The New Testament of our Lord and Saviour Jesus Christ
1:1 Bagèen ngo tarombo Jesus Kristus pinempar si Daud. Mungkah bai si Abraham nai bagèen mo gerar-gerar ibas tarombo i: 1:2-6a si Abraham, si Isak si Jakob, si Juda bak kaka-anggina, si Peres bak si Zerah (inang kalak i mergerar si Tamar), si Hezron, si Ram, si Aminadab, si Nahason, si Salmon, si Boas (inangna imo si Rahab), si Obed (inangna imo si Rut), si Isai, dekket Raja Daud. 1:6b-11 Tikan si Daud nai soh mi tikki bangsa Israel ibuang mi Babel tersurat mo begèen: si Salomo (inangna imo sinibages si Uria), si Rehabeam, si Abia, si Asa, si Josafat, si Joram, si Usia, si Jotam, si Ahas, si Hizkia, si Manasye, si Amon, si Josia, si Jekhonya dekket dèdah-dèdahenna. 1:12-16 Mungkah tikan bangsa Israel nai ibuang soh mi tikki pertubuh Jesus tersurat ngo gerar-gerar tarombo idi bagèen: si Jekhonya, si Sealtiel, si Zerubabel, si Abihud, si Elyakim, si Azur, si Zadok, si Akhim, si Eliud, si Eleazar, si Matan, si Jakob, si Josep sinibalè si Maria. Janah si Maria mo menubuhken Jesus simergerarken Raja Sipaluah siniperbagah-bagah Dèbata. 1:17 Mulai bai si Abraham nai soh mi si Daud, sipuluh empat cundut, bai si Daud nai soh mi kalak Israel ibuang mi Babel, sipuluh empat cundut ma. Nai i sidi nai soh mi pertubuh Raja Sipaluah i, tong ma ngo sipuluh empat cundut. 1:18 Bagèen ngo tersèngèt pertubuh Jesus Kristus: Ukum inangNa si Maria, imo ranto si Josep. Tapi sinderrang makdèng jejap kalak idi, merkitè kuasa Tendi ni Dèbata, berrat-berrat rumah mo si Maria. 1:19 Ukum si Josep rantona i, sada kalak mengulaken bennar ngo. Jadi naing isangsangi mo rantona si Maria i, janah ulang pella ibettoh dèba asa ulang mèla si Maria idi, i jelma nterrem. 1:20 Tikan bagidi perukuren si Josep, datang mo nipina. Ibas nipina idi iidah mo sada kalak malaèkat, mendokken tabasa, "Alè Josep, pinempar si Daud, ulang kono mbiar jejap dekket si Maria, karna ukum anak sini dagingna (sinikandongenna) idi, bai Tendi Dèbata nai ngo idi. 1:21 Menubuhken sada anak mo ia, janah Jesus mo baing gerarna, kerna naing paluahenNa mo bangsaNa ibas dosa-dosana nai." 1:22 Masa pè karinana idi, asa saut ngo sinidokken Tuhan merkitè nabiNa bagèen, 1:23 "Berrat-berrat rumah mo sada simerbaju janah menubuhken sada dukak daholi, baingenna mo gerarna Immanuel." (Lapaten Immanuel kata Heber imo denganta Dèbata). 1:24 Terengnget kessa si Josep, iuèi mo sinidokken malaèkat i tabasa. Jejap mo ia dekket si Maria. 1:25 Tapi sidekkah si Maria makdèng menubuhken anak i, oda campur si Josep dekket si Maria. Janah tubuh kessa anak idi, ibaing si Josep mo gerarNa Jesus.
2:1 Ukum kuta bekkas Jesus tubuh imo kuta Betlehem i nageri Juda, tikan si Herodes Raja i sidi. Sinderrang nai roh mo mi Jerusalem kalak sipandè bintang i kebincaren nai, kuso-kuso, 2:2 "Idikè ngo anak sirimbaru tubuh idi, sinaing gabè raja kalak Jahudi? Enggo kuidah kami bintangNa i kebincaren janah roh ngo kami naing mersembah tabasa". 2:3 Idengkoh si Herodes kessa kata i, tersengget kalohon mo ia bagi ma karina jelma silot i Jerusalem. 2:4 Idokken mo pulung karina imam ekuten dekket guru-guru Agama Jahudi, ikusoken mo taba kalak idi, "Idikè ngo bekkas tubuh Raja Sipaluah i, siniperbagah-bagah Dèbata?" 2:5 Ialoi kalak idi mo, "I Betlehem si ni nageri Juda ngo, ai bagèen ngo isuratken nabi, 2:6 'Ukum kono alè Betlehem si ni Juda kètèksu ngo ko nemmuken mertimbangken karina kuta silot i Juda. Kerna bamu nai ngo naing roh sada kalak raja, sinaing menggem-gemi Israel bangsangKu.' " 2:7 Enggo kessa ibettoh si Herodes, idilo mo sipandè bintang i kebincaren i nai merkitè kosik. Ikuso mo kalak i, ndigan ngo tuhu mulai idah kalak i bintang i. 2:8 Nai ipasulak mo kalak i laus mi Betlehem merkitè tennah bagèen, "Laus mo kènè, pemanat kènè mo Anak idi. Mula enggo jumpa kènè Ia, bagahken kènè mo bangku asa laus ma dekket aku mersembah baNa." 2:9 Nai laus mo kalak idi. I tengah ndalan, iidah kalak i nola mo bintang i, imo bintang siniidah kalak i tikanna i kebincaren. Merdalan ngo bintang idi i lebbè kalak i, nai kom mo i babo bekkas Anak idi. 2:10 Soh mo lolona kalak idi mengidah bintang i. 2:11 Mbengket mo kalak idi mi bages i, janah idah kalak i mo Anak i dekket inangNa si Maria. Nai isembah kalak idi mo Anak i, enggo kessa i ibuka kalak i mo perbekasen hartana janah ipèlèken mo taba anak idi emmas, kemènjen, dekket minak mur mahan persembahenna. 2:12 Tikan lako balik kalak i mi kutana, oda nèngè arap dalanna idi kin kalak i, karna enggo ipesèngèt Dèbata kalak idi ipas nipina, asa ulang nèngè pella balik mendahi si Herodes. 2:13 Enggo kessa laus sipandè bintang i, iidah si Josep mo sada malaèkat ibas nipina, nina malaèkat i mo, "Kèkè mo kono, embah mo Anak idi dekket inangNa mbungkas mi Mesir. I sidi mo kènè merian pèma roh nola ranangku bamu, ai iletlet si Herodes ngo Anak idi naing ibunuh". 2:14 Nai kèkè mo si Josep, iembah mo Anak i dekket inangNa mbungkas mi Mesir bernginna idi. 2:15 Merian i Mesir mo kalak i soh mi matè si Herodes. Saut mo sinidokken Tuhan i merkitè nabiNa, "I Mesir nai ngo Kudilo AnakKi". 2:16 Ibettoh si Herodes kessa enggo iakkali sipandè bintang idi ia, mellaga kalohon mo ia. Iperèntahken mo, kennah bunuhen nasa anak daholi simerumur dua tahun mi terruh,, i kuta Betlehem dekket i sikulilingna, ai bagi ngo cocok perndekkahna ibettoh bai sipandè bintang i nai. 2:17 Merkitè bagidi, saut mo sinidokken Nabi Jeremia, bagèen, 2:18 "Terdengkoh ngo sora derru-derru i kuta Rama, itangisi si Rahel ngo dukak-dukakna, oda terrapoon nèngè kalak i, ai enggo matè karina dukakna". 2:19 Enggo kessa matè si Herodes, iidah si Josep mo i Mesir sada kalak Malaèkat ibas nipina. 2:20 Idokken Malaèkat i mo tabasa, "Kèkè mo kono, embah mo Anak idi dekket inangna balik mi Israel, ai enggo matè kalak sinaing memunuh Anak i". 2:21 Nai kèkè mo si Josep, iembah mo Anak i dekket si Maria balik mi Israel. 2:22 Tapi ibettoh si Josep kessa, si Arkelaus anak si Herodes ngo mbangkit raja gancih bapana si Herodes mengerajai Juda, gabè mbiar mo si Josep balik mi sidi. Enggo kin ma ngo ipesèngèt Tuhan i ia ibas nipina terèngèt idi, gabè mi Galilea mo ia laus. 2:23 Merian i kuta Nazaret mo ia. Merkitè bagidi, saut mo sinidokken nabi-nabi bagèen, "Idokken dèba mo ia kalak Nazaret".
3:1 Sinderrangna i roh mo si Johanes Peridiken mi padang gurun Juda janah mulai merjamita nina mo, 3:2 "Tobat mo kènè ibas dosa-dosa ndènè nai, kerna ndor nèngè mo roh pemerèntahen Dèbata." 3:3 Si Johanes èn mo sinidokken Nabi Jesaya ibas ranana, "Sora tenggo-tenggo i padang gurun pelias kènè dalan bai Tuhan i, pedèas kènè mo dalan sidalanenNa i." 3:4 Ukum pakkèen si Johanes, bukbuk unto ngo. Pementingna koling-koling, panganna balang dekket tenggoli rambah. 3:5 Nterrem ngo roh jelma i Jerusalem nai, i suberri Juda nai dekket kuta si lot i kacimbang lambung Laè Jordan, merrohen mendahi si Jonanes. 3:6 Iperketuhu kalak i ngo dosa-dosana, nai iperidi si Johanes mo kalak idi i Laè Jordan. 3:7 Merrohen ma mo mèduk kalak Parisè bak Sadusè p` mendahi si Johanes lako iperidi. Tikan iidah si Johanes kalak idi merrohen, nina mo taba kalak i, "Kènè alè jelma jahat! Isè ngo mendokken taba kènè ndorok maluah tarap hukum Dèbata sinaing roh? 3:8 Tuduhken mo ibas ulaen ndènè, magahken enggo tobat kènè ibas dosa-dosa ndènè nai. 3:9 Ulang mo dok atè ndènè ndorok gabè maluah kènè pellin mendokken, si Abraham ngo empung nami. Bettoh kènè mo, i batu èn nai pè ndorok ngo ibaing Dèbata gabè pinempar si Abraham. 3:10 Enggo mo ampè takkè i babo daling, lako menabah kayu siso merbuahken merandal janah iporoni mi api. 3:11 Kuperidi ngo kènè merkitè laè magahken enggo tobat kènè ibas dosa-dosa ndènè nai. Tapi roh nèngè mo Ia, iperidi mo kènè dekket tendi Dèbata bak api. Belgahen ngo ia asa aku. Salang merembah cipatuNa sambing pè oda dèng ndorok aku. 3:12 I tanganNa ngo ndèru lako menapi, itapi ngo nasa pagè sampè mbersih. Nasa pagè mberras, ipepulung mo mi kebben, tapi ukum ronci dekket apa-apa, itutung ngo mi api siso ndorok mèntep." 3:13 Sinderrangna i laus mo Jesus i Galilea nai mi Laè Jordan. Idapetken mo si Johanes janah idokken mo asa iperidi si Johanes Ia. 3:14 Tapi icuba si Johanes ngo menulak pengidoen i. Nina si Johanes mo tabaSa, "Aku ngo nemmu iperidi Kono. Keppèken roh nola Kono mendahi aku." 3:15 Tapi nina Jesus mo, "Bagi mo lebbè ukum bagèndari. Ai merkitè bagidi enggo sibahanken nasa sinipergeddo Dèbata." Nai iperidi si Johanes mo Jesus. 3:16 Enggo kessa iperidi, karuar mo Jesus i laè idi nai. Mènter sintempu mo mbuka langit, iidah Jesus mo Tendi Simbadia susur bagè ndarapati, mi baboNa. 3:17 Nai terdengkoh mo Dèbata mendokken, "Èn ngo AnakKu siKukekelengi idi, ngkelleng ngo atèngKu midahsa."
4:1 Enggo kessa i, iarahken Tendi Simbadia mo Jesus mi kelongoon asa iunjuni sibolis. 4:2 Oda mangan Jesus empatpuluh ari empatpuluh berngin dekkahna. Nai melèhè mo iakap. 4:3 Roh mo sibolis mengunjunisa, "Mula Anak Dèbata ngo kono, dokken mo batu-batu èn gabè roti." 4:4 Ialoi Jesus mo, lot ngo tersurat ibas bukku, "Oda ngo ndorok ngelluh jelma i ibaing roti sambing, tapi kumarna kata ni Dèbata ngo." 4:5 Enggo kessa bagidi, iarahken sibolis i mo Jesus mi Jerusalem mi babo bungkulen Bages Dèbata. 4:6 Nai idokken sibolis i mo tabaSa, "Mula Anak Dèbata ngo kono, dabuhken mo dirimu mi terruh; ai tersurat ngo i bukku simabadia i bagèen, 'Ipasulak Dèbata ngo malaèkat-malaèkatNa menjaga Kono, janah itatang ngo Kono asa ulang tertuktuk nèhèmu mi batu.' " 4:7 Ialoi Jesus mo, "Tersurat ngo ibas Bukku Simbadia idi bagèen, 'Ulang iunjuni kono Tuhan Dèbatamu.' " 4:8 Nai iarahken Sibolis i nola ma mo Jesus mi sada delleng ndates kalohon, ituduhken Sibolis i mo i sidi karinana kerajaen dunia èn dekket karina kinibèakna. 4:9 Nai idokken Sibolis i mo mbang Jesus, "Karinana idi kuberrèken baMu, mula isembah kono aku." 4:10 Ialoi Jesus mo, "Laus mo ko Bolis, tersurat ngo ibas Bukku Simbadia i: Tuhan Dèbatamu ngo sisembahenmu, pellinSa ngo kessa siuèenmu." 4:11 Ujungna laus mo Sibolis idi, nai roh mo Malaèkat-malaèkat mendahisa. 4:12 Tikan idengkoh Jesus beritana, enggo ikurung si Johanes i Galilea. 4:13 Itadingken mo Nazaret, lako merrian i Kapernaum. Imo i biding tao Galilea i nageri Zebulon dekket Naptali. 4:14 Kumarna bagidi, saut mo sinidokken Nabi Jesaya bagèen: 4:15 "Tanoh Zebulon dekket Naptali, dalan lako mi laut, i kèparen Laè Jordan, Galilea siso masuk tanoh Jahudi, 4:16 kalak sinibagessen kegellapen, mengidah cuhaya mbellen enggo mbincar mataniari taba kalak sinilenggemmen kematèen!" 4:17 Mungkah i sidi nai mo Jesus menjamitaken, "Tobat mo ibas dosa-dosa ndènè nai, ai memerèntah nèngè mo Dèbata bagè Raja." 4:18 Tikan merdalan-dalan Jesus i biding Tao Galilea, iidah mo dua kalak sibeltek perikan, imo si Simon (igerari ma Petrus) dekket anggina si Andreas. Tupung menjala ngo kalak idi, ai perikan ngo kalak i. 4:19 Idokken Jesus mo taba kalak i, "Ekutken mo Aku, asa Kuajari kènè menjala jelma." 4:20 Nai mènter itadingken kalak i sidua mo jalana idi janah ièkutken mo Jesus. 4:21 Iterusken Jesus mo merdalan, nai iidah nola ma mo dua kalak sibeltek sidèbanna, imo si Jakobus dekket si Johanes, imo dukak-dukak si Zebedeus ibagessen bungkina ngo kalak i rebbak dekket bapana peliasken jala. Idiloi Jesus nola ma mo kalak idi. 4:22 Mènter itadingken kalak i mo bungkina dekket bapana lako mengèkutken Jesus. 4:23 Ikulilingi Jesus mo nageri Galilea i. Mengajari mo Ia i bages perguruen janah memagahken Sukuten Keluahen, imo Kerajaen Dèbata. Ipemalum ngo simersakit dekket simertikas. 4:24 Tersaar ngo berita Jesus terèngèt Jesus idi i suberri nageri Siria, sanga ngo nterrem kalak merrohen mendahiSa. Iembah kalak idi ngo kalak simenggong matcam bagè sakit, dekket simenggong mermatcam bagè kesusahen; kalak sinisellapen tendi jahat, si solpetten, bagi ma dekket nitempuk sigading, ipemalum Jesus ngo karinana. 4:25 Soh mo buèna kalak simengèkutken Jesus tikanna i, lot mo i dèba i Galilea nai, dèba i Sipuluh Kuta nai, dèba i Jerusalem nai, bagi ma i Juda nai, janah lot ma ngo dèba i kèparen laè Jordan nai.
5:1 Tikan itengngen Jesus jelma mbellang i, merrohen mo simengèkutkensa tabasa. 5:2 Nai ipungkah mo mengajari kalak idi: 5:3 "Sayur ntua ngo kalak simengakap dirina oda mergegoh janah mengharap pellin bai Tuhan sambing; ai kalak i ngo masuk mi Kerajaen Dèbata. 5:4 Sayur ntua ngo kalak sibonek atè, ai iapoi Dèbata mo kalak i. 5:5 Sayur ntua ngo kalak sincerrep merukur, ai jaloen kalak i mo siniperbagah Dèbata. 5:6 Sayur ntua mo kalak nteddoh mengulaken lemmo atè Dèbata, ai pebessuren Dèbata mo kalak idi. 5:7 Sayur ntua ngo kalak simerkelleng atè midah kalak sidèbaan, ai ikekelengi Dèbata ngo kalak idi. 5:8 Sayur ntua ngo kalak simpanting merukur, ai idahen kalak i ngo Dèbata. 5:9 Sayur ntua ngo kalak simemaing damè i tengngah jelma nterrem ai duka-dukak ni Dèbata ngo kalak i. 5:10 Sayur ntua ngo kalak simenggong simbernit, kumarna mengulaken lemmo atè Dèbata, ai kalak idi ngo masuk mi Kerajaen Dèbata. 5:11 Sayur ntua mo kènè, mula irèhèi janah iletlet dèba kènè janah icemburu kumarna mengèkutken Aku. 5:12 Bagi ngo ibaing kalak idi taba nabi-nabi i lebbènken ndènè pè. Lolo janah mersampang atè mo kènè, ai jaloon ndènè ngo upah ndènè mbelgah kalohon bai Dèbata nai." 5:13 "Kènè ngo sira dunia èn. Mula gabè ndèngap sira idi, kadè mo bakinen asa gabè masin mengolihi? Ipatakken mo i janah ideddoh-deddohi dèba. 5:14 Kènè ngo cuhaya dunia èn. Oda terboniken kuta si ni babo delleng. 5:15 Oda madun kalak menungkupi lampu sinilakatenna dekket kendang. Tapi mi babo perpelitaan ngo tupèh ibaing, asa icuhayai lampu idi nasa jelma silot i bages i. 5:16 Kennah bagi ma mo cuhaya ndènè merbindella i lebbè jelma nterrem, asa idah kalak i pemahan ndènè simerandal idi, nai ipoji mo Bapa ndènè ni sorga i." 5:17 "Ulang mo dok atè ndènè roh Aku lako mematei hatoren agama Jahudi siniajarken si Musa dekket nabi-nabi. Roh Aku oda ngo lako mematei, tapi lako petettahken ngo. 5:18 Èngèt kènè mo! Sidekkah lot dèng langit dekket tanoh èn, sada titik barang sada nggurat kettek pè ibas hatoren-hatoren idi oda ipitakken, mula makdèng ipesaut karinana. 5:19 Kumarnana i, barang isè mengelausken tah apaina pè i bas puhpuh idi nai, tah pè sikètèkna, janah memmedahken taba sidèbaan memaing bagidi ma, kalak sibagidi mo sikètèkna i ibas ummat Dèbata. Tapi barang isè pedalanken puhpuh idi janah memmedahken taba sidèban asa iulaken, kalak sibagidi mo simbelgahna i Kerajaen Dèbata. 5:20 Èngèt kènè mo: Oda ndorok kènè gabè ummat Dèbata, mula mak lot kesurungen ndènè bai guru-guru Agama dekket Parisè nai, terrèngèt menguèi lemmo atè Dèbata." 5:21 "Ibettoh kènè ngo, lot peddah taba empungta bagèen: Ulang memmunuh; barang isè memmunuh, kennah irungguken ngo ia. 5:22 Tapi bagèndari Aku mendokken taba kènè, barang isè melaga taba sidèbaan, kennah irungguken ngo ia; janah barang isè mengurat-ngurati sidèbaan, kennah irungguken i runggu Agama. Nai, barang isè mendokken taba sidèbaan, 'Lengngah' kennah idabuh ngo ia mi api narakka. 5:23 Kerna nai, mula lot sakalak ibas kènè nai tupung memèlèken pèlèen taba Dèbata, keppè terrèngèt mo ia lot kalak simerncio atè bana, 5:24 itadingken mo lebbè pèlèenna idi, laus mo ia lebbè merdamè dekketsa. Nai pè asa molih nola ia lako memmèlèken pèlèenna i taba Dèbata. 5:25 Tah bakunè lot kalak mengaduken kènè taba penghukum, merdamè mo kènè dekketsa, sinderrang lot dèng tikki janah makdèng soh mendahi penghukum i. Mula oda, ipessoh kalak idi mo kènè taba hakim, nai isohken hakim i mo kènè mendahi Polisi. Nai ikurungken polisi idi mo kènè. 5:26 Èngèt kènè mo èn: Oda ndorok karuar kènè i kurungen idi nai, ukum makdèng tupa karinana utang ndènè i." 5:27 "Ibettoh kènè ngo lot peddah bagèen: Ulang kono merlangkah julu meddem. 5:28 Bagèndari Aku mendokken taba kènè: barang isè menengen daberru janah tergerrek ukurna lako merlangkah pilit, enggo merlangkah julu meddem kalak sibagidi taba daberru idi ibagessen ukurna. 5:29 Mula matamu kamuhun i ngo memmaing kono merdosa, polditken mo i janah pitakken, lotin mo kènè kembalangen dèba sindihi dagingmu idi daripada bolet dagingmu i ibuang mi narakka. 5:30 Mula tanganmu kamuhun memmaing kono merdosa, gettap janah ambongken mo i, lotiin mo kono mak mertangan serrap daripada bolet badanmu idi masuk mi narakka." 5:31 "Lot ma ngo peddah bagèen: barang isè menirangken sinibagesna, kennah iberèken ngo surat sirang bana. 5:32 Tapi bagèndari Aku mendokken taba kènè: barang isè menirangken sinibagesna, keppèken oda ngo merlangkah julu meddem sinibagesna idi, i nola sebabna asa gabè merlangkah julu meddem sinibagesna idi mula sijahè nola. Janah barang isè mengkabini daberru sinisirangken i, merlangkah julu meddem ngo." 5:33 "Ibettoh kènè ma ngo peddah mi empungta bagèen: ulang kènè mengosè bulaban. Barang kadè sienggo ibulabanken kènè i hadeppen Dèbata, kennah ngo ulaken. 5:34 Bagèndari Aku mendokken taba kènè: Ulang mo kènè merbulaban. Ulang ma mo merbulaban mi langit i, karna bekkas Dèbata ngo langit idi. 5:35 Barang pè mi tanoh èn, kerna alas nèhèNa ngo tanoh èn; barang pè mi Jerusalem, karna kuta raja aur ngo idi. 5:36 Ulang mo merbulaban mi babontakalmu, kerna oda ndorok ko memaing bukmu idi mbulan barang mbèrèng giam sirambar pè. 5:37 Dokken mo uè barang oda, mula lebbih isidi nai, bai sibolis nai ngo rohna i." 5:38 "Ibettoh kènè ngo peddah bagèen: mata ngo abul mata, èpen ngo abul èpen. 5:39 Tapi bagèndari Kudokken mo bai ndènè: ulang mo balesken kènè siso mendè taba kalak simaing siso mendè i. Tapi mula iparap kalak kurummu kamuhun, berrèken mo dekket kurummu kambirang. 5:40 Janah mula iaduken kalak kè mi hakim mengido bajumu berrèken mo bana dekket inang bajumu. 5:41 Mula lot sada kalak perkuasa memaksa kènè asa ipersan embahen sabatu daohna, persan mo soh dua batu. 5:42 Mula ipido dèba bamu nai barang kadè, berrèken mo bana. Ulang mo itulak kono, kalak sinaing menginjam barang kadè bamu nai." 5:43 "Ibettoh kènè ma ngo peddah bagèen: kekelengi mo denganmi janah kecegoken musuhmu. 5:44 Tapi bagèndari Aku mendokken bai ndènè: kekelengi mo musuhmu, janah sodipken kènè mo kalak sipepersuk-persukken kènè, 5:45 asa gabè anak Bapa ndènè sini sorga i kènè. Kerna ipebincar Dèbata ngo mataniari taba kalak bennar dekket taba kalak jahat pè. Iberrè ngo udan taba kalak simemaing bennar dekket simemaing jahat pè. 5:46 Ai mula pellin kalak simengkekelengi kènè sambing ngo ikekelengi kènè, kadè mo pella balessen Dèbata sinibaing ndènè i? Otang kalak simenunggu belasting pè bagi ngo ibaing? 5:47 Mula pellin taba denganmu sambing ngo kessa kènè mertabi, kadè mo kelebihenna? Kalak siso menandai Dèbata pè bagi ngo ibaing. 5:48 Selloh ngo Bapa ndènè sini Sorga i mengkekelengi karina jelma. Kènè pè kennah bagidi ma ngo."
6:1 "Èngèt mo ulang kènè mengulaken hatoren Agama ndènè i hadeppen sinterrem, pellin asa iidah dèba sambing, mula bagi ngo ibaing kènè, oda ngo iberrè Bapa ndènè si ni sorga idi upah ndènè. 6:2 Mula iberrè kènè cudekkah taba kalak sincoor, ulang pella ibettoh dèba, bagè pemaing kalak perbuah ringadar. Perulaan ni kalak i simemaing bagidi i garèja dekket i dalan mbelgah asa ipoji kalak ia. Èngèt mo enggo ijalo kalak idi upahna merkitè bagidi. 6:3 Tapi ukum kènè, mula iberrèken kènè cudekkah ndènè sipsip mo iberèken, ulang lot mettohsa. 6:4 Selloh ngo sinibaingmu idi, oda pella ibettoh barang isè pè, ai ibettoh Bapa ndènè si ni sorga i ngo idi, janah iberèken mo upah bamu." 6:5 Mula mersodip kènè ulang mo bagè pemaing kalak sipekulah-kulahken. Ai ngkasah ngo kalak i mersodip ninganna cènder i bekkas persodipen dekket i sirpang dalan asa idah dèba. Èngèt mo, enggo ijalo kalak idi upahna. 6:6 Tapi mula mersodip kènè mi bilik mo kènè laus, gerruk kènè mo pèntu i, nai mersodip mo kènè taba Bapa ndènè siso teridah i, ai iidah ngo siniula ndènè siso nibettoh barang isè pè. Nai iberèken mo bai ndènè upah ndènè. 6:7 Mula mersodip kènè, ulang mo mergeddang-geddangen, bagè pemaing dèba siso menandai Tuhan. Idok atèna ngo idengkohken Dèbata sodipna simergeddang-geddangen idi. 6:8 Ulang mo bagidi. Ai enggo ibettoh Bapa ndènè kin, barang kadè perlu bai ndènè sinderrang madèng ipido kènè. 6:9 Bagèen mo sodip ndènè, 'Ialè Bapa nami si ni sorga: Dak niperbadia mo gerarMu. 6:10 Dak roh mo kerajaenMu, Saut mo lemmo atèMu i babo tanoh èn bagè si ni sorga. 6:11 Berrèken mo bai nami sidari èn pangaan nami sipat ari. 6:12 Sasa mo dosa nami bagè penasa nami, i dosa ni dengan simerdosa taba kami. 6:13 Ulang kami arahken mi pengojiin, paluah mo kami ibas pengago nai Ai Ko ngo sidasa kerajaen, dekket kegegohen, bang pè kesangapen soh mi amman sumendah. Amèn.' 6:14 Mula isasa kènè dosa dengngan ndènè simerdosa taba kènè, sasaen Bapa ndènè si ni sorga i mo dosa ndènè. 6:15 Tapi mula oda isasa kènè dosa ni kalak simerdosa taba kènè, oda ma ngo isasa Bapa ndènè si ni sorga idi dosa ndènè." 6:16 "Mula puasa kènè, ulang mo merèngut abè ndènè bagè kalak sipekulah-kulahken. Ai merèngut ngo abè kalak i, asa ibettoh dèba kalak i puasa. Èngèt mo, idi mo upah sienggo nijalo kalak i. 6:17 Tapi mula puasa kènè, duhapi kènè mo abè ndènè, janah sori kènè mo buk ndènè. 6:18 Asa ulang ibettoh dèba puasa kènè. Asa pellin Bapa ndènè siso teridah idi ukum mettohsa. Ai iidah ngo siniulaken ndènè, siso nibettoh ndènè, nai iberèken mo upah bai ndènè." 6:19 "Ulang mo pepulung-pulung kènè harta dunia, sindorok terpangan karat dekket ngitngit i, janah ndorok tertangko penangko. 6:20 Tapi pepulung-pulung mo harta sorga i, siso ndorok terpangan karat dekket ngitngit i, janah oda ndorok tertangko penangko. 6:21 Ai barang i dikè hartamu, dak mi sidi ngo ukurmu. 6:22 "Mata imo lampu ni daging. Mula ncihur penengenmu, ncihur mo karina dagingmu. 6:23 Tapi mula ramben ngo penengenmu, gellap bulita mo karina dagingmu, soh mo gellapna karinana. Asa mula gellap ngo lampu dagingmu, soh mo gellapna karinana." 6:24 "Oda ndorok sada kalak mahan bahaan taba dua induk. Kerna ikekelengi ngono sada, tapi ikecegoken ngo kum sisada nai. Barang, menguèi ngo ia taba sisada, tapi itonja ngo sisada nai. Bagi ngo bang kènè pè. Oda terbaing kènè mengula lako mi Dèbata ninganna mengula asa kaya ma. 6:25 Kumarna nai, èngèt kènè mo, ulang pella kelsohken nggelluhmu mendok: Kadè mo pangaan dekket ènumen nami, kadè mo oles nami. Otang hargaen ngo kessah asa pangaan? 6:26 Tengngen kènè mo manuk-manuk simerkabangen i, oda ngo mardang kalak idi, oda merrani, oda ma ngo pepulungken hasil suan-suanen mi kebben. Tapi ipehèdu-hèdu Bapa ndènè si ni Sorga i ngo kalak i! Otang lebbih mahargaen ngo kènè asa manuk-manuk? 6:27 Isè mo kè ndorok pegedangken umurna giam cituk pè merkitè-kitè kekelsohen? 6:28 Kasa mo pella ikelsohken kènè perolessen ndènè? Tengngen kènè mo bunga-bunga pancur simertubuhen i rambah idi. Oda ngo mengula kalak i, oda mertennun. 6:29 Tapi perdatèken mo! Si Salomo bèak tangas-tangasen idi pè, oda ngo nung memakkè bagè sinipakkè bunga-bunga i mendèna! 6:30 Salang dukut-dukut si ni rambah i bagidi mo mendèna sidari èn ipehèdu-hèdu Dèbata, keppè barembenkenna enggo mo ipatakken janah itutung. Mula bagi mo sellohna Dèbata pehèdu-hèdu dukut-dukut i, makinsa nola mo kènè! Tapi kepercayaenmu ngo oda ntegguh! 6:31 Ulang mo kènè roga ninganna mendokken, 'Kadè mo pangaan nami, barang kadè mo ènumen nami, barang kadè nola mo oles nami?' 6:32 Kalak siso menandai Dèbata ngo dakdak mengkelsohken sibagidi. Ai ibettoh Bapa ndènè si ni Sorga i ngo, perlu idi bai ndènè karinana. 6:33 Siperluna usahanken ndènè imo: bakunè carana asa ndorok kènè gabè ginemgem i Kerajaen Dèbata, janah mengulaken si ni pergeddo atèna. Mula enggo lebbèen idi itulusi kènè, nai iberrèken mo karinana sindai bai ndènè ma. 6:34 Kumarna nai, ulang mo pella roga kènè terrèngèt ari baremben. Karna ari baremben pè lot ngo kelsohkenenna. Kesusahen sigennep ari pè, enggo mo toko mbotongna."
7:1 "Ulang kènè menghukumi kalak sidèban, asa ulang ihukumi Dèbata kènè. 7:2 Kerna bakunè kènè menghukum taba sidèbaan, bagi ma ngo Dèbata menghukumi kènè. Bakunè sukaten sinibaing ndènè taba sidèbaan, idi ma ngo sukaten ibaing Dèbata bai ndènè. 7:3 Kasa mo pukpuk iperèso-rèso si ni mata ndèba nasa pellèmen, keppèken nasa pungur i mata ndènè idi oda iperdatèken kè? 7:4 Bakunè mo kè mendokken taba denganmu, 'Dikè kuagoi pellèmen si ni matami,' keppèken i matamu sendiri lot nasa pungur belgahna? 7:5 Ee, kènè perbuah ringadar! Lebbèen mo agoi pungur ni matami, ipè asa ntangkas idah ko, janah agoi nasa pellèmen si ni mata dengnganmu. 7:6 Ulang berrèken harta simbadia i taba biang, asa ulang merbhalik biang i janah menarut ko nola. Ulang berrèken buradda bai babi, asa ulang gabè ideddohi nola idi." 7:7 "Pengido kènè mo, nai jaloon ndènè mo, tulusi mo, nai dapet kènè mo, tuktuki kènè mo, nai bukaenna mo bai ndènè. 7:8 Ai dapetten ngo sidak tong mengido, kenaan ngo ngo si dak tong menulusi, janah ibuka ngo kalak si dak tong menuktuki. 7:9 Isè kènè merrèken batu taba dukakna ukum roti ngo ipido? 7:10 Barang nipè iberrèken, ukum ikan ngo ipido? 7:11 Barang bakunè pè jahat ndènè, ibettoh kènè ngo memerrèken simendè taba dukak-dukak ndènè, makinsa nola mo Bapa ndènè si ni sorga i, tentu iberrèken simende taba kalak simengido tabasa! 7:12 Bakin kènè mo lebbèen taba sidèbaan, barang kadè ipergeddo kènè naing bakinenna taba kènè. I ngo pemusaten hatoren agama sinipeddahken si Musa dekket nabi-nabina." 7:13 "Mbengket mo kènè arap pèntu sempit, kerna ukum arap pèntu mbellang janah dalan mbellen, mi narakka ngo puasna! Nterrem ngo kalak merdalan arap idi. 7:14 Tapi ukum pèntu sempit janah pècet, mi kenggeluhen ngo puasna. Oda piga kalak soh mi sidi." 7:15 "Mermanat mo kènè meradepken nabi-nabi palsu. Roh ngo kalak idi mendahi kènè bagè biri-biri, tapi ukum ukurna tosè bagè biahat menjerngem ngo. 7:16 Tandaan ndènè mo kalak idi merkitè-kitè hasil perulaenna. Oda terbuahken kopi-kopi buah anggur, janah oda terbuahken cipako, buah kayu ara. 7:17 Nasa Kayu merandal merbuahken mendè, tapi ukum kayu siso mendè nggodo ngo buahna. 7:18 Kayu merandal, oda nè merbuahken nggodo, janah ukum kayu nggodo oda ndorok merbuahken buah merandal. 7:19 Nasa kayu siso merbuahken merandal, itabah ngo janah itutung. 7:20 Asa bagi ngo bang nabi-nabi palsu idi pè. Itandai kènè ngo kalak i merkitè-kitè perulanna." 7:21 "Oda ngo karina kalak simendiloi Aku, 'Tuhan, Tuhan!' gabè ginemgem i Kerajaen Dèbata, tapi pellin kalak simengulaken lemmo atè BapangKu si ni sorga i ngo. 7:22 Tikan Ari Kiamat, mbuè ngo kalak mendokken bangKu, 'Tuhan, Tuhan,' otang enggo kupesoh kami sukuten bai Dèbata nai merkitè-kitè Gerarmu! Janah otang merkitè-kitè Gerarmu pè enggo kupelaus kami nasa bolis, janah memaing matcam bagè tanda kelengangen? 7:23 Tapi ningku mo, 'Oda kutandai kènè! Laus mo kènè i sèn nai, kènè simengulaken jahat!' " 7:24 "Barang isè simendengkoh kata èn, janah iulaken, codi mo ia bagè kalak si mpantas pekadèken bagesna i babo batu mpihir. 7:25 Tukasi pè roh udan janah mbelgah laè idi bagi ma angin sapa-sipu mi bages i, oda nggèut merumpak bages i, kerna ipajek merdanganen batu mpihir. 7:26 Tapi kalak simemegèken ranangKu, keppè oda iulaken, codi mo ia bagè kalak simoto, simemajek bagesna i babo kersik. 7:27 Sinderrang roh udan, mengeraja mo laè janah sapa-sipu angin menerpa bages i, nai merumpak mo bages i!" 7:28 Enggo kessa pul Jesus mengajari, lengang mo jelma nterrem ni sidi mendengkoh peddahNa i. 7:29 Ai meheji kalohon ngo peddahNa i, oda bagè guru-guru agama Jahudi i.
8:1 Mengencuah mo Jesus i delleng i nai, janah nterrem ngo kalak mengèkutkenSa. 8:2 Sinderrangna i roh mo sada kalak si koliten mendapetkenSa, mengido urup. Sujud mo ia menembah Jesus ninganna idokken, "Tuhan, mula uè Kono, terpemalum Ko ngo aku." 8:3 Nai idoroken Jesus mo tanganna lako menjamahsa, idokken Jesus mo, "Uè ngo Aku, malum mo kono!" Mènter kejapkenna i mersep mo kolitna i, janah malum mo ikap. 8:4 Nai nina Jesus mo mbangsa, "Èngèt da! Ulang ibagahken kono i taba barang isè pè. Tapi laus mo ko mendahi imam asa iperèso kono. Nai pèlèken mo pèlèenmu bagè sinihatorken si Musa, mahan tanda bukti taba jelma nterrem, magahken tuhu-tuhu enggo malum kono!" 8:5 Tikanna Jesus memengketti kuta Kapernaum, roh mo sada perwira tenterra Rom menimbakisa, mengido urup tabaSa. 8:6 "Tuan nami," nina perwira idi, "sakiten ngo naposongku i bages, dak gampar ngo ia i peddemmenna kumarna mpiahna itempuk sigading i." 8:7 "Laus pè aku pemalumkensa," nina Jesus. 8:8 "Ulang pella alè Tuan," nina perwira idi, "merlèasu ngo Aku alè Tuan nami menjalo kono mi bagesku. Kata sambing mo dokken alè Tuan, enggo njuah nahan iakap naposongki. 8:9 Ai aku pè kennah tunduk ngo mi perèntah indukku. Janah perajurit terruhenku i pè kennah patuh ngo bangku. Mula kudokken taba sada kalak, 'Laus!' nai laus ngo ia. Taba si sada, 'roh mi sèn, nai roh mo ia'; mula kudokken taba naposongku, 'Ulaken bahaan èn' mènter iulaken ngo." 8:10 Tikan idengkoh Jesus kadè sinidokken perwira i, kagum kalohon ngo Ia. Nai idokken mo taba kalak simengèkutkensa: "Dengkohken! Oda nung dèng kuidah kepercayaen bagidi belgahna barang isè pè kalak Israel. 8:11 Èngèt kènè mo! Nterrem ngo roh i kebincaren nai dekket i kecunduten nai lako meroang-oang rebbak dekket si Abraham, si Isak dekket si Jakob i Kerajaen Dèbata, 8:12 keppè kalak sipatut gabè ginemgem i Kerajaen Dèbata i sendiri, iambongken ngo mi bagasen kegellapen i. I sidi mo kalak i tangis kumara mpersukna." 8:13 Nai idokken Jesus mo taba perwira i, "Lako mo balik, dapet kono mo bagè kepercayaenmu i." Mènter malum mo iakap naposona i karangkenna i. 8:14 Laus mo Jesus mi bages si Petrus. Panè-panèen ngo i peddmenna simatua daberru ni si Petrus idah Jesus. 8:15 Ijamah Jesus mo tanganna, nai mènter malum mo panèna i. Kèkè mo ia lako mengkebasi Jesus. 8:16 Mayak bon ari, iembahi kalak mo mbuè si ni sellapen sètan. Ipelaus Jesus ngo sètan-sètan idi merkitè kata sambing janah ipemalum ngo karina si sakiten i. 8:17 Merkitè karinana idi, saut mo si nidokken Nabi Jesaya, imo, "Ia ngo menggong kinipersukta, janah pemalumken karina sakitta." 8:18 Lot mo mbuè kalohon mencingkoi Jesus. Idah Jesus kessa kalak i karinana ipasulak mo sisinna mi suberrang tao. 8:19 Nai roh mo sada kalak Guru Agama mendahiSa, nina mo, "Guru, uè ngo aku mengèkutken Kènè, barang dempak dikè pè." 8:20 Ialoi Jesus mo, "Merliang ngo ukum sorigala, janah merasar ngo ukum manuk, manuk, tapi ukum Anak ni Jelma i oda lot bekkasna lako galè, mentadi." 8:21 Nai nina sada kalak sidèban simengkusokenSa mo, "Tuan nami, paduè mo balik aku lebbè lako mengkubur bapa." 8:22 Tapi ialoi Jesus mo, "Ekutken mo Aku, belli mo simatè i menanem simatèna." 8:23 Mbengket mo Jesus mi bungki, rebbak dekket sisinna. 8:24 Sintempu roh mo angin sapasipu mi tao i, gabè iserpa galombang mo bungki idi. Meddem ngo Jesus tikala i. 8:25 Nai idahi sisinNa mo Ia lako mendungoiSa, "Tuhan urupi mo kami! Mermara ngo kita!" nina kalak idi. 8:26 "Kasa buradan kènè?" nina Jesus. "Kurang ngo kepercayaen ndènè!" Nai cènder mo Jesus, isenggak mo angin dekket galombang idi. Mènter kom mo galombang i. 8:27 Lengang mo karinana si ni sidi. Nina kalak i mo, "Kalak i dikè nai ngo èn? Angin dekket galombang pè patuh ngo mi perèntahNa!" 8:28 Soh mo Jesus mi suberrang tao i nageri Gadara. Mènter iambat dua kalak ni sellapen sètan mo ia i sidi. Gasaen kalohon ngo kalak i duana, gabè isè poda pang mentas tarap i. 8:29 Karuar i liang-liang kuburen nai ngo kalak idi, janah menurakken, "Kono alè Anak ni Dèbata, naing ikekadè ko ngo kami? Mada ngo naing isiksa ko kami makdèng pè dapet katikana?" 8:30 Oda ndaoh i sidi nai, lot sanggung-gunen babi dak menggigi tanoh. 8:31 Ipido sètan-sètan idi mo taba Jesus, "Mula naing ikaruarken ngo kami, pasulak mo kami mbengket mi babi-babi adonang." 8:32 "Lako mo!" nina Jesus. Nai laus mo sètan-sètan i sidi nai janah mbengket mi babi-babi idi. Mènter mermangkaten mo babi-babi idi i biding tebbing i nai mi tao, gabè mermatèen janah lenneng mo i sidi. 8:33 Nai merlojangen mo permakan babi i mi kuta. Isukutken kalak i mo karina simasa i, ibagahken ma mo tersèngèt simasa taba sidua kalak si nisellapen sètan i. 8:34 Gabè karina pengisi kuta i laus mendapetken Jesus. Idah kalak i kessa mo Jesus nggemmes mo ipidoken kalak idi, asa itadingken nageri i.
9:1 Ibengketti Jesus mo bungki, nai isuberrangi mo tao i lako balik mi kutaNa. 9:2 Iosong dèba mo mendahiSa sada kalak nitempuk sigading, gampar i peddemmenna. Tikan idah Jesus bagi belgahna kepercayaen kalak i, nina mo taba jelma nitempuk sigading i, "Percaya mo kono alè pa, enggo iampuni dosa-dosamu." 9:3 Nai mengeranai mo ibagasen ukurna guru-guru agama silot i sidi bagèen, "MengelèaI Dèbata ngo kalak èn." 9:4 Ibettoh Jesus ngo sinibagasen ukur kalak i, gabè nina mo, "Kasa bagi jahatna sura-sura ndènè? 9:5 Apaina ngo lotiin nidokken, 'enggo iampuni dosamu, barang kèkè mo ko merdalan mo'? 9:6 Kubuktiken mo bagèndari bai ndènè, merkuasa ngo Anak ni Jelma i i babo tanoh èn lako mengampuni dosa." Nai idokken Jesus mo taba nitempuk sigading i, "Kèkè mo kono, embah mo peddemmenmi, molih mo kono!" 9:7 Nai molih mo nitempuk sigading i mi bagesna. 9:8 Iidah jelma nterrem i kessa mo simasa i, mbiar mo kalak idi, ipoji kalak i mo Dèbata, kerna enggo iberrèken Dèbata kuasa sibagidi taba jelma. 9:9 Nai itadingken Jesus mo bekkas idi. Tikan merdalan i, idah Jesus mo sada kalak pertunggu belasting, si Mateus gerarna, kundul i kantorna. Idokken Jesus mo mbangsa, "Èkutken mo Aku!" Mènter cènder mo si Mateus janah mengèkutken Jesus. 9:10 Tikan mangan Jesus i bages si Mateus, merrohen mo mbuè sijalo belasting mi sidi dekket kalak perdosa janah rebbak mangan dekket Jesus bagi ma sisinNa. 9:11 Idah Parisè ngo idi. Ikuso kalak idi mo sisiin Jesus, "Kasa rebbak mangan guru ndènè dekket pertunggu belasting bak si perdosa?" 9:12 Idengkoh Jesus ngo kuso-kuso kalak idi, nai ialoi mo, "Oda perlu penambari bai kalak si juah-juahen, pellin taba kalak simersakit ngo. 9:13 Radum-radumi mo lapaten ayat ènda, 'Masèh atè ngo kukelemoken, oda ngo pèlèen.' Roh Aku oda ngo mendilo kalak simengètong dirina enggo bennar, tapi kalak simerlèa iètong dèba ngo." 9:14 Enggo kessa i, roh mo sisiin si Johanes Peridiken mendahi Jesus. Nai ikusoi kalak idi mo, "Kasa ndia kami dekket kalak Parisè nggati puasa keppèken sisinmu oda nung?" 9:15 Ialoi Jesus mo, "Bakunè dok atè ndènè, terbakin anak-anak kèla mo marsak tikan merbayo, sidekkah rebbak dèng kalak i dekket kèla i? Tentu oda! Tapi roh mo katikana, ialengi mo kèla i i gambarna nai. Kessa i sidi nai pè asa puasa kalak idi. 9:16 Oda nung kalak mendongkapken kaèn rimbaru mi baju singgo mumuk janah nggettem, ai terrago ngo sinidongkapken idi, gabè makin merribakna mo sidongkapen i. 9:17 Bagi ma ngo, oda nung ibaing dèba anggur tangkasen mi kiong sienggo buruk, mula ibaing mi sidi mpustak ngo kiong i. Ancuh mo anggur idi, janah kiong i pè maknè terpakkè. Kennah mi kiong rimbaru ngo anggur i ibaing, asa duana tong selloh." 9:18 Sinderrang mengeranai Jesus dekker sisiin si Johanes Peridiken, roh mo sada kalak pengendeng bages perguruen. Isembah mo Jesus ninganna idokken, "Gejapken èn dèng matè berrungku, èn pè masèh mo atèMu roh mo Ko lako menjamahsa asa ngelluh ia." 9:19 Kèkè mo Jesus, rebbakken laus mo kalak idi. SisinNa pè dekket ngo. 9:20 Tikan merdalan idi, roh mo sada kalak daberru menjolmiti Jesus i podi nai, enggo sipuluh dua tahun dekkahna ketimbasen. 9:21 Kerna dok atèna ngo ibagasen, "Asal mo giam kujamah olesNa, malum mo kuakap." Ijamah mo punca oles Jesus. 9:22 Karangkenna i tumulih mo Jesus. Idah kessa mo daberru i, nina mo tabasa, "Pos mo atèmu! Kerna percaya ko bangku, malum mo kono!" Nai mènter malum mo iakap daberru idi. 9:23 Nai soh mo Jesus mi bages pengendeng bages perguruen i. Tikan idah Ia peroning-oning bai kalak sibonek, janah mèngèr jelma mbuè, 9:24 nina Jesus mo bai kalak i, "Karuar mo kènè karina! Oda ngo matè si tatat ènda, medem ngo." Itertabai kalak idi ngo Jesus. 9:25 Sinderrang karuar jelma nterrem i, masuk mo Jesus mi bilik si tatat idi, ijamah mo tanganna. Kèkè janah cènder mo si tatat idi. 9:26 Nai mènter tersiar mo berita idi mi suberri nagerri idi. 9:27 Laus kessa Jesus i sidi nai, ièkutken dua kalak sipètung mo Ia. Dak itenggoken kalak idi mo, "O anak si Daud, masèh mo atèMu midah kami!" 9:28 Mbengket kessa Jesus mi bages, idapetken sipètung sidua kalak i mo Ia. Nai ikusoi Jesus mo kalak i, "Percaya ngo kènè ndorok Aku pejuahken kènè?" "Percaya ngono kami!" nina kalak i. 9:29 Nai ijamah Jesus mo mata kalak idi ninganna idokken, "Kerna percaya ngo kè saut mo bagè sinikepercayaen ndènè i." 9:30 Nai ndorok mo mata kalak i merpendidah. Nai pahè mo kalak i ipernoi Jesus, asa ulang ibagah-bagahken bai barang isè pè. 9:31 Tapi laus ngo kalak idi, ibagah-bagahken ngo mi suberri nagerri i, terrèngèt Jesus. 9:32 Tikanna laus jelma sidua kalak idi, lot mo merembah sada kalak sipekkak, nikekkang sètan. 9:33 Ipelaus kessa sètan idi, mengolihi nola mo ndorok ia mengerana. Lengngang mo jelma sinterem i, nina mo, "Oda nung dèng idah kami bagèen i Israel!" 9:34 Tapi idokken Parisè mo, "Ekuten sètan ngo memerèken kuasa bana, lako pelausken sètan." 9:35 Bagi mo dak merkaliling Jesus i sada kuta nai mi kuta sisada, i sada sosor nai mi sosor sisada. Mengajari ngo Ia i bages perguruun, janah menukutken sukuten kelluahen terèngèt Kerajaen Dèbata. Ipemalum ngo kalak i ibas matcam bagè sakit nai, bagi ma simertikas pè. 9:36 Tikan itengen Jesus jelma nterrem idi, masèh mo atèna, ai bingung ngo kalak idi janah ndotè, bagè biri-biri siso lot mermakan. 9:37 Nai idokken Jesus mo taba sisinNa, "Mbellang kalohon ngo peraniin tapi cituk ngo kum simerrani. 9:38 Kerna nai; pido kènè mo taba sidasa juma idi asa ipasulak kalak lako merani jumana i."
10:1 Tikan sidari, idilo Jesus mo sisinna sipuluh dua kalak idi pulung. Iberrèken mo taba kalak idi kuasa lako mengusir tendi jahat, janah lako pejuahken nasa matcam sakit dekket nasa matcam tikas daging. 10:2 Gerar sisiin si sipuluh dua kalak idi imo: perlebbè si Simon (igerari ma Petrus) dekket anggina si Andreas, nai si Jakobus dekket anggina si Johanes, imo dukak si Zebedeus. 10:3 Nai si Pilipus dekket si Bartolomeus, si Thomas, si Mateus pertunggu belasting i dekket si Jakobus anak si Alpeus, si Tadeus. 10:4 Nai si Simon kalak bhoho idi, dekket si Judas Iskariot simenelbuh Jesus. 10:5 Nai ipasulak Jesus mo sisinNa sipuluh dua kalak idi, enggo kessa itennahi bagèen, "Ulang laus kènè mi nagerri siso meragama Jahudi. Ulang laus kènè mi kuta-kuta kalak Samaria. 10:6 Tapi laus mo kènè mendahi kalak Israel, mendahi kalak i silaling. 10:7 Bagahken mo taba kalak idi, enggo seggep Kerajaen Dèbata. 10:8 Pejuah kènè mo kalak si sakiten, pegelluh kènè simatè, pejuah kènè sipuruun, janah pelaus kènè mo bolis. Enggo ijalo kènè idi karinana oda pella menokor; nai berrèken kènè mo i, oda pella mertokor. 10:9 Ulang pella embah kènè riar, emmas barang pirak, barang pè kèpèng tembaga i bagasen sakku ndènè. 10:10 Ulang pella embah kènè bagut-bagut cudekkah, barang pè dua mpasang pakkèen ndènè i perdalanen, barang pè cipatu barang tongket. Kerna barang isè mahan bahaan kennah mangan ngo i bahaanna i nai. 10:11 Soh kessa kènè mi sada kuta barang sosor, tulusi kènè mo i sidi kalak siuè menjalo kènè. Merrian i sidi mo kènè mèma laus nola kènè. 10:12 Sinderrang mbengket kènè mi bages ndèba, dokken kènè mo, 'Njuah-njuah mo bai ndènè!' 10:13 Mula ijalo persapo idi ngo kènè, hot mo bana salam ndènè i. Tapi mula oda ijalo kènè, balik ngo bai ndènè salam i. 10:14 Mula tah lot bages barang kuta siso uè menjalo kènè barang tah oda nggèut mendengkohken rana ndènè, tadingken kènè mo bekas idi, janah pirpirken kènè mo abu silot i tapap nèhè ndènè idi. 10:15 Èngèt mo! Tikan Ari Kiamat, lotiin mo iampuni Dèbata kalak Sodom dekket Gomora, dari pada kalak perkuta idi." 10:16 "Peratè-atèken kènè mo ènda: Kupasulak ngo kènè bagè biri-biri mi tengah-tengah sorigala. Kennah pantas ngo kènè merrukur bagè nipè, janah merrukur mpanting bagè ndarapati. 10:17 Mermanat mo kènè, ai lot ngo kalak naing menangkup kènè, janah iembah mi runggu Agama. Isiksa ngo kènè i bages perguruen kalak i. 10:18 Iembah ngo kènè taba perkuasa dekket raja-raja kumarna sisinKu kènè, janah idi mo kesempaten bai ndènè lako menaksiken terrèngèt Aku taba kalak siso menandai Dèbata. 10:19 Tapi mula pè iaduken kè asa iadili, ulang pella bulisah kènè terèngèt barang kadè sinaing ruapenken ndènè, ibagahken ngo idi tupung katikana. 10:20 Oda ngo kènè simengeranai i sidi, tapi Tendi Bapa ni Sorga i ngo merkitè kènè. 10:21 Roh mo arina, isohken kakana mo anggina asa ibunuh. Bagi ma mo bapana mi dukakna. Dukakna mengalo taba Bapa dekket inangna, janah pesakatken asa ibunuh. 10:22 Karina kalak merceggo atè midah kènè kumarna Aku. Tapi barang isè menahanken soh mi puncana, i ngo paluahenna. 10:23 Mula ipedersa-dersa kalak idi kènè ibas sada kuta, mperrus mo kènè mi kuta sidèban. Kubagahken mo bai ndènè: mak dèng sanga karina idahi kènè kuta Israel lako mengulaken ulaen ndènè, enggo mo roh Anak ni Jelma idi utusen ni Dèbata. 10:24 Oda ngo belgahen sisiin asa guruna, oda ngo belgahen perkebbas asa indukna. 10:25 Mula dos sisiin dekket guruna, janah mula dos naposo dekket indukna, enggo mo cukup idi bai kalak i. Mula idokken dèba induk ni bages idi Belsebul, makin nola mo taba pengisi bages i, otang igerari nola mo lebbih merroha!" 10:26 "Ulang mo kebbiari kè ukum jelma, barang kadè i simboni kennah ntarar ngo, barang kadè irusiaken kennah ntangkas ngo i seggen. 10:27 Barang kadè Kuruapken taba kènè i sigellap, kennah bagahenken ndènè ngo idi tikan mahar. Barang kadè ikosikken mi pènggelmu, tingtingken nola mo idi. 10:28 Ulang mo kebbiari kènè sindorok memunuh daging, tapi oda merkuasa memunuh tendi. Kebbiari kènè mo Dèbata, simerkuasa memunuh daging bak tendi mi narakka. 10:29 Dua perrik dapet itokor sada sèn, tukasi pè bagidi, sada perrik oda ndorok ndabuh mi tanoh, kum oda pemmettohen Bapamu ni sorga idi. 10:30 Salang bilangen buk sini babo ntakal idi ibettoh ngo karina. 10:31 Kerna nai, ulang kènè mbiar! Mahargaen ngo kènè bai Dèbata asa perrik!" 10:32 "Barang isè menaksiken i hadeppen jelma nterrem, memagahken ia sisinKu, Kusaksiken ma mo ia i hadeppen BapangKu i sorga. 10:33 Tapi barang isè memperso mada sisinKu ia i hadeppen jelma nterrem, Aku pè kupersomada mo ia i hadeppen Bapa i sorga." 10:34 "Ulang mo idokdok atè ndènè merembah damè Aku asa roh mi dunia èn, tapi peraloon ngo. 10:35 Roh aku memmakin asa pehalo ngo anakna mi bapana, berruna pehhalo mi inangna, janah purmaènna pehalo taba simatuana berru. 10:36 Uè, musuh simbelgahna imo denganna sada jabu. 10:37 Barang ise mengkekelengi bapana barang inangna lebbih daripada Aku, oda tau ia mahan sisinKu. Bagi ma kalak simengkekelengi anakna barang berruna lebbih dari pada Aku, oda tau sibagidi gabè sisinKu. 10:38 Kalak siso uè memersan silang dekket mengekutken Aku, oda tau ia gabè sisinKu. 10:39 Barang ise mengkekelengi nggelluhna, kemagoon nggelluh mo ia, tapi simenggiaken ngelluhna kumernaken Aku, ia ngo dapetten kenggeluhen." 10:40 "Barang isè menjalo kènè, Aku ngo sinijalona i sidi. Simenjalo Aku, sipasulakken Aku i ngo nijalona idi. 10:41 Simenjalo nabi, kumarna ia nabi, dapetten upah bagè sijaloon nabi. Simenjalo kalak simengulaken lemmo atè Dèbata, menjalo balesna bagè sinijalo kalak simengulaken lemmo atè Dèbata. 10:42 Barang isè memerèken laè sintèktèk giam bai kalak simerlèa èn, kumarna sisinKu ia, percaya mo kènè kenah ijalo ngo balesna."
11:1 Enggo kessa pul ipernoi Jesus sisinNa si sipuluh dua kalak idi, itadingken mo bekkas i. Laus mo Ia mengajar janah menukutken kata Dèbata soh mi kuta-kuta sinjolmit i si. 11:2 Idengkoh si Johanes Peridiken sienggo terkurung i ngo beritana terrèngèt ulaen Jesus Kristus. Ipasulak mo dèba sisinna mendahi Jesus lako mengkusoken bagèen, 11:3 "Kènè ngo kalakna siniperbagah-bagah sinaing roh i, barang sidèban dèng ngo kupèma kami?" 11:4 Ialoi Jesus mo, "Bagahken mo taba si Johanes sinidengkoh dekket siniidah ndènè: 11:5 Merpendidah nola ngo sipètung, merdalan ngo sinitempuk sigading, malum ngo sipuruun, merpendengkoh ngo si tongkik, balik nggelluh ngo simatè, janah Sukuten Kelluahen bai Dèbata nai isukutken taba kalak sincor. 11:6 Sayur ntua ngo kalak siso mercudalihen menonja Aku." 11:7 Balik kessa sisiin si Johanes idi, iranaken Jesus mo taba sinterrem si lot i sidi, terrèngèt si Johanes nina mo, "Kadè ngo tengennen ndènè tikan laus kènè mendahi si Johanes i kelongoon? Sirambar bulung sinikabangken angin ngo? 11:8 Kadè ngo situhunna dahiin ndènè? Sada anak laki merpakèen merandal kalohon ngo? Kalak simerpakèen bagidi i bages Raja ngo! 11:9 Kadè ngo situhunna naing idahen ndènè mula laus kènè mendahi si Johanes? Sada kalak nabi ngo? Imo tuhu, kudokken mo bai ndènè, belgahen ngo si Johanes asa nabi. 11:10 Ia ngo sinidoken ni ayat sitersurat i Bukku Bibèl, bagèen, 'èn ngo utusenKu, nina Dèbata; Kupesulak ngo ia lebbèen asa ia peliasken dalan baMu.' 11:11 Èngèt mo! Oda lot i suberri dunia èn jelma belgahen asa si Johanes Peridiken! Tukasi pè bagidi kalak sikètèkna i kerajaen Dèbata, belgahen dèng ngo ia asa si Johanes. 11:12 Kessa nai si Johanes mulai menukutken Sukuten Kelluahen bai Dèbata nai soh bagèndari, mbuè ngo kalak mengalo Sukuten Kelluahen i, gabè ipepèol lako mengabin bana. 11:13 Hatoren-hatoren Agama Jahudi sini peddahken si Musa dekket Nabi-nabi i arnia nai soh mi pekiroh si Johanes, karina ngo i memagahken terèngèt sikennah masa. 11:14 Mula percaya kènè mi peddah idi, bettoh kènè mo, si Johanes èn ngo si Elias singgo ibagahken nabi terrèngèt pekirohna. 11:15 Mula merpendengkoh ngo coping ndènè, dengkohken mo! 11:16 Asa kadè mo Kubaingken codinna jelma sibagèndari? Codi ngo kalak i bagè anak-anak sikundul i tengah ndalan; dak dilo-dilo taba denganna sidèbaan. 11:17 'Mergenderrang ngo kami, tapi oda nggèut kènè tumatak! Tangis milangi ngo kami, tapi oda nggèut kènè terèluh!' 11:18 Roh si Johanes puasa ngo ia janah oda nggèut mènum anggur, 'Tapi idokken dèba ngo ia isellapi sètan.' 11:19 Bagèndari roh Anak ni Jelma i, mangan dekket mènum ngo ia, keppè idokken dèba nola mo, 'Tengen mo kalak adoi! Kucul, permabuk, dengan kalak pertunggu belasting janah dengan jelma perdosa.' Tukasi pè bagidi dak merpenganju ngo Dèbata janah terridah ngo penganjuna i arap bahanna." 11:20 Nai isumbiahi Jesus mo nasa kuta siso nggèut mertobat, tukasi pè i sidi buèen ibaing tanda kelengangen. 11:21 "Merjaya mo kono alè Korazim bang kono alè Betsaida! Ukum i kuta Tirus dekket Sidon kin ibaing tanda kelengangen i, bakunè pè peselsel ngo kalak idi janah mertobat ibas dosa-dosana nai, janah memakè pakèen tanda bonek janah memaing abu mi babontakal. 11:22 Èngèt mo, lotiin ngo kalak Tirus dekket Sidon terolih masèh atè Dèbata i Ari Kiamat seggen, ulang pada kono. 11:23 Kènè pè alè Kapernaum! Tah dok atè ndènè ipedates kènè soh mi sorga? Oda! Tapi ibuang ngo kènè mi narakka! Ukum i Sodom kin ngo ibaing tanda kelengangen bagè sinibaing bamu idi, lot dèng ngo nemmuken Sodom i soh bagèndari. 11:24 Èngèt mo! Lotiin ngo Sodom terolih masèh atè tikan Ari Kiamat ulang pada kènè!" 11:25 Tikanna i mersodip mo Jesus, "Alè Pa, Tuhan simengkuasai langit dekket tanoh èn! Mendokken lias atè ngo Aku baMu kerna mboni ngo karinana ibaing Kono ukum taba kalak mpantas janah pandè. Ai pellin taba kalak siso pandè ngo kessa ipacidah Kono. 11:26 Idi mo pesennangken ukur Bapa." 11:27 "Karinana idi enggo mo ipesoh Bapangku taba Aku. Janah sada kalak poda lot menandai Bapa, laènken Anak i dekket kalak sienggo ipetandaken Anak idi Bapai tabasa." 11:28 "Roh mo kènè karinana mendahi Aku kènè sienggo leja janah botongen asa Kupesennang kènè. 11:29 Uèi kènè mo Aku janah guruken kènè mo bangku nai, ai melamlam janah ncerrep merukur ngo Aku, asa dapetten kesennangen Tendi ndènè. 11:30 Ai maing sennang ngo perèntah-perèntahKu janah menahang ngo siKupepersanken bai ndènè."
12:1 I sada ari tikan ari Sabat, mentas mo Jesus arap juma. Enggo mellèhè tikanna i sisinna idi, gabè ipotiki kalak idi mo pagè janah iguguti. 12:2 Idah kalak Parisè kessa mo i, idokken kalak i mo taba Jesus, "Tengen mo! SisinMu i enggo mengelausken hatoren Agama. Iulaken kalak idi ngo siso ndorok ulaenken tupung ari Sabat." 12:3 Ialoi Jesus mo, "Oda nung pana ijaka kènè sinibaing si Daud tikanna mellèhè ia dekket denganna? 12:4 Ibengketti ngo Bages Dèbata, nai ipangan kalak i ngo roti sienggo ipèlèken taba Dèbata. Ukum mengèkutken hatoren agamanta oda ndorok panganen barang isè kum sibagidi, laènken imam-imam. 12:5 Barang tah madèng ngo nung ijaka kènè hatoren Agama nipeddahken si Musa bagèen: Gennep ari Sabat iulaken imam-imam ngo ulanna i Bages Dèbata, tapi oda pella isalahken? 12:6 Perdatèken kènè mo siKudokken èn: lot ngo isèn terbelgahen dari pada Bages Tuhan. 12:7 Tersurat ngo ibas Bibèl: Masèh ni atè ngo siKukellemoken, oda ngo pèlèen pinakan. Mula tuhu-tuhuna kin iantusi kènè kata ènda, pasti ngo oda isalahken kènè kalak siso mersalah. 12:8 Kerna Anak Jelma idi ngo merkuasa taba ari Sabat." 12:9 Itadingken Jesus mo bakkas idi lako laus mi sada bages perguruun. 12:10 Lot mo i sidi sada kalak matè serrap tanganna. Ikusoken kalak simengentip kesalahen i mo taba Jesus, "Norok ngo ndia pemalumken kalak sisakiten tikan ari Sabat?" 12:11 Ialoi Jesus mo, "Barang isè kènè lot kerbona, keppè ndabuh mo kerbo i mi geddung mbages tikan ari Sabat, oda ngo ndia iusahaken sidasa kerbo i peluahken kerbona i i geddung i nai? 12:12 Nai, otang mahargaan dèng ma ngo jelma asa kerbo? Merlapaten ngo i: Ndorok ngo mengurupi jelma tikan ari Sabat." 12:13 Nai idokken Jesus mo taba pertangan matè serrap idi, "Pekustang mo tanganmi." Nai ipekustang mo tanganna, mènter malum mo tanganna i. 12:14 Itadingken kalak Parisè i mo bages perguruun idi, mertuptup mo kalak i lako memmunuh Jesus. 12:15 Ibettoh Jesus ngo enggo merniat jahat kalak Parisè i mendahiSa. Nai laus mo Jesus i bekkas i nai, janah ièkutken jelma nterrem i ngo Ia. Nai ipemalum mo karina kalak simersakit. 12:16 Tapi igerra ngo kalak i asa ulang ibagah-bagahken taba sidèbaan. 12:17 Merkitè idi saut mo sinidokken Dèbata merkitè Nabi Jesaya, 12:18 "Èn ngo utusenKu siKupilih idi, siKukellengi janah lemmo atèngKu. Kuberrèken ngo tendingKu baNa, janah sukutkenenNa ngo ketègerenKu taba karina bangsa. 12:19 Oda nèngè ngo ia merselisih barang mersurak, q2 barang pè mengerana i dalan mbellen. 12:20 Oda nè ngo Ia memenggelken buluh sienggo naing mbohok, janah lampu sienggo mèlep-èlep, oda ngo iènteppi, dak juhap ngo ia sampè mennang keadilen, 12:21 janah karina bangsa ngo mengharapkenSa." 12:22 Nai lot mo kalak merembahken taba Jesus sada kalak sipètung bana pekkak, ikuasai sètan ngo ia. Ipemalum Jesus mo sipètung i janah gabè ndorok kirana janah merpendidah mengolihi. 12:23 Karina kalak simengidahsa lengngang ninganna nina, "Tah èn ngo Anak si Daud sini perbagah-bagah idi?" 12:24 Idengkoh kalak Parisè kessa kata i, ialoi kalak i mo, "Ndorok pè kalak èn mengusir sètan, kumara pengulu sètan imo si Beelzebul enggo memerrèken kuasa baNa." 12:25 Ibettoh Jesus ngo pikiren kalak Parisè idi. Gabè idokken mo taba kalak idi, "Mula merselisih ngo sada kerajaen samah-samahsa, oda ngo ndekkah tahan kerajaen idi. Janah sada kuta barang sada jabu pe mula merrubat barang mersikosomen, lako tumpat mo idi. 12:26 Bagi ma ngo ibas kerajaen Sisètan; mula merselisih ngo pulungen sisada mi pulungen sisada nai, imo tanda-tanda oda sada kata janah lako kimpat mo kalak i oda ndekkah nèngè. 12:27 Idokken kènè nola ma, Kuusir ngo sètan i kumarna kuasa Beelzebul. Mula bagi, bai isè nai nola ngo keppè sisiin ndènè menjalo kuasa lako mengusir sètan? Mula bagi, sisiin ndènè i sendiri ngo kibuktiken kènè salah. 12:28 Asa ukum Aku, Tendi Dèbata ngo memerrèken kuasa bangku lako mengusir sètan. Merlapaten ngo i: Enggo imulai Dèbata kerajaenNa i tengah-tengah ndènè. 12:29 Bakunè kin mo ndorok mbengket mi sada bages simergegoh lako mengerampasi hartana, kum mak lebbèen ièkèti kalak simergegoh i? Nai ipè asa ndorok irampasi hartana idi. 12:30 Barang isè siso kan Aku, alongku mo ia, janah siso rebbak dekket Aku lako pepulungken, mencèdai ulaenKu ngo i. 12:31 Kumarna i, èngèt mo: Nasa dosa dekket nasa rana jahat sienggo iruapken, ndorok dèng ngo isasa. Tapi rana simengelèai Tendi Simbadia, oda nèngè ndorok isasa! 12:32 Barang isè mengeruapken rana mengalo Anak Jelma ndorok ngo iampuni, tapi kalak simengeruapken kata mengalo Tendi Simbadia, mak ndorok nèngè iampuni, bagèndari bang seggen pè." 12:33 "Asa mendè buahna, kennah mendè ngo batangna. Mula oda ngo mendè batangna buahna pè oda ngo mendè. Asa lako menandai mendè barang nggodo sada kayu, nibettoh ngo arap buahna. 12:34 Kalak jahat ngo kènè, bakunè mo kènè ndorok mengeruapken simendè, mula jahat ngo kènè? Ai barang kadè dak nisura-sura i ma ngo ruap i babah. 12:35 Barang isè kalak bujur tong ngo ia mengeruapken simendè ibas ukurna i nai, kerna tuhu ngo bujur ia. Barang isè jahat, dakdak ngo ia mengeruapken kejahaten si turah ibas ukurna jahat idi, kerna dom kejahaten ngo ia. 12:36 Kerna nai, èngèt mo: tikan Ari Kiamat, gennep jelma kennah mertanggung jabab kumarna karina rana siso merguna si niruapkenna. 12:37 Kerna ranamu i ngo ibaing sukat-sukatna, barang tah mersalah barang oda." 12:38 Enggo kessa i, pulung mo deba guru Agama dekket Parisè nina mo, "Guru, sèkel ngo kami naing mengidah, asa ibaing kono tanda kelengangen." 12:39 "Soh mo jahat bak tunggangna jelma si sencundut èn!" nina Jesus, "Kènè jelma jahat mengidoken asa Kubakin tanda kelengangen? Mada! Oda berrèen taba kènè sada tanda kelengangen pè, laènken pellin tanda kelengangen Nabi Jona. 12:40 Ai i beltek ikan mbellen ngo si Jona tellu ari tellu berngin dekkahna. Bagi ma mo Anak Jelma tellu ari tellu berngin i beltek tanoh. 12:41 Luas i ari perhukumen i cènder mo pengisi Niniwe rebbak jelma jaman bagèndari lako mendaba kènè. Ai enggo mertobat kalak Niniwe ibas dosana nai, tikan merjamita si Jona taba kalak idi. Tapi belgahen ngo nisènda bagèndari asa si Jona. 12:42 Luas tikan ari perhukumen, cènder ngo sada raja daberru i nagerri Selatan nai rebbak dekket jelma bagèndari lako mendaba kènè. Ai roh ngo ia i kutana sindaoh nai, pellin lako mendengkohken peddah si Salomo kalak bijak i; tapi belgahen ngo si ni sènda bagèndari asa si Salomo!" 12:43 "Mula itadingken tendi sètan sada kalak jelma, pukpuk ngo kadap tendi sètan i lako menulusi bekkas ngkerrah, mahan pentadinna, tapi oda jupasa. 12:44 Nai idokken mo, 'Mulak mo aku mi bages sienggo kutadingken idi.' Soh kessa mo ia mi bages idi, rumar ngo idapet bages idi, mbersih janah merratur. 12:45 Nai laus mo tendi sètan i mendiloi pitu nai tendi sètan sidèbanna, si lebbih jahat dèng asa ia. Nai ibengketti kalak i mo jelma idi, janah merrian i sidi. Ujungna gabè mparahen mo jelma sibagidi dari pada i mulana i nai. Bagi ma ngo masa bang taba kalak jahat si sincundut ènda." 12:46 Sinderrang mengeranai dèng Jesus dekket jelma nterrem idi, roh mo inangna dekket anggiNa. I ruar ngo kalak icènder ninganna mengusahaken asa ndorok nemmuken mengerana dekket Jesus. 12:47 Sada kalak i jelma nterrem i nai mendokken taba Jesus, "Guru! i ruar ngo bagèndari partua ndè naing mengerana dekket kènè." 12:48 Ialoi Jesus mo, "Isè ngo inangKu? Isè ngo anggingKu?" 12:49 Nai idempakken mo sisinNa ninganna idokken, "Tengen kènè mo, èn ngo inangKu dekket anggingKu. 12:50 Barang isè mengulaken lemmo atè BapangKu si ni sorga i, i ngo anggingku janah i ngo turangku, idi ma ngo inangKu."
13:1 Sidarinkenna idi, itadingken Jesus mo bages idi laus mo ia mo biding tao, janah kundul i sidi. 13:2 Nterrem ngo kalak pulung mencingkoi Jesus. Kerna i mbengket mo Jesus mi sada bungki janah kundul mo ia i bagasen bungki i, tapi ukum jelma nterrem idi mercènderren ngo i biding tao i. 13:3 Nai iajari Jesus mo jelma nterrem i terrèngèt matcam bagè merkitè umpama. "Lot mo sada kalak peruma-uma lako menaburken bennih," nina Jesus mo mentebbennai ajarNa. 13:4 "Tikan isaburken bennih idi, lot mo dèba ndabuh i dalan. Nai roh mo manuk-manuk ipangani mo keri bennih i. 13:5 Lot ma mo dèba ndabuh mi bekkas merbatu, siso pella ngkapal tanohna. Nturah ngo bennih i ndor kerna kurang tanohna. 13:6 Tapi enggo kessa ndates mataniari, males mo pagè sienggo turah idi, nai ngkerrah mo janah matè, kumerna oda mbages uratna mi tanoh i. 13:7 Lot ma mo dèba bennih idi ndabuh mi tanoh merkopi-kopi, makin mbelgah mo kopi-kopi idi, gabè ipeccek mo pagè siturah idi, gabè matè. 13:8 Tapi lot ma ngo bennih idi ndabuh mi tanoh nggabur, nai merbuah mo, janah lot dèba seratus lempit, deba ennempuluh lempit janah dèba nai tellupuluh lempit hasilna." 13:9 Enggo kessa isukutken Jesus umpama idi nina Jesus mo, "Mula lot ngo pènggel ndènè, dengkohken kènè mo i." 13:10 Enggo kessa i roh mo sisiin Jesus janah mengkuso taba Jesus, "Kasa ndia merkitè umpama ko Guru lako mengerana taba jelma nterrem?" 13:11 Ialoi Jesus mo, "Ipergeddo Dèbata ngo asa rusia kerajaen idi pellin kènè ukum mettohsa, oda dekket kalak idi. 13:12 Ai barang isè enggo lot bana, makin mbuè ngo itambahi bana, asa mertinèncuk silot bana i. Tapi barang isè oda lot sadikè milikna, milikna sicituk i pè buaten ngo bana nai. 13:13 Kumarna nai ngo asa merkitè umpama Aku mengerana taba jelma nterrem. Merpendidah ngo nemmu kalak i, tapi tosè ngo bagè kalak siso merpenengen; merpendengkoh ngo nemmu kalak idi, tapi tosè ngo bagè siso merpemeggè, janah oda ma mengantusi. 13:14 Merkitè bagi saut mo bagè sinidokken Nabi Jesaya terrèngèt kalak idi: 'Nina Dèbata: Idengkoh kènè ngho nemmu tapi oda iarti kènè; itengen kènè ngo nemmu tapi oda idah kènè. 13:15 Ai enggo majel pikiren ndènè coping ndènè pè enggo tongkik janah enggo pètung mata kalak i. Asa ulang merpendidah mata kalak i ulang merpendengkoh copingna ulang mengantusi pikirenna asa ulang balik mendahi Aku, nai Kupemmalum kalak i.' " 13:16 "Tapi ukum terrèngèt kènè," nina Jesus dèng ma taba sisinNa, "merlaba olih ngo kènè! Kerna merpendidah mata ndènè, janah merpendengkoh ngo pènggel ndènè. 13:17 Èngèt kènè mo: Mbuè ngo arnia nabi bak jelma pè menguèi Dèbata, sèkel mengidah sini idah ndènè bagèndari. Tapi oda terolih kesempaten kalak idi lako mengidah. Sèkel kalohon ngo kalak i naing mendengkoh bagè sinidengkoh ndènè bagèndari, tapi oda terolih kesempaten kalak idi lako mendengkoh." 13:18 "Dengkohken kènè mo mendè, lapaten umpama terrèngèt sada kalak penabur idi. 13:19 Kalak simendengkoh sukuten terrèngèt Kerajaen Dèbata, tapi oda iarti, kalak i mo bagè bennih sindabuh i dalan. Roh mo si jahat mengerampasi enggo kessa isabur mi bagasen ukurna. 13:20 Bennih sindabuh mi tanoh batu, imo kalak simendengkoh sukuten idi, mènter lolo mo ia menjalo. 13:21 Tapi oda mbages sukuten idi iradum-radumi, gabè oda ndekkah mertahan. Roh kessa taba kalak i simpersuk barang kinidersa kumarna sukuten idi, mènter murtat mono kalak i. 13:22 Bennih sindabuh mi tengah-tengah kopi-kopi i, codi mo i bagè kalak simendengkoh sukuten idi, tapi dak mengkelsohken nggelluh sipat ari idi dekket naing nggelluh mewah. Kerna i gabè terkapit mo sukuten idi ibas ukurna, gabè oda sanga merbuah. 13:23 Ukum bennih sinisaburken mi tanoh nggabur, imo kalak simendengkohken sukuten idi janah iarti. Kalak idi mo merbuah ratraten, dèba seratus kali lempit, dèba ennempuluh kali lempit, dèba nai tellupuluh kali lempit, i bennih idi nai." 13:24 Isukutken Jesus nola ma mo perumpamaan taba jelma nterrem. Nina mo, "Codi ngo Kerajaen Dèbata i bagè sada kalak perjuma-juma menaburken bennih merandal mi jumana. 13:25 I sada berngin sinderrang enggo meddem kalak, roh mo musuh perjuma i menuani isa-isa mi tengah-tengah pagè i, nai mulak mo ia. 13:26 Turah kessa pagè i, makin mbelgah mo janah roh mo rohina taridah nola ma mo isa-isa idi. 13:27 Nai roh mo sigajiin mendahi perjuma i nina mo, 'Tuan, otang bennih selloh ngo isaburken kono mi juma i? Kadè ndia merulah asa tubuh nola isa-isa i juma i?' 13:28 Ialoi mo, 'Musuh i ngo maing i.' Nai nina sigajinna i dèng ma mo, 'Ipaduè ko ngo asa laus kami memerkati isa-isa idi?' 13:29 'Oda', nina, 'Mula irengkati isa-isa idi, gabè dekket nola ngo pagè idi mberkat rebbakken isa-isa idi. 13:30 Belli mo bagi isa-isa idi rebbak tubuh dekket pagè i soh mi perraniin. Kudokken pè taba kalak simerrani i, asa ipepulung lebbèen isa-isa idi, nai rakuti mo asa itutung. Nai pè asa perrani kènè pagè i, janah ibaing mi kebben.' " 13:31 Nai isukutken Jesus nola mo sada perumpamaan taba jelma nterrem i nina mo, "Codi ngo Kerajaen Dèbata mi buah arum ibuat sada kalak janah isuanken mi jumana. 13:32 Buah arum mo sikètèkna nasa buah suan-suanen. Tapi turah kessa mo buahna i mènter ndeppur mo mbellen, janah belgahen ngo ia ibas nasa suan-suanen simerumbut. Gabè merkayu mo ia janah merrohen mo manuk-manuk merrasar mi dahanna." 13:33 Isukutken Jesus nola dèng ma mo umpama sidèban taba jelma nterrem, nina mo, "Codi ngo Kerajaen Dèbata bagè ragi, sinicampurken sada kalak daberru mi nditak empatpuluh litèr, asa sanga kambang karinana." 13:34 Karinana idi ipeddahken Jesus taba jelma nterrem merkitè umpama. 13:35 Saut mo sinidokken nabi bagèen: "Merkitè umpama ngo Aku mengerana taba kalak i, Kusukutken ngo siso nibettohna kessa nai hana dunia èn." 13:36 Enggo kessa i itadingken Jesus mo jelma nterrem i. Nai idapetken sisinNa mo ia, idokken mo, "Guru! bagahken mo bai nami lapaten umpama terrèngèt isa-isa ni kellang-kellang pagè idi." 13:37 Ialoi Jesus mo, "Simenaburken bennih merandal idi imo Anak Jelma. 13:38 Ukum juma idi imo dunia ènda. Bennih merandal idi imo kalak sienggo gabè ginemgem Kerajaen Dèbata. Janah isa-isa idi imo kalak si kan Sibolis. 13:39 Musuh simenaburken bennih isa-isa i, imo Sibolis. Tikan perraniin, imo Ari Kiamat, janah kalak simerrani idi, imo malaèkat-malaèkat. 13:40 Bagè isa-isa sinipepulung janah itutung mi api, bagi ma mo tikan Ari Kiamat seggen. 13:41 Anak Jelma, pasulakken malaèkatNa lako pepulungken ibas ummatNa nai, karina simengèta-èta maing merdosa, dekket karinana jelma sidèbanna simemaing kejahaten. 13:42 Ibuang mo kalak idi karinana mi api mergollah-gollah, i sidi mo kalak idi derru-derru kumarna mpiahna. 13:43 Tapi ukum kalak simengulaken lemmo atè Dèbata, mercuhaya ngo bagè mataniari i Kerajaen Dèbata. Kumarna idi dengkohken mo mendè-mendè, mula lot dèng ma ngo pènggel ndènè lako mendengkohken!" 13:44 "Codi ngo Kerajaen Dèbata bagè harta maharga itanem mboni ibas tanoh, nai jumpa dèba mo i, janah itanem nola balik mi bagasen tanoh i. Kessa i kumarna sampang atèna, laus mo ia mendèaken karina hartana, balik nola mo ia, itokor mo tanoh idi." 13:45 Codi ngo Kerajaen Dèbata bagè sada kalak pertiga-tiga menulusi buradda simahargana. 13:46 Jumpasa kessa buradda merandal kalohon, menter laus mo ia mendeaken karina hartana, nai itokor mo buradda sisada i. 13:47 "Codi ma ngo Kerajaen Dèbata bagè jala sinisampakken mi tao, nai dapetsa mo ikan mermatcam bagè. 13:48 Dom kessa jala idi, iruah perrikan i mo jala i mi darat. Nai kundul mo perrikan idi, ipilihi mo ikan i mengèkutken matcamna. Simendèna ipepulung ngo mi ucangna, tapi siso mendè idi iambongken ngo. 13:49 Bagi ma ngo tikan Ari Kiamat idi, isirang malaèkat-malaèkat i mo jelma jahat tarap jelma simengulaken lemmo atè Dèbata nai. 13:50 Nai ibuang mo jelma jahat idi mi api mergollah-gollah. I sidi mo kalak i derru-derru kumarna mbernitna." 13:51 "Iarti kènè ngo karinana idi?" nina Jesus. "Kuarti kami ngo Guru!" nina kalak idi. 13:52 Nai nina Jesus mo, "I ngo sebabna, nasa guru agama sienggo gabè ginemgem Kerajaen Dèbata, codi bagè sada kalak sidasa bages mengkaruarken barang-barang maharga i gudangna nai, barang rimbaru dekket sienggo malè." 13:53 Enggo kesa pul isukutken Jesus perumpamaan ndai karina, itadingken mo bekkas idi, 13:54 balik mo ia mi kutaNa. Mengajar mo Ia i sidi i bages perguruun. Bengap kalohon ngo kalak mendengkoh peddahna i. Idokken kalak idi mo, "I dikè nai ndia dapetsa pengajaren bagidi hejjina? Janah i idikè nai Ia menjalo kuasa lako memaing tanda kelengangen? 13:55 Otang dukak tukkang kayu ngo Ia? Otang si Maria ngo inangNa? Janah anggina si Jakobus, si Josep, si Simon dekket si Judas? 13:56 Janah otang tading i kuta èn ngo dekket turangna? Idikè nai ndia ibettoh karinana idi?" 13:57 Gabè oda ijalo jelma ni sidi Jesus. Nai idokken Jesus mo taba kalak idi, "Ukum nabi, ihormati ngo ukum i kuta ndèba, tapi ukum i kutana dekket i sapona, oda ihormati." 13:58 Kemulihkenna i, oda pella sadikè ibaing Jesus tanda kelengangen i sidi, kerna oda percaya kalak i.
14:1 Sinderrangna i si Herodes ngo raja i Galilea, janah idengkoh berita terrèngèt Jesus. 14:2 Idokken si Herodes mo taba pugabèna, "Kenah si Johanes Peridiken singgo matè idi ngo kalak ènda, balik nggelluh! Kumarnaken nai ngo asa bagidi kuasana i." 14:3 Kerna simadèngkenna i idokken si Herodes ngo menangkup si Johanes, ièkèti janah ikurung. Ibakin si Herodes pè bagi, kumarnaken si Herodias ngo imo purkat i si Pilipus anggina i. 14:4 Ai nung ngo idokken si Johanes bai si Herodes, "Oda ndorok ialihken ko si Herodias i! Ai mengelausi hatoren agama ngo i." 14:5 Ukum situhunna merngetnget ngo atè si Herodes naing memunuh si Johanes, tapi mbiar ngo ia taba jelma nterrem, ai Nabi ngo si Johanes idi dok atè jelma nterrem. 14:6 Tikan memestaken ulang tahunna si Herodes, tumatak mo berru si Herodias i hadeppen sitampak pulung i. Lolo kalohon mo si Herodes mengidah tatakna idi. 14:7 Gabè merjanji mo si Herodes tabasa merdengan sumbiah, nina barang kadè sambing pè ipido ukurna kennah iberrèken bana! 14:8 Kumarna iajar-ajari inangna, gabè idokken simerbaju i mo, "Berrèken mo bangku takal si Johanes Peridiken bagèndari i babo pinggan!" 14:9 Mendengkoh pengidonna idi, bonek kalohon mo si Herodes. Tapi kumarna enggo merjanji ia i hadeppen sitampak pulung i, idokken mo asa ipesaut pengidoon simerbaju i. 14:10 Ipasulak mo pasulakenna mi kurungen lako memancong takal si Johanes. 14:11 Iembahken mo takal si Johanes idi i babo pinggan janah iberrèken mo taba simerbaju i. Nai iembah simerbaju i mo taba inangna. 14:12 Enggo kessa i, roh mo sisiin si Johanes, ibuat mo bangkè si Johanes i lako mengkuburkensa. Laus mo kalak i ibagahken mo simasa idi mendahi Jesus. 14:13 Idengkoh Jesus kessa berita idi, itadingken mo bekkas i merbungki sadasa lako laus mi bekkas melongo. Tapi ibettoh jelma nterrem ngo barang mikè ia laus. Jadi kalak idi pè itadingken ma mo kutana gennep, lako mengèkutken Jesus kan dalan darat. 14:14 Susur kessa Jesus i bungki i nai janah iidah mo jelma nterrem i, gabè masèh mo atèna midah kalak i. Nai ipemalum mo kalak si sakiten ibas kalak i nai. 14:15 Cibonkenna i, roh mo sisiin Jesus mendokken tabaSa, "Enggo ramben ari janah melongo ngo bekkasta ènda. Lotiin mo ipasulak Guru i kalak idi laus menokor pangaan mi kuta sinjolmitna asa lot panganna." 14:16 "Oda pella laus kalak i," nina Jesus, "berrè kènè mo kalak idi mangan." 14:17 "Pellin lima ngkabuah ngo kessa lot roti bai nami dekket dua ikan!" nina sisiin Jesus. 14:18 "Embah kènè mo misèn!" nina Jesus. 14:19 Nai idokken mo jelma nterrem i kundul i babo dukut-dukut i. Nai ibuat mo roti silima dekket ikan sidua ngkabuah idi, itarè mo mi langit janah idokken melias atè taba Dèbata. Kessa i, ipasu-pasu mo roti dekket ikan idi. Nai ipenggelli mo, ipemberrèken taba sisinna asa ipellaken taba jelma nterrem i. 14:20 Mangan mo karinana kalak i janah bessur. Kessa pul mangan, ipepulung sisiin i mo iba-iba roti dekket ikan idi dom sipuluh dua barunjat nai. 14:21 Kalak simangan roti i buèna kira-kira lima ribu kalak, laènken daberru dekket anak-anak. 14:22 Enggo kessa i idokken Jesus mo sisinNa mbangkit mi bungki asa perlebbè kalak i suberrang turèpar tao. Ukum Jesus podi dèng ngo i bekkas idi lako pasulakken jelma nterrem idi molih. 14:23 Enggo kessa laus jelma nterem i menangkeng mo Jesus mi sada uruk lako mersodip i sidi. Enggo mo temmulai gellap ari, tapi i sidi dèng ngo Jesus sadasa. 14:24 Nderrang bagidi, keppèken bungki nitompang sisiin Jesus enggo mo ndaoh i tengah-tengah tao. Tumiling-tiling ngo bungki idi ibaing galombang, kumarna mengalo angin ngo tujuen bungki i. 14:25 I kellang-kellang pukkul tellu bak pukkul ennem siceggen, idapetken Jesus mo kalak idi, merdalan i babo laè i. 14:26 Idah sisinNa kessa Ia merdalan i babo laè i, tersengget kalohon mo kalak idi ninganna buradan. 14:27 Tapi nina Jesus mo, "Mènak mo kènè! Aku ngo i! Ulang kènè mbiar!" 14:28 Nai nina si Petrus mo, "Mula tuhu-tuhu ngo Jesus kono, dokken mo aku roh mendahi kono Tuhan janah merdalan i babo laè i." 14:29 "Roh mo kono," nina Jesus. Nai susur mo si Petrus i bungki i nai, merdalan i babo laè idi lako mendapetken Jesus. 14:30 Tapi iakapken si Petrus kessa mo penempul angin nderras i tao idi, mbiar mo ia, gabè lenneng mo, "Tuhan, urupi mo aku!" nina tenggo si Petrus. 14:31 Mènter idoroken Jesus mo tanganNa lako menangkupsa. Nai idokken Jesus mo, "Kurang percaya ngo kono Petrus, kasa ganggu kono?" 14:32 Nai mbangkit mo kalak i duana mi bungki i, angin i pè ndong mo. 14:33 Isembah sisiin silot i bungki i mo Jesus. Nina kalak i mo, "Tuhunna ngo kono Tuhan Anak Dèbata!" 14:34 Soh kessa kalak i mi suberrang tao i, mi darat mo kalak i i Genesaret. 14:35 Idah kalak i kessa Jesus ngo siroh i, ipembagahken kalak i mo berita idi mi kuliling kuta kalak idi. Iembah kalak i mo karina simersakitna mendahi Jesus. 14:36 Ipidoken kalak i mo tabaSa, mula ndorok asa ijamah kalak i giamken punca jubahNa. Nai malum mo nasa simenjamah jubahNa idi.
15:1 Tikan sikali lot mo roh kalak Parisè dekket guru-guru Agama Jahudi i Jerusalem nai mendahi Jesus. Ikusoken kalak idi mo taba Jesus bagèen: 15:2 "Kasa ilausi sisinMu adat sienggo itetapken empungta? Ai sinderrang naing mangan kalak idi, oda ngo iborih tanganna lebbèen bagè sinikecemmalken adatta!" 15:3 Ialoi Jesus mo, "Nai kènè kasa ilausken kènè kata Dèbata, pellin kumarnaken menguèi adat empung ndènè? 15:4 Ai idokken Dèbata ngo, 'Pesangap mo partuamu,' ai 'Barang isè mendokken rana merroha taba partuana, kennah matè ngo ihukum kalak sibagidi.' 15:5 Keppè iajarken kènè ngo bagèen: Mula idokken dèba taba partuana, 'Barang kadè naing bai partuangku kin, enggo mo kupèlèken i taba Dèbata, 15:6 nai oda nè pella ipesangap kalak sibagidi partuana.' Kumarnaken adat empung ndènè idi, gabè oda iparduliken kata Dèbata? 15:7 Èo, kènè perbuah ringadar! Tuhu kalohon ngo bagè sinidokken nabi Jesaya terrèngèt kènè sinderrang nidokkenna: 15:8 'Bagèen ngo idokken Dèbata: Ipesangap kalak ènda ngo Aku pellin i babah sambing, ukum ukurna ndaoh ngo bangku nai. 15:9 Oda lot lapatenna isembah kalak i Aku, karna hatoren agama sinipeddahken kalak i gabè hatoren sinibaing jelma ngo.' " 15:10 Nai idilo Jesus mo jelma nterrem i roh ndessing tabaSa, nai idokken mo taba kalak idi; "Dengkoh janah peratè-atèken kènè mo mendè-mendè. 15:11 Ukum simbengket arap babah jelma, oda ngo meronah ia ibakin, pellin sikaruar arap babah ngo simemaingken ia meronah." 15:12 Nai roh mo sisiin Jesus, "Ibettoh kono ngo Guru tikan idokken Kono ranaMu ndai, ai gabè ncio ngo atè kalak Parisè?" 15:13 Ialoi Jesus mo, "Nasa suan-suanen siso ni suan BapangKu ni sorga, kennah irengkat ngo. 15:14 Ulang pella pikirken kènè kalak Parisè idi. Ai ekuten pètung ngo idi, janah mula iuluken sipètung ngo jelma pètung, gabè rebbak ndabuh ngo kalak i mi parik." 15:15 Idokken si Petrus nola mo, "Bagahken mo bai nami umpama ndai Guru!" 15:16 Ialoi Jesus mo, "Petrus, lalap dèng ngo oda iarti kono? 15:17 Oda ngo ibettoh kono simasuk mi babah jelma gabè ndabuh mo i mi beltek, nai karuar nola i dagingna nai? 15:18 Tapi ukum sikaruar i babah jelma nai, siturah ibas ukurna nai ngo i, sibagidi mo memaing meronah jelma. 15:19 Ai ibagasen ukur nai ngo tubuh pikiren-pikiren jahat, maing kalak memmunuh, merlangkah julu meddem, rorang, menangko, mengerampok, merluap dekket mengkilang. 15:20 Sibagidi ngo memmaing jelma merronah. Tapi ukum mangan kumarna tanganna oda iborih, oda ngo memmaing meronah jelma!" 15:21 Nai laus mo Jesus i sidi nai mi gembar kuta Tirus dekket Sidon. 15:22 Roh mo sada kalak daberru Kanaan si ni sidi i mendahi Jesus ninganna dilo-dilo, "Tuhan, Anak si Daud, masèh mo atèmu midah aku! Isellapi sètan ngo berrungku. Mpiah kalohon ngo iakap." 15:23 Laju ngo oda ialoi Jesus daberru i. Nai idapetken sisinna mo Jesus lako mengidoken, "Guru pesulak mo daberru i laus. Ai menggutturi ngo ia i podinta!" 15:24 Ialoi Jesus mo, "Pellin taba kalak Israel siso menguèi lemmo atè Dèbata sambing ngo kessa Aku ipasulak." 15:25 Tukasi pè enggo idokken Jesus bagidi, tapi dak tong ngo roh daberru idi mendahiSa, nai sujud mo ia mersembahSa ninganna idokken, "Tuan urupi mo aku." 15:26 Tapi ialaoi Jesus mo, "Oda ngo selloh buaten pangaan anak-anak niberrèken nola taba biang." 15:27 "Tuhu ngo i Tuan," nina daberru i, "Tapi ipangan biang ngo iba-iba pangaan sindabuh i mèja empungna nai." 15:28 Nai idokken Jesus mo tabasa, "Mbelgah ngo kepercayaenmu i nangè! Saut mo bagè nipergeddomu i!" Mènter gejapkenna i mo malum iakap berruna i. 15:29 Itadingken Jesus mo bekkas i, janah merdalan mo Ia menepi-nepi tao Galilea. Nai ipenangkengi mo sada uruk janah kundul mo Ia i sidi. 15:30 Mbuè ngo kalak merrohen mendahiSa merembah kalak sikèpang, sipètung, nitempuk sigading, sipekkak, janah mbuè dèng ma kalak simersakit. Ipenggamparken mo kalak i mi gembar Jesus, nai ipemalum Jesus mo kalak i. 15:31 Bengngap kalohon ngo jelma nterrem idi, idah kalak i kessa ndorok mongkam kalak sipekkak, sikèpang gabè njerdik, nitempuk sigading gabè merdalan, janah kalak pètung gabè merpendidah mengolihi. Nai ipepoji-poji kalak i mo Dèbata ni kalak Israel. 15:32 Enggo kessa i, idiloi Jesus mo sisinNa, idokken mo taba kalak i, "Masèh ngo atèngKu midah jelma nterrem èn. Enggo tellu ari dekkahna kalak i i sèn rebbakken Aku, janah bagèndari oda lot nèngè mahan panganna. Oda kubelli kalak i mellèhè lako molih, ulang gabè rapar kalak i i tengah ndalan." 15:33 Ikusoken sisinNa i mo taba Jesus, "Idikè nai mo dapet kita pangaan i rambah èn, cukup bai jelma nterrem èn?" 15:34 "Piga ngo roti ndènè?" nina Jesus taba kalak i. "Pitu ngo," nina kalak idi, "janah ikan cituk." 15:35 Nai idokken Jesus mo jelma nterrem i kundul i babo tanoh idi. 15:36 Ibuat Jesus mo roti pitu ngkabuah idi dekket ikan idi, nai idokken mo mejalo metangkup taba Dèbata, enggo kessa i ipenggelli mo roti idi dekket ikan idi, ipemberrèken mo taba sisinNa asa ipembagiken taba jelma nterrem idi. 15:37 Mangan mo kalak i karina janah bessur. Nai ipepulung sisiin i mo iba-iba roti dekket ikan i, buèna pitu baka dom-dom. 15:38 Buèna anak laki si mangan idi empat ribu kalak, laènken daberru bak anak-anak. 15:39 Nai ipasulak Jesus mo jelma nterrem i balik. Ukum Ia ibengketti mo sada bungki lako laus mi nagerri Magadan.
16:1 Lot mo roh barang piga kalak Parisè dekket Sadusè mendahi Jesus naing pedapetkenSa. Ipido kalak i mo asa ibaing Jesus tanda kelengangen, magahken Ia roh bai Dèbata nai. 16:2 Ialoi Jesus mo, "Mula enggo bon ari, janah mbara langit i, idokken kènè mo, 'leggo mo ari.' 16:3 Janah mula siceggen idokken kènè ngo, 'Oo, roh ngo pana udan sidari èn, ai nggondem ngo.' Ndorok ngo kènè mengeramalken ari merkitè menengen langit, keppèken tanda-tanda jaman oda ndorok iramalken kènè." 16:4 "Jahat janah tunggangna i jelma jaman bagèndèen. Ipido kènè ngo Aku maing tanda kelengangen. Sada tanda kelengangen poda pacidahen bai ndènè, laènken tanda Nabi Jona." Enggo kessa idokken bagi, laus mo Jesus itadingken mo kalak i. 16:5 Soh kessa sisiin i mi suberrang tao, ibettoh kalak i mo enggo lupa keppè kalak i merembah roti. 16:6 Idokken Jesus mo taba kalak i, "Mermanat mo kènè meradepken ragi ni kalak Parisè dekket Sadusè." 16:7 Mendengkoh rana Jesus idi, mengerana mo sisiin i samahsa; "Kumarna oda lot siembah roti, memaingken asa bagi ranana". 16:8 Ibettoh Jesus ngo siniranaen kalak idi, jadi idokken nola mo, "Kasa mengerana kènè terrèngèt oda lot roti? Oo, kènè sikurang percaya! 16:9 Laju dèng mak iarti kènè? Oda ngo ièngèt kènè si lima roti Kupenggelli lako memerèken mangan lima ribu kalak? Piga baka lahna roti siso kerri ipepulung kènè? 16:10 Janah bagi ma si pitu roti taba si empat ribu kalak i? Idi pè oda ngo ièngèt kènè ma? Piga baka roti iba-iba sinipepulung ndènè? 16:11 Kasa oda iarti kènè, kudokken ranangku idi taba kènè oda ngo terrèngèt roti? Mermanat mo kènè taba ragi kalak Parisè dekket Sadusè." 16:12 Nai iarti sisiin mo maksud Jesus, idokken Jesus pè mermanat terrèngèt ragi nipakkè mahan roti, tapi terrèngèt peddah Parisè dekket Sadusè ngo perlu mermanat. 16:13 Nai laus mo Jesus mi nagerri sindessing mi kuta Kaisarèa Pilipi. Ikusoken Jesus mo i sidi taba sisinNa, "Isè ngo Anak Jelma idi idokken jelma nterrem?" 16:14 Ialoi sisiin idi mo, "Lot dèba mendokken si Johanes Peridiken; lot ma dèba mendokken si Elias, sidèban ma mendokken si Jeremia, barang sada ibas nabi-nabi i nai." 16:15 "Tapi ukum kènè isè ngo, Aku dok atè ndènè?" 16:16 Ialoi si Simon Petrus mo, "Kono ngo Raja Sipaluah siniperbagah-bagah Dèbata. Kono ngo Anak ni Dèbata singgelluh i." 16:17 Merlaba olih ngo ko alè Simon anak si Jona!" nina Jesus. "Ai oda ngo jelma memagahken idi bamu, tapi BapangKu ni sorga i ngo. 16:18 Kernana i èngèt mo mendè-mendè alè Petrus. Batu ngkong ngo kono, janah i babo batu cendi èn mo Kupecènder kuriangKu, siso ndorok itakiken barang isè pè, barang tah kematèen pè! 16:19 Kuberrèken mo bamu anak konci Kerajaen Dèbata. Barang kadè irarang kono i babo tanoh ènda, irarang ma ngo idi i sorga. Barang kadè ibennarken ko i babo tanoh ènda, ibennarken ma ngo idi i sorga." 16:20 Nai ipernoi Jesus mo sisinNa idi asa ulang ibagah-bagahken barang bai isè pè, memagahken Ia ngo Raja Sipaluah niperbagah-bagah Dèbata. 16:21 Mungkah i sidi nai, tompel mo ibagahken Jesus taba sisinNa, "Kennah laus ngo Ia mi Jerusalem, janah menggong mbuè kinipersuk bai pengulu-pengulu, imam-imam ekuten, dekket guru-guru agama. Ibunuh mo Ia tapi ipekèkè nola ngo iari petelluken. 16:22 Iarahken si Petrus mo Jesus mi lambung idi, ipesèngèt si Petrus mo Ia nina mo, "Katerra pè ipedaoh Dèbata mo sibagidi bamu nai Tuhan! Ulang mo terjadi i bamu." 16:23 Itengen Jesus mo si Petrus, ninganna idokken, "Laus mo kono i gembarKu nai bolis! Dak ihalang-halangi ko ngo Aku. Ai sura-sura jelma ngo ipikiri kono oda ngo sura-sura Dèbata!" 16:24 Enggo kessa bagidi idokken Jesus mo taba sisinNa, "Barang isè mengèkutken Aku, kennah ilupaken mo dirina, ipersan mo silangna, nai ièkutken mo Aku. 16:25 Ai barang isè mengkekelengi kessahna, ia ngo kembalangen kessah. Tapi barang isè kembalangen kessah kumarna Aku, ia ngo mengerasaken kenggelluhen soh mi amman sumendah. 16:26 Kadè mo gunana mula pè suberri dunia èn milikna, ukum mago ngo tendina? Tentu oda lot labana. Ai oda ndorok itukarken dekket barang kadè pè kenggelluhen? 16:27 Ai roh nè mo Anak ni Jelma merdengan Kuasa BapaNa, rebbak dekket malaèkat-malaèkatNa. I sidi mo balessenNa taba gennep jelma rembang mi sinibahanna. 16:28 Èngèt mo, lot ngo ipas kènè simertumpu èn nai, oda matè dèng ia ukum makdèng idah ia Anak Jelma idi roh bagè Raja."
17:1 Enggo kessa ennem ari nola, iarahken Jesus mo si Petrus, si Jakobus dekket si Johanes, simerkaka merkuanggi i mi babo delleng ndates. Pellin kalak i ngo kessa i sidi. 17:2 Nai mènter mobah mo rupa Jesus idah kalak i, abèNa mercala-cala bagè mataniari janah pakkènNa merkillok-killok bagè cuhaya. 17:3 Nai idah kalak i sitellu nola mo si Musa dekket si Elias mengeranai dekket Jesus. 17:4 Idokken si Petrus mo taba Jesus, "Tuhan, merasa kaloon siakap i sènda, mula uè Kono Tuhan, asa kupekkadè i sènda tellu sapo-sapo, sada bamu, sada bai si Musa, janah sada nai bai si Elias." 17:5 Sinderrang mongkam dèng si Petrus idi, roh mo hembun nterrang kalohon menangkemmi kalak idi janah terdengkoh mo sora i hembun idi nai, "Èn ngo AnakKu siKukekelengi, lemmo ngo atèngKu midahsa. Dengkohken kènè mo Ia!" 17:6 Idengkoh sisiin Jesus kessa mo sora idi, buradan mo kalak idi, sanga tangkep kalak i mi tanoh. 17:7 Tapi roh mo Jesus menjamah kalak i, "Kèkè mo kènè" nina, "Ulang kènè mbiar". 17:8 Kèkè kessa mo kalak i, sada kalak poda idah nèngè i sidi, laènken pellin Jesus nai ngo kessa. 17:9 Tikan mengencuah kalak i i delleng i nai, ipernoi Jesus mo kalak idi, "Ukum mak dèng balik nggelluh mengolihi Anak ni Jelma idi, ulang lebbè bagah-bagahken bai barang isè pè sini idah ndènè ndai." 17:10 Nai ikusoken sisinna mo taba Jesus, "Kasa idokken guru-guru agama Jahudi roh ngo nina lebbè si Elias?" 17:11 Ialoi Jesus mo, "Tuhu ngo lebbèen roh si Elias janah kennah ihantari ngo karinana. 17:12 Tapi kodokken mo taba kènè, enggo roh si Elias, tapi oda itandai dèba ia; lemmo-lemmo kalak i ngo ibaing tabasa. Bagi ma ngo bang Anak jelma idi ibaing kalak i." 17:13 Nai iarti sisiin idi mo, si Elias nidokkenNa idi, imo si Johanes Peridiken. 17:14 Soh kessa mo kalak i mendahi jelma nterrem idi, roh mo sada kalak anak laki, mènter sujud i hadeppen Jesus. 17:15 Nina mo, "Guru, masèh mo atèMu taba anakku i. Ai solpetten ngo ia. Mula menemboh solpetna idi, mènter oda nèngè ngo ibettoh jèhè juluna, ai nggati ngo ia onjem mi api, janah sipata mi laè. 17:16 Enggo ngo kutaruhken nemmu mendahi sisinMu i, tapi oda terpemalum kalak i." 17:17 Ialoi Jesus mo, "Nong, soh mo iakap kènè i! Tuhu-tuhu ngo kènè siso percaya janah enggo salah kalohon. Kennah sadikè dekkah nai Aku rebbak dekket kènè janah sobar mengidah kè? Embahken kè mo anak i mi sèn." 17:18 Nai ipelaus Jesus mo sètan i karuar. Janah karuar mo sètan-sètan i, nai mènter njuah mo iakap anak i gejapkenna i. 17:19 Nai idapetken sisiin i mo Jesus sadaSa, ikusoken mo tabaSa, "Guru, kasa oda terpelaus kami sètan idi?" 17:20 Ialoi Jesus mo, "Kumarna kurang percaya ngo kènè. Èngèt mo! Kum lot ngo kepercayaen ndènè nasa buah arum, ndorok ngo dokkonen ndènè bai delleng adèi, 'Mompat mo kono i sèn nai mi sadona' Kennah mompat ngo delleng i, janah kadè poda mak ndorok bakinen ndènè! 17:21 Tapi ukum sètan si samatcam èn, pellin mersodip dekket puasa ngo kessa ndorok mengusir idi." 17:22 Sinderrang pulung sisiin Jesus i Galilea, idokken Jesus mo taba kalaki, "Oda ndekkah nèngè, ipessoh mo Anak Jelma i bai jelma. 17:23 Ibunuh kalak idi mo ia tapi kèkè nola ngo Ia i ari petelluken." "Nai mellui kalohon mu ukur sisiin idi." 17:24 Tikan soh Jesus dekket sisinNa mi Kapernaum, roh mo simertunggu belasting mi bages Jerro mendahi si Petrus lako mengkusoken, "Igarar Gurumu ngo gugu mi Bages Jerro barang oda?" 17:25 Ialoi si Petrus mo, "Igarar ngo!" Balik kessa mo si Petrus, tikan madèng mongkam ia, idokken Jesus mo mbangsa, "Simon, bakunè ngo dok atèmu? Isè ngo kenah menggarar cokè barang gugu bai raja-raja dunia èn? Rayat ngo barang sidèban?" 17:26 "Kalak sidèban ngo," nina si Petrus. "Mula bagi ngo," nina Jesus nola ma, "rayat oda pella menggarar. 17:27 Tapi ulang ncio ukur kalak i sibakin. Laus mo ko mengkail mi tao. Buat mo ikan siperlebbè sidapet kono i. Ibagasen babah ikan idi, jumpa kono mo kèpèng, cukup menggarar gugunta sidua. Buat mo kèpèng idi, nai garar mo taba kalak idi gugu mi Bages Jerro."
18:1 Sinderrangna i roh mo sisiin i mendahi Jesus janah ikusoken mo, "Isè ngo simbelgahna i Kerajaen Dèbata?" 18:2 Nai idokken Jesus mo roh sada kalak anak-anak, idokken mo ia cènder i lebbè-lebbè kalak idi. 18:3 Idokken Jesus mo, "Èngèt mo! Mula lot perrobahen ndènè janah tosè bagè anak-anak, baru pè asa ndorok kènè mbengket mi Kerajaen ni Dèbata. 18:4 Kalak simbelgahna i Kerajaen Dèbata, imo kalak sipeteruhken dirina janah tosè bagè anak-anak idi. 18:5 Asa, barang isè menjalo anak-anak sibagèn kumarnaken Aku, dosken Aku ngo sinijalona i sidi." 18:6 "Barang isè memaing sada kalak ibas sikèdèk ènda nai gabè oda nè percaya taba Aku, lotiin mo igantungken batu penggilingen mi kerahongna lako mengelennengkensa mi laut mbages. 18:7 Merjaya mo dunia ènda, kerna mengèla jelma lako merdosa. Dak tong ngo lot sibagidi, tapi merjaya mo kalak simemaingsa." 18:8 "Mula tanganmu barang nèhèmu memaing ko merdosa, gettap mo janah pitakken. Lotiin mo ko nggelluh rebbak Dèbata, oda i sidi serrap tanganmu barang nèhèmu, ulang pada bolet karina sendihimu ibuang mi narakka. 18:9 Janah mula matamu memaing kono merdosa, poldit mo i janah pitakken. Lotiin mo kono nggelluh rebbak Dèbata mermata sada, ulang pada ibuang mi narakka rebbak duana." 18:10 "Abas! Ulang pellèa kènè barang apaina ibas sikèdèk èn nai. Kerna èngèt mo, ai dak i hadeppen BapangKu si ni sorga idi ngo malaèkat-malaèkatna." 18:11 Kerna roh pè Anak Jelma, lako peluahken kalak si laling ngo. 18:12 "Bakunè ngo dok atè ndènè? Umpamana lot sada kalak merbiri-biri serratus, nai mbalang mo sada biri-birina i, bakunè ngo baingen sidasa i? Otang itadingken mo biri-biri sibahpuluh sibah i jampalen, lako menulusi biri-biri si laling i. 18:13 Janah mula jumpasa nola biri-biri i, kum katèngKu kennah loloon ngo ia mengidah biri-biri sisada i, ulang pada sisibahpuluh sibah siso laling i. 18:14 Bagi ma ngo Bapa ndènè ni sorga i, oda toko atèna mula lot ibas singkèdèk èn nai gabè laling." 18:15 "Mula merdosa denganmu meradepken kono, dahi mo ia, bagahken mo kesalahenna. Baing mo bagidi sipsip pellin kè sidua sambing. Mula iuèi ranamu, merhasil mo kono merdenganken denganmu i mengolihi. 18:16 Tapi mula oda ngo, arahken nola mo denganmu sidèban sada barang dua kalak nai. Ai tersurat ngo ibas Bibèl; nasa tukas kennah dua barang tellu kalak saksi." 18:17 Mula bagidi pè oda ma terjalosa sipesèngèt kalak idi, bagahken mo mi kuria. Janah mula oda ma terjalosa sipesèngèt kuria i, ètong mo ia bagè sada kalak siso menandai Tuhan barang bagè sada kalak pertunggu belasting." 18:18 "Èngèt kènè mo èn, "Barang kadè irarang kènè i dunia èn, irarang ma ngo idi i sorga, barang kadè ibennarken kènè i dunia ènda, ibennarken ma ngo idi i sorga. 18:19 Janah èngèt kènè ma mo: Mula lot dua kalak merdos atè kènè lako menodipken barang kadè sambing, iuèi BapangKu ni sorga i ngo sodipna idi. 18:20 Kerna mula lot dua barang tellu kalak rebbak tumpu kumernaken Aku, i tengah-tengah kalak idi ngo Aku." 18:21 Nai roh mo si Petrus mendahi Jesus lako mengkusoken, "Tuhan piga kali ngo ndorok kuampuni denganku mersalah taba aku? Sanga ngo pitu kali?" 18:22 Ialoi Jesus mo, "Èngèt mo! Oda ngo pitu kali, tapi soh pitupuluh kali pitu ngo! 18:23 Kerna codi ngo Kerajaen Dèbata bagè sada kalak Raja naing merrètong utang-utang naposona. 18:24 Tikan imulai merrètong i, lot mo ibas naposo i nai iembah mi hadeppenna. Naposo èn merutang merjuta-juta, 18:25 janah maknè tergararsa utangna idi. Idokken raja i mo asa idèaken nasa milikna dekket dukak-dukakna bak sinibagesna pè, asa lot lako menggarar utangna idi. 18:26 Kumarna nai, mersembah merkuraja mo naposo i taba raja i lako mengidoken, 'Tuan, pesobar mo lebbè midah aku naposomen, kugarar pè karinana utangku idi.' 18:27 Nai masèh mo atè Raja i midahsa, gabè iampuni mo ia janah patè mo utangna i karinana. 18:28 Tapi karuar kessa mo naposo ndai, pesimbak mo ia dekket sada kalak denganna naposo simerutang bana barang piga-piga ribu. Itangkup mo dengana i, mènter ipokkik mo, 'Garar karina utangmu i bangku!' 18:29 Nai mersembah merkuraja mo denganna i ninganna mengidoken, 'Sobar mo ko lebbè oè, kugarar pè karina utangku idi!' nina. 18:30 Tapi oda isarihken naposo i pengidoon denganna idi, sampè igarar utangna idi. 18:31 Nai idah denganna naposo sidèbanna i kessa mo simasa i, mellui mo atè kalak i, ibagahken mo i taba raja i. 18:32 Nai itenggoi raja i mo naposo jahat ndai, idokken mo tabasa, 'Naposo jahat! Karinana utangmu enggo kuselangsaèken kerna ièlèk kono aku. 18:33 Otang kono pè nemmu kennah bagi ma ngo mermasèh atè taba denganmu naposo, bagè sienggo kubaing i mendahi ko?' 18:34 Nai mellaga kalohoon mo raja i, ipemasuk mo naposo si jahat i mi kurungen. I sidi mo ia mèma igarar karinana utangna idi." 18:35 Pengujungi sukuten idi idokken Jesus mo, "Bagi ma ngo ibaing BapangKu ni sorga i taba kènè, ukum mak iampuni kènè dengan ndènè ibagasen atè mbersih."
19:1 Enggo kessa pul iranaken Jesus karinana sindai, itadingken mo Galilea lako laus mi nagerri Juda i kèparen Laè Jordan. 19:2 Mbuè ngo kalak mengèkutkenSa, janah ipemalum ngo kalak i karina. 19:3 Nai roh mo kalak Parisè naing mencuba Jesus. Ikusoken kalak i mo, "Bakunè ndorok ngo kalak menirangken sinibagesna mengèkutken hatoren agamanta barang merkitè alasen kadè pe?" 19:4 Ialoi Jesus mo, "Oda ngo pennah ijaka kè ibas Bibèl, ai daholi dekket daberru ngo jelma itempa situmempai i mulana i? 19:5 Kessa i idokken nola ma mo, 'Kumarna nai, kennah itadingken anak laki ngo partuana lako mendahiken sinibagesna asa gabè sada kalak i sidua.' 19:6 Asa oda ngo kalak idi dua kalak nèngè, tapi sada ngo. Kumarna nai, jelma i mak ndorok menirang barang kadè sienggo ni peddemmu Dèbata." 19:7 Nai ikusoken kalak Parisè dèng ma mo tabaSa, "Mula bagi ngo kasa idokken si Musa, berèenken mo surat sirang lako menirangken?" 19:8 Nai mènter idokken Jesus mo taba kalak i, "Kerna ni jahat ndènè ngo memmaing asa ibelli si Musa kènè menirangken sinibages ndènè; tapi oda kin ngo bagidi arnia i. 19:9 Dengkohken kènè mo ènda: Kalak simenirangken sinibagesna -- keppèken oda kumerna merlangkah julu meddem -- janah kabin nola ma ia dekket daberru sidèban, merlangkah julu meddem ngo kalak i terdokken." 19:10 Gabè idokken sisiin i mo taba Jesus, "Mula bagi ngo keppèken terrèngèt jejap, padaan mo ulang." 19:11 Ialoi Jesus mo, "Oda ngo karina jelma ndorok terjalosa kata idi, laènken pellin kalak sienggo itentuken Dèbata. 19:12 Kerna lot pè kalak oda kabin, kerna enggo kin ngo pertubuhna bagidi. Lot ma ngo oda kabin jelma, kerna nakkatna ibaing dèba, janah lot ma ngo memilih sendiri ia oda kabin asa lebbih mertuhu-tuhu mengkebasi Dèbata. Barang isè ndorok mengulaken peddah ènda, ijalo mo i." 19:13 Lot mo kalak merembahken anak-anak mendahi Jesus, asa iampèken Jesus tanganNa mi babontakal kalak i janah isodipken. Tapi mènter mellaga mo sisiin i taba kalak i. 19:14 Tapi idokken Jesus mo, "Padiat kènè mo roh sikèdèk-kèdèk i mendahi Aku! Ulang gerai kènè kalak i, kerna bagè kalak èn ngo simbengket mi Kerajaen Dèbata!" 19:15 Nai, iampèken Jesus mo tanganNa bai sikèdèk-kèdèk idi, janah memasu-masu kalak i. Nai laus mo Ia i sidi nai. 19:16 Tikan i sada ari, lot mo sada kalak anak laki roh mendahi Jesus. "O Guru," nina, "Simendè bakunè ngo bakinenku asa dapet aku kenggelluhen soh mi amman sumendah i?" 19:17 Ialoi Jesus mo, "Kasa ikusoi ko Aku terrèngèt apaina simendè? Pellin sada ngo kessa mendè, imo Dèbata. Mula sèkel ko naing terolih kenggelluhen soh amman sumendah i, kennah ulaken mo karinana sinidokken Dèbata." 19:18 "Siapaina mo idi?" nina anak laki i. Ialoi Jesus mo, "Ulang ko memmunuh, ulang ko merlangkah julu meddem; ulang ko menangko; ulang kono merluap. 19:19 Pesangap partuamu, janah kekelengi mo denganmu jelma bagè pengkekelengimu mi dirimu." 19:20 "Karinana idi, enggo mo kuulaken," nina anak perana idi, "Nai kadè dèng dèba nai siperluna?" 19:21 Idokken Jesus mo mbangsa, "Mula naing sèkel kono merandal kalohoon, laus mo ko merdèa karina silot bamu. Berrèken mo tokorna i taba kalak sincoor, nai merharta mo kono i sorga. Enggo kessa i, roh mo ko balik mi sèn, èkutken mo Aku." 19:22 Idengkoh anak perrana i kessa mo rana idi, laus mo ia merdengan bonek, ai kalak kaya joong ngo ia. 19:23 Nai idokken Jesus mo taba sisiinNa, "Kodokken mo bai ndènè, mahal kalohoon ngo kalak sibèak mbengket mi Kerajaen Dèbata." 19:24 Kudokken mo taba kènè, "Murahen ngo iakap sada gajah mbengket mi lubang jarum, ulang pada sibèak mbengket mi Kerajaen Dèbata." 19:25 Idengkoh sisiin i kessa mo nidokken Jesus i, lengang mo kalak i. "Mula bagi, isè ngo kessa maluah?" Nina sisiin i. 19:26 Itengen Jesus mo kalak i, ninganna idokken, "Mahal ngo i, ukum bai jelma! Tapi oda lot mahal ukum bai Dèbata!" 19:27 Nai idokken si Petrus mo, "Idah mo, ukum kami enggo mo kutadingken kami karinana, lako mengèkutken Guru i. Nai kadè mo sinaing jaloon nami?" 19:28 Idokken Jesus mo taba kalak i, "Èngèt kènè mo! Anak Jelma idi kundul sikali èn i babo tahta kerajaen simermulia i dunia rimbaru. Nai kènè pè sisinKu kundul ma mo i babo tahta sisipuluh dua tahta janah mengerungguken sipuluh dua marga Israel! 19:29 Barang isè sienggo menadingken bagesna, kaka-anggina, barang turangna, barang partuana, barang dukak-dukana, barang jumana kumarna Aku, jalonna mo siratus kali lempit. Janah iberrèken ma mo bana kenggelluhen amman-sumendah i. 19:30 Tapi mbuè ngo kalak sibagèndari, perlebbè kin gabè perpodi, janah mbuè ma ngo siperpodi kin gabè perlebbè."
20:1 "Codi ngo Kerajaen Dèbata bagè sada kalak sidasa pekken anggur lako menulusi kalak mengulaken pekken anggur idi njengkas. 20:2 Enggo kesa lot keputusenna lako penggararen upah sada kalak imo sada kèpèng pirak sidari, ipasulak mo kalak idi mengula mi pekken anggurna i. 20:3 Tupung pukkul sibah siceggen, laus nola mo sidasa pekken i, jumpasa nola mo tah piga-piga kalak nai oda lot bahanna i pasar. 20:4 Jadi idokken mo taba kalak i. 'Laus mo kènè mengula mi peken anggurku. Kugarar pè upah ndènè bagè patutna.' 20:5 Nai laus nola ma mo ia tupung cèger ari, bagi ma i pukkul tellu ciboon, laus dèng ma ngo sidasa pekken anggur idi, memmaing bagè sindai dèng ma. 20:6 Janah kira-kira pukkul lima mayak ramben, laus dèng ma ngo ia, gabè iidah mo lot kalak, laju oda lot bahanna. Nai ikusoken mo taba kalak idi, 'Kasa dak cènder sambing kènè i sènda suntuk ari èn oda merkadè?' 20:7 Ialoi kalak idi mo, 'Isè poda pasulakken kami lako mengula.' 'Mula bagi ngo,' nina sidasa pekken i, 'Laus mo kènè dekket mengula mi pekken anggurku.' 20:8 Enggo kessa ramben, idokken sidasa pekken anggur i mo taba mandurna, 'Dilo mo karina simengula idi, asa igarari upahna, mulai i perpodi nai soh mi si perlebbè masuk.' 20:9 Nai roh mo pengula simengula mulai pukkul lima mayak ramben. Ijalo kalak i mo tersada kèpèng pirak. 20:10 Nai roh ma mo pengula sinigaji mulai siceggen. Dokatè kalak idi, bakunè pe menjalo mo ia lebbih nasa i. Keppèken kalak i pè tong ngo ijalo sada kèpèng pirak ma. 20:11 Sinderrang menjalo kèpèng idi kalak i, ngutnguten mo kalak i taba sidasa pekken anggur i. 20:12 Nina mo, 'Pengula siperpodi roh i, pellin sada jam ngo kalak i mahan bahaan, keppèken kami mahan bahaan soh sidari suntuk menggongken nggara ari. Kasa nola igarar kono upah nami dos dekket kalak idi!' 20:13 Ialoi sidasa pekken i mo, 'Oè, oda lot kubakin siso adil bamu, otang enggo kin ngo toko atèmu menjalo upah sada kèpèng pirak sidari? 20:14 Na, jalo mo upahmu lako mo. Ai naing ngo dok atèngku kuberrèken upah taba kalak siperpodi masuk idi dos dekket sikuberrèken bamu. 20:15 Otang lemmongku ngo memmaing barang bakunè hartangku? Barang tah oda kono sennang kumarna mendè kubaing taba sidèban?' " 20:16 Nai idokken Jesus nola ma mo, "Bagi mo siperpodi i kin gabè perlebbè janah siperlebbè i kin gabè perpodi." 20:17 Tikan laus Jesus mi Jerusalem, nai i tengah ndalan idilo Jesus mo sisinNa merpulung pellin kalak i. Idokken mo taba kalak idi, 20:18 "Dengkohken mo! Bagèndari laus mo kita mi Jerusalem. Ipesakat mo Anak Jelma idi mendahi imam-imam ekuten dekket mendahi guru agama. Nai ihukum matè mo Ia. 20:19 Nai ipesakat mo ia taba kalak siso bangsa Jahudi. Itertabai kalak i mo Ia, isiksa janah ipersilangken mo Ia. Tapi ipegelluh nola ngo mengolihi i ari petelluken." 20:20 Enggo kessa i roh mo sinibages si Zebedeus rebakken dekket dukak-dukakna mendahi Jesus. Mersembah mo ia i hadeppen Jesus lako mengido. 20:21 "Kadè naing bamu nangè?" nina Jesus. Ialoi mo, "Dok atèngku naing mo duana dukakku ènda kundul sada i kamuhunmu sada i kambirangmu, mula enggo kessa saut Tuan i gabè Raja." 20:22 "Oda ibettoh kènè sinipido ndènè idi," nina Jesus taba kalak idi. "Terrènum kènè ma ngo arap perrènumen kinidersa sikennah Kuènum idi?" "Terrènum kami ngo," nina kalak i. 20:23 Nai idokken Jesus nola mo, "Tuhu ngi, iènum kènè ngo arap perènumenki. Tapi ukum terrèngèt isè kundul i kamuhunku barang i kambirangKu oda ngo guru bangku i. Iberèken Bapa pè bekkas i pellin taba sienggo itentuken kin ngo." 20:24 Mendengkoh i, sisinna sisipuluh i nai, mellaga mo kalak i taba sidua kalak merkaka meranggi i. 20:25 Kernana i idilo Jesus mo kalak i karina, nai idokken mo, "Ibettoh kènè ngo mula bangsa siso menandai Dèbata gabè ekuten, itindas ngo rayatna. Janah perpangkat-perpangkat ndates memetcek kalak i. 20:26 Tapi oda ngo bagi ukum kènè. Barang isè kènè naing mbelgah, kennah mo ia gabè perkebbas. 20:27 Janah barang isè naing gabè perlebbè, ia mo naposo pasulaken. 20:28 Bagè Anak Jelma idi, roh oda ngo asa ikebbasi, tapi lako mengkebasi ngo, janah memerrèken kessahNa mahan tebbus jelma mbuè." 20:29 Tikan itadingken kalak i kuta Jeriko, mbuè ngo kalak mengèkutken Jesus. 20:30 I biding dalan, lot mo dua kalak sipètung kundul-kundul. Tikan idengkoh kalak i memellus Jesus, dilo-dilo mo kalak i, "O Tuhan, Anak si Daud, masèh mo atèmu bai nami!" 20:31 Ilagai jelma nterrem ni sidi mo kalak idi, janah idokken asa sip. Tapi makin ipegang kalak i nola ngo mendiloken, "Alè Anak si Daud, masèh mo atèmu bai nami!" 20:32 Nai mentadi mo Jesus, idiloi mo kalak idi, ikusoi mo, "Kadè ipergeddo kènè bakinenku bai ndènè?" 20:33 Ialoi kalak i mo, "Tuhan, merpendidah mo nemmu kami!" 20:34 Masèh mo atè Jesus midah kalak idi, ijamah mo mata ni kalak idi, nai mènter merpendidah mo. Ièkutken kalak i mo Jesus gejapkenna i.
21:1 Enggo kessa ndessing kalak i mi Jerusalem, soh mo kalak i mi Betpage i Uruk Zaitun. Ipasulak Jesus mo i sidi nai dua kalak sisinNa lebbèen merdalan. 21:2 "Laus mo kènè mi kuta si ni jolo ndènè adoi," nina Jesus taba kalak idi. "Mènter idah kènè mo nahan i sidi sada kalodè tertambat rebbak dekket anakna. Osari kènè mo duana kalodè i janah iring kènè mi sènda. 21:3 Mula lot kalak mendokken ranana, dokken kènè mo tabasa, 'Perlu ngo i bai Tuhan i,' nai ibelli ia mo kalodè i iiring kènè." 21:4 Masa pè bagi asa saut sinidokken nabi bagèen, 21:5 "Bagahken mo taba kuta Sion, Rajamu roh bagèndari mendahi kono. Percerrep ukur ngo ia janah mengkunduli sada kalodè, imo anak kalodè bajar dèng." 21:6 Nai laus mo sisiin sidua kalak i, pesautken bagè ni tennahken Jesus taba kalak idi. 21:7 Iiring kalak i mo kalodè i dekket anakna, ialasken kalak idi mo jubahna mi gurung kalodè i. Nai ipasang Jesus mo kalodè i. 21:8 Jelma nterrem ni sidi pè mènter ipengalasken mo jubahna i dalan idi janah dèba memenggelli ranting-ranting lako bakinen mi tengah ndalan i. 21:9 Jelma nterrem simerdalan i lebbè dekket i podi Jesus mengoangken: "Hosianna bai Anak si Daud! Ipasu-pasu Tuhan i mo Ia siroh merkitè-kitè gerar Tuhan! Poji mo Dèbata Sintèmbul i!" 21:10 Nai ibengketti Jesus kessa mo Jerusalem, gabè gontar mo kuta i. "Isè ngo èn?" nina pengisi kuta i. 21:11 "Nabi Jesus ngo i, i Nazaret si ni Galilea nai," nina jelma nterrem sirebbakken dekket Jesus i. 21:12 Nai masuk mo Jesus mi kasèan Bages Dèbata, iusir mo karina jelma simertiga-tiga i sidi. Ipentombang-mbalingken mo mèja kalak simenukari riar, dekket bangku-bangku simerdèa ndarapati. 21:13 Nina mo taba kalak i, "Lot ngo tersurat ibas Bibèl, idokken Dèbata ngo 'Bekkas mersodip ngo bagesKu.' Tapi gabè ibaing kènè nola ngo gabè bekkas pengkilangen." 21:14 Merrohen mo kalak sipètung dekket nitempuk sigading mendahi Jesus mi Bages Dèbata idi janah ipemalum Jesus ngo kalak idi. 21:15 Tapi punguren mo imam ekuten dekket guru-guru agama Jahudi mengidah simasa kelengangen nibaing Jesus idi. Makin punguren ngo kalak i mendengkoh oang-oang anak-anak silot i Bages Dèbata idi, "Hosianna bai Anak si Daud!" 21:16 Idokken kalak i mo taba Jesus, "Idengkohken kono ngo sinidokken kalak idi?" "Uè kudengkoh ngo," nina Jesus. "Mak dèng ngo pennah ijaka kènè ayat Bibèl bagèen, 'Anak-anak dekket anak mbara enggo iajari kono lako mengeruapken kata pemoji-mojiin'?" 21:17 Nai itadingken Jesus mo kalak idi, karuar mo ia i kuta i nai laus mi Betania, i sidi mo ia mermalam. 21:18 Sibarembenkenna ceggen i, i tengah ndalan tikan lako balik mi kuta Jerusalem, mellèhè mo iakap Jesus. 21:19 Idah Jesus mo ibiding dalan idi lot kayu ara. Idahi mo kayu ara idi, tapi oda lot buahna giam singkabuah, mak pellin bulungna sambing. Nai idokken Jesus mo taba kayu ara idi, "Oda ndorok merbuah nèngè kono!" Nai mènter males mo kayu ara idi. 21:20 Idah sisiin i kessa mo simasa i, lengngang kalohoon mo kalak idi. "Bakunè ngo perjadina i ndorok gejapkenna i matè kayu ara i?" nina kalak idi. 21:21 "Èngèt kènè mo!" nina Jesus. "Mula percaya kènè janah oda sangsi, ndorok ngo ibaing kènè bagè sienggo Kubaing mi kayu ara èn. Oda pellin i sambing tupèh; mendahi uruk ènda pè ndorok ngo idokken kènè, 'Mompat mo kono mi laut!' saut ngo bagidi. 21:22 Ai barang kadè sambing pè ipido kènè ibagasen sodip ndènè, jaloon ndènè ngo i asal mo percaya kènè." 21:23 Enggo kessa bagidi, ibengketti Jesus nola mo Bages Dèbata, nai mengajari mo ia i sidi. Sinderrang mengajari i Ia, roh mo imam ekuten dekket pengulu-pengulu Jahudi mengkusoken baNa, "Dikè ngo dalanna kono memaing ènda karinana? Isè memerèken kuasa i baMu?" 21:24 Ialoi Jesus mo, "Aku pè naing mengkuso ngo mendahi kènè. Enggo kessa ialoi kènè kuso-kusongku èn, nai pè asa kubagahken taba kènè, kuasa bai isè nai Aku memaingken karinana idi. 21:25 Kuasa bai isè nai ngo bai si Johanes lako peridiken jelma i? Bai Dèbata nai ngo barang bai jelma nai?" Nai mersungkuun mo imam-imam ekuten dekket pengulu-pengulu Jahudi samah-samahsa, nina bagèen, "Mula sidokken, 'Bai Dèbata nai,' dokkenenkenna mo banta, 'Kasa oda percaya kènè bai si Johanes?' 21:26 Tapi mula sidokken, 'Bai jelma nai,' tentu sijaga perasaan jelma nterrem ai nabi ngo ia dok atè sinterrem idi." 21:27 Jadi ialoi kalak idi mo, "Oda kubettoh kami i." Nai idokken Jesus mo taba kalak idi, "Oo, mula bagi ngo, Aku pè oda Kubagahken bai ndènè, barang kuasa isè sikubaing èn." 21:28 "Bagèndari pè bakunè ngo dok atè ndè terrèngèt mi sèn?" nina Jesus nola. "Lot mo sada partua bak dua anakna. Idahi mo anakna situaan nina mo mbangsa, 'Alè pa, laus mo ko mengula mi pekken anggur ari èn.' 21:29 Ialoi anakna i mo, 'Oda uè aku' nina. Tapi gabè mobah nola mo ukurna, nai laus mo ia mengula mi pekken anggur i. 21:30 Nai laus nola mo partua i mendahi anakna sipeduaken, idokken ma mo bagè katana bai situaan i. Ialoi anakna peduaken i mo, 'Uè pa,' tapi oda laus ia. 21:31 Bagi mo idi, siapaina ngo anakna sidua i mengulaken nidokken bapana i?" "Situaan idi ngo," nina imam ekuten dekket pengulu-pengulu Jahudi i. Nai idokken Jesus mo taba kalak i, "Peratè-atèken kènè mo: Lebbèen ngo kalak pertunggu cokè dekket daberru siso kasèa gabè ginemgem Kerajaen Dèbata, asa kènè. 21:32 Roh ngo si Johanes Peridiken menuduhken dalan situhunna bai ndènè tapi oda percaya kènè bana. Ai tukasi pè enggo idah kènè karinana idi, lalap ngo oda mobah pikiren ndènè, janah oda percaya bai Tuhan." 21:33 "Dengkohken mo codiin èn," nina Jesus. "Lot mo sada kalak sidasa pekken anggur. Ipagar ngo pekkenna i kuliling. Janah ibahan bekkas lako memerroh anggur idi. Ipekadè pantar bekkas merjaga. Nai ibellah pinangken mo pekken anggur idi bai ndèba, janah laus mo ia kiladang. 21:34 Dapet kessa katikana, memotik buah anggur, ipasulak sidasa pekken anggur i mo naposona mendahi simellah-pinang i, lako menjalo bagianna. 21:35 Tapi itangkup simellah-pinang i mo naposo pasulaken i, sisada ipekpekki, sidèbanna ibunuh, dèba nai ibentiri dekket batu. 21:36 Nai ipasulak sidasa pekken i nola mo naposona sidèban, buèen asa siperlebbè idi. Tapi ukum simellah-pinang idi, tong ngo ibaing bagè mendahi pasulaken perlebbè ndai. 21:37 Perpodi kaloon, ipasulak sidasa pekken i mo anakna sendiri, dekket pengharapen; tentu nangga atè pemellah pinang i midah anakna nipasulakna i. 21:38 Tapi, idah pemellah pinang i kessa mo anak sidasa pekken idi, nina kalak i mo samahsa, 'Èn ngo anak sidasa pekken i; aci, sibunuh mo ia, asa banta harta tinadingna i!' 21:39 Itangkup kalak i mo anak idi, isaran mo ia mi ruar pekken idi, nai ibunuh mo!" 21:40 "Mula balik kessa mo sidasa pekken anggur idi, bakunè mo ndia ibaing taba pemellah pinang idi?" nina Jesus. 21:41 Ialoi kalak idi mo, "Tentu bunuhenna mo kalak perjahat i, janah ipebellah-pinangken nola pekken anggurna i taba kalak siuè memerèken bagianna ibas hasil tanoh idi nai." 21:42 Gabè idokken Jesus mo taba kalak idi, "Mak dèng ngo nung ijaka kènè sitersurat ibas Bibèl bagèen: 'Batu si nipatakken tukkang bages idi, enggo gabè batu simahargana. Èn mo nibaing Tuhan i, soh mo mendèna!' " 21:43 "Asa èngèt kènè mo," nina Jesus. "Karinana hak ndènè kin nemmu gabè bangsa Dèbata icabut mo i bai ndènè nai, janah iberrèken mo taba bangsa simenguèi perèntah Dèbata. 21:44 Barang isè pè ndabuh mi batu èn, mpustak merbincahcah mo ia; janah merlicaten mo kalak nitinggangen sindabuh i." 21:45 Kessa pul idengkoh imam-imam ekuten bak Parisè umpama idi, iartiken mo rana i; taba kalak i ngo mengenna kata idi. 21:46 Nai mertaki sinunu mo kalak i lako menangkup Jesus; tapi mbiar ngo kalak i midah jelma nterrem idi, ai nabi ngo Jesus idok atè jelma nterrem i.
22:1 Mengerana nola mo Jesus taba jelma nterrem merkitè codiin. 22:2 Nina mo, "Codi ngo kerajaen Dèbata bagè sada kalak raja memèstaken anakna merbayo. 22:3 Ipasulak raja i mo naposona mengalengi kalak sienggo idilo kin mi pèsta i. Tapi oda uè roh kalak sienggo idilo i kin. 22:4 Nai ipasulak raja i nola mo nposona sidèbaan. Idokken raja i mo taba kalak i, 'Enggo kuhantari karinana i pèsta i lembu dekket anak lembu singgomokna enggo mo isembellih. Enggo mo hantar karina. Roh mo kè mi pesta merbayo idi!' 22:5 Tapi oda isarihken si ni dilo idi kin. Merlausen ngo kalak idi mi bahanna gennep -- dèba mi jumana, dèba nai mi perusahanna; 22:6 janah sidèbanna nai tupèh menangkup naposo raja i ninganna ipukkuli janah ibunuh. 22:7 Idengkoh raja i kessa mo idi mellaga kalohon mo ia. Ipasulak mo pakalimana memunuh perjahat-perjahat i, janah ilekkup mo kuta kalak i. 22:8 Enggo kessa bagi, idiloi mo naposona nina mo, 'Enggo mo hantar karinana mi bahaan pèsta i, tapi ukum kalak nidiloon idi kin, oda ndorok nèngè dekket. 22:9 Laus mo kènè bagèndari mi dalan-dalan mbellen, barang piga jumpa kènè, dokken kènè mo roh mi pèsta idi.' 22:10 Nai laus mo kalak idi, idahi kalak i mo dalan mbellen janah ipendokken mo nasa jelma silot jumpa kalak idi, jelma merpengelako selloh bak jahat pè. Gabè dom tamuè mo perpèstaan idi. 22:11 Roh mo raja idi mi perpèstaan idi lako mengidah tamuè i. Idah matana mo lot sada kalak i pèsta i oda merpakèen pèsta. 22:12 Ikusoi mo, 'Bakunè ngo permbengketmu mi pèsta èn oda merpakèen pèsta?' Gabè mertahan sip mo tamuè sisada kalak i. 22:13 Nai idokken raja i mo taba naposona, 'Ekèti kènè mo tanganna dekket nèhèna i, embah kènè mo ia mi bekkas singgellap tuiten. I sidi mo ia derru-derru menggong simpersuk.' " 22:14 Idokken Jesus mo lako mengenggoi codinna i, "Mbuè ngo terdiloon tapi cituk ngo terpilih." 22:15 Enggo kessa bagidi, laus mo kalak Parisè lako mersungkuun, bakunè carana lako mengenggep Jesus merkitè-kitè kuso-kuso. 22:16 Iutus kalak idi mo murid-murid kalak i mendahi Jesus rebbak dekket barang piga-piga i horong si Herodes nai. Itennahken kalak i mo sinaing dokkenen pasulaken i taba Jesus bagèen, "O Guru, kubettoh kami, kalak burju ngo kono. Ntompel ngo iajarken kono terrèngèt nipergeddo Dèbata bai jelma, oda pella ikebbiari kono barang isè. Kerna oda pella pilih-pilih rupa kono. 22:17 Kernana i bagahken mo bai nami barang bakunè ngo peddahmu terrèngèt ènda; Mengèkutken hatoren kalak Jahudi, ndorok ngo kugarar kami belasting taba Kèsar Rom, barang oda?" 22:18 Ibettoh Jesus ngo tujuun kalak i sijahat idi, jadi idokken mo, "Èo kènè pertaki-taki! Kasa mo naing ienggep kènè Aku? 22:19 Pacidah kènè mo bangKu kèpèng ni berrèken ndènè menggarar belasting idi." Nai iberrèken kalak idi mo taba Jesus sada kèpèng pirak. 22:20 Nai ikusoken Jesus mo taba kalak idi, "Gombaren dekket gerar isè ngo ènda?" 22:21 "Kèsar idi ngo," nina kalak idi. Nai idokken Jesus mo taba kalak idi, "Mula bagi, berrèken kènè mo bai Kèsar idi siroh bai Kèsar idi nai, janah berrèken mo bai Dèbata, siroh bai Dèbata nai." 22:22 Enggo kessa idengkoh kalak i penjelasen i, lengang kalohon mo kalak idi. Nai laus mo kalak i menadingken Jesus. 22:23 Arinkena idi, roh ngo kalak Sadusè mendahi Jesus. Kalak Sadusè mo simendokken, mula enggo matè jelma, oda nèngè ndorok balik nggelluh. 22:24 "O Guru", nina kalak i, "Ipeddahken si Musa ngo bagèen: Mula matè sada anak laki, ikebaluken sinibagesna janah madèng lot dukakna, kennah igelluhi anggina ngo simengkebaluken i pecèndekken pemparen bai kakana i. 22:25 Asa, lot mo pitu kalak sibeltek. Kabin mo situaan i, nai mènter matè oda dèng sanga lot dukakna, nai igelluhi anggina i mo daberru simengkebaluken idi. 22:26 Matè ma mo simenggelluhi kakana idi, oda dèng sanga lot dukakna, janah bagi ma mo anggina sipetelluken, soh mi pepituken. 22:27 Perpodi kalohoon, matè ma mo dekket daberru idi. 22:28 Nai bagi mo i bakunè ngo seggen i ari podi i, siapaina ngo kalak i sidasa daberru idi? Ai pituna ngo kalak idi kabin dekketsa." 22:29 Ialoi Jesus mo, "Ai salah ngo pengantusi ndènè, ai oda iantusi kènè isi Bibèl i, janah oda ibettoh kènè terrèngèt kuasa Dèbata. 22:30 Kerna mula balik nggelluh sienggo matè, oda nèngè ngo kabin ia. Tapi bagè malaèkat ngo kalak idi i sorga. 22:31 Oda dèng ngo nung ijaka kènè pendokken Dèbata terrèngèt simatè ipegelluh nola? Idokken Dèbata ngo 22:32 'Aku ngo Dèbata si Abraham, Dèbata si Isak, dekket Dèbata si Jakob.' Ukum Dèbata i, oda ngo Dèbata simatè, tapi Dèbata singgelluh ngo!" 22:33 Mendengkoh kejelasen Jesus idi, kagum kalohon mo jelma nterrem idi. 22:34 Asa enggo kessa idengkoh kalak Parisè enggo jellak kalak Sadusè ibakin Jesus, merpulung mo kalak idi. 22:35 Nai mengkuso mo sada kalak ibas kalak i nai, imo guru agama mengkusoken lako mengenggep Jesus. 22:36 "O Guru," nina, "Siapaina ngo ibas pati-patiin idi nai terdokken patiin raya?" 22:37 Ialoi Jesus mo, "Kennah kekelengenmu ngo Tuhan Dèbatamu, ibas nasa atè-atèmu nai, dekket nasa kessahmu, dekket nasa pikirenmu. 22:38 Imo patiin raya janah sipèntingna! 22:39 Tapi dos ngo idi dekket sipeduaken ènda. Kennah kekelengenmu ngo denganmi dosken dirimu. 22:40 Karinana hatoren agama nipeddahken si Musa dekket nabi-nabi, patiin sidua èn mo rèmpunna." 22:41 Tikan pulung dèng kalak Parisè i sidi, ikusoi Jesus mo kalak idi: 22:42 "Bakunè ngo dok atè ndènè terrèngèt Raja Sipaluah niperbagah-bagah Dèbata? Pemparen isè ngo Ia?" "Pemparen si Daud," nina kalak idi. 22:43 "Mula bagi ngo," nina Jesus, "Kasa idokken si Daud tikan i bagasen Tendi Dèbata terrèngèt Raja Sipaluah niperbagah-bagah Dèbata idi 'Tuhan'? Ai nina si Daud ngo, 22:44 'Idokken Tuhan i ngo taba Tuhanku: Kundul mo kono i kamuhunKu, pèma Kupetunduk karina musuhMu mi terruh nèhèMu.' 22:45 Jadi mula si Daud mengakui Raja Sipaluah niperbagah-bagah idi 'Tuhan', bakunè mo ia dokkenen pemparen si Daud?" 22:46 Sadapoda kalak i tellap mengaloi Jesus nèngè, janah mulai sidarinkenna i nai maknè pang kalak idi mengkusoken barang kadè taba Jesus.
23:1 Nai mengerana mo Jesus taba jelma nterrem dekket taba sisinNa, 23:2 "Guru-guru agama dekket Parisè menjalo kuasa ngo bagè niberrèken bai si Musa. 23:3 Kerna naidi, uèi kènè mo karina barang kadè idokken kalak i sibahanen ndènè. Tapi ulang mo ulaken kènè kadè niulaken kalak idi, ai oda ngo iulaken kalak i bagè nipeddahkenna idi. 23:4 Ipeddahken kalak i ngo simahal ulanken. Idokken kalak i ngo asa iulaken dèba hatoren simberratna, tapi cituk poda lot kalak i mengurupi jelma mengulakensa. 23:5 Karinana niulaken kalak idi pellin asa iidah dèba sambing. Ai ipakkè kalak i ngo tinali mbellang-mbellang kaloon mersodip; janah ipegeddang ngo rambu jubahna. 23:6 Dak ipilih-pilih kalak i ngo bekkas simendèna mula i perpèstaan, bagi ma karosi huntuun mula ibagasen bages persodipen. 23:7 Soh mo lolona kalak i menjalo penghormaten i tengah ndalan, janah mula idokken dèba 'Guru'. 23:8 Tapi ukum kènè, ulang mo kènè uè idiloken dèba Guru, ai pellin sada ngo Guru ndènè, ukum kènè karinana merkaka-kuanggi ngo. 23:9 Ulang mo lot bai ndènè nai mergerar Bapa, ai sada ngo kessa Bapa ndènè, imo Bapa sini sorga. 23:10 Ulang mo uè kènè idiloken 'pengulu', ai sada ngo pengulu ndènè imo Raja Sipaluah niperbagah-bagah Dèbata. 23:11 Kalak simersangapna ibas kènè nai mo kennah mahan naposo bai ndènè. 23:12 Ai kalak sipedatesken dirina, sipeteruhen ngono, janah kalak sipecerrepken dirina, sipedatessen ngo." 23:13 "Merjaya mo kènè guru-guru agama dekket Parisè! Ai jelma sipakulah-kulahken dirina ngo kènè, iambati kènè ngo kalak siuè ginemgem Kerajaen Dèbata. Kènè sendiri oda uè gabè ginemgem Kerajaen Dèbata, keppè kalak siuè, ihalang-halangi kènè. 23:14 Merjaya mo kènè guru-guru agama dekket Parisè! Kènè jelma sipakulah-kulahken dirina! Itipu janah irampasi kènè ngo bages simbalu. Nai ipakulah-kulah kènè mo mersodip nggeddang lako memmoniken pengelako ndènè i. Kumarna naidi, mberrat ngo kènè ihukum. 23:15 Merjaya mo kènè guru-guru agama dekket Parisè! Kènè jelma sipakulah-kulahken dirina! Isuberrangi kènè ngo laut lako mengayaki darat pellin pemasukken sada kalak mi agamamu. Enggo kessa uè kalak idi, gabè ibaing kè mo kalak i pengisi narakka, lebbih dua kali jahat bai ndènè nai. 23:16 Merjaya mo kènè pengulu pètung! Ipeddahken kènè ngo bagèen, 'Mula merbulaban kalak i merkitè Bages Dèbata, gabè maluah mo kalak i ibas bulabanna idi nai; tapi mula merbulaban kalak i mi emmas si ni Bages Dèbata, gabè lekket mo ia i bulabanna idi.' 23:17 Kènè mo jelma moto janah pètung, siapaina ngo mahargaan: emmas, barang Bages Dèbata simemmaing emmas mpanting? 23:18 Ipeddahken kènè dèng ma, 'Mula lot merbulaban mi langgaten, maluah ngo ia ibas bulabanna i nai, tapi mula merbulaban ia mi pèlèen si ni babo langgaten idi, lekket mo ia i bulabanna i.' 23:19 Soh mo pètungna kènè, siapaina ngo mahargaan! Pèlèen idi ngo barang langgaten simemaing langgaten idi mpanting? 23:20 Kerna nai, mula lot merbulaban mi pèlèen, merlapaten ngo idi merbulaban ia mi langgaten dekket karina pèlèen ni babona i. 23:21 Janah mula lot mersumpah mi Bages Dèbata, merlapaten ngo idi merbulaban ia mi Bages Dèbata dekket bai Dèbata ni sidi i. 23:22 Janah mula lot mersumpah merkitè sorga, merlapaten ngo idi merbulabanken mi tahta Dèbata dekket bai Dèbata simengkunduli tahta idi. 23:23 Merjaya mo kènè guru-guru agama dekket Parisè! Kènè sipekulah-kulahken dirina! Rempah ratus pè umpamana; bulung lemmas, serrè dekket acem pè ipersipuluh kènè berrènken mi Tuhan i. Keppèken hatoren siperluna mi agama imo: adil, permasèh atè, sètia, oda iparduliken kènè. Nemmuken kennah iulaken kènè ngo i, ninganna mengulaken sidèbanna i. 23:24 Èe kènè pengulu pètung! Naleng silot ibas ènumenmu iagoi kènè, keppèken unto iberrur kènè. 23:25 Merjaya mo kènè guru-guru agama dekket Parisè! Kènè sipakulah-kulahken dirina. Mangkuk dekket pahar ndènè iborihi kènè i ruarna, keppè ibagasen soh mellamunna merdengan mekerruh dekket penghakai ndènè. 23:26 Èe, kènè Parisè pètung! Borih mo lebbèen mpanting perbagasen mangkuk dekket pahar ndènè, asa mpanting dekket ni ruarna! 23:27 Merjaya mo kènè guru-guru agama dekket Parisè! Kènè sipekulah-kulahken dirina! Ai codi ngo kènè bagè kuburen si ni cèt mbulan; ukum i ruarna mendè tengennen, tapi ibagasen dom tulan-tulan bangkè jelma dekket karinana simacik. 23:28 Bagi ma mo kènè, tengennen mendè i ruar ngo kènè taba jelma; tapi kum ibagasen dom taki nggodo dekket pengelausiin." 23:29 "Merjaya mo kènè guru-guru agama dekket Parisè! Kènè sipelulah-kulahken dirina! Ipellias kènè ngo asa merandal kuburen nabi-nabi dekket perandalken tugu-tugu pernèngèten jelma kumerna mendè ia nderrang nggelluhna. 23:30 Janah idokken kènè ngo, 'Ukum kami kin nggelluh tikan i umur empungta arnia, oda uè kami bagè kalak idi memmunuhi nabi-nabi.' 23:31 Jadi kènè mengakuken, pemparen simemunuh nabi-nabi idi ngo kènè! 23:32 Mula bagi terrusken kènè mo janah salpunken kènè mo dosa-dosa sienggo itebbennai empung ndènè idi! 23:33 Jahat ngo kènè, janah pemparen kalak jahat bakunè mo kènè paluahken diri ndènè i hukumen narakka? 23:34 Kerna naidi, dengkoh kènè mo mendè-mendè; Kupasulak pè mendahi kènè nabi-nabi dekket kalak sipandè, bak guru-guru, dèba bai kalak i nai ibunuh kènè janah dèba ipersilangken kènè. Lot mo dèba isiksa kènè ibagasen garèja janah iletlet kènè i kuta sisada nai mi kuta sisada. 23:35 Ujungna hukum kerna karina perbuaten ndènè idi taba kalak siso mersalah kennah mengenna bai ndènè sendiri -- mulai terbunuh si Abel siso mersalah idi soh mi si Zakharia anak si Berekia si ni bunuh ndènè i kellang-kellang Bages Dèbata dekket langgaten. 23:36 Bettoh kènè mo: karinana idi jelma jaman bagèndari mo menggongken." 23:37 "Jerusalem, Jerusalem! Ibunuh kono ngo nabi-nabi. Janah ibentiri kono ngo sinipasulak Dèbata mendahi kono dekket batu soh matè! Enggo barang piga-piga kali naing kukeruduk karina pengisimu, bagè pengkeruduk inang manuk menjaga anakna ibas terruh kabengna, tapi oda uè kènè! 23:38 Idah mo terulang mo bagesmu èn, janah gabè longo-longoon. 23:39 Kudokken mo bai ndènè; mulai bagèndari nai oda nèngè idahen ndènè Aku soh mi podinkenna èn pèma idokken kènè, 'Ipasu-pasu Dèbata mo ia siroh merkitè gerar ni Tuhan i.' "
24:1 Itadingken Jesus mo Bages Dèbata i, roh mo sisinNa mendahiSa, janah ituduhken mo Bages Dèbata idi. 24:2 Nai idokken Jesus mo taba kalak idi, "Idah kènè ma ngo karinana idi? Bettoh kènè mo oda ngo padiatenna sada batu pè mersusun ibas bangunen-bangunen idi hot i bekkasna. Karinana ngo irumpakken." 24:3 Enggo kessa i laus mo Jesus janah kundul i Uruk Zaitun. Tikan kundul idi Ia, roh mo sisinNa lako mengeranai pellin-pellin, "Bagahken mo bai nami ndigan mo terjadi karinana idi?" nina kalak i tabaSa. "Janah kadè mo pertandanna katika pekirohmu dekket ari kiamat?" 24:4 Ialoi Jesus mo, "Kennah mermanat ngo kènè, ulang sanga iakkali dèba kènè. 24:5 I ari podi, mbuè ngo kalak roh menelluk gerarKu janah mendokken, 'Aku ngo Raja sipaluah niperbagah-bagah Dèbata!' Mbuè ngo kalak iluapi kalak idi. 24:6 Idengkoh kènè mo berrita geraha dekket berita juhap, tapi ulang kènè mbiar. Ai kennah masa ngo i, tapi oda dèng pertanda dunia èn lako kiamat idi. 24:7 Bangsa sisada juhap dekket bangsa sidèban. Kerajaen sisada mi kerajaen sidèban. Ninganna bagidi masa ma mo kellèhèen bagi ma rènur. 24:8 Karinana idi pellin pertanda dèng ngo kessa idi, bagè pengakap partua ibages tikan lako kettaring. 24:9 Enggo kessa bagidi, kènè pè naing tangkupenna mo, janah pesakatenna lako isiksa dekket ibunuh. Karinana dunia ènda merceggo atè midah kènè kemulihken Aku. 24:10 Sinderrang bagidi, mbuè mo kalak merbalik bangku nai. Mersiselbuhen mo kalak i janah mersikosomen. 24:11 Nai kèkè mo mbuè nabi-nabi palsu janah mengelalingken jelma mbuè. 24:12 Kejahaten pè makin mengentuda mo janah makin ndèngapna mo ukur ngkelleng. 24:13 Tapi barang isè menahan soh mi puncana, i ngo paluahenna. 24:14 Nai ibagahken mo mi suberri dunia ènda Sukuten Kelluahen terrèngèt Kerajaen Dèbata, asa karina jelma mendengkohsa. Enggo kessa i roh mo ari kiamat." 24:15 "Nai idahen ndènè mo masa pengelako siso puna-puna, bagè sinidokken Nabi Daniel, cènder i bekkas simbadia. (Iperatè-atèken simenjaka èn mo kadè lapatenna). 24:16 Mula masa bagidi, kennah mperrus mo pengisi Juda mi delleng. 24:17 Kalak si ni lotèng bages, ulang mo pella susur nèngè mi terruh lako memmuat olesna. 24:18 Kalak si ni juma, oda terbakinsa nèngè balik memmuat jubahna. 24:19 Soh mo masèh atè menengngen daberru berrat-berrat rumah dekket partua ibages pesusuken anak mbara tikan bagidi. 24:20 Mersodip mo kènè taba Dèbata asa ulang nemmu mperrus kènè tikanna mosim udan barang tikan ari Sabat! 24:21 Ai masa ngo tikan bagidi kepersuken siso tertahanken jelma, ai kessa nai tembem dunia èn soh mi sidari èn, mak dèng nung masa bagidi, janah enggo kesa i, oda nèngè masa bagidi. 24:22 Mula oda kin iorui Dèbata katikana, sada poda lot maluah jelma. Tapi kumarna ummatNa iorui Dèbata mo dekkahna tikki i. 24:23 Mula lot sinderrang bagidi mendokken taba kènè, 'Tengen, èn ngo Raja Sipaluah niperbagah-bagah idi!' barang 'i sadèi ngo ia!' -- nina, ulang kettoki kènè jelma bagidi! 24:24 Kerna merrohen ngo seggen sipaluah palsu dekket nabi palsu. Matcam ngo bagèna ibakin kalak idi ulaan mahantu dekket kelengangen-kelengangen lako menipu jelma. Janah mula ndorok, dekket ngo katèna ginemgem Dèbata sienggo terpilih idi. 24:25 Asa, èngèt kènè mo! Enggo kubagahken kin idi lebbèen taba kènè sinderrang madèng masa. 24:26 Mula lot mendokken bai ndènè, 'Tengen mo, i kellongoon ngo ia!' -- ulang laus kènè mi sidi. Barang mula idokken kalak idi, 'Roh mo kènè menengngen, i sèn ngo ia ciboni!' -- ulang ketoki! 24:27 Kerna ukum pekiroh Anak Jelma idi, bagè pellian merdebbet i kebincaren nai, merbendella soh mi kecunduten. 24:28 Barang i dikè lot bangkè, mi sidi ngo kelliki merdèmbur." 24:29 "Oda pella ndekkah i kepersuken simasa idi nai, gellap mo mataniari janah bulan idi pè maknè mercuhaya. Merrurus mo bintang i langit i nai janah merbulut-bulut mo nasa si lot i abang-abang idi. 24:30 Enggo kessa bagidi, teridah mo tanda-tanda Anak ni Jelma idi i langit i, nai tikan bagidi, derru-derru mo karina bangsa silot i dunia ènda. Idah kalak i mo roh Anak Jelma merkitèken hembun merkuasa dekket merkemuliaan mbellen. 24:31 Ipalu mo sarunè, nai ipasulak mo malaèkat-malaèkatNa mi dèsa siempat ni tanoh èn. Ipepulung kalak i mo ginemgem sienggo terpilih i, i kebincaren nai dekket i kesunduten nai, bagi ma i utara dekket i sèlatan nai, i punca langit sisada soh mi punca langit sisada nai." 24:32 "Perdatèken kènè mo kayu ara, mula mertunas rantingna janah merratah bulungna, roh nè mo mosim mpeddas. 24:33 Bagi ma mo mula iidah kènè enggo masa karinana sibagidi, bettohen ndènè mo, enggo njolmit katikana. 24:34 Janah èngèt mo! Masa ngo karinana idi sinderrang madèng matè karina jelma singgelluh bagèndari. 24:35 Salpun pè karinana langit dekket tanoh èn tapi ukum katangKi hot ngo soh mi amman-sumendah." 24:36 "Isè poda memettoh ndigan arina barang katikana. Malaèkat-malaèkat sorga pè oda ibettoh idi. Anak idi pè oda ibettoh, pellin Bapai ngo kessa bettoh-bettohen. 24:37 Bagè simasa sinderrang i umur si Noak, bagi ma mo masa tikan pekiroh Anak Jelma. 24:38 Tikan makdèng roh laè mbuncar idi, mangan mènum ngo kalak i, jejap dekket pejejapken, soh mi ari si Noak masuk mi keppel mbellen i. 24:39 Kessa nola pè iremrem laè mbuncar idi jelma i, asa satdar jelma i tah barang kadè masa. Bagi ma mo masa ibas pekiroh Anak Jelma. 24:40 Mula lot dua kalak mahan bahaan i juma; sada kalak mo ijalo, tapi kum sisada nai itadingken. 24:41 Mula dua kalak daberru nderrang menutu, sada mo iarahken, sisada nai itadingken. 24:42 Kernana i ulang mo terpeddem kènè, ai oda ibettoh kènè katikana pekirooh Tuhan ndènè. 24:43 Èngèt kènè mo! Ukum ibettoh sidasa bages ngo ndigan pekiroh penangko, oda terbaing mak ndungo ia barang tah ibelli penangko i mi bagesna. 24:44 Kernana i, kènè pè kennah ngo dak kebbas. Kerna pekiroh Anak Jelma idi oda ibettoh kènè janah siso pengharapen ndènè." 24:45 "Mula bagi, naposo apai ngo sètia janah bijak? Ia mo ipebangkit indukna mahan ekuten perkebbas sidèban, asa iberrè kalak i mangan tupung kettika sienggo itentuken. 24:46 Mertua mo naposo idi, mula idapet indukna ia mengulaken ulanna tikan balik indukna. 24:47 Tok mo kènè, gabè ipesoh indukna i mo tabasa karina harta mahan jamotenna. 24:48 Tapi mula naposo siso kasèa; dok atèna ngo ibagasen. 24:49 Ndekkah dèng ngo asa balik indukku idi, nai iligasi mo naposo-naposo sidèban, janah mangan mènum mo ia rebbak dekket kalak permabuk. 24:50 Keppè roh mo indukna ibas siso pengharapenna dekket ibas katika siso nibettohna. 24:51 Nai ihukum indukna mo ia, gabè iambongken mi bekkas kalak perbuah ringadar. Rebbak derru-derru mo kalak idi kumarna mpersukna."
25:1 "Mula roh Anak Jelma sikira Tuhan, codi ngo bagè si ni umpama ènda: Lot mo sipuluh kalak simerbaju rading gennep merembah oborna, menimbaki kèla sinaing roh. 25:2 Lima kalak bai kalak i nai moto, tapi merrukur ngo ukum si lima kalak nai. 25:3 Simerbaju moto si lima kalak i, iembah ngo nemmu oborna, tapi oda iembah dekket bekkas minak. 25:4 Tapi kum silima nai sipandè merukur i, iembah ngo bekkas minakna dekket oborna gennep. 25:5 Kumerna mellaun roh kèla idi, tertunduh mo simerbaju idi karinana janah terpeddem. 25:6 Tengah mberngin, terdengkoh mo sora dilo-dilo, 'Enggo roh kèla idi! Simbak-simbak kènè mo!' 25:7 Ndungo mo simerbaju sisipiluh kalak idi, ilakati mo oborna. 25:8 Nina simerbaju simoto i mo taba simerbaju simerukur idi: 'Berrèken baku dèba minak ndènè idi, ai enggo naing mèntep obor nami.' 25:9 'Oda kuberrè kami kè,' nina simerbaju simerukur idi. 'Ai gabè karina nola ngo kita nahan oda cukup minak. Laus mo kènè menokor mi tokko.' 25:10 Nai laus mo simerbaju simoto i menokor minak. Tikan laus idi kalak i, soh mo kèla i. Rebbak mbengket mo simerbaju simerukur silima kalak i dekket kèla i mi bekkas perpèstaan, janah igerruk mo pèntu. 25:11 Nai roh mo simerbaju simoto si lima kalak i, dilo-dilo mo kalak i, 'O tuan, tuan buka kènè mo, asa masuk kami.' 25:12 Tapi ialoi kèla i mo, 'Oda kutandai kènè!' " 25:13 Irempun Jesus mo umpama idi bagèen, "Kerna naidi, ndungo mo kènè, ai oda ibettoh kènè arina barang katikana." 25:14 "Mula roh kessa Anak Jelma i sikira Tuhan, codi ngo bagè si ni umpama ènda. Lot mo sada kalak anak laki naing laus mi kuta ndaoh. Idiloi mo naposo-naposona, nai ipesakat mo hartana bai kalak idi. 25:15 Iberrèken mo hartana bai gennep naposo mengèkutken patutna. Bai sada kalak iberrèken lima ribu riar emmas. Bai sidèbanna iberrèken dua ribu riar emmas janah bai sada kalak nai seribu riar emmas. Nai berkat mo ia. 25:16 Naposo simenjalo lima ribu riar emmas idi, mènter ndor mo ia laus mertiga-tiga janah merlaba mo ia lima ribu riar emmas nai. 25:17 Bagi ma ngo naposo simenjalo dua ribu riar emmas idi, merlaba ngo ia dua ribu riar. 25:18 Tapi naposo simenjalo seribu riar emmas idi, itanem ngo riar idi asa mboni. 25:19 Enggo kessa ndekkah, mulak mo indukna idi, ibaing mo perrètongen taba kalak idi. 25:20 Mbengket mo naposo simenjalo lima ribu riar i, iberèken mo gabè sipuluh ribu riar. 'Tuan,' nina. 'Ipesakat kono bangku lima ribu riar. Èn pè, tengen mo, dapet aku ngo laba lima ribu riar nai.' 25:21 'Selloh mo i,' nina indukna i. 'Naposo mendè ngo kono janah sètia. Kumarna kettoken ngo kono ipas sicituk, kupessoh mo bamu mbuè. Arko mo misèn, asa rebbak mersennang-sennang rebbak aku!' 25:22 Nai masuk nola mo naposo simenjalo dua ribu riar idi, nina mo, 'Tuan, iberrèken kono bangku dua ribu riar. Bagèndari tengen mo, dapet aku ngo dua ribu riar nai.' 25:23 'Selloh mo i,' nina indukna idi. 'Naposo mendè ngo kono janah sètia. Kumarna kettoken ngo kono ipas sicituk, kupesoh mo bamu mbuè. Arko mo kita, asa mersennang-sennang kono rebbak dekket aku!' 25:24 Nai masuk nola mo naposo simenjalo seribu riar i, nina mo: 'Tuan, kubettoh ngo ukum kono sada kalak perukur mpihir. Ai itapu kono ngo buah tukasi pè oda lot isuan kono. Janah ipotik kono ngo hasil tukasi pè oda lot isamèken kono. 25:25 Jadi mbiar ngo aku, gabè kuboniken ngo riar tuan idi ibagasen tanoh. Na mo tuan riarmu ènda!' 25:26 'Èo, kono naposo jahat janah mahangkè!' nina indukna i. 'Ibettoh kono ngo keppè aku merrani ibas siso kusuan nai, janah memmuat hasil ibas siso kusamèken nai? 25:27 Tentu ianakken kono mo nemmu giam kèpèng i bai dèba, asa roh kessa aku kujalo riarku i dekket anakna? 25:28 Kerna nai, buat kènè mo riar idi bana nai, janah berrèken taba naposo simenjalo sisipuluh ribu riar idi. 25:29 Ai makin buèen ngo berèenken taba kalak sikelloten asa mertinèncuk bana janah meriba-iba. Tapi sibuaten ngo bai simenjalo sicituk i nai, bagi ma silot bana i kin pè. 25:30 Janah naposo siso kasèa i pè dabuhken kènè mo mi sigellap tuiten. I sidi mo ia derru-derru kerna mpersukna.' " 25:31 "Mula roh kessa Anak Jelma i bagè Raja rebbak dekket malaèkat-malaèkatNa kundul mo ia i babo kerajaenNa. 25:32 Ipepulung mo karinana bangsa ni dunia èn mi hadeppenNa. Nai isirang mo kalak i gabè dua bagian bagè pemaing permakan menirang biri-biri dekket kambing. 25:33 Kalak simengulaken lemmo atè Dèbata ibaing mo mi kamuhunna janah sidèbanna i mi kambirangNa. 25:34 Nai idokken Raja i mo taba kalak si ni kamuhunNa, 'Roh mo kènè sinipasu-pasu Bapa. Jalo janah akapi kènè mo rasana i Kerajaen Dèbata sienggo ihantari kin bai ndènè kessa nai ntembem dunia ènda. 25:35 Kerna sinderrang mellèhè Aku, iberrè kènè ngo Aku mangan, sinderrang muasen Aku iberrè kè ngo Aku mènum. Jelma mpanjil ngo nemmu Aku tapi ijalo kènè ngo Aku mi bages ndènè. 25:36 Mada merroles pè Aku, iperrolessi kènè ngo. Sakiten ngo Aku, ikebbaru kènè ngo Aku. I kurungen pè Aku, idahi kènè ngo.' 25:37 Nai idokken simengulaken lemmo atè Dèbata i mo, 'Tuhan ndigan i kuidah kami kono mellèhè, gabè kuberrè kami kono mangan, barang muasen, gabè kuberrè kami kono mènum? 25:38 Ndigan i kuidah kami kono bagè jelma mpanjil, gabè kuarahken kami kono mi bages nami? Ndigan i kuidah kami kono mada merroles, gabè kuperolessi kami kono? 25:39 Ndigan i kuidah kami kono sakiten barang i kurungen gabè kudahi kami kono?' 25:40 Ialoi Raja i mo, 'Bettoh kènè mo, nasa sinibaing ndènè bai sada kalak anggingKu simerlèa ènda, bangku ngo sinibaing ndènè idi!' 25:41 Nai idokken Raja i mo taba kalak ni kambirangNa idi, 'Laus mo kènè i gembarku ènda nai, kènè alè sikenna sempetta, mi bekkas api siso nggèut mèntep, sienggo ipèmaken bai sibolis dekket malaèkat-malaèkatna! 25:42 Kerna sinderrang mellèhè Aku, oda iberrè kènè mangan; sinderrang muasen Aku, oda iberrè kènè mènum. 25:43 Kalak jelma mpanjil ngo Aku, oda ijalo kènè mi bages ndènè. Malot meroles Aku, oda iperrolessi kènè Aku. Sakiten ngo Aku janah kurungen, oda ikebbaru kènè Aku.' 25:44 Nai idokken kalak i mo mbangSa, 'Tuhan, ndigan i kuidah kami kono mellèhè barang muasen, barang kalak jelma mpanjil kono, barang oda merroles, barang sakiten, barang kurungen, oda kuurupi kami kono?' 25:45 Ialoi raja i mo, 'Dengkohken kènè mo, tikan oda iurupi kènè barang apaina pè simerlèa ènda, merlapaten ngo i, oda iurupi kènè Aku.' 25:46 Asa ihukum mo kalak idi soh mi amman sumendah, tapi ukum kalak simengulaken lemmo atè Dèbata, nggelluh janah mersennang-sennang rebbak dekket Dèbata."
26:1 Enggo kessa pul ipeddahken Jesus karina sindai, nina mo taba sisinNa: 26:2 "Ibettoh kènè ngo dua ari nai dapet mo Ari Raya Paskah, ipesakat mo Anak Jelma asa ipersilangken!" 26:3 Sinderrangna idi merpulung ngo imam-imam ekuten dekket pengulu-pengulu Jahudi i bages Imam Huntuun i mo si Kayafas. 26:4 Irungguken kalak i ngo lako menangkup Jesus dekket cara tipu lako memunuhSa. 26:5 "Tapi," idokken kalak idi, "ulang mo siulaken bagidi tikan pèsta i, asa ulang gontar jelma nterrem idi." 26:6 Tikan i Betania Jesus, i bages si Simon imo sikoliten tikanna i, 26:7 roh mo sada kalak daberru mendahi Jesus. Iembah ngo sada botol bagak merisi minak baungkus maharga kalohoon. Sinderrang kundul Jesus mangan, iarirken daberru i mo minak mi babontakal Jesus. 26:8 Mellaga mo sisiin Jesus mengidah bagidi, "Man kadè mo gunana baingenna bagi mbuasna?" nina kalak i. 26:9 "Otang lotiin idèaken minak i dekket harga mahal, asa niberrèken tokorna taba kalak sincoor?" 26:10 Ibettoh Jesus ngo pikiren kalak idi, nai nina mo, "Kasa isusahi kènè daberru ènda? Mendè ngo pemaingna i bangKu. 26:11 Pukpuk ngo lot kalak sincor bai ndènè, tapi ukum Aku oda menettap rebbak dekket kènè. 26:12 Merkitè iarirken minak baungkus idi mi dagingKu, solo-solo mengkuburken Aku ngo i. 26:13 Èngèt kènè mo! Barang i dikè luas ibagahken Sukuten Kelluahen bai Dèbata nai, dekket ngo pemaing daberru ènda isukutken, lako mernèngèt ia." 26:14 Nai sada kalak ibas sisiin sisipuluh dua idi nai, mergerar si Judas Iskariot, laus mendahi imam-imam ekuten. 26:15 Idokken mo taba kalak idi, "Kadè iberrèken kènè bangku, mula kupesakat Jesus bai ndènè?" Nai mènter ibilang kalak i mo tellupuluh riar pirak, iberrèken mo riar i bana. 26:16 Mulai i sidi nai mo itulus si Judas Iskariot ketika cocok lako menelbuh Jesus. 26:17 I ari perlebbè tupung Pèsta Roti Siso Meragi, roh mo sisiin Jesus tabaSa. Ikusoken kalak i mo, "Idikè sèkel Tuhan idi kipangan pangaan Paskah asa kuhantari kami?" 26:18 Ialoi Jesus mo, "Laus mo kènè mendahi sada kalak i kuta, dokken kènè mo tabasa, 'Tennah Guru i, enggo mo dapet katikangKu, jadi naing mengerayaken Paskah ngo Aku i bagesmu rebbak dekket sisinKu.' " 26:19 Ibagahken sisiin idi mo bagè nidokken Jesus idi taba kalak i. Laus mo kalak i menghantari pangaan Paskah idi. 26:20 Gellap kessa mo ari, kundul mo Jesus rebbak dekket sisinNa lako mangan. 26:21 Sinderrang mangan idi, mongkam mo Jesus, "Dengkohken kènè: sada kalak bai ndènè nai naing menelbuh Aku." 26:22 Idengkoh sisiin i kessa mo rana Jesus idi, mellui kalohon mo ukur kalak idi. Nai gennep mo kalak i mendokken taba Jesus, "Otang oda ma ngo aku nidokkenmi Tuhan?" 26:23 Ialoi Jesus mo, "Sirebbakken dekket Aku mengosepken roti mi bagasen caban, ia mo sinaing menelbuh Aku. 26:24 Kennah matè ngo Anak Jelma i, ai tersurat ngo ibas Bibèl, kennah matè ngo ia. Tapi merjaya mo kalak simenelbuh Anak Jelma idi! Lotiin kin ngo ulang sanga tubuh ia i dunia ènda!" 26:25 Nai mongkam mo si Judas penelbuh idi, "Otang oda ma ngo aku nidokken Guru i?" Ialoi Jesus mo, "Bagi ngo nimu!" 26:26 Enggo kessa bagidi, ibuat Jesus mo roti idokken mo lias atè, nai ipenggelli mo roti idi ibas tanganNa, ipemberrèken mo taba sisinNa ninganna idokken, "Jalo kènè mo janah pangan kènè, dagingKu ngo ènda." 26:27 Enggo kessa i, ibuat mo perènumen anggur, idokken mo melias atè bai Dèbata. Nai ipepènumken mo taba sisinNa ninganna idokken, "Mènum mo kènè karina i sidi nai! 26:28 Ai darohKu ngo ènda, pehotken perpadanen -- Iorèken ngo darohKu mahan kesasaan dosa bai jelma mbuè. 26:29 Èngèt kènè mo: Oda nèngè ènumenku anggur idi soh mi katikana Aku rebbak dekket kènè mengènum anggur sirimbaru i Dunia Sirimbaru dekket BapangKu." 26:30 Enggo kessa bagidi, iendèken kalak i mo endè pemoji-mojiin, kessa pul i laus mo kalak i mi Uruk Zaitun. 26:31 Nai idokken Jesus mo taba sisinNa, "Berngin èn, itadingken kènè mo Aku lako mperrus; ai tersurat ngo ipas Bibèl, 'ibunuh Dèbata ngo permakan i janah mermèrapen ngo biri-biri simpulguken idi.' 26:32 Tapi kèkè kessa Aku, Kulebbèi ngo kènè mi Galilea." 26:33 Nai idokken si Petrus mo taba Jesus, "Barang karina kalak i menadingken Kono Tuhan, tapi ukum aku oda!" 26:34 Nai idokken Jesus mo tabasa, "Èngèt mo, sinderrang madèng takuak manuk berngin ènda, enggo mo ipersomada ko Aku tellu kali." 26:35 Ialoi si Petrus mo, "Mula pè matè aku rebbak Kono Tuhan, oda kudokken baMu; oda kutandai Kono Tuhan." Janah karinana ngo sisiin idi mendokken bagidi ma. 26:36 Nggo kessa i laus mo Jesus dekket sisinNa mi sada bekkas mergerar Getsemane. Idokken Jesus mo taba kalak i, "Kundul mo kènè i sènda, laus Aku lebbè mersodip mi sandi." 26:37 Iarahken mo si Petrus dekket anak si Sebedeus si dua i laus rebakken Jesus. Nderrang bagidi teridah ngo Jesus bonek janah bulisah kalohoon. 26:38 Idokken mo taba sisinNa, "Bonek kalohon ngo kuakap ukurKu, bagè naing matè ngo. Isèn mo kènè, merjaga-jaga rebbak dekket Aku." 26:39 Nai misir mo Jesus narih merkellang situk, i sidi mo Ia tangkep mi tanoh janah mersodip, "Ialè Pa," nina, "Ukum ndorok, pesisi mo bangku nai kinipersuk simahan kugongken ènda. Tapi ulang mo lemmongku, lemmoMu mo." 26:40 Enggo kessa bagi, balik mo Jesus mendahi sisinna sitellu kalak idi, tapi meddem ngo kalak i idapet. Nina mo taba si Petrus, "Oda ngo kèppè tergong kè ndungo rebbak dekket Aku giam sinempas? 26:41 Merjaga-jaga mo kènè ninganna mersodip, asa ulang talu kènè i pengojiin. Tuhuna bennar ngo naing iulaken tendi ndènè, tapi oda tellap kè, kerna ndotè ngo tabiat jelma i." 26:42 Nai iolihi Jesus nola mo mersodip pedua kaliken, nina mo, "Ialè Pa, mula kennah Kubellus ngo kinipersuk ènda janah mak ndorok mada, saut mo lemmo atèMu alè Pa!" 26:43 Balik nola mo Jesus, idapet ma mo tong meddem sisinNa idi. Oda terbuka kalak i nèngè matana, ai mbotong ngo cilèbenna. 26:44 Itadingken Jesus mo kalak i sikali nai, lako mersodip petellu kaliken. Dos ngo sodipNa bagè perlebbè idi. 26:45 Nai molih mo Ia mendahi sisinna janah nina mo, "Dak iempet kènè dèng ngo meddem janah mentadi? Tengngen mo, enggo dapet katikana ipesakat mo Anak Jelma i taba kuasa jelma perdosa. 26:46 Kèkè mo kènè, ita kènè mo. Tengngen kènè mo! Enggo soh mi sèn kalak simenelbuh Aku!" 26:47 Tikan mengerana dèng Jesus, roh mo si Judas, sada kalak ibas sisipuluh dua idi nai. Rebbak roh ngo ia dekket mbuè jelma merembah peddang dekket palu-palu, imo pasulaken imam ekuten dekket pengulu-pengulu Jahudi. 26:48 Enggo kin ngo ibagahken penelbuh idi bai kalak idi tandana: "Barang isè nahan kusanggoh, i mo kalakna. Tangkup kènè mo Ia!" 26:49 I si soh mi bekkas idi, mènter idapetken si Judas mo Jesus janah nina mo, "Njuah-njuah mo Guru!" Ninganna isanggoh mo Jesus. 26:50 Ialoi Jesus mo, "Merkadè ko roh mi sèn anggia?" Nai mènter roh mo jelma mbuè i, itangkup mo Jesus. 26:51 Sada kalak sisiin Jesus sini gembar Jesus idi menintak peddangna. Ipastik mo naposo imam huntuun idi, sampè mistak pènggelna. 26:52 Idokken Jesus mo taba sisinNa idi, "Sembungken peddangmi, kerna barang isè mengasangken peddangna, matè ngo ia bakinen peddang. 26:53 Katèmu oda ndorok kupido bai Bapa, asa ipasulak bagèndari sipuluh dua ntinegu tenterra malaèkat? 26:54 Tapi mula bagi ngo, bakunè mo persautna bagè sienggo ikataken ibas Bibèl, kennah masa ngo bagèen?" 26:55 Nai idokken Jesus mo taba jelma mbuè idi, "Roh kènè lako menangkup Aku merembah peddang ninganna merpalu-palu, bagè dempak kalak perjahat! Gennep ari ngo Aku mengajari i Bages Dèbata, tapi oda itangkup kènè Aku. 26:56 Tapi karinana ènda kennah ngo terjadi, asa saut bagè nisuratken nabi-nabi i bagasen Bibèl." Enggo kessa bagi, mperrus mo karina sisiin idi menadingken Jesus. 26:57 I iring kalak i mo Jesus mi bages Imam Huntuun Kayafas. Enggo mo pulung i sidi guru-guru agama Jahudi dekket pengulu-pengulu Jahudi. 26:58 Tapi ukum si Petrus dak ièkut-èkut ngo Jesus ndaoh-ndaoh i podi nai, soh mi kasèan imam huntuun i. Ibengketti si Petrus mo mi kasèan i, janah rebbak kundul dekket perjaga ni sidi. Ai naing bettohenna ngo barang bakunè dungna. 26:59 Karina imam-imam ekuten dekket kerungguun idi menulusi saksi-saksi palsu, asa ndorok Jesus idi ihukum matè. 26:60 Tapi oda dapet bukti-bukti bai kalak i, tukasi pè enggo mbuè saksi ipecènder. Perpodi kalohon lot mo dua kalak cènder mi lebbè. 26:61 Nina mo, "Idokken kalak ènda, boi ngo irumpakken Bages Dèbata, janah ndorok nola ipecènder ibagasen tellu ari." 26:62 Nai cènder mo imam huntuun idi, idokken mo taba Jesus, "Oda ngo ialoi Kono tukas sinidokkenna baMu idi?" 26:63 Tapi sip sambing ngo ukum Jesus. Iulaki imam huntuun i mo sikali nai mendokken taba Jesus, "Merkitèken Dèbata singgelluh idi, dokken mo bai nami tuhu ngo kono Raja Sipaluah Anak ni Dèbata?" 26:64 Ialoi Jesus mo, "Bagi ngo nimu. Tapi percaya mo kènè, mulai bagèndari nai idahen ndènè mo Anak Jelma idi kundul i kamuhun Dèbata Pergegoh Sisotercodi janah roh merkitè-kitè hembun i langit!" 26:65 Nai mènter iribakken imam huntuun idi mo olesna, ninganna idokken, "Ilèai Ia ngo Dèbata! Oda perlu nè tulusen saksi. Karina kè enggo mendengkohken pengelèaina mi Dèbata. 26:66 Bagèndari pè bakunè katè ndènè?" Ialoi kalak i mo, "Sah mo ia ihukum matè!" 26:67 Nai icèduri kalak i mo abè Jesus janah iligasi. Lot mo dèba memarap. 26:68 Ninganna idokken, "Bagahken bai nami alè Raja Sipaluah! Isè ngo simemarap Kono?" 26:69 Kundul ngo si Petrus i ruar kasèan i. Roh mo sada kalak daberru, naposo imam huntuun idi, nina mo taba si Petrus, "Kono pè dekket ngo dengan Jesus kalak Galilea idi?" 26:70 Tapi iperso si Petrus ngo i hadeppen ni kalak i. "Kadè ngo nimu, oda kubettoh i!" nina si Petrus. 26:71 Nai laus mo si Petrus narih mi pèntu kasèan, iidah sada kalak naposo daberru sidèbanna mo ia janah mendokken taba jelma ni sidi, "Rebbak ngo ndai kalak ènda dekket Jesus i Nazaret nai." 26:72 Memerso dèng ma mo si Petrus janah mersumpah. "Tuhu-tuhu ngo oda kutandai ia!" nina si Petrus. 26:73 Oda ndekkah nèngè kessa bagidi, roh mo mendahi si Petrus kalak si cènder ni sidi janah mendokken, "Pasti kono ngo sada kalak bai kalak i nai, ai kennataan ngo arap permongkammu!" 26:74 Nai mersumpah-sumpah mo si Petrus mendokken, "Oda kutandai kalak i!" Nai mènter gejapkenna i mo takuak manuk. 26:75 Ièngèt si Petrus mo nidokken Jesus tabasa, "Sinderrang madèng takuak manuk berngin èn, enggo iperso kono Aku tellu kali, mendokken: Oda itandai kono nimu Aku." Nai laus mo si Petrus, tangis mo ia kerna bonekna soh mi ruar.
27:1 Sibarembenkenna i siceggen, karinana imam-imam ekuten dekket pengulu-pengulu Jahudi memutusken, kennah bunuhen mo Jesus. 27:2 Ièkèti kalak i mo ia janah iembah lako pesohken taba si Latus, gubèrnur kerajaen Rom. 27:3 Iidah si Judas penelbuh idi kessa mo enggo idabuh hukum taba Jesus, peselsel mo ia. Iulakken mo kèpèng sitellupuluh pirak i taba imam-imam dekket pengulu-pengulu kalak Jahudi. 27:4 Nina mo, "Enggo merdosa aku, menelbuh kalak siso merdosa, pella ihukum matè!" Tapi ialoi kalak idi mo, "Oda parduli kami! Otang urusenmu ngo i?" 27:5 Nai ibentirken si Judas mo kèpèng i mi Bages Dèbata. Laus mo ia i sidi nai lako mendelles. 27:6 Ipepulung imam-imam mo kèpèng i janah idokken, "Kèpèng daroh ngo kèpèng èn. Mengèkutken hatoren agama, oda ngo ndorok pesadaan kèpèng èn mi bekkas pèlèen i Bages Dèbata." 27:7 Mersungkuun mo kalak idi, itokorken kalak idi mo kèpèng i mi tanoh janah igerari mo Tanoh Tukang Koden. Ibaing kalak i mo tanoh i maing perkuburen kalak siroh. 27:8 Kumarna idi ngo asa igerari tanoh idi, "Tanoh Daroh" soh mi ari sidari ènda. 27:9 Merkitèken i, saut mo si nidokken Nabi Jeremia, bagèen, "Ijalo kalak idi ngo tellupuluh kèpèng pirak, imo buèna kèpèng isetujui kalak Israel mahan gararna. 27:10 Janah itokorken kalak i ngo kèpèng idi menokor Tanoh Tukang Koden, bagè sienggo nidokken Tuhan i taba aku." 27:11 Tikanna Jesus i hadeppen si Latus gubèrnur nagerri idi, ikusoi si Latus mo ia, "Kono ngo raja ni kalak Jahudi?" "Uè, idi mo tuhu bagè nidokkenmu idi," nina Jesus. 27:12 Tapi sinderrang imam ekuten dekket pengulu Jahudi mengeranaken tukas-tukas terrèngèt Jesus, oda ngo ialoi Jesus kalak i. 27:13 Kerna nai, idokken si Latus mo mbang Jesus, "Oda ngo idengkoh Kono karinana ni tukasken kalak idi taba kono?" 27:14 Laju oda ialoi Jesus, gabè lengang kalohon mo gubèrnur i. 27:15 Gennep Ari Raya Paskah, ncemmal ngo ipaluah gubèrnur sada kalak siterhukum barang apaina iteddo jelma nterrem. 27:16 Sinderrangna i, lot mo ikurung sada kalak perjahat mahantu mergerar si Barabas. 27:17 Jadi enggo kessa pulung jelma nterrem i, ikusoi si Latus mo, "Isè ipergeddo atè ndènè naing kupaluah? Si Barabas ngo barang Jesus simergerar Kristus?" 27:18 Idokken gubèrnur idi pè bagi, kerna ibettoh ngo iaduken kalak idi pè Jesus tabasa kumernaken ncian atè ngo. 27:19 Tikan kundul si Latus i kantorna, itennahken sinibagesna mo tabasa, "Ulang iantoi kono perkara kalak siso mersalah idi, ai kumarnaken Ia, lot nipingku ntengam kaloon berngin i." 27:20 Tapi dak ipejuju imam dekket pengulu Jahudi ngo jelma nterrem i, lako mengidoken bai si Latus; asa ipaluah si Barabas, tapi ibunuh mo ukum Jesus. 27:21 Nai ikuso gubèrnur i nola mo kalak idi, "Isè ngo sidua kalak èn dok atè ndènè kupaluah bai ndènè?" "Si Barabas," nina kalak idi. 27:22 "Nai bakunè mo kubaing taba Jesus sinidokken Kristus?" nina si Latus mengkuso kalak idi. "Persilangken mo Ia!" nina kalak idi. 27:23 "Nai mula bagi, kejahaten kadè pana ibakin Ia?" Nina si Latus. Nai makin nggang mo surak kalak i, "Persilangken mo Ia!" 27:24 Ujungna ibettoh si Latus mo maknè terdokken barang kadè, tah bakunè nola mènter berontak jelma idi, ibuat mo laè, iborih mo tanganna i lebbè-lebbè kalak idi ninganna idokken, "Oda pendikèi aku ibas permatè kalak èn! Urusen ndènè mo idi!" 27:25 Karinana jelma nterrem idi mengaloi, "Uè, kami dekket pinempar nami mo gemongken hukumenNa!" 27:26 Nai ipaluah mo si Barabas bai kalak idi, janah idokken mo kalak lako mengeligas Jesus nai ipesakat mo asa ipersilangken. 27:27 Nai iiring soridadu ni si Latus mo Jesus mi istana gubèrnur janah karinana mo kalak i mengkulilingi Jesus. 27:28 Iosari kalak i mo pakkèen Jesus janah isellukken baNa jubah mbara mesiap. 27:29 Ibaing kalak i mo sada bulang-bulang ibas ranting-ranting merdori nai, janah ibaing mo i mi takal Jesus. Nai ibaing kalak i mo sada tongket mi tangan kamuhunNa, nai mersembah mo klak idi mi lebbè Jesus ninganNa mengerèhè-rèhèi, "Njuah-njuah mo Raja Jahudi!" nina kalak idi. 27:30 Nai icèduri kalak i mo Ia, ibuat mo tongket idi, ipalu mo takalNa. 27:31 Enggo kessa pul Ia ipelèa-lèa, italkasi mo jubah mbara mesiap idi janah ipakkèken nola mo olesna kin. Nai iiring kalak i mo ia mi ruar asa ipersilangken. 27:32 I tengah ndalan pesimbak mo kalak idi dekket sada kalak Kirene mergerar si Simon. Ia mo igantal kalak idi lako memersan kayu persilang i. 27:33 Nai soh mo kalak idi mi sada bekkas mergerar Golgota, lapatenna "Bekas Tulan". 27:34 I sidi mo iberrè kalak i Jesus mènum anggur mersakkor peggu. Tapi iakapi Jesus kessa anggur i, gabè oda nggèut Ia mengènum. 27:35 Nai ipersilangken kalak i mo Ia, tapi ipella-pella kalak i ngo olesNa merkitè tendung. 27:36 Enggo kessa i, kundul mo kalak idi ninganna merjaga i sidi. 27:37 Ilekketken kalak i mo mi babontakalNa sada surat terrèngèt tukas mbangsa. Bagèen mo tersurat, "Jesus ngo èn, Raja kalak Jahudi." 27:38 Sinderrangna i, lot mo dua kalak penggarong rebbak ipersilangken dekket Jesus. Sada mo i kamuhun janah sada nai kan kambirangNa. 27:39 Karina kalak simemellus arap idi mengelèai ia ninganna ipetèldèng-tèldèng takalna. 27:40 Nina mo, "Èo, kono alè simengerumpakken Bages Dèbata janah pecènderken nola ibagasen tellu ari! Mula tuhu Anak Dèbata kono, paluah mo diriMu! Susur mo kono i kayu persilang idi nai." 27:41 Bagi ma ngo bang imam ekuten dekket guru agama Jahudi bak pengulu Jahudi pè, pukpuk mengerèhèi Jesus. Nina kalak i ngo, 27:42 "Sidèban ipaluah, diriNa oda terpaluahsa. Otang Raja Israel ngo ia? Mula bagi susur mo Ia nemmu bagèndari i kayu persilang i nai asa percaya kami tabaSa. 27:43 Percaya ngo Ia nina taba Dèbata, janah Anak Dèbata ngo Ia nina. Asa, siidah mo, tah ipaluah Dèbata ma ngo Ia bagèndari." 27:44 Pennamun sitersilang rebbakken Jesus idi pè bagi ma ngo pengelèaina. 27:45 I mulai ncèger ari nai gellap mo dunia èn sampè tellu jom dekkahna. 27:46 Pukkul tellu ciboon, nggang kaloon mo sora Jesus mendiloken, "Eli, Eli, lama sabakhtani?" Lapatenna, "Alè DèbatangKu, DèbatangKu, kasa itadingken Kono Aku?" 27:47 Lot mo cènder i sidi mendengkoh nidilokenna idi, nina mo, "Mendiloi si Elias ngo ia." 27:48 Nai mènter lojang mo sakalak ipas kalak i nai memmuat lumut, isornepken mo lumut i mi anggur macem, iberretken mo mi sada biski, idudurken mo asa iènum Jesus. 27:49 Tapi dèba nai mendokken, "Pèma mo siidah lebbè, tah roh ma si Elias paluahkenSa!" 27:50 Nai mengolihi mo mersora nggang Jesus, mpostep mo kessahNa. 27:51 Meribak mo kirè-kirè Bages Dèbata i babo nai soh mi terruh bellah dua. Dumegger mo dunia èn janah merpustaken delleng batu. 27:52 Mermbukaan mo kuburen janah mbuè ngo ginemgem Dèbata sienggo matè i kin balik nggelluh. 27:53 Asa kessa kèkè Jesus i kematèen i nai, karuar mo kalak i kuburen i nai janah mbengket mi Jerusalem. Janah mbuè ngo kalak mengidah kalak i isidi. 27:54 Buradan kalohon mo soridadu dekket ekuten simenjaga Jesus, iidah kalak i kessa rènur idi dekket karina simasa i, idokken kalak i mo, "Tuhunna ngo Ia Anak Dèbata!" 27:55 Lot ma mbuè daberru isidi roh menatap ndaoh-ndaoh. Mulai i Galilea nai, enggo dak ièkutken daberru idi Jesus lako mengkebasi Jesus. 27:56 Imo si Maria Magdalena, si Maria inang si Jakobus dekket si Josep, bagi ma inang dukak-dukak si Zebedeus. 27:57 Bernginna idi roh mo sada kalak sibèak i Arimatea nai mergerar Josep. Ia pè sada kalak simengèkutken Jesus ngo. 27:58 Laus mo ia mendahi si Latus mengido bangkè Jesus. Nai iperèntahken si Latus mo asa iberrèken bana bangkè Jesus. 27:59 Ibuat si Josep mo bangkè i, nai ibalut mo dekket kaèn kapan mbersih. 27:60 Igamparken mo bangkè idi mi kuburen sirimbaru sienggo ipahat i sada uruk batu. Nai igoling mo sada batu mbellen mi babah lubang kuburen idi, nai laus mo ia. 27:61 Si Maria Magdalena dekket si Maria sisada nai dak kundul ngo isidi padep-adep kuburen idi. 27:62 Sibarembenkenna, imo enggo kessa ari Sabat, laus mo imam ekuten dekket kalak Parisè menghadep si Latus. 27:63 Idokken kalak idi, "Tuan, kuèngèt kami nderrang nggelluhna dèng penipu idi lot ngo katana bagèen, 'Enggo kessa tellu ari, nggelluh nola ngo Aku.' 27:64 Kerna naidi suruh mo kalak menjaga kuburen idi sampè soh mi ari petelluken. Kum oda bagi, nggèut ngo sisinNa menangko bangkèNa i, nai idokken mo bai jelma nterem, 'Enggo balik nggelluh ia,' gabè merrohaan nola penipu siperpodi ulang perlebbè." 27:65 "Arahken kènè soridadu lako menjaga," nina si Latus mo taba kalak idi, "Janah jaga mo kuburen idi mertuhu-tuhu." 27:66 Nai laus mo kalak i mi kuburen, isègèl mo kuburen idi merkitè memaing cap mi batu tutupna i janah idokken mo soridadu merjaga isidi.
28:1 Enggo kessa leppas ari Sabat, teridah buk betekken dèng siceggen ari Minggu i, laus mo si Maria Magdalena dekket si Maria sisada nai lako menongkir kuburen idi. 28:2 Sintempu kaloon, masa mo rènur gegoh kalohon. Susur mo sada malaèkat i sorga nai menggulang batu penutup i janah kundul i babona. 28:3 Merbindella ngo abèna janah pakkènna mbulan bagè kapas. 28:4 Buradan mo perjaga ni sidi janah menggirgir sakkor mellangan bagè kalak simatè. 28:5 Nina malaèkat i mo mbang daberru silotna i sidi, "Ulang kènè mbiar! Kubettoh itulusi kènè ngo Jesus sienggo ipersilangken idi. 28:6 Oda i sèn nèngè ia, ai enggo kèkè ia bagè sienggo nidokkenna idi kin. Tengen kènè mo bekkasNa gampar ènda. 28:7 Bagèndari ndor mo kènè laus magahken taba sisinNa, 'Enggo balik nggelluh Ia, janah ilebbèi ngo kènè nahan mi Galilea. I sidi mo idahen ndènè Ia!' Èngèt mo sienggo nidokkenNa i bai ndènè." 28:8 Nai ndor mo itadingken daberru-daberru idi kuburen idi, mbiar mercampur lolo ukur kalak idi lojang lako memagahken simasa i taba sisiin Jesus. 28:9 Sintempu, roh mo Jesus mendahi daberru idi, nina mo, "Damè mo bai ndènè!" Nai roh mo kalak i menjolmitiSa, ikaol mo nèhèNa janah isembah mo Jesus. 28:10 "Ulang kènè mbiar!" nina Jesus taba kalak idi, "Laus mo kènè janah bagahken kènè mo bai karina anggingKu, asa laus kalak i mi Galilea, i sidi mo idahen kalak i Aku." 28:11 Enggo kessa laus karinana daberru idi, laus ma mo dèba soridadu penjaga kuburen idi mi kuta, ibagahken mo taba imam ekuten terrèngèt karina simasa idi. 28:12 Nai merrunggu mo imam ekuten dekket pengulu-pengulu Jahudi. Iputusken kalak idi mo asa iberrè kèpèng bai soridadu penjaga i. 28:13 Janah idokken mo, "Kennah mo dokken kènè bagèen, 'Tikan neddem kami, roh ngo sisinNa bernginna idi menangko bangkè i.' 28:14 Jadi, mula ibettoh gubèrnur idi pè i, kami pè mengamoh-ngamohisa, asa ulang susah nola kènè." 28:15 Ijalo kalak i mo kèpèng idi janah iulaken soridadu idi mo bagè sinidokken imam ekuten dekket pengulu Jahudi, nai tersaar ngo berrita bagidi soh sidari èn mi kalak Jahudi. 28:16 Laus mo sisiin sisipuluh sada i mi delleng i Galilea rembang mi siniperèntahken Jesus taba kalak idi. 28:17 Iidah kalak i kessa Jesus i sidi, sujud mo kalak i ninganna mersembah, tapi lot ngo ipas kalak i nai oda tok ukurna. 28:18 Nai ijolmiti Jesus mo kalak idi janah idokken, "Karina kuasa memerèntah sorga dekket dunia èn, enggo isohken bangKu. 28:19 Kerna nai, laus mo kènè mendahi karina bangsa i suberri dunia èn, bakin kènè mo kalak i gabè sisinKu, perridi kènè mo kalak i mi bagasen gerar Bapa, Anak dekket Tendi Dèbata. 28:20 Peddahi kènè mo kalak i, asa tunduk mi karina sienggo Kuperèntahken bai ndènè idi. Èngèt mo! Dak denganenKu ngo kènè soh mi ari perpodi."
1:1 Èn mo Sukuten Simerandal terrèngèt Jesus Kristus Anak Dèbata. 1:2 Sukuten Simerandal idi mulai bagè nisuratken Nabi Jesaya, bagèen, " 'Èn mo utusenKu,' nina Dèbata; 'Kuutus ngo ia lebbèen asa Kono, asa ihantari dalan baMu.' 1:3 Lot mo kalak dilo-dilo i padang gurun, 'Hantari kènè dalan bai Tuhan i, pedèas mo dalan sinaing bellusenNa.' " 1:4 Bagè sitersurat idi, bagi ma ngo pekiroh si Johanes i padang gurun. Iperidi ngo kalak i janah ikataken ngo sukuten bai Dèbata nai. "Kennah tobat ngo kènè ibas dosa-dosa ndènè nai janah kennah iperidi ngo kènè, asa isasa Dèbata karina dosa ndènè," nina si Johanes. 1:5 Mbuè ngo kalak i Juda nai dekket i Jerusalem nai roh mendengkohken jamita si Johanes. Iakku kalak i ngo dosana, nai iperridi si Johanes mo kalak idi i Laè Jordan. 1:6 Ukum pakkèen si Johanes bukbuk unto ngo. Tali abakna bebbak janah panganna balang dekket tenggoli wani. 1:7 Ibagahken mo sukuten ènda, "Janah enggo kessa aku roh ngo kalak belgahen asa aku. Lako mengosari tali cipatuNa sambing pè, oda ndorok dèng aku. 1:8 Laè ngo kuperidiken bai ndènè, tapi ukum Ia, iperidi ngo kènè merkitè Tendi Dèbata." 1:9 Tikanna i, roh mo Jesus i Nazaret nai sini nagerri Galilea, mendahi si Johanes perridiken mi Laè Jordan. 1:10 Karuar kessa Jesus i laè idi nai, iidah mo mbuka langit janah Tendi Simbadia susur mi babona bagè rumang ndarapati. 1:11 Nai terdengkoh mo sora i langit nai mendokken, "Kono ngo AnakKu kekelengenKu, lemmo ngo atèngKu midah kono." 1:12 Mènter ibabai Tendi Dèbata mo Jesus laus mi padang gurun. 1:13 Empatpuluh ari mo dekkahna Ia i sidi, iunjuni Sibolis. Lot mo mbuè binatang i sidi rebbakkenSa, dekket malaèkat-malaèkat mengkebasiSa. 1:14 Enggo kessa terkurung si Johanes, laus mo Jesus mi Galilea lako mengkataken Sukuten Simerandal bai Dèbata nai. 1:15 Nina mo, "Enggo dapet katikana imulai Dèbata Kerajaenna. Tobat mo kè ibas dosa-dosa ndènè nai, percaya mo kènè mi Sukuten Simerandal bai Dèbata nai!" 1:16 Tikan merdalan Jesus i biding tao Galilea, iidah mo dua kalak perrikan, imo si Simon dekket anggina si Andreas. Tupung menjala ngo kalak i i tao idi. 1:17 Idokken Jesus mo taba kalak idi, "Èkutken mo Aku. Naing Kuajari ngo kènè menjala jelma." 1:18 Nai mènter itadingken kalak i mo jalana lako mengèkutken Jesus. 1:19 Iterusken Jesus mo merdalan, iidah nola ma mo dua kalak sibeltek imo si Jakobus dekket si Johanes, dukak si Zebedeus. Ibagasen bungki ngo kalak i peliasken jalana. 1:20 Idah Jesus kessa kalak idi, idilo mo. Itadingken kalak i mo bapana si Zebedeus i, ibagasen bungki rebbakken sigajinna. Ièkutken kalak idi mo Jesus. 1:21 Nai soh mo kalak i mi kuta Kapernaum. Tikan ari Sabat, laus mo Jesus mi bages perguruun lako mengajar. 1:22 Lengang ngo kalak karina simendengkoh carana mengajar. Ai merseppuh ngo pengerananNa, oda bagè guru agama sidèban. 1:23 Sinderrang bagidi, masuk mo mi bages perguruun sada kalak nisellapen sètan janah mersurak, 1:24 "Naing ikekadè Kono kami alè Jesus, kalak Nazaret? Roh Kono misèn lako memunuh kami ngo? Kubettoh ngo barang isè Kono; Simbadia bai Dèbata nai!" 1:25 Isergangi Jesus mo tendi jahat idi nina mo, "Sip kono, karuar mo kono bana nai!" 1:26 Nai itembem-tembemken nisellapen sètan i mo dirina, nai mendempik ninganna karuar ibas sinisellapen idi nai. 1:27 Lengang kalohon mo karina jelma nisidi, mersidokenken mo kalak idi samahsa, "Iah kadè nola ngo èn? Sada pengajaren rimbaru nola ma ngo kidahken ènda! Iperèntah kessa tendi jahat idi iuèi ngo oda mengilak!" 1:28 Mènter ndor mo sar berrita terrèngèt Jesus i suberri nagerri Galilea. 1:29 Enggo kessa i laus mo Jesus i bages perguruun idi nai rebbakken dekket siempat kalak idi memènter mi bages si Simon dekket si Andreas. Berkat ma ngo si Jakobus bak si Johanes rebbak dekket kalak i. 1:30 Mersakit panè ngo simatua daberru ni si Simon, dak galè ngo i peddemmenna. Soh kessa Jesus dekket denganna mi bages idi, ibagahken mo taba Jesus terrèngèt sakit idi. 1:31 Idapetken Jesus mo simatua si Simon idi, ijamah mo tanganna ninganna iteggu mo asa kèkè. Mènter malum mo iakap, janah ikebbasi mo pangaan bai kalak idi. 1:32 Cibonna i, enggo kessa sundut mataniari, iembahi jelma i mo kalak simersakit bagi ma nisellapen sètan. 1:33 Karina pengisi kuta idi merrengngemmen i lebbè bages idi. 1:34 Nai ipemalum Jesus mo mbuè kalohon kalak simenggong matcam bagè sakit janah mengusir sètan. Oda ipaduè sètan-sètan idi mongkam, ai ibettoh sètan idi ngo, isè Ia. 1:35 Sibarembenkenna, langat dèng, kèkè mo Jesus menadingken bages i. Laus mi sada bekkas melongo i ruar kuta janah mersodip mo Ia i sidi. 1:36 Nai itulusi si Simon dekket denganna mo Ia i sidi. 1:37 Jumpa kalak i kessa Jesus, idokken kalak idi mo, "Karina ngo kalak menulusi Kono." 1:38 Tapi ialoi Jesus mo, "Kita mo menerusken perdalanenta mi kuta-kuta sidèban si slot sikuliling èn. Ai kennah merjamita ma ngo Aku i sidi, ai kumarna i ngo asa roh Aku." 1:39 Idahi Jesus mo suberri Galilea. Ikataken mo sukuten Simerandal i bages perguruun ninganna mengusir sètan-sètan. 1:40 Lot mo sada kalak sikoliten roh mendahi Jesus. Isembah mo Jesus ninganna mengido pengurupiin tabaSa, "Mula uè Kono Tuan," nina, "Terpemalum Kono ngo aku." 1:41 Masèh mo atè Jesus midahsa, idorokem mo tanganNa menjamahSa. Idokken mo, "Uè ngo Aku, malum mo iakap kono." 1:42 Nai mènter ntangtang mo kolitna idi karina janah mpanting i dagingna i nai. 1:43 Ipasulak Jesus mo ia laus janah seppè ipernoi: 1:44 "Jaga kono, ulang bagahken simasa èn barang taba isè pè. Laus mo ko mendahi imam, pengido asa iperrèso kono. Enggo kessa i pèlèken mo pèlèen bai Dèbata mengèkutken hatoren sinidokken si Musa, asa iidah jelma nterrem enggo malum iakap kono." 1:45 Laus mo ia, tapi ipesaar mo berita idi. Oda pellin bagi tapi makin irana-ranaken mo berrita idi, gabè sanga mak terbaing Jesus nèngè ntarar masuk mi sada-sada kuta. Gabè i ruar kuta i mo Ia, i bekkas melongo. Tukasi pè bagi, dak merrohen ngo kalak mendahiSa, tah i dikè nai dèba i.
2:1 Enggo kessa barang piga ari nola, balik mo Jesus mi Kapernaum, saar mo berrita mendok, enggo i bages Ia. 2:2 Nai mbuè mo jelma merrohen. Rengngem mo kalak i isidi, pella maknè lot bekkas. I babah pèntu pè enggo mersessak-sessak jelma. Nai iranaken Jesus mo berita bai Dèbata nai taba jelma nterrem idi. 2:3 Sinderrang mengerana Jesus, lot mo sada kalak nitempuk sigading iosong empat kalak mendahi Jesus. 2:4 Tapi kumarna jelma nterrem idi, gabè oda terbaing kalak idi merembah nitempuk sigading idi soh mi gembar Jesus. Iongkam kalak i mo saong sapo idi pas ibabo bekkas Jesus kundul idi. Enggo kessa i itontonken kalak idi mo nitempuk sigading idi i bagasen peddemmenna. 2:5 Idah Jesus kessa bagidi belgahna kepercayaen kalak idi, idokken mo taba nitempuk sigading i, "Alè pa, enggo isasa dosa-dosamu." 2:6 Lot mo isidi kundul guru-guru agama, mengerana mo ibagasen atèna bagèen. 2:7 "Pang ma mo kalak èn mongkam bagidi! Mengelèai Dèbata ngo ia. Isè poda ndorok mennasa dosa laènken Dèbata!" 2:8 Ibettoh Jesus ngo sura-sura kalak idi, nai idokken mo, "Kasa bagi sura-sura ndènè? 2:9 Apaina ngo murahen nidokken taba nitempuk sigading ènda, 'Enggo isasa dosamu, barang, kèkè mo ko, embah mo bellagenmu, merdalan mo kono?' 2:10 Kubagahken mo bai ndènè, merkuasa ngo Anak Jelma menasa dosa i babo tanoh èn." Nai idokken Jesus mo taba nitempuk sigading idi, 2:11 "Kudokken mo bamu, kèkè mo kono, balun mo bellagenmu, molih mo kono!" 2:12 Ipetengen-tengen jelma nterrem idi, kèkè mo nitempuk sigading i, ibalun mo bellagenna nai merdalan mo ia laus. Lengang ngo karina nisidi; ipoji mo Dèbata, nina kalak idi mo, "Makdèng nung kuidah kami masa sibagèen!" 2:13 Nai balik nola mo Jesus mi biding Tao Galilea. Nai merrohen mo mbuè jelma mendahiSa janah Iajari mo kalak idi. 2:14 Tikan merdalan Jesus isidi, dapet pennengenna mo sada kalak pertunggu cokè mergerar si Lepi i kantorna. "Èkutken mo Aku!" nina Jesus tabasa. Mènter cènder mo si Lewi janah ièkutken mo Jesus. 2:15 Enggo kessa i, itamuèi si Lewi mo Jesus mi bagesna. Mbuè ngo pertunggu cokè dekket kalak siso kasèa dokatè jelma nterrrem rebbak dekket Jesus isidi. Janah mbuè ma ngo kalak idi rebbakken mangan dekket Jesus bak sisinNa. 2:16 I idah barang piga-piga kalak mo Jesus rebbak mangan dekket siso kasèa dokatè jelma nterrem idi, gabè ikusoi mo sisiin Jesus, "Kasa rebbak mangan Jesus dekket pertunggo cokè bak siso kasèa idi?" 2:17 Idengkoh Jesus ngo kuso-kuso idi, gabè nina mo, "Oda perlu penambari bai kalak sijuah-juahen, pellin taba kalak simersakit ngo. Roh Aku oda ngo mendiloi kalak bennar, tapi kalak perdosa ngo." 2:18 Puasa ngo sisiin si Johanes Peridiken bagi ma kalak Parisè pè. Nai lot mo kalak mengkuso mendahi Jesus, "Kasa sisiin si Johanes Peridiken dekket Parisè puasa, keppèken sisiinmu oda?" 2:19 Ialoi Jesus mo, "Mula tikan merbayo, otang mangan ngo karina tamuè? Jadi, mula isidi dèng ngo kèla idi tentu mangan ngo tamuè idi. 2:20 Tapi roh mo kettikana, ialengi mo kèla idi, nai pè asa oda mangan nèngè tamuè idi. 2:21 Oda nung idongkapken dèba kaèn rimbaru mi pakkèen sienggo mumuk. Ukum bagi ngo ibaing, makin mbelgahna mo ribakna kaèn mumuk idi ibantun kaèn rimbaru idi. 2:22 Bagi ma ngo ènda, isè poda nung mengosèken anggur rimbaru mi kiong bebbak sienggo buruk. Mula bagi ngo ibaing, mpustak mo kiong idi ibaing anggur i. Ujungna duana oda nèngè terpakkè. Anggur rimbaru, kennah mi kiong rimbaru ma ngo iosèken." 2:23 Tikan sada ari Sabat, mentas mo Jesus arap juma. Nderrang merdalan i, ipotikken sisinNa mo rohi pagè. 2:24 Nai idokken kalak Parisè mo mbang Jesus, "Tengen mo, enggo ilausken sisinMu idi hatoren agamanta. Ai iulaken ngo ulaen siso ndorok bahanen tikan ari Sabat?" 2:25 Nai ialoi Jesus mo, "Madèng ngo nung ijaka kènè pemmaing si Daud tikan mellèhè ia dekket denganna, keppè oda lot pangaan bai kalak idi? 2:26 Ibengketti ngo Bages Dèbata, ipangan ngo roti sienggo ipèlèken bai Dèbata, nderrang si Abyatar imam huntuun tikanna i. Tapi ipangan si Daud ngo janah ipemberrèken taba denganna." 2:27 Idokken Jesus dèng ma. "Ibaing pè ari Sabat i, keperluun ni jelma ngo janah oda keperluun ari Sabat. 2:28 Kuasa Anak Jelma ngo ari Sabat i."
3:1 Nai balik nola mo Jesus mi bages perguruun. Lot mo isidi sada kalak matè serrap tanganna. 3:2 Jadi lot mo isidi kalak simengentip kesalahen Jesus asa ndorok iaduken katèna. Dak inelnelli kalak i ngo Jesus, tah uè ma pemalumken simersakit tikan ari Sabat. 3:3 Idokken Jesus mo taba kalak pertangan matè serrap idi, "Roh mo kono misèn, cènder mo ko i tengah ènda!" 3:4 Nai ikuso mo jelma silot isidi, "Mengèkutken hatoren agama, kadè ngo ndorok ulaenken tikan ari Sabat? Mengulaken mendè ngo barang mengulaken nggodo? Paluahken jelma ngo barang memmunuh?" Tapi sip sambing ngo kalak idi. 3:5 Mellui ngo ukur Jesus kerna perkata sada ngo kalak idi. Itengen Jesus mo kalak i kaliling merdengan mellaga, nai idokken Jesus mo taba pertangan matè serrap idi, "Doroken mo tanganmi!" Nai idoroken mo tanganna, mènter malum mo tanganna idi. 3:6 Itadingken Parisè i mo bages perguruun idi, ndor mo kalak i laus mersungkuun dekket barang piga kalak horong si Herodes lako memmunuh Jesus. 3:7 Laus mo Jesus dekket sisinNa sondar mi biding Tao Galilea. Nai mbuè kaloon ngo jelma i Galilea nai mengèkutken Jesus. Mbuè ma ngo merrohen i Juda nai. 3:8 I Jerusalem nai, i nagerri Idumea nai, bagi ma i nagerri i kèparen Jordan dekket i sikuliling kuta Tirus bak Sidon pè, roh mendahi Jesus. 3:9 Kumarna bagi buèna jelma nterrem idi, idokken Jesus mo taba sisinNa asa ipèmaken sada bungki baNa, tah bakunè isessak jelma nterrem idi Ia. 3:10 Ai enggo mbuè jelma ipemalum, gabè karina sisakiten pè mersisessaken lako menjamah Jesus. 3:11 Bagi ma sinisellapen sètan pè, mula mengidah Jesus, mènter sujud mo mi hadeppenNa, janah mendengkuk, ninganna idokken, "Kono ngo Anak Dèbata!" 3:12 Tapi igerra Jesus ngo tendi sètan-sètan i memagahken bai barang isè pè terrèngèt Jesus. 3:13 Nai menangkeng mo Jesus mi sada uruk, iarahken mo kalak lemmo atèna janah merrohen ngo kalak idi. 3:14 Nai ipilih mo ibas kalak idi nai sipuluh dua kalak. Nina mo, "Kupilih ngo kènè asa gabè rebbak dekket Aku, asa Kuutus kènè lako pesarken Sukuten Simerandal bai Dèbata nai, 3:15 janah merkuasa mo kènè lako mengusir sètan-sètan." 3:16 Èn mo gerar sisipuluh dua kalak idi: Si Simon (igerari ma, Petrus), 3:17 si Jakobus dekket si Johanes anggina, imo dukak-dukak si Zebedeus (sidua kalak èn igerari Boanerges lapatenna jelma binubuh renggur). 3:18 Si Andreas, Pilipus, Bartolomeus, Mateus, Tomas, Jakobus anak si Alpeus, Tadeus, Simon kalak lubalang. 3:19 Dekket si Judas Iskariot simenelbuh Jesus. 3:20 Nai balik mo Jesus. Tapi mertumpu ngo jelma nterrem idi, sanga gabè oda lot nèngè tikki bai Jesus dekket sisinNa mangan. 3:21 "Enggo gila ia", nina jelma i. Idengkoh pamiliNa kessa mo bagidi, laus mo kalak i merralengSa. 3:22 Ukum guru-guru agama siroh i Jerusalem nai mendokken, "Isellapi Beelzebul ngo Ia!" Lot mo dèba mendokken, "Induk sibolis ngo merrèken kuasa baNa lako mengusir sibolis idi." 3:23 Nai idiloi Jesus mo jelma nterrem idi, ibagahken mo codiin bai kalak idi, "Bakunè ngo pemmaing sibolis mengusir sibolis?" nina Jesus. 3:24 "Mula oda mersada kata sada kerajaen, janah mula mermusuh ginemgemna i samahsa, mago mo kerajaen i. 3:25 Janah mula ibas sisada mpangaan oda mersada kata, janah merselisih samahsa, lako mago mo sisempangaan idi. 3:26 Bagidi ma ngo mula enggo masa persilisihen i kerajaen Sibolis idi, oda ndekkah nè kerajaen idi pasti lako tumpat mo. 3:27 Oda ngo termasuken isè bages kepala perrang lako mengerampok hartana mula oda lebbè ièkèti keppala perrang idi, asa ndorok buatenna hartana idi. 3:28 Èngèt mo, nasa dosa nibaing jelma bak kata nggodo niruapkenna ndorok ngo iampuni. 3:29 Tapi kalak simengelèai Tendi Dèbata oda nèngè terampuni! Ai hot mo dosana idi." 3:30 (Idokken Jesus pè bagi, kumarna lot ngo simendokken lottendi sètan ibagasen Jesus.) 3:31 Enggo kessa i, roh mo inang dekket anggi Jesus. I ruar ngo kalak i memèma, janah ipasulak mo mendiloi Jesus. 3:32 Ibas katika i mbuè ngo jelma dogok mencingkoi Jesus. Idokken pasulaken idi mo, "O Guru, i ruar ngo bagèndari inang dekket anggimu, itulusi ngo Guru i." 3:33 Ialoi Jesus mo, "Isè ngo inangKu? Isè ngo anggingKu?" 3:34 Nai itengen mo sikundul i sikulilingNa, nina mo, "Èn ngo inangku janah anggingKu! 3:35 Barang isè mengulaken lemmo atè Dèbata, ia ngo anggingku dekket turangku bak inangKu."
4:1 Nai mengajar nola mo Jesus i biding Tao Galilea. Mbuè kalohon ngo jelma mencingkoiSa. Kumarna bagidi, gabè laus mo Ia kundul mi babo sada bungki i babo la1e idi, janah mercènderren ngo jelma mbellang idi i biding tao i. 4:2 Mbuè kalohon ngo iajarken Jesus bai kalak i merkitè codiin. Bagèen mo Iajarken bai kalak i. 4:3 "Lot mo sada kalak laus menaburken bennih. 4:4 Tikan menabur idi ia, lot mo dèba bennih i ndabuh mi biding dalan. Nai roh mo manuk-manuk, kerri mo ipangan bennih idi. 4:5 Lot ma mo dèba bennih i ndabuh mi babo tanoh merbatu, mennipis sambing ngo tanohna. 4:6 Ndor ngo nemmu turah bennih idi tapi nggara kessa ari, males mo pagè i gabè ngkerrah kerna oda mbages uratna. 4:7 Lot ma mo dèba bennih idi ndabuh mi tanoh kopi-kopi. Rebbakken tubuh mo kopi-kopi dekket pagè idi, tapi ipetcek kopi-kopi idi mo pagè i, gabè oda merbuah. 4:8 Tapi lot ma mo bennih idi ndabuh mi tanoh nggabur. Turah mo bennih idi, gabè mbellen mo janah mbuè buahna, dèba tellupuluh lempit hasilna, dèba ennempuluh lempit janah dèba nai soh seratus lempit." 4:9 Enggo kessa isukutken codiin idi, idokken Jesus nola mo, "Barang isè kènè merpènggel, idengkohken mo i mendè." 4:10 Tikan pellin Jesus sadasa, idapetken kalak sienggo nung mendengkohken peddahNa dekket sisinNa sisipuluh dua i mo Ia. Ipidoken kalak i mo asa ipeterrang lapaten codiin idi. 4:11 Nai nina Jesus mo, "Mendahi kènè enggo iberrèken basa-basa lako memettoh rahasia bakunè Dèbata memerèntah. Tapi ukum kalak sidèban, ibagahken ngo merkitè codiin, 4:12 asa, 'Dak ngo kalak i mendatèken tapi oda ibettoh kadè masa, dak ngo kalak i mendengkoh, tapi oda mengantusi, masa pè èn asa ulang idah janah iantusi, janah asa ulang roh kalak i mendahi Dèbata gabè iampuni Dèbata kalak i.' " 4:13 Enggo kessa i idokken Jesus mo taba kalak idi, "Mula codiin ndai oda iantusi kènè, bakunè nola mo pengantusi ndènè mi codiin sidèban? 4:14 Penabur idi imo kalak simenukutken kelluahen bai Dèbata nai. 4:15 Dèba ndabuh ngo bennih idi mi biding dalan, imo jelma simendengkoh sukuten idi, tapi idengkoh kalak i kessa, roh mo sibolis memmuat sukuten sienggo isaburken mi bagasen atè-atèna. 4:16 Bagi ma mo sinisaburken mi tanoh merbatu-batu idi, imo jelma simendengkoh sukuten idi, mènter lolo ngo ia menjalo. 4:17 Tapi oda lekket sukuten idi ibagasen atè-atèna janah oda ndekkah tahan isidi. Mula roh kesusahen barang iletlet dèba kumarna sukuten idi, mènter mo kalak i oda nè sètia. 4:18 Bennih sindabuh mi tanoh kopi-kopi idi imo jelma simendengkoh berrita idi. 4:19 Tapi dak mengkelsohken nggelluhna, janah sèkel ia naing bèak dekket cubellek mermatcam bagè mendomi ukurna, gabè i mo memmaing patè sukuten bai Dèbata nai janah oda nèngè merbuah ibagasen ukur kalak sibagidi. 4:20 Bennih sinisaburken mi tanoh nggabur imo jelma simendengkoh kata i, nai ijalo mo sukuten idi janah merbuah; dèba tellupuluh, dèba ennempuluh janah dèba nai seratus kali lempit buahna." 4:21 Nai idokken Jesus nola mo bai kalak idi, "Nung ngo kalak mengelakati lampu janah itungkupi nola dekket kendang barang tah igamparken nola mi terruh peddemmen? Oda mi bekkas perpelitaan igamparken lampuna idi? 4:22 Oda lot simboni mak ntarar nola; janah oda lot sinirahasiaken mak terbettoh i ari segen i. 4:23 Kumarna nai, kènè simerpènggel, beggèken mo i!" 4:24 Nai idokken Jesus nola ma mo, "Radumi kènè mo sikudokken ènda! Sukaten sinibaing ndènè taba kalak sidèban i ma ngo ibaing Dèbata bai ndènè. Oda pellin i tupèh tapi iberrè Dèbata ngo terbelgahen isidi nai. 4:25 Kerna mula kalak lot bana, iberrèken ngo mbuè tambahna, tapi mula cituk ngo lot bana, buatenna nola ngo bana nai." 4:26 Iuduti Jesus nola mo ranaNa, "Codi ngo Kerajaen Dèbata mi sada kalak simenaburken bennih mi jumana. 4:27 Meddem ngo ia berngin, ndungo ngo ukum mahar. Nai turah ngo ukum bennih idi janah makin mbelgah, oda pella pemettohen sidasa idi. 4:28 Tanoh i sendiri ngo mergegoh memmaing merhasil, imo batangna, nai tangkèna, nai buahna nola. 4:29 Janah mula enggo ntua pagè i, iperrani sidasa i mo, karna enggo waktuna merrani." 4:30 "Mi kadè mo sicodiken Kerajaen Dèbata?" nina Jesus dèng ma. "Mi kadè mo ndorok terdokken lako peterangken? 4:31 Codi ngo Kerajaen Dèbata bagè buah arum, imo buah sikitikna ibas nasa buah i suberri dunia ènda. 4:32 Isuan kessa mo buahna i mahan bennih mi tanoh, turah mo ia janah ndeppur mbellen gabè belgahen asa karina suan-suanen simerumbut. Dahanna pè mbuè janah ntem-ntem bulungna gabè seggep mo manuk-manuk mi dahanna i janah merrasar i terruh dahanna i." 4:33 Bagi mo isukutken Jesus sukuten bai Dèbata nai, merkitè-kitè umpama sindorok iantusi kalak idi. 4:34 Dak merkitè umpama ngo Jesus mendahi kalak idi. Tapi mula pellin kalak idi ngo dekket sisinNa, ipeterrang ngo karinana bai kalak i. 4:35 Cibonkenna i, idokken Jesus mo taba sisinNa, "Laus mo kita merlayar mi suberrang tao." 4:36 Nai mbangkit mo sisinNa i mi perrau. Enggo kin ngo lebbèen Jesus mi perrau i janah itadingken ngo jelma nterrem idi i biding tao. Berkat mo Jesus rebbak dekket sisinNa. Lot ma ngo perrau sidèban isidi. 4:37 Oda sadikè dekkah, mènter roh mo angin sapasipu. Iombang-ambingken galombang i mo perrau idi janah mbuè ngo laè masuk mi bagasen perrau idi, sanga naing dom. 4:38 I podi perrau idi meddem ngo Jesus. Idungoi sisinNa i mo Jesus nina mo, "O Guru, oda isarihken kono, lako mago mo kita?" 4:39 Ndungo mo Jesus, isergangi mo angin sapasipu idi, idokken mo taba galombang i, "Mènak mo ko!" Mènter mènak mo tuhu angin i janah ndong kaloon mo. 4:40 Nai idokken Jesus mo taba sisinNa, "Kasa mbiar kènè? Oda dèng ngo kè percaya taba Aku?" 4:41 Gabè mbiar mo simengèkutken Jesus idi, nina mo samahsa, "Isè ngo situhunna kalak ènda, dekket ngo angin bak galombang idi tunduk mi perèntahNa!"
5:1 Enggo kessa i, soh mo Jesus dekket simengèkutkensa mi suberrang Tao Galilea, i nagerri Gerasa. 5:2 Sampur kessa Jesus ibagasen perrau idi nai, idapetken sada daholi siroh i liang kuburen nai mo Jesus. 5:3 Ikuasai tendi sètan ngo kalak èn janah bekkasna pè i perkuburen ngo. Oda ndorok terrèketen ia, barang dekket rantè pè oda tellap nèngè. 5:4 Enggo nggati tanganna dekket nèhèna ilanggu, tapi dak irettes ngo langguna idi janah bessi bèangenna pè ipenggelken ngo. Gegohna menempurung, gabè isè poda ndorok mencèkèpisa. 5:5 Mahar dekket berngin pè dak kadap ngo ia i pekuburen dekket mi delleng, ninganna mendengkuk-ndengkuk janah ipempaluken ngo batu mi dagingna. 5:6 Tikan itatap ia roh Jesus, mènter merdigal mo ia mendapetken Jesus janah mersujud i hadeppenNa. 5:7 Nggang mo sorana menurakken, "Jesus, Anak Dèbata sintèmbul i! Kadè naing bakinenmu taba aku? Kuèlèk-èlèk kono merkitè Dèbata asa ulang susahi aku!" 5:8 (Idokken pè bagidi kumarna idokken Jesus tabasa, "Tendisètan,laus kono bana nai!") 5:9 Ikuso Jesus mo ia, "Isè ngo gerarmu?" Ialoi mo, "Gerarku Lègiun, ai mbuè kalohon ngo kami!" 5:10 Iendik-endik mo Jesus asa ulang isuruh sètan-sètan idi karuar i nagerri idi nai. 5:11 Njolmit isidi nai, mbuè ngo babi dak menggigi i tebbing uruk nisidi. 5:12 Ipidoken sètan i mo taba Jesus asa ipaduè kalak idi mbengket mi bagasen babi idi. 5:13 Nai ipaduè Jesus mo. Jadi karuar mo tendi sètan-sètan idi bai jelma idi nai janah ibengketti mo karina babi idi. Gabè karinana babi silungguken idi mermangkaten i tebing i nai mi tao, nai merlennengen mo. Karinana babi idi lot ngo dua ribu. 5:14 Bulanting mo permakan babi idi laus, ipembagahken mo simasa idi mi kuta dekket sosor-sosor. Merrohen mo kalak lako menengen simasa idi. 5:15 Idahi kalak i mo Jesus, iidah kalak i mo nisellapen sètan idi kin kundul i sidi. Enggo mo merroles ia janah enggo terrus ukurna. Gabè mbiar mo kalak idi karinana. 5:16 Isukutken simengidah idi mo simasa bai jelma i ndai dekket mi babi-babi idi. 5:17 Kumarnaken idi, gabè ièlèk-èlèk mo Jesus asa itadingken nagerri idi. 5:18 Tikan naing mbangkit mi perrau idi Jesus, nai roh mo sisellapen sètan idi kin mengidoken tabasa, asa ipaduè ia mengèkutken Jesus. 5:19 Tapi oda ipaduè Jesus, balikna nola ngo idokken Jesus tabaSa, "Mulak mo kono mendahi kaka-anggimu. Bagahken mo taba kalak idi terrèngèt karinana sienggo nibaing Tuhan i bamu dekket kiniselloh nibaingna i taba kono!" 5:20 Nai laus mo ia, ibagahken mo mi Sisipuluh Kuta nibaingken Jesus i tabasa. Lengang mo kalak karina simendengkohsa. 5:21 Balik mo Jesus mi suberrang tao, mbuè ngo kalak roh mengerengemmi Jesus i biding tao idi. 5:22 Roh mo sada kalak mergerar si Jairus. Ia ngo pengulu ibages perguruun ni kuta idi. Iidah kessa Jesus, sujud mo ia mi hadepenNa. 5:23 Ipidoken mo taba Jesus, "Alè Guru, mpiah kalohon ngo sakit berrungku. Tolong mo roh Kono mengampèken tanganmu bana asa malum janah nggelluh ia!" 5:24 Nai laus mo Jesus rebbakken si Jairus. Mbuè kalohon ngo mengèkutkenSa, gabè isessak jelma i ngo Ia kacimbang lambung. 5:25 Lot ma mo isidi sada kalak daberru, enggo sanga sipuluh dua tahun lalap bubus. 5:26 Enggo mbuè penambari mendaunisa janah enggo lahlah kèpèng ikerriken lako pertambarna. Tapi ulang lebbè malum iakap, makin mparahna nola ngo. 5:27 Enggo nung idengkoh terrèngèt Jesus. Asa i tengah-tengah jelma nterrem idi, isessak ia mo lako menjolmiti Jesus i podi nai. 5:28 Ai dok atèna, "Asal mo ndorok giam kujamah olesNa, pasti njuah kuakap!" 5:29 Ijamah mo jubah Jesus, mènter kom mo iakap sibubus i. Pengakapna oda lot nèngè ipas dagingna penakit idi. 5:30 Gejapkenna i, iakapken Jesus mo lot karuar gegoh i diriNa nai. Itulihken mo mi jelma nterrem idi, ikusoken mo, "Isè menjamah olesKu?" 5:31 Nina sisiin idi mo, "Iidah Guru i sendiri ngo bagèen jelma èn menessak Guru i, keppè ikusoken Guru idi barang isè menjamah jubah Guru i?" 5:32 Tapi dak irior Jesus ngo merkuliling lako menulus kalak sienggo menjamahSa idi. 5:33 Ibettoh daberru idi ngo, kadè sienggo masa bana. Mbiar janah menggirgir mo ia roh mersembah mi hadeppen Jesus, janah ipertuhu mo karinana. 5:34 Nai idokken Jesus mo taba daberru i, "Kepercayaenmi ngo pejuahken kono alè nangè! Laus mo kono merdamè-damè. Enggo njuah kono!" 5:35 Tikan mengerana dèng Jesus, enggo roh pasulaken i bages si Jairus nai. "Enggo matè berrumu i," nina taba si Jairus, "Kadè pella lejaan nèngè Guru idi?" 5:36 Oda pella ipikirken sinidokken pasulaken idi idokken Jesus mo taba si Jairus, "Ulang kono roga, percaya mo kono!" 5:37 Nai terrus mo merdalan Jesus, tapi oda ipaduè barang isè pè mengèkutkenSa laènken si Petrus dekket si Jakobus bak si Johanes dengan sibeltek si Jakobus. 5:38 Nai soh mo kalak i mi bages si Jairus pengulu bages perguruun idi: Iidah Jesus mo isidi bagi mèngèrna janah idengkoh mo sora tangis milangi pelluiken ukur. 5:39 Nai mbengket mo Jesus, nina mo taba kalak idi, "Kasa mèngèr kènè janah tangis? Ai oda ngo matè anak idi pellin meddem ngo!" 5:40 Itertabai kalak idi mo Jesus. Kernana i idokken Jesus mo kalak i mi ruar. Iarahken mo partua anak i duana dekket sisinNa idi masuk mi bilik anak idi. 5:41 Icèkèp Jesus mo tangan anak idi, idokken mo tabasa ibas kata Heber, "Talita kum," lapatenna, "Alè tatat, Aku mendokken bamu: kèkè mo ko!" 5:42 Mènter kèkè mo sitatat idi janah merdalan-dalan. Umurna enggo sipuluh dua tahun. Kagum ngo karinana simengidah simasa idi. 5:43 Tapi ipernoi Jesus ngo kalak idi, asa ulang ibagah-bagahken bai barang isè pè. Nai idokken mo asa iberrè mangan si tatat idi.
6:1 Balik mo isidi nai Jesus rebbak dekket sisinNa mi kutanNa. 6:2 I ari Sabat idi imulai mo mengajar i bages perguruun. Mbuè ngo jelma isidi. Idengkoh kalak i kessa pengajaren Jesus, lengang kalohoon mo kalak idi. Idokken kalak i mo, "Idikè nai ngo ibettoh Ia karinana idi? Bakunè asa ndorok Ia memmaing kellengangen? 6:3 Otang Ia ngo anak tukkang kayu, anak si Maria i janah kaka si Jakobus, si Joses, si Judas dekket si Simon? Otang turangNa pè lot ngo merrian i sènda?" Kernana idi, oda percaya kalak idi baNa. 6:4 Nai idokken Jesus mo taba kalak idi, "Ukum nabi dak ipesangap ngo barang idikè pè, tapi mula i kutana ia rebbak dekket kadè-kadèna bak kaka anggina, oda ihormati." 6:5 Oda terbaing Jesus i kutaNa idi memakinken sada kellengangen pè giam laènken pejuahken barang piga-piga kalak sisakiten merkitè mengampèken tanganNa taba kalak i sambing mo kessa. 6:6 Lengang ngo ia kumerna oda percaya kalak idi. Enggo kessa i, laus mo Jesus mi gennep kuta i kuliling ni sidi mengajari kalak idi. 6:7 Idiloi mo sisinNa si sipuluh dua i, ipasulak mo kalak i dua-dua sindalaan janah iberrèken mo kuasa lako mengusir tendi sètan. 6:8 Itennahi mo kalak idi, "Ulang iembah kènè barang kadè mi perdalanen, laènken sada tongket. Ulang embah kènè bekkel, barang tagan-tagan bekkas cudekkah, barang pè kèpèng ibas bagut-bagut. 6:9 Mercipatu mo kènè, tapi ulang memakkè dua baju." 6:10 Itennahi Jesus dèng ma mo kalak idi bagèen, "Mula ijalo ngo kènè i sada bages, i bages idi mo kènè lebbè mèma itadingken kènè kuta idi. 6:11 Tapi mula soh kènè mi sada bekkas, keppè oda uè nisidi menjalo kènè janah oda uè mendengkohken kènè, tadingken kènè mo bekkas idi. Janah pirpirken kènè mo abu silekket i nèhè ndènè idi mahan pernèngèten taba kalak idi." 6:12 Nai berkat mo sisiin Jesus si sipuluh dua idi. Laus mo kalak idi menaarken sukuten asa itadingken jelma dosa-dosana. 6:13 Iusir sisiin Jesus idi mo mbuè sètan-sètan. Mbuè ma ngo sisakiten itambari merkitè mengapusken minak janah pejuahken kalak idi. 6:14 Soh ngo berrita simasa idi taba Raja Herodes, kerna gerar Jesus enggo termurmur barang i dikè pè. Lot dèba mendokken, "Enggo nggelluh mengolihi si Johanes Peridiken! Kernana i ngo asa ndorok Ia memmaing tanda kellengangen." 6:15 Tapi sidèban mendokken, "Si Elias ngo Ia." Lot ma mendokken, "Nabi Ia, bagè sada kalak nabi arnia." 6:16 Idengkoh si Herodes kessa mo idi, nina mo, "Si Johanes Peridiken arnia ngo èn, sienggo kudokken kin ipancong takalna. Bagèndari enggo balik nggelluh ia." 6:17 Ai si Herodes ngo pasulakken kalak menangkup si Johanes janah ikurung. Ibaing si Herodes pè karina idi kumarna si Herodias anggina berru ngo, imo sinialihken si Herodes, padahal sinibages anggina kaloon imo simergerar si Pilipus. 6:18 Terrèngèt idi enggo kin ngo dak ipesèngèt si Johanes si Herodes bagèen, "Oda ndorok kono mengalihken sinibages anggimu idi!" 6:19 Kumarnana i ngo asa merngetnget atè si Herodias taba si Johanes, janah kennah bunuhen katèna si Johanes, tapi oda terbakinsa pesautken takina idi kerna ihalang-halangi si Herodes. 6:20 Ai enggo idokken si Herodes menjaga si Johanes i kurungen, kerna mbiar ngo ia midah si Johanes idi, ai ibettoh ngo sada kalak niutus Dèbata ia. Janah mula mengerana si Johanes, lemmo ngo atè si Herodes mendengkohken tukasi pè dak bulisah kalohoon ia kumarna si Herodias idi. 6:21 Keppè tikan ulang tahun pertubuh si Herodes, lot mo kesempaten bana. Merpèsta mo tikanna i si Herodes janah idilo mo karina pejabat ndates dekket perwira-perwira bagi ma pengituai ni Galilea. 6:22 Tumatak mo berru si Herodias i pèsta idi janah lolo kalohon ngo raja Herodes dekket tamuèna mengidah tatakna idi. Nai idokken raja i mo taba simerbaju situmatak idi, "Barang kadè katèmu naing bamu, pido sambing mo, Kuberrèken pè bamu!" 6:23 Pella isumpahken si Herodes ranana idi taba simerbaju idi, "Kubulabanken, kennah kuberrèken bamu barang kadè sambing ipido kono. Agia nola pè sitengah kerajaenki ipido kono, kuberrèken ngo!" 6:24 Karuar mo simerbaju i, ikusoi mo inangna si Herodias idi, "Nangè, kadè ngo sisellohna kupido?" Ialoi inangna idi mo, "Pido mo takal si Johanes Peridiken!" 6:25 Ndor mo balik ia mendahi raja i idokken mo, "Kupido taba raja i, asa berrèken bangku bagèndari takal si Johanes Peridiken i babo pinggan!" 6:26 Mendengkoh pengidonna idi tersengget mo raja i. Tapi oda ndorok nèngè imadaken pengidonna idi, kerna enggo sanga ibulabanken i hadeppen tamuèna. 6:27 Idokken mo taba pengabalna asa ipancong takal si Johanes Peridiken. Laus mo pengabalna idi mi kurungen, ipancong mo takal si Johanes. 6:28 Iembah mo takal idi i babo pinggan, iberrèken mo taba simerbaju idi. Nai iberrèken nola mo taba inangna. 6:29 Idengkoh sisiin si Johanes kessa mo simasa idi, laus mo kalak i mengaleng bangkè si Johanes nai ikuburken mo. 6:30 Rasul-rasul niutus Jesus idi, enggo mo balik janah pulung rebbak dekket Jesus. Ibagahken kalak idi mo karinana nibahanken janah niajarken kalak idi. 6:31 Mbuè kalohon ngo jelma merlaus roh i sidi sampè oda terbakin Jesus dekket sisinNa mangan kumarna oda sempat. Kernana i idokken Jesus mo taba sisinNa, "Èta kènè mo laus mi bekkas melongo, asa pellin kita i sidi, asa ndorok kènè mentadi giam sigejap." 6:32 Berkat mo kalak idi merbungki mi bekkas melongo. 6:33 Tapi mbuè ngo kalak mengidah perberkat ni kalak idi janah ibettoh dèba ngo mikè tujunna. Jadi mbuè ngo kalak pengisi nagerri i merdalan arap darat, isudu lako mi bekkas idi mengelebbèi Jesus dekket sisinNa. 6:34 Susur kessa Jesus i bungki i nai, enggo mo idah Jesus isidi jelma mbellang idi. Masèh mo atèna midah kalak idi, ai codi mi biri-biri siso lot permakan, bagi mo kalak idi. Jadi imulai Jesus mo memeddahi jelma nterrem idi tarrèngèt mermatcam bagè. 6:35 Enggo kessa bon ari, idokken sisiin idi mo taba Jesus, "Enggo bon ari, janah mpunjung ngo bekkas èn. 6:36 Lotiin mo ipasulak Guru i kalak èn laus mi sosor dekket kuta silotna ndessing i sèn asa ndorok menokor pangaan." 6:37 Tapi idokken Jesus mo, "Kènè mo memerrè kalak idi mangan!" Nai nina sisiin idi mo, "Idikè nai mo tokoren nami roti giamken dua ratus kèpèng pirak mahan pangaan kalak ènda?" 6:38 Nai idokken Jesus mo, "Piga ngo lot roti ndènè? Tengen kènè mo lebbè." Enggo kessa laus kalak idi menengen, idokken kalak idi mo, "Lot ngo lima roti dekket dua ikan." 6:39 Nai idokken Jesus mo jelma nterrem idi kundul merpulguk-pulguk i babo dukut-dukut nisidi. 6:40 Merkundulen mo kalak idi merratur merpulguk-pulguk. Lot mo dèba siratus kalak simpulguken, dèba limapuluh kalak simpulguken. 6:41 Ibuat Jesus mo roti silima dekket ikan sidua idi, itarè mo mi langit ninganna idokken mo mejalo metangkup taba Dèbata. Enggo kessa bagidi, ipenggelli mo roti idi, ipemberrèken mo taba sisinNa asa ibagi-bagiken mendahi jelma mbellang idi. Ikan sidua i pè bagi ma ngo ibaing mendahi kalak idi karina. 6:42 Bessur ngo mangan kalak idi karina. 6:43 Nai ipepulung sisiin Jesus mo siso kerri idi -- dom sipuluh dua baka mbellen. 6:44 Pellin daholi lot ngo kira-kira lima ribu kalak buèna simangan idi. 6:45 Ipasulak Jesus mo sisinNa i perlebbè ndor laus merbungki mi Betsaida i suberrang tao i, ukum Jesus isidi dèng ngo lako pemolihken jelma nterrem idi. 6:46 Enggo kessa mersirang Jesus dekket kalak idi, laus mo Ia mi sada uruk lako mersodip. 6:47 Enggo kessa gellap, soh mo bungki kalak idi i tengah tao, ukum Jesus tong dèng ngo i darat. 6:48 Idah Jesus ngo kalak idi ledja kalohon mengkayuh bungki idi, ai mengalo angin ngo perdalan bungki idi. Kerna naidi, antara pukkul tellu mi pukkul ennem siceggen, roh mo Jesus mendahi kalak idi merdalan nènèh i babo tao idi. Ipakulah ngo terus merdalan mengelausi kalak idi. 6:49 Idah kalak i kessa simerdalan i arap babo laè idi, idokken kalak idi mo bègu i. 6:50 Gabè mendengkuk mo kalak i ibaing mbiarna. Ai karina ngo kalak i mengidahSa janah tersengget kalohon. Tapi mènter idokken Jesus mo mendahi kalak idi, "Tennang mo kènè, Aku ngo èn, ulang mbiar!" 6:51 Nai ibengketti Jesus nola mo bungki idi janah menter mènak mo angin. Gabè lengang kalohon mo sisin Jesus karinana. 6:52 Kelengangen merkitè lima roti pè madèng iarti kalak idi, ai mahal ngo iradumi. 6:53 Merlabuh mo bungki kalak idi i biding tao Genesaret, soh kessa mi suberrang tao. 6:54 Karuar kessa kalak i i bungki idi nai, mènter enggo itandai kalak idi Jesus. 6:55 Mènter merlojangen mo kalak nisidi ni suberri nagerri idi. Janah iembah mo simersakitna i babo bellagen mendahi Jesus. Ai barang i dikè Jesus idengkoh kalak idi, iembah ngo mi sidi simersakitna. 6:56 Barang mikè roh Jesus tah pè i kuta -- i kota barang pè i sosor -- dak merrohen ngo kalak mi sidi janah ibaing ngo simersakit i i penongkohen. Nai iendik-endik kalak i mo asa ipaduè ijamah simersakit i tah pè pellin punca jubah Jesus. Ai karinana simenjamahsa, gabè malum ngo.
7:1 Nai roh mo dèba kalak Parisè dekket piga-piga kalak guru agama i Jerusalem nai mendahi Jesus. 7:2 Kerna idah kalak idi barang piga kalak simengèkutkensa oda pella merborih bagè nihatorken Parisè mènter mangan. 7:3 Ai ukum Parisè bagi ma Jahudi dak ièngèt ngo mengèkutken adat sienggo isusurken empung ni empungna i. Oda uè mangan kalak idi kum mak lebbè iborih tanganna mengèkutken hatoren sitertentu. 7:4 Pangaan i onan nai, oda ndorok ipangan ukum mak lebbè iborih. Mbuè dèng hatoren-hatoren sidèban nisusurken empung kalak idi. Ntegguh ngo ipatuhi kalak idi, umpamana hatoren memorih galas, mangkuk, perkakas-perkakas tembaga bagi ma peddemmen. 7:5 Kerna nai, ikuso Parisè dekket guru agama idi mo Jesus, "Kasa oda idalanken simengèkutken Kono idi adat sienggo isusurken empungta banta? Kasa mangan kalak idi, tanganna oda mbersih?" 7:6 Ialoi Jesus mo, "Tuhu kalohon ngo siniberitaken nabi Jesaya ibas bukkuna terèngèt kalak perbuah ringadar bagè kènè èn. Ai bagèen ngo isukutken, 'Idokken Dèbata, ipesangap kalak èn ngo Aku ibas ranana, tapi ukum ukurna ndaoh ngo bangKu nai. 7:7 Sia-sia ngo kalak i menembah Aku, ai ipeddahken kalak i ngo hatoren nibaing jelma idokdok atèna idi hatoren bangKu nai!' 7:8 Ipesisi kènè ngo hatoren Dèbata, keppè hatoren jelma ièkutken kènè mertuhu-tuhu." 7:9 Idokken Jesus dèng ma, "Soh mo pandè ndènè pesisiken hatoren Dèbata, asa ndorok iulaken kènè hatoren ndènè sendiri. 7:10 Enggo ihatorken si Musa bagèen, 'Pesanagap mo inangmu dekket bapamu, dekket, barang isè mengelèai partuana kennah matè ngo ia ihukum.' 7:11 Tapi ipeddahken kènè ngo bagèen: Mula lot kalak mendokken taba partuana, 'Kadè kin patut berrènkenku bai bapa bak inang enggo kupèlèken bai Dèbata,' 7:12 mula bagi, enggo ihalangi kènè kalak idi memaing sipatut taba partuana. 7:13 Jadi, merkitè hatoren nibaing ndènè, enggo mo ipitakken kènè hatoren sinibakin Dèbata. Mbuè dèng tupèh sinibahan ndènè codi mi sidi." 7:14 Nai itenggoi Jesus mo jelma nterrem idi sikali nai janah idokken mo, "Kènè karina sipulung èn, dengkohken kènè mo janah bettoh kènè! 7:15 Oda mellamun jelma ukum ibaing simbengket i ruar nai. Tapi sikaruar ibagasen nai ngo mengellamuni jelma. 7:16 Kerna naidi, radumi kènè mo mendè-mendè, mula lot ma ngo pènggèl ndènè lako mendengkohken!" 7:17 Enggo kessa itadingken Jesus jelma nterrem idi janah laus mi bages, ikuso sisinNa i mo Ia terrèngèt tujuen codiin nidokkenNa ndai. 7:18 Nai idokken Jesus mo taba kalak idi, "Kènè pè moto ngo bagè jelma sidèban i? Oda ngo idah janah iantusi kènè ukum simasuk i ruar nai mi bagasen jelma oda terbakin mengellamuni jelma? 7:19 Kerna simasuk i oda ngo atè-atè ibellus, tapi mi beltek ngo, nai karuar nola ngo i dagingna idi nai." Merkitè kata èn ntarar mo idokken Jesus, "Karinana pangaan, halal ngo nipangan." 7:20 Idokken Jesus dèng ma, "Sikaruar i jelma idi nai ngo memaing ia mellamun. 7:21 Kerna sikaruar bai jelma idi nai, imo ipas pusuh perratènna nai tubuh pikiren-pikiren jahat memmaingken asa iulaken ulaan cubellek daging, menangko, memmunuh, 7:22 merlangkah julu meddem, mengaitken bana dekket karina sijahat; merluap, mengulaken ulaan nggodo, ncian, mengelèai, jukkat, janah mahal ajaren. 7:23 Karinana sijahat idi rohna ibagasen dirina nai ngo, ingo memakin mellamun ia." 7:24 Enggo kessa bagidi, itadingken Jesus mo bekkas idi janah laus mi nagerri ndessing mi kuta Tirus. Mbengket mo ia mi bagasen sada bages janah oda ibettoh dèba Ia i sidi. Tapi oda terbonikenSa diriNa bai jelma i nai. 7:25 Sada kalak partua ibages mendengkoh terrèngèt Jesus. Kerna lot berruna isellapi sètan, roh mo ia mendahi Jesus mersembah mi hadeppenNa. 7:26 Oda ngo bangsa Jahudi daberru idi, kalak situbuh i ladang Fenesia i Siria ngo ia. Mènter mo ièlèk-èlèk ia Jesus, asa uè mengusir sètan idi ibagasen berruna i nai. 7:27 Tapi ialoi Jesus mo, "Lebbèen ngo niberrèken pangaan taba anak-anak, kerna oda patut buaten pangaan anak-anak idi, gabè niberrèken mi biang!" 7:28 "Tuan," nina daberru idi, "Tapi ipangan biang ni terruh mèja i ngo iba-iba anak-anak idi!" 7:29 Nai idokken Jesus mo mbangsa, "Kerna pengaloimu idi, molih mo kono, enggo karuar sètan idi bai berrumu i nai!" 7:30 Molih mo partua ibages i, idapet mo berruna idi galè-galè i peddemmenna i bages, janah tuhu ngo enggo karuar sètan idi bai berruna idi nai. 7:31 Enggo kessa i, itadingken Jesus mo nagerri Tirus, mennerusken perdalanenNa arap Sidon lako mi Tao Galilea. Arap dalan mengelausi nagerri Sipuluh Kuta. 7:32 Iembahken dèba mo mendahi Jesus sada kalak tongkik bana pekkak. Ipido kalak i mo asa iampèken Jesus tanganNa mi baontakalna. 7:33 Iarahken Jesus mo ia mellin bai jelma nterrem i nai, nai igirikken Jesus mo jari-jariNa mi bagasen copingna. 7:34 Nai itarè Jesus mo mi langit janah merkessah nggeddang Ia, nina mo, "Hèpata, lapatenna mbuka mo!" 7:35 Mènter mbuka mo pènggelna janah dilahna pè mellèah mo mengolihi janah mengerana mo. 7:36 Nai igerra Jesus mo karina kalak idi asa ulang ibagah-bagahken barang bai isè pè. Tapi makin irarang Jesus, makin ipesar kalak idi ngo. 7:37 Karina simendengkoh idi lengang kalohon. Idokken kalak i mo, "Mbelgah tuhu-tuhu ngo nibaingNa i karina. Merpendengkoh ngo jelma tongkik janah mengerana ngo sipekkak."
8:1 Oda sadikè dekkah nai, lot mo jelma nterrem roh mertumpu. Kumarna oda lot pangaan bai kalak idi, idilo Jesus mo sisinNa, idokken mo, 8:2 "Masèh ngo atèngKu midah jelma nterrem ènda. Enggo tellu ari kalak i rebbak dekket Aku; bagèndari oda lot pangaan kalak idi. 8:3 Mula Kupasulak kalak idi asa mulak nderrang mellèhè, gabè pangsan nola mo kalak idi i tengah ndalan. Bagi dèng ma kalak idi roh i sindaoh nai." 8:4 Ialoi sisiin Jesus mo, "I bekkas panjil bagèen, idikè mo ndorok dapet pangaan cukup bai jelma nterrem èn?" 8:5 "Piga ngo lot roti bai ndènè?" nina Jesus. "Pitu ngo," nina pengaloi kalak i. 8:6 Idokken Jesus mo jelma nterrem idi kundul i babo tanoh i, ibuat mo roti sipitu idi, idokken mo lias atè taba Dèbata. Nai ipenggelli mo roti idi ibas tanganNa, ipemberrèken mo taba sisinNa asa ipembagiken bai jelma mbellang idi. Nai ibaing sisinNa idi mo bagidi. 8:7 Lot ma mo jumpa kalak idi piga-piga ngkabuah ikan kètèk. Idokken Jesus mo lias atè mi Dèbata kumarnaken ikan idi janah idokken ma mo taba sisinNa membagi-bagiken ikan idi ma. 8:8 Bessur ngo karinana mangan jelma mbellang idi, lot kira-kira empat ribu kalak buèna simangan idi. 8:9 Ipepulung sisiin idi mo siso kerri idi -- dom pitu baka nai. Nai ipasulak Jesus mo jelma nterrem idi molih. 8:10 Tapi ukum Ia rebbak dekket sisinNa berkat mo merbungki mi nagerri Dalmanuta. 8:11 Roh mo tah piga kalak Parisè mendahi Jesus, ipungkah mo mersoal dekket Jesus lako mengenggepSa. Ipido kalak i mo asa ibaing Jesus tanda kellengangen pertandaan tandana, roh bai Dèbata nai Ia. 8:12 Ikelsohken Jesus mo ninganna mendokken, "Kasa ipido sisencundut èn ndia asa Kubakin tanda kelengangen? Oda! Oda uè Aku memerrèken tanda sibagidi bai ndènè!" 8:13 Itadingken Jesus mo kalak idi, ibengketti mo bungki, nai berkat mo Ia mi suberrang tao. 8:14 Lupa ngo sisiin Jesus merembah roti. Ai pellin sada sambing ngo kessa roti i bungki kalak idi. 8:15 "Manat mo kènè i ragi kalak Parisè dekket ragi si Herodes," nina Jesus. 8:16 Nai mengerana mo sisiin idi terrèngèt idi; nina kalak i, "Idokken pè bagi, kumarna oda siembah roti." 8:17 Ibettoh Jesus ngo niranaan kalak idi, kernana i ikusoken mo taba kalak idi, "Kasa iranai kènè terrèngèt oda merembah roti? Oda ngo memmettoh kènè janah oda iarti kènè? Oda ngo merpendidah kènè? 8:18 Lot ngo mata ndènè kasa oda perpendidah kènè. Mercoping ngo kènè -- nai kasa oda merpendengkoh kènè? Oda ngo ièngèt kènè? 8:19 Imo lima roti sikupenggelli taba si lima ribu kalak idi? Piga baka nai dom siso kerri nipepulung ndènè?" "Sipuluh dua baka," nina kalak i. 8:20 "Nai sinderrang Kupenggelli roti sipitu ngkabuah taba siempat ribu kalak," nina Jesus mo mengkuso kalak idi, "Piga baka nai oda kerri sinipepulung ndènè i?" "Pitu baka," nina kalak idi. 8:21 "Mula bagi, madèng ngo iarti kènè?" nina Jesus dèng ma. 8:22 Soh mo kalak idi mi Betsaida. Iembah dèba mo i sidi sada kalak sipètung mendahi Jesus janah ipido mo asa ijamah Jesus sipètung idi. 8:23 Icèkèp Jesus mo tangan sipètung idi, iteggu mo ia mi ruar kuta. Nai ièduri Jesus mo mata sipètung idi janah iampèken mo tanganNa mi sipètung idi. Nai ikuso mo ia, "Lot ngo idah kono enggo bagèndari?" 8:24 Itengen sipètung i mo mi babo, "Uè, Kuidah ngo jelma idi, tapi bagè tongkoh merdalan-dalan." 8:25 Iampèken Jesus nola mo tanganNa mi mata sipètung idi. Nai ipetangkan sipètung idi nola mo menengen. Malum mo enggo matana i janah enggo ndorok ntangkas kalohon mengidah. 8:26 Nai ipasulak Jesus mo ia balik janah idokken bana, "Ulang kono balik mi kuta!" 8:27 Laus mo Jesus rebbak dekket sisinNa mi kuta silot i gembar Kaisarèa Pilipi. I tengah ndalan, ikusoken Jesus mo taba kalak idi, "Isè ngo Aku idokken sinterrem?" 8:28 Ialoi kalak idi mo, "Lot dèba mendokken, si Johanes Peridiken, lot ma dèba mendokken, si Elias, tapi sidèban ma mendokken, sada kalak ibas nabi-nabi idi nai." 8:29 "Kènè, bakunè ngo dok atè ndènè?" nina Jesus. "Ukum dok ndènè isè ngo Aku?" Ialoi si Petrus mo, "Kono ngo Raja Sipaluah siniperbagah-bagah idi!" 8:30 Nai ipernoi Jesus mo kalak idi, asa ulang ibagahken barang bai isè pè terrèngèt diriNa. 8:31 Enggo kessa i ibagahken Jesus mo taba sisinNa, ia ukum Anak Jelma idi kennah menggong simpersuk ngo. Kennah ialo pengulu-pengulu ngo, bagi ma dekket imam-imam ekuten dekket guru-guru agama. Ibunuh mo ia, tapi balik nggelluh ngo Ia ari petelluken. 8:32 Ntangkas kalohoon ngo ibagahken Jesus terrèngèt idi taba sisinNa. Tapi iarahken si Petrus mo Jesus pellinsa, naing ipesèngèt katèna. 8:33 Tapi mènter ipodiken Jesus mo si Petrus, idempakken mo sisinNa sidèbanna i, ilagai mo si Petrus. Idokken Jesus mo, "Laus mo kono isèn nai bolis! Sinipikiren jelma ngo pikirenmi; oda pikiren Dèbata!" 8:34 Nai idilo Jesus mo jelma nterrem ni sidi dekket sisinNa. Idokken mo taba kalak idi, "Barang isè uè mengèkutken Aku, kennah ipesisi mo nipergeddo dagingna, nai ipersan mo silangna, nai pè asa ièkutken Aku. 8:35 Ai barang isè sinaing mempertahanken nggelluhna, i ngo kembalangen kessah. Tapi kalak siuè memerrèken nggelluhna baKu dekket kumarna Berrita Simerandal bai Dèbata nai, i ngo pegelluhkensa. 8:36 Kadè mo labana bai jelma, mula pè milikna suberri dunia ènda ukum mago ngo kessahna? Tentu oda lot gunana! 8:37 Ndorok kin mo dok atè ndènè kessah i itukar dekket barang kadè pè? 8:38 Barang isè mèla mempertuhu Aku dekket peddahKu ipas jaman jukkat bak jahat èn, Anak Jelma i pè mèla ma ngo mempertuhuken jelma sibagidi tikan roh Ia sikali èn merdengan kemuliaen BapaNa rebbak dekket Malaèkat-malaèkatna simbadia i."
9:1 "Èngèt mo!" nina Jesus. "Lot ngo barang piga kalak si nisènda èn, oda dènga matè kum mak dèng iidah Dèbata memerèntah merkitè kuasa!" 9:2 Enggo kessa ennem ari nola, idilo Jesus mo si Petrus, si Jakobus dekket si Johanes simerkaka-kuanggi idi, iarahken mo kalak idi memellin mi sada delleng ndates. Soh kessa kalak idi mi sidi, idah kalak idi mo mobah rupa Jesus bagè merbendella. 9:3 OlesNa mbulan merkillok-killok. Isè poda ndorok i dunia ènda menaptapi bagidi mbulanna oles. 9:4 Nai iidah sisinna sitellu idi mo Jesus mengeranai dekket si Elias bak si Musa. 9:5 Idokken si Petrus mo taba Jesus, "O Guru, merrasana i siakap i sènda. Kubahan kami mo isèn tellu sapo-sapo: sada baMu, sada bai si Musa janah sada nai bai si Elias." 9:6 Situhunna oda ngo ibettoh si Petrus kadè naing dokkenenna, ai mbiar kalohoon ngo ia bagi ma denganna sidua kalak idi. 9:7 Nai mènter roh mo hembun menangkemmi kalak idi dekket lèndungna, terdengkoh mo sora i hembun idi nai mendokken, "Èn ngo AnakKu siKukekellengi i. Uèi kènè mo Ia!" 9:8 Mènter tumulih mo kalak idi kuliling, isè nèngè poda lot idah isidi rebbak dekket kalak idi, pellin Jesus nai ngo kessa. 9:9 Enggo kessa i, mengencuah mo kalak idi i delleng i nai. Sinderrang lako susur idi idokken Jesus mo bagèen taba kalak i, "Ukum makdèng balik nggelluh Anak Jelma idi i kematèen nai, ulang bagahken kènè barang mendahi isè pè siniidah ndènè ndai." 9:10 Iuèi kalak idi ngo tennah idi, tapi lot mo samah-samah kalak idi mersikusoon, tah kadè ngo maksud Jesus mendokken, "Balik nggelluh i kematèen nai." 9:11 Nai ikusoi kalak idi mo Jesus, "Kasa idokken guru-guru agama kennah lebbèen ngo roh si Elias?" 9:12 Ialoi Jesus mo, "Tuhu ngo lebbèen roh si Elias lako menghantari karinana. Tapi bakunè ngo terrèngèt Anak Jelma? Kadè sebabna asa ibas Bibèl tersurat, menggong simpersuk ngo Ia janah ipelèa-lèa dèba? 9:13 Mendè mo èngèt kènè èn. Enggo roh si Elias, lemmo-lemmona ngo ibaing tabasa. Pas ngo i bagè sienggo tersurat ibas Bibèl terrèngèt dirina." 9:14 Enggo kessa roh kalak idi mulak rebbak dekket sisiin sidèbanna idi, idah kalak idi mo mbuè jelma i sidi. Lot mo isidi piga-piga kalak guru agama tupung mersoal dekket sisinna. 9:15 Idah kalak idi kessa mo Jesus, lolo mo kalak idi, mènter merlojangen mo menimbakiSa. 9:16 "Kadè ipersoalken kènè dekket guru-guru agama idi?" nina Jesus mengkusoi sisinNa idi. 9:17 Ialoi sada kalak ibas jelma mbuè idi nai mo, "O Guru, kuembah ngo dukakku taba Guru i. Solpetten ngo ia gabè pekkak. 9:18 Mula selluk kessa tendi sètan idi, itembem-tembemken mo dirina mi tanoh i, babahna merkupkup, èpenna pekekerrep, nai mènter nggenggeng mo karina dagingna. Enggo kuèlèk-èlèk sisin Guru idi asa iusir sètan idi, tapi oda terpemalumsa." 9:19 Nai nina Jesus mo taba sisinna i, "Nong kènè i! Oda ngo keppè percaya kènè. Sadikè dekkah nai Aku rebbak dekket kènè janah sobar mengidah kènè? Embah kènè mo misènda anak idi!" 9:20 Iembah kalak i mo anak idi mendahi Jesus. Iidah tendi sètan i kessa mo Jesus, mènter ipegenggeng sètan i mo anak idi, gabè geppah mi tanoh janah gumoling-goling. Babahna pè merkupkup mo. 9:21 Nai ikusoi Jesus mo bapa anak idi, "Enggo sadikè dekkah ia bagèen?" "Mulai anak-anak nai ngo!" nina bapana idi. 9:22 "Enggo ngo nggati naing ibunuh sètan idi ia merkitè idabuhken dirina mi api barang mi laè. Tapi mula ndorok ngo iurupi Guru idi, masèh mo atèMu bai nami, urupi mo kami!" 9:23 "Bakunè nimu? Mula ndorok?" nina Jesus. "Ndorok ngo karinana asal kalak percaya!" 9:24 Mènter ipegang partua i mo sorana, "Tuhan, percaya ngo aku, tapi kurang ngo belgahna kepercayanku. Urupi mo aku, asa makin percaya!" 9:25 Idah Jesus kessa mo enggo makin mbuè jelma rengngem, ipasulak mo tendi sètan idi laus. Idokken mo, "Alè tendi tongkik dekket pekkak, Kudokken bamu, laus mo kono bai anak ènda nai, janah oda ndorok nèngè kono balik mendahisa!" 9:26 Mendengkuk mo tendi sètan idi, ipegenggeng mo daging anak idi, nai karuar mo ia bai anak idi nai. Bagè bangkè nai ngo idahen daging anak idi, gabè karina kalak mendokken, "Enggo matè ia." 9:27 Tapi ijèmak Jesus mo tanganna, iteggu mo asa kèkè. Nai kèkè mo anak idi. 9:28 Enggo kessa mi bages Jesus, ikusoi sisinNa mo ia, "Kasa oda terusir kami ndia tendi sètan idi?" 9:29 "Sètan sibagidi, oda ndorok terusir i merkitè-kitè sidèban, pellin merkitè sodip ngo kessa," nina Jesus. 9:30 Berkat nola mo Jesus dekket sisinNa menerusken perdalanen memellus Galilea. Oda lemmo atè Jesus ibettoh dèba barang i dikè Ia, 9:31 kerna sidang mengajari sisinna Ia. "Anak Jelma, isohken mo taba kuasa jelma," bagi ngo idokken Ia, "Tapi balik nggelluh ngo Ia i ari petelluken!" 9:32 Oda iarti sisiin idi niajarken Jesus, tapi oda ma lot isè pang lako mengkuso tabaSa. 9:33 Nai soh mo kalak i mi Kapernaum. Enggo kessa i sapo kalak idi, ikuso Jesus mo sisinNa, "Kadè ngo niranaen ndènè i tengah ndalan ndai?" 9:34 Tapi oda ialoi kalak idi, kerna i tengah ndalan merselisih ngo kalak idi terrèngèt isè ngo kalak idi simbellenna. 9:35 Kundul mo Jesus, nai idilo mo sisinNa sisipuluh dua i, idokken mo taba kalak i, "Barang isè naing perlebbè, ibaing mo dirina gabè perpodi, janah gabè naposo i karina jelma." 9:36 Enggo kessa i iarahken mo sada kalak anak-anak janah ipecènder mi hadeppen kalak idi karina. Ikaol Jesus mo anak-anak idi ninganna idokken taba sisinNa, 9:37 "Barang isè menjalo anak-anak sibagèen kumernaken Aku, Aku ngo nijalona. Janah barang isè menjalo Aku, oda ngo pellin Aku nijalona, tapi Dèbata sipasulakken Aku dekket nijalona isidi." 9:38 Nai idokken si Johanes mo taba Jesus, "O Guru, kuidah kami lot ngo mengusir sètan mengasangken gerarMu. Kugerra kami ngo ia memmaing bagidi kumarna oda denganta ia." 9:39 Tapi ialoi Jesus mo, "Ulang gerra kènè ia, kerna barang isè memmaing kellengangen merkitè gerarKu, tentu oda ngo mènter merukur jahat ia meraloken Aku. 9:40 Ai barang isè oda mengalo kita, merlapaten ngo i, kan kita ngo ia. 9:41 Èngèt kènè mo! Barang isè memerrè kènè mènum kemulihken mengèkutken Raja Sipaluah i kènè, ibalesken Dèbata ngo bana kinimendèna i." 9:42 "Barang isè memmaing sada kalak ibas anak-anak ènda nai sienggo percaya kin taba Aku gabè mortat ibaing, lotiin mo igantungken mi kerahongna batu penggilingen janah iambongken mi laut. 9:43 Mula tanganmu memmaing kono mengulaken ulaan siso nikellemmoken Dèbata, gettap mo tanganmi! Lotiin mo ko mertangan serrap masuk mi sorga, ulang pada cukup mersendihi keppè masuk mi narakka, imo api siamman sumendah. 9:44 Isidi api oda nggèut mèntep janah olong nisidi oda ndorok matè. 9:45 Janah mula nèhèmu i memmaing kono mengulaken ulaan siso lemmo atè Dèbata, gettap mo nèhèmi. Lotiin mo kono mernèhè serrap masuk mi sorga, ulang pada bolet dagingmu ibuang mi narakka. 9:46 Isidi mo api siso nggèut mèntep dekket olong nisidi mak ndorok matè. 9:47 Mula matami memmaing kono mengulaken siso lemmo atè Dèbata, polditken mo matami! Lotiin mo kono mermata sada tapi gabè ginemgem i Kerajaen Dèbata, ulang pada bolet dagingmu mi narakka. 9:48 I sidi mo api siso nggèut mèntep dekket olong nisidi mak ndorok matè. 9:49 Karina jelma kennah memellus api pengojiin asa lot penguèen bana. Merkitè bagidi, enggo bagè sinisiraan ia. 9:50 Mendè ngo sira i, tapi mula gabè ndèngap sira idi, bakunè nola mo pemasinken sira i mengolihi? Jadi naing mo kènè bagè kalak sienggo isirai -- janah nggelluh mo kènè ibagasen damè."
10:1 Enggo kessa i, itadingken Jesus mo bekkas idi janah laus mi nagerri Juda dekket mi nagerri i kèparen Laè Jordan. Nai merrohen ma mo jelma nterrem mencingkoi Jesus. Bagè biasana, iajari Jesus mo kalak idi. 10:2 Roh ma mo dekket kalak Parisè lako mengenggep Jesus. Ikusoken kalak idi mo bagèen, "Peterrang mo bai nami, ndorok ngo kalak menirangken sinibagesna?" 10:3 Ialoi Jesus mo dekket kuso-kuso, nina mo, "Bakunè pana pendokken si Musa taba kènè?" 10:4 "Idokken si Musa mo, ndorok ngo isirangken sinibagesna, asal mo iberrèken surat sirang," nina kalak idi. 10:5 "Idokken si Musa pè bagidi, kumarnaken mahalna ngo kènè ajaren," nina Jesus taba kalak idi. 10:6 "Otang i mulana i nai ngo, imo tikan itempa Dèbata jelma i, idokken ngo, 'Itempa Dèbata mo kalak idi daholi dekket daberru. 10:7 Kernana i ngo asa kennah itadingken sada kalak anak laki mo partuana lako mengianken sinibagesna. 10:8 Nai gabè sada mo kalak i sidua.' Jadi oda nèngè kalak i dua kalak, tapi sada ngo. 10:9 Kerna nai oda ndorok sirang jelma, sienggo nipesada Dèbata!" 10:10 Balik kessa kalak idi mi bages, ikuso sisinNa mo Jesus terrèngèt sindai. 10:11 Idokken Jesus mo taba kalak i, "Nasa daholi simenirangken sinibagesna, janah kabin nola dekket daberru sidèban, merlangkah julu meddem ngo ia mi sinibagesna idi. 10:12 Bagi ma ngo daberru simenirangken sinibalèna, janah kabin nola dekket daholi sidèbaan, merlangkah julu meddem ngo ia." 10:13 Lot mo kalak merembah anak-anak mendahi Jesus asa ijamah janah ipasu-pasu. Tapi ilagai sisiin Jesus mo kalak idi. 10:14 Menengen i, mellaga mo Jesus nai idokken mo taba sisinNa, "Belli kènè mo roh anak-anak idi mendahi Aku! Ulang gerra kènè, ai kalak sibagidi ngo ginemgem Kerajaen Dèbata. 10:15 Èngèt kènè mo! Barang isè oda bagè anak-anak menjalo Kerajaen Dèbata, oda mbengket ia gabè ummat Dèbata." 10:16 Enggo kessa idokken bagi, ikaol mo anak-anak idi, nai iampèken mo tanganNa mi babo kalak i gennep lako memasu-masu. 10:17 Sinderrang menerusken perdalanenNa Jesus, lot mo sada kalak anak laki roh lojang-lojang mendahi Jesus. Mènter mersembah mo ia mi hadeppen Jesus ninganna ikusoken, "O Guru, permendè ukur, bakunè ngo kubakin asa ndorok kujalo kenggelluhen situhunna janah soh mi amman sumendah?" 10:18 "Kasa idokken kono Aku permendè ukur?" nina Jesus. "Isè poda lot permendè ukur laènken Dèbata sendiri. 10:19 Otang enggo ibettoh kono sinidokken Dèbata: Ulang memmunuh, ulang merlangkah julu meddem, ulang menangko, ulang merluap, ulang mengkilang, pesangap mo bapamu bak inangmu?" 10:20 "Alè Guru," nina, "mulai kèdèk nai dèng aku enggo mo kuulaken karinana idi." 10:21 Nai itengen Jesus mo ia ibagasen kelleng janah idokken, "Pellin sada matcam nai ngo kessa kurangna. Laus mo kono merdèa karina hartamu; nai berrèken mo tokorna bai kalak sincor, nai terrolih mo kono i harta ni sorga i. Enggo kessa idi, roh mo kono mengèkutken Aku." 10:22 Mendengkoh rana Jesus idi, sèkoh mo iakap, nai laus mo ia menadingken bekkas idi, ibagasen bonek, ai kaya joong ngo ia. 10:23 Itengen Jesus mo sisinNa, nina mo taba kalak idi, "Mahal kalohoon ngo kalak sibèak mahan ginemgem i Kerajaen Dèbata!" 10:24 Lengang ngo sisinNa idi mendengkoh rana Jesus idi. Tapi idokken Jesus nola ma mo, "Alè pa, mahal ngo lako mbengket gabè ginemgem i Kerajaen Dèbata! 10:25 Murahen ngo gajah cucuk mi lubang jarum daripada sibèak mbengket mi Kerajaen Dèbata." 10:26 Gabè tersengget mo sisiin idi kumarna kata niruapken Jesus idi, mersikusoon mo kalak i samahsa, "Ukum bagi, isè mo ndorok maluah?" 10:27 Itengngen Jesus mo kalak i karinana janah ialoi, "Ukum bai jelma, oda terbakin idi, tapi ukum bai Dèbata terbakinsa ngo i, ai oda lot siso terbakin Dèbata!" 10:28 Nai idokken si Petrus mo, "Tengen mo, enggo kutadingken kami karinana, lako mengèkutken Guru i." 10:29 "Imo tuhu," nina Jesus. Asa èngèt kènè mo, "Kalak sienggo menadingken bagesna, barang kaka anggina, barang turangna, barang bapana, barang dukak-dukakna, barang jumana kumernaken Aku dekket kumarnaken Sukuten Kelluahen bai Dèbata nai, 10:30 jalonna mo bagèndari pè seratus kali lempit buèna bages, kaka anggi, turang, inang, bapa, juma -- bagi ma ngo bang sindersa nola pè. Tapi seggen i ari podi, ijalo mo kenggelluhen situhunna soh mi amman sumendah idi. 10:31 Tapi mbuè ngo jelma sibagèndari ènda sienggo perlebbè gabè perpodi, janah mbuè ma ngo sibagèndari èn perpodi gabè perlebbè." 10:32 Sinderrang i tengah ndalan laus mi Jerusalem, Jesus dekket sisinNa, merdalan mo Jesus i lebbè sisinNa janah karina sisinna terendep-endep. Bagi ma ngo simengèkutken kalak idi i podi nai pè, mbiar ngo. Nai idilo Jesus mo manihan sisinNa i, ibagahken mo bai kalak i sinaing masa mi diriNa. 10:33 "Dengkohken kènè mo," nina, "Bagèndari kita lako mi Jerusalem. Isohken mo i sidi Anak Jelma taba imam-imam ekuten dekket guru-guru agama. Iputusken kalak idi mo hukumen matè tabasa, janah ipesoh taba kalak siso Jahudi. 10:34 Irèhè-rèhè kalak i mo Ia, icèduri, nai ipersilangken mo Ia. Tapi enggo kessa tellu ari, balik nggelluh ngo Ia." 10:35 Nai roh mo si Jakobus dekket si Johanes dukak si Zebedeus mendahi Jesus, "O Guru," nina kalak i, "Lot pengidoon nami sinaing bakinenMu bai nami." 10:36 "Kadè pana ipergeddo kènè sinaing bakinenKu bai ndènè?" nina Jesus. 10:37 Ialoi kalak i mo, "Mula kundul kessa Ko sikalienda ibas Kerajaen Dèbata merdengan kuasa, kupido kami asa paduè kami kundul rebbak dekket Kono, sada i kamuhunMu, sada nai i kambirangMu." 10:38 "Oda ibettoh kènè kadè nipido ndènè," nina Jesus taba kalak idi, "Sanggup ma ngo kènè mengènum i caban kinipersuk idi nai sinaing Kuènum idi, janah menggongken simpersah bagè sinaing Kugongken idi?" 10:39 "Sanggup ngo," nina kalak idi. Nai idokken Jesus nola mo bai kalak idi, "Tuhu ngo nemmu dekket ngo kènè mengènum ibas caban kinipersuk idi nai bagè sikuènum idi janah menggongken simpersah bagè siKugongken idi. 10:40 Tapi ukum memmaing isè kundul i kamuhunKu barang mi kambirangKu, oda ngo kuasangKu. Dèbata ngo menentuken barang isè mengkunduli bekkas idi." 10:41 Idengkoh sisiin sisipuluh kalak i nai kessa mo i, mellaga mo kalak i taba si Jakobus dekket si Johanes. 10:42 Nai idilo Jesus mo kalak i karina, idokken mo, "Ibettoh kènè ngo barang bakunè ibaing kalak penggemgemmi, memerèntah rayatna merkitè paksa janah ekuten nipebangkitna pè mengasangken gegoh ngo. 10:43 Tapi ukum kènè oda ndorok bagi! Barang isè naing mersangap bai ndènè nai, kennah gabè perkebbas ndènè mo ia. 10:44 Janah barang isè naing gabè huntuun, kennah gabè hamba mo ia bai ndènè. 10:45 Ai Anak Jelma idi pè, oda roh ia asa ikebbasi. Tapi roh Ia lako mengkebasi ngo janah merrèken kessahNa mahan tebbus ni mbuè jelma." 10:46 Soh mo kalak idi mi Jeriko. Nai itadingken Jesus dekket sisiin bak jelma nterrem i kessa kuta idi, lot mo i biding dalan idi sada kalak sipètung mengido-ngido. Si Bartimeus ngo gerarna, imo anak si Timeus. 10:47 Idengkoh kessa enggo mentas Jesus kalak Nazaret, dilo-dilo mo ia, "Jesus, Anak si Daud! Masèh mo atèMu midah aku!" 10:48 Ipincang jelma simentas i mo ia janah idokken asa sip. Tapi makin ipegang mo sorana mendiloken, "Alè Anak si Daud, masèh mo atèMu midah aku!" 10:49 Nai mentadi mo Jesus janah idokken mo, "Diloi mo ia misènda." Idiloi kalak i mo sipètung idi. Idokken kalak idi mo tabasa, "Tennang mo kono! Kèkè mo ko, idilo Jesus ngo kono!" 10:50 Nai ipitakken sipètung i mo jubahna, kèkè mo ia, laus mo ia mendapetken Jesus. 10:51 "Kadè ipergeddo kono Kubaing bamu?" nina Jesus mbangsa. Ialoi sipètung idi mo, "Alè Guru, ipergeddo atèngku asa merpendidah aku." 10:52 "Laus mo kono" nina Jesus, "enggo ipejuah kepercayaenmi kono." Nai mènter merpendidah mo ia gejapkenna i. Ièkutken mo Jesus merdalan.
11:1 Tikan lako mendapetken Jerusalem, soh mo kalak idi mi Betpage dekket Betanma, i pispis Uruk Jetun. Ipasulak Jesus mo i sidi nai dua kalak sisinNa perlebbè. 11:2 "Laus mo kènè mi kuta ni lebènta adoi," nina Jesus taba kalak idi. "Mbengket kessa kènè mi kuta idi, idahen ndènè mo i sidi anak kalodè tertambat, madèng nung ibaing dèba mahan kuda tunggang. Osari kènè mo kalodè idi, janah iring kènè mi sèn. 11:3 Mula lot kalak mendokken bai ndènè, kasa iosari kènè kalodè idi, dokken kènè mo: Perlu ngo i bai Tuhan i, janah ndor ngo iolihken i." 11:4 Laus mo sisiin sidua kalak i, janah idapet mo sada anak kalodè tertambat i pèntu pengkerruhen i biding dalan idi. Iosari kalak i mo kalodè i. 11:5 Ikuso kalak sicènder nisidi mo kalak idi, "Ei, merkadè kènè? Kasa iosari kènè kalodè i?" 11:6 Ialoi kalak idi mo bagè sienggo itennahken Jesus taba kalak i. Nai ibelli kalak nisidi mo iiring kalodè idi. 11:7 Soh kessa mendahi Jesus, ialasi kalak i mo gurung kalodè i dekket oles, nai ipasang Jesus mo. 11:8 Mbuè ma mo kalak mengalasken olesna mi dalan i, lot dèba menggamparken ranting kayu mi dalan sinialengna i jumana nai. 11:9 Kalak simerdalan i lebbè dekket simengèkut i podi nai pè mendiungken, "Poji mo Dèbata! Nipasu-pasu mo Ia siroh bai Tuhan i nai! 11:10 Nipasu-pasu mo kerajanNa siroh i -- kerajaen bapanta si Daud! Nipoji mo Dèbata sintèmbul i!" 11:11 Nai soh mo Jesus mi Jerusalem, ibengketti mo Bages Dèbata, iperèso mo kuliling, nai berkat mo Ia mi Betania rebbakken sisinNa sisipuluh dua idi, kumarna enggo gellap. 11:12 Sibarembenkenna, berkat kessa kalak idi i Betania nai, mellèhè mo iakap Jesus. 11:13 Itatap mo sada ngkabenna kayu ara ntem-ntem bulungna. Idahi mo batang kayu ara idi lako menengngen tah lot buahna. Tapi soh kessa Ia mi benna kayu ara idi, pellin bulungna ngo kessa lot idapet, ai madèng mosimna merbuah. 11:14 Nai idokken Jesus mo mi kayu ara idi, "Mulai bagèndari nai, isè poda ndorok nèngè kipangan buahmu!" Idengkoh sisin Jesus ngo kata idi. 11:15 Nai soh mo kalak idi mi Jerusalem, janah laus mo Jesus mi Bages Dèbata. Iusir Jesus mo karina jelma simertiga-tiga dekket simenokor nisidi. Mèja ni kalak penukari kèpèng pè dekket bangku simerdèa ndarapati ipentombang-mbalingken ngo karinana. 11:16 Isè poda ipadiat merembah barang kadè sambing arap kasèan Bages Dèbata idi. 11:17 Nai ipeddahi Jesus mo nisidi, nina mo, "Otang lot ngo tersurat ibas Bibèl bagèen: Idokken Dèbata, bekkas mersodip karina bangsa ngo BagesKu! Tapi gabè ibaing kènè nola ngo Bages Dèbata gabè bekkas pennamun!" 11:18 Idengkoh imam-imam ekuten dekket guru-guru agama ngo rana idi. Itulusi kalak idi mo dalan lako memmunuh Jesus, ai mbiar ngo kalak idi midahSa, kerna karina jelma nterem kagum mendengkoh peddahNa. 11:19 Cibonkenna idi, itadingken Jesus dekket sisinNa mo kuta idi. 11:20 Njengkas sibarembenkenna i, tikan ilausi kalak i kayuara idi, idah kalak i mo enggo matè kayu ara idi soh mi uratna. 11:21 Nai ièngèt si Petrus mo rana sienggo iruapken Jesus mi kayuara idi. Gabè idokken si Petrus mo, "O Guru, tengen mo. Kayu ara sikenna kata idi enggo matè!" 11:22 Ialoi Jesus mo, "Èngèt mo! Percaya mo ko bai Dèbata. 11:23 Ndorok ngo dokkenken ndènè taba uruk ènda, 'Mompat mo kono janah capak mi laut!' saut ngo bagidi; asal mo ulang ragu-ragu kènè, janah mula percaya kènè, saut ngo sinidokken ndènè i karinana. 11:24 Kernana i èngèt kènè mo: Mula mersodip kènè, mengido barang kadè, percaya mo kènè, enggo iberè Dèbata bai ndènè sinipido ndènè i, nai jaloon ndènè mo idi. 11:25 Janah mula mersodip kènè, keppè oda selloh ukur ndènè taba sada kalak, lebbèen mo ampuni kènè ia, asa iampuni Bapa ndènè ni sorga i dosa-dosa ndènè. 11:26 Mula oda iampuni kènè dosa sidèban, dosa-dosa ndènè pè, oda iampuni Bapa ndènè ni sorga idi." 11:27 Mulak nola mo kalak i mi Jerusalem. Nai tikan merdalani mi kuliling Bages Dèbata, roh mo imam-imam ekuten, guru-guru agama dekket pengulu-pengulu Jahudi mendahi Jesus. 11:28 Mengkuso mo kalak idi, "Kadè dalanna asa pang Kono memaing karinana ènda? Isè ngo memerrèken hak bamu lako memmaing bagidi?" 11:29 Ialoi Jesus mo, "Aku pè naing kukusoi ngo kènè lebbè. Mula ialoi kènè kuso-kusongKu idi, nai pè asa Kubagahken bai ndènè terrèngèt hakku lako mahanken bagidi. 11:30 Bagahken kènè mo bangku, isè ngo merrèken hak bai si Johanes Perridiken lako perridiken kalak, Dèbata ngo barang jelma?" 11:31 Nai mersungkuun mo kalak i samahsa, nina kalak idi, "Bakunè pendokkenta? 'Mula sidokken bai Dèbata nai,' dokkenenna mo banta, kasa oda percaya kènè taba si Johanes?' 11:32 Tapi mahal ngo mendokken bai jelma nai." Kerna mbiar kalak i midah jelma nterrem, ai karina kalak mendokken, nabi ngo si Johanes. 11:33 Jadi ialoi kalak idi mo, "Oda kubettoh kami." Nai idokken Jesus mo taba kalak i, "Mula bagi ngo, Aku pè oda kubagahken taba kènè terrèngèt hakku lako mahanken karinana idi."
12:1 Enggo kessa i, mengerana mo Jesus merkitè-kitè codiin mendahi imam-imam ekuten guru-guru agama bagi ma dekket pengulu-pengulu Jahudi idi. Idokken Jesus mo, "Lot mo sada kalak merpekken anggur, ipagar mo kuliling pekkenna idi. Nai ikurak mo lubang bekkas memerroh anggur i, janah ibahan mo pantar bekkas jaga. Enggo kessa i, ipebellah pinangken mo pekken anggur idi taba sigajiin. Nai laus mo ia kiladang. 12:2 Enggo kessa dapet katikana mosim menapu buah anggur, ipasulak sidasa idi mo sada kalak naposona mendahi simemellah pinang idi lako menjalo bagianna ibas hasil pekken i nai. 12:3 Tapi itangkup simemellah pinang pekken idi mo naposo pasulaken i, ipekpekki mo, ipasulak mo balik, laju bagidi merembah kadè poda. 12:4 Nai ipasulak sidasa pekken idi nola mo naposona sidèban. Tapi ipekpekki pemellah pinang idi mo takal naposo idi, janah iusir ninganna ipelèa-lèa. 12:5 Ipasulak sidasa pekken i dèng ma mo naposona sidèban. Tapi ibunuh ngo naposo idi, bagi mo dakdak ibaing kalak idi taba mbuè naposo sidèbanna ma, lot dèba ipekpekki lot dèba ibunuh. 12:6 Isè nola mo ndorok bagèndari pasulaken sidasa pekken idi? Pellin sada kalak nai ngo kessa, imo anakna sendiri, nikekellengenna. Jadi perpodi ipasulak mo anakna sendiri mendahi pemellah pinang idi. Bakunè pè ihargai ngo anakku, katèna. 12:7 Tapi mengerrana mo pemellah pinang i samah-samahsa, 'Èn ngo warisna, aci sibunuh mo ia, asa banta milikna idi.' 12:8 Nai itangkup kalak i mo anak idi, ibunuh mo. Bangkèna pè ipitakken mi ruar pekken idi." 12:9 Nai idokken Jesus nola mo, "Kadè mo ndia ibaing sidasa pekken idi? Bakunè pe kennah roh ngo ia, janah ibunuh pemellah pinang i, gabè ipesoh janah iberrèken bai pemellah pinang sidèban. 12:10 Tentu enggo pennah ijaka kènè ayat sitersurat i Bibèl bagèen, Batu sinipitakken tukang bages idi enggo gabè batu persoki. 12:11 Ènda mo pemaing Tuhan; soh mo mendèna." 12:12 Pengituai-pengituai Jahudi simendengkoh codiin idi merusaha lako menangkup Jesus, ai ibettoh kalak i ngo codiin idi merlapaten janah mengenna bai kalak idi, tapi mbiar ngo kalak i midah jelma mbellang. Jadi itadingken kalak i mo Jesus. 12:13 Barang piga kalak Parisè dekket horong si Herodes, ipasulak lako mengenggep Jesus merkitè-kitè kuso-kuso. 12:14 Roh mo kalak idi mendahi Jesus nina mo, "O Guru, kubettoh kami, kono sada kalak perrukur sènteng janah oda pella isarihken kono bakunè pemmikiren ndèba terrèngèt kono. Iajarken kono ngo terrèngèt lemmo atè Dèbata imo merdengan kebennaren sambing, kerna oda mengidahidah abè kono. Nai bakunè dok atèmu, bagahken mo bai nami, 'Mula sigarar belasting taba Kèsar Rom, mengelanggar hatoren agama ngo i barang oda? Kennah sigarar ngo idi barang oda?' " 12:15 Ibettoh Jesus ngo taki-taki kalak idi. Nai ialoi mo, "Kasa ienggep kènè Aku? Pacidah mo taba Aku sada kèpèng pirak." 12:16 Nai iberrèken kalak i mo tabaSa sada kèpèng pirak. Ikuso Jesus mo kalak idi, "Gombaren janah cap isè ngo èn?" "Kèsar," nina kalak idi mengaloi. 12:17 "Mula bagi ngo," nina Jesus, "Berrèken kènè mo balik bai Kèsar barang milik Kèsar, janah berrèken balik bai Dèbata, barang milik Dèbata." 12:18 Roh mo mendahi Jesus piga-piga kalak Sadusè. Kalak èn mo horong simendokken, oda lot ndorok balik nggelluh enggo kessa matè. 12:19 "O Guru," nina kalak idi taba Jesus. "Ipeddahken si Musa banta mula matè daholi menadingken sinibagesna, oda sanga lot dèng dukakna, kennah igelluhi anggina mo daberru simbalu i, lako pecèndekken turunen bai kakana sienggo matè i. 12:20 Lot mo pitu kalak sibeltek. Kabin mo situaan i, mènter matè oda dèng sanga lot dukakna. 12:21 Nai ialihken anggina sipeduaken mo daberru mbalu i. Tapi ia pè matè ma mo oda sanga lot dukakna. Bagi ma mo bang sipetelluken, 12:22 dekket peempatken soh mi pepituken. Ujungna matè ma mo dekket daberru idi. 12:23 Mula balik nggelluh kalak i karina i ari kiamat, sinibages isè mo daberru idi? Kerna pituna kalak i enggo kabin dekketsa!" 12:24 Ialoi Jesus mo, "Enggo laling kènè. Kerna oda iantusi kènè Bibèl, janah kuasa Dèbata pè oda iarti kènè. 12:25 Ai mula balik nggelluh nola simatè idi, oda nèngè ngo kabin idi, tapi pergelluh kalak idi tosè bagè malaèkat ni sorga idi nai ngo. 12:26 Janah terrèngèt sienggo matè ipegelluh mengolihi, makdèng ngo nung ijaka kènè ibas bukku si Musa, 'Aku ngo Dèbata si Abraham, Dèbata si Isak dekket Dèbata si Jakob.' 12:27 Ukum Dèbata i oda ngo Dèbata kalak simatè. Dèbata kalak singgelluh ngo Ia. Pilit ngo pengantusi ndènè i!" 12:28 Nai roh mo sada kalak guru agama mendengkohken pengeranaan Jesus dekket kalak Sadusè idi. Idah guru agama idi enggo mendè pengaloi Jesus taba kalak idi i. Nai mengkuso mo ia taba Jesus, "Siapaina ngo patiin siperluna kalohon ibas nasa patiin idi nai?" 12:29 Ialoi Jesus mo, "Patin raya perlebbè imo, 'Dengkohken kènè mo bangsa Israel! Pellin Dèbata Tuhanta idi ngo kessa Dèbata. 12:30 Kennah kekellengenmu ngo Tuhan Dèbatamu ibas nasa atèmu dekket nasa kessahmu, dekket nasa pikirenmu dekket nasa gegohmu!' 12:31 Patiin raya peduaken imo, 'Kennah kekellengenmu ngo sidèban, bagè pengkekelengimu mi dirimu sendiri.' Oda lot nèngè patiin sidèban belgahen dari pada patiin sidua idi." 12:32 Nai idokken guru agama id mo taba Jesus, "Tuhu kaloon ngo Pengaloi Gurui! Bennar ngo karina nidokkenmu idi, pellin Dèbata ngo kessa Tuhan, oda lot nèngè laènkenna. 12:33 Janah kennah ikekelengi jelma ngo Dèbata, ibas nasa atè-atèna, dekket ibas nasa pikirenna, dekket ibas nasa gegohna, janah kennah ikekelengi ngo jelma sidèban bagè pengkekelengina mi dirina sendiri. Lotiin ngo bagidi, ulang pada memèlèken pinakan bak pèlèen sidèbanna i babo langgaten taba Dèbata." 12:34 Idah Jesus pengaloi guru agama idi enggo mo mendè kalohon. Gabè idokken Jesus mo mbangsa, "Enggo mulai iarti kono bakunè carana gabè ginemgem i Kerajaen Dèbata." Enggo kessa i, isè nèngè poda pang memmaing kuso-kuso taba Jesus. 12:35 Sinderrang mengajari idi i Bages Dèbata, mengkuso mo Jesus, "Bakunè ngo asa idokken guru-guru agama, ukum Raja Sipaluah idi pemparen si Daud? 12:36 Keppèken si Daud sendiri -- kumerna idomi Tendi Dèbata -- mendokken, 'Enggo idokken Tuhan i taba Tuhanku; kundul mo kono i kamuhunKu mèma Kubaing karina musuhMu tunduk baMu.' 12:37 Jadi, mula si Daud mendokken Ia 'Tuhan', nai bakunè mo jadina Raja Sipaluah idi pemparen si Daud?" Jelma nterrem silot i Bages Dèbata idi, sennang ngo mendengkoh Jesus mengajar. 12:38 Ibas pengajaren idi idokken Jesus, "Jaga mo kènè taba guru-guru agama. Ngkasah ngo kalak i merdalan-dalan memakkè jubah nggeddang janah lolo ngo ia mula ihormati dèba i pasar-pasar. 12:39 Ipilih kalak i ngo bekkas mehangga i bages perguruun dekket i pèsta-pèsta. 12:40 Ikilang kalak i ngo simebbalu, janah iakkal-akkali dekket bagesna. Lako memmoniken kejahaten kalak idi, mersodip nggeddang mo kalak idi. Asa, mberrat ngo hukum mengenna mi kalak i seggen!" 12:41 Sikali, kundul mo Jesus i gembar pèti pèlèen i Bages Dèbata. Iperdatèken Jesus mo jelma simenèktèkken kèpèngna mèduk mi sidi, 12:42 nai roh mo sada kalak daberru simebbalu. Irèhrèhken ma mo dua kèpèng tembaga, imo pèsèr, im siperterruhna kèpèng. 12:43 Mènter idilo Jesus mo sisinNa, idokken mo taba kalak idi, "Perratèken kènè mo èn: Buèen ngo kèpèng niberrèken daberru simebbalu sincor adèi mi pèti-pèti idi ulang pada niberrèken karina kalak sidèbanna i. 12:44 Kerna karina kalak i lebbih-lebbih hartana ngo iberèken. Tapi daberru simebbalu idi, tukasi pè ncor ia -- enggo iberrèken karina silot bana tukasi pè idi ngo kessa nggelluhna."
13:1 Enggo kessai laus mo Jesus i Bages Dèbata i nai. Sinderrang bagidi idokken sada kalak ibas sisiin i nai mo, "O Guru, tengen mo bages ènda, bagi dekket batu nisusunna i. Soh mo mendèna!" 13:2 Ialoi Jesus mo, "Iidah kono bagidi belgahna bages idi? Sada batu pè oda lot nèngè mersusun i bekkas idi tading. Kennah irumpakken ngo karinana." 13:3 Kessa i laus mo Jesus mi Uruk Zaitun janah kundul i sada bekkas mendempak mi lebbè Bages Dèbata. Roh mo mendahisa si Petrus, si Jakobus, si Johanes dekket si Andreas lako mengeranai pellin. 13:4 "Bagahken mo bai nami Guru," nina kalak idi tabaSa. "Ndigan mo masa idi karinana?" Janah kadè mo tanda-tandana mula enggo dapet tikkina masa idi. 13:5 "Kennah lot ngo germet bai ndènè," nina Jesus mengaloi, "asa ulang itipu dèba kènè. 13:6 Mbuè ngo kalak roh merkitè-kitè gerarKu ia nina, janah mendokken, 'Aku ngo Ia!' nai itipu mo mbuè jelma. 13:7 Mula idengkoh kènè berrita geraha, ulang kènè mbiar. Kennah masa ngo sibagidi, tapi madèng ngo roh kettikana kiamat. 13:8 Mergeraha mo bangsa sisada merraloken bangsa sisada nai. Lako i dikè, masa mo rènur dekket kellèhèen. Karina idi pellin pertemmenanna dèng ngo idi bagè pengakap sada partua ibages rabisen nderrang lako kettaring. 13:9 Asa kennah mermanat ngo kènè, kerna kènè pè naing itangkup ngo janah iaduken mi runggu agama. Ipekpekki mo kènè i bages perguruun. Icaran mo kènè mi hadeppen penguasa dekket raja-raja kumernaken Aku, asa merkitè bagidi iindangken kènè terrèngèt Aku mendahi kalak idi. 13:10 Kennah lebbè isarken mo Sukuten Kelluahen bai Dèbata nai mi karina bangsa. 13:11 Mula itangkup kènè, janah mula iembahken mi perhukumen, ulang kènè mbiar terrèngèt sinaing dokkenken ndènè. Mula enggo dapet tikkina naing mengerana, ruapken mo barang kadè sinibagahken Tuhan idi bamu sinaing ruapenkenmu i kettikana. Karina rana sinaing ranaenken ndènè, oda ngo rana ndènè idi, tapi rana siroh bai Tendi Dèbata nai ngo idi. 13:12 Itakiken jelma mo dengan sibeltekna sendiri lako bunuhen. Bagi ma mo masa bai bapana mi dukakna. Dukak-dukak mengalo bai partuana, janah pesakatken kalak i lako bunuhen. 13:13 Karina ngo kalak merceggo atè midah kènè kumarnaken Aku. Tapi barang isè menahan soh mi puncana, ia ngo kessa ipaluah." 13:14 "Nai idahen ndènè mo, pengelako siso puna-puna masa i bekkas siso patutna. (Cataten penjaka: arti mo kadè lapatenna idi). Masa kessa idi, kalak sitading i Juda kennah mperrus mi delleng. 13:15 Kalak si ni pagu, ulang pella nèngè susur lako memmuat barang kadè i bages nai. 13:16 Kalak si ni juma, ulang pella balik nèngè lako mengaleng jubahna. 13:17 Soh mo ntengngamna simasa idi taba daberru simengkandong dekket partua ibages pennusuun. 13:18 Mersodip mo taba Dèbata, asa ulang masa bagidi tikan ari perrudan. 13:19 Kerna tikan bagidi lot mo kepersuken ntengam kalohoon, makdèng nung masa bagidi i dunia èn kessa nai itempa Dèbata dunia èn soh mi bagèndari, janah oda nèngè masa mi podinken èn. 13:20 Ukum oda kin ipejoppok Dèbata tikki simasa idi, isè poda lot meluah. Tapi kemulihken ummatNa i ngo, gabè ipejoppok Dèbata tikkina. 13:21 Sinderrang bagidi, mula lot mendokken taba kènè, 'Ita tengen mo, Raja Sipaluah niperbagah-bagah idi isèn ngo Ia, barang i sadèi ngo Ia!' -- ulang kènè percaya taba kalak idi. 13:22 Kerna raja-raja sipaluah palsu dekket nabi-nabi palsu naing roh. Ibaing kalak idi ngo ulaan kellengangen dekket tanda-tanda kellengangen lako menipu ginemgem Dèbata. Janah ninggat siterbakinsa, dekket ngo sienggo terpilih idi ma. 13:23 Jadi, manat mo! Enggo Kubagahken karinana idi taba kènè, sinderrang madèng i permasana." 13:24 "Enggo kessa salpun tikki simpersuk idi, gellap mo mataniari, bulan i pè maknè mercuhaya. 13:25 Merrurus mo bintang ni langit idi, janah sompar-baèr mo karina silotna i abang-abang i. 13:26 Sinderrang bagidi, teridah mo roh Anak Jelma i bagasen hembun merdengan hejji bak kuasa. 13:27 Ipasulak mo malaèkatna lako pedèmpuken bangsana sienggo terpilih i dèsa siempat idi nai, i punca tanoh èn soh mi punca sisada janah i punca langit soh mi punca sisada ma." 13:28 "Perdatèken kènè mo kayuara idi, mula mertunasi ia merratah bagi janah melamlam, ibettoh kènè mo mosim mpeddas enggo mayak njolmit. 13:29 Bagi ma mo mula idah kè ma masa sindai, bettoh kènè mo enggo njolmit kalohon tikkina. 13:30 Èngèt mo! Karinana simasa idi terjadi nderrang madèng matè karina jelma singgelluh bagèndari. 13:31 Salpun pè langit dekket tanoh, tapi ukum katangKu oda ndorok salpun." 13:32 "Tukasi pè bagidi, sada kalak poda memettoh ndigan arina barang pè kettikana. Malaèkat-malaèkat ni sorga idi poda, Anak Dèbata pè oda memettoh, pellin Bapa i sambing ngo kessa bettoh-bettohen. 13:33 Asa kennah ngo kènè ndungo janah mergermet gennep tèk, ai oda ibettoh kènè, ndigan mo kettikana. 13:34 Codi ngo i bagè sada kalak menadingken bagesna laus mi bekkas ndaoh. Itennahi mo naposona lako menjamotken bagesna idi, janah iberrèken siulanken naposo idi gennep. Taba penjaga pèntu itennahi asa mendè-mendè ijaga. 13:35 Kernana i, kènè pè kennah merjaga-jaga ngo, ai oda ibettoh kènè ndigan pekiroh sidasa bages idi -- tah ciboon, tah tengah mberngin, tah takuak manuk, barang pè tah nderrang mbincar mataniari. 13:36 Mula simpusta ia roh, ulang mo idapet kènè terpeddem. 13:37 Kadè siKubagahken bai ndènè èn, Kubagahken ma ngo i taba karinana jelma, ndungo mo kono janah mergermet!"
14:1 Dua ari nai asa dapet Pèsta Paskah dekket Ari Raya Roti Siso Meragi. Imam-imam ekuten dekket guru-guru agama menulusi dalan lako menangkup Jesus sip-sip naing bunuhenna. 14:2 "Tapi ulang mo silaluken idi tikan pèsta idi," nina kalak idi, "asa ulang masa kegontaren." 14:3 Tikan Jesus tupung i Betania, i bages si Simon simersakit puru nambi idi kin, roh mo sada kalak kalak mendahiSa merembah gori-gori merrisi minak baungkus. Sinderrang mangan Jesus, ipecahken daberru idi mo gori-gori idi, iarirken mo minak baungkus idi mi babontakal Jesus. Maharga kalohoon ngo minak baungkus idi, ijadiken pulungen urat baungkus nai. 14:4 Ceggo mo atè dèba jelma silot nisidi, nina mo samah-samahsa, "Kadè gunana ibakin bagidi minak baungkus idi? 14:5 Ndorok ngo idèa minak idi lebbih tellu ratus kèpèng pirak; janah iberrèken tokorna idi bai kalak sincoor!" Ngerrah mo atè kalak idi taba daberru idi. 14:6 Tapi nina Jesus mo, "Belli mo ia! Kasa isusahi kènè ia? Ibaing ngo mendè janah sipojiin taba Aku. 14:7 Dak lot ngo i tengah-tengah ndènè kalak sincoor gennep tèk, mula uè kènè, ndorok ngo iurupi kènè kalak idi. Tapi ukum Aku oda ngo menettap rebbak kènè. 14:8 Ibaing daberru èn ngo kadè sindorok ibakin. Sinderrang madèng dapet kettikana, enggo ikebbasi Aku merkitè minak baungkus hatoren mengkubur Aku. 14:9 Percaya mo kènè! Barang idikè i suberri dunia èn Sukuten Kelluahen idi ibagahken, isukutken ma ngo sinibakin daberru èn mahan pernèngèten bana." 14:10 Sada kalak ibas sisiin Jesus si sipuluh dua kalak idi nai, mergerar si Judas Iskariot laus ngo ia mendahi imam-imam ekuten dekket niat menelbuh Jesus lako bai kalak idi. 14:11 Nai sennang kalohon mo iakap kalak i mendengkoh pengidoon idi janah merjandi mo kalak i merrèken riar taba si Judas. Nai mènter itentuken si Judas mo tikkina lako menelbuh Jesus. 14:12 I ari perlebbè Pèsta Roti Mak Meragi i -- idahi smsinna mo Jesus. Biasa ngo i ari i isembellih biri-biri Paskah -- Ikusoi sisiin i mo Jesus, "I dikè ngo dok atèmu kuhantari kami pangaan Paskah bai Guru i?" 14:13 Nai ipasulak Jesus mo dua kalak sisiin idi, nina mo, "Laus mo kènè mi kuta, pejumpa ngo kènè nahan i sidi dekket sada daholi merembah jantar merrisi laè. Èkutken kènè mo ia, 14:14 mi bages sinaing bengkettenna, janah dokken mo taba sidasa bages i, 'Alè bapa, ikusoken Guru i, idikè ngo bekkas Guru i dekket sisinNa lako kipangan pangaan Paskah.' 14:15 Nai ituduhken mo bai ndènè sada bilik mbelgah perdates. Enggo kin ngo iatur bekkas idi dekket perkakasna, i sidi mo hantari banta." 14:16 Nai laus mo sisin sidua kalak i mi kuta. Tuhu ngo bagè sinidokken Jesus idi karinana. Mènter ikebbasi kalak i mo pangaan Paskah idi. 14:17 Berngin kessa, roh mo Jesus dekket sisinNa sisipuluh dua i. 14:18 Sidang kundul kalak i mangan, idokken Jesus mo, "Dengkohken kènè mo sikudokken èn, sada kalak bai ndènè nai sirebbakken mangan dekket Aku bagèndari, naing menelbuh Aku." 14:19 Gabè bonek kalohoon mo sisiin idi. Nai mengkuso mo sisiin idi sasakalak mendahi Jesus, "Oda ma ngo aku i Tuhan?" 14:20 Ialoi Jesus mo, "Ukum kalakna imo sada kalak ibas kènè sisipuluh dua èn nai. Imo sirebbak sada permangaan dekket Aku. 14:21 Tuhu ukum Anak Jelma kennah matè ngo bagè sienggo tersurat ibas Bibèl. Tapi magosiana i kalak simenelbuh Anak Jelma i! Padaan kin ia ulang sanga tubuh!" 14:22 Sinderrang mangan idi kalak i, ibuat Jesus mo roti, idokken mo sodip mellias atè mi Dèbata. Ipenggelli mo roti idi, nai ipemberrèken mo taba sisinNa ninganna idokken, "Pangan kènè mo dagingKu ngo èn." 14:23 Enggo kessa pul idi, ibuat nola mo sada perrènumen anggur. Idokken mo sodip mellias atè mi Dèbata, nai iberrèken mo siènumen idi bai sisinNa. Karina kalak idi mengènum anggur i sidi nai. 14:24 Enggo kessa bagidi, idokken Jesus mo, "DarohKu ngo èn, siniorèken menebbus mbuè jelma, daroh mensahken perjandiin Dèbata. 14:25 Percaya mo kènè: Oda nè Kuènum anggur bagèen i, soh mi katika Aku mènum anggur sirimbaru rebbak dekket kènè i Dunia Rimbaru rebbak BapangKu." 14:26 Nai iendèken kalak i mo sada endè pemoji-mojiin. Janah enggo kessa pul idi, laus mo kalak i mi Uruk Jetun. 14:27 Mengerana nola mo Jesus taba kalak idi, "Mperrus ngo kènè karina menadingken Aku. Kerna tersurat ngo ibas Bibèl, 'Ibunuh Dèbata ngo permakan idi, nai mperrus mo biri-birina mersitendeng dalanna.' 14:28 Tapi enggo kessa balik nggelluh Aku, Kulebbèi mo kènè mi Galilea." 14:29 "Oda," nina si Petrus mengaloi, "Barang karina nola kalak i menadingken Guru i, ukum aku oda ngo." 14:30 "Èngèt mo," nina Jesus, "I berngin ènda, sinderrang makdèng takuak manuk peddua kaliken, enggo mo tellu kali kono memerso, oda itandai ko nimu Aku." 14:31 Mènter ialoi si Petrus mo ntompel, "Mula pè kennah matè aku rebbak dekket Guru i, bakunè pè oda nggèut aku mendokken oda kutandai Guru i." Karinana ngo sisiin sidèbanna i mendokken bagi. 14:32 Soh mo kalak idi mi sada bekkas mergerar Getsemane. Idokken Jesus mo taba sisinNa, "Kundul mo kènè lebbè i sènda, Aku laus sigejap mersodip." 14:33 Nai iarahken Jesus mo si Petrus, si Jakobus dekket si Johanes laus rebbak dekketSa. Mulai mo bonek ukurna janah bulisah. 14:34 "Soh mo bonekna ukurKu," nina Jesus taba kalak i, "bagè dosken naing matè ngo pengakapKu. Pèma kènè mo i sènda janah ulang kè terpeddem!" 14:35 Laus mo Jesus narih ndaoh cituk, nai tangkep mo mi tanoh janah mersodip. Ibas sodipNa idi ipidoken, mula ndorok asa ulang pella irasai simpersuk idi. 14:36 "Alè Pa, O Pa," nina, "Ai oda lot mak terpetupa Bapa i. Agoi mo kinipersuk èn bangKu nai. Tapi ulang mo lemmongKu, lemmoMu mo saut." 14:37 Enggo kessa i, balik mo Jesus, janah meddem ngo idapet sisinNa idi. Idokken mo taba si Petrus, "Simon, meddem ngo kono? Oda ngo terbaing kono ndungo giamken sada jom?" 14:38 Idokken Jesus nola mo taba kalak idi, "Ndungo mo kènè janah mersodip, asa ulang mbengket kènè mi pengojiin. Ukum tendimu uè ngo mengulaken sibennar, tapi oda terrulaken kènè kerna ndotè ngo tabiat jelma." 14:39 Iolihi Jesus nola mo mersodip sikali nai janah mendokken kata sodip bagè sindai ma. 14:40 Enggo kessa i, balik nola mo ia mendahi sisinNa, janah idapet meddem dèng ma ngo kalak idi, ai soh mo mbotongna cilèben kalak i. Gabè oda ibettoh kalak idi kadè sidokkenkenna taba Jesus. 14:41 Tikan Jesus balik petellu kaliken taba kalak idi, idokken mo, "Iempet kènè dèng ngo meddem dekket mentadi? Enggo mi! Enggo jupa tikkina Anak Jelma itangkup janah ipesakat mendahi kalak perdosa. 14:42 Kèkè mo kènè, laus mo kita. Tengngen! Idi mo enggo roh menelbuh Aku!" 14:43 Ningan tikan mengerana dèng Jesus, roh mo si Judas, sada kalak ibas sisipuluh dua sisiin idi nai. Rebbak dekketsa roh ma mo mbuè kalak merpeddang dekket merpalu-palu. Ipasulak imam-imam ekuten ngo kalak idi dekket guru-guru agama bagi ma pengulu-pengulu Jahudi. 14:44 Enggo kin ngo itentuken penelbuh idi tanda bai kalak idi. "Mula idi kusanggoh," nina taba kalak idi, "I mo ia. Tangkup mo Ia janah iembah ijaga mertuhu-tuhu." 14:45 Soh kessa si Judas, mènter idapetken mo Jesus janah nina mo, "Njuah-njuah Guru!" nai mènter isanggoh mo Jesus. 14:46 Mènter roh mo jelma sirebbakken dekket si Judas idi menangkup Jesus, janah ilanggu mo Ia. 14:47 Tapi sada kalak silot ni sidi menintak peddangna, itampul mo coping naposo imam huntuun idi sanga ntalsun. 14:48 Nai idokken Jesus mo taba kalak idi, "Penjahat ngo Aku katèndènè, asa roh kènè merpeddang dekket merpalu-palu lako menangkup Aku? 14:49 Gennep ari ngo Aku mengajari i Bages Dèbata i hadeppen ndènè, tapi oda itangkup kènè Aku. Tapi kennah ngo bagidi, asa saut bagè sitersurat ibas Bibèl idi." 14:50 Mperrus ngo karina sisiin Jesus idi menadingkenSa. 14:51 Lot mo sada kalak anak perrana mengèkutken Jesus, pellin sirambar gedda ngo kessa i dagingna. Naing itangkup mo dekket ia. 14:52 Tapi ipaluahi mo geddana i, mperrus mo ia lubus sambing bagidi. 14:53 Iiring mo Jesus mi bages imam huntuun. Enggo tumpu i sidi imam-imam ekuten, pengulu-pengulu Jahudi dekket guru agama. 14:54 Dak mendirip-ndirip ngo si Petrus mengèkutken Jesus i podi nai narih ndaoh, soh mbengket mi kasèan bages imam huntuun idi. Kundul mo ia i sidi cidudu i gembar api lako pepedasken dagingna rebbak dekket perjaga idi. 14:55 Imam-imam ekuten bak karina anggota rungguun mbellen idi menulusi dalan dekket bukti-bukti menalahken Jesus, asa ndorok ihukum matè. Tapi oda lot dapet kalak idi giamken sada pè. 14:56 Mbuè ngo ipecènder saksi-saksi palsu, tapi merralo ngo kesaksiin kalak idi karina. 14:57 Nai cènder nola mo tah piga kalak nai saksi palsu. 14:58 Idokken mo, "Kudengkoh kami idokken kalak èn, Kurumpakken mo Bages Dèbata sinipecènder jelma ènda, janah enggo kessa tellu ari, Kupajek nola mo Bages Dèbata sidèban siso nibahan jelma." 14:59 Tapi pengindangken kalak idi pè tong ngo merralo samah-samahsa. 14:60 Nai cènder mo imam huntuun i hadeppen kalak idi karina, ikuso mo Jesus, "Oda ngo terraloi Kono giam sada kesaksiin kalak i terrèngèt Kono?" 14:61 Tapi sip sambing ngo Jesus, laju oda ialoi. Nai ikusoi imam huntuun i mo sikali nai mendahi Jesus, "Kono ngo Raja Sipaluah niperbagah-bagah idi? Anak Dèbata Simbadia ngo kono?" 14:62 "Aku mo i!" nina Jesus, "Idahen ndènè karina mo Anak Jelma i kundul i kamuhun Dèbata Pergegoh Sisotercodi, janah idahen ndènè mo Ia roh ibagasen hembun i langit nai!" 14:63 Nai mènter iribakken imam huntuun i mo geddana, ninganna idokken, "Oda perlu nèngè saksi. 14:64 Enggo idengkoh kènè ntompel kata-kataNa jahat idi. Bagèndari bakunè keputusenmu?" Karina kalak idi memmutusken salah Jesus, janah patut ihukum matè. 14:65 Nai dèba kalak idi mulai mo mencèduri Jesus, lot dèba menutupi mataNa janah ipalui mo, ninganna idokken, "Aloi mo Kudengkoh, isè memmalu kono?" Perjaga i pè dekket ngo memarapi Jesus. 14:66 Sidang i kasèan i si Petrus, roh mo sada kalak naposo daberru imam huntuun i mi kasèan i. 14:67 Idah kessa si Petrus cidudu i gembar api idi, iperdatèken mo abè si Petrus, idokken mo, "Kono pè otang sisiin Jesus kalak Nazaret idi ngo?" 14:68 Tapi iperso si Petrus mo, "Oda kubettoh janah oda kuantusi kadè maksudmu," nina taba naposo idi. Nai laus mo si Petrus mi pèntu gerbang imam huntuun i. Nai mènter takuak mo manuk. 14:69 Idah naposo daberru idi dèng ma mo ia i sidi. Idokken nola mo taba jelma nisidi, "Tuhu ngo kalak èn sada kalak ibas sisiin Jesus idi nai!" 14:70 Tapi iperso si Petrus dèng ma. Oda ndekkah kessa bagidi, idokken jelma nisidi nola mo taba si Petrus, "Mak ndorok mada, sada kalak bai kalak i nai ngo kono, kerna kalak Galilea ngo kono!" 14:71 Isumpah-sumpahken si Petrus mo, nina mo, "Mènter isintakken pè aku, oda kutandai kalak nidokken ndènè i!" 14:72 Gejapkenna idi mènter takuak mo manuk pedua kaliken. Ièngèt si Petrus mo kata nidokken Jesus tabasa, "Nderrang madèng takuak manuk peddua kaliken, enggo tellu kali idokken kono, oda itandai kono Aku." Nai tangis semmep-semmep mo si Petrus.
15:1 Njengkas kalohon, karina runggu Agama rebbak dekket imam-imam ekuten, pengulu-pengulu Jahudi dekket guru-guru agama mersungkuun. Ilanggu kalak i mo Jesus, iiring mo Ia, janah ipesakat mendahi si Latus. 15:2 Ikuso si Latus mo Jesus, "Tuhu ngo Kono raja kalak Jahudi?" "Uè! Bagè nidokkenmi mo tuhu," nina Jesus mengaloi. 15:3 Mbuè ngo tukas idokken imam-imam ekuten taba Jesus. 15:4 Nai ikuso si Latus nola mo Jesus, "Oda ngo uè Kono mengaloi? Tengen mo matcam bagè nitukasken kalak idi taba Kono!" 15:5 Tapi laju oda uè Jesus mengaloi, gabè lengang mo si Latus. 15:6 Gennep Pèsta Paskah, ncemmal ngo ipaluah si Latus sada kalak sikurungen mengèkutken nipilih jelma nterrem. 15:7 Ibas pemberontak-pemberontak sikurungen, lot mo sada kalak daholi mergerar si Barabas imo kalak simemunuh jelma tikan kegontaren. 15:8 Mertumpu mo jelma nterrem janah mengido taba si Latus asa ipaluah sada kalak sikurungen bagè ncemmalna. 15:9 Ikuso si Latus mo kalak idi, "Uè ngo kènè asa kupaluah raja kalak Jahudi i bai ndènè?" 15:10 Ibettoh si Latus ngo, iaduken imam-imam ekuten pè Jesus tabasa, pellin kumarna ncian ngo. 15:11 Tapi iajar-ajari imam-imam idi mo jelma nterrem, asa ipido taba si Latus, si Barabas mo ipaluah. 15:12 Nai idokken si Latus nola mo taba jelma nterrem i, "Mula bagi bakunè mo kubaing taba kalak sinidokken ndènè Raja kalak Jahudi?" 15:13 Isurakken kalak idi mo, "Persilangken mo Ia!" 15:14 "Tapi kadè ngo pana kejahatenNa?" nina si Latus mengkusoi. Nai makin nggang mo isurakken kalak idi, "Persilangken mo Ia!" 15:15 Nai ipaluah si Latus mo si Barabas taba kalak idi, kerna asa sennang ukur kalak idi. Enggo kessa i, ipasulak mo lako mengeligasi Jesus, nai ipessoh mo asa ipersilangken. 15:16 Iembah soridadu i mo Jesus mi bages perhukumen i istana gubèrnur. Nai karina pasukan idokken mo mertumpu. 15:17 Ipakkèken kalak i mo jubah mbara messiap taba Jesus, ibakin mo bulang-bulangna ibas dori-dori nai janah ibaing mo idi mi takal Jesus. 15:18 Enggo kessa i, itabi kalak i mo Ia, "Njuah-njuah mo bai Raja kalak Jahudi!" nina kalak idi. 15:19 Ipalui kalak idi mo takal Jesus dekket tongket, nai icèduri mo Ia janah mersembah mi hadeppenNa. 15:20 Enggo kessa ipelèa-lèa kalak idi Jesus, ibuka kalak i mo jubah mbara-messiap idi, ipakkèken nola mo pakkènNa kin. Nai iiring kalak i mo Ia mi ruar asa ipersilangken. 15:21 I tengah ndalan, ipaksa kalak i mo sada kalak daholi siroh i sosor kuta nai laus mi kuta merembah kayu persilang Jesus idi. (Gerarna si Simon -- anak Kirene -- bapa si Aleksander dekket si Rufus.) 15:22 Iiring kalak i mo Jesus mi sada bekkas mergerar Golgota, lapatenna "Bekkas Tulan-tulan". 15:23 Naing iberrè kalak i mo isidi bai Jesus anggur mercampur mur, tapi oda uè Jesus mengènum. 15:24 Nai ipersilangken kalak i mo Ia, olesNa ibagi-bagiken merkitèken tendung. 15:25 Pukkul sibah siceggen mo Jesus ipersilangken kalak idi. 15:26 I babo persilang idi isuratken ngo tukas bana bagèen, "Raja kalak Jahudi." 15:27 Rebbak dekket Jesus ipersilangken kalak i ngo dua kalak nai pennamun, sada i kamuhunna, janah sada kalak nai kan kambirangna. 15:28 Merkitè i, saut mo sitersurat ibas Bibèl, "Idokken dèba ngo ia kalak jahat." 15:29 Kalak simentas arap idi pè pellèa-lèaken janah mengerèhèi Jesus. Ipengopirken kalak i ngo takalna ninganna idokken, "Aa, akapi mo bagèndari! Kono sinaing mengerumpakken Bages Dèbata janah memajek nola ibagasen tellu ari. 15:30 Susur mo kono i kayu persilang i nai janah paluah diriMu!" 15:31 Bagi ma mo imam-imam ekuten dekket guru agama mengerèhèi Jesus. Nina kalak i mo samahsa, "Sidèban ipaluah, keppè diriNa oda terpaluahsa! 15:32 Mula Raja Israel ngo Ia janah Raja Sipaluah niperbagah-bagah idi, susur mo Ia i kayu persilang i nai asa kuidah kami janah asa percaya kami baNa!" Kalak nipersilangken rebbak dekket Jesus idi pè ipelèa-lèa ngo Jesus. 15:33 Tengah ari nai, gellap mo suberri nagerri i tellu jom dekkahna. 15:34 I pukkul tellu ciboon, mersora nggang mo Jesus mendiloken, "Èloi, Èloi, lama sabakhtani?" Lapatenna, "Alè DèbatangKu, DèbatangKu, kasa itadingken Kono Aku?" 15:35 Simendengkoh sora mendengkuk idi mendokken, "Dengkohken, idiloi ngo si Elias!" 15:36 Sada kalak bai kalak i nai lojang mengaleng lumut, isernepken mo mi anggur macem. Nai ilekketken mo lumut i mi sada kayu, idudurken mo mi bibir Jesus, ninganna idokken, "Sipèma mo tah roh ma tuhu si Elias lako pesusurken Ia i kayu persilang i nai." 15:37 Nai mersora nggang nola mo Jesus, mpostep mo kessahna. 15:38 Merribak mo kirè-kirè Bages Dèbata, i babo nai mi terruh ribak dua. 15:39 Soridadu sicènder i jolo kayu persilang idi, mengidah bakunè pendengkuk Jesus dekket permatèna, nina mo, "Tuhu ngo kalak èn Anak Dèbata!" 15:40 Lot ma ngo ndaoh-ndaoh daberru memperdatèken karinana idi, imo si Salome, si Maria Magdalena, si Maria inang si Jakobus mposo dekket si Joses. 15:41 Kalak i mo daberru simengèkutken janah mengkebasi, sinderrang i Galilea Jesus. Mbuè dèng ma ngo daberru sidèban i sidi sienggo roh mi Jerusalem rebbak dekket Jesus. 15:42-43 Enggo mo ramben ari tikan roh si Josep i Arimatea nai. Anggota Sanhèdrin ngo ia janah kalak mersangap. Dak terpèma-pèma ngo ia mi Kerajaen Dèbata. Ari perkebbasen ngo ari i (imo ari mendapetken ari Sabat). Kernanai, iberraniken mo mendahi si Latus lako mengido bangkè Jesus. 15:44 Lengang ngo si Latus mendengkoh enggo matè Jesus. Ipasulak mo menenggoi sada kalak ekuten soridadu, ikusoi mo tah enggo ndekkah matè Jesus. 15:45 Enggo kessa idengkoh pendokken ekuten soridadu i, ipaduè si Latus mo ibuat si Josep bangkè Jesus. 15:46 Itokor si Jusuf mo kaèn kapan lennen halus, janah ipesampur kessa bangkè Jesus, ibalut mo dekket kaèn idi. Itaruhken mo bangkè Jesus mi sada pendèbaan rimbaru sinipahat ibas uruk batu. Nai igoling mo sada batu mbellen mi babah lubang kuburen idi mahan tutupna. 15:47 Dak iperdatèken si Maria Magdalena dekket si Maria inang si Joses ngo i dikè Jesus igamparken.
16:1 Enggo kessa leppas ari Sabat, laus mo si Maria Magdalena, si Maria inang si Jakobus dekket si Salome menokor ramu-ramuun minak rempah mahan meminaki bangkè Jesus. 16:2 Njengkas kalohon dèng ari perlebbè minggu i, laus mo kalak idi mi kuburen. 16:3-4 I tengah ndalan mengeranai mo kalak i samahsa, "Isè ngo mengurupi kita menggoling batu tutup lubang kuburen idi?" Ai mbelgah kalohon ngo batu idi. Tapi soh kessa kalak idi, iidah mo enggo tergoling batu idi. 16:5 Nai ibengketti kalak i mo pendèbaan i. Idah kalak i mo ibagasen lot sada anak perrana kundul kan kamuhun. Mbulan ngo jubahna gabè tersengget mo kalak i. 16:6 Nina anak perrana i mo, "Ulang kènè mbiar. Kubettoh itulusi kènè ngo Jesus kalak Nazaret sienggo ipersilangken i. Oda isèn nè ia. Enggo kèkè ia! Tengen kènè mo bekkas bangkèna gampar idi. 16:7 Laus mo kènè bagèndari, bagahken kènè mo berrita i mendahi sisinNa dekket si Petrus. Dokken kè mo, 'Laus ngo Ia mengelebbèi kènè mi Galilea. I sidi mo asa idahen ndènè Jesus, bagè sienggo nidokkenNa i kin bai ndènè.' " 16:8 Karuar mo kalak idi i pendèbaan i nai, lojang mo kalak idi kerna sengget dekket mbiarna. Oda lot ibagahken kalak idi simasa i barang bai isè pè kumarna buradanna. 16:9 Laus mo daberru-daberru i mendahi si Petrus dekket dengan-denganna, ninganna manukutken seppe karina sienggo nibagahken anak perana i taba kalak i. Enggo kessa i, Jesus sendiri merkitèken sisinNa isukutken kalak i mo sukuten simbadia janah menettap i, ikebincaren nai mi kesunduten imo tersèngèt keluahen soh mi amman sumendah.Enggo kessa balik nggelluh Jesus siceggen ari Minggu i, ipacidahken mo diriNa perlebbè taba si Maria Magdalena. (Bai si Maria idi nai mo pennah iusir Jesus pitu sètan.) 16:10 Nai laus mo si Maria Magdalena magahken simasa idi mendahi dengan-dengan Jesus, ai dak tangis ngo kalak i janah marsak. 16:11 Tapi idengkoh kalak i kessa sukuten si Maria Magdalena magahken enggo balik nggelluh Jesus janah enggo idah si Maria, oda percaya kalak i. 16:12 Enggo kessa i, ipacidah Jesus mo dirina taba dua kalak sisinNa merkitè cara sidèban. Masa mo bagidi tikan merdalan sidua kalak idi mi sada kuta. 16:13 Balik mo kalak idi janah ibagahken mo simasa taba denganna sidèbanna. Tapi oda ma tok kalak idi. 16:14 Perpodi, ipacidah Jesus mo dirina taba sisinNa taba sisipuluh dua kalak i, sinderrang mangan kalak idi. Ipincang ngo kalak i kerna kurang kepercayaenna janah oda tok taba kalak sienggo mengidah, nggelluh ngo Jesus. 16:15 Idokken Jesus mo taba kalak idi, "Laus mo kènè mi suberri dunia èn, bagahken kènè mo Sukuten Kelluahen bai Dèbata nai mendahi karina jelma. 16:16 Barang isè percaya janah iperridi, maluah ngo. Tapi kalak siso percaya, kenna hukum ngo. 16:17 Taba kalak sipercaya, iberrèken ngo tanda-tanda kuasa: Iusir kalak idi mo sètan-sètan merkitè gerarKu, mengerrana ngo kalak i dekket kata siso itandai kin. 16:18 Mula pè ijamah kalak idi nipè, barang iènum racun, oda kadèen kalak idi. Mula iampèken kalak i tanganna bai kalak sisakiten, njuah mo iakap sisakiten idi." 16:19 Enggo kessa mengerana Tuhan Jesus dekket kalak idi, mènter terkèkè mo Ia mi sorga. Isidi mo Ia kundul i kamuhun Dèbata. 16:20 Nai laus mo sisinNa memagahken Sukuten bai Dèbata nai mi suberri aur. Dekket ngo Tuhan i mengula rebbak dekket kalak i lako petegguhken tuhuna ngo sukuten kalak idi.
1:1 Alè Teopilus sinipersangapen, Enggo mbuè kalak merrusaha mennuratken terratur terrèngèt simasa sienggo terjadi i tengah-tengahta. 1:2 Isuratken kalak i ngo tosè bagè sienggo isukutken kalak sienggo mengidah sendiri simasa idi i mulana nai, nai isukutken ma soh mendahi kita. 1:3 Tapi bagèndari, kumarna aku pè enggo mo kurisiki seppè karinana idi i permulanna nai, katèngku selloh ngo kusuratken merratur bamu alè supan. 1:4 Kubaingken pè bagidi, asa ibettoh kono ngo karinana sienggo ipeddahken bamu idi bennar janah tuhu. 1:5 Tikan si Herodes mengerajai nagerri Juda, lot mo sada kalak imam mergerar Zakharia. Imam horong si Abia ngo ia. Sinibagesna mergerar si Elisabet, tong ma ngo turunen imam. 1:6 Lemmo ngo atè Dèbata mengidah persaripèen kalak idi. Duana ngo kalak i menguèi karina patiin Tuhan. 1:7 Oda ngo lot dukakna, kerna nggempus ngo si Elisabet idi janah enggo mo tua-tua kalak i duana. 1:8 Ibas sidari, tikanna si Zakharia mengulaken ulanna sibagè imam i hadeppen Dèbata, kerna tupung dapet anggapna gèlèren horong imam Abia mengula. 1:9 Bagè biasana ibakin imam-imam, ikerret ngo tendung lako memilih, jadi tupung mo terpilih si Zakharia masuk mi Bages Dèbata lako menutung kemènjen mahan dahupa isidi. 1:10 Sidangna merdahupa idi, iruar ngo cènder karina ukum jelma nterrem. 1:11 Tikan bagidi, roh mo sada malaèkat mendahi si Zakharia, cènder kan kamuhun mèja perdahupaan idi. 1:12 Idah si Zakharia kessa mo malaèkat idi, tersengget mo ia janah mbiar. 1:13 Tapi idokken malaèkat idi mo mendahisa, "Ulang kono mbiar, alè Zakharia! Enggo iuèi Dèbata sodipmu. Menubuhken sada anak mo sinibagesmu si Elisabet. Si Johanes mo baing gerarna. 1:14 Lolo kalohon mo kono bagi ma mbuè kalak mersampang atè, enggo kessa tubuh anak idi sikalièn! 1:15 Gabè kalak mbelgah mo ia ipenengennen Tuhan. Oda ndorok ia mènum anggur barang ènumen mperngis. Kessa nai tubuh ia, dak ibagasen Tendi Dèbata ngo ia. 1:16 Mbuè ngo kalak Israel iteggu lako balik taba Dèbata, Tuhan ni kalak idi. 1:17 Sada kalak utusen mergegoh bai Dèbata nai ngo ia janah merkuasa bagè si Elias. Ipedamè mo bapana mi anakna, janah menguluken kalak siso tunduk gabè balik mi dalan bennar. Karinana idi ibaing lako menghantari jelma memmèma Tuhan i." 1:18 "Kadè mo pertandana magahken tuhu saut karina nidokkenmu idi?" nina si Zakharia mengkuso Malaèkat idi. "Aku enggo tua-tua, sinibagesku pè enggo tua-tua." 1:19 Ialoi malaèkat i mo, "Gabriel ngo aku! Naposo Dèbata ngo aku, janah ia ngo pasulakken aku memmagahken berrita èn mendahi kono. 1:20 Kennah saut ngo karina sikuranaken èn sienggo ibuhul Dèbata. Tapi kumarna oda tok kono, pekkak mo kono, mak ndorok mengerana soh mi persautna karina sikuranaken idi." 1:21 Nderrang bagidi, enggo mo dak ipèma-pèma jelma nterrem idi si Zakharia. Lengngang mo kalak idi, kumarna bagidi dekkahna i Bages Dèbata. 1:22 Karuar kessa ia, oda nèngè terbaingsa mengerana mi jelma nterrem idi. Tanganna mo iambas-ambasken mahan pertanda, nai memettoh mo sinterrem idi; bakunè pè enggo mo pana lot idah ia barang kadè i Bages Dèbata. 1:23 Enggo kessa pul mengula i Bages Dèbata nai, balik mo si Zakharia mi sapona. 1:24 Oda sadikè dekkah nai, mengkandong mo si Elisabet sinibagesna i, gabè ikirung mo dirina ibagasen lima bulan dekkahna. 1:25 "Iurupi Tuhan i ngo aku, enggo iagoi kinilèangku idi bangku nai," nina. 1:26 Enggo kessa ennem bulan si Elisabet mengkandong; ipasulak Dèbata mo malaèkat Gabriel mi sada kuta mergerar Nazaret i nagerri Galilea. 1:27 Mendahi sada kalak simerbaju mergerar si Maria sienggo ranto anak laki mergerar si Josep, ibas pemparen si Daud nai. 1:28 Soh kessa malaèkat i mendahi si Maria, nina malaèkat i mo, "Sintabi bamu sinimasèh atèen Tuhan i! Idengani Tuhan i mo kono!" 1:29 Tersengget mo si Maria mendengkoh kata malaèkat idi, kata pikirenna mo ibagasen, persentabiin bakunè ngo ndia i. 1:30 Nai nina malaèkat i mo tabasa, "Ulang kono mbiar alè Maria, ai lemmo ngo atè Dèbata midah kono. 1:31 Mengkandong mo kono janah menubuhken sada anak, Jesus mo baing gerarNa. 1:32 Gabè sada kalak mbelgah ngo Ia janah idokken mo Ia Anak Dèbata Sintèmbul idi. Pebangkiten Dèbata mo Ia gabè Raja pergemgem bagè empungNa si Daud. 1:33 Janah rajanNa mo karinana pemparen si Jakob soh mi amman sumendah. KerajaenNa i pè oda merpengadi-ngadiin." 1:34 "Bakunè mo terbakin masa i, ai tertatakken rambu-rambu dèng ngo aku?" nina si Maria taba malaèkat idi. 1:35 Ialoi malaèkat idi mo, "Roh ngo Tendi Perbadia mendahi kono janah kuasa Dèbata ngo perlènggemenmu. Kernana i anak sinaing tubuhenkenmu igerari ngo idi Simbadia, Anak Dèbata. 1:36 Bettoh mo: si Elisabet kadè-kadèmu i pè enggo mo mengkandong ennem bulan, janah daholi ngo ni dagingna i, tukasi pè ia enggo tua-tua janah idokken dèba ia nggempus. 1:37 Ai oda lot siso terbakin Dèbata." 1:38 Nai idokken si Maria mo, "Naposo ni Tuhan i ngo Aku, saut mo tuhu masa bangku bagè sinidokkenmu idi." Laus mo malaèkat i menadingken si Maria. 1:39 Enggo kessa i, laus mo si Maria mi uruk Judèa. 1:40 Iteppet mo bages si Zakharia. Tikan naing mbengket mi bages i ia, itabi mo si Elisabet. 1:41 Idengkoh si Elisabet kessa mo tabi si Maria i, mènter gumerrak mo sinikandongen si Elisabet idi. Nai dom Tendi Perbadia mo si Elisabet. 1:42 Nina mo, "Dapetten pasu-pasu ngo kono i tengah-tengah partua ibages, janah ipasu-pasu ngo nidagingmi. 1:43 Isè mo pella aku ènda, asa pella roh inang Tuhanki mendahi aku? 1:44 Ai kudengkoh kessa salammu idi, mènter gumerrak mo ni dagingku idi kumarna lolona. 1:45 Sayur ntau ngo kono kerna ikettoki kono ngo kennah saut nidokken Tuhan idi bamu!" 1:46 Nai nina si Maria mo, "Kupoji mo Tuhan i ibas ukurku, 1:47 janah mersampang atè ngo aku, kerna ipaluah Dèbata ngo Aku. 1:48 Ièngèt ngo aku naposoNa simerlèa ènda! Mulai bagèndari nai, karina kalak mendokken aku sayurntua. 1:49 Kerna Dèbata Pergegoh Sisotercodi memmaing ulaan mbelgah bangku. Mbadia mo gerarNa. 1:50 Masèh ngo atè Tuhan taba jelma simengkebiariSa, turun-temurun. 1:51 Merkitè tanganNa simergegoh i, Ipensèrakken ngo kalak sijukkat merrukur, janah menondati taki kalak i. 1:52 Nasa Raja ipesampur ibas kerajanNa nai tapi ukum kalak simerlèa ipedates. 1:53 Ibessuri ngo kalak simellèhè merkitè nasa simerandal tapi ipellaus ngo sibèak oda terrolih barang kadè pè. 1:54 Iurupi ngo kalak Israel, naposoNa, lako pesautken niperbagah-bagahNa taba empungta. 1:55 Oda lupa Tuhan ipas jandiNa, mermasèh atè ngo Ia taba si Abraham bak mendahi pinemparNa soh mi amman sumendah." 1:56 Kira-kira tellu bulan dekkahna si Maria merrian i bages si Elisabet, nai pè asa mulak ia mi bagesna. 1:57 Dapet mo katikana kettaring si Elisabet. Itubuhken mo sada anak. 1:58 Karina ni gembar sapona dekket kadè-kadèna mendengkoh terrèngèt simendè nibaing Tuhan i bai si Elisabet, rebbak merlolo atè ngo kalak idi dekketsa. 1:59 Enggo kessa merrumur ualuh ari anak mbara i, merrohen mo kalak lako mennunatsa. Idokken kalak i mo asa si Zakharia mo bakinen gerarna, dos dekket gerar bapana. 1:60 Tapi idokken inangna mo, "Oda i gerarna bakinen! Kennah si Johanes ngo gerarna." 1:61 "Isè poda lot kadè-kadèmu mergerar bagi," nina kalak i tabasa. 1:62 Nai ikuso kalak i mo si Zakharia merkitè maèn tangan, barang isè bakinen gerar anakna idi. 1:63 Ipido si Zakharia mo sada batu pennuraten, nai isuratken mo isidi, "Si Johanes mo gerarna." Gabè lengang kalohon mo kalak idi karina. 1:64 Gejapkenna i ma, mènter ndorok mo mengerana si Zakharia mengolihi, janah ipoji mo Dèbata. 1:65 Mbiar mo karina jelma siroh idi, gabè sar mo berrita idi mi suberri nagerri uruk Judèa. 1:66 Karinana kalak simendengkoh i dak kuso-kuso ukurna, "Gabè kadè mo ndia anak idi ipodi ari?" Kennah idengani kuasa Tuhan i ngo ia. 1:67 Idomi Tendi Perbadia mo si Zakharia gabè ibagahken mo tennah Tuhan i, nina mo, 1:68 "Ita kè mo si pojo Tuhan i, Dèbata bangsa Israel! Kerna enggo roh ia pegelluhken bangsaNa janah paluahken kalak idi. 1:69 Iberrèken ngo banta tanduk kelluahen. Arap pemparen si Daud naposoNa i. 1:70 Enggo kin ngo iperbagah-bagah i arnia merkitè nabi-nabi nipilihNa i, 1:71 lako paluahken kita ibas musuhta nai, bak ibas kuasa kalak simerceggo atè banta. 1:72 Asa merkitè-kitè bagidi, ituduhken ngo mendè basaNa taba empungta janah ipessaut bagah-bagahNa simbadia i. 1:73 Enggo ibulabanken taba bapanta si Abraham, 1:74 janah merjandi lako pelluahken kita ibas musuhta nai, asa sikebbasi Ia oda pella mbiar 1:75 dak menguèi tabaSa janah memaingken lemmo atèNa sidekkah nggelluh kita. 1:76 Kono alè pa, tergerar mo kono sipesakatken rana Dèbata Sintèmbul i, iutus ngo kono mahan solo-solo Tuhan i lako mengerentes dalanNa, 1:77 lako memagahken mendahi bangsaNa naing paluahenNa mo kalak idi, mula enggo iampuni Dèbata dosa-dosa kalak idi. 1:78 Permasèh atè ngo Tuhan i janah perkelleng atè roh ngo Ia lako paluahken kita, bagè mataniari mbincar siceggen. 1:79 Bagi ngo Iberrèken bindellaNa taba karinana singgelluh ibas kegellapen janah buradan. Iteggu ngo kita mi dalan kedamèen." 1:80 Makin mbelgah mo anak si Zakharia idi janah makin mergegoh bak tendina. I kellongoon ngo ia merrian soh mo jumpa kettikana ipetarar dirina mendahi bangsa Israel.
2:1 Nai roh mo tikannai perèntah Kèsar Agustus, kennah suraten nasa jelma nigemgemmenna. 2:2 Pemmilangen perlebbè mo idi tikan si Krinius gabè gubèrnur nagerri Siria. 2:3 Berkat mo karinana jelma mi lebbuh empungna gennep asa isurati gerarna. 2:4 Berkat mo si Josep i Nazaret nai sini Galilea, mi Betlehem i Juda mi kuta si Daud, kerna pemparen si Daud ngo ia. 2:5 Pessuratken dirina rebbak si Maria tinandana sienggo mengkandong idi. 2:6 Sinderrang i Betlehem kalak idi dapet mo kettikana kettaring si Maria idi. 2:7 Itubuhken mo sada anak buka bajuna, iampani mo, janah icoling mi babo gagaten kerna oda lot nèngè permalamen sidèban dapet kalak idi. 2:8 Lot ngo permakan i kuta i mermalam i jampalen bernginna i menjaga pinakanna. 2:9 Sintèmpu, roh mo malaèkat Tuhan i mendahi kalak idi janah mercuhaya ngo sangap Tuhan i mennerrangi kalak i, gabè mbiar kalohon mo kalak idi. 2:10 Nina mo, "Ulang kènè mbiar, ai Sukuten Simerandal ngo kubagahken bai ndènè -- sukuten sampang atè mbuè bai karina jelma. 2:11 Enggo tubuh Raja Sipaluah berngin èn i kuta si Daud, imo Kristus Tuhan. 2:12 Èn mo pertandanna: Anak mbara ngo dapetten ndènè, siniampanen icoling i babo gagaten." 2:13 Sintempu, roh mo rebbakken malaèkat i mbuè denganna malaèkat memoji-moji Dèbata, nina mo: 2:14 "Kessangapen mo bai Dèbata i bekkas sindatesna! Damè mo i tanoh èn bai jelma kellemmonken Tuhan i!" 2:15 Laus kessa malaèkat i mi sorga menadingken permakan idi, mengerana mo permakan i samahsa, "Laus mo kita mi Betlehem, sitengen mo simasa èn nibagahken Tuhan i mendahi kita." 2:16 Isudu kalak i mo laus, jumpa kalak i mo si Maria dekket si Josep dekket anak mbara idi icoling i babo gagaten. 2:17 Iidah permakan idi kessa anak mbara idi, ibagahken mo sinikataken malaèkat i terrèngèt anak mbara i. 2:18 Nai karinana mo kalak i bengap mendengkoh sukuten idi. 2:19 Tapi ukum si Maria, ijamotken ngo karina kata i janah iradumi ibas ukurna. 2:20 Mulak mo permakan idi ninganna ipoji mo Dèbata, kumarna karinana niidah dekket sinidengkohna idi tuhunna ngo bagè nidokken malaèkat i tabasa. 2:21 Enggo kessa ualuh ari umurna, nai isunat mo ia. Ibaing kalak i mo gerarna Jesus, imo gerar sinibakin malaèkat idi sinderrang makdèng sellet Ia. 2:22 Janah dapet kessa kettikana lako pepantingken mengèkutken hatoren patiin si Musa, iembah si Josep dekket si Maria mo Anak i mi Jerusalem asa isohken mi hadeppen Tuhan i. 2:23 Kerna tersurat i bukku hatoren Tuhan i bagèen, "Nasa anak buka baju kennah ipesakat mi hadeppen Tuhan i." 2:24 Laus ngo kalak i mi Jerusalem imo pessohken pèlèen simpasang kèrap barang dua ndarapati bagè sienggo itettahken Hukum Tuhan. 2:25 Lot mo tikannai sada kalak i Jerusalem mergerar si Simeon, sada kalak bennar ngo ia janah merkebiaren mi Dèbata dak memèma-mèma pekiroh Dèbata paluahken bangsa Israel. Idomi Tendi Perbadia mo ia, 2:26 ai enggo kin ngo ibagahken Tendi Perbadia mbangsa, oda dèng matè ia, ukum madèng iidah ia Mesias niperbagah-bagah Dèbata. 2:27 Merkitèken kegegohen Tendi Perbadia roh mo ia mi Bages Dèbata. Nderrang iembah partuana Jesus anak mbara i mengèkutken hatoren sitersurat ibas pati-patiin. 2:28 Iabing si Simeon mo Anak mbara i, ipoji mo Dèbata, nina mo, 2:29 "Bagèndari alè Tuhan, enggo mo ipesaut Kono niperbagah-bagahmi. Enggo mo sennang atèngku matè ibagasen damè. 2:30 Ai enggo mo iidah matangku sendiri kelluahen siroh baMu idi nai. 2:31 Siniberrèkenmu taba karina bangsa. 2:32 Tosè bagè kecihuren lako menerrangi dalan bai bangsa sidèban asa roh mendahi kono, janah mahan kemuliaan taba bangsaMu Israel." 2:33 Lengngang kalohon mo partuana mendengkoh nidokken si Simeon idi terrèngèt Anak idi. 2:34 Nai ipasu-pasu si Simeon mo kalak idi, "Sienggo nipilih Dèbata ngo anak ènda, lako mendabuh hukum dekket pekèkèken mbuè kalak Israel. Janah tanda bai Dèbata nai ngo Ia, itonja jelma nterrem ngo Ia, 2:35 janah merkitè bagidi terbettoh mo isi perukuren kalak i. Kinimarsak mo menurah atè-atèmu bagè peddang ntajem." 2:36 Lot mo isidi sada kalak nabi daberru, enggo mo tua-tua kalohon ia. Si Hana ngo gerarna imo berru si Panuel, marga Asyer. Enggo kessa pitu tahun mendiri, 2:37 mebbalu mo si Hana, janah enggo ualuh puluh empat tahun umurna. Dak tong ngo ia merrian i Bages Dèbata. Suntuk ari suntuk berngin ngo ia mersodip janah merpuasa menguèi Dèbata. 2:38 Tupung tikan bagidi, roh ma mo ia, ipoji mo Dèbata, janah iranaken ngo terrèngèt Anak idi mendahi karina jelma simengketeddohken Jerusalem ipaluah Dèbata. 2:39 Enggo kessa iulaken si Josep dekket si Maria karinana nihatorken Tuhan i, balik mo kalak idi mi kutana Nazaret nagerri Galilea. 2:40 Makin mbelgahna janah mergegoh mo anak idi. Bijak kalohoon ngo ia janah idomi masèh atè Dèbata. 2:41 Gennep tahun dak laus ngo partua Jesus mi Jerusalem lako merpèsta Ari Raya Paskah. 2:42 Enggo kessa merrumur sipuluh dua tahun Jesus, rebbakken mo kalak i mi Jerusalem bagè ncemmalna mi pèsta idi. 2:43 Pul kessa pèsta idi, balik mo kalak i, keppè tading ngo Jesus i Jerusalem siso pemmettohen partuana. 2:44 Persangkaan kalak idi enggo rebakken jelma mbellang idi Jesus balik i Jerusalem nai. Enggo kessa idalani kalak i dalanen sidari, itulus mo Ia iantara kadè-kadè dekket kalak nitandanna pè. 2:45 Tapi oda lot jupa kalak idi Ia, gabè balik nola mo kalak i mi Jerusalem mennulusi Jesus. 2:46 Enggo tellu ari itulusi, idapet kalak i mo Ia i Bages Dèbata kundul-kundul mendengkoh-ndengkohi ninganna maing kuso-kuso mendahi guru-guru agama Jahudi. 2:47 Karina kalak nisidi lengang mendengkoh ibas pengerrananNa dekket pengaloina. 2:48 Lengang ma mo dekket partuaNa mengidahSa. Nai idokken inangNa i mo tabaSa, "Kasa bagi pemaingmu taba kami alè pa? Terendep-endep ngo bapaMu dekket aku mennulusi kono." 2:49 Ialoi Jesus mo, "Kasa itulusi kènè Aku? Oda ibettoh kènè kennah ngo Aku i bages BapangKu?" 2:50 Tapi oda iarti si Josep dekket si Maria nidokken Jesus idi. 2:51 Nai balik mo Jesus rebbak dekket kalak idi mi Nazaret, janah dak merpenguèi ngo Ia taba kalak idi. Karinana simasa idi isimpan si Maria ngo ibagasen ukurna. 2:52 Makin ndekkah, makin mbelgahna ngo Jesus janah tambah bijak, ikellemmoken Dèbata bak jelma ngo Ia.
3:1 Pesipuluh tahunken kessa mbangkit Raja Kèsar Tiberias, gabè gubèrnur mo si Pontius Latus i Juda, janah si Herodes memerèntah i Galilea. Si Pilipus, imo dengan sibeltek si Herodes gabè raja i nagerri Iturea dekket Trakhonitis, janah si Lisanias mo mengerajai i Abilene. 3:2 Tikannai mo imam huntuun si Hanas dekket si Kayafas. Tahunna i ma mo roh kata Dèbata mendahi si Johanes i kellongoon. 3:3 Laus mo si Johanes mi suberri aur Laè Jordan pesakatken sukuten bai Dèbata nai. Nina si Johanes mo, "Mertobat mo kènè ibas dosa-dosa ndènè nai janah kennah iperridi ngo kènè, asa iampuni Dèbata dosa-dosa ndènè." 3:4 Bagè si tersurat ibas bukku Nabi Jesaya: "Lot ngo sora dilo-dilo i kellongoon: Pekkadè kènè mo dalan bai Tuhan i, pepènter kènè mo dalanNa. 3:5 Nasa lembeng-lembeng kennah itanohi janah cocoon ngo nasa delleng dekket uruk-uruk. Petèger mo nasa dalan merrèluk janah peddèas mo nasa dakkal-dukkul. 3:6 Karinana jelma ni dunia èn mengidah Dèbata paluahken jelma!" 3:7 Nai idokken si Johanes mo taba jelma nterrem siroh mendahisa asa iperridi, "Kènè alè kalak jahat! Isè magahken ndorok kènè maluah tarap hukum Dèbata sinaing roh? 3:8 Tuduhken kènè mo merkitè pengelako ndènè, magahken enggo tobat kènè ibas dosa-dosa ndènè nai! Ulang mo dak idokken kènè, si Abraham ngo empung nami. Èngèt kènè mo: Ndorok ngo ibaing Dèbata i batu èn nai gabè pemparen si Abraham! 3:9 Tengngen mo, enggo ampè takkè i daling kayu, tabahen mo nasa kayu siso merbuahken mendè, janah ipatakken mi api." 3:10 Nai ikuso jelma nterrem idi mo si Johanes, "Kadè mo sibakinen nami?" 3:11 Ialoi si Johanes mo, "Barang isè lot bajuna dua, kennah iberrèken sada taba kalak siso lot bajuna, janah isè lot panganna, kennah ibagi-bagiken taba sikellèhèen." 3:12 Roh ma mo dekket kalak pertunggu belasting mendahi si Johanes asa iperridi. Ikusoi kalak i mo si Johanes, "O Guru, kadè ngo ulanken nami?" Ialoi mo, 3:13 "Ulang mo pido kènè lebbih dari pada sienggo itetapken." 3:14 Lot ma mo tenterra mengkuso, "Bakunè kami? Kadè ngo ulanken nami?" Ialoi si Johanes mo, "Ulang jalo kènè kèpèng barang bai isè nai pè merkitè paksa barang memaing tukas siso tuhu tabasa. Kesabamken mo gajimu idi!" 3:15 Tikanna idi pè dak terpèma-pèma ngo jelma i terrèngèt pekiroh Raja Sipaluah niperbagah-bagah idi. Jadi idokken mo ibas ukurna tah mada ngo si Johanes Raja Sipaluah idi. 3:16 Kernanai ngo asa idokken si Johanes taba kalak idi, "Laè ngo kuperridiken taba kènè tapi roh nè mo sada kalak belgahen bangku nai, menalkasi cipatuNa poda tellap aku. Iperridi Ia ngo kènè bak Tendi Perbadia dekket api. 3:17 I tanganNa ngo ndèru lako mennapi karina pagè. Nasa pagè mberras, ipepulung ngo mi kebben tapi nasa apana ket ronciNa itutung mo mi api siso ndorok mèntep!" 3:18 Bagidi mo ipeddahi si Johanes jelma nterrem idi, tikan memagahken Sukuten Simerandal bai Dèbata nai. 3:19 Tapi si Herodes gubèrnur Galilea, ipincang si Johanes ngo kemulihken ialihken ia si Herodias anggi berruna, sinibages anggina idi dekket kumarna karina kejahaten sidèbanna niulakenna. 3:20 Tapi muat jahatna ngo si Herodes idi, ai imasukken ngo si Johanes mi bagasen kurungen. 3:21 Enggo kessa pul iperridi jelma nterrem idi, Jesus pè dekket ngo iperridi. Sinderrang mersodip Jesus, mbuka mo langit. 3:22 Susur mo Tendi Perbadia merrumangken ndarapati. Nai terdengkoh mo sora i sorga nai bagèen, "Kono ngo AnakKu siKukellengi idi. Lemmo ngo atèngKu midah ko." 3:23 Tikan imulai Jesus ulanNa, merrumur mo Ia tellu puluh tahun. Mengèkutken pendokken sinterrem, ukum Ia anak si Josep imo anak si Eli. 3:24 Anak si Matat, anak si Lewi, anak si Malkhi, anak si Janai, anak si Jusuf, 3:25 anak si Matika, anak si Amos, anak si Nahum, anak si Hesli, anak si Nagai, 3:26 anak si Mat, anak si Matica, anak si Simei, anak si Josekh, anak si Joda, 3:27 anak si Johanas, anak si Resa, anak si Zerubabel, anak si Sealtiel, anak si Neri, 3:28 anak si Malkhi, anak si Adi, anak si Kosam, anak si Elmadam, anak si Er, 3:29 anak si Jesua, anak si Eliezer, anak si Jorim, anak si Matat, anak si Lewi, 3:30 anak si Simeon, anak si Juda, anak si Jusuf, anak si Jonam, anak si Eliakim, 3:31 anak si Melea, anak si Mena, anak si Matata, anak si Natan, anak si Daud, 3:32 anak si Isai, anak si Obed, anak si Boas, anak si Salmon, anak si Nahason, 3:33 anak si Abinadab, anak si Admin. Anak si Arni, anak si Hezron, anak si Peres, anak si Juda, 3:34 anak si Jakob, anak si Isak, anak si Abraham, anak si Terah, anak si Nahor, 3:35 anak si Serug, anak si Rehu, anak si Peleg, anak si Heber, anak si Salmon, 3:36 anak si Kenan, anak si Arpakhsad, anak si Sem, anak si Noak, anak si Lamekh, 3:37 anak si Metusala, anak si Henokh, anak si Jared, anak si Mahalaèl, anak si Kenan, 3:38 anak si Enos, anak si Set, anak si Adam, anak Dèbata.
4:1 Dom Tendi Dèbata ngo Jesus tikan itadingken Laè Jordan. Nai ibabai Tendi Dèbata mo Ia mi padang gurun. 4:2 I sidi mo Ia iunjuni sibolis empat puluh ari empat puluh berngin dekkahna oda mangan. Jadi mellèhè mo iakap. 4:3 Idokken sibolis i mo mbangSa, "Mula Anak Dèbata ngo ko, dokken mo batu èn menjadi roti." 4:4 Ialoi Jesus mo, "Tersurat ngo ibas Bibèl, oda ngo roti sambing kenggelluhen jelma." 4:5 Nai iarahken Sibolis i mo Jesus mi bekkas ndates, ituduhken Sibolis i mo bai Jesus karinana kerajaen dunia èn. 4:6 Idokken sibolis i mo taba Jesus, "Karinana kuasa dekket kemuliaan bak kekayaan idi kuberrèken baMu, kerna enggo iberrèken karinana idi bangku janah merhak ngo aku merrèken bamu barang bai isè lemmo atèngku. 4:7 Jadi karinana idi gabè milikMu mula isembah kono aku." 4:8 Ialoi Jesus mo, "Tersurat ngo ibas Bibèl, pellin Tuhan Dèbatamu ngo sisembahenmu janah Ia ngo sikebbasenmu!" 4:9 Nai iembah Sibolis i mo Jesus mi Jerusalem, mi babo palas-palas Bages Dèbata. Nina mo mbang Jesus, "Mula Anak Dèbata ngo kono, dabuhken mo dirimu isidi nai mi terruh. 4:10 Ai tersurat ngo ibas Bibèl, 'Pasulaken Dèbata ngo malaèkatNa lako menjaga Kono.' 4:11 Janah ma itatang malaèkat ngo Kono asa ulang tertuktuk nèhèMu mi batu." 4:12 Ialoi Jesus mo, "Tersurat ngo ibas Bibèl, oda ndorok ojiinmu Tuhan Dèbatamu." 4:13 Enggo kessa ioji Sibolis idi Jesus, laus mo ia menadingken Jesus ninganna memmèma kettika selloh nola. 4:14 Enggo kessa i, balik mo Jesus mi Galilea, janah idengani Tendi Dèbata ngo Ia. Saar mo berrita terrèngèt Ia i suberri nagerri idi. 4:15 Nai mengajari mo ia i bages perguruun, janah karina ngo memojiSa. 4:16 Enggo kessa i, roh mo Jesus mi Nazaret. Imo kuta bekkasNa mbelgah. Tupung ari Sabat, laus mo Ia mi Bages perguruun bagè kecemmalenna kin. Tikan cènder Ia naing menjaka Bibèl, 4:17 Iberrèken mo bana bukku Nabi Jesaya. Ibuka mo bukku simergolong idi, nai tupung mo mi ayat bagèen: 4:18 "Senggep ngo Tendi Tuhan i bangKu, kerna enggo ipilih Aku lako memmagahken Sukuten Simerandal bai Dèbata nai mendahi kalak sincoor. Ia mengutus Aku lako magahken kelluahen bai sitertaban janah gabè merpendidah ibaing kalak sipètung dekket paluahken kalak sitertekkan. 4:19 Janah pesarken berrita tersèngèt pekiroh Tuhan i paluahken bangsaNa." 4:20 Nai igolong Jesus mo bukku i janah iulakken mendahi pengendeng, nai kundul mo ia. Karinana jelma nisidi dakdak nelnel mengidahSa. 4:21 Nai ipungkah Jesus mo mengerana mendahi kalak i, nina mo, "Sidarèn mo enggo saut bagè sitersurat nidengkoh ndènè sikujaka ndai." 4:22 Karina kalak i mennuhu-nuhuiSa, janah lengang merdengan kagum ngo kalak i mendengkoh kata merandal bak cara Jesus mengajar, gabè nina kalak i mo, "Otang anak si Josep ngo Ia?" 4:23 Nai idokken Jesus mo taba kalak idi, "Tentu dokkenken ndènè mo codiin bagèen taba Aku: O datu tambari mo dirimu sendiri, sienggo kudengkoh kami nibaingmu i Kapernaum idi baing ma mo bagidi i kutamu ènda." 4:24 Enggo kessa i idokken Jesus nola ma mo, "Èngèt kènè mo, oda maharga nabi i kutana sendiri. 4:25 Tapi dengkohken mo: I tikki si Elia, sinderrang oda roh udan tellu setengah tahun dekkahna, gabè masa mo kellèhèen matè kocing i suberri Israel. Ipas katika i mèduk ngo lot simebbalu i Israel. 4:26 Tapi tukasi pè bagi, oda ipasulak Dèbata si Elias mendahi barang apaina simebbalu ni Israel i. Gabè mi simebbalu ni kuta Sarpat i nagerri Sidon ngo ia ipasulak. 4:27 Bagi ma ngo sinderrang Nabi Elisa, mbuè ngo nemmu sipuruun i Israel, tapi sada poda kalak i itambari, laènken pellin si Naeman kalak Siria idi sambing ngo." 4:28 Nai mellaga kaloon mo karina ni bages perguruun idi mendengkohken Jesus idi. 4:29 Cènder mo kalak i, iruah mo Jesus mi ruar kuta i, naing mendabuhkenSa i tebbing idi nai. 4:30 Tapi merdalan ngo Jesus arap tengah-tengah kalak idi, laus mo Ia. 4:31 Enggo kessa i, laus mo Jesus mi kuta Kapernaum ni Galilea. Mengajar mo ai isidi tikan ari Sabat. 4:32 Kagum ngo kalak mendengkoh pengajarenna, Ia meheji ngo peddahna i. 4:33 Lot mo sada kalak i bages perguruun idi isellapi sètan, dak mendempik-dempik ngo ia, 4:34 "Alè Jesus kalak Nazaret, kadè naing bakinenmu bai nami? Naing mengago kami ngo kono asa roh? Kubettoh ngo barang isè kono. Kono ngo utusen Simbadia bai Dèbata nai!" 4:35 Isergangi Jesus mo tendi jahat i, nina mo, "Sip! Karuar mo kono bana nai!" Nai itembemken tendi jahat i mo daging nisellapenna idi mi tengah jelma mbellang i lako karuar bana nai, oda pella menakiti. 4:36 Lengang mo karina ni sidi, nina mo samah-samahsa, "Ah, mahantu ngo keppè, merkitè-kitè kuasa meheji iusir ngo tendi-tendi jahat idi, janah karuar ngo kalak i!" 4:37 Saar mo berrita terrèngèt Jesus idi mi suberri nagerri idi. 4:38 Nai laus mo Jesus i bages perguruun i nai mi bages si Simon. Mersakit panè ngo simatua berru si Simon. Ibagahken jelma i ngo idi taba Jesus. 4:39 Laus mo Jesus mi peddemmen partua i, iusir mo panè i. Njuah mo iakap, gabè kèkè mo simatua si Simon i janah dekket mo ia merkebbasi bai kalak idi. 4:40 Enggo kessa cundut mataniari, ipentaruhken dèba mo sincelketna simersakit merbagè matcam sakit mendahi Jesus. Nai iampèken Jesus mo tanangNa taba kalak sisakiten idi gennep lako pejuahkensa. 4:41 Merkaruaren ngo nasa sètan-sètan i i daging kalak idi nai, ninganna mendengkuk-ndengkuk mendokken, "Anak Dèbata ngo kono!" Tapi isergangi Jesus ngo kalak idi, oda ipadiat nèngè mongkam, kerna ibettoh kalak idi kin ngo Ia Raja Sipaluah niperbagah-bagah Dèbata. 4:42 Enggo kessa mbincar mataniari, laus mo Jesus i kuta i nai mi sada bekkas melongo. Nai itulusi sinterrem idi mo Ia. Jumpa kalak idi kessa Ia, icèkèpi kalak i mo Jesus asa nemmuken ulang laus menadingken kalak i. 4:43 Tapi idokken Jesus mo bai kalak idi, "Sukuten Simerandal terrèngèt Kerajaen Dèbata kennah Kubagahken ngo dekket mi kuta sidèban pè, ai kerna naidi ngo aku asa iutus." 4:44 Nai merjamita mo Ia i bages perguruun i suberri nagerri Juda.
5:1 Tikan sikali, cènder mo Jesus i biding Tao Genesaret. Mbuè ngo jelma nterrem i mersessak-sessak mencingkoi Jesus lako mendengkohken kata Dèbata. 5:2 Lot mo idah Jesus dua bungki i biding tao i; ukum perrikan idi enggo mo susur i bungkina nai, lako pebersihken jalana idi. 5:3 Ibengketti Jesus mo sada bungki idi, imo bungki si Simon, nai idokken mo bai si Simon asa ikayuhken bungkina i asa narih ndaoh cituk i biding tao i nai. Nai kundul mo Jesus i bungki idi, mengajari jelma mbellang idi. 5:4 Enggo kessa pul mengajari, idokken mo taba si Simon, "Kayuhken mo bungki i mi bekkas mbages, nai sampakken mo jalamu idi memmuat ikan." 5:5 "O Guru," nina si Simon mengaloi, "Suntuk berngin ndaboi ngo kami menjala, tapi kadè poda dapet! Tapi kumarna pendokkenmu idi, uè dèng ngo aku menampakken jala èn." 5:6 Enggo kessa bagi, dapet kalak i mo mbuè ikan, sanga naing merribak jala idi. 5:7 Kumarna bagidi, ikilap kalak i mo denganna ni bungki sisada. Nai roh kessa mo denganna i, iisi kalak i mo bungki i, dom duana merrisi ikan, sanga naing lenneng. 5:8 Idah si Simon kessa mo idi, mersembah mo ia taba Jesus, ninganna idokken, "Laus mo kono alè Tuhan i gembarku nai, ai jelma perdosa ngo aku." 5:9 Ai lengang ngo si Simon dekket karina denganna idi mengidah bagidi buèna ikan sidapet kalak idi. 5:10 Bagi ma dekket dengan si Simon imo si Jakobus, si Johanes, dukak-dukak si Zebedeus. Idokken Jesus mo mbang si Simon, "Ulang kono mbiar, mulai bagèndari nai gabè penjala jelma mo kono." 5:11 Itarik kalak idi mo bungkina i mi darat, itadingken mo bungki idi, nai ièkutken mo Jesus. 5:12 Tikan sidari, Jesus i sada kuta, lot mo i sidi sada kalak daholi koliten dagingna karinana. Idah kessa mo Jesus, mènter sujud mo ia mersembah mi lebbèNa ninganna idokken, "Tuhan, mula uè ngo Kono terpejuah kono ngo aku." 5:13 "Uè ngo aku, njuah mo kono!" nina Jesus ninganna mendoroken tanganna menjamahsa. 5:14 Nai igerra Jesus mo ia asa ulang ibagah-bagahken barang taba isè pè. Tapi ipasulak Jesus mo ia gejapkenna i mendahi imam. "Dokken mo asa iperrèso imam idi kono," nina Jesus. "Nai laus mo kono memèlèken pèlèen bagè nidokken si Musa, mahan bukti bai karina kalak magahken enggo malum kono." 5:15 Tapi makin saar ngo berrita Jesus idi, janah merrohen mo kalak lako mendengkohkenSa dekket asa ipemalum sakitna. 5:16 Enggo kessa i laus mo Jesus mersodip mi sada bekkas melongo. 5:17 Tikan sidari, sinderrang Jesus mengajari, lot ma mo i sidi kundul barang piga kalak parisè dekket guru agama. Roh ngo kalak idi i kuta Galilea nai, Juda dekket i Jerusalem nai. Idomi kuasa Tuhan i ngo Jesus lako pejuahken kalak sisakiten. 5:18 Nai lot mo nderrangna i menaruhken sada kalak nitempuk sigading, gampar i babo peddemmenna. Iusahaken kalak idi ngo barang bakunè carana asa ndorok sisakiten idi njolmit i hadeppen Jesus. 5:19 Tapi kumarna mbuè ni jelma idi, oda terbakin kalak i menggamparken mi bages. Kernanai iembah kalak i mo mi babo ntarum, ibuka mo saong bages i, nai itontonken mo sisakiten i ibagasen peddemmenna lako mi hadeppen Jesus i tengah jelma mbuè idi. 5:20 Mengidah belgahna kepercayaen kalak idi, idokken Jesus mo mbangsa, "Alè nggia, enggo iampuni dosami!" 5:21 Guru-guru agama dekket Parisè idi mengerana mo samahsa, "Jelma bakunè ngo èn berranina i mengelèai Dèbata? Isè pana ndorok mennasa dosa, laènken Dèbata?" 5:22 Ibettoh Jesus ngo nipikiren kalak idi, jadi idokken mo, "Kasa bagidi pikiren ndènè? 5:23 Apaina ngo murahen nidokken, 'Enggo isasa dosamu! Barang, kèkè mo ko, merdalan mo kono?' 5:24 Tapi asa ibettoh kènè, merkuasa ngo anak jelma idi i babo tanoh ènda mennasa dosa." Nina Jesus mo taba nitempuk sigading idi, "Kudokken mo bamu, kèkè mo ko, embah mo peddemmenmu, mulak mo kono." 5:25 Nai mènter kèkè mo sisakiten idi i lebbè jelma mbuè i nai, iembah mo peddemmenna, mulak mo ia ninganna memoji-moji Dèbata. 5:26 Karinana jelma idi kagum kalohoon, nai ipoji kalak i mo Dèbata. Janah ibagasen mbiar, nina kalak idi mo, "Enggo siidah kellengangen sidari ènda!" 5:27 Enggo kessa i, karuar mo Jesus i sidi nai, gabè idah mo sada kalak pertunggo belasting, si Lepi gerarna kundul i kantorna. Idokken Jesus mo tabasa, "Èkutken mo Aku." 5:28 Mènter kèkè mo si Lepi, itadingken mo karinana, ièkutken mo Jesus. 5:29 Nai ijamu si Lepi mo Jesus mi bagesna. Mbuè ngo merrohen pertunggu cokè bak jelma sidèban pè rebbak mangan dekket Jesus. 5:30 Nai ngutnguten mo Parisè dekket guru-guru agama taba sisiin Jesus, nina mo, "Kasa mangan mènum kènè rebbak dekket pertunggu belasting dekket kalak perdosa?" 5:31 Nai ialoi Jesus mo, nina mo, "Oda perlu penambari bai kalak sijuah-juahen, pellin taba kalak sisakiten ngo. 5:32 Roh aku, oda ngo mendilo kalak sibennar, tapi kalak perdosa ngo, asa mertobat kalak i." 5:33 Nai lot mo mendokken taba Jesus, "Ukum sisiin si Johanes nggati ngo puasa janah mersodip, bagi ma ngo bak sisiin Parisè. Keppè mangan mènum ngo ukum sisinMu." 5:34 Ialoi Jesus mo, "Ndorok ngo katèndènè pendengani kèla merpuasa sidekkah rebbak dèng dekket kèla i? Tentu oda! 5:35 Tapi roh mo tikkina, ibuat mo kèla i bai kalak i nai. Tikan bagidi mo asa puasa kalak idi." 5:36 Nai isukutken Jesus mo taba kalak i codiin bagèen, "Isè poda uè menggonting gedda rimbaru mahan pendongkap mi gedda sienggo mumuk. Mula bagi ngo ibaing, ncèda ngo oles rimbaru idi janah ma, pendongkap rimbaru idi pè oda cocok mi gedda sienggo mumuk idi. 5:37 Bagi ma ngo, isè poda lot mengosèken anggur rimbaru mi kiong sienggo buruk. Mula bagidi ibaing, mpustak ngo kiong sienggo buruk idi ibakin anggur rimbaru idi. Ancuh mo anggur rimbaru idi, janah ncèda ngo dekket kiong idi. 5:38 Kennah mi kiong rimbaru ngo ibakin anggur rimbaru. 5:39 Janah dèng ma, isè poda kalak uè mengènum anggur rimbaru sienggo mengènum anggur ndekkah, ai dokkenenna ngo: Mendèen ngo anggur sienggo ndekkah idi."
6:1 Tikan i sada ari Sabat, sinderrang memellus Jesus arap juma, ipotiki sisinNa mo pagè, ikubaki janah ipangan. 6:2 Nai mongkam mo kalak Parisè, "Kasa iulaken kènè siso ndorok ulanken tikan ari Sabat?" 6:3 Nai ialoi Jesus mo kalak i, "Oda dèng ngo nung ijaka kènè nibaing si Daud tikan mellèhè ia dekket denganna? 6:4 Ibengketti ngo Bages Dèbata, ibuat ngo roti sienggo ipèlèken taba Dèbata janah ipangan nola. Iberrèken ma dèba bai denganna. Padahal mengèkutken hatoren agamanta oda ndorok isè kipangan roti i laènken imam-imam." 6:5 Idokken Jesus dèng ma, "Anak Jelma idi ngo Tuhan ari Sabat!" 6:6 Tikan ari Sabat sidèban nola ma, mengajari mo Jesus i bages perguruun. Lot mo isidi sada kalak tanganna matè serrap. 6:7 Guru-guru agama dekket Parisè dakdak ngo mennulusi kessalahen Jesus asa ndorok iaduken. Nai dak ngo idatèken kalak i tah bakunè pejuahken kalak simersakit Ia tupung ari Sabat. 6:8 Tapi ibettoh Jesus ngo pikiren kalak i. Idokken mo taba kalak pertangan matè serrap idi, "Cènder mo kono i jolo èn." Kèkè mo ia, janah laus mo ia cènder mi sidi. 6:9 Enggo kessa i, nina Jesus mo taba kalak idi, "Mengèkutken hatoren agama kadè ngo ndorok bahaan tikan ari Sabat? Memmaing mendè ngo barang memmaing nggodo? Pelluahken jelma ngo barang maing mago?" 6:10 Itengen Jesus mo karina kalak idi kuliling, nai idokken mo taba pertangan matè serrap idi, "Doroken tanganmu i." Idoroken mo tanganna, gabè malum mo tanganna idi. 6:11 Tapi mellaga mo guru-guru agama dekket Parisè i, gabè mersungkuun mo kalak i, bakunè bakinenna terrèngèt Jesus. 6:12 Nderrangna i, menangkeng mo Jesus mi sada uruk lako mersodip. Suntuk bernginna idi dak mersodip ngo Ia mi Dèbata. 6:13 Enggo kessa nterrang ari, idilo mo simengèkutkenSa, nai ipilih mo sipuluh dua kalak bai kalak i nai, igerari mo sisipuluh dua kalak i rasul. 6:14 Si Simon (igerari ma si Petrus) dekket si Andreas anggi si Simon; si Jakobus bak si Johanes, si Pilipus, bak si Bartolomeus, 6:15 si Matèus bak si Tomas, si Jakobus anak si Alpèus, si Simon (nigerarenna berrani). 6:16 Si Judas anak si Jakobus dekket si Judas Iskariot sigabè penelbuh idi. 6:17 Enggo kessa i mengencuah mo Jesus rebbak dekket rasul sisipuluh dua idi i uruk i nai, nai mengadi mo kalak i janah cènder i sada bekkas ndèas. Mbuè ngo isidi mengèkutkenSa dekket siroh merrohen i Juda nai, i Jerusalem nai dekket i kuta Tirus bak Sidon nai i biding laut nai. 6:18 Pekiroh kalak idi imo naing mendengkoh rana Jesus dekket asa ipemalum ibas sakitna nai. Kalak nisellapen sètan pè roh ngo janah ipejuah. 6:19 Karina kalak idi sèkel janah mengusahaken asa menjamah Jesus kerna lot kuasa karuar bana nai lako pejuahken kalak i karina. 6:20 Itengen Jesus mo karina simengèkutkenSa, nai idokken mo, "Sayurntua mo kènè kalak sincoor, kerna ginemgem Kerajaen Dèbata ngo kènè! 6:21 Sayurntua mo kènè simellèhè bagèndari; ai pebessuren mo kènè. Sayurntua mo kènè sitangis bagèndari; ai tertaba mo kènè luas. 6:22 Sayurntua mo kènè mula ceggo atè ndèba taba kènè, janah mula iliplip kènè bak ipellèa dekket idokken dèba kènè jahat kumernaken Anak Jelma! 6:23 Nabi-nabi siperlebbè idi pè enggo ibaing bagidi. Mula bai ndènè pè masa bagidi, lolo mo kènè janah mersampang atè, kerna mbelgah ngo sulang ndènè i sorga. 6:24 Tapi merjaya mo kènè si kaya bagèndari; kerna enggo irasa kènè sintaboh. 6:25 Merjaya mo kènè sibessur bagèndari; ai mellèhè mo kènè! Merjaya mo kènè sitertaba bagèndari; kerna bonek mo kènè janah tangis! 6:26 Merjaya mo kènè mula karina kalak memoji kènè, kerna bagi ma ngo nabi-nabi palsu arnia memoji-moji empung kalak idi." 6:27 "Tapi ukum kènè simendengkohken Aku bagèndari, Kutennahken bai ndènè: Kekellengi mo musuhmu janah mendè mo baing taba kalak simerceggo atè taba kènè. 6:28 Pasu-pasu kènè mo kalak simenumpahi kènè, sodipken mo kalak simemmaing nggodo taba kènè. 6:29 Mula iparap dèba kurummu sisada, taroken ma mo dekket kurummu siserrap nari. Mula irampasi dèba jubahmu, berrèken ma mo dekket bajumu. 6:30 Mula ipido dèba barang kadè bamu nai, berrèken mo tabasa, janah mula irampasi dèba hartamu, ulang nèngè mo pido i balik. 6:31 Barang kadè ipergeddo ukurmu bakinen dèba taba kono, baing mo bagidi ma tabasa. 6:32 Ukum pellin simengkekelengi kènè ngo kessa ikekelengi kènè, kadè mo jasa ndènè isidi? Ai kalak perdosa pè ikekelengi ngo simengkekelengisa! 6:33 Janah mula mendè ibaing kènè pellin taba kalak simemmaing mendè bai ndènè sambing, kadè mo kellebihen ndènè? Kalak perdosa pè ibaing ngo bagidi! 6:34 Mula ipejual kènè kalak kumarna lot harapen ndènè bana nai, kadè mo jasa ndènè i sidi? Ai kalak perdosa pè ipejualken ma ngo taba perdosa, janah ijalo nola balik! 6:35 Tapi ukum kènè, kekellengi mo musuhmu mendè mo baing taba kalak idi. Pepinjamken kènè mo, janah ulang harapken balik nèngè idi. Mbelgah ngo upah ndènè janah gabè dukak-dukak Dèbata Sintèmbul i mo kènè. Kerna mendè ngo ibakin Dèbata mendahi kalak siso memettoh mendokken melias atè bang taba kalak jahat. 6:36 Gabè permasèh atè mo kènè bagè Bapa ndènè permasèh atè i!" 6:37 "Ulang mo kènè menghukum-hukumi sidèban, asa ulang ihukum Dèbata kènè. Ampuni kènè mo sidèban, asa iampuni Dèbata kènè. 6:38 Berrèken mo taba sidèban, asa iberrèken Dèbata taba kènè; jalonmu mo mertinèncuk sienggo isukatken meronjat-onjat bamu, kerna persukaten sienggo nibaingmu i bai sidèban, idi ma ngo ipakkè Dèbata mendahi kono." 6:39 Enggo kessa i, isukutken Jesus mo taba kalak idi codiin bagèen, "Mula iteggu sipètung denganna sipètung gabè rebbak terungkup mo kalak idi mi parik. 6:40 Oda lot belgahen sisiin asa guru. Tapi sisiin sienggo pul merguru, dos mo ia bagè guruna. 6:41 Kasa nasa pellèmen ibas mata kaltumu dak iperatè-atèken kono, keppè nasa pungur i matamu sendiri oda idah kono? 6:42 Idikè mo ndorok idokken kono taba denganmu, 'Dikè kuagoi pellèmenmi', keppèken nasa pungur ni matamu i oda idah kono? Èo kono perbuah ringadar! Agoi mo lebbè pungur silot ni matami, nai pè asa ndorok ntangkas idahenmu lako mengagoi nasa pellèmen silot i mata denganmi." 6:43 "Oda terbuahken kayu mendè buah kayu nggodo. Bagi ma ngo oda terbuahken kayu nggodo buah kayu mendè. 6:44 Nasa kayu tandaan ngo arap buahna. Oda nung nibuat buah kayu ara ibas kopi-kopi nai, barang pè buah anggur i bungkè rimbang nai. 6:45 Barang isè jelma selloh, dakdak ngo ia merpengelako merandal kumarna ukurna idi merandal. Tapi barang isè merpengelako jahat dakdak ngo i mengulaken jahat, kerna ibagasen pusuh perratèenna jahat ngo. Kerna karina siniruapkenna i babahna i nai, imo siroh ibas pusuh peratenna nai." 6:46 "Kasa idokken kènè Aku, 'Tuhan, Tuhan,' keppèken oda iulaken kènè siKudokken bai ndènè? 6:47 Mi kadè mo nicodiken nasa jelma siroh mendahi Aku, simendengkoh katangKu janah simengulakensa? -- Belli mo Kutuduhken bamu --. 6:48 Codi mo ia bagè kalak simemajek bages; ikurak mo mbages kalohoon tanoh idi janah ipajekken mo batu cendi. Mula roh pè laè mbellen janah mengerraja lako mengelentem bages i oda terrumpakkensa, kerna batu ngo dangaan bages idi. 6:49 Tapi ukum kalak simendengkoh ranangKu keppèken oda iulaken, codi mo ia bagè simemajek bages i babo tanoh, oda pella merbatu cendi. Mengerraja kessa mo laè mengelentem bages idi, merrumpak mo bages idi ncèda karina!"
7:1 Enggo kessa pul iranaken Jesus idi mi jelma nterrem idi, laus mo ia mi Kapernaum. 7:2 Lot mo i sidi sada kalak perwira tenterra Rom, kelleng kalohoon atèna midah sada naposona. Sakiten ngo naposona i, janah patè-patèen. 7:3 Idengkoh perwira i kessa mo terèngèt Jesus, ipasulak mo pengetuai-pengetuai Jahudi mendahi Jesus lako mengidoken asa roh Jesus pejuahken naposoNa idi. 7:4 Soh kessa pasulaken idi mendahi Jesus, ièlèk-èlèk kalak i mo Jesus asa iurupi nemmu perwira idi. Nina mo, "Patut ngo nemmu iurupi kono perwira idi." 7:5 "Ai kelleng ngo atèna midah bangsanta, janah enggo ipajek bages perguruun bai nami." 7:6 Nai laus mo Jesus rebbak dekket kalak idi. Enggo kessa naing soh Jesus mi bages idi, iutus perwira i nola mo denganNa mendahi Jesus lako mendokken, "Alè Guru, ulang mo pella ledja Guru i roh mi bagesku. 7:7 Aku sendiri pè oda sanggup roh mendahi Kono. Lotiin mo dokken singkebabah rana enggo malum iakap naposongku idi nahan. 7:8 Kerna aku pè tunduk ngo i perèntah atasenku, bagi ma i terruhku pè lot ma ngo tenterra imo perajuritku sikennah tunduk mi perèntahku. Mula kudokken taba kalak i, 'Laus!' mènter laus ngo ia; janah mula kudokken mi sisada, 'Roh ko misèn!' mènter roh ngo ia. Mula kudokken taba naposongku, 'Ènda mo bahan!' mènter ibahan ngo." 7:9 Lengang mo Jesus mendengkoh i. Itulihken mo jelma nterrem i ninganNa idokken, "I tengah-tengah bangsa Israel pè, makdèng nung jumpa Aku kepercayaen bagèen belgahna!" 7:10 Mulak kessa pasulaken idi mi bages perwira idi, enggo mo malum perwira idi. 7:11 Oda sadikè dekkah kellangna, laus mo Jesus mi kuta Nain rebbak dekket sisinNa, bak jelma nterrem i perrotor ma. 7:12 Soh kessa Jesus mi gembar pèntu pengkeruhen kuta idi, pesimbak mo kalak i dekket rombongen simengosong bangkè mi ruar kuta idi, imo bangkè anak sada-sada bai partua ibages sienggo mebalu. Mbuè ngo pengisi kuta i mendengani simebbalu i. 7:13 Idah Jesus kessa mo daberru idi, masèh mo atèna midahsa, nina mo mbangsa, "Ulang nèngè kono tangis nangè!" 7:14 Nai ijolmiti Jesus mo bangkè idi, ijamah mo. Gabè ndong mo simengosong bangkè i. Idokken Jesus mo, "Alè anak perrana, Aku mendokken kèkè mo kono!" 7:15 Nai mènter kundul mo anak perana sienggo matè idi kin, janah ipungkah mo mengerrana. Nai ipesakat Jesus mo anak i mendahi inangna. 7:16 Karinana kalak buradan ninganna ipoji Dèbata. Nina kalak i mo, "Sada nabi mbellen enggo roh mi tengah-tengahta! Dèbata Jahowa enggo roh lako paluahken karina jelma!" 7:17 Saar mo berita terèngèt Jesus idi i suberri Juda dekket i sikulilingna pè. 7:18 Ibagahken sisiin si Johanes mo karina simasa i taba si Johanes. Nai idilo si Johanes mo dua kalak sisinna. 7:19 Nai ipasulak mo mengkuso Tuhan Jesus, "Kono ngo sinaing roh idi siniperbagah Dèbata barang sidèban dèng ngo kupèma kami?" 7:20 Nai laus mo sisiin si Johanes sidua kalak i mendahi Jesus janah nina mo, "Ipasulak si Johanes Perridiken ngo kami mengkuso Kono, tah Kono ngo sinaing roh idi siniperbagah Dèbata barang sidèban dèng ngo kupèma kami?" 7:21 Tupung ngo tikala i Jesus pejuahken mbuè kalak ibas sakitna nai. Iusir ngo tendi jahat janah gabè merpendidah ngo ibakin kalak sipètung. 7:22 Jadi ialoi Jesus ngo pasulaken si Johanes i bagèen: "Laus mo kènè magahken taba si Johanes, kadè si niidah dekket sinidengkoh ndènè èn, gabè merpendidah ngo sipètung, merdalan ngo nitempuk sigading, malum ngo kalak sikoliten, merpendengkoh ngo kalak sitongkik, balik nggelluh ngo sienggo matè, janah mendahi kalak sincor ngo ibagahken Sukuten Kelluahen idi. 7:23 Sayurntua mo kalak siso meralingen menulak Aku." 7:24 Nai laus kessa mo pasulaken si Johanes idi, iranaken Jesus mo terèngèt si Johanes idi taba jelma nterrem, nina mo, "Mula laus kènè mendahi si Johanes i kellongoon, kadè ngo naing tengennen ndènè? Sirambar dukut nisempul angin ngo? 7:25 Kadè ngo naing tengennen ndènè i sidi? Sada kalak merpakèen mendè ngo? Kalak simerpakèen mendè bak kalak nduma, i bages raja ngo i! 7:26 Bagahken kènè mo taba aku, kadè ngo naing tengennen ndènè? naing menengen sada kalak nabi ngo? Imo tuhu. Belgahen dèng ngo ia asa sada kalak nabi. 7:27 Kerna si Johanes ngo nidokken ayat ibas Bibèl: Èn ngo pasulakenKu, nina Dèbata, Kupasulak ngo ia lebbèen asa kono nai asa ia menghantari dalan baMu!" 7:28 Perdatèken kènè mo ènda, nina Jesus ma, "Ibas karina jelma sienggo pennah nggelluh i dunia èn, isè poda lot belgahen dari pada si Johanes Perridiken. Tapi kalak sikettekna i Kerajaen Dèbata, belgahen ngo idi dari pada si Johanes Perridiken." 7:29 Karina kalak -- ni sidi dekket pertunggu cokè -- mendengkohken nidokken Jesus idi; ai kalak i ngo simenguèi nidokken Dèbata janah uè iperridi si Johanes. 7:30 Tapi ukum kalak Parisè dekket simettoh patiin oda uè menjalo hatoren Dèbata terrèngèt diri kalak idi. Oda uè kalak idi iperridi si Johanes. 7:31 Nai idokken Jesus nola ma, "Mi kadè mo ndia Kupecodi jelma sisencundut ènda? Bagè kadè ngo kalak idi? 7:32 Codi ngo kalak i bagè anak-anak kundul i onan, dèba mendiloken taba denganna sidèban: Mergenderrang ngo kami, tapi oda lot uè tumatak! Tangis milangi ngo kami, tapi oda uè kènè terrèluh! 7:33 Roh si Johanes, puasa ngo -- ia janah oda mènum anggur -- idokken kènè nola ngo; 'nisellapen sètan ia!' 7:34 Roh Anak Jelma -- mangan ngo Ia -- idokken kènè nola, 'tengen kènè kalak adoi! Mokkus, permabuk, alè-alè pertunggu cokè dekket supan-supan siso kasèa dokatè jelma nterrem!' 7:35 Tapi tukasi pè bagidi, bennar ngo nibaing Dèbata, ai terbukti ngo i bai karina kalak simenjaloSa." 7:36 Lot mo sada kalak Parisè mergerar si Simon, mengundang Jesus mangan mi sapona. Roh ngo Jesus mi sapona i, kundul janah mangan isidi. 7:37 Lot ma mo i kuta i sada daberru perdosa mbuè. Idengkoh kessa mo mangan Jesus i bages Parisè idi, roh mo ia merembah sada gori-gori merisi minak baungkus. 7:38 Cènder mo ia mi gembar nèhè Jesus ninganNa tangis, janah ilapui ngo nèhè Jesus dekket èluhna. Enggo kessa bagi, ilaap mo nèhè Jesus dekket bukna, nai isanggoh mo nèhèna i ninganna iarirken minak baungkus idi. 7:39 Iidah Parisè simengundang Jesus i kessa mo i, tubuh mo sura-surana ibagasen, "Mula tuhu-tuhu ngo kalak ènda nabi, ibettoh ngo nemmuken barang isè daberru simenjamahsa idi, tentu ibettoh ma mo nemmu, ukum daberru idi sada kalak perdosa mbuè ngo!" 7:40 Nai nina Jesus mo taba si Simon, "Simon, lot ngo sinaing kudokken bamu." "Uè Guru," nina si Simon, "dokken mo." 7:41 Idokken Jesus mo, "Lot mo dua kalak merutang taba sada kalak simungaken kèpèng. Utang sisada kalak lima ratus kèpèng pirak, janah sisada kalak nai lima puluh kèpèng pirak. 7:42 Duana kalak idi oda tergararsa nèngè utangna idi. Jadi ilèsèken sidasa riar idi mo utang kalak idi i. Isè ngo kalak i sidua kellengen atèna mendahi simenganakken kèpèng idi dok atèmu?" 7:43 "Ukum katèngku, kalak simerutang mbuèen idi ngo!" nina si Simon mengaloi. "Bennar ngo pendokkenmu idi," nina Jesus. 7:44 Nai itengen Jesus mo daberru idi ninganna idokken taba si Simon, "Idah kono ngo daberru ènda? Tikan roh aku mi sapo ènda, oda lot ipèmaken kono laè morih nèhèngKu, tapi ukum daberru ènda, iborih ngono nèhèngKu dekket èluhna janah ilaap dekket bukna. 7:45 Oda lot isanggoh kono Aku, tapi ukum daberru ènda mak mengadi-ngadi ia menanggoh nèhèngKu kessa nai soh Aku mi sènda. 7:46 Oda iminaki kono takalKu, tapi ukum daberru ènda enggo iminaki nèhèngKu dekket minak baungkus. 7:47 Èngèt mo! Kumarna bagi mbelgahna kelleng atèna, tandana enggo mo isasa dosana simbuè idi. Tapi kalak perdosa kètèk siniampuni, cituk ma ngo kelleng atèna." 7:48 Nai idokken Jesus mo taba daberru idi, "Enggo mo iampuni karina dosamu." 7:49 Kalak sidèban sirebbak kundul mangan dekket Jesus i merkosik mo samahsa, "Isè ngo kalak ènda, asa ndorok ia mengampuni dosa?" 7:50 Tapi nina Jesus mo taba daberru idi, "Kepercayaen midi ngo paluahken kono. Molih mo kono ibagasen damè!"
8:1 Oda pella sadikè dekkah nai, iagahi Jesus mo kuta dekket sosor-sosor merkuliling lako memagahken Sukuten Simerandal terrèngèt Dèbata pecèndekken Kerajaenna. Dekket sisinNa sisipuluh dua kalak rebbak dekketSa. 8:2 Bagi ma bak daberru-daberru sienggo ipemalum ibas sakitna nai dekket nisellapen sètan pè, imo si Maria simergerar Magdalena pè (pitu sètan ipellaus bana nai). 8:3 Si Johana sinibages si Kusa, pugabè istana si Herodes; si Susana, mbuè dèng tupèh daberru sidèban. Ikebbasi kalak i ngo karina mi sindalanen idi dekket riarna sendiri. 8:4 Dak merrohen ngo jelma idi i merbagè kuta nai mendahi Jesus. Enggo kessa mbuè kalohoon pulung, isukutken Jesus mo umpama taba kalak idi, nina mo, 8:5 "Lot mo sada kalak laus menabur bennih. Tikan menabur idi ia, lot mo dèba bennih idi ndabuh mi dalan, nai ideddohi dèba mo i janah ipangani manuk-manuk. 8:6 Dèba ndabuh mo i mi tanoh batu. Tikan turah dèng ngo bennih idi mènter males mo, kerna ngkerrah ngo tanohna. 8:7 Dèba ndabuh mi tanoh kopi-kopi, rebbak tubuh mo kopi-kopi idi dekket bennih i, gabè ipetcek kopi-kopi idi mo bennih siturah idi. 8:8 Tapi lot ma mo dèba ndabuh bennih i mi tanoh nggabur, turah janah ndeppur mbellen mo ia janah merbuahken serratus lempit." Iujungi Jesus mo sukutenna idi bagèen, "Kènè simendengkohkensa, radumi kènè mo i mendè-mendè!" 8:9 Nai ikusoi sisiin idi mo Jesus, kadè lapaten codiin idi. 8:10 Ialoi Jesus mo, "Ipergeddo Dèbata ngo asa pellin kenè kessa memettoh rusia kerajaenNa idi. Kernana i ngo asa taba sidèban isukutken idi merkitè codiin, asa mula pè merpenengen kalak i tapi oda merpendidah, tukasi pè merpemeggè kalak idi tapi oda merpendengkoh janah oda iarti." 8:11 "Bagèen ngo lapaten codiin ndai; Ia ukum bennih idi, imo kata Dèbata. 8:12 Bennih sindabuh mi dalan idi imo kalak simendengkoh kata i, tapi roh mo Sibolis irampasi mo berrita idi i pusuh perratèen kalak idi nai, gabè oda nèngè kalak idi percaya janah oda maluah. 8:13 Bennih sindabuh mi tanoh batu, imo kalak simendengkoh sukuten idi menter lolo ngo ia menjalo. Tapi oda ikeddarohken. Pellin sigejjap ngo kessa percaya ia. Ai roh kessa pengunjunen gabè oda nè hot kalak idi. 8:14 Bennih sindabuh mi tengah kopi-kopi, imo kalak simendengkoh sukuten idi, tapi olang-aling ngo kalak idi, ai sèkel kalohoon kalak i kaya janah mersennang-sennang i dunia èn. Idi nola mo menessak kalak idi gabè oda nè merbuahken selloh kalak idi. 8:15 Ukum bennih sindabuh mi tanoh nggabur idi, imo kalak simendengkoh sukuten idi janah mènter ipennep mendè ibagasen pennarihenna. Iulaken ngo mendè ibagasen mbingit, gabè merbuahken mbuè janah mendè." 8:16 "Oda lot kalak mengelakati pellita itungkupi nola dekket kendang, barang ibaing nola mi terruh peddemmen. Tapi mi babo perpelitaan i ngo ibakin asa karina kalak simbengket mi bages mengidah cuhayana. 8:17 Oda lot simboni mak gabè terridah janah oda lot sinirahasiaken mak ntarar nola janah terbettoh. 8:18 Kernana i peratè-atèken mo mendè sinidengkoh ndènè. Ai barang isè enggo lot bana, iberrèken nola ma ngo bana, tapi barang isè madèng lot bana, buaten ngo bana nai barang kadè sienggo lot bana idi kin." 8:19 Roh mo inang bak anggi Jesus mendahiSa, tapi oda terbakin kalak idi soh mendahi Jesus, kerna buèna jelma nterrem idi. 8:20 Nai lot mo sada kalak mendokken taba Jesus, "Guru, i ruar ngo bagèndari inang bak anggimu pè, naing pejumpa dekket kono." 8:21 Tapi nina Jesus mo taba kalak idi, "Kalak simendengkoh janah simengulaken kata Dèbata ingo inangku bak kaka-anggingKu." 8:22 Tikan i sada ari, mbangkit mo Jesus rebbak dekket sisinNa mi sada bungki, janah idokken taba sisinna, "Laus mo kita mi suberrang tao," nai mènter berkat mo kalak idi. 8:23 Sinderrang mengkayuh idi kalak i, terpeddem ngo Jesus. Sintempu roh mo angin sapa-sipu i tao i. Sumampak-sampak mo laè i masuk mi bungki janah lako bahaya mo kalak i karina. 8:24 Idapetken sisiin i mo Jesus janah idungoi, nina mo, "O Guru, Guru, mago mo kita!" Kèkè mo Jesus, isergangi mo angin bak tao situmuyu-tuyu idi. Nai mènter mènak mo angin bak tao i. 8:25 Idokken Jesus mo taba sisinNa, "Kasa buradan kènè? Idikè ngo kepercayaen ndènè?" Gabè mbiar janah kagum kalohoon mo kalak idi, nina mo samahsa, "Isè ngo ndia tuhu kalak ènda dekket ngo angin topan bak galombang ndorok iperèntah, janah tunduk ngo tabasa!" 8:26 Soh mo Jesus dekket sisinNa mi nagerri Gerasa i suberrang tao Galilea kan kebincaren. 8:27 Sampur kessa mo Jesus mi darat, idahi sada kalak daholi siniselluki tendi jahat ngo Ia. I kuta nai ngo kalak i. Enggo toko dekkahna oda nèngè uè ia meroles janah oda uè tading i bages. Dak merian ibas liang kuburen ngo ia. 8:28 Iidah kessa mo Jesus, mènter mersurak mo ia ninganna mersembah merkuraja i hadeppen Jesus janah nina mo, "O Jesus, Anak Dèbata Sintèmbul i! Merkadè kono roh mendahi aku? Kuèlèk-èlèk mo kono asa ulang isiksa kono aku!" 8:29 Idokken pè bagidi, kumarna enggo iusir Jesus ia bana nai. Mbuè ngo tendi jahat i menellukisa. Asa enggo pè irantè ia irettes ngo rantèna i janah iembah tendi jahat i mi kellongoon. 8:30 Ikuso Jesus mo ia, "Isè gerarmu?" "Ukum gerarku: Lègiun," nina mengaloi -- kerna mbuè ngo enggo tendi jahat i menellukisa. 8:31 Ièlèk-èlèk tendi jahat i mo Jesus, asa ulang iusir kalak idi mi Lembeng Kematèen. 8:32 Ndessing mi bekkas idi lot mo mbuè kalohoon babi, dak menggigi i pispis delleng ni sidi. Gabè i`lèkken tendi jahat i mo asa ipaduè nemmu kalak i memengketti babi idi. Nai ipaduè Jesus mo kalak idi misidi. 8:33 Karuar mo tendi jahat idi bai jelma idi nai janah ibengketti mo babi i, nai mènter mermangkaten mo babi idi i tebbing i nai mi tao gabè terneknek mo. 8:34 Iidah simermakan babi idi kessa mo simasa i, bulanting mo ia laus mi kuta, ibagahken mo simasa idi bai perkuta dekket mi sosor sikulilingna. 8:35 Merrohen mo kalak lako menengen simasa i. Idahi kalak i mo Jesus, gabè iidah kalak i mo enggo malum siniselluken tendi jahat idi kin kundul i gembar nèhè Jesus. Enggo mo merroles ia janah enggo merpikiren nterrang. Gabè buradan mo kalak idi karinana. 8:36 Isukutken sienggo mengidah simasa idi mo taba jelma siroh idi terrèngèt permalumna. 8:37 Karina pengisi Gerasa mengendik-endik Jesus asa itadingken bekkas idi, kerna mbiar kalohoon ngo kalak idi karina. Nai ibengketti Jesus mo bungki lako balik. 8:38 Ièlèk-èlèk niselluken tendi jahat idi mo Jesus, asa ipadiat ia mengèkut rebbak Jesus. Tapi ipasulak Jesus mo ia molih, 8:39 idokken Jesus mo mbangsa, "Molih mo kono mi sapomu janah sukutken mo barang kadè sienggo ibakin Tuhan i bamu." Nai laus mo ia, iagahi mo kuta i memagahken sienggo nibaing Jesus tabasa. 8:40 Balik kessa Jesus i suberrang tao i nai, lolo kalohoon mo jelma nterrem idi, ai ipèma-pèma ngo Ia. 8:41 Nai roh mo sada kalak pengendeng bages perguruun mergerar si Jairus. Isembah mo Jesus, janah ièlèk-èlèk asa roh mi bagesna. 8:42 Kerna mpiah kaloon ngo iakap berruna sisada i sienggo merrumur sipuluhdua tahun idi, ai enggo patè-patèen. Sinderrang merdalan Jesus mi bages si Jairus, dak sessak ngo jelma nterrem idi. 8:43 Lot mo isidi sada kalak daberru enggo sipuluhdua tahun dekkahna dak bubus. Enggo mbuè keroginna mertambar tapi laju oda malum. 8:44 Ibas tengah-tengah jelma nterrem idi nai mènter ijolmiti daberru idi mo Jesus i podi nai, ijamah mo punca jubah Jesus. Nai mènter mentadi mo iakap ia darohna bubus idi. 8:45 Ikuso Jesus mo jelma i, "Isè menjamah Aku?" Tapi isè poda lot mengaku, gabè nina si Petrus mo, "Guru, mbuè ngo jelma i kulilingmu, ai dak isessak kalak i ngo Kono!" 8:46 Idokken Jesus mo, "Tapi lot ngo menjamah Aku. Kubettoh ngo i, ai karuar ngo gegoh bangKu nai." 8:47 Satdar mo daberru idi, enggo terbettoh sinibaingna idi. Roh mo ia menggirgir, isembah mo Jesus. Ibagahken mo karinana, tah kadè sebabna asa ijamah ia Jesus, idengkoh jelma nterrem idi, janah barang bakunè permalumna sakitna i gejapkenna i. 8:48 Nai nina Jesus mo tabaSa, "Alè nangè, kepercayanmi ngo pemalumken kono. Njuah-njuah mo ko balik!" 8:49 Tikan mengerana dèng Jesus, soh mo sada kalak pasulaken i bages si Jairus nai. Idokken mo taba si Jairus, "Ulang pella lejai nèngè Guru i, ai enggo matè berrumu idi." 8:50 Idengkoh Jesus ngo nidokken pasulaken i, gabè nina mo mbang si Jairus, "Ulang kono ganggu, percaya mo ko, njuah mono iakap berrumu i." 8:51 Soh kessa mi bages si Jairus, isè poda ipadiat Jesus mbengket rebbakkensa laènken pellin si Petrus, si Johanes, si Jakobus dekket partua anak idi mo kessa. 8:52 Karina nisidi tangis ngo janah marsak kumarna permatè anak idi. Idokken Jesus mo, "Ulang kènè tangis, oda ngo matè anak ènda, pellin meddem ngo!" 8:53 Nai itertabai kalak idi mo Jesus, ai ibettoh kalak i ngo enggo matè berru idi. 8:54 Nai ijamah Jesus mo tangan anak idi, ninganna idokken, "Alè tatat, kèkè mo kono!" 8:55 Mènter roh mo kessah anak idi janah kèkè mo ia. Enggo kessa i, idokken Jesus mo asa iberrèken anak idi mangan. 8:56 Lengang kalohoon mo partua ni anak idi. Tapi igerai Jesus ngo kalak idi asa ulang ibagahken barang mendahi isè pè simasa idi.
9:1 Idilo Jesus mo pulung sisinNa sisipuluh dua kalak idi, iberrèken mo bai kalak i gegoh dekket kuasa lako mengusir sètan bak pemalumken sakit. 9:2 Nai ipasulak mo kalak i menukutken sukuten terrèngèt Kerajaen Dèbata bak pemalunken sakit. 9:3 "Ulang embah kè barang kadè mi perdalanen," nina Jesus taba kalak idi. "Ulang embah kènè tongket barang bagut-bagut bekkas cudekkah, barang togoh, barang riar barang pè pakkèen dua mpasang. 9:4 Barang i dikè kènè ijalo dèba, i bagesna i mo kènè lebbè mèma laus nola i kuta idi nai. 9:5 Janah barang i dikè kènè oda ijalo dèba, pispisken mo abu silekket i tapap nèhè ndènè i sinderrang lako menadingken kuta i kènè, mahan pertandaan pesèngètken kalak idi." 9:6 Berkat mo sisiin i lako menukutken Sukuten Simerandal i sada kuta nai mi kuta sidèban. 9:7 Nderrang idengkoh si Herodes Raja i Galilea, karina simasa i, gabè bingung mo ia. Kerna lot memagahken bana, "Enggo balik nggelluh si Johanes Perridiken!" 9:8 Lot ma sidèban magahken, enggo roh nola si Elias. Sidèban nola mendokken, enggo balik nggelluh sada kalak ibas nabi-nabi arnia. 9:9 Nina si Herodes mo, "Enggo ngo kudokken ipancong takal si Johanes, tapi isè ngo ndia tuhu kalak ènda? Enggo mbuè kudengkoh terrèngèt ia." Nai iusahaken si Herodes mo asa idah ia nemmu Jesus. 9:10 Balik kessa mo rasul-rasul idi, ibagahken kalak i mo mendahi Jesus karinana sienggo nibahan kalak idi. Nai iarahken Jesus mo kalak idi pellin laus mi sada kuta mergerar Betsaida. 9:11 Ibettoh sinterrem kessa mo i, gabè ièkutken mo Jesus. Ijalo Jesus ngo kalak idi janah iranaken mo bai kalak idi terrèngèt Kerajaen Dèbata janah ipemalum ngo kalak sisakiten. 9:12 Enggo kessa bon ari, roh mo sisiin sisipuluh dua i mendahi Jesus. Idokken kalak i mo, "Guru, pasulak mo jelma nterrem idi laus, asa ndorok itulusi panganna dekket permalamenna i kuta bak i sosor sindessingna isèn, ai melongo ngo bekkas ènda." 9:13 "Oda," nina Jesus taba kalak idi. "Berrè kènè mo mangan kalak idi." Ialoi sisiin idi mo Jesus, "Pellin lima roti dekket dua ikan ngo kessa lot bai nami. Oda lot nèngè laènkenna idi. Laèn mo mula kennah laus kami menokor pangaan lako bai karina jelma nterrem ènda?" 9:14 (Lot ngo kira-kira lima ribu kalak daholi i sidi).Nai idokken Jesus mo taba sisinNa, "Dokken kènè mo asa kundul kalak idi merturpuk-turpuk, lima-lima puluh kalak." 9:15 Ibakin sisiin idi mo bagè nidokken Jesus idi. Idokken mo kundul jelma nterrem idi. 9:16 Ibuat Jesus mo roti silima i dekket ikan sidua i, itarè mo mi dates ninganna idokken melias atè bai Dèbata. Ipenggelli mo roti i dekket ikan i ipemberrèken mo mendahi sisinNa asa ipembagi-bagiken taba jelma nterrem idi. 9:17 Mangan mo kalak idi karina bessur. Ipepulung sisiin i mo siso kerri ipangan jelma nterrem idi, dom sipuluhdua baka nai. 9:18 Tikan sada ari, nderrang pellin Jesus mersodip, roh mo sisinNa mendapetkenSa. Nai ikuso Jesus mo kalak idi, "Isè ngo Aku idokken sinterrem?" 9:19 Ialoi kalak idi mo, "Idokken dèba, si Johanes Perridiken ngo Guru i, tapi lot ma dèba mendokken si Elias. Nai lot ma dèba mendokken sada kalak ibas nabi-nabi arnia nai sienggo balik nggelluh." 9:20 "Nai pendokken ndènè, isè ngo Aku?" nina Jesus mengkusoi. Mènter ialoi si Petrus mo, "Kristus, Raja Sipaluah niperbagah-bagah Dèbata i ngo kono." 9:21 Nai ipernoi Jesus mo sisinna, asa ulang ibagah-bagahken i barang bai isè pè. 9:22 Nai ibagahken Jesus mo, "Kennah menggong simpersuk ngo Anak Jelma i janah itulak pengulu-pengulu bak imam-imam ekuten dekket guru-guru agama. Nai ibunuh mo, tapi balik nggelluh ngo ia i ari petelluken." 9:23 Enggo kessa i, idokken Jesus nola mo taba jelma nterrem idi, "Barang isè naing mengèkutken Aku, kennah ilupaken ngo dirina, nai kennah ipersan mo silangna gennep ari janah ièkutken mo Aku. 9:24 Barang isè menarihken nggelluhna, kemagoon nggelluhna situhu mo ia. Tapi barang isè kemagoon nggelluhna kumarnaken Aku, idi mo pegelluhkensa. 9:25 Kadè mo labana bai jelma mula pè gabè milikna suberri dunia èn, tapi ncèda janah mago nggelluhna? 9:26 Barang isè mèla mengindangken Aku janah mengkemèlaken peddahKu i hadeppen sidèban, Anak Jelma idi pè mèla ngo mengakuisa, roh kessa Ia luas ibagasen kemuliaanNa dekket kemuliaan Bapa bak kemuliaan malaèkat simbadia! 9:27 Perdatèken kènè mo sikudokken ènda: Lot ngo barang piga kalak nisènda èn oda sanga matè ia, kum mak lebbè idah ia ipecènder Dèbata Kerajaenna idi." 9:28 Kira ualuh ari enggo kessa iajarken Jesus sindai, iarahken mo si Petrus, si Johanes dekket si Jakobus mi babo sada delleng lako mersodip. 9:29 Sinderrang mersodip Jesus isidi, mènter mobah mo abèNa, pakkènNa pè oda kalih bagè mbulan merkillok. 9:30 Sintempu lot mo dua kalak mengeranai dekket Jesus, imo si Musa bak si Elias. 9:31 Mermulia kalohoon ngo kalak idi tengennen. Mengerranai ngo kalak idi dekket Jesus terrèngèt permatèNa i Jerusalem siso pella ndekkah nè. 9:32 Nderrang bagidi, terpeddem ngo si Petrus dekket denganna. Ndungo kessa kalak idi, idah kalak i mo kemuliaan Jesus merbindella, bagidi ma dekket denganna sidua kalak cènder idi. 9:33 Nai tikan naing itadingken sidua kalak i Jesus, mongkam mo si Petrus, "Sennangna i i sènda Guru! Kupekkadè mo isèn tellu sapo-sapo, sada baMu, sada bai si Musa, janah sada nai bai si Elias." (Idokken si Petrus pè bagidi, oda iantusi kadè nidokkenna idi.) 9:34 Sinderrang mengerana bagidi dèng si Petrus, taridah mo roh hembun menangkemmi si Petrus, si Johanes bak si Jakobus. Buradan mo kalak idi kumarna isangkemmi hembun idi. 9:35 Nai terdengkoh mo sora i hembun idi nai mendokken, "Èn ngo anakKu siKupilih i. Uèi kènè mo Ia!" 9:36 Enggo kessa bagi, pellin Jesus nai ngo kessa i sidi. Si Musa bak si Elias oda lot nèngè i sidi. Oda ibagahken sisiin idi simasa i barang taba isè pè. 9:37 Sibarembenkenna, mengencuah mo kalak idi i delleng idi nai, janah merrohen mo jelma nterrem mendahi Jesus. 9:38 Lot mo sada kalak daholi mersurak i tengah jelma nterrem idi nai, "Alè Guru, masèh mo atèmu, kuèlèk-èlèk mo kono asa tengngen mo lebbè anakku -- ai pellin sada i ngo kessa dukakku. 9:39 Mula isellapi tendi jahat kessa ia, mènter mendengkuk ngo ia, dagingna pè menter nggenggeng mo sampè merkupkup babahna. Soh mo mpiahna iakap, ai oda uè karuar tendi jahat i bana nai! 9:40 Enggo ngo nemmu kupido pengurupi bai sisinmi asa iusir tendi jahat i, tapi oda tellap kalak idi." 9:41 Ialoi Jesus mo, "Èo, kènè siso percaya mi Dèbata, sadikè dekkah nai aku rebbak dekket kènè janah sobar Aku midah kènè? Embahken mo dukakmu idi mi sènda!" 9:42 Nderrang merdalan anak idi mendahi Jesus, itulpasken tendi jahat idi ngo ia janah ipegenggeng mo daging anak idi. Tapi idokken Jesus mo tendi jahat idi ruar janah malum mo anak idi. Nai ipesakat Jesus mo anak i taba bapana. 9:43 Lengang mo karinana jelma nisidi mengidah bagi belgahna kuasa Dèbata. Tikan lengang dèng jelma nterrem idi mengidah karinana simasa nibakin Jesus i, idokken Jesus mo taba sisinNa, 9:44 "Èngèt kènè mo mendè siKudokken ènda: Ipesakat mo Anak Jelma idi taba kuasa jelma." 9:45 Tapi oda iarti sisiin idi nidokken Jesus idi. Ai mboni ngo idi ibaing bai kalak idi asa ulang iantusi barang kadè artina. Tapi oda pang kalak i mengkusoken taba Jesus. 9:46 Enggo kessa i tubuh mo persilisihen iantara sisiin Jesus, imo terrèngèt isè kalak idi simbelgahna. 9:47 Ibettoh Jesus mo pikiren kalak idi, idilo Jesus mo sada kalak anak-anak, janah ipecènder mi gembarNa. 9:48 Nai idokken Jesus mo taba kalak idi, "Barang isè menjalo anak-anak èn kumarnaken Aku, merlapaten ngo idi menjalo Aku. Janah barang isè menjalo Aku, menjalo simengutus Aku ngo Ia isidi. Ai barang isè sikètèkna bai ndènè nai, ia mo simbelgahna." 9:49 Nai idokken si Johanes mo, "O Guru, lot ngo kuidah kami kalak mengusir sètan merkitè gerarMu. Kugerra kami ngo ia asa ulang nèngè iterrusken bagidi, kerna oda ngo simengèkutken kita ia." 9:50 "Ulang gerra kènè ia," nina Jesus taba si Johanes bak sisinna sidèbanna i. "Barang isè oda mengalo kènè, dengngan ndènè mo ia." 9:51 Enggo kessa njolmit katikana Jesus lako mi sorga, mermaksud ngo Jesus laus mi Jerusalem. 9:52 Ipasulak mo dèba utusen perlebbè baNa nai. Berkat mo utusen i janah mbengket mi sada kuta i Samaria. Ihantari kalak idi ngo karina siperlu bai Jesus. 9:53 Tapi oda ijalo jelma ni kuta idi Jesus, kerna ntangkas ngo langkah Jesus laus mi Jerusalem. 9:54 Ibettoh dua kalak sisiin i kessa mo i, imo si Jakobus dekket si Johanes, idokken kalak idi mo, "Tuhan ipaduè Kono ngo asa kupengido kami roh api i langit nai asa kerri ilettup pengisi kuta èn?" 9:55 Itulihken Jesus mo mi podi, ilagai mo kalak idi. 9:56 Nai laus mo kalak idi terrus mi laèn kuta. 9:57 Tikan menerusken perdalanenna Jesus rebbak dekket sisinNa, lot mo mendokken taba Jesus, "Guru, naing kuèkutken ngo Kono barang dempak dikè Kono laus!" 9:58 Ialoi Jesus mo, "Merliang ngo serrigala, merrasar ngo ukum manuk-manuk, tapi ukum Anak Jelma, oda lot bekkasna meddem." 9:59 Nai idokken Jesus mo taba sada kalak sidèbanna, "Èkutken mo Aku." Tapi ialoi ia mo Jesus, "Guru, paduè mo balik aku lebbè mengkubur bapangku." 9:60 Ialoi Jesus mo ia, "Belli mo simatè i mengkuburken simatèna. Tapi ukum kono, bagahken mo Sukuten terrèngèt enggo ipecèndek Kerajaen Dèbata." 9:61 Lot ma mo sidèban mendokken, "Guru, uè ngo aku mengèkutken Kono, tapi paduè mo aku lebbè balik memagahken taba kadè-kadèngku." 9:62 Nai idokken Jesus mo mbangsa, "Barang isè kalak sienggo mencèkèp pangkur lako mengula, keppè dak itengen mi podi, oda terpakkè Dèbata kalak sibagdi i Kerajanna."
10:1 Enggo kessa i, ipilih Jesus mo pitu puluh kalak sisiin. Ipasulak mo kalak idi dua kalak sindalanen, joloon laus merdalan lako mengagahi kuta bak bekkas sinaing dahinNa. 10:2 "Enggo mbuè kalohoon peraniin," nina Jesus taba kalak idi, "tapi cituk ngo ukum simerrani. Jadi pido kènè mo bai sidasa perraniin i nai asa ipasulak lako merrani. 10:3 Asa, berkat mo kènè bagèndari, Kupasulak ngo kènè bagè biri-biri mi tengah-tengah biahat. 10:4 Ulang pella embah kènè tagan-tagan barang bagut-bagut barang pè cipatu. Ulang mo pella tendo kè i tengah ndalan lako merrèken salam barang taba isè pè. 10:5 Mula ibengketti kènè sada bages, mènter dokken kènè mo: 'Damè mo mi pengisi bages ènda.' 10:6 Mula lemmo atè perbages idi damè, selloh ngo salam ndènè idi bana. Tapi ukum oda lemmo atèna damè idi, jalo kènè mo balik salam ndènè idi. 10:7 Iani kènè mo sada bages, janah jalo kènè mo barang kadè ikebbasi bai ndènè i sidi, ai patut ngo menjalo upah kalak simahan bahaan. Ulang pella pindah-pindah kènè i sada bages nai mi bages sisada. 10:8 Mula soh kènè mi sada kuta janah ijalo ngo kènè mendè i sidi, pangan kènè mo nihidangkenna i sidi. 10:9 Pemalum kènè mo simersakit nisidi janah dokken kènè mo taba jelma nisidi: Oda ndekkah nèngè, ipecèndek Dèbata mo Kerajanna i tengah-tengah ndènè. 10:10 Tapi mula ibengketti kènè sada kuta, janah oda ijalo kènè i sidi. Laus mo kènè mi dalan mbellen ni kuta idi janah dokken kènè mo: 10:11 'Abu silekket ni tapap-tapap nèhè nami pè kupispisken kami ngo mahan pernèngèten bai ndènè. Tapi èngèt kènè mo, oda ndekkah nèngè roh mo Kerajaen Dèbata i tengah-tengah ndènè!' 10:12 Èngèt mo, mula roh ari kiamat, masèhen ngo atè Dèbata midah kuta Sodom, ulang pada midah kuta idi!" 10:13 "Merjaya mo kono Korazim dekket kono alè Betsaida! Ukum i kuta Tirus dekket Sidon kin ibakin tanda kellengangen sinibakin i tengah-tengahna idi, enggo mo nemmu peselsel kalak nisidi janah mertobat! 10:14 Lotiin mo pengisi Sidon dekket Tirus terrolih masèh atè i ari kiamat, ulang pada kènè. 10:15 Bang kènè pè alè Kapernaum; idokdok kènè ngo ipedates kènè soh mi langit? Oda, tapi ibuang mo kènè mi narakka!" 10:16 Nai nina Jesus mo taba sisinNa, "Barang isè menguèi rana ndènè simenguèi Aku mo i. Barang isè menonja kènè, simenonja Aku mo i. Janah barang isè menonja Aku, simengutus Aku ngo nitonjana isidi." 10:17 Balik mo sisiin sipitu puluh kalak idi ibagasen sampang atè. "Tuhan" nina kalak idi. "Tunduk ngo karinana dekket sètan pè kubakin kami mengasangken gerarMu!" 10:18 Ialoi Jesus mo, "Kuidah ngo ndabuh i langit nai Sètan i bagè pellian. 10:19 Èngèt kènè mo, enggo Kuberrèken kuasa bai ndènè mendeddoh nipè dekket bik, bak kuasa lako mennaluken karinana musuh. Janah kadè poda ndorok mencilakai kènè. 10:20 Tapi ulang pella lolo ukur ndènè kumarna karina tendi jahat i tunduk bai ndènè. Tapi lolo mo kènè, kerna enggo isuratken gerar ndènè i sorga." 10:21 Nderrangna i ma, mersampang atè mo Jesus ibagasen Tendi Perbadia. Idokken Jesus mo, "Ialè Pa, Tuhan ni karina langit dekket tanoh èn! Kudokken melias atè baMu, kerna nirusiakenmu taba kalak simpantas niasè dekket simbages nahu, ipeterar Kono ngo taba kalak sikurang nahu. Ibaing kono ngo karinana i alè Pa, ibas lemmomu nai." 10:22 "Karina enggo ipesakat BapangKu bangKu. Keppè isè ma poda menandai Aku, laènken Bapa i. Janah oda lot menandai Bapa laènken Anak i, kalak nipetandaken Anak i taba Bapa mo kessa." 10:23 Nai itulihken Jesus mo sisinNa, idokken mo pellin bai kalak idi, "Sayurntua mo kènè kumarna niidah ndènè i bagèndari. 10:24 Èngèt kènè mo: Mbuè kalohon ngo nabi dekket raja pè sèkel naing mengidah bagè niidah ndènè i, tapi oda terbaing kalak i mengidah idi. Sèkel kalohon ngo kalak idi mendengkoh bagè sinidengkoh ndènè i, tapi oda terbaing kalak i mendengkohsa." 10:25 Tikan sidari, roh mo cènder sada kalak guru agama lako mengunjuni Jesus, ikusoken mo, "O Guru, kadè ngo sibakinenku asa dapet aku kenggelluhen siamman sumendah idi?" 10:26 Ialoi Jesus mo ia, "Kadè sitersurat ibas Bibèl? Nai bakunè ngo pana pengantusimu terrèngèt idi?" 10:27 Ialoi simettoh patiin idi mo, "Kennah kekellengenmu ngo Tuhan Dèbatamu ibas nasa pusuh peratèenmu, dekket i nasa kessahmu, dekket nasa gegohmu, dekket nasa atè-atèmu, janah kekellengenmu ngo denganmu jelma tosè bagè dirimu." 10:28 "Tuhu ngo pengaloimu i," nina Jesus tabasa, "Baing mo bagidi asa nggelluh kono." 10:29 Tapi naing mo ipènterri guru-guru agama i dirina, ikuso mo, "Isè ngo dengan jelma idi?" 10:30 Ialoi Jesus mo, "Lot mo sada kalak daholi mengencuah i Jerusalem nai mi Jeriko. I tengah ndalan isamun pennamun mo ia. Ipupus mo nasa hartana, janah ipekpekki pella naing-naing matè ia, nai itadingken mo ia bagidi ugahen. 10:31 Nai lot mo tupung memellus sada kalak imam arap i. Iidah imam i ngo nemmu ia, tapi iimbilken mo merdalan janah iterrusken perdalanenna. 10:32 Enggo kessa i, mentas ma mo arap idi sada kalak marga Lewi, iidah ma mo nisamun ndèba i gampar. Ilausken ma mo arap dalan sidèban. 10:33 Tapi lot mo sada kalak Samaria mentas arap i, iidah kessa sitersamun i masèh mo atèna. 10:34 Idapetken mo sitersamun idi, idaisken mo minak dekket anggur mi ugahna, ibaluti mo ugahna i. Idokong mo mi babo kudana janah iembah mo mi permalamen, ikebbaru mo ia isidi. 10:35 Sibarembenkenna ibuat mo dua kèpèng pirak, iberrèken mo taba sidasa bages permalamen idi ninganna idokken, 'Kebbaru mo ia,' nina. 'Mulak kessa aku sikalèn mi sènda, kugarar pè karina kerogiin misidi.' " 10:36 Nai nina Jesus mo mengujungi sukutenna i, "Siapaina ngo dok atèmu kalak i sitellu ndai gabè dengan jelma bai sitersamun idi?" 10:37 Ialoi guru agama idi mo, "Kalak simermasèh atè tabasa idi ngo!" "Mula bagi, laus mo kono mengulaken bagidi!" nina Jesus mbangsa. 10:38 Sinderrang i perdalanen Jesus dekket sisinNa, soh mo kalak i mi sada kuta. Lot mo i kuta i sada kalak daberru mergerar si Marta menjalo kalak i mi bagesna. 10:39 Anggi si Marta imo si Maria. Ukum si Maria dak kundul ngo mendengkohken peddah Jesus. 10:40 Tapi ukum si Marta, dak merkebbas ngo iperluken. Nai idapetken si Marta mo Jesus janah idokken mbangsa, "Tuhan, tengen mo anggingku ènda, ibelli ngo pellin aku merkebbas. Dokken mo asa iurupi aku!" 10:41 Idokken Jesus mo, "O alè Marta, kasa pella bagidi pengkebasimu, 10:42 sada ngo siperluna! Ipilih si Maria ngo simendèna, oda buaten idi bana nai."
11:1 Tikan sikali mersodip mo Jesus i sada bekkas. Pul kessa ia mersodip idi idokken sada kalak sisinNa mo tabasa, "Tuhan, ajari mo kami mersodip, bagè si Johanes iajari ngo sisinna mersodip." 11:2 Nai idokken Jesus mo taba kalak idi, "Mula mersodip kènè, bagèen mo sodip ndènè: 'Ialè Bapa, Pellin sada Ko ngo Dèbata Katerra pè isembah janah ipesangap mo Ko. 11:3 Berrèken mo bai nami sipat ari pangaan siperlu bai nami. 11:4 Ampuni mo dosa-dosa nami, kerna kami pè kuampuni kami ngo gennep jelma simerdosa dempak kami. Janah ulang belli mago kepercayaen nami, tikan roh pengojiin bai nami.' " 11:5 Enggo kessa i, idokken Jesus mo taba sisinNa, "Umpamana laus kènè tengah mberngin mi bages supan ndènè, nai idokken kènè tabasa, 'Oè, pejual aku lebbè giam tellu rotimi, 11:6 kerna rimbaru roh supan-supanku i perdalanen nai, janah enggo i sapongku ia bagèndari, ai oda lot pangaan naing berrènken bana!' 11:7 Mula tah idokken supan-supanmu idi taba kono, 'Ulang dak susahi aku, enggo tergerruk pèntu janah ma pè enggo meddem kami karinana. Oda terbakin aku kèkè lako memerrèken barang kadè bamu.' " 11:8 "Bakunè mo mula bagi?" nina Jesus nola ma. "Tukasi pè oda kèkè ia, janah oda uè merrèken barang kadè pè bamu, tapi kumarna supan-supanmu ngo ia janah mula dak ipido kono pukpuk, kennah ngo kèkè ia janah iberrèken bamu niperlukenmu idi. 11:9 Asa, èngèt kènè mo! Mula ipido kènè, iberrèken ngo bai ndènè; tulusi kènè mo, dapet kènè ngo i, tuktuki kènè mo, ibuka ngo pèntu bai ndènè. 11:10 Kerna menjalo ngo nasa simengido, kennaan ngo kalak simennulusi janah ibuka ngo pèntu bai kalak simenuktuki. 11:11 Isè mo partua merrèken nipè taba dukakna ukum ikan ngo ipido? 11:12 Barang tah bik iberrèken, mula tinaruh ngo ipido? 11:13 Tukasi pè jahat kalohon kènè, ibettoh kènè ngo merrèken simendè taba dukak ndènè, makinsa nola mo Bapa ni sorga idi. Tentu iberrèken ngo tendiNa taba kalak simengido tabaSa!" 11:14 Tikan sikali iusir Jesus mo tendi jahat memmakin pekkak, karuar arap nisellapenna nai. Kessa karuar tendi jahat idi, mènter mengerranai mo nisellapenna idi. Lengang mo karinana jelma simengidahsa, 11:15 tapi dèba mendokken, "Ndorok pè iusir tendi jahat idi, kumarna iberrèken Beelzebul ekuten tendi jahat i ngo kuasa bana." 11:16 Lot ma mo dèba lako mengenggep Jesus. Ipido kalak i mo asa ibaing Jesus sada tanda kellengangen roh i sorga nai. 11:17 Tapi ibettoh Jesus ngo pikiren kalak idi, nai nina mo, "Sada kerajaen, mula masa perselisihen ibagasenna, oda nèngè ndekkah mertahan kerajaen idi, bagi ma ngo mula kalak simpangaan dakdak merrubati samahsa, lako sursar mo idi. 11:18 Bagi ma ngo ibas kerajaen Sibolis, mula merselisih sada pulungen mi pulungen sidèbanna, sursar mo kerajaenna idi. Idokken kènè nola Aku mengusir tendi jahat merkitè kuasa Beelzebul. 11:19 Mula bagidi ngo, merkitè kuasa isè ngo pemparen ndènè mengusir sètan idi? Nai, pemparen ndènè i nola ngo menghukum kènè! 11:20 Ukum Aku, kuusir pè tendi jahat idi, mengasangken Dèbata ngo, oda mengasangken Beelzebul. Janah i mo buktina enggo roh Kerajaen Dèbata mi tengah-tengah ndènè. 11:21 Mula ijaga sada kalak simergegoh janah mersinjata bagesna, sellamat mo karina hartana. 11:22 Tapi mula roh mergegohen asa ia lako mengkubusa, talu ngo ia. Karina sinjatana irampasi janah hartana pè itaban janah ibagi-bagiken. 11:23 Kalak siso kan Aku, alongKu mo ia, janah kalak siso uè mengurupi Aku situhunna mencèdai ulanKu ngo i." 11:24 "Mula tendi jahat enggo karuar bai jelma nai, laus mo ia mengagahi bekkas-bekkas ngkerrah lako mennulusi bekkas mentadi, tapi oda jupasa. Kernana i nina mo ibas atèna, 'Balik mo aku mi bages sienggo kutadingken idi kin!' 11:25 Soh kessa ia misidi, idapet mo enggo mbersih janah merratur bages idi. 11:26 Nai idiloi mo pitu nai tendi jahat, jahaten bana nai. Nai rebbak roh mo kalak idi, gabè merrian ibagasen jelma idi, nai gabè merrohaan mo pengelako jelma i ujungna, mertimbangken i mulana idi." 11:27 Enggo kessa idokken Jesus karinana idi, mongkam mo sada kalak daberru ibas jelma nterrem idi nai, nina mo taba Jesus, "Sayurntua ngo daberru simenubuhken janah sipesusuken kono!" 11:28 Tapi ialoi Jesus mo, "Oda ngo bagi. Kalak simendengkoh kata Dèbata janah mengulaken i ngono sayurntua!" 11:29 Sinderrang irengemmi jelma nterrem idi Jesus, iterrusken Jesus ngo mengerraNa nina mo, "Jahat ngo jelma sisincundut ènda. Ipido kalak i ngo naing iidah tanda kelengangen. Tapi sada poda pacidahen tanda kellengangen idi bana, laènken tanda kellengangen Nabi Jona. 11:30 Bagè Nabi Jona gabè kellengangen Bai Jelma sincundut ènda. 11:31 I ari podi, tikan ihukum Dèbata dunia ènda, cènder ngo Raja Daberru i Selatan nai gabè saksi terrèngèt kesalahen jelma sincundut ènda kerna pellin naing mendengkoh peddah si Salomo simpantasniasè janah bijak idi sambing. Igongken Raja Daberru idi ngo merdalan ndaoh i punca tanoh èn nai. Èngèt kènè mo! Belgahen ngo nisènda bagèndari ulang pada si Salomo! 11:32 Tikan ihukum Dèbata luas dunia ènda, cènder mo pengisi Niniwe gabè saksi terrèngèt kesalahen ndènè, kerna mobah ngo kalak idi ibas dosa-dosana nai tikan idengkoh kalak idi sukuten bai Dèbata nai sinipesoh si Jona. Èngèt mo! Lebbihen dari pada si Jona ngo kalak nisènda èn!" 11:33 "Oda lot kalak memaing lampu nilakatenna mi tongkarang barang menungkupi dekket kendang. Tapi mi perpelitaan ngo ibakin lampu i, asa iidah dèba cuhayana. 11:34 Pellita daging ngo ukum mata. Mula njenger penengenmu, ncihur mo pengakap dagingmu. Tapi ukum ramben ngo penengenmu, gellap bulita mo karina dagingmu. 11:35 Kernana idi mermanat mo kènè, asa ulang gabè mèntep kecihuren sienggo lot bai ndènè i. 11:36 Mula karina dagingmu ibendangi cuhaya, nterrang janah ncihur mo karina badanmu tosè nibendangen lampu idi." 11:37 Enggo kessa pul Jesus mengajari, itenggo sada kalak Parisè mo Jesus mi sapona mangan. Nai laus mo Jesus misidi. 11:38 Lengang ngo Parisè mengidah Jesus lako mangan i oda pella merborih. 11:39 Kernana idi idokken Jesus mo tabasa, "Kecemmalen ndènè Parisè ngo memorih mangkuk dekket piring pellin mbersih perluarna sambing, tapi kum ibagasen dirimu sendiri dom akkal-akkal dekket kejahaten. 11:40 Èo, kènè sikurang ukur, otang Dèbata ngo memaingken bagian perluarna idi dekket bagian perbagasen? 11:41 Silot ibagasen mangkuk dekket piring ndènè idi, imo nemmu kennah iberrè kènè bai kalak sincor. Merkitè bagidi gabè mpanting mo kènè. 11:42 Merjaya mo kènè alè kalak Parisè! Nasa hasil suan-suanen ngo ipersipuluh kènè bai Dèbata, tapi iparduliken kènè poda kebennaren dekket kelleng atè taba Dèbata. Padahal kennah idi ngo ulanken ndènè ninganna mengulaken sidèbanna. 11:43 Merjaya mo kèè alè kalak Parisè. Ipilih kènè ngo kundulen lebbè-lebbè ibages perguruun, janah ikelloloken kènè ngo asa ipesangap dèba kènè i onan. 11:44 Merjaya mo kènè! Kènè mo tosè bagè kuburen siso lot mertanda, ideddoh dèba pè oda terrasa." 11:45 Nai nina sada kalak guru agama mo taba Jesus, "O Guru, merkitè katamu i enggo ihina Kono dekket kami." 11:46 Ialoi Jesus mo, "Merjaya ma ngo bak kènè guru-guru agama pè. Ipido kènè ngo simahal ulanken dekket memaing hatoren-hatoren mbotong keppe kènè sendiri oda uè mengurupi lako mengulaken. 11:47 Merjaya mo kènè! Ipekkadè kènè ngo mendè kuburen nabi-nabi sinibunuh empung ndènè. 11:48 Merkitè bagidi ikesampangken kènè ngo pemmahan empung ndènè i. Ai kalak i ngo memmunuh nabi-nabi, nai kènè mo memahan tugu i babona. 11:49 Kumarna i ngo asa idokken Dèbata, 'Kupasulak ngo nabi-nabi dekket rasul; mendahi kalak idi, gabè idersa janah ibunuh kalak idi ngo!' 11:50 Jadi gabè mersimpetta mo daroh nabi-nabi sinibunuh idi kessa nai tembem dunia èn taba jelma sisincundut ènda. 11:51 Mungkah terbunuh si Abel soh mi terbunuh nola si Zakharia i kellang-kellang kuburen dekket bilik simbadia Bages Dèbata. Percaya mo kènè, karinana idi sisincundut ènda mo gemongken. 11:52 Merjaya mo kènè guru-guru agama. Bai ndènè ngo anak konci perbinettohen tapi kènè sendiri oda uè mbengket mi bagasen lako mengayaki perbinettohen idi. Keppè ihalang-halangi kè ngo kalak sinaing mbengket mi bagessen!" 11:53 Itadingken Jesus kessa bekkas idi, mulai mo guru-guru agama dekket Parisè i mellaga janah mengalo Jesus. Nai ienggep kalak i mo Ia merkitè-kitè kuso-kuso, 11:54 asa ndorok kalak i menangkupsa merkitè rana niruapkenNa.
12:1 Merribu-ribu kalak jelma mersessak-sessak, sanga dèba mersideddohen nèhè. Tikanna rengem i jelma nterrem i, idokken Jesus mo taba sisinNa, "Mermanat mo kènè midah Parisè, artiNa, imo terrèngèt pengelako perbuah ringadar. 12:2 Barang kadè itutup-tutupi kennah taridah, janah barang kadè irusiaken kennah terbettoh. 12:3 Barang kadè iranaken kènè tikan berngin, kennah terdengkoh tikan mahar, janah barang kadè ikosikken kènè mi pènggel jelma i bilik, kennah isurakken i bubung sapo nai." 12:4 "Èngèt kènè mo alè supan-supanKu! Ulang mo kebbiari kènè sindorok memmunuh daging, ai laènkenna idi oda ndorok nèngè terbaingsa. 12:5 Selloh mo Kutuduhken bamu isè sipatut kebbiaren ndènè. Kebbiari kènè mo Dèbata! Kerna enggo kessa ibunuh, merkuasa dèng ngo Ia membuang mi narakka! Èngèt kènè mo, Ia mo kennah sikebbiaren ndènè! 12:6 Otang idèa dèba ngo nina lima perrik dua sèn? Tapi tukasi pè bagi, sada perrik pè oda nung ilupaken Dèbata. 12:7 Salangken buk ni takal ndènè idi enggo ibilang Dèbata karinana, kernana idi, ulang kènè mbiar; ai mahargaan dèng ngo kènè asa perrik!" 12:8 "Èngèt kènè mo selloh: Barang isè mengaku sisinKu ia nina i lebbè sinterrem, ia pè iakkui Anak Jelma ma mo i hadeppen malaèkat Dèbata. 12:9 Tapi barang isè oda mengakui Aku i hadeppen sinterrem janah oda menandai Aku, ia pè oda ma mo iakkui Anak Jelma i hadeppen malaèkat Dèbata. 12:10 Barang isè mendokken rana mengalo Anak Jelma, ndorok dèng ngo iampuni; tapi barang isè medokken ranana mengalo Tendi Perbadia, oda nèngè terampuni ia. 12:11 Mula iembah dèba kènè mi bages perguruun lako iadili i hadeppen pemerèntah barang perkuasa, ulang pella kelsohen kènè terrèngèt membèla diri ndènè bak barang kadè sidokkenen ndènè. 12:12 Ai barang kadè naing kennah dokonen ndènè, mènter iajarken Tendi Perbadia ngo bai ndènè i tikkina." 12:13 Nai lot mo sada kalak ibas jelma nterrem idi nai mendokken taba Jesus, "O Guru, dokken mo taba denganku sibeltek asa kubagi kami harta tading-tadingen bapa nami." 12:14 Ialoi Jesus mo, "Isè ngo pebangkitken Aku gabè penimbang barang pembagi harta tading-tadingen ndènè sidua?" 12:15 Janah idokken Jesus mo taba karina nisidi, "Mermanat mo kènè janah jaga kènè mo diri ndènè asa ulang gabè jelma nahaka kènè. Tukasi pè mbuè harta, oda ngo harta i ukuren nggelluhna." 12:16 Nai iranaken Jesus mo bai kalak i umpama èn, "Lot mo sada kalak sibèak. Mbellang ngo tanohna janah nggabur, nai mbuè kalohon mo hasilna. 12:17 Mersura-sura mo sibèak i, 'Bakunè mo ndia kubaing bagèndari. Oda cukup nèngè bekkas memennep karina hasil tanohku idi.' 12:18 Nai mersura-sura nola mo ia, janah nina ibas ukurna, 'O lot keppè akkal, kurontas mo keppè langgihku i, asa kubahan nola terbelgahen, asa isidi mo kupennep hasil tanohku bak karinana hartangku idi. 12:19 Nai kudokken mo mi diringku, Mersennang-sennang mo kono, ai enggo mbuè hartamu janah oda nèngè kerri barang piga-piga tahun. Ulang pella kelsohen nèngè kono! Mangan mènum mo kono, asa sennang nggelluhmu!' 12:20 Tapi idokken Dèbata mo tabasa, 'Èo, kono alè moto! Berngin èn mo kubuat kessahmu! Gabè milik isè nola mo hartamu sienggo nipennepmu idi?' 12:21 Bagidi mo ujungna kalak sipepulungken harta mi dirina, mula oda ia merharta i hadeppen Dèbata." 12:22 Nai idokken Jesus mo taba sisinNa, "Kumarna bagi ngo asa Kudokken bai ndènè, ulang kelsohen kènè i nggelluh ndènè mendok, 'Kadè mo pangaan nami, kadè oles nami.' 12:23 Ai perluun ngo nggelluh asa pangaan, janah perluun ngo daging asa perrolessen. 12:24 Perdatèn kènè mo manuk-manuk kak i! Oda ngo mardang kalak i, oda merrani, oda ma lot kebben barang langgihna, tapi dak ipehèdu-hèdu Dèbata ngo kalak idi. Lebbih mahargaan dèng ngo kènè asa manuk-manuk! 12:25 Isè mo kènè ndorok menambahi umurna giam siasta merkitèken kelsohen? 12:26 Mula bagidi mo citukna keppè oda terbahanken kènè, kasa mo pella ikelsohken kènè sidèban? 12:27 Perdatèn kènè mo bunga pancur simertubuhen i juma-juma idi: oda nung mengula ia, janah oda nung mertennun. Kudokken mo bai ndènè, salangken si Salomo sendiri tikan kebungaren kerajanna, oda nung memakkè bagè mendèna bunga-bunga idi. 12:28 Mula bagidi mo keppè bunga-bunga i mendèna ipejèngkar Dèbata ari èn, tupa baremben nola enggo iporoni, makinsa nola mo kènè alè sikurang percaya! 12:29 Kerna nai, ulang mo kelsohen kènè kumarna pangaan mada lot barang pè ènumen ndènè. 12:30 Kalak siso menandai Dèbata ngo mengkelsohken janah menarihken sibagidi. Ai ibettoh Bapa ndènè ni sorga idi ngo siperlu bai ndènè. 12:31 Tapi kennah lebbèen mo tulusi kènè Kerajaen Dèbata, nai iberrèken mo bai ndènè sidèbanna idi." 12:32 "Ulang kènè mbiar alè pulungen sicituk! Ai lemmo ngo atè Dèbata merrèken pasu-pasu bak PemerèntahenNa. 12:33 Dèaken mo karina ugasenmu, nai berrèken mo karina tokorna bai kalak sincor. Pellias mo bamu dompèt merandal siso nggèut ncèda, tulusi kènè mo harta Sorga siso uè mumuk, siso terjolmiten kalak penangko janah oda terpangan ngitngit. 12:34 Ai barang idikè hartamu, misidi ngo dakdak ukurmu." 12:35 "Tetap mo kènè merjaga-jaga. Kennah tetap mo memmes pakèen ndènè janah lakat lampu ndènè, 12:36 tosè bagè naposo tikan memèma-mèma indukna balik merbayo. Mula roh kessa molih indukna idi janah ituktuk pèntu, enggo memèma ia lako memuka pèntu. 12:37 Soh mo labana naposo mula idapet indukna ia tetap memèma. Èngèt kènè mo: Dokonen indukna i mo tabasa asa kundul naposo i, janah indukna i mengkebasi bana. 12:38 Soh mo labana naposo mula idapet indukna ia dak tong mèma, tukasi pè roh tengah mberngin barang lebbih isidi nai. 12:39 Èngèt mo èn! Mula ibettoh sidasa bages idi ndigan roh penangko, tentu ndungo ngo ia merjaga-jaga asa ulang mbengket penangko idi mi sapona. 12:40 Kerna kènè pè, kennah ngo dak kebbas mèma, ai roh mo Anak Jelma ibas ketika siso pengharapen ndènè." 12:41 Nai gabè idokken si Petrus mo, "Tuhan, bai nami ngo idokken Kono codiin ndai barang tah dekket ngo taba karina kalak?" 12:42 Ialoi Jesus mo, "Isè ngo naposo siburju idi? Imo nipebangkit indukna gabè ekuten janah memerrè bekkel taba naposo sidèban, tupung tikki sienggo itentuken kin. 12:43 Sayurntua mo naposo simengulaken bagidi idapet indukna tikan roh ia. 12:44 Percaya mo kènè: Ai gabè ipesakat indukna i mo karina hartana ijamoti naposona idi. 12:45 Tapi mula nina naposo i ibas atèna, ah, ndekkah dèng ngo tupèh asa balik indukku; nai ibet-betti mo naposo anak laki dekket daberru, ninganna mangan mènum mo ia janah mabuk-mabuk, 12:46 nai, roh mo indukna ibas siso nibettohna, kenna kata mo ia janah itellohi indukna, nai ibakin mo naposo i rebbakken dekket kalak siso menguèi Dèbata. 12:47 Asa, naposo simemettoh nipergeddo indukna, keppè oda iulaken, gabè makap tangan mo naposo i ibakin indukna. 12:48 Tapi naposo simemettoh nipergeddo indukna, nai iulaken sipincangen; aturen makap-tangan kin pè ia, gabè hanjar ngo ipesèngèt indukna ia. Ai mbuè ngo itunggu bai kalak sienggo mbuè menjalo. Janah kalak sienggo kettoken ibas simbuè, mbuè ma ngo tungguun bana nai." 12:49 "Roh Aku mi tanoh èn lako merembah api asa kemessengen tanoh ènda. Mendè kalohon ngo mula enggo merjollah-jollah api idi! 12:50 Tapi lot dèng sitahanen mpersah sinaing kennah Kubellus. Janah bulisah ngo Aku, mula makdèng saut idi. 12:51 Tah idok kènè ngo roh Aku mi tanoh èn lako merembah damè? Kudokken mo bai ndènè, oda ngo merembahken damè, tapi merembah perraloon ngo. 12:52 Mulai bagèndari nai, masa mo perraloon i tengah-tengah lima kalak sidasa bages, imo tellu kalak mengalo dua, barang dua mengalo tellu kalak. 12:53 Bapana mengalo anakna, janah anakna mengalo bapana. Inangna mengalo berruna, berruna mengalo inangna. Simatuana berru mengalu purmaènna, janah permaènna mengalo simatuana berru." 12:54 Idokken Jesus nola mo taba jelma nterrem i, "Mula iidah kènè hembun naik mi dates i kesunduten, mènter idokken kènè ngo, 'naing roh mo udan.' Janah tuhu ngo roh udan. 12:55 Mula iakapken kènè menempul angin i selatan nai (Mula idah kènè mbara langit tikan ciboon), mènter idokken kènè mo, 'Leggo mo ari.' Janah tuhu ngo leggo! 12:56 Ibettoh kènè ngo tanda-tanda ni langit idi bak i tanoh ènda. Kasa oda ibettoh kènè tanda-tanda jaman bagèndari?" 12:57 "Kasa oda ibettoh kènè bakunè sibennar? 12:58 Mula lot kalak mengaduken kènè mi hakim, merusaha mo kènè merdamè dekketsa nderrang i tengah ndalan dèng. Kum oda bagi, iembah mo kènè mi hakim, janah ipesakat hakim mo kènè mi polisi, nai gabè ikurungken polisi nola mo kènè. 12:59 Kudokken mo bai ndènè, oda karuar kènè i sidi nai, mula mak lebbè selangsaè utang ndènè idi karinana."
13:1 Tikanna i, roh mo kalak memagahken mendahi Jesus terrèngèt kalak Galilea sinibunuh si Latus, nderrang memèlè Dèbata kalak idi. 13:2 Mendengkoh berrita idi, idokken Jesus mo, "Idokdok kènè ngo merdosaan sinibunuh idi ulang pada kalak Galilea sidèbanna? 13:3 O Oda! Tapi èngèt kènè mo, mula oda mertobat kènè ibas dosa-dosa ndènè nai bagè kalak i, matè ngo kènè karina. 13:4 Bagi ma ngo sisipuluh dua kalak matè itinggang palas-palas i gembar Siloam? Idokdok kènè ngo belgahen dosana ulang pada kalak simerrian i Jerusalem? 13:5 Oda ngo, tapi èngèt kènè mo, mula oda mertobat kènè, matè ma ngo kènè bagè kalak idi." 13:6 Enggo kessa i, isukutken Jesus mo codiin taba kalak idi: "Lot mo kayu ara ibas pekken sada kalak. Idahi sidasa i mo kayuara i menulusi buahna, tapi singkabuah poda jumpasa. 13:7 Nai idokken mo taba tukang pekken, 'Tengen mo enggo tellu tahun dekkahna dakdak roh aku misènda naing memmuat buah kayuara idi, tapi singkabuah poda lot. Kernana i, tabah kènè mo batangna idi. Man kadè mo i pegelluhen mula sia-sia sambing ngo!' 13:8 Tapi ialoi tukang pekken idi mo, 'Tuan, belli mo lebbè nggelluh isidi kayuara idi giamken sitahun nai, asa kukurak lebbè kuliling merparik janah kupupuki. 13:9 Tah bakunè nggèut ia merbuah tahun siroh. Tapi ukum oda bagidi, nai ipè asa ipasulak Tuan i lako menabah.' " 13:10 Ibagasen sidari, tupung ari Sabat, mengajar mo Jesus i bages perguruun. 13:11 Lot mo isidi sada daberru enggo sipuluh ualuh tahun dekkahna mersakit kumarna iiani tendi jahat ia. 13:12 Iidah Jesus kessa daberru i, idilo mo, "O nangè, malum mo iakap kono sakitmu idi!" 13:13 Nai iampèken mo tanganNa mi daberru i, nai mènter ndorok mo cènder daberru i gejapkenna i janah ipoji mo Dèbata. 13:14 Mellaga mo pengendeng bages perguruun i kumarna ipemalum Jesus sisakiten tupung ari Sabat. Nina mo taba jelma nisidi, "Lot ngo ennem ari bekkasta mengula; sidekkah ennem ari i mo kènè roh mertambar, ulang tupung ari Sabat!" 13:15 Ialoi Tuhan i mo pengendeng bages perguruun i, "Èo, kènè perbuah ringadar! Otang karina ngo kè paluahken lembu barang pè kalodè tikan ari Sabat janah mengiring mi ruar lako pesoburken. 13:16 Bagèndari pè, isèn lot daberru pemparen si Abraham enggo sipuluh ualuh tahun dekkahna ièkèti Sibolis. Oda ngo ndorok iosari èkètna idi tikan ari Sabat?" 13:17 Gabè termèla mo simengalo rana Jesus idi. Tapi ukum sidèbanna idi lolo ngo mengidah karina kellengangen nibakin Jesus idi. 13:18 Nai idokken Jesus mo, "Tosè mi kadè mo Kerajaen Dèbata janah mi kadè mo codinna Kubakin? 13:19 Codi ngo idi bagè buah arum, ibuat sada kalak menuanken mi jumana. Turah mo i janah ndeppur mbellen bagè kayu, nai merrasar mo manuk-manuk simerkabangen ibas dahan-dahanna." 13:20 Idokken Jesus nola ma, "Mi kadè mo ndia kucodiken Kerajaen Dèbata? 13:21 Codi ngo Kerajaen Dèbata bagè ragi sinicampurken mi empat puluh sellup nditak, nai igaru-garu mo idi sampè kambang." 13:22 Lako laus mi Jerusalem, idalani Jesus mo kuta-kuta dekket sosor ninganna mengajari. 13:23 Nai lot mo kalak mengkuso tabaSa, "Guru, cituk ngo kessa jelma ipaluah ndia?" Ialoi Jesus mo, 13:24 "Kennah usahaken kènè mo mbengket arap pèntu sempit. Kudokken mo bai ndènè: Mbuè ngo kalak merrusaha naing masuk arap pèntu i, tapi oda ndorok. 13:25 Ai mula ndungo kessa sidasa bages idi igerruk mo pèntu i. Nai cènder mo kènè i ruar, jadi mulai mo ituktuki kènè, ninganna mendiloken, 'Tuan, buka mo pèntu èn, asa mbengket kami!' Nai ialoi Tuan i mo, 'Oda kubettoh tah idikè nai roh ndènè.' 13:26 Nai idokken kènè mo, 'Enggo rebbak mangan mènum kènè dekket kami, janah enggo ma ngo mengajari kènè i dalan mi kuta nami!' 13:27 Tapi idokken Tuan i nola mo, 'Oda kubettoh barang idikè nai kènè roh. Laus mo kènè isèn nai, kènè simengulaken kejahaten!' 13:28 Asa, sinderrang iidah kènè kessa si Abraham, si Isak dekket si Jakob bak karinana nabi-nabi mersennang-sennang i Kerajaen Dèbata, gabè tangis mo kènè janah susah kalohon kumarna iusir kènè i sidi nai! 13:29 Keppèken merrohen mo kalak i kebincaren nai dekket i kesunduten nai, i utara nai bak i selatan nai, asa mersennang-sennang i Kerajaen Dèbata. 13:30 Situhunna lot ngo kalak perpodi kin gabè perlebbè, janah perlebbè kin gabè perpodi." 13:31 Tikanna idi ma, lot mo roh kalak Parisè mendahi Jesus, nina mo, "Laus mo kono isèn nai mi bekkas sidèban, ai naing ibunuh si Herodes ngo Kono." 13:32 Ialoi Jesus mo, "Laus mo kono bagahken mo taba jelma siso merguna i, 'Ari èn dekket baremben, pemalumken sisakiten ngo Aku, tapi i ari petelluken, isidi mo mendungi ulanKu.' 13:33 Ukum ari èn, baremben dekket kaduan, kennah Kuterusken ngo perdalanenKu, ai kennah i Jerusalem ngo nabi ibunuh. 13:34 Jerusalem, Jerusalem! Nabi-nabi ibunuh kono janah ibentiri kono dekket batu, sinipasulak mendahi kono sampè matè! Enggo nggati naing kukeruduk pengisimidi bagè pengkeruduk inang manuk mi terruh kabengna, tapi oda uè kono! 13:35 Èngèt mo, gabè tading mo bagesmu i janah melongo. Kudokken mo bamu, mulai bagèndari oda idahèn ndènè nè Aku, mèma idokken kènè, 'Nipasu-pasu mo siroh merkitè gerar ni Tuhan i.' "
14:1 Tikan sikali ari Sabat, laus mo Jesus mangan mi bages sada kalak Parisè. Karina nisidi dak memperatèken Jesus. 14:2 Nai, roh mo sada kalak sipuru-mbèangen cènder i lebbèna. 14:3 Nai ikuso Jesus mo guru-guru agama dekket Parisè silot isidi, nina, "Ndorok ngo pejuahken kalak simersakit tupung ari Sabat mengèkutken hatoren agamanta barang tah oda ndorok?" 14:4 Sip ngo guru-guru agama bak kalak Parisè i. Nai idilo Jesus mo kalak i, ipemalum mo janah ipemolih. 14:5 Enggo kessa i, idokken Jesus mo taba kalak idi, "Mula ndabuh dukak ndènè barang lembu ndènè mi geddung tupung ari Sabat, otang mènter iteggu kènè ngo dukak ndènè i barang pè lembu i mi darat, tukasi pè ari Sabat?" 14:6 Tapi sada kalak poda ndorok mengaloi Jesus terrèngèt misi. 14:7 Kumarna idatèken Jesus lot tamuè-tamuè memmilih bekkas simendèna janah simetunggungna, gabè ibakin mo sada codiin taba kalak idi karina. 14:8 "Mula idilo dèba kènè mi sada pèsta, ulang mènter kundul kènè mi bekkas simendèna barang simetunggungna. Tah bakunè lot idilo sukut i kalak lebbih mersangap bamu nai, 14:9 gabè roh nola sukut idi mendokken bamu, 'Sentabi! Berrè lebbè bekkas idi bana.' Gabè mèla kalohoon iakap kono laus isidi nai janah kundul nola kan podi kalohon. 14:10 Asa, mula idilo dèba kènè, doliin mo kènè kundul i podi kalohon, nai mula roh sukut idi mendokken taba kono, 'Mi takal bellagen ènda mo kono kundul' nina. Nai gabè mersangap mo kono i hadeppen karinana tamuè idi. 14:11 Ai barang isè pedatesken dirina gabè peterruhen ngo i, janah barang isè pecerrepken dirina, gabè pedatessen ngo." 14:12 Enggo kessa bagidi, idokken Jesus mo taba sidasa bages idi, "Mula itenggo kono kalak mangan barang mènum pè, ulang mo tenggo sincelketmu barang supan-supanmu, barang denganmu sakuta sibèak. Kerna ibales nola ngo i merkitè menenggo kono, merkitè bagidi enggo ijalo kono balesna. 14:13 Tapi mula ibaing kono pèsta dilo mo kalak sincoor, simertikas, kalak sikèpang, bagi ma sipètung. 14:14 Nai gabè terolih pasu-pasu mo kono, kerna oda terbales kalak i simendè nibakinmi. Tapi karina simerandal nibakimu idi balessen Dèbata mo i ibas ari perkèkèen simbelgah i." 14:15 Mendengkoh rana Jesus idi, lot mo sada kalak mendokken ranana tikan rebbak mangan idi, nina, "Sayurntua mo kalak sinidilo mi pèsta i Kerajaen Dèbata!" 14:16 Tapi nina Jesus mo taba kalak i, "Tikan sikali, lot mo sada kalak merpèsta, mbuè ngo kalak idilo mi pèsta idi. 14:17 Tikan enggo dapet mata pèsta idi, ipasulak mo naposona mendilo undangen memagahken, 'Roh mo kènè ai enggo hantar karina!' 14:18 Tapi karina ngo kalak i mercudalihen. Siperlebbè mendokken bagèen, 'Rimbaru dèng kutokor juma, oda terbakin aku mak kutongkir juma idi. Raja kono, ondiken aku.' 14:19 Sidèbanna mendokken, 'Rimbaru dèng kutokor lima rabaan lembu penarik, naing lako mengurus i mo aku. Raja ko, ondiken aku.' 14:20 Sidèbanna nola mendokken, 'Rimbaru jejap dèng aku, jadi oda terbakin aku roh.' 14:21 Molih mo naposo pasulaken i, ibagahken mo taba indukna. Mellaga mo Tuan idi, nina mo taba naposona i, 'Ndor mo kono laus mi kasèan-kasèan dekket balè ni kuta, arahken mo kalak sincoor, nitempuk sigading, sipètung dekket kalak sipangpangen.' 14:22 Jadi nina naposo idi mo, 'Tuan, enggo saut nidokkenmi, tapi lumbang dèng ngo.' 14:23 Gabè idokken sukut i mo taba naposona, 'Laus mo kènè mi dalan-dalan kètèk kebasbasen, sapo juma i ruar kuta èn, dokken kènè mo kalak idi asa dom bagesku. 14:24 Èngèt mo! Sada poda ndorok kalak sienggo niundang idi kin kipangan pangaan pèsta sienggo hantar èn!' " 14:25 Mbuè ngo kalak rebbak merdalan dekket Jesus. Jadi tumulih mo Jesus, idokken mo taba kalak idi, 14:26 "Barang isè naing mengèkutken Aku, tapi kellengen atèna bai inangna, bapana, sinibagesna, dukak-dukakna, kaka-anggina dekket turangna, bang dirina sendiri pè, oda ndorok ia mengèkutken Aku. 14:27 Kalak siso uè menggong simpersuk lako mengèkutken Aku, oda ndorok ia gabè sisinKu. 14:28 Ai barang isè naing memajek palas-palas, tentu lebbè kundul ia lako mengètong siperluna, asa ibettoh tah cukup ngo riarna lako memahan palas-palas idi barang oda. 14:29 Mula oda ngo cukup riarna, keppè enggo ipajek batu cendina, tentu itertabai dèba mo ia. 14:30 Gabè idokken dèba mo, 'Èah, enggo imulai kalak èn memajek, keppè oda lot pul!' 14:31 Mula sada kalak raja lot sipuluh ribu tenterrana lako mergeraha mengalo raja sidèban lot duapuluh ribu tenterrana, bakunè pè kennah kundul ia lebbè merpikir tah terralosa ma musuhna idi. 14:32 Mula ibettoh ngo oda terralosa, tentu nderrang ndaoh dèng musuhna idi, ipasulak mo utusenna lako mengido asa merdamè." 14:33 Perpodi idokken Jesus mo, "Bagi ma ngo bang kènè pè, isè poda ndorok kènè gabè sisinKu ukum oda tertadingkensa karinana i." 14:34 "Merguna kalohon ngo sira. Tapi mula gabè ndèngap sira i, bakunè nola mo pemasinken? 14:35 Mikè poda lot nèngè gunana. Mi juma ningin, oda kadè lapatenna, mahan pupuk pè, oda lot datina. Isampakken mo i. Kènè simerpènggel merbineggè, radumi kènè mo i."
15:1 Tikan sidari, merrohen mo mbuè pertunggu belasting dekket kalak siso kasèa dokatè sinterrem, mi gembar Jesus lako mendengkohken katana. 15:2 Jadi ngutnguten mo kalak Parisè bak guru-guru agama, nina mo, "Nong alè nang, idengani kalak èn ngo jelma siso kasèa, janah rebbak mangan ia dekket kalak idi!" 15:3 Kernana i, isukutken Jesus mo codiin bai kalak idi. 15:4 "Umpamana lot biri-biri ndènè serratus, nai mbalang mo sada -- bakunè ngo ndia bakinenna? Tentu itadingken mo lebbè biri-biri sisibah-puluh sibah idi i jampalen, nai laus mo ia menulusi simbalang i sampè jumpasa. 15:5 Jumpasa kessa biri-biri sisada i, iampèken mo biri-biri i mi barana kumarna sampang atèna. 15:6 Ipersan mo balik. Jadi enggo kessa soh ia, idilo mo supan-supanna dekket denganna sakuta, nina mo, 'Lolo kalohon ngo ukurku kumara enggo dapet aku biri-biri simbalang idi. Kernana idi, roh mo kènè asa sigohon-gohoni!' 15:7 Kudokken mo bai ndènè, bagidi ngo bang i sorga i pè! Loloon ngo Tuhan i mengidah sada kalak perdosa sienggo mertobat, ulang pada mengidah sisibah puluh sibah kalak sibennar siso pella mertobat." 15:8 "Barang, ukum sada kalak daberru merkèpèng sipuluh riar pirak, nai mbalang mo sada riar -- bakunè mo ndia bakinenna? Ilakati mo lampu, isapu mo bagesna lako menulusi riarna simbalang idi, sampè dapet. 15:9 Enggo kessa dapetsa, idiloi mo supan-supanna dekket dengan balengna, nina mo, "Sampang kalohoon atèngku kerna enggo dapet riarku simbalang idi. Roh mo kènè asa rebbak mengkeloloken kita!" 15:10 Kudokken mo bai ndènè: Bagi ma ngo malaèkat-malaèkat Dèbata idi, lolo kalohoon kalak idi mula lot sada kalak perjahat gabè mertobat i dosa-dosana nai!" 15:11 Idokken Jesus dèng ma mo, "Lot mo sada kalak pertua, dua anakna. 15:12 Nai idokken sikèdèken i mo taba bapana, 'O bapa, berrèken mo bagèndari bangku titik bagianku ibas hartanta idi nai.' Nai ibagiken bapana i mo harta i, bai anakna sidua kalak i. 15:13 Oda ndekkah kessa bagidi, idèa sikèdèken i mo harta bagianna i karina, nai laus mo ia mi nagerri ndaoh. Iembah mo karinana riarna idi, isidi mo ihambur-hamburken riarna i mengèkutken cubellekna. 15:14 Kerri kessa karinana kèpèngna idi, masa mo i nagerri idi lèhè mbellen, nai gabè mpersuk mo iakap. 15:15 Karèjo mo ia taba kalak nisidi, idokken mo ia mermakan babi i juma. 15:16 Isè poda lot memerrèken barang kadè tabasa, mula pè nemmu koling gadong nakan babi idi iberrè, enggo mo lolo ukurna kipangan. 15:17 Nai satdar mo ia, nina mo ibagasen pikirenna, 'Mbuè ngo jelma igaji bapa, janah oda kurangen pangaan, keppèken aku enggo naing matè mada mangan! 15:18 Kèkè mo aku, laus mo aku mendahi bapa, asa kudokken tabasa: Ialè Pa, enggo merdosa aku mendahi Dèbata dekket taba Kono. 15:19 Oda patut nèngè aku dokkenenMu dukakmu. Pekamet mo aku bagè sada kalak sigajinMu idi.' 15:20 Nai kèkè mo ia, balik mo ia mendahi bapana. Tapi ndaoh dèng i sapo nai, enggo mo keppè itatap bapana idi ia. Masèh kalohon mo atè bapana i midahsa, gabè lojang mo ia menimbaki, nai ikaol mo anakna i janah isanggoh. 15:21 'O bapa,' nina anakna i taba bapana. 'Enggo merdosa aku taba Dèbata dekket taba Kono pè. Oda patut nè aku dokkenkenmu anakMu.' 15:22 Tapi idilo bapana i mo naposona, nina mo, 'Kettu kènè mo mengaleng gedda simendèna, asa salin kènè mo ia. Baing mo cincin mi jari-jarina, janah sipatu mi nèhèna. 15:23 Enggo kessa i, alèng kènè mo anak lembu singgomokna, sembellih kènè mo, asa igohon-gohoni ia. 15:24 Kerna enggo kin ngo matè anakku èn, bagèndari nggelluh nola, enggo kin ngo mago ia, bagèndari enggo balik.' Jadi imulai kalak idi mo menggohon-gohoni anak idi. 15:25 Sinderrang bagidi, kum anakna situaan i juma ngo. Tikan mulak ia mi kuta janah enggo kessa ndessing mi sapona, idengkoh mo sora genderrang merkata sipitu dekket oang-oang merdengan tumatak. 15:26 Idilo mo sada kalak naposo, ikuso mo, 'Merkadè pana i rumah?' 15:27 Ialoi naposo i mo, 'Enggo balik anggimu! Enggo isèat lembu singgomokna, kumarna enggo balik anakna idi merkinijuah!' 15:28 Mellaga mo situaan i, oda uè mbengket mi bages. Nai idapetken bapana mo ia mi ruar mengendik-ngendiksa. 15:29 Tapi nina mo taba bapana i, 'Mertahun-tahun mo dekkahna aku mengula rebbak dekket kono pa, oda pennah kualo katamu. Kadè ngo enggo iberrèken Kono bangku? Sada kambing poda nung iberrèken bapa, asa merpèsta aku dekket dengan-denganku! 15:30 Keppèken anakmu sisada i enggo ikerriken ia karina hartamu rebbak dekket daberru sibabijalang, tapi roh kessa ia mènter isembellih kono anak lembu simendèna lako bana!' 15:31 Ialoi bapana idi mo, 'O alè pa, anakku, ukum kono menettap ngo kita rebbak i sènda. Karina silot bangku idi, kono ngo sidasa i. 15:32 Tapi ukum bagèndari, patut ngo kita menggohon-gohoni merdengan sampang atè, ai sienggo matè ngo anggimi, keppè nggelluh nola, sienggo mago ngo ia, keppè enggo balik bagèndari.' "
16:1 Nai idokken Jesus mo taba sisinNa, "Lot mo sada kalak sikaya joong, janah lot mo sada kalak kepala perkèpèngen mengurus hartana. Terbertik mo taba sikaya joong idi magahken enggo ihambur-hamburken kepala perkèpèngen idi riarna. 16:2 Jadi idilo mo ia, nina mo mbangsa, 'Bakunè ngo i, sikudengkoh terrèngèt kono? Bagèndari pacidah mo bangku perrètongen hartangu karinana. Mulai bagèndari, oda ndorok nèngè kono kesakaten hartangku.' 16:3 Nai merpikir-pikir mo kesakaten hartana idi, 'Kadè mo ndia kubaing bagèndari? Kerna indukku naing petadiken aku. Memangkur ningin, oda lot gegohku, mengido-ngido mèla diri. 16:4 Oo, bagèn mo keppè; mula iperadiken aku, kennah mbuè mo denganku singgèut menjalo aku i bagesna!' 16:5 Idilo kesakaten riar idi mo kalak simerutang taba indukna sada-sada. Nina mo taba siperlebbè, 'Sadikè utangmu taba indukku?' 16:6 'Seratus goci minak,' nina mengaloi. Nai idokken pugabè idi mo mbangsa, 'Na, surat utangmu èn. Kundul mo kono isidi, ndor mo suratken lima puluh.' 16:7 Kessa i, idokken mo taba sipeduaken, 'Kono sadikè utangMu?' 'Seratus pikkul pagè ngo,' nina. Nai idokken kesakaten riar idi mo mbangsa, 'Na surat utangmi. Suratken mo ualuh puluh.' 16:8 Nai ipoji induk sipesakatken riar idi ngo akkal kepala perkèpèngen siso bujur i; pandèen ngo jelma ni dunia èn mengatur urusenna sendiri ulang pada anak kecihuren i." 16:9 Nai nina Jesus nola mo, "Dengkohken kènè mo! Pakkè kènè mo harta dunia èn lako menulusi supan-supan ndènè, asa mula mak lot nèngè harta dunia ènda, terjalo mo kènè mi bekkas amman-sumendah idi. 16:10 Barang isè kettoken ibas sicituk, kettoken ma mo ia bang i simbuè pe. Tapi barang ise oda kettoken ibas sicituk oda ma kettoken ibas simbuè pe. 16:11 Mula terrèngèt harta dunia èn, oda nèngè kettoken ukum kènè, nai isè mo tok bai ndènè terrèngèt harta sorga i? 16:12 Janah mula oda kettoken kènè terrèngèt harta ni dèba, isè mo uè memerrèken bai ndènè barang kadè lako milik ndènè kin? 16:13 Oda teruèen sada naposo dua induk; ceggo ngo atèna midah sisada, tapi ikekelengi ngo sisada nai. Barang, iuèi ngono sisada, tapi oda iparduliken sisada nai. Oda terulaken jelma rebakken menguèi Dèbata dekket harta." 16:14 Karinana rana sinidokken Jesus idi ibeggè kalak Parisè ngo. Nai gabè itertabai kalak idi mo Jesus, kerna karina kalak idi mbara ngo matana midah kèpèng. 16:15 Tapi idokken Jesus mo mendahi kalak idi, "Dokatè ndènè ngo bennar kènè i hadeppen sinterrem, tapi ibettoh Dèbata ngo ukum perukuren ndènè. Simaharga dokatè jelma, oda kasèa i bai Dèbata. 16:16 Hatoren-hatoren Agama, pati-patiin niberrèken si Musa dekket peddah silot ibas bukku nabi-nabi, menettap ngo i soh mi tikki si Johanes Perridiken. Mulai isidi nai, dak isukutken ngo Sukuten Simerandal terrèngèt Kerajaen Dèbata. Janah dak igegohken dèba ngo asa masuk ia mi sidi. 16:17 Murahen ngo ncèda langit bak tanoh ulang pada sada surat ibas hatoren-hatoren niberrèken Dèbata idi nai gabè sondat. 16:18 Merlangkah julu meddem ngo barang isè menirangken sinibagesna, mula kabin nola ia dekket daberru sidèban. Merlangkah julu meddem ma ngo anak laki simengkabini daberru sisirang idi." 16:19 "Lot mo sada kalak sibèak dak merpakèen maharga-maharga janah pernggelluhna pè sennang ngo gennep ari. 16:20 Nai lot mo sada kalak sincor mergerar si Lazarus, dom baroh ngo dagingna. Dak kundul-kundul ngo ia i lebbè babah pèntu bages sibèak idi. 16:21 Ninganna naing ngo ia kipangan iba-iba pangaan simerrurusen i mèja sibèak idi nai. Roh mo biang dakdak mendilati barohna i. 16:22 Daoh-daoh ariin, matè mo kalak sincoor idi, nai iembah malaèkat mo ia mi bekkas mersangap i gembar si Abraham i sorga. Matè ma mo bang sibèak idi janah ikubur. 16:23 Soh mo ndersana iakap i bekkas kematèen idi. Nderrang bagidi, menarè mo ia mi babo, itatap mo si Abraham dekket si Lazarus i gembarna. 16:24 Nai dilo-dilo mo sibèak idi, 'Ialè empung Abraham! Masèh mo atèmu midah aku, pasulak mo si Lazarus menernepken pucuk jari-jarina mi laè, asa itèktèkken giamken laè mi dilahku; ai soh mo mpiahna kuakap ibagasen api ènda!' 16:25 Tapi ialoi si Abraham mo ia, 'Èngèt mo alè pa, tikan i nggelluhmu dèng enggo ijalo kono simendè, tapi ukum si Lazarus pellin menjalo singgodo ngo. Bagèndari pè, sennang mo iakap isènda, ukum kono mpersuk mo. 16:26 Janah lot ngo lembeng mbages ibakin mahan kellang-kellangta asa ulang terbakin laus misidi, janah asa ulang terbaing roh isidi nai misèn!' 16:27 'Mula bagidi alè empung, kuèlèk-èlèk mo Kono, asa pasulak giamken si Lazarus mendahi bapa,' nina sibèak idi. 16:28 'Asa ipesèngèt si Lazarus nemmu kaka-anggingku idi, lot dèng lima kalak nai. Katerra pè ulang nemmu dekket kalak idi mi bekkas mpersah ènda.' 16:29 Ialoi si Abraham nola mo, 'Otang lot ngo bai kalak idi bukku si Musa bak bukku nabi-nabi? Idi mo iuèi kalak i!' 16:30 Tapi nina sibèak idi mo, 'Oda cukup dèng i alè Empung Abraham. Tapi ukum lot balik nggelluh sienggo matè kin, janah roh mendahi kalak i, tobat mo kalak idi ibas dosa-dosana nai.' 16:31 Tapi idokken si Abraham mo mbangsa, 'Mula oda iparduliken kalak idi si Musa dekket nabi-nabi, oda ma ngo uè percaya kalak idi mula pè lot balik nggelluh kalak sienggo matè.' "
17:1 Idokken Jesus mo taba sisinNa, "Dak ngo lot memaing kalak mengulaken dosa, tapi merjaya mo kalak simemaingken idi! 17:2 Lotiin mo igantungken lessung batu mi kerrahongna nai ipitakken mi laut. Lotiin mo bagidi, ulang pada gabè merdosa barang apaina ibas sikètèk ènda nai. 17:3 Kernana idi, merjaga-jaga mo kènè! Mula merdosa denganmi, pesèngèt mo ia. Mula enggo peselsel ia, ampuni mo ia. 17:4 Mula merdosa ia taba kono pitu kali sidari, janah dak roh ia mendahi kono mengido asa ulang pella ilugun kono dosana i, ampuni mo ia." 17:5 Nai nina rasul-rasul idi mo taba Tuhan Jesus, "Tuhan, petegguh mo kepercayaen nami." 17:6 Ialoi Tuhan i mo, "Mula lot kepercayaen ndènè nasa batu sabi, ndorok ngo dokonen ndènè bai kayu jabi-jabi adoi: 'Mbungkar mo kono janah tertanem mi laut,' pasti iuèi kayu idi ranamidi." 17:7 "Isè mo kènè mendokken taba naposona, mula mulak kessa i juma nai barang balik mermakan, 'Mangan mo kono'? 17:8 Tentu oda! Gabè sungkarna nola ngo idokken kènè, 'Kebbasken mo pangaan bangku. Janah enggo kessa pul kènè mangan, nai pè asa idokken kènè: mangan mo kono.' 17:9 Janah idokken kènè ma ngo melias atè kumarna enggo iulaken karina nidokken ndènè idi? 17:10 Bagidi ma ngo bang kènè pè. Mula enggo ibahanken kènè karina sinidokken taba kènè, dokken kènè mo: Naposo biasa sambing ngo kami; ai pellin sipatutna dèng ngo kessa kuulaken kami!" 17:11 Tikan menerusken perdalanen Jesus mi Jerusalem, memellus mo ia arap perbalengen nagerri Samaria bak Galilea. 17:12 Lako masuk mi sada kuta, idapetken sipuluh kalak sikoliten mo Jesus. Cènder ndaoh-ndaoh ngo kalak idi, ninganna dilo-dilo, 17:13 "O Jesus, Guru! Masèh mo atèmu midah kami!" 17:14 Nai mtengen Jesus mo kalak i, nina mo, "Laus mo kènè mendahi imam-imam, pidoken kènè mo asa iperrèso daging ndènè i." Tikan i tengah ndalan dèng kalak idi, mènter ntangtang mo sakitna i iakap. 17:15 Sada kalak bai kalak i nai, gabè balik roh mendahi Jesus kumarna enggo malum iakap, memojo-moji Dèbata. 17:16 Soh kessa ia mi lebbè Jesus, mènter ipetangkep mo dirina mi tanoh mersembah taba Jesus. Ia ukum kalak idi kalak Samaria ngo. 17:17 Nai idokken Jesus mo, "Otang sipuluh kalak ngo sienggo malum idi? Idikè ngo ndia sisibah kalak nai? 17:18 Kasa pellin kalak sidèban ènda sambing kessa balik mendokken lias atè taba Dèbata?" 17:19 Nai nina Jesus mo tabasa, "Kèkè mo kono, molih mo kono. Kepercayaenmi ngo pemalumken kono." 17:20 Barang piga-piga kalak Parisè mengkuso taba Jesus, ndigan mo roh Kerajaen Dèbata. Ialoi Jesus mo, "Ukum pekiroh Kerajaen Dèbata, oda ngo pella mersolo-solo bagè simasa i dunia. 17:21 Janah oda terdokken, 'Tengngen mo, adoi barang èn mo!' Ai enggo i tengah-tengah ndènè Kerajaen Dèbata." 17:22 Enggo kessa i, idokken Jesus mo taba sisinNa, "Roh mo katikana, sèkel kalohon kènè naing mengidah sada ari ibas ari Anak Jelma idi, tapi oda terbakin kènè mengidah idi. 17:23 Idokken dèba mo luas mendahi kènè, 'Tengen mo i sadoi ngo ia, barang isèn ngo.' Tapi ulang dahi kènè. 17:24 Bagè perdebbet pellian i langit nai, mercala-cala i punca langit sisada soh mi punca sisada, bagidi mo Anak Jelma idi ibas ari pekirohNa. 17:25 Tapi kennah lebbè menggong mermatcam bagè simpersuk ngo Ia, janah itulak jelma sisencundut ènda. 17:26 Bagè tikan ari si Noak, codi bagi ma mo ari Anak Jelma idi luas. 17:27 Mangan mènum ngo jelma idi, jejap janah pejajapken dirina, soh mi kettikana mbangkit si Noak mi keppelna, nai roh mo laè mbuncar idi mengenengneng jelma i karina. 17:28 Bagè simasa tikan si Lot. Mangan mènum ngo jelma i, merdèa bak menokor, mardang bak majek bages. 17:29 Tapi tikan karuar si Lot i Sodom nai, roh mo api dekket barèrang idabuh i langit nai lako mengelettup kalak idi karinana. 17:30 Bagi ma mo masa i pekiroh Anak Jelma. 17:31 I ari idi, barang isè tupung i babo saong sapona, ulang mo pella susur nèngè ia mi terruh lako memmuat hartana. Bagi ma kalak sinijuma pè, ulang nèngè balik mi bagesna. 17:32 Èngèt kènè mo: tikan masa bai sinibages si Lot! 17:33 Barang isè dak mengkellini kessahna, kemmagoon kessah mo ia. Tapi barang isè kemmagoon kessah, idi ngo paluahken kessahna. 17:34 Kudokken mo bai ndènè: Bernginna idi, lot mo dua kalak simpeddemmen. Sada kalak ngo iembah, tapi sada kalak nai itadingken. 17:35 Mula lot dua kalak menutu, sada ngo iembah, sisada nai itadingken. 17:36 Mula lot dua kalak i juma, sisada kalak ngo iarahken, janah sisada nai itadingken." 17:37 Nai ikusoken sisinna i mo, "Idikè ngo masa karinana idi Tuhan?" Ialoi Jesus mo, "Barang idikè lot bangkè, misidi ngo mertumpu kelliki."
18:1 Enggo kessa idi, isukutken Jesus mo sada codiin bai kalak idi, lako mengajarken asa kennah tetap kalak idi mersodip ulang merkeleja-lejaan. 18:2 Nina mo, "I sada kuta, lot mo sada hakim oda parduli mi Dèbata, janah oda isarihken nè bang jelma pè. 18:3 Lot mo i kuta idi sada kalak simebbalu, pukpuk iempet roh mendahi hakim i asa ibèla perkarana. 'Urupi mo aku lako mengalo alongku idi,' nina simebbalu idi. 18:4 Tah sadikè dekkahna, oda lot nggèut hakim idi. Tapi gabè merpikir mo hakim idi ibas ukurna, 'Ah, tukasi pè oda perduli aku taba Dèbata, janah oda kusarihken jelma. 18:5 Kumarna dak ièlèk-èlèk simebbalu idi aku, padaan mo kubèla perkarana idi, tah bakunè dak roh pukpuk ia mendahi aku, gabè ijonggala nola aku.' " 18:6 Nai idokken Jesus mo, "Radumi kènè mo, kadè sinidokken hakim sijahat idi! 18:7 Asa mula mengido mengèlèk kènè taba Dèbata mahar bak berngin, otang ibèla ngo perkara sinigemgemNa? Patut nola katèndènè oda iurupi kalak idi? 18:8 Kudokken mo bai ndènè: Bakunè pè ndor ngo kalak idi iurupi! Nai bakunè nola mo luas, roh kessa Anak Jelma mi dunia ènda, lot dèng ma ngo idapet kalak sipercaya?" 18:9 Nai isukutken Jesus mo codiin taba kalak simendokken dirina ngo kessa bennar, ukum sidèbanna merlèa ngo dok atèna. 18:10 Nina mo, "Lot mo dua kalak laus mi Bages Perguruun lako mersodip. Sada imo kalak Parisè, janah sada kalak nai pertunggu belasting. 18:11 Cènder mo Parisè idi mersodip ibagasen ukurna bagèen, 'Alè Dèbata, kudokken melias atè baMu kerna oda dos aku dekket jelma sidèban, pennamun, perjahat, perlangkah julu meddem. Janah oda ma aku bagè pertunggu belasting adoi. 18:12 Dak puasa ngo aku dua ari gennep minggu, janah kuberrèken ngo baMu nipersipuluh cinaringku.' 18:13 Tapi ukum pertunggu belasting idi, narih ndaoh ngo ia cènder, janah oda pang ia giamken mennarè mi langit. Ninganna itempuk tentenna idokken mo, 'Ialè Dèbata, masèh mo atèmu midah aku perdosa èn!' " 18:14 "Kudokken mo bai ndènè," nina Jesus, "Nderrang balik kalak i mi sapona, sodip pertunggu belasting idi ngo ijalo Dèbata, ukum Parisè idi oda ngo ijalo. Kerna barang isè pedatesken dirina, kennah ipeterruh ngo, janah barang isè pecerrepken dirina, ipedates ngo." 18:15 Lot mo kalak merrohen merembah dukak-dukakna bai jelma asa ijamah janah ipasu-pasu. Iidah sisinna kessa bagidi, ipincang mo kalak idi. 18:16 Tapi idilo Jesus mo kalak idi, nina mo, "Belli mo roh anak-anak idi mendahi Aku, ulang gerai kènè, ai kalak sibagidi ngo ginemgem Kerajaen Dèbata. 18:17 Èngèt kènè mo! Kalak siso uè iperèntah Dèbata bagè anak-anak, oda terbakin ia ginemgem Kerajaen Dèbata." 18:18 Lot mo sada kalak pengulu Jahudi mengkuso taba Jesus, nina mo, "O Guru, simendè roka, bakunè ngo kennah bakinenku asa kujalo kenggelluhen amman sumendah?" 18:19 Ialoi Jesus mo merkitè kuso-kuso, "Kasa idokken kono aku simendè roka? Isè poda permendè roka, laènken Dèbata. 18:20 Ibettoh kènè ngo pati-patiin Dèbata: Ulang merlangkah julu meddem, ulang memmunuh, ulang menangko, ulang merluap, pesangap inangmu dekket bapamu." 18:21 Ialoi pengulu i mo, "Karinana idi enggo kuulaken mulai i kepposoenku nai." 18:22 Mendengkoh idi Jesus, idokken mo tabasa, "Sada nai ngo perlu ulankenenmu: Dèaken mo karina silot bamu, berrèken mo tokorna taba kalak sincoor, nai merharta mo kono i sorga. Enggo kessa i, roh mo kono mengèkutken Aku." 18:23 Idengkoh kessa bagidi, bonek mo ukurna, kerna kalak sibèak tangas-tangasen ngo ia. 18:24 Ibettoh Jesus ngo bonek idi ia, kerna naidi nina mo, "Soh mo mahalna kalak sibèak mbengket mi kerajaen Dèbata. 18:25 Murahen ngo gajah mbengket mi lubang jarum, asa sibèak mbengket mi Kerajaen Dèbata." 18:26 Nai mengkuso mo kalak simendengkoh idi, "Mula bagidi, isè mo kessa saut maluah?" 18:27 Ialoi Jesus mo, "Siso terpetupa jelma, terpetupa Dèbata ngo!" 18:28 Nai idokken si Petrus mo, "Ukum kami, enggo mo kutadingken kami karina silot bai nami lako mengèkutken Kono." 18:29 Ialoi Jesus mo, "Tuhu ngo i!" nina Jesus, "Barang isè menadingken bagesna, sinibagesna, kaka-anggina dekket partuana barang dukak-dukakna kumarna mengèkutken Aku dekket menguèi Dèbata, 18:30 gabè iberrè mo bana merlempit ganda bagèndari, janah seggen pè jalonna mo kenggelluhen amman-sumendah." 18:31 Iarahken Jesus mo sisinNa sisipuluh dua idi, nina mo mbang kalak idi, "Bagèndari laus mo kita mi Jerusalem, janah terjadi mo karina nisuratken nabi-nabi terrèngèt Anak Jelma idi. 18:32 Ipesakat mo ia mendahi kalak siso menandai Dèbata, irèhè-rèhèi mo ia, ilèai, icèduri. 18:33 Isiksa mo ia janah ibunuh; tapi balik nggelluh ngo i ari petelluken." 18:34 Tapi cituk poda iantusi sisiin idi. Oda lot iarti kalak i nidokken Jesus idi. Oda ibettoh tah terrèngèt kadè niranaken Jesus idi. 18:35 Nai soh kessa Jesus mi kuta Jeriko, lot mo isidi sada kalak sipètung mengido-ngido i biding dalan. 18:36 Idengkoh sipètung idi kessa mo lot sora memellus jelma mbuè arap idi, ikuso mo, "Kadè masa?" 18:37 Ibagahken jelma i mo bana, "Jesus kalak Nazaret i ngo memellus." 18:38 Nai mènter dilo-dilo mo ia, "O Jesus, pemparen si Daud, masèh mo atèmu midah aku!" 18:39 Tapi igerra kalak simentas perlebbè idi mo ia asa sip katèna. Tapi makin ipegang mo sorana mendiloken nola, "Alè pemparen si Daud, masèh mo atèmu midah aku!" 18:40 Nai, tendo mo Jesus, ipasulak mo mengalengi sipètung idi. Soh kessa sipètung idi, ikuso Jesus mo ia, 18:41 "Kadè ipergeddo Kono naing bakinenku bamu?" Ialoi sipètung idi mo, "Merpendidah mo nemmu matangku èn alè Tuhan!" 18:42 Idokken Jesus mo tabasa, "Merpendidah mo kono! Kepercayaenmi ngo pemalumken kono." 18:43 Nai mènter merpendidah mo tuhu ia, janah ièkutken mo Jesus ninganna memoji-moji Dèbata. Gabè karina jelma nterrem simengidah idi, memoji-moji Dèbata.
19:1 Soh mo Jesus mi kuta Jeriko, merdalan mo ia memellus arap kuta idi. 19:2 Lot ngo i kuta idi sada kalak ekuten pertunggu belasting mergerar si Zakheus. 19:3 Sèkel kalohoon ngo ia naing mengidah Jesus, tapi oda terbakinsa kumarna jelma mbellang idi, janah kalak joppok ma ngo ia. 19:4 Nai lojang mo ia mengelebbèi jelma nterrem idi, ipenangkih mo sada kayu, asa isidi nai ndorok iidah Jesus, kerna arap terruhna i ngo mentas Jesus sigejjap nai. 19:5 Soh kessa Jesus arap bekkas idi, itarè mo mi dates janah idokken mo taba si Zakheus, "O Sakkèus, ndor mo kono susur! Ai naing kiserrang aku mi sapomu ari èn." 19:6 Nai ikettu si Zakheus mo susur, janah lolo kalohoon mo ia menjalo Jesus. 19:7 Ngutnguten ngo karina jelma simengidah i, nina mo, "Iah, mertamu ngo keppèken ia mi bages perdosa!" 19:8 Roh mo si Zakheus mendokken taba Tuhan i, "O Tuhan, sitengah hartangku kucedekkahken mo bai kalak sincor, janah barang isè nung kalak kukilang, empat kali lempit mo kuulakken tabasa!" 19:9 Nai idokken Jesus mo tabasa, "Mertuah ngo pengisi bages ènda sidari èn ibakin Dèbata, kemulihken pemparen si Abraham ngo bang ia pè. 19:10 Ai roh ngo Anak Jelma lako menulusi janah paluahken kalak simago." 19:11 Kumarna mbuè ngo simendengkoh rana Jesus i, jadi iranaken mo codiin bai kalak idi, kerna enggo ndessing mi Jerusalem, idokdok kalak idi mo mènter petararen Kerajaen Dèbata. 19:12 Kumarna naidi nina Jesus mo, "Lot mo sada kalak berkat mi nagerri ndaoh, lako ipebangkit gabè raja isidi, nai pul kessa i, baru pè asa balik ia. 19:13 Sinderrang makdèng berkat, idilo mo sipuluh kalak naposona, ipemberrèken mo taba kalak i gennep tersada riar emmas, janah idokken mo taba kalak idi, 'Perpokok kènè mo riar ènda, sinderrang oda isèn aku,' nina. 19:14 Tapi ceggo ngo atè ginemgem i midahsa, ipasulak kalak idi ngo suruhenna mengayakisa magahken, 'Oda uè kami rajanna nèngè.' 19:15 Tapi ipebangkit kessa ia gabè raja, balik mo ia mi kutana. Idilo mo naposona simenjalo riar idi mi hadeppenna, ai naing ibettoh barang sadikè laba ni kalak i gennep. 19:16 Naposo perlebbè roh mendokken, 'Tuan ukum labangku, sipuluh riar emmas ngo kemulihken riarmu sada idi.' 19:17 'Selloh,' nina tuan i. 'Kono naposo mendè janah burju! Kumarna kettoken ngo ko ibas sicituk, jadi jalo mo kuasa lako mengerajai sipuluh kuta.' 19:18 Roh mo naposo peduaken, nina mo, 'Tuan, merkitè sada riar emmas niberrèkenmi bangku, dapet aku ma ngo laba lima riar emmas.' 19:19 Nai idokken tuan i mo mbangsa, 'Kono pè rajai mo lima kuta.' 19:20 Roh nola ma mo naposo sidèban nina mo, 'Tuan, èn ngo riar emmasmu idi, ai kubaluti ngo dekket sèkka. 19:21 Ai mbiar ngo aku midah Tuan i, ai kubettoh kalak mpihir ngo Tuan i. Ibuat Tuan i ngo siso lahna, janah ipepulung Tuan i ngo siso nisuanna.' 19:22 Gabè idokken raja i mo mbangsa, 'Tosè mi pendokkenmi ngo kuhukum kono alè naposo jahat! Ibettoh kono ngo keppèken aku kalak mpihir janah kubuat siso lahku, kupepulung siso nisuanku. 19:23 Mula bagidi ngo, kasa oda ianakken kono riarku idi dekket anakna.' 19:24 Nai idokken raja i mo taba jelma silotna i sidi, 'Buat kènè mo riar idi bana nai, berrèken mo bai naposo sidapet bagian sipuluh riar idi.' 19:25 Gabè idokken nisidi mo taba raja i, 'Tuan, otang enggo lot sipuluh riar emmas bagianna.' 19:26 Ialoi raja i mo, 'Kudokken mo bai ndènè, berrènken ngo taba kalak simerrusaha asa lot bana. Tapi ukum kalak siso uè merrusaha, tukasi pè cituk silot bana i, buaten ngo bana nai. 19:27 Bagèndari, embah mo ia mi sèn musuhku i siso uè kurajai idi. Bunuh kènè mo kalak idi karina i lebbè-lebbèngku!' " 19:28 Enggo kessa iruapken Jesus karinana idi, ilebbèi mo jelma nterrem idi laus mi Jerusalem. 19:29 Soh kessa ia mi gembar Betpage dekket Betania i Uruk Zaitun, ipasulak Jesus mo dua kalak sisinNa laus perlebbè. 19:30 "Laus mo kènè mi kuta ni lebbè ndènè adoi," nina Jesus taba kalak idi. "Soh kessa kènè nahan mi kuta id, idahèn ndènè mo isidi sada anak kalodè tertambat janah madèng nung ipasang dèba. Talkasi kènè mo kalodè idi, nai embah kènè mo mi sènda. 19:31 Mula ikuso dèba kènè, 'Kasa italkasi kènè kalodè idi i penambaten nai?' dokken kènè mo tabasa, 'Perlu ngo idi bai Tuhan i.' " 19:32 Nai laus mo sisiin sidua kalak idi. Idapet mo karinana tuhu bagè nidokken Jesus idi. 19:33 Tikan mengosari kalodè i kalak i, nina sidasa i mo taba kalak idi, "Kasa iosari kènè kalodè idi?" 19:34 Ialoi kalak idi mo, "Perlu ngo idi bai Tuhan i." 19:35 Nai iembah kalak idi mo anak kalodè i mendahi Jesus. Jadi ipengalasken kalak idi mo mi babo kalodè i olesna, janah ipekundul mo Jesus mi babona. 19:36 Tikan ibellus Jesus dalan idi merkalodè, ipengalasken jelma nterrem i ngo olesna i babo dalan idi. 19:37 Lako soh mo Jesus mi Jerusalem, imo i rebbèen pispis Uruk Zaitun, karina jelma nterrem simengèra-ngèra Jesus idi mersurak-surak, meroang-oang memoji Dèbata, kemulihken karina tanda kellengangen sienggo niidah kalak idi. 19:38 Kata surak ni kalak idi imo, "Ipasu-pasu mo Jesus siroh merkitè-kitè gerar Tuhan i! Damè mo i sorga janah kemmuliaan bai Dèbata!" 19:39 Nai kalak Parisè sirebbakken jelma nterrem idi mendokken taba Jesus, "O Guru, dokken mo asa sip sisiin simengèkutken Kono i." 19:40 Ialoi Jesus mo, "Kudokken mo bai ndènè, mula sip kalak idi, gabè mersurak-surak mo batu ènda." 19:41 Enggo kessa njolmit Jesus mi kuta Jerusalem janah iidah kuta i, itangisi mo kuta i nina mo, 19:42 "Nong ngalè, ukum bagèndari kin mo nemmuken itandai kono sipedamèken kono! Tapi mboni ngo idi ibas penengenmu nai. 19:43 Roh mo seggen musuhmu mengkubu kono janah isessak mo kono i kambirang kamuhunmu nai. 19:44 Kerri mo kono ireppuk rebbakken pengisi ni tengah-tengahmu idi, janah oda ibelli dua batu mertindih-tindih i bekkasna kin, kerna oda isarihken kono ndigan pekiroh Dèbata menongkir kono lako paluahenna!" 19:45 Nai ibengketti Jesus mo Bages Dèbata janah iusir mo kalak pertiga-tiga nisidi. 19:46 Nina mo, "Tersurat ngo ibas Bibèl: Bekkas mersodip ngo ukum BagesKu. Tapi gabè ibakin kènè ngo bekkas pennamun!" 19:47 Gennep ari ngo dak mengajari ukum Jesus i Bages Dèbata. Nai imam ekuten, simettoh Patiin dekket pengulu-pengulu Jahudi, mennulusi dalan lako memmunuh Jesus. 19:48 Tapi oda dapet kalak idi dalan lako pesautken takina idi, karna karina sinterrem idi merlemmo atè mendengkoh peddah Jesus.
20:1 Ibas sada ari tikan mengajar Jesus terrèngèt Sukuten Simerandal bai Dèbata nai i Bages Dèbata, roh mo imam-imam ekuten dekket simettoh Patiin bak pengituai-pengituai. 20:2 Nina kalak i mo taba Jesus, "Bagahken mo bai nami barang idikè nai ngo kuasamu lako mengulaken idi karinana, isè memerrè kuasa baMu?" 20:3 Ialoi Jesus mo kalak idi, "Aku pè mengkuso kènè ma. Bagahken kènè mo bangKu. 20:4 Ia ukum perridiin nibaing si Johanes, bai Dèbata nai ngo barang bai jelma nai?" 20:5 Nai mersungkuun mo kalak idi samahsa, "Kadè mo tuhu ndia jababna. Mula sidokken, 'I Sorga nai,' tentu dokkenenna banta, 'Mula bagi ngo, kasa oda percaya kènè taba si Johanes?' 20:6 Tapi mula sidokken nola, 'Bai jelma nai ngo,' karina nahan jelma nterrem idi mementiri kita dekket batu, kerna kalak idi percaya ngo karina ukum si Johanes idi nabi ngo." 20:7 Nai idokken kalak i mo, "Oda kubettoh kami." 20:8 Nai idokken Jesus mo taba kalak idi, "Mula bagi ngo, Aku pè oda Kubagahken barang idikè nai kuasangku lako mengulaken idi karinana." 20:9 Nai isukutken Jesus mo codiin taba jelma nterrem idi, "Lot mo pekken anggur ni sada kalak daholi. Ipebellahken mo pekken anggurna idi taba barang piga-piga kalak, nai laus mo ia mengeranto janah toko ngo dekkahna i pengerantoen idi. 20:10 Enggo kessa mosim memuat buahna, ipasulak sidasa pekken i mo naposona lako mengaleng bagianna. Tapi ipekpekki ngo pasulaken idi, janah ipellaus oda lot iberrè. 20:11 Nai ipasulak sidasa pekken idi nola mo naposona sidèban, tapi tong ma ngo ipekpekki, ipellèa janah ipemèla, nai ipellaus ma ngo oda lot iberrè. 20:12 Enggo kessa bagidi, ipasulak sidasa pekken i dèng ma mo naposona petellu kaliken, tapi tong bagidi ibakin kalak idi, janah iambongken mi ruar pekken idi. 20:13 Perpodi, nina sidasa pekken i mo ibas ukurna. Bakunè nola mo ndia kubaing? Kuutus mo tupèh anakku sendiri kekellengenki, tentu nangga ngo atè kalak idi midahsa. 20:14 Tapi iidah simengula pekken idi kessa mo roh anakna idi, idokken kalak idi mo samahsa, 'Èn mo anak sidasa pekken idi. Aci sibunuh mo ia, asa banta hartana i.' 20:15 Nai mènter itangkup mo ia, iruah mo mi ruar pekken idi janah ibunuh mo. 'Bakunè ngo ndia bakinen sidasa pekken i taba kalak idi?' nina Jesus mengkuso jelma nterrem simendengkoh codiin idi. 20:16 Tentu roh mo ia lako mengeripasken kalak idi, janah isohken nola mo pekken idi taba pemellah pinang sidèban." Mendengkoh idi, nina kalak i mo, "Ah ulang mo bagidi!" 20:17 Tapi itengen Jesus mo kalak idi ninganna idokken, "Mula oda ngo bagidi, bakunè mo lapaten ayat Bibèl idi? Batu sinipatakken tukang bages i, idi ngo gabè batu persoki. 20:18 Barang isè ndabuh mi batu idi kennah merreppuk, janah barang isè itinggang, kennah nggeppu." 20:19 Iarti simettoh Patiin dekket imam ekuten ngo mengarusi codiin idi janah mendahi kalak idi ngo lapatenna itujuken. Kumarna idi, iusahaken kalak i mo naing menangkup Jesus gejapkenna idi. 20:20 Nai, itulusi kalak i mo tikki mendè. Isisip mo kalak peteridahken dirina bagè kalak bujur, ipasulak mo mengenggep Jesus merkitè-kitè kuso-kuso, asa ndorok iserahken kalak idi Jesus mi gubèrnur asa itahan. 20:21 Nai idokken pasulaken simettoh Patiin dekket imam ekuten mo taba Jesus, "O Guru, kubettoh kami ngo karina niranakenmu bak nipeddahkenmi, tuhu ngo karina. Kubettoh kami ma ngo oda uè Kono mengidah-idah abè; pellin memeddahken situhunna sambing ngo kono terrèngèt nipergeddo Dèbata bai jelma. 20:22 Kernanai, bagahken mo bai nami tah ndorok ngo menggarar belasting taba Kèsar mengèkutken agamanta, barang tah oda?" 20:23 Tapi ibettoh Jesus ngo taki-taki ni kalak idi. Kernana i, idokken mo: 20:24 "Pacidah mo bangKu sada kèpèng pirak! Gombaren dekket surat isè ngo ibas kèpèng ènda?" Ialoi kalak idi mo, "Gombaren dekket surat Kèsar i ngo," nina kalak i mengaloi. 20:25 "Mula bagi ngo," nina Jesus mengaloi, "Berrèken kènè mo mi Kèsar, milik Kèsar idi janah berrèken mo balik mi Dèbata, milik Dèbata." 20:26 Gabè oda dapet kalak idi kesalahen Jesus i lebbè-lebbè jelma nterrem. Pellin mertahan sip mo kalak idi ninganNa kagum mendengkoh pengaloi Jesus idi. 20:27 Roh mo horong kalak Sadusè mendahi Jesus. (Horong kalak idi oda percaya balik nggelluh sienggo matè.) Ikusoi kalak i mo Jesus, 20:28 "O Guru, isuratken si Musa, mula matè sada kalak anak laki menadingken sinibagesna, keppè oda sanga lot dèng dukakna, kennah ipekèkè anggina mo sinibages kakana sienggo mebbalu i, asa lot anak bai sienggo matè idi. 20:29 Jadi lot mo pitu kalak sibeltek. Jejap mo situaan, keppè menter matè oda sanga dèng lot anakna. 20:30 Nai ipekèkè sipeduaken mo sinibages kakana idi, tapi ia pè matè ngo oda sanga lot anakna. 20:31 Nai mi sipetelluken pè tong ma bagidi perasatna ipekèkè ma ngo daberru idi. Bagidi mo soh mi pepituken, karinana kalak idi mengkabini daberru i, janah matè oda lot mersikèdèk-kèdèk. 20:32 Perpodi kalohoon, matè ma mo daberru idi. 20:33 Nai tikan balik nggelluh seggen jelma sienggo matè idi, sinibages isè mo daberru idi bai sipitu kalak idi? Ai pituna ngo kalak idi mengkabinisa." 20:34 Ialoi Jesus mo, "Jelma ni dunia ènda ngo kabin, 20:35 tapi ukum jelma sipatut balik nggelluh i ari podi idi seggen oda nèngè ngo kabin. 20:36 Nggelluh ni kalak idi, tosè bagè malaèkat janah oda ndorok matè. Gabè dukak-dukak Dèbata mo kalak idi, kerna enggo kèkè kalak i ibas kematèen nai. 20:37 Si Musa sendiri enggo memagahken balik nggelluh sienggo matè idi, imo suratna terrèngèt rambah mpulguk silakat idi, 'Tuhan i, imo Dèbata si Abraham, Dèbata si Isak, dekket Dèbata si Jakob.' 20:38 Jadi oda ngo Dèbata simatè Tuhan i, tapi Dèbata singgelluh ngo! Kerna nggelluh ngo karina jelma i hadeppen Tuhan." 20:39 Mendengkoh idi, idokken kalak simettoh Patiin mo, "Guru, kenna kalohoon ngo pengaloimu idi." 20:40 Kernana i, oda pang nèngè kalak idi lako mengkusoi Jesus. 20:41 Ikusoken Jesus mo taba kalak idi, "Bakunè mo i, Raja Sipaluah niperbagah Dèbata idi pemparen si Daud? 20:42 Padahal si Daud sendiri mendokken ibas bukku Psalm: 'Nina Tuhan i ngo mbang Tuhanku: Kundul mo kono i kamuhunKu ènda, 20:43 pèma Kubakin karina musuhMu tunduk baMu.' 20:44 Jadi, mula idokken si Daud ngo Raja Sipaluah idi 'Tuhan,' idikè mo terdokken Ia pemparen si Daud?" 20:45 Enggo kessa mengerana Jesus taba karina jelma nisidi, idokken Jesus mo taba sisinNa, 20:46 "Manat mo kènè taba kalak simettoh Patiin. Lolo ngo kalak i merdalan-dalani ninganna memakkè jubahna nggeddang janah ipido ukurna ngo asa itabi dèba ia i tengah ndalan dekket i onan. Dak ipilih kalak i ngo bekkasna kundul i lebbè mula ibages perguruun, janah bekkas simersangapna mula i perpèstaan. 20:47 Ikilang kalak i ngo daberru simebbalu janah ilaum bagesna. Nai memmoniken pengelakona jahat idi, mersodip nggeddang mo kalak i. Mberrat ngo kaduan hukumen kalak idi!"
21:1 I Bages Dèbata, idah Jesus mo kalak sibèak memakin kèpèngna mi pèti pèlèen. 21:2 Iidah ma mo sada daberru mebbalu memmaing mi pèti idi dua pèsèr. 21:3 Nai idokken Jesus mo, "Kudokken mo bai ndènè, buèen ngo siniberrèken daberru mebbalu adoi, ulang pada karinana sidèbanna idi. 21:4 Ia ukum pèlèen niberrèken sidèbankenna idi, iba-ibana sambing ngo i. Tapi ukum daberru sincoor idi, ibas kinicorna idi ngo ia memmèlèken karina silot bana, tukasi pè i nai kessa nggelluhna." 21:5 Lot mo kalak mengerrana terrèngèt kinimendè Bages Dèbata, ilantak dekket batu merandal bagi ma barang barang sinipèlèken mi Dèbata. Nai idokken Jesus mo taba kalak idi, 21:6 "Roh mo luas tikkina, karina niidah ndènè mendè idi irumpakken janah oda belliin dua pè giam batu mertindih i bekkasna kin!" 21:7 Nai ikuso sisiin imo Jesus, "O Guru, ndigan mo masa i? Kadè mo tanda-tandana mula naing masa idi?" 21:8 Idokken Jesus mo, "Mergermet mo kènè, asa ulang ilalingken dèba kènè. Ai mbuè ngo roh kalak menelluk gerarKu janah mendokken, 'Aku ngo Ia!' janah, 'Enggo ndessing katikana.' Tapi ulang mo percaya kènè. 21:9 Ulang kènè tersengget mendengkoh berrita geraha bak pemberontaken. Kennah masa ngo idi lebbèen, tapi oda dèng ngo idi tikki perpodi barang kiamat." 21:10 Nai iudut Jesus mo pengerananNa taba kalak idi, nina mo, "Ikubu bangsa sisada mo bangsa sisada, janah kèkè mo kerajaen mengalo kerajaen. 21:11 Idikè pè dak masa mo rènur, masa mo lèhè matè kocing dekket sakit wabba. Masa mo memaingken buradan dekket tanda kellengangen i langit. 21:12 Tapi sidang makdèng masa idi, itangkup mo kènè janah ikurungken. Nai iruah mo kènè mi hadeppen raja-raja dekket penguasa kemulihken aku. 21:13 I sidi mo kesempaten bai ndènè lako mengindangken aku. 21:14 Kernana i, petegguh kènè mo ukur ndènè, asa ulang pella ipikirken kènè barang kadè jabab ndènè i sidi. 21:15 Aku ngo mengajari kènè mengerrana, gabè isè poda musuh-musuh ndènè idi ndorok mengalo janah menjabab sinidokken ndènè i. 21:16 Isidi ma mo kènè itakiken bapa inang ndènè, kaka-anggi ndènè, sincelket bak supan-supan ndènè. Nai ibunuh ngo kènè dèba. 21:17 Karina mo kalak mengkosomi kènè kemulihken Aku. 21:18 Tapi sirambar pè buk ndènè idi oda ndorok bennè. 21:19 Barang isè uè mertahan janah sobar, maluah mo ia janah dapetten kenggelluhen." 21:20 "Mula iidah kènè ikubu tenterra kuta Jerusalem, bettohen ndènè mo enggo ndessing kettikana, irumpakken mo kuta idi. 21:21 Nderrang bagidi, kennah mperrus mo kalak ni Juda mi delleng, nai kalak nibagasen kuta pè mperrus menadingken kutana, janah kalak siniruar kuta oda ndorok nèngè mi kuta. 21:22 Kerna ari idi mo ari 'Mendabuh Hukum', ai merkitè bagidi saut mo nidokken sitersurat ibas Bibèl. 21:23 Soh mo karuna i ari i iakap daberru simengkandong barang simerdukak kèdèk dèng! Karina pengisi nagerri menggong kinipersuk siso terpetia-tia, janah ihukum Tuhan mo bangsa èn. 21:24 Dèba mo ibunuh merkitè peddang, dèba itaban; janah Jerusalem ideddohi kalak siso menandai Dèbata, soh mi tikki sienggo ibuhul Tuhan bai kalak idi." 21:25 "Janah lot mo seggen tanda-tanda i mataniari, bulan dekket bintang pè. Buradan mo bangsa-bangsa ni dunia èn mengidah perdengung bak pergoncang laut. 21:26 Sompar-baèr mo jelma kumarna buradanna janah terendep-endep memèma sinaing masa i dunia èn, ai kumeccaho ngo kegegohen langit i. 21:27 Nai iidah jelma i mo roh Anak Jelma merkitè hembun ibagasen kuasa dekket kesangapen meheji. 21:28 Mula masa kessa sibagidi, kèkè mo kènè, janah pedorgak kènè mo takal ndènè, ai enggo njolmit kelluahen ndènè." 21:29 Nai isukutken Jesus mo codiin èn bai kalak idi, "Perdatèken kènè mo kayuara dekket kayu sidèbanna i. 21:30 Mula iidah kènè kayu idi mertunasi, bettoh kènè mo enggo ndessing pertahunen mpeddas. 21:31 Bagi ma ngo mula iidah kènè masa sikubagahken idi, bettoh kènè mo enggo mo ndessing Kerajaen Dèbata. 21:32 Bettoh kènè mo! Oda matè dèng karina singgelluh bagèndari, enggo saut terjadi karinana idi. 21:33 Salpun pè karina langit dekket tanoh èn, kum katangki mak ndorok salpun!" 21:34 "Jaga kènè mo diri ndènè, asa ulang lalap ukur ndènè dak merpèsta-pèsta dekket mabuk kumarna ènumen mperngis, barang mergih-gihken nggelluh ndè i tanoh èn, ulang mak kebbas kènè mèma pekiroh Ari idi sintempu. 21:35 Kerna Ari ni Tuhan idi sintempu ngo bagè pennaib sambil i babo tanoh ènda. 21:36 Merjaga-jaga mo kènè janah iempet mersodip, asa mergegoh kènè menghaloken simasa idi, janah asa tahan kènè cènder i hadeppen Anak Jelma." 21:37 I bages Dèbata idi ngo Jesus mengajar tikanna mahar idi, tapi cibonna laus mo ia mi Uruk Zaitun janah merberngin isidi. 21:38 Gennep ceggen, merrohen ngo karinana jelma mi Bages Dèbata lako mendengkohken peddah Jesus.
22:1 Dapet nèngè mo Ari Raya kipangan roti siso meragi, mergerar Paskah. 22:2 Dak itulusi imam ekuten dekket guru-guru agama ngo dalan mboni-mboni lako memmunuh Jesus, kerna ikebbiari kalak idi ngo jelma nterrem idi. 22:3 Nai ibengketti Sibolis mo si Judas simergerar Iskariot, imo sada kalak ibas sisiin Jesus sipuluhdua i nai. 22:4 Laus mo si Judas mersinunu dekket imam ekuten bak penjaga Bages Dèbata, lako mennulusi dalan pessohken Jesus bai kalak idi. 22:5 Nai dos mo pekkat kalak idi, janah merjandi mo kalak idi merrèken kèpèng bana. 22:6 Iuèi si Judas mo i, jadi mulai i sidi nai mo itulusi si Judas tikki lako mennerahken Jesus taba kalak idi, siso pemettohen jelma nterrem. 22:7 Dapet mo Ari Raya mangan Roti Mak Meragi, imo kennah mennèat biri-biri pangaan Paskah. 22:8 Ipasulak Jesus mo si Petrus bak si Johanes, nina mo, "Laus mo kènè mengkebasi pangaan Paskah banta." 22:9 "Idikè katèmu kukebbasi kami?" nina Jesus. 22:10 "Ibengketti kènè kessa nahan kuta i, pesimbak mo kènè dekket sada kalak anak laki merjujung goci merrisi laè. Èkutken kènè mo ia mi sapona, 22:11 nai dokken kènè mo taba sidasa sapo idi, 'Tennah Guru i, idikè ngo bekkas berrènkenmu bangku dekket sisinKu lako kipangan pangaan paskah?' 22:12 Mènter ituduhken mo bai ndènè sada bilik mbellen i pagu sienggo terramaken mendè. Isidi mo kebbasi kènè banta." 22:13 Nai laus mo si Petrus dekket si Johanes, jumpa kalak i mo tuhu bagè nidokken Jesus i bai kalak idi. Nai ikebbasi mo pangaan Paskah idi. 22:14 Enggo kessa dapet katikna kipangan pangaan Paskah, kundul mo Jesus rebbak dekket sisinNa. 22:15 Nai nina mo taba kalak idi, "Sèkel kalohoon ngo ukurku kipangan pangaan Paskah ènda rebbak dekket kènè, sinderrang makdèng sempa sitahanenki!" 22:16 Kudokken mo bai ndènè, "Oda nèngè kupangan pangaan idi, soh mi persaut lapaten pangaan ènda ipecèndek i Kerajaen Dèbata." 22:17 Nai idokong Jesus mo perrènumen anggur idi, idokken mo melias atè bai Dèbata, nina mo, "Buat kènè mo ènda, bagiken kènè mo samah kènè; 22:18 bettoh kènè mo: Oda Kuènum nèngè anggur ènda soh mi lebbè ipecèndek Dèbata Kerajanna." 22:19 Enggo kessa i, ibuat Jesus mo roti idi, idokken mo melias atè bai Dèbata, ipenggelli mo, nai ipemberrèken mo bai kalak idi ninganNa idokken, "DagingKu ngo ènda, siniberrèken lako mengkepkep kènè. Bakin kènè mo bagidi, mahan pernèngèten ndènè bangKu." 22:20 Bagi ma mo perrènumen idi enggo kessa mangan kalak idi, iberrèken mo bai kalak idi ninganna idokken, "Ukum perrènumen ènda padan rimbaru ngo idi, merkitè-kitè darohKu siniorèken mengkepkep kènè." 22:21 "Tapi tengen kènè mo! Kalak simenelbuh Aku, rebbak ngo bagèndari dekket Aku i mèja ènda! 22:22 Kennah matè ngo nemmuken Anak Jelma i, bagè sienggo itentuken kin, tapi merjaya mo kalak sipesakatkenSa!" 22:23 Gabè mersikosoon mo kalak idi samahsa, isè ngo ndia kalak idi memmaingken bagidi. 22:24 Nai tubuh mo persoalen bai kalak idi, terrèngèt barang isè ngo kalak idi simbelgahna. 22:25 Gabè idokken Jesus mo taba kalak idi, "Raja-raja siso menandai Dèbata menèndes ginemgemna, janah kalak simemerèntah 'igerari ngo i percilèndungen.' 22:26 Tapi ulang mo masa idi bai ndènè, ai barang isè kènè simbelgahna, ia mo gabè sikètèkna, janah barang isè pengulu, kennah gabè perkebbas mo ia. 22:27 Isè simbelgahna kalak sikundul mangan i mèja ngo barang simengkebasi? Tentu kalak sikundul ngo. Tapi i tengah-tengah ndènè ngo Aku bagè perkebbas. 22:28 Ibagasen kepersukenKu idi, dak igembarKu ngo kènè. 22:29 Tosè bagè Bapangku enggo memerrèken bangKu kuasa, bagidi ma mo Kuberrèken bai ndènè kuasa memerèntah. 22:30 Merkitè bagidi, dekket mo kènè mersennang-sennang dekket Aku tikan mbangkit Raja aku. Janah iberrèken mo kuasa bai ndènè lako memerèntah kalak Israel sisipuluh dua marga idi." 22:31 "Simon, Simon, dengkohken mo! Enggo iberrè ijin bai Sibolis lako mengoji kènè; bagè mennapi pagè gabè ipejaè mo simerandal ibas simerroha nai. 22:32 Tapi enggo Kusodipken kono, asa hot kepercayanmu. Nai enggo kessa balik ukurmu luas taba Aku, pergegohi mo ukur ni kaka-anggimu." 22:33 Ialoi si Petrus mo, "Tuhan, kebbas ngo aku mendengani kono mi kurungen barang mi kematèen pè!" 22:34 "Kudokken mo mbang kono alè Petrus," nina Jesus, "Siderrang makdèng takuak manuk berngin ènda, enggo tellu kali iperso kono aku; oda itandai kono nimu Aku." 22:35 Nai nina nola mo, "Tikanna Kupasulak kènè, oda pella merembah bagut-bagut, oda merrucang, oda mercipatu, nung ngo kènè kurangen?" "Oda ngo tuhu nung," nina klak idi. 22:36 Nai nina Jesus mo, "Tapi ukum bagèndari, isè lot bagut-bagutna barang ucangna, kennah iembah mo; janah siso mergolok, idèa mo jubahna asa lot menokor golokna. 22:37 Kernana i, kudokken mo bai ndènè, ayat sitersurat i Bibèl bagèen, 'Iètong ngo ia perjahat,' kennah saut mi diringKu. Kerna kadè sienggo tersurat ibas Bibèl terrèngèt Aku, saut mo idi masa berngin ènda." 22:38 "Tuhan," nina sisiin Jesus, "Tengen mo, lot ngo isènda dua peddang." "Enggo mo i!" nina Jesus mengaloi. 22:39 Nai itadingken Jesus mo Jerusalem, janah ncemmalna laus ngo ia mi Uruk Zaitun. SisinNa pè dekket ngo mengèkutkenSa. 22:40 Soh kessa kalak idi misidi, nina mo taba sisinNa, "Mersodip mo kènè asa ulang merdosa kènè mula mbengket kènè mi pengunjunen." 22:41 Nai laus mo Jesus narih mi lebbè, kira-kira ndorok bentiren. 22:42 Nai mertongkel tèun mo ia mersodip, "Ialè Pa, mula ndorok ngo dok atèMu, pedaoh mo bangKu nai kinidersa ènda. Tapi ulang mo merguru bangKu, merguru bamu mo." 22:43 Roh ngo sada kalak malaèkat mendahiSa, lako mempergegohiSa. 22:44 Mbiar kalohoon ngo Jesus, gabè mertuhu-tuhu mo Ia mersodip. Rendes ngo panasNa bagè daroh menèktèken mi tanoh. 22:45 Kessa pul ia mersodip, molih mo ia mendahi sisinNa. Tapi terpeddem ngo sisinNa idapet kumarna bonekna. 22:46 Nai nina Jesus mo taba kalak idi, "Kasa meddem kènè? Kèkè mo kènè janah mersodip mo, asa ulang mbengket kènè mi pengojiin." 22:47 Tikanna mengerana dèng Jesus, roh mo mbuè jelma iuluken si Judas, imo sada kalak ibas sisinNa i nai. Idapetken mo Jesus, mènter isanggoh mo. 22:48 Tapi idokken Jesus mo tabasa, "O alè Judas, tah ngo merkitè sanggoh i iselbuh kono Anak Jelma?" 22:49 Iidah sisiin Jesus kessa mo simasa idi, idokken kalak idi mo, "Tuhan, kutampul kami mo dekket peddang ènda?" 22:50 Nai mènter itampulken sada kalak mo peddangna mi naposo imam huntuun, gabè ntalsun mo copingna kamuhun. 22:51 Tapi idokken Jesus mo, "Enggo mi!" Nai ijamah Jesus mo copingna idi, ipemalum mo. 22:52 Nai idokken Jesus mo taba imam-imam ekuten dekket taba ekuten pengabal Bages Dèbata bagi ma pengulu Jahudi sienggo roh mi sidi lako menangkup Jesus, "Bagè mendapetken pennamun ngo kènè roh merpeddang bak merpalu-palu menangkup Aku. 22:53 Gennep ari ngo Aku rebbak dekket kènè i Bages Dèbata, tapi oda itangkup kènè Aku. Tapi tupèh èn mo ketikana kènè mertindak, katikana kuasa kegellapen sidasa tampuk." 22:54 Nai itangkup kalak i mo Jesus janah iembah mi bages imam huntuun. Tapi dak mengèkut ngo si Petrus ndaoh-ndaoh. 22:55 I tengah-tengah kasèan i lakat ngono api, gabè roh mo si Petrus mi gembar api idi kundul rebbak dekket sikundul nisidi. 22:56 Lot mo sada kalak naposo daberru mengidah si Petrus, kundul i gembar api idi; iperdatèken daberru idi mo si Petrus, gabè nina mo, "Kalak èn pè ndai rebbak ngo dekket Jesus!" 22:57 Tapi memerso ngo si Petrus, nina mo, "Oda kutandai idi!" 22:58 Nai oda pella sadikè dekkah nai, iidah sidèbanna nola mo si Petrus, idokken mo, "Sada kalak ibas kalak idi nai ngo kono!" Tapi ialoi si Petrus mo, "Ah, oda aku i!" 22:59 Kira-kira sada jam nola ma, idokken sidèbanna nola ma mo nggang, "Tuhu ngo kalak ènda dengan Jesus, ai kalak Galilea ngo ia!" 22:60 Tapi ialoi si Petrus mo, "Oda kuantusi nidokkenmu i!" Gejapkenna idi tikan mongkam i si Petrus, mènter takuak mo manuk. 22:61 Nai itulihken Jesus mo si Petrus mennengensa. Ièngèt si Petrus mo sinidokken Tuhan i tabasa, "Sinderrang madèng takuak manuk, berngin èn, tellu kali mo iperso kono, oda itandai kono nimu Aku." 22:62 Nai karuar mo si Petrus isidi nai, tangis mo ia semmeb-semmep. 22:63 Ukum kalak simenjaga Jesus, ipellèa-lèa janah iligasi mo Jesus. 22:64 Ibaluti kalak idi mo mataNa, nai ikuso mo, "Ibettoh kono ngo barang isè mengelligasi kono?" 22:65 Matcam dèng ngo bagèna kata-kata pengelèai iruapken tabaSa. 22:66 Nterrang kessa ari siceggenna i, merpulung mo pengulu-pengulu Jahudi, imam-imam ekuten dekket guru-guru agama, nai iteggu mo Jesus mi hadeppen Runggu Mbellen. 22:67 Nina kalak idi mo mengkuso Jesus, "Bagahken mo bai nami, kono ngo Raja Sipaluah niperbagah-bagah Dèbata?" Ialoi Jesus mo, "Mula pè kubagahken idi taba kènè, oda lot percaya kènè. 22:68 Janah mula Kukuso nola pè kènè, oda ngo ialoi kènè. 22:69 Tapi mulai bagèndari nai, kundul mo Anak Jelma i kamuhun Dèbata si Perkuasa idi." 22:70 Nai karinana mo kalak i mendokken, "Mula bagidi, Anak Dèbata ngo kono?" Ialoi Jesus mo, "Bagè nidokken ndènè i mo." 22:71 Nai idokken kalak i mo, "Oda perlu nèngè tulusen saksi! Ai enggo ntangkas sidengkoh ranaNa sendiri!"
23:1 Nai kèkè mo karinana kalak idi lako menaruhken Jesus mi hadeppen si Latus. 23:2 Iaduken kalak idi mo Ia, nina mo, "Kudapet kami ngo kalak èn mengelalingken jelma nterrem. Iajar-ajari ngo jelma nterrem i asa ulang menggarar belasting taba Kèsar; kerna nina, Kristus ngo Ia sada kalak raja." 23:3 Nai ikusoi si Latus mo ia, "Tuhu ngo Kono raja ni kalak Jahudi?" Ialoi Jesus mo, "Bagè nidokkenmu ngo." 23:4 Gabè idokken si Latus mo taba imam-imam ekuten dekket jelma nterrem idi, "Oda lot dapet aku kesalahen kalak ènda, lako menghukumSa." 23:5 Tapi dak ipaksa kalak idi mo, nina mo, "Merkitè peddahNa, dak Iajar-ajari ngo karinana bangsa nami, mulai i Galilea nai soh mi Juda, janah bagèndari soh ma mi sènda." 23:6 Idengkoh si Latus kessa mo idi, mengkuso mo ia, "Ai kalak Galilea ngo keppè ia?" 23:7 Nai ibettoh kessa mo kalak Galilea ngo keppè Jesus imo gemgemmen si Herodes, ipasulak mo merembahken Jesus mi si Herodes, ai tupung i Jerusalem ngo ia tikanna bagidi. 23:8 Lolo kalohoon ngo si Herodes enggo kessa iidah ia Jesus, ai enggo ndekkah idengkoh terrèngèt Jesus janah sèkel ia naing mengidahSa. Dak ipercinta ukurna ngo idahenNa tanda kellengangen sibakinen Jesus. 23:9 Kernana idi matcam mo bagèNa ikusoken taba Jesus, tapi dak sip sambing ngo ukum Jesus. 23:10 Tapi dekket ngo roh imam-imam ekuten bak guru-guru agama nisidi lako mengaduken Jesus, idokken kalak i mo tuduhen mberrat bai Jesus. 23:11 Nai irèhè-rèhèi si Herodes rebbak dekket pengabalna mo Jesus, isellukken mo bai Jesus pakkèen kebelgahen, nai ipasulak mo Jesus balik mendahi si Latus. 23:12 Mulai sidarinkenna i nai, gabè mersupan-supan mo si Herodes dekket si Latus mengolihi, ai mersikosomen kin ngo kalak idi. 23:13 Nai ipepulung si Latus mo imam-imam ekuten, pengulu-pengulu bak jelma nterrem ginemgem pè, 23:14 nina mo taba kalak idi, "Iaduken kènè ngo kalak ènda bangku, janah mendokken Ia mengelalingken jelma. Bagèndari pè iidah kènè ngo enggo kutangkasi Ia, tapi kesalahen nidokken ndènè i oda lot dapet aku baNa. 23:15 Si Herodes pè oda ma lot jumpasa, kernana idi ngo asa iulakken ia mendahi aku. Situhunna oda lot ibahanken kalak ènda barang kadè pè memmaingken kennah merrutang kessah. 23:16 Kumarna nai, kuligas mo Ia, nai kupaluah mo Ia," 23:17 Biasana gennep ari raya Paskah ipaluah si Latus ngo sada kalak sikurungen bai kalak i nai. 23:18 Tapi karina nisidi menggegohken surakna, "Bunuh mo Ia! Si Barabas mo paluah bai nami!" 23:19 (I kurungen pè si Barabas, kumarna menggutturi ngo iajanah kumarna memmunuh.) 23:20 Kumarna naing ipaluah si Latus ngo Jesus, idokken mo sikali nai taba jelma nterrem idi. 23:21 Tapi isurakken kalak idi mo, "Persilangken mo Ia! Persilangken mo Ia!" 23:22 Idokken si Latus mo bai kalak i petellu kaliken, "Kadè ngo kessalahenNa? Ai oda lot dapet aku kessalahenNa tuk memmaingkensa merrutang kessah. Kuligas mo Ia, nai pè asa kupaluah." 23:23 Tapi dak isurakken kalak idi mo mergegoh mendokken asa ipersilangken Jesus, ujungna gabè mennang mo kalak idi. 23:24 Nai iputus si Latus mo hukumen matè bai Jesus, rembang bagè nipido jelma nterrem idi. 23:25 Nai ipaluah mo si Barabas bagè nipido kalak idi imo sienggo ikurungken kumarna menggutturi dekket memmunuh. Nai ipesakat mo Jesus bai kalak idi asa ibaing bana merguru lemmo atè kalak idi. 23:26 Nai iiring kalak i mo Jesus mi ruar. I tengah ndalan, pesimbak mo kalak i dekket sada kalak mergerar si Simon kalak Kirene, rimbaru roh dèng ia mi kuta idi. Ia mo itangkup kalak idi janah ipaksa memersan kayu silang idi ipodi Jesus. 23:27 Mbuè ngo kalak merrotor mengèkutken Jesus -- dèba mo ia daberru -- janah itangisi kalak i ngo Jesus. 23:28 Tapi itulihken Jesus mo mi podi, janah nina mo taba kalak idi, "Kènè alè karina daberru Jerusalem! Ulang mo tangisi kènè Aku, tapi diri ndènè mo tangisi kènè dekket dukak-dukak ndènè. 23:29 Kerna roh mo tikkina dokkenen ndèba mo, 'Sayurntua mo daberru nggempus, siso nung tubuh-tubuhen janah oda nung pesusuken!' 23:30 Nai idokken dèba mo ipas katika i taba delleng, 'Tinggang mo kami!' Janah taba uruk-uruk idokken, 'Tamburi mo kami!' 23:31 Kerna mula bagidi pemaing kalak idi taba kayu nggelluh, bakunè mo ndia pemmaing kalak idi taba kayu sienggo matè!" 23:32 Lot dua kalak sidèban perjahat -- iembah kalak idi asa ihukum matè rebbak dekket Jesus. 23:33 Soh kessa mo mi bekkas mergerar "Pertulanen", ilabangken kalak idi mo Jesus mi kayu persilang. Bagidi ma mo perjahat sidua kalak i -- ipersilangken mo sada kan kamuhun Jesus janah sada nai kan kambirangna. 23:34 Nai mersodip mo Jesus, "Ialè Pa, ulang pella ilugun kono pemmaing kalak idi, ai oda ibettoh kalak idi sinibaingna idi." Ibagi-bagi kalak idi mo isidi oles Jesus merkitè tendung. 23:35 Mbuè ngo kalak cènder i sidi janah mengidah karina simasa idi, ninganna pengulu-pengulu Jahudi dak mengerèhè-rèhè Jesus, nina mo, "Sidèban ipaluah ngo, bagèndari diriNa mo nemmu ipaluah mula tuhu ngo Ia Mesias Raja Sipaluah niperbagah-bagah Dèbata!" 23:36 Soridadu-soridadu idi pè mengerèhèi Jesus ngo. Roh ngo kalak idi mi gembar Jesus, iberrèken kalak i mo anggur macem tabasa. 23:37 Ninganna idokken kalak idi, "Mula raja ni kalak Jahudi ngo Kono, paluah mo diriMu!" 23:38 I babo kayu persilang Jesus idi, isurat ngo bagèen, "Èn mo Raja ni kalak Jahudi." 23:39 Sada ibas perjahat nipersilangken idi mengelèai Jesus, nina ngo, "Otang Kristus Raja Sipaluah niperbagah-bagah Dèbata ngo kono? Paluah mo diriMu, bak kami pè!" 23:40 Tapi ipesèngèt sisada kalak nai mo ia, nina mo, "Oda ngo keppè ikebbiari kono Dèbata, tukasi pè kita rebbak ihukum matè? 23:41 Sènteng ngo hukum simengenna banta, ai sijalo ngo ali perrulanta. Tapi ukum Ia, kadè poda lot salahna!" 23:42 Nai nina nola mo taba Jesus, "O Jesus, èngèt aku, Enggo kessa soh kono gabè Raja!" 23:43 Nai idokken Jesus mo tabasa, "Kudokken mo bamu, sidari èn mo kono rebbak dekket Aku i Paradaiso." 23:44 Kira-kira pukkul duabellas tengngah ari, gellap mo suberri nagerri idi kerna oda mercuhaya mataniari soh mi pukkul tellu cibon. 23:45 Nai merribak mo kirè-kirè ni Bages Dèbata, i babo nai soh mi terruh. 23:46 Nai mersora nggang mo Jesus, "Alè Pa! Mi bagasen tanganMu mo Kupesakat tendingKu!" Enggo kessa idokken bagidi, mpostep mo kessahna. 23:47 Iidah ekuten soridadu i kessa mo simasa i, ipoji kalak i mo Dèbata nina mo, "Tuhu ngo oda mersalah kalak ènda!" 23:48 Mbuè ngo roh jelma mi bekkas idi janah iidah ngo karina simasa idi. Mulak mo kalak i mi sapona merdengan ukur peselsel. 23:49 Karina simendahi Jesus bagi ma daberru simengèkutkensa i Galilea nai, cènder ndaoh-ndaoh janah mengidah karina simasa idi. 23:50 Lot mo sada kalak simergerar si Josep kalak Arimatea i nagerri Juda. Kalak selloh ngo ukurna janah ihormati sinterrem ngo ia, janah ia pè memmèma-mèma ngo i Kerajaen Dèbata idi senggep. 23:51 Oda ngo tuju iakap ukurna pemmakin ni runggu idi, tukasi pè ia masuk bilangen rungguun mbellen. 23:52 Laus mo ia menghadep mi si Latus, ipido mo bangkè Jesus. 23:53 Nai ipesampur mo bangkè Jesus idi i kayu persilang idi nai, ibalut mo dekket kaèn kapan ibas kaèn lennen nai. Nai igamparken mo bangkè idi mi bagasen kuburen sienggo ipahat i sada delleng batu. Oda nung dèng terpakkè kuburen idi. 23:54 Ari perkebbasen mi ari Sabat ngo arinna idi, janah oda pella ndekkah nèngè mulai mo ari Sabat. 23:55 Daberru-daberru siroh i Galilea nai sirebbakken Jesus idi, ièkutken ngo si Josep lako mengidah kuburen idi. Iidah kalak idi ngo barang bakunè pergampar bangkè Jesus ibagasen kuburen idi. 23:56 Nai molih mo kalak idi, ikebbasi mo rempah-rempah dekket minak baungkus lako memminaki bangkè Jesus. Sibarembenkenna, ari Sabat idi, mentadi ngo kalak idi ibas ulanna, mengèkutken pati-patiin.
24:1 Tikan ari Minggu, njengkas kalohoon, laus mo daberru-daberru i mi kuburen merembah rempah-rempah sienggo ihantari kalak idi kin. 24:2 Soh kessa kalak idi mi kuburen, idapet kalak i enggo nggoling batu penutup lubang kuburen idi. 24:3 Nai ibengketti kalak idi mo kuburen idi, tapi oda idah kalak idi bangkè Jesus idi. 24:4 Sinderrang cender idi kalak i janah jellak ukurna kerna simasa i, sintempu mo cènder dua kalak merpakèen mbulan merkillok-killok i gembar kalak idi. 24:5 Buradan mo kalak idi, nai gabè sujud mo kalak i mersembah soh mi tanoh, mènter idokken sidua kalak idi mo bai kalak i, "Kasa itulusi kènè singgelluh i bekkas simatè? 24:6 Oda isèn ia; enggo balik nggelluh ia! Èngèt kènè mo sienggo nidokkenNa i kin bai ndènè sinderrang i Galilea dèng Ia, 24:7 imo: Kennah ipesakat ngo Anak Jelma i mi tangan kalak perdosa, nai ipersilangken mo ia, tapi balik nggelluh ngo i ari petelluken." 24:8 Gabè ièngèt daberru-daberru idi mo kata nidokken Jesus idi kin. 24:9 Nai balik kessa kalak idi i pendèban idi nai, ibagahken kalak i mo karina simasa i mendahi sisiin sipuluhsada idi dekket mi karina simengèkutkensa sidèbanna i. 24:10 Ukum daberru-daberru idi imo: si Maria Magdalena, si Johana dekket si Maria inang si Jakobus, dekket daberru-daberru sidèbanna sirebbakken dekket kalak idi. 24:11 Tapi oda tok ukum sisiin idi mi sukuten daberru-daberru idi, ai idokdok ngo sukut-sukuten sambing. 24:12 Tapi kèkè mo si Petrus, lojang mo ia mi pendèban. Tungkuk mo ia menengngen mi bagasen, iidah mo pellin kaèn kapan mo kessa i sidi. Lengang kalohoon ngo si Petrus, balik mo ia dekket ukur merkalimesso terrèngèt karina simasa idi. 24:13 Sidarinkenna idi ma, laus ngo dua kalak sisiin Jesus mi sada kuta mergerar Emaus, kira-kira sipuluhsada batu daohna i Jerusalem nai. 24:14 Ninganna merdalan idi kalak i, dak icakapi kalak idi ngo karina terrèngèt simasa i. 24:15 Sinderrang kiranai idi kalak i, mènter roh mo Jesus mendahi kalak idi gabè rebbakken merdalan. 24:16 Iidah kalak i ngo Jesus tapi lot memmaingken asa oda itandai kalak i Ia. 24:17 Idokken Jesus mo taba kalak i, "Kadè ngo pana iranai kènè ninganna merdalan èn?" Terridah ngo ibas abè kalak idi marsak, merradi mo kalak idi merdalan idi. 24:18 Nai sada bai kalak i nai mergerar si Kleopas mengkuso taba Jesus, "Pellin kono ngo pana simerrian Jerusalem siso memettoh simasa mbaru dèng isidi?" 24:19 "Kadè pana masa?" nina Jesus mengaloi. "Simasa taba Jesus kalak Nazaret idi," nina kalak idi. "Ia sada kalak nabi, mergegoh kalohoon ngo ranaNa dekket pemahanNa pè i penengennen Dèbata bang jelma pè. 24:20 Enggo ipesakat imam-imam ekuten dekket pengulu-pengulu bangsanta Ia ihukum matè janah enggo mo ipersilangken Ia! 24:21 Harap ngo kami asa Ia naing paluahken Israel! Petellu ariken ènda mo enggo, kessa nai masa bagidi. 24:22 Nai dèng ma barang piga-piga kalak daberru horong nami memmaing kami gabè tersengget. Ai njengkas kalohon ngo ndaboi laus kalak idi mi kuburen, 24:23 tapi oda idapet kalak idi nèngè isidi bangkè Jesus. Balik mo kalak idi, janah nina iidah kalak idi ngo malaèkat; idokken malaèkat idi nggelluh ngo Jesus. 24:24 Dèba ma dengan nami enggo laus mi kuburen, idapet kalak idi ngo tuhu bagè sukuten daberru idi, pellin Jesus ngo kessa oda iidah kalak idi." 24:25 Nai idokken Jesus mo taba kalak idi, "Èo, kènè simoto! Mahal nai kènè percaya mi sinidokken nabi-nabi! 24:26 Mesias Raja Sipaluah niperbagah Dèbata idi, otang kennah menggong simpersuk ngo lako soh mi kemulianNa?" 24:27 Nai ipeterrang Jesus mo taba kalak idi, kadè idokken ibagasen Bibèl terrèngèt diriNa, mulai i bukku si Musa nai soh mi bukku nabi-nabi. 24:28 Ujungna naing soh mo kalak idi mi kuta nitujuna. Ipakulah Jesus mo bagè naing iterrusken merdalan, 24:29 tapi icèkèpi kalak idi mo ia, "Rebbak mo kita" nina kalak idi tabaSa, "ai enggo ramben ari, mataniari pè enggo sundut." Nai mbengket mo ia rebbak dekket kalak idi. 24:30 Tikan kundul rebbak mangan kalak idi, ibuat Jesus mo roti idi, idokken mo lias atè taba Dèbata, nai ipenggelli mo roti i dekket tanganNa, iberrèken mo bai kalak idi. 24:31 Gabè satdar mo kalak idi janah itandai mo ia. Tapi mersep mo Jesus ibas pengidah kalak i nai. 24:32 Nina kalak idi mo samahsa, "Otang bagè mpeddas ngo ndai siakap tikan kirana Ia dekket kita i tengngah ndalan bak sinderrang ipeterrang ma banta isi Bibèl?" 24:33 Nai gejapkenna i mènter kèkè mo kalak idi kebbas, balik mo kalak idi mi Jerusalem. Idapet kalak i, enggo tumpu sisiin Jesus sisipuluh sada idi, bagi ma dekket sidèbanna pè. 24:34 Nai idokken sisiin i mo, "Tuhu-tuhu ngo enggo balik nggelluh Tuhan i! Enggo ipetarar diriNa bai si Simon!" 24:35 Nai isukutken sidua kalak i ma mo simasa i tengah ndalan, soh mi penandai kalak i mi Tuhan i tikan memenggelli roti. 24:36 Sinderrang mengeranai kalak i, terrèngèt sindai, sintempu mo cènder Jesus i tengngah kalak idi ninganna mendokken, "Damè mo bai ndènè!" 24:37 Tersengget mo kalak idi janah buradan, idok ngo pana bègu niidah kalak idi. 24:38 Tapi idokken Jesus mo, "Kasa kènè mbiar janah kasa oda percaya kènè? 24:39 Tengngen mo tanganKu dekket nèhèngKu! Aku ngo èn, dadap mo janah tengngen kènè mo: ukum bègu oda ngo merdaging janah mertulan bagè niidah ndènè Aku." 24:40 Ninganna idokken Jesus bagidi, ipacidah mo tanganNa bak nèhèNa taba kalak idi. 24:41 Tapi kumarna oda dèng kalak i percaya, kemulihken lolo bak lengang, idokken Jesus mo taba kalak idi, "Lot ngo pangaan ndènè isèn bagèndari?" 24:42 Nai iberrèken kalak i mo tabaSa sada ikan pinanggang. 24:43 Ijalo Jesus mo ikan i janah ipangan ipetengngen-tengngen kalak idi. 24:44 Enggo kessa i, idokken Jesus mo bai kalak i, "Èn mo sienggo Kudokken i kin taba kènè, nderrang rebbak dèng Aku dekket kènè, ai tersurat terrèngèt Aku ibas Bukku si Musa bak Nabi-nabi dekket Psalm pè, kennah saut ngo i masa." 24:45 Nai ibuka Jesus mo pikiren kalak idi, asa iantusi kalak i nidokken Bibèl. 24:46 Idokken Jesus mo taba kalak i, "Tersurat ngo ibas Bibèl, kennah menggong simpersuk ngo Raja Sipaluah niperbagah-bagah Dèbata idi, janah balik nggelluh i ari petelluken. 24:47 Tersurat ma ngo, kennah isukutken ngo merkitè gerarna taba karina bangsa, iampuni Dèbata ngo dosa ni kalak simertobat. Berrita idi isiarken mulai i Jerusalem nai. 24:48 Kènè ngo gabè saksi terrèngèt karinana idi. 24:49 Kupasulak mo mendahi kènè niperbagah-bagah Bapangku. Tapi ulang mo kènè mèrèt ibas kuta ènda nai, pèma roh ipesenggep bai ndènè kuasa Dèbata." 24:50 Enggo kessa i, iarahken Jesus mo kalak i mi ruar kuta sampè soh mi Betania. Ipekimbang mo tanganNa memasu-masu kalak idi. 24:51 Sinderrang memasu-masu idi Ia, mersirang mo kalak idi, laus mo Ia mi sorga. 24:52 Mersujud mo kalak idi mersembah dempak Jesus, nai molih mo kalak i mi Jerusalem ibagasen merlolo atè kalohon. 24:53 Dak i Bages Dèbata ngo kalak idi memoji-moji Dèbata.
1:1 I mulana, sinderrang madèng ihanaken dunia èn, enggo kin ngo lot kata i. Rebbak dekket Dèbata ngo kata i, janah Dèbata ngo kata idi. 1:2 I mulana nai ngo Ia rebbak dekket Dèbata. 1:3 Merkitè kata i ngo ihanaken Dèbata sagumanna silot. Oda lot barang kadè pè hana, ukum mak merkitè-kitè Ia. 1:4 Kata i ngo memmerrèken kenggelluhen, janah kenggelluhen i ngo merrèken sendang taba jelma. 1:5 Merbinendang ngo cuhaya i mi bagasen sigellap, janah oda terènteppen sigellap i cuhaya i. 1:6 Ipasulak Dèbata ngo utusenna magahken terrèngèt cuhaya i taba jelma. Si Johanes ngo gerar utusen i. 1:7 Roh ngo ia memmagahken sukuten i mendahi karina jelma, asa percaya kalak i taba cuhaya i. 1:8 Oda ngo ia dèng penendang i; ai roh pè ia pellin lako memmagahken terrèngèt penendang idi ngo. 1:9 Penendang i ngo cuhaya situhunna, cuhaya siroh mi dunia èn lako menerrangi karina jelma. 1:10 Enggo i dunia èn kata idi. Tukasi pè merkitè kata idi ngo itempa Dèbata dunia ènda, tapi oda itandai dunia èn ia. 1:11 Roh ngo ia mi nagerriNa sendiri, tapi oda ijalo bangsaNa i Ia. 1:12 Tapi lot ma ngo barang piga-piga kalak menjaloSa, janah percaya baNa. Bai kalak idi mo iberrèken kuasa asa gabè dukak-dukak Dèbata, 1:13 sinitubuhken oda bai jelma nai, kerna nggelluh rimbaru idi bai Dèbata nai ngo rohna. 1:14 Enggo gabè jelma kata idi janah merrian i tengah-tengahta. Enggo siidah kesangapenNa imo kesangapen nijaloNa bagè Anak sada-sada ni Dèbata. Ai merkitè Ia ngo ipeterar Dèbata dirina dekket ngkelleng atèNa banta. 1:15 Si Johanes ngo mengindangkenSa, ai nina ngo, "Èn mo kalakna sikudokken i roh i podingku nai; tapi belgahen ngo Ia asa aku, ai enggo kin ngo lot Ia sinderrang madèng tubuh aku." 1:16 Ngkelleng kalohoon ngo atèna banta, jadi dakdak ipasu-pasu ngo kita. 1:17 Merkitè si Musa ngo iberrèken Dèbata pati-patiin banta, tapi merkitè Jesus Kristus, ipetarar Dèbata ngo dirina dekket kelleng atèna banta. 1:18 Isè poda nung mengidah Dèbata, laènken anakNa sada-sada i sidos dekket Dèbata, sirebbak dekket Bapa i, Ia ngo petararken Dèbata Bapa banta. 1:19 Ipasulak pengulu-pengulu Jahudi mo imam-imam dekket dèba marga Lewi i Jerusalem nai, mendahi si Johanes janah mengkusoken tabasa, "isè ngo ko situhunna?" 1:20 Oda ngo irusiaken si Johanes, ntompel ngo idokken, "Oda ngo Aku Raja Sipaluah niperbagah-bagah Dèbata." 1:21 "Mula bagidi, isè ngo kono?" nina kalak idi mengkusoi. "Mada ngo kono si Elias?" "Oda," nina si Johanes. "Mada ngo kono Nabi idi?" nina kalak i dèng ma. "Oda," nina mengaloi. 1:22 "Mula bagidi, bagahken mo bai nami, isè ngo kono," nina kalak idi, "Asa kubettoh kami magahken taba sipasulakken kami. Bakunè pendokkenmu terrèngèt dirimu?" 1:23 "Ukum aku," nina si Johanes, "Imo bagè nidokken Nabi Jesaya, 'Sora sitenggo-tenggo i kellongoon. Peddèas kènè mo dalan bai Tuhan i!' " 1:24 Ukum kalak simengkusoi idi imo sinipasulak kalak Parisè. 1:25 Nai nina kalak idi mo taba si Johanes, "Mula oda ngo kono Raja Sipaluah niperbagah-bagah Dèbata, oda si Elias, oda ma Nabi idi kasa perridiken jelma kono?" 1:26 Ialoi si Johanes mo, "Laè ngo kuperridiken bai jelma i. Tapi enggo i tengah-tengah ndènè sada kalak siso nitandaan ndènè. 1:27 Roh ngo Ia janah enggo i podingku, tapi mengosari èkèt cipatuNa pè oda sanggup dèng aku." 1:28 I Betania ngo masa i karina, kan kebincaren Laè Jordan bekkas si Johanes perridiken jelma i. 1:29 Sibarembenkenna, idah si Johanes mo roh Jesus mendahisa. Idokken si Johanes mo, "Tengen kènè mo! Adoi mo biri-biri Dèbata mahan pèlèenken i, asa sasa dosa dunia èn! 1:30 Ia ngo sikudokken i siroh i podingku nai, tapi belgahen ngo Ia asa aku; ai enggo kin ngono lot Ia, madèng kin pè tubuh aku. 1:31 Oda ngo kutandai dèng kin Ia, tapi roh aku perridiken bangsa Israel merkitè laè asa itandai kalak i Ia." 1:32 Bagèen ngo pengindangken si Johanes terrèngèt Ia, "Kuidah ngo Tendi Dèbata susur i langit nai bagè ndarapati, senggep janah merrian baNa. 1:33 Sinderrangna i oda kutandai dèng kin Ia; tapi Dèbata sipasulakken aku perridiken merkitè laè, mendokken bangku: 'Barang mendahi isè idah kono susur tendi Dèbata janah merrian bana, Ia mo roh perridiken jelma merkitè Tendi Dèbata!' 1:34 Tuhu-tuhu ngo enggo kuidah idi," nina si Johanes, "Asa, tuhu ngo Ia Anak Dèbata; percaya mo kènè!" 1:35 Sibarembenkenna nola, cènder nola ma mo i bekkas idi si Johanes dekket dua kalak sisinna. 1:36 Idah kessa mo Jesus memellus arap idi, nina mo, "Tengen kènè mo! Adoi mo biri-biri Dèbata!" 1:37 Idengkoh sisiin si Johanes sidua kalak idi ngo nidokkenna i, nai mèter ièkutken kalak idi mo Jesus. 1:38 Tumulih mo Jesus mi podi, nai idah mo kalak i mengèkutkenSa, gabè idokken Jesus mo, "Isè ngo nitulusen ndènè?" Ialoi kalak idi mo, "Rabi, i dikè ngo kono merian?" (Rabi lapatenna 'Guru'). 1:39 "Roh mo kènè, asa idah kènè," nina Jesus. Nai ièkutken kalak idi mo Jesus, rebbak mo kalak i sidarinkenna i. Kira-kira pukkul empat ciboon mo i. 1:40 Sada ibas kalak idi sidua i nai sienggo mendengkoh kadè sinidokken si Johanes janah laus nola mengèkutken Jesus, imo si Andreas, anggi si Simon Petrus. 1:41 Nai ndor mo itulusi si Andreas si Simon kakana i, nina mo mbangsa, "Enggo jumpa kami Mesias i, Raja Sipaluah niperbagah-bagah Dèbata!" (Mesias lapatenna Kristus kata Junani.) 1:42 Nai ibabai si Andreas mo si Simon mendahi Jesus. Idah Jesus kessa mo si Simon, nina mo, "Si Simon ngo kono, anak si Jona. Si Kepas mo kono mi podinkenna èn." (Kepas kata Heber dos ngo i dekket Petrus kata Junani, lapatenna delleng batu). 1:43 Sibarembenkenna, ipetettap Jesus mo ukurna lako laus mi Galilea. Nai pesimbak mo ia dekket si Pilipus, idokken mo mbangsa, "Èkutken mo Aku!" 1:44 Si Pilipus asalna i Betsaida nai, imo bekkas si Andreas dekket si Petrus. 1:45 Nai pesimbak nola mo si Pilipus dekket si Natanael, idokken mo mbangsa, "Enggo pesimbak kami dekket kalakna sinidokken si Musa ibas Bukku patinna dekket sinidokken nabi-nabi. Imo Jesus anak si Josep kalak Nazaret." 1:46 Tapi ialoi si Natanael mo, "Mèter lot mo harapen roh simendè i Nazaret nai?" "Ita mo asa idah kono!" nina si Pilipus mengaloi. 1:47 Idah Jesus kessa mo roh si Natanael mendahisa, idokken Jesus mo terrèngètsa, "Èn mo sada kalak Israel bennar, oda lot sipakulah-kulah bana!" 1:48 Nai idokken si Natanael mo taba Jesus, "Bakunè carana pemmettohmu terrèngèt aku?" Ialoi Jesus mo, "Kuidah ngo kono i terruh kayuara i, sinderrang madèng idiloi si Pilipus idi kono." 1:49 "Guru," nina si Natanael. "Anak Dèbata ngo kono, Raja kalak Israel!" 1:50 Nai nina Jesus mo, "Mada ngo kumarna Kudokken i kuidah kono i terruh kayu ara i, memmaing asa gabè percaya kono? Idahenmu mo belgahen dèng daripada i!" 1:51 Idokken Jesus dèng ma, "Kudokken mo bai ndènè; idahèn ndènè mo mbuka langit, janah merlaus roh malaèkat Dèbata mendahi Anak Jelma."
2:1 Enggo kessa dua ari, lot mo merbayo i kuta Kana sini Galilea. I sidi ma ngo dekket inang Jesus. 2:2 Jesus pe dekket sisinNa dekket ngo idilo merbayo i. 2:3 Nai tupung mo kerri karina anggur sukut i, nai idokken inang Jesus mo taba Jesus, "Enggo kerri anggur sukut i." 2:4 Ialoi Jesus mo, "Nangè, ulang pasulak Aku; ai makdèng dapet tikkingku lako memmaing barang kadè." 2:5 Nai idokken inangna i mo taba perkebbas nisidi, "Barang kadè idokken Jesus taba kènè, bahan kènè mo." 2:6 Lot mo isidi hantar ennem goci siat-siat ualuhpuluh soh mi serratus sellup laè mahan pemmorih nèhè, mengèkutken hatoren agama kalak Jahudi. 2:7 Idokken Jesus mo taba perkebbas i, "Domi kènè mo goci i dekket laè." Nai idomi kalak i mo laè mi goci i. 2:8 Idokken Jesus mo nola taba kalak idi, "Taku mo cituk laè ni goci i, embahken mo taba induk perkebbas." Iembah kalak i mo laè nitakuna i taba induk pèsta i, 2:9 iakapi mo laè i, keppè enggo mobah gabè anggur. (Oda ngo ibettoh barang i dikè nai rohna anggur i, ai pellin perkebbas i ngo kessa bettoh-bettohen). Nai idiloi induk perkebbas i mo kèla i, 2:10 nina mo mbangsa, "Biasana anggur simerrasana ngo lebbè ihidangken dèba, tapi mula enggo karina tamuè mengènum mbuè anggur, baru pè asa ihidangken nola anggur biasa. Keppèken kono isimpan kono dèng ngo anggur simerrasana, janah bagèndari dèng ngo asa ihidangken kono!" 2:11 Idi mo tanda kellengangen perlebbè ihanaken Jesus, i kuta Kana sini nagerri Galilea. Merkitè tanda kellengangen i, ipacidah Jesus ngo kemulianNa. Nai percaya mo sisinNa i tabaSa. 2:12 Enggo kessa i, laus mo Jesus bak inangNa rebbak dekket sisinNa i mi Kapernaum, janah i sidi mo kalak i merian barang piga-piga ari. 2:13 Tikan enggo ndessing Ari Raya Paskah kalak Jahudi, laus mo Jesus mi Jerusalem. 2:14 Idapet Jesus mo jelma merdèa lembu, biri-biri dekket ndarapati i Bages Dèbata i Jerusalem; bagidi ma dekket simenukari kèpèng merkundulen isidi. 2:15 Nai ipelias Jesus mo ligas-ligas ipas tinali nai, ijalang mo karina pinakan-pinakan idi i Bages Dèbata nai, biri-biri bak lembu pè. Ipengongkitken mo mèja penukaren kèpèng, merhamburen mo kèpèng kalak idi. 2:16 Idokken mo taba kalak simerdèa ndarapati, "Embah karina ndrapatimi. Ulang baing kènè gabè bekkas pertiga-tigaan Bages BapangKu!" 2:17 Nai ièngèt sisinNa i mo ayat Bibèl èn, "Mergollah-gollah ngo bagè api menutung ukum kelleng atèngKu midah Bagesmu alè Pa!" 2:18 Ialo penguasa-penguasa kalak Jahudi mo Jesus merkitè kata-kata mpingas, nina mo, "Tuduhken bai nami tanda kellengangen mahan bukti, lot kuasamu memmaing bagidi!" 2:19 Ialoi Jesus mo, "Rumpakken kènè mo Bages ni Dèbata èn, nai Kupajek nola mo i mengolihi ibagasen tellu ari." 2:20 "Empatpuluh tahun mo dekkahna pelliasken Bages Dèbata èn, keppèken ipellias kono nimu ibagasen tellu ari sambing?" nina kalak i. 2:21 Tapi dagingna sendiri ngo sinidokken Jesus Bages Dèbata. 2:22 Asa balik nggelluh kessa Jesus i kemmatèen nai ièngèt sisinNa i mo nidokken Jesus idi kin. Gabè percaya mo kalak idi mi sitersurat ibas Bibèl, dekket mi kata sinidokken Jesus. 2:23 Nderrang i Jerusalem Jesus mer Ari Raya Paskah, nterrem ngo kalak percaya bana kumarNa tanda kellengangen sinipehanaNa. 2:24 Tapi ukum Jesus oda tok midah kalak i, kumarna itandai ngo karina jelma. 2:25 Oda pella perlu ibagahken dèba keterrangen baNa, ai ibettoh ngo kadè siturah ibagasen pusuh perratèen jelma.
3:1 Lot mo sada kalak Parisè mergerar si Nikodemus. Sada kalak terpandang ngo ia i agama Jahudi. 3:2 I sada berngin, roh mo ia mendahi Jesus, mendokken, "Guru, kubettoh kami ngo Ko roh bai Dèbata nai. Ai isè poda ndorok memmaing tanda kellengangen bagè nibaingmu i, kum mak Dèbata denganna." 3:3 Ialoi Jesus mo, "Èngèt mo; isè poda ndorok mbengket mi Kerajaen Dèbata, ukum mak mengolihi tubuh ia." 3:4 "Bakunè ngo ndorok mengolihi tubuh jelma, mula enggo mbelgah?" nina si Nikodemus taba Jesus. "Ai ndorok kin mo ia mbengket nola balik mi kurungen manik, asa itubuhken nola?" 3:5 Ialoi Jesus mo, "Situhunna ngo sikudokken èn, mula oda kalak itubuhken ipas laè dekket Tendi Dèbata nai, oda ndorok mbengket ia mi Kerajaen Dèbata. 3:6 Secara perdagingen itubuhken ngo jelma bai partuana nai, tapi secara pertendiin itubuhken Tendi Dèbata. 3:7 Ulang kono lengang mula Kudokken kennah itubuhken ngo kènè mengolihi. 3:8 Menempul ngo angin barang mikè lemmo atèna; sidengkoh ngo sorana, tapi oda nibettoh idikè nai janah laus mikè ia. Bagi ngo jelma sienggo itubuhken Tendi Dèbata." 3:9 "Bakunè ndorok terjadi bagi?" nina si Nikodemus mengkusoi. 3:10 Ialoi Jesus mo, "Kono guru i tengah-tengah kalak Israel, oda ibettoh kono i? 3:11 Kudokken mo taba kono; kuranaken kami ngo sikubettoh kami, kuindangken kami ngo sikuidah kami, tapi oda tok kènè mi sikuindangken kami i. 3:12 Salang terrèngèt dunia èn Kusukutken bamu, oda percaya kono bangku, makinsa nola mo mula Kusukutken terrèngèt sorga? 3:13 Isè poda nung dèng laus mi sorga, tapi ukum i sorga nai enggo lot roh mi dunia èn, imo Anak Jelma. 3:14 Bagè pemmaing si Musa pedatesken nipè tembaga ipas sada tongket kayu i kellongoon, bagi ngo kennah ipedates Anak Jelma, 3:15 asa nggelluh karina sipercaya baNa." 3:16 Ai bagèen ngo ngkelleng atè Dèbata midah dunia èn, Iberrèken ngo AnakNa Sada-sada i, asa ulang mago gennep sipercaya bai Anak idi, tapi asa kenggelluhen siamman sumendah bana. 3:17 Ai ipasulak Dèbata AnakNa mi dunia èn, oda ngo lako menghukum dunia èn, tapi lako paluahken dunia èn ngo. 3:18 Barang isè percaya taba anak idi, oda ngo kenna hukum, tapi siso percaya taba Anakna Sada-sada i, kenna hukum ngo. 3:19 Bagèen ngo hukumna i: Enggo roh penendang i mi dunia èn, tapi lemmoon ngo atè jelma i midah sigellap daripada midah sinterrang i, ai jahat ngo pengelako kalak i. 3:20 Barang isè maing jahat, nceggo ngo atèna midah sinterrang i, asa mboni pengelakona sijahat i; 3:21 Tapi barang isè merpengelako mendè, idapetken ngo penendang i, asa ntarar karinana pemmaingna rembang mi sinipergeddo Dèbata. 3:22 Enggo kessa i, laus mo Jesus rebbak dekket sisinNa mi nagerri Juda. Isidi mo kalak i merrian barang piga-piga ari dekkahna ninganna perridiken jelma. 3:23 Tapi si Johanes pè peridiken ngo i Ainon, njolmit mi Salim, ai mbuè ngo isidi laè; nai merrohen mo nterrem jelma mi sidi asa iperridi, 3:24 ai madèng ngo ikurungken si Johanes tikanna i. 3:25 Mersoal mo tikanna i sisiin si Johanes dekket sada kalak Jahudi tersèngèt hatoren perpangiren i agama kalak Jahudi. 3:26 Laus mo kalak i mendahi si Johanes, nina mo, "O Guru, ièngèt kono dèng ma ngo kalak siroh mendahi Guru i, tikan i kèparen Laè Jordan, imo nituduhkenmu bai nami tikala i? Bagèndari perridiken ngo ia, janah mèduk ngo kalak roh mendahiSa!" 3:27 Nai ialoi si Johanes mo, "Oda ndorok jelma memmaingken barang kadè, ukum mak iberrèken Dèbata bana. 3:28 Otang enggo ngo idengkoh kènè kudokken, 'Oda ngo aku Raja Sipaluah niperbagag-bagah Dèbata. Pellin solo-solona ngo kessa aku, ipasulak roh lebbèen asa Ia.' 3:29 Kèla ngo sidasa daberru mula enggo jejap kalak i. Asa ukum anak-anak kèla pellin mendengani sambing ngo kessa i janah mendengkoh-ndengkohi, nai sampang mo atèna mula idengkoh sora kèla i. Bagidi ma ngo bang aku pè. Dom ngo sampang atèngku bagèndari. 3:30 Ia ngo makin mbelgah, tapi ukum aku makin kèdèkna ngo." 3:31 Barang isè roh i babo nai, ia ngo mengantusi karina jelma. Ukum siroh i dunia èn nai imo kalak sini dunia èn, janah mengeranaken tersèngèt dunia. Ia siroh i sorga idi nai ngo mengatasi karinana! 3:32 Iranaken ngo kadè siniidah dekket sinidengkohNa, tapi sada kalak poda percaya mi sini ranakenNa idi. 3:33 Barang isè percaya mi si ni ranakenNa idi, ituhu-tuhui kalak i ngo kebennaren Dèbata. 3:34 Barang isè iutus Dèbata, isukutken ngo Dèbata, ai iberrèken Dèbata ngo Tendina baNa. 3:35 Ikekelengi Bapa i ngo AnakNa janah enggo isohken sagumanna mi bagasen kuasaNa. 3:36 Barang isè percaya taba kalak idi, terolih nggelluh soh mi amman-sumendah ngo ia; tapi barang isè oda percaya taba Anak idi, oda irasai kalak sibagidi nggelluh situhunna. Ihukum Dèbata ngo ia soh sidekkah-dekkahna.
4:1 Idengkoh kalak Parisè mo buèen dèng ngo iperridi Jesus asa iperridi si Johanes. 4:2 (Tukasi pè oda ngo dekket Jesus perridiken, tapi pellinsisinNa idi sambing ngo kessa.) 4:3 Nai ibettoh Jesus kessa mo i, laus mo ia i Judèa nai balik mi Galilea. 4:4 Tikan perdalanenna idi, kennah memellus arap Samaria ngo Ia. 4:5 Nai soh mo Jesus mi sada kuta i Samaria i mergarrar Sikhar, imo ndessing mi tanoh niberrèken si Jakob arnia taba anakna si Josep. 4:6 Lot ngo isidi sada tellaga si Jakob. Kumarna ledjana iakap Jesus merdalan i, kundul mo Ia i biding tellaga i. Kira-kira cèger ari mo i, 4:7-8 tapi ukum sisiin Jesus enggo laus mi kuta lako menokor bekkel. Nai roh mo sada kalak daberru Samaria mi tellaga i naing menaku laè. Idokken Jesus mo tabasa, "Dikè mo Kuènum dèba laè i?" 4:9 Ialoi daberru Samaria i mo, "Kasa mengido mènum kono kalak Jahudi taba aku kalak Samaria?" (Ai oda mersaor kalak Jahudi dekket kalak Samaria). 4:10 Nai ialoi Jesus mo, "Ukum ibettoh kono ngo pemerrèken Dèbata janah itandai kono isè mengido laè bamu i, tentu uè ngo ko mido laè ènumen baNa nai; nai gabè Iberrèken mo bamu laè sipegelluhken." 4:11 "Tuan," nina daberru i, "salang taku-taku oda lot bamu, janah mbages kalohon ngo tellaga èn. I dikè nai mo dapet Kono laè sipegelluhken i? 4:12 Ai belgahen ngo kono dok atèmu asa empung nami si Jakob simemerrèken tellaga èn bai nami. Ia sendiri pè mennaku janah mengènum laè i tellaga èn nai; bagidi ma ngo dukak-dukak bak pinakanna pè?" 4:13 "Dak muasen ngo karina jelma simengènum laè i tellaga èn nai," nina Jesus, 4:14 "tapi simengènum laè sinaing berrènkenKu idi, oda nèngè muasen ia soh mi amman summendah. Janah dèng ma, ukum laè siberrènkenKu idi, gabè laè mul ngo i, ibagasen dirina, janah dak menjarir mi ruar, janah memerrèken bana nggelluh situhunna!" 4:15 Nina daberru i mo, "Tuan, berrè mo bangku laè sibagidi asa ulang muasen nè aku; janah oda perlu nè roh aku mengaleng laè mi sèn." 4:16 "Laus mo kono lebbè mengaleng sinibalèmu, nai molih nola mo kono misèn," nina Jesus. 4:17 Ialoi daberru i mo, "Oda lot sinibalèngku." Tuhu ngo nidokkenmi, oda lot sinibalèmu, 4:18 tapi enggo lima kalak sinibalèmu. Anak laki denganmu sibagèndari i pè oda ngo sinibalèmu." 4:19 Nina daberru idi mo taba Jesus, "Bagèndari enggo kubettoh nabi ngo Kono. 4:20 Idokken empung nami i delleng èn ngo kusembah kami Dèbata, tapi bangsa ndènè mendokken pellin i Jerusalem ngo kessa bekkas menembah Dèbata." 4:21 Nina Jesus mo, "Percaya mo kono. Roh mo tikkina, oda nè i delleng èn barang i Jerusalem bekkas menembah Dèbata. 4:22 Isembah kènè kalak Samaria ngo siso nitandaan ndènè. Tapi ukum kami kalak Jahudi kusembah kami ngo Ia sikutandai kami, ai bai bangsa Jahudi nai ngo roh kelluahen i. 4:23 Tapi dapet nè mo tikkina janah enggo roh tupèh, merkitè Tendi Dèbata, isembah karina jelma mo Bapa i. Merpenguèi tuhu-tuhu mo kalak i bagè nipergeddo atè Bapa. 4:24 Tendi ngo Dèbata, janah pellin merkitè kuasa Tendi Dèbata ngo kalak ndorok menembah Dèbata Bapa, bagè situhunna ia lot. 4:25 Nina daberru idi mo mbang Jesus, "Kubettoh ngo naing roh nè mo Raja Sipaluahken i (sinigerarenna Kristus). Mula roh kessa Ia ibagahken mo karinana banta." 4:26 Nina Jesus mo, "Aku ngo i, simengeranai bagèndari dekket kono." 4:27 Tikan bagidi roh mo sisiin Jesus. Lengang ngo kalak i mengidah Jesus mengeranai dekket sada kalak daberru. Tapi isè poda lot mendokken taba daberru i, "Kadè perlu bamu nangè?" barang taba Jesus, "Kasa mengeranai Kono dekket daberru i?" 4:28 Nai laus mo daberru i isidi nai lojang mi kuta janah mendokken taba pengisi kuta i, 4:29 "Ita kènè sidahi kalak simengeranaken bangku karina ulah-ulahki. Tah mada ngo Ia Raja Sipaluahken i?" 4:30 Nai merlausen mo pengisi kuta i mendahi Jesus. 4:31 Sinderrang bagidi, idokken sisiin i mo taba Jesus, "Mangan mo lebbèken Guru i," nina kalak i. 4:32 Tapi ialoi Jesus mo, "Lot ngo pangaan bangKu siso nibettoh ndènè." 4:33 Gabè mersidokenken mo sisiin i samahSa, "Mada ngo ndia lot menaruhken pangaan baNa?" 4:34 Nai idokken Jesus mo, "Pangaan ngo bangKu menguèi lemmo atè sipasulakken Aku, janah mengulaken ulaan niberrèkenNa mahan ulankenKu. 4:35 Otang idokken kènè ngo, 'Empat bulan nai mo mosim perraniin?' Tapi Kudokken mo taba kènè: Seppè mo tengen kènè! Enggo mo ntua buahna, lako perraniin! 4:36 Enggo ijalo kalak simerrani i upahna; enggo ipepulung hasilna imo kenggelluhen amman sumendah. Rebbak mersampang atè mo simardang dekket simerrani. 4:37 Asa tuhu ngo nidokken perumpamaan èn, 'Sisada èn ngo mennuan, tapi sisada adoi ngo merrani!' 4:38 Kupasulak ngo kè merrani juma siso niula ndènè; sidèban ngo mengula i sidi; tapi kènè ngo menjalo laba ipas ndiula kalak idi nai." 4:39 Mèduk ngo kalak Samaria pengisi kuta i gabè percaya taba Jesus kumarna pendokken daberru i, "Ibagahken ngo bangku karinana ulah-ulahku idi." 4:40 Asa pejumpa kessa mo kalak Samaria i dekket Jesus, iendik-endik kalak i mo Jesus, asa isidi lebbè merrian Jesus i. Jadi merrian i sidi mo Jesus dua ari dekkahna. 4:41 Jadi buèen ngo kalak percaya taba Jesus kumarna peddahNa sendiri taba kalak i. 4:42 Ai nina kalak i ngo taba daberru i, "Bagèndari enggo percaya kami, oda kumarna pellin nidokkenmu i sambing taba kami, tapi kumarna enggo kudengkoh kami sendiri peddahna; janah enggo kubettoh kami, tuhu ngo ia Sipaluah dunia èn." 4:43 Enggo kessa dua ari dekkahna Jesus i kuta Sikhar, berkat mo ia laus mi Galilea. 4:44 Enggo kin ngo idokken Jesus, "Oda ngo mersangap nabi i kutana." 4:45 Soh kessa mo Ia mi Galilea, lolo kalohoon ngo kalak nisidi menjalo Jesus, ai sinderrang i Jerusalem kalak i merari Raya Paskah, idah kalak i ngo karinana nibaing Jesus i sidi. 4:46 Nai balik mo Jesus mi kuta Kana si ni Galilea, imo kuta bekkasna pennah memmaing laè kembali anggur. Jadi lot mo i Kapernaum sada kalak pugabè istana, mersakit ngo dukakna. 4:47 Idengkoh kessa mo enggo roh Jesus mi Galilea i Juda nai, idapetken mo Jesus, ièlèk-èlèk mo Jesus, asa roh mi Kapernaum lako pemalumken dukakna sienggo patè-patèen i. 4:48 Nai idokken Jesus mo tabasa, "Mula oda idah kènè tanda kellengangen, oda ngo percaya kènè." 4:49 Gabè nina pugabè istana i mo taba Jesus, "Tuhan, narih pedor mo roh, sinderrang madèng matè dukakku idi." 4:50 "Molih mo kono," nina Jesus. "Nggelluh mo dukakmu i!" Percaya ngo ia mi sinidokken Jesus i, nai laus mo ia. 4:51 I tengah ndalan dèng ia lako balik mi bagesna, roh mo naposona mendahisa mendokken, "Nggelluh ngo dukamu idi!" 4:52 Jadi ikusoi mo kalak i, pukul piga malum iakap dukakna i. Nai ibagahken kalak i mo, "Bari kira-kira tengah ari pukul sada enggo laus singgara i." 4:53 Gabè ièngèt mo tupung bagidi ma ngo kettikana idokken Jesus tabasa, "Nggelluh mo dukakmu i." Gabè percaya mo ia bak karina sisimpangansa taba Jesus. 4:54 Idi mo kellengangen pedua kaliken ihanaken Jesus i Galilea, kessa nai roh Ia i Juda nai.
5:1 Enggo kessa i, lot mo pèsta kalak Jahudi, nai laus mo Jesus mi Jerusalem. 5:2 I Jerusalem, i gembar Pèntu Biri-biri, lot sada bendar i sidi mergerar Betesda kum i kata Heber. I sikuliling bendar i, lot ngo lima sapo-sapo. 5:3 Mèduk ngo simersakit mergalèen i èmpèr-èmpèr i; dèba pètung, dèba kèpang, dèba itempuk sigading Karinana kalak i dak mèma-mèma pergoncang bendar i. 5:4 Ai susur ngo sipata malaèkat Tuhan menggoncang laè bendar i. Barang isè simersakit i perlebbè masuk mi laè goncang i, kennah malum ngo, barang kadè pè sakitna. 5:5 Lot ma mo isidi sada kalak daholi enggo tellupuluh ualuh tahun dekkahna mersakit. 5:6 Idah Jesus mo ia galè isidi, janah ibettoh Jesus ngo enggo bagidi dekkahna ia mersakit janah gampar isidi, gabè nina Jesus mo mbangsa, "Naing malum kono?" 5:7 Ialoi simersakit i mo, "Ialè tuan, oda lot kadè-kadèngku isèn, lako mendokong aku mi bagasen laè i, tikan goncang. I dèng kebbas aku lako masuk mi bendar i, enggo mo ilebbèi dèba aku." 5:8 Nai idokken Jesus mo mbangsa, "Kèkè mo ko, balun mo bellagenmu, merdalan mo ko!" 5:9 Nai mènter malum mo iakap, iembah mo bellagenna, janah merdalan mo ia. Masa ngo i tikan ari Sabat. 5:10 Kerna naidi, nina perkuasa kalak Jahudm mo taba kalak sirembaru malum i, "Ari Sabat ngo ari èn. Oda ndorok kono merembah bellagenmu i, ai mengellausi hatoren agama ngo i." 5:11 Tapi ialoi mo, "Kalak sipemalumken aku i ngo mendokken taba aku, 'Embah mo bellagenmi, merdalan mo kono.' " 5:12 "Isè mendokken taba kono merembah bellagenmu janah merdalan?" nina kalak i mengkuso. 5:13 Tapi oda ngo ibettoh barang isè kalakna. Kerna mèduk ngo jelma isidi janah Jesus pè enggo galip mi tengah-tengah jelma nterrem i, lako mennadingken bekkas i. 5:14 Enggo kessa bagidi, pejumpa nola mo Jesus dekketsa ipas Bages Dèbata, nai nina Jesus mo tabasa, "Bagèndari enggo malum kono, jadi mermanat mo kono, ulang nèngè empet merdosa, asa ulang sempa nola termposiin." 5:15 Laus mo ia magahken taba kalak perkuasa kalak Jahudi mendokken, Jesus ngo pemalumkensa. 5:16 Kemmulihkenna idi, gabè ncian mo atè kalak i midah Jesus, kerna Ipemalum sakit tupung ari Sabat. 5:17 Tapi nina Jesus mo taba kalak i, "Dak mengula ngo BapangKu; jadi Aku pè kennah mengula ngo." 5:18 Kumarnaken rana Jesus i, makin itulusi penguasa-penguasa kalak Jahudi mo dalan lako memmunuh Jesus. Ibaing kalak i pè bagidi, oda ngo pellin Ilausi hatoren agama terrèngèt ari Sabat idi sambing, tapi dekket ngo kumarna idokken Jesus BapaNa nina Dèbata; merlapaten ngo idi, Ipesobok diriNa dosken Dèbata. 5:19 Gabè nina Jesus mo mengaloi kalak i, "Èngèt kènè mo sikudokken èn; Oda lot ndorok kadè iulaken Anak idi ukum ipas roka-rokana nai sendiri; tapi pellin niidahna Iulaken BapaNa I ngo ibahanken. Ai barang kadè iulaken Bapa i, idi ma ngo iulaken Anak idi. 5:20 Kumarna soh mo ngkellengna atè Bapa i midah Anakna i. Jadi ipettarar ngo karina taba anakna i sagumanNa sinibahankenNa. Lebbih dèng tupèh, ai ipettarar ngo taba Anakna i ulaan terhejiin, asa gabè lengang kènè karina. 5:21 Bagè bapa pegelluhken kalak singgo matè, janah memerrèken taba kalak i kenggelluhen; bagidi ma ngo bang Anak idi pè memerrèken kenggelluhen taba barang isè kalak naing berrènkenNa dok atèna. 5:22 Isè poda ihukum Bapa i. Kerna karina kuasa lako menghukum enggo isohken taba AnakNa i. 5:23 Ibakin Bapa i pè bagidi, asa karina kalak menghormati Anak idi, tosè bagè penghormatina taba Bapa i. Barang isè oda pesangapken Anak i, codi ngo oda pesangapken Bapa sipasulakken Anak idi. 5:24 Kubagahken mo bai ndènè: Barang isè mengeradum-radumi katangKu, janah percaya taba sipasulakken Aku, baNa ngo kenggelluhen siamman sumendah, janah oda ngo ihukum ia. Enggo maluah ia ipas hukumen kemmatèen idi nai. 5:25 Percaya mo kènè taba Aku -- 'Roh mo tikkina, enggo mo soh idi bagèndari -- simatè idi pè mendengkoh sora Anak Dèbata ngo, janah nggelluh ngo simendengkoh sora Dèbata. 5:26 Bagè Bapa i sendiri benna kenggelluhen, bagidi ma ngo Anak i pè ibaing gabè benna kenggelluhen. 5:27 Enggo iberrèken Ia hak taba AnakNa lako mendabuh hukum kerna Anak Jelma ngo ia.' 5:28 Ulang pella kènè lengang mendengkoh èn: Roh mo tikkina, karina kalak sienggo matè i pendèban idi mendengkoh soraNa, 5:29 gabè karuar i pendèban idi nai. Kalak simengulaken mendè, ipekèkè ngo lako menjalo kenggelluhen. Tapi kalak simengulaken jahat ipekèkè ngo lako menjalo hukum." 5:30 "Kadè poda terbahan aku ukum ibas kedirinKu nai sambing. Kudabuh pè hukum rembang mi kuasa sikujalo bai Dèbata nai ngo. Kerna naidi sènteng ngo penghukumKu i, ai oda ngo mengèkutken ukurKu sendiri nai sikubakin i, tapi mengèkutken lemmo atè Bapa sipasulakken Aku i ngo. 5:31 Mula Aku mengindangken tersèngèt diringku, oda tuhu sikuindangken i. 5:32 Tapi lot ngo sidèbaan mengindangken, janah Kubettoh ngo, tuhu ngo siniindangkenna i. 5:33 Enggo ipasulak kènè utusen ndènè mendahi si Johanes, janah situhunna ngo i indangken si Johanes tersèngèt Aku. 5:34 Kuruapken pè karina i, oda ngo kumarna perlu bangku pengindangken jelma, tapi asa maluah ngo kènè. 5:35 Codi mi togok lakat janah merbendella ngo si Johanes, tapi pellin sigejap sambing ngo kènè sennang menjalo cuhaya togok idi. 5:36 Tapi belgahen ngo kesaksiinKu daripada kesaksiin si Johanes. Ulaan sinidokken Bapa imo siKuulaken bagèndari, i ngo mengindangken Aku sinipasulak Bapa i. 5:37 Janah Bapa simengutus Aku i pè enggo mengindangken Aku. Oda nung dèng idengkoh kènè sora Bapa, barang pè mengidah abèNa. 5:38 Ai oda ngo iradum-radumi kènè kataNa, kerna oda percaya kènè taba Aku siniutusNa. 5:39 Iguruken kènè pè Bibèl, kumarna dok atè ndènè merkitè i dapet kènè kenggelluhen amman-sumendah. Bibèl idi sendiri pè ipeterrang ngo tersèngèt Aku. 5:40 Tapi laju ngo oda uè kènè roh mendahi Aku, asa dapet kènè nemmuken kenggelluhen soh mi amman-sumendah i. 5:41 Oda perlu bangku pemoji jelma. 5:42 Kutandai ngo kènè. Kubettoh ngo oda ngkelleng atè ndènè midah Dèbata. 5:43 Roh Aku merkitè-kitè gerar BapangKu, tapi oda ijalo kènè Aku. Tapi mula roh kalak merkitè kuasana sendiri, ijalo kènè ngo ia. 5:44 Bakunè mo terbakin kènè percaya, mula itulusi kènè ngo pemmojiin samah-samah kènè, janah oda merrusaha kènè, asa ipoji Dèbata Sintèmbul i kènè. 5:45 Ulang mo dok atè ndènè Kusalahken kènè i hadeppen Bapangku. Si Musa siniharapken ndènè i ngo menalahken kènè. 5:46 Ukum tuhu ngo percaya kènè taba si Musa, tentu percaya ma ngo kènè taba Aku, kerna ia pè isuratken ngo tersèngèt Aku. 5:47 Tapi mula oda ikettoki kènè nisuratken si Musa, bakunè mo pengkettoki ndènè mi siKuruapken èn?"
6:1 Enggo kessa barang sadikè dekkah nola, berkat mo Jesus mi suberrang Tao Galilea (sinigerari ma Tao Tiberias). 6:2 Nterrem ngo kalak mengèkutkensa, kumarna enggo idah kalak i tanda kellengangen nihanaken Jesus pemmalumken kalak simersakit. 6:3 Mennangkeng mo Jesus mi uruk nai kundul mo Ia isidi rebbak dekket sisinNa. 6:4 I katika i enggo mo ndessing Ari Raya Paskah kalak Jahudi. 6:5 Tikan itengen Jesus merkuliling, idah mo kalak merrohen merkolan-kolan mendahiSa. Nai idokken mo taba si Pilipus, "I dikè nai mo sitokor pangaan, asa ndorok mangan karinana jelma nterrem èn?" 6:6 (Idokken Jesus pè bagidi, mengunjuni si Pilipus ngo Ia, aiibettoh kin ngo sinaing bakinenna.) 6:7 Ialoi si Pilipus mo, "Sitokor pè roti dua ratus kèpèng pirak, oda cukup bai jelma mbellang èn giam tersituk pè." 6:8 Nai sada kalak ibas sisiin idi nai, imo si Andreas anggi si Simon Petrus mendokken, 6:9 "Lot ngo isenda anak-anak daholi merembah lima roti dekket dua ikan. Tapi kadè mo lapatenna bai jelma bagèen buèna?" 6:10 Nai idokken Jesus mo taba sisinna i, "Dokken kènè mo kundul jelma mbellang i karinana." Jadi merkundulen mo karinana kalak idi i babo dukut-dukut i, ai mbellang ngo jampalen i sidi. Karinana kalak idi lot ngo kira-kira lima ribu kalak daholi. 6:11 Nai ibuat Jesus mo roti i, idokken mo lias atè taba Dèbata. Enggo kessa i Ipembagiken mo roti i bai jelma mbellang i. Ikan idi pè, bagidi ma ngo ibakin. Nai mangan mo kalak idi karinana janah bessur. 6:12 Enggo kessa bessur mangan kalak idi karina, idokken Jesus mo taba sisinNa, "Pepulung kènè mo pangaan siso kerri i karina, ulang lot magosia." 6:13 Ipepulung sisinna i mo siso kerri i, dom sipuluh dua baka, imo siso kerri jelma mbellang i, ipas silima roti idi nai. 6:14 Idah jelma mbellang idi kessa mo kellengangen sini hanaken Jesus i, nina kalak i mo, "Èn ngo tuhu Nabi i, sinaing roh mi dunia èn!" 6:15 Naing mo ipaksa kalak i Jesus gabè rajana, tapi ibettoh Jesus ngo taki kalak idi i, laus mo Ia sadasa mi delleng ninganna mengillak. 6:16 Enggo kessa ramben ari, laus mo sisiin Jesus mi tao. 6:17 Ibengketti kalak i mo bungki, nai isuberrangi kalak idi mo taoi i, lako laus mi Kapernaum. Enggo pè gellap laju ngo madèng roh Jesus mendahi kalak idi. 6:18 Tikanna i enggo mulai goncang laut i kumarna angin sapa-sipu. 6:19 Enggo kessa ikayuhken kalak i kira-kira lima barang ennem batu mi tao; keppè sintempu mo idah kalak i roh Jesus mi bungki kalak idi, merdalan i babo laè i. Gabè buradan mo sisiin i. 6:20 Tapi nina Jesus mo taba kalak idi, "Ulang kènè mbiar, Aku ngo èn!" 6:21 Ibagasen sennang pennarihen ijalo kalak i mo Ia mbengket mi bungki i, janah gejapkenna i soh ma mo bungki kalak i mi tujunna. 6:22 Sibarembenkenna i, oda lot bungki idah jelma sitading i, laènken bungki sisada bari. Ibettoh kalak idi ngo tangkas enggo laus sisiin i perlebbè, janah oda ngo dekket Jesus ibagasen bungki i rebbak dekket sisinna i. 6:23 Tapi lot mo prau i Tiberias nai janah merlabuh ndessing mi bekkas kalak idi mangan i, imo tikan idokken Jesus lias atè taba Dèbata. 6:24 Ibettoh kalak idi kessa mo, oda i sidi Jesus bak sisinNa pè, ibengketti kalak i mo prau i, nai laus mo kalak i mi Kapernaum mennulusi Jesus. 6:25 Jumpa kalak idi kessa mo Jesus i suberrang tao i, ikusoi kalak i mo Ia, nina mo, "Guru, ndigan i kono soh mi sèn?" 6:26 Ialoi Jesus mo, "Kudokken mo taba kènè; itulusi kènè pè Aku, oda ngo kumarna enggo iarti kènè tanda kellengangen sienggo Kuhanaken i, tapi kemulihken bessur i ngo kènè. 6:27 Ulang mo tulusi kènè pangaan siuè kerri janah uè macik. Tapi mengula mo kènè lako menulusi pangaan siso uè macik, janah merrèken kenggelluhen situhunna, imo sinaing berrènken Anak Jelma bai ndènè. Kerna bana ngo enggo Ikuasaken Bapana Dèbata." 6:28 Nai ikuso kalak i mo Ia, "Bakunè ngo kubaing kami asa ndorok kuulaken kami ulaan lemmo atè Dèbata?" 6:29 Ialoi Jesus mo, "Èn mo ulaan lemmo atè Dèbata. Keppercayai kènè mo Ia sinipasulak Dèbata." 6:30 "Mula bagidi," nina kalak i, "Kadè ngo tanda kellengangen i ihanaken Kono sindorok kuidah kami asa percaya kami baMu? Kadè mo ndorok ibaing Kono? 6:31 Ukum empung nami mangan manna ngo tikan i kellongoon, ai tersurat ngo ibas Bibèl, 'Iberrèken ngo kalak idi mangan roti i sorga nai!' " 6:32 Nai idokken Jesus mo taba kalak i, "Kudokken mo taba kènè: Oda ngo si Musa merrèken pangaan idi i Sorga nai bai ndènè, tapi BapangKu ni sorga i ngo merrèken roti situhunna, i sorga nai bai ndènè. 6:33 Ai niberrèken Dèbata i sorga idi nai, imo ia siroh i sorga nai memerrèken nggelluh situhunna bai dunia ènda." 6:34 "Guru," nina kalak i, "roti sibagidi mo dak berrèken bai nami." 6:35 "Aku ngo roti kenggelluhen i," nina Jesus taba kalak i. "Barang isè roh mendahi Aku, oda nèngè mellèhè ia. Janah barang isè percaya taba Aku, oda nèngè muasen ia. 6:36 Enggo Kudokken taba kènè: Ai tukasi pè enggo idah kènè Aku, tapi oda percaya kènè. 6:37 Karina sienggo iberrèken Bapa bangKu, roh ngo i mendahi Aku, janah oda ngo Kutulak barang isè roh mendahi Aku. 6:38 Roh Aku i sorga nai, oda ngo memmahanken roh-roh gèutku sambing, tapi memmahanken lemmo atè simengutus Aku i ngo. 6:39 Èn mo lemmo atè simengutus Aku: Ulang nemmu lot mago barang isè sienggo niberrèkenNa i bangKu, tapi asa Kupegelluh kalak i mengolihi tikan Ari Kiamat! 6:40 Ai èn ngo ipergeddo BapangKu: Barang isè sienggo mengidah Anak idi janah percaya baNa kupegelluh mo ia i Ari Kiamat janah bana mo kenggelluhen siamman sumendah." 6:41 Nai ngutnguten mo kalak Jahudi taba Jesus kumarna nidokkenna i, "Aku ngo roti siroh i sorga nai." 6:42 Nina kalak idi, "Otang Jesus ngo ia, anak si Josep; otang sitandai ngo bapaNa dekket inangNa? Bakunè asa idokken roh i sorga nai Ia?" 6:43 Nai nina Jesus mo taba kalak i, "Ulang kènè ngutnguten. 6:44 Isè poda ndorok roh mendahi Aku, mula oda ipadiat BapangKu sipasulakken aku i ia roh mendahi Aku; janah karina sienggo roh mendahi Aku Kupekkèkè mo ia i Ari Kiamat. 6:45 Lot ngo tersurat ibas Bukku Nabi-nabi bagèen, 'Karinana jelma iajari Dèbata.' Asa karina jelma singgo mendengkoh janah menjalo peddah bai Bapa nai, roh ngo ia mendahi Aku. 6:46 Oda ngo merlapaten i, enggo lot jelma mengidah Bapa. Ai pellin ia singgo roh bai Dèbata nai ngo kessa sienggo mengidah Bapa i. 6:47 Kudokken mo taba kènè, 'Barang isè percaya taba Aku ia ngo mengerrasai nggelluh siamman-sumendah.' 6:48 Aku ngo roti kenggelluhen i. 6:49 Mangan manna ngo empung ndènè i kellongoon, tapi matè ngo kalak idi. 6:50 Tapi oda ngo bagi ukum roti si susur i sorga nai; barang isè kipangan roti idi oda matè nèngè ia. 6:51 Aku ngo roti sisusur i sorga nai -- roti memmerrèken nggelluh. Barang isè kipangan roti èn, nggelluh mo ia soh mi amman sumendah. Roti sinaing Kuberrèken i, imo dagingKu mahan kenggelluhen jelma sini dunia èn." 6:52 Gabè petongkah sora mo kalak Jahudi samahsa kemulihken pendokken Jesus i, "Bakunè ngo pemmaing kalak ènda memerrèken dagingNa sipangan?" nina kalak i. 6:53 Nai nina Jesus mo taba kalak i, "Percaya mo kènè mula oda ipangan kènè daging Anak Jelma, janah mula oda iènum kènè darohNa, oda tuhu-tuhu kènè nggelluh. 6:54 Barang isè kipangan dagingKu, janah mengènum darohKu, bana ngo kenggelluhen siamman sumendah, janah Kupegelluh ngo ia i Ari Kiamat. 6:55 Ai dagingKu ngo pangaan situhunna, janah darohKu ngo ènumen situhunna. 6:56 Barang isè kipangan dagingKu janah mengènum darohKu, nggelluh mo ia rebbak dekket Aku, janah Aku ibagasen ia. 6:57 Tosè bagè Bapa singgelluh i mengutus Aku, janah Aku nggelluh ibagasen Bapa, bagidi ma mo barang isè kipangan dagingKu nggelluh ibagasen Aku. 6:58 Èn ngo pangaan susur i sorga nai; oda bagè pangaan nipangan empung ndènè i. Ai enggo kessa ipangan kalak i pangaan idi, matè ngo kalak i. Tapi barang isè kipangan pangaan ènda, nggelluh mo ia soh mi amman sumendah." 6:59 Karinana i, idokken Jesus sinderrang mengajari Ia i bages perguruun, i Kapernaum. 6:60 Mendengkoh karina nidokken Jesus i, mèduk ngo sisinNa mendokken, "Mpihir ngo peddah i, isè mo ndorok mengantusi idi!" 6:61 Ibettoh Jesus sendiri ngo, ngutnguten sisinNa tersèngèt kata idi. Nai gabè idokken mo taba kalak i, "Mèter kebberraten ngo kènè kumarna kata idi? 6:62 Bakunè nola mo mula idah kènè Anak Jelma balik mi bekkasNa kin? 6:63 Tendi Dèbata ngo simemmaing jelma nggelluh. Oda ngo merguna ukum gegoh jelma. Ukum kata sienggo Kuruapken i taba kènè, kata Tendi Dèbata ngo i janah kata kenggelluhen. 6:64 Tapi lot bai ndènè nai oda percaya." (Enggo kin ngo ibettoh Jesus i mulana nai isè siso percaya bak simenelbuhSa). 6:65 Nai nina Jesus nola mo, "Kumarna naidi ngo asa Kudokken taba kènè: Isè poda terbakinSa roh mendahi Aku, ukum oda ipadiat Bapa i." 6:66 Mulai i sidi nai, mèduk ngo sisinNa mennadingkenSa, oda nèngè uè mengèkutken Jesus. 6:67 Nai ikusoi Jesus mo sisinNa sisipuluh dua i, "Mada ngo kènè pè naing mennadingken Aku?" 6:68 "Tuhan," nina si Simon Petrus tabaSa, "Mikè mo kami laus? Ai bamu ngo kessa lot kata kenggelluhen. 6:69 Enggo percaya janah tok kami bagèndari, Kono ngo simbadia roh bai Dèbata nai." 6:70 Nai nina Jesus mo taba kalak i, "Otang sipuluh dua kènè singgo Kupilih? Tapi tendi jahat ngo sada bai ndènè nai!" 6:71 Si Judas Iskariot ngo nidokken Jesus i ranana idi. Ai ia ngo sada ipas sisipuluh dua kalak i nai simenelbuh Jesus.
7:1 Enggo kessa i, iagahi Jesus mo nagerri Galilea. Oda uè ia mi nagerri Juda, kumarna mertaki ngo pengulu-pengulu Jahudi naing memmunuhSa. 7:2 Enggo ndessing tikanna i Ari Raya Undung-undung. 7:3 Nai idokken dengan sibeltek Jesus mo tabaSa, "Tadingken mo bekkas èn, janah laus mo kono mi Juda, asa idah sisinMu niulakenMu idi. 7:4 Isè poda lot memmoniken nibahankenna, mula naing termurmur ia. Mula enggo ibahanken kono bagidi, kennah ngo ibettoh suberri dunia èn!" 7:5 (Ai denganNa sibeltek pè oda ngo percaya baNa.) 7:6 "Oda dèng dapet tikkingKu," nina Jesus taba kalak idi, "tapi ukum bai ndènè, gennep tèk ngo ndorok. 7:7 Oda ngo ikecegoken dunia èn ukum kènè, tapi ukum Aku ikecegoken ngo, Kumarna dak Kupincang dunia èn terèngèt kejahatenna. 7:8 Laus mo kènè mi pèsta idi. Ukum Aku, oda dèng laus, kerna makdèng dapet kettikangKu." 7:9 Bagidi mo pendokken Jesus taba denganNa sibeltek, nai tading i Galilea ngo ukum Ia. 7:10 Enggo kessa laus denganNa sibeltek mi pèsta idi, laus ma mo Jesus mboni-mboni mi pèsta i, isè poda bettoh-bettohen. 7:11 Dak itulusi perkuasa kalak Jahudi ngo Ia i pèsta i ninganna ikuso-kusoken, "Idikè ngo Ia?" 7:12 Nai mèduk ngo kalak menerèngètisa merkitè kosik-kosik. Dèba mendokken, "Kalak bujur ngo ia." Lot ma dèba mendokken: "Oda! Mengelalingken jelma nterrem ngo ia." 7:13 Tapi isè poda pang menerèngètisa ntarar i tengah jelma nterrem, kumarna mbiar ngo kalak idi midah penguasa-penguasa kalak Jahudi. 7:14 Tupung pertengahen pèsta i, ibengketti Jesus mo Bages Dèbata, janah mengajar mo ia i sidi. 7:15 Lengang kalohoon mo penguasa-penguasa kalak Jahudi, nina kalak i mo, "Idikè nai ngo bagi pemettoh kalak èn, ai so barang mersikkola Ia?" 7:16 Ialoi Jesus mo, "Karina siKupeddahken idi, oda ngo peddahKu sendiri i, tapi peddah Dèbata simengutus Aku i ngo. 7:17 Barang isè menguèi lemmo atè Dèbata, ibettoh ngo tah bangKu nai sendiri siKupeddahken i, barang tah bai Dèbata nai. 7:18 Ai barang isè mengerana ipas dirina nai, imo magahken sèkel ia asa ipesangap dèba dirina. Tapi barang isè mennulusi kessangapen bai sipasulakkensa imo kalak bujur; oda lot akkal-akkal bana. 7:19 Otang enggo lot pati-patiin si Musa bai ndènè? Tapi isè poda kènè mengulaken pati-patiin i. Kasa naing ibunuh kènè Aku?" 7:20 Ialoi jelma nterrem i mo, "Ah, kalak sasèk ngo kono! Isè sinaing memmunuh Kono?" 7:21 Ialoi Jesus mo, "Pellin sada ngo Kuulaken bahaan tikan ari Sabat lengang kènè karinana. 7:22 Ibaing si Musa ngo pati-patiin bai ndènè asa mersittak (mertakkil). Janah kumarnaken naidi itakkil kènè mula pè tupung ari Sabat. (Oda ngo nemmu si Musa perlebbè menghatorken menittak jelma, tapi empungta sinderrang madèng lot si Musa ngo.) 7:23 Mula isittak kènè jelma tupung ari Sabat lako mengèkutken pati-patiin si Musa, kasa mellaga kènè taba Aku kumarna kupemmalum bolet jelma i tupung ari Sabat? 7:24 Ulang mo kènè menghukum-hukumi sitaridah sambing, tapi hukum mo ibagasen adil janah bennar." 7:25 Nai lot mo barang piga-piga kalak i Jerusalem mendokken: "Otang kalak èn ngo si dak tong itulusi naing ibunuh? 7:26 Tapi tengen mo! Mengerana ngo Ia ntarar i lebbè-lebbè sinterrem, keppè isè poda pang mendokken barang bakunè tabaSa! Tah mada ngo enggo satdar penguasa-penguasanta, kalak ènda ngo Raja Sipaluah niperbagah-bagah Dèbata? 7:27 Tapi mula roh Raja Sipaluah niperbagah-bagah Dèbata, isè poda bettoh-bettohen barang i dikè nai pekirohNa. Tapi ukum kalak ènda, sibettoh ngo barang i dikè nai asal-usulna." 7:28 Sinderrang mengajar Jesus i Bages Dèbata nggang mo idiloken, "Tuhu-tuhu ngo ibettoh kènè isè Aku janah i dikè nai asal usulKu? Roh aku oda ngo ipas lemmo-lemmongKu nai. Tapi lemmo atè sipasulakken aku i ngo, tapi oda ngo itandai kènè ukum Ia. 7:29 Ukum aku kutandai ngo Ia, ai Ia ngo pasulakken Aku asa roh." 7:30 Jadi segat-segaten mo kalak idi, naing itangkup mo Jesus, tapi ise poda lot mengellaluken tanganNa, kerna makdèng dapet tikkina. 7:31 Tapi mèduk ngo bai kalak nisidi nai gabè percaya tabaSa janah mendokken, "Mula roh Raja Sipaluah niperbagah-bagah Dèbata idi, harapen ma ngo ndia terhanakensa tanda kellengangen buèen dèng dari pada sienggo nihanaken kalak ènda?" 7:32 Idengkoh Parisè mo kosik-kosik jelma nterrem i tersèngèt Jesus. Kerna naidi ipasulak kalak i bak imam-imam ekuten mo barang piga-piga kalak penjaga Bages Dèbata lako menangkup Jesus. 7:33 Idokken Jesus mo, "Sigejap nai ngo kessa rebbak Aku dekket kènè, ai molih mo Aku mendahi simengutus Aku. 7:34 Itulusi kènè mo Aku, tapi oda jupa kènè Aku: Ai oda terdahi kènè bekkas sidahinKu idi." 7:35 Nai mersidokenken mo penguasa-penguasa kalak Jahudi samahsa, "Naing laus mikè ndia Ia, asa mèter oda jupa kita Ia? Mada ngo naing laus Ia ndia mendahi kalak Jahudi ni ruar nagerri imo i tengah-tengah kalak Junani, janah gabè mengajari kalak Junani? 7:36 Kadè ngo ndia maksudNa: Itulusi kènè mo Aku, tapi oda jumpa kènè Aku, dekket ai oda terdahi kènè bekkas sidahinku idi?" 7:37 Ari perpodi i mata pèsta idi, cènder mo Jesus tupung mata pèsta i, narih nggang mo idiloken, "Barang isè muasen, roh mo ia mènum taba Aku. 7:38 Ai tersurat ngo ibas Bibèl bagèen: Barang isè percaya taba Aku, marir ngo ibas pusuh peratèenna nai laè mul simemerèken kenggelluhen." 7:39 (Tendi Dèbata ngo nidokken Jesus isidi, sinaing jaloonkalak sipercaya tabaSa. Ai oda dèng ngo iberrèken tikala i Tendi Dèbata, kerna madèng ipesangap Jesus merkitè permatèNa.) 7:40 Mbuè ngo kalak mendengkoh nidokken Jesus i. Nai lot mo kalak ipas simendengkoh idi nai mendokken, "Tuhu ngo Nabi kalak èn!" 7:41 Lot ma ngo dèba mendokken, "Èn ngo Ia Raja Sipaluah niperbagah-bagah Dèbata." Tapi lot ma ngo dèba mendokken, "Ah, mèter i Galilea nai mo asalna Raja Sipaluah idi? 7:42 Ai tersurat ngo ipas Bibèl ukum Raja Sipaluah i, arap usur si Daud nai ngo rohna, janah bekkasna tubuh pè i Betlehem ngo, imo lebbuh si Daud." 7:43 Ujungna gabè petongkah sora mo jelma ni sidi tersèngèt Jesus. 7:44 Lot ngo dèba naing menangkupSa, tapi isè poda mengellaluken tanganNa. 7:45 Nai balik mo penjaga-penjaga Bages Dèbata pasulaken sinaing menangkup Jesus i mendahi imam-imam ekuten bak kalak Parisè. Nai ikusoi kalak i mo pasulaken i, "Kasa oda iembah kènè Ia mi sèn?" 7:46 Ialoi perjaga-perjaga i mo, "Ah, oda nung dèng lot kalak mengerana bagèSa!" 7:47 "Haah, tah mada ngo kènè pè enggo iajar-ajari?" nina Parisè i. 7:48 "Lot idah kènè sada kalak pè giam penguasa-penguasa kalak Jahudi barang Parisè pè percaya tabaSa? 7:49 Tapi merjaya ngo jelma nterrem èn siso menandai pati-patiin si Musa!" 7:50 Sada ibas kalak Parisè idi nai imo si Nikodemus, sienggo nung roh mendahi Jesus. Nai nina si Nikodemus, siroh berngin-berngin mendahi Jesus mo taba denganna Parisè sidèban: 7:51 "Mengèkutken hukum, oda ndorok sihukumi kalak, ukum makdèng nitangkasen ia, janah mula madèng nidengkoh bak niperrèso kadè sienggo ibahanken." 7:52 "Iaah, tah mada ngo kalak Galilea kono? Perrèso mo lebbè Bibèl! Idahenmu mo oda lot nabi i Galilea nai!" nina kalak i mengaloisa. 7:53 Nai mersidahi sapona mo kalak i karina.
8:1 Tapi laus mo Jesus mi Uruk Zaitun. 8:2 Sibarembeknna nola ma, laus nola mo Jesus mi Bages Dèbata; nterrem mo kalak roh mendapetkenSa. Kundul mo Jesus lako mengajari kalak i. 8:3 Sinderrang bagidi, itaruhken guru-guru agama dekket Parisè mo taba Jesus sada kalak daberru siterdapet merlangkah julu meddem. Idokken kalak i mo cènder daberru i, i tengah-tengah, 8:4 nai nina kalak i mo taba Jesus, "Guru, terdapet ngo daberru èn merlangkah julu meddem. 8:5 Ibas Bukku si Musa lot ngo pati-patiin Dèbata mendokken; mula lot daberru terdapet bagèen, kennah ibentiri ngo dekket batu sampè matè. Bagèndari pè bakunè ngo pendapet ndènè?" 8:6 Tapi ikusoken kalak i pè bagidi, lako mengenggep Jesus ngo, asa ndorok isalahken kalak i Ia. Tapi dak tungkuk sambing ngo ukum Jesus ninganna menurati tanoh i merkitè jari-jariNa. 8:7 Jadi kumarna dak iempet kalak i mengkuso, ipedorgah Jesus mo takalNa, nina mo, "Barang isè kènè oda merdosa, ia mo perlebbè mementirken batu taba daberru idi." 8:8 Nai tungkuk nola mo Jesus mennurati tanoh i. 8:9 Mendengkoh kata Jesus i sinterrem i, laus-laus sada mo kalak i mennadingken Jesus, situa-tuana mo perlebbè. Nai pellin Jesus nai ngo kessa tading i sidi bak daberru idi cènder i bekkasna. 8:10 Dorgak mo Jesus, idokken mo taba daberru i, "Enggo mikè kalak idi nangè? Oda lot memmaing hukumna bamu?" 8:11 "Oda lot Guru!" nina daberru i mengaloi. "Oo, Aku pè oda Kuhukum kono. Bagèndari pè laus mo kono, tapi ulang nèngè empet merdosa mi podiin èn," nina Jesus. 8:12 Nai iulaki Jesus mo mengajari kalak i, nina mo, "Aku ngo penendang dunia èn. Barang isè mengèkutken Aku, oda harapen merdalan ibas sigellap; bana ngo tupèh penendang simemerrèken nggelluh." 8:13 Nai nina Parisè i mo tabaSa, "Dirimu ngo iindangken kono. Jadi oda bennar pengindangkenMu idi." 8:14 Ialoi Jesus mo, "Tukasi pè diringKu Kuindangken, sènteng ngo pengindangkenKu; ai Kubettoh ngo barang i dikè nai Aku roh janah mikè Aku laus. Oda ngo ibettoh kènè barang idikè nai Aku, janah laus mikè Aku. 8:15 Ihukumi kènè ngo jelma mengèkutken perdagingen, tapi ukum Aku isè poda Kuhukumi. 8:16 Mula menghukum pè Aku, adil ngo penghukumKu, ai oda ngo punjung sadaKu. Bapa i simengutus Aku ngo denganKu. 8:17 Ibas patiin si Musa tersurat bagèen: Sah ngo kesaksiin, mula lot dua kalak saksi. 8:18 Jadi mengkesaksiken Aku pè lot ngo dua kalak -- imo Aku dekket Bapa i simengutus Aku." 8:19 "Idikè ngo BapaMu?" nina kalak i. Jadi ialoi Jesus mo, "Ai so itandai kènè Aku. BapangKu pè, oda ma ngo itandai kènè. Ukum itandai kènè Aku, Bapa pè pasti ngo itandai kènè." 8:20 Karinana idi idokken Jesus, tikan mengajari Ia i Bages Dèbata i gembar pèti-pèti bekkas pèlèen. Tapi isè poda pang menangkupSa kumarna makdèng dapet tikkina. 8:21 Nai nina Jesus nola mo taba kalak i, "Laus mo Aku, jadi itulusi kènè mo Aku, tapi matè mo kènè ibagasen dosa ndènè. Oda terdahi kènè ukum bekkas sidahinKu i." 8:22 Gabè nina penguasa-penguasa Jahudi mo, "Mada ngo ndia naing mendelles Ia, asa idokken oda terdahi kènè ukum bekkas sidahinKu idi?" 8:23 Nai nina Jesus mo taba kalak idi, "Ukum kènè, i terruh èn nai ngo kènè, tapi ukum Aku i dates nai ngo. I dunia èn nai ngo ukum kènè; tapi ukum Aku oda ngo i dunia èn nai. 8:24 Kumarna nai ngo asa Kudokken taba kènè: Matè mo kènè ibagasen dosa ndènè. Tuhu ngo, matè mo kènè ibagasen dosa ndènè, mula laju oda percaya kènè, 'Aku ngo Ia sinidokkenna AKU LOT.' " 8:25 "Ai isè ngo kono situhunna?" nina kalak i mengkusoi. Ialoi Jesus mo, "Kadè poda gunana nèngè mengerrana dekket kènè! 8:26 Sandok singgo Kuranaken taba kènè i ngo Aku. Matcam dèng ngo nemmu bagèna sinaing tersèngètenKu bak sipincangenKu terrèngèt kènè. Ai pellin sikudengkoh bana nai simengutus Aku i ngo Kusukutken mi dunia èn, ai kettoken ngo Ia." 8:27 Oda iantusi kalak i magahken tupung menerèngèti tersèngèt Bapa i ngo ia taba kalak i. 8:28 Kerna naidi idokken Jesus nola mo taba kalak i, "Enggo kessa pè ipedates kènè sikali èn Anak Jelma i, ibettoh kènè mo, 'Aku ngo Ia sinigeraren AKU LOT,' janah satdar mo kènè i sidi, oda lot barang kadè Kubahanken ukum ipas lemmo-lemmo atèngKu nai sendiri. Pellin niajarken Bapa taba Aku i ngo kessa kuranaken. 8:29 Janah dakdak ngo rebbak dekket Aku Ia simengutus Aku i. Oda nung ibelli pellin sadaKu, ai dak nipergeddo atèNa ngo Kuulaken." 8:30 Enggo kessa idokken Jesus karinana i, mèduk mo percaya kalak tabaSa. 8:31 Nai nina Jesus mo taba kalak Jahudi sienggo gabè percaya baNa, "Mula sètia kènè mengulaken peddahKu, tuhu mo kènè sisinKu. 8:32 Nai itandai kènè mo Dèbata situhunna, janah kemulihken i, gabè ipaluah mo kènè." 8:33 "Pemparen si Abraham ngo kami," nina kalak i. "Oda nung dèng kami ihamba barang isè pè! Kadè ngo maksudMu mendokken, 'Gabè ipaluah mo kènè?' " 8:34 "Situhunna ngo siKudokken èn," nina Jesus taba kalak i. "Hamba dosa ngo barang isè mengulaken dosa. 8:35 Sada kalak hamba oda lot tettap bekkasna ibagasen bilangen ripè. 8:36 Kerna i mula ipaluah Anak i kènè, tuhu-tuhu mo kènè maluah. 8:37 Kubettoh ngo kènè pemparen si Abraham. Tapi naing ibunuh kènè ngo Aku, kumarna oda uè kènè percaya mi peddahKu. 8:38 Kuranaken ngo siKuidah bai Bapa idi nai; janah kènè pè iulaken kènè ngo barang kadè idokken bapa ndènè." 8:39 Ialoi kalak i mo, "Si Abraham ngo bapa nami." "Ukum tuhu-tuhu ngo kènè dukak-dukak si Abraham," nina Jesus, "Tentu iulaken kènè ngo bagè pengulaken si Abraham. 8:40 Pellin memagahken kebennaren sikudengkoh bai Dèbata nai ngo aku mendahi kènè, keppèken naing ibunuh kènè ngo Aku. Ukum si Abraham, oda ngo uè ia memmaing bagidi! 8:41 Jadi iulaken kènè ngo rembang bagè niulaken bapa ndènè." Nai ialoi kalak i mo, "Ai oda ngo anak gampang kami. Sada ngo bapa nami imo Dèbata." 8:42 Nai nina Jesus mo taba kalak i, "Ukum tuhu ngo Dèbata Bapa ndènè, ngkelleng mo nemmu atè ndènè midah Aku, ai tuhu ngo roh bai Dèbata nai Aku. Oda roh Aku arap lemmo-lemmo atèngKu sendiri nai. Ia ngo pasulakken Aku. 8:43 Kadè sebabna asa oda iarti kènè siKudokken? Kumarna oda tahan kènè mendengkohken katangKu. 8:44 Sibolis ngo bapa ndènè, janah iulaken kènè ngo nipergeddo bapa ndènè i. Imulana nai ngo pemunuh Sibolis i, ai oda nung ia merpihak mi kebennaren, kerna oda lot kebennaren bana. Mula merluap ia, titikna ngo i kerna bagidi ngo bakkona. 8:45 Tapi kumarna Kubagahken bai ndènè tersèngèt kebennaren, ingo sebabna asa oda percaya kènè bangKu. 8:46 Isè kènè peddapetken Aku merdosa? Mula Kusukutken situhunna, kasa oda percaya kènè taba Aku? 8:47 Barang isè roh bai Dèbata nai, idengkohken ngo kata Dèbata. Tapi kumarna oda roh bai Dèbata nai kènè, idi ngo maing asa oda idengkohken kènè aku." 8:48 Gabè nina kalak Jahudi mo taba Jesus, "Otang tuhu ngo sikudokken kami kalak Samaria ngo Kono, janah isellapi sètan ngo kono?" 8:49 Ialoi Jesus mo, "Oda isellapi sètan Aku. Tapi Kupesangap ngo BapangKu, kènè ngo pellèa-lèaken Aku. 8:50 Oda ngo kutulusi kesangapen diringku, lot ngo simemmakin mersangap Aku, janah Ia ngo mendabuh hukum. 8:51 Situhunna ngo siKudokken èn: Barang isè mengu`i ranangKu, oda ngo matè ia soh mi amman sumendah." 8:52 Nai mènter idokken kalak Jahudi mo taba Jesus, "Bagèndari mo Enggo ntangkas kubettoh kami, enggo tuhu isellapi sètan kono! Si Abraham pè matè ngo, bagi ma ngo bak karina nabi-nabi. Idokken Kono nola, 'Barang isè menguèi katangKu oda matè ia soh mi amman sumendah nimu.' 8:53 Mula si Abraham enggo matè, bagidi ma ngo bak nabi-nabi idi pè matè ngo, nai isè ngo Kono dok atèmu? Belgahen ngo kono dok atèmu asa empung nami si Abraham!" 8:54 Ialoi Jesus mo, "Mula Aku pessangapken diringKu, siso mada ngo sangapku. Bapangku ngo pessangapken Aku; imo nidokken ndènè Dèbata ndènè, 8:55 padahal, oda itandai kènè Ia. Tapi Kutandai ngo Ia. Mula Kudokken oda Kutandai Ia, perluap mo Aku bagè kènè. Kutandai ngo Ia, janah kuuèi ngo kataNa. 8:56 Sèkel kalohoon ngo bapa ndènè si Abraham naing mengidah aringKu i. Jadi enggo mo idah tuhu, nai dom mo sampang atèna!" 8:57 Nai idokken kalak Jahudi mo taba Jesus, "Oda dèng ngo giamken dom limapuluh tahun umurMu, mèter idah kono mo si Abraham?" 8:58 Ialoi Jesus mo, "Ntangkas mo Kubagahken bai ndènè; madèng kin pè tubuh si Abraham, enggo mo lot Aku." 8:59 Nai mèter ibuat kalak Jahudi mo batu naing mementiri Jesus; tapi galip mo Jesus, janah laus ia i Bages Dèbata nai.
9:1 Nai nderrang merdalan i Jesus, idah mo sada kalak sipètung, janah kessa nai tubuh ngo Ia pètung. 9:2 Ikusoi sisinna i mo Jesus, "Guru, kasa pètung kalak ènda tubuh? Mada ngo kumarna dosana, barang kumarna dosa partuana?" 9:3 Ialoi Jesus mo, "Oda ngo kumarna dosana, barang kumarna dosa partuana, asa pètung ia tubuh. Tapi, asa ntangkas ngo idah jelma kuasa Dèbata merdalan ibas dirina. 9:4 Sidekkah mahar, kennah siulaken ngo bahaan simengutus Aku. Tapi sigejap nai ngo kessa asa gellap, isè poda ndorok mahan bahaan nèngè. 9:5 Aku ngo penendang dunia èn, sidekkah i dunia èn dèng Aku." 9:6 Enggo kessa idokken Jesus bagidi, ièduri mo tanoh memmahan kubang merkitè tanoh bak èdurna i. Nai Idaloh mo mata sipètung i merkitè kubang i, 9:7 nai nina mo taba sipètung i, "Lako mo merduhap mi Bendar Siloam." (Siloam lapatenna 'Ipasulak'). Nai laus mo ia merduhap, jadi mèter merpendidah mo ia lako balik. 9:8 Gabè nina kalak gembar bagesna mo dekket kalak simengidahsa mengido-ngido idi kin mo, "Otang ia ngo dak kundul mengido-ngido tikala i?" 9:9 Dèba mendokken, "Ia ngo." Tapi lot ma ngo dèba mendokken, "Aku ngo i." 9:10 "Bakunè ngo perjadina, asa gabè merpendidah kono?" nina kalak i mbangsa. 9:11 Ialoi mo, "Kalak simergerar Jesus i ngo memmaing tanoh gabè kubang, nai idalohken mo kubang i mi matangku ninganna idokken, 'Laus mo kono merduhap mi Bendar Siloam.' Nai laus mo aku. Jadi enggo kessa merduhap aku, mèter merpendidah mo matangku." 9:12 "Idikè ngo ia?" nina kalak i tabasa. Ialoi mo, "Oda kubettoh," nina. 9:13 Iarahken kalak idi mo sipètung idi kin mendahi Parisè. 9:14 Tupung ngo ari Sabat tikan Jesus pegabèken tanoh jadi kubang i merkitè èdurNa, memmaingken asa gabè merpendidah mata sipètung i. 9:15 Nai ikusoi kalak Parisè i mo ia, barang bakunè carana asa gabè merpendidah ia. Ialoi mo, "Idalohken ngo kubang mi matangku, nai merduhap mo aku, jadi mèter merpendidah mo aku." 9:16 Dèba Parisè mendokken tabasa, "Oda bai Dèbata nai asalna simenghanaken èn, ai ilausken ngo pati-patiin agama tersèngèt ari Sabat." Tapi dèba mendokken, "Bakunè mo pemmaing perdosa ndorok mengulaken kellengangen bagèen?" Gabè pejaè-jaè mo pendapet kalak i samahsa. 9:17 Nai, ikusoi Parisè nola mo sipètung idi kin sikali nai, "Nimu ndai, kalak idi ngo memmaing merpendidah matamu i! Mula bagidi, bakunè ngo pendokkenmu tersèngèt Ia?" Ialoi mo, "Nabi ngo ia." 9:18 Tapi oda ngo percaya penguasa-penguasa kalak Jahudi i, ia ngo sipètung idi kin sienggo gabè merpendidah i. Jadi asa percaya kalak idi, idiloi mo partua sipètung i, 9:19 nai ikusoi mo, "Tuhu ngo èn anakmu sinidokkenmu pètung tubuh i kin? Bakunè nola ngo asa gabè merpendidah ia bagèndari?" 9:20 Ialoi partuana i mo, "Tuhu ngo èn anak nami, janah tuhu ngo pètung kin ia tubuh. 9:21 Tapi ukum tersèngèt bakunè nola asa gabè merpendidah ia, oda kubettoh kami. Janah barang isè memmaing ia ndorok merpendidah, ipè oda ma kubettoh kami. Ia mo kusoi kènè, ai enggo mbelgah ia; enggo ndorok ipetterrang sendiri i." 9:22 Idokken partuana idi pè bagidi, kumarna mbiar ngo ia midah penguasa-penguasa kalak Jahudi; ai enggo sada kata kalak i mendokken, barang isè mendokken Jesus i Raja Sipaluah niperbagah-bagah Dèbata, kennah iliplip ngo ia ibas agama nai. 9:23 I ngo sebabna asa idokken partuana i, "Enggo mbelgah ia, jadi ia mo kusoi kènè." 9:24 Nai idiloi kalak i nola mo sipètung tubuh idi kin, janah idokken mo mbangsa, "Kupessumpah kami mo kono i hadeppen Dèbata, asa ibagahken kono situhunna, ai kubettoh kami jelma perdosa ngo kum ia." 9:25 Ialoi mo, "Barang perdosa Ia barang oda, oda kubettoh i. Tapi sada ngo sikubettoh; pètung kin ngo aku, tapi ukum bagèndari enggo gabè merpendidah aku." 9:26 Nai idokken kalak i dèng ma mo, "Bakunè ngo ibaing taba kono? Kadè ibaing asa gabè merpendidah matamu idi?" 9:27 Ialoi mo, "Enggo kubagahken idi taba kènè, tapi oda tok kènè. Kasa naing dengkohen ndènè dèng nola? Mada ngo kènè pè naing gabè sisinNa ma?" 9:28 Mellaga mo kalak i tabasa, nina mo, "Kono ngo sisinNa; kum kami oda. Sisiin si Musa ngo kami. 9:29 Kubettoh kami ngo, lot rana Dèbata tersèngèt si Musa. Tapi ukum ia, oda kubettoh kami barang idikè nai asal-usulNa." 9:30 Nai ialoi mo kalak i, "Lengang ukurku, mula idokken kènè oda ibettoh kènè barang idikè nai asal usulNa, keppèken enggo ibuka matangku pètung idi kin gabè merpendidah. 9:31 Sibettoh ngo, oda idengkohken Dèbata ukum kalak perdosa; pellin kalak simenguèi janah kalak sipessangapken Dèbata sambing ngo kessa idengkohken. 9:32 Kessa nai ntembem dunia èn, oda nung dèng terdengkoh, ndorok ibaing jelma merpendidah kalak pètung tubuh. 9:33 Ukum mak roh bai Dèbata nai ia, oda terbakinsa mahanken bagidi." 9:34 Nai nina kalak i mo tabasa, "Bolet ngo kono tubuh ibagasen dosa, naing ajarenmu nola ngo kami?" Nai iliplip kalak idi mo ia i agamana nai. 9:35 Idengkoh Jesus mo enggo iliplip kalak Jahudi sipètung tubuh idi kin i kuria nai. Nai pesimbak mo Jesus dekketsa, jadi nina mo tabasa, "Percaya ngo kono taba Anak Jelma?" 9:36 Nai ialoi mo, "Isè ngo Ia ndia? Petandaken mo bangku, asa ndorok percaya aku tabaSa." 9:37 Nai nina Jesus mo, "Oda pellin idah kono ia, tapi simengerrana dekket kono bagèndari, idi mo ia." 9:38 Nai mènter nina sipètung idi kin mo, "Percaya ngo aku Tuhan," janah mènter mersembah mo ia mi hadeppen Jesus. 9:39 Nai nina Jesus mo, "Roh aku mi dunia èn, lako merembah hukum ngo; imo gabè merpendidah kalak sipètung, janah gabè pètung kalak simerpendidah idi kin." 9:40 Jadi mengkuso mo kalak Parisè simendengkoh nidokken Jesus nisidi, "Mada ngo dekket kami pètung ibas pendokkenmu idi kin." 9:41 Ialoi Jesus mo kalak i, "Ukum pètung kin kènè, oda ngo merdosa kènè; tapi kumarna idokken kènè, 'Oda ngo kènè pètung,' gabè hot mo dosa ndènè."
10:1 Situhunna ngo sikudokken èn bai ndè, "Barang isè masuk mi kandang biri-biri oda arap pèntu, tapi menangkih arap pagar pennangko ngo i janah pendaus. 10:2 Tapi kalak simasuk arap pèntu, i ngo permakan biri-biri i. 10:3 Mula roh ia, mèter ibuka perjaga i ngo pèntu bana janah iuèi biri-biri i ngo ranana, gennep idiloi gerar biri-biri i; janah iuluken mo biri-biri i mi ruar. 10:4 Enggo kessa ruar karinana biri-birina i, mèter kan lebbè ngo ia merdalan, nai dak ièkut-èkut biri-birina i ngo ia, kerna itandai ngo sorana. 10:5 Oda uè biri-birina i mengèkutken sidèban; merberrus ngo tupèh biri-biri i bai sidèban idi nai, kumarna oda itandai sorana." 10:6 Oda iarti simendengkoh idi codiin nibaing Jesus i. 10:7 Nai nina Jesus nola mo, "Situhunna ngo sikudokken èn: Aku ngo pèntu biri-biri i. 10:8 Karina kalak siroh i lebbènKu, pennangko ngo i janah pendaus, janah oda idengkohken biri-biri i sora kalak i. 10:9 Aku ngo pèntu i. Barang isè mbengket arap Aku, njuah-njuah ngo ia; karuar masuk mo ia janah terrolih pangaan. 10:10 Ukum pennangko, roh ngo ia pellin lako mennangko sambing, memmunuh bak mencèdaken. Tapi ukum Aku roh, lako merrèken kenggelluhen mertinèncuk ngo taba kalak simendengkohken sorangku. 10:11 Aku ngo permakan burju. Iberrèken permakan burju i ngo kessahna mengkepkep biri-birina. 10:12 Tapi ukum permakan sinigaji siso sidasa biri-biri i, mula idah roh sorigala, mperrus mo ia mennadingken biri-biri i. Gabè ijerngemmi sorigala idi mo biri-biri i janah ipersuragè. 10:13 Mperrus mo ia, kumarna pellin mengharapken gaji idi sambing ngo kessa memmaing asa karèjo ia, ukum biri-biri idi, oda iparduliken. 10:14 Aku ngo permakan burju. Tosè bagè Bapa menandai Aku, janah Aku menandai Bapa, 10:15 bagidi ngo Aku menandai biri-biringKu, janah itandai biri-biringKu i ngo Aku. Kuberrèken ngo kessahKu mengkepkep biri-biringku. 10:16 Lot dèng ngo biri-biringKu sidèban siso i kandang èn nai; biri-biringKu i pè kuuluken ma ngo, janah idengkohken ngo sorangKu. Gabè sada pulungen mo karinana kalak i, janah gabè sada ngo mermakan kalak idi. 10:17 Ikekelengi Bapa ngo Aku, kumarna Kuberrèken kessahKu, asa kujalo nola i mengolihi. 10:18 Isè poda ndorok mengerampasi kessahKu, bangku nai. Tapi merkitè selloh ukurku ngo kuberrèken kessahku i. Merkuasa ngo aku merrèken, janah merkuasa ma ngo Aku menjalosa mengolihi. Idi mo ulaan sikujalo bai Bapa nai." 10:19 Merkitè kata nidokken Jesus i, gabè petongkah sora ma mo kalak Jahudi. 10:20 Mèduk ngo kalak i mendokken, "Isellapi sètan ngo Ia. Gila ngo Ia. Man kadè pedengkoh-dengkohen ndènè i?" 10:21 Dèba mendokken, "Oda ngo rana nisellapen sètan bagidi. I dikè mo ndorok ibuka sètan mata kalak sipètung gabè merpendidah?" 10:22 Nai dapet mo tikkina Pèsta memengket Bages Dèbata i Jerusalem. Enggo mosim mbergoh tikanna idi. 10:23 Merdalan-dalan mo Jesus i emper si Salomo, i Bages Dèbata. 10:24 Nai roh mo kalak Jahudi mencingkoisa ninganna mendokken taba Jesus, "Sadikè dekkah nai dak ibelli Kono kami ragu? Ntangkas mo bagahken bai nami, mula Kono ngo tuhu Raja Sipaluah niperbagah-bagah Dèbata!" 10:25 Ialoi Jesus mo, "Enggo ngo Kubagahken taba kènè tapi oda percaya kènè. Karina ulaan sikuula merkitè-kitè gerar BapangKu idi ngo memmagahken terrèngèt Aku. 10:26 Tapi oda percaya kènè, kerna oda biri-biringKu kènè. 10:27 Idengkohken biri-biringKu ngo sorangKu. Kutandai ngo kalak i, janah ièkutken kalak i ngo Aku. 10:28 Kuberrèken ngo kenggelluhen soh mi amman sumendah bai kalak i. Oda mo binasa kalak i soh mi amman sumendah. Isè poda terbakinsa mengerampasi kalak idi i tanganKu nai. 10:29 Ai belgahen ngo BapangKu simemerrèken kalak i bangKu, daripada sidèban, barang isè pè i. Asa isè poda ndorok mengerampasi kalak idi ibas gemgemmen Bapa nai. 10:30 Ai sada ngo Aku dekket Bapa i." 10:31 Nai mèter ibuat kalak Jahudi mo batu naing mementiri Jesus. 10:32 Tapi nina Jesus mo taba kalak idi, "Idah kènè ngo Kuulaken bagidi buèna ulaan simerandal sinidokken BapangKu mahan ulankenKu; ibas karinana ulaan singgo kuulaken idi, ulaan paina memmaingken asa naing ibentiri kènè Aku?" 10:33 Nai ialoi kalak i mo, "Oda ngo kemulihken ulaan mendè i asa naing kubentiri kami Kono, tapi kumarna ilèai Kono ngo Dèbata. Jelma ngo kono, tapi ipessobok kono nola diriMu bai Dèbata!" 10:34 Gabè ialoi Jesus mo kalak i, "Otang tersurat ngo ibas Bukku pati-patiin ndènè; bagèen ngo idokken Dèbata, 'Dèbata ngo kènè'? 10:35 Karinana ngo kita mengaku; karinana sitersurat ibas Bibèl, oda ndorok mondar i. Asa mula taba kalak simenjalo kata Dèbata, idokken Dèbata, kalak idi dèbata, 10:36 kasa idokken kènè Aku mengelèai Dèbata? Padahal ipilih Bapa i ngo Aku janah iutus mi dunia èn. 10:37 Mula oda Kuulaken ulaan Bapa, ulang kènè percaya taba Aku. 10:38 Tapi kerna Kuulaken ngo ulaan Bapa, tukasi pè nemmu oda tok kènè bangku, merkitè-kitè ulaan siKuulaken idi mo nemmu giamken kènè kennah percaya, asa ibettoh kènè, ibagasen Bapa i ngo Aku, janah ibagasen Aku ngo Bapa idi." 10:39 Jadi naing mo itangkup kalak i Jesus, tapi maluah ngo ia i tangan kalak idi nai. 10:40 Balik mo Jesus mi Kepar Laè Jordan, mi bekkas si Johanes tikala iperidiken jelma nterrem, janah merrian i sidi mo ia. 10:41 Mèduk ngo kalak merrohen mendahisa janah mendokken, "Ukum si Johanes, oda lot memaing tanda kelengangen tapi tuhu ngo karina nidokken si Johanes tersèngèt kalak ènda." 10:42 Mèduk ngo kalak gabè percaya taba Jesus i sidi.
11:1 Lot mo sada kalak simersakit mergerar si Lazarus. I Betania ngo kutana rebbak dekket si Maria bak si Marta turangna i. 11:2 Si Maria imo simeminaki nèhè Jesus merkitè minak mur, janah mengelapui merkitè bukna. 11:3 Duana ngo kalak simerkaka-kuanggi i magahken berrita mersakit turangna i bai Jesus, "Tuhan, mersakit ngo supan-supanmu nikekellengen atèmu i." 11:4 Idengkoh Jesus kessa mo berrita i, nina mo, "Oda ngo kemmatèen ujung sakitna i, tapi asa mersangap ngo gerar Dèbata, janah kumernaken i mo asa mersangap Anak Dèbata." 11:5 Ngkelleng ngo atè Jesus midah si Marta bak taba anggina si Maria bang taba si Lazarus pè. 11:6 Tapi enggo pè ibettoh Jesus mersakit si Lazarus i, ndong dèng ngo ngo Ia i bekkasna i dua ari nai. 11:7 Enggo kessa i, nina Jesus mo taba sisinNa, "Ita kènè mo balik mi Juda." 11:8 Nai nina sisinna i mo mengaloi, "Rabi, rembaru dèng naing ibentiri kalak Jahudi kono dekket batu, keppèken naing iolihi Kono dèng ma mi sidi?" 11:9 "Otang sipuluh dua jom ngo sidari?" nina Jesus. "Oda nggèut terdengdeng kalak simerdalan mahar, kerna idah ngo penendang dunia èn. 11:10 Tapi barang isè merdalan tikan gellap, terdengdeng ngo ia, ai oda lot penendang bana." 11:11 I mo idokken Jesus. Nai nina nola dèng ma mo, "Enggo meddem supan-supanta si Lazarus, laus mo Aku mendungoisa." 11:12 Nai nina sisinna i mo, "Tuhan, mula terpeddem ngo si Lazarus i, lako njuah mo i." 11:13 Keppè ukum maksud Jesus, enggo ngo matè si Lazarus. Tapi ukum dok atè kalak idi terpeddem sambing ngo. 11:14 Kerna naidi ntangkas mo ibagahken Jesus, "Enggo matè si Lazarus. 11:15 Tapi tuahna mo oda i sidi Aku tikanna idi kerna sellohen ngo bagidi, asa percaya kènè. Kita kènè mo laus mendahisa bagèndari." 11:16 Nai nina si Tomas nidokkenna ma Didimus (leppa) mo taba sisiin, "Laus ma mo kita, asa rebbak matè kita dekketSa!" 11:17 Tikan soh Jesus mi sidi, enggo mo empat ari dekkahna si Lazarus idi itanem. 11:18 Daoh Betania i Jerusalem nai kira-kira tellu batu (dua pal). 11:19 Toko ngo mèdukna roh kalak i Jerusalem nai lako mengapoi si Maria dekket si Marta, kemulihken permatè turangna si Lazarus i. 11:20 Ibettoh si Marta kessa mo enggo roh Jesus, mèter karuar mo ia menimbaki Jesus. Tapi ukum si Maria tading ngo i bages. 11:21 Nina si Marta mo taba Jesus, "Tuhan ukum isèn kin kono, oda matè turangki. 11:22 Tapi tukasi pè bagidi kubettoh ngo, bagèndari pè iberrèken Dèbata ngo bamu barang kadè sambing pè ipido kono." 11:23 "Nggelluh ngo mengolihi turangmu i," nina Jesus taba si Marta. 11:24 Ialoi si Marta mo, "Kubettoh ngo balik nggelluh si Lazarus i segen, tikan karinana kalak simatè ipegelluh tupung Ari Kiamat." 11:25 "Aku ngo memerrèken kenggelluhen dekket pekèkèken kalak simatè; barang isè percaya taba Aku, nggelluh ngo ia tukasi pè enggo matè," nina Jesus taba si Marta. 11:26 "Kalak singgelluh janah percaya taba Aku, oda ngo matè ia soh mi amman-sumendah. Percaya ngo kono isi?" 11:27 "Uè Tuhan, percaya ngo aku. Kono ngo Mesias, Anak Dèbata, Raja Sipaluah roh mi dunia èn." 11:28 Enggo kessa idokken si Marta ranana idi, laus mo ia mengaleng si Maria anggina i, ikosikken mo mbangsa, "Enggo roh Guru i, Ikusoken ngo tersèngèt kono." 11:29 Mendengkoh i, mèter cènder mo si Maria, sagal-sugul mo ia mendahi Jesus. 11:30 Oda dèng ngo soh tikanna i Jesus mi rumah. Tong dèng ngo Ia i bekkas simbak dekket si Marta i. 11:31 Idah kalak Jahudi siroh mengapoi silot i bages i mo kèkè si Maria janah rada-rudu mi ruar; gabè ièkutken kalak i mo ia, ai idok kalak i laus mi kuburen ia lako tangis. 11:32 Soh kessa si Maria janah idah kessa Jesus ninganna idokken, "Tuhan, ukum isèn kin Kono, oda ngo matè turangki!" 11:33 Idah Jesus kessa mo tangis si Maria bak kalak Jahudi siroh rebbak dekket si Maria i, mellui kalohon mo atè Jesus. 11:34 Ikusoi Jesus mo kalak i, "Idikè ngo ia ikuburken kènè?" Nai nina kalak i mo, "Roh mo kono mengidah, Tuhan!" 11:35 Nai tangis mo Jesus. 11:36 Gabè nina kalak Jahudi mo, "Tengen mo ngkelleng atèna taba si Lazarus i!" 11:37 Tapi lot ma ngo dèba mendokken, "Kalak sipètung gabè merpendidah ngo ibaing, oda ngo ndia tersondatsa, asa ulang matè si Lazarus i?" 11:38 Ibagasen bonek kalohoon, idahi Jesus mo kuburen i. Bagè liang ngo kuburen i, itutup dekket batu mbellen kalohoon. 11:39 "Pesisi kènè mo batu i," nina Jesus. Tapi ialoi si Marta mo, "Tuhan, enggo empat ari ia itanem, tentu enggo mbau i!" 11:40 Idokken Jesus mo taba si Marta, "Otang enggo Kudokken bamu: Mula percaya kono, idah kono ngo kemmuliaan Dèbata!" 11:41 Nai ipesisi kalak i mo batu tutupna i. Itarè Jesus mo mi langit ninganna idokken, "Ialè Pa, kudokken mellias atè bamu, kerna idengkohken Ko pengidonKu. 11:42 Kubettoh ngo dak idengkohken Kono ngo pengidonKu, tapi Kudokken i, kumarna jelma nterrem silot i sèn ngo; asa percaya kalak idi, Kono ngo pasulakken Aku." 11:43 Enggo kessa i idokken Jesus bagidi, nggang mo idiloken, "O Lazarus, karuar mo kono!" 11:44 Nai mèter karuar mo tuhu si Lazarus sienggo matè i kin. Merbalut dèng ngo tangan bak nèhèna dekket kaèn kapan, janah abèna pè mertutup dèng ma ngo tong. "Osari kènè mo kaèn kapanna i," nina Jesus taba jelma nisidi, "asa merdalan ia." 11:45 Mèduk ngo kalak Jahudi siroh mengapoi si Maria i gabè percaya taba Jesus, enggo kessa idah kalak i simasa i. 11:46 Tapi lot ma ngo dèba bai kalak i nai mendahi Parisè lako magahken sinibaing Jesus i. 11:47 Kumarna naidi, runggu mo kalak Parisè dekket imam-imam ekuten bagidi ma pè dekket runggu mbellen, nina mo, "Bakunè mo sibakin? Ai toko ngo buèna tanda kellengangen ibaing kalak èn! 11:48 Mula siebelli bagidi, gabè percaya mo kalak karina baNa. Ujungna roh nola mo kalak Rom lako menaban Bages Dèbata dekket bangsanta pè!" 11:49 Nai mongkam mo sada kalak bai kalak i nai; imo si Kayafas, imam huntuun tahunna i, nina mo, "Kadè poda pana pemettoh ndènè. 11:50 Oda ngo satdar kènè, lotiin ngo matè sada kalak mengkepkep bangsanta, daripada karinana nola bangsanta tumpat?" 11:51 Idokken si Kayafas pè bagidi, oda ngo ipas ukurna nai sendiri i. Tapi kumarna imam huntuun ngo ia, tahunna idi, merralaten ngo ia, kennah matè ngo Jesus mengkepkep bangsa Jahudi. 11:52 Oda pellin mengkepkep bangsa Jahudi sambing, tapi dekket ngo lako pepulungken bak peddemmuken dukak-dukak Dèbata simersèrak i. 11:53 Mulai i sidi nai mo mertaki pengulu-pengulu Jahudi lako memmunuh Jesus. 11:54 Kumarna naidi, oda nèngè uè Jesus ntarar merdalan i Juda. Itadingken mo Juda, gabè laus mo ia mi kuta Efraim, i gembar padang gurun. I sidi mo Ia merrian rebbak dekket sisinNa. 11:55 Enggo mo ndessing tikanna i Ari Raya Pèsta Paskah kalak Jahudi. Enggo mo nterrem kalak idi i suberri kuta nai laus mi Jerusalem, lako pepantingken dirina imo menguras, sinderrang makdèng dapet pèsta i. 11:56 Sinderrang ibagasen Bages Dèbata kalak i, itulusi kalak i ngo Jesus. Mersikusoon mo kalak i samahsa, "Bakunè ngo dok atèmu? Roh ma ngo ndia Ia mi pèsta èn?" 11:57 Ninganna bagidi enggo iperèntahken imam-imam ekuten dekket kalak Parisè mendokken; barang isè bettoh-bettohen idikè Jesus, kennah ibagahken, asa itangkup Ia.
12:1 Ennem ari nai asa dapet Pèsta Paskah, laus mo Jesus mi Betania. I kuta i ngo merrian si Lazarus sienggo nung matè gabè ipegelluh Jesus nola. 12:2 Ijamu kalak i mo Ia i sidi. Si Marta pè dekket ngo merkebbas. Rebbak kundul ngo si Lazarus dekket Jesus mangan. 12:3 Nai roh mo si Maria merembah minak narwatsu kira-kira sitengah litèr. Maharga kalohoon ngo minak i, nai iarirken mo minak i mi nèhè Jesus. Nai ilapui mo nèhè Jesus dekket bukna. Gabè baungkus mo bages i kumarnaken minak i. 12:4 Sada ipas sisiin i nai imo si Judas Iskariot simenelbuh Jesus mendokken -- 12:5 "Kasa oda idèa minak i merharga tellu ratus riar, asa iberrèken tokorna i mengurupi kalak sincor?" 12:6 Idokken si Judas pè bagidi, oda ngo kalak sincor nisarihkenna, tapi kerna pennangko ngo ia. Nggati ngo ibuat kèpèng i bagut-bagut nijèmakna idi nai, ai ia ngo memennep bagut-bagut i. 12:7 Tapi nina Jesus mo, "Belli mo ibaing bagidi, ai dosken solo-solo mi ari permatèngKu i ngo nibaingna i. 12:8 Dakdak ngo lot sincor i tengah-tengah ndènè." 12:9 Nterrem ngo kalak Jahudi mendengkoh, i Betania ngo Jesus, gabè laus mo kalak idi mi sidi, oda pellin kumarna Jesus, tapi dekket ngo naing mengidah si Lazarus sienggo nipegelluh Jesus i simatè nai. 12:10 Kumarnana idi ngo asa naing ibunuh imam-imam ekuten si Lazarus i; 12:11 ai kemulihkensa ngo, enggo mèduk kalak Jahudi percaya taba Jesus. 12:12 Sibarembenkenna nola, idengkoh jelma nterrem sienggo soh mi Jerusalem lako merpèsta Paskah idi mo enggo i tengah ndalan Jesus lako mi Jerusalem. 12:13 Nai ibuati kalak i mo ranting bak bulung kayu, nai laus mo kalak i mennimbak-nimbak Jesus ninganna mengoang-ngoangken: "Hosianna, Poji mo Dèbata! Nipasu-pasu mo Ia siroh merkitè-kitè gerar Tuhan i, Ipasu-pasu mo Raja kalak Israel!" 12:14 Nderrangna idi, enggo mo dapet Jesus sada kalodè bajar dèng, janah enggo mo kundul ia i babo kalodè i. Nai dapet mo bagè sitersurat ibas Bibèl: 12:15 "Ulang kono mbiar alè berru Sion! Tengen mo Rajami memmasang sada anak kalodè!" 12:16 Sinderrangna idi oda iarti sisiin Jesus dèng karinana i. Tapi enggo kessa ipesangap Jesus, merkitè kemmematèNa, gabè ièngèt kalak i mo kadè sinibaing ndèba tabaSa enggo tersurat ibas Bibèl tersèngèt diriNa. 12:17 Jelma silot rebbak dekket Jesus tikanna ipegelluh si Lazarus i simatè nai idi pè, dak ngo mennukutken pemmaing Jesus bai jelma nterrem i. 12:18 Kumarnana idi ngo asa merlausen kalak idi mendahi Jesus, kemmulihken tanda kellengangen nihanaken Jesus i. 12:19 Gabè nina Parisè mo samah-samahsa, "Oda lot nè kadè ndorok terbaing kita. Tengen mo, suberri dunia ngo mengèkutkensa!" 12:20 Kalak si roh merpèsta mi Jerusalem i, lot ngo dèba kalak Junani. 12:21 Idahi kalak i mo si Pilipus, nina mo mbangsa, "Tuan sèkel ngo kami naing pejumpa dekket Jesus." (Si Pilipus imo asalna i Betsaida sini Galilea nai.) 12:22 Nai idahi si Pilipus mo si Andreas, ibagahken mo i tabasa. Jadi rebbak laus mo kalak i sidua magahken i mendahi Jesus. 12:23 Nai nina Jesus mo taba kalak i, "Enggo dapet tikkina, Anak Jelma i ipesangap. 12:24 Èngèt kènè mo mendè: Oda ganda pagè i ukum mak itanem mi tanoh i janah matè. Tapi enggo kessa matè ia, gabè mbuè mo buahna. 12:25 Barang isè mengkellini kessahna, kemmagoon kessah mo ia. Tapi barang isè menelkangken kessahna i dunia èn, ia ngo sipegelluhkensa soh mi kenggelluhen siamman-sumendah. 12:26 Barang isè naing mengkebasi Aku, kennah ièkutken ngo Aku, asa rebbak ia dekket Aku, barang i dikè pè Aku. Ai kalak simengèkutken Aku, gabè mersangap ngo ia ibaing Bapa." 12:27 "Mellui kalohoon ngo atèngKu, kadè mo ndia Kudokken? Kennah mo ndia Kudokken: Ialè Pa, ulang mo padiat Aku menggongken kinidersa ènda? Tapi tupèh kumarna lako menggongken kinidersa èn ngo Aku asa roh. 12:28 Ialè Pa, pessangap mo gerarMu!" Nai terdengkoh mo sora i sorga nai, "Enggo mo Kupesangap, janah pessangapenKu nola dèng ngo!" 12:29 Idengkoh jelma nterrem ni sidi ngo sora i, gabè nina kalak i mo, "Renggur ngo i." Lot ma ngo dèba mendokken, "Ah,oda! Malaèkat ngo mengeranai dekketSa!" 12:30 Nai nina Jesus mo taba kalak idi, "Ukum sora siterdengkoh i, oda ngo lako bangKu i asa terdengkoh, tapi lako bai ndènè ngo. 12:31 Enggo dapet tikkina ihukum dunia èn, janah bagèndari mo italuken perkuasa dunia èn. 12:32 Luas Enggo kessa ipedates Aku gabè kuabin mo karina jelma taba Aku." 12:33 Idokken pè bagidi, magahken bakunè carana Ia ipersilangken. 12:34 Nai nina jelma nterrem i mo tabaSa, "Mengèkutken Bukku Pati-patiin nami, nggelluh ngo Raja Sipaluah siniperbagah-bagah i soh mi amman-sumendah. Kasa gabè idokken Kono, kennah ipedates ngo Anak Jelma idi i tanoh èn? Isè ngo Anak Jelma i?" 12:35 Ialoi Jesus mo, "Sigejap nai ngo i tengah-tengah ndènè penendang i, merdalan mo kènè sidekkah nterrang dèng, asa ulang isangkemmi sigellap i kènè. Ai barang isè merdalan tikan gellap, oda ibettoh barang dempak dikè temburenna. 12:36 Kepercayai kènè mo penendang i, asa gabè dukak-dukak kecihuren i kènè." Enggo kessa idokken Jesus bagidi, laus mo Ia i sidi nai, janah oda uè ia ntarar terridah bai kalak i. 12:37 Tukasi pè enggo matcam bagèna tanda kellengangen ihanaken Jesus, ipetengen-tengen kalak idi, tapi laju ngo oda percaya kalak i bana. 12:38 Asa merkitè bagidi, saut mo nidokken Nabi Jesaya: "Ialè Tuhan, isè mo percaya mi sukuten nami? Taba isè ngo ipacidah kuasa Tuhan i?" 12:39 Kumarna naidi ngo asa oda terbaing kalak i percaya, ai nina si Jesaya dèng ma ngo: 12:40 "Enggo kupepètung mata kalak i, janah enggo kupepihir ukur kalak idi; asa ulang merpendidah mata kalak i, janah asa ulang merpengantusi pikiren kalak i; asa ulang balik kalak i mendahi Aku, nai Kupemmalum mo kalak idi." 12:41 Idokken si Jesaya pè bagidi terrèngèt Jesus, kumarna enggo idah kemmuliaan Jesus i. 12:42 Tapi tukasi pè bagidi, mèduk ngo pengulu-pengulu kalak Jahudi percaya taba Jesus, tapi oda pang kalak i mengaku i sintarar, asa ulang iliplip kalak idi, ipas agama nai, ai mbiar ngo kalak i midah penguasa-penguasa kalak Jahudi. 12:43 Ai lotiin ngo kalak i ipoji jelma daripada terrolih pemmojiin bai Dèbata nai. 12:44 Nai ipegang Jesus mo sorana, "Barang isè percaya taba Aku, oda ngo pellin taba Aku ia percaya, tapi dekket ngo Ia percaya taba sipasulakken Aku. 12:45 Janah barang isè mengidah Aku, mengidah sipasulakken Aku ngo Ia. 12:46 Roh Aku mi dunia èn, tosè bagè penendang, asa karina sipercaya taba Aku ulang merrian ibagasen sigellap. 12:47 Barang isè mendengkohken peddahKu tapi oda iulaken -- oda ngo Aku menghukumsa. Ai roh Aku oda ngo lako menghukum dunia èn, tapi lako paluahkensa ngo. 12:48 Ai barang isè menulak Aku janah oda menguèi katangKu, enggo lot simenghukumsa, imo kata sienggo Kuruapken i; 12:49 oda ngo ibas atè-atèngKu nai, tapi Bapa simengutus Aku ingo mendokken kadè sipatut dokkenkenKu. 12:50 Janah kenggelluhen ngo kataNa i. Asa, karinana siKuruapken i, tosè ngo i mi sinidokken Bapa mahan ruapenkenKu."
13:1 Sidari nai asa dung Ari Raya Paskah i, enggo ibettoh Jesus dapet mo tikkina, Itadingken mo dunia èn lako balik mendahi BapaNa. Enggo mo Ikekellengi karina sitersoh baNa i dunia èn, janah soh mi puncana dak ikekelengi ngo kalak idi. 13:2 Tupung mo mangan Jesus bak sisinNa cibonna i. Ukum atè si Judas Iskariot, enggo mo ibengketti sibolis, janah enggo mo iniatken lako menelbuh Jesus. 13:3 Ibettoh Jesus ngo nemmu enggo ipesakat Bapana tabaSa kuasa. Ibettoh ma ngo bai Dèbata nai ngo rohna Ia, janah kennah balik mi Dèbata. 13:4 Kerna naidi cènder mo Ia, italkasi mo jubahNa, nai iabitken mo bèsahen mi abakNa. 13:5 Nai iarirken mo laè mi sambung, Iborih mo nèhè sisinNa i, janah ilap dekket bèsahen niabitkenNa i. 13:6 Soh kessa mo Ia taba si Simon Petrus, mèter idokken si Simon Petrus mo, "Tuhan, mèter patut mo kono memmorih nèhèngku?" 13:7 Ialoi Jesus mo, "Ukum bagèndari oda ngo iantusi kono dèng siKubakin èn, luas pè asa iarti kono i." 13:8 "Ulang mo alè Tuhan," nina si Petrus taba Jesus. "Barang bakunè pè, ulang mo gabè Tuhan i nola morih nèhèngku!" Tapi nina Jesus mo mbangsa, "Mula oda Kuborih nènèmu, oda lot perdemuunmu dekket Aku." 13:9 Ialoi si Simon Petrus mo, "Mula bagidi ngo Tuhan, ulang mo pellin nèhèngku sambing iborih kono, tapi dekket mo bak takalku!" 13:10 "Ukum kalak sienggo merridi, enggo mo mpanting i karina. Oda perlu nèngè ia kennah iborih, pellin nèhèna nai ngo kessa perlu iborih asa mpanting. Enggo mo mpanting kènè, tapi oda ngo karinana kènè," nina Jesus. 13:11 (Ai enggo ngo ibettoh Jesus isè naing menelbuhSa. Kernanaidi ngo asa idokken, "Enggo ngo mpanting kènè, tapi oda karinana.") 13:12 Enggo kessa pul iborih Jesus nèhè kalak idi, Ipakkè nola mo jubahNa kin, nai kundul mo ia. Nai idokken mo taba kalak I, "Iantusi kènè ngo kadè lapaten siKubaing ndai bai ndènè? 13:13 Idokken kènè ngo Aku Guru janah Tuhan, tuhu ngo i; ai Guru janah Tuhan ngo Aku. 13:14 Mula Aku ngo Tuhan janah Guru ndènè memmorih nèhè ndènè, kènèpè patut ngo mersiborihen nèhè. 13:15 Kubaingken codiin idi bai ndènè, asa samah-samah kènè pè mencodi bagè sienggo Kubaingken i taba kènè. 13:16 Èngèt kènè mo èn: Oda ngo belgahen hamba asa tuanna; janah oda ngo belgahen pasulaken dari pada sipasulakken. 13:17 Enggo ibettoh kènè i bagèndari; mula ibaingken kènè bagidi, tuhu-tuhu mo kènè mersampang atè. 13:18 Karina siKudokken èn taba kènè, oda ngo bai ndènè karinana i, ai Kubettoh ngo barang isè siKupilih. Tapi barang kadè sitersurat ibas Bibèl, kennah saut ngo i karinana, janah èn mo sitersurat i sidi, 'Kalak sirebbak mangan dekket Aku ngo mengalo Aku.' 13:19 Kubagahken i bai ndènè bagèndari, sinderrang madèng masa, asa enggo kessa masa idi, gabè percaya mo kènè, Aku ngo i sinidokkenna AKU LOT. 13:20 Situhunna ngo siKudokken èn: Barang isè menjalo pasulakenKu, Aku ngo nijalona i. Janah barang isè menjalo Aku, Dèbata sipasulakken Aku i ngo nijalona." 13:21 Idokken Jesus kessa mo bagidi, gabè mellui kalohoon mo atèna. Nai idokken mo, "Situhunna ngo siKudokken ènda; sada kalak bai ndènè nai ngo menelbuh Aku." 13:22 Mersitengennen mo sisinNa i samahsa ninganna ibagasen perasaan oda mertentu. Oda ibettoh kalak idi, isè nimaksud Jesus i. 13:23 Kundul ngo sisiin kekellengen atè Jesus i gembarna. 13:24 Nai ia mo ikilap si Simon Petrus, asa ikusoken taba Jesus, tah siapaina nimaksud Jesus i. 13:25 Nai ijolmiti mo Jesus, ikuso mo, "Isè ngo i Tuhan?" 13:26 Ialoi Jesus mo, "Barang bai isè Kuberrèken roti siKusernepken èn, idi mo ia kalakna." Nai ibuat Jesus mo sada roti, isernepken mo mi bagasen caban; iberrèken mo roti i taba si Judas Iskariot. 13:27 Ijalo si Judas kessa mo roti i, mèter mbengket mo Sibolis mi bagasen dirina. Idokken Jesus mo tabasa, "Ndor mo bahan sinaing bahankenmu i!" 13:28 Isè poda kalak i simangan i mengantusi, kasa idokken Jesus bagidi taba si Judas. 13:29 Lot ngo dèba merdokatè, ipasulak Jesus si Judas lako mennokor siperlu mi pèsta idi, barang tah ipasulak Jesus ia mennaruhken kèpèng giam cituk taba kalak sincor, ai ia ngo mencèkèp bagut-bagut kalak idi. 13:30 Enggo kessa ijalo si Judas roti i, mèter laus mo ia mi ruar, tapi enggo mo berngin tikanna i. 13:31 Enggo kessa laus si Judas i, idokken Jesus mo, "Bagèndari mo mersangap Anak Jelma i. Janah merkitè-kitè Ia, mersangap ma mo Dèbata. 13:32 Mula mersangap Dèbata merkitè-kitè Ia, Ia pè ipesangap Dèbata ma mo. Ndor nèngè mo i, ibakin Dèbata. 13:33 Kènè dukak-dukakKu, oda ndekkah nèngè rebbak Aku dekket kènè, itulusi kènè mo Aku, tapi bagè sienggo Kudokken taba kalak Jahudi, bagidi ma ngo Kudokken taba kènè: Oda terdahi kènè mi bekkas sidahinKu i. 13:34 Jalo kènè mo pati-patiin rembaru bangKu nai: Kennah mersikekelengen ngo kènè samah kènè. Bagè Aku mengkekelengi kènè, bagidi ma mo kènè kennah mersikekelengen. 13:35 Mula mersikekelengen kènè, samah kènè, karina mo kalak bettohen magahken sisinKu kènè." 13:36 Ikusoken si Petrus mo, "Tuhan, naing laus mikè ko pana?" Nina Jesus mengaloi, "Naing laus ngo Aku mi sada bekkas, tapi oda terbaing kono mengèkutken Aku mi bekkas i. Tapi ukum luas, ièkutken kono mo Aku mi sidi." 13:37 "O Tuhan, kasa oda ndorok kuèkutken kono bagèndari? Ai kebbas ngo aku lako matè pè, mengèkutken kono!" nina si Petrus. 13:38 Ialoi Jesus mo, "Tuhu-tuhu ngo matè pè uè ngo ko lako megèkutken Aku? Kubagahken mo bamu: Sinderrang madèng takuak manuk berngin èn, enggo mo tellu kali iperso kono Aku, oda itandai kono nimu Aku!"
14:1 "Ulang pella bonek atè ndènè," nina Jesus taba kalak i. "Percaya mo kènè taba Dèbata, janah percaya ma mo kènè taba Aku. 14:2 Lumbang ngo bekkas i Bages Bapa. Laus pè aku mi sidi lako menghantari bekkas ndènè ngo. Oda pella kubagahken idi taba kènè, ukum oda ngo tuhu bagidi. 14:3 Enggo kessa laus Aku menghantari bekkas bai ndènè, roh nola ngo Aku mengalengi kènè; asa barang i dikè Aku merbekkas, i sidi ma mo kènè merrian. 14:4 Ibettoh kènè ngo dalan mi bekkas sinaing dahinKu idi." 14:5 Gabè idokken si Tomas mo mbang Jesus, "Tuhan, oda ngo kubettoh kami barang dempak dikè kono laus, bakunè mo kami memettoh dalan laus mi sidi?" 14:6 Ialoi Jesus mo, "Aku ngo dalan lako menandai Dèbata, dekket dalan asa terolih kenggelluhen. Sada poda ndorok soh mendahi Bapa, ukum mak merkitè-kitè Aku. 14:7 Mula itandai kènè Aku, itandai kènè ma mo BapangKu. Mulai bagèndari nai, enggo mo itandai kènè Ia, janah enggo mengidah Ia." 14:8 Nai idokken si Pilipus mo taba Jesus, "Tuhan, tuduhken bai nami Bapa i, asa puas ukur nami." 14:9 Tapi ialoi Jesus mo, "Enggo mo bagi dekkahna Aku rebbak dekket kènè, laju dèng ngo keppè oda itandai kono Aku alè Pilipus? Barang isè mengidah Aku, mengidah Bapa i ngo Ia. Kasa idokken kono dèng, 'Tuduhken Bapa i bai nami?' 14:10 Oda ngo percaya kono alè Pilipus, sada ngo Aku dekket Bapa, janah sada ngo Bapa dekket Aku? Karina siKudokken taba kono i, oda ngo tubuh ibas ukur-ukurKu nai i. Bapa nibagasen Aku i ngo mendokken i karinana. 14:11 Percaya mo kènè, sada ngo Aku dekket Bapa, janah sada ngo Bapa dekket Aku. Mula oda terbaing kènè mengkettoki idi, ah, mak nèngè! Percaya mo kènè taba Aku, Kumarnaken sienggo Kuhanaken i. 14:12 Situhunna ngo siKudokken èn: Barang isè tuhu-tuhu percaya taba Aku, bakinenna ngo bagè sienggo Kubakin i -- oda pellin bagi sambing tupèh -- tapi buèen i sidi nai pè ndorok ngo ibaing, kumarna laus ngo Aku mendahi Bapa. 14:13 Asa barang kadè sambing ipido kènè merkitè-kitè gerarKu, Kuberrèken ngo i bai ndènè, asa mermulia Bapa merkitè-kitè Anak i. 14:14 Pido kènè mo barang kadè merkitè-kitè gerarKu; Kuberrèken ngo i bai ndènè." 14:15 "Mula ngkelleng atè ndènè midah Aku, ulaken kènè mo pati-patinKu. 14:16 Kupido mo bai Bapa, asa Iberrèken bai ndènè sada Pengurupi sidèban, simerian rebbak dekket kènè soh mi amman sumendah. 14:17 Tendi Dèbata ngo Ia sipetararken kebennaren tersèngèt Dèbata. Oda terjalo dunia èn Tendi Perbadia I, kerna oda idah dunia èn bak oda itandai dunia èn ia. Tapi itandai kènè ngo ia, kerna merrian rebbak dekket kènè ngo Ia, janah mersada dekket kènè mo Ia. 14:18 Oda Kutadingken kènè mak merinang bak mak merbapa. Balik nola ngo Aku mendahi kènè. 14:19 Sigejap nai ngo, oda idahen dunia èn nèngè Aku. Tapi idah kènè nola mo Aku. Janah kumarna nggelluh ngo Aku, kènè pè nggelluh ngo. 14:20 Enggo kessa dapet arina, bettohen ndènè mo, sada ngo Aku dekket Bapa i, janah kènè sada ngo dekket Aku, janah Aku pè sada ma ngo dekket kènè. 14:21 Barang isè menjalo janah mengulaken katangKu, ia ngo simerkelleng atè midah Aku. Ngkelleng mo atè BapangKu midah simengkekelengi Aku. Aku pè ngkelleng mo atèngKu midahsa, janah kupetandaken diringKu bana." 14:22 Mengkuso mo si Judas (oda si Judas Iskariot) taba Jesus, "Tuhan, kasa taba kami ipetandaken kono diriMu, keppè oda taba dunia èn?" 14:23 Ialoi Jesus mo, "Barang isè ngkelleng atèna midah Aku, iuèi mo peddahKu. Ngkelleng mo atè BapangKu midahsa. Nai roh mo Bapa rebbak dekket Aku mendahisa, janah merrian mo kami rebbak dekketsa. 14:24 Barang isè oda mengkekelengi Aku, itulak ngo peddahKu. Oda ngo bangku nai peddah nidengkoh ndènè i, tapi peddah Bapa sipasulakken Aku i ngo. 14:25 Kubagahken i karina taba kènè, sinderrang rebbak dèng Aku dekket kènè. 14:26 Tapi Tendi Dèbata i, pengurupi sinipasulak Bapa merkitè gerarku, ia mo mengajarken taba kènè tersèngèt mi sagumama dekket pessèngètken taba kènè tersèngèt karinana sienggo Kugabahken idi bai ndènè. 14:27 Damè ngo Kutadingken bai ndènè, imo damè silot bangku Kuberrèken bai ndènè. Oda ngo bagè niberrèken dunia èn ukum damè siKuberrèken i. Ulang kènè bulisah janah ulang mbiar. 14:28 Enggo idengkoh kènè siKudokken i, 'Laus mo Aku, tapi roh nola ngo Aku mendahi kènè'. Mula tuhu ngkelleng atè ndènè midah Aku, kennah lolo ngo kènè mula laus Aku mendahi Bapa, ai belgahen ngo Bapa i asa Aku. 14:29 Kubagahken kin i bagèndari taba kènè sinderrang madèng masa i karina, asa enggo kessa masa, gabè percaya mo kènè. 14:30 Oda pella mbuè nèngè sinaing dokkenkenKu taba kènè, kerna enggo katikana roh penguasa dunia èn. Tapi oda ngo merkuasa ia bangKu. 14:31 Tapi kennah masa ngo i karina asa ibettoh dunia èn, ngkelleng ngo atèngKu midah Bapa, janah kuulaken karinana sinidokken Bapa i taba Aku. Ita kènè mo, laus mo kita isèn nai."
15:1 Nina Jesus dèng ma, "Aku ngo batang anggur situhunna, Bapa ngo sidasa pekken i. 15:2 Karina dahanKu siso merbuah igettap ngo; tapi karina dahan simerbuah, itunasi ngo janah ipebersih asa makin ratraten buahna. 15:3 Enggo mpanting kènè kumarna peddah siKupeddahken i bai ndènè. 15:4 Tettap mo kènè ibagasen Aku, asa Aku pè tettap ibagasen kènè. Oda ndorok merbuah dahan i ukum ibas kedirinna nai. Tapi ndorok merbuah ngo ia, mula nggelluh ia ipas batang idi. Bagidi ma ngo bang kènè pè, lebbè nggelluh ibagasen Aku ngo kènè, asa ndorok merbuah kènè. 15:5 Aku ngo batang anggur i, janah kènè ngo dahan-dahanna. Barang isè nggelluh ibagasen Aku, janah Aku ibagasensa, ia ngo merbuahken mbuè; ai ukum mak merkitè-kitèken Aku, oda lot terbahan kènè barang kadè pè. 15:6 Barang isè oda nggelluh ia ibagasen Aku, igettap ngo ia janah ipatakken, nai gabè ngkerrah-kerring mo ia janah ipinumpukken mo asa itutungi mi api. 15:7 Mula nggelluh kènè ibagasen Aku janah dak iulaken kènè peddahKu, ndorok mo kènè mengido barang kadè sambing taba Bapa, nai iberrèken mo sinipido ndènè i. 15:8 Mula ratraten buah ndènè mersampang atè mo BapangKu, imo tandana tuhu-tuhu kènè sisinKu. 15:9 Kukekelengi ngo kènè bagè Bapa mengkekelengi Aku. Hot mo kènè mbagasen kelleng atèngKu i. 15:10 Mula iuèi kènè katangKu, nggelluh ibagasen Aku mo kènè, codi bagè Aku nggelluh ibagasen ngkelleng atè BapangKu, kerna kuuèi kataNa." 15:11 "Karinana Kubagahken i taba kènè, asa irasaken kènè sampang atèngKu, janah asa dom sampang atè ndènè. 15:12 Èn mo peddahKu: Kennah mersikekelengen kènè, codi bagè Aku mengkekelengi kènè. 15:13 Barang isè mengkekelengi denganna, kennah uè ia matè mengkepkep denganna i. 15:14 Mula iulaken kènè siKudokken, denganKu janah supan-sulanKu mo kènè. 15:15 Oda nèngè Kugerari kènè kandu, ai oda ibettoh kandu barang kadè ibahan tuanna. Kugerari mo kènè supan-supanKu, kerna karina siKudengkoh bai Bapa nai, enggo mo Kubagahken taba kènè. 15:16 Oda ngo kènè memilih Aku. Aku ngo milih kènè, janah mennuruh kènè, asa laus kènè merbuah -- asa ratraten buah ndènè, janah asa hot buah ndènè i. Nai iberrèken Bapa mo bai ndènè barang kadè sambing ipido kènè merkitè-kitè Aku. 15:17 Èn mo peddahKu: Kennah mersikekelengen kènè." 15:18 "Mula ncego atè dunia èn midah kènè, èngèt kènè mo, enggo lebbèen kin Aku ikecegoken. 15:19 Ukum dunia èn kin sidasa kènè, ngkelleng ngo atè dunia èn midah kènè, janah gabè supan-supanna ngo kènè. Tapi enggo Kupilih kènè i dunia èn nai, jadi oda nèngè milik dunia èn kènè. Kumarnakenna i ngo asa ceggo atè dunia èn midah kènè. 15:20 Èngèt kènè mo sienggo Kudokken idi taba kènè, 'Oda ngo belgahen kandu daripada tuanna.' Salang Aku enggo idersa kalak idi, makinsa nola mo kènè mak idersa. Mula iuèi kalak i peddahKu, iuèi ma ngo bang peddah ndènè pè. 15:21 Iulaken kalak i ngo karinana i taba kènè, kumarnaken sisinKu kènè; janah kumarna oda itandai kalak idi Ia simengutus Aku. 15:22 Ukum oda kin roh Aku, janah mula oda kin sanga kupeddahken karinana i taba kalak idi, oda ngo merdosa kalak i. 15:23 Barang isè merceggo atè midah Aku, ceggo ma mo atèna midah Bapa. 15:24 Ukum oda dèng kin nung Kuhanaken i tengah-tengah kalak i siso nung ihanaken barang isè pè, oda ngo merdosa kalak idi. Tapi bagèndari enggo mo idah kalak i kadè siKuhanaken, tapi ncego ngo atè kalak i midah Aku, bang midah BapangKu pè. 15:25 Masa pè karinana i, asa dapet ngo bagè sitersurat ibas Bukku Patiin kalak i, 'Ikecegoken kalak i ngo Aku, oda lot sebabna.' 15:26 Pasulakenku mo taba kènè Pengurupi siroh bai Bapa i nai. Ia ngo Tendi sipetandaken kebennaren terrèngèt Dèbata. Roh kessa Ia, Isaksiken ngo terrèngèt Aku. 15:27 Tapi kènè pè kennah ngo mennaksiken Aku, ai imulana nai ngo kènè enggo rebbak dekket Aku.
16:1 Kubagahken kin i lebbèen taba kènè, asa ulang gabè murak ukur ndènè. 16:2 Iliplip kalak i mo kènè i bages perguruun nai. Janah dapet nèngè mo tikkina, mengulaken lemmo atè Dèbata ngo ia dok atèna mula ibunuh kalak idi kènè. 16:3 Ibaing kalak i bai ndènè bagidi, kumarna oda itandai kalak i dèng BapangKu, janah Aku pè makdèng ma ngo itandai. 16:4 Tapi bagèndari Kubagahken idi taba kènè, asa mula masa i luas, èngèt kènè mo, enggo Kubagahken kin taba kènè." "Oda nung dèng Kubagahken idi i mulana nai taba kènè, kumarna rebbak dèng Aku dekket kènè. 16:5 Tapi ukum bagèndari laus nè mo Aku mendahi simengutus Aku; tukasi pè bagidi, sada kalak poda kènè mengkuso, dempak dikè Aku laus. 16:6 Bagèndari balikna nola ngo tupèh, ai gabè bonek nola ngo atè ndènè, kumarna Kubagahken idi taba kènè. 16:7 Tapi situhunna ngo siKudokken èn bai ndènè: Laba ndènè ngo mula laus Aku; ai ukum oda laus Aku, oda roh pengondiin i mendahi kènè. Tapi mula laus Aku, pasulakenKu mo Ia mendahi kènè. 16:8 Janah roh kessa Ia, Iajari mo dunia èn tersèngèt pengantusiin lapaten dosa, kebennaren dekket hukum; 16:9 ukum tersèngèt dosa, imo kumarna oda percaya kalak i bangKu; 16:10 ukum tersèngèt kebennaren, imo kumarna laus Aku mendahi Bapa, janah oda idah kènè nèngè Aku; 16:11 ukum tersèngèt hukum, imo enggo ihukum penguasa dunia enda! 16:12 Macam dèng ngo nemmu bagèna sinaing Kubagahken bai ndènè, tapi ukum bagèndari oda dèng terjalo kènè i. 16:13 Tapi mula enggo kessa roh Tendi i, imo Ia sipetandaken kebennaren tersèngèt Dèbata, itegu-tegu mo kènè lako menandai karina kebennaren. Oda ngo mengerrana Ia ibas diriNa sendiri nai, tapi iranaken ngo sinidengkohNa, janah bagahenkenna ma ngo taba kènè sinaing masa i podi ari. 16:14 Ipessangap ngo Aku, ai bagahenkenNa ngo taba kènè kadè sinijaloNa bangKu nai. 16:15 Karinana silot bai Bapa, milikNa ngo Kumarna naidi ngo asa Kudokken; bagahenken Tendi i ngo bai ndènè, kadè nijaloNa bangKu nai." 16:16 "Sigejap nai ngo kessa, oda idahen ndènè nèngè Aku, tapi sigejap nai nola ma, idahen ndènè nola ma mo Aku." 16:17 Mendengkoh idi, gabè mersikusoon mo dèba sisiin idi samahsa, "Kadè ngo lapaten sinidokkenna banta i; sigejap nai ngo kessa, oda idahen ndènè nèngè Aku, tapi sigejap nai nola ma, idahen ndènè nola mo Aku? Bagidi mo dekket nidokkenna: 'Laus mo aku mendahi Bapa?' 16:18 Dak ngo ikusoken kalak i: Kadè lapaten 'sigejap nai'? Oda siantusi tah kadè ranana!" 16:19 Ibettoh Jesus mo naing ikusoi kalak idi Ia, jadi Idokken mo taba kalak i, "Kasa mersikusoon kènè samah-samah kènè terrèngèt siKudokken: Sigejap nai ngo, oda idahen ndènè nèngè Aku, tapi sigejap nai nola ma, idahen ndènè nola mo Aku? 16:20 Ntangkas mo kubagahken taba kènè; tangis mo kènè janah derru-derru, tapi lolo mo dunia èn. Bonek ngo kènè, tapi gabè mobah mo bonek atè ndènè i gabè sampang atè. 16:21 Susah janah bonek ngo atè daberru lako menubuhken dukakna. Tapi enggo kessa tubuh dukakna i, gabè oda nèngè ngo ièngèt kinimpiahna i, ai mersampang atè mo ia kerna enggo itubuhken sada anak mbara mi dunia èn. 16:22 Bagidi ma ngo bang kènè pè. Bagèndari bonek ngo kènè, tapi rebbak nola mo Aku dekket kènè, nai gabè sampang mo atè ndènè; janah isè poda ndorok mengerampasi sampang atè ndènè i bai ndènè nai. 16:23 Dapet kessa mo ari i, oda pella mengkusoken barang kadè nengè kènè taba Aku. Kudokken mo bai ndènè: Barang kadè pè ipido kènè bai Bapa nai, iberrè ngo i bai ndènè merkitè-kitè gerarKu. 16:24 Soh bagèndari oda nung dèng kènè mengido barang kadè merkitè gerarKu. Pengido kènè mo, asa menjalo kènè, janah asa dom sampang atè ndènè." 16:25 "Karinana ènda Kuranaken bai ndènè merkitè-kitè codiin. Tapi roh nè mo tikkina, oda nèngè merkitè codiin Aku mengerrana taba kènè. Ntompel mo kuranaken bai ndènè tersèngèt Bapa. 16:26 Tikan dapet ari i, mersodip mo kènè merkitè gerarKu mendahi Bapa lako bai ndènè, 16:27 ai ngkelleng ngo atè Bapa midah kènè, kumarna ngkelleng atè ndènè midah Aku. 16:28 Bai Bapa nai ngo asalKu roh mi dunia èn. Tapi laus mo Aku menadingken dunia èn, lako balik mendahi Bapa." 16:29 Nai nina sisiin i mo taba Jesus, "Bagèndari dèng ngo asa ntompel iranaken kono bai nami, oda nèngè merkitè codiin. 16:30 Bagèndari enggo kubettoh kami, ibettoh kono ngo karinana, janah oda pella mengkuso nèngè kalak i mendahi kono. Kerna naidi, percaya ngo kami bai Dèbata nai ngo rohmu." 16:31 Nai nina Jesus mo taba kalak i, "Bagèndari otang enggo percaya kènè? 16:32 Èngèt kènè mo! Roh mo tikkina enggo mo roh i tupèh, isamburiahken mo kènè. Laus mo kènè balik mi bages ndènè gennep janah itadingken kènè mo sadaKu. Tapi oda ngo sadaKu tupèh, ai Bapa i ngo denganKu. 16:33 Karina i Kubagahken taba kènè, asa dom sampang atè ndènè, kumarna nggelluh kènè ibagasen Aku. Mpersuk mo iakap kènè ibakin dunia èn. Tapi tahanken kènè mo i sigejap, ai enggo kutaluken dunia èn!"
17:1 Enggo kessa idokken Jesus bagidi, itarè mo mi langit ninganna idokken, "Ialè Pa enggo dapet tikkina bagèndari pesangap mo anakMu, asa ipesangap anakMu i Kono. 17:2 Tosè bagè Kono enggo merrèken kuasa taba Anak idi tersèngèt karina jelma singgelluh, asa Iberrèken Anak I kenggelluhen siamman sumendah taba karina jelma siniberrèkenMu i bana. 17:3 Èn ngo kenggelluhen situhunna janah siamman sumendah i, asa itandai kalak i, Kono ngo kessa Dèbata situhunna, dekket menandai Jesus Kristus Raja Sipaluah sini utusMu i alè Pa. 17:4 Enggo Kupesangap Ko alè Pa i babo tanoh èn merkitè enggo pul Kubakin karina bahaan nidokkenMu idi mahan bahanKu. 17:5 Kumarna naidi alè Pa, persangapi mo Aku bagèndari merkitè kemmuliaan sienggo Kurasai rebbak dekket Kono idi kin sinderrang makdèng ihanaken Kono dunia èn. 17:6 Enggo kupetarar gerarMu alè Pa taba jelma niberrèkenMu bangKu i dunia èn. Ko ngo sidasa kalak idi, janah enggo ipesakat Kono kalak i taba Aku. Enggo mo iuèi kalak i peddahMu i alè Pa. 17:7 Bagèndari ibettoh kalak i ngo enggo, karinana niberrèkenMu bangKu, Kono ngo sidasa i. 17:8 Karina rana sinidokkenMu taba Aku, enggo Kupessoh taba kalak i, janah enggo mo ijalo kalak idi. Enggo ngo ntangkas ibettoh kalak idi, berkat bamu nai ngo Aku, janah percaya ngo kalak i, Kono ngo pasulakken Aku. 17:9 Kalak i ngo Kusodipken, oda ngo dunia èn, tapi kalak i sienggo nipesakatmu bangKu idi ngo Kusodipken, ai Kono ngo sidasa kalak i. 17:10 Karina milikKu, milik Bapa ngo i, janah karina milik Bapa, milikKu ngo i, janah mersangap ngo Aku i tengah-tengah kalak idi. 17:11 Naing roh ngo Aku bagèndari mendahi Kono alè Pa. Oda i dunia èn nèngè Aku, tapi ukum kalak idi dak i dunia èn ngo tong. Ialè Bapa Simbadia, permakani mo kalak idi ibagasen gerarMu, imo kuasaMu sienggo niberrèkenMu bangKu -- asa sada kalak idi bagè kita sisada i. 17:12 Sidekkah rebbak dèng Aku dekket kalak i, Kupermakan ngo kalak idi ibagasen gerarMu -- imo merkitè kuasaMu niberrèkenMu bangKu. Enggo kujaga kalak i siniberrèkenMu bangku i, janah sada kalak poda lot mbalang kubakin, laènken sisada kalak sienggo nitentukenmu lako mago i, asa merkitè bagidi saut bagè sitersurat ibas Bibèl. 17:13 Bagèndari roh mo Aku mendahi Kono alè Pa. Kudokken karinana i taba Kono, sinderrang i dunia èn dèng Aku; asa dom sampang atèngKu ibagasen kalak i. 17:14 Enggo Kupesakat karina peddahMu i taba kalak i, janah ikosomi dunia èn ngo kalak i, kumarna oda milik dunia èn kalak i, tosè bagè Aku oda milik dunia èn. 17:15 Oda ngo Kupidoken asa iabin Kono kalak idi i dunia èn nai tapi Kupidoken asa ilegenni Kono kalak idi ibas si jahat i nai. 17:16 Tosè bagè Aku oda i dunia èn nai, bagi ma ngo bang kalak idi pè oda i dunia èn nai. 17:17 Perbadia mo kalak idi i bagasen kebennarenMu, ai kataMu ngo kebennaren. 17:18 Tosè bagè niutusMu Aku mi dunia èn, bagi ma ngo Kupasulak kalak i mi dunia èn, 17:19 janah mahan tebbus kalak idi Kuberrèken ngo diringKu taba Kono alè Pa, asa tuhu-tuhu kalak idi bagè nipilih baMu. 17:20 Oda ngo pellin bai kalak i sambing Aku mersodip, tapi dekket ngo taba kalak sipercaya bangKu, kemmulihken sukuten kalak idi, 17:21 asa gabè sisada kalak i karina, tosè bagè Kono ibagasen Aku, janah Aku ibagasen Kono, janah kalak idi sada ibagasen kita, asa percaya dunia èn, Kono ngo mengutus Aku. 17:22 Enggo Kupersangapi kalak i merkitè kesangapen niberrèkenMu bangKu, asa merkitè bagidi, gabè sada kalak i, 17:23 tosè bagè kono pè sada dekket Aku, asa tuhu-tuhu kalak i sada, nai kemmulihkenna idi, gabè satdar dunia èn, Kono ngo alè Pa mengutus Aku, janah ngkelleng ngo atèMu midah kalak i, bagè ngkelleng atèMu midah Aku. 17:24 Ialè Pa, enggo ipesakat kono kalak i bangKu. Bagèndari pè, ipergeddo atèngKu, barang idikè pè Aku, dak rebbak nemmu kalak i dekket Aku, asa idah kalak i kemmulianKu; imo kemmuliaan niberrèkenMu bangKu, kumarna ikekelengi Kono ngo Aku, madèngkin pè ihanaken Kono dunia èn. 17:25 Alè Pa, Kono ngo sintèger i. Oda ngo itandai dunia èn Kono, tapi ukum Aku kutandai ngo Kono, janah ibettoh kalak èn ngo, Kono ngo mengutus Aku. 17:26 Enggo Kupetandaken Kono alè Pa taba kalak i, janah dak bagidi ngo Kubaing, asa ndorok irasaken kalak i, ngkelleng ngo atèmu midah Aku."
18:1 Enggo kessa pul isodipken Jesus bagidi, laus mo Ia rebbak dekket sisinNa mi suberrang Laè Kidron. Lot ngo isidi pekken. Misidi mo Jesus rebbak dekket sisinNa. 18:2 Ukum si Judas penelbuh idi, ibettoh ngo i bekkas i, ai nggati ngo Jesus mi sidi pulung dekket sisinNa. 18:3 Nai laus mo si Judas mi bekkas i menguluken sada nuhnuhen tenterra Rom bak perjaga Bages Dèbata, ipasulak imam-imam ekuten bak kalak Parisè. Lengkap ngo kalak i merembah senjata, suluh bak obor. 18:4 Ibettoh Jesus ngo karina sinaing masa baNa. Nai Idapetken mo kalak i ninganna idokken, "Isè ngo tulusen ndènè?" 18:5 Ialoi kalak i mo, "Jesus kalak Nazaret i ngo." "Aku ngo I," nina Jesus taba kalak i. Isidi ma ngo si Judas penelbuh i cènder rebbak dekket kalak i. 18:6 Sinderrang idokken Jesus taba kalak i, "Aku ngo I," mèter sondar mo karina kalak i mi podi, janah mertonggalingen mi tanoh. 18:7 Nai idokken Jesus mo mengolihi, "Isè ngo tulusen ndènè?" "Jesus kalak Nazaret i ngo," nina kalak i mengaloi. 18:8 "Enggo Kudokken taba kènè Aku ngo I," nina Jesus. "Asa mula Aku ngo sinitulusen ndènè, belli kènè mo kalak èn laus." 18:9 (Merkitè katana bagidi, saut mo nidokkenna i bagèen,"Alè Pa, isè poda lot mago Kubaing ibas sienggo nipessohMu mbang Aku i nai.") 18:10 Nai mènter isintak si Petrus mo pedangna, ai tupung kin ngo ia merpeddang, itampul mo sada kalak naposo imam huntuun, sanga nggettap copingna kamuhun. Si Malkus ngo gerar naposo imam huntuun i. 18:11 Nai idokken Jesus mo taba si Petrus, "Sembungken pedangmi! Otang kennah ngo Kuènum caban kinidersa niberrèken Bapa bangKu?" 18:12 Nai mènter itangkup soridadu bak ekutenna dekket perjaga-perjaga kalak Jahudi mo Jesus, janah ilanggu. 18:13 Iiring kalak i mo Jesus perlebbè mendahi si Hanas, simatua si Kayafas. Si Kayafas ngo imam huntuun tahun naidi. 18:14 Ia ngo simendokken taba perkuasa Jahudi, lotiin ngo matè sada kalak megkepkep jelma nterrem, dari pada karinana nola tumpat bangsa i. 18:15 Ukum si Simon Petrus dekket sisiin sisada kalak nai, dak ièkut-èkut ngo Jesus i podi nai. Mersitandaan ngo sisiin sisada kalak i dekket imam huntuun i; jadi dekket ngo ia mbengket rebbak dekket Jesus mi kasèan bages imam huntuun i, 18:16 tapi ukum si Petrus i ruar ngo ia memèma, i pèntu. Balik mo mi ruar sisiin sisada kalak i, simersitandan dekket imam huntuun i. Mengerranai mo ia dekket naposo daberru penjaga pèntu, nai iarahken mo si Petrus mbengket mi bagasen. 18:17 Nai nina daberru simenjaga pèntu i mo mbang si Petrus, "Èi, otang kono pè sada kalak ipas sisiin kalak adoi nai ngo?" Ialoi si Petrus mo, "Oda!" 18:18 Kumarna enggo mbergoh kalohoon tikanna idi, gabè ilakati naposo dekket perjaga-perjaga Bages Dèbata mo api, nai cingko mo kalak i cidudu i gembar api i. Si Petrus pè dekket ma mo cènder i sidi cidudu. 18:19 Nai ikusoi imam huntuun imo Jesus tersèngèt sisinNa bak tersèngèt peddahNa i. 18:20 Ialoi Jesus mo, "Dakdak ngo Aku mengajari jelma nterrem i bages perguruun dekket i Bages Dèbata bekkas kalak Jahudi mertumpu. Oda Aku mboni-mboni mengerana. 18:21 Kasa Aku ikusoi kono? Kalak idi sienggo mendengkoh peddahKu i mo kusoi, ai enggo ntangkas ibettoh kalak i siKupeddahken idi." 18:22 Enggo kessa idokken Jesus bagidi, mèter iparap sada kalak perjaga ni sidi mo Jesus ninganNa idokken, "Kasa bagidi pengaloiMu taba imam huntuun i?" 18:23 Nai ialoi Jesus mo ia, "Mula salah siKudokken i, bagahken salahna. Tapi mula tuhu ngo siKudokken i, kasa iparap kono Aku?" 18:24 Nai ipasulak si Hanas mo mengiring Jesus mendahi si Kayafas imam huntuun i, tapi tong dèng ngo terlanggu. 18:25 Ukum si Simon Petrus, tong dèng ngo cènder i sidi cidudu. Nai nina jelma nisidi mo mbangsa, "Otang kono pè sada kalak ipas sisinna i nai ma ngo?" Tapi iperso si Petrus ngo, nina mo, "Oda!" 18:26 Nai nina sada kalak ipas naposo imam huntuun i idi nai mo, imo sincelket si nitampul si Petrus copingna i, "Kuidah ngo kono i pekken Getsemane i, rebbak dekketSa!" 18:27 Nai idokken si Petrus mo, "Oda," -- janah tupung ibas katika i mèter takuak mo manuk. 18:28 Nai itaruhken kalak i mo Jesus njengkas kalohoon i bages si Kayafas nai mi bages gubèrnur si Latus. Ukum kalak Jahudi i sendiri, oda ngo masuk mi bages i, asa ulang tersubang kalak i lako mangan pangaan Paskah i. 18:29 Kerna naidi gabè karuar mo si Latus mendapetken kalak i, ikusoi mo kalak i, "Kadè pana pengaduun ndènè tersèngèt kalak ènda?" 18:30 Ialoi kalak i mo, "Oda kutaruhken kami Ia mendahi Gubèrnur i ukum oda lot salahNa." 18:31 Nai nina si Latus mo taba kalak idi, "Embah kènè mo Ia, janah hukum kènè Ia rembang mi agama ndènè!" Tapi ialoi kalak Jahudi imo, "Mengèkutken agama nami irarang ngo kami menghukum matè barang isè pè." 18:32 (Masa pè i, asa saut ngo nidokken Jesus tersèngètbakunè cara permatèna.) 18:33 Nai balik mo si Latus mi bagesna, janah iarahken mo Jesus, nai ikusoi mo Jesus, "Raja ngo Kono?" 18:34 Ialoi Jesus mo, "Turah i ukurmu nai ngo kuso-kusomu i, barang tah sidèban ngo mendokken i taba Kono?" 18:35 Ialoi si Latus mo, "Kalak Jahudi ngo aku idah kono? Bangsamu dekket imam-imam ekuten ngo pesakatken Kono taba Aku. Kadè pana ibahanken Kono?" 18:36 Nina Jesus mo, "Ukum kerajanKu idi, oda ngo bagè kerajaen dunia èn. Ukum i dunia èn nai kin ngo kerajanKu idi, tentu mengalo mo nemmu orangKu asa ulang ipesakat Aku mendahi kalak Jahudi. Tapi oda ngo i dunia èn nai kerajanKu i!" 18:37 Nai mengkuso mo si Latus, "Mula bagidi, tuhu ngo Kono Raja?" Ialoi Jesus mo, "Bagè nidokkenmu i ngo, Raja ngo aku. Asa tubuh aku janah roh mi dunia èn, pellin sada ngo kessa tujunku; imo lako mengkesaksiken tersèngèt kebennaren. Barang isè roh i sibennar idi nai, ijalo ngo peddahKu." 18:38 Nai ikusoi si Latus nola mo Jesus, "Kadè ngo kebennaren i?" Enggo kessa idokken si Latus bagidi, mi ruar mo ia mendahi kalak Jahudi, nina mo taba kalak i, "Kadè poda lot dapet aku salahNa. 18:39 Tapi bagè kecemmalen ndènè, dak kupaluah ngo sada kalak siterkurung tupung Ari Raya Paskah. Uè ngo kènè asa kupaluah raja kalak Jahudi bai ndènè?" 18:40 Ialoi kalak i mo ninganna isurakken, "Oda! Ulang paluah Ia! Si Barabas mo paluah lotiin!" (Ukum si Barabas i, pennamun ngo.)
19:1 Nai iarahken si Latus mo Jesus, idokken mo asa iligasi kalak idi ia. 19:2 Idandani soridadu nisidi mo dori mahan bulang-bulang, nai ibaing kalak i mo bulang-bulang dori i mi babontakal Jesus. Enggo kessa i, isellukken kalak i mo tabaSa jubah meharbu. 19:3 Merrohen mo kalak i mendahi Jesus ninganNa idokken, "Njuah-njuah mo bamu alè raja kalak Jahudi!" Enggo kessa idokken bagidi mèter iparapi kalak i mo Jesus. 19:4 Nai mi ruar nola mo si Latus sikali nai, nina mo taba jelma nterrem i, "Tengen kènè mo kuarahken Ia mi ruar, asa ibettoh kènè oda lot dapet aku salahNa." 19:5 Karuar mo Jesus ninganna memakè bulang-bulang dori i janah memakè jubah meharbu. Idokken si Latus mo taba kalak idi, "Tengen kènè mo kalakna!" 19:6 Idah imam-imam ekuten dekket perjaga-perjaga idi kessa mo Jesus, isurakken kalak i mo, "Persilangken, Persilangken mo Ia!" Nai idokken si Latus mo, "Embah kènè mo Ia janah persilangken kènè, ai kadè poda lot dapet aku salahNa." 19:7 Ialoi kalak Jahudi mo, "Mengèkutken hukum nami, kennah merrutang kessah ngo Ia, ai idokken ngo diriNa Anak Dèbata." 19:8 Idengkoh si Latus kessa mo nidokken kalak idi i, makin mbiar mo ia. 19:9 Ibengketti nola mo kantorna, janah ikusoi mo Jesus, "Idikè nai ngo Kono?" Tapi sip sambing ngo Jesus, oda ialoi barang kadè pè ikusoken. 19:10 Nai idokken si Latus mo mbangsa, "Oda uè Kono mengaloi aku? Èngèt mo, merkuasa ngo aku paluahken Kono, janah merkuasa ma ngo aku mempersilangken Kono!" 19:11 Nai ialoi Jesus mo, "Ukum oda Iberrèken Dèbata kuasa i bamu, kadè poda lot kuasamu bangKu. Kerna naidi, belgahen ngo dosa sipesakatken Aku, dari pada kono." 19:12 Idengkoh si Latus kessa mo rana Jesus idi, makin itulusi mo dalan lako paluahken Jesus. Tapi muat nggangna mo isurak-surakken kalak Jahudi, "Mula ipaluah Kono Ia, oda dengan Kèsar i Kono. Ai barang isè mendokken dirina raja, musuh Kèsar i ngo ia!" 19:13 Idengkoh si Latus kessa mo kata-kata idi, iarahken mo Jesus mi ruar. Kundul mo ia mi kundulen perhukumen mergerar Karosi Batu. (Kata Heber gerarna Gabata.) 19:14 Tikanna idi kira-kira naing pukul sipuluh dua, ari perkebbasen mi Ari Raya Paskah. Idokken si Latus mo taba kalak idi, "Ènda ngo raja ndènè!" 19:15 Nai isurakken kalak i mo, "Bunuh mo Ia! Bunuh! Persilangken mo Ia!" Nai nina si Latus mo, "Ipido kènè ngo kennah kupersilangken raja ndènè?" Ialoi imam-imam ekuten mo, "Oda lot raja nami laènken Kèsar i!" 19:16 Nai ipessoh si Latus mo Jesus taba kalak i, asa ipersilangken. Iarahken kalak i mo Jesus, laus i sidi nai. 19:17 Nai karuar mo Jesus, janah Ia sendiri ngo memersan kayu persilangNa i, lako laus mi bekkas mergerar "Bekkas Pertulanen". (Ukum i kata Heber igerari ngo Golgota.) 19:18 Isidi mo Ia ilabangken kalak i mi kayu persilang. Rebbak dekketSa lot dèng ma ngo dua kalak nai sidèbanna Ipersilangken; sada kalak kan kambirangna janah sada kalak nai kan kamuhunna. Ukum Jesus i tengah-tengah ngo. 19:19 I babo silang Jesus idi, isuratken si Latus ngo sada surat bagèen katana, "Jesus kalak Nazaret Raja Kalak Jahudi." 19:20 Mèduk ngo kalak Jahudi menjaka surat i, ai oda ndaoh bekkas Jesus ipersilangken idi i kuta nai. Isuratken ngo kata i, i kata Heber, kata Latin dekket kata Junani. 19:21 Nai idokken imam-imam ekuten kalak Jahudi mo taba si Latus, "Ulang surat Raja kalak Jahudi, 'tapi suratken mo: Idokken kalak ènda, Aku ngo Raja kalak Jahudi.' " 19:22 Tapi ialoi si Latus mo, "Sienggo tersurat idi, tersurat mo!" 19:23 Enggo kessa ipersilangken soridadu i Jesus, ibuat kalak i mo olesNa, ibagi empat mo i, gennep terolih sada bagian. Ibuat kalak idi ma mo jubahNa. Ukum jubahNa i, oda ngo merpenjarumen -- itennun sambing ngo i terruh nai mi babo. 19:24 Nina soridadu i mo samahsa, "Ulang mo sigettap-gettap jubah i. Mertendung mo kita barang bai isè i." Masa pè bagidi, asa saut ngo nidokken Bibèl bagèen: "Ipella-pella kalak idi ngo olesKu. Mertendung ngo kalak i tersèngèt jubahKu." Janah tuhuna bagi ngo ibaing soridadu i. 19:25 I gembar kayu persilang Jesus i, cènder ngo inangNa, nangudaNa, si Maria sinibages si Kleopas dekket si Maria Magdalena. 19:26 Tikan idah Jesus kessa enggo isidi inangNa dekket sisiin kekellengen atèNa, nina mo taba inangNa i, "Nangè, tengen mo, idi mo anakmi." 19:27 Nai nina Jesus mo mbang sisinNa i, "Tengen mo: Idi ngo inangmi." Mulai isidi nai mo iarahken sisinNa i inang Jesus merrian mi bagesna. 19:28 Enggo kessa bagidi, ibettoh Jesus mo enggo pul karinana, asa saut bagè sitersurat ibas Bibèl, Idokken Jesus mo, "Muas Aku." 19:29 Lot mo isidi sada mangkuk dom anggur macem. Isernepken kalak idi mo lumut mi bagasen anggur macem i, nai idudurken kalak idi mo lumut i arap sada biski mi bibir Jesus. 19:30 Enggo kessa iènum Jesus anggur macem i, nina mo, "Enggo merujung!" Nai ipetungkuk mo takalna lako mennohken tendina, nai mpostep mo kessahNa. 19:31 Oda uè perkuasa kalak Jahudi dak tong kenna gantung bangkè kalak sienggo ipersilangken i ipas kayu silang tupung ari Sabat, kerna ari mbellen ngo ari Sabat i, kerna tikan ipersilangken i Jesus tupung ngo Ari Sinderrang madèng Sabat. Nai ipidoken kalak Jahudi mo taba si Latus asa ipenggelli nèhè kalak sitersilang i, janah ipesampur bangkèna i kayu silang i nai. 19:32 Laus mo soridadu i memenggelli lebbèen nèhè sidua kalak sirebbak ipersilangken rebbak dekket Jesus. 19:33 Tapi soh kessa mo kalak idi mendahi Jesus, idah kalak I mo enggo matè keppè Jesus. Jadi oda nèngè pella ipenggel kalak i nèhèNa. 19:34 Tapi ipantem sada kalak soridadu mo merkitè kujurna terruh rusuk silao Jesus; nai tiris mo laè merdengan daroh i ugah Jesus i nai. 19:35 Kalak simengidah i sendiri ngo mennukutken i, asa percaya kènè, janah tuhu ngo nidokkenna i, ai ibettoh ngo mennukutken situhunna ngo ia. 19:36 Masa pè karina idi asa dapet ngo nidokken sitersurat ibas Bibèl, "Sada poda tulanna ipenggel." 19:37 Lot dèng ma ngo tersurat ibas Bibèl bagèen, "Itengen kalak simemantemsa i ngo Ia." 19:38 Enggo kessa bagidi, roh mo si Josep kalak Arimatea mi hadeppen si Latus lako mengido bangkè Jesus. (Ukum si Josep ènda percaya ngo taba Jesus, tapi kumarna mbiar ia midah penguasa kalak Jahudi, oda ntarar ia percaya). Nai ipaduè si Latus mo ipesampur si Josep bangkè Jesus. 19:39 Si Nikodemus pè, imo siroh mendahi Jesus berngin-berngin, rebbakken ngo ia dekket si Josep. Iembah si Nikodemus ngo minak mur mersaor minak gaharu -- kira-kira tellupuluh kilo buèna. 19:40 Duana ngo kalak i pelliasken bangkè Jesus, ibaluti mo dekket kaèn kapan rebbak dekket minak baungkus i, rembang mi adat mengkubur kalak Jahudi. 19:41 I bekkas Jesus ipersilangken i, lot ngo sada pekken. Lot ngo sada kuburen rembaru i pekken i, makdèng nung terpakkè lako mengkubur simatè. 19:42 Kumarna ndessing ngo pendèban i, janah kumarna enggo naing dapet tikkina ari Sabat, gabè mi kuburen i mo ikuburken kalak idi bangkè Jesus.
20:1 Njengkas kalohoon ari Minggunkenna idi, taridah bukbuk bettekken dèng, laus ngo si Maria Magdalena mi pendèban i. Soh kessa ia mi sidi, idah mo enggo mbuka kuburen i. 20:2 Nai lojang mo ia mendahi si Simon Petrus dekket sisiin kekellengen atè Jesus, nina mo taba kalak i, "Enggo ibuat dèba Tuhan i i pendèban nai, oda kubettoh barang mikè ibaing!" 20:3 Nai berkat mo si Petrus dekket sisiin sada kalak nai mendahi kuburen i. 20:4 Rebbak lojang ngo kalak i duana, tapi lebbèen ngo soh mi kuburen i sisiin sisada kalak nai asa si Petrus. 20:5 Itengen kessa mo mi bagasen kuburen i, idah mo kaèn kapan i isidi, tapi oda pella ibengketti kuburen i mi bagasen. 20:6 Soh ma mo si Petrus, mèter ibengketti mo mi bagasen kuburen idi, idah ma mo kaèn kapan i mergamparen, 20:7 tapi ukum kaèn pemalut takal Jesus, oda rebbak gampar dekket kaèn sidèbankenna i; jaè ngo bekkasna gampar, janah merserpih. 20:8 Nai ibengketti sisiin sisada nai ma mo kuburen i, imo sisiin perlebbè soh mi kuburen i. Idah ma mo karinana i, gabè percaya mo ia. 20:9 (Tapi soh mi katikana idi pè, laju dèng ngo oda iarti kalaki sitersurat ibas Bibèl, simendokken kennah balik nggelluh ngo ia i kemmatèen nai.) 20:10 Nai balik mo sisiin sidua kalak i mi kuta. 20:11 Ukum si Maria dak tong ngo ia i gembar kuburen i janah tangis. Ninganna ia tangis idi, itengen mo mi bagasen pendèban idi, 20:12 nai lot mo idah dua kalak malaèkat merpakèen mbulan. Sada kundul kan julu meddem, sada kalak nai kan tellagahen. 20:13 Nai nina malaèkat-malaèkat i mo mbangsa, "Kasa tangis kono nangè?" Nai ialoi si Maria mo, "Ibuat simemmuat ngo Tuhanki, oda kubettoh tah mikè Ibaing!" 20:14 Enggo kessa idokken si Maria bagidi, tumulih mo ia mi podi gabè idah mo Jesus cènder isidi, tapi oda ngo itandai, Jesus ngo keppèken i. 20:15 Idokken Jesus mo tabasa, "Kasa tangis kono nangè? Isè itulusi kono?" Idokdok si Maria ngo penjaga pekken i ia, gabè nina mo mbangsa, "Mula kono ngo mengompatSa isènda nai, bagahken mo bangku idikè ia ibaing kono, asa kualengi." 20:16 Idokken Jesus mo tabasa, "Maria!" Nai itengen si Maria mo Jesus gabè nina mo i kata Heber: "Rabuni!" (Mendok, alè Guru.) 20:17 "Ulang dèng jamah Aku," nina Jesus, "Kerna madèng laus Aku mendahi Bapa. Laus mo kono mendahi anggingKu, bagahken mo taba kalak i: Laus mo Aku mendahi BapangKu janah Bapa ndènè, mendahi DèbatangKu janah Dèbata ndènè." 20:18 Nai laus mo si Maria Magdalena memagahken i taba sisiin Jesus magahken enggo idah ia Tuhan i, janah Tuhan i ngo mendokken i karina tabasa. 20:19 Enggo kessa gellap ari, i ari Minggu i dèng ma, merpulung mo sisiin Jesus i sada bages. Enggo mo igerruki pèntu bages i karina, kumarna mbiar ngo kalak i midah penguasa-penguasa Jahudi. Sintempu mèter roh mo Jesus janah cènder i tengah-tengah kalak i ninganna mendokken, "Damè mo bai ndènè!" 20:20 Enggo kessa idokken bagidi, Ipacidah mo tanganNa dekket rusuk silaona taba kalak i. Idah kalak i kessa mo Tuhan i, sondel mo sampang atè kalak i. 20:21 Nai iolihi Jesus nola mo mendokken sikali nai, "Damè mo bai ndènè. Tosè bagè ipasulak Bapa Aku, bagidi ma mo kènè Kupasulak." 20:22 Idokken kessa bagidi, Isempulken mo kessahNa bai kalak i ninganna idokken, "Jalo kènè mo Tendi Dèbata. 20:23 Mula isasa kènè dosa barang isè, enggo mo sasa i; janah mula ipehot kènè dosa barang isè, hot mo dosana i." 20:24 Ukum si Tomas sada kalak ipas sisiin Jesus sisipuluh dua kalak idi nai, oda kin ngo rebbak dekket sisiin sidèbankenna i, tikan roh i Jesus. 20:25 Nai isukutken sisiin i mo tabasa, "Enggo kuidah kami Tuhan i!" Tapi ialoi si Tomas mo kalak i, "Ukum oda kuidah pengellabangen i tanganNa i, janah ukum mak kucucukken jari-jaringku mi ugahna i, dekket mi rusuk silaoNa i, oda percaya dèng aku." 20:26 Nai saminggu nai nola ma, merpulung mo sisiin Jesus i bages i, dekket mo si Tomas isidi. Karinana pèntu enggo igerruki. Tapi mèter roh mo Jesus cender i tengah-tengah kalak i mendokken, "Damè mo bai ndènè!" 20:27 Nai idokken Jesus mo taba si Tomas, "Baing mo jari-jarimu misèn, janah tengen mo tanganKu. Doroken mo tanganmu janah cucukken mo mi rusuk silaongKu, ulang ragu kono. Percaya mo kono!" 20:28 Nai mèter idokken si Tomas mo mbang Jesus, "Tuhanku janah Dèbatangku!" 20:29 Idokken Jesus mo tabasa, "Kumarna idah kono ngo Aku asa percaya kono? Sayurntua ngo sipercaya bangku, tukasi pè oda idah Aku!" 20:30 Matcam dèng ngo nemmu bagèna tanda-tanda sidèban ibaing Jesus, i hadeppen sisinNa i, tapi oda pella nisuratken idi ibas bukku èn. 20:31 Karinana sinisuratken isènda, ukum nitèmbakna imo asa percaya kènè, Jesus ngo Raja Sipaluah niperbagah-bagah Dèbata, imo Anak Dèbata, janah merkitè-kitè percaya bana, gabè terrolih kenggelluhen mo kènè.
21:1 Enggo kessa i ipacidah Jesus nola ma mo dirina sikali nai i biding Tao Tiberias. Bagèen ngo cara Jesus pacidahken dirina i: 21:2 Tikan sidari merpulung mo si Simon Petrus dekket si Tomas sinigerarenna ma si Leppa; si Natanael anak kuta Kana si ni Galilea, dukak-dukak si Zebedeus dekket dua kalak nai sisiin Jesus sidèban. 21:3 Nai nina si Simon Petrus taba denganna i, "Laus aku lebbè menjala ikan." "Kami pè dekket ma mo," nina kalak i ma tabasa. Kebbas mo kalak i karina, janah ibengketti mo bungki lako berkat. Tapi suntuk bernginna idi kadè poda giam dapet kalak i. 21:4 Enggo kessa mendok mbincar mataniari, roh mo Jesus cènder i biding tao i; tapi oda itandai kalak i, Jesus ngo keppè i. 21:5 Idokken Jesus mo taba kalak i, "Lot ngo ikan ndènè alè pa?" "Oda lot," nina kalak i mengaloi. 21:6 Nai nina Jesus mo taba kalak i, "Sampakken kènè mo jala ndènè i mi kamuhun bungki i, asa kennaan kènè." Mènter isampakken kalak idi mo jalana i, nai gabè mak terruah kalak i nèngè jalana i kumarna mbuè ikan ibagasen jalana i. 21:7 Nai nina sisiin kekellengen atè Jesus mo mbang si Petrus, "Tuhan i ngo i," nai mèter iselluk si Petrus mo geddana (oda kin ngo ipakkè geddana), mèter mangkat mo ia mi laè i. 21:8 Sisiin sidèbankenna i pè merbungki mo mi darat ninganna mengeruah jala sienggo dom ikan i, ai oda nèngè ndaoh kalak idi i darat nai, kira-kira seratus mèter nai ngo kessa. 21:9 Susur kessa mo kalak idi i bungki idi nai, idah kalak i mo enggo lot rara api i sidi janah ipanggang ikan i babona, bagidi ma dekket roti pè. 21:10 Idokken Jesus mo taba kalak i, "Embahken kènè mo misèn dèba ikan sidapet kènè ndai." 21:11 Laus mo si Simon Petrus mi bungki, iruah mo jala i mi darat. Dom ngo ikan mbelgah-mbelgah i ibagasen bungki i, buèna seratus limapuluh tellu ngkabuah. Tukasi pè bagidi buè ikan idi, oda pella meribak jala i. 21:12 Nai nina Jesus mo taba kalak i, "Roh mo kènè mangan." Isè poda lot sisiin i mengkusoken, "Isè ngo kono?" Ai ibettoh kalak i ngo, Tuhan i ngo Ia. 21:13 Nai ijolmiti Jesus mo kalak i, ibuat mo roti i, ipemberrèken mo taba kalak i. Ikan i pè bagi ma ngo ibaing. 21:14 Èn mo petellu kaliken ipacidah Jesus dirina taba sisinNa, kessa nai balik nggelluh Ia i kemmatèen nai. 21:15 Enggo kessa salpun mangan kalak i, idokken Jesus mo taba si Simon Petrus, "O Simon, anak si Jona, nggkellengen ngo atèmu midah Aku asa kalak ènda?" "Uè, Tuhan, ibettoh kono ngo ngkelleng atèngku bamu," nina si Petrus mengaloi. Nai idokken Jesus mo tabasa, "Permakani mo biri-biringKu." 21:16 Pedua kaliken ikusoken Jesus mo bana, "O Simon anak si Jona, ngkelleng ngo atèmu midah Aku?" Ialoi si Somon Petrus mo, "Uè Tuhan, ibettoh kono ngo ngkelleng atèngku bamu." Nai idokken Jesus mo tabasa, "Permakani mo biri-biringKu." 21:17 Nai ikusoi Jesus nola dèng ma mo ia petellu kaliken, "O Simon anak si Jona, ngkelleng ngo atèmu midah Aku?" Gabè marsak mo si Petrus kumarna sanga tellu kali ikusoi Jesus ia. Nai ialoi si Petrus mo, "Tuhan, Tuhan, ibettoh kono ngo karinana: Ibettoh kono ma ngo ngkelleng atèngku bamu." Nai idokken Jesus mo taba si Petrus, "Permakani mo biri-biringKu. 21:18 Ntangkas mo Kudokken bamu; tikan poso dèng kono, kono ngo mengkokosi dirimu, janah lemmomu ngo barang dempak dikè kono laus. Tapi tua-tua kessa kono luas, idoroken kono mo tanganmu mpak sidèban, janah sidèban i mo mengèkèti kono, nai iembah mo kono mi bekkas siso nikellemmokenmu." 21:19 (Merkitè kata i, ibagahken Jesus ngo bakunè permatè si Petrus lako pesangapken Dèbata.) Enggo kessa bagidi, idokken Jesus dèng ma mo taba si Petrus, "Èkutken mo Aku!" 21:20 Tikan tumulih si Petrus, idah mo i podina sisiin kekellengen atè Jesus. (Ia ngo sisiin kundul ndessing i gembar Jesus tikan mangan janah mengkuso taba Jesus, "Tuhan isè ngo naing menelbuh Kono?") 21:21 Idah si Petrus kessa mo sisiin i, ikusoi si Petrus mo Jesus, "Tuhan, bakunè ngo ia luas?" 21:22 Ialoi Jesus mo, "Mula pè Kupergeddo asa nggelluh ia soh mi pekirohKu luas, oda pella sarihenkenmu idi. Èkutken sambing mo Aku!" 21:23 Kemulihkenna idi, gabè sar mo berritana, bai samah-samah sisiin Jesus i, oda matè sisiin idi. Keppèken oda ngo lot idokken Jesus, oda matè sisiin i. Ukum nidokken Jesus imo: "Mula pè Kupergeddo asa tettap ia nggelluh soh mi ari pekkirohKu luas, asa oda pella sarihenkenmu idi!" 21:24 Sisiin idi ngo mengindangken tersèngèt karina simasa èn. Ia ma ngo simenuratken janah sibettoh ngo, bennar ngo sinidokkenna i. 21:25 Matcam dèng ngo nemmu bagèna sinibaing Jesus. Ukum isuratken karinana i, dokatèngku oda siat suberri dunia èn mahan bekkas bukku si nisurat idi.
1:1 Alè Teopilus! Ipas bukkungku perlebbè i enggo kupetterrang karinana sinibahan dekket sinipeddahken Jesus, kessa nai Ia kitebbennai bahanNa, 1:2 soh mi ari perlausna mi sorga. Sinderrang madèng laus mi sorga, enggo idokken kin taba apostèl-apostèl i merkitè kuasa Tendi Perbadia, imo apostèl nipilihNa i. 1:3 Enggo kessa matè Ia janah balik nggelluh, nggati ngo Ipacidah dirina janah memmaing tanda-tanda dekket mengerana ibagasen empat puluh ari dekkahna, magahken tuhu-tuhu ngo Ia balik nggelluh. Idah kalak i ngo Ia janah mengeranai dekket kalak i tersèngèt kerajaen Dèbata. 1:4 Tikan sidari tupung pulung kalak I rebbak mangan, idokken mo taba kalak idi, "Ulang kènè laus i Jerusalem nai. Pèma kènè mo i sidi soh mi iberrèken Bapa niperbagah-bagahNa i mo bagè sienggo Kubagahken idi kin bai ndènè tikala i. 1:5 Laè ngo ukum iperidiken si Johanes taba kènè, tapi oda pella ndekkah nèngè, iperridi mo kènè merkitè Tendi Dèbata." 1:6 Sinderrang mertumpu Apostèl i rebbak dekket Jesus, ikusoi kalak i mo Ia, "Tuhan, bagèndari mo pessuangenmu kerajaen i bai bangsa Israel?" 1:7 Nai ialoi Jesus mo, "Bapa ngo menentuken arina dekket tikkina. Oda pella perlu ibettoh kènè i, ai kuasa Bapa ngo i. 1:8 Tapi terolih kuasa ngo kènè, kumarna enggo senggep Tendi Dèbata bai ndènè. Gabè saksingKu mo kènè i Jerusalem dekket i suberri Judèa bak Samaria, soh mi punca dunia èn." 1:9 Enggo kessa idokken Jesus bagidi, mèter terkèkè mo Ma mi sorga inelnelli kalak i, nai ikemkemmi hembun i mo Ia ipas penengennen kalak i nai. 1:10 Sinderrang dak itarè kalak i dèng mi langit, sintempu mèter cènder mo dua kalak merpakèen mbulan i gembar kalak i. 1:11 "Kènè kalak Galilea, kasa dak cènder kènè i sidi janah mennarè mi langit?" Nina taba kalak i. "Ukum Jesus sininelnellen ndènè laus mi sorga i mennadingken kènè, molih nola ngo ia luas, tosè bagè perlausna niidah ndènè ndai." 1:12 Nai balik mo apostèl-apostèl i mi Jerusalem i Uruk Zaitun nai. Ukum daoh uruk Zaitun i Jerusalem nai, kira-kira sada batu ngo. 1:13 Soh kessa kalak i mi Jerusalem, ibengketti kalak i mo sada bages, bekkas kalak i kiserrang, janah merrian mo kalak idi i bilik perdatès. Apostèl-apostèl i imo si Petrus dekket si Johanes, si Jakobus dekket si Andreas, si Pilipus dekket si Tomas, si Bartolomeus dekket si Mateus, si Jakobus anak si Alpeus dekket si Simon kalak Zelot bak si Judas anak si Jakobus; 1:14 karinana ngo kalak i sada atè merpulung lako mersodip. Rebbak mersodip ngo kalak i dekket daberru-daberru bak si Maria inang Jesus, bagidi ma pè dekket anggi Jesus. 1:15 Tikan sidari nderrang merpulung -- kalak i lot ngo roh kira-kira seratus dua puluh kalak buèna -- cènder mo si Petrus lako mendokken ranana, 1:16 "Kènè karina alè dengan! Kennah saut ngo kata sitersurat i bagasen Bibèl, sinidokken Tendi Dèbata merkitè si Daud, tersèngèt si Judas simenguluken kalak lako menangkup Jesus idi. 1:17 Termasuk bilangenta ngo ukum si Judas i, janah terpilih kin ma ngo ia lako mengula rebbak dekket kita." 1:18 (Ukum si Judas enggo mo kennaan tanoh mahan pendèbannaarap upahna menelbuh i. Ndabuh ngo ia janah matè, sanga mpustak beltekna janah merbincahcah ngo ginagatna. 1:19 Karinana pengisi Jerusalem ngo bettoh-bettohen i. Kumarna naidi ngo asa igerari kalak i tanoh i ibagasen kata kalak i "Akeldama", lapatenna "Tanoh Daroh".) 1:20 "Ai tersurat ngo i bukku Psalm bagèen: Gabè melongo mo bekkas idi, janah oda lot nèngè pengisina. Lot ma ngo tersurat bagèen, 'Belli mo isingkat sidèban bekkasna idi kin.' 1:21 Kerna naidi kennah lot ngo tambah sada kalak nai mahan denganta gabè saksi, magahken ukum Tuhan Jesus enggo balik nggelluh i kemmatèen nai. Janah sienggo rebbak dekket kita ngo ia sidekkah Tuhan Jesus rebbak dekket kita, 1:22 mulai si Johanes perridiken soh mi tikan laus Tuhan Jesus mi sorga i tengah-tengahta nai." 1:23 Nai iusulken kalak i mo dua kalak mahan pilihen, imo si Josep nigerarenna ma Barsabas (igerari ma ngo ia si Justus), dekket si Matias. 1:24 Mersodip mo kalak i karina, "Ialè Tuhan, kono ngo menandai atè-atè bak pikiren jelma. Tuduhken mo barang siapai ngo ipilih kono kalak èn, 1:25 lako menjalo ulaan pengendeng, imo gabè apostèl nitadingken si Judas sienggo ndabuh ipas ulaan idi nai janah enggo matè." 1:26 Nai mersijemput sinisurat mo kalak i, gabè serrang si Matias mo. Jadi ipebangkit mo ia gabè apostèl rebbak dekket apostèl sisipuluh sada nai.
2:1 Dapet kessa mo ari Pentakosta, merpulung mo jelma sipercaya i sada bekkas. 2:2 Sintempu mo terdengkoh sora i langit nai bagè sora angin ndor menempul. Merdengung ngo sorana mendomi bages kundulen kalak idi i. 2:3 Nai idah kalak i mo tosè bagè dilah api merdalan, nai isenggeppi mo kalak i karinana. 2:4 Nai dom Tendi Dèbata mo kalak i, janah mèter mengeranai mo kalak idi ibas kata sidèban merguru mi pemmerrèken Tendi i bai kalak i mengkatakensa. 2:5 Tikanna idi nterrem ngo kalak Jahudi i merbagè-bagè nagerri silot i dunia èn merrian i Jerusalem. Kalak simenguèi Dèbata ngo kalak i. 2:6 Gabè tersengget janah lengang mo kalak i mendengkoh apostèl i mengerana i kata kalak i gennep. 2:7 Kumarna lengangna, gabè nina kalak i mo, "Otang kalak Galilea ngo kalak i karina simengeranai i? 2:8 Kasa karina kita mendengkoh rana kalak i, i gennep katanta sendiri imo kata sinipakkènta i nagerinta? 2:9 Ai kita roh i kuta Partia, Media, Elam, Mesopotamia, Judèa, Kapadosia, Pontus, Asia, 2:10 Frigia, Pamfilia, Mesir, nagerri Libia si kan Kirene; dèba kita èn roh i Rom nai, 2:11 dèba kalak Jahudi janah dèba bangsa sidèban sienggo masuk gabè agama Jahudi; dèba roh i Kreta dekket i Arab nai. Ipas katanta gennep ngo sidengkoh kalak i mengeranaken kellengangen bak kuasa nibaing Dèbata!" 2:12 Kumarna hèran janah lengangna kalak idi, nina mo samah-samahsa, "Merkadè ngo ndia i?" 2:13 Tapi mengalingi ngo dèba, "Mabuk ngo kalak idi." 2:14 Nai cènder mo si Petrus rebbak dekket apostèl si sipuluh sada kalak nai, nai ipegang mo ranana, nina mo, "Kènè alè dengan, kalak Jahudi dekket karina kènè simertumpu i Jerusalem! Dengkohken kènè mo janah bettoh kènè mo sikudokken èn. 2:15 Oda ngo mabuk kami bagè nitukasken ndènè, ai pukul sibah siceggen dèng ngo bagèndari. 2:16 Tapi enggo kin ngo ibagahken Dèbata narap Nabi Joel: 2:17 Nina Dèbata ngo, 'I ari podi Kuarirken mo TendingKu bai karina kalak. Nai merralaten mo dukak-dukak ndènè janah isukutken taba kènè siKubagahken bai kalak i. Idah simatah daging ndènè mo siKupacidah bai kalak i. Lot mo nipi situa-tua ndènè, imo nipi siKuberrèken bai kalak i. 2:18 Taba naposongKu -- anak laki bak daberru pè -- Kuarirken mo TendingKu i ari i. Isukutken kalak i mo tersèngèt siKubagahken bai kalak idi. 2:19 Kubaing mo tanda kelengangen i langit, janah oda nung masa bagidi i tanoh èn; imo daroh dekket api bak cèmber gellap tuiten. 2:20 Nai mobah mo mataniari gabè gellap bulita, janah bulan i gabè mbara bagè daroh sinderrang madèng dapet Ari Tuhan i, enggo roh ari mbellen janah mermulia i. 2:21 Ibas katika i, kalak sipingko-pingko taba Tuhan i, ipaluah ngo ia.' 2:22 Kènè alè kaka anggi kalak Israel! Dengkohken kènè mo sikudokken èn: Ukum Jesus kalak Nazaret i, enggo kin ngo ipasulak Dèbata lako bai ndènè. Taridah ngo i merkitè kellengangen dekket kuasa nihanaken Dèbata merkitè Jesus i tengah-tengah ndènè. Ntangkas ngo idi ibettoh kènè. 2:23 Ipessoh Dèbata ngo ia bagè nipergeddoNa kin gabè ipersilangken janah ibunuh kènè merkitè tangan perjahat. 2:24 Tapi ipegelluh Dèbata nola ngo Ia mengolihi i simatè nai. Ibendut kemmatèen i ngo Ia tapi ipaluah Dèbata ngo Ia, ai oda mèter terrus tercèkèpen kemmatèen i Ia. 2:25 Enggo kin ma ngo idokken si Daud tersèngèt Jesus bagèen: 'Dak kuidah ngo Tuhan i i hadeppenku; ai dak cènder ngo Ia i kamuhunku; asa ulang tergurtik barang kadè pè aku. 2:26 Kumarna naidi ngo dak meroang-oang atèngku, babahku mengeruapken pemoji-mojiin; nai sennang mo dagingku èn memèma-mèma i pendèbaan. 2:27 Ai oda ibelli Kono tendingku tading rebbak kalak sienggo matè. Oda ibelli kono naposoMu sibujur i macik soh mellala. 2:28 Enggo ibagahken kono bangku dalan mi kenggelluhen situhunna. Uluk gati sampang atèngku kumarna dak ngo Kono rebbak dekket aku.' 2:29 Kènè alè dengan, kudokken mo ntangkas janah ntompel taba kènè tersèngèt si Daud, bapanta simeppar kita i. Matè ngo ia janah ikubur; lot dèng ngo soh bagèndari kuburenna banta èn. 2:30 Enggo sanga ibulabanken Dèbata tersèngèt sada kalak ipas pemparen si Daud nai, ipebangkit Dèbata gabè raja. Kumarna ibettoh si Daud ngo bulaban i janah kumarna nabi ma ngo ia, 2:31 ibettoh ngo barang kadè sinaing bakinen Dèbata. Jadi enggo kin ngo ibagahken, ukum Raja Sipaluah niperbagah-bagah Dèbata, kennah balik nggelluh ngo i kemmatèen nai. Nina si Daud ngo: 'Oda ngo ibelli Ia tading i kemmatèen; oda ngo gabè mellala dagingNa sanga kerri!' 2:32 Jesus i ngo sienggo ipegelluh Dèbata i kemmatèen nai. Karina ngo kami mengidah i. 2:33 Enggo ipekèkè ia mi bekkas sindatesna, janah iberrèken Dèbata ngo bana kuasa ninganna menjalo Tendi Dèbata sienggo iperbagah-bagah Bapa i kin. Janah sinidengkoh bak siniidah ndènè bagèndari imo jandi sienggo Iarirken Dèbata bai nami. 2:34 Ukum si Daud oda ngo laus mi sorga, tapi nina si Daud ngo: 'Idokken Tuhan i ngo taba Tuhanku: Kundul mo kono i kamuhunKu èn. 2:35 Pèma Kubaing karina musuhMu tunduk baMu.' 2:36 Jadi bettoh kènè mo, karina kènè alè bangsa Israel, ukum Jesus sienggo nipersilangken ndènè i, ia ngo ipebangkit Dèbata gabè Tuhan janah Raja Sipaluah!" 2:37 Idengkoh kalak i kessa mo kata i, bulisah kalohoon mo atè kalak i. Nai ikusoken kalak i mo taba si Petrus, bak taba apostèl-apostèl sidèbanna i. "Kadè mo bakinen nami alè dengan?" 2:38 Ialoi si Petrus mo, "Tobat mo kènè ibas dosa-dosa ndènè nai. Janah kennah iperidi ngo karinana kènè mi bagasen gerar Jesus Kristus, asa iampuni dosa-dosa ndènè. Nai iberrèken Dèbata mo bai ndènè hadiah, imo Tendi Dèbata. 2:39 Ai lako bai ndènè dekket bai pinempar ndènè bak bai kalak simerrian i sindaoh ngo siniperbagah-bagah Dèbata i; imo bai karina kalak sinidokken Tuhan Dèbata roh mendahiSa." 2:40 Bagidi mo ipeterrang si Petrus taba kalak i. Janah mèduk dèng ma ngo peddah idokken taba kalak i, asa ipaluah kalak i dirina ipas bangsa jahat idi nai, sinaing ihukum Dèbata. 2:41 Nterrem ngo gabè percaya mendengkoh sinikataken si Petrus i, gabè iperridi mo kalak i. Nai gabè tambah mo bilangen sipercaya sidarinkenna i tellu ribu kalak. 2:42 Mertuhu-tuhu ngo kalak i merguru taba apostèl-apostèl i. Ibagasen sada ni atè sada orjok mertumpu. Rebbak mangan mo kalak i janah rebbak mersodip. 2:43 Mèduk kalohoon ngo tanda kellengangen ibaing apostèl-apostèl i, jadi gabè merkebiaren ngo kalak i karinana. 2:44 Gabè sisada ngo kalak i sipercaya i karinana, janah gabè rebbak sisada milik, i milik sisada. 2:45 Idèai kalak i ngo hartana dekket silot bana, janah ipembagiken ngo tokorna i bai kalak i karinana mengèkutken keperlunna gennep. 2:46 Gennep ari ngo kalak i mertumpu i Bages Dèbata, merkerrin ngo sesser bages kalak i janah rebbak mangan ibagasen sampang atè janah ibagasen ncerrep ukur. 2:47 Dakdak ngo kalak i memmoji Dèbata, gabè ikellemmoken karina jelma ngo kalak i. Gennep ari ngo tambah bilangen kalak i, kerna iberrèken Tuhan i ngo bai kalak i jelma sienggo ipaluah.
3:1 Tikan sidari laus mo si Petrus dekket si Johanes mi Bages Dèbata, pukul tellu ciboon, imo tikki lako mersodip. 3:2 I Pèntu simergerar 'Pèntu merandal', lot mo sada kalak daholi nitempuk sigading mulai tubuh. Gennep ari ngo ia itaruhken kadè-kadèna mi sidi lako mengido-ngido taba kalak siroh mbengket mi Bages Dèbata. 3:3 Ipido mo masèh atè bai kalak i nai. 3:4 Nai inelnelli kalak i mo ia, janah nina si Petrus mo, "Tengen dempak kami!" 3:5 Nai itengen mo kalak idi, janah harap ngo atèna lot barang kadè berrènken kalak i bana. 3:6 Tapi nina si Petrus mo mbangsa, "Ukum emmas barang pirak oda lot bangku. Tapi kadè silot bangku, kuberrèken mo bamu: Merkitè gerar Jesus kalak Nazaret i, merdalan mo kono!" 3:7 Nai mènter iteggu si Petrus mo tanganna kamuhun lako mengurupisa cènder. Jadi mèter mergegoh mo nèhèna dekket mata-mata nèhèna i. 3:8 Mèter simpusta mo ia cènder janah merdalan mo ia lumaus roh, mi sèn mi sadoi. Nai ibengketti mo Bages Dèbata rebbak dekket si Petrus dekket si Johanes; 3:9 ninganna merdalan i, mangkat-mangkat ngo ia ningan memoji-moji Dèbata. 3:10 Ai itandai kalak i ngo ia simengido-ngido mbaru èn janah dak kundul i "Pèntu Merandal" i Bages Dèbata. Lengang ngo kalak i janah kagum mengidah simasa bana i. 3:11 Karina ngo kalak i dak mengèkutken si Petrus dekket si Johanes. Nai soh kessa mo kalak i sitellu mi èmpèr simergerar "Èmpèr si Salomo", merrohen mo karina jelma i mencingkoi kumarna kagumna. 3:12 Idah si Petrus kessa mo jelma mbuè i, nina mo taba kalak i, "Kènè alè kalak Israel, kasa lengang kènè midah simasa èn? Mada ngo dok atè ndènè kumarna kuasa nami asa gabè merdalan jelma èn, barang kumarnaken burju nami menguèi Dèbata? 3:13 Dèbata nisembah si Abraham, si Isak, si Jakob dekket empungta i ngo enggo pessangapken NaposoNa, imo Jesus. Jesus imo nipesakat ndènè taba penguasa janah itulak kènè i hadeppen si Latus, tikanna naing ipaluah si Latus Ia. 3:14 Simbadia ngo ia janah bennar bana sènteng, tapi itulak kènè ngo Ia janah isessak kènè ngo si Latus asa ipaluah nola sada kalak pemmunuh mi tengah-tengah ndènè. 3:15 Ibunuh kènè ngo Ia tukasi pè Ia ngo benna kenggelluhen bai karinana jelma. Enggo ipegelluh Dèbata nola Ia mengolihi i kemmatèen nai. Kami ngo saksi tersèngèt i. 3:16 Kènè dengan enggo idah janah isaksiken kènè kadè simasa bai nitempuk sigading èn. Enggo mergegoh Ia janah malum, kemulihken percaya taba Jesus bak kuasaNa. Janah kumarna percaya mi gerar Jesus i ngo asa gabè malum iakap i hadeppen ndènè karina. 3:17 Kènè alè kaka-anggi! Kubettoh ngo, ibaing kènè pè bagidi, kumarna oda ibettoh kènè ngo kadè sinibaing ndènè i, tosè bagè karina pengulu-pengulu ndènè. 3:18 Merkitè bagidi, saut mo bagè nidokken Dèbata merkitè karina nabi-nabiNa arnia: Kennah menggong simpersuk ngo Raja Sipaluah i. 3:19 Kumarna naidi, satdar mo kènè janah tobat ipas dosa-dosa ndènè nai, nai balik mo kènè mendahi Dèbata, asa isasa dosa ndènè. 3:20 Roh mo Tuhan i mi perrukuren ndènè. Janah ipasulak Tuhan i mo Jesus roh mendahi kènè kerna enggo itentuken Dèbata kin ia gabè Raja Sipaluah. 3:21 Kennah merian i sorga ngo ia lebbè, mèma iperimbaru Dèbata karinana bagè sienggo nidokkenna i merkitè nabi-nabiNa arnia. 3:22 Nung ngo idokken si Musa, 'Nabi sada bagè aku èn, ipecèndek Tuhan Dèbata ndènè, i tengah-tengah ndènè idi nai; dengkohken kènè mo Ia. 3:23 Barang isè oda mendengkohken nidokken nabi idi, kennah iliplip ngo ia i bangsa Dèbata nai janah ibinasaken.' 3:24 Karina nabi sienggo nung memmagahken sinidokken janah niperbagah-bagah Dèbata mulai si Samuel nai soh mi nabi siroh i podi si Samuel, karina memeritaken tersèngèt jaman èn. 3:25 Lako bai ndènè ngo alè dengan bagah-bagah Dèbata sinipesoh nabi-nabi. Ibas padan sinibaing Dèbata taba empung ndènè idokken Dèbata ngo taba si Abraham bagèen, 'Merkitèken pemparenmu, gabè terolih pasu-pasu ngo karina bangsa ni duniaèn.' 3:26 Kemulihkenna idi ngo, asa ipilih Dèbata NaposoNa, janah ipasulak lebbèen mendahi kènè, asa ipasu-pasu kènè. Ukum pasu-pasuna idi, imo maing kènè gabè tobat ibas nggelluh ndènè jahat idi nai."
4:1 Sinderrang mengerana dèng si Petrus dekket si Johanes taba jelma nterrem i, roh mo imam-imam ekuten bagi ma ekuten perjaga Bages Dèbata bak kalak Sadusè. 4:2 Mellagab mo kalak i, kumarna idokken si Petrus dekket si Johanes tersèngèt Jesus sienggo balik nggelluh i kemmatèen nai. Janah èn mo membuktiken magahken kalak simatè mengolihi nola nggelluh. 4:3 Nai itangkup kalak i mo rasul sidua kalak i, janah ipemasuk mi kurungen, kumarna enggo berngin, gabè i kurungen i mo kalak i soh mi sibarembenkenna. 4:4 Tapi mèduk ngo gabè percaya simendengkoh jamita apostèl i. Gabè tambah mo bilangen kalak i, enggo lot kira-kira lima ribu kalak pellin daholi. 4:5 Sibarembenkenna idi, pulung mo i Jerusalem anggota runggu agama pengulu-pengulu Jahudi dekket guru-guru agama. 4:6 Pejumpa mo kalak i i sidi dekket Imam Huntuun si Hanas bak si Kayafas, si Johanes dekket si Aleksander, bagidi ma ngo dekket karina sincelket Imam Huntuun i. 4:7 Nai iembah kalak i mo si Petrus dekket si Johanes mi hadeppen kalak i, nai ikusoi mo, "Bakunè ngo pemmaing ndènè lako pemmalumken nitempuk sigading i? Merkitè kegegohen kadè barang merkitè kuasa isè ngo kènè petupaken i?" 4:8 Nai ikuasai Tendi Perbadia mo si Petrus, ialoi mo, "Kènè alè karina pengulu-pengulu bangsa Israel dekket karina kènè pengetuai-pengetuai runggu! 4:9 Mula kennah iperrèso mo kami sidari èn kumarna simendè kubaing kami mengurupi sada kalak nitempuk sigading, janah naing ibettoh kènè merkitè kuasa isè kalak idi ipemalum, 4:10 bettoh kènè mo dekket karina kènè bangsa Israel. Cènder pè bagèndari kalak èn i hadeppen ndènè i sènda kumarna enggo malum iakap, imo kumarna kegegohen dekket kuasa Jesus Kristus kalak Nazaret sienggo ipersilangken kènè i ngo. Tapi enggo ipegelluh Dèbata nola Ia. 4:11 Jesus i ngo nidokken ayat ipas Bibèl bagèen: 'Batu nipatakken ndènè tukkang bages idi, i ngo gabè batu cendi persoki.' 4:12 Pellin merkitè Jesus ngo kessa maluah jelma. Kerna sada kalak poda lot jelma i suberri dunia èn, barang merkitè gerar isè pè sienggo menjalo kuasa bai Dèbata nai lako paluahken kita." 4:13 Gabè lengang mo anggota runggu i mengidah keberaniin si Petrus dekket si Johanes i, terlebbih-lebbih kumarna ibettoh kalak idi, ukum apostèl sidua kalak idi jelma biasa ngo, siso pella ndates sikkolana. Nai ibettoh kalak idi mo, duana apostèl i, sisiin Jesus ngo. 4:14 Tapi oda terdokken kalak i ranana, kerna cènder ngo i hadeppen kalak i jelma sienggo nipemmalumna i, rebbak dekket si Petrus dekket si Johanes. 4:15 Nai ipasulak kalak i mo mi ruar apostèl sidua kalak i sigejap, jadi mersungkuun mo kalak i samahsa, 4:16 nina kalak i mo, "Bakunè mo sibaing taba kalak ènda? Karina pengisi Jerusalem ngo enggo bettoh-bettohen kellengangen mbellen èn, kalak i sidua ngo menghanaken. Oda terperso kita i. 4:17 Tapi asa ulang makin sar mi jelma nterrem, siasup mo kalak i sidua, asa ulang nèngè iranaken kalak i barang mendahi isè pè merkitè gerar Jesus." 4:18 Nai idiloi kalak i nola mo mengolihi apostèl sidua kalak i mi bages, iperèntahken mo, mak ndorok nèngè apostèl i menggegoli barang mengajari pè merkitè-kitè gerar Jesus. 4:19 Tapi ialoi si Petrus dekket si Johanes mo, "Kènè mo mengeradumi, apaina ngo sènteng i hadeppen Dèbata; menguèi perèntah ndènè ngo barang menguèi perèntah Dèbata. 4:20 Ai oda tersipken kami, mak kennah kuranaken kami, kadè sienggo kuidah janah sienggo kudengkoh kami." 4:21 Jadi kumarna oda lot dalanna lako menghukum si Petrus dekket si Johanes, gabè pellin asup mo kessa ipememmes kalak i, nai ipaluah mo kalak i sidua, ai mbiar ngo kalak i midah jelma nterrem sidak memoji-moji Dèbata kemulihken tanda kellengangen i. 4:22 Merdemmu ma kalak sinipemalum idi pè engo lebbih empat puluh tahun umurna. 4:23 Enggo kessa ipaluah kalak i si Petrus dekket si Johanes, balik mo kalak i mendahi denganna, isukutken mo taba kalak i karina sinidokken imam-imam ekuten dekket pengulu-pengulu Jahudi taba kalak i. 4:24 Idengkoh karina denganna i kessa mo sinisukutken kalak idi, gabè sada atè mo kalak i rebbak mersodip taba Dèbata, "Alè Tuhan Dèbata Kono ngo meghanaken langit dekket tanoh èn, bak laut soh mo karina sinna. 4:25 Merkitè-kitè TendiMu, enggo kin ngo idokken kono taba empung nami si Daud naposomi; nimu ngo, 'Kasa mengoga-ngoga kalak siso menandai Tuhan, kasa siso merguna ipikiri karina bangsa. 4:26 Kèkè ngo raja-raja ni tanoh èn, janah merpulung ngo penggemnggemmi lako juhap mengalo Tuhan Raja Sipaluah i!' 4:27 Ai tuhu ngo enggo merpulung i kuta èn, si Herodes dekket si Pontius Silatus merrunggu dekket kalak siso menandai Tuhan rebbak dekket kalak Israel lako mengalo Jesus naposomu simbadia i; janah sienggo nipebangkitmu gabè Raja Sipaluah. 4:28 Mersada taki ngo kalak i lako pesautken sienggo nitentukenmu kin kennah saut masa. Janah kono ngo menentuken i merkitè kuasa bak harkatMu sendiri. 4:29 Bagèndari pè alè Tuhan tengen mo asup-asup kalak idi. Duè mo kami naposomen oda mbiar lako mennukutken kataMu i. 4:30 Janah dak berrèken mo pengurupiMu pemalumken kalak simersakit dekket tanda kellengangen merkitèken kuasa dekket kegegohen i bagasen gerar Jesus naposoMu simbadia i." 4:31 Enggo kessa pul kalak i mersodip, mèter dumegger mo bekkas kalak idi i. Nai dom kuasa Tendi Perbadia mo kalak i karina, gabè mersampang atè mo kalak i karina lako mengeranaken kata Dèbata. 4:32 Karina kalak i sipercaya i, sada kata sada orjok ngo. Oda lot sada kalak pè giam sikelloten mendokken, milikna sadasa kessa hartana, tapi gabè rebbak sisada harta ngo kalak idi iètong. 4:33 Nai gabè mergegoh kalohoon mo apostèl-apostèl i mengindangken enggo balik nggelluh Jesus i. Nai gabè ikellemmoken sinterrem mo kalak i, janah ipasu-pasu Dèbata. 4:34 Ai sada kalak poda kalak i kurangen i barang kadè pè, kerna mula lot kalak i merbages barang merjuma, idèa ngo i; jadi iembah kalak i ngo tokorna i, 4:35 ipessoh ngo tokorna i taba apostèl. Nai ipembagiken apostèl i mo kèpèng i taba kalak simemerluken. 4:36 Bagidi ma mo lot sada kalak Lewi mergerar si Josep kalak pulo Kiprus, nigeraren Apostèl i Barnabas (lapatenna pengapoi). 4:37 Idèa mo tanoh bagianna, iembah mo kèpèng tokorna i janah iberrèken taba apostèl i.
5:1 Lot mo sada kalak mergerar si Ananias. Idèa ia rebbak dekket si Sapira sinibagesna i mo tanoh kalak i. 5:2 Nai mersada taki mo kalak i sidua, iboniken mo dèba tokor tanohna i, janah dèba iberrèken taba apostèl. 5:3 Nai nina si Petrus mo mbang si Ananias, "Èo alè Ananias! Kasa ibelli ko ikuasai Sibolis atè-atèmu, gabè iluapi kono Tendi Dèbata merkitè iperso kono dèba tokor tanohmu idi? 5:4 Otang kono ngo sidasa tanoh nidèamu i? Mula icèkèp kono pè tokorna i, guru bamu ngo i; kasa turah ukurmu memmaing bagidi? Oda ngo jelma niluapenmu i, tapi Dèbata ngo." 5:5 Idengkoh si Ananias kessa mo kata i, mèter ranggang mo ia, janah mpostep mo kessahna. Jadi gabè buradan kalohoon mo karina simendengkoh simasa i. 5:6 Nai roh mo anak perana, ibalut mo bangkè si Ananias i, janah iembah kalak i mo mi ruar lako mennanem. 5:7 Tapi enggo kessa kira-kira tellu jom, roh mo bang sinibagesna. Oda ibettoh dèng samasa i. 5:8 Nina si Petrus mo mbangsa, "Bagahken taba aku, nasa èn ngo kessa harga tanoh ndènè idi idèa kènè?" Ialoi sinibages si Ananias mo, "Uè, nasa i ngo." 5:9 Nai idokken si Petrus mo mbangsa, "Kasa sada taki kènè dekket sinibalèmu mengunjuni Tendi Tuhan? Idi mo enggo roh balik kalak simengkubur sinibalèmu, kono pè embahen kalak i ma mo mi ruar." 5:10 Mèter runggang ma mo gejapkenna idi sinibages si Ananias i mi lebbè-lebbè si Petrus, janah mpostep mo kessahna. Jadi mbangkit kessa mo anak perana i mi bages, idapet mo enggo matè sinibages si Ananias i. Jadi iosong kalak i mo mi ruar lako mennanem mi gembar pendèbaan sinibalèna i. 5:11 Gabè buradan kalohoon mo kalak i sisada kuria i, bagidi ma ngo bang kalak sidèban, simendengkoh simasa i. 5:12 Merkitè pengulaken apostèl-postèl i matcam ngo bagèna tanda-tanda kellengangen masa i tengah-tengah jelma nterrem. Ibagasen sada ukur ni kalak i, merpulung karina sipercaya i èmpèr si Salomo i Bages Dèbata. 5:13 Tapi ukum jelma ruar, oda lot pang roh lako merpulung rebbak dekket sipercaya i, janah soh mo hormatna jelma nterrem i midah kalak i sipercaya i. 5:14 Makin ndekkahna muat mertambah mbuèna ngo kalak gabè percaya taba Tuhan i -- anak laki bang daberru pè. 5:15 Masa ma ngo lot bagèen: Iembah kalak idi mo si sakiten mi ruar, ipegalè mo ipas peddemmen, barang pè i babo bellagen i dalan i, asa mula mentas si Petrus, giamken kenna lèndungna sisakiten i tikan merdalan i ia. 5:16 Merrohen ma ngo kalak merkolan-kolan i kuta sikuliling Jerusalem nai. Iosong kalak idi ngo kadè-kadèna si sakiten bang pè nisellapen tendi jahat. Karinana idi ipemalum ngo. 5:17 Nai dungna mellaga mo imam huntuun dekket denganna horong Sadusè kumarna ncian ukur kalak i. 5:18 Itangkup mo apostèl-apostèl i janah ipemasuk mi kurungen jelma nterrem. 5:19 Tapi roh mo sada kalak malaèkat Tuhan bernginna i mi kurungen i, iarahken mo apostèl-apostèl i mi ruar. Idokken malaèkat i mo taba apostèl i, 5:20 "Laus mo kènè, cènder mo kènè i Bages Dèbata, janah sukutken kènè mo taba jelma nterrem kata kenggelluhen i." 5:21 Jadi iuèi rasul-rasul i mo kata malaèkat i. Nterrang kessa mo ari sibarembenkenna i, laus mo kalak i mi Bages Dèbata, mengajari mo kalak i i sidi. Tapi ukum imam huntuun i, ipepulung mo denganna, runggu mo kalak i rebbak dekket anggota runggu mbellen bak karina pengulu-pengulu kalak Jahudi. Nai ipasulak kalak i mo mengaleng apostèl-apostèl idi i kurungen nai. 5:22 Keppè soh kessa mo pasulaken i mi sidi, oda idapet kalak i nèngè apostèl-apostèl idi i kurungen balik mo kalak i magahken taba runggu. 5:23 "Memmes ngo nemmu kuidah kami terkonci kurungen i, janah perjaga pè, dak merjaga-jaga ngo i pèntu," nina kalak i, "tapi kubuka kami kessa mo pèntu kurungen idi, isè poda lot kuidah kami i bagasen." 5:24 Idengkoh ekuten perjaga Bages Dèbata dekket imam-imam idi kessa mo i, jut mo ukur kalak i janah mbiar memmikiri kadè ndia naing masa. 5:25 Tapi lot mo roh sada kalak daholi magahken, "Mengajari ngo bagèndari sinitulusen ndènè idi i Bages Dèbata!" 5:26 Nai laus mo ekuten perjaga i rebbak dekket naposona mengalengi apostèl-apostèl i, tapi oda mengasangken gegoh nèngè ibaing kalak i, ai mbiar ngo kalak i midah jelma nterrem i; tah bakunè nola gabè ibentiri jelma nterrem i kalak i merkitè batu. 5:27 Nai iembah kalak idi mo apostèl-apostèl i mi hadeppen runggu mbellen. Iperrèso imam huntuun i mo kalak idi nina mo, 5:28 "Nggemmes ngo enggo kugerra kami kènè asa ulang nèngè kènè mengajari merkitè gerar i, keppè makin iempet kènè nola ngo lako pesarken peddah ndènè i mi suberri Jerusalem; janah naing nola dèng ma ngo isalahken kènè kami mendok, gabè kami nola memmaing matè ia." 5:29 Nai nina si Petrus rebbak dekket Apostèl sidèbanna i mo mengaloi, "Kennah uèen ngo kami taba Dèbata asa taba jelma. 5:30 Ai enggo ipegelluh Dèbata empungta i Jesus nipersilangken ndènè i. 5:31 Enggo iberrèken Dèbata baNa kuasa mbellen, gabè Pengulu janah Sipaluah, asa iberrè kesempaten taba kalak Israel lako tobat ibas dosa-dosana nai, asa gabè isasa dosana. 5:32 Kami ngo saksi tersèngèt karinana i -- dekket Tendi Perbadia siniberrèken Dèbata taba kalak simenguèi kataNa." 5:33 Idengkoh runggu mbellen i kessa mo i, mellaga kalohoon mo kalak i, iputusken mo kennah patèenken karina apostèl i. 5:34 Tapi lot mo sada kalak parisè ibas runggu mbellen i nai mergerar si Gamaliel. Sada kalak guru agama ngo ia janah kalak mersangap ngo idah sinterrem. Cènder mo ia, janah idokken mo kalak merembah apostèl-apostèl i mi ruar sigejap. 5:35 Nai idokken mo katana taba kalak perunggu i, "Kènè karina kalak Israel! Manat mo kènè tersèngèt mi sibakinen ndènè taba kalak i. 5:36 Ai tikala i pè pennah ngo kèkè si Teudas, ipebelgah ngo dirina, sanga ngo lot pengèkutna kira-kira empat ratus kalak. Tapi terbunuh ngo ia, mèrap mo pengèkutna i karina janah gabè mersep. 5:37 I podina nola ma, imo tikanna sènsus, kèkè ma ngo si Judas kalak Galilea. Mèduk ma ngo kalak iajar-ajari. Tapi ia pè terbunuh ma ngo, janah karina pengèkutna i pè mambur mèrap ngo. 5:38 Kerna naidi, èn ngo sipessèngètku; ulang mo kekkadè kènè kalak ènda, belli kènè mo bagidi. Ai ukum bai jelma nai ngo rohna peddah kalak idi i, kennah mersep-mersep bagidi ngo i. 5:39 Tapi ukum bai Dèbata nai ngo rohna, oda terkekadè kènè i. Janah asa ulang terdapet nola kènè simengalo Dèbata." Jadi gabè ijalo perrunggu i mo sipessèngèt si Gamaliel i. 5:40 Nai itenggoi nola mo apostèl-apostèl i, ibetbet mo janah irarang oda ndorok nèngè kalak idi mengajarken tersèngèt Jesus. Enggo kessa i, ipaluah mo kalak i. 5:41 Sampang kalohoon ngo atè apostèl-apostèl i mennadingken kerrungguun i, kerna tau kalak idi dok atè Dèbata lako menggongken kinilèa mengkepkep gerar Jesus. 5:42 Jadi oda mengadi-ngadi kalak idi gennep ari mengajarken Berrita Simerandal jojor bages, imo tersèngèt Jesus Raja Sipaluah si niperbagah-bagah i.
6:1 Tikanna idi makin ndekkahna makin mbuè ngo sisiin Jesus. Tapi ngutnguten mo kalak Jahudi simerkata Junani taba kalak Jahudi asli, kumarna oda kennaan pengurupiin sigennep ari daberru simebbalu bai kalak i nai. 6:2 Kerna naidi ipepulung apostèl sisipuluh dua i mo karinana kuria i, janah nina mo taba kalak i, "Oda mendè mula mentadi nola kami memeritaken kata Dèbata kumarna kennah mennarihken soal pangaan. 6:3 Kerna naidi, pilih kènè mo i tengah-tengah ndènè nai pitu kalak, tapi kennah selloh ngo berritana, janah siniianen Tendi Perbadia, bana kalak bujur janah bijak, asa kalak i kubaing kami lako mengulaken ulaan i. 6:4 Tapi ukum kami, sodip dekket ulaan menjamitaken kata Dèbata mo kuendengken kami." 6:5 Jadi lolo mo kalak i karina mendengkoh kata apostèl i. Ipilih kalak i mo si Stefanus imo sada kalak sipercaya kalohoon taba Jesus janah iiani Tendi Perbadia. Terpilih ma mo si Pilipus, si Prokhorus, si Nikanor, si Timon, si Parmenas dekket si Nikolaus kalak Antiokhia; ukum ia oda ngo kalak Jahudi. 6:6 Kalak idi mo ipecènder mi hadeppen apostèl-apostèl, nai mersodip mo apostèl-apostèl i lako mengido asa ipasu-pasu Tuhan i kalak idi. 6:7 Jadi makin sarna mo kata Dèbata, janah makin mertambah-tambah ngo simenukutken Jesus i Jerusalem. Imam-imam pè mèduk ngo gabè percaya bai Jesus. 6:8 Ukum si Stefanus, ipasu-pasu Dèbata ngo ia, gabè mermatcam bagè ngo ihanaken tanda-tanda kellengangen. 6:9 Tapi lot ma ngo kalak mengalosa i tengah-tengah bages perguruun kalak Jahudi nai, sinigeraren bages perguruun Libertini (Bages perguruun kalak Bèbas). Ukum anggota bages perguruun idi, imo kalak Jahudi ni Kirene dekket ni Aleksandria, rebbak dekket kalak Jahudi ni Kilikia bak Asia; mersoal mo kalak i dekket si Stefanus. 6:10 Tapi oda tersoal kalak i nidokken si Stefanus, ai enggo iajari Tendi Perbadia ia lako mengerana. 6:11 Kerna naidi iberrèken kalak i mo sisip taba kalak, asa idokken kata bagèen, "Kudengkoh kami ngo kalak èn mengelèai si Musa bang Dèbata pè!" 6:12 Nai igara-garai kalak i mo jelma nterrem bak pengulu-pengulu Jahudi, bagi ma bang simettoh patiin pè. Jadi gabè itangkup mo ia, janah ipehadep mi tengah runggu mbellen. 6:13 Nai ipehadep kalak idi ma mo saksi palsu, nina mo, "Dak ilèai kalak èn ngo Bages Dèbata simbadia i, ilèai ma ngo pati-patiin Dèbata siniberrèken si Musa. 6:14 Kudengkoh kami ma ngo naing irumpakken Jesus kalak Nazaret i ngo nina Bages Dèbata èn, jadi gabè iobah mo nina adatta sienggo nipetettah si Musa banta!" 6:15 Karina kalak silot i kerunggun i mengenel-nelli si Stefanus. Tikan naidi, bagè abè malaèkat ngo idah kalak i abè si Stefanus.
7:1 Nai ikusoken Imam Huntuun i mo taba si Stefanus, "Ti! Tuhu ngo karinana nidokken kalak i?" 7:2 Ialoi si Stefanus mo, "Kènè karina kaka anggi dekket partua-partua, dengkohken kènè mo lebbè ranangku èn! Sinderrang madèng mbungkas empungta si Abraham mi Haran, ipacidah Dèbata ngo dirina taba si Abraham, imo sinderrang merian i Mesopotamia dèng ia, 7:3 nina mo, 'Mbungkas mo kono i kuta idi nai, tadingken mo kadè-kadèmu, mi tanoh sinaing tuduhenkenKu bamu.' 7:4 Nai berkat mo ia i nagerri Kasdim nai lompat mi Haran. Nai enggo kessa matè bapa si Abraham i sidi, ilompat Dèbata nola ma mo ia mi tanoh ianen ndènè bagèndari. 7:5 Ukum tikanna idi oda lot dèng giam iberrèken Dèbata tanoh sinteppap taba si Abraham mahan milikna. Tapi iperbagah-bagah Dèbata ngo berrènkenna tanoh bai si Abraham mahan milikna soh mi pinemparna, tukasi pè tikanna idi oda lot dèng dukakna. 7:6 Tapi bagèen ngo idokken Dèbata, 'Gabè kalak ginemgem ngo pinemparmu i tanoh ndèba. Iperhamba janah ipacik kalak i ngo sanga empat ratus tahun dekkahna. 7:7 Tapi Kuhukum mo bangsa simemperhamba kalak idi' nina Dèbata. 'Nai ipè asa lompat nola kalak idi i kuta idi nai, lako mersembah taba Aku i bekkas èn.' 7:8 Enggo kessa idokken bagidi, tanda hot ni bulaban, ibakin mo acara mersittak. Nai tubuh mo dukakna si Isak, isittak ma mo ia i ari peualuhken. Bagidi ma mo isittak si Isak dukakna si Jakob, janah si Jakob pè isittak ma mo dukakna si sipuluh dua kalak i; idi mo empungta simemempar kalak Jahudi. 7:9 Nai ncian mo atè empungta midah si Josep i, idèa mo ia gabè hamba mi tanoh Mesir. Tapi dak idengani Dèbata ngo ia, 7:10 janah ipaluah ngo ia ipas karina keppersuken nai. Iberèken Dèbata ngo bana masèh atè dekket kepantasen, bak kebijaken pè, sinderrang i hadeppen si Parao raja kalak Mesir i. Kemulihkenna idi, gabè ipebangkit si Parao ngo ia gabè pengerajai i suberri tanoh Mesir bak karina sini istana si Parao. 7:11 Nai masa mo lèhè mbellen i suberri tanoh Mesir dekket i tanoh Kanaan, gabè mpersuk kalohoon mo iakap jelma tikala i. Empungta pè oda lot nèngè panganna tikan naidi. 7:12 Terdengkoh mo bai si Jakob, ukum i Mesir mbuè ngo pagè, ipasulak mo dukak-dukakna imo empungta i mi Mesir. Imo perlebbè kaloon kalak i mi sidi. 7:13 Tikan laus nola kalak i pedua kaliken, ipetandaken si Josep mo dirina taba kaka anggina i, gabè ntangkas mo ibettoh raja Parao asal usul si Josep. 7:14 Nai ipasulak si Josep mo mengalengi bapana si Jakob i dekket karina denganna simpangaan asa roh mi Mesir -- pitupuluh lima kalak buèna. 7:15 Jadi lompat mo si Jakob mi Mesir, janah i sidi ngo ia matè bak empungta i pè. 7:16 Tapi ukum bangkè kalak idi, itaruhken ngo mi Sikhem, janah ikuburken ngo mi kuburen sinitokor si Abraham dekket riar bai kalak bangsa Hemor i Sikhem idi nai. 7:17 Tapi enggo kessa makin ndessing tikkiNa dapet niperbagah-bagah Dèbata sinibulabankenna taba si Abraham i, muat merrak-merrikna mo bangsanta i, i tanoh Mesir. 7:18 Nai mbangkit raja mo kalak sidèban i tanoh Mesir, siso menandai si Josep. 7:19 Taki-taki bècuk ngo ibakin lako mengago empungta. Ipaksa ngo empungta i, asa iambongken karinana anak mbara sirembaru tubuh, asa matè. 7:20 Tikan bagidi i mo tubuh si Musa; anak mbara nikellemmoken Dèbata ngo ia. Tellu bulan ngo kessa dekkahna ia ipehèdu-hèdu partuana, 7:21 nai itaruhken mo ia mi ruar, ibuang, keppè gabè iperkuanak berru raja Parao ngo ia. 7:22 Iajarken ngo bana karina hèlmu bangsa Mesir, janah gabè mpantas ngo ia i rana barang i bahaan kadè pè. 7:23 Enggo kessa merumur empatpuluh tahun si Musa, sèkel ngo ia menongkir kaka anggina bangsa Israel. 7:24 Idah mo sada kalak bai kalak i nai ipekpekki kalak Mesir; ibèla mo siterpekpekken i, mèter ibunuh mo kalak Mesir i. 7:25 Idokdok si Musa ngo iantusi bangsana i, naing paluahen Dèbata kalak i merkitè-kitèsa, keppè oda lot iarti kalak idi. 7:26 Sibarembenkenna idi nola pè, roh dèng ma ngo tong ia. Tupung ma mo idah merrubati dua kalak, kalak Israel, gabè itellahi mo kalak i janah idokken asa merdamè, nina mo, 'Merkaka kuanggi ngo kènè alè dengan, kasa merrubati kènè?' 7:27 Tapi ionjemken simersalah i ngo si Musa ninganna idokken, 'Isè pebangkitken kono gabè raja janah gabè perhukum bai nami? 7:28 Mada ngo naing ibunuh kono ma aku bagè kalak Mesir nibunuhmu bari?' 7:29 Idengkoh si Musa kessa mo nidokkenna tabasa i, mperrus mo ia i tanoh Mesir nai. Merolip-olip mo ia i tanoh Midian. Tubuh mo dua kalak anakna i sidi. 7:30 Enggo kessa empat puluh tahun dekkahna merrian i sidi, roh mo sada kalak malaèkat mendahisa i gurun pasir ndessing mi Delleng Sinai ibagasen api mergollah-gollah ipas rambah mpulguk. 7:31 Lengang mo si Musa mengidah i, gabè ijolmiti mo lako petangkasken. Nai idengkoh mo sora Tuhan i mendokken, 7:32 'Aku ngo Dèbata empungmu si Abraham, si Isak dekket si Jakob.' Nai mèter menggirgir mo si Musa, gabè oda pang nèngè ia mencilik mi rambah mpulguk i. 7:33 Nai nina Tuhan i nola ma mo, 'Talkasi cipatumi i nèhèmu i nai, ai mbadia ngo tanoh bekkasmu cènder i. 7:34 Enggo ntangkas kuidah kinipersuk nigongken bangsangKu idi i tanoh Mesir. Enggo kudengkoh kelsoh kalak i, kerna naidi ngo asa roh Aku lako paluahken kalak i. Bagèndari pè roh mo kono, asa Kupasulak kono balik mi tanoh Mesir.' 7:35 Si Musa èn siso niakuun kalak Israel, tikan idokken kalak i tabasa, 'Isè pebangkitken kono gabè raja janah perhukum bai nami?' Keppèken ia ngo ipasulak Dèbata gabè pengulu janah sipaluah merkitè pengurupi malaèkat siroh niidahna i rambah mpulguk simergollah-gollah i. 7:36 Si Musa idi menogiken bangsa Israel karuar i tanoh Mesir nai merkitè tanda kellengangen i tanoh Mesir, i laut mbara dekket i padang gurun empat puluh tahun dekkahna. 7:37 Si Musa èn ma ngo mendokken taba kalak Israel: 'Ipebangkit Dèbata ngo sada kalak nabi bai ndènè, i tengah-tengah ndènè nai bagè pemmilihna taba aku èn.' 7:38 Ia ma ngo i tangah-tengah kalak Israel i padang gurun mahan perkitèen mengeranai dekket malaèkat i Delleng Sinai taba empungta. Ijalo ngo kata kenggelluhen bai Dèbata nai asa ipessoh banta. 7:39 Tukasi pè bagidi, oda ngo menguè empungta i tabasa. Itulak kalak idi ngo ia, janah gabè molih nola ngo ukur kalak i mi tanoh Mesir. 7:40 Ai idokken kalak i ngo taba si Aron, 'Bahan mo bai nami sada sisembahen, asa ia menguluken kami. Oda nibettoh barang kadè masa taba si Musa sienggo mennogiken kita karuar i tanoh Mesir nai!' 7:41 Jadi igana kalak i mo cuman-cuman anak lembu tikan naidi. Ipèlè kalak i mo gana-ganaan i janah merkerja ngo kalak i mengkesampang atèken keppandèen tanganna i. 7:42 Nai itadingken Dèbata mo kalak i, janah gabè cubelli mo Dèbata midah kalak i menembah bintang ni langit i, bagè sitersurat ibas bukku nabi-nabi bagèen, 'Kènè alè kalak Israel! Oda ngo lako bangKu asa isembellih kènè janah ipèlèken kènè jukut sidekkah empat puluh tahun kènè i padang gurun. 7:43 Sapo-sapo sembahen Molokh rebbak dekket bintang sembahen ndènè ngo ijujung-jujung kènè i mo Repan; imo gana-ganaan si ni gana ndènè mahan sembahen. Kerna naidi, Kubuang mo kènè ndaoh mi suberrang Babilon!' 7:44 Bai empungta ngo Undung-undung bekkas Dèbata, roh mendahi jelma i padang gurun. Codi ngo ia mi sinihatorken Dèbata bai si Musa, nderrang mengeranai si Musa dekket Dèbata, asa ibahan bagè siniidahna i. 7:45 Nai iembah empungta dekket si Josua nola mo undung-undung i tikan laus lako memmuat nagerrinta ènda tarap kuasa bangsa-bangsa sinipuari Dèbata i hadeppen kalak i nai. Isidi ngo tong undung-undung i soh mi tikki si Daud. 7:46 Ikellemmoken Dèbata ngo si Daud, gabè ipidoken mo taba Dèbata, asa ipaduè Dèbata ia lako memajek sada Bages bai Dèbata sinisembah si Jakob. 7:47 Tapi gabè si Salomo ngo saut memmajek Bages Dèbata. 7:48 Tapi oda ngo merrian i bages ni bahan tangan ukum Dèbata Simermulia i, kerna idokken surat nabi ngo bagèen: 7:49 'Langit i ngo tahtangKu, janah tanoh èn ngo nènèhKu. Bages kadè ngo sinaing bahanen ndènè bangKu? Idikè ngo bekkasKu mengadi? 7:50 Otang Aku ngo menghanaken sagumanna silot?' nina Dèbata. 7:51 Soh mo jèngèngna kènè janah mahal kalohoon tunduk mi Dèbata! Tongkik kalohoon ngo pènggel ndènè oda merpendengkoh mi kata Dèbata! Tosè ngo kènè bagè empung ndènè dakdak mengalo Tendi Dèbata! 7:52 Otang karina ngo nabi-nabi iletlet janah idersa empung ndènè? Ibunuh kalak i ngo simennukutken pekkiroh Naposo Dèbata sibennar i. Janah bagèndari pè, iselbuh janah ibunuh kènè ngo Naposo Dèbata idi. 7:53 Ipessakat malaèkat i ngo enggo bai ndènè pati-patiin i, tapi oda iuèi kènè!" 7:54 Bagi idengkoh anggota-anggota Runggu Agama i karina sinidokken si Stefanus, hangat mo iakap kalak i janah mellaga kalohoon tabasa. 7:55 Tapi ukum si Stefanus sienggo ikuasai Tendi Perbadia, itarè mo mi dates, gabè idah mo kessangapen Dèbata dekket Jesus cènder i kamuhun Dèbata, i bekkas simermulia i. 7:56 Jadi nina si Stefanus mo, "Tengen kènè mo! Mbuka ngo kuidah sorga janah Anak Jelma kan kamuhun Dèbata!" 7:57 Tapi ipegang anggota runggu i mo sorana ninganna ipètut kalak i copingna, nai rebbakken mo kalak i mennangkupsa. 7:58 Iruah kalak i mo si Stefanus mi ruar kuta, nai ipembentirken kalak i mo batu tabasa. Ipelliniken kalak simenaksiken simasa i ngo olesna taba sada kalak anak perrana sidakdak menengen-nengen kalak idi, mergerar si Saulus. 7:59 Sinderrang ipembentirken kalak i batu i taba si Stefanus, idokken si Stefanus mo katana bagèen, "Alè Tuhan Jesus, jalo mo tendingku!" 7:60 Nai mersembah mo ia ninganna ipegang sorana mendokken, "Alè Tuhan, ulang mo ipunjut kono dosa kalak i!" Enggo kessa idokken bagidi, matè mo ia.
8:1 Ukum si Saulus, lolo ngo ia mengidah ulah-ulah kalak idi i. Asa mulai i sidari i nai mo iletlet kalak idi kuria si ni Jerusalem, gabè mèrap mo kalak i karina, laènken apostèl-apostèl i, laus mi nagerri Judèa dekket mi Samaria. 8:2 Tapi ukum si Stefanus, itanem kalak simerkebiaren midah Dèbata ngo, ninganna itangisi. 8:3 Tapi ukum si Saulus dak iletlet ngo kuria i. Ibengketti ngo gennep bages, iruah mo ibages i nai kalak sipercaya, ikurung mo. 8:4 Ukum kalak sipercaya sienggo mèrap i, dak isukutken ngo Sukuten Kelluahen i, barang mikè pè ia laus. 8:5 Laus ma mo si Pilipus mi kuta Samaria, ijamitaken ngo taba kalak sinisidi tersèngèt Kristus Raja Sipaluah niperbagah-bagah Dèbata. 8:6 Nai idengkoh kalak i kessa mo jamita si Pilipus janah idah kalak i tanda kellengangen nipehanana i, gabè mèduk mo bai kalak i nai mengeradum-radumi jamita si Pilipus i. 8:7 Ai karuar ngo sètan ninganna mendempik-dempik ibas daging kalak i nai. Mèduk ma ngo ipemalum kalak nitempuk sigading bak sikèpang pè. 8:8 Jadi sampang kalohoon ngo atè kalak pengisi kuta Samaria i. 8:9 Lot mo sada kalak i kuta i mergerar si Simon, perkaji ujut; dak ilalingken ngo kalak perkuta i, ai sada kalak mahantu ngo ia nina. 8:10 Jadi karina pengisi kuta i anak-anak soh mi simbelgah pè mbiar janah mengèkut bana, nina kalak i mo, "Kalak èn ngo kegegohen si 'Roh bai Dèbata nai' apala simbelgahna i." 8:11 Tapi asa ipèkut-èkut kalak idi pè ia sapatna èn, kumarna ilalingken ngo kalak i merkitè-kitè hèlmuna i. 8:12 Tapi ijamitaken si Pilipus ngo Berita Simerandal i taba kalak idi, imo kerrajaan Dèbata dekket tersèngèt Jesus Kristus Raja Sipaluah i janah ikepercayai, nai iperridi mo mèduk daholi bak daberru. 8:13 Si Simon pè gabè percaya ngo janah iperridi, janah dak ièkut-èkut ngo siPilipus. Lengang kalohoon ngo ia mengidah tanda kellengangen dekket kuasa mbellen simasa nibaingken si Pilipus i. 8:14 Idengkoh Apostèl si ni Jerusalem kessa mo berita simendokken: Enggo keppè ijalo kalak Samaria kata Dèbata, ipasulak kalak i mo si Petrus dekket si Johanes mendahi kalak i. 8:15 Nai soh kessa mo kalak i mi Samaria, isodipken mo kalak ni sidi, asa ijalo kalak i Tendi Perbadia, 8:16 ai oda dèng iiani Tendi Perbadia barang isè pè kalak i, kerna asal iperridi bagi sambing dèng ngo kessa kalak i mi bagasen gerar Tuhan Jesus. 8:17 Nai iampèken si Petrus dekket si Johanes mo tanganna taba kalak i, nai gabè ijalo kalak i mo Tendi Perbadia. 8:18 Tapi iidah si Simon kessa mo mengampèken tangan kalak i lako memerrèken Tendi Perbadia, roh mo ia merembah riar taba si Petrus dekket si Johanes, 8:19 nina mo, "Berrèken kènè ma mo bangku kuasa bagidi, asa mula kuampèken kessa tanganku barang taba isè mèter ijalo ma mo Tendi Perbadia." 8:20 Tapi ialoi si Petrus mo ia, "Mago mo kono dekket riarmi! Idokdok kono ngo pana tertokor basa-basa Dèbata merkitè-kitè riar? 8:21 Oda dapet jambarmu lako mengulaken bagè ulaan nami èn, ai oda bennar ukurmu meradepken Dèbata. 8:22 Kernana i tadingken mo perrukurenmu jahat i; nai pengido mo taba Tuhan i, asa Iampuni janah isasa taki-takimu jahat i! 8:23 Ai kubettoh ngo dom cian ngo perukurenmu janah iperhamba kejahaten." 8:24 Gabè nina si Simon i mo taba si Petrus dekket si Johanes, "Sodipken kènè mo aku taba Tuhan i, asa ulang sempa bangku sada pè bagè nidokken ndènè i." 8:25 Asa enggo kessa pul kalak i menjamitaken kata Tuhan i, mulak mo si Petrus dekket si Johanes mi Jerusalem, ninganna iranaken kalak i Berita Simerandal idi i gennep kuta nibellus kalak idi i Samaria. 8:26 Nai ipermongkami sada kalak malaèkat Tuhan mo si Pilipus, "Berkat mo kono laus dempak selatan mi dalan langlang i kellang-kellang Jerusalem dekket Gaza!" 8:27 Nai mèter berkat mo si Pilipus dempak i. Jadi lot mo sada kalak Etiopia perpangkat ndates tupung lako balik mi kutana. Sada kalak kettoken ngo ia menjamotken harta si Kandakè raja daberru i Etiopia. Balik i Jerusalem nai ngo ia lako mersodip kin taba Dèbata. 8:28 Kundul i kurètana ngo ia tikan naidi ninganna menjakai Bukku Nabi Jesaya. 8:29 Nina Tendi Dèbata mo taba si Pilipus, "Lako dessingi kurèta i." 8:30 Nai idessingi si Pilipus mo kurèta i, gabè idengkoh mo ijaka perkurèta i surat Nabi Jesaya; nai ikusoken si Pilipus mo, "Iantusi kono ngo sinijakamidi?" 8:31 Ialoi mo ia, "Bakunè mo pengantusingku ukum mak lot sipeterangken bangku?" Nai mèter ièlèk-èlèk mo si Pilipus mbangkit mi kurètana i, gabè rebbak mo kalak i kundul. 8:32 Ukum kata surat nijakana i bagèen ngo, "Iteggu ngo ia bagè biri-biri mi penembellihen janah bagè anak biri-biri dak nono i lebbè simenggontingsa laju oda mongkam Ia. 8:33 Ipelèa-lèa ngo ia janah idabuh hukum siso puna-puna tabasa. Ai icabut ngo kessahna i babo tanoh èn nai gabè isè poda lot mennukutken tersèngèt usurNa." 8:34 Nai nina perpangkat i mo taba si Pilipus, "Kukuso mo kono, isè ngo sinidokken nabi idi?" 8:35 Nai mengerana mo si Pilipus, ibagahken mo Berita Simerandal tersèngèt Jesus, mermula ipas kata surat nijakana idi ndai nai. 8:36 Tikan i perdalanen i kalak idi, jupa kalak idi mo laè, jadi nina perpangkat idi mo taba si pilipus, "Enda mo enggo laè. Kadè dèng habatna asa mak terperidi aku?" 8:37 Nai nina si Pilipus mo, "Mula percaya ngo Kono ibas nasa ukurmu, ndorok ngo Kono iperidi." "Aku percaya, Anak Dèbata ngo Jesus Kristus," nina perpangkat i mo. 8:38 Mèter idokken mo merradi kurètana i, nai sampur mo kalak i sidua, si Pilipus dekket perpangkat i mi laè i, nai iperidi si Pilipus mo ia. 8:39 Tapi mi darat kessa mo kalak idi i laè i nai, ibabaken Tendi Tuhan i mo si Pilipus, gabè oda idah perpangkat idi nèngè ia. Jadi ibagasen lolo atè, iterrusken perpangkat i mo sidalanenna. 8:40 Tapi ukum si Pilipus, i Asdod ngo ia teridah. Niganna mennerusken sidalanna ia, dak ijamitaken ngo Berita Simerandal idi i gennep kuta soh mi Kaisarèa.
9:1 Dak tong ngo iendam si Saulus memunuh kalak simengèkutken Tuhan Jesus. Idahi mo imam huntuun, 9:2 lako mengido surat kuasa, asa laus ia mi bages perguruun silot i kuta Damaskus, asa mula lot jumpasa kalak sipercaya taba Jesus, daholi barang daberru pè, itangkup janah iembah mi Jerusalem. 9:3 Tapi tikan i tengah ndalan lako mendapetken kuta Damaskus dèng ia, mènter sintempu mo merdessik cuhaya i dates nai mengkalokoisa. 9:4 Geppah mo ia mi tanoh, nai idengkoh mo sora mendokken tabasa, "Saulus! Saulus! Kasa dak iletlet kono Aku?" 9:5 Nai nina si Saulus mo, "Isè ngo Kono Tuan?" Ialoi sora i mo ia, "Jesus ngo aku niletletmi. 9:6 Tapi ukum bagèndari, kèkè mo kono, bengketti mo kuta i. Isidi pè kubagahken bamu sibakinenmu." 9:7 Tapi ternono mo karina denganna sindalaan i, ai idengkoh kalak i ngo sora i, tapi oda lot barang isè idah. 9:8 Nai cènder mo si Saulus i, ibidakken mo matana, keppè oda nèngè merpendidah. Jadi gabè icèkèp kalak idi mo tanganna, itegu-tegu mo ia lako mi kuta Damaskus. 9:9 Tellu ari ngo dekkahna oda merpendidah matana, janah sidekkahna idi ma mo oda mangan dekket oda mènum ia. 9:10 Lot mo sada kalak i Damaskus i sisiin Tuhan Jesus mergerar si Ananias. Ipeteridahken Tuhan i mo dirina taba si Ananias, janah idokken mbangsa, "Alè Ananias!" Ialoi si Ananias mo, "Isèn ngo aku Tuhan!" 9:11 Nai idokken Tuhan i mo, "Berkat mo kono bagèndari mi bages si Judas i dalan mergerar Mpènter. Kusoi mo i sidi sada kalak anak Tarsus mergerar si Saulus, ai sidang mersodip ngo ia bagèndari. 9:12 Ibagasen alaten, idah ia mo sada kalak daholi mergerar si Ananias roh mendahisa, janah mengampèken tanganna mbangsa, asa suang nola merpendidah ia." 9:13 Tapi nina si Ananias mo mengaloi, "Alè Tuhan, enggo mèduk kalak magahken bangku tersèngèt ulah-ulahna memmaing kejahaten mengeletlet ummatMu i Jerusalem. 9:14 Isènda pè merkuasa ngo ia ibaing imam-imam ekuten menangkup karina sipercaya taba Kono." 9:15 Tapi idokken Tuhan i mo tabasa, "Laus sambing mo kono! Ai enggo Kupilih ia mahan perkebbasKu, asa isukutken Aku mendahi bangsa sidèban siso bangsa Jahudi bang mendahi raja-raja dekket mendahi kalak Israel pè. 9:16 Kubagahken pè bana kinipersuk sigongenkenna kumarnaken Aku." 9:17 Jadi berkat mo si Ananias laus mi bages i, iampèken mo tanganna taba si Saulus ninganna idokken, "O Saulus, nggia! Ipasulak Tuhan Jesus niidahmu i tengah ndalan i ngo aku misèn, asa mengolihi merpendidah nola kono, janah dak idomi Tendi Perbadia!" 9:18 Mèter merrurus mo bagè sisik ikan i mata si Saulus nai, gabè mengolihi mo ia merpendidah. Kèkè mo ia, lako iperidi. 9:19 Nai mangan kessa mo ia, gabè suang mo gegohna. Merian i Damaskus mo si Saulus barang sadikè dekkah rebbak dekket mengèkutken Jesus. 9:20 Dak merjamitai ngo ia i bages perguruun janah ikesaksiken ngo, Jesus i ngo Anak Dèbata. 9:21 Gabè dak merkalimesso ngo perrukuren ni karina kalak simendengkoh, nina ngo, "Otang ia ngo i Jerusalem simengeletlet janah memunuh kalak sipercaya taba Jesus? Pekerohna mi sèn pè otang lako menangkup janah merembah sipercaya ma ngo mi hadeppen imam-imam ekuten!" 9:22 Tapi makin igegohi si Saulus ngo mengindangken janah mbuè ngo bukti ibaing magahken Jesus i ngo Kristus. Sanga ngo jut ukur kalak Jahudi ni kuta Damaskus idi ibaing. 9:23 Asa enggo kessa narih toko dekkahna, mertaki mo kalak Jahudi, naing memmunuhsa. 9:24 Tapi terbertik ngo tuptup kalak idi mi pènggel si Saulus. Suntuk ari suntuk berngin dak ientip kalak Jahudi ngo ia i pèntu pengkerruhen kuta i lako memmunuh si Saulus. 9:25 Tikan sada berngin, itantan sisin si Saulus i mo ia ibas kirang arap babo pagar kuta idi. 9:26 Soh kessa mo si Saulus mi Jerusalem, naing dok atèna ipebengket bilangenna taba sisiin i, tapi mbiar ngo kalak i midahsa, ai oda tok kalak i enggo gabè sisiin Jesus ia. 9:27 Nai iarahken si Barnabas mo ia mendahi apostèl-apostèl i, ipejojor si Barnabas mo taba kalak i bakunè carana si Saulus mengidah Tuhan i, tikan i perdalanenna, dekket pendokkenna mbangsa soh mi pengkesaksikenna Tuhan idi i Damaskus. 9:28 Nai dak rebbak mo si Saulus dekket apostèl-apostèl i merdalani i Jerusalem janah pang ngo ia menjamitaken gerar Tuhan i. 9:29 Iantoi ngo kalak Jahudi mengeranai dekket mersoal imo Jahudi simerkata Junani, tapi mertaki ngo kalak i munuhsa. 9:30 Nai ibettoh dengan sipercaya i kessa mo i, itaruhken kalak i mo ia mi Kaisarèa, nai ipasulak mo ia laus mi Tarsus. 9:31 Jadi gabè mènak ngo Kuria silot i suberri Judèa, Galilea dekket Samaria pè. Janah merkitè pengurupi Tendi Perbadia, dak makin mergegoh janah makin mertambah-tambah ngo kuria i, kumarna merkebiaren ngo kalak i midah Tuhan i. 9:32 Tapi dak iagahi si Petrus ngo karina kuria-kuria. Nai tikan sidari idahi mo kalak simengèkutken Tuhan idi i kuta Lida. 9:33 Nai pejumpa mo ia i sidi dekket sada kalak mergerar si Ènèas, itempuk sigading ngo ia, janah dak gampar sambing ngo ia i peddemmenna, enggo ualuh tahun dekkahna. 9:34 Jadi idokken si Petrus mo tabasa, "Ènèas, ipemalum Jesus Kristus mo kono. Kèkè mo ko janah balun mo peddemmenmi!" Jadi mèter kèkè mo si Ènèas i gejapkenna idi. 9:35 Jadi karina pengisi kuta Lida bak Saron simengidahsa gabè percaya taba Tuhan i. 9:36 Lot ma mo sada kalak daberru sipercaya taba Jesus i kuta Jope, mergerar si Tabita (Gerarna ibas kata Junani si Dorkas merlapaten balkih). Termurmur ngo sellohna mengulaken simerandal dekket pengurupina taba kalak sincor. 9:37 Tupung ngo ia sakiten tikan naidi, nai mèter matè. Enggo kessa icuci bangkèna, ipebujur ngo ia i bilik perdates. 9:38 Ndessing ngo kuta Jope i, i kuta Lida nai. Idengkoh simengèkutken Jesus kessa mo, i Lida ngo keppè si Petrus, ipasulak kalak i mo dua kalak mendahi si Petrus lako mengendik-ngendiksa asa ndor ia roh mi kuta Jope. 9:39 Nai mèter kebbas mo si Petrus mengèkutken kalak i. Soh kessa kalak i, iarahken mo si Petrus mi bilik perdates. Jadi irengemmi daberru-daberru simebbalu mo si Petrus i ninganna mertangisen, janah ipacidahi kalak i mo taba si Petrus baju dekket jubah kalak i sinijarumen si Dorkas i tikan i nggelluhna dèng. 9:40 Nai ipasulak si Petrus mo kalak i asa laus lebbè mi ruar; nai mersembah merkurja mo ia mersodip taba Dèbata. Enggo kessa pul ia mersodip, idempakken mo mi bangkè si Dorkas i, nina mo, "O Tabita, kèkè mo ko!" Jadi mènter mbidak mo matana, janah idah kessa mo si Petrus, mèter kundul mo ia. 9:41 Nai idoroken si Petrus mo tanganna lako mennegusa asa kèkè. Nai idilo mo kalak sipercaya bak daberru-daberru simebbalu ni sidi i, janah mèter ipecènder mo si Dorkas sienggo balik nggelluh idi i hadeppen kalak idi. 9:42 Nai sar mo berita idi i suberri Jope, gabè mèduk mo percaya taba Jesus Sipaluah i. 9:43 Jadi narih ndekkah ngo merian i sidi si Petrus, i bages si Simon tukkang koling-koling ngo ia merian.
10:1 Lot mo sada kalak daholi i Kaisarèa mergerar si Kornelius. Komandan "Pasukan Italia" ngo ia. 10:2 Kalak simerkebiaren midah Dèbata ngo ia bak karina pengisi bagesna. Mèduk ngo ipemberrèken masèh atèna taba kalak Jahudi, janah oda nung lipang ia mersodip taba Dèbata. 10:3 Tikan sidari kira-kira pukul tellu ciboon, idah ia mo ntangkas ibas pennengenna, sada malaèkat Dèbata roh mendahisa, janah mendokken, "O Kornelius!" 10:4 Idempakken si Kornelius mo malaèkat i, gabè mbiar mo ia janah ninganna idokken, "Kadè alè Tuan?" Ialoi malaèkat i mo, "Enggo ijalo Dèbata sodipmu dekket masèh atèmu merkitè pemerrèkenmu i. 10:5 Bagèndari pè, pasulak mo laus mi Jope mengaleng si Simon janah mergerar si Petrus. 10:6 Rebbak tukkang koling-koling ngo ia bagèndari kiserrang i biding laut, janah si Simon ma ngo bekkasna kiserrang i." 10:7 Nai laus kessa mo malaèkat sikirana dekketsa i, mèter idilo mo dua kalak naposona dekket sada kalak soridadu penjagana simerkebiaren midah Dèbata. 10:8 Isukutken si Kornelius mo simasa i taba kalak i, janah terus ipasulak mo kalak i mi Jope. 10:9 Sibarembenkenna tikan i tengah ndalan dèng pasulaken i, tapi enggo soh mayak kuta i, laus mo si Petrus mi bilik perdates mersodip cèger ari. 10:10 Nai mellèhè kalohoon mo iakap janah sèkel mo ia mangan. Sinderrang menghantari pangaan dèng lako bana, gabè meralaten mo ia. 10:11 Idah mo tupung mbuka langit. Nai idah mo itontoni sada bekkas bagè kaèn mbellang i langit nai, merèket ngo gennep sokina siempat i, itantan mi terruh. 10:12 Lot ngo gennep macam binatang siempat nèhè ibas sinitantan i, bagi ma ngo dekket simenjoror i tanoh i pè, bak manuk-manuk simerkabangen i. 10:13 Nai idengkoh mo sora mendokken tabasa, "O Petrus, kèkè mo kono! Sèati mo i janah pangan!" 10:14 Tapi nina si Petrus mo mengaloi, "Ngganè Tuhan! Oda nung dèng kupangan barang kadè pangaan haram bak mellamun." 10:15 Tapi nina sora i dèng ma mo tabasa, "Barang kadè sienggo ihalalken Dèbata, ulang idokken kono nola i haram!" 10:16 Tellu kali ngo mulak-ulak roh alaten idi, nai gabè terkèkè mo kaèn i mi sorga. 10:17 Bagè cara bingung mo si Petrus mangarusi i, kadè ndia lapaten alaten idi. Nderrang merpikir-pikir bagi dèng si Petrus, keppè enggo mo cènder i lebbè pèntu bekkasna i pasulaken si Kornelius, ai enggo kin ngo lebbèen ikuso-kusoi kalak i taba kalak perkuta i kan dikè bages si Simon i. 10:18 Nai dilo-dilo mo kalak i mengkusoken, "Isèn ngo ndia kiserrang sada kalak mergerar si Simon Petrus?" 10:19 Tikan merpikir-pikir dèng si Petrus tersèngèt lapaten alaten idi ndai, nina Tendi Dèbata mo mbangsa, "Alè Petrus lot ngo roh tellu kalak mennulusi kono! 10:20 Kèkè mo kono janah susur mi terruh, ulang ganggu ukurmu mengèkutken kalak i, ai Aku ngo pasulakken kalak i." 10:21 Nai susur mo si Petrus janah nina taba kalak i, "Aku ngo sinitulusen ndènè i. Kadè pana sebabna asa roh kènè?" 10:22 Nai ialoi kalak i mo, "Kapten Kornelius ngo pasulakken kami roh misèn. Sada kalak bujur ngo ia janah merkebiaren taba Dèbata; selloh ngo beritana i tengah-tengah kalak Jahudi. Idokken sada kalak malaèkat Dèbata ngo mbangsa, asa ipasulak nina mengaleng kono, janah asa roh kono mi bagesna; ai naing dengkohenna nina bamu nai alus sodip bak perulanna." 10:23 Jadi iarahken si Petrus mo kalak i mi bages janah mermalam i sidi. Sibarembenkenna i berkat mo kalak i, dekket ma ngo dèba kalak sipercaya i kuta Jope nai mendengani kalak i. 10:24 Sibarembenkenna soh mo kalak i mi Kaisarèa. Enggo kin ngo mèma-mèma si Kornelius rebbak dekket karina sincelketna bak supan-supanna pè sienggo nitenggona. 10:25 Asa soh kessa mo si Petrus, mèter isimbak-simbak si Kornelius mo ia ninganna mersembah i hadeppenna. 10:26 Tapi iteggu si Petrus mo ia asa cènder ninganna idokken, "Kèkè mo kono! Ai aku pè jelma ngo." 10:27 Nai lako mbengket mi bages, dak mengeranai ngo kalak i sidua. Idah mo enggo mèduk keppè jelma mèmasa i bages i. 10:28 Nai nina mo taba kalak ni sidi, "Ibettoh kènè ngo pantangen mbellen ngo bai kalak Jahudi mendahi barang mersaor dekket bangsa sidèban. Tapi enggo idokken Dèbata taba aku, oda ndorok dokkenken haram barang kotor jelma barang tah jelma bakunè pè i. 10:29 Kumarna naidi ngo asa oda pella kujua tikan ialengi kènè aku. Asa mengkuso mo aku bagèndari; kadè ngo pana perluna asa idokken kènè roh aku mi sènda?" 10:30 Nai ipeterrang si Kornelius mo, "Empat ari sienggo laus tupung bagèen ma kettikana pukkul tellu, mersodip ngo aku i bagesku èn. Sintempu mèter cènder mo i lebbèngku sada kalak daholi merpakèen mbulan merkillong-killong, 10:31 mendokken taba aku, 'Alè Kornelius, enggo idengkohken Dèbata sodipmu dekket nibakinmu mermasèh atè i merkitè pemerrèkenmu i. 10:32 Jadi pasulak mo mi kuta Jope lako mendiloi si Simon mergarar Petrus, kiserrang ngo ia i bages si Simon tukkang koling-koling, kan biding laut ngo bagesna i.' 10:33 Nai mèter kupasulak mo mengalengi Kono. Bagèndari pè enggo pulung kami karinana isèn i hadeppen Dèbata lako mendengkohken karina sinidokken Dèbata mbang Kono sinaing bagahenkenmu bangku." 10:34 Jadi mengerana mo si Petrus, "Bagèndari enggo tangkas kuantusi, dos ngo ibaing Dèbata taba jelma karinana! 10:35 Barang isè merkebiaren midah Dèbata janah mengulaken kebennaren, ijalo Dèbata ngo ia. 10:36 Ibettoh kènè ngo beritana sinipesakat Dèbata taba kalak Israel, imo Berita Simerandal merkitè-kitè Jesus Kristus; Ia ngo Tuhan ni karina jelma. 10:37 Ibettoh kènè ma ngo kadè simasa i Judèa, mulai i Galilea nai, imo i podi perridiin nipeddahkensi Johanes. 10:38 Imo tersèngèt Jesus kalak Nazaret sienggo iminaki Dèbata merkitè Tendi Perbadia bak kuasana pè. Dak merdalani ngo Jesus idi i suberri ladang lako memmaingken simerandal janah pejuahken kalak si ni sellapen sibolis, kerna dak idengani Dèbata ngo Ia. 10:39 Kami ngo saksi tersèngèt karinana nibakinna i, i tanoh Jahudi dekket i Jerusalem. Tukasi pè bagidi gabè ipusa janah ipersilangken kalak i ngo Ia. 10:40 Tapi ipegelluh Dèbata ngo Ia i ari petelluken, janah ipetarar ngo dirina taba jelma, 10:41 tapi pellin taba kalak si ni pilih Dèbata arnia nai kin ngo kessa, imo mahan saksiNa, ai rebbak mangan bak mènum ngo kami dekketsa, enggo kessa balik nggelluh Ia i kemmatèen nai. 10:42 Ia ngo pasulakken kami lako menjamitaken dekket memmedahken taba jelma nterrem, magahken Ia ngo enggo ipebangkit Dèbata kin gabè Penghukum taba kalak singgelluh bang taba kalak sienggo matè pè. 10:43 Karinana ngo nabi-nabi mengindangken tersèngèt Ia, ai nina kalak idi, karinana jelma sipercaya taba Jesus terolih kesasaan dosa merkitè gerar Jesus i." 10:44 Sinderrang mengerana dèng si Petrus, mèter susur mo Tendi Dèbata janah isenggeppi mo kalak i karina simendengkoh kata i ndai. 10:45 Gabè lengang ngo karina kalak Jahudi sienggo percaya simendengani si Petrus i Jope nai, kumarna iberrèken Dèbata ngo TendiNa bang taba kalak siso Jahudi pè. 10:46 Kerna idengkoh ngo mengeranai kalak idi ibas kata sidèban, lako memoji-moji kebelgahen Dèbata. Nai nina si Petrus mo, 10:47 "Tengen kènè mo, enggo bagè kami kalak èn menjalo Tendi Perbadia. Jadi lot dèng kalak ndorok mengambati kalak i iperidi merkitè laè?" 10:48 Nai idokken si Petrus mo asa iperidi kalak i mi bagasen gerar Jesus Kristus. Enggo kessa pul idi karinana, ièlèk-èlèk kalak i mo si Petrus, asa merian i sidi lebbè ia giam barang sadikè dekkah.
11:1 Idengkoh karina Apostèl dekket sipercaya ni Judèa mo enggo dekket keppè bangsa sidèban menjalo kata Dèbata. 11:2 Nai roh kessa mo si Petrus mi Jerusalem, ilagai kalak i mo ia, nina mo, 11:3 "Kasa ibengketti kono bages kalak siso mertakkil? Janah mangan nola dèng ma kono rebbak dekket kalak i?" 11:4 Nai tembir mo isukutken si Petrus taba kalak i karinana sienggo masa i, nina mo, 11:5 "Sinderrang mersodip aku i kuta Jope, nai kuidah mo sada alaten. Kuidah mo susur sada bekkas mbellang bagè cara kaèn merempat soki janah bagè itantan i langit nai roh mi lebbè-lebbèngku. 11:6 Nai tikan kuperdatèken mi bagasen, gabè kuidah mo lot i sidi karina matcam binatang-binatang siempat nèhè, bagi ma dekket pinakan-pinakan bak simenjoror bang manuk-manuk pè. 11:7 Kudengkoh ma mo sora mendokken taba aku, 'Kèkè mo ko Petrus! Sèati mo i janah pangan mo!' 11:8 Tapi ningku mo mengaloi, 'Ngganè merrebbu alè Tuhan! Oda nung dèng kuakapi pangaan haram bak mellamun.' 11:9 Tapi nina sora i nola mo i langit nai, 'Barang kadè sienggo halal dok Dèbata ulang idokken kono nola haram i.' 11:10 Sanga ngo tellu kali kuidah roh simasa i, nai ipè asa irintak mi sorga. 11:11 Nai mèter soh ma mo gejapkenna idi pasulaken sitellu kalak i Kaisarèa nai mi bekkas nami lako mennulusi aku. 11:12 Nai nina Tendi i mo taba aku, asa ulang ganggu ukurku lako laus rebbak dekket kalak i. Janah dekket ngo denganku siennem kalak èn mi Kaisarèa, jadi kubengketti kami mo bages si Kornelius i. 11:13 Nai isukutken si Kornelius mo bai nami sienggo niidahna malaèkat cènder ibagasen sapona janah mendokken tabasa, 'Pasulak mo mengalengi si Simon simergerar Petrus mi Jope. 11:14 Asa ia magahken taba kono kata kenggelluhen, asa maluah kono dekket pengisi bagesmu!' 11:15 Tapi sinderrang merjamita dèng aku i sidi mèter senggep mo Tendi Perbadia taba kalak i, tosè bagè banta i mulana i. 11:16 Nai kuèngèt mo nidokken Tuhan i, 'Laè ngo ukum iperidiken si Johanes, tapi iperidi ngo kènè merkitè Tendi Perbadia!' 11:17 Jadi ntangkas ngo enggo siidah, mula dos ngo keppè sibasa-basa Dèbata bai kalak siso Jahudi sienggo gabè percaya bai Tuhan Jesus Kristus dekket basa-basa banta, bakunè mo pemmaingku mengambati Dèbata?" 11:18 Enggo kessa idengkoh kalak idi kata i, gabè nono nai ngo kalak i. Nai ipoji kalak i mo Dèbata, nina mo, "Mula bagidi ngo keppè, dekket ngo taba kalak siso Jahudi iberrèken Dèbata lako tobat, asa gabè mi kenggelluhen." 11:19 Kessa nai terbunuh si Stefanus, gabè iletlet mo kalak sipercaya taba Jesus, nai gabè mèrap mo kalak idi. Dèba laus mi Penesia, dèba mi pulo Siprus dekket mi Antiokhia. Jadi ningan merdalan i kalak idi, isukutken kalak i ngo kata Dèbata, tapi pellin taba kalak Jahudi sambing ngo kessa. 11:20 Tapi lot ngo dèba kalak sipercaya i kalak Siprus dekket kalak Kirene roh mi kuta Antiokhia, isukutken kalak i ngo Berita Simerandal tersèngèt Jesus i sidi bang mendahi siso meragama Jahudi pè. 11:21 Kumarna ipergegohi kuasa Tuhan i ngo kalak idi, gabè mèduk ngo bai kalak i nai percaya janah pesakatken dirina bai Tuhan i. 11:22 Soh ngo berita kalak i mi Jerusalem, nai ipasulak mo si Barnabas mi Antiokhia. 11:23 Soh kessa mo si Barnabas gabè idah mo sibasa-basa Dèbata taba kalak si nisidi, lolo kalohoon mo atèna. Nai ipeddahi mo kalak i karina, asa tettap ukur kalak i menguèi taba Tuhan i. 11:24 Merdemu kumarna kalak bujur ngo si Barnabas janah dak iiani Tendi Perbadia bana perkepercayaen mbellen, gabè mbuè ngo kalak terabin mengèkutken Tuhan i. 11:25 Nai laus mo si Barnabas mi kuta Tarsus mennulusi si Saulus. 11:26 Enggo kessa pejumpa dekket si Saulus, iarahken mo si Saulus i mi Antiokhia, janah sitahun mbellen mo kalak i rebbak kuria si ni sidi janah mengajari mbuè kalak janah i Antiokhia i mo perlebbè igerari sipercaya taba Jesus, kalak Kristen. 11:27 Sinderrangna idi lot mo roh nabi-nabi i Jerusalem nai mi kuta Antiokhia. 11:28 Sada kalak bai kalak i nai mergerar si Agabus. Ikuasai Tendi Dèbata mo ia, nai iberitaken mo masa lèhè mbellen i suberri dunia èn. (Tuhu ngo masa kellèhèen i tikan Kèsar Klaudius). 11:29 Nai mertuptup mo kalak sipercaya taba Jesus asa menenges tumpak kalak i, barang sadikè terbakinsa mendahi dengan sitading i Judèa. 11:30 Ipesaut kalak i mo tuptupna i, itengesken mo arap si Barnabas dekket si Saulus taba sintua kuria i.
12:1 I tikanna i ma mo ilaluken si Herodes tanganna mi kuria i lako pepersuk-persukken kalak idi. 12:2 Ibunuh ngo si Jakobus merkitè pedang, imo dengan sibeltek si Johanes. 12:3 Idah si Herodes kessa mo lolo ngo atè kalak Jahudi, makin iempet mo mengeletlet sipercaya i; idokken mo menangkup si Petrus tupung Pèsta Paskah imo Pesta mangan Roti Siso Meragi. 12:4 Enggo kessa itangkup, ipemasuk mo mi kurungen, janah idokken ma mo menjaga empat regu soridadu, gennep regu empat kalak soridadu. Isura-sura ukurna ngo, lebbè pul Pèsta Paskah i, asa ihukum ia i hadeppen jelma nterrem i. 12:5 Jadi dak ijaga kalak i ngo si Petrus i kurungen i; tapi ukum kuria i dak iempet kalak i ngo mennodipken si Petrus taba Dèbata. 12:6 Bernginna tikan naing ihukum si Herodes si Petrus i jolo jelma nterrem, terpeddem ngo ia irantè kalak idi ipas dua rantè ninganna ihapit dua kalak soridadu. I jolo pèntu kurungen idi pè lot ngo soridadu merjaga-jaga. 12:7 Nai sintempu mo cènder malaèkat Tuhan i bilik kurungen i mercuhaya mo sada penendang i sidi. Nai igoyok malaèkat i mo si Petrus asa ndungo, ninganna idokken, "O Petrus! Ndungo mo kono!" Nai mèter ntang-tang mo gejapkenna idi rantè bessi i tangan si Petrus i nai. 12:8 Nai idokken malaèkat i dèng ma mo, "Selluk mo geddamu, janah mercipatu mo kono!" Jadi iselluk si Petrus mo geddana janah iberretken mo cipatuna. Enggo kessa bagidi nina malaèkat idi dèng ma mo, "Selluk mo jubahmu janah èkutken mo aku!" 12:9 Nai ièkutken si Petrus mo malaèkat i mi ruar kurungen i. Tapi oda satdar dèng si Petrus, tah tuhu masa bagidi bana merkitè malaèkat i, tah oda, ai idok ngo alaten si niidahna i. 12:10 Tapi enggo kessa ilausi kalak i perjaga perlebbè dekket peduaken, soh mo kalak i mi pèntu bessi, imo pèntu lako mi kuta. Nai mènter mukaken bana ngo pèntu i, gabè karuar mo kalak i janah merdalan i sada lorong lako mi kuta. Sintempu ma mo mèter mersep malaèkat i sirang bana nai. 12:11 Nai satdar mo si Petrus, nina mo, "Baru pè asa ntangkas kubettoh, ipasulak Tuhan i ngo keppè malaèkatNa lako mengerampasi aku ipas kuasa si Herodes nai bagidi ma dekket ipas sura-sura sinaing bakinen kalak Jahudi bangku." 12:12 Jadi enggo kessa ntangkas bana simasa i, laus mo si Petrus mi bages si Maria inang si Johanes sinigeraren ma si Markus. Mèduk ngo mertumpu i sidi janah dak mersodip. 12:13 Ituktuki si Petrus mo pèntu bages idi i ruar, nai roh mo sada kalak naposo daberru mergerar si Rode lako memuka pèntu. 12:14 Itandai ngo sora simenuktuki i sora si Petrus. Tapi kumarna lolona oda mèter ibukaken dèng pèntu i, tapi lojang ngo ia mendahi jelma simertumpu i bages i magahken enggo keppè i ruar pèntu jolo si Petrus. 12:15 Gabè nina kalak i mo mbang daberru i, "Enggo gila kono pana." Tapi dak igegohi si Rode ngo mendokken, "Tuhu-tuhu ngo si Petrus ni ruar i." Tapi nina kalak i mo mbangsa, "Malaèkatna ngo i." 12:16 Tapi sinderrang bagidi, dak iempet si Petrus ngo menuktuki pèntu i. Jadi sinderrang ibuka kalak i kessa mo pèntu i, idah kalak i mo si Petrus, gabè bengngap kalohoon mo kalak idi. 12:17 Tapi ikilapken si Petrus mo tanganna taba kalak i asa ndong, nai isukutken si Petrus mo bai kalak i sinibaing Tuhan i lako menogikensa mi ruar kurungen i. Janah idokken dèng ma, "Bagahken kènè mo simasa èn taba si Jakobus dekket mendahi karina dengan." Jadi laus mo ia i sidi nai mi bekkas sidèban. 12:18 Nterrang kessa nola ari sibarembenkenna i, gontar mo karina soridadu perjaga i. Mersèto ngo ukur kalak i tersèngèt simasa taba si Petrus i. 12:19 Iperèntahken si Herodes mo lako menulusi si Petrus. Tapi kumarna oda jupa ia, gabè ihukum matè mo soridadu perjaga i. Mbungkas ma mo si Herodes i Judèa nai mi Kaisarèa. 12:20 Melaga kalohoon ngo si Herodes taba kalak Tirus dekket Sidon, kumarna i roh mo kalak i rebbakken mengadepsa. Idahi kalak i mo perlebbè si Blastus kettoken si Herodes asa kan kalak i ia. Nai laus mo kalak i mendahi si Herodes mengèlèk-èlèksa asa merdamè, kumarna mergantung mi nagerri si Herodes ngo pangaan kalak i. 12:21 Nai tupung ari sienggo ititi kin, ipakkè si Herodes mo pakèen kerajanna, janah kundul mo ia i babo kundulen raja, janah merpidato mo ia taba ginemgemna. 12:22 Nai mèter isurakken jelma nterrem i mo, "Sora Dèbata ngo i, oda sora jelma!" 12:23 Tapi mèter iparat malaèkat Tuhan mo si Herodes, kumarna oda ipesangap Dèbata. Ipangan olong-olong mo dagingna, janah lustun matè. 12:24 Jadi makin sar mo kata Dèbata janah makin mergegoh. 12:25 Balik mo si Barnabas dekket si Saulus i Jerusalem nai enggo kessa ipessoh kalak i tinenges masèh atè i, janah iarahken kalak i ngo dekket si Johanes Markus.
13:1 Ukum i kuria Antiokhia lot ngo tikala nai nabi bak guru pè, imo si Barnabas dekket si Simeon igerari ma si Nègèr bak si Lucius kalak Kirene dekket si Mènakèm dengan raja Herodes rebbak mbelgah, dekket si Saulus. 13:2 Tupung sidari tikan mengulaken ulaan menguèi Tuhan janah puasa kalak idi, idokken Tendi Dèbata mo taba kalak idi: "Pejaè kènè mo si Barnabas dekket si Saulus bangKu, ai naing lot bahaan kalak i petupungenKu." 13:3 Jadi puasa mo kalak i sisada kuria i janah mersodip, nai iampèken kalak i mo tanganna taba si Barnabas dekket taba si Saulus, kessa bagidi ipeberkat mo kalak i sidua. 13:4 Nai berkat mo kalak i si nipeberkat Tendi Dèbata laus mi kuta Seleukia, i sidi nai merkeppel mo kalak i mi pulo Siprus. 13:5 Soh kessa kalak i mi kuta Salamis, isukutken kalak i mo kata Dèbata i bages perguruun kalak Jahudi. Dekket ma ngo si Johanes Markus dengan kalak i. 13:6 Iagahi kalak i mo karina pulo i, nai soh mo kalak i mi kuta Pafos. Pejumpa mo kalak i, i sidi dekket sada kalak Jahudi mergerar Bar Jesus. Perhèlmu ngo ia janah mengaku dirina nabi. 13:7 Meralè-alè ngo ia dekket gubèrnur pulo i simergerar Sergius Paulus kalak singgeddang radumen mpantas niasè. Idilo Gubèrnur i mo si Barnabas dekket si Saulus, kerna sèkel kalohoon ia naing mendengkoh kata Dèbata. 13:8 Tapi ialo si Elimas perhèlmu i ngo si Barnabas dekket si Saulus (Elimas ngo gerarna i kata Junani), lako mengambati asa ulang percaya gubèrnur i taba Jesus dok atèna. 13:9 Tapi ukum si Saulus -- simergerar ma Paulus -- ikuasai Tendi Dèbata mo ia, ijengerri mo si Elimas perhèlmu i, 13:10 nina mo, "Èh, kono pendobo janah dukak sibolis! Musuh ni karina kebennaren! Oda pettadinmu dèng peppilitken nipergeddo Dèbata paluahken jelma manusia? 13:11 Gejapkenna èn mo kono ihukum Tuhan i! Pètung mo kono lebbè, asa ulang idah ko nèngè binendang mataniari!" Nai mèter gejapkenna idi mo iakapken si Elimas bagè lot mbèrèng mennutupi matana, nai mèter gellap mo idah; jadi dak dadap-dadap mo ia lako mennulusi jelma asa lot mennegusa. 13:12 Jadi idah gubèrnur i kessa mo simasa i, gabè percaya mo ia taba Jesus, ai kagum kalohoon ngo ia mi peddah tersèngèt Tuhan i. 13:13 Nai berkat mo si Paulus dekket denganna i kuta Pafos nai, merkeppel mi kuta Perga si ni Pamfilia. Tapi itadingken si Johanes Markus ngo kalak idi i si, ai laus ngo ia balik mi Jerusalem. 13:14 I Perga nai ipuspusken kalak i ngo dalanna soh mi Antiokhia si ni Pisidia. Tupung ari Sabat, laus mo kalak i mi bages perguruun janah kundul i sidi. 13:15 Enggo kessa pul ijaka Bukku si Musa dekket Bukku Nabi-nabi, ipasulak pengendeng perguruun i mo mendokken rana mendahi si Paulus bak taba denganna i bagèen, "Kènè alè dengan, tah lot peddah sinaing dokkenken ndènè taba sipulung èn, dokken kènè mo!" 13:16 Nai mèter kèkè mo si Paulus, ikilapken mo tanganna taba sipulung i, janah nina mo, "Kènè alè denganku kalak Israel dekket karina dengan sipulung isèn, simerkebiaren midah Dèbata, dengkohken kènè mo aku lebbè! 13:17 Ipilih Dèbata bangsa Israel ngo empungta, janah ibaing gabè bangsa mbellen tikan ginemgem dèng kalak idi i tanoh Mesir. Nai itogiken Dèbata mo kalak i karuar i tanoh Mesir nai merkitè-kitè kuasa mbellen. 13:18 Dak ianju-anju Dèbata ngo kalak i empat puluh tahun dekkahna i padang gurun. 13:19 Pitu bangsa ngo Irabbatken kalak idi i tanoh Kanaan, janah ibagi-bagiken mo tanohna i bai bangsa Israel gabè milikna. 13:20 Karinana i, kira-kira empat ratus limapuluh tahun mo dekkahna. Enggo kessa i bagi-bagi kalak i tanoh Kanaan, ipebangkit Dèbata mo sigantung puhpuh bai kalak idi. Ukum sigantung puhpuh perpodi, imo Nabi Samuel. 13:21 Enggo kessa i, ipido kalak idi mo asa lot rajana. Jadi ipebangkit Dèbata mo si Saul gabè raja, imo anak si Kis marga Benjamin; empat puluh tahun dekkahna gabè raja si Saul. 13:22 Enggo kessa ipesampur Dèbata ia i kerajanna nai, ipebangkit Dèbata nola mo si Daud gabè raja kalak i. Janah bagèen mo pendokken Dèbata tersèngè si Daud, 'Enggo dapet Aku si Daud anak si Isai, sipesennangken ukurku. Ia mo pessautken nipergeddo atèngKu! 13:23 Ipas pemparenna nai ngo roh ibaing Dèbata sada kalak Raja Sipaluah bai bangsa Israel, bagè sienggo iperbagah-bagah Dèbata kin imo Jesus. 13:24 Sinderrang makdèng mengula Jesus enggo idiungken si Johanes taba kalak Israel, asa tobat kalak i janah uè iperridi. 13:25 Mayak punca ulaan si Johanes idi, idokken ngo taba jelma nterrem i, 'Oda ngo aku si nipèma-pèma ndènè i. Èngèt mo, solo-solona ngo aku. Salang mengosari èkèt cipatuNa sambing pè madèng sanggup aku,' nina. 13:26 Kènè alè karina dengan ipas pemparen si Abraham nai, dekket karina kè simertumpu i sèn simerkebiaren midah Dèbata. Banta ngo itenges Dèbata kata kenggelluhen èn; 13:27 ai oda itandai pengisi kuta Jerusalem dekket pengulu-pengulu kalak idi, Ia ngo Sipaluahken i. Tapi oda iarti kalak i peddah nabi si nijaka kalak i gennep ari Sabat, gabè ihukum kalak i ngo Jesus. Merkitè bagidi, saut mo sinidokken nabi-nabi i. 13:28 Tukasi pè oda lot jumpa kalak i salahna memmakin tuk merutang kessah, ipidoken kalak i ngo bai si Latus asa ibunuh Ia. 13:29 Asa enggo kessa ipessaut kalak i bagè sitersurat idi kin tersèngèt Ia, ipesampur kalak i mo bangkèNa i kayu persilang idi nai, itanem mo mi pendèbaan. 13:30 Tapi ipegelluh Dèbata ngo Ia i kemmatèen nai. 13:31 Nai barang piga-piga ari dekkahna ipacidah ngo dirina taba dengan siroh i Galilea nai mi Jerusalem. Kalak i ngo bagèndari gabè saksi taba bangsa Israel. 13:32 Jadi bagèndari kutaruhken kami ngo Sukuten Kelluahen èn mendahi kènè; siniperbagah Dèbata taba empungta. 13:33 Enggo ipessaut Dèbata mendahi kita pinemparna, imo sinderrang ipekèkè Jesus i. Bagè sitersurat ma ibas endè Psalm pasal dua: 'AnakKu ngo kono; sidari èn ngo Kono Kuperkuanak!' 13:34 Enggo kin ma ngo ilumbaken Dèbata, ipekèkè Ia ipas simatè nai, janah mak ndorok nèngè iakapi kemmatèen bak macik ibagasen kuburen, ai nina Dèbata ngo: 'Kuberrèken mo taba kènè bagah-bagah bennar janah tuhu, sienggo Kuperbagah-bagah taba si Daud.' 13:35 Bagidi dèng ma ipas ayat sidèban: 'Oda ipaduè kono idahen NaposoMu sibennar i kinimacik!' 13:36 Ukum si Daud, enggo kessa ipessaut lemmo atè Dèbata sidekkah nggelluhna, kumellip ngo ia, janah tertanem i gembar kuburen empungna. Macik ngo ia janah kembali nancuè. 13:37 Tapi ukum Jesus sienggo ipegelluh Dèbata i kemmatèen nai, oda ngo mellala bak salpun. 13:38 Asa alè dengan bettoh kènè mo, 'Kumarnaken Ia ngo asa nisukutken bai ndènè tersèngèt kesasaan dosa.' 13:39 Janah ibagasenSa ngo maluah karina sipercaya, ipas dosa-dosna nai, siso ndorok dapet kènè ipas pati-patiin si Musa. 13:40 Kumarna naidi, manat mo kènè, asa ulang mengenna taba kènè, bagè nidokken nabi-nabi i; ai nina ngo: 13:41 Perdatèken kènè mo alè perpis mata, Lengang ngo ukur ndènè, nai matè mo! Bagèndari Kupehana ngo sada simasa i tengah-tengah ndènè tapi oda tok kènè, tukasi pè lot kalak peterangken taba kènè.' " 13:42 Asa tikan naing laus si Paulus dekket si Barnabas mennadingken bages perguruun i, ipidoken kalak i mo, asa iolihi nola peterangken kata idi i ari Sabat siroh. 13:43 Karuar kessa mo si Paulus dekket si Barnabas i bages perguruun i nai, mèduk ngo kalak Jahudi dekket bangsa sidèban sienggo masuk merragama Jahudi mengèkutken kalak i. Nai ipeddahi janah ijamitai mo kalak idi, asa tettap merian i bagasen masèh atè Dèbata. 13:44 Jadi tupung ari Sabat siroh i nola hampir ngo karina si nikuta i roh mendengkohken kata Tuhan i. 13:45 Idah kalak Jahudi kessa mo nterrem kalohoon roh jelma i, nangis mo atè kalak i, gabè ialo janah irèhèi mo jamita si Paulus i. 13:46 Tapi makin mbohona ngo si Paulus dekket si Barnabas mendokken, "Patut bai ndènè ngo nemmuken sukuten kata Dèbata. Tapi karna oda uè kènè menjalo, kenggelluhen siamman sumendah mengèkutken pertimbangen ndènè i, gabè oda mo terolih kènè. Kerna naidi mendahi bangsa sidèban mo kudempakken kami. 13:47 Ai bagèen ngo idokken Tuhan i bai nami: 'Kupasulak mo kono gabè penendang mendahi bangsa sidèban, siso bangsa Jahudi. Asa iembahken kono kelluahen taba suberri jelma i dunia èn.' " 13:48 Idengkoh kalak siso bangsa Jahudi kessa mo rana i, lolo kalohoon mo kalak i, ipoji kalak i mo kata Tuhan i. Jadi gabè percaya mo sienggo nitentuken Dèbata kin terolih kenggelluhen siamman sumendah. 13:49 Jadi sar mo kata Tuhan idi i suberri nagerri i. 13:50 Tapi dak igaru kalak Jahudi mo pengetua-pengetuai dekket daberru-daberru kalak mersangap ni kuta i simerkebiaren taba Dèbata. Gabè ibaing kalak i mo peraloon taba si Paulus dekket si Barnabas, nai iusir mo kalak i sidua i nagerri i nai. 13:51 Jadi ipaspasken apostèl i mo abu nèhèna i hadeppen kalak i mahan pernèngèten, nai laus mo kalak i mi Ikonium. 13:52 Tapi dom sampang atè ngo sipercaya ni Antiokhia ibaing Tendi Perbadia.
14:1 I Ikonium pè ibengketti si Paulus dekket si Barnabas ma mo bages perguruun kalak Jahudi janah merjamita ma ngo kalak idi i sidi. Kemulihken jamitana i mèduk ngo percaya bai Jesus, kalak Jahudi bak kalak Junani. 14:2 Tapi dak ipejuju janah igara-garai kalak Jahudi simenulak kata i mo ukur kalak siso Jahudi, gabè nggerger mo atè kalak i midah kalak sienggo percaya bai Jesus. 14:3 Kerna i sidi ngo si Paulus dekket si Barnabas merrian narih ndekkah. Lolo janah pang ngo kalak i merjamita mengasangken Tuhan i. Nai iberrèken Dèbata mo taba kalak i kuasa lako maing tanda kellengangen mahan bukti, magahken tuhu ngo nidokken kalak i. 14:4 Tapi gabè merralo ngo pengisi kuta i, dèba kan kalak Jahudi, dèba nai kan apostèl sidua kalak i. 14:5 Nai mertaki mo kalak Jahudi dekket siso Jahudi bang pengetuai bak pengulu kalak i siso percaya naing menggosa bak mendersa apostèl i merkitè mementiri dekket batu. 14:6 Terbertik kessa mo taki-taki i taba apostèl, mperrus mo kalak i mi kuta si ni nagerri Likonia, imo kuta Listra dekket Derbe bak mi kuta sikulilingna. 14:7 I kuta i pè ijamitaken kalak i ngo Sukuten Kelluahen i. 14:8 Lot mo sada kalak daholi i kuta Listra, pangpangen ngo ia kessa nai tubuh. Dak kundul sambing ngo ia, ai laju ngo oda pennah terbakinsa merdalan kumarna pangpangen i. 14:9 Idengkoh ngo si Paulus merjamita i. Nai itengen si Paulus mo ia, gabè idah si Paulus percaya ngo ia janah ndorok memmaing malum sakitna i. 14:10 Jadi ipegang si Paulus mo sorana mendokken, "Cènder mo kono ipas nèhèmu i!" Nai mèter kèkè mo ia janah merdalan. 14:11 Idah jelma nterrem i kessa mo sinibaing si Paulus i mersurak-surak mo kalak i mendokken i kata Likaonia, "Enggo roh sembahenta i tosè bagè rupa jelma mendahi kita!" 14:12 Igarari kalak i mo si Barnabas 'Zeus' janah si Paulus ierari kalak i 'Hermes' kerna pengerana ia. 14:13 Nai roh mo imam sembahen Zeus nikèparen kuta i merembah kerbo tonggal dekket lambè rebbak dekket jelma nterrem i memèlèken pèlèen bai rasul-rasul i. 14:14 Idengkoh si Barnabas dekket si Paulus kessa mo si nibakin jelma nterrem i, iribaki kalak i mo olesna, lojang mo kalak i mi tengah-tengah jelma nterrem i ninganna isurakken: 14:15 "Kènè alè dengan, kasa bagidi ibaing kènè? Jelma ngo kami dos dekket kènè. Asa roh pè kami mi sènda lako menaruhken Sukuten Kelluahen ngo bai ndènè, asa itadingken kènè siso merguna i, janah asa gabè mulak kènè mendahi Dèbata singgelluh i, situmempa langit dekket tanoh bak laut dekket karina pengisina. 14:16 Kumarna ibelli Dèbata ngo karinana bangsa tikanna idi nai mersitendeng dalanna. 14:17 Tapi bagidi pè i, dak ibaing ngo kesaksiin tersèngèt diriNa, imo merkitè basa mendè. Ai iberrèken ngo bai ndènè udan i dates nai dekket kiniduma. Ninganna i, ipesennang ngo ukur ndènè merkitè pangaan dekket sampang atè." 14:18 Tukasi pè bagidi, mahal ngo iakap apostèl i lako mennondati jelma nterrem i, asa ulang saut kalak idi ipèlè. 14:19 Nai roh mo dèba kalak Jahudi i Antiokhia dekket i Ikonium nai si ni nagerri Psidia mi kuta Listra, iunung mo jelma nterrem asa gabè kan kalak i, jadi gabè ibentiri kalak i mo si Paulus dekket batu, iruah mo ia mi ruar kuta i. Enggo ngo matè ia ukum dokatè jelma nterrem i. 14:20 Tapi roh kessa mo sienggo percaya i cènder mengkulilingisa, kèkè mo ia janah rebbakken dekket sinterrem i balik mi kuta. Nai siberembenkenna i, berkat mo ia dekket si Barnabas mi kuta Derbe. 14:21 I Derbe, ijamitaken si Paulus bak si Barnabas mo Sukuten Kelluahen i, janah mèduk ngo kalak ni sidi gabè percaya bai Jesus. Nai enggo kessa i, balik mo kalak i mi Listra, nai mi Ikonium, nai mi Antiokhia si ni nagerri Psidia. 14:22 I kuta idi pè ipergegohi kalak i ngo kepercayaen sienggo percaya i, janah ipesèngèt asa ulang mondar kepercayaen kalak i bai Jesus, nina mo, "Kennah sibellus ngo lebbè matcam bagè kepersuken, nai ipè asa mbengket kita mi Kerajaen Dèbata." 14:23 Ipebangkit kalak i ngo i gennep kuria sigabè pengendeng. Merdengan sodip dekket puasa, ipessoh kalak i ngo pengendeng nipebangkitna i taba Tuhan sinikepercayaen kalak idi i. 14:24 Nai berkat mo si Paulus dekket si Barnabas menerusken perdalanen kalak i mengelausi nagerri Psidia soh mi Pamfilia. 14:25 Enggo kessa isukutken kalak i kata Dèbata i Perga, laus mo kalak i mi Atalia. 14:26 I sidi nai balik mo kalak i merkeppel mi Antiokhia. Kuta i mo tikala i bekkas kalak idi isohken taba Dèbata, asa iulaken kalak i ulaan si niulaken kalak i bagèndari. 14:27 Soh kessa mo kalak i mi Antiokhia, idokken kalak i mo merpulung si sada kuria i nai ibagahken kalak i mo karina nihanaken Dèbata merkitè-kitè kalak i. Bagi ma pemmaing Dèbata memmuka dalan bai kalak bangsa sidèban siso Jahudi, gabè percaya bai Jesus. 14:28 I kuta i mo si Paulus bak si Barnabas merian narih toko dekkahna rebbak dekket sipercaya ni sidi.
15:1 Lot mo roh barang piga-piga kalak i Judèa nai mi Antiokhia, memmeddahken bagèen, "Ukum oda mertakkil kènè mengèkutken pati-patiin Dèbata bagè nidokken taba si Musa, oda ndorok maluah kènè." 15:2 Ialoi si Paulus bak si Barnabas ngo kalak i. Jadi ipasulak mo si Paulus bak si Barnabas rebbak dekket barang piga-piga kalak denganna i Antiokhia nai laus mi Jerusalem lako mendahi apostèl bak pengendeng silot i sidi, mengkusoken persoalen i. 15:3 Itaruhken kuria i ngo kalak i soh mi ruar kuta i. Arap tanoh Penesia ngo kalak i merdalan, ilausi ma mo dekket Samaria. Ibagahken kalak i ngo, enggo dekket kalak siso Jahudi menjalo kata Tuhan idi i si, gabè lolo mo atè kalak i mendengkoh berita i. 15:4 Nai soh kessa mo kalak i mi Jerusalem, mendè ngo penjalo si sada kuria i bak apostèl dekket pengendeng-pengendeng i. Isukutken kalak i mo karinana si nibaing Dèbata merkitè kalak i. 15:5 Tapi kèkè mo dèba kalak Parisè sienggo gabè percaya i, "Kennah itakkil ngo janah kennah peddahen ngo kalak i asa iulaken pati-patiin Dèbata nipessohna merkitè si Musa." 15:6 Nai gabè pulung mo Apostèl i bagi ma dekket pengituai-pengituai lako mengeranai tersèngèt mi si. 15:7 Enggo kessa ndekkah kalak i mertukar pikiren, kèkè mo si Petrus, nina mo, "Kènè karina kaka anggi! Ibettoh kènè ngo, enggo ipilih Dèbata aku i tengah-tengah ndènè nai lako magahken Sukuten Kelluahen i taba kalak bangsa sidèban siso Jahudi, asa kalak idi pè mendengkoh janah percaya. 15:8 Ijalo Dèbata simemettoh ukur ngo kalak i. Ipetandaken ngo penjalona i merkitè-kitè iberrèken Tendina tosè bagè pemerrèkenNa i banta. 15:9 Oda lot kadè kalihna kita dekket kalak idi ibaing Dèbata, enggo kessa ipepanting ukurna merkitè kepercayaen i. 15:10 Nteng, kasa nola bagèndari naing ialo kènè Dèbata merkitè mengampèken sada kewajiben meberrat i mahan ulanken kalak idi, padahal empungta bak kita sendiri pè oda sanggup merembah barang mengulakensa? 15:11 Balikna, ai sikepercayai ngo merkitèken masèh atè Tuhan Jesus sambing ngo makin asa maluah kita. Kalak idi pè bagidi ma ngo." 15:12 Nai nono mo karina kalak simertumpu i. Nai idengkohken kalak i mo si Barnabas dekket si Paulus, pejojorken tanda bak kellengangen nibaing Dèbata i tengah-tengah bangsa sidèba siso Jahudi merkitèken kalak i. 15:13 Enggo kessa salpun iranaken kalak i karinana, ialoi si Jakobus mo, "Kènè karina kaka anggi, dengkohken kènè mo aku lebbè! 15:14 Ndai ngo ibagahken si Simon bakunè penatap Dèbata taba bangsa sidèban siso Jahudi i mulana nai, asa gabè ijalo kalak i gabè ummatNa. 15:15 Jadi merdemmu ngo i mi kata nabi-nabi, ai bagèen ngo isuratken: 15:16 'Enggo kessa i roh nola mo Aku lako pekkadèn bages si Daud sienggo merumpak i, janah kupelias nola mo sienggo ncèda i; 15:17 asa karina kalak sitadingna mennulusi Tuhan i rebbak dekket karina bangsa sidèban siso Jahudi sienggo Kudilo gabè milikKu.' Bagidi mo kata Tuhan, 15:18 sienggo ibagahken kin i sinderbi nai!" 15:19 Kerna naidi, mengèkutken pertimbangenku nina si Jakobus, "Oda ndorok susahenta nèngè kalak i si roh i bangsa sidèban idi nai mendahi Dèbata lako mennohken dirina. 15:20 Tapi sitengesken mo surat hatoren mahan sièngèten kalak i, asa ulang ipangan kalak i pangaan sienggo ipèlèken bai bègu, ulang ipangan jukut siso isèat, ulang ipangan daroh, ipeddaoh dirina ipas ulaan memmaing mellamun janah ulang merlangkah julu meddem. 15:21 Ai dak ijakaken ngo pati-patiin Dèbata gennep ari Sabat i bages perguruun silot i gennep kuta, imo niberrèken Dèbata merkitè si Musa." 15:22 Nai iputusken apostèl-apostèl dekket pengituai-pengituai bak kuria i mo barang piga kalak bai kalak i nai mahan utusen mi Antiokhia rebbak dekket si Paulus bak si Barnabas. Nai ipilih kalak i mo si Silas bak si Judas sinigeraren ma si Barsabas. Duana kalak èn imo kalak siterkemuka bai kalak sipercaya i Jerusalem. 15:23 Ibahan kalak i mo surat siembehenna bagèen, "Kènè karina dengan sienggo percaya bai Jesus Kristus, imo siso bangsa Jahudi kin, si lot i Antiokhia, i Siria bak Kilikia. Tab`i nami apostèl-apostèl bak pengituai-pengituai mo bai ndènè karinana. 15:24 Soh ngo bai nami berita, lot keppèken roh dèba bai nami nai mendahi kènè, mengeributi kènè merkitè-kitè peddah kalak i mengelalingken kènè. Oda ngo berkat sungkun nami i. 15:25 Kerna naidi enggo runggu kami janah enggo sada ukur nami lako pasulakken kalak ènda rebbak dekket si Barnabas bak si Paulus sikukekellengi kami. 15:26 Ukum kalak èn sidua, sienggo isomadaken ngo kessahna kumarna Tuhanta Jesus Kristus. 15:27 Kupasulak kami ngo si Judas dekket si Silas mendahi kènè, asa ibagahken bai ndènè keputusen nami merkitè rana pè taba kènè, imo sienggo kusuratken kami èn. 15:28 Enggo isetujui -- Tendi Dèbata bak kami pè selloh -- ngo dok atè nami, ulang pella iampèken taba kènè ulaan mbotong, laènken siperlu èn: 15:29 ulang pangan kènè pèlèen sienggo ipèlèken bai bègu, ulang pangan kènè daroh, ulang pangan kènè jukut siso isèat, janah ulang kènè merlangkah julu meddem. Mula ipesisi kènè ngo diri ndènè ibas karinana idi, enggo mengulaken simerandal kènè. Bagidi mo, njuah-njuah mo." 15:30 Enggo kessa mersitennahen nai ipeberkat kalak i mo utusen i laus mi Antiokhia, jadi soh kessa mo utusen idi, ipepulung mo karina ruas kuria i lako pesakatken surat i. 15:31 Nai ijaka kuria i kessa mo surat i, lolo kalohoon mo atè kalak i, ai terapo mo perrukuren kalak i. 15:32 Tapi ukum si Judas bak si Silas, nabi ngo kalak i. Matcam ngo bagèna jamita kalak i lako mempergegohi janah petegguhken ukur sinterrem i. 15:33 Enggo kessa narih ndekkah merian si Judas dekket si Silas i sidi, ipasulak kuria i mo kalak idi balik mendahi sipasulakkensa merembah kata lias atè. 15:34 Tapi ukum si Silas lemmo kalohoon ngo atèna merian i Antiokhia. 15:35 Si Paulus bak si Barnabas pè, narih ndekkah ma ngo merrian i Antiokhia. Isukutken kalak i ngo kata Tuhan i rebbak dekket dengan sidèbanna i pè. 15:36 Oda sadikè dekkah nai idokken si Paulus mo taba si Barnabas, "Laus nola mo kita mendahi karina dengan sienggo sijamitai idi kin mi gennep kuta, imo sienggo gabè percaya bai Jesus, tah enggo bakunè kalak i!" 15:37 Tapi ukum dokatè si Barnabas, naing mo nemmu dekket si Johanes simergerar Markus, 15:38 tapi ukum dokatè si Paulus, oda selloh nèngè dekket si Markus i, kumarna enggo pennah itadingken ia kalak idi i Pamfilia, janah oda uè mendengani kalak i mi ulaan i. 15:39 Jadi gabè merselisih mo kalak i sidua, sanga mersirang. Jadi iarahken si Barnabas mo si Markus denganna merbungki mi pulo Siprus. 15:40 Ukum si Paulus, si Silas ngo iarahken mahan denganna. Berkat mo kalak i enggo kessa lebbè ipessoh dengan ni Antiokhia i kalak i mi bagasen masèh atè Tuhan i. 15:41 Ikulilingi kalak i mo tanoh Siria dekket Kilikia, lako petegguhken kuria ni sidi i.
15:1 Lot mo roh barang piga-piga kalak i Judèa nai mi Antiokhia, memmeddahken bagèen, "Ukum oda mertakkil kènè mengèkutken pati-patiin Dèbata bagè nidokken taba si Musa, oda ndorok maluah kènè." 15:2 Ialoi si Paulus bak si Barnabas ngo kalak i. Jadi ipasulak mo si Paulus bak si Barnabas rebbak dekket barang piga-piga kalak denganna i Antiokhia nai laus mi Jerusalem lako mendahi apostèl bak pengendeng silot i sidi, mengkusoken persoalen i. 15:3 Itaruhken kuria i ngo kalak i soh mi ruar kuta i. Arap tanoh Penesia ngo kalak i merdalan, ilausi ma mo dekket Samaria. Ibagahken kalak i ngo, enggo dekket kalak siso Jahudi menjalo kata Tuhan idi i si, gabè lolo mo atè kalak i mendengkoh berita i. 15:4 Nai soh kessa mo kalak i mi Jerusalem, mendè ngo penjalo si sada kuria i bak apostèl dekket pengendeng-pengendeng i. Isukutken kalak i mo karinana si nibaing Dèbata merkitè kalak i. 15:5 Tapi kèkè mo dèba kalak Parisè sienggo gabè percaya i, "Kennah itakkil ngo janah kennah peddahen ngo kalak i asa iulaken pati-patiin Dèbata nipessohna merkitè si Musa." 15:6 Nai gabè pulung mo Apostèl i bagi ma dekket pengituai-pengituai lako mengeranai tersèngèt mi si. 15:7 Enggo kessa ndekkah kalak i mertukar pikiren, kèkè mo si Petrus, nina mo, "Kènè karina kaka anggi! Ibettoh kènè ngo, enggo ipilih Dèbata aku i tengah-tengah ndènè nai lako magahken Sukuten Kelluahen i taba kalak bangsa sidèban siso Jahudi, asa kalak idi pè mendengkoh janah percaya. 15:8 Ijalo Dèbata simemettoh ukur ngo kalak i. Ipetandaken ngo penjalona i merkitè-kitè iberrèken Tendina tosè bagè pemerrèkenNa i banta. 15:9 Oda lot kadè kalihna kita dekket kalak idi ibaing Dèbata, enggo kessa ipepanting ukurna merkitè kepercayaen i. 15:10 Nteng, kasa nola bagèndari naing ialo kènè Dèbata merkitè mengampèken sada kewajiben meberrat i mahan ulanken kalak idi, padahal empungta bak kita sendiri pè oda sanggup merembah barang mengulakensa? 15:11 Balikna, ai sikepercayai ngo merkitèken masèh atè Tuhan Jesus sambing ngo makin asa maluah kita. Kalak idi pè bagidi ma ngo." 15:12 Nai nono mo karina kalak simertumpu i. Nai idengkohken kalak i mo si Barnabas dekket si Paulus, pejojorken tanda bak kellengangen nibaing Dèbata i tengah-tengah bangsa sidèba siso Jahudi merkitèken kalak i. 15:13 Enggo kessa salpun iranaken kalak i karinana, ialoi si Jakobus mo, "Kènè karina kaka anggi, dengkohken kènè mo aku lebbè! 15:14 Ndai ngo ibagahken si Simon bakunè penatap Dèbata taba bangsa sidèban siso Jahudi i mulana nai, asa gabè ijalo kalak i gabè ummatNa. 15:15 Jadi merdemmu ngo i mi kata nabi-nabi, ai bagèen ngo isuratken: 15:16 'Enggo kessa i roh nola mo Aku lako pekkadèn bages si Daud sienggo merumpak i, janah kupelias nola mo sienggo ncèda i; 15:17 asa karina kalak sitadingna mennulusi Tuhan i rebbak dekket karina bangsa sidèban siso Jahudi sienggo Kudilo gabè milikKu.' Bagidi mo kata Tuhan, 15:18 sienggo ibagahken kin i sinderbi nai!" 15:19 Kerna naidi, mengèkutken pertimbangenku nina si Jakobus, "Oda ndorok susahenta nèngè kalak i si roh i bangsa sidèban idi nai mendahi Dèbata lako mennohken dirina. 15:20 Tapi sitengesken mo surat hatoren mahan sièngèten kalak i, asa ulang ipangan kalak i pangaan sienggo ipèlèken bai bègu, ulang ipangan jukut siso isèat, ulang ipangan daroh, ipeddaoh dirina ipas ulaan memmaing mellamun janah ulang merlangkah julu meddem. 15:21 Ai dak ijakaken ngo pati-patiin Dèbata gennep ari Sabat i bages perguruun silot i gennep kuta, imo niberrèken Dèbata merkitè si Musa." 15:22 Nai iputusken apostèl-apostèl dekket pengituai-pengituai bak kuria i mo barang piga kalak bai kalak i nai mahan utusen mi Antiokhia rebbak dekket si Paulus bak si Barnabas. Nai ipilih kalak i mo si Silas bak si Judas sinigeraren ma si Barsabas. Duana kalak èn imo kalak siterkemuka bai kalak sipercaya i Jerusalem. 15:23 Ibahan kalak i mo surat siembehenna bagèen, "Kènè karina dengan sienggo percaya bai Jesus Kristus, imo siso bangsa Jahudi kin, si lot i Antiokhia, i Siria bak Kilikia. Tab`i nami apostèl-apostèl bak pengituai-pengituai mo bai ndènè karinana. 15:24 Soh ngo bai nami berita, lot keppèken roh dèba bai nami nai mendahi kènè, mengeributi kènè merkitè-kitè peddah kalak i mengelalingken kènè. Oda ngo berkat sungkun nami i. 15:25 Kerna naidi enggo runggu kami janah enggo sada ukur nami lako pasulakken kalak ènda rebbak dekket si Barnabas bak si Paulus sikukekellengi kami. 15:26 Ukum kalak èn sidua, sienggo isomadaken ngo kessahna kumarna Tuhanta Jesus Kristus. 15:27 Kupasulak kami ngo si Judas dekket si Silas mendahi kènè, asa ibagahken bai ndènè keputusen nami merkitè rana pè taba kènè, imo sienggo kusuratken kami èn. 15:28 Enggo isetujui -- Tendi Dèbata bak kami pè selloh -- ngo dok atè nami, ulang pella iampèken taba kènè ulaan mbotong, laènken siperlu èn: 15:29 ulang pangan kènè pèlèen sienggo ipèlèken bai bègu, ulang pangan kènè daroh, ulang pangan kènè jukut siso isèat, janah ulang kènè merlangkah julu meddem. Mula ipesisi kènè ngo diri ndènè ibas karinana idi, enggo mengulaken simerandal kènè. Bagidi mo, njuah-njuah mo." 15:30 Enggo kessa mersitennahen nai ipeberkat kalak i mo utusen i laus mi Antiokhia, jadi soh kessa mo utusen idi, ipepulung mo karina ruas kuria i lako pesakatken surat i. 15:31 Nai ijaka kuria i kessa mo surat i, lolo kalohoon mo atè kalak i, ai terapo mo perrukuren kalak i. 15:32 Tapi ukum si Judas bak si Silas, nabi ngo kalak i. Matcam ngo bagèna jamita kalak i lako mempergegohi janah petegguhken ukur sinterrem i. 15:33 Enggo kessa narih ndekkah merian si Judas dekket si Silas i sidi, ipasulak kuria i mo kalak idi balik mendahi sipasulakkensa merembah kata lias atè. 15:34 Tapi ukum si Silas lemmo kalohoon ngo atèna merian i Antiokhia. 15:35 Si Paulus bak si Barnabas pè, narih ndekkah ma ngo merrian i Antiokhia. Isukutken kalak i ngo kata Tuhan i rebbak dekket dengan sidèbanna i pè. 15:36 Oda sadikè dekkah nai idokken si Paulus mo taba si Barnabas, "Laus nola mo kita mendahi karina dengan sienggo sijamitai idi kin mi gennep kuta, imo sienggo gabè percaya bai Jesus, tah enggo bakunè kalak i!" 15:37 Tapi ukum dokatè si Barnabas, naing mo nemmu dekket si Johanes simergerar Markus, 15:38 tapi ukum dokatè si Paulus, oda selloh nèngè dekket si Markus i, kumarna enggo pennah itadingken ia kalak idi i Pamfilia, janah oda uè mendengani kalak i mi ulaan i. 15:39 Jadi gabè merselisih mo kalak i sidua, sanga mersirang. Jadi iarahken si Barnabas mo si Markus denganna merbungki mi pulo Siprus. 15:40 Ukum si Paulus, si Silas ngo iarahken mahan denganna. Berkat mo kalak i enggo kessa lebbè ipessoh dengan ni Antiokhia i kalak i mi bagasen masèh atè Tuhan i. 15:41 Ikulilingi kalak i mo tanoh Siria dekket Kilikia, lako petegguhken kuria ni sidi i.
17:1 Iterusken si Paulus bak si Silas mo perdalanen memellus kuta Amfipolis dekket kuta Apolonia, nai soh mo kalak i mi kuta Tesalonika. Lot ngo i kuta i bages perguruun kalak Jahudi. 17:2 Laus mo si Paulus mi bages perguruun i -- bagè kecemmalenna. Hojor mo tellu kali ari Sabat dak irisiki kalak i ayat-ayat Bibèl rebbak dekket jelma ni sidi. 17:3 Mengèkutken sitersurat i, kennah menggong simpersuk ngo Kristus Raja Sipaluah i, janah kèkè nola i kemmatèen nai. "Asa, Jesus sienggo kusukutken kami taba kènè i ngo Raja Sipaluah niperbagah-bagah Dèbata," nina si Paulus. 17:4 Nai gabè percaya mo dèba janah gabè mengèkut taba si Paulus bak si Silas; bagidi ma ngo nterrem bang kalak Junani simerkebiaren midah Dèbata, janah daberru-daberru simersangap pè mèduk ngo gabè percaya. 17:5 Tapi ncian mo atè kalak Jahudi. Ipepulung mo jelma dalang-dalangen, iunung mo kalak i, asa memaing kegontaren i kuta i. Nai ikubu kalak i mo bages si Jason lako mennulusi si Paulus bak si Silas naing embahen mi hadeppen jelma nterrem. 17:6 Tapi kumarna oda jupa kalak i si Paulus bak si Silas, gabè iruah kalak i mo si Jason dekket barang piga-piga kalak sipercaya mi hadeppen penggemgemmi kuta i. Idilo-diloken kalak i mo, "Dak menggutturi ngo kalak èn barang i dikè sambing pè! Bagèndari roh ngo kalak èn mi kuta èn, 17:7 enggo ijalo si Jason mi bagesna. Dak mengalo Hatoren Kèsar Rom ngo kalak i karina, ai ipeddahken ngo lot dèng nina Raja sidèban mergerar Jesus." 17:8 Merkitèken asung-asung kalak idi i, gontar mo jelma nterrem i bak simenggemgem kuta i. 17:9 Kessa pè lebbè ijalo kalak i riar, jaminen bai si Jason nai bak sipercaya idi nai, asa ipaluah kalak i. 17:10 Bernginna idi ipeberkat kalak sipercaya i mo si Paulus dekket si Silas mi Berea. Soh kessa kalak i mi sidi, idahi kalak i mo bages perguruun kalak Jahudi. 17:11 Burjuun ngo kalak Berea dari pada kalak Tesalonika, ai nggasang ngo atè kalak i mendengkohken berita tersèngèt Jesus, janah gennep ari ngo irisiki kalak i Bibèl, barang tah tuhu ngo nipeddahken si Paulus i. 17:12 Mèduk ngo kalak i percaya bai Jesus, janah mèduk ma ngo kalak Junani sitergerar gabè percaya; daberru dekket anak laki pè. 17:13 Tapi idengkoh kalak Jahudi ni Tesalonika kessa mo enggo keppè isukutken si Paulus kata Dèbata i Berea, roh mo kalak i mi Berea lako mengunung dekket menggutturi sinterrem i. 17:14 Nai ndor mo itaruhken dengan i si Paulus mi biding laut, tapi ukum si Silas dekket si Timoteus, tading dèng ngo i Berea. 17:15 Itaruhken kalak i ngo si Paulus soh mi Atena, nai balik mo simenaruhken i mi Berea ninganna merembah tennah si Paulus, asa ndor ipadapetti si Silas bak si Timoteus ia. 17:16 Sinderrang memmèma si Silas bak si Timoteus si Paulus i kuta Atena, mellui kalohon ngo atèna midah bagi buèna gana-ganaan i kuta i. 17:17 Kumarna naidi dak mertukar pikiren ngo ia dekket kalak Jahudi i bages perguruun, bagi ma pè dekket kalak simerkebiaren midah Dèbata bang dekket kalak siroh mi pasar-pasar i gennep ari. 17:18 Mersoal ngo ia dekket guru-guru kalak Epikuros bak horong Stoa pè. Dèba kalak i mendokken, "Kadè mo nahu jelma bagèen?" Cituk ngo pemmettohna, buèen rana ngo kessa ia. Tapi dèba mendokken, "Bagè cara isukutken ngo tersèngèt sembahen sidèban. Idokken kalak i pè bagidi, kumarna isukutken si Paulus ngo Jesus dekket kekèkèen i simatè nai." 17:19 Nai iarahken kalak i mo si Paulus mi Bages kerungguun Areopagus, nina kalak i mo mbangsa, "Ndorok ngo bettohen nami barang peddah rembaru bakunè ngo nidokkenmu i? 17:20 Ai bagè laèn ngo kudengkoh kami kata nisukutkenmu i. Kerna naidi naing ngo kubettoh kami kadè ngo i." 17:21 (Karina kalak Atena bak kalak simerian ni sidi, lemmokalohon ngo atèna menukutken bak mendengkohken berita rimbaru.) 17:22 Nai cènder mo si Paulus i tengah-tengah Areopagus i, nina mo, "Kènè alè kalak Atena! Kuidah mbiar kalohoon ngo kènè menengen sembahen ndènè i. 17:23 Ai tikan merdalan-dalan aku janah mendatèken bekkas-bekkas pemèlèen ndènè i, kuidah lot sada langgaten janah isuratken i sidi: Bai Dèbata Siso Nitandaan! Asa nisembah ndènè siso nitandaan ndènè i ngo sikusukutken taba kènè. 17:24 Ukum Dèbata situmempa langit dekket tanoh èn soh mi karina pengisina, ia ngo Tuhan ni karina langit dekket tanoh èn soh mi karina pengisina, Ia ipas bages sembahen nipellias tangan. 17:25 Oda ngo perlu bana pengurupiin jelma, kerna Ia ngo merrèken kenggelluhen, kessah dekket sagumanna siperlu bai jelma. 17:26 Arap sada jelma ngo Ipehana karinana jelma merbangsa-bangsa, janah idokken ngo jelma i mengiani suberri sisik tanoh èn. Ia ma ngo menentuken i mulana nai, ndigan janah i dikè ia merian. 17:27 Ibaing Dèbata pè karinana i bagidi, asa dak itulusi jelma i ngo Ia, janah katerra pè asa ndorok pejumpa jelma i dekketSa, ai oda ngo ndaoh ia banta èn nai gennep. 17:28 Bagè pendokken dèba jelma: nggelluh, gumerrek bak hana pè kita i dunia èn, kerna kuasana ngo! Tosè bagè pendokken singgeddang radumen ndènè, ai nina ngo, 'Karina ngo kita dukak-dukakNa.' 17:29 Asa, mula dukak-dukak Dèbata ngo kita, ulang dok atènta codi mi gana-ganaan buradda Dèbata, barang codi mi pirak, barang codi mi batu si niokir jelma. 17:30 Tapi oda ngo pella ilugun Dèbata tikki kemotonta i, tapi ukum bagèndari suberri jelma ngo idokken Dèbata kennah mertobat ipas dosa-dosana nai. 17:31 Ai enggo ibuhul Dèbata kin tikkina, asa ihukum dunia èn merkitè kesèntengen. Perhukumen idi ihukumken sada kalak sienggo ipilih Dèbata kin, janah enggo ngo ibuka Dèbata dalan, asa gabè percaya karina jelma i, ipekèkè ngo gabè balik nggelluh ia i kemmatèen nai." 17:32 Idengkoh kalak i kessa mo kata tersèngèt balik nggelluh i kemmatèen nai, lot mo dèba bai kalak i nai mentertabai si Paulus. Tapi lot ma ngo dèba mendokken, "Naing Kudengkoh kami dèng ngo ranamu tersèngèt i." 17:33 Enggo kessa bagidi, laus mo si Paulus mennadingken kalak i. 17:34 Tapi lot ma ngo dèba tan kalak i nai gabè kan si Paulus jahna percaya bai Jesus, imo si Dionisius anggota runggu Areopagus, dekket sada kalak daberru mergerar si Damaris bang piga-piga kalak nai.
18:1 Enggo kessa bagidi, berkat mo si Paulus i Atena nai mi kuta Korintus. 18:2 Nai jumpasa mo i sidi sada kalak Jahudi mergerar si Akwila, ukum kuta bekkasna tubuh i nagerri Pontus ngo. Rembaru roh dèng ngo ia i Italia nai rebbak dekket sinibagesna mergerar si Priskila. Roh pè kalak i mi Korintus, kemulihken perèntah Kèsar Klaudius ngo, ai iusir ngo karina kalak Jahudi i kuta Rom nai. 18:3 Gabè rebbak kalak i mo si Paulus merian, janah rebbak mahan bahaan, ai dos ngo pencariin kalak i dekket si Paulus imo mertennun tènda. 18:4 Tapi gennep ari Sabat dak laus ngo si Paulus mi bages perguruun lako mengeranai dekket kalak Jahudi bak kalak Junani, asa percaya bai Jesus. 18:5 Roh kessa mo si Silas dekket si Timoteus i Makedonia nai, gabè karina tikki si Paulus ibaing lako mengindangken taba kalak Jahudi, Jesus i ngo Kristus Raja Sipaluah niperbagah-bagah Dèbata. 18:6 Tapi kumarna ialo janah irèhèi kalak i ngo si Paulus, gabè ipaspasken mo abu silekket i olesna mahan pertandaan tersèngèt kesalahen kalak i, ninganna idokken, "Mersempetta bai ndènè mo kessah ndènè oda nè pendikèi ukum aku! Mulai bagèndari nai mo aku laus mendahi kalak siso Jahudi." 18:7 Mènter lompat mo si Paulus i sidi nai, mi bages kan bages perguruun i. Kalak siso Jahudi ngo sidasa bages i mergerar si Titius Justus; tapi isembah ngo Dèbata. 18:8 Tapi ukum si Krispus imo pengendeng bages perguruun i dekket karina pengisi bagesna percaya ngo bai Tuhan i. Mèduk dèng ma ngo kalak Korintus sidèbanna i, simendengkoh sukuten si Paulus i gabè percaya janah iperridi. 18:9 Tapi tupung i sada berngin, idah si Paulus mo ipas alatenna Tuhan i mendokken bana, "Ulang kono mbiar; ranaken mo dakdak, ulang ko gabè sip, 18:10 ai Aku ngo denganmu. Isè poda ndorok mengagoken kono, ai mèduk dèng ngo kalak perkuta èn milikKu." 18:11 Jadi merian i Korintus mo si Paulus tengah dua tahun dekkahna lako mengajarken kata Dèbata taba persidi. 18:12 Tapi tikan si Galio mbangkit gubèrnur menggem-nggemmi Akhaya, mersada sungkun mo kalak Jahudi lako mengalo si Paulus, iaduken mo si Paulus mi kerungguun. 18:13 Nina kalak i mo i pengadunna i, "Iajar-ajari kalak èn ngo jelma nterrem menguèi Dèbata, tapi merralo ngo dekket pati-patiin Dèbata siniberrèkenna merkitè si Musa bai nami!" 18:14 Jadi sinderrang naing mengerana si Paulus mengaloi kalak i, mèter nina si Galio mo taba kalak Jahudi, "Kènè alè kalak Jahudi! Ukum kumarna kejahaten barang kumarna kegèduken ngo asa iaduken kènè ia, uè ngo aku menjalo pengaduun ndènè i. 18:15 Tapi merselisih pè kènè kumarna kata-kata dekket gerar-gerar bak pati-patiin ndènè ngo, jadi kènè sendiri ngo mendungi i. Oda uè aku menghukum sibagidi." 18:16 Nai ipelaus mo kalak idi ipas perhukumen idi nai. 18:17 Nai gabè itangkup kalak idi mo si Sostenes pengendeng bages perguruun i, ipekpekki kalak i mo ia i lebbè bages perhukumen i. Tapi oda iantoi si Galio kalak i. 18:18 Enggo kessa bagidi tong dèng ma ngo narih ndekkah si Paulus i Korintus, baru pè asa mertinading kata ia taba kalak sipercaya nisidi i. Nai merkeppel mo ia laus mi Siria, rebbakken dekket si Priskila bak si Akwila. Soh kessa kalak i mi Kengkrea, mergonting mo si Paulus, ai enggo kin ngo ibelli hambuk-hambuken bukna kumarna lot kin niatna taba Tuhan i. 18:19 Soh kessa kalak i mi Epesus, itadingken si Paulus mo si Priskila bak si Akwila, laus mo ia mi bages perguruun, mertukar pikiren dekket kalak Jahudi i sidi. 18:20 Ipidoken ni sidi ngo nemmuken tabasa asa merian i sidi lebbèken ia, tapi oda uè si Paulus. 18:21 Tapi tukasi pè bagidi, tikan naing berkat ia, nina mo taba kalak i, "Mula ipaduè Dèbata luas, kuolihi pè mendahi kènè." Enggo kessa idokken bagidi, nai merkepel mo ia laus i Epesus nai. 18:22 Soh mo ia mi Kaisarèa, nai iterusken mo mi Jerusalem lako pesakatken kata njuah-njuahna taba kuria i, janah i sidi nai berkat mo ia mi Antiokhia. 18:23 Asa enggo kessa ndekkah ia i sidi, berkat nola mo ia mi Galatia dekket mi Frigia lako petegguhken kepercayaen sipercaya ni sidi. 18:24 Tikan bagidi, roh mo mi kuta Epesus sada kalak Jahudi mergerar si Apolos, roh i Aleksandria nai. Kalak pandè ngo ia mengerana janah ntangkas ngo iantusi isi Bibèl, 18:25 enggo kin ma ngo ipeddahken tabasa tersèngèt Jesus. Nggasang kalohoon ngo ukurna memmeddahken janah risik ngo pemeddahkenna tersèngèt Jesus, tukasi pè pellin perridiin si Johanes ngo kessa ibettoh. 18:26 Merjamita mo si Apolos i bages perguruun idi ipas ukurna nggasang nai; idengkoh si Akwila dekket si Priskila kessa mo jamitana i, iarahken kalak i mo ia mi sapona. Ipeterrang mo tabasa ntangkas dalan Dèbata lako paluahken jelma, merkitè-kitè Jesus. 18:27 Nai merhendak mo ia naing laus mi Akhaya. Jadi ibaing dengan ni Epesus mo surat embahenna, asa ijalo dengan sipercaya ni Akhaya si Apolos ibagasen rahè atè. Jadi soh kessa mo ia mi sidi, terasa ngo penumpakna taba dengan sipercaya taba Jesus kumarna masèh atè Dèbata. 18:28 Merkitè keterangen nterang kalohoon; talu ngo kalak Jahudi ibaing si Apolos mula mersoal kalak i i hadeppen jelma nterrem. Ai ibuktiken ngo merkitè-kitè ayat-ayat Bibèl i, Jesus ngo Raja Sipaluah niperbagah-bagah Dèbata.
19:1 Tikan i Korintus si Apolos dak idalani si Paulus ngo kuta ni pispis delleng, nai soh mo ia mi kuta Epesus. Jumpasa mo i sidi dèba sienggo percaya bai Jesus. 19:2 Nai ikusoken mo taba kalak i, "Enggo ma ngo ijalo kènè Tendi Perbadia tikan gabè percaya kènè bai Jesus?" Ialoi kalak i mo, "Madèng! Janah oda nung dèng kudengkoh kami lot Tendi Perbadia!" 19:3 Nai nina si Paulus mo, "Mula bagidi, perridiin apaina ngo iperridiken bai ndènè?" Ialoi kalak idi mo, "Perridiin si Johanes ngo," nina. 19:4 Nai idokken si Paulus mo, "Ukum perridiin si Johanes, pellin mendokken mertobat ngo kessa i. Tapi ipeddahken ngo taba kalak Israel, asa ikepercayai siroh i podinkenna, imo Jesus." 19:5 Idengkoh kalak i kessa mo i, gabè uè mo kalak idi iperridi nola mi bagasen garar Tuhan Jesus. 19:6 Jadi sinderrang iampèken si Paulus tanganna taba kalak i, mèter isenggeppi Tendi Perbadia mo kalak i. Nai mèter mengeranai mo kalak idi i kata sidèba janah meralaten. 19:7 Kira-kira sipuluh dua kalak ngo buè kalak idi. 19:8 Tellu bulan ngo dekkahna si Paulus i sidi janah dak ibagasen nggasang perukuren; tompel ngo ia merjamita i bages perguruun. Ipeddahi ngo kalak Jahudi, ninganna pesèngètken kalak i, bakunè cara kerajaen Dèbata. 19:9 Tapi lot ma ngo barang piga-piga kalak pepihirken ukurna, janah oda uè percaya. I lebbè karina kalak simertumpu i sidi iduhuli kalak i ngo peddah tersèngèt taki Dèbata lako paluahken jelma merkitè Jesus. Kerna naidi gabè itadingken si Paulus mo kalak i nai laus dekket simengèkutken Jesus. Jadi gabè i persikolaan si Tiranus mo gennep ari si Paulus merjamita. 19:10 Dua tahun ngo dekkahna bagi cara si Paulus memmeddahi kalak i, gabè rata mo mendengkoh kata Tuhan i karina pengisi Asia, kalak Jahudi barang kalak Junani pè. 19:11 Matcam ngo bagèna tanda kelengangen ibakin Dèbata merkitè si Paulus. 19:12 Pella ngo dekket sèkka-sèkka barang abit pementing sienggo nung ipakkè si Paulus, mula idaisken taba simersakit, mèter malum ngo sakitna i, janah karuar ngo tendi jahat bai sinisellapenna nai. 19:13 Lot mo barang piga-piga datu kalak Jahudi dak kadap lako tandang guru, menandangken kinanggurunna lako mahan pemalengi dekket memmuro sètan. Icuba kalak i ngo pelausken sètan merkitè gerar Tuhan Jesus, nina ngo taba sètan i, "Mengasangken gerar Jesus nisukutken si Paulus i, kupelaus kono!" 19:14 Lot mo pitu kalak dukak ni sada imam huntuun mergerar si Skewa mengulaken bagidi. 19:15 Tapi nina sètan i mo taba kalak i, "Kutandai kami ngo Jesus, janah si Paulus pè kutandai kami ma ngo. Tapi isè ngo kènè?" 19:16 Mèter iarakeppi nisellapen sètan i mo kalak idi, igosa mo janah ipengeribakken mo oles kalak i, jadi gabè mperrus mo kalak i sabar i bages idi nai, ai enggo ijang-jangi oles kalak i janah dom ugah i dagingna. 19:17 Karina kalak Jahudi dekket bangsa sidèban ni Epesus simendengkoh i gabè buradan. Nai makin ipoji kalak i mo gerar Tuhan Jesus. 19:18 Nai mèduk ngo kalak sienggo percaya taba Jesus roh mengakui ulah-ulahna siso kasèa i hadeppen jelma nterrem. 19:19 Nai mbuè ngo kalak perhèlmu sihir, mersiembah lapihenna, iporoni mo i karina janah ilekkup i hadeppen jelma mbellang. Karina harga lapihen sinilettup i, lot ngo lima puluh ribu kèpèng pirak. 19:20 Bagi mo makin sarna kata Tuhan i janah makin ntegguhna bai sinterrem. 19:21 Enggo kessa i isura-sura si Paulus mo naing laus mi Jerusalem arap nagerri Makedonia bak Akhaya, ai nina ngo, "Mula enggo mi sidi aku, kennah mo dekket kuta Rom kudahi." 19:22 Jadi ipasulak mo dua kalak simendenganisa imo si Timoteus dekket si Erastus perlebbè laus mi Makedonia. Tapi ukum ia, tading dèng ngo i Asia. 19:23 Tikan naidi mo masa kegontaren i Epesus kemulihken peddah tersèngèt Jesus i. 19:24 Lot mo sada kalak i kuta i tukkang pirak mergerar si Demetrius, mennukkangi bages-bages pirak bai sembahen Artemis. Mbuè ngo laba-laba poncan ipettupung taba kalak peneppa i. 19:25 Ipepulung mo peneppa-peneppa dekket karina tukkang-tukkang sidèbanna idi, nina mo mbang kalak i, "Kènè alè dengan, ibettoh kènè ngo, ipas ulanta ènda nai ngo pengemmonta. 19:26 Bagèndari ntangkas ngo idah janah ibettoh kènè kadè sinibaing si Paulus i, ai nina ngo, Oda ngo tuhu sembahen ukum nipellias tangan. Janah enggo mèduk kalak ibaing gabè percaya mi peddahna i; oda pellin i Epesus èn, tapi dekket ngo i suberri Asia. 19:27 Marana, oda pellin pencarinta gabè somada, tapi dekket ngo sembahen Artemis sitermurmur i, sisembahen ni karina jelma ni Asia bak suberri dunia èn gabè merlèa janah mago kemmulianna." 19:28 Idengkoh kalak i kessa mo rana i, punguren mo kalak i, nai nggang-nggang mo idiungken, "Termurmur ngo Artemis dèbata kalak Epesus!" 19:29 Gabè mèter gontar mo karina kalak ni kuta i. Isaran penggutturi i mo si Gayus dekket si Aristarkhus kalak Makedonia simendengani si Paulus i perdalanen. Iruah mo kalak i mi stadion kuta i. 19:30 Jadi naing mo itellas si Paulus mi tengah jelma mbellang i, tapi oda ipadiat dengan sipercaya i ia. 19:31 Bagi ma ngo barang piga-piga kalak pengituai kalak Asia supan-supan si Paulus pasulakken suruhenna mendahi si Paulus janah mengèlèkken, asa ulang laus ia mi stadion kuta i. 19:32 Ningan bagidi, ukum jelma simerpulung i stadion kuta i, soh mo gulutna, ai pejaè-jaè ngo ipengsurakken, janah buèen ngo oda bettoh-bettohen barang kadè sebabna asa pulung jelma idi i si. 19:33 Nai lot mo sada kalak mergerar si Aleksander i tengah-tengah jelma mbellang i nai ijula-julaken kalak Jahudi. Ikirapken si Aleksander mo tanganna asa sip sinterrem i, ai naing mendokken rana ia taba jelma mbellang ni sidi. 19:34 Tapi idah kalak i kessa, kalak Jahudi ngo keppèken ia, gabè rebbakken menurakken mo sinterrem i, "Termurmur ngo Artemis dèbata kalak Epesus!" nina. Kira-kira dua jom ngo dekkahna kalak i mennurakken bagidi. 19:35 Tapi roh mo juru tulis kuta i, ipemmènak mo sinterrem i, nina mo, "Kènè alè kalak Epesus! Karina ngo kalak memettoh kuta Epesus ngo bekkas sembahen Artemis sitermurmur i, dekket bekkas gana-ganaan sindabuh i langit nai. 19:36 Isè poda lot memerso i. Kerna naidi mènak mo kènè janah ulang lot memmakin siso puna-puna. 19:37 Bagèndari itaruhken kènè kalak èn mi sèn, so lot ibuat kalak ènda milik ni bages sembahen barang pè mengellèai sembahenta i. 19:38 Mula tah lot pè asung-asung si Demetrius dekket denganna peneppa barang taba isè, lot ngo hukum dekket sijèmak puhpuh banta, mi sidi mo kalak i mersiaduun. 19:39 Tapi tah lot dèng sidèban sura-sura ndènè, kennah i hadeppen sinterrem ngo idi itimbangi! 19:40 Tah bakunè iaduken dèba nola kita kumarna simasa ari èn, ai ndorok ngo gabè idokken dèba nola kita memberontak, gabè isè poda lot nèngè terbaing maluah." 19:41 Enggo kessa idokken bagidi, ipasulak mo jelma mbellang i balik mi bekkasna gennep.
20:1 Enggo kessa mènak kegontaren ni Epesus i, idilo si Paulus mo sipercaya ni Epesus i merpulung mi lebbèna. Nai mertading kata mo ia, jadi iterusken mo perdalanenna mi Makedonia. 20:2 Iagahi mo karinana nagerri Makedonia janah memerrèken mbuè peddah taba kalak sipercaya bai Jesus nisidi petegguhken ukur kalak i. Kessa i laus mo ia mi tanoh Junani. 20:3 Tellu bulan ngo dekkahna ia merian i sidi. Jadi tikan merkebbas-kebbas ia naing laus merkeppel mi Siria, terbertik mo lot kalak Jahudi mertaki lako memmunuhsa. Kerna naidi gabè iputusken mo ibas ukurna, asa balik ia arap Makedonia. 20:4 Rebbak dekketsa ngo berkat si Sopater anak si Pirus kalak Berea, bagidi ma dekket si Aristarkhus bak si Sekundus kalak Tesalonika, bangsa si Gayus anak kuta Derbe. Nai si Timoteus, si Tikikus dekket si Trofimus kalak propinsi Asia. 20:5 Perlebbè ngo kalak i berkat, nai ipèma mo kami i Troas. 20:6 Jadi salpun kessa mo Pèsta Paskah mangan roti siso meragi, merkeppel mo kami i Pilipi nai. Pelima ariken, soh mo kami mi Troas. Isidi mo kami pejumpa dekket kalak i, janah seminggu mo dekkah nami mengadi i sidi. 20:7 I ciboon ari Sabtuna, pulung mo kami lako rebbak mangan, merjamita mo si Paulus janah ipegeddang ngo Jamitana i, soh tengah mberngin, ai mersura-sura ngo ia naing berkat sibarembenkenna. 20:8 Mbuè ngo lampu i bilik perdates janah ilakati i bekkas nami merpulung i. 20:9 Nai lot mo sada kalak anak perana mergerar si Eutikus kundul ipas jendèla mendengkohken jamita si Paulus i. Keppè enggo tertunduh ia kumarna dekkahna si Paulus merjamita i, janah lustun terpeddem, gabè ndabuh mo ia i tingkaten petelluken nai mi terruh. Tikan idokong kalak i ia, enggo mo keppè matè. 20:10 Susur mo si Paulus mi terruh, irègep mo si Eutikus i, nina mo taba jelma nisidi, "Ulang pella roga kènè, ai nggelluh dèng ngo ia." 20:11 Balik mo si Paulus mi dates, ipenggelli mo roti i, nai mangan mo kalak i karina. Enggo kessa salpun mangan, mengerrana dèng ngo si Paulus soh mi mayak nterrang ari, jadi terrus berkat mo ia. 20:12 Ukum anak perrana i, itaruhken kalak i ngo ia nggelluh mi bagesna, janah terapo kalohoon ngo ukur kalak i karina kemulihken naidi. 20:13 Nai laus mo kami merkeppel lako berkat mi Asos, janah i sidi mo kusinggahi kami si Paulus. Ai bagi ngo iaturken si Paulus kerna naing merdalan arap darat ngo ia soh mi Asos. 20:14 Enggo kessa pesimbak kami i Asos, rebbak mo kami merkeppel mi Metilene. 20:15 I sidi nai pè merkeppel ngo kami, janah sibarembenkenna i nola soh mo kami mi kèparen Kios; nai dua berngin nai nola soh mo kami mi Samos, janah sibarembenkenna i nola soh mo kami mi Miletus. 20:16 Oda pella singgah kami dok atè si Paulus mi Epesus, asa ulang ipedekkah-dekkahken kami i Asia, ai dak i kudus ngo asa ndor soh mi Jerusalem tupung pèsta Pentakosta. 20:17 Nai ipasulak si Paulus mo i Milèt nai mendiloi pengendeng kuria Epesus, asa roh kalak i menjumpai si Paulus. 20:18 Roh kessa mo kalak idi, nina si Paulus mo taba kalak i, "Kènè alè dengan, ibettoh kènè ngo bakunè aku i tengah-tengah ndènè kessa nai soh aku mi Asia. 20:19 Mengula ngo aku bai Tuhan idi ibagasen ukur ncerrep merdengan èluh menggongken kinidersa kumarna taki jahat siroh bai kalak Jahudi nai. 20:20 Ibettoh kènè ngo oda lot alang-alangen aku memagahken bai ndènè, barang kadè simerguna bai ndè. Kuajari ngo kènè i perpulungen-perpulungen jelma nterrem bak ibas pulungen perjabu-jabu. 20:21 Dak tong ngo kudokken bai kalak Jahudi dekket bai kalak siso Jahudi pè, asa tobat kalak idi ipas dosana nai janah roh mendahi Dèbata, ninganna percaya taba Tuhan Jesus. 20:22 Bagèndari lako menguèi perèntah Tendi Perbadia laus ngo aku mi Jerusalem. Janah oda kubettoh tah kadè masa bangku i sidi. 20:23 Pellin èn kessa kubettoh; kira i gennep kuta enggo tangkas ibagahken Tendi Perbadia taba aku, enggo mèma kurungen dekket simpersuk bangku i sidi. 20:24 Tapi oda pella kukellini kessahku, asal mo ndorok pul kubakin sienggo ipessoh Tuhan Jesus bangku janah tong burju aku soh mi punca nggelluhku memeritaken Sukuten Kelluahen tersèngèt masèh atè Dèbata. 20:25 Enggo kudahi kènè karina janah enggo kusukutken bakunè tersèngèt Kerajaen Dèbata. Bagèndari pè kubettoh ngo, oda nèngè perridah kita. 20:26 Kumarna naidi tegas kudokken bai ndènè sidari èn mula lot ibas kènè nai binasa kaduan, oda salahku nè idi. 20:27 Oda nung menurimpang aku ipas ulanku nai lako memagahken bai ndènè karina rencana Dèbata. 20:28 Nteng, jamoti kènè mo diri ndènè dekket karinana kuria sienggo nipesakat Tendi Dèbata bai ndè mahan jamoten ndènè, ai enggo ipebangkit kènè, asa iperdimata kènè kuria i. Permakani kènè mo kuria ni Dèbata idi bagè permakan menjaga biri-birina, kerna enggo ibakin Dèbata kuria i gabè milikNa sendiri merkitè permatè AnakNa. 20:29 Ai laus kessa mo aku, kubettoh ngo, roh mo mendahi kènè sorigala penjerngem. Janah kalak sinipermakan ndènè i gabè jerngemmen sorigala i. 20:30 Salang i tengah-tengah ndènè nai pè, lot ngo gabè memeddahken siso tuhu. Ibaing kalak i bagidi asa sienggo percaya bai Jesus gabè laling janah asa mengèkut taba kalak i. 20:31 Kerna naidi, dak merjaga-jaga mo kènè. Èngèt kènè mo tellu tahun dekkahna oda mengadi-ngadi aku mahar dekket berngin memeddahi kènè merdengan èluh. 20:32 Bagèndari pè kupesakat mo kènè bai Dèbata dekket mi bagasen masèh atèna, asa ia mempergegohi janah menjamotken kènè, asa iberrèken bai ndènè pasu-pasu sienggo ipehantar bai karina kalak sienggo percaya baNa. 20:33 Oda nung kuteddo barang kadè bang bai isè nai kènè, tah pirak barang oles pè. 20:34 Ibettoh kènè ngo, aku sendiri ngo mencariken siperlu bangku dekket taba denganku pè. 20:35 Ipas karinana ngo kutuduhken diringku mahan codiin bai ndènè, asa kennah merkitè mahan bahaan ngo kita, asa ndorok kita mengurupi kalak sindotè. Kerna kennah ngo èngètenta kadè sinidokken ni Tuhan Jesus, ai nina ngo, 'Mertuahen ngo simemerrèken dari pada simenjalo!' " 20:36 Enggo kessa pul idokken si Paulus ranana idi, rebbak sujud mo kalak i lako mersodip. 20:37 Tangis ngo kalak i karinana, nai ikaol kalak i mo si Paulus janah isanggohi. 20:38 Bonek kalohoon ngo atè kalak i karinana, terlebbih kerna rana si Paulus simendokken, oda nèngè mo peridah kalak i. Nai itaruhken kalak i mo si Paulus soh mi keppel i.
21:1 Mersitennahen mo kami dekket pengendeng kuria i Epesus idi nai, kessa i tading mo kalak i. Merkeppel mo kami mennèger mi pulo Kos, janah sibarembenkenna i soh mo kami mi pulo Rodos. I sidi nai terrus mo kami mi pelabuhen Patara. 21:2 I Patara idapet kami mo sada keppel naing berkat mi Penesia. Kubengketti kami mo keppel i, nai berkat mo kami. 21:3 Janah merkeppel mo kami soh kuidah kami pulo Siprus kan kambirang nami, tapi terrus ngo kami mi Siria. Mendarat mo kami i Tirus, ai singgat i ngo kessohen embahen keppel sikutompangi kami i. 21:4 Kudahi kami ngo i sidi dengan sienggo percaya bai Jesus, janah i sidi mo kami mengadi sada minggu dekkahna. Merkitè gerrek bai Tendi Perbadia nai ipesèngèt kalak i ngo si Paulus asa ulang laus mi Jerusalem. 21:5 Tapi enggo kessa dapet ari nami naing berkat, berkat mo kami mennadingken kalak i, janah menerusken perdalanen nami. Karina ngo kalak i mennaruhken kami, partua ibages bak partua ibalè pè soh mi anak-anak mennaruhken kami soh mi ruar kuta i. Nai sujud mo kami mersodip i biding laut i. 21:6 Nai mersisalamen mo kami, kessa i mbengket mo kami mi keppel, janah balik ma mo kalak i mi bagesna gennep. 21:7 Merkeppel ngo kami i Tirus nai soh mi Ptolemais. Kudahi kami ngo sipercaya ni sidi lako pesakatken tabè nami, nai gabè i sidi mo kami sada berngin rebbak dekket kalak i. 21:8 Sibarembenkenna i, berkat nola mo kami nai soh mo kami mi Kaisarèa. Kudahi kami ngo si Pilipus perjamita i mi sapona, imo sada kalak ipas sipitu kalak siterpilih i Jerusalem idi nai, janah mi sapona i mo kami mentadi. 21:9 Lot ngo empat kalak berruna simerbaju sienggo menjalo sibasa-basa bai Dèbata nai merberita simerandal. 21:10 Enggo kessa narih ndekkah kami i sidi, roh mo i Judèa nai sada kalak nabi mergerar si Agabus. 21:11 Idapetken mo kami, ibuat mo pènggang si Paulus. Irakutken mo penggang i mi tanganna dekket mi nèhèna, nai nina mo, "Bagèen ngo idokken Tendi Perbadia: Kennah ièkèti kalak Jahudi ngo bagèen sidasa pènggang èn i Jerusalem, janah isohken ngo ia taba kalak siso Jahudi." 21:12 Kudengkoh kami kessa mo i, kuèlèk-èlèk kami dekket dengan-dengan si ni Kaisarèa i mo si Paulus, asa ulang laus ia mi Jerusalem. 21:13 Tapi nina si Paulus mo mengaloi, "Kadè mo gunana dak tangis kènè, memmakin gabè mellala atè-atèngku? Kebbas ngo aku oda pellin ièkèti, tapi bang matè nola pè ukum kumarna Tuhan Jesus!" 21:14 Kumarna oda uè ia mendengkohken sèngèt-sèngèt nami, sip nai ngo kami karina, nai dok nami mo, "Saut mo lemmo atè Tuhan i." 21:15 Asa enggo kessa i sidi kami barang piga-piga ari, berkat mo kami laus mi Jerusalem. 21:16 Tapi dekket ngo dèba dengan i, i Kaisarèa nai mennaruhken kami mi saposi Manason, ai mi sapona ngo kami merberngin. (Si Manason imo sada kalak Siprus sienggo ndekkah percaya bai Jesus.) 21:17 Soh kessa kami mi Jerusalem, sampang ngo atè dengan ni sidi menjalo kami. 21:18 Nai sibarembenkenna i, rebbakken mo si Paulus dekket kami mendahi si Jakobus; nai merrohen mo mi bages i karinana pengendeng. 21:19 Enggo kessa isalam si Paulus kalak i karinana, ipejojor mo karina sinibaing Dèbata taba kalak siso Jahudi merkitèkensa. 21:20 Mendengkoh sukuten si Paulus idi, ipoji kalak i mo Dèbata. Jadi nina kalak i mo mbangsa, "Alè nggia, idah kono ngo enggo merribu-ribu kalak Jahudi percaya bai Jesus janah karinana ngo kalak i sètia mengulaken pati-patiin nipessoh si Musa. 21:21 Idengkoh kalak i ngo, enggo ipeddahi kono kalak Jahudi karinana si ni ranto, asa sirang ipas pati-patiin si nipessoh si Musa idi nai, janah idokken kono ngo, asa ulang pella itakkil nèngè dukak-dukakna janah ulang pella ijamotken nèngè adat kalak Jahudi. 21:22 Ukum bagèndari tentu ibettoh kalak i ngo enggo roh kono mi sèn; jadi bakunè mo ndia? 21:23 Èn pè, uèi mo sipessèngèt nami èn: Lot ngo empat kalak bai nami èn, merutang bagah-bagah bai Tuhan i. 21:24 Togiken mo kalak i, janah uras mo dirimu dekket kalak i, asa igonting bukna. Merkitè bagidi, bettohen sinterrem mo oda keppè tuhu berita sinidengkohna i tersèngèt Kono, tapi dekket ngo Kono tupèh menjamotken pati-patiin i. 21:25 Tapi ukum tersèngèt siso bangsa Jahudi sienggo percaya taba Jesus, enggo kubaing kami surat pati-patiin bai kalak i, asa ulang ipangan kalak i pangaan sienggo ipèlèken mi bègu, ulang ipangan daroh bagi ma dekket jukut siso isèat; oda ndorok kalak i merlangkah julu meddem." 21:26 Jadi sibarembenkenna i, iarahken si Paulus mo si empat kalak i; iuras mo dirina bak kalak i pè. Nai laus mo kalak i mi Bages Dèbata memmagahken asa ituruti ari menguras i, mèma ibakin kalak i pèlènna gennep. 21:27 Tapi naing dung kessa mo sipitu ari i, idah kalak Jahudi ni Asia nai mo si Paulus i Bages Dèbata. Nai iunung kalak i mo jelma nterrem, gabè guttur mo kalak i, janah itangkup kalak i mo si Paulus, 21:28 ninganna isurakken, "Kènè alè kalak Israel, urupken kènè mo! Èn ngo kalakna simemeddahken barang i dikè sambing pè, peddah mendahi karina jelma asa ialo kalak i bangsa Israel dekket pati-patiin si Musa bak Bages Tuhan ènda pè. Bagèndari pè dekket ngo kalak siso Jahudi iarahken mi Bages Dèbata èn asa gabè mellamun bekkas simbadia èn!" 21:29 (Idokken kalak i pè bagidi kumarna enggo idah kalak i ngosi Trofimus kalak Epesus i rebbak dekketsa i kuta i, nai gabè idokken kalak i nola mo enggo iarahken si Paulus ia mi Bages Dèbata.) 21:30 Jadi gabè gontar mo karina kuta i. Pulung mo jelma nterrem i karina, itangkup kalak i mo si Paulus, isaran mo mi ruar kuta, janah mèter ikonci mo pèntu Bages Dèbata. 21:31 Tapi tikan naing ipusa kalak i si Paulus, lot mo magahken taba ekuten soridadu Rom, mendokken soh mo gutturna karina kuta Jerusalem. 21:32 Nai mèter iarahken komandan i mo soridaduna dekket barang piga-piga kalak perwira, isudu kalak i mo mendahi bekkas i. Nai idah kalak i kessa mo enggo roh soridadu bak komandanna mi sidi, ipettadi kalak i mo memmekpekki si Paulus i. 21:33 Nai idahi komandan soridadu i mo si Paulus, itangkup mo ia janah irantè. Ikusoi mo ia barang kalak dikè ia janah kadè pana ibakinken. 21:34 Nai dak mersidoroken katana mo sinterrem i, gabè oda mertentu nèngè, merbulut sambing ngo rana i, oda dapet iantusi, gabè iembah mo si Paulus mi markas. 21:35 Tapi enggo kessa soh si Paulus mi ardan markas i, makin mengamuk mo penggutturi i, gabè idokong soridadu i nai ngo si Paulus. 21:36 Nai dak ièkutken jelma nterrem i ngo ia ninganna idilo-diloken, "Kennah bunuhen ngo ia!" 21:37 Tapi naing masuk kessa mo kalak i merembah si Paulus mi markas, nina mo taba komandan soridadu i, "Ndorok ngo aku mengerana sigejap dekket Kono?" Jadi nina komandan soridadu i mo tabasa, "Ibettoh kono ngo keppè kata Junani? 21:38 Oda ngo keppè kalak Mesir i kono, simengarahken empat ribu kalak naing memberontak i padang gurun i?" 21:39 Ialoi si Paulus mo, "Kalak Jahudi ngo aku, i Tarsus nai, imo kuta sitermurmurna i Kilikia. Kuèlèkken bamu, asa padiat lebbè aku mengerana taba sinterrèm èn!" 21:40 Nai ipadiat kessa mo, cènder mo si Paulus i ardan i, ikilapken mo tanganna taba sinterrem i. Sip kessa mo jelma nterrem i, nina mo taba jelma nterrem idi ibas kata Heber:
22:1 "Kènè alè karina partua bak kaka anggi, dengkohken kènè mo lebbè keterangenku èn!" 22:2 Idengkoh kalak i kessa mo merkata Heber si Paulus taba kalak i, mèter sip mo kalak i, nai iterusken si Paulus mo ranana, nina mo, 22:3 "Kalak Jahudi ngo aku, tubuh i Tarsus i nagerri Kilikia, tapi mbelgah i kuta Jerusalem èn ngo aku, janah seppè kalohoon ngo aku iajari i persikolaan si Gamaliel lako mengguruken pati-patiin siniberrèken si Musa taba empungta i. Enggo mo kukedarohken menguèi Dèbata, tosè bagè kènè ni sèn sidari èn. 22:4 Kuletlet janah kupatèken ngo kalak sipercaya taba Jesus, sanga ngo dèba matè. Kutangkup ngo karina anak laki bak daberru janah kumasukken mi kurungen. 22:5 Imam Huntuun dekket imam ekuten i ngo saksingku tersèngèt i, ai bai kalak i nai ngo kujalo surat embahenku mendahi kalak Jahudi mi Damaskus, ai merkitèken surat sikuembah idi, ndorok mo kutangkup janah kuiring mi Jerusalem karinana kalak sipercaya mi peddah rembaru i, asa ihukum." 22:6 "Tapi sinderrang laus aku janah ndessing mi Damaskus kira-kira cèger ari, sintempu mo lot cuhaya nterrang kalohoon i langit nai mengkalokoi aku. 22:7 Nai mèter geppah mo aku mi tanoh janah kudengkoh mo sora mendokken taba aku bagèen, 'Saulus! Saulus! Kasa iletlet kono Aku?' 22:8 Nai ningku mo mengaloi, 'Isè ngo Kono Tuhan?' Jadi nina mo taba aku, 'Jesus kalak Nazaret i ngo aku niletletmi!' 22:9 Idah denganku i ngo ukum cuhaya i, tapi oda idengkoh sora simengerana dekket aku i. 22:10 Nai ningku nola mo mengkusoi, 'Kadè ngo sibahanenku Tuhan?' Jadi ialoi mo aku, 'Kèkè mo kono, lako mo mi Damaskus. Isidi mo nahan ibagahken bamu sinaing bahanenmu.' 22:11 Tapi gabè oda merpendidah nèngè aku kumarnaken bendella cuhaya i, itegu-tegu denganku i nai ngo aku soh mi Damaskus. 22:12 Lot mo i sidi sada kalak mergerar si Ananias, sada kalak burju ngo ia janah simengulaken pati-patiin i. Janah mersangap ngo ia ibaing kalak Jahudi silot i Damaskus. 22:13 Roh ngo ia menongkir aku, janah cènder i gembarku ninganna mendokken, 'Alè Saulus, nggia, merpendidah nola mo kono!' Jadi mèter kuidah mo ia gejapken naidi. 22:14 Nina nola dèng ma mo taba aku, 'Enggo ipilih Dèbata ni empungta i kono, asa ibettoh kono lemmo atèNa, janah asa idah kono Jesus, Naposo Dèbata simegulaken lemmo atè Dèbata janah simendengkoh sora Jesus sendiri. 22:15 Kennah gabè kalak simengindangkensa ngo kono taba karina jelma tersèngèt siniidah dekket sinidengkohmu. 22:16 Bagèndari pè kettu mo ulang pedekkah-dekkah. Kèkè mo kono, perridiken mo dirimu. Dilo mo Tuhan i, asa mpanting kono ipas dosa-dosamu nai.' " 22:17 "Nai balik kessa mo aku mi Jerusalem èn, ikuasai Tendi Perbadia mo aku sinderrang mersodip aku i Bages Dèbata. 22:18 Kuidah ngo Tuhan i mendokken taba aku, 'Kettu mo laus kono i Jerusalem èn nai, kerna oda ijalo kalak sinisèn i pengindangkenmu tersèngèt Aku.' 22:19 Nai ningku mo, 'Alè Tuhan, ibettoh kalak i ngo, aku ngo roh mi bages perguruun lako menangkup dekket mengerantè bak membet-bet sipercaya taba Kono. 22:20 Bagi ma ngo tikan terbunuh saksiMu si Stefanus, i sidi ngo aku janah lolo ngo aku kerna terbunuh i ia. Aku ngo tupèh menjaga oles kalak simemmunuhsa i.' 22:21 Tapi nina Tuhan i mo taba aku, 'Laus mo kono, ai Kupasulak ngo ko mi bekkas sindaoh mendahi bangsa sidèban siso Jahudi.' " 22:22 Ukum ninggat rana i dènga, dak idengkohken kalak i ngo ia mengerana. Tapi soh kessa mo mi rana perpodi i, gabè ipegang kalak i mo sorana mennurakken, "Bunuh mo ia! Oda belliin nggelluh jema bagidi!" 22:23 Ningan mersurak i kalak idi, ipengambas-ambasken ngo olesna janah ipengsampakken abu mi dates. 22:24 Jadi idokken ekuten soridadu i mo iembah ia mi tangsi, iligasi mo ia tikan iperrèso, asa ibettoh kadè sebabna asa bagi surak-surak kalak Jahudi tabasa. 22:25 Tapi iberretken kessa mo si Paulus lako mengeligas, nina si Paulus mo taba perwira sicènder nisidi, "Ndorok ngo iligasi kènè sada kalak Rom, tukasi pè makdèng iadili?" 22:26 Mendengkoh kata si Paulus i, idahi pèrwira i mo komandan soridadu i, nina mo tabasa, "Kadè naing bakinenmu tabasa? Ai kalak Rom ngo ia!" 22:27 Nai idapetken komandan soridau i mo si Paulus, nina mo mbangsa, "Bagahken taba aku, tuhu ngo ko kalak Rom?" Jadi ialoi mo, "Uè, kalak Rom ngo aku." 22:28 Nai nina komandan soridadu i dèng ma mo tabasa, "Ukum aku toko ngo buèna kugarar, asa ndorok aku gabè kalak Rom!" Ialoi si Paulus mo, "Ukum aku kessa nai tubuh ngo aku enggo kalak Rom." 22:29 Nai mèter sondar mo anggota-anggota soridadu sinaing memerèso si Paulus i. Ekuten soridadu i pè gabè mbiar ngo, ibettoh kessa kalak Rom ngo keppè si Paulus, keppè enggo sanga irantè. 22:30 Ukum komandan soridadu Rom i sèkel kalohoon ngo ia naing memettoh kadè kulih sebabna asa isalahken kalak Jahudi si Paulus i. Nai sibarembenkenna, idiloi mo pulung karina imam-imam ekuten dekket sanhèdrin. Ipaluah mo si Paulus janah iarahken mi tengah-tengah kalak idi.
22:1 "Kènè alè karina partua bak kaka anggi, dengkohken kènè mo lebbè keterangenku èn!" 22:2 Idengkoh kalak i kessa mo merkata Heber si Paulus taba kalak i, mèter sip mo kalak i, nai iterusken si Paulus mo ranana, nina mo, 22:3 "Kalak Jahudi ngo aku, tubuh i Tarsus i nagerri Kilikia, tapi mbelgah i kuta Jerusalem èn ngo aku, janah seppè kalohoon ngo aku iajari i persikolaan si Gamaliel lako mengguruken pati-patiin siniberrèken si Musa taba empungta i. Enggo mo kukedarohken menguèi Dèbata, tosè bagè kènè ni sèn sidari èn. 22:4 Kuletlet janah kupatèken ngo kalak sipercaya taba Jesus, sanga ngo dèba matè. Kutangkup ngo karina anak laki bak daberru janah kumasukken mi kurungen. 22:5 Imam Huntuun dekket imam ekuten i ngo saksingku tersèngèt i, ai bai kalak i nai ngo kujalo surat embahenku mendahi kalak Jahudi mi Damaskus, ai merkitèken surat sikuembah idi, ndorok mo kutangkup janah kuiring mi Jerusalem karinana kalak sipercaya mi peddah rembaru i, asa ihukum." 22:6 "Tapi sinderrang laus aku janah ndessing mi Damaskus kira-kira cèger ari, sintempu mo lot cuhaya nterrang kalohoon i langit nai mengkalokoi aku. 22:7 Nai mèter geppah mo aku mi tanoh janah kudengkoh mo sora mendokken taba aku bagèen, 'Saulus! Saulus! Kasa iletlet kono Aku?' 22:8 Nai ningku mo mengaloi, 'Isè ngo Kono Tuhan?' Jadi nina mo taba aku, 'Jesus kalak Nazaret i ngo aku niletletmi!' 22:9 Idah denganku i ngo ukum cuhaya i, tapi oda idengkoh sora simengerana dekket aku i. 22:10 Nai ningku nola mo mengkusoi, 'Kadè ngo sibahanenku Tuhan?' Jadi ialoi mo aku, 'Kèkè mo kono, lako mo mi Damaskus. Isidi mo nahan ibagahken bamu sinaing bahanenmu.' 22:11 Tapi gabè oda merpendidah nèngè aku kumarnaken bendella cuhaya i, itegu-tegu denganku i nai ngo aku soh mi Damaskus. 22:12 Lot mo i sidi sada kalak mergerar si Ananias, sada kalak burju ngo ia janah simengulaken pati-patiin i. Janah mersangap ngo ia ibaing kalak Jahudi silot i Damaskus. 22:13 Roh ngo ia menongkir aku, janah cènder i gembarku ninganna mendokken, 'Alè Saulus, nggia, merpendidah nola mo kono!' Jadi mèter kuidah mo ia gejapken naidi. 22:14 Nina nola dèng ma mo taba aku, 'Enggo ipilih Dèbata ni empungta i kono, asa ibettoh kono lemmo atèNa, janah asa idah kono Jesus, Naposo Dèbata simegulaken lemmo atè Dèbata janah simendengkoh sora Jesus sendiri. 22:15 Kennah gabè kalak simengindangkensa ngo kono taba karina jelma tersèngèt siniidah dekket sinidengkohmu. 22:16 Bagèndari pè kettu mo ulang pedekkah-dekkah. Kèkè mo kono, perridiken mo dirimu. Dilo mo Tuhan i, asa mpanting kono ipas dosa-dosamu nai.' " 22:17 "Nai balik kessa mo aku mi Jerusalem èn, ikuasai Tendi Perbadia mo aku sinderrang mersodip aku i Bages Dèbata. 22:18 Kuidah ngo Tuhan i mendokken taba aku, 'Kettu mo laus kono i Jerusalem èn nai, kerna oda ijalo kalak sinisèn i pengindangkenmu tersèngèt Aku.' 22:19 Nai ningku mo, 'Alè Tuhan, ibettoh kalak i ngo, aku ngo roh mi bages perguruun lako menangkup dekket mengerantè bak membet-bet sipercaya taba Kono. 22:20 Bagi ma ngo tikan terbunuh saksiMu si Stefanus, i sidi ngo aku janah lolo ngo aku kerna terbunuh i ia. Aku ngo tupèh menjaga oles kalak simemmunuhsa i.' 22:21 Tapi nina Tuhan i mo taba aku, 'Laus mo kono, ai Kupasulak ngo ko mi bekkas sindaoh mendahi bangsa sidèban siso Jahudi.' " 22:22 Ukum ninggat rana i dènga, dak idengkohken kalak i ngo ia mengerana. Tapi soh kessa mo mi rana perpodi i, gabè ipegang kalak i mo sorana mennurakken, "Bunuh mo ia! Oda belliin nggelluh jema bagidi!" 22:23 Ningan mersurak i kalak idi, ipengambas-ambasken ngo olesna janah ipengsampakken abu mi dates. 22:24 Jadi idokken ekuten soridadu i mo iembah ia mi tangsi, iligasi mo ia tikan iperrèso, asa ibettoh kadè sebabna asa bagi surak-surak kalak Jahudi tabasa. 22:25 Tapi iberretken kessa mo si Paulus lako mengeligas, nina si Paulus mo taba perwira sicènder nisidi, "Ndorok ngo iligasi kènè sada kalak Rom, tukasi pè makdèng iadili?" 22:26 Mendengkoh kata si Paulus i, idahi pèrwira i mo komandan soridadu i, nina mo tabasa, "Kadè naing bakinenmu tabasa? Ai kalak Rom ngo ia!" 22:27 Nai idapetken komandan soridau i mo si Paulus, nina mo mbangsa, "Bagahken taba aku, tuhu ngo ko kalak Rom?" Jadi ialoi mo, "Uè, kalak Rom ngo aku." 22:28 Nai nina komandan soridadu i dèng ma mo tabasa, "Ukum aku toko ngo buèna kugarar, asa ndorok aku gabè kalak Rom!" Ialoi si Paulus mo, "Ukum aku kessa nai tubuh ngo aku enggo kalak Rom." 22:29 Nai mèter sondar mo anggota-anggota soridadu sinaing memerèso si Paulus i. Ekuten soridadu i pè gabè mbiar ngo, ibettoh kessa kalak Rom ngo keppè si Paulus, keppè enggo sanga irantè. 22:30 Ukum komandan soridadu Rom i sèkel kalohoon ngo ia naing memettoh kadè kulih sebabna asa isalahken kalak Jahudi si Paulus i. Nai sibarembenkenna, idiloi mo pulung karina imam-imam ekuten dekket sanhèdrin. Ipaluah mo si Paulus janah iarahken mi tengah-tengah kalak idi.
24:1 Enggo kessa lima ari nola, roh mo Imam Huntuun Ananias rebakken dekket pengulu-pengulu dekket sada kalak pengacara mergerar Tertulus, mi Kaisarèa, mengaduken si Paulus mendahi Gubèrnur Feliks. 24:2 Enggo kessa mbuka perkara i, idhaba si Tertulus mo si Paulus bagèen, "Alè gubèrnur nipersangapen! Mènak ngo nagerri nami kessa nai kono menggem-nggem kami. Janah naik ngo pernggelluh nami, ai enggo mbuè ibaing kono simendè mi bangsa nami. 24:3 Karinana pennarihkenmu i bai nami, kudokken kami mejalo metangkup bamu, janah jalo mo penghormati nami siso terasam belgahna. 24:4 Tapi asa ulang mbuèsu magosia tikki ndènè, kupido kami bamu, dengkohken mo lebbè sigejap pengaduun nami si cituk èn. 24:5 Dapet kami ngo kalak èn mengago janah menggutturi taba kalak Jahudi barang i dikè sambing. Ia ma ngo pengulu geraken kalak Nazaret. 24:6 Ioji ngo memmaing asa gabè samur Bages Dèbata, jadi kutangkup kami ngo ia. Janah naing kuhukum kami ngo ia rembang mi pati-patiin nami. 24:7 Tapi roh komandan Lisias, irampasi mo ia bai nami nai, 24:8 janah memerèntahken taba kami asa roh kami menghadep taba kono. Karinana sikudokken kami èn, ndorok ngo ibettoh kono i bana nai, mula ikusoi kono ia." 24:9 Karinana kalak Jahudi ni sidi mennuhu-nuhui pendokken si Tertulus i. 24:10 Nai ibaing gubèrnur i mo pertanda bai si Paulus asa ialoi. Nai nina si Paulus mo, "Ntangkas ngo kubettoh, enggo ndekkah Tuan i gabè penghukum i nagerri èn. I ngo sampang atèngku mendokken ranangku èn i lebbè Tuan i. 24:11 Ndorok ngo iselidik Tuan i, oda lebbih sipuluh dua ari sienggo laus i dèng ngo laus aku mi Jerusalem lako mersodip. 24:12 Oda pennah idapet kalak Jahudi aku merselisih barang dekket isè pè barang memmaing kegontaren i Bages Dèbata, barang i bages perguruun barang i tengah kuta pè. 24:13 Kalak èn pè oda ngo terindangkensa taba aku sinitukaskenna i. 24:14 Tuhu, kuuèi ngo Dèbata ni empung nami tosè mi sinipeddahken Tuhan Jesus; tapi pilit ngo i ukum idokken kalak èn. Percaya ngo aku mi isi sitersurat ibas bukku si Musa dekket Bukku Nabi-nabi. 24:15 Lot ngo pengharapenku bai Dèbata, tosè bagè kalak idi, imo tersèngèt karina jelma sienggo matè -- kennah balik nggelluh nola ngo, barang jelma bujur i tah pè barang jelma nggèduk i. 24:16 Kerna naidi ngo asa dak kukeburjuken, asa mpanting ukurku merradepken Dèbata bang meradepken jelma pè. 24:17 Enggo kessa salpun barang piga-piga tahun oda nèngè aku i Jerusalem, roh mo aku mi sidi merembah tumpak pengurupiin, imo riar bai bangsangku nai, janah naing memèlè Dèbata. 24:18 Tikan kuulaken i, jupa kalak i mo aku i Bages Dèbata, enggo kessa pul aku menguras. Oda lot sinterrem rebbak dekket aku, janah oda ma ngo lot kegutturen idi. 24:19 Tuhu lot ngo i sidi tikan naidi kalak Jahudi i propinsi Asia nai. Asa kennah mo nemmu isèn kalak i lako memmaing pengadunna tersèngèt aku taba kènè alè tuan gubèrnur, mula tah lot siadunkenna tersèngèt aku bak kesalahenku. 24:20 Mula pè oda isèn kalak i, kalak èn pè iruapken mo barang kadè kegèdukenku ibettoh kalak i tikanna irungguken kalak èn aku i Runggu Agama. 24:21 Pellin kata èn ngo kudokken ninganna cènder aku i tengah-tengah kalak èn, Irungguken pè aku sidari èn kumarna percaya ngo aku lot perkèkèen ipas simatè nai." 24:22 Nai iondari si Feliks sienggo memettoh ntangkas tersèngèt Jesus mo perkara i, nina mo, "Lebbè roh pè komandan Lisias asa kuputusken perkara èn." 24:23 Nai idokken mo perwira menjamotken si Paulus i asa tong itahan ia, tapi narih merongkah mo, janah ulang iararang barang isè denganna si uè mengurupi janah mengkebasisa. 24:24 Nai barang piga-piga ari nai nola, roh mo si Feliks rebbak dekket sinibagesna si Drusila berru Jahudi ngo ia. Nai ipasulak si Feliks mo mengalengi si Paulus. Nai idengkohken si Feliks mo rana si Paulus tersèngèt percaya bai Kristus Jesus. 24:25 Tapi soh kessa mo sukuten tersèngèt ketègerren, metemman dekket hukum seggen, gabè mbiar mo si Feliks nai nina mo, "Singgat i mo lebbè. Tah cidahari nola lot tikki kesempatenku, kupasulak pè mengalengi kono." 24:26 Tapi harap ngo si Feliks berrènken si Paulus riar bana; kumarna naidi ngo asa nggatimi pasulak mengaleng si Paulus asa mengeranai dekketsa. 24:27 Tapi enggo kessa mo dua tahun dekkahna mbangkit mo si Perkius Festus gabè gubèrnur menggancihi si Feliks. Kumarna naing muat ukur kalak Jahudi si Feliks, gabè ibelli mo si Paulus i kurungen.
25:1 Enggo kessa tellu ari si Festus soh mi nagerri i, berkat mo ia i Kaisarèa nai mi Jerusalem. 25:2 Roh mo mi hadeppenna imam-imam ekuten dekket pengulu-pengulu Jahudi mennerrèngèti pengaduun kalak i tersèngèt si Paulus. Mersembah merkuraja ngo kalak i mendokken taba si Festus: 25:3 "Masèh mo nemmu atè gubèrnur Festus, ipasulak mo nemmu si Paulus mi Jerusalem; ai enggo kin ngo sada taki kalak i lako mengenggep i tengah ndalan janah asa ipusa." 25:4 Tapi nina si Festus mo mengaloi, "Itahan ngo bagèndari si Paulus i Kaisarèa, janah ndor ngo aku balik mi sidi. 25:5 Jadi dekket mo pengulu-pengulu asa rebbakken kami laus mi Kaisarèa, janah iasè kin mo kadè pengaduun ndènè mula tah lot ibahanken siso hukum," nina. 25:6 Asa enggo kessa merian i sidi ia ualuh soh mi sipuluh berngin, berkat mo si Festus balik mi Kaisarèa. Sibarembenkenna, mèter ibuka mo runggu perhukumen, idokken mo mengalengi si Paulus asa roh mi hadeppenna. 25:7 Soh kessa mo si Paulus, mèter ikulilingi kalak Jahudi siroh i Jerusalem nai mo ia; ipendokken mo tukas mberrat mengaduken si Paulus. Tapi oda terbuktiken kalak i tukas sinidokkenna i. 25:8 Jadi itariasken si Paulus mo, nina mo, "Oda lot kesalahenku tersèngèt pati-patiin kalak Jahudi barang pè mi Bages Dèbata, barang dempak Kèsar Rom pè." 25:9 Tapi lako muat ukur Jahudi, nina si Festus mo taba si Paulus, "Uè ngo kono mi Jerusalem, asa i sidi kutimbang perkaramu rembang mi si nitukasken kalak i ndai?" 25:10 Ialoi si Paulus mo, "Cènder ngo aku i kerungguun Kèsar Rom, i sidi ngo aku iadili. Ntangkas ngo ibettoh kono, oda lot kessalahenku taba kalak Jahudi. 25:11 Mula lot kulausi hukum, sindorok memmaing aku patut merutang kessah, ijin ngo aku matè. Tapi ukum oda ngo tuhu nitukasken kalak i taba aku, isè poda ndorok pessakatken aku taba kalak i. Kupengido, asa irungguken aku i kerungguun Kèsar i!" 25:12 Enggo kessa mersungkuun si Festus dekket denganna penghukum, gabè idokken mo, "Ipido kono ngo asa irungguken kono i kerungguun Kèsar i; jadi berkat mo kono menghadep Kèsar." 25:13 Enggo kessa salpun barang piga-piga ari, roh mo raja Agripa dekket Bernike mi Kaisarèa lako mendokken kata njuah-njuah taba si Festus. 25:14 Enggo kessa i sidi kalak i barang piga-piga ari, ibagahken si Festus mo taba raja Agripa tersèngèt perkara si Paulus i, nina mo, "Lot ngo isèn sada kalak tahanen itadingken si Feliks. 25:15 Tikan i Jerusalem aku, roh mo imam-imam ekuten menghadep taba aku bagi ma pè dekket pengulu-pengulu Jahudi lako magahken pengadunna tersèngèt sitertahan i, janah ipidoken kalak i asa kudabuh hukum bana. 25:16 Tapi ningku ngo mengaloi kalak i, Oda hukum i bai kalak Rom, mula bagi sambing mèter ihukum sada kalak sitertukas, ukum makdèng hadep sitertukas i dekket sipenukas, janah iberrèken kesempaten bana membèla dirina. 25:17 Jadi sinderrang roh kalak i misènda, oda pella kupedekkah-dekkah, ai siberembenkenna mèter kubaing mo runggu, janah kudokken mo asa iembahken ia menghadep aku. 25:18 Tikan iranaken pennukas i tukas bana ninganna cènder, kudokdok kin ngo lot itukasken kalak idi kejahaten. 25:19 Tapi pellin pejaè pendapet ngo kalak i dekketsa tersèngèt agama kalak i, dekket tersèngèt sada kalak mergerar Jesus sienggo matè. Tapi mertahan ngo si Paulus mendokken enggo balik nggelluh nina Jesus i. 25:20 Tapi kumarna bingung aku tersèngèt bakunè asa ndorok dapet aku keterangen tersèngèt perkara i, gabè kukusoi mo si Paulus, tah uè ia laus mi Jerusalem, asa i sidi irungguken ia. 25:21 Tapi ipidoken si Paulus ngo asa tong ia lebbè ikurung pèma irungguken ia mi kerungguun Kèsar. Kerna naidi kudokken ngo asa ikurung ia, mèma kutengesken ia mendahi Kèsar." 25:22 Nai nina si Agripa mo taba si Festus, "Aku pè sèkel ngo mendengkoh ranana." Mula bagidi, "baremben mo dengkohenmu," nina si Festus. 25:23 Sibarembenkenna, roh mo Agripa dekket Bernike merpakèen kerajaen. Ibengketti mo kerungguun rebbakken dekket lubalang-lubalang bagi ma dekket simersangap ni kuta i. Jadi idokken si Festus mo mengaleng si Paulus. 25:24 Nai nina si Festus mo, "Alè Raja Agripa, dekket kènè karina sitampak pulung isènda. Èn mo kalakna siniaduken kalak Jahudi bangku, kalak i si ni Jerusalem bang si ni sèn. Janah dak idilo-diloken kalak i ngo, oda pegelluhen nina jelma bagèen. 25:25 Tapi kubettoh ngo oda lot iulaken kalak èn siso hukum, memmaing patut ia merrutang kessah. Tapi kumarna ia sendiri mengido asa perkarana èn irungguken i kerungguun Kèsar, enggo kuputusken, asa pasulaken mo ia laus mi sidi. 25:26 Tapi oda lot dèng bangku sada keterangen tegas mahan suratenken ibas surat sinaing kutenges mi Kèsar. Kumarna naidi ngo asa kuhadapken ia mendahi kènè karinana, terlebbih-lebbih kono Alè Raja Agripa! Maksudku asa merkitè penimbangen ndènè, lot suratenkenku. 25:27 Ai dok atèngku kurang ngo sellohna mula nitengesken sada kalak tahanen keppè oda nibagahken kadè tukas nitukasken pengadu bana."
26:1 Nai nina si Agripa mo taba si Paulus, "Dokken mo rana pembèlanmu!" Jadi ikilapken si Paulus mo tanganna, ninganna idokken, 26:2 "Alè Raja Agripa! Dapetten tuah ngo aku kuakap sidari èn kumarna ndorok aku mengerana dekket kono tersèngèt nitukasken kalak Jahudi bangku; 26:3 kerna enggo lebbih penandaan Raja idi i karina adat dekket permasalehen kalak Jahudi. Kerna i kupido bamu; sobar mo kono lebbè mendengkohken ranangku èn! 26:4 Ibettoh karina kalak Jahudi ngo bakunè nggelluhku, mulai anak-anak nai aku, i tengah-tengah bangsangku. Janah kessa nai anak perana aku i Jerusalem. 26:5 Mulai tikala i nai enggo ngo itandai kalak i aku. Ukum uè kalak idi, terindangken kalak idi ngo, imulana nai ngo aku nggelluh bagè sada kalak Parisè, janah mengèkutken karinana hukum-hukumna, janah horong èn mo si seppèna menniahi agamanta i. 26:6 Bagèndari cènder ngo aku isèn lako irungguken kumarna pengharapen dekket kepercayaenku mi si tersèngèt bagah-bagah niperbagah Dèbata taba empung nami. 26:7 Kumarna bagah-bagah i ma ngo niharap kalak Israel sisipuluh dua marga i, asa dak iuèi kalak i Dèbata mahar dekket berngin ipas karina gegohna nai. Jadi kumarna bagah-bagah i ngo alè Raja Agripa memmaingken asa iaduken kalak Jahudi aku. 26:8 Kasa nola kaka-anggingku kalak Jahudi oda percaya, ipegelluh Dèbata kalak sumatè? 26:9 Ai aku pè tikanna i, ukum pendapetku, kennah mertuhu-tuhu aku mengalo Jesus kalak Nazaret i. 26:10 Janah saut ngo enggo kubahanken idi i Jerusalem. Ai kujalo ngo surat kuasa bai imam-imam ekuten nai, asa kukurung mbuè kalak sipercaya janah simengèkutken Dèbata. Janah aku sendiri pè setuju ngo asa ihukum matè kalak i. 26:11 Mèduk janah ngkatep ngo kusiksa kalak idi i bages perguruun, memaksa kalak i, asa ialo kepercayaenna i. Soh mo nggettemna kuakap mengidah kalak i, memmaingken asa mi kuta sidèban pè kuletlet ngo kalak idi." 26:12 "Bagidi ma ngo laus aku mi Damaskus merembah surat kuasa, ipeberkat imam-imam ekuten. 26:13 Jadi sinderrang i tengah ndalan dèng aku, tupung cèger ari, kuidah mo Alè Raja Sinihormaten, roh cuhaya i langit nai, ncihuren asa sendang mataniari, icuhayai mo sikulilingku dekket karina denganku sindalaan i. 26:14 Nai geppah mo kami karina mi tanoh. Kudengkoh mo sora mendokken taba aku i kata Heber bagèen, Saulus! Saulus! Kasa dak iletlet kono Aku? Mpiah mo akapenmu mula dak ialo Ko penguluken tuanmu! 26:15 Nai ningku mo, 'Isè ngo Ko Tuan?' Ialoi Tuhan i mo, 'Jesus ngo aku siniletletmi. 26:16 Tapi kèkè mo kono, janah cènder mo ko! Ai kupacidah pè diringku taba kono, lako milih kono ngo, asa gabè naposongKu. Kupasulak mo kono mengindangken si ni idahmu sidari èn dekket sinaing pacidahenku dèng mi podiin èn. 26:17 Kupaluah mo kono i bangsa Israel nai dekket i bangsa sidèban siso Jahudi nai. Kupasulak mo ko laus mendahi kalak i, asa ibuka kono mata kalak i, 26:18 janah asa karuar kalak idi ibas sigellap idi nai balik mi kecihuren; asa maluah kalak idi ipas gemgemmen Sibolis i nai, balik mi gemgemmen Dèbata. Ai merkitè percaya kalak i bangKu, ijalo kalak i mo kesasaan dosana janah gabè persulang rebbak dekket kalak sienggo ginemgem Dèbata sienggo terpilih i.' " 26:19 "Kumarna naidi alè Raja Agripa, dak ngo kuusahaken menguèi karina peddah siroh bai Dèbata nai. 26:20 Nai kujamitai mo kalak ni Damaskus i perlebbè, asa tobat kalak i ipas dosa-dosana nai, janah asa ipessoh dirina taba Dèbata, janah kennah teridah ngo i merkitè perangè selloh tandana enggo ia mertobat. Bagi ma ngo bang i Jerusalem dekket i suberri Judèa soh mendahi kalak siso bangsa Jahudi pè. 26:21 Jadi kemulihken naidi mo asa itangkup kalak Jahudi aku i Bages Dèbata nai, janah naing ibunuh. 26:22 Tapi iondingi Dèbata ngo aku soh mi sidari èn, asa cènder aku begèndari isèn lako mennaksiken taba karina jelma -- simbelgah bang singkèdèk pè. Karinana sienggo kudokken i, tosè ngo i bagè sienggo ni lumbaken nabi-nabi dekket si Musa; 26:23 mendokken: Menggong simbernit ngo Kristus Raja Sipaluah niperbagah-bagah Dèbata, janah ia ngo perlebbè balik nggelluh i simatè nai; asa merkitèken bagidi Iberitaken kecihuren kelluahen i taba kalak Jahudi dekket kalak sidèban siso Jahudi pè!" 26:24 Enggo kessa idokken si Paulus bagidi, ipegang si Festus mo sorana mendokken, "Enggo mo pana gila ko Paulus! Kepandèenmi ngo memmaing kono gila." 26:25 Tapi ialoi si Paulus mo, "Oda ngo gila aku alè Festus nipersangapen; karna ukum kata sienggo kuruapken i, bennar ngo i janah roh ibas pikirenku situhunna nai! 26:26 Ai ntangkas ngo ibettoh Raja Agripa i idi. Kumarna naidi ngo asa nggasang ukurku lako mengeranai i hadeppenNa, janah oda pella alang-alangen; kum dok atèngku sada poda mak ntangkas i bai raja i, ai masa ngo i karinana ipas sintarar. 26:27 Otang percaya ngo kono mi sinidokken nabi-nabi Alè Raja Agripa? Kubettoh ngo percaya ngo kono!" 26:28 Nai nina si Agripa mo taba si Paulus, "Idokdok kono ngo murah memmaing aku gabè kalak Kristen ibagasen sigejap sambing?" 26:29 Nai nina si Paulus mo, "Barang ibagasen sigejap barang pè ndekkah dènga, kusodipken ngo taba Dèbata, asa dekket kono alè Raja bak karina simendengkoh aku sidari èn -- naing mo nemmu bagè aku èn, tapi oda dekket rantèngku èn!" 26:30 Nai dungna cènder mo raja i, gubèrnur Festus bak si Bernike dekket karina denganna. 26:31 Laus mo kalak i sigejap mi ruar, janah mengeranai mo kalak i samahsa bagèen, "Oda lot ulah-ulah kalak èn barang kadè salah, memmaing ia ndorok merutang kessah, barang kurungen pè." 26:32 Janah idokken si Agripa mo taba si Festus, "Terpaluah ngo nemmuken kalak èn, ukum oda kin idokken asa irungguken perkarana idi i kerungguun Kèsar."
27:1 Nai iputusken mo hukum taba si Paulus, kennah merkeppel mo kami laus mi Italia, isohken mo si Paulus dekket dèba nai sienggo ikurung kin, taba sada kalak perwira mergerar si Julius, imo ekuten "Soridadu Kèsar." 27:2 Mbengket mo kami mi keppèl siroh i Adramitium nai, nai berkat mo kami arap keppel i, ai enggo kin ngo kebbas ninganna dak meninggahi pellabuhen-pellabuhen silot i propinsi Asia. Lot ngo dengan nami sada kalak Makedonia mergerar si Aristarkhus roh i Tesalonika nai. 27:3 Sibarembenkenna soh mo kami mi Sidon. Ukum si Julius, selloh ngo ibaing taba si Paulus, ipadiat ngo ia laus mendahi dengan silot ni sidi i, asa ijalo bai kalak i nai kadè siperlu bana. 27:4 I sidi nai merkeppel mo kami kan biding-biding Selatan Pulo Siprus, kumarna sapa-sipu ngo angin. 27:5 Nai kubellus kami mo laut pènterenken Sisilia dekket Pamfilia, jadi soh mo kami mi Mira i nagerri Likia. 27:6 Jumpa komandan i mo i sidi keppel Aleksandria naing laus mi Italia, gabè ipindahken mo kami karina mi keppel i. 27:7 Hanjar kalohoon ngo keppel nami i merlayar barang piga-piga ari dekkahna, janah kumarna hanjarna, jadi mahal ngo perdalanen i soh mi Knidus. Kumarna dak tong ngo sapa-sipu angin, oda ngo terbaing kami tèngken merkeppel mi tujuun dak memiding-miding pulo Kreta mo kami memellus Tanjung Salmone, asa narih terlègen i angin topan i nai. 27:8 Soh mo lejana kuakap kami memellus biding pulo i, jadi dungna sakat mo kami mi sada bekkas mergerar Pelabuhen Merandal, oda sadikè daoh i kuta Lasea nai. 27:9 Tikan naidi enggo leppas tikki Ari Raya Perdamèen kalak Jahudi. Enggo mbuè magosia tikki nami, asa oda tikkina nè aman merkeppel, gabè dak mermara nai ngo mula merkeppel. Kumarna naidi ipesèngèt si Paulus ngo kalak i, nina mo, 27:10 "Kènè alè dengan kuidah dak mermara janah mengkerohken kerogiin ngo taba kita mula siterusken merkeppel. Oda pellin embahen dekket keppel sambing mermara, tapi dekket ngo kessahta mermara." 27:11 Tapi token ngo komandan i mi kata juru mudi dekket nahoda keppel i dari pada kata si Paulus. 27:12 Tuhu kurang selloh ngo labuhen i bekkas keppel ukum tupung tahun mbergoh. Kerna naidi buèen ngo pekerja keppel i setuju lako merkeppel terrus mennadingken pelabuhen i, katerra pè giam ndorok soh mi Feniks, janah mentadi i sidi sidekkah mosim mbergoh. Feniks imo sada pelabuhen i Kreta mendempak barat daya dekket barat laut. 27:13 Ipas katika i narih hanjar ngo penempul angin selatan, gabè idokdok perkeppel i mo ndorok merlayar dèng lako mennerusken perdalanen i. Nai itarik mo sauh, nai merlayar mo menembiri pulo Kreta. 27:14 Tapi oda pella ndekkah -- mèter sapa-sipu mo kaba-kaba i pulo i nai, mergerar kaba-kaba Timur Laut, 27:15 gabè ipuyu mo keppel nami i. Kumarna oda terjuljul keppèl i nèngè angin i, kubelli kami nai ngo keppel i merkinisohna barang mikè iembah angin i. 27:16 Jadi tikan iombang-ambingken angin i keppel nami i, keppè soh mo kami mi kan Sèlatan pulo Kauda sikèdèk i. Kumarna narih terlègennen pulo kètèk i kami dak kucèkèpi kami mo sekoci keppel i, tukasi pè mersusah payah. 27:17 Enggo kessa ipenaik sekoci i mi keppel i, ililiti mo dekket tinali keppel i, asa tambah ngkongana. Kumarna mbiar lekket mi dasar pasir Sirtis i laut Libia, ilèmpang kalak i mo layar i, gabè bagidi nai ngo kami mombang-ombang. 27:18 Sibarembenkenna nola, makin mengamukna ngo angin i, gabè idabuhi mo dèba embahen keppel i. 27:19 Mbiar ngo kalak i tah bakunè nola terhantuk keppel nami i mi batu karang, jadi gabè idabuh kalak i mo empat sauh kan podi keppel i mema nterrang ari. 27:20 Tah sadikè dekkahna oda nèngè kuidah kami mataniari barang bintang pè, bagi dèng ma penessak kaba-kaba i, enggo saip ukur nami oda nèngè maluah kami. 27:21 Enggo toko dekkahna oda nèngè uè mangan kalak i, nai kèkè mo si Paulus mi tengah-tengah kalak i, nina mo, "Kènè alè dengan! Ukum idengkohken kènè kin ranangku asa ulang mèrèt kita i pulo Kreta nai, tentu oda siakapi kesusahen dekket kerogiin èn. 27:22 Bagèndari pè, kupido bai ndènè karina, asa tong nggasang ukur ndènè, ai oda pella lot kembalangen kessah barang isè bai ndènè nai, pellin keppel i ngo kessa bennè. 27:23 Ai roh ngo berngin i mi gembarku malaèkat Dèbata sikusembah, imo Dèbata sidasa aku, 27:24 mendokken taba aku, 'Ulang kono mbiar alè Paulus! Ai kennah cènder ngo kono i lebbè-lebbè Kèsar i. Janah kumarnaken sibasa-basa Dèbata bamu, gabè njuah-njuah ngo karina pengisi keppel i kumarnaken kono!' 27:25 Ai percaya ngo aku bai Dèbata, kennah saut ngo karina nidokkenNa bangku i. 27:26 Tapi ukum keppelta èn, tertuktuk bana terhantuk ngo mi sada pulo." 27:27 Pesipulu empat bernginken dak mombang-ombang kami i Laut Adria. Nai tupung tengah mberngin, bagè irasaken perkeppel idi mo, enggo ndessing darat. 27:28 Nai idabuh kalak i mo tinali pengasak mi terruh tah sadikè nai bages laut i. Keppè lot ngo empat puluh mèter bagesna bekkas i. Enggo kessa ma merdalan keppel i sigejap nai, iasak kalak i nola dèng ma mo laut i, terbettoh nola ma mo hampir tellu puluh mèter bagesna. 27:29 Mbiar ngo kalak i tah bakunè nola terhantuk keppel nami i mi batu karang, jadi gabè idabuh kalak i mo empat sauh kan podi keppel i mèma nterrang ari. 27:30 Lot ngo dèba perkeppel i sipsip naing mperrus. Itontoni kalak i mo sekoci mi laut merdalihken bagè cara naing mendabuh sauh i lebbè keppel idi nai. 27:31 Tapi idokken si Paulus mo taba Perwira dekket soridadu ni keppel i, "Kènè alè dengan, ukum oda ibagasen keppel èn kalak idi, oda terbaing kènè maluah." 27:32 Kerna naidi igettap soridadu i mo èkèt sekoci i, nai ndabuh mo sekoci i janah mayup-ayup bagi tah mikè. 27:33 Ningan mèma mbincar mataniari, idasdas si Paulus mo mangan kalak i karina, nina mo, "Pesipulu empat ariken mo bagèndari dak terendep-endep kènè, janah laju oda mangan. 27:34 Kerna naidi, kudokken mo taba kènè, asa mangan kènè lebbè, asa lot menumpak gegoh ndènè. Karina kènè oda mermara, janah sirambar buk poda lot mermara bai ndènè nai." 27:35 Enggo kessa idokken si Paulus bagidi, ibuat mo roti, idokken mo mejalo metangkup bai Dèbata i hadeppen kalak i, nai ipenggelli mo roti i, jadi mangan mo kalak i. 27:36 Nai gabè nggasang nola mo ukur kalak i karinana janah mangan mo kalak i. 27:37 Ukum buè kalak si ni keppel i, dua ratus ennem puluh ngo. 27:38 Enggo kessa salpun mangan kalak i, idabuh kalak i mo embahen keppel i mi laut, asa mennahang keppel i. 27:39 Jadi enggo kessa nterrang ari, idah perkeppel i mo sada pulo, tapi oda ibettoh kalak i barang pulo kadè i. Itatap kalak i mo sada suak laut bak bidingna. Merhendak mo kalak i asa mi sidi ipetupung keppel idi ukum terbaing. 27:40 Nai igettap kalak i mo tali sauh, janah ibelli ngo sauh i lenneng. Iosari kalak i ma mo èkèt kemudi. Ipekimbang kalak i mo layar kan lebbè keppel i, asa isempul angin keppel i tèngken mi biding suak laut i. 27:41 Tapi terhantuk nola ngo keppel i mi kersik, gabè tersanggal mo takal keppel i janah lekket i sidi; podina pè mereppuk ngo iempasken galombang mbelgah-mbelgah i. 27:42 Tapi mertaki mo soridadu i naing memmunuh sikurungen i ai mbiar kalak i tah bakunè nola merlangi kalak i mi darat lako mperrus. 27:43 Tapi igerra komandan i ngo taki soridadu i, kumarna naing pegelluhenna ngo si Paulus. Ipasulak mo merlangi sindorokna merlangi perlebbè mi biding laut i. 27:44 Sidèbanna i perpodi mo, janah ibaing kalak i mo rapan-rapanna papan-papan barang pè pecah-pecahen keppel i. Bagi mo carana kami njuah-njuah soh mi darat.
28:1 Enggo kessa soh kami mi darat ibagasen njuah-njuah, baru pè kubettoh kami gerar pulo i Malta. 28:2 Selloh kalohoon ngo basa pengisi pulo i meradepken kami. Ilakati kalak i ngo api; nai iarahken mo kami cidudu, kumarna enggo roh nola ma udan, janah soh mo mbergohna. 28:3 Sinderrang pepulungken ranting-ranting si Paulus lako memmaing mi api i, mèter morot mo nipè darih i sidi nai kumarna nggarana, itebbi mo tanganna. 28:4 Idah pengisi pulo i kessa mo nipè i mantong-antong i tangan si Paulus, nina kalak i mo samahsa, "Pemmunuh ngo pana tuhu kalak ènda, ai tukasi pè maluah ia i laut i nai, tapi oda ipadiat dèbata kesèntengen i ia nggelluh." 28:5 Tapi ikurpasken si Paulus ngo nipèi mi api, janah oda pella kadèen ia. 28:6 Ukum dok atè kalak idi, bakunè pe kennah mbessar mo sigejap nai tangan si Paulus i, barang simpusta runggang lako matè. Tapi enggo kessa narih ndekkah ipèma kalak idi, oda kadèen ia idah kalak i, mobah nola mo perukuren kalak i, nina mo, "sembahen ngo ia." 28:7 Ndessing i bekkas idi nai, lot ngo pekken pengulu kalak ni pulo i, mergerar si Publius. Mendè ngo kami ijalo janah itamuè tellu ari dekkahna. 28:8 Tapi dak gampar ngo bapa si Publius i sakiten, kumarna sakit panè dekket adum kikiren. Idah si Paulus mo ia, nai mersodip mo si Paulus ninganna iampèken tanganna dempaksa, nai malum mo iakap. 28:9 Kemulihken naidi merrohen mo kalak sisakiten ni pulo idi mendahi si Paulus, gabè ipemalum mo kalak i karinana. 28:10 Jadi mersangap ngo kami idah kalak i; janah tikan naing laus nola kami merkeppel, ipemberrèken kalak idi mo karina siperlu bai nami, janah kalak i dèng ma ngo merembah mi keppel. 28:11 Enggo kessa tellu bulan, berkat nola mo kami merkeppel i pulo i nai, arap keppel Aleksandria, ai sidekkah mosim mbergoh, merlabuh ngo ia i pulo i. Lot ngo cap keppel i, "Sembahen Leppa Kastor dekket Poluks." 28:12 Nai merlabuh mo kami i kuta Sirakusa janah mentadi isidi tellu ari dekkahna. 28:13 I sidi nai dak mengèkut-ngèkut biding mo kami soh mi kuta Regium. Sibarembenkenna menempul mo angin selatan, pedua ariken soh mo kami mi kuta Putioli. 28:14 Pejumpa mo kami i sidi dekket barang piga-piga kalak sipercaya bai Jesus, janah kumarna pencèkèpi kalak idi, gabè mengadi mo kami i sidi pitu ari dekkahna. Nai berkat nola mo kami mi kuta Rom. 28:15 Roh ngo dengan sipercaya bai Jesus ni kuta Rom simendengkoh berita nami menimbak-nimbak kami soh mi Pasar Apius dekket mi Pesenggerahen Tellu. Idah si Paulus kessa mo kalak i, mendokken melias atè ngo si Paulus bai Dèbata, janah makin nggasangna ngo atèna. 28:16 Soh kessa kami mi kuta Rom, ipadiat ngo si Paulus merian i bages lemmo atèna, tapi dak ijagai sada kalak soridadu ngo ia. 28:17 Enggo kessa tellu ari, idiloi si Paulus mo pengitua-pengituai kalak Jahudi ni kuta i. Pulung kessa mo kalak i, nina mo taba kalak i, "Kènè alè dengan! Ukum aku, oda ngo lot kubaingken salah taba bangsanta barang pè dempak adat kebiasaan si sijalo bai empungta nai. Tapi tukasi pè bagidi, itangkup ngo aku i Jerusalem, janah ipesakat taba kalak Rom. 28:18 Enggo kessa iperrèso kalak i aku, naing ipaluah ngo nemmuken aku, kerna oda lot terdapet aku memmaing barang kadè pè patut memmaing aku merutang kessah. 28:19 Tapi kumarna dak ialo kalak Jahudi, terpaksa kudokken, Kèsar Rom mengadili perkara èn. Kudokken pè bagidi, oda pella lot pengadunku tersèngèt bangsanta. 28:20 Kumarna naidi ngo asa kudilo kènè; ai irantè pè aku kumarna pengharapen kalak Israel tersèngèt Sipaluah i ngo." 28:21 Nai nina kalak i mo mengaloi, "Oda lot dèng kujalo kami surat i Judèa nai tersèngèt kono, janah oda lot barang isè pè dengan i roh mi sènda memmagahken tersèngèt kono, bang pè tah lot jahat iulaken kono. 28:22 Tapi tukasi pè bagidi, sèkel ngo kami mendengkoh tersèngèt pikirenmu, ai kubettoh kami ngo ukum tersèngèt ajaren sinikettokenku idi, dak ialo dèba ngo i barang i dikè sambing pè." 28:23 Nai ititi kalak i mo sada ari dekket si Paulus lako mertumpu nola. Asa dapet kessa mo ari sienggo ititi i, nterrem ngo merrohen kalak i mi bekkas si Paulus. Jadi siceggen nai soh mi ciboon ipeterrang si Paulus ngo taba kalak i tersèngèt kerajaen Dèbata. Ipejojor mo taba kalak i ayat-ayat tersèngèt Jesus, mulai i Bukku si Musa nai dekket Bukku Nabi-nabi, janah merrusaha ngo si Paulus asa percaya kalak i bai Jesus. 28:24 Lot ngo dèba percaya mi sinidokken si Paulus i, tapi lot ma ngo dèba oda percaya. 28:25 Gabè merselisih pendapet ngo kalak i ninganna mennadingken bekkas i, enggo kessa idokken si Paulus bagèen, "Bennar ngo sinidokken Tendi Dèbata merkitè Nabi Jesaya taba empung ndènè arnia! 28:26 Ai nina ngo, 'Lako mo bagahken taba bangsa èn: Dak ngo idengkoh kènè i, tapi laju oda iarti kènè, dak ngo iperdatèken kènè tapi oda ibettoh kènè kadè masa. 28:27 Ai enggo mpihir pusuh peratèen bangsa èn, janah enggo isompel pènggelna, enggo ipècengken matana. Masa pè èn asa ulang merpendidah mata kalak i, janah oda merpendengkoh pènggel kalak i, pusuh peratèenna oda mengantusi, janah ulang balik nemmu kalak i mendahi Aku, nai gabè Kupejuah nola kalak idi.' " 28:28 Perpodi idokken si Paulus mo, "Bettoh kènè mo alè dengan enggo iberitaken Sukuten Kelluahen i taba kalak bangsa sidèban siso Jahudi; janah idengkohken kalak i ngo i!" 28:29 Enggo kessa idokken si Paulus bagidi, merlausen mo kalak Jahudi i sidi nai, ninganna mersoal samah-samahsa. 28:30 Dua tahun ngo dekkahna si Paulus i kuta Rom, i bages ni ongkosna i. Sennang ngo ukurna menjalo kalak siroh mendahisa. 28:31 Berrani ngo ia janah nggasang kalohoon mennukutken Kerajaen Dèbata bai kalak i, bak dekket tersèngèt berita Tuhan Jesus Kristus; bèbas ngo ia memmaing bagidi, oda lot menghalang-halangi.
1:1 Kènè karina dengan si lot i Rom, sinikekellengen Dèbata janah sienggo idilo Dèbata gabè ummatNa. Enggo ipilih janah ipebangkit Dèbata aku mi bahaan magahken Sukuten Kelluahen bai Dèbata nai. 1:2 Imo niperbagah-bagah Dèbata kin merkitè nabi-nabiNa arnia enggo tersurat ibagasen Bukku Simbadia. 1:3 Sukuten Kelluahen i imo tersèngèt Anakna Jesus Kristus Tuhanta i. Secara perdagingen tubuh arap pemparen si Daud nai ngo Ia, 1:4 tapi Anak Dèbata ngo Ia mengèkutken pertendiin. Terbukti ngo i merkitè kuasana mahantu i iperkèkèNa idi ipas simatè nai. 1:5 Merkitè-kitèsa ngo kujalo ulaan pengendeng dekket masèh atè lako mennuanken mi bagasen karina bangsa -- imo asa percaya janah menguèi Dèbata. 1:6 Kènè pè dekket ngo ibas kalak i kènè sienggo nidilo gabè milik Kristus. 1:7 Mendahi kènè karinana simerian i Rom janah sinimasèh atèen Dèbata, sinidilona janah ibaing gabè kalak simbadia. Masèh atè mo bai ndènè dekket damè bai Dèbata Bapanta dekket Tuhan Jesus Kristus i nai. 1:8 Lebbèen kudokken mejalo metangkup taba Dèbata merkitè Jesus Kristus, kumarnaken kènè karina, ai sar ngo suberri dunia èn tok kalohoon kènè bai Kristus. 1:9 Dak kuèngèt ngo kènè gennep mersodip aku. Dèbata mo saksina magahken kadè sikudokken i bennar ngo. Ia ngo Dèbata sikukebbasi tarap nasa ukurku nai merkitè mennukutken Berita Merandal tersèngèt AnakNa i. 1:10 Dak kupidoken ngo taba Dèbata ibagasen sodipku, asa Ipaduè nemmuken aku roh mendahi kènè. 1:11 Ai sun ngo sèkel ukurku naing mengidah kènè, asa ndorok kuberrèken bai ndènè dèba sibasa-basa pertendiin, lako petegguhken perrukuren ndènè. 1:12 Maksudku imo kerna enggo rebbak percaya kita bai Jesus Kristus, nai ndorok mo kita mersipegasangen ukur. 1:13 Kènè alè dengan! Naing mo nemmu bettohen ndènè, enggo nggati kukebbasi naing roh mendahi kènè, tapi dak ngo mbuè halangen. Dok atèngku naing ngo asa nemmuken merbuah aku bang bai ndènè pè, bagè taba bangsa sidèban i. 1:14 Ai merutang ngo aku kuakap taba karinana bangsa, imo taba kalak simpantas bang pè taba siso mpantas. 1:15 Kemulihken naidi ngo asa sèkel kalohoon aku menjamitaken Sukuten Kelluahen i taba kènè simerian i Rom pè. 1:16 Tok kalohoon ngo aku, kegegohen Dèbata ngo Sukuten Kelluahen i lako paluahken karina sipercaya, kalak Jahudi lebbè, nai pè asa bangsa sidèban. 1:17 Kerna merkitè Sukuten Simerandal i, ituduhken Dèbata ngo bakunè carana hubungen jelma dekket Dèbata enggo gabè selloh balik; carana imo merkitè percaya bai Dèbata i mulana nai soh mi puncana. Dos ngo i bagè sitersurat ibas Bibèl, "Kalak sipercaya bai Dèbata, gabè selloh nola hubungenna dekket Dèbata, nai nggelluh mo ia." 1:18 Ipetarar Dèbata ngo pungurNa i sorga nai taba jelma perdosa dekket perrukur nggèduk simengambati kebennaren i, merkitè-kitè nggèdukna i gabè oda nèngè itandai jelma i Dèbata. 1:19 Kadè sindorok ibettoh jelma tersèngèt Dèbata enggo ntangkas ibas perukuren jelma. Ai enggo ibagahken Dèbata sendiri bai jelma. 1:20 Ndorok teridah ngo kedèbataan ni Dèbata simboni i kin, kessa nai ihanaken dunia èn, imo kuasaNa dekket kedèbatanNa simenettap i; asa oda lot nèngè cudalihen jelma i lako memènterri dirina. 1:21 Ai tukasi pè itandai jelma i Dèbata, tapi oda ngo ipessangap jelma Dèbata janah oda uè mendokken mejalo metangkup tabaSa, gabè ioto-otoi pikirenna ngo tupèh jelma i janah gellap bulita. 1:22 Idokdok mpantas ia, keppè moto ngo. 1:23 Oda ngo Dèbata simenettap i isembah kalak i, tapi gana-gana tosè mi siniteppa singgèut matè i ngo; imo mi jelma, manuk-manuk, binatang-binatang siempat nèhè dekket mi binatang-binatang simenjoror i. 1:24 Kerna naidi, ibelli Dèbata ngo kalak i mi sinipergeddo ukur kalak i, imo cubellek simellamun i, gabè ibaing kalak i mo simeronah bai samah kalak i sendiri. 1:25 Igancih kalak i ngo Dèbata sibennar i merkitè ipetupa siso tuhu. Nai gabè isembah janah iuèi kalak i ngo siniteppa singkat penempa i. Keppèken penempa i ngo nemmuken kennah ipoji soh mi amman-sumendah. Amèn. 1:26 Kumarna naidi, ibelli Dèbata ngo kalak idi i cubellek kememèla idi. Oda nèngè lemmo ètongen daberru-daberru kalak idi taba anak laki bagè patutna kin bai jelma, tapi enggo gabè sèkel bai samah kalak i daberru. 1:27 Bagidi ma ngo sinibalè pè, gabè itadingken kalak i ngo percampuren dekket sinibagesna, ai gabè luhlah ngo kalak i, sanga gabè samah-samah daholi nola mengulaken percampuren kememmèla idi. Gabè ijalo mo bales ulah-ulah kalak idi i. 1:28 Kumarnaken oda ikerencetken kalak idi nèngè menandai Dèbata, gabè ibelli Dèbata mo kalak i mi pikiren-pikiren ncèda nai ibahanken kalak idi mo siso patut, 1:29 imo kejahaten, kegèduken, nahaka, ncian, bunuh-bunuh, rubat, taki-taki dekket bècuk. 1:30 Ikellemmoken ngo peroha-rohaken sidèban, perkata tondal, ikosomi ngo Dèbata, bana ngo jukkat, perukur ndates, perbual, perukur macik, oda iuèi partuana; 1:31 oda iparduliken denganna sidèban, oda sètia kalak i janah oda lot ipaduliken jelma. 1:32 Ibettoh kalak idi ngo nemmu pati-patiin Dèbata simendokken, barang isè mengulaken bagidi kennah merutang kessah no, keppè tong ngo dak ibahanken; balikna nola ngo tupèh, ai lemmo ngo atèna midah kalak simengulaken sibagidi.
2:1 Kerna naidi isè ngo kènè alè jelma, dak ihukumi kono ngo denganmu sidèban. Dirimu ngo nihukumenmu i, tikan ihukumi kono denganmi, menghukum dirimu ngo kono i si, ai dos ngo ulah-ulahmu bagè ulah-ulahna i. 2:2 Sibettoh ngo, sènteng ngo hukum Dèbata, simengennai taba kalak simengulaken bagidi. 2:3 Asa, kono alè jelma idokdok kono ngo terimbilken kono hukum Dèbata, mula pè ihukumi kono kalak simengulaken bagidi, keppèken kono sendiri pè mengulaken bagidi? 2:4 Barang, tah mada ngo murah dok atèmu mendè basana, kessobarenNa dekket ukurna melamlam idi? Oda ngo ibettoh kono, ukum mendè basa Dèbata, imo mennogike kono asa gabè tobat ipas dosa-dosa ndenè nai? 2:5 Tapi kumarna ukurmu jeggal i, ipegukguk kono ngo mi dirimu pungur Dèbata i ari perhukumen i, enggo kessa ntarar hukum Dèbata sibennar i. 2:6 Ai ibalesken Dèbata ngo taba gennep jelma codi mi pemmahanna. 2:7 Iberrèken Dèbata ngo kenggelluhen siamman sumendah taba kalak simbingit memmaing mendè lako mennulusi kessangapen, kemmuliaan dekket simenettap i. 2:8 Tapi pungur dekket laga ngo ukum bai kalak sitau, siso menguèi mi kebennaren, janah dak mengulaken kejahaten. 2:9 Barang isè jelma mengulaken jahat, kennah gabè susah janah mpersuk, perlebbè kalak Jahudi, nai bangsa sidèban. 2:10 Tapi karina kalak siuè mengulaken mendè, iberrèken ngo kessangapen, kemmuliaan dekket damè sitermurmur i, perlebbè bai kalak Jahudi bagi ma taba kalak bangsa-bangsa sidèban pè. 2:11 Kerna dos ngo karina jelma ibaing Dèbata. 2:12 Merdosa ngo jelma bangsa sidèban kumarna mak ibettoh pati-patiin i, ihukum ngo ia oda merkitè pati-patiin i; janah karina jelma perdosa si nipas gemgemmen pati-patiin i; ihukum ngo merkitè pati-patiin i. 2:13 Oda ngo maluah jelma kumarna ibettoh pati-patiin i, tapi maluah ngo ia kumarna iulaken sinidokken pati-patiin i. 2:14 Tukasi pè oda ibettoh bangsa sidèban pati-patiin i, tapi mula iulaken ngo sinidokken pati-patiin idi ipas dirina nai, kalak sibagidi ngo gabè pati-patiin mi dirina. 2:15 Merkitè pengelakona bagidi teridah ngo kadè nidokken pati-patiin i tersurat ibas pusuh peratènna. Pusuh peratèen kalak i pè iindangke ngo i, kerna kalak i sendiri pè lot ngo dèba isalahken bak ibennarken pikiren kalak i. 2:16 Bagidi ngo masa segen tupung ari sienggo ibuhul kin, roh kessa -- Dèbata merkitè-kitè Jesus Kristus bagè Sukuten Kelluahen sienggo kubagahken i, lako menghukumi sagumanna silot i simboni ibagasen pusuh peratèen jelma. 2:17 Tapi mula igerari kono dirimu kalak Jahudi, ulang mo manggang kono kumarna pati-patiin i, janah ulang mo ièndèl-èndèlken kono Dèbata. 2:18 Otang iajari pati-patiin i ngo kono, asa ibettoh kono nipergeddo atè Dèbata, janah asa ibettoh kono mennirang paina mendè dekket oda. 2:19 Tok ngo kono dok atèmu, gabè pengendeng taba kalak sipètung, janah penendang taba kalak nibagasen kegellapen; 2:20 gabè pemmeddahi taba kalak anak ajaren, pengajari taba kalak simoto, ai tok ngo kono, ibagasen pati-patiin idi dapet kono ngo karina matcam perbinettohen dekket kebennaren. 2:21 Nteng, sidèban ipeddahi kono ngo, kasa oda ipeddahi Kono dirimu sendiri? Iajarken Kono ngo, "Ulang mennangko", keppèken menangko ngo Kono! 2:22 Iajari Kono ngo sidèban asa, "Ulang merlangkah julu meddem," keppèken perlangkah julu meddem ngo Kono! Moyang atèmu midah sembahen, keppèken kasa ibuat ko ugasen ibas sembahen nai? 2:23 Mokka ngo kono kerna pati-patiin Dèbata niberrèkenna merkitè si Musa, keppèken kasa ilèai kono Dèbata, merkitè ilausken kono pati-patiin idi? 2:24 Otang lot ngo tersurat ibas Bibèl bagèen, "Kumarnaken kènè kalak Jahudi ngo gabè merlèa Dèbata idah kalak bangsa sidèban." 2:25 Tuhu lot ngo gunana mertakkil, mula iperangèken kono ngo pati-patiin idi. Tapi ukum ilausken kono ngo pati-patiin idi, kadè poda lapaten pertakkilenmu i bamu. 2:26 Asa mula ijamotken kalak siso mertakkil i ngo sinidokken pati-patiin i, otang iètong Dèbata ngo enggo ia bagè kalak sienggo mertakkil? 2:27 Janah isalahken kalak siso mertakkil i mo kono kalak Jahudi, kerna kono ngo mersidasaken pati-patiin Agama Jahudi janah mertakkil, tapi kono nola ngo mengelausi pati-patiin i. Ukum kalak i oda ngo mertakkil, tapi kalak i nola ngo menguei pati-patiin Agama Jahudi. 2:28 Ukum Jahudi tuhu-tuhu, oda ngo pellin gerar sambing ia Jahudi, janah kalak situhu-tuhu mertakkil, oda ngo kumarna itakkil secara perdagingen. 2:29 Tapi barang isè i pusuh peratènna Jahudi, ia ngo tuhu-tuhu Jahudi; janah pertakkilen tuhu-tuhu imo mertakkil ibagasen ukur sinibahanken Tendi Perbadia, oda ngo sinisurat ibagasen bukku, janah kalak i sibagidi ngo terrolih pemmojiin bai Dèbata nai, oda ngo bai jelma nai.
3:1 Mula bagidi kadè ngo kesurungenna gabè kalak Jahudi? Janah kadè ngo gunana mertakkil? 3:2 Mbuè ngo gunana! Perlebbè, kalak Jahudi ngo kesoh-sohen kata Dèbata. 3:3 Tapi bakunè nola ngo mula lot dèba kalak Jahudi siso sètia? Mada ngo kerna kalak siso sètia i gabè oda sètia Dèbata? 3:4 Oda ngo bagidi! Balikna nola ngo tupèh. Bennar ngo ukum Dèbata, mula pè karina jelma merluap. Ai bagèen ngo tersurat ibas Bibèl, "Asa naing mo lot buktina bennar kono ipas karina ranamu janah mennang kono tikan i perhukumen!" 3:5 Tapi mula makin ntarar kebennaren Dèbata kerna kegèdukenta, kadè mo dokkenkenta? Nggèduk ngo Dèbata mula Ihukum kita? (Sintabi bai Dèbata, mengerana aku cara jelma). 3:6 Ndaoh mo i, oda ngo bagidi! Ai mula oda bennar Dèbata bakunè mo Ia menghukum dunia èn? 3:7 Tapi mula makin ntèmbul ngo Dèbata kumarna luapku, janah makin merbungaren kemmulianna, kasa idokken dèng aku salah bagè perdosa? 3:8 Janah kasa oda ndorok sidokken, "Ia sibahan mo merroha, asa makin ntèmbul kesangapen Dèbata?" Lot ngo dèba mengelèai aku, nina lot kudokken bagidi. Jadi ukum kalak sibagidi, kennah ngo ihukum Dèbata! 3:9 Mula bagidi bakunè ngo? Lot ngo kesurungen kalak Jahudi bai kalak siso Jahudi nai? Oda! Ai enggo kubagahken, "Rebbak igemgemmi dosa ngo karinana, barang kalak Jahudi pè i, barang bangsa siso Jahudi." 3:10 Bagè sitersurat ibas Bibèl: "Sada poda lot bennar. 3:11 Sada poda merukur, janah sada poda lot menulusi Dèbata. 3:12 Suberri jelma ngo laling, gabè ndaoh bai Dèbata nai; Isè potang lot nèngè bennar, mak lot nèngè giamken sada pè memmaingken merandal. 3:13 Tosè bagè pendèbaan ngangang ngo bergeng kalak i, marir ngo kata mengoto-ngotoi arap dilah kalak i, janah bibir kalak i memurpurken selbuh, bagè bisa nipè. 3:14 Dom ngo sumbiah dekket sumpah ibas babah kalak idi. 3:15 Ngkasting ngo nèhè kalak i mula lako meniksa bak memunuh jelma. 3:16 Kemmagoon dekket kinipersuk ngo isuanken kalak i, barang i dikè sambing. 3:17 Oda ibettoh kalak i dalan kiniduma 3:18 janah oda merbebiaren kalak i midah Dèbata." 3:19 Smbettoh ngo, bai nigemgemmen pati-patiin i ngo karina kata pati-patiin i, janah oda terbaing barang isè mercudalihen, ai merutang ngo karinana jelma i hadeppen Dèbata. 3:20 Isè poda ipaluah Dèbata ipas dosana nai ukum kumarnaken mengulaken pati-patiin. Tapi gabè merkitè pati-patiin i, enggo itandai jelma i mo dosana. 3:21 Tapi ukum bagèndari, oda pè merkitèken pati-patiin i, enggo ipetarar Dèbata dalan perdamèen dekketsa bagè nidokken pati-patiin i dekket bukku nabi-nabi, 3:22 mula percaya jelma i bai Jesus Kristus, merdamè mo ia dekket Dèbata. Ibaing Dèbata dalan bagidi bai karinana sipercaya, ai oda lot kalihna barang isè pè jelma i. 3:23 Ai karinana jelma ngo merdosa janah ndaoh bai Dèbata simermulia i nai. 3:24 Jadi enggo gabè terolih ketègerren jelma i kumarna masèh atè Dèbata ibagasen pengkepkeppen Kristus Jesus. 3:25 Iberrèken Dèbata ngo Jesus Kristus mi kemmatèen, asa merkitè kemmatèenNa i maluah karina jelma sipercaya baNa. Ibaing Dèbata pè bagidi, lako mennuduhken kebennarenNa ngo, ai sobar Dèbata i sienggona i nai mengidah dosa jelma i, oda pella Ihukum tikala i. 3:26 Tapi bagèndari italuken ia ngo dosa lako petararken kebennarenna. Merkitè bagi mo menuduhken dirina bennar; janah gennep kalak sipercaya taba Jesus, igerari mo ia gabè kalak sienggo mende balik dekket Dèbata. 3:27 Mula bagidi, kadè ngo asangenkenta bagèndari? Oda lot! Mada ngo kumarna siulaken pati-patiin i? Oda! Tapi kumarna kepercayanta i ngo. 3:28 Jadi bagèen ngo rèmpunna: Kepercayaen i ngo maing asa gabè maluah jelma i, oda kumarna mengulaken pati-patiin. 3:29 Barang, pellin Dèbata kalak Jahudi sambing ngo kessa Dèbata? Uè, I ngo tuhu! Dekket ngo kalak siso Jahudi merdèbata taba Dèbata. 3:30 Ai sada ngo Dèbata. Ia ngo paluahken kalak Jahudi simertakkil i mula percaya Ia, janah Ia ma ngo paluahken kalak siso Jahudi siso mertakkil pè, kumarna percaya ngo kalak i. 3:31 Nai mendokken asa gabè sitadingken ngo pati-patiin i kumarna percaya kita bai Kristus? Oda! Tapi merkitè kepercayanta idi enggo mo gabè sipecèndek pati-patiin.
4:1 Mula bagidi, bakunè ngo pendokkenta tersèngèt si Abraham, empungta i cara i daging? 4:2 Ukum bennar ngo ia kumarna perulanna, tentu lot mo dalanna gegah. Tapi oda ndorok ia gegah i hadeppen Dèbata. 4:3 Tersurat ngo ibas bukku Bibèl, "Percaya ngo si Abraham bai Dèbata janah kepercayanna i ngo iètong Dèbata gabè kebennarenna." 4:4 Ai menjalo upah ngo karina kalak simahan bahaan, janah upahna i oda ngo sibasa-basa barang pemmerrèken, tapi hakna ngo i. 4:5 Tapi lot ngo dèba maluah kerna percaya bai Dèbata simengampuni dosa-dosana tukasi pè oda merdengan perulaan. Kepercayanna i ngo iètong Dèbata gabè kebennarenNa. 4:6 Bagi ma ngo pendokken si Daud; sayurntua ngo kalak sienggo ijalo Dèbata janah mula oda pella ilugun Dèbata pengellakoNa, ai nina si Daud ngo: 4:7 "Sayurntua ngo jelma, sienggo isasa pengellausina, janah enggo ikemkemmi dosa-dosana. 4:8 Sayurntua ngo barang isè mula oda ilugun Tuhan i dosana!" 4:9 Pellin mendahi kalak simertakkil ngo kessa ndia rana simendokken sayurntua i, barang tah dekket ngo ndia taba kalak siso mertakkil pè? Enggo sidokken, "Iètong Dèbata ngo kepercayaen si Abraham gabè kebennarenNa!" 4:10 Ndigan ngo idokken Dèbata bagidi? Sinderrang madèng mertakkil barang enggo mertakkil ngo si Abraham? Sinderrang madèng mertakkil ngo. 4:11 Kessa i mertakkil mo ia, janah pertakkilenna i pellin kira pertanda sambing ngo i magahken enggo ijalo Dèbata ia gabè pesennangken atè Dèbata, kerna percaya ia taba Dèbata. Ijalo Dèbata ngo ia sinderrang makdèng ia mengulaken hatoren mertakkil. Janah gabè bapa karina kalak sipercaya taba Dèbata mo si Abraham ibagasen pertendiin, janah kumernakenna i enggo ijalo Dèbata maing pesennangken ukurna, tukasi pe kalak i oda mengulaken hatoren mertakkil. 4:12 Janah tong ma ngo si Abraham i gabè bapa bai kalak sienggo mertakkil; tapi oda ngo asal mertakkil ia, ai kennah icodi ngo bagè keppercayaen si Abraham bapanta i, sinderrang madèng mertakkil i ia. 4:13 Oda ngo kumarna pati-patiin i asa roh bagah-bagah Dèbata bai si Abraham bang taba pinemparna pè, mendokken, "gabè milikna ngo dunia ènda", tapi kumernaken ketègerenna i bagasen kepercayaen idi ngo. 4:14 Ai mula ukum pellin kalak simenjamotken pati-patiin idi sambing ngo kessa menjalo niperbagah-bagah Dèbata magosia ngo percaya bai Dèbata, janah sontar ngo bagah-bagah i. 4:15 Ai kumarnaken pati-patiin idi ngo, oda ngo lot pengelausiin. 4:16 Jadi kepercayaen i ngo maingken asa roh bagah-bagah Dèbata. Idi ngo perkitèen pemmerrèken Dèbata ibagasen masèh atèna taba karinana pinempar si Abraham; oda pellin taba kalak simengulaken pati-patiin i sambing, tapi bagi ma ngo dekket taba kalak sipercaya bai Dèbata, tosè bagè si Abraham percaya bai Dèbata. Ai karina ngo kita merbapa taba si Abraham, 4:17 bagè sitersurat i, "Kupebangkit ngo kono gabè bapa taba mèduk bangsa." Bagi ngo cara Dèbata merrèken bagah-bagah i taba si Abraham, janah percaya ngo si Abraham, ai Ia ngo Dèbata sipegelluhken kalak sienggo matè, janah simenghanaken sagumanna silot merkitèken kataNa sambing. 4:18 Ai tukasi pè oda lot nèngè harapen tapi tong ngo tok si Abraham janah percaya ibagasen pengharapen, gabè bapa bai mèduk bangsa ngo ia, rembang bagè sitersurat, "Nterrem kalohon ngo seggen pinemparmu." 4:19 Tukasi pè ibettoh si Abraham oda nèngè harapen merdukak ia kumarna enggo tua-tua ia janah umurna pè neggo mayak seratus tahun, si nibagesna si Sara pè nggempus ngo, tong ngo hot kepercayanna. 4:20 Oda nung ia ganggu, tapi percaya ngo ia i bagah-bagah Dèbata. Dak makin ipergegohi kepercayanna i ngo ia, ai makin ipesangap ngo Dèbata. 4:21 Percaya kalohoon ngo ia, tuk ngo gegoh Dèbata pesautken niperbagah-bagahNa i. 4:22 Kumarna naidi ngo, asa gabè kelemonken Dèbata ia. 4:23 Bagè kata simendokken, "gabè kelemonken Dèbata," oda ngo isuratken i pellin bai si Abraham sambing, 4:24 tapi dekket ngo banta. Kita pè ijalo ngo gabè kelemonken gabè kelemonken Dèbata, kumarna percaya kita bai Dèbata, sipegelluhken Jesus Tuhanta i, ibas simatè ai. 4:25 Ipessoh ngo Jesus asa ibunuh kumarna dosanta, janah Ipegelluh Dèbata nola ngo ia, asa gabè ntèger janah bennar kita.
5:1 Asa ukum bagèndari enggo gabè ntèger janah bennar kita kumarna percaya. Kerna naidi enggo merdamè kita dekket Dèbata merkitè-kitè Tuhan Jesus Kristus. 5:2 Merkitè-kitèkensa dekket kemulihken kepercayaen idi gabè mbengket kita iembah mi bagasen mendè basa bak masèh atè Dèbata. Ibagasen naidi ngo kita nggelluh janah mergegoh bagèndari. Jadi lolo janah mersampang atè mo kita mengharap lako menjalo kesangapen Dèbata. 5:3 Lebihna i dèng ngo tupèh, ai kennah lolo ngo kita mula pè irenrenni simpersuk i kita, kerna sibettoh ngo, kumarna kepersuken i ngo gabè mbingit kita, 5:4 janah kumarna mbingit kita, gabè tahan mo kita i pengojiin, janah i ngo mengkerohken pengharapen. 5:5 Oda ngo gabè mpadu siakap ibaing pengharapen sibagidi, kerna enggo idomi kelleng atè Dèbata ukurta merkitè-kitè Tendi Simbadia sienggo niberrèkenNa i banta. 5:6 Tupung kessa ketikana, sienggo ibuhul Dèbata kin, imo tikan mpersuk janah ndotè i kita, tupung bagidi ngo matè Kristus lako mengkepkep kita, tukasi pè kalak ndaoh kita bai Dèbata nai. 5:7 Ai salang mengkepkep kalak bennar janah ntèger, mahal ngo uè kalak matè, tapi nggèut ngo dèba uè matè mengkepkep kalak permendè basa. 5:8 Tapi ukum Dèbata masèh ngo atèna midah kita sinderrang merdosa dèng pè kita, ai tikan bagidi ngo matè Kristus mengkepkep kita. 5:9 Jadi makinsa nola mo bagèndari enggo kessa kebbas kita kumarna permatè Kristus, mak makin maluahna nola mo kita ipas pungur Dèbata nai, kemulihken daroh Kristus idi! 5:10 Ai mula ipedamè permatè Anakna i kita dekket Dèbata sinderrang musuhNa dèng kita, makinsa nola mo bagèndari enggo kessa mengolihi merdamè kita dekket Dèbata, otang makin paluahenna mo kita sienggo merdemu dekket Dèbata ibagasen Kristus? 5:11 Lampo i sidi nai dèng ngo tupèh, lolo kalohoon ngo kita midah mendè basa Dèbata merkitè-kitè Tuhan Jesus Kristus. Kerna merkitè Kristus i ngo sirasaken kinitaboh perdemunta sienggo mendè dekket Dèbata. 5:12 Masuk ngo dosa i mi dunia èn arap sada kalak jelma janah kumarnaken dosa i ngo roh kemmatèen. Nai gabè sempa mo kemmatèen i taba suberri jelma, ai karinana jelma ngo enggo merdosa. 5:13 Sinderrang madèng kin pè iberrèken pati-patiin idi, enggo kin ngo lot dosa idi i dunia èn; tapi oda ilugun dèng dosa idi kumarna madèng lot pati-patiin. 5:14 Tukasi pè bagidi, enggo mo igemgemmi kemmatèen idi suberri jelma mulai si Adam nai soh mendahi si Musa. Janah tukasi pè oda dos rumangna pengelausiin jelma bagè nibaing si Adam, tapi gabè karina jelma ngo igemgemmi kemmatèen i. Asa si Adam i ngo bagè lèndung sinaing roh i. 5:15 Tapi oda dos sidua i; ai belagahen ngo masèh atè Dèbata, mula ipesobok mi pengelausiin si Adam. Kumarna pengelausiin sada kalak ngo memmaingken nterrem kalohoon jelma matè. Tapi belgahen dèng ngo ngkelleng atè Dèbata merkitèken masèh atè sada kalak, imo Jesus Kristus. 5:16 Sibasa-basa Dèbata pè ndaoh dèng ngo belagahen dari pada dosa si sada kalak i. Ai kumarnaken hukum taba sisada kalak simerdosa i ngo sempa hukum kemmagoon. Tapi enggo kessa mèduk jelma merdosa, gabè roh mo basa-basa Dèbata, imo maluah ibas dosa idi nai. 5:17 Kemulihken pengelausiin sada kalak, gabè sempa kemmatèen i menggem-nggemmi karina jelma. Tapi belgahen dèng ngo sinibaing sisada kalak nai, imo Jesus Kristus bai jelma i. Ai gabè ibasa-basaken Dèbata ngo masèh atèna paluahken jelma idi ipas dosana nai. Jadi gabè igemgemmi kalak i ngo dunia èn merkitèken Kristus. 5:18 Asa merkitè pengelausiin sada kalak, gabè karinana jelma ihukum, bagidi ma mo merkitè penguèi sada kalak ipas nipergeddo atè Dèbata, gabè maluah karinana jelma janah ipegelluh. 5:19 Kumarnaken njais sada kalak jelma gabè nterrem jelma merdosa, tapi kumarnaken penguèen sisada kalak i ma, gabè nterrem jelma nggelluh janah bennar ibaing Dèbata. 5:20 Dèbata ngo merrèken pati-patiin i. Tapi makin igegohi jelma mengulaken pati-patiin i, makin ilausi nola ngo i gabè makin merdosana mo jelma i bai Dèbata. Nai makin gandana mo perdosa i, makin mbelgahna ma mo ngkelleng atè Dèbata. 5:21 Asa kennah gabè matè ngo kita kumarna merdosa. Bagi ma ngo masèh atè Dèbata menggem-nggemmi janah peliasken dalan banta, asa balik merdamè taba Dèbata. Janah kumarna enggo merdamè kita mengolihi dekket Dèbata, gabè iberrèken mo kenggelluhen siamman sumendah banta merkitè Jesus Kristus Tuhanta i.
6:1 Mula bagidi, bakunè mo dokkenkenta? Dakdak mo kita merdosa asa makin masèh atè Dèbata midah kita? 6:2 Ngganè bagidi! Oda nèngè ngo merkuasa dosa i taba kita; jadi bakunè ngo kita ndorok nggelluh ninganna mengulaken dosa? 6:3 Oda dèng ngo ibettoh kènè, sinderrang iperridi kita mi bagasen Jesus Kristus, sienggo ikubur ngo kita rebbak dekket Kristus mi kemmatèen? 6:4 Merkitè peridiin i sienggo ikubur ngo kita rebbak dekket Kristus mi kemmatèen, asa codi bagè Kristus sienggo ipegelluh kuasa Dèbata ipas kemmatèen nai, bagidi ma mo kita ipegelluh janah mernggelluh rembaru. 6:5 Ai mula enggo gabè sada kita dekket Kristus kumarna rebbak matè kita dekketsa, suang bagi ma ngo gabè sada kita dekketsa i perkèkèNa i. 6:6 Sibettoh ngo enggo ibunuh tabiat kejelmaan sienggo buruk i rebbak dekket Kristus i kayu silang i, asa sipettadi tabiat dosa i; merkitè bagidi oda nèngè kita iperhamba dosa. 6:7 Ai mula enggo matè jelma i, lias ngo ia ipas dosana nai. 6:8 Mula matè kita rebbakken Kristus, percaya ngo kita, pegelluhenNa ma ngo kita rebbakken Kristus. 6:9 Ai sibettoh ngo enggo ipegelluh Kristus idi i simatè nai, janah oda nèngè matè Ia, ai oda nèngè merkuasa kemmatèen i baNa. 6:10 Kemmatèen sinibellus Kristus, imo kemmatèen meradepken dosa. Pellin sikali ngo kessa i ibellus soh mi sidekkahNa. Nggelluh Ia bagèndari, nggelluh kumarna Dèbata ngo janah bai Dèbata. 6:11 Kènè pè alè dengan, tosè bagidi ma mo ètong kènè diri ndènè matè kerna dosa i, tapi nggelluh ibas Dèbata merkitèken Jesus Kristus. 6:12 Nteng ulang nèngè mo dosa i mengerajai nggelluh ndènè i dunia èn, menguèi cubellek-cubellek jahat i. 6:13 Ulang mo padiat kènè nèngè sendihi ndènè i mengulaken dosa janah mengulaken kejahaten. Tapi pesakat kènè mo diri ndènè bai Dèbata, bagè sienggo ilompat i kemmatèen nai mi kenggelluhen. Bagidi ma mo bang sendihi ndènè i pessakat kènè mo bai Dèbata, asa ibaing mengulaken lemma atèNa. 6:14 Oda nèngè irajai dosa i kènè, kerna oda nèngè igemgemmi pati-patiin idi kènè, tapi enggo igemgemmi masèh atè Dèbata. 6:15 Mula bagidi bakunè ngo rèmpunna? Ndorok ngo kita merdosa, kumarna oda nèngè kita igemgemmi pati-patiin i, tapi enggo nigemgemmen masèh atè Dèbata? Ngganè ngo bagidi! 6:16 Oda ngo ibettoh kènè, mula ipessoh kènè diri ndènè bai sada kalak lako mengulaken nipergeddo atèna, otang enggo mo gabè hamba si niuèen ndènè i kènè -- tah pè hamba dosa simerembah kènè mi kemmatèen, barang tah hamba simerpenguèi mi Dèbata, janah merkitè bagidi mendè nola balik taba Dèbata. 6:17 Tapi mejalo metangkup mo bai Dèbata! Kerna enggo leppas tikki ndènè i perhambaan dosa, janah ukum bagèndari enggo gabè penguèi kènè i peddah sienggo iberrèken bai ndènè. 6:18 Enggo ngo kènè ipaluah ipas dosa nai, janah gabè penguèi bai Dèbata. 6:19 Kumarna ndotè ukur ndènè, codiin jelma mo kubakin asa melukah iarti kènè; rembang bagè perbollet diri ndènè ibaing kènè menguèi simellamun janah jahat, bagi ma mo nemmuken naing bolet berrèken kènè diri ndènè bagè hamba menguèi nipergeddo Dèbata mi simerkedekoon bai Dèbata. 6:20 Kerna sinderrang hamba dosa kènè, oda nigemgemmen lemmo atè Dèbata kènè. 6:21 Kadè mo buahna dapet kènè bagèndari ipas ulah-ulah ndènè sinderrang naidi nai, imo ulah-ulah ukum bagèndari enggo mèla kènè mengulakensa? Karina ulah-ulah i pellin merembahken mi kemmatèen. 6:22 Tapi ukum bagèndari enggo ipaluah kènè ipas dosa nai janah enggo gabè hamba Dèbata. Jaloon ndènè mo buah simerembahken kènè mi kebadiaan janah imo mengkerohken kenggelluhen siamman sumendah. 6:23 Ai kemmatèen ngo ukum upah dosa; tapi basa-basa Dèbata ngo kenggelluhen amman sumendah merkitè-kitè Jesus Kristus Tuhanta i.
7:1 Kènè alè dengan! Simettoh hukum ngo kènè karina. Ibettoh kènè ngo, igemgemmi hukum ngo jelma sidekkah nggelluh ia. 7:2 Sada kalak daberru sienggo sijahè, kennah tunduk ngo ia ibas hukum bai sinibalèna, sidekkah nggelluh sinibalèna i. Tapi mula enggo kessa matè sinibalèna i, bèbas mo daberru idi ipas hukum simengèkètsa taba sinibalèna i. 7:3 Asa mula sijahè nola sada daberru taba sada anak laki, keppè nggelluh dèng ngo sinibalèna, merlangkah julu meddem ngo terdokken daberru i. Tapi mula enggo matè sinibalèna, jadi secara hukum, enggo mo bèbas daberru i. Jadi mula sijahè nola pè ia taba anak laki sidèban, oda ngo merlangkah julu meddem nèngè ia. 7:4 Bagi ma ngo bang kènè pè alè dengan. Sienggo matè ngo kènè ipas pati-patiin i, kemulihken ipesada kènè dekket daging Kristus janah ia sienggo ipekèkè ibas simatè nai sidasa kènè. Ipegelluh ngo Ia ibas kematèen nai, asa gabè merguna kita bai Dèbata sinderrang nggelluh dèng kita. 7:5 Kerna sinderrang nggelluh ibagasen perdagingen dèng kita, nggelluhta pè mengèkutken bakko-bakko kejelmaan ngo. Janah mergegoh ngo cubellek-cubellek sendihi daging i mengabin lako mengulaken dosa, kumarnaken pati-patiin i. Idi ngo kulih sebabna asa siulaken ulaan patè mi kemmatèen. 7:6 Tapi ukum bagèndari, oda nè ngo kita terrèkèt ipas pati-patiin i. Janah sienggo matè ngo kita ipas pati-patiin siperlebbè simenggemgem kita i kin. Jadi oda nèngè ngo kita tunduk bagèndari mi pati-patiin sitersurat bagè siperlebbè i, tapi tunduk mi cara rembaru ngo kita, imo sinipeddahken Tendi Dèbata banta. 7:7 Nteng bakunè mo pendokkenta? Dosa ngo pati-patiin i? Ngganè, oda ngo bagi! Tapi pati-patiin i ngo petandaken bangku tersèngèt dosa, ai oda kubettoh kin kadè lapaten kata mokkus, ukum oda kin ibagahken pati-patiin i, "Ulang kono mokkus." 7:8 Pati-patiin i ngo bikkasna, gabè idungkul ukurku mi matcam bagè kemokkusen, kerna dosken matè ngo dosa ukum oda lot kin pati-patiin. 7:9 Nggelluh ngo aku tikala i, tukasi pè oda merpatiin. Tapi roh mo pati-patiin i, gabè kèkè mo dosa, 7:10 nai gabè matè mo aku. Asa ukum i mulana, merembahken kenggelluhen kin ngo nemmuken pati-patiin i, keppèken gabè merembahken kemmatèen nola ngo bangku. 7:11 Kerna merkitè pati-patiin i gabè ioto-otoi dosa i ngo aku, nai gabè ibunuh dosa i mo aku. 7:12 Bai Dèbata nai ngo pati-patiin i, janah perèntah sinibagasen pati-patii i pè bai Dèbata nai ngo; jadi bennar ngo i janah selloh. 7:13 Mula bagidi, mada ngo siselloh i nola mengkerrohken kemmatèen bangku? Tentu oda! Dosa ngo mengkerrohken kemmatèen i. Tapi asa ntangkas ibaing dosa i mo siselloh i merembahken kemmatèen i bangku, nai gabè ntangkas mo taridah bakko-bakko dosa i. Asa, merkitè hatoren Dèbata, makin nakkat mo taridah kejahaten dosa siterlebbih i. 7:14 Sibettoh ngo bai Tendi Dèbata nai ngo pati-patiin i. Ukum aku perdaging ndotè ngo. Enggo idèa aku mahan hamba dosa. 7:15 Kerna aku sendiri oda kuantusi nibakinku. Ai barang kadè kukellemmoken oda kuulaken, tapi barang kadè moyang atèngku, idi nola ngo kuulaken. 7:16 Jadi mula kuulaken ngo moyang atèngku, merlapaten ngo i, kuakkui ngo selloh pati-patiin i. 7:17 Jadi situhunna oda ngo aku mengulaken i, tapi dosa sienggo menguasai aku i ngo. 7:18 Kubettoh ngo, oda lot simerandal merian i bagasen diringku, imo ibagasen kejelmanku. Lot ngo nemmuken sura-surangku lako mahanken selloh, tapi oda terbahanken aku ulaan selloh i. 7:19 Ai oda kuulaken selloh bagè sura-surangku i; balikna nola ngo tupèh, gabè kuulaken simeroha, siso lemmo atèngku mengulakensa. 7:20 Asa, mula kuulaken kecegonken atèngku, oda ngo aku simengulaken i, tapi dosa simengerajai aku i ngo. 7:21 Jadi kubaing mo rèmpunna: mula naing kuulaken selloh, gabè pellin simerroha sambing ngo terdapet bangku. 7:22 Ikellemmoken pusuh perratènku ngo nemmuken pati-patiin Dèbata. 7:23 Tapi kuidah ngo lot hatoren sidèban ibagasen diringku -- juhap dekket patip-patiin ni pusuh perratèenku i. Kerna naidi ngo ipepatu aku mi pati-patiin dosa silot ibagasen diringku i. 7:24 Èo, aku jelma simertulbang èn! Isè ngo ndia paluahken aku ipas perdagingen kemmatèen ènda nai? 7:25 Mellias atè mo bai Dèbata merkitè-kitè Jesus Kristus Tuhanta i. Ai kuuèi ngo pati-patiin Dèbata ibagasen batinku, tapi kuulaken ngo patiin dosa ipas dagingku.
8:1 Èn pè, oda nèngè mengenna hukum taba kalak sienggo sada dekket Jesus Kristus. 8:2 Kumarna hatoren Tendi Perbadia simemmaing kita nggelluh rebbak dekket Jesus Kristus, enggo paluahken kita ipas hukum dosa dekket kemmatèen idi nai. 8:3 Ai barang kadè siso ndorok ibaing pati-patiin i kumarna ndotèna kita jelma enggo mo ibaing Dèbata. Italuken Dèbata ngo kegegohen dosa sinibagasen bakko jelma merkitè-kitè ipasulak Dèbata AnakNa sendiri merrupaken daging perdosa i lako mennasa dosa. 8:4 Ibaing Dèbata pè bagidi, asa ndorok ngo siulaken ibas dirinta, sinipergeddo Dèbata silot ibagasen pati-patiin i, mengèkutken Tendi Dèbata oda nèngè bagè mengèkutken bakko kejelmaan. 8:5 Kalak singgelluh mengèkutken bakko jelma, dakdak ngo memikiri nipergeddo bakko jelma. Tapi ukum kalak singgelluh mengèkutken Tendi Perbadia, dakdak ngo mengeradumi nipergeddo Tendi Perbadia. 8:6 Mula irajai bakko jelma ngo perukuren ndènè, mi kemmatèen ngo ujungna i. Tapi mula ikuasai Tendi Dèbata pikiren ndènè, nggelluh bak merdamè dekket Dèbata ngo ujungna. 8:7 Barang isè irajai bakko daging pikirenna, mermusuh ngo ia taba Dèbata; oda uè tunduk kalak sibagidi mi pati-patiin Dèbata; ai oda terbaing kalak sibagidi menguèi pati-patiin Dèbata. 8:8 Kalak simenguèi bakko perdagingen, oda ngo uè Dèbata menjalo sibagidi. 8:9 Tapi ukum kènè, oda nèngè ngo nggelluh ibagasen bakko sibagidi, tapi nggelluh iabagasen Tendi Perbadia ngo -- mula tuhu Tendi Perbadia merrian ibagasen kènè. Barang isè oda iiani Tendi Perbadia oda ngo Kristus ibagasen ia. 8:10 Tapi mula Kristus nggelluh ibagasen kènè, mula pè matè daging ndènè kumarna dosa, tapi berrènken Tendi Perbadia ngo bai ndènè kenggelluhen, kumarna enggo merdemmu kènè dekket Dèbata. 8:11 Asa mula merrian ngo bai ndènè Tendi Dèbata sipegelluhken Kristus ibas simatè nai, gabè pegelluhenna ma mo daging ndènè siuè matè i, merkitè Tendina singgelluh ibagasen kènè. 8:12 Èn pè kènè alè dengan, kennah lot ngo tanggung jababta; tapi oda ngo tanggung jabab bakko kejelmaan; ulang nèngè mo kita nggelluh mengèkutken cubellek daging. 8:13 Mula merguru mi daging ngo kènè merperangè, matè ngo kènè; tapi mula ibunuh kènè perrulaan daging merkitè Tendi Perbadia, nggelluh mo kènè. 8:14 Ai barang isè itogiken Tendi Dèbata, ia ngo dukak Dèbata. 8:15 Ai Tendi niberrèken Dèbata bai ndènè, oda ngo asa gabè hamba kènè, gabè memmaing buradan tapi memmaing asa gabè dukak-dukak Dèbata ngo kènè. Janah merkitè kegegohen Tendi Dèbata i ngo kènè mendiloken, "Abba", mendokken, "Alè Pa!" 8:16 Janah Tendi Dèbata i ngo mengindangken mi tendinta, magahken tuhu-tuhu ngo kita dukak-dukak Dèbata. 8:17 Asa mula dukak-dukakna ngo kita, gabè persidasa ngo kita i basa-basa nipèmaken Dèbata taba dukak-dukakna. Rebbakken menjalo mo kita dekket Kristus sinipèmaken Dèbata bana; ai mula dengan Kristus kita i sigongenken, denganna ma ngo kita bang i kesangapen pè. 8:18 Kuradumi karina kinidersa sinigongta bagèndari, kira siso lot ngo i mertimbangken kesangapen sinaing petararenna seggen banta. 8:19 Ai dak nteddoh ngo karina tinempa i memèma-mèma kettikana asa ipettarar Dèbata kesangapen dukak-dukakNa. 8:20 Ai karinana tinempa i, enggo ibelli soh mumuk, oda ipas lemmo atèna nai, tapi kumarnaken ibelli Dèbata ngo bagidi. Tukasi pè bagidi lot dèng ngo siharapen bagèen: 8:21 tupung kettikana, ipaluah mo tinempa idi ipas kemmagonna nai mi kessangapen rebbak dekket dukak-dukak Dèbata. 8:22 Sibettoh ngo soh bagèndari pehehui ngo tinempa i kumarna mpiahna tosè bagè partua ibages sinderrang rabisen. 8:23 Janah dèng ma oda ngo pellin sagumanna tinempa i kessa kekelsohen, kita sendiri pè kekelsohen ngo ibas ukurta. Ai tukasi pè kita menjalo Tendi Dèbata imo sibasa-basa Dèbata perlebbè banta, dak tong dèng ngo kita terpèma-pèma taba Dèbata paluahken dirinta, asa ibaing gabè dukak-dukakNa. 8:24 Ai dak tong ngo kita mengharap, asa ipaluah kita. Tapi ukum enggo ngo siidah niharapta idi, oda nèngè ngo pengharapen i. Ai kasa nè mo harapen ukum enggo ngo ndidah? 8:25 Tapi mula siharap simakdèng ndidah, mbingit mo kita mèma. 8:26 Ai bagidi ma ngo Tendi Dèbata roh mengurupi kita tikan ndotè kita. Oda ngo sibettoh bakunè ngo patutna mersodip. Tendi i sendiri ngo menghadep Dèbata lako mengidoken banta merkitè kiniteddoh ukur siso terhuapken nèngè. 8:27 Nai idah Dèbata simengidah pusuh peratèen kejelmaan i ngo nihendakken Tendi i; kerna nipidoken Tendi taba Dèbata siperlu bai ummat Dèbata ngo, janah rembang ngo i mi sinipergeddo atè Dèbata. 8:28 Sibettoh ngo iatur Dèbata ngo karinana, asa gabè mengkerrohken merandal taba kalak simengkekelengi Dèbata janah sinidilona ibas takina nai kin. 8:29 Ai kalak sienggo ipilih Dèbata idi ngo iteddo i mulana i nai, asa gabè tosè kalak idi bagè AnakNa imo Jesus Kristus. Merkitè bagidi, Anakna i mo situaan bai karina anggina. 8:30 Bagi ngo Dèbata mendilo kalak sienggo itentuken kin lebbèen. Nai kalak sienggo nidiloNa i, kalak i ngo ndorok merdamè dekket Dèbata. Janah sienggo merdamè dekket Dèbata idi ma ngo nggelluh ibagasen Dèbata. 8:31 Èn pè, bakunè mo ndorok sidokken tersèngèt i karina? Mula Dèbata denganta, isè mo terbakinsa mengalo kita? 8:32 Oda ngo ikellini AnakNa sendiri, tapi ipesakat ngo mi kemmatèen lako mengkepkep kita karinana; nai mèter harapen mo mak ibasa-basaken banta sidèbankenna i karinana? 8:33 Isè menggugat kita ummat sienggo ipilih Dèbata, mula Dèbata ngo mendokken kita oda mersalah? 8:34 Isè lot mendokken kita salah? Kristus Jesus sienggo matè janah sienggo balik nggelluh i ngo membèla kita. I kamuhun Dèbata ngo ia bagèndari mengondiken kita. 8:35 Isè terbakinsa mennirang kita ipas kelleng atè Jesus Kristus nai? Kinipersah ngo barang kinipersuk? Kinidersa ngo barang kumarna rapar, barang kinicor ngo barang mara, tah barang kemmatèen ngo? 8:36 Tersurat ngo ibas Bibèl bagèen: "Suntuk ari ngo mermara nggelluh nami kumarnaken Kono. Tosè bagè biri-biri naing sembellihen ngo kami iètong." 8:37 Oda! Tapi sondel ngo tupèh kemmennangenta i karinana i, kemulihken Ia simengkekelengi kita. 8:38 Tok kalohoon ngo ukurku, oda lot mennondati kelleng atè Dèbata kumarna kemmatèen barang kenggelluhen, bang malaèkat penguasa pè, bang asup-asup sibagèndari barang asup-asup simasa luas, bang kegegohen pè, 8:39 barang bakinen si ni langit bang si ni tanoh èn pè, barang bakinen tah kadè sidèban naidi pè, taba kita ibagasen Jesus Kristus Tuhanta i.
9:1 Tuhu ngo sikudokken èn, kerna milik Kristus ngo aku. Oda ngo luap aku. Itegu-tegu Tendi Perbadia ngo ukurku peposken ukurku tuhu sikudokken èn. 9:2 Bonek kalon ngo atèngku janah merhendem; 9:3 kumarna kaka-anggi denganku sada bangsa. Ai isumpahi janah iliplip Dèbata pè aku i hadeppen Kristus nai, mengkepkep kalak idi, jadi ngo. 9:4 Kerna bangsa sinipilih janah ibaing Dèbata ngo kalak i gabè dukak-dukakNa janah terrolih kessangapen rebbak dekketsa. Kalak i ngo denganna merpadan janah iberrèken pati-patinna. Ibagahken ngo bai kalak i bakunè hatoren meragama, janah enggo ijalo kalak i bagah-bagahNa. 9:5 Pinempar empungta i ngo kalak i, janah roh pè Kristus tubuh merrupa daging, arap kalak i ngo; Ia ngo sindatesna ipas nasa karinana. Nipoji mo Dèbata soh mi amman-sumendah. Amèn. 9:6 Oda ngo kudokken sondat padan sinidokken Dèbata; tapi oda ngo karinana kalak Israel ipilih Dèbata. 9:7 Oda karina dokkenken pemparen si Abraham dukak-dukak Dèbata. Tapi, "Pellin pemparen si Isak ngo dokkenken pinemparmu." 9:8 Lapatenna, pinempar si Abraham sigabè dukak-dukak Dèbata imo pellin pemparen situbuh kumarnaken iperbagah-bagah Dèbata. Asa oda ngo karinana pinemparna i. 9:9 Ai bagèen ngo bagah-bagah Dèbata, "Tupung bagèen ma luas tikkina roh aku, lot mo enggo sada anak bai si Sara!" 9:10 Janah makin ntangkasna dèng ma: Dua kalak ngo anak si Rebekka, sada bapana imo si Isak empungta i. 9:11 Ai sinderrang madèng tubuh kalak i sidua, enggo kin ngo lebbèen itentuken Dèbata nipilihNa i. Ukum pemmilih Dèbata oda ngo merguru mi sindorok ibaing jelma, tapi mergantung mi pemmilihen Dèbata sendiri ngo. Kerna makdèng tubuh anak si Rebekka sidua kalak i, oda ngo lot dèng ibahanken kalak i mendè barang nggodo pè, 9:12 enggo kin ngo idokken Dèbata taba si Rèbèkka kennah mengkebasi bai anakna sikèdèken i ngo situanna, 9:13 bagè sitersurat i Bibèl, "Kukekelengi ngo si Jakob, tapi ncego ngo atèngku midah si Esau." 9:14 Jadi, bakunè mo ninta bagèndari? Otang bagè oda adil tengennen Dèbata? Mada lè! Adil ngo! 9:15 Ai nina Dèbata ngo taba si Musa, "Kuberrèken ngo mendè basangKu bai kalak sinaing berrènkenKu, janah masèh ngo atèngKu bai kalak simasehenKu." 9:16 Asa oda ngo merguru mi hendak jelma, barang pè mi usaha jelma, tapi pellin mergantung mi lemmo atè Dèbata sambing ngo barang isè kalak nipilihNa i. 9:17 Ai tersurat ngo ibas Bibèl, "Idokken Dèbata ngo taba raja Mesir, asa kupebangkit pè kono gabè raja, asa kupacidah ngo kuasangku merkitè kono, janah asa termurmur gerarku i suberri dunia èn." 9:18 Jadi masèh ngo atè Dèbata midah kalak sinaing masèh atèna, janah ipejèngèng Dèbata ngo ukur kalak sinaing pejèngèngenna dok atèna. 9:19 Tah bakunè idokken kènè bagèen taba aku, "Ukum bagi ngo kasa pella isalahken Dèbata dèng jelma? Otang isè poda ndorok mengalo takina?" 9:20 Èo, alè jelma permanusia! Isè ngo kono pana asa pang mersoal kono taba Dèbata? Ndorok ngo ndia idokken siniteppa taba peneppa, "Kasa iteppa kono aku bagèen?" 9:21 Otang lemmo atè peneppa i ngo memmaing tanoh dendang i dèba merandal dèba nai merroha. 9:22 Tosè bagi ngo pemmaing Dèbata, lako pacidahken pungurNa dekket petararken kuasaNa, ipelambas kalohoon ngo lebbè ukurna menganju kalak sienggo patut kenna hukum kumarnaken Idungkul sienggo ipediri mi kemmagoon i lagana. 9:23 Bagi ma ngo mula naing ipetarar Dèbata mendè basana mertinèncuk banta sinimasèh atèna janah sienggo ipilih asa merkesangapen, 9:24 i mo kita sienggo nidilona, oda pellin kalak Jahudi tapi dekket ngo bangsa sidèban pè. 9:25 Ai nina Dèbata ngo ibas bukku Nabi Hosea: "Gabè bangsangKu ngo kalak siso bangsangKu kin, janah Kukekelengi ngo bangsa siso ni kekellengenKu kin." 9:26 Janah i bekkas sipernah idokken: "Oda ngo ummatKu kènè," i sidi ngo idokken ma taba kalak i: "dukak-dukak Dèbata singgelluh i." 9:27 Si Jesaya mendokken tersèngèt bangsa Israel bagèen: "Tukasi pè nterrem kalak Israel bagè kersik i laut, tapi situk ngo kessa maluah; 9:28 ai ndor mo saut nidokken Tuhan i mendabuh hukum mi suberri dunia èn." 9:29 Bagèen ma ngo pendokken si Jesaya, "Ukum oda kin itadingken Dèbata Pergegoh Sisotercodi pinempar banta, enggo kin mo nemmu kita bagè Sodom dekket Gomora." 9:30 Jadi bagèen mo rèmpunna: Bangsa sidèban siso bangsa Jahudi oda pellin merrusaha asa mendè nola balik perdemunna dekket Dèbata. Tapi kerna percaya kalak i, gabè mengolihi nola mo mendè perdemunna taba Dèbata ibaing Dèbata. 9:31 Tapi ukum kalak Israel merusaha menguèi hatoren asa merdemmu nola mengolihi dekket Dèbata, keppèken oda sakat mi sidi. 9:32 Kasa oda terbakin kalak idi? Kumarna iulaken kalak i pè i, oda ngo kumarna ibagasen kepercayaen taba Dèbata, tapi merkitè usahana sendiri ngo. Jadi gabè tertuktuk janah tergempang mo kalak idi ipas 'Batu Pertuktuken'. 9:33 Bagè sitersurat i: "Kugamparken ngo i Sion sada batu bekkas jelma tertuktuk; imo sada batu mbellen memmaing jelma tergempang. Tapi barang isè percaya tabaSa, oda ngo termalu."
10:1 Alè dengan! Ipergeddo atèngku, asa bangsangku pè nemmu, dekket ipaluah Dèbata. Kerna naidi dakdak ngo kusodipken i taba Dèbata. 10:2 Kusaksiken ngo ukum kalak idi mertuhu-tuhu ngo menguèi Dèbata, tapi semangat kalak i oda merhenjellen mi perbinettohen siroh bai Dèbata nai. 10:3 Kerna oda ibettoh kalak idi cara Dèbata memmaingken asa mendè nola persaoren Dèbata dekket jelma; janah ibaing kalak i ngo carana sendiri, nai gabè oda nèngè tunduk kalak i mi cara sinituduhken Dèbata. 10:4 Ai enggo ipuncai Kristus pati-patiin i. Jadi barang isè percaya bai Kristus, gabè mengolihi mendè nola ngo hubungenna dekket Dèbata. 10:5 Isuratken si Musa ngo tersèngèt kelluahen kumarna pati-patiin i, "Barang isè mengulaken pati-patiin i, nggelluh ngo ia." 10:6 Tapi taba barang isè percaya, bagèen ngo idokken, "Ulang dokken ibas pikirenmu; isè ngo ndia laus mi Sorga? (lapatenna merembah Kristus i susur). 10:7 Barang: Isè ngo susur mi lembeng kemmatèen i? (lapatenna mengarahken Kristus i kemmatèen nai)." 10:8 Bagèen ngo tupèh pengartinna, "Ntalpè ngo bai ndènè Sukuten bai Dèbata i nai ibagasen babah dekket ibagasen pusuh perratèen ndènè." I ngo Sukuten sikubagahken kami; sukuten mendokken kennah ngo kalak percaya. 10:9 Ai mula iakku kènè ngo "Jesus i Tuhan" janah mula ikettoki kènè ngo ipegelluh Dèbata Jesus i kemmatèen nai, maluah mo kènè. 10:10 Ai ukur i ngo percaya, asa selloh dekket Dèbata; babah i ngo mengeruapken, asa mi kelluahen. 10:11 Tersurat ngo ibas Bibèl, "Barang isè percaya bai Jesus, oda ngo termalu." 10:12 Taba karina jelma ngo rana i, ai oda lot kalihna kalak Jahudi barang bangsa sidèban pè; ai sada ngo Tuhan mi karinana. Iberrèken ngo pasu-pasuna mertinèncuk taba barang isè mengido urup baNa. 10:13 Ai tersurat ngo ibas Bibèl, "Maluah ngo karina simendilo gerar Tuhan i". 10:14 Tapi bakunè mo jelma i dilo-dilo taba Tuhan, ukum oda ngo ia percaya? Janah bakunè mo jelma i percaya, ukum oda ngo idengkoh dèng katana? Nai bakunè mo jelma i mendengkoh katana, ukum oda lot mennukutken? 10:15 Janah bakunè mo mennukutken kata i, mula oda lot pasulaken? Tersurat ngo ibas Bibèl bagèen, "Sellohna i langkah kalak simerembah Sukuten Kelluahen i!" 10:16 Tapi oda ngo karinana mendengkohken Sukuten Kelluahen i. Ai nina si Jesaya ngo, "Alè Tuhan, isè mo percaya mi jamita nami?" 10:17 Ai merkitèken mendengkohken jamita i ngo gabè lot kepercayaen, janah idengkoh jamita kumarna lot kalak simenjamitaken tersèngèt Kristus. 10:18 Tapi mengkuso mo aku: Oda ngo ndia idengkoh kalak i dèng Sukuten i? Enggo ngo nemmuken! Ai tersurat ngo ibas Bibèl, "Enggo terdengkoh sorana mi suberri dunia èn, janah enggo soh katana i mi gennep soki tanoh èn." 10:19 Tapi mengkuso nola mo aku, "Oda dèng ngo ndia tahu kalak Israel? Si Musa ngo mengaloi perlebbè: 'Kubaing mo kènè cemburu meradepken siso ummatku kin, janah Kudungkul mo laga ndènè midah kalak simoto.' " 10:20 Pangen dèng ngo si Jesaya mendokken, "Kalak siso mennulusi aku idi nola ngo kennaan; janah Kupacidah ngo diringKu taba kalak siso madun mengkuso tersèngèt Aku." 10:21 Tapi ukum tersèngèt bangsa Israel idokken si Jesaya ngo bagèen, "Suntuk ari ngo Kudoroken tanganKu mendahi bangsa jèngèng bana mengalo-ngalo."
11:1 Mengkuso mo aku: Mada ngo ndia enggo ipitakken Dèbata bangsaNa? Tentu oda! Ai aku pè kalak Israel ngo, pinempar si Abraham marga Benjamin. 11:2 Oda ngo ipatakken Dèbata bangsaNa sienggo ipilih idi i mulana nai kin. Otang ibettoh kènè ngo sinidokkenna sitersurat ibas Bibèl tersèngèt si Elias, tikanna iaduken bai Dèbata tersèngèt Israel, ai nina ngo, 11:3 "Alè Tuhan, enggo ibunuh kalak i nabi-nabiMu janah enggo irumpakken langgaten pemmèlèen baMu i; pellin sadaku nai ngo tading, tapi dekket ngo kessahku i pè iletlet kalak i." 11:4 Bakunè pengaloi Dèbata taba si Elias? Bagèen ngo, "Kukiraken ngo bangku pitu ribu kalak nai siso menurimpang. Oda nung dèng kalak i mersembah taba Dèbata Baal." 11:5 Bagidi ma ngo bang bagèndari pè. Lot dèng ngo cituk nai bilangen kalak sienggo ipilih Dèbata, kerna masèh atèna midah kalak i. 11:6 Kumarna masèh atè Dèbata ngo asa ipilih kalak idi, oda ngo kemulihken perulaan kalak i. Ai ukum kemulihken perulaan jelma ngo pemilih Dèbata, oda ngo masèh atè Dèbata i dokkenken! 11:7 Asa, bakunè ngo keppè? Oda jupa kalak Israel si ni tulusenna. Pellin siterpilih i ngo kessa terolih. Ukum sidèbanna i, oda parduli i penenggoon Dèbata. 11:8 Rembang bagè sitersurat ibas Bibèl, "Soh bagèndari ngo lalap atè-atè pikiren kalak idi ibaing Dèbata, mata kalak i pè laju ngo oda merpendidah, pènggelna pè oda merpendengkoh." 11:9 Janah idokken si Daud ngo bagèen: "Belli mo gabè togong-togong pèsta bak kerja kalak idi bai kalak i, janah gabè geddung kedabuhenna! 11:10 Belli mo gellap mata kalak i ulang merpendidah, janah belli mo mukung kalak i sidekkah-dekkahna." 11:11 Mengkuso nola mo aku: Sinderrang geppah kalak Jahudi, asa gabè tumpat ngo? Oda! Tapi kemulihken pengellausiin kalak idi, gabè ipaluah mo bangsa sidèban, asa katerra pè gabè cemburu kalak Jahudi midah bangsa sidèban i. 11:12 Mula kemulihken pengelausiin kalak Jahudi ngo gabè dapetten pasu-pasu Dèbata bangsa sidèban, makinsa nola mo mula mengolihi mendè hubungen kalak Jahudi dekket Dèbata, tentu makin mertinèncukna mo pasu-pasu berrènken Dèbata! 11:13 Kudokken mo ranangku bai ndènè dengan siso bangsa Jahudi! Sidekkahna èn, kumarna rasul taba kalak siso bangsa Jahudi ngo aku, mulia ngo kuètong ulanku i. 11:14 Dak kuharapken ngo asa gabè cemburu bangsangku sendiri, asa merkitè bagidi ndorok kutegu dèba kalak i. 11:15 Kumarna itulak Dèbata ngo kalak i, gabè mengolihi mendè nola mo hubungen Dèbata dekket dunia èn; makinsa nola mo ukum ijalo Dèbata kalak i! Tosè mo i, balik nggelluh sienggo matè. 11:16 Ai mula milik Dèbata ngo nditak nikupul perlebbè i pas nditak idi nai, merlapaten ngo i, milik Dèbata ngo karina nditak i. Janah mula Dèbata sidasa urat kayu, Dèbata ngo sidasa kayu i karina. 11:17 Tuhu iagoi ngo dèba ranting kayu Zaitun i -- imo kalak Jahudi. Nai singkat nola mo ranting sidèban mi sidi, imo kènè siso bangsa Jahudi, asa irasaken kènè simendè ipas kayu Zaitun tuhu i nai, imo kalak Jahudi. 11:18 Kerna naidi ulang mo bagè pis mata ndènè alè dengan midah ranting sienggo iagoi i. Èngèt mo ranting si ni dampelken ngo kono. Oda ngo ranting merrèken pangaan taba urat, tapi urat i ngo merrèken pangaan taba ranting. 11:19 Tah bakunè idokken kono, "Otang iagoi ngo enggo ranting i kin, asa aku nola idampelken mi sidi!" 11:20 Uè, tuhu ngo i! Kumarna oda percaya ngo kalak i asa iagoi; janah kumarna percaya ngo kènè asa ijalo. Jadi ulang mo kono gabè gegah, tapi merkebiaren mo. 11:21 Ai mula oda pella rogi iakap Dèbata memmatakken ranting tuhu i kin i mo kalak Jahudi, ulang mo dok atèmu rogi iakap Dèbata memmatakken Kono! 11:22 Nai merkitèken i sidi nai si idah ngo mendè basa Dèbata dekket bakunè mposiNa. Ai mposi ngo pemmaingna taba kalak perdosa, tapi mendè ngo basana taba kono, asal mo tettap kono i bagasen mendè basaNa i; kum oda ngo, ipatakken ma ngo bang kono pè. 11:23 Nai kalak Jahudi pè, mula percaya nola kalak idi, ijalo nola ma ngo. Kerna merkuasa ngo Dèbata menjalosa mengolihi. 11:24 Kènè siso kalak Jahudi kin codi ngo bagè ranting kayu rambah. Asa mula idampelken ngo kènè mi kayu Zaitun tuhu, siso dos kin kayu ndènè, makinsa nola mo kalak Jahudi si niumpamaken mi kayu Zaitun tuhu; otang makin murah bai Dèbata lako mengolihken kalak i mi kayuna sendiri kin. 11:25 Alè dengan! Ulang idokdok kènè enggo mpantas kènè, tapi naing mo dok atèngku bettohen ndènè nihendakken Dèbata, siso nung ibettoh kalak i dèng. Gegah pè dèba kalak Israel ninggat enggo kessa tumpu ngo kalak siso Israel kin mendahi Dèbata. 11:26 Nai gabè maluah mo kalak Israel, rembang bagè sitersurat i kin, "Roh mo Raja Sipaluahken i Sion nai; Isasa mo karina kejahaten pemparen si Jakob. 11:27 Èn mo padanku dekket kalak i, tikan Kuampuni dosa-dosa kalak i." 11:28 Kumarna oda uè kalak Jahudi menjalo Sukuten Kelluahen bai Dèbata nai, gabè musuh Dèbata ngo kalak i janah gabè perlabaan ngo idi bai ndènè siso Jahudi, tapi kemmulihken pemmilihenna i, gabè kekellengen atè Dèbata ngo kalak i merkitèken empung kalak idi i. 11:29 Ai oda ngo uè Dèbata mennondati masèh atè dekket pemmilihenNa i. 11:30 Kènè pè, oda ngo menguèi Dèbata ukum arnia, tapi terolih masèh atè Dèbata ngo kènè bagèndari, kemulihken oda menguèi i kalak Israel. 11:31 Bagi ma ngo bang kalak Israel i pè. Oda menguèi kalak i bagèndari bai Dèbata, asa gabè terolih masèh atè bak kesasaan dosa kènè. Tapi i podi ari, kalak i pè terolih masèh atè kesasaan dosa ma ngo kemmulihken masèh atè sienggo ijalo kènè. 11:32 Ai enggo ibelli Dèbata karina jelma irajai ukur oda merpenguèi, asa gabè terolih masèh atè kalak karinana. 11:33 Mahantuna i tupèh kekayaan Dèbata! Mbagesna i tupèh keppantasen dekket nahu Dèbata. Oda terradumen karina hukum nidabuhna, janah oda tertulusen karina dalan-dalanna. 11:34 Bagè sitersurat i: Isè memettoh pikiren Tuhan i? Isè pennah memmeddahiSa? 11:35 Isè nung merèken taba Dèbata, asa ipido nola balesNa? 11:36 Dèbata ngo menghanaken sagumanna silot. Bana nai ngo rohna karinana i, janah merpunca bana. Pessangap mo Dèbata soh mi amman sumendah! Amèn.
12:1 Kènè alè dengan! Bagi mo merandalna mendè basa Dèbata banta. Kerna naidi ngo asa kuèlèk-èlèk kènè, asa bakin kènè diri ndènè pèlèen singgelluh janah mbadia kellemmonken atè Dèbata. Bagi mo nemmuken penguèen ndènè taba Dèbata. 12:2 Ulang dos cara ndènè dekket dunia èn. Paduè mo Dèbata perimbaruken diri ndènè, asa gabè mobah. Nai merkitè bagidi gabè terbaing kènè mo memmettoh lemmo atè Dèbata -- imo kadè mendè ikesampangken atè Dèbata janah sondel kinimerandalna. 12:3 Kumarna enggo iberrèken Dèbata masèh atèna bangku, jadi kupeddahi mo kènè karinana: Ulang ètong kènè diri ndènè lampo dari pada patutna. Tapi ibagasen ncerrep perrukuren mo radumi kènè diri ndènè mengèkutken bakunè belgahna kepercayaen iberrèken Dèbata bai gennep kènè. 12:4 Codinna, mbuè janah matcam bagè ngo sendihi dagingta. Gennep sendihi lot ngo ulanna. 12:5 Bagidi ma ngo bang kita pè. Tukasi pè mbuè kita, tapi sada daging ngo kita kerna sada mi Kristus. Janah gennep ngo sendihi kita samah kita. 12:6 Karinana kita menjalo allèh merguru mi pemmerrèken masèh atè Dèbata banta. Kerna naidi sipakkè mo allèhta i; mula merjamita ngo allèhta, sukutken mo Sukuten Kelluahen idi ibagasen kepercayaen silot banta. 12:7 Mula allèh mengajari, mengajari mo. 12:8 Mula allèh memmeddahi taba sidèban, iulaken mo i selloh. Mula allèh merbasa-basa, berrèken mo idi ibagasen sampang atè dekket sènteng. Mula allèh menguluken, menguluken mo ia ngkasah. Mula allèh mermasèh atè taba sidèban, ulaken mo idi ibagasen ukur nggasang. 12:9 Ulang mo merpengait ngkelleng atè i. Nggogo mo atèmu midah sijahat janah bahanken mo simerandal. 12:10 Èngèt kènè mo mersikekelengen samah dengan bagè merkaka kuanggi, janah mersilebbè-lebbèen mo kènè mersipesangapen. 12:11 Ulang moru ngakasah ndènè mahan bahaan; nggasang mo kènè mengkebasi bahaan bai Tuhan i merkitèken Tendi Perbadia. 12:12 Sampang mo atè ndènè mengharap taba Tuhan, janah mbingit mo kènè ipas sitahanen, nai empet kènè mo mersodip. 12:13 Sarihken kènè mo siperlu bai kalak sipercaya bai Dèbata janah jalo kènè mo kalak i kiserrang mi bages ndènè ibagasen sampang atè. 12:14 Pido kènè mo bai Dèbata asa ipasu-pasu kalak simenessak-nessak kènè. Uè, pido mo asa ipasu-pasu Dèbata kalak idi, ulang sumpahi. 12:15 Rebbak lolo mo kènè dekket si lolo, janah rebbak tangis mo kènè dekket kalak si tangis i. 12:16 Sada mo orjok ndènè samah kènè. Ulang ndates ukur merpengelako, tapi pessobok mo dirimu mi kecereppen. Ulang mpantasen kono dok atèmu ipas situhunna nai. 12:17 Ulang balesken jahat alo jahat, tapi baing mo mendè i hadeppen kalak karinana! 12:18 Usahaken mo nggelluh ibagasen damè meradepken karina jelma. 12:19 Kènè alè si nikekellengen! Ulang kènè bales dendam, belli mo Dèbata merlulu, ai tersurat ngo ibas Bibèl, "Aku ngo menghukum, Aku ngo memmales, nina Tuhan i." 12:20 Balikna nola mo tupèh baing, mula mellèhè musuhmi berrèken ia mangan; mula muasen ia, berrè mènum. Ai mula ibaing kono bagidi, termèla mo ia ibaing kono. 12:21 Ulang talu kono ibaing kejahaten, tapi taluken mo kejahaten i merkitè-kitè selloh.
13:1 Gennep mo kalak kennah tunduk mi pemerèntah, di oda lot pemerèntah ukum mak bai Dèbata nai menjalo kuasa. Janah pemerèntah silot bagèndari pedalanken kuasana merkitè perèntah bai Dèbata nai. 13:2 Mengalo sinitentuken Dèbata ngo barang isè kalak mengalo pemerèntah. Asa barang isè mengalo pemerèntah, mengaitken hukum mi dirina ngo ia simengalo i. 13:3 Kalak memmakin mendè ulang mbiar midah pemerèntah. Pellin kalak simengulaken jahat ngo kessa patut mbiar. Mula sèkel kono ulang mbiar midah pemerèntah, kennah mo ulaken simerandal asa gabè ipoji nola kono. 13:4 Kerna naposo Dèbata ngo pemerèntah i, lako menghatorken simerandal bamu. Tapi mula iulaken kono kejahaten, patut ngo kono buradan midahsa, ai oda sia-sia kuasana i lako menghukum barang isè. Ai suruhen Dèbata ngo kalak i lako mendabuh hukum ni Dèbata taba barang isè simaingken kejahaten. 13:5 Kerna naidi kennah tunduk ngo kènè taba pemerèntah -- ulang kumarna mbiar ihukum, tapi kumerna ienjar pusuh peratèen mo. 13:6 Kumarna naidi ngo asa menggarar belasting kènè, kerna perkebbas Dèbata ngo kalak idi, janah mi ulaan i ngo kalak idi ipebangkit. 13:7 Jadi garar kènè mo bai pemerèntah kadè patut gararen bana; imo belasting, taba sipatut menjalosa, cokè taba kalak sipatut kessakaten cokè; merkebiaren mo kènè taba kalak sipatut kebbiaren, hormat taba kalak sihormaten. 13:8 Ulang merutang kènè barang bai isè pè, laènken utang mersikekelengen. Barang isè mengkekelengi denganna, kalak sibagidi ngo mengulaken pati-patiin Dèbata siniberrèken merkitè-kitè si Musa. 13:9 Ai idokken pati-patiin i ngo: Ulang kono merlangkah julu meddem; ulang memmunuh, ulang mennangko; ulang mennakiken kadè silot bai ndèba, karinana dekket pati-patiin sidèbanna idi, èn ngo rèmpunna, "Kekellengi mo denganmu jelma dosken dirimu." 13:10 Barang isè perkelleng atè, oda nggèut ia memmaing nggodo taba denganna jelma; jadi barang isè kalak perrukur ngkelleng, enggo mo idomi nipergeddo pati-patiin i. 13:11 Tambahna, kerna ibettoh kènè ngo tikkina, ukum bagèndari enggo mbasna lako kèkè ipas simeddem nai, ai enggo makin ndessing ketikana kelluahenta i, mertimbangken mula-mula kita gabè percaya. 13:12 Salpun nèngè mo bernginna, sigejap nai mahar mo. Nteng sitadingken mo ulaan kegellapen i siselluk mo sinjata kecihuren i. 13:13 Mehator mo pengellakonta, bagè pengellako patut sinderrang mahar, ulang tikka caranta mangan bak mènum, merpèsta-pèsta, ulang rorang barang mabuk, ulang mak merjullat. Ulang merrubat barang merrukur ncian. 13:14 Tapi paduè mo Jesus Kristus menghatorken sinaing bahankenmu. Ulang uèi cubellek daging ndènè memmaing dosa.
14:1 Anju kènè mo kalak sikurang ntegguh merkepercayaen, ulang pella mersoal dekketsa tersèngèt pemikirenna. 14:2 Lot ngo dèba mendokken ndorok ipangan karina matcam pangaan. Tapi lot ma ngo dèba kalak sikurang ntegguh kepercayaenna merdok atè, pellin roroh bulung-bulung idi sambing mo kessa ndorok pangaan. 14:3 Barang isè sindorok kipangan mermatcam bagè pangaan, ulang gabè lègan nola dok atèna kalak sikipangan pangaan merkedekoon. Bagidi ma mo kalak simengerrem oda kipangan pangaan mermatcam bagè, ai sienggo ijalo Dèbata ngo bang kalak i pè. 14:4 Isè ngo ko pana dok atèmu, asa gabè ihukumi kono denganmu naposo sidèban? Tah hot pè ia barang geppah, tuanna ngo mennarihken i. Tapi tettah ngo ia cènder, ai terpetettah Tuhan i ngo ia. 14:5 Lot ngo dèba merdok atè, merkesurungen ari sisada bai ari sisada nai, tapi lot ma ngo dèba mengakap dos ngo karinana ari. Belli mo kalak i menentuken memmes pikirenna sendiri! 14:6 Barang isè memmaing lot ari merkesurungen, lako pesangapken Tuhan i mo idi ibaing. Barang isè kipangan pangaan simermatcam bagè, baing mo i lako pessangapken Tuhan i, ninganna mendokken mejalo metangkup taba Dèbata, kemmulihken pangaan i. Bagi ma mo kalak simengerrem i imo pellin kipangan pangaan merkedekoon, kalak i pè pesangapken Tuhan i ngo janah mendokken mejalo metangkup taba Dèbata. 14:7 Isè poda kita nggelluh ibas dirinta nai sendiri; isè ma poda kita matè ibas dirinta nai sendiri. 14:8 Mula nggelluh kita, nggelluh bai Tuhan i ngo, janah mula matè pè kita, matè bai Tuhan i ngo. Asa, nggelluh barang matè pè kita, tong ngo milik Tuhan i kita. 14:9 Ai enggo matè Kristus janah balik nggelluh. Kerna naidi ngo Ia gabè Tuhan kalak singgelluh janah Tuhan kalak sienggo matè pè. 14:10 Jadi kerna naidi alè dengan, kadè mo lapatenna mula ihukum-hukumi kono denganmu sisada kepercayaen? Kasa pis matamu midah denganmu? Ai rebbak hadep ngo kita seggen i jolo Dèbata lako iadili. 14:11 Tersurat ngo ibas Bibèl, "Tuhuna ngo nggelluh Aku," nina Tuhan i. "Karina jelma kennah mersembah i hadeppenKu, janah gennep jelma merkettuhuken, Aku ngo Dèbata." 14:12 Karinana kita kennah mertanggung jabab tersèngèt mi sinibaingta seggen i hadeppen Dèbata. 14:13 Èn pè, ulang nèngè mo kita mersihukum-hukumen. Tapi dak sipikiri mo asa ulang nibakin siso puna-puna taba dengan, asa ulang gabè laling ia. 14:14 Ntangkas ngo kubettoh janah tok ngo aku ibagasen Tuhan Jesus, ukum ujutna kadè poda lot simellamun, tapi gabè mellamun ngo i bai kalak simendokken mellamun. 14:15 Tapi mula ncio ukur kaltumu ibaing kono kemmulihken pangaan, oda nèngè ibagasen ngkelleng i kono. Ulang mo mago denganmi kumarna peppanmu, ai enggo matè Kristus mengkepkepsa. 14:16 Kerna naidi ulang paduè simerandal silot bamu i oda selloh ibaing denganmu. 14:17 Ai ukum kerajaen Dèbata, oda ngo perlu pangaan barang ènumen. Tapi menguèi Dèbata ngo dekket mengakapi kedamèen bak menjalo sampang atè si niberrèken Tendi Perbadia. 14:18 Ai mula bagi penguèimu taba Kristus, ikellemmoken Dèbata mo kono janah maharga mo kono i tengah-tengah jelma nterrem. 14:19 Kumarna naidi siayaki mo memmaingken damè janah mersipehèdu-hèduun samah kita. 14:20 Ulang sicèdai nibaing Dèbata kumarna pangaan. Halal ngo karinana sipanganen, tapi mula mengkerrohken dosa ngo i bai dèba dengan, ulang kita gabè mersalah. 14:21 Lotiin mo ulang kipangan gulè, ulang mènum anggur kita, barang mengulaken tah kadè pè, mula i nola memmakin merdosa dengan sipercaya bai Tuhan Jesus. 14:22 Mula percaya kono, ntegguh mo idi jèmak i hadeppen Dèbata. Sayurntua ngo kalak siso ganggu ukurna i sinaing bakinenna! 14:23 Tapi barang isè sèk ukurna lako kipangan barang kadè, keppè mula ipangan nola pangaan i kenna hukum Dèbata ngo ia, kumarna oda ibagasen kepercayaenna ia mengulaken tersèngèt kadè bennar bak salah. Ai barang kadè sambing nibahanken mula oda tok atè, dosa ngo i.
15:1 Kita sienggo ntegguh merkepercayaen bai Dèbata, kennah sianju ngo denganta perkepercayaen ndotè. Ulang mo kita pellin pesennangken dirinta sambing. 15:2 Karina mo kita memmaing sampang atè denganta, asa makin ntegguh kepercayanna. 15:3 Ai Kristus pè oda ngo memikirken kesennangen diriNa sendiri, bagè nidokken sitersurat i Bibèl bagèen, "Gabè sempa bangku ngo ramin-ramin, aturen bamu i kin." 15:4 Karina sitersurat ibagasen Bibèl, mahan peddah banta ngo i, asa ntegguh janah mbingit kita merpengharapen taba Dèbata. 15:5 Dak iberrèken Dèbata mo bai ndènè mbingit dekket pengapoon, asa mersikatè-katèen kènè mengèkutken lemmo atè Kristus Jesus, 15:6 asa merkitè sada kata sada orjok kènè, memmoji Dèbata Bapa ni Tuhanta Jesus Kristus. 15:7 Kerna naidi, mersijaloon mo kènè tosè bagè penjalo Kristus banta mahan kessangapen bai Dèbata. 15:8 Èngèt mo. Singgo mengkebasi kalak Jahudi ngo Kristus mennuduhken kesètiaan Dèbata pesautken bagah-bagahNa bai empungta arnia. 15:9 Bang bangsa sidèban i pè, ipesanagap ngo Dèbata merkitè-kitè Jesus, kumarna mendè basana taba kalak i, bagè sitersurat ibas Bibèl bagèen: "Kumarna i ngo kupoji Kono i tengah-tengah karina bangsa janah kuèndèken ngo èndè pemoji-mojiin mi gerarmi." 15:10 Tersurat dèng ma ngo bagèen, "Meroang-oang mo kènè rebbak dekket bangsa sienggo terpilih i, alè karina bangsa!" 15:11 Dèba nai dèng ma, "Poji kènè mo Dèbata, kènè alè karina bangsa poji kènè mo Ia, kènè alè karina jelma!" 15:12 Si Jesaya mendokken bagèen, "Kèkè ngo seggen ipas pemparen si Jese nai, lako menggem-nggemmi karina bangsa. Ia ngo siharapenken karina bangsa." 15:13 Dèbata ngo siharapenken ndènè. Dak Iberrèken mo sampang atè, mendomi atè-atè ndènè; bagi ma pè damè, kerna percaya kènè, asa merkitè-kitè Tendina i, makin mengharap kènè bai Dèbata. 15:14 Tok ngo aku alè dengan, kènè pè enggo idomi simendè dekket perbinettohen, janah terbaing kènè ngo mersiajar-ajaren. 15:15 Tapi lot ngo perlu kupessèngèt taba kènè, kerna enggo ibasa-basaken Dèbata bangku ulaan i. 15:16 Enggo ipebangkit aku gabè naposo Jesus Kristus, mahan pasulaken taba kalak siso Jahudi. Aku ngo gabè imam memmagahken Sukuten Simerandal bai Dèbata nai asa kalak siso Jahudi gabè mahan pèlèen sindorok ijalo D èbata. Katerra pè Tendi Dèbata mo memmaing kalak i gabè pèlèen merkedekoen bai Dèbata. 15:17 Jadi kumarna ibagasen Kristus Jesus ngo aku, ndorok mo kupoji diringku tersèngèt pengkebasingku bai Dèbata. 15:18 Pang ngo aku mengeruapken bagidi, kemmulihken sienggo ibahanken Kristus merkitè-kitè aku lako memmaing kalak siso Jahudi menguèi taba Dèbata. Kuulaken ngo i merkitè kata bak pemakin, 15:19 merdengan tanda kelengangen bak kuasa mahantu merkitè Tendi Perbadia. Bagi ngo enggo kupesakat Sukuten Kelluahen tersèngèt Kristus mendahi suberri jelma, mulai i Jerusalem nai soh mi Ilirikum. 15:20 Ipergeddo atèngku ngo, asa kubagahken Sukuten Kelluahen bai Dèbata nai taba jelma simakdèng mendengkoh tersèngèt Kristus, asa ulang kupajek bages i babo batu cendi si nibahan sidèban. 15:21 Bagè sinidokken Bibèl, "Idah kalak simakdèng nung menjalo Sukuten i mo Ia, janah iantusi kalak i mo si mak nung dèng mendengkohsa." 15:22 Idi ngo sebabna asa enggo nggati terhabat langkahku roh mendahi kènè. 15:23 Tapi ukum bagèndari, enggo pul bahanku i nagerri i. Jadi kumarna enggo kin ma ngo mertahun-tahun dekkahna sèkel aku naing mendahi kènè, 15:24 sikali èn tikan memellus aku arap kuta ndènè lako mi Spanyol, harap ngo aku ndorok pessimbak dekket kènè. Nai kuharapken ma ngo iurupi kènè aku i perdalanenku mi Spanyol i. 15:25 Tapi ukum bagèndari naing mi Jerusalem dèng ngo aku lako mennaruhken pengurupiin bai ummat Dèbata nisidi. 15:26 Kerna ipepulung Kuria Makedonia dekket Akhaya ngo pengurupiin bai dengan sincor ni Jerusalem. 15:27 Ibagasen sennang atè ngo kalak i memutusken i. Situhunna patut ngo kalak i mengurupi sincor i Jerusalem; kerna bai kalak Jahudi nai ngo bangsa siso Jahudi enggo manjalo pasu-pasu Dèbata. Jadi patutna ngo kalak siso Jahudi i mengurupi kalak Jahudi merkitè pasu-pasu perhartaan. 15:28 Mula enggo pul kubakin bahanku èn janah mula enggo kupesakat taba kalak ni Jerusalem pengurupiin sienggo terpeppulung i, mèter berkat mo aku mi Spanyol memellus arap kuta ndènè. 15:29 Mula roh kessa aku medahi kènè, roh ibagasen mbuè pasu-pasu Kristus ngo lako bai ndènè. 15:30 Ibagasen Tuhan Jesus Kristus dekket ibagasen ngkelleng atè Tendi Perbadia, memmes kupidoken bai ndènè asa tuhu-tuhu kènè mennodipken rebbak dekket aku mendahi Dèbata lako baku; 15:31 asa ipaluah Dèbata aku ipas tangan kalak siso percaya i Judèa nai, janah katerra pè asa ijalo ummat Dèbata, si ni Jerusalem pengurupiin sikutaruhken i. 15:32 Nai mula ikellemmoken Dèbata, terbaing aku mo roh mendahi kènè ibagasen sampang atè. Jadi gabè nggasang mo kuakap i tengah-tengah ndènè. 15:33 Dak idengani Dèbata perdamè i mo kènè karinana. Amèn.
16:1 Kupetandaken mo bai ndènè turangta si Poibè pengurupi i kuria Kengkrea ngo ia. 16:2 Jalo kènè mo ia, ai sada kalak sipercaya bai Tuhan i ngo ia, ai bagi ngo patut kalak sipercaya bai Dèbata kennah mersijaloon; urupi kènè mo ia, mula iperluken pengurupiin bai ndènè nai, ai enggo mèduk kalak iurupi -- termasuk aku pè. 16:3 Pessoh kènè salamku bai si Priska dekket si Akwila denganku mengula bai Jesus Kristus. 16:4 Sanga ngo naing matè kalak i lako paluahken aku. Asa oda pellin aku kessa mendokken melias atè tabasa -- tapi dekket ngo karina kuria bangsa sidèban siso Jahudi. 16:5 Pessoh kènè ma salamku bang mendahi kuria simertumpu i bages kalak i. Salamku ma bai si Epenetus kekellengenku; Ia ngo perlebbè percaya bai Kristus i Asia. 16:6 Salamku ma bai si Maria sienggo leja lako mendahi kènè. 16:7 Pessoh kènè ma salamku bai si Andronikus dekket bai si Junias. Denganku sada marga ngo ia janah pennah kurungen dekket aku. Lebbèen ngo kalak i percaya bai Kristus dari pada aku. Janah termurmur ngo ia bai karina apostèl. 16:8 Salamku bai si Ampliatus, sikukekelengi kerna rebbak ngo kami ibagasen Tuhan i. 16:9 Salamku bai si Urbanus denganna rebbak mengula bai Kristus. Bagi ma salamku bai si Stakhis kekellengenku. 16:10 Salamku bai si Apeles, sètia kalohoon ngo ia bai Kristus. Salamku ma bai dengan simpangaan si Aristobulus. 16:11 Salamku bai si Herodion denganku sada marga. Salamku ma bai dengan simpangaan si Narkisus sirebbak percaya bai Tuhan i. 16:12 Salamku bai si Tripena dekket bai si Triposa siuè leja mengkebasi Tuhan i, dekket bai si Persis sikukekellengi, sienggo uè merleja-leja mengkebasi Tuhan i. 16:13 Salamku bai si Rufus dekket bai inangna sidosken inangku. Sinipilih Tuhan i ngo si Rupus janah terpoji. 16:14 Pessoh kènè ma salamku bai si Asinkritus, si Plegon, si Hermes, Patrobas, si Hermas bak taba karina dengan Kristen sirebbak dekketsa. 16:15 Salamku bai si Pilologus, si Julia, si Nereus dekket bai Turangna i; bai si Olimpas dekket karina sipercaya sirebbak dekket kalak i. 16:16 Mersisalam-salamen mo kènè ninganna mersisanggohen perkaka-kuanggiin. Soh mo bai ndè salam karina kuria Kristus. 16:17 Kupeddahi mo kènè alè dengan! Jagaken kènè mo kalak simentebbennaken persilisihen dekket kalak simaing merbulut kepercayaen bai Tuhan i, ai meralo ngo i mi sienggo iajarken bai ndènè i. Ilakken kènè mo kalak sibagidi. 16:18 Ai ukum kalak sibagidi, oda ngo iuèi kalak i Tuhanta Kristus i, tapi beltekna ngo isarihken. Janah merkitè rana mendè dengkohen nèam-nèam penggel, ioto-otoi kalak i ngo perborjok-borjok. 16:19 Ai enggo karina kalak memettoh sètia kènè mi Sukuten Kelluahen bai Dèbata nai, i ngo lolo atèngku midah kènè. Tapi dok atèngku naing mo bijak kènè tersèngèt mi simerandal janah moto tersèngèt simerroha. 16:20 Dèbata perdamè i mo pettumpatken Sibolis mi terruh kuasa ndènè. Dak idengani janah ipasu-pasu Jesus Kristus Tuhanta i mo kènè. 16:21 Mennenges salam ngo si Timoteus denganku i bai ndènè. Bagidi ma ngo si Lukius, si Jason dekket Sosipater denganku sada marga. 16:22 Kudokken ma mo salamku simennuratken surat èn, aku si Tertius, imo salam perkaka kuanggiin. 16:23 Si Gayus pè mennenges salam ma ngo bai ndènè; kiserrang i bagesna ngo aku, janah kuria nami pè i sidi ngo. Si Erastus kesakaten riar ni kuta i pè menenges salam ngo bai ndènè. Bagi ma denganta si Kuartus. 16:24 Dak idengani janah ipasu-pasu Tuhanta i mo kènè. Amèn. 16:25 Kessangapen mo bai Dèbata! Merkuasa ngo ia petegguhken kepercayaen ndènè tosè bagè Sukuten Kelluahen bai Dèbata nai sikubagahken tersèngèt Jesus Kristus. Kuberitaken sukuten i rembang mi kadè sinipetarar Dèbata, imo rencana Dèbata i sinderbi nai simakdèng nung ibettoh jelma. 16:26 Tapi bagèndari enggo ipetarar janah ibagahken taba suberri bangsa merkitè surat nabi-nabi mengèkutken kata Dèbata simenettap i, asa gabè percaya janah iuèi kalak i Dèbata. 16:27 Sadasa ngo kessa Dèbata sibijakna kalohoon. Dak terpoji mo Ia soh mi amman-sumendah merkitè-kitè Jesus Kristus! Amèn. Tabe nami, Paulus, perserrèaan Kristus Jesus
1:1-3 Kènè dengan Kuria ni Tuhanta si ni Korintus! Enggo idilo Dèbata kènè gabè ummatNa kerna milik Kristus ngo kènè, rebbak dekket karina kalak barang i dikè sambing simersembah Tuhanta Jesus Kristus, Tuhan kalak idi bak Tuhanta ma. Aku, si Paulus dekket denganta si Sostenes, merketoken katerra pè iberrèken Dèbata Bapa dekket Tuhan Jesus Kristus mo pasu-pasu dekket damèNa bai ndènè. Aku rasul Kristus Jesus mennurat surat èn, sinipebangkit Dèbata sendiri janah mengèkutken lemmo atèNa. 1:4 Dak mendokken melias atè ngo aku taba Dèbatangku kumarnaken kènè, ai enggo ijalo kènè basa-basa Dèbata merkitè-kitè Jesus Kristus. 1:5 Kumarna enggo gabè milik Kristus kènè, jadi gabè kaya ngo kènè ibas segalana. Ai enggo mbages nahu ndènè terrèngèt segalana, dekket pandè ngo kènè mengajarken perbinettohen i. 1:6 Tanda enggo ikeddarohken kènè ngo sukuten terrèngèt Kristus i, 1:7 gabè oda nèngè kurangen kènè ibas matcam bagè sibasa-basa Dèbata, ninganna kènè memèma-mèma pekkiroh Tuhanta Jesus Kristus janah idah karina kalak. 1:8 Kristus i sendiri ngo pehotken kènè soh mi puncana; asa ulang mertikas kènè idapet mula roh kessa Ia. 1:9 Kettoken ngo Dèbata sienggo mendilo kènè mi persaoren dekket anakNa Jesus Kristus, Tuhanta idi. 1:10 Tapi kupido bai ndènè alè dengan merkitèken gerar Tuhanta Jesus Kristus, tettap mo kènè karinana sada kata; asa ulang lot perselisihen i tengah-tengah ndènè. Kennah mersada kata kènè, sada ukur janah sada pikiren. 1:11 Kerna terbertik ngo soh bangku arap dengan simpangaan si Kloë, terrèngèt perselisihen ndènè. 1:12 Sikudokken imo, "Lot iantara kènè mendokken, sisiin si Paulus ngo aku," dèba mendokken, "sisiin si Apolos ngo aku," dèba nai mendokken sisiin si Kepas ngo aku; dèba ma mendokken "sisiin Kristus ngo ukum aku." 1:13 Ai terpella-pella ngo Kristus idi? Otang oda nung si Paulus tersilang mengkepkep kènè? Otang oda ngo mi bagasen gerar si Paulus kènè iperridi? 1:14 Tuahna mo oda lot kuperridi barang isè bai ndènè nai laènken si Krispus dekket si Gayus. 1:15 Ulang mo lot mendokken asa gabè pengèkutku ia makinken asa kuperridi ia. 1:16 (Oo, uè, dekket ngo keppè simpangaan si Stefanuskuperridi. Nai laènkenna i, ukum kuèngèt oda lot nèngè barang isè kuperridi). 1:17 Ipasulak Kristus aku oda ngo lako perridiken, tapi lako merrèken Sukuten Kelluahen bai Dèbata nai ngo; idi pè oda ngo kubakin pantas-pantas jelma mengerrana. Ai ukum kerna kepantasen ngo kubakin, gabè moru mo kuasa permatè Kristus i silang i. 1:18 Kemmotoon ngo permatè Kristus i kayu silang i ukum taba kalak sinaing ihukum Dèbata. Tapi kuasa kegegohen Dèbata ngo idi ukum banta nipaluah Dèbata. 1:19 Tersurat ngo ibas Bibèl bagèen, "Kusursari ngo perbinettohen kalak sipandè janah Kutumpatken ngo kepistaren kalak simpantas." 1:20 Asa kadè mo gunana kalak singgeddang radumen? Kadè gunana kalak simpantas? Kadè guna simbages nahu sibagèndèen? Ai gabè kemmotoon ngo kepantasen jelma idi ibakin Dèbata! 1:21 Barang bakunè pè kepandèen jelma, oda tertandansa Dèbata ukum merkitè kepandènna idi. Tapi kemmulihken kebijaken Dèbata gabè ipaluah ngo jelma sipercaya tabaSa, merkitèken sukuten kemmotoon dokatè dunia èn. 1:22 Mengido tanda kellengangen ngo ukum kalak Jahudi mahan bukti, janah ukum kalak Junani menulusisa merkitè perbinettohen dunia èn. 1:23 Tapi ukum kami, pellin Kristus simatè tersilang idi ngo kusukutken kami. Terselkah ngo ukur Jahudi kumarna i janah kemmotoon ngo i bai kalak siso bangsa Jahudi. 1:24 Tapi ukum bai kalak sienggo nidilo Dèbata -- barang Jahudi pè i barang siso Jahudi -- sukuten idi imo kuasa dekket kebijaken ni Dèbata. 1:25 Ai bijaken dèng ngo mula pè tengngennen bagè kemmotoon sitaridah bai Dèbata, ulang pada kebijaken jelma; janah gegohen dèng ngo mula pè pè lot tengngennen ndotè bai Dèbata ulang pada kegegohen jelma. 1:26 Alè dengan! Perdatèken kènè mo lebbè bakunè kènè sinderrang idilo Dèbata kènè. Oda kènè kalak bijak, oda piga merkuasa, oda piga kalak raja, ukum mengèkutken kejelmaan. 1:27 Ai sengaja ngo ipilih Dèbata simoto dokatè dunia èn, janah sindotè dokatè dunia èn lako pemmèlaken kalak simergegoh dokatè dunia èn. 1:28 Kalak simerlèa, hina dekket siso merlapaten iètong dunia èn idi ngo ipilih Dèbata, asa gabè isomadaken nipesangap dunia èn kin, 1:29 merkitè bagidi sada kalak poda ndorok gegah i hadeppen Dèbata. 1:30 Dèbata ngo memmakin asa gabè sada kita ibagasen Kristus Jesus. Merkitè Jesus Kristus ngo kita gabè bijak. Janah merkitè Ia ngo memmakin asa gabè merdemmu kita dekket Dèbata. Kristus ma ngo memmakin kita bennar, asa gabè ummat Dèbata kita. Kristus ma ngo paluahken kita ibas dosanta nai. 1:31 Asa saut bagè sitersurat ibas Bibèl, "Barang isè naing moji dirina, kennah ibagasen sienggo nibaingken Dèbata idi mo ia memmoji dirina."
2:1 Bagi ma ngo tikanna roh aku mendahi kènè alè dengan, oda ngo merkitè kata-kata mendè dengkohen aku lako mennukutken kata Dèbata. Oda ngo kupakkè perbinettohen dunia èn. 2:2 Ai enggo kin ngo kutekadken sidekkah i tengah-tengah ndènè aku; oda kuruapken barang kadè laènken terrèngèt Jesus Kristus, Ia sienggo matè ipersilangken. 2:3 Tikan i tengah-tengah ndènè aku ndotè janah buradan ninganna menggirgir. 2:4 Bak sukuten si kusukutken pè bai ndènè oda ngo kuranaken i merkitè-kitè rana kepantasen jelma. Tapi kuranaken idi merkitè pos atè ibas kuasa Tendi Dèbata ngo. 2:5 Kubakin bagidi asa merdangaan bai kegegohen Dèbata kepercayaen ndènè, ulang gabè merdangaan mi kepandèen jelma. 2:6 Tukasi pè bagidi ukum mendahi kalak sienggo tang pertendinna, kubagahken ngo terrèngèt kebijaken. Tapi oda ngo bagè kebijaken dunia èn barang kebijaken pemimpin ni tanoh èn silako salpun i. 2:7 Tapi kebijaken sikuranaken idi imo siroh bai Dèbata nai siso nibettoh dunia èn kin dèng, sienggo ihantari Dèbata banta, sinderrang madèng kin pè hana dunia èn, mahan kesennangenta. 2:8 Isè poda lot pemimpin ni tanoh ènda memmettoh kebijaken i. Ai ukum enggo kin ngo ibettoh, tentu oda ipersilangken kalak idi Tuhan simermulia idi. 2:9 Bagè sitersurat ibas Bibèl, "Siso nung idah, barang idengkoh jelma, siso nung turah ibas sura-sura jelma, idi ngo ihantari Dèbata bai kalak simengkekelengiSa." 2:10 Tapi karinana enggo mo ipetarar Dèbata banta merkitè-kitè TendiNa. Ai karinana ngo iasak Tendi i soh mi pucuk jambu hendak ni Dèbata. 2:11 Isè bettoh-bettohen perrukuren jelma, mula mak tendina sendiri? Bagidi ma ngo terrèngèt Dèbata, oda lot memettoh perrukurenna, laènken ni Tendi Dèbata sendiri! 2:12 Oda ngo tendi dunia èn sijalo, tapi Tendi bai Dèbata nai ngo, asa sibettoh karina mendè basa Dèbata sienggo iberrèken banta. 2:13 Kerna naidi, mula kuranaken kami terrèngèt Dèbata, oda kuranaken kami mengèkutken kepantasen jelma, tapi mengèkutken sinipeddahken Tendi Dèbata ngo, kuranaken kami terrèngèt Dèbata taba kalak sienggo iiani Tendi Dèbata. 2:14 Barang isè kalak siso niianen Tendi Dèbata, oda terjalosa terrèngèt nibagahken Tendi i. Kerna ukum bai kalak sibagidi, kemmotoon ngo iètong terrèngèt misi. Ai oda ndorok iarusi kalak idi i kerna pellin merkitè pertendiin ngo i ndorok terantusen. 2:15 Kalak sienggo iiani Tendi Dèbata, iarti ngo karinana i, tapi kedirinna sendiri oda terradumen barang isè pè. 2:16 Ai tersurat ngo ibas Bibèl: "Isè kalak memettoh pikiren Tuhan i? Isè ndorok mengajariSa?" Tapi ukum kita, perrukuren Kristus idi ngo enggo lot banta!
3:1 Jadi situhunna oda terbakin aku mengerrana taba kènè alè dengan, bagè mengerranai dekket sienggo iiani Tendi Dèbata; tapi mengerrana aku bai ndè bagè mi jelma ibagasen perdagingen tanoh èn dèng ngo, tosè mi anak mbara kepercayanna mi Kristus. 3:2 Tikanna i kumamahi dèng ngo kènè bagè anak mbara, oda dèng pangaan biasa, kumarna madèng tertellen kènè pangaan bagidi tikala idi. Salangken bagèndari madèng tertellen kènè. 3:3 Kerna tong dèng ngo kènè nggelluh mengèkutken daging mula lot dèng bai ndènè ncian dekket perselisihen samah kènè; otang tanda-tanda magahken tong dèng ngo kènè merperangè bagè tabiat jelma ni tanoh ènda? 3:4 Otang kejelmaan tanoh èn dèng ngo kènè mula lot mendokken sisiin si Paulus aku, barang sisiin si Apolos ngo aku, nina? 3:5 Isè ngo pana si Apolos? Isè si Paulus? Pellin naposo Dèbata ngo kami, simenegu-negu kènè asa percaya bai Kristus. Pellin mengulaken sienggo idokken Dèbata mendahi kami sambing ngo kessa kami. 3:6 Aku ngo mennuan janah si Apolos menggaburi, tapi Dèbata ngo ukum memmakin turah. 3:7 Jadi sipentingna imo Dèbata, kerna Ia ngo petturahken. Simennuan bak simenggaburi oda pella pènting! 3:8 Dos ngo ukum simennuan dekket simenggaburi; gennep kalak idi menjalo upah rembang mi pengulankenna. 3:9 Asa ukum kami imo jelma perkebbas ni Dèbata, janah kènè mo terpecodi bagè juma ni Dèbata. Oda pellin i tupèh, tapi terpecodi ma ngo kènè mi bages Dèbata ma. 3:10 Merkitè kepandèen nibasa-basaken Dèbata bangku, aku mo bagè sada kalak pandè tukkang sienggo memmahan batu cendi bekkas bages i, janah sidèban pelliasken bages i babo batu cendi idi, kennah lebbèen mo ipemmanat barang bakunè bakinenna memmahan bages idi. 3:11 Ai oda lot nèngè batu cendi sidèban laènken sienggo pajek idi kin, imo Jesus Kristus sienggo itentuken Dèbata. 3:12 Asa mula pè ipekkadè i babo batu cendi idi, tah emmas pè, tah pirak, tah batu permatè, tah kayu, tah rih barang pè tah nggala pagè. 3:13 Tangkas ngo taridah sinibahanna i, mula enggo kessa roh Kristus mengolihi i ari podi i, ai api pengadilen i ngo memmakinken ntarar karinana nibahanken jelma i, janah api i mo mengoji bak menentuken barang bakunè pengulankenna idi. 3:14 Mula tahan ngo bages nipajekna idi oda ipangan api, jaloon kalak i mo upahna. 3:15 Tapi mula melettup ngo nipajekna idi, rogi mo ia, maluah ngo nemmuken ia, tapi tosè bagè siniruah ngo ia ibas api idi nai. 3:16 Ibettoh kènè ngo: ukum kènè imo Bages Dèbata? Janah Tendi Dèbata merrian ibagasen kènè? 3:17 Barang isè mencèdai Bages Dèbata, kennah cèdaan Dèbata ngo ia, ai mbadia ngo Bages Dèbata, imo kènè. 3:18 Ulang lot barang isè mengoto-ngotoi dirina sendiri. Mula lot mengètong dirina mpantas mengèkutken dunia èn, gabè kalak moto mo lebbè ia, asa tuhu gabè pandè. 3:19 Kerna, ukum i hadeppen Dèbata, kemmotoon ngo kepandèen dunia èn, bagè sitersurat ibas Bibèl, "Itogongi Dèbata ngo kalak sipandè ni dunia èn merkitè kepandènna sendiri." 3:20 Tersurat dèng ma ngo bagèen, "Ibettoh Tuhan i ngo, oda merguna pikiren kalak sibijak ni tanoh èn." 3:21 Kernana i, ulang mo lot barang isè pè memoji-moji jelma, kerna enggo iberrèken Dèbata karinana mahan milik ndènè. 3:22 Barang si Paulus pè i, barang si Apolos, barang si Kepas, barang dunia, barang kenggelluhen pè barang kematèen, simasa bagèndèen barang simasa seggen pè, karinana idi milik ndènè ngo. 3:23 Nai ukum kènè, milik Kristus ngo janah Kristus idi milik Dèbata.
4:1 Ètong kènè mo karina naposo Kristus, janah pengendeng lako memmagahken hendak Dèbata, simakdèng ibettoh dunia èn. 4:2 Perlebbè kaloon bai naposo nai ipengido imo kennah kettoken ia mi indukna. 4:3 Ukum bangku oda pella soal mula pè tah barang kadè aku dok ndènè, barang tah dok isè pè. Ai aku sendiri pè oda ngo kuhukum diringku. 4:4 Ai oda lot salahku barang kadè pè dok atèngku, tapi oda ngo gabè ketentuun i mendokken oda lot kessalahenku. Tuhan i ngo menentuken mersalah aku barang oda. 4:5 Kumarana idi, ulang mènter ndorsu idokken kènè salah barang isè pè, ukum makdèng dapet tikkina, pèma roh Tuhan idi. Ia ngo petararken nasa simboni ibas sigellap. Ia ma ngo pedapetken nasa niat bak sura-sura silot ibagasen atè jelma. Isidi mo luas nasa jelma menjalo bai Tuhan nai pemojiin mi sipatut menjalosa. 4:6 Alè dengan, kumara kènè, kuaitken ngo kata ndai taba si Apolos dekket bangku pè. Asa merkitè-kitè sikudokken idi terrèngèt diri nami, gabè peddah bai ndènè mendok, "Asa ulang nilampoi sitersurat i." Merkitè bagidi ulang mo lot bai ndènè memmoji sisada, keppè irèhè sisada nai. 4:7 Mula pè sellohen kono asa sidèban, isè ngo memmaing idi? Kadè silot bamu idi siso bai Dèbata nai ijalo kono? Kasa gabè gegah kono, mula karina silot bamu idi siniberrèken ngo i? 4:8 Tuhu ukum bagèndari, oda nèngè pella lot siperlu bamu, ai enggo kaya kènè. Enggo gabè raja kènè, oda pella merkitè-kitè kami. Sondel mo merandalna ukum tuhu-tuhu kènè enggo gabè raja, asa rebbakken memerèntah kita. 4:9 Karna ukum dok atèngku, enggo ipebangkit Dèbata kami gabè rasul, janah gabè tontonen i hadeppen jelma bak malaèkat pè. Enggo gabè kalak merlèa kami sinihukum matè i hadeppen sinterrem janah isurak-suraki dunia èn. 4:10 Kumarnaken Kristus, gabè simoto ngo kami, tapi ukum kènè mergegoh ngo! Ukum kami merlèa ngo! Tapi ukum kènè mersangap ngo! 4:11 Soh mi bagèndari rapar ngo kami janah muasen. Oles nami pellin silekket i daging ngo kessa; dak iletlet dèba ngo kami, oda lot hot bekkas nami. 4:12 Ledja ngo kami mahan bahaan asa lot pangaan nami. Mula isumpahi dèba kami, kubales kami ngo i dekket pasu-pasu; mula isiksa kami, dak mertahan gong ngo kami ibagasen sobar; 4:13 mula iperroha-roha dèba kami, kualoi kami ngo i dekket rana selloh. Kira dosken empak-empak dunia èn ngo kami, soh bagèndari iètong ngo kami dosken kotoren tanoh èn. 4:14 Oda ngo gabè asa termèla kènè, memmaingken kusuratken ènda taba kènè, tapi lako memmeddahi kènè ngo codi bagè dukak-dukakku sendiri. 4:15 Mula pè lot guru ndènè sipuluh ribu kalak, sibagè kalak Kristen kènè, oda piga idi bagè bapa. Aku ngo kessa gabè bapa bai ndènè kumarna aku ngo merembah sukuten kelluahen terrèngèt Kristus bai ndènè. 4:16 Kerna nai, kupengido bai ndènè: Aku mo codi kènè! 4:17 Kerna naidi ngo asa kupasulak si Timoteus mendahi kènè. Dosken anak lemmo-lemmongku ngo ia kuètong janah kepposen ibagasen Tuhan i. Ia mo pesèngèt-sèngètken kènè terrèngèt bakunè dalan pernggelluhku, enggo kessa gabè percaya aku taba Kristus, rembang mi cara nggelluh sikuajarken i gennep kuria barang i dikè pè. 4:18 Barang piga kalak bai ndènè nai gabè dirina ipebelgah, ai dok atèna oda roh nèngè aku mendahi kènè. 4:19 Tapi mula ipaduè Tuhan i, ndor nèngè mo aku roh mendahi kènè; janah tikan roh i pè aku sikali èn asa kuidah barang bakunè pemmaing sipebelgah-belgahken dirina idi, ulang pellin katana sambing. 4:20 Ai oda ngo pellin kata ukum Kerajaen Dèbata, tapi kegegohen ibas nggelluh jelma idi ngo. 4:21 Asa pilih kènè mo apaina lotiin katè ndènè roh aku mengajari kènè merkitè ajar ngkellek ulang pada mengajar merkitè-kitè lamlam dekket kelleng.
5:1 Soh ngo bangku berritana, lot bai ndènè nai mengulaken merlangkah julu meddem, lebbihen bagè perulaan siso menandai Tuhan, ai lot ngo bai ndènè nai merlangkah pilit dekket inangna menggancih. 5:2 Tukasi pè bagidi tong ngo dak ipedates kènè ukur ndènè. Otang merpenderrep mo nemmuken pikiren ndènè janah puaren ndènè kalak simengulaken bagidi! 5:3 Ai tukasi pè ndaoh dagingku bai ndènè nai tapi ukum ibagasen batin, i tengah-tengah ndènè ngo aku. Jadi, dosken i tengah-tengah ndènè ngo aku lako menghukum sibagidi. 5:4 Ibagasen gerar Tuhan Jesus Kristus kudokken taba kènè, kennah ihukum ngo kalak sibagidi. Mula mertumpu kènè janah i tengah-tengah ndènè aku ibagasen tendi, merdengan keggegohen Tuhanta Jesus, 5:5 kennah pesakaten ndènè kalak sibagidi bai Sibolis, asa iago dagingna, asa merkitè bagidi maluah tendina ipekiroh Tuhanta mengolihi. 5:6 Oda mendè kegegahen ndènè i! Tah bakunè enggo ibettoh kènè codiin èn, "Cituk pè ragi, kambang ngo ibakin nditak sienggo igaru." 5:7 Patakken kènè mo lebbè ragi sienggo ndekkah i, imo dosa, asa gabè nditak sirimbaru nigaru kènè mpanting ibas ragi dosa sienggo ndekkah idi nai. Ai enggo ipèlèken Kristus, tosè bagè biri-biri Paskah mengkepkep kita. 5:8 Kerna nai merpèsta mo kita ulang merkitè roti meragi, oda ma dekket ragi sienggo lama janah jahat, tapi dekket roti siso meragi mo, imo roti memellin dekket kebennaren nikellemmoken Dèbata. 5:9 Ibas suratku tikala idi enggo kudokken bai ndènè, asa ulang mersaor kènè dekket kalak luhlah. 5:10 Sikudokken idi oda ngo kalak luhlah, nahaka barang pennipu barang simenembah bègu siso menandai Dèbata dèng. Oda ngo kalak ènda maksudku; ukum ipedaoh kènè ngo i bai kalak idi nai, kennah karuar ngo kènè i dunia èn nai. 5:11 Tapi èn ngo tujunku ibas suratku idi: Oda ndorok mersaor kènè dekket kalak simendokken Kristen ia, keppè perlangkah julu meddem ngo ia, barang nahaka, barang menembah bègu, barang peroha-rohaken kalak, barang permabuk, barang pennangko pè. Salangken rebbak kundul kènè dekket jelma sibagidi pè oda ndorok! 5:12 Ukum menghukum kalak siso Kristen, oda lot kuasangku. Dèbata ngo menghukum kalak idi. 5:13 Tapi ukum anggota-anggota Kuria, otang kennah kènè sendiri ngo menghukum kalak idi? Ibas Bibèl tersurat ngo, "Liplip mo perjahat idi, i tengah-tengah ndènè nai."
6:1 Kasa lot iantara kènè nai laus mendahi hakim siso percaya bai Tuhan, mengaduken denganna samah Kristen, mula lot kessa perselisihenna? Kasa oda mengido hukum taba ummat Dèbata asa ipellias perkarana idi? 6:2 Oda ngo ibettoh kènè, ihukum Dèbata ngo seggen dunia èn? Jadi, mula naing ngo kènè menghukumi dunia èn, kasa oda terpeselloh kènè perselisihen sikètèk idi? 6:3 Oda ibettoh kènè, kita ngo seggen menghukumi malaèkat-malaèkat? Nai makinsa nola mo terrèngèt keperluun sigennep ari! 6:4 Keppè mula tubuh ngo bai ndènè perselisihen terrèngèt keperluun sigennep ari, kasa mènter iaduken kènè mendahi kalak siso lot masuk ètongen i Kuria? 6:5 Sadikè mèla mo bagidi! Bakunè pè tentu lot ngo i tengah-tengah ndènè kalak bijak lako pesellohken perselisihen samahsa dengan Kristen. 6:6 Keppèken gabè perkara nola kènè samah-samah Kristen i hadeppen penimbangi kalak siso Kristen. 6:7 Ulang lebbè perkara kènè laus mendahi kalak siso Kristen, salangken merselisih sambing pè kènè samah kènè, enggo mo sada kettaluun idi bai ndènè. Lotiin dèng ngo ipessel kènè pusuh ndènè kumara kurang adil barang pè irogiken kènè! 6:8 Keppèken kènè nola ngo memmakin siso hukum janah oda adil taba kalak sidèban. Kènè nola ma ngo memmaing rogi kalak. Janah taba dengan nola ngo ibaing kènè bagidi. 6:9 Oda ngo ibettoh kènè; mula barang isè oda menguèi nipergeddo Dèbata, oda ngo terolih ia i gemgemmen Dèbata? Tapi bettoh kènè mo: Ukum kalak luhlah, kalak simenembah bègu, kalak perlangkah julu meddem, kalak merdaberruken daholi, 6:10 kalak pennangko, pengkilang, kalak permabuk, kalak peroha-rohaken sidèban dekket pendobo; oda ndorok kalak i gabè ummat Dèbata. 6:11 Bagidi ngo dèba kènè merpengelako tikala idi. Tapi ukum bagèndari, enggo iuras kènè ibas dosa nai. Enggo mendè persaoren ndènè dekket Dèbata janah maluah ibas dosa ndènè nai, kemmulihken enggo percaya kènè mi Tuhan Jesus Kristus dekket kumarna kuasa kegegohen Tendi bai Dèbatanta nai. 6:12 Lot ngo mendokken karinana ndorok iulaken. Tapi ukum bangku oda karinana idi kasèa. Asa mula pè ndorok kuulaken barang kadè sambing, tapi oda uè aku iperhamba barang kadè pè idi. 6:13 Lot ngo dèba mendokken, ukum pangaan idi lako mi beltek ngo, janah lot pè beltek idi, mahan bekkas pangaan i ngo nina. Tapi duana idi, rebbakken ipettadi Dèbata ngo. Daging jelma idi, ulang mo ibakin mi ulaan luhlah, tapi pellin mi ulaan siperlu bai Tuhan i mo. Janah Tuhan ngo menghanaken siperlu mi daging. 6:14 Enggo ipegelluh Dèbata Tuhan Jesus ibas kemmatèen nai, bagi ma ngo bang kènè pè ipegelluh merkitè-kitè kuasaNa. 6:15 Otang ibettoh kènè ngo ukum badan ndènè idi, imo sendihi Kristus. Nai bakunè mo pemmaingku sendihi daging Kristus idi gabè sendihi sada kalak perkendangen? Ngganè ngo bagidi! 6:16 Barang oda dèng ngo ibettoh kènè, barang isè kalak mercampur dekket jelma sibabi jalang, sienggo gabè sada badan ngo kalak idi duana? Kerna tersurat ngo ibas Bibèl, "Gabè sada badan ngo kalak i sidua." 6:17 Tapi kalak sipedemmuken dirina dekket Tuhan i, gabè sada Tendi mo Tuhan i dekket tendina. 6:18 Peddaoh kènè mo diri ndènè ibas ulaan luhlah idi nai. Kerna karina dosa sidèbanna sinibaing jelma, i ruar badanna ngo idi. Tapi barang isè kalak mengulaken luhlah, i ngo memmakin dosa mi dirina sendiri. 6:19 Bettoh kènè mo, ukum badan ndènè idi imo bekkas Tendi Dèbata sienggo nijalo ndènè bai Dèbata nai. Asa oda ngo kènè sidasa badan ndènè i, Dèbata ngo sidasa i. 6:20 Ai maharga kalohoon ngo kènè itebbus Dèbata, kerna nai pessangap kènè mo Dèbata merkitè-kitè badan ndènè i!
7:1 Bagèndari kualoi mo terrèngèt nisuratken ndènè taba aku. Selloh ngo sada anak laki ulang jejap barang merunjuk. 7:2 Tapi lako pessidingken luhlah idi lotiin mo gennep anak laki merperrukat janah gennep daberru idi pè lot sinibalèna. 7:3 Iulaken sinibalè mo sipatut taba sinibagesna, janah bagi ma mo iulaken sinibages sipatutna taba sinibalèna; gennep mo kalak i mengulaken patutna bai samah kalak i. 7:4 Oda ngo guru bai daberru idi dirina, tapi guru bai sinibalèna ngo. Suang bagidi ma ngo anak laki idi, oda merguru bana dirina, tapi guru bai sinibagesna ngo. 7:5 Ulang mo kènè pedaoh-daoh, ukum mak arap ijin ndènè duana, ipè ulang ndekkahsu, asa lot tikki ndènè lako mersodip. Nai rebbak nola mo kènè, asa ulang iunjuni sibolis kènè, kumarna oda tertahan kènè cubellek daging ndènè. 7:6 Kudokken pè bagidi oda ngo gabè perèntah, tapi sada sipessèngèt ngo. 7:7 Ukum dok atèngku naing mo nemmuken karina kalak bagè aku èn, tapi tupèh, gennep ngo enggo menjalo rembang mi siterjalosa bai Dèbata nai. Sada kalak menjalo bagèen, sisada nai menjalo bagè adoi. 7:8 Bagèen ngo sipessèngètku taba kalak simadèng jejap dekket taba sienggo mbalu: Lotiin mo kènè mertahan bagè aku èn. 7:9 Tapi mula oda tertahansa napsuna, jejap mo kènè. Ai sellohen ngo jejap ulang pada luhlah. 7:10 Nai kalak sienggo jejap idi, Tuhan i ngo mendokken, oda pellin aku. Oda ndorok itadingken daberru idi, sinibalèna. 7:11 Tapi mula sanga enggo sirang, ulang nèngè pella ia sijahè barang mulak nola mendahi sinibalèna kin. Bagidi ma ngo anak laki, oda ndorok mennirangken sinibagesna. 7:12 Ukum mendahi sidèbanna i sipesèngètku sendiri, oda bai Tuhan i nai, bagèen ngo: Mula sada anak laki Kristen kabin mi sada daberru siso percaya bai Kristus, nai daberru idi uè ngo rebbak nggelluh dekketsa, oda ndorok anak laki idi menirangken sinibagesna idi. 7:13 Bagi ma ngo: sada daberru Kristen sijahè mi sada anak laki siso percaya bai Kristus, keppè uè ngo anak laki i rebbak nggelluh dekketsa, jadi oda ndorok daberru idi menirangken sinibalèna. 7:14 Ai gabè selloh ngo ijalo Dèbata anak laki siso percaya i kemulihken kabin ia dekket daberru sienggo ummat Dèbata. Ukum oda bagidi, tentu oda ipasu-pasu dukak-dukak kalak idi, keppèken dukak-dukak Dèbata ngo dukakna i. 7:15 Tapi mula siso percaya i menadingken sinibagesna barang pè sinibalèna sienggo Kristen, naing sirang katèna, belli mo bagi! Kerna iberrè Dèbata ngo kita meneddo sinibagesna bang pè meneddo sinibalèna, asa ibagasen damè. 7:16 Asa kono pertua ibages sienggo percaya mi Tuhan, bakunè mo pemettohmu pasti, oda terpaluah ko sinibalèmu? Bagidi ngo bang kono pè pertua ibalè sienggo Kristen, bakunè mo pemettohmu pasti oda terpaluah kono sinibagesmu? 7:17 Enteng, karinana mo kènè merperangè bagè sienggo ihatorken Tuhan i bai ndènè gennep sinderrang idilo Dèbata kènè lako percaya baNa. Idi mo hatoren kuajarken mi gennep Kuria. 7:18 Umpamana: sada kalak enggo kin mertakkil sinderrang percaya ia mi Dèbata, ulang mo iobah nola tanda pertakkilen idi. Bagi ma sada kalak mula makdèng mertakkil nderrang roh ia percaya mi Dèbata, ulang mo pella nèngè ia mertakkil. 7:19 Kerna mertakkil pè barang oda mertakkil, oda lot gunana i. Siperluna kaloon imo menguèi pati-patiin Dèbata. 7:20 Bakunè kin ia sinderrang percaya mi Dèbata, tettap mo ia bagidi. 7:21 Mula hamba kin kono sinderrang idilo gabè percaya mi Dèbata, ulang mo pella kelsohken idi. Tapi mula lot kesempaten bamu lako maluah i hamba idi nai, pakkè mo kesempaten idi. 7:22 Ai sada kalak hamba, mula enggo percaya mi Tuhan, kalak ni Dèbata sienggo bèbas ngo ia. Janah sada kalak sienggo bèbas, siterdilo gabè percaya mi Dèbata, naposo Kristus ngo i. 7:23 Maharga kalohoon ngo kènè itebbus Dèbata, ulang mo uè kènè iperhamba jelma. 7:24 Jadi alè dengan, bakunè kin pè kènè sinderrangna baru-baru percaya mi Dèbata, naing tettap kènè bagidi rebbak Dèbata. 7:25 Nai ukum terrèngèt simakdèng jejap, oda ngo nemmuken lot dèng perèntah bai Tuhan i nai. Tapi tukasi pè bagidi, sibagè sada kalak nimasèh atèen Tuhan i aku, bagèen mo peddahku. 7:26 Mernèngèt kesusahen sinaing masa bagèndari, katèngku sellohen mo pernggelluh kalak i idi bagè sibagèndari. 7:27 Mula sanga enggo merunjuk, ulang bakin dalan mennirangken sinibagesmu idi. Mula makdèng ngo kono merunjuk ulang nèngè pella muat berru. 7:28 Tapi mula merunjuk pè kono, oda ngo dosa idi. Pellin èn, kalak sienggo sijahè idi kennah mengerasaken mermatcam bagè kessusahen; ipergeddo ukurku ngo, asa terpesisi kènè i kesusahen idi nai. 7:29 Èn ngo sikudokken alè dengan! Enggo sengseng tikkina bagèndari. Bagèn mo mulai bagèndari nai; gennep sienggo jejap, ibaingken mo ia tosè bagè oda jejap; 7:30 kalak sitangis; ibaingken mo dirina bagè oda bonek idahen, kalak sitertaba, bagè sioda lolo ia idahen. 7:31 Janah kalak simengkasèaken harta-harta dunia ènda, naing mo nidokdok oda perlu bana idi tengngennen. Kerna lako salpun ngo dunia sisiidah bagèndari! 7:32 Tapi ipergeddo ukurna ulang kekelsohen kènè. Isarihken siso merkejejapen idi mo siperlu bai Tuhan i, asa lemmo atè Tuhan i midahsa. 7:33 Tapi ukum kalak sienggo merrunjuk, dak itulusi ngo siperlu i tanoh èn, katèna asa lolo atè sinibagesna idi; 7:34 dungna gabè merdua ukur nola mo ia. Sada kalak daberru siso sijahè, barang pè sada simerbaju, siperlu bai Tuhan i mo ipikiri, asa bolet tendina bak dagingna gabè milik Tuhan i. Tapi ukum daberru sienggo sijahè, dak ipikiri ngo siperlu i tanoh èn, kerna naing ngo ia pesennangken ukur sinibalèna. 7:35 Kudokken pè bagidi, asa kasèa ngo kènè; oda ngo lako menggerra asa ulang bèbas, tapi asa gabè metemman ngo pengelako ndènè janah rentem bagè patutna, janah asa hot pikiren ndènè mi Tuhan i. 7:36 Mula sada kalak mengakap oda idalanken sipatut baingenna taba sinitandana, mula oda ndorok tertahansa napsuna, janah iakap perlu kabin dekket daberru i, ndorok mo iulaken kadè dok atèna selloh. Oda ngo merdosa ia mula kabin kalak i. 7:37 Tapi mula sada kalak enggo menettapken ibas ukurna mendokken oda kabin ia dekket rantona i, janah enggo tutus ukurna, selloh ngo nibakinna i mula tahan ia menggongken bagidi. 7:38 Asa, selloh ngo mula kabin jelma idi, tapi sellohen dèng ngo mula oda kabin. 7:39 Sada kalak daberru sienggo sijahè kennah jejap mi sinibalèna ngo ia sidekkah nggelluh sinibalèna i, tapi enggo kessa matè sinibalèna idi, ndorok ngo sijahè nola daberru i dekket lemmo atèna; asal mo ibagasen perjejapen Kristen. 7:40 Nemmuken sennangen ngo ia oda nèngè sijahè; ningku ngo i, tapi dok atèngku lot ngo ibagasen aku Tendi Dèbata memeddahi aku.
8:1 Bagèndari terrèngèt pangaan sienggo ipèlèken mi sembahen, tuhu ngo bagè pendokken dèba, "Karinana kita enggo pandè." Kepandèen memmaing gabè tunggang, tapi ukum kelleng, imo lako pesellohken. 8:2 Barang isè merdokatè enggo mbuè nibettohna, situhunna oda lot dèng mabges pemettohna. 8:3 Tapi kalak simengkekelengi Dèbata mertuhu-tuhu, ia ngo itandai Dèbata. 8:4 Asa ukum terrèngèt sipangaan sienggo ipèlèken mi sembahen, bettoh kènè mo ukum sembahen oda ngo lot. Sibettoh ma ngo pellin sada ngo kessa Dèbata; oda lot laènkenna i. 8:5 Tuhu mbuè ngo matcamna idokken dèba: dèbata bak tuhan silot i langit dekket i babo tanoh èn. 8:6 Tapi ukum banta, pellin sada ngo Dèbata. Ia ngo Bapa simenghanaken sagumanna silot, gabè lako milikna ngo kita nggelluh; sada ma ngo kessa Tuhan imo Tuhan Jesus Kristus. Merkitè Ia ngo ihanaken sagumanna silot, janah kumarna Ia ngo asa nggelluh kita. 8:7 Tapi oda karinana jelma memettoh idi. Kerna jelma siarnia mbuè dèng ngo menembah sembahen. Jadi kerna naidi soh mi bagèndari iakap kalak salah ia mula ipangan pangaan sienggo ipèlèken mi sembahen; ai tuhu ngo katèna lot sembahen i, kerna madèng ntegguh kepercayanna. 8:8 Nemmuken oda ngo pangaan i memmaingken muat ncelketna kita bai Dèbata. Ai mula pè sipangan pangaan idi, oda mènter soh mikè kita, janah mula oda pè sipangan pangaan i oda lot kadè roginta isidi. 8:9 Tapi mermanat mo! Ulang gabè merdosa kalak kemmulihken bèbas kita mengulaken barang kadè, ai makdèng ntegguh kepercayanna. 8:10 Umpamana, iidah dèba mo kènè sienggo ntegguh kepercayanna kundul mangan i bages pemèlèen sembahen, otang gabè pang nola mo kalak sikurang ntegguh kepercayanna i kipangan pangaan sienggo icibalken bai sembahen? 8:11 Gabè laling mo kalak sikurang ntegguh kepercayanna idi. Keppèken ia pè engket ngo ikepkep ibas permatè Kristus i. 8:12 Jadi mula ibakin kono kesalahen sibagidi taba dengan Kristen sidèbanna memmaingken guga kepercayanna sikurang ntegguh idi, merdosa ngo kono taba Kristus. 8:13 Kernanai, mula merdosa denganku kumarnaken pangaan, lotiin oda kupangan nèngè pangaan idi soh seggen, ulang kumarnaken i merdosa denganku kemmulihken aku.
9:1 Otang rasul ngo aku? Otang kalak bèbas ngo aku? Otang enggo nung kuidah Jesus Tuhanta idi? Otang kènè ngo hasil sikuula lako bai Tuhan? 9:2 Mula pè kalak sidèban oda idokken rasul aku nina, tapi ukum kènè, rasul ngo aku bai ndènè. Ai kènè ngo gabè bukti kerna enggo gabè kalak Kristen kènè kumarnaken kerasulenku. 9:3 Mula lot kalak mennoal tersèngèt aku bagèen ngo pengaloingku; 9:4 Otang lot ngo kuasangku mangan bak mènum arap ulanku? 9:5 Otang lot ngo kuasangku merembah sada partua ibages Kristen mi perdalanen, bagè nibakin anggi ni Tuhan Jesus bak rasul-rasul sidèbanna i bang si Petrus pè? 9:6 Barang pellin si Barnabas dekket aku sambing mo kessa kennah mencariken pangaan nami sendiri? 9:7 Oda lot soridadu siso mergaji! Oda lot perumauma simennuan anggur i pekkenna siso kipangan buah anggur arap pekkenna i nai. Oda lot permakan siso mengènum susu pinakanna! 9:8 Kudokken bagidi oda ngo kumarna kecemmalen simasa bai jelma, tapi ibas Bibèl pè tersurat ngo 9:9 imo Bukku si Musa, "Ulang ikontam muncung kerbo tikanna mengerrik pagè kerbo idi." Otang oda ngo kerbo i isarihken Dèbata? 9:10 Otang banta ngo kata i? I ngo tuhu, tersurat pè idi lako banta ngo. Kerna simengula i juma dekket simengerrik patut menjalo dèba arap siniulana i nai. 9:11 Enggo mo kusuan kami bennih pertendiin mi bagasen atè-atè ndènè. Jadi mula kuperrani kami bai ndènè nai siperlu mi daging, mberratsu ngo pemmaing nami idi? 9:12 Mula kalak sidèban dapetten bai ndènè nai, makinsa nola mo kami? Tapi makdèng nung kuasangken i. Lotiin ngo kugongken kami mencariken keperluun daging èn, asa ulang gabè penghalang pesarken Sukuten Kelluahen terrèngèt Kristus i. 9:13 Otang ibettoh kènè ngo mula mengula kalak i Bages Dèbata patut menjalo pangaan ia arap Bages Dèbata nai? Bagidi ma ngo simengulaken ulaan memèlè Dèbata i langgaten, patut terrolih ia ibas nipèlèken idi nai? 9:14 Jadi bagi ngo iaturken Tuhan i, barang isè memmagahken Sukuten Kelluahen i, kennah merrolih kenggelluhen perdagingen ibas ulanna idi nai. 9:15 Tapi sada poda nung dèng kupakkè ibas kuasa idi nai. Janah kubakin pè suratku èn, oda ngo asa roh bangku bagidi bagèndari. Lotiin mo aku matè ulang pada iorui kesurungenki. 9:16 Kerna mula kuulaken ulaan Sukuten Kelluahen bai Dèbata nai, oda gabè gegah aku, ai perèntah ngo i bangku lako mengulaken i. Merjaya ngo aku mula mak kubagahken Sukuten Kelluahen idi! 9:17 Mula kuulaken ulaan i kerna ibas kedirinku nai, ndorok ngo kuharapken upah i sidi nai. Tapi kubagahken pè Sukuten Kelluahen idi kumarna kewajiben ngo. Dèbata ngo mengampèken ulaan kewajiben i asa kuulaken. 9:18 Asa, kadè ngo upahku? Èn ngo: Ndorok ngo aku memmagahken Sukuten Kelluahen idi, oda pella lot rogi barang isè merrèken belanjangku, kerna oda uè aku menuntut hakku, bagè sada kalak simemagahken Sukuten Kelluahen idi. 9:19 Tukasi pè oda hamba aku, tapi kubakin ngo diringku gabè hamba bai karinana kalak, asa ndorok muat nterremna kalak kuarahken mendahi Kristus. 9:20 Ai dosken kalak Jahudi ngo aku tupung mendahi kalak Jahudi, asa katerra pè ndorok kuarahken kalak Jahudi taba Kristus. Dosken kalak simenguèi pati-patiin Dèbata arap si Musa ngo aku rebbakken kalak idi, asa katerra pè kuarahken kalak i mendahi Kristus. 9:21 Taba kalak siso Jahudi, gabè dosken siso Jahudi ngo aku, siso ibagasen pati-patiin idi, asa kuarahken kalak idi mendahi Kristus, tapi oda ngo mak kuuèi pati-patiin Dèbata; ai nigemgemmen pati-patiin Kristus i ngo aku. 9:22 Taba kalak siso ntegguh merkepercayaen, gabè bagidi ma ngo aku, asa ndorok kuarahken kalak i mendahi Kristus. Gabè rembang ngo aku mi karinana jelma, asa merkitè-kitè bagidi ndorok kupaluah kalak idi giam dèba. 9:23 Karinana idi kuulaken kumarna Sukuten Kelluahen bai Dèbata idi nai, asa giamken gabè persulang janah ipasu-pasu aku. 9:24 Tentu ibettoh kènè ngo; mula lot merpatcu, karinana ngo lojang tapi sada kalak sambing ngo kessa menjalo hadiah. Kernanai empet kènè mo lojang, asa terolih hadiah kènè. 9:25 Barang isè dekket mertanding, kennah ierem mo dirina ibas karinana, asa dapetten rudang singgèut salpun i ia. Tapi ukum kita lako mengerem dirinta, asa banta ngo rudang siso nggèut salpun idi. 9:26 Kerna nai lot ngo tujuun sijalangenta i, oda bagè menènju angin perjuapenku. 9:27 Kujerra ngo diringku janah kupetunduk, asa ulang pellin kalak sidèban kujamitai, keppèken diringku gabè itulak.
10:1 Kènè alè dengan, naing mo tangkas bettohen ndènè katèngku simasa bai empungta arnia sinderrang mengèkutken si Musa. Karinana ngo nemmuken kalak idi ilènggemmi hembun janah njuah-njuah lako merlantes Laut Mbara i. 10:2 Lako mengèkutken si Musa, iperridi ngo kalak i karinana ibagasen hembun dekket mi tengah laut. 10:3 Janah dos ngo pangaan pertendiin ipangan kalak idi, 10:4 janah dos ma ngo ènumen pertendiin iènum kalak i karinana, ai rebbak mènum ngo kalak idi i delleng batu pertendiin simendengani kalak i; Kristus ngo delleng batu idi. 10:5 Tukasi pè bagi, buèen ngo kalak i oda ikellemmoken Dèbata, kerna nai ngo asa gabè radas janah mersara-sara bangkèna i padang gurun. 10:6 Karinana idi mahan codiin penjerraan mo banta, asa ulang cubellekken kita mengulaken jahat bagè ulah-ulah ni kalak idi. 10:7 Janah ma, asa ulang kita menembah sembahen, bagè nibaingken dèba ibas kalak idi nai. Asa tersurat ma ngo ibas Bibèl, "Kundul ngo kalak i mangan mènum, nai kèkè nola mo tumataki menembah gana-gana." 10:8 Ulang mo kita luhlah bagè dèba kalak i mengulaken luhlah, gabè radas kalak i duapuluh tellu ribu kalak sidarinkenna i. 10:9 Ulang siunjuni Tuhan i, bagè dèba kalak i mengunjuni tikala i, gabè mermatèen dèba kalak i itebbi nipè darih. 10:10 Ulang mo kita ngutnguten, bagè dèba kalak i singutnguten di, gabè ibunuh Malaèkat Kemmatèen idi kalak i. 10:11 Codiin ngo karina simasa bai kalak idi i, janah gabè lumba-lumba banta ngo i asa isuratken; ai enggo makin njolmit kita mi ajal dunia èn. 10:12 Èn pè, barang isè dokatèna enggo ntegguh ia cènder, mermanat mo ia asa ulang ndabuh. 10:13 Ai nasa pengojiin sinirasaken ndènè, pellin pengojiin biasa ngo i bai jelma. Tapi kettoken ngo Dèbata, ai oda ipaduè kènè ioji lebbih daripada gegoh ndènè. Sinderrang sempa taba kènè pengojiin i, mènter iurupi ngo kènè asa tergongken kènè. 10:14 Kernana i alè dengan sinikekellengen! Kecegoken kènè mo mersembah taba gana-gana bak bègu. 10:15 Mengerrana aku taba kènè bagè cara taba kalak jelma bijak. Timbangi kènè mo katangku i. 10:16 Sinderrang kita mènum anggur ibas caban pasu-pasu idi nai, merkitè mendokken mejalo metangkup taba Dèbata, otang menuduhken kesadanta dekket Kristus mi bagasen kemmatèenna i ngo idi? Janah sinderrang sipella-pella roti i janah rebbak kipangan, otang mennuduhken kesadanta mi badan Kristus idi ngo i? 10:17 Kumarna sada ngo roti, janah karina ngo kita kipangan i roti sisada i nai, jadi kita sinterrem èn gabè sada badan ngo karinana. 10:18 Perdatèken kènè mo kalak Jahudi. Kalak i sikipangan pangaan sinipèlèken i babo langgaten pemèlèen. Gabè sada ngo kalak i dekket langgaten bekkas pencibalen pèlèen i. 10:19 Kadè tujuan ranangku ènda? Oda lot kadè lapaten sembahen barang pè pangaan sinipèlèken bai sembahen i. 10:20 Oda lot tujuun nipèlèkenna i bai Dèbata, laènken mi sembahen ngo. Jadi oda lemmo atèngku mersaor kènè dekket tendi jahat. 10:21 Oda ndorok rebbak iènum kènè arap perrènumen Tuhan i nai bak i perrènumen tendi jahat i nai! Ulang mangan kènè i langgaten Tuhan, mangan ma i langgaten tendi jahat! 10:22 Barang gabè njais mo kita taba Tuhan? Barang gegohen ngo kita dok atènta asa Tuhan? 10:23 Nina dèba jelma, "Ndorok ngo kita karina memahan barang kadè sambing dok atèna." Tuhu ngo i, tapi oda karina sinibahanken idi merguna. "Ndorok ngo sibakin barang kadè sambing dok atènta," -- tapi oda karinana idi pesellohken nggelluhta. 10:24 Ulang mo lot barang isè mengkerencetken siperlu bana sambing, tapi gennep mo mengkerencetken siperlu bai sidèban. 10:25 Ndorok ngo ipangan kènè barang gulè kadè sambing idèa dèba ipajek gulè. Ulang pella risiki kènè mula pè lot sèk ibagasen ukur ndènè. 10:26 Kerna tersurat ngo ibas Bibèl, "Tuhan i ngo sidasa dunia èn bak sagumanna pengisina pè." 10:27 Mula idilo siso Kristen kènè mangan janah iuèi kènè dilo-dilo idi, pangan kènè mo barang kadè pè ihidangken bai ndènè, ulang pella risiki kènè barang i dikè nai pangaan idi, tah bakunè sèk atè ndènè. 10:28 Tapi mula lot mendokken bai ndènè, "Sienggo ipèlèken ngo pangaan ènda mi sembahen," ulang pangan kènè idi, kerna mennarihken kepentingen kalak idi dekket bagi ma sèk atè ndènè. 10:29 Tapi oda ngo kerna sèk ukurmu sikudokken, tapi sèk ukur ni kalak idi ngo. Tah bakunè lot mengkuso, "Kasa nola gabè ibatasi gerrek atè ndèba kebèbasenku? 10:30 Ai mula kupangan pangaan janah lebbèen kudokken mejalo metangkup taba Dèbata, kasa mo pella irèhèi dèba aku kipangan idi, ai enggo mo kudokken mejalo metangkup taba Dèbata?" 10:31 Èn pè, barang kadè pè ulaan ndènè -- mangan barang mènum pè kènè -- bakin kènè mo i karina pesangapken Dèbata. 10:32 Ulang mo bakin kènè pertuktuken memmaingken merdosa kalak, tah Jahudi pè i barang siso Jahudi, barang i kuria ni Dèbata. 10:33 Bagè aku mo kènè. Kuuasahaken ngo asa lolo kalak karina merkitè-kitè pemmahanku, janah oda kubaing merpengait. Asa merkitè bagidi, ndorok maluah kalak idi karina.
11:1 Aku mo codi kènè, bagè aku mencodi Kristus i! 11:2 Kupoji ngo kènè, kumarna dak tong ièngèt kènè aku janah dak ijèmak kènè ngo peddah sikuberrèken idi bai ndènè. 11:3 Tapi naing ngo bettohen ndènè dok atèngku imo: Kristus ngo ekuten karina anak laki, janah sinibalèna ngo ekuten sinibages; nai Dèbata ngo ukum ekuten Kristus. 11:4 Barang isè daholi mertangkuluk tikan mersodip, barang merjamita, mengelèai Kristus ngo ia. 11:5 Tapi mula daberru oda mersaong tikan mersodip barang merjamita, mengelèai sinibalèna ngo ia, ai sinibalèna i ngo takalna. Tosè ngo i bagè sienggo icukur takal daberru i. 11:6 Ai mula oda uè mersaong daberru, lotiin mo igonting bukna i. Tapi mula igonting barang icukkur buk daberru i, gabè kinilèa ngo i bana, kerna nai mersaong mo ia. 11:7 Ukum daholi oda pella perlu mertangkuluk, ai codi mi rupa dekket kehejiin Dèbata ngo ia, tapi ukum daberru, imo mennuduhken kesangapen daholi, 11:8 ai oda ngo ihanaken daholi i tarap daberru nai, tapi daberru i ngo ihanaken arap anak laki nai. 11:9 Janah oda ngo itempa anak laki i kumarna keperluun daberru, tapi daberru itempa barang ihanaken mahan keperluun mi anak laki. 11:10 Kerna nai, lako pesennangken ukur malaèkat patut mo mersaong daberru idi, ai pertandaan ngo i memmagahken tunduk ia bai sinibalèna. 11:11 Tukasi pè bagidi, ukum kita sibagè kalak Kristen, oda lot anak laki kum oda lot daberru, janah oda ngo lot daberru idi mula oda lot anak laki. 11:12 Ai tukasi pè daberru i mulana i itempa arap anak laki, tapi enggo kessa i, tubuh arap daberru nai nola ngo anak laki; janah karinana idi bai Dèbata nai ngo rohna. 11:13 Timbangi kènè mo lebbè; selloh ngo barang oda sada kalak daberru mersodip mi Dèbata oda pella mersaong? 11:14 Ibas bakkonta kin pè enggo mo ipeddahken Dèbata, mula nggeddang buk daholi, kurang selloh ngo janah oda patut. 11:15 Tapi ukum daberru, mengkerohken pemmojiin ngo bana mula nggeddang bukna. 11:16 Tapi tah lot kalak menduhuli kami terrèngèt idi, pellin èn ngo kudokken bana: Kami sendiri dekket karina Kuria i bagidi ngo kecemmalen nami, laènken i oda lot nè. 11:17 Ukum sinaing kudokken bagèndari nola, oda nèngè kupoji kènè, kerna lot oda kukellemmoken, imo: Oda mengkerohken merandal perpulungen ndènè, tapi mi simerroha ngo. 11:18 Ai perlebbè kudengkoh berritana, merpihak-pihak kènè tikan merpulung i Kuria. Tuhu ngo sendah i. 11:19 Nemmuken mak terjua kennah tubuh ngo bai ndènè perselisihen, asa taridah isè ngo tuhu-tuhu Kristen. 11:20 Tapi tikan merpulung kènè oda ngo tandaan bagè kipangan hidangen Perpadanen Tuhan. 11:21 Kerna tikan merpulung i kènè, mersibuat lahna ngo, gabè lot dèba oda kennaan barang kadè, keppèken dèba sampè mabuk. 11:22 Kasa nola bagidi? Otang lot ngo bages ndènè bekkas mangan dekket mènum? Barang tah pis ngo mata ndènè midah Kuria Dèbata, dekket asa pemmèlaken kalak sincor; bakunè mo ndia ningku taba kènè? Kupoji mo kènè? Oda! Barang bakunè pè oda kupoji kènè! 11:23 Ai bai Tuhan nai ngo kujalo sikuajarken bai ndènè imo: I berngin tikan terselbuh Jesus Tuhanta i, ibuat mo roti, 11:24 enggo kessa idokken mejalo metangkup taba Dèbata, ipenggelli mo roti i dekket tanganNa, nai nina mo, "DagingKu ngo èn siniberrèken mengkepkep kènè. Bakin kènè mo bagi lako mernèngèt Aku." 11:25 Bagidi ma ngo tikan mènum anggur i kessa pul mangan, ibuat mo perrènumen i ninganna idokken, "Padan sirembaru ngo èn, isahken merkitè darohKu. Baing kènè mo bagidi lako mernèngèt Aku gennep iènum kènè anggur i." 11:26 Ai gennep ipangan kènè roti janah iènum kènè anggur sibagèen, mennukutken permatè Tuhan i ngo kènè, soh mi lebbè balik nola Ia. 11:27 Kerna nai, barang isè kipangan roti Tuhan idi barang mengènum anggur Tuhan i dekket cara siso patut, merdosa ngo ia mi daging dekket daroh Tuhan i. 11:28 Jadi kennah lebbèen mo itimbangi dirina, baru pè asa ipangan roti i dekket iènum anggur i. 11:29 Ai barang isè kipangan roti i dekket mengènum anggur i, keppèken oda ihumulken bahasa daging bak daroh Tuhan i ngo idi, gabè mengaitken hukum Dèbata mi dirina ngo ia, mula ipangan janah iènum. 11:30 Kumarna naidi ngo asa nterrem kènè sakiten dekket ndotè; lot dèba matè. 11:31 Tapi mula lebbèen siperrèso dirinta, oda ngo ihukum Dèbata kita. 11:32 Mula salah keppè kita nina Dèbata, Iligas mo kita, asa ulang pella ihukum nè kita rebbak dekket dunia ènda. 11:33 Kumarna i alè dengan, mula pulung kènè lako kipangan hidangen Tuhan, kennah mersipèmaan mo kènè. 11:34 Mula tah lot mellèhè, lebbè mangan mo ia ibagesna asa ulang gabè mengalengi hukum ni Dèbata kènè i perpulungen idi. Ukum terrèngèt sidèbanna, lebbè roh pè aku asa kubagahken bai ndènè.
12:1 Bagèndari alè dengan terrèngèt sibasa-basa niberrèken Tendi Dèbata. Dok atèngku naing mo ntangkas bettohen ndènè terrèngèt idi. 12:2 Èngèt kènè mo lebbè sinderrang madèng itandai kènè Tuhan, bagè siterteggu janah terrabin ngo kènè lako mengèkutken gana-gana sipekkak idi. 12:3 Jadi kubagahken mo bai ndènè ukum kalak sienggo idengani Tendi Dèbata oda nggèut ia mendokken, "Ituras mo Jesus i!" Nai ukum kalak siso idengani Tendi Dèbata, oda ma ngo uè mendokken, "Jesus ngo Tuhan!" 12:4 Mermatcam bagè ngo sibasa-basa bai Tendi Dèbata nai, tapi karinana ngo iberrèken Tendi sisada idi. 12:5 Mermatcam bagè ngo ulaan mengkebasi Tuhan idi i Kuria, tapi sada ngo Tuhan. 12:6 Mermatcam bagè ngo mengulaken ulaan Tuhan i, tapi sada ngo Dèbata simemerèken gegoh lako mengulaken idi. 12:7 Tapi lako menumpaki kita ngo mengula Tendi Dèbata mi gennep-gennep kita. 12:8 Bai sisada iberrèken ngo merkitè Tendi i mpantas mengerana. Taba sisada nai, iberrèken Tendi sisada i ngo perbinettohen lako peterrangken terrèngèt Dèbata. 12:9 Bai sisada nola, iberrè Tendi sisada i ngo kepercayaen, nai taba sidèbanna ma iberrèken Tendi i ngo kuasa lako pemmalumken. 12:10 Taba sisada, iberrèken kuasa lako memmakin tanda kellengangen janah taba sisada nola ma iberrèken alamat lako magahken hendak Dèbata. Taba sidèban nola iberrèken ngo penandaiin tah siapai bai Tendi Dèbata nai, janah siapai oda bai Tendi Dèbata nai. Lot ma ngo iberrèken mengkataken merbagè-bagè kata sidèban, janah lot ma iberrèken perbinettohen lako petterangken kata sidèban i. 12:11 Tapi karinana idi iberrèken merkitè-kitè Tendi sisada i, ai pellaèn-l`aen ngo pemmèrrèkenna mi gennep jelma merguru mi lemmo atè Tendi idi. 12:12 Terpecodi ngo Kristus idi bagè cara badan jelma. Sada ngo badan i, tapi mbuè ngo sendihina. Tapi barang bakunè pè buèna sendihi idi, iterdun ngo ia gabè sada badan. 12:13 Bagi ma ngo kita karina, barang kalak Jahudi pè i, barang siso kalak Jahudi, tah hamba pè i, barang siso hamba; karinana ngo kita iperridi Tendi sisada i, asa gabè sada badan kita mi Kristus i. Janah iiani Tendi sisada i ngo kita karinana. 12:14 Ai badan i pè oda ngo ia pellin sada sendihi sambing, tapi mbuè ngo sendihina. 12:15 Umpamana tah idokken nèhè, "Kerna oda tangan aku, jadi oda ikira masuk badan aku," oda ngo tuhu mak terkira ia masuk badan. 12:16 Janah mula idokken coping, "Kerna oda mata aku, jadi oda ikira aku masuk badan." Oda ngo tuhu mak terkira coping masuk badan. 12:17 Mula pellin mata kin karinana badan i, bakunè mo badan idi ndorok mendengkoh? Barang mula coping karinana badan i, bakunè mo ndorok merpenganggoh? 12:18 Tapi siidah ngo iatur Dèbata karinana perbakkasen sendihi badan i mengèkutken lemmo atè Dèbata. 12:19 Ukum sada sendihi kin ngo kessa daging i, apai mo siterdokken simergerar badan? 12:20 Asa mula pè mbuè sendihi, sada ngo badan. 12:21 Kerna nai oda terdokken mata taba tangan, "Oda man kadèngku kono!" barang takal taba nèhè, "Oda man kadèngku kono!" 12:22 Tapi soh mo tupèh perluna sendihi daging i tukasi pè bagè kurang hargana dokatè; 12:23 Balikna nola ngo tupèh, ai sendihi simerlèa dokatè, keppèken terlebbih ngo penghargainta bana. Sendihi singgodona dokatè, idi nola ngo sisarihken lebbèen. 12:24 Sendihi simerandalna idahen, gabè oda nèngè perlu nisarihken. Enggo mo ipettemmu Dèbata badanta i, janah mersangapen ngo ibakin sendihi simerlèa i. 12:25 Asa merkitè bagidi, oda merselisih nèngè badan i samahsa, ai enggo mersièngèt ulanna gennep sendihi idi. 12:26 Janah mula ncio iakap sisada, rebbak mengakapken ncio ngo karinana sendihi idi. Mula sada sendihi ipoji, rebbak mersampang atè ngo karinana sendihi i. 12:27 Karinana kènè rebbak gabè badan Kristus ngo, tapi samah-samah sendihi ngo kènè ibas badan i. 12:28 Bagidi ma ngo ibas Kuria pè. Enggo itentuken Dèbata ulaan mi gennep jelma; perlebbè rasul-rasul peduaken nabi-nabi; petelluken pengajari barang guru, nai menjalo kuasa memmaing kellengangen, menjalo kuasa pemmalumken, barang tah mengurupi sidèban, barang lako pemimpin, barang tah mengerranaken ibas kata sidèban. 12:29 Oda ngo karinana kalak idi rasul, barang nabi, barang guru. Oda ngo karinana menjalo kuasa memmaing kellengangen, 12:30 barang lako pejuahken sicioon, barang lako mengerrana ibas kata sidèban, barang peterrangken kata sidèban idi. 12:31 Kerna nai tulusi kènè mo sibasa-basa simehamatna! Nai kubagahken nola mo bai ndènè simendèna kalohoon.
13:1 Mula pè ndorok aku mengerrana merkitè perkataan-perkataan jelma. Lebbih isidi nai dèng ngo tupèh, imo merkitè malaèkat, mula oda perkelleng atè aku, dosken sora nggang sambing ngo sikuruapken i oda lot lapatenna. 13:2 Mula pè perralamat aku, ndorok kubagahken kediriin Dèbata janah kubettoh perbinettohen simbages-mbagesna, janah mula pè perkepercayaen kaloon aku, ndorok terlompat aku delleng, tapi oda kukekelengi sidèban, dosken siso mada ngo aku. 13:3 Mula pè kubasa-basaken karina hartangku mi kalak sincoor, janah kuberrèken diringku itutung, ukum oda ngkelleng atèngku midah sidèban, karinana idi oda lot lapatenna. 13:4 Bujur merrukur ngo ngkelleng atè i janah sobar. Oda sèk atè oda terruluk, oda durakah, janah oda uè gegah. 13:5 Merradat kalohoon ngo kelleng atè i, oda nahaka, oda uè punguren, oda ijujur-jujur kessalahen kaltuna bana, 13:6 oda tuju iakap midah siso adil, tapi sampang atèna midah kesèntengen. 13:7 Ngkelleng atè idi tahan menggong simermatcam bagèna, janah percaya ngo ia mi sisellohna taba gennep jelma; oda pennah kundur pengharapenna, janah sobar memmèma barang kadè sambing. 13:8 Oda uè salpun ngkelleng atè i. Ukum perralamat simemagahken berrita Tuhan, i sada tikki kerri ngo sisukutkenenna. Kepandèen mengeranaken ibas kata sidèban idi pè mentadi ngo, bang perbinettohen i karinana pè oda nèngè iperluken. 13:9 Ai merdèba-dèba dèng ngo ukum perbinettohenta dekket pennukutkenta terrèngèt hendak Dèbata. 13:10 Luas roh kessa sondel kinimerandal i, mentadi mo simerdèba-dèba idi. 13:11 Sidekkah anak-anak dèng aku meddanak pekkerrananku, meddanak ngo bang pemikirenku bak perukurenku pè. Tapi enggo kessa mbelgah aku, kupatakken ngo pekkilakongku meddanak idi. 13:12 Ukum siidah bagèndari, dosken lèndung mehèjem ibas cermin dèng ngo idi. Tapi seggen, ntangkas mo siidah hadep abè. Merdèba-dèba dèng ngo kubettoh ukum bagèndari, tapi ukum seggen ntangkas mo kubettoh janah kutandai, tosè bagè pemettoh bak penandai Dèbata bangku. 13:13 Nai tellu nai ngo kessa hot, imo kepercayaen, pengharapen dekket kelleng. Tapi kelleng i ngo simbelgahna.
14:1 Dak mo usahaken kènè mengkekelengi sidèban. Keperluken kènè mo sibasa-basa niberrèken Dèbata, imo magahken taki bak hendak Dèbata bai jelma. 14:2 Ai ukum kepandèen merkata sidèban, oda ngo jelma nipermongkamina; tapi mengerrana mi Dèbata ngo, oda lot jelma mengantusi siniruapkenna, ai Tendi Dèbata ngo makin asa iruapken kata i, pellin Dèbata ngo kessa memettohsa. 14:3 Tapi ukum kalak simenjamitaken kata Dèbata, pesakatkensa taba jelma; lako petegguhken, pehèdu-hèduken dekket peloloken ukur. 14:4 Ukum kalak simengerana ibas kata sidèban dirina ngo nipetteguhna, tapi ukum kalak simenjamitaken kata Dèbata, Kuria i ngo nipelliasna. 14:5 Sampang ngo atèngku mula karina kènè mengerrana ibas kata sidèban, tapi simerandalna kaloon imo menjamitaken hendak Dèbata bai jelma, ai merkessurungen ngo kalak simenjamitaken hendak Dèbata ulang pada kalak perkata sidèban. Laèn mo mula ndorok ia petterangken niruapkenna kata sidèban i, asa iantusi karina kuria i. 14:6 Umpamana mula roh aku mendahi kènè, janah mengerrana aku ibas kata sidèban, kadè mo gunana idi bai ndènè? Cituk poda lot gunana! Laèn mo mula kubagahken terrèngèt alamat bai Dèbata nai, barang kupetterrang terrèngèt Dèbata, barang kupessakat sukuten bai Dèbata nai, barang mengajari aku. 14:7 Codinna, goci barang oning-oning ndorok mersora tukasi pè pè oda merkessah, ukum oda ngo ranggut sorana idi, bakunè mo ndorok nibettoh lagu kadè sinibaingna i? 14:8 Barang pè sarunè umpamana isempul bagidi sambing, mènter lot nola mo kalak kebbas lako geraha? 14:9 Bagi ma mo mula mengerrana kènè ibas kata sidèban. Ukum oda ngo ntangkas iruapken, isè poda mengantusi sinidokken ndènè i. Nai bagè angin menempul sambing mo rana ndènè i. 14:10 Mermatcam bagè ngo perkataan i dunia èn, tapi karinana ngo kata i lot lapatenna. 14:11 Mula oda kuantusi rana niruapken dèba, otang dosken kalak sidèban ngo ia bangku, bagi ma mo aku merradepkensa. 14:12 Asa kènè pè alè dengan, kubettoh perlu ngo bai ndènè sibasa-basa bagidi bai Tuhan nai. Tapi siperluna kalohoon bakin kènè mo sibasa-basa i lako mengurupi pehèdu-hèduken kuria asa maju. 14:13 Kumarna naidi ipidoken simengerana ibas kata sidèban i mo taba Dèbata, asa iberrèken bana perbinettohen lako petterangken niruapkenna idi. 14:14 Ai mula mersodip aku ibas kata sidèban, pellin tendingku ngo kessa mersodip, tapi ukum pennarihenku oda. 14:15 Jadi bakunè mo? Bagèen mo kubakin: Mersodip ngo aku ibas tendingku janah mersodip ma ngo aku ibas pennarihenku. Merendè ngo aku ibas tendingku janah merendè ma ngo aku ibas dagingku. 14:16 Ai mula idokken kènè mellias atè taba Dèbata ibagasen tendi sambing, keppè lot sidèban siso mengantusi kata sidèban nidokkenmu idi, bakunè mo ia mendokken, "Amèn lapatenna imo tuhu", mi sodip ndènè i kumarna oda iarti kadè nidokken ndènè i. 14:17 Mula pè sodip melias atè ndènè i mi Tuhan selloh kalohoon, keppèken oda lot lapatenna sodipmu i bai kalak sidèban. 14:18 Melias atè mo kudokken bai Dèbata, kerna pandèen aku mengerrana ibas kata sidèban asa kènè karina. 14:19 Tapi tukasi pè bagidi, lotiin ngo kuruapken lima ngkebabah kata siniantusen jelma ibas pulungen mersembah taba Dèbata ulang pada serribu ngkebabah ibas kata sidèban siso iantusi jelma, asa merkitè bagidi kupeddahi jelma nterrem. 14:20 Kènè alè dengan! Ulang mo kènè bagè perrukur anak-anak. Tapi ukum ibas kejahaten, bagè anak-anak mo kènè, janah bagè simbelgah mo kènè merrukur. 14:21 Ai tersurat ngo ibas Bibèl bagèen, "Mengerrana ngo aku mi bangsa èn ibas kata sidèban, janah merkitè kalak sidèban mengerrana aku taba ummatKu; tukasi pè bagidi laju oda idengkohken ranangKu." 14:22 Asa ukum sibasa-basa terrèngèt kata sidèban, mahan tanda kellengangen ngo i taba kalak siso percaya. Nai ukum sibasa-basa bai perralamat lako memmagahken hendak Dèbata mi jelma, imo pertanda kalak percaya, oda taba siso percaya. 14:23 Kernana i mula tupung merpulung kuria i janah karinana sipulung i mengerrana ibas kata sidèban, keppè roh ma mo mi sidi kalak siso Kristen, tentu dokkenenna mo kènè gila karina! 14:24 Tapi ukum karinana kènè mennukutken berrita bai Dèbata nai, janah roh mi pulungen kalak siso Kristen barang kalak sidèban pè, kumarna iantusi nidokken ndènè i, gabè peddah mo idi bana janah gabè itandai dosana. 14:25 Gabè ntarar mo simboni silot i ukurna, nai gabè ipecerrep mo ukurna roh mersembah mi Dèbata, janah tuhu-tuhu mo ia percaya i tengah-tengah ndènè ngo enggo Dèbata. 14:26 Jadi kadè ngo lapaten ni karina idi alè dengan? Mula merpulung kènè lako mersembah taba Tuhan: lot simerendè, lot merjamita, lot mengajari, lot memmagahken barang kadè bai Dèbata nai, lot mengerrana ibas kata sidèban, janah lot ma petterangken kata sidèban idi. Tapi karinana idi kennah lako mengajari dekket pessellohken kuria idi no. 14:27 Mula lot mengerrana ibas kata sidèban, bias mo mengerrana dua barang tellu kalak peganci-ganci, janah kennah lot mo kalak petterangken kata sinidokken simengerana i. 14:28 Tapi mula oda ngo lot petterangken, sip mo simengerrana ibas kata sidèban i. Pellin ibagasen ukurna sambing mo ia mengerrana taba Dèbata. 14:29 Nai barang dua tellu kalak ma mo merjamita, sidèbankenna iradum-radumi mo jamita idi. 14:30 Tapi mula roh berita bai Dèbata nai taba sada kalak sipulung i, kennah sip mo lebbè simerjamita i. 14:31 Merkitè bagidi enggo karina kènè peganci merjamita, asa karina terrolih peddah janah makin mi percayana. 14:32 Ai ndorok ngo iantak perjamita idi jamitana, siroh bai Tendi Dèbata nai. 14:33 Oda ikellemmoken Dèbata siso merratur, kennah damè ngo. Ibas karinana Kuria, 14:34 kennah nono ngo daberru tupung merpulung kènè. Oda selloh mula mendokken rana kalak idi; oda ndorok gabè huntuun ia, ai tersurat ngo ibas Bibèl: 14:35 Mula tah lot naing ikuso kalak idi, sinibalèna mo ikuso ibages, ai subang ngo mula mendokken rana daberru i kuria. 14:36 Ai bai ndènè nai ngo rohna kata Dèbata, barang tah kessakatenna ngo kènè? 14:37 Tah bakunè lot mendokken i tengah-tengah ndènè nai, lot nina ijalo sibasa-basa mennukutken berrita bai Dèbata nai barang sibasa-basa bai Tendi Dèbata nai, memettoh mo ia: Perèntah Tuhan i ngo sikusurat ènda. 14:38 Tapi mula lot oda terjalosa ènda, ulang parduliken kènè ia. 14:39 Kerna nai alè dengan, keperluken kènè mo menjamitaken kata Dèbata, tapi ulang gerra kènè kalak simengerrana ibas kata sidèban. 14:40 Tapi karinana i kennah merratur ngo dekket rèntem.
15:1 Bagèndari alè dengan ipergeddo ukurku, asa èngèt kènè karina Sukuten Kelluahen bai Dèbata nai sikusukutken bai ndènè tikala i, sienggo ijalo kènè janah danganen kepercayaen ndènè. 15:2 Mula lot kènè menjèmak Sukuten Kelluahen sikusukutken idi, maluah mo kènè; laèn mo mula pè percaya kènè, iulaken kènè oda pella merpikir. 15:3 Karina sikupessoh bai ndènè i, sikujalo ma ngo i, bagè sitersurat ibas Bibèl: sikupessakat idi imo sienggo matè ngo Kristus kumarna dosanta; 15:4 sienggo Ikubur ngo ia, nai balik nggelluh nola i ari petelluken, rembang bagè sitersurat i. 15:5 Enggo ma ngo kubagahken bai ndènè: ipacidah Kristus sienggo balik nggelluh i ngo diriNa taba si Petrus, nai taba sisipuluh dua sisiin i. 15:6 Nai ipacidah nola mo dirina taba lebbih lima ratus kalak, nggelluh dèng ngo buèen kalak idi bagèndari, dèba ngo enggo matè. 15:7 Nai ipacidah nola mo dirina taba si Jakobus, nai taba karina sisiin i. 15:8 Tapi ipodi karinana idi, ipacidahken ma dirina taba aku, siterdokken bagè anak mabara tubuh siso tikkina! 15:9 Ai aku mo rasul Tuhan sikètèkna, oda ngo nemmu aku patut idokken rasul, ai enggo sanga kuletlet kuria Dèbata. 15:10 Tapi kemulihken masèh atè Dèbata ngo ndorok aku bagè sibagèndari; oda magosia pengampuni Dèbata bangku i, ai buèen ngo sikuulaken ulang pada iulaken karina rasul-rasul. Tapi oda ngo usahangku tupèh, karinana idi usaha Dèbata simermasèh atè bangku idi ngo, mengula rebbak dekket aku! 15:11 Asa, barang bai isè nai ijalo kènè Sukuten Kelluahen i -- tah bangku nai barang pè bai sidèbankenna idi nai -- dos ngo i; siperluna imo sikubagahken kami idi imo Sukuten Kelluahen bai Dèbata nai, sinikepercayaen ndènè i. 15:12 Sienggo kubagahken kami bai ndènè, imo enggo ipegelluh Kristus i, i kemmatèen nai. Kasa lot nola i tengah-tengah ndènè nai mendokken, oda ipegelluh ukum kalak sienggo matè mengolihi? 15:13 Ukum tuhu ngo oda ipegelluh sienggo matè i mengolihi, merlapaten ngo i Kristus i pè oda balik nggelluh i kemmatèen nai, 15:14 oda lot gunana kami merjamita janah oda lot gunana kènè percaya, ai oda lot danganen kepercayaen ndènè. 15:15 Oda pellin idi tupèh. Kami pè terbukti mo perluap terrèngèt Dèbata, kerna kusukutken kami ngo Dèbata pegelluhken Kristus i simatè nai, keppèken oda, mula tuhu oda ipegelluh mengolihi sienggo matè i! 15:16 Kerna mula oda ipegelluh mengolihi kalak sienggo matè i, Kristus pè oda ipegelluh mengolihi i kemmatèen nai. 15:17 Asa ukum oda ngo tuhu ipegelluh Kristus, magosia ngo kepercayaen ndènè i; janah mago mo kènè ibagasen dosa ndènè. 15:18 Janah mago ma ngo bang kalak sienggo matè ibagasen Kristus i. 15:19 Ukum pellin nggelluh i tanoh èn ngo kessa kita mengharap bai Kristus i, kita mo jelma simpersukna! 15:20 Tapi enggo mo ipegelluh Kristus mengolihi i kemmatèen nai, janah imo mahan jaminenna, magahken balik nggelluh ngo kalak sienggo matè i. 15:21 Ai bagè kemmatèen i, merkitè sada kalak ngo sempa mi dunia èn, bagi ma ngo balik nggelluh ibas simatè nai merkitè sada kalak ngo. 15:22 Karina jelma matè kumarna ibagasen si Adam ngo; bagi ma ngo karina jelma ipegelluh ibagasen Kristus. 15:23 Tapi gennep jelma ipegelluh merkitè gèrèrenna ngo: perlebbè Kristus, nai ipekiroh Kristus i mi dunia èn nola, gèrèren ni sienggo milik Kristus mo. 15:24 Enggo kessa i, kiamat mo. Sinderrang bagidi ipetunduk Kristus mo kerajaen, kuasa dekket nasa kegegohen; nai ipesakat mo kuasaNa sibagè Raja taba Dèbata Bapa. 15:25 Mengerajai mo Kristus soh mi ipetunduk Dèbata karinana musuhna mi terruh nèhèna. 15:26 Ukum musuhna perpodi sipetundukenna, imo kemmatèen i. 15:27 Ai tersurat ngo ibas Bibèl bagèen, "Karinana ngo ipetunduk Dèbata mi terruh nèhèNa." Merkitè idi ntangkas mo bettohen maksudna "karinana i", oda termasuk Dèbata simemmaing karinana situnduk mi Kristus. 15:28 Tapi enggo kessa tunduk karinana idi mi terruh pemerèntahen Kristus, nai Ia sendiri sebagè Anak Dèbata, petundukken diriNa mi Dèbata sienggo memmaingken tunduk baNa. Jadi Dèbata mo memerèntah karinana. 15:29 Mula oda ngo mengolihi ipegelluh kalak sienggo matè i, kasa pella jelma i iperridi bai kalak simatè? Man kadè pella kalak i mengulaken i? Mula oda ngo ipegelluh kalak sienggo matè, kadè gunana iperridi kalak silako matè? 15:30 Janah man kadè nami mo kugongken kami mara gennep tèk? 15:31 Kènè alè dengan! Gennep ari ngo kutahanken simpersuk kumarnaken lolongku, ai enggo percaya kènè mi Kristus Jesus Tuhanta i. 15:32 Ukum kumarnaken cara kemmanusiaan sambing ngo, pella mo juhap aku mi binatang penjerngem i kuta Epesus, kadè gunana idi bangku? Ukum oda ngo ipegelluh nola kalak sienggo matè i, lotiin mo bagè pendokken umpama, "Mersennang-sennang mo kita, mangan mènum, kerna baremben matè ngo kita." 15:33 Ulang kènè laling! Mula idengani kènè perjahat, gabè jahat ngo pengelako ndènè simendè kin pè. 15:34 Satdar mo kènè bagèndari, janah ulang nèngè ulaken kènè dosa. Kemmemèla mbellen ngo idi, ai lot dèng ngo iantara kènè oda tuhu-tuhu menandai Dèbata. 15:35 Tah bakunè lot mengkuso, "Bakunè ndia ipegelluh nola balik kalak sienggo matè i? Bakunè mo ndia perdagingen enggo kessa ipegelluh nola mengolihi?" 15:36 Moto ngo ukum bagidi! Mula isuan bennih mi tanoh, oda ngo uè tubuh bennih i, kum oda lebbè matè! 15:37 Asa mula tikan mardang kono -- otang oda ngo batang sinaing tubuh i iardangken kono -- tah pè i bennih gandum barang bennih sidèbankenna i. 15:38 Ai Dèbata sendiri merrèken mi bennih i tempaNa merguru mi lemmo atèna; janah pellaèn-laèn ngo ibakin Dèbata mi gennep suan-suanen idi. 15:39 Oda ngo dos matcamna karina daging simerkessah, laèn ngo daging jelma, laèn ma ngo pinakan, laèn ma ngo daging manuk-manuk, laèn ma ngo mi ikan. 15:40 Bagidi ma ngo dekket silot i langit bak i dunia èn. Si lot i langit mersiembah rupana janah ni dunia èn pè mersiembah matcamna. 15:41 Laèn ngo sendang mataniari, laèn ngo sendang bulan, laèn ma ngo sendang bintang, mersiembah kinimendè cuhayana gennep. 15:42 Codi bagi ma ngo seggen bang kalak sienggo matè i, sinaing nggelluh nola. Ukum badan idi i mo badan siso uè ncèda. 15:43 Ukum badan sinitanem idi, badan merroha janah ndotè ngo idi, tapi enggo kessa ipegelluh nola ia gabè badan merandal janah mergegoh kalohoon idi. 15:44 Sinderrang itanem badan idi, imo badan tanoh èn; tapi enggo kessa balik nggelluh, badan i mo niberrèken Tendi Dèbata. Ai mula lot badan tanoh èn; lot ma ngo badan bai Dèbata nai. 15:45 Rembang bagè sitersurat ibas Bibèl, "Gabè kessah nggelluh ngo jelma perlebbè idi imo si Adam," tapi Tendi pegelluhken ngo ukum Adam perpodi i. 15:46 Ukum siroh perlebbè imo daging rembaga i, nai pè asa badan pertendiin i. 15:47 I tanoh nai ngo ijadiken ukum Adam perlebbè i, tapi i sorga nai ngo Adam peduaken i. 15:48 Ukum jelma ni dunia èn, tosè bagè Adam perlebbè idi ngo, ihanaken ibas tanoh nai, tapi ukum jelma ni sorga, tosè bagè ia siroh i sorga i nai ngo. 15:49 Bagè kita sibagèndari, tosè bagidi ngo Adam sinitempa ibas tanoh nai, bagi ma mo kita seggen tosè mi sini sorga idi nai. 15:50 Èn ngo sikudokken alè dengan, oda terbakin badan sinihanaken ibas badan bak daroh nai, gabè ginemgem i Kerajaen Dèbata, janah badan siuè matè i oda ndorok menettap idi. 15:51 Peratè-atèken kènè mo rusia èn: Oda karina kita matè, tapi karina ngo kita mobah. 15:52 Sintempu ngo masa i, ibagasen singkerjep mata; tikan mersora sarunè siperpodi kalohoon i mèter balik nggelluh mo kalak sienggo matè i gabè merdaging rimbaru janah menettap, janah karinana ngo kita mobah bakinenna. 15:53 Asa ukum badanta siuè matè èn, kennah igancih dekket badan siso uè matè janah badanta simermula i tanoh èn nai kennah igancih dekket badan ni sorga i nai. 15:54 Ai mula badan siuè matè i enggo igancih dekket badan siso uè matè i, janah mula badan si ni tanoh èn enggo igancih dekket badan i sorga i nai, tikan bagidi mo saut nidokken surat Bibèl i, "Enggo talu kemmatèen, enggo dapet kemennangen!" 15:55 "Alè kemmatèen, idikè kemennangenmi? Alè kemmatèen idikè serrenmi?" 15:56 Dosa ngo serren kemmatèen, janah pati-patiin i ngo perkitèen dosa. 15:57 Tapi melias atè mo bai Dèbata, ai enggo iberrèken banta kemennangen i merkitè-kitè Jesus Kristus Tuhanta i. 15:58 Èn pè alè dengan sinikekellengen, kennah hot mo kènè janah ulang mobah-obah. Makin ngkasah mo kènè mengulaken ulaan Tuhan i, ai ibettoh kènè ngo; oda magosia kelejaan ndènè ibagasen Tuhan i.
16:1 Terrèngèt riar sinaing itumpakken kènè mi dengan sipercaya taba Jesus Kristus, baing kènè mo bagè sienggo kudokken mi kuria Galatia. 16:2 Gennep ari minggu, naing mo pepulung kènè merguru mi sindorok bakinenna. Boniken mo lebbè i, asa ulang tikan roh aku isidi nola asa ipepulung. 16:3 Roh kessa aku sikali èn, mèter sipasulak mo jelma kettoken atè ndènè lako mennaruhken riar idi merdengan surat, asa iembah mi Jerusalem. 16:4 Tapi mula narih toko ngo buèna, dekket pè aku laus mennaruhken riar i rebbak dekket kalak i. 16:5 Roh ngo aku mendahi kènè enggo kessa kubellus kuta Makedonia, kerna lot niatku naing merdalan arap kuta i. 16:6 Dok atèngku tah sanga ngo aku tading rebbak kènè tikan mosim merngali. Nai pè asa dengani kènè aku lako mennerusken perdalanen mi kuta sidèban. 16:7 Oda ngo naing singgah sambing aku. Mula ipadiat Tuhan i, sèkel ngo aku narih ndekkah rebbak dekket kènè. 16:8 Ninganna i i Epesus ngo aku merrian soh mi ari Pentakosta. 16:9 Ai mbuka ngo mbellang pèntu i Epesus janah mengkerohken mbuè; tukasi pè mbuè kalak mengalo. 16:10 Mula roh si Timoteus, jalo kènè mo ia mendè, asa selloh iakap rebbak dekket kènè, ai bagè aku ngo ia, pengula ni Tuhan i. 16:11 Ulang lot merpis ni mata midahsa. Urupi kènè mo ia asa ndorok ia merdalan lako balik mendahi aku merkinijuah, ai kupèma ngo pekirohna rebbak dekket dengan sidèbanna i. 16:12 Terrèngèt denganta si Apolos, enggo nggemmes kudokken bana asa idahi ia kènè dekket dengan i, tapi makdèng seppè iakap berkat ukum bagèndari. Bakunè pè, mula tupung lot tikkina luas, roh ngo ia mi sènda. 16:13 Ndungo mo kènè ninganna ntegguh merkepercayaen. Tang mo kènè janah mergegoh! 16:14 Karinana pengulanken ndènè, ulaken kènè mo ibagasen ngkelleng. 16:15 Itandai kènè ngo si Stefanus bak pengisi bagesna. Kalak i mo mula-mula kaloon tobat gabè kalak Kristen i Akhaya. Mertuhu-tuhu ngo kalak i mengula lako mangkebbasi ummat Tuhan. 16:16 Kudokken bai ndènè, asa codi kènè mo mertuhu-tuhu cara sibagidi dekket dengan sidèban i pè bagèsa ma simerkebbas rebbak dekket kalak idi. 16:17 Sampang kalohoon atèngku kerna roh si Stefanus, si Portunatus dekket si Akhaikus, ai kalak èn ngo dosken menggancih kènè i gembarku. 16:18 Tuhu-tuhu ngo lolo atèngku ibakin kalak i, bang atè ndènè pè kalak sibagidi patut ngo nihargaan. 16:19 Pessohken salam ngo karinana kuria si ni Asia. Bagidi ma ngo si Akwila bak si Priskila dekket kuria simertumpu i bagesna pè. 16:20 Karina dengan i pè mennengesken salam taba kènè. Mersisalamen mo kènè merdengan sanggoh mbadia. 16:21 Soh ma mo salamku sikusuratken sendiri bai ndènè, imo salam bangku nai si Paulus! 16:22 Barang isè siso mengkekelengi Tuhan Jesus, kenna hukum Dèbata mo ia. "Maranata," Tuhan nami, roh mo ko! 16:23 Dak idengani Jesus Tuhanta i mo kènè karina! 16:24 Idengani kelleng atèngku mo kènè karina sienggo percaya mi Jesus Kristus. Tabe nami, Paulus
1:1 Kènè dengan kuria Dèbata silot i Korintus bak karinana ummat Dèbata i suberri Akhaya. Aku, si Paulus, rasul Kristus sinipebangkitna ibas lemmo atè Dèbata nai, dekket denganta si Timoteus. 1:2 Masèh atè bak damè ni Dèbata Bapanta dekket Tuhan Jesus Kristus imo mendengani kènè karina. 1:3 Nipoji mo Dèbata Bapa Tuhanta Jesus Kristus. Ia ngo Bapa permasèh atè kalohoon janah Dèbata simemerrèken ntegguh pennarihen sitermurmur i bai jelma. 1:4 Ai ia ngo petegguhken pennarihen nami ibas karina kepersuken sisempa bai nami, asa merkitè ntegguh pennarihen sikujalo kami bai Dèbata nai ndorok kupetegguh kami pennarihen karina jelma nibagasen kesusahen idi. 1:5 Kupersuken sinigong Kristus, enggo mo narih mèduk sempa bai nami ma, kemmulihkenna idi gabè ipetegguh Kristus ngo pennarihen nami. 1:6 Tapi mpersah pè kugong kami, karinana idi gabè mengapoi janah petegguhken pennarihen ndènè ngo, asa maluah kènè. Asa mula ipetegguh pennarihen nami, kènè pè dekket ngo ipetegguh, asa gabè mbingit kènè ibas sitahanen sisempa mendahi kènè, tosè bagè sisempa bai nami. 1:7 Hot ngo pengharapen nami terrèngèt kènè, ai kubettoh kami ngo dekket kènè menggong kinipersuk bagè kami, janah kemmulihkenna i dekket ma ngo kènè menjalo apo-apo dekket ipetegguh bagè kami ma. 1:8 Naing ngo dok atè nami ibettoh kènè alè dengan, bakunè sinigong nami i Asia, soh mo mbotongna kinipersuk kugongken kami, enggo sanga saip ukur nami terrèngèt mi nggelluh nami; 1:9 tosè bagè sienggo iputus hukumen nami kennah matè, ukum perrasaan nami. Tapi masa pè i asa ulang merkepposen mi diri nami ngo kami, tapi asa merkepposen taba Dèbata sipegelluh kalak sienggo matè ngo. 1:10 Ia ngo pelluahken kami ibas kemmatèen sintengam idi nai, janah kuharapken kami Ia ma ngo paluahken kami bang i ari podi pè. 1:11 Tok ngo kami iurupi kènè ngo kami ibas sodip ndènè, nai ipaluah Dèbata dèng ma mo kami ibas mara nai, merkitè bagidi gabè nterrem mo kalak mendokken lias atè mi Dèbata, kumarna idengkohken Dèbata ngo sodipna lako mengkepkep kami. 1:12 Èn ngo memaingken lolo atè nami; ikesaksiken pennarihen nami ngo karina sikubahanken kami i dunia èn -- terlebbih-lebbih perdemuun nami dekket kènè enggo kubakin kami ibagasen mendè janah oda merpengait siroh bai Dèbata nai. Kuulaken kami idi oda ngo kumarna bijak kejelmaan, tapi sibasa-basa niberrèken Dèbata bai nami idi ngo. 1:13 Ai sikusuratken kami, oda laèn lapatenna ibas sinijaka dekket iantusi kènè, ibagasenna i kuharapken ngo asa terrus iarti kènè. 1:14 Bagèndari, enggo bagè iantusi kènè dèba terrèngèt kami, tapi harap ngo kami, makin iantusi kènè kami mi podiin èn. Merkitè bagidi, ibas pekiroh Tuhan Jesus seggen, gabè sampang mo atè ndènè midah kami janah kami pè sampang mo atè nami midah kènè. 1:15 Kemmulihken kettoken idi ngo kènè, asa ndor kin lot hendakku mendahi kènè, asa terolih pasu-pasu kènè merlempit ganda. 1:16 Kuhendakken kin ngo asa kudahi kènè tikan perdalanenku mi Makedonia, janah singgah nola ma aku mendahi kènè mula balik kessa aku i sidi nai, asa ndorok urupi kènè aku ipas perdalanen lako mi Judèa. 1:17 Tapi gabè kuobah ngo hendakku idi; jadi ketteridahen oda hot perrukurenku mula bagidi? Barang merguru mi daging ngo hendakku idi, sipata "Uè, sipata oda?" 1:18 Ibagasen gerar Dèbata sidak tong kepposen terrèngèt mi sienggo iruapken, ukum sienggo kudokken idi oda ngo "Uè" bak "Oda". 1:19 Kerna ukum Jesus Kristus Anak Dèbata sienggo isukutken si Silas, si Timoteus dekket aku sendiri pè oda ngo kalak jelma "uè" barang "oda". Tapi kata "uè" ngo siroh bai Dèbata nai. 1:20 Ai merkitè Ia enggo "uè" nina Dèbata terrèngèt karina niperbagahNa. Kemmulihkenna idi ngo kita mendokken "Amèn" mi Dèbata merkitè Jesus Kristus. Kubakin kami bagidi asa mermulia Dèbata. 1:21 Ai Dèbata sendiri ngo memmaing kami bak kènè pè gabè ntegguh mersaor ibagasen Kristus, janah Ia ngo memmilih kita gabè milikNa. 1:22 I ngo memmaing asa icap kita gabè milikNa, janah Iberrèken mi bagasen atè-atènta, TendiNa i mahan jaminen mi karinaNa. 1:23 Dèbata ngo saksingku -- ai Ibettoh ngo pikirenku -- i ngo memmaingken oda saut dèng aku berkat mi Korintus asa ulang gabè marsak kènè. 1:24 Ai oda ngo naing mengerajai pikiren ndènè aku terrèngèt kadè sinaing keppercayaen ndènè, ai enggo percaya kalohoon kènè mi Kristus. Pellin mengurupi ngo aku bai ndènè, asa makin dom sampang atè ndènè.
2:1 Kumarna naidi, enggo kuputusken ibas ukurku asa ulang nèngè roh aku mendahi kènè ukum gabè marsak kènè. 2:2 Ai mula aku ngo memmakin marsak kènè, isè nola memmakin sampang atèngku, ukum mak ia sikuarsaki idi? 2:3 Kerna nai ngo asa kubakin surat mendahi kènè, oda uè aku roh mendahi kènè ukum gabè marsak, kerna kènè ngo memmakin sampang atèngku. Ai tok ngo aku, mula lolo aku, kènè pè lolo ngo. 2:4 Kutengesken surat èn taba kènè ibagasen keppersuken ngo aku janah posek ukurku janah merdengan èluh; oda ngo asa gabè marsak kènè asa kubagahken idi, tapi asa ibettoh kènè ngo kelleng atèngku midah kènè. 2:5 Mula lot barang isè memmaingken arsak atè ènda, oda ngo taba aku nibakinna i, tapi taba kènè karina ngo i; asa ulang pella lebbihsu ranangku bai dèba arap kènè nai. 2:6 Cukup mo hukumen taba kalak sibagidi, imo pincang-pincang sinterrem bai ndènè nai. 2:7 Bagèndari pè kennah ampuni kènè mo ia janah peddahi kènè asa ulang marsaksu ia; janah asa ulang mendellè ia. 2:8 Kupengido bai ndènè asa tuduhken kènè kelleng ndènè mengolihi mendahisa. 2:9 Idi ma ngo tinèmbak suratku i bai ndènè lako mengunjuni kènè, tah uè ma ngo kènè dak menguèi peddah bak ajarku. 2:10 Mula iampuni kènè salah ni kalak simersalah taba kènè, aku pè kuampuni ma mo ia. Kerna barang kadè pè sikuampuni i -- mula lot sinaing ampunen -- kumarna kènè ngo kuampuni i hadeppen Kristus. 2:11 Kubakin pè bagidi asa ulang sanga sempat Sibolis maing seggat mi ukurta, ai sibettoh ngo taki-takina. 2:12 Sinderrang soh aku mi Troas magahken sukuten kelluahen terrèngèt Kristus, enggo ngo nemmuken ibuka Tuhan i pèntu taba aku lako mengula i sidi. 2:13 Tapi gabè happu ngo kuakap, kumarna oda pejumpa aku dekket si Titus i sidi. Nai gabè kutennahi mo kalak ni sidi, janah laus mo aku mi Makedonia. 2:14 Tapi melias atè mo taba Dèbata, ai dak tong ngo itatang-tatang kami merkemennangen ibagasen Kristus kerna nggelluh ngo kami rebbak dekket Ia. Ipakkè Dèbata ngo kami asa makin sar berrita terrèngèt Kristus bagè sibaungkus soh mi karina nagerri. 2:15 Ai bagè dahupa ngo kami baungkus itutung Kristus lako bai Dèbata. Tapi ukum bai kalak silako mago, gabè bau kemmatèen simemunuh ngo kami. 2:16 Tapi ukum bai kalak sinaing ipaluah, baungkus ngo kami janah bagè simerembahken kenggelluhen, jadi isè ngo ndorok mengulaken bagidi? 2:17 Ai oda ngo bagè sidèbankenna i kami, simemmaing sukuten terrèngèt Dèbata dosken tiga-tiga sambing. Oda ngo merpengait kami, ai Dèbata ngo pasulakken kami. Janah idah Dèbata ngo, pengendeng Kristus ngo kami pessakatken berrita idi.
3:1 Mada ngo katè ndènè nola kupoji-poji kami dirinami? Barang mada ngo tah porlu surat pemoji-mojiin taba kènè barang taba kami, bagè sinibakin dèba kalak sidèban i? 3:2 Kènè sendiri ngo surat pemojiin bai nami sienggo tersurat ibagasen pusuh perratèen nami, janah ndorok ijaka gennep jelma. 3:3 Ai terjaka jelma idi ngo, kènè surat bai Kristus nai, merkitè-kitè kami. Isurat ngo surat i oda dekket tinta, tapi dekket Tendi Dèbata singgelluh ngo; oda ngo isurat ipas batu, tapi ibas atè-atè jelma ngo. 3:4 Kudokken kami pè bagi, kumarna tok ngo ukur nami mi Dèbata merkitèken Kristus. 3:5 Oda ngo kediriin nami lako mengulaken ulaan idi, tapi Dèbata ngo memmerrèken asa ndorok kami mengulaken idi. 3:6 Ia ngo memmaing asa tau kami gabè pengendeng ibas padan sirimbaru merkitè Tendi Dèbata; oda ngo merkitè patiin sitersurat i, tapi pegelluhken ngo ukum siroh bai Tendi Dèbata nai. 3:7 Sinderrang padan simerembahken mi kemmatèen ibahan bak iokirken mi batu, merbindella ngo cuhaya kessangapen Dèbata, merbindella kalohoon ngo cuhaya i, gabè oda nè tertengen bangsa Israel abè si Musa, tukasi pè cuhaya abè si Musa enggo mulai mèlep tikanna idi. Mula i mo bagidi 3:8 makinsa nola mo padan si niberrèken Tendi Dèbata, mak makin merbindellana mo. 3:9 Mula sinderrang iberrèken padan simennalahken jelma idi bagidi mo bindella kesangapenna tentu merkessurungen dèng ma ngo bindella kessangapen sinderrang iberrèken padan simemmaing jelma i ndorok merdamè dekket Dèbata. 3:10 Ndorok dokonen dosken siso merbindella nè ngo kessangapen siarnia i kumarna bindella kessangapen sibagèndari i. 3:11 Mula bagidi mo bindella kessangapen singgèut salpun i, otang makin merbindellana mo kessangapen simenettap idi! 3:12 Kerna bagidi ngo pengharapen nami asa pang kami mengerrana bagidi. 3:13 Oda bagè pemmaing si Musa pemmaing nami, ai gabè itutupi ngo abèna asa ulang idah bangsa Israel bindella kessangapen Tuhan, enggo makin mèlep janah mersep i abèna nai. 3:14 Nai gabè tertutup ngo pikiren kalak idi janah soh bagèndari ngo tertutup pikiren kalak i, mula pè ijaka kalak i padan siarnia. Ai pellin ibagasen Kristus ngo ndorok terbuka pennutup idi. 3:15 Soh bagèndari pè, mula ijaka kalak idi bukku si Musa, tong dèng ngo ikemkemmi penutup i pikirenna. 3:16 Tapi mula roh menghadep sada jelma taba Tuhan i, terrago mo penutup idi i abè kalak i nai. 3:17 Tuhan si nidokken i sèn imo Tendi. Barang i dikè Tendi Tuhan i, isidi ngo lot kelluahen. 3:18 Ukum abènta karina bagèndari oda nèngè ngo itutupi pengemkemmi i. Dakdak ngo kita merbindellaken cuhaya Kessangapen Tuhan Jesus, nai dakdak iobah mo kita gabè tosè bagèsa, makin ndekkah makin merbindella. Bindella siroh bai Tendi i nai janah Tendi i imo Tuhan.
4:1 Dèbata ngo merrèken ulaan i bai nami ibagasen masèh atèna, janah i ngo maing kami asa oda mendellè. 4:2 Oda ngo kubaing kami bagè cara-cara kegellapen tapi maing kemmemalu. Oda ngo bagè cara akkal barang pè pebalik-balikken kata Dèbata. Ntangkas ngo kusukutken kami lemmo atè Dèbata. Kernana idi harap ngo kami karina kalak mendokken ibagasen ukurna selloh terrèngèt kami, i hadeppen Dèbata. 4:3 Mula oda dèng ngo iarti Sukuten Kelluahen sikubagahken kami idi, kalak silako mago i ngo siso mengantusi. 4:4 Ipepètung tendi jahat ni dunia èn ngo pikiren kalak siso percaya idi. Ia ngo mengellègenni kalak i asa ulang idah kalak idi bindella kessangapen Sukuten Kelluahen terrèngèt Kristus i; ai ibas Kristus idi ngo kita mengidah rupa Dèbata. 4:5 Berrita sikubagahken kami i, oda ngo berrita nami, tapi berrita terrèngèt Jesus Kristus ngo. Ia ngo Tuhan, janah kami ngo perkebbas ndènè kumarnaken Ia. 4:6 Dèbata ngo mendokken, "Mbincar ngo cuhaya i sigellap nai," Dèbata i ma ngo pebincarken cuhaya i mi bagasen perrukurenta, asa gabè ntangkas siantusi bindella kessangapen Dèbata ipas abè Kristus. 4:7 Tapi harta pertendiin simerandal i kuembah kami ibagasen diri nami, siso maharga èn sipellias ibas tanoh nai. Merkitè-kitè bagidi, terridah mo kinibelgah kuasa Dèbata, oda ngo kuasa nami. 4:8 Iletlet ngo kami, tapi oda ngo gabè tersessak kami. Posek ngo kuakap kami, tapi oda gabè mendellè kami. 4:9 Mbuè ngo mendersa kami, tapi oda ibelli kami punjung. Tukasi pè dak nggati kami ibetbet sampè geppah, tapi oda matè kami. 4:10 Barang i dikè kami, dak ngo kurasaken kami permatè Jesus, asa terridah nggelluh Jesus i ibas badan nami. 4:11 Sidekkah nggelluh kami dak ngo mengenggep kemmatèen i bai nami kumarna Jesus, asa gabè ntarar pernggelluh Jesus i ipas daging nami siuè matè èn. 4:12 Lapatenna dakdak ngo kemmatèen i menessak bai nami, tapi kenggelluhen ngo ukum menessak kènè. 4:13 Tersurat ngo ibas Bibèl bagèen, "Percaya ngo aku, kerna naidi ngo asa mengerrana aku." Asa kumarna kepercayaen idi ngo, asa mengerrana kami. 4:14 Ai tok ngo kami, Dèbata sienggo pekèkèken Tuhan Jesus, ipekèkè ma ngo bang kami rebbak Jesus, janah mengarak kènè rebbak dekket kami mi hadeppenNa. 4:15 Karinana idi lako keperluun bai ndènè ngo, ai mula makin mbuè jelma mengakapken masèh atè Dèbata, makin mbuè ma ngo jelma pesohken sodip lias atè taba Dèbata. Merkitè bagidi, makin mermulia mo Dèbata. 4:16 Kumarna naidi ngo asa oda mendellè kami. Ai tukasi pè makin buruk daging nami perduru i, tapi dak ngo iperimbaru ukum daging nami perbagasen idi gennep ari. 4:17 Ai keppersuken siso sadikè janah sigejap sikutahanken kami èn, gabè mengkerrohken kessenangen sitermurmur soh mi amman sumendah ngo bai nami. Janah dosken siso mada ngo kepersuken i mula nibandingken mi kessangapen idi. 4:18 Ai mi siso terridah idi ngo kutembèrèngken kami, oda ngo mi siterridah èn, ai persigejapen ngo ukum siterridah, tapi hot ngo ukum siso taridah i soh mi amman sumendah.
5:1 Kubettoh ngo, mula irontas bages si niianenta bagèndari i -- imo dagingta -- ni dunia ènda nai, ipèmaken Dèbata ngo banta bages i sorga, sinipellias Dèbata sendiri janah hot soh mi amman sumendah. 5:2 Ai dak kekelsohen ngo kita mengiani bages sibegèndari i, kumarna dak nteddoh ngo kita naing mengiani bagesta si ni sorga i. 5:3 Bages idi mo daging rembaru banta. 5:4 Sidekkah mengiani bages dunia èn dèng kita, dakdak ngo kita kekelsohen kumarna mbotong sitanggungenta. Oda ngo kumarna asa italkasi kita ibas dagingta èn nai, tapi asa iberrèken ngo banta daging ni sorga idi nai, asa ikuasai dagingta singgelluh i, dagingta siuè matè èn. 5:5 Dèbata ngo petauken kita lako mi sidi, enggo kessa Iberrèken TendiNa banta mahan jaminenna. 5:6 Kerna naidi pos ngo atè nami, tukasi pè kubettoh kami ukum sidekkah merrian dèng kami ibas daging nami èn, ndaoh dèng ngo kami i bages bekkas nami dekket Tuhan idi nai. 5:7 Ai ibagasen percaya taba Kristus ngo kami nggelluh, oda nggelluh kumarna sindorok niidah, 5:8 kerna naidi ngo asa pos atè nami. Nemmuken loloon ngo kami mula maluah kami ibas daging nami èn nai, asa ndorok kami rebbak dekket Tuhan i. 5:9 Kerna naidi dak ngo kukeperluken kami lako pessenangken atèNa, sinderrang ibas rembaga èn dèng pè kami, barang pè soh kessa mi sadèi seggen. 5:10 Ai karina ngo kita seggen ipehadep i lebbè perhukumen Kristus, janah gennep mo menjalo pemallessen tosè perulanna i dunia èn -- perulaan merandal barang pè jahat. 5:11 Kubettoh kami ngo kadè lapatenna merkebiaren taba Tuhan; kerna naidi ngo asa kuusahaken kami lako peposken ukur kalak tersèngèt diri nami. Ntangkas ngo kami itandai Dèbata, janah kuharap ngo kènè pè itandai kènè ma kami ibas pusuh perratèen ndènè. 5:12 Oda ngo asa ipoji kènè kami, mula pè kudokken bagidi. Tapi merkitè i kuberrèken bai ndènè sada ketterangen selloh, asa lot dalan ndènè memmoji kami, janah asa ibettoh kènè mengaloi kalak simemerluken rupana, oda bakkona. 5:13 Mula bagè siso merrukur ngo kami idahen, lako siperlu bai Dèbata ngo i. Janah mula merrukur ngo kami idahen, perlu bai ndènè ngo i. 5:14 Kelleng atè Kristus i ngo mengarak-arak kami. Janah kubettoh kami ngo, mula enggo matè sada kalak mengkepkep karina jelma, merlapaten ngo i, karinana jelma enggo matè. 5:15 Kristus matè mengkepkep karinana jelma, asa kalak singgelluh idi ulang nèngè nggelluh ibas dirina, tapi lako bai Kristus sienggo matè janah enggo ipegelluh mengolihi lako mengkepkep kalak idi ma. 5:16 Kemmulihken idi oda nèngè ngo kami menandai jelma i, mengèkutken cara kejelmaan, tapi ukum bagèndari oda nèngè ngo bagidi. 5:17 Barang isè enggo ibagasen Kristus, kalak sienggo nitempa rimbaru mo enggo ia. Enggo salpun pengelako sinderbi i -- karinana ngo enggo iperimbaru. 5:18 Dèbata ngo memmaingken idi karina, merkitèken Kristus gabè ipedamè Dèbata kita mi dirina, nai ipasulak ngo kita lako peddamèken karina jelma dekket Dèbata. 5:19 Èn mo kubagahken kami; Merkitèken Kristus, ipeddamè Dèbata ngo jelma i mi diriNa, oda pella ijujur Dèbata kessalahen-kessalahen jelma i tabaSa. Imo ulaan nami asa kubagahken kami i taba dunia èn. 5:20 Kernana i pertennahen Kristus ngo kami. Mengerana kami dempak kènè, Dèbata ngo simengerrana dekket kènè i. Singkat Kristus i ngo kami mengèlèk-ngèlèk kènè; jalo kènè mo rana Dèbata sigabè peddamèken kènè dekketSa. 5:21 Oda ngo merdosa Kristus, tapi gabè ia ngo menggongken dosanta, asa merkitè enggo ibagasen Kristus i kita, gabè merdamè mo kita dekket Dèbata.
6:1 Kumarna dengan sada ulaan Dèbata ngo kami, jadi kuèlèk-èlèk kami mo kènè asa ulang magosia ibaing kènè masèh atè Dèbata. 6:2 Nina Dèbata ngo ibas Bibèl i, "Tikan permasèh atèen ngo kènè kudengkohken. Janah tikan ari kelluahen ngo kènè kuurupi!" Bettoh kènè mo! Bagèndari mo tikki permasèh atèen i. Bagèndari mo kelluahen idi. 6:3 Oda lot kubakin kami barang kadè asa gabè merdosa jelma i. Jadi isè poda terbakinsa mennalahken pengkebasi nami. 6:4 Ibas karinana ngo kutuduhken kami diri nami bagè naposo Dèbata. Mermatcam bagè kinipersuk ngo kugongken kami ibas mbingit; 6:5 isiksa ngo kami, ikurung, idersa; leja ngo kami, nggati ngo maker mata nami janah nggati ngo kami rapar. 6:6 Ibagasen metemman, bijak, sobar, janah lambas ukur, kutuduhken kami diri nami bagè naposo Dèbata. Ibagasen pengurupiin Tendi Dèbata dekket ibagasen kelleng atè siso merpengait, 6:7 janah ninganna memagahken berrita bai Dèbata nai, ibagasen kegegohen Dèbata. Dak kucèkèp kami ngo lemmo atè Dèbata mahan sinjata nami, tikan juhap barang tikan ikubu dèba pè. 6:8 Ipesangap ngo kami, tapi dak ngo ipellèa; ipoji; tapi itukas. Bujur pè kami idokken ngo perluap. 6:9 Bagè siso itandai ngo kami, tapi karina ngo kalak menandai kami. Dok atèna matè ngo enggo kami, keppè nggelluh dèng ngo kami. Tukasi pè kami isiksa, tapi oda matè kami. 6:10 Tukasi pè irennuk ukur nami, tapi mersampang atè ngo kami. Ncoor ngo kami idahen, tapi enggo mèduk kalak gabè bèak kubaing kami. Kadè poda lot bai nami idahen, tapi karina ngo lot bai nami. 6:11 Kènè alè kalak Korintus sinikekellengen! Enggo ntarar kubagahken kami bai ndènè karinana silot ibas pusuh perratèen nami. 6:12 Mbuka ngo ukur nami bai ndènè, keppè ibekkem kènè ngo ukur ndènè bai nami. 6:13 Asa ukum bagèndari naing mo nemmuken mersijaloon; tosè mi dukak-dukak mo ranangku èn taba kènè: Buka kènè mo ukur ndènè bai nami. 6:14 Ulang kènè uè mertumpu dekket kalak siso percaya bai Jesus, ai oda ngo mendè bagi. Idikè mo ndorok kalak simengulaken lemmo atè Dèbata mertumpu dekket kalak simengalo Dèbata! Oda nung rebbak sinterrang dekket sigellap. 6:15 Oda ndorok rebbak Kristus dekket Sibolis. 6:16 Kadè mo perdemmuun bages Dèbata dekket bages gana-gana? Ai bages Dèbata singgelluh i ngo kita, ai nina Dèbata ngo, "Naing merrian i tengah-tengah kalak i ngo aku, janah rebbak nggelluh dekket kalak idi. Aku ngo gabè Dèbata kalak i, janah gabè ummatKu mo kalak idi. 6:17 Kerna naidi, tadingken kènè mo kalak siso menandai Dèbata idi, janah peddaoh dirimu bai kalak i nai. Ulang mo demmu kènè dekket kalak simellamun, asa Kujalo kènè. 6:18 Aku ngo gabè Bapa bai ndènè, janah kènè gabè dukak-dukakKu, nina Tuhan pergegoh siso lot codinna."
7:1 Kènè alè dengan sinikekellengen! Banta ngo karina siniperbagahna idi. Kerna naidi kennah sipepanting mo dirinta ibas nasa sipellamunken daging bak tendinta i nai. Merkebiaren mo kita taba Dèbata, asa tuhu-tuhu nggelluhta i lako bai Dèbata. 7:2 Jalo kènè mo kami ibagasen atè-atè ndènè! Oda lot salah kubakin kami barang bai isè pè kènè, janah oda nung kubakin kami rogi. Oda nung kubuat kami laba barang bai isè nai pè. 7:3 Kudokken pè bagidi oda ngo lako mennalahken kènè, ai bagè sikudokken perlebbè ndai, ibagasen pusuh perratèen nami ngo kènè, ai denganku ngo kènè matè barang nggelluh pè. 7:4 Percaya ngo aku midah kènè janah soh ngo lolongku midah kènè! Ai menggong mbuè simpersuk pè kami, tapi dakdak ngo nggasang ukur nami kumarna kènè. Tuhu-tuhu ngo sampang atèngku! 7:5 Kessa soh mi Makedonia pè kami, tong ngo susah kuakap kami. Ibas karinana ngo kami susah; perraloon bai sidèban nai, buradan ibagasen pikiren nami nai. 7:6 Tapi mellias atè mo mi Dèbata, ai dak ngo iapoi perrukuren ni kalak simendellè; ai iapoi ngo ukur nami merkitèken pekiroh si Titus. 7:7 Lolo kami, oda ngo pellin kumarna pekkiroh si Titus, tapi dekket ngo kumarna penjalo ndènè bana bak ibagahken bai nami terrèngèt kènè; imo nteddoh ndènè naing pejumpa dekket aku, bagi ma pè terrèngèt enggo peselsel kènè, janah gabè mertuhu-tuhu kènè membèla aku. Idi ngo memmaingken lebbih lolo atèngku. 7:8 Tukasi pè bonek kènè kubakin merkitè suratku idi, oda pella kuselseli ukurku. Tapi kumarna gabè bonek ngo kènè ibakin suratku idi -- tukasi pè nemmuken sigejap sambing ngo bonek ndènè idi -- gabè kuselseli nola ngo ukurku. 7:9 Tapi ukum bagèndari lolo ngo atèngku -- oda kumarna bonek idi kènè, tapi kumarna enggo gabè tobat kènè kemmulihken bonek atè ndènè i ngo! Tuhu bonek ukur ndènè i sindalan ngo bak hendak Dèbata. Jadi oda lot kurogiken kami kènè. 7:10 Ai ikerrohken bonek atè bai Dèbata nai ngo gabè lot pertobaten asa mi kelluahen, janah oda peselsel jelma kerna naidi. Tapi ukum bonek atè i dunia èn nai mengkerrohken kemmatèen ngo i. 7:11 Peratè-atèken kènè lebbè bonek siroh bai Dèbata nai, otang gabè ikerrohken i ngo bai ndènè lako pecihoken simellètuk! Ai moyang ngo atè ndènè midah dosa, gabè mbiar mo kènè, ntedoh mo kènè, gabè nggasang ngo kènè, gabè uè mo kènè menghukum kalak simersalah! Ibas karina simasa persoalen i, enggo ituduhken kènè diri ndènè oda mersalah. 7:12 Jadi kutenges pè surat idi taba kènè, oda ngo kumarna kalak sienggo mersalah i, oda ma ngo kumarna kalak sienggo susah kumarna kessalahenna idi. Kusurat pè idi asa gabè ntarar ngo i hadeppen Dèbata, bakunè belgahna pennarihen ndènè taba kami. 7:13 Idi ngo memmaing nggasang ukur nami. Oda pellin nggasang kessa tupèh, muat lolona ngo atè nami mengidah nggasangna atè si Titus; ai enggo ipegasang kènè ukurna, alè dengan. 7:14 Enggo kin ngo kupoji-poji kènè meradepkensa. Tuahna mo, oda termèla aku ibaing kènè. Ai tuhu ngo karinana sienggo kuranaken kami bai ndènè. Bagi ma ngo terrèngèt pemoji nami taba kènè mendahi si Titus, tuhu ngo karinana. 7:15 Asa ukum bagèndari enggo makin mbelgahna kelleng atèna midah kènè, ai ièngèt ngo penguèi ndènè mi sinidokkenna janah bakunè penjalo ndènè bana merdengan hormat janah patuh. 7:16 Lolo kalohoon atèngku, ai ibas karinana ngo kènè ndorok kettoken.
8:1 Kènè alè dengan, kubagahken ma mo taba kènè bakunè sellohna ibakin Dèbata mendahi kuria Makedonia. 8:2 Ioji ngo kalak i merkitè pengunjunen kepersuken mbotong kalohon. Tapi ibagasen kinipersuk idi, mersampang atè ngo kalak i memerrèken pengurupiin bai sidèbaan, tukasi pè ncoor kalohoon ngo kalak idi. 8:3 Ndorok ngo kupastiken iberrèken kalak i ngo nasa terbakin kalak i, dèba lebbih tupèh ibas gegohna nai, oda pella isè lot mennuruh. 8:4 Memmes ngo ipidoken kalak i bai nami, mula ndorok asa dekket kalak i memerrèken pengurupiin bai ummat Dèbata ni Judèa. 8:5 Iurupi kalak idi ngo merkitè niberrèkenna, oda kumarna kuharapken kami bai kalak i nai kin, tapi kumarna enggo perlebbè isohken kalak i dirina mi Tuhan i, nai mendahi kami ma, rembang mi hendak Dèbata. 8:6 Kemmulihkenna idi ngo asa kudokken kami taba si Titus -- simentebbennai bahaan idi -- asa i tengah-tengah ndènè pè iterusken bahaan merandal i. 8:7 Merkesurungen ngo kè alè dengan ibas karinana, ibas kepercayaen, ibas mengeruapken isi ukur, perbinettohen, ngkasah merrusaha, dekket pengkekelengi ndènè mendahi kami. Jadi ibas ulaan merandal èn pè naing mo lot ma kesurungen ndènè. 8:8 Kudokken katangku èn, oda ngo dosken perèntah. Tapi magahken bakunè pengkerencetken dengan i mengurupi denganna, jadi naing ngo kubettoh bakunè belgahna kelleng ndènè. 8:9 Ai ibettoh kènè ngo bakunè pengkekelengi Jesus Kristus Tuhanta i banta: Kaya kin ngo ia tapi gabè ibaing ngo diriNa ncoor, asa gabè kaya kènè kumarna kinicorNa i. 8:10 Ukum katèngku, patut ngo i ulanken ndènè bagè sienggo imulai kènè mengulaken bagidi tahun buari, ai kènè ngo mula-mula mengulaken bagidi. Memmikiri lako mengulaken bagidi pè, bai ndènè nai ngo rohna. 8:11 Asa bagèndari pè bakin kènè mo tong bagidi tosè ninggat gegoh ndènè. Jadi naing mo nggasang kènè pepulken usaha idi, bakunè kin nggasang ndènè mengerencanaken i. 8:12 Mula lot ngo sura-sura ndènè naing memerrèken, ijalo Dèbata ngo siniberrèken ndènè idi merguru mi lotna bai ndènè, oda merguru mi siso lot bai ndènè. 8:13 Oda ngo lot sura-surangku sendiri, asa gabè maluah dèba dengan i ibas tanggung jababna, lako maingken mberrat bai ndènè kubaing. Tapi kennah merdos ngo. 8:14 Tapi kumarnaken kelloten ngo kènè bagèndari, patut ngo kènè menampal sikurangna bai kalak idi. Ipodi ari tah bakunè kurangen ma kènè, kalak idi enggo kelloten nola, tentu iurupi kalak idi ngo kènè. Merkitè bagi kacimbang mbellahna mersikebbasen. 8:15 Rembang mi sitersurat, "Kalak simercinari mbuè oda pella merlebbih-lebbih, janah kalak siso sadikè cinarina, oda pella kurangen." 8:16 Kudokken kami mellias atè taba Dèbata, kerna enggo Iberrèken nggasang ni ukur sibagidi taba si Titus lako mengurupi kènè. 8:17 Ai oda pellin iuèi si Titus pengidoon nami, tapi mertuhu-tuhu ngo ia lako mengurupi kènè, ai ibas ukurna nai ngo mendokken laus ia mendahi kènè. 8:18 Rebbak dekketsa kuutus kami ma ngo sada kalak dengan siterpoji i gennep kuria kumarna ulanna mennukutken Sukuten Kelluahen bai Dèbata nai. 8:19 Ninganna i ma, ipilih Kuria i ngo ia lako mendengani kami mi perdalanen nami, ai naing berkat mo kami lako mennaruhken pengurupiin i, mahan kemmuliaan Tuhan i, janah asa idah kènè ma, kami pè nggasang ngo mengurupi. 8:20 Mermanat ngo kami asa ulang lot mennalahken kami ibas pesakatken tumpak pengurupi simbelgahna. 8:21 Ai dok atè nami bujur kubakin kami oda pellin i hadeppen Tuhan i, tapi kennah dekket ngo i hadeppen jelma pè. 8:22 Rebbak dekket si Titus bang dengan i, kupasulak kami dèng ma ngo sada kalak nai dengan sidèban. Enggo barang piga-piga kali kuoji kami ia, janah ketteridahenna nggasang ngo ia mengurupi. Bagèndari pè terruluk ngo nggasangna mengurupi kènè, ai tok kalohon ngo atèna midah kènè. 8:23 Ukum si Titus denganku ngo ia, rebbak mengula lako mengurupi kènè. Nai denganku sirebbakken dekketsa idi, sinipilih kuria ngo ia, mahan pemoji-mojiin mi Kristus. 8:24 Harap ngo aku asa tuduhken kènè taba kalak idi sènteng kelleng atè ndènè, asa karinana kuria memettoh, ngkelleng ngo atè ndènè midahsa janah asa tuhu karinana sikupojiken bai ndènè idi.
9:1 Situhunna ukum terrèngèt pengurupiin taba ummat Dèbata ni Judèa, oda pella sadikè perluna kusuratken bai ndènè. 9:2 Ai kubettoh ngo ukum kènè nggasang ngo mengurupi bagè sienggo kubagah-bagahken taba kalak Makedonia. Ai kubagahken ngo bai kalak idi, ukum kènè per Akhaya, i tahun buari nai ngo kènè dak enggo memerrèken pengurupiin; janah kemmulihken nggasang ndènè i, enggo mo kèkè dèba perrukuren kalak idi. 9:3 Bagèndari kupasulak ngo si Titus rebbak dekket denganna dua kalak nai mendahi kènè, asa karinana sienggo kupojiken terrèngèt kènè, naing mo nemmu tuhu. Enggo mo nemmu kebbas kènè ai enggo kudokken kin taba kalak idi, ukum kènè tettap ngo kebbas mi ulaan i. 9:4 Asa tah bakunè lot kalak Makedonia dekket rebbakken aku sikali èn mendahi kènè, keppèken oda dèng kebbas kènè, nang alè nang, soh mo mèlana kuakap, ai enggo sanga kudokken kami, tok ngo kami ukum bai ndènè! Janah kènè pè mèla ma ngo! 9:5 Idi ngo sebabna asa lebbèen kupasulak dengan èn mendahi kènè, lako pepulungken pengurupiin sienggo nidokken ndènè i kin. Kubakin bagidi asa roh kessa aku, enggo pulung kudapet. Merkitè bagidi terridah mo pemmerrèken ndènè i, ibas nienjar ukur ndènè nai ngo lako merrèken, oda kumarna terpaksa. 9:6 Èngèt mo! Simengardangken cituk, cituk ma ngo perraninna; tapi simengardangken mbuè, mbuè ma ngo perraninna. 9:7 Gennep mo memmerrèken ibas nienjar ukurna nai. Ulang mo malang atèna barang pè kumarna terpaksa. Ai ngkelleng ngo atè Dèbata midah kalak simersampang atè memmerrèken. 9:8 Merkuasa ngo Dèbata memmerrèken bai ndènè pasu-pasu mertinèncuk, asa tuk bai ndènè janah merlebbih-lebbih tupèh lako memmakin mendè. 9:9 Ai tersurat ngo ibas Bibèl bagèen: "Ipemberrèken ngo mendahi kalak sincor, menettap ngo mendè basaNa soh mi amman sumendah." 9:10 Ipèmaken Dèbata ngo bennih taba kalak simardang, bagi ma ipèmaken pangaan banta, Dèbata ma ngo pejadiken dekket pegandaken barang kadè niardangken ndènè, asa makin mbuè buah pennarihenmu simermasèh atè i. 9:11 Merkitè bagidi kaya mo kènè ibas karinana, gabè dakdak mo kènè memerrèken ibagasen sampang atè. Janah kemmulihken pemmerrèken ndènè sikubagi-bagiken i, mengkerohken mbuè kalak mendokken lias atè taba Dèbata. 9:12 Kerna simendè nibakin ndènè idi, oda pellin asa cukup bai ummat Dèbata sambing, tapi mengkerrohken nterrem kalak mendokken lias atè mi Dèbata. 9:13 Janah kumarna perrulaan ndènè mendè nituduhken ndènè i, gabè mèduk kalak Kristen i Judèa memmoji Dèbata, kerna idah kalak i ngo penguèen ndènè i Sukuten Kelluahen terrèngèt Kristus nikepercayaen ndènè i. Bagi ma kerna sampang atè ndènè memmerrèken taba kalak i dekket sidèban, kadè silotna janah ndorok bakinen ndènè. 9:14 Nai kalak idi pè isodipken mo kènè ibagasen kellengna mengidah kènè, kumarna basa-basa ni Dèbata sienggo ijalo kènè. 9:15 Sidokken mo mellias atè bai Dèbata, kumarna niberrèkenNa simertinèncuk idi.
10:1 Bagèndari aku si Paulus, lot naing dokkenenku taba kènè. Idokken dèba ukum aku nina melamlam tikan hadep abè dekket kènè, tapi berrani nina, mula peddaoh-daoh. Jadi kumarna lamlam dekket mendè atè ni Kristus, 10:2 kupido bai ndènè, ulang mo paksa kènè aku memmaing kasar taba kènè, roh kessa aku sikali èn. Ai enggo kusura-suraken, tegas mo aku sikali èn taba kalak simendokken, "lot nina tujuun nami terrèngèt dunia èn." 10:3 Tuhu nggelluh dèng ngo kami i tanoh èn, tapi oda bagè tanoh èn pemmaing nami. 10:4 Ai oda ngo i dunia èn nai sinjata nami, tapi sinjata bai Dèbata nai ngo janah mergegoh lako mengerumpakken pertahanen kejelmaan, kupesiding kami ngo persiroon-persiroon, 10:5 kurumpakken kami ngo nasa ukur ntudak simengilakken sibennar bai Dèbata nai. Kutaban kami ngo pikiren ni dèba, janah gabè penguèi kalak i taba Kristus. 10:6 Asa mula enggo seppè penguèi ndènè, enggo mo kebbas kami bagèndari lako menghukum kalak siso menguèi idi. 10:7 Naing mo bettohen ndènè keadaan sebenarna. Mula percaya ngo kalak i milik Kristus ia, kennah iperrèso mo dirina janah ibettoh mo; kami pè milik Kristus ngo bagè ia. 10:8 Ai oda ngo pella termalu kami mula buèen kupoji-poji kami siniberrèken Tuhan i bai nami, ai iberrèken pè bai nami kuasa i, lako pehèdu-hèduken kènè ngo, oda lako mencèdaken. 10:9 Oda ngo lako pebiar-biarken kènè aku merkitè suratku idi. 10:10 Idokken dèba ngo, "Surat-surat si Paulus ntegas ngo janah merseppuh, tapi mula i tengah-tengahta ia ndotè ngo ia janah oda mernidok ranana!" 10:11 Kalak sibagidi satdar mo ia bagèndari nai, mula roh kessa kami sikali èn, kubaing kami mo tosè bagè sienggo kusuratken kami ibagasen surat idi. 10:12 Tentu oda pang kami lako pedosken diri nami dekket kalak simengètong dirina enggo ndates. Ai moto ngo kalak i mula dirina ibakinken alat persukaten mi samah denganna. 10:13 Ukum kami oda uè bagidi. Mula pè kupoji kami diri nami, lot ngo batasna. Tettap ngo kami ibagasen batas sienggo itentuken Dèbata bai nami. Kènè pè alè dengan dekket ngo ibagasenna idi. 10:14 Jadi, mula roh kami mendahi kènè merembah Sukuten Kelluahen terrèngèt Kristus, oda ngo kulausi kami baleng bekkas ulaan nami i, kerna kènè pè ibagasenna idi ngo. 10:15 Oda ngo gabè gegah kami kumarna perrulaan sidèban i i ruar sienggo nitentuken Dèbata. Tapi makin gandana mo ulaan nami i tengah-tengah ndènè, asa makin mertambah-tambahna kepercayaen ndènè, tapi tong mo ibagasen sienggo itentuken Dèbata bai nami. 10:16 Merkitè bagidi, terbakin kami mo mennukutken Sukuten Kelluahen i mi nagerri sidèban, siso pella memmoji-mojiken diri ibas ulaan i bekkas nagerri sidèban. 10:17 Ibas Bibèl tersurat, "Barang isè gegah, ibagasen Tuhan idi mo ia gegah." 10:18 Ai kalak siterpoji, imo kalak sienggo nipoji Tuhan i, oda ngo kalak simemmoji dirina.
11:1 Selloh ngo lebbè mula idengkohken kènè sigejap kemmotonku sicituk ènda. 11:2 Nteddoh kalohoon ngo aku midah kènè, bagè Dèbata sendiri pè nteddoh midah kènè. Codi ngo kènè bagè simerbaju tertatakken rambu-rambu dèng, sienggo kuuèken kabin ia mi sada kalak sinibalèna, imo Kristus. 11:3 Tapi sangsi aku, tah bakunè mulak matah pikiren ndènè gabè oda metemman taba Kristus, tosè bagè si Hawa arnia, tergoda ibakin taki-taki bècuk nipè i. 11:4 Ai rupana sennang ngo kènè menjalo kalak siroh mengajarken terrèngèt Jesus sidèban -- laèn dari pada Jesus sienggo ipetandaken kami bai ndènè i. Janah ijalo kènè ma ngo "tendi" dekket "sukuten kelluahen" siso tosè bagè Tendi Dèbata dekket Sukuten Kelluahen sienggo nijalo ndènè bai nami nai. 11:5 Oda ngo kètèken aku asa rasul-rasul ndènè simahantu i! 11:6 Tah bakunè kurang pandè aku mengerrana, tapi ukum perbinettohen terrèngèt Dèbata, oda ngo moto aku. Enggo kutuduhken kami i bai ndènè ibas karinana. 11:7 Tikan kusukutken Sukuten Kelluahen bai Dèbata nai mendahi kènè, oda lot kupido bai ndènè nai mahan belanjangku giam cituk pè, merkitè bagidi kupecerrep ngo diringku, asa gabè ndates kènè. Jadi salah ngo aku merradepken kènè ndia kumarna bagidi? 11:8 Ai sinderrang mengula aku i tengah-tengah ndènè, bai kuria sidèban nai ngo belanjangku. Terdokken rogi kubaing kuria sidèban, asa ndorok mengurupi kènè. 11:9 Mula pè kurangen belanja aku tikala i, oda lot barang isè bai ndènè nai kususahi, ai barang kadè kekurangen bangku mènter ngo isediaken dengan siroh i Makedonia nai. Dak kujaga ngo asa ulang kususahi kènè i barang kadè pè dekket barang i dikè pè kènè, janah dak kubakin ngo bagidi soh mi podiin èn. 11:10 Kumarnaken peddah Kristus silot bangku i, oda ndorok murak kebangganku barang i dikè pè i suberri Akhaya. 11:11 Kasa kudokken bagidi? Kumarna oda ngo ngkelleng atèngku midah kènè? Ibettoh Dèbata ngo ngkelleng atèngku! 11:12 Sikuulaken bagèndari i, kuulaken ngo bagi mi podiin èn, asa ulang lot cidalihen rasul-rasul sidèban i lako gegah ninganna idokken, dos ngo nina pengulanken kalak i dekket aku. 11:13 Kalak sibagidi mo rasul-rasul palsu, pengula sipakulah-kulahken, rasul-rasul Kristus ia nina. 11:14 Oda pella lengang kita i si, ai Sibolis pè ipakulah-kulah ngo bagè malaèkat kecihuren i! 11:15 Jadi oda pella lengang kita mula ipakulah-kulah naposo Sibolis bagè naposo simengulaken nipergeddo Dèbata. Ujungna ijalo kalak idi rembang bagè perulanna i. 11:16 Kuulaki sikali nai mendokken: Ulang lot merdokatè, moto aku. Tapi ukum bagidi tong anggapen ndènè, jalo kènè mo aku simoto èn, asa terpoji aku diringku cituk. 11:17 Kudokken mo lebbè kebangganku. Tapi oda ngo Tuhan i mendokken bangku. Tapi bagè sada kalak simoto mo lebbè aku. 11:18 Nterrem ngo kalak gegah kumarna dunia èn, jadi aku pè gegah ma mo cituk. 11:19 Ai sobar ngo kènè mengidah simoto, ai dokatè ndènè pandè ngo kènè! 11:20 Mula iperhamba dèba kènè, barang pè gabè pencari-carina janah gabè perlabanna, janah datessen ia katèna, pang memmarap kènè, gabè ijalo kènè mo sibagidi. 11:21 Mèla ngo kuakap mendokken èn, ai kalak ndotè ngo kami mengulaken bagidi. Tapi kadè siniggegahken dèba, pang ma ngo aku menggegahken! (Bagè rana simoto ngo ranangku èn.) 11:22 Kalak Heber ngo kalak idi? Aku pè kalak Heber ma ngo! Kalak Israel ngo kalak idi? Aku pè kalak Israel ma ngo! Pemparen si Abraham ngo kalak idi? Aku pè bagi ma ngo! 11:23 Naposo Kristus ngo kalak idi? Dengkohken bagè rana siso merpendèngèt ngo enggo ranangku, tapi terlebbih ngo pengkebasingku bai kalak i nai karina! Ai lejaan ngo aku mengula asa kalak i; nggati ngo aku ikurung, nggati ngo aku isiksa janah nggati ngo naing matè. 11:24 Enggo lima kali aku isiksa kalak Jahudi, ibetbet tellupuluh sibah kali. 11:25 Tellu kali aku ipekpekki kalak Roma, pennah ngo aku ibentiri dekket batu, tellu kali aku mengalami naing karam i laut, sikali aku mombang-ombang i laut duapuluh empat jom dekkahna. 11:26 Nggati ngo aku mermara i perdalanen; mermara ibas laè mengeraja, mermara ibaing pennamun, mermara ibaing Jahudi dekket kalak siso Jahudi pè, mermara i kuta, mermara i ruar kuta, mermara i laut dekket mermara i tengah-tengah kalak simengaku dirina Kristen, keppèken oda. 11:27 Dak ngo kureppuk tulanku mengula ibagasen kesusahen, nggati maker matangku kumarna oda meddem, muasen janah mellèhè, nggati rapar, bergohen kerna oda lot oles, janah oda lot bekkas merrian. 11:28 Laènkenna idi, suntuk ari ngo aku dakdak kekelsohen memmikirken karina kuria. 11:29 Mula lot ndotè, aku pè gabè ndotè, mula lot ndabuh mi dosa mellala ngo atè-atèngku. 11:30 Mula kennah gegah mo aku, mergegahen ngo ketteridahen ibas kinindotèngki. 11:31 Oda luap aku; Dèbata, Bapa Tuhan Jesus ngo saksi! Terpoji mo gerarNa soh mi amman sumendah. 11:32 Tikan i Damaskus aku, lot ngo i sidi sada kalak Gubèrnur memerèntah i terruh kuasa Raja Aretas. Ipasulak ngo soridadu menjaga kuta i, lako menangkup aku. 11:33 Tapi ibagasen sada kirang itontonken dengan i ngo aku lako mi terruh arap ruang pagar. Gabè maluah mo aku i sidi nai.
12:1 Nemmuken oda ngo lot barang kadè labana gegah. Tapi lemmo ngo atèngku menggegahken nipacidah Dèbata bangku arap alamat bak alaten. 12:2 Lot mo kutandai sada kalak Kristen, icukung mi bekkas sindatesna i sorga, imo sipuluh empat tahun sienggo leppas (tah ibagasen dagingna ia tikan icukung i barang i ruar dagingna, oda pella kubettoh -- Dèbata ngo mettohsa.) 12:3 Kudokken sikali nai: Kubettoh ngo icukung ia mi Paradaiso (Tah ibagasen dagingna ia tikan icukung i barang tah merupaken alaten sambing, oda pella kubettoh -- Dèbata ngo memmetohsa.) 12:4 Idengkoh kalak i ngo i sidi terrèngèt perkataan siso tellap iranaken jelma, janah oda ma ipadiat iranaken jelma. 12:5 Ia ngo sikupeppoji-poji, oda ngo diringku. Ai ukum terrèngèt diringku, pellin ketteridahen kinindotèngku i ngo kugegahken. 12:6 Asa mula pè kugegahken diringku, oda uè aku bagè pembual, merkata luap; situhunna i ngo kuruapken. Tapi kuorom ngo i, asa ulang laèn aku idah dèba ibas sienggo niidahna kuulaken, barang pè sienggo idengkoh kuranaken. 12:7 Tapi asa ulang gabè jukkatsu aku kumarna alaten-alaten sikuidah i, ibakin ngo mersakit aku bagè rumang perkitèen alat Sibolis. Sakit idi mo ibakin lako menendel aku, asa ulang gabè sombong aku. 12:8 Tellu kali mo aku enggo mersodip mi Tuhan, asa nemmuken iagoi sakit idi bangku nai. 12:9 Tapi ialoi Tuhan i ngo, "Ngkelleng ngo atèngku midah kono, janah cukup mo i bamu; ai tikan ndotè kono isi mo roh kuasangKu simergegohna." Kerna i ngo asa kupoji diringku ipas kendotèenku idi, ai mula ndotè aku, tikanna bagidi ngo kuakapken roh Kristus mengurupi aku dekket kegegohenNa. 12:10 Jadi lolo ngo aku mula pè ndotè aku. Lolo ngo aku mula pè ilèai dèba aku, barang pè mula susah kuakap, barang mula iletlet dèba aku, barang pè mula mpersah kuakap kumarna Kristus. Ai tikan ndotè idi aku, isidi mo aku gabè mergegoh. 12:11 Enggo gabè dosken kalak moto aku -- tapi kènè ngo menessakken aku asa gabè bagidi, kènè kin ngo nemmuken memmoji aku. Ai oda pè kadè lapatenku, tapi oda pella talu aku dempak rasul-rasul ndènè simahantu i! 12:12 Enggo mo nemmuken nibaing tanda-tanda kellengangen merkitè-kitè kebingiten taba kènè, magahken tuhu ngo aku rasul. 12:13 Ibas kadè mo kènè mak niperdatèken mertimbangken kuria sidèbanna idi? Pellin, oda kususahi idi mo kessa kènè lako memelanjoi aku. Ampuni kènè mo kessalahenku idi! 12:14 Enggo pella petellu kaliken aku kebbas lako mendahi kènè, janah oda kususahi kènè, ai oda ngo harta ndènè i perlu bangku, tapi diri ndènè i ngo. Ai oda ngo patut dukak-dukak mennarihken pangaan partuana, tapi partuana ngo mennarihken pangaan dukak-dukakna. 12:15 Kernana i, sampang ngo atèngku mengururi, barang soh nola pè diringku kugiaken lako mengkepkep kènè. Bagi mo ngkelleng atèngku midah kènè, ai patut nola mo kurang ngkelleng atè ndènè midah aku? 12:16 Ipertuhu kènè ngo oda nung kènè kususahi. Tapi lot ngo mendokken perakkal-akkal nina aku; ai buèen nina perlabaenku bai ndènè nai kumarna akkal-akkalku idi. 12:17 Idikè mo tuhu i! Lot ngo perlabanku bai ndènè nai kumarna kupasulak i utusenku mendahi kènè? 12:18 Kupasulak ngo tuhu si Titus mendahi kènè, janah kupasulak ma ngo dengan Kristen sidèbankenna i rebbak dekket ia. Lot ibuat si Titus perlabaan bai ndènè nai? Ai rebbakken mengual ngo kami, janah bagè aku ngo ia i perrukuren dekket i pertendiin pè! 12:19 Tah lot sura-sura ndènè sidekkahna èn, bagè cara kupènterri kami diri nami merradepken kènè? Oda ngo bagi! Alè sinikekellengen! Ibettoh Dèbata ngo karina sikuruapken kami bai ndènè idi, tosè mi lemmo atè ni Kristus ngo i kuruapken kami. Karinana sikubakin kami i lako pehèdu-hèduken kènè ngo i. 12:20 Ai mbiar ngo aku tah bakunè oda kudapet kènè ipas pekkirohku sikali èn tosè bagè sikuharapken kin, janah aku pè tah oda ma bagè niharapken ndènè. Tah bakunè nola lot perselisihen, nangis atè, pungur, pegulut, merkata tondal, jukkat dekket maing gontar. 12:21 Mbiar aku tah bakunè ipeterruh Dèbata sikuuèi i nola aku i hadeppen ndènè tikan roh i aku mendahi kènè. Tah bakunè pella nola kutangisi sienggo merdosa i, kumarna oda mobah idi dekket oda ipettadi pengelakona luhlah idi, bak perbuatenna simellamun janah siso patut i.
13:1 Èn mo petellu kaliken aku roh mendahi kènè. Ibas Bibèl tersurat ngo "Mula lot dua barang tellu saksi, ndorok mo iputusken perkara i." 13:2 I pekkirohku pedua kaliken tikala i, enggo kupesèngèt karinana simengulaken dosa bak mi dengan pè. Ukum bagèndari tikan peddaoh-daoh dèng aku dekket kènè, kupesèngèt mo kènè; mula roh aku isè poda maluah sikali èn ibas hukumen nai. 13:3 Nai dapet kènè mo karina bukti siniperluken ndènè magahken tuhu-tuhu ngo Kristus mengerrana merkitèken aku. Mula sanga Kristus memmakin barang kadè taba kènè, oda ngo alang-alang Ia pecidahken kuasaNa taba kènè. 13:4 Tuhu bagè ndotè ngo Ia tikan ipersilangken idi, tapi nggelluh ngo Ia bagèndari kumarna kegegohen Dèbata. Ndotè ma ngo bang kami pè, kumarna ibagasen Kristus kami nggelluh, tapi ukum lako pesèngètken kènè mergegoh ngo kami rebbak dekket Kristus kumarna kegegohen dekket kuasa Dèbata. 13:5 Oji kènè mo diri ndènè janah perdatèken kènè, tah tuhu-tuhu ma ngo kènè nggelluh tosè bagè pengkepercayai ndènè mi Kristus! Oda ngo satdar kènè, Kristus Jesus ngo ibagasen kènè? -- Laèn mo mula kepercayaen ndènè i oda tuhu-tuhu kepercayaen. 13:6 Kuharapken ngo asa bettohen ndènè, kami pè mennahen ngo ibas pengunjunen. 13:7 Kusodipken kami ngo mi Dèbata, asa iurupi kènè ulang mersalah nèngè. Oda ngo mendokken enggo pandè janah enggo tau kami, tapiasa iulaken kènè ngo lemmo atè Dèbata -- tukasi pè oda tau kami idahen. 13:8 Ai oda terbakin kami mengulaken simerralo bai Dèbata. Kennah kuuèi kami ngo nipergeddo atè ni Dèbata. 13:9 Lolo ngo kami mula ndotè kami, janah mula mergegoh kènè. Kusodipken kami ngo asa gabè ntegguh ukur ndènè. 13:10 Kerna naidi ngo asa kusuratken surat èn bai ndènè sinderrang oda dèng roh aku mendahi kènè, asa mula enggo kessa soh aku mendahi kènè, ulang pella nèngè ngkerrassu pemincangku taba kènè mengasangken kuasa niberrèken Tuhan i bangku lako pehèdu-hèduken kènè, ulang mo lako mencèdai. 13:11 Èn pè alè dengan! Dak nggasang mo atè ndènè, janah uè mo kènè pehèdu-hèduun asa gabè ntegguh. Jalo kènè mo peddah janah sipesèngètku èn. Sada ukur mo kènè janah mersada ibagasen kedamèen. Idengani ngkelleng atè dekket damè ni Dèbata mo kènè. 13:12 Mersisalamen mo kènè ibagasen ngkelleng samah-samah Kristen. Karinana ummat Dèbata mennengesken salam mendahi kènè. 13:13 Katerra pè, Tuhan Jesus Kristus mo memmasu-masu kènè, bagi ma ngo masèh atè Dèbata. Tendi Dèbata mo mendengani kènè karinana! Tabe nami, Paulus
1:1-3 Kènè karinana kuria silot i Galatia. Aku si Paulus dekket karina dengan Kristen sirebbak dekket aku mengharapken, dak ipasu-pasu Dèbata Bapanta dekket Tuhan Jesus Kristus mo kènè, janah iberrèken bai ndènè kedamèen. Gabè rasul pè aku oda ngo kumarna ipilih jelma barang pè merkitè-kitè jelma, tapi ipebangkit Jesus Kristus dekket Dèbata Bapanta sienggo pegelluhken Jesus Kristus mengolihi i kematèen nai idi ngo. 1:4 Lako mengèkutken lemmo atè Dèbata Bapanta, ipesakat Kristus ngo diriNa mimkematèen kemulihken dosa-dosanta, asa ipaluah kita ipas kejahaten idi nai. 1:5 Terpoji mo Dèbata soh mi amman sumendah. Amèn. 1:6 Lengang ngo aku midah kènè alè dengan! Idilo Dèbata ngo kènè kumarna masèh atè Kristus, keppè bagèndari bagi nola mo ndorna kènè menondali Dèbata, gabè laus kènè mengèkutken sukuten sidèban. Laèn dari pada Sukuten Kelluahen bai Dèbata nai. 1:7 Situhunna oda ngo lot 'sukuten kelluahen' sidèban. Mula pè isukutken sidèban siroh mendahi kènè 'sukuten kelluahen' terrèngèt Kristus laèn dari pada Sukuten Kelluahen sienggo kusukutken kami bai ndènè gabè pepèolken penarihen ndènè ngo i. 1:8 Kalak simenukutken 'sukuten kelluahen' laèn dari pada sienggo kusukutken kami, ihukum Dèbata mo nemmi sibagidi; barang tah kami pè i barang malaèkat i sorga nai pè i! 1:9 Bagè sienggo kudokken bai ndènè tikala i, bagèndari pè kudokken dèng ma mo bai ndènè sikali nai: Barang isè kalak menukutken taba kènè 'sukuten kelluahen' laèn dari pada Sukuten Kelluahen sienggo nijalo ndènè bai nami nai, ihukum Dèbata mo ia! 1:10 Mada ngo merkitè bagidi gabè kuharapken nola asa iakkui jelma? Oda ngo! Ukum sikuharapken, imo asa iakkui Dèbata. Mada ngo kutulusi bagè cara muat-muat ukur jelma asa sennang atèna midah aku? Ukum bagi ngo, oda tuhu aku naposo Kristus. 1:11 Kennah bettohen ndènè ngo alè dengan, ukum Sukuten Kelluahen sikusukutken idi, oda ngo sukuten bai jelma nai. 1:12 Oda ngo bai jelma nai kujalo sukuten idi, janah sada kalak ma poda mengaajarken i bangku, Jesus Kristus sendiri ngo mennukutken i bangku. 1:13 Tentu enggo idengkoh kènè tersèngèt aku, bakunè aku tikala i sebagè sada kalak peragama Jahudi. Ibettoh kènè ma ngo bakunè gasa-gasanku taba kuria Dèbata, janah bakunè carangku lako petumpatken kuria i. 1:14 Ukum mengèkuti hatoren agama kalak Jahudi tikka ngo aku bai Jahudi denganku sisada nterbang nai. Tikka ma ngo penggegohingku lako menguèi adat empung nami. 1:15 Tapi kumarna mendè basa Dèbata, Ipilih Dèbata ngo aku bang sinderrang madèng kin pè hana aku, janah idilo ngo aku lako menandai bak mengkebasiSa. 1:16 Gabè ipetarar Dèbata ngo AnakNa taba aku asa kubagahken Sukuten Kelluahen tersèngèt AnakNa i bai kalak siso Jahudi. Sinderrangna i pè, oda lot mengido ajar aku barang bai isè pè. 1:17 Oda ma ngo laus aku mi Jerusalem mendahi kalak sienggo perlebbè gabè rasul dari pada aku. Tapi mi nageri Arab ngo aku laus, i sidi nai balik mo aku mi Damaskus. 1:18 Tapi enggo kessa tellu tahun, laus mo aku mi Jerusalem lako mersitandaan dekket si Petrus. Sipuluh lima ari dekkahna rebbaksa aku. 1:19 Oda lot pesimbak aku dekket rasul-rasul sidèbankenna i, laènken pellin si Jakobus anggi Tuhan Jesus i ngo kessa. 1:20 Tuhu ngo sikusuratken èn. Oda luap aku. Ibettoh Dèbata ngo i! 1:21 Enggo kessa i, laus mo aku mi nagerri bak kuta silot i aur Siria bak Kilikia. 1:22 Soh mi katika i, oda dèng ngo itandai kalak Kristen ni Judèa ukum abèngku. 1:23 Pellin rana dèng ngo kessa idengkoh iranaken dèba, "Kalak simengeletlet kami tikala i, enggo gabè menukutken kepercayaen sinaing petumpatenna tikanna i kin." 1:24 Nai ipoji kalak i mo Dèbata kemulihken aku.
2:1 Enggo kessa leppas sipuluh empat tahun, balaik mo aku mi Jerusalem dekket si Barnabas, kuarahken ma mo bak si Titus. 2:2 Janah perlausku mi Jerusalem i pè, kumarna lot ngo alamat bai Dèbata nai mendokken kennah laus aku mi sidi. Janah ibas sada runggu pellin kami dekket pengendeng-pengendeng nisidi, kubagahken mo tersèngèt Sukuten Kelluahen sienggo kusukutken bai kalak siso Jahudi. Kerna oda lemmo atèngku magosia kelejanku tikala i bang pè mi podiin èn. 2:3 Si Titus simendengani aku kalak Junani ngo ia. Tapi tukasi pè bagidi, oda ngo ipaksa ia kennah mertakkil, 2:4 kasi pè lot dèng menggegohken, imo dengan so dengan, pesamak-samakken dirina masuk mendirip-ndirip lako mengenggep kebèbasen silot banta ibagasen Kristus Jesus. Ai naing ngo dok atèna, iarahken kita mengolihi gabè hamba bagè sitikala i, 2:5 tapi singkerjep mata pè oda tunduk kami bai kalak i, asa tong hot kebennaren Sukuten Kelluahen i bai ndènè. 2:6 Tapi tukasi pè bagidi, oda lot kadè itambahi pengendeng sitergerar i mi sienggo lot kin bangku -- ukum bangku oda lot kadè kalihna, tergerar pè kalak i barang oda, ai oda ngo mengidah-ngidah rupa Dèbata. 2:7 Tapi mengaku ngo kalak sitergerar i, Dèbata ngo merrèken ulaan i bangku lako menukutken Sukuten Kelluahen i taba kalak siso Jahudi, tosè bagè si Petrus lako magahken Sukuten Kelluahen i taba kalak siso Jahudi. 2:8 Kerna Dèbata sienggo merrèken ulaan i bai si Petrus imo ulaan kerasulen mendahi kalak Jahudi, Dèbata ma ngo merrèken bangku ulaan kerasulen mendahi kalak siso Jahudi. 2:9 Si Jakobus, si Petrus dekket si Johanes, kalak idi mo dokkenken huntuun pengendeng kuria, mengaku ngo kalak i Dèbata ngo merrèken bangku sibasa-basa i. Nai bagè isalam kalak i mo tangan si Barnabas bak tanganku bagè tanda persaoren nami, magahken kami mo laus mendahi kalak siso Jahudi, janah kalak i mo mi tengah-tengah kalak Jahudi. 2:10 Tapi sada ngo kessa ipergeddo kalak i bai nami nai, imo asa kuperdatèken kami kalak sincoor. Janah nggasang ngo atèngku mengulaken i. 2:11 Nai sinderrang roh si Petrus mi Antiokhia, tompel ngo ia kualo, kerna lot salahna. 2:12 Ai tikan madèng roh pasulaken si Jakobus, rebbak kundul ngo ia mangan dekket dengan siso kalak Jahudi. Tapi roh kessa mo kalak idi, mènter ipedaoh mo dirina bai dengan siso Jahudi nai; oda nèngè uè ia rebbak mangan dekket kalak i, ai mbiar ia midah kalak simendokken; kennah mertakkil ngo nina kalak siso Jahudi. 2:13 Kalak Jahudi sidèbankenna i pè munafik ma mo bagè si Petrus i, bagi ma ngo dekket si Barnabas pè, gabè terrèkut-èkut bagè kalak i. 2:14 Nai kuidah kessa mo oda nèngè sènteng kalak i bagè kebennaren Sukuten Kelluahen i, ningku mo mbang si Petrus, i hadeppen karina jelma silot ni sidi, "Mula kono sada kalak Jahudi, enggo bagè kalak siso Jahudi, kasa ipaksa kono nola bagèndari kalak siso Jahudi kennah bagè kalak Jahudi?" 2:15 Ukum mengèkutken pertubuh kalak Jahudi ngo kami; janah oda ngo "kalak siso Jahudi simerdosa i." 2:16 Tapi tukasi pè bagidi kubettoh kami ngo, asa gabè mendè nola mengolihi persaoren jelma dekket Dèbata kennah percaya ngo ia bai Jesus Kristus, oda ngo kumarna idalanken hatoren pati-patiin i. Ai kami pè, lebbè percaya ngo kami bai Jesus Kristus asa gabè mendè nola kami mersaor taba Dèbata, oda ngo kumarna kudalanken kami hatoren pati-patiin i. Ai ukum mendalanken hatoren pati-patiin i ngo kessa, isè poda terbakinsa mendè nola mengolihi persaorenna dekket Dèbata. 2:17 Merkitè mersaor dekket Kristus, kuusahaken kami ngo asa gabè mendè nola mengolihi persaoren nami dekket Dèbata. Tapi enggo kessa mo kubaing kami bagidi, keppèken terdapet nola ngo kami "kalak perdosa" ma bagè kalak siso Jahudi. Mada ngo gabè Kristus nola memmaing kami merdosa? Tentu oda! 2:18 Mula kumulai nola memajek perugamaan sienggo kurumpakken kin, keteridahenna sienggo gabè mengelanggar ngo aku. 2:19 Ai enggo matè aku ibakin hatoren pati-patiin idi -- ipatèken hatoren pati-patiin i sendiri -- asa ndorok nggelluh aku bai Dèbata. Enggo ipersilangken aku rebbak dekket Kristus. 2:20 Oda aku nèngè singgelluh bagèndari, Kristus ngo nggelluh ibagasen aku. Ai nggelluh pè aku bagèndari merkitè-kitè kepercayaen bai Anak Dèbata simermasèh atè midah aku janah memerrèken diriNa mengkepkep aku i ngo. 2:21 Oda ngo gabè kèdèk atèngku sibasa-basa Dèbata. Mula mendè ngo mengolihi persaoren jelma i dekket Dèbata kumarna idalanken hatoren pati-patiin, merlapaten ngo i, oda lot kadè gunana matè Kristus i.
3:1 È kènè kalak Galatia siso merrukur! Isè ngo kalak simerrèken ajar latlat i bai ndènè? Enggo mo ntangkas kubagahken bai ndènè tersèngèt permatè Kristus i kayu silang i. 3:2 Bagahken kènè mo bangku tersèngèt si sada matcam èn: Ijalo kènè tikala i Tendi Perbadia, kumarnaken idalanken kènè ngo hatoren pati-patiin i, barang tah kumarnaken idengkohken kènè ngo Sukuten Kelluahen i janah percaya kènè taba Kristus? 3:3 Kasa gabè moto kènè! Nggelluh ndènè rembaru i, merkitè-kitè Tendi Perbadia ngo imulai kènè, kasa bagèndari iunjunu kènè merkitè kuasa perdagingen ndènè sendiri nola? 3:4 Mèter magosia mo karinana sienggo irasai kènè idi kin? Ulang mo magosia! 3:5 Dèbata ngo merrèken TendiNa bai ndènè janah memmaingken tanda-tanda kellengangen i tengah-tengah ndènè. Jadi ibaing Dèbata karinana idi kumarnaken idalanken kènè ngo hatoren pati-patiin idi, barang kumarnaken idengkohken kènè ngo Sukuten Kelluahen i ninganna percaya bai Kristus? 3:6 Tosè ngo i bagè sitersurat i Bibèl tersèngèt si Abraham -- bagèen, "Percaya ngo si Abraham bai Dèbata janah kemulihken kepercayanna idi gabè ijalo Dèbata ngo ia bagè kalak sienggo ikellemmoken atè Dèbata." 3:7 Jadi bettoh kènè mo; kalak sipercaya bai Dèbata ngo kessa pemparen si Abraham. 3:8 Enggo kin ngo lebbèen idokken i Bibèl i; ndorok ngo mersaor nola mengolihi dekket Dèbata kalak siso Jahudi, mula percaya ia bai Dèbata. Ai lebbèen kin ngo ibagahken Sukuten Kelluahen i taba si Abraham merkitè bagah-bagah èn, "Merkitèken kono, ipasu-pasu Dèbata ngo karina jelma i babo tanoh èn." 3:9 Jadi kerna percaya si Abraham, gabè ipasu-pasu ngo ia. Bagi ma ngo karina sipercaya ipasu-pasu rebbak dekket si Abraham. 3:10 Barang isè kalak mergantung mi hatoren pati-patiin i sambing, kenna sumpah ngo i. Ai tersurat ngo ibas Bibèl, "Barang isè oda mendalanken karina hatoren pati-patiin sitersurat ibas Bibèl kenna sempetta Dèbata ngo kalak i sibagidi!" 3:11 Isè poda ndorok mersaor dekket Dèbata, ukum kumernaken mendalanken hatoren pati-patiin i, ai ntangkas ngo idokken ibas Bibèl, "Kalak sienggo mendè nola persaorenna mengolihi dekket Dèbata, ia ngo nggelluh, ia ngo nggelluh kumerna kepercayanna bai Dèbata!" 3:12 Tapi ukum hatorenpati-patiin oda ngo merdangaan mi kepercayaen. Tersurat ngo ibas Bibèl, "Nggelluh ngo kalak simengulaken hatoren pati-patiin kumarna hatoren i." 3:13 Ipaluah Kristus i ngo kita ipas sumpah hatoren pati-patiin i nai merkitè-kitè iberrèken diriNa kenna sumpah pati-patiin i mengkepkep kita. Tersurat ngo ibas Bibèl, "Kenna sumpah ngo gennep sinigantung i kayu persilang." 3:14 Ibaing Kristus bagidi, asa ijalo kalak siso Jahudi ngo niperbagah Dèbata taba si Abraham i. Merkitè bagidi, kita sipercaya bai Dèbata pè, ndorok mo menjalo Tendi sienggo iperbagah Dèbata idi kin. 3:15 Alè dengan! Kebiasaan jelma mo lebbè kubaing mahan codiin. Mula lot ibaing jelma sada bulaban, janah enggo isahken, jadi isè poda ndorok mengosè bulaban i barang pè menambahisa. 3:16 Bagidi ma ngo bulaban Dèbata sienggo ibulabanken taba si Abraham dekket mi pemparenna. Ibas Bibèl oda lot tersurat "dekket taba kalak pinempar si Abraham," tentu jelma nterrem ngo i. Tapi ukum sitersurat imo; "dekket taba pemparenmu," lapatenna sada kalak sambing, imo Kristus. 3:17 Sikudokken i sènda imo: Enggo lot bulaban Dèbata janah enggo isahken lebbèen. Asa hatoren pati-patiin siniberrèkenna enggo kessa lebbè leppas empat ratus tellupuluh tahun, oda ndorok membatalken sienggo isahken idi kin, ukum gabè mago nola ngo kegegohen bulaban Dèbata i. 3:18 Ai ukum mergantung mi pati-patiin ngo basa-basa Dèbata, oda nèngè ngo ibasa-basaken sienggo ibulabanken; kerna enggo kin ngo ibulabanken Dèbata bai si Abraham, jadi iberrèken Dèbata mo i bana. 3:19 Mula bagi, man kadè ngo hatoren pati-patiin idi iberrèken? Gunana imo: iberrèken hatoren pati-patiin i mahan tambahna ngo, lako magahken kadè dosa jelma merradepken Dèbata. Mergegoh ngo hatoren pati-patiin idi ninggat pekerroh sada kalak pemparen si Abraham i mo sinibulabanken Dèbata kin taba si Abraham i. Hatoren pati-patiin idi iberrèken merkitè malaèkat-malaèkatna bai jelma merkitè sada kalak jelma. 3:20 Lebbè lot ngo dua kalak kettubungen, asa perlu lot tellangkè. Tapi ukum Dèbata oda pella memmaing tellangkè, kerna Ia sendiri ngo hadep memmaingkensa. 3:21 Mula bagidi meralo ngo hatoren pati-patiin idi mi siniperbagah Dèbata? Oda ngo! Ai ukum hatoren pati-patiin niberrèkenna i ndorok merrèken kenggelluhen taba jelma merlapaten ngo i ndorok mendè nola mengolihi persaoren jelma dekket Dèbata kemulihken hatoren pati-patiin i. 3:22 Tapi tersurat ngo ibas Bibèl: karina jelma enggo ilenggemmen kuasa dosa. Kernana idi, sibasa-basa nibulabankenna kumernaken kepercayaen bai Jesus, ndorok ma ngo iberrèken taba jelma sipercaya bana. 3:23 Tikan makdèng dapet tikkina jelma i percaya bai Kristus, idèdah hatoren pati-patiin idi ngo kita lebbè; bagè cara ikandang ngo kita soh mi tikki perntarar ni kepercayaen i. 3:24 Jadi dosken pendèdah ngo hatoren pati-patiin i banta mersembah kita soh mi pekerroh Kristus lako pelliasken persaorenta dekket Dèbata, kerna percaya kita bai Kristus. 3:25 Bagèndari kerna enggo dapet tikkina jelma i percaya bai Kristus, jadi oda nèngè ngo kita igemgemmi pendèdah i, imo hatoren pati-patiin i. 3:26 Kerna percaya ngo kènè bai Jesus Kristus, gabè mersaor mo kènè dekketSa, kernana idi gabè dukak-dukak Dèbata mo kènè. 3:27 Enggo ngo iperridi kènè mi bagasen gerar Kristus. Jadi sada daiging ngo enggo kènè dekket Kristus. 3:28 Kemulihkenna idi, oda nèngè ngo lot bèdana kalak Jahudi bang kalak siso Jahudi pè, kalak hamba barang siso hamba, anak laki barang daberru. Gabè sisada ngo kènè ibagasen Kristus. 3:29 Mula milik Kristus kènè, jadi pemparen si Abraham ngo kènè. Karina ngo kènè merhak menjalo niperbagah-bagah Dèbata.
4:1 Èn ngo sikudokken; sidekkah anak-anak dèng ahli waris i, oda lot kalihna bagè sada kalak hamba, tukasi pè ia ngo sidasa karinana. 4:2 Tapi ibagasen penjamotiin janah pengurusen ngo ia, mèma soh umurna mi sienggo ibuhul Bapana kin. 4:3 Bagidi ma ngo bang kita pè; sidekkah anak-anak dèng kita dak iperhamba tendi simerkuasa i duniaèn ngo kita. 4:4 Tapi enggo kessa dapet tikkina, ipasulak Dèbata mo AnakNa mi dunia èn, itubuhken sada kalak daberru situnduk mi gemgemmen pati-patiin, 4:5 asa merkitè bagidi, Ipaluah kalak sinigemgemmen hatoren pati-patiin idi, nai kernana idi ndorok mo kita gabè dukak-dukak Dèbata. 4:6 Kumarna dukak-dukak Dèbata ngo kènè, gabè ipasulak Dèbata mo Tendi AnakNa i mi bagasen ukur ndè bak ukurku, imo Tendi simendilo-ndiloken "Abba, alè Pa!" 4:7 Jadi kumarna naidi, oda nèngè ngo hamba kènè tapi dukak ngo. Janah kumarna dukak Dèbata kènè, iberrèken Dèbata mo bai ndènè karinaNa silot bana i, gabè perbagianen bai dukak-dukakNa. 4:8 Ukum tikala i, oda dèng ngo itandai kènè Dèbata, kernana idi iperhamba siso Dèbata i ngo kènè. 4:9 Tapi ukumbagèndari, enggo itandai kènè Dèbata, jadi itandai Dèbata ma ngo kènè pè. Nai kasa uè nola kènè balik taba tendi dunia siso mergoldè janah simerlèa i? Kasa uè dèng kènè iperhamba sibagidi? 4:10 Enggo gabè kalak peniti-niti ari, bulan bak tahun-tahun tertentu nola kènè? 4:11 Kekelsohen ngo aku kumarna kènè bagidi, tah mada ngo oda merguna kelejanku mengkepkep kènè! 4:12 Kènè alè dengan! Kupido bai ndènè, asa bagè aku mo kènè, ai aku pè enggo bagè kènè. Oda lot kadè pè salah ibaing kènè taba aku. 4:13 Katèngku ièngèt kènè dèng ma ngo bakunè tikala i aku mennukutken Sukuten Kelluahen i bai ndènè, imo tikan sakiten i aku. 4:14 Oda ngo moyang atè ndè midah aku tikan naidi, tukasi pè dagingku gabè sada pengojiin bai ndènè. Dosken malaèkat Dèbata ngo aku ijalo kènè tikan naidi, bak bagè penjalo ndènè bai Jesus Kristus sendiri. 4:15 Sennang kalohon ngo kènè tikala i, tapi bagèndari enggo bakunè lolo ukur ndènè i? Ukum tikala i uè ngo kènè bang mencokil mata ndènè idi pè merrèken bangku, ukum terbakin kin. 4:16 Jadi gabè musuh ndènè nola ngo aku kumarna kudokken situhunna taba kènè? 4:17 Ukum kalak sidèban i, laèn ngo maksudna taba kènè, mula pè idahen bagè cara mertuhu-tuhu kalak i nggasang mendahi kènè, ai ukum tujuun kalak idi imo asa mpostep persaorenta, nai gabè mengèkut bai klak i mo kènè katèna. 4:18 Selloh ngo nggasang mi ulaan merandal tapi ulang mo nemmu lebbè i tengah-tengah ndènè aku asa nggasang kènè. 4:19 Kènè alè dukak-dukak sikukellengi! Mengolihi mpiah ngo kuakap bagèndari kumarna kènè. Bagè sada kalak partua ibages ngo aku bagèndari mengakap mpiah tikan mennubuhken dukakna. Janah dak terrus ngo bagidi, mula oda tersuan dèng bakko Kristus bai ndènè! 4:20 Nteddoh ngo aku bagèndari roh mi tengah-tengah ndènè, asa ndorok mengerana aku pessèngètken kènè, ai oda kubettoh nèngè bagèndari bakunè mo ndia kubakin bai ndènè! 4:21 Kènè alè siuè nigemgemmen hatoren pati-patiin i, dengkohken kènè mo ranangku èn; asa kubagahken bai ndènè bakunè tersurat ibas Bukku hatoren si Musa. 4:22 Tersurat ngo i sidi: Dua kalak ngo dukak si Abraham, hamba ngo inang dukakna sisada, tapi oda ngo hamba inang dukakna sisada nai. 4:23 Ukum anak nitubuhken hamba i, tubuh mengèkutken nipergeddo daging ngo, tapi ukum anak nitubuhken berru nitokor i, tubuh kumarna enggo kin ngo iperbagah-bagah Dèbata. 4:24 Gabè sada codiin ngo i; daberru sidua kalak i codi ngo mi dua padan; sada mo idi i Delleng Sinai nai asalna, imo si Hagar; itubuhken ngo dukakna mahan hamba. 4:25 Jadi si Hagar imo Delleng Sinai si ni nagerri Arab. Ia ngo lèndung kuta Jerusalem bak karina pengisina sibagèndari i, sienggo gabè hamba. 4:26 Tapi ukum Jerusalem si ni sorga i, imo Jerusalem bèbas, janah ia ngo inangta. 4:27 Tersurat ngo ibas Bibèl, "Lolo mo kono alè daberru nggempus, siso nung mennubuhken. Mersampang atè janah merroang-oang mo kono alè siso nung mengakapken bakunè mpiahna mennubuhken! Ai buèen ngo dukak daberru nitadingken serrangenna dari pada dukak daberru ni ianken serrangenna." 4:28 Kènè ngo alè dengan dukak-dukak Dèbata sinitubuhken kumarna bagah-bagah Dèbata; codi ngo kènè bagè si Isak. 4:29 Tikanna idi dak idersa anak situbuh kumarna nipergeddo daging i ngo kènè anak situbuh kumarna lemmo atè Tendi Perbadia. Bagi ngo soh bagèndari. 4:30 Tapi bakunè ngo idokken sitersurat i bai Bibèl? Bagèen ngo, "Pelaus mo daberru hamba i rebbak dekket dukakna, kerna mak ndorok rebbak usur dukak daberru hamba i dekket dukak daberru nitokor i." 4:31 Asa, alè dengan, oda ngo dukak daberru hamba i kita; tapi dukak daberru nitrokor i ngo.
5:1 Ukum bagèndari enggo mo ipaluah kita, kerna enggo ipaluah Kristus i! Kerna naidi pertahanken mo kebèbasenmu, janah ulang nèngè uè iperhamba. 5:2 Èngèt kènè mo; mula ipidoken kènè asa itakkil kènè, merlapaten ngo i oda lot kadè gunana bai ndènè Kristus i. Aku si Paulus ngo mendokken èn bai ndènè. 5:3 Kuulaki mendokken sikali nai taba kènè kalak simengido asa itakkil i, kennah iulaken ngo karina hatoren pati-patiin i! 5:4 Ai mula merkitè mengulaken hatoren pati-patiin i naing merdamè kènè dekket Dèbata enggo gabè mpostep persaoren ndènè dekket Kristus. Jadi gabè iruar masèh atè Dèbata ngo kènè. 5:5 Tapi ukum kami dak mengharapken pengurupi Tendi Perbadia janah merdangaan ipas kepercayaen bai Kristus idi ngo asa gabè ndorok merdamè dekket Dèbata. 5:6 Ai mula enggo ibagasen Kristus Jesus kita, mertakkil barang oda mertakkil oda nèngè soal i. Siperluna imo percaya bai Kristus, janah keteridahenna imo merrukur ngkelleng taba kalak sidèban. 5:7 Tikala i toko ngo pengonggal ndènè! Keppè bagèndari kasa oda nèngè merpenguèi kènè mi lemmo atè Dèbata? Isè mengajar-ngajari kènè? 5:8 Oda ngo bai Dèbata sienggo mendilo kènè i nai rohna simengkella-kella kènè i! 5:9 "Cituk pè ragi, kembang ngo ibaing nditak sienggo igaru!" nina simendokken. 5:10 Tapi bagi pè idi, tok ngo aku bai ndènè, oda gabè laèn nola perrukuren ndènè bangku nai, ai enggo sisada kita ibagasen Kristus. Janah tok ngo aku, barang isè pè mengkella-kella kènè, ihukum Dèbata ngo i. 5:11 Ukum tersèngèt aku alè dengan kasa imusuhi kènè aku mula kujamitaken hatoren mertakkil idi perlu? Mula kujamitaken bagidi oda ngo lot nèngè persoalen tersèngèt silang Kristus i. 5:12 Lotiin mo karuar kalak simengkella-kella perrukuren ndènè bagidi i kuria nai! 5:13 Asa mi kelluahen i ngo kènè idilo. Tapi ulang mo baing kènè kelluahen i gabè pepulakken cubellek-cubellek daging ndènè. Dak ibagasen kelleng i mo kènè mersipeuè-uèen. 5:14 Èn ngo rèmpun hatoren pati-patiin "Kennah kekellengenmu ngo denganmu jelma dosken dirimu." 5:15 Tapi mula mersingatngaten ngo kènè samah kènè, manat mo kènè, ai gabè rebbak tumpat mo kènè. 5:16 Èn ngo kudokken: Belli mo Tendi Dèbata mengarak-ngarak kono, janah ulang kono nggèut menguèi cubellek-cubellek dagingmu. 5:17 Merralo ngo lemmo atè Dèbata mi cubellek daging, janah nikellemmoken Tendi Perbadia pè, merralo ngo mi cubellek daging. Juhap ngo dakdak sidua i, gabè oda nèngè terbaing kono mengulaken nipercinta ukurmu. 5:18 Tapi mula Tendi Perbadia ngo mengarak-ngarak kènè, oda ngo ikuasai hatoren pati-patiin idi kènè. 5:19 Ai ntangkas ngo perulaan daging; imo luhlah, mellamun, siso patut, 5:20 kesipèlèbèguun, kinangguruun, persilisihen-persilisihen, merrubat-rubat, cimburu, pungur, dirina kessa isarihken, mersikosomen, dekket mersitaki-takiin, 5:21 cian, permabuken, merkerja-kerja dekket sidèbankenna codi misi. Ukum klak simengulaken bagidi tosè bagè sienggo kudokken tikala i, bagi ma ngo kudokken bang bagèndari pè; oda dekket kalak sibagidi gabè ummat Dèbata. 5:22 Tapi èn buah sienggo iarak-arak Tendi Perbadia: Nkelleng, lolo, damè, sobar, budi, atè mbersih, sètia, 5:23 merrukur ncerrep, mengerajai diri. Oda merralo hatoren pati-patiin dempak kalak sibagidi. 5:24 Kalak sienggo gabè milik Jesus Kristus, enggo ipersilangken bakko kejelmaan rebbak dekket cubellek, bak ketagiin dagingna. 5:25 Kumarna enggo iberrèken Tendi Perbadia banta nggelluh sirembaru, jadi patut ngo ia menguasai nggelluhta. 5:26 Oda ndorok kita gabè sombong, ulang memmaing cio atè barang mersicianen.
6:1 Alè dengan! Mula idapet kènè tersor jelma mengulaken dosa, peddahi kènè sienggo menguèi Tendi Perbadia i mo ia, merkitè-kitè rana melamlam, asa balik ia mi ulaan sènteng, tapi jamoti kènè mo diri ndènè asa ulang dekket kènè pè gabè terèkut-èkut. 6:2 Mersiurupen mo kènè memersan embahen simbotong i ai merkitè bagidi, enggo iuèi kènè pati-patiin Kristus. 6:3 Ai mula ipeburnang dèba dirina, keppèken kadè poda ia, mengelluapi dirina ngo ia. 6:4 Gennep mo memerrèso dirina, tah selloh ma pengellakona barang tah oda. Nai ndorok mo ia gegah kerna simendè nibaingna i. Ulang pella ibanding-bandingken pemmaingna i dekket nibaing sidèban. 6:5 Ai gennep jelma ngo memersan tanggung jababna. 6:6 Kalak simenjalo peddah bai Kristus nai, ibagiken mo dèba simerandal silot bana i bai simengajarisa. 6:7 Ulang kènè laling. Oda uè Dèbata akkal-akkalen! Barang kadè isuanken jelma idi ma ngo perraninna. 6:8 Barang isè mennuan mengèkutken bakko kejelmaan, kemmatèen ngo iperrani i bakkona i nai. Tapi barang isè mennuan mengèkutken Tendi Perbadia, iperrani mo kenggelluhen siamman sumendah bai Tendi Perbadia nai. 6:9 Kernana idi ulang mo kita merkeleja-lejaan mengulaken simerandal; ai mula oda mengadi-ngadi kita mengulaken simerandal, siperrani mo luas hasilna. 6:10 Jadi tikan lot dèng kesempaten banta, siulaken mo simerandal taba karina jelma, terlebbih mo taba samah dengan sipercaya bai Jesus. 6:11 Perratè-atèken kènè mosuratku sikusuratken i sèn! 6:12 Barang isè mengayaki kesangapen daging, kalak sibagidi mo simemaksa kènè lako mengèkutken hatoren mertakkil. Tapi ibaing kalak i pè bagidi, pellin asa ulang i letlet Jahudi sambing ngo kessa ia kerna silang Kristus. 6:13 Salangkalak i semengulaken mertakkil i, oda ngo i dalanken karinana hatoren pati-patiin. Tapi dok atèna mertakkil mo kènè nemmu, asa i poji kalak i dirina, kumarna i uèi kènè hatoren i! 6:14 Tapi ukum aku, oda uè aku moji-moji diringku, laènken kumarna Tuhanta Jesus Kristus sienggo matè i persilangken i. Ai kumarna nggo matè Ipersilangken ia, oda nèngè ngo lotlapaten dhunia èn bangku. Janah aku pè nggo bagè cara sienggo matè meradepken dhunia èn. 6:15 Mertakkil barang oda mertakkil, oda pella kadè i, ai ukum siperluna i mo gabè jelma rembaru. 6:16 Jadi bai karina jelma simengulaken i bak karina ummat Dèbata, dak i berrèken Dèbata mo bana damè dekket masèh atè. 6:17 Laènkenna i, ulang pella lot nèngè barang isè pè mennusahi aku, kerna lot ngo i pas dagingku tandha-tandha magahken si mengèkutken Jesus ngo aku. 6:18 Dak i pasu-pasu Tuhanta Jesus Kristus i mo kènè karina. Amèn. Tabe nami, Paulus
1:1 Kènè alè ummat Dèbata kalak sètia bai Jesus Kristus i Epesus! 1:2 Aku si Paulus rasul Jesus Kristus ipas lemmo atè Dèbata nai, mengharapken dak idengani masèh atè dekket damè Dèbata Bapanta dekket Tuhan Jesus Kristus imo kènè. 1:3 Nipoji mo Dèbata, Bapa ni Tuhanta Jesus Kristus sienggo merrèken matcam bagè pasu-pasu pertendiin i Sorga nai banta, merkitè Kristus. 1:4 Madèng kin pè ihanaken dunia èn, enggo kin ngo ipilih Dèbata kita asa gabè sada dekket Kristus janah mbadia, janah oda mertikas i hadeppenNa kumarna kelleng atèna. 1:5 Iteddo Dèbata ngo kita gabè dukak-dukakNa merkitè Jesus Kristus, mengèkutken lemmo atèNa. 1:6 Nipoji mo Dèbata kumarna mendè basana simermulia i, sienggo ipetarar banta ibagasen Anak kekelengen atèna i. 1:7 Ai kemmulihken permatè Kristus idi, gabè maluah ngo kita; isasa ngo dosanta kerna masèh atè Dèbata sitermurmur i, 1:8 sienggo iberrèken banta mertinèncuk merdengan karina bijak bak pengantusiin. 1:9 Ibagahken Dèbata ngo banta takina, imo rusia sinaing bakinenna imulana nai ibagasen Kristus. 1:10 Imo hendakna mi suberri alam èn si nidates barang pè ni tanoh èn, asa gabè sada ibagasen Kristus ekuten i. Ipesaut Dèbata ngo i, enggo kessa jupa tikkina. 1:11 Ipesaut Dèbata ngo karinana i mengèkutken lemmo atèna sendiri. Ai i mulana nai ngo enggo iteddo kita, kerna ipergeddo ngo asa gabè ummatNa kita merkitè Kristus; 1:12 asa nggelluhta simengharap perlebbè kalohoon bai Kristus memmoji kiniheji Dèbata. 1:13 Kènè pè enggo ummat Dèbata sinderrang idengkoh kènè kata bennar i, imo Sukuten Kelluahen merrèken kelluahen bai ndènè. Sinderrangna i ngo iberrèken Dèbata pertandaan bai ndènè magahken enggo milikna kènè, imo Tendi Perbadia sienggo niperbagah-bagahna i. 1:14 Tendi i ngo gabè jamienna, magahken jalonta ngo sienggo iperbagah-bagah Dèbata kin banta. Janah Tendi i ma ngo memmaing tok kita ummatna sienggo nipaluah Dèbata. Nipoji mo kehejiin Dèbata i. 1:15 Jadi kessa nai kudengkoh enggo percaya kènè bai Tuhan Jesus janah ikekelengi kènè karina ummat Dèbata, 1:16 dakdak ngo aku mendokken menjalo metangkup taba Dèbata kemmulihken kènè. Dak ngo kutersèngètken kènè gennep mersodip aku. 1:17 Kupidoken ngo bai Dèbata ni Tuhanta Jesus Kristus, imo Bapa simermulia i, asa iberrèken Tendina bai ndènè, asa sènteng penandai ndènè bana. 1:18 Kupido ngo asa ibuka Dèbata pikiren ndènè asa gabè ncihur; asa iarti kènè siharapen ndènè bai Dèbata nai simendiloi kènè, janah asa ibettoh kènè basa-basa Dèbata sienggo iberrèken mertinèncuk bak merandal bai karina jelma ummatna i; 1:19 Bagi dèng ma dekket kegegohen kuasa Dèbata banta sipercaya i, imo kuasana sitermurmur i, 1:20 si nipettararna tikanna ipegelluh Kristus i simatè nai janah ipekundul ngo ia i kamuhunna i Sorga i. 1:21 Datessen ngo tahta bak kuasa Kristus dari pada tahta bak kuasa kerajaen dekket perkuasa tanoh èn, bang kegegohen dekket kemuliaan bang nasa pengulu-pengulu sitergerar dekket barang kadè nola pè tupèh; oda pellin silot bagèndari, soh ngo mi sinaing roh seggen. 1:22 Ipetunduk Dèbata ngo karina mi terruh nèhè Kristus, janah ipebangkit ngo Ia gabè takal Kuria i. 1:23 Daging Kristus ngo Kuria i. Idomi ngo dagingna i dekket sinijalona bai Dèbata nai, kerna ia ngo mendomi sagumanna silot.
2:1 Kènè pè enggo ngo matè kin arnia; kumarna ilausi kènè perèntah Dèbata, nai gabè merdosa mo kènè. 2:2 Imo siniulaken ndènè mengèkutken bakko dunia èn; iuèi kènè ngo kuasa niperkuasa ni abang-abang i, imo tendi simengula soh bagèndari i atè-atè jelma siso uè tunduk bai Dèbata. 2:3 Tosè bagè kalak i ngo kita arnia, dak ngo siulaken cubellek dagingta bak mengulaken taki-taki ukurta lako pesennangken daging bak pikiren. Jadi kita pè jelma sikenna pungur Dèbata ngo tosè bagè kalak sidèban i. 2:4 Tapi ukum Dèbata permasèh atè mbellen ngo! Sun ngo kelleng atèna midah kita, 2:5 gabè rebbak dekket Kristus ngo kita ipegelluh nola, sienggo matè kin cara pertendiin kumarna pengelausinta. Asa pellin masèh atè Dèbata sambing nai ngo kessa memmaing asa maluah kita. 2:6 Kumarna enggo sisada kita dekket Kristus Jesus, gabè ipegelluh Dèbata ngo kita mengolihi rebbak dekketsa janah rebbak mengerajai dekketsa i Sorga. 2:7 Ibaing Dèbata bagidi, asa idah jelma i luas bakunè belgahna masèh atè bak mendè basa Dèbata siniberrèkenna banta merkitè-kitè Jesus Kristus. 2:8 Kumarna masèh atè Dèbata ngo asa ipaluah kènè, dalanna imo kerna percaya kènè bai Kristus; oda ngo kumarna usaha ndènè asa maluah pè kènè, tapi sibasa-basa Dèbata sambing ngo. 2:9 Jadi isè poda ndorok gegah tersèngèt idi. 2:10 Nihanaken Dèbata ngo kita. Merkitè-kitè Jesus Kristus itempa nola ngo kita, asa siulaken simerandal sienggo idokken Dèbata kin siperangènkenta. 2:11 O kènè bangsa siso Jahudi! Èngèt kènè mo bakunè kin kènè tikala i "ai kalak siso mertakkil" ngo kènè bagè pendokken kalak Jahudi simengaku enggo mertakkil (i mo sienggo lot pertandanna ibaing jelma mi daging kalak i). 2:12 Ukum tikanna idi oda mersada dèng kènè dekket Kristus, kalak sidèban dèng ngo kènè siso mbengket mi ummat si nipilih Dèbata. Oda dekket dèng kin kènè sidasa bulaban nibaing Dèbata bak ummatna. Nggelluh kènè i dunia èn, oda lot pengharapen ndènè janah oda itandai kènè dèng Dèbata sibennar i. 2:13 Tapi ukum bagèndari enggo ibagasen Jesus Kristus kènè, tukasi pè ndaoh kin kènè arnia, enggo mo gabè ndessing nola kumarnaken permatè Kristus i. 2:14 Kristus ngo perdamènta. Ia ngo pessadaken kalak Jahudi dekket kalak siso Jahudi gabè sada bangsa, perjuhapenta i ngo bagè dingding simenirang kalak i, sienggo irontas Kristus merkitè permatèna i. 2:15 Hatoren pati-patiin kalak Jahudi dekket perèntah bak adatna, enggo isasa Kristus, asa gabè sada bangsa rembaru kalak i, ibagasen Kristus. Bagidi ngo Kristus maing perdamèen i. 2:16 Merkitè-kitè matè Kristus i silang i, gabè ipersada Kristus ngo kacimbang mbellahna kalak i janah ipedamè dekket Dèbata, nai gabè salpun mo perjuapen i. 2:17 Kerna naidi roh mo Kristus mendahi kènè merembah Sukuten Kelluahen tersèngèt damè i bai ndènè; damè bai kalak siso Jahudi sindaoh kin bai Dèbata nai, damè bang bai kalak Jahudi sindessing kin taba Dèbata. 2:18 Merkitè Kristus gabè karina mo kita bang kalak Jahudi pè i barang siso Jahudi -- ndorok mo kita mendahi Bapa i, merkitè Tendi Perbadia sisada i. 2:19 Asa, oda nèngè ngo kalak sidèban kènè barang pè kalak ruar. Tapi dengan sisada ngo gabè ummatna, janah dengan simpangaan Dèbata. 2:20 Ipellias ngo kènè i babo dangaan sinibaing rasul-rasul bak nabi-nabi pè; Jesus Kristus sendiri ngo gabè batu binangun. 2:21 Ia ngo pelliasken bages i gabè Bages Dèbata simbadia bai Tuhan i. 2:22 Ibagasen Kristus i ngo kènè ipekkadè rebbak dekket sidèbanna i, gabè sada bages bekkas Dèbata dekket Tendina.
3:1 Kerna naidi aku si Paulus gabè sada kalak sinikurung kumarna Kristus Jesus mahan olih ndènè siso bangsa Jahudi. 3:2 Enggo sendah idengkoh kènè beritana, kumarna masèh atè Dèbata ipebangkit ngo aku mengulaken bahaan èn lako keperluun bai ndènè. 3:3 Ai ibuka Dèbata ngo alamat bangku janah ibagahken ngo rusia rencanana taba aku. (Tersèngèt mi sèn enggo kubagahken cituk i babo ndai. 3:4 Mula ijaka kènè i, tentu ndorok itimbangi kènè rusia tersèngèt Kristus tosè bagè sikuradumi.) 3:5 Ukum arnia oda nung ibagahken rusia i taba jelma, tapi kum bagèndari ipetarar Tendi Dèbata ngo taba rasul-rasul dekket nabi-nabina. 3:6 Rusia idi imo: Merkitè-kitè Sukuten Kelluahen i enggo terolih kalak siso Jahudi gabè dengan persidasa rebbak dekket kalak Jahudi lako menjalo masèh atè bak pasu-pasu bai Dèbata nai; ai gabè sada daging ngo kalak i janah rebbak menjalo niperbagah Dèbata merkitè Kristus Jesus. 3:7 Iberèken Dèbata ngo bangku sada basa-basa gabè pengendeng lako pesarken Sukuten Kelluahen i. Kujalo ngo basa-basa i merkitè kuasa Dèbata simengula ibas diringku. 3:8 Aku ngo sikètèkna ipas karina ummat Dèbata nai; tapi ipesakat Dèbata ngo bangku basa-basa èn: Ulaan mennukutken beritana mendahi kalak siso Jahudi; imo kekayaan Kristus siso merkerri-kerriin i; 3:9 dekket asa karina kalak mettohsa bakunè pemaing Dèbata situmempa sagumanna silot i, lako pesautken hendakna sidom rusia i, ai mboni dèng kin ngo taki Dèbata i sidekkahna èn. 3:10 Maksud Dèbata imo asa bagèndari merkitè kuria i karina simerkuasa i abang-abang i memettoh kebijaken Dèbata simermatcam bagè i. 3:11 Idi mo taki Dèbata i mulana i nai kin, sinipesautna merkitè Jesus Kristus Tuhanta i. 3:12 Merkitèken percaya bai Jesus Kristus janah kumarnaken mersada ibagasensa, gabè ndorok janah berrani mo kita mendessingi Dèbata ibagasen dom kepercayaen. 3:13 Kerna naidi mengido mo aku: Ulang pella roga kènè mula pè mpersuk kuakap mengkepkep kènè, ai karinana i mahan kiniselloh bai ndènè ngo. 3:14 Kerna naidi ngo kulempit tèunku mersembah taba Bapa i. 3:15 Bana nai ngo rohna karina pemparen ni dunia èn bak si ni Sorga pè menjalo bakkona gennep. 3:16 Kusodipken ngo taba Dèbata simermulia i, asa ipergegohi jelma perbagasen ndènè merkitèken Tendina i. 3:17 Kumarna percaya ngo kènè bai Kristus i, katerra pè dak merian mo Kristus idi ibagasen atè-atè ndènè, janah nggelluh ndènè merhenjellen bak ikuasai kelleng. 3:18 Kusodipken ngo asa rebbak mengantusi kènè dekket ummat Dèbata tersèngèt bakunè bellangna, geddangna, datesna dekket mbagesna ngkelleng atè Kristus i, 3:19 ai so terantusen jelma i ukum merkitè-kitè pikirenna sendiri. Katerra pè, iantusi kènè mo nemmu ngkelleng atè Kristus i, asa gabè dom bai ndènè kedèbataan ni Dèbata. 3:20 Ai terpehana Dèbata ngo lebih dari pada si sipido, bang pè si sipikirken, rembang mi kuasa Dèbata simengula ibagasen kita. 3:21 Mermulia mo Dèbata i tengah-tengah kuria soh mercundut-cundut merkitè-kitè Jesus Kristus. Poji mo Dèbata soh mi amman sumendah! Amèn.
4:1 Kerna naidi ngo asa aku -- sada kalak tahanen kumarnaken mengkebasi Tuhan i -- mengidoken bai ndènè alè dengan: merpengelako selloh mo kènè rembang mi pendiloi Tuhan i bai ndènè. 4:2 Merncerrep ukur mo kènè janah lamlam mo ukur ndènè, ninganna perlambas ukur. Pacidah kènè mo ngkelleng atè ndènè merkitè mersiurup-urupen samah-samah kènè. 4:3 Kerencetken kènè mo mertuhu-tuhu nggelluh ibagasen damè, asa dak tong teridah kesadaan sinibaing Tendi Dèbata. 4:4 Sada ngo daging i janah sada ngo Tendi, bagidi ngo pendilona bai ndènè, asa gabè sisada pengharapen kènè. 4:5 Sada ngo kessa Tuhan, sada ngo kepercayaen janah sada ma ngo peridiin, 4:6 sada ngo Dèbata Bapa ni karinana jelma. Ia ngo Tuhan sagumanna silot janah sidasa sagumanna silot i. 4:7 Gennep ngo kita menjalo sibasa-basa bana nai, mengèkutken pemerèken Kristus. 4:8 Ibas Bibèl tersurat bagèen, "Tikan laus Ia mi bekkas sindatesna, Iembah ngo nterrem taban-taban; janah Iberèken ngo sibasa-basa bai jelma." 4:9 Asa mula idokken "laus mi babo ia", merlapaten ngo i, enggo kin susur Ia soh mi bekkas siperterruhna i tanoh èn. 4:10 Asa Ia sienggo roh susur i, Ia ma ngo laus mi bekkas datessen asa langit, nai gabè idomi mo karinaNa. 4:11 Ia ma ngo "merèken basa-basa bai jelma", dèba gabè rasul, dèba gabè nabi; dèba gabè mennukutken Sukuten Kelluahen i, dèba nai gabè pengendeng kuria dekket guru pengajari. 4:12 Ibaing pè bagidi asa cukup ngo mengkebasi kalak sipercaya dekket pehèdu-hèduken kuria i, imo daging Kristus. 4:13 Merkitè bagidi, gabè sisada kepercayaen mo kita karina janah sisada pengantusiin tersèngèt Anak Dèbata. Nai gabè makin tang mo kita janah makin seppè bagè Kristus. 4:14 Jadi oda nèngè ngo bagè anak-anak kita ikodèng-kodèng barang ipelindak-lindak janah misèn mi sadoi ipe-embah-embah matcam bagè peddah-peddah jelma kalak perakkal-akkal sipeoto-otoken. Ilalingken kalak i ngo jelma i merkitè rana ndalit. 4:15 Tapi ukum kita dak gabè simengkejengjengken kebennaren i mo ibagasen ngkelleng, asa muat ndekkahna muat tangna kita ipas karinana janah muat suntukna tosè bagè Kristus. Ia ngo takalta. 4:16 Bana nai ngo sendihi i janah isusun bak iterdun-terdun janah ipetemmu-temmu gennep bukku sinirakuten urat-urat. Jadi mula gennep sendihi mengula bagè patutna, gabè makin mbelgah mo daging i janah mergegoh janah ipehèdu-hèdu ibagasen ngkelleng. 4:17 Èn ngo sikudokken memmes ibagasen Tuhan i, Ulang nèngè mo kènè merpengalako bagè kalak siso menandai Dèbata, simemikirken siso puna-puna. 4:18 Gellap mo perukuren kalak i. Oda itandai kalak i kenggelluhen siroh bai Dèbata nai, ai kadè poda pemettoh kalak i tersèngèt Dèbata, ai perukur mpihir ngo kalak i. 4:19 Oda ibettoh kalak i nèngè mèla gabè cubellekna ngo iuèi kalak i janah luhlah pengellakona. 4:20 Tapi Kristus sinitandai ndènè i oda ngo bagidi. 4:21 Otang ièngèt kènè ngo tersèngèt Ia! Ai enggo ngo iajari kènè, tersèngèt kebennaren silot bai Jesus. 4:22 Kerna naidi patakken kènè mo bakko ndènè sinderbi i, ai lako mago ngo pengkerohkenna i, kumarna cubellek sipeoto-oto janah mengelalingken i. 4:23 Kennah iperembaru ngo pikiren dekket pennarihen ndènè karinana. 4:24 Naing mo kènè nggelluh bagè jelma rembaru imo merbakko rembaru mengèkutken penempaan Dèbata, ibagasen kebennaren dekket ketègerren simbadia. 4:25 Kerna naidi, ruapken kènè mo sisèntengna. Ulang nèngè merluap, ai gabè rebbak sendihi ngo kita i daging Kristus. 4:26 Mula mellaga kènè ulang mo sanga merdosa. Ulang sanga sundut mataniari mak malap laga ndènè. 4:27 Ulang sanga sumiat-siat sibolis i atè-atè ndènè. 4:28 Sienggo ncemmal menangko, ulang nèngè mo mennangko, tapi mahan bahaan mo ia asa lot panganna dapet merkitè kejujuren asa lot berènkenna taba kalak sikekurangen. 4:29 Mula mongkam kènè, ulang ruap kata siso merjullat bai ndènè nai. Kata merandal mo ruap ndorok pesellohken janah merrèken peddah taba dengan. Ai gabè terolih simerandal ngo kalak simendengkohi. 4:30 Ulang mo arsaki kènè atè Tendi Dèbata. Enggo ngo icapken kènè merkitè Tendi gabè milik Dèbata. Tendi i mo gabè jaminenna magahken roh nè mo Ari Kelluahen bai ndènè. 4:31 Peddaoh kènè mo hellem, kosom, laga, perselisihen dekket pungur. Ulang nèngè lot bai ndènè senggak-senggak, rèhè-rèhè dekket si codi mi sidi. 4:32 Tapi naing mo kènè ramah tamah janah melamlam samah-samah kènè, ulang mo kènè mersilugunen, ai Dèbata pè oda ngo ilugun dosa ndènè merkitè Kristus.
5:1 Dukak-dukak nikekkellengen Dèbata ngo kènè, kerna naidi kennah codi kènè mo Ia. 5:2 Perangèken kènè mo ngkelleng i bagè Kristus sienggo mengkekelengi kita. Iberrèken ngo diriNa mengkepkep kita, mahan luah janah pèlèen baungkus pesennangken atè Dèbata. 5:3 Ummat Dèbata ngo enggo kènè, kerna naidi ulang mo kènè merlangkah julu meddem, ulang luhlah bak mengait mi diri ndènè sambing kènè, salang menggerari sibagidi sambing pè ulang kènè uè. 5:4 Ulang kènè uè mengerana rorang bak luhlah barang mengeruapken kata-kata meronah bang pè pergait-gaiten siso patut. Tapi lotiin mo dokken kènè mendok lias atè taba Dèbata. 5:5 Peratè-atèken kènè mo èn mendè: kalak simerpengelako luhlah bak rorang barang perukur mengait bana (pengelako sibagidi dos ngo i dekket menembah dèbata sidèban), kalak sibagidi oda pendikèi i Kerajaen Kristus bak Dèbata. 5:6 Ulang kènè uè ioto-otoi kata rumar, ai kumarna sibagidi ngo melaga Dèbata taba kalak siso menguèi baNa. 5:7 Jadi ulang mo kènè mersaor dekket kalak sibagidi. 5:8 Kènè pè ibas sigellap ngo tikala i, tapi ukum bagèndari, enggo gabè ummat Tuhan kènè, jadi enggo ibagasen kecihuren i. Kerna naidi kenggelluhken kènè mo bagè dukak-dukak kecihuren. 5:9 Ibas kecihuren idi nai ngo roh buah simerandal bak ketègerren dekket kebennaren. 5:10 Perdatèken kènè mo barang kadè lemmo atè Tuhan i. 5:11 Ulang dekket kènè mengulaken ulaan kegellapen siso merguna i. Tapi pincang kènè mo kalak sibagidi. 5:12 (Ai salang menerèngèti ulah-ulah kalak idi ipas simbonipè enggo mo kememèla.) 5:13 Ai gabè ntarar ngo taridah karinana ibaing kecihuren i. 5:14 Janah karina sienggo ntarar ntangkas mo enggo i. Kerna naidi ngo asa idokken, "Ndungo mo kènè siterpeddem, janah kèkè mo kè ibas simatè nai. Nai ibendangi Kristus i mo kènè." 5:15 Kerna nai seppè mo perdatèken bakunè perulanmu. Ulang kènè merperangè bagè kalak sikurang ukur; tapi bijak mo ukur ndènè. 5:16 Pergunaken kènè mo tikki silot bai ndènè, ai tikki kesusahen janah jahat ngo bagèndari. 5:17 Kumarna naidi ulang gabè moto kènè, tapi perdatèken mo kadè lemmo atè Tuhan i siulankenmu. 5:18 Ulang mo kènè mabuk ibaing anggur, ai kemmagoon ngo nikerrohkenna i. Tapi dom Tendi Perbadia mo kènè. 5:19 Ranaken kènè mo samah-samah kènè endè-endè Psalm, endè pemoji-mojiin bai Tuhan i dekket endè pertendiin. Mersampang atè mo kènè merendè memoji Tuhan i. 5:20 Menettap mo kènè mendokken menjalo metangkup kumarna karinana, taba Dèbata Bapa, merkitè-kitè gerar Jesus Kristus Tuhanta i. 5:21 Mersiuè-uèen mo kènè ibagasen merkebiaren midah Kristus. 5:22 Iuèi sinibages mo sinibalèna bagè penguèina bai Tuhan i. 5:23 Ai sinibalè i ngo takal si nibagesna, bagè Kristus takal Kuria i, janah ia ma ngo Sipaluah i kuria sienggo terdokken dagingNa i. 5:24 Tosè bagè penguèi kuria bai Kristus i, bagidi ma mo sinibages menguèi sinibalèna. 5:25 Kènè alè sinibalè, kekellengi kènè mo sinibages ndènè, bagè Kristus mengkekelengi kuria i, janah merrèken diriNa mengkepkep kuria i. 5:26 Ibaing Kristus bagidi asa ndorok Ia pepantingken kuria i merkitè peddahNa bak perridiin laè i, asa ndorok Ia pesakatken bai Dèbata. 5:27 Merkitè bagidi ibaing Kristus mo kuria idi cènder ntegguh janah mpanting i hadeppenNa, oda mertikas, oda sirèhèen, janah oda kurang barang kadè pè. 5:28 Bagidi ma mo sinibalè kennah ikekelengi ngo sinibagesna bagè dagingna sendiri. Karina simengkekelengi sinibagesna, mengkekelengi dirina ngo ia i si. 5:29 (Oda nung isè mengkosomi badanna. Tapi dak ipehèdu-hèdujanah ijamotken ngo i, bagè Kristus menjamoti kuriaNa, 5:30 kerna sendihi daging Kristus i ngo kita.) 5:31 Tersurat ngo ibas Bibèl, "Kerna naidi itadingken anak laki ngo bapana bak inangna, lako rebbak dekket sinibagesna, janah gabè sada daging mo kalak i sidua." 5:32 Mbages ngo nitèmbak kata èn. Kucodiken ngo i mi persaoren Kristus dekket kuria i. 5:33 Lot ngo demmuna ayat i bai ndènè: Karinana sinibalè kennah ikekelengi ngo sinibagesna gennep, dosken dirina sendiri, janah gennep sinibages kennah merkebiaren taba sinibalèna.
6:1 Kènè alè anak-anak, uèi kènè mo partua ndènè, i bagasen Tuhan i; ai i ngo patut ulanken ndènè. 6:2 "Pesangap bapamu dekket inangmu," i ngo pati-patiin perlebbè bai Dèbata nai merdengan bagah-bagah, 6:3 "Asa sayurntua kono, janah ndekkah nggelluh i tanoh èn". 6:4 Kènè alè partua! Ulang baing kènè mellaga dukak-dukak ndènè, tapi pehèdu-hèdu kènè mo kalak idi i bagasen ajar dekket peddah bai Tuhan i nai. 6:5 Kènè alè hamba! Uèi kènè mo induk ndènè i tanoh èn ipas mehormat janah merkebiaren ninganna mertuhu-tuhu bagè penguèi ndènè bai Kristus i. 6:6 Ulang mo kènè penguèi mula tikan pellin imanduri; janah ulang ma asa ipoji dèba barang naing muat-muat ukur. Tapi naing mo bagè naposo Kristus menguèi Dèbata ibagasen ukur ndènè nai. 6:7 Ulaken kènè mo bahaan ndènè idi ibas burju ndènè merukur dekket sampang atè, bagè penguèi ndènè bai Tuhan i, ulang kumarna jelma. 6:8 Èngèt kènè mo, suang ngo jaloon gennep jelma bai Tuhan i nai, tah naposo pè ia barang induk, tosè mi sinibahankenna. 6:9 Kènè alè induk! Bagi ma mo baing kènè taba naposo ndènè. Ulang mo dak asup kènè kalak idi. Èngèt mo! Rebbak merinduk ngo kènè taba Tuhan ni sorga i; janah oda mengidah-idah abè ukum ia. 6:10 Laènkenna i naing mo gabè ntegguh kènè ibagasen kegegohen nijalo ndènè bai Tuhan i nai. 6:11 Pakkè kènè mo karinana senjata nijalo ndènè bai Dèbata nai, asa ndorok kènè mengalo akkal-akkal Sibolis i. 6:12 Kerna oda ngo taba jelma kita juhap, tapi mengalo kegegohen karina sètan-sètan simengerajai jaman jahat ènda ngo. Mengalo kegegohen tendi jahat simengerajai abang-abang i ngo kita. 6:13 Kerna naidi pakkè kènè mo senjata bai Dèbata nai, asa mula roh sijahat i, gabè ndorok mo kènè mengalo musuh i janah mula enggo juhap kènè soh mi puncana, dak mergegoh ngo kènè tong. 6:14 Kerna naidi tettah mo kènè cènder, bèntingken kènè mo kebennaren i abak ndènè, janah pakkèken kènè mo baju bessi ketègerren mahan pertahanen ndènè. 6:15 Nènèh ndènè mercipatuken kekasahen lako magahken Sukuten Kelluahen merembahken kedamèen i. 6:16 Adumna i embah-embah mo gennep tèk tambeng-tambeng i, imo kepercayaen i, ai merkitèken tambeng-tambeng idi tertaluken kènè ngo karinana pengèpuh oltep perjahat i. 6:17 Jalo janah tangkulukken kènè mo tangkuluk kelluahen i dekket peddang bai Tendi Perbadia nai, imo kata Dèbata. 6:18 Baing kènè mo bagidi ninganna mersodip, lako mengido urup bai Dèbata nai. Gennep tèk mo kènè mersodip tosè mi penggerrekken Tendi i, janah tettap ndungo, ulang ndotè, jugulken kènè mo mennodipken karinana ummat Dèbata. 6:19 Sodipken kènè ma mo bang aku pè, asa iajari Dèbata aku, lako mengeranaken situhunna, janah asa nggasang aku mennukutken Sukuten Kelluahen i taba karina jelma. 6:20 Ai i ngo ulankenku idokken Dèbata, janah terantè ngo aku bagèndari. Dak sodipken kènè mo asa nggasang aku mengeranaken Sukuten Kelluahen i bagè patutna. 6:21 Bagahenken si Tikikus ngo bai ndènè karina tersèngèt diringku, ai ia ngo sada kalak denganta kekellengen janah perkebbas kettoken ipas ulaan Tuhan i, asa ibettoh kènè simasa bangku bak ulanku. 6:22 I ngo sebabna asa kupasulak ia mendahi kènè lako magahken karina simasa bai nami, janah asa terapo ukur ndènè. 6:23 Iberrèken Dèbata Bapa dekket Tendi Tuhan Jesus Kristus mo damè bak ngkelleng atèna rebbak dekket kepercayaen taba karinana kuria. 6:24 Dak ipasu-pasu Dèbata mo kènè karinana sidekkah mengkekelengi Tuhanta Jesus Kristus. Tabe nami, Paulus
1:1 Kènè karina ummat Dèbata simerian i Pilipi, sienggo mersaor dekket Kristus Jesus. Bagi ma pè dekket kènè pengendeng bak pengurupi i kuria! 1:2 Kami sidua, imo si Paulus bak si Timoteus naposo Kristus Jesus mengharapken, dak masèh atè dekket damè mo bai ndènè siroh bai Dèbata Bapanta dekket Tuhan Jesus Kristus idi nai. 1:3 Gennep kuèngèt kènè dakdak ngo kudokken melias atè taba Dèbata. 1:4 Janah gennep kusodipken kènè karinana, dak ibagasen sampang atè ngo aku mersodip. 1:5 Mejalo metangkup kudokken taba Dèbata kumarna pengurupi ndènè bangku i bennana nai soh mi bagèndari lako pesarken Sukuten Kelluahen bai Dèbata nai. 1:6 Tok kalohoon ngo ukurku tersèngèt èn: Dèbata sienggo mentebbennai bahaan i mendè soh mi ari pekiroh Jesus Kristus i nola. 1:7 Dak ibagasen ukurku ngo kènè karinana. Jadi patut ngo bagidi pengèngètku bai ndènè. Ai karinana ngo kènè enggo bagè aku menjalo masèh atè bai Dèbata nai; bang bagèndari ibagasen kurungen aku barang sinderrang i ruar aku lako mennukutken Sukuten Kelluahen i. 1:8 Soh mo messengna nteddohku midah kènè karinana i bagasen ngkelleng bai Jesus Kristus i nai. Dèbata ngo saksingku tersèngèt i. 1:9 Èn ngo kupidoken ibas sodipku: naing mo makin mbellen ngkelleng atè ndènè ibagasen bijak, 1:10 asa ibettoh kènè memmilih simendèna. Ai mula bagi ngo kènè, mpanting mo kènè oda mertikas janah oda pertuktuken tikan ari pekkeroh Kristus i nola. 1:11 Nai gabè mertinèncuk mo simendè ipas perrulaan ndènè i bagasen Jesus Kristus i, asa gabè mermulia Dèbata janah terpoji. 1:12 Ipergeddo ukurku, naing mo ibettoh kènè alè dengan, karina simasa bangku, gabè peddorken sar ngo Sukuten Kelluahen i. 1:13 Janah gabè karinana ngo pengisi tangsi i bak sidèbanna i pè tupèh memmettoh, i kurung pè aku kumernaken naposo Kristus i ngo aku. 1:14 Janah makin posna ngo atè dèba dengan sisada kepercayaen bai Tuhan i, makin nggasangna ngo ukurna lako mennukutken sukuten Kelluahen i, oda pella nèngè mbiar. 1:15 Tuhu lot ngo dèba kalak i mennukutken Kristus i kumarna ncian dekket perselisihen, tapi lot ma ngo dèba mennukutken ibagasen ukur mbersih. 1:16 Ukum kalak sibagèn i iulaken bagi imo kerna sinienjar ukur ngkelleng bai Dèbata bak bangku ngo i, kumarna ibettoh kalak i ipasulak Dèbata ngo aku, lako mengkesaksiken bennar ngo Sukuten Kelluahen i. 1:17 Tapi ukum sidèbanna idi menjamitaken Kristus i oda ngo mendè tujunna, ai dirina ngo isarihken. Ai dok atè kalak i, merkitè pemaingna bagidi, gabè muat susahna mo kuakap i kurungen i. 1:18 Tapi oda pella kadè i! Ai barang bakunè pè i, asal mo ijamitaken Kristus, tah arap ukur mendè pè i barang ukur merroha, lolo ngo aku. Janah dak ngo lolo aku soh mi podiin èn, 1:19 kubettoh ngo, merkitèken sodip ndènè dekket pengurupi Tendi Jesus Kristus menumpak ngo i gabè kelluahenku. 1:20 Ukum sikupido janah sikuketeddohken imo: asa ulang nemmuken sondat sikuula. Nai dak kuharapken ngo asa gennep tèk -- terlebbih-lebbih bagèndari, tong nemmu nggasang ukurku bagè dekkah ari, -- barang matè barang nggelluh pè aku, -- mersangap nemmu Kristus. 1:21 Ai Kristus ngo kenggelluhen bangku, janah laba ngo kemmatèen. 1:22 Tapi mula merkitè nggelluh i dunia èn ndorok kuulaken ulaan termendèen, oda kubettoh siapai kupilih. 1:23 Duana ngo menessak aku. Sèkel kalohoon ngo atèngku laus mennadingken dunia èn, asa rebbak dekket Kristus, ai merandalen ngo i; 1:24 tapi lotiin ngo nggelluh aku i dunia èn lako mengkepkep kènè. 1:25 Tok ngo ukurku tersèngèt idi. Kubettoh ngo, idi ngo sebabna asa mian dèng aku, tong rebbak dekket kènè karinana, asa kuurupi kènè karinana, asa muat ntegguhna janah muat nggasangna kepercayaen ndènè bai Tuhan i. 1:26 Kerna naidi, mula enggo balik aku luas mendahi kènè makin ganda mo sampang atè ndènè mengkepercayai Jesus Kristus kemmulihken aku. 1:27 Siperluna bagèndari imo: Kennah tosè mi sinipergeddo Sukuten Kelluahen tersèngèt Kristus mo pernggelluh ndènè. Nai tah ndorok dèng luas pejumpa aku dekket kènè, barang tah oda pè, giam kudengkoh berita ndènè, magahken hot ngo kènè ibagasen kessadaen mengkepercayai Sukuten Kelluahen bai Dèbata nai. 1:28 Ulang kènè mbiar midah musuh i. Tanda-tanda ngo i bai kalak i magahken kettalunna, tapi mennang ngo ukum kènè kumarna Dèbata sendiri ngo merrèken kemmennangen i taba kènè. 1:29 Ai iberrèken Dèbata ngo basa-basa bai ndènè oda pellin percaya bai Kristus, tapi dekket ngo sitahanen kumarna Kristus. 1:30 Bagèndari pè dekket ngo kènè juhap, imo perjuapen siniidah ndènè tikala i janah dak tong dèng kuperjuapken soh bagèndari bagè sienggo nidengkoh ndènè bagèndari.
2:1 Mergegoh ngo kènè, kerna mersada ibagasen Kristus. Janah terapo ngo kènè kerna ikekelengi Kristus kènè! Itegu-tegu Tendi Dèbata ngo kènè, janah bagi ma mersikekelengen ngo kènè bak mersimasèh atèen samah kènè. 2:2 Kerna naidi domi kènè mo sampang atèngku merkitèken: Dak sada atè sada orjok mo kènè janah mersikekelengen bak dos ukur. 2:3 Ulang merdikkan barang mengakut mi diri bang tunggang. Tapi karina mo kènè merukur ncerrep, janah radumi mo lot ngo kesurungen dengan i bamu nai. 2:4 Ulang mo siperlu bamu sambing pikiri, tapi dekket mo pikiri siperlu bai dengan. 2:5 Bagè perukuren Jesus Kristus mo perukuren ndènè: 2:6 Tukasi pè tosè bai Dèbata Ia tapi oda pella kennah Ipertahanken ketosènNa dekket Dèbata idi. 2:7 Tapi Irumari ngo dirina isellukken rupa hamba asa tosè ia dekket jelma janah rumang dekket pergelluh jelma ngo dapet bana. 2:8 Ipecerrep ngo ukurna, janah merpenguèi ngo ia taba Dèbata soh matè -- i kayu persilang. 2:9 Kerna naidi ngo ipedates Dèbata Ia soh mi sindatesna kalohoon, janah iberrèken baNa kuasa mbellen belgahen dari pada kuasa silot bai sidèban. 2:10 Jadi lako menghormati Jesus sagumanna silot i sorga dekket i dunia èn, bak ni terruh tanoh pè, mersembah baNa. 2:11 Karina dilah mengaku, Jesus Kristus ngo Tuhan; merkitè bagidi mermulia mo Dèbata Bapa. 2:12 Kerna naidi alè dengan si nikekellengen, bagè penguèi ndènè bangku, sinderrang i tengah-tengah ndènè aku, naing mo nemmu lebbih bagi dèng penguèi ndènè tukasi pè pedaoh-daoh kita. Enggo ipaluah Dèbata kènè janah ayaki kènè mo asa makin seppèna nggelluh ndènè. Ulaken mo i merdengan sangap janah merkebiaren taba Dèbata, 2:13 kerna Dèbata ngo mengula ibagasen kediriin ndènè, asa gabè kalak sipessennangken atè Dèbata kènè. 2:14 Ipas karina pemmakinen ndènè ulang mo ngutnguten kènè barang pè merselisih. 2:15 Merkitè bagidi gabè ituduhken kènè mo diri ndènè sienggo gabè dukak-dukak Dèbata siso mertikas, janah nggelluh ibagasen ketègerren i tengah-tengah kalak perjahat bana merdosa. Jadi tikan ibagahken kènè taba kalak i berita kenggelluhen, gabè cuhaya mo kènè menendangi dunia èn. 2:16 Mula enggo bagi pernggelluh ndènè ndorok mo gegah aku tersèngèt kènè sinderrang roh Jesus Kristus nola mengolihi. Gabè sada pertandaan mo i magahken oda magosia pengulankenku, tapi merguna ngo. 2:17 Mula pè ipèlèken nggelluhku èn lako peseppèken pèlèen si ni pèlèken ndènè ibagasen kepercayaen bai Dèbata, mejalo metangkup ngo kudokken, janah lolo ngo aku rebbak dekket kènè. 2:18 Bagidi ma mo nemmu bang kènè pè mendokken mejalo metangkup janah rebbak lolo dekket aku. 2:19 Tok ngo aku merkitèken pengurupiin Tuhan Jesus ndorok kupasulak ndor èn si Timoteus mendahi kènè, asa mersampang atè aku mendengkoh berita tersèngèt kènè. 2:20 Pellin si Timoteus nai ngo kessa terharapken aku janah ndorok denganku sada atè lako mennarihken kènè. 2:21 Ukum sidèbanna idi, pellin dirina nai ngo kessa isarihken, oda nèngè isarihken siperlu bai Jesus Kristus. 2:22 Kènè pè enggo ibettoh kènè, merguna ngo si Timoteus i. Mertuhu-tuhu ngo pengkebasina rebbak dekket aku lako mennukutken Sukuten Kelluahen bai Dèbata nai. Tosè ngo kami sidua bagè dukak mi bapana. 2:23 Kerna naidi, dok atèngku kupasulak mo ia mendahi kènè enggo kessa kubettoh bakunè ujungna perkarangku èn. 2:24 Tok ngo aku merkitèken pengurupiin Tuhan i, oda pella ndekkah nèngè roh ngo aku mendahi kènè. 2:25 Ukum tersèngèt denganta si Epaproditus, sinipasulak ndènè lako mengurupi aku, dok atèngku lotiin mo kupasulak ia balik mendahi kènè. Enggo ngo iurupi aku ipas ulanku janah rebbak menggong sindersa ngo kami. 2:26 Ai enggo nteddoh kalohoon ia midah kènè karina janah ikelsohken ngo kerna enggo soh bai ndènè beritana sakiten i ia. 2:27 Tuhu ngo ia sakiten, enggo sanga naing-naing matè. Tapi masèh ngo atè Dèbata bana, oda pellin bana sambing tupèh dekket ngo bangku asa ulang makin bonekna aku. 2:28 Kerna naidi ngo asa doliin dok atèngku kupasulak ia balik mendahi kènè, asa lolo kènè, mula enggo idah kènè ia, nai sennang mo dekket atèngku. 2:29 Èn pè lolo mo kènè menjalosa bagè dengan sisada kepercayaen. Hargai kènè mo kalak sibagidi. 2:30 Ai mengkepkep ulaan Kristus ngo asa enggo sanga naing matè ia; janah isèaken ngo kessahna mengkebasi aku janah mendomi sikurangna dèng si bai ndènè nai i.
3:1 Adumna i alè dengan, lolo mo kènè ibagasen Tuhan i. Oda pella mbotong kuakap mendokken bagè sienggo kusurat kin taba kènè ibas suratku i; ai selloh ngo i gabè kelluahen ndènè. 3:2 Mermanat mo kènè merradepken kalak simengulaken jahat kalak sipatut geraren biang; dak ipaksa kalak i ngo asa kennah mersittak nina. 3:3 Pada hal kita enggo mengulaken mersittak situhunna, oda ngo kalak i; siuèi ngo Dèbata ibagasen penneggu-negguun Tendi Perbadia sendiri, janah mejalo metangkup mo sidokken kumarna enggo mersaor kita dekket Jesus Kristus. Oda ngo mergantung mi cara perdagingen kita. 3:4 Situhunna, ukum aku ndorok ngo nemmu mergantung mi cara-cara perdagingen i. Ai mula lot kaltu mendokken lot alasenna ia mergantung mi cara perdagingen i makinsa nola mo aku. 3:5 Ai isittak i ari peualuhken ngo aku. Kalak Israel ngo aku itubuhken i marga Benjamin nai, janah kalak Heber asli ngo aku. Ukum tersèngèt penguèenku mi hatoren pati-patiin kalak Jahudi, horong Parisè ngo aku. 3:6 Tikka ngo aku mengulaken i, gabè kuletlet ngo kuria i. Ukum ipas hatoren pati-patiin idi sada kalak siso tercodi dengan i ngo aku i tengah-tengah kalak Jahudi. 3:7 Tapi kumarnaken Kristus, perlabaan kin dok atèngku tikala i, enggo gabè sada kerogiin mbellen ukum bagèndari. 3:8 Oda pellin i sambing; tapi gabè karinana ngo pellin keroginku sambing. Ai mahargaan ngo milikku sibagèndari i mo menandai Jesus Kristus Tuhanki. Kumarna Kristus enggo kupaluah karinana i, ai dosken empak-empak sambing ngo i karina kuètong, asal mo dapet aku Kristus, 3:9 janah tuhu-tuhu ibagasensa aku. Oda nèngè ngo arap penguènkenku mi hatoren pati-patiin, asa gabè ndorok mersaor aku dekket Dèbata. Tapi kumarna percaya ngo aku bai Kristus. Jadi bai Dèbata nai ngo rohna persaoren i janah merdangaan mi kepercayaen bai Jesus Kristus. 3:10 Siperluna bangku imo asa kutandai Kristus janah asa kuperakapken kegegohen sipegelluhkenSa i simatè nai. Sèkel ngo aku rebbak mpersuk dekketsa janah dos bagèsa i permatèNa i. 3:11 Janah kuharapken tuhu-tuhu ngo ipegelluh aku i simatè nai. 3:12 Oda ngo kumarna enggo dapet aku i asa kudokken bagidi, barang enggo gabè soh selloh aku, tapi dak kuayaki ngo sibasa-basa sienggo ipèmaken Jesus Kristus i. Kerna naidi ngo asa Itangkup aku gabè milikNa. 3:13 Alè dengan, oda dèng ngo kuakap enggo dapet aku sibasa-basa i tapi lot ngo sienggo kubaingken, imo kulupaken sinipodingku, kuuayaki ngo si nilebbèngku. 3:14 Dak kupuspusken ngo lojang mi tujuun perpodi lako menjalo sibasa-basa i, imo nggelluh i sorga. Mi sidi ngo kita idilo Dèbata merkitè Jesus Kristus. 3:15 Karinana kita sienggo sondel mengantusi cara pertendiin, imo dakdak siperatè-atèken. Tapi mula lot bai ndènè nai laèn pengantusinna, peterangen Dèbata ngo i bai ndènè. 3:16 Asal mo èngèt kènè: Kennah ngo kita nggelluh mengèkutken hatoren sienggo sijalo bagèndari. 3:17 Kènè karinana alè dengan, codi kènè mo aku! Enggo kutuduhken kami diri nami mahan codiin sènteng, kerna naidi perdatèken kènè mo selloh-selloh simencodi kami i. 3:18 Enggo nggati kubagahken taba kènè, janah kuulaki mendokken i bagèndari taba kènè merdengan èluh; mèduk ngo bagèndari gabè musuh silang Kristus i. 3:19 Ukum kalak sibagidi lako mago ngo i ujungna, kumerna cubellek dagingna ngo i perdèbata. Kadè makinken merlèa, idi nola ngo ihargaken; kerna siperlu i dunia èn sambing ngo kessa ipikiri. 3:20 Tapi ukum kita i sorga ngo bekkasta, janah i sidi nai ngo Raja Sipaluahken kita, imo Tuhan Jesus Kristus sinaing roh i. Ia ma ngo dakdak sipèma-pèma dekket siketedohken. 3:21 Dagingta sindotè janah singgèut melala èn gabè iobah Kristus nola ngo tosè mi badanNa sendiri simermulia i. Ibakin bagidi, rembang mi kuasana sindorok pepatuken karinana.
4:1 Kerna naidi alè denganku sinikekkellengen! Dak bagidi mo kènè nemmuken tettap merpengelako janah tuhu-tuhu percaya bai Tuhan i. Ntedoh ngo ukurku bai ndènè! Kènè ngo kebangganku janah pesampangken atèngku. 4:2 Kènè alè turang Euodia dekket si Sintikè! Memmes kupido bai ndènè asa sada orjok kènè bagè dengan sipercaya bai Kristus i. 4:3 Bang kono pè alè Sunsugos pertobok, kupido bamu asa urupi duana turangta i. Ai enggo ikelejaken kalak i mengurupi aku lako mennukutken Sukuten Kelluahen bai Dèbata nai; tosè bagè si Klemen dekket sidèbankenna i pè sienggo mengula rebbak dekket aku. Tersurat ngo gerar kalak idi ibas Bukku Kenggelluhen. 4:4 Dak mersampang atè mo kènè sienggo ibagasen Tuhan i; kuulaki mo mendokken, mersampang atè mo kènè! 4:5 Naing mo nemmu idah karina jelma mendè perukuren ndènè. Roh nèngè mo Tuhan i! 4:6 Ulang kelsohken kènè barang kadè. Dak bagahken kènè mo bai Dèbata merkitè sodip pengidoon ndènè i merdengan ukur mejalo metangkup. 4:7 Nai damè Dèbata sitermurmur ibas karina perukuren, imo menjamoti atè-atè dekket pikiren ndènè ibagasen Kristus Jesus. 4:8 Adumna i alè dengan, pikiri kènè mo simerandal, imo kesèntengen, mehormat, ntèger, merjullat, mendè dekket kebujuren, ndorok gabè pemoji-mojiin. 4:9 Ulaken mo sienggo nigurukenmi dekket sinijalomu bangku nai; tah pè i merkitè ranangku, bang pè merkitè sikubaingken. Idengani Dèbata siperdamè i mo kènè. 4:10 Ibagasen nggelluhku mersada dekket Tuhan, sennang kalohoon ngo kuakap, kerna enggo sanga narih ndekkah, baru pè bagèndari asa mengolihi nola ukur ndènè mennarihken aku. Oda ngo kudokken ilupaken kènè aku; tong ngo dak isarihken kènè aku, tapi tikkina ngo oda tupung. 4:11 Kudokken pè bagidi, oda ngo kumarna naing lot buat-buatenku bai ndènè nai, ai enggo kukecemmalken mengkesampang atèken bakunè lotna. 4:12 Ai ndorok ngo aku pecituk-citukken mula pè buèen sikurangna, barang pè mula merlebbih-lebbih. Ai enggo dapet aku rèmpunna lako pesobokken diringku tupung nduma bang pè ncor, barang tupung oda kadè kurang, bang pè tupung mèter kadè poda lot. 4:13 Merkitèken kuasa Kristus niberrèkenna bangku, dak ipergegohi ngo aku lako mengalo barang bakunè sambing pè. 4:14 Tapi enggo iurupi kènè aku ipas kesusahenku nai; jadi selloh ngo pemmaing ndènè i. 4:15 Kènè dengan si ni Pilipi! Ntangkas ngo ibettoh kènè, sinderrang kutadingken Makedonia, imo tikan perlebbè kalohon dèng Kusukutken Sukuten Kelluahen i, pellin kènè ngo kessa kuria siuè mengurupi aku janah denganku mengètongi laba rogi. 4:16 Ai tikan i Tesalonika pè aku janah memerluken pengurupiin, enggo lebbih sikali itèngès kènè pengurupiin taba aku. 4:17 Jadi oda ngo pellin pengurupiin i perlu bangku, tapi buahna i ngo, janah ido ndènè ngo i bangku. 4:18 Bagèndari enggo kujalo tinenges ndènè i -- jadi enggo merlebbih-lebbih aku, mertinèncuk ngo enggo bangku enggo kessa soh tinenges ndènè idi iembah si Epaproditus. Jadi gabè huap baungkus mo i, pèlèen kelemonken atè Dèbata. 4:19 Tapi tok ngo aku, idomi Dèbatangku ngo siperlu bai ndènè, rembang mi kekayanna i kesangapenna idi, ibagasen Kristus Jesus! 4:20 Kessangapen mo bai Dèbata Bapanta i, soh mi amman sumendah! Amèn. 4:21 Pesakat kènè mo salamku bai karina sipercaya ibagasen Kristus Jesus. Soh ma mo bai ndènè salam sirebbak dekket aku. 4:22 Bagidi ma salam bai karina kalak sienggo ummat Dèbata, tapi buèen salam silot i bages Kesar idi nai. 4:23 Idengani masèh atè Tuhan Jesus Kristus mo tendi ndènè. Tabe nami, Paulus
1:1 Bangku nai si Paulus rasul Kristus Jesus ipas lemmo atè Dèbata nai, bak denganku si Timoteus, 1:2 mendahi ummat Dèbata silot i Kolose. Masèh atè mo bai ndènè dekket damè bai Dèbata Bapanta i nai. 1:3 Dak mendokken mejalo metangkup ngo kami taba Dèbata Bapa Tuhan Jesus Kristus, gennep mersodip kami mennodipken kènè, 1:4 kumarna enggo kudengkoh kami berita kepercayaen ndènè bai Kristus Jesus bak ngkelleng atè ndènè midah karina ummat Dèbata. 1:5 Percaya ngo kènè janah merkelleng atè, kerna mengharap ngo kènè mi sienggo ipèmaken Dèbata bai ndènè i sorga. Enggo ngo idengkoh kènè tersèngèt i tikan isukutken Sukuten Kelluahen i bai Dèbata nai sienggo soh bai ndènè. 1:6 Sar ngo Sukuten bai Dèbata idi nai mi suberri dunia èn, janah memasu-masu ngo i bai jelma, codi bagè sienggo masa bai jelma imo sienggo masa bai ndènè, kessa nai idengkoh kènè masèh atè Dèbata, janah tuhu-tuhu irasaken kènè. 1:7 Karinana idi ibettoh kènè bai si Epapras nai, dengan pengendeng sikukekelengi kami. Ai perkebbas Kristus ngo Ia janah sètia mengula lako keperluun banta. 1:8 Bana nai ngo kubettoh kami magahken merkitè kuasa Tendi Dèbata ngo ndorok kènè mersikekelengen. 1:9 Kerna naidi ngo asa dak kusodipken kènè, kessa nai kudengkoh kami tersèngèt kènè. Dak kupido kami ngo bai Dèbata, asa iberrèken Tendina i bai ndènè kebijaken dekket kepantasen, asa makin ntangkas ibettoh kènè kadè lemmo atè Dèbata. 1:10 Jadi merkitè bagidi gabè iperangèken kènè mo lemmo atè Dèbata, nai gabè kelemmonkenNa mo kènè, asa gabè merbuah merandal kènè. Jadi makin ntangkas janah mbages mo penandai ndènè tersèngèt mi Dèbata. 1:11 Katerra pè dak ipergegohi Dèbata mo kènè, asa mergegoh kènè lako menggong barang kadè sigongenken, janah sobar ninganna merukur sennang, 1:12 janah dokken kènè mo mellias atè bai Bapa i. Kerna Bapa i ngo petauken kènè rebbak dekket ummat Dèbata gabè terolih janah mbengket mi kecihuren i. 1:13 Ai enggo iruah kita ibas gemgemmen kegellapen idi nai, gabè ilompat kita mi bagasen kerajaen Anak kekellengen atèNa. 1:14 AnakNa i ngo paluahken kita; jadi enggo iampuni dosa-dosanta. 1:15 Oda ndorok ndidah Dèbata, tapi Kristus i ngo codi mi rupa Dèbata sindorok idahen jelma. Ai sinderrang makdèng lot ihanaken, enggo kin ngo lot Kristus janah huntuun. 1:16 Ai merkitè-kitè Ia ngo ihanaken Dèbata sagumanna silot i sorga bang pè i tanoh èn, imo sitaridah bak siso taridah pè; bagi ma dekket tendi simerkuasa dekket simemerèntah. Karinana dunia èn ihanaken merkitè-kitè Kristus janah merkepatèen bai Kristus. 1:17 Sinderrang makdèng ihanaken barang kadè, enggo mo lot kin Kristus. Janah kumarna ia ngo hot i kebekkasenna sagumanna silot idi. 1:18 Ia ngo takal daging i, idi mo kuria i, kerna Ia memerèken kenggelluhen bai kuria i. Ia ngo perlebbè ipegelluh i simatè nai, kerna nai ngo asa Ia gabè huntuun janah perlebbè ni karinana silot i. 1:19 Dèbata ngo menentuken, barang kadè silot ibas kedirinna bagi ma ngo lot ibas kediriin AnakNa i. 1:20 Janah merkitè Anakna i ma ngo ibaing Dèbata ndorok mersaor nola mengolihi sagumanna silot i dekket Dèbata -- silot i dunia èn bak si ni sorga pè, merkitè-kitè permatè AnakNa i, i kayu persilang. 1:21 Ukum arnia, ndaoh ngo kènè bai Dèbata nai. Musuh ndènè ngo Dèbata kumarna pengelako dekket pikiren ndènè jahat i. 1:22 Tapi ukum bagèndari enggo merdamè kè dekket Dèbata merkitè permatè AnakNa i. Jadi mpanting mo kènè iembah mi hadeppen Dèbata janah oda mertikas. 1:23 Tapi kennah hot ngo kènè percaya janah ntegguh cènder merkepercayaen. Ulang gabè mosè pengharapen ndènè bagè sienggo niberrèkenna kin bai ndènè sinderrang ijalo kènè Sukuten Kelluahen bai Dèbata nai. Enggo mo ibagahken taba karina jelma Sukuten i mi suberri dunia èn. Idi ma ngo sebabna aku si Paulus enggo gabè perkebbas. 1:24 Lolo ngo aku bagèndari, kerna ndorok menggong simpersuk aku lako mengkepkep kènè. Ai merkitè sitahanen i perdagingen èn, imo lako pepulken kadè kin dèba nai sigongenken Kristus mengkepkep kuriaNa, imo dagingNa i. 1:25 Ipebangkit Dèbata aku gabè pengendeng i kuriaNa, lako bai ndènè ngo i, asa kupessoh bai ndènè karinana Sukuten bai Dèbata nai, 1:26 imo sukuten sienggo merratus-ratus tahun sienggo salpun irusiaken Dèbata bai karina jelma, tapi ukum bagèndari enggo ibagahken bai ummatNa. 1:27 Bai ummatNa i ngo naing ibagahken Dèbata bakunè mendèna dekket kesurungen rusiaNa i lako bai karina jelma. Ukum rusia idi, imo: Mula ibagasen Kristus kènè, iperakapken kènè mo kebelgahen Dèbata. 1:28 Kristus ngo kusukutken kami bai gennep jelma. Kupesèngèt janah kupeddahi kami ngo kalak i karina merkitè kebijaken nami, asa merkitè idi karina jelma terteggu mendahi Dèbata, imo sienggo mbages perbinettohenna tersèngèt pertendiin i ibagasen Kristus. 1:29 Asa dapet idi, mertuhu-tuhu ngo kukelejaken ibas karina gegohku, imo gegoh siniberrèken Kristus bangku, janah simengula ibas diringku dom kuasa.
2:1 Ukum dok atèngku naing mo nemmu ibettoh kènè bakunè susahna perjuapen batinku mengkepkep kènè bang kalak ni Laodikia dekket karina siso ntangkas menandai aku dèng. 2:2 Karina i kuulaken asa ntegguh nemmuken ukur kalak i janah mersikekelengen samahsa, asa makin sisada kalak i, janah asa makin iarti kalak i janah makin percayana, jadi makin ibettoh kalak i mo rusia Dèbata, imo Kristus i. 2:3 Kristus ngo memukaken kebijaken bak perbinettohen Dèbata simboni arnia. 2:4 Kubagahken i asa ulang ioto-otoi kalak perkata ndalit kènè. 2:5 Mula pè ndaoh aku bai ndènè nai, ukum pertendinku rebbak ngo dekket kènè. Lolo kalohoon ngo aku mengidah seppèna kènè sada kata janah percaya bai Kristus. 2:6 Kerna naidi bagè penjalo ndènè bai Jesus Kristus Tuhan i, bagi mo kènè merpengelako ibagasensa, 2:7 janah merurat ibagasenSa. Naing mo nemmu kènè bagè sinipehèdu-hèdu merbatu cendiken Kristus. Kepercayaen ndènè pè makin ntegguhna tosè bagè sienggo ipeddahken bai ndènè. Dakdak mo kènè perukur mejalo metangkup. 2:8 Merjaga-jaga mo kènè, asa ulang iago dèba kènè merkitè nahu jelma siso merguna janah mengelalingken, ai oda ngo bai Kristus nai nahu sibagidi, tapi bai jelma nai ngo rohna dekket bai tendi-tendi perkuasa dunia ènda nai. 2:9 Ibagasen Kristus ngo dapet kedèbataan ni Dèbata, merupaken jelma. 2:10 Asa gabè dom ngo kinimerandal ibagasen Kristus bagidi ma perangè mendè pè, kerna Kristus ngo ekuten bai karina tendi simerkuasa bak memerèntah. 2:11 Mula ibagasen Kristus kènè, enggo mo kènè itakkil, oda bagè pertakkil nibaing jelma, tapi mertakkil nibaing Kristus ngo imo merkitè enggo ipaluah kènè ibas bakko dosa idi nai. 2:12 Ai sinderrang iperidi kènè, tikan bagidi ngo kènè ikubur rebbak dekket Kristus, janah merkitè perridiin i ma rebbak ipegelluh nola ngo kènè rasken dekket Kristus, kerna ikepercayai kènè kuasa Dèbata sienggo pegelluhken Kristus i kematèen nai. 2:13 Ai sienggo matè ngo kènè tikala idi ipas pertendiin, kumarna dosa ndènè i, janah kumarna oda itakkil kènè cara daging. Tapi ukum bagèndari enggo ipegelluh Dèbata kènè rebbak dekket Kristus, kerna enggo isasa Dèbata karina dosanta, 2:14 janah enggo isondati hukumna simengennai kin nemmu banta. Merkitè ipersilangken karina idi ipas kayu persilang isasaken Dèbata mo karina tuntuten taba kita. 2:15 Asa ulang nèngè mergegoh karina tendi simemerèntah bak simerkuasa i. Gabè tontonen sinterrem mo kalak i karinana, sinderrang iarak Kristus kalak i gabè taban-tabanen, tikan ibas arak-araken petuduhken kemenangenNa. 2:16 Kerna naidi ulang mo ipekata-kata dèba kènè kemulihken pangaan barang ènumen, barang pè kumarna ari raya agama, barang ari raya peltak bulan barang pè tersèngèt ari Sabat. 2:17 Ai pellin lèndung simasa seggen i ngo kessa i, tapi Kristus ngo keteridahen ni karinana i! 2:18 Ulang belli kènè diri ndènè irogiken kalak sipakulah-kulahken peteruhken dirina janah mersembah taba malaèkat-malaèkat. Gabè gegah ngo kalak i kemulihken pikiren-pikiren tanoh èn janah mengasang-asangken alaten-alaten siniidahna, 2:19 oda nèngè Kristus i ekutenna. Bai Kristus ngo mertemmu karinana daging sinipedemmu sendihi janah makin mbelgah mengèkutken lemmo atè Dèbata. 2:20 Enggo matè kènè rebbak dekket Kristus janah enggo ipaluah ipas gemgemmen tendi simengkuasai dunia èn nai? Kasa uè dèng kènè nggelluh janah tunduk mi hatoren pati-patiin simendokken, 2:21 "Ulang jamah i; ulang pangan i, ulang dais kono mi sidi?" 2:22 Oda merlapaten nèngè karinana hatoren sibagidi, ai hatoren dekket pati-patiin jelma ngo i karina. 2:23 Tuhu ukum tengennen bagè kebijaken ngo i mula idokken mersembah taba malaèkat janah pebujur-bujurken ukur ncerrep dekket mendersa diri; tapi cituk poda merguna i karinana lako mengalo cubellek-cubellek daging.
3:1 Ukum kènè enggo ipegelluh rebbak dekket Kristus, kerna naidi jalangi mo si ni sorga i, imo bekkas Kristus kundul i kamuhun Dèbata. 3:2 Si ni Sorga i mo pikiri, ulang mo si ni tanoh èn. 3:3 Kerna sienggo matè ngo kènè, jadi ukum nggelluh ndènè sibagèndari rebbak dekket Kristus, mboni ibagasen Dèbata ngo. 3:4 Nai ntarar kessa mo seggen Kristus simerrèken kenggelluhenta i, kènè pè dekket ma mo terridah rebbak dekketsa i kessangapenNa i. 3:5 Kerna naidi, bunuh kènè mo karina cubellek-cubellek tanoh èn simencèdai diri ndènè, imo perlangkah julu meddemenken, luhlah, rorang, cubellek jahat nipergeddo daging, nahaka (kerna nahaka i dos ngo i mi mersembah taba bègu). 3:6 Ai sibagidi ngo mengkerohken laga Dèbata taba kalak siso menguèi katana. 3:7 Ukum tikala i, iulaken kènè ngo sibagidi, sinderrang ikuasai dèng kènè. 3:8 Tapi ukum bagèndari, patakken kènè mo nasa sijahat ibas diri ndènè nai; ulang nèngè melaga barang mengamuk barang merrukur benci taba sidèban. Ulang ruap bai ndènè nai kata-kata mengelèai barang rana-rana mellamun. 3:9 Ulang kènè mersiluapen, ai enggo italkasi kènè nggelluh ndènè siarnia dekket bakko i. 3:10 Enggo iberrè nggelluh sirembaru bai ndènè bagèndari, jadi enggo mo kènè gabè jelma rembaru, siniperimbaru Situmempa, tasè bagè rupaNa ibaing Dèbata, asa itandai kènè Dèbata i. 3:11 Jadi patakken kènè mo karina simengkella-kella, ai oda lot nèngè kalihna kalak Jahudi barang siso Jahudi, kalak simertakkil barang siso mertakkil; oda lot nèngè kalihna perbangsaan pè, oda kalih hamba barang anak tohè, ai Kristus ngo ibas sagumanna i, janah ibagasen Kristus ngo sagumanna i. 3:12 Kerna naidi kènè alè sienggo gabè ummat Dèbata janah nipilihna. Kennah gabè permasèh atè ngo kènè, perrukur mendè, merrukur ncerrep, melamlam janah mbingit. 3:13 Kennah mersipeuè-uèen ngo kènè samah kènè, janah mersisasaan dosa. Ai Tuhan i pè enggo isasa dosa ndènè, bagi ma mo bang kènè pè. 3:14 Siperluna kalohoon imo: Kennah mersikekelengen ngo kènè samah kènè, ai i ngo rakut-rakut simendèna kalohoon. 3:15 Naing mo keputusen-keputusen ndènè itentuken damè siniberrèken Kristus idi ibagasen atè-atè ndènè. Ai idilo Dèbata kènè asa gabè sada daging ngo ibagasen damè ni Kristus i. Ninganna gabè perrukur mejalo metangkup mo kènè. 3:16 Naing mo idomi peddah Kristus perrukuren ndènè, janah dak mertinèncuk mo damèna bai ndènè. Mersiajar-ajaren mo kènè merkitè-kitè kebijaken, endèken kènè mo endè pemoji-mojiin Psalm dekket endè-endè pertendiin. Endèken kènè mo Dèbata ibagasen ukur mejalo metangkup ibas atè-atè ndènè. 3:17 Rèmpunna, barang kadè iulaken barang iranaken kènè, ulaken janah ranaken kènè mo i lako memoji gerar Tuhan Jesus, ninganna mendokken mejalo metangkup bai Dèbata Bapa merkitè-kitè Jesus. 3:18 Kènè partua ibages, uèi kènè mo sinibalè ndènè, ai bagi ngo patutna pengelako kalak Kristen. 3:19 Kènè partua ibalè, kekellengi kènè mo sinibages ndènè. Ulang tois kènè meradepkensa. 3:20 Kènè alè anak-anak, uèi kènè mo partua ndènè, ai bagidi ngo ikellemmoken Dèbata. 3:21 Kènè alè partua, ulang gettemmi kènè ukur dukak-dukak ndènè, asa ulang mendellè kalak i! 3:22 Kènè alè dengan sigabè hamba! Ibas karinana mo uèi kènè induk ndènè i tanoh èn. Ulang mo pellin sinderrang idah kalak i asa merpenguèi kènè bana bagè cara muat-muat ukur; tapi uèi kènè mo induk ndènè i, kumarna merkebiaren kènè midah Tuhan i. 3:23 Ulaken kènè mo bahaan sinidokkenna bai ndènè ipas ukur nggasang, bagè pengulaken ndènè bai Tuhan i, oda bai jelma. 3:24 Èngèt kènè mo, bai Tuhan i nai ngo jaloon ndènè upah ndènè. Barang kadè ipèmaken Tuhan i bai ummatNa, idi ma ngo iberrèken bai ndènè. Ai Kristus i ngo induk siniuèen ndènè. 3:25 Barang isè salah, jalonna ngo bales kessalahenna i, ai dos ngo karinana jelma i hadeppen Dèbata.
4:1 Kènè alè induk, adil mo baing kènè taba naposo ndènè. Èngèt kènè mo, lot ngo induk ndènè i sorga. 4:2 Tettap mo kènè ngkasah mersodip, janah ndungo mo kènè. Dokken kènè mo mejalo metangkup taba Dèbata. 4:3 Sodipken kènè ma mo bak kami pè, asa iberrèken Dèbata tikki selloh bai nami lako mennukutken rusia Dèbata tersèngèt Kristus, ai kemmulihken naidi ngo asa terkurung aku bagèndari. 4:4 Mersodip mo kènè asa merkitè i ndorok kusukutken rusia i bagè patutna. 4:5 Bijak mo kènè taba kalak siso percaya dèng, janah pessanga kènè mo tikki ndènè lako mendahi kalak i. 4:6 Dak melamlam mo rana ndènè asa terrabin ukurna mendengkoh rana ndènè i. Mpantas mo kènè mengaloi kuso-kuso ndèba. 4:7 Bagahenken si Tikikus kekellengen i ngo bai ndènè karinana simasa bangku. Sada kalak kettoken ngo Ia mengula rebbak dekket kami bai Tuhan i. 4:8 Kuutus ngo ia mendahi kènè, asa ibettoh kènè bakunè masa bai nami, janah asa ipegasang kènè. 4:9 Rebbak berkat ngo si Onesimus dekket si Tikikus; sada kalak bai ndènè èn nai ngo ia janah kettoken. Ikekelengi kami ngo ia. Bagahenken kalak i ngo bai ndènè karina simasa i bekkasku èn. 4:10 Rebbak dekket aku ngo i kurungen si Aristarkhus. Menenges salam ngo ia taba kènè. Bagidi ma dekket si Markus bebberrè si Barnabas (Enggo kin ibagahken berita asa ijalo kènè ia, mula roh ia mendahi kènè). 4:11 Bagi ma dekket salam si Jesus simergerar Justus. Pellin kalak i sitellu nai ngo kessa denganku kalak Jahudi sipercaya bai Tuhan Jesus, denganku mengula ulaan bai Dèbata nai. Pengurupi tuhu-tuhu ngo kalak i bangku. 4:12 Menenges salam ma ngo taba kènè si Epapras, anak kuta ndènè èn ngo ia. Naposo Jesus Kristus ngo ia janah dak tong menodipken kènè, asa hot kènè ntegguh merukur ninganna tetap menguèi Dèbata. 4:13 Aku sendiri ngo saksina tersèngèt pengkelejakenna mengkepkep kènè, bagi ma dekket mengkepkep kalak Laodikia bak Hierapolis. 4:14 Dokter Lukas nikekellengen i bang si Demas pè, menenges salam ma ngo bai ndènè. 4:15 Pessoh kènè salam nami taba dengan Kristen i Laodikia; bagi ma taba si Nimpa dekket taba kuria silot i bagesna. 4:16 Enggo kessa ijakaken surat èn i tengah-tengah ndènè, ijakaken ma mo bang i kuria Laodikia. Bagi ma mo asa ijakaken kènè isèn surat si nitenges arap Laodikia bai ndènè. 4:17 Bagahken bai si Arkhipus, "Pul ibaing ulaan siniberrèken bana lako mengkebasi Tuhan i." 4:18 Salam bangku nai si Paulus. Aku sendiri ngo mennuratken èn. Ulang lupa kènè bangku si ni bagasen kurungen. Dak idengani masèh atè Dèbata mo kènè. Tabe nami, Paulus
1:1 Kènè alè dengan si ni kuria Tesalonika sienggo gabè ummat Dèbata Bapa dekket Tuhan Jesus Kristus. Kami imo si Paulus, si Silas dekket si Timoteus mengharapken dak idengani masèh atè Dèbata mo kènè janah iberèken mo damèna bai ndènè. 1:2-3 Mendokken melias atè ngo kami dakdak taba Dèbata, kemulihken kènè karinana. Gennep mersodip kami bai Dèbata Bapanta dak kuèngèt kami ngo kènè. Dak kusodipken kami ngo kènè. Kuèngèt kami ngo barang bakunè kènè peteridahken ibas pemahan ndènè magahken percaya kènè bai Kristus, barang bakunè kènè mengkekelengi kalak sidèban janah gabè mengkebasi kalak i, janah bakunè kènè merpengharapen sintegguh taba Tuhanta Jesus Kristus. 1:4 Kubettoh kami ngo alè dengan, ikekelengi Dèbata ngo kènè janah ipilih mahan milikNa. 1:5 Ai oda ngo pellin kata-kata sambing kupesoh kami bai ndènè Sukuten Kelluahen i, tapi merdengan kuasa bak Tendi Perbadia ngo. Tok kalohon ngo kami mi kebennaren Sukuten Kelluahen i. Ibettoh kènè ngo barang bakunè pergelluh nami lako mengkepkep kènè, tikan i tengah-tengah ndènè kami. 1:6 Enggo ngo icodi kènè kami dekket mencodi Tuhan i. Ijalo kènè ngo sukuten sinibagahken bai ndènè ibagasen sampang atè, tukasi pè menggong matcam bagè simpersuk kènè, Tendi Perbadia ngo merrèken i. 1:7 Merkitè bagidi gabè codiin ngo kènè taba karina kalak Kristen ni Makedonia dekket ni Akhaya. 1:8 Ai mulai bai ndènè nai makin sarna ngo berita tersèngèt Tuhan i mi Makedonia dekket mi Akhaya, oda pellin i tupèh, tapi dekket ngo kepercayaen ndènè bai Dèbata, terberita mi suberri aur, jadi oda pella kadè nèngè sidokkenken nami tersèngèt i. 1:9 Ibagahken kalak idi ngo bakunè penjalo ndènè bai nami sinderrang roh kami mendahi kènè tikala i dekket i pennadingken ndènè gana-ganaan ndènè i, gabè roh kènè mendahi Dèbata singgelluh i janah bennar. 1:10 Iranaken kalak i ma ngo bakunè pemmèma-mèma ndènè i pekkiroh Anak Dèbata i sorga i nai, imo Jesus sienggo nipegelluh Dèbata i simatè nai. Jesus i ngo paluahken kita ipas hukum pungur Dèbata sinaing roh seggen i.
2:1 Alè dengan ibettoh kènè ngo oda magosia pekkeroh nami mendahi kènè. 2:2 Ibettoh kènè ngo sinderrang madèng roh kami mendahi kènè mi Tesalonika, sienggo idersa janah ilèai ngo kami i Pilipi. Tapi tukasi pè mèduk mengalo kami, iberrèken Dèbatanta ngo nggasang ni ukur bai nami lako mengerranaken bai ndènè Sukuten Kelluahen siroh bana nai. 2:3 Oda ngo kellalingen pengarahken nami bai ndènè i; oda ma ngo akkal-akkal barang lako mengkilang. 2:4 Tapi bagè kalak sienggo tau ngo kami dok atè Dèbata mahan kesampèen Sukuten Kelluahen i, bagidi ngo kuruapken kami oda bagè cara muat-muat ukur jelma, tapi asa gabè kelemmonken atè Dèbata simenniahi pusuh perratèen nami i ngo. 2:5 Ibettoh kènè ngo; oda nung kami merkata ndalit, oda nung kami merukur bècuk lako muat harta; Dèbata ngo saksi nami tersèngèt idi. 2:6 Oda nung kutulusi kami pemoji-mojiin bai jelma nai -- tah bai ndènè nai barang bai jelma sidèban idi nai pè, kasi pè nemmu ndorok kupido kami bai ndènè nai barang kadè, kumarna rasul Kristus i kami. 2:7 Ai melamlam ngo kami i tengah-tengah ndènè, tosè bagè partua ibages pehèdu-hèduken dukak-dukakna. 2:8 Kumarnaken ngkelleng atè nami, uè ngo kami merrèken oda pellin Sukuten Kelluahen i bai ndènè, tapi dekket ngo bang nggelluh nami i pè. 2:9 Dok atè tentu ièngèt kènè ngo alè dengan, bakunè pengkelejaken nami. Mahar ari berngin ngo kami mahan bahaan, asa ulang lot barang isè pè kènè kususahi kami sidekkah i tengah-tengah ndènè kami magahken Sukuten Kelluahen siroh bai Dèbata nai i. 2:10 Kènè ngo saksi, bagi ma pè bak Dèbata, ukum kami merpengelako merandal kalohoon ngo janah bennar, oda sitikasen merradepken kènè sienggo percaya bai Kristus i. 2:11 Ibettoh kènè ma ngo, karina ngo kènè kubaing kami bagè pemmaing sada kalak bapa taba dukak-dukakna. 2:12 Kupeddahi kami ngo kènè janah kuajari kami, asa merperangè mengèkutken lemmo atè Dèbata kènè. Ai enggo idilo Dèbata kènè mi gemgemmenna ibas Dunia Rembaru bai Dèbata nai janah mengakapi kesangapenNa i. 2:13 Lot dèng sada nai makinken oda meradi-adi kami mendokken mejalo metangkup bai Dèbata, imo penjalo ndènè i kata Dèbata sikusukutken kami; ijalo kènè berita i oda bagè sukuten bai jelma nai, tapi berita bai Dèbata nai ngo, ai tuhu-tuhu ngo i kata bai Dèbata nai! Mengula ngo Dèbata ibagasen kènè sienggo percaya bai Kristus. 2:14 Alè dengan, tosè bagè sienggo iakapi kènè bagi ma ngo iakapi kuria Dèbata milik Jesus Kristus si lot i Judèa. Igong kènè ngo simbernit nibaing bangsa ndènè taba kènè, tosè bagè nigongken kuria-kuria Dèbata silot i Judèa bai kalak Jahudi nai. 2:15 Ibunuh kalak Jahudi ngo Tuhan Jesus dekket nabi-nabi, kami pè iletlet ngo. Dak ialo kalak i ngo Dèbata, jadi musuh karina jelma ngo ia. 2:16 Ihalang-halangi kalak i ngo kami menjamitaken berita kelluahen bai kalak siso Jahudi. Merkitè bagidi, dak makin itambahi kalak i ngo dosana gabè gukguk soh mi langit. Bagèndari pè lalu mo luas hukum Dèbata bai kalak i. 2:17 Tapi alè dengan, kessa nai laus kami, i tengah-tengah ndènè nai -- ndaoh ngo nemmuken kènè i mata -- tapi ndessing ngo ukum ibas ukur. Jadi enggo mo messeng nteddoh nami midah kènè. Nai dak ngo ipergeddo ukur nami naing roh mendahi kènè nola! 2:18 Kerna naidi iniatken kami ngo naing roh mendahi kènè, janah aku si Paulus enggo barang piga-piga kali mencubaken naing berkat, tapi dak ihalangi Sibolis i dèng ngo langkah nami. 2:19 Situhunna kènè ngo pengharapen nami dekket sampang atè nami. Mula roh kessa luas Tuhan Jesus, mengadep mo kita baNa, nai kènè mo gabè kebanggaan nami. 2:20 Uè tupèh, kènè ngo kebanggaan dekket kelolonken ukur nami.
3:1 Nai kumarna oda tertahanken nèngè messeng nteddoh nami, gabè lotiin mo dok atèngku sadaku lebbè tading i Atena, 3:2 kuutus mo si Timoteus. Dengan sada ulaan ngo ia janah naposo Dèbata, simengula rebbak dekket kami lako mennukutken Sukuten kelluahen tersèngèt Kristus. Kuutus kami ia, asa ipetegguh ukur ndènè janah ipeddahi kènè, asa makin percayana kènè bai Kristus, 3:3 asa ulang lot barang isè bai ndènè nai gabè sondar kumarnaken kinipersukta èn. Ibettoh kènè ngo, dekket kepersuken i pè sienggo irencanaken Dèbata kin ngo i banta. 3:4 Ai sinderrang i tengah-tengah ndènè dèng pè kami, enggo kin ngo kubagahken kami taba kènè, kennah menggong simpersuk ngo kita. Jadi idi ngo simasa bagèndari, bagè nibettoh ndènè i kin. 3:5 Idi ngo kulih sebabna, asa kupasulak si Timoteus mendahi kènè naing kubettoh bakunè kepercayaen ndènè taba Kristus. Tah bakunè enggo iunjuni Sibolis i kènè, gabè magosia nola kelejaan nami karina. 3:6 Bagèndari enggo balik si Timoteus janah ibagahken bai nami tersèngèt kepercayaen bai Kristus dekket kelleng atè ndènè samah kènè, pesampangken ukur nami. Ibagahken dèng ma ngo bakunè lekketna i ukur ndènè kami, dekket nteddoh ndènè naing mengidah kami, tosè bagè kami pè, nteddoh ngo naing mengidah kènè. 3:7 Kerna naidi alè dengan gabè terapo mo ukur nami kumarna berita tersèngèt kènè. Kepercayaen ndènè i i ngo pegasangken pennarihen nami. 3:8 Asa bagè balik nggelluh ngo pengakap nami bagèndari, asal mo hot kènè percaya bai Tuhan i. 3:9 Oda terdokken kami merkitè kata, bakunè belgahna melias atè nami bai Dèbata kemulihken sampang atè sikujalo kami bana nai kumerna kènè. 3:10 Mahar ari berngin dak kupido kami ngo ibas sodip nami asa ndorok kami pejumpa hadep dekket kènè, asa kudomi kami kadè sikurangna ibas kepercayaen ndènè. 3:11 Katerra pè, ipaduè Dèbata Bapanta dekket Tuhan Jesus Kristus mo ndorok kami pejumpa dekket kènè! 3:12 Dak itambahi Tuhan i mo ngkelleng atèna samah-samah kènè dekket mengkekelengi karina jelma, asa makin mertinèncuk ngkelleng atè ndènè, tosè bagè ngkelleng atè nami midah kènè. 3:13 Asa merkitè i makin ipergegohi Tuhan i ukur ndènè, gabè mbadia kènè janah oda mertikas i hadeppen Dèbata Bapanta, tikan roh luas Tuhanta Jesus rebbak dekket karina sienggo gabè milikNa.
4:1 Adumna i alè dengan, naing mo nemmuken ièkutken kènè codiin sikubaing kami tersèngèt bakunè carana kènè lako pesampangken atè Dèbata. Nemmuken enggo ngo ibagasenna i kènè, tapi bagèndari ibagasen kuasa Tuhan Jesus memmes kupidoken kami taba kènè, asa makin tangna kènè mengulaken i! 4:2 Kerna enggo ibettoh kènè peddah sienggo kuberrèken kami bai ndènè merkitè kuasa Tuhan Jesus. 4:3 Ai èn ngo ipergeddo Dèbata: Naing mo mpanting kènè ipas ulaan luhlah i nai. 4:4 Karina anak laki i tengah-tengah ndènè, kennah ibettoh bakunè carana nggelluh rebbak sinibagesna maing lolo atè Dèbata bak jelma. 4:5 Ulang mo kumarnaken cubellek daging bagè pemmaing kalak pemmèlè bègu siso menandai Dèbata. 4:6 Ipas sibagèen i ulang lot barang isè pè memmakin salah taba denganna, barang pè mengakkal-ngakkali. Tikala i enggo kubagahken kami taba kènè i, ihukum Dèbata ngo kalak simengulaken kessalahen sibagidi. 4:7 Ai mi kebadiaan ngo kita idilo Dèbata, oda ngo mi simerroha. 4:8 Kerna naidi barang isè pis matana midah peddah ènda, oda jelma nilèanna, tapi merpis mata midah Dèbata simerrèken TendiNa Simabadia i ngo. 4:9 Ukum tersèngèt bakunè carana kènè mengkekelengi samah dengan oda pella pessèngètenku nèngè kènè. Ai enggo iajari Dèbata kènè tersèngèt mersikekelengen. 4:10 Janah enggo mo ituduhken kènè i taba dengan Kristen i suberri Makedonia. Tapi alè dengan memmes kupido kami taba kènè, naing mo makin sellohna pengulanken ndènè. 4:11 Kerencetken kènè mo gabè kalak persip janah ulang iantoi simasa bai sidèban. Mahan bahaan mo kènè asa lot pangaan ndènè; bagè sienggo kuaturken kami tikala i bai ndènè. 4:12 Merkitè bagidi, oda nèngè mengharapken kalak kènè, nai gabè ipesangap kalak siso percaya bai Kristus i mo kènè. 4:13 Kènè alè dengan, dok atè nami naing mo ntangkas iarusi kènè tersèngèt kalak sienggo kumellip i, asa ulang bonek atè ndènè bagè kalak siso merpengharapen. 4:14 Mula percaya ngo kita, sienggo matè Jesus, janah nggelluh nola mengolihi, sikepercayai ma mo pegelluhen Dèbata ma ngo karina kalak sienggo kumellip sipercaya bai Jesus, asa rebbak kalak i dekketSa. 4:15 Tersèngèt idi, bagèen ngo peddah Tuhan i sinaing pessohken nami bai ndènè: Mula pè nggelluh dèng kita soh mi pekerroh Tuhan Jesus, oda ngo kita mengelebbèi kalak sienggo perlebbè kumellip i. 4:16 Sampur kessa mo seggen Tuhan Jesus i sorga nai, mersurak-surak mo ekuten malaèkat janah isempul mo sarunè Dèbata mahan pertandaan. Nai ipegelluh mo perlebbè kalak simatè sienggo percaya bai Tuhan Jesus. 4:17 Enggo kessa bagidi, kita singgeluhna dèng pè tikan bagidi, iarahken mo rebbak dekket kalak i merkitè hembun lako menimbak-nimbak Tuhan i, i abang-abang i. Nai rebbak mo kita dekket Tuhan i soh mi amman sumendah. 4:18 Kerna naidi, dak mersiapoon mo kènè samah kènè merkitè kata ènda.
5:1 Tapi alè dengan, oda pella kusuratken kami taba kènè ndigan mo kettikana masa i. 5:2 Ai ntangkas ngo ibettoh kènè, ukum Ari pekiroh Tuhan i, bagè pekiroh pennangko berngin ngo. 5:3 Mula idokken dèba, "Mènak ngo karina," nai tikan bagidi mo sempa kememmago bana! Masa ngo karinana i tosè bagè pengakap daberru rabisen lako mennubuhken dukakna. 5:4 Tapi ukum kènè alè dengan, oda ngo ibagasen sigellap, gabè uè tersengget bagè pennangko kumarna kaharen. 5:5 Karinana ngo kènè nggelluh ibas kecihuren janah dukak-dukak sinterrang. Oda ngo kita nggelluh ipas sigellap barang pè kalak gellap tuiten. 5:6 Kerna naidi, ulang mo kita terpeddem bagè kalak sidèban; kennah ndungo ngo kita merjaga-jaga janah nterrang merrukur. 5:7 Ai tikan berngin ngo terpeddem kalak, janah tupung berngin ngo mabuk kalak simabuk. 5:8 Tapi ukum kita kalak kecihuren ngo, kerna naidi kennah terrus ukurta. Kennah ngo kita tettap percaya taba Tuhan, janah mengkekelengi kalak sidèban janah tok merpengharapen ipaluah Dèbata ngo kita. Idi mo senjata mengelènggemmi kita ibas perjuapen mengalo kegellapen. 5:9 Oda ngo ipilih Dèbata kita mahan lagana, tapi asa terrolih kelluahen ngo kita merkitè-kitè Tuhan Jesus Kristus. 5:10 Ai enggo matè Jesus mengkepkep kita -- jadi roh kessa ia luas, mula pè nggelluh dèng kita barang enggo matè pè -- gabè nggelluh nola mo kita rebbak dekketSa. 5:11 Kerna naidi naing mo kènè mersipesèngèten janah mersipehèdu-hèduun ibagasen kepercayaen, bagè sienggo nibaing ndènè bagèndari. 5:12 Alè dengan, memmes kupido kami bai ndènè, asa hargai kènè kalak simengkebasi kènè i tengah-tengah ndènè, imo kalak sienggo ipilih Tuhan i lako menguluken janah memeddahi kènè. 5:13 Hargaken kènè mo kalak i janah kekellengi kènè mernèngèt bahaan sienggo ibahanken kalak i. Dak merdamè mo kènè samah kènè. 5:14 Kupido kami dèng ma taba kènè alè dengan, asa pincang kènè kalak siso uè karèjo. Pepos kènè mo ukur kalak simbiar; urupi kènè kalak siperlu urupen, janah merpenganju mo kènè taba karina jelma. 5:15 Perdatèken kènè mo asa ulang lot memmalesken nggodo bales nggodo. Merandal mo baing kènè samah kènè bang taba karina jelma pè. 5:16 Dak merlolo atè mo kènè, 5:17 janah ulang mengadi-ngadi mersodip. 5:18 Mendokken mejalo metangkup mo kènè kumernaken karinana ai i ngo ipergeddo Dèbata bai ndènè nai sienggo ibagasen Kristus Jesus. 5:19 Ulang ènteppi kènè Tendi Perbadia! 5:20 Ulang pis mata ndènè midah sukuten niberrèken Tendi Perbadia. 5:21 Pemmanat kènè mo karinana, janah patohi kènè mo sisellohna. 5:22 Peddaoh kènè mo karina kejahaten. 5:23 Dak ibaing Dèbata simerrèken banta damè i mo bai ndènè nggelluh pellin ibagasen Dèbata sambing. Janah dak ijamoti Dèbata mo tendi, kessah dekket daging ndènè karinana, asa ulang mertikas kènè tikan roh kessa Tuhan Jesus Kristus mengolihi. 5:24 Dèbata sienggo mendilo kènè; pessautenna ngo karinana i, kerna sètia ngo Ia. 5:25 Sodipken kènè mo kami alè dengan! 5:26 Mersisalamen mo kènè merkitè salam ngkelleng taba dengan sipercaya bai Kristus. 5:27 Kuèlèk-èlèk mo kènè i hadeppen Tuhan, asa jakaken kènè surat èn taba karina dengan sipercaya bai Kristus. 5:28 Dak ipasu-pasu Tuhan Jesus Kristus mo kènè. Tabe nami Paulus
1:1 Kènè dengan sada kuria i Tesalonika sienggo gabè ummat Dèbata Bapa dekket Tuhan Jesus Kristus! Kami, imo si Paulus, si Silas dekket si Timoteus 1:2 mengharapken iberrèken Dèbata Bapanta dekket Tuhan Jesus Kristus mo pasu-pasu dekket damèna bai ndènè. 1:3 Kènè dengan, patut ngo kami mendokken mejalo metangkup taba Dèbata kumarna kènè alè dengan. Janah patutna ngo kami mendokken i, ai dak makin percayana ngo kènè bai Kristus, janah enggo makin mersikekelengen kènè samah kènè. 1:4 Kemmulihkenna idi ngo dak kuterèngèti kami kènè gennep kami mendalani kuria Dèbata. Nggasang ngo ukur nami lako mennukutken ntegguhna kepercayaen ndènè bai Kristus, tukasi pè dak iletlet janah mpersuk iakap kènè. 1:5 Merkitè idi enggo ntangkas taridah ntèger ngo hukum Dèbata: Enggo kènè menggong simpersuk kumarna kerajaen Dèbata. Janah kumarna i ngo enggo patut kènè mbengket mi kerajaen Dèbata. 1:6 Ntèger ngo pemmaing Dèbata. Ibalesken ngo simpersuk taba kalak sipepersuk-persukken kènè. 1:7 Iberrèken Dèbata ngo kessennangen bai ndènè simenggong simpersuk bagèndari -- bagi ma ngo bang bai nami pè -- tikan roh Kristus ntarar i sorga nai rebbak dekket malaèkatNa simerkuasa i, 1:8 dekket merkitè api mergollah-gollah. Roh ngo ia lako mendabuh hukum taba kalak siso uè kipaduliken Dèbata janah siso menguèi Sukuten Kelluahen tersèngèt Jesus Tuhanta i. 1:9 Ihukum ngo kalak i mi kemmagoon siamman sumendah. Oda terolih kalak i kemmuliaan dekket kegegohen dekket kuasa Tuhan i, 1:10 tikan pekirohna i, mersangap mo Ia ibaing ummatNa janah ipepoji-poji kalak sipercaya i mo ia. Kènè pè dekket ngo gabè ummat Dèbata kerna percaya ngo kènè mi sukuten sikusukutken kami bai ndènè. 1:11 Idi ngo sebabna asa dak kusodipken kami kènè. Mersodip ngo kami asa ibaing Dèbata kènè patut nggellluh rembang mi lemmo atèNa, kerna i ngo asa idilo kènè. Katerra pè iurupi Dèbata mo kènè lako mengulaken simerandal bagè nipergeddo ndènè, janah pelliasken karina ulaan ndènè, kumarna percaya kènè bai Kristus. 1:12 Merkitè bagidi terpoji mo Tuhanta Jesus kumarna kènè, janah kènè pè ipoji Jesus ma mo kumarna mendè basa Dèbata dekket Tuhan Jesus Kristus.
2:1 Ukum tersèngèt pekerroh Tuhan Jesus Kristus, dekket tersèngèt ipepulung kita asa rebbak dekketSa, memmes kupido bai ndènè: 2:2 Ulang mèter ndor jut ukur ndènè janah bulisah, kumarna lot bertikna enggo dapet tikkina roh Tuhan Jesus mengolihi. Tah bakunè bertik idi roh merkitè alaten barang pè arap sada peddah barang idokken dèba nung nina kusuratken kami bagidi ipas surat nami. 2:3 Barang bakunè nola pè i, ulang uè kènè ioto-otoi dèba. Ai sinderrang madèng dapet Ari idi, kennah masa ngo lebbè: Mèduk mo kalak merbalik bai Kristus nai janah taridah mo Sijahat sienggo itentuken masuk mi naraka i. 2:4 Mengalo mo ia ipas kejukattenna nai janah ipedates dirina mi babo karina sinisembah jelma bak karina sinidok-dok jelma i Dèbata. Ikunduli ngo bages Dèbata janah idokken taba jelma nterrem; Dèbata ia nina. 2:5 Oda ngo ièngèt kènè nèngè, enggo kin ngo kubagahken i taba kènè, sinderrang i tengah-tengah ndènè aku. 2:6 Tapi ukum bagèndari lot dèng ngo mengambatsa, janah ibettoh kènè ngo i. Enggo kessa dapet luas tikki sienggo ibuhul Dèbata, roh mo si Jahat i. 2:7 Enggo ngo mengula kegegohen si jahat i mboni-mboni, tapi tong dèng ngo iambat. Enggo kessa pè ipesisi simengambat i luas, 2:8 mèter taridah mo si Jahat i. Nai ibunuh Tuhan Jesus mo ia merkitè kessah sitarap babahNa nai sendiri, nai tumpat mo ia kumarna pekkirohNa i. 2:9 Merkitè perulaan Sibolis i ngo taridah si Jahat i merkegegohen. Ibaing mo mermatcam bagè tanda-tanda kellengangen siso nung masa lako mengkilang. 2:10 Merkitè-kitè kilang kejahaten ngo ibaing mengelalingken kalak sinaing mago. Mago mo kalak i kumarna oda ijalo janah oda ikellemmoken kalak i berita situhunna bai Dèbata nai sigabè kelluahen kalak i nemmuken. 2:11 Ingo sebabna asa iberrèken Dèbata bai kalak i kuasa pengoto-ngotoi lako mengelalingken kalak i, asa percaya kalak i mi siso tuhu. 2:12 Nai gabè kenna hukum mo karina kalak simengulaken dosa janah siso percaya taba kesèntengen i. 2:13 Kènè alè dengan, si nikekellengen Tuhan i! Kennah ngo dak kudokken kami mejalo metangkup taba Dèbata kumarna kènè, kerna i mulana nai ngo kènè ipilih Dèbata mahan paluahenna. Karinana idi ibaing Tendi Perbadia, asa gabè ummat simbadia Dèbata kènè, janah kerna percaya kènè mi sukuten kesentengen siroh bai Dèbata nai. 2:14 Mi sidi ngo kènè idiloi Dèbata merkitè-kitè Sukuten Kelluahen sikusukutken kami taba kènè asa gabè terolih kesangapen kènè rabbak dekket Tuhanta Jesus Kristus. 2:15 Kerna naidi alè dengan naing mo nemmu hot kènè cènder janah ntegguh mergantung mi peddah sienggo kuajarken kami merkitè-kitè kata barang ibagasen surat pè. 2:16-17 Katerra pè dak iapoi janah ipergegohi Tuhanta Jesus Kristus dekket Dèbata Bapanta i mo kènè, asa ndorok kènè mengulaken dekket mennukutken kadè simerandal. Kerna ngkelleng ngo atè Dèbata midah kita, janah kemulihken mendè basaNa, gabè iberrèken ngo banta pengharapen selloh.
3:1 Adumna i alè dengan, sodipken kènè mo kami, asa makin ndor sar sukuten bai Tuhan idi nai janah ijalo mendè, tosè bagè sienggo masa bai ndènè tikala i. 3:2 Sodipken kènè ma mo asa ipaluah Dèbata kami bai jelma jahat dekket nggodo idi nai, ai oda karinana jelma percaya mi Sukuten bai Tuhan idi nai. 3:3 Tapi kettoken ngo Tuhan i. Ipergegohi ngo kènè janah ilègenni meraloken kejahaten i. 3:4 Tok kalohoon ngo kami bai Tuhan i tersèngèt kènè, enggo iulaken kènè janah terrus ulanken ndènè karinana sienggo kudokken kami taba kènè. 3:5 Katerra pè dak iarak-arak Tuhan i mo kènè lako makin tangkas mengantusi ikekelengi Dèbata ngo kènè, janah iberrèken Kristus kebijaken bai ndènè. 3:6 Alè dengan, mengasangken kuasa Tuhan Jesus Kristus kudokken kami taba kènè, asa peddaoh kènè diri ndènè bai kalak siso uè mahan bahaan idi nai, dekket bai kalak siso menguèi peddah sienggo kuajarken kami bai kalak i. 3:7 Ibettoh kènè ngo barang bakunè cara ndènè kennah mencodi kami. Ai oda ngo ndong-ndong sambing kami sinderrang i tengah-tengah ndènè kami. 3:8 Oda nung kupangan kami pangaan barang isè pè mak mergarar. Rengè ngo kuakap kami mahan bahaan suntuk ari suntuk berngin, asa ulang lot kuberrati kami barang isè pè kènè; 3:9 oda ngo kumarna mak i dalanna nemmuken mengido pengurupiin kami taba kènè, tapi asa gabè mahan codiin ngo sikubaing kami i bai ndènè. 3:10 Ai sinderrang i tengah-tengah ndènè dèng pè kami, enggo kuhatorken kami, "Kalak siso mahan bahaan, ulang mo ia iberrè mangan." 3:11 Kudokken kami pè kata i bagidi, kumarna soh ngo bai nami bertikna lot bai ndènè nai siso mahan bahaan. Gabè siso bahanna ngo ibahan janah kadè poda iulaken. 3:12 Merkitè kuasa Tuhan Jesus Kristus kupesèngèt kalak sibagidi, mengula mo ia asa lot panganna. 3:13 Tapi ukum kènè alè dengan ulang kènè merkeleja-lejaan memmaing simerandal. 3:14 Tah bakunè lot dèba oda nggèut menguèi sikudokken kami ibas surat èn. Perdatèken kènè mo kalak sibagidi janah u;ang uè kènè mersaor dekketsa, asa mèla iakap. 3:15 Tapi ulang ètong kènè bagè musuh ia; dak pesèngèt kènè mo ia bagè sada kalak dengan. 3:16 Tuhan i ngo benna kelluahenta. Dak Iberrèken mo damèna sitermurmur i bai ndènè, janah dak idengani mo kènè karina. 3:17 "Salamku" si Paulus. Aku sendiri ngo mennuratken èn. Ai bagèen ngo tèkkènenku i gennep surat. 3:18 Dak idengani Tuhan Jesus Kristus mo kènè karinana. Tabe nami, Paulus
1:1-2 Alè Timoteus anakku sibujur ibagasen Tuhan i! Dukakku ngo kono kumarna percaya ko bai Kristus. Rasul Kristus Jesus ngo aku simenuratken surat èn. Gabè rasul ngo aku ipebangkit Dèbata Sipaluahken kita i, dekket merkitè-kitè Kristus Jesus pengharapenta i. Dak masèh mo atè Dèbata Bapa dekket Kristus Jesus Tuhanta i midah kono, janah iberrèken mo bamu pasu-pasu dekket damè. 1:3 Kupido bamu asa tong kono merian i Epesus, bagè sienggo kudokken taba kono, tikan naing laus aku mi Makedonia. Kudokken kono merian i Epesus kumarna lot i sidi barang piga-piga kalak mengajarken peddah siso tuhu, janah kennah dokkenkenmu asa ipettadi ajar latlatna i. 1:4 Pesèngèt kalak i asa ulang ipejojor-jojor tori-toriin dekket cundut-cundut siso merujung sudah. Ai pellin petubuhken perselisihen sambing ngo kessa karina i, janah oda ngo ipesaut taki Dèbata sindorok tandaan merkitè pellin percaya baNa. 1:5 Ukum nitèmbak peddah idi, imo asa gabè perkelleng atè jelma idi ibas pusuh peratènna nai, ibagasen pennarihen dekket ibagasen kepercayaen siso meradum. 1:6 Lot ngo dèba oda ibagasenna idi nèngè. Ai gabè laling ngo kalak idi ipas songsang siso merguna. 1:7 Naing ngo katèna gabè guru-guru agama kalak idi, keppèken oda iarti kalak i kata niruapkenna dekket niindangkenna. 1:8 Sibettoh ngo, mendè ngo ukum pati-patiin i mula rembang mi si pemakkèna. 1:9 Tapi kennah èngèten, iberrèken pè pati-patiin i oda ngo taba kalak simengulaken merandal tapi bai kalak perjahat siso menandai Tuhan ngo, dekket taba kalak perdosa, siso meragama simenguèi nipergeddo dunia èn; dekket taba kalak simemunuh partuana, dekket taba karina kalak pemmunuh jelma, 1:10 bang taba kalak simerpengelako luhlah, perlangkah julu meddem, pennamun, perluap; taba kalak saksi palsu dekket taba karina kalak simengalo peddah sènteng i. 1:11 Ukum peddah idi imo Sukuten Kelluahen bai Dèbata nai simermulia i janah patut sipoji Ia sipesakatken bangku ulaan i, asa kujamitaken. 1:12 Mendokken mejalo metangkup ngo aku taba Jesus Kristus Tuhanta i, sienggo merrèken bangku gegoh lako mengkebasiSa, janah mendilo aku mi bahaan i. 1:13 Ai kalak pengerèhèi kin ngo aku tikala i, janah pengeletlet ninganna mengellèaiSa. Tapi tukasi pè bagidi, masèh ngo atè Dèbata midah aku, ai oda dèng ngo aku percaya janah oda kubettoh dèng kin sikubakin i. 1:14 Keppèken gabè mertinèncuk ngo iberrèken Tuhan i bangku sibasa-basaNa. Ibaing ngo aku ndorok gabè percaya baNa janah mengkekelengi dengan jelma. Gegoh sibagidi iberrèken ngo taba kita karina sienggo sada ibagasen Jesus Kristus. 1:15 Kettoken ngo kata èn -- kerna naidi patut ngo sijalo i janah sikepercayai --: "Enggo roh Jesus Kristus mi dunia èn lako paluahken jelma perdosa." Aku mo jelma perdosa sijahatna, 1:16 tapi kumarna naidi ngo asa masèh atè Dèbata midah aku. Asa ndorok ituduhken Jesus Kristus karina lambas ukurNa midah aku jelma perdosa èn. Janah èn mo gabè sada codiin taba karina jelma sinaing percaya baNa asa gabè terolih kenggelluhen simenettap i. 1:17 Kennah sipoji ngo Dèbata Raja sidekkah-dekkahna, ai hot ngo Ia soh mi amman-sumendah. Sada ngo Ia janah oda teridah! Amèn. 1:18 Alè anakku Timoteus! Èn mo bahaan kupesakat bamu, mernèngèt sinidokken Dèbata merkitè nabi-nabi i Kuria tersèngèt dirimu. Pakkè mo i mahan sinjatamu lako mengulaken ulaan selloh. 1:19 Mengula mo kono ibagasen kepercayaen situhunna dekket ibagasen ukur mpanting. Lot ngo dèba oda isarihken gertek pennarihenna, gabè ncèda mo kepercayaenna. 1:20 I mo bagè si Hemeneus dekket si Aleksander. Enggo kupesakat kalak i sidua bai Sibolis, asa merguru nola kalak i lako mentadi menumpahi Dèbata.
2:1 Perlebbè kalohoon peddahku bamu imo: Dak mersodip mo kono mengido taba Dèbata ninganna mengondiken dengan janah mendokken mejalo metangkup bai Dèbata kumarna karina dengan; 2:2 mengkepkep karina raja dekket karina kalak perkuasa. Pido mo asa sennang kita janah oda lot mara banta lako mengulaken bahanta bai Dèbata. 2:3 Sodip sibagidi ngo merandal janah ikellemmoken Dèbata Sipaluahken kita. 2:4 Ipergeddo ukurNa ngo asa karina jelma maluah janah menandai kesèntengen i, 2:5 kerna sada ngo kessa Dèbata janah sada ma ngo kessa sipedemmuken Dèbata bak jelma i, imo Jesus Kristus. 2:6 Iberrèken ngo diriNa mahan tebbus karinana jelma ipas dosana nai. Merkitè bagidi ipacidah Dèbata ngo tupung ketikana selloh, magahken Ipergeddo ukurna ngo naing paluahken karinana jelma. 2:7 Kemulihkenna idi ngo asa ipasulak aku mendahi kalak siso Jahudi lako magahken bai kalak i sukuten tersèngèt kepercayaen sènteng. Tuhu ngo sikudokken èn, oda luap i. 2:8 Barang i dikè sambing pè naing mo karina anak laki mersodip taba Dèbata ibagasen ukur mpanting, ulang merdengan pungur barang pè rubat. 2:9 Dok atèngku bang daberru pè, biasa-biasa mo pemakkèna janah rèntem. Ulang mo tikka ibaing potongen bukna merpakkè-pakkèen emmas tah pè mutiara tah gedda simahal hargana. 2:10 Tapi naing mo karina daberru memakkè merkitè pengèlako rèntem bagè patutna bai daberru simenguèi Dèbata. 2:11 Kennah mersiajar ngo daberru i nono janah tuhu-tuhu merpenguèi. 2:12 Oda kupaduè daberru mengajar barang pè mengerajai sinibalèna; sandok kennah nono ngo kalak i. 2:13 Kerna si Adam ngo perlebbè itempa Dèbata, nai pè asa si Hawa. 2:14 Janah oda ngo si Adam ioto-otoi, tapi daberru i ngo gabè mengelausi i perèntah Dèbata. 2:15 Tapi tukasi pè bagi merkitèken menubuhken dukak, gabè maluah ngo daberru i, asal mo tettap ia mercerrep ukur merkepercayaen bai Kristus janah tettap merkelleng atè bak metemman i hadeppen Dèbata.
3:1 Kata bennar ngo èn, "Barang isè kalak mennulusi ulaan gabè pengendeng i kuria, selloh kalohoon ngo i, ai ulaan maharga ngo nitulusenna i!" 3:2 Kerna naidi ulang mo lot sitikasen perulaan pengendeng; pellin sada kalak mo ukum sinibagesna; merpengerrem, bijak, metemman, dak mersampang atè mertamuè janah pandè mengajari bak memmeddahi; 3:3 ulang permabuk, ulang perrubat-rubat, kennah perlemlam ngo ia janah perdamè. Ulang mbara matana midah riar. 3:4 Pandè mengerajai denganna sada bages, perdukak simenguèi ajar bak mehormat janah menguèi bana. 3:5 Kerna mula oda ngo ibettoh mengajari pengisi bagesna, bakunè mo ia ndorok mengatur kuria Dèbata? 3:6 Ulang mo kalak sirembaru gabè Kristen ibaing gabè pengendeng, asa ulang ndates ukurna, asa ulang gabè ndabuh ia mi hukumen bagè si Sibolis arnia. 3:7 Kennah mendè ngo beritana bai jelma nterrem, mula oda bagidi ilèai dèba mo ia, janah gabè ndabuh nola ia mi bagasen tinogong Sibolis i. 3:8 Bagidi ma ngo kalak sipengurupi ipas bahaan kuria, kennah kalak bujur ngo ia; oda ndorok kalak sisobur pola barang mbara matana midah riar. 3:9 Kennah kalak perkepercayaen ntegguh mi kekristenen sienggo nipeterrang Dèbata. Kennah iulaken kalak i ngo i, ibagasen pusuh peratènna mpanting tuhu-tuhu. 3:10 Kennah ioji ngo lebbè ia, nai mula oda lot terdapet tikasna, baru pè asa ndorok ipebangkit ia gabè pengurupi i tengah-tengah kuria. 3:11 Sinibagesna pè kennah kalak metemman ngo, ulang njalmit pekata-kataken janah peroha-rohaken sidèban. Kennah kalak merpengerrem ngo ia janah kettoken ipas karinana. 3:12 Kalak pengurupi ibahaan kuria, kennah sada ngo kessa sinibagesna. Kennah ibettoh mengatur dukak-dukakna dekket sinibagesna. 3:13 Mula enggo selloh perulanna i pengurupina i ulaan kuria i, ihormati dèba mo ia, janah makin nggasangna mo ia mengerranaken taba jelma tersèngèt kepercayaen bai Kristus. 3:14 Harap ngo aku oda pella sadikè dekkah nèngè, roh mo aku mendahi kono. Tapi tukasi pè bagidi, kutengesken ngo surat èn mendahi kono, 3:15 asa tah bakunè mellaun nola aku asa roh, giamken enggo ibettoh kono kin bakunè patutna kita merpengelako i hadeppen Dèbata, imo kuria Dèbata singgelluh i. Ai kuria i ngo dosken binangun janah simenjujung kebennaren bai Dèbata nai. 3:16 Isè poda terbakinsa mempersomada bagidi mbagesna rusia agamanta i: Ipetarar ngo diriNa merupaken jelma janah enggo ipetandap Tendi Perbadia kebennarenna janah enggo idah malaèkat-malaèkat i. Enggo idengkoh karina bangsa beritaNa janah enggo percaya dunia èn bana, janah enggo laus Ia mi sorga.
4:1 Tapi ntangkas ngo idokken Tendi Perbadia; gabè merbalik ngo dèba luas ipas kepercayaen i nai, oda nèngè menguèi peddah Kristus. Gabè penguèi mo kalak i mi tendi pengoto-ngotoi simengellalingken dekket mi pengajar-ngajari tendi jahat, 4:2 imo sinijarken kalak perbuah ringadar bana perluap. Enggo gellap pennarihen kalak i. 4:3 Ipeddahken kalak i ngo taba jelma, asa ulang jejap janah ulang ipangan dèba pangaan nihanaken Dèbata. Keppèken ihanaken Tuhan i ngo karina pangaan i, asa ipangan jelma i enggo kessa lebbèen idokken mejalo metangkup bai Dèbata siniruapkenNa kerna percaya ia bai Kristus janah enggo itandai peddah merandal bai Dèbata nai. 4:4 Ai merandal ngo karina sinihanaken Dèbata, janah sada poda ipas si nihanakenna i nai haram, mula enggo nijalo ibas ukur menjalo metangkup taba Dèbata. 4:5 Halal ngo karinana pangaan kumarna bai Dèbata nai ngo rohna janah mula enggo nisodipken taba Dèbata. 4:6 Mula ipeddahken kono i bai karina dengan sisada kepercayaen, naposo Jesus Kristus simengulaken selloh mo kono. Janah kennah kenggelluhenkenmu ngo ibas ukurmu kata Dèbata sisipercayai i, rebbak dekket peddah kesèntengen nigurukenmu sapatna èn. 4:7 Pesisi mo tori-toriin kesipèlèbèguun siso merguna i, pecemmal-cemmal mo dirimu mi nggelluh sinikellemmoken atè Dèbata. 4:8 Cituk ngo kessa guna pekebbelken daging, tapi ukum pecemmal-cemmalken diri mi simerandal, mi karinana ngo merguna i, ai merpengkerrohken ngo i mi nggelluh bagèndari dekket tikki silako roh. 4:9 Kettoken ngo kata èn janah sikepercayaen. 4:10 Kumarna naidi ngo asa leja kita janah mertuhu-tuhu mengula ai mengharapken Dèbata singgelluh i ngo kita, Ia ngo Paluahken karina jelma, tapi merkesurungen ngo kalak sipercaya i. 4:11 Peddahken mo karinana i janah dokken mo asa iulaken kalak i. 4:12 Ulang belli pis mata ndèba midah kono kumarna bajar i dèng kono. Tapi kennah codiin mo kono taba kalak sipercaya, merkitè-kitè pengerananmu, pengelakomu, ngkellengmu, kepercayaenmu dekket nggelluhmu simetemman i. 4:13 Ninganna idi mèma roh aku, empet mo menjakaken Bibèl taba sinterrem i janah ajari mo kalak i. 4:14 Ulang menahang ukurmu mernèngèt sibasa-basa Tendi Perbadia sienggo lot bamu. Ai ijalo kono i tikanna i, lebbè iampèken pengendeng kuria ngo tanganna mi babontakalmu, janah nabi-nabi pesakatken tennah Dèbata terrèngèt dirimu. 4:15 Mertuhu-tuhu mo i ulaken asa idah jelma nterrem karina kemajunmi. 4:16 Perdatèken dirimu dekket pengajarenmu, kennah tutus ukurmu mengulaken i karinana, ai paluahken dirimu ngo dekket kalak simendengkohken kono mula ibaing kono bagidi.
5:1 Ulang sergangi situa-tua. Tapi èlèk-èlek mo ia gabè dosken bapa bamu, janah ètong mo dosken dèdahenmu kalak mula posoon dèng ia bamu nai, 5:2 janah ètong ma mo daberru sienggo tua-tua i dosken inangmu. Mula simerbaju, ètong mo ia dosken turangmu, nai kennah rèntem bana metemman ngo kono merpengelako taba kalak i. 5:3 Persangapi daberru simebbalu sitading pellin sadasa. 5:4 Tapi mula merdukak janah merkempu ngo enggo daberru simebbalu i, ajari mo pinemparna i, asa isarihken kalak i kadè-kadèna i, janah memmales kiniselloh partuana barang empungna pè, ai idi ngo ikellemmoken Dèbata. 5:5 Tapi daberru simebbalu siso lot sima-simana sindorok mennarihkensa, mengharap mo ia bai Dèbata, janah mersodip mo ia gennep ari gennep berngin mengido pengurupiin bana nai. 5:6 Tapi ukum daberru mebalu simengulaken cubellek-cubellek dagingna, sienggo matè ngo tendina tukasi pè nggelluh dèng ia. 5:7 Pesakat peddahmu bai kalak i asa ulang sirèhèen kalak i. 5:8 Mula lot siso mennarihken kadè-kadèna, terlebbih mula sincelketna, sienggo mengelausken kepercayanna sendiri ngo kalak sibagidi, jahaten dèng ngo ia daripada siso percaya i. 5:9 Siterdokken daberru mbalu imo: kennah enggo merumur ennempuluh tahun janah pellin sikali ngo kessa ia jejap; 5:10 mendè pengelakona, umpamana; enggo ipehèdu-hèdu dukakna soh mbelgah, mersampang atè menjalo tamuè mermalam i bagesna, mengkebasi kalak sipercaya, mengurupi kalak susah, janah simengulaken mertuhu-tuhu karina matcam bagè ulaan simerandal. 5:11 Ulang dèng pemmasuk mi sidi daberru mbalu mula narih matah dèng ngo dagingna, ai tah mula sèkel dèng ia jejap, gabè kurang sètia ngo ia bai Kristus. 5:12 Salah ngo kalak i kumarna iosè padanna sienggo iberrèken bana. 5:13 Ningan naidi bagè pesia-siaken tikki ngo kalak sibagidi saik mi jèhè saik mi julu. Simparahna dèng dak iperoha-roha ngo sidèban janah icampuri siso ulanna, nai nggèut ngo sibagidi mengeruapken kata siso patut ruapenken. 5:14 Kerna naidi, lotiin mo sijahè nola daberru sinceppet mebalu i asa lot dukakna janah asa ipehèdu-hèdu bagesna, asa ulang lot botcir bai musuh-musuhta i lako peroha-rohaken kita. 5:15 Ai lot ngo dèba simebbalu i merbalik nola laus mengèkutken tendi jahat. 5:16 Tapi mula lot sincelket kalak Kristen mebalu, kennah ipehèdu-hèdu kalak Kristen sincelketna i mo ia, ulang ibelli kuria i pehèdu-hèduken; asa tah lot simebbalu siso mersima-sima, sibagidi mo ipehèdu-hèdu kuria. 5:17 Pengendeng kuria simertuhu-tuhu mengulaken kepengendengenna, patut ngo ihargai kuria i dua kali lempit, terlebbih-lebbih pengendeng singkasah merjamita dekket memmeddahi. 5:18 Ai tersurat ngo ibas Bibèl, "Oda kontamen kerbo tikan mengerrik ia," bagi dèng ma, "Merupah ngo karina simengula." 5:19 Mula lot pengaduun tersèngèt sada kalak pengendeng, oda mèter jaloon pengaduun i, ukum oda lot dua barang tellu kalak saksi. 5:20 Kalak perdosa, pincang mo ia i hadeppen kuria i, asa gabè mbiar sidèbankenna i. 5:21 Kupido bamu i hadeppen Dèbata dekket Jesus Kristus bak malaèkat-malaèkatna siterpilih i, asa ijamotken kono sipessèngètku èn ibagasen ukur borjok, ulang pella mersèto ukurmu ulang merdikkan kono. 5:22 Ulang kono merudu-rudu mengampèken tangan lako pebangkitken kalak gabè pengendeng. Ulang ko mersaor taba kalak perdosa, tapi jamotken dirimu asa tong mpanting kono. 5:23 Ulang pellin laè sambing iènum kono; ènum ma mo situk-situk anggur ai tambar beltek ngo i kumarna nggati ko mersakit-sakit. 5:24 Ukum dèba enggo ntarar dosana tukasi pè madèng irungguken, tapi dèba lebbè perpodi pè asa terbettoh dosana. 5:25 Bagidi ma dèba ntarar ngo perulanna merandal, janah siso mudah idahen pè tong ngo oda mèter terrus mboni.
6:1 Barang isè kalak Kristen gabè hamba, iètong mo indukna i patut pesangapenna asa ulang terrèhèi dèba Dèbata bang pè pengajarenta i. 6:2 Tapi mula Kristen ngo induk hamba i, ulang mo mapas iakap nola indukna i, kumarna samah-samah kalak Kristen i kalak i. Tapi makin ulukna mo pengkebasina bai indukna i, kerna kalak Kristen ngo indukna i janah sinikekellengen. Karina mo idi kennah ajarken janah peddahken. 6:3 Mula lot kalak mengajarken laèn daripada i, janah oda toko iakap peddah tuhu janah merandal bai Tuhanta Jesus Kristus idi nai, dekket peddah agamanta. 6:4 Kalak tunggang ngo sibagidi, janah oda lot kadè pemettohna. Ntagi kalohoon ngo iakap kalak sibagidi mersoal janah petangkis tersèngèt sada-sada perkataan, gabè pekerohken cian atè, perselisihen, rèhè-rèhè, rubat dekket penukasiin simeroha i, 6:5 bagi ma persilisihen siso mengadi-ngadi bai jelma sienggo ncèda ukurna. Ai idokdok ndorok gabè bèak ibas agama i nai. 6:6 Pengemoon mbellen ngo tuhu agama i, mula ikesabamken silot bana i bas ukurna. 6:7 Ai oda lot siembah mi dunia èn. Janah oda lot kadè terembah kita bang lako menadingken dunia èn. 6:8 Jadi mula lot banta pangaan barang perrolessen, sikesampangken mo i! 6:9 Barang isè naing bèak, ndabuh ngo i mi bagasen pengunjunen dekket sambil cubellek kemmotoon simengago i, mengelennengken jelma i mi tulbang dekket kemagoon. 6:10 Ai urat ni karina kejahaten ngo mula mbara mata midah riar, dèba pellin idi sambing ngo iayaki, gabè itadingken peddah Kristus, gabè iabinken bana mermatcam bagè simbernit memmaing gabè mellui ukurna. 6:11 Tapi milik Dèbata ngo ukum kono, kerna naidi kennah pedaoh dirimu i sidi nai. Usahaken mo gabè kalak bennar i hadeppen Dèbata janah merpenguèi bana ninganna percaya bai Kristus, siperkelleng, mbingit ibas sitahanen, janah perukur lamlam. 6:12 Burju mo kono mertuhu-tuhu nggelluh sebagè kalak Kristen, asa ndorok kono mengayaki kenggelluhen siamman sumendah i. Ai dempak i ngo kono idilo Dèbata tikanna iakuken kono i hadeppen jelma nterrem magahken percaya kono bai Kristus. 6:13 Bagèndari i hadeppen Dèbata simemerèken kessah bai karina simenggormit dekket i hadeppen Jesus Kristus simengindangken situhunna i hadeppen si Pontius Pilatus bagèen mo kupidoken taba kono: 6:14 Uèi mo karina patiin èn, janah ulang ketikasen soh mi pekiroh Tuhanta Jesus Kristus pedua kaliken. 6:15 Enggo kin ngo itentuken pekirohna i tupung ari sinipilih Dèbata sendiri. Ia ngo kessa merkuasa janah meheji. Raja ni karina raja janah Tuhan ni akrina tuan. 6:16 Pellin sadasa ngo kessa oda terkuasaan kematèen i; merrian i kecihuren siso terdessingen barang isè ngo ia. Isè poda nung jelma mengidahSa, janah oda nung tertengen barang isè pè ia. Bana mo siberrèken kemuliaan, kekkuasaan soh mi amman sumendah! Amèn. 6:17 Pesèngèt mo sibèak ni tanoh èn, asa ulang gegah kalak i, janah ulang tok atèna midah harta siso menettap -- umpamana bagè kinibèak. Tapi ikettoki mo Dèbata simemerèken karinana silot banta sanga mertinèncuk, asa sennang kita. 6:18 Peddahi kalak i asa iulaken kalak i simerandal janah tettap mengulaken selloh ninganna merukur dak nggèut merrèken. 6:19 Idi ngo dalan kalak i pepulungken peremmasen mi ari seggen. Merkitè bagidi dapet kalak i mo kenggelluhen siamman sumendah, imo nggelluh situhunna. 6:20 Alè Timoteus! Tuhu-tuhu mo jamoti sienggo nijalomu i. Pesiding mo rana siso merjullat janah oda merguna ulang antoi kalak mersoal sinidokken dèba perbinettohen keppèken oda ngo. 6:21 Ai lot ngo dèba memmaing bagidi gabè menurimpang nola ngo ia ipas peddah Kristen nai si nikepercayanna kin. Dak idengani masèh atè Dèbata mo kènè. Tabe nami Paulus
1:1-2 Alè Timoteus anakku sikukekelengi! Aku si Paulus simennuratken surat èn mendahi kono, janah dak kuharapken ngo, asa ipasu-pasu Dèbata Bapa dekket Tuhanta Jesus Kristus i kono janah iberrèken masèh atèna dekket damèNa i bamu. Merkitè lemmo atè Dèbata, ipebangkit ngo aku gabè rasul Kristus Jesus, janah ipasulak lako magahken kenggelluhen sienggo iperbagah-bagah Dèbata idi kin. Sijalo ngo kenggelluhen i kumarna mersada kita dekket Kristus Jesus. 1:3 Kudokken ngo melias atè taba Dèbata, sikukebasi ibas karina pusuh peratènku nai, bagè sienggo ibaing empungta siarnia. Dak kudokken ngo mejalo metangkup taba Dèbata gennep kuèngèt ko ipas sodipku, mahar barang berngin pè. 1:4 Kuèngèt ngo bonek ukurmu. Kumarna naidi ngo asa sèkel kalohoon atèngku naing pejumpa dekket kono, asa tuhu-tuhu lolo kalohoon atèngku. 1:5 Kuèngèt ngo kepercayanmu simertuhu-tuhu i bai Kristus, tosè bagè kepercayaen empungmu si Lois bak inangmu si Eunike. Tok ngo aku bagidi ma ngo bang kepercayanmu pè. 1:6 Kerna naidi kupesèngèt mo kono, asa kenggelluhken sibasa-basa niberrèken Dèbata bamu i, sinderrang kuampèken i tanganku bamu. 1:7 Kerna ukum Tendi siniberrèken Dèbata banta i, oda ngo Tendi memmaing kita asa gabè buradan. Tapi memmaing kita gabè mergegoh ngo, dom masèh atè janah merpengerrem. 1:8 Kerna naidi ulang kono mèla mengindangken Tuhanta i, janah ma ulang mèla kono tersèngèt aku siterkurung kumarnakenSa. Tapi naing mo kono pè ipergegohi Dèbata bang pè menggong simpersuk kumarna Sukuten Kelluahen i. 1:9 Ipaluah janah idiloi Dèbata ngo kita asa gabè ummatNa. Ibaing pè bagidi oda ngo kemmulihken perulanta, tapi kemulihken masèh atèNa sendiri ngo. Iberrèken ngo masèh atèNa banta merkitè Kristus Jesus sinderrang madèng ihanaken dunia èn. 1:10 Bagèndari ipacidah Dèbata ngo masèh atèNa i banta merkitè pekeroh Raja Sipaluahken kita i, imo Kristus Jesus. Italuken Jesus ngo kuasa kemmatèen i janah merembahken kenggelluhen si amman sumendah merkitè Sukuten Kelluahen i. 1:11 Lako magahken Sukuten Kelluahen i ngo asa ipebangkit Dèbata aku gabè rasul janah guru. 1:12 Kumarnaken i ngo asa kugongken karina simpersuk èn, tapi tok ngo aku, ai kubettoh ngo isè si sikupercayai i. Tok ma ngo aku barang kadè sienggo nipessohna bangku idi ndorok ngo Ia menjamoti i soh mi Ari Kiamat. 1:13 Tuhu-tuhu mo codi peddah bennar sienggo kuajarken bamu i. Hot mo kono ibagasen kepercayaen dekket kelleng sienggo gabè milikta i kerna persaorenta dekket Jesus Kristus. 1:14 Jamoti mo sienggo tersoh bamu i merkitè pengurupiin Tendi Dèbata singgelluh ibagasen kita i. 1:15 Ibettoh kono ngo, enggo karina kalak per Asia mennadingken aku, si Pigelus bak si Hermogenes pè. 1:16 Tapi ukum simpangaan si Onesiporus nggati ngo enggo ipesampang atèngku. Dak masèh mo atè Tuhan i bai kalak i. Ai tukasi pè i kurungen aku, oda ngo ikemmèlaken si Onesiporus i aku. 1:17 Ai soh kessa ia mi kuta Rom, mèter itulusi ngo aku soh pejumpa kami. 1:18 I Epesus pè mbuè kalohoon ngo pengurupina bangku. Enggo ngo ibettoh kono karinana i. Dak masèh mo atè Tuhan i bana, mula roh kessa ari perhukumen Tuhan i taba karina jelma manusia.
2:1 Alè Timoteus anakku! Kennah ntegguh ngo kono sinipeteguh sibasa-basa sienggo niberrèkenna banta i, kumarna persaorenta ibagasen Kristus Jesus. 2:2 Peddah sienggo nidengkohmu bangku nai tikala i, i hadeppen jelma nterrem, kennah peddahken i bai jelma kettoken janah sindorok mengajari jelma sidèban. 2:3 Kennah dekket ngo ko menggong simpersuk bagè tenterra Kristus Jesus siburju janah sètia. 2:4 Sada kalak tenterra simerjaga-jaga, oda ngo uè mengkelaputi urusenna sendiri, ai sèkel ngo ia pesampangken atè pakkalimana. 2:5 Barang isè naing mersiadu, oda ngo terbaingsa mennang ukum oda iuèi hatoren mersiadu. 2:6 Peruma-uma sienggo mertuhu-tuhu mengula, kennah ia ngo lebbèen merhak menjalo hasil suan-suanenna. 2:7 Radumi mo karina sienggo kudokken èn, kerna iberrèken Tuhan i ngo bamu kebijaken lako mengantusi i karina. 2:8 Èngèt mo èn: Sukuten Kelluahen sienggo kubagahken i, imo tersèngèt Jesus Kristus, pemparen si Daud; Ia ngo Kristus sienggo balik nggelluh i simatè nai. 2:9 Kumarna mennukutken Sukuten Kelluahen i ngo menggong simpersuk aku; sanga irantè bagè kalak perjahat. Tapi ukum kata Dèbata oda ndorok irantè. 2:10 Idi ngo sebabna asa mbingit aku menggongken i karinana lako paluahken karina kalak sienggo ipilih Dèbata, asa gabè maluah kalak i merkitèken Kristus Jesus, janah terolih kemuliaan simenettap i. 2:11 Tuhu ngo kata èn, "Mula enggo rebbak matè kita dekketSa gabè rebbak nggelluh ma mo kita dekketSa. 2:12 Mula dak mbingit ngo kita, gabè rebbak mengerajai mo kita dekketSa. Mula situlak ngo Ia, itulak ma ngo bang kita. 2:13 Mula oda sètia kita Ia pè oda sètia ai oda ndorok merralo Ia mi diriNa sendiri". 2:14 Kennah pesèngètenmu ngo karina jelma tersèngèt karinana i. Pessèngèt mo kalak idi i hadeppen Dèbata asa ulang merselisih kumarna kata-kata, ai oda lot merguna i, tapi gabè maing merkalimesso nola ngo i mi ukur kalak simendengkoh. 2:15 Kennah mertuhu-tuhu ngo kono mengulaken i, asa gabè kalak sipojiin kono mi Dèbata. Ulang kemmèlaken ulanmu, tapi tettah mo ajarken peddah sibai Dèbata nai. 2:16 Peddaoh dirimu ipas pengeranaan siso merguna janah siso merjullat i nai janah simengelèai Dèbata ai memmaing muat jahatna ngo kalak kumarna pengeranaan sibagidi. 2:17 Ai langket ngo peddah sibagidi bagè sakit puru, bagè si Himeneus dekket si Piletus. 2:18 Enggo menurimpang kalak idi ipas dalan mpènter i nai nginganna menursari kepercayaen ni dèba dengan. Idokken kalak idi enggo mo dapet tikkina balik nggelluh i simatè nai. 2:19 Tapi oda ngo terdegger kalak i dangaan ntegguh si nibaing Dèbata. Tersurat ngo i babona, "Itandai Tuhan i ngo barang isè milikNa," dekket "Barang isè mendokken milik Tuhan ngo ia, kennah ulang nèngè ia merpengelako jahat." 2:20 Mermatcam bagè ngo perkekkas ibas bages mbellen. Lot ngo idi iteppa ipas pirak barang pè i emmas nai, tapi lot ma ngo ijadiken ipas kayu barang i tanoh nai. Lot ngo idi ibaing mi ulaan mbellen, lot ma dèba mi ulaan biasa. 2:21 Barang isè pepantingken dirina ipas karina kejahaten nai, kalak sibagidi ngo ipakkè mi ulaan mbellen. Gabè milk merkedekoon ngo ia janah merguna bai indukna. Ipèmaken ngo ia mi ulaan simerandal. 2:22 Peddaoh dirimu ipas kessennangen simatah daging nai. Usahaken mo asa nggelluh ipas lemmo atè Dèbata kono, sètia mi peddahNa janah perkelleng atè bak damè. Bagidi mo kènè rebbak nggelluh dekket kalak simendiloi Tuhan idi ibagasen ukur mbersih. 2:23 Ulang campuri persoalen kalak simoto siso memettoh barang kadè. Ai ibettoh kono ngo pellin maing perselisihen sambing ngo kessa sibagidi. 2:24 Oda mendè gabè petubuhken perselisihen ukum naposo Tuhan i; kennah melamlam ngo ia taba karina kalak janah ndorok memeddahi jelma i, ibagasen selloh janah mbingit. 2:25 Kennah melamlam ngo ia mengajari kalak pengalo-ngalo; asa katerra pè ibuka Dèbata tikki pertobaten taba kalak sibagidi i dosana nai, janah asa itandai peddah situhunna i. 2:26 Merkitè bagidi gabè saddar nola mo kalak i mengolihi, janah maluah ipas togong-togong Sibolis simemmaksa kalak i kennah menguèi lemmo atèna.
3:1 Èngèt kènè mo èn: Matcam ngo bagèna kesusahen tupung ari perpodi. 3:2 Pellin dirina ngo kessa isarihken jelma i, karina kalak mata kèpèngen, jukkat janah dak luap. Dak ilèa-lèai ngo denganna sidèban, dak mengalo-ngalo taba situa-tua, oda ibettoh mendokken mejalo metangkup janah ikecegoken ngo ulaan pertendiin. 3:3 Oda lot bana ukur ngkelleng, oda uè pehembunken ukurna dak iperoha-roha ngo gerar sidèban, tunggang, jahat janah ikecegoken ngo simerandal. 3:4 Penelbuh ngo kalak i, oda ipikirken ari podi janah dak sombong. Lemmoon atèna midah kessennangen dunia èn daripada menguèi Dèbata. 3:5 Tukasi pè tengennen mertuhu-tuhu kalak i mendalanken hatoren agama, tapi itulak kalak i ngo inti agama i. Peddaoh mo dirimu bai kalak sibagidi nai. 3:6 Lot ngo enggo dèba kalak i mendirip-ndirip masuk mi bages, janah iajar-ajari mo daberru-daberru sikurang ntegguh merkepercayaen janah simbuè dosa bak sienggo idomi matcam bagè cubellek daging. 3:7 Dak ipidoken daberru sibagidi ngo asa dak iajari kalak i, tapi oda nung menandai pengajaren Dèbata sibennar i. 3:8 Tosè bagè si Janès dekket si Jambrès mengalo si Musa arnia, bagi ma ngo kalak sibagidi mengalo peddah siroh bai Dèbata nai. Ai enggo ncèda pikiren kalak i, janah oda lot nèngè kepercayanna. 3:9 Tapi oda ngo lot dapet kalak i barang kadè pè, ai ibettoh karinana jelma ngo kemmotoon kalak i, bagè pengakap si Janès dekket si Jambrès i. 3:10 Tapi ukum kono, enggo mo ièkutken kono sikupeddahken i dekket sikupengelakoken i bang pè si nituju nggelluhku. Enggo ngo idah kono kepercayanku, mbingitku, ngkelleng atèngku bak kesobarenku pè. 3:11 Enggo ngono idah kono aku idersa dekket menggong simpersuk. Ibettoh kono ma ngo simasa bangku i Antiokhia, i Ikonium dekket i Listra; ibettoh kono ngo karina sikugongken! Tapi ipaluah Dèbata ngo aku i pas karinana kinidersa i nai. 3:12 Karina ngo kalak simenguèi dekket simersaor dekket Kristus Jesus idersa, 3:13 janah kalak jelma perjahat bak perkilang dak makin jahatna ngo. Ikilang kalak i ngo jelma i, keppè kalak idi pè terkilang ngo. 3:14 Tapi ukum kono alè Timoteus, kennah hot mo kono menjèmak peddah sènteng i sienggo iajarken bamu janah sienggo nikepercayanmu i; ai ibettoh kono ngo barang isè gurumu. 3:15 Kennah èngètenmu ngo, i mulai kèdèkmu nai ngo enggo itandai kono Bibèl. Iajari Bibèl i ngo kono asa iantusi janah dapet kono kelluahen merkitè percaya bai Kristus Jesus. 3:16 Karina sitersurat ibas Bibèl, bai Dèbata nai ngo rohna i janah mengajarken situhunna, lako pesèngètken janah pekkadèken si salahna, janah mengajari jelma i asa nggelluh ia mengèkutken lemmo atè Dèbata. 3:17 Merkitè Bibèl i gabè tettah mo naposo Dèbata lako mengkebasi matcam bagè ulaan merandal.
4:1 Roh nola ngo balik Kristus Jesus mi dunia èn lako menghukum kalak singgelluh dekket sienggo matè pè; janah roh ngo Ia lako memmerèntah bagè Raja. Kerna naidi memmes kupido bamu i hadeppen Dèbata dekket Kristus Jesus: 4:2 Kennah jamitaken kata Dèbata idi janah terrus mendessak asa idengkoh dèba tah pè uè kalak i barang oda. Kennah tok ngo kalak nipesèngètmu i kerna kesalahenna, janah toat mo kalak idi. Mbingit mo kono mengajari kalak i. 4:3 Ai lot ngo tikkina, oda nèngè uè jelma i menjalo ajar bennar, tapi dak menguèi nipergeddo atèna nai ngo ia, janah pepulungken mbuè guru, asa iajarken bana pellin selloh dengkohen pènggel sambing. 4:4 Isompel kalak i ngo copingna, asa ulang idengkohken ajar bennar, tapi ukum mi sukut-sukuten ajar latlat mèter cingir ngo copingna. 4:5 Tapi tukasi pè bagidi, kennah perdatèken dirimu barang tah tupung bakunè pè i. Mbingit mo kono menggong sindersa, ulaken mo ulanmu bagè sada kalak simagahken Sukuten Kelluahen i, janah mendè mo pengkebasimu bagè naposo Dèbata. 4:6 Ukum tersèngèt diringku, enggo dapet tikkingku matè mahan pèlèen bai Dèbata. Sigejap nai kutadingken mo dunia èn. 4:7 Enggo dekket aku merpacu janah selloh ngo kuulaken i, jadi enggo mo soh mi tujuun perpodi. Tettap ngo sètia aku taba Kristus soh mi puncana. 4:8 Ukum bagèndari enggo mèma bangku hadiah kemennangen i. Iberrèken Tuhan Raja simenghukum i mo bangku hadiah i tupung Ari Kiamat kerna enggo merdamè aku dekket Dèbata. Tapi oda ngo pellin aku sambing menjalo hadiah i, karina kalak simengketeddohken pekerroh Tuhan i ngo. 4:9 Usahaken mo roh kono ndor mendahi aku, 4:10 kerna enggo itadingken si Demas aku kumarna i kekellengi ngo dunia èn. Enggo laus ia mi Tesalonika. Si Kreskes enggo laus mi Galatia janah si Titus laus mi Dalmatia. 4:11 Pellin si Lukas nai ngo kessa tading rebbak aku. Alèng ma mo si Markus janah rebbakken mo kènè roh, ai ndorok terharapken ngo ia mengurupi aku ipas ulanku. 4:12 Enggo kupasulak si Tikikus mi Epesus. 4:13 Mula roh kessa kono, embah mo mantèlku sikutadingken i Troas i bages si Karpus. Embah ma mo dekket bukku-bukkungku, terlebbih bukkungku si nibahan ipas kertas koling-koling i nai. 4:14 Ukum si Aleksander tukkang tembaga i, jahat kalohoon ngo pemmaingna bangku. Ibalesken Tuhan i mo bana rembang mi pemmaingna bangku i. 4:15 Kono pè kennah mermanat mbangsa, ai sondel mo pengalona banta. 4:16 Tikan perlebbè kalohoon i aku lako membèla diringku, isè poda lot mendengani aku; karinana ngo mennadingken aku. (Katerra pè ulang mo nemmu ilugun Dèbata kalak idi!) 4:17 Tapi idengani Tuhan i ngo aku. Iberrèken ngo bangku gegoh, gabè ndorok kubagahken Sukuten Kelluahen i karinana, asa idengkoh karina kalak siso Jahudi. Janah maluah ngo aku ipas mara kemmatèen i nai. 4:18 Tuhu ngo dak ipaluah Tuhan i ngo aku ipas karina simaing jahat bangku i. Iembah ngo aku merkinijuah mi bagasen KerajanNa si ni sorga i. Kessangapen mo bana soh mi amman sumendah! Amèn. 4:19 Pessoh salamku bai si Priskila dekket bai si Akwila, bagi ma taba dengan simpangaan si Onesiporus. 4:20 Ukum si Erastus, i Korin ngo ia tading janah si Trofimus sakiten ngo ia kutadingken i Milèt. 4:21 Usahaken mo roh sinderrang madèng mosim mbergoh. Menenges salam ngo bamu si Ebulus, si Pudes, si Linus dekket si Klaudia; bagidi ma ngo dekket karina dengan si sada kepercayaen sidèbanna i. 4:22 Dak idengani Tuhan i mo kono. Dak ipasu-pasu Tuhan i mo kènè karina! Tabe nami, Paulus
1:1 Alè Titus anakku! Aku si Paulus menuratken surat èn, naposo Dèbata janah rasul Jesus Kristus. Ipasulak ngo aku mengurupi kalak sienggo ipilih Dèbata asa ntegguh kalak i ibas kepercayanna. Kennah kuurupi ngo kalak i asa menandai kebennaren niajarken agamanta. 1:2 Asa mengharap kalak i mi kenggeluhen siamman sumendah kerna enggo kin ngo iperbagah-bagah Dèbata idi sinderrang makdèng kin pè ihanaken dunia èn, janah oda uè merluap Dèbata. 1:3 Ipetarar Dèbata ngo niperbagah-bagahNa i tupung ketikana ibas tennahNa. Enggo ipercayaken tennahna i bangku janah kusukutken ngo i merkitèken perèntah Dèbata Sipaluahken kita. 1:4 Alè Titus, anakku tuhu-tuhu ngo kono kerna samah percaya ngo kita bai Jesus Kristus. Masèh atè dekket damè bai Dèbata Bapa bak Jesus Kristus Raja Sipaluahken kita idi nai mo mendengani kono. 1:5 Asa kutadingken pè kono tikala idi i Kreta, asa ipeturè kono ngo ulaan sibanggungna i dèng. Nai asa pebangkitenmu pengendeng kuria i gennep kuta; janah èngèt mo tennahku èn: 1:6 Ulang lot sirèhèen bai pengendeng; pellin sada ukum sinibagesna, perdukak percaya bai Kristus, oda perdukak jèngèng, janah oda ndorok iatur. 1:7 Kumarna perkebbas Dèbata ngo pengendeng i, ulang mo lot sirèhèen pengellakona. Ulang tunggang barang perlaga barang permabuk, barang perubat-rubat, ulang mbara matana midah riar. 1:8 Kennah pertamuè, lolo ia midah simerandal, merpengerrem, bujur, perukur mpanting, dekket terajansa dirina. 1:9 Ntegguh menjèmak Sukuten bai Dèbata nai sikepercayaen i, bagè sienggo iajarken bana, asa merkitè bagidi merseppuh ia memeddahi kalak dekket peddah kesèntengen i janah ndorok memincang kalak simengalo-ngalo. 1:10 Mèduk ngo kalak oda tunduk, terlebbih kalak peragama Jahudi. Ioto-otoi kalak i ngo jelma nterrem merkitè kata-kata luap kalak i. 1:11 Kennah ikontam ngo babah kalak sibagidi, ai mèduk ngo enggo perjejapen ni dèba isursari kerna iajarken siso jadi, janah ibaing kalak idi pè bagi, pellin naing mengaum laba sambing arap dalan siso patut ngo. 1:12 Nung ngo idokken nabi kalak i siroh i Kreta nai bagèen, "Jelma perluap ngo kalak Kreta, janah binatang penjerngem, mokkus janah permalas." 1:13 Tuhuna ngo kadè sinidokken nabi idi. Kerna naidi, nggemmes mo pincangenmu kalak idi, asa tettap kalak i percaya bai Dèbata ibagasen kebennaren, 1:14 janah oda nèngè percaya mi tori-toriin kalak Jahudi barang pè mi hatoren-hatoren jelma lako mengalo peddah Dèbata. 1:15 Mpanting ngo sagumanna bai kalak simpanting. Tapi ukum bai kalak perukur macik janah siso percaya bai Dèbata, oda lot barang kadè pè mpanting, kerna enggo melamun ukurna bak pikirenna pè! 1:16 Idokken kalak idi itandai ngo nina Dèbata, tapi merkitè pengelakona, ialo kalak i ngo Dèbata. Ai perukur jahat ngo kalak i janah oda merpenguèi; oda nung ndorok terbahanken kalak i barang kadè pè simerandal.
2:1 Tapi ukum kono alè Titus! Ajarken mo peddah simerdemmu dekket peddah merandal. 2:2 Ajari mo anak laki sienggo tua-tua asa merpengerrem kalak i janah nggelluh bagè kalak sipatut pesangapen. Kennah ngo kalak i hot ibagasen peddah sèntèng bai Dèbata nai, merukur ngkelleng siso merpengait janah mbingit bana sobar ipas sitahanen. 2:3 Bagi ma ngo kennah peddahi daberru sienggo tua-tua, asa merpengalako mpanting kalak i bagè patutna kalak simenguèi Dèbata. Oda ndorok kalak i menikas-nikasi kalak sidèban, janah ulang ketagiin mengènum simperngis. Kennah iajarken kalak i ngo simerandal, 2:4 asa merkitè bagidi ndorok iajari kalak i daberru sinarih poso dèng lako mengkekelengi sinibalèna bak dukak-dukakna pè, 2:5 asa bijak, metemman, janah gabè pertua ibages codiin menguèi simennokorsa. Merkitè bagidi oda lot dalan ndèba mengerèhèi kata Dèbata. 2:6 Pessèngèt ma mo bang simatah daging pè, asa metemman pengelakona. 2:7 Baing mo dirimu gabè codiin ipas pengelako selloh, janah pengajari sènteng tuhu-tuhu. 2:8 Bijak mo kono mengerana, ulang ndorok irèhè barang isè pè, asa mèla karina alomi, kumarna oda lot simak toko dapetsa bamu nai kata-katankenna tersèngèt kita. 2:9 Kennah tunduk mo hamba mi indukna, janah iulaken mo lemmo atè indukna idi ibas karinana. Oda ndorok kalak i mengalo-ngalo, 2:10 barang mennangko. Kennah ituduhken pengellakona kalak mendè ia janah kettoken; asa merkitè pemmahanna i gabè ipoji kalak Dèbata, Sipaluahken kita i. 2:11 Ai enggo ipetarar Dèbata masèh atèna lako paluahken karina jelma. 2:12 Iajari Dèbata ngo kita, asa ulang nèngè mengalo lemmo atèNa janah ulang nèngè mengulaken cubellek tanoh èn. Iajari ngo kita asa nggelluh i dunia èn sibettoh merpengerrem, metemman janah sètia taba Dèbata. 2:13 Bagèndari mèma-mèma Ari siharapen i ngo kita. Tupung pekirohna i, idah dunia èn mo kehejiin Dèbata simahangga i dekket Jesus Kristus Raja Sipaluahken kita. 2:14 Ai iberrèken ngo diriNa mahan pèlèen lako paluahken kita ipas karina kejahaten nai, janah memmaing kita, gabè ummat simbadia janah uè mengkekasahken bahaan merandal. 2:15 Ajarken janah peddahken mo i karina, nai pesèngèt mo sinijamitanmu. Ulang belli mapas kalak midah kono.
3:1 Pessèngèt mo ruas kuriamu asa tunduk taba penggemnggemmi dekket raja janah ngkasah mengulaken gennep ulaan merandal. 3:2 Dokken bai kalak i asa ulang menukasi barang merubat barang taba isè pè, tapi merdamè-damè mo janah merpenganju ninganna merpengelako melamlam. 3:3 Ai kita pè tikan naidi moto ngo, njais janah laling, iperhamba matcam bagè cubellek dekket roh-roh gèut daging. Siulaken ngo kejahaten dekket ukur ncian, bagi ma mersikosomen pè. 3:4 Tapi ipetarar Dèbata Sipaluahken kita i ngo masèh atèNa dekket mendè basana banta. 3:5 Oda ngo kumarna lot siulaken simerandal memmaing asa ipaluah kita, tapi kumarna pellin masèh atèna sendiri ngo, merkitè-kitè perridiin pepantingken nibaing Tendina i, gabè iperimbaru kita mengolihi. 3:6 Iberrèken Dèbata ngo TendiNa i banta merkitè-kitè Jesus Kristus Raja Sipaluahken kita, 3:7 Asa merkitè masèh atè Jesus i, gabè merdamè kita dekket Dèbata janah gabè terolih kenggelluhen kita imo kenggelluhen siamman sumendah, si siharapken idi kin. 3:8 Tuhuna ngo sikudokken èn. Kupido bamu, memmes ajarken i, asa karina kalak sienggo percaya bai Dèbata mertuhu-tuhu mengulaken ulaan merandal janah merguna taba karina jelma. 3:9 Peddaoh dirimu ipas persoalen siso merguna i nai dekket tori-toriin tarombo i. Ulang kono uè mencampuri perselisihen bak perubaten tersèngèt pati-patiin i. Ai oda lot gunana janah oda lot peruntungenna. 3:10 Barang isè maing perselisihen i kuria, pessèngèt ia sikali dua kali; enggo kessa i, ulang nèngè mersaor ko dekketsa. 3:11 Ai ibettoh kono ngo, enggo menurimpang kalak sibagidi, janah dosana i ngo magahken mesalah ia. 3:12 Mula enggo soh mendahi kono si Artemas barang si Tikikus, usahaken mo ndor roh mendapetti aku mi Nikopolis, ai dok atèngku merian i sidi mo aku sidekkah mosim mbergoh. 3:13 Kerencetken mengurupi si Zenas simemettoh patiin i dekket si Apolos; asa terbaing kalak i berkat janah oda kurangen i barang kadè pè. 3:14 Kennah sipecemmal-cemmal ngo denganta asa ngkasah ia mennarihken siperlu mahan kebbasen; ulang gabè mak merguna nggelluh kalak idi. 3:15 Menenges salam ngo bamu karinana denganku si nisèn dekket aku pè. Pessoh salam nami taba karina denganta sipercaya bai Kristus. Idengani masèh atè Dèbata mo kènè karinana. Tabe nami, Paulus
1:1 Alè nggia Pilemon, dengan sisada ulaan dekket kami! Aku si Paulus, sada kalak siterkurung kumarna Kristus Jesus rebbak dekket denganta si Timoteus menuratken surat èn mendahi kono, 1:2 bak mendahi kuria simerpulung i bagesmu; bagi ma mendahi turangta si Apfia dekket denganta sisada tujuun si Arkhipus. 1:3 Dak kuharapken kami ngo asa ipasu-pasu Dèbata Bapanta dekket Tuhan Jesus Kristus kènè janah iberrèken damèna bai ndènè. 1:4 Gennep mersodip aku, dak kuèngèt ngo gerarmu ninganna mendokken mejalo metangkup taba Dèbata. 1:5 Kerna kudengkoh ikekelengi kono ngo karina ummat Dèbata, janah percaya ngo kono bai Tuhan Jesus. 1:6 Dak kusodipken ngo asa kita simerkaka-kuanggi ibagasen kepercayaen merbuahken pengantusiin makin mbagesna ipas pasu-pasu sisijalo kumarna persaorenta dekket Kristus. 1:7 Kelleng atèmu i alè nggia Pilemon, taba karina ummat Dèbata, pesampangken atèngku janah mennoat aku! Enggo merlolo atè karina ummat Dèbata kumarna Kono. 1:8 Kumarna naidi, bagè dengan sisada kepercayaen, ndorok ngo nemmu aku memerèntahken baMu barang kadè sinaing bahankenMu. 1:9 Tapi kumarna kelleng ngo atèngku baMu, pellin kupidoken sambing mo. Sada kalak sienggo tua-tua ngo aku janah ikurung kumarnaken Kristus Jesus. 1:10 Aku si Paulus mengidoken bamu sada pengidoon tersèngèt si Onesimus, dukakku ibagasen Kristus. Ai bapana ngo aku ipas pertendiin, ninganna kurungen èn aku. 1:11 Ukum tikala i oda merguna ia bamu, tapi ukum bagèndari, merguna kalohoon ngo ia bamu, oda pellin bamu sambing tupèh, tapi dekket ngo bangku pè. 1:12 Kupasulak ngo ia balik mendahi kono bagèndari, dosken tampuk pusuh-pusuhku ngo ia. 1:13 Situhunna naing kucèkèpi ngo ia nemmu asa rebbak aku ia gabè dosken singkatmu asa ndorok iurupi aku, sidekkahku kurungen èn kemmulihken Sukuten Kelluahen bai Dèbata nai. 1:14 Tapi oda nggèut aku mahanken barang kadè ukum oda setuju kono. Belgahen ngo atèngku mula ibahanken Kono i merkitè ibagah ukurmu sendiri; oda uè aku memaksa kono. 1:15 Sirang pè si Onesimus bamu nai sigejap ngo i, asa gabè dapet Kono nola ia soh mi amman sumendah. 1:16 Oda ngo pellin naposo ia baMu ukum bagèndari; lebbih dari pada i ngo. Sada kalak dengan Kristen sinikekellengen ngo ia. Merguna kalohoon ngo ia bangku; makinsa nola mo bamu, tah pè bagè naposo barang pè bagè sada kalak dengan kemulihken Tuhan i! 1:17 Kumarna naidi, kerna iètong Kono aku dengan samah Kristen, jalo mo si Onesimus mengolihi tosè bagè penjalomu mi diringku. 1:18 Mula mersalah barang merutang pè ia bamu, bangku mo jujur karina i. 1:19 Aku sendiri mo mennuratken isèn: Aku si Paulus ngo menggarar lunas i bamu karina. (Tentu oda pellin kuterèngètken baMu isèn mendokken, kono pè merutang ngo bangku, imo nggelluhmu sendiri sebagè kalak Kristen.) 1:20 Kerna naidi alè nggia, urupi mo aku ibagasen Tuhan i; pesampang mo atèngku bagè sada kalak dengan kumarna Kristus. 1:21 Tok ngo aku mennuratken èn, iuèi kono sikupidi èn. Kubettoh ngo, iuèi kono ngo pengidonku lebbih dari pada i pè. 1:22 Ninganna idi, hantari kin mo bekkasku i sapomu, ai tok ngo aku iuèi Dèbata sodip ndènè karina kènè, janah merembah aku balik mendahi kènè. 1:23 Menenges salam ngo si Epapras sirebbak dekket aku i kurungen kumarna Kristus Jesus. 1:24 Soh mo bamu salam dengan-denganku: si Markus, si Aristarkhus, si Demas dekket si Lukas. 1:25 Dak iapsu-pasu Tuhan Jesus Kristus mo kènè. Tabe nami, Paulus
1:1 Ukum arnia nggati ngo mengerana Dèbata taba empungta merkitè-kitè nabi-nabi janah merbagè ngo carana. 1:2 Tapi i ari perpodi èn mengerana ngo Ia taba kita merkitè AnakNa. Asa merkitè AnakNa i ngo ihanaken Dèbata sagumanna silot i janah AnakNa i ngo merhak mersidasaken karinana i. 1:3 Bendella kehejiin Dèbata siemercuhaya i ngo ia, janah codi mi rupa Dèbata sendiri. Ia ma ngo menjaga sagumanna silot i merkitè kataNa simerkuasa i. Enggo kessa Ipepanting jelma idi ipas dosana nai, kundul mo Ia i babo tahta kerajaen i sorga rebbak dekket Dèbata Perkuasa sitermurmur i. 1:4 Bagè gerar kesurungenna i mengatasi karinana nasa gerar niberrèkenna taba malaèkat, bagi ngo kesurungen kuasaNa pè bai malaèkat-malaèkat idi nai. 1:5 Oda nung idokken Dèbata taba malaèkat kata bagèen, "Kono ngo AnakKu; sidari èn ngo kono Kutubuhken." Oda ngo pennah idokken Dèbata taba malaèkat paina pè bagèen, "Aku ngo gabè Bapana, janah Ia gabè AnakKu." 1:6 Tapi sinderrang ipasulak Dèbata AnakNa Situaan i mi dunia èn, idokken Dèbata ngo kata èn, "Kennah mersembah taba Anak idi ngo karina malaèkat Dèbata." 1:7 Ukum tersèngèt malaèkat, bagèen ngo idokken Dèbata, "Gabè angin ngo ibaing Dèbata malaèkat-malaèkatNa, janah naposoNa gabè api simergollah-gollah i." 1:8 Tapi ukum tersèngèt Anak idi, idokken Dèbata, "Kono ngo Dèbata janah soh mi amman sumendah ngo kono Raja! Sènteng ngo PemerèntahenMu." 1:9 "Ikellemmoken kono ngo ketègerren, janah ikecegoken kesalahen; idi ngo sebabna asa ipilih Dèbata kono, alè Dèbata, janah ipesampang atèMu merkitè-kitè kessangapen, lebih bai denganMu nai!" 1:10 Idokken Dèbata ma ngo, "Kono ngo alè Tuhan menghanaken tanoh èn i mulana i, janah tanganmu sendiri ngo menempa langit, 1:11 Mersep ngo karina i seggen, gabè mumuk bagè oles; tapi hot ngo Kono oda mobah. 1:12 Iserpih Kono ngo suberri dunia èn bagè oles, janah igancihi Kono dekket sidèban. Tapi ukum kono hot ngo oda mobah janah oda merpunca ukum nggelluhmu." 1:13 Oda nung idokken Dèbata taba malaèkatna siapaina pè bagèen, "Kundul mo kono i kamuhunKu, mèma kubaing karina musuhmu mersembah merkuraja i hadeppenmu." 1:14 Mula bagidi, bakunè ngo keppè malaèkat-malaèkat Dèbata idi? Karinana ngo kalak i Tendi simengkebasi Dèbata, janah ipasulak Dèbata lako megurupi kalak sinaing menjalo keluahen niperbagah-bagah Dèbata.
2:1 Kerna naidi kennah memmes ngo mencèkèp peddah-peddah sienggo sidengkoh, asa ulang sitadingken kepercayanta. 2:2 Salang tennah Dèbata nipessoh malaèkat-malaèkat taba empungta tuhu ngo mula oda iulaken bak oda iuèi jelma, ihukum ngo jelma i rembang mi si, 2:3 makinsa nola mo kata kelluahen èn siemrgegohen asa tennah i, otang makin magona mo kalak siso merrèken ukurna taba kelluahen i. Ai Tuhan sendiri ngo perlebbè mengeranaken i janah memmes ipesakat kalak simendengkoh kata kelluahen i taba kita. 2:4 Dekket ngo Dèbata mengindangken kesaksiin kalak idi i merkitè-kitè matcam bagè tanda kelengangen dekket kegegohen bagi merkitè pemerèken Tendi Perbadia mengèkutken lemmo atèNa. 2:5 Oda ngo menjalo kuasa malaèkat-malaèkat Dèbata lako menggem-nggemmi dunia rembaru seggen i, imo dunia siniterèngètenta ènda. 2:6 Balikna ibas Bibèl tersurat bagèen, "Kadè mo pana jelma i alè Dèbata, asa pellè ièngèt kono? Barang pè jelma i, keppèken iperdatèken Kono ia! 2:7 Sigejap ibaing Kono ngo ia ncerreppen asa malaèkat; nai gabè iberrèken Kono nola ngo bana kemuliaan dekket kessangapen, 2:8 janah gabè ipetunduk kono ngo sagumanna silot mi terruh gemgemmenna." Mula idokken Dèbata menghanaken jelma, "Perkuasa mi sagumanna silot", merlapaten ngo i, oda lot barang kadè pè mak i terruh kuasa ni jelma. Bagidi nola pè i, oda ngo lot siidah bagèndari merkuasa jelma i mi karinana. 2:9 Tapi enggo siidah Jesus merkuasa. Ibaing Dèbata ngo ia sigejjap ncerreppen asa malaèkat, asa merkitè mendè basa Dèbata, lebbè matè Ia mengkepkep karinana jelma. Bagèndari siidah ngo enggo iberrèken bana kemuliaan dekket kesangapen kumerna enggo menggong simbernit Ia, pella soh matè. 2:10 Enggo patutna Dèbata situmempa sagumanNa silot i -- memmaing Jesus i bagidi merkitèken kinipersuk. Asa merkitè bagidi, iarahken Jesus nterrem jelma dekket merkesangapen rebbak dekketsa, ai Ia ngo memmuka dalan bai kalak asa ndorok ipaluah. 2:11 Itebbus Jesus ngo jelma idi ipas dosana nai, asa gabè ummat Dèbata Simbadia kalak i. Nai gabè sada Bapa mo siemenebus i dekket sitertebbus pè. Kumarna naidi ngo asa oda pella mèla Jesus mendokken kalak idi anggiNa. 2:12 Nina Jesus taba Dèbata, "Kusukutken ngo gerarmu taba karina anggingKu, janah Kupoji ngo Kono i tengah-tengah kuria." 2:13 Nai dèng ma, "Dèbata ngo kubaing kepposenKu." Nai Idokken Jesus dèng ma, "Isèn ngo Aku dekket anak-anak sienggo niberrèkenmu bangKu i alè Dèbata." 2:14 Kumarna anak-anak sinidokken Jesus idi imo jelma siuè matè, jadi Jesus idi pè dos ngo bagè jelma i janah nggelluh tosè bagè jelma i. Ibaing pè bagidi asa merkitè permatèNa idi, italuken Sibolis simerkuasa i kemmatèen i. 2:15 Merkitè bagidi gabè Ipaluah mo jelma sienggo niperhamba mbiar midah kemmatèen i sidekkah nggelluhna. 2:16 Taridah ngo i sidi, oda ngo malaèkat nisarihkenNa, tapi pemparen si Abraham ngo. 2:17 Merlapaten ngo idi kennah gabè dos kalohoon ngo Ia dekket anggina ibas karinaNa. Janah merkitè sibagidi gabè Imam Huntuun ngo Ia bai kalak i janah kepposen bak permasèh atè tikanNa mengkebasi Dèbata Ia lako mahan kesasaan dosa ni kalak i. 2:18 Nai merkitè bagidi gabè iurupi mo kalak sienggo terunjunen i, kerna ia sendiri pè enggo kin ngo nung iunjuni janah menggong simpersuk.
3:1 Kerna naidi alè dengan sienggo nidiloon Dèbata! Mbages mo pikiri kènè bak radumi kènè tersèngèt Jesus i: Ipasulak Dèbata ngo Ia gabè Imam Huntuun ibas agama sikuèkutken. 3:2 Sètia ngo Jesus i bai Dèbata sienggo memilihSa mi bahaan i, bagè si Musa tikala i, sètia mengulaken ulaan i tengah-tengah ummat bak Bages Dèbata. 3:3 Kemmulihkenna idi patut ngo Jesus i menjalo kesangapen lebbih daripada si Musa. Ai kalak sipeliasken bages ngo mersangapen dari pada bages i sendiri. 3:4 Gennep bages lot ngo sipekadèken, tapi ukum pekadèken sagumanna idi, imo Dèbata. 3:5 Kettoken ngo si Musa mengula i tengah-tengah ummat Dèbata, janah magahken tersèngèt sinaing pettararen Dèbata luas. 3:6 Tapi ukum Kristus kepposen ngo bagè Anak simertanggung jabab mi Bages Dèbata. Janah kita ngo Bages Dèbata, mula tetap nggasang janah tok ukurta soh mi puncana lako menjalo niharapkenta i. 3:7 Kumarna naidi bagè pendokken Tendi Perbadia, "Sidari èn tikan idengkoh kènè sora Dèbata, 3:8 ulang peppihir kènè ukur ndènè, bagè empung ndènè sipeppihirken ukurna, tikan memberontak i kalak i taba Dèbata, janah iunjuni kalak i Dèbata i padang gurun. 3:9 'I sidi ngo iunjuni empung ndènè i Aku janah ioji Aku,' nina Dèbata, 'pada hal enggo ngo idah kalak i siKubakin sidekkah empatpuluh tahun dekkahna.' 3:10 Kerna naidi ngo asa mellaga Aku midah kalak i janah Kudokken dak laling ngo ukur kalak i janah oda uè menguèi katangKu. 3:11 Sanga mersumbiah Aku i lagangku i, siso ndorok mbengket kalak i mi bekkasKu i!" 3:12 Asa alè dengan perdatèken kènè mo, asa ulang lot sada kalak pè bai ndènè nai perukur jahat janah oda uè percaya, gabè merbalik ia mennadingken Dèbata singgelluh i! 3:13 Jadi mersipessèngèt-sèngèten mo kènè gennep ari, asa ulang lot barang isè bai ndènè nai ioto-otoi dosa i gabè ialo Dèbata, sinderrang terdokken nggelluh dèng kita; "Sidari èn" bagè pendokken Bibèl i. 3:14 Ai dengan sada ulaan Kristus ngo kita, mula memmes sijèmak sienggo sipercayai i mulana i nai soh mi ari podi. 3:15 Ai bagèen ngo tersurat ibas Bibèl, "Sidari èn tikan idengkoh kènè kata Dèbata, ulang mo peppihir kènè ukur ndènè, bagè empung ndènè peppihirken ukurna, tikan memberontak kalak i taba Dèbata." 3:16 Isè ngo sipeppihirken ukurna tukasi pè idengkoh kata Dèbata? Imo kalak Israel siniuluken si Musa mbungkas i Mesir nai. 3:17 Janah taba isè ngo mellaga Dèbata empatpuluh tahun dekkahna? Otang taba kalak simerdosa sindabuh janah matè i padang pasir ngo? 3:18 Taba isè ngo idokken Dèbata pella mersumbiah ia mendokken, "siso ndorok mbengket kalak i mi bekkasKu i," otang taba kalak simemberontak taba Dèbata ngo? 3:19 Sibettoh ngo i asa oda iberrè Dèbata pè bekkas i ibengketti, kumarna oda percaya ngo kalak i bai Dèbata!
4:1 Kerna naidi siperdatèken mo dirinta, asa ulang lot bai ndènè nai gabè oda dekket mi pentadiin i, tukasi pè bagah-bagah i soh bagèndari dèng ngo i merdalan. 4:2 Ai banta pè enggo isukutken Sukuten Kelluahen i, tosè bagè bai kalak idi. Tapi ukum bai kalak i oda lot gunana sukuten i. Ai tikan idengkoh kalak i kata i, oda ngo percaya kalak i bai Dèbata. 4:3 Tapi ukum kita sipercaya bai Dèbata, iberrèken ngo banta bekkas pentadiin, sienggo niperbagah-bagah Dèbata bagè nidokkenna i, "Pella kusumpahken ninganna mellaga aku, mak ndorok mbengket kalak i mi bekkas pentadiinKu!" Idokken Dèbata bagidi tukasi pè enggo pul ulanNa kessa nai Ihanaken dunia èn. 4:4 Ukum tersèngèt ari pepituken i, idokken Dèbata ngo bagèen ibas Bibèl, "Mentadi ngo Dèbata i ari pepituken i." 4:5 Janah idokken dèng ma ngo bagèen, "Mak ndorok mbengket kalak idi mi bekkas pentadinKu idi." 4:6 Asa ukum kalak siperlebbè mendengkoh kata Sukuten Kelluahen i, oda ngo ipaduè mbengket mi bekkas pentadiin i, kumarna oda percaya kalak i. Mula bagidi, tentu lot ngo kalak sidèben ndorok mbengket mi bekkas pentadiin i. 4:7 Ai enggo itentuken Dèbata nola sada ari sidèban sinidokkenna "Ari èn", imo nidokken Dèbata merkitè si Daud, "Sidari èn tikan idengkoh kènè kata Dèbata, ulang peppihir kènè ukur ndènè." 4:8 Ukum enggo kin ngo iberrèken si Josua kalak i pentadiin niperbagah-bagah Dèbata, tentu oda pella dokkenken Dèbata nèngè terrèngèt kata sada ari sidèban. 4:9 Jadi lot dèng ngo tikki bai ummat Dèbata lako mentadi bagè niperbagah-bagah Dèbata mi bekkas pentadiin i ari peppituken i. 4:10 Ai kalak sienggo menjalo ari pentadiin si niperbagah-bagah Dèbata idi, mentadi ngo kalak i, ipas ulanna nai karinana, tosè bagè Dèbata pè mentadi ngo ipas ulanna nai. 4:11 Kerna naidi sikerencetken mo memengketti bekkas pentadiin niperbagah-bagah Dèbata idi. Ulang mo lot barang isè pè siso mbengket bagè kalak i arnia, kumarna oda percaya bai Dèbata. 4:12 Ai nggelluh ngo kata Dèbata janah mergegoh; tajemmen asa peddang sidua babah. Mennusuk ngo kata i mi kessah dekket mi tendi; soh mi sendihi bak otok-otok pe, gabè ibettoh ngo soh mi simbagesna sinipikiren dekket sinisura-sura jelma. 4:13 Oda lot mboni barang kadè pè sinihanakenna idi i hadeppen Dèbata nai, ai ntarar ngo i karinaNa. Kennah merdabuh-dabuh ngo kita karinana baNa. 4:14 Èn pè, kumarna lot ngo banta Imam Huntuun Mbellen sienggo mbengket mi hadeppen Dèbata -- imo Jesus Anak Dèbata; sicèkèp mo memmes kata kepercayaen i. 4:15 Imam Huntuun i ngo denganta mengerasaken karina kinindotènta. Enggo iunjun Ia ibas karinana, tosè bagè kita; tapi ukum Ia oda merdosa! 4:16 Kerna naidi mersampang atè mo kita mendapetken Dèbata simenggem-nggemmi i merkitè masèh atè, janah asa terolih masèh atè kita mahan pengurupi banta tupung kasèana.
5:1 Gennep imam huntuun sinipilih ibas ummat nai, janah ipebangkit lako mengula i hadeppen Dèbata bagè utusen jelma lako mèlèken pèlèen kesasaan dosa bai Dèbata. 5:2 Ia pè nggati ndotè, janah kemmulihkenna i ma gabè ndorok ngo ia melamlam taba kalak siso memettoh kadè janah kalak laling. 5:3 Kumarna ia pè ndotè ngo, jadi ia pè kennah memmèlèken pèlèen perdosaan ngo, oda pellin pèlèen perdosaan bai ummat sambing, tapi dekket ngo bai dirina sendiri. 5:4 Oda lot barang isè pè mengaitken kessangapen sibagidi mi dirina sendiri. Dèbata ngo mendilo ia gabè imam huntuun -- tosè bagè si Aron. 5:5 Bagidi ma ngo Kristus. Oda ngo ipebangkit dirina gabè Imam Huntuun, tapi Dèbata ngo pebangkitkenSa mi ulaan i, bagè nidokkenna i, "Anakku ngo Kono; Sidari èn ngo Kono Kutubuhken!" 5:6 Idokken dèng ma ngo ipas sidèban, "Gabè Imam ngo kono soh mi amman sumendah; mengèkutken horong si Melkisedek." 5:7 Sinderrang nggelluh i dunia èn dèng Jesus tangis ngo Ia mèlèken pengidonna merdengan èlèk-èlèk taba Dèbata, sindorok paluahkenSa i kemmatèen nai; janah kumarna iuèi ngo Dèbata, gabè iuèi Dèbata ngo pengidonna i. 5:8 Tukasi pè Anak Dèbata ngo Jesus i, Iguruken ngo penguèenken merkitèken nigongkenNa simpersuk i. 5:9 Enggo kessa gabè sondel ibakin kinimerandalna, gabè Ia mo benna kelluahen bai jelma simenguèisa soh mi amman sumendah, 5:10 nai gabè ipebangkit Dèbata mo Ia gabè Imam Huntuun, bagè Imam Melkisedek! 5:11 Matcam dèng ngo nemmu bagèna dokkenken nami tersèngèt Jesus Imam Huntuun i taba kènè, tapi mahal ngo kuakap kami peterangken, kerna mahal ngo iantusi kènè. 5:12 Ukum mertimbangken dekkah ndènè, enggo mo patut kènè nemmuken gabè guru, tapi mengidah keteridahenna, perlu dèng ngo kènè merguru bai sidèban nai terrèngèt dangaan peddah Dèbata; ai oda terpangan kènè dèng pangaan ngkerras, tapi kennah mènum susu dèng ngo kènè lebbè. 5:13 Barang isè mènum susu dèng tosè bagè Anak mbara ngo ia, ai mdèng iantusi kadè bennar janah kadè salah. 5:14 Ukum pangaan ngkerras, pellin bai simbelgah ngo i, sienggo pecemmal-cemmalken dirina ndorok membijaken kadè simerandal janah kadè merroha.
6:1 Kerna naidi aci mo siguruken nola sidebanna i tersèngèt kinitamas nggelluh Kristen janah ulang pellin memperdatèken henjellen perlebbè peddah agamanta. Ulang mo lebbè siterèngèti nèngè peddah buka dasar tersèngèt Kristus, imo kennah mentadi jelma idi ipas ulaan siso merguna i nai dekket kennah percaya bai Dèbata; 6:2 barang pè peddah tersèngèt peridiin barang pè mengampèken tangan bai jelma; bang pè balik nggelluh enggo kessa matè dekket hukum seggen. 6:3 Tapi mula iijinken Dèbata sibengketti mo peddah lebbih mbages, janah bennar. 6:4 Kalak sienggo merbalik mennadingken Dèbata, bakunè nola mo menguluken kalak i asa molih? Ai kalak sienggo nung ibagasen kecihuren Dèbata, janah sienggo nung mengakapi kinitaboh pasu-pasu i sorga nai, janah sienggo nung iiani Tendi Perbadia, 6:5 ai ibettoh kalak i ngo, merandal ngo kata Dèbata i, janah enggo mengerasaken tanda kelengangen ari segen i. 6:6 Mula gabè merbalik nola kalak idi, otang enggo mahal mengarak kalak idi asa gabè tobat nola kalak i mengolihi ipas dosa-dosana nai, ai gabè mengulaki ipersilangken kalak i nola ngo Anak Dèbata, dekket gabè ipemmèla jelma nterrem nola mo diriNa. 6:7 Tanoh simengencep udan siroh bana janah menubuhken suan-suaan merandal bai jelma simengulakensa, tanoh sibagidi ngo ipasu-pasu Dèbata. 6:8 Tapi ukum tanoh simennubuhken rih dekket dori, oda lot gunana tanoh sibagidi, sempetta nai ngo pèmanna i puncana janah gabè itutungi mo ia gabè kerri. 6:9 Tapi kudokken kami pè bagidi alè dengan sinikekellengen, ukum tersèngèt kènè, tok ngo kami simerandalna i ngo patohi kènè, imo tersèngèt kelluahen ndènè i. 6:10 Adil ngo Dèbata. Oda ngo lupa ia mengèngèt sienggo iulaken kènè baNa. Dak ièngèt ngo kelleng atè ndènè baNa i janah ièngèt ngo pengurupi ndènè bai dengan Kristen sidèbanna i. Janah soh bagèndari ngo iberrèken kènè pengurupiin i. 6:11 Ipergeddo ukur nami asa karinana kènè mengkerencetken sibagidi, lako pememmesken pengharapen sijaloon ndènè i puncana. 6:12 Ulang mo gabè perhangkè kènè. Codi kènè mo kalak sipercaya bai Dèbata, janah kumarna sobar memèma-mèma, gabè ijalo mo niperbagah Dèbata. 6:13 Tikan merpadan Dèbata dekket si Abraham, mi dirina i ngo mersumpah Dèbata magahken kennah ipessaut ngo karina niperbagahNa i. Nai kumarna oda lot nèngè datessen bai Dèbata nai, gabè merjandi ngo Dèbata ipas gerarNa i. 6:14 Nina ngo, "Kupasu-pasu ngo ko janah nterrem ngo kubaing pinemparmu." 6:15 Jadi kumarnaken sobar ngo si Abraham memmèma, gabè ijalo mo niperbagah Dèbata bana i. 6:16 Ukum jelma mersumpah, mersumpah ngo ia merkitè gerar sidèban sinidatesna, janah merkitè mersumpah i ia, gabè oda nèngè terkekadè ia. 6:17 Ipergeddo Dèbata bai jelma sinaing menjalo niperbagah-bagahNa i, asa tuhu-tuhu ikettoki, ukum Dèbata oda uè mengobah barang kadè sienggo niperbagahNa. Kerna naidi ngo asa ipetetah Dèbata nola bagah-bagahNa i. 6:18 Oda mobah-obah sidua pengkah èn; ai merkitè-kitè jandi dekket bagah-bagah i, oda ngo uè Dèbata merluap. Kerna naidi, kita sienggo ilènggemmi Dèbata merpengharapen tuhu-tuhu menjalo sienggo ihantari idi i podi ari banta. 6:19 Asa dosken sauh ngo pengharapen i, hot janah tettap banta kerna mbages ngo i tertanem. Pengharapen i menelpus soh mi kirè-kirè Bilik Simbadia kalohoon i Bages Dèbata i sorga. 6:20 Enggo irentes Jesus dalan laus mi bekkas i, janah enggo mbengket mi sidi Imam Huntuunta i, janah merian i sidi ngo ia soh mi amman sumendah mengèkutken horong si Melkisedek.
7:1 Ukum si Melkisedek raja i kuta Salem janah imam Dèbata Sindates i ngo ia. Tikan balik geraha si Abraham janah enggo mèduk raja-raja italuken, isimbak-simbak janah ipasu-pasu si Mèlkisèdèk mo ia. 7:2 Nai iberrèken si Abraham mo bai si Melkisedek sipersipuluh harta taban-tabanna i. (Melkisedek lapatenna perlebbè imo "Raja Adil".) 7:3 Ukum tersèngèt si Melkisedek èn, oda lot dapet keterangen barang i dikè pè, tah lot bapana barang inangna bak asal usulna pè, oda lot keterangen tersèngèt pertubuhna barang permatèna pè. Tosè ngo ia bagè Anak Dèbata; imam ngo ia soh mi amman sumendah. 7:4 Jadi siidah ngo barang bakunè belgahna kesangapen si Melkisedek i; pella ngo iberrèken si Abraham empungta persadaan i sipersipuluh harta taban-taban i bana. 7:5 Ipas hatoren agama Jahudi itentuken ngo, kennah gararen kalak Israel ngo sipersipuluh i hartana nai bai marga Lewi sienggo gabè imam tukasi pè idi kaka-anggina sendiri, ai samah-samah pemparen si Abraham ngo kalak i. 7:6 Tukasi pè oda marga Lewi si Melkisedek tapi ijalo ngo sipersipuluh bagian ipas milik si Abraham nai, janah ipasu-pasu ngo si Abraham sienggo kessakaten bagah-bagah Dèbata. 7:7 Jadi oda termadaken simemasu-masu ngo belgahen dari pada sinipasu-pasu. 7:8 Ukum imam-imam simenjalo sipersipuluh bagian i, jelma biasa ngo ia janah matè. Tapi ukum si Melkisedek simenjalo sipersipuluh bagian bai si Abraham nai, nggelluh ngo soh mi amman-sumendah, bagi ngo tersurat ibas Bibèl. 7:9 Jadi terdokken ngo si Lewi -- sendiri pè dekket ngo menggarar sipersipuluh bagian i taba si Melkisedek merkitè si Abraham, tukasi pè pinemparna kin ngo nemmuken simenjalo nipersipuluh bagian bai bangsa Israel nai. 7:10 Tuhu sinderrang pejumpa si Melkisedek dekket si Abraham, oda dèng ngo tubuh si Lewi; tapi ibagasen daging empungna i ngo enggo ia. 7:11 Asa mula pè iberrèken Dèbata pati-patiin i bai bangsa Israel janah merpengguruun bai marga Lewi, tapi kumarna oda iulaken imam-imam marga Lewi i seppè kalohoon, tukasi pè kennah ulankenna ngo nemmuken i, jadi kennah lot ngo Imam sidèban imo horong si Melkisedek; oda nèngè Imam horong si Aron! 7:12 Jadi mula mobah ngo perkundul imam, pati-patiin idi pè kennah mobah ngo. 7:13 Tuhanta i ngo sinitèmbak kata èn. Ai marga sidèban ngo ia, janah oda nung i margaNa nai mengulaken ulan imam. 7:14 Karina kalak mettoh, marga Judèa ngo Tuhanta i janah oda nung iranaken si Musa i marga idi nai sienggo gabè imam. 7:15 Makin ntangkas kalohoon ngo sinidokken èn, merkitèken pekiroh sada kalak imam sidèban bagè si Melkisedek. 7:16 Ipebangkit pè ia gabè imam, oda ngo kumarnaken permargaan, tapi kemmulihken kuasana dekket nggelluhna siso uè salpun i ngo. 7:17 Ai nina ngo ibas Bibèl, "Gabè imam ngo kono soh mi amman-sumendah, mengèkutken hatoren si Melkisedek." 7:18 Jadi merkitè bagidi, oda nèngè perlu hatoren sinderbi, kumarna oda merguna. 7:19 Oda lot kadè terbaing pati-patiin i lako memmaing sondel kinimendè. Kumarna naidi ngo asa iberrèken banta sada pengharapen merandal, janah merkitèken i ndorok sijolmiti Dèbata. 7:20 Janah dèng ma, merkitèken mang-mang Dèbata ngo i. Ukum sidèbanna idi oda ngo pella merkitè mangmang Dèbata ia ipebangkit. 7:21 Tapi ukum Jesus ipebangkit Dèbata gabè imam merkitè-kitè mang-mang ngo, ai nina ngo, "Enggo imangmangken Tuhan i, janah oda nèngè iondari sienggo niruapkenNa i. 'Imam soh mi amman sumendah ngo kono.' " 7:22 Asa merkitèken i, Jesus ngo gabè jaminen padan simerandalna kalohoon i. 7:23 Mèduk ngo kalak i gabè malim, tapi kumarna mermatèen ngo kalak idi karina, gabè oda ngo ndorok kalak idi menerusken ulanna. 7:24 Tapi ukum Jesus nggelluh ngo soh mi amman sumendah, jadi hot ngo ia imam janah oda suberrang kemalimenNa i taba sidèban. 7:25 Kerna naidi terbaing Jesus ngo paluahken jelma i mi kessennangen soh mi amman sumendah ninganna mengondiken kita mi Dèbata. 7:26 Jadi Jesus ngo Imam Huntuun si siperluken i, simbadia, siso mersalah janah sienggo ikella bai perdosa nai, janah ipeddates mi bekkas datessen asa langit. 7:27 Oda pella bagè imam huntuun sidèbanna i ia, dak gennep ari mèlèken pèlèen tersèngèt dosana perlebbè, nai pè asa dosa bangsa i. Ukum Jesus sikali ngo kessa ibahanken i, tikan Ipèlèken i diriNa mahan pèlèen. 7:28 Ukum pati-patiin idi, ipebangkit ngo jelma perdosa i gabè imam huntuun. Tapi i podi pati-patiin idi nola, iperbagah-bagah Dèbata ngo merdengan mangmang sada Imam Huntuun, imo Anakna i sienggo sondel merandal soh mi amman sumendah.
8:1 Jadi èn mo pangkalna ipas rana èn: Lot ngo banta Imam Huntuun sibagidi; kundul i kamuhun Dèbata simeheji idi i sorga. 8:2 Simenjamotken ulaan Imam Huntuun i bekkas Meheji janah Simbadia, ibagasen Undung-undung Jahowa si Tuhanna, imo si nipajek Tuhan i, oda ngo jelma peliasken. 8:3 Karina imam huntuun sinipebangkit ngo, lako mèlèken pèlèen bai Dèbata. Bagi ma ngo Imam Huntuun èn. Jadi kennah lot ma ngo milikna mahan pèlèenkenna. 8:4 Ukum i tanoh èn Ia, oda ndorok Ia gabè imam, kumarna enggo kin lot imam-imam simemmèlèken pèlèen bagè sinihatorken pati-patiin i. 8:5 Asa ukum ulaan sinijamotken imam-imam idi, pellin lèndung janah cuman-cuman si ni sorga i ngo i, bagè sienggo ibagahken Dèbata taba si Musa kin, tikan naing ipajek si Musa jerro i, "Èngèt janah tengen!" nina, 'Bahan mo tosè bagè siniidahmu i babo ndelleng i.' 8:6 Tapi bagèndari Jesus terolih ulaan imam, ndaoh seppèen daripada ulaan imam nijamotken kalak idi nai. Ai padan nibakin Dèbata dekket jelma merkitè-kitè Jesus, i ngo padan simerandalna kalohoon. 8:7 Ukum oda lot kurangna bagah-bagah siperlebbè i, oda pella perlu nèngè ibakin padan sipeduaken i. 8:8 Tapi enggo idah Dèbata barang kadè kurangna taba ummatNa, gabè idokken Dèbata nola mo, "Èngèt mo! Roh mo tikkina, Kubakin mo padan rembaru bai pinempar kalak Israel dekket marga Judèa. 8:9 Oda dos padan i dekket padan sienggo Kupadanken bai empung kalak i, imo tikan Kuarak kalak idi i Mesir nai. Ai oda hot kalak i menjèmak padan sienggo Kupadanken bai kalak i; kerna naidi oda nèngè Kusarihken kalak i. 8:10 Tapi bagèndari èn mo padan sikupadanken bai bangsa Israel, sinaing Kuberrèken i luas; tikan ari perpodi, nina Tuhan i. Kuberrèken mo pati-patinKu mi bagasen pusuh peratèen kalak i, janah kuokirken mi bagasen atè-atè kalak i. Aku ngo gabè Dèbata kalak i, janah kalak idi mo gabè ummatKu. 8:11 Oda pella nèngè iajari denganna sada bangsa kalak i barang pè memagahken taba kaka anggina 'Tandai mo Tuhan.' Ai karinana mo kalak i menandai Aku mulai anak-anak soh mi simbelgah pè. 8:12 Kuampuni mo karina kessalahen kalak i, janah oda nèngè kupèngèt-èngèt dosana i." 8:13 Merkitè iberrèken padan sirembaru i, gabè oda nèngè perlu padan siperlebbè idi ibaing Dèbata; janah karina siso perlu lako salpun mo i.
9:1 Ipas padan siperlebbè idi pè, lot ngo nemmuken hatoren perpulungen janah lot ma ngo bang jerro nipekkadè jelma. 9:2 Ibahan ngo ipas jerro i kan lebbè sada bekkas mergerar Bekkas Simbadia. Isidi ngo perpelitaan dekket mèja bak roti ipèlèken bai Dèbata. 9:3 Tapi i podi kirè-kirè peduaken i lot bekkas igerari Simbadia Kalohoon. 9:4 Lot ngo i sidi langgaten perdahupaan ilantak dekket buradda. I Bagasen Pèti i lot gori-gori emmas sin manna, bagidi ma bak tongket si Aron simertunas i dekket dua lèi batu bekkas pati-patiin Dèbata sisipuluh i isuratken. 9:5 I babo Pèti i lot gombaren Kerubim, tuduh-tuduh ngo i, magahken i sidi ngo Dèbata. Ngkèrbang ngo kabengna i babo bekkas pemispisen daroh mahan tanda kesasaan dosa. Tapi oda terpeterrang i bagèndari sada-sada. 9:6 Bagidi mo ipekkadè meratur. Nai gennep ari mo mbengket imam mi bilik kan lebbè lako mengulaken ulaan kepengendengenken. 9:7 Tapi ukum mi bilik peduaken i, pellin imam huntuun ngo kessa ndorok mbengket mi sidi, i pè sikali sitahun ngo kessa. Janah kennah merembah daroh ngo ia mahan pèlèen bai Dèbata kumarna dirina sendiri dekket kumarna dosa-dosa siniulaken arap siso nibettoh bangsa i. 9:8 Merkitè idi iajari Tendi Perbadia ngo kita sidekkah lot dèng bilik lebbè-lebbè jerro i, dalan mbengket mi bilik Simbadia Kalohoon, simadèng mbuka. 9:9 Tuduh-tuduh mi tikki èn ngo i; ai ukum merkitè pinakan ngo ipèlèken, oda terbakin i petettahken ukur simemmèlèken. 9:10 Kerna pellin acara simerdemmu mi pangaan, ènumen, dekket matcam bagè sipeppantingken sambing ngo kessa i; hatoren perdagingen, soh dapet ketikana iperimbaru Dèbata nola. 9:11 Tapi enggo roh Kristus. Ia ngo Imam Huntuun perolihen sinaing roh i. Ukum bages jerro bekkasNa mengulaken keImamenna idi imo bages termurmuren janah termendèen, oda ngo jelma memajek, lapatenna oda i dunia èn nai ihanaken. 9:12 Ai pellin sikali ngo kessa ibengketti Kristus Bilik Simbadia kalohoon i soh mi sidekkahna. Oda ngo daroh kambing bajar barang daroh anak lembu iembah mahan pèlèen, tapi darohna sendiri ngo asa merkitè darohNa i, ipaluah kita soh mi amman sumendah. 9:13 Ai salang daroh kambing bajar dekket daroh lembu jenggi bak abu anak lembu mula ipispisken taba simellamun gabè mpanting ngo perdagingen perluar i; 9:14 makinsa nola mo daroh Kristus i. Ai merkitè Tendi simenengteng i, ipèlèken Kristus ngo diriNa sendiri bai Dèbata mahan pèlèen siso lot kurangna. DarohNa i ngo peppantingken perukurenta ipas ulaan siso kasèa idi nai, asa ndorok kita menguèi Dèbata singgelluh i. 9:15 Kumarna naidi ngo asa ibaing Dèbata nola padan sirembaru merkitè Kristus asa ijalo sienggo ni diloon Dèbata idi pasu-pasu soh mi amman sumendah niperbagah-bagahna i. Karinana i ndorok masa, kemmulihken enggo lot matè, imo Kristus; janah kumarna matè i Ia, gabè maluah mo jelma i pas lènggemmen padan sinderbi idi nai. 9:16 Ukum lot surat harta tading-tadingen, kennah lot ngo buktina enggo matè simemmaingken surat tading-tadingen i. 9:17 Ai lebbè matè ngo simemmaing surat harta tading-tadingen i, asa sah surat i, tapi ukum nggelluh dèng ngo ia, oda dèng ngo sah surat i. 9:18 Kumarna naidi ngo asa padan siperlebbè i pè isahken merkitè daroh. 9:19 Ai enggo kessa iranaken si Musa karinana tennah bak pati-patiin Dèbata taba karina kalak Israel, ibuat si Musa mo daroh anak lembu dekket daroh kambing tonggal, icampur mo i dekket laè, nai ipispisken mo i mi lapihen pati-patiin Dèbata dekket taba karinana bangsa Israel merkitè lumut dekket bukbuk biri-biri mbara kalohoon; 9:20 ninganna idokken si Musa, "Èn ngo simensahken padan Dèbata sikennah uèen ndènè!" 9:21 Nai ipispisken si Musa mo daroh i mi Undung-undung Jahowa i dekket i karina barang-barang keperluun memmèlè Dèbata. 9:22 Janah ukum mengèkutken agama Jahudi, karina sinaing peppantingken, ipeppanting ngo merkitè-kitè daroh: asa dosa pè, pellin merkitè-kitè daroh ngo kessa asa ndorok sasa. 9:23 Merkitè bagidi ngo ipeppanting karina simertuduh-tuduh mi sorga idi, iperluken ngo kennah merandalen pèlèen i daripada tuduh-tuduh i nai. 9:24 Ai bekkas Simbadia nibengketten Kristus i oda ngo bekkas simbadia nibahan tangan jelma i, pellin mertuduh-tuduh mi bekkas Simbadia situhunna i. Sorga i ngo nibengketten Kristus i; i sidi ngo Ia bagèndari i hadeppen Dèbata lako mengondiken kita. 9:25 Ukum Imam huntuun kalak Jahudi, gennep tahun ngo memengketti bilik Simbadia i Bages Jerro, merembah daroh pinakan. Tapi ukum Kristus oda ngo mbengket mi sidi imo lako memmèlèken diriNa merulak-ulak. 9:26 Ai ukum bagidi ngo, enggo dakdak menggong simpersuk Ia mulak-ulak, kessa nai ihanaken dunia èn. Tapi pellin sikali ngo Ia roh lako mennasa dosa, merkitè-kitè memmèlèken diriNa sendiri. 9:27 Enggo itettapken Dèbata matè jelma i pellin sakali ngo kessa, enggo kessa idi, ihukumi mo rembang mi pengellakona. 9:28 Bagi ma ngo bang Kristus ipèlèken sikali mahan kesasaan dosa mbuè jelma. Roh nola ngo Ia pedua kaliken, oda nèngè ngo lako menelangsaèken persoalen dosa tapi lako paluahken kalak simemèma-mèma pekirohNa ngo.
10:1 Ukum pati-patiin i, pellin lèndung simerandal sinaing roh i ngo kessa i, oda dèng gombaren situhunna. Dak ipèlèken ngo pèlèen bagè sinidokken pati-patiin i janah dos ngo pèlèen i barang ndigan tahun. Bakunè mo ndorok pati-patiin i dekket pèlèen sibagidi memmakin merandal kalohoon kalak siroh mersembah taba Dèbata? 10:2 Ukum enggo ngo mpanting jelma i ipas dosana nai kumarnaken naidi, tentu oda nèngè pella roh jelma i memmèlèken pèlèenna taba Dèbata. 10:3 Tapi merkitè memmèlè i ia gennep tahun, gabè idi nola mo pessèngètken jelma i tersèngèt dosana, 10:4 kerna oda ngo terbaing daroh lembu barang daroh kambing bajar mennasa dosa. 10:5 Kumarna naidi ngo asa idokken Kristus taba Dèbata tikan roh Ia mi dunia èn, "Oda ipergeddo Kono pèlèen barang pè pemmerrèken; tapi enggo ipèmaken Kono badanKu. 10:6 Oda lemmo atèmu midah jukut situtungen mahan pèlèen barang pè pèlèen sinipèlèken mahan kesasaan dosa! 10:7 Nai Kualoi mo: Èn ngo Aku alè Dèbata! Roh ngo aku mengulaken lemmo atèMu, bagè sienggo tersurat i bas Bibèl i tersèngèt diringKu." 10:8 Mula-mula idokken Kristus, "Oda ipergeddo atèmu pèlèen dekket pemmerrèken; oda lemmo atèmu midah pinakan mahan pèlèen situtungen, janah oda lemmo atèmu midah pèlèen siniberrèken lako mennasa dosa." Idokken Kristus bagidi tukasi pè nemmuken pèlèen idi ipèlèken mengèkutken pati-patiin. 10:9 Nai idokken Kristus mo, "Èn ngo Aku alè Dèbata! Roh mo Aku mengulaken lemmo atèMu." Kerna naidi ipettadi Dèbata mo pèlèen-pèlèen siperlebbè i, janah igancihi dekket pèlèen Kristus. 10:10 Jadi enggo mo iulaken Kristus kadè lemmo atè Dèbata, janah enggo ipeppanting kita ipas dosanta nai merkitèken ipèlèken Jesus i diriNa sikali sambing. 10:11 Karina imam kalak Jahudi, gennep ari ngo ia mengulaken keimamenna janah dak iulak-ulaki ngo mèlèken pèlèen. Tapi ukum pèlèen si nipèlèkenna i oda terbaing mennasa dosa. 10:12 Tapi ukum Kristus, pellin sikali sambing ngo kessa Ia mèlèken pèlèen kerna dosa, janah enggo kessa i, gabè rebbak mo Ia memmerèntah dekket Dèbata. 10:13 Asa ukum bagèndari memmèma nai ngo kessa Ia soh mi ipeppatu Dèbata karina musuhNa. 10:14 Jadi merkitè sada pèlèen, gabè mpanting ngo jelma idi ibaing Kristus ipas dosana nai. 10:15 Tersèngèt i dekket ngo Tendi Perbadia mengindangken taba kita, ai nina ngo, 10:16 " 'Èn ngo padan siKubaing dekket kalak i, i ari sinaing roh èn,' nina Tuhan i. 'Kuokirken mo pati-patinKu mi bagasen atè-atè kalak i.' " 10:17 "Oda nèngè kupèngèt-èngèt dosa dekket pengelausiin kalak i." 10:18 Jadi dosa dekket pengelausiin kejahaten i, enggo mo iampuni; asa oda nèngè pella perlu memèlèken pèlèen kesasaan dosa. 10:19 Jadi bagèndari alè dengan, kemmulihken permatè Kristus i, maluah mo kita janah bèbas mbengket mi bekkas Simbadia kalohoon i. 10:20 Ai enggo ibuka Jesus sada dalan rembaru banta, imo dalan mi kenggelluhen, arap kirè-kirè i, imo daging Jesus sendiri. 10:21 Janah lot ngo bagèndari sada kalak Imam Huntuun simertanggung jabab mi Bages Dèbata. 10:22 Kerna naidi sidessingi mo Dèbata merkitè ukur tutus janah percaya tabasa; bagi ma dekket ukur sienggo mpanting ipas kessalahen-kessalahen idi nai dekket badan sienggo iborih merkitè laè nciho. 10:23 Sicèkèp mo memmes pengharapenta i, ai kettoken ngo Dèbata tersèngèt niperbagah-bagahNa i. 10:24 Janah kennah mersiantoon mo kita samah kita, ninganna mersipejujuun mengulaken simerandal ibagasen kelleng. 10:25 Ulang kita mahangkè lako mertumpu, bagè dèba dengan, tapi mersiarah-arahenken mo kita, ai sibettoh ngo, oda ndekkah nèngè roh mo Tuhan i. 10:26 Mula enggo soh banta kata Dèbata, keppèken dak siempet merdosa, oda lot nèngè pèlèen sindorok mennasa dosanta. 10:27 Pellin hukumen nai ngo mèma banta, imo api dekket pungur Dèbata simengelettup soh tumpat jelma simengalo Dèbata! 10:28 Kennah matè ngo jelma simengellausi pati-patiin si Musa, mula enggo lot saksi dua barang tellu kalak mahan bukti enggo mersalah ia. 10:29 Mula bagi ngo keppèken hukum taba jelma sibagidi, bakunè nola mo ndia hukum taba jelma simengellèai Anak Dèbata janah siso menghargai permatè Kristus, mahan jaminen bagah-bagah Dèbata lako peppantingken jelma i nemmuken ipas dosana nai dekket kalak simengelèai Tendi Perbadia simermasèh atè tabasa. Radumi janah pikiri kènè mo bakunè mpiahna hukum idabuh taba kalak sibagidi! 10:30 Sibettoh ngo isè mendokken kata èn, "Aku ngo mendabuh hukum." 10:31 Soh mo mpiahna mula ndabuh mi tangan Dèbata Singgelluh i! 10:32 Èngèt kènè mo bakunè kin kènè tikala i. Ai enggo kessa icuhayai kecihuren Dèbata kènè, matcam ngo bagèna kinidersa igongken kènè, tapi itahanken kènè ngo i. 10:33 Sipata ilèa-lèai janah irèhè-rèhèi ngo kènè i hadeppen jelma nterrem. Sipata menggong simpersuk ngo kènè rebbak dekket kalak sinibaingna bagidi, 10:34 janah irasaken kènè ngo bakunè pengerasaan kalak siterkurung. Mula irampasi harta ndènè, mersampang atè ngo kènè menggongken i, kumarna ibettoh kènè lot dèng ngo milik ndènè lebbih merandalen janah tahan soh mi amman sumendah. 10:35 Kerna naidi ulang gabè saip ukur ndènè, ai ukum ntegguh ngo kepercayaen ndènè, mbelgah ngo upah ndènè! 10:36 Keperluken kènè mo mbingit, asa ndorok ibahanken kènè lemmo atè Dèbata, janah merkitè bagidi terjalo kènè mo niperbagah-bagah Dèbata. 10:37 Tersurat ngo ibas Bibèl, "Sigejap nai ngo, roh mo sienggo nitentukenna roh i; janah oda isondati pekerohNa i. 10:38 Jadi nggelluh mo ummatKu sibennar kumarna percaya ia taba Aku; tapi mula lot bai kalak i nai gabè sondar, oda ngo lemmo atèngKu midah kalak sibagidi." 10:39 Tapi ukum kita oda ngo sondar barang laling, tapi percaya ngo kita bai Dèbata janah sienggo ipaluah ngo kita.
11:1 Ukum kepercayaen i, pos niatè ngo i tersèngèt siharapen janah pemmettohen pasti tersèngèt simadèng ndidah. 11:2 Kumarna percaya i ngo jelma siarnia asa lemmo atè Dèbata midah kalak i. 11:3 Kemmulihken kepercayaen i ngo, gabè siantusi ihanaken Dèbata ngo dunia èn, janah merkitèken ranana gabè menjadi si siidah i, ipas siso lot teridah idi nai kin. 11:4 Kumarna kepercayaen ngo maing asa merandalen pèlèen si Habel bai Dèbata daripada pèlèen si Kain, janah merkitèken kepercayaenna i, gabè ikesaksiken Dèbata ngo si Abèl i jelma selloh, kerna ijalo Dèbata ngo pèlènna i. Ukum si Abèl enggo ngo matè, tapi soh bagèndari ngo mengerrana kepercayaenna i. 11:5 Kumarnaken kepercayaen si Henokh ngo asa oda pella matè ia, tapi mèter iabin Dèbata ngo ia mi sorga. Isè poda lot pejumpa nèngè dekketsa, kumarna enggo iabin Dèbata ia. Tersurat ngo ipas Bibèl, kelemmoon Dèbata ngo ia sinderrang madèng kin pè iabin ia mi sorga. 11:6 Asa ukum oda ngo percaya, isè poda lot ikellemmoken Dèbata. Ai barang isè roh mendahi Dèbata, kennah percaya ngo ia lot Dèbata, janah iberrèken upah bai kalak simennulusiSa. 11:7 Kumarna kepercayaen ngo asa ijalo si Noak sipesèngèt Dèbata bana tersèngèt sinaing masa i podi ari, madèng pè masa tanda-tandana. Kerna naidi ngo asa iuèi si Noak mahan perrau nidokken Dèbata bana asa maluah ia rebbak dekket pengisi bagesna. Kemulihkenna idi gabè ihukum ngo dunia èn, tapi ukum si Noak gabè kalak bennar ngo ia idokken Dèbata kerna kepercayanna i. 11:8 Kumarna kepercayaen ngo asa iuèi Dèbata dilo-dilo Dèbata bana. Nai berkat mo si Abraham oda pè ibettoh dèng barang mikè tumburenna. 11:9 Kumarna kepercayaen ngo asa merian si Abraham gabè ginemgem i nagerri si niperbagah-bagah Dèbata bana i, bagè i tanoh kalak sidèban. Sapo-sapo ngo iiani si Abraham rebbak dekket si Isak bak si Jakob sienggo menjalo bagah-bagah i bai Dèbata nai. 11:10 Ipèma-pèma si Abraham ngo bekkas simerdangaan ntegguh sinipellias janah itukkangi Dèbata. 11:11 Kumarna kepercayaen ngo asa lot dukak si Abraham dekket si Sara, tukasi pè enggo tua-tua si Abraham kennah saut ngo siniperbagah Dèbata. 11:12 Tukasi pè tikanna i mak nèngè harapen merpinempar si Abraham i, tapi tubuh ngo pinemparna oda terkira buèna, bagè bintang i langit dekket bagè kersik i biding laut. 11:13 Karinana ngo kalak i merkepercayaen, tapi soh matè pè kalak i, oda dèng ngo ijalo bagah-bagah Dèbata i. Pellin mennatap ngo kessa kalak idi ipas sindaoh nai ninganna mengharap. Jadi merkitè bagidi, idokken kalak i mo taba dunia èn, kalak sidèban janah pengeranto ngo ia i tanoh èn. 11:14 Asa merkitè pendokken kalak idi bagidi, dak mennulusi kuta ngo kalak i mahan lebbuhna. 11:15 Tapi oda nèngè ngo ipèngèt-èngèt kuta sienggo itadingken kalak idi i, ai kum bagi kin ngo ukurna, terbaing kalak i ngo nemmu balik mi sidi. 11:16 Tapi iketeddohken ngo kuta simerandalen, imo sorga. Kumarna naidi, oda ngo mèla Dèbata idokken kalak i Ia Dèbatana, kumarna enggo ihantari Dèbata kuta bai kalak i. 11:17 Kumarna kepercayaen i ma ngo ioji Dèbata si Abraham, gabè uè si Abraham memmèlèken anakna si Isak i. Tukasi pè anak bagah-bagah i enggo iberrèken Dèbata bai si Abraham tapi bagi pè i, uè ngo si Abraham memmèlèken anakna sada-sada i. 11:18 Tukasi pè enggo kin idokken Dèbata tabasa, "Arap si Isak i ngo pinemparmu siKuperbagah-bagah i bamu." 11:19 Ai ikettoki si Abraham ngo, ndorok ngo ipegelluh Dèbata si Isak idi ipas simatè nai -- jadi terdokken mo, I kemmatèen nai nola ngo si Isak i ijalo si Abraham. 11:20 Kumarna kepercayaen ngo iperbagah si Isak pasu-pasu bai si Jakob dekket bai si Esau i ari podi. 11:21 Kumarna kepercayaen ngo, asa sinderrang madèng matè si Jakob tetongket mo ia i tongketna ninganna mersembah taba Dèbata -- nai ipasu-pasu mo pemparen si Josep. 11:22 Kumarna kepercayaen ngo, asa sinderrang naing matè si Josep iranaken tersèngèt kalak Israel kennah karuar i Mesir nai. Jadi itennahi si Josep mo kalak i tersèngèt sibakinenna mi tulan-tulanna. 11:23 Kumarna kepercayaen ngo asa iboniken partuana si Musa tellu bulan dekkahna enggo kessa tubuh ia, kerna dukak selloh ngo ia idah kalak i janah oda mbiar kalak i midah perèntah raja. 11:24 Kumarna kepercayaen ngo, asa enggo kessa mbelgah si Musa oda uè ia gabè anak nikamet berru raja Mesir. 11:25 Lotiin ngo ipilih rebbak ia dekket bangsa Dèbata daripada mersennang-sennang sigejap, tapi dom dosa. 11:26 Ai hargaan ngo iakap si Musa mengkepkep Raja Sipaluahken i tukasi pè gabè merlèa ia, dari pada harta nagerri Mesir, kerna iharapken si Musa ngo upah i ari podi. 11:27 Kumarna kepercayaen ngo, asa itadingken si Musa tanoh Mesir, janah oda pella ikebbiari laga raja Parao. Dak ipuspusken si Musa ngo langkahna, bagè cara enggo idah ia Dèbata, siso nung teridah i kin. 11:28 Kumarna kepercayaen ngo, asa iulaken si Musa Paskah i janah idokken asa ipempalitken kalak Israel daroh i babo tekkang pèntu kalak i, asa ulang ibunuh Malaèkat Pengago i karina buka baju kalak idi. 11:29 Kumarna kepercayaen ngo, asa tersuberrangi kalak Israel Laut Mbara tosè bagè i babo tanoh ngkerrah kalak i merdalan, keppè kum kalak Mesir, inengneng laut i ngo sinderrang isuberrangi kalak i ma laut i. 11:30 Kumarna kepercayaen ngo, asa ikulilingi kalak Israel kessa kuta Jeriko pitu ari dekkahna gabè megargar mo kuta i. 11:31 Kumarna kepercayaen ma ngo, asa maluah si Rahab daberru perkendangen i, oda dekket ia terbunuh rebbak dekket kalak simengalo Dèbata, kerna ijalo ngo mi bagesna perkakap kalak Israel i. 11:32 Mbuè dèng ngo nemmuken sukutenkenku, umpamana bagè si Gideon, si Barak, si Simson, si Jepta, si Daud, si Samuel dekket nabi-nabi i, tapi oda cukup tikkingku. 11:33 Ai kumarna kepercayaen ngo asa italuken kalak i mbuè raja. Iulaken kalak i ngo kebennaren asa gabè italuken kalak i mbuè raja. Iulaken kalak i ngo kebennaren asa gabè ijalo kalak i niperbagah-bagah Dèbata. Ikontam kalak i ngo babah singa. 11:34 Iènteppi kalak i ngo api mergollah-gollah. Maluah ngo kalak idi i babah peddang nai. Mergegoh ngo kalak idi ibas kinindotèna nai, janah muat mergegohna ngo kalak i tupung mergerraha, italuken kalak i ngo balapergunggung bangsa sidèban. 11:35 Kumarna kepercayaen ngo, asa ijalo daberru-daberru balik nggelluh simatèna. Lot ma ngo dèba lotiin isiksa soh matè janah oda uè ia ipaluah asa gabè mulak nggelluh ia lako menjalo sitermerandalen. 11:36 Lot ngo dèba menggongken rèhè-rèhè, isiksa, irantè janah ikurung. 11:37 Ibentiri dekket batu soh matè, dèba igettap merkitè garagaji kerahongna, ibunuh merkitè peddang. Mberrus mo kalak i ninganna merrolesken bebbak unto barang pè bebbak kambing; rapar, iletlet, isiksa. 11:38 Asa oda ngo bekkas kalak i ukum tanoh èn. Mampar-ampar ngo kalak idi i Padang Pasir dekket i kellongoon, janah i liang-liang i ngo kalak i merbekkas, bak ipas luhung-luhung i tanoh i. 11:39 Mbelgah kalohoon ngo kemmennangen kalak i kumarna kepercayanna i, 11:40 ai mi simerandalna i ngo sura-sura Dèbata, imo kennah lebbè rebbak ngo kita baru pè asa sondel kinimerandal kalak idi.
12:1 Kerna naidi bang kita pè, kumarna mèduk ngo saksi i sikulilingta, sigamparken mo karina simemberati kita bak dosa simengellekketti dirinta, janah mbingit mo kita lojang mi lebbè. 12:2 Sitengen mo dempak Jesus, kerna Ia ngo mengurupi kita, asa terbaing kita percaya bana, i bennana nai soh mi puncana, igongken ngo matè tersilang. Oda ngo pella kemmemèla iradumi matè i kayu persilang i, lako mengayaki sampang atè sinaing jalonNa i podi ari. Asa kum bagèndari, kundul ngo Ia i kamuhun Dèbata rebbak mengerajai. 12:3 Pikiri mo bakunè mpiahna iakap Jesus menahanken peraloon sibagidi bai kalak simengalosa nai. Kerna naidi ulang mo kèdèk atè ndènè janah ulang mendellè. 12:4 Ai oda pella nung dèng tiris daroh ndènè lako mengalo dosa i 12:5 Ulang lupa kènè i peddah Dèbata sitaba kènè i, kerna dukakNa ngo kènè, ai nina ngo, "O alè pa, ulang toisken pengajaren Tuhan i, janah ulang mendellè kono, mula pè ipincang kono. 12:6 Iajar Tuhan i ngo karina jelma nikekellengenNa, janah Iligas ngo karina dukak nikametNa." 12:7 Mbingit mo kènè sinderrang iligas Tuhan i ai kerna dukakNa ngo kènè iètong Dèbata. Isè mo nung dukak-dukak siso nung iajar partuana? 12:8 Mula oda iajar kènè, merlapaten ngo i oda ngo dukak nikametna kènè. 12:9 Lot ngo partuanta i dunia èn. Iajar ngo kita, janah sikebbiari ngo ia. Otang makin merpenguèen mo kita taba Bapanta si ni sorga i asa nggelluh kita. 12:10 Ukum partuanta ni tanoh èn iajar ngo kita oda pella sadikè dekkah merguru mi penimbangen ukurna bakunè merandal. Tapi ukum Dèbata, iajar ngo kita mi simerguna, asa bagèsa kita mpanting janah merkebadiaan. 12:11 Tuhu, mula tikan ipincang kita, oda ngo sampang atè siakap, tapi siarsakenken ngo; tapi enggo kessa leppas idi, gabè ibuahken idi ngo banta nggelluh mengekutken lemmo atè Dèbata, janah memmaing damè ipas perrukurenta. 12:12 Kerna naidi petegguh mo tangan ndènè ndalmèh i bak nèhè ndènè sikadotdot i! 12:13 Merdalan mo kènè arap dalan sindèas i, asa ulang makin sihitna nèhè ndènè sièangen i, tapi asa makin malumna. 12:14 Kerencetken kènè mo merdamè nggelluh ndènè taba karina jelma ninganna ayaki kènè mo nggelluh ibagasen Tuhan i, ai isè poda ndorok mengidah Tuhan i, ukum oda bagidi nggelluhna. 12:15 Perdatèken mo asa ulang lot peddaohken dirina ipas masèh atè Tuhan i nai, asa ulang i gabè dori i tengah-tengah ndènè mengkerrohken kesusahen, janah memmaing ncèda jelma nterrem. 12:16 Jagaken mo asa ulang lot luhlah barang oda ihargai simerdemmu mi pertendiin, bagè nibakin si Esau. Ai idèa ngo sulangna situaan i kumarnaken pangaan cituk. 12:17 Ibettoh kènè ngo sèkel ngo ia menjalo pasu-pasu i bai bapana nai, tapi itulak ngo ia. Ai barang tangis kin pè ia lako mengido pelliasken kesalahenna i, oda dapetsa nèngè i. 12:18 Oda ngo lot iakapi kènè bagè pengakap kalak Israel i arnia. Ukum kalak idi idapetken ngo sindorok idadap i, imo Delleng Sinai dekket apina mergollah-gollah i; bagi ma dekket gellap tuiten bak angin kaba-kaba; 12:19 bagidi ma dekket sora sarunè bak ginoling sora. Tikan i tengah kalak i sora i, mersembah merkuraja mo kalak i mengido, asa ulang taba kalak idi ipehonggem sora idi. 12:20 Kerna oda tahan kalak i mendengkoh perèntah nipessoh sora i taba kalak i, mendokken, "Barang kadè dais mi delleng èn, tah pinakan barang jelma pè i, kennah iderder ngo merkitè ibentiri dekket batu soh matè." 12:21 Sondel ngo hejji siniidah kalak Israel i, ai si Musa pè sanga idokken, "Buradan ngo aku janah kadotdot!" 12:22 Tapi ukum kènè, Delleng Sion i ngo idapetken kènè dekket kuta Dèbata singgelluh i, imo Jerusalem i sorga, bak malaèkatna simerribu-ribu i. 12:23 Bagi ma sinidapetken ndènè pertumpuun meriah janah rami kalohoon imo pertumpuun dukak-dukak situaan ni Dèbata, sienggo tersurat gerarna i sorga, dekket Dèbata simenghukumi karina jelma bak tendi jelma sienggo iperandal, 12:24 dekket Jesus tellangkè simahanken padan rembaru i dekket darohna simenguras i, ndaoh merandalen dèng dari pada daroh si Habel. 12:25 Kerna naidi, jagaken kènè mo, asa ulang mak idengkohken kènè Ia simengerrana i. Salang kalak i siso uè mendengkohken simennukutken Sukuten bai Dèbata nai, tukasi pè kalak siso terbakinsa maluah, tapi mak ndorok mennilahken, makinsa nola mo kita simendengkohken Ia simengerrana i sorga i nai. Mula oda kita uè mendengkohkenSa bakunè mo permaluahta bana nai! 12:26 Ukum tikala i, dumegger ngo tanoh èn mendengkoh soraNa. Tapi ukum bagèndari Iperbagah-bagah ngo, "Ukum sikali nai oda pellin tanoh èn gontar Kubaing, tapi dekket mo langit i." 12:27 Kata simendokken 'sikali nai' magahken, sagumanna sienggo ihanaken janah ndorok dumegger i kennah itingtingi, asa pellin siso terdegger idi nai ngo kessa tading. 12:28 Kumarna naidi, sidokken mo mejalo metangkup taba Dèbata, kerna sijalo ngo bai Dèbata nai bekkas siso ndorok dumegger. Kennah sidokken mo mejalo metangkup bai Dèbata janah siuèi mo ia ninganna merkebiaren janah metemman, tosè bagè nipergeddo Dèbata. 12:29 Ai tosè bagè api mengelettup ngo Dèbatanta i.
13:1 Kennah tettap ngo kènè mersikekelengen samah kènè bagè kalak Kristen simerkaka-kuanggi. 13:2 Ulang njais kènè mertamuè, tukasi pè oda itandai kènè dèng siroh mi bages ndènè i; ai merkitè bagidi, pennah ngo enggo itamuèi dèba malaèkat i bagesna, siso pemettohenna. 13:3 Èngèt kènè mo kalak siterkurung bagè dengan rebbak terkurung. Bagi ma èngèt kènè mo kalak siterkilang, ai kènè pè ndorok ngo bagè terkilang ma. 13:4 Hargaken kènè mo perjejapen i, janah ulang mo gabè samur nola perjejapen i; kennah mersipeuè-uèen ngo sinibalè dekket si nibages. Ai ihukum Dèbata ngo kalak luhlah dekket perlangkah julu meddem. 13:5 Ulang mo irajai riar nggelluh ndènè tapi kesampangken kènè mo silot bai ndè; ai idokken Dèbata ngo, "Oda kubelli kono sengsara; oda kutadingken kono." 13:6 Kennah pos ngo atènta mendokken, "Tuhan i ngo Mengurupi aku, jadi oda mbiar aku. Isè poda terbakinsa mengkekkadè aku?" 13:7 Ulang lupa kènè mernèngèt simengendengken kènè, sienggo pessohken sukuten bai Dèbata nai bai ndènè. Perdatèken kènè mo bakunè cara pernggelluh kalak i dekket bakunè cara permatè kalak i janah èkutken kènè mo kepercayaen kalak i. 13:8 Ukum Jesus Kristus i, bagi arnia, bagèndari, bagi ma ngo soh amman sumendah. 13:9 Ulang uè kènè ikella-kella peddah simermatcam bagè janah simengelalingken kènè. Kennah ntegguh ngo perukurenta, kumarna mendè atè Dèbata, idi ngo merandal; oda ngo merkitèken hatoren-hatoren sipanganen. Kalak sienggo menjamoti hatoren i tikala i, kadè poda buahna dapetsa. 13:10 Lot ngo banta langgaten bekkas memèlèken pèlèen bai Dèbata. Janah imam-imam simemmèlèken i pè i bages jerro, oda ndorok kipangan pèlèen si nipèlèken i babo langgaten i. 13:11 Ai jukut sienggo isèat, janah darohna ipèlèken imam huntuun i Bilik Simbadia kalohoon idi ibagasen jerro i, i ruar jerro i ngo itutungi. 13:12 Kumarna naidi ma ngo asa Jesus pè matè i ruar pèntu pengkerruhen kuta i ngo lako peppantingken ummatNa ipas dosana nai merkitè darohNa sendiri. 13:13 Kerna nai sidapetken mo ia mi ruar perundung-undungen i, janah dekket mo kita ipelèa-lèa rebbak dekketSa. 13:14 Kerna oda lot i dunia èn bekkasta hot; situlusi mo bekkas hot sinaing roh i. 13:15 Kerna naidi, dak sipoji mo Dèbata merkitè-kitè Jesus Kristus, ai idi ngo pèlèen merlias atè baNa, sipèlèken merkitè rananta bana lako pessangapken gerarNa. 13:16 Ulang lupa kènè memmaing merandal, janah mersiurupen, ai i ngo pèlèen nikellemmoken atè Dèbata. 13:17 Uèi kènè mo kata simenguluken kènè, janah tunduk mo kènè bana. Ai kalak i ngo menjagai tendi ndènè janah kalak i ma ngo segen mertanggung jabab taba Dèbata. Mula iuèi kènè ngo kalak i, terbaing kalak i mo mengendengken kènè; jadi oda laba olih i bai ndènè. 13:18 Dak sodipken kènè mo kami. Tok ngo kami, oda pella iselselli gerrek nibas perrukuren nami i kami, kerna simerandal i ngo kuulaken kami. 13:19 Kupido dèng ma taba kènè dak sodipken kènè mo aku taba Dèbata, asa ipaduè Dèbata nola aku ndor roh mendahi kènè. 13:20 Enggo ipegelluh Dèbata Tuhanta Jesus, i kemmatèen nai. Jadi kemmulihken matè i Ia, enggo gabè permakan Mbellen Ia taba kita biri-biriNa. Kerna matè i Ia, imo gabè jaminen i padan Dèbata simenettap i. 13:21 Dak iberrèken Dèbata benna ni Damè i mo taba kènè karina simerandal lako menguèi lemmo atèna, janah dak ipetupung Dèbata merkitè Jesus i mo banta kadè lemmo atèNa. Nipoji mo Kristus soh mi amman sumendah! Amèn. 13:22 Kuèlèk-èlèk mo kènè asa peratè-atèken kènè ajarku èn ibagasen mbingit, kerna oda pella nggeddangsu suratku èn. 13:23 Bettoh kènè ma mo, ukum denganta si Timoteus, enggo ngo ipaluah i kurungen nai. Mula enggo roh ia sikali èn mendahi aku kuarahken pè ia asa dekket ia roh mendahi kènè. 13:24 Pesakat kènè mo salamku taba karina simengendengken kènè dekket taba karinana ummat Dèbata. Jalo kènè ma mo dekket salam denganta per Italia. 13:25 Dak ipasu-pasu Dèbata mo kènè karinana.
1:1 Kènè karina kaka anggi ummat Dèbata simersèrak i suberri dunia! Njuah-njuah mo bai ndènè, bangku nai si Jakobus naposo Dèbata dekket Jesus Kristus. 1:2 Alè dengan! Mula roh mendahi kènè matcam bagè pengunjunen, ètong kènè mo i perlabaan. 1:3 Ai mula tettap kènè percaya bai Tuhan i tikan roh pè pengunjunen i, gabè mengkerohken mbingit perukuren ngo i. 1:4 Perdimata kènè mo asa ukur mbingit ndènè i, ulang singgat pertengahen ndalan sambing, tapi dak tong mo terrus i soh mbelgah janah seppè, janah oda lot kurangna i barang kadè pè. 1:5 Mula lot bai ndènè nai kurang bijak, ipido mo kebijaken i bai Dèbata nai, asa iberrèken Dèbata bana kebijaken i; ai mbuas ngo Dèbata merrèken idi ibagasen masèh atèna janah oda merdengan pengèah. 1:6 Tapi kennah ibagasen tok ngo sipido i, ulang mo ragu. Ukum kalak perukur ragu, tosè ngo i bagè galombang laut si nisempul angin mi sèn mi sadoi. 1:7-8 Janah kalak sibagidi, oda hot pikirenna; oda tertentukensa barang kadè pè. Kerna naidi ulang mo iharapken kalak sibagidi barang kadè pè bai Tuhan i nai. 1:9 Kennah lolo mo ukur kalak Kristen sincor mula ipedates Dèbata ia. 1:10 Bagi ma ngo kalak Kristen Bèak, mersampang atè mo ia mula pè ipecerrep Dèbata ia. Ai lako salpun ngo sibèak i bagè bunga dukut-dukut. 1:11 Mula isenggang mataniari ia, males mo ia janah merurus mo bungana, mersep ma mo dekket kinimendèna. Bagi ngo kalak sibèak, mago ngo ia tikan mendalanken usahana i. 1:12 Sayur ntua ngo kalak mula mbingit ibas pengojiin i, ijalo mo upahna, imo kenggelluhen niperbagah-bagah Dèbata. 1:13 Ulang mo dok atè barang isè, mula tikan terunjun ia gabè nina, "Bai Dèbata nai ngo pengunjunen i," ai oda uè Dèbata mengunjuni barang isè merkitè kejahaten. 1:14 Tapi terunjun pè jelma i kumarna iabin janah ihèla-hèla cubellekna simeroha i ngo ia. 1:15 Nai mula iuèi cubellekna simeroha i, tubuh mo dosana, janah mula enggo ibahanken dosa, mi kemmatèen mo ujungna. 1:16 Ulang kènè tertipu alè dengan sinikekellengen! 1:17 Sagumanna pemerrèken merandal dekket mendè basa bai Dèbata ni sorga i nai ngo rohna i, simenghanaken kecihuren i langit i. Ia ngo Dèbata siso mobah-obah, janah oda uè mennadingken kita, gabè tading pellin lèndung sambing i gembarta. 1:18 Ibas taki ukurNa sendiri ngo kita iabin gabè dukak-dukakNa merkitè kataNa bennar i. Ibaing pè bagidi asa gabè kita ngo perlebbè ipas karina sinihanakenNa i nai. 1:19 Èngèt kènè mo alè dengan sinikekellengen! Gennep jelma, ngkasah mo ia mendengkoh-ndengkohi; ulang gerrèdèk mengerana, ulang murah mellaga. 1:20 Oda terulaken kalak simurah mellaga simerandal nikellemoken atè Dèbata. 1:21 Kerna naidi, patakken kènè mo kecemmalen simerroha janah singgodo i. Ipas ukur ncerrep mo jalo kènè peddah nisuanken Dèbata mi bagasen perrukuren ndènè, ai mergegoh ngo peddah i paluahken tendi ndènè. 1:22 Naing mo nemmu kènè mengulaken kadè sinidokken Dèbata, ulang pellin mendengkohken sambing, asa ulang gabè mengoto-ngotoi diri ndènè kènè. 1:23 Kalak simendengkoh kata Dèbata keppèken oda iulaken codi mo i bagè mengidah rupana i cermin. 1:24 Enggo kessa ntangkas iperèso abèna i, laus mo ia, keppè oda ièngèt nèngè bakunè bentuk abèna i. 1:25 Ukum Patiin Dèbata merandal ngo i janah merkegegohen paluahken jelma. Jadi kalak simengeradum-radumi janah simemperatè-atèken bak simengulaken kata i, oda pellin idengkohken sambing janah oda ilupaken, kalak sibagidi ngo ipasu-pasu Dèbata ipas ulanna. 1:26 Mula lot kalak mendokken ibas ukurna kalak peragama ia, keppèken oda irantè dilahna, mengoto-ngotoi dirina sendiri ngo ia; magosia ngo peragamanna i. 1:27 Ukum peragama sènteng siso lot tikasna i hadeppen Dèbata, imo: Pehèdu-hèduken sinceppet mak merbapa mak merinang dekket kalak simebbalu janah mpersah; ninganna menjaga dirina sendiri ulang icèdai dunia èn.
2:1 Kènè alè dengan! Ulang mo kènè mengidah-ngidah rupa, mula tuhu-tuhu ngo kènè percaya bai Jesus Kristus simermulia i. 2:2 Ai mula roh sada kalak sibèak mercincin emmas janah merpakèen mbara mbèrèng mi perpulungen ndènè, nai roh mo sada kalak sincor merpakèen ompak-ampik, 2:3 nai laèn mo cara ndènè menghormati simerpakèen mbara-mbèrèng i, dok ndènè mo tabasa, "Mi julu meddem èn mo kènè kundul." Tapi ukum taba kalak sincor i dok ndènè, "Kan tellagahen adoi mo kènè cènder," barang ma "I sarimar èn mo kono kundul." 2:4 Merkitè bagidi otang merbagi dua perrukuren ndènè janah enggo pejaè-jaè ibaing kènè taba samah-samah jelma merdangaan mi sura-sura jelma siso kasèa. 2:5 Èngèt kènè mo alè dengan sinikekellengen! Kalak sincor atè dunia èn, ipilih Dèbata gabè kaya merkepercayaen bai Tuhan i. Kalak sibagidi mo mbengket mi kerajaen Dèbata sienggo niperbagah-bagahna taba kalak simerkelleng atè midahSa. 2:6 Tapi ilèai kènè ngo kalak sincor, pada hal kalak sibèak i ngo pepersuk-persukken kènè janah mengaduken kènè mi perhukumen. 2:7 Kalak idi ma ngo simengelèai gerar sienggo ienggerarken Dèbata bai ndènè. 2:8 Merandal ngo nibaing ndènè mula iulaken kènè kata Dèbata sitersurat ibas Bibèl bagèen, "Kekellengi mo denganmu jelma dosken dirimu!" 2:9 Tapi mula mengidah-ngidah abè ngo kènè, merdosa ngo kènè, janah idokken Dèbata, mengellausi kata Dèbata ngo kènè ukum bagi. 2:10 Barang isè mengellausi salah satu dari pada pati-patiin i, enggo mo pengellausi ia i karinana pati-patiin i. 2:11 Kerna simendokken, "Ulang merlangkah julu medem," ia ma ngo mendokken, "ulang memmunuh." Jadi mula oda pè kènè merlangkah julu meddem, tapi mula memmunuh, sienggo mengellausi pati-patiin i ngo enggo kènè. 2:12 Asa, mula mengerana kono barang mengulaken barang kadè pè, kennah èngèten ndènè lebbèen, kennah meralus ngo kono seggen rembang mi si nidokken Dèbata sipaluahken jelma manusia. 2:13 Barang isè kalak siso mermasèh atè taba kalak sidèban, kenna hukum ngo ia, oda terolih masèh atè. Tapi belgahen ngo masèh atè dari pada hukum. 2:14 Kadè mo gunana alè dengan mula pè nidokken, "Percaya ngo aku," keppèken oda merdengan perulaan? Ndorok ngo kepercayaen sibagidi paluahkensa? 2:15 Umpamana mula lot dengan samah Kristen, memerluken gedda janah dèng ma oda lot panganna. 2:16 Kadè mo gunana idokken kènè tabasa, "Njuah-njuah mo kènè memakè dekket mangan mènum!" -- keppèken oda iberrè kènè siperlu bana i tanoh èn? 2:17 Tosè bagi ngo kepercayaen i mula oda sipacidah merkitè-kitè perulaan, oda lot kadè lapaten kepercayaenta i. 2:18 Tah bakunè lot mendokken, "Dèba ia merdangaan mi kepercayaen, dèba nai merdangaan mi perulaan." Aku mendokken taba kènè, "Pacidah mo kuidah kepercayaenmu siso merdangaan mi perulaan, asa kupacidah taba kono kepercayaen merkitè perulanku." 2:19 Percaya ngo kènè pellin sada ngo kessa Dèbata, selloh ngo i. Tapi sibolis pè percaya ngo tersèngèt idi janah buradan ngo ia ninganna kadotdot! 2:20 Tapi alè jelma rumar! Perlu ngo ndia ipacidah taba kènè magahken oda lot lapatenna percaya ukum oda merdengan perulaan? 2:21 Tengen kènè mo si Abraham empungta i. Ijalo Dèbata ngo ia kumarna perulanna. 2:22 Terridah i sidi nai, kennah nipacidah ngo kepercayaen i merkitè perulaan asa gabè sondel kinisellohna. 2:23 Tosè ngo i mi sinidokken Bibèl bagèen, "Percaya ngo si Abraham bai Dèbata, janah merkitè kepercayaenna i, gabè ijalo Dèbata ngo ia simengulaken lemmo atè Dèbata." Kemmulihkenna idi ngo asa igerari si Abraham i, "supan-supan Dèbata." 2:24 Jadi ntangkas ngo sibettoh bagèndari, ijalo Dèbata ngo jelma i kumarnaken merandal perulaan jelma i, oda ngo pellin kepercayaen sambing. 2:25 Bagidi ma ngo bang daberru si Rahab daberru luhlah i. Ijalo Dèbata ngo ia kumarna perulanna menjalo perkakap kalak Israel mi bagesna, janah iurupi ngo kalak i lako laus arap dalan sidèban, asa maluah. 2:26 Codi bagè daging i, mula oda mertendi, enggo matè i; bagi ngo mula percaya pè kita tapi oda merdengan perulaan, enggo matè kepercayanta i, oda lot nè gunana.
3:1 Kènè alè denganku! Ulang mo mbuèsu kènè gabè guru. Otang ibettoh kènè ngo mberraten ngo hukum taba guru dari pada sidèbankenna i? 3:2 Nggati ngo kita karina salah. Barang isè oda nung salah merkitè-kitè pekerananna, kalak sibagidi mo simerandalna kalohoon sindorok mengerajai karina dagingna i. 3:3 Mula sikontam muncung kuda, iuèi ngo kita barang mikè pè ia siteggu. 3:4 Keppel pè bagi ngo. Tukasi pè mbelgah kalohoon keppel i janah iembusken angin ndor kalohoon, tapi dak ipetupung-tupung ngo merkitè kemudi sikètèk kaloon i mi lemmo atè jurumudi. 3:5 Tosè bagi ngo dilahta; tukasi pè kettèk dilahta i tapi kataltil ngo katana, kata jukkat bana sombong. Kètèk ngo api, tapi ndorok ngo ilettup rambah mbellang! 3:6 Tosè ngo dilah i bagè api. Bagè dosken benna kejahaten ngo ia, memmaing kejahaten mi suberri dagingta. Mellekkup ngo ibaing karinana nggelluhta merkitè api simerbenna i narakka i nai. 3:7 Sagumanna matcam binatang pennoro, manuk-manuk, simenjoror bak ikan, ndorok ngo iajar gabè melemmuk ibaing jelma. 3:8 Tapi ukum dilah, oda terpelemmuk barang isè pè i. Dom kejahaten ngo dilah i janah dom racun simemmunuh soh matè. 3:9 Merkitè dilah i siruapken ngo kata menjalo metangkup bai Tuhan janah Bapanta, tapi dilah i ma ngo tong sipakkè lako menumpahi dengan jelma sienggo ihanaken tosè bagè rupa Dèbata. 3:10 Arap sada babah ngo ruap kata menjalo metangkup dekket kata sumpah. Patutna oda ndorok nemmuken bagi! 3:11 Otang oda ngo lot takal laè mengarirken laè malum bak laè mpagit? 3:12 Kènè alè dengan, oda terbuahken kayu ara buah kayu zaitun; anggur pè oda terbuahkensa buah kayu ara. Mata laè masin pè, oda terarirkensa laè malum. 3:13 Mula lot i tengah-tengah ndènè kalak mpantas janah merukur, ituduhken mo merkitè perangè selloh merkitè mengulaken simerandal idengani kecereppen ukur bak kebijaken. 3:14 Tapi ukum dak cemburu ngo kènè, perncio atè, perlaga janah dak mengait mi diri ndènè sambing, ulang mo igegahken kepantasenna i, ai merkitè bagidi gabè ipebalik kènè nola ngo berita kebennaren bai Dèbata nai. 3:15 Oda i sorga nai kepantasen sibagidi, tapi i tanoh èn nai ngo idi, oda bai Tendi Perbadia nai, tapi bai sibolis nai ngo! 3:16 Barang bai isè lot cimburu barang mengait mi diri sendiri, i sidi ngo terdapet rukrak dekket matcam bagè kejahaten. 3:17 Tapi ukum kepantasen si ni dates idi nai, memellin ngo i janah oda merpengait, ikelloloken ngo merdamè, persaor janah merpenguèi. Idomi masèh atè ngo i janah merperangè selloh. Oda ganggu i janah oda merakkal-akkal. 3:18 Merandal ngo buah damè i sinisuanken jelma perdamè.
4:1 I dikè nai ngo rohna perrubaten dekket perselisihen i tengah-tengah ndènè? Otang ipas cubellek-cubellek ndènè sidak tong merralo i bagasen diri ndènè nai ngo, imo lako muat kesennangen dunia èn! 4:2 Sèkel ngo kènè, tapi oda dapet, nai gabè memmunuh mo kènè! Nangis mo atè ndènè, tapi oda dapet kènè nipergeddo ukur ndènè, nai gabè merrubat mo kènè janah mermusuh, tapi oda lot kadè dapet kènè nipergeddo ukur ndènè, ai gabè merrubat mo kènè janah mermusuh, tapi oda lot kadè dapet kènè kumarna oda bai Dèbata nai ipido kènè. 4:3 Janah mula pè ipido kènè, tapi oda ngo menjalo kènè, kerna salah ngo tujuun ndènè mengido i; ai kesennangen ukur dekket kesennangen diri ndènè ngo ipido kènè. 4:4 Kalak siso hot merrukur ngo kènè! Oda ngo ibettoh kènè, mula merdengan kènè dekket dunia èn, meralo ngo kènè dekket Dèbata? 4:5 Barang tah dok atè ndènè, dèra-dèra ngo nidokken sitersurat èn, "Mposi ngo tendi niberrèken Dèbata mi bagasen kita." 4:6 Tapi tukasi pè bagidi, gegohen ngo basa-basa Dèbata niberrèkenna banta i dari pada nipergeddo tendinta i. Kumarna i ngo tersurat ma i Bibèl bagèen, "Ialo Dèbata ngo kalak sindates merukur, tapi masèh ngo atèna midah kalak sincerrep merukur." 4:7 Kerna naidi, uèi kènè mo Dèbata, janah alo kènè mo Sibolis, nai mperrus mo Sibolis i bai ndènè nai. 4:8 Jolmiti kènè mo Dèbata, nai gabè ijolmiti Dèbata mo kènè. Borih kènè mo tangan ndènè, alè kènè kalak perdosa, janah peppanting kènè mo ukur ndènè, kènè alè kalak simerdua ukur! 4:9 Tuhu-tuhu mo kènè peselsel, tangis janah mengandung; mobah mo pertaba-tabanken ndènè gabè tangis, janah lolo atè ndènè i gabè bonek! 4:10 Pecerrep kènè mo ukur ndènè i hadeppen Tuhan i, asa ipedates Tuhan i kènè. 4:11 Kènè alè dengan ulang mo kènè mengerèhè-rèhèi dengan barang mersisalahenken. Barang isè kalak mengerèhè-rèhè dengan barang pè mennalahken dengan samah Kristen, dosken mengkata-katai dekket mennalahken pati-patiin Dèbata ngo i. Jadi mula isalahken kènè ngo pati-patiin Dèbata merlapaten ngo i oda iuèi kènè pati-patiin i, balikna nola gabè ihukumi kènè nola ngo i tupèh. 4:12 Sada ngo kessa ndorok merrèken pati-patiin bai jelma dekket menghukum jelma, imo Dèbata; terbakinsa ngo paluahken dekket mengeripasken jelma. Tapi ukum kono isè ngo kono asa ihukumi kono denganmu jelma, ai samah-samah jelma ngo kènè? 4:13 Dèba dengan mendokken, "Ari èn barang baremben naing berkat mo kami mi kuta adoi, janah i sidi mo lebbè kami sitahun èn mertiga-tiga bak mencari." Dengkohken kènè mo sipessèngètku èn. 4:14 Oda ngo ibettoh kènè barang kadè masa bai ndènè i ari baremben! Tosè bagè cèmber ngo ukum nggelluh ndènè i, taridah sigejap, nai mersep mo. 4:15 Lotiin ngo nemmuken idokken kènè bagèen, "Mula ipadiat Tuhan i nggelluh kami, nai kubahan kami mo èn barang adoi." 4:16 Tapi dak ilanjangken kènè ngo rana manggang ndènè. Salah ngo karina kata lanjang sibagidi. 4:17 Kernana i, merdosa ngo barang isè memmettoh merandal tapi oda iulaken.
5:1 Kènè alè dengan sibèak! Dengkohken kènè mo sipessèngètku èn. Tangis mo kènè janah derru-derru, kerna menggongken simpersuk mo kènè! 5:2 Enggo macik kinibèak ndènè. Oles ndènè i pè enggo ipangan ngitngit. 5:3 Emmas dekket pirak ndènè i enggo karaten; karatna i nola ngo gabè saksi mengalo kènè janah kerri ngo ipangan karat idi daging ndènè i tosè bagè pemmaing api. Dak ipepulung-pulung kènè ngo harta mayak ari perpodi èn. 5:4 Oda igarar kènè upah simengula i juma ndènè. Dengkohken kènè mo uo-uo kalak i sipepulungken hasil juma ndènè, ai enggo soh uo-uo kalak idi ninganna mengido urup mi pènggel Dèbata, Tuhan Pergegoh Sisotercodi. 5:5 Enggo merlebbih-lebbih irasai kènè kesennangen dunia èn. Bagè cara ipegomok kènè ngo daging ndènè mèma isembellih. 5:6 Ihukum janah ibunuh kènè ngo siso mersalah, janah oda ngo mengalo kalak i taba kènè. 5:7 Kerna nai mbingit mo kènè alè dengan soh mi ari pekeroh Tuhan i. Codi kènè mo bakunè mbingitna peruma-uma i memèma ari perudan dekket udan mbuah bagi ma mèma ari perudan dekket udan mbuah bagi ma mèma buah maharga i tanoh i nai. 5:8 Kènè pè kennah mbingit ngo janah mersampang atè, ai enggo ndessing ari pekeroh Tuhan i. 5:9 Ulang kènè ngutnguten janah ulang mersiselsellen, asa ulang ihukum Dèbata kènè. Èngèt mo! Roh nèngè mo penghukum i! 5:10 Tengen kènè mo nabi-nabi simerjamita merkitè-kitè gerar Tuhan i. Mbingit ngo kalak i menggong simpersuk; imo codi kènè. 5:11 Sayur ntua ngo kalak i dokonen, kumarna mbingit i kalak i. Enggo ma ngo idengkoh kènè tersèngèt kebingiten si Job, janah ibettoh kènè ma ngo, ujungna ipasu-pasu Tuhan i nola ngo ia. Ai permasèh atè mbellen ngo Tuhan i janah permendè basa. 5:12 Tapi perlebbè kalohoon alè dengan, imo: ulang mo kènè mersumpah-sumpah mi langit i barang mi tanoh barang mi kadè sambing pè tupèh. Dokken kènè mo "Uè" mula uè kin, "Oda" mula oda kin, asa ulang ihukum Tuhan i kènè. 5:13 Mula lot kalak mpersah i tengah-tengah ndènè, mersodip mo ia. Mula lot merlolo atè, merendè mo ia memoji Dèbata. 5:14 Mula lot mersakit, idilo mo pengendeng kuria. Isodipken pengendeng i mo simersakit i janah ialunken mo minak merkitè-kitè gerar Tuhan i. 5:15 Ipemalum sodip simenodipken taba Tuhan ibagasen kepercayaen ngo sakit i. Ipemalum Tuhan i mo ia, janah isasa mo karina dosa nibahankenna. 5:16 Kernana i mersisasaan dosa mo kènè janah mersisodipenken, asa ipemalum kènè. Mergegoh kalohoon ngo sodip simenguèi Dèbata. 5:17 Jelma ngo bang si Elias bagè kita. Mertuhu-tuhu ngo isodipken asa ulang roh udan, gabè oda mo tuhu roh udan tengah empat tahun dekkahna. 5:18 Enggo kessa bagidi, mersodip nola mo ia, nai roh mo udan i langit i nai, gabè iberrèken tanoh i mo hasilna. 5:19 Kènè alè dengan! Mula lot i tengah-tengah ndènè nai siso menguèi nèngè mi kata Dèbata, nai lot nola menogikensa balik taba Dèbata, 5:20 èngèt kènè mo kata èn: Paluahken tendina ibas kemmatèen nai ngo kalak barang isè menogiken perdosa balik ipas dosana nai mendahi Dèbata, janah mèduk ngo dosa iampuni kemulihkenna i.
1:1-2 Kènè dengan sienggo ipilih Dèbata simersellaten i ranto, si ninagerri Pontus, Galatia, Kapadosia, i Asia dekket i Bitinia! Aku si Petrus rasul Jesus Kristus mengharapken dak ipasu-pasu janah iberrèken Dèbata mo damèna mertinèncuk bai ndènè. Sienggo ipilih ngo kènè gabè ummat Dèbata, kemulihken rembang mi lemmo atè Dèbata Bapa i mulana i nai. Janah enggo ibaing Tendi Dèbata kènè gabè ummatNa simbadia bai Dèbata, asa tunduk kènè bai Jesus Kristus janah ipepanting darohNa i. 1:3 Sidokken mo mejalo metangkup bai Dèbata Bapa ni Tuhanta Jesus Kristus, kumarna mendè basana. Kerna naidi ngo asa ibaing kita gabè jelma rembaru, merpengharapen nggelluh, kerna enggo Ipegelluh nola mengolihi Kristus ipas simatè nai. 1:4 Kerna naidi ngo asa dak siharapken pasu-pasu sinaing jalonta sienggo ipèmaken Dèbata banta i sorga, siso uè ncèda barang macik, barang pè merulang. 1:5 Bam ndènè ngo karinana i, kerna percaya kènè bai Dèbata. Dak ijagai ngo kènè ibagasen kuasa Dèbata asa ijalo kènè kelluahen sienggo hantar sinaing pettararenna i ari podi. 1:6 Kerna naidi dak mersampang atè mo kènè, mula pè bagèndari bonek kènè sigejap kemulihken pengunjunen i. 1:7 Ai pellin keteridahen kepercayaen ndènè ngo i, barang tah tuhu-tuhu ma ngo kènè percaya bai Tuhan i barang tah oda. Salang emmas siuè ncèda i pè ioji ngo janah itingtingi ipas api. Jadi mahargaan ngo kepercayaen ndènè i dari pada emmas, jadi kennah ioji ma ngo i asa gabè tulèn. Janah merkitè bagidi, ipoji mo kènè janah ipessangap ninganna ipeddates tikan roh kessa balik Tuhan Jesus Kristus. 1:8 Ikekelengi kènè ngo Ia, tukasi pè oda nung dèng idah kènè. Ikepercayai kènè ngo Ia, tukasi pè oda idah kènè Ia bagèndari. Kumarna naidi ngo asa dak ipoji kènè Dèbata ibagasen sampang atè siso ndorok terruapken merkitè kata. 1:9 Ai èn ngo buah pengkepercayai ndènè bai Tuhan i, kerna enggo dapet kènè, imo kelluahen ndènè! 1:10 Kelluahen i ngo sinitulusen nabi-nabi janah iperdatèken, sienggo mengalamatken pasu-pasu niberrèken Dèbata bai ndènè. 1:11 Dak iperdatèken kalak idi ngo, ndigan barang cidahari ngo ketikana masa sinidokken Tendi Kristus i mi bagasen pusuh peratèen kalak i, sienggo mengindangken tersèngèt keppersuken sitahanen Kristus i dekket kemulianna si Roh i podinkenna. 1:12 Ipettarar Dèbata pè taba nabi-nabi idi oda ngo lako bana sambing, tapi lako bai ndènè ngo sinijamotkenna i; imo tersèngèt sienggo nidengkoh ndènè bagèndari i bai kalak simennukutken Sukuten Kelluahen tersèngèt Jesus Kristus. Ipessoh kalak idi bai ndènè merkitè kuasa Tendi Dèbata si nitengeskenNa i sorga i nai. Malaèkat-malaèkat pè sèkel ngo naing memettoh sukuten nisukutken kalak idi i. 1:13 Kerna naidi, kebbasi kènè mo ukur ndènè, nterrang mo pikiren ndènè; mertuhu-tuhu mo kènè mengharap masèh atè si nibasa-basakenna bai ndènè, tikan roh kessa Jesus Kristus. 1:14 Uèi kènè mo Dèbata, ulang mo kènè menguèi cubellek daging ndènè bagè siarnia, sinderrang mak dèng itandai kènè Dèbata. 1:15 Tapi kennah mbadia ngo kènè ipas karinana pemmahan ndènè, tosè bagè Dèbata simendiloi kènè i. 1:16 Tersurat ngo ibas Bibèl, "Kennah mbadia ngo kènè, kerna simbadia ngo Aku." 1:17 Idokken kènè ngo taba Dèbata i 'Bapa', mula mersodip kènè. Asa Dèbata i ngo mendabuhken hukum bai jelma rembang mi pengellakona oda merpilih bulu. Kerna naidi sidekkah nggelluh dèng kènè i dunia èn, kennah pessangap kènè Dèbata ibas nggelluh ndènè. 1:18 Kennah bettohen ndènè ngo kadè igararken lako paluahken kènè ipas nggelluh siso puna-puna idi nai, sinisusurken empung ndènè bai ndènè. Oda ngo emmas barang pirak siuè karaten idi igararken, 1:19 tapi simahargana kalohoon i ngo, imo diri Kristus i sendiri ipèlèken bagè biri-biri pèlèen bai Dèbata, oda mertikas barang pè kurang. 1:20 Kristus i ngo ipilih Dèbata sinderrang madèng kin pè ihanaken dunia èn. Janah mayak ari podi dunia èn, roh ngo Ia lako paluahken kènè. 1:21 Merkitè Ia ngo kènè percaya bai Dèbata sienggo pegelluhkenSa i simatè nai janah merrèken kessangapen baNa. Jadi Dèbata ngo nikepercayaen ndènè i janah Dèbata ngo siharapenken ndènè i. 1:22 Kumarna iuèi kènè ngo kata Dèbata, jadi kennah nggelluh ibagasen Dèbata ngo kènè janah kennah kelleng ngo atè ndènè midah kalak sipercaya bai Kristus. Kerna naidi kennah mersikekelengen ngo kènè, 1:23 kerna merkitè kata Dèbata singgelluh i janah tettap, enggo iperembaru kènè, oda tubuh arap jelma tapi arap Bapa simenettap i ngo. 1:24 Tersurat ngo ibas Bibèl bagèen, "Dosken dukut-dukut ngo karina jelma, janah bagè bunga dukut i ngo karina kesangapenna. Mula males dukut-dukut i merrurus ma mo dekket bungana. 1:25 Tapi hot ngo kata Tuhan i soh mi amman sumendah." Kata i ngo Sukuten Kelluahen sinisukutken taba kènè.
2:1 Kerna naidi, patakken kènè mo ipas diri ndènè nai karina kejahaten i; ulang nè mo merluap, ulang merakkal-akkal, ulang ncian, janah ulang lèai denganmu sidèban. 2:2 Bagè anak rembaru tubuh mo kènè dak muas mi laè susu pertendiin situhunna, asa merkitè i makin mbelgah kènè janah ipaluah. 2:3 Tersurat ngo ibas Bibèl bagèen, "Enggo irasaken kènè sendiri bakunè mendè basa Tuhan i." 2:4 Kerna naidi, dapetken kènè mo Tuhan i. Ai tosè mi batu singgelluh ngo Ia, si nipatakken jelma, ai idokdok oda merguna; keppèken batu sinipilih ngo Ia janah maharga bai Dèbata. 2:5 Kènè pè alè dengan, tosè bagè batu singgelluh i ngo. Kumarna naidi uè mo kènè ibaing lako pekkadèken Bages Dèbata ipas pertendiin. Merkitè bagidi, gabè imam-imam singgelluh mo kènè janah sinipilih bai Dèbata, simemmèlèken bai Dèbata merkitè-kitè Kristus idi, imo pèlèen pertendiin sinikellemmoken Dèbata. 2:6 Ai tersurat ngo ibas Bibèl bagèen: "Enggo kupilih sada batu maharga, janah Kubaing ngo idi i Sion mahan batu persoki; barang isè percaya baNa oda ngo ipemmèla." 2:7 Maharga kalohoon ngo batu i bai ndènè sipercaya. Tapi ukum bai kalak siso percaya i, bagèen ngo pendokken Bibèl, "Batu sinipatakken tukkang bages i, idi nola ngo keppè batu persoki," 2:8 dekket "Gabè terdengdeng ngo kalak i i batu i, janah batu i maing kalak i tergempang." Terdengdeng ngo kalak i kumarna oda percaya mi kata Dèbata. Bagi ngo enggo itentuken Dèbata tersèngèt kalak i. 2:9 Tapi bangsa sinipilih ngo kènè, imam-imam naposo raja janah bangsa simbadia nipilih bai Dèbata, bak ummat Dèbata sendiri. Ipilih janah idiloi Dèbata ngo kènè karuar ibas sigellap i nai, lako mbengket mi bagasen kecihurenna sinterrang i, janah asa isukutken kènè berita tersèngèt sinibaingna simeheji i. 2:10 Ukum arnia oda ngo kènè ummat Dèbata, tapi ukum bagèndari enggo gabè ummatna. Arnia oda ngo dekket kènè menjalo masèh atè Dèbata, tapi ukum bagèndari enggo iakapi kènè masèh atèNa i. 2:11 Kènè alè dengan sinikekellengen! Kalak sidèban janah kalak ranto ngo kènè i dunia èn. Kerna naidi memmes kupido bai ndènè, asa ulang uèi kènè cubellek jelma simerralo dekket ukur. 2:12 Kennah mendè ngo pengellako ndènè i tengah-tengah jelma nterrem siso menandai Tuhan, asa tah pè ilèai kènè, bagè kalak perjahat, mula idah kalak i kessa mo pengellako ndènè selloh i, gabè ipoji kalak i mo Dèbata tikan roh kessa ia mi dunia èn. 2:13 Kennah uèi kènè mo pemerèntah silot i dunia èn; tah pè i Kèsar sigabè perkuasa tuhu-tuhu, 2:14 tah pè i gubèrnur sinihunjuk Kèsar lako menghukum kalak simerpengelako jahat janah menghormati kalak simerpengelako mendè. 2:15 Ai ipergeddo Dèbata ngo, asa gabè sip kalak simengerrana manggang, merkitèken pengellako ndènè simerandal i. 2:16 Ai sienggo maluah ngo kènè, tapi ulang mo baing kènè kelluahen ndènè i lako mengkemkemmi kejahaten, tapi bagè pergelluh naposo Dèbata mo pergelluh ndènè. 2:17 Rèntem mo kènè taba karina kalak, kekellengi mo dengan samah-samah Kristen, kebiari mo Dèbata; pessangap mo Raja. 2:18 Kènè dengan sigabè perkebbas, uèi kènè janah merkebiaren mo kènè taba induk somang ndènè, oda pellin taba kalak siperrukur selloh janah melamlam, tapi dekket ngo bai induk perukur ntuing. 2:19 Ai ipasu-pasu Dèbata ngo kènè mula saddar kènè kadè lemmo atè Dèbata, imo sobar lako menggongken siso patut janah oda adil. 2:20 Kadè mo kelebbihen ndènè mula pè sobar kènè menggongken ligas-ligas keppèken kerna kessalahen ndènè? Tapi mula mbingit kènè menggong simpersuk ali perulaan ndènè merandal, nai gabè ipasu-pasu Dèbata mo kènè. 2:21 Mi si ngo kènè idiloi Dèbata, Kristus sendiri pè menggong simpersuk ngo mengkepkep kènè, memmaing codiin bai ndènè, asa ièkutken kènè caraNa. 2:22 Oda nung ia merdosa, janah oda lot isè pennah mendengkoh Ia merluap. 2:23 Oda mengerrèhè Ia tikan irisak, oda nung mengasupi Ia tikan menggong simpersuk; ipessoh ngo karinaNa i taba Dèbata Perhukum sènteng i. 2:24 Ipersan Jesus i ngo karina dosanta mi kayu persilang i, asa maluah kita ipas kuasa dosa i nai, janah asa nggelluh kita codi mi lemmo atè Dèbata. Kumarna ugahna i ngo malum iakap kènè. 2:25 Bagè biri-biri laling ngo kènè arnia, tapi ukum bagèndari enggo mo itatang nola kènè balik mengèkutken Kristus, permakan janah sipehèdu-hèduken kènè.
3:1 Bagidi ma ngo bang kènè pè alè partua ibages, kennah tunduk ngo kènè taba sinibalè ndènè, asa tah lot dèba kalak i siso percaya bai Dèbata, jadi merkitè pengellako ndènè i gabè percaya nola mo ia, janah oda pella perlu merkitè-kitè kata ndènè, 3:2 Kerna idah kalak idi perangè ndènè rèntem i, ninganna merpenguèi. 3:3 Ulang pellin ipejagar-jagar kènè rupa ndènè kan duru sambing merkitèken mendandan buk barang merpakèen buradda barang memakkè pakèen maharga-maharga. 3:4 Tapi naing mo nemmu kinimberru ndènè i arap pusuh perratèen ndènè nai rohna, umpamana merpengelako lamlam janah damè; i ngo kinimberru ikellemmoken atè Dèbata. 3:5 Bagidi ngo daberru simeragama ukum arnia memakkè, janah merpenguèi bai sinibalèna. 3:6 Si Sara pè bagi ngo, merpenguèi ngo ia bai si Abraham, janah idokken ngo ia tuanna. Kènè pè dukak si Sara ngo. Jadi ulaken kènè mo simerandal i, ulang kumarnaken mbiar midah kalak. 3:7 Bang kènè pè alè partua ibalè, merukur mo kènè lako mendengani si nibages ndènè, janah bettoh kènè mo perdaging ndotè ngo daberru. Mehormat mo kènè taba kalak i, ai dekket ngo kalak i dengan sidasa i masèh atè Dèbata, imo kenggelluhen siamman sumendah. Mula bagi ngo ibaing kènè, oda ngo lot nèngè mengkella-kella sodip ndènè. 3:8 Rèmpunna sada kata janah sada orjok mo kènè, sada pengerrasaan, janah dak mersikekelengen bagè kalak merkaka kuanggi. Dak mersimasèh atèen mo kènè janah perncerrep ukur. 3:9 Ulang mo balesken kènè jahat alo jahat, rèhè bales rèhè, tapi mersodip mo kènè taba Dèbata, kerna idilo pè kènè lako menjalo pasu-pasu bai Dèbata nai ngo. 3:10 Tersurat ngo ibas Bibèl bagèen, "Barang isè naing nggelluh janah sèkel mengidah ari sennang, kennah ipettadi mo dilahna mengeruapken simerroha, asa ulang ruap kata nggodo dekket luap. 3:11 Ipeddaoh mo dirina i kejahaten idi nai, iulaken mo simerandal. Tuhu-tuhu mo itulusi damè, janah imo iayaki. 3:12 Ai mendahi kalak simengulaken lemmo atè Dèbata ngo pennengenNa, janah dak idengkohken Dèbata ngo sodip kalak sibagidi; tapi ialo Tuhan i ngo kalak simahanken jahat." 3:13 Isè ngo maing nggodo taba kènè, mula dak iperluken kènè simendè? 3:14 Tapi mula pè tah menggong simpersuk kènè kumarnaken mengulaken sibennar, merlaba olih ngo kènè! Kerna naidi ulang pella mbiar kènè midah barang kadè janah ulang buradan. 3:15 Tapi perbadiai kènè mo Kristus i bagasen ukur ndènè ai Tuhan ngo Ia. Gennep tèk mo kebbas mengaloi kalak simengkusoi kènè tersèngèt si niharap ndènè i. 3:16 Tapi ulaken kènè mo idi ibagasen rana melamlam janah mehormat, kennah mpanting ngo ukur ndènè asa termèla kalak simengerrèhèi kènè, kerna merandal ngo ibaing kènè bagè kalak simengèkutken Kristus. 3:17 Lotiin mo kènè menggong simpersuk -- kumarna mengulaken simerandal mula i ngo lemmo atè Dèbata -- dari pada menggong simpersuk kumarna mengulaken simerroha. 3:18 Kristus pè enggo matè sikali kumarna dosanta -- asa itogiken kita mendahi Dèbata. Ibunuh ngo dagingNa tapi ipegelluh ngo Ia merkitè Tendi. 3:19 Ibagasen Tendi ngo Ia laus mennukutken Sukuten bai Dèbata nai taba tendi si nikurungen, 3:20 imo tendi kalak siso menguèi Dèbata tikan i umur si Noak. Ai dak ipèma-pèma Dèbata ngo tikala i sidekkah mahan keppel si Noak -- tapi pellin ualuh kalak mo kessa maluah tikan masa laè mbuncar i. 3:21 Simasa i imo merrumangken codiin ipas perridiin sibagèndari lako paluahken kènè. Ukum perridiin idi, oda ngo memmorih simellamun nidaging i nai, tapi gabè sada perjandiin ndènè ngo i taba Dèbata ibagasen pusuh perratèen ndènè nai. Perridiin i ngo paluahken kènè kerna enggo balik nggelluh Jesus Kristus i simatè nai, 3:22 janah enggo laus mi sorga. Merkuasa ngo Ia bagèndari janah kundul i kamuhun Dèbata janah memerèntah karina malaèkat, karina penguasa dekket kegegohen.
4:1 Nteng, kumarna enggo mersitahanen Kristus ipas perdagingen kènè pè kennah ngo mersenjataken ukur sibagidi. Kerna barang isè mersitahanen secara perdagingen, enggo mentadi ia mengulaken dosa. 4:2 Kerna naidi barang sadikè dekkah nai kènè nggelluh i dunia èn, naing mo nemmu kènè mengèkutken nipergeddo Dèbata, ulang mo mengèkutken nipergeddo cubellek kejelmaan. 4:3 Tikala i enggo ndekkah kènè mengulaken bahaan siniulaken siso menandai Dèbata, imo menguèi cubellek-cubellek, mabuk-mabuk, mangan mènum dekket mersembah taba bègu siso patut i. 4:4 Ukum bagèndari lengang ngo kalak siso menandai Tuhan i mengidah kènè kumarna oda nè uè kènè mengulaken bagè ulaan janah pergelluh kalak siso selloh i. Kerna nai ngo asa ilèai kalak i kènè. 4:5 Jadi kennah ipertanggung jababken kalak i ngo segen karina ulah-ulahna i taba Dèbata sienggo memmèmaken hukum taba jelma singgelluh bak sienggo matè i pè. 4:6 Kumarna naidi ma ngo asa enggo ibagahken Sukuten Kelluahen i taba kalak sienggo matè i. Ai mula pè enggo matè kalak i cara daging -- bagè karinana jelma kennah matè -- tapi ukum ibagasen pertendiin, nggelluh ngo kalak i kemulihken lemmo atè Dèbata. 4:7 Enggo mo ndessing ajal dunia èn, kerna nai mengerrem mo kènè janah merjaga-jaga, asa ndorok kènè mersodip. 4:8 Tapi ibabo karinana idi, tuhu-tuhu mo kènè mersikekelengen, ai mula mersikekelengen kènè, mbuè ngo dosa ikemkemmi. 4:9 Keperluken kènè mo mersitamuèen, tapi ulang ngutnguten. 4:10 Enggo mo ijalo kènè pasu-pasu bai Dèbata nai mermatcam bagè. Kerna naidi karinana mo kènè pehèdu-hèduken samah-samah dengan kadè niberrèken Dèbata i bai ndènè. 4:11 Kalak simennukutken berrita bai Dèbata nai mo ibagahken; barang isè mengurupi denganna sidèban, iurupi mo merkitè kuasa bai Dèbata nai, asa terpoji Dèbata merkitè Jesus Kristus. Ia ngo simerkuasa janah patut ipoji soh mi amman-sumendah. Amèn. 4:12 Alè dengan si nikekellengen! Ulang pella sungkar dok atè ndènè mula roh kinidersa, kerna lako mengoji kènè ngo i. Jadi ulang pella camber dok atè ndènè i. 4:13 Tapi lolo mo kènè kerna enggo dekket kènè menggong simpersuk rebbak dekket Kristus. Jadi ntarar kessa mo kemmuliaan Kristus gabè meroang-oang mo kènè. 4:14 Mertuah ngo kènè mula ilèai dèba kènè kemulihken mengèkutken Kristus i kènè. Sada tanda-tanda ngo i, magahken iiani Tendi Perbadia ngo kènè. 4:15 Ulang mo lot bai ndènè nai menggong simpersuk kumarna memmunuh ia, barang mennangko, barang kumarna merjahat ia, barang kumarna iantoi siso bahanna. 4:16 Tapi mula menggong simpersuk kènè kumarna kalak Kristen kènè, ulang pella mèl`a kènè kumarna naidi. Dokken kènè mo mejalo metangkup taba Dèbata, kerna igerari ngo kènè ibagasen gerar Kristus. 4:17 Enggo dapet ketikana ihukum Dèbata dunia èn. Janah ummat Dèbata sendiri ngo lebbèen ihukum. Jadi mula lebbèen ngo kita ihukum bakunè nola mo ndia hukum taba kalak siso percaya taba Sukuten Kelluahen bai Dèbata i nai? 4:18 Bagèen ngo tersurat ibas Bibèl, "Mula kalak bennar pè enggo mahal paluahen, bakunè mo ndia masa bai kalak perdosa siso menandai Tuhan!" 4:19 Kerna nai, mula lot kalak menggong simpersuk, ipas lemmo atè Dèbata nai, kennah bennar mo pergelluh kalak i janah isohken mo dirina taba situmempasa. Ai dak ièngèt ngo bagah-bagahNa.
5:1 Peddahku taba pengendeng si lot i tenah-tengah kuria ndènè. Kusuratken surat èn bai ndènè, bagè sada kalak pengendeng ngo aku sienggo mengidah kepersuken si nigongken Kristus, janah persulang ipas kesangapen sipettararenna roh kessa Kristus merkessangapen mendahi jelma. Memmes kupido taba kènè, 5:2 asa permakani kènè mo biri-biri siniberrèken Dèbata, ulang mo kumarna oda terjua. Ulang ma mo kumarna pellin naing menjalo laba bak upah, tabi kemulihken ukur ndènè tutus mo lako mengendengken. 5:3 Ulang mo kènè bagè memmerèntah taba kalak i tapi gabè codiin mo kènè bai kalak i. 5:4 Jadi roh kessa mo Permakan Mbellen i luas, jaloon ndènè mo rudang kessangapen siso uè males i. 5:5 Bagi ma mo kènè pè alè simatah daging. Uèi kènè mo situa-tua. Kennah mersipecerrep ukurna ngo kènè karina janah mersipehèdu-hèduun. Kerna tersurat ngo ibas Bibèl, "Ialo Dèbata ngo kalak sindates merrukur, tapi masèh ngo atèna midah kalak sincerrep merukur." 5:6 Kerna naidi, peterruh kènè mo diri ndènè mi terruh kuasa Dèbata, asa ipeddates kènè tupung kettikana. 5:7 Pessoh mo karina nikelsohken ukurmu taba Dèbata, ai Ia ngo pehèdu-hèduken kènè. 5:8 Terrus mo ukur ndènè janah merjaga-jaga mo kènè! Dak kadap ngo musuh ndènè Sibolis i bagè biahat merngengngeng lako menulusi sindorok jerngemenna. 5:9 Mertuhu-tuhu mo kènè mengalosa, janah ulang mo ganggu kènè mengkepercayai Kristus, ai ibettoh kènè ngo, karinana ngo dengan ndènè sipercaya bai Kristus ni dunia èn menggong simpersuk tosè bagè kènè. 5:10 Jadi mula enggo menggong simpersuk kènè sigejap, gabè ipetetah, ipetteguh janah ipetettap mo kènè, ai Dèbata permasèh atè ngo Ia, sienggo mendiloi kènè asa dekket menjalo kesennangen simenettap i merkitè Kristus. 5:11 Hot ngo kuasana soh mi amman sumendah! Amèn. 5:12 Kusuratken suratku sipondok èn bai ndènè merkitè pengurupi si Silas, sikuètong dosken anggingku i pas keKristenen i janah sètia. Kusuratken èn taba kènè lako menduhduh kènè janah asa makin tok kènè, bennar ngo karinana sikusuratken èn janah sènteng tersèngèt masèh atè Dèbata. Tettap mo kènè ibagasen masèh atèNa i. 5:13 Soh mo bai ndènè salam dengan silot i kuria Babilon, imo sienggo nipilih Dèbata, bagidi ma bak salam anakku si Markus sikukekkelengi i. 5:14 Mersisalamen mo kènè samah kènè dom ibagasen kelleng merkaka-kuanggi sebagè kalak Kristen. Dak iberrèken Dèbata mo bai ndènè damèNa sitermurmur i alè kènè sienggo gabè milik Kristus. Tabe nami, Petrus
1:1 Kènè alè dengan sienggo tuhu-tuhu percaya bagè kami! Jesus Kristus imo Dèbata janah Raja Sipaluahken kita. I ngo memmaingken ndorok kita percaya tabaSa, kerna dakdak ngo bennar iulaken barang kadè pè. Surat èn bai si Simon Petrus nai, sada kalak naposo bak rasul Jesus Kristus. 1:2 Dak ipasu-pasu Dèbata mo kènè janah iberrèken mo bai ndènè damèna mertinèncuk karna itandai kènè Dèbata bak Jesus Tuhanta i. 1:3 Idilo Dèbata ngo kita asa dekket kita mengakapi kuasaNa dekket mengakapken kinimendè basaNa. Merkitè kuasaNa sendiri dekket kemulihken enggo sibettoh tersèngèt dirina, imo Dèbata sienggo mendilo kita, iberrèken ngo banta karinana siperlu ibas nggelluhta èn, asa nggelluh kita tosè mi sinipergeddo atè Dèbata. 1:4 Merkitè bagidi ngo iberrèken Dèbata banta, pasu-pasuNa simaharga i sienggo niperbagah-bagahNa kin. Janah merkitè pasu-pasuNa simaharga i ndorok maluah kènè ipas cubellek-cubellek ndènè siso kasèa i nai imo nipergeddo dunia èn, asa gabè dos bakko ndènè dekket pertendiin. 1:5 Kerna naidi mertuhu-tuhu mo kènè ipas karina gegoh ndènè nai asa makin percaya kènè taba Kristus janah kepercayaen ndènè idengani perangè selloh. Laènken pengelako merandal, perlu ngo kènè gabè kalak mpantas, 1:6 janah laènken perbinettohen, kennah ndorok ma mo kènè mengerajai diri ndènè. Janah mbingit mo kènè. Mula enggo mbingit kènè menghaloken karinana, nai nggelluh mengèkutken nipergeddo Dèbata mo kènè. 1:7 Nggelluh mengèkutken nipergeddo atè Dèbata, kennah lot ngo bai ndènè ukur kelleng midah dengan samah Kristen. Jadi mula enggo ngkelleng atè ndènè midah dengan samah Kristen, gabè kennah kelleng mo atè ndènè midah karinana jelma. 1:8 Mula enggo lot sibagidi bai ndènè, oda ipaduè nèngè kènè mahangkè dekket oda merbuah, lako menandai Jesus Kristus Tuhanta i. 1:9 Tapi ukum oda lot sibagidi bai ndènè, gabè sada tanda-tanda ngo i oda lot kadè pemettoh ndènè, janah oda ndorok kalak sibagidi mengidah barang kadè, janah enggo lupa ia, dosana pè enggo kin ma ngo ipeppanting. 1:10 Kumarna naidi kènè kènè alè dengan, makin ngkasahna mo kènè lako pehotken pendiloon Dèbata sienggo soh bai ndènè dekket pemilihenna i bai ndènè, asa makin ntegguh kènè. 1:11 Merkitè bagidi gabè iberrèken mo bai ndènè kuasa asa dekket gabè sidasa ibas gemgemmen Tuhan Raja Sipaluahken kita idi, imo Jesus Kristus simemerèntah soh mi amman sumendah. 1:12 Kerna nai dak kupesèngèt ngo kènè tersèngèt i karina, tukasi pè enggo ibettoh kènè i janah enggo percaya kènè i sukuten bai Dèbata nai sienggo nijalo ndènè i. 1:13 Sidekkah nggelluh dèng aku, patutna ngo dak kupesèngètken i taba kènè. 1:14 Ai kubettoh ngo, oda pella sadikè dekkah nai, kutadingken mo dunia èn, ai enggo ntangkas ibagahken Tuhan Jesus Kristus i bangku. 1:15 Dak kukerencetken ngo, asa mula enggo kessa laus aku dak tong lot dalanna ièngèt kènè karinana idi. 1:16 Kubagahken kami bai ndènè bakunè kehejiin Tuhan Jesus Kristus tikan roh. Oda ngo i bagè cara sukut-sukuten bai jelma nai, tapi sienggo kuidah kami ngo. 1:17 Ai i sidi ngo kami tikala i tikan ijalo kessangapen simeheji i bai Dèbata Bapa i nai, ai terdengkoh ngo sora bagèen, "Èn ngo anakKu siKukekelengi i, lemmo ngo atèngKu midahsa!" 1:18 Kudengkoh kami sendiri ngo sora i roh i sorga nai tikan rebbak kami dekketsa i babo ndelleng simbadia i. 1:19 Merkitè bagidi makin tokna mo kami mi sukuten nabi-nabi tersèngèt Dèbata. Merandal kalohoon ngo mula iperatè-atèken kènè sukuten i, ai codi mi pellita merbendella ngo i, ipas sigellap mèma mbincar mataniari dekket mercuhaya kecihuren i bagasen pusuh peratèen ndènè. 1:20 Tapi perlebbè sièngèten ndènè, èn ngo: Tennah Dèbata sinipesoh nabi-nabi oda ndorok itafsirken mengèkutken pendapet sendiri. 1:21 Ai oda nung tennah bai Dèbata nai pellin merkitè lemmo atè jelma. Tapi sinidomen Tendi Perbadia ngo kalak lako pesakatken tennah bai Dèbata nai sendiri.
2:1 Tosè bagè arnia enggo roh guru-guru palsu mi tengah-tengah ummat Dèbata, bagi ma ngo bang mi tengah-tengah ndènè pè, kennah roh ngo guru-guru palsu. Iajarken kalak i ngo siso tuhu lako mencèdai jelma, janah ipersomada kalak i ngo Tuhan sienggo menebbussa; nai gabè iabinken kalak i ngo kemmagoon i ndor sangkem mi dirina. 2:2 Tukasi pè bagidi, mèduk ngo mengèkutken guru-guru palsu i sienggo nirajaan cubellek-cubellek dagingna siso kasèa i. Jadi kemulihken ulah-ulah kalak i bagidi, mèduk ngo kalak mengelèai Dalan Bennar, imo simerdemmu mi Dèbata. 2:3 Kumarnaken ukur merpengait guru-guru palsu i, gabè ioto-otoi ngo kènè merkitè sukut-sukuten siturah ibas ukurna nai sendiri, lako muat laba bai ndènè nai. Tapi enggo mo ipèmaken hukum bai kalak i, janah enggo mo tertentu kin kemagoon bai kalak i. 2:4 Malaèkat-malaèkat sienggo merdosa i pè oda ngo ikellini Dèbata ipas hukumen idi nai, idabuh ngo kalak i mi api narakka, mi bakkas gellap tuiten ngo kalak idi ikurung mèma dapet Ari Perhukumen simbellen i. 2:5 I jaman dunia sinderbi pè bagi ma ngo, oda ikellini Dèbata ipas hukum idi nai. Ai iperroh Dèbata ngo laè mbuncar mi dunia siniianen jelma siso uè percaya bai Dèbata tikala i. Pellin si Noak dekket si pitu kalak i nai ngo kessa ijamotken, kumarna dak ibagahken si Noak ngo berita kenggelluhen tosè mi sinipergeddo atè Dèbata. 2:6 Bagi ma ngo bang kuta Sodom bak Gomora; ihukum Dèbata ngo kuta i, ilettup merkitè api, asa lot mahan lumba-lumba taba kalak siso uè percaya bai Dèbata. 2:7 Tapi ipaluah ngo si Lot, kumarna iuèi si Lot Dèbata, tukasi pè dak isusahi kalak siso menguèi kata Dèbata ia. 2:8 Tersiksa ngo pengakap si Lot i tengah-tengah kalak sibagidi, ai dak gennep ari ngo idah janah idengkoh pengellako kalak i siso kasèa i. 2:9 Jadi ibettoh Tuhan i ngo bakune paluahken kalak simenguèi lemmo atèna mula tupung sempa bai kalak i pengojiin. Janah ibettoh Tuhan i ngo barang bakunè pedèmpuken kalak perjahat asa isiksa tupung Ari Perhukumen, 2:10 imo kalak simenguèi cubellek dagingna, mengulaken ulaan mellamun mi dirina janah simengelèai kuasa Dèbata. Ai tunggang janah tois ngo guru-guru palsu i, salang mengèlèai kalak simersangap ni sorga i pè oda ngo alang atèna. 2:11 Keppèken ukum malaèkat-malaèkat, tukasi pè ndaoh mergegohen janah merkuasaan dari pada kalak guru-guru palsu i, oda nung ilèai kalak simersangap ni sorga i, i hadeppen Tuhan i. 2:12 Tapi ukum guru-guru palsu i tosè bagè binatang ngo tubuh pellin lako itangkup bak ibunuh sambing ngo kalak i. Oda merpikir kalak i, ai pellin menguèi sura-sura ukurna sambing ngo kessa kalak i, mengelèai siso nibettohna, gabè mago mo kalak i bagè binatang penjerngem. 2:13 Ali pengelako kalak i jahat i, imo kinipersuk. Sennang ngo atè kalak i maing barang bakunè sambing tikan mahar lako peppuasken cubellek dagingna. Mula rebbak kundul kalak i dekket kènè i perpèstaan, dak iurat-urati mo kènè lako peburuk-burukken gerar ndènè asa merlèa, ai mabuk ngo enggo kalak i kumarna pengelakona luhlah i. 2:14 Oda merkeleja-lejaan kalak i mengulaken dosa, lommo ngo atè kalak i mengidah daberru luhlah. Janah kalak sikurang ntefuh kepercayanna dekket kurang tok ukurna, ikella-kella kalak i. Enggo kecemmalen bai kalak i merukur nahaka. Kalak sienggo kenna sempetta ngo kalak i. 2:15 Kumarna oda uè kalak i merdalan arap dalan mpenter, taling mo kalak i. Dalan si Bileam anak si Beor arnia ngo jekutken kalak i, ai dak sèkel ngo si Bileam menjalo upah arap dalan siso patut. 2:16 Tapi gabè mposi ngo pengajaren bana kumarnaken kejahatenna i, ai kalodè siso ndorok kin kirana bagè jelma, idi nola ngo pesèngètkensa, gabè ipaksa mo nabi i mentadi ipas perulanna gila i nai. 2:17 Codi bagè mata laè sienggo ngkerrah ngo guru-guru palsu i, janah bagè hembun si nisempul angin. Enggo ipèmaken Dèbata bai kalak i bekkas gellap tuiten. 2:18 Dak iranaken kalak i ngo rana nèam-nèam pènggel tapi oda mernidok, lako menghèla-hèla kalak sirembaru dèng mennadingken dalanna dekket jelma laling kumarna cubellek nipergeddo dagingna. 2:19 Dak iperbagah-bagah guru palsu i ngo kelluahen, tukasi pè hamba kemagoon i ngo kalak i, ai barang isè talu ibaing barang kadè pè i, hambana ngo ia. 2:20 Barang isè enggo pessidingken simerroha ni dunia èn kumarna enggo itandai Tuhan janah Raja Sipaluahken kita imo Jesus Kristus, keppè mula terjorat nola ia janah tersundalih, gabè mparahen nola ngo kalak sibagidi i puncana dari pada i mulana. 2:21 Lotiin kin ngo bai kalak i ulang sanga itandai dalan sènteng bai Dèbata nai, dari pada itadingken nola, keppè enggo kin sanga itandai. 2:22 Tuhu ngo bagè nidokken kata umpama èn tersèngèt kalak i, "Dak ipangan biang ngo utahna," dekket "Dak merkubang nola ngo babi sienggo iperridi."
2:1 Tosè bagè arnia enggo roh guru-guru palsu mi tengah-tengah ummat Dèbata, bagi ma ngo bang mi tengah-tengah ndènè pè, kennah roh ngo guru-guru palsu. Iajarken kalak i ngo siso tuhu lako mencèdai jelma, janah ipersomada kalak i ngo Tuhan sienggo menebbussa; nai gabè iabinken kalak i ngo kemmagoon i ndor sangkem mi dirina. 2:2 Tukasi pè bagidi, mèduk ngo mengèkutken guru-guru palsu i sienggo nirajaan cubellek-cubellek dagingna siso kasèa i. Jadi kemulihken ulah-ulah kalak i bagidi, mèduk ngo kalak mengelèai Dalan Bennar, imo simerdemmu mi Dèbata. 2:3 Kumarnaken ukur merpengait guru-guru palsu i, gabè ioto-otoi ngo kènè merkitè sukut-sukuten siturah ibas ukurna nai sendiri, lako muat laba bai ndènè nai. Tapi enggo mo ipèmaken hukum bai kalak i, janah enggo mo tertentu kin kemagoon bai kalak i. 2:4 Malaèkat-malaèkat sienggo merdosa i pè oda ngo ikellini Dèbata ipas hukumen idi nai, idabuh ngo kalak i mi api narakka, mi bakkas gellap tuiten ngo kalak idi ikurung mèma dapet Ari Perhukumen simbellen i. 2:5 I jaman dunia sinderbi pè bagi ma ngo, oda ikellini Dèbata ipas hukum idi nai. Ai iperroh Dèbata ngo laè mbuncar mi dunia siniianen jelma siso uè percaya bai Dèbata tikala i. Pellin si Noak dekket si pitu kalak i nai ngo kessa ijamotken, kumarna dak ibagahken si Noak ngo berita kenggelluhen tosè mi sinipergeddo atè Dèbata. 2:6 Bagi ma ngo bang kuta Sodom bak Gomora; ihukum Dèbata ngo kuta i, ilettup merkitè api, asa lot mahan lumba-lumba taba kalak siso uè percaya bai Dèbata. 2:7 Tapi ipaluah ngo si Lot, kumarna iuèi si Lot Dèbata, tukasi pè dak isusahi kalak siso menguèi kata Dèbata ia. 2:8 Tersiksa ngo pengakap si Lot i tengah-tengah kalak sibagidi, ai dak gennep ari ngo idah janah idengkoh pengellako kalak i siso kasèa i. 2:9 Jadi ibettoh Tuhan i ngo bakune paluahken kalak simenguèi lemmo atèna mula tupung sempa bai kalak i pengojiin. Janah ibettoh Tuhan i ngo barang bakunè pedèmpuken kalak perjahat asa isiksa tupung Ari Perhukumen, 2:10 imo kalak simenguèi cubellek dagingna, mengulaken ulaan mellamun mi dirina janah simengelèai kuasa Dèbata. Ai tunggang janah tois ngo guru-guru palsu i, salang mengèlèai kalak simersangap ni sorga i pè oda ngo alang atèna. 2:11 Keppèken ukum malaèkat-malaèkat, tukasi pè ndaoh mergegohen janah merkuasaan dari pada kalak guru-guru palsu i, oda nung ilèai kalak simersangap ni sorga i, i hadeppen Tuhan i. 2:12 Tapi ukum guru-guru palsu i tosè bagè binatang ngo tubuh pellin lako itangkup bak ibunuh sambing ngo kalak i. Oda merpikir kalak i, ai pellin menguèi sura-sura ukurna sambing ngo kessa kalak i, mengelèai siso nibettohna, gabè mago mo kalak i bagè binatang penjerngem. 2:13 Ali pengelako kalak i jahat i, imo kinipersuk. Sennang ngo atè kalak i maing barang bakunè sambing tikan mahar lako peppuasken cubellek dagingna. Mula rebbak kundul kalak i dekket kènè i perpèstaan, dak iurat-urati mo kènè lako peburuk-burukken gerar ndènè asa merlèa, ai mabuk ngo enggo kalak i kumarna pengelakona luhlah i. 2:14 Oda merkeleja-lejaan kalak i mengulaken dosa, lommo ngo atè kalak i mengidah daberru luhlah. Janah kalak sikurang ntefuh kepercayanna dekket kurang tok ukurna, ikella-kella kalak i. Enggo kecemmalen bai kalak i merukur nahaka. Kalak sienggo kenna sempetta ngo kalak i. 2:15 Kumarna oda uè kalak i merdalan arap dalan mpenter, taling mo kalak i. Dalan si Bileam anak si Beor arnia ngo jekutken kalak i, ai dak sèkel ngo si Bileam menjalo upah arap dalan siso patut. 2:16 Tapi gabè mposi ngo pengajaren bana kumarnaken kejahatenna i, ai kalodè siso ndorok kin kirana bagè jelma, idi nola ngo pesèngètkensa, gabè ipaksa mo nabi i mentadi ipas perulanna gila i nai. 2:17 Codi bagè mata laè sienggo ngkerrah ngo guru-guru palsu i, janah bagè hembun si nisempul angin. Enggo ipèmaken Dèbata bai kalak i bekkas gellap tuiten. 2:18 Dak iranaken kalak i ngo rana nèam-nèam pènggel tapi oda mernidok, lako menghèla-hèla kalak sirembaru dèng mennadingken dalanna dekket jelma laling kumarna cubellek nipergeddo dagingna. 2:19 Dak iperbagah-bagah guru palsu i ngo kelluahen, tukasi pè hamba kemagoon i ngo kalak i, ai barang isè talu ibaing barang kadè pè i, hambana ngo ia. 2:20 Barang isè enggo pessidingken simerroha ni dunia èn kumarna enggo itandai Tuhan janah Raja Sipaluahken kita imo Jesus Kristus, keppè mula terjorat nola ia janah tersundalih, gabè mparahen nola ngo kalak sibagidi i puncana dari pada i mulana. 2:21 Lotiin kin ngo bai kalak i ulang sanga itandai dalan sènteng bai Dèbata nai, dari pada itadingken nola, keppè enggo kin sanga itandai. 2:22 Tuhu ngo bagè nidokken kata umpama èn tersèngèt kalak i, "Dak ipangan biang ngo utahna," dekket "Dak merkubang nola ngo babi sienggo iperridi."
1:1 Isi surat èn imo terrèngèt Kata simemerèken kenggelluhen, imo Kata sienggo lot i mulana i. Enggo kudengkoh kami janah iidah mata nami sendiri. Enggo kutatap kami bak ijamah tangan nami. 1:2 Tikan ipetarar kenggelluhen i kuidah kami ngo. Kernana i ngo asa kusaksiken kami terrèngèt misi. Kusukutken kami taba kènè imo terrèngèt kenggelluhen situhunna janah siamman sumendah, sienggo lot kin rebbak dekket Bapa i, janah sienggo ipetarar taba kami. 1:3 Sikuidah janah sikudengkoh kami, i ngo kubagahken kami taba kènè, asa mersaor kènè dekket kami. Ai persaoren dekket Bapa i ngo persaoren nami bang dekket AnakNa Jesus Kristus. 1:4 Kusuratken kami èn taba kènè, asa dom ngo sampang atènta. 1:5 Ukum sukuten sikudengkoh kami bai Anak Dèbata nai, janah nisukutken taba kènè; imo: Kecihuren ngo Dèbata janah oda lot sigellap ibagasenSa. 1:6 Mula sidokken enggo mersaor kita dekket Dèbata, keppèken siulaken kegellapen, perluap ngo kita janah oda siulaken kebennaren. 1:7 Tapi mula sikenggelluhken kecihuren i, bagè Dèbata sinibagasen kecihuren i, saor mo kita samah kita, janah ipepanting daroh Jesus Anak Dèbata i mo kita ipas dosa nai. 1:8 Mula sidokken oda merdosa kita, menipu dirinta sendiri ngo kita janah oda lot kebennaren ibagasen kita. 1:9 Tapi mula siakku dosanta bai Dèbata, kettoken ngo Ia janah adil, gabè isasa ngo dosanta ninganNa ipepanting kita ipas karina kegèduken nai. 1:10 Tapi mula sidokken, oda merdosa kita, gabè perluap ngo sibaing Dèbata, janah oda lot ibagasen kita kataNa i.
2:1 Kènè alè pa! Asa kusuratken pè èn karina bai ndènè, asa ulang mengulaken dosa nèngè ngo kènè. Tapi tah lot barang isè merdosa, lot ngo pengondinta imo Jesus Kristus simengondiken kita bai Bapa i, ai pertèger ngo Ia. 2:2 Merkitè Jesus Kristus i ngo isasa dosanta janah oda ngo pellin dosanta isasa, dekket ngo dosa karina jelma ummatna ni dunia èn. 2:3 Èn ngo tandana, mula siuèi Dèbata sienggo menandai Dèbata ngo kita. 2:4 Barang isè mendokken, "Kutandai ngo Dèbata," tapi oda iuèi katana, perluap ngo ia, janah oda lot merian Dèbata iabagasen ukurna. 2:5 Tapi kalak simenguèi kata Dèbata, ikekelengi ngo Dèbata. Imo tandana nggelluh ibagasen Dèbata ia enggo. 2:6 Barang isè mendokken enggo nggelluh ibagasen Dèbata ia, kennah bagè pergelluh Jesus Kristus ngo pernggelluhna. 2:7 Kènè alè dengan sinikekellengen! Oda ngo hatoren rembaru sikusuratken èn taba kènè, tapi hatoren sienggo lot kin ngo, sienggo ipessoh bai ndènè i mulana i nai; imo sukuten sienggo ijalo kènè bai Dèbata nai. 2:8 Tukasi pè bagidi, hatoren rembaru ngo sikusuratken èn taba kènè; ai enggo ntangkas hatoren idi ibagasen Jesus Kristus dekket ibagasen diri ndènè; ai enggo mersep sigellap i, janah enggo mbincar kecihuren i. 2:9 Barang isè mendokken ibagasen sinterrang ia nina, tapi mula ikosomi ngo denganna, merlapaten ngo idi, ibagasen kegellapen i dèng ngo ia soh bagèndari. 2:10 Barang isè mengkekelengi denganna sibagidi i ngo nggelluh ibagasen kecihuren, janah oda lot ibagasensa akkal-akkal memmamng gabè merdosa denganna sidèban. 2:11 Tapi simengkosomi denganna, i bagasen sigellap ngo kalak sibagidi. Nggelluh ibagasen sigellap, oda ngo ibettoh barang dempak dikè tumburenna, ai enggo gellap penengenna. 2:12 Kutenges surat mendahi kènè dukak-dukak, kerna enggo iampuni Kristus dosa ndènè. 2:13 Kutenges surat mendahi kènè partua ibalè, kerna itandai kènè ngo kata sienggo lot i mulana i nai. Kutenges surat mendahi kènè simatah daging, kerna enggo italuken kènè Sibolis. 2:14 Kutenges surat mendahi kènè Anak-anak, kerna enggo itandai kènè Dèbata Bapa. Kutenges surat bai ndènè Partua-partua, kumarna enggo itandai kènè Kata i sienggo lot i mulana i nai. Kutenges surat mendahi kènè simatah daging, kumarna mergegoh kènè. Dak ibagasen pusuh peratèen ndènè ngo kata Dèbata, janah enggo italuken kènè Sibolis. 2:15 Ulang mo kekelengi kènè dunia èn barang pè pengisina. Ai mula ikekelengi kènè dunia èn oda ngo ikekelengi kènè nè Dèbata Bapa. 2:16 Barang kadè si ni dunia èn -- nipergeddo jelma perdosa imo simengabin perukuren jelma asa gabè sèkel ia -- janah nisèkelkenna memmaing ia gabè gegah, oda ngo bai Dèbata nai rohna sibagidi, tapi i dunia èn nai ngo. 2:17 Lako salpun ngo karina dunia èn dekket nipergeddo jelma pè, tapi ukum kalak simengulaken lemmo atè Dèbata, nggelluh ngo ia soh mi amman sumendah. 2:18 Kènè alè pa! Enggo ndessing ari perpodi. Janah bagè sienggo idengkoh kènè, roh nèngè mo anti Kristus, janah bagèndari pè enggo mèduk roh musuh Kristus. Kerna naidi ngo makin tokna kita, enggo ndessing ari kiamat. 2:19 Ukum musuh Kristus idi, imo kalak sienggo mennadingken kita, ai oda ngo denganta kalak i. Ukum denganta kin ngo kalak idi, tentu dak rebbak ngo kita. Tapi karuar ngo kalak i banta nai asa kennataan, tuhu-tuhu ngo oda denganta kalak i. 2:20 Ukum kènè enggo mo idomi Tendi Perbadia si niberrèken Jesus Kristus. Kumarna idi ngo asa itandai kènè sukuten situhunna bai Dèbata nai. 2:21 Jadi kutengesken surat ènda mendahi kènè, oda kerna mak dèng itandai kènè sukuten situhunna bai Dèbata idi nai, tapi kumarna enggo itandai kènè i ngo janah ibettoh kènè ngo, ukum Dèbata idi oda pennah merluap. 2:22 Kalak simerluap imo simendokken, oda nina Raja Sipaluah ukum Jesus i si niperbagah-bagah Dèbata. Kalak sibagidi mo Musuh Kristus; oda ngo iakkui kalak idi Bapa i barang pè Anak i. 2:23 Ai barang isè oda tok taba Anak i, oda ma ngo tok ia bai Bapa i, janah simengketoki Anak i, ikettoki ma mo bak Dèbata. 2:24 Kerna naidi, jamoti kènè mo sukuten sienggo idengkoh kènè i mulana i nam ibagasen pusuh peratèen ndènè. Mula ijamoti kènè ngo i mendè, nggelluh ibagasen Bapa i mo kènè rebbak dekket Anak i. 2:25 Èn ngo niperbagah Kristus banta, imo kenggelluhen situhunna janah soh mi amman sumendah. 2:26 Idi mo sikusukutken taba kènè, tersèngèt kalak sinaing mengelalingken kènè. 2:27 Tapi ukum tersèngèt kènè sendiri, enggo ngo iarirken Kristus TendiNa bai ndènè. Janah sidekkah merian TendiNa ibagasen kènè, oda pella nèngè ajaren kènè. Ai iajari Tendi i ngo kènè tersèngèt karinana janah sènteng ngo nipeddahkenNa i, oda luap. Kerna naidi, uèi kènè mo nipeddahken Tendi i, janah tettap mo kènè ibagasen Kristus. 2:28 Bagèndari pè alè pa, dak nggelluh ibagasen Kristus mo kènè, asa roh kessa Ia luas, gabè tok mo kita janah pang menghadepSa, oda pella ciboni kerna mèla. 2:29 Ai ibettoh kènè ngo ukum Kristus nggelluh ibagasen hendak Dèbata ngo. Jadi bettoh kènè mo, barang isè nggelluh mengèkutken nipergeddo Dèbata, kalak sibagidi ngo dukak Dèbata.
3:1 Tengen kènè mo belgahna masèh atè Dèbata niberrèkenNa banta, ai idokken ngo kita dukak-dukak Dèbata; janah tuhu ngo i, ai dukak-dukak Dèbata ngo kita. Kerna i ngo asa oda itandai dunia èn kita, kumarna oda itandai dunia èn Dèbata. 3:2 Kènè karina nikekellengen! Dukak Dèbata ngo kita bagèndari, tapi bakunè kita luas, makdèng ipetarar i ukum bagèndari. Tapi sibettoh ngo, mula enggo roh Kristus, gabè tosè bagè Ia mo kita, ai ntarar mo Ia siidah. 3:3 Karina simengharapken bagidi bai Kristus, tuhu-tuhu mo ijaga dirina asa tettap mpanting ipas dosana nai bagè Kristus siso merdosa i. 3:4 Barang isè merdosa, i ngo simengelausi perèntah Dèbata, ai pengellausiin mi perèntah Dèbata i ngo dosa. 3:5 Ibettoh kènè ngo, roh Kristus i lako mennasa dosa jelma ngo janah ukum Ia oda ngo nung merdosa. 3:6 Karina kalak singgelluh ibagasen Kristus, oda ngo pukpuk mengulaken dosa. Ai kalak simengulaken dosa, oda nung mengidah Kristus, janah oda nung dèng idah. 3:7 Kènè alè pa! Ulang uè kènè ilalingken dèba. Ai barang isè mengulaken lemmo atè Dèbata, kalak sibagidi ngo Anak Dèbata, bagè Kristus roh bai Dèbata nai. 3:8 Tapi barang isè dakdak mengulaken dosa, dukak Sibolis ngo kalak sibagidi, ai dak mengulaken dosa ngo Sibolis i mulana nai. Jadi roh Anak Dèbata mi dunia èn, lako petumpatken ulaan sibolis ngo. 3:9 Kalak sienggo gabè anak Dèbata, oda nèngè pukpuk dak mengulaken dosa, kerna lot ngo bana bakko Dèbata. Jadi kumarna Dèbata ngo Bapana, oda uè ia dak mengulaken dosa. 3:10 Èn mo laènna dukak-dukak Dèbata bak dukak-dukak Sibolis; barang isè oda menegulaken lemmo atè Dèbata barang oda mengkekelengi denganna, kalak sibagidi mo oda dukak Dèbata. 3:11 Èn ngo sukuten sienggo idengkoh kènè i mulana nai, kennah mersikekelengen ngo kita dekket dengan. 3:12 Ulang mo kita bagè si Kain, sienggo gabè dukak Sibolis, ai ibunuh ngo anggina sendiri. Kadè sebabna asa ibunuh si Kain anggina sendiri? Kumarna salah ngo karina pengellakona, tapi ukum pengellako anggina selloh ngo. 3:13 Kerna naidi alè dengan, ulang pella lengang kènè mula ikecegoken dunia èn kènè. 3:14 Ai sibettoh ngo sienggo suberrang kita i kemmatèen i nai mi kenggelluhen situhunna. Sibettoh ngo i kumarna mersikekelengen ngo kita dekket dengan. Barang isè oda merukur kelleng, merlapaten ngo i tettap dèng ia ipas kemmatèen. 3:15 Pemmunuh ngo barang isè merceggo atè taba denganna, janah kalak pemmunuh, oda terolih kenggelluhen siemman sumendah. 3:16 Merkitè dalan bagèen ngo sibettoh cara mengkekelengi denganta; iberrèken Kristus ngo diriNa dekket kessahNa mengkepkep kita, jadi kita pè patut ngo merrèken kessahta mengkepkep denganta. 3:17 Barang isè kelloten i dunia èn, nai idah mo denganna mpersah bana kurangen, keppèken oda mermasèh atè ia taba denganna simpersah i, bakunè mo ia nina mengkekelengi Dèbata? 3:18 Kènè alè pa! Ulang mo pellin rananta dekket dilahta mendokken mersikekelengen, tapi naing mo dekket pemmahan. 3:19 Èn mo tandana kita roh bai Dèbata nai, gabè berrani janah tennang kita i hadeppen Dèbata. 3:20 Tapi mula lot siakap kita mersalah ibas pusuh perratènta, janah sibettoh ntarar ngo i i hadeppen Dèbata, ai belgahen ngo Dèbata ibettoh ngo karinana. 3:21 Jadi alè dengan sinikekellengen, mula ibas pusuh peratènta oda lot kita memmaing salah, tok mo kita janah berrani i hadeppen Dèbata. 3:22 Barang kadè sipido bana nai sijalo ngo i, kumarna siuèi kataNa janah siulaken nipergeddoNa. 3:23 Ukum nipergeddoNa imo: Kennah percaya kita bai AnakNa Jesus Kristus; janah kennah mersikekelengen kita dekket dengan, bagè sienggo idokken Kristus banta. 3:24 Karina kalak simenguèi kata Dèbata nggelluh ngo ia rebbak Dèbata janah Dèbata ibagasensa. Sibettoh ngo ibagasen kita Dèbata kerna ipettok Tendi Perbadia sienggo niberrèken Dèbata banta.
4:1 Kènè alè dengan si nikekellengen! Ulang tok kènè taba karina kalak simendokken dom Tendi Perbadia ia, tapi unjuni kènè mo lebbè ia tah tuhu bai Dèbata nai Tendi silot bana i barang tah oda. Ai enggo mèduk nabi palsu merrohen bagèndari èn. 4:2 Èn mo tandana: barang isè kalak mengaku, Jesus Kristus Roh mi dunia èn tosè bagè jelma, kalak sibagidi ngo idomi Tendi siroh bai Dèbata nai. 4:3 Tapi kalak siso mengaku bagi tersèngèt Jesus, oda ngo idomi Tendi siroh bai Dèbata nai ia, tapi idomi tendi anti Kristus ngo ia. Ukum tersèngèt Tendi i enggo ibagahken bai ndènè, kennah roh ngo ia, janah enggo mo i dunia èn bagèndari. 4:4 Tapi kènè alè pa, Dèbata ngo sidasa kènè. Enggo mo italuken kènè nabi-nabi palsu i, ai merkuasaan ngo Tendi silot bai ndènè dari pada tendi siroh i dunia jahat èn nai. 4:5 Iranaken nabi palsu i ngo tersèngèt dunia janah idengkohken dunia èn ngo kalak i, kumarna i dunia èn nai ngo kalak i. 4:6 Tapi ukum kita dukak-dukak Dèbata ngo; jadi barang isè menandai Dèbata, idengkohken ngo kita. Tapi siso dukak Dèbata, oda ngo idengkohken katanta. Merkitè bagidi sibettoh mo laènna Tendi simengkeruduk jelma lako menandai Dèbata bak tendi simengelalingken. 4:7 Kènè alè dengan si nikekellengen! Mersikekelengen mo kita, ai bai Dèbata nai ngo kelleng i. Barang isè kalak merukur kelleng, dukak Dèbata ngo ia janah itandai ngo Dèbata. 4:8 Kalak siso perkelleng oda ngo itandai kalak sibagidi Dèbata; kerna kelleng ngo Dèbata. 4:9 Ipetarar Dèbata ngo kellengNa i banta merkitè ipasulak AnakNa roh mi dunia èn, asa merkitè AnakNa i gabè nggelluh kita. 4:10 Èn ngo kelleng i: Oda ngo kita lebbèen mengkekelengi Dèbata, tapi Dèbata ngo mengkekelengi kita janah pasulakken AnakNa mi dunia èn, asa merkitè Anakna i gabè terolih kesasaan dosa kita. 4:11 Kènè alè dengan si nikekellengen, mula bagi mo keppè kelleng atè Dèbata banta, otang kita pè patut ngo mersikekelengen dekket denganta sidèban, 4:12 ai isè poda nung mengidah Dèbata, tapi ibagasen Dèbata ngo kita janah dom masèh atèNa ngo kita mula mersikekelengen kita samah kita. 4:13 Kumarna enggo iberrèken Dèbata banta TendiNa sibettoh mo enggo nggelluh ibagasen Dèbata i kita janah kita pè ibagasen Dèbata. 4:14 Ukum kami enggo mo kuidah kami Anak Dèbata, janah kubagahken kami ngo i bai jelma, ai ipasulak Dèbata ia lako gabè Raja Sipaluahken dunia èn. 4:15 Barang isè mengaku Anak Dèbata ngo Jesus i, gabè sada mo ia dekket Dèbata janah nggelluh ibagasen Dèbata mo ia. 4:16 Sibettoh janah sikettoki ngo kelleng atè Dèbata banta. Kelleng ngo Dèbata. Barang isè nggelluhna idomi kelleng, kalak sibagidi ngo nggelluh rebbak Dèbata, janah Dèbata rebbak dekketsa. 4:17 Nai gabè ipesuntuk mo kelleng atè i banta, asa gabè pang janah mersampang atè kita menghadep Dèbata tikan ari perhukumen i, ai tosè bagè Kristus ngo nggelluhta tukasi pè i dunia èn dèng kita. 4:18 Barang isè kalak mengerasaken kelleng Dèbata, oda mbiar kalak sibagidi; kerna talu ngo ukur mbiar idi ibakin kelleng situhunna. Asa barang isè kalak mbiar oda perkelleng kalak sibagidi. Ai roh mo ukur mbiar kerna Hukum. 4:19 Gabè perkelleng atè mo kita kumarna enggo lebbèen Dèbata mengkekelengi kita. 4:20 Mula lot kalak mendokken, "Kukekelengi ngo Dèbata," keppèken ikosomi denganna, perluap ngo jelma sibagidi. Mula dengan siniidah oda nikekellengen, tuhu kin mo ia mengkekelengi Dèbata siso nung idah. 4:21 Jadi èn mo perèntah si sijalo bai Kristus nai: Barang isè mengkekelengi Dèbata, kennah kelleng ngo atèna midah denganna.
5:1 Barang isè percaya, Jesus i ngo Raja Sipaluah niperbagah-bagah Dèbata, kalak sibagidi ngo dukak-dukak Dèbata. Janah barang isè kelleng atèna midah Bapa i, kelleng ma ngo atèna midah anak i. 5:2 Sibettoh ngo mula sikekelengi dukak-dukak Dèbata, mengkekelengi Dèbata ngo kita janah siuèi kataNa. 5:3 Ketteridahen mengkekelengi Dèbata imo kennah siuèi kataNa. Oda pella mberrat mengulaken kataNa sinidokenNa banta i, 5:4 ai barang isè dukak Dèbata kennah tertalukensa ngo dunia jahat èn. Janah tertaluken kita ngo dunia èn merkitè kepercayanta. 5:5 Isè ngo ndorok mennaluken kejahaten dunia èn? Pellin kalak sipercaya bai Jesus Anak Dèbata ngo kessa. 5:6 Jesus Kristus i ngo sienggo roh mi dunia èn merkitè-kitè laè perridiin i dekket merkitè daroh kemmatèenNa i. Roh ia oda ngo merkitè laè sambing, tapi merkitè laè dekket daroh ngo. Tendi Perbadia i ngo mengkesaksiken i janah tuhu ngo i, ai oda pennah luap Tendi i. 5:7 Jadi lot ngo tellu saksi: 5:8 Imo Tendi Perbadia, laè dekket daroh -- janah dos ngo pengindangken sitellu i. 5:9 Tok ngo kita mi si niindangken jelma, tapi percayaen ngo kita mi si niindangken Dèbata. Idi mo kesaksiin nibaingken Bapa i tersèngèt AnakNa i. 5:10 Kerna naidi, barang isè percaya bai Anak Dèbata, enggo ikesaksiken èn ibagasen pusuh perratènna; tapi barang isè oda percaya bai Dèbata, dosken gabè memmaing perluap ngo Dèbata idi ibaing, kemmulihken oda percaya idi ia mi sienggo ipettarar Dèbata imo AnakNa i. 5:11 Èn ngo kesaksiin i: enggo iberrèken Dèbata banta nggelluh situhunna soh mi sidekkahna, janah AnakNa i ngo benna kenggelluhen situhunna i. 5:12 Barang milik isè Anak idi, milikna ma ngo kenggelluhen situhunna i; janah barang isè oda milikna Anak idi; oda ma ngo milikna kenggelluhen i. 5:13 Kusuratken idi bai ndènè sienggo percaya bai Anak Dèbata, asa ibettoh kènè ngo, enggo bai ndènè kenggelluhen siamman sumendah i. 5:14 Pang janah sampang atènta mi hadeppen Dèbata, kumarna idengkohken ngo karina pengidonta merguru mi lemmo atèNa. 5:15 Jadi kerna sibettoh ngo i uèi ngo pengidonta, tahu ma mo kita jalonta ma mo barang kadè sipido baNa nai. 5:16 Mula lot idah kènè dengan Kristen mengulaken dosa, siso pella merembah mi kemmatèen, mersodip mo kènè taba Dèbata, nai iberrèken Dèbata mo bana kenggelluhen i. Lot ngo dosa merembahken mi kemmatèen, janah ukum dosa tersèngèt mi kemmatèen i, oda ngo kudokken asa isodipken kènè bai Dèbata. 5:17 Karinana pengellako salah, dosa ngo i, tapi lot ngo dosa siso pella merembah mi kemmatèen. 5:18 Sibettoh ngo karina jelma sienggo gabè dukak Dèbata, oda nèngè ngo dakdak iuèi mengulaken dosa, kerna ikellini Anak Dèbata ngo ia, janah oda terkekadè Sibolis i ia. 5:19 Sibettoh ngo bai Dèbata nai ngo rohta, tukasi pè suberri dunia èn ikuasai Sibolis. 5:20 Sibettoh ma ngo enggo roh Anak Dèbata mi dunia èn janah iberrèken ngo banta perbinettohen, asa sitandai Dèbata perbennar i. Ibagasen Dèbata perbennar i ngo kita, janah nggelluh merkitè AnakNa Jesus Kristus. Ia ngo Dèbata perbennar janah Ia ma ngo kenggelluhen siamman sumendah. 5:21 Kènè alè pa, peddaoh kènè mo diri ndènè bai bègu bak sembahen idi nai.
1:1 Bangku nai ngo surat èn, pengendeng kuria, mendahi inang sienggo ipilih Dèbata, bak mendahi dukak-dukakna sikukekkellengi tuhu-tuhu. Oda ngo pellin aku sambing, dekket ngo taba karina simenandai sukuten sènteng bai Dèbata nai simengkekelengi kènè, 1:2 ai enggo merian ibagasensa berita sènteng tarap Dèbata i nai janah dak ngo rebbak dekket kita soh mi amman sumendah. 1:3 Dak iberrèken Dèbata mo banta pasu-pasuNa, masèh atèNa dekket damèNa bang Jesus Kristus Anak Bapanta i, ibagasen kesèntengen dekket kelleng. 1:4 Sampang kalohoon ngo atèngku, kerna kudengkoh lot ngo dukak-dukakmu alè nangè mengkenggelluhken kata sènteng bai Dèbata nai, bagè sienggo idokken Bapa i banta. 1:5 Kerna naidi alè nangè, memmes ngo kupido bamu asa karinana kita dak mersikekelengen samah kita bang taba dengan pè. Oda ngo kata rembaru sikudokken èn, ai i mulana i nai ngo enggo sijalo i kessa nai percaya kita. 1:6 Mersikekkellengen, merlapaten ngo i, siuèi pati-patiin Dèbata. Janah pati-patiin sinidengkoh ndènè i mulana i nai imo asa mersikekelengen dekket dengan. 1:7 Enggo mèduk kalak sipengoto-ngotoi mersèrak mi suberri dunia èn, imo kalak siso mempertuhuken Jesus Kristus roh mi dunia èn merrupaken rupa jelma. Kalak sibagidi, perluap ngo i janah Musuh Kristus. 1:8 Kerna naidi mermanat mo kènè, asa ulang bennè nola bai ndènè nai sienggo kuberrèken kami bai ndènè i. Kerencetken kènè mo asa karina kènè menjalo upah mertinèncuk bai Dèbata nai. 1:9 Kalak siso merian ibagasen peddah Kristus, tapi menurimpang nola ngo i sidi nai, oda ngo rebbak Dèbata kalak sibagidi. Tapi kalak simerian ibagasen peddah Kristus, merlapaten ngo i rebbak Bapa bak Anakna i ngo ia. 1:10 Kerna naidi, mula lot kalak roh mendahi kènè, janah mengajarken peddah simeralo mi peddah Kristus, ulang jalo kènè kalak i mi bages ndènè; ulang pella dokken kènè 'njuah-njuah' taba kalak i. 1:11 Ai barang isè mendokken njuah-njuah taba kalak i, dosken dekket ngo enggo ia bagè kalak i mengulaken perulaan jahat i. 1:12 Matcam dèng ngo nemmu bagèna sinaing dokkenkenku taba kènè, tapi kurang ngo sellohna mula merkitè surat. Dok atèngku roh ngo aku mendahi kènè janah mengerana tompel dekket kènè, asa dom sampang atènta. 1:13 Menenges salam ngo bamu dukak ni denganmu siterpilih i.
1:1 Alè Gayus sinikekkellengen! Aku pengendeng kuria, simengkekelengi kono tuhu-tuhu, 1:2 kusodipken ngo asa selloh karinana meradepken kono, janah njuah-njuah ma bagè sikubettoh dak selloh ngo bak tendimu. 1:3 Sampang kalohoon ngo atèngku tikan roh dengan magahken bangku bakunè burjumu mengkenggelluhken berita sènteng bai Dèbata nai. 1:4 Oda lot mengelebbihi sampang atèngku dari pada mula kudengkoh dukak-dukakku mengkenggelluhken sukuten sènteng bai Dèbata nai. 1:5 Merandal ngo nibaingmu i nggia taba dengan-dengan samah Kristen, bagi ma pè dekket taba simadèng itandai kono pè enggo itamuèi ko. 1:6 Enggo ibagahken kalak i karina idi i kuria si nisèn tersèngèt ngkellengmu i. Ulaken mo dakdak mengurupi kalak idi asa ndorok kalak i mennerusken perdalanenna. Janah ulaken mo i merdemmu mi lemmo atè Dèbata. 1:7 Ai berkat pè kalak i kemulihken mengulaken ulaan Kristus oda ngo lot pengurupiin bai kalak i ukum bai kalak siso menandai Dèbata nai. 1:8 Kumarna i kennah kita samah-samah Kristen ngo mersiurupen, asa merkitè bagidi enggo dekket kita mennukutken berita sènteng bai Dèbata nai. 1:9 Enggo kutengesken suratku mendahi kuria i kunu pè joppok, tapi oda iuèi si Diotrepes, kerna dak naing igegohi ngo nola katèna asa ia nola pengendeng kuria. 1:10 Roh kessa aku sikali èn, kutersèngèti mo ulah-ulahna i, imo kejahatenna dekket luapna lako mengelèai kami! Oda pellin i kessa tupèh, ai tikan roh dengan samah Kristen, oda uè ia menjalo janah dekket ngo kalak siuè menjalo pè gabè igerra, janah ipellaus ngo dengan idi i kuria i nai. 1:11 Ulang mo èkutken simeroha i nggia, tapi simerandalna i mo codi. Bai Dèbata nai ngo rohna karina kalak simaingken selloh, janah barang isè kalak oda memmaing selloh, oda dèng itandai ia Dèbata. 1:12 Karina ngo kalak memmoji si Demetrius, janah Dèbata pè memmojisa ngo. Kami pè kupoji kami ngo ia kerna selloh ngo pengindangkenna i, janah ibettoh kono ngo, bennar ngo pengindangken nami i. 1:13 Matcam dèng ngo nemmu bagèna sinaing dokkenkenku bamu nggia, tapi kupikiri oda selloh mula arap surat kubaing. 1:14 Kuharap ngo oda pella ndekkah nèngè roh ngo aku asa pejumpa kita janah asa hadep kita mengeranai. 1:15 Dak damè mo bamu! Menenges salam ngo bamu dengan silot i bekkasku, janah pessoh ma salamku taba karina dengan mersada-sada.
1:1 Kènè karina dengan sienggo nipilih Dèbata janah sinikekkellengen Dèbata Bapa i tuhu-tuhu, si nijamotken Jesus Kristus. Aku -- si Judas -- anggi si Jakobus janah naposo Jesus Kristus, mengharapken: 1:2 Dak ipasu-pasu Dèbata mo kènè janah iberrèken mo masèh atèNa dekket damèNa bai ndènè mertinèncuk. 1:3 Kènè dengan sinikekkellengen! Sèkel kalohoon ngo atèngku mennengesken surat bai ndènè tersèngèt kelluahen sienggo sijalo. Tapi bagèndari perlu kaloon kuakap memeddahi kènè merkitè surat èn ai dak tong kènè merjuhap lako petettahken kepercayaen sienggo iberrèken Dèbata taba ummatNa. 1:4 Kerna lot ngo kalak siso percaya bai Dèbata enggo mendirip-ndirip roh mi tengah-tengahta arap siso sibettoh. Gabè ipebalik kalak i ngo masèh atè Dèbata asa merkitè bagidi ndorok ibaing kalak i lemmo atèna siso mendè i. Oda uè kalak i mengakui Jesus Kristus, perkuasa janah pellin sadaSa ngo kessa Tuhanta. I sinderbi nai ngo enggo kin ibagahken ibas Bibèl bakunè hukumen taba kalak i. 1:5 Enggo ngo ibettoh kènè karinana i. Tapi tukasi pè bagidi, perlu ngo dok atèngku kusèngètken bai ndènè bakunè cara Tuhan i lako paluahken kalak Israel i Mesir nai, janah ipetumpat ngo kalak siso percaya idi i tengah-tengah kalak idi nai. 1:6 Èngèt kènè ma mo malaèkat-malaèkat siso menghargai ulanna i, gabè laus mennadingken bekkas kalak i. Irantè Dèbata ngo kalak i merkitè rantè siso uè ncèda soh mi amman sumendah ipas bekkas sigellap tuiten i terruh tanoh. Isidi mo kalaki i tahan soh mi tikki idabuh hukum taba kalak i, ipas Ari Simahantu i. 1:7 Èngèt kènè ma mo kuta Sodom dekket Gomora bak kuta silot i sikulilingna i; ai karina ngo jelma pengisina i merpengelako tosè bagè malaèkat siso kasèa i. Ai luhlah ngo kalak i janah mengalo-ngalo, nai gabè isiksa mo kalak i merkitè api siso uè mentep, asa lot mahan lumba-lumba bai karina jelma. 1:8 Suang bagi ma ngo kalak i simerangan-angan soh mi memmaing dosa kalak i mi dirina sendiri, janah pis matana midah kuasa Dèbata janah ilèai kalak i ngo simbadia i sorga i. 1:9 Salang si Mikhael oda nung ibaing bagè pengelako kalak idi i, tukasi pè ia huntuun malaèkat-malaèkat i karina. Tikan merselisih kalak i dekket Sibolis tersèngèt bangkè si Musa, oda nung si Mikhael menghukum Sibolis i merkitè kata mengelèai. Pellin èn ngo kessa idokken si Mikhael, "Ipincang Tuhan i mo kono!" 1:10 Tapi ukum kalak i, irèhèi ngo siso nibettohna janah ialo. Tosè bagè binatang siso merukur ngo kalak i, ai pellin menguèi bakkona ngo kessa kalak i. Jadi kumarna i nola ngo maingken mago kalak i. 1:11 Merjaya mo kalak i! Ai dalan si Kain ngo ièkutken kalak i. Terèkut-èkut ngo kalak i bagè si Bileam lako muat-muat riar. Ipetumpat ngo kalak i bagè si Korah kumarna mengalo-ngalo. 1:12 Mula rebbak mangan kènè dekket kalak i, gabè kememmalu nola ngo kalak i bai ndènè. Mokkus ngo kalak i janah oda ibettoh mèla, janah pellin dirina ngo kessa isarihken. Asa bagè hembun si nisempul angin ngo kalak i, sienggo mberkat dekket uratna, gabè matè mo enggo. 1:13 Tosè bagè galombang laut merkupkup ngo kalak i, oda ibettoh mèla kumarna ulah-ulahna. Dak bagè binatang kadap ngo kalak i janah enggo ipèmaken Dèbata bekkasna sigellap tuiten janah merippot-ippot soh mi amman sumendah. 1:14 Enggo kin ngo pennah ialamatken si Henokh pemparen si Adam si pepitu cundutken i, ukum pengellako kalak èn ai nina ngo, "Tengen mo, roh ngo Tuhan i rebbak dekket malaèkatNa simbadia meribu-ribu, 1:15 lako menghukumi karina jelma. Ihukum Tuhan i ngo kalak simengalo bak kalak siso percaya bana. Ihukum ma ngo kalak simengeruapken kata-kata mengelèaisa!" 1:16 Dak ngutnguten ngo kalak i janah menalahken kalak sidèban. Dak menguèi cubellekna simerdosa i ngo kalak i. Perkata manggang janah ipanggar-panggar mo kalak lako muat laba bai kalak i nai. 1:17 Tapi alè si nikekellengen, èngèt kènè mo sienggo nialamatken rasul-rasul nipebangkit Tuhanta Jesus Kristus. 1:18 Mayak ari Kiamat, enggo kin ngo ibagahken kalak i mendokken kennah roh ngo kalak simengerèhèi kènè, imo kalak simengulaken cubellek dekket kejahatenna. 1:19 Kalak sibagidi ngo simemellah-mellah kuria sienggo ikuasai cubellekna sendiri. Oda ngo iiani Tendi Perbadia kalak sibagidi, tapi iiani cubellek dunia èn ngo. 1:20 Tapi ukum kènè alè dengan, pehèdu-hèdu kènè mo diri ndènè ibagasen tuhu-tuhu percaya bai Tuhan i; simbadia ngo kepercayaen ndènè i. Ninganna idi dak mersodip mo kènè ibagasen Tendi Perbadia, 1:21 janah ibagasen i mo kènè tettap mengharapken masèh atè Dèbata merkitè Jesus Kristus Tuhanta i simemerrèken bai ndènè kenggelluhen situhunna soh mo amman sumendah. 1:22 Pacidah kènè mo masèh atè ndènè taba kalak perukur ganggu. 1:23 Ruah kènè mo kalak si nibagasen api lako paluahken kalak i. Mermasèh atè mo kènè taba kalak sidèbankenna i ninganna merkebiaren, tapi kecegoken kènè mo pakkènna sienggo mellamun i kemulihken cubellek-cubellekna sienggo merdosa i. 1:24 Kessangapen mo bai Dèbata simenjamotken kènè asa ulang tersundalih janah merembah kènè mi hadeppenNa i, ibagasen oang-oang janah oda mertikas. 1:25 Ia ngo kessa Dèbata sipaluahken kita merkitè Jesus Kristus Tuhanta i. Ia ngo Dèbata simermulia, meheji, merkuasa janah merkegegohen arnia nai soh bagèndari sakat soh mi amman sumendah! Amèn.
1:1 Isi bukku èn imo terrèngèt kadè sinipetarar Jesus Kristus terrèngèt barang kadè sinaing masa oda pella ndekkah nèngè. Ibagahken Dèbata ngo taba Kristus asa pacidahken taba pengendeng Dèbata kadè sinaing ndor nè masa. Ipasulak Kristus ngo malaèkatNa taba si Johanes naposoNa, lako magahken simasa i tabasa. 1:2 I indangken si Johanes ngo kata Dèbata janah ikesaksiken ngo tersèngèt Jesus Kristus imo tersèngèt sagumanNa sienggo idah. 1:3 Sayurntua ngo simenjaka dekket simendengkohken kata alamat èn dekket simenjamoti sitersurat ibagasenna, ai ndessing ngo enggo ketikana. 1:4 Kènè dengan silot i sipitu kuria i Asia! Aku, si Johanes, mengharapken dak ipasu-pasu Dèbata mo kènè, imo Dèbata bagèndari -- Dèbata i sinderbi nai janah Dèbata sinaing roh i -- bagi ma dekket tendi sipitu silot i hadeppenna sirebbak memerèntah dekket Dèbata, 1:5 dekket bai Jesus Kristus saksi kettoken idi nai. Ia ngo perlebbè ipegelluh i simatè nai janah Ia ma ngo merkuasa taba raja-raja ni dunia èn. Masèh mo atè Jesus midah kita, janah merkitè permatèNa i, Ipaluah ngo kita ipas dosanta nai. 1:6 Ibaing ngo kita gabè keturunen raja janah gabè malim i kerajaen Dèbata BapaNa i. Bai Jesus i mo kemuliaan dekket kuasa soh mi amman sumendah! Amèn. 1:7 Tengen, roh mo Ia ibagasen hembun! Karina ngo mengidahSa bang kalak sienggo memmantemSa i pè. Derru-derru mo karina bangsa silot i dunia èn menderruken diriNa kumarnakensa. Imo tuhu! Amèn! 1:8 "Aku ngo Alpa dekket Omèga (Bennana dekket puncana)," nina Tuhan Dèbata, simengkuasai sagumanna silot. Dèbata bagèndari, Dèbata sienggo lot kin janah Dèbata sinaing roh i. 1:9 Aku si Johanes dengan ndènè sisada nasip ibas kinidersa siniakapen gennep simengèkutken Kristus. Mbingit ngo kita menggong sindersa sebagè ummatNa. Mi pulo Patmos ngo aku ibuang kumarna kusukutken Kelluahen bai Dèbata nai, sinipesoh Jesus. 1:10 Tupung ari Tuhan i, ikuasai Tendi Perbadia ngo aku -- nai kudengkoh mo sora i podingku nai nggang kalohoon tosè bagè sora sarunè mengerana. 1:11 Bagèen nina, "Suratken mo si niidahmu mi sada lapihen, nai tengesken mo i mi kuria sipitu èn, imo Epesus, Smirna, Pergamos, Tiatira, Sardis, Piladelpia dekket Laodikia." 1:12 Tumulih mo aku mi podi, menengen isè simermongkami aku i, gabè kuidah mo pitu pelita emmas mernèhè. 1:13 I tengah-tengah pelita i kuidah cènder tosè bagè jelma memakè jubah nggeddang soh mi nèhèna. Janah i tentenNa lilit kokos emmas. 1:14 Mbulan ngo bukNa bagè kapas, mernala-nala ngo mataNa bagè api; 1:15 nèhèNa merkillong bagè tembaga niumbaken i perpandèen, soraNa gumeruhguh bagè sora sampuren ndates. 1:16 Ijèmak tanganNa kamuhun ngo pitu bintang janah karuar ngo i babahNa nai peddang sidua babah ntajem kalohoon, nai mercala-cala ngo abèNa bagè mataniari mpilngas. 1:17 Kuidah kessa Ia, tangkep mo aku i lebbè nèhèNa bagè sienggo matè; nai Iampèken mo tanganna kamuhun taba aku, ninganna idokken, "Ulang kono mbiar! Aku ngo merkuasa i mulana nai soh mi puncana. 1:18 Aku simemerèken nggelluh! Sienggo matè kin ngo enggo Aku arnia, tapi tengen mo, nggelluh ngo Aku soh mi amman sumendah. Merkuasa ngo Aku bang i kemmatèen bang bekkas i balik i. 1:19 Kernana idi suratken mo si niidahmu, imo simasa bagèndari dekket sinaing masa i podiin èn. 1:20 Èn ngo rusia bintang sipitu si niidahmu i tanganKu dekket pelita emmas mernèhè i. Ukum bintang sipitu i, imo malaèkat-malaèkat sipitu kuria, janah nèhè lampu sipitu i, imo kuria sipitu i."
2:1 "Bagèen mo suratken mendahi malaèkat kuria Epesus: Èn ngo tennah simenjèmak pitu bintang i tanganNa kamuhun janah merdalan-dalan i tengah-tengah nèhè pelita emmas sipitu i. 2:2 Kubettoh ngo perulanmu; kelejanmu bak mbingitmu. Kubettoh ngo oda terdessingen perjahat kono, bang pè kalak simengaku apostèl ia, keppè oda; enggo mo iunjuni kènè kalak i, terdapet ngo perluap ngo keppè kalak i. 2:3 Kubettoh ngo mbingit kènè janah susah kemulihken gerarKu, tapi oda uè kènè mendellè. 2:4 Tapi lot ngo pengkurangi ukurKu bai ndè imo: Oda bagè kelleng atè ndènè bangku i mulana i ngkelleng atè ndènè bagèndari. 2:5 Kerna i, perdatèken mo kettadingen ndènè i! Tobat mo kènè ibas dosa-dosa ndènè nai janah ulaken mo bahanmu bagè siperlebbè i. Mula oda, roh mo Aku mendahi kènè, menunggalingken pelita ndènè idi i bekkasna nai. 2:6 Tapi lot ma ngo tuhu kesurungenmu; ncego atèmu midah perulaan sisiin si Nikolaus siKukecegoken i ma. 2:7 Idengkohken simerpènggel mo sinidokken Tendi i taba kuria-kuria. Simennang i ngo kubaing kipangan buah kayu kenggelluhen si ni pekken Paradaiso ni Dèbata!" 2:8 "Mendahi malaèkat kuria Smirna suratken mo bagèen: Bagèen ngo kata bana nai simerkuasa i mulana nai soh mi podiin èn -- sienggo matè janah mengolihi nola nggelluh. 2:9 Kubettoh ngo kepersuken ndènè dekket kinipogos ndènè, tapi situhunna bèak ngo kènè; Kubettoh ma ngo bak pennukasi ndèba mendahi kènè, imo kalak simendokken Jahudi ia nina, keppè oda tuhu; ai pulungen Sibolis ngo kalak i. 2:10 Ulang kènè mbiar midah kepersuken sinaing sempa mendahi kènè ndor èn. Èngèt kènè mo, ikurung Sibolis mo barang piga-piga kalak bai ndènè nai lako mengunjuni kènè, gabè susah mo kènè sipuluh ari dekkahna. Dak burju mo kènè soh matè nai Kuberrèken mo bai ndènè rudang kenggelluhen i! 2:11 Idengkohken simerpènggel mo kata sinidokken Tendi Dèbata taba kuria-kuria. Oda terkekadè kemmatèen pedua kaliken i karina simennang i." 2:12 "Bagèen mo suratken mendahi malaèkat kuria Pergamos: Èn ngo tennah simenjèmak peddang sidua babah janah ntajem. 2:13 Kubettoh ngo i dikè kènè merrian imo i bekkas tahta Sibolis. Sètia ngo kènè bangKu. Ai tikan ibunuh pè tikala i naposongku kettoken imo si Antipas i tengah-tengah ndènè i bekkas Sibolis i, oda ngo iperso kènè Aku sinikepercayaen ndènè i. 2:14 Tapi lot ngo siso Kukellemmoken bai ndènè. Lot ngo dèba bai ndènè nai mengèkutken peddah si Bileam. Iajarken ngo taba si Balak bakunè pemmaing asa gabè merdosa kalak Israel; ièla ngo kalak i kipangan pangaan sienggo ipèlèken bai sembahen dekket mengulaken ulaan luhlah. 2:15 Bagi ma lot kè dèba mengèkutken peddah si Nikolaus. 2:16 Kerna naidi tobat mo kènè i dosa-dosa ndènè nai! Mula oda, ndor mo Aku roh lako juhap taba kalak i merkitè peddang silot i babahKu. 2:17 Idengkohken simerpènggel mo sinidokken Tendi i mi kuria-kuria. Simennang i ngo Kuberrèken kipangan manna simboni i dèng janah karina kalak i menjalo sada batu mbulan bangKu nai. Tersurat ngo i batu i sada gerar rimbaru, siso nibettoh barang isè pè, laènken simenjalosa i." 2:18 "Bagèen mo suratken taba malaèkat kuria Tiatira: Bagèen ngo tennah Anak Dèbata simermata mernala-nala bagè api janah nèhèNa bagè tembaga siniumabaken i perpandèen. 2:19 Kubettoh ngo perulaan ndènè -- kelleng atè ndènè bak kepercayaen ndènè, bang pengkebasi ndènè dekket mbingit ndènè. Buèen ngo ihanaken kènè bagèndari daripada tikala i. 2:20 Tapi ukum sisada matcam èn, lot ngo pengkurangi ukurku midah kènè. Ibelli kènè ngo daberru Isebel simengaku dirina sinipasulak Dèbata idi. Enggo mèduk naposongKu iakkali janah iajari mengulaken luhlah, bak kipangan pangaan sienggo ipèlèken bai sembahen. 2:21 Enggo Kuberrèken nemmu tikki bana asa mertobat ipas dosa-dosana nai, tapi oda nggèut mentadi ia mengulaken ulaan luhlah idi. 2:22 Èngèt mo! Kudabuh mo ia mi bagasen persakiten. Bagi ma pè dekket denganna simerlangkah julu meddem i. Kupatakken mo ia mi bagasen kepersuken mahantu -- ukum oda mertobat ia ibas perulanna nai. 2:23 Janah Kuradasken mo karina parangenna simengèkutkensa i, asa ibettoh karina kuria Aku ngo mengoji pusuh peratèen jelma karinana, janah Kubalesken tabasa rembang bagè siniulana gennep. 2:24 Tapi ukum taba kalak siso mengèkutken peddah laling i, imo sitading i Tiatira janah oda mengguruken hèlmu Sibolis bagè kalak i, bagèen mo Kudokken Oda kuampèken boban mberrat taba kènè. 2:25 Asal mo tong ijèmak kènè sienggo lot bai ndènè i kin sakat soh roh Aku. 2:26 Taba kalak simennang janah simengulaken lemmo atèngKu soh mi puncana Kuberrèken mo kuasa dos dekket sikujalo bai BapangKu nai. 2:27 Ijalo kalak i mo kuasa bangKu nai lako memerèntah bangsa-bangsa merdengan tongket bessi, janah mengereppuk bangsa-bangsa i bagè mengereppuk koden tanoh. 2:28 Ijalo kalak i mo bangKu nai bintang perlambuk. 2:29 Idengkohken simerpenggel mo nidokken Tendi i taba kuria-kuria."
3:1 "Bagèen mo suratken bai malaèkat kuria Sardes: Bagèen ngo tennah sidasa Tendi sipitu bai Dèbata nai, dekket simenjèmak bintang sipitu i. Kubettoh ngo karinana perulanmu. Terdokken nggelluh ngo kènè nemmu, keppèken matè ngo! 3:2 Kernana idi, kèkè mo kènè, petegguh mo dengan ndènè sitading i, imo kalak sinaing-naing matè i. Ai oda lot jupa Aku ulanmu merandal i hadeppen Dèbata. 3:3 Nteng, èngèt mo balik barang kadè sienggo ipeddahken dekket sienggo idengkoh kènè, ulaken mo i janah tobat mo kènè! Kum oda ndungo kènè, roh mo Aku mendahi kè bagè pekerroh penangko, oda ibettoh kènè ndigan ketikana pekirohKu i. 3:4 Tapi lot ma ngo i tengah-tengah ndènè i Sardes simenjaga olesna asa tong mpanting. Rebbak merdalan mo kalak i dekket Aku seggen meroles mbulan, ai tau ngo kalak i. 3:5 Oles mbulan sibagidi ngo seggen iberrèken bai kalak simennang i. Oda kusasa gerarna ibas lapihen kenggelluhen i nai, tapi Kuindangken ngo gerarna i hadeppen BapangKu bak i hadeppen malaèkat-malaèkatNa. 3:6 Barang isè merpènggel, idengkohken mo sinidokken Tendi i taba kuria-kuria." 3:7 "Nai bagèen mo baing surat mendahi malaèkat kuria Piladelpia: Èn ngo kata simbadia janah bennar simenjèmak anak konci si Daud. Mula enggo Ibuka oda lot sindorok memmuka. 3:8 Kubettoh ngo karina perulaan ndènè, tengen mo, enggo Kubuka pèntu bai ndènè, siso ndorok ikonci barang isè pè. Tukasi pè oda sadikè gegoh ndènè, tapi dak iuèi kènè ngo katangKu, janah dak satia taba Aku. 3:9 Èngèt mo èn; kubaing mo kalak sienggo gabè mengèkutken Sibolis i, smendokken Jahudi ia keppèken oda tuhu, perluap ngo ia, asa roh kalak i mi hadeppenmu lako mersembah taba kènè, janah mengaku ngo Kukekelengi kènè! 3:10 Kumarna mbingit ngo kènè menjamotken katangKu, Aku pè Kujamotken mo kènè tupung ari kesusahen sinaing sempa mi suberri dunia èn. Masa ngo i lako mengunjuni karina kalak simerian i babo tanoh èn. 3:11 Ndor mo aku roh! Cèkèp mo sienggo lot bai ndènè i, ulang gabè ibuat dèba nola rudangmi! 3:12 Simennang i ngo Kubakin gabè binangun Bages DèbatangKu Simbadia i, janah i sidi nola merian soh sidekkahna. Kusuratken mo ibas diri kalak i gerar DèbatangKu dekket gerar kuta DèbatangKu -- imo Jerusalem sirembaru, susur i sorga nai bai DèbatangKu nai -- bagi ma dekket gerarKu sirembaru i. 3:13 Barang isè merpènggel janah ndorok merpendengkoh, ibeggèken mo sinidokken Tendi i taba kuria-kuria." 3:14 "Bagèen mo suratken mendahi malaèkat kuria Laodikia: Bagèen ngo kata si Amèn, saksi kettoken janah bennar i, permulaan sinitempa Dèbata. 3:15 Kubettoh ngo karina perulaan ndènè; mbarngap so mbarngap janah mpeddas so mpeddas ngo kènè. Mbarngap barang mpeddas mo kè nemmu. 3:16 Kumarna nggara-nggara sisèlu ngo kènè, oda mbarngap oda ma mpeddas, Kuutahken mo kè i babahKu nai. 3:17 Idokken kènè ngo, 'bèak ngo kènè janah kaya, oda kurangen kadè kènè.' Oda ibettoh kènè kalak mpersuk ngo kè bana mpersah, ncor bak pètung janah sabar. 3:18 Kerna naidi, Kupernoi mo kènè, tokor mo bangKu nai emmas sienggo itingtingi asa tuhu bèak kènè, bagi ma dekket oles mbulan mahan abit ndè, asa ulang termèla kènè kumarna sabar i kènè. Bagi ma pè dekket minak sidalisenken mi mata ndènè, asa merpendidah kènè! 3:19 Ai kalak siKukekellengi, kalak i ngo Kupesèngèt janah Kupeddahi. Kernana i mertuhu-tuhu mo ukur ndènè ninganna mertobat ibas dosa-dosa ndènè nai. 3:20 Tengen mo! Cènder ngo Aku i lebbè pèntu i ninganna menuktuki. Barang isè mendengkoh sorangKu janah memmuka pèntu i, mbengket mo Aku mendapetkensa janah rebbak mangan mo Aku dekketsa, janah ia rebbak dekket Aku. 3:21 Kupehantar mo kundulen taba simennang idi i kerajanKu, bagè Aku sienggo mennang janah rebbak kundul i karjaan BapangKu. 3:22 Barang isè merpènggel sindorok merpendengkoh, idengkohken mo sinidokken Tendi i taba kuria-kuria!"
4:1 Nai kuidah nola mo sada alaten. Mbuka mo sada pèntu i sorga, janah kudengkoh rana sienggo mengerana idi kin taba aku bagè sarunè. Nina mo, "Roh mo kono mbengket mi sèn, asa Kubagahken bamu kadè sinaing masa i podinkenna èn." 4:2 Mèter ikuasai Tendi Dèbata mo aku. Nai kuidah mo sada tahta i sorga, janah lot sada kalak kundul i babona. 4:3 Ukum rupa sikundul i tahta i, bagè intan jaspis janah bagè Sardes ngo tengenen. Merkillong-killong ngo mengkulilingi tahta idi, janah perbintoha bagè zamrud. 4:4 I sikuliling tahta i lot dèng ma ngo duapuluh empat nai tahta ikunduli duapuluh empat pengendeng merpakèen mbulan janah merudangken buradda i babontakalna. 4:5 Gumeruhguh ngo dengkohen tahta i janah butbat pellian mencuhayai. Merjollah-jollah ngo pitu obor i hadeppen tahta i, imo Tendi Dèbata sipitu i. 4:6 Lot dèng ma ngo i hadeppen tahta i teridah bagè laut kaca nciho bagè cermin terrus. Ipas empat persoki tahta i tengah-tengah idi, lot ngo empat pernggelluh, mbuè ngo matana i lebbè dekket i podi. 4:7 Ukum rupa pernggelluh siperlebbè tosè bagè rupa singa ngo, sipeduaken bagè rupa lembu jenggi; sipetelluken merabè tosè bagè abè jelma, janah sipeempatken tosè bagè manuk-manuk sipanggor daha sidang ngkabang ngo. 4:8 Siempat pernggelluh idi merkabeng ngo gennep terennem; dom ngo mata i sikulilingna dekket i bagasenna pè. Oda mengadi-ngadi kalak i mahar ari berngin mengendèken bagèen, "Simbadia, simbadia, simbadia ngo Tuhan Dèbata simenggem-nggemmi saguanna silot, sienggo lot kin janah sienggo lot bagèndari, dekket sinaing roh i." 4:9 Empatna pernggelluh i mengendèken endè lako memmoji janah pesangapken bak mendokken mejalo metangkup taba sikundul i babo tahta i janah singgelluh soh mi amman sumendah. Janah tikan merendè pernggelluh i 4:10 nai mèter tangkep mo pengendeng siduapuluh empat i mi hadeppen si kundul i babo tahta i, isembah kalak i mo singgelluh soh mi amman sumendah i, nai ipenggamparken kalak i mo rudangna mi hadeppen tahta i ninganna idokken, 4:11 "Alè Tuhan Dèbata nami! Pellin kono ngo patut ipoji, ipessangap kumarna merkuasa. Kono ngo menghanaken sagumanna silot janah kemmulihken lemmo atèMu ngo memmaingken asa terhana janah nggelluh."
5:1 Nai kuidah mo tangan sikundul i tahta i sada lapihen sienggo isurat ibagasen dekket i ruarna janah sienggo isègèl merkitè pitu sègèl. 5:2 Nai kuidah ma mo sada kalak malaèkat mergegoh, nggang kalohoon ngo sorana mendiloken, "Isè ngo ndia ndorok mengkarkari sègèl i janah mengogè lapihen simerserpih i?" 5:3 Tapi isè poda sanggup memuka lapihen i dekket menengen mi bagasen ukum kalak si ni sorga, bang si ni tanoh èn pè bak si ni terruh tanoh i pè. 5:4 Nai gabè tangis janah semmep-semmep mo aku, kerna isè poda lot sanggup mengogè lapihen i dekket menniah mi bagasenna. 5:5 Nai nina sada kalak ipas pengendeng idi nai mo taba Aku, "Ulang kono tangis! Tengen mo. Enggo mennang Singa i bas marga Judèa nai, pinempar si Daud simbellen i, lako mengkarkari sègèl sipitu i memmuka lapihen merserpih i." 5:6 Nai kuidah ma mo sada Anak Biri-biri cènder i tengah-tengah tahta i, ikulilingi pernggelluh siempat i bak karina pengendeng pè. Ukum Anak Biri-biri i, enggo bagè cara tersembellih kin. Pitu ngo tandukna janah pitu matana, imo tendi sipitu sienggo iutus mi suberri dunia èn. 5:7 Nai ibuat Anak Biri-biri i mo lapihen merserpih i, i tangan sikundul i babo tahta i nai. 5:8 Ningan bagidi, tangkep mo mersembah siempat pernggelluh bak pengendeng siduapuluh empat idi i hadeppenNa. Karina pengendeng i menggelem kucapi i tanganna gennep dekket caban emmas merisi kemenjen, imo sodip ummat Dèbata. 5:9 Jadi iendèken kalak i mo sada endè rembaru, "Kono ngo kessa sanggup memmuat lapihen i dekket mengkarkari sègèl-sègèlna. Kumarna Enggo kin ibunuh kono, janah merkitè permatèMu, enggo itebbus kono karinana jelma i gennep marga, kata, nègara bak bangsa Dèbata. 5:10 Enggo gabè ibaing kono kalak idi gabè usur imam-imam asa gabè mengkebasi Dèbatanta kalak idi, janah menggem-nggemmi dunia èn." 5:11 Nai kuidah nola mo. Kudengkoh ma mo sora malaèkat merribu-ribu bak merjuta-juta buèna! Cènder ngo kalak i mencingkoi tahta i, bak mencingkoi pernggelluh siempat i bang pengendeng-pengendeng i. 5:12 Merendè ngo kalak i nggang kalohoon, "Anak Biri-biri sienggo isembellih i ngo patut menjalo kuasa; kinibèak kebijaken bak kegegohen; patut ngo Ia sipessangap, imuliaken dekket ipepoji-poji!" 5:13 Nai kudengkoh ma mo merendè karina sinitempa i langit i, i tanoh èn, i terruh tanoh dekket ibagasen laut i -- "Ia sikundul i babo tahta i -- dekket Anak Biri-biri i ngo sipojiin dekket sipesangapen janah mermulia bak merkuasa soh mi amman sumendah!" 5:14 Jadi ialoi pernggelluh siempat i mo, "Amèn!" Nai tangkep mo pengendeng-pengendeng i mersembah.
6:1 Enggo kessa bagidi, kuidah mo ikarkari Anak Biri-biri i sègèl perlebbè i pas sipitu sègèl i nai. Nai kudengkoh mo sada ipas pernggelluh siempat i nai mendokken, "Roh mo kono!" Tosè bagè renggur nggang sorana i. 6:2 Jadi kuperdatèken mo, gabè kuidah mo sada kuda putih. Ijèmak simemmasang kuda i ngo sada cèur, janah iberrèken bana sada rudang. Berkat mo ia bagè sada kalak permennang juhap merkemennangen. 6:3 Nai ikarkari Anak Biri-biri i nola ma mo sègèl peduaken. Kudengkoh ma mo pernggelluh sipeduaken i mendokken, "Roh mo kono!" 6:4 Jadi karuar mo sada kuda sidèban mbara rupana. Iberrèken mo taba simemmasang kuda i kuasa lako memmuat damè i babo tanoh èn nai, asa mersirasipen samah-samah jelma, janah iberrèken dèng ma ngo sada peddang mbelgah bana. 6:5 Nai ikarkari Anak Biri-biri i nola mo sègèl sipetelluken. Jadi kudengkoh ma mo pernggelluh sipetelluken i mendokken, "Roh mo kono!" Jadi kuperdatèken mo, bagè kuidah mo lot sada kuda mbèrèng. Icèkèp simemmasang kuda i ngo sada dacing i tanganna. 6:6 Nai kudengkoh mo sora bagè cara i tengah-tengah pernggelluh siempat idi nai mendokken, "Sisellup berras upah sidari janah tellu sellup jagong upah sidari. Tapi ulang kekkadè batang zaitun dekket pekken anggur!" 6:7 Nai ikarkari Anak Biri-biri i nola mo sègèl sipeempatken, gabè kuidah mo pernggelluh sipeempatken i mendokken, "Roh mo kono!" 6:8 Kuperdatèken mo, gabè taridah mo sada kuda kellabu rupana. Ukum gerar simemmasang kuda i, kemmatèen ngo, janah mengèkut ngo i podina kebèguun. Iberrèken ngo bana kuasa mi siperempat tanoh èn, asa iradasken merkitè-kitè geraha dekker keraparen bak merkitèken sakit uabba dekket merkitè binatang penjerngem silot i tanoh èn. 6:9 Enggo kessa bagidi, ikarkari Anak Biri-biri i nola mo sègèl pelimaken, nai kuidah mo i terruh langgaten pemèlèen i tendi kalak sienggo matè terbunuh kumarna percaya kalak i mi kata Dèbata dekket kumarnaken iindangken kalak i ngo sukuten i. 6:10 Dak itenggo-tenggoken tendi i ngo merkitè sora nggang, "Ialè Tuhan Perkuasa, simbadia janah persènteng! Sadikè dekkah nai ngo asa ihukum kono pengisi dunia èn, kumarnaken pemmaing kalak i sienggo memmunuh kami?" 6:11 Jadi iberrèken mo taba gennep tendi i tersada jubah mbulan. Nai idokken mo taba kalak i asa ipèma sinempas nari, soh tumpat lebbè denganna sada ulaan dekket kaka anggina sinaing bunuhen dèng bagè kalak idi i. 6:12 Nai kuidah nola mo ikarkari Anak Biri-biri i sègèl sipeenemken. Mèter masa mo rènur gaya-guyu. Gabè mbèrèng mo mataniari i bagè kaèn mbèrèng, janah bulan i pè mbara bagè daroh. 6:13 Merrurus mo bintang i, i langit nai mi tanoh bagè buah kayu ara merntalpungen idegger angin ndor. 6:14 Langit i pè mersep mo bagè cara bellagen sinibalun janah mèrèt mo karina delleng dekket pulo igèsèr i bekkasna nai kin. 6:15 Gabè ciboni mo karina raja ni tanoh èn dekket simersangap, ekuten balapergunggung, kalak sibèak dekket kalak perkuasa pè bang kalak sidèbanna i, barang hamba pè i barang siso hamba karinana ngo kalak i ciboni mi liang-liang bak mi ruang-ruang batu delleng. 6:16 Nina kalak i mo taba batu bak delleng i, "Dendenni janah boniken mo kami, asa ulang kuidah kami abè sikundul i babo tahta kerajaen sienggo punguren i, bak Anak Biri-biri i! 6:17 Ai enggo dapet tikkina roh pungur sikundul i babo tahta kerajaen i dekket Anak biri-biri i; isè poda mennahan i hadeppenna!"
7:1 Enggo kessa bagidi, kuidah nola mo lot cènder empat kalak malaèkat i dèsa siempat ni tanoh i. Itagangi kalak i ngo siempat mata angin ni tanoh èn asa ulang nèngè menempul angin i mi darat bang mi laut barang mi kayu i pè. 7:2 Nai kuidah ma mo sada malaèkat sidèban kèkè kan kebincaren nai, icèkèp ngo sada sègèl sinijalona bai Dèbata singgelluh i nai. Nggang ngo sorana mendiloken taba malaèkat siempat i, sienggo menjalo kuasa bai Dèbata nai lako mencèdaken darat dekket laut. 7:3 Nina malaèkat sisada i mo, "Ulang lebbè cèdai kènè darat barang laut barang pè kayu, pèma kubaing kami lebbè tanda sègèl i abè naposo Dèbatanta." 7:4 Jadi kudengkoh mo ibagahken buè kalak sienggo iberrè sègèl i seratus empatpuluh empat ribu kalak. Karinana idi ipas sisipuluh dua marga Israel i nai ngo; 7:5 i marga Judèa nai sipuluh dua ribu kalak sienggo iberrè tanda sègèl, i marga Ruben nai sipuluh dua ribu kalak, i marga Gat nai sipuluh dua ribu kalak, 7:6 i marga Asyer nai sipuluh dua ribu kalak, i marga Naptali nai sipuluh dua ribu kalak, i marga Manasye nai sipuluh dua ribu kalak, 7:7 i marga Simeon nai sipuluh dua ribu kalak, i marga Lewi nai sipuluh dua ribu kalak, 7:8 i marga Zebulon nai sipuluh dua ribu kalak, i marga Josep nai sipuluh dua ribu kalak, i marga Benjamin nai sipuluh dua ribu kalak. 7:9 Enggo kessa salpun i, lot mo kuidah nterrem kalohoon jelma, siso terbilangen buèna -- imo i suberri bangsa, marga, kaum dekket perkataan silot idi nai. Dak cènder ngo kalak i mengadep tahta bak mengadep Anak biri-biri i, merpakèen jubah mbulan janah menjèmak lambè i tanganna. 7:10 Nggang kalohoon ngo idiloken kalak i, "Bai Dèbata simengkunduli tahta i dekket bai Anak Biri-biri i nai ngo rohna keluahenta!" 7:11 Tikan bagidi cènder ngo malaèkat-malaèkat mengkulilingi tahta i bak i sikuliling pengendeng dekket pernggelluh siempat i. Tangkep ngo malaèkat-malaèkat idi i lebbè tahta i menembah Dèbata. 7:12 Idiungken kalak i ngo, "Amèn! Nipoji mo Dèbatanta simermulia i janah bijak. Ia ngo Dèbata janah patut menjalo kata merlias atè dekket pemoji-mojiin mertinèncuk. Dèbata perkuasa janah mergegoh ngo Ia soh mi amman sumendah! Amèn." 7:13 Nai ikuso sada kalak pengendeng i mo aku, "Isè ngo kalak simerjubah mbulan i janah i dikè nai ngo rohna kalak idi?" 7:14 Kualoi mo ia, "Oda kubettoh i alè Tuan. Kono ngo bettoh-bettohen idi." Nai nina mo taba aku, "Kalak i ngo sienggo maluah ibas kepersuken idi nai. Enggo itaptapi kalak i jubahna, janah ipeputih merkitè daroh Anak Biri-biri i. 7:15 Kemulihkenna idi ngo asa dak cènder kalak idi i hadeppen tahta Dèbata, ninganna menguèi Dèbata Simbadia i. Janah sikundul i tahta i, dak rebbak mo dekket kalak i lako mengkeruduk kalak idi. 7:16 Oda nèngè mellèhè kalak i, oda nè muasen, oda nè isenggang nggara niari, bang singgara bakunè pè, 7:17 ai ipermakan Anak Biri-biri sikundul i tengah-tengah tahta i ngo kalak i. Itogiken ngo kalak i mi laè mul kenggelluhen, janah iapusi Dèbata mo èluh i mata kalak i nai."
8:1 Jadi ikarkari Anak Biri-biri i kessa mo sègèl sipepituken i, nono mo karina si ni sorga i kira-kira setengah jom dekkahna. 8:2 Nai kuidah mo iberrèken sarunè taba malaèkat sipitu sicènder i hadeppen Dèbata i. 8:3 Nai roh ma mo sada kalak malaèkat sidèban merembah perdahupaan buradda, cènder mo ia i lebbè langgaten pemmèlèen i. Iberrèken mo tabasa kemènjen mbuè kalohoon, asa ipersada mi sodip karina ummat Dèbata, asa ipèlèken i langgaten pemèlèen silot i hadeppen tahta i. 8:4 Kumèkè mo cèmber dahupa i rebbak dekket sodip ummat Dèbata mercèmpul i tangan malaèkat sicènder i hadeppen Dèbata i nai. 8:5 Nai ibuat malaèkat i mo perdahupaan i, idomi mo dekket rara api i langgaten pemèlèen i nai, janah ibentirken mo mi tanoh èn. Mèter purpar mo renggur bak sora merderrem-derrem, butbat mo pellian janah dumegger mo dunia èn. 8:6 Enggo kessa bagidi, kebbas mo malaèkat sipitu simenjèmak sarunè i lako menempul. 8:7 Nai isempul malaèkat perlebbè i mo sarunèna, gabè merrohen mo baho dekket api mercampur daroh mi dunia èn, nai melettup mo sepertellu dunia èn; bagi ma dekket sepertellu sagumanna kayu, messeng ngo karinana dukut-dukut simeratah i. 8:8 Nai isempul malaèkat sipeduaken i ma mo sarunèna, nai taridah mo sada mbelgah kalohoon tosè bagè delleng merjollah-jollah ndabuh mi laut, nai mèter mobah mo sepertellu laut i gabè daroh, 8:9 radas mo sepertellu sinihanaken janah singgelluh i ibagasen laut i; janah karam mo sepertellu keppel silot i laut i. 8:10 Nai isempul malaèkat sipetelluken i ma mo sarunèna, mèter ndabuh mo i langit i nai sada bintang mbellen mergollah-gollah bagè api pinoron, itinggang mo sepertellu batang laè dekket takal laè. 8:11 Ukum gerar bintang i, Apsintos (mpagit) ngo. Jadi gabè mpagit mo sepertellu suberri laè, mermatèen mo mbuè jelma simengènum laè i. 8:12 Nai isempul sipeempatken mo sarunèna gabè terpastap mo sepertellu mataniari i, bak sepertellu bulan i, dekket sepertellu bintang-bintang i, janah mèlep mo sepertellu cuhayana. Gellap bulita mo sepertellu mahar bak berngin i. 8:13 Jadi kuperdatèken mo, kuidah mo sada manuk-manuk sipanggor daha ngkabang ndates kalohoon i abang-abang i. Nggang ngo sorana pingko-pingko, "Merjaya! Merjaya! Merjaya mo karinana jelma simerian i dunia, mula isempul malaèkat-malaèkat sitellu kalak i nai kessa sarunèna i!"
9:1 Nai isempul malaèkat sipelimaken i mo sarunèna, gabè kuidah mo ndabuh sada bintang i langit nai mi dunia èn. Iberèken ngo taba bintang i anak konci lembeng kemmatèen. 9:2 Ibuka bintang i mo lembeng kemmatèen i, nai mèter karuar mo cèmber i bagasenna nai, tosè bagè cember pinoron kayu matah, gabè gellap mo mataniari soh mi perlangiten kemulihken cèmber i. 9:3 Jadi merrohen mo balang i cèmber i nai mi tanoh i, iberrèken mo taba balang i kuasa tosè bagè siniberrèken taba bik. 9:4 Igerra mo balang i, mak ndorok icèdai dukut-dukut, barang pè ka}u dekket suan-suaan sidèbanna i. Pellin jelma siso lot tanda sègèl bai Dèbata nai ipas perdempakenna ngo kessa ndorok iletlet. 9:5 Oda ma ngo ndorok balang i memmunuh jelma, pellin isiksa sambing ngo kessa lima bulan dekkahna. Ukum mpiahna peniksa balang i tosè bagè mpiahna itebbi bik ngo. 9:6 Sidekkah lima bulan i, ipergeddo jelma ngo asa matè nemmuken ia, tapi oda ndorok matè; sèkel kalohoon ngo kalak i matè tapi ndaoh ngo kemmatèen i bai kalak i nai. 9:7 Ukum rupa balang i tosè ngo bagè rupa kuda sienggo kebbas lako geraha. Lot ngo i babontakalna bagè rudang emmas idahen. Abèna bagè abè jelma. 9:8 Bukna bagè buk daberru janah èpenna bagè èpen singa. 9:9 Tentenna mertutup bagè tutup baju bessi. Sora kabengna tosè bagè sora kurèta kuda mbuè kalohoon lojang mi perjuapen. 9:10 Lot ngo uitna janah merbisa ngo uitna i bagè bisa bik, janah ipas uitna i ngo kuasana lako meniksa jelma sidekkah lima bulan. 9:11 Ukum raja kalak i, imo raja kemmatèen i. Ukum gerarna ipas kata Heber imo Abadon; ukum i kata Junani gerarna Apolion (lapatenna pencèdai). 9:12 Enggo mo leppas ukum olpek perlebbè, kessa i lot dèng ngo dua nai olpek kennah roh. 9:13 Nai isempul malaèkat sipeennemken mo sarunèna. Jadi kudengkoh mo lot sora ipas soki siempat langgaten emmas bekkas pemmèlèen ni hadeppen Dèbata idi nai. 9:14 Bagèen ngo katana taba malaèkat sipeennemken simenjèmak sarunè i, "Paluah mo empatna malaèkat sinitambat idi i Laè Euprat i!" 9:15 Nai ipaluah mo empatna malaèkat i, asa kebbas ia tupung kettikana, tupung arina, tupung bulanna dekket tupung tahunna sienggo itentuken kin lako mengeragèken sepertellu ipas ummat kejelmaan idi nai. 9:16 Ibagahken ngo buè balapergunggung simerkuda i, imo dua ratus juta. 9:17 Ibas alaten nibagahkenna bangku i kuidah ngo, ukum kuda i dekket simenunggang i pè memakè baju bessi janah mbara sol ngo dèba rupana, dèba meratah bagè batu nilam janah dèba nai nggersing bagè belèrang. 9:18 Kumarnaken tulbang sitellu i terbunuh ngo sepertellu kejelmaan, imo kumarnaken api, cèmber dekket belèrang siremuar i muncung kuda i nai. 9:19 Ai ipas muncung dekket uit kuda idi ngo gegohna. Codi bagè nipè ngo uitna i mertakal, janah merkitè-kitè uitna iderder kuda i jelma. 9:20 Tapi laju ngo oda tobat jelma sitadingna i, imo jelma siso ibunuh kinipersuk i. Laju ngo oda mentadi kalak i menembah bègu bak gana-ganaan emmas, pirak, tembaga, batu dekket kayu si nigana siso merpendidah i, dekket siso merpendengkoh janah siso ndorok merdalan i. 9:21 Oda tobat kalak i ipas ulah-ulahna dak memmunuh idi nai, mengulaken merlangkah julu meddem dekket mennangko i nai.
10:1 Enggo kessa i, kuidah mo sada kalak malaèkat sidèban susur i sorga nai mergegoh kalohoon. Ibalut hembeun ngo ia janah cengko bintoha i babontakalna. Bagè mataniari ngo cuhaya abèna, janah nèhèna bagè tihang api. 10:2 Icèkèp ngo sada lapihen kètèk janah mbuka ipas tanganna. Nèhèna kamuhun mendeddoh laut janah nènèhna kambirang mendeddoh darat. 10:3 Nai nggang kalohoon mo sorana bagè sora singa mengaung mendiloken; jadi dilo-dilo kessa mo malaèkat i gabè mengaloi mo pitu renggur. 10:4 Mersora kessa mo renggur sipitu i, naing mennurat mo aku, tapi kudengkoh nola mo sora i sorga nai mendokken, "Rusiaken mo sinikataken renggur sipitu i; ulang suratken i!" 10:5 Nai ipekustang malaèkat simendeddohken nèhèna mi laut dekket mi darat i mo tanganna kamuhun mi langit. 10:6 Isumbiahken mo taba Dèbata singgelluh soh mi amman-sumendah situmempa langit, tanoh dekket laut, soh mi karina pengisina, nina mo, "Oda nèngè tersondaten tikkina! 10:7 Ai tupung isempul malaèkat sipepituken idi kessa mo sarunèNa, saut mo karina hendak Dèbata simakdèng ipetarar i, imo bagè sienggo ibagahken kin taba naposona nabi-nabi i." 10:8 Nai nina sienggo mengerana taba aku i sorga idi nola mo taba aku, "Lako mo, jalo mo lapihen simergolong sienggo mbuka i bai malaèkat simendeddohken nèhèna mi laut dekket mi darat i nai." 10:9 Laus mo aku mendahi malaèkat i, kupido mo bana nai asa iberrèken bangku lapihen kètèk i. Jadi nina mo taba aku, "Na, pangan mo. Mpagit ngo i ibagasen beltekmu, tapi tenggi ngo i bagè tenggoli ukum i babahmu." 10:10 Kujalo mo lapihen kèdèk idi i tanganna nai janah mèter kupangan. Tenggi ngo kuakap i babahku, tapi enggo kessa kutellen, gabè mpagit ngo kuakap ibagasen beltekku. 10:11 Enggo kessa bagi, nina mo taba aku, "Kennah ulakenmu dèng ngo menjamitaken sukuten bai Dèbata nai mendahi marga, bangsa dekket kata, bang raja pè."
11:1 Nai enggo kessa i, iberrèken mo bangku sada kayu mahan sibar-sibar, tosè bagè tongket, ninganna idokken, "Lako mo, sibar mo Bages Dèbata dekket langgaten pemmèlèen taba Dèbata idi; bilang ma mo dekket kalak simersembah taba Dèbata nisidi. 11:2 Tapi ulang pella sibar kasèan niruar Bages Dèbata i, kerna ukum kan idi, enggo iberèken i taba kalak siso menandai Tuhan; ipededdoh-deddoh kalak i mo kuta simbadia i sidekkah empatpuluh dua bulan. 11:3 Nai kupasulak mo dua kalak saksingKu merpakèen oles bonek, jadi isukutken kalak i mo kata Dèbata sidekkah seribu dua ratus ennempuluh ari." 11:4 Ukum saksi sidua i, imo batang kayu zaitun, dekket dua ngkabuah nèhè lampu silot i hadeppen Tuhan ni sagumanna silot. 11:5 Mula lot kalak naing makin jahat taba kalak i, mèter remuar ngo api i babah kalak i nai lako mengelettup musuh-musuhna, asa gabè mermatèen mo bagidi. 11:6 Merkuasa ngo kalak i mengkonci langit, asa ulang roh udan, sidekkah ijamitaken kalak i kata Dèbata. Merkuasa ma ngo kalak i pekellihken takal laè, asa gabè daroh nola laèna i, janah merkuasa ma ngo kalak i memmaing simpersuk mi dunia èn, barang ndigan dok atèna. 11:7 Mula enggo pul pengkesaksiken kalak idi, roh mo binatang i napa kematèen idi nai lako mergeraha dempak kalak i, gabè italuken janah ibunuh mo kalak i. 11:8 Gampar mo bangkè kalak idi i dalan mbellen i kuta mbelgah i bekkas Tuhan kalak idi i, ipersilangken. Ukum gerar-gerar codiin kuta idi imo Sodom barang Mesir. 11:9 Idah karina marga, bangsa, kata dekket kerajaen ngo bangkè kalak idi i. 11:10 Lolo mo pengisi tanoh i mengidah permatè sidua kalak i. Mersampang atè mo kalak i janah meriaia, kemulihken matcam bagèna kinipersuk dumatang ibaing nabi sidua kalak i taba suberri jelma. 11:11 Enggo leppas tengah empat ari, roh mo kessah kenggelluhen bai Dèbata nai janah mbengket taba nabi sidua kalak i, gabè kèkè janah cènder mo kalak i; nai buradan mo karina kalak simengidah i. 11:12 Nai idengkoh kalak i mo nggang sora i sorga nai mendilo kalak i, "Roh mo kènè mennaik mi sènda!" Jadi mennaik mo kalak idi ibagasen hembun mi sorga inelnelli musuh-musuhna. 11:13 Nai masa mo rènur gejapkenna i mergegoh kalohoon, merumpak mo sepersipuluh kuta i, matè mo pitu ribu kalak kumarnaken rènur i. Jadi mbiar kalohoon mo kalak sidèban siso matè i, nai gabè ipoji kalak i mo kemuliaan Dèbata si ni sorga. 11:14 Enggo salpun olpek sipeduaken i. Tapi tengen mo, roh nèngè mo olpek sipetelluken! 11:15 Nai isempul malaèkat sipepituken i mo sarunèna; jadi masa mo sora nggang kalohoon i sorga mendiloken, "Enggo sakat kuasa bai Tuhanta lako memerèntah dunia èn dekket bai Raja Sipaluah niperbagah-bagahNa i, mbangkit Raja mo ia soh mi amman sumendah!" 11:16 Ukum pengendeng siduapuluh empat simengkunduli tahtana gennep i hadeppen Dèbata idi, tangkep ngo lako mersembah taba Dèbata. 11:17 Nina kalak i ngo, alè Tuhan Dèbata Perkuasa, Dèbata bagèndari bak Dèbata i sinderbi nari, melias atè kudokken kami bamu kerna enggo ipacidah kono kuasaMu simeheji i; janah enggo imulai kono memerèntah! 11:18 Enggo punguren kalak siso menandai Tuhan, jadi Enggo dapet katikana mellaga kono; janah Enggo ma ngo dapet tikkina ihukum kono kalak sienggo matè i, ninganna berènkenmu sibasa-basa taba naposoMu nabi-nabi i, bagima pè taba karina ummatMu, imo bai karina kalak simerkebiaren taba kono, simbelgah bang anak-anak pè. Èn ma mo kettikana iago kono kalak simengago tanoh i! 11:19 Nai mbuka mo Bages Dèbata i sorga; taridah mo Pèti Perpadanen i, ibagasen. Nai masa mo kasiksak pelian janah purpar sora renggur. Dumegger-degger mo tanoh èn, janah roh mo baho gata-gutu.
12:1 Nai taridah mo tanda-tanda lègan i langit i. Sada kalak daberru merolesken mataniari, janah cènder ia i babo bulan i. Ipas takalna lot rudangna sipuluh dua bintang. 12:2 Mbadan ngo daberru i. Dak mendeherreng ngo ia, kerna rabisen naing kettaring. 12:3 Nai taridah dèng ma mo i langit i tanda-tanda lègan sidèban. Lot sada naga mbara mbellen kalohoon, pitu takalna janah sipuluh tandukna. Gennep takal memakè rudang kerajaen. 12:4 Iruah ngo merkitè uitna sepertellu bintang ni langit i janah idabuh mi tanoh. Cènder ngo naga idi i lebbè-lebbè daberru sinaing kettaring i kerna naing ipangan ngo dukak sinaing tubuh i. 12:5 Nai tubuh mo anak daberru i sinaing mengerajai karina bangsa, merkitè tongket bessi. Tapi galip mo anakna i mi hadeppen Dèbata mi bekkas tahtaNa. 12:6 Ukum daberru i, mperrus mo ia mi padang gurun, mi bekkas sienggo ihantari Dèbata bana. Isidi mo ia ipehèdu-hèdu seribu dua ratus ennempuluh ari dekkahna. 12:7 Tapi masa mo geraha i sorga. Juhap mo Mikhael rebbak dekket malaèkat-malaèkatna mergeraha taba naga i; naga i pè iurupi malaèkat-malaèkatna ma mo mengalo Mikhael. 12:8 Tapi talu ngo naga i, jadi oda nèngè ipadiat ia bak balapergunggungna i merian i sorga. 12:9 Iusir mo naga mbellen i, simergerar nipè sinderbi, imo Sibolis barang sètan simengoto-ngotoi suberri dunia èn, mi tanoh i rebbak dekket malaèkat-malaèkatna karina. 12:10 Nai kudengkoh mo sora nggang kalohoon i sorga mendokken, "Bagèndari mo kettikana ipaluah Dèbata ummatNa i! Ai enggo ipacidah Dèbata kuasaNa bagè Raja! Raja Sipaluahken niperbagah-bagah i pè bagèndari ma mo pacidahken kuasaNa! Ai enggo iusir i sorga nai simengasungi kaka-angginta mahar dekket berngin i hadeppen Dèbata. 12:11 Enggo talu ia ibakin kaka angginta merkitè daroh Anak Biri-biri i, dekket merkitè-kitè sukuten bai Dèbata nai sinisukutken kalak idi; oda ikellini kalak i kessahna soh matè. 12:12 Kernana idi meroang-oang mo sorga rebbak dekket karina pengisina i! Meroang-oang mo kènè! Tapi merjaya mo tanoh i dekket laut, ai enggo susur Sibolis i mendahi kono ibagasen pungur ai ibettoh ngo, sigejap nai ngo tikkina." 12:13 Saddar kessa mo naga i, enggo keppè ibuang ia mi dunia, iletlet mo daberru sienggo menubuhken anak i. 12:14 Tapi enggo kin ngo iberrèken dua kabeng manuk-manuk sipanggor daha simbellen kalohoon i, taba daberru i, asa ngkabang ia mi bekkasna i padang gurun, asa ulang dapet naga i ia. I padang gurun i mo ia ipehèdu-hèdu tengah empat tahun dekkahna. 12:15 Ukum naga i, iborsikken mo laè mbuè kalohoon taba daberru i, asa giam ianun laè i ia nemmuken. 12:16 Tapi iurupi tanoh i ngo daberru i, ipengangang tanoh i mo babahna, itellen mo laè siniborsikken naga i. 12:17 Punguren mo naga i taba daberru i, gabè laus mo ia mengèkutken tading-tadingen daberru i, imo karina kalak simenguèi kata Dèbata janah simerkettoken mi sukuten bai Dèbata nai sinibagahken Jesus. 12:18 Nai cènder mo naga i, i biding laut.
13:1 Nai kuidah nola mo sada binatang remuar i laut nai. Sipuluh ngo tandukna, pitu takalna. Ipas gennep tanduk i lot ngo rudang janah i gennep takalna i lot tersurat sada gerar pengelèaiin taba Dèbata. 13:2 Tosè bagè biahat ngo rupa binatang i, nèhèna bagè nèhè geppul; muncungna bagè muncung singa. Iberèken naga sikuidah i lebènkenna imo gegohna dekket tahtana bai binatang i. 13:3 Sada ipas takal binatang sipitu i nai, enggo bagè sikenna luka mbakat kin pana, tapi enggo pana njuah. Ièkut-èkut suberri dunia èn ngo ia ninganna lengang. 13:4 Isembah kalak i mo naga i, kumarna iberrèken kuasana taba binatang i janah isembah kalak i ma ngo bak binatang i, nina mo, "Isè mo tosè bagè binatang i! Janah isè ngo ndorok mengalosa!" 13:5 Ipadiat ngo binatang i mengeruapken kata gegah mengellèai Dèbata, janah iberrèken ngo kuasa bana lako memerèntah empatpuluh dua bulan dekkahna. 13:6 Nai imulai mo mengellèai Dèbata bak gerar Dèbata dekket bekkas Dèbata soh mi karina kalak simerian si ni sorga. 13:7 Ipaduè ma ngo ia mengalo ummat Dèbata janah memmaing mèla taba kalak i. Iberrèken ma ngo bana kuasa lako mengerajai marga, kaum bak perkataan dekket bangsa pè. 13:8 Isembah karina singgelluh pengisi tanoh èn ngo binatang i. Laènken kalak sienggo tersurat gerarna i lapihen kenggelluhen i, imo sienggo gabè milik Anak Biri-biri sienggo tersembellih i. 13:9 Kumarna i, mula merpendengkoh ngo kènè, beggèken kènè mo sukuten èn, 13:10 "Barang isè mennaban kennah tertaban ngo, janah barang isè memmunuh merkitè peddang, kennah terbunuh ma ngo merkitè peddang. Jadi ukum ummat Dèbata kennah mbingit ngo janah sètia." 13:11 Enggo kessa i, kuidah nola mo lot binatang remuar i tanoh i nai. Dua ngo tandukna, bagè tanduk anak biri-biri. Ukum sorana bagè sora naga ngo. 13:12 I lebbè binatang perlebbè i ipakè ia ngo kuasa mbellen sinijalona tarap binatang idi nai ma. Karina tanoh en bak kerina simerian i babona, ipaksa lako menembah binatang siperlebbè i, sienggo njuah ugahna mbakat i. 13:13 Ihanaken binatang sipeduaken i ngo tanda kelengangen i hadeppen jelma nterrem i janah susur ngo api i langit nai ibaing mi tanoh i. 13:14 Ilalingken ngo kalak simerian i tanoh i merkitè tanda kelengangen nibaingna i hadeppen binatang perlebbè i. Idokken ngo taba kalak i karina asa memmahan mèjan lako pesangapken binatang sienggo luka ibaing peddang i, tapi tong dèng nggelluh. 13:15 Iberrèken ma ngo kuasa taba binatang sipeduaken i lako menempulken kessah kenggelluhen taba mèjan i, asa gabè ndorok mengerana janah memmunuh karina kalak siso uè mersembah tabasa. 13:16 Karina ngo kalak singkèdèk barang simbelgah sibèak barang sincor, hamba barang anak asal ipaksa binatang i ngo menjalo pertandaan i tanganna kamuhun barang i perdempakenna. 13:17 Isè poda ndorok merdèa bak mennokor barang kadè pè, ukum oda lot bana pertandaan i, imo gerar binatang i sendiri barang pè nomor magahken gerar binatang i. 13:18 Isèn mo perlu kebijaken lako memmikiri lapaten ipas nomor binatang i nai, ai gerar sada kalak jelma ngo i. Ukum nomor idi, ennem ratus ennempuluh ennem.
14:1 Enggo kessa bagidi menengen mo aku, gabè kuidah mo Anak Biri-biri i cènder i Delleng Sion. Lot ngo i sidi rebbak dekketsa seratus empatpuluh empat ribu kalak sienggo lot tersurat gerar Anak Biri-biri i dekket gerar BapaNa i perdempakenna. 14:2 Nai kudengkoh mo sora i langit nai gumeruhguh bagè sora sampuren dekket bagè sora renggur purpar bagi. Lot ma ngo sora i bagè sora oning-oning dengkohen sinderrang igerrit perkucapi kucapina. 14:3 I hadeppen tahta dekket pernggelluh siempat bak pengendeng simencingkoi tahta i, iendèken seratus empatpuluh empat ribu kalak idi ngo endè rembaru. Oda terguruken barang isè endè i, laènken seratus empatpuluh empat ribu kalak i. Kalak i ngo sienggo itebbus i tanoh i nai. 14:4 Kalak i ngo anak laki tulèn siso pesaorken dirina taba daberru; tulèn ngo kalak i bagè sitertatakken rambu-rambu dèng. Dak ièkutken kalak i ngo Anak Biri-biri i barang dempak dikè pè laus. Kalak i ngo sienggo itebbus mahan pertebbennaan i suberri kejelmaan nai bai Dèbata dekket bai Anak Biri-biri i. 14:5 Oda nung merluap kalak i, janah oda lot sitikasen bai kalak idi. 14:6 Nai kuidah mo sada malaèkat sidèban ngkabang ndates kalohoon. Iembah ngo Sukuten Kelluahen siamman sumendah i sinaing bagahenkenna mi dunia èn taba gennep bangsa, marga, kata dekket kaum. 14:7 Dak pingko-pingko ngo malaèkat i, "Kebbiari kènè mo Dèbata janah poji kènè mo kessangapenNa i! Enggo dapet tikkina mendabuh hukum Dèbata taba jelma. Sembah kènè mo Ia situmempa langit, tanoh dekket karina takal laè!" 14:8 Nai mengèkut nola ma mo malaèkat peduaken pingko-pingko, "Enggo tumpat, enggo tumpat kuta Babel simbellen i! Enggo mabuk karina bangsa ibakin merkitè anggur -- imo anggur cubellek luhlah bak perlangkah julu meddemenken!" 14:9 Nai mengèkut nola ma mo sada kalak malaèkat sipetelluken taba malaèkat sidua kalak i ninganna pingko-pingko, "Barang isè mersembah taba binatang i dekket taba gombarenna, barang tah lot bana pertandaan binatang idi i perdempakenna bang i tanganna pè, 14:10 kennah mènum ngo ia ipas anggur pungur Dèbata nai sienggo iarirken mi bekkas pungurNa! Karina kalak i kennah isiksa ipas api dekket balèrang i hadeppen malaèkat-malaèkat Dèbata dekket i hadeppen Anak Biri-biri i. 14:11 Mercèmpul mo cèmber api peniksaan kalak idi i soh mi amman sumendah. Oda ngo mengadi-ngadi isiksa kalak i suntuk ari suntuk berngin kerna mersembah kalak i bai binatang i bak gombarenna pè dekket karina kalak simenjalo pertandaan gerar binatang i." 14:12 Sinderrang bagidi mo perlu mbingit ummat janah simenguèi Dèbata dekket kalak simenguèi Jesus. 14:13 Nai kudengkoh mo sora i sorga nai mendokken, "Suratken mo èn. Sayurntua ngo kalak simatè ibagasen Tuhan i mulai bagèndari nai." "Imo tuhu!" nina Tendi Dèbata mengaloi. "Mentadi mo kalak idi ipas ulanna nai janah ijalo mo buah perulanna i karina." 14:14 Nai kutengen mo, kuidah mo lot bagè hembun mbulan. Kundul ngo i babo hembun i sada kalak bagè jelma. Lot ngo rudang emmas i babontakalNa, janah i tanganNa lot sada sabi-sabi ntajem. 14:15 Nai karuar nola mo sada malaèkat sidèban i Bages Dèbata nai. Nggang ngo idiloken taba sikundul i babo hembun i, "Sabiken mo sabi-sabiMu janah perani mo bagèndari, ai enggo dapet tikkina peraniin; iperani mo dunia èn, ai enggo ntua!" 14:16 Jadi iambasken sikundul i hembun i mo sabi-sabiNa mi dunia èn, iperani mo dunia èn. 14:17 Nai kuidah nola mo sada kalak malaèkat sidèban remuar i Bages Dèbata nai i sorga, Ijèmak ma ngo sabi-sabi ntajem. 14:18 Enggo kessa i remuar mo sada kalak malaèkat sidèban, i langgaten pemèlèen i nai simerkuasa tersèngèt api. Nggang ngo idiloken taba simenjèmak sabi-sabi ntajem i, "Ambasken mo sabi-sabimu sintajem i, potiki mo buah kayu anggur ni tanoh i, ai enggo ntasak buahna!" 14:19 Iambasken malaèkat i mo sabi-sabina mi tanoh i janah ipotiki mo buah anggur i bennana nai, ipepulung mo i mi pengilangen anggur pungur ni Dèbata. 14:20 Iilang mo anggur idi i ruar kuta, gabè menjarir mo i pengilangen i nai daroh sanga tellu ratus batu daohna janah naing-naing dua mèter bagesna.
15:1 Enggo kessa i kuidah mo i langit tanda kelengangen lègan kalohoon. Lot mo pitu malaèkat menjèmak pitu kepersuken perpodi. Èn mo puncaNa pungur Dèbata. 15:2 Nai kuidah mo lot bagè cara cermin laut mersaor api. Kuidah ma mo cènder i biding laut cermin i kalak sienggo mennang meraloken binatang i bak gombarenna dekket meradepken kalak simertandaken gerarna merkitè bilangen nomorna. Icèkèp kalak i ngo kucapi niberrèken Dèbata bai kalak i. 15:3 Iendèken kalak i ngo endè si Musa, naposo Dèbata i dekket endè Anak Biri-biri i. Bagèen ngo endè kalak idi i, "Ialè Tuhan Perkuasa, mbelgah kalohoon janah kelengangen ngo karina nibakinMu! Raja ni karina bangsa, adil janah bennar kalohoon ngo karina pemaingMu! 15:4 Isè mo siso mengkebiari kono alè Tuhan? Isè mo kalak siso uè menukutken kebelgahenMu? Ai pellin kono ngo kessa simbadia karina bangsa roh menembah Kono kemulihken adil ngo hukumMu sienggo idah karina jelma." 15:5 Enggo kessa i kuidah mo mbuka Bages Dèbata dekket undung-undung bekkas Dèbata i bagasen. 15:6 Nai remuar mo malaèkat simenjèmak kepersuken sipitu i merolesken kaèn mbulan merèlèng-èlèng janah emmas ngo tutup i tentenna. 15:7 Nai sada kalak ipas pernggelluh siempat i nai memerrèken taba malaèkat sipitu i pitu caban emmas dom pungur Dèbata singgelluh i soh mi amman sumendah. 15:8 Nai dom cèmber kehejiin Dèbata mo Bages i oda terbengketten barang isè bages i sidekkah madèng pul kepersuken sipitu i, ibaing malaèkat sipitu kalak i.
16:1 Nai kudengkoh mo sora nggang kalohoon i Bages Dèbata idi mendokken taba malaèkat sipitu i, "Berkat mo kènè, orèken kènè mo isi caban sipitu sienggo dom pungur Dèbata i mi tanoh!" 16:2 Nai laus mo malaèkat perlebbè mengorèken isi cabanna mi tanoh i, gabè masa mo baroh meroha janah mpiah kalohoon taba kalak simenjalo pertandaan binatang i dekket taba kalak simenembah gombarenna. 16:3 Enggo kessa i, iorèken malaèkat sipeduaken i mo isi cabanna mi laut, nai gabè daroh simatè mo laut i; mermatèen mo karina singgelluh i laut i. 16:4 Nai iorèken malaèkat petelluken i mo isi cabanna i mi laè dekket mi takal laè, gabè daroh mo karina laè i. 16:5 Jadi kudengkoh mo sora malaèkat simengkuasai laè i bagèen, "Ntèger ngo karina nibakinmu alè simbadia, Dèbata bagèndari janah Dèbata bang arnia nai! 16:6 Enggo iorèken kalak i daroh Umat Dèbata dekket daroh nabi-nabi; bagèndari ibaing ko ngo kalak i mènum daroh. Situhuna patut ngo i bai kalak i." 16:7 Nai kudengkoh mo sora ipas langgaten pemèlèen idi nai mendokken, "Uè alè Tuhan Dèbata simenggem-nggemmi karinana, bennar janah sènteng ngo karinana hukummu!" 16:8 Enggo kessa i, iorèken malaèkat peempatken mo isi cabanna mi mataniari, gabè ipaduè mo mataniari i mengelettup jelma merkitè kininggarana kalohoon i. 16:9 Gabè messeng mo jelma i kemulihken nggarana, nai isumpahi jelma i mo gerar Dèbata simerkuasa menenges kepersuken i. Tukasi pè bagidi, laju ngo oda uè tobat kalak i janah oda uè pesangapken kebelgahen Dèbata. 16:10 Nai iorèken malaèkat pelimaken i mo isi cabanna mi tahta binatang i, mèter gellap mo suberri kerajanna; nai dak pekekkerrep mo dakdak èpen kalak i kumarna mpiahna. 16:11 Jadi dak isumpahi kalak i mo Dèbata i sorga kemulihken mpiahna iakap dekket kumarna baroh kalak idi i. Tapi laju ngo oda uè tobat kalak idi ipas pengelakona jahat i nai. 16:12 Enggo kessa i, iorèken malaèkat peennemken mo isi cabanna mi laè Euprat simbellen i. Marsak mo laè i, gabè ndorok mo raja i kebincaren nai merdalan arap i. 16:13 Nai kuidah mo tellu tendi jahat bagè tekkuk rupana, remuar i babah naga i nai, i muncung binatang i nai i babah nabi palsu i nai. 16:14 Tendi sètan ngo kalak i simemmaing tanda kelengangen. Idahi tendi sitellu i ngo karina raja ni suberri dunia èn, lako pepulungken kalak i mergeraha i Ari mbellen i, imo Ari Dèbata simenggem-nggemmi karinana. 16:15 "Dengkohken mo! Roh mo aku bagè penangko! Sayurntua ngo kalak sindungo janah menjamotken olesna, kerna oda uè ia merdalan mak meroles, asa ulang gabè mèla ia i hadeppen sinterrem!" 16:16 Nai ipepulung tendi-tendi i mo raja-raja i mi sada bekkas mergerar Harmagedon ukum i kata Heber. 16:17 Enggo kessa bagidi, iorèken malaèkat pepituken mo isi cabanna mi abang-abang. Jadi terdengkoh mo sora nggang kalohoon i tahta si ni Bages Dèbata i nai mendokken, "Enggo pul!" 16:18 Nai masa mo siksak pelian, janah dumegger-degger mo dunia èn. Oda nung dèng masa rènur bagi, kessa nai ihanaken Dèbata jelma. Idi mo rènur simahantuna! 16:19 Gabè bellah tellu mo kuta mbellen i janah megargar mo karina kuta bak nagerri i suberri dunia èn. Jadi ièngèt Dèbata mo kuta Babel simbellen i. Iberrèken Dèbata mo ia mènum anggur i caban anggur Dèbata nai -- imo anggur pungur dekket laga. 16:20 Gabè mperrus mo karina pulo janah mersep mo karina delleng. 16:21 Merdabuhen mo baho mbellen-mbellen berrat-berrat limapuluh kilo i langit nai mendempangi jelma, nai gabè isumpahi jelma i mo Dèbata kumarna simpersuk merkitè baho i.
17:1 Enggo kessa i, roh mo mendahi aku sada kalak malaèkat sipitu i, nina mo, "Roh mo kono, asa kutuduhken bamu bakunè cara hukumen taba perlangkah julu meddem i, imo kuta mbellen sinipajek i gembar laè. 17:2 Ai merlangkah julu meddem ngo raja-raja dunia èn rebbak dekketsa, janah gabè mabuk ngo pengisi tanoh èn kerna mènum anggur perlangkah julu meddemenkenna i." 17:3 Nai iembah malaèkat i mo aku i bagasen tendi mi padang pasir. Jadi kuidah mo i sidi sada kalak daberru kundul i babo sada binatang mbara sol janah dom gerar-gerar pengelèaan mi Dèbata ngo binatang i. Pitu ngo takalna janah sipuluh ngo tandukna. 17:4 Ukum daberru i kelabu ngo rupa bajuna dekket mbara sol janah itiktik dekket emmas bak intan dekket mutiara. Ijèmak ngo i tanganna caban emmas dom simellamun dekket sikotor ipas luhlahna idi nai. 17:5 Tersurat ngo ipas perdempakenna sada gerar rusia, imo, "Babel Simbelgah i, inang ni karina perlangkah julu meddem dekket karina pengelako luhlah i dunia." 17:6 Nai kuidah mo mabuk daberru i kemulihken daroh ummat Dèbata dekket daroh sinibunuh kumarna menguèi Jesus. Jadi lengang kaloon mo aku mengidah daberru i. 17:7 Nai nina malaèkat i mo taba aku, "Kasa lengang kono? Kubagahken mo bamu rusia daberru i dekket rusia binatang nipasangna i, imo binatang simertakal pitu bak mertanduk sipuluh i. 17:8 Nggelluh ngo arnia binatang i, tapi enggo matè ukum bagèndari. Sigejap nai remuar mo ia i napa kemmatèen i nai janah laus mi kemogoon. Lengang mo ukur jelma pengisi dunia èn siso tersurat gerarna (sinderrang makdèng kin ihanaken dunia èn) ipas bukku kenggelluhen i, mengidah binatang i. Ai nggelluh kin ngo arnia binatang i, tapi ukum bagèndari mak nèngè lot, tapi naing taridah nola mo ia mengolihi. 17:9 Isèn perlu ngo pengantusiin. Ukum takal sipitu i, imo pitu delleng bekkas daberru i kundul. Janah pitu raja ngo i, 17:10 lima raja bai kalak i nai enggo mo tumpat, sada tong dèng memerèntah, janah sada nai madèng roh. Tapi roh kessa ia luas, mengerajai mo ia sigejap. 17:11 Ukum binatang sipernah nggelluh i arnia, tapi oda nè lot ukum bagèndari, imo raja peualuhken, sada raja ipas sipitu i nai, bagèndari enggo berkat mi kemmagoon. 17:12 Ukum sipuluh tanduk niidahmu idi, imo sipuluh raja, tapi madèng memerèntah. Tapi iberrèken mo kuasa bai kalak i lako memmerèntah rebbak dekket binatang i sada jom dekkahna. 17:13 Dos ngo hendak raja si sipuluh i; ipesakat kalak i ngo gegohna dekket kuasana taba binatang i. 17:14 Mergaraha mo kalak i dempak Anak Biri-biri i bak denganna sienggo idilo dekket nipilihna i. Tapi italuken Anak Biri-biri i bak denganNa i ngo kalak idi, ai Tuhan ni karina tuan janah Raja ni karina raja ngo Anak Biri-biri i." 17:15 Nai nina malaèkat i dèng ma, "Ukum laè siniidahmu idi, imo bekkas kundul perlangkah julu meddem, imo bangsa-bangsa, pulungen mbellen, marga dekket kata. 17:16 Ukum sipuluh tanduk dekket binatang siniidahmu i, ceggo ngo atèna midah perlangkah julu meddem i. Irampasi kalak i mo karina milik perlangkah julu meddem i, janah gabè sabar mo perlangkah julu meddem idi ibakin kalak i. Ipangan kalak i mo jukutna janah itutungi mi api. 17:17 Ai enggo idungkul Dèbata ukur kalak i lako pessautken lemmo atè Dèbata. Ipersada Dèbata ngo ukur kalak i lako merrèken kuasana taba binatang i, asa mengerajai binatang i soh mi saut karina sinidokken Dèbata. 17:18 Ukum daberru si niidahmu idi, imo kuta mbellen simemerèntah karina raja si ni tanoh èn."
18:1 Enggo kessa i, kuidah mo sada kalak malaèkat sidèban susur i sorga nai. Mbelgah ngo kuasana. Kumarna cuhayana, ncihur ngo suberri dunia èn ibaing. 18:2 Nggang kalohoon ngo idiungken, "Enggo tumpat Babel simbellen i! Enggo tumpat daberru i! Bekkas sètan dekket tendi jahat ngo ia, janah ranjang-ranjang manuk-manuk si nikecegoken jelma. 18:3 Karina bangsa enggo mengènum anggur pengellakona luhlah i, janah raja-raja dunia èn enggo merlangkah julu meddem dekketsa. Enggo bèak karina pertiga-tiga i suberri dunia èn kemulihken nipergeddo dagingna siso terantaken i." 18:4 Nai kudengkoh mo sora sidèban i sorga mendokken, "Karuar mo kènè alè ummatKu! Karuar mo kènè ibagasenNa nai! Ulang mo ièkutken kènè dosa-dosana i, asa ulang dekket kènè menggongken hukum simengenna bana! 18:5 Ai enggo mertinèncuk dosana soh mi langit, janah enggo ièngèt Dèbata karina kejahatenna i. 18:6 Balesken kènè mo bana tosè bagè pemmaingna i bai ndènè; balesken kènè mo dua kali lempit bana, bales ni karinana pemmaingna i. Baing kènè mo perrènumenna dua kali lempit lebbih mperngis dari pada ènumen si nipènumkenna bai ndènè. 18:7 Baing kènè mo bana kinidersa dekket kinipersuk dos buèna bagè kesangapen dekket kiniduma si ni abinkenna mi dirina, ai dak nina ngo mi dirina, 'Aku ngo raja, oda mbalu Aku, oda kurasai bonek!' 18:8 Kumarna naidi ngo asa ipas sidari roh olpek bana -- persakiten, bonek bak lèhè. Itutung mo ia ibas api, ai sondel ngo kuasa Tuhan Dèbata simenghukumsa." 18:9 Karina raja si ni tanoh èn sienggo dengan daberru i mengulaken luhlah dak menangisi kuta i, mula idah kalak i kessa mo mercèmpul cèmber i api simengelettupsa i nai. 18:10 Ndaoh-ndaoh mo kalak i cènder, ai mbiar ngo ia kenna kepersukenna i, janah nina mo, "Inang ngalè nang, sondel kinipersuk ngo mengenna taba -- kuta Babel sitermurmur janah kuta ntegguh i! Ibagasen sada jom sambing ngo roh hukum lako petumpatken kono!" 18:11 Pertiga-tiga ni dunia èn pè tangis mo janah bonek kumarna oda nèngè lot menokor tiga-tiga kalak i. 18:12 Oda lot nèngè menokor emmas, pirak, intan dekket mutiara kalak idi i; bagi ma dekket kaèn linen, kaèn mbara, sutera bak kaèn mbalo, bagi ma dekket kayu maharga, gading bak barang-barang kayu maharga, tembaga, bessi dekket marmar; 18:13 kulit manis, rempah ratus, pemurpuri, minak mur bak kemenjen; kuda bak kurèta, katoban bang jelma pè. 18:14 Nina pertiga-tiga i mo taba daberru i, "Karina sinaing imiliki kono, oda ngo lot nèngè, janah karina si nikecemmalkenmu dekket kinimendèmu enggo mo mersep. Oda nèngè jumpa kono i!" 18:15 Pertiga-tiga sienggo gabè kaya jong i kuta i nai gabè ndaoh-ndaoh mo ia cènder, ai mbiar ngo kalak i dais mi kinipersuk kuta i. Dak tangis ngo kalak i janah merhendem, 18:16 nina ngo, "Nong ngalè nang, cilakana i kuta sitermurmur i! Ncemmal kin ngo ko merpakèen linen janah meroles mbara mbèrèng, dakdak kin ngo kono memakè emmas, intan bak mutiara pè! 18:17 Keppèken ibagasen sada jom sambing ngo enggo mo mago karina kinibèakna i!" Ndaoh-ndaoh nai ngo cènder juru mudi dekket pesisir, bak perkeppel dekket karina simencari i laut, 18:18 janah dak mendilo-ndiloken tikan idah kalak i mercèmpul cèmber api simengelettup kuta i, nina mo, "Oda lot i dikè kuta bagè kuta mbellen èn!" 18:19 Nai icircirken kalak i mo cirabun mi babontakal mahan tanda bonek, ninganna derru-derru, "Nong ngalè nang cilakana i kuta mbellen èn! Kinibèakna i ma ngo makinken kalak perkeppel i laut gabè kaya, keppèken ibagasen sada jom sambing, enggo mersep bana nai karinana!" 18:20 Mersampang atè mo kono alè sorga, dekket kènè alè ummat Dèbata, bagi ma rasul-rasul dekket nabi-nabi pè, ai enggo ibalesken Dèbata hukum bana mahan bales sinibakinna i bai ndènè! 18:21 Enggo kessa i, ipekèkè sada malaèkat mergegoh mo sada batu -- mbellen nasa lessung mbellen -- ibentirken mo i mi laut, ninganna idokken, "Bagèen ngo carana kuta Babel sitermurmur idi ibentirken gabè oda jupa nèngè. 18:22 Oda nèngè terdengkoh i tengah-tengahmi sora kucapi dekket sora perendè bang sora sordam bak sarunè pè! Oda nè dapet i tengah-tengahmi kalak pandè meneppa, barang sora mennutu pè mak terdengkoh nèngè i sidi. 18:23 Oda lot idah dèba nèngè bendella togok i tengah-tengahmi; oda nèngè terdengkoh oang-oang tikan merbayo i sidi, ai enggo sap i suberri dunia èn pertiga-tigamu janah kemulihken kedatunmu ikilang kono ngo karina bangsa ni tanoh èn!" 18:24 Ihukum pè Babel i, kumarna terdapet ngo i kuta i daroh nabi-nabi, daroh ummat Dèbata -- dekket daroh karina siterbunuh i dunia èn.
19:1 Enggo kessa i kudengkoh mo sora merdengung bagè sora jelma nterrem i sorga nai dak mendilo-ndiloken, "Halèluya! Bai Dèbatanta ngo kelluahen, kemuliaan dekket kuasa! 19:2 bennar janah sènteng ngo hukumNa! Enggo idabuh hukum taba perlangkah julu meddem mbellen i, sienggo mencèdai dunia èn merkitè perulanna luhlah i. Enggo ihukum Dèbata Ia, bales kumarna ibunuh kalak i naposo Dèbata." 19:3 Nai nina jelma nterrem i dèng ma, "Halèluya! Mercèmpul ngo mi dates cèmber simengelettup kuta i soh mi amman sumendah!" 19:4 Nai tangkep mo pengulu siduapuluh empat i dekket pernggelluh siempat simencingkoi tahta i lako mersembah taba Dèbata sikundul i tahta i. Nina kalak i mo, "Amèn, Halèluya!" 19:5 Nai terdengkoh mo sora i tahta i nai mendokken, "Poji kènè mo Dèbatanta alè kènè karina naposoNa dekket kènè karina simerkebiaren midah Dèbata, singkèdèk bang simbelgah pè!" 19:6 Enggo kessa i kudengkoh mo sora bagè sora jelma nterrem kalohoon bagè sora laè mbellen merdeggar janah purpar bagi, bagè sora renggur, nina mo: Halèluya! Tuhan Dèbatanta simenggem-nggemmi karinana i ngo bagèndari memmerèntah. 19:7 Lolo mo kita janah mersampang atè; sipoji mo kesangapenna i; kerna enggo dapet ari perbayonken Anak Biri-biri i, janah enggo merkebbas berru tokoren i. 19:8 Enggo iberrèken bana oles ndalit merkillong i mahan pakèen Pakèen ndalit merkillong idi imo pengelako mendè ummat Dèbata. 19:9 Nai nina malaèkat i mo taba aku, "Suratken mo èn; sayurntua ngo barang isè idilo mi pèsta perjejapen Anak Biri-biri i." Janah nina malaèkat i dèng ma, "Èn ngo kata bennar bai Dèbata nai." 19:10 Jadi tangkep mo aku i hadeppen malaèkat i naing mersembah, tapi mèter nina mo taba aku, "Ulang aku sembah kono, tapi Dèbata mo sembah! Aku pè denganmu naposo ngo janah tosè bagè kaka-anggimu sienggo menjalo sukuten bai Jesus nai!" Ai tendi ngo mendasdas nabi-nabi i mengkesaksiken tersèngèt Jesus. 19:11 Nai kuidah mo mbuka sorga janah remuar mo sada kuda putih. Ukum simemmasang kuda i mergerar Kettoken janah Persènteng ngo. Adil ngo ia mendabuh hukum bang ibas geraha pè. 19:12 Bagè nala api ngo mataNa janah merudang ngo takalNa. Iokirken ngo sada gerar ipas dagingna janah isè poda bettoh-bettohen i laènken Ia. 19:13 Merguyu daroh ngo jubahna. Gerarna idokken, "Kata Dèbata." 19:14 Ièkut-èkut balapergunggung sorga ngo Ia janah karina kalak i mengkunduli kuda putih bak meroles kaèn linen putih mersillak. 19:15 Karauar ngo i babahNa nai sada peddang ntajem kalohoon, janah merkitè peddang i ngo italuken karinana bangsa, janah iperèntah ngo kalak i merkitè tongket bessi. Ia ngo mengilang anggur ipas pengilangen anggur pungur Dèbata simenggem-nggemmi karinana. 19:16 Tersurat ngo gerarNa idi ipas jubahNa dekket ipas pahaNa, "Raja ni karina raja janah Tuhan ni karina tuan." 19:17 Nai kuidah mo sada kalak malaèkat cènder i babo mataniari. Nggang ngo idiloken taba karina manuk-manuk simerkabangen i, "Roh mo kènè pulung mi kerja mbellen nisukutken Dèbata! 19:18 Roh mo kènè kipangan jukut daging raja-raja, jukut daging pakalima-pakalima dekket jukut daging ummat manusia simbelgah bang singkèdèk pè, hamba barang siso hamba pè." 19:19 Nai kuidah mo binatang i dekket raja-raja dunia èn bak balapergunggungna mertumpu lako geraha mengalo simemmasang kuda putih i bak balapergunggungNa. 19:20 Nai tertangkup mo binatang i rebbak dekket nabi palsu sienggo menghanaken tanda kelengangen i hadeppen binatang i. (Merkitè tanda kelengangen i ngo ikilang binatang i jelma sienggo lot pertanda binatang i bana, dekket kalak simenembah gombarenna.) Nai ibuang mo gelluh-gelluhen binatang i dekket nabi palsu i mi laut api barèrang mergollah-gollah. 19:21 Balapergunggungna i pè iripasken ngo merkitè peddang sikaruar i babah simemmasang kuda putih i nai. Jadi merrohen mo manuk-manuk kipangan jukut kalak siterbunuh i sanga bessuren.
20:1 Enggo kessa i kuidah mo sada kalak malaèkat susur i sorga nai. Ijèmak ngo i tanganna anak konci napa kemmatèen dekket sada rantè mbellen. 20:2 Nai itangkup mo naga i, nipè sinderbi -- imo Sibolis barang Sètan i -- irantè mo ia seribu tahun dekkahna. 20:3 Idabuh malaèkat i mo naga i mi lembeng kemmatèen. Ikonci mo luhung i janah isègèl, asa ulang ndorok nèngè naga i mengkilang jelma ukum makdèng salpun seribu tahun dekkahna. Enggo kessa pè leppas seribu tahun i asa ipaluah nola ia sinempas. 20:4 Nai kuidah mo tahta dekket jelma sikundul i babo tahta i; iberrèken mo bai kalak simengkunduli tahta-tahta i kuasa lako menghukum. Kuidah ma mo dekket tendi jelma sienggo ipancong takalna kemulihken mengindangken Jesus dekket kata Dèbata, imo kalak siso mersembah taba binatang i, barang pè menjalo pertanda binatang idi i perdempakenna bang pè i tanganna. Mengolihi nggelluh ngo kalak i janah mengerajai rebbak dekket Kristus seribu tahun dekkahna. 20:5 Èn mo perlebbè ipegelluh i simatè nai. (Tapi ukum simatè sidèbankenna i oda dèng ngo ipegelluh sidekkah seribu tahun i.) 20:6 Sayurntua janah terpasu-pasu ngo kalak sidekket ipegelluh perlebbè i simatè i nai. Ai oda terkekadè kematèen pedua kaliken i nèngè kalak i. Gabè imam Dèbata dekket imam Kristus ngo kalak i tupèh; janah mengerajai dekket Kristus seribu tahun dekkahna. 20:7 Enggo kessa dung tikki seribu tahun i, ipaluah nola mo Sibolis i, i kurungen i nai, 20:8 jadi laus mo ia mengkilang karina bangsa silot mèrap i suberri dunia èn, imo Gok dekket Magok. Ipepulung Sibolis i mo kalak i lahlah kalohoon oda terbilangen buèna lako berkat mergeraha. 20:9 Nai kadap mo kalak i mi suberri tanoh èn, ikubu kalak i mo kuta gotting i mo kuta ummat Dèbata dekket kuta si nikekellengen Dèbata i. Tapi roh mo api i langit nai lako mengeradasken kalak i. 20:10 Jadi idabuh mo Sibolis simengelalingken kalak idi i mi laut api mercampur barèrang. Imo bekkas binatang dekket nabi palsu idi i buang arnia. Isiksa mo kalak idi i sidi mahar dekket berngin oda mengadi-ngadi soh mi amman sumendah. 20:11 Nai kuidah mo sada tahta mbelgah, mbulan rupana. Kuidah ma mo dekket ia kundul i baboNa. Mersep mo langit dekket tanoh i hadeppenna, gabè oda teridah nèngè. 20:12 Nai kuidah mo kalak sienggo matè i simbelgah bang singkèdèk rebbak cènder i lebbè tahta i; jadi ibuka mo lapihen-lapihen. Nai ibuka mo lapihen sidèban, imo lapihen kalak singgelluh. Ihukum mo kalak sienggo matè i, rembang mi pengellakona bagè sitersurat ibas lapihen i. 20:13 Nai iberrèken laut i mo jelma silot matè ibagasenna. Iberrèken kemmatèen dekket napa kemmatèen i mo jelma sienggo matè silot bana, gabè ihukumi mo kalak i rembang mi perulanna gennep. 20:14 Nai idabuh mo kemmatèen dekket napa kemmatèen i mi laut api. (Kemmatèen pedua kaliken i ngo laut api i.) 20:15 Karina jelma siso tersurat gerarna ibas lapihen jelma nggelluh, ibuang ngo i karina mi laut api i.
21:1 Nai kuidah mo langit sirembaru dekket tanoh rembaru, ai enggo salpun langit dekket tanoh siperlebbè i; laut i pè oda ngo lot nèngè. 21:2 Jadi kuidah mo kuta simbadia i, imo Jerusalem sirembaru susur i sorga bai Dèbata nai. Enggo kin ngo ikebbasi kuta idi bagè berru tokoren sienggo iuras lako mendapetken sinibalèna. 21:3 Nai kudengkoh mo sora i tahta i nai nggang mendiloken, "Ukum bagèndari rebbak mo Dèbata dekket jelma! Rebbak nggelluh mo Dèbata dekket kalak idi, janah gabè ummat Dèbata mo kalak i. Mersaor mo Dèbata sendiri dekket kalak i janah gabè Dèbata kalak i mo Dèbata. 21:4 Iapusi Dèbata mo èluh kalak idi i matana nai. Oda lot nèngè kemmatèen i sidi, ai enggo salpun karinana siperlebbè i." 21:5 Nai nina sikundul i tahta i mo, "Tengen mo karinana ngo Kuperembaru bagèndari!" Janah idokken mo taba aku, "Suratken mo èn, ai tuhu ngo rana èn janah kettoken!" 21:6 Nina dèng ma taba aku, "Enggo saut! Aku ngo Tuhan benanna soh mi puncana, Aku ngo Perlebbè dekket Perpodi. Barang isè muasen Kuberrèken mo ia mènum i laè mul kenggelluhen i nai oda pella mennokor. 21:7 Ijalo simennang i ngo karinana bangKu nai. Aku ngo gabè Dèbatana janah ia gabè dukakKu. 21:8 Tapi ukum kalak simendellè, kalak siso tettap percaya, kalak simerbalik, pemmunuh, perlangkah julu meddem, kalak simemmakkè kinangguruun, kalak simenembah gana-ganaan, dekket karina perluap, ijalo mo bagianna, imo laut api dekket barèrang sidak mergollah-gollah, imo kemmatèen pedua kaliken i." 21:9 Nai roh mo mendahi aku sada kalak ipas malaèkat sipitu simenjèmak pitu caban sienggo dom kepersuken perpodi i, nina mo taba aku, "Roh mo kono, asa Kutuduhken bamu sinibages Anak Biri-biri i." 21:10 Nai ikuasai Tendi Perbadia mo aku janah iembah malaèkat i mo aku mi babo delleng ndates kalohoon. Ituduhken mo taba aku Jerusalem kuta simbadia i, susur i sorga nai bai Dèbata nai, 21:11 merdenganken oang-oang bak kesangapen Dèbata. Merkillok-killok ngo kuta i bagè batu intan simahargana, bagè batu jaspis janah nciho bagè kaca. 21:12 Ndates janah mbelgah ngo pagar kuta i, sipuluh dua ngo pèntuna, janah sipuluh dua ma ngo malaèkat menjaga babah pèntu i. Isuratken ngo i tekkang pèntu i marga Israel sisipuluh dua i. 21:13 Tellu pèntu mendempak mi kebincaren, tellu mendempak mi selatan, tellu mendempak mi utara janah tellu nai mendempak mi kesunduten. 21:14 Sipuluh dua ngo batu cendi kuta i. Ipas batu cendi i tersurat gerar sisipuluh dua rasul ni Anak Biri-biri i. 21:15 Icèkèp malaèkat sikirana dekket aku i ngo sada tongket emmas mahan sibar-sibar kuta i bak pèntuna dekket parikna. 21:16 Empat soki ngo kuta i -- dos ngo henjurna dekket bekkangna. Isibar malaèkat mo kuta i merkitè tongket i, gabè dapet mo henjurna dua ribu empat ratus sipuluh lima batu, datesna bak bekkangna dos ngo mi henjurna i. 21:17 Isibar malaèkat i mo dates pagarna, dapet mo ennempuluh mèter. Dos ngo sibar-sibar nipakkè malaèkat i dekket nipakkè jelma. 21:18 Batu jaspis ngo pagar kuta i; ukum kuta i ipas emmas matah nai ngo karina tosè bagè kaca. 21:19 Itiktik ngo batu cendi kuta i dekket matcam bagè batu maharga. Ukum batu cendi perlebbè, batu jaspis ngo idakdak, sipeduaken batu nilam, sipetelluken batu mirah, sipeempatken batu zamrud, 21:20 sipelimaken batu unam, sipeennemken batu sardis, sipepituken batu ratna cempaka, sipeualuhken batu pirus, sipesibahken batu topas, sipesipuluhken batu krisopras, sipesebelasken batu lazuardi, janah sipeduabelasken batu kecubung. 21:21 Ukum pèntuna sisipuluh dua i, i batu mutiara nai ngo ibahan; gennep pèntu ibaing i sada batu mutiara nai. Ukum dalan mbellen i kuta idi, ipas buradda nai ngo ibaing ncerling bagi. 21:22 Oda kuidah Bages Dèbata ibagasen kuta i, ai Dèbata Tuhan simenggem-nggemmi karinana i dekket Biri-biri i sendiri ngo Bages Dèbata i sidi. 21:23 Oda perlu cuhaya mataniari bak cuhaya bulan menendangi kuta i, ai cuhaya Dèbata ngo menendangi kuta i janah Anak Biri-biri i ngo lampuna. 21:24 Merdalan ngo bangsa-bangsa ni dunia èn ibagasen cuhayana janah karina raja merembah kinibèakna mi kuta i. 21:25 Mbuka ngo pèntu kuta i suntuk ari, ai oda lot nèngè berngin i sidi. 21:26 Kesangapen dekket kekayaan bangsa-bangsa pè iembah ngo mi kuta i. 21:27 Tapi ukum kalak simengulaken ulaan kotor, kalak perluap -- oda ipaduè mbengket mi kuta i, ai pellin kalak sienggo tersurat gerarna ipas lapihen Anak Biri-biri i ngo kessa ndorok mbengket mi sidi, imo ipas lapihen kenggelluhen i.
22:1 Nai ituduhken malaèkat i dèng ma mo taba aku laè kenggelluhen i, nciho kalohoon janah ncerling menjarir i tahta Dèbata nai dekket i tahta Anak Biri-biri i nai, 22:2 soh mi tengah ndalan mbellen ni kuta i. I biding laè i kacimbang lambung, lot ngo kayu kenggelluhen dak merbuah dua belas kali sitahun, imo gennep bulan. Ukum bulungna mahan daun pejuahken karina bangsa. 22:3 Oda lot i kuta i sikenna sumpah Dèbata. I kuta i ngo tahta Dèbata bak Anak Biri-biri i. I sidi ma ngo naposo Dèbata menguèi Dèbata, 22:4 janah idah kalak i mo abè Dèbata. Tersurat ngo gerar Dèbata i perdempaken kalak i. 22:5 Oda perlu bai kalak i lampu barang cuhaya mataniari pè, ai oda lot nèngè berngin i sidi, ai Tuhan Dèbata sendiri ngo menendangi kalak i. Nai rebbak memerèntah mo kalak i soh mi amman sumendah. 22:6 Nai nina malaèkat i mo taba aku, "Tuhu ngo kata èn janah kettoken. Tuhan Dèbata simemerèken Tendina taba nabi-nabi, Ia ma ngo mengutus malaèkatNa lako magahken mendahi naposona sinaing masa ndor èn." 22:7 "Peratè-atèken mo ènda!" nina Jesus. "Ndor mo Aku roh. Sayurntua ngo kalak simemperatè-atèken alamat sitersurat ibas bukku èn!" 22:8 Aku si Johanes ngo sienggo mendengkoh dekket mengidah karinana ènda. Enggo kessa dung kuidah janah kudengkoh, gabè tangkep mo aku mi hadeppen malaèkat simenuduhken karinana i taba aku, janah naing mersembah tabasa, 22:9 tapi nina mo taba aku, "Ulang ko mersembah taba aku! Dèbata mo sembah! Denganmu naposo ngo aku janah bagè kaka anggimu nabi-nabi i dekket bagè karina kalak simengeradum-radumi sipesèngèt ibas bukku èn!" 22:10 Nina dèng ma, "Ulang mo rusiaken sipesèngèt silot ibas alamat nibagasen bukku èn, ai enggo ndessing ketikana permasana i karinana. 22:11 Barang isè jahat, iempet mo maing jahat, barang isè melamun, makin ilamuni mo dirina, barang isè menguèi Dèbata janah barang isè nggelluh ibagasen Dèbata, terrus mo ia nggelluh ibagasen Dèbata." 22:12 "Radumi mo èn!" nina Jesus. "Oda ndekkah nèngè, roh mo Aku merembahken upah taba karinana jelma rembang mi sinibakinna. 22:13 Aku Alpa dekket Omèga, Bennana dekket puncana, Perlebbè janah Perpodi." 22:14 Sayurntua ngo barang isè simenaptapi olesna soh mpanting ai kalak i ngo kipangan buah kayu kenggelluhen i, janah mbengket mi bagasen kuta i arap pèntuna. 22:15 Tapi kalak simengulaken kinilèa dekket simerkinangguruun, dekket kalak luhlah, kalak pemunuh, kalak simenembah gana-gana dekket kalak perluap merkitè kata bak pemmahan, karinana sibagidi i ruar ngo bekkasna. 22:16 "Aku, Jesus ngo mengutus malaèkatKu mendahi kènè asa ibagahken karinana i taba kènè kuria-kuria. Aku ngo pinempar si Daud, Aku ngo bintang pelambuk simercala-cala i." 22:17 Nai nina Tendi Perbadia dekket Berru Tokoren i mo, "Roh mo kono!" Karina kalak simendengkoh i mendokken, "Roh mo kono!" Barang isè muasen, roh mo ia! Barang isè uè, itakui mo laè kenggelluhen i, oda pella mennokor! 22:18 Aku si Johanes, simengindangken karina sipesèngèt nibas alamat èn mendokken: Barang isè menambahi sitersurat ipas alamat èn, itambahi Dèbata mo bana tulbang marè-marè sitersurat ibas bukku èn. 22:19 Barang isè mengkurangi alamat èn, ikurangi Dèbata mo bana pasu-pasu silot ipas kayu simerrèken kenggelluhen i kuta simbadia i. 22:20 Nina simagahken simasa èn dèng ma, "I mo Tuhu! Ndor ngo Aku roh!" Amèn! Roh mo kono alè Tuhan Jesus! 22:21 Dak ipasu-pasu Tuhan Jesus mo kènè karinaNa ummat Dèbata! Amèn!