma na tarsurat di Jamita Na Denggan i na dung dipasahat tu au di bagasan pos ni roha, i ma Jamita Na Denggan na sian Debata na sangap i. 1:12 Mandok tarimakasi do au tu Jesus Kristus Tuhanta i, na mangalehen gogo di au laho mangoloi Ia jana na mangetong au gabe songon sada halak haposan maniop karejo i. 1:13 Najolo, madung hupalayas Ia, huparkanciti jana hupabile. Tapi haru songon i pe asi do roha ni Debata mida au, angke nada porsaya dope au hatiha i, gabe nada huboto sanga aha na hubaen i. 1:14 Hape asi ni roha ni Tuhanta i madung dipasupasuhon marlobi-lobi tu au. Dilehen Ia do i marhite haporsayaan dohot holong ni roha di bagasan Kristus Jesus. 1:15 Hata na tutu do pandohan on, na patut jagiton jana sihaporsayaan --: "Ro pe Kristus Jesus tu portibi on na giot paluahon halak pardosa do." Jana sian sude halahi, au ma na umbahat dosana. 1:16 Tapi laing hara ni i muse ma dihaholongi Debata au, anso laing tarpatuduhon Jesus Kristus hasobaronNia maradopkon au halak pardosa on. Jana gabe tiruan ma on di angka na giot porsaya muse tuSia jana na manjagit hangoluan na so mantak. 1:17 Debata do Raja ni sude hatiha, patut nipasangap jana pujion tongtong, angke Ia do na manongtong, na so tarida jana sasadaSa! Amen. 1:18 Pos do rohangku pasahatkon karejo on tu ho, ale Timoteus anakku, hombar tu na nisurirangkon taringot tu ho, anso dipargogoi panurirangon i ho mangkarejohon pambaenan na denggan, 1:19 marhite haporsayaan dohot roha na ias. Adong do deba halak na so parduli di sora ni taroktokna, jadi gabe mago do haporsayaan ni halahi. 1:20 I ma songon si Himeneus dohot si Aleksander. Ma hupasahat halahi na dua tu Sibolis, anso jora halahi mangincahi.
2:1 Jadi on ma na hupaingot, anso parjolo nipasahat simora-mora, tangiang dohot mangidohon tu Debata bope mandok tarimakasi tuSia hara ni sude jolma; 2:2 hara ni angka raja dohot hara ni sude halak na maniop kuaso. Tapangidohon ma anso tarbaen hita mangolu marsonang-sonang di Debata mardongan pangalaho na tama. 2:3 Denggan do tangiang na songon i, angke jop do roha ni Debata Sipalua hita, di na songon i. 2:4 GiotNia ulang so nipalua halak sudena jana rap umboto di na sintong, 2:5 harana hum sada sajo do Debata jana sada muse do panonga-nongai ni Debata dohot jolma, i ma jolma Jesus Kristus. 2:6 Madung dipasahat Ia diriNia gabe partobus humopkop sudena, anso disaksihon di hatiha na nitontuhon Debata. 2:7 Jana hara ni i ma umbaen na nisuruNia au mandapotkon angka halak na so Jahudi laho manjamitahon tu halahi barita taringot tu haporsayaan ni halak Kristen na tutu. Tutu do na hudokkon on, nada margabus au disi. 2:8 Sanga na di dia pe angkon martangiang do angka halaklahi tu Debata sian roha na ias jana ulang mardongan muruk dohot salisi. 2:9 Laing songon i taringot tu angka dadaboru, giotku nian mangias ma halahi songon na somal jana mamake pakean na sopan. Ulang ma dibaen parsuri na lobi sanga mamake angka barang sere sanga berlian, sanga pe angka pakean sigodang arga. 2:10 Gumonan ma angka pangalaho na denggan dibaen halahi pakeanna songon na patut di angka dadaboru na marsomba tu Debata. 2:11 Angkon pasomal-somalon ni angka dadaboru do dirina hohom jana pangoloi na burju di angka pangajaran. 2:12 Nada hupatola angka dadaboru mangajari sanga pe mamarenta halaklahi; angkon hohom do halahi. 2:13 Angke si Adam do parjolo ditompa, dung i pe anso si Hawa. 2:14 Jana nada si Adam na dipaoto-oto, tapi dadaboru i do, gabe mangalaosi parenta ni Debata. 2:15 Haru songon i pe, paluaon do angka dadaboru hara ni na manubuhon angka dakdanak, asal ma tongtong porsaya, tongtong marholong ni roha jana habadiaan mardongan hapantunon.
3:1 Hata na tutu do on, "Sanga ise na marhagiot gabe pamimpin ni parlagutan, patuduhon por ni rohania do ia tu sada karejo sigodang arga." 3:2 Hara ni i, sanga ise na gabe pamimpin ni parlagutan, angkon halak na so martilako ma; angkon sada sajo do dadaborunia; *ANGKON SADA SAJO DO DADABORUNIA: Sanga: Holan sanoli sajo marbagas.* bisa mangorom dirina, na malo jana na maraturan; angkon jop do rohana manjagit tamu di bagasna; jana ringgas mangajari halak; 3:3 ulang parmabuk sanga na parbada. Tapi angkon halak na lambok do jana pardame. Ulang halak na sai mangarohahon hepeng. 3:4 Angkon malo do mangatur rumahtanggana sadenggan-dengganna, dohot mangajari dakdanakna mangoloi jana pantun tusia. 3:5 Angke muda so malo halakna i mangatur rumahtanggana sandiri, tarbia ma he baenonnia mangatur parlagutan ni Debata? 3:6 Nada tola halak na baru masuk Kristen gabe pamimpin ni parlagutan angke gabe ginjang do rohania, jadi gabe hona bura ni Sibolis ia. 3:7 Angkon na denggan do goarna di tonga-tonga ni halak na bahat; angke anggo nada songon i, dipalayas halak do ia, gabe madabu ma ia tu sambil ni Sibolis baenon ni i. 3:8 Sanga ise halak na mangurupi di parlagutan angkon laing halak na burju jana na tigor ma, nada tola parmabuk sanga halak na sai marroha hepeng. 3:9 Angkon togu do rohana maniop pangajaran ni haporsayaan i di bagasan roha na ias. Angkon sian roha na ias do halahi patuluskon i sude. 3:10 Angkon jolo niuji ma halahi nian, jadi muda torang do na so adong tilako ni halahi sanga na aha, i pe anso tola halahi mangurupi di parlagutan i. 3:11 Dadaboru ni halahi *DADABORU NI HALAHI: Sanga: Angka dadaboru na mangurupi halahi di parlagutan i.* pe angkon halak na denggan roha do, ulang ma halak na ringgas mangkata-hatai hahurangan ni halak na asing. Angkon taroromsa do dirina jana haposan di sude pangalaho. 3:12 Sanga ise na mangurupi di parlagutan, angkon laing sada halak sajo do dadaborunia. *SADA HALAK SAJO DO DADABORUNIA: Sanga: Holan sanoli sajo do marbagas.* Angkon malo do ia mangatur angka dakdanakna dohot rumahtanggana sadenggan-dengganna. 3:13 Sanga ise angka na mangurupi di parlagutan i mur dipasangap halak do i jana mur puluk ma ia mangkobari tu halak, taringot tu haporsayaan ni halahi maradopkon Kristus. 3:14 Ning rohangku, santongkin nari ro ma au mandapotkon ho. Haru pe songon i, laing hubaen do surat on tu ho, 3:15 betak sai tarlambat au anso diboto ho hian sanga na bia sapatutna hita mangolu songon halak na sabagas dohot Debata, i ma parlagutan ni Debata na mangolu. Parlagutan i ma na songon tiang partunggul ni hasintongan ni Debata. 3:16 Sada halak pe nada tarbaen mansoadahon sanga na bia godang ni rahasia ni ugamonta: Dipataridahon Ia do diriNia gabe jolma, jana dipatigor di bagasan Tondi, *JANA DIPATIGOR DIBAGASAN TONDI: Sanga: Dohot dibagasan partondion, madung dipatigor.* na patidahon diriNia tu angka surusuruan. Dipatubegehon do baritaNa di tonga-tonga ni angka bangso, jana sihaposan do Ia di tano on. Saonnari madung nipanaek Ia tu banua ginjang.
4:1 Torang do didok Tondi i anggo tu angka hatiha na giot ro, marbalik ma deba halak sian haporsayaan i. Angka tondi na mangaliluhon noma oloan ni halahi, jana pangajaran ni angka setan noma ihutkononna, 4:2 markite-hite lancap-lancap ni angka na manghobarkon gabus, angka na martihas di taroktokna. 4:3 Diajari halahi do halak anso ulang mambuat boru dohot mamantangkon angka sipanganon. Hape nian na nijadihon ni Debata do angka sipanganon i anso mardongan tarimakasi tu Debata, dipangan angka na porsaya tu Kristus dohot na dung mananda hasintongan ni Debata, angka sipanganon i. 4:4 Denggan do sasudena sanga aha na nijadihon ni Debata, sada pe sian i nada tama etongon na so hasaya muda dung nijagit i mardongan hatarimakasion tu Debata. 4:5 Angke pasupasu na sian Debata do dohot tangiang na nipasahat tu Debata mambaen gabe marguna angka sipanganon i. 4:6 Muda diajarkon ho sudena i tu angka dongan na porsaya, gabe pangoloi na denggan ma ho markarejo di Jesus Kristus. Jana angkon pupuonmu do padenggan rohamu hombar tu Hata Ni Debata na tahaporsayai i dohot angka pangajaran na sintong na dung diihutkon ho sahonokna on. 4:7 Padao ma ho sian angka turi-turian na so ture. Gumonan ma pasomal-somal dirimu marhadaulaton tu Debata. 4:8 Pangoromon ni pamatang, saotik do guna ni i, tapi anggo latihan ni roha, i ma na marguna tu sude pangalaho, angke dijamin i do ngolunta di tano on lopus tu ari parpudi. 4:9 Denggan do on sude nijagit jana tutu situtu nihaporsayaan. 4:10 Hara ni i ma dibaen na manggogo *MANGGOGO: Dipiga-piga-piga naskah narobi didok: Dilayas-layasi.* hita jana marsitutu na karejo i, hara ni sude arop ni rohanta tu Debata na mangolu i; Ia do Sipalua ni jolma sasudena, lumobi ma i angka halak na porsaya. 4:11 Ajarkon ma sudena i jana suru ma halak sudena mangoloi i. 4:12 Ulang ma padiar sahalak pe marlayas ni roha tu ho hara ni na poso i dope ho. Tapi angkon gabe tiruan na denggan ma ho di angka halak na porsaya, di bagasan pangakataionmu, pangalahomu, holong ni rohamu, haporsayaanmu dohot di haiason ni ngolumu. 4:13 Jadi laing haburjuhon ma manyise Buku Na Badia i tu halak, dohot manyosoi bope mangajari halahi lopus ro au. 4:14 Ulang lalap ho mamake hasurungan na adong di ho, na nijagitmu dompak na niampehon ni angka pamimpin ni parlagutan tangan ni halahi tu ulumu. 4:15 Situtui ma mangkarejohon i sudena anso sudena halak marnida hamajuanmu. 4:16 Jagohon ma dirimu jana jagohon muse ma dohot pangajaranmu. Burju ma ho patuluskon i sudena, angke muda songon i, dipalua ho do dirimu sandiri bope angka halak na manangihon ho.
5:1 Ulang songgahi halak na matobang, tapi paingot ma ia songon amanta sandiri. Angka na poso baen ma songon kahanggimu, 5:2 jana angka dadaboru na matobang, songon inanta sandiri. Tu angka bujing-bujing, angkon ias sun do baenonmu pangalahomu, songon tu ibotomu sandiri. 5:3 Parsangapi ma angka na mabalu na tarpunjung. 5:4 Tapi muda adong sahalak ina na mabalu, adong dakdanakna sanga pahompuna, tu angka dakdanakna i ma dohot angka pahompuna i parjolo lehenonmu hata na denggan, mandok, angkon halahi sandiri do paresohon halahi na sabagas, bope laho mambalos pambaenan ni simatobangna dohot ompungna, angke apala i ma na pajop roha ni Debata. 5:5 Na mabalu boti na tarpunjung, jana na so adong sanga na ise na paturehonsa, hum tu Debata ma mararop roha dadaboru na songon i. Martangiang ma ia arian na borngin tu Debata mangido pangurupion. 5:6 Tapi na mabalu na giot mangolu marsonang-sonang, madung mate do i haru pe laing mangolu. 5:7 Paboa ma na hudok on tu halahi, anso ulang martilako halahi. 5:8 Muda halak na so paturehon koum sisolkotna, lumobi donganna samudar, na mamorso haporsayaanna do halak na songon i; jumatjat dope i sian halak na so porsaya. 5:9 Angka na mabalu sipamasuhon tu goar-goar ni na mabalu, tuk ma angka na mabalu na manggohi Tona na songon on: Angkon na marumur di ginjang ni onom pulu taon, hum sanoli sajo do marbagas nahinan; *HUM SANOLI SAJO DO MARBAGAS NAHINAN: Sanga: Na setia tu halaklahina.* 5:10 tarbarita ia songon sada ina na dung mambaen pangalaho na denggan; isarana: Denggan dipagodang-godang ia angka dakdanaknia, sonang rohana manjagit angka tamu di bagasna, tata bohina manyambut angka na porsaya, dohot na mangurupi halak na susa -- pendekna madung dibaen ia sian situtu ni rohana sude ragam ni karejo na denggan. 5:11 Ulang pamasuk tu panyuratan ni goar-goar i angka ina na mabalu na poso dope. Angke muda manggogo roha ni halahi mangoloi hagiot ni sibukna, sirang ma halahi sian Kristus, ujungna marbagas ma halahi. 5:12 Jadi gabe sala do halahi hara ni na nilanggar ni halahi i janjinia najolo tu Kristus i. 5:13 Boti muse hum pasude-sude hatiha noma i, puas-pais halahi manaek mijur tu bagas ni halak, jana na jumatjat dope, marsiajar disi ma halahi pahata-hata halak dohot na mangantoi karejo ni halak dohot na mangkata-hatai na so sihataan. 5:14 Hara ni i ma dibaen na dumenggan hudok marbagas mangulahi angka na mabalu na poso dope. Denggan ma i mardakdanak halahi dohot na mangurus rumahtanggana anso ulang adong tarbaen angka musunta i dalan pajatjat-jatjatkon goarta. 5:15 Angke adong do na mabalu i na dung lilu mangihutkon setan. 5:16 Tapi muda adong sada halak Kristen na adong koumna na mabalu, angkon urupan ni dongan Kristen i ma angka na mabalu i; ulang pola dipainte-inte angkon sai parlagutan mananggung halahi. Jadi muda songon i tarbaen parlagutan i ma mangurupi angka na mabalu na so markoum sisolkot. 5:17 Angka sintua na denggan markarejo songon pamimpin, patut do lehenon dua noli lompit sangap tu halahi, lumobi angka na ringgas marjamita dohot mangajari. 5:18 Harana di Buku Na Badia i tarsurat do, "Ulang ma dihuntam pamangan ni lombu na mardege eme," sada muse, "Dapotan upa do na loja." 5:19 Muda adong sada pangaduan maradopkon sada halak sintua, ulang jagit muda so adong dua bagi tolu halak saksi. 5:20 Sanga ise na mardosa, angkon paingoton do di jolo ni sude parlagutan i anso mabiar na asing i. 5:21 Gomos pangidoanku tu ho di adopan ni Debata, dohot Jesus Kristus bope angka surusuruan todoan, anso diihutkon ho angka na hudok on so pola mardongan biar ni roha maradopkon sanga ise pe jana nada mamihak-mihak. 5:22 Ulang mamopoptu ho mangampehon tangan laho mangangkat sada-sada halak gabe pangoloi ni Tuhan. Muda mardosa halak, ulang ho dohot-dohotan di dosa i. Jagohon ma dirimu anso tongtong polin. 5:23 Ulang be hum aek sajo inum; laing inum ma saotik anggur padenggankon butuhamu, harana ma jotjot ho na marnyae-nyae i. 5:24 Dosa ni deba halak, inda diadili dope madung tangkas tarboto. Tapi dosa ni na deba, dung niadilan pe anso tarboto. 5:25 Songon i muse do angka pambaenan na denggan manigor habotoan do i. Salang na maol i pe anso haidaan, nada tarbunihon i tongtong.
6:1 Angka halak Kristen na gabe hatoban, angkon etongon ni halahi do na patut nihormatan tuan ni halahi i anso ulang tarpajatjat halak Debata sanga pe pangajaranta. 6:2 Angka hatoban na martuan tu halak Kristen, nada tola pamenehonna tuanna i hara ni na rap Kristen i. Sugari nian, angkon mur jeges dope pangoloi ni halahi tu tuanna i, angke rap dongan sahaporsayaan na nihaholongan ni halahi do tuan na nioloan i di bagasan na denggan. Sudena on, angkon ajarkononmu do jana paingotkononmu tu halak sudena. 6:3 Adong do halak na mangajarkon asing sian i jana na so satujuan muse tu pangajaran na sintong na sian Tuhanta Jesus Kristus. Nada satuju muse halahi tu pangajaran ni ugamonta. 6:4 Angka siginjang roha do i, hape nian so adong na binotona sanga aha! Na tagi-tagi marsoal dohot martongkari do i taringot tu angka pandohan, na mambaen anyok ni roha, hasisirang, marsitilakoan, manuhas na so ture, 6:5 dohot parsalisian na so marujung. Na dung puntol do pikiran ni halak na songon i jana sala. Diambang halahi tarbaen ma dapotan untung sian ugamo. 6:6 Tutu nian dilehen hadaulaton i do bahat untung muda sonang roha ni halak di sinadonganna. 6:7 Angke nada adong sanga aha pe na taoban tu portibi on. Jana nada taroban hita muse sanga aha haruar sian portibi on! 6:8 Jadi muda adong sipanganon dohot sipakeon, sai pe tuk ma i. 6:9 Tapi sanga ise angka halak na giot kayo, targoda jana hona jorgong ma i dibaen hagiot na oto na marragam rupa boti na manyegohon. Angka hagiot na songon i ma na mangalantuk dohot na mangagohon halak. 6:10 Angke sian holong ni roha tu hepeng do haroroan ni sude ragam ni hajahatan. Adong do deba halak na sai mangkojar hepeng jana na so mangihut be tu ajaran ni Kristen, lopus gabe didondoni pardangolan halahi, mambaen gabe marsak roha ni halahi. 6:11 Tapi anggo ho, halak ni Debata do ho, jadi angkon mandao do ho sian i sudena. Parayak ma anso halak na bonar ho di parnidaan ni Debata, jana na mangoloi tu Debata boti na porsaya tu Kristus, na marholong ni roha, sobar dohot marlambok ni roha. 6:12 Situtui ma mamorangkon na nihaporsayaanmi jana sai parayak ma ngolu na so mantak i. Angke tusi do ho dipiohon Debata di na niokumu di jolo ni halak na bahat paboa na porsaya ho tu Kristus. 6:13 Jana saonnari pe, di jolo ni Debata na mangalehen hosa tu sasudena dohot di jolo ni Jesus Kristus na mangalehen hasaksian na tutu di jolo ni si Pontius Pilatus, hutonahon ma tu ho songon on: 6:14 Patulus ma sude na hutonahon i tu ho sian roha na ias jana ulang targora, lopus tu haroro ni Tuhanta Jesus Kristus mangulahi. 6:15 Tontuhonon ni Debata sandiri do di hatiha hadenggananNa anggo haroroNa i. Hum Ia do Parkuaso; na sangap, Raja ni sasudena raja jana Tuhan ni sasudena tuan. 6:16 Hum Ia sajo do na so tarkuasoi hamatean; di bagasan sinondang na so hadonohan sanga ise pe. Nada adong sahalak jolma pe na jungada marnida Ia, sanga na tarbaen marnida Ia. Angkon lehenon ma nian tuSia sangap dohot kuaso salolot-lolotna! Amen. 6:17 Tu angka halak na kayo di tano on, paingot ma halahi anso ulang manyombong jana anso ulang mararop ni roha halahi tu angka barang-barang na ra salpu -- songon sinadongan rupani. Angkon mararop ni roha tu Debata do halahi, i ma Debata na mangalehen sasudena tu hita marlobi-lobi anso sonang hita. 6:18 Paingot ma halahi laho patuduhon hadengganan, laho patupahon bahat pangalaho na denggan, habasaon dohot haburjuon mangalehen. 6:19 Songon i ma baenon ni halahi dalanna laho palagutkon arta na gabe poko na denggan tu ari pangapudian ni halahi. Jadi muda songon i, maruli ma halahi ngolu na manongtong i ma ngolu na satutuna i. 6:20 Sasude pos ni roha na nilehen di ho, denggan ma jagohon i sude Timoteus! Padao ma ho sian angka pangkataion na so marguna. Laing padao ma ho sian partangkangan taringot tu angka pangalaho na didok roha ni halak "Parbinotoan," hape sian dalan na lilu. 6:21 Harana adong do halak na mandohoti mangajarkon na songon i hape madung manyimbil sian angka ajaran ni Kristen na nihaporsayaan ni halahi na salpu i. Sai dibasa-basahon Debata ma asi ni rohana i tu hamu.
1:1 Sian si Paulus, rasul ni Kristus Jesus markite-hite hagiot ni Debata, giot mamarintahon janji taringot tu ngolu di bagasan Kristus Jesus. 1:2 Tu si Timoteus, anakku na nihaholongan. Asi ni roha dohot hasonangan ma di ho, sian Debata Ama dohot Kristus Jesus, Tuhanta i! 1:3 Tarimakasi ma hudok di Debata na huoloi sian taroktok na ias songon na nibaen ni angka daompung najolo. Jana sai mandok tarimakasi do au tu Debata ganop huingot ho di na martangiang au arian sanga borngin pe. 1:4 Huingot do hamamarsak ni rohamu. I do umbaen na songon i situtu ni rohangku anso marsuo dohot ho anso tarbaen au nian marjop ni roha situtu. 1:5 Taringot do tu rohangku situtu ni haporsayaanmu tu Kristus, sarupa tu haporsayaan ni ompungmu si Lois dohot inanta si Eunike. Jana au pe pos do rohangku, laing songon i muse haporsayaanmu. 1:6 Hara ni i hupaingot ho, anso dipasunggul-sunggul ho silehen-lehen ni Debata, na di bagasan ho, hara ni na hupayakkon tanganku tu ho. 1:7 Harana anggo Tondi na nilehen ni Debata tu hita, nada Tondi na mambaen hita gabe parbiar. Tapi na patoguhon hita do Tondi i, na manggohi hita dohot holong ni roha jana na margogoihon hita mangorom dirinta. 1:8 Jadi hara ni i, ulang ma maila ho pajojorkon hasaksian taringot tu Tuhanta jana ulang maila ho hara ni au na tarhurung hara ni Ia. Gumonan ma dohot ho manaon parkancitan hara ni Jamita Na Denggan i mangasahon gogo na sian Debata. 1:9 Dipalua Debata do hita jana dipiohon Ia hara ni na giot baenonNia hita gabe halakNia sandiri. Nada marnida tu angka karejonta i dibaen Debata, tapi marguru tu sangkapNia sandiri do i dohot denggan ni rohaNia. Taran so dijadihon dope portibi on madung songon i hian denggan ni rohaNia adop hita markite-hite Kristus Jesus. 1:10 Jana saonnari dipatidahon Debata ma denggan ni rohaNia i tu hita sian haroro ni Sipaluanta Kristus Jesus. Ditaluhon Jesus do kuaso ni hamatean jana dilehen Ia ngolu na so ra mantak markite Jamita Na Denggan i. 1:11 Laho manjamitahon Jamita Na Denggan i do dipabangkit Debata au gabe rasul dohot pangajari. 1:12 Hara ni i ma umbaen na hutaon sudena on, tapi nada maila au, angke tangkas do huboto sanga ise na huhaporsayai. Pos do rohangku, sanga aha na nipasahatNia tu au, *SANGA AHA NA NIPASAHATNIA TU AU: Sanga: Sanga aha na dung hupasahat tuSia.* tarjagohon Ia do i lopus tu Ari Parpudi i. 1:13 Haburjuhon ma mangihutkon pangajaran na tutu na dung huajarkon i tu ho. Jana porsaya ma ho tongtong dohot marholong ni roha, angke na dung mardomu do ho dohot Jesus Kristus. 1:14 Mardongan pangurupi ni Tondi Parbadia na maringanan di bagasan hita, angkon jagohononmu ma sadenggan-dengganna angka na mararga na dung dihaporsayahon tu ho. 1:15 Diboto ho do na dung morot sude halak na di Luat Asia manadingkon au, dohot ma disi si Pigelus dohot si Hermogenes. 1:16 Tapi anggo na sian bagas ni si Onesiporus madung adong sanga na piga noli dipajop ia rohangku. Ibo ma roha ni Tuhan, sai dilehen ma tu halahi asi ni rohaNa. Haru pe tarhurung au, nada pola maila si Onesiporus marnida na masa tu au. 1:17 Disi lalu tu Rom manigor dijalahi ia do au lopus padumpang hami. 1:18 Jana di Epesus pe na dung bahat sajo do pangurupinia tu au. Taringot tusi pe madung diboto ho i. Sai denggan ma roha ni Tuhan mangalehen asi ni rohaNa tusia muda ro Tuhan manguhumi sudena jolma manusia.
2:1 Amang Timoteus! Sai margogo ma ho hara ni asi ni roha na nilehen di hita hara ni pardomuanta i dohot Kristus. 2:2 Pangajaran na nibegemu sian au di jolo ni halak na bahat, pasahat ma i tu angka dongan sanga ise na tarhaposi roha jana na malo mangajari halak na asing. 2:3 Angkon laing dohot do ho manaon parkancitan songon tentara na burju di Jesus Kristus. 2:4 Muda sada tentara na topet mardinas nada tola baenonna urusanna sandiri, angke por do rohania laho pasonangkon roha ni komandanna i. 2:5 Sada halak parolah raga nada tarbaen ia gabe juaro di bagasan partandingan anggo so diihutkon ia angka paraturan. 2:6 Partani na marsitutu markarejo, i do na patut parjolo dapotan suha ni na nisuanna. 2:7 Pikiri ma jolo sanga aha na hupajojor on, angke dilehen Tuhan do di ho gogo laho mangastui sasudena i. 2:8 On ma ingot: Jamita Na Denggan na hujamitahon i, barita taringot tu Jesus Kristus do i, i ma pomparan ni si Daud; i ma Kristus na mulak mangolu i sian hamatean. 2:9 Hara ni na manjamitahon Jamita Na Denggan i do umbaen na markancit au; lopus tarrante dope songon sada halak parjahat, tapi nada tarrante anggo hata ni Debata. 2:10 Hara ni i do umbaen na huhasobarkon mananggung sudena i pasari-sari angka dongan na dung nipili ni Debata. Hutaon pe sudena i bia anso laing dohot halahi maruli haluaan na di bagasan Kristus Jesus, dohot hasangapan salolot-lolotna. 2:11 Na tutu situtu do pandohan on: "Muda dung mate hita rap dohot Ia, laing mangolu muse ma hita rap dohot Ia. 2:12 Muda laing sobar hita, angkon laing mamarenta ma hita rap dohot Ia. Muda tatulak Ia, tulahonNia muse ma hita. 2:13 Muda nada torus hita burju, laing tongtong do Ia burju, angke nada tarbaen Ia mamorso diriNia." 2:14 Paingotkon ma tu halak taringot tuson sudena. Di jolo ni Debata, paingot ma halahi anso ulang martangkangi hara ni angka pandohan. Nada adong guna ni i, gariada hum mambaen gaor pikiran ni halak na umbegesa do i. 2:15 Haburjuhon ma na markarejo i anso dioku Debata ho gabe halak na tama markarejo di Debata. Parayak ma anso ulang jabat maila ho hara ni karejomu, tapi sintong ma ajarkon angka pangajaran na sian Debata. 2:16 Padao ma ho sian angka kecet rarat na so marguna jana na so ias. Hum mambaen jahat do angka pangkataion sisongon i. 2:17 Songon sahit kanker do angka pangajaran na songon i, mur honok mur mangararati. Masuk ma disi si Himeneus dohot si Piletus. 2:18 Madung manyimbil halahi sian pangajaran na sintong, jana gabe disego-sego halahi do haporsayaan ni deba halak. Pandok ni halahi anggo hangongot ni angka na mate i ma pola salpu i. 2:19 Hape anggo ojahan na nibaen ni Debata, ojahan na togu situtu do i jana na so tarhutur. Di ginjangna i tarsurat do, "Ditanda Tuhan do angka nampunaNia," bope "Sanga ise na mandok nampuna ni Tuhan ia, angkon mantak ma halakna i mambaen dosa". 2:20 Anggo di bagasan bagas godang adong do marragam panjamaan nada hum panjamaan na sian perak sanga sere na adong, tapi laing adong do na sian hayu dohot tano. Adong na nipake tu angka pangalaho na sangap, jana adong muse na nipake tu pangalaho na bile. 2:21 Sanga ise halak na paias dirina sian sude na jahat, i ma na nipake songon parkokas tu pangalaho na marsangap. Gabe nampuna hapunjungan jana na hasaya ma ia di tuanna. Na diparade hian do halak na songon i sipakeon tu angka ragam ni karejo na denggan. 2:22 Orom ma dirimu taringot tu angka hasonangan ni na poso-poso. Haburjuhon ma mangoloi hagiot ni Debata, manghaporsayai Ia jana marholong ni roha dohot hadameon ni roha. Saroha ma ho na mangolu i rap dohot angka dongan na mangido tolong sian Tuhan mardongan roha na ias. 2:23 Ulang ma dohoti angka partongkaran ni angka halak na oto na so umboto sanga aha. Angke diboto ho do i hum na parohon partangkangan do i. 2:24 Anggo naposo ni Tuhan nada tola martongkari; angkon rama do tu halak sudena, jana tarajarisa halak na asing denggan jana sobar. 2:25 Angkon ajaranna halak na sai mangalo mardongan halambohon; ibo nian roha ni Tuhan, sai dilehen ma di halak na songon i hatiha na denggan paubahon rohana sian angka dosa ni halahi dohot mananda pangajaran na tutu. 2:26 Jadi anso gabe torang roha ni halahi mangulahi jana talgang sian sambil ni Sibolis na manjorat halahi jana na mamaksa halahi mangihutkon hagiotna.
3:1 Angkon ingotonmu do on: Saulahon di angka ari na parpudi marroan ma bahat hasusaan. 3:2 Marsisarihon di ibana be do jolma i, sai giot kayo, sombong dohot na mamburas. Mangalayasi halak ma giot ni halahi, mangalo tu simatobangna, inda malo mandok tarimakasi, jana magigi tu angka pangalaho partondion. 3:3 Nada adong be holong marsihaholongan di halahi, nada ra marsisesaan sala, sai ra pabusuk-busukkon goar ni halak, nada bisa mangorom diri, kejam jana nada giot di na denggan. 3:4 Hum na giot manghianat noma jolma i, nada ginjang marpikir jana bulbul. Gumonan do di halahi hasonangan ni portibi on ulang pado mangihutkon Debata. 3:5 Haru pe di sihapataran ringgas halahi mandalankon angka na niaturkon ni ugamo, tapi anggo hagogoon ni ugamo i sandiri nada adong be diboto halahi. Padao ma ho sian angka halak sisongon i. 3:6 Adong do deba sian halahi na dung manyisip masuk tu bagas ni halak, manarik roha ni angka dadaboru na gale, na bahat dosana jana na nirajaan ni hagiot na marrupa-rupa. 3:7 Sai torus mangido niajaran do angka dadaboru na songon i tapi nada jungada lalu tartanda halahi hasintongan i. 3:8 Songon si Janes dohot si Jambres na mangalo si Musa najolo, laing songon i ma jolma sisongon i mangalo pangajaran na sian Debata. Masego pikiran ni halahi jana nada porsaya be halahi tu pangajaran na sintong. 3:9 Tapi inda na dapot halahi be bagi aha, harana angkon muli tarboto do haotoon ni halahi di halak sudena, songon haotoon ni si Janes dohot si Jambres i. 3:10 Tapi madung diihutkon ho angka pangajaran na sian au, parangengku dohot tujuan ni ngolungku. Madung diida ho sandiri haporsayaanku, hasobaronku, holong ni rohangku dohot pohom ni rohangku. 3:11 Madung diida ho au dibalbalan jana markancit au. Diboto ho do sude na tarjadi tu au di Antiokia, di Ikonium dohot di Listra; jana diboto ho do sude na hutaon i! Tapi malua do au dibaen Tuhan sian sudena i. 3:12 Angkon hona ayak-ayak do tutu sude halak na ra pasahat ngoluna marsomba tu Debata jana na marpardomuan dohot Kristus Jesus, 3:13 hape anggo angka parjahat dohot angka panipu i mur jumahat dope. Ditipu halahi ma halak na asing, hape hona tipu muse do halahi. 3:14 Tapi anggo taringot tu ho Timoteus, marsitiopan tu angka pangajaran na tutu i ma ho, na dung niajarkon tu ho jana na nihaporsayaanmu situtu; harana diboto ho do sanga ise angka gurumu. 3:15 Ingotonmu do, mamungka sian hamenehanmu dope madung ditanda ho Buku Na Badia i. Ditorangi Buku Na Badia i do rohamu laho mangastui anso maruli haluaan ho sian na mangkaporsayai Kristus Jesus. 3:16 Sudena na tarsurat di Buku Na Badia i na nituturkon ni Debata i, na marguna *SUDENA NA TARSURAT DI BUKU NABADIA I NA NITUTURKON NI DEBATA I, NA MARGUNA: Sanga: Sandok suratan na di Buku Na Badia i, na nituturkon ni Debata, na marguna.* do i laho mangajarkon na sintong, manggorahon dohot paturehon na sala bope laho mangajari jolma anso mangolu di bagasan hatigoran. 3:17 Mardongan Buku Na Badia i dipasingkop do sadenggan-dengganna sanga ise na mangoloi Debata di sude ragam ni parkarejoan na denggan.
4:1 Ro dope Kristus Jesus tu tano on manguhumi angka jolma na mangolu dohot na mate; jana ro ma Ia mamarenta songon Raja. Jadi hara ni i gomos ma pangidoanku tu ho, di jolo ni Debata dohot Kristus Jesus: 4:2 Jamitahon ma Jamita na sian Debata i di hatiha na denggan sanga na so denggan. Papos ma roha ni halak, paboa angka na sala, jana sosoi ma halahi. Ajari ma halak mardongan sude hasobaronmu. 4:3 Angke angkon ro do hatihana na so ra be halak manjagit pangajaran na sintong. Gumonan noma hagiot ni halahi sandiri ihutkonon ni halahi, jana gabe palaguton ni halahi ma angka guru laho mangajarkon angka pangalaho na tabo begeon ni pinggol ni halahi. 4:4 Dipahusor halahi do pinggol ni halahi sian na sintong, tapi patinggilon ni halahi do i tu angka turiturian na so tutu. 4:5 Tapi haru songon i pe, ulang pola jabat dut rohamu marnida sanga aha pe na masa. Sobar ma ho di parkancitan, karejohon ma karejomu, songon parjamita ni Jamita Na Denggan i jana dalankon ma na nipaporsankon tu ho sadenggan-dengganna. 4:6 Anggo taringot tu au, madung dapot hatihana mate au songon haul tu Debata. Santongkin nari tadingkononku ma portibi on. 4:7 Anggo au madung hudohoti parlumbaan i sadenggan-dengganna, jana madung lalu tu ujung, jana madung humomosi do haporsayaan i. 4:8 Jana saonnari upa ni hamonangan i noma sipainteonku. Di Ari Parpudi, pasahaton ni Tuhan Panguhum na tigor i ma upa i tu au, angke di bagasan pardomuan na denggan do au mangolu dohot Debata. Jana nada hum au sajo na giot manjagit upa i, tapi dohot do sudena halak na sai malungun paintehon haroro ni Tuhan i. 4:9 Usahohon ma jolo anso tumibu tarbaen ho manopot au, 4:10 harana madung ditinggalkon si Demas au hara ni holong ni rohania tu portibi on. Madung kehe ia tu Tessalonika. Si Kreskes pe madung kehe tu Galatia jana si Titus tu Dalmatia. 4:11 Hum si Lukas noma na rap dohot au. Alap ma si Markus jana oban ma ia tuson, angke tangkas do tarurupi ia au di bagasan parkarejoanku. 4:12 Madung husuru si Tikikus kehe tu Epesus. 4:13 Jadi muda ro ho, boan muse ma jolo mantel na hutadingkon i di Troas di bagas ni si Karpus. Laing boan ma angka buku i, lumobi angka buku na sian kulit i. 4:14 Si Aleksander tukang tumbaga i, madung bahat dibaen ia na jahat tu au. Baloskonon ni Tuhan ma tusia hombar tu pangalahonia i. 4:15 Ho pe angkon manat do ho tu bayo i, angke manggogo situtu do ia mangalo jamitanta. 4:16 Di na parjolo hupajojor pambelaanku umpe sahalak na ro mandongani au; kehe do sude manadingkon au. Sai ulang ma nian dipasala Debata halahi taringot tusi! 4:17 Tapi madung didongani Tuhan au disi. Dipargogoi Ia do au, gabe margogo au manjamitahon Jamita i sudena anso laing dibege sudena angka halak na so Jahudi. Jana malua do au sian baba ni singa. 4:18 Sai paluaon ni Tuhan Jesus do au tongtong sian sude usaho na jat maradopkon au. BoanonNia do au lopus tu bagasan HarajaanNia di banua ginjang. Sipasangapon do Ia salolot-lolotna! Amen. 4:19 Tabengku tu si Priskila dohot si Akuila dohot tu dongan sabagas ni si Onesiporus. 4:20 Tading do si Erastus di Korintus jana si Tropinus hutadingkon do marnyae-nyae di Miletus. 4:21 Usahohon ma anso ro ho dompak so musim ngali nian. Si Ebulus, si Pudes, si Linus dohot si Klaudia palalu tabe do tu ho; songon i muse dohot angka dongan sahaporsayaan na asing i. 4:22 Sai didongani Tuhan i ma tondimu. Sai didongani asi ni roha ni Debata ma hamu!
1:1 Sian si Paulus, naposo ni Debata, bope rasul ni Jesus Kristus, na nipili do au jana na nisuru laho manyarihon angka na nipili ni Debata anso mur togu di haporsayaanna. Angkon togu-toguonku do halahi laho mananda hasintongan na niajarkon ni ugamonta, 1:2 marguru tu arop ni roha di hangoluan na so mantak i. Harana na dung dijanjihon Debata hian do i dompak so dijadihon dope portibi on -- jana nada tarbaen Debata margabus. 1:3 Topet di hatihana, dipataridahon Debata do ngolu i di bagasan barita i jana hupaboa do i hara ni parenta ni Debatanta Sipalua i. 1:4 Tu si Titus, anakku, mangihutkon haporsayaanta. Asi ni roha dohot hasonangan ma di ho, sian Debata Ama dohot Kristus Jesus, Sipalua hita. 1:5 Hutinggalkon pe ho na salpu i di Kreta anso tarpasidung ho do angka na porlu dope sikarejohonon. Boti anso diangkat ho angka sintua di ganop kota. Jadi paingot-ingot ma na hudok on: 1:6 Muda sintua sagiotna ulang ma halak na targora; angkon sada sajo do dadaboruna; *ANGKON SADA SAJO DO DADABORUNA: Sanga: Hum sanoli sajo marbagas.* angkon na marhaporsayaan ma angka dakdanakna jana ulang ma angka anak padiar sanga dakdanak na so taratur. 1:7 Harana na mangurus karejo ni Debata do sada halak sintua jadi nada tola halak na targora. Nada tola ginjang rohana sanga na parmuruk, sanga na parmabuk, sanga na kasar, sanga na sai mangarohahon hepeng. 1:8 Angkon jop do rohana manjagit tamu di bagasna, na mangkagioti pangalaho na denggan, na malo mangorom dirina, na jujur, ias jana maraturan. 1:9 Angkon halak na togu marsitiopan tu hata na tutu, i ma jamita sihaporsayaan songon na niajarkon i tusia. Jadi dohot dalan na songon i malo ma ia paingot halak hombar tu pangajaran na sintong jana malo ma ia manudu hasalaan ni halak na mangalo tusia. 1:10 Harana bahat do halak na so ra mangoloi, lumobi na marugamo Jahudi hian; dipalilu-lilu halahi do halak na asing markite-hite hata-hata ni halahi na so marguna. 1:11 Angkon dijait do giotna pamangan ni jolma sisongon i, harana madung bahat angka bagas ni halak na gabe gaor sudena hara ni angka pangajaran na so patut na nibaen ni halahi. Na manjalahi untung na so patut do antong halahi di karejona i! 1:12 Jungada do adong panurirang ni halahi sandiri na marasal sian Kreta mandok: "Anggo halak Kreta angka pargabus do i, binatang panyoro, na songkal jana na losok." 1:13 Tutu do hasaksian on. Hara ni i ma umbaen na angkon paingotonmu halahi, anso sai porsaya halahi di bagasan dalan na tigor; 1:14 jana anso ulang marguru tu angka turiturian ni halak Jahudi dohot tu angka aturan na nibaen ni halak na marbalik sian hasintongan i. 1:15 Ias do sude sanga aha pe anggo di halak na ias. Tapi anggo di halak na hodar pikiranna jana na so porsaya tu Debata, sada pe nada adong na ias, angke madung hodar pikiran ni halahi dohot taroktokna! 1:16 Pandok ni halahi, ditanda halahi do Debata, hape anggo sian parange ni halahi nada tarida na songon i. Jahat do roha ni halahi jana nada marpangoloion. Sada pe nada adong tarpatupa halahi na denggan.
2:1 Tapi anggo ho Titus, ajarkon ma pangajaran na denggan. 2:2 Paingot ma angka ama na tumobang anso marroha jana malo mangorom dirina; anso denggan dihaporsayai halahi Debata, denggan marsihaholongan jana sobar di sitaonon jana benget. 2:3 Songon i muse angka dadaboru na matobang laing apoi halahi anso ias parange ni halahi songon na patut di angka halak na badia. Nada tola pajatjaton ni halahi goar ni halak, jana nada tola diparhatoban anggur. Angkon pangalaho na denggan do ajarkonon ni halahi, 2:4 anso diajari halahi angka ina na umposo mangkaholongi halaklahina dohot angka dakdanakna, 2:5 anso malo mangarajai dirina, anso ias dohot anso gabe ina na denggan di rumahtanggana na mangoloi tu halaklahina. Jadi muda songon i, nada tarincahi halak be jamita na sian Debata. 2:6 Paingot muse ma angka na poso anso malo mangarajai dirina. 2:7 Jana ho sandiri pe, angkon patuduhononmu do parange na denggan na gabe tiruan di sude pangalaho. Muda mangajari ho, angkon tigor do baenonmu. 2:8 Angka pandohan na tabo ma pake, na so tarincahi halak, anso maila angka halak na mangalo ho angke sada pe nada adong na hurang denggan dapot halahi sihataanna taringot tu hita. 2:9 Angka hatoban angkon mangoloi do tu tuanna, jana di sude pangalaho angkon pasonangon ni halahi ma roha ni tuanna. Nada tola halahi mangalo na nidok, 2:10 sanga manangko. Angkon patuduhonon ni halahi do na tongtong halahi denggan jana burju; anso dipuji halak pangajaran taringot tu Debatanta Sipalua i hara ni pambaenan ni halahi. 2:11 Harana madung dilehen Debata asi ni rohaNia laho paluahon jolma sudena. 2:12 Na mangajari hita do hadengganan ni roha ni Debata i anso ulang be maralo ngolunta tu hagiot ni Debata jana nada be mangihutkon hagiot ni portibi on; diajari do hita anso malo hita mangarajai dirinta, tigor jana manghaholongi Debata. 2:13 Saonnari na painte-intehon Ari na niarop ni rohanta i do hita. Anggo di Ari i, idaon ni portibi on ma hasangapan ni Jesus Kristus, i ma Debata Na Gumodang i jana Jesus Kristus Sipalua hita. 2:14 Madung dihaulkon Ia diriNia hara ni hita laho paluahon hita sian hajahatan sudena, jana dibaen Ia hita gabe bangso hapunjunganNia, jana na ringgas mambaen na denggan. 2:15 Ajarkon ma sudena i, jana paingot ma halahi jana gorahon ma angka na umbege jamitamu sian sude gogomu. Ulang ma adong na marlayas ni roha tu ho.
3:1 Paingot ma sudena ruasmu anso tunduk halahi tu angka pamimpin dohot na markuaso di negara, jana mangoloi dohot na patuluskon sandok na denggan. 3:2 Dok tu halahi anso ulang adong na manilakoi sanga ise pe, tapi gumonan ma halahi basar jana burju. Marlambok ni roha ma halahi maradopkon halak sudena. 3:3 Angke hita pe oto do najolo, nada mangoloi jana nada tigor. Dirajai angka hagiot dohot por ni roha na marragam rupa do hita. Na mangolu di angka hajahatan dohot gutgut dohot na marsihosoman hian do hita. 3:4 Tapi madung dipatuduhon Debata Sipalua hita, holong dohot denggan ni rohaNa tu hita. 3:5 Dipalua Ia do hita, nada hara ni na tabaen sanga aha na denggan, tapi hara ni ibo ni rohaNia sandiri do tu hita. Dipalua Ia do hita markite-hite Tondi Parbadia na mangalehen hasosorang na imbaru dohot ngolu na imbaru marhite na paiaskon hita. 3:6 Diduruskon Debata do TondiNia i tu hita markite-hite Jesus Kristus i, di hita, 3:7 anso mardenggan hita mangulahi tu Debata hara ni ibo ni roha ni Jesus jana tola ma hita maruli hangoluan na so mantak na sai tapainte-inte i. 3:8 Tutu do sasudena sanga aha na hudok on. Jadi giotku, gomos ma dokkon taringot tu angka na hudok on, anso marsitutu angka na porsaya tu Debata patuluskon angka karejo na denggan na marguna tu sude halak. 3:9 Padao ma ho sian angka partongkaran na so marguna dohot sian parsoalan ni angka tarombo. Ulang dohot-dohoti angka partangkangan dohot parbadaan taringot tu angka Tona ni ugamo. Inda adong guna ni i sude jana nada adong muse untungna. 3:10 Sanga ise na patubu bada di parlagutan i angkon paingotonmu do sanoli sanga dua noli; dung i indangkon be sai mardomu ho dohot halakna i. 3:11 Jadi botoonmu ma na dung manyimbil do dalan ni halak na songon i jana dipabotohon angka dosana i ma na marsala ia. 3:12 Disi husuru si Artemas sanga si Tikikus manopot ho, usahohon ma manigor anso sigop ho ro mandapotkon au tu Nikopolis, harana giot disi do au ninna rohangku salolot musim ngali. 3:13 Laing haburjuhon ma jolo mangurupi si Zenas siboto tona i, dohot si Apollos; anso tarbaen halahi kehe so pola hurang sanga aha. 3:14 Angkon marsiajar do angka ruasta i patupahon angka na denggan anso tarbaen manggohi angka na porlu situtu; ulang jabat gabe halak na so marguna ngolu ni halahi. 3:15 Sude angka dongan na dison na rap dohot au, manongos tabe do di ho. Palalu ma tabenami tu angka donganta na sahaporsayaan tu Kristus. Sai dipasupasu Debata ma hamu sudena.
1:1 Sian si Paulus, sada halak na tarhurung hara ni Kristus Jesus, dohot sian si Timoteus donganta, tu si Pilemon na nihaholongan, dongan saparkarejoannami. 1:2 Songon i muse ma tu si Appia ibotonta dohot tu si Arkhipus dongan saparjuanganta dohot tu parlagutan na di bagasmu. 1:3 Asi ni roha dohot hasonangan ma di hamu sian Debata, Amanta, dohot sian Tuhan Jesus Kristus! 1:4 Ganop martangiang au sai hudok do goarmu jana hupasahat tarimakasi tu Debata. 1:5 Harana madung hubege dihaholongi ho do sude halak na porsaya jana dihaporsayai ho do Tuhan Jesus. 1:6 Hutangiangkon do anso nian parkahamaranggionta songon angka halak na porsaya mur pamalohon hita mangastui sude angka pasupasu na tajagit hara ni na domu hita dohot Kristus. 1:7 Hara ni holong ni rohami Pilemon, gabe tamba do jop ni rohangku jana mur maringgas! Gabe tarapul do sude roha ni angka dongan sahaporsayaan hara ni ho. 1:8 Hara ni i, songon kahanggimu di bagasan Kristus tarsuru au do nian ho laho mangkarejohon aha na patut sipatupaonmu. 1:9 Tapi hara ni holong ni roha, gumonan noma mangido au tu ho. Au, si Paulus na dung matobang, *NA DUNG MATOBANG: Sanga: Duta Ni Kristus Jesus.* jana na dihurung saonnari hara ni Kristus Jesus, 1:10 pajojorkon pangidoan tu ho taringot tu anakku na hudapot hatiha di hurungan au, i ma si Onesimus. 1:11 Najolo nada adong gunania be di ho, tapi anggo saonnari madung marguna situtu, nada hum di ho sajo, tapi dohot do di au. 1:12 Tampuk ni pusupusungkon, hutongos mangulahi saonnari tu ho. 1:13 Satutuna nian sai giot tioponku do ia dison gabe songon gontimu anso tarbaen ia mangurupi au salolot ditahan au di hurungan on hara ni Jamita Na Denggan i na sian Debata. 1:14 Tapi nada tarbaen au sanga na aha, anggo so jolo adong isin sian ho. Dumenggan do ninna rohangku muda sian ias ni rohamu sandiri mambaen songon i; nada ra au mamaksa ho. 1:15 Betak na on do dalanna marsirang si Onesimus santongkin sian ho, anso dapot ho do ia mangulahi salolot-lolotna. 1:16 Saonnari nada hum hatobanmu be ia; lobi sian i noma. Dongan haholongan noma ia hara ni Kristus. Marguna situtu do ia di au: Lumobi di ho, tontu marguna situtu do ia sanga pe songon jolma sanga pe songon kahanggi di bagasan Tuhan. 1:17 Jadi, hara ni na nietongmu au songon dongan Kristen, antong jagit ma si Onesimus mangulahi dos songon na manjagit au. 1:18 Muda na adong salania sanga utangnia tu ho, padiar ma au mananggung i sudena. 1:19 Au sandiri na manyuratkon dison tu ho: "Au ma si Paulus manggararsa tu ho." (Tontu nada pola porlu sunggulanku tu ho, paboa na marutang muse do ho tu au, i ma dirimu sandiri.) 1:20 Jadi hara ni i laing urupi ma jolo au hara ni Tuhan i; pajop ma jolo rohangku songon kahanggimu hara ni Kristus. 1:21 Pos do rohangku na mambaen surat on, patulusonmu do sanga aha na hupangido on tu ho. Jana huboto lobi sian i dope patupaonmu. 1:22 Jadi laing pasingkop muse ma jolo ingananku di bagasmu, angke arop do rohangku tangihonon ni Debata do tangiang ni hamu sudena jana obanonNia au mangulahi tu tonga-tongamunu. 1:23 Palalu tabe do tu ho si Epafras na tarhurung rap dohot au hara ni Jesus Kristus. 1:24 Laing jagit ma tabe ni angka donganku: Si Markus, si Aristarkus, si Demas dohot si Lukas. 1:25 Sai dipasupasu Tuhan Jesus Kristus ma nian hamu sudena.
1:1 Madung jotjot jana marragam dalanna dibaen Debata laho mangkatai tu angka ompunta markite-hite angka panurirang. 1:2 Tapi di hatiha na parpudi on madung mangkatai Ia tu hita markite-hite AnakNia, na dung ditontuhon do Ia gabe sipanean ni sasude na adong. Marhite Ia madung ditompa Debata hasiangan on. 1:3 Ia do sinondang hasangapan ni Debata, jana Ia do gambaran ni Debata sandiri dohot na mangasahon sasude markite-hite hataNia na gok kuaso. Dung sidung dipaias Ia jolma sian angka dosa ni halahi, juguk ma Ia di siamun ni Na Sun Margogo i di banua ginjang. 1:4 Dao dope gumincat hasangapan na nijagit ni Anak i sian surusuruan, harana goar na nilehen ni Debata pe tuSia dao do sumangap ulang pado goar na nilehen tu surusuruan. 1:5 Na so jungada do didok Debata tu sada surusuruan, "AnakKu do Ho; Sadari on ma Au gabe AmangMu." Na so jungada muse do didok Debata songon on sanga na tu surusuruan dia pe, "Gabe AmangNia ma Au, jana Ia ma gabe AnakKu." 1:6 Tapi di na nisuru ni Debata AnakNia siangkaan i tu portibi on, didok Ia do, "Sude surusuruan ni Debata angkon manyomba tuSia." 1:7 Anggo taringot tu angka surusuruan, didok Debata songon on, "Dibaen Debata do angka surusuruanNia gabe alogo, jana angka pangoloiNia gabe jilam ni api." 1:8 Hape anggo tu Anak i didok Debata do, "Ho do Debata, jana hot do salolot-lolotna hasangapanMu songon Raja! Pangarajaion na tigor do pangarajaionMu. 1:9 Hatigoran do giot ni rohaMu jana magigi do Ho di na sala; i ma dalanna umbaen na nipili ni Debata Ho, i ma DebataMu jana dipasonang rohaMu dohot hasangapan na sumurung sian angka donganMu." 1:10 Didok Debata dope, "Ho do Tuhan di mulana na manompa portibi, jana dohot tanganMu sandiri dijadihon Ho langit i. 1:11 No giot salpu do sudena i, jana mumut songon pakean; tapi anggo Ho, mian do tongtong. 1:12 LompitonMu ma hasiangan on songon pangalompit ni pakean, jana gontionMu ma i dohot na asing. Hape anggo Ho laing songon i do tongtong, jana umurMu pe nada marujung." 1:13 Nada jungada didok Debata songon on tu angka surusuruanNia, "Juguk ma Ho di siamunKu, lopus Hubaen angka musuMu gabe si degean ni patMu." 1:14 Antong, aha noma satutuna angka surusuruan ni Debata i? Angka tondi na mangoloi Debata do i jana na nisuru ni Debata laho mangurupi sanga ise halak na giot manjagit haluaan na nijanjihon ni Debata.
2:1 Hara ni i ma umbaen na porlu hita mur manat tu angka na hita bege, anso ulang mayup hita. 2:2 Harana muda dung togu angka na nihatahon ni angka panurirang i, jana ganop pangalosion dohot panggagaion manjagit pamaloson na hombar tu pangalahona, 2:3 songon dia ma he tarbaen hita malua, anggo so taparrohahon do haluaan na songon i godangna? Tuhan i do na mangkatahonna di mulana i, jana na nioban dohot dipatontu tu hita markite-hite angka na umbegena. 2:4 Tamba ni i, dohot do Debata pagomoskon hasaksian ni angka halahi di na nibaenNia ragam-ragam ni hahomangan bope angka pangalaho na luar biasa bope dohot na mambagi-bagihon angka hamaloan hapunjungan na sian Tondi Parbadia marguru tu hagiot ni Debata sandiri. 2:5 Anggo angka surusuruan nada dohot manjagit kuaso ni Debata, giot mamarenta di portibi na imbaru na giot ro i, i ma portibi na tahatai on saonnari. 2:6 Tapi adong do sada bagian sian Buku Na Badia i manyuratkon songon on, "Aha ma he jolma ale Debata, umbaen na pola ra Ho marningotsa? Hum jolma humani do jolma i, hape diparrohahon Ho do i! 2:7 Santongkin dipasurut Ho ia sian surusuruan i, dung i ditukuhon Ho hasangapan, dohot hamuliaan tusia, *Dipiga-piga naskah narobi adong dope hata on: Dibaen Ho Ia mangarajai sude portibi on.* 2:8 jana dibaen Ho ia gabe pangarajai ni sasudena." Antong muda didok, Debata manjadihon jolma gabe "pangarajai ni sasudena," astuan ni i, nada adong be sanga aha na so di toru ni kuaso ni jolma. Haru songon i pe nada adong be taida saonnari jolma na markuaso di ginjang ni sasudena. 2:9 Tapi anggo Jesus madung taida mangarajai! Dibaen do Ia santongkin tumoruk saotik sian surusuruan anso tarbaen Ia mate laho manghopkop sude jolma hara ni denggan ni roha ni Debata. Taida do saonnari dilehen diSia juguhan na marmulia jana na sangap hara ni na dung manaon parkancitan Ia lopus mate. 2:10 Madung sapatutna nian baenon ni Debata na manompa jana na pangolu sasudena -- Jesus gabe sanggam hara ni parkancitanNa i. Jadi hara ni i tarpiohon Jesus do bahat halak anso dohot nipasangap rap dohot Ia. Angke Ia do na mambaen dalan di halahi anso tola dohot nipalua. 2:11 Dibaen sian Sada do haroroan ni sude halahi, bope Ia na pabadiahon, bope halahi na niparbadiai, hara ni i do nada maila Ia manggoari halahi kahanggi. 2:12 Ning Ia ma, "PaboaonKu ma tu angka kahanggingKu taringot tu Ho. PujionKu ma Ho di tonga-tonga ni parlagutan." 2:13 Didok Jesus dope, "Tu Debata noma Au mararop ni roha." Jana didok Jesus muse dope, "Dison do Au rap dohot angka dakdanak na nilehen ni Debata di Au." 2:14 Angke anggo angka halak na nidokNia i dakdanakNia, i ma angka mudar dohot sibuk, gabe sarupa ma Jesus sandiri dohot halahi jana mangolu songon pangalaho ni jolma sarupa dohot halahi. Songon i pe pambaenNia, anso ditaluhon Ia do Sibolis i na maniop kuaso ni hamatean i. 2:15 Jadi songon i ma dalanna dibaen Ia laho paluahon angka jolma na niparhatoban ni biar mida hamatean i sapanjang mangolu. 2:16 Jadi torang do, nada na manyarihon surusuruan Ia, tapi pomparan ni si Abraham do na disarihonNia songon na nidok ni surat i di Buku Na Badia i. 2:17 Jadi astuanna, angkon sarupa do Ia dohot halahi di sude pangalaho. Jadi dung songon i tarbaen Ia ma diriNia gabe Malim Godang ni halahi, na burju jana na maribo ni roha di na nioloanNia Debata laho manyesa angka dosa ni halahi. 2:18 Dohot dalan na songon i, haurupan Ia ma sanga ise halak na hona pandugaan, harana Ia sandiri pe madung jungada hona pandugaan jana manaon parkancitan.
3:1 Hara ni i ale angka dongan na badia, na dohot taruli di pio-pio na sian banua ginjang, ligi hamu ma rasul dohot Malim Godang na taoku i, i ma Kristus Jesus. 3:2 Haposan do Jesus di Debata na mamili Ia tu karejo i, laing songon haburjuon ni si Musa najolo mandalankon karejonia di tonga-tonga ni bagasNia. 3:3 Tapi patutna do Jesus maruli hasangapan na gumodang ulang si Musa. Harana angkon laing sumangap do halak na malo pajongjongkon bagas ulang bagas na nipajongjongnia i sandiri. 3:4 Angke sude bagas adong do na pajongjongkonsa, tapi na pajongjongkon sasudena, i ma Debata. 3:5 Si Musa pe nian burju do ia songon pangoloi di tonga-tonga ni bagas ni Debata jana dipaboa ia do angka na giot ro. 3:6 Tapi anggo Kristus, songon anak do di bagasNia. Jana hita do bagas i muda tongtong marmomos jana marpos ni roha paboa na jagitonta do sanga aha na niarop ni rohanta. 3:7 Hara ni i songon na nidok ni Tondi Parbadia, "Muda dibege hamu sadarion sora ni Debata, 3:8 ulang pajogal hamu rohamunu songon tangkang ni ompungmunu i, di na mangalo halahi tu Debata, jana diuji halahi Debata di parhorsihan i. 3:9 'Diuji ompungmunu i do Au disi, jana diuji halahi Au, hape nian madung diida halahi sandiri sasudena na Hubaen opat pulu taon honokna.' 3:10 I do umbaen na goyak rohangKu mida halahi jana Hudok ma, 'Na tongtong do halahi lilu, jana losok mangoloi angka parenta na Hudok.' 3:11 Muruk do Au jana Husumpahon, 'Na so tola masuk halahi tu inganan na giot lehenonKu tu halahi gabe paradiananna!' " 3:12 Hamu angka dongan, manat ma hamu anso ulang jabat adong sian hamu sahalak pe na songon i jahatna jana na so porsaya tu Jesus, gabe marbalik mangkudukkon Debata na mangolu i! 3:13 Jadi, anso ulang adong sanga ise sian hamu na hona tipu dibaen dosa, na mambaen gabe mangalo tu Debata, angkon marsipaingotan do hamu sama hamu ganop ari salolot mangolu hita di hatiha na nidok "Sadari on" di Buku Na Badia i. 3:14 Sapartohapan do hita on sudena rap dohot Kristus; asal ma togu tatiop lopus tu ujungna, sanga aha na tahaporsayai di mulana i. 3:15 On ma na tarsurat di Buku Na Badia i, "Muda dibege hamu sadari on sora ni Debata, ulang ma pajogal hamu rohamunu, songon jogal ni roha ni ompungmunu i di na mangalo halahi tu Debata." 3:16 Antong, ise dehe halakna i, na umbege sora ni Debata, gabe mangalo halahi tuSia? Nada he sudena halak na niuluhon ni si Musa i haruar sian Mesir? 3:17 Jana ise dehe na nimuruhan pola opat pulu taon honokna? Nada he angka na mardosa na marmatean di parhorsihan i lakna? 3:18 Ise dehe na nidok ni Debata di na nisumpahonNia, "Na so tola halahi masuk tu inganan paradianan na giot lehenonKu di halahi?" Nada he laing angka halak na mangalo i do tu Debata? 3:19 Saonnari madung taboto, na so dilehen di halahi inganan paradianan i, hara ni na so porsaya halahi tu Debata!
4:1 Antong, laing adong dope janji ni Debata na giot lehenonNia dope di hita i ma paradianan. Jadi jago ma hita anso ulang jabat adong sahalak pe sian hamu na so tola masuk tu paradianan na nijanjihonNa i. 4:2 Harana madung dipaboa tu hita Jamita Na Denggan i laing songon na tu halahi. Hape anggo di halahi nada marguna jamita i. Angke di na nibege ni halahi jamita i, nada dijagit halahi i mardongan haporsayaan tu Debata. 4:3 Tapi anggo taringot tu hita na mangkaporsayai Debata, dilehen do paradianan, i ma na nijanjihon ni Debata i. Jana sauduran do i tu na nidok ni Debata songon on, "Muruk do Au jana Husumpahon do, na so tola halahi masuk tu inganan na giot lehenonKu hian tu halahi gabe inganan paradianan!" Didok Debata dope songon i haru pe madung sidung karejoNia mamungka sian na manompa portibi on. 4:4 Harana anggo taringot tu ari papituhon, adong do tarsurat di Buku Na Badia i songon on, "Maradian do Debata di ari papituhon i sian sude parkarejoanNia." 4:5 Taringot tusi pe laing adong do tarsurat songon on, "Nada tola halahi masuk tu inganan na giot lehenonKu hian paradianan ni halahi." 4:6 Jadi halahi na parjolo umbege barita taringot tu Jamita Na Denggan i nada dilehen inganan paradianan hara ni na so porsaya halahi. Antong madung torang sian i, adong dope angka halak na asing na nipatola manjagit inganan paradianan i sian Debata. 4:7 Harana madung ditontuhon Debata sada ari na asing, i ma na nigoaran "Sadari on". Dung adong piga-piga taon, dipaboa Debata ma taringot tusi markite-hite si Daud, i ma di ayat sinangkinan i, "Muda dibege hamu sadari on sora ni Debata, ulang ma pajogal hamu rohamunu." 4:8 Sugari na dung dioban si Josua angka jolma i masuk tu inganan na giot lehenon ni Debata gabe paradianan ni halahi, tontu nada pola taringotan ni Debata be sada ari na asing. 4:9 Jadi anggo di halak ni Debata laing adong dope janji anso maradian songon Debata na maradian di ari papituhon i. 4:10 Angke sanga ise halak na dung masuk tu inganan na gabe paradiananNia, maradian muse ma ia sian karejonia, songon Debata na maradian muse sian karejoNa. 4:11 Hara ni i ringgas ma hita anso dohot hita masuk tu inganan paradianan i. Ulang jabat adong sahalak pe sian hita na madabu hara ni na mangihutkon tiruan na binaen ni na so porsaya i. 4:12 Hata na mangolu jana na margogo do hata ni Debata; tumajom dope i sian podang sidua baba. Disirang ia do tondi dohot hosa, utok-utok dohot holi-holi, jana markuaso do i manguhumi pikiran dohot parrohahon ni ate-ate. 4:13 Umpe sada sian na nitompa i na buni, na so niida ni Debata. Talak do sudena jana patar di joloNia. Jana angkon lehenonta do tuSia partanggungjawabanta. 4:14 Hara ni i do dibaen na angkon togu tioponta haporsayaanta i. Angke adong do Malim Godang na sangap di hita, na dung masuk lalu tu jolo ni Debata -- i ma Jesus Anak Ni Debata. 4:15 Angke anggo Malim Godang i nada malim na so dohot mangkilala angka hagaleanta. Ma pola hona uji Ia di sude ragam ni pangalaho, laing songon hita; hum i tutu, nada mardosa Ia! 4:16 Hara ni i, pos ma rohanta ulang pola mabiar be hita mandapotkon habangsa parasinirohaan, anso tajagit ibo ni roha dohot dumpangan asi ni roha, na gabe pangurupi di hatiha na dung ditontuhon i.
5:1 Sudena Malim Godang, na nipili do i sian tonga-tonga ni dongan jolma, jana dipajongjong markarejo songon wakil ni jolma di adopan ni Debata anso dihaulkon ia angka silehen-lehen dohot angka haul hara ni dosa. 5:2 Laing gale do Malim Godang i di ragam-ragam ni pangalaho, tapi haru songon i pe laing tarbaen ia muse dope marlambok ni roha maradopkon angka halak na so umboto sanga aha jana na lilu pardalananna. 5:3 Boti hara ni hagaleannia sandiri, angkon laing haulkononnia do haul, nada hum hara ni angka dosa ni bangso i, tapi dohot do hara ni dosania sandiri. 5:4 Nada adong sahalak pe na mambuat hasangapan i tu dirina sandiri, tapi na nipio ni Debata do ia dikarejo i, songon na masa tu si Harun. 5:5 Laing songon i do Kristus. Nada na nipasangapNia diriNa sandiri markite na gabe Malim Godang, tapi na nipasangap ni na mandok tuSia: "AnakKu do Ho! Sadari on ma Au gabe AmangMu." 5:6 Di na asing didok Debata muse do, "Gabe Malim ma Ho salolot-lolotna, mangihutkon horong ni Malim Melkisedek." 5:7 Hatiha di ngolu ni Jesus di tano on, mangangguk godang do Ia tangis martangiang dohot pasahatkon angka pangidoanNia tu Debata, na margogo paluahon Ia sian hamatean. Boti hara ni na mangoloi Ia tu Debata mardongan sangap na gok, gabe ditangihon Debata do pangidoanNia i. 5:8 Haru pe Anak Ia, laing na nipabangkit ni Debata do Ia. 5:9 Jadi dung sanggam Ia, gabe Ia ma haroroan ni haluaan na manongtong di sude halak na burju mangoloi Ia. 5:10 Jana na nipabangkit ni Debata do Ia gabe Malim Godang, mangihutkon aturan ni si Melkisedek. 5:11 Taringot tusi, bahat do sipaboaonnami tu hamu, tapi maol do pajojorkonsa hara ni lambatna anso mangarti hamu. 5:12 Satutuna nian, madung hatihana gabe guru hamu, hape angkon laing porlu dope hamu marsiajar tu halak na asing taringot tu ojahan ni angka pangajaran ni Debata. Laing na so tarpangan hamu dope panganon na pir; angkon laing minum susu sajo dope hamu. 5:13 Sanga ise na laing manyusu, tontu nada diastui ia dope ajaran taringot tu na tigor, harana dakdanak dope ia. 5:14 Anggo panganon na pir, tu halak na dung magodang do i, harana madung malo ia paasingkon sanga dia na denggan dohot mandok sanga dia na jat.
6:1 Hara ni i, tapadiar ma jolo ojahan na parjolo sian ajaran taringot tu Kristus, jana taparayak ma hasanggapan i. Ulang be taulahi mambaen ojahan taringot tu hamubaan ni roha sian pambaenan na so hasaya, jana ojahan haporsayaan tu Debata, 6:2 i ma parsiajaran parmulaan taringot tu pandidion *PANDIDION: Sanga: Upacara pangiason.* sanga taringot tu na mamayakkon tangan tu halak; sanga pe taringot tu na mulak mangolu sian hamatean bope uhuman na so ra mantak. 6:3 Jana i do na giot sibaenonta, muda dipaloas Debata. 6:4 Nabaruon madung maringanan halahi di sinondang na sian Debata, jana madung didai halahi hatonggian ni angka pasupasu na sian banua ginjang. Halahi pe madung manjagit Tondi Parbadia. 6:5 Sian pangalaman ni halahi pe diboto halahi do na denggan do hata ni Debata i, jana madung dihilala halahi angka tanda ni kuaso na giot ro i. 6:6 Hape marbalik do roha ni halahi! Bia dope baenon manogu halahi mangulahi anso muba sian angka dosa ni halahi i. Angke na mamparsilangkon Anak Ni Debata i do halahi mangulahi jana mambaen halak na bahat anso dohot mangalayasi Ia. 6:7 Anggo tano na mangincop udan na sai madabu tusia, ditubuhon i do angka suan-suanan na marguna di halak na mangkarejohonsa, dipasupasu Debata do tano i. 6:8 Tapi anggo angka duri dohot angka duhut do na tubu sian tano i, nada adong guna ni tano sisongon i, jana buraan ma i muse jana ujungna nitutungan lopus abis. 6:9 Tapi hamu angka dongan na nihaholongan, haru pe hami dok songon i, anggo taringot tu hamu pos do rohanami adong do angka na dumenggan ditiop hamu satontang tu haluaanmunu. 6:10 Nada Debata na so tigor. Nada halupahononNia sanga aha na denggan na nibaenmunu tuSia. Sai na ingotonNia do holong ni roha na nipatuduhonmunu tuSia di bagasan pangurupionmunu na nipasahatmunu maradopkon angka dongan Kristen na asing i. Jana lopus saonnari pe laing dilehen hamu do pangurupion i. 6:11 Giotnami nian sugari laing ringgas ma hamu, lopus dijagit hamu na niarop ni rohamunu i. 6:12 Nada por rohanami gabe losok hamu. Anggo giotnami, mangolu ma hamu songon halak na manjagit sanga aha na nijanjihon ni Debata hara ni haporsayaanmunu tuSia dohot hasobaranmunu paintehonsa. 6:13 Di na marjanji Debata tu si Abraham, marsumpa do Ia tu diriNia sandiri, harana nada adong na gumincat sian Ia. 6:14 Didok Ia, "Sasintongna, pasupasuonKu ma ho jana baenonKu ma bahat pomparanmu." 6:15 Jadi hara ni sobarna si Abraham paintehon, gabe dijagit ia do na nijanjihon ni Debata tusia. 6:16 Harana anggo jolma, marsumpa do i marhite halak na gumodang sian ia. Jadi sumpa i ma hasidungan ni sude parbadaan jana pate ma i di halahi. 6:17 Anggo giot ni Debata ulang so pos sajo roha ni halak na giot manjagit na nijanjihonNia, na so ubaon ni Debata be sangkapNia i. Hara ni i ma umbaen na nitambaan ni Debata dohot sumpa tu janjiNia i. 6:18 Dua pangalaho na so ra muba; nada margabus Debata di janji dohot sumpaNia! Hara ni i, hita angka na marlinggom tu Debata, adong do di hita jaminan na togu anso tongtong mararop ni roha tu na nipasingkop di hita di hatiha na giot ro. 6:19 Arop ni rohanta i ma na gabe sitiopan na togu jana na pasonangkon rohanta di ngolu on, na dung masuk lalu tu pudi ni tire i. 6:20 Madung ditotas Jesus dalan sibolusonta tusi, jana madung masuk Ia tusi songon Malim Godang di hita salolot-lolotna, di bagasan horong ni Malim Melkisedek.
7:1 Raja sian Salem do si Melkisedek on jana malim ni Debata Na Gumincat i. Hatiha mulak si Abraham sian parporangan di na nitaluhonnia angka raja, ro ma si Melkisedek mangalo-alo jana mamasumasu ia. 7:2 Dung i dilehen si Abraham ma tu si Melkisedek saparsampulu ni sude na dapotnia sian parporangan i. (Goar Melkisedek astuanna na parjolo, "Raja Na Adil"; jana hara ni raja sian Salem ia, gabe "Raja Hasonangan" ma astuan ni goarnia.) 7:3 Na so marama, na so marina do ia, na so martarombo, na so marmula ni ari, jana na so marujung di ngoluna, tapi sobok do ia dohot Anak Ni Debata. Na gabe malim do ia ro di salolot ni salolotna. 7:4 Jadi madung taida dison sanga songon dia godang ni si Melkisedek hara ni sangapnia, salang si Abraham na umpompar bangsonta laing manggarar do tusia saparsampulu ni na dapotnia sian parporangan i. 7:5 Di Tona ni ugamo Jahudi ditontuhon do, ganop halak Israel angkon manggarar do saparsampulu ni sude sinadonganna tu pomparan ni si Levi na gabe angka malim -- astuanna laing tu kahanggi ni halahi sandiri do. Hape pomparan ni si Abraham muse do halak Israel. 7:6 Nada pomparan ni si Levi si Melkisedek, hape laing manjagit do ia saparsampulu bagian sian sinadongan ni si Abraham, jana dipasupasu ia muse si Abraham haru na dung dipasahat angka janji na nilehen ni Debata tu si Abraham sandiri. 7:7 Jadi sanga na bia pe nada tarsoadahon be i, na tumoruk do halak na nipasupasu ulang pado na mamasumasu i. 7:8 Jana na ra mate do halahi, na manjagit saparsampuluan, tapi anggo Ia dilehen do hasaksian, paboa na mangolu do Ia. 7:9 Jadi tardok muse do, si Levi sandiri pe -- di na dohot pomparannia manjagit panggararan ni na saparsampulu bagian i sian halak Israel dohot do manggarar sisaparsampulu bagian i tu si Melkisedek markite-hite si Abraham, di na manggarari si Abraham tu si Melkisedek. 7:10 Dibaen di bagasan pamatang ni ompunia dope ia, dompak di aloalo si Melkisedek ompunia i. 7:11 Antong, sugari sura madung ro hasanggaman i markite-hite hamalimon ni halak levi -- angke di toru hamalimon ni halahi do dijagit halak na bahat Tona i -- aha dope he gunana dipabangkit Malim Godang mangihutkon aturan ni si Melkisedek, jana nada nidok mangihutkon aturan ni si Harun? 7:12 Antong muda muba-uba do hamalimon ni malim, Tona i pe angkon dohot do muba. 7:13 Tuhanta i do na nidok dison. Tapi Ia pe sian marga na asing do, jana na so adong dope jungada sian na samarga on na mangoloi di jolo ni parkaulan i. 7:14 Sude do halak mamboto i, na sian Marga Juda do anggo asal ni Tuhanta i; jana si Musa pe nada jungada didok ia marga on muda hatiha manaringoti angka malim ia. 7:15 Mur tangkas dope na nitaringotan on, di na ro sada malim na sarupa dohot si Melkisedek. 7:16 Na dipajongjong gabe Malim so pola marojahan tu angka aturan na nibaen ni jolma, tapi na marojahan tu ngolu na manongtong. 7:17 Angke taringot tuSia didok, "Malim do Ho ro di salolot ni lolotna, mangihutkon aturan ni si Melkisedek." 7:18 Nisoadahon do angka tona na jolo i, hara ni na so margogo dohot hara ni na so hasaya. 7:19 Dibaen nada adong na ni paujung ni Tona na sanggam i, hara ni i do nipabangkit arop ni roha na dumenggan, markite-hite i do tarpadonok hita tu Debata. 7:20 Boti muse, nada tulus i, ia so markite-hite sumpa, tutu dibaen do halahi gabe Malim nada markite-hite sumpa. 7:21 Tapi anggo Ia mamake sumpa do i di na niangkat Ia gabe Malim, di na nidok ni Debata tuSia, "Madung marsumpa Tuhan, jana na so ubaonNia be di na nidokNia i, 'Ho do Malim salolot-lolotna.' " 7:22 Jadi dao do dumenggan pamudun ni janji na nibaen ni Jesus i. 7:23 Adong dope sada nari: Bahat do anggo angka malim na asing i, angke marmatean do halahi gabe nada tarbaen be manoruskon jabatanna i. 7:24 Tapi anggo Jesus mangolu do salolot-lolotna, jadi nada pinda be tu halak na asing jabatanNia i. 7:25 Jadi hara ni i sanga andigan pe tarbaen Jesus do paluahon sanga ise halak na ro tu Debata markite-hite Ia. Tarbaen Jesus pe songon i hara ni na mangolu do Ia sapanjangna laho pasahatkon tu Debata angka pangidoan ni halahi. 7:26 Jadi Jesus i do Malim Godang na porlu di hita. Na badia do Ia; nada adong dapot disi hasalaan sanga dosa aha pe. Madung disirang Ia sian angka jolma pardosa jana dipanaek lopus tu inganan na gumincat sian langit. 7:27 Nada songon angka Malim Godang na asing i Ia, angkon jolo manghaulkon haul hara ni angka dosana sandiri, dung i hara ni angka dosa ni bangso i. Holan sanoli sajo do Jesus manghaulkon haul, i ma di na nihaulkonNia diriNia sandiri gabe haul. 7:28 Angka halak na so sanggam do na niangkat ni angka Tona ni ugamo Jahudi gabe Malim Godang. Tapi di pudi ni angka Tona i, dibaen Debata ma janji mardongan sumpa, diangkat Ia do gabe Malim Godang, Anak na sanggam i ro di salolot-lolotna.
8:1 Impola ni sude na tahatai on, songon on ma: Adong do di hita Malim Godang na songon i, na juguk di siamun ni habangsa ni Debata Na Gumodang i di banua ginjang. 8:2 Dikarejohon Ia do karejoNia songon Malim Godang di Bilik Na Sun Badia, i ma di Bandar na manongtong i, na nipajongjong ni Tuhan, nada na nibaen ni jolma. 8:3 Sude Malim Godang, niangkat do i laho manghaulkon na nisombahon sanga haul, tu Debata, laing songon i muse do Malim Godangta i; angkon adong do diSia sanga na aha sihaulkononNia. 8:4 Sugari laing di tano on Ia, nada tarbaen Ia gabe malim, harana madung adong angka malim na manghaulkon haul na nipangido ni angka Tona ni ugamo Jahudi. 8:5 Anggo angka karejo na nibaen ni halahi hara ni hamalimon ni halahi i, satutuna tarsongon sada tudosan dohot gambaran ni na di banua ginjang do i. Ma pola dipaboa Debata i najolo tu si Musa, di na laho pajongjongkon bandar i si Musa. Didok Debata do songon on tu si Musa, "Ingot ma! Angkon baenonmu do sudena i mangihutkon tiruan na nipatuduhon tu ho di ginjang ni dolok i." 8:6 Tapi saonnari madung dijagit Jesus karejo na dao sumurung. Angke dumenggan dope pamudun ni janji na nibaen antara ni Debata dohot jolma markite-hite Jesus na songon Pandomuina, angke na marojahan tu janji na dumenggan dope i. 8:7 Sugari sura nada adong hurangna pamudun ni janji na parjolo i, gabe nada pola porlu be pudunon janji na paduahon. 8:8 Hape madung tardapot Debata hasalaan i di bangsoNa i, gabe didok Debata ma, "Ingot hamu ma, na ro ma hatihana, baenonKu ma janji na imbaru dohot bangsongKu Israel, dohot tu Marga Juda. 8:9 Nada sarupa janji i tu janji na Hubaen dohot ompung ni halahi di na Hutogu halahi haruar sian Mesir. Nada togu ditiop halahi janji na Hubaen dohot halahi, hara ni i ma umbaen na so Hupardulihon halahi. 8:10 Tapi saonnari, on ma janji na Hubaen dohot Israel tu angka ari na giot ro: SuankononKu ma angka tona tu bagasan pikiran ni halahi, jana suratkononKu tu ate-ate ni halahi. Debata ni halahi noma Au, jana halahi ma gabe bangsongKu. 8:11 Sahalak pe nada pola porlu halahi mangajari donganna sabangso, sanga paboahon tu donganna, 'Tanda ma Debata.' Angke sudena halahi, sian na menekna lopus tu na gumodang, tandaonna ma Au. 8:12 SesaonKu ma angka hasalaan ni halahi, jana halupahononKu ma angka dosa ni halahi." 8:13 Jadi di na nidokNia sada ihot-ihot ni janji na imbaru, gabe nada hasaya be dibaen Debata ihot-ihot ni janji na parjolo i; jana sanga aha na so hasaya angkon manigor mago ma i.
9:1 Adong do aturan ni ibadat sian ihot-ihot ni janji na parjolo i jana adong muse do inganan paribadatan na nibaen ni jolma. 9:2 Dipajongjong do sada bandar, bagian parjolona i nigoaran do i Inganan Na Badia. Adong ma disi parlampuan, jana adong muse ma meja dohot roti na nihaulkon tu Debata. 9:3 Dibagasanna i muse, i ma na di balik ni tire na paduahon, adong ma sada bilik na nigoaran Bilik Na Sun Badia. 9:4 Di balik ni i adong do sada inganan na nibaen sian sere laho manutung hamonyan jana adong muse Poti Parjanjian na nilampis sudena dohot sere. Di bagasan poti i adong do sada mangkuk sere na marisi manna, tungkot ni si Harun na dung martunas dohot duangkoping batu tulis panyuratan ni Tona Na Sampulu i na sian Debata. 9:5 Di ginjang ni poti i adong ma dua kerub na manggambarkon na disi do Debata. Mangerbang ma habong ni kerub i di ginjang inganan pamispisan ni mudar, tanda ni hasesaan ni dosa i. Tapi nada tarpatorang sudena i pasada-sada saonnari. 9:6 Songon i ma dibaen pangaturna sude. Ganop ari angkon masuk ma angka malim i tu bagasan bilik na parjolo i laho mandalankon karejo ni halahi. 9:7 Anggo na masuk tu bilik parbagasan ni bandar i hum Malim Godang i sajo do. I pe, hum sanoli sataon do i tola. I pe angkon mamboan mudar do ia patuluskon i, i ma sisombahononkon tu Debata hara ni ia sandiri dohot hara ni angka dosa na nibaen ni bangsonia i sian na so pamotoanna. 9:8 Sian Tona i, tangkas ma diajari Tondi Parbadia hita, salolot laing jongjong dope bandar bagian na di jolo i, na so tarbuka dope dalan masuk di hita tu Bilik Na Sun Badia i. 9:9 Hatiha sisaonnari on ma na nigambarkon ni i; astuanna, anggo angka haul sanga haul pahan-pahanan na nihaulkon i tu Debata, nada tarbaen i paias roha ni halak na manghaulkon i gabe sanggam. 9:10 Harana anggo angka upacara na songon i na marpardomuan tu sipanganon sajo do i dohot siinumon bope angka ragam-ragam ni upacara na mambaen ias. Hum angka Tona na tarida do na mardalan i lopus tu hatihana sanga andigan baenon ni Debata haimbaruan. 9:11 Tapi madung ro Kristus gabe Malim Godang ni angka na denggan na giot ro i. Bandar ingananNia mandalankon tugas songon Malim Godang, i ma bandar na sumurung jana na sumanggam. Nada na nibaen ni jolma; astuanna, nada na sian portibi on. 9:12 Hum sanoli sajo do Kristus masuk tu Bilik Na Sun Badia na di bandar i ro di salolot-lolotna. Anggo di hatiha i nada maroban mudar ni hambeng jantan Ia sanga mudar ni anak ni lombu sihaulkonon; hum mudarNia sandiri do dioban Ia jana i ma dalanna dibaen Ia paluahon hita salolot-lolotna. 9:13 Anggo mudar ni hambeng jantan dohot mudar ni lombu jantan bope tiranggong ni haul anak ni lombu i, dipispiskon tu angka halak na hodar do i -- mangihutkon Tona ni ugamo; anso ias halahi. Antong, muda tarpaias mudar i do halahi sian hahodaran na nidok ni ugamo, 9:14 mur ma mudar ni Kristus! Markite-hite Tondi na manongtong, dihaulkon Kristus do diriNia sandiri tu Debata gabe haul na sanggam. Dipaias mudarNia i do taroktokta sian angka karejo na so marguna, anso tarbaen hita dohot mangoloi karejo na so marguna, anso tarbaen hita dohot mangoloi Debata na mangolu i. 9:15 Jadi hara ni i do dibaen Debata sada janji na imbaru markite-hite Kristus, anso maruli pasupasu na so ra mantak angka halak na nipiohon ni Debata, i ma pasupasu na dung nijanjihon ni Debata. Tulus pe sudena i hara ni na dung adong do na mate, i ma Kristus; jana dipalua hamamateNia i ma halak sian angka hasalaan na nibaen ni halahi dompak margogo janji na parjolo i. 9:16 Muda adong surat ni tean-teanan, angkon laing adong do tanda paboa na dung marujung ngolu ni na mambaen surat i. 9:17 Angke nada marlaku dope sada surat tean-teanan anggo laing mangolu dope na mambaen surat i. Angkon jolo mate do halakna i anso marlaku suratna i. 9:18 Hara ni i do umbaen na nirasmihon dohot mudar janji na parjolo i. 9:19 Jolo dipaboa si Musa do sude angka Tona na sian Debata tu bangso Israel sude. Baru ma dibuat ia mudar ni anak ni lombu dohot mudar ni hambeng jantan i, dicampur ia ma i dohot aek, dung i dipispiskon ia ma tu Buku Tona na sian Debata dohot tu sude bangso Israel. Ruput hisop dohot imbulu ni biri-biri na rara tobang do dibaen ia pamispisna. 9:20 Hatiha na mamispiskon i si Musa didok ia ma, "On ma mudar na pahotkon pamudun ni janji na sian Debata, na angkon sioloanmunu." 9:21 Dung i dipispiskon ia muse ma laing songon nangkin mudar i tu bandar i dohot tu angka panjamaan na nipake marsomba tu Debata. 9:22 Tutu nian, anggo mangihutkon Tona ni ugamo Jahudi bolas nidok, sasudena sanga aha pe angkon nipaias dohot mudar do; jadi nada tarsesa dosa anggo so adong mudar na niduruskon. 9:23 Angka songon i ma dalanna paiaskon angka barang na manggambarkon pangalaho na di banua ginjang. Tapi anggo taringot tu angka na di banua ginjang i sandiri porlu dope angka haul na dumenggan sian angka gambaran i. 9:24 Harana anggo Bilik Na Sun Badia na nipature ni jolma i hum na manggambarkon Inganan Na Badia na satutuna i do i. Banua Ginjang i do na nimasuhan ni Kristus; disi ma Ia saonnari mangadop tu Debata laho manyarihon hita. 9:25 Ganop taon do Malim Godang ni halak Jahudi masuk tu Bilik Na Sun Badia na di Bagas Ni Debata, maroban mudar ni sada pahan-pahanan. Tapi anggo Kristus nada marpupu Ia manghaulkon diriNia. 9:26 Harana muda songon i do, gabe marpupu do Ia manaon parkancitan mamungka sian dung ditompa portibi on. Hape anggo satutuna, saonnari di hatiha na giot marujung on, hum sanoli sajo do Ia ro laho manyesa dosa markite-hite na mangalehen diriNa sandiri. 9:27 Madung ditotopkon Debata hian, sanoli sajo do mate jolma, dung i diadili Debata noma. 9:28 Laing songon i do Kristus i, hum sanoli sajo do Ia nihaulkon songon haul laho manyesa dosa ni bahat halak. Ro dope Ia nian paduanolihon tapi nada mamorsan dosa be; na giot paluahon angka jolma na paintehon haroroNia noma.
10:1 Dibaen hum halinu ni angka haluaan na giot ro i do na di bagasan Tona i, nada anggo haluaan i sandiri. Hara ni i nada tarbaen Tona i markite-hite angka haul na tongtong dihaulkon ganop taon padenggankon singkop angka na ro tu Debata. 10:2 Sugari na dung tutu situtu ias sian dosa angka halak na marsomba i tu Debata, nada adong be di halahi pangkilalaan na mardosa jana mantak noma halak manghaulkon haul. 10:3 Hape anggo satutuna, haul na nihaulkon i ganop taon, na pasingotkon jolma i do taringot tu angka dosa ni halahi, 10:4 harana anggo mudar ni lombu dohot mudar ni hambeng i sandiri nada tarbaen i manyesa dosa. 10:5 Hara ni i do di na ro Kristus tu tano on didok Ia tu Debata, "Nada pola dihagioti rohaMu haul dohot haul silehen-lehen; tapi madung diparade Ho sada pamatang di Au. 10:6 Nada dihalomohon rohaMu haul sian pahan-pahanan na nitutung gabe haul sanga angka haul na nisombahon laho manyesa dosa. 10:7 Dung i Hudok ma, 'Dison do Au, o Debata! Ro do Au laho patuluskon hagiotMu songon na tarsurat i di Buku Na Badia taringot tu Au sandiri.' " 10:8 Mula-mula didok Kristus, "Nada pola dihagioti Ho haul dohot haul silehen-lehen; nada dihalomohon rohaMu haul sian pahan-pahanan na nitutung gabe haul dohot haul na nisombahon panyesa ni dosa." Didok Kristus do songon i haru pe sasude angka haul i nisombahon mangihutkon Tona ni ugamo Jahudi. 10:9 Dung i didok Kristus dope, "Dison do Au, o Debata! Ro do Au laho patuluskon hagiotMu." Jadi hara ni i, disoadahon Debata ma angka haul na honok i jana digonti Ia ma i dohot Kristus gabe haul na imbaru. 10:10 Madung dipatulus Jesus Kristus sanga aha na nidok ni Debata baenonNia. Hara ni i ma umbaen na nipaias hita sudena sian dosa markite-hite haul i, i ma Jesus sandiri -- na nihaulkon sanoli sajo ro di salolot-lolotna. 10:11 Sasude Malim Ni Jahudi angkon mandalankon karejo hamalimon ganop ari, jana marpupu ia manghaulkon angka haul na sarupa. Hape dosa aha pe nada adong tarsesa angka haul i. 10:12 Tapi anggo Ia, dung dihaulkon Ia haul na sada i, hara ni dosa, juguk ma Ia salolot-lolotna di siamun ni Debata. 10:13 Jadi saonnari, hum na paintehon sajo do Ia, lopus nipayakkon musuNia sudena gabe sidegean ni patNia. 10:14 Jadi sian haul na sada i, gabe sanggam ma dibaen Kristus sudena halak na nipaias sian dosana salolot-lolotna. 10:15 Taringot tusi pe dohot do Tondi Parbadia mandok tu hita, 10:16 " 'On ma janji na giot baenonKu dohot halahi tu ari na giot ro,' ninna Tuhan i, 'SuratkononKu ma angka TonangKu tu bagasan roha ni halahi, jana suankononKu ma i tu pikiran ni halahi.' 10:17 'HalupahononKu ma angka dosa dohot hajahatan ni halahi.' " 10:18 Jadi madung disesa angka dosa i dohot hajahatan i, gabe nada pola be haulkonon haul laho manyesa dosa. 10:19 Antong saonnari hamu angka dongan, hara ni mudar ni Jesus i, madung bisa hita masuk tu Bilik Na Sun Badia i. 10:20 Madung dibuka Ia dalan na imbaru, jana na mangolu do hita markite-hite tire i, i ma pamatang ni Jesus sandiri. 10:21 Jana adong do di hita sada Malim Godang di Bagas Ni Debata. 10:22 Antong hara ni i, tapadonok ma tu Debata mardongan roha na bulus dohot haporsayaan na tutu tu Debata; bope dohot roha na dung dipaias sian pangkilalaan na sala, bope dohot pamatang na dung nipaias dohot aek na lan. 10:23 Togu ma hita marsitiopan tu arop ni rohanta na dung taoku i angke haposan do Debata, patulusonNia do janjiNia. 10:24 Jana marsipamanatan ma hita sama hita anso tarbaen hita marsiparinggasan patupahon angka na denggan dohot patuduhon holong marsihaholongan. 10:25 Ulang ma tatinggalkon parlagutanta i, songon na nibaen ni na deba. Angkon mur umburju ma nian hita marsipaingotan sama hita, angke taboto do, ro ne ma Tuhan i. 10:26 Harana anggo dung dipasahat do tu hita jamita na sian Debata, hape laing tapupu do tasangajo mambaen dosa, gabe nada adong sada haul pe na tarbaen manyesa dosanta. 10:27 Hum na manjagit pangadilan ni Debata sajo noma hita dohot manjagit hagugurgur ni muruk ni Debata na mangabiskon sanga ise halak na mangalo Debata! 10:28 Sanga ise na so burju mangoloi angka Tona Ni Debata na nipasahat ni si Musa, nimatehon sajo do i nada adong ampunan, muda tardapot ia marsala disaksihon dua sanga tolu halak. 10:29 Haru tu halak na songon i, i ma borat ni uhumanna, mur bia muse dope ulaning borat ni uhuman tu angka jolma na songon on: Na mangalayasi Anak Ni Debata, halak na marnayang ni roha mida hamamate ni Kristus na songon jaminan ni janji ni Debata na mangkaholongi Ia. Hilala hamu ma sanga bia dokdok ni uhuman tu angka jolma sisongon i! 10:30 Angke taboto do sanga ise na mandok songon on, "Au do nampuna pamaloson, Au do na giot mambaen pamaloson!" Jana na mandok muse, "Uhuman ni Tuhan ma bangsoNa." 10:31 Na jorbut situtu do muda madabu hita tu tangan ni Debata Na Mangolu i! 10:32 Ingot hamu ma sanga na bia pangalahomunu di hatiha na salpu. Anggo di hatiha i, dung ditorangi sinondang ni Debata hamu, bahat do parhancitan ditaon hamu; haru songon i pe laing marsitutu do hamu marjuang. 10:33 Huhul hona incak do hamu jana gabe sitontonan di jolo ni halak na bahat. Huhul laing dohot do hamu manaon dohot halahi na manaon songon i, 10:34 jana dohot do hamu mangkilalahon pardangolan ni angka halak na tarhurung. Jana di na hona rampas sude sinadonganmunu, jop do rohamunu manjagit sasudena i, angke diboto hamu do, laing adong dope di hamu na dao dumenggan na tahan salolot-lolotna. 10:35 Jadi hara ni i, ulang mandele hamu, angke muda togu do haporsayaanmunu, adong do upa na godang disi! 10:36 Porlu do sobar hamu, jana muda dung dipatulus hamu hagiot ni Debata, jagitonmunu ma janji i. 10:37 Angke tarsurat do, "Santongkin nari sajo noma, ro ne ma Ia na giot ro i hian; nada palambat-lambatonNia haroroNia. 10:38 Jana halakKu na tigor roha i, mangolu do hara ni haporsayaanna, tapi muda adong sian halahi na sumurut, nada jop be rohangKu mida i." 10:39 Anggo hita nada halak na sumurut sanga na lilu hita. Tapi halak na porsaya do hita jana na dung nipalua.
11:1 Haporsayaan i ma jojahan ni roha taringot tu angka na niarop ni roha dohot hapastian taringot tu na so niida dope. 11:2 Hara ni na porsaya, gabe jop do roha ni Debata mida angka jolma narobi. 11:3 Hara ni haporsayaan, gabe mangarti hita bahaso hata na nidok ni Debata do manjadihon hasiangan on; jadi sanga aha na tarida, sian na so tarida do i tarjadi. 11:4 Hara ni na porsaya, gabe dihaulkon si Abel do tu Debata haul na dumenggan ulang pado haul na nihaulkon ni si Kain. Hara ni haporsayaannia i, dijagit Debata do si Abel gabe songon halak na dumenggan; angke tangkas do i tarida di na nijagit ni Debata na nihaulkonnia i. Madung mate nian si Abel, tapi hara ni haporsayaannia i, gabe mangkobari dope ia lopus tu sadari on. 11:5 Hara ni na porsaya, gabe nada mate si Henokh, tapi dipanaekkon do ia jana dioban tu Debata. Sahalak pe nada adong tarbaen marsuo dohot ia, angke madung diangkat Debata ia. Di Buku Na Badia i tarsurat do na nipasonang ni si Henokh roha ni Debata dompak so diangkat ia. 11:6 Muda so marhaporsayaan sanga ise pe nada tarbaen pasonang roha ni Debata. Angke sanga ise na ro tu Debata angkon porsaya do ia na tutu adong Debata jana lehenon ni Debata do upa tu angka na manjalahi Ia. 11:7 Hara ni na porsaya, gabe dijagit si Noak do barita na nilehen ni Debata tusia taringot tu angka na giot masa muse, na so haidaan dope tanda-tandana. Laing hara ni i muse ma, gabe dioloi si Noak Debata, gabe dipauli ia sada parau na paluahon ia muse rap dohot pangisi ni bagasnia. Jadi gabe dipasala ma portibi on, hape anggo si Noak sandiri didok Debata ma gabe halak na burju hara ni haporsayaannia. 11:8 Hara ni na porsaya, gabe dioloi si Abraham Debata, di na nipio ni Debata ia jana disuru anso kehe tu luat na nijanjihon ni Debata tusia. Dung i kehe do si Abraham so pola diboto ia sanga na giot tudia ia kehe. 11:9 Mardongan haporsayaan tu Debata, songon halak na ro do si Abraham di luat na nijanjihon ni Debata i tusia. Maringanan ma si Abraham disi di bagasan bandar. Laing songon i do si Ishak dohot si Jakob na dung dohot manjagit janji i sian Debata. 11:10 Angke tarpainte-inte do si Abraham anso tinggal ia di kota na giot baenon jana na nipauli ni Debata di ginjang ni ojahan na togu. 11:11 Hara ni na porsaya, gabe maruli pomparan si Abraham *HARA NI NA PORSAYA ... ABRAHAM: Dipiga-piga-piga naskah narobi didok: Hara ni na porsaya, gabe denggan ma pamatang ni si Sara, bope na dung matobangtu ia giot manubuhon dakdanak ... Sara.* dohot si Sara, haru pe na dung matobangtu si Abraham boti si Sara pe na so maruntungan. Pos do roha ni si Abraham laing na gohan ni Debata do janjiNia. 11:12 Haru pe di hatiha i songon na so adong be idaon same na mangolu sian si Abraham, hape hum sian ia sandiri sajo do martubuan bahat pomparannia, na so taretong bahatna -- songon bahat ni bintang na di langit dohot horsik na di topi ni laut. 11:13 Di bagasan haporsayaan i, madung mate halahi sude. Nada dijagit halahi dopena janji i, tapi di tatap halahi do i sian na dao. Jadi pos jana jop do roha ni halahi marnidasa, jana dioku halahi do, bahaso pangaranto dohot paisolat do halahi di tano on. 11:14 Sanga ise na mandok songon i, tangkas do dipatuduhon halahi, na manjalahi luat na gabe inganan na hot do halahi. 11:15 Nada luat na nitinggalkon ni halahi be na nipasari-sari ni halahi. Sugari songon i, jotjot do tarbaen halahi mulak mangulahi tu luat i. 11:16 Hape anggo saonnari, luat na dumenggan do na nijalahan ni halahi, i ma banua ginjang. Hara ni i ma umbaen na so pola ila roha ni Debata nigoaran Ia Debata ni halahi, angke madung dipasingkop Debata sada kota di halahi. 11:17-18 Laing hara ni na porsaya, di na niuji ni Debata si Abraham, dipasahat si Abraham do si Ishak anakna i nihaulkon gabe haul. Haru pe madung dilehen tu si Abraham anak na nijanjihon ni Debata i; jana haru pe na dung didok Debata taringot tu dakdanak i, "Sian si Ishak on ma jagitonmu pomparan na Hujanjihon i tu ho," haru songon i pe laing rade dope si Abraham pasahatkon anaknia na sasada i. 11:19 Angke dihilala si Abraham, tarbaen Debata do pangoluhon angka na mate. Jadi bolas didok, madung dijagit si Abraham mangulahi si Ishak sian hamatean. 11:20 Hara ni na porsaya, dijanjihon si Ishak do pasupasu tu si Jakob dohot si Esau di hatiha na giot ro. 11:21 Hara ni na porsaya, di na giot mate si Jakob -- disandehon ia ma tu pangkal ni tungkotnia i jana disomba ia Debata -- dilehen ia ma pasupasu tu dakdanak ni si Josep. 11:22 Hara ni haporsayaan, di na giot mate si Josep, dibaritahon ia do taringot tu haruruar ni halak Israel. Laing ditonahon ia hian do sibaenon taringot tu holi-holinia. 11:23 Hara ni na porsaya, gabe ditabunihon natorasna do si Musa tolu bulan honokna dung sorang ia. Diida halahi na denggan do dakdanak i jana nada mabiar halahi mangalo parenta ni raja. 11:24 Hara ni haporsayaanna, dung magodang si Musa, nada ra ia nigoar anak ni boru ni raja ni Mesir. 11:25 Gumonan do dihilala ia markancit rap dohot bangso ni Debata ulang pado santongkin mandai hasonangan sian ngolu na mardosa. 11:26 Dihilala si Musa dao dope ummarga maruli incak-incak hara ni Kristus na nijanjihon ni Debata i ulang pado manjagit sasude arta ni tano Mesir; harana upa di ari na giot ro do na nipainte ni si Musa. 11:27 Hara ni haporsayaanna, gabe ditadingkon si Musa do tano Mesir so pola mabiar ia mida raja i na topet muruk marsitutu. Torus ditustus ia do dalannia songon na dung niidania Debata na so tarida i. 11:28 Hara ni haporsayaannia, dipatupa si Musa do Paskah jana dibaen ia parenta, angkon pispiskonon ni halak Israel mudar di pintu ni bagas ni halahi anso ulang dimatehon angka anak siangkaan ni halahi. 11:29 Hara ni haporsayaan, gabe tartaripari halak Israel do Laut Rara songon na mamolus di tano na mahiang, hape anggo halak Mesir dibondut laut i do di na nicubo ni halahi manyiborang muse. 11:30 Hara ni haporsayaanna, dung dihaliangi halak Israel tembok ni Jeriko pitu ari honokna gabe matolbak do tembok i. 11:31 Laing hara ni haporsayaan, gabe nada dohot si Rahab dadaboru jalang i mate rap dohot angka na mangalo Debata; angke denggan do dibaen ia manjagit angka pamata-matai ni halak Israel. 11:32 Antong, dia dope dokkononku? Tarpaboa au do sudena i tapi nada tuk hatiha di au. Na so hupaboa dope si Gidion, si Barak, si Simson, si Jefta, si Daud, si Samuel dohot angka panurirang i. 11:33 Hara ni haporsayaanna, ditaluhon halahi do angka harajaan. Na tigor do na nibaen ni halahi, gabe dijagit halahi ma na nijanjihon ni Debata. Dihuntam halahi do baba ni angka singa. 11:34 Diintopi halahi do api na godang. Malua do halahi marlojong sian baba ni podang. Gale do nian halahi, tapi gabe margogo; mur margogo dope tehe di parporangan, lopus tartaluhon halahi angka parangan ni bangso na asing. 11:35 Hara ni haporsayaanna gabe dijagit angka dadaboru do angka na matena na mulak mangolu. Tapi adong muse do na mangalehen dirina disiksa lopus mate, jana manjua do halahi nipalua, hara ni na giot maruli halahi di hangongot na dumenggan. 11:36 Adong ma deba na niincahan, na diparkanciti, dirante jana dipamasuk tu hurungan. 11:37 Didanggur do halahi dohot batu lopus mate, dilobong do halahi dohot gargaji, dimatehon dohot podang. Madang-adang halahi mamake baju sian bobak ni biri-biri sanga bobak ni hambeng; marpogos do halahi, diparkanciti jana disiksa. 11:38 Inganan na so tama do portibi on di halahi. Di parhorsihan dohot di dolok-dolok i do halahi madang-adang, jana di bagasan angka liang dohot di angka rigat ni tano i do halahi maringanan. 11:39 Na godang do hamonangan na dapot ni sudena halahi hara ni haporsayaanna i! Tapi haru songon i pe laing na so nijagit ni halahi dope anggo na nijanjihon ni Debata, 11:40 angke adong dope sangkap ni Debata na dumenggan salaho tu hita. Angkon rap do dohot hita anso gabe sanggam halahi.
12:1 Jadi anggo taringot tu hita, bahat sajo do humaliang hita angka saksi! Hara ni i, sasudena na padokdok hita bope dosa na sai lohot tu hita, tatalgangi ma sudena sian hita. Jana marsitutu ma hita manyalpui parlumbaan na di jolonta. 12:2 Tu Jesus ma tatatap, na manogu-nogu hita di bagasan haporsayaan, jana na maroban haporsayaanta i tu hasanggaman. Ditaonkon Ia do mate di hayu parsilang gonti ni jop ni roha na dung diparade diSia, jana juguk do Ia nuaeng di siamun ni habangsa ni Debata. 12:3 Ingot hamu ma Ia na manaon sai bahat hata partangkangon sian angka pardosa, anso ulang gale hamu, jana ulang mandele rohamunu. 12:4 Angke di paraloanmunu mangalo dosa i, nada jabat dope lopus tiris mudarmunu. 12:5 Jana madung lupa hamu di sipaingot na mandok tu hamu songon tu dakdanak, "Ale dakdanakku, ulang menek rohamu mida pangajaran ni Tuhan i; jana ulang mandele muda dipaingot Ia ho. 12:6 Angke diajari Tuhan i do sanga ise halak na nihaholonganNia, jana diloncing Ia do ganop na niokuNia dakdanakNia." 12:7 Angkon songon pangajaran ni sada ama tu dakdanakna do panjagitmunu muda ro loncing-loncing ni Debata. Adong ma he lakna dakdanak na so jungada diajar amangna? 12:8 Anggo na so dohot do hamu diajar songon pangajarina di sude dakdanaknia, anak gampang do hamu muda songon i, nada anakna kandung. 12:9 Di tano on, adong do amanta. Diajari amanta be do hita, jana tapasangap do amanta. Antong mur ma hape maradopkon Amanta na di banua ginjang i, tontu angkon mur umoloan ma hita tuSia anso mangolu hita. 12:10 Marhatiha do pangajaran ni natorasta na di tano on tu hita, hombar tu na denggan na niboto ni halahi. Tapi anggo Debata, diajari do hita laho padenggankon hita, anso gabe badia hita rap dohot Ia. 12:11 Tutu nian dompak hona ajar hita, nada sonang rohanta manjagit pangajaran i, hum na pahancit roha sajo do i nihilala. Hape dung salpu i, dilehen do di halahi parbatu ni hatigoran, na mangalehen hasonangan. 12:12 Hara ni i, pargogoi hamu ma tanganmunu na gale dohot patmunu na humitir-hitir i mardalan! 12:13 Di dalan na hornop ma hamu mardalan, anso ulang tarbalingsu patmunu, tapi mur tu malumna ma. 12:14 Usahahon hamu ma anso mardame-dame hamu tu sude halak jana manggogo ma hamu anso hum di Tuhan ngolumunu, harana sahalak pe nada adong na tarbaen mida Tuhan anggo inda songon i pardalan ni ngoluna. 12:15 Jagohon hamu ma anso ulang adong sanga ise na morot sian asi ni roha ni Debata; anso ulang adong na gabe duri dohot sihupi di tonga-tongamunu na parohon hasusaan jana na mambaen sego halak na bahat. 12:16 Jagohon hamu ma anso ulang adong na gabe siparkamainan sanga na so mangargahon angka pangalaho na badia songon na nibaen ni si Esau. Digadis ia haknia songon anak siangkaan, hum hara ni samangkuk sipanganon. 12:17 Diboto hamu do, por do rohania, hape ditulak do ia, angke nada adong be hatiha disia giot paubahon roha, *ANGKE NADA ADONG BE HATIHA DISIA GIOT PAUBAHON ROHA: Sanga: Marusaha do ia giot maruli dipasupasu i.* haru pe marilu-ilu matana manjalahi. 12:18 Nada pola diadopi hamu songon na masa tu halak Israel najolo. Anggo halahi diadopi halahi do na bolas nijama, i ma Dolok Sinai dohot api na marnyala-nyala i; diadopi halahi do hagolapan, haholomon bope halingsungsung; 12:19 saringar ni sarune dohot sora na lobi gogo. Di na nibege ni halak Israel sora i, gogo do pangidoan ni halahi anso ulang be nian mangkuling sora i tu halahi. 12:20 Angke nada tahan halahi pabege-bege parenta na nipalalu ni sora i. Angke didok sora i do, "Sasudena na mandonohi dolok on, nada marimbar sanga na binatang sanga na ise pe tehe, angkon dangguran do dohot batu lopus mate." 12:21 Sanga aha na niida ni halak Israel i, i noma sogenna jabat didok si Musa, "Mabiar do au jana humitir!" 12:22 Tapi anggo hamu, Dolok Sion noma na niadopanmunu bope Kota Ni Debata na mangolu, i ma Jerusalem na di banua ginjang dohot surusuruanNa na marribu-ribu. 12:23 Sada parsuoan godang do na niadopanmunu -- parsuoan ni angka anak siangkaan ni Debata na dung disuratkon goarna di banua ginjang. Debata do na niadopanmunu, Panguhum ni sude jolma manusia. Adopanmunu do angka tondi ni halak na burju na dung dipasanggam. 12:24 Diadopi hamu do Jesus pandomui na mambaen janji na imbaru i; diadopi hamu do mudar pamispison na gabe jaminan ni angka na dao dumenggan sian na nijamin ni mudar ni si Abel. 12:25 Antong, jago ma hamu anso ulang jabat layas rohamunu tuSia na mandok hata i. Salangkan halahi na so manangihon na palalu hata ni Debata di portibi on nada tarbaen marlojong, mur ma hita on na umbege hata na nidokNia sian banua ginjang. Muda nada ra hita manangihonsa, bia dope pambaenna malua hita sian Ia! 12:26 Mangaronggur do ditano on soraNia hatiha i. Tapi saonnari madung marjanji Ia, "Mangaronggur dope baenonKu sanoli nari, nada hum tano on, tapi dohot do langit." 12:27 Pandohan "sanoli nari" patuduhon bahaso pasidingon do sasudena na dung nitompa i jana na ra humutur i, anso tinggal ma hum na so ra humutur i. 12:28 Hara ni na dung tajagit harajaan na so tarhutur i, beta ma tadok tarimakasi jana mangoloi tu Debata mangihutkon angka tona na tama tuSia, mardongan sangap dohot biar. 12:29 Angke songon api na mangabiskon do tutu anggo Debatanta i.
13:1 Tongtong ma jagohon hamu holong maradopkon dongan! 13:2 Ulang pola gamang hamu manjagit dongan na so haru tangkas dope ditanda hamu. Angke di na patupahon na songon i sian na so pamotoan, madung dijagit ia surusuruan di bagasnia. 13:3 Ingot hamu ma angka halak na tarhurung, laing songon na dohot hamu tarhurung rap dohot halahi. Dohot angka na manaon pambaenan na so patut, ingot hamu ma halahi songon na dohot hamu manaonkon na songon i. 13:4 Dipatuduhon ganop halak ma sangap di parsaripeonna, hara ni i angkon burju do na mardongan saripe tu donganna saripe i. Halak na markamainan dohot na mambaen na so ture adilan ni Debata do i. 13:5 Ulang dirajai hepeng ngolumunu, tapi hasonangkon hamu ma intap ni na adong di hamu. Angke madung didok Debata, "Nada padiaronKu ho jana nada tadingkononKu ho." 13:6 Hara ni i gabe puluk ma hita mandok, "Tuhan do Pangurupi di au, nada mabiar au. Aha ma he na tarbaen jolma tu au lakna?" 13:7 Ulang hamu lupa tu angka pamimpinmunu na dung pasahatkon jamita na sian Debata tu hamu. Paligi-ligi hamu ma sanga songon dia pardalan ni ngolu ni halahi lopus mate jana haporsayai hamu ma Debata songon pangkaporsayai ni halahi di Debata. 13:8 Tongtong do sarupa anggo Jesus Kristus, najolo, saonnari jana ro di salolot-lolotna. 13:9 Ulang ma padiar-diar hamu angka pangajaran na marragam-rupa i mangaliluhon hamu. Angkon denggan ni roha ni Debata do na patogu rohanta, i do na denggan; ulang ma angka paraturan ni sipanganon. Angke angka halak najolo na mangihutkon paraturan i nada adong pola gunana dapot halahi. 13:10 Adong do di hita sada inganan laho pasahat haul tu Debata. Jana angka malim na markarejo mangoloi di bagasan bandar i, nada dipatola halahi mangankon haul na adong di ginjang ni parkaulan i. 13:11 Anggo mudar ni pahan-pahanan na nihaulkon i gabe haul laho manyesa dosa, dioban Malim Godang do i tu Bilik Na Sun Badia di bagasan bandar i; tapi anggo bangke ni pahan-pahanan i sandiri di duru ni bandar i do nitutungan. 13:12 Hara ni i ma umbaen na di ruar ni horbangan ni kota Jesus mate laho paiaskon bangsoNa sian dosa markite-hite mudarNia i sandiri. 13:13 Hara ni i, beta ma tadapotkon Ia di ruar ni bandar i jana dohot ma hita niincahan rap dohot Ia. 13:14 Nada adong inganan na hot di hita anggo di tano on; inganan tu hatiha na giot ro do na tajalahi. 13:15 Hara ni i, sai tapuji-puji ma Debata markite-hite Jesus; i ma haul haluaan tuSia, na tahaulkon sian pandohan na tapajojor dohot pamanganta laho pasangapkon goarNia. 13:16 Ulang lupa hamu mambaen na denggan bope na marsiurup-urupan, angke na songon on do haul na pasonangkon roha ni Debata. 13:17 Ihutkon hamu ma angka parenta na sian pamimpinmunu jana oloi hamu ma na nidok ni halahi. Angke tongtong do diparrohahon halahi tondimunu jana angkon martanggung jawab do halahi tu Debata. Muda dioloi hamu do halahi, tarbaen halahi ma markarejo di bagasan sonang ni roha; muda inda songon i, humolos ma halahi na karejo i, jana nada adong ro labo sian na songon i di hamu. 13:18 Torus ma tangiangkon hamunu hami. Pos do rohanami na denggan do taroktoknami, angke sai ra do hami patuluskon na tigor. 13:19 Tarlobi gomos hupangidohon, anso laing tangiangkon hamu ma au. Tangiangkon hamu ma anso tumibu dioban Debata au mangulahi tu tonga-tongamunu. 13:20 Madung dipangolu Debata Tuhanta Jesus sian hamatean. Hara ni hamamateNia i, gabe Parmahan Bolon ma Ia saonnari di hita na gabe songon biri-biriNia. Laing songon jaminan muse do hamamateNia i taringot tu janji na so ra muba na sian Debata. 13:21 Sai dipasingkop Debata mual ni hasonangan i ma hamu di sasude na denggan i na porlu di hamu laho patuluskon hagiot ni rohaNia. Sai dibaen Debata ma di hita sanga aha giot ni rohaNia markite-hite Jesus Kristus. Tarpuji ma Jesus salolot-lolotna! Amen. 13:22 Hupaingot ma hamu ale dongan, jagit hamu ma hata sipaingot i, angke saotik do isi ni suratkon tu hamu. 13:23 Boto hamu ma si Timoteus donganta i madung malua ia sian hurungan. Muda dung di inganankon ia, obanonku do ia muda ro au manopot hamu sanoli on. 13:24 Palalu hamu ma tabengku tu sude angka pamimpinmunu dohot tu sude halak na badia. Laing jagit hamu ma tabe ni angka dongan na di Italia. 13:25 Asi ni roha ma mandongani hamu sude.
1:1 Tabe ma sian au, si Jakobus, naposo ni Debata dohot Tuhan Jesus Kristus, tu na dua bolas marga i, na di parserahan. 1:2 Hamu angka dongan! Muda manaon pandugaan na marragam-ragam hamu, etong hamu ma i songon sada hauntungan. 1:3 Angke muda laing tong do porsaya hamu tu Tuhan di na mamolus pandugaan i gabe diparo i ma hasobaron di hamu. 1:4 Jagohon hamu ma anso ulang mantak di tonga dalan hasobaronmunu i, tapi mur martumbur ma i lopus magodang hamu jana sanggam bope na so markahurangan hamu di sasudena. 1:5 Muda adong sanga ise sian hamu na hurang marroha, dipangido ia ma habisuhon sian Debata, gabe lehenon ni Debata ma disia habisuhon. Angke tu ganop halak do Debata mangalehen jana mardongan ibo ni roha. 1:6 Tapi angkon porsaya do sanga ise na mangido i; ulang ganggu rohana. Angke tarsongon ombak ni laut na nionjar tu siamun siambirang do anggo halak na ganggu roha. 1:7 Ulang dipikir halak na songon i jagitonnia bagi aha sian Tuhan i. 1:8 Anggo halak na mardua roha, nada tontu di bagasan sude pardalananna. 1:9 Sanga ise halak Kristen na pogos, jop ma rohania muda dipagincat Debata ia. 1:10 Jana halak Kristen na kayo, laing marjop ni roha ma muda dipatutoru Debata ia. Angke na giot mago do sanga ise na kayo songon bunga ni duhut. 1:11 Muda dung bincar mataniari di panyoro ni milasna i, gabe malos ma duhut i, marurus ma bungana i jana mago muse ma dohot hajegesonna i. Laing songon i ma halak na kayo; magopu ma ia di na mandalankon karejona i. 1:12 Martua do sanga ise na sobar di na manaon pandugaan. Angke muda dung disalpui ia pandugaan i, manjagit upa ma ia, i ma hangoluan na nijanjihon ni Debata tu angka na mangkaholongi Debata. 1:13 Muda adong sanga ise na hona ujian na songon i, ulang ma didokkon ia, "Sian Debata do haroroan ni ujian i," angke nada tarbaen hona uji Debata baenon ni hajahatan jana nada diuji Debata sanga na ise pe. 1:14 Tapi ganop halak digoda do marhite hagiotna sandiri na jahat i. 1:15 Dung i muda dioloi ia hagiotnia na jahat i, gabe tubu ma dosa; dung mardosa, gabe hamatean noma na ro. 1:16 Ulang hamu tarpaoto-oto, ale angka dongan! 1:17 Ganop silehen-lehen na denggan jana na sanggam sian banua ginjang i do ro; na nipaijur ni Debata na manompa sasudena na torang di langit i do sudena i. Ia do Debata na so muba-uba, jana nada mandao muse Ia sian hita, gabe adong do tading halinuNa humaliang hita. 1:18 Hara ni giot ni rohaNia sandiri, dibaen Ia do hita gabe dakdanakNia markite-hite hataNia na tigor i, anso dapotan inganan na dumenggan hita sian sasudena na nitompaNia. 1:19 Denggan ma parrohahon hamu on, hamu ale angka dongan na nihaholongan! Ganop halak angkon hipas do manangihon, tapi lambat ma mandok hata, jana maol ma laho muruk. 1:20 Harana nada tarbaen hamuruhon ni jolma mangkarejohon hatigoran ni Debata. 1:21 Antong hara ni i, ambungkon hamu ma sude hasomalan na hodar dohot na jat. Jagit hamu ma di bagasan toruk ni roha Hata na nisuan ni Debata di bagasan rohamunu, angke margogo do Hata i laho paluahon hamu. 1:22 Patulus hamu ma sanga aha na nidok ni Debata, ulang ma hum na manangihon sajo, angke na paoto-oto dirimunu sandiri do hamu muda songon i. 1:23 Sanga ise na manangihon hata ni Debata hape nada dipatulus ia, songon halak na mangaligi bohina sandiri do i di sormin. 1:24 Dung denggan diparate-atehon ia, kehe ma ia jana torus lupa ma ia sanga na songon dia tompa ni bohinia i. 1:25 Sanggam do tona i jana margogo do i laho mambaen jolma gabe mardeka. Jana sanga ise na manangkasi dohot na mamparrohahon dohot denggan bope na patuluskon angka parenta i, jana nada hum na manangihon sajo jana mangkalupahonsa, martua ma halakna i di sude pangalaho na nibaennia. 1:26 Muda adong sanga ise na mangkilala dirina halak na burju marugamo, hape nada dijagohon ia dilania, na paoto-otohon dirinia do ia disi; nada adong guna ni ibadatnia i. 1:27 Haburjuon marugamo na ias jana na so martihas diadopan ni Debata Amanta, on do: Manyarihon na so marama so marina dohot angka na mabalu na mardangol; dohot na manjagohon dirina sandiri anso ulang sego dibaen portibi on.
2:1 Hamu angka dongan! Songon halak na porsaya tu Tuhan Jesus Kristus, Tuhan Na Sumangap i, ulang ma hara ni angka pangalaho na tarida baen hamu mangaligi bohi ni halak. 2:2 Angke muda adong sada halak na martintin sere dohot na marpakean na jeges ro tu parpunguanmunu, dung i ro muse ma sada halak na pogos na mamake pakean na mardungkap, 2:3 gabe sumangapan ma hamu tu bayo na marpakean na jeges i. Dokkononmunu ma tusia, "Di karosi na jumegesna on ma tuan i juguk." Hape anggo tu bayo na pogos i dokkononmunu ma, "Disadu ma ho jongjong," sanga "Dilante on ma da pajuguk." 2:4 Muda songon i dibaen hamu, nada he na mardia imbar do dibaen hamu sama hamu jana manguhumi hamu di bagasan pikiran na jahat? 2:5 Hamu angka dongan na nihaholongan, tangihon hamu ma! Angka halak na pogos ninna roha ni portibi on, i do na dipili Debata anso gabe halak na mora di haporsayaanna tu Tuhan. Halahi do na maruli di Harajaan Ni Debata na nijanjihonNa i tu angka halak na mangkaholongi Ia. 2:6 Hape anggo hamu, mur dipabile hamu do halak na pogos haru pe nian angka halak na mora i do mamisat hamu dohot na manyarat hamu tu paruhuman! 2:7 Nada he halahi do na pabilehon Goar na sangap na marhite i hamu gabe nampuna ni Debata! 2:8 Na denggan ma na nibaenmunu muda dipatulus hamu tona na gumodang tarsurat di Buku Na Badia i na mandok, "Haholongi ma donganmu jolma songon pangkaholongimu di dirimu sandiri." 2:9 Tapi muda mardia imbar do dibaen hamu halak, na mambaen dosa do hamu songon i, jana marhite Tona i, tangkasma bahaso na dung mangalaosi hamu disi. 2:10 Harana sanga ise na mangkarejohon sude Tona i, tapi nada dikarejohon ia sada sian i, na marsala do ia maradopkon sasudena i. 2:11 Angke Ia do na mandok, "Ulang ho markarosuan," laing Ia muse do na mandok, "Ulang ho mamunu." Jadi muda nada markarosuan ho, hape mamunu jolma, laing na mangalanggar Tona i do hamu disi. 2:12 Jadi muda mangkobari hamu sanga patupahon bagi aha, angkon hilalaonmunu do, hamu sandiri pe laing halak siuhumon do mangihutkon Tona Ni Debata na mambaen jolma gabe mardeka. 2:13 Angke sanga ise halak na so maribo ni roha tu halak na asing, sidabuon do uhuman tusi so pola mardongan ibo ni roha. Tapi gumogo dope ibo ni roha ulang uhuman! 2:14 Hamu angka dongan! Aha ma gunana didok halak, "Porsaya do au," anggo so dipatidahon ia do sian pambaenannia na tutu ia porsaya? Tarpalua haporsayaan na songon i ma he ia lakna? 2:15 Sugari adong sada dongan Kristen na mangkaporluhon pakean jana na so tuk panganonnia siganop ari. 2:16 Aha ma gunana didok hamu, "Marjop ni roha ma ho mamake pakean na las jana mangan ma ho lopus butong!" -- anggo so dilehen hamu do tusia na nihaporluhonnia i? 2:17 Laing songon i ma muda porsaya hita hape nada tapatuduhon dohot pambaenan, na mate do haporsayaanta i. 2:18 Tapi sugari adong na mandok, "Haporsayaan do di ho, pambaenan i di au. Antong patidahon ma di au haporsayaanmu na so mardongan pambaenan, jana hupatidahon di ho sian pambaenan do haporsayaanki." 2:19 Nada he porsaya do ho hum sada do Debata? Denggan do i! Tapi setan i pe porsaya do jana humitir halahi hara ni biarna! 2:20 Ale jolma na oto, saonnari ra dehe ho mamparkatutui bahaso na mate do haporsayaan na so mardongan pambaenan? *SAONNARI RA DEHE HO ... MARDONGAN PAMBAENAN?:Dipiga-piga naskah narobi didok: Haporsayaan na so mardongan pambaenan, i ma haporsayaan na mate.* 2:21 Ligi hamu ma ompunta si Abraham. Denggan ia dijagit Debata, hara ni pambaenannia do, i ma di na nihaulkonnia si Ishak anaknia i tu Debata di inganan parkaulan ni haul. 2:22 Dison tarida ma, angkon nipatuduhon do haporsayaan i dohot pambaenan anso gabe sanggam. 2:23 Hombar do i tu ayat na mandok, "Porsaya do si Abraham tu Debata, jana dietong ma i disia gabe hatigoran." Hara ni i ma umbaen na nigoaran si Abraham, "Ale-ale ni Debata." 2:24 Tangkas ma saonnari, anso denggan dijagit Debata jolma laing hara ni pambaenan na nikarejohon ni jolma i do, jana nada hum hara ni haporsayaan sajo. 2:25 Laing songon i do si Rahab boru jalang i. Nada he dapotan hatigoran do ia marhite pambaenanna di na nijagitnia angka pamata-matai jana diurupi ia halahi palua dirina sian dalan na asing? 2:26 Harana pamatang na so martondi, pamatang na mate do i, laing songon i do haporsayaan na so mardongan pambaenan, na mate do i.
3:1 Hamu ale angka dongan! Ulang ma bahat sian hamu na marpor ni roha gabe guru. Nada he diboto hamu do anggo hita na gabe guru angkon umborat do uhumanna sian angka halak na asing i. 3:2 Jotjot do hita sudena mambaen hasalaan. Sanga ise na so jungada mambaen hasalaan di angka hatana, halak na sanggam do i, na margogo mangarajai dirina. 3:3 Muda tabaen kokang tu pamangan ni kudo anso diihutkon ia hagiotta, gabe tarbaen hita ma marroha-roha paegol-egolkon pamatang ni kudo i. 3:4 Laing tarbaen do kapal songon tudosanna. Haru pe barang na lobi godang sada kapal jana na nigulotkon ni alogo na gogo situtu, hape na niatur ni sada amudi na menek do i na nitontuhon ni juaro mudina i. 3:5 Laing songon i ma dilanta i; haru pe menek sajo dilanta i, hape tarbaen ia do manggodang diri taringot tu angka pangalaho na godang. Ligi hamu ma, salang harangan godang tarsurbu do i hara ni api na menek. 3:6 Songon api do dila i. Asar ni hajahatan do dila i di pamatangta na pararatkon hajahatan tu sude dirinta. Markite-hite api na sian narako i, dipamosok ia ma sude ngolunta. 3:7 Sude ragam ni binatang na manjurur dohot angka ihan, tarpajinak do sude jana madung dipajinak jolma. 3:8 Tapi anggo dila ni jolma umpe sahalak na tarbaen pajinakonsa. Jahat do dila i jana nada tarrajai; jana gok rasun na mamatehon. 3:9 Tarpake do i laho mandok tarimakasi tu Debata, Amanta, hape laing tarpake muse do i mamurai dongan jolma na nitompa mangihutkon rupa ni Debata. 3:10 Sian pamangan na sada i haruar do angka hata pasupasu jana dohot muse angka hata bura. Nada tola songon i hamu ale angka dongan! 3:11 Adong dehe mual ni aek na gabe haroroan ni aek na tonggi dohot aek na paet sian mual na sada i? 3:12 Tarbaen ma he lakna, hamu angka dongan, hayu ara marbatuhon zetun sanga bona ni anggur marbatuhon hayu ara? Mual ni aek na ancim, nada tarbaen i parohon aek na tabo. 3:13 Muda adong do sian hamu na marroha jana na burju, dipatuduhon ia ma i dohot ngolu na denggan bope dohot pambaenan na denggan mardongan hatoruhon ni roha dohot habisuhon. 3:14 Tapi muda mangiburu hamu, markancit ni roha, muruk jana manyarihon dirina sajo, ulang ma hamu manggodang jana ulang hamu margabus mangalo hasintongan i. 3:15 Nada habisuhon na ro sian banua ginjang anggo habisuhon na songon i, sian portibi on do i, sian hagiot ni jolma, karejo ni setan do i! 3:16 Muda masa pangiburuon dohot na manyarihon dirina be, masa muse ma disi hagaoron dohot sude ragam-ragam ni na jat. 3:17 Tapi sanga ise na maruli habisuhon na ro sian ginjang, na parjolo: Na ias do i, dung i pardame, na burju dohot na ra mangoloi. Gok do i dohot ibo ni roha bope na pataridahon angka parange na denggan. Nada ganggu rohana jana nada mangalancap. 3:18 Tutu ma tarida hadengganan i na songon parbatu ni same ni dame na nisuan ni halak na mangkaholongi dame!
4:1 Sian dia dehe asal ni sude parbadaan dohot partangkangan na masa di hamu? Nada he sian angka hagiotmunu na sai giot torus marporang di bagasan dirimunu anso dapotan hasonangan portibi do asal ni i? 4:2 Por do rohamunu, hape nada dapot hamunu, gabe ra ma hamu mamunu! Mangiburu do hamu, hape umpe dapot hamu na nijalahanmunu i gabe martangkangi ma hamu lopus marbada. Umpe bagi aha dapot hamu, angke nada tu Debata hamu mangido. 4:3 Tarsung pe dipangido hamu, hape laing nada dapotan hamu, angke madung sala tujuan ni pangidoanmunu i; na laho pasonang-sonangkon dirimunu sajo do na nipangidomunu i. 4:4 Angka jolma na so tigor do hamu! Diboto hamu dehe, muda mardongan hamu dohot portibi on na gabe musu ni Debata do hamu? 4:5 Ulang ma didok rohamunu na so marguna na nidok ni Buku Na Badia i, "Madung dibaen Debata sada tondi na malungun situtu maringanan di bagasan hita." 4:6 Haru songon i pe, gumogo dope asi ni roha ni Debata na nilehenNa i di hita ulang pado hagiot ni rohanta i. Hara ni i do umbaen na laing tarsurat di Buku Na Badia i muse, "Dialo Debata do halak siginjang roha, tapi asi do rohaNia anggo tu halak na toruk roha." 4:7 Antong, oloi hamu ma Debata jana alo hamu ma Sibolis i, anggo i marlojongi ma Sibolis i sian hamu. 4:8 Pasolkot hamu ma tu Debata, jana Debata pe padonohonNa ma tu hamu. Hamu dongan na mardosa, paias hamu ma tanganmunu! Hamu na mardua roha, paias hamu ma rohamunu. 4:9 Angkon tutu ma hamu manyosal jana tangis dohot mangandungi; angkon gabe muba ma partatamunu gabe partangisan dohot hajojop ni rohamunu gabe hamarsahan! 4:10 Patoruk hamu ma dirimunu di jolo ni Tuhan, gabe patuginjangon ni Tuhan i ma hamu. 4:11 Hamu angka dongan, ulang ma hamu marsitilakoan sanga marsipasalaan. Sanga ise na manilakoi sanga na pasalahon donganna Kristen, na manilakoi dohot na manyalahon angka Tona Ni Debata do i. Jana muda disalahon hamu angka Tona Ni Debata, na so diihutkon hamu be angka Tona i tapi gabe panguhum noma hamu disi. 4:12 Hape nian, hum sada do na marhak mamarenta jolma dohot manguhumisa. I ma Debata na margogo paluahon dohot pangabiskon. Jadi, ise ma hamu lakna umbaen na jabat ra hamu pasala halak na asing, laing jolma na somal songon hamu. 4:13 Hamu angka dongan na mandok, "Sadari on sanga ancogot na giot kehe do hami tu kota adu i jana disi ma hami maringanan sataon honokna anso marjagal jana manjalahi hepeng disi, 4:14 hape nada diboto hamu sanga aha na giot masa ancogot di ngolumunu. Aha ma he hosamunu i? Na songon timus sajo do ho, tarida santongkin sajo, dung i manigor mago." 4:15 Angkon songon on do nian dokkononmunu, "Muda ibo roha ni Tuhan, mangolu ma hami jana baenonnami ma songon on sanga songon an." 4:16 Hape saonnari gabe marginjang ni roha do hamu jana mamburas. Sala do sudena buras na songon i. 4:17 Jadi hara ni i, mardosa do sanga ise na umboto na denggan sipatupaonnia nian, hape nada dipatulus ia.
5:1 Hamu angka halak na mora! Tangihon hamu ma sipaingotkon. Tangis ma hamu jana mangandungi, harana manaon parkancitan ma hamu! 5:2 Madung busuk sinadonganmunu i. Madung dipangan ngitngit pakeanmunu i. 5:3 Madung haraton sere dohot perakmunu i; haratna i ma na gabe saksi mangalo hamu jana panganonna ma pamatangmunu songon api. Madung dipalagut hamu arta marayak ari na parpudi. 5:4 Nada digarar hamu upa ni angka halak na markarejo di ladangmunu. Saonnari bege hamu ma hoi-hoi ni halahi! Angka halak na palagutkon suha ni ladangmunu, marsurak do halahi mangido tolong jana lalu do angguk ni halahi i tu simanangi ni Debata, Tuhan Na Markuaso i. 5:5 Marlobi-lobi do ngolumunu di tano on jana didai hamu na sonang. Tarsongon na pamokmok-mokmokkon diri do hamu laho sambolon. 5:6 Diuhum jana dibunu hamu do angka halak na so marsala, hape nada mangalo halahi tu hamu. *NA SO MARSALA, HAPE NADA MANGALO HALAHI TU HAMU: Sanga: Na so marsala. Nada he aloon ni Debata hamu?* 5:7 Antong sobar ma hamu angka dongan lopus ro Tuhanta i. Ligi hamu ma sobar ni angka partani i paintehon lopus dilehen tanonia i suha na mararga disia. Sobar do ia paintehon udan di musim gugur dohot udan di musim bunga. 5:8 Hamu pe angkon laing sobar do jana margodang ni roha, harana madung donok ari haroro ni Tuhan i. 5:9 Ulang mungut-ungut hamu jana marsipasalaan anso ulang diuhumi Debata hamu. Ingot! Ro ma panguhum i. 5:10 Ligi hamu ma angka panurirang na mandok hata mangasahon goar ni Tuhan. Sobar do halahi jana tahan manaon parkancitan. Jadi, halahi ma baen hamu gabe tiruan. 5:11 Hara ni sobarna halahi gabe dohonon ma halahi na martua. Diboto hamu do sanga na bia hasobaron ni si Job, jana diboto hamu do sanga na bia di ujungna dipasupasu Tuhan ia. Angke parasi roha na sumurung do Tuhan jana na denggan roha. 5:12 Anggo na ummarga hamu angka dongan, on do: Ulang hamu marsumpa sanga pe maradopkon langit bope tu tano on sanga maradopkon bagi aha pe tehe. Dok sajo ma "Olo" muda olo, jana "Nada" muda nada, anso ulang didabu Debata uhuman tu ho. 5:13 Muda topet adong na susa sian hamu, martangiang ma ia. Muda adong na marjop ni roha, marende ma ia mamuji Debata. 5:14 Muda adong na marnyae, dipiohon ia ma angka sintua i. Ditangiangkon angka pamimpin i ma halak na marnyae i jana diapuskon ma miak mangasahon goar ni Tuhan. 5:15 Tangiang na nipasahat tu Tuhan mardongan pos ni roha, tarbaen do i pamalumkon halak na marnyae. Pamalumon ni Tuhan ma i jana sesaonNia ma angka dosa na nibaennia. 5:16 Hara ni i, marsioku dosana ma hamu jana marsitangiangan anso dipamalum hamu. Na margogo situtu do tangiang ni halak na mangihutkon hagiot ni Debata. 5:17 Si Elia pe laing jolma humani do, sarupa dohot hita. Marsitutu do ia martangiang anso ulang ro udan, jana nada ro udan tolu satonga taon honokna. 5:18 Dung i ditangiangkon ia mangulahi, jadi dipaijur langit i ma udan gabe diparlehen tano i ma mangulahi angka parbatuna. 5:19 Hamu angka dongan! Muda adong barang ise na lilu sian hatigoran i, dung i adong barang ise na paulakkon rohania, 5:20 boto hamu ma on: Sanga ise na manogu halak pardosa marbalik sian dalanna na sala i, na nipaluania do halakna i sian hamatean jana ditutupi ia ma bahat dosa.
1:1 Sian si Petrus rasul ni Jesus Kristus, tu angka halak na ro, na marserak di Pontus, Galatia, Kapadokia, Asia dohot Bitinia, i ma angka halak na nipili, 1:2 mangihutkon sangkap ni Debata Ama jana na niparbadiai ni Tondi, anso mangoloi Jesus Kristus jana manjagit pamispion ni mudarNia. Mur martamba ma asi ni roha dohot hasonangan di hamu. 1:3 Mandok tarimakasi ma hita tu Debata bope Ama ni Tuhanta Jesus Kristus! Hara ni denggan ni rohaNia, dibaen Ia do hita gabe jolma na imbaru na maruli arop ni roha na tongtong mangolu, angke madung dipangolu Kristus mangulahi sian hamatean. 1:4 Hara ni i do umbaen na mararop ni roha hita maruli di pasupasu na nipasingkop ni Debata di halakNia, i ma angka pasupasu na nipasingkopNia di banua ginjang, gabe nada ra sego, sanga busuk, sanga manyocang. 1:5 Di hamu do i sudena, hara ni na dung porsaya hamu tu Debata. Gabe dijago kuaso ni Debata ma hamu anso dohot hamu manjagit haluaan na dung singkop giot pabotohonon di hatiha parpudi. 1:6 Hara ni i angkon marjop ni roha do hamu, haru pe saonnari angkon laing marsak hamu santongkin hara ni na manaon angka pandugaan hamu. 1:7 Sudena i na laho patandahon haporsayaanmunu do tu Tuhan, paboa na tutu do haporsayaanmunu i sanga nada. Sere na ra sego pe angkon laing tutungon do i tu api. Dao dope ummarga haporsayaanmunu i ulang pado sere, jadi angkon laing diuji dope i anso gabe pita. Jadi gabe pujion ma hamu jana pasangapon bope dipatuginjang di haroro ni Jesus Kristus mangulahi tu tano on. 1:8 Dihaholongi hamu do Ia haru pe nada jungada diida hamu Ia najolo. Jana dihaporsayai hamu do Ia haru pe saonnari nada diida hamu Ia. Dipapuji-puji hamu do Debata mardongan jop ni roha godang na so tarpajojor dohot hata. 1:9 Dibaen dapot hamu do parbatu ni haporsayaanmunu i, i ma haluaan ni tondimu. 1:10 Haluaan on do na nitangkasan dohot na nisihiran ni angka panurirang na paboahon hian taringot tu pasupasu i na giot lehenon ni Debata tu hamu. 1:11 Ditangkasi halahi do sanga na bia dohot andigan hamamasa ni *SANGA NA BIA DOHOT ANDIGAN HAMAMASA NI: Sanga: Ise do halakna i jana andigan do Ia ro?* na nidok ni Tondi Ni Kristus i, na adong di bagasan halahi. Dipaboa Tondi i hian do hatiha i tu halahi taringot tu angka parkancitan na angkon taonon ni Kristus dohot taringot tu hagodanganNia na giot ro dung salpu parkancitanNia i. 1:12 Dipaboa Debata do tu angka panurirang i sasudena na nibaen ni halahi i laho mangoloi hamu do, jana nada na mangoloi halahi sandiri; i ma taringot tu angka na nibegemunu saonnari sian angka na manjamitahon Jamita Na Denggan. Mardongan kuaso ni Tondi Parbadia na nitongosNia sian banua ginjang do dipasahat halahi na songon i tu hamu. Salang angka surusuruan pe por do rohana mamboto barita na nipaboa ni halahi i. 1:13 Hara ni i hobas ma hamu. Jonggor ma hamu jana mararop ni roha situtu di pasupasu na giot lehenonNa tu hamu di haroro ni Jesus Kristus muse. 1:14 Songon dakdanak na mangoloi poda ma hamu, jana ulang be mangoloi hagiotmunu najolo i ngolumunu, i ma dompak so ditanda hamu Debata. 1:15 Tapi, angkon badia ma hamu di sasudena na nibaenmunu, laing songon Debata na badia i na mamiohon hamu. 1:16 Di Buku Na Badia i tarsurat do, "Angkon badia do hamu, angke Au pe na badia do." 1:17 Didok hamu Amang tu Debata dompak martangiang hamu. Antong, Debata i do na mandabuhon uhuman tu jolma marguru tu pambaenanna be so pola mangaligi bohi. Hara ni i, salolot di tano on hamu, pagodang hamu ma Debata di ngolumunu. 1:18 Angkon botoonmunu do sanga aha na dung digarari laho paluahon hamu sian ngolu na so marguna i na nipateankon ni angka ompungmunu tu hamu. Nada barang na ra sego songon perak sanga sere dibaen panggararna, 1:19 tapi na lobi arga do dibaen; i ma diri ni Kristus sandiri, na gabe songon biri-biri na nihaulkon tu Debata na so martihas sanga marhahurangan. 1:20 Na dung nipili ni Debata do Kristus i dompak so ditompa dope tano on. Jana di angka ari marayak ujung ni jaman on, ro do Ia tu portibi on laho paluahon hamu. 1:21 Markite-hite Ia do porsaya hamu tu Debata na pangoluhon Ia mangulahi sian hamatean dohot na pasangapkon Ia. Jadi Debata do na nihaporsayaanmunu jana laing tu Debata muse ma hamu mararop ni roha. 1:22 Hara ni na nioloanmunu ajaran na sian Debata, gabe dipaias hamu dirimunu jana holong do rohamunu mida angka halak na porsaya tu Kristus. Antong, marsihaholongan ma hamu sama hamu sian sandok rohana be. *SIAN SANDOK ROHANA BE: Dipiga-piga-piga naskah narobi didok: Dohot ateate na ias.* 1:23 Angke markite-hite hata ni Debata na mangolu jana na manongtong i, madung gabe jolma na imbaru hamu dibaen, i ma na so sorang sian jolma, tapi sian Ama na manongtong i do. 1:24 Tarsurat do di Buku Na Badia i songon on, "Tarsongon duhut-duhut do sude jolma, jana songon bunga ni duhut i do hasangapanna. Malos ma duhut i, marurus muse ma bungana i; 1:25 tapi anggo hata ni Debata hot do salolot-lolotna." Jamita na Denggan do hata na dung dijamitahon i tu hamu.
2:1 Antong, ambungkon hamu ma sian dirimunu sandok na jat; ulang be hamu margabus jana ulang be mangalancap. Ulang mangiburu jana ulang mandok hata na jat hamu taringot tu dongan. 2:2 Songon dakdanak na baru sorang na sai manguas di susu na polin, laing songon i ma hamu manguas tongtong di susu na polin sian Hata Ni Debata; anso mur magodang hamu jana dipalua. 2:3 Tarsurat do di Buku Na Badia i songon on, "Madung dihilala hamu sanga songon dia hadengganan ni Tuhan i." 2:4 Antong, dapotkon hamu ma Ia. Songon batu na mangolu do i, i ma batu na niambungkon ni jolma hara ni na so marguna didok rohana; hape batu i do na mararga situtu anggo di Debata. 2:5 Songon angka batu na mangolu do hamu. Antong ra ma hamu dipake laho pajongjong bagas ni Debata di pangalaho partondion. Jadi gabe angka malim na badia ma hamu jana na mangalehen haul tu Debata markite-hite Jesus Kristus, i ma haul partondion jana na tumbuk di roha ni Debata. 2:6 Harana tarsurat do di Buku Na Badia i songon on, "Madung Hupili sada batu na arga, na Hupayakkon di Sion gabe batu parsuhi; jana sanga ise na porsaya tuSia nada pailaon." 2:7 Na arga situtu do batu i di hamu na porsaya. Tapi anggo di halak na so porsaya, tulus ma na nidok ni Buku Na Badia i na mandok, "Batu na niambungkon ni angka tukang i, madung gabe batu parsuhi. Batu i ma na mambaen halak tartuktuk, batu na mambaen halahi gabe tinggang." 2:8 Tartuktuk pe halahi, hara ni na so dioloi halahi do hata ni Debata. Songon i ma panontuhon ni Debata taringot tu halahi. 2:9 Tapi anggo hamu, bangso na Hupili do hamu, angka harajaan hamalimon, bangso na badia, bangso hapunjungan ni Debata. Ia do na mamiohon hamu haruar sian hagolapan anso masuk tu bagasan sinondangNia na tumorang i, anso pararatonmunu barita taringot tu angka pambaenanNia na godang i. 2:10 Na jolo, nada bangso ni Debata hamu, hape anggo saonnari bangso ni Debata do hamu. Najolo, nada dihaholongi Debata hamu, hape anggo saonnari didai hamu do asi ni rohaNia. 2:11 Hamu angka dongan na nihaholongan! Halak na asing do hamu jana pangaranto di tano on. Hara ni i gomos hupangido tu hamu anso ulang ihutkon hamu hagiot ni jolma na sai marporang mangalo tondi. 2:12 Angkon denggan do pangalahomunu di tonga-tonga ni angka halak na so porsaya tu Kristus, jadi haru pe diincahi halahi hamu songon halak na jahat, gabe idaon ni halahi ma angka pambaenanmunu na denggan i, jana gabe pujion ni halahi ma Debata di haroro ni Debata tu portibi on. 2:13 Hara ni Tuhan, oloi hamu ma sudena pamarenta na adong di portibi on; sanga pe tu Kesar na gabe sitiop kuaso na guminjang; 2:14 sanga pe gubernur na nitodo ni Kesar i manguhumi halak sibaen na jahat, dohot na manghormati halak sibaen na denggan. 2:15 Anggo giot ni Debata, huntam hamu ma pamangan ni halak na oto pangkataina markite-hite angka pambaenanmunu na denggan i. 2:16 Mardalan ma hamu di ngolu on songon halak na mardeka tapi ulang antong pake hamu ngolumunu na mardeka i laho manutup-nutupi hajahatan, tapi songon angka naposo ni Tuhan ma hamu na mangolu i. 2:17 Pantun ma hamu tu sude halak, haholongi hamu ma donganmunu sahaporsayaan tu Kristus. Habiari hamu ma Debata jana pasangap ma Kesar i. 2:18 Hamu angka dongan na gabe pangoloi, unduk ma hamu mangoloi tuanmunu sasangap-sangapna; ulang hum tu halahi angka na denggan roha dohot tu na burju, tapi angkon dohot do tu halahi na jorbong i. 2:19 Pasupasuon ni Debata do halak na sobar manaon pambaenan na so tigor -- hara ni partinandaannia di hagiot ni Debata. 2:20 Harana aha ma he hasurunganna muda sobar hamu manjagit uhuman na patut tanggungonmunu hara ni hasalaanmunu? Tapi muda sobar hamu manjagit sitaonon na ro tu hamu hara ni na nibaenmunu na denggan, anggo i, pasupasuon ni Debata ma hamu. 2:21 Hara ni i do umbaen na nipio ni Debata hamu. Angke Kristus sandiri pe madung ditaon Ia parkancitan hara ni hamu jana markite-hite i dilehen Ia ma di hamu tiruan anso diihutkon hamu indegeNia. 2:22 Nada jungada Ia mambaen dosa jana sahalak pe nada adong jungada umbege Ia margabus. 2:23 Di na hona incak Ia, nada mangincahi Ia mambaloskon. Dompak na niparkancitan i Ia, nada mangondam Ia; tapi dipasahat Ia do parkaroNia i tu Debata, Panguhum na tigor i. 2:24 Kristus sandiri do mamorsan angka dosanta i di pamatangNia sandiri di ginjang ni hayu parsilang i, anso tola hita malua sian kuaso ni dosa jana tola hita mangihutkon hagiot ni Debata. Angke bugang ni Kristus i do na paluahon hamu. 2:25 Najolo, songon biri-biri na lilu do hamu hape anggo saonnari madung dioban hamu mangulahi mangihutkon Kristus, Parmahan jana na marmahani hamu.
3:1 Laing songon i ma hamu ale angka ina, angkon oloanmunu do halaklahimunu, jadi muda adong sian halahi na so porsaya di hata ni Debata, nada pola porlu dohononmunu sanga na aha pe tu halahi, parangemunu i ma na mambaen halahi gabe porsaya, 3:2 hara ni na niida ni halahi parangemunu na ias jana pantun. 3:3 Ulang ma hum sian duru hajegesonmunu isarana songon parsuri ni obukmunu sanga pamake ni barang sere, sanga pamake ni baju. 3:4 Tapi na sian roha ma nian hajegesonmunu; umpamana halambohon dohot hadameon ni pangalaho; i do hajegeson na manongtong na mararga situtu di parnidaan ni Debata. 3:5 Songon i do dalanna dibaen angka dadaboru na badia na mararop ni roha tu Debata, laho pajegeskon diri ni halahi, i ma mangoloi halaklahina. 3:6 Si Sara pe laing songon i do. Pangoloi situtu do ia tu si Abraham jana "Tuan" do dipio ia si Abraham. Saonnari angka boru ni si Sara ma hamu, muda dibaen hamu angka na denggan jana nada pola mabiar hamu mida bagi aha pe. 3:7 Bope hamu angka ama, mardongan bisuk ma hamu maradopkon dadaborumunu jana mardongan roha na torang, ingot hamu ma halak na gale do halahi. Sangap ma baen hamu halahi, angke rap na giot hasahatan ni ngolu na tutu na sian Debata do halahi dohot hamu. Di ngolu na songon i, nada adong be na mangambati tangiangmunu maradopkon Tuhan. 3:8 Songon on ma panyimpulina: Angkon saroha do hamu jana sapangkilalaan. Marsihaholongan ma hamu na sada tu na asing songon na markahamaranggi. Jana marsiasi-asian ma hamu jana martoruk ni roha na sada tu na asing. 3:9 Ulang ma baloskon hamu hajahatan alo ni hajahatan, sanga hata na panyaor-nyaorkon; tapi pasupasu ma pangidohon hamu balos ni i sian Debata tu halahi. Angke anso manjagit pasupasu do hamu umbaen na nipiohon ni Debata hamu. 3:10 Di Buku Na Badia i tarsurat do songon on, "Sanga ise na giot maruli hangoluan jana na giot mandai angka ari na denggan, angkon jagohononna do dilana anso ulang dohot mangkobari angka na jat jana ulang mandok hata gabus bibirna. 3:11 Angkon mandao do ia sian na jahat jana dipatulus ia ma na denggan; marsitutu ma ia parayakkon hadameon. 3:12 Angke sai disarihon Tuhan do angka halak na mangihutkon hagiot ni roha ni Debata, jana sai na tangihonon ni Tuhan do angka tangiang ni halahi; tapi dialo Tuhan i do angka halak na mambaen hajahatan." 3:13 Ise ma he ra mambaen na jahat tu hamu anggo sai jop do rohamunu mambaen na denggan? 3:14 Tapi haru pe angkon manaon hamu hara ni na mambaen angka pangalaho na denggan, na maruntung do hamu disi! Ulang hamu mabiar sanga na mida ise pe jana ulang hamu tarsonggot. 3:15 Tapi di bagasan rohamunu, parbadia i hamu ma Kristus songon Tuhan! Jana angkon singkop do hamu tongtong laho mangalusi sanga ise na manyapai hamu taringot tu pos ni rohamunu di angka na niarop ni rohamunu sian Tuhan. 3:16 Tapi mardongan lambok ni roha dohot hapantunon ma baen hamu i sudena. Jana angkon ias do taroktokmunu, anso maila sandiri sanga ise na manilakoi hamu hara ni na denggan pardalananmunu songon siihutkon Kristus. 3:17 Gumonan dope manaon parkancitan hamu hara ni na mambaen na denggan -- muda na tumbuk ma i tu roha ni Debata -- ulang pado manaon hara ni na mambaen na jahat. 3:18 Angke sanoli sajo do mate Kristus hara ni dosanta ro di salolot-lolotna -- i ma sada halak na so marsala, na mate *MATE: Bahat do angka naskah narobi na mandok: Parhancitan.* humopkop halak parsala, anso tartogu Ia hamu mandapotkon Debata. Nibunu do Ia mangihutkon sibuk tapi nipangolu mangulahi mangihutkon tondi. 3:19 Di pangalaho na songon i ma Ia kehe paboahon jamita na sian Debata tu angka tondi na hona hurung: 3:20 i ma tondi ni angka halak na so mangoloi tu Debata hatiha i salolot paulihon paraunia i si Noak. Hape hum halak na di parau i sajo do -- salapan halak do sudena -- na malua sian aek na oto i. 3:21 Antong, na masa i ma na gabe gambaran ni pandidion sisaonnari on na paluahon hamu. Nada karejo na giot paiaskon angka na hodar di pamatangniba pandidion i, tapi songon janjimunu do i tu Debata sian taroktok na denggan. Gabe dipalua pandidion i ma hamu hara ni na dung mulak mangolu Jesus Kristus mangulahi sian hamatean, 3:22 jana madung manaek Ia tu banua ginjang. Saonnari markuaso ma Ia rap dohot Debata jana mamarenta tu sude surusuruan, tu sude parkuaso dohot tu sude angka hagogoon di pangalaho partondion.
4:1 Dibaen madung manaon parkancitan Kristus mangihutkon parsibuhon, hamu pe angkon laing papironmunu do rohamunu dohot parngoluan na songon i. Angke sanga ise na manaon mangihutkon pangkilalaan parsibuhon, nada ra be i mambaen dosa. 4:2 Hara ni i, salolot mangolu hamu di tano on tu pudi on, ihutkon hamu ma hagiot ni Debata, ulang be mangihut di hagiot ni jolma hamu. 4:3 Tuk ma hatiha na salpu i di na nibaenmunu sanga aha por ni roha ni angka jolma na so mananda Debata. Nada denggan ngolumunu i. Giot-giot ni sibuk do na niihutkonmunu, na mabuk, na marpesta-pesta, na minum-minum dohot na marsomba gana-ganaan, i ma sada parange na niantahan ni Debata. 4:4 Saonnari gabe homang ma roha ni angka halak na so mananda Tuhan i hara ni na so dohot be hamu mandohoti ngolu na so denggan i songon halahi. Hara ni i ma umbaen na nitilakoan ni halahi hamu. 4:5 Tapi angkon lehenon ni halahi do saulahon partanggung jawaban tu Debata na dung singkop laho manguhumi halak na mangolu dohot halak na dung mate. 4:6 Hara ni i muse ma umbaen na nijamitahon muse Jamita Na Denggan i tu angka jolma na dung mate. Anso niuhum halahi haru pe na dung mamolus hamatean halahi -- laing songon jolma na asing i sasudena -- harana anggo di pangalaho partondion laing na mangolu do halahi sian hangoluan ni Debata sandiri. 4:7 Na giot dapot ne ma ujung ni sasudena. Hara ni i, rajai hamu ma dirimunu jana torang ma rohamunu anso tarbaen hamu martangiang. 4:8 Tapi na umporlu sian sasudena i, marsihaholongan ma hamu sama hamu, angke muda marsihaholongan hamu gabe bahat ma dosa disesa. 4:9 Marsijagitan ma hamu na sada tu na asing di bagasna be, so pola humolos. 4:10 Ganop be do hamu angka dongan manjagit silehen-lehen na paasing-asing sian Debata. Jadi hara ni i, songon parkobas na denggan di angka silehen-lehen ni Debata i, pake hamu ma angka silehen-lehen i anso marguna tu haporluanmunu sama hamu. 4:11 Sanga ise na marjamita, barita na sian Debata ma dijamitahon; sanga ise na mangurupi halak na asing, mangasahon gogo na sian Debata ma ia mangurupi, anso tarpasangap Debata markite-hite Jesus Kristus di bagasan sasudena i. Ia do na markuaso jana na patut pasangapon salolot-lolotna. Angkon songon i ma na sapatutna. Amen. 4:12 Angka dongan na hihaholongan! Hancit do ditaon hamu saonnari hara ni na hona uji. Tapi ulang pola homang rohamunu, muda adong masa tu hamu sada pangalaho na luar biasa. 4:13 Angkon mur sonang do rohamunu angke dohot do hamu manaon parkancitan rap dohot Kristus. Jadi saulahon muda dung dipataridahon hasangapan ni Kristus i tu sude jolma, marsurak-surak ma hamu disi. 4:14 Na maruntung do hamu muda dipabile halak hamu songon sada siihutkon Kristus. I ma tandana paboahon na maruli Tondi na sangap hamu, i ma Tondi Parbadia. 4:15 Ulang ma adong sahalak pe sian hamu na manaon parkancitan hara ni na mamunu, sanga manangko sanga mambaen na jat, sanga hara ni na manggunturi. 4:16 Tapi muda manaon parkancitan hamu hara ni na Kristen hamu, ulang ma maila hamu hara ni i. Mandok tarimakasi ma hamu tu Debata hara ni na dipanggoarkon tu hamu goar ni Kristus sandiri. 4:17 Madung dapot hatihana, Debata manguhumi portibi on. Jana halak ni Debata sandiri do parjolo niuhuman. Antong, muda sian hita ma pungkaon ni Debata, tarbia muse noma ulaning na masa tu angka halak na so mangkaporsayai Jamita Na Denggan na sian Debata? 4:18 Tarsurat do di Buku Na Badia i songon on, "Jadi muda maol do angka halak na denggan i paluaon, bia muse noma ulaning na masa tu angka halak pardosa na so mananda Tuhan i!" 4:19 Hara ni i, muda adong sanga ise halak na manaon parkancitan hara ni hagiot ni Debata, angkon laing tigor ma ngolu ni halak na songon i jana dipasahat halahi ma diri ni halahi tu Sipanompa i. Sai patulusonNa do na nijanjihonNia.
5:1 Nipangido anso diparrohahon angka sintua jolo on. Songon donganmunu pamimpin, hubaen surat on bope donganmunu na manyaksihon sandiri parkancitan ni Kristus, jana na giot dohot pasangapon muda dung dipataridahon hasangapan ni Kristus tu hita jolma. Gomos pangidoanku 5:2 anso parmahani hamu punguan ni biri-biri ni Debata na nipasahat tu hamu. Sonang ma rohamunu marmahani halahi songon na nihagiotan ni Debata, ulang ma borat rohamunu. Jana ulang ma hum hara ni na giot manjalahi labo baen hamu, tapi hara ni situtu ni rohamunu ma mangoloi. 5:3 Ulang ma songon pambaen ni halak na markuaso baen hamu maradopkon halak na nipasahat tu hamu, tapi gabe tiruan na denggan ma hamu di halahi. 5:4 Jadi muda ro Parmahan Bolon i, jagitonmunu ma tuku hamuliaon na so ra malos. 5:5 Laing songon i ma hamu angka na poso! Oloi hamu ma angka halak na matobang. Angkon sude do hamu patoruk dirina jana marsioloan di bagasan haserepon ni roha. Harana tarsurat do di Buku Na Badia i songon on, "Dialo Debata do halak siginjang roha, tapi dihaholongi Ia do halak na serep roha." 5:6 Hara ni i paserep hamu ma rohamunu di bagasan kuaso ni Debata, anso dipagincat Ia hamu muda dung dapot di hatihana. 5:7 Pasahat hamu ma sudena holos ni rohamunu tu Debata, angke diparrohahon Ia do hamu. 5:8 Angkon hobas do hamu jana jonggor! Angke Sibolis do musumunu. Songon singa do i na res pahae res pahulu na mangorong soroanna. 5:9 Alo hamu ma i, jana ulang ma ganggu haporsayaanmunu tu Kristus i, harana diboto hamunu do, angka donganmunu pe di portibi on na rap sahaporsayaan tu Kristus i, laing manaon parkancitan do songon hamu. 5:10 Tapi dung ditaon hamu santongkin parkancitan i, Debata sandiri noma mambaen hamu gabe sanggam. PajongjongonNia ma hamu jana patoguonNia dohot parjugukmunu pe pahotonNia muse ma. Angke Debata parroha na sun denggan do Ia, na mamiohon hamu anso dohot mangkilala hasangapanNia na manongtong i markite-hite Kristus. 5:11 Ia do na markuaso salolot ni lolotna! Amen. 5:12 Na niurupan ni si Silas do au mambaen surat na pendek on tu hamu; huetong do ia sada dongan Kristen na burju. Hubaen pe surat on tu hamu na giot manyosoi hamu do dohot paposkon rohamunu, taringot tu asi ni roha ni Debata na sintong. Togu ma hamu marsitiopan tu asi ni roha i. 5:13 Manongos tabe do tu hamu angka dongan saparlagutan na di Babilon; *BABILON: Songon na tarsurat di Buku Halumbaan didok roha Babilon na nidok dison i ma Rom.* songon i muse anak haholonganku si Markus. 5:14 Marsijalangan ma hamu sama hamu mamake umma na badia. Sai dilehen Debata ma hasonangan di hamu angka dongan sasudena na gabe arta ni Kristus.
1:1 Sian si Simon Petrus, naposo jana rasul ni Jesus Kristus, tu angka na rap dohot hami manjagit haporsayaan i markite-hite hatigoran ni Debatanta dohot Sipalua hita, Jesus Kristus. 1:2 Mur martamba ma di hamu asi ni roha dohot hasonangan markite-hite parbinotoan taringot tu Debata dohot Tuhanta Jesus. 1:3 Dipio Debata do hita anso dohot hita mangkilalahon hagodanganNa dohot mandai hadengganan ni rohaNia. Mardongan kuasoNia sandiri bope sian na taboto taringot tuSia sandiri, dilehen Debata na mamiohon hita i do tu hita sanga aha na porlu anso mangolu hita songon halak na maribadat tu Debata. 1:4 Songon i ma dalanna dibaen Debata mangalehen tu hita angka pasupasu na godang jana na arga na dung nijanjihonNia hian. Hara ni angka pasupasu i tarbaen ma hamu malua sian angka hagiot na jat na adong di portibi on, jana maruli ma hamu di angka bako ni Debata. 1:5 Antong hara ni i, haburjuhon hamu ma markarejo jana tambahon hamu ma di bagasan haporsayaanmunu haburjuon, jana di bagasan haburjuon parbinotoan. 1:6 Jana di bagasan parbinotoan i tambahon hamu ma hatomanan, di bagasan hatomanan hapohoman, jana di bagasan papohoman hadaulatan tu Debata. 1:7 Di bagasan hadaulatan tu Debata ditambahon ma holong ni roha mida dongan, jana di bagasan holong ni roha mida dongan di tambahon ma holong ni roha mida sude halak. 1:8 Angka pangalaho na songon i ma na porlu di hamu. Muda tibu magodang angka bako na songon i di dirimunu, gabe mur marjop ni roha ma hamu jana mur marguna mamake parbinotoanmunu taringot tu Jesus Kristus Tuhanta i. 1:9 Tapi anggo halak na so marpangalaho na songon i, gabe sompit do parnidaan ni i, nada adong diida ia jana lupa do ia na nisesa angka dosania na salpu i. 1:10 Hara ni i hamu ale angka dongan, mur haburjuhon hamu ma markarejo anso mur togu pamioon ni Debata dohot panodoonNia tu hamu. Muda dipatulus hamu songon i, nada jadi be madabu hamu. 1:11 Jadi muda songon i, lehenonNa ma di hamu hak na gok anso gabe anggota ni Harajaan Na Manongtong, i ma Harajaan Ni Tuhan dohot Sipalua hita, i ma Jesus Kristus na mamarenta salolot ni lolotna. 1:12 Hara ni i, angkon laing pupuonku do paingotkon na songon i tu hamu, haru pe nian madung tangkas i di hamu jana na dung situtu hamu porsaya tu hatigoran na sian Debata na nijagitmunu i. 1:13 Salolot mangolu au, na patut do huhilala manyungguli hamu taringot tusi. 1:14 Angke huboto do, nada pola honok be marujung ma ngolungku, harana madung tangkas dipaboa Tuhanta Jesus Kristus tu au. 1:15 Jana angkon husitutui noma markarejo anso laing adong dalan di hamu marningot angka i mangulahi muda dung jumolo au. 1:16 Di na hami patorang sanga songon dia hasangapan ni Tuhanta Jesus Kristus di haroroNia tu hamu, nada sian turi-turian na dibaen ni jolma hami baen hatorangan i. Na dung hami ida do dohot matanami sandiri hasangapan ni Kristus i. 1:17 Dohot do hami disi di na nilehen ni Debata Ama i diSia hamuliaan dohot hasangapan i. Tarbege do di hatiha i sora sian Na Sun Marmulia i mandok songon on, "On do Anak haholonganKu; jop do rohangKu mida Ia!" 1:18 Hami bege sandiri do sora i ro sian banua ginjang hatiha i di na rap hami dohot Ia di ginjang ni dolok na badia i. 1:19 I do umbaen na mur pos rohanami di barita ni Debata na nipaboa ni angka panurirang i. Denggan sajo do sugari dohot hamu mamparate-atehon barita i, angke songon lampu na marsinondang di inganan na golap do barita i jana marsinondang ma i songon sinondang ni bintang di andostorang di bagasan rohamunu. 1:20 Tapi na ummarga angkon ingotonmunu do on: Barita na sian Debata taringot tu angka na giot tarjadi sanoli on, nada adong hasurirangon marguru tu pandapotniba sandiri. 1:21 Angke nada adong halak na tarbaen paboahon barita na sian Debata taringot tu angka na giot tarjadi saulahon, anggo sian dirina sandiri. Tondi Parbadia sandiri do na mangajari halahi paboahon barita na sian Debata i.
2:1 Najolo di tonga-tonga ni bangso ni Debata, ro do angka panurirang pargabus. Laing songon i muse do di tonga-tongamunu, marroan ma angka guru pargabus. Baritahonon ni halahi ma angka pangajaran na so tutu, na pasegohon. Jana diporso halahi do Parkuaso na dung marhancit laho paluahon halahi. Jadi na mangalap magona do halahi disi, na tibu mandondoni halahi sandiri. 2:2 Haru pe songon i laing bahat do halak na mangihutkon parngoluon ni angka guru pargabus na nirajaan ni angka hagiot na so denggan i. Jana parange ni angka guru pargabus i ma na mambaen gabe bahat halak pabilehon Dalan Na Tigor i na nilehen ni Debata. 2:3 Hara ni na ahut tu dirina, caritohonon ni angka guru pargabus i ma tu hamu angka carito na nibaen ni halahi sandiri anso dapotan untung halahi sian hamu. Tapi anggo panguhuman laho manguhum halahi madung tibu dipasingkop jana hamagoan na dung ditontuhon pe tu halahi madung paintehon tu halahi. 2:4 Haru angka surusuruan na mardosa pe nada dipatola Debata malua sian uhuman, tapi ambungkonon do i tu narako. Pamasuhon do halahi tu inganan na golap *TU INGANAN NA GOLAP: Dipiga-piga-piga naskah narobi didok: Dirante dibagasan hagolapan.* anso tarhurung disi lopus tu Ari Paruhuman. 2:5 Songon i muse do dohot tu portibi nahinan; nada patolaon ni Debata malua sian uhuman. Disuru Debata do aek na oto tu portibi on na niinganan ni angka jolma na so ra porsaya tu Debata di hatiha i. Hum si Noak rap dohot sipitu halak nari sajo ma na malua, hara ni na nipaboania barita taringot tu ngolu na tumbuk di roha ni Debata. 2:6 Laing songon i muse do pangalaho ni Luat Sodom dohot Gomora. Hona uhum do luat i dibaen Debata jana ditutung dohot api anso gabe tiruan tu angka na giot masa maradopkon angka jolma na so ra mangkaporsayai Debata. 2:7 Tapi dipalua do anggo si Lot, hara ni na niihutkonnia hagiot ni Debata jana ia pe na dung sun ma marsaknia dibaen parange ni angka jolma na so ra mangihutkon angka parenta ni Debata. 2:8 Di tonga-tonga ni angka jolma na songon i, tarhapit do pangkilalaan ni si Lot na mangolu i, angke ganop ari do diida jana dibege ia angka parange na jat sian halahi. 2:9 Jadi anggo taringot tu angka halak na mangihutkon hagiot ni Tuhan, diboto Tuhan do sanga na bia dalanna baenonNia laho paluahon halahi sian angka ujian na masa tu halahi. Jana taringot tu angka jolma na jahat pe, diboto Tuhan do manabunihon halahi anso hona siksa di Ari Paruhuman, 2:10 lumobi ma i angka jolma na mangoloi angka hagiot na pahodarkon dirina, jana mangincahi harajaan ni Tuhan i. Puluk-puluk do angka guru pargabus i jana ginjang-ginjang do roha ni halahi; nada pola alang roha ni halahi mangalayasi Na Sangap i. 2:11 Haru angka surusuruan na gumogo jana na umbahat i kuasona ulang guru-guru pargabus i, nada dituhas halahi angka mahluk na sangap na di banua ginjang i di jolo ni Tuhan. 2:12 Hape anggo angka guru pargabus i, songon binatang na so marakal do halahi, na tubu sian bakona, anso nitangkup jana nisambol. Inda marpikir halahi; na nionjar ni bakona sajo do na nibaen ni halahi, gabe incak-incak sajo ma didok halahi laho mangalo sude angka na so niastuan ni halahi. Hara ni angka parange ni halahi sandiri, angkon magete halahi songon binatang panyoro. 2:13 Songon balos ni pambaenan ni halahi na jahat i, angkon mardangol ma halahi. Anggo pangalaho na pasonangkon roha ni halahi, i ma na mambaen sanga aha sajo di arian na papuaskon hagiot ni pamatang ni halahi. Muda juguk halahi rap dohot dongan di parpestaan, gabe jatjat do goar ni dongan baenon ni halahi jana marlayas, angke mabuk do halahi di sude parange ni halahi na so denggan. 2:14 Angke na so marnaloja do halahi mambaen dosa, jana mangaligi dadaboru ma giot ni halahi dohot mata na sai giot markamainan. Jana sanga ise na gale haporsayaanna, hona jorgong ma i baenon ni halahi. Madung somal roha ni halahi di angka hagiot na so denggan. Angka jolma na hona bura do halahi! 2:15 Gabe lilu do halahi hara ni na so ra halahi mangihutkon dalan na tingkos. Dalan na nibolus ni si Bileam anak ni si Beor nahinan, i do diihutkon halahi. Na sai por sajo do roha ni si Bileam mida upa ni pambaenan na jat. 2:16 Tapi manjagit sipaingot na pir do ia hara ni hajahatannia i, di na mandok hata songon jolma halodenia na so malo mangkobari i laho mangantak haotoan ni panurirang i. 2:17 Songon mual na mate do angka guru pargabus i jana songon ombun na niombus ni halingsungsung. Madung diparade Debata do di halahi inganan na golap marimpot-impot. 2:18 Sian angka pangkobarion ni halahi na mardongan lancap jana na rumar i dipake halahi ma hagiot na jat laho mangaronjomkon halak sanga ise na baru malua sian angka na mardalan dihaliluon di ngoluna. 2:19 Dijanjihon angka guru pargabus i ma haluaan di halahi, hape halahi sandiri pe na niparhatoban ni angka hasomalan na mangagohon jolma do -- angke sanga ise na nitaluhon ni sanga aha, hatoban ni na manaluhon i do i. 2:20 Muda dung ditanda sanga ise Tuhan i dohot Sipaluanta, Jesus Kristus i, jana hara ni i madung malua ia sian angka na marpardomuan tu portibi on na manyegohon parange ni jolma, hape tarjorat muse ia mangulahi jana ditaluhon angka pangalaho ni portibi on, ujungna gabe jumatjat dope na masa tusia ulang pado na parjolo i. 2:21 Na gumonan hian do indangkon jungada ditanda angka jolma na songon i dalan na tigor na sian Debata i, ulang pado ditanda halahi hape dung salpu i nada ra halahi mangoloi angka parenta na nilehen ni Debata tu halahi. 2:22 Sude na nibaen ni halahi tudos do tu pandohan on, "Mulak do anjing mangan uta-utana," dohot, "Mulak marluntak do babi diparguluanna."
3:1 Hamu angka dongan na nihaholongan! On ma suratku na paduahon tu hamu. Di suratki na dua i, giot sunggulanku do rohamunu na denggan i. 3:2 Husosoi hamu anso diingot hamu mangulahi angka hata na nidok ni angka panurirang ni Debata nahinan, dohot parenta ni Tuhan, Kristus na nipasahat tu hamu markite-hite angka rasul. 3:3 Parjolo angkon diboto hamu, di ari na parpudi marroan ma angka jolma na mardalan mangihutkon giot-giot ni rohana sandiri. Incahan ni halahi ma hamu 3:4 dokkonon ni halahi ma songon on, "Di dia do janji taringot tu haroroNia i? Madung pola marmatean angka ompunta, hape laing songon-songon i sajo do sandok na adong mamungka sian mula ni tano on!" 3:5 Sangajo na so ra do halahi umbotosa paboa na nitompa ni Debata do langit dohot tano on narobi markite-hite hata ni Debata; tano on pe sian aek do ditompa jana mardongan aek; 3:6 jana laing dohot aek i muse, diabiskon Debata portibi si narobi i, i ma dohot aek na oto. 3:7 Tapi anggo langit dohot tano na saonnari on, i ma na giot abiskonon dohot api saulahon, dipauli-uli Debata dope i laing markite-hite hataNia anso nisimpan lopus dapot hatihana niuhuman jana nimatehon sudena angka jolma na so porsaya tu Debata. 3:8 Tapi na saragam on nada tola lupa hamu: anggo di parnidaan ni Debata nada adong asing ni na sadari dohot na saribu taon -- sarupa do i dua-dua. 3:9 Nada tarlambat Debata mangalehen sanga aha na nijanjihonNia songon na nipikiran ni deba halak. Tapi sobar do Ia paadop-adop hamu, angke sahalak pe nada dihagioti Ia mago. GiotNia ulang so muba nian sude roha ni jolma sian angka dosana be. 3:10 Tapi anggo Ari haroro ni Tuhan na padua nolihon i, songon haroro ni panangko do i. Anggo di Ari i mago ma langit mardongan sora na gogo, jana mosok ma sude angka na adong di langit jana mago muse ma tano on dohot sude isina. 3:11 Antong, anggo na giot segohonon do sudena i, angkon gabe na badia ma ngolumunu jana marpangoloion tu Debata, 3:12 salolot painte-intehon jana na patibuhon haroro ni Ari Ni Debata i hamu. Abis ma mosok sudena di Ari i sandok langit i, jana hara ni milasna gabe malala ma gabe songon aek sandok na adong di langit i. 3:13 Tapi na painte-intehon na nijanjihon ni Debata do hita, i ma langit na imbaru dohot tano na imbaru. Disi ma dapot na tigor salolot-lolotna. 3:14 Hara ni i hamu angka dongan na nihaholongan, di na painte-intehon Ari i hamu, situtui hamu ma mangkarejohon anso ulang mardosa be hamu jana martihas di jolo ni Debata. Jana ulang so denggan pardomuanmunu tu Debata. 3:15 Etong hamu ma hasobaron ni Tuhanta i na mangalehen dalan tu hita anso dohot hita malua. Taringot tusi pe, nada he madung dibaen si Paulus surat tu hamu? Mardongan habisuhon na nilehen ni Debata do dibaen ia surat i. 3:16 Di sude suratnia i, sai dipaboa si Paulus do taringot tusi. Tutu nian, adong do piga-piga pangalaho na maol astuan di bagasan suratnia i. Jana angka halak na so togu haporsayaanna dohot na so angarti di surat ni si Paulus i, gabe dipabalik-balik halahi do na nisuratkon ni si Paulus i. Deba sian na tarsurat di Buku Na Badia i laing songon i do dibaen halahi. Pangalaho ni halahi do mambaen mago halahi. 3:17 Tapi anggo hamu angka dongan na nihaholongan, madung diboto hamu taringot tusi. Hara ni i, jonggor ma hamu, anso ulang jabat tarela-ela hamu tu haliluon ni angka halak na so mananda parenta ni Debata, anso ulang madabu hamu sian ojahanmunu i. 3:18 Sai mur pangkilalahon hamu ma hadengganan ni roha ni Tuhan, Sipaluanta i, i ma Jesus Kristus, jana sai mur tangkas ma nian ditanda hamu Ia. Tarpuji ma Ia saonnari bope ro di salolot-lolotna. Amen.
1:1 Taringot tu hata na mangalehen hangoluan do isi ni surat on, i ma Hata na dung adong hian mamungka sian mula ni mulana. Madung hami bege i jana hami ida sandiri dohot matanami. Madung hami ligi jana hami jama dohot tangannami. I ma na hami suratkon tu hamu. 1:2 Madung dipaboa hangoluan i tu portibi on, jana madung hami ida. I ma umbaen na hami saksihon taringot tusi jana hami jamitahon taringot tu ngolu na manongtong na adong hian rap dohot Ama i jana na dung dipatidahon tu hami. 1:3 Sanga aha na hami ida dohot na hami bege i, laing i do na hami jamitahon tu hamu, anso tarbaen hamu rap dohot hami marhasadaan dohot Ama i dohot tu Jesus Kristus AnakNa i. 1:4 Hami baen pe surat on, anso mur marjop ni roha do hita. *HITA: Dipiga-piga-piga naskah narobi didok: Hamunu.* 1:5 Anggo jamita na hami jagit sian Anak Ni Debata jana na hami paboa tu hamu, on do: Na torang do Debata i, jana nada adong hagolapan bagi aha pe diSia. 1:6 Muda tadok na sada hita dohot Ia, hape laing mangolu di hagolapan hita, gabe pargabus do hita di hata bope di pambaenanta. 1:7 Tapi muda mangolu di na torang hita laing songon Debata na maringanan di na torang i, gabe mangolu ma hita di bagasan pardomuan na solkot na sada tu na asing, jana hara ni mudar *MUDAR: Na manudu tu hamatean ni Jesus do on.* ni Jesus AnakNa i gabe ias ma hita sian sasude dosanta. 1:8 Muda tadokkon nada mardosa hita, na paoto-oto dirinta do hita disi, jana nada adong hasintongan di bagasan dirinta. 1:9 Muda taoku dosanta, gabe na bonar jana na tigor do Ia, jadi sesaonNia ma dosanta jana dipaias Ia hita sian sasude hageduhan. 1:10 Muda tadokkon na so mangkarejohon dosa hita, gabe Ia do na tabaen pargabus jana nada adong hataNia di bagasan hita.
2:1 Hamu angka dakdanakku! Hubaen surat on tu hamu, anso ulang mambaen dosa be hamu. Tapi muda adong na mambaen dosa, adong do di hita sada pangurupi di adopan ni Ama i, i ma Jesus Kristus na tigor i. 2:2 Markite-hite Jesus Kristus do dapot hita hasesaan ni angka dosanta i. Jana nada hum dosanta na nisesaNia, tapi dohot do dosa ni sandok tano on. 2:3 Muda dohot hita burju mangoloi angka parenta ni Debata, i ma paboahon na tutu tatanda Debata. 2:4 Sanga ise na mandok, "Hutanda do Debata," hape nada dioloi ia angka tona ni Debata, pargabus do halak na songon i, jana na so adong do maringanan jamita na sintong i na sian Debata di bagasan rohania. 2:5 Tapi sanga ise na burju mangoloi hata ni Debata, sanggam ma haholongannia Debata. I ma tandana paboa na dung marsada ngolunta dohot Debata. 2:6 Sanga ise na mandok na marsada ngoluna dohot Debata, angkon laing songon Jesus Kristus ma muse ngoluNia. 2:7 Hamu angka dongan na nihaholongan! Nada pola parenta na imbaru na husuratkon on. Parenta na dung honok do on dipaboa tu hamu sian mulana; i ma jamita na dung dibegemunu. 2:8 Tapi haru songon i pe, laing tona na imbaru do dohonon na husuratkon on. Madung tangkas tarida parenta on di diri ni Jesus Kristus dohot di dirimunu; angke madung mamungka salpu hagolapan jana mamungka ma bincar sinondang na tigor. 2:9 Sanga ise na mandok maringanan ia di na torang hape goyak do rohania mida donganna, laing na di bagasan hagolapan dope ia lopus saonnari. 2:10 Sanga ise na mangkaholongi donganna, i do na mangolu di na torang, angke nada adong sanga aha disia na mambaen halak gabe mardosa. 2:11 Tapi halak na margoyak ni roha mida donganna, laing na di hagolapan dope i. Na mardalan di bagasan hagolapan dope i jana na so diboto ia do sanga na giot tu dia ia kehe, angke nada marnida ia dibaen hagolapan i. 2:12 Hubaen surat on tu hamu angka dakdanak, dibaen madung disesa dosamunu hara ni goarNia. 2:13 Hubaen surat tu hamu angka ama, dibaen madung ditanda hamu Ia na adong sian mula ni mulana. Hubaen surat on tu hamu angka na poso, angke madung ditaluhon hamu hajahatan. 2:14 Hubaen surat on tu hamu angka dakdanak, dibaen madung ditanda hamu Ama i. Hubaen surat on tu hamu angka ama, dibaen madung ditanda hamu Ia na dung adong hian sian mula ni mulana. Hubaen surat on tu hamu angka na poso, angke gogo do hamu, jana hata ni Debata maringanan di bagasan hamu, jana madung ditaluhon hamu hajahatan i. 2:15 Ulang haholongi hamu portibi on, sanga pe bagi aha na adong di bagasan portibi on. Muda holong do rohamunu di portibi on, na so holong do rohamunu mida Ama i. 2:16 Sasudena na adong di portibi on na nihalungunkon ni jolma -- i ma sasude hagiot ni sibuk, hagiot ni mata dohot na pagodangkon dirina -- nada sian Debata haroroan ni angka na songon i, tapi sian portibi on do. 2:17 Na giot mago do portibi on bope sasudena na adong di bagasanna na nihalungunkon ni jolma. Tapi anggo halak na patulus hagiot ni Debata, mangolu do salolot-lolotna. 2:18 Hamu angka dakdanakku, hatiha na parpudi do saonnari, songon na dung dibege hamu, giot ro ma musu ni Kristus i, jana madung mur bahat musu ni Kristus i saonnari; i ma tandana na hatiha parpudi do saonnari. 2:19 Angka halak na dung manadingkon hita do anggo angka musu ni Kristus i, tapi nada halak na masuk tu hita hian halahi. Sugari halak na masuk tu hita hian halahi, tontu angkon tongtong do halahi rap dohot hita. Tapi morot do halahi sian hita anso torang tarida na so masuk tu hita hian sahalak pe sian halahi. 2:20 Jadi madung dimiahi Na Badia i hamu, gabe sude ma hamu umbotosa. 2:21 Jadi hubaen pe surat on tu hamu nada hara ni na so nibotomunu hasintongan i, tapi hara ni na dung nibotomunu i do jana diboto hamu muse do na so adong do gabus di hasintongan i. 2:22 Anggo pargabus i, i ma halak na mandok, na so tutu do Jesus i Kristus na nijanjihon ni Debata i. Musu ni Kristus do halahi: nada dioku ia Ama i sanga pe Anak i. 2:23 Barang ise na mangoku Anak i, disia muse do Ama i. 2:24 Antong, jamita na dung nibegemunu sian mulana, denggan ma i jagohon hamu di bagasan rohamunu. Muda denggan diparrohahon hamu jamita i, tongtong do marsada hamu di bagasan Anak i, bope di bagasan Ama i. 2:25 Jana on ma na nijanjihon ni Kristus sandiri tu hita, i ma ngolu na manongtong. 2:26 Na husurat on, i ma taringot tu angka halak na sai giot paoto-otohon hamu. 2:27 Harana di bagasan dirimunu tinggal do pamiahion na dung nijagitmunu sian Ia. Hara ni i nada porlu hamu ajaran ni halak na asing, tapi songon dia pamiahonNia mangajari hamu taringot tu sudena -- jana sintong do pangajaranNia i; nada gabus -- jana songon dia Ia mangajari hamu na jolo, songon i muse ma nian hamu maringanan di bagasan Ia. 2:28 Jadi hamu angka dakdanakku, tongtong ma hamu maringanan di bagasan Kristus, anso pos situtu rohanta paboa na puluk hita mangadop tuSia so pola maila be hita saulahon di haroroNa. 2:29 Muda diboto hamu, na tigor do Ia, tangkas muse ma di hamu, barang ise na mambaen hatigoran, i do na tubu sian Ia.
3:1 Ligi ma, sai godang do holong ni roha na nilehen ni Ama i tu hita, ma pola nigoar hita dakdanak ni Debata; jana na tutu do angka dakdanak ni Debata hita. Hara ni i nada ditanda portibi na jahat on hita, harana nada ditanda portibi on Debata. 3:2 Hamu angka dongan na nihaholongan! Saonnari dakdanak ni Debata do hita, tapi sanga na bia hita muse, nada dipatidahon dope i tu hita. Tapi laing toboto do, muda ro Kristus, gabe songon Ia ma hita, angke idaonta ma Ia di pangalahoNia na satutuna. 3:3 Sude halak na mararop ni roha tuSia, dipaias ia ma dirina songon Ia na badia i. 3:4 Sanga ise na mambaen dosa, na mangalaosi Tona Ni Debata do i; angke na nidok dosa, i ma karejo na mangalaosi Tona Ni Debata. 3:5 Diboto hamu do sanga hara ni aha umbaen na ro Kristus, i ma na laho manyesa angka dosa ni jolma *JOLMA: Dipiga-piga-piga naskah narobi didok: Hita.* jana nada adong dosa di bagasan Ia. 3:6 Hara ni i sude halak na tinggal di bagasan Ia, nada be mangkarejohon dosa; ganop halak na tongtong mangkarejohon dosa nada marnida jana nada mananda Ia. 3:7 Hamu angka dakdanakku, ulang ma padiar hamu adong halak na mangaliluhon hamu. Barang ise na mangkarejohon hatigoran, na tigor do i, dos songon Kristus na tigor i. 3:8 Tapi sanga ise halak na sai torus mambaen dosa, anak ni Sibolis do i, angke na sai mardosa do Sibolis i sian mula ni mulana. Na giot manyegohon karejo ni Sibolis i do umbaen na ro Anak Ni Debata tu portibi on. 3:9 Ganop halak na sorang sian Debata, nada mangkarejohon dosa be, harana madung adong do disia bako ni Debata jana nada be mangkarejohon dosa, harana na sorang sian Debata do ia. 3:10 On ma parasingan ni angka dakdanak ni Debata sian angka dakdanak ni Sibolis: Sanga ise na so patuluskon hatigoran, sanga na so manghaholongi donganna, nada dakdanak ni Debata halak na songon i. 3:11 Sian mulana madung dipaboa jamita on tu hamu: Angkon marsihaholongan do hita sama hita. 3:12 Nada songon si Kain, na ro sian na jahat jana na mambunu anggina. Hara ni aha ma lakna umbaen na nibununia i? Dibaen na jahat do pambaenannia i, tapi na tigor do na nibaen ni angginia i. 3:13 Antong hamu ale angka dongan! Ulang pola homang be rohamunu muda dihagigihon portibi on hamu. 3:14 Taboto do na dung taripar hita sian hamatean tu hangoluan, hara ni na marsihaholongan hita tu angka donganta. Halak na so marholong ni roha, laing na nirajaan ni hamatean dope i. 3:15 Halak na mangkosomi donganna, sibunu jolma do i, jana diboto hamu do ganop sibunu jolma nada maruli i di ngolu na manongtong. 3:16 Anggo hita, sian on do tatanda holong ni rohaNia: Madung dipasahat Kristus ngoluNia humopkop hita! Hara ni i, hita pe angkon pasahatonta do ngolunta manghopkop angka donganta. 3:17 Muda adong sada halak na marsinadongan di tano on na marnida donganna markahurangan, hape nada ra ia patuduhon ibo ni roha tu donganna i, bia ma he pandoknia na holong rohania tu Debata? 3:18 Hamu angka dakdanakku! Ulang ma hum di pamangan sajo hita marholong ni roha sanga hum di hata sajo. Holong ni roha na tutu i ma tabaen mangkaholongi, sipataridahononta di pambaenanta. 3:19 Sianon ma dalanna taboto na dohot do hita tarmasuk tu angka halak na ro sian Debata, gabe tarbaen sonang pangkilalaanta di jolo ni Debata. 3:20 Angke muda diuhumi rohanta hita, na gumodang dope Debata sian rohanta jana diboto Ia do sasudena i. 3:21 Ale hamu angka dongan na nihalungunan, muda nada diuhumi rohanta hita, adong ma pos ni rohanta mida Debata. 3:22 Jana sanga aha pe na tapangido sian Ia, dapot hita do i, angke burju do hita mangoloi angka tonaNia dohot patuluskon sanga aha na tumbuk tu rohaNia. 3:23 Anggo na niparentahonNia tu hita, on do: Angkon tahaporsayai do AnakNia i, i ma Jesus Kristus; jana angkon marsihaholongan do hita sama hita songon na niparentahon ni Kristus tu hita. 3:24 Barang ise na mangoloi angka na niparentahonNia, na maringanan do ia di bagasan Debata, jana Debata di bagasan ia. Jana taboto ma bahaso Debata maringanan di bagasan hita, i ma hara ni Tondi na dung dilehenNia tu hita.
4:1 Angka dongan na nihaholongan! Ulang ma hamu porsaya tu ganop tondi, tapi uji hamu ma angka tondi i sanga na marharoroan sian Debata do i, harana madung bahat angka panurirang pargabus ro tu portibi on. 4:2 Songon on ma baen hamu laho mananda sanga Tondi Parbadia do tondi i sanga nada: Sanga ise na mangoku Jesus Kristus ro tu portibi on gabe jolma, na sian Debata ma Tondi na adong di halahi. 4:3 Tapi sanga ise na so mangoku songon i taringot tu Jesus, nada adong di halahi Tondi Parbadia. Sian musu ni Kristus do tondi na adong di halahi. Taringot tu tondi i pe madung dipaboa hian i tu hamu na giot ro hian do i. Madung di portibi on ia saonnari. 4:4 Tapi ale dakdanakku, anggo hamu dakdanak ni Debata do. Madung ditaluhon hamu angka panurirang pargabus i, angke gumogoan dope Tondi na adong di hamu sian tondi na adong di angka jolma na ro sian portibi on. 4:5 Taringot tu angka pangalaho na di portibi on do na nihataan ni angka panurirang pargabus i, jana ditangihon portibi on do halahi, angke sian portibi on do haroroan ni halahi. 4:6 Sian Debata do haroronami; barang ise mananda Debata, tangihononna do hami. Barang ise na so sian Debata, nada tangihononna hami. Sian i do tatanda Tondi hasintongan dohot tondi na paliluhon. 4:7 Hamu angka dongan na nihaholongan! Marsihaholongan ma hita sama hita, angke sian Debata do ro holong ni roha i. Sanga ise na marholong ni roha, i do dakdanak ni Debata jana na mananda Debata. 4:8 Sanga ise na so marholong ni roha, nada ditanda i Debata; angke holong ni roha do Debata i. 4:9 Dipataridahon Debata do holong ni rohaNia tu hita di na nisurunia AnakNia na sasada i tu portibi on anso tarbaen hita mangolu markite-hite AnakNia. 4:10 On do holong ni roha i: Nada hita parjolo mangkaholongi Debata tapi Debata do na mangkaholongi hita jana na marsuru AnakNia tu portibi on anso dapotan pardengganan hita taringot tu angka dosanta. 4:11 Hamu angka dongan na nihaholongan, muda songon i ma pangkaholongi ni Debata tu hita, hita pe angkon marsihaholongan ma sama hita. 4:12 Sahalak pe nada adong na jungada mida Debata, tapi maringanan do Debata di bagasan hita jana gabe sanggam do holong ni rohaNia di bagasan hita muda marsihaholongan hita sama hita. 4:13 Dibaen madung dilehen Debata TondiNia tu hita, gabe taboto ma na di bagasan ni Debata do hita, jana Ia di bagasan hita. 4:14 Madung hami ida sandiri Anak Ni Debata, jana saonnari hami saksihon, na dung disuru Ama i do Ia ro tu portibi on anso gabe Sipalua di portibi on. 4:15 Sanga ise na mangoku Anak Ni Debata do Jesus, marsada ma Debata tu halakna i jana na maringanan do Debata di bagasan ia, jana ia di bagasan Debata. 4:16 Taboto jana tahaporsayai do holong ni roha ni Debata maradopkon hita. Holong ni roha do Debata. Sanga ise na sai torus mangkaholongi halak na asing, na maringanan do ia di bagasan Debata jana Debata di bagasan ia. 4:17 Sanggam do holong ni roha i dipatupa di bagasan dirinta anso marpos ni roha hita di Ari Paruhuman i, harana tudos songon Ia, hita pe di portibi on do. 4:18 Nada adong biar ni roha di bagasan holong; holong na sanggam mangagohon sude biar; angke adong do uhuman di bagasan biar i. Jadi barang ise na mabiar; nada dope sanggam ia di bagasan holong. 4:19 Marholong ni roha pe hita, hara ni na dung parjolo do Debata mangkaholongi hita. 4:20 Muda adong na mandok, "Huhaholongi do Debata," hape hosom rohania mida dongannia, pargabus do halak na songon i. Angke sanga ise na so mangkaholongi dongan na bolas idaonnia, nada tarbaen ia be mangkaholongi Debata na so jungada diida ia. 4:21 Antong, on ma tona na nilehen ni Kristus tu hita: Sanga ise na mangkaholongi Debata angkon laing dihaholongi ia muse ma dohot donganna.
5:1 Barang ise na porsaya bahaso Jesus do Kristus i, i do na sorang sian Debata, bope barang ise na mangkaholongi Ia na manyorangkon, dihaholongi ia muse do na sorang sian Ia. 5:2 On ma tandana na holong rohanta mida angka dakdanak ni Debata: Muda tahaholongi Debata jana burju hita mangoloi angka tonaNia. 5:3 Angke muda nidok mangkaholongi Debata, na mangoloi angka tonaNia do astuan ni i. Jana nada pola borat di hita angka tonaNia i, 5:4 angke sanga ise na sorang sian Debata tartaluhonsa do portibi na jahat on. Jana haporsayaanta i do hamonangan na manaluhon portibi on. 5:5 Ise ma he na tarbaen manaluhon hajahatan ni portibi on? Hum halak na mangkaporsayai bahaso na tutu do Jesus Anak Ni Debata. 5:6 Ia do naro i markite-hite aek dohot mudar, i ma Jesus Kristus, nada hum markite aek sajo, tapi markite-hite aek dohot mudar. Jana Tondi do na mangalehen hasaksian, angke Tondi i do hasintongan. 5:7 Jadi adong do tolu saksina: *JADI ADONG DO TOLU SAKSINA: Dipiga-piga-piga naskah narobi didok: Angka saksi na di banua ginjang i ma Ama i, Hata i dohot Tondi Ni Debata -- sada do anggo na tolu i. Angka saksi na di portibi on i ma.* 5:8 Tondi Parbadia, aek dohot mudar. Sarupa do hasaksian ni na tolu i. 5:9 Tahaporsayai do hasaksian ni jolma, tapi gumogo dope hasaksian ni Debata. Jana on ma hasaksian na dung dilehen Debata taringot tu AnakNia i. 5:10 Hara ni i, sanga ise halak na porsaya tu Anak Ni Debata, madung dijagit Ia hasaksian on di bagasan dirinia; tapi anggo halak na so porsaya tu Debata, madung dibaen Ia Debata gabe songon pargabus, angke nada porsaya ia tu na nipatangkas ni Debata taringot tu AnakNia i. 5:11 On do hasaksian i: Madung dilehen Debata di hita ngolu na manongtong; jana AnakNia i do mual haroroan ni ngolu na manongtong i. 5:12 Sanga ise na maruli di Anak i, i do na maruli di ngolu na manongtong i; jana halak na so maruli di Anak Ni Debata i, nada maruli di ngolu i. 5:13 Hubaen pe surat on tu hamu angka na mangkaporsayai Anak Ni Debata anso diboto hamunu do na dung maruli ngolu na manongtong i hamu. 5:14 Jana puluk ma hita ro tu Debata, angke tangihononNia do sudena pangidoan na tapajojor tuSia mangihutkon hagiot ni rohaNia. 5:15 Antong, dibaen taboto do na nitangihonNia hita muda mangido hita tuSia, gabe taboto muse ma na lehenonNia do sanga aha na tapangido tuSia. 5:16 Muda adong diida hamu dongan Kristen mambaen dosa na so pola mambaen hamatean, sitangiangkononmunu do i tu Debata; jana lehenon ni Debata ma ngolu di halak na songon i, i ma tu halak na mambaen dosa na so pola mambaen hamatean i. Tapi adong do dosa na mambaen hamatean, jana nada hudok anso tangiangkononmunu dosa na songon i tu Debata. 5:17 Sude pambaenan na sala, dosa do i, tapi adong do dosa na so pola mambaen hamatean. 5:18 Taboto do anggo halak na dung gabe dakdanak ni Debata, nada pola sai marpupu halahi mambaen dosa, angke dijagohon Anak Ni Debata do ia jana nada tarkahua si Parjahat i ia. 5:19 Taboto do na sian Debata haroroanta, jana sude na satano on di bagasan tangan ni si Parjahat i. 5:20 Taboto do na dung ro Anak Ni Debata tu portibi on. Madung dilehen Ia tu hita pangastuion, anso tatanda Debata na sintong i; jana na maringanan do hita di bagasan Na Sintong i, i ma di bagasan AnakNia Jesus Kristus. On do Debata na sintong, jana on do ngolu na manongtong. 5:21 Hamu angka dakdanakku, padao hamu ma dirimunu sian angka gana-ganaan!
1:1 Sian Sintua tu Ina na dung tarpili dohot tu angka dakdanakna *INA NA DUNG TARPILI DOHOT TU ANGKA DAKDANAKNA: Didok roha anggo na nimaksud ni hata on, i ma sada parlagutan dohot angka ruasna (dohot di ayat 4-5).* na huhaholongi. Nada hum au sajo na mangkaholongi hamu, tapi dohot do sude halak na dung mananda hasintongan i. 1:2 Angke maringanan do jamita na sintong i na sian Debata di bagasan rohanta jana na sai tongtong rap dohot hita salolot-lolotna. 1:3 Sai dipasupasu ma hita jana sai dilehen ma asi ni roha dohot hasonangan sian Debata Amanta i dohot sian Jesus Kristus Anak Ni Debata Ama i. Sai maruli ma hita di sudena i di bagasan hasintongan dohot holong ni roha. 1:4 Jop sajo do rohangku dung huboto, na adong do hape angka dakdanaknami na mangolu mangihutkon jamita na sintong i na sian Debata songon na dung diparentahon ni Ama i tu hita. 1:5 Jadi gomos hupangido di Dainang anso marsihaholongan hita sama hita. Nada pola tona na imbaru na hupajojor on; na dung dilehen do tu hita tona on sian mulana. 1:6 Marholong ni roha, astuanna mangoloi tona ni Debata. Jana tona na dung dibege hamu sian mulana i, i ma anso marsihaholongan hamu sama hamu. 1:7 Madung bahat angka pargabus manyarsar sun ro di dia di tano on. Na so nioku ni halahi do na dung ro Jesus Kristus tu portibi on songon sada jolma. Pargabus do halak na songon i jana musu ni Kristus. 1:8 Hara ni i, jagohon hamu ma anso ulang jabat adong sanga aha na mago sian na hami pasahat i tu hamu. *NA HAMI PASAHAT I TU HAMU: Sanga: Na dung diusahahonmunu i.* Manat ma hamu anso laing dohot hamu manjagit sudena upamunu i. 1:9 Sanga ise na so maringan di pangajaran ni Kristus i, tapi na kehe manyimbil sian na niajarkon ni Kristus, nada marsada halak na songon i dohot Debata. Halak na sai tongtong di bagasan pangajaran ni Kristus, astuanna na marsada do ia tongtong tu Ama i dohot tu Anak i muse. 1:10 Hara ni i, muda adong halak na ro jana manjamitahon tu hamu pangajaran na so niajarkon ni Kristus, ulang ma jagit hamu halakna i di bagasmunu; jana ulang dok hamu "Horas" tu halahi. 1:11 Angke sanga ise na manjalang halak na songon i, na dohot do i rap dohot halahi mambaen parange na jahat i. 1:12 Bahat sajo do nian na giot pajojoronku tu hamu, tapi huhilala dumenggan ma ulang pola markite-hite surat. Arop do rohangku tarbaen au manopot hamu jana mandok hata au sandiri tu hamu anso tutu situtu marjop ni roha hita. 1:13 Tabe ma di hamu sian angka dakdanak ni donganmunu *DAKDANAK NI DONGANMUNU: Didok roha angga na nidok ni hata on i ma parlagutan di inganan ni si panyurat.* na dung tarpili i.
1:1 Sian Sintua tu si Gayus na nihaholongan, na huhaholongi di bagasan hasintongan i. 1:2 Hutangiangkon do anso denggan nian sasudena boti anso laing horas torkis ho nian, laing songon na huboto i na denggan do ngolu partondionmu. 1:3 Jop sajo do rohangku di parlalu ni angka deba dongan na paboahon taringot tu ngolumunu na tongtong di bagasan hasintongan, jana tutu do ho sai mardalan di bagasan hasintongan. 1:4 Nada adong jop ni rohangku na gumodang di balik ni on, muda hubege na mardalan do dakdanakku di bagasan hasintongan i. 1:5 Ale dongan na huhaholongi! Na burju do ho di pambaenanmu na nibaenmi tu angka dongan dohot tu angka halak na asing. 1:6 Madung disaksihon halahi tu parlagutan na dison taringot tu holong ni rohamu. Cubo ma jolo mangurupi halahi anso tarpatorus halahi pardalanan ni halahi. Dalan na pasonangkon roha ni Debata ma baen patuluskon i. 1:7 Dibaen hara ni goarNia do kehe halahi, jana nada dijagit halahi bagi aha pe sian angka halak na so mananda Debata. 1:8 Antong, tama do tajagit halak na songon i, anso gabe dongan saparkarejoan ni halahi hita di hasintongan i. 1:9 Madung hubaen sada surat na pendek tu parlagutan i, hape nada ra si Diotrefes na marpor ni roha gabe pamimpin ni parlagutan i mangihutkon na hudok. 1:10 Muda ro au bagi na andigan, hataanku do taringot tu pambaenannia, i ma taringot tu angka pangalaho na jat dohot gabus na nihatahonnia taringot tu hami! Tapi nada tuk dope i disia. Dompak na ro angka dongan Kristen i, nada ra ia manjagitsa. Diantahi ia muse dope halak na ra manjagit angka dongan i jana disuru ia anso morot halahi sian parlagutan i. 1:11 Dongan na nihaholongan! Ulang ma tiru hamu na jat i. Na denggan i ma tiru hamu. Sanga ise na mambaen na denggan, sian Debata do ro ni i. Jana halak na mambaen na jat, na so padumpang dope i dohot Debata. 1:12 Sude do halak mamuji si Demetrius. Sian jamita na sintong na sian Debata pe tarpuji do ia. Hami pe dohot do mamuji ia jana diboto hamu do, tutu do pamujinami i. 1:13 Bahat dope nian sidokkononku tu ho, tapi dumenggan do huhilala ulang pola markite-hite surat. 1:14 Didok rohangku nada pola sadia honok nari marsuo ma au dohot ho, disi ma hita na dua mangkobari. 1:15 Hasonangan ma di ho! Palalu tabe do angka dongan sian on di ho. Palalu ma tabengku tu sude angka donganta marsada-sada.
1:1 Sian si Judas naposo ni Jesus Kristus, anggi ni si Jakobus, tu angka halak na tarpio jana na nihaholongan di bagasan Debata Ama, jana na nijagohon ni Jesus Kristus. 1:2 Mararop roha do au pasupasuon ni Debata hamu jana lehenonna asi ni roha dohot hasonangan mardapot-dapot di hamu. 1:3 Angka dongan na nihaholongan! Tutu situtu do ringgas do rohangku mambaen surat on tu hamu taringot tu haluaan na dung tadalani i. Tapi saonnari taronjar do rohangku paingot hamu markite-hite surat on anso laing torus hamu marjuang hara ni haporsayaan i na nilehen tu angka halak na badia. 1:4 Angke madung adong masuk tu tonga-tonganta sian angka halak na so porsaya so sian pamotoanta. Dipabalik-balik halahi do jamita taringot tu asi ni roha ni Tuhanta i, anso tarbaen halahi patuluskon angka parange ni halahi na so ture. Jana na so ra do halahi mangoku paboa Jesus Kristus do Parkuaso dohot Tuhanta na sasada i. Mamungka sian nahinan madung dipaboa hian di Buku Na Badia i uhuman na tu halahi. 1:5 Madung diboto hamu i sudena. Tapi haru songon i pe laing hupaingot ma hamu taringot tu dalan na nibaen ni Tuhan *TUHAN: Dipiga-piga-piga naskah narobi didok: Jesus (di bahasa Junani sarupa do i dohot Josua). laho paluahon bangso Israel sian tano Mesir, tapi dung salpu i, diragehon Ia do sanga ise angka na so porsaya sian halahi. 1:6 Laing ingot hamu ma angka surusuruan na so mangargahon jabatan ni halahi, na gabe kehe halahi manadingkon ingananna. Dipasung Debata do angka surusuruan i dohot hayu na so ra sego salolot-lolotna, di inganan na golap situtu. Torus ma halahi disi ditahan lopus nidabu uhum tu halahi di Ari na godang i. 1:7 Laing ingot hamu ma kota Sodom dohot Gomora dohot angka kota na humaliang i, na niinganan ni halak angka na mambaen pangalaho songon na nibaen ni angka surusuruan i. Angka pangalaho na rorang dohot na mangoloi hagiot ni sibukna do dipambaeni halahi, gabe hona uhum ma halahi dohot api na so ra mintop, baen sipaingot tu halak sudena. 1:8 Laing dohot dalan na songon i muse ma angka halak na manyisip masuk tu tonga-tonganta na mambaen dosa tu pamatang ni halahi sandiri hara ni angka nipina. Layas do diida halahi kuaso ni Debata jana dipabile halahi do angka na sangap na di banua ginjang i. 1:9 Tapi si Mikael sandiri kapala ni angka surusuruan i nada jungada dibaen ia songon i. Di na marsalisi ia sanoli dohot Sibolis i hara ni bangke ni si Musa, nada puluk si Mikael mandok hata pincang-pincang laho manguhumi Sibolis i. Hum on sajo do didok si Mikael, "Sai dipincang Debata ma ho!" ning ia. 1:10 Tapi anggo halahi, mardongan hata incak dialo halahi do sanga aha na so niastuan ni halahi. Tarsongon binatang na so marroha do halahi, na mangastui angka pangalaho hum hara ni bakona sajo. Hape angka na songon i do mambaen hamamago tu halahi. 1:11 Marjaya ma halahi! Dalan ni si Kain do na nibolus ni halahi. Anso dapotan upa, gabe didohoti halahi do angka hasalaan songon na nibaen ni si Bileam. Jana mago do halahi hara ni na manggaori songon na nibaen ni si Kora. 1:12 Muda hatiha mambaen pesta parjamuan hamu, laing halahi ma tongtong na mambaen tilako di hamu. Angke nada adong ila ni roha ni halahi, na songkal jana na pamokmokkon dirina. Songon ombun na niombuskon ni alogo do halahi, hape nada parohon udan. Laing songon suan-suanan do halahi na so marbatu haru pe madung dapot musimna; songon suan-suanan na niumpat do halahi gabe rahar. 1:13 Laing tarsongon ombak ni laut na margubo-gubo, laing songon i ma halahi paila-ilahon markite-hite angka parange ni halahi. Songon angka binatang na mardalan di ramba i do halahi jana na dung diparade Debata do inganan di halahi salolot-lolotna di hagolapan na jumorbut. 1:14 Jungada do didok si Henokh pomparan ni si Adam na papitu sundutkon taringot tu halak sisongon on. Didok ia, "Ligi da, na giot ro do Tuhan mardongan angka surusuruanNia na marribu-ribu 1:15 laho manguhumi halak sudena. Dabuhonon ni Tuhan ma uhuman hara ni angka pambaenan ni angka jolma na so porsaya tuSia. Jana laing dabuhononNia ma uhuman hara ni sudena angka hata pangincahion na nipardokkonan ni angka halak pardosa na jahat tuSia!" 1:16 Hum na mungut-ungut do halahi dohot na manyolsoli hara ni bagianna, na mardalan mangihutkon giot-giot ni sibukna mambaen dosa. Na pujian halahi di diri ni halahi, jana dipanggar-panggar halahi ma halak anso dapotan untung halahi. 1:17 Tapi anggo hamu ale dongan na nihaholongan, ingot hamu ma sanga aha na nidok ni angka rasul ni Tuhanta Jesus Kristus hian najolo. 1:18 Madung dipaboa halahi hian tu hamu, marroan do angka halak na mangincahi hamu marayak dapot ari na parpudi; i ma angka na mangolu mangihutkon giot-giot ni halahi sandiri na jat i. 1:19 Angka halak on ma na mamola-mola jana na nirajaan ni angka hagiotna sandiri. Angka na so maruli Tondi Parbadia do halahi. 1:20 Tapi anggo hamu ale angka dongan, tambori hamu ma ngolumunu mardongan haporsayaan tu Tuhan; ias sun do haporsayaanmunu i. Laing martangiang ma hamu mardongan kuaso ni Tondi Parbadia 1:21 jana sai mardongan holong na sian Debata ma hamu mardalan di ngolu on salolot mararop ni roha hamu di asi ni roha ni Tuhanta Jesus Kristus na giot mangalehen ngolu na manongtong di hamu. 1:22 Maribo ni roha ma hamu maradopkon sanga ise halak na laing ganggu dope rohana. 1:23 Palua hamu ma halak sian api. Maradopkon angka halak na asing sian i pe laing maribo ni roha ma hamu mardongan biar, tapi hagigihon hamu ma anggo pakean ni halahi na hodar dibaen angka hagiot ni halahi na mardosa i. 1:24 Debata do na margogo manjagohon hamu, anso ulang tinggang, jana na pajongjongkon hamu di adopan ni hasangapanNia di bagasan jop ni roha, jana nada martihas. 1:25 Di Debata na sasada i, Sipalua hita markite-hite Jesus Kristus, Tuhanta i, diSia ma hasangapan, hagodangan, hagogoan dohot kuaso sian mula ni mulana, saonnari ro di salolot ni lolotna! Amen.
1:1 On ma halumbaan ni Jesus Kristus, na nilehen ni Debata diSia anso dipatidahon Ia i tu angka naposoNia taringot tu angka na giot masa. Jana madung dipatangkas jana ditongos Ia i markite-hite surusuruanNia tu naposoNia si Johannes. 1:2 Dipaboa si Johannes ma sudena na niidania i, i ma taringot tu jamita na sian Debata na nipasahat ni Jesus Kristus. 1:3 Martua ma na mambasahon dohot na manangihon angka hata panurirangon on, jana na mangoloi angka na tarsurat di bagasanna, angke madung donok hatihana. 1:4 Sian si Johannes tu parlagutan na pitu i, na di tano Asia. Asi ni roha ma di hamu dohot hasonangan sian Ia, na adong saonnari, na dung adong hian, jana na giot ro, dohot sian tondi na pitu i, na di jolo ni habangsaNia, 1:5 dohot sian Jesus Kristus saksi na bonar roha i. Ia do na parjolo dipangolu mangulahi sian hamatean jana Ia muse ma parkuaso di ginjang ni angka raja na di tano on. Dihaholongi Jesus do hita jana hara ni hamateanNia i dipalua Ia do hita sian angka dosanta. 1:6 Madung dibaen Ia do hita gabe sada harajaan anso laing gabe malim hita na markarejo di Debata AmaNa i. DiSia ma hasangapan dohot kuaso ro disalolot ni lolotna. Amen! 1:7 Ligi da, na ro ma Ia dihaliangi ombun! Idaon ni sude halak ma Ia, dohot halahi na maniham Ia. Mangangguhi ma sasudena bangso na di tano on manangisi dirina be hara ni Ia. Olo, tutu do na songon i! Amen! 1:8 "Au do na parjolo dohot na parpudi," ninna Tuhan Debata, na adong, na dung adong, jana na giot ro, Parkuaso Na Sumurung i. 1:9 Si Johannes do au, kahanggi bope donganmunu saparjuangan na topet manaon parkancitan, di harajaan dohot di pohom ni roha paintehon Jesus. Na tarbuang do au di pulo Patmos hara ni na pararatkon jamita na sian Debata na nipasahat ni Jesus. 1:10 Di ari ni Tuhan i, digohi Tondi Parbadia do au, dung i hubege ma sada sora na gogo -- songon sora ni sarune -- mandok hata sian pudingku. 1:11 Didok sora i do, "Suratkon ma sanga aha na niidamu jana tongoskon ma buku i tu parlagutan na pitu on: Epesus, Smirna, Pergamus, Tiatira, Sardis, Piladelpia dohot Laodikea." 1:12 Manaili ma au adop pudi laho mangaligi sanga ise na mandok hata i tu au. Manigor huida ma pitu parlampuan na nibaen sian sere. 1:13 Di holang-kolang ni angka parlampuan i jongjong ma sada songon Anak Ni Jolma do idaon rupana. Mamake baju juba na ginjang do Ia lalu tu patNa i. Adong di andoraNa i sere dialitkon Ia. 1:14 ObukNa i songon bontar ni hapur, songon bontar ni hapas. MataNa songon api na hagaraanna; 1:15 patNa i songon gurasa ni tumbaga na nitutung. SoraNa songon sora ni sampuran na godang. 1:16 Ditiop tangan siamunna i ma pitu bintang jana ruar ma sada podang na tajom sidua baba sian pamanganNa i. BohiNa i torang songon sinondang ni mataniari di hatiha hamilasanna. 1:17 Di na mangaligi au tuSia, tungkap ma au tu joloNia songon halak na dung mate. Tapi dibaen Ia ma tu au tangan siamunNia didok Ia ma, "Ulang ho mabiar! Au do Na Parjolo dohot Na Parpudi. 1:18 Au do Na Mangolu i! Madung mate hian Au, tapi ligi ma, na mangolu do Au salolot-lolotna. Guru di Au do hamatean dohot inganan ni angka jolma na dung mate. *INGANAN NI ANGKA JOLMA NA DUNG MATE: Mangihutkon pandapot ni halak di hatiha i, inganan ni halak na mate i ma di inganan na golap ditoru ni tano on.* 1:19 Antong, suratkon ma sanga aha na niidamu, i ma angka na adong saonnari dohot angka na giot tarjadi tu pudi on. 1:20 On ma arti ni rahasia ni bintang na pitu na niidamu di tangan siamunKon dohot astuan ni parlampuan na pitu na nibaen sian sere i. Bintang na pitu i, i ma angka surusuruan ni parlagutan na pitu i, jana parlampuan na pitu i, i ma parlagutan na pitu i."
2:1 "Tu surusuruan ni parlagutan na di Epesus, songon on ma suratkon: On ma barita sian na maniop bintang na pitu i di tangan siamunNia jana na mardalan pahae-pahulu di holang-kolang ni parlampuan sere na pitu i. 2:2 Huboto do sanga aha na nibaenmunu: Madung disitutui hamu karejo jana sobar sajo do hamu. Huboto do na so dilehen hamu rohamunu tu angka halak parjahat. Jana madung diuji hamu angka halak na mangoku dirina rasul, hape na so tutu do, gabe tardapot do halahi pargabus dibaen hamu. 2:3 Huboto do na sobar hamu dohot na manaon parkancitan hara ni goarKu, hape laing nada pola mandele hamu. 2:4 Tapi anggo pangalaho na sada on nada sonang rohangKu mida hamu: Nada songon di mulana i be holong ni rohamunu. 2:5 Hara ni i, ingot hamu ma sanga na dung sadia dao hamu madabu. Pauba hamu ma rohamunu, dung i ulahi hamu ma patuluskon pambaenanmunu na di mulana i. Anggo inda, ro ma Au jana umpatonKu ma parlampuanmunu i sian jongjonganna i -- muda nada muba rohamunu. 2:6 Tapi haru songon i pe, laing adong dope na denggan di hamu; i ma: Dohot do hamu mangkagigihon pambaenan ni halak na mangihutkon si Nikolaus, na Huhagigihon i. 2:7 Ditangihon na marpinggol i ma na nidok ni Tondi i tu angka parlagutan i. Di na monang i do lehenonKu mangankon parbatu ni hayu hangoluan, na di Pirdaus." 2:8 "Tu surusuruan ni parlagutan na di Smirna, songon on ma suratkon: On ma na nidok ni Na Parjolo dohot Na Parpudi -- i ma na dung mate jana na mulak mangolu i. 2:9 Huboto do hasusaanmunu; na pogos do hamu -- tapi anggo satutuna na mora do hamu! Huboto do angka adu-aduan na nituhaskon ni angka na manggoari dirina halak Jahudi, hape nian nada tutu; parlagutan ni sibolis do halahi! 2:10 Ulang ho mabiar taringot tu na giot taononmu. Ligi ma dabuon ni sibolis ma deba sian hamu tu bagasan hurungan, anso niuji hamu, jana manaon parkancitan ma hamu salolot sampulu ari. Sai bonar ma rohamunu lopus tu hamatean i, dung i lehenonKu ma di ho tuku hangoluan. 2:11 Ditangihon na marpinggol i ma na nidok ni Tondi i tu angka parlagutan i! Di na monang i do lehenonKu mangan sian manna na buni, jana lehenonKu ma disia batu na bontar." 2:12 "Tu surusuruan ni parlagutan na di Pergamus, suratkon ma songon on: On ma barita sian na maniop podang na tajom na marmata dua i. 2:13 Huboto do sanga di dia hamu maringanan. Di inganan ni kuaso ni Sibolis i do ingananmunu. Burju do hamu tu Au. Dompak na dibunu i pe si Antipas saksingKu na burju i di tonga-tongamunu di markas ni Sibolis i, disi pe nada disoadahon hamu paboa na porsaya hamu di Au. 2:14 Tapi haru songon i pe, laing adong do piga-piga pangalaho na so dihagioti ni rohangKu di hamu: Adong deba sian hamu na mangihutkon pangajaran ni si Bileam. Diajari si Bileam do si Balak paoto-otohon halak Israel anso mambaen dosa, i ma na mangankon pelean na nihaulkon tu gana-ganaan dohot mambaen pangalaho na markarosuan. 2:15 Laing songon i muse, adong deba sian hamu na mangihutkon pangajaran ni si Nikolaus. 2:16 Antong, pauba hamu ma rohamunu sian angka dosamunu i! Muda inda songon i, ro ma Au santongkin nari mandapotkon hamu jana poranganKu ma angka halakna i dohot podang na di pamanganKon. 2:17 Ditangihon na marpinggol i ma na nidok ni Tondi i tu angka parlagutan i. Di na monang i do lehenonKu mangan sian manna na buni, jana lehenonKu ma disia batu na bontar. Niuhir do di batu i sada goar na imbaru na so binoto ni sanga ise pe asing sian halak na manjagit i." 2:18 "Tu surusuruan ni parlagutan na di Tiatira songon on ma suratkon: On ma barita na sian Anak Ni Debata, na marnyala-nyala i mataNa songon api, dohot patNa na margurasa i songon tumbaga na marlinu. 2:19 Huboto do sude pambaenanmunu dohot holong ni rohamunu dohot pangoloionmunu dohot haporsayaanmunu dohot pohom ni rohamunu. Na umbahat do pambaenanmunu na parpudi on sian na parjolo i. 2:20 Tapi anggo taringot tu pangalaho na sada on, nada jop rohangKu mida hamu: Dilehen hamu do rohamunu tu si Isebel dadaboru na mangoku dirina i suruan ni Debata. Madung miduk sian angka naposongKu na niajarannia dohot na nipaoto-otonia anso markamainan dohot mangankon sipanganon na nihaulkon tu gana-ganaan. 2:21 Jana madung Hulehen tusia hatiha anso dipauba ia ma rohania sian na markarosuan i; tapi nada dipauba ia rohania. 2:22 Ligi ma Hudabu ma ia rap dohot donganna na markamainan i, tu podoman ni parkancitan na godang, muda so dipauba halahi rohana sian pambaenanna i. 2:23 Angka halak na mangihutkon ia pe angkon Hubunu do anso laing torang diboto angka parlagutan i paboa na Au do na tuk mandodo pikiran dohot roha ni jolma. BaloskononKu ma tu hamu marguru tu pambaenanmunu be. 2:24 Tapi anggo tu hamu na asing i na di Tiatira angka na so mangihutkon pangajaran na jahat i jana na so mamparsiajari angka parbinotoan ni Sibolis i, Hudokkon ma tu hamu, nada pola tambaanKu be boban na padokdokkon hamu. 2:25 Tapi tiop hamu ma na adong di hamu lopus ro Au. 2:26 Jana barang ise na monang jana na mangkarejohon karejongKu lopus tu ujungna, lehenonKu ma kuaso tu halahi, maradopkon angka bangso. 2:27 Jana mamarenta ma ia tu halahi dohot tungkot bosi; dohot mangabiskon bangso i songon na manapor-napor hudon tano -- dos songon na Hujagit sian Damang. 2:28 Jagiton ni halahi ma bintang sidongdong sian Au. 2:29 Ditangihon na marpinggol i ma na nidok ni Tondi i tu angka parlagutan i!"
3:1 "Tu surusuruan ni parlagutan na di Sardis, songon on suratkon: On ma barita sian na martondi na pitu na sian Debata dohot nampuna bintang na pitu i. Huboto do sanga aha na dung dikarejohon hamu. Nidok hamu na mangolu, hape na mate do! 3:2 Hara ni i, ngot ma hamu jana pargogoi hamu ma sanga aha na tading dope di hamu dompak so jabat mate sude. Angke nada adong dapot Au hum sada pe pambaenanmunu na sanggam di adopan ni DebatangKu. 3:3 Jadi angkon ingotonmunu do mangulahi sanga aha na niajarkon tu hamu najolo, songon i muse dohot na nijagitmunu. I ma dalankon hamu jana pauba hamu ma rohamunu sian angka dosamunu. Anggo nada ngot hamu, ro ma Au songon panangko mandapotkon hamu; jana nada botoonmunu sanga sadihari Au ro. 3:4 Tapi adong dope deba sian hamu na di Sardis on na manjagohon pakeanna anso laing tongtong ias. Rap mardalan ma halahi dohot Au marpakean na bontar, angke tama do songon i halahi. 3:5 Angke pakean na songon i ma bontarna na giot pakeon ni angka halak na monang. Nada sesaonKu be goar ni halahi sian buku hangoluan, tapi okuonKu ma halahi di adopan ni Damang dohot di adopan ni angka surusuruanNia paboa na Au nampuna halahi. 3:6 Ditangihon na marpinggol i ma na nidok ni Tondi i tu angka parlagutan i!" 3:7 "Tu surusuruan ni parlagutan na di Piladelpia, songon on ma suratkon: On ma barita sian Na Badia jana Na Tigor i. I ma sitiop kunci ni si Daud; muda dibuka Ia, nada adong sahalak pe na tarbaen manutupsa, jana muda ditutup Ia nada tarbuka sanga ise be i. 3:8 Huboto do sanga aha na nibaenmunu. Haru so sadia pe gogomunu, tapi laing dioloi hamu do pangajaranKu jana unduk do hamu tu Au. Madung Hubuka sada pintu na godang di hamu na so tartutup sanga ise pe. 3:9 Ligi ma! Huboan ma tu hamu angka halak sian punguan ni Sibolis, angka na manggoari dirina halak Jahudi, hape nada tutu nian, pargabus do halahi. Baenonku ma halahi marsinggang di jolo ni patmu, jana botoon ni halahi ma na holong do rohangKu mida hamu. 3:10 Hara ni na dung nioloanmunu parentangKu anso sobar hamu, Au pe jagohononKu ma hamu anso laing horas torkis hamu mamolus hasusaan na giot masa tu sude portibi on. I ma na giot tarjadi laho manguji sasude jolma na satano on. 3:11 Ligi ma! Tibu do Au ro! Tiop ma na adong di ho, anso ulang adong na mambuat tukumi. 3:12 Sanga ise na monang, baenonKu ma gabe songon tiang partunggul di bagas na badia inganan ni DebatangKu, jana nada morot-morot be ia sian inganan i. SuratkononKu ma tu halahi sandiri goar ni DebatangKu dohot goar ni kota ni DebatangKu -- i ma Jerusalem na imbaru na giot mijur sian banua ginjang. Laing suratkononKu ma dohot goarKu na imbaru tu diri ni halahi. 3:13 Ditangihon na marpinggol i ma na nidok ni Tondi i tu angka parlagutan i!" 3:14 "Tu surusuruan ni parlagutan na di Laodikea songon on ma surat on! On ma barita sian si Amen, Saksi na setia jana na bonar i, mula ni sude na nitompa ni Debata. 3:15 Huboto do sanga aha na dung dibaen hamu; nada ngali hamu jana nada milas. Sugari sura ngali ma ho nian; sanga na milas. 3:16 Tapi na danggol danggol sisilon do hamu; milas dohonon nada, ngali pe nada. I ma dalanna umbaen na giot utahononKu hamu sian pamanganKu. 3:17 Didok hamu, 'Madung mamora hami jana tuk sude; sada pe nada adong be na hurangnami.' Hape umpe diboto hamu sanga songon dia dangolmunu dohot parkancitanmunu! Na pogos do hamu, marsaemara jana na mapitung. 3:18 Jadi Hupaingot ma hamu anso tobusi hamu ma sian Au sere, i ma sere na polin, anso tutu hamu gabe mamora. Laing dohot ma pakean na bontar tobusi hamu sian Au anso marpakean hamu, ulang diida halak be hamu di pangalahomunu na marsaemara jana na pailahon i. Jana tobusi hamu muse ma ubat ni matamunu i anso marnida hamu. 3:19 Sanga ise halak na Huhaholongi, i do na Humuruhi dohot na Husambok. Hara ni i, angkon marsitutu ma hamu jana pauba hamu ma rohamunu. 3:20 Ligi ma! Jongjong do Au di jolo ni pintu manektek. Muda adong halak na umbege sorangKi, gabe dibuka ia pintu i, masuk ma Au mandapotkon ia; mangan ma Au rap dohot ia jana ia rap dohot Au. 3:21 Di na monang i ma lehenonKu anso juguk ia rap dohot Au di habangsangKi, laing songon Au na monang jana na juguk rap dohot Damang di habangsaNia i. 3:22 Ditangihon na marpinggol i ma na nidok ni Tondi i tu angka parlagutan i!"
4:1 Dung salpu i, huligi ma, mungkap do sada pintu di banua ginjang, jana mangkuling ma sora na dung hubege mangkatai dohot au di mulana i, songon sora ni sarune, ninna ma, "Manaek ma ho tuson jana patidahononKu ma tu ho sanga aha na giot tulus dung salpu on." 4:2 Manigor digohi Tondi Parbadia ma au. Huida ma di banua ginjang i sada habangsa. Adong do halak na juguk di habangsa i. 4:3 Marsinondang do bohi ni na juguk i, songon intan Jaspis dohot Sardes idaon. Adong muse do halibutongan humaliang habangsa i songon zamrud. 4:4 Adong ma dua pulu opat habangsa na asing martingko mangkaliangi habangsa i. Juguk ma disi dua pulu opat angka pangituai marpakean na bontar, jana martuku sere. 4:5 Mangaronggur ma habangsa i jana marsinondang songon sinondang ni hilap na marnyala-nyala. Jana adong muse do pitu lampu na gara di jolo ni habangsa i; i ma Tondi Parbadia na pitu i. 4:6 Jana laing adong muse dope di jolo ni habangsa i tarsongon laut sorminan, lan songon kristal. Adong muse do opat mahluk humaliang habangsa na di tonga-tonga i, na marmata sian jolo dohot sian pudi. 4:7 Songon singa do idaon tompa ni mahluk na parjolo i. Na paduahon, songon anak ni lombu. Na patoluhon i, songon bohi ni jolma do idaon. Na paopatkon i, songon halihi na habang do idaon. 4:8 Mahluk na opat i, onom be habongna jana sap sudena dohot mata. Nada mantak mahluk na opat i marende arian na borngin, "Na badia, na badia, na badia do Tuhan Debata Parkuaso Na Sumurung i; na adong, na dung adong, jana na giot ro!" 4:9 Diendehon mahluk siopat-opat i ma angka logu ni ende na pasangapkon jana na marmulia dohot na mandok tarimakasi tu na juguk di habangsa i, i ma na mangolu i salolot-lolotna. Jana di na marende i angka mahluk i, 4:10 manungkap ma pangituai na dua pulu opat i di jolo ni na juguk di habangsa i, marsomba tuSia na mangolu i salolot-lolotna. Dung i dipayakkon halahi ma tuku ni halahi i tu jolo ni habangsa i jana ninna halahi ma, 4:11 "Ale Tuhan, jana Debatanami, na tama do Ho manjagit puji-pujian, hasangapan, dohot kuaso, angke ditompa Ho do sandok jana markite-hite rohaMu do adong sudena i jana nitompa."
5:1 Dung i huida ma di siamun ni na juguk di ginjang ni habangsa i sada pustaha na marsurat di bagasan dohot di luar, jana na nicap dohot pitu cap. 5:2 Dung i huida ma sada surusuruan na gogo, marsurak-surak gogo sorana, ning ia ma, "Ise ma he na patut mambuka cap on laho mangungkap buku on?" 5:3 Hape nada adong sahalak pe na sanggup mangungkap karotes na nibalun i laho mangaligi tu bagasanna, bope na di banua ginjang bope na di tano dohot na di toru ni tano *DI TORU NI TANO: Inganan ni halak na mate.* dope. 5:4 Gabe tangis ma au panguncombopon hara ni na so adong halak na sanggup mangungkap balunan ni karotes i jana mangaligi tu bagasanna. 5:5 Dung i adong ma sahalak sian angka pangituai i na mandok tu au, "Ulang ho tangis! Ligi ma! Madung monang singa na sian horong ni si Juda i, i ma pomparan ni si Daud. Tama do Ia mambuka cap na pitu i dohot mangungkap gulungan ni buku i." 5:6 Dung i huida ma sada Anak Ni Biri-biri jongjong di tonga-tonga ni habangsa i, dihaliangi mahluk na mangolu siopat-opat i dohot sude angka pangituai i. Songon na dung hona sambol do idaon Anak Ni Biri-biri i. Pitu tandukna jana pitu dohot matana: i ma tondi na pitu na sian Debata na nisuruNa tu sude portibi on. 5:7 Dung i ro ma Anak Ni Biri-biri i tu jolo jana dibuat Ia ma buku na nibalun i sian tangan siamun ni na juguk di habangsa i. 5:8 Jadi taran songon i dope, manungkap ma mahluk na opat i dohot pangituai sidua pulu opat halak i di joloNia. Marsitiop hasapina do pangituai na dua pulu opat halak i dohot mangkuk sere na marisi hamonyan, i ma angka tangiang ni halak na badia. 5:9 Dung i diendehon halahi ma sada logu na imbaru: "Hum Ho sajo do na patut mambuat buku on dohot mambuka angka capna i. Angke madung hona bunu Ho, jana hara ni hamamateMi madung ditobus Ho jolma tu Debata sian sandok marga, hata, negara, dohot bangso. 5:10 Madung dibaen Ho halahi gabe sada bangso pinompar ni raja, anso laing gabe malim muse ma halahi na mangoloi Debatanta, jana mamarenta di ginjang ni tano on." 5:11 Dung i manaili ma au mangulahi. Hubege ma sora ni surusuruan na marribu-ribu dohot na marjuta-juta bahatna! Jongjong ma halahi humaliang habangsa i dohot humaliang mahluk siopat-opat i dohot angka pangituai i. 5:12 Dung i digogoi halahi ma sora ni halahi marende, "Anak Ni Biri-biri na dung nisambol i, Ia do na markuaso; na mora na bisuk jana na gogo; na patut nipasangap, nipagodang jana nipuji-puji!" 5:13 Dung i hubege ma sasude mahluk na di langit, na di tano dohot na di bagasan laut -- pendekna sudena mahluk na adong di portibi on -- mangendehon, "Na juguk di habangsa i dohot Anak Ni Biri-biri i na tarpuji dohot sipasangapon jana na godang bope na markuaso salolot-lolotna!" 5:14 Dung i mangalusi ma mahluk siopat-opat i, "Amen" ning halahi. Jana manungkap ma angka pangituai i laho marsomba.
6:1 Dung i huida ma dibuka Anak Ni Biri-biri i cap na parjolo sian angka cap na pitu i. Dung i hubege ma sada sian mahluk na opat i mandok, "Ro ma ho!" ning ia. Songon sora ni ronggur noma begeon sorana i. 6:2 Jadi hupamanat ma, gabe huida ma sada kudo na bontar. Ditiop na manengget kudo i do sada sior jana dilehen ma tusia sada tuku. Ruar ma ia songon sada halak parmonang, na maju laho mambuat hamonangan i. 6:3 Dung i dibuka Anak Ni Biri-biri i ma cap na paduahon jana hubege ma didok mahluk na paduahon i, "Ro ma ho!" ning ia. 6:4 Dung i ruar ma sada nari kudo na asing. Na rara sun do tompa ni kudo i. Dilehen ma kuaso tu na manengget kudo i laho mangagohon hadameon sian portibi on, anso marsimatean jolma i na sada tu na asing. Dilehen muse ma tusia sada podang na godang. 6:5 Dung i dibuka Anak Ni Biri-biri i ma cap na patoluhon. Jana hubege ma mahluk na mangolu na patoluhon i mandok, "Ro ma ho!" ning ia. Hupamanat ma, gabe huida ma sada kudo na lomlom. Ditiop na manengget i ma sada timbangan di tangannia. 6:6 Jadi hubege ma tarsongon sora na pio-pio sian tonga-tonga ni mahluk siopat-opat i. Ninna sora i ma, "Satuhul eme argana sabahat ni upa sadari jana tolu tuhul jaung pe argana tong sabahat ni upa sadari. Tapi ulang nisego-sego angka miak dohot anggur!" 6:7 Dung i dibuka Anak Ni Biri-biri i ma cap na paopatkon. Jana hubege ma didok mahluk na mangolu na paopatkon i, "Ro ma ho!" ning ia. 6:8 Hupamanat ma, gabe haidaan ma sada kudo na langan tompana, Hamatean do goar ni na manengget i. Dipaihut-ihut Harajaan Hamatean ma ia donok sian pudi. Dipasahat ma saparopat ni tano on tu kuaso ni halahi, anso tarbaen halahi mamunu markite-hite porang, hamamasa ni haleon, markite-hite nyae dohot markite-hite angka binatang panyoro na di tano on. 6:9 Dung i dibuka Anak Ni Biri-biri i ma cap na palimahon. Dung i huida ma di toru ni meja parhaulan i, adong angka tondi ni angka halak na mate hona bunu hara ni haporsayaan ni halahi tu jamita na sian Debata dohot hara ni haburjuon ni halahi pararatkon jamita i. 6:10 Jana pio-pio ma halahi marsora na gogo ninna ma, "Ale Tuhan, na badia jana na sintong! Sadia honok nari dope anso diuhumi, jana dibaloskon Ho mudarnami tu angka na maringanan di tano on?" 6:11 Dung i dilehen ma tu halahi sada be baju juba na bontar. Dung i disuru ma halahi maradian santongkin nari, painte gok bilangan ni angka aleale ni halahi saparjuangan dohot angka dongan ni halahi na hona bunu songon halahi. 6:12 Dung i huida ma dibuka Anak Ni Biri-biri i cap na paonomkon. Ro ma lalo na gogo situtu. Mangalomlom ma mataniari songon goni jana bulan pe gabe rara ma songon mudar. 6:13 Mangkadabu ma angka bintang sian langit an tu tano on songon parrurus ni batu ni gala-gala na so matobang dope sian bonana na nihutur ni alogo na gogo. 6:14 Mago ma langit i songon karotes na nibalun jana marmorotan ma angka dolok dohot pulo sian ingananna hian. 6:15 Dung i martabuni be ma angka raja na di tano on, angka halak na godang, angka panglima ni angka parporang, angka halak na marsinadongan dohot angka na markuaso dohot angka halak na asing i, bope hatoban dohot na mardeka marmasuhan ma tu bagasan angka liang dohot tu holang-kolang ni angka batu na di dolok. 6:16 Marsurak ma halahi tu angka dolok i dohot tu angka batu i, "Dondoni ma hami! Linggomi ma hami anso ulang hami ida bohi ni na juguk di habangsa i jana ulang hona muruk hami dibaen Anak Ni Biri-biri i! 6:17 Dibaen madung ro ari haririmas ni halahi, ise ma he na tarbaen manaon i lakna? Jana umpe adong sahalak na tarbaen manahan di jolo ni halahi!"
7:1 Dung i huida ma opat surusuruan jongjong di suhi-suhi na opat ni tano on manahan angin na opat i di tano on anso ulang mangombus di darat, di laut sanga tu bona ni hayu aha pe. 7:2 Dung i huida ma sahalak surusuruan na asing ruar muse sian Habincaran. Dioban ia do sada cap sian Debata na mangolu i. Gogo ma sora ni surusuruan i mamiohon surusuruan na opat i na manjagit kuaso sian Debata laho manyegohon darat dohot laut i. 7:3 Didok surusuruan na sada i ma, "Ulang jolo segohon hamu darat i sanga laut i, sanga hayu-hayu i sapanjang so hami lehen tanda cap di bohi ni angka naposo ni Debatanta." 7:4 Jadi hubege do bilangan ni angka na ni cap i, 144.000 halak sian sude marga ni halak Israel i 7:5 sian ganop marga dibuat ma 12.000 halak. I ma sian marga-marga: Juda, Ruben, Gat, 7:6 Aser, Naftali, Manase, 7:7 Simeon, Levi, Isakar, 7:8 Zebulon, Josep, Benyamin. 7:9 Dung i manaili muse dope au, gabe huida ma jolma na marlagut na lobi bahatna -- sahalak pe nada adong tarbaensa mangetong i! I ma angka jolma sian ganop bangso, marga, negara dohot bahasa. Mamake baju juba na bontar ma halahi, maniop mare-mare di tanganna be, jongjong ma halahi sude adop habangsa i dohot adop Anak Ni Biri-biri i. 7:10 Marsora na gogo ma halahi pio-pio, "Haluaan ma di Debatanami na juguk di habangsa i, dohot di Anak Ni Biri-biri i!" 7:11 Jadi jongjong ma angka surusuruan i humaliang habangsa i dohot humaliang angka pangituai i dohot humaliang mahluk na opat i. Manungkap ma angka surusuruan i di jolo ni habangsa i manyomba Debata. 7:12 Pio-pio ma halahi, "Amen! Puji-pujian dohot hasangapan, dohot habisuhon dohot hatarimakasion dohot hagogoon ma di Debatanta salolot ni lolotna! Amen!" 7:13 Ro ma sahalak sian pangituai i manyapai tu au, "Ise do angka halak na mamake baju juba na bontar on jana sian dia dehe halahi ro?" 7:14 Jadi hualusi ma, "Tuanku, ho do na umbotosa." Dung i didok ia ma tu au, "Halak on ma angka na malua sian hasusaan na godang i. Madung dibasu halahi baju juba ni halahi jana bontar dibaen mudar ni Anak Ni Biri-biri i. 7:15 I ma umbaen na tola halahi jongjong di adopan ni habangsa ni Debata jana mangoloi Ia arian na borngin di bagasan Bagas Na Badia. Jana rap ma Ia na juguk di habangsa i dohot halahi laho mangondihon halahi. 7:16 Nada be male halahi sanga manguas; nada taonon ni halahi mataniari sanga las ni ari, 7:17 angke Anak Ni Biri-biri na di tonga-tonga ni habangsa i noma na marmahani halahi. ToguonNia ma halahi tu mual ni aek haroroan ni hangoluan. Jana apusan ni Debata ma sude ilu-ilu sian mata ni halahi."
8:1 Di na niungkap ni Anak Ni Biri-biri i cap na papituhon i, gabe mamolngit ma banua ginjang i hira-hira satonga jom. 8:2 Dung i huida ma dilehen pitu sarune tu surusuruan na pitu na jongjong i di jolo ni Debata. 8:3 Ro ma sada surusuruan na asing na maroban pardupaan sere, jongjong di jolo ni meja inganan ni haul i. Madung dilehen tusia bahat sajo hamonyan sibaenon tu angka tangiang ni sudena halak na badia jana sihaulkonon di meja parhaulan na adong ni jolo ni habangsa i. 8:4 Rap dohot angka tangiang ni halak na badia, martimbual ma timus ni hamonyan na nitutung i manaek sian tangan ni surusuruan i tu adopan ni Debata. 8:5 Dung i dibuat surusuruan i ma pardupaan i jana dibaen ia ma banggar na gara tusi sian meja parkaulan i, didanggurkon ia ma i tu tano on. Mangkuling ma ronggur, ro ma hilap na sumiksak jana ro ma lalo. 8:6 Dung i markobas ma surusuruan na pitu i na maniop sarune i laho mamalu sarune i. 8:7 Diombus surusuruan na parjolo i ma sarunenia gabe songon na niduruskon ma pardoras ni udan es dohot udan api na marcampur mudar tu portibi on. Abis ma mosok sapartolu ni portibi on; songon i muse sapartolu sian angka hayu-hayu dohot duhut-duhut na rata. 8:8 Dung i diombus surusuruan na paduahon i ma sarunenia gabe adong ma na lobi godang tarsongon dolok na gara idaon madabu tu laut. Muba ma sapartolu laut i gabe mudar, 8:9 jana mate ma sapartolu sian sude angka na nitompa di bagasan laut; laing abis muse ma sapartolu sian sude kapal. 8:10 Dung i diombus surusuruan na patoluhon i ma sarunenia, gabe madabu ma sian langit sada bintang na godang na gara songon palito, didondoni ia ma sapartolu sian angka batang aek dohot angka mual ni aek. 8:11 ("Si Paet" do goar ni bintang i.) Gabe paet ma sapartolu aek i, jana gabe mate ma bahat halak hara ni na manginum aek na muba i gabe paet. 8:12 Dung i diombus surusuruan na paopatkon i ma sarunenia. Gabe hona ma sapartolu mataniari i, sapartolu bulan dohot sapartolu sian angka bintang gabe mago ma sapartolu gogo ni sinondang ni halahi. Laing songon i muse sapartolu sian arian dohot sapartolu sian borngin gabe manggolap situtu. 8:13 Dung i hupamanat ma, gabe huida ma sada unggas rajawali na habang di ginjang an. Dung i mangkuling ma unggas i, "Marjaya! Marjaya! Marjaya ma sudena halak na di tano on muda tarbege surusuruan na tolu nari i mangombus sarunenia i sanoli on!"
9:1 Dung i diombus surusuruan na palimahon i ma sarunenia, jana huida ma sada bintang madabu sian langit tu portibi on. Dilehen do di bintang i kunci ni rura hamatean. *RURA HAMATEAN: Inganan na dao ditoru ni tano on, disi ma dihurung angka tondi na jahat lopus tu ari panguhuman na parpudi.* 9:2 Gabe diungkap bintang i ma rura ni hamatean i, gabe ruar ma sian bagasan songon timus ni purunan na godang. Gabe manggolap ma awang-awang i dohot mataniari dibaen timus na sian rura i. 9:3 Gabe marroan ma angka siapor sian timus i mijur tu portibi on. Dilehen do tu halahi kuaso songon kuaso ni angka hala. 9:4 Diantahi do halahi manyegohon duhut-duhut sanga hayu sanga suan-suanan na asing pe. Hum angka jolma na so martanda cap na sian Debata di bohina i sajo do na tola serangon ni halahi. 9:5 Nada dipatola angka siapor i mamatehon angka jolma i, hum na mamparkanciti halahi do dipatola lima bulan honokna. Songon hancit ni na nidoit ni hala do hancit ni parkancitan na nibaen ni angka siapor i. 9:6 Anggo na lima bulan i maradu mate ma nian giot ni jolma i, hape nada tarbaen halahi mate; por roha ni halahi nian anso mate, hape dao do hamatean i sian halahi. 9:7 Songon dia ma kudo na giot tu porang idaon angka siapor i. Di angka uluna i adong ma idaon songon tuku na sian sere. Songon bohi ni jolma do idaon tompana. 9:8 Obukna pe songon obuk ni dadaboru jana iponna i songon ipon ni singa. 9:9 Andorana i martutup do idaon songon baju bosi. Sora ni habongna i songon sora ni kareta kudo na bahat na topet mangaroro hatiha marporang. 9:10 Adong do lailaina dohot corotna songon hala. Jana di lailaina i do hagogoon ni halahi laho mamparkanciti jolma i di bagasan na lima bulan i. 9:11 Adong do rajana na mamarenta halahi, jana rajana i ma na martanggung jawab taringot tu rura hamatean i. Si Abadon ma goarna di hata Ibrani; jana hata Junani didok Apolion (astuanna "Panyego-nyego"). 9:12 Madung salpu hamamago na parjolo i. Dung i adong dope dua nari hamamago na giot ro. 9:13 Dung i diombus surusuruan na paonomkon ma sarunenia. Gabe hubege ma sada sora na ruar sian na opat tanduk ni parkaulan sere di adopan ni Debata. 9:14 Mangkuling ma sora i tu surusuruan paonomkon na maniop sarune i, "Palua ma surusuruan na opat i na hona tambat di Batang aek Efrat i!" 9:15 Dipalua ma surusuruan na opat i. Madung dihobasi hian halahi laho mamunu sapartolu sian sude jolma manusia di jom, ari, bulan dohot taon na dung ditontuhon i hian. 9:16 Dipaboa do tu au, anggo bahat ni angka parangan na markudo i adong do dua ratus juta bahatna. 9:17 Jana di boa-boa na nilehenna i tu au, huida do angka kudo i dohot angka halak na manenggetsa. Mamake baju bosi na rara sun, na rata langit dohot na gorsing songon barerang do angka na manengget kudo i. Songon ulu ni singa do ulu ni angka kudo i jana ruar do api, timus dohot barerang sian pamanganna i. 9:18 Hona bunu ma sapartolu sian jolma dibaen parmaraan na tolu i; i ma api, timus dohot barerang na ruar sian pamangan ni angka kudo i. 9:19 Di pamangan ni angka kudo i do hagogoan ni halahi dohot di lailaina i. Songon ulok do angka lailaina i, adong do ulu ni halahi jana marhite ulu i ma diparkanciti halahi angka jolma i. 9:20 Hape laing so ra dope jolma na so hona bunu i pauba rohana sian sasude na nibaen ni halahi sandiri. Laing na so mantak do halahi marsomba tu angka begu dohot tu angka gana-ganaan sere, perak, tumbaga, batu dohot hayu na so marnida sanga marbinege, sanga pe mardalan. 9:21 Laing so muba dope roha ni halahi sian na mamunu jolma, na padalankon hadatuon, sian markarosuan dohot sian na manangko.
10:1 Dung i huida ma sahalak surusuruan na asing mijur sian banua ginjang. Na gogo sun do surusuruan i. Dibalut ombun do ia jana halibutongan di ginjang ni ulunia. Songon mataniari do bohina i jana patna i songon tiang api. 10:2 Adong ma di tanganna i sada balunan buku na menek na ungkap. Patnia siamun i mandege laut, jana patnia siambirang i mandege darat. 10:3 Jadi marsurak ma ia sagogona songon singa na marngaur. Dung marsurak ia, mangkuling ma pitu ronggur na manghutur. 10:4 Disi mangkuling ronggur na pitu i, giot suratkononku ma nian, hape hubege ma manigor sada sora sian banua ginjang na mandok, "Angkon rahasiahononmu do sanga aha na nidok ni ronggur na pitu i; ulang suratkon i!" 10:5 Dung i surusuruan na huida mandegehon patna tu laut dohot tu darat i, diangkat ia ma tangannia siamun tu langit. 10:6 Marsumpa ma ia mangasahon goar ni Debata na mangolu i salolot-lolotna, na manompa langit, tano dohot laut bope sasudena na adong di langit, di tano dohot na di laut i. Didok surusuruan i ma, "Nada palambaton be hatihana! 10:7 Tapi di na niombus ni surusuruan papituhon i sarunenia, patuluson ni Debata ma sangkaNia i na so nipabotohon dope, hombar tu boa-boaNia tu angka naposoNia, i ma angka panurirang." 10:8 Dung i mangkobari muse ma mangulahi tu au sora na dung mangkobari i tu au sian banua ginjang i. Ning ia ma, "Kehe ma ho mambuat balunan ni buku na talak i na di tangan ni surusuruan na mandege laut dohot darat i." 10:9 Jadi kehe ma au mandapotkon surusuruan i jana hupangido ma anso dilehen ia balunan ni buku na menek i tu au. Didok ia ma tu au, "Jomput jana pangan ma on. Gabe paet ma i di bagasan butuhamu, tapi anggo di pamanganmu tonggi do songon aer ni loba." 10:10 Hubuat ma balunan na menek i sian tangannia jana hupangan. Songon tonggi ni aer ni loba ma antong daina anggo di pamanganniba, hape dung hubondut, gabe paet ma dung di butuhangku. 10:11 Dung i ning ia ma tu au, "Angkon mangulahi do ho manyurirangi tu bahat marga, dohot bangso, dohot bahasa dohot angka raja."
11:1 Dung i dilehen ma di au sada bulu suhat-suhat tarsongon tungkot, jadi diparentahon ma, "Kehe ma ho mangukur Bagas Na Badia ni Debata dohot meja inganan parkaulan i. Etong ma sanga sadia bahat halak na maribadat di bagasan. 11:2 Tapi anggo alamanna i ulang pola suhat, angke anggo alaman ni Bagas Na Badia i madung dipasahat i tu angka jolma na so mananda Tuhan. Lonca-loncaon ni halahi ma Kota Na Badia i opat pulu dua bulan honokna. 11:3 SuruhononKu ma dua halak sangsingKu anso manyurirangi jana marpakean arsak ni roha, salolot saribu dua ratus onompulu ari." 11:4 Anggo saksi na dua i, i ma duakambona hayu zetun dohot dua parlampuan na adong di jolo ni Tuhan ni sude na nitompa on. 11:5 Muda adong halak na mancubo-cubo mambaen na jahat tu halahi, gabe ruar ma api sian pamangan ni halahi laho mangaluntak angka musu ni halahi i. Jadi songon i ma dalanna gabe tarbunu sude sanga ise na giot mambaen susa tu halahi. 11:6 Markuaso do halahi manutup langit anso ulang ro udan salolot manyurirangi halahi. Laing markuaso do halahi di angka mual ni aek laho mambaen aekna i gabe mudar. Jana laing markuaso muse do halahi mangalibas tano on markite-hite angka ragam ni bala, sanga na andigan giot ni halahi. 11:7 Dung sidung dipaboa halahi jamita ni halahi i, ro ma binatang na ruar sian rura hamatean i mangalo halahi. Taluhononnia ma halahi jana bunuonnia. 11:8 Jana payak ma bangke ni halahi di dalan godang na di kota na godang i, mangihutkon partondion digoar do i kota Sodom dohot Mesir, jana disi do Tuhan diparsilangkon halahi. 11:9 Paligi-ligion ni halak ma sude, sian ganop marga, ganop bangso, ganop bahasa dohot negara bangke ni halahi tolu satonga ari honokna jana nada dipatola tanomon angka bangke i. 11:10 Marjop ni roha ma halak na mangingani tano on hara ni parmate ni saksi na dua halak i. Marpesta ma halahi jana marsitongosan silua, angke madung bahat hasusaan na ro tu jolma manusia dibaen panurirang sidua halak i. 11:11 Dung tolu satonga ari, ro ma hosa hangoluan sian Debata jana masuk tu bagasan panurirang sidua halak i. Halahi pe jongjong ma, jadi gabe mabiar ma sudena halak na marnida halahi. 11:12 Dung i dibege panurirang sidua halak i ma sora na gogo mamio halahi sian banua ginjang, "Beta ma, manaek ma tuson!" ninna. Laing di jolo ni mata ni angka musu ni halahi i, manaek ma halahi tu banua ginjang, dibalut ombun i. 11:13 Jadi ro ma lalo na gogo hatiha i di tano on. Maronco ma saparsampulu ni kota i jana mate ma dibunu lalo i pitu ribu halak. Angka halak na asing i na so mate dibunu lalo i, gabe mabiar situtu ma; jadi gabe dipuji halahi ma hagodangan ni Debata di banua ginjang i. 11:14 Madung salpu parmaraan na paduahon. Tapi ligi ma! Manigor ro dope santongkin nari parmaraan na patoluhon. 11:15 Dung i diombus surusuruan papituhon i ma sarunenia, gabe adong ma sora na gogo situtu di banua ginjang na marsurahi mandok, "Anggo kuaso laho mamarenta portibi on saonnari madung di bagasan tangan ni Tuhanta dohot Kristus na nijanjihon i. Mamarenta noma Ia salolot-lolotna!" 11:16 Angka pamimpin sidua pulu opat halak na juguk di habangsa ni halahi na di jolo ni Debata i pe, manungkap ma jana marsomba tu Debata. 11:17 Ninna halahi ma, "Debata Na Markuaso do Tuhan, mandok tarimakasi do hami tu Ho, ale Tuhan Debata Parkuaso Na Sumurung, na adong dohot na dung adong, dibaen madung dipake Ho kuasoMu na godang i, jana madung dipungka Ho pamarentaanMu. 11:18 Madung muruk do angka bangso, tapi madung ro haririmasMu, dohot hatiha anso ni uhum halak na mate i. Dung i anso dilehen Ho upa di angka naposoMu, i ma angka panurirang, di angka na badia dohot angka na manghabiari goarMu, angka na menek dohot na magodang, jana segohononMu ma angka na manyego-nyego tano on." 11:19 Gabe marbuka ma Bagas Na Badia ni Debata di banua ginjang jana tarida ma poti inganan ni surat parjanjian na di bagasan Bagas Na Badia i. Manigor ro ma hilap na sumiksak dohot sora ni ronggur na mangkutur jana na matuoror. Ro ma lalo jana madabu ma ambolas na lobi por.
12:1 Jadi tarida ma di langit hahomangan godang jana na luar biasa. Adong ma sahalak dadaboru na mamake mataniari songon pakeanna, dohot bulan di toru ni patnia. Adong ma di ulunia i sada tuku na nibaen sian dua bolas bintang. 12:2 Hatiha denggan ma topet pamatang ni anak boru i, jadi hara ni na dung giot dapot hatihana laho sorang anaknia gabe mangangguhi ma ia hara ni hancitna. 12:3 Dung i tarida muse ma tanda na asing di langit. Adong ma sada ulok naga na rara na lobi godang, pitu uluna jana sampulu tandukna. Jana pitu tuku di ginjang ni uluna. 12:4 Disarat ia ma dohot lailainia i sapartolu sian angka bintang na di langit i, disampakkon ia ma i tu tano on. Jongjong ma naga i di jolo ni anak boru na giot manubuhon dakdanakNa i anso manigor dipolgak ia Dakdanak i disi sorang. 12:5 Dung i di sorangkon ia ma sada Dakdanak halaklahi, i ma na giot mamarenta angka bangso sudena dohot tungkot bosi. Tapi dirampas ma Dakdanak i sian anak boru i, dioban ma tu Debata dohot tu jolo ni habangsaNa. 12:6 Gabe marlojong ma dadaboru i tu parhorsihan, i ma inganan na nipasingkop ni Debata disia. Di inganan i noma ia dipauli 1260 ari honokna. 12:7 Dung i masa ma parporangan di banua ginjang. Marporang ma si Mikael rap dohot angka surusuruannia mangalo naga i. Jana naga i pe antong mangalo ma rap dohot angka surusuruannia. 12:8 Tapi ditaluhon do naga i. Nada dipatola be ia dohot angka surusuruannia i maringanan di banua ginjang. 12:9 Diambungkon ma naga i tu ruar! I ma ulok na tobang i na margoar Sibolis sanga Setan, na paoto-otohon sude portibi on. Diambungkon ma ia tu tano on rap dohot sude surusuruannia i. 12:10 Dung i hubege ma sada sora na gogo sian banua ginjang na mandok, "Saonnari madung ro hatiha haluaan dohot kuaso dohot pamarentaon ni Debatanta, dohot hakuasoonNia na nimiahanNia. Harana madung di danggurkon tu toru angka na mangaduhon angka donganta i, na mangaduhon halahi arian dohot borngin di adopan ni Debatanta. 12:11 Madung ditaluhon angka donganta i ia dohot mudar ni Anak Ni Biri-biri i bope dohot hasaksian ni halahi. Angke nada dihaholongi halahi hosa ni halahi lopus tu hamatean. 12:12 Hara ni i, angkon marjop ni roha godang ma banua ginjang dohot sudena na maringanan disi! Tapi marjaya ma anggo tano dohot laut, dibaen madung mijur tu ho Sibolis di hagigilap ni rimasna, harana madung diboto ia santongkin nari noma hatihania." 12:13 Di na tarboto tu naga i na dung dibuang ia tu tano on, diompot ia ma mangkojar dadaboru na baru manubuhon Dakdanak i. 12:14 Hape madung dilehen di dadaboru i dua habong ni rajawali na godang situtu anso tarbaen ia habang tu inganannia di parhorsihan jana anso malua ia sian serangan ni naga i. Di parhorsihan i ma ia dipauli-uli sada hatiha, dua hatiha, dohot satonga hatiha. 12:15 Gabe dibursikkon naga i ma aek na bahatan sian pamangannia tu dadaboru i laho mangayupsa. 12:16 Tapi diurupi tano on ma ia; diungkap tano i ma babana jana diincop ia ma aek na ruar sian baba ni naga i. 12:17 Mur gilap ma naga i tu dadaboru i, gabe kehe ma ia mangaroro na asing pinompar ni dadaboru i, i ma sasude halak na marmomosi tona ni Debata dohot angka na maniop hasaksian ni Jesus Kristus. 12:18 Dung i jongjong ma naga i *DUNG I JONGJONG MA NAGA I: Dipiga-piga-piga naskah narobi didok: Dung i jongjong ma au.* di topi ni laut.
13:1 Dung i huida ma sada binatang ruar sian laut. Adong do sampulu tandukna jana pitu uluna. Adong muse ma tuku sada be di uluna i jana tarsurat ma di uluna i sude sada goar pangincahion. 13:2 Tarsongon babiat do rupa ni binatang i, patna songon pat ni gompul jana babana i songon baba ni singa. Dung i dilehen naga na huida parjolo i ma tu binatang i gogona sandiri, dohot habangsa dohot kuasonia na godang i. 13:3 Sada sian uluna na pitu i songon na jungada do banga bugangna idaon, tapi madung malum bugangna i. Diihutkon portibi on ma sude binatang i mardongan pangkilalaan na homang-komang. 13:4 Jana disomba halahi ma naga i hara ni na dung nilehennia i kuasonia tu binatang i. Laing dohot muse do binatang i disomba halahi. Didok halahi ma, "Ise dehe na sarupa songon binatang i? Ise dehe na tarbaen mamorangi ia?" 13:5 Dipatola do binatang i pajojorkon angka ginjang ni rohana dohot pangincahion. Dipatola do ia mamarenta opat pulu dua bulan honokna. 13:6 Dung i diungkap ia ma pamangannia mangincahi Debata, bope mangincahi goarNia dohot bandar parmiananNia dohot angka na maringanan di banua ginjang. 13:7 Dipatola muse do ia mangalo tu halak na badia bope manaluhon halahi. Jana dipasahat do tusia mangkuasoi sude marga, negara, bahasa dohot bangso. 13:8 Sombaon ni sude jolma na mangolu di ginjang tano on ma binatang i, i ma angka halak na so tarsurat goarna di buku hangoluan ni Anak Ni Biri-biri na dung disambol i, mamungka sian panompaon ni portibi on. 13:9 Barang ise na marpinggol, ditangihon ia ma! 13:10 "Sanga ise na angkon hurungon, angkon laing hurungkonon do. Jana sanga ise na mamunu dohot podang, pasti bunuon dohot podang. Hara ni i ma da umbaen na angkon sobar jana setia tongtong anggo halak na badia." 13:11 Dung i huida ma sada binatang ro sian darat. Dua tandukna songon tanduk ni Anak Ni Biri-biri. Sorana songon sora ni naga. 13:12 Dipake ia do kuaso na godang sian binatang na parjolo i. Dipaksa ia ma portibi on dohot sudena na maringanan disi anso marsomba tu binatang na parjolo i, i ma na dung malum i bugangna na banga i. 13:13 Dibaen ia ma angka tanda hahomangan na godang. Dibaen ia ma mijur api sian langit tu tano di jolo ni sudena jolma. 13:14 Dipatola do ia mambaen angka hahomangan; jana dipaoto-oto ia do sude jolma na mangolu di tano on hara ni angka hahomangan na nibaennia i di jolo ni binatang na parjolo i. Jana disuru ia ma halahi sudena pajongjong sada patung laho mamparsangapi binatang na mabugang dibaen podang i, hape laing mangolu. 13:15 Dipatola do binatang i mangombuskon hosa hangoluan tu bagasan patung i, anso gabe malo mangkobari patung i dohot mamunu sudena halak na so ra marsomba tusia. 13:16 Dipaksa binatang i ma sudena halak, na menek sanga na magodang, na mora sanga na pogos, hatoban sanga na mardeka anso manjagit tanda di tangan siamun ni halahi dohot di bohi ni halahi. 13:17 Sahalak pe nada tarbaen manobusi sanga manggadis bagi aha anggo nada adong disia tanda i, i ma goar ni binatang i sandiri sanga nomor ni goarnia. 13:18 Anggo dison porlu ma adong bisuk. Sanga ise na marbisuk, taretong ia ma arti ni bilangan ni binatang i, harana goar ni sada jolma do bilangan i. Anggo bilanganna i 666 do.
14:1 Dung i hupamanat ma, jadi tarida ma Anak Ni Biri-biri i jongjong di Dolok Sion. Adong do 144.000 halak na rap dohot Ia, tarsurat do di bohi ni halahi sude goar ni Anak Ni Biri-biri i dohot goar ni AmangNia. 14:2 Jadi hubege ma sada sora na mardorom sian langit songon sora ni sampuran na godang dohot songon sora ni ronggur na godang na matuoror. Habegean ma sora i songon sora ni musik sian angka parhasapi na topet mamiltik hasapina. 14:3 Di jolo ni habangsa i dohot mahluk na opat i dohot di angka pamimpin na humaliang habangsa i diendehon angka halak si 144.000 i ma sada ende na imbaru. Nada tarparsiajari sanga ise pe ende i asing sian halak na 144.000 i. Angka halak na nipalua do halahi sian tano on. 14:4 Angka halak na manjagohon dirina do halahi, jana nada dipahodar halahi diri ni halahi markite-hite dadaboru; ias do halahi songon bujing-bujing. Dipaihut-ihut halahi do Anak Ni Biri-biri i sanga na tudia Ia kehe. Sian sudena jolma manusia, halahi ma na dung nipalua anso haulkononkon songon patumonaan ni haul tu Debata dohot tu Anak Ni Biri-biri i. 14:5 Nada jungada halahi margabus; jana nada adong saotik pe tihas ni halahi. 14:6 Dung i huida ma sada surusuruan na asing habang gincat di langit. Dioban surusuruan i do barita taringot tu Jamita Na Denggan na manongtong i sipalaluon tu jolma na di tano on; i ma tu sude bangso, marga, bahasa dohot negara. 14:7 Marsurak ma surusuruan i gogo sajo, "Habiari ma Debata jana puji ma hagodanganNia! Angke madung dapot hatihana dabuhonon ni Debata uhuman tu jolma. Somba hamu ma na manjadihon langit, tano, laut dohot angka mual ni aek i!" 14:8 Ihut ma surusuruan na paduahon tu surusuruan na parjolo i jana marsurak ma ia, "Madung madabu ia! Ma madabu kota Babel na godang i! Madung gabe mabuk sude bangso dibaen ia rap dohot aek ni anggur -- i ma anggur na ro sian hagiotnia na jorngang i!" 14:9 Ro ma surusuruan na patoluhon ihut tu surusuruan na dua i marsurak ma ia gogo, ning ia ma, "Sanga ise na manyomba binatang i dohot patungna i dohot halak na maruli tanda ni binatang i di bohina dohot di tanganna, 14:10 painumon ma tu halahi anggur na badia, i ma anggur haririmasNia na niusehonNia tu ingananna, na so niurahan saotik pe! Hona parkancitan ma halahi di bagasan api dohot barerang di jolo ni angka surusuruan ni Debata dohot di jolo ni Anak Ni Biri-biri i. 14:11 Martimbual ma timus ni api parkancitan ni angka jolma i salolot-lolotna. Nada marnamantak be hona parkancitan halahi arian dohot borngin, i ma angka halak na manyomba binatang i dohot patungna i, dohot sasudena halak na maruli tanda goar ni binatang i." 14:12 Na porlu dison i ma hasobaran ni angka halak na badia, jana na mangihutkon parenta ni Debata dohot marhaporsayaan tu Jesus. 14:13 Dung i hubege ma sada sora sian banua ginjang mandok, "Suratkon ma on: Martua do sanga ise halak na mate di bagasan Tuhan mamungka sian hatiha on!" "Na tutu ma i!" ning Tondi i. "Maradian ma halahi sian karejo na dokdok jana daion ni halahi ma suha ni pangoloion ni halahi na sai tongtong mangihut di halahi." 14:14 Dung i huparrohahon ma, gabe huida ma ombun na bontar. Juguk ma di ombun i songon Anak Ni Jolma do idaon rupaNa. Adong do di uluNa i sada tuku sere jana di tanganNa i sada sasabi na tajom. 14:15 Dung i ruar ma sahalak surusuruan na asing sian Bagas Na Badia. Digogoi ia ma sorania marsurak tu na juguk di ginjang ni ombun i, "Paruar ma sasabiMi jana sabi ma saonnari, harana madung dapot hatihana sabion; madung tarsabi tano on!" 14:16 Manigor ro ma na juguk di ginjang ni ombun i maroban sasabiNa tu tano i, gabe dipungka ma sabion di tano i. 14:17 Dung i huida muse ma sahalak nari surusuruan na asing ruar sian Bagas Na Badia di banua ginjang. Ia pe laing maniop sasabi na tajom do. 14:18 Dung salpu i, ro muse ma sian parkaulan i sahalak surusuruan na asing, sirajai api. Gogo ma sorania marsurak tu surusuruan na maniop sasabi na tajom i, "Paruar ma sasabi jana horoti ma angka batu ni anggur na di bagasan kobun anggur na di tano i, harana madung malamun angka batuna i!" 14:19 Jadi dipadalan ia ma manigor sasabinia i tu tano i jana disabi ia ma angka batu ni anggur i sian bonana, dipamasuk ia ma i tu panggilingan ni anggur haririmas ni Debata na marsigorgor i. 14:20 Di balian ni kota do digiling angka anggur i jana mardalan ma mudar na doras sian panggilingan i tolu ratus kilometer daona jana dua meter bagasna.
15:1 Dung i huida ma di langit sada tanda hahomangan jana na godang situtu. Adong ma pitu surusuruan dohot pitu mara, bala na parpudi. On ma na parpudi situtu dipalalu Debata haririmasNia. 15:2 Dung i huida ma tarsongon laut kaco na marcampur api idaon. Huida muse ma angka halak na dung monang mangalo binatang i dohot patung i dohot angka na monang mangalo halak na martanda nomor goarna. Jongjong ma angka halak na monang i di topi ni laut kaco i marsitiop hasapi na nilehen ni Debata tu halahi. 15:3 Jana diendehon halahi ma ende ni si Musa, naposo ni Debata i dohot ende ni Anak Ni Biri-biri i. Songon on ma ende ni halahi i, "Na godang jana hahomangan do angka pambaenanMu ale Tuhan, Debata Parkuaso Na Sumurung. Na tigor jana na sintong do sude dalanMu, ale Raja ni sude bangso. *BANGSO: Dipiga-piga-piga naskah narobi didok: Jaman.* 15:4 Ise dope he na so mabiar mida Ho, Tuhan, jana ise dope he na so ra pasangapkon goarMu? Hum Ho sajo do na badia. Marroan ma angka bangso sudena manyomba Ho dibaen madung diida sasude halak angka panguhumanMu na tigor i." 15:5 Dung i huida ma marbuka Bagas Na Badia -- bandar hasaksian -- di banua ginjang. 15:6 Manigor ruar ma pitu surusuruan -- i ma na mangurus mara na pitu i -- sian bagasan Bagas Na Badia i. Sian abit linen do pakean ni halahi, ias jana marnyirlak-nyirlak. Jana adong do panutup ni andora ni halahi na nibaen sian sere. 15:7 Dung i ro ma sada sian mahluk na opat i mangalehen tu surusuruan na pitu i, pitu sambong sere na bubung marisi haririmas ni Debata, -- Debata na mangolu i salolot-lolotna. 15:8 Jadi gok ma antong Bagas Na Badia i dohot timus sian hasangapan dohot sian hara ni kuasoNia. Jana salolot so sidung dope mara na pitu i dibaen surusuruan na pitu i, sahalak pe nada dipatola masuk tu bagasan Bagas Na Badia i.
16:1 Dung i hubege ma sada sora na gogo sian Bagas Na Badia i. Didok sora i ma tu surusuruan na pitu i, "Kehe ma hamu, duruskon hamu ma haririmas ni Debata isi ni sambong na pitu i tu tano!" 16:2 Kehe ma manigor surusuruan na parjolo jana diduruskon ia ma isi ni sambongnia i tu tano. Gabe baro-baroon ma sudena sanga ise halak na maruli tanda ni binatang i dohot halak na manyomba patungna i. 16:3 Dung i ro ma surusuruan na paduahon, diduruskon ia ma isi ni sambongnia i tu laut. Gabe songon mudar ni jolma na mate ma aek laut i, marmatean ma sanga aha na mangolu di bagasan laut i. 16:4 Dung i ro ma surusuruan na patoluhon mangusehon isi ni sambongnia tu angka batang aek dohot tu angka mual, gabe mudar ma sude aekna i. 16:5 Hubege ma surusuruan na mangarajai aek mandok, "Na tigor do Ho, na adong saonnari, jana na adong hian, jana na badia do Ho, na dung mandabuhon uhuman on. 16:6 Dibaen madung diusehon halahi mudar ni angka halak na badia dohot angka panurirang i. Madung dilehen Ho mudar gabe inumon ni halahi tama do na songon i di halahi!" 16:7 Hubege ma sada sora sian inganan parkaulan i. Didok sora i ma, "Sintong jana tigor do sudena haputusan na nibaenMi, ale Tuhan Debata Parkuaso Na Sumurung." 16:8 Dung i diduruskon surusuruan na paopatkon i ma isi ni sambongnia tu mataniari, jana dilehen ma kuaso disia manutung jolma i markite-hite api. 16:9 Mosok ma jolma hara ni sun ni milasna i, gabe diburai halahi ma Debata na mangarajai angka mara i. Haru songon i pe, laing nada ra halahi pauba rohana sian angka dosa ni halahi jana nada ra halahi mamuji hasangapan ni Debata. 16:10 Dung i diusehon surusuruan na palimahon i ma isi ni sambongnia i tu habangsa ni binatang i. Gabe manggolap ma sudena harajaan ni binatang i, gabe disarbut halahi ma dilana hara ni na hancitan. 16:11 Diburai halahi ma Debata na di banua ginjang hara ni na hancitan dohot hara ni na baro-baroon i halahi. Hape laing nada ra halahi pauba rohana sian angka pambaenan ni halahi. 16:12 Dung i diduruskon surusuruan na paonomkon i ma isi ni sambongnia i tu Batang aek Efrat na godang i. Gabe mahiang ma batang aek i, lopus tardalani angka raja na sian Habincaran. 16:13 Dung i huida ma haruar sian pamangan ni naga i dohot sian binatang i dohot sian pamangan ni panurirang pargabus i tolu tondi na roncam na marrupahon tohuk. 16:14 Angka i ma tondi ni setan na mambaen angka tanda hahomangan. Kehe ma tondi na tolu i mandapotkon angka raja na satano on jana dipalagut ma halahi sudena laho marporang di ari na godang ni Debata Parkuaso Na Sumurung i. 16:15 "Ligi ma! Ro ma Au songon parro ni panangko! Martua do sanga ise na tongtong jonggor jana na manjagohon pakeanna, anso ulang salang-salang ia mardalan, jana anso ulang tarida hailaannia!" 16:16 Dung i dipalagut tondi na tolu i ma angka raja i tu inganan na nigoaran di hata Ibrani, Armagedon. 16:17 Dung i diduruskon surusuruan na papituhon i ma isi ni sambongnia i tu awang-awang. Jadi tarbege ma sada sora na gogo sian habangsa na di bagasan Bagas Na Badia i. Ninna sora i ma, "Madung tulus i!" 16:18 Jadi ro ma hilap na sumiksak dohot sora ni ronggur na mangkutur, jana mangalalo ma tano i gogo sajo. Na so unjung dope masa lalo na songon i mamungka sian panompaon ni jolma. On dope lalo na gumogo! 16:19 Dung i mabola ma kota na godang i gabe tolu bagian; jana marrumpahan ma angka kota ni halak na so mananda Debata. Jadi gabe taringot ma Debata tu kota Babel na godang i, giot lehenon ma tusia panginuman na gok anggur haririmas dohot hamumurukNia. 16:20 Marmagoan ma angka pulo dohot angka dolok pe limpot ma. 16:21 Mardabuan ma udan es na boratna lima-lima pulu kilogram, sian langit mandondoni jolma, jana diburai jolma i ma Debata hara ni parmaraan udan es i, angke na godang situtu do parmaraan i.
17:1 Dung i ro ma sada sian surusuruan na pitu i na maniop sambong na pitu i, mangkobari dohot au ninna ma, "Beta, anso hupatidahon tu ho sanga na bia baenon manguhumi panggampang godang i, na juguk di ginjang ni aek na bahat. 17:2 Na markamainan do angka raja ni portibi on dohot panggampang godang i jana gabe mabuk do halak na mangingani tano on hara ni na minum anggur ni panggampang i." 17:3 Di bagasan Tondi dioban ia ma au tu parhorsihan. Huida ma disi sahalak dadaboru na juguk manengget sada binatang na rara songon hasumba. Gok dohot goar pangincahion. Pitu ulu ni binatang i jana sampulu tandukna. 17:4 Marbaju na ungu do dadaboru i dohot na rara tobang jana na nipambaeni dohot angka sere, simata dohot berlian. Adong do di tanganna i sada sambong sere bubung dohot angka pangalaho hagigian jana na hodar, na sian parkarosuanonna i. 17:5 Tarsurat do di bohina i sada goar rahasia. Anggo goar i, i ma "Babel Na Godang i, ina ni sandok panggampang dohot angka parbuatan na so ture di portibi on." 17:6 Jadi huida ma mabuk dadaboru i dibaen mudar ni angka na badia dohot sian mudar ni angka saksi ni Jesus. Dung huida dadaboru i, gabe homang-komang ma au. 17:7 Jadi didok surusuruan i ma tu au, "Biasi homang-komang ho? Hupaboa pe tu ho rahasia ni anak boru i dohot rahasia ni binatang na nitenggetnia i, i ma binatang na marulu pitu jana na martanduk sampulu i. 17:8 Anggo binatang na dung niidami madung adong do i, tapi nada adong, na giot manaek ma ia sian rura hamatean anso kehe ma ia tu hamagoan. Jadi homang ma roha ni angka na maringanan di tano on, i ma angka na so tarsurat goarna di buku hangoluan sian mula-mula ni hasiangan on, muda diida halahi binatang i na dung adong, tapi nada adong, jana na giot ro muse. 17:9 Na porlu dison i ma bisuk dohot pangastuion: Ulu na pitu i, i ma pitu dolok, i ma na nijuguhan ni dadaboru i. 17:10 Tardok muse pitu raja do i. Lima madung madabu, na sada madung adong, na sada nari nada adong dope; tapi muda dung ro ia, satongkin do i tola tinggal. 17:11 Jana binatang na jungada i mangolu tapi na so adong i be saonnari, ia sandiri do raja na pasalapankon jana bope songon i sada sian na pitu i kehe ma tu hamagoan i. 17:12 Tanduk na sampulu na niidami, i ma sampulu raja na so mamungka dope mamarenta. Tapi lehenon do kuaso tu halahi anso mamarenta halahi songon raja rap dohot binatang i sajom lolotna. 17:13 Sarupa do tujuan ni raja na sampulu halak on; rap na giot pasahatkon gogona dohot kuasona do halahi tu binatang i. 17:14 Na giot marporang do halahi mangalo Anak Ni Biri-biri i. Tapi taluhonon ni Anak Ni Biri-biri i ma halahi, angke Ia do Tuhan ni angka tuan jana Raja ni angka raja. Dung i monang ma na rap dohot Ia, i ma angka na nipiohon dohot na nipili dohot na setia." 17:15 Dung i didok ia ma tu au, "Sude aek i, na niidamu juguhan ni panggampang i, i ma angka bangso dohot halak na bahat, angka marga dohot bahasa. 17:16 Tanduk na sampulu na niidami dohot binatang i, margoyak ni roha ma mida panggampang i. Baenon ni halahi ma ia lungun-lungunan jana salang-salang. Panganon ni halahi ma sibukna jana pangabison ni halahi ma ia dohot api. 17:17 Angke na dung digorakkon Debata do roha ni halahi laho patuluskon sangkap ni Debata. Dibaen Debata ma halahi satahi laho pasahatkon kuaso ni halahi tu binatang i, anso binatang i noma torus mamarenta lopus tarjadi sude na nidok ni Debata. 17:18 Dadaboru na niidami, i ma kota na godang i, na mamarenta angka raja di portibi on."
18:1 Dung salpu i, huida ma sada surusuruan na asing mijur sian banua ginjang. Na godang do kuasonia jana gabe torang ma tano on sudena hara ni sahalania. 18:2 Marsora na gogo ma ia marsurak, "Madung madabu dadaboru i! Madung madabu Babel Na Godang i! Gabe inganan ni tondi na jahat dohot partabunian ni angka tondi na hodar noma i saonnari. Angka unggas na hodar jana na nihagigihon ni halak noma na mangolu di bagasan. 18:3 Madung diinum sasude bangso anggur sian hagiotnia na rorang i. Mambaen harorangon do angka raja dohot ia jana gabe maradong be ma angka saudagar na satano on hara ni hagiotna na so tarordahon i." 18:4 Jadi hubege ma sada sora na asing sian banua ginjang mandok, "Ruar ma hamu angka bangsongKu! Ruar ma hamu sian bagasan! Ulang ihutkon hamu angka dosana i, jana ulang dohot hamu mananggung uhumanna i! 18:5 Angke martamba-tamba do dosania sungkot ro di langit, jana dipaingot-ingot Debata do angka dosana i. 18:6 Baen hamu ma tusia balos ni na nibaennia i tu hamu; dua noli lompit baloskon hamu sandok na nibaennia. Isi hamu ma mangkukna i dohot siinumon na dua noli lompit korasna sian siinumon na niparade di hamu. 18:7 Lehen hamu ma tusia parkancitan dohot pardangolan sabahat ni hasangapan dohot sinadongan na dung dirasoinia. Harana didok ia do di bagasan rohania, 'Au do ratu na mamarenta! Nada na mabalu au, nada daionku hamarsahan!' 18:8 Hara ni na songon i ma gabe angkon hona bala ia tompu di sada ari -- nyae, hamarsahan dohot tangkuraparon. Tutungon ma ia tu api angke na sun do kuaso ni Tuhan Debata i na mangadili ia." 18:9 Jadi ditangisi jana diandungi angka raja ni tano on ma ia, i ma angka na markarosuan jana na marharorangan rap dohot ia, muda diida halahi timus ni panutunganna i. 18:10 Jana jongjong ma halahi sian na dao hara ni biar ni roha di parkancitan i, jana didok halahi ma, "Marjaya; marjaya ma kota na godang i -- kota Babel na gogo! Di bagasan sajom do ro panguhumanmu!" 18:11 Angka saudagar na satano on pe tangis jana marsiluluton ma hara ni dadaboru i angke nada adong be hum sahalak pe na manobusi angka barang jagalan ni halahi i. 18:12 Angka barang-barang sere dohot perak, dohot batu intan dohot simata dohot abit na alus dohot abit ungu dohot surto dohot abit hasumba dohot ragam-ragam ni hayu na huskus dohot ragam-ragam ni panjamaan sian gading dohot rupa-rupa ni parkokas sian hayu na arga dohot sian tumbaga, sian bosi, dohot pualam, 18:13 hulim, parmasak, pulungan ni ubat-ubat, mur *MUR: Gota na dung hiang sian sajenis hayu.* dohot hamonyan; anggur dohot miak, topung dohot gandum; lombu dohot biri-biri, kudo dohot kareta, angka hatoban dohot jolma. 18:14 Jana didokkon halahi ma, "Madung mago angka parbatu na ni hagioti ni rohamu, jana sude sinadonganmu dohot hatongamonmu, madung mago sian ho, jana nada dapot ho be i sanga andigan." 18:15 Jongjong sian na dao ma angka saudagar na dung mamora hara ni na marjagal di kota i, angke mabiar do halahi hona parkancitan ni kota i. Tangis ma halahi jana marsiluluton, 18:16 Jana didokkon halahi ma, "Marjaya, marjaya ma kota na godang i, na marpakean linen na alus, dohot abit ungu dohot abit na rara, na nitabur dohot sere dohot batu intan dohot simata! 18:17 Di bagasan sajom do nipasego hamoraan na sai godang i!" Sude juaromudi ni kapal, angka pasisir dohot angka na karejo di kapal dohot sudena halak na mangomo sian laut, jongjong ma sian na dao, 18:18 jana marsurak dung diida halahi timus na marbual-bual sian api na manyurbu kota i. Didok halahi, "Nada adong jungada kota na asing songon kota na godang on!" 18:19 Dung i disampakkon halahi ma abuan tu ulu ni halahi di na pio-pio, tangis jana mangandungi halahi, ninna halahi ma, "Marjaya, marjaya ma kota na godang i, angke markite-hite sinadongannia gabe mamora sude angka nampuna kapal di laut! Di bagasan sajom do ia abis!" 18:20 Marjop ni roha ma hara ni ia, ale banua ginjang, dohot hamu halak na badia, angka rasul dohot angka panurirang, harana madung diuhumi Debata ia hara ni pambaenannia maradopkon hamu! 18:21 Dung salpu i, ro ma sada surusuruan na gogo, diangkat ia ma sada batu -- sagodang ni batu panggilingan -- diambungkon ia ma i tu laut jana didok ia ma, "Songon on ma gogona baenon mangambungkon kota Babel na tarbonggal i lopus nada dapot be mangulahi. 18:22 Nada habegean be sian ho sora ni musik ni parhasapi, dohot angka parende, sian parsuling dohot sian pangombus sarune! Sahalak pe nada dapot be halak na malo disi jana sora ni batu panggilingan pe nada adong be habegean. 18:23 Dung i nada be manyondangi sinondang ni palito di bagasan ho, nada tarbege be sora ni bayo pangoli, bagi sora ni boru na nioli di bagasan ho, dibaen angka halak na godang do na jolo angka parjagalmi, jana markite-hite hadatuonmu madung lilu sude bangso." 18:24 Jana di bagasanna adong do mudar ni angka panurirang dohot angka halak na badia dohot mudar ni sude halak na nibunu di tano on.
19:1 Dung i hubege ma sora na gogo sian halak na ribur, na marsurahi sian banua ginjang, mandok, "Haleluya! Haluaan dohot hasangapan dohot hagogoan ma di Debatanta. 19:2 Dibaen na sintong jana na tigor do angka uhumNia, angke diuhumi Ia do panggampang godang i, na manyegohon tano on markite-hite panggampangonnia i, jana Ia do na mambaloskon mudar ni angka naposoNia tu panggampang i." 19:3 Dung i didok halahi ma na padua nolihon, "Haleluya! Olo, martimbual ma timusna salolot ni lolotna." 19:4 Jadi gabe manungkap ma pamimpin sidua pulu opat halak i dohot mahluk siopat-opat na humaliang habangsa i jana marsomba ma halahi tu Debata na juguk di habangsa i. Ninna halahi ma, "Amen! Haleluya!" 19:5 Jadi tarbege ma sian habangsa i hata na mandok, "Puji ma Debatanta, ale hamu angka naposoNia, hamu angka na mabiar mida Ia, bope na menek, bope na magodang!" 19:6 Dung i hubege do songon sora ni jolma na bahat situtu; songon sora ni aek na godang dohot songon sora ni ronggur na gogo na mandok, "Haleluya! Harana Tuhan Debatanta Parkuaso Na Sumurung i madung gabe Raja. 19:7 Beta ma marjop ni roha hita jana marmoga-moga; jana tapasangap ma Ia! Angke madung dapot arina marbagas Anak Ni Biri-biri i jana boru i pe madung singkop na giot marbagas i. 19:8 Madung dilehen abit linen na alus na marnyala na bontar jana na ias di angka halak na badia." 19:9 Dung i didok ia ma tu au, "Suratkon ma on: 'Martua do sanga ise halak na dung niontang tu pesta parbagason ni Anak Ni Biri-biri i.' " Dung i didok surusuruan i muse dope tambana, "On ma angka hata na sintong na sian Debata." 19:10 Tungkap ma au di jolo ni surusuruan i giot marsomba tusia, tapi ning ia ma mandok tu au, "Ulang! Ulang pola marsomba ho tu au, Debata ma somba! Harana au pe laing naposo do songon ho jana sarupa dohot angka donganmu na marhasaksian taringot tu Jesus." Somba ma Debata, angke anggo hasaksian taringot tu Jesus, i ma tondi hasurirangon. 19:11 Dung i huida ma mungkap banua ginjang, haruar ma sada kudo na bontar, jana na juguk di ginjangna i margoar, "Na Setia dohot Na Sintong," jana markite-hite hatigoran do Ia manguhumi dohot marporang. 19:12 Songon jilam ni api do mataNa jana bahat do tuku dipake Ia di uluNia i. Adong do sada goar na niuhir di diriNia; jana hum Ia sajo do na umboto astuan ni goar i. 19:13 Jana niabitan do Ia dohot abit na nironjomkon tu bagasan mudar, jana nidok ma goarNia, "Hata ni Debata." 19:14 Diihutkon angka parangan na sian banua ginjang ma Ia, rap markudo na bontar jana marpakean linen na bontar saksak. 19:15 Ruar ma sian pamanganNia i sada podang na tajom, jana podang i ma baenonNia manaluhon angka bangso jana parentaonNia ma halahi dohot tungkot bosi. PoroonNia ma anggur di panggilingan ni anggur haririmas ni Debata Parkuaso Na Sumurung i. 19:16 Tarsurat do di baju jubaNia dohot di hae-haeNia i goar on, "Raja ni sasude raja jana Tuan ni sude tuan." 19:17 Dung i huida ma sahalak surusuruan jongjong di ginjang ni mataniari. Marsurak ma ia gogo tu sude unggas na habang di awang-awang, "Beta ma marlagut anso tatopot pesta godang na nipatupa ni Debata! 19:18 Pangan hamu ma juhut ni angka raja, juhut ni angka panglima dohot juhut ni angka na gogo, juhut ni na manengget kudo dohot juhut ni angka kudona i dohot juhut ni sude jolma manusia na menek bope na magodang, hatoban sanga na mardeka!" 19:19 Dung i huida ma binatang i, dohot angka raja ni tano on bope parangan ni halahi marlagut laho marporang mangalo na Manengget kudo na bontar i dohot paranganNia. 19:20 Gabe tartangkup ma binatang i rap dohot panurirang pargabus na pabaen-baen angka tanda hahomangan di jolo ni binatang i. (Angka tanda hahomangan i do dibaen binatang i paoto-otohon angka jolma na mamake tanda ni binatang i dohot angka jolma na manyomba patung ni binatang i.) Jadi didanggurkon ma binatang i dohot panurirang pargabus i mangolu-ngolu tu bagasan laut api na gara-gara dohot barerang. 19:21 Jana hona bunu ma angka na asing na tinggal dope dibaen podang na ruar sian pamangan ni na Manengget kudo na bontar i. Jadi marroan ma angka unggas, dipapangani ma juhut ni halahi na hona bunu i.
20:1 Dung i huida ma sahalak surusuruan mijur sian banua ginjang. Ditangannia tiop dibaen ia kunci ni rura hamatean dohot sada rante na godang. 20:2 Dung i ditangkup ia ma naga, ulok na tobang i -- i ma Sibolis dohot Setan i -- jana dirante ia ma i saribu taon honokna. 20:3 Dung i diambungkon surusuruan i ma naga i tu rura hamatean, dikunci ia ma rura i jana dicap ia anso ulang tarbaen naga i be paoto-otohon angka bangso salolot so abis na saribu taon i. Dung salpu i, paluaon dope ia santongkin. 20:4 Dung i huida ma angka habangsa dohot angka halak na juguk di habangsa i; dilehen ma kuaso tu halahi laho mandabu uhuman. Huida muse dope angka tondi ni halak na hona ponggol uluna hara ni hasaksian taringot tu Jesus dohot hara ni hata ni Debata. Halak on ma na so jungada ra manyomba binatang i bope patungna i. Tanda ni binatang i pe nada jungada dijagit halahi di bohi sanga pe di tangan ni halahi. Gabe mangolu ma halahi mangulahi jana mamarenta ma halahi songon raja rap dohot Kristus di na saribu taon i. 20:5 On ma na parjolo dipangolu mangulahi angka halak na mate. (Tapi angka halak na mate na asing i nada dipangolu anggo di na saribu taon i.) 20:6 Martua jana na badia do, na taruli di hangongot na parjolo i. Nada markuaso be hamatean na paduahon i tu halahi. Gabe angka malim ni Debata ma halahi dohot malim ni Kristus; jana mamarenta ma halahi rap dohot Ia saribu taon honokna. 20:7 Dung salpu hatiha sisaribu taon i, paluaon ma Sibolis i sian hurunganna i, 20:8 jana kehe ma i giot paoto-otohon angka bangso na marserak di sude portibi on, i ma si Gog dohot si Magog. Nada taretong sanga na sadia bahat ni halahi na giot palaguton ni Sibolis i laho marporang. 20:9 Jadi manangkok ma halahi tu portibi on marsitopot dalanna, dihobuk halahi ma parbandaran ni angka halak na badia dohot kota na nihaholongan ni Debata. Hape mijur ma api sian langit mangabisi halahi. 20:10 Dung i didanggurkon ma Sibolis na paoto-otohon halahi i tu bagasan api na marcampur dohot barerang. Disi do inganan ni binatang i dohot panurirang pargabus na nibuang najolo i. Diparkanciti ma halahi disi arian na borngin nada marnamantak ro di salolot-lolotna. 20:11 Dung i huida ma sada habangsa na godang, jana na bontar. Huida muse do Ia na juguk di habangsa i. Mago ma langit dohot tano sian joloNia lopus nada haidaan. 20:12 Jana huida ma angka halak na mate, na menek dohot na magodang rap jongjong di jolo ni habangsa i. Dibuka ma dohot angka buku, dung i dibuka muse ma sada buku na asing, i ma buku hangoluan. Jana di hatiha i ma didabu uhuman tu angka halak na dung mate, satongtang tu pambaenan ni halahi di hatiha na salpu marguru tu na tarsurat di bagasan angka buku i. 20:13 Dung i dilehen laut i ma angka halak na mate na adong di bagasanna, bope hamatean i, bope harajaan banua toru mangalehen angka halak na mate na adong di bagasanna, jana diuhumi ma halahi hombar tu pambaenanna be. 20:14 Dung i didanggurkon ma hamatean dohot harajaan banua toru i tu bagasan laut api. (Laut api on ma hamatean na paduahon.) 20:15 Sanga ise halak na so adong goarna tarsurat di bagasan buku hangoluan i, diambungkon ma tu bagasan laut api i.
21:1 Jadi huida ma sada langit na imbaru dohot tano na imbaru. Mago ma langit na parjolo dohot tano na parjolo i jana laut pe, mago ma. 21:2 Gabe huida ma Kota Na Badia i, i ma Jerusalem na imbaru, na mijur sian banua ginjang sian Debata. Madung jolo nihobasan kota i songon boru na giot marbagas laho mandapotkon halaklahina. 21:3 Dung i hubege ma sada sora na gogo sian habangsa i mandok, "Ligi ma, bandar ni Debata adong di tonga-tonga ni jolma, jana maringanan ma Ia di tonga-tonga ni halahi. Gabe Ia noma Debata ni halahi, jana halahi ma gabe bangsoNia. 21:4 ApusanNia ma sasude ilu sian mata ni halahi. Nada adong be anggo hamatean; hamarsahan, partangisan sanga parkancitan pe nada adong be. Madung salpu angka pangalaho na honok i." 21:5 Didok na juguk na di ginjang ni habangsa i ma, "Ligi ma, Hupaimbaru do sasudena!" Jana mangkuling ma Ia muse, "Suratkon ma, angke na tutu jana na sintong do sude hata on." 21:6 Dung i didok Ia ma tu au, "Sasudena i madung tarjadi, Au do Na Parjolo dohot Na Parpudi, Bonana dohot Ujungna. Halak na manguas Hulehen do minum sian mual hangoluan i. 21:7 Sanga ise halak na monang, jagitonnia ma sudena on sian Au. Au ma gabe Debatana jana ia ma gabe anakKu. 21:8 Tapi anggo angka parbiar, angka na so tontu, angka na so ture, sibunu jolma, angka na rogon, angka pardatu-datu, angka na manyomba gana-ganaan dohot sudena pargabus, laut api do inganan ni halahi dohot barerang na gara-gara, i ma hamatean na paduahon i." 21:9 Ro ma tu au sahalak sian surusuruan na pitu i na maniop angka sambong na bubung marisi bala na parpudi i, ning ia ma tu au, "Beta anso hupatidahon tu ho dadaboru ni Anak Ni Biribiri i, i ma boru sipabagason i." 21:10 Jadi digohi Tondi Parbadia ma au, jana dioban surusuruan i ma au tu puncut ni dolok na lobi gincat. Dipatidahon ia ma tu au Jerusalem, Kota Na Badia i. Na mijur do huta i sian banua ginjang, sian Debata 21:11 mardongan hasangapan dohot hagodangan ni Debata. Marsilo-silo do kota i idaon songon batu simata na umjeges, songon batu simata jaspis ias songon kristal. 21:12 Godang jana gincat do tiangna i, marhorbangan dua bolas jana dijagoi dua bolas halak surusuruan. Tarsurat do di angka pintu ni horbangan i goar ni marga ni halak Israel na dua bolas i. 21:13 Tolu pintu horbangan na mangadop tu ganop arah; tolu adop Habincaran, tolu adop Selatan, tolu adop Utara jana tolu sabola Hasundutan. 21:14 Di ginjang ni dua bolas batu ojahan do dipajongjong tembok ni kota i. Tarsurat do angka goar ni rasul ni Anak Ni Biri-biri i, i ma sidua bolas halak i di angka batu ojahan i. 21:15 Adong do di tangan ni surusuruan donganku mangkobari i sada tungkot sere baen suhat-suhat laho mangukur kota i, marsuhat horbanganna dohot tembokna i. 21:16 Maropat suhi do kota i -- sarupa ginjangna dohot bidangna. Jadi disuhat surusuruan i ma kota i dohot tungkot parsuhat i; dapot ma ginjangna 2415 kilometer; bidangna dohot gincatna sarupa tu ginjangna i. 21:17 Dompak na marsuhat tembokna i surusuruan i, dapot ma gincatna *GINCAT: Sanga: Hapal.* 60 meter. Suhat-suhat ni jolma do na nipake ni surusuruan i. 21:18 Sian batu intan jaspis do dibaen tembok ni kota i, jana kota i sandiri sian sere na polin do dibaen, lan songon sormin na tiur. 21:19 Di angka batu ojahan ni kota i dipambaeni do sude rupa-rupa ni batu intan. Batu ojahan na parjolo dibaen do sian batu intan jaspis, na paduahon sian batu nilam, patoluhon sian batu jakut, paopatkon sian batu zamrud, 21:20 palimahon sian batu intan sardonik, paonomkon sian batu intan sardes, na papituhon sian batu intan krisolit, pasalapankon sian batu beril, pasambilankon sian batu intan topas, pasampuluhon sian batu intan krisopras, pasabolaskon sian batu intan hiasin, na padua bolaskon sian batu intan ametis. 21:21 Mutiara do horbangan na dua bolas i, ganop pintu sada mutiara ma i. Dalan godang na di kota i, sian sere na polin do dibaen, lan songon kaco na ias. 21:22 Nada huida Bagas Na Badia di bagasan kota i, angke Tuhan Debata Parkuaso Na Sumurung i sandiri do Bagas Na Badia, songon i muse Anak Ni Biri-biri i. 21:23 Nada pola porlu sondangan ni mataniari sanga bulan kota i, angke sinondang ni Debata do manyondangisa jana Anak Ni Biri-biri i ma lampuna. 21:24 Jadi mardalani di sinondang i noma angka bangso, jana angka raja na ditano on marsiboan hamoraonna ma tuSia. 21:25 Jana angka pintu horbangan ni kota i nada ditutup be arian, harana nada adong be disi borngin. 21:26 Obanon ma sude hasangapan dohot hamoraon ni angka bangso tu bagasan kota i. 21:27 Tapi sanga ise halak na mangkarejohon angka pangalaho sihailahononkon, dohot angka pargabus, nada dipatola masuk tu bagasan -- pendekna sandok na hodar, nada tola dioban masuk tu bagasan. Anggo na dipatola masuk tu bagasan, hum angka halak na tarsurat do goarna di bagasan buku hangoluan ni Anak Ni Biri-biri i.
22:1 Dipatidahon surusuruan i muse dope tu au batang aek na lan sajo songon kristal jana mangalehen ngolu do aekna i. Sian habangsa ni Debata do mardalan batang aek i dohot sian Anak Ni Biri-biri i, 22:2 torus ma i tu angka dalan godang na di kota i. Ditopi ni batang aek i paipar-ipar adong ma bona ni hayu haroroan ni hangoluan, na marbatu ganop taon dua bolas noli, i ma sanoli sabulan. Bulungna i, dibaen do laho pamalumkon angka bangso. 22:3 Jadi nada adong be disi na niburaan, angke habangsa ni Debata dohot Anak Ni Biri-biri i do di bagasan kota i, jana angka naposoNia mangoloi noma tuSia, 22:4 jana ligion ni halahi ma bohiNa i. Suratkonon ma goar ni Debata di bohi ni halahi. 22:5 Nada porlu be di halahi lampu sanga sinondang ni mataniari, angke nada adong be ro borngin disi boti hara ni na nisondangan ni Tuhan Debata do halahi. Gabe mamarenta ma halahi songon raja ro di salolot-lolotna. 22:6 Jadi didok surusuruan i ma tu au, "Tutu do sude pandohan on jana sihaposan, Tuhan Debata na mangalehen TondiNia tu angka panurirang i, i do na marsuru surusuruanNia laho patuduhon tu angka naposoNia sanga aha na angkon masa santongkin nari." 22:7 "Ligi ma! Tibu do au ro! Martua ma sanga ise halak na marmomos angka sipaingot sian hasurirangon na di bagasan buku on!" 22:8 Au si Johannes, madung hubege jana huida i sudena. Dung sidung hubege jana huida, tungkap ma au di jolo ni surusuruan na patidahon sasudena i tu au, giot marsomba ma nian au tusia, 22:9 hape ning ia ma tu au, "Ulang! Ulang ho marsomba tu au! Debata ma somba! Angke laing naposo muse do au sarupa dohot ho, dohot songon angka donganmu panurirang dohot sudena halak na marmomos angka hata na di bagasan buku on!" 22:10 Dung i ning ia ma mangulahi, "Ulang rahasiahon angka sipaingot na sian hasurirangon na di bagasan buku on, angke dapot ma hatihana anso tarjadi sudena on. 22:11 Barang ise na mambaen hageduhan, dipupu ia ma mambaen hageduhan i, jana barang ise na hodar dipahodar ia ma dirina; dung i barang ise na tigor roha, dipupu ia ma mambaen hatigoran, jana barang ise na badia, diparbadiai ia ma dirina." 22:12 "Ligi ma! Ro ma Au maroban upa laho mamaloskon tu ganop halak hombar tu pambaenanna. 22:13 Au do Alpa dohot Omega, Na Parjolo dohot Na Parpudi, Bonana dohot Ujungna." 22:14 Martua do sanga ise halak na paiaskon baju jubana lopus ias. Halahi do na tola mangankon batu ni hayu hangoluan dohot na tola mandalani masuk tu kota i sian harbanganna i. 22:15 Tapi sanga ise halak na mambaen habilean, angka na marhadatuon, angka halak na mambaen rorang, angka halak sibunu jolma, angka halak na marsomba gana-ganaan, dohot angka halak pargabus di hatana sanga markite-hite pambaenanna, di balian ni kota i do anggo inganan ni angka halak sisongon i. 22:16 "Au, Jesus, madung Hutongos surusuruanKu tu hamunu anso dipaboa ia taringot tu pangalaho on laho manyarihon angka parlagutan i. Pomparan ni si Daud do Au; Au ma bintang sidongdong na torang i." 22:17 Didok Tondi i dohot Boru Oroan i ma, "Beta ma!" Jana ganop halak na umbege on angkon laing dohot ma mandok, "Beta ma!" Sanga ise na manguas, ro ma ia! Jana sanga ise na marpor ni roha, dibuat ma aek na mangalehen hangoluan i so pola mangalehen bagi aha panggararna! 22:18 Ganop na umbege angka hata sian halumbaan na di bagasan buku on, au si Johannes hupaingotkon songon on: Sanga ise na manambai sanga aha tu angka hata na sian halumbaan on, tambaan ni Debata ma uhuman tu halakna i dohot angka bala na nigambarkon di bagasan buku on. 22:19 Jana sanga ise na mangurahi sanga aha sian angka sipaingot na sian halumbaan on, buaton ni Debata ma bagiannia sian hayu hangoluan dohot sian Kota Na Badia, songon na tarsurat di bagasan buku on. 22:20 Didok na manyaksihon sudena on do, "Olo, tibu ma Au ro!" Amen! Ro ma Ho, ale Tuhan Jesus! 22:21 Asi ni roha ni Tuhan Jesus ma na mandongani hamu sudena! Amen.