The New Testament of our Lord and Saviour Jesus Christ
1:1 Enda me terombo Jesus Kristus. Jesus e me kesusuren Daud, dingen Daud e me kesusuren Abraham. 1:2 Abraham e me bapa Isak; Isak e me bapa Jakup; Jakup e me bapa Juda ras senina-seninana; 1:3 Juda e me bapa Peres ras Sera (Tamar e me ndehara Juda); Peres e me bapa Hesron; Hesron e me bapa Aram; 1:4 Aram e me bapa Aminadap; Aminadap e me bapa Nahesson; Nahesson bapa Salmon; 1:5 Salmon e me bapa Boas (Rahap e me ndehara Salmon); Boas e me bapa Obet (Rut e me ndehara Boas); Obet e me bapa Isai; 1:6 Isai e me bapa Daud. Daud e me bapa Salomo (nande Salomo e me ndehara Uria nai); 1:7 Salomo e me bapa Rehabeam; Rehabeam bapa Abia; Abia bapa Asa; 1:8 Asa bapa Josapat; Josapat e me bapa Joram; Joram e me bapa Usia; 1:9 Usia e me bapa Jotam; Jotam e me bapa Ahas; Ahas e me bapa Hiskia; 1:10 Hiskia e me bapa Manase; Manase e me bapa Amon; Amon e me bapa Josia; 1:11 Josia e me bapa Jekonia ras senina-seninana. Kalak enda nggeluh i bas paksa Israel i buang ku Babil. 1:12 Kenca lepas paksa pembuangen i taneh Babil e, ipupus Jekonia si Sealtiel; Sealtiel e me bapa Serubabil; 1:13 Serubabil e me bapa Abiud; Abiud e me bapa Eliakim; Eliakim e me bapa Asor; 1:14 Asor e me bapa Sadok; Sadok e me bapa Ahim; Ahim e me bapa Eliud; 1:15 Eliud e me bapa Eleasar; Eleasar e me bapa Mattan; Mattan e me bapa Jakup; 1:16 Jakup e me bapa Jusup; Jusup e me perbulangen Maria. Arah Maria me tubuh Jesus si igelari Mesias si ipadanken Dibata. 1:17 Jadi i bas Abraham nari seh ku paksa Daud lit sepuluh empat kesusuren; janah i bas paksa Daud nari seh ku paksa pembuangen bangsa Israel i taneh Babil lit sepuluh empat kesusuren, janah i bas paksa pembuangen i taneh Babil nari seh ku paksa Kristus tubuh lit sepuluh empat kesusuren. 1:18 Kerna ketubuhen Jesus Kristus, bagenda me: Maria nande Jesus ertunangen ras Jusup. Tapi ope denga erjabu Maria enggo mehuli kulana arah Kuasa Kesah Si Badia. 1:19 Jusup tunangen Maria e kalak bujur. Labo lit sura-surana ngaduken Maria gelah ola mela iakap Maria. Saja ngenca ersura-sura ia nirangken Maria alu sinik-sinik. 1:20 Tapi asum ia rukur-rukur kerna si e, teridah man bana malekat Dibata arah nipina. Nina malekat e man bana, "O Jusup, kesusuren Daud, ola kam mbiar muat Maria jadi ndeharandu. Sabap anak si lit i bas bertinna e jadi erkiteken kuasa Kesah Dibata. 1:21 Ipupusna pagi sekalak anak dilaki janah arus ibahanndu gelarna Jesus -- sabap Ia me pagi si nebusi bangsaNa i bas dosa-dosa nari." 1:22 Kerina si enda jadi gelah seh kai si ikataken Tuhan arah nabi nina, 1:23 'Singuda-nguda e pagi mehuli kulana, jenari ipupusna sekalak anak dilaki. Anak e pagi igelari Immanuel' (ertina: "Dibata ras kita"). 1:24 E maka kenca keke Jusup, ikutkenna kata malekat Tuhan e. Ialokenna Maria jadi ndeharana. 1:25 Tapi Jusup ras Maria langa erjabu, ipupusna anak dilaki. Kenca tubuh anak e ibahanna gelarna Jesus.
2:1 Jesus tubuh i kuta Betlehem i taneh Judea asum Herodes jadi raja. La ndekahsa kenca si e reh me ku Jerusalem piga-piga kalak guru i Timur nari. 2:2 Nungkun guru-guru Timur e nina, "I ja kin raja kalak Jahudi si mbaru tubuh e? Sabap idah kami bintangna i Timur, janah kami enggo reh guna nembah man baNa." 2:3 Megi kata e sengget kal Raja Herodes ras kerina anak kuta Jerusalem. 2:4 E maka ipepulung Raja Herodes kerina imam-imam si mbelin ras guru-guru agama Jahudi. Jenari nungkun ia nina, "I ja kin Mesias e tubuh?" 2:5 Ngaloi kalak e nina, "I kuta Betlehem i taneh Judea, sabap enggo isuratken nabi: 2:6 'O kam Betlehem i taneh Juda, labo kam kuta si kitikna i daerah Juda; sabap i bas kam nari reh me sekalak peminpin si mpermakani bangsaNgku bangsa Israel.' " 2:7 Kenca megi kai si ikataken e, idilo Herodes guru-guru i Timur nari e alu erbuni-buni. Jenari isungkunina ndiganai bintang e mulai teridah. 2:8 Kenca bage isuruhna guru-guru e lawes ku Betlehem. Nina, "Berkatlah janah pepayo alu mehuli i ja ingan anak e, janah adi enggo kam jumpa, beritaken man bangku, gelah aku pe ku jah nembah man baNa." 2:9-10 Kenca bage berkat guru-guru Timur e. Idahna ka bintang si enggo idahna mbarenda i Timur. La tanggung riahna ukurna ngidahsa. Bintang e erdalan arah lebena jenari ngadi tepat i babo ingan anak e. 2:11 E maka bengket ia ku bas idahna Anak ndai ras Maria, nandeNa. Jenari erjimpuh ia nembah man Anak e. Ibuatna erta-erta si ibabana e, jenari ipersembahkenna man Anak si mbaru tubuh e. Erta-erta si ipersembahkenna e, e me: emas, kumenen ras mur. 2:12 Perbahan ikataken Dibata man guru-guru e arah nipina gelah ola ia mulihken ndahi Herodes, e maka mulih ia arah dalan si deban ku negerina. 2:13 Kenca berkat guru-guru Timur e, teridah malekat Tuhan man Jusup i bas nipina. Nina malekat e man bana, "Kekeken, baba Anak e ras nandena mengongsi ku Mesir. I jahlah kam lebe seh aku erkata man bandu, sabap idarami Herodes anak enda janah ibunuhna pe atena." 2:14 E maka keke Jusup, janah i bas berngi e ibabana Anak e ras nandena ku Mesir. 2:15 I Mesir ia ringan seh Herodes mate. Kerina si enda jadi gelah seh kai si ikataken Tuhan arah nabi nina, "Enggo Kudilo AnakKu i taneh Mesir nari." 2:16 Asum ieteh Raja Herodes ia enggo itipu guru-guru si reh i Timur nari e, merawa-rawa kal ia. Isuruhna perajurit-perajurit munuhi anak-anak dilaki si lit i Betlehem ras sekelewetna. Anak-anak si ibunuhi umur dua tahun kuteruh. Enda icocokkenna ras dekahna bintang e enggo teridah bagi si ituriken guru Timur man bana. 2:17 Alu bage seh me kata si ikataken Nabi Jeremia nina, 2:18 "Lit sora terbegi i Rama, sora nderkuh dingen tangis ceda ate. Itangisi Rahel anakna, tangis ia janah lanai terapuli, sabap kerina anakna mate." 2:19 Kenca mate Herodes, teridah malekat Tuhan man Jusup i bas nipina asum ia i Mesir denga. 2:20 Nina malekat e man bana, "Kekeken, baba Anak e ras nandena mulih ku taneh Israel, sabap kalak si ersura-sura munuh Anak e enggo mate." 2:21 E maka keke Jusup, ibabana Anak e ras nandena mulihken ku negeri Israel. 2:22 Tapi kenca ibegi Jusup berita maka Arkelaus enggo jadi raja i negeri Judea, mbiar ia ku Judea sabap Arkelaus anak Herodes. Tole perbahan enggo ka ipersingeti Dibata ia kerna si e arah nipina, e maka lawes ia ku daerah Galilea. 2:23 Kenca seh ia i Galilea ibahanna jabuna i kuta Nasaret. Kerina enda jadi gelah seh kai si ikataken nabi-nabi nina, "Ia pagi igelari kalak Nasaret."
3:1 Paksa si e mulai me Johanes Peridiken encidahken dirina i gurun pasir Judea, janah iberitakenna kata Dibata nina, 3:2 "Jeralah i bas dosa-dosandu nari, sabap Kinirajan Surga enggo ndeher!" 3:3 Johanes Peridiken enda me maksud Nabi Jesaya sanga ikatakenna, "Lit sekalak erlebuh i taneh mesawang 'Sikapkenlah dalan Tuhan. Pepinter dalan man baNa!' " 3:4 Paken Johanes Peridiken e me: jubahna i bas mbulu unta nari, genditna i bas kuling-kuling nari. Nakanna: labang ras tengguli kerangen. 3:5 Jenari reh me ndahi ia kalak si ringan i Jerusalem, ras kerina kalak si ringan i daerah Judea bage pe kerina kalak si ringan i daerah sekitar Lau Jordan. 3:6 Kenca kalak si nterem ngakuken dosana, e maka iperidiken Johanes i Lau Jordan. 3:7 Tapi asum idah Johanes Peridiken nterem kalak Parisi ras kalak Saduki reh ndahi ia guna iperidiken nina Johanes Peridiken man bana, "O kam kesusuren nipe -- ise ngatakenca man bandu maka banci kam pulah i bas ukumen Dibata si reh pagi? 3:8 Tuduhken arah perbahanenndu tandana kam enggo jera. 3:9 Ola iakapndu banci kam ialemi alu ngataken, 'Kesusuren Abraham kap kami.' Kukataken man bandu Dibata ngasup njadiken batu-batu enda jadi kesusuren Abraham! 3:10 Kapak enggo sikap nektek batang kayu. Kerina batang kayu si la mehuli buahna itektek jenari iambekken ku api. 3:11 Tandana kam enggo jera, kuperidiken kam alu lau. Tapi reh me arah pudingku si lebih erkuasa asangken aku. Ngosari nali sepatuna pe la aku metunggung. Ia pagi mperidiken kam alu Kesah Si Badia ras api. 3:12 NdiruNa enggo sikap i bas tanNa guna miari. IpepulungNa page ku bas lumbung, tapi lapungna itamakenNa ku bas api si la ernimpet-nimpet." 3:13 Paksa e reh Jesus i Galilea nari ku Lau Jordan. Idahina Johanes Peridiken, jenari ipindona gelah Johanes mperidiken Ia. 3:14 Tapi Johanes Peridiken la nggit mperidikenca nina, "Aku nge aturenna iperidikenNdu; enda Kam ka ngadap man bangku!" 3:15 Ngaloi Jesus nina, "Labo dalih. Sabap alu bage sidalanken kai si ngena ate Dibata!" 3:16 E maka Johanes pe setuju meridiken Jesus. Kenca Jesus iperidikenna, ndarat Ia i bas lau nari. Rempet talang langit janah idahna Kesah Dibata nusur bagi nderapati ku baboNa. 3:17 Jenari terbegi sora i Surga nari ngatakenca nina, "Enda me Anakku si Kukelengi. Ia me si ngena ateKu."
4:1 Kenca bage Kesah Dibata mabai Jesus ku gurun pasir guna icubai Iblis. 4:2 Kenca empat puluh wari empat puluh berngi Jesus la man igejapNa melihe. 4:3 E maka reh Iblis ncubai Ia nina, "Erkiteken Kam Anak Dibata salihken dage batu enda jadi roti." 4:4 Ngaloi Jesus nina, "Lit kap tersurat i bas Pustaka Si Badia: Labo alu roti saja manusia enggeluh, tapi arah tep-tep kata si ibelasken Dibata." 4:5 Jenari ibabai Iblis me Jesus ku Jerusalem janah isuruhna Ia tedis i babo anjung-anjung Rumah Pertoton. 4:6 Jenari nina man Jesus, "Adi Anak Dibata kin kam, dabuhken man baNdu ku teruh, sabap lit tersurat i bas Pustaka Si Badia bagenda: 'Isuruh Dibata kap malekat-malekatNa reh njagai Kam, itatangna nge Kam alu tanna gelah naheNdu pe la terantuk ku batu.' " 4:7 Ngaloi Jesus, "Tapi lit tersurat i bas Pustaka Si Badia 'Ola cubai Tuhan Dibatandu.' " 4:8 Ibabai Iblis e ka Jesus ku deleng si seh kal ganjangna. Jenari ituduhkenna man Jesus kerina kerajan doni enda ras kinibayakenna. 4:9 Nina Iblis e man Jesus, "Kerina kerajan doni enda ras kiniulinna kubereken man baNdu, adi nggit Kam erjimpuh nembah man bangku." 4:10 E maka ngaloi Jesus nina, "Laweslah Iblis! Lit kap tersurat i bas Pustaka Si Badia: 'Sembahlah Tuhan Dibatandu, janah Ia saja ngenca patut man sembahen!' " 4:11 Kedungenna itadingken Iblis e Jesus; e maka reh malekat-malekat nampati Ia. 4:12 Kenca ibegi Jesus berita maka Johanes Peridiken enggo ipenjaraken, lawes Ia ku Galilea. 4:13 ItadingkenNa Nasaret e maka lawes Ia ringan i Kapernaum. Kapernaum e me sada kuta i tepi Dano Galilea, daerah Sebulon ras Naptali. 4:14 Alu bage seh me kai si ikataken Nabi Jesaya nina, 4:15 "Taneh Sebulon ras taneh Naptali, dalan kempak lawit, i lepar Lau Jordan, daerah Galilea si ni ingani kalak si labo bangsa Jahudi! 4:16 Kalak si ringan i bas gelap, enggo ngidah terang si mbelin e! Man kalak si ringan i bas taneh si ikuasai kematen enggo mbincar terang e!" 4:17 I bas paksa si e nari me ibenaken Jesus ngajar nina, "Jeralah kam i bas dosandu nari, sabap Kinirajan Surga enggo reh deherna." 4:18 Asum Jesus erdalan-dalan i tepi Dano Galilea, idahNa dua kalak si sembuyak sangana njala nurung. Si dua kalak e, e me Simon (igelari Petrus) ras Andereas. 4:19 Nina Jesus man bana, "Mari, ikutken Aku, maka Kuajari kam ndilo kalak si deban jadi ajar-ajarKu." 4:20 Minter itadingken kalak e jalana jenari ikutkenNa Jesus. 4:21 Asum iterusken Jesus erdalan, idahNa ka dua kalak si sembuyak. Si dua kalak e, e me anak Sebedeus, gelarna Jakup ras Johanes. Kalak enda i datas perahu ras bapana sangana pesikap jala. Asum idilo Jesus ia duana, 4:22 minter itadingkenna perahu e bage pe itadingkenna bapana. Jenari ikutkenna Jesus. 4:23 Isiari Jesus kerina daerah Galilea. Ngajar Ia i bas rumah-rumah pertoton dingen iberitakenNa Berita Si Meriah kerna Kinirajan Surga. IpepalemNa kerina penakit bage pe si mesui i bas daging kalak e nari. 4:24 Perbahanen Jesus e mbar beritana ku belang-belang negeri Siria seh maka nterem kalak ndahi Jesus. Itaruhken kalak man baNa kerina si penakiten. Erbage-bage penakit kalak si reh e; lit si setanen, lit si tabun, janah lit si pangpangen. Kerina ipepalem Jesus. 4:25 E maka nterem kal kalak si ngikut-ngikut Jesus; lit i Galilea nari, i Dekapolis nari, i Jerusalem nari; i Judea nari bage pe i daerah lepar Lau Jordan nari.
5:1 Kenca Jesus ngidah jelma si nterem, inangkihNa sada uruk. Kenca Ia kundul reh ajar-ajarNa pulung deherken Ia. 5:2 Jenari ibenakenNa ngajari ajar-ajarNa e. 5:3 Nina Jesus, "Ketuahen kalak si nggejap maka ia labo kai pe ertina i lebe-lebe Dibata; sabap man bana me Kinirajan Surga. 5:4 Ketuahen kalak si erceda ate erkiteken dosa; sabap Dibata me ngapuli ia. 5:5 Ketuahen kalak si meteruk ukurna; sabap isehken Dibata me padanNa man bana. 5:6 Ketuahen kalak si muas melihe nehken peraten Dibata; sabap ibesuriNa me ia. 5:7 Ketuahen kalak si perkuah ate dingen perkeleng; sabap ia me ngaloken perkuah ate Dibata. 5:8 Ketuahen kalak si meciho pusuh peratenna; sabap itandaina me tuhu-tuhu Dibata. 5:9 Ketuahen kalak si erbahan perdamen; sabap iakui Dibata me ia anakNa. 5:10 Ketuahen kalak si ngenanami kiniseran erkite-kiteken nehken peraten Dibata; sabap man bana me Kinirajan Surga. 5:11 Ketuahen me kam adi erkite-kiteken kam ajar-ajarKu igombang-gombangi, ipesega-sega dingen ipelawes kalak kam janah alu kata guak ipalitkenna si jahat man bandu. 5:12 Ermengkah dingen meriahlah atendu, sabap enggo isikapken Dibata upahndu si mbelin i Surga; sabap bage me pe nabi-nabi si nggeluh leben asangken kam ipesega-sega kalak." 5:13 "Bagi sira si seh kal perluna guna pangan, bage pe kam nandangi kerina manusia. Tapi adi sira e lanai masin, lanai banci ibahan masin mulihi. Sira e lanai erguna, e maka iambekken jenari idedehi kalak. 5:14 Bagi terang si seh kal perluna i bas gelap, bage pe kam nandangi doni enda. Kuta si lit i das uruk la banci lang teridah. 5:15 Labo isagani kalak lampu kenca bage itutupina alu tumba; tapi itamakenna ku datas nahe pertendangen, gelah terang iakap kalak kerina si lit i bas rumah e. 5:16 Dage, ersinalsal lah min terangndu i lebe-lebe kalak si nterem gelah adi idahna perbahanenndu si mehuli, ipujina Dibata, Bapandu si i Surga." 5:17 "Ola iakapndu Aku reh ncedai Undang-undang si ibereken Musa ras si iajarken nabi-nabi. Aku reh labo ncedai, tapi guna nehken si enggo isuratkenna e. 5:18 Ingetlah katangKu enda! Seh masap langit ras doni, sada titik ntah sada bagin si kitikna pe i bas Undang-undang e la bene adi langa kin seh kerina kai si enggo isuratken e. 5:19 E maka ise la ngikutken si enggo isuratken e, aminna gia bagin si kitikna, janah ibabaina papak kalak si deban, ia me si la mehergana i bas Kinirajan Surga. Tapi ise ngikutkenca janah ibabaina kalak si deban ngikutken si enggo isuratken e, ia me si mbelinna i bas Kinirajan Surga. 5:20 Kukataken pe man bandu maka labo kam banci bengket ku bas Kinirajan Surga adi la kin tutusen atendu erbahan si ngena ate Dibata asa guru-guru agama ras kalak Parisi." 5:21 "Enggo ietehndu maka nai ikataken man nini-nininta, 'Ola munuh; kalak si munuh iadili.' 5:22 Tapi genduari Kukataken man bandu: Ise merawa nandangi seninana, iadili pagin, ise si ngisakken kalak, arus iadili i lebe-lebe Pengadilen Agama. Janah ise ngataken seninana: 'O kemali!', ia pagin itamaken ku api naraka. 5:23 Dage, adi asum atendu nehken persembahen man Dibata ingetndu maka sangkut ukur seninandu nandangi kam, 5:24 tadingkenlah lebe persembahenndu e jenari erdame ras ia. Kenca bage persembahkenlah persembahenndu e man Dibata. 5:25 Adi iaduken kalak kam janah ibabana ku pengadilen, erdamelah ras ia ope denga seh i pengadilen. Sabap adi enggo seh i pengadilen iendeskenna me kam man hakim, jenari iendesken hakim kam man polisi. Kenca bage itamaken polisi kam ku bas penjara. 5:26 Adi kam i bas penjara, lanai kam ipulahina adi langa kin bali utangndu e kerina." 5:27 "Enggo ietehndu maka lit ikataken, 'Ola erlua-lua.' 5:28 Tapi genduari Kukataken man bandu: Ise ngenehen sekalak diberu, jenari leket ukurna ras diberu e, si tuhuna ia enggo erlua-lua i bas ukurna. 5:29 Dage, adi matandu si kemuhen erbahanca kam erdosa, pulditkenlah e jenari ambekkenlah! Sabap ulin sada bagin badanndu bene asa kerina iambekken ku bas naraka. 5:30 Adi tanndu si kemuhen erbahanca kam erdosa, keretlah e jenari ambekken! Sabap ulin bene sada tanndu asangken kerina badanndu iambekken ku bas naraka." 5:31 "Lit ka pengajaren bagenda, 'Ise ngulihken ndeharana, arus ibahanna surat mulih man ndeharana!' 5:32 Tapi genduari Kukataken man bandu: Ise ngulihken ndeharana labo erkiteken ndeharana e erlua-lua ras kalak si deban, ia si erbahanca ndeharana e erlua-lua adi sereh ia man kalak si deban, janah ji ngempoi diberu e pe erlua-lua." 5:33 "Enggo pe ietehndu maka i bas nini-nininta nai lit pengajaren bagenda, 'Ola ersumpah kerna si la tuhu, tapi bahanlah kai si enggo isumpahkenndu i lebe-lebe Tuhan.' 5:34 Tapi genduari Kukataken man bandu: Ola ersumpah kerna kai-kai pe, ola ersumpah i bas gelar langit, sabap langit kap ingan kundul Dibata; 5:35 ola ersumpah i bas gelar doni, sabap doni kap ingan naheNa; bage pe ola ersumpah i bas gelar Jerusalem, sabap Jerusalem kuta Raja Simbelin kap. 5:36 I bas gelar takalndu pe ola kam ersumpah, sabap labo kam erkuasa nalihken selambar buk pe jadi mbentar ntah mbiring. 5:37 Katakenlah, 'ue' adi tuhu janah katakenlah, 'lang' adi la tuhu. Lain asangken si e i bas Iblis nari kap rehna." 5:38 "Enggo ietehndu maka nai lit bagenda pengajaren, 'Mata gancih mata, janah ipen gancih ipen.' 5:39 Tapi genduari Kukataken man bandu: Ola erbalas nandangi kalak si enggo ersalah man bandu. Adi iparap kalak kurumndu si kemuhen, bereken parapna kurumndu si kawes. 5:40 Janah adi iaduken kalak kam erkiteken morah atena bajundu, bereken pe ras cabinndu man bana. 5:41 Adi ipaksa kalak kam maba barangna sada kilometer dauhna, babalah barang e dua kilometer dauhna. 5:42 Adi mindo kalak man bandu berekenlah; bage pe ola tulak adi kalak minjam kai-kai pe man bandu." 5:43 "Enggo pe ietehndu kerna ajaren enda, 'Kelengilah temanndu, janah elem-elemlah man imbang-imbangndu.' 5:44 Tapi genduari Kukataken man bandu: Kelengilah imbang-imbangndu, janah ertotolah man Dibata kerna kalak si erbahanca kam ngenanami kiniseran. 5:45 Alu bage kam enggo jadi anak-anak Dibata. Sabap labo saja man kalak si mehuli ibereken Dibata matawariNa, tapi pe man kalak si jahat. Bage pe labo saja man kalak si bujur ibereken Dibata udan, tapi pe man kalak si la bujur. 5:46 Sabap adi si ngkelengi kam saja ngenca ikelengindu, man kade Dibata mbalas perbahanenndu e? La kin kalak si muat cuke pe bage ka nge perbahanenna? 5:47 Janah kai kin lainna kam ras kalak si deban adi ras temanndu saja ngenca kam siperkuanen? Kalak si la nandai Tuhan pe bage nge perbahanenna. 5:48 E maka kam arus serta bagi Bapandu si ni Surga pe serta."
6:1 "Ingetlah! Ola ilakokenndu aturen agamandu i lebe-lebe kalak si nterem alu tujun gelah idah kalak. Sabap adi bage ibahanndu la kam dat upah i bas Bapandu si i Surga. 6:2 Dage, adi mere kam man kalak musil, ola gejek-gejekken bagi kalak si pekulah-kulah i rumah-rumah pertoton ntah pe i tengah dalan. Kalak si pekulah-kulah e tujunna gelah ndatken pujin. Inget! Ia lanai ngaloken upah i bas Dibata nari. 6:3 Tapi adi mere kam man kalak musil, bahanlah maka temanndu meriah pe la meteh. 6:4 Labo perlu igejek-gejekken i bas kam mere e. Alu bage, Bapandu si ngidah perbahanenndu e mereken upah man bandu." 6:5 "Adi ertoto kam, ola bagi kalak si pekulah-kulah. Kalak si pekulah-kulah e megati tedis ertoto i rumah-rumah pertoton bage pe i simpang-simpang gelah iidah kalak. Inget! Ia lanai ngaloken upah i bas Dibata nari. 6:6 Tapi adi ertoto atendu, bengketlah ku bas kamarndu, eruk pintun jenari ertotolah man Dibata si la iidah e. Dibata si ngidah perbahanenndu e mereken upah man bandu. 6:7 Bage pe adi ertoto kam ola mulih-ulih bagi kalak si la nandai Tuhan. Ia erpengakap maka adi gedang pertotonna ibegiken Dibata kap. 6:8 Tapi kam, ola bage. Sabap ope denga ipindondu, enggo leben ieteh Bapandu kai si iperlukenndu. 6:9 Dage, bagendalah nindu ertoto, O Bapa kami si ni Surga. GelarNdu ipebadia min; 6:10 reh min KinirajanNdu; sehlah min peratenNdu, i bas doni enda bagi ni Surga. 6:11 Bereken min man kami nakan cukup i bas wari si sendah enda. 6:12 Alemi min salah kami bagi nialemi kami salah kalak kempak kami. 6:13 Ola min kami ibaba Kam kubas percuban, tapi olangilah kami idur si ilat nari. Sabap Kam kap si mada Kinirajan, ras kuasa, ras kemulian si ndekah-ndekahna. Amin. 6:14 Adi ialemindu salah kalak, salahndu pe ialemi Bapandu si i Surga ka nge. 6:15 Tapi adi la ialemindu salah kalak, salahndu pe la ialemi Bapandu." 6:16 "Adi erpuasa kam, ola peberjut-berjut ayondu bagi kalak pekulah-kulah. Kalak pekulah-kulah iperberjut-berjutna ayona bagi kalak melihe, gelah ieteh kalak ia erpuasa. Inget! Ia lanai ngaloken upah i bas Dibata nari. 6:17 Tapi adi erpuasa kam, erduhaplah jenari suri bukndu, 6:18 gelah la ieteh kalak kam erpuasa. Tapi Bapandu si ngidah perbahanenndu e, Ia nge si mereken upahndu." 6:19 "Ola pepulung erta-erta i doni enda man bandu. Sabap erta-erta doni banci ipan nget-nget, tembesin dingen itangko pinangko. 6:20 Tapi pepulunglah erta-erta i Surga. Sabap i Surga la banci ipan nget-nget, tembesin dingen itangko pinangko. 6:21 Sabap i ja ertandu, i je pe ukurndu." 6:22 "Mata kap tendang kula. Adi terang pengidahndu, kulandu pe terang. 6:23 Tapi adi gelap pengidahndu kulandu pe gelap. Dage, adi tendang si lit i bas kam gelap, seh nari kal nge gelapna!" 6:24 "Ise pe labo ngasup ngikutken dua tuan. Sabap adi dua tuanna, la banci lang sekalak keleng atena janah sekalak nari nembeh atena; ntah pe mejingkat ia nandangi sekalak tuan, tapi tuan si sada nari la diatena pe. Labo kam ngasup erdahin guna Dibata adi erdahin ka kin kam guna duit. 6:25 Perbahan si e, ola aru atendu kerna nakan ras inemen si iperlukenndu i bas geluhndu ntah kerna uis si man pakenndu. Ergan nge kesah asangken nakan janah ergan nge kula asangken uis. 6:26 Perdiatekenlah perik-perik si kabang. Labo ia merdang, labo ia rani, labo ipepulungna ulihna rani ibas lumbung, tapi man nge ia ibahan BapaNdu si i Surga. Ergan nge kam asang perik-perik e! 6:27 Sekalak pe kam labo ngasup nambahi umurndu alu aru ate e! 6:28 Engkai maka aru atendu kerna uis si man pakenndu? Perdiatekenlah bunga ncole si turah i mbalmbal. Bunga e la erdahin dingen la ertenun. 6:29 Tapi Raja Salomo si bayak nai pe la lit pakenna bagi bunga ncole e jilena. 6:30 Dage ingetlah! O kalak si kurang kiniteken! Adi dukut-dukut si sendah nggeluh pagi iambekken ku bas api pe bage jilena ibahan Dibata, apai ka kam! 6:31 E maka ola aru atendu ntah kai pagi ipanndu, ntah kai pagi inemndu bage pe ntah kai pagi uisndu. 6:32 (Kalak si la nandai Tuhan nge maka bage perukurenna). Kam ola bage, sabap ieteh Dibata nge maka kerina enda perlu man bandu. 6:33 Tapi si pentingna kal, daramilah lebe KinirajanNa, janah dalankenlah si ngena ateNa, maka icukupiNa kai si perlu man bandu. 6:34 E maka ola aru atendu kerna wari si pepagi, sabap pepagi lit denga ka nge si man ndelenken. Labo pada itambahi kiniseran si sendah alu kiniseran si pepagi."
7:1 "Ola isalahindu kalak si deban, gelah kam pe la isalahi Dibata, 7:2 sabap uga penalahkenndu kalak bage ka kam penalahken Dibata. Sarat-sarat si ituntutndu man kalak, sarat-sarat e ituntut Dibata ka man bandu. 7:3 Engkai maka idahndu rintep i bas mata seninandu, tapi beloti si lit i bas matandu la igejapndu? 7:4 Kuga maka pang kam ngerana, 'O senina, enta kuagui rintep si lit i bas matandu,' sedangken i bas matandu jine pe lit beloti si galang? 7:5 O kalak si pekulah-kulah! Agui lebe beloti si lit i bas matandu e, sabap kenca bage maka ngasup kam ngagui rintep si lit i bas mata seninandu. 7:6 Ola iberekenndu barang si Badia man biang sabap ilawanna nge kam; ola itamakenndu mutiara ku lebe-lebe babi sabap kugapa pe iperjatina nge." 7:7 "Pindolah, tentu ngalo me kam; daramilah, tentu idatndu; tuktuklah, tentu italangi pintun man bandu. 7:8 Sabap si mindo, ngalo, si ndarami dat me, janah si nuktuk, italangi pintun man bana. 7:9 Tentu labo lit i bas kam bapa mereken batu man anakna adi ipindona roti man bandu. 7:10 Bage pe tentu la iberekenndu nipe adi ipindona nurung. 7:11 Kuga gia jahatna kam ietehndu nge kai si mehuli man berenken man anakndu. Apai denga ka Dibata, tentu iberekenNa nge si mehuli man kalak si mindo man baNa! 7:12 Bahanlah man kalak si deban bagi ngena atendu ibahanna man bandu. Enda me ertina Undang-undang si isuratken Musa ras kai si enggo isuratken nabi-nabi." 7:13 "Bengketlah arah pintun si kitik, sabap mbelang me pintun dingen mbelang pe dalan ku naraka, janah nterem kalak arah e erdalan. 7:14 Pintun si kitik dingen dalan si mesera nuju ku kegeluhen si rasa lalap, janah piga-piga kalak ngenca ngasup arah e erdalan." 7:15 "Metengetlah nandangi nabi-nabi perguak; reh ia ndahi kam bagi biri-biri si melemuk, tapi si tuhuna ukurna bagi serigala si merawa. 7:16 Itandaindu nge ia arah perbahanenna. Batang bungke rimbang labo anggur buahna, janah batang lateng labo galiman buahna. 7:17 Batang si mehuli tentu mehuli nge buahna, tapi batang si la mehuli tentu pe la mehuli buahna. 7:18 Labo banci la mehuli buahna batang si mehuli, bage pe labo banci mehuli buahna batang si la mehuli. 7:19 Batang si la mehuli buahna itektek me jenari itamaken ku bas api. 7:20 E maka itandaindu nge nabi si palsu e arah perbahanenna." 7:21 "Labo kerina kalak si erlebuh man bangKu, 'O Tuhan, Tuhan!' bengket ku bas Kinirajan Surga, tapi kalak si ngelakoken rikutken si ngena ate bapangKu i Surga nge bengket ku bas Kinirajan e. 7:22 I bas wari pendungi pagi, nterem kalak ngataken man bangKu, 'O Tuhan, Tuhan! I bas gelarNdu ernubuat kami, i bas gelarNdu ipelawes kami setan-setan dingen ibahan kami tanda-tanda sengget.' 7:23 Tapi ningKu pagin njabapsa, 'La kam Kutandai pe. Laweslah i bas Aku nari, o kalak jahat!' " 7:24 "Ise megi katangKu enda dingen ngikutkenca, ia bali ras kalak pentar si majekken rumahna i babo batu. 7:25 Rumah e labo runtuh aminna gia reh banjir ras angin si meter nderpasa, sabap rumah e ipajekken i babo batu. 7:26 Ise si megi katangKu enda tapi la ikutkenna, ia bali ras kalak lenge si majekken rumahna i babo kersik. 7:27 Asum reh banjir ras angin meter, minter runtuh dingen sontar rumah e." 7:28 Kenca dung Jesus ngerana, mamang ate kalak si nterem kerna pengajarenNa. 7:29 Sabap Jesus ngajar la bali ras guru-guru agama kalak enda; Ia ngajar alu erkuasa.
8:1 Kenca nusur Jesus i uruk e nari, nterem kal jelma ngikutken Ia. 8:2 Jenari reh sekalak gadamen ndahi Jesus. Erjimpuh ia i lebe-lebe Jesus jenari nina, "O Tuan, adi nggit Kam, ngasup kap Kam pepalem aku." 8:3 Ijemak Jesus kalak si gadamen e jenari Nina, "Nggit nge aku. Malemlah kam!" Minter malem ia i bas penakitna e nari. 8:4 Jenari nina Jesus man bana, "Ola kataken man ise pe kerna si enda, tapi cidahkenlah man Imam. Kenca bage, bahanlah persembahenndu bagi isuruh Musa, gelah kerina kalak meteh maka kam enggo malem." 8:5 Asum Jesus bengket ku kuta Kapernaum, reh sekalak perwira njumpai Ia. 8:6 Nina perwira e man baNa, "O Tuan, sekalak suruh-suruhenku sakit i rumah. Mekelek kal iakapna, lanai ia ngasup muit pe." 8:7 Ngaloi Jesus, "Banci reh Aku pepalemca." 8:8 Tapi nina perwira e, "O Tuan, la metunggung aku ngalo-ngalo Kam i rumahku. Sengkebabah ranan sajalah gia ibelaskenNdu, tentu malem suruh-suruhenku e. 8:9 Sabap aku pe lit nge si ganjangen asa aku, janah lit ka nge perajurit-perajurit teruhenku. Adi kusuruh perajurit e lawes, minter nge ia lawes; adi kusuruh ka perajurit si deban reh, minter nge ia reh; janah adi bahan enda ningku man suruh-suruhenku, minter nge ibahanna." 8:10 Mamang ate Jesus megi ranan perwira e. E maka nina Jesus man kalak si ngikutken Ia, "Langa pernah Aku jumpa ras kalak Israel si bagenda belinna kinitekenna. 8:11 Ingetlah! Nterem pagi si labo kalak Jahudi reh i Timur ras i Barat nari ersada ras Abraham, Isak, Jakup i bas Kinirajan Surga. 8:12 Sedangken bangsa si kin aturenna bengket ku bas Kinirajan e iambekkenNa ku ingan si seh kal gelapna. I je tangis ras mesui kal atena." 8:13 Jenari nina Jesus man perwira e, "Mulihlah ku rumahndu, jadilah man bandu bagi si enggo ibelaskenndu arah kinitekenndu." I bas paksa si e ka malem me suruh-suruhen perwira ndai. 8:14 Lawes Jesus ku rumah Petrus. I bas rumah e idahNa mami Petrus medem erkiteken sakit. 8:15 Ijemak Jesus tan mami Petrus e, jenari minter malem. Keke ia jenari isikapkenna pangan man Jesus. 8:16 Nandangi gelap, rehen kalak maba si penakiten ras si setanen man Jesus. Alu sengkebabah ranan saja ipelawes Jesus setan-setan e janah ipepalemNa kerina kalak si penakiten. 8:17 Ibahan Jesus bage, gelah seh si enggo isuratken Nabi Jesaya, "Ia kap mulahi kita i bas kiniseranta nari janah Ia kap pepalem penakitta." 8:18 Asum idah Jesus kalak si nterem ngkeleweti Ia, isuruhNa ajar-ajarNa gelah berkat ngepari dano. 8:19 Paksa si e, reh sekalak guru agama ndahi Jesus janah nina, "O Guru, ikut ateku ras Kam aminna ku ja gia Kam lawes." 8:20 Ngaloi Jesus, "Serigala lit liang inganna, perik-perik pe lit asarna, tapi Aku, Anak Manusia si isuruh Dibata la lit inganKu pekesahken." 8:21 Sekalak ajar-ajar si deban ngerana man Jesus nina, "O Bapa, mulih lebe aku gelah kukuburken bapangku." 8:22 Tapi ngaloi Jesus, "Ikutkenlah Aku. Pelepaslah kalak mate ngkuburken kalak matena jine." 8:23 Jenari idatasi Jesus perahu, ajar-ajarNa pe ikut ras Ia. 8:24 Asum erlayar, rempet rembus angin meter seh maka galumbang pe nderpa perahu e. Tapi tunduh Jesus paksa si e. 8:25 E maka iingeti ajar-ajarNa Ia nina, "O Tuan, sampati min! Enggo cilaka kita!" 8:26 Tapi nina Jesus man ajar-ajarNa e, "Engkai maka kam mbiar? Kurang kal tuhu kinitekenndu!" Jenari keke Jesus, isergangina angin meter ras galumbang ndai. E maka enggo seh kal tenengna. 8:27 Mamang ate ajar-ajarNa e kerina nina, "Kalak si kuga kin nge enda ndia? Angin ras galumbang pe ngikutken kataNa." 8:28 Seh kenca Jesus i daerah Gadara reh dua kalak setanen njumpai Ia. Kalak setanen e reh i kuburen nari. Ise pe la pang mentas arah e sabap mehantu kal ia duana. 8:29 Kenca ndeher ia ras Jesus, minter ia serko nina, "O Anak Dibata, kuga atendu kami ibahanNdu? IsiksaNdu kin ateNdu kami langa pe seh paksana?" 8:30 La ndauhsa i bas ingan e nari, lit babi sada rarasen sangana nungke-nungke ndarami nakanna. 8:31 Nina setan-setan e man Jesus, "Adi ipelawesNdu kami, suruhlah kami neluki babi-babi ah." 8:32 Nina Jesus, "Laweslah!" Itadingken setan si dua kalak e jenari iselukina babi-babi e. E maka kiamen babi e, ndabuh ku dano jenari mate gedap kerina. 8:33 Kalak si mpermakani babi e kiam ku bas kuta. Iturikenna man kalak si nterem kerna babi dingen kerna si dua kalak ndai. 8:34 E maka reh kerina anak kuta e ndahi Jesus. Kenca jumpa, ipindokenna gelah lawes Jesus i daerahna e nari.
9:1 Kenca Jesus ku das perahu, ngepar Ia, jenari seh Ia ku kutaNa. 9:2 E maka itaruhken kalak ku Ia sekalak si pangpangen tare ingan medem. Perbahan idah Jesus maka tek kal kalak e man baNa, e maka Nina man si pang-pangen e, "Tetapkenlah ukurndu, o anakKu! Dosandu enggo ialemi." 9:3 Perbahan si e piga-piga kalak guru agama jungut-jungut i bas ukurna nina, "IlawanNa kap Dibata arah cakapNa e." 9:4 Ieteh Jesus kai si lit i bas ukur kalak enda, e maka nina, "Engkai maka jahat i bas ukurndu? 9:5 Apai kin sukahen ngatakenca, 'Dosandu enggo ialemi,' asangken ngatakenca, 'Kekekenlah, jenari erdalanken!' 9:6 Tapi Kucidahken man bandu maka Aku, Anak Manusia si isuruh Dibata erkuasa ngalemi dosa i doni enda." Jenari nina Jesus man si pang-pangen e, "Kekekenlah angkat ingan medemndu, jenari mulihlah!" 9:7 Keke ia jenari mulih ia ku rumah. 9:8 Mbiar kalak si nterem ngidah kejadin e. Ipujina Dibata si enggo mereken kuasa si bage belinna man manusia. 9:9 Lawes Jesus i bas ingan ndai nari janah asum Ia erdalan idahNa sekalak pengalo cuke kundul i bas kantorna. Gelarna Matius. Nina Jesus man bana, "Ikutken Aku." Tedis Matius jenari ikutkenna Jesus. 9:10 Asum Jesus ras ajar-ajarNa man i rumah Matius, nterem pengalo cuke ras kalak perdosa ikut man ras Jesus ras ajar-ajarNa. 9:11 Piga-piga kalak Parisi ngidah si enda. E maka nina man ajar-ajar Jesus, "Engkai maka Gurundu e man ras pengalo cuke bage pe ras kalak perdosa?" 9:12 Ibegi Jesus penungkunen kalak Parisi enda, e maka erjabap Ia, "Kalak si sehat labo ia perlu dokter, tapi kalak si sakit nge. 9:13 Laweslah, jenari pelajari kata si tersurat i bas Pustaka Si Badia enda, 'Keleng atendu nge si kuperluken, labo asuh-asuhen si ipersembahkenndu.' Aku reh labo guna ndilo kalak si bujur akapna bana, tapi guna ndilo kalak perdosa." 9:14 Kenca bage reh ajar-ajar Johanes ndahi Jesus. Nungkun ia man Jesus nina, "Kami ras kalak Parisi megati erpuasa; engkai maka ajar-ajarNdu la erpuasa?" 9:15 Ngaloi Jesus, "Atendu kin maka temue i bas kerja erdemu bayu erceda ate adi si empo e ras ia denga? Tentu lang! Lit nge paksana ia sirang ras si empo e. Kenca si e me ia erpuasa. 9:16 Labo uis mbaru ibahan kalak guna ngerangkapi uis si enggo buruk. Sabap adi bage, reh belangna me rigatna ibahan pengerangkapina e. 9:17 Bage pe labo itamaken kalak lau anggur mbaru ku bas guci kuling-kuling si enggo male. Sabap adi bage, pecah me guci e, janah anggur pe mambur dingen guci e pe lanai terpake. Tapi lau anggur mbaru itamaken kalak ku bas guci kuling-kuling si mbaru. Alu bage anggur ras guci tetap mehuli duana." 9:18 Asum Jesus ngerana denga ras ajar-ajar Johanes Peridiken, reh sekalak pengulu rumah pertoton kalak Jahudi. Erjimpuh ia i lebe-lebe Jesus, jenari nina, "Anakku e denga kal mate. Reh min Kam namaken tanNdu ku babona gelah ia nggeluh mulihi." 9:19 E maka keke Jesus, ikutkenNa pengulu e janah ajar-ajarNa pe ikut ras Ia. 9:20 Asum Jesus erdalan, reh sekalak ndeheri Ia i pudi nari. Diberu e enggo sepuluh dua tahun dekahna bluding rusur. Idadapna uis Jesus, 9:21 sabap nina i bas ukurna, "Kudadap saja lah gia uis Jesus e, tentu malem penakitku." 9:22 Itulihken Jesus diberu e, jenari nina, "Malem atendu, o anakKu! Malem penakitndu erkiteken tek kam man bangKu." I bas paksa si e malem penakit diberu ndai. 9:23 Jenari iterusken Jesus erdalan ku rumah pengulu ndai. Kenca seh i rumah, idahNa piga-piga kalak penarune janah kerina kalak nderkuhen. 9:24 E maka nina Jesus, "Ndarat kam kerina! Anak enda labo mate, tunduh saja nge ia!" Tapi itawai kalak ndai Jesus. 9:25 Kenca ndarat kalak e kerina, minter bengket Jesus ku kamar anak ndai. Ijemak Jesus tan anak e jenari minter nggeluh mulihi. 9:26 Berita kerna si enda mbar ku belang-belang daerah e. 9:27 Lawes Jesus i bas rumah pengulu e nari. Asum ia erdalan lit dua kalak pentang ngikut-ngikut Ia. Alu sora megang nina man Jesus, "Mekuah min atendu kami, o Anak Daud!" 9:28 Kenca bengket Jesus ku bas sada rumah, reh duana kalak pentang e. Isungkun Jesus nina, "Tek kin kam ngasup Aku erbahan kam erpengidah?" Erjabap si pentang e, "Tek kami Tuan!" 9:29 E maka idadap Jesus mata kalak pentang e jenari nina, "Jadilah bagi kinitekenndu e." 9:30 Minter terang pengidahna duana. Jenari telkas pengerana Jesus man bana, niNa,"Ula kataken man ise pe kerna si enda!" 9:31 Tapi lawes kalak e duana, jenari iturikenna kerna Jesus ku belang-belang daerah e. 9:32 Asum ndarat si dua kalak e i rumah nari, reh ka piga-piga kalak ndahi Jesus. Ibabana sekalak si lanai beluh ngerana erkiteken iseluki setan. 9:33 Kenca ipelawes Jesus setan e, minter ia beluh ngerana. Mamang ate kalak si nterem nina, "Langa pernah jadi bagenda i Israel!" 9:34 Tapi nina kalak Parisi, "Pengulu setan kap mereken kuasa man baNa maka ngasup Ia mpelawes setan." 9:35 Jenari isiari Jesus kuta-kuta si meriah ras kuta-kuta si kitik. Ngajar Ia i rumah-rumah pertoton kalak Jahudi. IberitakenNa Berita Si Meriah kerna Kinirajan Surga. IpepalemNa erbage-bage penakit kalak si nterem. 9:36 Mekuah ate Jesus ngenehen kalak si nterem e, sabap enggo kote dingen lanai lit si ngepkepsa, bagi biri-biri si la ipermakani. 9:37 E maka nina Jesus man ajar-ajarNa, "Mbelang man peranin, tapi kurang si ranisa. 9:38 E maka pindolah man si Mada juma e, gelah isuruhNa si erdahin guna peranin e."
10:1 Idilo Jesus ajar-ajarNa si sepuluh dua kalak, jenari iberekenNa man ajar-ajarNa e kuasa pelawesken setan ras pepalem erbage-bage penakit. 10:2 Gelar rasul si sepuluh dua kalak e: Simon (igelari Petrus) ras Andereas, duana ia sembuyak; Jakup ras Johanes, duana ia anak Sebedeus; 10:3 Pilipus ras Bartolomeus; Tomas ras Matius pengalo cuke; Tadius ras Jakup anak Alpeus; 10:4 Simon Pejuang ras Judas Iskariot si ndayaken Jesus. 10:5 Jesus nuruh rasul si sepuluh dua kalak e. Ope berkat nina Jesus man kalak enda, "Ola kam bengket ku daerah si labo kalak Jahudi ntah ku kuta-kuta kalak Samaria. 10:6 Tapi dahilah kalak Israel biri-biri si enggo papak e. 10:7 Berkatlah jenari nindu erberita, 'Kinirajan Surga enggo reh deherna.' 10:8 Pepalemlah kalak si penakiten, pegeluh kalak si enggo mate; pepalemlah kalak si gadamen, janah pelaweslah setan-setan. Kerina e ialokenndu la ertukur. E maka berekenlah man kalak si deban alu la ngaloken upah. 10:9 Ola baba emas, pirak ntah tembaga. 10:10 I bas perdalanenndu ola baba bekal, baju ose, sepatu ntah ciken, sabap kalak si erdahin patut ngaloken kai si iperlukenna. 10:11 Adi bengket kam ku kuta si meriah ntah kitik, pepayolah lebe i bas kuta e ise si patut inganndu kesilang. Jenari kesilanglah kam ras ia ngayak kam lawes nadingken kuta e. 10:12 Adi bengket kam ku sada rumah nindulah, 'Mejuah-juah!' 10:13 Adi meriah ukur si empu rumah e ngalo-ngalo kam, tading i bas ia pasu-pasundu, tapi adi la kam ialo-alona, mulih man bandu pasu-pasundu e. 10:14 Adi i bas sada rumah ntah sada kuta la kam ialo-alo kalak ntah la kam ibegikenna, tadingkenlah rumah ntah kutana e, kisamken abu si lit i bas nahendu. 10:15 Inget! I bas wari pendungi pagi, beraten ukumenna asangken ukumen anak kota Sodom ras Gomora." 10:16 "Begikenlah! Kam Kusuruh bagi biri-biri ku tengah-tengah serigala. E maka kam arus cerdik bagi nipe janah lemah-lembut bagi nderapati. 10:17 Metengetlah, sabap nandangi lit me kalak si nangkap kam; ibabana kam ku pengadilen agama janah iligasna kam i bas rumah-rumah pertoton. 10:18 Iaduken kalak me kam man si erkuasa ras man raja-raja erkite-kiteken Aku. Alu bage banci iturikenndu Berita Si Meriah man si erkuasa ras raja-raja e bage pe man si labo kalak Jahudi. 10:19 Sanga kam ibaba ku pengadilen e, ola aru atendu kerna kai ras uga arus ikatakenndu, sabap i bas paksa si e Dibata petangkassa bandu kai si man turinkenndu. 10:20 Kata-kata si ibelaskenndu e labo kata-katandu, tapi Kesah Bapandu nge si ngerana i bas kam. 10:21 Kalak si sembuyak ngendesken sembuyakna pagi gelah ibunuh, bapa pe bage nandangi anakna. Anak ngelawan orang tuana pagi janah ngendeskenca gelah ibunuh. 10:22 Segat pagi ate kalak kerina man bandu erkite-kiteken Aku. Tapi kalak si megenggeng seh ku kedungenna terkelin kap. 10:23 Adi i bas sada kuta isiksa kalak kam, lompatlah ku kuta si deban. Inget! Ope denga serser isiarindu kuta-kuta Israel, enggo reh Aku, Anak Manusia si isuruh Dibata. 10:24 Labo lit murid ganjangen asangken guruna; labo lit suruh-suruhen belinen asangken tuanna. 10:25 Cukup min iakap murid adi enggo bali ia ras guruna, janah suruh-suruhen enggo bali ras tuanna. Adi tuan rumah igelari Balsebul, apai dengan ka isi jabuna?" 10:26 "Dage ola kam mbiar man manusia. Kerina si terligen teridah nge pagi, janah kerina buni-buni tereteh nge pagi. 10:27 Si Kukataken man bandu i bas gelap, turikenlah e i bas terang, janah si ibegindu alu kusik-kusik momokenlah man kalak si nterem. 10:28 Ola kam mbiar man kalak si ngasup munuh kula tapi la ngasup munuh tendi; tapi mbiarlah man Dibata si erkuasa namaken kula ras tendi ku naraka. 10:29 Dua perik cip-cip banci itukurndu alu piga-piga rupia saja; tapi labo sada pe perik e ndabuh ku taneh adi la bage peraten Bapandu. 10:30 Janah buk takalndu pe enggo ibeligaiNa. 10:31 E maka ola kam mbiar, sabap ergan kap kam asangken melala perik cip-cip!" 10:32 "Ise ngaku i lebe-lebe manusia maka ia ajar-ajarKu, ia pe pagi Kuakui i lebe-lebe BapangKu si i Surga. 10:33 Tapi ise si merso i lebe-lebe manusia maka ia ajar-ajarKu, ia pe pagi Kupersoken i lebe-lebe BapangKu si i Surga." 10:34 "Ola akapndu Aku reh ku doni enda maba dame. Aku reh labo maba dame, tapi erbahan perang. 10:35 Aku reh erbahanca rubati anak si dilaki ras bapana, anak si diberu ras nandena, permain ras si metuana, 10:36 janah kerina si lit i bas jabuna imbangna kerina. 10:37 Ise kelengen atena bapana ntah nandena asangken Aku, la metunggung ia ras Aku; ise kelengen atena anakna si dilaki ntah si diberu asangken Aku, la metunggung ia ras Aku. 10:38 Ise la mersan kayu persilangna ngikutken Aku, la metunggung jadi ajar-ajarKu. 10:39 Kalak si mpertahanken kesahna ia kebenen kesah, tapi kalak si kebenen kesah erkiteken Aku, ia ndatken kelegeluhenna." 10:40 "Ise ngalo-ngalo kam, ia kap ngalo-ngalo Aku; janah ise ngalo-ngalo Aku, ialo-alona kap Ia si nuruh Aku. 10:41 Ise ngalo-ngalo nabi erkiteken ia sekalak nabi, ialokenna me upahna bagi ialoken sekalak nabi. Ise ngalo-ngalo kalak bujur erkiteken ia sekalak si bujur, ialokenna me upahna bagi ialoken kalak bujur. 10:42 Inget! Ise mereken sada cangkir lau mbergeh lah gia man sekalak ajar-ajarKu si kitikna kal erkiteken ia ajar-ajarKu, tuhu ialokenna nge pagi upahna."
11:1 Kenca Jesus ngerana man ajar-ajarNa si sepuluh dua kalak, lawes Ia ku kuta-kuta si ndeher ngajar meritaken Berita Si Meriah. 11:2 Johanes Peridiken si lit i bas penjara megi berita kerna pendahin Kristus. E maka isuruhna piga-piga kalak ajar-ajarna ndahi Jesus. 11:3 Nungkun ajar-ajarna e man Jesus nina, "Kam kin si ikataken Johanes si enggo ndeher e ntah itimai kami dengan kalak si deban?" 11:4 Erjabap Jesus man bana, "Dahilah Johanes Peridiken, turiken man bana kerina si ibegindu ras iidahndu genduari enda; 11:5 kalak pentang erpengidah, si pang-pangen erdalan, si gadamen malem, si pasek erpemegi, si mate nggeluh mulihi janah Berita Si Meriah iberitaken man kalak musil. 11:6 Ketuahen kalak adi la tondel ukurna erkiniteken man bangKu!" 11:7 Kenca lawes ajar-ajar Johanes Peridiken, ibenaken Jesus ngerana man kalak si nterem kerna Johanes nina, "Asum idahindu ndube Johanes Peridiken ku taneh si melungun, kai kin si man nehenenndu? Atendu kin ngenehen beski si mole-ole iembus angin? Tentu lang! 11:8 Kai dage nehenenndu ku je? Sekalak si mejile uisna? Tentu lang, sabap kalak si mejile uisna inganna i bas istana raja nge. 11:9 Kataken man bangKu, kai nehenenndu ku je? Sekalak nabi? Payo, Kukataken pe man bandu maka si enggo idahndu e lebihen asangken sekalak nabi. 11:10 Sabap kerna Johanes Peridiken enggo isuratken i bas Pustaka Si Badia, 'Kusuruh persuruhenKu leben asangken Kam,' nina Dibata, 'Ia kap nikapken dalan man bandu.' 11:11 Ingetlah! Johanes Peridiken kap si mbelinna i bas kerina manusia si enggo pernah nggeluh. Tapi si kitikna i bas Kinirajan Surga belinen asangken Johanes Peridiken. 11:12 Mulai kin Johanes Peridiken ngajar seh genduari, Kinirajan Surga tetap ilawan kalak janah ikuasaina atena. 11:13 Sabap kerina pengajaren nabi-nabi ras Undang-undang si ibereken Musa ernubuat kerna Johanes. 11:14 Janah adi tek kam kai si ikataken nabi e, Johanes kap Elia si aturna reh. 11:15 Begikenlah, adi lit kin cupingndu! 11:16 Bagi kai nge ndia banci Kuandingken kalak si genduari enda? Kalak si genduari enda bali kap ras anak-anak erguro-guro i tengah kesain. Nina sada terpuk man terpuk si deban, 11:17 'Enggo ipalu kami gendang guro-guro tapi la kam nggit landek. Enggo iendeken kami lagu tangis-tangis tapi la kam nggit tangis!' 11:18 Sabap Johanes la ikut i bas kerja man-man ras minem-minem e maka ikataken kalak, 'Enggo setanen ia!' 11:19 Genduari reh Aku, Anak Manusia si isuruh Dibata, ku kerja man-man ras minem-minem, e maka ikataken kalak, 'Nehenlah! Ia kalak rangap dingen peminem! TemanNa pengalo cuke ras kalak perdosa.' Amin bage gia Dibata pentar kap janah kepentarenNa enggo ibenarken arah kerina pendahinNa." 11:20 Kenca bage isumpahi Jesus kuta-kuta si i je enggo melala ibahanNa tanda-tanda sengget, sabap kalak kuta e la nggit jera i bas dosana nari. 11:21 Nina Jesus, "Cilaka me kam o Korasin! Cilaka me kam o Betsaida! Bicara i Tirus ras i Sidon min ndai ibahan tanda-tanda sengget si enggo ibahan i tengah-tengahndu, enggo min ndai jera kalak si i je. 11:22 Ingetlah! I bas wari pendungi pagi beraten ukumenndu asangken ukumen kalak Tirus ras kalak Sidon. 11:23 Kam pe, o Kapernaum! Sura-surandu meganjang seh ku langit. Idabuhken nge kam pagi ku naraka! Bicara i Sodom min ndai ibahan tanda-tanda sengget si enggo ibahan i tengah-tengahndu, lit denga min ndai Kota Sodom e seh asa genduari. 11:24 Ingetlah! I bas wari pendungi pagi beraten ukumenndu asangken ukumen Sodom." 11:25 Paksa e nina Jesus, "O Bapa, Tuhan si erkuasa i Surga ras i doni! Bujur Kukataken man baNdu sabap enggo ipetangkasNdu man kalak si la erpemeteh kai si ibunikenNdu man kalak pentar ras erpemeteh. 11:26 O Bapa, enda kap si ngena ateNdu." 11:27 "Enggo ibereken BapangKu kerinana man bangKu. Ise pe la nandai Anak seakatan Bapa, janah ise pe la nandai Bapa seakatan Anak ras kalak si man bana enggo ipetangkasken Anak e." 11:28 "Marilah kam si latih janah beraten, maka Kubereken pengadi-ngadinndu. 11:29 Tamakenlah pasangenKu ku kudukndu janah erlajarlah i bas Aku nari. Sabap Aku melias janah meteruk ukurKu; alu bage idatndu me kemalemen ate. 11:30 Sabap pasangen si Kubereken man bandu ntabeh mabasa, dingen baban si Kutamaken ku babondu menahang kap."
12:1 La ndekahsa kenca si e, tupung wari Sabat kalak Jahudi, mentas Jesus arah perjuman gandum. Iputikken ajar-ajarNa gandum e, jenari igugutna sabap melihe ia. 12:2 Ngidah si e nina kalak Parisi man Jesus, "Nehenlah, ajar-ajarNdu erbahan kai si la banci ibahan i bas wari Sabat rikutken Undang-undang Agama." 12:3 Ngaloi Jesus, "Langa kin pernah iogendu i bas Pustaka Si Badia kai ibahan Daud asum melihe ia ras teman-temanna? 12:4 Bengket ia ku rumah Dibata, ibuatna roti si enggo ipersembahken man Dibata, jenari ipanna ras teman-temanna. Rikutken Undang-undang Agama, imam-imam ngenca banci man roti e. 12:5 Langa kin iogendu i bas Undang-undang si isuratken Musa maka i bas tep-tep wari Sabat si tuhuna imam-imam ngelanggar Undang-undang wari Sabat i bas Rumah Pertoton, tapi la ia ersalah? 12:6 Tapi ingetlah, maka i jenda lit si lebihen asa Rumah Pertoton. 12:7 Lit kap tersurat i bas Pustaka Si Badia, 'Ate keleng nge si Kuperluken, labo asuh-asuhen si ipersembahkenndu.' Adi tuhu-tuhu kin iertindu kata enda, labo iukumndu kalak si la ersalah. 12:8 Sabap Anak Manusia si isuruh Dibata, Ia kap Tuhan si engkuasai wari Sabat e." 12:9 Kenca bage, lawes Jesus ku rumah pertoton kalak Jahudi. 12:10 I rumah pertoton e lit sekalak sembelah tanna enggo kesip perban mate serapen. Piga-piga kalak si i je ersura-sura ndarami kesalahen Jesus. E maka isungkunna Jesus nina, "Rikutken Undang-undangta, banci kin ipepalem kalak sakit i bas wari Sabat?" 12:11 Ngaloi Jesus nina, "Adi lit sekalak i bas kam ndabuh biri-birina ku bas lubang si mbages i bas wari Sabat, tentu itangkapna dingen ipedaratna biri-birina e. 12:12 Manusia ergan nge asa biri-biri! E maka rikutken Undang-undangta mehuli nge nampati kalak i bas wari Sabat." 12:13 Jenari nina Jesus man si mate serapen tanna e, "Pepinter tanndu." Ipepinterna tanna, jenari minter malem bagi tanna si sembelah nari. 12:14 Ndarat kalak Parisi e, arih-arih ia guna munuh Jesus. 12:15 Kenca ieteh Jesus sura-sura kalak Parisi e, lawes Ia i bas rumah pertoton kalak Jahudi e nari. Nterem kalak ngikutken Ia. IpepalemNa kerina kalak si penakiten, 12:16 jenari ipersingetiNa gelah man ise pe ola ituriken kerna Ia. 12:17 Si enda jadi gelah seh kai si enggo ikataken Dibata arah Nabi Jesaya nina, 12:18 "Enda me persuruhenKu si enggo Kupilih, Ia me si Kukelengi dingen si ngena ateKu. Kubereken me KesahKu man baNa, janah Ia me si meritaken kebujurenKu man kerina bangsa. 12:19 Tapi labo Ia pagi rubat ntah serko bage pe labo Ia ngerana alu sora megang i pasar si meriah. 12:20 Buluh si enggo mbeltuk la ipenggelkenNa, lampu si midep-idep la inimpetiNa, la Ia erngadi-ngadi seh menang ibahanNa keadilen e. 12:21 Janah i bas Ia me kerina bangsa-bangsa erpengarapen." 12:22 Jenari itaruhken kalak man Jesus sekalak pentang dingen lanai beluh ngerana perbahan iseluki setan. Kenca Jesus mpelawes setan e, beluh ia ngerana dingen erpengidah. 12:23 Mamang ate kalak si nterem nina sapih-sapih ia, "Banci jadi Ia nge Anak Daud si ipadanken e." 12:24 Asum ibegi kalak Parisi kata enda ngaloi ia nina, "Balsebul pengulu setan nge mereken kuasa man baNa mpelawes setan e." 12:25 Ieteh Jesus perukuren kalak Parisi enda e maka nina, "Kerajan si erbelah-belah kugapa pe sontar nge. Janah kuta ntah rumah tangga si erbelah-belah kugapa pe sontar nge. 12:26 Bage pe adi Iblis pelawes Iblis, erbelah-belah kap ia. Adi bage ma sontar kerajanna? 12:27 Dage, adi Balsebul kin mereken kuasa man bangKu, ise dage mereken kuasa man teman-temanndu mpelawes setan-setan e? Teman-temanndu e lah ertimbang kerna cakapndu e. 12:28 Erkiteken Kupelawes setan-setan alu kuasa Kesah Dibata, e tandana maka Kinirajan Dibata enggo reh man bandu. 12:29 Ise pe labo banci bengket ku rumah si mbisa ngerampasi erta-ertana, pala iketna lebe kalak si mbisa e. Kenca bage maka banci irampasina erta-erta si lit i bas rumah e. 12:30 Ise si Ia mihak Aku ngelawan Aku kap; ise la ras Aku pepulungken, ia engkerapi kap. 12:31 E maka Kukataken man bandu: Kerina dosa ras cakap si encekuraki Dibata banci ialemi; tapi kalak si encekuraki Kesah Si Badia la ialemi Dibata ndigan pe. 12:32 Kalak si encekuraki Anak Manusia si isuruh Dibata banci ialemi Dibata; tapi kalak si encekuraki Kesah Si Badia asa ndigan pe la ialemi Dibata, subuk i bas kegeluhen si gundari, bage pe ibas kegeluhen si pagin." 12:33 "Guna ndatken buah si mehuli arus lit batang si mehuli; adi batang la mehuli tentu buahna pe la mehuli. Sabap arah buahna itandai kap batangna. 12:34 O, kesusuren nipe si jahat! Kuga nindu ngataken si mehuli adi ukurndu pe jahat nge? Sabap kai si ibelasken, e me si erburak i bas pusuh nari. 12:35 Kalak bujur tentu teridah i bas ia nari si mehuli, ndarat i bas pusuh peratenna si mehuli nari; janah kalak jahat ndarat me si jahat i bas pusuh peratenna si jahat nari." 12:36 "Tapi ingetlah! I bas wari pendungi pagi kerina si la mehuli si enggo ibelaskenndu arus ipertanggung-jawabken. 12:37 Sabap arah kai si enggo ibelaskenndu me kam iadili." 12:38 Jenari ngerana piga-piga guru agama ras kalak Parisi man Jesus nina, "O Guru, merincuh kal kami ngidah tanda sengget i bas Kam nari." 12:39 Ngaloi Jesus, "Andiko, jahatna jelma si genduari enda! Kam kalak jahat mindo maka Kubahan tanda sengget? Labo Kubahan! La ibereken sada tanda sengget pe man bandu seakatan tanda sengget Nabi Juna ngenca. 12:40 Sabap bagi Nabi Juna telu wari telu berngi dekahna i bas beltek nurung galang, bage ka me pagi Anak Manusia si isuruh Dibata e telu wari telu berngi dekahna i bas beltek taneh enda. 12:41 I bas wari pendungi pagi i lebe-lebe Pengadilen Dibata tedis kalak Niniwe ngaduken kam, sabap ia jera i bas dosana nari kenca ibegina Nabi Juna ngajar; janah si tuhuna i jenda lit beliden asa Nabi Juna! 12:42 I bas wari pendungi pagi i lebe-lebe Pengadilen Dibata tedis me Kemberahen i Selatan nari ngaduken kam, sabap ia reh i bas ingan si ndauh nari guna megiken pengajaren Salomo; janah si tuhuna i jenda lit beliden asa Salomo." 12:43 "Adi enggo ndarat setan i bas sekalak jelma nari, lawes setan e, isiarina gurun pasir ndarami ingan ngadi. Adi la idatna ingan e, 12:44 nina i bas ukurna, 'Mulihlah aku ku rumahku si enggo kutadingken e.' E maka mulihken ia, idapetina rumah e enggo bersih isapui dingen enggo sikap. 12:45 Jenari lawes ia, idilona pitu setan si jahaten asa ia. Kerina ia bengket ku bas janah i je me ia ringan seh maka reh kelekna kalak si ibengketina e. Bage me pagi jadina kalak jahat si genduari enda." 12:46 Asum Jesus ngerana denga, reh nandeNa ras senina-seninaNa. Tedis ia i darat, sabap atena njumpai Jesus. 12:47 E maka nina sekalak si i je man Jesus, "I darat nandeNdu, senina-seninaNdu, jumpa atena ras Kam." 12:48 Tapi ngaloi Jesus, "Ise kin nandengKu? Ise kin seninangKu?" 12:49 Jenari ituduh Jesus ajar-ajarNa janah nina, "Enda kap nandengKu ras senina-seninangKu! 12:50 Ise ndalanken kai si ngena ate Dibata, BapangKu, ia kap seninangKu, turangKu, ras nandengKu."
13:1 I bas wari si e berkat Jesus i rumah e nari ku tepi dano. I tepi dano kundul Ia guna ngajar. 13:2 Perbahan nterem kal kalak pulung ngkeleweti Ia, e maka idatasiNa sada perahu. Kundul Ia i datas perahu e, janah kalak si nterem tedis i daraten, i tepi dano. 13:3 Jenari ituriken Jesus man kalak e erbage-bage pengajaren alu perumpaman. Nina Jesus, "Lit me sekalak perjuma lawes ku jumana ngambur benih. 13:4 Asum ia ngambur benih e, lit ndabuh ku dalan, jenari reh perik-perik manganisa. 13:5 Lit ka ndabuh ku taneh si erbatu-batu, si la mbages tanehna, e maka minter turah benih e. 13:6 Tapi kenca reh las matawari, minter melus dingen kerah sabap la mbages uratna. 13:7 Lit ka pe ndabuh ku tengah peren duri, turah benih e, tapi talu ibahan peren duri. 13:8 Tapi lit pe ndabuh ku taneh si mehumur, mehuli perturahna seh erbuah; lit si seratus buahna, lit si enem puluh janah lit si telu puluh. 13:9 Begikenlah adi lit kin cupingndu!" 13:10 Jenari reh ajar-ajar nungkun man Jesus nina, "Engkai maka alu perumpaman Kam ngerana man kalak si nterem e?" 13:11 Erjabap Jesus, "Man bandu enggo ibereken Dibata kengasupen guna meteh rahasia Kinirajan Surga, tapi man kalak enda lang. 13:12 Sabap man kalak si lit i bas ia itambahi gelah reh buena i bas ia; tapi man kalak si la lit, si lit i bas ia e pe ibuat i bas ia nari. 13:13 Aku ngerana man kalak e alu perumpaman sabap: aminna gia inehenna tapi la idahna, janah aminna gia idengkehna tapi la ibegi dingen la iangkana. 13:14 Alu bage enggo seh Kata Dibata si isuratken Nabi Jesaya, nina: 'Idengkehkenndu tapi la iangkandu; ipernehenndu tapi la idahndu. 13:15 Sabap enggo batu-batun ukur kalak enda; enggo pasek cupingna, ipit-pitkenna matana. Sabap adi la bage tentu erpengidah nge mata ras erpemegi nge cuping kalak enda, janah ukur kalak enda tentu erpengangka, e maka reh kalak enda ndahi Aku, nina Dibata, janah Kupepalem me kalak enda.' 13:16 Tapi melem tuhu-tuhu atendu, sabap matandu erpengidah dingen cupingndu erpemegi. 13:17 Ingetlah! Nterem nabi bage pe nterem kalak si erkemalangen man Dibata, merincuh ngidah kai si iidahndu genduari e, tapi la banci, janah merincuh ia megi kai si ibegindu, tapi la dorek." 13:18 "Begikenlah dage, kai ertina perumpaman enda. 13:19 Kalak si megi Berita kerna Kinirajan e, tapi la iangkana bali kap ia ras benih si ndabuh ku tepi dalan. Si jahat reh nangko berita si enggo iamburken ku bas pusuhna e. 13:20 Benih si ndabuh ku taneh si erbatu-batu bali ras kalak si minter ngaloken Berita e alu meriah ukur asum ibegina. 13:21 Tapi la mbages janah kentisik ngenca i bas ia. Adi ia ngenanami kesusahen ras iayak-ayak erkiteken Berita e, minter tondel ukurna. 13:22 Benih si ndabuh ku tengah-tengah peren duri bali ras kalak si ngaloken Berita e; tapi aru atena kerna geluhna ras merincuh kal ia bayak e maka kicat Berita e, janah e me erbahanca la erbuah. 13:23 Tapi benih si ndabuh ku taneh si mehumur bali ras kalak si megi Berita dingen iangkana, jenari erbuah pe; lit si erbuah seratus, lit si enem puluh, lit si telu puluh." 13:24 Jenari ituriken Jesus ka perumpaman man kalak e nina, "Adi Kinirajan Surga e banci iandingken ras kalak si nuan benih si mehuli i jumana. 13:25 Tapi i bas sada berngi, asum kerina kalak enggo tunduh, iamburken musuhna ku juma e buah sesa. 13:26 Kenca turah page e dingen kenca rumpah teridah me sesa ndai. 13:27 E maka isungkun si erdahin i bas juma e perjuma ndai nina, 'O tuan, ma benih si mehuli nge mbaru enda isuanndu i jumandu e? I ja nari nge rehna sesa e?' 13:28 Erjabap tuan e, 'Musuh nge si ngamburken benih sesa ku je.' Jenari nina si erdahin e, 'Iruahi kami dage sesa e?' 13:29 Erjabap tuan e, 'Ola, sabap adi iruahindu sesa e, banci jadi page e pe ikut meruah. 13:30 Pelepas saja sesa e turah ras page seh rani. I bas paksa peranin e pagi kusuruh kalak si rani pepulung sesa lebe, jenari iberkisi gelah iambekken ku bas api. Kenca si e kusuruh ipepulungna page ku bas lumbungku.' " 13:31 Ituriken Jesus ka perumpaman si deban nina, "Kinirajan Surga banci iandingken ras sengkebuah benih sawi si isuanken kalak i bas jumana. 13:32 Tuhu benih sawi benih si kitik i bas kerina benih sinuan-sinuan. Tapi kenca turah, batangna si galangna i bas batang gule-gulen si debanna. Bagi batang kayu kap sawi e seh maka perik-perik pe banci rasar i bas dahan-dahanna." 13:33 Ituriken Jesus ka perumpaman si deban nina, "Kinirajan Surga e banci iandingken alu ragi. Ibuat sekalak diberu me ragi e, jenari iadukna ras telu tumba tepung seh niar jadi kembang." 13:34 Kerina enda ipeseh Jesus man kalak si nterem alu perumpaman. Adi la arah perumpaman labo kai pe ikataken Jesus man kalak si nterem e. 13:35 Alu bage seh me kai si ikataken Dibata arah nabi nina, "Alu perumpaman-perumpaman me Aku ngerana ras kalak e; Kuturiken me kai si terbuni mula tembe doni nari." 13:36 Jenari mulih Jesus, itadingkenNa kalak si nterem e. Idahi ajar-ajarNa Ia, jenari nina man Jesus, "Turiken min man kami erti perumpaman sesa si turah i juma e." 13:37 Ngaloi Jesus, "Si ngambur benih si mehuli e, e me Anak Manusia si isuruh Dibata; 13:38 juma e, e me doni enda; benih si mehuli e, e me kalak si enggo ngendesken dirina man Dibata. Sesa e, e me kalak si ikuasai si Iblis; 13:39 musuh si ngambur benih sesa e, e me Iblis. Paksa peranin, e me kedungen doni enda, janah si rani e me malekat-malekat. 13:40 Bagi sesa ipepulung kalak si rani jenari itutungna, bage ka me pagi i bas pendungi doni enda. 13:41 Isuruh Anak Manusia e me malekat-malekatNa gelah ipepulungna kerina si mabai manusia erdosa i bas kinirajanNa, bage pe kerina manusia si erbahan jahat, 13:42 jenari iambekkenNa me kerina ku api. I bas api e, tangis me kerina dingen seh kal suina atena. 13:43 Tapi kalak si ngelakoken si ngena ate Dibata ersinalsal bagi matawari i bas Kinirajan Bapana. Begikenlah, adi lit kin cupingndu!" 13:44 "Kinirajan Surga e banci iandingken ras erta-erta si terbuni i tengah juma. Idat kalak erta e, jenari itamburina mulihi. Meriah kal ukurna, e maka lawes ia, idayakenna kerina erta-ertana, jenari itukurna juma e." 13:45 "Adi Kinirajan Surga e banci iandingken ras sekalak perbinaga si ndarami mutiara si mejilena. 13:46 Kenca jumpa ia mutiara si mejile e, lawes ia, idayakenna kerina si lit i bas ia, jenari itukurna mutiara ndai." 13:47 "Kinirajan Surga e banci iandingken ras jala si iamburken ku lawit. Erbage-bage nurung ku bas jala e. 13:48 Kenca dem jala e, irintak penjala me ku duru, jenari kundul ia milihi nurung e. Si mehuli itamakenna ku bas tong, janah si la mehuli iambekkenna. 13:49 Bage pe i bas wari pendungi pagi: reh me malekat-malekat nerapken kalak jahat i bas kalak si ngelakoken si ngena ate Dibata. 13:50 Kalak jahat e iambekkenna ku api. I bas api e tangis me ia kerina dingen mesui kal atena i je." 13:51 Jenari isungkun Jesus ajar-ajarNa e nina, "Iangkandu nge perumpaman enda kerina?" Erjabap kalak e, "Iangka kami." 13:52 E maka nina Jesus, "Bageme tep-tep guru Undang-undang si enggo jadi murid i bas Kinirajan Surga bali kap ia ras sekalak tuan rumah; ipedaratina erta-ertana si meherga si mbaru ras erta-ertana si enggo ndekah." 13:53 Kenca dung ituriken Jesus perumpaman e, lawes Ia i bas ingan e nari ku kutaNa. 13:54 Kenca Ia seh i kutaNa, ngajar Ia i bas rumah pertoton kalak Jahudi man anak kutaNa e. Mamang ate kalak nina, "I ja nari nge pemetehNa e dingen i ja nari nge KuasaNa erbahan tanda-tanda sengget e? 13:55 Ma Anak tukang kayu kin Ia? Ma Maria kin nandeNa, janah Jakup, Joses, Simon ras Judas nge seninaNa? 13:56 Ma turangNa pe i jenda nge kerina?" 13:57 E maka la ialoken kalak Nasaret e Jesus. Perbahan si e nina Jesus man kalak e, "Sekalak nabi ipehaga kalak nge i japa pe; tapi i kutana ras i tengah-tengah keluargana lang." 13:58 Perbahan la tek anak kuta e man Jesus, e maka la piga ibahan Jesus i je tanda-tanda sengget.
14:1 Paksa si e, berita kerna Jesus seh man Herodes raja i daerah Galilea. 14:2 E maka nina Herodes man pegawaina, "Si tuhuna Ia me Johanes Peridiken si enggo nggeluh mulihi. Perbahan si e nge maka erdahin kuasa-kuasa e i bas Ia." 14:3 Ope si e, enggo isuruh Herodes perajuritna nangkap Johanes Peridiken dingen namakenca ku bas penjara. Bage ibahan Herodes erkiteken lit sanditna ras Herodias ndehara sembuyakna Pilipus. 14:4 Perbahan pernah ikataken Johanes Peridiken man Herodes, "La patut iempoindu Herodias perbahan ia ndehara sembuyakndu," 14:5 e maka ersura-sura Herodes munuh Johanes Peridiken. Tapi mbiar Herodes man kalak Jahudi, sabap kalak Jahudi tek maka Johanes Peridiken e me kap sekalak nabi. 14:6 Asum iperingeti wari tubuh Herodes, landek anak Herodias si diberu i lebe-lebe Herodes ras temuena. Meriah kal ukur Herodes, 14:7 e maka erpadan ia man anak e nina, "Kubereken man bandu aminna kai pe ipindondu!" 14:8 Kenca iajar-ajari nandena nina, "Genduari, bereken dage man bangku takal Johanes Peridiken tare talam!" 14:9 Megi pemindonna enda, ceda ate Raja Herodes. Tapi perbahan enggo ia erpadan i lebe-lebe temuena, e maka isehkenna pemindonna e. 14:10 Isuruhna perajuritna ku penjara nampul kerahung Johanes Peridiken. 14:11 E maka ibaba perajurit takal Johanes Peridiken tare talam, iberekenna man anak e, jenari ibereken anak e man nandena. 14:12 Kenca bage reh ajar-ajar Johanes Peridiken ku penjara, ibuatna mait Johanes, jenari ikuburkenna. Kenca ikuburkenna, iberitakenna man Jesus. 14:13 Kenca ibegi Jesus berita kerna Johanes enggo mate, lawes Ia sisada-sisada tare perahu ku sada ingan si melenget. Tapi ieteh jelma si nterem ku ja Ia lawes, e maka berkat ia i bas kutana nari ngikutken Jesus arah daraten. 14:14 Asum nusur Jesus i perahu nari, idahNa kalak si nterem e. Mekuah ateNa, e maka ipepalemNa asakai kalak penakiten si lit i je. 14:15 Kenca ben wari, reh ajar-ajarNa ndahi Ia, jenari nina, "Ingan enda melungun janah wari pe enggo ben. Suruhlah kalak si nterem enda lawes gelah itukurna nakanna i kuta-kuta si ndeher i jenda nari." 14:16 Ngaloi Jesus, "Labo perlu ia lawes. Kamlah mereken nakanna." 14:17 Nina ajar-ajarNa, "Lima ngkibul roti ras dua ikan ngenca lit i bas kami." 14:18 Nina Jesus, "Baba ku jenda roti ras ikan e!" 14:19 Jenari isuruhNa kalak si nterem e kundul i bas dukut. Kenca ialokenNa roti ras ikan e, ertoto Ia ngataken bujur man Dibata, icepik-cepikna roti e, jenari iberekenNa man ajar-ajarNa gelah ielaken man kalak si nterem e. 14:20 Kerina ia man seh besur. Kenca elah man ipepulung ajar-ajar asakai si iba, buena sepuluh dua sumpit. 14:21 Teremna kalak si man e kira-kira lima ribu kalak dilaki, janah la ikira diberu ras anak-anak. 14:22 Kenca man, isuruh Jesus ajar-ajarNa nangkih perahu gelah leben berkat ngepari dano. Berkat kenca ajar-ajarNa e, isuruhNa ka kalak si nterem mulih. 14:23 Kenca bage lawes Jesus ku sada uruk guna ertoto. Seh berngi Jesus i bas ingan e sisada. 14:24 Paksa si e perahu si idatasi ajar-ajar enggo ndauh ku tengah dano, janah menam-menam gedap sabap rembus angin meter nungsang perahu e. 14:25 Tekuak manuk reh Jesus ndahi ajar-ajarNa; erdalan Ia i babo lau. 14:26 Asum idah ajar-ajar e Jesus erdalan i babo lau, sengget dingen mbiar kal ia. Serko ajar-ajar e nina, "Begu!" 14:27 Tapi minter ngerana Jesus man bana nina, "Tetapkenlah ukurndu! Aku kap enda, ola kam mbiar!" 14:28 Jenari ngaloi Petrus, "O Tuhan, adi Kam kin e, suruhlah aku erdalan i babo lau ndahi Kam." 14:29 Nina Jesus, "Marilah!" E maka nusur Petrus i perahu e nari, erdalan ia i babo lau ndahi Jesus. 14:30 Tapi asum igejapna meter angin, mbiar ia, jenari menam pe ia gedap. Perbahan si e, serko ia nina, "O Tuhan sampati aku!" 14:31 Minter itangkap Jesus tan Petrus, jenari nina, "O kam si kurang kiniteken, ngkai maka la tetap ukurndu?" 14:32 Kenca Jesus ras Petrus nangkih perahu, minter ngadi angin si meter e. 14:33 Jenari isembah ajar-ajar si idas perahu e Jesus nina, "Tuhu-tuhu me Kam Anak Dibata!" 14:34 Seh me kalak e i tepi dano i taneh Genesaret. 14:35 I Genesaret itandai kalak Jesus, e maka iberitakenna man kerina kalak si penakiten si lit i belang-belang daerah e, jenari ibabana kalak si penakiten e man Jesus. 14:36 Ipindokenna man Jesus gelah banci min uisNa lah gia idadap kalak si penakiten e. Kerina kalak si ndadap uis Jesus e malem i bas penakitna nari.
15:1 Jenari reh piga-piga kalak Parisi ras guru-guru agama Jahudi ndahi Jesus. Nina man Jesus, 15:2 "Engkai maka ajar-ajarNdu la ngikuti adat nini-nininta? Ope man la iburihina tanna rikutken adat si dekah." 15:3 Ngaloi Jesus, "Kam pe ngkai maka ilanggarndu pedah Dibata erkiteken, atendu patuh man adat si ndekah saja? 15:4 Sabap nina Dibata, 'Mehamatlah man bapandu ras nandendu.' Ise numpahi bapana ntah nandena la banci lang iukum mate kap ia. 15:5 Tapi nindu ngajar: Adi lit kalak si ngataken man orang tuana, 'Kai si banci ialokenndu i bas aku nari enggo kupersembahken man Dibata,' 15:6 e maka kalak si bage lanai iarusken enghamati orang tuana e. Alu bage lanai meherga man bandu Kata Dibata erkiteken adat nini-ninindu. 15:7 O kalak si pekulah-kulah! Tuhu kal kai si ikataken Nabi Jesaya kerna kam, 15:8 'Nina Dibata, bangsa enda ipujina Aku i bas biberna ngenca, tapi ukurna ndauh sirang i bas Aku nari. 15:9 La lit ertina isembahna Aku, sabap undang-undang agama si ajarkenna e me peraturen-peraturen manusia!' " 15:10 Kenca bage idilo Jesus kalak si nterem e, jenari nina, "Begiken dingen ertikenlah! 15:11 Labo si bengket arah babah erbahanca kalak keliamen, tapi si ndarat arah babahna nari nge erbahanca ia keliamen." 15:12 Jenari reh ajar-ajarNa ndeheri Ia nina, "IetehNdu ka nge maka kitik ukur kalak Parisi megi KataNdu e?" 15:13 Erjabap Jesus, "Kerina si turah, si labo BapangKu si i Surga nuansa iruah nge pagi. 15:14 Labo man ukuren kalak Parisi e. Ia peminpin si pentang. Adi kalak pentang negu kalak pentang tentu duana ia ndabuh ku parik." 15:15 Jenari nina Petrus, "Turiken dage man kami erti perumpaman e." 15:16 Ngaloi Jesus, "Kam pe dage langa denga bo ngerti? 15:17 La iangkandu perumpaman e, maka si bengket ku bas babah jelma terus kap ku bas beltek jenari ipedarat ka? 15:18 Tapi kai si ndarat arah babah, i bas pusuh nari kap rehna; si e me erbahanca kalak keliamen. 15:19 Sabap i bas pusuh nari nge rehna sura-sura si jahat, si erbahanca ia munuh, erlua-lua, erlagu la mehuli, nangko, jadi saksi si perguak dingen numpahi. 15:20 Enda me erbahanca kalak keliamen. Tapi man ope erburih bagi si ikatakenna labo erbahanca kalak la bersih rikutken aturen agama." 15:21 Jenari lawes Jesus ku daerah deherken Kuta Tirus ras Sidon. 15:22 I je reh sekalak diberu kalak Kanaan ndahi Jesus nina, "O Tuhan, Anak Daud! Mekuah min ateNdu aku sabap anakku iseluki setan. Mekelek kal iakapna." 15:23 Tapi sengkebabah ranan pe Jesus la ngaloi. E maka ideheri ajar-ajarNa ia, jenari nina, "Pelawes min diberu e, sabap gejek ia arah pudinta." 15:24 E maka ngaloi Jesus man diberu e, "Bangsa Israel desken biri-biri si enggo lalar kap, janah Aku isuruh Dibata man guna ia ngenca." 15:25 Minter erjimpuh diberu e i lebe-lebe Jesus, jenari nina, "O Tuhan sampati min aku!" 15:26 Ngaloi Jesus, "La patut ibuat nakan anak-anak jenari ibereken man biang." 15:27 Nina diberu e, "Tuhu Tuhan, tapi biang pe man rimah-rimah si ndabuh i bas meja tuanna nari." 15:28 E maka nina Jesus man bana, "Kam sekalak diberu si tuhu-tuhu tek man Dibata. Perbahan si e jadi me man bandu bagi sura-surandu." Janah paksa si e minter malem anakna ndai. 15:29 Itadingken Jesus ingan e, jenari lawes Ia erdalan arah tepi dano Galilea. InangkihNa sada uruk, i je kundul Ia. 15:30 Nterem jelma rehen ndahi Jesus; ibabana kalak si mate serapen, si cempang-cempang, si pentang, si pekak ras erbage-bage penakit si deban. Ipepedemna si penakiten e i lebe-lebe Jesus. Jenari ipepalem Jesus kerina. 15:31 E maka mamang ate kalak si nterem ngidah kalak pekak enggo banci ngerana, si mate serapen ipepalem, si cempang-cempang enggo banci erdalan alu mehuli, si pentang enggo erpengidah. Jenari ipujina Dibata si isembah kalak Israel. 15:32 Kenca bage idilo Jesus ajar-ajarNa jenari nina, "Mekuah ateKu ngenehen kalak si nterem enda, sabap enggo telu wari ia ras Aku janah genduari lanai lit kai pe i bas ia si man panganna. La ia Kupelepas lawes adi langa kin ia man, sabap banci kari lumben ia i tengah dalan." 15:33 Nungkun ajar-ajarNa, "I bas ingan si melungun enda i ja ibuat pangan guna mesuri jelma si bagenda teremna?" 15:34 Nina Jesus, "Piga lit i bas kam roti?" Erjabap ajar-ajarNa, "Pitu ngkibul roti janah lit piga-piga ikan." 15:35 E maka isuruh Jesus jelma si nterem e kundul i bas taneh. 15:36 IbuatNa roti si pitu ngkibul ras ikan e, jenari ertoto Ia ikatakenNa bujur man Dibata. Kenca bage icepik-cepikNa, jenari iberekenNa man ajar-ajarNa guna ielaken man kalak si nterem. 15:37 Kerina ia man seh besur. Kenca elah man ipepulung ajar-ajar kerina si iba, buena lit pitu sumpit. 15:38 Teremna si man e lit kira-kira empat ribu kalak, diberu ras anak-anak la ikira. 15:39 Janah kenca isuruh Jesus kalak si nterem e mulih, lawes Ia ku perahu jenari erlayar ku Magdala.
16:1 Piga-piga kalak Parisi ras kalak Saduki reh ncubai Jesus, e maka ipindona gelah icidahken Jesus tanda sengget mbuktikenca maka Dibata si nuruh Ia. 16:2 Tapi ngaloi Jesus, "Kenca ben wari, adi megara langit, ikatakenndu, 'Berngi enda ugapa pe salang kal.' 16:3 Tapi adi erpagi-pagi megara langit janah embun mekapal, ikatakenndu, 'Sendah ugapa pe udan me.' Ietehndu kerna musim arah rupa langit, tapi la iangkandu kerna tanda-tanda jaman. 16:4 Andiko, jahatna kalak si genduari enda! Ipindondu tanda man bangKu. Labo Kubahan! Seakatan tanda Nabi Juna ngenca." Jenari lawes Jesus, itadingkenNa kalak Parisi ras kalak Saduki e. 16:5 Asum Jesus ras ajar-ajarNa ngepari dano, lupa ajar-ajarNa maba roti. 16:6 Nina Jesus man ajar-ajarNa, "Metenget dingen erjaga-jagalah kam nandangi ragi kalak Parisi ras kalak Saduki." 16:7 Rukur ajar-ajarNa e, jenari nina sapih-sapih ia, "Perbahan lupa kita maba roti maka bage nina." 16:8 Tapi ieteh Jesus kai si icakapken ajar-ajar e, e maka nina, "Engkai maka kerna la lit roti icakapkenndu? Kurang kal tuhu kinitekenndu! 16:9 Langa kin lalap iangkandu? La kin ingetndu asum Kucepik-cepik roti si lima ngkibul guna lima ribu kalak? Piga sumpit asum si e ipepulung ibana? 16:10 Bage pe kerna roti si pitu ngkibul guna empat ribu kalak, piga sumpit asum si e ipepulung ibana? 16:11 Kuga maka la iangkandu, maka si Kukataken man bandu e labo kerna roti? Metengetlah kam nandangi ragi kalak Parisi ras kalak Saduki!" 16:12 Kenca bage maka enggo iangka ajar-ajar maka maksud Jesus labo metenget nandangi ragi si lit i bas roti, tapi metenget nandangi ajaren kalak Parisi ras kalak Saduki. 16:13 Kenca seh Jesus i daerah Kesarea Pilipi, nungkun Ia man ajar-ajarNa nina, "Nina kalak, ise nge Anak Manusia si isuruh Dibata e?" 16:14 Erjabap ajar-ajarNa, "Lit ngatakenca maka Kam kap Johanes Peridiken. Lit ka ngatakenca Elia, bage pe lit ngatakenca maka Kam Jeremia ntah pe sekalak i bas nabi-nabi si deban." 16:15 Isungkun Jesus ka ajar-ajarNa, "Tapi iakapndu ise Aku enda?" 16:16 Erjabap Simon Petrus, "Kam kap Mesias, Anak Dibata si Nggeluh." 16:17 Ngaloi Jesus, "O Simon, anak Jona, ketuahen me kam, sabap labo manusia ngataken si enda man bandu, tapi BapangKu si i Surga kap. 16:18 Janah Kukataken pe man bandu: Kam kap Petrus, batu si enteguh, janah i babo batu palas enda me Kupajekken perpulungenKu, si la tertaluken aminna pe alu kinirajan kematen. 16:19 Kubereken me man bandu kunci Kinirajan Surga. Kai si irakutindu i doni enda, i Surga pe enggo kap irakuti; kai si iosarindu i bas doni enda, i Surga pe enggo kap iosari." 16:20 Jenari ikataken Jesus man ajar-ajarNa gelah ola iturikenna man ise pe maka Ia kap Mesias si ipadanken Dibata. 16:21 I bas paksa si e nari mulai me ituriken Jesus alu jelas man ajar-ajarNa nina, "Aku la banci lang lawes ku Jerusalem, la banci lang Kunanami erbage-bage kiniseran i bas peminpin-peminpin Jahudi, imam-imam si mbelin ras i bas guru-guru agama Jahudi nari. Aku ibunuh tapi i bas wari si peteluken ipekeke ka i bas si mate nari." 16:22 Tapi iawin Petrus me Jesus, e maka ipandangna Ia nina, "Mbera-mbera ipedauh Dibata si e i bas Kam nari o Tuhan! Labo banci jadi e man baNdu!" 16:23 Itulihken Jesus, jenari nina man Petrus, "Laweslah i bas Aku nari, o, Iblis! Isidingindu kap Aku. Perukurenndu perukuren manusia, labo perukuren Dibata." 16:24 Jenari nina Jesus man ajar-ajarNa, "Ise atena ikut ras Aku arus ipersilahangna bana, ipersanna kayu persilangna jenari iikutkenna Aku. 16:25 Sabap ise mpertahanken kegeluhenna, bene kap kegeluhenna e, tapi ise kebenen kegeluhenna erkiteken Aku, ialokenna me kegeluhenna e. 16:26 Lit kin gunana man sekalak jelma, adi man bana gia kerina erta-erta doni enda tapi bene kegeluhenna si tuhu-tuhu? Tentu lang! Kai pe labo banci ibahan manusia gancih kesahna. 16:27 Sabap reh me Anak Manusia si isuruh Dibata alu kemulian si mbelin dingen iarakken malekat-malekat Dibata. I bas paksa e pagi ibalasNa man sekalak-sekalak sue ras kai si enggo ibahanna. 16:28 Ingetlah! I bas si pulung enda lit piga-piga kalak si langa mate ope denga idahna Anak Manusia si isuruh Dibata i bas KinirajanNa."
17:1 Enem wari kenca si e Jesus mabai Petrus, Jakup, ras sembuyakna Johanes serap ku das deleng si meganjang. 17:2 I lebe-lebe kalak enda teluna, salih rupa Jesus: ayoNa ersinalsal bagi terang matawari janah uisNa mbentar erndilap-ndilap. 17:3 Jenari idah ajar-ajar si telu kalak e Musa ras Elia ercakap-cakap ras Jesus. 17:4 E maka nina Petrus man Jesus, "O Tuhan, senang kal iakap kami i jenda; adi mehuli iakapNdu banci kubahan i jenda telu sapo-sapo, sada man baNdu, sada man Musa, janah sada nari man Elia." 17:5 Asum Petrus ngerana denga, rempet nusur embun ersinalsal ngelinggemi Jesus, Musa ras Elia. Jenari terbegi sora i bas embun e nari, "Enda me AnakKu si Kukelengi, Ia me si nehken peratenKu begikenlah Ia!" 17:6 Kenca ibegi ajar-ajar sora e, nembah ia, ayona seh ku taneh, janah mbiar kal ia. 17:7 Tapi ideheri Jesus ajar-ajar e, ikuitNa, jenari nina, "Tediskenlah! Ola kam mbiar!" 17:8 E maka jurgak ajar-ajar e ise pe lanai idahna i je seakatan Jesus. 17:9 Tupung erdalan nusur ku berneh, ngerana Jesus man ajar-ajarNa nina, "Ola iturikenndu man ise pe kerna kai si enggo idahndu ndai ope denga Anak Manusia si isuruh Dibata ipekeke i bas si mate nari." 17:10 Jenari nungkun ajar-ajar man Jesus, "Adi bage, ngkai maka ikataken guru agama Jahudi maka Elia arus reh lebe?" 17:11 Ngaloi Jesus, "Tuhu Elia leben reh guna mpesikap kerinana. 17:12 Tapi Kukataken man bandu: Elia si tuhuna enggo reh, tapi la ia itandai kalak, e maka ibahan kalak man bana bagi ate-atena. Bage me pe, Anak Manusia nandangi ngenanami kiniseran erkiteken perbahanen kalak e." 17:13 Kedungenna iangka ajar-ajar maka si imaksudken Jesus e me kap kerna Johanes Peridiken. 17:14 Kenca seh Jesus ras ajar-ajarNa ku jelma si nterem, reh sekalak dilaki ndahi Jesus. Erjimpuh ia i lebe-lebe Jesus 17:15 jenari nina, "O Tuan, mekuah min ateNdu man anakku! Anakku e tabun mekelek kal. Megati ia guling ku bas api bage pe ku bas lau. 17:16 Enggo kupindoken man ajar-ajarNdu gelah ipepalemna, tapi la ia ngasup pepalemsa." 17:17 E maka nina Jesus man ajar-ajarNa e, "O kam kalak si la erkiniteken, kam enggo salah! Asakai nari dekahna Aku ras kam? Asa kai nari dekahna Aku tahan ras kam? Baba anak e ku jenda!" 17:18 Isuruh Jesus gelah ndarat setan si neluki anak e. E maka ndarat setan e, jenari minter malem penakit anak e i bas paksa e ka. 17:19 Kenca bage reh ajar-ajar ndeheri Jesus. Asum la nai sada pe i je kalak si nterem, nungkun ajar-ajar e man Jesus nina, "Engkai maka la kami ngasup mpelawes setan e?" 17:20 Ngaloi Jesus, "Perbahan kam kurang tek! Inget! Adi lit kinitekenndu asa buah sawi lah gia, banci kap ikatakenndu man uruk enda, 'Miser i bas inganndu enda nari ku jah!', janah miser me uruk e. Labo lit kai pe si metahat man bandu. 17:21 Tapi setan si bagi enda ndai labo terpelawes adi la kin alu gegeh ertoto dingen erpuasa." 17:22 Asum Jesus ras ajar-ajarNa i Galilea, ngerana Jesus man ajar-ajarNa e nina, "Anak Manusia si isuruh Dibata lanai ndekah iendesken ku bas kuasa manusia. 17:23 Ibunuhna me Ia, tapi i bas wari peteluken ipekeke Dibata Ia mulihi i bas si mate nari." Megi kata Jesus e ceda ate ajar-ajarNa. 17:24 Kenca seh Jesus ras ajar-ajarNa i Kapernaum reh si ngutip yuren Rumah Pertoton njumpai Petrus. Nina man Petrus, "Gurundu nggalari yuren Rumah Pertoton ntah lang?" 17:25 Erjabap Petrus, "Nggalar." Kenca Petrus mulih, Jesus leben mperkuanken ia nina, "O Simon, kuga nge iakapndu? I bas ise nari nge raja-raja doni enda ngutip yuren ntah pajak? I bas rayatna nari ntah i bas kalak si deban nari?" 17:26 Ngaloi Petrus, "I bas kalak si deban nari." E maka nina Jesus, "Adi bage, rayatna la nggalar. 17:27 Tapi gelah ola tondel ukur kalak e erkiteken kita, to lawes ku dano ngkawil. Apai nurung si pemena itangkapndu, uak babahna. I bas babahna idatndu kari duit pirak cukup guna nggalari yurenKu ras yurenndu. Buat duit pirak e jenari galari yurenta."
18:1 Paksa si e reh ajar-ajar Jesus ndeheri Ia, jenari nina, "Ise si mbelinna i bas Kinirajan Surga?" 18:2 Idilo Jesus sekalak danak-danak, isuruhNa tedis i lebe-lebe ajar-ajar, 18:3 jenari nina, "Ingetlah! Adi la kin kam tuhu-tuhu robah dingen bali ras danak-danak, asa ndigan pe kam labo banci bengket ku bas Kinirajan Surga. 18:4 Si mbelinna i bas Kinirajan Surga e me kalak si peteruk bana bali ras anak-anak enda. 18:5 Bage pe ise ngaloken danak-danak si bagenda i bas gelarKu, ialokenna kap Aku pe." 18:6 "Ise erbahanca maka sekalak i bas si kitik enda tondel ukurna erkiniteken man bangKu, ulin irakutken batu penggilingen ku kerahungna, jenari igedapken ia ku bas lawit. 18:7 Cilaka kal doni enda sabap erbage-bage i je si erbahanca kalak erdosa! Tuhu la tersilahken si enda kerina tapi cilaka kal kalak si erbahanca dosa e jadi! 18:8 Adi tanndu ntah nahendu erbahanca kam erdosa, tekteklah e jenari ambekken! Ulin kam nggeluh sada tan ntah sada nahe asangken dua tanndu ras dua nahendu tapi iambekken kam ku bas api naraka si la ernimpet-nimpet. 18:9 Bage pe adi matandu erbahanca kam erdosa, pulditken ras ambekkenlah matandu e. Ulin kam nggeluh sada mata asangken dua matandu tapi kam iambekken ku bas api naraka." 18:10 "Ingetlah, ola la meherga iakapndu kalak si kitik enda. Sabap lit kap malekatna si katawari pe natap ku ayo BapangKu si i Surga. 18:11 Sabap Anak Manusia si isuruh Dibata rehengkelini si enggo papak! 18:12 Kuga kin pengakapndu? Adi lit sekalak lit biri-birina seratus, jenari bene sada, kuga nge ibahanna? Tentu itadingkenna biri-birina si siwah puluh siwah e i mbalmbal, jenari lawes ia ndarami biri-biri si bene e. 18:13 Kenca idatna, tentu riahen ukurna kerna biri-biri si sada e asangken biri-biri si siwah puluh siwah si la papak. 18:14 Bage pe Dibata, Bapandu, labo ateNa sekalak pe danak-danak enda papak." 18:15 "Adi ersalah seninandu man bandu, katakenlah man bana salahna e, asum kam dua-dua. Adi erkadiola ia, enggo kap idatndu ia mulihi. 18:16 Tapi adi la kam ibegikenna, babalah temanndu sekalak ntah dua kalak gelah bagi tersurat i bas Pustaka Si Badia: 'Tep-tep pengadun enggo sah adi lit dua ntah telu kalak saksi.' 18:17 Tapi adi teman-temanndu e pe la ibegikenna, sehkenlah persoalen e man perpulungen. Adi perpulungen e pe la ibegikenna anggap sajalah ia bali ras kalak perbegu ntah pe kalak si muat cuke. 18:18 E maka Kukataken man bandu kerina: Kai si irakutindu i doni enda, enggo kap irakuti i Surga; kai si iosarindu i doni enda enggo kap mosar i Surga. 18:19 Tole Kukataken man bandu: Adi lit i bas kam dua kalak i doni enda ersada ukur kerna kai si ipindondu i bas pertotonndu man Dibata, tentu ibereken BapangKu si i Surga nge pemindonndu e. 18:20 Sabap i ja lit dua ntah telu kalak pulung i bas gelarKu, Aku lit i tengah-tengahna." 18:21 Jenari reh Petrus ndeheri Jesus nina, "O Tuhan, piga kali banci kualemi seninangku si ersalah man bangku? Cukup pitu kali?" 18:22 Erjabap Jesus, "Lang, labo cukup pitu kali, tapi pitu puluh kali pitu kali. 18:23 Sabap Kinirajan Surga bali kap ras sekalak raja si erkira atena ras juak-juakna. 18:24 Kenca ibenakenna perkiran e, isuruhna ngadap sekalak juak-juak si rutang erjuta-juta. 18:25 Tapi perbahan la ia ngasup nggalari utangna e, e maka isuruh raja gelah ia ndayaken dirina ras ndeharana bage pe anak-anakna bage ka pe kerina erta-ertana guna nggalari utangna e. 18:26 Tapi erjimpuh juak-juak e i lebe-lebe raja, jenari nina, 'Sabar kam nimaisa tuan, kugalari nge pagi utangku e kerina.' 18:27 Mekuah ate raja e, e maka isasapkenna utang juak-juak e jenari isuruhna mulih. 18:28 Asum juak-juak e erdalan mulih, jumpa ia ras sekalak juak-juak si deban si rutang man bana piga-piga ribu. Itangkapna dingen icekakna temanna e, jenari nina, 'Galari utangndu.' 18:29 Erjimpuh temanna e i lebe-lebena, jenari nina, 'Sabar kam nimaisa teman, kugalari nge pagi utangku e kerina.' 18:30 Tapi la ia sabar; itamakenna temanna e ku bas penjara seh bali utangna. 18:31 Ngidah si enda ceda ate teman-temanna si deban, e maka ipesehna man tuanna. 18:32 E maka isuruh raja me juak-juak ndai ngadap, jenari nina, 'Kam kalak jahat! Erkiteken pemindonndu, utangndu si bage buena enggo kusasapken. 18:33 Kam pe aturna mekuah atendu temanndu sapih juak-juak bagi mekuah ateku kam.' 18:34 Merawa-rawa kal raja e, jenari itamakenna juak-juak e ku bas penjara seh igalarina kerina utangna." 18:35 Tole nina, "Bage ka nge ibahan BapangKu si i Surga man bandu kerina adi la kin ialemindu seninandu terus ku bas pusuhndu."
19:1 Kenca dung Jesus ngajar, itadingkenNa Galilea, lawes Ia ku daerah Judea, ku lepar Lau Jordan. 19:2 Nterem kal jelma ngikutken Jesus. I je nterem kalak si penakiten ipepalemNa. 19:3 Jenari reh piga-piga kalak Parisi njumpai Jesus sabap atena ncubai Ia. Nungkun ia man Jesus nina, "Rikutken Undang-undang agamanta banci kin iulihken kalak ndeharana bagi ate-atena saja?" 19:4 Erjabap Jesus, "Langa kin iogendu kata si tersurat i bas Pustaka Si Badia, i ja ikataken maka mula-mulana ijadiken si Nepasa sekalak dilaki ras sekalak diberu? 19:5 Jenari nina si Nepasa e, 'Erkiteken si enda itadingken si dilaki me nande-bapana jenari ersada ia ras ndeharana janah si dua e enggo jadi sada.' 19:6 E maka lanai bo ia dua, tapi sada. Dage si enggo ipersadaken Dibata la banci isirangken manusia." 19:7 Nina ka kalak Parisi, "Adi bage, ngkai maka ipelepas Musa kalak ngulihken ndeharana alu erbahan surat mulih?" 19:8 Erjabap Jesus, "Perbahan la kam terajarken maka ipelepas Musa kam ngulihken ndeharandu. Tapi tang-tangna nari labo bage. 19:9 Ise ngulihken ndeharana, adi labo erkiteken ndeharana e erlagu la mehuli, ia enggo erlua-lua adi iempoina diberu si deban." 19:10 Jenari nina ajar-ajarNa man baNa, "Adi bage kin, ulin me la erjabu." 19:11 Ngaloi Jesus, "Labo kerina kalak ngaloken kata enda ndai, seakatan kalal si enggo itentuken Dibata. 19:12 Sabap erbage-bage kap dalanna maka kalak la banci erjabu: lit erkiteken pertubuhna kin erbahanca ia la banci erjabu, lit erkiteken kalak si deban erbahanca ia la banci erjabu, janah lit ka erkiteken igejapna maka ia idilo guna dahin i bas Kinirajan Surga. Ise ngasup ngaloken kata enda, alokennalah." 19:13 Jenari reh piga-piga kalak maba danak-danak man Jesus. Atena gelah ipasu-pasu dingen itotoken Jesus danak-danak e. Tapi iambati ajar-ajar Jesus kalak e. 19:14 E maka nina Jesus man ajar-ajarNa, "Pelepaslah danak-danak e reh ndahi Aku, ola ambati ia, sabap man kalak si bagi enda kap Kinirajan Surga." 19:15 Ipasu-pasu Jesus danak-danak e kerina, jenari lawes Ia i bas ingan e nari. 19:16 I bas sada wari, reh sekalak dilaki njumpai Jesus. Nungkun ia man Jesus nina, "O Guru, perbahanen si mehuli si kuga nge arus kubahan gelah aku dat kegeluhen si tuhu-tuhu si la erkeri-kerin?" 19:17 Erjabap Jesus, "Engkai maka isungkunndu Aku kerna si mehuli? Si sada e kap ngenca si mehuli. Ikutken kerina pedah Dibata adi bengket atendu ku kegeluhen si tuhu-tuhu." 19:18 Nungkun ka ia, "Pedah si apai kin?" Erjabap Jesus, "Ola munuh; ola erlua-lua; ola nangko; ola jadi saksi si la tuhu; 19:19 mehamatlah man bapa ras nandendu; kelengi temanndu manusia bagi ikelengindu bandu." 19:20 Nina anak perana e, "Kerina e enggo kudalanken. Kai nari kin si kurang?" 19:21 Erjabap Jesus, "Adi atendu gelah kam serta, laweslah, dayaken kerina erta-ertandu, jenari bereken duitna man kalak musil, alu bage ialokenndu me erta Surga; Jenari reh kam ngikutken Aku." 19:22 Kenca ibegi anak perana e kata Jesus, lawes ia, gulut ukurna sabap bayak kal ia. 19:23 Jenari nina Jesus man ajar-ajarNa, "Kukataken man bandu: Tuhu-tuhu mesera kal kalak bayak bengket ku bas Kinirajan Surga. 19:24 Kukataken pe tole man bandu: sukahen unta mentas arah lubang jarum asangken kalak bayak bengket ku bas Kinirajan Surga." 19:25 Mamang kal ate ajar-ajar megi kata e, e maka nina, "Adi bage, ise nge banci terkelin?" 19:26 Ipernehen Jesus ajar-ajarNa, jenari nina, "Si enda la banci jadi i bas manusia, tapi i bas Dibata kai pe banci jadi." 19:27 Jenari nina Petrus man Jesus, "Nehenlah, enggo itadingken kami kerinana gelah ngikutken Kam. Dage kai nge pagi ialoken kami?" 19:28 Nina Jesus man ajar-ajarNa, "Kukataken man bandu i bas doni si mbaru pagi, asum Aku, Anak Manusia si isuruh Dibata kundul erkuasa i bas kursi Kinirajan, kam pe kerina ajar-ajarKu kundul kundul pagi i bas sepuluh dua kursi guna ngadili bangsa Israel si sepuluh dua suku. 19:29 Man kalak si enggo nadingken rumahna, seninana ntah turangna, bapana ntah nandena, anak-anakna ntah jumana erkiteken Aku, ibereken Dibata man bana seratus kali lipat janah ialokenna me kegeluhen si tuhu-tuhu si la erkeri-kerin. 19:30 Tapi nterem kalak si arah lebe genduari jadi arah pudi pagi, janah nterem kalak si arah pudi genduari jadi arah lebe pagi."
20:1 "Sabap Kinirajan Surga bali kap ras si mada kebun anggur. Erpagi-pagi si lampas ndarat ia i rumah nari ndarami kalak upahen guna erdahin i kebun anggurna. 20:2 Kenca ersada arihna ras kalak upahen e maka upahna sada duit pirak sada wari rikutken gaji biasa, isuruhna kalak upahen ku kebun anggurna. 20:3 Jam siwah erpagi-pagi ndarat ka ia i rumah nari, idahna kalak dongal-dongal i tiga. 20:4 Nina man kalak e, 'To, berkatlah kam pe ku kebun anggurku erdahin. Bujur nge kari kubahan upahndu.' 20:5 E maka berkat kalak e. Kira-kira jam sepuluh dua, bage pe jam telu karaben ndarat ka ia i rumah nari, janah bagi si ndai ka me perbahanenna. 20:6 Kira-kira jam lima karaben ndarat ka ia i rumah nari, jenari jumpa ia ras piga-piga kalak si tedis-tedis la erkai pe. Nungkun ia man kalak e nina, 'Engkai maka dongal-dongal saja kam gedang-gedang wari?' 20:7 Erjabap kalak e, 'Sabap la lit si ndilo kami ngemo i jumana.' Nina tuan e, 'To berkatlah kam pe ku kebun anggurku erdahin.' 20:8 Nandangi gelap nina tuan e man mandurna, 'To dilo kalak upahen e, jenari galari upahna; si perpudina erdahin lebe bereken upahna janah si lebe erdahin pudi bereken.' 20:9 Man kalak si mulai erdahin jam lima karaben iberekenna sada duit pirak sekalak. 20:10 Ngidah si enda, kalak si perlebena kal erdahin erpengakap maka lebih asa si e ialokenna. Tapi man bana igalari sada duit pirak ka nge sekalak. 20:11 Kenca ialokenna duit e, jungut-jungut ia man tuan e. 20:12 Nina, 'Kalak si pudin reh enda, sada jam ngenca erdahin, tapi kami erpagi-pagi nari seh ben iparpari las matawari ipeserindu ka nge upah kami.' 20:13 Ngaloi tuan e man sekalak si jungut-jungut e, 'O teman, begiken! Bujur kap kubahan man bandu. Enggo kap ndai sue arihta maka sada duit pirak upahndu sada wari. 20:14 E maka to mulih, baba upahndu e. Man kalak si pudin erdahin asa kam, bali ateku kubahan ras man bandu. 20:15 Ma ate-ateku nge adi duitku? Ntah cian kin atendu ngidah aku melumbar?' " 20:16 Jenari idungi Jesus kataNa nina, "Dage kalak si arah pudi jadi si arah lebe kap pagi, janah kalak si arah lebe jadi si arah pudi." 20:17 Sanga Jesus lawes ku Jerusalem, i tengah dalan iserapkenNa ajar-ajar si sepuluh dua, jenari nina, 20:18 "Begiken! Genduari kita i bas perdalanen ku Jerusalem. I jah iendesken kalak me Anak Manusia si isuruh Dibata, man imam-imam si mbelin ras guru-guru agama Jahudi, guna iukum mate. 20:19 Jenari iendeskenna man kalak si la nandai Dibata. Isaling-saling kalak si la nandai Dibata e Ia, iligasina, Jenari ipakukenna ku kayu persilang; tapi i bas wari si peteluken ipekeke Dibata mulihi." 20:20 Jenari reh ndehara Sebedeus ras anakna ndahi Jesus. Nembah-erjimpuh ia i lebe-lebe Jesus nuriken pemindonna. 20:21 Nungkun Jesus man bana, "Kai kin atendu?" Erjabap pernanden e, "Ateku min maka duana anakku enda kundul sekalak arah kemuhen, sekalak arah kawesNdu, kenca Kam jadi Raja pagi." 20:22 Tapi nina Jesus man bana ras anakna si dua kalak e, "La kap iangkandu kai si ipindondu e. Ngasup kin kam minem tare calung kiniseran si nandangi reh man bangKu e?" Erjabap kalak e duana, "Ngasup." 20:23 Nina ka Jesus man bana, "Payo katandu e, kam pe nandangi minem me tare calung kiniseranKu. Tapi kerna ise kundul arah kemuhen ras arah kawesKu labo Aku nentukenca. Ingan e pagi ibereken BapangKu man kalak si enggo ipilihNa." 20:24 Kenca ajar-ajar si sepuluh kalak nari megi kerna si enda, merawa ia man si dua kalak enda. 20:25 Perbahan si e idilo Jesus ajar-ajar e kerina jenari nina, "Enggo ietehndu maka pemerentah erkuasa nandangi rayatna janah peminpin-peminpin rate-ate nuruh rayatna. 20:26 Tapi i bas kam labo bage. Ise atendu jadi si mbelinna, ia arus ngelai nandangi kam kerina; 20:27 janah ise atendu jadi peminpin, ia arus jadi suruh-suruhenndu kerina 20:28 bagi Anak Manusia si isuruh Dibata, reh labo guna ielai tapi guna ngelai, janah iendeskenNa kesahNa guna nebusi nterem jelma." 20:29 Asum Jesus berkat ras ajar-ajarNa i Jeriho nari, nterem kal jelma ngikutken Ia. 20:30 I tepi dalan si ibentasi Jesus lit kundul dua kalak pentang. Kenca ibegina Jesus sangana mentas erlebuh ia nina, "O, Tuhan! O, Anak Daud! Mekuah min atendu ngenehen kami." 20:31 Itembehi kalak si nterem e ia, tapi reh gangna ia erlebuh nina, "O, Tuhan! O, Anak Daud! Mekuah min atendu ngenehen kami." 20:32 Ngadi Jesus erdalan, idiloNa kalak pentang e duana. Kenca bage nina Jesus, "Kai kin atendu Kubahan man bandu?" 20:33 Erjabap ia duana, "O, Tuhan, bahanlah min maka kami erpengidah!" 20:34 Mekuah ate Jesus ngenehen ia duana. Idadap Jesus matana, e maka minter erpengidah, jenari ikutkenna Jesus.
21:1 Kenca Jesus ras ajar-ajarNa seh i Betpage, i uruk Seton, enggo ndeher ku Jerusalem, isuruh Jesus dua kalak ajar-ajarNa leben. 21:2 Nina, "To lawes ku kuta si arah lebendu ah; kenca seh kam ku bas kuta e, idapetindu kari sada kelede tambat dingen anakna deherken ia. Osari nalina jenari tegu duana ku jenda. 21:3 Adi lit kalak nungkun nindulah, 'Perlu Tuhan'; kenca bage nindu minter nge kari ipelepasna kelede e ibabandu." 21:4 Si enda jadi gelah seh kai si enggo ikataken Dibata arah nabi nina, 21:5 "Katakenlah man Kuta Sion, genduari reh Rajandu ndahi kam, meteruk ukurNa iersakNa kelede, anak kelede singuda denga." 21:6 Jenari lawes ajar-ajar ndai, idalankenna kai si enggo ikataken Jesus man bana. 21:7 Iteguna kelede e ras anakna. Kenca ikimbangken ajar-ajar e uisna i gurung kelede ndai, kenca bage maka iersak Jesus. 21:8 Kalak si nterem ngkimbangken uisna i dalan. Lit ka deba itektekna lambe jenari iamparkenna i dalan. 21:9 Kalak si nterem si erdalan arah lebe Jesus ras arah pudiNa ersurak-surak nina, "Pujin man Anak Daud! Ipasu-pasu Dibata Ia si reh i bas gelar Tuhan! Pujilah Dibata!" 21:10 Kenca bengket Jesus ku bas kuta Jerusalem guntar belang-belang kota e. Nungkun anak kuta e nina, "Ise kin Ia?" 21:11 Erjabap kalak si nterem e, "Enda kap Jesus, Nabi i kuta Nasaret daerah Galilea nari." 21:12 Bengket Jesus ku Rumah Pertoton ipelawesNa kerina kalak si erbinaga ras si nukur i je. ItunggalingkenNa meja-meja kalak si nukari duit bage pe bangku-bangku kalak si erbinaga nderapati. 21:13 Jenari nina man kalak e, "Lit kap tersurat i bas Pustaka Si Badia maka nina Dibata, 'RumahKu igelari me pagi Rumah Pertoton.' Tapi ijadikenndu Rumah e jadi asar penamun." 21:14 Jenari reh kalak pentang ras kalak mate serapen ndahi Jesus i bas Rumah Pertoton e; ipepalem Jesus ia. 21:15 Ngidah tanda sengget si ibahan Jesus e, ngilas ate imam-imam si mbelin ras guru-guru agama. Bage pe ngilas atena anak-anak si ersurak-surak i bas Rumah Pertoton si ngataken, "Pujin man Anak Daud!" 21:16 E maka isungkun kalak enda Jesus nina, "IbegiNdu nge kai si ikataken anak-anak enda?" Erjabap Jesus, "Kubegi! Langa kin pernah iogendu i bas Pustaka Si Badia kerna si e? I je lit kap tersurat, 'Enggo iajariNdu danak-danak ras anak si minem denga guna nehken puji-pujin si serta.' " 21:17 Jenari itadingken Jesus kalak e, lawes Ia ku Betani janah i je Ia erberngi. 21:18 Pepagina lampas erpagi-pagi, asum Jesus ibas perdalanen mulih ku Jerusalem, melihe Ia. 21:19 I tepi dalan idahNa batang ara. IdeheriNa batang ara e, tapi la lit buahna, bulungna ngenca mbur. E maka nina Jesus man batang ara e, "Asa ndigan pe kam lanai erbuah!" Jenari minter kerah batang ara ndai. 21:20 Ngidah si e mamang kal ate ajar-ajarNa. E maka nina ajar-ajar e man Jesus, "Kuga maka bage kal pedasna batang ara e kerah?" 21:21 Erjabap Jesus, "Ingetlah! Adi tek kam man Dibata dingen la monce-once ukurndu, ngasup kap kam erbahanca bagi si enggo Kubahan nandangi batang ara enda; janah labo terjeng si e saja, tapi ngasup pe kam ngataken man uruk enda, 'Angkatken bandu jenari benterken bandu ku lawit,' e maka jadi me bage! 21:22 Adi tek kam, ialokenndu kap i bas Dibata nari kai saja si ipindondu man baNa arah pertotonndu." 21:23 Jenari bengket ka Jesus ku Rumah Pertoton kalak Jahudi; asum Ia ngajar reh piga-piga imam si mbelin ras peminpin-peminpin kalak Jahudi njumpai Ia nina, "Kuasa kai lit i bas Kam erbahan si enda kerina? Ise mereken Kuasa e man baNdu?" 21:24 Erjabap Jesus, "Kusungkun kam lebe, janah adi ijabapndu kari penungkunenKu, Kukataken man bandu Kuasa kai lit i bas Aku erbahan si enda kerina. 21:25 I ja nari rehna kuasa Johanes Peridiken, ibas Dibata nari ntah ibas manusia nari?" E maka sisungkun-sungkunen ia sapih-sapih ia nina, "Kuga ninta? Adi ninta, 'I bas Dibata nari,' kugapa pe niNa, 'Adi bage, ngkai maka la kam tek man Johanes Peridiken?' 21:26 Tapi adi ninta, 'I bas manusia nari,' mbiar kita jelma si nterem, sabap kerina kalak e erpengakap maka Johanes Peridiken nabi." 21:27 E maka erjabap kalak e man Jesus, "La ieteh kami." Perbahan si e nina Jesus man bana, "Aku pe la Kukataken man bandu alu kuasa kai Kubahan si enda." 21:28 "Tapi kuga pengakapndu kerna si enda? Lit me sekalak perbapan, anakna dua kalak dilaki. Nina man anakna sintua, 'O anakku, to erdahin kam sekali enda i kebun anggur.' 21:29 Erjabap anakna e, 'Banci bapa,' tapi la idalankenna. 21:30 Jenari ikatakenna man anakna singuda si ikatakenna man anakna sintua ndai. Ngaloi anakna singuda e, 'Aku lang,' tapi dungna erkadiola ia, e maka lawes ia erdahin ku kebun anggur e. 21:31 Si apai dage i bas si dua kalak enda nehken sura-sura bapana?" Erjabap kalak e, "Anak singuda." E maka nina Jesus man bana, "Leben nge pemungut cukai ras diberu si dahinna erlua-lua bengket Kinirajan Dibata asa kam. 21:32 Sabap kerehen Johanes Peridiken nuduhken man bandu dalan kegeluhen si ituduhken Dibata, janah la kam tek; tapi pengalo cuke ras diberu-diberu si pendahinna erlua-lua e, tek. Janah aminna enggo pe idahndu si e, lalap la erkusur ukurndu dingen lalap kam la tek man Tuhan." 21:33 Nina Jesus, "Begiken lah perumpaman enda. Lit sekalak si nuan anggur i bas jumana. Jenari ibidena kelewet. Ikurukna lubang ingan merehi buah anggur janah ipajekkenna sada menara ingan erjaga. Kenca bage isewakenna kebun e man kalak si newa. Jenari lawes ia ku negeri si deban. 21:34 Kenca seh peranin buah anggur, isuruh tuan e juak-juakna ngelegi sewa kebun e. 21:35 Tapi itangkap si newa kebun ndai juak-juak e, deba ipekpekina, deba ibunuhna janah deba ibenterina alu batu. 21:36 Isuruh tuan e ka juak-juak si deban teremen asa si arah lebe, tapi e pe bagi si arah lebe ndai ka nge ibahanna. 21:37 E maka dungna anakna jine isuruhna, sabap nina i bas ukurna, 'Tentu mehangke ia ngenehen anakku.' 21:38 Tapi asum idah si newa ndai anak tuan e nina sapih-sapih ia, 'Enda kap anak tuan si mada kebun anggur enda. Mari si bunuh ia gelah man banta kebunna enda.' 21:39 E maka itangkapna anak tuan e, iambekkenna ku darat kebun, jenari ibunuhna. 21:40 Dage, kenca reh tuan si mada kebun e, kuga nge ibahanna si newa kebun anggur ndai?" 21:41 Ngaloi kalak e man Jesus, "Tentu ibunuhna si newa kebun anggur si jahat e, jenari ipesewakenna kebun e man kalak si deban si nggit mereken sewana i bas paksa peranin." 21:42 Nina Jesus man bana, "Langa kin pernah iogendu kai si tersurat i bas Pustaka Si Badia? Nina, 'Batu si iambekken tukang e kap jadi batu palas. Enda perbahanen Tuhan kap; janah e tuhu-tuhu sengget kita natapsa ban ulina!' " 21:43 "Dage ingetlah," nina Yesus, "kerina hakndu i bas Kerajan Dibata ibuat ibas kam nari jenari ibereken man bangsa si patuh ngikutken perentah Dibata. 21:44 Ise ndabuh ku batu enda getem me ia; janah ise idabuhi batu e meripuk me ia." 21:45 Kenca ibegi imam-imam si mbelin ras kalak Parisi perumpaman e, ietehna maka kerna ia me si ikataken Jesus i bas perumpaman e. 21:46 E maka idaramina dalan nangkap Jesus. Tapi mbiar ia man kalak si nterem sabap kalak si nterem ngakui Jesus sekalak nabi.
22:1 Ngerana ka Jesus man kalak si nterem alu perumpaman nina, 22:2 "Kinirajan Surga e bali kap ras sekalak raja erbahan kerja erdemu bayu anakna. 22:3 Isuruhna suruh-suruhenna ngelegi kalak si enggo iundangna, tapi sekalak pe la nggit reh. 22:4 E maka isuruh raja e ka suruh-suruhenna si deban nina, 'Katakenlah man kalak si enggo iundang e: Nina raja, enggo sikap kerina pangan; lembu ras asuh-asuhenku si mbur enggo igeleh; e maka marilah ku kerja erdemu bayu enda!' 22:5 Tapi kalak si enggo iundang e la megiken kalak si erlegi enda. Lit lawes ku juma, lit lawes ndahiken usahana, 22:6 janah lit ka pe si nangkap suruh-suruhen raja ndai, iligasina jenari ibunuhna. 22:7 Perbahan si e merawa raja. Isuruhna perajurit-perajuritna ngkernepken kalak si munuh ndai bage pe enciluk kuta kalak si munuh e. 22:8 Jenari nina man suruh-suruhen, 'Enggo sikap pangan guna kerja erdemu bayu, tapi kalak si enggo kuundang erpenulak. 22:9 E maka to lawes ku simpang-simpang pasar, undanglah ku kerja enda asakai jelma si ijumpaindu.' 22:10 Berkat suruh-suruhen e ku simpang-simpang pasar, iundangna kerina kalak si ijumpaina subuk kalak jahat bagepe kalak bujur seh maka enggo dem ingan kerja erdemu bayu ndai. 22:11 Asum reh raja e ku bas njumpai temue, idahna sekalak si la isambarina uisna asum ia bengket ku bas ingan erdemu bayu e. 22:12 Nungkun raja e man bana nina, 'O teman, ngkai maka la isambarindu uisndu muatndu bengket ku bas ingan enda?' Sinik saja ia. 22:13 E maka nina raja man suruh-suruhenna, 'Iketlah tanna ras nahena, jenari ambekken ia ku ingan si gelapna kal. I je tangis ras mesui kal atena!' " 22:14 E maka idungi Jesus cakapNa nina, "Sabap nterem kalak si idilo, tapi la piga si ipilih." 22:15 Jenari lawes kalak Parisi e arih-arih guna ncubai Jesus alu penungkunen. 22:16 E maka raduken piga-piga kalak i bas parte Herodes nari, Kalak Parisi nuruh ajar-ajarna ndahi Yesus. Nina persuruhen e, "O, Guru, ieteh kami maka Kam kalak bujur. Kam ngajar alu terus terang kerna sura-sura Dibata nandangi manusia, alu la biar-biaren man ise pe. Sabap la erpilihen manusia man Bandu. 22:17 Kataken dage man kami, la kin ngelanggar Undang-undang agama Jahudi adi igalari pajak man pemerentah Roma?" 22:18 Tapi ieteh Jesus maka jahat ukur kalak enda e maka nina, "O kalak pekulah-kulah! Engkai maka icubaindu Aku? 22:19 Cidahken lebe man bangKu selambar duit!" Icidahken kalak e selambar duit man Jesus. 22:20 Jenari nina Jesus, "Gambar ras gelar ise kin enda?" 22:21 Erjabap kalak ndai, "Gambar ras gelar kepala pemerentah Roma." Jenari nina Jesus man bana, "Adi bage, bereken man pemerentah Roma kai patut ibereken man bana, janah berekenlah man Dibata kai patut ibereken man Dibata." 22:22 Megi si enda jengang kalak ndai. Jenari lawes ia nadingken Jesus. 22:23 I bas wari si ndai reh piga-piga kalak Saduki ndahi Jesus. Kalak enda me si ngatakenca maka manusia labo lit keke i bas si mate nari. 22:24 Nungkun ia man Jesus nina, "O Guru! Nina Musa, 'Adi sekalak dilaki mate nadingken ndeharana, janah la lit pupusna, e maka diberu si enggo mbalu e arus ilako-mangani senina si mate ndai gelah ipupusna anak jadi gancih si enggo mate e.' 22:25 Lit me nai i jenda ringan pitu kalak dilaki, pituna ia sembuyak. Empo si ntua, jenari mate ia. Janah perbahan la lit pupusna e maka ilakomangani si nomor dua diberu e. 22:26 Mate ka si nomor dua e, la lit pupusna. Bage ka me pe jadi nandangi si nomor telu janah bage me seterusna seh pituna ia enggo ngempoi diberu e. 22:27 Dungna diberu e pe mate. 22:28 Dage, asum manusia keke i bas si mate nari, ndehara ise nge pagi ia? Sabap pituna ia enggo erjabu ras diberu e." 22:29 Ngaloi Jesus, "Enggo lepak kal kam! Sabap la iangkandu Pustaka Si Badia, bage pe la iangkandu Kuasa Dibata. 22:30 Sabap kenca manusia keke i bas si mate nari, ia bali kap ras malekat-malekat i Surga, lanai ia empo ntah pe sereh. 22:31 Dage kerna si mate nggeluh mulihi, langa kin pernah iogendu i bas Pustaka Si Badia kai si ikataken Dibata man bandu? Nina Dibata, 22:32 'Aku kap Dibata si tetap isembah Abraham, Dibata si tetap isembah Isak ras Dibata si tetap isembah Jakup.' Ertina Ia labo Dibata si isembah kalak mate tapi Dibata si isembah kalak si nggeluh." 22:33 Jengang kal kalak si nterem megi pengajaren Jesus enda. 22:34 Kenca idah kalak Parisi maka lanai pang kalak Saduki nungkun man Jesus, arih-arih ia, 22:35 jenari sekalak i bas ia nari, e me guru agama, ncubai Jesus alu penungkunen nina, 22:36 "O Guru, perentah si apai kin si pentingna kal i bas kerina Undang-undang agama?" 22:37 Erjabap Jesus, "Kelengilah Tuhan Dibatandu asa ukurndu, asa tendindu, dingen asa gegehndu lit. 22:38 Enda me perentah si mbelinna dingen si pentingna. 22:39 Si peduaken bali ras si ndai e me, 'Kelengilah temanndu manusia bagi kam ngkelengi dirindu.' 22:40 Kerina Undang-undang agama si ibereken Musa ras nabi-nabi erpalasken duana perentah enda ndai kap." 22:41 Asum kalak Parisi e pulung denga, nungkun Jesus man bana, nina, 22:42 "Kuga pengakapndu kerna Mesias si ipadanken Dibata e? Kesusuren ise kin Ia?" Erjabap kalak e, "Kesusuren Daud." 22:43 Jenari nina Jesus, "Adi bage, ngkai maka ikataken Daud Ia Tuhan? Sabap Daud si ipengaruhi Kesah Si Badia ngataken, 22:44 'Nina Tuhan man Tuhanku: Kundulken arah kemuhenku, seh Kutamaken imbang-imbangndu i teruh tapak-tapak nahendu.' 22:45 Dage, adi Daud erlebuh man Mesias si ipadanken Dibata e 'Tuhan', kuga banci Mesias e kesusuren Daud ka?" 22:46 Sekalak pe la lit ngasup ngaloi Jesus; janah mulai i bas wari nari ise pe lanai pang nungkun man Jesus.
23:1 Jenari ngerana Jesus man kalak si nterem bage pe man ajar-ajarNa, 23:2 nina, "Guru-guru agama ras kalak Parisi e, si nerusken ajar-ajaren Musa kap. 23:3 E maka ikutkenlah kai si ikatakenna man bandu. Tapi ola usih si ibahanna, sabap kai si iajarkenna la idalankenna. 23:4 Baban si mberat iampekenna ku bara kalak tapi ia sitik pe la nggit mabasa. 23:5 Ntah kai gia ibahanna, tujunna e me gelah ia idah kalak. Perdiatekenlah tulisen ayat-ayat Pustaka Si Badia si ililetken i perdempakenna ras i bas pergelangen tanna! Bage pe perdiatekenlah ambu-ambu uisna si nggedang! 23:6 Lit kenca kerja-kerja kundul ia arah ingan si mehamat, janah i bas rumah pertoton pe arah lebe ia kundul; 23:7 atena gelah mehamat kalak man bana i tiga janah atena ikataken kalak ia 'Guru'. 23:8 Tapi kam, ola kam nggit ikataken kalak 'Guru', sabap sada ngenca Gurundu, janah kam kerina ersenina. 23:9 Ola ise pe i doni enda ikatakenndu 'Bapa', sabap sada ngenca Bapandu e me Dibata. 23:10 Bage pe ola kam nggit ikataken kalak 'Peminpin', sabap sada ngenca Peminpinndu, e me Mesias si ipadanken Dibata. 23:11 Ise si mbelinna i bas kam, ialah si ngelai kam kerina. 23:12 Ise si peganjangken bana, ipeteruk Dibata me, janah ise si peteruk bana, ipeganjangken Dibata me Ia." 23:13 "Andiko, cilaka kal kam o, guru-guru agama, janah kam pe o, kalak Parisi! O, kalak pekulah-kulah! Iolang-olangindu kalak gelah ola bengket ku bas Kinirajan Surga. Kam jine la nggit jadi rayat Kinirajan Surga, janah kalak si deban pe iolang-olangindu. 23:14 Andiko, cilaka kal kam o, guru-guru agama, janah kam pe o kalak Parisi! O, kalak pekulah-kulah! Ibuatndu erta-erta diberu si enggo mbalu jenari ibahanndu pertoton si nggedang i lebe-lebe jelma si nterem. Perbahan si enda, kugapa pe reh beratna ukumenndu. 23:15 Andiko, cilaka kal kam o guru-guru agama, janah kam pe o, kalak Parisi! O, kalak pekulah-kulah! Isiarindu lawit ras daraten si mbelang guna ndatken sekalak jelma gelah ikutkenna agamandu; tapi kenca idatndu, ijadikenndu ia jadi calon naraka si dua kali lipat jahaten asangken kam. 23:16 Andiko, cilaka kal kam, o peminpin-peminpin si pentang! Sabap nindu, 'Adi lit kalak ersumpah i bas gelar Rumah Pertoton, sumpahna e la esah; tapi adi ersumpah i bas gelar emas si lit i bas Rumah Pertoton, sumpahna e esah.' 23:17 Kam kalak motu dingen pentang! Apai kin pentingen, emas ntah Rumah Pertoton si erbahanca emas e badia? 23:18 Bage pe nindu, 'Adi lit kalak ersumpah i bas gelar batar-batar ingan ersembah, sumpahna e la esah; tapi adi ersumpah kalak i bas gelar persembahen si lit i datas batar-batar e, sumpahna e esah.' 23:19 Kam kalak pentang! Apai kin pentingen, persembahen ntah batar-batar si erbahanca persembahen e badia? 23:20 Dage ise ersumpah i bas batar-batar, ia ersumpah i bas gelar batar-batar ras i bas gelar persembahen si lit i datas batar-batar e. 23:21 Bage pe ise ersumpah i bas gelar Rumah Pertoton, ia ersumpah i bas gelar Rumah Pertoton ras i bas gelar Dibata si ringan i je. 23:22 Ise ersumpah i bas gelar Surga, ia ersumpah i bas gelar kursi Kinirajan Dibata ras i bas gelarNa si kundul i bas kursi e. 23:23 Andiko, cilaka kal kam o, guru-guru agama, janah kam pe o, kalak Parisi! O, kalak pekulah-kulah. Ipersembahkenndu man Dibata sepersepuluh i bas ulihndu nuan-nuan nari, seh maka jera, lenga ras serei pe ipersembahkenndu. Tapi si pentingna i bas Undang-undang la iperdiatekenndu, e me kap keadilen, keleng ate, ras kinibujuren. Si enda arus idalankenndu alu la ngelupaken si debanna. 23:24 O, peminpin-peminpin si pentang! Iaguindu laneng i bas inemendu, tapi unta ibendutndu. 23:25 Andiko, cilaka kal kam, o, guru-guru agama, janah kam pe o, kalak Parisi! O, kalak pekulah-kulah! Arah darat ngenca iburihindu cangkir ras pinggandu, tapi arah bas meluat kal. 23:26 O, kalak Parisi si pentang! Burihi lebe cangkir e arah bas gelah arah darat pe bersih. 23:27 Andiko, cilaka kal kam o, guru-guru agama, janah kam pe o kalak Parisi! O, kalak pekulah-kulah! Bali kal kam ras kuburen si icet mbentar; arah darat tatapen mejile, tapi i bas dem tulan-tulan kalak mate ras si macik-macik. 23:28 Bage me kam! Tatapen bujur, tapi kam pekulah-kulah janah ukurndu jahat kal kepe." 23:29 "Andiko, cilaka kal kam, o guru-guru agama janah kam pe o, kalak Parisi! O, kalak pekulah-kulah! Iseminndu kuburen nabi-nabi janah ipejilendu tugu kalak bujur, 23:30 janah nindu, 'Adi enggo min nai kami lit asum nini-nininta nggeluh, tentu la kami nggit munuh nabi-nabi e.' 23:31 Alu bage, si tuhuna kam enggo ngaku maka kam kesusuren si munuh nabi-nabi e. 23:32 Dage terusken dingen dungilah kai si enggo ibenaken ninindu! 23:33 O, nipe! O, kesusuren nipe upar. Arah apai nari dalanndu pulah i bas ukumen naraka nari? 23:34 Kukataken man bandu: Kusuruh pagi reh ndahi kam piga-piga kalak nabi, kalak pentar ras guru; tapi deba pagi ibunuhndu, ipakukenndu ku kayu persilang janah deba iligasindu i bas rumah pertotondu, janah iayak-ayakndu i bas sada kuta nari ku kuta si deban. 23:35 E maka man bandu me ndabuhna ukumen kalak si enggo munuh kalak si la ersalah, mulai i bas pembunuhen Abil nari seh ku pembunuhen Sakaria, anak Barahia, si ibunuhndu kelang-kelang Rumah Pertoton ras batar-batar ingan persembahen. 23:36 Kukataken man bandu: Kerina ukumen kalak si munuh e ndabuh man kalak si genduari enda." 23:37 "O Jerusalem, Jerusalem! Ibunuhindu nabi-nabi janah ibenterindu alu batu kalak si isuruh Dibata ndahi kam! Enggo piga-piga kali ateKu pepulung bangsandu bagi indung manuk ngkeremken anakna i teruh kabengna, tapi la kam nggit! 23:38 Tuhu-tuhu me pagi itadingken Dibata rumahndu. 23:39 Kukataken man bandu: Lanai bo pagi Aku idahndu seh paksana ikatakenndu, 'Dibata kap si masu-masu Ia si reh i bas gelar Tuhan.' "
24:1 Ndarat Jesus i bas Rumah Pertoton nari. Asum Ia lawes nadingken Rumah Pertoton e, ideheri ajar-ajarNa Ia, jenari ituduhken ajar-ajar e man baNa Rumah Pertoton. 24:2 Nina Jesus man ajar-ajarNa, "Ma idahndu kin kerina enda? Kukataken man bandu: Kerina nge pagi runtuh, lanai sada batu pe pagi tading i bas inganna." 24:3 Kenca kundul Jesus i Uruk Seton, reh ajar-ajarNa ndeheri Ia jenari ercakap-cakap ia ras. Nina ajar-ajarNa man baNa, "Kataken min man kami: Ndigan kin kerina enda jadi? Kai nge pagi tanda-tanda kerehenNdu dingen kai nge pagi tanda-tanda kedungen jaman enda?" 24:4 Erjabap Jesus, "Jagalah gelah ola kam papak ibahan kalak. 24:5 Nterem pagi kalak reh i bas gelarKu nina, 'Aku kap Mesias si ipadanken Dibata,' janah nterem ibahanna jelma papak. 24:6 Ibegindu pagi sora perang ras berita kerna perang i bas ingan si ndauh. Amin bage gia ola aru atendu, sabap kerina si enda arus jadi, tapi e pe langa bo seh ku kedungenna. 24:7 Bangsa pagi ngelawan bangsa, kerajan ngelawan kerajan. I jah-i je terjadi kelihen ras taneh pe linuren. 24:8 Tapi kerina enda permulan denga nge, seri ras penggejapen mesui sanga kalak nandangi mupus. 24:9 I bas paksa e pagi kerina kalak rate segat man bandu erkiteken Aku. Isiksana me kam jenari ibunuhna. 24:10 Nterem pagi kalak murtad; si adun ras si cian-cianen. 24:11 Rehen pe nabi perguak erbahanca nterem kalak papak. 24:12 Perbahan reh buena kejahaten e maka nterem kalak reh kurangna kekelengenna. 24:13 Tapi kalak si megenggeng seh ku kedungenna terkelin kap. 24:14 Janah kenca Berita Si Meriah kerna Kinirajan e iberitaken man manusia i belang-belang doni enda, jadi saksi man kerina bangsa, kenca bage maka seh me kedungenna e." 24:15 "Idahndu pagi kejahaten si ciga ate encedai tedis i bas Ingan si Badia, bagi enggo ikataken Nabi Daniel. (Iantusi si ngogesa min kai erti kata enda!) 24:16 Paksa si e pagi kalak si ringan i Judea arus kiam ku uruk-uruk. 24:17 Kalak si kundul-kundul i darat pekesahken olanai bengket ku rumah ngelegi barang-barangna. 24:18 Kalak si sangana i juma olanai ku rumah ngelegi uisna. 24:19 O, andiko kuahna ate pernanden si sangana mehuli kulana bage pe pernanden si sangana pepinemken i bas paksa si e! 24:20 Ertotolah man Dibata gelah si enda kerina ola jadi i bas paksa-paksa perudan tah pe wari Sabat! 24:21 Sabap kiniseran si jadi paksa si e pagi ndauh keleken asa si enggo pernah jadi, mulai kin tembe doni seh ku wari enda, janah kenca si e lanai bo pagi lit kejadin si bage. 24:22 Tapi beligan warina enggo ipegendeki Dibata; adi la kin enggo ipegendekiNa ise pe la bo lit terus nggeluh. Ipegendeki Dibata me wari kiniseran e nginget kalak si enggo ipilihNa. 24:23 Paksa si e pagi adi lit kalak si ngataken man bandu, 'I jenda kap Mesias si ipadanken Dibata' ntah nina, 'I jah kap Ia', ola kam tek. 24:24 Sabap reh me Mesias palsu ras nabi-nabi perguak; ibahanna me tanda-tanda sengget si mbelin, sabap atena, adi banci, gelah papak kalak si enggo ipilih Dibata. 24:25 Ingetlah! Kerina enda enggo leben Kukataken man bandu ope denga jadi. 24:26 Ntah pe, adi lit kalak ngatakenca man bandu, 'Mesias si ipadanken Dibata e genduari i taneh si melungun,' ola dahi ku je; ntah pe adi nina, 'I jenda Ia cebuni,' ola kam tek. 24:27 Sabap Anak Manusia si isuruh Dibata e reh pagi bagi kilap erkincar i Timur nari ku Barat. 24:28 I ja lit bangke i je pulung kuliki, si man bangke." 24:29 "Kenca lepas wari-wari kiniseran e, minter gelap matawari, bulan la nai ersinalsal, bintang-bintang nartar i langit nari janah kuasa-kuasa si lit i langit mugur-ugur. 24:30 Jenari teridah tanda Anak Manusia si isuruh Dibata i langit janah tangis kerina bangsa manusia i doni enda. Idahna me pagi Anak Manusia si isuruh Dibata e reh i datas embun; alu kuasa ras kiniulin si mbelin. 24:31 Kenca bage terbegi me sora trompet si megang jenari isuruhNa me malekat-malekatNa ndarat ku belang-belang doni enda. Ipepulung malekat-malekat e me kalak si enggo ipilih Dibata i bas tampuk doni nari ku tampukna si deban." 24:32 "Bahanlah batang ara jadi pelajaren man bandu. Adi idahndu dahanna meratah janah erbulung nguda ia, ietehndu maka musim perlego enggo ndeher. 24:33 Bage me pe, adi idahndu pagi jadi kerina si Kukataken enda ndai, ietehndu me maka enggo ndeher kedungen doni enda. 24:34 Ingetlah! Si enda pagi kerina jadi ope denga keri mate kalak si genduari enda. 24:35 Langit ras doni masap kap pagi; tapi KatangKu tetap rasa lalap." 24:36 "Kerna warina ntah jamna kejadin e la lit kalak si metehsa. Malekat-malekat si i Surga pe lang, janah Anak e pe lang; Bapa ngenca metehsa. 24:37 Kerehen Anak Manusia si isuruh e pagi bali kap ras kai si jadi i bas paksa Nuah nai. 24:38 Bagi nai ope denga reh lau mbelin kerina kalak si nggeluh paksa si e man dingen minem, sereh dingen empo seh ku warina Nuah bengket ku bas perahu; 24:39 sitik pe la ietehna kai nandangi jadi man bana ope denga reh lau mbelin si erbahanca ia mombak kerina. Bage ka me pagi jadi asum reh Anak Manusia si isuruh Dibata e. 24:40 Paksa si e pagi lit dua kalak dilaki erdahin i juma: sekalak pagi ibuat, janah si sekalak nari itadingken. 24:41 Dua kalak diberu sangana nutu: sekalak pagi ibuat, sekalak nari itadingken. 24:42 E maka erjaga dingen ersikaplah, sabap la ietehndu ndigan Tuhanndu reh. 24:43 Ingetlah! Adi ieteh tuan rumah katawari reh pinangko, tentu erjaga-jaga ia dingen la ipelepasna rumahna e ibongkar pinangko. 24:44 E maka kam pe erjaga-jagalah, sabap Anak Manusia si isuruh Dibata e reh i bas paksa si la iarapndu." 24:45 "Adi bage, ise dage juak-juak si tutus dingen pentar? Ia me si ipercayaken tuanna jadi kepala juak-juak si deban guna mbagiken pangan man juak-juak e i bas paksana. 24:46 Malem me ate juak-juak e adi idapeti tuanna ia sangana ndahiken dahinna. 24:47 Kukataken man bandu: Tuhu-tuhu iangkat tuan e me ia jadi pengawas i bas kerina erta-ertana. 24:48 Tapi adi la mehuli ukur juak-juak e tentu nina i bas ukurna, 'Tuanku ndekah denga nge maka mulih,' 24:49 jenari ipekpekina juak-juak si deban, mangani dingen minem ia seh mabuk. 24:50 Jenari reh me tuan e i bas paksa si la ietehna dingen la isangka-sangkana. 24:51 Ibunuh tuan e me ia janah bali ia ibahanna ras kalak pekulah-kulah. I je tangis dingen mesui kal atena."
25:1 "I bas paksa e Kinirajan Surga bali ras sepuluh kalak singuda-nguda. Isaganina lampuna jenari lawes ia ngalo-ngalo kalak empo. 25:2 Ibas si sepuluh kalak e, lima kalak lenge, lima kalak pentar. 25:3 Si lenge ibabana lampuna tapi la ibabana minak persedian; 25:4 si pentar ibabana lampuna ras minak persedianna tare botol. 25:5 Perbahan melawen maka reh si empo e, munduk-unduk ia kerina jenari tunduh ia. 25:6 Tengah berngi terbegi sora erlebuh nina, 'Enda si empo ndai! Alo-alolah ia!' 25:7 E maka keke singuda-nguda ndai kerina, ipesikapna lampuna. 25:8 Nina singuda-nguda si lenge man si pentar, 'Man kami min sitik minakndu sabap nimpet atena lampu kami.' 25:9 Ngaloi singuda-nguda si pentar e, 'Lanai kari bias minak kami adi man bandu deba, e maka ulin tukur minakndu ku kede.' 25:10 Asum ia lawes nukur minak reh si empo e. Singuda-nguda si enggo sikap nimaisa bengket ras si empo ku ingan si enggo isikapken guna kerja e, jenari pintun ieruk. 25:11 Kenca bage reh si nguda-nguda si lenge ndai, erlebuh ia, nina, 'O tuan, tuan! Talangi min pintun enda gelah bengket kami.' 25:12 Ngaloi si empo e, 'Tuhu-tuhu la kam kutandai.' " 25:13 Jenari nina Jesus, "Dage ersikap-sikaplah sabap la ietehndu warina ntah pe jamna Tuhan reh." 25:14 "Paksa si e pagi, Kinirajan Surga e bali kap ras sekalak tuan si berkat atena ku negeri si ndauh. Idilona juak-juakna jenari iberekenna erta-ertana gelah ipokokken juak-juak e. 25:15 Sekalak iberekenna lima talenta, sekalak dua talenta janah sekalak nari iberekenna sada talenta; sekalak-sekalak iberekenna rikutken kengasupen juak-juak e. Kenca bage berkat tuan ndai. 25:16 Juak-juak si ngaloken lima talenta e minter ibahanna usahana; idatna untungna lima talenta. 25:17 Juak-juak si ngaloken dua talenta pe bage ka nge ibahanna; idatna untungna dua talenta. 25:18 Tapi juak-juak si ngaloken sada talenta e la bage; ibunikenna saja duit tuan ndai. 25:19 Kenca ndekah, mulih tuan ndai, idilona juak-juak guna erkira ras. 25:20 Reh juak-juak si ngaloken lima talenta, ibabana bungana lima talenta janah nina, 'O tuan, lima talenta mbaru enda iberekenndu man bangku, genduari enggo kudat lima talenta nari.' 25:21 Ngaloi tuan e, 'Mehuli kal perbahanenndu e. Kam juak-juak si tutus dingen bujur; tutus atendu i bas si kitik, perbahan si e kupercayaken man bandu si terbelinen. Mari bengketlah kam ku bas, ersenang-senang ras aku.' 25:22 Jenari reh juak-juak si ngaloken dua talenta, nina, 'O tuan, dua talenta mbaru enda iberekenndu man bangku; genduari enggo kudat dua talenta nari.' 25:23 Ngaloi tuan e, 'Mehuli kal perbahanenndu e. Kam juak-juak si tutus dingen bujur; tutus atendu i bas si kitik, perbahan si e kupercayaken man bandu si terbelinen. Mari bengketlah kam ku bas ersenang-senang ras Aku.' 25:24 Kenca bage reh juak-juak si ngaloken sada talenta, nina, 'O Tuan, kueteh maka Kam kalak kejam. IperaniNdu ateNdu si la isuanNdu, ipepulungndu ateNdu ulih benih si la Kam nuansa. 25:25 Perbahan si e mbiar aku, e maka kutanemken duit si iberekenNdu e. Enda duitNdu ndai.' 25:26 Ngaloi tuan e, 'Kam juak-juak si jahat dingen perkisat. Bahanlah kuperani si la kusuan, kupepulung si la kuerapken, 25:27 ma patut min ndai iberekenndu duitku e man si mbungaken duit? Ma banci kenca aku mulih kualoken ras bungana? 25:28 Buatlah duit e i bas ia nari, jenari bereken man si enggo lit i bas ia sepuluh talenta. 25:29 Sabap man kalak si lit ibereken tole gelah idatna lebih asa cukup; tapi kalak si la lit i bas ia, si lit sitik i bas ia e pe ibuat i bas ia nari. 25:30 Juak-juak si la terpake enda sampetkenlah ku bas ingan si gelap; je tangis me ia dingen mesui kal atena.' " 25:31 "Asum reh pagi Anak Manusia persuruhen Dibata e jadi Raja janah kerina malekat-malekat ras Ia, kundul me Ia i kursi KinirajanNa. 25:32 Jenari pulung me kerina manusia i lebe-lebeNa. Kenca bage ibagiNa me manusia e jadi dua terpuk, bagi permakan nerapken biri-biri i bas kambing nari; 25:33 biri-biri arah kemuhen, kambing arah kawes. 25:34 Jenari nina Raja man kalak si arah kemuhenNa, 'Marilah kam si enggo ipasu-pasu BapangKu; alokenlah Kinirajan si enggo isikapken Dibata man bandu mulai kin ijadikenNa doni enda. 25:35 Sabap asum melihe Aku iberendu man Aku, asum muas Aku iberendu minem; asum tandang Aku idilondu kesilang ku rumahndu, 25:36 asum manjang-anjang Aku iuisindu, asum sakit Aku iadep-adepndu, janah asum Aku i bas penjara idahindu.' 25:37 Jenari ngaloi kalak si arah kemuhen e, 'O Tuhan, ndiganai Kam idah kami melihe jenari ibere man kami, tah muas Jenari ibere minem kami? 25:38 Ndiganai Kam idah kami tandang, jenari idilo kami Kam kesilang ku rumah kami, ntah la Kam ruis jenari ibereken kami uisndu? 25:39 Ndiganai Kam idah kami sakit ntah i bas penjara jenari idahi kami Kam?' 25:40 Erjabap Raja e nina, 'Kukataken man bandu: Kai si ibahanndu man sekalak si musilna i bas seninangKu enda, e me si tuhuna perbahanenndu man bangKu.' 25:41 Jenari ngerana Raja e man si arah kawesNa nina, 'Laweslah i bas Aku nari o kam si enggo isumpahi Dibata! Laweslah ku bas api si la ernimpet-nimpet si enggo isikapken man Iblis ras malekat-malekatna! 25:42 Sabap asum melihe Aku la iberendu man, asum muas Aku la iberendu minem. 25:43 Asum tandang Aku la idilondu kesilang ku rumahndu, asum Aku la ruis la iberekenndu uis man bangKu; janah asum Aku sakit ntah i bas penjara la dahindu.' 25:44 E maka ngaloi si arah kawes e nina, 'O Tuhan, ndiganai Kam idah kami melihe, ntah muas, ntah tandang, ntah la ruis, ntah sakit, ntah i bas penjara, jenari la Kam isampati kami?' 25:45 E maka erjabap Raja e, 'Kukataken man bandu: Asum la kam nggit nampati sekalak i bas seninangKu si musilna enda, Aku kap si la isampatindu e.' 25:46 Jenari bengket me kalak si arah kawes e ku bas ukumen si rasa lalap; janah si arah kemuhen bengket ku bas kegeluhen si tuhu-tuhu si la erkeri-kerin."
26:1 Kenca dung ituriken Jesus si enda kerina nina man ajar-ajarNa, 26:2 "Bagi ietehndu, dua wari nari irayaken me Wari Paskah, janah Anak Manusia persuruhen iendesken kalak me guna ipakuken ku kayu persilang." 26:3 Paksa si e pulung imam-imam si mbelin ras peminpin kalak Jahudi i bas rumah Kayapas, Imam si Mbelin. 26:4 Arih-arih ia kerina guna nangkap dingen munuh Jesus alu erbuni-buni. 26:5 Ibas ia arih-arih e nina, "Ola asum Wari Paskah Ia sibunuh, gelah ola guntar kalak si nterem." 26:6 Asum Jesus i Betani i rumah Simon si enggo malem ibas penakit gadamen nari, 26:7 reh sekalak diberu ndahi Ia. Ibaba diberu e sada botol mar-mar isin minak merim si meherga. Icurcurkenna minak e ku takal Jesus si sangana man. 26:8 Ngidah si e ngeranai ajar-ajar nina, "Engkai maka isia-siaken minak e? 26:9 Adi idayaken meherga kap janah duitna e banci ibereken man kalak musil!" 26:10 Ieteh Jesus kai si icakapken ajar-ajar e e maka nina, "Engkai maka iganggundu ia? Ia enggo erbahan si mehuli man bangKu. 26:11 Kalak musil lalap nge pagi ras kam, tapi Aku labo lalap ras kam. 26:12 Sabap diberu enda enggo erbahan persikapen man bangKu alu ncurcurken minak ku dagingKu ope denga Aku ikuburken. 26:13 Ingetlah! I japa pe pagi iberitaken Berita Si Meriah i belang-belang doni enda, ituriken pe kerna perbahanen enda guna nginget ia." 26:14 Jenari sekalak i bas ajar-ajar si sepuluh dua e, gelarna Judas Iskariot lawes ndahi imam-imam si mbelin. 26:15 Nina man imam-imam si mbelin e, "Kai iberekenndu upahku adi kuendesken Jesus man bandu?" Minter ibereken imam-imam si mbelin e telu puluh duit pirak man Judas Iskariot. 26:16 E maka mulai i bas wari e idarami Judas dalan ndudurken Jesus. 26:17 I bas wari pemena Wari Raya Roti si La Itama Ragi reh ajar-ajar ndahi Jesus nina, "I ja sura-suraNdu isikapken kami lakon Paskah man baNdu?" 26:18 Ngaloi Jesus, "To lawes ku kuta njumpai si Anu, kataken man bana: nina Guru lanai ndekah waringKu. I bas rumahndu ateKu ras ajar-ajarKu ngerayaken Wari Paskah." 26:19 Ikutken ajar-ajar kata Jesus e; isikapkenna pangan Paskah. 26:20 Kenca gelap wari kundul Jesus ras ajar-ajarNa jenari man. 26:21 Paksa man nina Jesus man ajar-ajarNa, "Kukataken man bandu: Si tuhuna sekalak i bas kam nari me si ndudurken Aku." 26:22 Ceda ate ajar-ajar jenari pegancih-gancih ia nungkun man Jesus nina, "Ma labo aku kataNdu Tuhan?" 26:23 Erjabap Jesus, "Si ncelupken roti ku bas pinggan raduken Aku, ia me si ndudurken Aku. 26:24 Bicara kugapa pe mate nge Anak Manusia persuruhen Dibata e, sue ras si ikataken Pustaka Si Badia tapi andiko, cilaka kal si ndudurken Anak Manusia e. Ulin min nai la ia tubuh." 26:25 Jenari ngerana Judas penghianat e nina, "Aku kin kataNdu Guru?" Ngaloi Jesus, "Bagi katandu e me!" 26:26 Asum ia man denga kerina, ibuat Jesus roti, ikatakenNa bujur man Dibata, jenari icepik-cepikNa roti e, iberekenNa man ajar-ajarNa nina, "Buatken, panken, enda me dagingKu." 26:27 Kenca bage ibuatNa calung, ikatakenNa bujur man Dibata, jenari iberekenNa man ajar-ajarNa nina, "Minemken, kerina kam tare calung enda. 26:28 Enda me darehKu si ngesahken padan si ibahan Dibata, si iamburken guna nterem jelma lako pengalemi dosana. 26:29 Kukataken pe man bandu: Kenca wari enda lanai Kuinem lau anggur enda seh warina Aku ras kam nginem lau anggur si mbaru i bas Kinirajan BapangKu." 26:30 Kenca Jesus ras ajar-ajarNa rende muji Dibata lawes ia kerina ku Uruk Seton. 26:31 Jenari nina Jesus man ajar-ajarNa, "I bas berngi enda kiamen me kam kerina nadingken Aku, sabap lit tersurat i bas Pustaka Si Badia, 'Ibunuh Dibata me permakan e, jenari marpar kerina biri-biri e.' 26:32 Tapi kenca Aku ipekeke Dibata i bas si mate nari leben Aku asa kam ku Galilea." 26:33 Ngaloi Petrus man Jesus, "Kiam pe kalak enda kerina, aku labo nggit nadingken Kam!" 26:34 E maka nina Jesus man Petrus, "Ingetlah! I bas berngi enda, ope tekuak manuk enggo ipersokenndu Aku telu kali." 26:35 Ngaloi Petrus, "Asa ndigan pe la Kam kupersoken, aminna gia terpaksa aku mate ras Kam!" Ajar-ajar si deban pe ngaloi bagi si ikataken Petrus enda. 26:36 Jenari seh Jesus ras ajar-ajarNa ku sada ingan si igelari Getsemane. Nina Jesus man ajar-ajarNa, "Kundul kam i jenda, Aku ertoto lebe ku jah." 26:37 Petrus ras duana anak Sebedeus ibabaNa. Paksa e ceda ate Jesus dingen getem kal pusuhNa. 26:38 E maka nina man ajar-ajarNa si telu kalak e, "Ceda kal ateKu perbahan Kugejap maka Aku nandangi mate. Timai i jenda janah erjaga-jagalah ras Aku." 26:39 Lawes Jesus terdauhen sitik nari, i je erjimpuh Ia jenari ertoto man Dibata nina, "O Bapa, adi banci buat min calung kiniseran enda i bas Aku nari. Tapi labo peratenKu, peratenNdulah jadi." 26:40 Kenca bage mulihken Ia ndahi ajar-ajarNa si telu kalak ndai. IdapetiNa ajar-ajar e tunduh. E maka nina Jesus man Petrus, "Sada jam pe la kam ngasup erjaga ras Aku? 26:41 Erjaga dingen ertotolah gelah ola kam ndabuh ku bas percuban. Ukur mehuli me, tapi daging kote kap!" 26:42 Jenari lawes Jesus pedua kaliken ertoto nina, "O Bapa, adi la kin banci la Kuinem calung e, peratenNdulah jadi." 26:43 Mulihken ka Jesus ndahi ajar-ajarNa si telu kalak, idapetiNa ajar-ajar e tunduh, perbahan madat kal matana. 26:44 Ipelepas Jesus ajar-ajar e tunduh, lawes Ia petelu kaliken ertoto; pertotonNa bali ras si ndai. 26:45 Kenca bage mulihken Ia ndahi ajar-ajarNa si telu kalak e, nina, "Tunduh dingen pekesahken denga kam? Nehenlah! Enggo seh paksana, Anak Manusia iendesken man kalak perdosa. 26:46 Kekekenlah, ota lawes kita. Enggo reh si ndudurken Aku." 26:47 Sanga Jesus ngerana denga seh me Judas, sekalak i bas ajar-ajar si sepuluh dua. Ibabana sada rombongan si maba pedang ras perpalu. Rombongan enda isuruh imam-imam si mbelin ras peminpin-peminpin kalak Jahudi. 26:48 Judas enggo mereken tanda man rombongen e nina, "Ise kari kuema e me kalakna. Tangkaplah Ia!" 26:49 Kenca seh Judas e minter ideherina Jesus nina, "Mejuah-juah Guru," jenari iemana Jesus. 26:50 Tapi ngaloi Jesus man bana, "O teman, kai atendu reh ku jenda?" Itangkap kalak ndai Jesus, dingen nteguh itagangina. 26:51 Perbahan si e ngelawan sekalak ajar-ajar Jesus. Idekdekna pedangna jenari itampulna sekalak juak-juak Imam si Mbelin seh retap cupingna. 26:52 Tapi nina Jesus man ajar-ajarNa e, "Sembungken pedangndu e, sabap kalak si make pedang mate pagi ibahan pedang. 26:53 La kin ietehndu maka banci Kupindo penampat BapangKu gelah isuruhNa lebih sepuluh dua pasuken tentera malekat nampati Aku? 26:54 Tapi adi bage, ma lanai seh kai si enggo tersurat i bas Pustaka Si Badia, maka arus jadi bage?" 26:55 Jenari nina Jesus man rombongen e, "Akapndu kin Aku enda pengerampok maka reh kam maba pedang ras perpalu nangkap Aku? Tep-tep wari nge Aku ngajar i bas Rumah Pertoton janah la itangkapndu. 26:56 Tapi kerina enda arus jadi gelah seh kai si tersurat i bas Pustaka Si Badia." Jenari kiamen kerina ajar-ajar Jesus nadingken Ia. 26:57 Kenca bage ibaba kalak ndai Jesus ku rumah Kayapas, Imam si Mbelin. I bas rumah e enggo pulung guru-guru agama Jahudi ras peminpin-peminpin kalak Jahudi. 26:58 Petrus ngikut-ngikut i dauh-dauh nari seh ku kesain rumah Imam si Mbelin e. Kenca seh i bas kesain e, kundul ia ras pengawal guna ngenehen kuga kedungenna. 26:59 Imam-imam si mbelin ras kerina si ersidang ndarami saksi si nalahken Jesus gelah banci Jesus ibunuh. 26:60 Tapi la idatna salah Jesus aminna gia nterem saksi si ngerana. Dungna tedis ku lebe dua kalak saksi, 26:61 Jenari nina, "Pernah ikatakenNa, 'Aku ngasup ngeruntuhken Rumah Pertoton Dibata janah i bas wari si peteluken enggo ka dung Kubangun mulihi.' " 26:62 Jenari tedis Imam si Mbelin nina man Jesus, "La lit jabapndu nandangi saksi si ngelawan Kam enda?" 26:63 Tapi sinik saja Jesus. Ngerana ka Imam si Mbelin man Jesus, "I bas gelar Dibata si nggeluh kupindo gelah ersumpah kam man kami: Tuhu kin Kam Mesias si ipadanken Dibata e?" 26:64 Erjabap Jesus, "Bagi si ikatakenndu e me. Tapi Kukataken man bandu: Mulai genduari nari idahndu me, Anak Manusia si isuruh Dibata kundul arah kemuhen si Mada Kuasa janah reh pagi i datas embun i langit." 26:65 Megi kata Jesus e, icaingken Imam si Mbelin uisna jenari nina, "Enggo igombangina Dibata! Man kadenta nari kin saksi? Genduari enggo ibegindu Ia nggombangi Dibata. 26:66 Kuga iakapndu?" Erjabap kalak si ersidang, "Ia enggo ersalah janah arus ibunuh." 26:67 Jenari iciduri kalak ndai ayo Jesus, itinjuina, deba nggudamisa, 26:68 janah nina, "Kataken dage ise nggudam Kam, o Mesias!" 26:69 Asum Petrus kundul i kesain, reh sekalak singuda-nguda ndeheri ia; singuda-nguda e juak-juak Imam si Mbelin. Nina man Petrus, "Kam pe megati kap ras Jesus kalak Galilea ah." 26:70 Tapi merso Petrus i lebe-lebe kalak e kerina nina, "La kuangka katandu e." 26:71 Jenari lawes Petrus ku pintu gerbang. Sekalak diberu, e me juak-juak si deban, ngidah ia, jenari nina man kalak si i je, "Ia kap teman Jesus kalak Nasaret e." 26:72 Merso ka Petrus nina, "Pang aku ersumpah, la kutandai pe Ia!" 26:73 La ndekahsa reh ka kalak tedis-tedis i je ndahi Petrus, jenari nina, "Pasti kam sekalak ibas temanNa e. Ketandan kap arah cakapndu!" 26:74 Jenari ersumpah Petrus nina, "La kutandai Ia!" Paksa e tekuak minter manuk. 26:75 Janah minter inget Petrus kai si ikataken Jesus man bana, asum nina Jesus man bana, "Ope denga tekuak manuk enggo ipersokenndu Aku telu kali." Jenari lawes ia ndarat, tangis ia sabap ceda atena.
27:1 I bas erpagi-pagi si lampas pulung kerina imam-imam si mbelin ras pertua-pertua kalak Jahudi. Enggo ersada arihna guna munuh Jesus. 27:2 Igarikenna Jesus jenari iendeskenna man Pilatus, Gubernur Pemerentah Roma. 27:3 Ngidah Jesus ibaba ku pengadilen erkadiola Judas. Jenari iulihkenna duit pirak si telu puluh e man imam-imam si mbelin ras peminpin-peminpin kalak Jahudi. 27:4 Nina Judas, "Aku enggo erdosa sabap kududurken kalak si la ersalah guna ibunuh." Ngaloi imam-imam si mbelin ras peminpin e, "Kerna si e la urusen kami. Ena urusenndu." 27:5 Ibenterken Judas duit e ku bas Rumah Pertoton, jenari lawes ia ndelis. 27:6 Ibuat imam-imam si mbelin duit e, jenari nina, "Duit enda duit dareh, e maka rikutken Undang-undang agamanta la banci ipersembahken man Dibata." 27:7 Kenca icakapken ras-ras itukurkenna duit e ku Taneh Pande Kudin, guna ijadiken kuburen kalak pertandang. 27:8 Perbahan si e me maka seh asa genduari taneh e igelari "Taneh Dareh". 27:9 Alu bage enggo seh kai si ikataken Nabi Jeremia nina, "Ibuatna duit pirak telu puluh, e me erga sekalak jelma si itetapken kalak Israel, 27:10 jenari itukurkenna ku taneh pande kudin, bagi enggo ikataken Tuhan man bangku." 27:11 Kenca e Jesus ibaba ku adep-adepen Gubernur. Jenari nungkun Gubernur e man Jesus, nina, "Kam kin Raja kalak Jahudi?" Erjabap Jesus, "Bagi katandu e me." 27:12 Tapi pengadun imam-imam si mbelin ras peminpin-peminpin e kerna Ia sengkebabah ranan pe la ijabapNa. 27:13 E maka nina Pilatus man baNa, "La kin ibegindu pengadun kalak enda kerina?" 27:14 Tapi sengkebabah ranan pe la ijabap Jesus, e maka mamang kal ate Gubernur e. 27:15 Enggo jadi kebiasan maka i bas tep-tep Wari Raya Paskah ibebasken Pilatus sekalak kalak tahanen si ipilih kalak si nterem. 27:16 Paksa si e lit sekalak i bas penjara terberita kal kejahatenna, gelarna Barabas. 27:17 E maka kenca pulung jelma si nterem nungkun Pilatus nina, "Ise atendu kubebasken, Barabas ntah Jesus si igelari Mesias e?" 27:18 Terang ieteh Pilatus maka Jesus iendesken man bana erkite-kiteken cian ate kalak ngenehen Jesus. 27:19 Asum Pilatus kundul i bas ingan ersidang, isuruh ndeharana pertenahen, ndahi ia ngataken, "Ola campurindu urusen kalak si bujur e, sabap gulut kal nipingku nderbinai kerna Ia." 27:20 Imam-imam si mbelin ras pertua-pertua kalak Jahudi ngendik-ngendik jelma si nterem guna ngataken man Pilatus gelah Barabas ibebasken janah Jesus ibunuh. 27:21 Tapi nungkun Gubernur, "Apai atendu kubebasken i bas si dua kalak enda?" Erjabap jelma si nterem e, "Barabas!" 27:22 Nungkun ka Pilatus, "Adi bage, kuga dage kubahan Jesus si igalari Mesias enda?" Erjabap kalak e kerina, "Pakukenlah Ia ku kayu persilang!" 27:23 Tapi nina Pilatus, "Kai kin salahNa?" Lanai ibegiken jelma si nterem Gubernur e ngerana. Tapi reh gangna sorana nina, "Pakukenlah Ia ku kayu persilang!" 27:24 Ngidah si e lanai akap Pilatus tersuriangi kalak si nterem sabap reh gejekna nari nge maka banci, e maka ibuatna lau, iburihina tanna i lebe-lebe kalak si nterem janah nina, "Aku la ertanggung jawab i bas kematenNa! Kamlah si ertanggung jawab!" 27:25 Ngaloi kerina kalak si nterem nina, "I bas kematenNa kami kerina ertanggung jawab ras anak-anak kami." 27:26 Jenari ibebasken Pilatus si Barabas, tapi Jesus isuruhna iligasi perajurit dingen iendeskenna pe gelah ipakuken ku kayu persilang. 27:27 Ibaba perajurit Jesus ku istana gubernur, ije kerina perajurit engkeleweti Ia. 27:28 Itangtangina uis Jesus, jenari ipakekenna man Jesus uis si megara. 27:29 Kenca bage ibahanna sada tengkuluk duri jenari itamakenna ku takal Jesus janah itamakenna pe ciken buluh ku tan Jesus si kemuhen. Igombang-gombangi kalak e Jesus, erjimpuh ia i lebe-lebeNa, jenari nina, "Tabi, o Raja kalak Jahudi!" 27:30 Jenari icidurina, ibuatna buluh e, ipekpekkenna ku takal Jesus. 27:31 Kenca puas akapna nggombang-gombangi Jesus, itangtangina uis si megara e jenari ipakekenna ka mulihken uis Jesus si tangtangna ndai. Kenca bage ibabana Jesus ndarat gelah ipakuken ku kayu persilang. 27:32 Asum rombongen e erdalan ku darat kuta, jumpa ia ras Simon kalak Kireni. Simon enda me ipaksa perajurit-perajurit maba kayu persilang Jesus. 27:33 Jenari seh me ia kerina ku sada ingan si igelari Golgota, ertina: "Ingan takal-takal". 27:34 I je ibereken kalak ndai inem Jesus anggur si enggo icampur ras pegu; tapi kenca icecap Jesus, la Ia nggit nginemsa. 27:35 Kenca Jesus ipakuken perajurit-perajurit e, itikam-tandukkenna uis Jesus. 27:36 Jenari kundul ia njagai Jesus. 27:37 Arah babo takal Jesus isuratkenna kesalahen si erbahanca Ia iukum mate: "Enda Jesus, Raja kalak Jahudi". 27:38 Jenari ipakukenna ka dua kalak jahat, sekalak arah kemuhen Jesus, janah sekalak nari arah kawesNa. 27:39 Kalak si mentas arah ingan e ngupir, janah icekurakina Jesus nina, 27:40 "IruntuhkenNdu ateNdu Rumah Pertoton dingen majekkenca i bas telu wari! Adi Kam kin Anak Dibata, pulahilah baNdu. Nusurlah i kayu persilang e nari!" 27:41 Imam-imam si mbelin pe ras guru-guru agama bage pe peminpin-peminpin kalak Jahudi nggombang-gombangi Jesus nina, 27:42 "Kalak si deban ipulahiNa tapi Ia jine la terpulahiNa baNa. Ma Ia kin Raja kalak Israel? Adi nusur Ia genduari, tek kami man baNa! 27:43 Ia tek man Dibata janah ikatakenNa maka Ia me Anak Dibata. Sinehenlah ntah nggit kin Dibata mulahi Ia genduari." 27:44 Kalak jahat si ipakuken ras Ia e pe nggombang-gombangi Ia. 27:45 Mulai ciger gelap kerina negeri e, telu jam dekahna. 27:46 Kira-kira jam telu karaben serko Jesus alu sora megang, nina, "Eli, Eli, lama sabakhtani?" ertina: "O, DibatangKu, o, DibatangKu, ngkai maka itadingkenNdu Aku?" 27:47 Piga-piga kalak si tedis i je megi sora Jesus, e maka nina, "IlebuhNa Elia!" 27:48 Minter kiam sekalak muat bunga karang. Icelupkenna bunga karang e ku bas anggur si macem, jenari idudurkenna ku babah Jesus alu galah. 27:49 Tapi nina kalak si deban, "Timai lebe, sinehen ntah reh kin Elia e mulahi Ia!" 27:50 Sekali nari serko Jesus jenari keri kesahNa. 27:51 Paksa si e merigat kire-kire Rumah Pertoton idas nari seh ku teruh. Taneh linuren, uruk-uruk batu pecah, 27:52 kuburen-kuburen talang, janah nterem kalak si badia si enggo mate ipekeke Dibata i bas si mate nari. 27:53 Itadingkenna kuburen e; janah kenca keke Jesus i bas si mate nari bengket ia ku Jerusalem; i je nterem kalak ngidah ia kerina. 27:54 Asum perwira ras perajurit-perajurit si erjaga ngidah kejadin e kerina, mbiar kal ia, janah nina, "Tuhu-tuhu me Ia Anak Dibata." 27:55 I dauh-dauh nari nterem diberu ngenehenca. Diberu e, e me si ngikutken Jesus i Galilea nari dingen si enggo nampati Jesus. 27:56 Piga-piga i bas si e, e me Maria Magdalena, Maria nande Jakup ras Jusup bage pe ndehara Sebedeus. 27:57 Kenca ben wari, reh sekalak kalak bayak; ia kalak Arimatea, gelarna Jusup. Ia enggo tek man Jesus. 27:58 Ngadap ia man Pilatus guna mindo mait Jesus. Isuruh Pilatus perajurit-perajurit mereken mait e man Jusup. 27:59 Ibuat Jusup mait Jesus e, ibalutina alu kain dagangen mbaru, 27:60 jenari itamakenna ku bas kuburenna jine. Kuburen e mbaru denga itukakna i bas lingling batu. Kenca igulingkenna batu si mbelin guna nutupi kuburen e lawes ia. 27:61 Maria Magdalena ras Maria si deban kundul ngalaken kuburen e. 27:62 Pepagina kenca wari persikapen wari Sabat ngadap imam-imam si mbelin ras kalak Parisi man Pilatus. 27:63 Nina man Pilatus, "O tuan, inget kami maka nina penipu e asum Ia nggeluh denga, 'Kenca telu wari iepekeke me Aku.' 27:64 E maka suruhlah perajurit-perajurit erjaga i kuburen seh wari peteluken. Adi lang, banci reh ajar-ajarNa nangkosa jenari ikatakenna man kalak si nterem, 'Ia enggo ipekeke ibas si mate nari.' Adi bage penipun si peduaken enda keleken asa si arah lebe." 27:65 Ngaloi Pilatus, "Babalah perajurit-perajurit, to lawes janah jagailah kuburen e asa ngasupndu." 27:66 E maka lawes ia ku kuburen, ibahanna cap ibas batu kuburen e jenari isuruhna perajurit-perajurit njagaisa.
28:1 Kenca lepas wari Sabat, erpagi-pagi si lampas wari Minggu, lawes Maria Magdalena ras Maria si deban ku kuburen Jesus. 28:2 Rempet jadi linur mehantu kal. Sekalak malekat Tuhan nusur i Surga nari, igulingkenna batu e jenari kundul ia i babona. 28:3 Ayona ersinalsal bagi kilap janah uisna mbentar bagi kapas. 28:4 Mbiar kal perajurit-perajurit si erjaga e, nggirgir ia jenari ampar bagi kalak mate. 28:5 Ngerana malekat e man diberu ndai, "Ola kam mbiar! Kueteh nge maka idaramindu Jesus si enggo ipakuken ku kayu persilang e. 28:6 Ia lanai i jenda. Ia enggo ipekeke Dibata i bas si mate nari bagi enggo pernah ikatakenNa man bandu. Mari, nehenlah inganNa cibal e. 28:7 To pedas-pedaslah kam lawes, katakenlah man ajar-ajarNa, 'Ia enggo ipekeke i bas si mate nari, janah genduari leben Ia ku Galilea asa kam. I jah idahndu me Ia.' Ingetlah kai si kukataken man bandu enda." 28:8 E maka minter itadingken diberu ndai kuburen e. Mbiar kal ia janah meriah ka ukurna. Kiam-kiam ia, ijumpaina ajar-ajar Jesus guna ngatakenca. 28:9 Rempet reh Jesus njumpai diberu e nina, "Mejuah-juah!" Ideheri kalak e Jesus, ijemakna nahe Jesus janah isembahna. 28:10 Nina Jesus man bana, "Ola kam mbiar to lawes, suruh senina-seninangKu ku Galilea. I jah idahna me Aku." 28:11 Asum diberu-diberu e nerusken perdalanenna, piga-piga perajurit si erjaga i kuburen mulihken ku kuta. Iturikenna man imam-imam si mbelin kerina si enggo jadi. 28:12 E maka arih-arih imam-imam si mbelin ras peminpin-peminpin kalak Jahudi. Jenari iberekenna melala duit man perajurit-perajurit e, 28:13 nina, "Arus ikatakenndu maka rebinai asum kam tunduh reh ajar-ajarNa nangko maitNa. 28:14 Adi ibegi Gubernur berita enda, kami ngerana ras ia, ola aru atendu kerna si e." 28:15 Ialoken perajurit-perajurit duit e jenari idalankenna kai si isuruh imam-imam si mbelin ras peminpin-peminpin e. Seh i bas wari enda berita kerna si enda mbar i tengah-tengah kalak Jahudi. 28:16 Ajar-ajar si sepuluh sada kalak lawes ku uruk i Galilea, ku ingan si enggo ikataken Jesus man bana. 28:17 Asum idah ajar-ajar e Jesus, isembahna Ia, aminna gia piga-piga kalak ibas ia sangsi. 28:18 Ideheri Jesus ajar-ajar, jenari nina, "Enggo ibereken Dibata man bangKu kerina kuasa i Surga ras i doni. 28:19 Laweslah ku kerina bangsa manusia, bahanlah ia jadi ajar-ajarKu: Peridiken ia ibas gelar Bapa, gelar Anak, ras gelar Kesah Si Badia, 28:20 janah ajari ia ngikutken kerina si enggo Kupedahken man bandu. Janah ingetlah! Aku tetap kap ras kam seh ku kedungen jaman."
1:1 Enda me Berita Si Meriah kerna Jesus Kristus Anak Dibata. 1:2 Ibenaken sue ras si isuratken Nabi Jesaya, "Nina Dibata, 'Nehenlah, Kusuruh persuruhenKu leben asa Kam, ia me si nikapken dalan man baNdu.' 1:3 Lit sekalak si erlebuh i taneh si mesawang, 'Pesikaplah dalan man Tuhan; pepinter dalanNa!' " 1:4 Sue ras si tersurat e, reh me Johanes Peridiken ku taneh si mesawang. Iperidikenna kalak janah ipesehna berita ibas Dibata nari nina, "Jeralah, maka kam iperidiken, gelah dosa-dosandu ialemi Dibata." 1:5 E maka kerina jelma i taneh Judea ras i kota Jerusalem reh megiken Johanes. Iakukenna dosana janah iperidiken Johanes ia i bas Lau Jordan. 1:6 Paken Johanes e me kap: jubahna ibas mbulu unta nari, genditna ibas kuling-kuling nari, nakanna labang ras tengguli kerangen. 1:7 Ikatakenna pe man kalak ndai nina, "Reh me sekalak si lebih erkuasa asangken aku. Mungkuk ngosari tinali sepatuna pe aku la metunggung. 1:8 Aku, mpridiken kam alu lau, tapi Ia pagi, mpridiken kam alu Kesah Si Badia." 1:9 La ndekahsa kenca si e, reh Jesus i Nasaret taneh Galilea nari. Ia pe iperidiken Johanes i bas Lau Jordan. 1:10 Ndarat kenca Jesus ibas lau nari, rempet idahNa langit talang, janah Kesah Si Badia nusur ku baboNa bagi nderapati. 1:11 Terbegi pe sora i Surga nari, "Kam kap AnakKu si Kukelengi, Kam kap si ngena ateKu." 1:12 Kenca si e minter Ia ibabai Kesah Si Badia ku taneh si mesawang. 1:13 Dekahna Ia i je lit empat puluh wari. I je me Ia icubai si Iblis. I bas ingan e, melala pe rubia-rubia si meliar. Tapi malekat-malekat reh nampati Ia. 1:14 Kenca Johanes Peridiken ipenjaraken, lawes Jesus ku Galilea. IberitakenNa Berita Si Meriah si rehna ibas Dibata nari nina, 1:15 "Enggo seh paksana maka reh me Kinirajan Dibata! Jeralah, janah teklah nandangi Berita Si Meriah!" 1:16 Sanga Jesus erdalan arah tepi Dano Galilea, idahNa dua kalak penjala nurung sangana njala. Gelarna Simon ras Andreas; duana ia sembuyak. 1:17 Nina Jesus man si dua kalak e, "Mari ikutken Aku, maka Kuajari kam jadi penjala jelma." 1:18 Minter itadingkenna jalana janah ikutkenna Jesus. 1:19 La ndauhsa Jesus erdalan idahNa ka dua kalak si ersembuyak, e me Jakup ras Johanes anak Sebedeus, sanga nikapken jalana i bas perahuna. 1:20 Minter idilo Jesus duana. E maka itadingkenna bapana Sebedeus ras kalak upahen i bas perahuna jenari ikutkenna Jesus. 1:21 Seh ia kerina i kota Kapernaum. Asum wari Sabat kalak Jahudi minter lawes Jesus ku rumah pertoton jenari ibenakenNa ngajar. 1:22 Ia ngajar la bali ras guru-guru agama. Ia ngajar alu kuasa. E maka mamang ate kalak si megi pengajarenNa. 1:23 Paksa si e reh sekalak setanen ku bas rumah pertoton janah serko ia nina, 1:24 "Man kadendu kin kami o, Jesus kalak Nasaret? Reh ateNdu munuh kami kin? Kueteh nge ise Kam. Kam me si Badia ibas Dibata nari!" 1:25 Isergangi Jesus setan ndai nina, "Sinik! Ndaratlah ibas ia nari!" 1:26 Idampes-dampesken setan e si setanen ndai, e maka ndarat setan e ibas ia nari janahna serko. 1:27 Kerina kalak kemamangen. Si sungkun-sungkunen ia sapih-sapih ia nina, "Kai kin enda ndia? Pengajaren si mbaru? I bas Ia lit kuasa. IpelawesNa setan-setan, janah setan-setan ngikutken kataNa!" 1:28 E maka berita kerna Jesus pedas mbar ku belang-belang taneh Galilea. 1:29 Jesus ras ajar-ajarNa nadingken rumah pertoton, lawes ku rumah Simon ras Andreas, ikut pe Jakup ras Johanes. 1:30 Mami Simon ampar i bas ingan medem perbahan sakit. Kenca seh Jesus i rumah, minter seh baNa berita enda. 1:31 Idahi Jesus mami Simon ndai, ijemakNa tanna, e maka ipekekeNa, janah minter malem penakitna. Jenari kuskas mami Simon ngelai Jesus ras kalak ndai kerina. 1:32 Kenca sundut matawari enggo, nandangi gelap, ibaba kalak man Jesus kerina si penakiten ras si setanen. 1:33 Kerina anak kuta e pulung i lebe-lebe rumah ndai. 1:34 Erbage-bage penakit jelma si nterem ipepalemNa, janah setan-setan pe ipelawesNa. La ipediat Jesus pe setan-setan e ngerana, sabap ieteh setan-setan ise Ia. 1:35 Pepagina erpagi-pagi si lampas ope denga terang wari keke Jesus lawes Ia ku ingan si melenget. I je ertoto Ia. 1:36 Tapi Simon ras teman-temanna lawes ndarami Ia. 1:37 Kenca jumpa nina man Jesus, "Kerina kalak ndarami Kam." 1:38 Erjabap Jesus, "Kita arus berkat ku kuta-kuta si deban, i taneh Galilea enda, gelah i je pe Kuberitaken ka Berita Si Meriah. Sabap guna si e kap maka Aku reh." 1:39 E maka isiari Jesus kerina kuta-kuta i Galilea. Ngajar Ia i bas rumah pertoton kalak Jahudi janah ipelawesNa setan-setan. 1:40 Reh me sekalak gadamen ndahi Jesus, nembah erjimpuh i lebe-lebe Jesus mindo perkuah ateNa nina, "Bicara nggit Kam, ngasup kap Kam pepalem aku." 1:41 Mekuah ate Jesus idudurkenNa tanNa janah ijemakNa kalak gadamen ndai jenari nina Jesus man bana, "Nggit Aku, malemlah kam." 1:42 Minter malem gadamna janah mejelis pe dagingna. 1:43 Jenari isuruh Jesus ia lawes janah ipedahiNa, 1:44 "Jaga, ola turiken man ise pe kerna si enda. Tapi laweslah, cidahken bandu man imam. Gelah tek kalak maka kam enggo malem, bahan persembahenndu bagi isuruh Musa." 1:45 E maka lawes kalak si enggo malem ndai. Tapi la tergengkenca sinik. Ku ja ia lawes, i je iturikenna kerna Jesus si pepalem ia. Perbahan si e, lanai terang-terangen Jesus reh ku bas sada-sada kuta. E maka i bas ingan si melenget Ia. Bage gia rehen nge kalak i ja nari pe ndahi Ia.
2:1 Kenca lepas piga-piga wari mulihken Jesus ku Kapernaum. Minter mbar berita maka Ia i rumah. 2:2 E maka nterem jelma rehen seh maka rumah ndai enggo picet. I lebe-lebe pintun pe nterem jelma. Sanga Jesus ngajar, 2:3 reh empat kalak dilaki ngelanja sekalak si pangpangen. 2:4 Perbahan picetna rumah, lanai lit dalan naruhken si pangpangen e man Jesus. E maka italangi si empat kalak ndai tarum rumah ibabo ingan Jesus. Kenca talang, itantanna kalak si pangpangen e ras tilamna ku teruh. 2:5 Ngidah belinna kiniteken kalak enda nina Jesus man si pangpangen ndai, "O, anakKu, dosandu enggo ialemi." 2:6 Piga-piga guru agama si kundul i je nungkun i bas ukurna, 2:7 "Engkai maka bage kal pangna Ia ngerana? Ia encekuraki Dibata. Ise pe labo ngasup ngalemi dosa, seakatan Dibata." 2:8 Minter ieteh Jesus perukuren kalak enda, e maka nina Jesus man bana, "Engkai maka bage perukurenndu? 2:9 Apai kin sukahen ngatakenca man kalak si pangpangen enda: 'Dosandu enggo ialemi,' asangken, 'Kekeken, angkat tilamndu, erdalanlah?' 2:10 Kucidahken pe man bandu, maka lit kuasa i bas Anak Manusia persuruhen Dibata guna ngalemi dosa i doni enda." E maka nina Jesus man kalak si pangpangen ndai, 2:11 "Kukataken man bandu, kekeken, angkat tilamndu, jenari mulihlah ku rumahndu!" 2:12 Sanga si e minter ia keke i lebe-lebe jelma si nterem, janah iangkatna tilamna jenari berkat ia. Mamang kal ate kalak ngidahsa. E maka ipujina Dibata nina, "Langa pernah idah kami kejadin si bagenda!" 2:13 Lawes ka Jesus ku tepi Dano Galilea. Kalak si nterem reh ndahi Ia. E maka ibenakenNa ngajar. 2:14 Kenca Jesus erdalan ka ibas ingan si ndai nari, idahNa sekalak pengalo cuke, gelarna Lewi anak Alpeus, kundul i bas kantorna. E maka nina Jesus man bana, "Ikutken Aku." Minter keke Lewi ikutkenna Jesus. 2:15 Sekali jadi, man Jesus ras ajar-ajarNa i rumah Lewi. Nterem pengalo cuke ras kalak perdosa reh ngikutken Jesus. Janah nterem ibas kalak e nari man nemani Jesus ras ajar-ajarNa. 2:16 Piga-piga guru agama kalak Parisi ngidahsa. E maka isungkunna ajar-ajar Jesus nina, "Engkai maka Ia man dingen minem ras pengalo cuke bage pe ras kalak perdosa e?" 2:17 Penungkunen enda ibegi Jesus e maka ijabapNa, "Kalak sakit nge si perlu dokter, labo kalak sehat. Aku reh labo guna ndilo kalak si bujur akapna bana tapi guna ndilo kalak perdosa." 2:18 Sekali jadi sanga ajar-ajar Johanes Peridiken ras kalak Parisi erpuasa, reh kalak nungkun man Jesus nina, "Engkai maka ajar-ajarNdu la erpuasa, sedangken ajar-ajar Johanes Peridiken ras kalak Parisi erpuasa?" 2:19 Erjabap Jesus nina, "Metunggung kin akapndu adi temue i bas kerja erdemu bayu erpuasa? Tentu lang. Sanga ia ras si empo denga tentu la ia erpuasa. 2:20 Tapi lit masana maka sirang ia ras si empo. I bas paksa si e pagi erpuasa ia. 2:21 La lit kalak ngerangkapi uis si enggo buruk alu uis si mbaru. Sabap adi bage ibahanna maka reh belangna rigat uis si buruk ndai. 2:22 Bage pe labo itamaken kalak lau anggur si mbaru ku bas guci kuling-kuling si enggo male, gelah ola pecah guci ndai. Sabap adi bage ibahanna sia-sia anggur ras guci ndai. Si mehulina min anggur si mbaru itamaken ku bas guci si mbaru!" 2:23 Sekali jadi, sanga wari Sabat kalak Jahudi, Jesus ras ajar-ajarNa mentas arah juma gandum. Janahna erdalan iputikken ajar-ajar ruhi gandum e. 2:24 E maka nina kalak Parisi man Jesus, "Nehenlah! Ajar-ajarNdu ngelanggar Undang-undang agamanta. Ibahanna kai si la banci ilakoken i bas wari Sabat." 2:25 Ngaloi Jesus, "Langa kin pernah iogendu kuga perbahanen Daud sanga ia ras teman-temanna ibas kepiceten ras kelihen? 2:26 Kejadin e paksa Abiatar jadi Imam si Mbelin. Bengket Daud ku bas rumah Dibata janah ibuatna roti si ipersembahken man Dibata. Rikutken Undang-undang imam-imam ngenca banci man roti e. Tapi e me ipan Daud janah iberekenna pe man teman-temanna." 2:27 Tole nina Jesus man kalak ndai, "Wari Sabat iaturken guna manusia. Labo manusia guna wari Sabat. 2:28 Jadi Anak Manusia si isuruh Dibata pe erkuasa nandangi wari Sabat."
3:1 E maka bengket ka Jesus ku rumah pertoton kalak Jahudi. I je lit sekalak si sembelah tanna enggo kesip perban mate serapen. 3:2 I bas si pulung e lit piga-piga kalak si ndaram-ndarami kesalahen Jesus gelah banci iaduken. E maka terus iperdiatekenna Jesus ntah ipepalemNa kin kalak i bas wari Sabat. 3:3 Nina Jesus man si mate serapen tanna ndai, "Mari tedis kam i lebe enda!" 3:4 E maka isungkun Jesus kalak ndai nina, "Rikutken agama, kai kin banci ibahan i bas wari Sabat? Erbahan si mehuli ntah si jahat? Nampati geluh manusia ntah munuhsa?" Tapi sinik saja kalak ndai. 3:5 Merawa Jesus, ipernehenNa jelma sekelewetNa. Tapi ceda ka ateNa ngidah perukuren kalak Parisi ndai. E maka nina man si mate serapen tanna ndai, "Pepinter tanndu." Ipepinterna tanna janah minter malem. 3:6 Jenari lawes kalak Parisi, ijumpaina piga-piga kalak Herodiani. Arih-arih ia guna munuh Jesus. 3:7 Jesus ras ajar-ajarNa lawes ku Dano Galilea janah nterem jelma ngikutken Ia. 3:8 Jelma si nterem enda ndai reh i Galilea nari, i Judea nari, i Jerusalem nari, i Idumea nari, i lepar Lau Jordan nari ras kuta-kuta deherken Tirus ras Sidon nari. Kalak si nterem e reh ndahi Jesus sabap ibegina berita kerna perbahanen Jesus. 3:9 Perbahan seh kal teremna jelma si reh e, e maka isuruh Jesus ajar-ajarNa nikapken sada perahu guna Ia. Alu bage jelma si nterem lanai ngasak-ngasak ku Ia. 3:10 Sabap enggo nterem jelma ipepalemNa, e maka kerina kalak si penakiten siasak-asaken ndahi Jesus, atena njemak Jesus gelah malem penakitna. 3:11 Bage pe adi lit kalak si setanen ngidah Jesus, minter ia reh, iguling-gulingna bana i lebe-lebe Jesus janahna serko nina, "Kam kap Anak Dibata!" 3:12 Tapi alu mesangat ilarang Jesus kalak nuriken ise kin Ia. 3:13 E maka lawes Jesus ku das uruk-uruk, janah idiloNa kalak rikutken si payo iakapNa. Kalak enda ndai reh ndahi Jesus. 3:14 E maka itetapken Jesus sepuluh dua kalak jadi Rasul. Nina Jesus man si sepuluh dua kalak ndai, "Kam enggo Kupilih gelah ras Aku. Kusuruh kam ngajar, 3:15 janah lit kuasandu mpelawes setan-setan." 3:16 Enda me gelarna si sepuluh dua kalak si ipilih Jesus; Simon (igelari Petrus), 3:17 Jakup ras seninana Johanes anak Sebedeus (duana ia igelari Jesus si Boanergis, ertina, "Anak lenggur"). 3:18 Andreas, Pilipus, Bartolomeus, Matius, Tomas, Jakup anak Alpeus, Tadius, Simon Pejuang, 3:19 janah Judas Iskariot, si ndayaken Jesus. 3:20 Kenca Jesus mulih ku rumah, minter ka pulung jelma si nterem, seh maka lanai sempat Jesus ras ajar-ajarNa man. 3:21 Sanga ibegi keluarga cakap maka Ia lanai sehsa, e maka reh ia ngelegi Jesus. 3:22 Guru-guru agama si reh i Jerusalem nari ngatakenca maka i bas Ia lit Balsebul. "Pengulu setan e nge si mereken kuasa man baNa maka terpelawesNa setan-setan," nina. 3:23 E maka idilo Jesus kalak ndai, jenari iturikenNa piga-piga perumpaman nina, "Kuga banci setan pelawesken setan? 3:24 Adi i bas sada negara lit perubaten ras perpecahen tentu la ndekah umur negara ndai. 3:25 Bage pe adi i bas sada jabu turah rusur perubaten, tentu la ndekah umur jabu e. 3:26 Jadi adi kerajan setan erbelah-belah tentu lanai ia erkuasa, janah enggo seh pe kedungenna. 3:27 Ise pe labo ngasup bengket ku bas rumah kalak si megegeh guna ngerampasi erta-ertana, pala iketna lebe kalak si megegeh ndai, e maka banci irampasina. 3:28 Ingetlah! Kerina dosa-dosa ras cakap si ncekuraki Dibata banci ialemi Dibata. 3:29 Tapi kalak si nimbak Kesah Si Badia asa ndigan pe la ialemi. Sabap enggo ibahanna dosa si rasa lalap." 3:30 Enda ikataken Jesus sabap piga-piga enggo ngatakenca maka Ia keseluken setan. 3:31 E maka reh nande Jesus ras senina-seninaNa. Isuruhna kalak ku rumah ndilo Jesus, janah ia kerina nimai i darat. 3:32 Ikataken kalak si nterem si kundul i kelewet Jesus e man baNa nina, "Ah nandeNdu ras senina-seninaNdu i darat, Kam atena." 3:33 Erjabap Jesus nina, "Ise kin nandengKu? Ise kin seninangKu?" 3:34 Ipernehen Jesus kerina kalak si kundul i kelewetNa jenari nina, "Nehenlah! Enda me nandengKu ras seninangKu! 3:35 Ise si nehken peraten Dibata, ia me seninangKu, turangKu ras nandengKu."
4:1 Ngajar ka Jesus mulihi i tepi Dano Galilea. Perbahan teremna jelma reh, e maka inangkihNa sada perahu si lit i je ngadi-ngadi. I bas perahu ndai me Jesus kundul janah ngajar. Kalak si nterem tedis i tepi dano. 4:2 Melala pengajaren iajarkenNa man kalak ndai alu perumpaman. Nina i bas pengajarenNa, 4:3 "Begikenlah! Lit me sekalak perjuma, lawes ku juma ngambur benih. 4:4 Sanga ia ngambur benih deba ndabuh ku dalan. E maka reh perik-perik manganisa seh keri. 4:5 Deba ka ndabuh ku taneh si erbatu-batu. Perbahan la mbages tanehna e maka pedas turah benih ndai. 4:6 Tapi kenca iparpari las matawari minter melus dingen kerah, sabap la mbages uratna. 4:7 Lit ka ndabuh kempak peren duri. Peren duri ndai pedas perturahna janah iasakna benih si enggo turah e seh maka la banci erbuah. 4:8 Tapi deba ndabuh ku taneh si mehumur. Mejile perturahna, janah erbuah pe. Lit deba buahna telu puluh kali lipat, deba enem puluh, janah lit ka pe seratus kali lipat." 4:9 E maka idungi Jesus pengajarenNa nina, "Begikenlah adi lit kin cupingndu." 4:10 Sanga Jesus serap sisada, reh ajar-ajarNa si sepuluh dua kalak ras piga-piga kalak si megi perumpaman ndai ndahi Ia. Jenari isungkunna Jesus kerna maksud ras tujun perumpaman ndai. 4:11 Erjabap Jesus nina, "Man bandu enggo ibereken rahasia Kinirajan Dibata. Tapi kalak si deban si i darat, ibegikenna kerina alu perumpaman saja, 4:12 e maka, 'Aminna gia ipernehenna, tapi labo idahna, aminna gia ibegina, tapi labo iangkana. Sabap adi idahna janah iangkana tentu jera ia janah Dibata ngalemi ia.' " 4:13 Jenari isungkun Jesus kalak ndai nina, "La kin iangkandu perumpaman enda? Adi lang kuga ka banci iangkandu perumpaman si deban? 4:14 Si ngambur benih e kalak si meritaken berita ibas Dibata nari. 4:15 Mawen-mawen berita e ndabuh ku dalan e me kalak si megi berita e, i je ibegina, i je ka minter ibuat Iblis ibas ia nari Berita si enggo iamburken i bas ia e. 4:16 Berita si ndabuh ku taneh si erbatu-batu e me perumpaman kerna kalak si megi berita e, minter ialokenna alu meriah ukur. 4:17 Tapi kentisik ngenca, sabap berita e la rurat i bas ia. Reh kenca kiniseran ntah iayak-ayak kalak ia perbahan Berita e, minter ia murtad. 4:18 Berita si ndabuh ku bas peren duri e me perumpaman kerna kalak si megi Berita e, 4:19 kearun kerna geluh enda, bage pe erkiteken kebayaken nipu ia, ras erbage-bage sura-sura si deban ngasak Berita e seh lanai erbuah. 4:20 Berita si iamburken ku taneh si mehumur e me perumpaman kalak si megikenca, ialokenna Berita e, erbuah pe. Lit telu puluh, lit enem puluh janah lit ka pe seratus kali lipat buahna." 4:21 Tole nina Jesus, "Pernah kin isagani kalak lampu jenari itutupi alu tumba ntah pe itamana ku teruh ingan medem? Ma kin itamakenna ku datas nahe pertendangen? 4:22 Kerina si terbuni teridah nge pagi, janah kerina rahasia tangkas kap pagi. 4:23 Begikenlah, adi lit kin cupingndu!" 4:24 Ikataken Jesus pe man kalak ndai, "Ukurkenlah kai si ibegindu! Sukat-sukat si ipakendu man kalak si deban, e ka nge ipake man bandu, janah ibereken pe tambahna. 4:25 Kalak si lit i bas ia itambahi man bana, tapi kalak si la lit i bas ia, si sitik i bas ia e pe ibuat ibas ia nari." 4:26 Iterusken Jesus ngerana nina, "Kinirajan Dibata banci iandingken ras sekalak si ngambur benih i jumana. 4:27 Paksa berngi tunduh ia; suari idahina dahinna. Kidekah si e benih ndai ersuli, turah pe. Tapi kuga carana turah labo ieteh perjuma ndai. 4:28 Mahan bana taneh enda mereken ulihna. Tangtangna ersuli, jenari ertangke, kenca bage maka erbuah. 4:29 Kenca metua buahna ndai, mulai isabina sabap paksa rani enggo seh." 4:30 Nina Jesus, "Bagi kai kin Kinirajan Dibata banci iandingken? Kai contohna banci si pake guna nerangkenca? 4:31 Kinirajan e bali ras benih sawi, e me benih si kitikna si isuanken i bas taneh. 4:32 Tapi kenca isuan turah me ia janah belinen asangken kerina gule-gulen. Lit dahan-dahanna seh maka perik-perik pe banci rasar i teruh bulungna si mbur." 4:33 Alu perumpaman-perumpaman si bagenda me Jesus meritaken Berita ibas Dibata nari. Iajarken Jesus bagi ngasupna kalak ndai ngertikenca. 4:34 Adi la arah perumpaman labo kai pe ituriken Jesus man kalak si nterem. Tapi adi man ajar-ajarNa iturikenNa kerina. 4:35 Karaben i bas wari si ndai nina Jesus man ajar-ajarNa, "Ota ku lepar ah." 4:36 E maka itadingken kalak ndai jelma si nterem. Inangkihi ajar-ajar perahu si enggo idatasi Jesus janah berkat ia ras. Perahu-perahu si deban pe lit i je. 4:37-38 Jesus arah pudi i bas perahu e, iamparkenNa takalNa i babo bantal jenari tunduh Ia. Paksa e rembus angin meter ras galumbang si merawa. Iombang-ambingkenna perahu e, dingen lau pe bengket ku bas. E maka ingeti ajar-ajar me Jesus nina, "O Guru, la kin kutera pe ukurndu amin bene pe kita?" 4:39 Keke Jesus, isergangiNa lau ras angin ndai nina, "Sinik!" Jenari nina man lau, "Jenenglah!" E maka minter angin ndai ngadi, janah lau ndai pe enggo jeneng kal. 4:40 Jenari nina Jesus man ajar-ajarNa, "Engkai maka kam mbiar kal? Langa kin kam tek?" 4:41 Reh biarna pe kalak ndai nina sapih-sapih ia, "Ise kin ndia Ia, maka angin ras galumbang ngikutken kataNa?"
5:1 Seh me kalak ndai i lepar Dano Galilea daerah kalak Geraseni. 5:2 Nusurkenca Jesus i perahu nari, minter reh sekalak jelma i kuburen nari. 5:3 Si reh e setanen janah ringan i kuburen-kuburen. 5:4 Enggo piga-piga kali igariken tanna ras nahena alu rante besi, tapi icedakenna ras iretapina rante e. Perbahan seh kal gegehna, ise pe la ngasup nangkap ia. 5:5 Suari ras berngi ia erdalan-dalan i kuburen ras ku das uruk-uruk. Nderkuh-nderkuh ia janah itemtemina bana alu batu. 5:6 Kenca idahna Jesus i dauh-dauh nari, kiam ia ndahi Jesus janah isembahna. 5:7 Alu sora megang nderkuh ia nina, "O Jesus Anak Dibata si Meganjang. Kuga ateNdu aku ibahanNdu? I bas gelar Dibata kupindo maka ola aku isiksaNdu." 5:8 (Ikatakenna bagenda sabap enggo megati iperentahken Jesusman bana, "Setan, laweslah ibas ia nari.") 5:9 E maka isungkun Jesus ia nina, "Ise gelarndu?" Erjabap ia, "Gelarku si Meribu-ribu sabap nterem kami!" 5:10 Alu meseksek ipindo setan-setan e man Jesus gelah ola ia ipelawes ibas daerah e nari. 5:11 I bas mbalmbal ture-ture deleng e lit me sada rarasen babi paksana nungke-nungke ndarami nakanna. 5:12 Meseksek pemindon setan ndai man Jesus nina, "Suruh kami ku bas babi ah gelah iseluki kami ia." 5:13 E maka ibere Jesus bagi si ipindona. Lawes setan-setan e, jenari iselukina babi ndai. Babi si lebih kurang dua ribu e, minter kiamen janah megulang, ndabuhen ku dano, mate gedap kerina i je. 5:14 Kiam permakan babi ndai janah iturikenna berita e ku kuta-kuta ras ku dusun-dusun. E maka berkat kalak ngenehen si enggo jadi. 5:15 Idahina Jesus janah idahna kundul kalak si gelgel setanen e, ia enggo ruis janah enggo jore ukurna. 5:16 Mbiar pe kalak kerina. Ituriken kalak si enggo ngidah kejadin e man kalak si reh ndai kai si enggo jadi nandangi kalak si setanen e ras kerna babi-babi ndai. 5:17 E maka meseksek ipindo kalak ndai maka lawes min Jesus i bas daerah e nari. 5:18 Sanga Jesus nangkih perahu, kalak si setanen ndai mindo man Jesus gelah banci min ia ikut. 5:19 Tapi la ibere Jesus. IkatakenNa pe man bana, "Mulihlah ku rumahndu, ku tengah-tengah keluargandu, beritaken man bana kuga belinna perbahanen ras perkuah ate Tuhan man bandu." 5:20 E maka lawes ia ku kerina daerah Dekapolis, iberitakenna kai si enggo ibahan Jesus man bana. Kerina kalak sengget megi berita e. 5:21 Lawes ka Jesus ngepari dano e. Kenca seh Ia i lepar, nterem jelma engkeleweti Ia. 5:22 Sanga Jesus i tepi dano e denga reh sekalak pengulu rumah pertoton, gelarna Jairus. Sanga idahna Jesus minter isembahna. 5:23 Mindo ia alu meseksek nina, "Anakku si diberu sakit mekelek. Reh min Kam, tamaken tanNdu ku babona, gelah ola ia mate tapi gelah malem min." 5:24 E maka lawes Jesus ras Jairus. Nterem jelma ngikutken Ia, janah siasak-asaken ndeheri Jesus. 5:25 I bas jelma si nterem e lit sekalak diberu si enggo sepuluh dua tahun dekahna bluding rusur. 5:26 Enggo nterem dokter si nambari ia, enggo keri pe duitna, amin bage pe la lit terakapna, tapi reh kelekna lalap. 5:27 Berita kerna Jesus enggo ibegina, e maka reh ia ku tengah-tengah jelma si nterem e, idadapna uis Jesus i pudi nari. 5:28 Sabap nina i bas ukurna, "UisNa lah gia kudadap, tentu malem penakitku." 5:29 Kenca idadapna uis Jesus minter igejapna dareh ndai enggo ngadi. 5:30 Minter ka pe ieteh Jesus, maka lit kuasa ndarat ibas Ia nari. E maka itulihkenNa kempak jelma si nterem janah nungkun nina, "Ise ndadap uisKu?" 5:31 Erjabap ajar-ajarNa, "Ma idahNdu kuga teremna jelma si asak-asaken ndeheri Kam? Engkai maka isungkunNdu ise si njemak uisNdu?" 5:32 Tapi ipepayo Jesus sekelewetNa ndarami kalak si enggo ndadapsa ndai. 5:33 Sabap ieteh diberu ndai kai si enggo jadi man bana, e maka mbiar janah nggirgir ia. Idahina Jesus, isembahna terus ku naheNa, janah iturikenna kerina kai si enggo jadi. 5:34 Nina Jesus man bana, "Malem penakitndu perbahan tek kam man bangKu. Mulihlah alu meriah ukur, lanai bo mulihken penakitndu." 5:35 Sanga Jesus ngerana dengan reh piga-piga kalak si erlegi i rumah Jairus nari. Nina man Jairus, "Anakndu ndai enggo mate, man kai nari ngelatihi Guru ena?" 5:36 Tapi la jadi soal man Jesus kai si ikataken kalak ndai. Nina man pengulu rumah pertoton, "Ola kam mbiar, tek sajalah." 5:37 Jenari ise pe lanai ibere Jesus ikut selain Petrus, Jakup ras seninana Johanes. 5:38 Tupung seh i rumah Jarius, idapeti Jesus lit gejek-gejek i je, janah ibegiNa sora tangis ras serko. 5:39 Kenca Jesus seh i rumah nina man kalak ndai, "Engkai maka kam kerina serko ras tangis? Anak enda labo mate tapi tunduh saja nge ia!" 5:40 Itawai kalak ndai Jesus. Kenca bage isuruh Jesus kalak si nterem ndarat. E maka idilo Jesus bapa ras nande anak ndai bage pe ajar-ajarNa si telu kalak ku bas kamar anak e. 5:41 E maka ijemak Jesus tan anak ndai, ikatakenna man bana nina, "Talitakumi," ertina, "O beru, Kukataken man bandu, kekeken!" 5:42 Minter keke anak ndai janah erdalan pe ia (sabap umurna enggo sepuluh dua tahun). Ngidah kejadin e sengget kalak kerina. 5:43 Tapi ipedahi Jesus, gelah ola iturikenna man ise pe. Jenari nina Jesus, "Bere man ia."
5:1 Seh me kalak ndai i lepar Dano Galilea daerah kalak Geraseni. 5:2 Nusurkenca Jesus i perahu nari, minter reh sekalak jelma i kuburen nari. 5:3 Si reh e setanen janah ringan i kuburen-kuburen. 5:4 Enggo piga-piga kali igariken tanna ras nahena alu rante besi, tapi icedakenna ras iretapina rante e. Perbahan seh kal gegehna, ise pe la ngasup nangkap ia. 5:5 Suari ras berngi ia erdalan-dalan i kuburen ras ku das uruk-uruk. Nderkuh-nderkuh ia janah itemtemina bana alu batu. 5:6 Kenca idahna Jesus i dauh-dauh nari, kiam ia ndahi Jesus janah isembahna. 5:7 Alu sora megang nderkuh ia nina, "O Jesus Anak Dibata si Meganjang. Kuga ateNdu aku ibahanNdu? I bas gelar Dibata kupindo maka ola aku isiksaNdu." 5:8 (Ikatakenna bagenda sabap enggo megati iperentahken Jesusman bana, "Setan, laweslah ibas ia nari.") 5:9 E maka isungkun Jesus ia nina, "Ise gelarndu?" Erjabap ia, "Gelarku si Meribu-ribu sabap nterem kami!" 5:10 Alu meseksek ipindo setan-setan e man Jesus gelah ola ia ipelawes ibas daerah e nari. 5:11 I bas mbalmbal ture-ture deleng e lit me sada rarasen babi paksana nungke-nungke ndarami nakanna. 5:12 Meseksek pemindon setan ndai man Jesus nina, "Suruh kami ku bas babi ah gelah iseluki kami ia." 5:13 E maka ibere Jesus bagi si ipindona. Lawes setan-setan e, jenari iselukina babi ndai. Babi si lebih kurang dua ribu e, minter kiamen janah megulang, ndabuhen ku dano, mate gedap kerina i je. 5:14 Kiam permakan babi ndai janah iturikenna berita e ku kuta-kuta ras ku dusun-dusun. E maka berkat kalak ngenehen si enggo jadi. 5:15 Idahina Jesus janah idahna kundul kalak si gelgel setanen e, ia enggo ruis janah enggo jore ukurna. 5:16 Mbiar pe kalak kerina. Ituriken kalak si enggo ngidah kejadin e man kalak si reh ndai kai si enggo jadi nandangi kalak si setanen e ras kerna babi-babi ndai. 5:17 E maka meseksek ipindo kalak ndai maka lawes min Jesus i bas daerah e nari. 5:18 Sanga Jesus nangkih perahu, kalak si setanen ndai mindo man Jesus gelah banci min ia ikut. 5:19 Tapi la ibere Jesus. IkatakenNa pe man bana, "Mulihlah ku rumahndu, ku tengah-tengah keluargandu, beritaken man bana kuga belinna perbahanen ras perkuah ate Tuhan man bandu." 5:20 E maka lawes ia ku kerina daerah Dekapolis, iberitakenna kai si enggo ibahan Jesus man bana. Kerina kalak sengget megi berita e. 5:21 Lawes ka Jesus ngepari dano e. Kenca seh Ia i lepar, nterem jelma engkeleweti Ia. 5:22 Sanga Jesus i tepi dano e denga reh sekalak pengulu rumah pertoton, gelarna Jairus. Sanga idahna Jesus minter isembahna. 5:23 Mindo ia alu meseksek nina, "Anakku si diberu sakit mekelek. Reh min Kam, tamaken tanNdu ku babona, gelah ola ia mate tapi gelah malem min." 5:24 E maka lawes Jesus ras Jairus. Nterem jelma ngikutken Ia, janah siasak-asaken ndeheri Jesus. 5:25 I bas jelma si nterem e lit sekalak diberu si enggo sepuluh dua tahun dekahna bluding rusur. 5:26 Enggo nterem dokter si nambari ia, enggo keri pe duitna, amin bage pe la lit terakapna, tapi reh kelekna lalap. 5:27 Berita kerna Jesus enggo ibegina, e maka reh ia ku tengah-tengah jelma si nterem e, idadapna uis Jesus i pudi nari. 5:28 Sabap nina i bas ukurna, "UisNa lah gia kudadap, tentu malem penakitku." 5:29 Kenca idadapna uis Jesus minter igejapna dareh ndai enggo ngadi. 5:30 Minter ka pe ieteh Jesus, maka lit kuasa ndarat ibas Ia nari. E maka itulihkenNa kempak jelma si nterem janah nungkun nina, "Ise ndadap uisKu?" 5:31 Erjabap ajar-ajarNa, "Ma idahNdu kuga teremna jelma si asak-asaken ndeheri Kam? Engkai maka isungkunNdu ise si njemak uisNdu?" 5:32 Tapi ipepayo Jesus sekelewetNa ndarami kalak si enggo ndadapsa ndai. 5:33 Sabap ieteh diberu ndai kai si enggo jadi man bana, e maka mbiar janah nggirgir ia. Idahina Jesus, isembahna terus ku naheNa, janah iturikenna kerina kai si enggo jadi. 5:34 Nina Jesus man bana, "Malem penakitndu perbahan tek kam man bangKu. Mulihlah alu meriah ukur, lanai bo mulihken penakitndu." 5:35 Sanga Jesus ngerana dengan reh piga-piga kalak si erlegi i rumah Jairus nari. Nina man Jairus, "Anakndu ndai enggo mate, man kai nari ngelatihi Guru ena?" 5:36 Tapi la jadi soal man Jesus kai si ikataken kalak ndai. Nina man pengulu rumah pertoton, "Ola kam mbiar, tek sajalah." 5:37 Jenari ise pe lanai ibere Jesus ikut selain Petrus, Jakup ras seninana Johanes. 5:38 Tupung seh i rumah Jarius, idapeti Jesus lit gejek-gejek i je, janah ibegiNa sora tangis ras serko. 5:39 Kenca Jesus seh i rumah nina man kalak ndai, "Engkai maka kam kerina serko ras tangis? Anak enda labo mate tapi tunduh saja nge ia!" 5:40 Itawai kalak ndai Jesus. Kenca bage isuruh Jesus kalak si nterem ndarat. E maka idilo Jesus bapa ras nande anak ndai bage pe ajar-ajarNa si telu kalak ku bas kamar anak e. 5:41 E maka ijemak Jesus tan anak ndai, ikatakenna man bana nina, "Talitakumi," ertina, "O beru, Kukataken man bandu, kekeken!" 5:42 Minter keke anak ndai janah erdalan pe ia (sabap umurna enggo sepuluh dua tahun). Ngidah kejadin e sengget kalak kerina. 5:43 Tapi ipedahi Jesus, gelah ola iturikenna man ise pe. Jenari nina Jesus, "Bere man ia."
7:1 Sekali jadi reh rombongen kalak Parisi ras piga-piga guru agama i Jerusalem nari njumpai Jesus. 7:2 Iperdiatekenna maka piga-piga ajar-ajar Jesus man alu tan melket, ertina la ia murihi tanna bagi aturen kalak Parisi. 7:3 Kalak Parisi ras kalak Jahudi si deban ikutina adat kebiasan ninina. La ia man adi la kin iburihina lebe tanna bagi si enggo iaturken. 7:4 Bage pe labo ipanna kai pe si ibaba i tiga nari adi la iburihina lebe (ntah pe adi ia i tiga nari ibersihkenna lebe dirina maka man). Melala denga pe aturen-aturen si deban si ikutina, umpamana: cara-cara murihi calung, kudin, perkakas-perkakas tembaga ras ingan medem. 7:5 E maka nungkun kalak Parisi ras guru-guru agama man Jesus nina, "Engkai maka ajar-ajarNdu la ngikuti adat nininta? Engkai maka man ia salu tan si melket?" 7:6 Erjabap Jesus nina, "Payo me tuhu bagi nubuat Nabi Jesaya kerna kam, o kalak pekulah-kulah, bagi enggo tersurat, 'Nina Dibata: bangsa enda muji Aku alu biberna, tapi ukurna ndauh sirang ibas Aku nari. 7:7 La lit gunana ia ersembah man bangKu, sabap si iajarkenna labo Undang-undang Dibata, tapi undang-undang manusia nge, janah e ikatakenna Undang-undang Dibata!' 7:8 Itundalkenndu pedah Dibata, gelah ngikuti adat kebiasan manusia." 7:9 Tole pe ikataken Jesus, "Tuhu beluh kam nulak Undang-undang Dibata, gelah ngergaken adat-kebiasanndu. 7:10 Sabap adi nina Musa, 'Pehaga bapandu ras nandendu' janah, 'Kalak si nggombangi bapana ras nandena arus ibunuh.' 7:11 Tapi ajarkenndu maka sekalak si lit ibas ia, si banci nampati bapana ras nandena, tapi adi nina, 'Enda Kurban kap' (ertina sikerajangen Dibata), 7:12 e maka nindu la ia ersalah amin la gia isampatina bapana ras nandena e. 7:13 I bas si e enggo lanai iergakenndu Pedah Dibata alu pengajaren si isehkenndu. Janah melala denga pe adum si enda ibahanndu." 7:14 E maka idilo Jesus sekali nari jelma si nterem janah ikatakenNa man bana nina, "Kam kerina, begikenlah janah ertiken kata enda. 7:15 Kai pe si i darat nari si bengket ku bas manusia, la erbahanca ia keliamen. Tapi si ndarat ibas manusia nari, e nge erbahanca ia keliamen." 7:16 Begikenlah adi lit kin cupingndu! 7:17 Kenca itadingkenNa jelma si nterem, lawes Ia ras ajar-ajarNa ku rumah. Jenari isungkun ajar-ajarNa Ia kerna perumpaman ndai. 7:18 E maka ngaloi Jesus nina, "Kam pe la lit pemetehndu lebih asa kalak si deban? La dage iangkandu? Kai pe si darat nari, si bengket ku bas manusia, la e erbahanca ia keliamen. 7:19 Sabap labo seh ku bas ukurna, tapi ku bas beltekna, janah ndarat kang." (Alu bagenda ipebetehken Jesus maka kerina pangan banci ipan.) 7:20 Tole nina Jesus, "Kai si ndarat ibas manusia nari, e me si erbahanca ia keliamen. 7:21 Sabap ibas nari, ibas ukur manusia nari reh sura-sura si jahat, si erbahanca ia ndalanken lagu la mehuli, nangko, munuh, 7:22 erlua-lua, rangap, erbahan jahat, nipu, la meteh mela, percian, percekurak, sombong, la terajar. 7:23 Kerina si la mehuli enda reh ibas manusia nari, janah e me erbahanca ia keliamen." 7:24 Kenca bage lawes ka Jesus ku taneh Tirus. Bengket Ia ku bas sada rumah, ateNa gelah ola ise pe meteh Ia i je. Tapi la terrahasiaken. 7:25 Lit sekalak pernanden, anakna iseluki setan. Kenca ibegina kerna Jesus, minter idahina Jesus janah isembahna terus ku naheNa. 7:26 Diberu enda ndai kalak Junani, tubuh i Siro Penesia. Ipindona man Jesus gelah ipelawes Jesus min setan e ibas anakna nari. 7:27 Tapi nina Jesus man bana, "Peturut lebe anak-anak man seh besur, sabap la patut ibuat nakan anak-anak jenari iambengken man biang." 7:28 Erjabap diberu ndai, "Tuhu, Tuhan. Tapi biang si i teruh meja pe kenan nge rimah-rimah si ndabuh iban anak-anak e." 7:29 Minter ngaloi Jesus man bana nina, "Perbahan jabapndu si bagenda, mulihlah ku rumahndu, setan enggo ndarat ibas anakndu nari." 7:30 E maka mulih diberu ndai ku rumahna, idapetina anakna medem i bas ingan medem janah tuhu-tuhu setan ndai enggo lawes ibas ia nari. 7:31 Jenari itadingken Jesus taneh Tirus. Lawes Ia arah Sidon bage pe arah daerah Dekapolis ku Dano Galilea. 7:32 Itaruhken kalak man Jesus sekalak pasek dingen pekak. Ipindokenna man Jesus gelah itamaken Jesus min tanNa ku babo si pasek dingen pekak e. 7:33 E maka ipeserap Jesus ia ibas jelma si nterem nari. ItamakenNa jari-jariNa ku bas cuping kalak ndai, iciduriNa janah ikuitNa dilah kalak ndai. 7:34 Jenari itare Jesus ku langit. Mbelin kesahNa janah ikatakenNa man kalak ndai, "Epata", ertina, "Talanglah". 7:35 Minter talang cuping kalak ndai, longgar pe dilahna janah ngerana alu terang. 7:36 Kenca bage inasihati Jesus kalak ndai kerina, gelah ola iturikenna man ise pe. Tapi akin ilarang reh mbarna pe ituriken kalak ndai. 7:37 Sengget kalak kerina megisa janah nina, "Mehuli kal kerina si ibahanNa. Kalak si pasek ibahanNa erpemegi, kalak si pekak ibahanNa banci ngerana."
8:1 La ndekahsa kenca si e, enggo ka nterem jelma pulung. Kenca lanai lit kai pe man pangan, e maka idilo Jesus ajar-ajarNa janah nina, 8:2 "Mekuah ateKu ngenehen jelma si nterem enda, sabap enggo telu wari ia ras Aku janah genduari lanai lit kai pe si man panganna. 8:3 Adi Kusuruh pe ia mulih ope denga man, tentu kote ia i tengah dalan, sabap ndauh deba kutana." 8:4 Ngaloi ajar-ajarNa nina, "I bas ingan si melenget enda, i ja kin banci ibuat pangan cukup guna mere man kalak enda kerina?" 8:5 Nungkun Jesus nina, "Piga ngkibul lit roti i bas kam?" Erjabap ajar-ajar nina, "Pitu ngkibul." 8:6 E maka isuruh Jesus jelma si nterem kundul i taneh. IbuatNa roti si pitu ngkibul e, ikatakenNa bujur man Dibata, icepik-cepikNa, jenari iberekenNa man ajar-ajarNa gelah ielaken. E maka ielaken ajar-ajar roti e man jelma si nterem. 8:7 Lit pe i bas ia piga-piga ikan. Ertoto Jesus ngataken bujur man Dibata kerna ikan e, jenari isuruhNa ajar-ajar ngelakenca. 8:8 Kerina ia man seh besur. Teremna lit empat ribu kalak. 8:9 Kenca elah man ipepulung ajar-ajar roti ras ikan si iba, buena lit pitu sumpit. Jenari isuruh Jesus kalak si nterem mulih. 8:10 Jesus pe ras ajar-ajarNa minter nangkih perahu, janah lawes ku daerah Dalmanuta. 8:11 Reh me piga-piga kalak Parisi ndahi Jesus janah ibenakenna ersoal ras Ia. Atena encubai Jesus, e maka isuruhna Jesus erbahan tanda guna encidahken kuasa Dibata. 8:12 Kelsehen Jesus nina, "Engkai maka kalak jaman enda mindo tanda? Kukataken man bandu maka ndigan pe labo ibereken tanda man kalak si bage." 8:13 Kenca bage itadingken Jesus kalak ndai; mulih Ia ku perahu janah lawes Ia ngepar. 8:14 Ajar-ajar Jesus lupa maba roti. Sada ngenca lit rotina i bas perahu e. 8:15 Ipersingeti Jesus ajar-ajarNa nina, "Jagalah, metengetlah kerna ragi kalak Parisi ras ragi Herodes." 8:16 Rukur ajar-ajar jenari ngerana sapih-sapih ia nina, "Sabap la sibaba roti, e maka bage nina Jesus." 8:17 Ieteh Jesus kai si icakapken ajar-ajar. E maka nina Jesus, "Engkai maka iranakenndu kerna la lit roti? Langa kin ietehndu janah iangkandu? Mersik denga kin lalap ukurndu? 8:18 Lit kap matandu la kin idahndu? Lit cupingndu, la kin ibegindu? La kin ingetndu, 8:19 sanga Kucepik-cepik roti si lima man lima ribu kalak? Piga sumpit lit ibana ipepulungndu?" Erjabap ajar-ajarNa, "Sepulu dua." 8:20 Tole nina Jesus, "Bage pe sanga Kucepik-cepik roti si pitu ngkibul man empat ribu kalak, piga sumpit lit ibana ipepulungndu?" Erjabap ajar-ajar nina, "Pitu." 8:21 E maka nina Jesus man bana, "Kuga dage maka langa denga iertindu?" 8:22 Seh me Jesus ras ajar-ajarNa i Betsaida. Ibaba kalak man Jesus sekalak pentang. Ipindokenna gelah idadap Jesus min kalak pentang e. 8:23 E maka itegu Jesus si pentang ndai ku daraten kuta. Kenca iciduriNa mata kalak pentang e, itamaNa tanNa ku babo kalak si pentang e janah isungkunNa nina, "Kai lit idahndu?" 8:24 Inehenna ku lebe, jenari nina, "Kuidah manusia, tapi bagi batang kayu erdalan." 8:25 Jenari itamaken Jesus ka tanNa ku mata kalak ndai. Kenca bage icubakenna ka ngenehen. Enggo malem matana, janah enggo terang pengidahna. 8:26 E maka isuruh Jesus ia mulih janah ipedahiNa nina, "Olanai kam mulihken ku bas kuta e." 8:27 Jenari lawes Jesus ras ajar-ajarNa ku kuta-kuta sekelewet Kesarea Pilipi. I tengah dalan isungkun Jesus ajar-ajarNa nina, "Ise kin aku nina kalak e?" 8:28 Erjabap ajar-ajarNa nina, "Piga-piga kalak ngatakenca maka Kam me Johanes Peridiken. Deba ngatakenca maka Kam sekalak nabi ibas nabi-nabi si nai nari." 8:29 Nungkun ka Jesus nina, "Kam kuga nindu? Ise kin akapndu Aku?" Erjabap Petrus nina, "Kam me Mesias si ipadanken Dibata." 8:30 E maka inasihati Jesus ajar-ajarNa nina, "Ola kataken man ise pe kerna Aku." 8:31 E maka iajari Jesus ka ajar-ajarNa nina, "Anak Manusia si isuruh Dibata la banci lang ngenanami mbue kiniseran, janah itulak peminpin-peminpin ras imam-imam si mbelin bage pe guru-guru agama. Ia ibunuh janah kenca telu wari keke Ia ibas si mate nari." 8:32 Kerina kiniseranNa enda jelas kal iturikenNa man ajar-ajar. Perban si e iawin Petrus me Jesus e maka ipandangna. 8:33 Tapi erkusur Jesus, ipernehenNa ajar-ajarNa janah irawaiNa Petrus nina, "Laweslah ibas Aku nari, Iblis! Perukurenndu e, perukuren manusia kap, la bagi perukuren Dibata." 8:34 Jenari idilo Jesus jelma si nterem ras ajar-ajarNa. Nina man kalak e, "Ise atena ikut ras Aku, arus maka ipersilahangna bana, ipersanna kayu persilangna jenari iikutkenna Aku. 8:35 Sabap ise si mpertahanken kegeluhenna, bene kep kegeluhenna e, tapi ise si bene kegeluhenna erkiteken Aku ras erkiteken Berita Si Meriah, terkelin me. 8:36 Lit kin gunana man sekalak jelma, amin bana gia kerina doni enda tapi bene kesahna? Tentu lang! 8:37 La kai pe banci ibereken manusia guna gancih kesahna. 8:38 Adi sekalak jelma mela ia ngakuken Aku ras KatangKu i tengah-tengah manusia si genduari bage pe i tengah-tengah kalak perdosa, e maka Anak Manusia si isuruh Dibata pe pagi mela ngakuken ia, sanga Anak Manusia si isuruh Dibata e reh ibas kemulian si mbelin si reh ibas Bapana nari ras malekat-malekat si badia."
9:1 Tole nina Jesus, "Inget katangKu enda! Lit si pulung i jenda, langa mate ope denga idahna Kinirajan Dibata reh alu kuasa." 9:2 Enem wari kenca si ndai Jesus maba Petrus, Jakup ras Johanes ku datas sada deleng si meganjang. I lebe-lebe ajar-ajarNa salih rupa Jesus. 9:3 UisNa mbentar erkilat-kilat. La lit sekalak pe i doni enda si ngasup nucisa seh bage mbentarna. 9:4 Kenca bage idah ajar-ajar si telu kalak ndai nabi Elia ras Musa sangana ercakap-cakap ras Jesus. 9:5 Nina Petrus man Jesus, "O Guru, senang kal i jenda. Ibahan kami saja i jenda telu sapo, sada man baNdu, sada man Musa janah sada nari man Nabi Elia." 9:6 Enda ikataken Petrus, sabap mbiar ia teluna, lanai ietehna kai si man katanken. 9:7 Jenari reh embun, ilinggemina ia, lit pe sora ibas embun e nari nina, "Enda me AnakKu si Kukelengi, begikenlah Ia!" 9:8 Minter ipernehen ajar-ajar sekelewetna tapi lanai ise pe idahna, seakatan Jesus ras ia teluna. 9:9 Sanga kalak ndai nusur i datas deleng e nari, iperentahken Jesus ajar-ajarNa e nina, "Ola kataken man ise pe kai si enggo iidahndu, ope denga Anak Manusia si isuruh Dibata keke ibas si mate nari." 9:10 Kai si ikataken Jesus ndai ibegiken ajar-ajar, tapi nungkun ia sapih-sapih ia nina, "Kai kin ertina keke ibas si mate nari?" 9:11 Jenari isungkunna Jesus nina, "Engkai maka ikataken guru-guru agama maka Elia arus leben reh?" 9:12 Erjabap Jesus nina, "Tuhu nge nabi Elia leben reh guna nikapken kerinana. Tapi kuga kin si enggo tersurat kerna Anak Manusia si isuruh Dibata, ma Ia denggo ngenanami mbue kiniseran janah igombang-gombangi kalak? 9:13 Kukataken man bandu maka nabi Elia enggo reh janah ibahan kalak man bana bagi ate-atena, bagi enggo isuratken kerna ia." 9:14 Sanga Jesus ras ajar-ajarNa si telu kalak ndai mulihken ndahi ajar-ajar si deban, idahNa ajar-ajar e ikeleweti jelma si nterem. Piga-piga kalak guru-guru agama sangana ersoal ras ajar-ajar e. 9:15 Kenca idah jelma si nterem Jesus, minter terdejep pusuhna janah kiam ia ngalo-ngalo Jesus. 9:16 Isungkun Jesus ajar-ajarNa nina, "Kai si ipersoalkenndu ras kalak enda?" 9:17 Erjabap sekalak ibas jelma si nterem e nari nina, "O Guru, anakku enda kubaba man baNdu, sabap iseluki setan ia, seh maka lanai banci ia ngerana. 9:18 Tep-tep kali adi ia iseluki setan e, idampes-dampeskenna bana ku taneh, rugup-ugup babahna, erderik ipenna janah mekeng pe dagingna. Enggo kupindo penampat man ajar-ajarNdu gelah ipelawesna setan e, tapi la ia ngasup." 9:19 Ngaloi Jesus nina man kalak ndai, "O kam kalak si la erkiniteken, asa kai nari dekahna Aku ras kam? Asa kai nari dekahna Aku tahan ras kam? Baba anak e ku jenda." 9:20 E maka ibaba kalak ndai. Kenca idah setan e Jesus, minter nggirgir anak e, idampes-dampeskenna bana ku taneh, janah rugup-ugup babahna. 9:21 Isungkun Jesus bapa anak e nina, "Asa kai enggo dekahna ia bagenda?" Erjabap bapana, "Kitik-kitikna nari. 9:22 Enggo rusur ia menam mate, sabap megati setan e maba ia ku api ras ku bas lau. E maka mekuah min ateNdu ngenehen kami, sampati min kami adi ngasup Kam." 9:23 "Kai nindu? Adi Aku ngasup?" nina Yesus ngaloi. "Kai pe banci, adi kalak erkiniteken!" 9:24 Minter serko bapa anak ndai nina, "Tek nge aku! Tapi kinitekenku langa cukup. Sampati min aku ibas kinitekenku si kurang." 9:25 Asum idah Jesus maka reh teremna jelma si pulung, e maka isergangiNa setan e nina, "O setan, si erbahanca kalak pasek ras pekak, ndaratlah ibas anak e, janah olanai bengketi ia!" 9:26 E maka nderkuh setan e idampes-dampeskenna anak e, jenari ndarat ia. Ndarat setan e e maka anak ndai enggo bali ras mait, seh maka nterem pe kalak ngatakenca maka ia enggo mate. 9:27 Tapi ijemak Jesus anak ndai, ipekekeNa jenari minter ia tedis. 9:28 Kenca Jesus i rumah, sanga Ia ngenca i je ras ajar-ajarNa, nungkun ajar-ajar man baNa nina, "Engkai maka la kami ngasup pelawes setan e?" 9:29 Erjabap Jesus, "Alu ertoto (ras erpuasa) ngenca maka terpelawes setan bagi si ndai." 9:30 E maka itadingken Jesus ras ajar-ajarNa ingan e, janah berkat ia kempak Galilea. La ate Jesus ieteh ise pe i ja Ia ringan, 9:31 sabap Ia sangana ngajari ajar-ajarNa. Nina man ajar-ajarNa, "Anak Manusia si isuruh Dibata iendesken pagi ku bas kuasa manusia, ibunuh manusia pe Ia; tapi kenca telu wari, mulihi Ia nggeluh." 9:32 La ierti ajar-ajar kerna kata enda, tapi mbiar ia nungkun Jesus. 9:33 Seh me Jesus ras ajar-ajarNa i Kapernaum. Kenca seh i rumah isungkun Jesus ajar-ajarNa nina, "Kai si ipersoalkenndu i tengah dalan ndai?" 9:34 Tapi ajar-ajar sinik saja, sabap i tengah dalan ndai ersoal ia sapih-sapih ia kerna ise si mbelinna ibas ia. 9:35 E maka kundul Jesus, idilona ajar-ajarNa si sepuluh dua kalak. Nina man ajar-ajarNa, "Ise atena jadi si arah lebe, arus maka ia arah pudi janah ia pe si ngelai kerinana." 9:36 Jenari idilo Jesus sekalak danak-danak janah ipetedisna i lebe-lebe ajar-ajar. IangkipNa anak e janah nina, 9:37 "Ise si ngaloken danak-danak si bagenda ibas gelarKu, ia kap si ngaloken Aku. Janah ise si ngaloken Aku, labo Aku saja si ialokenna tapi ialokenna pe si nuruh Aku." 9:38 Nina Johanes man Jesus, "O Guru, lit idah kami sekalak mpelawes setan ibas gelarNdu. Perbahan labo ia masuk terpukta, e maka ilarang kami." 9:39 Ngaloi Jesus, "Ola ambati ia! Sabap labo lit sekalak pe si erbahan tanda sengget ibas gelarKu, jenari terus ibelaskenna cakap si jahat kerna Aku. 9:40 Sabap ise la ngelawan kita, temanta kap. 9:41 Ingetlah! Ise pe si mereken lau inemen man bandu erkiteken kam pengikut Kristus, tentu ia dat upah." 9:42 "Ntah ise gia si erbahanca maka sekalak jelma lanai erkiniteken man bangKu, ulin irakutken batu penggilingen ku kerahungna, jenari igedapken ia ku bas lawit. 9:43 Bage pe adi tanndu erbahanca kam erdosa, tekteklah e. Sabap ulin kam nggeluh alu sada tan asangken dua tanndu, tapi ku naraka kam, ku api si la ernimpet-nimpet. 9:44 I je bernga si ngkarati ia la ermate-mate, janah api la ernimpet-nimpet! 9:45 Adi nahendu erbahanca kam erdosa, keretlah e. Sabap ulin kam nggeluh alu sada nahe asangken dua nahendu tapi kam ku naraka. 9:46 I je bernga si ngkarati ia la ermate-mate, janah api la ernimpet-nimpet! 9:47 Janah adi matandu erbahanca kam erdosa, pulditkenlah matandu e, sabap ulin kam alu sada mata bengket ku bas Kinirajan Dibata asangken dua matandu tapi kam iambekken ku naraka. 9:48 I je bernga si ngkarati ia la ermate-mate janah api la ernimpet-nimpet! 9:49 Sabap kerina manusia isirai pagi alu api. 9:50 Sira tuhu mbelin gunana, tapi adi sira lanai masin, alu kai kin ibanndu maka banci masin mulihi? Lit min tetap sira ibas kam, janah tetaplah kam erdame sapih-sapih kam ibas geluhndu."
10:1 Kenca bage itadingken Jesus ingan ndai, lawes Ia ku taneh Judea, ras ku lepar Lau Jordan. I bas ingan e pe nterem jelma reh ndahi Ia. Janah bagi si nggona, iajari Jesus ka jelma si nterem e. 10:2 Reh piga-piga kalak Parisi atena ncubai Jesus. Isungkunna Jesus nina, "Rikutken Undang-undang agamanta, banci kin sekalak perbulangen ngulihken ndeharana? Katakenlah man kami!" 10:3 Ijabap Jesus alu penungkunen ka nina, "Undang-undang si kuga kin enggo ibereken Musa man bandu?" 10:4 Ngaloi kalak ndai nina, "Adi Musa iberena sekalak dilaki ngulihken ndeharana alu erbahan surat mulih." 10:5 Nina Jesus man kalak ndai, "Perbahan kam la terajarken, e maka isuratken Musa Undang-undang e man bandu. 10:6 Tapi mula-mulana ijadiken doni enda, i je pe enggo me ikataken, 'Dibata njadiken manusia dilaki ras diberu. 10:7 E maka sekalak dilaki arus nadingken nande bapana, ersada ras ndeharana, 10:8 janah si dua kalak enda enggo jadi sada.' E maka lanai bo ia dua tapi sada nge. 10:9 E me sabapna si enggo ipersadaken Dibata, lanai banci isirangken manusia." 10:10 Kenca Jesus ras ajar-ajarNa enggo ka seh i rumah, isungkun ajar-ajar Ia kerna si ikatakenNa ndai. 10:11 Nina Jesus man ajar-ajarNa, "Kalak si ngulihken ndeharana, jenari erjabu ka ia ras diberu si deban, dilaki ndai erlua-lua nandangi ndeharana e. 10:12 Bage pe sekalak ndehara si nadingken perbulangenna, janah erjabu ka ia ras dilaki si deban, ia pe erlua-lua nge." 10:13 Lit me piga-piga kalak maba anak-anak man Jesus. Atena gelah anak-anak e ipasu-pasu Jesus, tapi merawa ajar-ajarNa man kalak ndai. 10:14 Sanga idah Jesus e, merawa Ia man ajar-ajarNa nina, "Pelepas anak-anak e reh ndahi Aku, ola ambati ia, sabap kalak si bage nge kap empuna Kinirajan Dibata. 10:15 Ingetlah katangKu enda! Ise si la nggit ngaloken Kinirajan Dibata bagi sekalak anak-anak, kalak si bage labo pagi bengket ku bas Kinirajan Dibata e." 10:16 Jenari idakepNa anak-anak e sekalak-sekalak, itamakenNa tanNa ku babona janah ipasu-pasuNa. 10:17 Asum berkat ka Jesus nerusken perdalanenNa, reh me sekalak dilaki kiam-kiam njumpai Ia. Erjimpuh ia i lebe-lebe Jesus jenari nina, "O Guru si bujur, kai nge ndia arus kubahan maka dat aku kegeluhen situhu-tuhu si la erkeri-kerin?" 10:18 Ngaloi Jesus nina, "Engkai maka ikatakenndu Aku bujur? Ma ise pe labo bujur seakatan Dibata? 10:19 Tentu enggo ietehndu pedah Dibata, 'Ola munuh, ola erlua-lua, ola nangko, ola erbual, ola nipu, mehamat man nande bapandu.' " 10:20 E maka ngaloi kalak ndai, "O Guru, kerina pedah e enggo kuikutken kitik-kitikku nari." 10:21 Itatap Jesus ka ia janah mekuah ateNa. E maka nina Jesus man bana, "Sada nari kekurangenndu. Laweslah, dayaken kerina erta-ertandu janah bereken man kalak musil gelah idatndu erta-erta i Surga; jenari reh kam, ikutken Aku." 10:22 Kenca ibegina kata Jesus e ceda atena, e maka lawes ia. Berjut ia sabap bayak kal ia. 10:23 Ipernehen Jesus ajar-ajarNa jenari nina, "Seh kal serana kalak bayak bengket ku Kinirajan Dibata!" 10:24 Sengget ajar-ajar megi kataNa e, tapi Jesus terus ngerana, "O anakKu, tuhu-tuhu mesera bengket ku Kinirajan Dibata. 10:25 Sukahen sada unta mentas arah lubang jarum asa sekalak bayak bengket ku bas Kinirajan Dibata." 10:26 Reh mamangna ate ajar-ajar, e maka sisungkun-sungkunen ia, nina, "Adi bage ise nari nge banci terkelin?" 10:27 Ipernehen Jesus ajar-ajarNa, jenari nina, "Si enda la banci jadi rikutken pengakap manusia, tapi ibas Dibata banci kap. Sabap kai pe banci nge jadi ibas Dibata." 10:28 Jenari nina Petrus man Jesus, "Adi kami, kerina enggo itadingken kami lako ngikutken Kam!" 10:29 Ngaloi Jesus nina, "Kukataken pe man bandu, maka ise pe si nadingken rumahna, seninana ntah turangna, nandena ntah bapana, anak-anakna ntah juma, erkite-kiteken Aku dingen erkite-kiteken Berita Si Meriah, 10:30 genduari e pe ialokenna buen asa si ndai. Ialokenna seratus kali lipat: rumah, senina, turang, nande, bapa, anak ras juma, aminna gia mesera akapna erkiteken iayak-ayak kalak janah ialokenna pe pagi kegeluhen si tuhu-tuhu si la erkeri-kerin. 10:31 Nterem kalak si arah lebe genduari jadi arah pudi pagi, janah nterem kalak si arah pudi genduari jadi pagi arah lebe." 10:32 Jesus ras ajar-ajarNa sangana ibas perdalanen ku Jerusalem. Jesus erdalan arah lebe ajar-ajar. Aru ate ajar-ajar bage pe mbiar kalak si deban si ngikutken Ia arah pudi. Sekali nari idilo Jesus ajar-ajar si sepuluh dua jenari iturikenNa kerna kai pagi si jadi man baNa. 10:33 Nina man ajar-ajar e, "Begikenlah! Genduari kita ibas perdalanen ku Jerusalem. I je me pagi Anak Manusia si isuruh Dibata iendesken man imam-imam si mbelin ras guru-guru agama. Iukumna pe rutang kesah. Bage pe iendeskenna man kalak si la nandai Dibata. 10:34 Kalak si la nandai Dibata e pagi nokoh-nokohi Ia, icidurina, iligasina janah ibunuhna pe Ia. Tapi kenca telu wari keke ka Ia mulihi ibas si mate nari." 10:35 Reh me anak-anak Sebedeus e me Jakup ras Johanes ndahi Jesus, janah nina, "O Guru, lit pemindon kami man baNdu, ngarap kami gelah iberekenndu." 10:36 E maka isungkun Jesus ia, "Kai kin atendu si Kubahan man bandu?" 10:37 Erjabap kalak si dua ndai, "Ate kami, kundul min arah kawes ras kemuhenNdu kune pagi Kam erkuasa ibas KinirajanNdu." 10:38 Tapi nina Jesus man kalak ndai, "La kap ietehndu kai si ipindondu e. Ngasup kin kam minem tare calung kiniseran si arus Kuinem e? Ngasup kin kam iperidiken alu peridin si arus Kualoken e?" 10:39 Erjabap kalak ndai, "Ngasup." Nina ka Jesus man bana, "Payo katandu e; kam pe nandangi minem me tare calung kiniseranKu janah kam iperidiken alu peridin si arus Kualoken. 10:40 Tapi kerna ise kundul arah kawes ras arah kemuhenKu labo Aku metehsa. E pagi ibereken Dibata man kalak si enggo itentukenNa." 10:41 Sanga ibegi ajar-ajar si sepuluh kalak nari kata e, irawaina Jakup ras Johanes. 10:42 E maka idilo Jesus ia kerina jenari nina, "Enggo ietehndu maka si iakui jadi pemerentah erkuasa nandangi rayatna janah peminpin-peminpin rate-rate nandangi bawahenna. 10:43 Tapi ibas kam la banci bage. Ise atena ibas kam jadi mehaga, ia arus jadi si ngelai nandangi kam. 10:44 Ise atena jadi si arah lebe, arus maka ia jadi suruh-suruhen temanna kerina. 10:45 Sabap Anak Manusia si isuruh Dibata reh labo guna ielai, tapi guna ngelai. Janah iendeskenNa kesahNa guna nebusi nterem jelma." 10:46 Seh me Jesus ras ajar-ajarNa i Jeriho. Asum Jesus ras ajar-ajarNa bage pe ikut jelma si nterem ndarat i Jeriho nari, lit sekalak pemindo-mindo kundul i tepi dalan. Ia pentang, gelarna Bartimeus anak si Timeus. 10:47 Asum ibegina maka si reh e Jesus kalak Nasaret, erlebuh ia, nina, "O Jesus! Anak Daud! Mekuah min ateNdu aku!" 10:48 Nterem jelma ngelarang ia gelah sinik. Tapi reh gangna ia erlebuh nina, "O Anak Daud! Mekuah min ateNdu aku!" 10:49 Ngadi Jesus erdalan jenari nina, "Dilolah ia ku jenda!" E maka idilo kalak me si pentang ndai nina, "Malem atendu! Tediskenlah! IdiloNa kam." 10:50 Minter itangtangina cabinna, tedis ia jenari idahina Jesus. 10:51 Isungkun Jesus ia nina, "Kai kin atendu Kubahan man bandu?" Erjabap si pentang ndai, "O Guru, ateku min gelah aku erpengidah mulihi." 10:52 E maka nina Jesus, "Mulihlah, kinitekenndu erbahanca kam malem." Minter ia erpengidah, e maka ikutkenna Jesus, ras ia erdalan.
11:1 Asum Jesus ras ajar-ajarNa lanai ndauhsa ku Jerusalem, seh me Ia i Uruk Seton, deherken Betpage ras Betani. Isuruh Jesus dua kalak ajar-ajarNa 11:2 nina, "To lawes, leben kam ku kuta si arah lebendu ah. Seh kenca kam ku bas kuta e, idapetindu kari sada kelede tambat, si langa pernah iersak kalak. Osari nalina jenari baba kelede e ku jenda. 11:3 Adi lit kari kalak nungkun man bandu, 'Engkai maka itangtangindu?' katakenlah, 'Perlu Tuhan, minter ka kari iulihkenNa ku jenda.' " 11:4 E maka lawes ajar-ajar si dua kalak ndai. Idapetina sada kelede deher dalan, tambat ibas pintun rumah. Asum ia ngosari nali kelede e, 11:5 piga-piga kalak si tedis i je nungkun nina, "Engkai maka iosarindu kelede e?" 11:6 Erjabap ajar-ajar bagi si enggo ikataken Jesus man bana, e maka ipelepas kalak ndai ibabana. 11:7 Ibaba ajar-ajar si dua kalak ndai kelede e, e maka iersak Jesus. 11:8 Nterem jelma ngkimbangken uisna ibas pasar, lit ka pe deba ngamparken lambe si itektekna i juma. 11:9 Kerina jelma si ngikutken Jesus, si arah lebe ras si arah pu di mulai ersurak-surak nina, 11:10 "Pujilah Dibata! Ipasu-pasu Dibata gelah Ia si reh ibas gelar Tuhan. Dibatalah si masu-masu Kinirajan si mulihi ipanteki, e me Kinirajan bapanta Daud; Pujilah Dibata i bas ingan Simeganjangna!" 11:11 Kenca seh Jesus i Jerusalem, lawes Ia ku Rumah Pertoton. IperdiatekenNa kerina si lit i je. Tapi perbahan wari nandangi gelap e maka lawes Ia ku Betani ras ajar-ajarNa si sepuluh dua kalak e. 11:12 Pepagina, kenca berkat ia kerina i Betani nari, melihe Jesus. 11:13 I dauh-dauh nari idahNa sada batang ara, mbur bulungna. Lawes Ia ku je ngenehen ntah lit kin buahna. Tapi kenca seh Ia i je, la lit kai pe idatNa seakatan bulung si mbur e, sabap paksa si e la musim erbuah. 11:14 E maka isumpahi Jesus batang ara ndai nina, "Lanai ise pe pagi man buahndu." Ajar-ajarNa pe megisa kai si ikatakenNa e. 11:15 Kenca seh ia kerina i Jerusalem, lawes Jesus ku Rumah Pertoton. IpelawesNa kerina si erbinaga ras si nukur ibas kesain Rumah Pertoton e. Meja-meja kalak si nukar duit ras bangku-bangku si erbinaga nderapati itunggalingiNa. 11:16 La ibereNa ise pe maba barang arah kesain Rumah Pertoton e. 11:17 Kenca bage iajariNa kalak si nterem nina, "Enggo isuratken ibas Pustaka Si Badia, maka nina Dibata, 'RumahKu pagi igelari Rumah Pertoton man kerina manusia.' Tapi enggo ijadikenndu jadi asar penamun." 11:18 Ibegi imam-imam si mbelin ras guru-guru agama pe kai si ikataken Jesus e, e maka idaramina dalan guna munuh Jesus. Mbiar ia ngenehen Jesus sabap cocok iakap jelma si nterem megi pengajarenNa. 11:19 Nandangi gelap, Jesus ras ajar-ajarNa lawes ibas kuta e nari. 11:20 Pepagina, erpagi-pagi si lampas asum Jesus ras ajar-ajarNa mentas, idahna batang ara si nderbih, enggo kerah seh ku uratna. 11:21 Teringet Petrus kai si enggo jadi, e maka nina man Jesus, "O Guru, nehenlah batang ara si isumpahiNdu e, enggo kerah." 11:22 Ngaloi Jesus, "Ingetlah! Adi kam erkiniteken man Dibata, 11:23 banci pe ikatakenndu man uruk-uruk enda, 'Angkat bandu, janah miserlah ku lawit.' Adi tetap ukurndu janah tek maka kai si ikatakenndu e jadi, la banci lang jadi nge bagi si ikatakenndu e. 11:24 Perbahan si e Kukataken pe man bandu: Adi ertoto kam bage pe mindo janah tek maka enggo ialokenndu, ibere Dibata nge man bandu kai pe si ipindondu. 11:25 Bage pe adi tedis kam ertoto, alemilah kerina kalak si ersalah man bandu, gelah Bapandu si i Surga pe ialemiNa dosa-dosandu. 11:26 Adi la ialemindu salah kalak si deban, Bapandu si i Surga pe labo ngalemi dosa-dosandu." 11:27 Jesus ras ajar-ajarNa mulihken ka ku Jerusalem. Sanga Jesus erdalan ibas kesain Rumah Pertoton, reh imam-imam si mbelin, guru-guru agama ras peminpin-peminpin Jahudi ndahi Ia. 11:28 Isungkunna Jesus nina, "Kuasa kai kin si lit ibas Kam erbahan si enda kerina? Ise mereken kuasa e man baNdu?" 11:29 Erjabap Jesus man kalak ndai, "Kusungkun kam lebe, alu sada penungkunen saja, janah adi ijabapndu, Kukataken ka pe man bandu kuasa kai kin si lit ibas Aku erbahan si enda kerina. 11:30 I ja nari rehna kuasa Johanes Peridiken maka ia mperidiken? I bas Dibata nari ntah ibas manusia nari? Jabap dage!" 11:31 E maka sisungkun-sungkunen ia sapih-sapih ia nina, "Kuga ninta? Adi ninta, 'I bas Dibata nari,' kugapa pe nina, 'Adi bage ngkai maka la kam tek Johanes Peridiken?' 11:32 Tapi adi ninta, 'I bas manusia nari ...' " (Mbiar ia ngenehen jelma si nterem, sabap kerina kalak tek maka Johanes Peridiken e tuhu-tuhu sekalak nabi.) 11:33 E maka erjabap ia man Jesus, "La ieteh kami." Nina Jesus man bana, "Aku pe la Kukataken man bandu alu kuasa kai kin Kubahan enda kerina."
12:1 E maka ngerana Jesus man kalak ndai alu perumpaman nina, "Lit me sekalak si nuan anggur ibas jumana. Juma ndai ibidena kelewet, ikurukna lubang erbahan bak ingan mereh buah anggur, janah ipajekkenna sada menara ingan erjaga. Kenca bage isewakenna kebun ndai man kalak si newa, 12:2 jenari lawes ia ku negeri si deban. Kenca seh paksa peranin buah anggur, isuruhna sekalak juak-juakna ndahi si newa kebun anggur ndai, guna mindo sikerajangenna. 12:3 Tapi itangkap si newa kebun e juak-juak ndai, ipekpekina, isuruhna mulih alu la maba kai pe. 12:4 E maka isuruh si empu kebun anggur ndai ka sekalak juak-juak si deban. E pe ipekpekina seh luka takalna janah igombang-gombangina pe. 12:5 Isuruh si empu kebun anggur ndai ka sekalak juak-juak si deban, janah ibunuh kalak ndai ka. Nterem juak-juak si deban isuruhna pegancih-gancih, tapi e pe ipekpekina janah deba ibunuhna. 12:6 Sekalak nari ngenca tading ras si empu kebun anggur ndai, e me anakna si ikelengina. Dungna anakna enda pe isuruhna ndahi si newa kebun anggur e nina, 'Adi anakku enda kusuruh tentu mehangke nge ia.' 12:7 Tapi nina si newa kebun anggur ndai sapih-sapih ia, 'Enda kap anak si empu kebun anggur enda. Marilah sibunuh ia, gelah man banta kebun enda.' 12:8 E maka itangkapna anak si empu kebun anggur e, ibunuhna jenari iambekkenna ku darat kebun." 12:9 Jenari nungkun Jesus nina, "Kenca bage kai nge ibahan si empu kebun anggur ndai? Tentu reh ia, janah ibunuhina kerina si newa kebun anggur e, jenari isewakenna kebun anggur e man kalak si deban. 12:10 Ma enggo kin iogendu ibas Pustaka Si Badia, 'Batu si iambekken tukang e kap jadi batu palas. 12:11 Perbahanen Dibata kap enda, andiko, jilena lanai kap teralang!' " 12:12 E maka peminpin-peminpin kalak Jahudi ndarami dalan guna nangkap Jesus, sabap ietehna maka ia kap si imaksud Jesus ibas perumpaman e. Tapi perbahan mbiar ia ngenehen jelma si nterem, e maka lawes ia, itadingkenna Jesus. 12:13 Kenca bage, isuruh peminpin-peminpin kalak Jahudi me piga-piga kalak Parisi ras piga-piga ibas partai Herodes nari encubai Jesus alu penungkunen. 12:14 E maka idahi kalak ndai Jesus nina, "O Guru, ieteh kami maka kerina si ikatakenNdu e tuhu. La erpilihen temanNdu ngerana: La ipernehenNdu pangkat manusia, iajarkenNdu pe kerna kai si ngena ate Dibata idalanken manusia. Kataken dage man kami: La kin ngelanggar Undang-undang agamanta adi igalari pajak man Kepala Pemerentah Roma? Arus kin igalari kami ntah lang?" 12:15 Tapi ieteh Jesus maka kalak ndai pekulah-kulah, e maka nina, "Engkai maka icubaindu Aku? Enta lebe sada lembar duitndu gelah Kupepayo." 12:16 Kenca ibereken kalak ndai nungkun Jesus man bana nina, "Gambar ras gelar ise kin enda?" Erjabap kalak ndai nina, "Gambar ras gelar Kepala Pemerentah Roma." 12:17 E maka nina Jesus, "Adi bage, berekenlah man Kepala Pemerentah si patut ibereken man bana janah berekenlah man Dibata kai si patut ibereken man baNa." E maka jengang kalak ndai megi kata Jesus e. 12:18 Reh me piga-piga kalak Saduki ndahi Jesus. (Kalak Saduki enda me salah sada golongen si ngatakenca maka labo lit kekeken i bas si mate nari.) 12:19 Nina man Jesus, "O Guru, man banta enggo isuratken Musa enda, 'Adi sekalak dilaki mate nadingken ndeharana janah la lit pupusna, e maka diberu si mbalu ndai arus ilakomangani senina si mate ndai, gelah ipupusna anak jadi gancih seninana si enggo mate ndai.' 12:20 Sekali jadi lit me pitu kalak dilaki si ersenina; sintua enggo empo, janah mate ia, la lit pupusna. 12:21 E maka ilakomangani seninana si nomor dua diberu e, janah mate ka ia la lit pupusna. Bage ka pe jadi nandangi seninana si nomor telu. 12:22 Janah bage me pe seterusna, seh pituna ia ngempoi diberu ndai janah mate sada pe la nadingken anak. Dungna diberu ndai pe mate. 12:23 Kenca nggeluh kerina si mate ndai ibas wari pendungi pagi, ndehara ise dage diberu ndai? Sabap pituna ia enggo erjabu ras diberu ndai." 12:24 Ijabap Jesus kalak ndai nina, "Kam enggo lepak kal. Janah ietehndu kin kai sabapna? Sabap la iangkandu Pustaka Si Badia ras Kuasa Dibata. 12:25 Kenca kalak keke ibas si mate nari, bali nge ia ras malekat-malekat i Surga. Lanai bo ia empo tah sereh. 12:26 Dage kerna si mate ipekeke ka, langa kin pernah iogendu i bas Kitap si isuratken Musa kerna turi-turin rambah duri si gara? I je isuratken, maka nina Dibata man Musa, 'Aku kap Dibata si tetap isembah Abraham, Dibata si tetap isembah Isak dingen Dibata si tetap isembah Jakup.' 12:27 Ertina, Ia Dibata kalak si nggeluh, labo Dibata kalak si mate. Tuhu-tuhu kal kam enggo lepak." 12:28 E maka reh me sekalak guru agama megiken percakapen Jesus ras kalak ibas golongen Saduki e. Ibegina maka jabap si ikataken Jesus man kalak Saduki ndai tengteng kal. E maka isungkunna ka Jesus nina, "Undang-undang si apai nge si pentingna kal ibas kerina Undang-undang?" 12:29 Erjabap Jesus nina, "Si pentingna kal e me kap, 'Begikenlah o kalak Israel! Tuhan Dibata ngenca Tuhan. 12:30 Arus ikelengindu Tuhan Dibatandu asa atendu, asa tendindu lit, asa ukurndu lit ras asa gegehndu.' 12:31 Si peduaken e me kap, 'Arus ikelengindu temanndu manusia bagi ikelengindu badanndu.' Lanai lit undang-undang si deban si pentingen asa undang-undang si dua enda." 12:32 E maka nina guru agama ndai man Jesus, "Payo Guru! Tuhu bagi si ikatakenNdu e. Tuhan ngenca Dibata, lanai lit Dibata si deban lain Ia. 12:33 E maka arus manusia engkelengi Dibata asa ukurna lit, alu kerina kengasupenna ngukurisa ras alu kerina gegeh si lit ibas ia. Janah manusia arus engkelengi temanna manusia bagi ikelengina bana. Pentingen ngikutken undang-undang si dua enda asangken erbahan persembahen tutungen ras persembahen gelehen man Dibata." 12:34 Idah Jesus, maka pentar kal guru agama e erjabap, e maka nina Jesus man bana, "Enggo mulai kam ngerti uga dalanna bengket ku bas Kinirajan Dibata." Kenca si e, ise pe lanai pang nungkun Ia. 12:35 Sanga Jesus ngajar ibas Rumah Pertoton, nungkun Ia nina, "Kuga maka ikataken guru-guru agama maka Mesias si ipadanken Dibata e anak Daud? 12:36 Sedangken Daud pe, erkiteken ikuasai Kesah Si Badia ernubuat nina, 'Nina Tuhan man Tuhanku, kundulken arah kemuhenKu seh Kutamaken imbang-imbangNdu i teruh tapak-tapak naheNdu.' 12:37 Daud pe ngataken, maka Ia me Tuhan. Kuga ka banci jadi maka Mesias si ipadanken Dibata e anak Daud?" 12:38 I bas pengajarenNa nina, "Metengetlah nandangi guru-guru agama, si megati erdalan-dalan erbaju gedang, si atena gelah ihormati i gedang-gedang dalan ras i tiga. 12:39 Merincuh kal ia kundul arah lebe ibas rumah pertoton, bage pe ndarami ingan si arah gugung ibas kerja. 12:40 Itipuna diberu balu-balu ras irampasina rumahna. E maka guna nutup-nutupi kejahatenna e, gedang-gedang ibahanna pertotonna. E maka mberat kal denggo ukumenna." 12:41 Asum Jesus kundul deher ingan persembahen, iperdiatekenNa kalak si namaken persembahen ku bas. Nterem kalak bayak namaken persembahen si melala. 12:42 Reh ka pe sekalak diberu mbalu si musil kal, itamakenna dua peser, e me duit si kitikna kal. 12:43 E maka idilo Jesus ajar-ajarNa, jenari nina, "Kukataken man bandu: si tuhuna buen persembahen diberu si enggo mbalu si musil e asangken kerina persembahen kalak si debanna. 12:44 Sabap kalak si deban ipersembahkenna ibas kinibayakenna si lebih nari, tapi diberu balu-balu e ipersembahkenna ibas kemusilenna nari, itamakenna kerina si lit ibas ia."
13:1 Sanga Jesus ndarat ibas Rumah Pertoton nari, ngerana sekalak ajar-ajarNa man baNa nina, "O Guru, nehenlah seh kal galangna batu enda janah seh kal jilena gedung enda." 13:2 Ngaloi Jesus nina, "Idahndu gedung si galang enda? Lanai lit sada batu pe pagi tading ibas inganna; kerina pagi iruntuhken." 13:3 Asum kundul Jesus i datas Uruk Seton petingtang Rumah Pertoton, reh me Petrus, Jakup, Johanes ras Andreas ndahi Ia. Sanga si e ise pe la lit i je, ia ngenca kerina. E maka nungkun ajar-ajar si empat kalak enda man Jesus nina, 13:4 "Katakenlah man kami ndigan kin jadi e? Kai tanda-tandana si encidahkenca maka enggo ndeher kejadin e?" 13:5 E maka nina Jesus man bana, "Jagailah bandu, ola kam pagi papak ibahan kalak. 13:6 Nterem pagi kalak reh ibas gelarKu nina, 'Aku kap Ia!' Janah nterem jelma itipuna. 13:7 Bage pe ola gulut ukurndu adi ibegindu sora perang, ntah berita-berita kerna perang. Kerina si e arus jadi, tapi labo ertina maka enggo seh kedungenna. 13:8 Negara pagi ngelawan negara, kerajan pagi ngelawan kerajan. I jah i je jadi taneh linuren, ras paksa kelihen. Kerina e bagi persui sekalak diberu si nandangi mupus ngenca. 13:9 E maka jagalah bandu! Kam pagi itangkap janah iadili i pengadilen agama. Kam pagi ipekpeki ibas rumah pertoton; kam pagi tedis i lebe-lebe kalak si erkuasa ras raja-raja erkiteken Aku gelah iturikenndu Berita Si Meriah man bana. 13:10 Berita Si Meriah e arus ipeseh lebe man kerina bangsa. 13:11 Janah adi itangkapna kam dingen iadilina, ola gulut ukurndu kerna kai si arus ikatakenndu. Katakenlah kai si ibereken Dibata man bandu paksa e. Sabap kai si ikatakenndu e labo ibas kam nari, tapi reh ibas Kesah Si Badia nari. 13:12 Kalak si ersenina ndudurken seninana gelah ibunuh, bage pe sekalak bapa nandangi anakna. Anak-anak pe ngelawan orang tuana, janah ibunuhna pe orang tuana e. 13:13 Kerina kalak rate segat man bandu erkite-kiteken Aku. Tapi kalak si megeng-geng seh ku kedungenna terkelin kap." 13:14 "Idahndu pagi 'Kejahaten si Encedai' tedis ibas ingan si la kin arusna. (Iantusi si ngogesa min kai erti kata enda.) Paksa si e pagi kalak si ringan i Judea arus kiam ku uruk-uruk. 13:15 Kalak si kundul-kundul i darat pekesahken olanai bengket ku rumah ngelegi barang-barangna. 13:16 Kalak si sangana i juma olanai ku rumah ngelegi uisna. 13:17 Andiko, kuahna ate pernanden si sangana mehuli kulana bage pe pernanden si sangana pepinemken paksa si e. 13:18 Ertotolah man Dibata gelah si enda ola jadi ibas paksa perudan. 13:19 Sabap ibas paksa si e pagi reh me kiniseran si seh kal ngerina, langa pernah jadi bage mulai kin ijadiken Dibata doni enda, seh asa genduari enda, janah lanai bo denggo jadi bagi si e. 13:20 Tapi beligan warina enggo ipegendeki Tuhan. Adi la kin ipegendekiNa, ise pe lanai bo lit terus nggeluh. IpegendekiNa wari kiniseran e nginget kalak pilihen si enggo ipilihNa. 13:21 Jenari adi lit pagi kalak si ngatakenca man bandu, 'Nehenlah, i jenda nge Mesias si ipadanken Dibata!', ntah 'Ah i jah kap Ia,' ola kam tek katana e. 13:22 Sabap reh me pagi Mesias perguak ras nabi-nabi perguak. Ibahanna tanda-tanda sengget, adi banci, gelah papak kalak si enggo ipilih Dibata. 13:23 E maka metengetlah kam! Enggo Kuturiken enda kerina man bandu ope denga jadi." 13:24 "Kenca lepas wari-wari kiniseran e, matawari jadi gelap, bulan pe lanai ersinalsal. 13:25 Bintang-bintang nartar i langit nari janah kuasa-kuasa i langit mugur-ugur. 13:26 Jenari teridah me Anak Manusia si isuruh Dibata reh ibas embun, alu kuasa si mbelin ras erdolat. 13:27 Asum e pagi isuruhNa malekat-malekat lawes ku Utara, Timur, Selatan bage pe ku Barat janah ipepulungNa kerina kalak si enggo ipilih Dibata i tampuk doni nari seh ku tampuk langit." 13:28 "Erlajarlah kam ibas batang ara nari. Adi dahanna enggo ertunas janah bulungna mulai meratah, ietehndu maka musim perlego enggo ndeher. 13:29 Bage pe adi idahndu pagi si Kukataken ndai kerina jadi, maka enggo ietehndu, paksana enggo ndeher, janah molai me. 13:30 Ingetlah! Kerina si e jadi pagi ope denga mate kerina manusia si nggeluh genduari enda. 13:31 Langit ras doni masap kap pagi, tapi KatangKu tetap rasa lalap." 13:32 "Kerna warina ntah pe jamna, ise pe la lit si metehsa. Malekat-malekat i Surga pe lang, janah Anak Dibata pe la meteh tapi Bapa ngenca metehsa. 13:33 Metenget janah erjaga-jagalah kam, sabap la ietehndu ndigan paksana. 13:34 Si enda bali me ras sekalak si lawes ku negeri si ndauh nadingken rumahna. Iberekenna kuasa man kerina si erdahinna gelah ertanggung jawab ia ibas dahinna sekalak-sekalak. Man si njaga pintun ikataken tuan ndai gelah ia erjaga-jaga. 13:35 E maka erjaga-jaga kam, sabap la ietehndu katawari tuan rumah ndai reh, banci jadi karaben, banci jadi tengah berngi, banci ka pe tekuak manuk ntah pe erpagi-pagi. 13:36 Gelah adi rempet ia reh, la kam tunduh idapetina. 13:37 Kai si Kukataken man bandu enda, Kukataken pe man kerina jelma: Erjaga-jaga ras metengetlah."
14:1 Dua wari nari Wari Raya Paskah ras Roti si La Itama Ragi, idarami imam-imam si mbelin ras guru-guru agama me dalan guna nangkap Jesus alu erbuni-buni janah ibunuhna atena. 14:2 Nina kalak e sapih-sapih ia, "Ola asum Wari Raya e sidalanken, gelah ola guntar kalak si nterem." 14:3 Asum Jesus i rumah Simon si nai sakit gadamen, i Betani, paksa man reh me sekalak diberu, ibabana sada botol dem minak si merim si meherga kal. Minak e ibahan ibas urat sinian-sinuan si merim nari. Ipecahkenna botol minak e jenari icurcurkenna ku takal Jesus. 14:4 Piga-piga kalak si lit i je jungut-jungut nina sapih-sapih ia, "Engkai maka iambur-ambur minak si merim e? 14:5 Ma kin banci idayaken lebih telu ratus duit pirak, janah duitna e ibereken man kalak musil?" Jenari irawaina pe diberu e. 14:6 Tapi nina Jesus, "Pelepaslah! Engkai maka iganggundu ia? Ia enggo erbahan si mehuli man bangKu. 14:7 Adi kalak musil usur nge pagi ras kam janah adi bage atendu banci isampatindu katawari pe. Tapi Aku labo lalap ras kam. 14:8 Diberu enda ibahanna asa ngasupna. Iminakina dagingKu ope denga Aku ikuburken. 14:9 Ingetlah! I japa pe pagi iberitaken Berita Si Meriah i belang-belang doni enda, ituriken pe kerna kai si enggo ibahan diberu enda ndai guna nginget ia." 14:10 Judas Iskariot e me sekalak ibas ajar-ajar si sepuluh dua; lawes ia ndahi imam-imam si mbelin guna ngataken maka ia nggit ngendesken Jesus man bana. 14:11 Meriah kal ukur imam-imam si mbelin megi kai si ikataken Judas Iskariot e. Jenari mulai me idaramina kesempaten si mehuli guna ngendesken Jesus. 14:12 I bas wari si pemena wari raya roti si La Itama Ragi, e me sanga kalak nggeleh biri-biri Paskah, nungkun ajar-ajar man Jesus nina, "I ja sura-suraNdu kami nikapken pangan Paskah man Bandu?" 14:13 E maka isuruh Jesus dua kalak ajar-ajarNa nina, "To lawes ku kota ah; i je jumpa kam kari ras sekalak dilaki si maba lau tare guci. Ikutken ia ku rumah, janah sungkun kari si mada rumah e; 14:14 'Nina Guru: Kamar si apai banci Kupake ras ajar-ajarKu guna man-man Paskah?' 14:15 E maka ituduhkenna kari man bandu sada kamar si mbas i datas loteng, si enggo sikap. I je me sikapkenndu kerina kai si perlu guna man-man Paskahta." 14:16 Berkat me si dua kalak e janah seh kenca ia i kota, idapetina kerina bagi si enggo ikataken Jesus man bana. Jenari isikapkenna pangan guna Paskah e. 14:17 Kenca gelap reh me Jesus ras ajar-ajarNa. 14:18 Paksa ia man kerina, ngerana Jesus nina, "Begikenlah: sekalak ibas kam nari si sangana man ras Aku paksa enda, ndudurken Aku kap kari." 14:19 Ceda ate ajar-ajar e, jenari pegancih-gancih ia nungkun man Jesus nina, "Ma labo aku kataNdu?" 14:20 Erjabap Jesus, "Jelmana e me kap sekalak ibas kam si sepuluh dua enda, si encalehken roti ras Aku bas mangkuk. 14:21 Anak Manusia si isuruh Dibata la banci lang mate nge pagi bagi isuratken kerna Ia ibas Pustaka Si Badia. Tapi andiko, cilaka kap kalak si ndudurken Anak Manusia si isuruh Dibata e. Ulin kin min mbarenda la ia tubuh." 14:22 Sanga Jesus ras ajar-ajarNa man, ibuat Jesus roti, ertoto Ia ngataken bujur man Dibata, jenari icepik-cepikNa roti e janah iberekenNa man ajar-ajarNa. Nina Jesus, "Buatlah, enda me badanKu." 14:23 Kenca bage ibuatNa ka calung, ertoto Ia ngataken bujur man Dibata jenari iberekenNa man ajar-ajarNa, janah kerina ia minem tare calung e. 14:24 Nina Jesus, "Enda me darehKu si iamburken guna nterem jelma, si ngesahken padan Dibata. 14:25 Kukataken pe man bandu, maka lanai bo pagi Kuinem lau anggur. Tapi denggo Kuinem anggur si mbaru ibas Kinirajan Dibata." 14:26 Kenca bage kerina ia ngendeken ende-enden pujin, jenari lawes Ia ku Uruk Seton. 14:27 Nina Jesus man ajar-ajarNa, "Kerina kam pagi kiam nadingken Aku, sabap enggo tersurat ibas Pustaka Si Badia, 'Permakan e pagi ibunuh Dibata janah biri-biri e kerina merap.' 14:28 Tapi kenca Aku ipekeke, leben pagi Aku ku Galilea asa kam." 14:29 Ngaloi Petrus nina, "Aku labo pagi nggit nadingken Kam, aminna gia kerina kalak enda kiam." 14:30 Nina Jesus man Petrus, "Ingetlah! I bas berngi enda pe, ope tekuak manuk dua kali, enggo ipersokenndu Aku telu kali." 14:31 Reh lantangna Petrus ngaloi nina, "Asa ndigan pe la Kam kupersoken, amin terpaksa pe aku mate ras Kam!" Janah ajar-ajar si deban pe kerina ngataken bagi si ikataken Petrus enda. 14:32 Seh me Jesus ras ajar-ajarNa ibas sada ingan gelarna Getsemane. Nina Jesus man ajar-ajarNa, "Kundul kam i jenda, Aku ertoto lebe." 14:33 Ibabana Petrus, Jakup ras Johanes ngikut ras Ia. Paksa e ceda ate Jesus dingen getem kal pusuhNa, 14:34 janah nina man ajar-ajarNa si telu kalak, "Ceda kal ateKu, bagi si mate atena Aku. Timai i jenda, ola kam tunduh." 14:35 Lawes Ia terdauhen sitik nari, jenari erjimpuh Ia i taneh, janah ertoto Ia gelah adi banci, ola min ibentasiNa paksa kiniseran e. 14:36 Nina ibas pertotonNa, "O BapangKu, o BapangKu! La kap lit si metahat ibas Kam. Agui min calung kiniseran enda ibas Aku nari. Tapi labo peratenKu, peratenNdu lah jadi." 14:37 Kenca bage mulihken Ia, idapetiNa ajar-ajar si telu kalak ndai tunduh. E maka nina man Petrus, "O Simon, tunduh kam e? La kam ngasup la tunduh sada jam pe?" Nina ka Jesus man bana teluna, 14:38 "Erjaga janah ertotolah gelah ola kam ndabuh ku bas percuban. Ukurndu mehuli kap tapi dagingndu kote." 14:39 Jenari lawes ka Ia ertoto bagi si ndai. 14:40 Asum Ia mulihken ka, idapetina ajar-ajar si telu ndai tunduh; la termedakkenca matana, bage pe lanai teraloisa Jesus. 14:41 Asum mulihken Jesus petelu kaliken, isungkunNa ajar-ajarNa si telu e nina, "Medem dingen tunduh denga kin kam? Enggo me bias! Enggo seh paksana, maka Anak Manusia si isuruh Dibata iendesken ku bas kuasa kalak perdosa. 14:42 Kekeken, ota lawes kita. Nehenlah, si ngendesken Aku enggo reh." 14:43 Sanga Jesus ngerana denga, reh Judas, e me sekalak ibas ajar-ajar si sepuluh dua kalak e. Ibabana sada rombongen si maba pedang ras perpalu, e me rombongen si isuruh imam-imam si mbelin ras guru-guru agama bage pe peminpin-peminpin kalak Jahudi. 14:44 Si ndudurken Jesus enggo mereken tanda man kalak ndai, nina, "Si kuema e me kari kalakna, tangkap janah baba, olanai pulah." 14:45 Kenca seh Judas ndai minter ideherina Jesus nina, "O Guru!" Jenari iemana Jesus. 14:46 E maka itangkap kalak ndai Jesus jenari iketna. 14:47 Tapi sekalak ibas ia si tedis i je isintakna pedangna, jenari itampulna juak-juak Imam si Mbelin seh retap cupingna. 14:48 E maka ngerana Jesus man kalak si reh ndai nina, "Iatekndu kin Aku enda sekalak pengerampok maka reh kam maba pedang ras perpalu guna nangkap Aku? 14:49 Idahndu nge Aku tep-tep wari ngajar ibas Rumah Pertoton, janah labo itangkapndu Aku. Tapi arus nge isehken kai si tersurat ibas Pustaka Si Badia." 14:50 Kenca bage kiam kerina ajar-ajar nadingken Jesus. 14:51 Lit me sekalak anak perana si ngikutken Jesus, uisna selambar kain putih ngenca. Icubaken kalak ndai pe nangkap ia, 14:52 tapi itadingkenna uisna e jenari kiam ia manjang-anjang. 14:53 E maka ibaba kalak ndai Jesus kurumah Imam si Mbelin. I je enggo pulung kerina imam-imam si mbelin, peminpin-peminpin ras guru-guru agama. 14:54 Petrus ngikut-ngikut i dauh-dauh nari seh ku kesain rumah Imam si Mbelin e. I je ia kundul ras pengawal-pengawal janahna cudu deher api. 14:55 Imam-imam si mbelin bage pe Pengadilen Agama e ndarami bukti-bukti si nalahken Jesus, gelah banci Ia ibunuh; tapi la lit idatna. 14:56 Nterem saksi si ngataken si la tuhu kerna Jesus, tapi sada pe la seri katana. 14:57 Dungna tedis piga-piga kalak saksi ngelawan Jesus alu tuduhen palsu, 14:58 nina, "Enggo pernah ibegi kami maka nina Jesus enda, 'Kuruntuhken pagi Rumah Pertoton si ibahan manusia enda, janah kenca telu wari Kupajekken ka sada si labo bekas manusia erbahan.' " 14:59 Kesaksin enda pe la seri ras kesaksin kalak si deban. 14:60 E maka tedis me Imam si Mbelin i lebe-lebe kalak si ersidang e jenari isungkunna Jesus nina, "La kin lit jabapndu nandangi tuduhen saksi-saksi enda man bandu?" 14:61 Sinik saja Jesus, kai pe nina lang. E maka isungkun Imam si Mbelin ndai ka Ia sekali nari nina, "Kam kin Mesias si ipadanken e, e me Anak Dibata si Badia e?" 14:62 Erjabap Jesus nina, "Aku me, janah pagin idahndu Anak Manusia si ipadanken Dibata kundul arah kemuhen si Mada Kuasa janah reh me ras embun i langit nari!" 14:63 Minter icaingken Imam si Mbelin ndai baju dinasna, janah nina, "Man kai nari kin saksi? 14:64 Enggo ibegindu uga pencekurakiNa Dibata. Kuga pengakapndu kerina?" Kerina ia ngatakenca maka Jesus e ersalah janah ersada arihna gelah Jesus ibunuh. 14:65 Piga-piga kalak mulai enciduri Jesus, itutupina ayo Jesus jenari itinjuina janah nina, "Kataken ise si ninju Kam!" Pengawal-pengawal pe ikut mbalmbal Ia. 14:66 Asum Petrus i teruh denga, i kesain rumah Imam si Mbelin, reh me sekalak diberu, suruh-suruhen Imam si Mbelin e. 14:67 Sanga idahna Petrus cicudu, ipernehenna kal janah nina, "Kam kap teman Jesus kalak Nasaret e." 14:68 Tapi merso Petrus nina ngaloi, "La kueteh, la kuangka pe kai si ikatakenndu e." Jenari lawes ia ku kesain si arah lebe. Paksa e pe tekuak manuk sekali. 14:69 Idah diberu ndai denga ka Petrus i je, e maka ikatakenna man kalak si lit i je nina, "Ia kap sekalak ajar-ajar Jesus e!" 14:70 Tapi e pe ipersoken Petrus ka nge. Lanai ndekahsa kenca si e lit kalak nuduh ia nina, "Lanai bo terpersoken; ugapa pe kam teman kalak e, sabap kam pe i Galilea nari!" 14:71 E maka ersumpah Petrus nina, "Mate gia aku, adi kutandai kin tuhu si ikatakenndu e!" 14:72 Paksa e pe minter tekuak manuk si pedua kaliken. Inget Petrus pe kai si enggo ikataken Jesus man bana, e me, "Ope denga tekuak manuk dua kali, enggo ipersokenndu Aku telu kali!" E maka erkadiola kal Petrus e maka tangis kal ia kesi-kesi.
15:1 Erpagi-pagi si lampas enggo ersada arih ibas imam-imam si mbelin, peminpin-peminpin Jahudi, guru-guru agama ras kerina anggota sidang, janah ibahanna rencana. Igarikenna Jesus jenari ibabana ngadap man Pilatus ras ngendeskenca man Pilatus. 15:2 Nungkun Pilatus man Jesus nina, "Kam kin raja kalak Jahudi e?" Erjabap Jesus, "Bagi katandu e me!" 15:3 Jenari erbage-bage tuduhen ibahan imam-imam si mbelin nandangi Jesus. 15:4 E maka nungkun ka Pilatus man Jesus nina, "La kam ngasup njabapsa? Kuga buena tuduhen-tuduhen kalak enda man baNdu!" 15:5 Tapi sitik pe la ngaloi Jesus, e maka mamang kal ate Pilatus. 15:6 Enggo jadi kebiasan maka ibas tep-tep Wari Raya Paskah ibebasken Pilatus sekalak tahanen, e me si ipindo jelma si nterem. 15:7 Paksa si e lit me sekalak gelarna Barabas ipenjaraken ras pemberontak-pemberontak si deban. Kalak enda kerina munuh sanga ia berontak ngelawan pemerentah. 15:8 Asum kalak si nterem reh mindo man Pilatus gelah kebiasan si gelgel ilakoken. 15:9 E maka ngaloi Pilatus alu penungkunen nina, "Atendu kin maka raja kalak Jahudi enda kubebasken man bandu?" 15:10 Si tuhuna ieteh Pilatus nge maka iendesken imam-imam si mbelin Jesus e man bana perbahan cian ate imam-imam si mbelin nandangi Jesus. 15:11 Tapi iajar-ajari imam si mbelin kalak si nterem mindo man Pilatus gelah Barabaslah ibebasken. 15:12 Ngaloi ka Pilatus man kalak si nterem nina, "Adi bage, kai dage kubahan nandangi kalak enda, si ikatakenndu raja kalak Jahudi e?" 15:13 Alu sora si megang ngaloi kalak ndai nina, "Pakukenlah Ia ku kayu persilang!" 15:14 Jenari nina Pilatus man kalak e, "Kejahaten kai kin enggo ibahanNa?" La ibegiken kalak ndai penungkunen enda, tapi reh gangna sorana nina, "Pakukenlah Ia ku kayu persilang!" 15:15 Perbahan ate Pilatus muat ukur kalak si nterem, e maka ipulahina Barabas man kalak si nterem. Tapi Jesus isuruhna iligas perajurit-perajurit jenari iendeskenna gelah ipakuken ku kayu persilang. 15:16 E maka ibaba perajurit-perajurit me Jesus ku bas istana gubernur, jenari idilona pulung kerina perajurit-perajurit si deban. 15:17 Ipakekenna uis megara man Jesus. Ibayuna tengkuluk duri, jenari itamakenna ku takal Jesus. 15:18 Kenca bage "ihormati" na Jesus nina, "Tabi, o raja kalak Jahudi!" 15:19 Jenari ipaluna takal Jesus alu ciken, icidurina, janah erjimpuh ia nembah man Jesus. 15:20 Kenca puas akapna kerina nggombang-nggombangi Jesus, itangtangina ka uis si megara e. Ipakekenna mulihi uis Jesus si gelgel. Jenari ibabana Jesus ndarat gelah ipakuken. 15:21 I tengah dalan jumpa kalak ndai ras sekalak dilaki gelarna Simon. Simon e rehna i kuta nari. Ia me ipaksa perajurit-perajurit mersan kayu persilang Jesus. (Simon enda kalak Kireni bapa Alexander ras Rupus.) 15:22 Ibaba perajurit-perajurit ndai Jesus ku sada ingan si igelari Golgota, ertina, "Ingan takal-takal". 15:23 I je ibereken man Jesus anggur si icampur ras mur. Tapi Jesus la nggit nginemsa. 15:24 Kenca bage ipakukenna Jesus ku kayu persilang jenari itikam tandukkenna uis Jesus ibas ia erbagi. 15:25 Jesus ipakuken ku kayu persilang jam siwah erpagi-pagi. 15:26 I datas kayu silang itulis i je, "Raja Kalak Jahudi". 15:27 Raduken ras Jesus lit ka pe dua kalak pengerampok ipakuken kalak ndai. Sekalak arah kemuhenNa, sekalak arah kawesNa. 15:28 Alu bage enggo seh isi Pustaka Si Badia e me, "Ia ipeseri ras kalak jahat". 15:29 Kalak si mentas arah e ncekuraki Ia janahna ngupir nina, "Oh! AteNdu ngeruntuhken Rumah Pertoton janah majekkenca ka i bas telu wari. 15:30 Genduari nusurkenlah janah pulahilah baNdu!" 15:31 Bage ka pe imam-imam si mbelin ras guru-guru agama isindir-sindirna Jesus nina sapih-sapih ia, "Kalak si deban isampatiNa, tapi diriNa jine la tersampatiSa. 15:32 Adi Ia kin raja Israel, Mesias si ipadanken e, nusur dage Ia ibas kayu persilang e nari, gelah kami tek man baNa." Perampok si dua kalak si ipakuken ras Jesus e pe isindirna ka nge Jesus. 15:33 Jam sepuluh dua ciger seh jam telu, gelap kerina daerah e. 15:34 Jam telu serko Jesus alu megang, "Eloi, Eloi, lama sabakhtani!" Ertina, "O DibatangKu, o DibatangKu, ngkai maka Aku itadingken Kam?" 15:35 Piga-piga kalak si tedis i je megi Jesus serko e maka nina, "Begikenlah, idilona Elia." 15:36 E maka minter kiam sekalak encelupken bunga karang ku bas anggur si macem, jenari icucukkenna ku ujung galah. Kenca bage idudurkenna gelah icecap Jesus. Nina, "Sitimai cuba, ntah reh kin Elia pesusur Ia i datas kayu persilang e nari!" 15:37 E maka nderkuh Jesus alu megang soraNa jenari keri kesahNa. 15:38 Paksa e pe merigat kire-kire Rumah Pertoton; erbelah dua das nari ku teruh. 15:39 Kepala perajurit si tedis i je ngidah Jesus nderkuh seh mate, e maka nina, "Tuhu-tuhu Ia Anak Dibata." 15:40 Lit piga-piga diberu natap i dauh-dauh nari. I je pe Maria Magdalena, Salome, ras Maria nande Jakup si kitik ras Joses. 15:41 Kalak enda enggo ngikutken Jesus janah nampati Ia sanga i Galilea. Nterem denga i je diberu-diberu si deban si ras Jesus reh ku Jerusalem. 15:42-43 Ope seh jam wari Sabat, reh me Jusup kalak Arimatea. Ia sekalak anggota Pengadilen Agama si ihamati. Ia pe sekalak si tertima-tima nandangi kerehen Kinirajan Dibata. Sendah enda wari Persikapen (e me wari ope wari Sabat). E maka alu la biar-biaren Jusup pang ngadap man Pilatus mindo mait Jesus. 15:44 Mamang ate Pilatus, asum ibegina berita kerna Jesus enggo mate. E maka idilona kepala perajurit jenari isungkunna ntah tuhu kin Jesus enggo mate. 15:45 Kenca ibegina keterangen kepala perajurit e, e maka ipelepasna Jusup muat mait Jesus e. 15:46 Itukur Jusup dagangen si meherga, ipesusurna mait Jesus jenari ibalutina alu e. Kenca bage itamakenna mait e ku bas sada kuburen si itukak ibas lingling batu. E maka igulingkenna sada batu si mbelin nutupi kubur e. 15:47 Idah Maria Magdalena ras Maria nande Joses i ja Jesus ikuburken.
16:1 Kenca lepas wari Sabat, Maria Magdalena, Maria nande Jakup ras Salome lawes nukur rempah-rempah si merim, gelah mait Jesus iminakina alu e. 16:2 E maka asum wari Minggu erpagi-pagi si lampas, pultak kenca matawari, berkat me ia ku kuburen. 16:3-4 I tengah dalan nungkun ia sapih-sapih ia nina, "Ise kari nampati kita nggulingken batu si nutupi kuburen e?" Batu e seh kal galangna. Tapi kenca ia seh, idahna kuburen e enggo talang. 16:5 E maka bengket ia ku bas, janah idahna i je sekalak anak perana, mbentar uisna kundul arah kemuhen. Mamang kal atena. 16:6 Tapi iperkuanken anak perana ndai ia nina, "Ola mamang atendu! Kueteh nge maka idaramindu Jesus kalak Nasaret si ipakuken ku kayu persilang. Ia lanai i jenda. Ia enggo keke! Nehenlah! Enda kap inganNa. 16:7 Genduari mulihlah janah beritaken man Petrus ras ajar-ajarNa, nindu, 'Ia enggo leben ku Galilea; i jah kam itimaiNa bagi si enggo ikatakenNa man bandu.' " 16:8 E maka ndarat kalak ndai ibas kuburen e nari jenari kiam ia perbahan mamang atena dingen mbiar kal ia. Perbahan biarna lanai iturikenna man ise pe. 16:9 Diberu-diberu ndai lawes ndahi Petrus ras teman-temanna. Alu gendek iturikenna kerina kai si enggo ikataken anak perana ndai man bana. Tapi kenca si e, Jesus jine nenahken Berita Si Badia si tetap nggeluh, kerna keterkelinen si rasa lalap e. Si enda ibahanNa erkelangkelangken ajar-ajarNa i Timur nari seh ku Barat. Asum wari Minggu erpagi-pagi, kenca Jesus keke ibas si mate nari, man Maria Magdalena lebe icidahkenNa baNa. Maria Magdalena enda me si pernah ipelawes Jesus pitu setan ibas ia nari. 16:10 E maka lawes Maria Magdalena meritakenca man teman-teman Jesus. Kalak enda ndai kerina sangana erceda ate dingen tangis. 16:11 E maka la ia tek sanga iberitaken Maria Magdalena maka Jesus e enggo nggeluh mulihi dingen enggo pe idahna. 16:12 Jenari Jesus ncidahken diriNa ibas rupa si la bagi biasa man dua kalak ajar-ajarNa. Ajar-ajar e sangana ibas perdalanen ku bas sada kuta. 16:13 E maka mulihken ajar-ajar si dua e, iberitakenna man teman-temanna si deban, tapi teman-temanna e la tek. 16:14 Dungna Jesus ncidahken baNa man ajar-ajar si sepuluh sada kalak, asum ia paksa man kerina. Ipandang Jesus ia kerina sabap la lit kinitekenna dingen mersik ukurna. La ia tek nandangi kalak si enggo ngidah Jesus nggeluh mulihi; 16:15 jenari nina Jesus man ajar-ajarNa, "Laweslah, siari doni enda jenari beritaken Berita Si Meriah man kerina manusia. 16:16 Ise si tek dingen iperidiken terkelin kap pagi. Tapi ise si la tek ia pagi iukum. 16:17 Kalak si tek lit pagi tandana e me: Ipelawesna setan-setan ibas gelarKu, ngerana ia ibas cakap si mbaru e. 16:18 Adi icikepna nipe ntah inemna racun labo kaden pe ia. Itamakenna tanna ku babo kalak sakit, malem penakit e." 16:19 Kenca Tuhan Jesus ngerana man ajar-ajar, iangkat me Ia ku Surga. I jah Ia kundul arah kemuhen Dibata. 16:20 Lawes ajar-ajar, janah erberita ia ku japa pe. Tuhan nampati ia ibas dahinna, janah Tuhan pe ikut erdahin ras-ras kalak enda. Ibahan Tuhan maka i japa pe kalak enda meritaken berita si ibas Dibata nari e i je pe jadi tanda kuasa ras tanda sengget.
1:1 Teopilus si ihamati. Nterem kalak enggo nuratken alu ratur kerna kejadin-kejadin si terjadi i tengah-tengahta. 1:2 Kalak enda nuratken kai si enggo ituriken man banta, e me si ituriken kalak si ngidah kejadin e tangtangna nari dingen meritakenca. 1:3 Dage, perbahan enggo kupepayo alu megermet kerina kejadin e i bas mula-mulana nari, e maka mehuli kuakap adi kusuratken ka alu ratur man bandu. 1:4 Kubahan e gelah tangkas man bandu, maka tuhu-tuhu nge kerina si enggo iajarken man bandu e. 1:5 Asum Herodes jadi raja i taneh Judea, lit me i je sekalak imam, gelarna Sakaria; ia i bas terpuk Abia nari. Ndeharana Elisabet gelarna; ia pe kesusuren imam. 1:6 Duana ia nggeluh rikutken ate Dibata ngena janah idalankenna kerina pedah ras Undang-undang Tuhan bagi patutna. 1:7 Anakna la lit, perbahan si Elisabet la ertuah, janah duana ia enggo metua. 1:8 I bas sada wari Sakaria sangana ndahiken dahin imam i lebe-lebe Dibata, rikutken giliren terpukna ndahiken dahin i bas kebaktin pelayanen si tep-tep wari. 1:9 Rikutken kebiasan imam-imam, ibahan me tikam tanduk, e maka Sakaria me si terpilih bengket ku bas Kamar si Badia guna nutung kumenen i je. 1:10 Jelma si nterem ertoto i darat seh dung kumenen e itutung. 1:11 Paksa si e, reh me malekat Tuhan ndahi Sakaria. Malekat e tedis arah kemuhen batar-batar ingan nutung kumenen. 1:12 Ngidah malekat e, sengget dingen mbiar kal Sakaria. 1:13 Tapi nina malekat man bana, "O, Sakaria ola kam mbiar! Pertotonndu enggo ibegiken Dibata. Ndeharandu Elisabet ipupusna me pagi sada anak dilaki. Bahan gelarna Johanes. 1:14 Meriah dingen malem pagi atendu, janah kalak si deban pe meriah ukurna arah ketubuhenna. 1:15 Ia jadi kalak si mbelin i lebe-lebe Tuhan. La banci inemna lau anggur tah pe inemen keras si deban. Mulai tubuhna pe ia enggo dem alu Kesah Si Badia. 1:16 Arah ia nterem pagi kalak Israel mulihken erkemalangen man Tuhan Dibatana. 1:17 Leben pagi Ia reh asa Tuhan; ia megegeh dingen erkuasa bagi Nabi Elia. Idamekenna pagi bapa ras anak-anakna; ibahanna kalak jahat jadi bujur; alu bage isikapkenna man Tuhan bangsa si metunggung." 1:18 Ngaloi Sakaria man malekat ndai, "Kai dage tanda man bangku maka kueteh tuhu si ikatakenndu e? Sabap aku ras ndeharangku enggo metua." 1:19 Erjabap malekat, "Aku kap Gabriel suruh-suruhen Dibata. IsuruhNa aku ngerana ras kam guna peseh Berita Si Meriah enda man bandu. 1:20 Tapi la kam tek si kuberitaken enda, si tuhu-tuhu pagi jadi i bas paksana. Erkiteken si e e maka lanai kam banci ngerana, pekak kam seh idahndu jadi si kukataken ndai." 1:21 Paksa si e, tertima-tima kalak si nterem, janah mamang atena sabap ndekahsa akapna si Sakaria i bas Kamar si Badia. 1:22 Dungna kenca Sakaria ndarat lanai ia banci ngerana man kalak si nterem, e maka iangka kalak si nterem maka Sakaria enggo ngidah sada pengenehenen i bas Kamar si Badia e. Perbahan lanai banci ia ngerana, e maka ibahanna tanda-tanda alu tanna man kalak si nterem. 1:23 Kenca dung masa penugasenna i Rumah Pertoton e, mulih ia ku rumah. 1:24 Jenari mehuli me kula ndeharana Elisabet janah seh lima bulan ia la ndarat i rumah nari. 1:25 Nina Elisabet, "Dungna isampati Tuhan ka nge aku, janah ibahanNa aku lanai medungu i lebe-lebe jelma si nterem." 1:26 Kenca enggo enem bulan Elisabet natang tuah, Dibata nuruh malekat Gabriel ku kuta Nasaret i daerah Galilea. 1:27 Gabriel isuruh ndahi sekalak singuda-nguda tergelar si Maria. Singuda-nguda e enggo ertunangen ras sekalak anak perana tergelar si Jusup, kesusuren Raja Daud. 1:28 Idahi malekat ndai Maria nina, "Mejuah-juah! Tuhan kap ras kam janah enggo iberekenNa pasu-pasuNa si mbelin man bandu!" 1:29 Sengget kal Maria megi kata malekat e, jenari nungkun i bas ukurna ntah kai erti kata e. 1:30 E maka nina malekat ndai man bana, "Ola kam mbiar, Maria, sabap enggo ibereken Dibata perkuah ateNa man bandu. 1:31 Mehuli pagi kulandu janah ipupusndu sada anak dilaki, bahanlah gelarna Jesus. 1:32 Ia pagi jadi kalak si mbelin dingen igelari pe Anak Dibata si Meganjangna kal. Tuhan Dibata pagi njadiken Ia jadi Raja bagi ninina Daud, 1:33 janah Ia me pagi raja man kesusuren Jakup seh rasa lalap; KinirajanNa la erkeri-kerin." 1:34 Ngaloi Maria man malekat ndai, "Kuga banci jadi e man bangku, sabap aku singuda-nguda denga?" 1:35 Erjabap malekat nina, "Kesah Si Badia pagi nusur ku babondu janah kuasa Dibata ringan i bas kam. Perbahan si e me, maka anak si ipupusndu e pagi Badia janah igelari Anak Dibata. 1:36 Nehenlah kade-kadendu Elisabet. Ikataken kalak maka ia la banci mupus, tapi enggo peenem bulanken mehuli kulana, aminna gia ia enggo metua. 1:37 Sabap la lit si metahat i bas Dibata." 1:38 Ngaloi Maria, "Kuendesken diringku man Tuhan. Janah jadilah i bas aku bagi si enggo ikatakenndu e!" Kenca bage itadingken malekat ndai ia. 1:39 Minter kenca si e, lawes Maria ku sada kuta i Judea i daerah si erdeleng-deleng. 1:40 I je lawes ia ku rumah Sakaria. Janah sanga ia bengket ku rumah e ikatakenna man Elisabet, "Mejuah-juah." 1:41 Asum ibegi Elisabet sora Maria, minter kemuit anak si lit i bas bertinna. Elisabet dem alu Kesah Si Badia. 1:42 E maka alu sora megang nina, "Kerina diberu, Kam me si mbelinna daten pasu-pasu! Ipasu-pasu gelah anak si ipupusndu! 1:43 Ise kin aku, maka nande Tuhan reh ndahi aku? 1:44 Sabap kenca kubegi sorandu, minter kemuit anak si lit i bas bertinku alu meriah ukur. 1:45 Malem tuhu-tuhu atendu sabap tek kam maka kai si iberitaken Tuhan man bandu tuhu-tuhu jadi." 1:46 Nina Maria, "Tendingku muji Tuhan. 1:47 Meriah ukurku perbahan Dibata Penebusku. 1:48 Sabap enggo ingetNa aku, kawanNa si meteruk! Genduari nari kerina kalak ngataken maka aku daten tuah. 1:49 Sabap Dibata si Mada Kuasa ncidahken perbahanenNa man bangku. Badia me gelarNa. 1:50 IcidahkenNa perkuah ateNa man kalak si erkemalangen man baNa. 1:51 IcidahkenNa KuasaNa alu perbahanen tanNa, janah iambatiNa gelah ola seh sura-sura kalak si meganjang ukurna. 1:52 IpeterukNa raja-raja si erkuasa, janah ipeganjangkenNa kalak si meteruk. 1:53 Kalak si melihe ibesuriNa alu kerina si mehuli, janah kalak bayak isuruhNa lawes ngambe-ngambe. 1:54 IngetNa padan si enggo ibahanNa ras nini-nininta, janah reh Ia nampati kalak Israel kawanNa. 1:55 La Ia lupa ncidahken perkuah ateNa man Abraham, bage pe man kerina kesusurenna seh rasa lalap." 1:56 Kira-kira telu bulan dekahna Maria ringan i rumah Elisabet; e maka mulih ia ku rumahna. 1:57 Enggo seh paksana Elisabet mupus, e maka ipupusna me sada anak dilaki. 1:58 Kenca ibegi anak kutana ras kade-kadena maka enggo icidahken Tuhan perkuah ateNa si mbelin e man bana, e maka kerina ia ermeriah ukur ras Elisabet. 1:59 Kenca sada minggu umur anak e, reh ka ia kerina nunatken anak ndai. Ate kalak ndai Sakaria ibahan gelarna, seri ras gelar bapana. 1:60 Tapi nina nandena, "Ola! Gelarna e me Johanes." 1:61 Nina kalak ndai man Elisabet, "Tapi la kap lit gelar e i bas jabunta." 1:62 E maka ibahan kalak ndai tanda man Sakaria guna nungkun ntah ise bahan gelar anak e. 1:63 Ipindo Sakaria me sada batu tulis, jenari isuratkenna, "Gelarna e me Johanes." Mamang ate kalak ndai kerina. 1:64 Paksa si e pe minter Sakaria mulihi ngerana, jenari ipujina Dibata. 1:65 Kerina kalak si deherken rumahna mbiar, janah berita kerna kejadin e mbar ku belang-belang daerah deleng-deleng Judea. 1:66 Kerina kalak si megi berita e ngukuri kejadin e, janah nungkun, "Jadi kai nge ndia pagi anak e?" Enggo tangkas maka kuasa Tuhan ras ia kap. 1:67 Sakaria, bapa Johanes dem alu Kesah Si Badia. Iturikenna kata Dibata nina, 1:68 "Marilah sipuji Tuhan, Dibata kalak Israel Ia reh ndahi bangsana janah mulahisa. 1:69 IberekenNa man banta Penebus si erkuasa e me kesusuren kawanNa si Daud. 1:70 Bagi enggo ikatakenNa nai-nai nari arah nabi-nabiNa si Badia, 1:71 erpadan Ia mulahi kita i bas musuh-musuhta nari, bage pe i bas kuasa kalak si er elem-elem man banta. 1:72 IkatakenNa maka icidahkenNa nge perkuah ateNa man nini-nininta, janah ingetNa padanNa si Badia. 1:73-74 Enda me padanNa ras nininta Abraham, asum ersumpah Ia maka ipulahiNa kita i bas musuh-musuhta nari, gelah lanai kita mbiar ersembah man baNa. 1:75 IbahanNa kita Badia dingen bujur ilebe-lebeNa, i bas gedang-gedang geluhta. 1:76 O, anakku, kam pagi igelari Nabi Dibata Si Meganjangna kal. Kam reh leben asa Tuhan, guna nikapken dalan man baNa; 1:77 guna mpebetehken man bangsaNa, maka bangsa-bangsa e pagi itebusi alu nasapken dosa-dosana. 1:78 Dibatanta perkeleng dingen dem perkuah ate. IsehkenNa pagi man banta sinalsal Keselamaten. 1:79 Janah isal-salina pe ku kerina kalak si ringan i bas kegelapen e me awih kematen, Ia mabai kita erdalan ku bas kegeluhen si dame." 1:80 Anak ndai reh belinna dingen ertambahna ukurna. Ia ringan i taneh si mesawang seh paksa maka terang-terangen icidahkenna bana man kalak Israel.
2:1 Paksa si e Agustus kepala pemerentahen Roma, nuruh kerina rayat si lit i bas daerah kekuasanna gelah isensus. 2:2 Enda me sensus si pemena. Sanga si e, Kirenius me gubernur i Siria. 2:3 E maka kerina kalak berkat ku kuta pengulihenna gelah isensus. 2:4 Jusup pe berkat i kuta Nasaret i Galilea nari ku kuta Betlehem i daerah Judea, kuta ketubuhen Raja Daud; sabab Jusup kesusuren Daud kap. 2:5 Jusup nuratken gelarna ras tunangenna Maria si enggo mehuli kulana. 2:6 Kenca seh i Betlehem, seh me paksana ia mupus. 2:7 E maka ipupusna me anakna sintua dilaki, ibalutina alu ampan janah ipepedemna i bas pelangkah sabap lanai lit ingan i bas rumah penginapen. 2:8 I bas daerah e lit piga-piga kalak permakan sangana ngiani asuh-asuhen i mbalmbal. 2:9 Rempet tedis sekalak malekat Tuhan ilebe-lebe permakan ndai, janah terang si rehna i bas Tuhan nari ersinalsal ku sekelewetna. Mbiar kal permakan-permakan e, 2:10 tapi nina malekat man bana, "Ola mbiar: Aku reh maba Berita Si Meriah, si mereken keriahen si mbelin man kerina manusia. 2:11 Sendah i Kuta Daud enggo tubuh Juruselamat man bandu, e me Kristus Tuhan. 2:12 Si jadi tanda kari man bandu e me: idapetindu kari anak-anak ibaluti alu uis, medem i bas pelangkah." 2:13 Rempet teridah nterem malekat Surga tedis ras malekat si ndai dingen rende muji Dibata, 2:14 "Terpujilah Dibata i bas Surga si meganjangna. Janah dame i doni man manusia si ngena ateNa." 2:15 Kenca malekat-malekat mulihken ku Surga nina permakan sapih-sapih ia, "Ota lawes kita ku Betlehem ngenehen kejadin si lit i je, bagi ikatakan malekat Tuhan ndai man banta." 2:16 E maka pedas-pedas berkat permakan ndai janah idapetina Maria ras Jusup dingen idahna pe Anak e medem i bas pelangkah. 2:17 Asum permakan-permakan ngidah Anak e, iturikenna man Jusup ras Maria kai si enggo ikataken malekat man bana kerna Anak e. 2:18 Jenari iturikenna pe man kalak si deban, janah kemamangen kerina kalak si megi berita si ikataken permakan e. 2:19 Tapi rukur Maria kerna erti kata e janah ibunikenna i bas ukurna. 2:20 Jenari mulih permakan-permakan janahna rende muji Tuhan, sabap kerina si enggo ibegina ras idahna payo bagi si ikataken malekat ndai man bana. 2:21 Kenca umur waluh wari isunatkenna Anak ndai. Janah ibahanna gelarNa Jesus, e me gelar si enggo ibereken malekat ope denga Ia lit i bas bertin. 2:22 Seh me paksana Jusup ras Maria ngelakoken lakon pembersihen rikutken kai si iaturken Musa. E maka ibabana Anak e ku Jerusalem gelah ipersembahken man Tuhan. 2:23 Sabap bagenda kap tersurat i bas kitap perentah-perentah Tuhan, "Kerina anak sintua dilaki arus ipersembahken man Tuhan." 2:24 Bage pe ibabana ka nge man persembahen sada pasang ndukur ntah dua nderapati si nguda denga, rikutken si itetapken i bas kitap undang-undang Tuhan. 2:25 I bas paksa e lit i Jerusalem sekalak dilaki gelarna Simeon. Ia kalak bujur dingen si erkemalangen man Dibata, janah tertima-tima ia nandangi Keselamaten kalak Israel. Kesah Dibata nemani ia, 2:26 ngataken man bana maka la ia mate adi langa kin idahna Mesias si enggo ipadanken Tuhan. 2:27 Alu ibabai Kesah Dibata bengket ia ku Rumah Pertoton. Asum Jesus, anak si kitik e ibaba orang tuaNa ku bas Rumah Pertoton gelah ilakoken man bana kai si enggo itentuken rikutken ajaren agama, 2:28 ialo-alo janah iangkip Simeon me Ia, ikatakenna bujur man Dibata nina, 2:29 "Genduari o Tuhan, enggo isehkenNdu padanNdu. Malem ateku aminna mate pe aku. 2:30 Sabap enggo kuidah alu matangku jine, penampat si rehna i bas Kam nari. 2:31 Penampat si isikapkenNdu man kerina bangsa, 2:32 bali ras terang si ersinalsal man bangsa si deban, gelah reh ndahi Kam e me terang si mereken kemulian man bangsaNdu Israel." 2:33 Mamang ate Jusup ras Maria megi si ikataken Simeon kerna Anak e. 2:34 Ipasu-pasu Simeon ia, jenari nina man Maria, "Anak enda enggo itetapken Dibata maka erkiteken Ia nterem kalak Israel guling tah pe tedis. Ia pagi jadi tanda i bas Dibata nari, si itulak nterem kalak, janah 2:35 alu bage jadi tangkas me kerina perukuren-perukuren si terbuni. Kam o Maria, ceda pagi atendu. Tempa-tempa itebak pedang pagi pusuhndu." 2:36 Lit sekalak nabi diberu si enggo metua kal. Gelarna Anna, anak si Panuel i bas suku Aser nari. Pitu tahun dekahna ia erjabu. 2:37 Anna enggo mbalu, umurna genduari 84 tahun, la pernah nadingken Rumah Tuhan. Suari berngi ia muji Tuhan, alu ertoto ras erpuasa. 2:38 Asum Simeon masu-masu Anak e reh Anna ndeheri Jesus ikatakenna bujur man Dibata, janah iturikenna kerna Anak e, man kerina kalak si nimai-nimai warina Jerusalem ibebasken Dibata. 2:39 Kenca dung ilakokenna kerina rikutken si iaturken i bas perentah Tuhan, mulihken me ia ku kutana e me Nasaret i daerah Galilea. 2:40 Anak e reh belinna dingen reh gegehna; pentar Ia janah tetap ipasu-pasu Dibata. 2:41 Tep-tep tahun orang tua Jesus berkat ku Jerusalem guna ngerayaken Wari Paskah. 2:42 Kenca umur Jesus sepuluh dua tahun, berkat Ia teluna ngerayaken Wari Paskah bagi biasana. 2:43 Kenca dung perayan e, mulih ia, tapi Jesus tading i Jerusalem. Orang tuana la meteh kerna si e. 2:44 Iakapna kin Jesus sangana erdalan ras kalak si nterem si mulih i Jerusalem e nari. Kenca erdalan sada wari e maka idaramina ku kade-kadena ras teman-temanna. 2:45 Perbahan lalap la ia jumpa, e maka mulihken Jusup ras Maria ku Jerusalem ndaramisa. 2:46 I bas wari si peteluken idapetina Jesus kundul ras guru-guru agama Jahudi i bas Rumah Pertoton. Ibegiken Jesus pengajaren guru-guru e janah isungkuniNa pe. 2:47 Janah adi nungkun guru-guru e man baNa mamang ate kalak kerina megi jabapNa si dem kepentaren e. 2:48 Orang tuana pe mamang atena ngidah Ia, jenari nina nandeNa man baNa, "O Anakku, ngkai maka bagenda perbahanenNdu man kami? Aku ras bapandu enggo ndarami Kam alu aru ate." 2:49 Erjabap Jesus man bana, "Engkai maka idaramindu Aku? La kin ietehndu Aku arus i rumah BapangKu?" 2:50 Tapi la iangka nande ras bapaNa kai si ikatakenNa e. 2:51 Jenari mulih Ia radu ras orang tuaNa ku Nasaret; ibegikenNa kata orang tuaNa. Kerina si enggo jadi enda itimbangken nandeNa i bas ukurna. 2:52 Jesus pe reh belinna dingen reh tambahna pemetehNa, janah reh tambahna pe ngena ate Dibata ras manusia man baNa.
3:1 Tiberius enggo sepuluh lima tahun jadi Kepala Pemerentah Roma. Tupung si e Pontius Pilatus jadi gubernur i Judea, Herodes raja i Galilea. Janah sangana Pilipus jadi raja i daerah Iturea ras Trakhonitis; Lisanius jadi raja i Abilene, 3:2 janah Annas ras Kayapas jadi Imam si Mbelin. Tupung e reh Kata Dibata man Johanes anak Sakaria, i taneh si mesawang. 3:3 E maka isiari Johanes kerina daerah aluren Lau Jordan. Iberitakenna Berita i bas Dibata nari nina, "Jeralah i bas dosa-dosandu nari! Tandana kam enggo jera, kam arus iperidiken, gelah dosa-dosandu ialemi Dibata." 3:4 Bagi enggo isuratken Nabi Jesaya i bas kitapna, "Lit sekalak si erlebuh i taneh si mesawang nari, 'Pesikap dalan Tuhan -- Pepinter dalanNa! 3:5 Kelbung-kelbung arus itambusi, uruk-uruk ras deleng arus ipekendit dalan si meluk-eluk arus ipepinter janah si erlubang-lubang iperata. 3:6 Kerina pagi manusia ngidah keselamaten si reh i bas Dibata nari!' " 3:7 Nterem jelma reh ndahi Johanes gelah iperidikenna. E maka nina man kalak ndai, "O, kalak jahat, ise ngatakenca man bandu, maka banci kam pulah i bas ukumen Dibata si reh pagi? 3:8 Cidahkenlah arah perbahanenndu tandana kam enggo jera i bas dosa nari. Ola nindu i bas ukurndu, 'Abraham kap nini kami.' Kukataken man bandu maka Dibata ngasup nge njadiken batu-batu enda jadi kesusuren Abraham. 3:9 Kapak enggo sikap guna nabah batang kayu; kerina batang kayu si la mehuli buahna itabah janah iambekken ku bas api." 3:10 Nungkun kalak e man bana nina, "Kai dage si arus ibahan kami?" 3:11 Erjabap si Johanes, "Ise lit dua bajuna, arus iberekenna sada man kalak si la lit bajuna, bage pe ise si lit nakanna, arus ibagikenna." 3:12 Reh pe ku je kalak pengalo cuke, atena gelah iperidiken, jenari nungkun ia man Johanes nina, "O guru, kai arus ibahan kami?" 3:13 Erjabap si Johanes, "Ola pindo buen asa si enggo itentuken." 3:14 Nungkun ka piga-piga tentera nina, "Kuga kami enda? Kai nge arus ibahan kami?" Ngaloi Johanes, "Ola ngerampas ntah ngataken salah man si la ersalah. Janah pebias-biaslah gaji si ibereken man bandu." 3:15 Erkiteken kalak si nterem e paksana nima-nimai dingen ngarapken kerehen Mesias si ipadanken Dibata, e maka mamang atena kerna Johanes dingen nungkun i bas ukurna ntah Johanes e kin Mesias si ipadanken e. 3:16 E maka nina Johanes man bana kerina, "Aku mperidiken kam alu lau, tapi reh me sekalak si belinen asang aku. Ngosari nali sepatuNa pe labo aku metunggung. Ia mperidiken kam pagi alu Kesah Si Badia ras api. 3:17 Ndiruna enggo sikap i bas tanNa guna miari. Ipepulungna page si perngis ku bas lumbung, tapi lapung-lapungna itutungNa i bas api si la ernimpet-nimpet." 3:18 Alu erbage-bage pengajaren iberitaken Johanes Berita Si Mehuli i bas Dibata nari man jelma si nterem. 3:19 Raja Herodes pe iajarkenna sabap iempoina Herodias ndehara seninana janah perbahan enggo melala kejahaten ibahanna. 3:20 E maka itambahi Herodes pe tole kejahatenna alu namaken Johanes ku bas rumah tutupen. 3:21 Kenca kerina kalak si nterem iperidiken, Jesus pe iperidiken ka. Sanga Jesus ertoto talang me langit, 3:22 janah Kesah Si Badia nusur ku baboNa bagi nderapati. Terbegi pe sora i Surga nari nina, "Kam kap AnakKu si Kukelengi. Kam kap si ngena ateKu." 3:23 Sanga Jesus mulai menaken dahinNa, umurna kira-kira telu puluh tahun. Rikutken pengakap kalak Ia e me anak Jusup, anak Eli, 3:24 anak Mattat, anak Lewi, anak Melki, anak Jannai, anak Jusup, 3:25 anak Matatias, anak Amos, anak Nahum, anak Esli, anak Nagai, 3:26 anak Maat, anak Matatias, anak Simei, anak Josek, anak Joda, 3:27 anak Johanan, anak Resa, anak Serubabel, anak Sealtiel, anak Neri, 3:28 anak Melki, anak Addi, anak Kosam, anak Elmadam, anak Er, 3:29 anak Josua, anak Elieser, anak Jorim, anak Matat, anak Lewi, 3:30 anak Simeon, anak Juda, anak Jusup, anak Jonam, anak Eliakim, 3:31 anak Malia, anak Menna, anak Matata, anak Natan, anak Daud, 3:32 anak Isai, anak Obed, anak Boas, anak Salmon, anak Nahesson, 3:33 anak Aminadap, anak Admin, anak Arni, anak Hesron, anak Peres, anak Juda, 3:34 anak Jakup, anak Isak, anak Abraham, anak Terah, anak Nahur, 3:35 anak Seruh, anak Rehu, anak Peleh, anak Heber, anak Selah, 3:36 anak Kenan, anak Arpaksat, anak Sem, anak Nuah, anak Lameh, 3:37 anak Metusalah, anak Enoh, anak Jaret, anak Mahalalel, anak Kenan, 3:38 anak Enos, anak Set, anak Adam, anak Dibata.
4:1 Asum Jesus mulih i Lau Jordan nari, idemi Kesah Si Badia Ia, janah ibabai Kesah Si Badia e Ia ku taneh gurun pasir. 4:2 I je me Ia icubai Iblis empat puluh wari dekahna. Kidekah i je kai pe la lit ipanNa, e maka kenca si e igejapNa melihe. 4:3 E maka nina Iblis man baNa, "Adi Anak Dibata kin Kam salihken dage batu-batu enda jadi roti." 4:4 Ngaloi Jesus, "Lit kap tersurat i bas Pustaka Si Badia, 'Labo ibahan pangan ngenca maka manusia nggeluh.' " 4:5 Jenari ibabai Iblis Jesus ku ingan si meganjang, janah icidahkenna kerina kerajan doni. 4:6 Nina Iblis man baNa, "Kerina kuasa ras kinibayaken enda kubereken man baNdu, sabap kerina e enggo iendesken man bangku janah banci kubereken man ise ateku. 4:7 Adi nggit Kam nembah mungkuk man bangku, kerina enda kubereken man baNdu." 4:8 Ngaloi Jesus, "Lit kap tersurat i bas Pustaka Si Badia, 'Sembahlah Tuhan Dibatandu, janah Ia saja ngenca si man sembahen!' " 4:9 Kenca bage ibabai Iblis ka Jesus ku Jerusalem janah ipetedisna i babo ingan si meganjangna i bas tarum Rumah Pertoton, jenari nina man Jesus, "Adi kam kin Anak Dibata, dabuhken dage baNdu ku teruh. 4:10 Sabap lit kap tersurat i bas Pustaka Si Badia, 'Isuruh Dibata kap malekat-malekatNa reh njagai Kam,' 4:11 bage pe itatang malekat-malekat e nge Kam alu tanna gelah naheNdu pe ola terantuk ku batu." 4:12 Nina Jesus, "Lit kap tersurat i bas Pustaka Si Badia, 'Ola cubai Tuhan Dibatandu.' " 4:13 Kenca Iblis dung ncubai Jesus arah kerina dampar itadingkenna Ia seh lit kesempaten si deban. 4:14 E maka mulihken Jesus ku Galilea, janah ikuasai Kesah Si Badia Ia. Mbar me berita kerna Jesus ku belang-belang daerah e. 4:15 Ngajar Ia i bas rumah-rumah pertoton si lit i je janah kerina kalak muji Ia. 4:16 Seh ka pe Jesus i Nasaret, e me kuta inganNa ipebelin. Sanga wari Sabat ku rumah pertoton Ia bagi biasana. Tedis Ia guna ngoge Pustaka Si Badia. 4:17 Jenari ibereken kalak man baNa kitap Nabi Jesaya. Kenca ipepayoNa, idahNa me ayat-ayat si ateNa iogekenNa e me, 4:18 "Kesah Tuhan lit i babongKu, sabap enggo ipilihNa Aku guna meritaken Berita Si Meriah man kalak si musil. IsuruhNa Aku erberita man kalak si tertaban maka ipulahi me ia, janah kalak si pentang erpengidah me, kalak si itindas ipulahi me. 4:19 Janah mpebetehken masana Tuhan mulahi bangsaNa." 4:20 Kenca dung Ia ngoge, igulungNa kitap ndai, iulihkenNa man si erdahin i je, jenari kundul Ia. Kerina mata kalak i bas rumah pertoton e ngenen ku Ia. 4:21 E maka ibenaken Jesus ngajar nina, "Sendah enggo seh isi Pustaka Si Badia si ibegindu ndai." 4:22 Tuhu iakap kalak si nterem kai si ikataken Jesus, tapi mamang atena sabap Jesus mbelaskenca kata si mehuli e. E maka nina kalak ndai, "Ma anak si Jusup kin Ia?" 4:23 E maka ngerana Jesus man bana kerina, "La banci lang maka ibelaskenndu atendu man bangKu kata enda, 'O dokter, pepalemlah bandu.' Bage pe ikatakenndu atendu man bangKu, 'Bahanlah i kutaNdu enda bagi si enggo ibegi kami ibahanNdu i Kapernaum.' " 4:24 Tole nina Jesus, "Kukataken pe man bandu, maka labo lit sekalak pe nabi ipehaga i bas kutana. 4:25 Tapi ingetlah: nai paksa Elia nggeluh, sanga musim kemarau telu tahun enem bulan dekahna terjadi kelihen si mesangat i belang-belang taneh enda, nterem kal diberu si enggo mbalu i bas kalak Israel. 4:26 Amin bage pe la isuruh Dibata maka Elia lawes ndahi sekalak diberu balu-balu ndai, tapi Elia isuruhNa ku sada diberu balu-balu i Sarpat i daerah Sidon ngenca. 4:27 Bage ka pe sanga paksa Nabi Elisa, nterem nge kalak Israel si gadamen. Tapi labo lit sekalak pe ipepalem, seakatan Naman kalak Siria ngenca ipepalem." 4:28 Megi kata Jesus e, merawa kerina kalak si i bas rumah pertoton e. 4:29 Tedis ia kerina irintakna Jesus ku darat kota jenari ibabana Ia ku das uruk ingan kota e ipanteki. I das uruk e nari ianjumkenna atena Jesus ku embang. 4:30 Tapi erdalan Jesus arah tengah-tengah kalak si nterem e, jenari lawes Ia. 4:31 Jenari ngincuah Jesus ku Kapernaum, e me sada kuta i Galilea. I bas wari-wari Sabat ngajar Ia man kalak si nterem. 4:32 Mamang ate kalak megi pengajarenNa sabap Ia ngajar alu kuasa. 4:33 I bas rumah pertoton e lit sekalak setanen; serko ia alu megang sorana nina, 4:34 "Oh, man kadeNdu kin kami o Jesus kalak Nasaret? Reh Kam gelah meneken kami? Kueteh nge ise Kam. Kam me si Badia si reh i bas Dibata nari!" 4:35 Isergangi Jesus setan ndai nina, "Sinik! Ndaratlah i bas ia nari!" E maka idampes-dampesken setan e kula si setanen e, i lebe-lebe kalak si nterem, jenari ndarat setan e i bas ia nari alu la nakiti ia. 4:36 Kerina kalak kemamangen, janah sisungkun-sungkunen ia, nina, "Kata-kata si kuga nge enda ndia? Erdolat dingen erkuasa Ia merentahken setan-setan e, janah setan-setan e pe ndarat." 4:37 E maka berita kerna Jesus mbar ku belang-belang daerah e. 4:38 Kenca ndarat i bas rumah pertoton nari, berkat Jesus ku rumah Simon. Mami Simon sakit mekelek; perbahan e ipindoken kade-kadena man Jesus gelah ipepalemNa min ia. 4:39 E maka idahi Jesus mami Simon, tedis la deherken ingan medemna, jenari ipelawesNa penakit e, janah penakit e pe nadingken mami Simon. Minter keke mami Simon, kuskas ia nikapken pangan dingen ngelai Jesus ras kalak ndai kerina. 4:40 Kenca matawari enggo sundut, kerina kalak maba kade-kadena si erbage-bage penakitna man Jesus. Ipepalem Jesus kerina alu namaken tanNa ku babo kalak si penakiten e sekalak-sekalak. 4:41 Setan-setan pe ndarat i bas kerina kalak si setanen nari, alu serko nina, "Kam kap Anak Dibata." Isuriangi Jesus setan-setan e, janah la ibereNa ngerana, sabap ieteh setan-setan e pe maka Ia kap Kristus, si Engkelini si ipadanken Dibata. 4:42 Kenca terang wari itadingken Jesus kuta e, berkat Ia ku sada ingan si melenget. Kalak si nterem ndarami Ia, janah kenca jumpa lanai iberena Jesus lawes sabap atena ola min ia itadingken Jesus. 4:43 Tapi nina Jesus man bana, "Berita Si Meriah kerna Kinirajan Dibata arus Kupeseh ku kuta-kuta si deban, sabap guna ngelakoken si e me kap Aku isuruh Dibata." 4:44 E maka erkotbah Jesus i bas rumah-rumah pertoton i belang-belang daerah Judea.
5:1 Sekali jadi sanga Jesus tedis i tepi Dano Genesaret, kalak si nterem siasak-asaken ngkeleweti Ia guna megiken Berita i bas Dibata nari. 5:2 Idah Jesus lit dua perahu ngadi i tepi dano; penjala-penjala si mada perahu e enggo nusur janah sangana nikapken jalana. 5:3 Idatasi Jesus perahu e, e me perahu Simon; jenari isuruhNa Simon njembaken perahu e sitik ku lau nirangken tepi dano e. Kundul Jesus i bas perahu e, janah i jenari Ia ngajar man jelma si nterem. 5:4 Kenca dung Ia ngajar nina man Simon, "Baba perahundu tertengahen ku ingan si mbages. Amburkenlah jalandu guna nangkap nurung." 5:5 Ngaloi Simon, "O Guru, sada berngi enda latih kal akap kami erdahin, kai pe la lit dat kami! Tapi adi Kam kal nuruhsa banci kuamburken jala e." 5:6 E maka iamburken kalak ndai jalana janah melala kal datsa nurung seh maka merigat atena jala ndai. 5:7 E maka ikiapi kalak enda teman-temanna si lit i bas perahu si sada nari ndai gelah reh nampati. Reh kalak ndai janah isina perahu e duana seh dem, janah menam gedap pe. 5:8 Kenca idah Simon Petrus kai si enggo jadi, erjimpuh ia nembah man Jesus nina, "O Tuhan, laweslah Kam i bas aku nari! Aku kalak perdosa kap!" 5:9 Mamang ate Simon Petrus ras teman-temanna perbahan melala kal nurung si idatsa e. 5:10 Bagepe temanna anak-anak Sebedeus e me Jakup ras Johanes. Nina Jesus man si Simon, "Ola kam mbiar, mulai genduari nari kam jadi penjala jelma." 5:11 Kenca ikayuhna perahu e ku tepi, e maka itadingkenna me e kerina, jenari ikutkenna Jesus. 5:12 Sekali jadi asum Jesus i bas sada kota, lit me i je sekalak dilaki si kerina dagingna gadamen. Kenca idahna Jesus, minter isembahna dingen mindo nina, "O, Tuan, bicara nggit Kam, ngasup kap Kam pepalem aku!" 5:13 E maka idudurken Jesus tanNa, idadapNa kalak si gadamen ndai, jenari nina, "Nggit nge Aku, malemlah kam!" Minter malem gadamna ndai janah mejelis pe dagingna. 5:14 Jenari nina Jesus man bana, "Ola turiken man ise pe kerna si enda, tapi laweslah, cidahken bandu man imam. Gelah tek kalak maka kam enggo malem, bahanlah persembahenndu bagi iperentahen Musa." 5:15 Berita kerna Jesus reh mbarna, janah nterem kalak reh megiken Ia dingen mindo gelah ipepalemNa ia i bas penakitna nari. 5:16 Tapi ulin iakapNa Ia lawes ku ingan si melenget, janah i je Ia ertoto. 5:17 I bas sada wari sanga Jesus ngajar, lit me i je piga-piga kalak Parisi ras guru-guru agama kundul megiken Ia. Kalak enda ndai reh i bas tep-tep kuta i Galilea ras Judea nari, bage pe i Jerusalem nari. Kuasa Tuhan lit i bas Jesus guna pepalem kalak si sakit. 5:18 Asum si e reh piga-piga kalak si ngelanja sekalak si pangpangen i bas ingan medem. Ibabana ku bas rumah, ku lebe-lebe Jesus. 5:19 Perbahan nterem kal jelma i rumah, e maka la lit dalanna mabasa ku bas. E maka inangkihna rumah e, ibukana tarumna, janah arah e itantanna kalak si pangpangen ndai ras ingan medemna ku tengah-tengah jelma si nterem pas i lebe-lebe Jesus. 5:20 Kenca idah Jesus maka tek kal kalak e, e maka nina man kalak si pangpangen e, "O senina, dosandu enggo ialemi." 5:21 Guru-guru agama ras kalak Parisi mulai sisungkun-sungkunen, nina, "Ise kin Ia maka bagenda kal pengeranaNa ngelawan Dibata? La kap ise pe ngasup ngalemi dosa seakatan Dibata!" 5:22 Ieteh Jesus kai si lit i bas ukur kalak enda ndai, e maka nina man kalak e, "Kai nge si lit i bas ukurndu e? 5:23 Apai kin sukahen, 'Dosandu enggo ialemi,' asa ngataken, 'Kekeken, erdalanken!'? 5:24 Genduari Kucidahken man bandu maka lit nge kuasa i bas Anak Manusia si isuruh Dibata guna ngalemi dosa manusia i doni enda." E maka nina Jesus man kalak si pangpangen e, "Kukataken man bandu: Kekeken, angkat ingan medemndu, dingen mulihlah ku rumahndu." 5:25 Minter keke si pangpangen ndai i lebe-lebe jelma si nterem, iangkatna ingan medemna, jenari mulih ia ku rumah janah ipujina Dibata. 5:26 Mamang kal ate kalak si nterem, alu dem kebiaren ipujina Dibata nina, "I bas wari enda enggo idah kami kejadin si luar biasa." 5:27 Kenca si e, lawes Jesus nadingken kuta ndai, jenari idahNa sekalak pengalo cuke, gelarna Lewi, kundul i bas kantorna. Nina Jesus man bana, "Ikutken Aku." 5:28 Tedis Lewi, itadingkenna kerina, jenari ikutkenna Jesus. 5:29 Kenca bage, ibahan Lewi i bas rumahna kerja man-man si mbelin guna Jesus. Nterem pe pengalo cuke bage pe kalak si deban ikut man ras kalak enda ndai i je. 5:30 Perbahan si e, piga-piga kalak Parisi ras guru-guru agama jungut-jungut man ajar-ajar Jesus nina, "Engkai maka kam man dingen minem ras kalak pengalo cuke, kalak perdosa?" 5:31 Megi penungkunen e, erjabap Jesus, "Kalak si sehat labo iperlukenna dokter, tapi kalak si sakit nge. 5:32 Aku reh labo guna ndilo kalak si bujur akapna bana, tapi guna ndilo kalak perdosa gelah ia jera." 5:33 E maka nina kalak nungkun man Jesus, "Ajar-ajar si Johanes megati kal erpuasa dingen melasken pertoton, bage pe ajar-ajar kalak Parisi; tapi ajar-ajarNdu tetap ia man ras minem." 5:34 Ngaloi Jesus, "Metunggung kin iakapndu adi temue i bas kerja erdemu bayu erpuasa kidekah ia ras si empo denga? Tentu lang! 5:35 Tapi lit pagi masa sirang ia ras si empo, janah i bas paksa si e me ia erpuasa." 5:36 Ituriken Jesus pe sada perumpaman nina, "Labo lit kalak ngerigatken baju si mbaru guna ngerangkapi baju si enggo buruk. Sabap adi bage ibahanna, baju si mbaru ndai pe enggo merigat, janah uis si mbaru e la kabo tengteng jadi pengerangkapi baju si enggo buruk. 5:37 Bage pe labo itamaken kalak lau anggur si mbaru ku bas guci si enggo regat. Sabap adi bage ibahanna, pecah me guci ndai ibahan anggur e; jadi anggur pe mambur, guci pe pecah. 5:38 Dage, tamakenlah anggur si mbaru kubas guci si mbaru! 5:39 Janah ise pe labo nggit nginem anggur si mbaru adi enggo iinemna anggur si ndekah. Sabap nina, 'Ulin anggur si ndekah.' "
6:1 Sekali jadi rembang tupung wari Sabat mentas Jesus arah juma gandum. Iputiki ajar-ajar ruhi gandum e, ipiyuina alu tanna, jenari ipanna buahna. 6:2 Piga-piga kalak Parisi nungkun, "Engkai maka ibahanndu si la banci ilakoken rikutken peraturen agamanta i bas wari Sabat?" 6:3 Erjabap Jesus man kalak Parisi e, "La kin iogendu kuga perbahanen Daud asum ia ras teman-temanna melihe? 6:4 Bengket ia ku bas rumah Dibata, ibuatna roti si ipersembahken man Dibata, ipanna janah iberekenna pe man teman-temanna. Rikutken peraturen-peraturen agamanta ise pe la banci man roti e, seakatan imam-imam." 6:5 Tole nina Jesus, "Anak Manusia si isuruh Dibata, Ia kap Tuhan si engkuasai wari Sabat e." 6:6 I bas wari Sabat si debanna ka bengket Jesus ku bas rumah pertoton, i je ngajar Ia. I je lit kalak tanna si kemuhen enggo kesip perban mate serapen. 6:7 Piga-piga kalak Parisi ras guru-guru agama ndarami kesalahen Jesus gelah lit dalanna ngaduken Ia. E maka iperdiatekenna kal Jesus ntah mawen ipepalemNa kin kalak sakit i bas wari Sabat. 6:8 Tapi ieteh Jesus perukuren kalak ndai, e maka nina man kalak si mate serapen tanna e, "Mari tedis kam ku lebe enda!" Keke ia, jenari tedis ia arah lebe. 6:9 E maka nina Jesus man kalak si nterem, "Kusungkun kam; rikutken peraturen agamanta kai kin banci si bahan i bas wari Sabat? Erbahan si mehuli ntah si jahat? Nampati geluh manusia ntah munuh?" 6:10 Ipernehen Jesus kerina jelma si lit ikelewetNa jenari nina man kalak si mate serapen tanna sembelah, "Pepinter tanndu." E maka ipepinterna tanna janah minter malem. 6:11 Tapi merawa kal ate kalak Parisi ras guru-guru agama, e maka arih-arih ia kerina ntah kai banci ibahanna nandangi Jesus e. 6:12 Paksa si e, lawes Jesus ku datas sada uruk-uruk; i je Ia ertoto man Dibata seh terang wari. 6:13 Kenca terang wari, idiloNa ajar-ajarNa, jenari ipilihNa sepuluh dua kalak i bas si e nari, si igelariNa rasul, e me: 6:14 Simon (igelari pe Petrus) ras seninana Andreas; Jakup ras Johanes, Pilipus, Bartolomeus, 6:15 Matius ras Tomas, Jakup anak Alpius, Simon (si igelari pe Pejuang), 6:16 Judas anak Jakup, Judas Iskariot si ndayaken Jesus. 6:17 Ngincuah Jesus ras rasul-rasul e kerina, jenari ngadi Ia i bas ingan si kendit. I je lit ka piga-piga ajar-ajarNa si deban ras nterem jelma reh i belang-belang daerah Judea ras i Jerusalem nari, bage pe i kuta Tirus ras Sidon nari si i tepi lawit. 6:18 Reh ia kerina guna megiken pengajaren Jesus dingen mindo gelah penakitna ipepalem. Kalak si setanen pe reh janah penakitna ipepalem. 6:19 Kerina kalak erpala-pala njemak Jesus, sabap lit Kuasa ndarat i bas Ia nari dingen pepalem ia kerina. 6:20 Kenca bage, ipernehen Jesus ajar-ajarNa, jenari nina, "Ketuahen me kam, o kalak musil, sabap man bandu me Kinirajan Dibata. 6:21 Ketuahen kam si melihe genduari, sabap ibesuri me kam. Ketuahen kam si tangis genduari, sabap tawa me kam pagi. 6:22 Ketuahen kam adi segat ate kalak kam janah itulak dingen iisak-isakken ras ikatakenna kam jahat erkiteken Anak Manusia si isuruh Dibata! 6:23 Meriahlah ukurndu dingen ersurak-suraklah i bas paksa si e, erkiteken pemere si mbelin isikapken man bandu i Surga. Sabap nini-ninina pe nai bage perbahanenna man nabi-nabi. 6:24 Tapi, cilaka me kam kalak bayak, sabap enggo ialokenndu kepuasen i bas geluhndu. 6:25 Cilaka me kam si besur genduari; sabap melihe kam pagi! Cilaka me kam si tawa genduari; sabap ceda atendu dingen tangis kam pagi! 6:26 Cilaka me kam adi kerina kalak muji kam; sabap nini-ninina pe nai bage perbahanenna man nabi-nabi perguak." 6:27 "Tapi man bandu si megiken Aku, Kukataken, Kelengilah imbang-imbangndu, mehulilah perbahanenndu man kalak si ernembeh ate nandangi kam, 6:28 pasu-pasu kalak si numpahi kam, janah totokenlah kalak si erbahan la mehuli man bandu. 6:29 Adi iparap kalak pipindu sembelah, bereken pe parapna pipindu si sembelah nari. Adi ibuat kalak bajundu, bereken pe ras bajundu si deban. 6:30 Adi lit kalak mindo man bandu, berekenlah, janah adi enggo i bas ia olanai pindo mulihken. 6:31 Bahanlah man kalak si deban bagi atendu ngena ibahanna man bandu. 6:32 Adi kalak si engkelengi kam ngenca ikelengindu, kai nge dalanna maka kam dat pasu-pasu? Kalak perdosa pe keleng nge atena kalak si engkelengi ia. 6:33 Adi man kalak si mehuli perbahanenna bandu ngenca ibahanndu mehuli kai nge dalanna maka kam dat pasu-pasu? Kalak perdosa pe bage nge perbahanenna. 6:34 Adi man kalak si ngasup ersimulih ngenca ipinjamkenndu kai nge dalanna kam dat pasu-pasu? Kalak perdosa pe ipinjamkenna nge man kalak perdosa, janah ialokenna pe mulihken asa si iberekenna e. 6:35 Tapi kam, kelengilah imbang-imbangndu janah mehulilah perbahanenndu man bana; pinjamken janah ola arapken mulih. Alu bage maka ialokenndu pagi upahndu si mbelin janah kam jadi anak-anak Dibata si Meganjangna. Sabap Dibata mehuli nge man kalak si la ngataken bujur bage pe man kalak si jahat. 6:36 Mekuah atendu bagi ate Bapandu mekuah!" 6:37 "Ola isalahkenndu kalak si deban, maka kam pe pagi la isalahken Dibata; ola ukum kalak si deban, maka kam pe pagi la iukum Dibata; alemilah kalak si deban, maka kam pagi ialemi Dibata. 6:38 Berelah kalak si deban, maka kam pe pagi ibere Dibata; ialokenndu me pagi sada persukaten si dem, sada bagin si sampur si itungtungken ku bas tanndu asa ngasup kam ngalokenca. Sukat-sukat si ipakendu e ka nge isukatken man bandu." 6:39 Jenari ituriken Jesus ka perumpaman enda, "Sekalak si pentang labo ngasup negu-negu kalak pentang; sabap adi bage duana me ia ndabuh ku parik. 6:40 Bage pe labo lit murid belinen asa guruna; tapi adi murid enggo tammat pelajarenna, bali me ia ras guruna. 6:41 Engkai maka idahndu rintep si i bas mata seninandu, tapi beloti si i bas matandu la igejapndu? 6:42 Kuga nindu ngatakenca man seninandu, 'O, senina, bere maka kuagui rintep si i bas matandu,' tapi beloti si i bas matandu la iidahndu? O, kalak pekulah-kulah, agui lebe beloti si lit i bas matandu, sabap kenca bage maka banci terang pengidahndu guna ngagui rintep si lit i bas mata seninandu." 6:43 "Labo lit batang kayu si mehuli erbuahken si la mehuli, bage pe labo lit batang kayu si la mehuli erbuahken si mehuli. 6:44 Kerina batang kayu itandai arah buahna; sabap labo iputikkenndu buah ara i bas dukut-dukut si erduri nari, ntah pe ipepulungndu buah anggur i bas batang bungke rimbang nari. 6:45 Kalak si bujur tentu ndarat i bas ia nari si mehuli, reh i bas pusuh peratenna si mehuli nari; janah kalak si jahat ndarat me kejahaten i bas pusuh peratenna si jahat nari. Sabap kai si ibelasken kalak arah babahna, e reh i bas pusuh peratenna nari." 6:46 "Engkai maka kam erlebuh man bangKu, 'O Tuhan, O Tuhan,' adi labo ikutkenndu kai si Kukataken man bandu? 6:47 Ise si reh ku Aku, si megiken katangKu dingen si ngikutkenca -- bali ras ise ia banci ipeseri? -- Kukataken man bandu. 6:48 Ia bali ras sekalak si erbahan rumah: Ikalina taneh mbages seh jumpa batu, janah i babo batu e me ipajekkenna palas rumah e. E maka adi reh banjir ras lau mbelin nderpa rumah e, la mugur pe ibahanna, sabap rumah e seh kal teguhna. 6:49 Janah ise si megi katangKu tapi la ikutkenna, bali ia ras sekalak si erbahan rumah si la erpalas; e maka adi reh banjir nderpa rumah e, minter runtuh mesangat pe runtuhna."
7:1 Kenca dung Jesus ngajar man kalak si nterem, lawes Ia ku Kapernaum. 7:2 I je lit sekalak perwira Roma; keleng kal atena suruh-suruhenna. Suruh-suruhenna e paksana sakit dingen menam mate pe. 7:3 Sanga ibegi perwira e kerna Jesus, isuruhna piga-piga peminpin-peminpin Jahudi ndahi Jesus guna mindo gelah ipepalemNa suruh-suruhenna e. 7:4 E maka idahi peminpin-peminpin ndai me Jesus janah mindo alu meseksek nina, "O Tuhan, tuhu-tuhu patut kal perwira e isampatindu, 7:5 sabap keleng kal atena bangsanta, janah ibahanna pe sada rumah pertoton man kami." 7:6 E maka berkat Jesus ras kalak ndai. Asum lanai ndauhsa Jesus i bas rumah perwira nari, isuruh perwira e teman-temanna ndahi Jesus guna ngataken, "O Tuan, olanai gia Kam latih. Kuakap labo aku metunggung ngalo-ngalo Kam i bas rumahku, 7:7 bage pe la kuakap metunggung aku reh njumpai Kam. E maka katakenlah sengkebabah kal lah gia, tentu malem perajurit e. 7:8 Sabap aku pe lit nge perwira-perwira si ganjangen asangken aku, lit ka pe si teruhen asangken aku. Adi ningku man bana, 'Lawes!', lawes ia; adi ningku man si deban 'Mari!', reh ia, jadi adi man sekalak suruh-suruhen ningku, 'Bahan bagenda!', ibahanna pe minter." 7:9 Mamang ate Jesus asum ibegiNa kata e. JanahNa nulih kempak kalak si nterem si ngikutken Ia nina, "Kukataken man bandu: Langa pernah Aku jumpa ras sekalak si bagenda kal belinna kinitekenna. I bas kalak Israel pe langa pernah Aku jumpa." 7:10 Kenca mulihken kerina si isuruh perwira ndai, idapetina suruh-suruhen e enggo malem. 7:11 Kenca si e, minter lawes Jesus ku sada kuta, gelarna Nain; ajar-ajarNa ras jelma si nterem ikut ras Ia. 7:12 Seh kenca Ia i kerabangen kuta e, simbel Ia ras rombongen si ngelanja kalak mate, ndarat i bas kuta e nari. Si mate e sekalak anak perana, e me anak sada diberu balu-balu. Nterem kal anak kuta ikut naruhkenca. 7:13 Megogo dingen mekuah ate Tuhan Jesus ngidah nande si kepaten e, e maka nina man bana, "Ola kam tangis." 7:14 Ideheri dingen ijemak Jesus peti mait e, e maka ngadi si ngelanjasa. Nina Jesus, "O anak perana, Kukataken man bandu: kekeken!" 7:15 E maka keke si mate ndai janah ngerana ia, jenari ibereken Jesus ia man nandena. 7:16 Mbiar kalak e kerina, janah ipujina Dibata nina, "Enggo reh nabi si mbelin ku tengah-tengahta! Enggo reh Dibata mulahi bangsaNa!" 7:17 E maka berita kerna Jesus mbar ku kerina taneh Judea ras ku daerah-daerah sekitarna. 7:18 Kerina kejadin e seh man Johanes Peridiken perbahan ituriken ajar-ajarna. E maka idilo Johanes Peridiken dua kalak ajar-ajarna, 7:19 jenari isuruhna duana ndahi Tuhan guna nungkun, "Kam kin si ikataken Johanes Peridiken si enggo ndeher kerehenna e, ntah itimai kami denga si deban?" 7:20 Kenca si dua kalak e jumpa ras Jesus, e maka nina, "Kami isuruh Johanes Peridiken nungkun man baNdu, 'Kam kin si ikataken Johanes Peridiken si enggo ndeher kerehenna e, ntah itimai kami denga si deban?' " 7:21 Paksa si e ka, ipepalem Jesus nterem kalak penakiten si erbage-bage persuina ras si setanen, janah ibahanNa jadi erpengidah kalak si pentang. 7:22 E maka erjabap Jesus man persuruhen Johanes Peridiken e, nina, "Mulihlah, janah turiken man Johanes Peridiken kai si enggo idah dingen ibegindu, e me: kalak pentang enggo erpengidah, si pangpangen enggo ngasup erdalan, si gadamen enggo malem, si pasek enggo erpemegi, si enggo mate nggeluh mulihi, janah Berita Si Meriah iberitaken man kalak musil. 7:23 Malem tuhu-tuhu ate kalak si tetap erkiniteken man bangKu." 7:24 Kenca lawes persuruhen Johanes Peridiken ndai, ibenaken Jesus ngerana man kalak si nterem kerna Johanes Peridiken nina, "Asum idahindu mbaru enda Johanes Peridiken ku taneh si melungun, kai kin min atendu nehenenndu? Atendu kin ngenehen dukut si iole-oleken angin? Tentu lang! 7:25 Jadi, kai dage nehenenndu? Sekalak si mejile uisna? Tentu lang, sabap kalak si mejile uisna dingen nggeluh mewah inganna i bas istana raja nge. 7:26 Katakenlah, kai dage nehenenndu? Sekalak nabi? Payo, Kukataken pe man bandu maka si enggo idahndu e lebihen asa sekalak nabi. 7:27 Sabap kerna Johanes Peridiken enggo isuratken i bas Pustaka Si Badia, 'Nina Dibata: Kusuruh persuruhenKu leben asa Kam, ia kap nikapken dalan man baNdu.' " 7:28 Tole nina Jesus, "Kukataken man bandu maka i doni enda la lit pernah manusia belinen sangken Johanes Peridiken. Tapi si kitikna i bas Kinirajan Dibata belinen asangken Johanes Peridiken." 7:29 Kerina kalak si nterem: pengalo cuke, si megi pengajaren Johanes Peridiken ngikutken pemindon Dibata, dingen enggo pe ialokenna peridin arah Johanes. 7:30 Tapi kalak Parisi ras guru-guru agama nulak rencana Dibata nandangi dirina, dingen la ia nggit iperidiken Johanes Peridiken. 7:31 Tole nina Jesus, "Dage alu kai nge banci Kuumpamaken manusia si genduari enda? Ras kai nge ia bali? 7:32 Kalak si genduari enda bali ras anak-anak si erguro-guro i tengah kesain. Nina sada terpuk man terpuk si deban, 'Enggo ipalu kami gendang guro-guro tapi la kam landek! Enggo iendeken kami lagu tangis-tangis, tapi la kam tangis!' 7:33 Sabap Johanes Peridiken enggo reh, la ia ikut man-man i bas pesta dingen la inemna anggur, janah ikatakenndu, 'Setanen ia!' 7:34 Reh ka Anak Manusia si isuruh Dibata, ikut Ia man ras minem i bas pesta, janah nindu, 'Nehenlah! Ia sekalak si rangap dingen peminem-minem; meriah Ia ras pengalo cuke bage pe kalak si enggo terbuang i tengah-tengah jelma si nterem nari!' 7:35 Tapi amin bage pe, kepentaren Dibata nge si payo. E lit buktina i bas kerina kalak si ngalokenca." 7:36 Sekalak i bas kalak Parisi nari ngundang Jesus man ku rumahna. Lawes Jesus ku rumah e janah kundul Ia man i je. 7:37 I bas kuta e lit sekalak diberu perdosa. Ibegina berita maka Jesus sangana man i rumah kalak Parisi e, e maka reh ia, ibabana sada botol marmar minak merim. 7:38 Tedis ia i pudi Jesus deher naheNa, tangis ia seh litap pe nahe Jesus ibahan iluhna, jenari isapuina alu bukna. Iemaina nahe Jesus dingen iminakina alu minak si merim ndai. 7:39 Ngidah si e mecekurak ukur kalak Parisi si ngundang Jesus ndai nina, "Adi tuhu-tuhu kin Ia nabi, tentu ietehNa nge ise diberu si njemak Ia e dingen kalak si kuga kin ia. Tentu ietehNa maka diberu enda kalak perdosa." 7:40 E maka nina Jesus man bana, "O, Simon, lit ateKu Kukataken man bandu." Ngaloi Simon, "Katakenlah Guru." 7:41 E maka nina Jesus, "Lit me dua kalak rutang man kalak si peraihken duit. Sekalak rutang lima ratus duit pirak sekalak nari rutang lima puluh duit pirak. 7:42 Duana kalak enda lanai ngasup nggalari utangna e, e maka isasapken perutangenna e utangna ndai. Adi bage, si apai nge i bas si dua kalak enda ndai si lebih erkeleng ate nandangi perutangenna e?" 7:43 Erjabap Simon, "Kuakap kalak si mbuena utangna isasapken." Ngaloi ka Jesus, "Payo jabapndu e." 7:44 E maka erkusur Jesus man diberu e, jenari nina man Simon, "Idahndu kin diberu enda? Reh Aku ku rumahndu, la iberendu lau man pemurihi nahengKu, tapi ia enggo iburihina nahengKu alu iluhna dingen isapuina alu bukna. 7:45 La iemandu Aku, tapi ia la erngadi-ngadi ngema nahengKu. 7:46 La iminakindu takalKu alu minak, tapi ia enggo iminakina nahengKu alu minak si merim. 7:47 Perbahan si e, Kukataken man bandu maka dosana si melala enggo ialemi! Sabap melala icidahkenna kekelengen. Tapi kalak si sitik ialemi tentu kekelengenna pe sitik." 7:48 E maka nina Jesus man diberu e, "Dosandu enggo ialemi!" 7:49 Kalak si deban si ras Jesus kundul i je nungkun i bas ukurna nina, "Ise kin kalak enda maka banci ialemiNa dosa?" 7:50 Tole nina Jesus man diberu ndai, "Kinitekenndu erbahanca kam terkelin. Mulihlah alu mejuah-juah!"
8:1 La ndekahsa kenca si ndai isiari Jesus kota-kota ras kuta-kuta, iberitakenNa Berita Si Meriah kerna Kinirajan Dibata. Ajar-ajar si sepuluh dua kalak ikut ras Ia, 8:2 bage pe piga-piga diberu si enggo ipepalemNa i bas setan ras penakit-penakit nari, e me: Maria (si igelari Magdalena) si enggo ipelawes pitu setan i bas ia nari; 8:3 Johana ndehara Kusa menteri Herodes, Susanna bage pe nterem diberu-diberu si deban. Diberu-diberu enda ndai me si nampati Jesus ras ajar-ajarNa alu erta-ertana. 8:4 Nterem kalak rehen i kuta-kuta nari ndahi Jesus, e maka asum pulung ia kerina ituriken Jesus perumpaman enda nina, 8:5 "Sekalak perjuma lawes ku juma ngambur benih. Asum ia ngambur benih ndai, deba ndabuh ku dalan, e maka idedehi kalak jenari reh perik-perik manganisa seh keri. 8:6 Deba ka ndabuh ku taneh si erbatu-batu, kenca turah, la ndekahsa kerah ia, sabap kerah taneh e. 8:7 Lit ka deba ndabuh ku tengah peren duri; turah raduken peren duri e, tapi iasak peren duri e benih ndai seh mate pe. 8:8 Tapi deba ndabuh ku taneh si mehumur, mehuli perturahna, jenari erbuah seratus kali ganda." Kenca ituriken Jesus si e, e maka nina, "Begikenlah adi lit kin cupingndu!" 8:9 E maka nungkun ajar-ajar Jesus man baNa kerna maksud ras tujun perumpaman ndai. 8:10 Erjabap Jesus nina, "Man bandu enggo ibereken pemeteh kerna rahasia Kinirajan Dibata; tapi man kalak si deban ituriken alu perumpaman, e maka aminna gia ipernehenna, tapi labo idahna, aminna gia ibegikenna tapi labo iangkana." 8:11 "Bagenda me antusenna perumpaman ndai. Benih ndai e me kata Dibata. 8:12 Benih si ndabuh ku dalan iandingken man kalak si megiken berita e, ibegikenna, tapi reh Iblis muat kata e i bas ukurna nari gelah ola ia tek dingen terkelin. 8:13 Benih si ndabuh ku taneh si erbatu-batu iandingken man kalak si megiken berita e, ibegikenna dingen ialokenna alu meriah ukur. Tapi la mbages uratna, kentisik ngenca ia tek. Reh kenca percuban minter ia murtad. 8:14 Benih si ndabuh ku peren duri, iandingken man kalak si megiken berita e, tapi aru atena janah jadi kalak bayak atena. Ersenang-senang atena i bas doni enda. Kerina si e nindih ia seh maka buahna la sempat metua. 8:15 Benih si ndabuh ku taneh si mehumur iandingken man kalak si megiken berita e, ibegikenna, ibunikenna i bas ukurna si mehuli dingen tetap, janah megenggeng ia seh erbuah." 8:16 "Labo lit kalak nagani lampu jenari itutupina alu tumba ntah pe itamakenna ku teruh ingan medem. Tentu itamakenna ku ingan sangket gelah terang iakap kalak si bengket ku bas. 8:17 Sabap kerina si terbuni teridah nge pagi janah kerina rahasia terbongkar dingen tangkas nge pagi. 8:18 Megermetlah kam kerna kai si ibegindu; sabap kalak si enggo lit i bas ia man bana itambahi tole. Tapi kalak si la lit kai pe i bas ia si iakapna lit i bas ia pe ibuat i bas ia nari." 8:19 Nande Jesus ras senina-seninaNa reh ndahi Ia, tapi perbahan teremna jelma i je, e maka la terbahanca jumpa. 8:20 Tapi lit sekalak si ngatakenca man Jesus nina, "NandeNdu ras senina-seninaNdu tedis i darat, atena njumpai Kam." 8:21 E maka nina Jesus man kalak si nterem, "NandengKu ras senina-seninangKu, e me kalak si megiken dingen si ngikutken Kata Dibata." 8:22 I bas sada wari idatasi Jesus ras ajar-ajarNa sada perahu, janah nina Jesus man ajar-ajarNa, "Ota ku lepar ah." E maka berkat ia. 8:23 Asum kalak e erlayar, tunduh Jesus. Rempet rembus angin meter ku dano e, janah mulai bengket lau ku bas perahu si erbahanca kalak e i bas bahaya tuhu-tuhu. 8:24 E maka iingeti ajar-ajar me Jesus nina, "O Guru, Guru! Cilaka kita!" Keke Jesus, isergangiNa angin ras galumbang si merawa ndai. Angin ras galumbang e minter jeneng kal. 8:25 Kenca bage nina Jesus man kalak ndai, "Engkai maka kam mbiar? I ja kinitekenndu?" Tapi mamang ate ajar-ajar dingen mbiar pe ia, janah nina sapih-sapih ia, "Ise kin ndia Ia? IperentahkenNa angin ras galumbang, janah angin ras galumbang e pe patuh nandangi perentahNa." 8:26 Terus Jesus ras ajar-ajarNa erlayar ku Gerasa pekepar-kepar ras daerah Galilea. 8:27 Seh kenca Jesus idaraten, reh me sekalak dilaki i kuta nari njumpai Ia. Dilaki enda ndai setanen. Enggo ndekah ia la ruis dingen lanai ia i rumah, tapi ringan ia i tengah-tengah kuburen. 8:28 Asum idahna Jesus serko ia, nembah-erjimpuh i lebe-lebe Jesus janah alu sora megang nina, "O Jesus, Anak Dibata si Meganjangna, kuga ateNdu aku ibahanNdu? Kupindo maka Ola aku iukumNdu!" 8:29 Enda ikatakenna perbahan isuruh Jesus setan e ndarat i bas ia nari. Enggo megati ia ikuasai setan e, seh maka aminna gia ia enggo ipenjaraken janah tanna ras nahena iiket alu rante, banci denga ka nge iretapkenna rante e, jenari ibaba setan ia ku ingan si mesawang. 8:30 E maka isungkun Jesus ia nina, "Ise gelarndu?" Erjabap ia, "Gelarku Meribu-ribu," sabap melala setan si neluki ia. 8:31 Ipindoken setan-setan e man Jesus gelah Ola ia ipelawesNa ku bas kelbung si mbages. 8:32 I bas mbalmbal i ture-ture uruk e, lit me sada rarasen babi sangana nungke-nungke. E maka ipindoken setan-setan e man Jesus gelah ibere Jesus min ia kerina lawes neluki babi-babi e. Pemindonna enda ibere Jesus. 8:33 Kenca bage, ndarat me setan-setan ndai bas dilaki e nari, jenari iselukina babi-babi e. Kerina babi si sada rarasen ndai minter kiamen janah megulang, ndabuhen ku dano mate gedap kerina i je. 8:34 Kenca idah permakan babi ndai kai si enggo jadi e, kiam ia jenari iturikenna kejadin e ku kuta-kuta sekelewetna. 8:35 E maka rehen kalak ngenehen kai si enggo jadi. Idahina Jesus janah idapetina kalak si enggo itadingken setan ndai kundul i deher Jesus; enggo ruis ia dingen enggo jore ukurna. E maka mbiar kalak enda ndai kerina. 8:36 Kalak si enggo ngidah kejadin e, nuri-nuri man kalak si reh ndai kuga dalanna maka kalak si setanen ndai enggo malem. 8:37 E maka kerina kalak si i bas daerah Gerasa e mindo man Jesus gelah itadingkenNa min daerah e, sabap tuhu-tuhu mbiar ia kerina. Perbahan si e, idatasi Jesus perahu jenari lawes Ia. 8:38 Kalak si enggo itadingken setan ndai mindo man Jesus gelah ia ikut. Tapi isuruh Jesus ia lawes nina, 8:39 "Mulihlah kam ku rumahndu janah beritakenlah kai si enggo ibahan Dibata man bandu." E maka lawes ia isiarina kuta e janah iberitakenna kai si enggo ibahan Jesus man bana. 8:40 Kenca seh ka Jesus i lepar, ialo-alo jelma si nterem Ia, sabap kerina enggo tertima-tima. 8:41 E maka reh me sekalak pengulu rumah pertoton gelarna Jairus. Isembahna nahe Jesus janah ipindokenna gelah Jesus reh ku rumahna, 8:42 sabap anakna narus mate. Anakna e diberu, umurna kira-kira sepuluh dua tahun janah ia anak sada-sada. Asum erdalan Jesus ku rumah Jairus, siasak-asaken jelma si nterem ndeheri Ia. 8:43 Lit i je sekalak diberu enggo sepuluh dua tahun dekahna bluding rusur. Enggo keri erta-ertana guna pertambarna man dokter-dokter, tapi la lit sekalak pe si ngasup pepalem ia. 8:44 Ideherina Jesus i pudi nari dingen idadapna rambu-rambu uis Jesus, janah paksa e pe minter ngadi dareh e. 8:45 E maka nungkun Jesus nina, "Ise si ndadap Aku?" Perbahan la lit kalak si ngaku, e maka nina Petrus, "O Guru, nterem kap jelma i kelewetNdu janah siasak-asaken ndeheri Kam." 8:46 Tapi nina Jesus, "Lit kap sekalak si ndadap Aku, sabap Kugejap lit kuasa ndarat i bas Aku nari." 8:47 Asum ieteh diberu ndai maka kai si enggo ibahanna e la terbuniken, e maka reh ia ku lebe, nggirgir ia, janah erjimpuh nembah man Jesus. I lebe-lebe jelma si nterem iturikenna kai sabapna maka idadapna Jesus ras kerna penakitna si minter malem e. 8:48 E maka nina Jesus man diberu e, "O anakKu, kinitekenndu enggo nampati kam, mulihlah alu ermeriah ukur." 8:49 Sanga Jesus ngerana denga, reh me sekalak si maba berita i rumah pengulu e nari. Nina man Jairus, "Anakndu ndai enggo mate, man kai nari ngelatihi Guru enda?" 8:50 Tapi kata e ibegi Jesus, e maka nina man Jairus, "Ola kam mbiar, tek sajalah, malem nge kari anakndu e." 8:51 Kenca seh Jesus i rumah, ise pe la ibereNa ikut ras Ia ku bas selain Petrus, Johanes, Jakup ras bapa dingen nande anak e. 8:52 Kerina kalak si i je erceda ate dingen nangisi anak e. Tapi nina Jesus, "Ola kam tangis; anak enda labo mate, tunduh saja nge ia!" 8:53 Itawai kalak ndai Jesus, sabap ietehna nge maka anak e enggo mate. 8:54 Tapi ijemak Jesus tan anak ndai, janah nina alu sora megang, "O beru, kekeken!" 8:55 E maka erkesah anak ndai mulihken janah minter ia keke. Jenari isuruh Jesus gelah ibere man anak e. 8:56 Jengang orang tuana, tapi ipedahi Jesus gelah ola iturikenna man ise pe kai si enggo jadi e.
9:1 Idilo Jesus ajar-ajarNa si sepuluh dua kalak jenari iberekenNa kuasa man bana guna mpelawes setan-setan dingen pepalem penakit. 9:2 Kenca bage isuruhNa ajar-ajar lawes meritaken kerna Kinirajan Dibata, janah pepalem kalak si penakiten. 9:3 Nina Jesus man ajar-ajar e, "Ola kai pe baba i bas perdalanenndu, ola baba ciken, gajut-gajut, roti, duit, bage pe ola baba baju man osendu. 9:4 Adi i bas sada kuta ialo-alo kalak kam kesilang i bas rumahna, i je saja kam ngayak kam berkat ku kuta si deban. 9:5 Adi i bas sada kuta labo lit kalak ngalo-ngalo kam, tadingken kuta e, apusi abu si leket i bas nahendu. Enda pagi tanda bukti si jadi saksi man bana." 9:6 E maka lawes me ajar-ajar ndai, isiarina kuta-kuta janah iberitakenna Berita Si Meriah dingen ipepalemna kalak si penakiten. 9:7 Herodes raja wilayah Galilea pe megi kerna kejadin e. Lanai ia tenang sabap lit piga-piga kalak ngatakenca, "Johanes Peridiken enggo nggeluh mulihi!" 9:8 Deba ngatakenca maka Elia enggo reh, janah lit ka pe si ngatakenca maka sekalak i bas nabi-nabi si nai enggo nggeluh mulihi. 9:9 Nina Herodes, "Enggo kusuruh itampul kalak takal Johanes, tapi ise dage ia, si rikutken beritana ngasup ngelakoken perbahanen-perbahanen si mbelin?" E maka idarami Herodes dalan gelah jumpa ras Jesus. 9:10 Kenca mulih rasul-rasul ndai, iturikenna man Jesus kai si enggo ibahanna. Jenari ibabai Jesus rasul-rasul e lawes ku sada kuta gelarna Betsaida, ateNa gelah ia saja ngenca i je. 9:11 Tapi tereteh man jelma si nterem, e maka berkat ia ndapeti Jesus. Ialo-alo Jesus jenari iturikenNa kerna Kinirajan Dibata janah ipepalemNa kalak si penakiten. 9:12 Asum wari nandangi gelap, reh ajar-ajar si sepuluh dua kalak ndahi Jesus, janah nina, "Suruhlah kalak enda lawes ku kuta-kuta i sekelewet enda gelah banci idaramina nakanna ras inganna medem, sabap ingan enda ingan si melungen." 9:13 Tapi ngaloi Jesus man ajar-ajar nina, "Kam lah mereken nakanna." Nina ka ajar-ajar, "Si lit i bas kami lima ngkibul roti ras dua ikan ngenca. Pala lawes kami nukur nakan guna kalak si nterem enda?" 9:14 Teremna jelma si i je dilaki lit kira-kira lima ribu kalak. Nina Jesus man ajar-ajarNa, "Suruhlah kalak si nterem e kundul, tep-tep terpuk teremna kira-kira lima puluh kalak." 9:15 Kerina si ikataken Jesus ilakoken ajar-ajar, isuruhna kalak si nterem kundul. 9:16 Jenari ibuat Jesus roti si lima ngkibul ras ikan si dua ndai, janah ertoto Ia ngataken bujur man Dibata. E maka icepik-cepikNa roti e jenari iberekenNa man ajar-ajar gelah ielakenna man kalak si nterem. 9:17 Kerina ia man seh besur. Kenca elah, ipepulung ajar-ajar kerina si iba, buena lit sepuluh dua sumpit. 9:18 Sekali jadi asum Jesus ertoto sisada-sisada, reh ajar-ajarNa ndahi Ia. E maka isungkun Jesus ajar-ajar e nina, "Ise kin Aku nina kalak?" 9:19 Erjabap ajar-ajar nina, "Lit si ngatakenca Kam kap Johanes Peridiken. Deba ngatakenca maka Kam kap Elia. Janah lit ka pe si ngatakenca maka Kam kap sekalak i bas nabi-nabi si nai si enggo nggeluh mulihi." 9:20 Nungkun ka Jesus nina, "Kam kuga nindu? Ise kin akapndu Aku?" Erjabap Petrus nina, "Kam kap Mesias si ipadanken Dibata." 9:21 Jenari ilarang Jesus ajar-ajarNa ngkataken si e man ise pe. 9:22 Tole nina Jesus, "Anak Manusia si isuruh Dibata la banci la ngenanami mbue kiniseran, janah itulak peminpin-peminpin, imam-imam si mbelin, bage pe guru-guru Undang-undang. Ia ibunuh jenari keke i bas wari si peteluken." 9:23 Janah nina Jesus man bana kerina, "Ise atena ikut ras Aku arus maka ipersilahangna dirina, ipersanna kayu persilangna tep-tep wari janah ikutkenna Aku. 9:24 Sabap ise si mpertahanken kegeluhenna, bene kap kegeluhenna, tapi ise si bene kegeluhenna erkiteken Aku terkelin me. 9:25 Kai kin gunana man sekalak jelma aminna gia bana kerina doni enda tapi bene ia ntah pe iukum? Tentu la lit! 9:26 Adi sekalak jelma mela ia ngakuken Aku ras pengajarenKu, Anak Manusia si isuruh Dibata pe pagi mela ngakuken kalak si bage sanga Anak Manusia e reh alu kemulian si mbelin bage pe alu kemulian Bapa ras kemulian malekat-malekat si badia. 9:27 Inget katangKu enda! I bas si pulung enda lit piga-piga kalak si la ia mate adi langa kin idahna Kinirajan Dibata." 9:28 Kira-kira seminggu kenca ituriken Jesus kerna kiniseran ras kematenNa, ibabaNa Petrus, Jakup ras Johanes berkat ku das sada uruk guna ertoto. 9:29 Asum Jesus ertoto, salih ayoNa dingen uisNa jadi mbentar ersinalsal. 9:30 Rempet lit i je dua kalak dilaki, e me Musa ras Elia ercakap-cakap ras Jesus. 9:31 Duana ikeleweti sinalsal kemulian Surga. Ercakap-cakap ia duana ras Jesus kerna kematen Jesus si lanai ndekah jadi i Jerusalem sue ras si enggo iaturken Dibata. 9:32 Paksa e Petrus ras temanna si dua kalak munduk-unduk seh tunduh pe. Janah asum ia keke idahna ersinalsal kemulian Jesus, ras si dua kalak ndai tedis ras Ia. 9:33 Asum berkat ate si dua kalak ndai nadingken Jesus nina Petrus man Jesus, "O Guru! Malem kal ate kami i jenda. Ibahan kami saja telu sapo-sapo, sada man baNdu, sada man Musa, janah sada nari man Elia." (Tapi si tuhuna la ierti Petrus kai si ibelaskenna e.) 9:34 Sanga Petrus ngerana denga, reh embun ngelinggemi ia kerina. Perbahan e mbiar ajar-ajar. 9:35 Terbegi pe sora i bas embun e nari nina, "Enda me AnakKu si enggo Kupilih. Begikenlah Ia." 9:36 Asum terbegi sora e, Jesus nari ngenca i je idah ajar-ajar. Kerina kejadin si enggo idahna e irahasiakenna janah la iturikenna man ise pe. 9:37 Pepagina asum Jesus ras ajar-ajarNa si telu kalak ndai nusur i das uruk nari, nterem kal kalak reh njumpai Ia. 9:38 Sekalak i bas jelma si nterem e erlebuh man Jesus nina, "O, Guru! Ngarap aku maka iperdiatekenNdu min anakku enda, sabap e ngenca anakku. 9:39 Adi iseluki setan e ia, rempet ia nderkuh, idampes-dampeskenna bana dingen rugup-ugup babahna. Mesui kal atena ibahan setan e janah menam-menam lanai erleka setan e ras ia. 9:40 Enggo kupindoken man ajar-ajarNdu gelah ipelawesna min setan e, tapi la ia ngasup." 9:41 Nina Jesus man kerina kalak si i je, "O, kam kalak si la erkiniteken dingen si enggo papak, asa kai nari dekahna Aku ras kam? Asa kai nari dekahna Aku tahan ras kam?" Jenari nina man bapa anak e, "Baba kujenda anakndu e." 9:42 Sanga anak e ibaba ndahi Jesus, nggirgir ia dingen idampes-dampeskenna bana. Tapi isergangi Jesus setan e dingen ipepalemNa anak ndai. Kenca malem iberekenNa mulihi man bapana. 9:43 Mamang ate jelma si nterem erkiteken Kuasa Dibata si mbelin e. Asum kemamangen denga jelma si nterem kerna kerina perbahanen Jesus nina Jesus man ajar-ajarNa, 9:44 "Begikenlah dingen pegermetkenlah kai si Kukataken man bandu. Anak Manusia si isuruh Dibata iendesken pagi ku bas kuasa manusia." 9:45 Tapi la ieteh ajar-ajar kai ertina si ibelasken Jesus e. La tangkas man bana ertina, e maka la iangkana. Janah nungkunsa man Jesus pe la ia pang. 9:46 Turah me persoalen i bas perukuren ajar-ajar, e me kerna ise kin si mbelinna i bas ajar-ajar e. 9:47 Tapi ieteh Jesus kai si iukurken ajar-ajar e, e maka idiloNa sekalak danak-danak, ipetedisNa deherken Ia, 9:48 jenari nina man ajar-ajarNa, "Ise si ngaloken danak-danak enda i bas gelarKu ia me kap si ngaloken Aku; bage pe ise si ngaloken Aku, labo Aku saja ialokenna, tapi ialokenna pe Ia si nuruh Aku. Sabap ise si kitikna kal i bas kam kerina, ia me si mbelinna." 9:49 E maka ngaloi Johanes man Jesus nina, "O, Guru, lit idah kami sekalak si mpelawes setan i bas gelarNdu. Perbahan labo ia bengket i bas terpukta enda, e maka ilarang kami ia." 9:50 Ngaloi Jesus man Johanes ras ajar-ajar si deban nina, "Ola ambati ia, sabap ise si la ngelawan kam, temanndu kap." 9:51 Asum enggo ndeher Jesus iangkat Dibata ku Surga, e maka itetapkenNa ukurNa guna lawes ku Jerusalem. 9:52 Isuruhna piga-piga kalak persuruhenNa ngelebei Ia. Lawes persuruhen ndai, bengket ia ku sada kuta kalak Samaria guna nikapken ingan kesilang man Jesus. 9:53 Tapi kalak Samaria e la nggit ngalo-ngalo Jesus, sabap tujun perdalanen Jesus e me kap ku Jerusalem. 9:54 Asum ibegi Jakup ras Johanes berita e, e maka nina man Jesus, "O Guru, setuju Kam adi isuruh kami api nusur i langit nari ngkernepken kalak Samaria e?" 9:55 Erkusur Jesus janah ipandangNa Jakup ras Johanes. 9:56 Jenari lawes ia kerina ku kuta si deban. 9:57 Sanga Jesus ras ajar-ajarNa nerusken perdalanenNa, lit sekalak dilaki ngerana man Jesus nina, "Kuikutken nge Kam aminna ku ja gia Kam lawes." 9:58 Ngaloi Jesus man bana, "Serigala lit liang inganna, perik-perik pe lit asarna, tapi Anak Manusia si isuruh Dibata la lit inganNa pekesahken pe." 9:59 Man sekalak si deban nina Jesus, "Ikutken Aku." Tapi ngaloi ia man Jesus nina, "O Bapa, mulih aku lebe ngkuburken bapangku." 9:60 Ngaloi Jesus, "Pelepaslah kalak mate ngkuburken si matena; tapi kam, to lawes beritakenlah kerna Kinirajan Dibata." 9:61 Nina ka sekalak si deban man Jesus, "O Tuan, ateku maka ikut ras Kam, tapi mulih aku lebe erkata man keluargangku." 9:62 Ngaloi Jesus man bana, "Kalak si enggo njemak tenggala, jenari ngenen ia ku pudi, kalak si bage la erguna i bas Kinirajan Dibata."
10:1 Kenca si e, ipilih Tuhan pitu puluh kalak nari jadi ajar-ajarNa. Ajar-ajar enda ndai isuruhNa dua-dua kalak sendalanen ngelebei Ia ku kerina kuta ras ingan si minter ateNa idahiNa. 10:2 Nina Jesus man kalak e, "Mbelang si man peranin, tapi kurang si ranisa. Dage, ertotolah man si Mada peranin e, gelah isuruhNa si erdahin guna mperanisa. 10:3 Berkatlah! Kusuruh kam lawes bagi anak biri-biri ku tengah-tengah serigala. 10:4 Ola baba dompet, gajut-gajut, ntah sepatu, ola kam ngadi i tengah dalan guna ercakap ras kalak. 10:5 Adi bengket kam ku bas sada rumah katakenlah lebe, 'Dame man isi jabu enda.' 10:6 Janah adi lit i bas rumah e kalak si ngarapken dame, maka dame si isehkenndu ringan i bas ia. Tapi adi la lit, dame si isehkenndu mulih man bandu. 10:7 Kesilanglah i bas rumah e, pan dingen inemlah kai si iberekenna man bandu, sabap kalak si erdahin patut kap dat upah. Ola sambar-sambar inganndu kesilang. 10:8 Adi bengket kam ku sada kuta janah i je ialo-alo kalak kam, panlah kai si iberekenna man bandu; 10:9 janah pepalemlah kalak si penakiten i je. Kataken pe man anak kuta e, 'Kinirajan Dibata enggo ndeher ku tengah-tengahndu!' 10:10 Tapi adi bengket kam ku sada kuta janah i je la kam ialoken kalak, laweslah kam ku pasar-pasar, jenari momokenlah, 10:11 'Abu kutandu si leket i bas nahe kami iapusi kami i lebe-lebendu; tapi ingetlah, maka Kinirajan Dibata enggo ndeher ku tengah-tengahndu.' 10:12 Kukataken man bandu maka i bas wari pendungi e pagi, nahangen ukumen si isehken Dibata man kota Sodom asangken man kota e." 10:13 "Andiko, cilaka kal kam pagi o, Korasin. Kam pe o Betsaida, cilaka me kam! Sabap adi tanda-tanda sengget si enggo ibahan i tengah-tengahndu ibahan i Tirus ras i Sidon, ndekah me ia erkadiola ras erceda ate. Tentu enggo itamakenna abu ku badanna guna mbuktiken maka enggo ia jera i bas dosa-dosana nari. 10:14 E maka i bas wari pendungi e pagi, liten denga perkuah ate Dibata man Tirus ras Sidon asangken man bandu. 10:15 Bage pe kam, o Kapernaum! Atendu kin maka ipeganjangkenndu bandu seh ku langit? Kam pagi idampesken ku naraka." 10:16 Nina Jesus man ajar-ajarNa, "Ise si megiken kam, ia megiken Aku; ise si nulak kam, itulakna pe Aku; janah ise si nulak kam, itulakna pe Ia si nuruh Aku." 10:17 Ajar-ajar si pitu puluh kalak ndai mulih alu dem keriahen. Nina man Jesus, "O Tuhan, setan-setan pe ngikutken kata kami adi isergangi kami ia i bas gelarNdu!" 10:18 Ngaloi Jesus man bana kerina nina, "Kuidah Iblis ndabuh i langit nari bagi kilap. 10:19 Begikenlah! Enggo kubereken man bandu kuasa merjati nipe ras kacip gelang, bage pe kuasa naluken musuh e, janah kai pe la banci encilakai kam. 10:20 Tapi ola meriah ukurndu perbahan setan-setan ngikutken perentahndu, tapi meriahlah ukurndu perbahan gelarndu enggo isuratken i Surga." 10:21 Paksa si e, meriah iakap Jesus ibahan Kesah Dibata janah nina, "O Bapa, Tuhan si mada langit ras doni! Kukataken bujur man baNdu, sabap enggo icidahken Kam man kalak si la erpemeteh, kerina si ibuniken Kam man kalak si pentar dingen erpemeteh. Payo bage me jadina Bapa, sabap bage me si ngena ateNdu. 10:22 Kerina enggo iendesken BapangKu man bangKu. Ise pe la meteh ise Anak e seakatan Bapa; janah ise pe la meteh ise kin Bapa e seakatan Anak ras kalak si man bana ipebetehken Anak e." 10:23 Asum Jesus nari ngenca i je ras ajar-ajarNa nina Jesus, "Malem tuhu-tuhu atendu sabap kam enggo ngidah kai si idahndu! 10:24 Kukataken pe man bandu maka nterem nge nabi ras raja merincuh ngidah kai si idahndu tapi la idahna, bage pe merincuh ia megi kai si ibegindu, tapi la ibegina." 10:25 Sekali jadi reh sekalak guru agama Jahudi ncubai Jesus. Isungkunna Jesus nina, "O Guru, kai arus kubahan gelah kualoken kegeluhen si rasa lalap?" 10:26 Erjabap Jesus nina, "Kai kin si tersurat i bas Pustaka Si Badia? Kai si iogendu i je?" 10:27 Erjabap guru Undang-undang e, "Kelengilah Tuhan Dibatandu asa ukurndu, asa tendindu dingen asa gegeh ras kepentarenndu lit; bage pe kelengilah temanndu manusia bagi kam ngkelengi badanndu." 10:28 Ngaloi Jesus, "Payo jabapndu e. Bahanlah bage gelah ialokenndu kegeluhen si rasa lalap." 10:29 Tapi ate guru agama e pebujur-bujurken bana, e maka nungkun ia man Jesus nina, "Ise kin temanku manusia?" 10:30 Erjabap Jesus alu perumpaman nina, "Lit sekalak ngincuah i Jerusalem nari ku Jeriho. I tengah dalan jumpa ia ras pengerampuk. La saja barang-barang irampukna, tapi igudamina pe ia seh menam mate, jenari itadingkenna. 10:31 Rembang mentas sekalak imam arah dalan e; kenca idahna kalak si enggo ampar e, isilahkenna, jenari iteruskenna perdalanenna. 10:32 Bage pe mentas ka sekalak Lewi; kenca idahna, ia pe nilah jenari iteruskenna perdalanenna. 10:33 Tapi sekalak Samaria si mentas ka arah dalan e mekuah atena asum idahna kalak si ampar e. 10:34 E maka ideherina jenari itamakenna minak ras anggur ku luka-lukana dingen ibalutina pe. Kenca bage iangkatna ku datas kaldena, ibabana ku ingan penginapen guna itambari. 10:35 Pepagina iberekenna dua duit pirak man si empu penginapen e janah nina, 'Tambari ia janah adi la bias enda kutambahi pagi asum aku reh mulihken.' " 10:36 E maka nungkun Jesus man guru agama e nina, "Si apai nge iakapndu i bas si telu e jadi teman manusia kalak si irampok e?" 10:37 Erjabap guru Undang-undang e, "Kalak si enggo nampati ia." Ngaloi Jesus, "Kam pe laweslah, janah bahanlah bage." 10:38 Asum Jesus ras ajar-ajarNa nerusken perdalanenna, seh ia i bas sada kuta. I je lit sekalak diberu gelarna Marta; ialo-alona Jesus i rumahna. 10:39 Lit pe sekalak seninana gelarna Maria. Maria kundul i deher nahe Tuhan megiken pengajarenNa. 10:40 Tapi Marta kuskas nikapken pangan; e maka murkas ia ideherina Jesus janah nina, "O Tuhan, la iperdiatekenNdu ipeturut seninangku aku sisada ndahiken kerina dahin e? Suruh min ia nampati aku!" 10:41 Erjabap Jesus man Marta nina, "O Marta, Marta! Suhsah dingen gulut ukurndu sabap melala atendu ibahanndu, 10:42 tapi sada ngenca si la banci lang. Enggo ipilih si Maria si mehuli e janah lanai banci ibuat i bas ia nari."
11:1 Sekali jadi ertoto Jesus i bas sada ingan. Kenca dung Ia ertoto nina sekalak ajar-ajarNa, "O Tuhan, ajari min kami ertoto bagi Johanes ngajari ajar-ajarna." 11:2 Ngaloi Jesus man ajar-ajarNa nina, "Adi ertoto kam nindulah, 'O Bapa, Terpujilah gelarndu si Badia; Rehlah min KinirajanNdu, 11:3 Bereken min man kami nakan cukup tep-tep wari. 11:4 Alemi min dosa-dosa kami, bagi kami pe ngalemi kalak si ersalah kempak kami. Ola min kami ibaba Kam ku bas percuban.' " 11:5 Tole nina Jesus man ajar-ajarNa, "Adi sekalak i bas kam lawes ku rumah temanndu i tengah berngi janah nindu, 'O teman, kupinjam min rotindu telu ngkibul, 11:6 sabap temanku si i bas perdalanen singgah ku rumahku janah la lit si man berenken man bana.' 11:7 Banci jadi temanndu e erjabap i rumah nari, 'Ola ganggundu aku! Pintun enggo ieruk, janah aku ras anak-anakku enggo medem. La terbahan aku keke guna merekenca man bandu.' 11:8 Bage gia, Kukataken pe man bandu, aminna gia ia la keke mereken roti man bandu erkiteken ia temanndu, tapi perbahan la kam mela mindo alu meseksek, keke nge ia, iberekenna man bandu kai si iperlukenndu. 11:9 Perbahan si e Kukataken man bandu: Pindolah tentu ngalo kam; daramilah, tentu idatndu; tuktuklah, tentu italangi pintun man bandu. 11:10 Sabap ise si mindo ngalo kap, janah ise si ndarami idatna kap, bage pe ise si nuktuk pintun italangi kap. 11:11 Tentu la lit i bas kam selaku bapa mereken nipe man anakndu adi ipindona nurung. 11:12 Ntah iberekenndu kacip gelang man bana adi ipindona tinaruh. 11:13 Dagina, adi kam pe kalak si jahat ietehndu mereken si mehuli man anak-anakndu, apai denga ka Bapa si i Surga. Tentu iberekenNa nge man bandu Kesah si Badia man si mindo man baNa." 11:14 Sekali jadi ipelawes Jesus setan i bas sekalak pekak nari. Kenca ndarat setan e, ngasup ia ngerana. Ngidah si e mamang ate kalak si nterem. 11:15 Tapi piga-piga kalak ngataken, "Balsebul, pengulu setan nge si mereken kuasa man baNa mpelawesken setan-setan." 11:16 Lit ka deba nidingi Jesus atena, e maka ipindona gelah ibahan Jesus sada tanda sengget si nusur i Surga nari. 11:17 Tapi ieteh Jesus perukuren-perukuren kalak e, e maka nina, "Kerajan si lit i je perpecahen, la banci lang runtuh me kerajan e, jenari runtuhen pe rumah-rumahna. 11:18 Dage, adi kerajan setan erbelah-belah ia sapih-sapih ia, tentu kerajan e la ndekah. Ikatakenndu maka Balsebul nge si mereken kuasa man bangKu guna pelawesken setan-setan. 11:19 Adi bage kin carangKu pelawesken setan-setan, kuga dage teman-temanndu pelawessa? Temanndu e jinelah ertimbang kerna kam. 11:20 Labo Balsebul si mereken kuasa man bangKu, tapi Aku pelawesken setan-setan alu kuasa Dibata si nuduhken maka i tengah-tengahndu enggo ndeher Kinirajan Dibata. 11:21 Adi sekalak si megegeh njagai rumahna alu senjata lengkap, tentu aman kerina erta-ertana. 11:22 Tapi adi reh kalak si gegehen ngelawan ia, italukenna ia janah irampasna me kerina senjata si lengkap si iarapken tuan rumah ndai, jenari ibagi-bagikenna man teman-temanna kai si enggo irampasna e. 11:23 Ise si la mihak Aku si tuhuna ngelawan Aku kap; ise si la ras Aku pepulungken, si tuhuna ia engkerapi kap." 11:24 "Adi enggo ndarat setan i bas manusia nari, lawes ia, niari kerina taneh gurun pasir ndarami ingan ngadi. Adi la lit idatna ingan ngadi e maka nina i bas ukurna, 'Mulihlah aku ku rumahku si enggo kutadingken.' 11:25 E maka mulihken ia, idapetina rumah e enggo bersih isapui dingen sikap. 11:26 Jenari lawes ia, idilona pitu setan si jahaten asa ia. E maka ringan ia kerina i bas rumah ndai seh maka si ibengketi setan e enggo keleken asang si tangtangna ndube." 11:27 Kenca enggo ikataken Jesus si enda ndai, sekalak diberu i bas jelma si nterem e nari ngerana alu megang nina, "Malem tuhu-tuhu ate diberu si mupus dingen pebelin Kam!" 11:28 Tapi ngaloi Jesus, "Malemen tuhu-tuhu ate kalak si megiken Kata Dibata dingen ndalankenca!" 11:29 Asum jelma si nterem ngkeleweti Jesus, iteruskenNa ngerana nina, "Andiko jahatna jelma si genduari! Ipindona tanda sengget, tapi sada pe la ibereken man bana seakatan tanda sengget Nabi Juna. 11:30 Sabap bagi Nabi Juna jadi tanda man kalak Niniwe, bage me pe Anak Manusia si isuruh Dibata jadi sada tanda man bangsa si genduari. 11:31 I bas wari pendungi pagi i lebe-lebe Pengadilen Dibata keke Ratu negeri Selatan nuduhken kelepaken kalak jaman enda. Sabap lako megiken kepentaren Salomo, Ratu ndai enggo reh erdalan i bas tampuk doni nari. Tapi i jenda genduri lit kalak si belinen asangken Salomo! 11:32 I bas wari pendungi pagi i lebe-lebe Pengadilen Dibata keke kalak Niniwe ras bangsa si genduari enda. Iaduken kalak Niniwe me pagi bangsa si genduari, sabap kalak Niniwe jera i bas dosana nari asum ibegina pengajaren Nabi Juna; janah Kukataken man bandu maka si tuhuna lit i jenda si belinen asa Nabi Juna!" 11:33 "Labo lit kalak nagani lampu, jenari itamakenna i teruh ingan si terligen ntahpe nutupisa alu tumba; tapi itamakenna nge ku nahe lampu, gelah sinalsalna nerangi kalak si bengket ku bas. 11:34 Matandu kap lampu i bas badanndu. Adi matandu sehat, kerina badanndu terang; tapi adi matandu la sehat, kerina badanndu gelap. 11:35 E maka jagalah gelah terang si lit i bas kam ola jadi gelap. 11:36 Adi kerina badanndu terang, lanai lit bagin si gelap, e maka sempurna nge terangna, bali ras isalsali terang lampu kam." 11:37 Kenca dung Jesus ngerana, iundang kalak Parisi Ia man ku rumahna. E maka bengket Jesus ku rumah e, jenari kundul dingen man. 11:38 Mamang ate kalak Parisi e asum iperdiatekenna Jesus la erburih ope denga man. 11:39 Tapi nina Tuhan man bana, "O kalak Parisi, tuhu iburihindu cangkir ras pinggan e arah darat, tapi arah bas dem alu rampasen ras kejahaten. 11:40 O kalak lenge! Ma kin Dibata nge si njadiken si arah darat e bage pe si njadiken si arah bas e? 11:41 Si lit i bas mangkuk ras piringndu e nge arus iberekenndu man kalak musil. Alu bage kerina enggo bersih man bandu. 11:42 Tapi andiko, cilaka kal kam o kalak Parisi: Ipersembahkenndu sepersepuluh i bas ulihndu nuan-nuan nari: jera, sere, ras gulen-gulen; tapi la ibahanndu bujur man manusia dingen la atendu keleng Dibata. Tapi e nge si tuhuna si arus ilakokenndu alu la ngelupaken si debanna. 11:43 Andiko, cilaka kal kam o kalak Parisi! Atendu ngkunduli kursi-kursi si arah lebe i bas rumah pertoton dingen atendu iperkuanken kalak kam i tengah dalan alu mehamat. 11:44 Andiko, cilaka kal kam! Sabap kam bagi kuburen si la ertanda; kalak si erdalan arah datasna la meteh maka e kuburen." 11:45 Ngaloi sekalak guru agama Jahudi nina, "O Guru, alu kataNdu si bage, kami pe enggo ikenaiNdu." 11:46 Ngaloi Jesus, "Kam pe cilaka nge o guru-guru agama! Iberekenndu baban si mberat man kalak seh maka la ngasup ia mabasa, tapi kam jine alu sada jari pe la kam nggit ngkuitsa baban e. 11:47 Andiko, cilaka kal kam! Ipekena kam kuburen nabi-nabi si enggo ibunuh nini-ninindu. 11:48 Alu bage enggo tangkas maka setuju kam ras si ibahan nini-ninindu nai; sabap nini-ninindu munuh nabi-nabi e janah kam erbahan kuburenna. 11:49 Arah kepentarenNa maka nina Dibata, 'Kusuruh pagi reh nabi-nabi ras rasul-rasul ndahi ia; piga-piga pagi ibunuhna janah si deban isiksana.' 11:50 E maka bangsa si genduari enda ituntut pagi perbahan dareh nabi-nabi si enggo ibunuh mula-mula tembe doni nari, 11:51 e me pembunuhen i bas Abil nari seh ku pembunuhen Sakaria si ibunuh i kelang-kelang batar-batar persembahen ras Rumah Tuhan. Kukataken man bandu maka kalak jaman enda la banci la iukum pagi erkiteken perbahanenna e. 11:52 Andiko guru Undang-undang, cilaka kal kam! Enggo ibuatndu kunci pemeteh; tapi kam jine la bengket ku bas janah kam jine erbahanca maka kalak la banci bengket ku bas!" 11:53 Kenca lawes Jesus i bas ingan e nari, lalap ia igempang-gempangi guru-guru Undang-undang ras kalak Parisi. Isungkunna erbage-bage soal guna ncubai Jesus. 11:54 I bas si e iusahakenna gelah salah jabap Jesus, maka banci Ia iaduken rikutken kesalahenNa e.
12:1 Asum enggo pulung jelma meribu-ribu kalak seh maka enggo rincet-incet ia kerina, perlebe ngerana Jesus man ajar-ajarNa nina, "Metengetlah kam nandangi ragi kalak Parisi biakna si pekulah-kulah. 12:2 Kerina si terligen teridah kap pagi, janah kerina rahasia ipetangkas kap pagi. 12:3 Kai pe si enggo ikatakenndu i bas gelap terbegi nge pagi i bas terang, janah kai pe si enggo ikusikkenndu ku cuping kalak i bas kamar si tertutup imomoken nge man jelma si nterem." 12:4 "O temanku, kukataken man bandu: ola kam mbiar nandangi kalak si ngasup munuh badan tapi kenca si e lanai ngasup erbahan kai pe. 12:5 Kukataken man bandu ise arusna si man kebiaren: Mbiarlah kam man Dibata, si kenca munuh, lit ka kuasaNa ngambengkenca ku bas naraka. Ingetlah, tuhu-tuhu lah min kam erkemalangen man Dibata! 12:6 Ma kin idayaken kalak lima cipcip alu dua sen saja? Amin bage gia labo sada pe ilupaken Dibata. 12:7 Buk takalndu pe kerina enggo ibeligaiNa. E maka ola kam mbiar, sabap ergan kap kam asa cip-cip." 12:8 "Kukataken man bandu, ise si ngakuken Aku i lebe-lebe manusia ia ajar-ajarKu, Anak Manusia si isuruh Dibata pe pagi ngakuken ia i lebe-lebe malekat Dibata. 12:9 Tapi ise la ngakui maka ia ajar-ajarKu i lebe-lebe manusia, Anak Manusia si isuruh Dibata pe pagi mersoken ia i lebe-lebe malekat Dibata. 12:10 Ise si pengeranana nimbak Anak Manusia si isuruh Dibata, ia banci ialemi, tapi kalak si nggombangi Kesah Si Badia la banci ialemi. 12:11 Adi iaduken kalak kam ku Pengadilen Agama, ntah ku pemerentah ntah ku kalak si erkuasa, ola aru atendu kerna kuga kam mpertahanken dirindu, ntah pe kerna si arus ikatakenndu. 12:12 Sabap paksa si e pagi iajari Kesah Si Badia nge kam kerna kai arus ikatakenndu." 12:13 Sekalak i bas jelma si nterem e ngerana nina, "O Guru, katakenlah man seninangku maka erbagi kami kerna erta-erta si itadingken bapa kami." 12:14 Ngaloi Jesus man bana, "O senina, ise kin ngangkat Aku guna ngerunggui kam duana? Labo dahinKu mbagiken erta-ertandu." 12:15 Tole nina Jesus man bana kerina, "Jaga dingen metengetlah maka ola kam merangap nandangi kai pe; sabap kegeluhen manusia si tuhu-tuhu labo erpalasken erta-erta si lit i bas ia, aminna uga gia ia bayakna." 12:16 E maka ituriken Jesus man jelma si nterem e perumpaman enda, "Lit me sekalak bayak, melala kal ulih jumana. 12:17 E maka rukur ia nina, 'Lanai siat lumbung ingan ulih jumangku e kerina. Kuga nge ndia kubahan?' 12:18 Nina ka i bas ukurna, 'Bagenda kubahan: Kuruntuhken lumbungku enda, jenari kupajekken si tergalangen; i je me pagi kutamaken ulih jumangku ras kerina erta-ertangku. 12:19 Kenca bage ningku i bas ukurku: Malem atendu, o tendingku! Sabap melala enggo ergun-gun erta-ertandu, cukup guna piga-piga tahun. Pesenangkenlah man bandu, man dingen minemlah.' 12:20 Tapi nina Dibata man bana, 'O, bodoh! I bas berngi enda kam arus mate; man ise nge kerina erta-erta si enggo ipepulungndu e?' " 12:21 Tole nina Jesus, "Bagenda me jadina nandangi kalak si pepulung kinibayaken man dirina jine, tapi la bayak i bas adep-adepen Dibata." 12:22 Kenca bage nina Jesus man ajar-ajarNa, "Perbahan si e Kukataken man bandu: ola aru atendu kerna nakan si iperlukenndu i bas geluhndu ntah pe kerna uis si iperlukenndu guna dagingndu. 12:23 Sabap ergan nge geluhndu asa pangan, dingen ergan pe badanndu asa uis. 12:24 Nehenlah perik kak: la merdang, la rani, la lit lumbungna; tapi bage gia man nge ia ibahan Dibata. Kam ndauh ergan asa perik-perik e. 12:25 Ise kin i bas kam ngasup pegedangken umurna alu aru ate? 12:26 Adi labo kam ngasup erbahan si kitik e pe, ngkai maka aru atendu kerna kai-kai si debanna? 12:27 Nehenlah perturah bunga ncole, labo ia ertenun ntah pe erbahan uisna. Tapi kukataken man bandu maka raja Salomo si bage kal bayakna labo lit uisna bagi bunga enda jilena. 12:28 Dibata nge si erbahanca mejile dukut-dukut i mbalmbal -- dukut-dukut si sendah lit, pagi iambekken ku bas api. Makin lebihen kam iuisiNa? Andiko, kitikna kinitekenndu! 12:29 Dage, ola aru atendu, ola gulut ukurndu kerna pangan ras inemenndu. 12:30 (Sabap kalak si la nandai Dibata nge si aru atena kerna si e.) Ieteh Bapandu nge maka iperlukenndu si e. 12:31 Arus maka buen kam rukur kerna Kinirajan Dibata gelah kerina si debanna pe ibereken Dibata ka man bandu." 12:32 "Ola kam mbiar, o rarasen si kitik sabap meriah ukur Bapandu mereken Kinirajan man bandu. 12:33 Dayaken kerina erta-ertandu jenari bereken duitna man kalak musil. Bahanlah dompetndu si nteguh janah pepulunglah kinibayakenndu i Surga. I je la urak beliganna sabap la ibengketi penangko ntah pe ipan ngetnget. 12:34 Sabap i ja erta-ertandu i je pe ukurndu." 12:35 "Tetap min kam erbenting kibul dingen ersinalsal pe lampundu. 12:36 Bagi sekalak budak si nimai tuanna mulih i bas kerja erdemu bayu nari min kam. Asum reh tuan e dingen nuktuk pintun, minter italangina. 12:37 Sangap me budak si idapeti tuanna erjaga-jaga nimai ia mulih. Kukataken man bandu, erbenting kibul me tuan e, isuruhna budak e kundul jenari kuskas ia ngelaisa. 12:38 Sangap me budak e adi idapeti tuanna ia erjaga-jaga aminna gia tuan e mulih tengah berngi ntah pe tekuak manuk. 12:39 Ingetlah katangKu enda: Adi ieteh tuan rumah katawari penangko reh, tentu erjaga-jaga ia dingen la ipelepasna rumah e ibongkar. 12:40 Bage pe kam, tetaplah min erjaga-jaga sabap Anak Manusia si isuruh Dibata reh i bas paksa si la arapndu." 12:41 Nina Petrus man Jesus, "O Tuhan, man kami saja kin iturikenNdu perumpaman e, ntah man kerina manusia?" 12:42 Erjabap Tuhan, "Ise dage budak si pentar dingen tutus? Ia me ipercayaken tuanna jadi kepala budak si deban guna mbagiken pangan man budak e kerina i bas paksana. 12:43 Sangap me budak si asum mulih tuanna idapetina ia sangana ndalanken tugasna! 12:44 Kukataken man bandu, tuhu-tuhu iangkat tuan e me ia jadi pengawas i bas kerina erta-ertana. 12:45 Tapi adi nina budak e i bas ukurna, 'Tuanku ndekah denga nge maka mulih,' jenari ipekpekina budak si deban si dilaki ras si diberu, mangani dingen minem ia seh mabuk. 12:46 Jenari alu la iarapna rempet reh tuanna. Ibunuh tuanna ndai ia janah bali ibahanna ras kalak si la patuh. 12:47 Budak si meteh sura-sura tuanna, tapi la ia ersikap dingen la ibahanna bagi si ngena ate tuanna, ia mekelek iligasi. 12:48 Tapi budak si la meteh sura-sura tuanna, jenari ibahana kesalahen seh maka arus ia iligasi, budak e la mekelek iligasi. Sabap kalak si enggo ibereken man bana melala, i bas ia nari ituntut melala. Bage me pe man kalak si iendesken man bana melala, i bas ia nari ipindo ka melala." 12:49 "Aku reh namaken api ku doni enda; mehuli kal adi api e enggo gara! 12:50 Aku pagi ngaloken peridin si tertentu, janah kuga sedakna pusuhku ope denga si e enggo erkedungen! 12:51 Akapndu kin maka Aku reh ku doni enda maba dame? Kukataken man bandu, labo maba dame, tapi pertentangen. 12:52 Genduari nari terjadi pertentangen i bas si lima kalak sada jabu, telu kalak ngelawan dua, janah si dua kalak ngelawan telu. 12:53 Bapa ngelawan anakna si dilaki janah anak si dilaki ngelawan bapana; nande ngelawan anakna si diberu, janah anak si diberu ngelawan nandena; simetua ngelawan permainna janah permain ngelawan simetuana." 12:54 Tole nina Jesus man jelma si nterem, "Adi idahndu reh embun i Barat nari, minter ikatakenndu, 'Udan atena,' janah tuhu bage. 12:55 Bage pe adi igejapndu rembus angin i Selatan nari, minter ikatakenndu, 'Las me wari,' janah tuhu bage. 12:56 O, kalak pekulah-kulah! Ietehndu ertina tanda-tanda i bas doni ras i bas langit. Tapi ngkai maka la iangkandu tanda-tanda masa si genduari enda?" 12:57 "Engkai maka la itetapkenndu i bas ukurndu kai arus ibahanndu? 12:58 Adi kam iaduken imbangndu dingen ibabanandu ku pengadilen, cubakenlah asa ngasupndu erdame ras ia asum kam i bas perdalanen denga gelah ola kam isehkenna ku lebe-lebe hakim, janah hakim nerahken kam ku polisi, jenari itamaken polisi kam ku bas penjara. 12:59 Kukataken man bandu maka labo kam ndarat i bas penjara e nari, adi langa kin igalarindu utangndu seh bali."
13:1 Paksa si e, reh piga-piga kalak maba berita man Jesus kerna kalak Galilea si enggo ibunuh Pilatus asum ia mpersembahken persembahenna man Dibata. 13:2 Ngaloi Jesus man kalak ndai nina, "Perbahan kalak Galilea e ibunuh alu cara si bage, akapndu kin maka keleken dosana asangken dosa kalak Galilea si deban? 13:3 Kukataken man bandu, labo bage! Kam pe adi la kin kam jera, mate nge kam pagi bagi kalak ah ndai. 13:4 Kuga kerna si sepuluh waluh kalak si mate itindihi menara i Siloam? Akapndu kin maka keleken dosana asangken dosa kerina kalak si ringan i Jerusalem? 13:5 Kukataken man bandu, labo bage! Kam pe adi la kin kam jera, mate nge kam pagi bagi kalak ah ndai." 13:6 Jenari ituriken Jesus man kalak e perumpaman enda, "Lit me sekalak empu kebun anggur; i bas kebun anggur e turah sada batang ara. Lawes ia ku je ndarami buahna tapi la lit sada pe idatna. 13:7 E maka nina man si ngiani kebun e, 'Enggo telu tahun tep-tep aku reh ndarami buah batang ara enda, tapi la pernah lit buahna. Tabah sajalah! Percuma ia turah i bas taneh enda.' 13:8 Tapi nina si ngiani kebun e, 'O Tuan, pelepas i je setahun nari; kukuruk lebe taneh i kelewetna gelah kutama pupukna. 13:9 Mbera-mbera erbuah ia tahun si reh; tapi adi lang tabah saja.' " 13:10 Sekali sanga wari Sabat kalak Jahudi ngajar Jesus i bas rumah pertoton. 13:11 Lit me i je sekalak diberu enggo sepuluh waluh tahun dekahna bangger iulahi setan, si erbahanca ia mbengkung dingen lanai ngasup tedis pajek. 13:12 Asum idah Jesus diberu e, ilebuhNa nina, "Nande, penakitndu enggo malem!" 13:13 Itamaken Jesus tanNa ku babo diberu e jenari minter ia tedis pajek. Kenca bage ipujina Dibata. 13:14 Tapi merawa pengulu rumah pertoton e, sabap ipepalem Jesus ia i bas wari Sabat. E maka ngerana ia man jelma si nterem nina, "Lit kap enem wari guna erdahin; e maka rehlah i bas salah sada wari e gelah ipepalem, labo i bas wari Sabat." 13:15 Ngaloi Jesus man bana nina, "O kam kalak pekulah-kulah! Ma kin kerina nge kam peluar lembuna ntah kaldena i bas karangna nari pemincepsa i bas wari Sabat pe? 13:16 Diberu enda kesusuren Abraham; enggo sepuluh waluh tahun dekahna ia itaban Iblis; ma patut nge ia ipulahi i bas wari Sabat gia?" 13:17 Asum ikataken Jesus bage, mela kerina imbang-imbangNa, tapi kalak si nterem ermeriah ukur ngidah tanda sengget si ilakoken Jesus. 13:18 E maka iterusken Jesus ngerana nina, "Bali ras kai kin Kinirajan Dibata e? Alu kai kin e banci Kuandingken? 13:19 E me bagi sengkebuah benih sawi si ibuat kalak dingen isuankenna i jumana; turah me sawi e jadi meganjang bagi batang kayu seh banci perik-perik rasar i bas dahanna." 13:20 Tole nina Jesus, "Alu kai kin banci Kuandingken Kinirajan Dibata e? 13:21 E me bagi ragi si ibuat diberu jenari icampurna ras telu tumba tepung seh serser kerina." 13:22 Iterusken Jesus perdalanenNa ku Jerusalem janah i bas perdalanenNa singgah Ia arah kuta-kuta si meriah bage pe kuta-kuta si kitik dingen ngajar Ia i je. 13:23 Lit sekalak si nungkun man baNa nina, "O Tuan, la kin pagi nterem kalak si terkelin?" Erjabap Jesus man bana, 13:24 "Cubakenlah asa ngasupndu bengket arah pintun si kitik e; Kukataken pe man bandu maka nterem nge kalak si ncubakenca bengket ku bas tapi la banci. 13:25 Adi kenca keke tuan rumah e dingen kenca ierukna pintun kam tedis i darat nuktuk, janah nindu, 'O, Tuan, talangi pintun man kami!', ialoina me kam, 'La kam kutandai!' 13:26 Jenari nindu ka, 'Enggo pernah kami man dingen minem ras kam, bage pe enggo pernah Kam ngajar i pasar-pasar kuta kami.' 13:27 Ngaloi ka ia man bandu, 'La kam kutandai! Laweslah i bas Aku nari o kalak jahat!' 13:28 I je me pagi kam tangis dingen mesui kal atendu asum idahndu Abraham, Isak, Jakup ras kerina nabi-nabi ermeriah-meriah i bas Kinirajan Dibata, tapi kam iambekken ku darat. 13:29 Janah rehen me kalak i Timur, i Barat, i Utara, ras i Selatan nari ermeriah-meriah i bas Kinirajan Dibata. 13:30 Kalak si genduari arah pudi jadi arah lebe kap pagi; janah kalak si genduari arah lebe jadi arah pudi kap pagi." 13:31 I bas paksa e reh piga-piga kalak Parisi ndahi Ia, janah nina, "To lawes, tadingken ingan enda sabap ibunuh Herodes atena Kam." 13:32 Ngaloi Jesus man kalak ndai nina, "To kataken man serigala e, 'Kupelawes setan-setan dingen Kupepalem si sakit i bas wari si sendah ras si pe pagi, janah i bas wari peteluken dung me dahinKu.' 13:33 Amin bage gia, la banci lang kuterusken nge perdalanenKu sendah, pagi ras kedun; sabap labo mungkin sekalak nabi ibunuh pala i Jerusalem. 13:34 O Jerusalem, Jerusalem! Ibunuhndu nabi-nabi, ibenterindu persuruhen si enggo isuruh Dibata reh ndahi kam! Enggo piga-piga kali ateKu mpepulung bangsandu, bagi indung manuk pepulung anak-anakna i teruh kabengna, tapi la kam nggit! 13:35 Tuhu-tuhu me pagi rumahndu itadingken seh melungun. Kukataken pe man bandu, lanai pagi Aku idahndu seh waktuna ikatakenndu, 'Ipasu-pasu gelah Ia si reh i bas gelar Tuhan.' "
14:1 Sekali i bas wari Sabat Jesus man i rumah peminpin kalak Parisi. Tuan rumah ras teman-temanna mperdiateken Ia. 14:2 Jenari reh me sekalak sakit busungen ku lebe-lebe Jesus nahena ras tanna besar. 14:3 E maka nungkun Jesus man guru-guru agama Jahudi ras kalak Parisi nina, "Rikutken agama Jahudi, banci ntah lang pepalem kalak sakit i bas wari Sabat?" 14:4 Tapi sada pe kalak ndai la ngaloi. E maka ijemak Jesus tan kalak sakit ndai, ipepalemNa, jenari isuruhNa mulih. 14:5 Kenca bage nina Jesus man kalak si lit i bas rumah e, "Adi ndabuh anakndu ntah lembundu ku bas sumur i bas wari Sabat, ma kin minter irintakndu ndarat i bas wari Sabat e ka?" 14:6 Lanai teraloi kalak ndai ranan Jesus e. 14:7 Perbahan idah Jesus piga-piga temue milih ingan kundul arah ingan si mehamat, e maka iturikenNa perumpaman enda man kerina kalak si pulung i bas rumah e. 14:8 "Adi iundang kalak kam ku kerja-kerja erdemu bayu, ola kam kundul arah ingan si mehamat, gelah bicara lit gia kalak si belinen asa kam iundangna, 14:9 la ikatakenna man bandu, 'Miser kam, temanta enda i je kundul!' Sabap adi bage mela iakapndu sabap kam arus miser ku ingan si arah suah. 14:10 Dage, adi iundang kalak kam, ulin kam kundul arah suah, gelah reh si mada kerja nina man bandu, 'O, teman, mari kundulken i bas ingan si mehamat enda.' Alu bage kam ipehaga i lebe-lebe kalak si nterem. 14:11 Sabap ise si peganjangken bana ia me pagi ipeteruk, janah ise si peteruk bana ia me pagi ipeganjangken." 14:12 Jenari nina Jesus man si ngundang Ia, "Adi kam erbahan kerja suari ntah berngi, ola undang teman-temanndu, ntah senina-seninandu, ntah kade-kadendu, ntah pe anak kutandu si bayak-bayak gelah ola ia ersimulih man bandu alu ngundang kam ka. 14:13 Tapi adi atendu erbahan kerja man-man, undanglah kalak musil, kalak cempang-cempang, kalak pangpangen ras kalak pentang, 14:14 maka malem tuhu-tuhu atendu sabap la ia ngasup ersimulih man bandu. Dibata nge pagi si ersimulih man bandu i bas wari kekeken kalak si benar." 14:15 Megi kai si ikataken Jesus e, ngerana sekalak temue e man Jesus nina, "Malem tuhu-tuhu ate kalak si itenahken Dibata ku kerja i bas Kinirajan Dibata." 14:16 Ngaloi Jesus man bana, "Lit me sekalak si erbahan man-man si mbelin; nterem kalak iundang. 14:17 Kenca seh waktuna kerja man-man e, isuruhna juak-juakna ngelegi kalak si enggo iundangna, alu ngataken, 'Ota, enggo sikap kerina!' 14:18 Tapi sekalak-sekalak ia ngataken alangenna. Si pemena nina, 'Sentabi aku man bandu, sabap mbaru denga kal aku nukur juma; ateku lawes ngenehenca.' 14:19 Deba nina, 'Enggo kutukur lembuku lima nioga, lembu penenggala; kucubaken ateku nenggalakenca, e maka sentabi aku man bandu.' 14:20 Si deban ka nina, 'Mbaru denga aku erjabu, perbahan si e aku la banci reh.' 14:21 E maka mulihken me juak-juak ndai, iturikenna kerina si e man tuanna. Megi si e merawa tuan ndai, e maka nina man juak-juakna, 'To lawes ku pasar-pasar ras ku kesain kuta, baba ku jenda kalak musil-musil, kalak cempang-cempang, kalak pangpangen ras kalak pentang.' 14:22 La ndekahsa ngelapur juak-juak ndai nina, 'O tuan, kai si ikatakenndu ndai enggo kudalanken, tapi lit denga ingan langa isin.' 14:23 E maka nina tuan e man juak-juakna, 'To lawes ku simpang-simpang ras ku pasar-pasar, iahken kerina kalak si i je ku bas rumahku enda gelah dem. 14:24 Kukataken man bandu maka labo sekalak pe si enggo Kuundang ndube ngenanami pangan si enggo Kusikapken.' " 14:25 Asum nterem kalak si erdalan ngikutken Jesus, itulihken Jesus kalak si nterem e jenari nina, 14:26 "Ise pe si reh ndahi Aku labo banci ia jadi ajar-ajarKu, adi la kin kelengen atena man Dibata asangken man bapana ras nandena, ndeharana ras anak-anakna, turangna ras seninana janah bage pe dirina jine. 14:27 Ise pe labo banci jadi ajar-ajarKu adi la kin ipersanna kayu persilangna dingen ikutkenna Aku. 14:28 Adi lit sekalak i bas kam atena erbahan menara, tentu ibahanna lebe anggaren biaya guna meteh ntah cukup kin duitna ntah lang i bas ndungi menara e. 14:29 Sabap adi la bage, banci jadi kenca ipajekkenna palasna, lanai ia ngasup ndungisa. Jenari kerina kalak si ngidah dahinna si lolo e ncakapken ia, 14:30 nina, 'Kalak enda icubakenna majekken, tapi la ia ngasup ndungisa!' 14:31 Adi sekalak raja lawes ras sepuluh ribu kalak erperang ngelawan raja si deban si ras dua puluh ribu kalak, tentu iukurkenna lebe ngasup kin ia ntah lang. 14:32 Adi iakapna kin pe maka labo ia ngasup, tentu ikirimna utusenna mindo perdamen asum ndauh denga raja e." 14:33 Tole nina Jesus, "Alu bage, apai pe kam la metunggung jadi ajar-ajarKu, adi la kin itadingkenndu kerina si lit i bas kam." 14:34 "Sira tuhu mehuli, tapi adi sira e pe lanai masin alu kai nari banci ipemasin? 14:35 Tuhu lanai erguna man juma ntah man campur pupuk; tapi iambekken nge. Begikenlah adi lit kin cupingndu!"
15:1 Sekali jadi nterem reh pengalo cuke ras kalak perdosa si deban megiken pengajaren Jesus. 15:2 Ngidah si e jungut-jungut kalak Parisi ras guru-guru agama nina, "Ialo-aloNa kalak perdosa janah man pe Ia ras." 15:3 E maka ituriken Jesus man bana perumpaman enda, 15:4 "Adi sekalak i bas kam lit seratus biri-birina janah bene sada kuga nge ibahanna? Tentu itadingkenna biri-biri si siwah puluh siwah i mbalmbal, lawes ia ndarami biri-biri si bene e seh dat. 15:5 Kenca idatna biri-biri e, meriah kal ukurna, itamakenna biri-biri e ku datas barana, 15:6 jenari ibabana mulih. Kenca bage, idilona teman-temanna ras si ndeher-ndeher rumahna janah nina, 'Meriah kal ukurku sabap enggo ku dat biri-biringku si bene e. Marilah kita ermeriah ukur ras-ras.' 15:7 Kukataken man bandu: Belinen pe keriahen i Surga nandangi sekalak perdosa si jera asangken si siwah puluh siwah kalak si akapna ia benar dingen la perlu jera." 15:8 "Ntah pe sekalak diberu lit sepuluh duit pirakna, janah bene sada kuga nge ibahanna? Tentu isaganina lampu isapuina jabuna, idaramina manjar-anjar seh dat. 15:9 Kenca idatna duitna e, idilona teman-temanna ras tetanggana, janah nina, 'Ermeriah ukur gelah kita, sabap enggo ku dat duitku si bene e!' 15:10 Kukataken man bandu, bage me pe malekat-malekat ermeriah ukur nandangi sekalak perdosa si jera." 15:11 Iterusken Jesus ngerana nina, "Lit me sekalak perbapan, dua kalak anakna dilaki. 15:12 Nina si nguda man bapana, 'O bapa, bereken genduari man bangku erta-erta sikerajangenku.' E maka ibagi bapana erta-erta e man anakna duana. 15:13 Kenca piga-piga wari, idayaken anak si nguda e me sikerajangenna, jenari lawes ia ku negeri si ndauh. I je isia-siakenna duitna e. 15:14 Kenca keri ibahanna duitna e, jadi me kelihen i bas negeri e, janah mulai me iakapna suhsah. 15:15 E maka erdahin ia ras sekalak anak negeri e. Isuruhna ia ku juma ermakan babi. 15:16 Nakan iba-iba babi e pe meriah nge min ukurna manca, tapi ise pe la mereken kai pe man bana. 15:17 Dungna rukur ia, janah nina i bas ukurna, 'Kerina si erdahin bapangku riba-iba panganna, tapi aku i jenda menam mate kelihen. 15:18 Laweslah aku ndahi bapangku janah ningku man bana, O bapa, aku enggo erdosa man Dibata dingen ersalah man bandu. 15:19 Lanai metunggung pe aku igelari anakndu.' 15:20 E maka berkat ia ndahi bapana. Ndauh denga pe ia i rumah nari enggo idah bapana ia. Mekuah ate bapana, e maka kiam ia ngayakisa, idakepna janah iemaina. 15:21 Nina anakna e man bana, 'O bapa, aku enggo erdosa man Dibata dingen ersalah man bandu. Lanai metunggung pe aku igelari anakndu.' 15:22 Tapi idilo bapana juak-juakna nina, 'Pedasken baba ku jenda uis si mejilena janah pakeken man bana! Tamaken cincin ku jari-jarina janah sepatui ia. 15:23 Jenari geleh sada anak lembu si mburna, gelah erbahan pesta man-man kita. 15:24 Sabap anakku enda nai enggo mate, tapi genduari enggo nggeluh mulihi; ia enggo bene, tapi genduari mulihken ia.' E maka ibenakenna erpesta ras ermeriah-meriah. 15:25 Tapi anakna sintua paksa e i juma. Asum ia i bas perdalanen i juma nari, lanai ndauhsa ku rumah, ibegina sora gendang ras sora rende. 15:26 E maka idilona sekalak juak-juak, isungkunna nina, 'Kai si jadi e?' 15:27 Erjabap juak-juak man bana, 'Agindu enggo reh mulihken janah isuruh bapandu igeleh sada anak lembu si mburna, sabap agindu si enggo bene e enggo reh mulihken i bas mejuah-juah.' 15:28 E maka nembeh kal ate anak sintua e dingen la ia nggit ku rumah. E maka reh bapana nami-nami ia i darat. 15:29 Ngaloi ia man bapana, 'Enggo piga-piga tahun aku erdahin ras kam bagi sekalak juak-juak janah la pernah kusimbak katandu. Kai kin enggo iberekenndu man bangku? Sada anak kambing pe la iberekenndu man bangku gelah aku man-man ras teman-temanku. 15:30 Tapi anakndu ah, enggo ikerikenna erta-ertandu ras diberu perdenggal, janah kenca ia mulihken minter igelehndu sada anak lembu pilihen si mbur!' 15:31 Ngaloi bapana, 'O anakku, kam tetap ras aku janah kerina erta-ertangku sikerajangenndu kap. 15:32 Tapi patut pe kita erbahan kerja man-man dingen ermeriah ukur, sabap agindu si nai enggo mate, genduari enggo nggeluh mulihi; ia enggo bene, tapi genduari enggo reh mulihken.' "
16:1 Jenari nina ka Jesus man ajar-ajarNa, "Lit me sekalak bayak, lit pe sekalak bendaharana. Iaduken kalak man bana maka bendaharana e korupsi. 16:2 E maka idilona bendahara e janah nina, 'Kuga nge perbahanenndu e? Bahan perkiranna kerina dahindu, sabap kam kupengadi jadi bendahara.' 16:3 Nina bendahara e i bas ukurna, 'Ipengadi tuanku aku jadi bendahara, kai nge ndia kubahan? Ncangkul la aku ngasup, mindo-mindo mela aku. 16:4 Enggo kueteh kai si kubahan, gelah kenca aku ipengadi lit kalak si ngaloken aku i bas rumahna.' 16:5 E maka idilona sekalak-sekalak peridon tuanna. Isungkunna si pemena nina, 'Asa kai utangndu man tuanku?' 16:6 Erjabap ia, '200 kaleng minak makan.' E maka nina bendahara e, 'Enda surat utangndu, kundulken, jenari minter suratken 100.' 16:7 Kenca bage isungkunna ka kalak si deban nina, 'Kam kasa kai utangndu?' Erjabap ia, '300 guni page.' E maka nina bendahara e, 'Enda surat utangndu, suratken 250.' 16:8 Kenca bage ipujiken tuan ndai bendahara si la bujur e sabap cerdik kal ia; sabap cerdiken kap anak-anak doni enda i bas urusenna sapih-sapih ia asangken anak-anak terang." 16:9 Iterusken Jesus ngerana nina, "Kukataken man bandu: Pakelah erta doni enda guna ndatken teman man bandu gelah aminna gia erta doni e lanai lit, kam ialoken me i bas ingan si rasa lalap." 16:10 "Ise pe situtus i bas si kitik, tentu tutus pe ia i bas si mbelin; ise si la bujur i bas si kitik, tentu pe la ia bujur i bas si mbelin. 16:11 Dage, adi la kam tutus i bas erta doni, labo ibereken man bandu erta si tuhu-tuhu. 16:12 Janah adi la kam terteki nandangi sikerajangen kalak ise nge si nggit mereken ertandu jine man bandu? 16:13 Labo mungkin sekalak juak-juak dua tuanna. Sabap adi bage ugapa pe nembeh atena nandangi si sekalak, janah si sekalak nari ikelengina; sekalak ihamatina janah sekalak nari igombangina. Kam la banci erkeleng ate man Dibata janah erngena ate man erta doni enda." 16:14 Kerina si ikataken Jesus e ibegi kalak Parisi; perbahan ia rangap nandangi duit, e maka icacina Jesus. 16:15 Tapi nina Jesus man bana, "Kam pekulah-kulahndu bujur i lebe-lebe jelma si nterem, tapi ieteh Dibata nge isi pusuhndu. Sabap kai si meherga iakap manusia la kap lit ergana i bas Dibata." 16:16 "Undang-undang si ibereken Musa, ras pengajaren nabi-nabi, kerina e tetap ipake seh masa Johanes Peridiken. Kenca si e Berita Si Meriah kerna Kinirajan Dibata terus iberitaken. Merincuh kalak jadi bangsa Dibata, e maka rehen ia ku je. 16:17 Tapi sukahen nge langit ras doni masap asangken bagin si kitikna i bas Undang-undang e masap. 16:18 Ise si ngulihken ndeharana, jenari iempoina diberu si deban, ia enggo erlua-lua; janah ise si ngempoi diberu si enggo iulihken perbulangenna, ia pe enggo erlua-lua." 16:19 "Lit me sekalak bayak; pakenna uis si meherga-meherga janah tep-tep wari ia erbahan pesta. 16:20 Tapi lit ka pe sekalak kalak musil, gelarna Lasarus. Kerina dagingna ugahen janah biasana medem ia deher pintun rumah kalak bayak e. 16:21 Ia ngarapken rimah-rimah kalak si erpesta guna ngisi beltekna si lume. Biang pe rehen ndilati ugahna. 16:22 La ndekahsa mate si musil e, e maka ibaba malekat-malekat ia kundul deher Abraham. Kalak bayak e pe mate jenari ikuburken. 16:23 I bas kerajan kematen ia ngenanami kiniseran. Asum jurgak ia idahna Abraham bage pe Lasarus deherken ia. 16:24 E maka erlebuh ia nina, 'O bapangku Abraham! Mekuah min atendu kempak aku. Suruhlah sitik Lasarus ncebukken jari-jarina ku bas lau gelah itaktakkenna ku bas dilahku sabap muas kal kuakap i bas api si gara enda.' 16:25 Tapi nina Abraham, 'O anakku, ingetlah maka sanga kam nggeluh enggo ialokenndu kesenangen, janah Lasarus enggo ngaloken kegeluhen si mesera. Tapi genduari malem atena i jenda, janah kam ngaloken kiniseran. 16:26 Tambah si e pe, lit kelang-kelangta kelbung si mbages si la terkepari, si erbahanca la banci ku jena kalak si i jenda janah kalak si i jena pe la banci ku jenda.' 16:27 E maka nina ka kalak bayak e, 'Adi bage, kupindoken man bandu bapa, suruhlah min Lasarus ku rumah bapangku. 16:28 I je lit lima nari seninangku. Suruh Lasarus mpersingeti ia kerina, maka ola ia seh ku ingan si mesui enda.' 16:29 Tapi nina Abraham, 'Lit kap i bas ia kitap-kitap Musa ras kitap-kitap nabi-nabi! Pelepas iikutkenna kai si ikataken i bas kitap e.' 16:30 Ngaloi ka ia, 'O bapangku Abraham, labo cukup adi e saja. Tapi adi sekalak si enggo keke i bas si mate nari reh ndahi ia, tentu jera ia.' 16:31 Tapi nina Abraham, 'Adi la kin ibegikenna kai si tersurat i bas kitap Musa ras nabi-nabi, labo ia jera aminna gia lit kalak mate nggeluh mulihi.' "
17:1 Jenari nina Jesus man ajar-ajarNa, "La banci lang ndabuh kalak ku bas dosa arah erbage-bage dalan; tapi andiko cilaka kal si arah ia dalanna maka kalak ndabuh ku bas dosa. 17:2 Ulin me irakuti batu penggilingen i bas kerahungna jenari iambekken ia ku lawit asangken kalak si kitik enda ibabaina erdosa. 17:3 Jagailah dirindu! Adi erdosa seninandu, ajarkenlah ia. Janah adi robah ia, alemilah. 17:4 Bage pe adi ersalah ia pitu kali sada wari nandangi kam, janah tep-tep ersalah, reh ia ndahi kam, janah nina, 'Aku enggo robah, arus maka ialemikam ia.' " 17:5 E maka nina rasul-rasul e man Tuhan, "Pegegehi min kiniteken kami." 17:6 Ngaloi Tuhan, "Adi lit kinitekenndu sengkebuah sabi lah gia, banci ikatakenndu man batang ara enda, 'Meruahlah kam, suanken bandu i bas lawit!', janah minter pe ikutkenna katandu e." 17:7 "Adi sekalak i bas kam lit suruh-suruhenna sangana nenggala ntah pe ermakan biri-biri. Mulih kenca ia i juma nari, minter kin idilondu ia man? 17:8 Tentu lang! Tapi nindu, 'Pesikap nakanku; erbenting kibul kam janah elai aku. Kenca aku elah, e maka banci kam man.' 17:9 Ikatakenndu kin bujur man suruh-suruhenndu adi idalankenna kerina kewajipen e? 17:10 Bage pe kam; adi enggo idalankenndu kerina kewajipenndu, nindulah, 'Kami enda suruh-suruhen si la erguna, kewajipen kami ngenca idalanken kami.' " 17:11 I bas perdalanen Jesus ku Jerusalem, mentas Ia arah perbatasen Samaria ras Galilea. 17:12 Asum bengket Ia ku bas sada kuta, reh sepuluh kalak gadamen njumpai Ia. Si sepuluh kalak enda tedis i dauh-dauh nari, 17:13 janah alu megang sora erlebuh ia nina, "O, Jesus! O, Tuhan! Mekuah min atendu kami." 17:14 Kenca idah Jesus kalak e nina, "To lawes, cidahken badanndu man imam." I tengah dalan enggo malem penakit kalak enda ndai. 17:15 Sekalak i bas si sepuluh kalak e, kenca idahna maka enggo mejelis kulana, mulihken, ia, ipujina Dibata alu sora megang. 17:16 Erjimpuh ia i lebe-lebe Jesus janah ikatakenna bujur. Kalak si mulihken enda e me kalak Samaria. 17:17 E maka nina Jesus, "Ma sepuluh kalak kin si malem ndai? I ja siwah kalak nari? 17:18 Engkai maka kalak si lain bangsa enda ngenca mulihken ngataken bujur man Dibata?" 17:19 Jenari nina Jesus man bana, "Kekeken to mulihken; kinitekenndu enggo erbahanca kam malem." 17:20 Piga-piga kalak Parisi nungkun man Jesus kerna ndigan kin rehna Kerajan Dibata e. Erjabap Jesus, "Kinirajan Dibata labo reh alu tanda-tanda si banci iidah manusia. 17:21 E maka labo beluh kalak ngatakenca, 'Enda kap, mari nehen ku jenda,' ntah pe, 'Ah, adah i jah kap Ia.' Sabap Kinirajan Dibata e enggo kap i bas kam." 17:22 Jenari nina man ajar-ajarNa, "Reh me pagi paksana maka mesikel kam ngidah sada wari i bas wari-wari Anak Manusia si isuruh Dibata, tapi la banci idahndu. 17:23 Ikataken kalak me pagi man bandu, 'Nehenlah, i jenda kap Ia!', ntah, 'I jah kap Ia!' Tapi ola kam ku je ngenehenca. 17:24 Sabap kerehen Anak Manusia persuruhen Dibata i bas warina, bali kap ras kilap si erbinar i langit ngencer i tampukna nari seh seh ku tampukna si deban. 17:25 Tapi ope denga reh warina e, la banci lang maka inanamiNa lebe melala kiniseran dingen itulak bangsa si genduari enda Ia. 17:26 Bagi sanga Nuah nai, bage me pe pagi kerna kerehen Anak Manusia persuruhen Dibata e. 17:27 Kerina kalak, man, minem, sereh bage pe empo, seh warina Nuah bengket ku bas perahuna. Jenari reh banjir si mbelin janah kerina kalak mate gedap. 17:28 Bage me pe tupung paksa Lut. Kerina kalak man, minem, erbinaga, nukur, nuan-nuan bage pe majekken rumah. 17:29 Tapi i bas warina Lut nadingken Sodom, ipesusur Dibata me udan api ras kertah i langit nari si erbahanca jelma si nterem mate. 17:30 Bage me pe pagi jadi i bas warina Anak Manusia persuruhen Dibata ncidahken diriNa. 17:31 Ise pagi paksa si e kundul-kundul pekesahken i darat, olanai ia bengket ku rumah muat erta-ertana; bage pe kalak si i juma olanai ia mulihken ku rumah ngelegi erta-ertana. 17:32 Ingetlah ndehara Lut! 17:33 Ise si mpertahanken kegeluhenna, ia kebenen geluhna si tuhu-tuhu; tapi kalak si kebenen geluhna, si tuhuna ia enggo mpertahanken kegeluhenna si tuhu-tuhu. 17:34 Kukataken pe man bandu, i bas berngi si e pagi lit dua kalak medem i bas sada ingan medem: sekalak ibuat, sekalak nari itadingken. 17:35 Dua kalak diberu sanga nutu, sekalak ibaba sekalak nari itadingken." 17:36 Dua kalak dilaki si i juma: sekalak ibaba, sekalak nari itadingken. 17:37 E maka nungkun ajar-ajar man Jesus nina, "I ja e pagi jadi Tuhan?" Erjabap Jesus, "I ja lit bangke, i je pulung perik-perik si man bangke."
18:1 Kenca bage, guna ngajari ajar-ajar gelah ia ertoto rusur maka ola peltep pengarapenna, 18:2 ituriken Jesus perumpaman enda nina, "I bas sada kuta lit sekalak hakim si la erkemalangen man Dibata dingen la erkeleng ate man manusia. 18:3 Lit ka pe i bas kuta e sekalak diberu enggo mbalu. Ia rusur reh ndahi hakim e, janah nina, 'Sampati min aku i bas perkarangku nandangi imbangku.' 18:4 Ndekah la nggit hakim e, tapi dungna nina i bas ukurna, 'Aminna gia aku la erkemalangen man Dibata dingen la erkeleng ate man manusia, 18:5 tapi perbahan rusur aku igangguna, kupejore gia perkarana e; gelah olanai ia reh rusur dingen dungna iraukina ayongku.' " 18:6 Iterusken Tuhan nina, "Begindu kai si enggo ikataken hakim si la bujur e? 18:7 Ma kin ibegiken Dibata nge kalak pilihenNa si erlebuh suari ras berngi mindo penampat man baNa? Melawen kin Ia nampati kalak pilihenNa? 18:8 Kukataken pe man bandu, pedas nge iberekenNa keadilen man kalak si mindo man baNa. Tapi asum reh pagi Anak Manusia si isuruh Dibata lit nge pagi idapetiNa kalak si erkiniteken i doni enda?" 18:9 Man kalak si pebujur-bujur bana dingen si erpengakap maka kalak si deban la lit ergana, ituriken Jesus perumpaman enda, 18:10 "Lit me dua kalak si lawes ku Rumah Pertoton guna ertoto. Sekalak e me kalak Parisi janah sekalak nari pengalo cuke. 18:11 Kalak Parisi e tedis janah ertoto ia i bas ukurna nina, 'O Dibata, bujur kukataken man baNdu, sabap aku la merangap, la nipu, la erlua-lua bagi kalak si deban. Bujur kukataken man baNdu sabap aku labo bagi pengalo cuke ah. 18:12 Aku erpuasa dua kali seminggu, janah kupersembahken man baNdu sepersepuluh i bas kerina ulihku erdahin nari.' 18:13 Tapi pengalo cuke tedis ndauh i bas ia nari, janah la ia pang nare ku langit, itemtemina bana janah nina, 'O Dibata, mekuah min atendu aku kalak perdosa!' " 18:14 Nina Jesus, "Kukataken man bandu: Mulih kalak enda ku rumah janah pengalo cuke enda me si ibenarken Dibata, labo kalak Parisi e. Sabap kalak si peganjangken bana ipeteruk Dibata, janah kalak si peteruk bana ipeganjangken Dibata kap." 18:15 Reh me piga-piga kalak orang tua maba anak-anakna si kitik denga man Jesus. Atena gelah ipasu-pasu Jesus anak-anak e. Asum idah ajar-ajarNa, e maka ilarangna. 18:16 Tapi idilo Jesus anak-anak e janah nina, "Pelepas anak-anak e reh ndahi Aku, ola ambati ia. Sabap kalak si bagi enda kap empuna Kinirajan Dibata. 18:17 Ingetlah! Kalak si la ngaloken Kinirajan Dibata bali ras sekalak anak-anak, la ia banci bengket ku bas Kinirajan Dibata." 18:18 Lit me sekalak peminpin kalak Jahudi nungkun man Jesus nina, "O Guru si bujur, kai nge ndia arus kubahan gelah kudat kegeluhen si rasa lalap?" 18:19 Erjabap Jesus, "Engkai maka ikatakenndu Aku si bujur? Ma ise pe labo bujur seakatan Dibata ngenca? 18:20 Tentu enggo ietehndu pedah Dibata, 'Ola munuh; ola erlua-lua; ola nangko; ola ngataken si la tuhu; ola nipu; mehamat man nande ras bapandu.' " 18:21 E maka ngaloi ia, "O Guru, kerina pedah e enggo kuikutken kitik-kitikku nari." 18:22 Kenca ibegi Jesus jabapna e nina, "Sada nari kekurangenndu, dayaken erta-ertandu janah duitna bereken man kalak musil, gelah idatndu erta-erta i Surga; jenari reh kam, ikutken Aku." 18:23 Kenca ibegina kata Jesus e gulut ukurna, sabap bayak kal ia. 18:24 Asum idah Jesus bage kal cedana atena, e maka nina, "Tuhu-tuhu mesera kal kalak bayak bengket ku bas Kinirajan Dibata. 18:25 Sukahen sada unta mentas arah lubang jarum asangken sekalak kalak bayak bengket ku bas Kinirajan Dibata." 18:26 Kalak si megi Ia nungkun nina, "Adi bage ise nari nge pagi terkelin?" 18:27 Erjabap Jesus, "Kai si la banci jadi i bas manusia, e me banci jadi i bas Dibata." 18:28 Jenari nina Petrus, "Kami enggo nadingken sikerajangen kami guna ngikutken Kam." 18:29 Ngaloi Jesus, "Tuhu, janah Kukataken pe man bandu maka ise pe si nadingken rumahna ntah ndeharana ntah seninana ntah orang tuana ntah anak-anakna erkite-kiteken Dibata dingen erkite-kiteken dahin Dibata, 18:30 ialokenna nge erganda-ganda i bas jaman enda pe, dingen pagin ialokenna kegeluhen si tuhu-tuhu si rasa lalap." 18:31 Idilo Jesus ajar-ajarNa si sepuluh dua kalak, jenari nina, "Begikenlah! Genduari kita i bas perdalanen ku Jerusalem. I je me pagi jadi kerina si enggo isuratken nabi-nabi kerna Anak Manusia si isuruh Dibata. 18:32 Sabap Ia pagi iendesken man kalak si la nandai Dibata. Isaling-saling kalak e pagi Ia, igombang-gombangina janah icidurina. 18:33 Iligasina jenari ibunuhna Ia, tapi i bas wari peteluken nggeluh Ia mulihi." 18:34 Bage gia labo iangka ajar-ajar kai si ikataken Jesus. La tangkas man bana erti kata e, e maka labo iangkana maksud Jesus. 18:35 Asum Jesus nandangi seh i Jeriho, lit me sekalak pentang kundul i tepi dalan mindo-mindo. 18:36 Asum ibegina mentas jelma si nterem, nungkun ia nina, "Kai e?" 18:37 Erjabap kalak man bana, "Mentas Jesus kalak Nasaret." 18:38 Jenari erlebuh ia alu sora megang, "O Jesus! Anak Daud! Mekuah min ateNdu aku." 18:39 Ilarang kalak si arah lebe ia, gelah ola ia gejek. Tapi reh gangna ia erlebuh nina, "O Anak Daud! Mekuah min ateNdu aku." 18:40 E maka ngadi Jesus erdalan, jenari isuruhNa kalak negu si pentang e ku Ia. Kenca seh ia i lebe-lebe Jesus, isungkun Jesus ia nina, 18:41 "Kai kin atendu Kubahan man bandu?" Erjabap ia, "O Tuan, ateku min gelah aku erpengidah mulihi." 18:42 E maka nina Jesus man bana, "Erpengidahlah kam! Kinitekenndu erbahanca kam enggo malem." 18:43 Minter ia erpengidah, jenari ikutkenna Jesus, janah ikatakenna bujur man Dibata. Asum kalak si nterem ngidah si e, kerina ia muji Dibata.
19:1 Jesus bengket ku kuta Jeriho janah terus Ia erdalan mentasi kota e. 19:2 I bas kota e lit me sekalak kepala pengalo cuke, gelarna Sakeus. Ia bayak. 19:3 Ia merincuh kal ngidah ise kin Jesus e. Tapi la idahna perbahan nterem kal jelma arah lebena dingen ia pe gendek ka. 19:4 E maka kiam ia ngelebei jelma si nterem e, jenari inangkihna batang kayu, guna ngenehen Jesus si mentas arah dalan e. 19:5 Asum Jesus seh i bas ingan e, itatap Jesus ku datas janah nina man Sakeus, "O Sakeus pedasken nusurken! Sabap sendah kesilang ateKu i rumahndu." 19:6 Minter nusur Sakeus janah ialo-alona Jesus alu ermeriah ukur. 19:7 Tapi jungut-jungut kalak si nterem ngidah si e nina, "Kesilang Ia i rumah kalak perdosa." 19:8 Tapi tedis Sakeus janah nina man Tuhan, "Setengah i bas erta-ertangku kubereken man kalak musil; janah adi lit kalak enggo kutipu, kuulihken man bana empat kali lipat." 19:9 Ngaloi Jesus nina, "I bas wari enda enggo reh keselamaten man isi jabu enda. Kam pe kesusuren Abraham kap. 19:10 Sabap Anak Manusia si isuruh Dibata reh guna nelamatken kalak si papak." 19:11 Sanga jelma si nterem sangana denga megiken Jesus ngerana, ituriken Jesus sada perumpaman. Paksa e nandangi seh me Ia ku Jerusalem, janah iakap kalak maka pedas me i idah manusia Kinirajan Dibata. 19:12 Erkiteken si e nina Jesus man kalak enda, "Lit me sekalak si biak raja berkat atena ku kuta si ndauh guna iesahken jadi raja. Kenca iesahken e atena minter mulih. 19:13 Tapi ope denga ia berkat, idilona sepuluh kalak juak-juakna. Jenari iberekenna sekalak-sekalak sepuluh duit mina. Janah nina man kalak enda, 'Pergunaken duit enda jadi pokokndu erbinaga seh aku mulih.' 19:14 Tapi anak kutana erelem-elem man bana, e maka ikirimna utusenna ndapeti alu ngataken, 'Kami la setuju ia jadi raja kami.' 19:15 Kenca ia iesahken jadi raja, mulihken ia. Jenari idilona juak-juak si sepuluh kalak ndube ngadap man bana guna meteh asa kai buena untung si idatna sekalak-sekalak. 19:16 Ngadap me juak-juak si pemena nina, 'O, tuan, enggo kudat untungna sepuluh duit mina alu duit si iberekenndu mbarenda.' 19:17 Nina tuan man bana, 'Merandal, kam juak-juak si mehuli! Perbahan kam tutus i bas si kitikna, e maka kubereken man bandu kuasa i bas sepuluh kota.' 19:18 Ngadap si peduaken nina, 'O tuan alu sada sepuluh duit mina si iberekenndu bangku mbarenda, enggo dat aku untungna lima duit mina.' 19:19 Man bana nina tuan e, 'Kam erkuasa i bas lima kota.' 19:20 Ngadap si peteluken, 'O tuan, enda duitndu mbarenda; kubuniken gelgel nari i bas saputanganku. 19:21 Mbiar kal aku kam, sabap kam kalak kejam. Ibuatndu si labo sikerajangenndu janah iperanindu si la isuanndu.' 19:22 Ngaloi tuan e man bana, 'Kam juak-juak si jahat! Kam kuukum rikutken pengeranandu. Bahanlah maka aku kalak kejam, kubuat si labo sikerajangenku janah kuperani si labo kusuan. 19:23 Adi bage, ngkai maka la itamakenndu duitku e ku bas bank? Gelah kenca aku mulih banci kualoken ras bungana.' 19:24 Jenari nina man kalak si tedis i je, 'Buatlah duit e i bas ia nari, jenari bereken man kalak si enggo idatna sepuluh duit emas.' 19:25 Nina kalak ndai, 'O tuan, enggo kap lit sikerajangenna sepuluh duit mina.' 19:26 Ngaloi raja e, 'Kukataken man bandu maka man kalak si lit ibereken kap tole; tapi kalak si la lit bas ia, si sitik i bas ia pe ibuat ka ibas ia nari. 19:27 Genduari baba ku jenda kerina imbang-imbangku si la ia setuju aku jadi rajana, jenari bunuh ia i lebe-lebengku!' " 19:28 Kenca ikataken Jesus perumpaman e, iteruskenNa perdalanenNa ku Jerusalem. 19:29 Asum Ia enggo ndeher ku Betpage ras Betani, e me daerah i Uruk Seton, isuruhNa dua kalak ajar-ajarNa leben, 19:30 nina, "To lawes ku kota si arah lebendu ah. Seh kenca kam ku bas kota e, idapetindu kari sada kelede tambat, kelede si langa pernah iersak kalak. Osari nalina, jenari baba ku jenda. 19:31 Adi lit kari kalak nungkun man bandu, 'Engkai maka iosarindu?', nindulah, 'Perlu Tuhan.' " 19:32 E maka lawes si dua kalak ndai janah idapetina kerina bagi si enggo ikataken Jesus e. 19:33 Asum iosarina nali kelede ndai nina empu kelede man bana, "Engkai maka iosarindu?" 19:34 Erjabap ia, "Perlu Tuhan." 19:35 Jenari ibabana kelede e man Jesus. Ikimbangkenna uisna ku gurung kelede e jenari isampatina Jesus ngersaksa. 19:36 Asum iterusken Jesus perdalanenNa, ikimbangken kalak uis i bas pasar. 19:37 Kenca Ia enggo ndeher ku Jerusalem, ngincuah i Uruk Seton nari, mulai me ajar-ajar si nterem si ngikutken Ia ersurak-surak. Alu sora si megang ipujina Dibata, meriah ukurna perbahan tanda sengget si idahna. 19:38 Ersurak-surak ia nina, "Ipasu-pasu gelah Raja si reh i bas Gelar Tuhan! Keriahen i Surga ras pujin man Dibata!" 19:39 Piga-piga kalak Parisi si ikut i bas kalak si nterem e ngerana man Jesus nina, "O Guru, suruh min sinik ajar-ajarNdu e." 19:40 Ngaloi Jesus, "Adi sinik kalak enda, batu-batu enda me si ersurak." 19:41 Reh deherna me Jesus ku Jerusalem, janah kenca idahNa kota e itangisiNa, 19:42 nina, "Ah andiko, mehuli kal adi ietehndu kai si baci erbahan perdamen. Tapi genduari la kam ngasup ngidahsa! 19:43 Reh me pagi paksana maka ikeleweti imbang-imbangndu kam alu benteng-benteng pertahanen, jenari ikepungna janah ijapa nari pe reh serangen. 19:44 Kerina kam pagi ikernepkenna ras anak-anakndu. La ipelepasna sada batu pe i bas inganna si gelgel, sabap la ipegermetkenndu ndigan reh Dibata ndahi kam!" 19:45 Jenari bengket Jesus ku bas Rumah Pertoton. IpelawesNa kerina kalak si erbinaga i je. 19:46 Nina man kalak e, "Lit kap tersurat i bas Pustaka Si Badia, maka nina Dibata, 'RumahKu Rumah Pertoton kap.' Tapi enggo ijadikenndu jadi asar penamun." 19:47 Tep-tep wari Jesus ngajar i bas Rumah Pertoton e. Imam-imam si mbelin ras guru-guru agama Jahudi bage pe peminpin-peminpin bangsa Jahudi sanga ndarami dalan guna munuh Jesus. 19:48 Tapi la ietehna kuga carana, sabap jelma si nterem erngena ate nandangi Jesus janah meriah ukurna megiken pengajaren Jesus.
20:1 I bas sada wari, Jesus ngajar i bas Rumah Pertoton dingen meritaken Berita Si Meriah i bas Dibata nari man kalak si nterem. Paksa si e, reh imam-imam si mbelin, guru-guru agama Jahudi ras peminpin-peminpin Jahudi, 20:2 jenari nina man Jesus, "Kataken man kami, kuasa kai kin si lit i bas Kam erbahan si enda kerina? Ise mereken kuasa e man Bandu?" 20:3 Erjabap Jesus man kalak e nina, "Kusungkun kam lebe. 20:4 Kuasa Johanes Peridiken mperidiken e reh i bas Dibata nari, ntah i bas manusia nari?" 20:5 E maka sisungkun-sungkunen ia kerina nina, "Kuga ninta? Adi ninta, 'I bas Dibata nari,' ugapa pe nina, 'Adi bage ngkai maka la kam tek man Johanes Peridiken.' 20:6 Tapi adi ninta, 'I bas manusia nari,' merawa kari kalak si nterem enda janah ibenterina kita alu batu, sabap kalak si nterem tek maka Johanes Peridiken sekalak nabi." 20:7 E maka erjabap ia man Jesus nina, "La ieteh kami i ja nari rehna." 20:8 Nina Jesus man bana, "Adi bage, Aku pe la Kukataken man bandu alu kuasa kai Kubahan enda kerina." 20:9 Jenari ituriken Jesus perumpaman enda man kalak si nterem nina, "Lit me sekalak si nuan anggur i bas kebunna. Jenari lawes ia ku negeri si ndauh. Perbahan ndekah atena i bas negeri si ndauh e, e maka isewakenna kebun anggur e. 20:10 Kenca seh paksa peranin buah anggur, isuruhna sekalak juak-juakna ndahi si newa kebun anggur e, guna mindo sikerajangenna. Tapi ipekpeki si newa kebun anggur juak-juak ndai jenari isuruhna mulih alu la maba kai pe. 20:11 E maka isuruh tuan si mada kebun anggur juak-juak si deban. Tapi ia pe ipekpeki si newa e, igombang-gombangi janah isuruhna mulih alu la maba kai pe. 20:12 Jenari isuruh tuan si mada kebun anggur juak-juak si peteluken. Ia pe ipekpeki si newa e seh luka janah iambekkenna ku darat kebun e. 20:13 E maka rukur tuan si mada kebun anggur nina, 'Kai nge ndia arus kubahan? Kusuruh me anakku si kukelengi enda; tentu mehangke kari ia.' 20:14 Tapi kenca idah si newa kebun anggur anak tuan e nina sapih-sapih ia, 'Enda kap anak tuan si mada kebun anggur enda. Sibunuhlah ia gelah man banta kebunna enda!' 20:15 E maka iambekkenna anak tuan e ku darat kebun, jenari ibunuhna." Jenari nungkun Jesus nina, "Kenca bage kuga nge ibahan tuan si mada kebun anggur nandangi si newa e? 20:16 Tentu reh ia, ibunuhna kerina si newa kebun anggur e, jenari isewakenna kebun e man kalak si deban." Megi kata e nina kalak si nterem, "Mbera-mbera ola bage!" 20:17 Itatap Jesus ia kerina janah nina, "Adi bage, kai nge erti kata si tersurat i bas Pustaka Si Badia enda? 'Batu si iambekken tukang, enggo jadi batu palas.' 20:18 Ise si ndabuh ku batu e getem me ia, janah ise si idabuhi batu e meripuk me ia." 20:19 Paksa si e pe guru-guru agama Jahudi ras imam-imam si mbelin ersura-sura nangkap Jesus. Sabap ietehna maka ia nge tujun perumpaman si ituriken Jesus ndai. Tapi mbiar ia kalak si nterem. 20:20 E maka idaramina kesempaten si deban. Isogokna piga-piga kalak gelah ipekulah-kulahna bana bujur. Kalak enda isuruhna ncubai Jesus alu penungkunen-penungkunen, gelah alu bage banci iendeskenna Jesus man gubernur gelah itutup. 20:21 Nina kalak enda ndai man Jesus, "O Guru, ieteh kami maka kai si ikatakenndu ras si iajarkenNdu e tuhu. La erpilihen temanNdu ngerana. La ipernehenNdu pangkat manusia, tapi iajarkenNdu kerna kai si tuhu-tuhu ngena ate Dibata ibahan manusia. 20:22 Kataken dage man kami, rikutken aturen agamanta banci ntah lang galar pajak man Kepala Pemerentah Roma?" 20:23 Tapi ieteh Jesus kai tujun ranan kalak si pekulah-kulah enda, e maka nina, 20:24 "Cidahken lebe man bangKu sada duit pirak. Gambar ras gelar ise kin lit i bas duit e?" Erjabap kalak ndai, "Gambar ras gelar Kepala Pemerentah Roma." 20:25 E maka nina Jesus, "Adi bage, berekenlah man Kepala Pemerentah Roma kai sikerajangen Kepala Pemerentah Roma janah bereken man Dibata kai sikerajangen Dibata." 20:26 La ngasup kalak ndai nidingi cakap Jesus i lebe-lebe jelma si nterem. Mamang pe atena megi jabap Jesus, e maka sinik nari nge ia. 20:27 Reh me piga-piga kalak Saduki ndahi Jesus. Kalak enda la tek maka kalak mate nggeluh mulihken. Isungkunna Jesus nina, 20:28 "O Guru, man banta enggo isuratken Musa Undang-undang enda, 'Adi sekalak dilaki mate nadingken ndeharana, janah la lit pupusna, e maka diberu si enggo mbalu ndai arus ilakomangani senina si mate e gelah ipupusna anak jadi gancih senina si enggo mate ndai.' 20:29 Lit me pitu kalak dilaki si ersenina. Sintua enggo empo, janah mate ia, la lit pupusna. 20:30 E maka ilakomangani seninana si nomor dua diberu e, 20:31 jenari seninana si nomor telu ngelako manganisa. Bage me jadi man pituna si ersenina ndai -- kerina ia mate, sada pe la nadingken anak. 20:32 Dungna diberu ndai pe mate ka. 20:33 Adi bage, kenca nggeluh kerina si mate ndai i bas wari kekeken, si apai nge perbulangen diberu ndai? Sabap pituna ia enggo pernah erjabu ras diberu e." 20:34 Ijabap Jesus kalak ndai nina, "Kalak si nggeluh i bas paksa enda sereh dingen empo. 20:35 Tapi kalak si metunggung ngaloken kegeluhen si mbaru kenca ipekeke i bas si mate nari lanai bo ia sereh dingen empo. 20:36 Ia enggo bali ras malekat-malekat janah lanai banci mate. Ia enggo ipegeluh i bas si mate nari, janah enda me tandana maka ia anak-anak Dibata. 20:37 Kerna si mate nggeluh mulihi enggo tangkas ituriken Musa i bas bagin turi-turin kerna rambah si gara. I je ikataken maka Tuhan e, e me Dibata si tetap isembah Abraham. Dibata si tetap isembah Isak ras Dibata si tetap isembah Jakup. 20:38 Enda ertina maka Ia Dibata kalak si nggeluh labo Dibata si mate, sabap i bas adep-adepenNa kerina jelma nggeluh." 20:39 Megi si enda nina piga-piga guru-guru agama Jahudi, "Payo kal jabapNdu e Guru!" 20:40 E maka lanai ia pang naungkun kai pe man Jesus. 20:41 Nina Jesus man kalak e, "Kuga banci ikataken kalak maka Mesias si ipadanken Dibata e, e me kesusuren Daud? 20:42 Sabap Daud jine ngatakenca i bas kitap Masmur, 'Nina TUHAN man TuhanKu Kundulken arah kemuhenKu 20:43 seh Kutamaken imbang-imbangNdu i teruh tapak-tapak naheNdu.' 20:44 Daud jine ngatakenca maka Ia Tuhan. Kuga banci maka Mesias si ipadanken e kesusuren Daud ka?" 20:45 Asum kalak si nterem pe megiken Ia nina man ajar-ajarNa, 20:46 "Metengetlah nandangi guru-guru agama Jahudi, si megati erdalan-dalan erbaju gedang, si atena ihamati i gedang-gedang dalan ras itiga. Ia nggit kal kundul arah lebe i bas rumah pertoton. Idaramina ingan si mehamat i bas kerja-kerja. 20:47 Ibuatna keuntungenna i bas kalak si enggo mbalu nari ras ngerampasi rumah diberu balu-balu. Ibahanna pertoton si gedang alu pekulah-kulah. Kalak si bage pasti iukum alu ukumen si seh kal beratna."
21:1 I bas Rumah Pertoton iidah Jesus piga-piga kalak bayak namaken duit persembahen ku bas ingan persembahen. 21:2 IdahNa pe sekalak diberu si enggo mbalu si musil kal, namaken dua peser. 21:3 Jenari nina Jesus, "Kukataken man bandu maka si tuhuna buen persembahen diberu si enggo mbalu si musil e asangken kerina persembahen kalak si deban. 21:4 Sabap kalak si deban mere alu labo kurang i bas ia, tapi diberu e seh kal musilna; tapi amin bage pe iberekenna kerina si lit i bas ia." 21:5 Lit piga-piga kalak ncakapken kerna jilena Rumah Pertoton, si ihiasi alu batu-batu si mejile dingen erbage-bage persembahen si iendesken man Dibata. Nina Jesus, 21:6 "Kerina si iidahndu enda lit pagi masana maka lanai lit sada batu pe pagi tading i bas inganna; kerina pagi iruntuhken." 21:7 Nungkun ajar-ajar man Jesus nina, "O Guru, ndigan kin e jadi? Janah kai nge pagi tanda-tandana kejadin e?" 21:8 Erjabap Jesus, "Metengetlah gelah ola kam kena tipu. Sabap nterem pagi kalak reh i bas gelarKu nina, 'Aku kap Ia,' janah, 'Enggo ndeher waktuna.' Tapi ola ikutken ia. 21:9 Bage pe ola kam mbiar adi ibegindu kerna perang ras pemberontaken-pemberontaken. Kerina si e arus jadi, tapi labo berarti maka enggo seh ku kedungenna." 21:10 Tole nina Jesus, "Bangsa pagi ngelawan bangsa, kerajan ngelawan kerajan. 21:11 Ijapa pe terjadi pagi taneh linuren, kelihen ras penakit langket-langket. Lit pe pagi kejadin si mehantu ras tanda-tanda sengget i langit nari. 21:12 Ope denga jadi si enda kerina, kam pagi itangkap dingen isiksa. Kam pagi iendesken ku bas rumah pertoton guna icubai janah itamaken ku bas penjara. Kam pagi ibaba ku lebe-lebe raja ras ku lebe-lebe kalak si erkuasa erkite-kiteken Aku. 21:13 Enda pagi jadi kesempaten man bandu guna meritaken Berita Si Mehuli si i bas Dibata nari e. 21:14 E maka tetapkenlah i bas ukurndu, maka la atendu ndele kerna kai si man katanken guna mbela dirindu. 21:15 Aku pagi mereken man bandu jabapenna, ras kepentaren gelah la lit sekalak pe imbang-imbangndu ngasup ngelawan ntah nimbak kai si ikatakenndu e. 21:16 Kam pagi iendesken orang-tuandu, senina-seninandu, kade-kadendu ras teman-temanndu. Piga-piga i bas kam ibunuh pe pagi. 21:17 Kerina kalak e rate segat man bandu erkite-kiteken Aku. 21:18 Tapi labo bene selambar buk pe i bas takalndu nari. 21:19 Megenggenglah kam, sabap alu bage maka kam banci engkelini geluhndu." 21:20 "Adi idahndu pagi Jerusalem ikepung tentera, tentu ietehndu maka keruntuhenna enggo ndeher. 21:21 Asum si e pagi kalak si ringan i Judea arus kiam ku deleng-deleng; kalak si i kuta arus mengongsi janah kalak si i daraten kuta olanai ia bengket ku bas kuta. 21:22 Sabap wari e me wari pengukumen, gelah alu bage seh me rikutken si isuratken i bas Pustaka Si Badia. 21:23 Andiko, cilaka kal pernanden-pernanden si sangana mehuli kula ras si sangana pepinemken i bas paksa si e! Sabap reh me pagi kiniseran si mesangat ku doni enda janah ukumen Dibata nandangi bangsa enda. 21:24 Lit kalak si ibunuh alu pedang. Si debanna ibaba jadi tabanen ku kerina negeri. Jerusalem italuken kalak si la nandai Dibata seh pagi genep paksa si enggo itetapken Tuhan." 21:25 "Teridah me pagi tanda-tanda i bas matawari, bulan ras bintang-bintang. Bage pe kerina bangsa i babo doni enda bene ukurna dingen mbiar ia nandangi galumbang ras lawit si merawa. 21:26 Manusia pagi labuh perbahan biarna i bas ia nimai kai si jadi ku doni enda, sabap kuasa-kuasa langit pe mugur-ugur. 21:27 Sanga si e me pagi teridah Anak Manusia si isuruh Dibata reh i bas embun alu kemulian si mbelin dingen erdolat. 21:28 Adi si enda kerina enggo mulai jadi, kekekenlah janah jurgakken, sabap penebusenndu enggo ndeher." 21:29 Jenari ituriken Jesus man kalak e perumpaman enda, "Nehenlah batang ara bage pe batang kayu si deban. 21:30 Adi idahndu batang kayu e enggo ertunas, ietehndu pe maka musim lego enggo ndeher. 21:31 Bage pe adi idahndu pagi jadi kerina si Kukataken ndai, ingetlah, maka Kinirajan Dibata enggo ndeher. 21:32 Kerina si e pagi jadi ope denga mate kerina manusia. 21:33 Langit ras doni masap kap pagi tapi katangKu tetap rasa lalap." 21:34 "Jagalah bandu, gelah pusuhndu la iberati alu barang si erbahanca kam ketagih minem si erbahanca mabuk, ntah kearun ate kerna kegeluhen enda, seh maka erkiteken si e la kam ersikap sanga wari e rempet reh. 21:35 Sabap wari e rempet pagi reh bagi siding man kerina jelma ibelang-belang doni enda. 21:36 Erjagalah dingen tetap ertoto gelah kam pulah i bas kerina kejadin e, janah ngasup kam tedis i lebe-lebe Anak Manusia si isuruh Dibata." 21:37 Suari Jesus ngajar i bas Rumah Pertoton janah berngi lawes Ia ku daraten kuta, erberngi Ia i datas Uruk Seton. 21:38 Tep-tep wari lampas kerina kalak reh ndahi Ia ku Rumah Pertoton guna megiken pengajarenNa.
22:1 Wari Raya Roti la erragi si igelari Paskah enggo ndeher. 22:2 Imam-imam si mbelin ras guru-guru agama Jahudi ndarami dalan guna munuh Jesus, sabap mbiar ia kalak si nterem. 22:3 Judas, si igelari Iskariot sekalak i bas ajar-ajar si sepuluh dua kalak, ikuasai Iblis ukurna. 22:4 E maka lawes ia, jenari arih-arih ia ras imam-imam si mbelin bage pe pengulu Rumah Pertoton kerna kengasupenna ndudurken Jesus man kalak e. 22:5 Meriah kal ukur kalak e janah erpadan ia mereken duit man Judas Iskariot. 22:6 Judas setuju kerna si e. Jenari idaramina me kesempaten si cocok guna ndudurken Jesus alu la ieteh kalak si nterem. 22:7 Seh me Wari Raya Roti si La Itama Ragi. I bas wari e kerina kalak nggeleh biri-biri guna man-man Paskah. 22:8 Isuruh Jesus Petrus ras Johanes nina, "To pesikap pangan Paskah man banta gelah ras-ras kita man." 22:9 Nungkun kalak e nina, "I ja atendu isikapken kami?" 22:10 Erjabap Jesus, "Begiken! Seh kenca kam kari i bas kuta ah, jumpa kam ras sekalak dilaki si maba lau tare guci. Ikutken ia ku rumah. 22:11 Sungkun kari si mada rumah e, Guru nungkun bandu, 'Kamar si apai banci Kupake ras ajar-ajarKu guna man-man Paskah?' 22:12 E maka ituduhkenna kari man bandu sada kamar si mbas i datas loteng, si enggo sikap. I je me sikapken kerina si perlu guna ngerayaken Paskah." 22:13 E maka lawes me Petrus ras Johanes. Idapetina kerina bagi si enggo ikataken Jesus man bana, jenari isikapkenna pangan guna Paskah e. 22:14 Kenca seh jam man, kundul Jesus ras rasul-rasul e. 22:15 Nina Jesus man kalak e, "Mesikel kal aku ngerayaken Paskah ras kam ope denga Aku ngenanami kiniseran. 22:16 Sabap lanai bo pagi kupan e seh Wari Paskah si tuhu-tuhu i bas Kinirajan Dibata." 22:17 Jenari ibuat Jesus calung, itotokenNa ngataken bujur man Dibata, e maka nina man ajar-ajarNa, "Buat enda, jenari bagi-bagiken i bas kam kerina. 22:18 Sabap lanai bo pagi kuinem anggur enda, genduari nari seh ngayak kerehen Kinirajan Dibata." 22:19 Kenca bage ibuatNa roti, ertoto Ia ngataken bujur man Dibata. Icepik-cepikNa roti e jenari iberekenNa man rasul-rasul nina, "Enda me dagingKu si ibereken man gunandu. Bahanlah bagenda guna peringet-ingeten man bangKu." 22:20 Bage me pe, kenca elah man e ibereken Jesus calung nina, "Arah calung enda Dibata erbahan Padan si Mbaru si iesahken alu darehKu si mambur man gunandu. 22:21 Tapi, nehenlah! Sekalak si ndudurken Aku i bas meja enda ras Aku. 22:22 Sabap Anak Manusia si isuruh Dibata la banci lang mate bagi si enggo itetapken Dibata. Tapi andiko, cilaka me kalak si ndudurkenca e!" 22:23 Jenari mulai me ajar-ajar e sisungkun-sungkunen ntah ise kin i bas ia si atena erbahan bage. 22:24 Turah me perubaten i bas ajar-ajar kerna ise kin si mbelinna i bas ia. 22:25 Nina Jesus kalak e, "Raja bangsa-bangsa si la nandai Dibata erbahan mesui ate bangsana janah si erkuasa ibahan gelarna 'Teman Kalak si nterem.' 22:26 Tapi kam ola bage; kalak si mbelinna i bas kam arus jadi si kitikna, janah si atena jadi peminpin arus bali ras suruh-suruhen. 22:27 Apai kin ergan kalak si kundul man asangken kalak si ngelai ia? Tentu kalak si kundul. Tapi Aku i tengah-tengahndu bagi kalak si ngelai kap. 22:28 Kam enggo ras Aku nggengken kerina kiniseranKu. 22:29 Bali ras Bapa enggo mereken man bangKu Kinirajan e, Kubereken ka pe man bandu Kinirajan e. 22:30 Banci kam ikut man ras minem ras Aku i bas KinirajanKu. Janah man bandu ibereken pagi ingan kundul jadi pemerentah guna ngadili suku Israel si sepuluh dua." 22:31 "O, Simon, Simon! Begikenlah! Iblis enggo iijinken ncubai kam kerina bagi kalak si miari gandum. 22:32 Tapi enggo Kutotoken kam Simon, gelah kinitekenndu ola nimpet. Janah adi enggo kam jera, pegegehilah senina-seninandu gelah tetap kinitekenna." 22:33 Ngaloi Petrus, "O Tuhan, aku enggo pang ku bas penjara ntah pe mate ras Kam." 22:34 Ngaloi Jesus, "O Petrus, Kukataken man bandu: Ope tekuak manuk enggo ipersokendu Aku telu kali." 22:35 Tole nina Jesus man ajar-ajarNa, "Asum Kusuruh kam mbaru enda lawes alu la maba dompet, gajut-gajut ntah sepatu, lit kin si kurangenndu tupung e?" 22:36 Erjabap kalak e, "La lit kai pe si kurang." Nina Jesus, "Tapi genduari ise lit dompetna ntah gajut-gajutna, babalah. Bage pe ise si langa lit pedangna, idayakennalah uisna guna nukur pedang. 22:37 Kukataken man bandu maka i bas Pustaka Si Badia lit tersurat 'Ia iperseri ras kalak jahat' la baci la jadi man Bangku. Sabap si tersurat i bas Pustaka Si Badia kerna Aku sangana terjadi." 22:38 Nina ajar-ajar, "O Tuhan! Enda dua pedang." Ngaloi Jesus, "Enggo me bias." 22:39 Kenca bage itadingken Jesus kuta e. Bagi biasana lawes Ia ku Uruk Seton ras ajar-ajarNa. 22:40 Kenca seh i bas ingan e nina man ajar-ajarNa, "Ertotolah gelah ola kam kena percuban." 22:41 Jenari iserapken Jesus baNa i bas ajar-ajar e nari, dauhna asa gegeh mbenterken batu. I je erjimpuh Ia dingen ertoto, 22:42 nina, "O Bapa, adi banci pedauh min calung kiniseran enda i bas Aku nari. Tapi labo peratenKu, peratenNdulah jadi." 22:43 Teridah me man baNa sekalak malekat i Surga nari si pegegehi Ia. 22:44 Perbahan bage getemna pusuhNa, e maka reh gegehna Ia erbebe i bas pertotonNa seh maka panasNa naktaken ku taneh bagi taktak dareh. 22:45 Kenca dung Ia ertoto mulihken Ia ndahi ajar-ajarNa. IdapetiNa ajar-ajar e tunduh perbahan cedasa atena. 22:46 Jenari nina Jesus man kalak e, "Engkai maka kam tunduh? Kekeken janah ertotolah gelah ola kam kena percuban." 22:47 Sanga Jesus ngerana denga, reh sada rombongen kalak nterem. Judas, sekalak i bas ajar-ajar si sepuluh dua kalak, mabai rombongen e. Ideheri Judas e Jesus jenari iemana. 22:48 Tapi nina Jesus, "O, Judas, alu ema enda kin kam ndudurken Anak Manusia si isuruh Dibata?" 22:49 Asum idah ajar-ajar ras Jesus kai si nandangi jadi nina man Jesus, "O Tuhan, ilawan kami ia alu pedang enda?" 22:50 Jenari sekalak ajar-ajar e minter ngelawan sekalak suruh-suruhen Imam si Mbelin seh maka retap cupingna si arah kemuhen. 22:51 Tapi nina Jesus, "Olanai." Jenari idadap Jesus cuping kalak ndai jenari ipepalemNa. 22:52 E maka ngerana Jesus man imam-imam si mbelin, pengulu Rumah Pertoton ras peminpin-peminpin Jahudi si reh ku Ia nina, "Iakapndu kin Aku enda sekalak pengerampok maka reh kam maba pedang ras perpalu? 22:53 Tep-tep wari Aku ras kam i bas Rumah Pertoton janah labo Aku itangkapndu. Tapi enda me paksa si cocok man bandu, asum kuasa kegelapen erkuasa." 22:54 Jenari itangkap kalak si reh e Jesus janah ibabana ku rumah Imam si Mbelin. Petrus ngikutisa i dauh-dauh nari. 22:55 I tengah kesain lit kalak pegara api janah kundul kalak e i kelewetna cudu. Petrus pe ku je kundul. 22:56 Sekalak juak-juak diberu ngidah Petrus kundul i deher api e. Ipepayona kal jenari nina, "Ia pe teman Jesus kap!" 22:57 Tapi merso Petrus nina ngaloi, "O bibi, la kutandai pe Ia!" 22:58 La ndekahsa kenca si e, lit ka kalak si deban ngidah ia janah nina, "Kam pe temanNa kap!" Tapi ngaloi Petrus, "Lang teman, aku labo!" 22:59 Kira-kira sada jam kenca si e, lit kalak si deban ngerana alu tegas nina, "Enggo pasti ia pe pengikutNa, sabap ia pe kalak Galilea!" 22:60 Tapi ngaloi Petrus, "La kueteh kai si ikatakenndu e!" Asum Petrus ngerana denga minter tekuak manuk. 22:61 Jenari itulihken Tuhan kempak Petrus. Inget Petrus pe maka enggo ikataken Tuhan man bana, "Ope denga tekuak manuk i bas berngi enda, enggo ipersokenndu Aku telu kali." 22:62 E maka lawes Petrus ndarat janah tangis ia perbahan ceda atena. 22:63 Kalak si erjaga nggombang-gombangi Jesus dingen mekpeki Ia. 22:64 Itutupina ayo Jesus jenari nina, "Kataken, ise si mekpek Kam?" 22:65 Melala denga pe cekurak si deban ibelaskenna man Jesus. 22:66 Kenca terang wari pulung me pertua-pertua kalak Jahudi, imam-imam si mbelin ras guru-guru agama. Jenari ibabana Jesus ku lebe-lebe Pengadilen Agama. 22:67 Nina kalak e, "Kataken man kami, Kam kin Mesias si ipadanken Dibata?" Erjabap Jesus, "Adi Kukataken pe man bandu, labo kam tek. 22:68 Janah adi Kusungkun pe kam, labo ka ijabapndu. 22:69 Tapi mulai genduari nari Anak Manusia si isuruh Dibata kundul arah kemuhen Dibata si Mada Kuasa." 22:70 Nina kalak ndai kerina, "Dage, Kam kin Anak Dibata?" Erjabap Jesus, "Bagi katandu e me!" 22:71 Jenari nina kalak e, "Kita lanai perlu saksi! Enggo si begi kai si ikatakenNa."
23:1 Jenari tedis kerina anggota sidang e. Ibabana Jesus ngadap man Pilatus. 23:2 Iadukenna Jesus nina, "Enggo tangkas man kami uga pemabaiNa bangsa kami papak. Iajuk-ajukna kalak gelah ola nggalar pajak man Pemerentah Roma janah ikatakenNa maka Ia kap Kristus, Raja e." 23:3 Nungkun Pilatus man Jesus nina, "Kam kin Raja kalak Jahudi?" Erjabap Jesus, "Bagi katandu e me!" 23:4 Jenari nina Pilatus man imam-imam si mbelin ras kalak si nterem, "La lit ku dat kesalahen kai pe i bas Ia." 23:5 Tapi igegehi kalak ndai ngatakenca, "Iajuk-ajukNa kerina rayat taneh Jahudi alu pengajarenNa. Ibenakenna i Galilea janah genduari enggo seh ku jenda." 23:6 Kenca ibegi Pilatus si e, nungkun ia nina, "Kalak Galilea kin Ia?" 23:7 Kenca ietehna maka Jesus i taneh si ikuasai Herodes nari, e maka isuruhna Jesus ngadap man Herodes. Paksa si e Herodes pe i Jerusalem. 23:8 Asum idah Herodes Jesus meriah kal ukurna. Sabap ndekah me ibegina berita kerna Jesus dingen mesikel ia ngidahsa. Ngarap pe ia ngidah Jesus erbahan tanda-tanda sengget. 23:9 E maka melala penungkunenna man Jesus, tapi sengkebabah ranan pe la ijabap Jesus. 23:10 Paksa si e pe, tedis ku lebe imam-imam si mbelin ras guru-guru agama kalak Jahudi. Alu merawa-rawa ikatakenna pengadunna nandangi Jesus. 23:11 E maka Herodes ras tentera-tenterana mulai nggombang-gombangi dingen ngisak-ngisakken Jesus. Ipakekenna baju si mehaga man bana jenari isuruhna mulih ku Pilatus. 23:12 Mulai i bas wari si ndai enggo erteman Herodes ras Pilatus. Ope denga si e la ia meriah. 23:13 Kenca bage ipepulung Pilatus imam-imam si mbelin ras peminpin-peminpin bage pe kalak si nterem. 23:14 Nina man kalak e, "Enggo ibabandu Ia ngadap man bangku janah ikatakenndu maka iajariNa bangsa enda papak. Genduari enggo Ia kuperiksa i lebe-lebendu, tapi la lit kudat salahNa bagi si ikatakenndu e. 23:15 Herodes pe la lit idatna salahNa, e maka isuruhna Ia mulihken man banta. Si tuhuna labo lit salahNa si sue ras ukumen mate. 23:16 Perbahan si e, iligasi saja me Ia jenari ibebasken." 23:17 I bas tep-tep Wari Raya Paskah, Pilatus arus mulahi sekalak kalak tahanen man kalak si nterem. 23:18 Nina kalak si nterem e alu megang, "Bunuh Ia! Pulahi Barabas man kami!" ( 23:19 Barabas enda ipenjaraken asum ia ikut i bas pemberontaken ras pembunuhen si jadi i bas kuta e.) 23:20 Ngerana ka Pilatus alu megang man kalak si nterem sabap atena mulahi Jesus. 23:21 Tapi ngaloi kalak si nterem alu sora si megang nina, "Pakukenlah Ia! Pakukenlah Ia ku kayu persilang!" 23:22 Petelu kaliken ngerana Pilatus nina, "Kejahaten kai kin si tuhuna enggo ibahanNa? La kap lit kudat salahNa sue ras ukumen mate. Iligasi saja me Ia jenari ipulahi." 23:23 Tapi igegehi kalak e asa gangna sorana gelah Jesus ipakuken ku kayu persilang. Dungna menang me kalak si nterem e. 23:24 E maka iputusken Pilatus ukumen Jesus bagi pemindon kalak si nterem. 23:25 Ipulahina sekalak si ipindoken kalak si nterem, e me kalak si ipenjaraken erkiteken pemberontaken ras pembunuhen. Tapi Jesus iendeskenna man kalak si nterem gelah ibahanna bagi ate-atena. 23:26 Jesus ibaba ku darat kota. I tengah dalan simbel ras sekalak dilaki si atena bengket ku kota e, gelarna Simon i Kireni nari. Itangkapna jenari ipaksana mersan kayu persilang Jesus janah erdalan ngikutken Ia. 23:27 Nterem kal jelma si ngarakken Jesus. I bas si e lit piga-piga diberu; itangisi diberu e me Jesus. 23:28 Itulihken Jesus kempak diberu e, jenari nina, "O diberu-diberu Jerusalem! Ola tangisindu Aku, tapi tangisilah bandu ras anak-anakndu. 23:29 Sabap reh me pagi warina maka ikataken kalak, 'Sangap kal diberu si la ertuah, si la pernah mupus dingen si la pernah pepinemken!' 23:30 Paksa si e pe ikataken kalak man deleng-deleng, 'Runtuhlah, dabuhi min kami!', janah man uruk-uruk nina, 'Tamburi min kami!' 23:31 Sabap adi bagenda me perbahanen kalak nandangi kayu si meratah, apai denga ka nandangi kayu si kerah?" 23:32 Lit pe dua kalak nari ibaba kalak e, e me kalak si jahat guna iukum mate raduken Jesus. 23:33 Kenca seh kalak e i bas ingan si igelari "Takal-takal", ipakukenna Jesus ku kayu persilang. Penjahat si dua kalak e pe ipakukenna ka, sekalak arah kemuhen Jesus, sekalak arah kawesNa. 23:34 Nina Jesus ertoto, "O Bapa, alemi min kalak enda, sabap la iangkana kai si ibahanna enda." Ibagiken kalak e uis Jesus alu erbahan tikam tanduk. 23:35 Kalak si nterem tedis janahna ngenehen-ngenehen, janah peminpin-peminpin kalak Jahudi nokoh-nokohi Jesus nina, "Kalak si deban isampatiNa; pelepaslah Ia mulahi baNa adi Ia kin Mesias si ipadanken Dibata e." 23:36 Perajurit-perajurit pe nokoh-nokohi Jesus; ideherina Ia janah iberekenna anggur macem man baNa, 23:37 jenari nina, "Adi Kam kin Raja kalak Jahudi, pulahilah baNdu!" 23:38 I babo Jesus lit isuratken, "Enda me Raja kalak Jahudi." 23:39 Sekalak i bas penjahat si ipakuken i je igombangina Jesus, nina, "Ma Kam kin Mesias si ipadanken Dibata e? Pulahilah baNdu dingen pulahi pe kami!" 23:40 Tapi ipandang sekalak nari ia nina, "La kin kam mbiar Dibata? Kita seri ukumenta ras Ia. 23:41 Adi kita ma bujur nge bagenda, sabap kita iukum sue nge ras perbahanenta. Tapi Ia labo lit perbahanenNa si salah." 23:42 Jenari nina man Jesus, "O Jesus, inget aku asum Kam reh pagi jadi Raja!" 23:43 Ngaloi Jesus man bana, "Kukataken man bandu maka sendah me kam ras Aku i Pardis." 23:44 Kira-kira pukul sepuluh dua matawari lanai ersinalsal janah gelap kerina negeri e seh pukul telu. 23:45 Kire-kire Rumah Pertoton merigat erbelah dua. 23:46 Serko Jesus alu megang soraNa nina, "O Bapa, ku bas tanNdu Kuendesken tendingKu!" Kenca ikatakenNa si e, mate Ia. 23:47 Asum idah kepala perajurit kai si enggo jadi ipujina Dibata nina, "Tuhu-tuhu Ia la ersalah!" 23:48 Kalak si nterem si pulung i je ngenehen-ngenehen, mulih ku rumahna nemtemi bana kenca idahna kai si enggo jadi e. 23:49 Kerina teman-teman Jesus, ikut pe diberu-diberu si enggo ngikutken Ia i Galilea nari, i dauh-dauh nari ia tedis ngenehen kejadin e kerina. 23:50-51 Lit i je sekalak gelarna Jusup. Asalna i kuta Arimatea i taneh Judea nari. Ia kalak bujur dingen ihamati kalak si nimai kerehen Kinirajan Dibata. Aminna gia anggota Sidang Mahkamah Agama, tapi ia la setuju keputusen ras tindaken Mahkamah e. 23:52 Lawes ia ngadap man Pilatus guna mindo mait Jesus. 23:53 Kenca ipesusurna mait e ibalutina alu uis mbentar. Jenari itamakenna ku bas kuburen si itukak i bas lingling batu kuburen si langa pernah ipake. 23:54 Wari e wari Jumat; jam persikapen wari Sabat nandangi seh. 23:55 Diberu-diberu si ngikutken Jesus i Galilea nari e ikut ras Jusup. Iperdiatekenna kuburen e, janah idahna pe kuga mait Jesus itamaken ku bas kuburen e. 23:56 Kenca bage mulih ia ku rumah nikapken rempah-rempah si merim ras minak wangi guna mait Jesus. I bas wari Sabat la ia banci erdahin bagi si iperentahken Undang-undang.
24:1 Erpagi-pagi si lampas i bas wari Minggu, berkat diberu-diberu e ku kuburen. Ibabana rempah-rempah si merim si enggo isikapkenna. 24:2 Idapetina batu si nutupi lubang kuburen e enggo igulingken. 24:3 E maka bengket ia ku bas; tapi lanai i je mait Tuhan Jesus. 24:4 Asum kalak e tedis i je dingen mamang atena, rempet tedis i deherna dua kalak dilaki, uisna terang ersinalsal. 24:5 Mbiar kal diberu-diberu e, e maka nembah mungkuk ia seh ku taneh. Tapi nina si dua kalak e man bana, "Engkai maka idaramindu Kalak si nggeluh i tengah-tengah kalak si enggo mate? 24:6 Ia lanai i jenda; Ia enggo ipekeke. Ingetlah kai si enggo ikatakenNa man bandu asum Ia i Galilea denga, e me, 24:7 'Anak Manusia si isuruh Dibata la banci lang iendesken man kalak perdosa, ipakuken ku kayu persilang janah i bas wari peteluken nggeluh mulihi.' " 24:8 Kenca bage i inget diberu-diberu e kai si enggo ikataken Jesus. 24:9 Jenari mulihken ia i kuburen nari e maka iturikenna kerina kejadin enda man ajar-ajar si sepuluh sada bage pe man ajar-ajar si deban. 24:10 Gelar diberu-diberu e: Maria Magdalena, Johana ras Maria nande Jakup. Bage pe diberu-diberu si deban si ikut ras kalak enda nurikenca man rasul-rasul e. 24:11 Tapi la tek rasul-rasul e. Iakapna maka kai si ikataken diberu-diberu e guak saja. 24:12 Tapi keke Petrus jenari kiam ia ku kuburen. Asum itungkirna ku bas, uis mbentar balut mait e nari ngenca idahna, lain si e kai pe la lit. E maka mulih ia ku rumah dingen mamang atena kerna kai si enggo jadi e. 24:13 I bas wari e pe lit dua kalak ajar-ajar Jesus lawes ku sada kuta. Gelar kuta e Emaus. Kuta e kira-kira sepuluh sada kilometer i Jerusalem nari. 24:14 I tengah dalan ercakap-cakap ia duana kerna kerina si enggo jadi e. 24:15 Asum ia ercakap-cakap, reh me Jesus ndeheri ia dingen erdalan ras. 24:16 Idah si dua kalak e nge Jesus, tapi la itandaina. 24:17 Nina Jesus man bana duana, "Kerna kai nge si icakapkenndu janah erdalan e?" Jengang kalak e janah teridah i bas ayona maka ceda atena. 24:18 Sekalak i bas ia gelarna Keleopas ngaloi man Jesus nina, "Ntah kam kal nge ngenca kalak pertandang i Jerusalem si la meteh kerna kejadin-kejadin i bas wari-wari si perpudi enda?" 24:19 "Kai kin e?" nina Jesus nungkun. Erjabap kalak e, "Kerna kai si enggo jadi man Jesus kalak Nasaret e. Ia sekalak nabi janah erkuasa i bas kata ras perbahanen subuk iakap Dibata bage pe kerina manusia. 24:20 Tapi Ia enggo idudurken imam-imam si mbelin ras kalak si erkuasa gelah iukum mate. Ia ipakuken ku kayu persilang. 24:21 Pada hal enggo iarapken kami maka Ia me si mbebasken bangsa Israel. Tapi i babo si e kerina sendah me petelu wariken kenca kejadin e. 24:22 Lit ka pe piga-piga teman kami si diberu si erbahanca kami sengget. Ndai erpagi-pagi si lampas lawes ia ku kuburen, 24:23 tapi lanai lit i je idapetina mait Jesus. Jenari mulihken ia janah iturikenna maka ia enggo ngidah malekat-malekat. Ikataken malekat-malekat e man bana maka Jesus nggeluh kap. 24:24 Kenca bage piga-piga kalak teman kami lawes ku kuburen. Idapetina payo kal bagi si ikataken diberu-diberu e. Tapi la idahna Jesus." 24:25 Jenari nina Jesus man si dua kalak e, "Bodoh kal kam tuhu dingen mesera kal iakapndu tek nandangi kai si ikataken nabi-nabi. 24:26 Ma kin Mesias si ipadanken Dibata e arus ngenanami kiniseran e janah alu bage bengket kemulianNa?" 24:27 Jenari iterangken Jesus man si dua kalak e kai si enggo isuratken i bas Pustaka Si Badia kerna Ia, mulai i bas kitap-kitap Musa ras kerina kitap nabi-nabi. 24:28 Kenca seh kalak e ku kuta si man dahinna, Jesus tempa-tempa nerusken perdalanenNa. 24:29 Tapi si dua kalak e mindo alu meseksek nina, "I jendalah kita sendah, sabap wari enggo ben nandangi gelap me." E maka bengket Jesus ku rumah janah tading Ia ras kalak ndai. 24:30 Ibuat Jesus roti, ikatakenNa bujur man Dibata jenari icepik-cepikNa janah iberekenNa man kalak e. 24:31 Kenca bage minter terang pengidah si dua kalak e janah itandaina Jesus. Tapi i je ka minter lanai iidahna Jesus. 24:32 Nina si dua kalak e sapih-sapih ia, "Ma malem kal tuhu ateta dingen ergiah-giah ukurta asum Ia ngerana ras kita i gedang-gedang dalan dingen iterangkenNa man banta kerna isi Pustaka Si Badia?" 24:33 Keke ia duana dingen minter mulihken ku Jerusalem. I je idapetina ajar-ajar si sepuluh sada kalak pulung ras teman-temanna si deban. 24:34 Nina si pulung e ngalo-ngalo ia, "Tuhu-tuhu Tuhan enggo nggeluh mulihken! Enggo icidahkenNa baNa man Simon." 24:35 Jenari si dua kalak e pe nuriken, kai si enggo jadi i tengah dalan janah kuga ia enggo nandai Tuhan asum icepik-cepikNa roti. 24:36 Asum kalak ndai ercakap-cakap kerna kejadin e, rempet tedis Tuhan i tengah-tengahna janah nina, "Mejuah-juah man bandu." 24:37 Sengget dingen mbiar kal kalak e. Iakapna maka ia ngidah begu. 24:38 Tapi nina Tuhan man bana, "Engkai maka kam mbiar? Engkai maka turah ukur la tetap i bas kam? 24:39 Nehenlah tanKu ras nahengKu. Perdiateken, ma idahndu Aku nge enda. Dadaplah Aku gelah ietehndu maka adi begu labo lit daging ras tulanna bagi iidahndu lit i bas Aku." 24:40 Asum Ia ngerana e icidahkenNa tanNa ras naheNa man kalak e. 24:41 Tapi langa denga kalak e tek perbahan ia dem alu keriahen dingen mamang denga atena; e maka nungkun Tuhan nina, "Lit pangan i bas kam?" 24:42 Ibereken kalak ndai man baNa sada potong ikan si enggo ipanggang. 24:43 Ibuat Jesus ikan e jenari ipanNa i lebe-lebe kalak ndai. 24:44 Jenari nina Tuhan man kalak ndai, "Kai si enggo jadi enda enggo Kukataken nai man bandu asum Aku ras kam denga e me: Kerina si isuratken kerna Aku i bas Undang-undang Musa ras surat nabi-nabi bage pe i bas Masmur enggo jadi kap." 24:45 Kenca bage ibuka Tuhan perukuren kalak e gelah iangkana si tersurat i bas Pustaka Si Badia. 24:46 Nina man kalak ndai, "Lit kap tersurat maka Mesias si ipadanken Dibata e arus ngenanami kiniseran, janah i bas wari si peteluken arus keke i bas si mate nari. 24:47 Bage pe i bas gelarNa berita kerna jera ras pengalemi dosa arus ipeseh man kerina bangsa, ibenaken i Jerusalem nari. 24:48 Kam me jadi saksi si enda kerina. 24:49 Janah Aku jine nuruhsa man bandu kai si enggo ipadanken BapangKu. Tapi arus itimaindu i bas kuta enda seh nusur kuasa i datas nari man bandu." 24:50 Jenari ibabai Jesus kalak e ku darat kuta, seh ku Betani. I je iangkatNa tanNa janah ipasu-pasuNa kalak e. 24:51 Asum Ia masu-masu, sirang Ia ras kalak e; iangkat Ia ku Surga. 24:52 Nembah erjimpuh kalak e man baNa, jenari meriah kal ukurna mulih ku Jerusalem. 24:53 Gedang-gedang wari ipujina Dibata i bas Rumah Pertoton.
1:1 Ope denga ijadiken Dibata doni enda, Kata e enggo lit. Kata e ras Dibata, janah Kata e Dibata. 1:2 Mula-mulana nari Kata e ras Dibata. 1:3 Arah Kata e ijadiken Dibata kerina si nasa lit; la lit sada pe i bas kerina si enggo jadi e ijadiken la arah Kata e. 1:4 Kata e me ulu kegeluhen, janah kegeluhen e maba terang man manusia. 1:5 Terang e ersinalsal i bas gelap janah la tertaluken gelap e terang ndai. 1:6 Isuruh Dibata persuruhenNa, gelarna Johanes. 1:7 Ia reh guna meritaken kerna terang e man manusia, gelah kerina manusia megiken dingen tek man berita e. 1:8 Labo si Johanes terang e; ia reh meritaken kerna terang e. 1:9 Enda me terang si tuhu-tuhu; terang e sangana reh ku doni enda nerangi kerina manusia. 1:10 Kata e enggo i bas doni enda. Doni enda ijadiken Dibata arah Ia, tapi la itandai doni enda Ia. 1:11 Reh Ia ndahi negeriNa jine, tapi bangsaNa e la ngaloken Ia. 1:12 Amin bage gia lit nge kalak si ngaloken Ia dingen tek man baNa; man kalak si bage iberekenNa hak jadi anak-anak Dibata. 1:13 Kalak e jadi anak-anak Dibata labo tubuh arah dareh manusia bagi biasana, ntah tubuh erkiteken sekalak dilaki, tapi Dibata kap Bapana. 1:14 Kata e enggo jadi manusia, janah Ia ringan i tengah-tengahta. Enggo idah kami kemulianNa si mbelin, e me kemulian si ibereken Dibata man baNa erkiteken Ia Anak Dibata si Tonggal. Anak e encidahken lias ate ras kai si benar kerna Bapa e. 1:15 Kerna Ia me si iberitaken Johanes, asum nina, "Ia me katangku asum ningku, 'Pudin Ia reh asangken aku, tapi belinen Ia asa aku, sabap ope denga aku tubuh pe Ia enggo lit.' " 1:16 Erkiteken Ia dem perkuah ate, ipasu-pasuNa kita kerina, iberekenNa man banta lias ate si la erkeri-kerin. 1:17 Dibata mereken undang-undang arah Musa tapi lias ate ras kebenaren kerna Dibata reh arah Jesus Kristus. 1:18 Ise pe labo pernah ngidah Dibata. Tapi Anak si Tonggal, si bali ras Dibata, dingen si rembak ras Bapa, Ia me si enggo mpetandaken Dibata. 1:19 Piga-piga kalak Jahudi si erkuasa i Jerusalem nuruh imam-imam ras suku Lewi njumpai Johanes guna nehken penungkunen, "Ise kin kam si tuhuna?" 1:20 Johanes la nggit erbual. Ngaku ia alu terus terang nina ngaloi, "Aku labo Mesias si ipadanken Dibata." 1:21 Nina ka kalak ndai, "Adi bage, ise dage kam si tuhuna? Kam kin Elia?" Erjabap Johanes, "Lang, labo aku." Nungkun tole kalak ndai nina, "Kam kin Nabi si itimai kalak e?" Erjabap Johanes, "Lang." 1:22 Nina ka kalak ndai, "Kataken dage ise kin kam si tuhuna, sabap kami arus ngelapur man si nuruh kami. Turikenlah kerna dirindu." 1:23 Ngaloi Johanes alu make ayat-ayat i bas kitap Nabi Jesaya nari nina, "Aku e me, 'Sora si erlebuh i taneh si mesawang; bahanlah dalan pinter gelah Ia mentas!' " 1:24 Kalak si nungkun enda ndai bekas persuruhen kalak Parisi kap. 1:25 Nungkun ka ia man Johanes nina, "Adi labo kam Mesias si ipadanken Dibata ntah Elia, bage pe labo kam Nabi si itimai kami, ngkai maka kam mperidiken?" 1:26 Erjabap Johanes, "Aku mperidiken alu lau; tapi i tengah-tengahndu nari reh me Sekalak si la itandaindu. 1:27 Ia reh pudin asa aku, tapi ngosari tinali sepatuNa pe aku la metunggung." 1:28 Kerina si enda jadi i Betani, arah timur Lau Jordan. I Lau Jordan e me Johanes mperidiken kalak. 1:29 Pepagina idah Johanes reh Jesus ndahi ia. E maka nina Johanes, "Nehenlah, enda me Anak Biri-biri Dibata, si ngangkut dosa doni enda! 1:30 Kerna Ia me katangku asum ningku, 'Pudin Ia reh asa aku, tapi belinen Ia asa aku, sabap ope denga aku tubuh pe Ia enggo lit.' 1:31 Aku pe nai labo kutandai Ia tapi guna mpetandaken Ia man kalak Israel, reh aku mperidiken alu lau." 1:32-33 Tole nina Johanes, "Aku pe nai labo kueteh ise Ia. Tapi Dibata si nuruh aku mperidiken alu lau, ngataken man bangku nina, 'Adi idahndu pagi Kesah Si Badia nusur janah ringan i bas sekalak manusia, Ia me si mperidiken alu Kesah Si Badia.' Enggo kuidah Kesah Si Badia e nusur i Surga nari bagi nderapati janah ringan i bas Ia. 1:34 Kukataken man bandu maka Ia kap Anak Dibata." 1:35 Pepagina Johanes ras dua kalak ajar-ajarna tedis i bas inganna si biasa. 1:36 Asum idah Johanes mentas Jesus, ngerana ia nina, "Enda me anak Biri-biri Dibata." 1:37 Megi katana e, ajar-ajar Johanes si dua kalak e lawes ngikutken Jesus. 1:38 Asum itulihken Jesus ku pudi idahNa si dua kalak e, e maka nina, "Kai daramenndu?" Erjabap kalak ndai, "O Rabbi, i ja rumahNdu?" (I bas cakap Heber, Rabbi ertina: "Guru".) 1:39 Ngaloi Jesus, "Marilah gelah idahNdu." Iikutken kalak e Jesus e maka enggo ietehna i ja rumah Jesus. I bas wari si ndai asa ben ia i je. (Paksa si e kira-kira jam empat karaben.) 1:40 Sekalak i bas si ngikutken Jesus e gelarna Andereas sembuyak Simon Petrus. 1:41 Minter ijumpai Andereas si Simon Petrus jenari nina, "Kami enggo jumpa ras Mesias, Mesias si ipadanken Dibata." (Mesias i bas cakap Heber bali ras Kristus i bas cakap Junani.) 1:42 Jenari itaruhkenna Simon ndahi Jesus. Ipernehen Jesus ia, jenari nina, "Kam kap si Simon anak Johanes, tapi pagi kam igelari Kepas." (Kepas cakap Heber bali ras Petrus i bas cakap Junani; ertina: batu.) 1:43 Pepagina berkat Jesus ku Galilea. I Galilea jumpa Ia ras Pilipus. Nina Jesus man bana, "Mari, ikutken Aku." 1:44 (Pilipus asalna i Betsaida nari, e me kuta Andereas rasPetrus.) 1:45 Jenari ijumpai Pilipus si Natanael nina, "Kami enggo jumpa ras Ia, si isingetken Musa i bas Kitap Undang-undang bage pe si isingetken i bas kitap nabi-nabi. Gelarna Jesus; Ia anak Jusup i Nasaret nari." 1:46 Tapi nina Natanael, "Banci kin si mehuli reh i Nasaret nari?" Ngaloi Pilipus, "Marilah sinehen." 1:47 Asum idah Jesus reh Natanael ndahi Ia, ngerana Ia kerna Natanael nina, "Enda me kalak Israel si asli; la lit si palsu i bas ia!" 1:48 Megi si e nungkun Natanael nina, "Kuga penandaindu aku?" Erjabap Jesus, "Ope denga kam idilo Pilipus, enggo kuidah kam i teruh batang ara." 1:49 Ngaloi Natanael, "O Guru, Kam kap Anak Dibata! Kam me Raja kalak Israel!" 1:50 Nina Jesus man bana, "Perbahan Kukataken Kuidah kam i teruh batang ara, maka kam tek man bangKu? Pagin idahndu me kejadin-kejadin si belinen asangken si enda." 1:51 Jenari nina Jesus man kalak e, "Idahndu me pagi talang Surga jenari nangkih-nusur malekat-malekat Dibata ndahi Anak Manusia si isuruh Dibata."
2:1 Dua wari kenca si e lit kerja erdemu-bayu i kuta Kana i daerah Galilea. Nande Jesus ikut i bas kerja e. 2:2 Jesus pe ras ajar-ajarNa iundang ku kerja e. 2:3 Asum enggo keri lau anggur nina nande Jesus man Jesus, "Enggo keri lau anggur kalak si erkerja enda." 2:4 Ngaloi Jesus, "O nande, labo man aturenkenndu kai si man bahanenKu. PaksangKu langa seh." 2:5 Tapi nina nande Jesus man serayan e, "Ikutken kai si ikatakenNa." 2:6 I je lit isikapken enem guci guna keperlun erburih rikutken adat Jahudi. Isi tep-tep guci lit kira-kira 100 liter. 2:7 Nina Jesus man serayan e, "Isi guci e alu lau seh dem." E maka idemi kalak ndai guci e. 2:8 Jenari nina Jesus man kalak e, "Genduari jaruk lau e sitik jenari baba man sukut i bas kerja enda." 2:9 E maka ibaba kalak ndai lau e man sukut kerja e, jenari inanamina lau si enggo salih jadi anggur e. (La ietehna i ja nari rehna; tapi serayan si njaruksa metehsa.) E maka idilo sukut e si empo, 2:10 jenari nina man bana, "Biasana anggur si mehulina nge lebe ielaken kalak, janah kenca puas temue e minem, ielaken anggur si biasa. Tapi kam seh asa genduari lit i bas kam anggur si mehulina!" 2:11 Enda me tanda sengget si pemena ibahan Jesus i kuta Kana i daerah Galilea. IcidahkenNa kuasaNa si mbelin e maka ajar-ajarNa tek man baNa. 2:12 Kenca bage lawes Jesus ras nandeNa, sembuyak-sembuyakNa bage pe ajar-ajarNa ku Kapernaum, janah i je me ia kerina ringan piga-piga wari dekahna. 2:13 Kenca Wari Raya Paskah kalak Jahudi enggo ndeher, lawes Jesus ku Jerusalem. 2:14 I bas Rumah Pertoton idapetiNa kalak erbinaga lembu, biri-biri ras nderapati. Lit pe i je kalak kundul si dahinna nukari duit. 2:15 Jesus erbahan cambuk si idandan i bas nali nari. Alu e iligasiNa gelah ndarat asuh-asuhen e kerina i bas Rumah Peroton nari: subuk lembu, biri-biri. ItunggalingkenNa meja-meja kalak si nukari duit, seh maka merap duitna e kerina. 2:16 Man kalak si erbinaga nderapati nina Jesus, "Angkat ndarat barang-barangndu e! Ola bahan rumah BapangKu jadi ingan erbinaga!" 2:17 Perbahan si e inget ajar-ajar maka lit tersurat i bas Pustaka Si Badia, "O Dibata, keleng-ateKu nandangi rumahNdu, ngutkut desken api." 2:18 Jenari kalak Jahudi si erkuasa ngelawan Jesus nina, "Tanda sengget kai banci ibahanNdu guna nuduhken man kami maka lit hakNdu erbahan si enda kerina?" 2:19 Erjabap Jesus, "Runtuhkenlah rumah Dibata enda, maka i bas telu wari Kupajekken ka mulihi." 2:20 Ngaloi kalak e, "IpajekkenNdu ateNdu mulihi i bas telu wari? La mungkin, sabap empat puluh enem tahun nai dekahna majekken Rumah Dibata enda!" 2:21 Tapi Rumah Dibata si ikataken Jesus, e me kulaNa. 2:22 E maka kenca Jesus nggeluh mulihi, iinget ajar-ajar kai si ikatakenNa enda; janah tek ajar-ajar e kai si isuratken i bas Pustaka Si Badia bage pe kai si enggo ikataken Jesus. 2:23 Paksa Jesus i Jerusalem denga tupung Wari Raya Paskah, nterem kalak tek man baNa erkiteken tanda-tanda sengget si ibahanNa. 2:24 Tapi Jesus la tek nandangi kalak e, sabap kerina manusia tangkas itandai Jesus. 2:25 Labo perlu kalak nuriken kerna manusia man Jesus sabap ieteh Jesus nge kai si lit i bas pusuh manusia.
3:1 Lit me sekalak peminpin agama kalak Jahudi, gelarna Nikodemus; ia kalak Parisi. 3:2 I bas sada berngi idahina Jesus nina, "O Guru, ieteh kami maka Kam me Guru si isuruh Dibata. Sabap ise pe labo ngasup erbahan tanda-tanda sengget bagi si ibahanNdu e, adi la kin Dibata ras ia." 3:3 Ngaloi Jesus, "Kukataken man bandu: Ise pe labo nggejap Dibata Rajana adi la kin ia tubuh pedua kaliken." 3:4 Nungkun Nikodemus man Jesus, "Banci kin kalak si enggo mbelin tubuh pedua kaliken? Lanai ia banci bengket ku bas bertin nandena jenari tubuh pedua kaliken!" 3:5 Erjabap Jesus, "Kukataken man bandu: Si tuhuna ise pe labo banci bengket ku bas Kinirajan Dibata adi la kin ia tubuh i bas lau dingen Kesah Dibata nari. 3:6 Manusia tubuh i bas orang tuana nari secara daging, tapi i bas Kesah Dibata ia tubuh secara pertendin. 3:7 E maka ola atendu mamang adi ningku, 'Kerina kam arus tubuh pedua kaliken.' 3:8 Angin rembus ku ja atena, janah ibegindu sorana, tapi la ietehndu i ja nari rehna ntah ku ja perlawesna. Bage me pe kalak si tubuh i bas Kesah Dibata." 3:9 Nungkun Nikodemus, "Banci kin jadi bage?" 3:10 Erjabap Jesus, "Kam kap guru kalak Israel, la kin ietehndu kerna si enda? 3:11 Kukataken man bandu: Si tuhuna kami ngerana kerna kai si ieteh kami dingen ituriken kami kerna si enggo idah kami, tapi sekalak pe kam la nggit tek. 3:12 Kerna barang-barang doni enda pe aku ngerana la kam tek, apai denga ka kerna Surga? 3:13 Ise pe labo pernah ku Surga, selain Anak Manusia si nusur i Surga nari. 3:14 Bagi ipeganjangken Musa nipe tembaga i gurun pasir, bage pe Anak Manusia si isuruh Dibata ipeganjangken, 3:15 gelah kerina kalak si tek man baNa ngaloken kegeluhen si tuhu-tuhu si la erkeri-kerin. 3:16 Sabab bage pengkelengi Dibata doni enda, e maka iberekenNa AnakNa Sitonggal, gelah ola bene isie pe si tek man Bana, tapi gelah dat kegeluhen si tuhu-tuhu si la erkeri-kerin. 3:17 Sabap Dibata nuruh AnakNa ku doni enda labo jadi Hakim tapi jadi Singkelini manusia. 3:18 Ise tek man Anak Dibata e la iukum; tapi ise la tek, enggo kena ukumen, sabap la ia tek man Anak Dibata si Tonggal. 3:19 Ukumen e: Terang enggo reh ku doni enda, tapi ngenan ate manusia si gelap e asa terang, sabap jahat perbahanenna. 3:20 Sabap kalak jahat la atena ngena terang e, dingen la ia nggit ku terang e gelah ola teridah perbahanenna si jahat e. 3:21 Tapi kalak si ndalanken si ngena ate Dibata reh ia ku terang e, gelah i je teridah maka kai si ibahanna e sue ras kai si ngena ate Dibata." 3:22 Kenca bage lawes Jesus ras ajar-ajarNa ku daerah Judea; ndekah sitik Ia i je ras ajar-ajarNa janah mperidiken kalak si tek. 3:23 Johanes Peridiken pe mperidiken i Ainon, deherken kuta Salim, sabap i je melala lau. Nterem kalak reh ndahi ia gelah iperidiken. 3:24 (Paksa si e Johanes langa ipenjaraken.) 3:25 Piga-piga kalak ajar-ajar Johanes rubat ras kalak Jahudi kerna aturen pembersihen rikutken agamana. 3:26 E maka idahi kalak enda Johanes jenari nina, "O Guru, ingetndu nge si ras kam mbaru enda i lepar Lau Jordan dingen si iturikenndu man kami kerna Ia? Genduari Ia pe mperidiken janah nterem kalak reh ndahi Ia." 3:27 Erjabap Johanes, "Kai pe labo idat kalak adi la kin Dibata merekenca man bana. 3:28 Kam jadi saksingku maka pernah nge kukataken, 'Labo aku Mesias si ipadanken Dibata e, tapi aku isuruh Dibata leben asa Ia.' 3:29 Penganten si dilaki kap empuna penganten si diberu. Si naruh si dilaki tedis dingen megi-megi; janah meriah ukurna asum ibegina sora si empo e. Bage me aku genduari; tuhu-tuhu meriah kal ukurku. 3:30 Ia me arus lebih ipehaga janah aku lebih ipekitik." 3:31 Ia si reh i Surga nari belinen asa ise pe. Si reh i doni nari, doni empuna. Ia ngerana kerna si lit i doni. Tapi Ia, si reh i Surga nari i babo kerina si nasa lit. 3:32 IturikenNa kerna kai si enggo idahNa ras kai si enggo ibegiNa tapi ise pe la tek nandangi si ikatakenNa. 3:33 Ise tek nandangi si ikatakenNa e, iakukenna maka Dibata benar kap. 3:34 Sabap persuruhen Dibata nge si nehken kata Dibata, erkiteken ia dem Kesah Dibata. 3:35 Bapa ngkelengi AnakNa, janah kerina iendesken Bapa i teruh kuasa Anak e. 3:36 Ise tek man Anak e ialokenna me kegeluhen si tuhu-tuhu si la erkeri-kerin. Tapi si ngelawan Anak e asa ndigan pe la ngaloken kegeluhen si rasa lalap e, janah ia lalap i teruh ukumen Dibata.
4:1 Kalak Parisi megi berita maka teremen jelma si idat ras iperidiken Jesus asangken iperidiken Johanes. 4:2 (Si tuhuna labo sekalak jelma pe iperidiken Jesus, tapiajar-ajarNa nge mperidikenca.) 4:3 Kenca ibegi Jesus kai si icakapken kalak, itadingkenNa daerah Judea, mulih Ia ku daerah Galilea. 4:4 I bas perdalanenNa, la banci la ibentasiNa daerah Samaria. 4:5 Seh me Jesus ku sada kuta i daerah Samaria, gelarna Sihar. Kuta e deher ras juma si ibereken Jakup nai man anakna Jusup. 4:6-8 I bas juma e lit sumur si igelari sumur Jakup. Perbahan latih Jesus erdalan, e maka kundul Ia i tepi sumur e. Paksa e wari enggo ciger; ajar-ajar Jesus lawes ku kuta nukur nakan. Asum Jesus sisada i je, reh sekalak diberu bangsa Samaria ku sumur e ngelegi lau. Nina Jesus man bana, "Enta sitik lau ena gelah Kuinem." 4:9 Ngaloi diberu e, "Kam kalak Jahudi janah aku kalak Samaria; ngkai maka ipindoNdu lau inemen man bangku?" (Biasana kalak Jahudi la nggit make kai pe si enggo ipake kalak Samaria.) 4:10 Nina Jesus, "Adi ietehndu kerna pemere Dibata, janah adi itandaindu ise si mindo lau man bandu enda, tentu ipindondu man baNa lau, jenari iberekenNa man bandu lau si mereken kegeluhen." 4:11 Ngaloi diberu e, "O Tuan, mbages kap sumur enda, janah timbaNdu pe la lit. I ja ibuatNdu lau si mereken kegeluhen e? 4:12 Nini kami Jakup nai mereken sumur enda man kami. I jenda nari me lau inemenna, inemen anak-anakna ras asuh-asuhenna. Ma labo kin ikatakenNdu maka belinen Kam asangken nini kami Jakup e?" 4:13 Erjabap Jesus, "Kalak si nginem lau enda muas denga. 4:14 Tapi kalak si nginem lau si Kubereken man bana, lanai ia muas seh rasa lalap. Sabap lau si Kubereken e jadi sumbul si erburak-burak i bas ia dingen mereken kegeluhen si tuhu-tuhu si la erkeri-kerin." 4:15 Ngaloi diberu e, "O Tuan, bereken min lau e man bangku gelah olanai aku muas, janah lanai perlu aku ku jenda muat lau." 4:16 Nina Jesus, "To legi perbulangenndu, ras kam ku jenda." 4:17 Ngaloi diberu e, "La lit perbulangenku." E maka nina Jesus, "Tuhu bagi si ikatakenndu e, la lit perbulangenndu. 4:18 Sabap kam enggo lima kali erjabu janah dilaki si ras kam genduari e pe si tuhuna labo perbulangenndu. Payo kal katandu e." 4:19 Ngaloi diberu e, "O Tuan, nabi kepeken kam. 4:20 Nini-nini kami i das uruk ah nembah Dibata, tapi nini kalak Jahudi i Jerusalem me inganna ersembah man Dibata." 4:21 Nina Jesus man bana, "O bibi, teklah kam man bangKu. Reh me pagi paksana maka lanai kalak i deleng ah nembah Dibata bage pe lanai i Jerusalem. 4:22 Kam kalak Samaria si tuhuna la ietehndu ise si isembahndu, tapi kami kalak Jahudi ieteh kami ise si isembah kami, sabap Si Engkelini si ipadanken Dibata e reh arah kalak Jahudi. 4:23 Tapi reh me paksana, janah si tuhuna enggo seh pe, i ja arah Kesah Si Badia manusia ersembah man Dibata alu payo. 4:24 Dibata Kesah kap, e maka arah Kesah e ngenca maka banci manusia nembah Dibata alu payo." 4:25 Ngaloi diberu e man Jesus, "Kueteh maka Mesias si ipadanken Dibata, si igelari Kristus, nandangi reh me. Janah adi reh Ia, kerinana pagi ipetangkasNa man banta." 4:26 Nina Jesus man bana, "Aku, si ngerana ras kam enda kap Si Engkelini si ipadanken Dibata e." 4:27 Paksa si e enggo reh mulihken ajar-ajar Jesus. Mamang kal atena sabap idapetina Jesus ngerana ras sekalak diberu. Tapi sekalak pe ia la nungkun man diberu e, "Kai atendu?", ntah nungkun man Jesus, "Engkai maka Kam ngerana ras ia?" 4:28 Kenca bage lawes diberu e ku kuta itadingkenna ingan launa ndai, jenari nina man anak kuta, 4:29 "Marilah sinehen kalak si enggo nuriken kerina lagu langkahku. Banci jadi Ia me Mesias si ipadanken Dibata e." 4:30 E maka berkat anak kuta e ndahi Jesus. 4:31 Paksa si e ajar-ajar ngiahken Jesus man nina, "O Guru, man kita!" 4:32 Tapi ngaloi Jesus, "Lit kap panganKu si la ietehndu." 4:33 E maka sisungkun-sungkunen ajar-ajar e nina, "Lit kin ndai kalak naruhken nakan man baNa?" 4:34 Jenari nina Jesus, "PanganKu e me kap ngikutken peraten si nuruh Aku, dingen ndungi dahin si iberekenNa man bangKu. 4:35 Ikatakenndu: Empat bulan nari enggo rani. Tapi nehenlah ku juma-juma; page enggo megersing i bas juma e guna iperani! 4:36 Kalak si mperanisa ngaloken upah janah ipepulungna asilna guna kegeluhen si tuhu-tuhu si la erkeri-kerin, gelah si merdang ras si rani ras-ras ermeriah ukur. 4:37 Tuhu me bagi si ikataken i bas kuan-kuan, 'Lain si merdang, lain si peranisa.' 4:38 Kusuruh kam rani i juma si la kam ndahisa; kalak si deban i je erdahin janah kam si mpepulung ulihna latih." 4:39 Nterem kalak Samaria i bas kuta e tek man Jesus erkiteken nina diberu e, "IturikenNa man bangku kerina si enggo pernah kubahan." 4:40 E maka kenca jumpa kalak Samaria e ras Jesus, ipindokenna gelah ola lebe Jesus lawes. Perbahan si e dua wari dekahna Jesus i kuta kalak Samaria e. 4:41 Kenca Jesus ngajar reh teremna pe kalak si tek. 4:42 Jenari nina kalak e man diberu ndai, "Kami enggo tek genduari, labo erkiteken kai si ikatakenndu, tapi erkiteken kami jine enggo megi pengajarenNa, janah ieteh kami maka tuhu-tuhu me Ia Si Engkelini doni enda." 4:43 Kenca dua wari Jesus i bas kuta e berkat Ia ku Galilea. 4:44 Jesus enggo pernah ngataken, "Sekalak nabi labo meherga i bas kutana." 4:45 Tapi kenca seh Jesus i Galilea, ialo-alo kalak Ia alu meriah ukur, sabap asum Wari Raya Paskah i Jerusalem enggo idah kalak kerina kai si ibahan Jesus. 4:46 Alu bage mulihken Jesus ku kuta Kana i daerah Galilea, kuta si pernah i je ibahanNa lau jadi anggur. I bas kuta e lit sekalak menteri raja, anakna sakit i Kapernaum. 4:47 Kenca ibegina berita maka Jesus enggo reh i Judea nari ku Galilea, e maka ijumpaina Jesus, janah ipindokenna gelah berkat Jesus ku Kapernaum mpepalem anakna si menam mate e. 4:48 Tapi nina Jesus man bana, "Adi langa kin idahndu tanda-tanda sengget si mbelin labo kam tek." 4:49 Ngaloi menteri raja e, "O Tuan, berkatlah kita minter ope denga mate anakku." 4:50 Nina Jesus man bana, "To mulih kam, malem nge anakndu e." Tek menteri e kai si ikataken Jesus, e maka lawes ia. 4:51 I tengah dalan jumpa ia ras juak-juakna. Nina juak-juakna e man bana, "Anakndu enggo malem." 4:52 Isungkunna juak-juakna e ntah jam piga anakna e mulai malem. Erjabap juak-juak e, "Nderbih kira-kira jam sada suari enggo malem penakitna." 4:53 Jenari i inget menteri e maka i bas jam e me nina Jesus man bana, "Malem nge anakndu e." E maka kerina ia ras keluargana tek man Jesus. 4:54 Enda me tanda sengget si peduaken ibahan Jesus i Galilea. Tanda sengget enda ibahanNa kenca Ia mulih i Judea nari.
5:1 Jenari mulihken Jesus ku Jerusalem guna ngerayaken wari raya kalak Jahudi. 5:2 I Jerusalem, deherken "Pintu Gerbang Biri-biri", lit sada kolam si igelari Betesda i bas cakap Heber. Kolam e lit lima serambina. 5:3 I bas serambi e nterem kalak si penakiten medem; lit si pentang, lit si cempang bage pe lit si mate serapen. Itimaina lau e erburak, 5:4 sabap lit paksana lau e erburak ibahan malekat Tuhan si nusur ku bas kolam e. Kalak si tangtangna bengket ku bas kolam e asum launa erburak malem penakitna, amin sakit kai pe ia. Bage me pengakap kalak. 5:5 Lit pe i je sekalak si enggo telu puluh waluh tahun dekahna ia penakiten. 5:6 Idah Jesus ia ampar i je janah ietehNa maka enggo ndekah ia sakit. E maka nina Jesus man bana, "Atendu kin gelah malem penakitndu?" 5:7 Ngaloi si penakiten e, "O Tuan, la kap lit kalak si namaken aku ku bas kolam e asum erburak launa; asum kupala-palai ku bas, enggo lit kalak si deban leben asa aku." 5:8 Nina Jesus man bana, "Kekekenlah, angkat amakndu jenari dalanken!" 5:9 Paksa si e pe minter malem penakitna. Iangkatna amakna jenari erdalan ia. Si enda jadi asum wari Sabat kalak Jahudi. 5:10 E maka nina kalak Jahudi si erkuasa man kalak si enggo malem e, "Wari Sabat kap sekalenda. Rikutken Undang-undangta la banci ibabandu amakndu e." 5:11 Ngaloi ia, "Nina kalak si enggo pepalem aku ndai, 'Angkat amakndu jenari dalanken.' " 5:12 Jenari nungkun kalak Jahudi e, "Ise kin si nuruh kam e?" 5:13 Tapi la itandai kalak si enggo malem e ise si mpepalem ia, sabap nterem kal i je jelma, janah Jesus enggo lawes arah tengah jelma si nterem e. 5:14 La ndekahsa kenca si e, jumpa Jesus ras ia i Rumah Pertoton. Nina Jesus man bana, "Genduari kam enggo malem; olanai bahan si la ngena ate Dibata, gelah ola jadi man bandu keleken asa si nggona." 5:15 Jenari lawes kalak si enggo malem e, iberitakenna man penguasa-penguasa kalak Jahudi maka Jesus kap si mpepalem ia. 5:16 Perbahan si e idarami kalak Jahudi e dalan guna pesega-sega Jesus, sabap ipepalem Jesus kalak si penakiten i bas wari Sabat. 5:17 Tapi nina Jesus man kalak Jahudi e, "BapangKu erdahin kap lalap; e maka Aku pe arus erdahin." 5:18 Megi kata Jesus enda, ergegehna kalak Jahudi ndarami dalan munuh Jesus; sabap iakap kalak Jahudi labo saja undang-undang wari Sabat ilanggar Jesus, tapi ikataken Jesus pe maka Dibata e BapaNa, alu bage ipeseri Jesus bana ras Dibata. 5:19 Jenari ngerana Jesus man kalak Jahudi e, "Kukataken man bandu: Situhuna kai si ibahan Anak e labo rikutken sura-suraNa. Kai i idahNa ibahan BapaNa, e nge si ibahanNa. 5:20 Perbahan Bapa e erkeleng ate nandangi AnakNa, icidahkenNa man Anak e asa kai si ibahanNa. IcidahkenNa me pe man Anak e si terbeliden, gelah reh mamangna atendu kerina. 5:21 Bagi enggo ipegeluh Dibata mulihi kalak si enggo mate jenari iberekenNa kegeluhen man bana, bage me pe ibereken Anak e kegeluhen man kalak si ndalanken peratenNa. 5:22 Bapa e labo ngadili ise pe. Tapi kuasa guna ngadili enggo iberekenNa man AnakNa, 5:23 gelah kerina kalak mpehaga Anak e, bagi mpehaga Bapa. Ise la mpehaga Anak e, Bapa si nuruh Anak e pe la ipehagana." 5:24 "Kukataken man bandu maka kalak si megiken katangKu, dingen tek man si nuruh Aku, ialokenna kap kegeluhen si tuhu-tuhu si la erkeri-kerin. Ia lanai iukum tapi enggo pulah i bas kematen nari janah ndatken kegeluhen. 5:25 Kukataken man bandu: Tuhu-tuhu reh me paksana janah enggo seh pe; ibegi si mate me sora Anak Dibata, janah si megisa e nggeluh me. 5:26 Bagi enggo ibereken Bapa kegeluhen man kerina si nasa nggeluh, bage me enggo ibereken Bapa man Anak e kuasa mereken kegeluhen. 5:27 Bage pe ibereken Dibata man Anak e kuasa guna ngadili sabap Anak Manusia e me si isuruh Dibata. 5:28 Ola atendu mamang kerna si enda; sabap reh me paksana maka kerina kalak mate si i bas kuburen megi sora Anak e, 5:29 jenari ndarat me ia kerina i bas kuburen e nari. Kalak si enggo erbahan si mehuli ipekeke guna nggeluh; tapi si jahat perbahanenna ipekeke guna iukum." 5:30 Tole nina Jesus, "Aku la ngasup erbahan kai pe alu gegehKu sisada; Kuadili kalak rikutken perentah Dibata, e maka rembang tengah nge keputusenKu, sabap labo Kubahan bagi ate-ateKu, tapi rikutken peraten si nuruh Aku nge." 5:31 "Adi Aku nurikenca kerna diringKu, la kap teraloken kai si Kuturiken e. 5:32 Tapi lit kap kalak si deban si erberita kerna Aku, janah Kueteh maka kai si iberitakenna e tuhu. 5:33 Enggo isuruhndu persuruhenndu njumpai Johanes, janah enggo ituriken Johanes si tuhuna kerna Aku, 5:34 Aku labo perlu manusia naksiken kerna Aku, tapi Kukataken enda man bandu gelah kam terkelin. 5:35 Johanes bali kap ras lampu si gara dingen ersinalsal, janah enggo meriah ukurndu kentisik ngaloken sinalsalna e. 5:36 Tapi i bas Aku lit saksi belinen asa si isaksiken Johanes, e me: Dahin si Kudahi si ibereken Bapa e man bangKu. Arah dahin si Kudahi, teridah kap maka Dibata nge si nuruh Aku. 5:37 Janah Bapa si nuruh Aku e pe enggo ersaksi kerna Aku. Langa pernah ibegindu soraNa ntah idahndu ayoNa. 5:38 La ibegindu kataNa, sabap la kam tek man si isuruhNa. 5:39 Ipelajarindu Pustaka Si Badia sabap iakapndu idatndu me kegeluhen si tuhu-tuhu si la erkeri-kerin i bas Pustaka Si Badia nari. Situhuna Pustaka Si Badia e pe erberita kerna Aku nge! 5:40 Tapi la kam nggit ndahi Aku guna ngaloken kegeluhen e." 5:41 "Labo Kuarapken manusia muji Aku. 5:42 Sabap Kutandai nge kam kerina; Kueteh nge maka i bas ukurndu labo atendu keleng Dibata. 5:43 Aku reh i bas kuasa BapangKu, tapi la Aku ialokenndu. Tapi adi kalak si deban reh i bas kuasana jine ialokenndu ia. 5:44 Perbahan kam ersura-sura gelah ipujiken temanndu manusia, la lit sura-surandu gelah ipujiken Dibata si tuhu-tuhu, e maka la kam banci tek man bangKu. 5:45 Amin bage gia ola iakapndu Aku si ngaduken kam man BapangKu. Tapi Musa si iarap-arapkenndu e nge pagi si ngaduken kam kerina. 5:46 Adi tek kin kam man si Musa, tek nge pe kam man bangKu, sabap Musa pe nuratken kerna Aku nge. 5:47 Tapi adi la kam tek kerna kai si isuratken Musa, e maka la kam tek kerna kai si Kukataken."
6:1 Kenca bage mulihken Jesus ku lepar Dano Galilea (igelari pe Dano Tiberias). 6:2 Nterem kalak ngikutken Ia sabap enggo idah kalak e tanda-tanda sengget si ibahanNa pepalem kalak penakiten. 6:3 Jenari inangkihi Jesus sada uruk; i je kundul Ia ras ajar-ajarNa. 6:4 Paksa si ndai lanai ndekah Wari Raya Paskah kalak Jahudi. 6:5 Ipernehen Jesus kelewetNa janah idahNa nterem jelma rehen ndahi Ia. E maka nina Jesus man Pilipus, "I ja ndia banci situkur pangan guna kalak si nterem enda?" 6:6 (Ikataken Jesus bagenda guna nguji Pilipus; si tuhuna ietehJesus nge kai si man bahanenNa.) 6:7 Ngaloi Pilipus, "Amin tersitik pe kalak si nterem ibere man, dua ratus duit pirak pe la bias man penukur pangan e." 6:8 Ngerana ajar-ajar Jesus si deban, e me Andereas sembuyak Simon Petrus nina, 6:9 "I jenda lit sekalak danak-danak; i bas ia lit lima ngkibul roti ras dua ikan. Tapi lit kin gunana man kalak si bagenda teremna?" 6:10 Jenari nina Jesus man ajar-ajarNa, "Suruhlah kalak si nterem e kundul." (I bas ingan e mbur dukutna.) E maka kundul kerina kalak si nterem e; dilaki saja teremna lit lima ribu kalak. 6:11 Ibuat Jesus roti e, ertoto Ia ngataken bujur man Dibata jenari ielakenNa roti e man kalak si nterem. Ikan e pe bage ka nge ibahan Jesus, janah kerina kalak si nterem e man asa besurna. 6:12 Kenca besur ia kerina nina Jesus man ajar-ajarNa, "Pepulung kerina si iba; ola lit sitik pe terbuang." 6:13 E maka ipepulung ajar-ajar kerina si iba e. Lit sepuluh dua sumpit buena iba roti si lima ngkibul ndai. 6:14 Ngidah tanda-tanda sengget si ibahan Jesus e nina kalak si nterem, "Si tuhuna enda me nabi si enggo ipadanken Dibata reh ku doni enda!" 6:15 Ieteh Jesus maka ate kalak si nterem e maksa Ia jadi raja. E maka lawes Jesus sisada i bas ingan e nari. 6:16 Kenca ben wari lawes ajar-ajar Jesus ku dano. 6:17 Idatasina perahu jenari berkat ia ngepari dano e ku Kapernaum. Seh mbages berngi, Jesus langa reh ndapeti ajar-ajar e. 6:18 Paksa si e angin meter rembus janah lau pe ergalumbang. 6:19 Kenca kira-kira telu ntah empat kilometer ajar-ajar e engkayuh perahuna, iidahna Jesus erdalan i babo lau ndeheri perahu e. Mbiar kal ajar-ajar e. 6:20 Tapi nina Jesus man bana, "Ola kam mbiar, Aku nge enda!" 6:21 E maka alu meriah ukur ialokenna Jesus ku das perahuna. Janah minter seh perahu e ku tepi, ku ingan si itujuna. 6:22 Pepagina kenca Jesus mere man lima ribu kalak, sada ngenca perahu i tepi dano idah kalak si nterem e. Asum berkat ajar-ajar tare perahu ieteh kalak si nterem maka Jesus la ikut berkat. 6:23 Paksa e reh piga-piga perahu i Tiberias nari, jenari ngadi deher ingan kalak si nterem man roti kenca Jesus ngataken bujur. 6:24 Tapi kenca idah kalak si nterem maka Jesus la i bas perahu e janah ajar-ajarNa pe lang, e maka idatasina perahu e jenari berkat ia ku Kapernaum ndarami Jesus. 6:25 Kenca jumpa kalak si nterem e ras Jesus i lepar dano, nungkun ia man Jesus, "O Guru, ndiganai Kam ku jenda?" 6:26 Ngaloi Jesus, "Kukataken man bandu: Si tuhuna idaramindu Aku labo perbahan iangkandu tanda-tanda sengget si Kubahan e, tapi perbahan enggo ipanndu roti e seh besur. 6:27 Ola cariken pangan si banci melengas. Tapi daramilah pangan si banci mereken kegeluhen si tuhu-tuhu si la erkeri-kerin. Pangan si enda me pagi si ibereken Anak Manusia si isuruh Dibata e man bandu, sabap Dibata Bapa enggo mereken tanda pengesahen man Anak Manusia e." 6:28 Jenari nungkun ka kalak ndai, "Kai dage arus ibahan kami guna ndahiken dahin Dibata?" 6:29 Erjabap Jesus, "Si sentudu ras peraten Dibata ibahanndu, e me: Teklah kam man baNa si isuruh Dibata." 6:30 Nina kalak e, "Tuduhkenlah man kami tanda sengget si mbelin gelah tek kami man baNdu. Bahanlah kai ateNdu. 6:31 Nini kami nai ipanna manna i gurun pasir, bagi lit tersurat i bas Pustaka Si Badia, 'IberekenNa man kalak e roti si reh i Surga nari.' " 6:32 Ngaloi Jesus, "Kukataken man bandu: Si tuhuna kai si ibereken Musa man bandu, labo roti i Surga nari. BapangKu nge si mereken Roti si tuhu-tuhu si reh i Surga nari. 6:33 Sabap Roti si ibereken BapangKu, e me Ia si reh i Surga nari dingen si mereken kegeluhen man doni enda." 6:34 Nina kalak ndai, "O Tuan, bereken min lalap roti e man kami." 6:35 Ngaloi Jesus, "Aku kap Roti si mereken kegeluhen. Ise reh ndahi Aku, lanai ia melihe; ise tek man bangKu lanai ia muas. 6:36 Enggo Kukataken man bandu maka enggo idahndu Aku, tapi la kam tek man bangKu. 6:37 Kerina manusia si iendesken BapangKu man bangKu reh nge pagi ndahi Aku. Janah ise pe si reh ndahi Aku labo Kutulak. 6:38 Sabap Aku enggo reh i Surga nari guna nehken peraten si nuruh Aku, labo guna nehken peratenKu. 6:39 Sura-sura si Nuruh Aku e, e me gelah sada pe la bene si enggo iendeskenNa man bangKu e; tapi gelah i bas wari pendungi pagi Kupekeke ia kerina i bas si mate nari. 6:40 Sabap sura-sura BapangKu, e me kap: gelah kerina si ngidah Anak e dingen si tek man baNa ngaloken kegeluhen si tuhu-tuhu si la erkeri-kerin, janah i bas wari pendungi pagi Kupekeke ia i bas si mate nari." 6:41 Perbahan ikataken Jesus maka Ia me Roti si reh i Surga nari, jungut-jungut kalak Jahudi. 6:42 Nina, "Ma ia kin Jesus anak Jusup? Sitandai kap nandena ras bapana. Engkai ka maka ikatakenna Ia reh i Surga nari?" 6:43 Perbahan si e nina Jesus, "Ola kam jungut-jungut. 6:44 Labo ise pe ngasup reh ndahi Aku adi la kin itaruhken Bapa si nuruh Aku ia man bangKu; janah i bas wari pendungi pagi Kupekeke ia i bas si mate nari. 6:45 I bas kitap nabi-nabi lit tersurat, 'Kerina pagi manusia e iajari Dibata.' Kerina si megi dingen ngaloken pengajaren Bapa reh kap ndahi Aku. 6:46 Labo ertina maka enggo lit kalak ngidah Bapa; tapi Ia si reh i bas Dibata nari ngenca enggo ngidah Bapa e. 6:47 Ingetlah! Kalak si tek ngenca ngaloken kegeluhen si tuhu-tuhu si la erkeri-kerin. 6:48 Aku kap Roti si mereken kegeluhen. 6:49 Ninindu nai, ipanna manna i gurun pasir, tapi mate ka nge ia. 6:50 Tapi Roti si reh i Surga nari la bage. Kalak si man Roti enda la pagi mate. 6:51 Aku me Roti si mereken kegeluhen si reh i Surga nari. Kalak si man Roti enda nggeluh me rasa lalap. Roti si Kubereken e, e me kap dagingKu, si Kuendesken gelah terkelin doni enda." 6:52 Megi kata Jesus enda rubat kalak Jahudi sapih-sapih ia. Nina, "Kuga nge ibahanna mereken dagingna gelah si pan?" 6:53 Nina Jesus man kalak e, "Kukataken man bandu: Adi la kin ipanndu daging Anak Manusia si isuruh Dibata e, janah la iinemndu darehNa, labo lit kegeluhen i bas kam. 6:54 Ise man dagingKu dingen nginem darehKu, ia me ngaloken kegeluhen si tuhu-tuhu si la erkeri-kerin, janah i bas wari pendungi pagi Kupekeke ia i bas si mate nari. 6:55 Sabap dagingKu me pangan si tuhu-tuhu janah darehKu me inemen si tuhu-tuhu. 6:56 Ise man dagingKu dingen nginem darehKu, ia nggeluh i bas Aku janah Aku pe nggeluh i bas ia. 6:57 Bagi Aku isuruh Bapa si nggeluh janah Aku nggeluh erkiteken Ia, bage me pe kalak si ipanna Aku, ia nggeluh erkiteken Aku. 6:58 Enda nge Roti si reh i Surga nari, labo bali ras roti si ipan ninindu nai. Ninindu si man roti nai, mate ka nge. Tapi si man Roti enda nggeluh me rasa lalap." 6:59 Kerina enda ikataken Jesus i Kapernaum asum Ia ngajar i rumah pertoton. 6:60 Megi kata Jesus e, nterem ajar-ajar Jesus ngerana nina, "PengajarenNa enda meserasa. Ise nge ngasup megikenca?" 6:61 Aminna la gia lit si nurikenca man baNa, ieteh Jesus nge maka nterem kalak jungut-jungut kerna Ia. E maka nina man kalak e, "Tondel kin ukurndu megi pengajarenKu enda? 6:62 Kuga ndia adi idahndu Anak Manusia si reh i Surga nari e mulihken nangkih ku inganna ndube? 6:63 Ingetlah! Si pegeluhken manusia e, Kesah Dibata kap. Gegeh manusia labo lit ertina. Kata si enggo Kukataken man bandu e rehna i bas Kesah Dibata nari. Kata e me si mereken kegeluhen man bandu. 6:64 Tapi lit piga-piga i bas kam la tek." (Tangtangna nari pe enggo iteh Jesus ise pagin si la tek man baNa janah ise si ndayaken Ia.) 6:65 Tole nina Jesus, "Perbahan si e Kukataken man bandu: Ise pe labo banci ndahi Aku adi la kin ipesikap Bapa e dalan man bana guna ndahi Aku." 6:66 Erkiteken pengajarenNa enda, nterem kalak nadingken Ia, lanai iikutkenna Jesus. 6:67 E maka nina Jesus man ajar-ajarNa si sepuluh dua kalak, "Kam pe itadingkenndu atendu Aku?" 6:68 Ngaloi Simon Petrus, "O Tuhan, kempak ise kami lawes? Katandu kap si mereken kegeluhen si tuhu-tuhu si la erkeri-kerin. 6:69 Genduari tuhu-tuhu kami tek maka Kam me si Badia si reh i bas Dibata nari." 6:70 Nina Jesus man ajar-ajarNa e, "Ma kin sepuluh dua kalak kam enggo Kupilih? Tapi sekalak i bas kam Iblis kap." 6:71 Maksud Jesus e me si Judas anak Simon Iskariot; sabap aminna gia Judas sekalak i bas ajar-ajar si sepuluh dua, idayakenna atena Jesus.
7:1 Kenca bage isiari Jesus daerah Galilea. I daerah Judea la Ia nggit niar-niar sabap kalak Jahudi si erkuasa i je ersura-sura munuh Ia. 7:2 Paksa si e lanai ndekah Wari Raya Sapo-sapo. 7:3 Perbahan si e nina senina-senina Jesus man baNa, "Tadingken ingan enda, laweslah ku daerah Judea gelah idah ajar-ajarNdu dahin si idahikenNdu. 7:4 Labo lit kalak erbuni-buni erdahin adi atena kin mpetandaken bana man doni enda. Kam enggo melala dahin idahikenNdu, bahanlah gelah kerina kalak i belang-belang doni metehsa." 7:5 (Senina-senina Jesus e pe langa bo tek man Jesus.) 7:6 E maka nina Jesus man bana, "Langa seh paksangKu. Tapi kam katawari pe lit kesempatenndu. 7:7 Kam labo segat ate doni enda, tapi Aku segat atena, sabap Kucidahken perbahanenna si jahat. 7:8 To, kam lah ku kerja e. Aku labo reh ku je sabap langa seh paksangKu." 7:9 Bage me nina Jesus man senina-seninaNa, jenari tading Ia i Galilea. 7:10 Kenca lawes senina-senina Jesus ku wari raya e, Jesus pe lawes ku je. La Ia terang-terangen lawes, tapi erbuni-buni. 7:11 Kalak Jahudi si erkuasa ndarami Jesus i bas kerja e. Nungkun ia nina, "I ja ndia Ia?" 7:12 Nterem kalak erkusik-kusik kerna Jesus. Lit si ngatakenca, "Ia kalak bujur kap." Tapi lit ka si ngatakenca, "Lang! Itokohina kap kalak si nterem!" 7:13 Tapi sada pe la pang terang-terangen encakapken Jesus sabap mbiar ia kalak Jahudi si erkuasa. 7:14 Kenca menam setengah acara perayan e erdalan, bengket Jesus ku Rumah Pertoton, jenari ibenakenNa ngajar. 7:15 Mamang kal ate kalak Jahudi si erkuasa ngidah Ia ngajar e. Nina, "I ja nari nge pemetehNa e kerina adi Ia labo pernah sekolah?" 7:16 Ngaloi Jesus, "Kai si Kuajarken e labo i bas Aku nari, tapi i bas Dibata si nuruh Aku nari nge. 7:17 Kalak si ndalanken peraten Dibata alu ukur meriah, ietehna nge ntah i bas Dibata nari ntah i bas Aku nari rehna pengajarenKu enda. 7:18 Kalak si ngajar rikutken pemetehna, iusahakenna nge gelah ia terpuji. Tapi kalak si ersura-sura gelah si nuruh ia terpuji, bujur kap, la lit si palsu i bas ia. 7:19 Ma ibereken Musa Undang-undang man bandu? Tapi sada pe la kam ngikutken Undang-undang e. Engkai maka ibunuhndu atendu Aku?" 7:20 Ngaloi kalak si nterem, "Setanen Kam! Ise kin atena munuh Kam?" 7:21 Nina Jesus man kalak si nterem e, "Sada perbahanen si mbelin enggo Kubahan, kerina kam kemamangen. 7:22 Perbahan isuruh Musa kam nunatken anakndu, i bas wari Sabat pe isunatkenndu ia. (Situhuna labo i bas Musa nari Undang-undang sunat e, tapi i bas nini-ninindu nari nge.) 7:23 Adi guna nehken Undang-undang si ibereken Musa banci kalak isunatkenndu i bas wari Sabat, ngkai maka kam merawa adi Kupepalem kalak si penakiten i bas wari Sabat? 7:24 Ola kin salahindu kalak arah si teridah saja, tapi bahanlah pertimbangen si bujur." 7:25 Piga-piga anak kota Jerusalem ngerana kerna Jesus nina, "Ma Ia kin si enggo isura-suraken peminpin-peminpinta ibunuh? 7:26 Nehenlah! Erate-ate Ia ngerana i lebe-lebe jelma si nterem janah ise pe la ngelawan Ia. Enggo kin tuhu-tuhu ieteh si erkuasa maka Ia me Mesias si ipadanken Dibata? 7:27 Aturna adi Mesias si ipadanken Dibata e reh, la sekalak pe meteh i ja nari rehna. Tapi Ia, kerina kita meteh i ja nari rehna." 7:28 Asum Jesus ngajar i bas Rumah Pertoton e, nungkun Ia alu sora si megang nina, "Tuhu-tuhu kin itandaindu Aku? Ietehndu kin i ja nari Aku? Labo erkiteken peratenKu Aku reh. Si nuruh Aku e bujur kap; janah la Ia itandaindu. 7:29 Tapi Aku, Kutandai Ia, sabap Ia me si nuruh Aku, janah Aku reh i bas Ia nari." 7:30 Perbahan si e ersura-sura kalak Jahudi si erkuasa nangkap Jesus, tapi sada pe la pang sabap langa seh paksana. 7:31 Tapi i bas kalak si nterem e lit piga-piga kalak tek man Jesus. Nina, "Adi reh Mesias si ipadanken Dibata e, ngasup kin Ia erbahan tanda-tanda sengget buen asa si ibahan Jesus enda?" 7:32 Kalak si nterem erkusik-kusik kerna Jesus. Si enda ibegi kalak Parisi, e maka arih-arih ia ras imam-imam si mbelin; jenari isuruhna piga-piga kalak si njaga Rumah Pertoton e nangkap Jesus. 7:33 Tapi nina Jesus, "Kentisik nari ngenca Aku ras kam. Kenca bage mulih Aku ndahi si nuruh Aku. 7:34 Idaramindu pagi Aku, tapi la idatndu, sabap labo kam banci ku ingan si Kudahi e." 7:35 E maka sisungkun-sungkunen kalak Jahudi si erkuasa e sapih-sapih ia nina, "Ku ja kin ndia Ia pagi lawes maka la Ia si dat? Ntah kin ateNa lawes ku kuta-kuta Junani si lit i je ringan kalak Jahudi guna ngajari kalak Junani? 7:36 Kai nge maksudna maka nina, 'Idaramindu pagi Aku tapi la idatndu. Labo kam banci ku ingan si Kudahi e?' " 7:37 Wari pengkeri-kerin kerja e, e me si pentingna. I bas wari e tedis Jesus jenari ngerana Ia alu sora megang nina, "Ise muas rehlah ku Aku gelah ia minem. 7:38 Bagi si tersurat i bas Pustaka Si Badia, 'Kalak si tek man bangKu, erburak i bas ia nari lau si mereken kegeluhen.' " 7:39 Si ikataken Jesus enda, e me kerna Kesah Si Badia, si nandangi ialoken kalak si tek man baNa. Paksa si e Kesah Si Badia langa reh sabap Jesus langa iangkat ku kemulian. 7:40 Megi kata Jesus, ngerana piga-piga i bas kalak si nterem e nina, "Tuhu-tuhu me Ia nabi si ipadanken Dibata e!" 7:41 Deba nina, "Ia me Mesias si ipadanken Dibata." Tapi nina ka deba, "Labo! Mesias si ipadanken Dibata labo i Galilea nari rehna. 7:42 Sabap i bas Pustaka Si Badia lit tersurat maka Mesias si ipadanken Dibata e, reh i bas kesusuren Daud nari, tubuh i kuta Betlehem; Kuta Daud nai." 7:43 E maka turah perubaten i tengah-tengah kalak si nterem kerna Jesus. 7:44 Piga-piga kalak ersura-sura nangkap Jesus, tapi sada pe la pang ngkuit Jesus. 7:45 E maka mulihken kalak si njaga Rumah Pertoton ndai ndahi imam-imam si mbelin ras kalak Parisi. Nungkun imam-imam si mbelin ras kalak Parisi e nina, "Engkai maka Ia la ibabandu?" 7:46 Erjabap kalak e, "Ise pe langa pernah bagi Ia e ngerana!" 7:47 Nina kalak Parisi e man bana, "Kam pe enggo ka kin ibabaiNa papak? 7:48 Nehenlah! Lit kin idahndu sekalaklah gia peminpin-peminpinta ntah kalak Parisi tek man baNa? 7:49 Kalak si nterem enda la meteh Undang-undang Musa, e maka iukum Dibata me ia!" 7:50 Sekalak i bas kalak Parisi ndai, e me Nikodemus, si pernah njumpai Jesus. Nina Nikodemus, 7:51 "Rikutken Undang-undangta la banci kalak siukum ope denga sibegiken ia ngerana janah ope denga sieteh kai si enggo ibahanna." 7:52 Ngaloi kalak ndai, "Ntah kam pe i Galilea nari nge! Pepayolah i bas Pustaka Si Badia. I je ietehndu me maka labo pernah lit nabi i Galilea nari."
8:1 Kenca bage mulih jelma si nterem e ku rumahna sekalak-sekalak, tapi Jesus lawes ku Uruk Seton. 8:2 Pepagina mulihken Jesus ku Rumah Pertoton. Kalak si nterem pe reh ka ndahi Ia. Kundul Jesus jenari ibenakenNa ngajar. 8:3 Paksa Ia ngajar e reh guru-guru Undang-undang ras kalak Parisi. Ibabana sekalak diberu si itangkapna asum diberu e erlua-lua. Isuruhna diberu e tedis i lebe-lebe jelma si nterem e. 8:4 Jenari nina man Jesus, "Diberu enda itangkap kami asum ia erlua-lua. 8:5 I bas Undang-undangta isuruh Musa maka diberu si bagenda arus ibenteri alu batu seh mate. Tapi kam, kuga nindu?" 8:6 Kalak enda nungkun guna ncubai Jesus; atena gelah lit dalan ngaduken Jesus. Tapi mungkuk Jesus, isuratiNa taneh alu jari-jariNa. 8:7 Lalap igegehi kalak ndai nungkun. Perbahan si e jurgak Jesus, jenari nina, "Apai kam si langa pernah erdosa, ialah lebe mentersa." 8:8 Kenca bage mungkuk ka Jesus, isuratiNa ka taneh. 8:9 Megi jabap Jesus enda lawesen kalak ndai sekalak-kalak, mulai i bas si metuana nari, seh maka Jesus nari ngenca i je ras diberu ndai. 8:10 Jurgak Jesus jenari nina man diberu e, "I ja kalak ndai kerina o bibi? La kin lit sekalak pe ngukum kam?" 8:11 Erjabap diberu e, "Sekalak pe lang, Tuan!" Nina Jesus man bana, "Adi bage, Aku pe la kam Kuukum. Mulihlah olanai bahan si la ngena ate Dibata." 8:12 Ngerana ka Jesus man kalak si nterem e nina, "Aku kap terang doni. Ise ngikutken Aku, ialokenna me terang si mereken kegeluhen, janah lanai ia erdalan i bas gelap." 8:13 Ngaloi kalak Parisi man Jesus, "Kam ngerana kerna diriNdu jine, e maka labo tuhu kesaksinNdu e." 8:14 Ngaloi Jesus, "Aminna gia kerna diringKu Aku ngerana, tuhu nge si Kukataken enda, sabap Kueteh nge i ja nari Aku janah ku ja Aku lawes. Tapi kam la ietehndu i ja nari Aku janah ku ja Aku lawes. 8:15 Isalahindu kalak rikutken pengakap manusia; tapi Aku la ise pe Kusalahken. 8:16 Bicara Kuadili pe kalak, bujur nge keputusenKu e. Sabap i bas si e labo Aku sisada; Bapa si nuruh Aku ras Aku kap. 8:17 I bas Undang-undangndu lit kap tersurat maka adi lit dua kalak seri katana, tuhu me si ikatakenna e. 8:18 Bage me Aku ngerana kerna diringKu janah Bapa si nuruh Aku pe ngerana kerna Aku." 8:19 Nungkun kalak ndai, "I ja kin BapaNdu?" Erjabap Jesus, "Labo itandaindu Aku, janah BapangKu e pe labo itandaindu. Adi itandaindu Aku, BapangKu e pe itandaindu nge." 8:20 Kerina si enda ikataken Jesus asum Ia ngajar denga i bas Rumah Pertoton deherken peti ingan nusun persembahen. Tapi labo ise pe nangkap Ia sabap paksana langa seh. 8:21 Tole nina Jesus man kalak ndai, "Aku lawes me; idaramindu pagi Aku, tapi mate me kam i bas dosandu. Kam labo banci lawes ku inganKu e." 8:22 E maka sisungkun-sungkunen kalak Jahudi si erkuasa nina, "Munuh baNa nge ateNa, maka nina, 'Kam labo banci lawes ku inganKu e?' " 8:23 Nina Jesus, "Kam asalndu i jenda, i teruh enda; tapi Aku reh i datas nari. Kam reh i doni enda nari; tapi Aku labo i doni enda nari. 8:24 Perbahan si e Kukataken man bandu maka mate me kam i bas dosa-dosandu. Tuhu mate me kam i bas dosa-dosandu adi la kin kam tek maka 'Aku me Aku.' " 8:25 Jenari nungkun kalak e, "Ise kin Kam?" Erjabap Ia, "Kai kin si enggo Kukataken man bandu tangtangna nari! 8:26 Melala si arus Kukataken kerna kam janah melala pe si arus Kuadili. Ingetlah! Si nuruh Aku e Dibata si tuhu-tuhu kap janah si Kukataken man doni enda, e me si Kubegi i bas Ia nari." 8:27 La iangka kalak e maka Jesus ngerana kerna Bapa. 8:28 E maka nina Jesus, "Kenca ipeganjangkenndu Anak Manusia persuruhen Dibata e, ietehndu me maka, 'Aku me Aku.' Alu bage maka enggo iangkandu maka kerina si kukataken e labo sada pe Kubahan bagi ate-ateKu, tapi kai si iajarken Bapa man bangKu, e me si Kukataken. 8:29 Si nuruh Aku ras Aku kap. Labo itadingkenNa Aku sisada sabap tetap nge Kudalanken si ngena AteNa." 8:30 Asum Jesus ngerana kerna si enda nterem kalak tek man baNa. 8:31 Jenari ngerana Jesus man kalak Jahudi si enggo tek man baNa e nina, "Adi tetap atendu tutus ngikutken si enggo Kuajarken, tuhu-tuhu me kam ajar-ajarKu. 8:32 Itandaindu me Dibata si tuhu-tuhu, janah Ia jine si mbebasken kam." 8:33 Nina kalak ndai, "Kami kesusuren Abraham kap. Langa pernah kami jadi budak kalak. Kuga maka nindu, 'Bebas me kam?' " 8:34 Ngaloi Jesus, "Kukataken man bandu: Ise erbahan si la ngena ate Dibata, ia enggo jadi budak dosa. 8:35 Sekalak budak labo lalap jadi anggota keluarga, tapi sekalak anak tetap kap jadi anggota keluarga. 8:36 Adi Anak e mbebasken kam maka tuhu-tuhu me kam enggo bebas. 8:37 Kueteh nge kam kesusuren Abraham. Amin bage gia kerina kam ersura-sura munuh Aku, sabap la ialokenndu kai si Kuajarken. 8:38 Aku ngerana rikutken kai si ikataken BapangKu man bangKu. Tapi kam, ibahanndu kai si ikataken bapandu." 8:39 Ngaloi kalak ndai, "Bapa kami Abraham kap." Nina Jesus, "Adi tuhu-tuhu kin kam anak Abraham bali nge perbahanenndu ras Abraham nai. 8:40 Kerina si enggo pernah Kubahan e me mpetangkas man bandu kebenaren si Kualoken i bas Dibata nari. Amin bage gia ibunuhndu ka nge atendu Aku. Si Abraham nai labo bage perbahanenna! 8:41 Kam, perbahanen bapandu nge iusih-usihndu." Ngaloi kalak ndai, "Sada ngenca Bapa kami, e me Dibata. Janah kami me anakNa si tuhu-tuhu." 8:42 Nina Jesus, "Adi tuhu-tuhu kin Dibata Bapandu, tentu keleng atendu Aku, sabap Aku reh i bas Dibata nari janah genduari Aku ringan i jenda. Aku reh labo erkiteken kuasangKu, tapi Ia nge si nuruh Aku. 8:43 Engkai maka la iangkandu si Kukataken e? E me erkiteken la kam ngasup ngaloken katangKu. 8:44 Bapandu si Iblis nge janah tuhu-tuhu kam anakna. Sura-sura si Iblis e nge si ikutkenndu. Nai nari Iblis pemunuh kap. La pernah ikapitina si benar, sabap la lit si benar i bas ia. Adi erbual ia biakna nge, sabap ia perguak dingen bapa kerina kalak si perguak. 8:45 Tapi perbahan Kukataken man bandu si tuhuna kerna Dibata, la kam tek man bangKu. 8:46 Apai kin kam ngasup mereken keterangen maka Aku erdosa? Dage adi kebenaren kerna Dibata nge Kukataken man bandu ngkai maka la kam tek man bangKu? 8:47 Kalak si reh i bas Dibata nari ibegikenna kap kata Dibata. Tapi kam labo i bas Dibata nari, e maka la kam nggit megikenca." 8:48 Jenari ngaloi kalak Jahudi e man Jesus nina, "Ma tuhu dage si ikataken kami e? Kam kap kalak Samaria si setanen." 8:49 Nina Jesus, "Aku labo setanen. Aku mpehaga BapangKu, tapi igombangindu Aku. 8:50 Aku labo ndarami dalan gelah Aku ipehaga. Tapi lit kap sada si mpehaga Aku, dingen si ngataken maka Aku benar. 8:51 Kukataken man bandu: Ise si ngikutken katangKu ndigan pe la ia mate." 8:52 Nina kalak Jahudi e man Jesus, "Genduari enggo ieteh kami maka tuhu-tuhu Kam setanen! Abraham bage pe kerina nabi-nabi enggo mate. Tapi nindu, 'Ise si ngikutken katangKu asa ndigan pe la ia mate.' 8:53 Bapa kami Abraham enggo mate. Ma labo ikatakenndu maka belinen Kam asangken Abraham? Bage pe kerina nabi-nabi enggo mate. Ise kin iakapndu baNdu?" 8:54 Erjabap Jesus, "Labo lit gunana adi Kupujiken bangKu. Si mujiken Aku e me BapangKu, si ikatakenndu Dibatandu. 8:55 Tapi si tuhuna labo Ia itandaindu. Aku, Kutandai kap Ia. Adi Kukataken maka la Ia Kutandai, perguak me Aku bagi kam. Tapi Kutandai kap Ia janah Kuikutken kataNa. 8:56 Bapandu, Abraham, ermeriah ukur nimai waringKu; wari e enggo idahna, e maka meriah iakapna." 8:57 Nina kalak Jahudi e man Jesus, "UmurNdu pe langa lit lima puluh tahun enggo ka idahNdu Abraham?" 8:58 Erjabap Jesus, "Kukataken man bandu: Situhuna ope denga Abraham tubuh, Aku enggo lit." 8:59 Ibuat kalak Jahudi e batu, atena menteri Jesus; tapi cebuni Jesus, jenari lawes Ia nadingken Rumah Pertoton e.
9:1 Asum Jesus erdalan, idahNa sekalak si enggo pentang tubuhna nari. 9:2 Nungkun ajar-ajarNa nina, "O Guru, dosa ise nge erbahanca maka ia pentang tubuhna nari? Dosana ntah dosa orang tuana?" 9:3 Erjabap Jesus, "Ia pentang labo erkiteken dosana bage pe labo erkiteken dosa orang tuana, tapi gelah teridah kuasa Dibata i bas geluhna. 9:4 Kita arus ndahiken dahin si nuruh Aku sanga terang denga wari; sabap reh me gelap janah paksa si e ise pe la ngasup erdahin. 9:5 Asum Aku i bas doni enda, Aku me terang doni." 9:6 Kenca ikataken Jesus si enda, iciduriNa taneh, iadukNa taneh ras cidurNa e, jenari idampelkenNa taneh e ku mata kalak si pentang ndai. 9:7 Kenca bage nina Jesus man bana, "To erduhap kam ku kolam Siloam." (I bas cakap Heber Siloam ertina "Isuruh".) E maka lawes si pentang e erduhap; janah asum ia reh mulihken enggo erpengidah matana. 9:8 Jenari nungkun temanna si sada kesain bage pe si megati ngidah ia mindo-mindo nina, "Ma ia kin si biasa kundul mindo-mindo e?" 9:9 Piga-piga kalak ngatakenca, "Ia me," tapi lit ka pe si ngatakenca, "Lang, labo ia. Tapi seri rupana ras." Si enggo erpengidah e ngaku nina, "Aku me si biasa mindo-mindo e." 9:10 E maka isungkun kalak ndai ia nina, "Kuga maka kam enggo erpengidah?" 9:11 Erjabap ia, "Si igelari Jesus erbahanca aku enggo erpengidah. IciduriNa taneh, iadukNa taneh e ras cidurNa jenari idampelkenNa ku matangku. Kenca bage nina, 'To erduhap kam ku kolam Siloam.' E maka lawes aku ku je, janah kenca aku erduhap minter erpengidah matangku." 9:12 Nungkun ka kalak ndai, "I ja dage Ia?" Erjabap ia, "La kueteh." 9:13-14 Asum Jesus ngaduk taneh ras cidurNa dingen mpemedakken mata kalak pentang e, rembang wari Sabat. E maka ibaba kalak Jahudi kalak si enggo erpengidah ndai man kalak Parisi. 9:15 Jenari isungkun kalak Parisi ia kai sabapna maka ia enggo erpengidah. Ngaloi si enggo erpengidah e man kalak Parisi, "IdampelkenNa ku matangku taneh si enggo iadukNa ras cidurNa. Janah kenca aku erduhap, enggo erpengidah matangku." 9:16 Nina piga-piga kalak Parisi, "Kalak si erbahanca e kugapa pe labo i bas Dibata nari, sabap la iperdiatekenNa Undang-undang Sabat." Nina ka deba, "Banci kin kalak perdosa erbahan tanda sengget si bagenda?" E maka kalak Parisi e pe enggo lain-lain pendapatna. 9:17 Sekali nari nungkun kalak Parisi e man si enggo erpengidah ndai nina, "Ikatakenndu maka Ia me si erbahanca kam erpengidah. Genduari kuga dage pengakapndu kerna Ia?" Erjabap ia, "Ia sekalak nabi." 9:18 Kalak Jahudi si erkuasa la tek maka nai ia pentang, janah genduari enggo erpengidah. E maka idilona orang tua kalak si enggo erpengidah ndai. 9:19 Jenari isungkunna nina, "Tuhu kin enda anakndu si tubuh pentang e? Kuga maka genduari ia enggo erpengidah?" 9:20 Erjabap orang tuana, "Payo nge ia anak kami si pentang tubuhna nari. 9:21 Tapi la ieteh kami kuga maka enggo erpengidah ia genduari janah la ieteh kami ise erbahanca. Ia enggo mbelin, ialah sungkun! Enggo kap ia ngasup ertanggung jawab kerna dirina." 9:22 Bagenda jabap orang tua sabap mbiar ia kalak Jahudi si erkuasa e. Sabap enggo ersada arih kalak Jahudi si erkuasa maka ise ngakui Jesus e Mesias si ipadanken Dibata, ipedarat i bas rumah pertoton nari. 9:23 Erkiteken si e me maka nina orang tuana, "Ia enggo mbelin, ialah sungkuni." 9:24 Sekali nari idilo kalak e si enggo erpengidah ndai, jenari nina, "Erpadanlah kam i lebe-lebe Dibata maka si tuhuna nge iturikenndu sabap ieteh kami si erbahanca kam erpengidah e kalak perdosa." 9:25 Ngaloi ia, "Kerna Ia kalak perdosa ntah lang, e labo kueteh. Sada ngenca kueteh: Nai aku pentang, genduari enggo erpengidah." 9:26 Nungkun kalak Jahudi si erkuasa e, "Kai ibahanNa man bandu? Kuga ibahanNa maka matandu enggo erpengidah?" 9:27 Erjabap ia, "Enggo kap kukataken man bandu, tapi la ibegikenndu. Engkai maka isungkunndu denga ka. Ntah kin kam pe ersura-sura jadi ajar-ajarNa?" 9:28 Merawa kalak ndai man bana janah nina, "Kamlah jadi ajar-ajarNa; kami ajar-ajar Musa kap. 9:29 Si ieteh kami Dibata ngerana arah Musa nge. Tapi kerna kalak si ikatakenndu e la ieteh kami ntah i ja nari Ia." 9:30 Ngaloi ka si enggo erpengidah e, "Mejin kap e adi la kin ietehndu i ja nari Ia reh, sedangken enggo ibahanNa matangku erpengidah! 9:31 Sieteh maka Dibata labo megiken kalak perdosa. Kalak si mpehaga Dibata dingen si ngikutken peratenNa nge ibegikenNa. 9:32 Nai-nai nari langa pernah si begi maka lit kalak si ngasup pemedakken mata kalak pentang tubuhna nari. 9:33 Adi la kin ia i bas Dibata nari, labo ia ngasup erbahan kai pe." 9:34 Ngaloi kalak Jahudi si erkuasa e, "Tubuhndu nari pe enggo kam erdosa, janah kam ipebelin-belin i bas dosa, jenari iajarindu ka atendu kami?" Kenca bage ipedarat kalak Jahudi si erkuasa e ia i bas rumah pertoton nari. 9:35 Berita kerna kalak si pentang ndube ipedarat i bas rumah pertoton nari seh man Jesus. E maka asum jumpa Jesus ras ia, nina Jesus man bana, "Tek kin kam man Anak Manusia si isuruh Dibata e?" 9:36 Erjabap ia, "O Tuan, kataken man bangku ise Ia gelah aku tek man baNa." 9:37 Ngaloi Jesus man bana, "Enggo kap Ia idahndu. Ia kap si ngerana ras kam genduari e." 9:38 Nina kalak ndai, "O Tuhan, tek nge aku!" Jenari erjimpuh ia i lebe-lebe Jesus. 9:39 Jenari nina Jesus man bana, "Aku reh ku doni enda guna nehken keadilen, gelah si pentang jadi erpengidah janah si erpengidah jadi pentang." 9:40 I je lit piga-piga kalak Parisi megi si ikataken Jesus. E maka nungkun ia man Jesus nina, "Rikutken pengakapndu kami pe kalak pentang kin?" 9:41 Erjabap Jesus, "Adi pentang kam labo kam erdosa; tapi perbahan ikatakenndu, 'Kami erpengidah,' e maka tetap kam erdosa."
10:1 Tole nina Jesus, "Kukataken man bandu: Si tuhuna kalak si bengket ku karang biri-biri la arah pintun, tapi inangkihna dingding, pinangko dingen pengerampok kap ia. 10:2 Ise si bengket arah pintun, ia me permakan biri-biri e. 10:3 Si erjaga i bas pintun nalangi pintun guna permakan e janah biri-biri megiken sorana. Sada-sadai igelari permakan e biri-birina janah ibabaina ndarat i bas karang nari. 10:4 Kenca ndarat biri-biri e kerina, erdalan ia arah lebe. Biri-biri e ngikutken ia, sabap itandai biri-biri e sorana. 10:5 Adi kalak si deban labo nggit biri-biri e ngikutkenca; kiam pe biri-biri e lawes sabap la itandaina sorana." 10:6 Ituriken Jesus perumpaman enda, tapi la iangka kalak ndai kai maksud Jesus. 10:7 Jenari nina ka Jesus, "Kukataken man bandu maka Aku kap pintun guna biri-biri e. 10:8 Kerina si reh leben asangken Aku pinangko dingen pengerampok, janah labo ibegiken biri-biri e ia. 10:9 Aku me pintun. Ise bengket arah Aku terkelin me. Ku bas-kudarat ia, janah idatna gagaten. 10:10 Penangko reh guna nangko, munuh dingen meneken saja. Tapi Aku reh gelah si megiken sorangKu ngaloken kegeluhen si cukup. 10:11 Aku me permakan si tuhu-tuhu. Permakan si tuhu-tuhu nggit ngasamken kesahNa guna biri-biri e kerina. 10:12 Tapi kalak upahen, si labo ia permakan dingen si labo ia empuna biri-biri e, kiam nge ia nadingken biri-biri e adi idahna serigala reh. E maka irigep serigala me biri-biri e seh merap kerina. 10:13 Kalak upahen e kiam sabap upahen ngenca ia labo diatena biri-biri e. 10:14-15 Aku me permakan si tuhu-tuhu. Bagi itandai Bapa Aku janah Kutandai Bapa, bage me pe Kutandai biri-biringKu e janah itandai biri-biringKu Aku. Janah nggit Aku ngasamken kesahKu guna biri-biri e. 10:16 Lit denga biri-biringKu si deban si la bengket i bas karang enda. Si e pe arus Kubaba, janah ibegikenna nge pagi sorangKu. Kerina pagi ia jadi sada rarasen dingen sada nge permakanna. 10:17 Keleng ate Bapa e Aku sabap nggit Aku ngendesken kesahKu, gelah Kualoken ka mulihi. 10:18 Labo lit kalak si ngasup muat kesahKu i bas Aku nari. Aku jine nge si merekenca. Lit hakKu mereken kesahKu janah lit pe hakKu ngalokenca mulihi. Enda me si enggo itetapken BapangKu guna Kudalanken." 10:19 Erkiteken kata Jesus enda, turah ka perubaten i bas kalak Jahudi. Piga-piga kalak ngatakenca, 10:20 "Ia enggo setanen dingen adon! Engkai maka ibegikenndu Ia?" 10:21 Tapi deba ngatakenca, "Kalak si setanen labo ngasup bagi Ia e ngerana! Ngasup kin kalak si setanen erbahanca kalak pentang erpengidah?" 10:22 Asum pesta peringeten mengket Rumah Pertoton i Jerusalem, paksa perudan, 10:23 erdalan Jesus arah serambi Salomo i bas Rumah Pertoton e. 10:24 Pulung kalak Jahudi engkeleweti Ia, jenari nina man Jesus, "Asakai nari dekahna kami kemamangen ibahanNdu? Katakenlah man kami terus terang; tuhu kin Kam Mesias si ipadanken Dibata e?" 10:25 Nina Jesus, "Enggo Kukataken man bandu tapi la kam tek. Perbahanen si Kulakoken i bas kuasa BapangKu, naksiken kerna Aku kap. 10:26 Tapi la kam tek perbahan kam la biri-biringKu. 10:27 Biri-biringKu ibegikenna nge sorangKu. Kutandai nge biri-biringKu e janah ikutkenna Aku. 10:28 Man biri-biringKu e Kubereken kegeluhen si tuhu-tuhu si la erkeri-kerin. Asa lalap ia la mate, janah ise pe la ngasup nirangken ia i bas kepkepenKu nari. 10:29 BapangKu belinen asa kai pe, janah kai si enggo iberekenNa man bangKu ise pe la ngasup muatsa i bas kepkepen BapangKu nari. 10:30 Bapa ras Aku sada kap." 10:31 Jenari ibuat kalak Jahudi e batu, atena menteri Jesus. 10:32 Tapi nina Jesus man bana, "Enggo melala perbahanen si mehuli Kucidahken man bandu i bas gelar Bapa. Dahin si apai kin erbahanca maka ibenterindu atendu Aku?" 10:33 Ngaloi kalak Jahudi e, "Labo erkiteken perbahanen si mehuli e, tapi erkiteken ipekitik Kam Dibata! Kam sekalak manusia, tapi iakukenNdu maka Kam me Dibata." 10:34 Nina Jesus, "I bas Undang-undangndu lit tersurat maka nina Dibata, 'Kam me dibata-dibata.' 10:35 Sieteh maka kai si tersurat i bas Pustaka Si Badia tuhu kap. Kalak si man bana ipeseh kata Dibata, igelari Dibata kap ia: dibata-dibata. 10:36 Payo kin iakapndu Aku encekuraki Dibata erkiteken ngaku Aku maka Aku me Anak Dibata? Aku kap si ipilih Dibata dingen si isuruhNa ku doni enda. 10:37 Adi la kin dahin Dibata Kudahiken ola kam tek man bangKu. 10:38 Tapi adi dahin Dibata nge Kudalanken, la gia kam tek man bangKu, si lang-langna teklah kam nandangi kai si Kubahan e gelah ietehndu dingen ngaku kam maka Bapa e i bas Aku janah Aku i bas Bapa e." 10:39 Sekali nari icubaken kalak ndai nangkap Jesus, tapi pulah Jesus i bas ia nari. 10:40 Jenari mulihken Jesus ngepari Lau Jordan ku ingan Johanes mperidiken nai; i je me Ia ringan. 10:41 Nterem kalak reh ndahi Ia ku je. Nina kalak si nterem e, "Johanes nai la erbahan tanda-tanda sengget, tapi tuhu kerina si ikatakenna kerna kalak enda." 10:42 E maka nterem kalak si i je tek man Jesus.
11:1 I Betani lit sekalak si penakiten, gelarna Lasarus. Ia turang si Maria ras Marta. 11:2 (Si Maria enda me si ncurcurken minak si merim ku naheTuhan dingen si ngapusisa alu bukna.) 11:3 Si Maria ras Marta erbahan berita man Jesus nina, "O Tuhan temanNdu si ikelengiNdu paksana sakit." 11:4 Kenca seh berita e man Jesus nina, "Penakit enda labo erkedungen i bas kematen; tapi penakit enda jadi gelah terpuji Dibata, janah enda me jadi sada dalan gelah terpuji Anak Dibata." 11:5 Si Marta, Maria ras Lasarus keleng kal ate Jesus. 11:6 Tapi kenca ibegiNa pe berita kerna Lasarus sakit, la minter idahiNa; tapi lit dua wari nari dekahna Ia i bas ingan e. 11:7 Kenca si dua wari e nina man ajar-ajarNa, "Ota ku Judea kita mulihken." 11:8 Ngaloi ajar-ajarNa, "O Guru, mbaru denga pe ibenteri kalak Jahudi atena Kam; mulihken ka ateNdu ku jah?" 11:9 Erjabap Jesus, "Ma sepuluh dua jam sada wari? Adi suari kalak erdalan labo ia tertuktuk, sabap idahna terang doni enda. 11:10 Tapi adi berngi ia erdalan tertuktuk me ia, sabap la lit terang i bas ia." 11:11 Bagenda me nina Jesus. Jenari tole nina, "Temanta Lasarus enggo tunduh, janah ateKu lawes guna ngingeti ia." 11:12 Ngaloi ajar-ajarNa, "O Tuhan, adi enggo tunduh ia, malemna me e." 11:13 Si tuhuna maksud Jesus e me Lasarus enggo mate; tapi iakap ajar-ajarNa maksud Jesus si Lasarus tunduh saja. 11:14 E maka ikataken Jesus man ajar-ajarNa e alu terus terang, "Lasarus enggo mate. 11:15 Tapi meriah ukurKu sabap la Aku i jah, sabap erkiteken si e banci kam tek man bangKu. Otalah si dahi ia." 11:16 Jenari Tomas (si igelari Kembar) ngerana man temanna sapih ajar-ajar, "Ota ku jah kita ras Guru enda, gelah mate kita kerina ras Ia!" 11:17 Kenca seh Jesus i Betani, idapetiNa enggo empat wari dekahna Lasarus ikuburken. 11:18 I Jerusalem nari ku Betani la lit telu kilometer dauhna. 11:19 E maka i Jerusalem nari pe nterem kalak reh ngapuli Marta ras Maria erkiteken turangna Lasarus enggo mate. 11:20 Kenca ibegi Marta maka Jesus enggo reh, ndarat ia njumpai Jesus; tapi Maria tading i rumah. 11:21 Nina Marta man Jesus, "O Tuhan, bicara i jenda min ndai Kam, labo mate turangku e! 11:22 Tapi amin bage gia, tek nge aku maka kai pe ipindoNdu genduari man Dibata iberekenNa nge." 11:23 Nina Jesus man Marta, "Nggeluh nge turangndu mulihken." 11:24 Ngaloi Marta, "Kueteh nge maka i bas wari pendungi pagi keke nge Ia i bas si mate nari." 11:25 Nina Jesus man Marta, "Aku kap si mereken kegeluhen ras mpekeke kalak mate. Ise tek man bangKu, nggeluh me aminna gia enggo mate. 11:26 Kalak si nggeluh dingen tek man bangKu ndigan pe la mate. Tek kam katangKu e?" 11:27 Erjabap Marta, "Tek aku, Tuhan! Tek aku maka Kam Anak Dibata, Si Engkelini si ipadanken Dibata enggo reh ku doni enda." 11:28 Kenca bage mulihken Marta ku rumah. Ikusikkenna man Maria nina, "Enggo i jenda Guru, idiloNa kam." 11:29 Kenca ibegi Maria kai si ikataken Marta, minter tedis ia jenari lawes ia njumpai Jesus. 11:30 (Paksa si e Jesus langa seh i bas kuta. Ia tetap denga ibas inganNa jumpa ras Marta ndai.) 11:31 Ngidah Maria rempet tedis, iakap kalak Jahudi si reh ngapuli e, lawes ate Maria ku kuburen. E maka ikutkenna Maria lawes. 11:32 Kenca Maria ngidah Jesus janah kenca seh ia i bas ingan Jesus, minter ia erjimpuh i lebe-lebe Jesus, jenari nina, "O Tuhan, bicara i jenda min ndai Kam labo mate turangku e!" 11:33 Asum idah Jesus si Maria tangis ras kalak Jahudi si reh ras si Maria e megogo dingen ceda ateNa. 11:34 E maka isungkunNa kalak ndai nina, "I ja ia ikuburkenndu?" Erjabap kalak ndai, "Ota sinehen, Tuhan." 11:35 Tangis Jesus. 11:36 E maka nina kalak Jahudi, "Nehenlah, seh kal tuhu ateNa kelengna si Lasarus e!" 11:37 Tapi lit ka si ngerana, "Kalak pentang ibahanNa jadi erpengidah, la kin Ia ngasup erbahanca gelah ola min ndai mate si Lasarus e?" 11:38 Alu ate megogo lawes Jesus ku kuburen e; kuburen e liang si itutupi alu batu. 11:39 "Gulingken batu enda!" nina Jesus. Tapi ngaloi Marta turang si mate e, "O Tuhan, enggo mbau ia, sabap enggo empat wari ikuburken!" 11:40 Nina Jesus man Marta, "Ma enggo ndai Kukataken man bandu maka adi tek kam idahndu nge kuasa Dibata?" 11:41 E maka igulingken kalak e batu ndai. Jenari ertoto Jesus man Dibata nina, "O Bapa, bujur Kukataken man baNdu sabap ibegikenNdu pemindonKu. 11:42 Kueteh nge maka katawari pe ibegikenNdu pemindonKu, tapi si enda Kukataken guna kalak si tedis i jenda, gelah tek Ia maka Kam kap si nuruh Aku." 11:43 Kenca bage, alu sora megang erlebuh Jesus nina, "O Lasarus, mari ndaratken!" 11:44 E maka ndarat si enggo mate e. Tanna ras nahena ibaluti alu uis mbentar, ayona ibaluti alu uis. Jenari nina Jesus man kalak si i je, "Tangtangi balutna e, jenari pelepas ia lawes." 11:45 Ngidah kejadin e nterem kalak Jahudi si reh ngapuli Maria jadi tek man Jesus. 11:46 Tapi lit piga-piga kalak i bas ia nari mulihken ku kalak Parisi nuriken perbahanen Jesus e. 11:47 Erkiteken si e runggu kalak Parisi ras imam-imam si mbelin nina, "Kai nge arus sibahan? Enggo melala tanda-tanda sengget ibahanNa! 11:48 Adi sipelepas lalap Ia erbahan si bage, nandangi kerina me kalak tek man baNa. Janah dungna reh me Pemerentah Roma ngeruntuhken Rumah Pertoton dingen ngkernepken bangsanta enda." 11:49 Jenari ngerana sekalak i bas si runggu e, gelarna Kayapas; ia me Imam si Mbelin i bas tahun si ndai. Nina Kayapas, "La kap iangkandu. 11:50 La kin ietehndu maka ulin sekalak mate guna bangsanta asangken kerina bangsanta enda kernep?" 11:51 Si tuhuna kai si ikatakenna enda labo i bas ukurna nari. Tapi erkiteken ia Imam si Mbelin i bas tahun si ndai, ernubuat ia maka mate me Jesus guna kalak Jahudi. 11:52 Janah labo guna kalak Jahudi saja, tapi pe gelah kerina anak-anak Dibata si merap ipersadaNa. 11:53 Mulai i bas wari si ndai nari enggo ersada arih kalak Jahudi si erkuasa guna munuh Jesus. 11:54 E maka lanai terang-terangen Jesus erdalan arah Judea. Lawes Ia ku kuta Eperaim deherken gurun pasir; i je me Ia ringan ras ajar-ajarNa. 11:55 Paksa si ndai lanai ndekah Wari Raya Paskah kalak Jahudi. I kuta-kuta nari nterem kalak reh ku Jerusalem guna mbersihken dirina ope denga paskah e. 11:56 Asum ia pulung i Rumah Pertoton, idaramina Jesus. Nungkun ia sapih-sapih ia nina, "Kuga nge pengakapndu? Ugapa pe labo Ia reh ku wari Paskah e, ma bage?" 11:57 Imam-imam si mbelin ras kalak Parisi enggo erbahan momo maka ise metehsa i ja Jesus arus ilaporkenna gelah banci itangkap.
12:1 Enem wari ope Wari Raya Paskah, Jesus lawes ku Betani kuta Lasarus si enggo ipekekeNa i bas si mate nari. 12:2 E maka kuskas Marta nikapken pangan guna ielaken man Jesus ras temue si debanna. Lasarus kundul ras Jesus. 12:3 Kenca e reh Maria, ibabana sada botol galang minak merim si meherga. Icurcurkenna minak e ku nahe Jesus, jenari isapuina alu bukna. E maka merim kerina i bas rumah e. 12:4 Jenari ngerana sekalak ajar-ajar Jesus, gelarna Judas Iskariot (si ndayaken Jesus) nina, 12:5 "Engkai maka la idayaken saja minak e telu ratus duit pirak jenari duitna e ibereken man kalak musil?" 12:6 Si enda ikatakenna labo erkiteken iukurina kalak musil, tapi erkiteken pinangko ia. Ia kap si njemak perduiten kalak enda janah megati ipakena duit e. 12:7 Tapi nina Jesus, "Ola kam nuhsahi diberu enda! Pelepaslah ibahanna enda guna penguburenKu! 12:8 Adi kalak musil lit nge pagi lalap ras kam, tapi Aku labo pagi lalap ras kam." 12:9 Nterem kalak Jahudi megi berita maka Jesus paksa si e i Betani. E maka lawes kalak Jahudi e ku jah. Kalak ndai lawes ku Betani labo erkiteken Jesus saja, tapi pe guna ngenehen Lasarus si enggo ipekeke Jesus i bas si mate nari. 12:10 E maka imam-imam ersura-sura munuh Lasarus pe; 12:11 sabap erkiteken Lasarus enggo nterem kalak Jahudi nadingken peminpin-peminpinna janah tek ia man Jesus. 12:12 Pepagina kalak si nterem si reh ku Jerusalem ngerayaken Paskah megi berita maka Jesus sangana i dalan nandangi seh ku Jerusalem. 12:13 E maka itektekna lambe jenari ialo-alona Jesus. Ersurak-surak ia nina, "Pujilah Dibata! Ipasu-pasu gelah Kam si reh i bas gelar Tuhan! Ipasu-pasu gelah Raja kalak Israel!" 12:14 Paksa e idapeti Jesus sada kelede si nguda denga. IersakNa kelede e bagi si tersurat i bas Pustaka Si Badia, 12:15 "Ola mbiar o kuta Sion! Nehenlah reh Rajandu, iersakNa kelede nguda!" 12:16 Paksa si e la iangka ajar-ajar Jesus kai ertina kata enda. Tapi kenca Jesus ipakuken ku kayu persilang janah kenca Ia ipekeke Dibata i bas si mate nari, iinget ajar-ajar maka si tersurat enda e me kerna Jesus janah enggo pe jadi man baNa. 12:17 Kalak si i je tupung Jesus ngelebuh Lasarus gelah ndarat i bas kuburen nari dingen mpekekesa i bas si mate nari terus ersaksi kerna kejadin e. 12:18 Erkiteken si e me maka nterem kalak njumpai Jesus, sabap ibegina maka enggo ibahan Jesus tanda sengget si mbelin e. 12:19 Nina kalak Parisi sapih-sapih ia, "Nehenlah, kerina usahanta sia-sia, sabap i ja pa pe nterem kalak ngikutken Ia!" 12:20 I bas jelma si nterem si lawes ku Jerusalem guna ngikuti kebaktin i bas wari raya e, lit piga-piga kalak Junani. 12:21 Ijumpaina Pilipus (ia i Betsaida daerah Galilea nari) jenari nina, "O, tuan mesikel kal kami jumpa ras Jesus." 12:22 Idahi Pilipus si Andereas, jenari iturikenna sura-sura kalak Junani e man bana. Kenca bage duana ia lawes ngatakenca man Jesus. 12:23 Ngaloi Jesus man bana duana, "Genduari enggo seh paksana, Aku, Anak Manusia persuruhen Dibata ipermuliaken. 12:24 Kukataken man bandu: Si tuhuna sengkebuah page labo reh buena adi la kin isuanken dingen mate. Adi benih e isuanken dingen mate, melala me buahna. 12:25 Kalak si engkelengi geluhna si i doni enda, bene kap kegeluhenna e. Tapi kalak si nembeh atena geluhna si i bas doni enda, kegeluhen si tuhu-tuhu dingen si rasa lalap tetap jadi sikerajangenna. 12:26 Ise atena jadi persuruhenKu, ikutkennalah Aku; gelah persuruhenKu tetap ras Aku amin i japa pe Aku ringan janah persuruhenKu ipehaga BapangKu." 12:27 Jenari nina Jesus, "Genduari ceda kal ateKu. Kuga ndia ningKu? Kukataken ndia pagi, 'O Bapa, pedauh min paksa kiniseran enda i bas Aku nari?' Lang, sabap guna si e kap Aku reh, gelah Kunanami kiniseran e. 12:28 O Bapa ipermuliakenlah gelarNdu!" Jenari terbegi sora i langit nari Nina, "Enggo Kupermuliaken Ia, janah tetap denga Kupermuliaken." 12:29 Megi sora e nina kalak si nterem si tedis i je, "Sora lenggur kap e." Tapi deba nina, "Labo! Malekat nge ngerana man baNa!" 12:30 Tapi nina Jesus man kalak si nterem si megi sora e, "Labo man gunangKu maka reh sora e, tapi man gunandu. 12:31 Genduari me paksana doni enda iadili. Genduari italuken me si Penguasa doni enda. 12:32 Kenca Aku ipeganjangken i doni nari, Kurintak me kerina manusia man bangKu." 12:33 (Alu kataNa enda me iturikenNa kerna kematen si nandangiinanamiNa.) 12:34 Jenari ngaloi kalak si nterem, "Rikutken Undang-undang kami, Mesias si ipadanken Dibata e nggeluh me rasa lalap. Engkai maka ikatakenNdu si reh i bas Dibata nari e ipeganjangken i doni nari? Ise kin Anak Manusia si reh i bas Dibata nari e?" 12:35 Erjabap Jesus, "Kentisik nari ngenca terang e ringan i tengah-tengahndu. Teruskenlah perdalanenndu asum terang e lit denga i tengah-tengahndu, gelah ola kam ikuasai si gelap; sabap kalak si erdalan i bas gelap, la ietehna ku ja ia lawes. 12:36 Dage teklah kam man terang e, asum terang e ras kam denga, gelah kam jadi kalak si nggeluh i bas terang." Kenca ikataken Jesus si e, lawes Ia cebuni gelah la idah Kenca ikataken Jesus si e, lawes Ia cebuni gelah la idah kalak si nterem. 12:37 Aminna gia enggo melala tanda sengget ibahan Jesus i lebe-lebe kalak si nterem e, labo ia tek man Jesus. 12:38 Alu bage enggo seh nubuat Nabi Jesaya nina, "O Tuhan ise nge tek nandangi berita si ipeseh kami? Janah man ise kin enggo tangkas kuasa Tuhan?" 12:39 Kalak ndai la ngasup tek sabap enggo pe ikataken Nabi Jesaya, 12:40 "Enggo pentang ibahan Dibata matana, bage pe enggo ipemersik Dibata ukurna; gelah matana la erpengidah, janah ukurna la erpengangka. Gelah ola ia mulihken man bangKu janah gelah ola Kualemi dosa-dosana nina Dibata." 12:41 Si enda nai ikataken Nabi Jesaya erkiteken enggo idahna kemulian Jesus si mbelin janah erkiteken si e maka ia ernubuat kerna Jesus. 12:42 Amin bage gia nterem nge kalak Jahudi si erkuasa tek man Jesus. Tapi erkiteken mbiar ia ipedarat kalak Parisi i bas Rumah Pertoton nari la ia terang-terangen encakapken kinitekenna. 12:43 Ngenan atena pujin i bas manusia nari asangken pujin i bas Dibata nari. 12:44 Jenari nina Jesus alu sora megang, "Ise tek man bangKu, labo man bangKu saja ia tek tapi man si nuruh Aku. 12:45 Ise ngidah Aku, idahna pe si nuruh Aku. 12:46 Aku reh ku doni enda bali ras terang, gelah kalak si tek man bangKu la tading i bas gelap. 12:47 Kalak si megi pengajarenKu tapi la ikutkenna, labo Aku ngukumsa. Aku reh labo guna ngukum doni enda, tapi guna mulahisa i bas ukumen nari. 12:48 Kalak si nulak Aku dingen la ngaloken pengajarenKu lit nge pagi si ngukum ia. Kata si enggo Kupeseh e pagi ngukum ia i bas wari pendungi! 12:49 Aku ngerana labo bagi ate-ateKu saja, tapi Bapa nge si nuruh Aku, janah Ia ngaturken kai arus Kukataken ras Kuturiken. 12:50 Janah Kueteh maka perentahna e mereken kegeluhen si tuhu-tuhu si la erkeri-kerin. E maka Kupeseh kai si iajarken Bapa man Bangku."
13:1 Sada wari ope Wari Raya Paskah, enggo ieteh Jesus maka seh paksaNa itadingkenNa doni enda janah mulih Ia ku BapaNa. Keleng kal ateNa teman-temanNa i doni enda janah seh ku kedungenna tetap ateNa keleng. 13:2 Jesus ras ajar-ajarNa sangana man berngi. Iblis enggo erdahin i bas ukur Judas anak Simon Iskariot guna ndayaken Jesus. 13:3 Ieteh Jesus maka enggo ibereken Dibata kuasa kai pe man baNa. Ieteh Jesus pe maka Ia reh i bas Dibata nari janah nandangi mulih ku Dibata. 13:4 E maka tedis Jesus, itangtangina jubahNa, jenari ibentingkenNa uis. 13:5 ItamakenNa lau ku bas sambung, jenari iburihiNa nahe ajar-ajarNa janah ielapNa alu uis si ibentingkenNa. 13:6 Asum seh giliren Simon Petrus nina Simon Petrus man Jesus, "O Tuhan, Kam kin arusna si murihi nahengku?" 13:7 Erjabap Jesus man Simon Petrus, "Si Kubahan genduari e, la iangkandu, tapi pagin tangkas kap man bandu." 13:8 Ngaloi ka Petrus, "Asa ndigan pe la kubere iburihiNdu nahengku!" Tapi nina Jesus man bana, "Adi la Kuburihi nahendu lanai kam ajar-ajarKu." 13:9 Ngaloi Simon Petrus, "O Tuhan, adi bage kin ola nahengku saja burihi! Tapi burihilah tanku ras takalku pe!" 13:10 Nina Jesus, "Kalak si enggo ridi enggo kap bersih kerina kulana, e maka lanai bo perlu ia ridi; nahena saja ngenca perlu iburihi." 13:11 Kam enggo bersih kerina, sekalak ngenca lang. (Enggo ieteh Jesus ise si nandangi ndayaken Ia; perbahan si e me maka nina, "Kam enggo bersih kerina, sekalak ngenca lang.") 13:12 Kenca dung iburihi Jesus kerina nahe ajar-ajarNa e, ipakeNa ka mulihi jubahNa ndai, jenari kundul Ia ku inganNa. Kenca bage nungkun Jesus nina, "Iangkandu kin kai tujunna si Kubahan man bandu enda ndai? 13:13 Ikatakenndu Aku Guru bage pe Tuhan. Payo kap si ikatakenndu e; sabap tuhu me Aku Guru dingen Tuhan. 13:14 Dage adi Aku, Guru dingen Tuhanndu enggo murihi nahendu, patut pe maka kam siburih-burihen nahe. 13:15 Enggo Kubahan si man usihenndu gelah banci ibahanndu bagi si enggo Kubahan man bandu e. 13:16 Kukataken man bandu: Situhuna la lit budak belinen asangken tuanna. Labo lit suruh-suruhen belinen asangken si nuruh ia. 13:17 Genduari enggo ietehndu kerna si enda; malem tuhu-tuhu atendu adi idalankenndu i bas geluhndu. 13:18 Aku ngerana enda labo kerna kam kerina. Kueteh nge ise enggo Kupilihi. Tapi kai si tersurat i bas Pustaka Si Badia arus seh. I bas Pustaka Si Badia lit tersurat, 'Kalak si man ras Aku, ia me si ngelawan Aku.' 13:19 Si enda Kukataken man bandu ope denga jadi, gelah kenca jadi, tek kam maka 'Aku me Aku.' 13:20 Kukataken pe man bandu: Kalak si ngaloken persuruhenKu, ialokenna pe Aku, janah kalak si ngaloken Aku, ialokenna pe Dibata si nuruh Aku." 13:21 Kenca ikataken Jesus si e, megogo kal ateNa. E maka ngerana Ia alu terus terang nina, "Kukataken man bandu, si tuhuna sekalak i bas kam nandangi ndayaken Aku." 13:22 Tumpat kal ukur ajar-ajar, e maka sinihenen ia sapih-sapih ia, sabap la ietehna ise kata Jesus e. 13:23 Sekalak ajar-ajar si lebih ikelengi Jesus kundul rembak ras Ia. 13:24 E maka ikuit Simon Petrus ia, jenari nina, "Sungkun ise kin kataNa e?" 13:25 E maka ajar-ajar si kundul rembak ras Jesus ndai ngerembaki Jesus tole jenari nina nungkun, "O Tuhan, ise kin kataNdu e?" 13:26 Erjabap Jesus, "Kucalehken me roti enda ku bas mangkuk jenari man ise kari kubereken, ia me katangKu." Kenca icalehkenNa roti e, iberekenNa man Judas anak Simon Iskariot. 13:27 Asum ialoken Judas roti e minter ibengketi Iblis ia. Jenari nina Jesus man bana, "Kai si enggo irencanakenndu e, minterlah bahan!" 13:28 Sekalak pe ajar-ajar la ngangkasa kai si ikataken Jesus e. 13:29 Piga-piga ajar-ajar erpengakap maka Judas isuruh Jesus nukur keperlun guna perayan Paskah; ntah isuruh Jesus ia mereken penampat man kalak musil, sabap Judas me si njemak duit. 13:30 Kenca ialoken Judas roti e, minter ia lawes ndarat; paksa si e wari enggo gelap. 13:31 Kenca Judas lawes nina Jesus, "Genduari ipetangkas me kemulian Anak Manusia si isuruh Dibata janah kemulian Dibata pe ipetangkas arah Ia. 13:32 Adi kemulian Dibata ipetangkas arah Ia maka Dibata pe mpetangkas kemulian Anak Manusia e i bas diriNa, janah minter me ibahanNa. 13:33 O anakku, kentisik nari ngenca Aku ras kam. Idaramindu me pagi Aku. Tapi genduari Kukataken man bandu bagi si enggo Kukataken man kalak Jahudi e, 'Kam labo banci lawes ku inganKu e.' 13:34 Kubereken man bandu pedah si mbaru, e me: Sikeleng-kelengenlah kam. Bagi Aku enggo engkelengi kam, kam pe min arus sikeleng-kelengen. 13:35 Adi sikeleng-kelengen kam, kerina kalak meteh maka kam ajar-ajarKu." 13:36 Jenari nungkun Simon Petrus man Jesus nina, "O Tuhan, ku ja kin ateNdu lawes?" Erjabap Jesus, "Genduari labo banci Aku ikutkenndu ku inganKu lawes e, tapi denggo ikutkenndu nge Aku." 13:37 E maka nungkun ka Petrus nina, "O Tuhan ngkai maka la banci Kam kuikutken genduari? Aku pang mate man gunaNdu." 13:38 Ngaloi Jesus, "Tuhu-tuhu kin kam enggo pang mate man gunangKu?" Kukataken man bandu, "Si tuhuna ope denga tekuak manuk enggo ipersokenndu pagi Aku telu kali."
14:1 Jenari nina Jesus man ajar-ajarNa kerina, "Ola aru atendu. Ernalemlah kam man Dibata janah ernalem pe kam man bangKu. 14:2 I bas rumah BapangKu mbas ingan; janah lawes me Aku nikapken ingan man bandu. Tuhu kap enda; adi lang labo Kukataken bage man bandu. 14:3 Kenca Aku lawes nikapken ingan man bandu, reh denga pagi Aku ngalo-ngalo kam, gelah i ja Aku i je kam pe. 14:4 Ietehndu dalanna ku inganKu lawes e." 14:5 E maka nungkun Tomas man Jesus, "O Tuhan, la kap ieteh kami ku ja Kam lawes; kuga ka pemeteh kami dalanna ku je?" 14:6 Erjabap Jesus man Tomas, "Aku kap dalan nandai Dibata, dingen ndatken kegeluhen. Ise pe la banci ndahi Bapa adi la arah Aku. 14:7 Adi Aku enggo itandaindu, BapangKu e pe enggo itandaindu. Genduari nari itandaindu me Ia janah enggo pe idahndu." 14:8 E maka nina Pilipus man Jesus, "O Tuhan cidahken dage Bapa e man kami, gelah puas iakap kami." 14:9 Ngaloi Jesus, "O Pilipus, bage dekahna enggo Aku ras kam kerina, langa kin Aku itandaindu? Ise enggo ngidah Aku, enggo idahna pe Bapa e. Engkai maka nindu, 'Cidahken Bapa e man kami?' 14:10 O Pilipus, la kin kam tek maka Aku ersada ras Bapa, janah Bapa ersada ras Aku? Kerina si enggo Kukataken man bandu, labo i bas Aku nari saja. Bapa si ersada ras Aku e me si ndahiken kerina si e. 14:11 Teklah kam maka Aku ersada ras Bapa, janah Bapa ersada ras Aku. Adi la kam tek arah si Kukataken enda, arah perbahanenKu e lah gia kam tek. 14:12 Kukataken man bandu maka situhuna kalak si tek man bangKu, ibahanna me bagi si enggo Kubahan. Tuhu ibahanna pe terbelinen asangken si e, sabap Aku lawes ndahi BapangKu. 14:13 Maka kai pe pagi ipindondu i bas gelarKu, Kubereken nge, gelah Bapa ipemuliaken arah Anak e. 14:14 Ntah kai gia ipindondu i bas gelarKu, Kubereken nge." 14:15 "Adi keleng atendu Aku, ikutkenlah pedah-pedahKu. 14:16 Kupindoken me man BapangKu gelah isuruhNa Penampat si deban man bandu e me Kesah si naksiken kebenaren kerna Dibata, gelah itemaniNa kam rasa lalap. 14:17 Doni enda la ngasup ngaloken Ia sabap la Ia idah doni enda dingen la itandaina. Tapi kam itandaindu Ia sabap Ia ras kam, janah kam ringan i bas Ia. 14:18 Labo kam Kutadingken melumang. Reh nge Aku mulihken ndahi kam. 14:19 Kentisik nari, lanai bo Aku idah doni enda. Tapi kam idahndu nge Aku janah perbahan Aku nggeluh, kam pe nggeluh me. 14:20 I bas wari e pagi, ietehndu me maka Aku ersada ras Bapa, janah kam ersada ras Aku bage pe Aku ersada ras kam. 14:21 Kalak si ngaloken dingen ngikutken pedah-pedahKu, ia me si engkelengi Aku. Kalak si engkelengi Aku ikelengi BapangKu kap ia; janah Aku pe engkelengi ia ras Kupetandaken diringKu man bana." 14:22 Jenari nina Judas (labo Judas Iskariot), "O Tuhan nggit Kam mpetandaken diriNdu man kami, janah la man doni enda?" 14:23 Erjabap Jesus, "Kalak si engkelengi Aku, ikutkenna kap katangKu. Alu bage ikelengi BapangKu me ia, janah Bapa ras Aku reh ndahi ia dingen ringan ras ia. 14:24 Kalak si la engkelengi Aku, labo ikutkenna katangKu. Kata si ibegikenndu labo katangKu tapi rehna i bas Bapa si nuruh Aku e nari. 14:25 Si enda Kukataken man bandu asum Aku ras kam denga. 14:26 Si nampati, e me Kesah Si Badia, si isuruh Bapa pagi i bas gelarKu, iajariNa kam kerna kai pe; dingen ipersingetiNa kam pagi kerna kerina si enggo Kukataken man bandu. 14:27 Malem me atendu Kutadingken; Kemalemen ateKu Kubereken man bandu. Carana Aku mere kemalemen ate e man bandu labo bali ras cara doni enda merekenca. Ola ukurndu gulut janah ola kam mbiar. 14:28 Enggo ibegindu maka ningku, 'Lawes me Aku, tapi reh ka nge pagi Aku ndahi kam.' Adi keleng atendu Aku, meriah nge ukurndu Aku lawes ndahi Bapa, sabap BapangKu e belinen nge kuasaNa asangken Aku. 14:29 Genduari enggo Kukataken si e man bandu ope denga jadi; gelah kenca jadi pagi si e tek kam. 14:30 Lanai bo Aku gedang ngerana ras kam, sabap si Penguasa doni enda reh me. Si tuhuna labo lit kuasana nandangi Aku. 14:31 Tapi gelah ieteh doni enda maka keleng ateKu Bapa, e me sabapna maka Kuikutken kerina si isuruh Bapa. Ota lawes kita i bas ingan enda nari."
15:1 "Aku kap batang anggur si tuhu-tuhu, janah BapangKu kap perkebun anggur e. 15:2 Dahan-dahan si la erbuah itektekNa, janah dahan-dahan si erbuah ibersihkenNa alu mutiki tunas-tunas si la erguna gelah reh buena buahna. 15:3 Kam enggo ibersihken alu kata si Kukataken man bandu. 15:4 Tetaplah min kam i bas Aku, janah Aku pe tetap i bas kam. Dahan labo ngasup erbuah adi la kin ersada dahan e ras batangna. Bage me pe kam, adi la kin kam ersada ras Aku labo kam erbuah. 15:5 Aku kap batang anggur janah kam me dahan-dahanna. Kalak si tetap i bas Aku dingen Aku i bas ia melala me buahna; sabap adi la kin ras Aku labo kam ngasup erbahan kai pe. 15:6 Kalak si la tetap i bas Aku itektek me bagi dahan. Jenari kerah me ia. Ipepulung me dahan e jenari iambekken ku bas api. 15:7 Adi kam tetap i bas Aku janah KatangKu tetap nggeluh i bas kam, banci ipindondu kai pe atendu, janah ialokenndu me kai si ipindondu e. 15:8 Adi melala buahndu, kam me ajar-ajarKu, janah i bas si e ermulia me BapangKu. 15:9 Kam Kukelengi bali ras Bapa engkelengi Aku; tetap min kam i bas kekelengenKu e. 15:10 Adi ikutkenndu pedah-pedahKu, tetap nge kam Kukelengi, bali ras Aku ngikutken pedah-pedah BapangKu, janah tetap Aku ikelengiNa." 15:11 "Si enda Kukataken man bandu gelah inanamindu keriahenKu janah gelah tuhu-tuhu kal meriah ukurndu. 15:12 Enda me pedahKu: Sikeleng-kelengen min kam bagi Aku engkelengi kam. 15:13 Labo lit keleng ate si belinen asangken keleng ate kalak si nggit ngasamken kesahna guna teman-temanna. 15:14 Kam teman-temanKu adi idalankenndu kai si Kupedahken man bandu. 15:15 Lanai bo kam Kugelari juak-juak, sabap sekalak juak-juak labo ietehna kai si ibahan tuanna. Tapi Kugelari kam teman-temanKu sabap man bandu enggo Kupeseh kerina si enggo Kubegi i bas BapangKu nari. 15:16 Labo kam si milih Aku. Tapi Aku nge milih kam janah nuruh kam lawes gelah erbuah meramis, e me buah si tahan rasa lalap. Adi bage, kai pe ipindondu i bas gelarKu ibereken Bapa e nge man bandu. 15:17 Dage pedahKu man bandu: Sikeleng-kelengenlah kam." 15:18 "Adi nembeh ate doni enda man bandu, ingetlah maka enggo leben nembeh atena man bangKu. 15:19 Adi nggit kam jadi sikerajangen doni, ikelengi doni enda nge kam bagi anak-anakna. Tapi kam enggo Kupilih i bas doni enda nari, e maka genduari lanai kam sikerajangen doni. Perbahan si enda me maka nembeh ate doni enda man bandu. 15:20 Ingetlah kai si enggo Kukataken man bandu, 'La lit juak-juak belinen asangken tuanna.' Adi ibahan kalak Aku ngenanami kiniseran, kam pe ibahan kalak me ngenanami kiniseran. Adi ikutkenna katangKu, katandu pe ikutkenna me. 15:21 Kerina pagi si enda ibahanna man bandu erkiteken kam sikerajangenKu; bage pe erkiteken la itandaina si Nuruh Aku. 15:22 Bicara la Aku reh, janah la Aku pernah ngerana man bana, labo min ndai ia banci isalahken. Tapi genduari lanai lit perdalihenna kerna dosana e. 15:23 Kalak si nembeh atena man bangKu, nembeh pe atena man BapangKu. 15:24 Bicara la Kubahan tanda-tanda sengget si mbelin i lebe-lebena, labo min ndai ia ndabuh ku bas dosa; tapi genduari enggo idahna perbahanenKu, si langa pernah ibahan kalak, janah elem-elem ia man bangKu ras man BapangKu. 15:25 Alu bage enggo seh kai si tersurat i bas kitap Undang-undangna, 'Elem-elem ia man bangKu la lit dalanna.' 15:26 Kusuruh pagi Penampat si reh i bas Bapa nari ndahi kam. Ia kap Kesah si ncidahken kebenaren Dibata. Adi enggo pagi reh Ia kap si eraksi kerna Aku. 15:27 Kam pe arus ngerana kerna Aku, sabap tangtangna nari kam ras Aku."
16:1 "Si enda Kukataken man bandu gelah ola monce-once kinitekenndu. 16:2 Ipedaratna me kam i bas rumah pertoton nari. Reh me pagi paksana maka kalak si munuh kam erpengakap maka arah perbahanenna e isehkenna peraten Dibata. 16:3 Bagenda perbahanenna man bandu erkiteken la itandaina BapangKu bage pe la itandaina Aku. 16:4 Tapi si enda enggo Kukataken man bandu genduari gelah kenca seh pagi bage ingetndu maka enggo Kukataken man bandu kerna si e." "Si enda la Kukataken man bandu nai nari sabap ras kam denga Aku. 16:5 Genduari lawes me Aku ndahi si Nuruh Aku, tapi sekalak pe la kam nungkun, 'Ku ja Kam lawes?' 16:6 Genduari megogo atendu erkiteken enggo Kukataken si enda man bandu. 16:7 Tapi Kukataken man bandu: Si tuhuna man bandu ulin kap Aku lawes. Sabap adi la Aku lawes, labo reh Penampat e. Tapi adi lawes Aku, Kusuruh me Ia ndahi kam. 16:8 Kenca pagi reh Penampat e ipetangkasNa me man bangsa doni enda maka pengertin bangsa doni enda salah kerna dosa, kerna ise si benar bage pe kerna ukumen si reh i bas Dibata nari. 16:9 IpetangkasNa maka bangsa doni enda salah pengertinna kerna dosa perbahan la ia tek man bangKu. 16:10 Ipetangkas Penampat e me pagi man bangsa doni enda maka Aku nge benar alu encidahken maka adi lanai Aku idahndu i bas doni enda, e me tandana Aku enggo lawes ndahi Bapa. 16:11 IpetangkasNa maka salah pengertin bangsa doni enda kerna ukumen si rehna i bas Dibata nari alu encidahken maka si Penguasa doni enda enggo iukum. 16:12 Melala denga ateKu Kukataken man bandu, tapi genduari langa kam ngasup ngalokenca. 16:13 Tapi asum reh pagi Kesah si naksiken kebenaren kerna Dibata, ipetangkasNa me man bandu kebenaren kerna Dibata alu serta. Ia ngerana labo bagi ate-ateNa saja, tapi ikatakenNa me kai si ibegiNa dingen iturikenNa kai si nandangi jadi. 16:14 IpermuliakenNa pagi Aku, sabap iberitakenNa me man bandu kai si ialokenNa i bas Aku nari. 16:15 Kerina si lit i bas BapangKu sikerajangenKu pe. E me sabapna Kukataken man bandu maka ialoken Kesah e me kai si Kubereken man baNa gelah ipesehNa man bandu." 16:16 "Kentisik nari lanai Aku idahndu, jenari kentisik nari ka idahndu ka me Aku." 16:17 Megi kata Jesus e, piga-piga ajar-ajarNa sisungkun-sungkunen sapih-sapih ia nina, "Kai nge maksudNa maka nina, 'Kentisik nari lanai Aku idahndu; jenari kentisik nari ka idahndu ka me Aku?' IkatakenNa pe, 'Sabap lawes me Aku ndahi Bapa.' 16:18 Kai nge maksudNa, 'Kentisik nari' e? La kap siangka maksudNa!" 16:19 Ieteh Jesus maka nungkun ate ajar-ajar man baNa, e maka nina, "Enggo Kukataken man bandu, 'Kentisik nari lanai Aku idahndu; jenari kentisik nari ka idahndu ka me Aku.' Kerna si enda kin maka kam sisungkun-sungkunen? 16:20 Kukataken man bandu: Si tuhuna tangis-ngandung kam pagi, tapi bangsa doni enda ermeriah ukur. Ceda pagi atendu, tapi ceda atendu e salih jadi keriahen. 16:21 Sekalak diberu si nandangi mupus aru atena, sabap enggo seh paksa kiniseranna. Tapi kenca tubuh anak e, lanai ingetna kiniseranna e, sabap meriah ukurna erkiteken enggo tubuh sada anak ku doni enda. 16:22 Bage me pe kerna kam: Genduari ceda atendu, tapi kenca jumpa kita pagi mulihi tuhu-tuhu meriah kal ukurndu, janah ise pe la ngasup muat keriahen si lit i bas kam e. 16:23 I bas wari e pagi lanai lit penungkunenndu man bangKu. Kukataken man bandu: Si tuhuna ntah kai gia ipindondu man Bapa i bas gelarKu, iberekenNa nge man bandu. 16:24 Seh asa genduari langa pernah ipindondu kai pe i bas gelarKu. Pindolah, tentu ngalo me kam gelah tuhu-tuhu meriah kal ukurndu." 16:25 "Kerna si enda enggo Kukataken man bandu arah perumpaman. Tapi seh me paksana maka lanai Aku ngerana arah perumpaman man bandu, tapi alu tangkas Kukataken man bandu kerna Bapa e. 16:26 I bas wari e pagi mindo me kam man baNa i bas gelarKu; janah labo Kukataken maka Aku mindo man baNa guna keperlunndu, 16:27 sabap kam pe keleng nge ate Bapa e. Keleng ate Bapa e kam perbahan keleng atendu Aku janah tek kam maka Aku reh i bas Dibata nari. 16:28 Tuhu Aku reh i bas Bapa nari, janah enggo reh ku doni enda. Tapi genduari Kutadingken me doni enda; mulihken Aku ndahi Bapa." 16:29 Jenari nina ajar-ajar Jesus man Jesus, "Genduari alu tangkas ikatakenNdu man kami, la make perumpaman. 16:30 Genduari enggo ieteh kami kai pe ietehNdu nge; la Kam perlu kalak nungkun man bandu. Erkiteken si e tek kami maka Kam reh i bas Dibata nari." 16:31 Ngaloi Jesus, "Enggo kam tek genduari? 16:32 Reh me paksana, janah enggo seh pe, maka merap me kam kerina, sekalak-sekalak kam lawes ku rumahndu janah itadingkenndu Aku sisada. Tapi amin bage gia labo Aku sisada, sabap Bapa ras Aku kap. 16:33 Si enda Kukataken man bandu gelah malem atendu erkiteken kam ersada ras Aku. Jumpa kiniseran me kam ibahan doni enda. Tapi ola kam mbiar! Enggo kap Kutaluken doni enda!"
17:1 Kenca Jesus dung ngerana, itareNa ku langit nina, "O Bapa genduari enggo seh paksana. Pemuliakenlah AnakNdu gelah AnakNdu pe mpermuliaken Kam. 17:2 Enggo iberekenNdu man baNa kuasa nandangi kerina manusia, gelah iberekenNa kegeluhen si tuhu-tuhu si la erkeri-kerin man kalak si iendeskenNdu man baNa. 17:3 Kegeluhen si tuhu-tuhu si la erkeri-kerin e: Itandai kalak Kam ngenca Dibata si tuhu-tuhu, dingen itandaina Jesus Kristus si isuruhNdu. 17:4 Enggo Kucidahken kemulianNdu i doni enda, enggo Kudungi dahin si iberekenNdu man bangKu. 17:5 O Bapa, muliakenlah Aku genduari i bas adep-adepenNdu bagi Aku ermulia nai ras Kam ope denga lit doni enda. 17:6 Kam enggo Kupetandaken man kalak si enggo iendeskenNdu man bangKu, si enggo ipilihNdu i bas doni enda nari. SikerajangenNdu kap ia, janah enggo iendeskenNdu man bangKu. Enggo ikutkenna kataNdu, 17:7 janah genduari ietehna kerina si iberekenNdu man bangKu rehna i bas Kam nari. 17:8 Enggo Kupeseh Kata si iberekenNdu man bangKu, janah enggo ialokenna. Ngaku pe ia maka Aku reh i bas Kam nari janah tek pe ia maka Kam si nuruh Aku. 17:9 Ertoto Aku man baNdu kerna ia. Labo Aku ertoto kerna doni enda, tapi ertoto kerna kalak si enggo iendeskenNdu man bangKu, sabap sikerajangenNdu kap ia. 17:10 Kerina si lit i bas Aku sikerajangenNdu kap, bage pe kerina si lit i bas Kam sikerajangenKu; janah kemulianKu teridah arah ia kerina. 17:11 Genduari reh Aku ndahi Kam; lanai ndekah Aku i doni enda, tapi ia i doni enda denga. O Bapa si Badia, kepkep ia alu KuasaNdu, Kuasa si iberekenNdu man bangKu, gelah ersada ia bagi Kam ersada ras Aku. 17:12 Sanga Aku ras ia denga Kukepkep ia alu KuasaNdu, Kuasa si iberekenNdu man bangKu. Enggo Kukawali ia, janah la lit sekalak pe bene; kalak si arusna bene e nge ngenca bene gelah seh si tersurat i bas Pustaka Si Badia. 17:13 Genduari reh Aku ndahi Kam, janah kerna si enda Kukataken i doni enda gelah banci igejapkenna keriahenKu si tuhu-tuhu. 17:14 KataNdu enggo Kupeseh man bana, tapi nembeh ate doni enda man bana sabap la ia sikerajangen doni enda bagi Aku la sikerajangen doni enda. 17:15 Labo Kupindo gelah ipedarat ia i bas doni enda nari, tapi Kupindoken man baNdu gelah ikawaliNdu ia i bas si jahat nari. 17:16 Bagi Aku labo sikerajangen doni enda, bage pe ia labo sikerajangen doni. 17:17 Serapken ia man gunaNdu arah kebenaren; KataNdu kap kebenaren. 17:18 Enggo Kusuruh ia ku doni enda bali ras Aku enggo isuruhNdu ku doni enda. 17:19 Kuendesken diringKu Bandu guna ia, gelah ia pe iserapkenNdu man gunaNdu arah kebenaren. 17:20 Aku ertoto labo saja kerna ia, tapi pe kerna kerina kalak si tek man bangKu erkiteken berita si ipesehna. 17:21 O Bapa, ertoto Aku man baNdu gelah ersada min ia kerina. Ersadalah min ia ras Kita, bagi Kam ersada ras Aku janah Aku ersada ras Kam. Ersadalah min ia gelah tek doni enda maka Kam me si nuruh Aku. 17:22 Kemulian si iberekenNdu man bangKu, enggo Kubereken man bana, gelah ia ersada bagi Kam ersada ras Aku. 17:23 Aku ersada ras ia, janah Kam ersada ras Aku, gelah ia pe min tuhu-tuhu ersada. Alu bage tek doni enda maka Kam si Nuruh Aku, janah idah doni enda maka keleng ateNdu ia bagi keleng ateNdu Aku. 17:24 O Bapa, ateKu min gelah kalak si enggo iendeskenNdu man bangKu, ersada ras Aku i bas inganKu, gelah banci idahna kemulian si iberekenNdu man bangKu; sabap kam engkelengi Aku ope denga pe doni enda ijadiken. 17:25 O Bapa si bujur, doni enda la nandai Kam, tapi Aku nandai Kam kap, janah kalak si enggo iendeskenNdu man bangKu pe meteh maka Kam me si nuruh Aku. 17:26 Kam enggo Kupetandaken man bana janah Kuterusken me bage gelah keleng ateNdu si iberekenNdu man bangKu seh pe man bana, bage pe gelah ersada Aku ras ia."
18:1 Kenca dung Jesus ertoto, lawes Ia ras ajar-ajarNa ngepar Lau Kidron. Kenca seh i lepar bengket Jesus ku bas sada peken. 18:2 Judas, si penghianat e meteh ingan e, sabap enggo megati i je pulung Jesus ras ajar-ajarNa. 18:3 E maka reh Judas ku je. Ibabana sada pasuken perajurit ras piga-piga penjaga Rumah Pertoton kalak Jahudi si isuruh imam-imam si mbelin ras kalak Parisi. Kalak enda ndai ersenjata janah ibabana pe lampu ras obor. 18:4 Enggo ieteh Jesus kai si nandangi jadi man baNa; e maka ideherina si reh e, jenari Nina, "Ise daramenndu?" 18:5 Erjabap kalak ndai, "Jesus kalak Nasaret e." Nina Jesus, "Aku kap katandu e." Judas si penghianat e tedis i je ras kalak ndai. 18:6 Asum nina Jesus, "Aku kap katandu e," surut kalak e kerina jenari guling ku taneh. 18:7 Isungkun Jesus ka kalak ndai nina, "Ise kin daramenndu?" Erjabap kalak e, "Jesus kalak Nasaret e." 18:8 Nina Jesus, "Ma enggo Kukataken man bandu maka Aku me si idaramindu e? Dage adi Aku kin daramenndu, pelepaslah kalak enda lawes." 18:9 (Si enda ikataken Jesus gelah seh kai si enggo ikatakenNa,e me, "O Bapa labo sada pe Kupelepas bene kalak si enggo iendeskenNdu man bangKu.") 18:10 Simon Petrus lit pedangna. Idekdekna pedangna e jenari itampulna juak-juak Imam si Mbelin seh retap cupingna si kemuhen. Gelar juak-juak ndai e me si Malkus. 18:11 Jenari nina Jesus man Petrus, "Sembungken pedangndu e! Aku labo banci la minem tare calung kiniseran si ibereken BapangKu man bangKu." 18:12 Jenari itangkap perajurit-perajurit ras perwira bage pe penjaga-penjaga Rumah Pertoton e Jesus. 18:13 Kenca iketna ibabana ngadap man Annas. Si Annas, e me mama Kayapas. Kayapas e me Imam si Mbelin i bas tahun si ndai. 18:14 Kayapas me si enggo ngataken man kalak Jahudi maka ulin sekalak saja mate guna bangsa e kerina. 18:15 Simon Petrus ras sekalak ajar-ajar si deban ngikut-ngikut Jesus. Teman Simon Petrus enda ndai itandai Imam si Mbelin, e maka banci terus ikutkenna Jesus ku kesain rumah Imam si Mbelin e. 18:16 Tapi Petrus nimai i daraten pintu gerbang. Jenari ndarat ka teman Petrus e. Ercakap-cakap ia ras diberu si erjaga i bas pintu gerbang, jenari ibabana Petrus ku bas. 18:17 Tapi nina diberu e man Petrus, "Ma kam kin sekalak i bas ajar-ajarNa e?" "Lang," nina Petrus njabapsa. 18:18 I bas berngi si ndai seh kal bergehna. Juak-juak ras si erjaga pegara api i kesain e, jenari cudu ia i kelewet api e. Ideheri Petrus kalak e jenari ikut pe ia cudu. 18:19 Isungkuni Imam si Mbelin me Jesus kerna ajar-ajarNa ras kai si iajarkenNa. 18:20 Nina Jesus, "Terang-terangen kap Aku rusur ngerana. Aku ngajar i bas rumah-rumah pertoton bage pe i bas Rumah Pertoton ingan pulung kalak Jahudi. La pernah Aku ngerana erbuni-buni. 18:21 Engkai maka Aku isungkunindu? Sungkunilah kalak si enggo megi pengajarenKu. Sungkunilah ia, tentu ietehna nge kai si enggo Kuturiken man bana." 18:22 Megi pengerana Jesus e, sekalak si erjaga e minter marap Ia janah nina, "Pangna kam ngerana bage man Imam si Mbelin!" 18:23 Ngaloi Jesus man bana, "Adi lit salah i bas pengeranangKu e, katakenlah man kalak si i jenda salahKu e. Tapi adi labo salah pengeranangKu e, ngkai maka iparapndu Aku?" 18:24 Jenari isuruh Annas perajurit-perajurit maba Jesus ngadap man Kayapas, Imam si Mbelin e. Paksa si e Jesus igariken denga. 18:25 Petrus tedis denga deher api e dingenna cudu. E maka nina kalak si je man bana, "Ma kam kin sekalak i bas ajar-ajarNa?" Tapi merso Petrus nina, "Lang." 18:26 Jenari nina sekalak juak-juak Imam si Mbelin, e me kade-kade si enggo retap cupingna ibahan Petrus, "Ma kam kin si kuidah ras Ia asum i bas peken e?" 18:27 Merso ka Petrus nina, "Lang." Kenca bage nina, minter tekuak manuk. 18:28 Kenca terang, erpagi-pagi si lampas ibaba kalak ndai Jesus i bas rumah Kayapas nari ku istana Gubernur. Kalak Jahudi la bengket ku bas istana e sabap la atena ia meluat rikutken Undang-undang agama gelah banci ia ikut i bas man pangan Paskah. 18:29 E maka ndarat Pilatus njumpai kalak e, jenari nungkun ia, nina, "Kai kin salahNa maka iadukenndu?" 18:30 Erjabap kalak e, "Labo Ia ibaba kami ngadap man bandu adi la kin lit salahNa." 18:31 Nina Pilatus man kalak e, "Babalah Ia, janah kamlah ngadili Ia rikutken Undang-undang agamandu!" Ngaloi kalak Jahudi e, "Kami la banci munuh kalak." 18:32 (Bage me jadi gelah seh kai si enggo ikataken Jesus kernakematenNa.) 18:33 Mulihken Pilatus ku bas istana jenari idilona Jesus. Nungkun ia man Jesus nina, "Kam kin raja kalak Jahudi e?" 18:34 Erjabap Jesus, "I bas ukurndu nari kin penungkunenndu enda ntah kalak si deban enggo erberita man bandu kerna Aku?" 18:35 Ngaloi Pilatus, "Kalak Jahudi kin aku? BangsaNdu ras imam-imam simbelin e nge si ngendesken Kam man bangku. Kai kin enggo ibahanNdu?" 18:36 Nina Jesus, "KinirajanKu labo i bas doni enda nari asalna. Adi i bas doni enda nari kin KinirajanKu tentu enggo ngelawan suruh-suruhenKu gelah ola Aku iendesken man kalak Jahudi. Tapi KinirajanKu labo i bas doni enda nari!" 18:37 Jenari nungkun Pilatus, "Adi bage, raja dage kam?" Erjabap Jesus, "Bagi katandu e me. Aku tubuh dingen reh ku doni enda, guna encidahken kebenaren Dibata. Janah kalak si ngaloken kebenaren Dibata e ibegikenna nge Aku." 18:38a Jenari nungkun ka Pilatus nina, "Kai kin kebenaren e?" 18:38b Jenari ndarat ka Pilatus njumpai kalak Jahudi e. Nina, "La lit kudat salahNa guna ngukum Ia. 18:39 Tapi rikutken kebiasan i tengah-tengahndu, i bas tep-tep Wari Raya Paskah kupulahi sekalak tahanen man bandu. Atendu kin maka kupulahi Raja kalak Jahudi e man bandu?" 18:40 Erjabap kalak Jahudi e alu sora si megang, "Lang! Ola Ia pulahi. Pulahilah si Barabas!" (Barabas e me sekalak pengerampok.)
19:1 Kenca bage isuruh Pilatus perajurit-perajuritna ngeligas Jesus. 19:2 Ibahan perajurit-perajurit tengkuluk duri jenari itamakenna ku takal Jesus. Kenca bage ipakekenna man Jesus jubah si megara tua. 19:3 Ideherina Jesus jenari nina, "Tabi, o Raja kalak Jahudi!" Kenca bage iparapna Jesus. 19:4 Ndarat ka Pilatus sekali nari, jenari nina man kalak si nterem e, "Nehenlah, kubaba me Ia ndarat ku lebe-lebendu gelah idahndu maka la lit kudat salahNa guna ngukum Ia." 19:5 E maka ndarat me Jesus si enggo make tengkuluk duri ras jubah si megara tua e. Nina Pilatus man kalak si nterem e, "Nehenlah! Enda me Ia!" 19:6 Ngidah Jesus enggo ndarat nina imam-imam si mbelin ras pengawal-pengawal alu sora megang, "Pakukenlah Ia ku kayu persilang! Pakukenlah Ia ku kayu persilang!" Nina Pilatus man kalak e, "Babalah Ia, janah kamlah makuken Ia ku kayu persilang. Aku, la lit kudat salahna guna ngukum Ia." 19:7 Ngaloi kalak Jahudi e, "Rikutken Undang-undang agama kami Ia arus iukum mate, sabap iakukenNa maka Ia Anak Dibata." 19:8 Megi kata e reh biarna Pilatus. 19:9 Mulihken Pilatus ku bas istana jenari nungkun ia man Jesus nina, "I ja nari kin Kam?" Tapi la ngaloi Jesus. 19:10 E maka nina Pilatus man baNa, "La kam nggit ngaloi aku? Ingetlah! Lit kap kuasangku mulahi Kam janah lit pe kuasangku makuken Kam ku kayu persilang!" 19:11 Ngaloi Jesus, "Labo lit kuasandu nandangi Aku adi la kin ibereken Dibata man bandu. E maka belinen nge dosa kalak si ngendesken Aku man bandu asangken dosandu!" 19:12 Megi kata Jesus e, idarami Pilatus dalan guna mulahi Jesus. Tapi ngerana kalak Jahudi alu sora si megang nina, "Adi ipulahindu Ia, e tandana kam la erteman ras pemerentah Roma! Kalak si ngakuken dirina raja, musuh pemerentah kap." 19:13 Megi kata enda, ibaba Pilatus me Jesus ndarat, jenari kundul Ia i bas kursi pengadilen i bas ingan si igelari Kesain Batu (I bas cakap Heber igelari: Gabbata.) 19:14 Matawari nandangi ciger. Karaben i bas wari si e ibenaken me Wari Raya Paskah. Nina Pilatus man kalak Jahudi e, "Enda me Rajandu!" 19:15 Ngaloi kalak si nterem alu sora si megang, "Bunuhlah Ia! Bunuhlah Ia! Pakukenlah Ia ku kayu persilang!" Nungkun Pilatus, "Atendu kin gelah kupakuken Rajandu enda ku kayu persilang?" Erjabap imam-imam si mbelin, "Raja Roma ngenca raja kami." 19:16 Kenca bage iendesken Pilatus me Jesus man kalak e guna ipakuken ku kayu persilang. E maka ibaba kalak ndai me Jesus. 19:17 Ndarat Jesus, ipersanNa kayu persilang inganNa ipakuken. Erdalan Ia ku ingan si igelari Ingan Takal-takal. (I bas cakap Heber igelari Golgota.) 19:18 I je me Jesus ipakuken kalak ndai ku kayu persilang. Ipakukenna pe dua kalak penjahat, sekalak arah kawes Jesus, sekalak nari arah kemuhenNa. 19:19 Isuratken Pilatus sada keterangen kerna salah Jesus e me, "Jesus kalak Nasaret, Raja kalak Jahudi", jenari ileketkenna i kayu persilang arah babo takal Jesus. 19:20 Nterem kalak Jahudi ngogesa, sabap ingan Jesus ipakuken e la ndauh i kuta nari. Keterangen ndai isuratken i bas cakap Heber, Latin bage pe i bas cakap Junani. 19:21 Nina Imam si Mbelin kalak Jahudi man Pilatus, "Ola suratken: Raja kalak Jahudi, tapi suratkenlah, 'Nina kalak enda: Aku kap Raja kalak Jahudi.' " 19:22 Tapi ngaloi Pilatus, "Kai si enggo kusuratken e, lanai banci isambari!" 19:23 Kenca Jesus ipakuken perajurit-perajurit e, ibuatna uis Jesus jenari ibagi empatkenna, tersada bagin ia sekalak. Ibuatna pe jubah Jesus, jubah e i datas nari seh ku teruh la lit penjarumenna. 19:24 Nina perajurit e sapih-sapih ia, "Jubah enda ola sicaingken. Sitikam tandukken sajalah guna nentuken man ise jubah enda." Si enda jadi gelah seh si tersurat i bas Pustaka Si Badia, "Ibagi-bagikenna uisKu, janah itikam tandukkenna jubahKu." Enda me si ibahan perajurit-perajurit e. 19:25 Deherken kayu persilang Jesus, tedis nandeNa, senina nandeNa, Maria ndehara Kleopas ras Maria Magdalena. 19:26 Idah Jesus nandeNa tedis i je ras ajar-ajar si ikelengiNa, e maka Nina man nandeNa, "O nande, ena me anakndu." 19:27 Jenari nina Jesus man ajar-ajar si ikelengiNa e, "Ena me nandendu." E maka mulai paksa si ndai ibaba ajar-ajar e nande Jesus ringan i bas rumahna. 19:28 Kenca bage ieteh Jesus maka enggo dung kerina dahinNa. Janah gelah seh bagi si tersurat i bas Pustaka Si Badia nina Jesus, "Muas Aku." 19:29 I bas ingan ndai lit sada guci dem anggur si macem. Icelupken kalak ndai bunga karang ku bas anggur e, jenari icucukkenna ku batang isop, kenca bage idudurkenna ku biber Jesus. 19:30 Icepcep Jesus anggur e, jenari nina, "Enggo dung!" Jenari mungkuk takalNa, mate Ia. 19:31 Asum Jesus ipakuken e, e me wari Jumat, wari persikapen guna wari Sabat kalak Jahudi. Kalak Jahudi ersura-sura gelah mait kalak si ipakuken e olanai min gantung i kayu persilang, sabap wari Sabat si pepagina, e me wari Sabat si Mbelin. E maka ipindoken kalak Jahudi man Pilatus gelah banci min ipenggelkenna nahe kalak si ipakuken e dingen ipesusurna maitna e i kayu persilang nari. 19:32 E maka ipenggelken perajurit-perajurit nahe kalak si pemena ras si peduaken si ipakuken raduken Jesus e. 19:33 Tapi kenca ia seh ku Jesus nahe Jesus la ipenggelkenna sabap Jesus enggo mate. 19:34 E maka sekalak perajurit nebak awak Jesus alu lembingna; ndarat dareh ras lau i bas nari. 19:35 (Kalak si ngidah kejadin enda jine nge meritaken kejadinenda, gelah kam pe tek. Kai si iberitakenna e tuhu kap, janah ietehna maka kai si ikatakenna e tuhu-tuhu nge jadi.) 19:36 Si enda jadi gelah seh si tersurat i bas Pustaka Si Badia, e me "Sada pe labo ipenggelken tulanNa." 19:37 Lit pe tersurat i bas Pustaka Si Badia, "Ipernehen kalak si nebak e me Kalak si enggo itebakna." 19:38 Kenca bage ipindoken Jusup kalak Arimatea man Pilatus gelah banci min ibuatna mait Jesus. (Si Jusup, e me kalak si enggo tek man Jesus, tapi la terang-terangen sabap mbiar ia kalak Jahudi si erkuasa.) Pemindon Jusup enda ibere Pilatus, e maka lawes Jusup ngelegi mait Jesus. 19:39 Nikodemus si gelgel e pernah reh ndahi Jesus berngi-berngi, ikut pe ngelegi mait Jesus e. Ibabana kira-kira telu puluh kilo minak mur si isinggur ras minak gaharu. 19:40 Duana kalak enda muat mait Jesus, jenari ibalutina alu kain putih janah itamakenna pe rempah-rempah rikutken adat penguburen kalak Jahudi. 19:41 Deherken ingan Jesus ipakuken e, lit sada peken. I bas peken e lit sada kuburen si mbaru, si langa pernah itamaken ku bas kalak mate. 19:42 Erkiteken wari si ndai e me wari persikapen guna wari Sabat kalak Jahudi, janah kuburen e pe ndeher ka, e maka i je me ikuburken kalak ndai Jesus.
20:1 Erpagi-pagi si lampas i bas wari Minggu e asum gelap denga, lawes Maria Magdalena ku kuburen. Kenca seh i kuburen idahna pintu kuburen e enggo talang. 20:2 E maka kiam ia mulihken: ijumpaina Simon Petrus ras sekalak ajar-ajar si deban, ajar-ajar si ikelengi Jesus. Nina Maria Magdalena, "Enggo ibuat kalak Tuhan i bas kubur nari janah la ieteh kami ku ja ibabana!" 20:3 E maka minter berkat Petrus ras temanna e ku kuburen. 20:4 Kiam ia duana, tapi pedasen teman Petrus ndai seh ku kuburen. 20:5 Itungkirna ku bas kuburen e janah idahna i je ampar gulungen kain putih e, tapi la ia bengket ku bas. 20:6 Jenari reh Simon Petrus, terus ia bengket ku bas. Idah Simon Petrus kain putih e, 20:7 janah idahna pe ampar uis si ibalutken ku takal Jesus. Uis e igulung serap i bas kain putih e nari. 20:8 Jenari bengket pe teman Petrus si leben seh ndai. Kenca idahna tek ia. 20:9 (Tapi amin bage gia, langa denga iangka kalak enda sitersurat i bas Pustaka Si Badia maka Jesus la banci lang keke i bas si mate nari.) 20:10 Kenca bage mulihken ajar-ajar ku rumah. 20:11 Maria Magdalena tedis deherken kuburen e. Janahna tangis itungkirna ku bas. 20:12 I bas kubur e idahna dua kalak malekat, uisna mbentar. Malekat e kundul i bas ingan bekas mait Jesus cibal, sekalak arah ingan takalNa, sekalak nari arah ingan naheNa. 20:13 Jenari nungkun malekat-malekat e man Maria nina, "O bibi, ngkai maka kam tangis?" Erjabap Maria Magdalena, "Enggo ibuat kalak Tuhanku, janah la kueteh ku ja ibabana!" 20:14 Kenca ikatakenna si enda, itulihkenna ku pudi, idahna Jesus tedis i je; tapi la ietehna maka Jesus kap si tedis e. 20:15 Nina Jesus man bana, "O bibi, ngkai maka kam tangis? Ise kin daramenndu?" Maria Magdalena erpengakap maka temanna ngerana e si njagai peken, e maka nina, "O tuan, adi kam kin muat Tuhanku e, katakenlah i ja Ia ibahanndu gelah kulegi ku je." 20:16 Nina Jesus, "O, Maria!" Ipernehen Maria Magdalena me Jesus, jenari ngaloi ia i bas cakap Heber, "Rabuni!" (Ertina, "Guru!") 20:17 Nina Jesus man bana, "Ola cikep Aku, sabap Aku langa ndahi BapangKu. Laweslah, jumpai senina-seninangKu janah kataken man bana, maka ningKu: Aku lawes ndahi BapangKu dingen Bapandu, ndahi DibataKu dingen Dibatandu." 20:18 E maka lawes Maria Magdalena njumpai ajar-ajar Jesus. Ikatakenna maka ia enggo jumpa ras Tuhan janah iturikenna pe kai si isuruh Tuhan ndai. 20:19 Karaben i bas wari Minggu ndai, pulung ajar-ajar Jesus i bas sada ingan. Perbahan mbiar ia kalak Jahudi si erkuasa e maka ierukna pintun. Jenari bengket me Jesus, tedis Ia i lebe-lebe ajar-ajar e. Nina Jesus, "Mejuah-juah." 20:20 Jenari icidahken Jesus tanNa ras awakNa man ajar-ajar e, e maka meriah kal ukur ajar-ajar ngidah Tuhan. 20:21 Nina ka Jesus man ajar-ajar, "Tetapkenlah ukurndu. Bagi Aku isuruh Bapa, bage me pe kam Kusuruh." 20:22 Kenca bage isempulken Jesus KesahNa man ajar-ajar e, jenari nina, "Alokenlah Kesah Si Badia. 20:23 Adi ialemindu dosa kalak, dosana enggo ialemi; adi ipelepasndu dosana i bas ia, dosana e enggo tetap i bas ia." 20:24 Sekalak i bas ajar-ajar si sepuluh dua e gelarna si Tomas (igelari pe si Kembar). Sanga Jesus encidahken diriNa man ajar-ajarNa, Tomas la ikut i je. 20:25 E maka erberita ajar-ajar e man Tomas nina, "Kami enggo jumpa ras Tuhan!" Ngaloi Tomas, "Adi la kin kuidah bekas paku i bas tanNa, janah adi la kin kutamaken jari-jaringku ku je bage pe adi la kin kutamaken tanku ku awakNa, labo aku tek." 20:26 Seminggu kenca ajar-ajar e pulung, pulung ka ia i bas inganna pulung e. Tomas pe ikut pulung. Pintu enggo ieruk, tapi bengket Jesus ku bas, tedis Ia i lebe-lebe ajar-ajar e, jenari nina, "Mejuah-juah!" 20:27 Jenari nina Jesus man Tomas, "Tamakenlah jari-jarindu ku jenda, janah nehenlah tanKu. Dadaken tanndu, tamaken ku awakKu. Olanai la tek, tapi teklah!" 20:28 Ngaloi Tomas man Jesus, "O, Tuhanku! O, Dibatangku!" 20:29 Nina Jesus man Tomas, "Ma perbahan idahndu Aku nge maka kam tek? Malem tuhu-tuhu ate kalak si tek man bangKu aminna pe la Aku idahna!" 20:30 Tuhu melala denga tanda-tanda sengget ibahan Jesus i lebe-lebe ajar-ajarNa si la isuratken i bas Kitap enda. 20:31 Kai si enggo isuratken i bas Kitap enda tujunna e me gelah kam tek maka Jesus kap Anak Dibata; Ia kap Mesias si ipadanken Dibata. Bage pe gelah arah kinitekenndu nggeluh kam i bas gelarna!
21:1 Kenca si ndai icidahken Jesus ka diriNa sekali nari man ajar-ajarNa i Dano Tiberias. Bagenda me turi-turinna: 21:2 Asum pulung Simon Petrus, Tomas (si igelari si Kembar), Natanael (anak kuta Kana i daerah Galilea), ras anak-anak Sebedeus bage pe dua kalak nari ajar-ajar Jesus si deban, 21:3 nina Simon Petrus man teman-temanna e, "Ateku lawes njala nurung." Ngaloi teman-temanna e, "Kami pe ikut." E maka berkat kalak e, inangkihna sada perahu. Tapi i bas berngi si ndai sada nurung pe la idatna. 21:4 Terangkenca wari, tedis Jesus i tepi dano; tapi la Ia itandai ajar-ajar e. 21:5 Iperkuanken Jesus ajar-ajarNa e nina, "O senina, lit nge idatndu nurung?" Erjabap kalak ndai, "Lang, sada pe la lit." 21:6 E maka nina Jesus man kalak e, "Amburken jalandu kempak kemuhen perahu e, tentu rulih kam." Iamburken kalak ndai jalana, jenari lanai ia ngasup ngerintaksa sabap melala kal nurung i bas. 21:7 Nina ajar-ajar si ikelengi Jesus man Petrus, "Tuhan kap si ngerana man banta e!" Kenca ibegi Simon Petrus maka Tuhan kap si tedis i tepi dano e, ipakena jubahna (sabap ndai enggo itangtangina) jenari lompat ia ku lau. 21:8 Ajar-ajar si deban pe ku tepi ras perahu e janahna ngerintak jala si dem nurung e. Kalak e labo ndauh i tepi nari; kira-kira seratus meter ngenca. 21:9 Kenca seh i daraten, idapetina enggo merara arang, janah i babo api e lit nurung ras roti. 21:10 Nina Jesus man ajar-ajarNa e, "Baba ku jenda piga-piga nurung si mbaru itangkapndu e." 21:11 Lawes Simon Petrus ku perahu, jenari irintakna jalana ndarat. Jala e dem nurung kegalangen, buena seratus lima puluh telu. Amin bage pe buena, labo merigat jala e. 21:12 Nina Jesus man ajar-ajarNa e, "Mari, man kita." Sada pe ajar-ajar e la pang nungkun, "Ise Kam?" Sabap ietehna nge maka Tuhan kap e. 21:13 E maka ibuat Jesus roti, jenari iberekenNa man kalak ndai. Bage pe nurung e iberekenNa man ajar-ajarNa. 21:14 Enda me petelu kaliken Jesus ncidahken diriNa man ajar-ajarNa kenca Ia ipekeke i bas si mate nari. 21:15 Kenca elah man, nungkun Jesus man Petrus nina, "O Simon anak Johanes, kelengen kin atendu Aku asangken ate kalak enda?" Erjabap Simon Petrus, "O Tuhan, ietehndu kap maka keleng ateku Kam." Nina Jesus man bana, "Permakanilah anak biri-biringKu." 21:16 Nungkun ka Jesus pedua kaliken man Petrus, "O Simon, anak Johanes, keleng kin atendu Aku?" Erjabap Simon Petrus, "Keleng Tuhan, ietehNdu kap maka keleng ateku Kam." Nina Jesus man Simon Petrus, "Permakanilah biri-biringKu." 21:17 Petelu kaliken nungkun Jesus man Simon Petrus nina, "O Simon, anak Johanes, keleng kin atendu Aku?" Getem kal pusuh Simon Petrus sabap telu kali enggo Jesus nungkun man bana, "Keleng kin atendu Aku?" E maka erjabap Simon Petrus, "O Tuhan, kai pe ietehNdu kap. IetehNdu pe maka keleng ateku Kam!" Nina Jesus man bana, "Permakanilah biri-biringKu. 21:18 Kukataken man bandu: Si tuhuna asum kam nguda denga, kam ngaturken dirindu gelah banci lawes ku ja atendu, tapi kenca kam metua, idudurkenndu tanndu janah kalak si deban ngiket kam, jenari ibabana kam ku ingan si la atendu bage." 21:19 (Alu kata enda icidahken Jesus kerna uga kematen Petrus guna mpemuliaken Dibata.) Jenari nina Jesus man Simon Petrus, "Ikutkenlah Aku!" 21:20 Jenari itulihken Petrus ku pudi; idahna ajar-ajar si ikelengi Jesus. Ajar-ajar si ikelengi Jesus, e ndeher ras Jesus kundul asum Jesus man ras ajar-ajarNa si sepuluh dua dingen si nungkun, "O Tuhan ise kin si nandangi ndudurken Kam e?" 21:21 Asum idah Petrus ajar-ajar e nina man Jesus, "O Tuhan kuga kerna ia?" 21:22 Erjabap Jesus, "Adi ateKu nggeluh ia seh Aku reh mulihken, kena kadena kin kam i je? Ikutkenlah Aku!" 21:23 E maka mbar berita maka ajar-ajar si ikelengi Jesus e la pagi mate. Tapi si tuhuna labo ikataken Jesus maka ajar-ajar si ikelengiNa e la mate! Nina Jesus, "Adi ateKu nggeluh ia seh Aku reh mulihken, kena kadena kin kam i je?" 21:24 Ajar-ajar si ikelengi Jesus e me si ngidah kerina kejadin e dingen ia pe nuratkenca. Sieteh maka kerina si isuratkenna enda tuhu. 21:25 Melala denga perbahanen Jesus si deban. Adi kerina isuratken sada-sadai, kuakap la siat doni enda ingan kitap si isurati e.
1:1 Teopilus si ihamati. I bas kitapku si pemena enggo kusuratken kerna kerina si ibahan Jesus ras si iajarkenNa, tangtangna nari, 1:2 seh ku warina Ia iangkat ku Surga. Ope denga Ia iangkat ku Surga, i bas kuasa Kesah Si Badia iberekenNa pedah-pedah man kalak si enggo ipilihNa jadi rasul-rasulNa. 1:3 Empat puluh wari dekahna kenca kematenNa, icidah-cidahkenNa baNa man rasul-rasul e alu erbage-bage cara guna mbuktiken maka Ia nggeluh. Tangkas idah rasul-rasul e Jesus, janah ngerana Ia ras rasul-rasul e kerina kerna Kinirajan Dibata. 1:4 Sekali asum Jesus pulung ras rasul-rasul e iberekenNa perentah man rasul-rasul e nina, "Ola tadingken kuta Jerusalem tapi timailah pemere si enggo ipadanken BapangKu, sue ras si enggo Kukataken man bandu. 1:5 Johanes mperidiken alu lau, tapi piga-piga wari nari kam iperidiken alu Kesah Si Badia." 1:6 Asum rasul-rasul pulung ka ras Jesus, isungkunna Jesus nina, "O Tuhan, genduari kin atendu manteki kerajan Israel mulihi?" 1:7 Erjabap Jesus man rasul-rasul nina, "Kerna si e BapangKu metehsa; la perlu ietehndu ntah ndigan jadi. 1:8 Tapi ialokenndu pagi gegeh asum Kesah Si Badia seh man bandu. Janah kam me pagi naksiken kerna Aku man kalak si deban, i Jerusalem, i daerah Judea ras Samaria seh ku belang-belang doni enda." 1:9 Kenca ikatakenNa si e iangkat Ia ku Surga i lebe-lebe rasul e nari, jenari lit embun ngeligeni Ia erbahanca lanai Ia idah rasul-rasul e. 1:10 Asum rasul-rasul e natap denga ku langit, kempak Jesus si enggo lawes e, rempet tedis dua kalak dilaki i deherna, uisna mbentar. 1:11 Nina man rasul-rasul e, "O kalak Galilea, ngkai maka kam tedis natap ku langit? Bagi enggo idahndu Jesus iangkat ku Surga, bage ka Ia pagin reh mulihken." 1:12 Kenca bage mulih rasul-rasul e i Uruk Seton nari ku Jerusalem. Uruk e dauhna kira-kira sada setengah kilometer i Jerusalem nari. 1:13 Kenca seh i Jerusalem, lawes ia ku loteng rumah inganna numpang. Kalak enda e me: Petrus ras Johanes, Jakup ras Andreas, Pilipus ras Tomas, Bartolomeus ras Matius, Jakup anak Alpeus, Simon Pejuang ras Judas anak Jakup. 1:14 Tutus atena kerina ras-ras ertoto, ikut pe diberu, bage pe Maria nande Jesus ras senina-senina Jesus. 1:15 I bas sada wari pulung ka ia kerina, teremna lit seratus dua puluh kalak. Asum e tedis Petrus jenari ngerana ia nina, 1:16 "Turang ras senina, arus me jadi kai si isuratken i bas Pustaka Si Badia sue ras si ikataken Kesah Si Badia arah Daud kerna Judas si maba kalak nangkap Jesus. 1:17 Judas sekalak anggota terpukta, erkiteken ia pe enggo ipilih Jesus guna muat bagin i bas dahin enda." 1:18 (Alu duit si idat Judas arah perbahanenna si jahat itukurnasada lambar taneh. I je me ia ndabuh seh mate. Beltekna mburtas ndaraten tukana. 1:19 Kerina anak kuta Jerusalem meteh kerna si e. E maka i bas cakapna taneh e igelarina "Akeldama" ertina Taneh Dareh.) 1:20 "Sabap lit tersurat i bas Kitap Masmur, 'Terulang min rumahna, olanai min lit si ngianisa'. Lit ka pe tersurat, 'Igantiken kalak si deban min jabatenna.' 1:21 Erkiteken si e maka arus itambahi sekalak nari teman kami jadi saksi maka Tuhan Jesus enggo keke i bas si mate nari. Si ipilih e arus pe si rusur ngikut Jesus asum Ia erdalan-dalan ras kita. 1:22 E me mulai i bas paksa Johanes ndilo kalak gelah iperidiken seh ku paksa Jesus iangkat i tengah-tengahta nari ku Surga." 1:23 E maka iusulken kalak e dua kalak dilaki, e me Jusup si igelari Barsabas (igelari pe ia Justus) ras si Matias. 1:24 Jenari ertoto perpulungen e nina, "O Tuhan itehNdu kap seh ku pusuh peraten manusia kerina. Perbahan si e Tuhan, tuduhken min man kami si apai ipilih Kam i bas si dua kalak enda, 1:25 lako ngaloken jabaten rasul, guna ndahiken dahin si enggo itadingken Judas, Judas si enggo lawes ku inganna si patut." 1:26 Jenari itikam tandukkenna me guna milih sekalak i bas si dua e. Gelar si terpilih e me Matias. Alu bage Matias me bengket ku bas terpuk rasul si sepuluh sada kalak.
2:1 Asum wari raya Pentakosta, pulung kerina kalak si tek man Tuhan Jesus i bas sada ingan. 2:2 Paksa si e rempet lit sora terbegi reh i langit nari bagi sora angin rembus erdeso. Sora ndai ndemi rumah inganna pulung e. 2:3 Kenca bage lit idah kalak ndai tempa-tempa bagi dilah api merap kujah-kuje encinepi ia sada-sadai. 2:4 Kerina si pulung e dem alu Kesah Si Badia janah ngerana ia i bas cakap si deban, bagi ibere Kesah e ia ngerana. 2:5 I Jerusalem nterem ringan kalak Jahudi si tutus nembah man Dibata, si enggo reh i belang-belang doni enda nari. 2:6 Asum ibegina sora e, rehen ia. Mamang kal atena sabap i bas cakapna jine rasul-rasul e ngerana. 2:7 Mamang kal atena, e maka nina, "Ma kin kerina si ngerana enda kalak Galilea? 2:8 Engkai ndia maka sibegi ia ngerana i bas cakapta sekalak-sekalak? 2:9 Kita i Partia, Media ras Elam nari, i Mesopotami, Judea ras Kapadokia nari; i Pontus ras i Asia nari, 2:10 i Perigia ras i Pampilia nari, i Mesir ras taneh Libia deher Kirene nari. Piga-piga kalak i bas kita i Rum nari. 2:11 Kalak Jahudi ras kalak si deban si enggo i Jahudiken; janah piga-piga kalak i bas kita i Kreta nari ras i Arab nari -- amin bage gia kerina kita megi ia ngerana i bas cakapta sekalak-sekalak kerna perbahanen si mbelin si enggo ilakoken Dibata." 2:12 Kerina ia jengang dingen mamang atena janah nungkun ia sapih-sapih ia nina, "Kai ertina kerina enda?" 2:13 Tapi lit ka si nawaisa nina, "Mabuk kap ia e." 2:14 E maka tedis Petrus ras rasul-rasul si sepuluh sada kalak e, janah alu megang sorana nina, "O kam kalak Jahudi, bage pe kam kerina si ringan i Jerusalem, begiken! Kuturiken man bandu kai kin ertina kejadin enda. 2:15 Kalak enda labo mabuk bagi pengakapndu, sabap genduari pe jam siwah denga erpagi-pagi. 2:16 Kejadin enda me si ikataken nabi Joel nina, 2:17 'Enda me pagi si kubahan i bas wari-wari pendungi nina Dibata, Kucurcurken pagi KesahKu man kerina manusia. Anakndu si dilaki ras si diberu ernubuat; anak perana si lit i tengah-tengahndu ngidah pengenehenen janah; kalak si enggo metua si lit i tengah-tengahndu ngaloken nipi. 2:18 Man serayan-serayanKu si dilaki ras si diberu Kucurcurken pagi KesahKu i bas wari e, janah ia pe ernubuat. 2:19 Kubahan pagi tanda-tanda sengget i langit ras i doni. E me dareh, api ras cimber si erdipul; 2:20 matawari jadi gelap, janah bulan megara bagi dareh, ope denga seh wari kerehen Tuhan, wari si mbelin dingen mulia. 2:21 Janah ise pe si ernalem man kuasa Tuhan terkelin me!' 2:22 Begiken kata enda o kalak Israel! Jesus kalak Nasaret e, tuhu-tuhu si isuruh Dibata sabap i bas Ia enggo icidahken Dibata kuasaNa, alu ncidahken kejadin-kejadin si mejin i tengah-tengahndu. 2:23 Sue ras sura-sura Dibata, iendeskenNa Jesus man bandu. Ibunuhndu Ia alu nuruh bangsa si deban makukenca ku kayu persilang. 2:24 Tapi Ia enggo ipekeke Dibata i bas si mate nari; ipulahiNa Ia i bas kuasa kematen nari, sabap la mungkin Ia tetap i bas kuasa kematen e. 2:25 Bagi enggo ikataken Daud kerna Jesus, 'Katawari pe kuidah Tuhan i lebe-lebengku; Ia ras aku, e maka tetap ukurku. 2:26 Perbahan si e meriah ukurku janah babahku ersurak dem keriahen; Tambah si e, aminna gia aku manusia si ermasap-masap tetap nge aku i bas pengarapen, 2:27 sabap labo itadingkenNdu aku i bas ingan kalak si mate; labo ipelepasndu daging suruh-suruhenNdu si tutus melengas i bas kuburen. 2:28 Enggo icidahkenNdu man bangku dalan ku kegeluhen, janah perbahan Kam ras aku tuhu-tuhu meriah kal kuakap.' 2:29 Senina-senina, terus terang kukataken man bandu kerna nininta Raja Daud. Ia enggo mate dingen ikuburken. Kuburenna e si idah denga genduari. 2:30 Ia sekalak nabi, janah ietehna padan Dibata man bana. Dibata erpadan ngangkat sekalak kesusuren Daud jadi raja bali ras ia. 2:31 Janah perbahan enggo ieteh Daud kai si nandangi ibahan Dibata, e maka ernubuat ia kerna kekeken Raja si ipadanken Dibata e, asum nina, 'Ia labo itadingken i bas ingan kalak mate; dagingNa labo melengas i bas kuburen.' 2:32 Jesus me si enggo ipekeke Dibata i bas si mate nari e, janah kami saksina kerna si e. 2:33 Ia enggo iangkat ku kemuhen Dibata. Ia enggo ngaloken Kesah Si Badia i bas Dibata nari bagi enggo ipadanken BapaNa e. Janah kai si idah dingen si ibegindu genduari, e me Kesah Si Badia si ialokenNa i bas BapaNa nari e si iberekenNa man kami. 2:34 Sabap labo Daud si nangkih ku Surga; ia pe ngataken: 'Nina TUHAN man Tuhanku, 2:35 Kundulken arah kemuhenKu seh Kutamaken musuh-musuhNdu i teruh tapak-tapak naheNdu.' 2:36 Dage, kerina min kalak Israel metehsa maka Jesus si ipakuken ku kayu persilang e, Ia itetapken Dibata jadi Tuhan dingen Raja si engkelini bangsaNa." 2:37 Kenca ibegi kalak si nterem kai si ikataken Petrus, ceda atena. E maka isungkunna Petrus ras rasul-rasul si deban nina, "O senina-senina kai dage si arus ibahan kami?" 2:38 Erjabap Petrus man bana, "Jeralah janah alokenlah peridin i bas gelar Jesus Kristus, gelah dosa-dosandu ialemi Dibata, janah ialokenndu pe pemereNa e me Kesah Si Badia. 2:39 Sabap enggo ipadanken Dibata man bandu ras anak-anakndu, bage pe man kerina kalak si ndauh i bas Dibata nari, e me kerina kalak si idilo Tuhan Dibatanta ku Ia." 2:40 Melala denga kata si deban ituriken Petrus i bas ia ngajari kalak si nterem e nina, "Pulahilah bandu i bas ukumen si reh ku bangsa si jahat enda!" 2:41 Nterem kalak si megi kata Petrus e tek dingen mindo gelah iperidiken. I bas wari e lit kira-kira telu ribu kalak tambah ku bas perpulungen e. 2:42 Perpulungen e tutus megiken pengajaren i bas rasul-rasul nari. Nggeluh ia sikeleng-kelengen bagi si ersenina. Ras-ras ia ncepik-ncepik roti dingen ras-ras pe ia ertoto man Dibata. 2:43 Melala tanda-tanda sengget ras kejadin-kejadin si mejin ibahan rasul-rasul. Perbahan si e kerina kalak e erkemalangen man Dibata. 2:44 Kerina kalak si enggo tek man Jesus e tetap pulung ras-ras janah kai si lit i bas ia ipakena ras-ras. 2:45 Idayakenna taneh ras erta-ertana janah duitna ibagi-bagikenna sue ras keperlun sekalak-sekalak. 2:46 Alu ersada ukur tep-tep wari ia pulung i bas Rumah Pertoton. Ras-ras ia kerina man i bas rumahna alu meriah dingen ukur meteruk. 2:47 Ipujina Dibata, janah kerina kalak erngena ate man perpulungen e. Tep-tep wari itambahi Tuhan ku perpulungen e kalak si iselamatkenNa.
3:1 I bas sada wari tupung jam ertoto, e me jam telu karaben, berkat Petrus ras Johanes ku Rumah Pertoton. 3:2 I bas gerbang Rumah Pertoton si igelari Gerbang si Mejile, lit sekalak dilaki pangpangen mulai kin tubuhna nari. Tep-tep wari ia ilanja ku gerbang e guna mindo-mindo man kalak si bengket ku bas Rumah Pertoton e. 3:3 Asum idahna bengket ate Petrus ras Johanes ku Rumah Pertoton e, ipindona perkuah ate kalak e duana. 3:4 Itatap Petrus ras Johanes ia, jenari nina Petrus man bana, "Nehenlah kami." 3:5 E maka inehenna kalak e duana alu pengarapen ngaloken perkuah atena. 3:6 Tapi nina Petrus man bana, "La lit duit i bas aku, tapi kai si lit i bas aku kubereken man bandu: I bas gelar Jesus Kristus, kalak Nasaret, kukataken man bandu, dalankenlah!" 3:7 Kenca bage ijemak Petrus tan kemuhen si pangpangen e jenari isampatina tedis. Minter megegeh nahena ras mata-mata nahena. 3:8 Lompat ia janah erdalan kujah-kujenda. Jenari bengket ia ku Rumah Pertoton ras kalak ndai; erdalan ia janahna lompat-lompat ipujina Dibata. 3:9 Kerina kalak si nterem ngidah ia erdalan dingen muji Dibata. 3:10 Jengang ia kerina kenca itandaina maka ia kap si biasa mindo-mindo i Gerbang si Mejile i Rumah Pertoton e. Mamang atena ngidah kai si enggo jadi man kalak si mindo-mindo e ndai. 3:11 Ngidah kalak si enggo ipepalem ndai ngikutken Petrus ras Johanes, mamang ate kalak si nterem. E maka rehen kalak si nterem e ndahisa ku serambi si igelari "Serambi Salomo". 3:12 Ngidah jelma si nterem e, ngerana Petrus nina, "O kalak Israel, ngkai maka mamang atendu dingen ipernehenndu kal kami? Iakapndu kin maka ibahan kami ia erdalan alu kuasa kami ntah pe erkiteken kami kalak si tutus nandangi Dibata? 3:13 Dibata si isembah Abraham, Isak ras Jakup, Dibata si isembah nini-nininta enggo mpehagaken Jesus, PersuruhenNa, si enggo iendeskenndu man peminpin-peminpin kalak Jahudi janah itulakndu Ia i lebe-lebe Pilatus aminna gia ipulahi Pilatus atena Jesus. 3:14 Ia kalak bujur dingen rembak ras Dibata. Tapi itulakndu Ia janah ipindokenndu man Pilatus gelah pemunuh ipulahi man bandu. 3:15 Ibunuhndu Ia si mabai manusia ku kegeluhen si tuhu-tuhu. Tapi Ia enggo ipekeke Dibata i bas si mate nari janah kerna si enda tuhu-tuhu enggo idah kami. 3:16 Kuasa Jesus nge si erbahanca erdalan kalak si itandaindu enda. Kai si enggo idahndu enda ibahan erkiteken kiniteken i bas gelarNa; kiniteken i bas Jesus me si erbahanca ia malem bagi kerina kam ngidahsa. 3:17 O Senina-senina, kueteh maka labo ietehndu ertina kai si enggo ibahanndu ras peminpin-peminpinndu nandangi Jesus. 3:18 Tapi alu bage maka enggo isehken Dibata kai si enggo ikatakenNa nai arah nabi-nabi. E me kerna Raja si ipadanken Dibata e arus ngenanami kiniseran. 3:19 E maka erkadiola dingen jeralah kam gelah dosandu ialemi Dibata. 3:20 Gelah ibereken Tuhan man bandu paksa kemalemen ate dingen isuruhNa Jesus, e me Si Engkelini si ipadanken Dibata si enggo itetapkenNa man gunandu. 3:21 Ia ringan i Surga seh warina ibahan Dibata kerina jadi mbaru, bagi enggo ikataken Dibata nai arah nabi-nabiNa si badia. 3:22 Bagi ikataken Musa, 'Iangkat Tuhan Dibatandu pagi sekalak nabi man gunandu, i tengah-tengahndu nari, bali ras aku enggo iangkatNa. Begikenlah kai si ikatakenna man bandu. 3:23 Ise si la megiken kata nabi e ipeserap pagi i bas bangsa Dibata nari janah iukum.' 3:24 Janah kerina nabi-nabi si isuruh Dibata ngerana, termasuk Samuel ras nabi-nabi si arah pudina, enggo ernubuat kerna kai si terjadi i bas paksa enda. 3:25 Padan si enggo ibereken Dibata nai arah nabi-nabi man nini-nininta, man bandu kap. Bagi ikatakenNa man Abraham, 'Arah kesusurenndu pagi kerina bangsa i doni enda Kupasu-pasu.' 3:26 E maka man bandu lebe isuruh Dibata Persuruhen si iangkatNa, guna nehken pasu-pasuNa alu ngajari kam sekalak-sekalak gelah kam jera i bas si jahat nari."
4:1 Sanga Petrus ras Johanes ngerana denga, reh piga-piga imam ras kepala pengawal Rumah Pertoton ras piga-piga kalak Saduki. 4:2 Nembeh ate kalak e sabap iajarken rasul-rasul si dua e man kalak si nterem maka Jesus enggo keke i bas si mate nari, si nuduhkenca maka lit kekeken i bas si mate nari. 4:3 E maka itangkapna Petrus ras Johanes, jenari itamakenna ku bas penjara seh pagina, sabap paksa e wari enggo ben. 4:4 Tapi nterem kalak si megi pengajaren e tek; teremna dilaki si enggo tek e tambah jadi kira-kira lima ribu kalak. 4:5 Pepagina pulung peminpin-peminpin kalak Jahudi ras pertua-pertua bage pe guru-guru Undang-undang i Jerusalem. 4:6 Ikut pe pulung Imam si Mbelin Annas ras Kayapas, bage pe Johanes ras Aleksander ras kalak si deban i bas kesusuren Imam si Mbelin nari. 4:7 Kenca bage isuruhna Petrus ras Johanes tedis i lebe-lebe sidang. Jenari isungkunina nina, "Kuga ibahanndu maka kalak si pangpangen e enggo banci erdalan? Kuasa kai lit i bas kam ntah pe gelar ise ipakendu asum kam mpepalem ia?" 4:8 Petrus si dem alu Kesah Si Badia erjabap man sidang e nina, "O kam peminpin-peminpin ras pertua-pertua. 4:9 Kami iadilindu kerna perbahanen kami si mehuli nandangi kalak si pangpangen e. Isungkunindu kami kerna kuga kami pepalem ia. 4:10 Dage arus ietehndu kerina bage pe arus ieteh kerina kalak Israel maka ia si tedis i lebe-lebendu enda enggo banci erdalan erkite-kiteken kuasa gelar Jesus Kristus kalak Nasaret. Ia me Jesus si enggo ipakukenndu ku kayu persilang dingen si enggo ipekeke Dibata i bas si mate nari. 4:11 Jesus si ikataken i bas Pustaka Si Badia, 'Batu si iambekken tukang enggo jadi batu palas.' Janah kam me tukang e. 4:12 Arah Jesus ngenca kita banci terkelin; sabap i belang-belang doni enda la lit itetapken Dibata gelar si deban si erbahanca kita terkelin." 4:13 Ngidah Petrus ras Johanes pang kal ngerana alu terus terang, dingen perbahan ietehna maka si dua kalak e rakyat biasa si la erpendidiken, e maka mamang ate anggota sidang e. Jenari ietehna maka kalak e duana ajar-ajar Jesus. 4:14 Tapi lanai ieteh anggota sidang e ngaloisa sabap kalak pangpangen si enggo banci erdalan e tedis i je ras rasul si dua kalak ndai. 4:15 E maka isuruhna rasul-rasul e ndarat jenari arih-arih ia kerina. 4:16 Nina sapih-sapih ia, "Kai tindakenta genduari man bana? Kerina kalak si ringan i Jerusalem enggo meteh tanda sengget si ibahanna enda. 4:17 Tapi gelah ola reh mbarna berita e i tengah-tengah jelma si nterem, siolangilah dingen siajarken ia gelah olanai ngerana man ise pe i bas gelar Jesus." 4:18 E maka isuruhna rasul-rasul e ku bas mulihi. Ilarangna gelah olanai ngerana ntah pe ngajar i bas gelar Jesus. 4:19 Tapi ngaloi Petrus ras Johanes nina, "Kamlah kerina ertimbang si apai kin mehuli iakap Dibata: patuh kami man bandu ntah man Dibata. 4:20 Sabap la terngadiken kami ngerana kerna kai si enggo idah dingen ibegi kami." 4:21 Isergang-sergangi anggota sidang tole rasul-rasul e, jenari ipulahina. La idatna alasen guna ngukum rasul-rasul e sabap kalak si nterem kerina muji Dibata erkiteken kai si enggo jadi e. 4:22 Kalak si enggo ipepalem alu tanda sengget e umurna lebih empat puluh tahun. 4:23 Kenca Petrus ras Johanes ibebasken, minter ia lawes ndahi teman-temanna. Iturikenna man teman-temanna e kai si enggo ikataken imam-imam si mbelin ras pertua-pertua. 4:24 Kenca teman-temanna megi si e, ertoto ia kerina ras-ras man Dibata nina, "O Tuhan, Kam kap si njadiken langit, doni, ras lawit bage pe kerina isina. 4:25 I bas Kesah Si Badia enggo ngerana Kam arah nini kami Daud persuruhenNdu, asum nina, 'Engkai maka merawa ate bangsa-bangsa si deban; ngkai maka ia erbahan rencana si sia-sia? 4:26 Raja-raja doni enggo ersikap janah kalak si erkuasa enggo pulung guna ngelawan Tuhan Dibata ras Si Engkelini si enggo ipilihNa.' 4:27 Tuhu enggo pulung i bas kuta enda Herodes, Pontius Pilatus ras bangsa-bangsa si deban bage pe bangsa Israel guna ngelawan Jesus, PersuruhenNdu si Badia, si enggo itetapkenNdu jadi Raja. 4:28 Pulung ia guna ndalanken kerina si enggo itetapkenNdu nai nari alu kuasa ras peratenNdu. 4:29 Janah genduari, o Tuhan, perdiatekenlah kuga ancamen nandangi serayanndu, janah berelah kami suruh-suruhenNdu, guna meritaken kataNdu alu la biar-biaren. 4:30 Dudurken tanNdu guna pepalem kalak si penakiten janah bahanlah maka jadi tanda-tanda sengget si mbelin i bas gelar Jesus PersuruhenNdu si Badia e." 4:31 Kenca dung kalak e ertoto, mugur-mugur rumah inganna pulung e. Kerina ia dem alu Kesah Si Badia jenari alu ukur si tetap iberitakenna kata Dibata. 4:32 Kerina kalak si enggo erkiniteken e ersada ukurna dingen ersada pe penggejapenna. La lit sekalak pe si ngatakenca maka erta-erta si lit i bas ia, si kerajangenna sisada; tapi kerina iraskenna. 4:33 Alu kuasa si mbelin isaksiken rasul-rasul e maka Tuhan Jesus enggo keke i bas si mate nari. Janah Dibata mereken pasu-pasuNa si mbelin man perpulungen e. 4:34 La lit sekalak pe si kekurangen, sabap kalak si lit taneh ntah rumahna, idayakenna. 4:35 Janah duitna iberekenna man rasul-rasul. Jenari ibagiken rasul-rasul man perpulungen rikutken keperlunna sekalak-sekalak. 4:36 Bage me Jusup si igelari rasul-rasul e Barnabas (ertina anak si nggit nampati), ia kalak Lewi tubuh i pulau Kiprus. 4:37 Idayakenna tanehna, jenari iberekenna duitna e man rasul-rasul.
5:1-2 Tapi lit me kalak si deban gelarna Ananias, ndeharana si Sapira. Idayakenna tanehna selambar tapi ibunikenna deba tukur taneh e; sada bagin iberekenna man rasul-rasul. Ndeharana pe meteh kerna si enda. 5:3 Jenari isungkun Petrus ia nina, "O Ananias ngkai maka ipelepasndu Iblis engkuasai ukurndu, seh maka ibualindu Kesah Si Badia alu muniken sada bagin tukur taneh e? 5:4 Kam kap empu taneh e ope denga idayaken; janah kenca idayaken, duit e pe ate-atendu empergunakenca. Dage ngkai maka turah ukurndu erbahan si enda? Labo manusia si ibualindu, tapi kam enggo erbual man Dibata!" 5:5 Kenca ibegi Ananias kata e minter ia mbulak dingen mate pe. Mbiar kal kerina kalak si megi kejadin e. 5:6 Jenari tedis piga-piga anak perana si i je, ibalutina mait e, ibabana ndarat guna ikuburken. 5:7 Kira-kira telu jam kenca si e, reh ndehara Ananias ku bas, la ietehna kai si enggo jadi nandangi perbulangenna. 5:8 Nina Petrus man bana, "Kataken man bangku, tuhu kin enda ngenca tukur taneh si ialokenndu ras perbulangenndu?" Erjabap ia nina, "Tuhu, ase me ergana." 5:9 E maka nina Petrus man bana, "Engkai maka ersada arihndu ras perbulangenndu encubai Kesah Tuhan? Nehenlah, kalak si enggo engkuburken perbulangenndu tedis i lebe-lebe pintun. Kam pe ibabana me ku darat." 5:10 Rempet mbulak Sapira ku nahe Petrus jenari mate. Asum bengket anak perana ndai ku bas idapetina Sapira enggo mate. E maka ilanjana ndarat jenari ikuburkenna deherken perbulangenna. 5:11 Mbiar kal kerina perpulungen e, bage pe kerina kalak si deban si megi kejadin enda. 5:12 Melala tanda-tanda sengget si mbelin ibahan rasul-rasul i tengah-tengah jelma si nterem. Megati pulung kerina kalak si enggo tek e, i Serambi Salomo. 5:13 Kalak si deban mehangke ndeherisa, amin bage gia ikataken kalak si nterem maka perpulungen e mehuli. 5:14 Tapi reh dekahna reh teremna kalak si tambah ku perpulungen e, subuk dilaki bage pe diberu si tek man Tuhan. 5:15 Erkiteken tanda-tanda sengget si enggo ibahan rasul-rasul e, e maka nterem kalak si maba kade-kadena si penakiten ku pasar. Ipepedemna i datas ingan medem ntah amak, gelah adi mentas Petrus, awihna lah gia engkenai kalak si penakiten e. 5:16 Bage pe nterem kalak si ringan i kuta-kuta sekelewet Jerusalem reh. Ibabana kalak si penakiten ras kalak si iseluki setan; janah kerina ia ipepalem. 5:17 Imam si Mbelin ras teman-temanna kalak Saduki, mulai erbahan tindaken man rasul-rasul sabap cian kal atena. 5:18 Itangkapna rasul-rasul e jenari itamakenna ku bas penjara si mbelin. 5:19 Tapi sanga berngi e reh malekat Tuhan nalangi pintun penjara e. Iteguna rasul-rasul e ndarat, janah nina, 5:20 "Laweslah, beritaken kerna kegeluhen si mbaru enda man kalak si nterem i bas Rumah Pertoton." 5:21 Iikutken rasul-rasul kata malekat e. Kenca terang pepagina bengket ia ku bas Rumah Pertoton, jenari ibenakenna ngajar i je. Paksa si e Imam si Mbelin ras teman-temanna mpepulung kerina pertua-pertua kalak Jahudi guna ersidang. Jenari isuruhna kalak ngelegi rasul-rasul e ku penjara. 5:22 Tapi kenca seh kalak e i penjara lanai idahna rasul-rasul e i je. E maka mulihken ia jenari iberitakenna. 5:23 Nina, "Idapeti kami penjara e ikunci janah kerina si erjaga i bas inganna, i lebe-lebe pintun. Tapi kenca italangi kami, la lit sekalak pe idapeti kami i bas." 5:24 Kenca ibegi pengulu Rumah Pertoton ras imam-imam si mbelin berita e mamang atena janah nungkun ia nina, Kai nge si enggo jadi nandangi rasul-rasul e? 5:25 Jenari reh sekalak maba berita nina, "Begiken! Kerina kalak si itamakenndu ku bas penjara e genduari paksa ngajari kalak si nterem i Rumah Pertoton." 5:26 E maka berkat pengawal Rumah Pertoton ras juak-juakna ngelegi rasul-rasul e. Tapi labo alu cara paksa ibahanna, sabap mbiar ia ibenteri kalak si nterem. 5:27 Ibabana rasul-rasul e ku bas janah isuruhna tedis i lebe-lebe sidang. Jenari isungkun Imam si Mbelin rasul-rasul e. 5:28 Nina, "Enggo ilarang kami kam ngajar i bas gelar Jesus. Tapi teridah, maka enggo serser kalak Jerusalem enda megi pengajarenndu. Janah ikatakenndu maka kami erbahanca Ia mate." 5:29 Ngaloi Petrus ras rasul-rasul si deban nina, "Kami arus ngikutken Dibata, labo manusia. 5:30 Dibata si isembah nininta enggo mpekeke Jesus i bas si mate nari, kenca Ia enggo ibunuhndu alu makuken Ia ku kayu persilang. 5:31 Dibata enggo ngangkat Ia dingen mereken kuasa man baNa jadi Raja dingen Penebus, gelah kalak Israel jera dingen dosa-dosana ialemi Dibata. 5:32 Kami me saksi i bas si e kerina, kami ras Kesah Si Badia si ibereken Dibata man kalak si ngikutken Ia." 5:33 Megi kata e merawa kal ate anggota sidang. Ibunuhna pe atena rasul-rasul e. 5:34 Tapi tedis sekalak anggota sidang e, e me kalak Parisi, gelarna Gamaliel. Ia sekalak guru Undang-undang janah kerina kalak mehamat man bana. Isuruhna gelah ibaba lebe ndarat rasul-rasul e. 5:35 Jenari nina man anggota sidang, "O kam kalak Israel, ukurkenlah manjar-anjar kai si atendu ibahanndu nandangi rasul-rasul enda. 5:36 Sabap nai reh si Tudas, ikatakenna maka ia sekalak si mbelin; janah lit pe si ngikutken ia empat ratus kalak. Tapi kenca ia ibunuh kerina pengikut-pengikutna e merap janah pergerakenna ngadi. 5:37 Kenca si e, sanga ilakoken cacah jiwa reh ka Judas i Galilea nari. Ibabaina kalak si nterem mbrontak. Tapi ia pe ibunuh janah kerina pengikut-pengikutna merap. 5:38 Perbahan si e kukataken man bandu, ola ugapa pe ibahan ia. Pelepas sajalah, sabap adi i bas manusia nari kin ajarenna e, masap nge pagi. 5:39 Tapi adi i bas Dibata nari, labo mungkin kam ngasup ngolangisa. Banci jadi kam nge si ngelawan Dibata." Kai si ikataken Gamaliel e ikutken anggota sidang. 5:40 E maka idilona rasul-rasul e ku bas. Isuruhna pengawal-pengawal ngeligasi rasul-rasul e janah ilarangna ia kerina ngajar i bas gelar Jesus. Kenca bage ipulahina. 5:41 Itadingken rasul-rasul sidang e alu ukur meriah sabap metunggung iakap Dibata ia ikut ngenanami penggombangi kalak gelar Jesus. 5:42 Janah tep-tep wari iteruskenna ngajar dingen meritaken Berita Si Meriah kerna Jesus Kristus i Rumah Pertoton bage pe i bas rumah kalak.
6:1 Paksa e, asum reh teremna kalak si tek man Jesus, turah perubaten i tengah-tengah kalak Jahudi si make cakap Junani ras kalak Jahudi si make cakap Jahudi. Jungut-jungut kalak e sabap kalak si mbalu i tengah-tengah kalak Jahudi si make cakap Junani la ngaloken bagin i bas pemere si arus ialoken tep-tep wari. 6:2 E maka ipepulung rasul-rasul si sepuluh dua e kerina kalak si enggo tek e, jenari nina, "La metunggung itadingken kami dahin meritaken kata Dibata erkiteken ngelaken pangan si tep-tep wari e. 6:3 Perbahan si e o senina-senina, pilihlah pitu kalak i bas kam nari si ietehndu kalak mehuli si dem alu Kesah Si Badia dingen pentar, gelah ia ngaturken dahin e. 6:4 Alu bage banci ipergunaken kami kerina waktu kami guna ertoto ras meritaken Berita Si Meriah." 6:5 Kerina perpulungen ngaloken kata enda. E maka ipilihna Istepanus si dem kiniteken dingen Kesah Si Badia. Bage pe ipilihna Pilipus, Prokorus, Nikanor, Timon, Parmenas ras Nikolaus; ia kalak Antiokia si enggo eragama Jahudi. 6:6 Kalak enda me pituna ibabana ku lebe-lebe rasul. Jenari ertoto rasul-rasul e janah kenca bage ipasu-pasuna ia kerina alu namaken tanna ku babona sekalak-sekalak. 6:7 Kata Dibata reh mbarna janah ertambahna kalak si tek i Jerusalem. Bage pe nterem imam ngaloken Berita Si Meriah e. 6:8 Istepanus si dem lias ate ras kuasa i bas Dibata nari erbahan tanda-tanda sengget si mbelin i tengah-tengah jelma si nterem. 6:9 Tapi lit piga-piga kalak si njabapi ia, e me anggota rumah pertoton Kalak Bebas. (Bage me rumah pertoton e igelari.) Perpulungen enda e me kalak Jahudi si i Kireni ras si i Aleksanderia nari. Bage pe kalak Jahudi si i Propinsi Kiliki ras si i Propinsi Asia nari ikut njabapi Istepanus. 6:10 Tapi perbahan Kesah mereken kepentaren man Istepanus asum ia ngerana e maka la ngasup kalak ngelawansa. 6:11 E maka isogokna piga-piga kalak guna ngataken, "Enggo ibegi kami ia ngerana encekuraki Musa ras encekuraki Dibata." 6:12 Alu cara bage me ia erbahan sada geraken i tengah-tengah jelma si nterem, pertua-pertua ras guru-guru Undang-undang. E maka kenca bage itangkapna Istepanus, jenari ibabana ku Pengadilen Agama. 6:13 Jenari isuruhna ngerana saksi-saksi palsu si ngataken, "Kalak enda la erngadi-ngadi ngataken si la mehuli kerna Rumah Pertoton si Badia enda bage pe icekurakina Undang-undang si ibereken Musa man banta. 6:14 Pernah pe ibegi kami ikatakenna maka Jesus kalak Nasaret e ngeruntuhken Rumah Pertotonnta enda denggo janah isambariNa adat-istiadat si enggo ibereken Musa man banta." 6:15 Kerina mata kalak si runggu kempak Istepanus, janah idahna ayo Istepanus bali ras ayo malekat paksa si e.
7:1 Isungkun Imam si Mbelin si Istepanus nina, "Tuhu kin ikatakenndu bagi si ikataken kalak enda?" 7:2 Ngaloi Istepanus nina, "Kam bapa ras senina-senina, begikenlah! Dibata si Mulia e enggo ncidahken diriNa man nininta Abraham, asum ia nai ringan i Mesopotami, ope denga ia lawes ku Haran. 7:3 Janah nina Dibata man bana, 'Tadingkenlah kade-kadendu ras negerindu; berkatlah ku negeri si Kutuduhken man bandu.' 7:4 E maka itadingken Abraham taneh Kaldea, pindah ia ku Haran. Janah kenca mate bapana, isuruh Dibata ia miser ku negeri enda, ku inganndu si genduari enda. 7:5 Paksa si e nai la lit taneh enda sentepap pe ibereken Dibata jadi si kerajangen Abraham. Tapi erpadan nge Dibata mereken taneh enda kerina man bana ras man kesusurenna aminna gia paksa e la lit pupusna. 7:6 Paksa si e pe ikataken Dibata man bana, 'Kesusurenndu pagi ringan i negeri si deban empat ratus tahun dekahna. I je pagi ia iperkawanken dingen inanamina kiniseran. 7:7 Tapi Kuukum pagi bangsa si emperkawanken ia, jenari Kupulahi ia i bas negeri e nari janah isembahna Aku i bas ingan enda.' 7:8 Si jadi tanda i bas perpadanen enda isuruh Dibata maka Abraham ras kesusurenna isunatken. E maka isunatken Abraham anakna Isak kenca waluh wari umurna. Isunatken Isak anakna Jakup janah isunatken Jakup anakna si sepuluh dua kalak si enggo jadi nini-nininta. 7:9 Nininta e nai ercian ate nandangi senina Jusup, e maka idayakenna jadi budak i taneh Mesir. 7:10 Tapi itemani dingen isampati Dibata ia i bas kerina kiniseranna. Asum ia ngadap man Paro, raja Mesir, ipehaga Dibata ia janah iberekenNa kepentaren man bana. E maka iangkat Paro si Jusup jadi kalak si erkuasa i bas ingan e bage pe nandangi kerina erta-erta raja. 7:11 Kenca si e jadi me kelihen i belang-belang taneh Mesir bage pe taneh Kanan, si erbahanca turah kiniseran si mbelin. Nininta nai pe lanai ndat pangan. 7:12 Tapi kenca ibegi Jakup maka i Mesir lit gandum, e maka isuruhna anak-anakna, e me nininta nai, ku Mesir. Enda me perdalanenna si pemena. 7:13 Asum ia ku jah pedua kaliken, ipetandaken Jusup dirina man senina-seninana e. Perbahan si e, Paro pe enggo meteh kerna keluarga Jusup. 7:14 Jenari isuruh Jusup piga-piga kalak ngelegi bapana Jakup ras kerina kade-kadena gelah kerina pindah ku Mesir. Teremna kalak e pitu puluh lima kalak. 7:15 E maka berkat Jakup ku taneh Mesir. I je me ia ringan seh mate janah bage ka pe anak-anakna. 7:16 Maitna ibaba ku Sihem janah ikuburken i bas kuburen si nai enggo itukur Abraham i bas anak Emor nari. 7:17 Kenca enggo ndeher paksana padan Dibata man Abraham nai jadi, bangsanta i taneh Mesir enggo reh teremna. 7:18 Paksa e mulai me erkuasa i Mesir sekalak raja si la meteh kerna Jusup. 7:19 Itipuna nininta alu kejam. Ipaksana ia muangken anak-anak si mbaru tubuh gelah mate. 7:20 Paksa si e me tubuh Musa, anak dilaki si mejile kal rupana. Telu bulan dekahna ia ibuniken orangtuana i rumah. 7:21 Kenca bage ibuangken orang tuana ia. Tapi idah putri Paro jenari ibuatna janah ijadikenna jadi anakna. 7:22 Iajarken guruna man bana kerina kepentaren kalak Mesir. Musa jadi kalak si mbelin. Ia erkuasa i bas kata ras perbahanen. 7:23 Kenca umur Musa empat puluh tahun turah ukurna ndahi senina-seninana bangsa Israel. 7:24 Idahna sekalak Israel ipekpeki kalak Mesir. E maka ibelana kalak Israel e; isampatina ia alu munuh kalak Mesir e. 7:25 Ietehna maka ate Dibata make ia mulahi bangsana. Janah iakapna maka bangsana pe meteh kerna si e; tapi la ieteh bangsana. 7:26 Pepagina idahna dua kalak bangsa Israel rubati. Icubakenna ndameken si dua kalak e nina, 'O teman begikenlah! Kam ersenina; ngkai maka sipekpeken kam duana?' 7:27 Tapi kalak si ersalah i bas perubaten e la megiken kata Musa nina man Musa, 7:28 'Ise kin ngangkat kam jadi peminpin dingen hakim nandangi kami? Ibunuhndu ka kin atendu aku bagi nderbih enggo ibunuhndu kalak Mesir e.' 7:29 Megi kata e, kiam Musa, itadingkenna taneh Mesir janah ringan ia i taneh Midian. I je ipupusna dua kalak anak dilaki. 7:30 Kenca empat puluh tahun Musa ringan i Midian icidahken malekat dirina man Musa i bas api si gara i bas rambah duri i gurun pasir deher Deleng Sinai. 7:31 Mamang ate Musa ngidahsa. E maka ideherina rambah duri guna pepayosa. Asum ideherina e ibegina sora Tuhan nina, 7:32 'Aku kap Dibata si isembah ninindu, Dibata si Abraham, Isak ras Jakup.' Erkiteken si e nggirgir Musa perbahan biarna. Lanai ia pang jurgak. 7:33 Jenari nina ka Tuhan man bana, 'Tangtangi sepatundu sabap ingan enda taneh Badia kap. 7:34 Tuhu-tuhu enggo Kuidah bangsangKu i Mesir ngenanami melala kiniseran. Enggo Kubegi pernderkuhna e maka reh Aku mulahi ia. Marilah, kam me kusuruh ku taneh Mesir.' 7:35 Musa enda me si itulak bangsa Israel alu ngataken, 'Ise kin si ngangkat kam jadi peminpin dingen hakim nandangi kami?' Ia si isuruh Dibata erkelang-kelangken malekat si enggo teridah man bana i rambah duri si gara jadi peminpin ras simulahi bangsa Israel. 7:36 Ibabana bangsa Israel ndarat i taneh Mesir nari alu erbahan tanda-tanda sengget si mbelin i Mesir, i Lawit Merah, ras empat puluh tahun i gurun pasir. 7:37 Musa enda me si ngataken man bangsa Israel, 'Iangkat Dibata pagi sekalak nabi man gunandu, i tengah-tengahndu nari, bali ras aku enggo iangkatNa.' 7:38 Musa enda me si pulung ras nini-nininta i gurun pasir. Ia me si ngerana ras malekat i Deleng Sinai. Ialokenna kata Dibata si ngaturken kegeluhen guna ipeseh man banta. 7:39 Tapi nininta nai la megiken katana. Isimbakna Musa, sabap atena mulihken ku taneh Mesir. 7:40 E maka nina man Arun, 'Bahanlah dibata-dibata man kami jadi peminpin kami. Sabap la ieteh kami kai si enggo jadi nandangi Musa si maba kami ndarat i taneh Mesir nari.' 7:41 E maka ibahan kalak enda sada gana-gana, bali ras anak lembu. Jenari ipersembahkenna persembahen tutungen man gana-gana e. Ihamatina kai si enggo ibahanna e alu erbahan sada kerja si meriah. 7:42 Tapi Dibata nadingken kalak e. Ipelepasna kalak e nembah man bintang-bintang i langit, bagi enggo isuratken i bas kitap nabi-nabi, 'O bangsa Israel! Empat puluh tahun dekahna asum kam i gurun pasir, igelehndu dingen ipersembahkenndu asuh-asuhenndu. Tapi man bangKu kin ipersembahkenndu asuh-asuhen e? 7:43 Lang! Tapi ilanjandu kemah dewa Moloh ras gambar bintang dewa Repan man dibatandu; e me patung-patung si ibahanndu man sembahenndu. Perbahan si e Kubuang kam ku ingan si terdauhen asa Babil.' 7:44 Asum nini-nininta i gurun pasir, lit kap i tengah-tengahna Kemah Perjumpan. Kemah e isuruh Dibata ibahan Musa rikutken contoh si enggo icidahken Dibata man bana. 7:45 Kemah si ialoken nininta i bas bapana nari seterusna ibabana asum ia lawes ras Josua guna ngerebut taneh enda i bas bangsa si deban nari, e me bangsa si ipelawes Dibata i lebe-lebe nininta nari. Kemah e lit denga asum Daud jadi raja. 7:46 Daud si ngena ate Dibata e, mindo man Dibata, gelah ia iijinken erbahan sada rumah, e me rumah man Dibata si isembah Jakup. 7:47 Tapi Salomo me surungna erbahan Rumah Pertoton man Dibata. 7:48 Tapi Dibata si Mbelin e labo ringan i bas rumah si ibahan manusia; bagi enggo isuratken nabi, 7:49 Nina Tuhan, 'Surga kap inganKu kundul janah doni kap manca-manca nahengKu. Rumah si kuga kin atendu ibahanndu man bangKu? I ja kin inganKu pekesahken? 7:50 Ma kin Aku erbahanca si nasa lit?' 7:51 O kam si keras kepala! Ukurndu bali ras ukur kalak perbegu, la kam nggit megiken kata. La erngadi-ngadi isimbakNdu Kesah Si Badia. Bali kam ras ninindu nai! 7:52 Lit kin sekalak lah gia nabi si la isiksa ninindu? Ibunuhna pe nai kalak si enggo leben erberita kerna kerehen Persuruhen Dibata si Bujur janah Persuruhen Dibata si Bujur e enggo ihianati dingen ibunuhndu. 7:53 Enggo ialokenndu Undang-undang si reh i bas Dibata nari, si isehken malekat man bandu tapi la ikutkenndu." 7:54 Megelut anggota sidang megi ranan si Istepanus. Erderik ipenna perban rawana nandangi Istepanus. 7:55 Tapi Istepanus si dem alu Kesah Si Badia, natap ku das. Idahna terang si ersinalsal i bas Dibata nari janah idahna pe Jesus tedis arah kemuhen Dibata. 7:56 Jenari nina, "Nehenlah! Kuidah langit talang, janah Anak Manusia si isuruh Dibata tedis arah kemuhen Dibata." 7:57 Alu sora megang serko kerina anggota sidang e janah nutupi cupingna alu tanna. Jenari iserbuna Istepanus. 7:58 Isarenna ku darat kuta, jenari ibenterina alu batu. Kalak si menterisa e nangtangi bajuna, janah itadingkenna i bas sekalak anak perana; gelarna Saul. 7:59 Asum Istepanus ibenteri kalak e, ertoto ia man Tuhan nina, "O Tuhan Jesus, alokenlah tendingku!" 7:60 Erjimpuh ia janah nina alu sora megang, "O Tuhan, ola min ikira Kam dosa kalak enda." Kenca ikatakenna si enda, mate ia.
8:1 Saul pe erpengakap maka Istepanus patut ibunuh. I bas wari e pe mulai me perpulungen si lit i Jerusalem ngenanami kiniseran, sabap ia isiksa kalak si nterem. Kerina kalak si tek mengongsi ku dusun-dusun i Judea ras Samaria; rasul-rasul ngenca la mengongsi. 8:2 Piga-piga kalak si erkiniteken, engkuburken mait Istepanus, janah tangis kal ia kerina. 8:3 Tapi Saul ersura-sura engkernepken perpulungen e. Ibengketina tep-tep rumah kalak si tek janah ibabana kalak e ku darat subuk dilaki bage pe diberu. Jenari itamakenna ku penjara. 8:4 Kalak si erkiniteken si enggo merap e lawes ku kuta-kuta meritaken Berita Si Meriah. 8:5 Pilipus lawes ku sada kuta i Samaria. I je iberitakenna kerna Si Engkelini si ipadanken Dibata man kalak si nterem. 8:6 Meriah ukur kalak si nterem megiken pengajaren Pilipus. Ersada kerina ukurna megiken ia. Idahna pe tanda-tanda sengget si mbelin si ibahan Pilipus. 8:7 I bas kalak si setanen nari, ndaraten setan-setan janahna serko alu megang. Bage pe nterem kalak si pangpangen ras kalak si cempang ipepalem. 8:8 Perbahan si e jadi me keriahen si mbelin i Samaria. 8:9 I bas kuta e lit me sekalak dilaki; gelarna Simon. Gelgel nari enggo ieteh kalak maka ia lit kinigurunna. Ikatakenna pe maka ia sekalak si mbelin. 8:10 Kerina kalak si i bas kuta e, subuk kalak si meganjang ras si meteruk megiken katana. Nina kalak si nterem e, "I bas ia me Kuasa Dibata si igelari Kuasa si Mbelin." 8:11 Kalak si nterem megiken ia perbahan ndekah me enggo kemamangen kalak ibahanna alu kinigurunna. 8:12 Tapi kenca ia tek kerina man Berita Si Meriah si iberitaken Pilipus kerna Kinirajan Dibata ras kerna Jesus Kristus, e maka iperidiken ia kerina, subuk si dilaki bage pe si diberu. 8:13 Simon pe tek. Janah kenca ia iperidiken, ras Pilipus ia katawari pe. Mamang kal atena asum idahna tanda-tanda sengget si mbelin ibahan Pilipus. 8:14 Rasul-rasul si i Jerusalem megi berita maka kalak Samaria enggo ngaloken kata Dibata. E maka isuruhna Petrus ras Johanes ndahi kalak e. 8:15 Kenca ia seh, ertoto ia gelah kalak si enggo tek e ngaloken Kesah Si Badia. 8:16 Sabap Kesah Si Badia langa nusur man bana; saja ia enggo iperidiken i bas gelar Tuhan Jesus. 8:17 Kenca bage itamaken Petrus ras Johanes tanna ku babo kalak Samaria e, jenari ialoken kalak e me Kesah Si Badia. 8:18 Kenca idah Simon maka kalak si tek e enggo ngaloken Kesah Si Badia asum itamaken rasul-rasul tanna ku babo kalak e, e maka iberekenna duit man Petrus ras Johanes, janah nina, 8:19 "Berelah maka i bas aku pe lit kuasa e, gelah kalak ngaloken Kesah Si Badia adi kutamaken tanku ku babona." 8:20 Tapi nina Petrus, "Bene me kam ras duitndu e, sabap iakapndu banci itukur pemere Dibata. 8:21 Labo lit baginndu ntah pe hakndu i bas dahin kami, sabap ukurndu la bujur i bas pengidah Dibata. 8:22 E maka jeralah kam i bas rencanandu si jahat e janah ertotolah man Tuhan gelah ialemiNa kam i bas perukurenndu si la mehuli e. 8:23 Sabap kuidah maka kam dem cian ate janah kam iperbudak dosandu." 8:24 Ngaloi Simon man Petrus ras Johanes, "Totokenlah aku man Tuhan gelah ola sada pe jadi i bas aku kai si ikatakenndu ndai." 8:25 Kenca Petrus ras Johanes ersaksi dingen nuriken kata Tuhan, mulihken ia ku Jerusalem. I bas perdalanenna iberitakenna Berita Si Meriah i kuta-kuta kalak Samaria. 8:26 Sekalak malekat Tuhan, ngerana man Pilipus nina, "Ersikap janah laweslah kam ku Selatan, ku dalan si i Jerusalem nari ku Gasa." (Dalan enda melungun). E maka ersikap Pilipus, jenari berkat ia. 8:27 Paksa e lit sekalak Etiopia mentas arah dalan e mulihna ersembah i Jerusalem nari. Ia kepala Bendahara Kandake, Ratu Etiopia. Guna si e ia enggo 8:28 ikebiriken. Ia mulih tare geretana. Asum ia i datas geretana alu sora megang iogena kitap Nabi Jesaya. 8:29 Nina Kesah Si Badia man Pilipus, "To deheri gereta e." 8:30 Iayaki Pilipus gereta e janah ibegina menteri e ngoge kitap Nabi Jesaya. E maka nungkun Pilipus man bana, "Iangkandu nge kai si iogendu e?" 8:31 Erjabap menteri e, "I ja ka nge banci kuangka, adi la lit kalak si nerangkenca man bangku?" Jenari ipindoken menteri e gelah Pilipus nangkih ku gereta dingen kundul i datas ras ia. 8:32 Bagin Pustaka Si Badia si iogena e e me, 'Ia bali ras biri-biri si ibaba guna igeleh. Ia bali ras anak biri-biri si la ngelawan asum igunting mbuluna. Kai pe la ibelaskenNa. 8:33 Ia ihina janah la lit keadilen ibahan man baNa. Ise pe la ngasup nuriken kerna kesusurenNa, Sabap geluhNa enggo ibuat i bas doni enda nari.' 8:34 Kenca bage nina menteri e man Pilipus, "Kusungkun kam: Kerna ise si ikataken nabi enda? Kerna dirina ntah kerna kalak si deban?" 8:35 E maka ibenaken Pilipus ngerana erpalasken kata e. Iturikenna man menteri e Berita Si Meriah kerna Jesus. 8:36 Asum ia ras nerusken perdalanenna, seh ia ku sada ingan si lit i je lau. E maka nina menteri e man Pilipus, "Nehenlah, enda kap lau. Ma banci kin aku iperidiken?" 8:37 Nina Pilipus man bana, "Kam banci iperidiken adi kam tuhu-tuhu enggo tek man Jesus Kristus." Ngaloi menteri e, "Aku tek maka Jesus Kristus Anak Dibata kap." 8:38 E maka isuruh menteri kusirna pengadi gereta e. Jenari duana ia, si Pilipus ras menteri e, nusur ku lau. I je me ia iperidiken Pilipus. 8:39 Kenca ia ndarat i bas lau nari, rempet Pilipus ibabaken Kesah Tuhan. Menteri e lanai ngidah Pilipus, tapi iteruskenna perdalanenna alu meriah ukur. 8:40 Pilipus enggo seh i Asdot. Isiarina kerina kuta-kuta janah iberitakenna Berita Si Meriah ngayak seh ia i Kesarea.
9:1 Tapi Saul tetap niksai dingen munuhi ajar-ajar Tuhan. Idahina Imam si Mbelin, 9:2 janah ipindona surat kuasa guna ibabana man pengulu rumah pertoton i Damaskus. Gelah adi jumpa ia ras kalak si ngikutken Tuhan i Damaskus, subuk dilaki bage pe diberu banci itangkapna janah ibabana ku Jerusalem. 9:3 I bas perdalanen ku Damaskus, asum ia enggo ndeher ku kuta e, rempet terang i langit nari ersinalsal engkeleweti ia. 9:4 Perbahan si e ndabuh ia ku taneh janah ibegina sora erlebuh, "O Saul, Saul, ngkai maka iayakindu Aku?" 9:5 Ngaloi Saul, "Ise kin Kam Tuhan?" Erjabap Tuhan, "Aku kap Jesus si iayakindu. 9:6 Bage gia, kekekenlah janah teruskenlah ku bas kuta. I jah kari lit si ngatakenca man bandu kai si arus ibahanndu." 9:7 Sengget kal teman-teman Saul si ikut ras ia i bas perdalanenna. Lanai ia ngasup ngerana sabap ibegina sora, tapi la idahna si ngerana e. 9:8 Tedis Saul, imedakkenna matana, tapi kai pe la idahna. Perbahan si e itegu kalak ndai Saul ku Damaskus. 9:9 Telu wari dekahna Saul la erpengidah, janah i bas si telu wari e la ia man ntah pe minem. 9:10 I Damaskus, lit sekalak ajar-ajar Tuhan, gelarna Ananias. I bas sada pengenehenen nina Tuhan man bana, "O, Ananias!" Ngaloi si Ananias, "I jenda aku Tuhan." 9:11 Nina Tuhan man bana, "Ersikaplah, jenari laweslah ku Pasar Pinter. Jumpai i rumah Judas sekalak i Tarsus nari, gelarna Saul. Saul e ertoto genduari. 9:12 I bas pengenehenen idahna sekalak dilaki gelarna Ananias bengket ku rumah, janah itamakenna tanna ku babona gelah ia erpengidah mulihi." 9:13 Ngaloi Ananias, "O Tuhan, enggo kubegi berita kerna ia i bas kalak si nterem nari. Enggo melala kiniseran ibahanna nandangi ajar-ajarNdu si badia i Jerusalem. 9:14 Janah alu kuasa si ibereken imam si mbelin man bana enggo reh ia ku Damaskus enda guna nangkapi kerina kalak si nembah man baNdu." 9:15 Tapi nina Tuhan man bana, "To dahilah, sabap ia me si enggo Kupilih guna mpetandaken Aku man bangsa Israel bage pe man bangsa-bangsa si deban ras raja-raja. 9:16 Janah Kucidahken pe pagi man bana, kerina kiniseran si arus inanamina erkite-kiteken gelarKu." 9:17 E maka lawes Ananias. Bengket ia ku bas rumah ingan Saul, jenari itamakenna tanna ku babo Saul. Nina, "O seninangku Saul, Tuhan Jesus si teridah man bandu i tengah dalan asum kam reh ku jenda, nuruh aku ndahi kam. IsuruhNa aku gelah banci kam erpengidah mulihi janah gelah kam dem alu Kesah Si Badia." 9:18 Minter lit naktak bagi sisik ikan i bas mata Saul nari, jenari erpengidah ia mulihi. Tedis ia jenari iperidiken. 9:19 Janah kenca ia man, mulihken ka ia megegeh. Piga-piga wari dekahna Saul i Damaskus ras ajar-ajar si ringan Piga-piga wari dekahna Saul i Damaskus ras ajar-ajar si ringan i je. 9:20 Paksa si e pe iberitakenna kerna Jesus i rumah-rumah pertoton. Nina, "Jesus e Anak Dibata kap." 9:21 Mamang ate kerina kalak si megi ia. Nina sapih-sapih ia, "Ma ia kin si munuhi kalak si ningetken gelar Jesus i Jerusalem? Ma kin guna nangkapi kalak si ningetken gelar Jesus dingen mabasa man imam-imam si mbelin maka ia reh ku jenda?" 9:22 Tapi gegeh penuri-nurin Saul tep-tep wari ertambah-tambah. Kalak Jahudi si ringan i Damaskus lanai ngasup njabap ia, sabap arah penuri-nurinna iberekenna bukti-bukti si kuat maka Jesus me Mesias si ipadanken Dibata e. 9:23 Piga-piga wari kenca si e, arih-arih kalak Jahudi guna munuh Saul. 9:24 Tapi tereteh man Saul kai si irencanaken kalak enda. Suari berngi ia itimai kalak e i gerbang kuta, gelah banci ia ibunuh. 9:25 Tapi i bas sada berngi isampati pengikut-pengikutna ia ndarat i bas kuta e nari. Itantan ajar-ajar e ia ku teruh i datas tembok nari tare raga. 9:26 Kenca seh Saul i Jerusalem, idaramina dalan gelah ersada ras kalak si enggo tek man Jesus. Tapi kerina kalak mbiar man bana. Sekalak pe ia la tek maka Saul enggo tek man Jesus. 9:27 Kenca bage reh Barnabas nampati Saul; itaruhkenna ia man rasul-rasul e. Iturikenna man rasul-rasul e maka Saul enggo ngidah Tuhan i tengah dalan, janah Tuhan enggo ngerana man bana. Iturikenna pe maka Saul enggo ngajar i bas gelar Jesus i Damaskus alu la biar-biaren. 9:28 E maka mulai i bas wari si e enggo meriah Saul ras rasul-rasul. Isiari Saul kuta Jerusalem, janah alu la biar-biaren ngajar ia i bas gelar Tuhan. 9:29 Ngerana dingen ersoal-jabap pe ia ras kalak Jahudi si make cakap Junani; tapi kalak e ersura-sura munuh ia. 9:30 Kenca ieteh anggota perpulungen sura-sura kalak e, itaruhkenna Saul ku Kesarea jenari isuruhna ia lawes ku Tarsus. 9:31 Paksa si e perpulungen si lit i belang-belang Judea, Galilea ras Samaria i bas keadan aman. Perpulungen e erkemalangen nandangi Tuhan. Erkiteken penampati Kesah Si Badia reh belinna kiniteken perpulungen janah erteremna kalak si tek. 9:32 Melala kuta-kuta isiari Petrus. Sekali jadi ngincuah ia ndahi ajar-ajar Tuhan si ringan i Lida. 9:33 I je jumpa ia ras sekalak dilaki gelarna Eneas. Eneas e lumpuh, janah enggo waluh tahun dekahna ia ampar i bas ingan medem. 9:34 Nina Petrus man bana, "O Eneas, Jesus Kristus pepalem kam, kekekenlah janah gulung amakndu." E maka minter keke Eneas. 9:35 Kerina kalak si ringan i Lida ras i Saron ngidah ia, e maka kerina kalak e ngendesken dirina man Tuhan. 9:36 I Jope lit sekalak diberu si enggo tek, gelarna Tabita (I bas cakap Junani: Dorkas, ertina belkih beru-beru). Melala kal perbahanenna si mehuli janah isampatina kalak si musil. 9:37 Paksa si e sakit ia jenari mate. Kenca maitna iperidi kalak, iamparkenna i bas ruangen si i datas loteng. 9:38 Kuta Jope la ndauhsa i Lida nari. Kenca ajar-ajar si i Jope megi berita maka Petrus paksa si e lit i Lida, isuruhna dua kalak ndahi Petrus alu pemindon maka pedas min ia reh. 9:39 E maka ersikap Petrus, jenari berkat ia ras si erlegi e. Kenca seh ia i Jope, ibaba kalak ia ku ruangen si i datas loteng. Kerina kalak si enggo mbalu pulung engkeleweti ia, dingen janahna tangis icidahkenna man Petrus uis ras baju si enggo ibahan Tabita asum ia nggeluh denga. 9:40 Kenca bage isuruh Petrus kerina ndarat, jenari erjimpuh ia dingen ertoto. Kenca bage ialekenna kempak mait e, janah nina, "O Tabita, kekekenlah!" Imedakken Tabita matana, janah kenca idahna Petrus minter ia kundul. 9:41 Jenari ijemak Petrus tanna, isampatina ia tedis. Kenca bage idilo Petrus kerina kalak si tek ras diberu-diberu si enggo mbalu e. Iendeskenna man bana Tabita si enggo nggeluh mulihi e. 9:42 Mbar kejadin enda ku belang-belang Jope. Perbahan si e nterem kalak tek man Tuhan. 9:43 Piga-piga wari dekahna Petrus ringan i Jope, i rumah sekalak tukang kulit, gelarna Simon.
10:1 I Kesarea lit sekalak dilaki gelarna Kornelius. Ia sekalak komandan i bas pasukan tentera Romawi si igelari "Pasukan Itali". 10:2 Ia kalak si tutus i bas agama; ia ras isi jabuna nembah man Dibata. Isampatina kalak Jahudi si musil janah la erngadi-ngadi ertoto ia ku Dibata. 10:3 Sekali jadi kira-kira jam telu karaben ialokenna sada pengenehenen. I bas pengenehenenna idahna alu tangkas sekalak malekat Dibata bengket ku bas rumahna. Nina malekat e man bana, "O Kornelius." 10:4 Itatap Kornelius malekat e alu dem kebiaren, janah nina, "Kai Tuan?" Erjabap malekat ndai, "Pertotonndu enggo ibegiken Dibata. Enggo idahNa kai si enggo ibahanndu nandangi kalak si musil, janah enggo ingetNa pe kam. 10:5 Genduari, suruhlah piga-piga kalak ku Jope guna ngelegi Simon si igelari pe Petrus. 10:6 Ia kesilang i rumah sekalak tukang kulit, gelarna pe Simon. Rumahna e i tepi lawit." 10:7 Kenca lawes malekat e, idilo Kornelius dua kalak juak-juakna ras sekalak perajurit si tutus ku Tuhan e me sekalak ajudanna. 10:8 Iturikenna man kalak e kai si enggo jadi, jenari isuruhna ia lawes ku Jope. 10:9 Pepagina kira-kira pukul dua belas ciger, asum si telu kalak e i bas perdalanen janah enggo ndeher ku Jope, lawes Petrus ku datas tarum rumah guna ertoto. 10:10 Paksa si e igejapna melihe, e maka man atena. Asum isikapken pangan, sangana ia lolah, ialokenna sada pengenehenen. 10:11 Idahna langit talang jenari nusur ku teruh bagi sada lambar uis si mbelang itantan alu empatna sukina ku taneh. 10:12 I bas bungkusen e lit erbage-bage rubia-rubia si empat nahe, rubia-rubia si njoler bage pe perik-perik si meliar. 10:13 Kenca bage lit sora erkata man bana, "O Petrus, kekekenlah, geleh jenari pan rubia-rubia enda." 10:14 Tapi nina Petrus, "Lang Tuhan, lang! La pernah kupan pantangen bage pe si la bersih rikutken aturen agama." 10:15 Nina ka sora ndai, "Kai si enggo ikataken Dibata bersih ola ikatakenndu la bersih." 10:16 Bagenda me jadi telu kali, kenca bage bungkusen ndai iangkat mulihken ku langit. 10:17 Latih akap Petrus ngukurisa kai ertina pengenehenen e. Paksa si e kalak si isuruh Kornelius ndai enggo ndat rumah Simon, janah enggo tedis pe ia kerina i lebe-lebe pintun. 10:18 Erlebuh dingen nungkun ia nina, "Lit kang i bas rumah enda kesilang Simon Petrus?" 10:19 Asum Petrus rukur denga kerna maksud pengenehenen ndai, nina Kesah man bana, "Begiken! Lit telu kalak si ndarami kam. 10:20 E maka ersikaplah kam, jenari ku teruh kam. Ola kam sangsi berkat ras ia sabap Aku kap si nuruh ia reh ku jenda." 10:21 Ku teruh Petrus jenari nina man si telu kalak e, "Aku kap si idaramindu. Kai atendu maka kam reh?" 10:22 Erjabap kalak e, "Kapten Kornelius nuruh kami reh ku jenda. Kerina kalak Jahudi ngatakenca maka ia mehuli. Sekalak malekat Dibata nuruh ia ngundang kam ku rumahna, gelah ibegina kata i bas kam nari." 10:23 Iundang Petrus si telu kalak e ku rumah dingen kesilang i rumah e i bas berngi e. Pepagina ersikap Petrus jenari berkat ia ras si telu kalak e. Piga-piga kalak si tek i Jope nari ikut ras ia. 10:24 Pepagina ka maka ia enggo seh i Kesarea. Kornelius ras kade-kadena bage pe temanna meriah si enggo itenahkenna nima-nimai kerehen Petrus. 10:25 Asum bengket Petrus ku bas rumah e, reh Kornelius ngalo-ngalosa. Erjimpuh ia janah isembahna Petrus. 10:26 Tapi isuruh Petrus ia keke nina, "Tediskenlah, sabap aku pe manusia biasa nge." 10:27 Janahna ercakap-cakap erdalan ia ku bas. I je idapeti Petrus enggo nterem kalak pulung. 10:28 Nina Petrus man kalak si nterem e, "Enggo ietehndu maka rikutken Undang-undang kalak Jahudi, la kal kami banci bengket ku bas rumah si labo kalak Jahudi, ntah pe ergaul ras ia. Tapi enggo icidahken Dibata man bangku maka la banci kukataken ise pe meluat ntah pe la bersih. 10:29 Perbahan si e maka la mberat ukurku reh ku jenda asum aku idilondu. Dage genduari kusungkun kam: Kai sabapna maka aku idilondu?" 10:30 Nina Kornelius, "Telu wari si enggo lewat, waktuna bagi si genduari e, kira-kira pukul telu karaben ertoto aku i rumah. Paksa si e rempet tedis sekalak dilaki i lebe-lebengku; uisna erkilat. 10:31 Nina man bangku, 'Pertotonndu enggo ibegi Dibata. Enggo idahNa kai si ibahanndu nandangi kalak si musil. 10:32 E maka suruhlah kalak ku Jope ngelegi Simon Petrus. Ia kesilang i rumah sekalak tukang kulit, gelarna Simon kang. Rumah e i tepi lawit.' 10:33 E maka minter kusuruh kalak enda ngelegi kam, janah alu meriah ukur enggo ka kam reh ku jenda. Genduari enggo pulung kami kerina i jenda, i lebe-lebe Dibata guna megiken kata Dibata si isuruhNa ipesehndu." 10:34 E maka ibenaken Petrus ngerana nina, "Genduari enggo kueteh maka tuhu-tuhu la erndobah iakap Dibata manusia e. 10:35 Tep-tep manusia i bas bangsa si apai nari gia, adi ia erkemalangen man Dibata dingen mehuli perbahanenna, ialoken Dibata kap. 10:36 Enggo ietehndu kata si ipeseh Dibata man kalak Israel e me Berita Si Meriah kerna perdamen arah Jesus Kristus. Jesus Kristus e me Tuhan si erkuasa nandangi kerina si nasa lit. 10:37 Ietehndu kejadin si mbelin si enggo jadi i belang-belang taneh Israel, mulai i Galilea nari kenca peridin si iberitaken Johanes, 10:38 e me kerna Jesus kalak Nasaret. Ia iminaki Dibata alu Kesah Si Badia ras kuasa. IsiariNa taneh enda, ibahanNa si mehuli dingen ipepalemNa kerina kalak si isiksa Iblis, sabap Dibata ras Ia. 10:39 Janah kami saksina kerna kerina si ibahanNa i taneh kalak Jahudi bage pe i Jerusalem. Aminna bage gia Ia ibunuh kalak alu makuken Ia ku kayu persilang. 10:40 Tapi i bas wari si peteluken Dibata mpegeluh Ia mulihi. Janah rikutken rencana Dibata, icidah-cidahkenNa baNa. 10:41 Labo man kerina manusia icidah-cidahkenNa baNa, tapi man kami ngenca; e me saksi-saksi si enggo leben ipilih Dibata. Man dingen minem kami ras Ia kenca Ia nggeluh mulihi. 10:42 Janah isuruhNa kami meritaken man jelma si nterem dingen naksiken maka Ia me si enggo itetapken Dibata guna ngadili kalak si nggeluh ras si enggo mate. 10:43 Kerina nabi ersaksi kerna Ia. Ikataken nabi-nabi e maka kalak si tek man baNa ialemi Dibata kap dosana i bas gelar Jesus." 10:44 Asum Petrus ngerana denga, nusur Kesah Si Badia man kerina kalak si megiken Berita e. 10:45 Mamang ate kalak Jahudi si enggo tek, si enggo reh ras Petrus i Jope nari, perbahan man si labo kalak Jahudi pe icurcurken Dibata Kesah Si Badia. 10:46 Ibegina kalak e ngerana i bas erbage-bage cakap si deban, dingen ipujina Dibata. Nina Petrus, 10:47 "Kalak enda enggo ngaloken Kesah Si Badia bali ras kita. Banci kin ia iolang-olangi iperidiken alu lau?" 10:48 Jenari isuruh Petrus kalak e iperidiken i bas gelar Jesus. Kenca bage ipindoken kalak e man Petrus gelah ola lebe ia mulih ngayak piga-piga wari.
11:1 Rasul-rasul ras kalak si enggo tek i belang-belang Judea megi maka si labo kalak Jahudi pe enggo ngaloken Kata Dibata. 11:2 Kenca mulih Petrus ku Jerusalem, kalak Jahudi si enggo tek mandang ia nina, 11:3 "Kam enggo kesilang i rumah kalak si labo kalak Jahudi dingen langa isunatken, janah enggo pe kam man ras ia." 11:4 E maka ituriken Petrus kerina si enggo jadi, i bas pemenana nari nina, 11:5 "Asum ertoto aku i kuta Jope sanga aku lolah rempet kualoken sada pengenehenen. Kuidah lit nusur bagi selambar uis mbelang, irakut i bas empatna sukina, janah ngadi i lebe-lebengku. 11:6 Kupepayo isina janah kuidah i bas rubia-rubia si empat nahe, rubia-rubia si meliar, si njoler ras perik-perik si meliar. 11:7 Jenari kubegi sora erkata man bangku nina, 'O Petrus kekeken, geleh jenari pan rubia-rubia enda!' 11:8 Tapi ningku, 'Lang Tuhan, lang. La pernah kupan pantangen ntah pangan si la bersih rikutken aturen agama.' 11:9 Ngerana sora e i langit nari nina, 'Kai si enggo ikataken Dibata bersih, ola ikatakenndu meluat!' 11:10 Si enda jadi seh telu kali, kenca bage mulihken bungkusen ndai irintak ku langit. 11:11 Paksa e pe telu kalak si isuruh ndahi aku i Kesarea nari enggo seh i rumah inganku kesilang. 11:12 Jenari nina Kesah Si Badia man bangku, 'Berkatlah ras kalak e. Ola kam sangsi!' Seninanta si enem enda pe ikut ras aku ku Kesarea, janah radu kami ku rumah Kornelius si ndilo aku. 11:13 Ituriken Kornelius man kami, maka enggo idahna malekat tedis i bas rumahna, janah nina malekat e man bana, 'Suruh kalak ku Jope ngelegi Simon si igelari Petrus. 11:14 Ia pagi nehken Berita man bandu, gelah arah Berita e terkelin kam ras isi jabundu.' 11:15 Janah kenca kubenaken ngerana, nusur Kesah Si Badia man kerina kalak si pulung i rumah Kornelius bagi nai tangtangna Kesah Si Badia nusur man banta. 11:16 Jenari kuinget kai si enggo ikataken Tuhan, 'Johanes mperidiken alu lau, tapi kam pagi iperidiken alu Kesah Si Badia.' 11:17 Enggo tangkas maka Dibata mereken pemereNa man si labo kalak Jahudi la lit kurangna ras si iberekenNa man banta asum tangtangna nai kita tek man Tuhan Jesus Kristus. Dage, banci kin kuambati Dibata?" 11:18 Kenca ibegi kalak e siikataken Petrus, sinik ia. Jenari ipujina Dibata nina, "Man si labo kalak Jahudi pe enggo ibereken Dibata dalan jera gelah dat kegeluhen." 11:19 Kalak si enggo tek man Jesus merap erkiteken peniksan si jadi kenca Istepanus ibunuh. Piga-piga kalak seh ku Penike, Kiperus ras Antiokia. I je iberitakenna Berita kerna Jesus man kalak Jahudi saja. 11:20 Tapi piga-piga kalak si seh ku Antiokia e, e me kalak Kiperus ras kalak Kireni meritaken Berita Si Meriah kerna Tuhan Jesus man si labo kalak Jahudi pe. 11:21 Tuhan nampati kalak e i bas dahinna. E maka nterem kal kalak tek dingen ngendesken dirina man Tuhan. 11:22 Perpulungen si i Jerusalem megi berita kerna kai si enggo jadi i Antiokia, e maka isuruhna Barnabas ku jah. 11:23 Kenca seh Barnabas i Antiokia, meriah kal ukurna ngidah lias ate Dibata si enggo seh man kalak e. Iajukna perpulungen e gelah tetap erkiniteken man Tuhan. 11:24 Perbahan merandal kal Barnabas bage pe ia dem alu Kesah Si Badia dingen nteguh kinitekenna, e maka nterem kalak tek man Tuhan. 11:25 Jenari berkat Barnabas ku Tarsus ndarami Saul. Kenca jumpa, radu ia ku Antiokia. 11:26 Sada tahun dekahna ia ras perpulungen e, janah i bas sada tahun e nterem kalak iajarina. I Antiokia me tangtangna ajar-ajar e igelari Kristen. 11:27 Paksa si e reh piga-piga kalak nabi i Jerusalem nari ku Antiokia. 11:28 Sekalak i bas si reh e tedis, gelarna Agabus. Alu kuasa Kesah Si Badia ernubuat ia maka lanai ndekahsa jadi me kelihen si mesangat i belang-belang doni. (Kelihen e jadi asum Klaudius jadi Kaisar Roma.) 11:29 E maka ersada arih ajar-ajar guna pepulung penampat rikutken kengasupenna sekalak-sekalak guna nampati senina-senina si ringan i Judea. 11:30 Kenca ipepulungna, ikirimkenna duit e man pertua-pertua arah Barnabas ras Saul.
12:1 Asum Herodes jadi raja, ngawan perpulungen ngenanami kiniseran. 12:2 Isuruh Herodes gelah Jakup, senina Johanes, ibunuh alu pedang. 12:3 Kenca ieteh maka kai si ibahanna e ngena ate kalak Jahudi, e maka isuruhna ka kalak nangkap Petrus. (Si enda jadi asum Wari Raya Roti si la erragi.) 12:4 Kenca Petrus itangkap, itamaken ia ku bas penjara. Ia ijagai empat terpuk perajurit; tep-tep terpuk empat kalak. Sura-sura Herodes iadili Petrus i lebe-lebe jelma si nterem kenca lepas wari Paskah. 12:5 Tapi asum Petrus i bas penjara, perpulungen alu tutus ate lalap ertoto man Dibata kerna ia. 12:6 Berngina, ope Petrus ibaba Herodes ku lebe-lebe jelma si nterem, tunduh Petrus i kelang-kelang dua kalak perajurit. Ia iiket alu dua rante besi janah i lebe-lebe pintun lit perajurit erjaga. 12:7 Jenari rempet tedis malekat Tuhan deherken Petrus, janah terang ersinalsal i bas penjara e. Itamaken malekat e tanna ku babo bara Petrus, ingetina ia nina, "Kekekenlah!" Minter mosar rante si ngiket tan Petrus. 12:8 Jenari nina malekat man bana, "Genditkenlah genditndu janah pake sepatundu!" Ikutken Petrus kata malekat e jenari nina ka malekat, "Pake jubahndu jenari ikutken aku!" 12:9 Ikutken Petrus malekat ndarat i bas penjara nari. Amin bage gia labo ia sedar maka kai si ibahan malekat nandangi ia, e me kejadin si tuhu-tuhu. Iakapna maka ia ngaloken sada pengenehenen. 12:10 Ibentasina penjagan si pemena, si peduaken janah seh pe ia ku gerbang besi dalan ndarat. Talang jine gerbang besi e asum ia mentas. Kenca seh i darat erdalan ia duana arah sada gang, jenari rempet itadingken malekat e Petrus. 12:11 Kenca sedar Petrus nina, "Genduari enggo kueteh maka tuhu-tuhu aku enggo ipulahi Dibata. Isuruh Tuhan malekatNa mulahi aku i bas kuasa Herodes nari bage pe i bas sura-sura kalak Jahudi nari." 12:12 Kenca tuhu-tuhu kal ia sedar, lawes ia ku rumah Maria nande Johanes Markus. I bas rumah e nterem kalak pulung ertoto. 12:13 Asum erlebuh Petrus i pintu gerbang nari, reh sekalak juak-juak diberu, gelarna si Rode. Ipepayona ise si erlebuh e. 12:14 Itandai Rode maka sora e, sora Petrus. Perbahan riahna ukurna kiam ia mulihken ku rumah, lanai ingetna pe nalangi pintu gerbang e. Ikatakenna man kalak si pulung maka Petrus tedis i lebe-lebe pintu gerbang. 12:15 Tapi ngaloi kalak e man bana nina, "Adon kam." Tapi igegehi Rode ngatakenca maka tuhu Petrus i darat. Nina kalak e, "Malekatna nge." 12:16 Tapi perbahan la erngadi-ngadi Petrus nuktuki, e maka dungna italangi kalak ndai. Kenca idahna Petrus mamang kal atena. 12:17 Ibahan Petrus tanda alu tanna gelah ola gejek. Jenari iturikenna man si pulung e kuga Tuhan enggo mulahi ia i bas penjara nari. Tole nina, "Beritakenlah si enda man Jakup ras man kerina senina-seninanta." Kenca bage ndarat ia dingen lawes ku ingan si deban. 12:18 Pepagina kenca terang wari, gejek kerina perajurit-perajurit dingen mbiar ia. Nina sapih-sapih ia, "Kai nge si enggo jadi nandangi Petrus?" 12:19 E maka isuruh Herodes perajurit-perajurit ndarami Petrus, tapi la idatna. E maka iperiksa Herodes perajurit-perajurit si erjaga jenari iperentahkenna munuh perajurit-perajurit e. Kenca si e lawes Herodes i Judea nari, pindah ia ku Kesarea. 12:20 Nembeh kal ate Herodes gelgel nari nandangi kalak Tirus ras kalak Sidon. E maka ersada arihna ndahi Herodes, sabap biasana ia ndatken pangan i bas negeri Raja Herodes e nari. Perlebe itami-tamina Blastus; Blastus e me sekalak kepala pegawai istana raja. Jenari ngadap ia man Raja Herodes mindo perdamen. 12:21 I bas sada wari si enggo itetapken Herodes, ipake Herodes paken kerajanna janah kundul ia i kursi kinirajanna. Jenari ngerana ia man kalak e. 12:22 Kalak si nterem ersurak-surak nina, "Labo manusia si ngerana enda, tapi sekalak dibata kap." 12:23 Minter iparap malekat Tuhan si Herodes, sabap iperajangna kemulian si arusna ibereken man Dibata. Berngan ia, jenari mate. 12:24 Tapi Kata Dibata reh mbarna dingen reh teremna kalak si megisa. 12:25 Barnabas ras Saul mulih i Jerusalem nari kenca idungina dahinna i je. Ikut pe ras ia Johanes Markus.
13:1 I bas perpulungen i Antiokia lit piga-piga kalak nabi ras guru. Gelarna, Barnabas, Simeon (igelari si Mbiring), Lusius (kalak Kireni), Manaen (anak angkat Raja Herodes) ras Saul. 13:2 Sekali, asum kalak enda erbahan kebaktian man Tuhan dingen erpuasa, ngerana Kesah Si Badia man bana nina, "Peserap Barnabas ras Saul man bangKu, guna ndahiken dahin si enggo Kutetapken man bana." 13:3 E maka erpuasa dingen ertoto kalak e. Janah kenca ipasu-pasuna Barnabas ras Saul alu namaken tanna ku babona, ipeberkatna ia duana. 13:4 Barnabas ras Saul si isuruh Kesah Si Badia berkat ku Selukia. I jenari erlayar ia ku pulau Kiprus. 13:5 Kenca seh ia i Salamis iberitakenna Kata Dibata i bas rumah pertoton kalak Jahudi. Johanes Markus ikut ras ia guna nampati i bas dahin e. 13:6 Isiarina kerina pulau e seh ku Papos. I Papos jumpa ia ras sekalak tukang sihir, gelarna Baryesus. Ia kalak Jahudi. Ikatakenna maka ia sekalak nabi. 13:7 Ia meriah ras Gubernur pulau e. Gubernur e kalak pentar, gelarna Sergius Paulus. Idilo Gubernur e Barnabas ras Saul sabap atena megiken Kata Dibata. 13:8 Tapi Barnabas ras Saul iolang-olangi Elimas (enda gelar tukang sihir e i bas cakap Junani). Iusahaken Elimas gelah ola tek Gubernur e. 13:9 Tapi Saul si igelari Paulus dem Kesah Si Badia. Ijerlengna tukang sihir e. 13:10 Jenari nina, "O anak Iblis! Kam kap musuh kerina si mehuli! Kam jahat kal dingen penipu, janah la erngadi-ngadi iusahakenndu encedaken rencana Tuhan engkelini manusia. 13:11 Genduari ukumen i bas Tuhan nari reh man bandu; pentang me kam, janah piga-piga wari dekahna la kam ngidah terang." Minter gelap pengidah Elimas. Perbahan si e dadap-dadap ia ndarami kalak si nggit negu ia. 13:12 Tek Gubernur e man Tuhan, kenca idahna kai si enggo jadi. Mamang kal atena megi pengajaren kerna Tuhan. 13:13 Paulus ras teman-temanna nadingken Papos, jenari erlayar ku Perge i propinsi Pampilia. Tapi Johanes Markus nadingken kalak e i je, janah mulihken ia ku Jerusalem. 13:14 Paulus ras Barnabas nerusken perdalanenna, janah seh ia i Antiokia i daerah Pisidi. Sanga wari Sabat kalak Jahudi bengket ia ku bas rumah pertoton, dingen kundul i je. 13:15 Kenca ioge kitap Undang-undang Musa ras kitap nabi-nabi, e maka isuruh pengulu rumah pertoton sekalak ndahi Barnabas ras Paulus guna ngataken, "O senina-senina, adi lit pedahndu man jelma si nterem enda, ngarap kami maka kam ngerana." 13:16 E maka tedis Paulus. Alu tanna ibahanna tanda man kalak si nterem. Jenari ibenakenna ngerana nina, "O kalak Israel bage pe kam kerina kalak si deban si nembah man Dibata, begikenlah. 13:17 Dibata si isembah kalak Israel enggo milih nini-nininta janah enggo ibahanNa jadi sada bangsa si mbelin asum nai ia ringan i taneh Mesir jadi kalak pertandang. Enggo ipulahi Dibata bangsa e i Mesir nari alu kuasaNa si mbelin. 13:18 Janah empat puluh tahun dekahna iarak-arakNa i taneh gurun pasir. 13:19 IkernepkenNa pitu bangsa i taneh Kanaan janah iberekenNa taneh e jadi si kerajangen bangsaNa. 13:20 Si enda ndai kerina jadi kira-kira empat ratus lima puluh tahun dekahna. Kenca bage iberekenNa puanglima-puanglima guna ngaturken bangsa e seh ku masa nabi Samuel. 13:21 Janah asum ipindoken bangsa e sekalak raja, ibereken Dibata man bana Saul, anak Kis i bas suku Benyamin nari. Ia erkuasa empat puluh tahun dekahna. 13:22 Kenca itulak Dibata si Saul, iangkat Dibata si Daud jadi raja. Dibata enggo ngerana kerna Daud nina, 'Daud anak Isai, ia me si ngena ateKu. Ia me si nehken kerina sura-surangKu.' 13:23 Janah i bas kesusuren Daud e nari me ipekeke Dibata si Engkelini bangsa Israel, e me Jesus, bagi nai enggo ipadanken Dibata. 13:24 Ope denga Jesus menaken dahinNa, enggo leben Johanes erlebuh man kalak Israel gelah jera dingen iperidiken. 13:25 Janah asum nandangi dung dahin Johanes nina man kalak si nterem, 'Ise kin iakapndu aku? Labo aku si itimai-timaindu e. Tapi nehenlah! Ia reh arah pudingku. Jadi juak-juakNa pe aku la metunggung.' 13:26 O senina-senina, subuk kam kesusuren Abraham, bage pe kalak si deban si nembah man Dibata: man banta me berita keselamaten enda ipeseh! 13:27 Sabap kalak si ringan i Jerusalem ras peminpin-peminpin la nandai Ia. La ibegikenna pe kata nabi-nabi si iogeken tep-tep wari Sabat. Tapi si tuhuna alu ngukum Jesus, enggo isehken kata nabi-nabi e. 13:28 Janah aminna gia la idatna kesalahen si sue ras ukumen mate, ipindokenna man Pilatus gelah Jesus e ibunuh. 13:29 Janah kenca isehkenna kerina si tersurat i bas Pustaka Si Badia kerna Ia, ipesusurna Ia i kayu persilang nari jenari itamakenna ku bas kuburen. 13:30 Tapi Dibata mpegeluh Ia mulihi. 13:31 Janah piga-piga wari dekahna icidah-cidahkenNa baNa man kalak si ras Ia i Galilea nari ku Jerusalem. Genduari kalak enda si naksiken kerna Jesus man bangsa Israel. 13:32-33 Janah genduari kami i jenda nehken Berita Si Meriah man bandu. Kai si enggo ipadanken Dibata man nini-nininta nai, enggo isehkenNa genduari man banta anak-anakna alu pegeluh Jesus mulihi. Bagi enggo isuratken i bas Masmur si peduaken, 'Kam me AnakKu; sendah Aku enggo jadi BapaNdu.' 13:34 Dibata enggo pekeke Ia i bas si mate nari janah lanai Ia melengas. Si enda ikataken Dibata i bas bagin si deban nina, 'Kubereken pagi man bandu pemere si tuhu-tuhu dingen badia, si enggo Kupadanken man Daud.' 13:35 Bage ka pe lit tersurat i bas masmur si deban, 'La ipelepasNdu PersuruhenNdu si setia e melengas.' 13:36 Sanga Daud nggeluh, idalankenna kerina sura-sura Dibata i bas paksa e. Janah kenca ia mate, ikuburken ia ras ninina janah melengas pe kulana i bas kuburen. 13:37 Tapi Ia si enggo ipekeke Dibata i bas si mate nari, la ngenanami si melengas e. 13:38-39 Dage o senina-seninangku kerina, perlu pe ietehndu maka arah Jesus e me berita pengalemi dosa isehken man bandu. Perlu pe ietehndu maka adi tek kam man Jesus kam ibebasken i bas kerina ukumen-ukumen nari, i ja Undang-undang Musa la ngasup mulahi kam. 13:40 E maka metengetlah gelah ola jadi i bas kam kai si enggo isuratken nabi-nabi nina, 13:41 'Begikenlah, o kalak si megombang! Senggetlah dingen masaplah! Sabap dahin si kudahi sanga kam nggeluh denga e me sada dahin si la kam tek aminna gia lit kalak si nurikenca man bandu!' " 13:42 Asum Paulus ras Barnabas nadingken rumah pertoton e, ipindoken kalak si nterem e gelah reh ka ia i bas wari Sabat si rehna guna nuriken tole kerna pengajaren e. 13:43 Kenca sirang kebaktin e, nterem kalak Jahudi ras kalak si enggo bengket ku bas agama Jahudi ngikutken Paulus ras Barnabas. Iajuk rasul-rasul e ia kerina gelah ia tetap nggeluh i bas lias ate Dibata. 13:44 I bas wari Sabat si rehna menam kerina anak kuta e reh megiken kata Dibata. 13:45 Asum idah kalak Jahudi kalak si nterem e, cian atena. Ikatakenna maka kai si ikataken Paulus e la tuhu janah igombangina pe rasul e. 13:46 Tapi ngaloi Paulus ras Barnabas alu la biar-biaren nina, "Tuhu maka arus man bandu lebe Kata Dibata ipeseh. Tapi perbahan itulakndu, janah iakapndu maka la kam metunggung ngaloken kegeluhen si tuhu-tuhu si rasa lalap, e maka lawes kami ku bangsa-bangsa si deban. 13:47 Sabap Tuhan enggo nuruh kami alu kataNa, 'Enggo kutetapken kam jadi terang man kalak si la nandai Dibata, arah kam me keselamaten seh ku kerina doni!' " 13:48 Megi si enda meriah ukur kalak si langa nandai Dibata jenari ipujina Tuhan erkiteken kataNa. Janah kalak si enggo ipilih Dibata gelah ngaloken kegeluhen si tuhu-tuhu si rasa lalap, jadi tek. 13:49 Kata Tuhan mbar ku belang-belang daerah e. 13:50 Tapi iajuk-ajuk kalak Jahudi diberu-diberu si tergolong ihamati kalak, si tutus nembah man Dibata, bage pe pembesar-pembesar kuta e, gelah ilawanna Paulus ras Barnabas. E maka mulai me isiksa kalak ndai Paulus ras Barnabas jenari ipelawesna ia i bas daerah e nari. 13:51 Iapusi Paulus ras Barnabas abu i bas tapak-tapak nahena jadi sada tanda persinget kempak kalak e. Jenari lawes ia ku Ikoni. 13:52 Ajar-ajar si i Antiokia dem alu keriahen dingen Kesah Si Badia.
14:1 I Ikoni pe bengket rasul si dua kalak e ku bas rumah pertoton kalak Jahudi. Bage ulina carana ngajar i je seh maka nterem kal kalak Jahudi ras si labo Jahudi tek man Jesus. 14:2 Tapi kalak Jahudi si tetap la tek man Jesus ngajuk-ngajuk kalak si la nandai Dibata gelah ngelawan kalak si enggo tek e. 14:3 Paulus ras Barnabas ndekah ringan i Ikoni. Ngajar ia alu terang-terangen sabap tek ia maka Tuhan si nampati ia. Ipegegehi Tuhan Berita kerna lias ateNa alu mereken kuasa man rasul-rasul guna erbahan tanda-tanda sengget si mbelin. 14:4 Anak kuta e erbelah jadi dua golongan, deba engkapiti kalak Jahudi, janah deba ka engkapiti rasul-rasul. 14:5 Jenari ersada ukur kalak si labo Jahudi ras kalak Jahudi, bage pe peminpin-peminpin guna erbahan sada geraken ngelawan rasul-rasul. Isiksana atena rasul-rasul e janah ibenterina atena alu batu. 14:6 Kenca ieteh rasul-rasul sura-sura kalak e, lawes ia ku kuta-kuta i Likaoni, e me Listera, Derbe ras daerah sekitarna. 14:7 I je pe iberitaken Berita Si Meriah. 14:8 I Listera lit sekalak dilaki si la megegeh nahena. Tangtang tubuh nari kin ia bage, janah langa pernah ia erdalan. 14:9 Asum Paulus ngerana, kundul ia i je megikenca. Paulus mperdiateken ia janah idahna maka ia enggo tek janah banci ipepalem. 14:10 E maka nina Paulus alu sora megang, "Tedisken, pepinter nahendu!" Lompat ia jenari erdalan. 14:11 Kenca idah kalak si nterem kai si enggo ibahan Paulus, ersurak ia i bas cakap Likaoni nina, "Dewa-dewa enggo nusur ku tengah-tengahta bagi rupa manusia!" 14:12 Ikatakenna Barnabas dewa Zeus janah Paulus ikatakenna Hermes, sabap ia me si ngerana e. 14:13 E maka reh imam dewa Zeus i rumah pertotonna nari i darat kuta, ibabana lembu jenggina ras bunga ku pintu gerbang kuta. Atena erbahan persembahen ras kalak si nterem man rasul-rasul e. 14:14 Kenca ibegi rasul Barnabas ras Paulus kai ate kalak enda ibahanna, icaingkenna uisna jenari kiam ia ku tengah-tengah jelma si nterem e janahna serko nina, 14:15 "O teman-teman, ngkai maka bagenda perbahanenndu? Kami pe manusia kap bali ras kam. Kami reh ku jenda meritaken Berita Si Meriah man bandu, gelah tek kam man Dibata si nggeluh si njadiken langit, doni, lawit ras kerina isina; gelah olanai ilakokenndu perbahanen si sia-sia enda. 14:16 I bas paksa-paksa si enggo lewat ipelepas Dibata kerina manusia erbahan bagi ate-atena. 14:17 Tapi Ia tetap encidahken DiriNa arah perbahanenNa si mehuli. IpesusurNa udan i langit nari janah iberekenNa paksa mbuah page. IberekenNa man bandu pangan janah meriah ukurndu ibahanNa." 14:18 Aminna gia bagenda ikataken rasul-rasul, menam-menam la ia ngasup ngambati kalak si nterem e erbahan persembahen man bana. 14:19 Piga-piga kalak Jahudi reh i Antiokia, i daerah Pisidi nari, ras Ikoni. Iajuk-ajukna kalak si nterem gelah ngikutken katana. Jenari ibenterina Paulus alu batu janah isarenna ku darat kuta. Iakapna Paulus enggo mate. 14:20 Tapi asum kalak si enggo tek e tedis engkeleweti ia, keke ia jenari mulihken ia ku bas kuta. Pepagina lawes ia ras Barnabas ku Derbe. 14:21 I Derbe pe iberitaken Paulus ras Barnabas Berita Si Meriah janah nterem ibahanna kalak tek man Jesus. Kenca bage mulihken ia ku Listera, jenari ku Ikoni, janah i Ikoni nari mulihken ia ku Antiokia i Pisidi. 14:22 I bas tep-tep kuta ipegegehina ukur ajar-ajar janah iajarina gelah tetap ia tek man Tuhan. Nina ngajar, "La banci lang sibentasi lebe erbage-bage kiniseran i bas mengketi Kinirajan Dibata." 14:23 I bas tep-tep perpulungen itentuken rasul-rasul e pertua-pertuana. Kenca ertoto man Dibata dingen erpuasa, iendeskenna pertua-pertua e man Tuhan si itekina. 14:24 Kenca ibentasi rasul si dua kalak e daerah Pisidi, lawes ia ku Propinsi Pampilia. 14:25 Iberitakenna Kata Dibata i Perge, jenari lawes ia ngincuah ku Atalia. 14:26 I Atalia nari erlayar ia mulih ku Antiokia; i Antiokia me nai duana ia enggo iendesken ku bas lias ate Dibata guna ndahiken dahin si enggo idungina enda. 14:27 Kenca seh i Antiokia ipepulungna kalak si enggo tek man Jesus. Iturikenna man perpulungen e kai si enggo ibahan Dibata arah ia. Iturikenna pe kuga enggo icidahken Dibata maka man si labo kalak Jahudi pe pintun kiniteken enggo talang tuhu-tuhu. 14:28 Paulus ras Barnabas ndekah ringan i je ras perpulungen.
15:1 Lit piga-piga kalak reh i Judea nari ku Antiokia janah iajarina kalak si enggo tek man Jesus nina, "Labo kam terkelin ibahan Dibata adi la kin kam isunatken bagi iaturken Undang-undang Musa." 15:2 Pengajaren kalak enda ilawan Paulus ras Barnabas tuhu-tuhu seh jadi perjengilen si mesangat. E maka dungna ersada arih perpulungen gelah Paulus ras Barnabas bage pe piga-piga kalak anggota perpulungen berkat ku Jerusalem ndahi rasul-rasul ras pertua-pertua guna ncakapken persoalen enda. 15:3 Itaruhken perpulungen ia seh ku darat kuta. Jenari erdalan ia arah Penike ras Samaria. I bas kuta-kuta si ibentasina, iturikenna man kalak si enggo tek maka si la kalak Jahudi pe enggo robah. Meriah ukur perpulungen megi berita enda. 15:4 Kenca seh i Jerusalem, ngalo-ngalo perpulungen, rasul-rasul ras pertua-pertua. Iturikenna man kalak e kai si enggo ibahan Dibata arah ia. 15:5 Tapi tedis piga-piga kalak i bas kalak Parisi si enggo tek jenari nina, "Si labo kalak Jahudi e arus isunatken lebe, jenari ikutkenna Undang-undang Musa." 15:6 E maka ersidang rasul-rasul ras pertua-pertua guna ncakapken persoalen e. 15:7 Kenca ndekah ngerana, janah percakapen e lalap la erkedungen, tedis Petrus, jenari nina, "O senina-senina, ietehndu maka nai nari aku enggo ipilih Dibata i tengah-tengahndu nari guna meritaken Berita Si Meriah man si labo kalak Jahudi gelah ibegina dingen tek ia. 15:8 Janah Dibata, si nandai perukuren manusia, enggo encidahken maka si labo kalak Jahudi pe iakuiNa nge. IcidahkenNa e alu mereken Kesah Si Badia man kalak e bali ras iberekenNa man banta. 15:9 Labo erndobah idahNa kita ras si labo kalak Jahudi. IbersihkenNa ukur kalak e perbahan ia tek. 15:10 Dage ngkai maka genduari icubaindu Dibata alu namaken baban si mberat man ajar-ajar e? Nininta nai bage pe kita jine labo ngasup mersansa. 15:11 Tapi sebalikna, tek kita, maka erkiteken lias ate Tuhan Jesus kita terkelin bali ras si labo kalak Jahudi." 15:12 Sinik kerina kalak si pulung e. Jenari ibegikenna Paulus ras Barnabas nuriken kerina tanda-tanda sengget si mbelin si enggo ibahan Dibata arah ia i tengah-tengah si labo kalak Jahudi. 15:13 Kenca dung ngerana Paulus ras Barnabas, ngerana ka Jakup, nina, "O senina-senina, begikenlah katangku enda! 15:14 Enggo ituriken Simon kuga nai tangtangna Dibata ndahi kalak si la nandai Dibata janah ipilihNa sada bangsa i bas kalak e nari jadi si kerajangenNa. 15:15 Si enda sue ras si ikataken nabi-nabi bagi tersurat i bas Pustaka Si Badia, 15:16 'Nina Tuhan: Kenca si enda mulihken Aku pagi; janah Kupajekken mulihi rumah Daud si enggo runtuh. Runtuh-runtuhna e Kubahan jadi mbaru janah Kubangun rumah e mulihi. 15:17 Gelah kerina kalak si deban ndarami Tuhan, kerina si labo kalak Jahudi si enggo Kudilo jadi si kerajangenKu. 15:18 Enda me si enggo ikataken Tuhan, si erbahanca nai ieteh kalak kerna si enda.' " 15:19 Iterusken Jakup ngerana nina, "Adi kuakap, ola sisusahi si labo kalak Jahudi si enggo erpengendes man Dibata e. 15:20 Tapi sibahanlah surat man bana gelah ola ipanna pangan si la bersih si enggo ipersembahken man dibata-dibata palsu; gelah ola ia erlagu la mehuli; gelah ola ipanna dareh ntah asuh-asuhen si mate la perbahan igeleh. 15:21 Sabap nai nari Undang-undang Musa iberitaken i tep-tep kuta, janah seh asa genduari iogeken i bas rumah pertoton tep-tep wari Sabat kalak Jahudi." 15:22 Jenari ersada arih rasul-rasul, pertua-pertua ras kerina ngawan perpulungen guna netapken utusen si berkat ras Paulus bage pe Barnabas ku Antiokia. Itetapkenna Silas ras Judas si igelari Barsabas. Kalak enda duana ihamati i bas perpulungen. 15:23 Arah ia isehken surat man si labo kalak Jahudi; isina bagenda, "Kami, rasul-rasul ras pertua-pertua, e me senina-seninandu, nehken berita mejuah-juah man bandu senina-senina kami si labo kalak Jahudi si ringan i kuta Antiokia, i Propinsi Siria ras Propinsi Kiliki. 15:24 Enggo ibegi kami berita, maka lit piga-piga i bas kami nari, si labo isuruh kami, nuhsahi ukurndu janah si erbahanca gulut akapndu alu pengajarenna. 15:25 Perbahan si e enggo ersada arih kami guna netapken piga-piga kalak si erberita man bandu. Ia berkat ras Barnabas bage pe Paulus, si ikelengi kami, 15:26 si enggo nggit berkorban guna gelar Tuhanta Jesus Kristus. 15:27 Dage isuruh kami Judas ras Silas gelah ikatakenna langsung man bandu isi surat kami enda. 15:28 Enggo itetapken Kesah Si Badia bage pe enggo itetapken kami maka olanai itambahi aturen-aturen si deban man bandu, selain aturen-aturen si perlu enda; 15:29 ola pan pangan si enggo ipersembahken man dibata-dibata palsu; ola pan dareh; ola pan asuh-asuhen si mate la igeleh; janah ola erlagu la mehuli. Adi ipatuhindu enda maka kam enggo erbahan si mehuli. Sibar em. Mejuah-juah." 15:30 E maka ipeberkat me rombongen e ku Antiokia. Kenca seh ia i Antiokia, isuruhna kerina kalak si tek man Jesus pulung, jenari iberekenna surat e man bana. 15:31 Meriah ukur perpulungen kenca iogena surat e, perbahan isi surat e netapken ukurna. 15:32 Judas ras Silas duana ia nabi; gedang ia ngerana man perpulungen e. Ipegegehina dingen ipetetapna ukur perpulungen e. 15:33 Kenca piga-piga wari dekahna ia i je, ipeberkat perpulungen e ia alu meriah ukur. Mulihken ia ndahi perpulungen si ngutus ia. 15:34 Tapi mehuli iakap Silas maka ia tading i je. 15:35 Paulus ras Barnabas ndekah ringan i Antiokia. Duana ia ras nterem kalak si deban ngajar dingen meritaken Kata Tuhan. 15:36 Piga-piga wari kenca si e nina Paulus man Barnabas, "Ota sidahi mulihi senina-seninanta ku kuta-kuta si enggo siberitaken i je Kata Tuhan. Gelah si idah dingen sieteh kuga perkembangenna." 15:37 Ate Barnabas ikut min Johanes Markus. 15:38 Tapi Paulus erpengakap maka Johanes Markus la mehuli ibaba, sabap Johanes Markus nadingken ia mbaru enda i Pampilia dingen lanai ia ikut ras-ras ndungi dahin e. 15:39 Perbahan si e turah perubaten i bas ia duana si erbahanca ia sirang. Barnabas ras Markus erlayar ku Kiprus. 15:40 Tapi Paulus, ipilihna Silas. Kenca perpulungen ngendesken ia ku bas lias ate Tuhan berkat ia. 15:41 Isiarina daerah Siria ras Kiliki janah ipegegehina kiniteken perpulungen si i je.
16:1 Seh pe Paulus ku Derbe ras ku Listera. I Listera lit sekalak ajar-ajar gelarna Timotius. Nandena kalak Jahudi si enggo tek man Jesus tapi bapana kalak Junani. 16:2 Kerina kalak si tek man Jesus si ringan i Listera bage pe i Ikoni ngataken maka Timotius kalak si mehuli. 16:3 Ate Paulus maba Timotius jadi temanna, e maka isunatkenna ia. Isunatken Paulus ia perbahan kerina kalak Jahudi i daerah e meteh maka bapa Timotius kalak Junani. 16:4 Jenari berkat kalak e niari kuta-kuta. Ipesehna kai si enggo itetapken rasul-rasul ras pertua-pertua i Jerusalem gelah ipatuhi perpulungen-perpulungen. 16:5 Alu bage erteguhna kiniteken perpulungen. Janah tep-tep wari reh teremna anggota perpulungen e. 16:6 Perbahan Kesah Si Badia ngambati Paulus ras teman-temanna meritaken Berita Si Meriah i Propinsi Asia e maka lawes ia arah Perigia ras arah Galati. 16:7 Kenca seh ia i perbalengen Misia, lawes atena ku Propinsi Bitinia. Tapi Kesah Jesus ngambati ia. 16:8 E maka lawes ia ku Troas arah Misia. 16:9 I bas berngi e Paulus ngaloken sada pengenehenen. I bas pengenehenen e idahna sekalak kalak Makedoni tedis janah erdilo man bana nina, "Marilah ku Makedoni, sampati kami!" 16:10 Kenca Paulus ngaloken pengenehenen e, minter kami ersikap guna berkat ku Makedoni. Sabap tek kami maka Dibata nuruh kami meritaken Berita Si Meriah man kalak si ringan i Makedoni. 16:11 Jenari erlayar kami i Troas nari ku Pulau Samotrake. Pepagina terus kami ku Neapolis. 16:12 I Neapolis nari erdalan kami ku Pilipi e me kuta i daerah si pemena i Makedoni. Penduduk kuta e, e me warga negara Roma. I bas kuta e me kami ringan piga-piga wari dekahna. 16:13 Asum wari Sabat kalak Jahudi, lawes kami ku darat kuta, ku tepi lau, sabap iakap kami maka lit i je ingan ertoto kalak Jahudi. Kenca kami kundul, ngerana kami man diberu-diberu si pulung i je. 16:14 Sekalak i bas diberu e gelarna Lidia. Ia i Tiatira nari janah dahinna erbinaga uis si meherga, ungu rupana. Ia kalak Junani si ersembah man Dibata. Italangi Tuhan ukurna, e maka tutus kal atena megiken kai si ikataken Paulus. 16:15 Ia iperidiken ras kerina isi jabuna. Jenari iundangna kami ku rumahna nina, "Adi iakapndu maka aku tuhu-tuhu enggo tek man Tuhan, marilah kesilang ku rumahku." Ipindokenna kal gelah kami kesilang ku rumahna. 16:16 I bas sada wari, asum kami lawes ku ingan ertoto, jumpa kami ras sekalak budak diberu. Ia erjinujung, e maka ngasup ia nuriken kejadin si langa reh. Melala untung tuanna arah ia. 16:17 Ikut-ikutna Paulus ras kami, janah alu sora si megang nina, "Kalak enda kerina e me persuruhen Dibata si Meganjang. Iturikenna man bandu dalan keselamaten." 16:18 Piga-piga wari ibahanna bage seh dungna lanai sabar Paulus. E maka erkusur Paulus, isergangina setan e nina, "I bas gelar Jesus Kristus kusuruh kam ndarat i bas diberu enda nari." I bas paksa e pe minter ndarat setan e. 16:19 Kenca idah tuanna maka lanai ia banci dat duit arah diberu e nari, itangkapna Paulus ras Silas, jenari isarenna ku bale i tiga. 16:20 Ibabana ia ku lebe-lebe Pemerentah Roma janah nina, "Kalak enda kalak Jahudi; janah iguntarina kutanta enda. 16:21 Iajarkenna adat si la banci sibahan rikutken undang-undangta kalak Roma." 16:22 Kalak si nterem pe ikut ngelawan Paulus ras Silas. Icaingken pengulu-pengulu bale e uis Paulus ras uis Silas jenari isuruhna perajurit ngeligasisa. 16:23 Kenca mesangat Paulus ras Silas iligasina, itamakenna ia ku bas penjara. Iperentahken pengulu-pengulu e man kepala penjara gelah ijagai kal rasul-rasul e. 16:24 Sue ras perentah e, itamaken kepala penjara e ia duana ku bas kamar si arah tengahna kal. Nahena i pasungna i bas beloti si galang. 16:25 Tapi kira-kira tengah berngi Paulus ras Silas ertoto dingen rende muji Dibata, janah kalak tahanen si deban megiken ia. 16:26 Rempet jadi linur mehantu, si erbahanca mugur-ugur palas penjara e. Talang kerina pintun rumah penjara; bage pe rante-rante si ngiket tan kalak tahanen e nangtangen. 16:27 Medak kepala penjara, janah kenca idahna enggo talang pintun penjara, iakapna kerina kalak tahanen e enggo kiam. E maka idekdekna pedangna, ibunuhna atena bana. 16:28 Tapi alu sora si megang nina Paulus, "Ola sakiti bandu, sabap i jenda denga nge kami kerina!" 16:29 Isuruh kepala penjara sekalak juak-juak maba lampu jenari kiam ia ku bas. Nggirgir kal ia, isembahna Paulus ras Silas. 16:30 Jenari ibabana Paulus ras Silas ndarat, janah nina, "O tuan, kai arus kubahan gelah aku terkelin?" 16:31 Ngaloi rasul-rasul nina, "Teklah man Tuhan Jesus gelah kam terkelin, e me kam ras isi jabundu." 16:32 Jenari iberitaken rasul-rasul e Kata Tuhan man bana ras man kerina isi jabuna. 16:33 I bas jam berngi si ndai pe ibaba kepala penjara e rasul-rasul ndai ku bas sada ruangen jenari itambarina luka-lukana. Kenca bage iperidiken rasul-rasul kepala penjara ras isi jabuna. 16:34 Ibaba kepala penjara e rasul-rasul ndai ku rumahna jenari isuruhna man. Meriah kal ukur kepala penjara ras isi jabuna perbahan enggo tek ia man Dibata. 16:35 Kenca terang wari isuruh pengulu-pengulu piga-piga kalak perajurit ndahi kepala penjara guna ngataken, "Pulahi si dua kalak e!" 16:36 Kata enda ikataken kepala penjara ka man Paulus nina, "Pengulu-pengulu kuta enda nuruh aku mulahi kam ras Silas. E maka enggo banci kam ndarat; lawes lah alu mejuah-juah." 16:37 Tapi nina Paulus man perajurit e, "Kami warga negara Roma kap. Langa pe idatna kesalahen kami, enggo iligasina kami i lebe-lebe jelma si nterem. Jenari itamakenna kami ku bas penjara. Janah genduari atena mulahi kami bage-bage saja? Lang, la kami nggit! Suruh pengulu-pengulu kuta enda ku jenda mulahi kami." 16:38 Ipeseh perajurit e kata enda man pemerentah. Mbiar ia kenca ibegina maka Paulus ras Silas warga negara Roma. 16:39 E maka berkat ia mindo maap man Paulus ras Silas. Kenca bage ibabana rasul-rasul e ndarat i bas penjara e nari janah ipindokenna gelah lawes rasul-rasul nadingken kuta e. 16:40 Itadingken Paulus ras Silas penjara e jenari lawes ia ku rumah Lidia. Kenca jumpa ia ras senina-senina si sada kiniteken janah kenca ipetetapna ukur senina-senina e, berkat ia nadingken kuta e.
17:1 Kalak enda nerusken perdalanenna arah Ampipolis ras Apolonia jenari seh ia i Tesalonika. I Tesalonika lit sada rumah pertoton kalak Jahudi. 17:2 Bagi biasana, bengket Paulus ku rumah pertoton kalak Jahudi. Telu kali wari Sabat erturut-turut ituriken Paulus ras kalak e bagin-bagin Pustaka Si Badia. 17:3 Iterangken Paulus bagin-bagin Pustaka Si Badia e janah arah e ibuktikenna maka Raja si ipadanken Dibata e la banci lang ngenanami kiniseran janah keke i bas si mate nari. Iterusken Paulus tole ngerana nina, "Jesus si kucakapken man bandu enda, Ia me Raja si ipadanken Dibata." 17:4 Piga-piga i bas kalak e, tek dingen igabungkenna bana ras Paulus ras Silas. Kalak Junani si nembah man Dibatana pe nterem tek man Jesus dingen kalak e pe nggabungken bana ras Paulus ras Silas; i bas si e subuk pe diberu-diberu si mbelin pengaruhna i tengah masarakat. 17:5 Tapi cian ate kalak Jahudi ngidah si enda. E maka ipepulungna kalak si gutul-gutul i tiga nari guna ngguntari. Jenari gujuh ibahanna i belang-belang kuta e. Iserbuna ku rumah Jason guna nangkap Paulus ras Silas, sabap atena maba Paulus ras Silas ku lebe-lebe kalak si nterem. 17:6 Tapi perbahan la ia jumpa ras Paulus bage pe Silas e maka isarenna Jason ras piga-piga kalak si enggo tek man Jesus. Ibabana kalak enda ngadap man pengulu-pengulu, janah nina, "Kalak si ngguntari i japa pe genduari enggo seh ku jenda, 17:7 janah Jason ngaloken ia kesilang i bas rumahna. Kerina ia enggo ngelawan undang-undang si ibereken Kaisar Roma man banta. Ikatakenna maka lit raja si deban, gelarna Jesus." 17:8 Megi kata enda gulut ukur kalak si nterem ras pengulu-pengulu. 17:9 Kenca isuruh pengulu-pengulu si Jason ras senina-senina e nggalar duit jaminen e maka ia ipulahi. 17:10 Kenca wari enggo gelap perpulungen Tesalonika minter nuruh Paulus ras Silas berkat ku Berea. Kenca seh i Berea lawes ia ku rumah pertoton kalak Jahudi. 17:11 Ulin ukur kalak Jahudi si i kuta Berea asangken kalak Jahudi si i kuta Tesalonika. Kalak Jahudi si i kuta Berea mesikel kal megiken kai si ikataken Paulus. Tep-tep wari ipelajarina Pustaka Si Badia pepayo ntah tuhu kin si iajarken Paulus e. 17:12 Nterem kalak si i je jadi tek. I bas si e nterem pe kalak Junani subuk dilaki bage pe diberu-diberu si ihamati kalak. 17:13 Tapi kenca ibegi kalak Jahudi si ringan i Tesalonika maka i Berea pe enggo iberitaken Paulus Kata Dibata, reh ia ku Berea. Iajuk-ajukna kalak si nterem gelah ngguntari. 17:14 E maka minter isuruh perpulungen e Paulus lawes ku pelabuhen. Silas ras Timotius tading i Berea. 17:15 Piga-piga kalak anggota perpulungen e nemani Paulus seh ku Aten. Jenari mulihken ia ku Berea alu maba tenah i bas Paulus nari gelah Silas ras Timotius pedas reh ndahi ia. 17:16 Asum Paulus nima-nimai kerehen Silas ras Timotius i Aten, nembeh kal atena sabap melala idahna patung-patung i kuta e. 17:17 Perbahan si e ngerana ia ras kalak Jahudi bage pe ras kalak si deban si ikut nembah man Dibata i rumah pertoton. Bage pe tep-tep wari ngerana ia i tiga ras kalak si mentas, si nggit megiken ia. 17:18 Reh pe piga-piga guru i bas golongen Epikurea ras guru-guru i bas golongen Setoa nari ersoal ras Paulus. Janah lit kalak ngerana ncakapken Paulus nina, "Kai nge si ikataken tukang koyok ena? Kai pe labo lit pemetehna." Nina ka deba, "Tempa-tempa ia meritaken dua dibata si asing." Ikataken kalak enda bage sabap ituriken Paulus kerna Jesus ras kerna kekeken. 17:19 E maka ibabana Paulus ku sidang Areopagus jenari nina, "Banci iturikenndu man kami, kuga kin pengajaren si mbaru si iajarkenndu e? 17:20 Piga-piga si iturikenndu e langa pernah ibegi kami, e maka merincuh kami metehsa." 17:21 (Kalak Aten bage pe kalak si deban si ringan i kuta Atennggit kal engkeriken wari-warina guna nuriken ras megi-megi kerna kai-kai si mbaru.) 17:22 Tedis Paulus i lebe-lebe sidang Areopagus jenari nina, "O kalak Aten! Enggo kuidah maka kam kalak tutus tuhu-tuhu i bas agama. 17:23 Sabap asum aku erdalan-dalan i kutandu enda, janah asum aku ngenennen inganndu ersembah man dibata, kuidah sada ingan persembahen si lit tulisenna, 'Man Dibata Si La Itandai'. Dage Dibata si isembahndu, si la itandaindu e, e me ateku ku petandaken man bandu genduari. 17:24 Dibata si enggo njadiken doni ras isina, Ia me Tuhan si engkuasai langit ras doni. Janah Ia labo ringan i bas ingan sembah-sembahen si ibahan manusia. 17:25 Labo perban lit si kurang i bas Ia maka ialokenNa persembahen manusia, sabap Ia jine kap mereken kegeluhen, kesah, ras kerina keperlun manusia. 17:26 I bas sekalak jelma nari enggo ijadikenNa kerina bangsa manusia si ngiani doni enda. Ope denga ijadiken Dibata bangsa-bangsa manusia, enggo leben itetapkenNa ndigan bangsa-bangsa manusia e nggeluh janah i ja ia ringan. 17:27 Si enda ibahanNa gelah idarami manusia e Ia, gelah alu dadap-dadap banci idat manusia e Ia. Tapi si tuhuna Dibata e labo ndauh i bas kita nari sekalak-sekalak. 17:28 Bagi si ikataken sekalak jelma, 'I bas Ia kita nggeluh, muit, dingen lit.' Bage pe bagi si ikataken piga-piga kalak penyair i tengah-tengahndu nari nina, 'Kita pe kesusurenNa kap.' 17:29 Dage adi kita kesusuren Dibata, ola min siakap maka Dibata e bali ras gana-gana emas ntah pirak, ntah gana-gana batu si ibahan tukang si beluh. 17:30 I bas paksa si enggo lepas, asum manusia langa erpemeteh kerna Ia, Dibata tutup mata. Tapi genduari isuruh Dibata kerina manusia i belang-belang doni enda gelah jera. 17:31 Sabap enggo itetapken Dibata maka i bas sada wari iadiliNa me kerina manusia i belang-belang doni enda alu bujur arah sekalak si enggo ipilihNa. Gelah manusia tek kerna si e, enggo ipekekeNa kalak si ipilihNa e i bas si mate nari." 17:32 Asum ibegi kalak e Paulus ngerana kerna si mate nggeluh mulihi, piga-piga kalak i bas si megi e nguncimi Paulus. Tapi lit deba si ngataken, "Merincuh kami gelah iturikenndu tole kerna si enda man kami." 17:33 E maka lawes Paulus nadingken kalak ndai. 17:34 Tapi lit piga-piga kalak tek dingen ngikutken Paulus. Piga-piga kalak i bas si enggo tek e subuk Dionisius, e me sekalak anggota sidang Areopagus, ras sekalak diberu, gelarna Damaris, bage pe piga-piga kalak si debanna.
18:1 Kenca bage itadingken Paulus kuta Aten janah lawes ia ku Korinti. 18:2 I Korinti jumpa ia ras sekalak Jahudi gelarna si Akuila, asalna i Propinsi Pontus nari. Langa ndekahsa ia reh i Italia nari ras ndeharana Persila. Pindah ia ku Korinti i Italia nari sabap kerina kalak Jahudi ipelawes Klaudius, Kaisar Roma, i Roma nari. Idahi Paulus kalak enda ndai. 18:3 Janah perbahan seri pendahinna, e me erbahan tenda, e maka i rumahna Paulus kesilang. 18:4 Tep-tep wari sabat kalak Jahudi, ngerana Paulus i bas rumah pertoton. Iajarina kalak Jahudi ras kalak Junani gelah tek man Jesus. 18:5 Kenca reh Silas ras Timotius i Makedoni nari, meritaken Berita Si Meriah nari ngenca dahin Paulus. Iturikenna man kalak Jahudi maka Jesus e me Raja si ipadanken Dibata. 18:6 Tapi asum ia ijabapi dingen icekuraki kalak enda ikipaskenna abu si leket i bas uisna, janah nina man kalak e, "Adi bene kam i bas Dibata nari, kam jine nge nggengkenca. Aku lanai ersalah i bas si e. Mulai genduari nari kudahi me si labo kalak Jahudi." 18:7 Jenari itadingken Paulus kalak ndai, lawes ia ku rumah Titus Justus. Ia labo kalak Jahudi tapi isembahna Dibata. Rumahna e i samping rumah pertoton. 18:8 Pengulu rumah pertoton e gelarna Krispus. Ia ras kerina isi jabuna tek man Tuhan. Kenca megi pengajaren Paulus, nterem pe kalak Korinti tek dingen iperidiken. 18:9 I bas sada berngi Paulus ngaloken sada pengenehenen. I bas pengenehenen e nina Tuhan man bana, "Ola mbiar, tapi teruslah beritaken, ola kam surut, 18:10 sabap Aku tetap ras kam. Labo ise pe pang pesega-sega kam sabap nterem kalak si enggo Kupilih i bas kuta enda." 18:11 E maka sada setengah tahun dekahna Paulus i bas kuta e, iajarkenna Kata Dibata man anak kuta e. 18:12 Tapi kenca Galio jadi Gubernur i Propinsi Akaya ersada arih kalak Jahudi guna ngelawan Paulus. Ibabana Paulus ras-ras ku lebe-lebe Gubernur gelah iadili. 18:13 Nina kalak Jahudi e, "Ibabaina kalak si nterem nembah man Dibata alu cara si bertentangen ras Undang-undang." 18:14 Asum ngerana ate Paulus, leben Galio ngerana man kalak Jahudi e nina, "O kalak Jahudi, bicara kin min si iadukenndu enda kerna kesalahen ntah kejahaten banci kualoken pengadunndu e. 18:15 Tapi perbahan si enda perubaten kerna kata-kata, gelar-gelar ras Undang-undangndu jine, kam sajalah ndungisa. I bas persoalen si bagenda labo aku nggit jadi hakimndu." 18:16 Jenari ipelawes Galio kalak ndai kerina i bas ruangen e nari. 18:17 Tapi kerina kalak e nangkap Sostenes, pengulu rumah pertoton. Ipekpekina ia i lebe-lebe gedung pengadilen. Tapi la diate Galio pe. 18:18 Kenca si e ndekah denga Paulus tading i Korinti. Jenari itadingkenna senina-senina si sada kiniteken e, lawes ia erlayar radu Persila ras Akuila ku Siria. Ope denga erlayar iguntingna bukna i Kenkerea rikutken padanna man Dibata. 18:19-21 Kenca seh i Epesus lawes Paulus ku rumah pertoton janah ercakap-cakap ia ras kalak Jahudi. Ipindoken kalak Jahudi e gelah ola min lebe lawes Paulus i kuta e nari, tapi pemindonna enda itulak Paulus. Muatna berkat nina man kalak Jahudi e, "Reh nge pagi aku mulihken ndahi kam, adi bage ate Dibata." Jenari erlayar Paulus i Epesus nari, tapi Persila ras Akuila tading i kuta e. 18:22 Kenca seh Paulus i Kesarea, terus ia nangkeng ku Jerusalem. Kenca ia ngerana ras perpulungen Jerusalem lawes ia ku Antiokia. 18:23 Kenca piga-piga wari dekahna ia i Antiokia berkat ka ia. Isiarina taneh Galati ras Perigia guna mpegegehi kiniteken perpulungen. 18:24 Sanga si e lit me sekalak kalak Jahudi reh ku Epesus. Gelarna Apolos; kutana i Aleksandria. Ia sekalak si beluh ngerana janah melala pemetehna kerna Pustaka Si Badia. 18:25 Enggo ipelajarina kerna Dalan Kegeluhen si ituduhken Tuhan. Alu ukur ergiah-giah iajarkenna kerna Jesus alu payo, tapi peridin Johanes ngenca ietehna. 18:26 Pang kal ia ngajar i rumah pertoton. Tapi kenca ibegi Persila ras Akuila pengajaren Apolos, ibabana Apolos ku rumahna jenari alu lebih tepat ipejelasna man Apolos kerna Dalan Kegeluhen si ituduhken Dibata. 18:27 Kenca bage iputusken Apolos maka lawes ia ngepar ku Propinsi Akaya. E maka ibahan perpulungen e surat man perpulungen si lit i Akaya gelah ialo-alona Apolos alu mehuli. I Akaya mbelin kal penampat Apolos man kalak si enggo tek man Jesus arah lias ate Dibata. 18:28 Alu la biar-biaren ijabapina kalak Jahudi i lebe-lebe kalak si nterem. Alu ngogeken ayat-ayat Pustaka Si Badia ibuktikenna maka Jesus e kap si Engkelini si ipadanken Dibata.
19:1 Asum Apolos i Korinti, isiari Paulus terus ku kuta-kuta Propinsi Asia Kitik, janah seh pe ia i Epesus. I Epesus jumpa ia ras piga-piga kalak ajar-ajar. 19:2 Isungkun Paulus kalak e nina, "Ialokenndu ka nge Kesah Si Badia asum tangtangna kam mulai tek?" Erjabap kalak e, "Langa, janah langa pernah pe ibegi kami maka lit Kesah Si Badia." 19:3 Nungkun ka Paulus nina, "Dage, peridin si apai kin si ialokenndu?" Erjabap kalak e nina, "Peridin Johanes." 19:4 Nina Paulus, "Peridin Johanes e me peridin man kalak si enggo jera; janah ikataken Johanes pe man kalak Israel gelah kalak Israel tek man Ia, si reh arah pudina, e me Jesus." 19:5 Kenca ibegi kalak ndai penjelasen Paulus enda, iperidiken ia i bas gelar Tuhan Jesus. 19:6 Janah asum Paulus namaken tanna ku babona, nusur Kesah Si Badia man bana. Jenari ngerana kalak e i bas erbage-bage cakap si deban, janah ernubuat ia. 19:7 Teremna kalak ndai lit kira-kira sepuluh dua kalak. 19:8 Telu bulan dekahna Paulus alu la biar-biaren ngerana i rumah pertoton. I bas percakapenna ras kalak e iusahakenna gelah tek kalak e kerna Kinirajan Dibata. 19:9 Tapi lit piga-piga kalak si mersik ukurna janah la ia tek. Icekurakina pe pengajaren kerna Dalan Kegeluhen e i lebe-lebe jelma si nterem. E maka itadingken Paulus ia, jenari iserapkenna kalak si enggo tek e janah tep-tep wari ia erbahan tanya-jabap ras kalak e i bas sada gedung sekolah, Tiranus empuna. 19:10 Dua tahun dekahna si enda ilakokenna. Alu bage kerina kalak si ringan i Propinsi Asia, subuk kalak Jahudi bage pe si labo kalak Jahudi megi Kata Tuhan. 19:11 Arah Paulus ibahan Dibata tanda-tanda sengget si luar biasa. 19:12 Alu namaken saputangan ntah pe uis si enggo ipake Paulus ku babo kalak si sakit malem penakit e janah ndarat pe setan-setan i bas kalak si setanen nari. 19:13 Lit piga-piga kalak Jahudi erdalan-dalan, dahinna mpelawes setan i bas kalak nari. Icubakenna pelawes setan-setan alu make gelar Tuhan Jesus. Nina man setan-setan e, "I bas gelar Jesus si iberitaken Paulus, kusuruh kam ndarat i bas kalak enda nari." 19:14 Kalak si erbahan si enda pituna anak Sekewa, si ngakuken dirina imam si mbelin kalak Jahudi. 19:15 Tapi ngaloi setan-setan e nina, "Jesus kutandai, Paulus pe kueteh ise ia, tapi kam ise kin kam?" 19:16 Irigep si setanen e ia kerina, isintakkenna uisna seh merigat janah iraukina dagingna seh luka-luka. E maka kiam kerina kalak e i bas rumah kalak si setanen e nari lanai ruis. 19:17 Kerina si ringan i Epesus subuk kalak Jahudi bage pe si labo kalak Jahudi meteh kejadin enda. Jengang kalak kerina janah erkiteken si e reh terpujina gelar Tuhan Jesus. 19:18 Nterem kalak si enggo tek man Jesus e reh janah iakukenna alu terus terang maka gelgel nari ia make tabas-tabas. 19:19 Nterem kalak si lit kinigurunna maba pustakana jenari itutungna i lebe-lebe jelma si nterem. Erga buku-buku e kerina adi ijumlahken lit lima puluh ribu duit pirak. 19:20 Alu cara si luar biasa enda reh mbarna Kata Tuhan dingen reh teremna kalak si tek. 19:21 Kenca kejadin e itetapken Paulus maka lawes ia ku Makedoni ras Akaya, jenari terus ia ku Jerusalem. Enda itetapkenna erkite-kiteken pang Kesah Si Badia. Janah pe nina, "Kenca kudahi perpulungen Jerusalem terus pe ateku ku Roma." 19:22 E maka isuruhna Timotius ras Erastus leben ku Makedoni. Tapi Paulus lit piga-piga wari nari dekahna i Propinsi Asia. 19:23 Paksa si e jadi ka keributen i Epesus erkiteken Dalan Kegeluhen si ituduhken Tuhan. 19:24 Lit sekalak tukang pirak gelarna Demetrius. Ibahanina patung-patung rumah pertoton Dewi Artemis i bas pirak nari. Arah usahana enda melala untungna ras kalak si erdahinna. 19:25 Ipepulungna si erdahinna bage pe kalak si seri pendahinna ras ia, jenari nina man kalak e, "O teman-teman, ietehndu maka kebayakenta rehna arah usahanta enda. 19:26 Genduari banci idahndu dingen ibegindu kai si ibahani Paulus. Ikatakenna maka patung-patung si ibahan manusia labo dibata. Enggo nterem kalak papak ibahanna, labo saja i Epesus tapi pe menam i belang-belang Propinsi Asia. 19:27 Si enda tuhu-tuhu bahaya, sabap labo saja perusahanta enda icekuraki kalak, tapi Rumah Sembah-sembahen Dewi Artemis si mbelin e pe lanai lit ertina. Janah Dewi Artemis si isembah kalak i Asia ras i belang-belang doni enda lanai ipehaga." 19:28 Megi kata enda ngamuk kalak e janah alu sora megang kerina ia ngerana nina, "Terpujilah Artemis Dewi si isembah kalak Epesus!" 19:29 Guntar kuta e ibahanna. Itangkapna Gayus ras Aristarkus; kalak enda duana i Makedoni nari janah duana teman Paulus sada dalanen. Isaren kalak si nterem e ia duana ku stadion. 19:30 Idahi Paulus atena ku tengah-tengah jelma si nterem e, tapi la ipelepas ajar-ajar. 19:31 Bage pe piga-piga kalak pembesar Propinsi Asia teman Paulus mindo gelah ola ia bengket ku bas stadion e. 19:32 Tupung e megang-megang kerina ngerana kalak si pulung e; lit si ngataken bagenda lit si ngataken bagah, sabap teremen si la meteh kai sabapna maka pulung. 19:33 Jenari ijembaken kalak Jahudi si Aleksander ngerana ku lebe. Erkiteken si e iakap jelma si nterem e ia me bena-benana si erbahan guntar e. Ibahan Aleksander tanda alu tanna gelah ola gejek sabap atena ngerana mereken penjelasen man kalak si nterem maka labo kalak Jahudi si erbahan guntar e. 19:34 Tapi kenca ieteh kalak si nterem maka ia kalak Jahudi, serko-serko ia kerina seh dua jam dekahna nina, "Terpujilah Artemis, Dewi si isembah kalak Epesus!" 19:35 Dungna kalak si nterem e banci ipeteneng Sekretaris daerah. Janah kenca teneng nina, "O kalak Epesus! Kerina kalak meteh maka Epesus me si mada rumah pertoton Dewi Artemis si mbelin ras patungna si nusur i langit nari. 19:36 Labo ise pe ngatakenca lang. E maka tenenglah kam, janah ukuri lebe kai si atendu ibahanndu. 19:37 Sabap enggo ibabandu kalak enda duana ku jenda aminna gia labo irampokna rumah pertoton janah labo lit ikatakenna si jahat kerna dewinta e. 19:38 Dage adi lit pengadun Demetrius ras si erdahinna nandangi sekalak jelma, lit kap pengadilen, janah lit kap hakim-hakim, ku jelah ia ngadu. 19:39 Janah adi lit tuntutenndu si deban, cakapkenlah e i bas sidang si resmi. 19:40 Sabap banci jadi arah kejadin i bas wari enda kita ituduh pemerentah Roma erbahan pemberontaken. Janah la lit alasenta guna mpertanggung-jawabken perpulungen si ngguntari enda." 19:41 Kenca dung ngerana sekretaris e, isuruhna kalak si nterem e mulih.
20:1 Piga-piga wari kenca guntar ndai ipepulung Paulus ajar-ajar jenari pegegehina ukur ajar-ajar e. Janah kenca sisalam-salamen, berkat ia ku Makedoni. 20:2 Isiari Paulus taneh e, iajari dingen ipegegehina ukur kalak si enggo tek man Jesus jenari seh ia i Junani, Propinsi Akaya. 20:3 Kenca telu bulan dekahna i je erlayar atena ku Siria. Tapi perbahan ibegina berita maka kalak Jahudi ersura-sura munuh ia, e maka mulihken ia arah Makedoni. 20:4 Ia itemani Sopater anak Pirus si i Berea nari, Aristarkus ras Sekondus duana i Tesalonika nari, Gayus i Derbe nari, Timotius ras dua kalak i Asia nari e me Tikikus ras Tropimus. 20:5 Kalak enda kerina leben berkat janah itimaina kami i Troas. 20:6 Kenca lepas Wari Raya Roti si la erragi erlayar kami i Pilipi nari janah kenca lima wari maka kami seh i Troas dingen jumpa ras teman-teman kami. I Troas pitu wari kami dekahna. 20:7 I bas wari Sabtu berngi pulung kami ras-ras guna man ras-ras. Asum si e ngerana Paulus man perpulungen seh mbages berngi, sabap berkat atena pepagina. 20:8 Melala lampu ipasang i bas ruangen i datas loteng ingan kami pulung e. 20:9 Sekalak anak perana gelarna Etikus kundul i jendela. Perbahan dekahna Paulus ngerana, munduk-unduk kal anak perana e. Dungna tunduh ia, jenari ndabuh ia ku teruh i datas tingkat telu nari. Asum iangkat kalak e ia, tapi enggo mate. 20:10 Nusur Paulus ku teruh jenari tungkuk ia, idakepna anak perana e janah nina man kalak si pulung, "Ola aru atendu, ia nggeluh denga nge." 20:11 Kenca bage mulihken Paulus ku datas loteng, icepik-cepikna roti. Jenari man ia ras kalak si enggo tek man Jesus e. Kenca dung man ndekah denga ia ngerana ras perpulungen e, seh terang wari, jenari berkat ia. 20:12 Anak perana e itaruhken perpulungen ku rumahna. Meriah kal ukur perpulungen sabab nggeluh denga ia. 20:13 Jenari leben kami berkat ku kapal janah erlayar ku Asos. Ate kami ninggahi Paulus i Asos bagi enggo isuruhna, perbahan ia erdalan arah daraten ku jah. 20:14 Kenca jumpa kami i Asos, ibaba kami ia ku kapal jenari terus erlayar ku Mitilena. 20:15 I Mitilena nari terus kami erlayar janah pepagina ka maka kami seh i bas sada ingan si petala-tala ras Kios. Sada wari nari ka kenca si e seh kami i Samos janah pepagina ka i Miletus. 20:16 Enggo itetapken Paulus maka la ia singgah arah Epesus gelah ola ndekah i Propinsi Asia. Merudu Paulus sabap adi banci seh min atena i Jerusalem asum wari Pentakosta. 20:17 E maka isuruh Paulus sekalak i Miletus nari ku Epesus ngelegi pertua-pertua Epesus. 20:18 Kenca reh pertua-pertua e nina Paulus man bana, "Ietehndu kuga aku nggeluh dingen erdahin tep-tep wari i tengah-tengahndu mulai kin tangtangna seh aku i daerah Asia. 20:19 Alu meteruk ukur kudahi dahin Tuhan. I bas dahin e melala iluhku mambur janah melala percuban man bangku i bas kalak Jahudi nari, si ersura-sura munuh aku. 20:20 Amin bage gia la pernah aku surut nehken si mehuli man bandu. Kuberitaken dingen kuajarken man bandu berita kerna Tuhan Jesus, subuk i lebe-lebe kalak si nterem, bage pe i rumahndu. 20:21 Kuusahaken pe gelah kalak Jahudi bage pe kalak si labo Jahudi jera kempak Dibata, janah gelah tek ia man Tuhanta Jesus Kristus. 20:22 Janah genduari arah penjemba Kesah Si Badia, lawes me aku ku Jerusalem. Labo kueteh kai pagi si jadi man bangku i jah. 20:23 Saja ngenca i bas tep-tep kuta si kudahi ipersingeti Kesah Si Badia man bangku maka penjara ras melala kiniseran enggo nimai aku. 20:24 Tapi labo persoalen man bangku kerna diringku, gelah min banci aku seh ku ujung perlumban dingen kudungi dahin si ibereken Tuhan Jesus man bangku, e me meritaken Berita Si Meriah kerna lias ate Dibata. 20:25 Enggo kudahi kam kerina guna meritaken Kinirajan Dibata. Janah genduari kueteh maka lanai pagi kita jumpa. 20:26 Perbahan si e, sendah kukataken man bandu: adi lit pagi kam bene i bas Dibata nari, la aku si salah. 20:27 Sabap man bandu enggo kupeseh kerina sura-sura Dibata. 20:28 E maka jagailah dirindu dingen jagai pe kerina kalak si enggo itetapken Kesah Si Badia man kepkepenndu. Permakanilah perpulungen Tuhan si enggo itebusiNa alu engkorbanken diriNa seh mate. 20:29 Kueteh pe maka kenca aku lawes, reh me serigala si merawa ku tengah-tengahndu si la alang-alangen ncedaken perpulungen e. 20:30 Bage pe i tengah-tengahndu nari keke me kalak si ngajar alu pengajaren si la tuhu. Atena narik kalak si enggo tek man Jesus jadi pengikutna. 20:31 Perbahan si e erjaga-jagalah dingen inget maka telu tahun dekahna kuajari kam sekalak-sekalak suari ras berngi alu iluh mambur. 20:32 Janah genduari kuendesken kam ku bas pengepkepen Dibata dingen ku bas Kata lias ateNa, si Ngasup mpegegehi kam dingen mereken pasu-pasu man bandu, e me pasu-pasu si nandangi iberekenNa man kalak si enggo ipilihNa. 20:33 La pernah aku ersura-sura gelah ibereken man bangku pirak ntah emas ntah uis. 20:34 Kam pe ietehndu nge maka tanku enda nge erdahin guna keperlunku ras teman-temanku. 20:35 I bas si enda kerina, enggo kucidahken si man usihenndu. Kita arus mejingkat erdahin guna nampati kalak musil. Ingetlah kata si ikataken Tuhan Jesus nina, 'Malemen kap ate ibas mere asangken ibas ngalo.' " 20:36 Kenca dung Paulus ngerana erjimpuh ia ras kalak e kerina dingen ertoto man Dibata. 20:37 Tangis kalak e kerina, idakepina dingen iemaina Paulus. 20:38 Ceda kal atena perbahan ikataken Paulus maka lanai pagi ia jumpa. Jenari itaruhken kalak e Paulus ku kapal.
21:1 Kenca kami sirang ras kalak ndai, terus kami erlayar ku pulau Kos. Pepagina seh kami i pulau Rodus, janah i Rodus nari lawes kami ku Patara. 21:2 I Patara lit sada kapal muatna berkat ku Penike. Inangkihi kami kapal e, jenari berkat kami erlayar. 21:3 Kenca teridah pulau Kiprus arah kawes iterusken kami erlayar ku Siria. Singgah kami arah Tirus sabap muaten kapal e ibongkar i je. 21:4 Nusur kami i datas kapal nari, jenari idahi kami kalak si enggo tek man Jesus. Sada minggu dekahna kami ras kalak si enggo tek e. Bekas pengajari Kesah Si Badia alu mesek-sek nina kalak si enggo tek e man Paulus, "Ola kam lawes nangkeng ku Jerusalem." 21:5 Tapi kenca seh paksana kami berkat, iterusken kami perdalanen kami. Kerina kalak e ras ndeharana bage pe anak-anakna ikut naruhken kami ku darat kuta. I tepi lawit ras-ras kami erjimpuh ertoto man Dibata. 21:6 Jenari kenca kami sisalam-salamen, nangkih kami ku kapal janah kalak e mulihken ku rumah. 21:7 I Tirus nari erlayar kami ku Ptolomais. I Ptolomais idahi kami senina-senina si sada kiniteken janah i je kami sada wari. 21:8 Pepagina berkat ka kami, janah seh kami i Kesarea. I Kesarea bengket kami ku rumah Pilipus. Dahin Pilipus meritaken Berita Si Meriah. Ia me salah sada i bas si pitu kalak si enggo ipilih i Jerusalem. I rumahna e me kami kesilang. 21:9 Lit empat kalak anak Pilipus si nguda-nguda si enggo biasa ernubuat. 21:10 Kenca piga-piga wari kami i kuta e, reh sekalak nabi i Judea nari gelarna Agabus. 21:11 Idahina kami, jenari ibuatna benting Paulus. Iiketkenna ku nahena ras ku tanna jine jenari nina, "Nina Kesah Si Badia: empu benting enda iiket kalak Jahudi pagi bagenda i Jerusalem janah iendeskenna pe ia man si labo kalak Jahudi." 21:12 Megi kata enda ipindoken kami alu mesangat ras perpulungen gelah ola min lawes Paulus nangkeng ku Jerusalem. 21:13 Tapi ngaloi Paulus nina, "Engkai maka kam tangis? Engkai maka ilemahkenndu semangatku arah pertangisndu e. Aku enggo sikap labo saja iiket i Jerusalem, tapi pe ersedia aku ibunuh i je erkite-kiteken Tuhan Jesus." 21:14 La kami ngasup ngendik-ngendik Paulus gelah ola ia lawes ku Jerusalem, e maka ningkami, "Peraten Tuhanlah jadi." 21:15 Kenca piga-piga wari dekahna kami ringan i Kesarea, ersikap kami jenari berkat ku Jerusalem. 21:16 Ikut pe ras kami piga-piga kalak anggota perpulungen Kesarea. Ia me si naruhken kami ku rumah Menason. I je me kami kesilang. Menason enda asalna i Kiprus nari. Ndekah me ia tek man Jesus. 21:17 Kenca seh kami i Jerusalem, ialo-alo perpulungen kami alu meriah ukur. 21:18 Pepagina Paulus ras kami lawes ndahi Jakup. Pertua-pertua i bas perpulungen Jerusalem e pe reh ku je. 21:19 Paulus ngataken mejuah-juah man kalak si pulung e. Jenari iturikenna sada-sadai kerina si enggo ibahan Dibata arah pendahinna i tengah-tengah kalak si labo kalak Jahudi. 21:20 Kenca ibegi kalak ndai kai si ituriken Paulus, ipujina Dibata. Jenari nina man Paulus, "O senina, nehenlah maka enggo meribu-ribu kalak Jahudi i Jerusalem enda tek man Jesus janah kerina ia patuh man Undang-undang Musa. 21:21 Enggo ibegina kerna kam maka iajarindu kerina kalak Jahudi si ringan i negeri si deban gelah nadingken Undang-undang Musa. Enggo ibegina maka ikatakenndu man kalak e gelah ola isunatken anak-anakna ntah pe gelah ola ngikutken adat kalak Jahudi. 21:22 Dage genduari, kai nge arus sibahan? Kugapa pe enggo ietehna maka kam enggo seh i jenda. 21:23 E maka ola simbakndu kai si ikataken kami man bandu. I jenda lit empat kalak si gedang bukna perbahan lit padanna man Dibata. 21:24 Ras kalak e kam ngikuti cara pembersihen rikutken aturen agama janah galari biaya persembahen kalak e gelah banci igunting bukna. Alu bage la tek kalak Jerusalem enda nandangi berita si enggo ibegina kerna kam, sabap kam jine ngikuti Undang-undang Musa. 21:25 Tapi nandangi si labo kalak Jahudi, si enggo tek man Jesus, enggo kap mbarenda sibahan surat man bana gelah ola ipanna pangan si enggo ipersembahken man berhala-berhala, bage pe gelah ola ipanna dareh tah asuh-asuhen si mate la igeleh, janah gelah ola ia erlagu la mehuli." 21:26 E maka pepagina lawes Paulus ras si empat kalak e janah ras ia ngikuti acara pembersihen dirina rikut acara agama Jahudi. Jenari lawes ia ku Rumah Pertoton guna pebetehken ndigan warina idungi pembersihen e dingen ndigan ipersembahken persembahenna sekalak-sekalak. 21:27 Tapi asum jangka si pitu wari e nandangi dung, piga-piga kalak Jahudi si reh i Propinsi Asia nari ngidah Paulus i bas Rumah Pertoton. Iajuk-ajukna kalak si nterem e, jenari itangkapna Paulus. 21:28 Alu sora si megang nina, "O kalak Israel! Mari sampati kami! Enda me jelmana si ngajari kalak si nterem i japa pe guna ngelawan bangsanta ras ngelawan Undang-undang Musa bage pe ngelawan Rumah Pertoton enda! Janah genduari enggo ibabana pe kalak perbegu ku bas Rumah Pertoton enda! Keliamen ibahanna ingan si Badia enda!" 21:29 (Si enda ikataken sabap enggo idahna Paulus gawah-gawah ikuta e ras Tropimus kalak Epesus. Iakapna maka enggo ibaba Paulus ia ku Rumah Pertoton e.) 21:30 E maka guntar kuta e; kiamen anak kuta e reh. Itangkapna Paulus dingen isarenna ndarat i bas Rumah Pertoton e nari, janah minter ikuncina pintun Rumah Pertoton. 21:31 Asum irencanakenna munuh Paulus, lit piga-piga kalak nehken berita man puanglima Roma. Iberitakenna maka lit kegujuhen i bas kuta e. 21:32 E maka minter ibuatna sada rombongen perajurit ras piga-piga kalak perwira, jenari alu pedas kiam ia ku tengah jelma si nterem e. Asum idah kalak si nterem puanglima ras perajurit-perajurit e, ngadi ia mekpeki Paulus. 21:33 Ideheri puanglima e Paulus, itangkapna janah isuruhna perajurit-perajurit ngiket Paulus alu dua rante. Jenari nungkun puanglima e nina, "Ise kin enda, janah kai kin enggo ibahanna?" 21:34 Kerina kalak si nterem e ngaloi alu sora si megang, lit si ngataken bagenda lit si ngataken bagah. Perbahan gejekna jelma si nterem e lalap la ieteh puanglima e kai si tuhuna si enggo jadi. E maka isuruhna prajuritna maba Paulus ku bas markas. 21:35 Kenca seh i tangga terpaksa iangkat perajurit-perajurit e Paulus perbahan enggo ngganas kal kalak si nterem e. 21:36 Kerina kalak si nterem e ngayakisa janah serko ia kerina alu sora si megang, "Bunuhlah ia!" 21:37 Asum Paulus nandangi ibaba perajurit e bengket ku markas, ngerana ia man puanglima e nina, "Banci aku ngerana man bandu?" Ngaloi puanglima e nina, "Ietehndu cakap Junani? 21:38 Jadi la dage kam kalak Mesir si mbaru enda erbahan pemberontaken dingen si kiam ras empat ribu kalak penghianat si ersenjata ku taneh si melungun?" 21:39 Ngaloi Paulus nina, "Aku kalak Jahudi, kutangku i Tarsus, e me kuta si terberita i Kiliki. Mindo aku man bandu gelah banci min aku ngerana man kalak si nterem enda." 21:40 Ibere puanglima e Paulus ngerana. E maka tedis ia i tangga. Ibahanna tanda alu tanna gelah ola gejek kalak si nterem. Kenca teneng kalak si nterem e, ngerana Paulus i bas cakap Jahudi nina,
22:1 "O senina-senina ras bapa kerina; begikenlah aku ngerana i bas aku mbela diringku!" 22:2 Asum ibegi kalak Paulus ngerana i bas cakap Jahudi reh tenengna ia kerina. Iterusken Paulus ngerana nina, 22:3 "Aku kalak Jahudi, tubuh i Tarsus i Propinsi Kiliki tapi ipebelin-belin i kuta enda. Aku bekas murid Gamaliel. Iajarina aku kuga arusna ngikutken Undang-undang seh maka aku jadi kalak si tutus erdahin i bas Dibata bali ras kam i paksa enda. 22:4 Janah enggo kusiksa seh mate kalak si ngikutken Dalan Kegeluhen si ituduhken Tuhan e. Subuk dilaki bage pe diberu kutangkap janah kutamaken ku bas penjara. 22:5 Kerna si enda banci isungkunndu Imam si Mbelin ras kerina anggota-anggota sidang. Iberekenna pe man bangku surat keterangen guna ipeseh man senina-senina kalak Jahudi i Damaskus. E maka lawes aku ku jah, guna nangkapi kalak si ngikutken ajaren e, janah guna maba ia ku Jerusalem gelah iukum." 22:6 "Asum aku i bas perdalanen nandangi seh i Damaskus, kira-kira tengah wari, rempet terang i langit nari ersinalsal engkeleweti aku. 22:7 Ndabuh aku ku taneh janah kubegi sora erlebuh man bangku, nina, 'O Saul, Saul, ngkai maka iayak-ayakndu Aku?' 22:8 Ngaloi aku, 'Ise kin kam Tuhan?' Erjabap Tuhan, 'Aku kap Jesus, kalak Nasaret si iayak-ayakndu.' 22:9 Temanku sada dalanen ngidah terang e tapi la ibegina sora si ngerana man bangku e. 22:10 Nungkun aku man Tuhan, 'O Tuhan, kai arus kubahan?' Ngaloi Tuhan, 'Kekeken janah teruskenlah ku Damaskus. I jah kari ituriken man bandu kai si enggo itetapken guna ibahanndu.' 22:11 Janah perbahan aku enggo pentang erkiteken sinalsal si sehkal silona e, e maka itegu temanku aku ku Damaskus. 22:12 I Damaskus lit sekalak si tutus ngikuti Undang-undangta, gelarna Ananias. Kerina kalak Jahudi si ringan i Damaskus mehamat man bana. 22:13 Idahina aku jenari nina, 'O seninangku Saul, erpengidahlah mulihi.' Paksa e pe minter aku erpengidah mulihi janah kunehen ia. 22:14 Jenari nina, 'Dibata si isembah nini-nininta enggo milih kam guna meteh sura-suraNa. Gelah idahndu PersuruhenNa si Bujur dingen gelah ibegindu langsung soraNa. 22:15 Sabap kam me jadi saksiNa guna nuriken kai si enggo idahndu ras si ibegindu man kerina manusia. 22:16 Janah genduari, olanai timai terdekahen. Kekekenlah, iperidikenlah kam dingen bersihkenlah dirindu i bas dosa-dosandu nari alu erlebuh man gelarNa.' " 22:17 "Jenari kenca aku mulihken ku Jerusalem, i bas sada wari asum aku ertoto i bas Rumah Pertoton ah, kualoken sada pengenehenen. 22:18 I bas pengenehenen e kuidah Ia. Nina man bangku, 'Pedasken, berkatlah i Jerusalem nari sabap kalak Jerusalem enda labo megiken kai si iturikenndu kerna Aku.' 22:19 Ngaloi aku, 'O Tuhan ieteh kalak kap maka aku si bengket ku bas rumah pertoton nangkapi dingen mekpeki kalak si tek man baNdu. 22:20 Janah asum saksindu si Istepanus ibunuh, aku pe i je kap. Setuju pe aku maka ia ibunuh janah aku me si njagai uis kalak si munuh ia.' 22:21 Tapi nina man bangku, 'To, berkatlah, sabap kam me Kusuruh ndahi kalak si labo kalak Jahudi si ndauh i jenda nari.' " 22:22 Seh ngayak si enda ngenca ibegiken kalak si nterem e Paulus ngerana. Jenari mulai ia gejek kerina. Alu sora megang nina, "Bunuh ia! Kalak si bagenda la patut nggeluh!" 22:23 Reh gejekna ia kerina, iawat-awatkenna uisna dingen icaburkenna abu ku datas. 22:24 Perbahan si e isuruh puanglima ndai perajuritna maba Paulus ku bas markas. Isuruhna pe perajurit e ngeligasi Paulus guna meteh ngkai maka merawa kalak Jahudi e man Paulus. 22:25 Tapi kenca dung Paulus iiketna dingen ipeterdangna guna iligasi nina Paulus man perwira si tedis i je, "Rikutken undang-undang banci kin iligasindu sekalak warga negara Roma, terlebih-lebih langa ia iadili?" 22:26 Megi kata enda minter ilaporken perwira e man puanglima nina, "Kuga nge atendu ibahanndu ia? Ia warga negara Roma kap." 22:27 E maka idahi puanglima e Paulus, jenari nina, "Tuhu kin kam warga negara Roma? Katakenlah man bangku!" Erjabap Paulus nina, "Tuhu." 22:28 Jenari nina puanglima e, "Aku enggo jadi warga negara Roma alu nggalar melala man pemerentah Roma." Ngaloi Paulus, "Tapi aku, tubuhku nari kin pe warga negara Roma nge." 22:29 E maka minter surut kalak si aturna mereksa dingen ngeligasi Paulus ndai. Puanglima e pe enggo mbiar kenca ietehna maka Paulus si isuruhna iiket e warga negara Roma. 22:30 Perlu iakap puanglima e meteh kai sabapna maka iaduken kalak Jahudi Paulus. E maka pepagina isuruhna perajurit-perajurit nangtangi rante si ngiket Paulus. Isuruhna pe pulung imam-imam si mbelin ras anggota-anggota Pengadilen Agama. Jenari ibabana Paulus ku lebe-lebe sidang e.
23:1 Ipernehen Paulus anggota-anggota sidang e, jenari nina, "O senina-senina! Seh i bas wari enda aku tetap nggeluh alu pusuh peraten si bersih i lebe-lebe Dibata." 23:2 Tapi Ananias, e me Imam si Mbelin, nuruh kalak si tedis i deher Paulus marap Paulus. 23:3 Perbahan si e nina Paulus, "Dibata kal pagi marap kam o dingding si icat mbentar! Kam kundul i jenda guna ngadili aku rikutken Undang-undang. Tapi kam ngelanggar Undang-undang alu nuruh kalak enda marap aku." 23:4 Piga-piga kalak si kundul deher Paulus ngerana man Paulus, nina, "Megombang kal kam man Imam si Mbelin Dibata." 23:5 Ngaloi Paulus, "O senina, la kueteh maka ia Imam si Mbelin. Tuhu lit tersurat i bas Pustaka Si Badia, 'Ola ihinandu peminpin bangsandu.' " 23:6 Tapi perbahan enggo ieteh Paulus maka kalak si ersidang e lit piga-piga kalak Parisi dingen piga-piga kalak Saduki, e maka nina alu sora si megang, "O senina-senina, aku kalak Parisi kap, dingen orang-tuangku pe kalak Parisi. Aku iadili erkiteken erpengarapen aku maka si mate nggeluh mulihi!" 23:7 Kenca ibelasken Paulus si enda, minter turah perubaten kalak Parisi ras kalak Saduki janah kalak si nterem pe erbelah-belah. 23:8 (Sabap ikataken kalak Saduki maka labo lit kalak si matenggeluh pagi mulihi, janah labo lit malekat-malekat bage pe mahluk-mahluk si la teridah. Tapi kalak Parisi tek si telu enda.) 23:9 E maka reh belinna perubaten e dingen reh gejekna i bas ingan e. Piga-piga kalak guru Undang-undang atau pe terpuk kalak Parisi tedis ku lebe. Ngerana ia alu sora megang, "La dat kami sitik pe salah kalak enda! Banci jadi tuhu-tuhu lit kesah ntah malekat si ngerana man bana." 23:10 Perbahan reh mesangatna perubaten e mbiar puanglima e medate kari Paulus ibahan kalak e. E maka isuruhna perajurit-perajurit nusur guna ngerintak Paulus janah mabasa ku markas. 23:11 Berngina tedis Tuhan ideher Paulus, janah nina Tuhan, "Tetapkenlah ukurndu! Enggo kam ersaksi kerna Aku i Jerusalem, janah bage ka lah pagi perbahanenndu i Roma." 23:12 Kenca terang wari pulung piga-piga kalak Jahudi. Arih-arih ia guna munuh Paulus. Ersumpah ia kerina maka la ia man ras minem adi langa kin ibunuhna Paulus. 23:13 Teremna kalak si arih-arih e lebih empat puluh kalak. 23:14 Kenca arih-arih idahina imam-imam si mbelin ras pertua-pertua kalak Jahudi jenari nina, "Kami enggo ersumpah maka la kami man ras minem adi langa kin ibunuh kami Paulus. 23:15 E maka iarapken kami maka kam ras kerina anggota sidang mindoken man puanglima gelah ibabana Paulus ku lebe-lebendu. Kataken man puanglima maka atendu tole erbahan pemeriksan man Paulus. Tapi ope denga seh ia i jenda enggo ersikap kami munuh ia i tengah dalan." 23:16 Pertakin enda ibegi bebere Paulus. Lawes ia ku markas janah kenca mindo ijin, idahina Paulus ku bas. Iturikenna rencana kalak ndai man Paulus. 23:17 Jenari idilo Paulus sekalak perwira, janah nina, "Baba anak perana enda ngadap man puanglima sabap lit si man katanken man bana." 23:18 Ibaba perwira e anak perana e man puanglima, jenari nina perwira e man puanglima, "Paulus, kalak tahanen e, nuruh aku maba anak enda ngadap man bandu sabap lit si man katankenna man bandu." 23:19 Itegu puanglima anak perana e, ibabana ku duru janah nina, "Kai kin si man katankenndu man bangku?" 23:20 Erjabap ia, "Enggo arih-arih kalak Jahudi ngadap man bandu guna mindoken gelah pepagi isuruhndu Paulus ngadap ku lebe-lebe Pengadilen Agama. Ikatakenna maka atena tole erbahan pemeriksan man Paulus. 23:21 Tapi ola kal kam tek katana e. Sabap lit empat puluh kalak lebih nggempang-nggempangi i tengah dalan, guna munuh Paulus. Enggo ersumpah ia maka la ia man ras minem adi langa kin ibunuhna Paulus. Genduari enggo sikap ia kerina ndalankenca, janah itimaina keputusenndu." 23:22 E maka nina puanglima man anak perana e, "Ola kataken man ise pe maka enggo ilaporkenndu si enda man bangku." Jenari isuruh puanglima e ia mulih. 23:23 Kenca bage idilo puanglima dua kalak perwira, jenari nina, "Sikapken dua ratus kalak perajurit ras pitu puluh kalak si erkuda bage pe dua ratus kalak si ertombak guna berkat ku Kesarea pukul siwah berngi enda. 23:24 Sikapken pe piga-piga kuda guna iersak Paulus janah selamatken ia seh ku Gubernur Pelik." 23:25 Itulis puanglima e pe surat, bagenda isina, 23:26 "Salam i bas aku nari Klaudias Lisias man Gubernur Pelik si mehamat. 23:27 Kalak enda itangkap kalak Jahudi janah menam ibunuhna pe. Perbahan kudat keterangen maka ia warga negara Roma e maka aku ras prajurit-prajurit reh nelamatken ia. 23:28 Enggo kubaba pe ia ku lebe-lebe Pengadilen Agama guna ndarami kesalahenna. 23:29 E maka enggo kueteh maka ia iaduken kalak Jahudi e erkiteken persoalen Undang-undang agamana saja. Labo lit kesalahenna si erbahanca ia patut ibunuh ntah pe ipenjaraken. 23:30 Tapi lit ka kubegi laporen maka arih-arih kalak Jahudi guna munuh ia. Perbahan si e maka kusuruh perajurit maba ia man bandu. Janah man si ngaduken ia kukataken maka ia arus ngadu man bandu." 23:31 Sue ras perentah puanglima, ibaba prajurit e Paulus i bas berngi e ku Antipatris. 23:32-33 Pepagina mulihken prajurit-prajurit si erdalan nahe e ku markas tapi kalak si erkuda terus naruhken Paulus ku Kesarea. Kenca seh i Kesarea iberekenna surat ndai janah iendeskenna Paulus man Gubernur. 23:34 Ioge Gubernur surat e, jenari isungkunna Paulus, ntah i bas propinsi si apai nari ia. Kenca ieteh maka Paulus i Kiliki nari, 23:35 nina man Paulus, "Perkarandu kuperiksa kenca seh i jenda si ngaduken kam." Jenari isuruh Gubernur e gelah Paulus itahan i bas istana Gubernur si ibangun Herodes.
24:1 Lima wari kenca si e reh ku Kesarea Imam si Mbelin, gelarna si Ananias ras piga-piga kalak pertua kalak Jahudi bage pe sekalak juru bicara gelarna Tertulus. Ngadap kalak enda man Gubernur Pelik janah iadukenna Paulus man bana. 24:2 Kenca Paulus ilegi, e maka ibenaken Tertulus ngerana mbelasken pengadunna nina, "O Gubernur Pelik si mehamat! Erkiteken kepeminpinenndu kami tetap aman. Melala pembaharun si penting enggo ibahanndu guna pembangunen man bangsa kami. 24:3 Ialoken kami enda alu dem pengataken bujur i japa pe dingen katawari pe. 24:4 Tapi gelah ola melala sia-sia waktundu e maka kupindoken alu meteruk ukur gelah ibegikenndu min kentisik pengadun kami si gendek-gendek enda. 24:5 Enggo tangkas man kami maka kalak enda sekalak penggujuh si ncedaken. Iguntarina kerina kalak Jahudi i belang-belang doni enda. Janah ia me sekalak peminpin sekte kalak Nasrani. 24:6 Terlebih pe icubakenna encemarken Rumah Pertoton si Badia. Perbahan si e maka itangkap kami ia. Ate kami ngadili ia rikutken Undang-undang kami. 24:7 Tapi icampuri puanglima Lisias janah ibuatna Paulus i bas kami nari alu paksa. Jenari isuruh puanglima e kami ngadu man bandu. 24:8 Adi isungkunndu pe kalak enda ietehndu nge i bas ia nari maka kai si ikataken kami enda tuhu." 24:9 Kalak Jahudi si ikut i bas pengadun e pe ngataken maka kai si ikataken Tertulus e tuhu. 24:10 Kenca bage ibahan Gubernur e tanda man Paulus gelah ia ngerana. E maka ngerana Paulus nina, "Kueteh nge maka enggo piga-piga tahun dekahna kam jadi hakim i tengah-tengah bangsa enda. E maka tetap ukurku mbela diringku i lebe-lebendu. 24:11 Banci ietehndu jine maka la lebih sepuluh dua wari si lewat ku Jerusalem aku guna ersembah man Dibata. 24:12 Ise pe labo pernah ngidah aku erjengil ntah ngguntari subuk i bas Rumah Pertoton e ntah i bas rumah pertoton ntah i japa pe i bas kuta e. 24:13 Janah kalak enda pe labo ngasup mereken bukti man bandu kerna pengadunna nandangi aku. 24:14 Tapi ngaku aku i lebe-lebendu, maka aku ersembah man Dibata si isembah nini kami alu ngikutken Dalan Kegeluhen si ituduhken Tuhan, si ikataken kalak enda 'sekte'. Tapi aku pe tek nge kai si tersurat i bas Undang-undang Musa ras kai si tersurat i bas kitap nabi-nabi. 24:15 Pengarapenku man Dibata bali ras pengarapen kalak enda, maka lit nge kekeken i bas si mate nari, subuk kalak si bujur bage pe kalak si la bujur. 24:16 E maka aku pe tetap nge kuusahaken gelah bersih pusuh peratenku i adepen Dibata ras i adepen manusia. 24:17 Kenca piga-piga tahun dekahna aku nadingken Jerusalem reh aku mulihken ku kuta e guna nehken pemere man bangsangku bage pe guna nehken persembahen man Dibata. 24:18 Asum aku nehken persembahen e, kenca dung upacara pembersihenku, idapeti kalak enda aku i bas Rumah Pertoton. Sanga si ndai labo aku i tengah jelma si nterem janah labo lit keributen. 24:19 Tapi tupung si e lit piga-piga kalak Jahudi i Propinsi Asia nari i je. Kalak ah ndai nge aturna reh ngadu man bandu adi lit kin si man adunkenna kerna aku. 24:20 Amin bage gia pelepaslah kalak si enggo reh enda ngataken kejahaten si enggo kubahan asum aku i lebe-lebe Pengadilen Agama e. 24:21 Banci jadi salah akapna aku asum kukataken i lebe-lebe pengadilen e, 'Aku iadilindu sendah erkiteken tek aku maka kalak si mate nggeluh pagi mulihi.' " 24:22 Jenari nina Pelik, si enggo melala meteh kerna Dalan Kegeluhen si ituduhken Tuhan nutup sidang e alu ngataken, "Kenca seh i jenda puanglima Lisias maka kuputusken perkarandu enda." 24:23 Kenca bage isuruh Pelik perwira namaken Paulus ku bas penjara. Tapi iberekenna nge sitik kebebasen man Paulus; teman-temanna banci reh ndahi ia dingen mereken keperlunna. 24:24 Kenca piga-piga wari, Pelik ras ndeharana Drusila reh njumpai Paulus. Ndeharana e kalak Jahudi. Isuruhna kalak ngelegi Paulus jenari ibegikenna Paulus ngerana kerna kiniteken man Kristus Jesus. 24:25 Tapi asum iterusken Paulus ngerana kerna kai si benar ras kai si salah, uga arus engkuasai diri ras kerna warina Dibata ngadili manusia, mbiar Pelik. E maka nina man Paulus, "Sibar e me sekali enda, banci kam mulih. Ndigan pagi lit kesempatenku kudilo kam mulihi." 24:26 I bas paksa si e iarapken Pelik gelah Paulus mereken duit man bana. E maka megati idilona Paulus ercakap-cakap ras ia. 24:27 Dua tahun kenca si e Gubernur Pelik igantiken Porkius Pestus. Paulus lalap ipelepas Pelik i bas penjara sabap muat ukur kalak Jahudi atena.
25:1 Telu wari kenca Pestus seh i propinsi e, nangkeng ia i Kesarea nari ku Jerusalem. 25:2 I Jerusalem reh imam-imam si mbelin ras peminpin-peminpin kalak Jahudi ngadap man Pestus ngaduken Paulus. 25:3 Erkiteken enggo irencanaken kalak Jahudi munuh Paulus i tengah dalan, e maka ipindokenna man Pestus gelah Paulus ibaba ku Jerusalem. 25:4 Ngaloi Pestus nina, "Paulus tetap ipenjaraken i Kesarea, janah aku ras minter nge mulihken ku jah. 25:5 E maka ku jah lah peminpin-peminpinndu ras aku guna ngaduken ia adi lit kin salahna." 25:6 Kenca waluh tah sepuluh wari nari Pestus i Jerusalem mulih ia ku Kesarea. Kenca seh ia i Kesarea, pepagina ibukana sidang pengadilen janah isuruhna perajurit-perajurit maba Paulus ku bas ruangen sidang e. 25:7 Kenca seh Paulus ku bas ruangen e, minter ia ikeleweti kalak Jahudi si reh i Jerusalem nari. Jenari iturikenna kesalahen-kesalahen Paulus si mbelin, tapi sada pe la terbuktikenca. 25:8 Tapi ibela Paulus dirina nina, "Sitik pe labo lit salahku subuk nandangi Undang-undang kalak Jahudi, nandangi Rumah Pertoton ntah pe nandangi Kaisar." 25:9 Perbahan Pestus ersura-sura muat ukur kalak Jahudi, e maka nina man Paulus, "Nggit kam ku Jerusalem gelah i jah kudungi perkarandu enda?" 25:10 Tapi ngaloi Paulus nina, "Genduari aku tedis i lebe-lebe pengadilen Pemerentah Roma; e maka perkarangku enda arus idungi i bas pengadilen Kaisar Roma. Ietehndu jine maka labo lit salahku man kalak Jahudi. 25:11 Adi tuhu-tuhu kin aku ersalah janah salahku e sue ras ukumen mate, rela nge aku mate. Tapi adi labo tuhu pengadunna e, ise pe labo erkuasa ngendesken aku man kalak Jahudi e. E maka kutuntut hakku gelah Kaisar mutusken perkarangku." 25:12 Arih-arih Pestus ras penasehatna jenari nina man Paulus, "Perbahan ipindokenndu gelah Kepala Pemerentah Roma mutusken perkarandu e maka man Pemerentah si Roma lah kam ngadap." 25:13 La ndekah kenca si e reh Raja Agripa ras Bernike ku Kesarea ndahi Pestus guna ngataken mejuah-juah man bana perbahan Pestus enggo jadi gubernur. 25:14 Kenca piga-piga wari ia i Kesarea ituriken Pestus man bana persoalen Paulus e nina, "I bas penjara lit sekalak kalak tahanen si itadingken Pelik. 25:15 Asum ku Jerusalem aku, imam-imam si mbelin ras pertua-pertua kalak Jahudi ngaduken ia man bangku. Kalak Jahudi e nuntut gelah kuukum ia. 25:16 Tapi kukataken man bana maka kalak Roma labo biasa erbahan ukumen man sekalak si iaduken adi langa kin ia ipejumpaken ras si ngaduken ia guna mereken kesempaten man bana mbela dirina. 25:17 Janah asum kalak e ikut reh ku jenda, pepagina minter kubuka sidang. Kusuruh perajurit-perajurit maba kalak si iadukenna e ku lebe-lebe sidang. 25:18 Tedis kalak e ngaduken ia, tapi pengadunna e sada pe la lit kerna kejahaten bagi si kuarapken kin. 25:19 Pengadunna e, persoalen kerna agamana saja nge janah kerna sekalak si gelarna Jesus, si enggo mate, tapi ikataken Paulus maka Ia nggeluh. 25:20 Perbahan mesera kuakap mpepayo perkara e, e maka kusungkun ntah nggit ia ku Jerusalem gelah i jah kudungi perkarana e. 25:21 Tapi ipindoken Paulus gelah Kaisar mutusken perkarana e. Janah ipindokenna gelah ia ikawali ngayak iputusken Kaisar perkarana e. E maka kusuruh perajurit-perajurit njagai ia seh warina ia kukirim man Kaisar i Roma." 25:22 Jenari nina Agripa man Pestus, "Aku pe merincuh megi ia ngerana." Ngaloi Pestus, "Pagi banci ibegindu." 25:23 Pepagina reh Agripa ras Bernike alu upacara si mehaga iarakken puanglima-puanglima bage pe pembesar-pembesar kota. Bengket ia ku ruang sidang. Kenca iperentahken Pestus, ibaba perajurit me Paulus ku lebe-lebe sidang. 25:24 Kenca bage, ngerana Pestus nina, "O Raja Agripa bage pe kerina kam si pulung i jenda. Enda me jelmana si iaduken kalak Jahudi si ringan i Jerusalem bage pe kalak Jahudi i bas kota enda. Reh kalak Jahudi e ngadap man bangku janah alu sora si megang ikatakenna man bangku maka si iadukenna enda lanai patut nggeluh. 25:25 Tapi la lit kudat salahna si sue ras ukumen mate. Janah perbahan ipindokenna gelah Kaisar si mutusken perkarana e, e maka kutetapken ngirim ia man Kaisar. 25:26 Tapi langa lit i bas aku pengadun si tepat kerna ia guna kusuratken man Kaisar. E me sabapna maka kubaba ia ku lebe-lebendu kerina terlebih-lebih man bandu Raja Agripa, gelah kenca sibahan pemeriksan ras-ras i jenda, enggo lit dalanku erbahan surat man Kaisar. 25:27 Sabap la kuakap mehuli engkirimken sekalak tahanen adi la ituriken tuduhen si tangkas kerna kesalahen-kesalahen si ibahanna."
26:1 Nina Agripa man Paulus, "Genduari banci kam ngerana guna mbela dirindu." Kenca Paulus ngangkat tanna guna mereken penghormaten man anggota sidang, ibenakenna ngerana nina, 26:2 "O Raja Agripa, megah kal kuakap sabap sendah banci aku ngerana i lebe-lebendu mbela diringku nandangi kerina pengadun kalak Jahudi. 26:3 Terlebih-lebih megah kuakap sabap ietehndu kal alu payo adat istiadat kalak Jahudi ras persoalen-persoalenna. E maka kupindoken gelah megenggeng kam megiken aku. 26:4 Kerina kalak Jahudi meteh kerna kegeluhenku mulai kitik-kitikku nari. Ietehna kerina lagu langkahku ras perbahanenku subuk asum aku i kutangku bage pe asum aku i Jerusalem. 26:5 Ndekah me ietehna maka aku masuk golongen si tutusna kal ersembah man Dibata i bas agama Jahudi, e me golongen Parisi. Janah adi bage atena banci pe iturikenna kerna aku. 26:6 Janah genduari iadili aku i jenda perbahan erpengarapen aku nandangi padan si ibahan Dibata man nininta nai. 26:7 E me padan si iarapken bangsa si sepuluh dua suku. Em sabapna maka isembahna Dibata suari ras berngi. Janah perbahan pengarapen enda me, o raja, maka aku iaduken kalak Jahudi. 26:8 O kam kerina si pulung i jenda, ngkai kin iakapndu maka la mungkin ipegeluh Dibata mulihi kalak si enggo mate? 26:9 Aku jine nai erpengakap maka tugasku kal kuakap ngelawan pengaruh gelar Jesus kalak Nasaret e. 26:10 Janah enggo pe kudalanken i Jerusalem alu kuasa si ibereken imam-imam si mbelin man bangku. Nterem kalak si enggo tek man Jesus kutangkap janah kutamaken ku bas penjara. Janah asum kalak e iukum mate, aku me sekalak si setuju i bas pembunuhen e. 26:11 Megati kalak si enggo tek man Jesus e kusiksa i bas rumah-rumah pertoton. Kupaksaken gelah ipersokenna kinitekenna man Jesus. Janah perbahan segatna ateku ngenehen kalak si enggo tek man Jesus e, kuayaki pe ia seh ku kuta-kuta i darat taneh Jahudi guna niksaisa." 26:12 "Guna si e kap maka lawes nai aku ku Damaskus alu kuasa ras perentah imam-imam si mbelin. 26:13 Tapi o Raja Agripa, sanga ciger wari aku i tengah dalan, rempet kuidah sinalsal nusur i langit nari terangen asa matawari. Isalsalina aku ras teman-temanku si sada dalanen. 26:14 Kerina kami ndabuh ku taneh janah kubegi sora erlebuh man bangku i bas cakap Jahudi, 'O Saul, Saul ngkai maka Aku isiksandu? Isiksandu kap dirindu bagi nukuli pergalah si entelap.' 26:15 Jenari ngaloi aku, 'Ise kin Kam Tuhan?' Erjabap Tuhan, 'Aku kap Jesus, si isiksandu. 26:16 Tapi kekeken janah tediskenlah! Kucidahken diringKu man bandu guna milih kam jadi si erdahinKu ras saksingKu. Gelah iturikenndu man kalak si deban kai si enggo idahndu sendah, e me kerna Aku, bage pe gelah iturikenndu kai si Kucidahken pagin man bandu. 26:17 Kupulahi kam pagi i bas tan bangsa Israel nari ras i bas kalak si deban si labo kalak Jahudi si Kusuruh idahindu. 26:18 Pemedakken matana gelah itadingkenna si gelap guna bengket ku bas si terang. Bage pe gelah itadingkenna kuasa Iblis jenari reh ku Dibata. Gelah erkiteken tek ia man bangKu, Kualemi dosa-dosana. Bage pe gelah ialokenna ingan, e me ingan si patut ialoken kalak si ipilih Dibata.' " 26:19 "Janah bage me, o Raja Agripa, kupatuhi pengenehenen si kualoken i bas Dibata nari e. 26:20 Mula-mula kuajari kalak Jahudi si i Damaskus jenari si i Jerusalem ras si i belang-belang taneh Judea, bage pe kalak si labo kalak Jahudi gelah kerina jera dingen reh ku Dibata. Kuajari pe ia gelah icidahkenna arah perbahanen si mehuli maka ia enggo jera. 26:21 Perbahan si enda me maka itangkap kalak Jahudi aku asum aku i Rumah Pertoton, janah ibunuhna pe atena aku. 26:22 Tapi seh i bas wari enda aku tetap isampati Dibata. Erkiteken si e tedis aku i jenda nuriken kerna Jesus man kerina manusia subuk man kalak si mbelin bage pe man kalak si meteruk. Kai si kuturiken e bali nge ras si enggo leben ituriken nabi-nabi ras Musa. 26:23 E me: Mesias e arus ngenanami kiniseran seh mate, janah Ia me si tangtangna ipegeluh Dibata i bas si mate nari, gelah arah kekekenNa e banci icidahkenNa terang keterkelinen subuk man kalak Jahudi bage pe man kalak si deban si labo Jahudi." 26:24 Asum Paulus ngerana denga nina Pestus man bana alu sora si megang, "Enggo mehado kam e Paulus! Pemetehndu si melala e erbahanca kam enggo mehado!" 26:25 Tapi ngaloi Paulus nina, "O Pestus si mehamat, aku labo mehado. Kai si kukataken enda tuhu-tuhu nge, janah jore-jore nge ukurku ngerana enda. 26:26 O Raja Agripa, tentu ietehndu kerina persoalen enda, e maka pang aku ngerana man bandu. Tek aku maka labo lit sada pe i bas e langa ibegindu, sabap kerina enda labo terjadi i tengah kerangen si terbuni. 26:27 O Raja Agripa, tek nge kam man kai si ikataken nabi-nabi? Kueteh nge maka tek kam." 26:28 Ngaloi Raja Agripa man Paulus nina, "Iakapndu kin maka i bas paksa si kentisik enda banci aku ibahanndu jadi kalak Kristen?" 26:29 Ngaloi Paulus nina, "Pertotonku man Dibata gelah i bas paksa si kentisik tah ndekah denga gia, kam ras kerina si megiken aku sendah banci jadi bali ras aku, seakatan rante enda." 26:30 Jenari tedis raja, gubernur bage pe Bernike ras kerina kalak si kundul ras ia i je. 26:31 Muatna ndarat ngerana ia sapih-sapih ia nina, "Labo lit perbahanenna si salah si sue ras ukumen mate ntah ukumen penjara." 26:32 Jenari nina Agripa man Pestus, "Si tuhuna enggo banci ia ibebasken adi la min ndai ituntutna hakna maka Kaisar mutusken perkarana."
27:1 Kenca enggo iputusken maka kami arus erlayar ku Italia, iendesken me Paulus ras piga-piga kalak tahanen si deban man Julius. Julius, e me sekalak perwira i bas pasuken tentera Roma si igelari "Pasukan Kaisar". 27:2 Idatasi kami kapal si reh i Adramiti nari, jenari erlayar kami alu kapal e si enggo sikap berkat ku pelabuhen-pelabuhen i Propinsi Asia. Aristarkus, sekalak Makedoni i Tesalonika nari ikut ras kami. 27:3 Pepagina seh kami i Sidon. Julius mehuli kal man Paulus. Iijinkenna Paulus ndahi teman-temanna si i Sidon gelah banci ibereken teman-temanna e kai si iperlukenna. 27:4 I Sidon nari terus kami erlayar ngikut-ngikut pantai pulau Kiprus si terampang i bas angin si meter rembus nungsang kapal e. 27:5 Ikepari kami lawit tingtang Kiliki ras tingtang Pampilia, jenari seh kami i kuta Mira, i daerah Likia. 27:6 I Mira idat perwira e kapal si reh i Aleksandria nari. Kapal e muatna berkat ku Italia. E maka ipindahken perwira e kami ku kapal e. 27:7 Piga-piga wari dekahna kapal kami manjar-anjar ngenca banci erdalan. Alu mesera-mesera ideheri kami kuta Kenidos. Tapi perbahan lalap meter angin nungsang kapal kami, la banci iterusken kami kempak arah si pemena; e maka kenca seh i tanjung Salmone erlayar kami arah Selatan pulau Kreta gelah kapal kami terligen i bas angin si meter e nari. 27:8 Alu mesera-mesera tetap iikut-ikut kami tepi pulau e janah kedungenna seh kami i bas sada ingan si igelari Pelabuhen si Mejile. Pelabuhen enda la ndauh i kuta Lesea nari. 27:9 Ngayak ingan enda saja enggo melala wari-wari kami terbuang. Enggo tambah pe bahayana adi iterusken pelayaren paksa si e. Bage pe enggo lepas wari puasa kalak Jahudi. E maka nina Paulus man kalak si i bas kapal e, 27:10 "O teman-teman, kuakap bahaya man banta adi terus kita erlayar. Labo saja kapal ras barang-barang si lit i bas kapal enda bene tapi kita pe banci bene nge." 27:11 Tapi teken perwira e man kapten ras empu kapal e asangken man Paulus. 27:12 Janah perbahan pelabuhen e labo ingan si sikap i bas paksa-paksa musim angin topan e maka teremen kalak setuju berkat alu pengarapen banci seh i Peniks, gelah kidekah musim angin topan e banci ringan i je. Peniks, e me sada pelabuhen i pulau Kreta. Pengalana kempak Barat Daya ras kempak Barat Laut. 27:13 Asum angin si reh i Selatan nari mulai rembus alu manjar-anjar, mbelin pengarapen kalak e maka banci seh sura-surana. E maka iangkatna jangkar jenari erlayar ia ngikut-ngikut pantai pulau Kreta. 27:14 Tapi la ndekahsa kenca si e, rempet rembus angin si meter i pulau e nari si igelari angin Timur Laut. 27:15 Iderpa anginna kapal ndai janah perbahan lanai tersungsang angin e, e maka ipelepas kami saja kapal ndai ibabaken angin e. 27:16 Jenari ibabakenna kapal kami kempak Selatan pulau si kitik si igelari pulau Kauda. Paksa e me irintak kami alu mesera-mesera sekoci ku das kapal e. 27:17 Kenca iangkat pegawai kapal perahu si kitik e ku bas kapal, irakutina kapal e kelewet alu tinali. Perban mbiar kalak enda tertendeng kapal e uruk kersik si i bas lawit i pantai Libia, e maka ipesusurna layar janah ipelepasna kapal e ibaba angin. 27:18 Angin si merawa e terus rembus, e maka pepagina iambekken pegawai me muaten kapal. 27:19 Janah pepagina ka alat-alat kapal e pe deba terpaksa iambekkenna. 27:20 Piga-piga wari dekahna matawari ras bintang la teridah, janah angin si merawa e tetap rembus. Dungna lanai lit arapen kami nggeluh. 27:21 Kenca enggo ndekah kalak si i bas kapal e la man, e maka tedis Paulus i lebe-lebe kalak e jenari nina, "O senina-senina, ulin kin min mbarenda ibegikenndu katangku. Ulin min mbarenda la kita berkat i pulau Kreta nari, gelah ola kita rugi dingen ngenanami kiniseran enda. 27:22 Tapi genduari, kukataken man bandu maka aminna gia kita lit i bas kiniseran enda tetapkenlah ukurndu, labo kam sekalak pe bene. Kapal enda ngenca pagi bene. 27:23 Sabap ndai berngi reh ndahi aku malekat persuruhen Dibata si kusembah dingen Dibata si empu geluhku. 27:24 Nina malekat e man bangku, 'O Paulus, ola kam mbiar! La banci kam la seh ku lebe-lebe Kaisar, janah erkiteken perkuah ate Dibata arah kam, kerina kalak si lit i bas kapal enda pe selamat.' 27:25 E maka tetapkenlah ukurndu o senina-senina! Sabap tek aku man Dibata maka kai si ikatakenNa man bangku jadi kap. 27:26 Tapi la banci lang ibabaken angin kita ku sada pulau." 27:27 Kenca sepuluh empat berngi kapal kami bombang-bombang i Lawit Adria, asum tengah berngi pegawai-pegawai kapal erpengakap maka kami enggo ndeher ku daraten. 27:28 E maka ipesusurna batu si irakutken ku nali guna nibari bagesna lawit. Bagesna lawit e lit empat puluh meter. Kenca terleben isibarina ka bages lawit e, lit telu puluh meter. 27:29 Perbahan mbiar ia kapal e terantuk ku batu karang e maka idabuhkenna empat jangkar arah pudi kapal e. Ngarap pe kami kerina gelah pedas min terang wari. 27:30 Pegawai-pegawai kapal kiam atena i kapal nari. Ipesusurna sekoci i kapal nari, dingen ipekulah-kulahna ndabuhken jangkar arah lebe kapal. 27:31 Perbahan si e nina Paulus man perwira ras prajurit, "Adi itadingken pegawai-pegawai e kin kapal enda labo kam sada pe banci selamat." 27:32 E maka iretapken perajurit-perajurit nali si ngiket sekoci e janah ipelepasna sekoci e ndabuh ku lawit janah mombak. 27:33 Nandangi terang, isuruh Paulus kerina kalak si lit i bas kapal e man. Nina, "Enggo sepuluh empat wari dekahna iarap-arapkenndu ngadi angin si meter e. Janah kidekah si e la kam man. 27:34 E maka kukataken man bandu maka man lah kam lebe. Si enda perlu guna kesehatenndu. Labo selambar pe buk takalndu bene." 27:35 Kenca ikataken Paulus enda, ibuatna roti, ertoto ia i lebe-lebe kalak e kerina guna ngataken bujur man Dibata kerna pangan e. Jenari icepik-cepikna roti e janah ipanna. 27:36 Ngidah si e tetap ukur kalak ndai janah man pe ia kerina. 27:37 Teremna kami i bas kapal e dua ratus pitu puluh enem kalak. 27:38 Kenca kerina besur man, iambekken pegawai gandum si lit i bas kapal gelah reh nahangna kapal e. 27:39 Kenca terang wari idah pegawai-pegawai daraten si la itandaina. Idahna teluk ras pantai. E maka itetapkenna gelah kapal itamaken ku daraten i je adi banci. 27:40 Ipeltepkenna tinali-tinali jangkar janah ipelepasna jangkar e tading i bas lawit. Iosarina tinali si ngiket kemudi kapal jenari ipasangna layar arah lebe kapal gelah ibaba angin kapal e ku tepi pantai. 27:41 Tapi itendeng kapal e uruk kersik si lit i bas lawit si erbahanca kapal e lanai banci erdalan. Bagin kapal si arah lebe leket janah bagin si arah pudi pecah ibahan galumbang. 27:42 Paksa si e arih-arih perajurit-perajurit guna munuh kerina kalak tahanen gelah ola sekalak pe ia erlangi ku duru jenari kiam. 27:43 Tapi perbahan Paulus la ate perwira e ibunuh, e maka ilarangna perajurit-perajurit munuh kalak tahanen e. Isuruhna kalak si beluh erlangi leben lompat ku lau janah erlangi ku daraten. 27:44 Kalak si la beluh isuruhna make papan-papan ntah pe pecahen-pecahen kapal. Bagenda me carana kerina kami terkelin seh ku daraten.
28:1 Kenca kerina kami seh ku daraten, ieteh kami arah kalak si ngiani pulau maka gelar pulau e, e me pulau Malta. 28:2 Mehuli kal kerina anak dusun si ngiani pulau e man kami. Ialo-alona kami alu mehuli, janah perbahan wari mulai udan dingen seh kal bergehna e maka ipegarana api. 28:3 Ipepulung Paulus ranting sada mberkis janah asum itamakenna ku bas api, ndarat sada nipe upar i bas ranting e nari sabap melas iakapna jenari itagutna tan Paulus. 28:4 Ngidah nipe si molah-olah i bas tan Paulus nina si ngiani pulau e sapih-sapih ia, "Kalak si itagut nipe e ugapa pe kalak pemunuh. Sabap enggo pe ia selamat i bas lawit nari la ka bo ia ipelepas Dewi Keadilen nggeluh." 28:5 Tapi ikupisken Paulus nipe e ku bas api, janah la ia sitik pe suin. 28:6 Rikutken pengakap kalak e ugapa pe besar nge kerina daging Paulus ntah pe minter mate. Tapi kenca ndekah itimaina janah idahna maka Paulus la kaden pe e maka dungna erkusur ukurna, nina, "Ia sekalak dewa kap." 28:7 La ndauhsa i bas ingan e nari lit sada juma, pengulu pulau e empuna. Gelarna Publius. Ialo-alona kami alu mehuli janah telu wari dekahna kami iberena man i bas rumahna e. 28:8 Paksa si e bapa Publius ampar i bas ingan medem, sabap panas dingen mesui beltekna. E maka idahi Paulus ia ku bas kamarna. Ertoto Paulus man Dibata janah itamakenna tanna ku babo si sakit e. E maka malem iakapna. 28:9 Kenca si enda rehen kerina kalak si sakit i bas pulau e ndahi Paulus. Kerina ipepalem Paulus. 28:10 Melala iberekenna pemerena man kami. Janah asum kami berkat erlayar icukupina kerina keperlun kami i tengah perdalanen. 28:11 Telu bulan dekahna kami i pulau Malta. Jenari berkat kami tare kapal si erlabuh i bas pulau e kedekah musim angin topan. Kapal e i Aleksandria nari. Kapal e make lambang dewa kembar Kastor ras Poluks. 28:12 Singgah kami i Sirakusa janah telu wari dekahna kami i je. 28:13 I Sirakusa nari terus kami erlayar ku Regium. Pepagina mulai rembus angin i Selatan nari, janah pepagina ka seh kami i Puteoli. 28:14 I Puteoli jumpa kami ras piga-piga kalak si enggo tek man Jesus. Sada minggu dekahna kami i bas kuta e perbahan ipindoken ngawan perpulungen. Jenari erdalan kami ku Roma. 28:15 Senina-senina si sada kiniteken si lit i Roma megi berita kerna kami. Reh ia ku tiga Apius ras ku Pasanggerahan Telu ngalo-ngalo kami. Ngidah kalak enda, ikataken Paulus bujur man Dibata, janah enggo ertetapna ukurna. 28:16 Kenca seh kami i Roma, Paulus ibere pemerentah Roma ringan i bas sada rumah ras sekalak perajurit si ngawasi ia. 28:17 Kenca telu wari Paulus i Roma idilona pulung pengulu-pengulu rumah pertoton kalak Jahudi si lit i Roma. Kenca pulung nina Paulus man bana, "O senina-senina! Si tuhuna labo lit salahku sitik pe nandangi bangsanta ntah nandangi adat si ialoken kita i bas nini-nininta nari. Tapi aku itangkap bangsanta i Jerusalem jenari iendeskenna man kalak Roma. 28:18 Ipulahi kalak Roma atena aku kenca iperiksana perkarangku sabap labo lit idatsa salahku sue ras ukumen mate. 28:19 Tapi kalak Jahudi tetap ertahan. E maka terpaksa kupindoken gelah Kaisar enda mutusken perkarangku. Enda kubahan labo erkiteken lit pengadunku kerna bangsangku jine. 28:20 Perbahan si e maka kudilo kam kerina ku jenda, gelah banci kita jumpa dingen ngerana. Sabap si tuhuna kal aku enda irante erkiteken Ia, si iarap-arapken kalak Israel." 28:21 Ngaloi kalak Jahudi e man Paulus nina, "Labo lit ialoken kami surat i Judea nari kerna kam. Bage pe labo lit senina-seninanta i jah nari maba berita tah pe cakap-cakap si la mehuli kerna kam. 28:22 Tapi merincuh nge kami megi pendapatndu sabap ieteh kami maka i japa pe ilawan kalak sekte si i ikutkenndu e." 28:23 E maka ras-ras ia netapken warina. I bas wari si enggo itetapken nterem kalak reh ku rumah si iingani Paulus. Erpagi-pagi nari seh berngi iberitaken dingen ijelasken Paulus man kalak e kerna Kinirajan Dibata. Erpalasken ayat-ayat si lit i bas Undang-undang Musa dingen kitap nabi-nabi iusahakenna gelah tek kalak e man Jesus. 28:24 Lit piga-piga kalak si tek janah lit ka si tetap la tek. 28:25 Alu ukur si la ersada mulih ia kerina kenca ikataken Paulus kata enda, "Payo kal si ikataken Kesah Si Badia arah nabi Jesaya man ninindu nai. 28:26 Sabap nina Kesah e, 'To dahi bangsa e, bage nindu: Ibegindu alu cupingndu tapi la iangkandu, inehenndu alu matandu tapi la idahndu. 28:27 Sabap enggo batu-batun ukur kalak enda, cupingna lanai mehuli pemegina matana enggo ipitpitkenna. Sabap adi la bage, tentu iidahna alu matana ibegina alu cupingna, iangkana alu ukurna, janah robah dingen Kupepalem ka ia, nina Dibata.' " 28:28 Jenari idungi Paulus rananna nina, "Dage arus ietehndu maka keterkelinen si rehna i bas Dibata nari enggo ipeseh man si labo kalak Jahudi janah ibegikenna nge!" 28:29 Kenca ikataken Paulus kata enda, lawes kalak Jahudi e janahna ersoal sigaran ayo sapih-sapih ia. 28:30 Dua tahun dekahna Paulus ringan i bas rumah sewana e. I bas si dua tahun e ialo-alona kerina kalak si reh ndahi ia. 28:31 Iberitakenna kerna Kinirajan Dibata janah i ajarkenna kerna Tuhan Jesus Kristus. La ia mbiar-mbiar dingen la lit pe si ngolang-ngolangi ia.
1:1 Surat enda rehna i bas aku nari, Paulus. Aku me suruh-suruhen Kristus Jesus, rasul si enggo ipilih dingen iserapken Dibata guna meritaken Berita Si Meriah si reh i bas Dibata nari. 1:2 Berita Si Meriah e ipadanken Dibata nai-nai arah nabi-nabiNa janah enggo isuratken i bas Pustaka Si Badia. 1:3 Berita e kerna AnakNa, Tuhanta Jesus Kristus: Ia manusia, Ia tubuh arah kesusuren Daud. 1:4 Janah erkiteken Kesah Si Badia tangkas maka Ia Anak Dibata si erkuasa. Enda teridah arah kekekenNa i bas si mate nari. 1:5 Arah Ia, dingen i bas gelarNa me Dibata mereken hak istimewa man kami, gelah ibabai kami kerina bangsa maka tek dingen erkemalangen man Kristus. 1:6 Ikut pe kam kerina si ringan i Roma, si enggo ipilih Dibata jadi sikerajangen Jesus Kristus. 1:7 E maka o kam kerina si ringan i Roma si ikelengi Dibata dingen si enggo ipilihNa jadi anak-anakNa: Dibata Bapanta ras Tuhan Jesus Kristuslah mereken lias ateNa man bandu janah malem atendu ibahanNa. 1:8 Perlebe kukataken bujur man Dibatangku arah Jesus Kristus, erkiteken kam kerina; sabap enggo mbar beritana i belang-belang doni enda kerna kinitekenndu. 1:9 Rusur kal kam kuinget i bas pertotonku. Dibata saksina maka kai si kukataken enda tuhu. Ia me Dibata si kusembah alu bulat ukur i bas meritaken Berita Si Meriah kerna AnakNa. 1:10 Kupindoken man Dibata gelah adi sentudu ras peratenNa iberekenNa min kesempaten man bangku guna ndahi kam. 1:11 Sabap merincuh kal aku jumpa ras kam, gelah kubagi-bagiken man bandu pemere pertendin guna mpegegehi kinitekenndu. 1:12 Maksudku gelah ipegegehi kita pekepar; kam kupegegehi alu kinitekenku janah aku ipegegehindu alu kinitekenndu. 1:13 O senina-seninangku, perlu ietehndu maka enggo megati ateku reh ndahi kam tapi lit rusur abatna. Ateku min erbuah pendahinku e pagi i tengah-tengahndu bagi i tengah-tengah kalak si deban. 1:14 Sabap aku rutang guna meritaken Berita Si Meriah man kerina manusia, subuk man kalak si enggo maju bage pe man kalak si kolot denga, subuk man kalak si erpemeteh, bage pe man kalak si la erpemeteh. 1:15 Erkiteken si e maka man bandu si ringan i Roma pe mesikel aku meritaken Berita Si Meriah. 1:16 La aku mela kerna Berita Si Meriah e; sabap Berita Si Meriah e kap Kuasa Dibata guna nelamatken kerina kalak si tek man Jesus Kristus, perlebe man kalak Jahudi, jenari man kalak si deban si labo kalak Jahudi. 1:17 Sabap arah Berita Si Meriah tangkas uga Dibata ngerambakken manusia kempak diriNa. Si enda ibenaken i bas kiniteken janah erkedungen i bas kiniteken. Bagi lit tersurat i bas Pustaka Si Badia, "Kalak si enggo iperembakken Dibata kempak diriNa erkiteken kinitekenna nggeluh me ia." 1:18 Pernembeh ate Dibata ipetangkas i Surga nari ndabuh ku kerina kejahaten manusia si la nggit nembah man Dibata. Erkiteken kejahatenna, manusia encekak ketuhu-tuhun e. 1:19 Ersalah manusia e, sabap kai si banci ietehna kerna Dibata, tangkas me man bana. Dibata nge si petangkassa man bana. 1:20 Mulai kin doni enda ijadiken Dibata, tangkas kap biakNa si la teridah, e me KuasaNa ras KinidibatanNa si la ermasap-masap. Si enda banci igejapken manusia arah kai si enggo ijadiken Dibata e. E maka lanai lit perdalihenna kerna kai si enggo ibahanna e. 1:21 Itandai manusia e nge Dibata, tapi la ipehagana Dibata e bagi Dibata; bage pe la ia ngataken bujur man Dibata. Tapi perukurenna kerna si sia-sia saja, janah pusuh peratenna si batu-batun e ikuasai si gelap. 1:22 Ngaku ia pentar, tapi motu nge ia. 1:23 Itadingkenna kiniulin Dibata si la ermasap-masap jenari isembahna patung-patung manusia, perik-perik, rubia-rubia si empat nahena, bage pe rubia-rubia si njoler si biakna kerina ermasa-masap. 1:24 Erkiteken si e ipelepas Dibata ia nehken sura-surana si melket, dingen ngelakoken perbahanen-perbahanen si cemar nandangi kulana sapih-sapih ia. 1:25 Itukarkenna kebenaren Dibata alu guak. Labo Dibata si isembahna, tapi si ijadiken Dibata e nge ipuji dingen isembahna. Arusna kin si Njadikenca e nge ipuji seh rasa lalap! Amin. 1:26 Erkiteken si e ipelepas Dibata ia nehken sura-surana si njuruken. Diberu-diberu erlagu la mehuli ia sapih-sapih ia diberu. Lagu langkah diberu-diberu e lanai bagi arusna. 1:27 Bage pe si dilaki nadingken hubungenna si payo ras diberu, janah leket ukurna man sapih-sapih dilaki. Dilaki erlagu-langkah si njuruken sapih-sapih dilaki; erkiteken si e ia ndat balasen i bas dirina sue ras perbahanenna si jahat dingen la arus e. 1:28 Perbahan lanai iakap manusia e perlu ngakui Dibata, e maka ipelepas Dibata ia i bas perukurenna si macik e, seh maka ibahanna perbahanen si la metunggung. 1:29 I bas ia dem erbage-bage si la mehuli: kejahaten, rangap, lat-lat, cian ate, munuh, rubat, nipu, bage pe elem-elem, sicekurak-cekuraken, 1:30 pebau-bau kalak si deban. Nembeh atena nandangi Dibata, megombang, meganjang ukur, meganjang cakapna. Rusur idaramina taki guna erbahan kejahaten si mbaru; la mehamat man orang tuana. 1:31 Pusuh peratenna batu-batun; la itepatina padanna, janah la lit kekelengen ntah pe perkuah atena man kalak si deban. 1:32 Ietehna maka rikutken keputusen Dibata si adil, kalak si bagenda perbahanenna arus iukum mate. Tapi amin bage gia tetap nge idalankenna bage. Janah labo saja ibahanna si jahat e, tapi lebih asa si e ipujina pe kalak si bali ras ia perbahanenna.
2:1 O teman, ise kin kam maka iukumndu kalak si deban? Kam pe ersalah kap! Adi iukumndu kalak si deban, iukumndu kap bandu, sabap perbahanenndu pe bali ras perbahanen kalak si iukumndu e. 2:2 Sieteh maka patut nge Dibata ngukum kalak si erbahan kejahaten-kejahaten e. 2:3 Tapi kam o teman, iukumndu kalak si deban, sedang kam pe bage nge perbahanenndu! Ntah iakapndu kin banci kam pulah i bas ukumen si rehna i bas Dibata nari? 2:4 Ntah la iergakenndu kiniulin Dibata si bage belinna, kesabaren ateNa mereken ukumen e? Ietehndu kap maka Dibata e mehuli, sabap ateNa mabai kam gelah jera. 2:5 Tapi mersik ukurndu janah la kam nggit jera. Erkiteken si e kam kap mpepulung pernembeh ate Dibata guna Wari Ukumen e, i ja ukumen Dibata si adil ipetangkas. 2:6 Ibalas Dibata me pagi man tep-tep kalak sue ras kai si enggo ibahanna. 2:7 Man kalak si ndarami kemulian ras kehamaten, labo guna kegeluhen si genduari enda saja, tapi pe guna kegeluhen si reh, e me alu la erleja-leja erbahan si mehuli, man kalak si bage ibereken Dibata kegeluhen si tuhu-tuhu si la ermasap-masap. 2:8 Tapi man kalak si ngukuri kepentingenna saja, si la ia nggit ngikuti ketuhu-tuhun, tapi si salah nge si iikutina, man kalak si bage idabuhken Dibata pernembeh ateNa. 2:9 Kerina kalak si ndalanken kejahaten la banci la ngenanami kiniseran ras kesusahen pagi, lebe man kalak Jahudi bage pe kalak si deban. 2:10 Tapi man kerina kalak si ndalanken si mehuli, ibereken Dibata me kemulian, kehamaten, ras kemalemen ate, lebe man kalak Jahudi, bage pe man kalak si deban. 2:11 Sabap kerina manusia bali nge i lebe-lebe Dibata. 2:12 Si labo kalak Jahudi la lit i bas ia Undang-undang Musa; tapi erdosa nge ia janah bene me aminna gia la lit i bas ia Undang-undang e. Kalak Jahudi lit i bas ia Undang-undang si ibereken Musa; erdosa ia janah iukum me ia erpalasken Undang-undang e. 2:13 Sabap labo kalak si megi Undang-undang e si rembak ras Dibata, tapi kalak si ndalankenca nge. 2:14 Adi si labo kalak Jahudi ndalanken Undang-undang e erkiteken ukurna ersuruh, maka aminna gia la lit i bas ia Undang-undang e, icidahkenna kap maka ietehna nge apai si mehuli janah si apai si la mehuli guna idalanken sue ras isi Undang-undang. 2:15 Arah perbahanenna teridah maka pedah si lit i bas Undang-undang e lit tersurat i bas pusuhna. Si enda teridah pe arah pusuh peratenna, sabap mawen-mawen ukurna nalahken ia janah mawen-mawen engkapiti ia. 2:16 Dage rikutken Berita Si Meriah si kuberitaken, bagenda me pagi jadina tupung warina Dibata ngadili perukuren manusia si terbuni. Dibata e ngadili arah Jesus Kristus si jadi hakim ras sukat-sukatna. 2:17 Kuga kerna kam? Ikatakenndu maka kam kalak Jahudi. Ernalem kam i bas Undang-undang janah megah akapndu erkiteken kam bangsa pilihen Dibata. 2:18 Ietehndu kai si ngena ate Dibata guna idalankenndu. Janah ietehndu pe arah Undang-undang e milih si mehuli. 2:19 Ikatakenndu maka kam me si negu-negu kalak si pentang, kam me terang nandangi kalak si lit i bas gelap. 2:20 Ikatakenndu maka kam me si ngajari kalak si motu; kam me guru kalak si nguda denga. Ikatakenndu maka i bas Undang-undang e enggo lit kerina pemeteh ras ketuhu-tuhun. 2:21 Kalak si deban iajarindu -- ngkai maka la iajarindu bandu? Imomokenndu "Ola nangko" -- tapi kam la kin nangko? 2:22 Ikatakenndu "Ola erlua-lua" -- tapi kam la kin erlua-lua? Ciga atendu berhala -- tapi la kin irampasindu rumah pertoton ingan nembah berhala e? 2:23 Megah iakapndu erkiteken lit i bas kam Undang-undang Dibata; tapi la kin icekuraki kalak Dibata erkiteken la iikutkenndu Undang-undangNa e? 2:24 Bagi tersurat i bas Pustaka Si Badia, "O kalak Jahudi, erkiteken kam maka icekuraki bangsa-bangsa si deban gelar Dibata." 2:25 Adi iikutkenndu Undang-undang e lit nge gunana kam isunatken. Tapi adi labo iikutkenndu, si tuhuna kam bali nge ras kalak si la isunat. 2:26 Adi bangsa si deban, e me si la isunatken, ndalanken isi Undang-undang e, ma iakap Dibata kalak e tempa-tempa enggo isunatken? 2:27 E maka, o kalak Jahudi, iukum bangsa si deban me kam, aminna gia lit i bas kam Undang-undang janah enggo kam isunatken, sabap la iikutkenndu Undang-undang e. Bangsa si deban e idalankenna Undang-undang aminna pe la ia isunatken secara dagingna. 2:28 Dage ise kin kalak Jahudi si tuhu-tuhu? Kalak Jahudi si tuhu-tuhu labo kalak Jahudi si arah darat! Kai dage sunat tuhu-tuhu? Sunat si tuhu-tuhu labo tanda si arah darat si lit i bas badan! 2:29 Kalak Jahudi si tuhu-tuhu e me kalak Jahudi si arah bas, si enggo isunatken pusuh peratenna. Labo Undang-undang si tersurat erbahanca kalak enggo jadi kalak Jahudi si tuhu-tuhu, tapi kuasa Kesah Dibata nge. E maka kalak si bage labo ngaloken pujin i bas manusia nari tapi i bas Dibata nari nge.
3:1 Adi bage i bas kai nge lebihen kalak Jahudi e asangken bangsa si deban? Ntah lit kin nge gunana isunatken e? 3:2 Tentu mbue i bas kai pe! Perlebe: sabap man kalak Jahudi me perlebe iendesken Dibata perkatan-perkatanNa. 3:3 Dage adi lit piga-piga kalak Jahudi la setia man Dibata, iakapndu kin maka erkiteken si e Dibata lanai setia man padanNa? 3:4 Tentu lang! Tapi bagenda kap. Dibata e tetap nge i bas ketuhu-tuhun aminna gia kerina manusia perguak. Bagi lit tersurat i bas Pustaka Si Badia, "I japa pe Kam ngerana, Kam tetap nge ibenarken. Katawari pe menang nge Kam, adi iaduken kalak Kam." 3:5 Tapi kuga, adi arah kesalahenta e reh ulina teridah kebujuren Dibata? Kuga ninta? Salah kin perbahanen Dibata e adi iukumna kita? (Aku ngerana i jenda bagi biasana manusia ngerana.) 3:6 Tentu lang! Sabap adi la kin adil Dibata e, labo banci iadilina doni enda. 3:7 Umpamakenlah lit kalak si atena ersoal, nina, "Adi arah kejahatenku e maka ertangkasna teridah keadilen Dibata seh maka la ipermuliaken, ma patut min aku lanai iukum Dibata bagi kalak perdosa? 3:8 Dage ngkai maka la sibahan si jahat, gelah arah kejahaten e reh si mehuli?" Si tuhuna lit nge kalak si encekuraki aku alu ngataken maka si enda me kuajarken. Kalak enda la banci la iukum bagi patutna. 3:9 Dage, ulin kin kita kalak Jahudi asangken si labo kalak Jahudi? Sitik pe lang! Ndai enggo kupetangkas i das maka subuk kalak Jahudi bage pe bangsa si deban kerina i teruh kuasa dosa. 3:10 Bagi lit tersurat i bas piga-piga kitap i bas Pustaka Si Badia, "La lit ise pe bujur i lebe-lebe Dibata, 3:11 la lit ise pe si pentar, la lit ise pe ndarami Dibata. 3:12 Kerina manusia enggo nilah i bas Dibata nari; kerina ia enggo macik; la lit ise pe erbahan si mehuli, sada pe lang. 3:13 Kalah-kalahna desken lubang kubur si talang nipu ia alu dilahna, janah i bas biberna nari ndarat kata-kata desken bisa nipe si erbahanca kalak mate. 3:14 Babahna dem alu sumpah pagit. 3:15 Nahena pedas ngayak-ngayak dingen munuh kalak. 3:16 Gedang-gedang dalan si ibentasina, ibahanna kecedan dingen kesusahen. 3:17 La pernah idalanina dalan perdamen. 3:18 Bage pe la diatena erkemalangen man Dibata." 3:19 Sieteh maka kerina si ikataken Undang-undang e, itujuken man kalak si nggeluh i teruh Undang-undang, gelah olanai lit kalak si erdalih janah gelah doni enda lanai lit ampang-ampangna nandangi ukumen Dibata. 3:20 Sabap labo ise pe banci rembak ras Dibata adi arah ndalanken Undang-undang. Undang-undang e gunana e me gelah ierti manusia ia erdosa. 3:21 Tapi genduari cara Dibata ngerembakken manusia kempak diriNa enggo ipetangkas, janah si e la lit sangkut pautna ras Undang-undang. (Si tuhuna Undang-undang Musa ras kitap nabi-nabi mereken kesaksin maka si e tuhu kap.) 3:22 Dibata ngerembakken manusia kempak diriNa erkiteken kiniteken manusia e man Jesus Kristus. Kerina kalak si tek man Kristus iperembak Dibata ras diriNa sabap bali nge kerina manusia enda. 3:23 Kerina manusia enggo erdosa janah enggo ndauh sirang ras sura-sura Dibata si mejile. 3:24 Tapi arah pemere Dibata erpalasken lias ateNa, kerina manusia irembakken Dibata kempak diriNa, arah pertebusen si ibahan Kristus Jesus. 3:25 Dibata enggo netapken Ia jadi sada persembahen gelah arah Ia engkorbanken diriNa seh mate, kerina dosa-dosa manusia isasapken dingen pernembeh ate Dibata ipepalem, adi tek ia man Jesus Kristus. Arah si enda icidahken Dibata maka Ia bujur kap. Nai nari isinikken Dibata saja kerna dosa-dosa manusia, 3:26 janah la Ia megelut. Tapi i bas paksa si genduari enggo iukum Dibata dosa-dosa manusia i bas diri Jesus Kristus. Arah si e icidahkenNa maka Ia adil, janah radu ras si e irembakkenNa kempak diriNa kerina kalak si tek man Jesus. 3:27 Dage labo lit si man megahenken manusia. Engkai makana bage? Sabap manusia ikelini Dibata labo erkiteken ndalanken Undang-undang, tapi erkiteken tek ia man Jesus Kristus. 3:28 Dage, manusia banci rembak ras Dibata labo erkiteken manusia e ndalanken kai si ituntut Undang-undang, tapi erkiteken tek man Jesus Kristus ngenca. 3:29 Ntah kin Dibata e Dibata kalak Jahudi saja ngenca? Ma kin Ia pe Dibata bangsa si deban nge? Tentu. 3:30 Sabap Dibata e sada ngenca. Dibata ngerembakken kalak Jahudi si ersunat e kempak diriNa erkiteken ia tek man Jesus Kristus; bage pe irembakkenNa kalak si deban si la ersunat kempak diriNa erkiteken kalak enda pe tek man Jesus Kristus. 3:31 Adi tek kita man Jesus Kristus, sicedaken kin Undang-undang e? Kutera pe lang! Tapi arah si e sitamaken Undang-undang e i babo palas si lebih enteguh.
4:1 Dage kuga ninta kerna nininta Abraham nai? Uga kin pengalamenna? 4:2 Adi ia rembak ras Dibata erkiteken perbahanenna tentu lit dalanna muji bana. Tapi teridah maka i lebe-lebe Dibata labo lit dalanna ia muji bana. 4:3 Sabap i bas Pustaka Si Badia lit tersurat, "Abraham tek man Dibata, janah kinitekenna e iperkiraken Dibata jadi dalan guna ngerembakken Abraham kempak diriNa." 4:4 Kalak si erdahin, upah si ialokenna e labo pemere e, tapi hakna kap e. 4:5 Tapi kalak si ernalem kempak kinitekenna man Dibata, labo kempak perbahanenna, kinitekenna e me iperkiraken Dibata jadi dalan ngaloken ia rembak ras diriNa. Enda ertina Dibata enggo erbahan keputusen maka kalak si ersalah e ikataken la salah. 4:6 Kerna si enda me si ikataken Daud maka malem me ate kalak si ialoken Dibata rembak ras diriNa la arah kai si ibahanna. Nina Daud. 4:7 "Ketuahen kalak si enggo ialemi Dibata salahna si enggo itanemken Dibata dosa-dosana. 4:8 Ketuahen kalak si la iperkiraken Dibata dosa-dosana." 4:9 Kemalemen ate si ikataken Daud enda sikerajangen kalak si isunatken saja kin ngenca? Lang! Tapi kemalemen ate e jadi sikerajangen kalak si labo isunatken pe. Sabap bagi enggo ndai sikutip i bas Pustaka Si Badia nari, "Kinitekenna e iperkiraken Dibata jadi dalan ngerembakken Abraham kempak diriNa." 4:10 Ndiganai kin perkiran enda jadi? Ope denga Abraham isunatken ntah kenca ia isunatken? Labo kenca ia isunatken, tapi ope denga si e. 4:11 Pudin nge ia isunatken. Sunat e ialokenna jadi tanda pengesahen maka ia enggo rembak ras Dibata erpalasken kinitekenna ope denga ia isunatken. E maka Abraham jadi bapa nandangi kerina kalak si tek man Dibata, kalak si la isunatken, si ialoken Dibata rembak ras diriNa. 4:12 Ia pe bapa kerina kalak si isunatken, labo erkiteken sunat e, tapi erkiteken ia ngikuti dalan kiniteken si ibentasi Abraham bapanta, ope denga ia isunatken. 4:13 Dibata erpadan mereken doni enda man Abraham ras kesusurenna. Padan enda ibereken Dibata labo erkiteken Abraham ndalanken Undang-undang, tapi erkiteken Dibata enggo ngaloken Abraham rembak ras diriNa erpalasken kiniteken. 4:14 Sabap adi man kalak si ernalem man Undang-undang nge ibereken Dibata kai si ipadankenNa e, sia-sia me kiniteken manusia, janah padan Dibata kosong. 4:15 Si reh i bas Undang-undang Musa e nari si tuhuna e me ukumen Dibata; tapi i ja la lit undang-undang i je me la lit kalak si ngelanggar undang-undang. 4:16 Padan Dibata man Abraham, e me erpalasken kiniteken, janah kai si ipadankenNa e, tuhu-tuhu tangkas pemere Dibata, janah esah pe man kerina kesusuren Abraham. Labo saja man kalak si ndalanken Undang-undang, tapi pe man kalak si erkiniteken bagi Abraham. Sabap Abraham me bapanta kerina, 4:17 bagi lit tersurat i bas Pustaka Si Badia, "Enggo Kutetapken kam jadi bapa nterem bangsa." Alu bage padan e enggo sah i lebe-lebe Dibata, Dibata si iteki Abraham, sabap Ia me si erbahanca kalak si enggo mate nggeluh mulihi dingen si njadiken si la lit jadi lit alu kataNa. 4:18 Aminna gia la lit arapen, tapi Abraham tetap erkiniteken dingen erpengarapen maka ia jadi "bapa melala bangsa", bagi lit tersurat i bas Pustaka Si Badia, "Bagi buena bintang i langit bage me pagi buena kesusurenndu." 4:19 Paksa si ndai umur Abraham enggo nandangi seratus tahun. Tapi kinitekenna labo kote aminna gia ietehna maka kulana enggo kerah janah ndeharana Sarah la banci mupus. 4:20 La ia sangsi, janah kinitekenna nandangi padan si ibereken Dibata la surut; kinitekenna erbahanca ia reh gegehna, seh maka ia tetap muji Dibata. 4:21 Tek ia maka ngasup nge Dibata nehken kai si enggo ipadankenNa. 4:22 Janah erkiteken ia tek e, "kinitekenna e iperkiraken Dibata jadi dalan guna ngerambakken Abraham kempak diriNa." 4:23 Kata-kata "iperkiraken" e itulis labo man Abraham saja. 4:24 Tapi pe man banta. Kita pe iperembakken me ras Dibata adi kita tek man Dibata si enggo mpekeke Jesus, Tuhanta, i bas si mate nari. 4:25 IendeskenNa Jesus ku bas kematen erkiteken kesalahen-kesalahenta, jenari ipegeluhNa mulihi gelah kita iperembak ras Ia.
5:1 Erkiteken kita enggo rembak ras Dibata erkiteken kinitekenta, e maka kita nggeluh i bas perdamen ras Dibata arah Tuhanta Jesus Kristus. 5:2 Jesus Kristus me si maba kita bengket ku bas lias ate Dibata erkiteken kinitekenta. Janah i bas lias ate Dibata e me kita nggeluh dingen ringan. Dage meriah ukurta sabap lit pengarapenta maka kita ikut dat bagin i bas kemulian Dibata. 5:3 Janah labo terjeng je saja, tapi megah pe siakap i bas kiniseranta, sabap sieteh maka arah kiniseran turah saber ate. 5:4 I bas saber ateta e teridah maka kita enggo menang i bas pengujin, janah erkiteken kita enggo menang i bas pengujin, lit pengarapenta. 5:5 Pengarapenta enda labo erbahanca kita kecewa, sabap Dibata enggo ncurcurken kekelengenNa ku bas pusuhta arah Kesah Si Badia. Ia me pemere Dibata man banta. 5:6 Sabap asum kita kote denga, mate Kristus i bas paksa si payo, man gunanta kalak si jahat. 5:7 Labo sukah muatsa kalak si nggit mate guna kalak si bujur. Tapi adi guna kalak si mehuli banci jadi lit kalak si nggit mate. 5:8 Tapi Kristus mate asum kita perdosa denga! Arah e Dibata enggo encidahken keleng ateNa man banta. 5:9 Dage tangkas kal man banta maka kita enggo rembak ras Dibata erkiteken Jesus Kristus enggo engkorbanken diriNa seh mate; tentu terlebih-lebih pe kita terkelin i bas pernembeh ate Dibata nari arah Ia. 5:10 Gelgel nari kita imbang Dibata, tapi enggo iperiahken Dibata kita ras diriNa arah kematen AnakNa. Tentu terlebih-lebih genduari adi kita enggo meriah ras Dibata la banci lang ikeliniNa me kita arah kegeluhen Kristus. 5:11 Janah labo e saja, tapi meriah pe ukurta dingen sipuji Dibata erkiteken Tuhanta Jesus Kristus si enggo mperiahken kita ras Dibata. 5:12 Dosa enggo ngkenai kerina manusia i bas doni enda arah sekalak manusia, janah dosana e maba kematen. Erkiteken si e kematen enggo ngelangketi kerina manusia, sabap tep-tep kalak enggo erdosa. 5:13 Ope denga ibereken Dibata pe Undang-undang arah Musa, enggo me lit dosa i doni enda, tapi dosa e la iperkiraken erkiteken la lit undang-undang. 5:14 Tapi kematen enggo erkuasa nandangi kerina manusia i bas paksa Adam nari seh ku bas paksa Musa, subuk pe kalak si la langsung ngelanggar perentah si rehna i bas Dibata nari bagi si Adam. Adam me gambaren Manusia si nandangi reh. 5:15 Tapi pemere Manusia si nandangi reh e la terpeseri belinna ras dosa si ibahan Adam. Tuhu maka nterem jelma mate erkiteken dosa Adam, tapi ndauh beliden lias ate Dibata si isehkenNa man manusia si bage teremna, dingen pemereNa erpalasken lias ate si Sekalak e, e me Jesus Kristus. 5:16 Janah pemere Dibata e labo terpeseri belinna ras dosa si sekalak e. Kenca Adam erbahan sada dosa, ia iadili Dibata janah ikatakenNa ia salah. Tapi kenca mbue kal dosa ibahan manusia e, ibereken Dibata pemere si la metunggung manusia ngalokenca, e me ikataken Dibata man manusia e, "Kam ibenarken." 5:17 Tuhu erkiteken dosa sekalak jelma, kematen enggo ngerajai kerina jelma, erkiteken si sekalak jelma e. Tapi kai si ibahan Jesus Kristus ndauh beliden asilna asangken kai si jadi erkiteken dosa si sekalak e! Kerina kalak si ngaloken lias ate Dibata si la erkeri-kerin ras pemereNa si ngerambakken manusia kempak diriNa, kalak si bage erkuasa i bas geluhna desken sekalak raja arah Kristus. 5:18 Bagi kerina manusia iukum erkiteken sada dosa, bage me pe kerina manusia ibebasken dingen ngaloken kegeluhen erkiteken sada perbahanen si benar. 5:19 Janah bagi kerina manusia jadi kalak perdosa erkiteken kinilapatuhen si sekalak jelma e, bage me pe kerina manusia iperembak ras Dibata erkiteken kepatuhen sekalak jelma si deban, e me Jesus Kristus. 5:20 Undang-undang reh gelah erbuena kesalahen; tapi i ja reh buena dosa, i je me pe ndauh reh belinna lias ate Dibata. 5:21 Dage, bagi nai dosa erkuasa desken sekalak raja si maba manusia ku bas kematen, bage me pe lias ate Dibata genduari enggo erkuasa desken sekalak raja si ngerambakken manusia kempak Dibata, janah mabai kita ku bas kegeluhen si tuhu-tuhu si rasa lalap arah Jesus Kristus Tuhanta.
6:1 Kuga dage ninta genduari? Siusur-usur dage erbahan dosa gelah erbelinna lias ate Dibata? 6:2 Tentu lang! Kita enggo mate nandangi dosa; kuga banci kita terus nggeluh i bas dosa? 6:3 Sabap tentu enggo ietehndu maka asum kita iperidiken kita ipersada ras Kristus Jesus; ertina peridin e mpersadaken kita ras kematenNa. 6:4 I bas kita iperidiken e, enggo kap kita mate dingen ikuburken ras Kristus, gelah bagi Kristus ipekeke i bas si mate nari i bas kemulian Bapa, bage me pe kita nggeluh i bas kegeluhen si mbaru. 6:5 Sabap adi kita enggo ersada ras Ia i bas kematen si bali ras kematenNa, bage me pe kita tentu ersada ras Ia i bas kekeken si bali ras kekekenNa. 6:6 Janah sieteh pe maka "aku"-nta si male e enggo ikut mate i kayu persilang, gelah alu bage gegeh "aku"-nta si dem alu dosa e iruntuhken, dingen lanai kita jadi budak dosa. 6:7 Sabap kalak mate enggo bebas i bas kuasa dosa nari. 6:8 Dage erkiteken enggo mate kita ras Kristus, tek kita maka kita pe nggeluh ka nge ras Ia. 6:9 Sabap sieteh maka Kristus enggo keke i bas si mate nari jenari rasa lalap Ia lanai mate, kematen lanai erkuasa nandangi Ia. 6:10 Dage arah kematenNa, sekali seh rasa lalap Kristus enggo nadingken kuasa dosa; janah i bas kegeluhenNa si genduari Ia enggo bengket ku bas lingkungen i ja Dibata erkuasa. 6:11 Sue ras si e kam pe arus nganggap dirindu enggo mate janah ndarat i bas lingkungen dosa nari, dingen nggeluh i bas lingkungen kuasa Dibata, erkiteken persadanndu ras Kristus Jesus. 6:12 E maka olanai pelepas dosa ngerajai kulandu si la banci lang mate e, gelah ola iikutkenndu kinirincuhenna. 6:13 Bage pe ola pelepas ringringndu ipake dosa guna ndalanken si jahat. Tapi endeskenlah dirindu man Dibata, bagi kalak si ipekeke i bas si mate nari. Endeskenlah ringringndu guna ipake Dibata ngelakoken si ngena ateNa. 6:14 Dosa lanai erkuasa nandangi kam, sabap kam lanai nggeluh i teruh kuasa Undang-undang, tapi i teruh lias ate Dibata. 6:15 Kuga dage genduari? Sibahan dage dosa erkiteken kita lanai i teruh Undang-undang, tapi i teruh lias ate Dibata? Tentu lang! 6:16 Tentu ietehndu adi iendeskenndu dirindu man sekalak jelma dingen patuh kam man bana bagi sekalak budak, si tuhuna kam enggo jadi budakna. Adi iperbudakndu dirindu kempak dosa, akibatna kematen, tapi adi erkemalangen kam man Dibata, kam jadi kalak benar. 6:17 Tapi sikataken bujur man Dibata, sabap nai kam budak dosa, tapi genduari, alu bulat ukurndu enggo erkemalangen kam man Dibata arah kam ngikutken pengajaren si isehken man bandu. 6:18 Dage kam enggo ibebasken i bas dosa nari janah genduari kam enggo jadi "budak" Dibata guna ndalanken perbahanen si mehuli. 6:19 Kupake perumpaman budak gelah murah iakapndu ngertikenca. Bagi nai iendeskenndu ringringndu jadi budak si nggesuh ras kejahaten guna ndalanken erbage-bage kejahaten bage me pe genduari arus iendeskenndu ringringndu jadi budak nandangi perbahanen si mehuli gelah kam nggeluh khusus guna Dibata saja. 6:20 Asum kam nai budak dosa denga, iakapndu kam la terpaksa ngelakoken kai si ngena ate Dibata. 6:21 Kai dage asilna man bandu i bas si e nari? Kerina si e erbahanca mela iakapndu genduari, sabap perbahanenndu e mabai ku kematen. 6:22 Tapi genduari kam enggo ibebasken i bas dosa nari, janah kam enggo jadi "budak" Dibata. Asilna man bandu e me kap, kam nggeluh khusus guna Dibata. Si enda mabai kam ku kegeluhen si tuhu-tuhu si rasa lalap. 6:23 Sabap upah dosa e me kematen; tapi pemere si ibereken Dibata man banta e me kegeluhen si rasa lalap i bas persadan ras Kristus Jesus.
7:1 O senina-seninangku kalak Jahudi, kuakap iangkandu nge kai si nandangi kukataken enda, terlebih-lebih kam si meteh Undang-undang. Kukataken man bandu, maka undang-undang erkuasa nandangi sekalak jelma asa dekah geluhna ngenca. 7:2 Sekalak ndehara umpamana, lit i teruh undang-undang perjabun asa umur geluh perbulangenna ngenca. Tapi adi mate perbulangenna e, ia lanai teriket man undang-undang perjabun ras perbulangenna e. 7:3 Dage adi erjabu ia ras dilaki si deban asum nggeluh denga perbulangenna e, ia igelari erlua-lua. Tapi adi mate perbulangenna e, ia enggo bebas i bas undang-undang perjabun nari, janah labo ia icap perlua-lua aminna pe ia erjabu ras dilaki si deban. 7:4 Bage me pe kam o senina-seninangku, adi inehen arah dampar hubungenndu ras undang-undang, kam enggo mate, erkiteken kam enggo ersada ras kula Kristus. Janah genduari kam enggo banci "erjabu" ras kalak si deban, si enggo ipekeke i bas si mate nari, gelah banci sibahan si mehuli man Dibata. 7:5 Sabap asum nai kita nggeluh denga rikutken biakta si dekah, kerincuhenta erbahan dosa si ipekeke undang-undang e, erdahin i bas ringringta. Si enda mabai kita ku kematen. 7:6 Tapi genduari kita enggo bebas i bas Undang-undang e nari, sabap adi inehen arah segi hubungenta ras Undang-undang si mpenjaraken kita e kita enggo mate. Erkiteken si e pendahinta man Dibata lanai bo sidalanken alu perukuren si dekah, e me erpalasken kepatuhen nandangi aturen-aturen si tersurat saja nge ngenca, tapi dahin Dibata e si dalanken alu sikap si mbaru, e me kap alu pusuh si ersuruh. 7:7 Dage kuga ninta? Undang-undang e kin dosa? Tentu lang! Tapi adi la lit Undang-undang labo aku ngerti kerna dosa. Umpamana, labo kueteh kai ermengga ate adi la ikataken Undang-undang, "Ola ermengga ate!" 7:8 Arah perentah si e dosa ndat kesempaten peturah erbage-bage mengga ate i bas diringku. Adi la lit Undang-undang, dosa bagi barang mate kap. 7:9 Nai pernah menahang kuakap nggeluh asum aku langa i teruh Undang-undang; tapi asum reh perentah Dibata, dosa minter nggeluh mulihi. 7:10 E maka mate aku. Janah Undang-undang e si aturna kin mabai aku ku kegeluhen, rikutken pengalamenku kepeken mabai aku ku kematen. 7:11 Dosa ndat kesempaten arah Undang-undang e janah alu Undang-undang e itipuna janah ibunuhna aku. 7:12 Dage Undang-undang e badia nge. Janah pedah e badia, adil dingen mehuli. 7:13 Ntah kin enda ertina maka si mehuli e maba kematen man bangku? Tentu lang! Tapi dosa make si mehuli e ngerehken kematen man bangku, janah alu bage, tangkas me uga kin si tuhuna biak dosa e. Dage erkiteken Undang-undang e tangkas me maka dosa e tuhu-tuhu kal jahat. 7:14 Sieteh maka Undang-undang e biakna biak tendi kap; tapi aku biak si erkula kap, janah aku enggo terdaya jadi budak dosa. 7:15 Lanai kuangka kai si kubahan; sabap labo kulakoken rikutken sura-surangku, tapi si ciga ateku nge kubahan. 7:16 Tapi adi si kudalanken e la bagi sura-surangku, si enda nuduhkenca maka kuakui Undang-undang e bujur. 7:17 Dage si tuhuna labo aku erbahanca si la mehuli e; tapi dosa si ringan i bas aku e nge erbahanca. 7:18 Kueteh maka si mehuli la lit ringan i bas aku, e me i bas biak kulangku enda. Sabap aminna lit gia sura-surangku erbahan si mehuli, si kudalanken labo bage. 7:19 La kudalanken si mehuli si ateku kubahan, tapi kudalanken kai si la mehuli, si la bagi sura-surangku. 7:20 Adi kudalanken si la bagi sura-surangku, si enda ertina maka labo aku si ndalankenca e, tapi dosa si ringan i bas aku e nge. 7:21 Dage enggo kudat biak si enda i bas diringku: Kubahan kenca ateku si mehuli, si jahat ngenca terbahan aku. 7:22 Pusuh peratenku ermeriah ukur nandangi Undang-undang Dibata, 7:23 tapi kugejap lit sada biak si deban i bas ringringku si erlawanen ras biak si payo kuakap i bas ukurku. Si enda me erbahanca maka aku enggo itaban biak dosa si ringan i bas ringringku. 7:24 Andiko, cilaka me tuhu aku! Ise nge si mulahi aku i bas biak kematen enda nari? 7:25 Kukataken bujur man Dibata si mulahi aku arah Jesus Kristus Tuhanta. Dage adi aku jine, i bas ukurku ngenca aku ngikutken Undang-undang Dibata, tapi kulangku ndalanken biak dosa.
8:1 Tapi genduari ukumen lanai perlu idalani kalak si lit i bas persadan ras Kristus Jesus. 8:2 Kesah, si biakna kin mereken kegeluhen man kalak si lit i bas persadan ras Kristus Jesus, enggo mulahi kam i bas biak dosa ras kematen nari. 8:3 Kai si la ngasup Undang-undang erbahanca erkiteken biak kula manusia kote, enggo ibahan Dibata. Enggo iukum Dibata dosa si rurat i bas biak kula manusia alu nuruh AnakNa jine si reh bagi rupa manusia si erdosa guna naluken dosa. 8:4 Si enda ibahan Dibata gelah kita, si lanai nggeluh rikutken sura-sura ukur manusia tapi rikutken Kesah, banci ndalanken perentah si mehuli si lit i bas Undang-undang e. 8:5 Sabap kalak si nggeluh rikutken sura-sura ukur manusia, pusuhna ikuasai sura-sura e. Kalak si nggeluh rikutken sura-sura Kesah, pusuhna ikuasai sura-sura Kesah. 8:6 Adi kalak si pusuhna ikuasai sura-sura ukurna mate kap; tapi adi kalak si pusuhna ikuasai Kesah Dibata nggeluh me ia dingen malem atena. 8:7 Pusuh si ikuasai sura-sura ukur manusia ermusuhen kap ras Dibata; sabap pusuh si bage la ngikutken Undang-undang Dibata, janah la kin ngasup pe ngikutken Undang-undang e. 8:8 Kalak si nggeluh rikutken sura-sura ukur manusia la banci ngena ate Dibata ibahanna. 8:9 Kam labo nggeluh rikutken sura-sura ukur manusia, tapi kam nggeluh rikutken sura-sura Kesah adi tuhu kin Kesah Dibata ringan i bas kam. Kalak si la lit Kesah Kristus i bas ia, la ia sikerajangen Kristus. 8:10 Tapi adi Kristus ringan i bas kam, maka amin arus gia kulandu mate erkiteken dosa, tendindu nggeluh kap erkiteken Dibata enggo ngerembakken kam kempak diriNa. 8:11 Adi Kesah Dibata si enggo mpekeke Jesus i bas si mate nari ringan i bas kam, maka Dibata si enggo mpekeke Kristus i bas si mate nari e la banci lang mereken geluh si mbaru man kulandu si arus mate e, arah KesahNa si ringan i bas kam e. 8:12 Dage o senina-senina, tuhu rutang kita; tapi labo guna nggeluh rikutken sura-sura ukur manusia. 8:13 Sabap adi nggeluh kam rikutken sura-sura ukur manusia, kempak kematen kap perlawesndu. Tapi adi ibunuhndu perbahanen-perbahanen biak kulandu alu Kesah Dibata, maka nggeluh me kam. 8:14 Kasa kai kalak si itegu-tegu Kesah Dibata, anak-anak Dibata kap. 8:15 Sabap Kesah si ibereken Dibata man bandu labo erbahanca kam jadi budak si mulihken, seh maka kam mbiar rusur, tapi Kesah e erbahanca kam jadi anak-anak Dibata, janah erkiteken si e banci kita ngerana man Dibata, "O Bapa! O Bapa kami!" 8:16 Kesah Dibata ikut ersaksi ras tendinta ngataken maka kita anak-anak Dibata kap. 8:17 Dage adi kita anak-anak Dibata tentu sialoken nge kai si enggo isikapken Dibata guna anak-anakNa. Janah kita pe ikut dat bagin i bas kai si enggo isikapken Dibata man Kristus e; sabap adi dat bagin kita i bas kiniseranNa, dat bagin ka me pe kita i bas kemulianNa. 8:18 Rikutken perkiranku maka kiniseran si inanami kita genduari labo kai kal pe e adi ibandingken ras kemalemen ate si pagin ipetangkas Dibata man banta. 8:19 Kerina si enggo ijadiken Dibata tertima-tima alu ate metedeh ndigan Dibata mpetangkas kemulian anak-anakna. 8:20 Sabap kerina si ijadiken Dibata e enggo lanai erguna, labo erkiteken sura-surana jine, tapi erkiteken bage me sura-sura Dibata. Amin bage gia lit arapen. 8:21 Sabap i bas sada wari pagi ibebasken Dibata me kerina si enggo ijadikenNa e i bas perbudaken si erbahanca ia kernep, gelah ia merdeka janah ngenanami kebebasen dingen kemulian ras kerina anak-anak Dibata. 8:22 Sabap ieteh maka seh paksa si genduari enda kerina si enggo ijadiken Dibata kelsehen ras-ras dingen seh kal akapna suina desken sekalak pernanden si nandangi mupus. 8:23 Janah labo e saja, tapi kita pe si enggo ngaloken Kesah selaku jaminen i bas pemere-pemere Dibata si nandangi iberekenNa man banta, kelsehen nge nimai Dibata ndungi pengangkatenta jadi anak-anakNa, e me nebusi badanta. 8:24 Sabap alu erpengarapen nge maka kita enggo ikelini; tapi adi enggo iidah kai si iarapken lanai bo e pengarapen. Sabap ise kin ngarapken kai si enggo idahna? 8:25 Tapi adi erpengarapen kita nandangi kai si langa idah, sitimai e alu saber. 8:26 Bage me pe Kesah Dibata reh nampati kita, kita si kote enda. Sabap la sieteh kuga arusna kita ertoto; Kesah e me ertoto kerna kita man Dibata alu kelsehen si la terbelasken. 8:27 Dibata si ngidah pusuh peraten manusia, meteh kai sura-sura Kesah; sabap Kesah e mindo man Dibata guna anak-anak Dibata, janah sue ras peraten Dibata. 8:28 Sieteh maka i bas kai pe Dibata erdahin guna kiniulin man kalak si erkeleng ate man baNa, e me kalak si enggo ipilih Dibata arah sura-suraNa. 8:29 Kalak si enggo itandai Dibata arah lebe nai, enggo itetapkenNa gelah bali ras tempas AnakNa, Jesus Kristus, gelah Anak e jadi sintua i tengah-tengah seninana si nterem. 8:30 E maka enggo ipilih Dibata kalak si enggo itetapkenNa e; kalak si enggo ipilihNa e enggo iperembakNa ras diriNa; janah kalak si enggo iperembakNa ras diriNa e enggo ipermuliakenNa. 8:31 Adi bage, kuga dage ninta kerna si enda kerina? Adi Dibata temanta, ise kin ngasup ngelawan kita? 8:32 AnakNa kal pe la itahanNa, tapi iendeskenNa AnakNa e man gunanta kerina. Adi AnakNa kal pe iberekenNa man banta, tentu iberekenNa nge kai pe man banta radu ras AnakNa e. 8:33 Ise kin pang ngaduken kalak si enggo ipilih Dibata? Dibata jine mutuskenca maka ia la ersalah! 8:34 Dage ise banci ngukumsa? Kristus Jesus nge ngenca! Tapi Ia jine enggo mate guna kita, enggo nggeluh mulihi, janah enggo merentah ras Dibata guna kita! Kristus Jesus pagi jadi pembelanta i lebe-lebe Dibata. 8:35 Ise kin ngasup nirangken kita i bas keleng ate Kristus nari? Banci kin kiniseran nirangkenca, ntah kepiceten, penganiayan, kurang pangan tah uis, ancamen, ntah kematen? 8:36 Bagi lit tersurat i bas Pustaka Si Badia, "Erkite-kiteken Kam me maka gedang-gedang wari kami ibunuhi kalak. Bali kami iakapna ras biri-biri si nandangi igeleh." 8:37 Tapi i bas si enda kerina tuhu-tuhu kita lebihen asa kalak si permenang erkiteken Kristus si erkeleng ate man banta. 8:38 Sabap aku enggo tek maka la lit kai pe si ngasup nirangken kita ras keleng ate Kristus: subuk kematen tah kegeluhen, subuk malekat-malekat, penguasa-penguasa ras kuasa-kuasa i langit, subuk kai si jadi genduari bage pe kai si jadi pagin. 8:39 Subuk kai pe si i babo doni tah si i teruh doni, la lit kai pe i bas kerina si enggo ijadiken Dibata si ngasup nirangken kita ras keleng ate Dibata, e me keleng ate si cidahkenNa i bas Kristus Jesus Tuhanta.
9:1 Erkiteken persadanku ras Kristus kai si ateku kukataken enda tuhu kap, labo guak. Pusuh peratenku pe i bas persadan ras Kesah Si Badia ikut ngatakenca bage. 9:2 Tuhu maka ceda kal ateku dingen megogo ateku la erngadi-ngadi. 9:3 Erkite-kiteken seninangku si sada bangsa ras aku. Adi banci lah labo kuakap dalih aku gia isumpahi Dibata dingen sirang ras Kristus adi alu bage banci kusampati bangsangku e. 9:4 Sabap kalak Israel e me kap bangsa pilihen Dibata, si enggo iangkat Dibata jadi anak-anakNa dingen ipetangkasNa kemulianNa man bana. Ibahan Dibata iketen padan man bana, janah ibereken Dibata Undang-undang man bana. I bas ia lit aturen uga arusna ersembah man Dibata, janah enggo ialokenna padan-padan i bas Dibata nari. 9:5 Kalak enda me kesusuren nini-nini si terberita nai-nai nari, janah Mesias si ipadanken Dibata e, si reh selaku manusia, rehna i bas bangsa e nari. Dibata si erkuasa i bas kerinana terpujilah seh rasa lalap! Amin. 9:6 Labo maka tempa-tempa kai si enggo ikataken Dibata kerna Israel e la seh; sabap labo kerina kesusuren Jahudi subuk Israel si tuhu-tuhu. 9:7 Bage pe labo kerina kesusuren Abraham anak-anakna si tuhu-tuhu. Nina Dibata man Abraham, "Kesusuren Isak nge ngenca pagi ikataken kesusurenndu." 9:8 Si enda ertina maka anak si tubuh secara biasa labo anak-anak Dibata, tapi anak-anak si tubuh erkiteken padan Dibata nge ngenca ikira anak-anak si esah. 9:9 Sabap padan Dibata man Abraham e me kap, "I bas paksa si enggo itentuken pagi, reh Aku mulihken, janah ipupus Sarah me pagi sekalak anak dilaki." 9:10 Janah labo e saja, tapi Rebeka pe lit nge dua anakna, bapana sada, e me nininta Isak. 9:11-12 Ope denga tubuh anak si dua e, bage pe ope denga ia erbahan si mehuli ntah si jahat nina Dibata man Rebeka, "Anakndu sintua pagi jadi si erdahin anakndu si nguda." Si enda ikataken Dibata gelah tangkas ise si pilih Dibata, e erpalasken sura-sura Dibata saja nge. Erkiteken si e tangkas maka pilihen Dibata labo erpalasken perbahanen, tapi erpalasken pilihen Dibata. 9:13 Bagi si tersurat i bas Pustaka Si Badia, "Keleng ateku kesusuren Jakup, tapi elem-elem aku man kesusuren Esau." 9:14 Dage kuga ninta? Sikataken kin Dibata e la bujur? Tentu lang! 9:15 Sabap man Musa nai enggo ikataken Dibata, "Man ise ateKu Kucidahken perkuah ateKu man bana me Kusehken, man ise ateKu erkeleng ate ia me Kukelengi." 9:16 Dage kerna pilihen Dibata labo erpalasken sura-sura tah pendahin manusia, tapi erpalasken perkuah ate Dibata ngenca. 9:17 Sabap bagi lit tersurat i bas Pustaka Si Badia, nina Dibata man raja Mesir, "Kam kuangkat jadi raja gelah arah kam teridah kuasangKu si mbelin, janah gelah arah kam gelarKu terberita i belang-belang doni." 9:18 Dage man ise ate Dibata icidahkenNa perkuah ateNa, man bana me icidahkenNa perkuah ateNa e, janah ukur ise ate Dibata ipemersikNa, ipemersik Dibata kap. 9:19 Banci jadi nungkun kam man bangku, "Adi bage ngkai ka maka isalahken Dibata manusia? Ise kin ngasup ngelawan sura-sura Dibata?" 9:20 Tapi ise kin iakapndu kam, o manusia, maka pang kam ersoal jabap ras Dibata? Banci kin ngerana kudin taneh man si nepasa, "Engkai maka bagenda aku ibahanndu?" 9:21 Ma kin sekalak pande kudin ate-atena nge erbahan kudin i bas segumpal taneh dah nari sada jadi kudin guna pemaken si meherga, janah sada nari guna pemaken si biasa? 9:22 Uga adi ituduhken Dibata ateNa rawaNa ras gegehNa nandangi tinepaNa e? Uga adi radu ras si e icidahken Dibata ateNa kesabarenNa arah kalak si nembeh ateNa e, e me kalak si patut ikernepken? 9:23 Uga adi ibahanNa bage guna encidahken sinalsal kemulianNa si mehaga nandangi kalak si ngaloken perkuah ateNa, e me kalak si enggo isikapkenNa nai-nai nari guna ngaloken kemulian si bage? 9:24 Kita me si enggo ipilihNa, labo saja i tengah-tengah kalak Jahudi nari, tapi pe i tengah-tengah kalak si deban si labo kalak Jahudi nari. 9:25 Bagi lit tersurat i bas kitap Nabi Hosea, nina Dibata, "Bangsa si gelgel nari lanai bangsangKu, Kukataken, 'BangsangKu.' Si gelgel nari la Kukelengi, genduari Kukataken, 'Keleng ateKu.' " 9:26 I bas ingan i ja ikataken man kalak, 'Kam labo bangsangKu,' i je kal pe igelari me kalak anak-anak Dibata si nggeluh. 9:27 Tapi nina nabi Jesaya kerna bangsa Israel, "Aminna gia bagi kersik i tepi lawit teremna bangsa Israel, piga-piga kalak si tading nge ngenca pagi terkelin. 9:28 Sabap keputusen ukumen Tuhan si pedas isehkenNa nandangi doni enda lanai tersimbak." 9:29 Ope denga si enda, enggo pe ikataken Nabi Jesaya, "Bicara la min ndai lit piga-piga kalak kesusurennta itadingken Tuhan si mada kuasa, enggo min ndai kita kernep bagi Sodom ras Gomora." 9:30 Kuga dage kedungenna? Kalak si deban si labo kalak Jahudi la ndarami gelah rembak ras Dibata, teridah maka ndatken kerembaken ras Dibata, erpalasken kinitekenna. 9:31 Tapi kalak Israel si ndarami gelah ia rembak ras Dibata arah Undang-undang, la ndatca. 9:32 Engkai maka lang? Sabap idaramina kerembaken e ras Dibata labo erpalasken kiniteken man Dibata, tapi erpalasken perbahanenna. Enggo terantuk nahena ku "batu antuken". 9:33 Bagi lit tersurat i bas Pustaka Si Badia, "Nehenlah, Kutamaken sada batu i Sion si erbahanca kalak tertuktuk, sada batu si erbahanca kalak guling. Tapi kalak si tek man baNa la kecewa."
10:1 O senina-seninangku, i bas pusuh peratenku ngarap kal aku gelah ikelini Dibata min bangsangku kalak Israel. Ertoto pe aku man Dibata guna si e. 10:2 Pang aku ngatakenca maka kalak Israel e tuhu-tuhu tutus er-Dibata, tapi ketutusenna e la erpalasken pemeteh si payo. 10:3 La ia nggit mperdiateken kuga Dibata ngerembakken manusia kempak diriNa. Iusahakenna erbahan kebenaren jine, seh maka la ia nggit takluk man kebenaren Dibata. 10:4 Sabap Kristus e me penggenepen Undang-undang seh maka kerina kalak si tek man baNa rembak ras Dibata. 10:5 Kerna manusia rembak ras Dibata arah ndalanken Undang-undang enggo isuratken Musa, "Kalak si ndalanken kai si ipedahken Undang-undang idatna me kegeluhen arah perbahanenna e." 10:6 Tapi kerna manusia rembak ras Dibata arah kiniteken lit tersurat i bas Pustaka Si Badia, "Ola nungkun i bas ukurndu, 'Ise nge pagi nangkih ku Surga?' (e me guna maba Kristus ku teruh, ku tengah-tengahta). 10:7 Bage pe ola nungkun i bas ukurndu, 'Ise nge pagi nusur ku teruh, ku ingan kalak si enggo mate?' (e me mpekeke Kristus i bas si mate nari)." 10:8 Dage kai kin si ikataken i bas Pustaka Si Badia? Enda me, "Kata Dibata e rembak ras kam, enggo lit i bas babahndu dingen enggo pe lit i bas pusuhndu" -- e me kata si iberitaken kami, si nuntut gelah kam erkiniteken. 10:9 Adi ngaku kam alu babahndu, "Jesus Tuhan kap," janah tek kam i bas pusuhndu maka Jesus enggo ipekeke Dibata i bas si mate nari, maka terkelin me kam. 10:10 Sabap alu pusuh me kalak erkiniteken seh maka ia irembakken ras Dibata, janah alu babah kalak ngaku seh maka ia ikelini. 10:11 I bas Pustaka Si Badia lit tersurat, "Ise tek man baNa la kecewa." 10:12 Si enda maksudna kerina manusia, sabap labo lit lainna kalak Jahudi ras kalak Junani. Sada ngenca Tuhan, e me Tuhan kerina manusia. Ia melumbar mere man kalak si erlebuh man baNa. 10:13 Bagi lit tersurat i bas Pustaka Si Badia, "Kerina kalak si erlebuh mindo penampat man Tuhan, ikeliniNa nge." 10:14 Tapi kuga banci kalak erlebuh mindo penampat man Tuhan adi langa ia tek man baNa? Kuga banci ia tek man baNa adi langa pernah ibegina pe kerna Ia? Kuga banci ibegina adi la lit si meritakenca? 10:15 Kuga banci kalak meritaken berita e adi la ia isuruh? I bas Pustaka Si Badia lit tersurat, "Seh kal tuhu ulina kerehen kalak si maba Berita Si Meriah e." 10:16 Tapi labo kerina kalak mehuli pengalo-ngalona nandangi Berita Si Meriah e. Nina Nabi Jesaya, "O Tuhan, ise nge tek nandangi berita si ipeseh kami?" 10:17 Dage kiniteken rehna arah megi Berita e, janah isi Berita e, e me Kata kerna Kristus. 10:18 Tapi nungkun aku: Tuhu kin nge la ibegina berita e? Tentu saja enggo ibegina. Bagi lit tersurat i bas Pustaka Si Badia, "Sorana enggo terbegi ku belang-belang doni enda, janah katana enggo seh ku tampuk doni." 10:19 Nungkun ka aku: Uga kerna Israel? Ntah la kin iangkana? Guna njabap penungkunen enda, perlebe kubuat si enggo isuratken Musa, "Nina Dibata, 'Mecimberu kam pagi Kubahan nandangi bangsa si labo bangsa pilihenKu, merawa pagi atendu Kubahan nandangi bangsa si motu.' " 10:20 Janah lebih asa si e Nabi Jesaya ngerana alu la biar-biaren, nina, "Nina Dibata, 'Kalak si la ndarami Aku, jumpa ras Aku; Kucidahken diringKu man kalak si la nungkuni kerna Aku.' " 10:21 Tapi man kalak Israel, nina Dibata, "Gedang-gedang wari Kududurken tanKu man bangsa si la patuh dingen si nimbak."
11:1 Dage nungkun aku: Enggo kin itulak Dibata bangsa pilihenNa e? Tentu lang! Aku pe kalak Israel nge, kesusuren Abraham, janah i bas suku Benyamin nari. 11:2 Labo itulak Dibata bangsaNa si enggo itandaiNa nai nari. Tentu enggo ietehndu si tersurat i bas Pustaka Si Badia kerna Elia, asum ia ertoto ngaduken bangsa Israel man Dibata, nina, 11:3 "O Tuhan, enggo ibunuhna nabi-nabiNdu, janah enggo irontaskenna batar-batarNdu. Aku nari ngenca tading, janah kesahku pe ibuatna atena." 11:4 Kuga nina Dibata ngaloi Elia? Nina Dibata, "Enggo Kuserapken man bangKu pitu ribu kalak si langa pernah ersembah man dewa Baal." 11:5 Bage me genduari enda: lit piga-piga kalak si tading si enggo ipilih Dibata erkiteken lias ateNa. 11:6 Dibata milih labo erpalasken kai si enggo ibahan kalak e, tapi erkiteken ateNa nge. Sabap adi erpalasken perbahanen manusia kin Dibata e milih, maka lias ateNa e lanai bo lias ate si tuhu-tuhu. 11:7 Kuga dage? Kai si idarami Israel la idatna. Tapi piga-piga kalak si enggo ipilih Dibata e ngenca si ndatsa. Si debanna e kerina ipemersik ukurna. 11:8 Bagi lit tersurat i bas Pustaka Si Badia, "Ibahan Dibata maka bene kal ukurna, janah seh paksa enda matana lanai erpengidah janah cupingna lanai erpemegi." 11:9 Bage me pe si ikataken Daud, "Mbera-mbera kerja si ibahanna jadi siding, jadi ragum, batu antuken ras ukumen man bana. 11:10 Mbera-mbera seleng matana gelah ola ia erpengidah; janah mbengkunglah ia rasa lalap ibahan kesusahenna." 11:11 Nungkun ka aku: Asum kalak Jahudi tertuktuk nai, guling kin ia seh ampar? Tentu lang! Tapi erkiteken kalak Jahudi enggo erdosa, ibereken Dibata kesempaten e man bangsa si deban gelah mengga ate bangsa Jahudi nandangi bangsa si deban e. 11:12 Bangsa Jahudi la erkemalangen man Dibata janah la setia man baNa. Si enda maba pasu-pasu man kerina bangsa-bangsa si deban i doni enda. Apai denga ka adi hubungen bangsa Jahudi ras Dibata jadi mehuli mulihken, tentu beliden ka pasu-pasu si ibereken Dibata. 11:13 Kukataken man bandu o kam kalak si labo Jahudi: Kidekah aku rasul guna kalak si labo Jahudi, megah kuakap i bas dahinku e. 11:14 Banci jadi ngasup aku erbahan bangsangku ermengga ate, gelah erkiteken si e ikelini Dibata ia deba-deba. 11:15 Sabap adi enggo itulak Dibata ia, doni enda jadi teman ras Dibata. Tapi kuga nge adi ialoken Dibata bangsa Jahudi e mulihken? Tentu si e bali ras si mate nggeluh mulihi. 11:16 Adi cimpa si pemena khusus ibereken man Dibata, maka kerina cimpa e pe jadi sikerajangenNa. Janah adi urat kayu ikhususken man Dibata maka dahan-dahan kayu e pe jadi sikerajangenNa. 11:17 Piga-piga dahan batang seton enggo itektek, jenari icangkokken ku batangna e sada dahan seton kerangen. Kam kalak si labo Jahudi iumpamaken bali ras batang seton si turah i kerangen e, janah genduari kam enggo ndat bagin si mehuli bagi si enggo inanami kalak Jahudi. 11:18 E maka ola kam megombang man kalak si bali ras dahan si enggo itektek e. La kap lit dalanna maka kam megombang. Sabap kam dahan nge ngenca, labo kam natang urat-urat tapi urat-urat nge natang kam. 11:19 Tapi nggit me maka nindu, "Dahan-dahan e itektek gelah aku banci icangkokken ku batang e." 11:20 Tuhu bage. Bangsa Jahudi e enggo itektek erkiteken la ia tek, tapi kam tetap leket i bas batang e erkiteken tek kam. Amin bage pe ola meganjang ukurndu kerna si e, tapi erkemalangenlah kam man Dibata. 11:21 Sedangken bangsa Jahudi pe la Dibata alang-alangen ngambengkenca, apai denga ka kam? 11:22 Dage teridah man banta uga belinna lias ate Dibata bage pe kuga Ia la alang-alangen ngukum kalak. La Ia mbiar ngukum kalak si enggo erdosa, tapi melias Ia man bandu adi tetap kam erbahan si ngena ateNa, gelah tetap kam ngenanami kiniulinNa; tapi adi lang, kam pe iambekkenNa nge. 11:23 Janah kalak Jahudi, adi jera ia janah tek, icangkokken Dibata me ia mulih ku batang e, sabap Dibata ngasup nge erbahan si bage pe. 11:24 Kam kalak si labo Jahudi bali ras dahan seton kerangen si enggo itektek, jenari icangkokken ku batang seton si ipiara. Si enda erlawanen ras kebiasan. Kalak Jahudi bali ras batang seton si ipiara; tentu sukahen nge iakap Dibata encangkokken mulihi dahan asli ku batangna jine. 11:25 O senina-seninangku, gelah ola iakapndu beluh bandu, perlu kuakap ietehndu rahasia enda: Ukur kalak Jahudi labo mersik seh rasa lalap, tapi ngayak kuh bilangen kalak si labo Jahudi jadi anak-anak Dibata. 11:26 Dage kerina nge pagi kalak Israel ikelini. Bagi lit tersurat i bas Pustaka Si Badia, "Si Engkelini e pagi rehna i Sion nari janah imasapkenNa me kerina kejahaten kesusuren Jakup." "Nina Dibata, 11:27 'Kubahan me iketen padan ras ia, tupung Kualemi dosa-dosana.' " 11:28 Erkiteken itulak kalak Jahudi Berita Si Meriah, e maka jadi imbang Dibata ia, tapi si enda jadi keuntungen man bandu o kalak si labo Jahudi. Tapi erkiteken pilihen Dibata, kalak Jahudi e teman Dibata nge, erkiteken nini kalak Jahudi e. 11:29 Dibata labo erkadiola adi Ia enggo milih dingen masu-masu. 11:30 Bali nge ras kam nai, o kalak si labo Jahudi, nai la kam erkemalangen man Dibata; tapi genduari erkiteken kalak Jahudi la erkemalangen man Dibata enggo ialokenndu perkuah ate Dibata. 11:31 Bage me pe kalak Jahudi genduari la erkemalangen man Dibata gelah arah perkuah ate si enggo ialokenndu e ialokenna ka perkuah ate. 11:32 Sabap kerina manusia la erkemalangen man Dibata. E maka lanai lit dalanna pulah ibahan Dibata. Si enda ibahanNa alu perayaken gelah banci icidahkenNa perkuah ateNa man kerinana. 11:33 Seh kal tuhu bayakna Dibata! Seh kal tuhu bagesna kepentaren ras pemetehNa! Ise kin ngasup nerangken keputusen-keputusenNa? Ise ngasup ngikuti dalan si idalaniNa? 11:34 Bagi lit tersurat i bas Pustaka Si Badia, "Ise kin meteh perukuren Tuhan? Ise kin ngasup ngajarken Ia? 11:35 Ise kin pernah mere man baNa gelah ndatken balasen i bas Ia nari?" 11:36 Sabap kerina si nasa lit Dibata njadikenca, janah kerina e lit erkiteken Ia dingen man gunaNa. Terpujilah Dibata seh rasa lalap. Amin.
12:1 O senina-seninangku, nginget perkuah ate Dibata si mbelin si isehkenNa man banta, kupindo man bandu: Endeskenlah kulandu man Dibata saja selaku persembahen si nggeluh rikutken si ngena ateNa. Sabap bage me arusna kam ersembah man Dibata sue ras biakndu selaku mahluk si rukur. 12:2 Ola pelepas dirindu jadi seri ras doni enda, tapi berelah maka perukurenndu ipelimbarui Dibata. Alu bage banci idatndu kai sura-sura Dibata, kai si mehuli, kai si ngena ateNa, janah kai si sempurna. 12:3 Janah erpalasken lias ate Dibata si enggo iberekenNa man bangku, kukataken man bandu kerina: Ola iakapndu ganjangen bandu asa patutna. Tapi arus maka rembang tengah pengukurindu kerna dirindu sue ras belinna kiniteken si enggo ibagi-bagiken Dibata man bandu sekalak-sekalak. 12:4 I bas kulanta si sada enda melala ringringna, janah kerina ringring e lit gunana. 12:5 Bage pe, amin nterem gia kita, tapi sada kula kap kita i bas persadanta ras Kristus, janah kita ipersada kerina bagi ringring i bas sada kula. 12:6 E maka sipergunakenlah kengasupenta si pelai-lain e si enggo ibereken Dibata man banta rikutken lias ateNa. Adi man banta ibereken Dibata kengasupen ernubuat, silakokenlah e sue ras ajaren kiniteken. 12:7 Adi man banta ibereken Dibata kengasupen guna nampati kalak, sisampatilah ia. Adi man banta ibereken Dibata kengasupen ngajar, ngajarlah kita. 12:8 Adi man banta ibereken Dibata kengasupen petetap ukur kalak, silakokenlah e. Kalak si ngasup mere man kalak si deban arus iberekenna e alu ukur menahang; kalak si lit kengasupenna jadi peminpin, arus ia tutus erdahin; kalak si ngasup encidahken perkuah ate man kalak si deban, arus ibahanna e alu ukur meriah. 12:9 Keleng ate ola min alu pekulah-kulah. Cigalah atendu si jahat janah persadalah dirindu ras si mehuli. 12:10 Sikeleng-kelengenlah kam bagi si ersenina. Silebe-lebenlah kam i bas mpehaga teman. 12:11 Ola kam mekisat, tapi tutuslah erdahin. Ergiah-giahlah ukurndu i bas ndahiken dahin Tuhan. 12:12 Meriahlah atendu i bas kam erpengarapen, megenggenglah kam i bas kiniseranndu, janah ertotolah kam man Dibata la erngadi-ngadi. 12:13 Raskenlah kinilitenndu ras temanndu si sada kiniteken, janah alokenlah kalak si reh kesilang ku rumahndu. 12:14 Pasu-pasulah kalak si pesega-sega kam, pasu-pasulah, ola sumpahi. 12:15 Meriahlah ukurndu ras kalak si ermeriah ukur, tangislah kam ras kalak si tangis. 12:16 Sekalak-sekalak kam arus mperdiateken keperlun kalak si deban. Ola meganjang ukurndu, tapi pertemanilah kalak si meteruk pe. Ola beluh iakapndu bandu. 12:17 Adi lit kalak erbahan jahat man bandu, ola balas alu kejahaten. Bahanlah si mehuli rikutken pengakap jelma si nterem. 12:18 Asa ngasupndu usahakenndulah gelah meriah kam ras kerina kalak. 12:19 O teman, ola kal kam erbalas, tapi berelah dalan man Dibata guna nehken rawaNa. Sabap nina Tuhan i bas Pustaka Si Badia, "Kuukum me pagi! Kubalas me pagi!" 12:20 Tapi lit ka pe tersurat i bas Pustaka Si Badia, "Adi melihe imbangndu, bere manlah ia; adi muas ia, bere minemlah. Sabap adi bage perbahanenndu, mela dingen melas me iakapna." 12:21 Ola pelepas kam talu ibahan si jahat, tapi talukenlah si jahat e alu perbahanen si mehuli.
13:1 Kerina kam arus patuh man pemerentah si erkuasa, sabap labo lit pemerentah si la i bas Dibata nari, janah pemerentah si lit genduari e pe Dibata nge netapkenca. 13:2 Kalak si ngelawan pemerentah si lit e, ilawanna kap kai si enggo itetapken Dibata, janah kalak si bage perbahanenna, ilegina kap ukumen nandangi dirina jine. 13:3 Kalak si mehuli perbahanenna, labo mbiar man pemerentah; kalak si jahat perbahanenna nge si mbiar. Adi atendu gelah ola kam mbiar man pemerentah, bahanlah si mehuli, gelah pemerentah muji kam. 13:4 Sabap pemerentah e kap persuruhen Dibata si erdahin guna kiniulinndu. Tapi adi kam erbahan jahat, mbiarlah man bana, sabap labo sia-sia lit senjata i bas pemerentah guna ngukum. Persuruhen Dibata kap ia janah ia me si nehken ukumen si reh i bas Dibata nari nandangi kalak si erbahan jahat. 13:5 Erkiteken si e, patuhlah kam nandangi pemerentah, labo saja erkiteken mbiar kena ukumen, tapi erkiteken pusuh peratenndu pe nuruh kam. 13:6 Erkiteken si enda me pe maka kam arus nggalar pajak, sabap pemerentah ngaloken jabatenna i bas Dibata nari, janah alu bulat ukur idalankenna tugas-tugasna e. 13:7 E maka berekenlah man sekalak-sekalak kai si patut ialokenna. Galarilah pajakndu man si ngaloken pajak, cuke man pemungut cuke. Hamatilah kalak si patut ihamatindu, janah pehagalah kalak si patut ipehagandu. 13:8 Ola kam rutang man ise pe -- seakatan rutang sikeleng-kelenglah sapih-sapih kam. Kalak si erkeleng ate nandangi kalak si deban, ia enggo nehken Undang-undang. 13:9 Sabap pedah "Ola erlua-lua; ola munuh; ola nangko; ola mengga ate;" -- kerina si enda ras pedah-pedah si debanna ipersada i bas pedah si sada enda, e me, "Kelengilah temanndu manusia bagi kam engkelengi dirindu." 13:10 Kalak si erkeleng ate man temanna manusia asa ndigan pe labo ibahanna si jahat. Dage alu nehken kekelengen enggo kap bali ras nehken kerina Undang-undang. 13:11 Si enda arus idalankenndu, sabap ietehndu maka enda me paksa si menentuken man bandu. Enggo seh jamna maka kam medak. Sabap warina kita ikelini Dibata deheren genduari asangken asum tangtangna kita tek nai. 13:12 Sabap berngi lawes ku siangna me, janah nandangi terang me wari. E maka sitangtangilah perbahanen si gelap, janah sipakelah senjata guna erperang i bas terang. 13:13 Mehulilah min lagu langkahta, bagi kalak si nggeluh i bas terang wari; ola erpesta minem-minem mabuk-mabuk; ola erlua-lua ntah la meteh mela; ola rubat ntah pe mecimberu. 13:14 Tapi cidahkenlah biak Jesus Kristus i bas geluhndu. Janah ola asuhi i bas ukurndu sura-sura guna ngikutken dingen pepuasken biakndu si erdosa.
14:1 Alokenlah kalak si merampek kinitekenna. Ola sijabapen ras ia kerna penggejapenna. 14:2 Kalak si deban kinitekenna erbahanca maka kai pe banci ipanna, tapi kalak si merampek kinitekenna gule-gulen saja ngenca ipanna. 14:3 Kalak si kai pe banci ipanna e ola megombang nandangi kalak si man gule-gulen saja; kalak si gule-gulen saja ngenca ipanna ola isalahkenna kalak si kai pe ipanna e, sabap ia enggo ialoken Dibata. 14:4 Ise kin kam maka isalahkenndu juak-juak kalak? Tuanna nge si metehsa perguling ras pertedisna. Janah si tuhuna tetap nge pertedisna, sabap Tuhan ngasup erbahanca ia tedis. 14:5 Lit kalak erpengakap maka wari-wari tertentu pentingen asangken wari-wari si deban, tapi lit ka kalak erpengakap bali nge kerina wari-wari e. Kerna si e arus maka sekalak-sekalak netapken ukurna. 14:6 Kalak si erpengakap maka lit sada wari si tertentu si lebih penting, ibahannalah e guna Tuhan. Kalak si kai pe ipanna, ibahannalah e guna Tuhan, sabap ikatakenna nge bujur man Dibata. Kalak si labo kerina pangan ipanna, ibahannalah guna Tuhan, janah ikatakennalah bujur man Dibata. 14:7 Sekalak pe kita enda labo nggeluh guna dirinta saja; sekalak pe kita enda labo mate guna dirinta saja. 14:8 Adi nggeluh kita, kita nggeluh guna Tuhan, janah adi mate kita, kita mate guna Tuhan. Dage nggeluh tah mate gia kita, sikerajangen Tuhan kap kita. 14:9 E me sabapna maka Kristus mate jenari mulihi, gelah Ia jadi Tuhan kalak si nggeluh ras kalak si enggo mate. 14:10 Dage ngkai maka isalahkenndu temanndu si sada kiniteken i bas pihak si deban? Janah ngkai maka pihak si sada nari megombang kam nandangi temanndu si sada kiniteken? Sabap kerina nge pagi kita tedis i lebe-lebe Dibata guna iadili. 14:11 Bagi lit tersurat i bas Pustaka Si Badia, "Nina Tuhan, 'Ersumpah Aku maka kerina pagi manusia erjimpuh i lebe-lebengKu,' janah kerina pagi babah ngaku maka Aku kap Dibata." 14:12 Dage sekalak-sekalak kita arus pagi mereken pertanggungen jawabenna man Dibata guna dirina jine. 14:13 Dage olanai kita sisalah-salahen pekepar. Tapi tetapkenlah i bas ukurndu maka ola ibahanndu guling ntah kitik ukur teman-temanndu si sada kiniteken. 14:14 Sue ras si iajarken Tuhan Jesus kueteh dingen tek aku maka labo lit pangan si biak man pantangenken; tapi adi lit kalak erpengakap maka lit deba-deba pangan si man pantangenken, ipantangkennalah e. 14:15 Adi menek ate senina-seninandu ibahanndu erkiteken panganndu, perbahanenndu e lanai erpalasken kekelengen. Ola pelepas kai si ipanndu meneken temanndu si sada kiniteken; ingetlah maka Kristus enggo mate guna ia. 14:16 Ola pelepas kai si iakapndu mehuli e icap kalak la mehuli. 14:17 Sabap i bas Kinirajan Dibata, aturen kerna pangan ras inemen labo penting. Si penting e me perbahanen si mehuli, kemalemen ate ras keriahen si ibereken Kesah Si Badia. 14:18 Kalak si bage perbahanenna selaku si erdahin Kristus, ngena ate Dibata dingen iergaken manusia pe ia. 14:19 E maka sidaramilah kai si erbahanca maka kalak tetap nggeluh alu dame bage pe si peteguh kinitekenta pekepar. 14:20 Janah ola erkiteken pangan icedakenndu pendahin Dibata. Kerina pangan banci ipan tapi salah me kam adi erkiteken kai si ipanndu e kalak si deban guling. 14:21 Ulin la kam man daging ntah minem anggur ntah ngelakoken kai si debanna adi e erbahanca temanndu si sada kiniteken monggar. 14:22 Adi tek kam maka kerina pangan banci ipan, lakokenlah e guna dirindu jine i lebe-lebe Dibata. Ketuahen kalak si pusuh peratenna la nalahken ia i bas ia ndalanken kai si iakapna mehuli. 14:23 Tapi kalak si sangsi enggo ersalah iakapna bana adi ipanna, sabap e la turah i bas kiniteken nari. Kerina si ibahan kalak si la turah i bas kiniteken nari, dosa kap.
15:1 Kita si megegeh kinitekenta arus nampati kalak si merampek kinitekenna, guna mersan babanna. Ola dirinta ngenca siukuri. 15:2 Tapi sekalak-sekalak kita arus mperdiateken temanta manusia janah ngukuri kai si mereken kiniulin man bana gelah alu bage erteguhna kinitekenna. 15:3 Sabap Kristus pe labo diriNa saja iukuriNa, bagi lit tersurat i bas Pustaka Si Badia, "Isak-isak kalak si ngisakken Kam enggo ndabuh man bangku." 15:4 Kerina si tersurat i bas Pustaka Si Badia isuratken ngajari kita gelah erpengarapen erkiteken kesabaren ras pergegeh si ibereken Pustaka Si Badia man banta. 15:5 Mbera-mbera Dibata ulu kesabaren ate dingen ulu pergegeh erbahanca ersada ukurndu kerina erkiteken Jesus Kristus jadi usihenndu. 15:6 Gelah kerina kam, alu ersada sora banci muji Dibata, Bapa Tuhanta Jesus Kristus. 15:7 Bagi Kristus enggo ngaloken kam, kam pe alokenlah temanndu sapih-sapih kam gelah terpuji Dibata. 15:8 Sabap kukataken man bandu maka Kristus enggo erdahin guna kalak Jahudi lako encidahken maka Dibata setia i bas nehken padanNa man nininta nai. 15:9 Janah gelah kalak si labo Jahudi pe banci muji Dibata erkiteken perkuah ateNa. Bagi lit tersurat i bas Pustaka Si Badia, "E maka kukataken bujur man baNdu, i tengah-tengah bangsa-bangsa si deban, rende me aku muji gelarNdu." 15:10 Tole nina, "O kam kalak si labo Jahudi, meriahlah atendu ras bangsa pilihen Dibata." 15:11 Lit ka pe tole tersurat, "Pujilah Tuhan o kam kerina kalak si labo Jahudi; pujilah Ia o kerina bangsa." 15:12 Bage pe nina Nabi Jesaya, "Turah me tunas i bas urat Isai nari, keke me Ia pagi guna merentah kalak si labo Jahudi, janah man baNa me kalak si labo Jahudi e erpengarapen." 15:13 Dibata sumbul pengarapen, Ialah ndemi kam alu keriahen ras kemalemen ate, erpalasken kinitekenndu man baNa, gelah erkiteken gegeh Kesah Si Badia reh tambahna pengarapenndu man baNa. 15:14 O seninang-seninangku, kugejap tuhu-tuhu maka melala kal si mehuli i bas kam. Kam pe dem alu erbage-bage pemeteh maka kam ngasup siajar-ajaren. 15:15 Tapi i bas surat enda enggo kusuratken piga-piga persoalen man bandu alu terus terang gelah mpersingeti kam mulihken. Pang aku nurutkenca erkiteken lias ate Dibata si enggo iberekenNa man bangku. 15:16 Lias ateNa e enggo ngangkat aku jadi pejabat Kristus Jesus guna kalak si labo Jahudi. Aku erdahin selaku imam si meritaken Berita Si Meriah si rehna i bas Dibata nari, gelah kalak si labo Jahudi e banci desken sada persembahen si ngena ate Dibata si ikhususken Kesah Si Badia man Dibata. 15:17 Dage megah kuakap i bas persadanku ras Jesus Kristus erkiteken pendahinku guna Dibata. 15:18 Kai si ibahan Kristus arah aku, e ngenca aku pang ngatakenca, e me mabai kalak si labo Jahudi e erkemalangen man Dibata. erkemalangen ia man Dibata arah kata si kubelasken ras arah perbahanen si kubahan. 15:19 Arah gegeh tanda-tanda sengget si mbelin, bage pe arah gegeh Kesah Si Badia. Bage me i bas aku niari daerah-daerah mulai i Jerusalem nari seh ku propinsi Iliria enggo serser kuberitaken Berita Si Meriah kerna Kristus. 15:20 Sura-surangku si mbelinna e me meritaken Berita Si Meriah ku ingan i ja langa pernah ibegi kalak kerna gelar Kristus, gelah ola aku tempa-tempa majekken rumah i babo palas si enggo ipajekken kalak si deban. 15:21 Bagi lit tersurat i bas Pustaka Si Badia, "Kalak si man bana langa iberitaken kerna Ia, idahna me pagi, janah kalak si langa pernah megi, iangkana me pagi." 15:22 E me sabapna maka lit rusur abatna man bangku guna reh ndahi kam. 15:23 Tapi genduari enggo dung dahinku i daerah-daerah enda. Janah erkiteken enggo piga-piga tahun dekahna aku ersura-sura ndahi kam, 15:24 ngarap aku maka i bas perdalanenku ku Sepanyol denggo banci aku singgah dingen jumpa ras kam. Janah ateku isampatindu aku i bas perdalanenku ku jah kenca kita ras piga-piga dekah. 15:25 Tapi genduari lawes aku ku Jerusalem guna naruhken penampat man perpulungen si i jah. 15:26 Sabap perpulungen-perpulungen si lit i Propinsi Makedoni ras Akaya enggo ersada arih mereken penampat guna nampati si musil i tengah-tengah perpulungen i Jerusalem. 15:27 Si enda itetapkenna alu ukurna meriah. Janah si tuhuna rutang nge ia nampati kalak si musil e, sabap adi kalak si labo Jahudi e enggo ngaloken keperlun pertendinna i bas kalak Jahudi nari, rutang pe ia nampati kalak Jahudi e alu mereken keperlun kula si tep-tep wari. 15:28 Kenca dung dahinku enda, janah kenca kuendesken buah kiniteken enda man bana, berkat me aku ku Sepanyol, janah i bas perdalanenku ku jah singgah aku i jena. 15:29 Tek aku maka sanga aku reh pagi ndahi kam, dem pagi kubaba pasu-pasu si rehna i bas Kristus nari. 15:30 O senina-seninangku, erkiteken Tuhan Jesus Kristus dingen erkiteken kekelengen si enggo ibereken Kesah Dibata man banta, kupindo man bandu maka ras-ras min kita ertoto man Dibata alu tutus ate guna aku. 15:31 Ertotolah kita gelah aku terkelin i bas bahaya si rehna i bas kalak Judea si la tek man Jesus Kristus, janah anak-anak Dibata si Jerusalem ermeriah ukur ngaloken pendahinku man bana. 15:32 Janah adi bage ate Dibata, reh me aku ndahi kam alu dem keriahen, gelah arah kerehenku e kita ras-ras pekesahken alu senang. 15:33 Dibata sumbul kemalemen ate man banta, nemani kam kerina gelah! Amin.
16:1 Ateku mpetandaken turangta Pebe man bandu. Ia sekalak diaken i bas perpulungen si lit i Kenkerea. 16:2 Alokenlah ia i bas gelar Tuhan, bagi arusna ibahan anak-anak Dibata. Sampatilah ia i bas kai pe si iperlukenna i bas kam nari; sabap ia jine enggo nterem kalak isampatina janah aku pe enggo isampatina. 16:3 Mejuah-juah man Persila ras perbulangenna Akuila, temanku sada dahin i bas dahin Kristus Jesus. 16:4 Si la mbiar ngasamken kesahna man gunangku. Mbue bujur kukataken man bana, labo aku saja ngataken bujur man bana, tapi pe kerina perpulungen-perpulungen kalak si labo Jahudi. 16:5 Mejuah-juah pe kukataken man perpulungen si make rumahna jadi ingan kebaktin. Mejuah-juah man Epenetus temanku si kukelengi, kalak si pemenana tek man Kristus i Propinsi Asia. 16:6 Mejuah-juah man Maria si enggo latih erdahin gunandu. 16:7 Mejuah-juah man Andronikus ras Junias, temanku sebangsa si pernah ipenjaraken ras aku. Duana ia terberita selaku perintis i bas meritaken Berita Si Meriah janah leben nge ia duana jadi Kristen asangken aku. 16:8 Mejuah-juah man Ampliatus, temanku si kukelengi i bas Tuhan. 16:9 Mejuah-juah man Urbanus, temanta si sada dahin i bas dahin Kristus janah man Stahis temanku si kukelengi. 16:10 Mejuah-juah man Apeles si enggo icidahkenna kesetianna man Kristus. Mejuah-juah man Aristobulus sada jabu. 16:11 Mejuah-juah man Herodian, temanku sebangsa, ras man senina-senina i bas keluarga Narkisus nari si lit i bas persadan ras Tuhan. 16:12 Mejuah-juah man Tripena ras Triposa si enggo latih erdahin guna dahin Tuhan, bage pe man Persis si kukelengi si enggo mbue erdahin i bas dahin Tuhan. 16:13 Mejuah-juah man Rupus kalak pilihen i bas dahin Tuhan bage pe man nandena si perbahanenna man bangku bali ras man anakna jine. 16:14 Mejuah-juah man Asinkritus, Pelegon, Hermes, Petrobas, Hermas, ras kerina senina-seninanta si sada kiniteken si ras kalak enda. 16:15 Mejuah-juah man Pilologus ras Julia, man Nerus ras turangna, man Olimpas ras kerina anggota anak-anak Dibata si ras kalak e. 16:16 Katakenlah mejuah-juah sapih-sapih kam arah sisalam-salamen alu dem ate keleng. Kerina perpulungen-perpulungen Kristus ngataken mejuah-juah man bandu. 16:17 Kupindo man bandu o senina-seninangku: Metengetlah nandangi kalak si erbahanca pecah perpulungen dingen si erbahanca kalak papak alu ngelawan pengajaren si enggo ipelajarindu. Ola deherindu kalak si bage! 16:18 Sabap kalak si bage labo erdahin guna Tuhanta, Kristus, tapi guna beltekna saja nge. Alu ranan mehuli dingen muji-muji itipuna kalak si bujur-bujur ukurna. 16:19 Kepatuhenndu nandangi Dibata enggo terberita ku japa pe. E maka malem ateku erkiteken kam. Amin bage gia ateku min gelah pentar kam i bas si mehuli tapi bersih kam i bas perbahanen si jahat nari. 16:20 Janah Dibata sumbul kemalemen ate man banta minter me engkernepken Iblis i teruh tapak-tapak nahendu. Lias ate Tuhanta Jesus ras kam kerina gelah. 16:21 Timotius temanku sada dahin, ras Lusius, Jason, bage pe Sosipatrus, e me teman-temanku sebangsa, nehken berita mejuah-juah man bandu. 16:22 Aku pe, Tertius, si enggo nuratken surat enda, nehken berita mejuah-juah man bandu i bas Tuhan. 16:23 Gayus inganku kesilang, si i bas rumahna perpulungen pulung, nehken berita mejuah-juah man bandu. Bage pe Erastus e me bendahara kuta enda ras seninanta Kuartus nehken berita mejuah-juah man bandu. 16:24 Lias ate Tuhanta Jesus Kristus, ras kam kerina gelah! Amin. 16:25 Pujin man Dibata si ngasup mpeteguh kam i bas kiniteken rikutken Berita Si Meriah si kuberitaken, e me berita kerna Jesus Kristus dingen rikutken tangkasna rahasia si terbuni nai-nai nari. 16:26 Tapi genduari rahasia e enggo tangkas arah kai si isuratken nabi-nabi. Janah erkiteken pedah Dibata, e me Dibata si rasa lalap, rahasia e ipebetehken me man kerina bangsa, gelah kerina banci erkemalangen erpalasken kiniteken man baNa. 16:27 Terpujilah Dibata seh rasa lalap arah Jesus Kristus; Ia kap ngenca si mada kepentaren. Amin.
1:1 Surat enda rehna i bas aku nari, Paulus si enggo ipilih Dibata rikutken sura-suraNa, jadi rasul Kristus Jesus, bage pe i bas seninanta Sostenes nari. 1:2 Surat enda man perpulungen ni Dibata i Korinti, e me man kerina kalak si ipilih ras ikhususken Dibata jadi sikerajangenNa i bas persadan ras Kristus Jesus. Surat enda pe man kerina kalak subuk i japa pe ia ringan, si ertoto i bas gelar Tuhanta Jesus Kristus, e me Tuhanna dingen Tuhanta. 1:3 Dibata Bapanta ras Tuhanta Jesus Kristuslah mereken lias ate ras kemalemen ate man bandu. 1:4 La erngadi-ngadi kukataken bujur man Dibatangku kerna kam, erkiteken lias ate si enggo iberekenNa man bandu arah Kristus Jesus. 1:5 Sabap i bas persadanndu ras Kristus, kam enggo ipebayak i bas kai pe, i bas pengeranandu bage pe i bas pemetehndu. 1:6 Berita kerna Jesus Kristus enggo enteguh i tengah-tengahndu. 1:7 Seh maka i bas kam nimai Tuhanta Jesus Kristus encidahken diriNa, la kam kurang kai pe kerna pemere-pemereNa. 1:8 Janah Kristus pe ngepkep kam seh ku kedungenna, gelah sanga Ia reh pagi ngadili doni enda idapetiNa kam la ersalah. 1:9 Dibata e terteki kal. Ia kap si ndilo kam ku bas persadan ras AnakNa Jesus Kristus Tuhanta. 1:10 O senina-senina, kupindo man bandu i bas gelar Tuhanta Jesus Kristus: ersadalah katandu kerina, gelah ola sempat jadi perpecahen i tengah-tengahndu. Ersadalah ukurndu janah ersadalah sura-surandu. 1:11 Sabap piga-piga kalak i bas jabu Klue nari ngatakenca man bangku maka i tengah-tengahndu lit turah perjengilen. 1:12 Maksudku e me: maka sekalak-sekalak kam enggo erpihak-pihak. Lit si ngatakenca, "Aku arah Paulus," lit ka si ngatakenca, "Aku arah Apolos," deba nina, "Aku arah Petrus," janah lit pe si ngatakenca, "Aku arah Kristus." 1:13 Ibagi-bagiken kin Kristus man bandu? Paulus kin si mate i kayu persilang man gunandu? I bas gelar Paulus kin kam iperidiken? 1:14 Kukataken bujur man Dibata sabap sekalak pe kam la aku mperidikenca, seakatan Krispus ras Gayus. 1:15 Dage sekalak pe kam la banci ngatakenca maka kam nai iperidiken gelah jadi ajar-ajarku. 1:16 Lupa aku! Istepanus ras isi jabuna pe nai aku nge kepe mperidikenca; tapi lain si e la lit kuinget kalak si deban si kuperidiken. 1:17 Aku isuruh Kristus labo guna mperidiken, tapi guna meritaken Berita Si Meriah, janah e pe labo erkiteken kinibeluhen manusia ngerana, gelah ola lasam kematen Kristus i kayu persilang. 1:18 Sabap berita kerna kematen Kristus i kayu persilang jadi kebodohen man kalak si nuju ku kebenen, tapi man banta si nuju ku keselamaten, berita e me gegeh Dibata. 1:19 Sabap nina Dibata bagi tersurat i bas Pustaka Si Badia, "Kukernepken me kepentaren kalak si pentar, janah Kusia-siaken me kinibeluhen kalak si beluh." 1:20 Dage, kai ertina kalak pentar, kalak si erpemeteh, ras tukang njabapi jaman enda adi enggo ijadiken Dibata kepentaren doni enda jadi kebodohen? 1:21 Sabap doni enda la ngasup nandai Dibata alu kepentarenna, e maka kepentaren Dibata enggo netapken guna nelamatken kalak si tek kerna berita si iakap doni enda e me kebodohen. 1:22 Kalak Jahudi mindo tanda sengget jadi bukti, janah kalak Junani ndarami kepentaren. 1:23 Tapi si iberitaken kami e me Kristus si ipakuken i kayu persilang. Berita enda erbahanca megelut kalak Jahudi janah kebodohen iakap kalak si deban si labo kalak Jahudi. 1:24 Tapi man kalak si enggo ipilih Dibata, subuk kalak Jahudi bage pe kalak Junani, Kristus e kap gegeh Dibata ras kepentaren Dibata. 1:25 Sabap kai si tempa-tempa kebodohen Dibata, si tuhuna pentaren asangken kepentaren manusia, janah kai si tempa-tempa kinilangasupen Dibata, si tuhuna gegehen asangken gegeh manusia. 1:26 O senina-senina, ingetlah kuga nai kam asum ipilih Dibata. La piga kam si pentar, ntah erkuasa, ntah pe kesusuren kalak si mehaga rikutken anggapen manusia. 1:27 Tapi guna pekitik kalak pentar, ipilih Dibata kalak bodoh rikutken anggapen doni enda; janah guna pekitik kalak si mbisa, ipilih Dibata kalak si la megegeh rikutken anggapen doni enda. 1:28 IpilihNa pe kalak si la meherga, si hina, dingen si la terpake iakap doni enda, guna engkernepken kai si ianggap doni enda penting. 1:29 Gelah ola ise pe meganjang ukurna i lebe-lebe Dibata. 1:30 Tapi kam enggo ipersadaken Dibata ras Kristus Jesus, janah enggo itetapken Dibata maka Kristus Jesus jadi kepentarenta. Erkiteken Kristus nge maka kita enggo rembak ras Dibata, khusus jadi sikerajangenNa, janah kita enggo itebusiNa. 1:31 E maka bagi lit tersurat i bas Pustaka Si Badia, "Kalak si ermegah ate, megahlah akapna kerna Tuhan."
2:1 O senina-seninangku, asum reh aku nai ndahi kam meritaken rahasia kebenaren Dibata, labo kubeluh-beluhi ngerana ntah pe kupake pemeteh si meganjang. 2:2 Sabap asum aku nai ras kam enggo kutetapken i bas ukurku maka kerina kulupaken seakatan Jesus Kristus, dingen kuga Ia ipakuken seh mate i kayu persilang. 2:3 E maka asum aku ndahi kam la aku megegeh dingen nggirgir erkiteken mbiar. 2:4 Pengajaren ras berita si kusehken e labo rikutken kebeluhen ngerana, tapi alu ncidahken kuasa Kesah Dibata. 2:5 Gelah kinitekenndu labo erpalasken kepentaren manusia, tapi erpalasken Kuasa Dibata. 2:6 Amin bage gia, iberitaken kami nge berita kerna kepentaren man kalak si enggo dewasa kinitekenna. Tapi kepentaren e labo kepentaren jaman si genduari, ntah pe kepentaren penguasa i bas jaman si enda, kuasa-kuasa si nuju ku kemasapen. 2:7 Kepentaren si iberitaken kami kepentaren Dibata si terbuni, si terligen man manusia, si enggo itetapken Dibata guna kemulianta ope denga doni enda ijadiken. 2:8 Penguasa i doni enda sekalak pe la meteh kepentaren e. Sabap adi ietehna, labo min ndai ipakukenna ku kayu persilang Tuhan si mada kemulian e. 2:9 Tapi lit tersurat i bas Pustaka Si Badia, "Kai si langa pernah iidah ntah pe ibegi manusia, kai si langa pernah iukuri manusia, e kal me si enggo isikapken Dibata man kalak si erkeleng ate man baNa." 2:10 E me kerina si enggo ipetangkas Dibata man banta arah KesahNa. Kesah e ipepayona kai pe, terus ku biak Dibata si terbuni kal pe. 2:11 Bagi manusia, pusuh si lit i bas ia e ngenca si meteh kerina kerna ia, bage me pe kerna Dibata, Kesah Dibata e nge ngenca metehsa kerina kerna Dibata. 2:12 Si ialoken kita labo biak doni enda, tapi Kesah si i bas Dibata nari, gelah sieteh kerina pemere Dibata man banta. 2:13 Dage asum iterangken kami kebenaren pertendin man kalak si enggo dewasa kegeluhen pertendinna labo kami ngerana alu kata-kata si iajarken kepentaren manusia, tapi alu kata-kata si iajarken Kesah Dibata. 2:14 Tapi kalak si la lit i bas ia Kesah Dibata, labo ngaloken kasa kai si asalna i bas Kesah Dibata nari. La ia ngasup ngangkasa, janah si lang-lang nge e iakapna, sabap arah cara pertendin nge ngenca maka si e banci iergai. 2:15 Kalak si enggo dewasa kegeluhen pertendinna, ngasup ia ertimbang kerna kai pe, tapi la lit kalak si ngasup ertimbang kerna ia. 2:16 Bagi lit tersurat i bas Pustaka Si Badia, "Ise kin meteh perukuren Tuhan? Ise kin ngasup ngajarken Ia?" Tapi i bas kita lit kap perukuren Kristus.
3:1 O senina-seninangku, sanga si e aku labo banci ngerana man bandu bagi pengeranangku nandangi kalak si enggo dewasa kegeluhen pertendinna. Aku arus ngerana man bandu bagi man kalak si nggeluh rikutken biak doni, man kalak si medanak denga kinitekenna man Kristus. 3:2 La banci lang susu kubereken inemenndu, labo nakan keras kubereken man bandu, sabap langa kam ngasup ngalokenca. Janah genduari pe langa kam ngasup ngalokenca. 3:3 Sabap kam nggeluh rikutken biak doni denga. Adi sician-cianen kam janah turah perubaten i tengah-tengahndu, ma kin enda biak doni? Ma kin perbahanenndu e bali ka nge ras kalak si deban? 3:4 Adi lit si ngatakenca, "Aku arah Paulus," janah lit ka si ngatakenca, "Aku arah Apolos," ma la lit kelebihenndu asa manusia si deban? 3:5 Ise kin Apolos? Ise kin Paulus? Kami enda pelayan Dibata kap ngenca, si negu-negu kam gelah erkiniteken. Sekalak-sekalak kami ndahiken dahin rikutken si ibereken Tuhan man kami. 3:6 Aku nuanca, Apolos niramsa; tapi Dibata si erbahanca turah. 3:7 Si nuanca ras si niramsa labo penting, tapi si penting e me Dibata, sabap ia nge si peturahsa. 3:8 Si nuanca ras si niramsa sada aron kap; tapi sekalak-sekalak ibereken Dibata me upahna rikutken pendahinna sekalak-sekalak. 3:9 Sabap kami sada aron kap ndahiken dahin Dibata, janah kam me jumaNa. Kam pe bangunen Dibata kap. 3:10 Rikutken pemere si ibereken Dibata man bangku, enggo kupajekken palas bangunen selaku pande si beluh, jenari kalak si deban mbangunca i babo palas e. Tapi sekalak-sekalak arus metenget kuga ia mbangunca. 3:11 Sabap la lit palas si deban si banci ipajekken seakatan palas si enggo pajek e, e me Jesus Kristus. 3:12 Ntah kalak mpergunaken emas, ntah pirak, ntah batu permata i bas ia majekken i babo palas e; ntah ka pe mpergunaken kayu, ntah dukut-dukut, ntah nggala. 3:13 Jadi tangkas me pagi pendahinna sekalak-sekalak i bas wari kerehen Kristus. Sabap i bas wari e pagi ipetangkas api me pendahin sekalak-sekalak; iuji dingen icidahken api e pagi uga kin si tuhuna pendahin sekalak-sekalak. 3:14 Adi pendahin kalak i bas ia majekken e tahan api, ialokenna me pagi upahna. 3:15 Tapi adi meseng pendahinna e rugi me ia i bas upah; tapi ia iselamatken nge, bagi kalak si pulah i bas api nari. 3:16 Ma ietehndu kin maka kam me Rumah Pertoton Dibata dingen Kesah Dibata ringan i bas kam? 3:17 Adi ikernepken kalak Rumah Pertoton Dibata, ikernepken Dibata me kalak e. Sabap Rumah Pertoton Dibata badia kap, janah kam me rumahNa e. 3:18 Ola ise pe nipu bana. Adi lit i tengah-tengahndu kalak si erpengakap maka ia pentar rikutken doni enda, arus min ia jadi bodoh lebe, gelah tuhu-tuhu ia pentar. 3:19 Sabap kepentaren doni enda kebodohen i lebe-lebe Dibata. Bagi lit tersurat i bas Pustaka Si Badia, "Isidingi Dibata me kalak pentar alu kebeluhenna jine." 3:20 Lit ka pe tersurat, "Ieteh Tuhan maka sia-sia nge perukuren kalak si pentar e." 3:21 E maka ola ise pe meganjang ukurna kerna kengasupen manusia si tuhuna kerina kap sikerajangenndu: 3:22 Paulus, Apolos, ras Petrus; doni enda, kegeluhen ras kematen, si genduari ras si pagin; kerina si enda sikerajangenndu: 3:23 janah kam sikerajangen Kristus, janah Kristus sikerajangen Dibata.
4:1 Arus min iakuindu maka kami enda kap suruh-suruhen Kristus dingen pengurus erta-erta Tuhan si ertanggung jawab kerna rahasia Dibata. 4:2 Sekalak pengurus arus teridah maka ia kalak si terteki kap. Enda me si la banci lang i bas sekalak pengurus. 4:3 Soal kitik nge kuakap e adi aku iperiksandu tah iadili kalak si deban. Janah aku jine pe labo kuperiksa bangku. 4:4 Sabap bersih pusuh peratenku; tapi labo e ngatakenca maka aku la ersalah. Tuhan me pagi si meriksa aku. 4:5 E maka ola biasaken ngukum kalak ope denga seh paksana, tapi timailah ngayak reh Tuhan. Iterangina me pagi rahasia-rahasia si gelap denga, janah ipetangkasna isi pusuh peraten manusia si terbuni. Kenca bage maka sekalak-sekalak ngaloken pujin i bas Dibata nari sue ras si patut ialokenna. 4:6 Kerina si enggo kukataken e, o senina-senina, e me kap kerna aku ras Apolos. Tujunku e me kap gelah erlajar kam i bas kami, maka ola ilanggarndu batas-batas si tersurat i bas Pustaka Si Badia, e me kap gelah ola meganjang ukurndu jenari iangkatkenndu sekalak tapi iperjakndu si deban. 4:7 Ise kin erbahanca kam lebihen asa kalak si deban o seninangku? Ma kin kerina si lit i bas kam e pemere Dibata nge? Adi pemere nge e, ngkai dage maka meganjang ukurndu, tempa-tempa si lit i bas kam e labo pemere? 4:8 Enggo tuhu cukup kerina si iperlukenndu! Enggo tuhu bayak kam! Enggo tuhu jadi raja kam; kami lang! Jadi raja lah gia min kam kerina pe, gelah banci kam jadi raja ras kam. 4:9 Sabap rikutken pengakapku, maka man kami rasul-rasul enda enggo itentuken Dibata ingan kami i bas barisen si arah pudina kal, bali ras kalak si iukum mate, gelah jadi tontonen kerina si nasa lit, malekat-malekat ras manusia. 4:10 Kami tuhu kalak bodoh erkiteken Kristus; tapi kam kalak Kristen si beluh! Kami kote, tapi kam megegeh! Kami ihina, tapi kam ipehaga! 4:11 Seh ku bas paksa enda pe muas dingen kelihen kami; uis kami pe si leket i bas daging kami e ngenca; kasar perbahanen kalak man kami; la lit ingan kami si tetap. 4:12 Latih kami erdahin alu tan kami guna encariken keperlun kami. Adi isumpahi kalak kami, ipasu-pasu kami ia; adi isiksa kalak kami, megenggeng kami. 4:13 Adi igombang-gombangi kalak kami, mehuli pengaloi kami man bana. Perbahan kalak man kami bali ras perbahanenna nandangi sampah doni enda; seh ku bas paksa enda kami me kalak si la terpakena i bas pengidah manusia. 4:14 Si enda kusuratken man bandu labo gelah mela iakapndu, tapi guna ngajarken kam sabap kam anak-anakku si kukelengi. 4:15 Sabap bicara lit gia sepuluh ribu kalak gurundu selaku kam kalak Kristen, bapandu labo mbue. I bas kegeluhenndu selaku kalak Kristen aku me bapandu, sabap aku nge si maba Berita Si Meriah man bandu. 4:16 Dage kupindoken man bandu: Usihlah aku. 4:17 Guna si e me maka kusuruh Timotius ndahi kam. I bas kiniteken man Tuhan ia me anakku si kukelengi dingen si setia. Ia me si mpersingeti kam kerna dalan kegeluhenku si kudalanken i bas Kristus Jesus, dingen e me pe si kuajarken i bas kerina perpulungen i japa pe. 4:18 Tapi lit piga-piga kalak i bas kam enggo meganjang ukurna sabap iakapna labo aku reh ndahi kam. 4:19 Tapi lanai ndekahsa reh nge aku ndahi kam adi bagelah peraten Tuhan. Jenari kupepayo me kalak si meganjang rukur e, labo cakapna tapi gegehna nge si kupepayo. 4:20 Sabap Kinirajan Dibata labo soal cakap, tapi soal gegeh. 4:21 Kuga dage atendu? Reh atendu aku alu maba perpalu, ntah alu keleng ate dingen mesayang?
5:1 Si tuhuna enggo kubegi berita maka i tengah-tengahndu lit kalak perlua-lua. Janah perlua-lua si bage kalak si langa nandai Dibata pe ciga atena, e me: lit kalak si nggeluh erlua-lua ras ndehara bapana. 5:2 Amin bage pe meganjang ka ukurndu! Kin min arus ceda atendu, janah si perlua-lua e arusna ipedarat i bas persadanndu nari. 5:3 Secara badan aku ndauh i bas kam nari, tapi ukurku lit i tengah-tengahndu. Enggo kuukum kalak si perlua-lua e, tempa-tempa aku tuhu-tuhu lit i tengah-tengahndu. 5:4 Kam kerina pulung i bas gelar Tuhanta Jesus, janah aku lit i tengah-tengahndu i bas ukur alu kuasa Tuhanta Jesus, 5:5 guna ngendesken si perlua-lua e man Iblis, gelah daging ras kerincuhenna ikernepken, guna nelamatken tendina i bas wari kerehen Tuhan. 5:6 Labo mehuli meganjang ukurndu! Ma ietehndu kin maka lit kuan-kuan ngataken, "Ragi si sitik isiarina cimpa e kerina?" 5:7 Arus dage iambekkenndu ragi si ndekah, e me dosa, gelah kam jadi cimpa si mbaru, si la itama ragi, bali ras roti Paskah Jahudi. Janah si tuhuna Paskahta enggo sikap, sabap biri-biri Paskahta enggo igeleh, e me Kristus jine. 5:8 Dage sirayakenlah pestanta, labo alu roti si lit i je ragi si ndekah -- ragi dosa dingen kejahaten -- tapi alu roti si la itama ragi, alu biak si bersih dingen benar. 5:9 I bas suratku si mbarenda enggo kukataken man bandu gelah ola kam erteman ras kalak perlua-lua. 5:10 Maksudku labo perlua-lua si la nandai Tuhan, ntah kalak rangap, ntah tukang kompas, ntah si nembah berhala, sabap adi isirangindu atendu kalak si bage, ndarat kam i bas doni enda nari. 5:11 Dage si kumaksudken, ola kam erteman ras kalak si ngaku ia Kristen tapi ia perlua-lua, ntah rangap, ntah nembah berhala, ntah pengisak-ngisak, ntah pemabuk, ntah tukang kompas. Kalak si bage, man pe ola kam ras. 5:12-13 Labo urusenku ngadili kalak si labo Kristen. Dibatalah pagi ngadili ia. Ma kin kam nge arusna ngadili anggota perpulungenndu? Bagi lit tersurat i bas Pustaka Si Badia, "Pedaratlah kalak si jahat i bas perpulungenndu nari."
6:1 Adi sekalak i bas kam lit perkarana ras seninana, ngkai maka ia pang ngadu man hakim si la nandai Tuhan? Engkai maka la ipindona kalak si nandai Tuhan ndungi perkarana e? 6:2 La kin ietehndu maka anak-anak Dibata nge pagi ngadili doni enda? Dage adi ikut kam ngadili doni enda, ma kin ngasup nge pe kam ngadili perkara si kitik? 6:3 La kin ietehndu maka kita nge pagi ngadili malekat-malekat? Apai denga ka kerna persoalen-persoalen i bas kegeluhen si tep-tep wari enda! 6:4 Adi turah persoalen si bagenda, ngkai maka kam ngadu man kalak si sitik pe la meherga iakap perpulungen? 6:5 Kukataken enda gelah mela iakapndu! La kin lit sekalaklah gia i tengah-tengahndu si pentar, si ngasup ngadili perkara kalak Kristen e? 6:6 Sabap teridah maka kalak Kristen si adun ia sapih-sapih ia, janah kalak si la erkiniteken ngadili perkarana e! 6:7 Si tuhuna, alu litna perubaten-perubaten i tengah-tengahndu teridah maka kam tuhu-tuhu enggo talu. Ma ulin kam kena perbahanen si la adil? Ma ulin kam kena tipu? 6:8 Tapi teridah maka kam erbahan si la adil sapih-sapih kam, janah sitipu-tipun kam, aminna pe kam sapih-sapih Kristen! 6:9 Tentu enggo ietehndu maka kalak si la adil la dat bagin i bas Kinirajan Dibata. Ola tipu bandu. Kalak si erlagu la mehuli, ntah si nembah berhala, ntah perlua-lua, ntah erlagu la mehuli sapih-sapih dilaki. 6:10 Ntah penangko, ntah si rangap, ntah pemabuk, ntah pengisak-ngisak, ntah tukang kompas -- sada pe la dat bagin i bas Kinirajan Dibata. 6:11 Nai lit piga-piga kalak i bas kam si bage. Tapi genduari kam enggo ibersihken i bas dosa-dosandu nari. Kam enggo iserapken jadi sikerajangen Dibata. Kam enggo iperembakken ras Dibata arah gelar Tuhan Jesus Kristus dingen arah Kesah Dibatanta. 6:12 Banci jadi lit si ngatakenca, "Bebas kap aku ngelakoken kai pe." Payo nge min, tapi labo kerina erguna. Aku pe banci nge kukataken, "Bebas kap aku ngelakoken kai pe," tapi la kupelepas kai pe ngkuasai aku. 6:13 Banci ka nina kalak tole, "Pangan ma guna beltek nge, janah beltek ma guna pangan?" Payo nge katana e, tapi duana pagi imasapken Dibata! Labo tuhu maka kula manusia guna erlagu la mehuli, tapi guna Tuhan; janah Tuhan guna kula. 6:14 Dibata enggo mpekeke Tuhan i bas si mate nari, janah kita pe ipekekeNa nge pagi alu kuasaNa. 6:15 La kin ietehndu maka kulandu e me ringring Kristus? Banci kin kubuat ringring Kristus e jenari kubahan e jadi ringring diberu si pendahinna erlua-lua? Tentu lang! 6:16 Ntah la kin ietehndu maka kalak si ersada kula ras diberu si pendahinna erlua-lua enggo ia jadi sada kula rassa? Kerna si enda tangkas i bas Pustaka Si Badia, nina, "Si dua kalak e jadi sada kula." 6:17 Tapi kalak si mpersadaken dirina ras Tuhan, enggo ia jadi sada ras Tuhan secara pertendin. 6:18 E maka silahkenlah perbahanen erlagu la mehuli. Banci ka pe nina kalak, "Kasa kai dosa si ilakoken kalak labo mpengaruhi kulana." Tapi e labo payo, sabap kalak si erlua-lua erdosa ia nandangi kulana. 6:19 La kin ietehndu maka kulandu e me Rumah Pertoton Kesah Si Badia, si ringan i bas kam dingen si ibereken Dibata man bandu? Dirindu e labo kam empuna. 6:20 Sabap kam enggo itukur Dibata meherga kal. Dage muliakenlah Dibata arah kulandu.
7:1 Genduari ateku encakapken kerna isi surat si ikirimkenndu man bangku. Mehuli tuhu adi dilaki la empo. 7:2 Tapi erkiteken i japa pe nterem kal kalak si erlua-lua, e maka kerina dilaki lit min ndeharana sekalak-sekalak, bage pe kerina diberu lit min perbulangenna sekalak-sekalak. 7:3 Si dilaki arus nehken tugasna selaku dilaki man ndeharana, bage pe si diberu arus nehken tugasna selaku diberu nandangi perbulangenna. 7:4 Labo ndehara si erkuasa nandangi kulana, tapi perbulangenna nge. Bage pe labo perbulangen si erkuasa nandangi kulana, tapi ndeharana nge. 7:5 Ola tulak kerincuhenndu pekepar guna ersada kula, pala alu arih ersada i bas paksa si kentisik, gelah lit kesempatenndu ertoto; tapi kenca bage teruskenlah nehken kerincuhenndu e, gelah ola kam icubai Iblis erkiteken la kam ngasup nahanca. 7:6 Si kukataken enda ndai labo paksan, tapi persunget nge ngenca. 7:7 Si tuhuna ulin nge kuakap maka kerina kam bali ras aku; tapi i bas sekalak-sekalak lit pemere Dibata; lit pemere bagi si enda, lit pemere bagi si ah. 7:8 Man kalak si la erjabu, subuk diberu-diberu si enggo mbalu, kukataken: ulin kam tetap la erjabu bali ras aku. 7:9 Tapi adi la kam ngasup, erjabulah. Ulin erjabu asangken gara rusur kerincuhenndu. 7:10 Man kalak si enggo erjabu kuperentahken -- enda labo perentahku, tapi perentah Tuhan: sekalak ndehara la banci nadingken perbulangenna. 7:11 Adi itadingkenna, olanai ia erjabu, pala mulihken ia man perbulangenna e; bage pe sekalak perbulangen la banci ngulihken ndeharana. 7:12 Man kalak si deban kukataken (enda labo kata Tuhan, tapi katangku): adi lit sekalak perbulangen si enggo Kristen, ndeharana la erkiniteken man Tuhan, tapi ndeharana e nggit tetap nggeluh ras ia, ola iulihkenna ndeharana e. 7:13 Bage pe adi lit sekalak ndehara si enggo Kristen, perbulangenna la erkiniteken man Tuhan, tapi perbulangenna e nggit tetap nggeluh ras ia, ola ipindona mulih man perbulangenna e. 7:14 Sabap perbulangen si langa Kristen e enggo ikhususken arah persadanna ras ndeharana si enggo Kristen e gelah ia pe jadi sikerajangen Dibata. Bage pe ndehara si langa Kristen enggo ikhususken arah persadanna ras perbulangenna si enggo Kristen gelah ia pe jadi sikerajangen Dibata. Adi la bage, anak-anakndu tentu la banci deher ras Dibata; sedangken genduari anak-anakndu e enggo jadi sikerajangen Dibata. 7:15 Amin bage gia, adi perbulangen si la Kristen ntah ndehara si la Kristen ersura-sura nadingken ndeharana ntah perbulangenna si enggo Kristen pelepaslah bage. I bas si e, perbulangen si enggo Kristen ntah ndehara si enggo Kristen e bebas. Dibata ndilo kam maka kam nggeluh alu dame. 7:16 O ndehara, kuga pemetehndu maka la kam ngasup nelamatken perbulangenndu? Bage pe kam o perbulangen, kuga pemetehndu maka la kam ngasup nelamatken ndeharandu? 7:17 Kerina min nggeluhken geluhna rikutken kai si enggo itentuken Tuhan man bana sekalak-sekalak, bali ras asum ia ipilih Dibata nai. Enda me aturen si kuajarken i bas kerina perpulungen. 7:18 Adi sekalak si enggo isunatken jadi Kristen, ola iusahakenna meneken tanda-tanda sunat e. Adi sekalak si langa isunatken enggo jadi Kristen, ola ia isunatken. 7:19 Sabap labo penting ersunat ntah la ersunat. Si perlu e me ngikutken pedah Dibata. 7:20 Sekalak-sekalak min nggeluhken geluhna tetap bali ras asum ia idilo Dibata jadi kalak si tek. 7:21 Adi budak kin kam nai asum kam ipilih Dibata, labo dalih! Tapi adi lit kesempaten man bandu jadi kalak bebas, pergunakenlah kesempaten e. 7:22 Sabap sekalak budak si enggo ipilih Tuhan, ia enggo kalak bebas erkiteken jadi sikerajangen Tuhan ia. Bage pe kalak si bebas asum ia ipilih Kristus, ia budak Kristus kap. 7:23 Kam enggo itukur Dibata meherga kal; e maka ola kam jadi budak manusia. 7:24 O senina-senina, sekalak-sekalak kam arus tetap bali i bas adep-adepen Dibata ras keadanndu asum kam tangtangna ipilihNa nai. 7:25 Kerna kalak si langa erjabu la lit i bas aku perentah Tuhan. Tapi kusehken pendapatku man bandu, sabap erkiteken perkuah ate Tuhan metunggung aku iakap kalak. 7:26 Nginget kesusahen-kesusahen si lit genduari enda, mehuli kuakap adi manusia tetap bagi keadanna si genduari. 7:27 Adi enggo lit ndeharandu ola sirangken ia. Adi langa kam empo, ola darami si man emponndu. 7:28 Tapi adi empo kam, labo kam erdosa. Bage pe adi sekalak singuda-nguda tersereh, labo ia erdosa. Saja ngenca, kalak si enggo erjabu inanamina me erbage-bage kesusahen. Janah ateku maka ola kam ngenanami kesusahen si bage rupana. 7:29 Maksudku bagenda, o senina-senina: paksa si itentuken Tuhan enggo ipegendeki; e maka kalak si enggo empo, nggeluh min ia tempa-tempa la lit ndeharana. 7:30 Kalak si tangis, tempa-tempa ia la tangis; kalak si ermeriah ukur, tempa-tempa la meriah ukurna; kalak si nukur barang-barang, tempa-tempa la lit barangna. 7:31 Kalak si make barang-barang doni enda, pakenalah e tapi ola ia pepuasken. Sabap tempas doni si genduari enda lawes ku lesapna kap. 7:32 Ateku gelah bebas kam i bas aru atendu nari. Sekalak dilaki si la lit ndeharana iukurina kerna Tuhan ras dahinNa, kuga erbahanca maka ngena ate Tuhan. 7:33 Tapi sekalak si lit ndeharana iukurina kerna keperlun doni enda, sabap atena ndalanken si ngena ate ndeharana. 7:34 Enda erbahanca ukurna ertupang. Diberu si la lit perbulangenna ntah pe singuda-nguda, iukurina kerna Tuhan ras dahinNa, sabap atena tendi ras kulana khusus jadi sikerajangen Tuhan. Tapi diberu si lit perbulangenna iukurina kerna keperlun doni enda, sabap atena ndalanken si ngena ate perbulangenna. 7:35 Si enda kukataken man bandu guna kiniulinndu jine. Labo ateku ngolangi kam. Tapi ateku gelah kam nggeluh alu ratur dingen tetap ersembah man Tuhan alu la ersungsung janah la lit ganggunna. 7:36 Tapi adi lit kalak si iakapna la patut adi la iempoina tunangenna, janah tunangenna e enggo ndekah jadi singuda-nguda, janah iakapna la ia ngasup nahan kerincuhen kulana, ibahanalah rikutken sura-surana, e me erjabu sajalah ia; labo ia erdosa adi bage. 7:37 Tapi adi lit sekalak si enggo erbahan keputusen i bas ukurna guna la erjabu ras tunangenna, janah keputusenna e la lit si maksasa, mehuli nge e, adi ngasuplah ia ndalanken si bage rupana. 7:38 E maka mehuli nge perbahanen kalak si ngempoi tunangenna, tapi ulin ka pe perbahanen kalak si la ngempoisa. 7:39 Sekalak diberu si lit perbulangenna la banci bebas adi nggeluh denga perbulangenna. Tapi adi mate perbulangenna e, banci ka ia erjabu ras dilaki si ngena atena asal perjabunna e ilakokenna i bas Tuhan. 7:40 Tapi adi kuakap senangen nge iakapna adi lanai ia erjabu. Enda me pendapatku, tapi kuakap Kesah Dibata lit i bas aku.
8:1 Genduari kerna pangan si ipersembahken man berhala. Tuhu me bagi si ikataken kalak maka "kerina kita erpemeteh". Amin bage gia, pemeteh erbahanca kalak meganjang ukur, tapi kekelengen pehuliken kap. 8:2 Kalak si erpengakap maka i bas ia lit pemeteh, si tuhuna labo lit i bas ia pemeteh si arusna kin ietehna. 8:3 Tapi kalak si erkeleng ate man Dibata itandai Dibata kap ia. 8:4 Kerna pangan si ipersembahken man berhala; bagi si ikatakenndu, "Sieteh maka berhala-berhala si tuhuna kal labo lit i doni enda." Sieteh ka pe maka, "La lit Dibata seakatan Dibata si Sada e." 8:5 Aminna lit gia igelari dibata-dibata, subuk i langit bage pe i doni enda, janah aminna melala pe "dibata-dibata" dingen "tuhan-tuhan" e. 8:6 Tapi man banta sada ngenca Dibata, e me Bapanta. I bas Ia nari me rehna kerina si nasa lit, janah kempak Ia me pe perlawesta. Janah sada ngenca Tuhan, e me Jesus Kristus. Arah Ia me kerina si nasa lit ijadiken, dingen arah Ia kita nggeluh. 8:7 Tapi labo kerina kalak meteh kerna si enda. Lit kalak si gelgel e biasa erbahan persembahen man berhala; e maka seh i bas paksa si genduari enda pe adi ipanna pangan si enggo ipersembahken man berhala e, iakapna maka pangan e tuhu-tuhu enggo berhalaan. Janah erkiteken ukurna la tetap, pusuh peratenna ngataken maka ia enggo melket. 8:8 Si tuhuna pangan labo maba kita reh deherna ras Dibata. Bicara la pe sipan labo lit ruginta; bicara sipan pe labo lit untungta. 8:9 Tapi metengetlah, gelah ola min kebebasanndu e erbahanca maka guling kalak si merampek kinitekenna. 8:10 Sabap adi kalak si bage ngidah kam "si erpemeteh" man i bas ingan berhala, ma kin si enda erbahanca reh pangna ia man pangan si iakapna berhalaan? 8:11 Alu bage kalak si merampek kinitekenna bene erkiteken "pemetehndu" e, sedangken Kristus mate man guna seninandu si bage. 8:12 I bas si enda erdosa kam man Kristus alu erbahan dosa man seninandu e, sabap ilukaindu pusuh peratenna. 8:13 E maka adi pangan kin erbahanca seninangku erdosa, asa ndigan pe lanai kupan pangan e, aminna pe e daging, gelah seninangku e ola ndabuh ku bas dosa arah pengelakongku.
9:1 Ma bebas kin aku? Ma rasul kin aku? Ma enggo kin pernah kuidah Jesus Tuhanta? Ma kin kam nge bekas dahinku i bas Tuhan? 9:2 Amin la gia iakui kalak si deban aku rasul, kam tentu iakuindu nge! Kam me desken materai si mbuktiken maka aku sekalak rasul, erkiteken kam nggeluh i bas Tuhan. 9:3 Adi iorati kalak kerna kinirasulenku, bagenda me ningku mbela diringku: 9:4 Ma kin lit hakku ngaloken pangan ras inemen erkiteken dahinku? 9:5 Ma kin lit hakku maba sekalak ndehara si enggo Kristen i bas perdalanenku bali ras si ibahan rasul-rasul si deban? Ma bage pe si ibahan Petrus ras senina-senina Tuhan? 9:6 Ntah kin Barnabas ras aku saja ngenca arus ncariken keperlun kami jine? 9:7 Lit kin perajurit si ikut erperang alu biayana jine? Lit kin perjuma si la man buah anggur si isuanna i bas kebun anggurna? Lit kin permakan si la kenan susu asuh-asuhenna? 9:8 Tuhu maka kerina si kuturiken enda umpama-umpama i bas manusia; tapi ma kin bage ka nge si ikataken i bas Undang-undang Musa? 9:9 I bas Undang-undang e lit tersurat, "Ola tutupi babah lembu si sangana ipake ngerik." Iakapndu lembu kin si iperdiateken Dibata? 9:10 Ma kin enda si tuhuna kerna kita nge si ikatakenna e? Tentu si e isuratken guna kita. Kalak si nenggala bage pe kalak si ngerik arus ndahiken dahinna i bas pengarapen ndatken baginna i bas peranin e nari. 9:11 Enggo isuanken kami benih pertendin i bas kegeluhenndu. Mbelinca kin e adi iperani kami barang doni i bas kam nari? 9:12 Adi kalak si deban lit hakna ngarapken si enda i bas kam nari, ma kin beliden pe hak kami? Amin bage gia, hak kami e la ipake kami. Tapi ulin iakap kami nggengken latih erdahin asangken terhalang perdalanen Berita Si Meriah kerna Kristus e. 9:13 Tentu enggo ietehndu maka kalak si erdahin i bas Rumah Pertoton ngaloken pangan i bas Rumah Pertoton e nari, janah kalak si mpersembahken persembahen tutungen dat bagin i bas persembahen e nari. 9:14 Bage me pe enggo itetapken Tuhan maka kalak si meritaken Berita Si Meriah ngaloken keperlun geluhna i bas dahinna e nari. 9:15 Tapi sada pe labo kupake hakku enda, janah i bas aku erbahan surat enda pe labo ateku nuntut hakku e. Sabap ulin aku mate asangken bene kai si kumegahken e. 9:16 Si tuhuna labo lit hakku ermegah i bas meritaken Berita Si Meriah e, sabap terpaksa kap aku. Janah cilaka kal aku adi la kin kuberitaken Berita Si Meriah e. 9:17 Adi aku jine min ndai milih dahin e, banci nge aku ngarapken upah. Tapi adi dahin meritaken Berita Si Meriah e sada kearusen man bangku, janah e sada tanggung jawab si iendesken Dibata. 9:18 Kai dage upahku? Upahku me kap: meritaken Berita Si Meriah alu la ngarapken upah. La kutuntut hakku i bas dahinku meritaken Berita Si Meriah e. 9:19 Aku bebas nge; aku labo budak ise pe. Tapi kujadiken diringku jadi budak nandangi kerina jelma gelah banci nterem kalak dat aku guna Kristus. 9:20 Nandangi kalak Jahudi bagi kalak Jahudi aku guna ndatken kalak Jahudi. Bagi ia patuh man Undang-undang Musa, aku pe patuh man Undang-undang e, gelah banci ia dat aku, aminna pe aku labo i teruh Undang-undang e. 9:21 Bage me pe nandangi kalak si la lit i bas ia Undang-undang Musa, bagi ia e ka aku, gelah banci ia dat aku. Si enda labo nuduhken maka la aku i teruh Undang-undang Dibata, sabap si tuhuna aku i teruh Undang-undang Kristus. 9:22 Nandangi kalak si merampek kinitekenna, bagi ia e ka aku, gelah kudat ia. Aku enggo jadi bali ras kerina kalak rikutken paksana gelah banci deba-deba ia kuselamatken alu kerina dalan si payo. 9:23 Si enda kerina kubahan guna Berita Si Meriah, gelah aku pe dat bagin subuk i bas dahin bage pe i bas pasu-pasu Berita Si Meriah e. 9:24 Tentu ietehndu maka kalak si erlumba kiam i bas sada perlumban, kerina ia kiam, tapi sekalak ngenca si dat pemere. E maka empetlah kiam gelah kam menang. 9:25 Kerina kalak si ikut i bas perlumban e arus ia lebe ngikuti latihen si mberat. Si enda idalankenna guna ndatken rudang-rudang tanda kemenangen si ermasap-masap; tapi kita sidalanken e guna ndatken rudang-rudang si tahan seh rasa lalap. 9:26 E me sabapna maka pinter aku kiam ku garis batas. Janah bali ras sekalak si jago ertinju, la aku nggit ninju angin. 9:27 Kupekpeki badanku seh batu-batun, seh maka kukuasai tuhu-tuhu, gelah ola pagi aku itulak kenca kudilo kalak si deban ku perlumban e.
10:1 O senina-senina, ateku gelah iingetndu kerna kai si enggo jadi nai man nini-nininta asum ia ngikutken Musa. Kerina ia nai ipinpin binangun embun janah terkelin ia kerina ngepari Lawit Merah. 10:2 I bas embun dingen i bas lawit e kerina ia tempa-tempa iperidiken jadi pengikut-pengikut Musa. 10:3 Kerina ia man pangan pertendin si seri, dingen minem inemen pertendin si seri. 10:4 Kerina ia minem i bas batu pertendin nari, e me batu si nemani ia; batu e Kristus kap. 10:5 Tapi amin bage gia, nterem nge ia si la ngena ate Dibata, janah perban si e nge maka merapen bangkena i gurun pasir. 10:6 Kerina si enda jadi usihen man banta, mpersingeti kita gelah ola jahat sura-suranta bagi si ilakoken nininta nai. 10:7 Bage pe gelah ola sisembah berhala-berhala bagi si ilakoken piga-piga nininta nai. I bas Pustaka Si Badia lit tersurat, "Bangsa e kundul guna man-minem, jenari tedis ia landek murjah-urjah." 10:8 Ola kita erlua-lua bagi si ilakoken piga-piga nini-nininta nai, seh maka i bas sada wari lit dua puluh telu ribu kalak ia radas mate. 10:9 Ola sicubai Tuhan bagi si ibahan piga-piga nininta nai, seh maka mate ia itagut nipe. 10:10 Ola kita jungut-jungut, bagi si ibahan piga-piga nininta nai, seh maka ikernepken Malekat Kematen ia. 10:11 Kerina si jadi man bana e jadi pelajaren, janah kerina si enda isuratken gelah jadi pertenget man banta. Sabap genduari kita nggeluh i bas paksa pendungi jaman. 10:12 Kalak si erpengakap maka ia nteguh pertedisna, ulin me ia metenget gelah ola ia guling. 10:13 Kerina percuban si reh man bandu e bali nge biakna ras percuban si biasa seh man manusia si deban. Tapi Dibata setia nge i bas padanNa. Labo ipelepasNa kam icubai lebih asa gegehndu. Asum kam ngenanami percuban, iberekenNa nge gegeh man bandu gelah ngasup kam nggengkenca, janah radu ras si e iberekenNa pe dalan pulah. 10:14 E maka o senina-senina si kukelengi, kiamkenlah, ola kal sembah berhala-berhala. 10:15 Aku ngerana man bandu bagi man kalak si pentar. Timbanglah kai si kukataken man bandu. 10:16 Asum siinem lau anggur tare calung si enggo ipasu-pasu alu ngataken bujur man Dibata, ma kin e nuduhken maka kita dat bagin i bas dareh Kristus? Janah asum sicepik-cepik roti guna ipan ras-ras, ma kin e nuduhken maka kita dat bagin i bas kula Kristus? 10:17 Erkiteken sada nge roti e, e maka kerina kita, aminna pe nterem, sada kula nge, sabap kerina kita dat bagin i bas roti si sada e. 10:18 Perdiatekenlah kalak Israel secara manusia; kalak si man pangan si enggo ipersembahken i babo batar-batar ikut i bas persadan ras si man sembahen e. 10:19 Adi bage, kai kin si kumaksud? Enggo kin berhalan pangan si ipersembahken man berhala e? Lit kin si tuhuna berhala e? 10:20 Tentu lang! Dage si kumaksud e me kai si ipersembahken i babo batar-batar persembahen berhala, labo ipersembahken man Dibata, tapi man setan-setan nge. Janah ateku min ola kam ersada ras setan e. 10:21 La banci kam minem tare calung Tuhan jenari minem ka tare calung setan. La banci kam man i bas meja Tuhan jenari man ka i bas meja setan-setan. 10:22 Ntah ateta kin maka mecimberu Tuhan e? Ntah kin siakap maka gegehen kita asangken Tuhan e? 10:23 Lit kalak ngatakenca, "Kai pe banci ilakoken." Tuhu, tapi labo kerina erguna. "Kai pe banci ilakoken," tapi labo kerina pehuliken. 10:24 Ola ise pe ngukuri untung man bana saja, tapi inget pe ngukuri untung kalak si deban. 10:25 Kerina daging si idayaken i tiga banci ipanndu alu la pada nungkun-nungkun i bas pusuh peratenndu. 10:26 Sabap i bas Pustaka Si Badia lit tersurat, "Doni enda ras kerina isina Tuhan empuna." 10:27 Adi sekalak si la tek man Jesus Kristus ndilo kam man ras-ras, janah tetap ukurndu ndahisa, panlah kai si idangkenna man bandu alu la pada nungkun-nungkun pusuhndu. 10:28 Tapi adi lit kalak si ngatakenca man bandu, "Pangan enda enggo ipersembahken man berhala," ola pan pangan e erkiteken kalak si ngatakenca man bandu e dingen erkite-kiteken penggejapen i bas pusuh si la tetap. -- 10:29 Labo penggejapenndu, tapi penggejapen kalak si ngatakenca man bandu e. Banci jadi lit kam ngataken, "Engkai maka penggejapen kalak si deban jadi hakim nandangi kebebasenku? 10:30 Adi ngataken bujur nge aku man Dibata kerna pangan e, ngkai maka ipandang kalak aku, sedangken kukataken nge bujur man Dibata kerna pangan e?" 10:31 Dage kerina si ilakokenndu, subuk man ntah minem, bahanlah si e kerina tama kemulian man Dibata. 10:32 Ola ibahanndu kitik ukur kalak, subuk kalak Jahudi ntah kalak perbegu ntah pe perpulungen Dibata. 10:33 Bagi aku, kupala-palai erbahan si ngena ate kalak kerina i bas kerina si kubahan. Labo keuntungenku si kudarami, tapi keuntungen kalak si nterem, gelah ia terkelin.
11:1 Usihlah dage aku, bagi aku pe ngusih Kristus. 11:2 Kupujiken kam, sabap ingetndu aku rusur dingen alu tutus iikutkenndu ajaren si kuendesken man bandu. 11:3 Tapi ateku min gelah iangkandu maka kerina dilaki, Kristus takalna; diberu, dilaki takalna; Kristus, Dibata kepalana. 11:4 Tep-tep dilaki si erbulang asum ertoto ntah ernubuat i tengah-tengah perpulungen, njuruken ia man kepalana. 11:5 Janah sekalak diberu si la itutupina takalna asum ia ertoto ntah ernubuat i tengah-tengah perpulungen, njuruken ia man kepalana; bali me ia ras sekalak diberu si enggo icukur bukna. 11:6 Sekalak diberu si la itutupina takalna, ulin me adi igunting bukna. Tapi erkiteken njuruken kap adi sekalak diberu icukur ntah pe igunting, madin me itutupina takalna. 11:7 Sekalak dilaki labo perlu nutupi takalna sabap ia me gambar ras kemulian Dibata. Tapi diberu me kemulian dilaki; 11:8 sabap labo dilaki ijadiken i bas diberu nari, tapi diberu nge si ijadiken i bas dilaki nari. 11:9 Bage pe labo guna diberu maka dilaki ijadiken, tapi diberu ijadiken guna dilaki. 11:10 Erkiteken si e janah erkiteken malekat-malekat, sekalak diberu arus make tutup takal, e me tanda kuasana ras tanda maka ia i teruh kuasa perbulangenna. 11:11 I bas persadanta ras Tuhan, dilaki perlu nge diberu, janah diberu perlu nge dilaki. 11:12 Sabap bagi diberu ijadiken i bas dilaki nari, bage ka pe dilaki tubuh i bas diberu nari nge, janah kerinana rehna i bas Dibata nari. 11:13 Rukurlah kam sekalak-sekalak: mehuli kin sekalak diberu la nutupi takalna asum ia ertoto man Dibata? 11:14 Ma kin biak kegeluhenta ngajarken man banta maka adi dilaki gedang bukna e njuruken bana. 11:15 Tapi adi diberu gedang bukna sada kemegahen man bana? Bukna e ibereken man bana selaku cabinna. 11:16 Tapi adi lit denga kalak si pet ersoal jawab kerna si e, alu gendek banci kukataken maka adat si bage la lit i bas kita tah pe i bas perpulungen-perpulungen Dibata. 11:17 Kerna perentah-perentah si kubereken i teruh enda la kam kupujiken, sabap adi pulung kam, lalan perbahanenndu si la mehuli asangken si mehuli. 11:18 Pemena, lit kubegi berita maka i tengah-tengah perpulungenndu lit perpecahen. Tek aku maka lit perpayona berita e. 11:19 Tuhu arus maka lit kalak erpihak-pihak i tengah-tengahndu, gelah teridah kalak si lulus ujian selaku kalak si tulen i tengah-tengahndu. 11:20 Asum kam pulung lanai bo kam man i bas Pesta Tuhan. 11:21 Sabap tep-tep kalak kam merudu man panganndu jine, seh maka deba lit kalak si lumben janah deba lit si mabuk ban besurna. 11:22 Ma kin lit rumahndu inganndu man ras minem? Alu bage ma ihinandu kin perpulungen Dibata, janah atendu erbahanca gelah mela iakap si musil? Kuga dage ningku man bandu kerna si enda? Arus kin maka kupuji kam? Lang, tentu la kam kupuji! 11:23 Sabap i bas Tuhan nari nge kualoken pengajaren si kuendesken man bandu e, e me: maka i bas berngina Tuhan Jesus idudurken, ibuatNa roti. 11:24 Janah kenca Ia ertoto ngataken bujur man Dibata, icepik-cepikNa roti e, jenari nina, "Enda me kulangKu si ibereken man gunandu. Lakokenlah bage, guna peringet-ingeten nandangi Aku." 11:25 Bage pe kenca dung man, ibuat Jesus calung, jenari nina, "Calung enda me iketen padan si mbaru si isahken alu darehKu. Tep-tep kam minem tare calung e, lakokenlah bage, guna peringet-ingeten nandangi Aku." 11:26 Tep-tep kam man roti e, dingen minem tare calung e, alu bage iberitakenndu kematen Tuhan, seh ngayak Ia reh mulihken. 11:27 E maka kalak si man roti Tuhan ntah minem tare calungNa alu cara si la patut, banci ia iukum sabap ersalah ia nandangi badan ras dareh Tuhan. 11:28 Dage tep-tep kalak nguji banalah, jenari ipannalah roti e dingen minem tare calung e. 11:29 Sabap kalak si man ras minem alu la nandai badan Tuhan i je, ia jine maba ukumen man bana, asum ia man ras minem e. 11:30 Erkiteken si e me maka nterem kalak si kote dingen sakit i tengah-tengahndu janah la sitik si enggo mate. 11:31 Adi si adili man banta, maka la kita iukum bagi si e. 11:32 Tapi adi iukum Tuhan kita bagi si e, tujunNa e me gelah ola kita pagi iukum radu ras doni enda. 11:33 Dage, o senina-seninangku, adi pulung kam erbahan Lakon Persadan si Badia, sitimanlah kam. 11:34 Janah adi lit kalak melihe, manlah ia lebe i rumah, gelah ola erkiteken kepulungenndu e kam kena ukumen Tuhan. Kerna persoalen-persoalen si deban, kuatur pagi e sanga aku reh.
11:1 Usihlah dage aku, bagi aku pe ngusih Kristus. 11:2 Kupujiken kam, sabap ingetndu aku rusur dingen alu tutus iikutkenndu ajaren si kuendesken man bandu. 11:3 Tapi ateku min gelah iangkandu maka kerina dilaki, Kristus takalna; diberu, dilaki takalna; Kristus, Dibata kepalana. 11:4 Tep-tep dilaki si erbulang asum ertoto ntah ernubuat i tengah-tengah perpulungen, njuruken ia man kepalana. 11:5 Janah sekalak diberu si la itutupina takalna asum ia ertoto ntah ernubuat i tengah-tengah perpulungen, njuruken ia man kepalana; bali me ia ras sekalak diberu si enggo icukur bukna. 11:6 Sekalak diberu si la itutupina takalna, ulin me adi igunting bukna. Tapi erkiteken njuruken kap adi sekalak diberu icukur ntah pe igunting, madin me itutupina takalna. 11:7 Sekalak dilaki labo perlu nutupi takalna sabap ia me gambar ras kemulian Dibata. Tapi diberu me kemulian dilaki; 11:8 sabap labo dilaki ijadiken i bas diberu nari, tapi diberu nge si ijadiken i bas dilaki nari. 11:9 Bage pe labo guna diberu maka dilaki ijadiken, tapi diberu ijadiken guna dilaki. 11:10 Erkiteken si e janah erkiteken malekat-malekat, sekalak diberu arus make tutup takal, e me tanda kuasana ras tanda maka ia i teruh kuasa perbulangenna. 11:11 I bas persadanta ras Tuhan, dilaki perlu nge diberu, janah diberu perlu nge dilaki. 11:12 Sabap bagi diberu ijadiken i bas dilaki nari, bage ka pe dilaki tubuh i bas diberu nari nge, janah kerinana rehna i bas Dibata nari. 11:13 Rukurlah kam sekalak-sekalak: mehuli kin sekalak diberu la nutupi takalna asum ia ertoto man Dibata? 11:14 Ma kin biak kegeluhenta ngajarken man banta maka adi dilaki gedang bukna e njuruken bana. 11:15 Tapi adi diberu gedang bukna sada kemegahen man bana? Bukna e ibereken man bana selaku cabinna. 11:16 Tapi adi lit denga kalak si pet ersoal jawab kerna si e, alu gendek banci kukataken maka adat si bage la lit i bas kita tah pe i bas perpulungen-perpulungen Dibata. 11:17 Kerna perentah-perentah si kubereken i teruh enda la kam kupujiken, sabap adi pulung kam, lalan perbahanenndu si la mehuli asangken si mehuli. 11:18 Pemena, lit kubegi berita maka i tengah-tengah perpulungenndu lit perpecahen. Tek aku maka lit perpayona berita e. 11:19 Tuhu arus maka lit kalak erpihak-pihak i tengah-tengahndu, gelah teridah kalak si lulus ujian selaku kalak si tulen i tengah-tengahndu. 11:20 Asum kam pulung lanai bo kam man i bas Pesta Tuhan. 11:21 Sabap tep-tep kalak kam merudu man panganndu jine, seh maka deba lit kalak si lumben janah deba lit si mabuk ban besurna. 11:22 Ma kin lit rumahndu inganndu man ras minem? Alu bage ma ihinandu kin perpulungen Dibata, janah atendu erbahanca gelah mela iakap si musil? Kuga dage ningku man bandu kerna si enda? Arus kin maka kupuji kam? Lang, tentu la kam kupuji! 11:23 Sabap i bas Tuhan nari nge kualoken pengajaren si kuendesken man bandu e, e me: maka i bas berngina Tuhan Jesus idudurken, ibuatNa roti. 11:24 Janah kenca Ia ertoto ngataken bujur man Dibata, icepik-cepikNa roti e, jenari nina, "Enda me kulangKu si ibereken man gunandu. Lakokenlah bage, guna peringet-ingeten nandangi Aku." 11:25 Bage pe kenca dung man, ibuat Jesus calung, jenari nina, "Calung enda me iketen padan si mbaru si isahken alu darehKu. Tep-tep kam minem tare calung e, lakokenlah bage, guna peringet-ingeten nandangi Aku." 11:26 Tep-tep kam man roti e, dingen minem tare calung e, alu bage iberitakenndu kematen Tuhan, seh ngayak Ia reh mulihken. 11:27 E maka kalak si man roti Tuhan ntah minem tare calungNa alu cara si la patut, banci ia iukum sabap ersalah ia nandangi badan ras dareh Tuhan. 11:28 Dage tep-tep kalak nguji banalah, jenari ipannalah roti e dingen minem tare calung e. 11:29 Sabap kalak si man ras minem alu la nandai badan Tuhan i je, ia jine maba ukumen man bana, asum ia man ras minem e. 11:30 Erkiteken si e me maka nterem kalak si kote dingen sakit i tengah-tengahndu janah la sitik si enggo mate. 11:31 Adi si adili man banta, maka la kita iukum bagi si e. 11:32 Tapi adi iukum Tuhan kita bagi si e, tujunNa e me gelah ola kita pagi iukum radu ras doni enda. 11:33 Dage, o senina-seninangku, adi pulung kam erbahan Lakon Persadan si Badia, sitimanlah kam. 11:34 Janah adi lit kalak melihe, manlah ia lebe i rumah, gelah ola erkiteken kepulungenndu e kam kena ukumen Tuhan. Kerna persoalen-persoalen si deban, kuatur pagi e sanga aku reh.
13:1 Bicara beluh kal pe aku ngerana i bas kerina cakap manusia janah i bas cakap malekat pe, tapi adi la aku erkeleng ate man kalak si deban, maka kai si kubelasken e la lebih asangken gung si erbulnang ntah pe penganak si erdeping. 13:2 Aminna gia lit i bas aku pemere ernubuat, aminna gia kueteh kerina rahasia, janah lit i bas aku kerina pemeteh, aminna gia cukup kinitekenku seh maka ngasup aku mindahken deleng pe, tapi adi la aku erkeleng ate nandangi kalak si deban, sia-sia me aku. 13:3 Bicara kusumbangken pe kerina erta-ertangku, janah bicara kukorbanken pe diringku seh mate guna ndatken kemegahen, tapi adi la aku erkeleng ate nandangi kalak si deban labo lit untungna man bangku. 13:4 Kalak si erkeleng ate, ia arus megenggeng, mehuli, la percian, la meganjang ukur, la sombong. 13:5 Ia labo mekarus, la ncariken untung man bana saja, la pergelut, la ngkira kesalahen kalak. 13:6 La meriah ukurna adi kalak erbahan si jahat, tapi ikut ermeriah ukur i bas si benar. 13:7 Kalak si erkeleng ate ngasup nggengken kai-kai pe, tek maka lit si mehuli i bas kerinana, tetap erpengarapen dingen saber i bas kai-kai pe. 13:8 Kekelengen la erkeri-kerin. Adi ernubuat masap kap; ngerana i bas erbage-bage cakap Kesah ngadi me, janah pemeteh pe masap nge. 13:9 Sabap pemeteh ras nubuatta labo dem. 13:10 Tapi kenca reh pagi si kuh dingen serta e, bene me si la kuh dingen la serta e. 13:11 Asum anak-anak denga aku, pengeranangku, perukurku, ras pengertinku bali ras anak-anak. Tapi kenca aku dewasa, kutadingken kerina biak anak-anak e. 13:12 Kai siidah kita genduari enda bali ras awih si meremang-remang i bas cermin tembaga; tapi pagin kerina siidah alu petala-tala. Pemeteh si lit i bas aku genduari langa dem; tapi pagin pemetehku e jadi kuh dingen serta me, bali ras pemeteh Dibata kerna aku kuh dingen serta kap. 13:13 Dage lit telu si tetap arus idalanken, e me: erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, e me engkelengi kalak si deban.
14:1 Bahan maka kekelengen nge si jadi perayakenndu, tapi pe ersura-suralah kam ndatken pemere-pemere Kesah, terlebih-lebih gelah banci kam ernubuat. 14:2 Kalak si ngerana i bas cakap Kesah labo man manusia ia ngerana tapi man Dibata, sabap manusia la ngangka cakap e, erkiteken secara pertendin ibelaskenna perkara-perkara si rahasia. 14:3 Tapi kalak si ernubuat man manusia nge ia ngerana; pengeranana e gunana majekken, ngajarken dingen ngapuli kalak si deban. 14:4 Kalak si ngerana i bas cakap Kesah, dirina kap si ipekenana. Tapi kalak si ernubuat ia majekken perpulungen. 14:5 Ateku min kerina kam ngerana i bas cakap Kesah; tapi ulin nge kuakap adi kam ernubuat. Sabap beliden gunana kalak si ernubuat asangken kalak si ngerana i bas cakap Kesah -- pala lit kalak si nuriken antusenna, gelah perpulungen e banci ibangun. 14:6 O senina-senina, bicara reh aku ndahi kam, janah ngerana aku i bas cakap Kesah, kai nge untungna man bandu? Tentu sitik pe la lit gunana, pala ngerana aku erpalasken kai si ipetangkas Dibata, ntah erpalasken pemeteh, ntah nubuat, ntah pengajaren. 14:7 Bali ras alat-alat musik, e me barang-barang si la erkesah tapi ersora, umpamana sarune ntah kulcapi, kuga ningen ngangkasa laguna adi la tangkas nadana? 14:8 Ntah pe adi si ngembus terompet perang la erturi-turin ibahanna sorana, ise nge ersikap guna erperang? 14:9 Bage me pe kerna kam; ise nge ngerti kerna berita si isehkenndu alu cakap Kesah adi pengeranandu e la iangka? Sia-sia luam kap kam e! 14:10 Erbage-bage cakap i doni enda, tapi labo lit sada pe si la lit ertina. 14:11 Tapi adi la kuangka cakap si ipake kalak, bali ras kalak asing me ia nandangi aku, janah aku pe bali ras kalak asing man bana. 14:12 Kueteh maka mbelin kal sura-surandu ngaloken pemere-pemere Kesah, tapi usahakenlah maka i bas kam lit pemere si majekken perpulungen ngelebihi pemere-pemere si deban. 14:13 E maka kalak si ngerana i bas cakap Kesah, ertotolah ia man Dibata mindo kengasupen guna nuriken antusen kai si ikatakenna e. 14:14 Sabap adi ertoto aku i bas cakap Kesah, tendingku nge si tuhuna ertoto, tapi ukurku labo ikut. 14:15 Kuga dage arusna? Arus aku ertoto alu tendingku, tapi arus ka pe aku ertoto alu ukurku. Arus aku rende alu tendingku, tapi arus ka pe aku rende alu ukurku. 14:16 Adi tendingku saja ngenca ngataken bujur man Dibata, kuga nina kalak si sangana erlajar i bas kiniteken ngataken "Amin" kerna pertoton pengataken bujurndu e? La mungkin iertina kai si ikatakenndu e. 14:17 Bicara mehuli kal pe pertotonndu i bas ngataken bujur man Dibata, labo e majekken kalak si sangana erlajar e. 14:18 Bujur kukataken man Dibata sabap rusuren aku ngerana i bas cakap Kesah asangken kam kerina. 14:19 Tapi i bas perpulungen ulin kuakap aku ngerana lima engkebabah kata si banci iangka, guna ngajari, asangken meribu-ribu cakap Kesah si la iangka. 14:20 O senina-senina, ola medanak perukurndu. I bas perkara kejahaten bagi anak-anak si mbaru tubuhlah min pemetehndu, tapi i bas rukur, bagi kalak dewasa min kam. 14:21 I bas Pustaka Si Badia lit tersurat, nina Tuhan, "Ngerana me Aku man bangsa enda alu cakap bangsa si deban Kubelasken katangKu alu babah kalak asing, tapi amin bage gia, lalap nge la ibegiken bangsa enda Aku." 14:22 E maka pemere ngerana i bas cakap Kesah jadi tanda-tanda man kalak si la nggit tek, labo man kalak si tek, tapi pemere ernubuat, e me guna kalak si tek, labo man kalak si la nggit tek. 14:23 Arah dampar si deban bicara asum kam pulung, kerina anggota perpulungen ngerana i bas cakap Kesah, jenari reh ku bas kalak si sangana erlajar i bas kiniteken, ntah kalak si langa tek man Jesus, ma ikatakenna maka adon kam kerina? 14:24 Tapi adi kerina kam ernubuat jenari reh ku bas kalak si sangana erlajar i bas kiniteken, ntah si langa tek man Jesus, tentu igejapna dosana arah kerina si ibegina e, dingen igejapna maka kerina kalak mereksa ia. 14:25 Alu bage rahasia si terbuni i bas ukurna jadi tangkas, jenari mungkuk ia, isembahna Dibata janahna ngaku, "Tuhu-tuhu kepe Dibata lit i tengah-tengahndu!" 14:26 Kuga dage arusna o senina-senina? Adi pulung kam, sekalak-sekalak kam ngendeken ende-enden si lit i bas ia, sekalak-sekalak nehken ajarna, sekalak-sekalak nehken perkara si ipetangkas Dibata, sekalak-sekalak nehken berita i bas cakap Kesah, janah sekalak-sekalak nuriken antusen cakap Kesah e. Bahanlah si e kerina guna majekken perpulungen. 14:27 Adi lit kalak si atena ngerana i bas cakap Kesah, cukup me dua ntah telu kalak saja, janah sekalak-sekalak ia ngerana, bage pe lit min kalak si nuriken antusen kata e. 14:28 Tapi adi la lit kalak si nuriken antusen cakap Kesah e, madin me sinik saja i bas perpulungen. Man dirina jine ras man Dibata saja lah ia ngerana. 14:29 Adi nabi, dua ntah telu kalak ia si ngerana, janah kalak si deban ertimbang kerna kai si ikatakenna e. 14:30 Tapi adi man kalak si sangana kundul megi-megi lit perkara si ipetangkas Dibata, kalak si leben ngerana ndai arus sinik. 14:31 Kerina nabi banci ernubuat alu ergiliren, gelah kerina ndatken pengajaren dingen kerina ipegegehi. 14:32 Penjemba Kesah guna ernubuat lit kap i teruh kuasa nabi. 14:33 Sabap Dibata labo Dibata kinilaraturen, tapi Dibata kiniraturen. Bali ras i bas kerina perpulungen-perpulungen si enggo ikhususken jadi sikerajangen Dibata. 14:34 Si diberu arus sinik i bas perpulungen. La ia ipelepas ngerana. La ia banci jadi peminpin, sue ras si ikataken Undang-undang. 14:35 Adi perlu iakapna ia meteh sada-sada perkara, i rumah lah ia nungkun man perbulangenna. Man kemelan kap adi diberu nungkun i bas perpulungen. 14:36 Banci kin i bas kam nari rehna Kata Dibata? Ntah man bandu saja kin Kata Dibata e ipeseh? 14:37 Adi lit kalak si erpengakap maka ia nabi, ntah erpengakap maka i bas ia lit pemere Kesah, arus ietehna maka si kusuratken man bandu enda e me kap perentah Tuhan. 14:38 Janah adi lit kalak si la mperdiateken si enda, ia pe ola perdiateken. 14:39 E maka o senina-senina, ersura-suralah kam guna ernubuat, janah ola olangi kalak si ngerana i bas cakap Kesah. 14:40 Lakokenlah kerina alu metunggung dingen ratur.
15:1 Tole pe, o senina-senina, arus kuakap kupersingeti man bandu kerna Berita Si Meriah si enggo kuberitaken nai man bandu. Enggo nai ialokenndu, janah kinitekenndu si genduari enda pe erpalasken si e nge. 15:2 Arah Berita Si Meriah e me kam iselamatken adi tetap icikepndu isi Berita Si Meriah si enggo kuberitaken man bandu e, pala asum kam tek nai la kin mbages iukurindu. 15:3 Si pentingna kal enggo kupeseh man bandu, e me kai si enggo kualoken: maka Kristus enggo mate erkite-kiteken dosanta, bagi si tersurat i bas Pustaka Si Badia. 15:4 Maka Ia enggo ikuburken, jenari i bas wari si peteluken ipekeke Dibata Ia i bas si mate nari, sue ras kesaksin Pustaka Si Badia. 15:5 Maka Ia enggo encidahken diriNa man Petrus, jenari man rasul si sepuluh dua kalak. 15:6 Kenca si e icidahkenNa diriNa man ajar-ajarNa, teremna lebih lima ratus kalak si sangana radu pulung kerinana. Ajar-ajar e teremen denga nggeluh seh asa genduari, janah piga-piga kalak denga ngenca si enggo mate. 15:7 Jenari icidahkenNa diriNa man Jakup, bage pe man kerina rasul-rasul. 15:8 Si perpudina kal, icidahkenNa diriNa man bangku pe -- aku si desken sekalak anak si pertubuhna la bagi kalak. 15:9 Aku me rasul si meterukna -- si tuhuna la metunggung pe aku igelari rasul -- sabap enggo kusiksa perpulungen Dibata. 15:10 Tapi erkiteken lias ate Dibata aku lit bagi si genduari enda. Janah lias ate si iberekenNa man bangku e labo sia-sia. Jingkaten aku erdahin asa kerina rasul-rasul si deban, aminna pe si e labo gegehku jine, tapi lias ate Dibata nge si erdahin ras aku. 15:11 Jadi si penting labo ise kalakna si erberita e -- aku tah rasul si deban -- gendekna, enda ndai me si iberitaken kami kerina, janah e ka me si enggo itekindu. 15:12 Dage adi iberitaken kami maka Kristus enggo ipekeke Dibata i bas si mate nari, uga banci maka piga-piga i bas kam ngatakenca maka labo lit kekeken i bas si mate nari? 15:13 Adi tuhu kin la lit kekeken, Kristus pe labo ipekeke i bas si mate nari. 15:14 Janah adi Kristus la ipekeke Dibata i bas si mate nari, sia-sia me berita si isehken kami, janah sia-sia pe kinitekenndu. 15:15 Lebih asa si e, kami enggo ketunduken maka guak kap kesaksin kami kerna Dibata, sabap enggo isaksiken kami maka enggo ipekekeNa Kristus i bas si mate nari -- tapi la kepe ipekekeNa -- adi tuhu kin la lit kekeken i bas si mate nari. 15:16 Sabap adi tuhu kin la lit kekeken i bas si mate nari, Kristus pe labo ipekeke Dibata i bas si mate nari. 15:17 Janah adi la kin ipekeke Dibata e Kristus i bas si mate nari, sia-sia me kinitekenndu e janah kam tetap denga i bas dosandu. 15:18 Bage pe kalak si enggo mate, si nai enggo tek man Kristus, bene me. 15:19 Adi pengarapenta nandangi Kristus terjeng kegeluhen i bas doni enda ngenca, maka kita me si liahna i bas kerina manusia. 15:20 Tapi si tuhuna Kristus enggo ipekeke Dibata i bas si mate nari, janah enda me jaminen maka kalak si enggo mate nggeluh ka mulihi. 15:21 Sabap bagi kematen reh arah sekalak manusia, bage me pe kekeken i bas si mate nari reh arah sekalak Manusia. 15:22 Sabap bali ras kerina manusia mate erkiteken persadanna ras Adam, bage me pe kerina manusia ipegeluh mulihi erkiteken persadanna ras Kristus. 15:23 Sekalak-sekalak pagi ipekeke Dibata rikutken gilirenna: perlebe Kristus; jenari i bas paksa kerehen Kristus e me giliren kalak sikerajangen Kristus. 15:24 Kenca bage seh kedungenna; i bas paksa si e, kenca ikernepken Kristus kerina raja, pemerentah, ras kuasa-kuasa, e maka iendeskenNa me KinirajanNa man Dibata Bapa. 15:25 Sabap enggo itetapken maka Kristus jadi raja seh itamakenNa kerina musuh-musuhNa i teruh tapak-tapak naheNa. 15:26 Musuh si perpudina kal ikernepkenNa e me kematen. 15:27 Sabap i bas Pustaka Si Badia lit tersurat, "Kerinana enggo itamaken Dibata ku teruh tapak-tapak naheNa." Aminna pe ikataken "kerinana", tentu labo ikut Dibata, e me si namaken kerinana ku teruh tapak-tapak nahe Kristus e. 15:28 Tapi kenca kerinana itamaken i teruh kuasa Kristus, maka Kristus jine selaku Anak, naluken diriNa man Dibata si enggo namaken kerinana i teruh kuasaNa. Alu bage, Dibata tuhu-tuhu me Dibata i bas kerinana. 15:29 Kuga dage kerna kalak si enggo iperidiken guna kalak si enggo mate? Engkai maka si e ilakokenna? Adi tuhu kin la lit kekeken i bas si mate nari, ngkai dage maka kalak iperidiken guna kalak si enggo mate? 15:30 Janah kami jine, man kade kami nggeluh i bas bahaya tep-tep jam? 15:31 O senina-senina, tep-tep wari aku menam mate. Perbahan megahna kuakap kerna kam i bas persadan ras Kristus Jesus Tuhanta, aku i jemba ngataken si enda man bandu. 15:32 Bicara erbebe aku ras rubia-rubia si merawa i jenda, i Epesus, erpalasken pertimbangen manusia saja, kai kin untungna man bangku? Janah adi labo lit kekeken i bas si mate nari, "Man minem sajalah kita, sabap pagi mate me kita." 15:33 Ola kal kam papak! "Pergaulen si la mehuli, ncedaken biak si mehuli." 15:34 Pejorelah ukurndu ku si benar, janah olanai bahan dosa. Piga-piga i bas kam lit denga si la nandai Dibata. Si enda kukataken gelah mela iakapndu. 15:35 Tapi lit kalak si njabap bagenda, "Kuga ka dalanna kalak mate banci keke mulihi? Janah kuga nge pagi tempas kulana?" 15:36 Motu kal tuhu kam! Adi isuanndu benih i bas taneh, labo banci turah adi la kin mate lebe benih e. 15:37 Adi nuan-nuan kam, si isuankenndu labo sinuan-sinuan si enggo mbelin, tapi benihna saja nge ngenca, umpamana page, tah si debanna. 15:38 Dibata nge si mereken tempas batang man benih e rikutken si enggo isura-surakenNa. Tep-tep benih iberekenNa tempas batang si sue rikutken bangsana. 15:39 Labo bali kerina daging: lain daging manusia, lain daging asuh-asuhen, lain daging perik-perik, janah lain daging nurung. 15:40 Bage me pe lit tempas kula si sue man mahluk si nggeluh i bas ingan si meganjang, lit tempas kula si sue man mahluk si nggeluh i doni enda. Tapi lain kiniulin si lit i bas ingan si meganjang, lain kiniulin si lit i doni. 15:41 Lain kiniulin matawari, lain kiniulin bulan, lain kiniulin rubia-rubia; janah rubia-rubia pe lain kiniulinna sada nandangi si debanna. 15:42 Bage me pagi kerna kekeken kalak si enggo mate. Kula si ikuburken biakna ermasap-masap; si ipekeke pagi biakna la ermasap-masap. 15:43 Asum itanemken, kula e ciga ate; asum ipekeke dem alu kiniulin. Asum itanemken lanai ergegeh; asum ipekeke kula e enggo megegeh tuhu-tuhu. 15:44 Asum itanemken tempas kula e sue guna kegeluhen doni enda; tapi asum ipekeke tempasna sue guna kegeluhen pertendin. Dage lit kula si sue guna kegeluhen doni, janah lit kula si sue guna kegeluhen pertendin. 15:45 Sue ras pengajaren Pustaka Si Badia, "Adam, manusia si tangtangna, ijadiken jadi mahluk si nggeluh"; tapi Adam si perpudi jadi Kesah si mereken Kegeluhen. 15:46 Si pemena tempasna labo biak Kesah, tapi tempasna sue guna kegeluhen doni enda; janah kenca bage maka reh si tempasna sue guna kegeluhen pertendin. 15:47 Manusia si pemena e asalna i bas abu taneh nari; tapi Manusia sipeduaken e asalNa i Surga nari. 15:48 Manusia-manusia bangsa doni enda contohna ibuat i bas manusia si asalna i bas abu nari e; janah manusia-manusia bangsa Surga contohna ibuat i bas Manusia si asalNa i Surga nari e. 15:49 Bagi genduari kita make gambar manusia si asalna i bas taneh nari e, bage ka me pagi kita make gambar Manusia si asalNa i Surga nari e. 15:50 O senina-senina, si kumaksud e me: kula si genduari enda, si jadi i bas daging ras dareh nari, labo pagi banci dat bagin i bas Kinirajan Dibata, janah si biakna ermasap-masap labo pagi banci dat bagin i bas si biakna la ermasap-masap. 15:51 Perdiatekenlah, kuturiken sada rahasia man bandu: labo pagi kerina kita mate, tapi kerina pagi kita iobah. 15:52 I bas sada detik, i bas singkemirep mata, asum terbegi sora terompet si perpudina. Sabap asum ersora terompet e, kalak si enggo mate ipekeke i bas tempas si la ermasap-masap, janah i bas paksa si e iobah me kita. 15:53 Sabap si ermasap-masap janah si banci mate arus makeken si la ermasap-masap ras si la banci mate. 15:54 Dage kenca si ermasap-masap dingen si banci mate e enggo makeken si la banci ermasap-masap dingen si la banci mate, maka seh me si tersurat i bas Pustaka Si Badia, "Kematen enggo itelen, kemenangen enggo seh." 15:55 "O kematen, i ja kemenangenndu? O kematen, i ja bisandu?" 15:56 Bisa kematen e me dosa, janah dosa ergegeh erkiteken Undang-undang. 15:57 Tapi bujur ninta man Dibata si mereken kemenangen man banta arah Tuhanta Jesus Kristus. 15:58 Erkiteken si e, o senina-senina si kukelengi, tetaplah ukurndu, ola mbewat-mbewat. Mejingkatlah kam rusur i bas ndahiken dahin Tuhan, sabap ietehndu maka labo percuma dahin si idahikenndu i bas Tuhan.
16:1 Kerna pepulung penampat guna perpulungen si i Judea, bahanlah bagi si kuaturken i bas perpulungen-perpulungen si lit i Galilea. 16:2 Tep-tep wari Minggu sekalak-sekalak kam nerapken sada bagin i bas keuntungenndu, sue ras kengasupenndu. Pepulunglah e gelah asum aku reh pagi lanai man pepulungen. 16:3 Kenca aku reh, kubereken pagi surat pengantar man kalak si enggo isetujuindu, jenari kalak enda isuruh maba pemerendu e ku Jerusalem. 16:4 Janah adi penampatndu e cukup metunggung aku ikut naruhkenca ku jah, ras kami pagi berkat. 16:5 Aku reh ndahi kam kenca kusiari Makedoni -- sabap ateku reh arah Makedoni. 16:6 Ndekah sitik ateku ras kam, banci jadi kidekah musim mbergeh. Alu bage banci aku iperberkatndu guna nerusken perdalanenku, ntah ku ja gia pagi aku lawes. 16:7 Ateku min i bas kerehenku ndahi kam ola aku singgah saja. Ngarap aku banci ndekah sitik ras kam, adi ibere Tuhan. 16:8 Tapi seh ngayak wari Pentakosta i Epesus enda aku lebe. 16:9 Sabap enggo talang pintun si mbelang man bangku guna ndahiken dahin si erguna, janah nterem pe si ngelawan. 16:10 Adi reh Timotius, alo-alolah ia gelah ola metumbur iakapna, sabap ia pe erdahin guna Tuhan, bali ras aku. 16:11 Ola ise pe mekarus nandangi ia, tapi peberkatlah ia, gelah mejuah-juah ia i bas nerusken perdalanenna, maka banci ia mulihken ndahi aku. Sabap aku ngarapken kerehenna ras senina-senina si deban. 16:12 Kerna seninanta Apolos, enggo piga-piga kali kupindoken gelah reh ia ndahi kam ras senina-senina si deban, tapi seh asa genduari la ia nggit. Tapi adi lit piga kesempaten si mehuli tentu reh nge ia ndahi kam. 16:13 Erjaga-jagalah! Tetaplah erkiniteken! Bagi dilakilah kam, dingen megenggenglah! 16:14 Kasa kai si ilakokenndu bahanlah e alu ate keleng. 16:15 Ietehndu kerna Istepanus ras isi jabuna; ia me kalak Kristen si tangtangna i propinsi Akaya, janah enggo iendeskenna dirina guna nampati anak-anak Dibata. Kupindoken man bandu o senina-seninangku. 16:16 Patuhlah kam man kalak si bage, bage pe man kerina kalak si latih erdahin ras ia. 16:17 Meriah ukurku kerna kerehen Istepanus, Portunet, ras Akaikus, sabap ia reh jadi gancihndu. 16:18 Malem kal ateku ibahanna bagi malemna atendu ibahanna. Kalak si bagi enda patut iergaken. 16:19 Perpulungen-perpulungen si i daerah Asia ngataken mejuah-juah man bandu. Akuila ras Persila bage pe perpulungen si pulung i rumahna ngataken man bandu mejuah-juah i bas Tuhan. 16:20 Kerina senina si sada kiniteken i jenda ngataken mejuah-juah man bandu. Sisalam-salamenlah kam alu dem keleng ate bagi si ersenina. 16:21 Alu tanku jine kusuratken enda man bandu: Mejuah-juah i bas aku nari, Paulus. 16:22 Kalak si la erkeleng ate man Tuhan, kena sumpahlah ia! Maranatha -- Rehlah Kam o Tuhan kami. 16:23 Lias ate Tuhan Jesus ras kam kerina gelah. 16:24 Keleng ateku i bas Kristus Jesus ras kam kerina gelah.
1:1 Surat enda i bas aku nari, Paulus, Rasul Kristus Jesus erpalasken peraten Dibata, ras i bas seninanta Timotius nari. Surat enda man perpulungen anak-anak Dibata i Korinti, ras man kerina kalak si iserapken jadi sikerajangen Dibata i belang-belang propinsi Akaya. 1:2 Lias ate dingen kemalemen ate i bas Dibata Bapanta ras i bas Tuhan Jesus Kristus nari man bandu gelah. 1:3 Bujur man Dibata, Bapa Tuhanta Jesus Kristus, Bapa si perkuah, Dibata sumbul kerina pengapul. 1:4 Enggo iapulina kami i bas kerina kiniseran kami, gelah ngasup kami ngapuli kalak si lit i bas erbage-bage kiniseran. Si enda banci ilakoken kami erpalasken pengapul si ialoken kami i bas Dibata nari. 1:5 Bali ras kiniseran Kristus sampur seh man kami, bage me pe sampur ka pengapul Dibata ialoken kami arah Kristus. 1:6 Adi kami ngenanami kiniseran, si e guna ngapuli kam dingen guna keterkelinenndu kap. Adi kami iapuli Dibata, e pe erguna jadi pengapul man bandu, gelah e njadiken kam megenggeng adi inanamindu kiniseran bagi si inanami kami genduari e. 1:7 Pengarapen kami kerna kam enteguh kap, sabap ieteh kami maka bagi kam ikut ngenanami kiniseran, bage pe ikut nge kam ngaloken pengapul. 1:8 O senina-senina, la ate kami la ietehndu kerna kiniseran si inanami kami i Propinsi Asia. Kiniseran si nindih kami e, lebih asa si ngasup kami nggengkenca, seh maka lanai lit arapen kami nggeluh. 1:9 Bage beratna, seh maka enggo iakap kami idabuhken ukumen mate man kami. Tapi si enda jadi gelah ola kami ernalem man diri kami, tapi man Dibata saja, si mpekeke kalak si enggo mate. 1:10 Enggo ipulahiNa kami i bas erbage-bage ancamen kematen si ngeri nari, janah tetap nge kami ipulahiNa; enggo itamaken kami pengarapen kami man baNa maka Ia ka nge tole si mulahi kami. 1:11 Kam pe isampatindu ka kami alu pertoton. Alu bage, erkiteken nterem kalak ertoto guna kami, nterem ka pe kalak si ngataken bujur erkiteken kami, sabap Dibata enggo encidahken lias ateNa man kami. 1:12 Si erbahanca megah iakap kami e me: pusuh peraten kami naksiken maka i bas hubungen kami ras kalak si deban, terlebih-lebih ras kam, perbahanen kami tetap erpalasken kinibujuren ras ukur si bersih i adep-adepen Dibata. Si enda ilakoken kami labo erkiteken kepentaren kami selaku manusia, tapi erkiteken lias ate Dibata. 1:13-14 Kai si isuratken kami man bandu e me si banci iogendu ras iantusindu saja nge ngenca. Tapi aminna pe langa payo kal kami itandaindu, ngarap aku maka kedungenna banci kami itandaindu alu serta, gelah bagi megahna iakap kami kerna kam, bage ka pe megahna iakapndu kerna kami i bas wari kerehen Tuhanta Jesus. 1:15 Erkiteken tek aku maka mehuli kal ukurndu man bangku, e maka ersura-sura aku maka kam me lebe kudahi, gelah banci kam dua kali ndatken pasu-pasu. 1:16 Sabap mbarenda ateku ndahi kam muat aku ku Makedoni bage pe kenca aku mulihi Makedoni nari, gelah ipeberkatndu aku ku Judea. 1:17 Bali kin aku ras sanggar uruk-uruk erkiteken la sahun rencanangku e? Ntah percakap longgar kin iakapndu aku erbahan rencana? "Ue!" ningku tempa, tapi i bas ukurku "Lang!"? 1:18 I bas gelar Dibata si setia, padan kami man bandu labo "Ue" tapi ngataken "Lang". 1:19 Sabap Jesus Kristus Anak Dibata, si kuberitaken ras Silas bage pe Timotius man bandu, labo biakna "Ue" ras "Lang", tapi i bas Ia tetap nge "Ue". 1:20 Sabap kerina padan-padan Dibata enggo "iueken" i bas Jesus. Erkiteken si e me maka arah Jesus sikataken "Amin", guna kemulian Dibata. 1:21 Dibata sendiri jine si enggo mereken man kami ras man bandu ingan si nteguh i bas Kristus. Dibata me si enggo nangkuhken kita. 1:22 Dingen si enggo encap kita, tandana kita enggo jadi sikerajangenNa, janah selaku panjarna enggo iberekenNa Kesah Si Badia ku bas pusuhta. 1:23 Kulebuh Dibata jadi saksingku, itandaiNa kap pusuhku. Maka la aku surung reh ku Korinti e me gelah ola kam kena ukumen. 1:24 La ate kami engkuasai kinitekenndu; sabap ieteh kami maka tetap nge paguh pertedisndu i bas kiniteken. Tapi ras-ras kita erdahin guna keriahenndu.
2:1 Em sabapna maka enggo kuputusken la aku sahun reh ndahi kam gelah ola arah kerehenku e ka nambahi ate menek. 2:2 Sabap adi menek atendu kubahan, ise nari nge erbahanca ukurku meriah? Tentu kam ka nge ngenca, si enggo kubahan menek atendu e. 2:3 Erkiteken si e me maka pernah mbarenda kubahan surat man bandu, gelah kune aku reh ndahi kam, la menek ateku ibahan kalak si kin arusna erbahan kuakap meriah. Sabap tek aku maka adi meriah ukurku, kam pe kerina meriah nge ukurndu. 2:4 Surat e kubahan alu ate ceda dingen pusuh sedak, rikut pe iluhku mambur erdire-dire. Kuturiken enda labo ateku gelah menek atendu, tapi gelah ietehndu maka tuhu-tuhu keleng kal ateku man bandu. 2:5 Adi lit kalak si erbahanca turah ate menek, si tuhuna kal labo ateku si ibahanna menek e, tapi kerina nge kam ibahanna ermenek ate, aminna deba la gia mekeleksa. Si enda kukataken gelah ola mberatca ukumen si ibereken man bana. 2:6 Teremen i bas kam enggo mereken ukumen si bage man bana. Enggo me bias si e saja pe. 2:7 Dage genduari arus ialemindu salahna ras ngapuli ia gelah ola ia gedap ibahan menek ate si bage sangatna. 2:8 Kupindoken man bandu gelah icidahkenndu maka tuhu-tuhu kam erkeleng ate man bana. 2:9 Surat e kubahan mbarenda man bandu, sabap ateku nguji kam ntah kin kam patuh man bangku i bas kerinana. 2:10 Adi ialemindu kalak si ersalah, aku pe kualemi nge ia. Sabap adi aku ngalemi salah kalak -- adi lit kin si perlu ialemi -- si e kulakoken i lebe-lebe Kristus guna kam kap. 2:11 Si enda kulakoken gelah ola lit kesempaten man Iblis guna ngkuasai kita, sabap sieteh nge kai sura-surana. 2:12 Asum aku seh i Troas guna meritaken Berita Si Meriah kerna Kristus, kudapeti maka Tuhan enggo nalangi pintun man bangku guna erdahin i je. 2:13 Tapi la teneng ukurku sabap la aku jumpa ras seninangku Titus. E maka kenca aku erkata man kalak si i je, kuterusken perdalanenku ku Makedoni. 2:14 Tapi bujur ningku man Dibata sabap ibereNa kami ikut selaku tawanen i bas arak-araken kemenangen Kristus. Janah ipake Dibata kami guna pembarken pemeteh kerna Kristus ku japa pe bali ras bau kumenen si merim. 2:15 Sabap kami bali ras kumenen si merim si ipersembahken Kristus man Dibata, si mbar i tengah-tengah kalak si nuju ku keselamaten, bage pe i tengah-tengah kalak si nuju ku kebenen. 2:16 Nandangi kalak si nuju ku kebenen, kami enda bali ras bau si nandaken kematen; tapi nandangi kalak si nuju ku keselamaten, kami enda bali ras bau si merim si nandaken kegeluhen si tuhu-tuhu. Dage ise ngasup ndahiken dahin si bagenda? 2:17 Silang-langna kami labo bali ras nterem kalak si deban, si njajaken Kata Dibata guna keuntungenna jine. Tapi tujun kami murni kap. E maka selaku kami kalak persuruhen Dibata, janah wakil Kristus, ibelasken kami kata ketuhu-tuhun selaku kalak si nggeluh i adep-adepen Dibata.
3:1 Ntah kin enda ertina ibenaken kami ka mujiken diri kami? Perlu kin kami surat pujin i bas kam nari ntah pe surat pujin si man cidahenken man bandu bagi piga-piga kalak si deban? 3:2 Kam kap surat kami, si tersurat i bas pusuh kami si banci ieteh dingen ioge kerina jelma. 3:3 Enggo terang maka kam kap surat Kristus si isuratkenNa arah pendahin kami. Surat e la itulis alu tinta, tapi alu Kesah Dibata si nggeluh; la itulis i bas papan batu, tapi i bas pusuh manusia. 3:4 Si enda pang kami ngatakenca i adep-adepen Dibata, sabap ibelasken kami e erpalasken kiniteken man Kristus. 3:5 Enda labo ngataken maka lit kengasupen i bas diri kami jine. Tapi pang kami ngataken si enda erkiteken kengasupen kami si rehna i bas Dibata nari. 3:6 Ia me si erbahanca kami ngasup jadi si erdahin i bas iketen padan si mbaru e. Iketen padan si mbaru e biakna labo biak tulisen, tapi biak Kesah kap. Undang-undang si tersurat e maba kematen, tapi Kesah mereken kegeluhen. 3:7 Undang-undang e isuratken i bas batu, janah asum Undang-undang e ibereken man Musa, teridah terang sinalsal Dibata. Terang e ersinalsal i bas ayo Musa, janah amin minter pe bene, ergegeh kap, seh maka kalak Israel la ngasup natap ia. Adi pendahin si maba kematen e reh i bas kemulian si bage belinna, 3:8 la kin beliden nge kemulian Kesah? 3:9 Adi pendahin si nuduhken kesalahen ras ukumen manusia pe mulia nge, tentu ndauh lebih mulia pendahin si njadiken manusia ndeher ras Dibata. 3:10 Banci sikataken maka: sinalsal si nai seh kal terangna, lanai lit ertina erkiteken sinalsal si genduari ndauh terangen. 3:11 Sabap adi si nandangi masap e pe ersinalsal, tentu beliden pe sinalsal i bas si la ermasap-masap! 3:12 Erkiteken bagenda pengarapen kami, e maka pang kami erterus terang. 3:13 Kami labo bali ras Musa si make penutup ayo gelah ola idah kalak Israel sinalsal e lesap seh bene. 3:14 Ukur kalak Israel e enggo batu-batun, janah seh ku bas wari enda adi iogeken kitap-kitap iketen padan si ndekah e, penutup si ndai tetap nutupi ukurna. Ukurna e la banci talang pala ersada ia ras Kristus. 3:15 Seh wari enda pe adi iogeken kitap-kitap Musa, penutup si ndai tetap nutupi ukurna. 3:16 Tapi adi sekalak "erkusur kempak Tuhan", bali ras si ilakoken Musa, e maka penutup e nangtang. 3:17 "Tuhan" si imaksudken i jenda e me Kesah Dibata. Janah i ja lit Kesah Tuhan, i je me lit kebebasen. 3:18 Janah kita kerina natap dingen pembincarken sinalsal kemulian Tuhan alu ayo si la itutupi. Kemulian e, si rehna i bas Tuhan nari, e me Kesah, ngobah kita reh dekahna reh muliana, seh maka kita dungna segambar ras Tuhan.
4:1 Erkiteken pendahin kami e erpalasken perkuah ate Dibata, e maka la kami erleja-leja. 4:2 Enggo itulak kami kerina perbahanen si erbuni-buni si erbahanca mela iakap kami. Kami labo nggeluh nipui, bage pe labo iputar balikken kami Kata Dibata. Tapi kebenaren si icidahken kami e jadi sada pujin kerna diri kami gelah kami ialoken kerina pusuh peraten manusia i adep-adepen Dibata. 4:3 Janah adi kin Berita Si Meriah si iberitaken kami e tertutup denga man kalak, e tertutup man kalak si perlawesna kempak kebenen nge ngenca. 4:4 Kalak e kalak si la tek, si ukurna enggo ipepentang dibata palsu jaman enda. La ipelepasna kalak e ngidah terang sinalsal erpagi-pagi si sangana mbincar man bana. Terang e, e me Berita Si Meriah si encidahken kemulian Kristus si segambar ras Dibata. 4:5 Labo kerna diri kami si iberitaken kami, tapi kerna Jesus Kristus selaku Tuhan, janah kami enda budakndu erkiteken Jesus. 4:6 Dibata kap si ngataken, "Ersinalsallah terang i bas gelap nari." Ia me pe Dibata si erbahanca terang e ersinalsal i bas pusuhta, gelah jelas man banta pemeteh kerna kemulian Dibata si teridah i bas ayo Kristus. 4:7 Kami si jadi ingan nimpan erta-erta pertendin e, desken kudin taneh saja ngenca, gelah teridah maka gegeh si mbelin e i bas Dibata nari kap, labo i bas kami nari. 4:8 Arah apai pe kami itindih, tapi la kami meripuk. Bingung kami, tapi la seh putus asa. 4:9 Iayak-ayak musuh kami, tapi la kami itadingken Dibata. Idampesken kalak kami, tapi la seh getem. 4:10 Kiniseran Jesus si maba kematen lalap ipersan kami jadi baban kula kami, gelah kegeluhenNa pe jadi tangkas i bas kula kami. 4:11 I bas gedang-gedang geluh kami, lalap kami iendesken kempak kematen erkiteken Jesus, gelah kegeluhenNa banci tangkas ia bas kula kami si ermasap-masap enda. 4:12 Dage kematen e erdahin i bas kami, tapi kegeluhen erdahin i bas kam. 4:13 I bas Pustaka Si Badia lit tersurat, "Erkiteken aku tek, e maka aku ngerana." Erkiteken perukuren kami i bas erkiniteken bali ras si enda, e maka kami ngerana, erkiteken kami tek. 4:14 Ieteh kami maka Dibata si enggo mpekeke Tuhan Jesus i bas si mate nari, mpekeke kita ka pe pagin ras Jesus, jenari ibabaNa kita ku lebe-lebe Dibata. 4:15 Kerina si enda man gunandu kap. Janah erkiteken reh teremna rusur kalak si ngaloken lias ate Dibata, reh sampurna ka pe isehken pengataken bujur man Dibata; alu bage Dibata imuliaken. 4:16 Enda me sabapna maka la kami erleja-leja dingen la lesek ate kami. Aminna pe kula kami enda reh burukna reh dekahna, tapi ukur kami tep-tep wari ipelimbarui. 4:17 Janah kiniseran si genduari e menahang nge dingen labo ndekah, janah ulihna e me kemulian si rasa lalap si la terturiken beratna ertimbangken kiniseran si menahang e. 4:18 Sabap kami labo natap kempak si teridah, tapi kempak si la teridah. Sabap si teridah kentisik nge ngenca; tapi kai si la teridah tetap seh rasa lalap.
5:1 Sabap ieteh kami maka adi kemah si jadi rumahta i doni enda kulanta enda itangtangi, lit kap rumahta i Surga, si tahan rasa lalap, la bekas tan manusia, tapi bekas Dibata erbahan. 5:2 Kidekah kita ringan i bas kemah enda, kelsehen kita, sabap metedeh kal ateta make rumahta si asalna i Surga nari e i babo kemahta si genduari e. 5:3 Alu make rumah e, la kap kita ketunduken manjang-anjang. 5:4 Kidekah kita ringan i bas kemah si i doni enda, kelsehen kita erkiteken bage beratna babanta. Labo perban ateta nangtangi si male e, tapi sura-suranta e me makeken si mbaru i babona, gelah si ermasap-masap e itelen kegeluhen. 5:5 Dibata nge si nikapken kita guna si e, janah selaku jaminenna, Dibata enggo mereken KesahNa man banta. 5:6 E maka tetap kami pang ngalaken kematen. Ieteh kami maka kidekah kami i bas rumah enda, e me kula enda, kami langa serumahen ras Tuhan. -- 5:7 Sabap kami nggeluh erpalasken kiniteken, labo erpalasken kai si teridah. -- 5:8 Sitik kal pe labo kami mbiar, janah pangen kal kami nadingken kula enda gelah banci kami serumahen ras Tuhan. 5:9 Tapi lebih asa si e, perayaken kami e me kap ndarami uga maka ngena ateNa, subuk i bas rumah kami si i jenda tah pe i jah. 5:10 Sabap kerina kita la banci lang ngadap ku lebe-lebe Kristus guna iadiliNa, gelah sekalak-sekalak ngaloken kai si patut ialokenna rikutken kai si enggo ibahanna arah kulana paksa ia nggeluh, subuk perbahanen si mehuli ntah si jahat. 5:11 Ieteh kami kai ertina erkemalangen man Tuhan, e maka iusahaken kami alu meseksek gelah tek kalak. Perukuren kami tangkas kap man Dibata, janah ngarap pe aku maka pusuh peratenndu enggo tangkas nandai perukurenku. 5:12 Labo ate kami mujiken diri kami ka i lebe-lebendu. Saja ngenca isehken kami man bandu alasen si mehuli gelah megah iakapndu kerna kami, gelah lit i bas kam bekal guna ngelawan kalak si megah iakapna kerna kai si teridah saja, tapi la ia ngenehen ku bas pusuh. 5:13 Adi tuhu kin kami adon, guna Dibata kap e. Janah adi jore ukur kami, man gunandu kap e. 5:14 Erkiteken kekelengen Kristus ngkuasai kami nge maka enggo kami seh ku bas sada pengertin, e me: sekalak Manusia enggo mate guna kerina manusia. Enda ertina maka kerina manusia e enggo mate. 5:15 Ia mate guna kerina manusia, gelah kalak si nggeluh lanai nggeluh erbana-bana, tapi guna Ia si enggo mate dingen si enggo ipekeke Dibata i bas si mate nari. 5:16 Dage genduari pengerganta nandangi sekalak manusia lanai bo rikutken pertimbangen manusia. Aminna gia nai pengerganta nandangi Kristus e rikutken pertimbangen manusia, tapi genduari lanai bage sibahan. 5:17 Adi kalak ersada ras Kristus, ia me tinepa si mbaru, si male enggo lepas janah nehenlah, si mbaru enggo reh. 5:18 Kerina si enda Dibata erbahanca, maka arah Kristus, kita si gelgel nari ermusuhen ras Ia, enggo ibahanNa jadi temanNa. Janah man kami iberekenNa dahin guna njadiken musuhNa jadi temanNa. 5:19 Alu kata si deban: Dibata enggo nai reh i bas Kristus; enggo ijadikenNa manusia jadi teman Dibata. Dibata la mperkiraken kelepaken manusia. Janah man kami enggo iendeskenNa Berita perdamen e. 5:20 Dage kami enda me utusen-utusen Kristus, bali ras Dibata jine si mindo man bandu arah kami. I bas gelar Kristus ipindo kami alu mesangat man bandu: bere min maka kam si gelgel nari ermusuhen ras Dibata banci ibahan Dibata jadi temanNa! 5:21 Aminna pe Kristus la erdosa, enggo ibahan Dibata maka Ia si mersan dosa-dosanta, gelah i bas persadan ras Kristus kita irembakken mulihken ras Dibata.
6:1 Kami selaku teman Tuhan erdahin mindo man bandu: gelah ola isia-siakenndu lias ate Dibata e si enggo ialokenndu. 6:2 Begikenlah kai si ikataken Dibata i bas Pustaka Si Badia, "I bas paksa si mehuli Kuakap enggo Kubegiken kam. I bas wari keselamaten, enggo Kusampati kam." Nehenlah! Genduari kap paksa si mehuli e, janah genduari kap wari keterkelinen e! 6:3 La pernah tondel ukur ise pe ibahan kami, gelah dahin Tuhan la tersalahken kalak. 6:4 Tapi i bas kerina perbahanen kami icidahken kami maka kami si erdahin Dibata kap. Si enda icidahken kami arah megenggeng i bas ngenanami kiniseran-kiniseran, kepiceten, ras kebiaren. 6:5 Megenggeng kami asum kami ipekpeki, ipenjaraken, bage pe iurup kalak. Megenggeng kami i bas latih erdahin, la tunduh, janah erpuasa. 6:6 Icidahken kami maka kami si erdahin Dibata alu kinibujuren, alu pemeteh kami, alu ate saber, alu kiniulin, alu penampat Kesah Si Badia, alu keleng ate si tuhu-tuhu. 6:7 Alu meritaken berita si tuhu-tuhu janah alu gegeh si rehna i bas Dibata nari. Kinibujuren ipake kami jadi senjata kami, subuk i bas ngelawan bage pe i bas njaga diri kami. 6:8 Kami ipehaga bage pe igombang-gombangi; kami ipuji bage pe ihina. Bujur pe kami, ikataken kalak nge kami perguak. 6:9 Kami tempa la itandai, tapi kerina kalak nandai kami. Kami tempa enggo mate, tapi bagi idahndu, nggeluh denga nge kami. Kami iligas alu kiniseran, tapi la kami mate. 6:10 Aminna pe ceda ate kami, lalap nge kami ermeriah ukur. Kami tempa-tempa musil, tapi enggo nterem kalak jadi bayak ibahan kami. Tempa-tempa la lit kai pe i bas kami, tapi si tuhuna kai pe lit nge i bas kami. 6:11 O kalak Korinti! Enggo terang-terangen kami ngerana man bandu. Pusuh peraten kami enggo talang man bandu. 6:12 Keleng ate si lit i bas pusuh kami italangi kami kap man bandu, tapi keleng ate si lit i bas pusuhndu la italingindu man kami. 6:13 Genduari gelah bujur, selaku balasna kupindoken man bandu: talangilah pusuh peratenndu man kami. Enda kukataken man bandu bali ras man anakku jine. 6:14 Ola kam nggit teriket i bas sada pasangen ras kalak si la tek man Tuhan. Ja nge banci kebenaren erkongsi ras kejahaten! Ja nge banci terang ersada ras gelap! 6:15 Banci kin ersadakata Kristus ras Iblis? Kai kin perkongsin kalak si tek ras kalak si la tek man Tuhan? 6:16 Banci kin sada tujunna Rumah Pertoton Dibata ras berhala? Sabap kita kap Rumah Pertoton Dibata, si nggeluh. Bagi nina Dibata, "Nggeluh me aku ras ia janah ringan aku i tengah-tengahna. Aku me jadi Dibatana janah ia jadi bangsangKu." 6:17 Bage pe tole, "Nina Tuhan, 'Ndaratlah kam i tengah-tengahna nari, janah peserap bandu i bas ia nari. Ola kuit si la bersih, maka Kualoken kam. 6:18 Aku me jadi Bapandu, janah kam jadi anakKu si dilaki ras si diberu,' bage me nina Tuhan si Mada Kuasa."
7:1 Kerina padan enda ibahan Dibata man banta, o teman-temanku. E maka sibersihkenlah banta i bas kerina sierbahanca kula ras tendinta meluat. Kita enggo khusus jadi sikerajangen Dibata; sibahanlah e jadi serta alu erkemalangen man baNa. 7:2 Alokenlah kami i bas pusuh peratenndu. La pernah ibahan kami salah man ise pe. La pernah ise pe irugiken kami. La pernah ise pe iperalat kami guna keuntungen kami. 7:3 Si enda kukataken labo guna nalahken kam; sabap bagi si enggo kukataken ndai, maka kam enggo ialoken kami i bas pusuh kami seh maka kita tetap ersada, subuk mate ntah nggeluh. 7:4 Tek kal aku nandangi kam janah megah kal kuakap kerna kam. Keriahen kami ngelebihi kerina kiniseran kami, e maka terapul kal aku. 7:5 Kenca kami seh pe i Makedoni labo lit ketenengen i bas kami. Arah dampar si apai pe kami ikenai kiniseran: arah dampar si arah darat, perubaten; arah dampar si arah bas, aru ate. 7:6 Tapi Dibata, si ngapuli kalak si lit i bas kepiceten ukur, enggo ngapuli kami alu kerehen Titus. 7:7 Labo saja alu kerehenna, tapi pe alu berita si ibabana maka kam enggo mpegegehi ia. Iturikenna kerna uga tedehna atendu aku, uga erkadiolana kam, janah uga gegehna kam mbela aku. Erkiteken si e reh tambahna keriahenku. 7:8 Aminna pe menek atendu ibahan suratku e, labo aku erkadiola. Tuhu kentisik erkadiola aku sabap kuidah maka menek atendu erkiteken suratku e. 7:9 Tapi genduari meriah ukurku -- labo erkiteken menek atendu, tapi erkiteken menek atendu e erbahanca kam jera. Menek atendu e sue kap ras peraten Dibata, seh maka la kam sitik pe irugiken kami. 7:10 Menek ate si sue ras peraten Dibata erbahan kalak jera kap, gelah ia selamat; janah kerna si e la perlu kalak erkadiola. Tapi menek ate si pelin-pelin erkiteken soal doni enda mabai ku kematen kap. 7:11 Nehenlah! Uga ulina menek atendu si sue ras peraten Dibata e: genduari enggo tutus atendu encidahkenca maka pengadun kerna kam lanai tuhu. Nembeh kal atendu man kalak si ngguluti e. Mbiar kam, tedeh atendu. Ergiah-giah ukurndu ndalanken si bujur. Enggo icidahkenndu maka i bas kerina persoalen e la kam ersalah. 7:12 Dage, amin kubahan pe surat e, si pentingna labo erkiteken kalak si ersalah e, ntah pe kalak si isalahken e. Tapi surat e kubahan gelah teridah man bandu kuga tutusna atendu mperdiateken kami i lebe-lebe Dibata. 7:13 Si enda me erbahanca maka malem kal ate kami. Labo saja malem ate kami, tapi pe sampur keriahen kami ngidah uga riahna ukur Titus, erkiteken kerina kam enggo pesalangken ukurna. 7:14 Nai kupujiken kam i lebe-lebena, janah la aku kemalun ibahanndu. Bagi kerina si ikataken kami man bandu tuhu kap, bage pe kai si ipujiken kami i lebe-lebe Titus enggo teridah maka e tuhu kap. 7:15 E maka genduari reh sampurna atena keleng nandangi kam, nginget kepatuhenndu man bana, janah nginget kuga nai kam ngaloken ia alu mehamat dingen erkemalangen man bana. 7:16 E maka meriah ukurku sabap banci kam kupenalem tuhu-tuhu.
8:1 O senina-senina, ate kami gelah ietehndu kai si enggo ibahan Dibata arah lias ateNa nandangi perpulungen-perpulungen si i Makedoni enda. 8:2 Perpulungen-perpulungen e enggo iuji alu mesangat alu kiniseran-kiniseran si inanamina. Tapi keriahenna si simpar dingen kemusilenna si la teralang e erbahanca ia melumbar mere, tempa-tempa ia bayak. 8:3 Pang aku ngatakenca, maka perpulungen e enggo mere asa ngasupna -- lebih nge pe asa ngasupna -- alu ukurna ersuruh. 8:4 Alu meseksek ipindokenna man kami gelah ibereken kesempaten man bana guna ikut muat bagin i bas nampati kalak Kristen si i Judea. 8:5 Labo terjeng si iarapken kami e saja! Si pentingna e me iendeskenna dirina man Tuhan. Jenari, alu peraten Dibata, iendeskenna pe dirina man kami. 8:6 Ngidah si e, e maka ipindo kami man Titus gelah ia mulihken ndahi kam guna nerusken dahin keleng ate si enggo ibenakenna e maka idungina. 8:7 Kam sampur kap i bas kai pe: i bas kiniteken, i bas ngerana, i bas pemeteh, i bas ketutusen i bas kai-kai pe, bage pe i bas keleng atendu nandangi kami. E maka sampur ka lah min kam i bas dahin keleng ate enda pe. 8:8 Si enda kukataken labo selaku perentah. Tapi alu encidahken kuga kalak si deban ergiah-giah i bas nampati, ateku nguji ntah kin kekelengenndu e tuhu-tuhu tulen. 8:9 Ietehndu uga liasna Tuhanta Jesus Kristus: maka aminna bayak gia Ia, tapi guna kiniulinndu, ipemusilNa baNa, gelah arah kemusilenNa e jadi bayak kam. 8:10 Rikutken pengakapku: guna kiniulinndu, dungilah dahin si enggo ibenakenndu tahun nderbih. Kam me si pemenana kal ndahiken dahin e, labo saja ndahikenca, tapi pe ukur ersuruh ndahiken dahin e i bas kam me si pemenana turah. 8:11 Genduari teruskenlah, dingen dungi dahin e! Ergiah-giahlah ukurndu ndungisa, bagi ergiah-giah nai ukurndu menakenca. Dahikenlah e rikutken kai si lit i bas kam genduari. 8:12 Adi litlah ukur ersuruh guna mere, maka ialoken Dibata me pemere e erpalasken kai si lit i bas kita, labo erpalasken kai si la lit i bas kita. 8:13 Labo ateku mpenahangi kalak si deban alu nambahi babanndu; tapi gelah ola si tualen 8:14 kelebihen si lit i bas kam genduari ras kekurangen si lit i bas kalak e genduari. Kune denggo kelebihen ka kalak e, ia ka denggo encukupi kekurangenndu. Alu bage lanai situalen. 8:15 Bagi si lit tersurat i bas Pustaka Si Badia, "Kalak si mbue ipepulungna la ia kelebihen, janah kalak si sitik ipepulungna la ia kekurangen." 8:16 Bujur ningkami man Dibata si erbahanca maka bali ras kami ergiah-giah ukur Titus erdahin guna kiniulinndu. 8:17 Labo saja meriah ukurna ngaloken pemindon kami, tapi pe ergiah-giah ukurna seh maka alu ukurna ersuruh enggo itetapkenna ndahi kam. 8:18 Isuruh kami pe ikut ras ia sekalak senina si ipujiken perpulungen-perpulungen i japa pe erkiteken dahinna meritaken Berita Si Meriah. 8:19 Labo e saja, tapi pe ia enggo ipilih dingen itetapken perpulungen-perpulungen jadi teman kami i bas perdalanen ndahiken dahin keleng ate e. Si e ilakoken kami guna kiniulin Tuhan dingen guna encidahken ukur kami ersuruh ndahiken dahin e. 8:20 Isilahken kami kal maka ise pe la nalahken kami i bas kami ngurus pemere si ibereken alu melumbar e. 8:21 Tujun kami e me guna ndalanken si mehuli, labo saja i lebe-lebe Tuhan, tapi pe i lebe-lebe manusia. 8:22 Bage pe isuruh kami sekalak nari seninanta ikut ras kalak e duana. Enggo megati ia iuji kami alu erbage-bage cara, janah teridah maka tetap ergiah-giah ukurna. Janah genduari reh ergiah-giahna ia perbahan bage belinna kinitekenna kerna kam. 8:23 Adi kerna Titus, ia kap temanku sada dahin kal guna kam. Adi senina-senina si dua kalak nari e, ia me utusen perpulungen-perpulungen si jadi kemulian Kristus. 8:24 Cidahkenlah keleng atendu man kalak enda, gelah arah ia kerina perpulungen-perpulungen meteh kerna kekelengenndu e. Alu bage kai si ipujiken kami kerna kam teridah maka tuhu kap.
9:1 Si tuhuna labo perlu kusuratken kerna penampat si isehken man kalak Kristen si sangana i bas kekurangen e. 9:2 Kueteh maka ersuruh nge ukurndu guna nampati, janah kupujiken pe kam i tengah-tengah kalak Makedoni enda. Kukataken man bana, "Senina-senina si i propinsi Akaya tahun nderbih kin enggo sikap nampati." Janah erkiteken ketutusenndu e teremen i bas ia enggo keke ukurna. 9:3 Aminna pe bage isuruh kami ka nge senina-senina enda, gelah kai si enggo ipujiken kami kerna kam la sia-sia. Dage bagi si enggo kukataken e, sikap dage kam. 9:4 Adi lang, maka adi reh kalak Makedoni ras aku janah idapeti kami kam la sikap, tentu mela iakap kami, apai denga ka kam -- sabap tek kal kami man bandu. 9:5 E maka perlu kuakap mindo kempak senina-seninanta enda berkat leben asa aku ndahi kam gelah isikapkenna leben perkuah ate si enggo ipadankenndu e. Adi enggo pagi leben sikap perkuah atendu e, bekas ukurndu meriah kap e, labo erkiteken terpaksa. 9:6 Inget lah maka kalak si sitik ngerdangken benih, sitik ka iperanina; kalak si melala ngerdangken benih, melala ka iperanina. 9:7 Sekalak-sekalak iberekennalah sue ras si enggo itetapkenna i bas ukurna; ola alu pusuh jungut-jungut tah pe bagi si terpaksa, sabap Dibata engkelengi kalak si mere alu ukur meriah. 9:8 Dibata ngasup mereken man bandu kasakai pemereNa alu sampur. Alu bage kerina keperlun guna dirindu i bas kai pe icukupi, seh maka sampur pe guna banci kam ndahiken dahin-dahin si mehuli si apai pe. 9:9 Kerna kalak si bage lit tersurat i bas Pustaka Si Badia, "Enggo iambur-amburna pemerena man si musil, kiniulinna e tahan seh rasa lalap." 9:10 Dibata si nikapken benih man kalak si merdang bage pe nakan si man pangan. Ia pe si nikapken benih si iperlukenndu. Ia ka nge si peturah benih e dingen si mereken ulih si erlipat ganda i bas kiniulinndu e nari. 9:11 Dibata erbahanca kam bayak i bas kai pe, seh maka kam melumbar mere katawari pe, janah nterem kalak ngataken bujur man Dibata erkiteken pemerendu si ialokenna bekas pendahin kami. 9:12 Sabap penampat si ipersembahkenndu e labo saja encukupi keperlun kalak Kristen si lit i bas kekurangen, tapi pe sampur jadi pengataken bujur man Dibata. 9:13 Kam ngaku maka patuh kam nandangi Berita Si Meriah kerna Kristus. Pengakunndu e payo adi teridah kam menang i bas soal nampati. Janah erkiteken penampatndu e, nterem me pagi kalak muji Dibata. Tole pe ipujina Dibata erkiteken persadanndu si enteguh e, si teridah man bana ras man kerina kalak Kristen si deban. 9:14 Itotokenna pe kam alu dem keleng ate, nginget lias ate Dibata si la tersipati si seh man bandu. 9:15 Bujur ninta man Dibata kerna pemereNa si la terkataken nari uga ulina.
10:1 Aku, Paulus, mindo man bandu, aku si ikataken kalak melemuk adi ngerana petala-tala ras kam, tapi pang merawa adi sangana pedauh-dauh. I bas gelar Kristus si melias dingen lemah lembut kupindo man bandu. 10:2 Adi reh pagi aku, ola pagi aku terpaksa merawa i lebe-lebendu; sabap tek aku maka pang nge aku merawa nandangi piga-piga kalak i bas kam si erpengakap maka kami nggeluh rikutken biak manusia si ndekah denga. 10:3 Tuhu maka kami manusia biasa nge, tapi labo kami erjuang rikutken biak manusia si ndekah. 10:4 Senjata si ipake kami biakna labo bali ras senjata si ipake kalak, tapi senjata Dibata si erkuasa, si ngasup ngeruntuhken benteng-benteng, e me kepantasen perukuren manusia. 10:5 Iruntuhken kami kerina tembok kesombongen si ipajekken guna ngambati manusia nandai Dibata. Itaban kami kerina perukuren manusia, jenari ibaba kami gelah erkemalangen man Kristus. 10:6 Janah adi kepatuhenndu enggo bulat tuhu-tuhu, kami enggo sikap guna ngukum kerina kinilapatuhen. 10:7 Nehenlah kai si lit i lebe-lebendu. Adi lit kalak erpengakap maka ia me suruh-suruhen Kristus, iukurkenna ka lah min maka kami pe suruh-suruhen Kristus ka nge bali ras ia. 10:8 Adi teridah maka meganjangsa aku ngerana kerna kuasa si ibereken Tuhan man kami -- si gunana pegegehi kam, labo ngeruntuhkenca -- labo pagi aku juru. 10:9 Ola iakapndu maka kupebiar-biar kam alu surat-suratku e. 10:10 Sabap lit si ngatakenca, "Surat-surat Paulus tegas dingen meser kal, tapi asum ia i tengah-tengahta, labo ia erdolat, janah carana ngerana pe labo terpake." 10:11 Kalak si ngerana bage arus ietehna maka labo lit lainna ranan kami si isuratken kami ras perbahanen kami asum kami lit i tengah-tengahndu. 10:12 Tuhu, labo kami pang mpeseri dingen mbandingken diri kami ras kalak si mujiken bana man kalak si deban e. Dirina jine ipakena jadi sibar-sibarna janah ibanding-bandingkenna dirina sapih-sapih ia. Perbahanen si bage bodoh tuhu-tuhu! 10:13 Si imegahken kami labo daerah si la ersibar belangna, tapi rikutken daerah si enggo ibagi-bagiken Dibata man kami. I bas si e ikut pe kam. 10:14 Erkiteken kam pe bengket ku bas daerah si man dahin kami, labo kami ngelanggar batas sabap kami kap si perlebe ndahi kam maba Berita Si Meriah kerna Kristus. 10:15 Bage pe labo imegahken kami kerna pendahin kalak si deban si labo bengket ku bas lingkungen si enggo itetapken Dibata man kami. Tapi ngarap kami gelah kinitekenndu reh belinna, janah e erbahanca maka reh belinna pendahin kami i tengah-tengahndu, tapi tuhu la ndarat i bas daerah si enggo itetapken Dibata man kami. 10:16 Kenca bage maka banci iberitaken kami Berita Si Meriah ku daerah-daerah si terdauhen asa kam, sabap la ate kami ermegah kerna pendahin kalak si deban si enggo idahina i bas daerah e. 10:17 Bagi lit tersurat i bas Pustaka Si Badia, "Kalak si ermegah ate, megahlah akapna kerna Tuhan." 10:18 Sabap labo kalak si muji dirina si terbukti kalak si tutus, tapi si ipujiken Tuhan nge.
11:1 Ngarap aku maka ola kam megelut erkiteken kebodohen si sitik enda! Kugapa pe labo kam megelut. 11:2 Mecimberu ateku ngenehen kam e, e me cemburu ate Dibata kap, sabap kam enggo kupertunangken bagi sekalak singuda-nguda si la keliamen man dilaki si Sada e, e me Kristus jine. 11:3 Aru ateku perukurenndu tergoda, seh maka ukurndu lanai bulat dingen lanai bersih man Kristus, bali ras si Hawa itipu si Iblis alu kinipantasenna. 11:4 Sabap adi reh kalak man bandu meritaken kerna "Jesus" si lain asangken si iberitaken kami, labo kam megelut. Bage pe ialokenndu denga ka nge kesah tah pe "berita si mehuli" si lain kal ras Kesah Dibata bage pe Berita Si Meriah si ialokenndu i bas kami nari! 11:5 Kuakap labo aku sitik kal pe ketadingen i bas rasul-rasulndu "si mbelin la teralang e". 11:6 Banci jadi kurang beluhku ngerana, tapi labo si e nuduhkenca maka kurang pemetehku. Si enda enggo tangkas ibahan kami i bas kai-kai pe arah erbage-bage cara. 11:7 Asum kuberitaken nai Berita Si Meriah si rehna i bas Dibata nari man bandu la aku ngaloken upah i bas kam nari. Alu si e kupeteruk diringku gelah kam ipeganjang. Salah kin aku i bas si e? 11:8 Perpulungen-perpulungen si deban nge mereken keperlunku; tempa-tempa kurampasi perpulungen-perpulungen e gelah aku banci erdahin i tengah-tengahndu. 11:9 Asum aku i tengah-tengahndu, adi kekurangen aku, la aku jadi tanggungen ise pe. Kerina kekurangenku icukupi senina-senina si reh i Makedoni nari. Subuk asum si e, bage pe i bas wari-wari si reh enda kujaga kal maka ola aku jadi babanndu. 11:10 Erkiteken kebenaren Kristus si lit i bas aku, la kupelepas ise pe i belang-belang propinsi Akaya ena ngambati kemegahenku e. 11:11 Engkai maka bage ningku? Perbahan la kin ateku keleng kam? Ieteh Dibata kap maka keleng ateku kam. 11:12 Kai sikubahan i bas paksa enda terus nge kulakoken gelah ola lit alasen "rasul-rasul" si deban e mujiken dirina alu ngataken maka pendahinna bali ras pendahin kami. 11:13 Sabap kalak si bage rasul-rasul palsu kap. Nipui ia i bas dahinna alu encidahken bana tempa-tempa bali ia ras rasul-rasul Kristus. 11:14 Si enda labo ate mamang! Sabap Iblis pe banci nalihken rupana gelah teridah ia bali ras malekat terang! 11:15 Jadi labo perkara si mbelin kal e adi persuruhen Iblis e nalihken rupana gelah teridah bali ras persuruhen si mehuli. Kedungenna ugapa pe idatna nge balasen sue ras perbahanenna. 11:16 Sekali nari kukataken: ola ise pe erpengakap maka aku la sehsa. Tapi adi bage pengakapndu, alokenlah aku bagi kalak si la sehsa, gelah banci meganjang sitik cakapku. 11:17 Kai si nandangi kukataken enda labo bekas penjemba Tuhan, tapi aku ngerana bagi kalak si la sehsa. 11:18 Bagi nterem kalak meganjang cakapna erkiteken kemegahen doni, aku pe meganjang ka ateku kubahan cakapku. 11:19 Erkiteken kam kalak pentar, alu ukur menahang la kam megelut man kalak si la sehsa. 11:20 Aminna pe kam iperbudak, tah itipu, tah icari kalak untung i bas kam, tah megombang kalak man bandu, dingen iparap kalak ayondu, la kam megelut man kalak si erbahan bage. 11:21 Si tuhuna mela kuakap ngakuisa, maka kami la ngasup ngelakoken si bage. Tapi adi lit kalak si pang ngerana alu cakap meganjang kerna kai-kai gia, aku pe pang ka nge. Aku ngerana bagi kalak si la sehsa. 11:22 Kalak Jahudi kin ia? Aku pe kalak Jahudi nge. Kalak Israel kin ia? Aku pe kalak Israel nge. Kesusuren Abraham kin ia? Aku pe kesusuren Abraham nge. 11:23 Persuruhen Kristus kin ia? Bagi kalak adon tempa pengeranangku -- aku lebihen asangken kalak e. Buen aku erdahin. Usuren aku ipenjaraken. Usuren aku iligasi. Gatin aku menam mate. 11:24 Lima nembas aku iligasi kalak Jahudi; telu puluh siwah kali tep-tep nembas. 11:25 Telu kali aku igudam kalak Roma janah sekali aku ibenteri alu batu. Telu kali karam kapal si kutumpangi, janah sekali bombang-bombang aku i babo lawit sada wari sada berngi dekahna. 11:26 I bas perdalanen-perdalanenku, megati aku jumpa bahaya: bahaya lau mbelin, bahaya kena rampok, bahaya erkiteken teman sebangsangku ras i bas bangsa si deban nari, bahaya i bas kota ras i bas ingan si mesawang, bahaya i lawit, bage pe bahaya i bas teman si pekulah-kulahna erkiniteken. 11:27 I bas aku erdahin mberat dingen latih suhsah e, megati aku la terpedem, megati muas dingen melihe; megati la lit si man panganenku, megati bergehen erkiteken kurang uis. 11:28 Tambah-tambah si debanna si la kuturiken i jenda, tep-tep wari leket i bas ukurku kecibal kerina perpulungen. 11:29 Adi lit kalak si mesera akapna, ndiganai kin la kugejapken kiniseranna e? Adi lit kalak si idabuhken ku bas dosa, ndiganai kin la gara pusuh peratenku? 11:30 Adi la banci lang meganjang cakapku, kerna gegehku si kuranglah cakapku meganjang. 11:31 Dibata, Bapa Tuhan Jesus, si terpuji seh rasa lalap, Ia metehsa maka aku labo erbual. 11:32 Asum aku i Damaskus, wakil raja Aretas nuruh perajurit-perajuritna erjaga i gerbang kota guna nangkap aku. 11:33 Tapi arah sada jendela si lit i bas tembok kuta itantan kalak aku ku teruh tare raga, ndarat i bas kuta e nari. Alu bage pulah aku i bas ia nari.
12:1 Aminna pe la lit gunana, la banci lang meganjang cakapku. Genduari kuturiken kerna pengenehenen ras ketangkasen i bas Tuhan nari. 12:2 Lit kutandai sekalak Kristen; sepuluh empat tahun si enggo lewat ia rempet iangkat ku adep-adepen Dibata i Surga. Ntah kulana ikut terangkat ntah lang, la kueteh -- Dibata metehsa. 12:3 Sekali nari kukataken: kueteh maka ia rempet iangkat ku Pardis. (Ntah kin e jadi ikut ras kula ntah lang, la kueteh -- Dibata si metehsa.) 12:4 I je ibegina kata-kata si la terbelasken, si la banci ibelasken manusia. 12:5 Kerna kalak si bage me si ku megahken tapi kerna diringku jine gegehku si kurang nge cakapku meganjang. 12:6 Bahanlah maka nggit aku meganjang ngerana; aku labo seri ras kalak si la sehsa, sabap si tuhu-tuhu nge si kukataken e. Tapi kutahan kal maka la meganjang cakapku, sabap la ateku ikira kalak aku lebih asa si iidahna i bas aku dingen si enggo ibegina i bas aku nari. 12:7 Gelah ola meganjang ukurku kerna pengenehenen si mejin e, ibereken duri i bas dagingku, e me persuruhen Iblis guna ngeligas aku gelah ola meganjang ukurku. 12:8 Telu kali aku ertoto man Tuhan kerna si enda, gelah ipedauhna min si e i bas aku nari. 12:9 Tapi ngaloi Tuhan, "Cukup kap lias ateKu man bandu; sabap gegehKu serta kap i bas gegeh si kurang." Erkiteken si e meriah kal ukurku meganjang ngerana kerna gegehku si kurang gelah gegeh Kristus mengketi aku. 12:10 E maka senang kuakap i bas gegehku si kurang, i bas aku igombang-gombangi kalak, i bas aku kepiceten, bage pe i bas aku isiksa kalak, i bas kesusahen erkiteken Kristus. Sabap adi gegehku kurang, i je me maka aku megegeh. 12:11 Perbahanenku enda bali kal ras perbahanen kalak bodoh -- tapi kam nge si maksasa maka aku bage. Kam nge arusna mujiken aku. Sabap aminna gia labo kai pe aku, si tuhuna labo aku sitik pe ketadingen asangken rasul-rasulndu "si mbelin la teralang e". 12:12 Tandana maka aku rasul tangkas kap teridah man bandu arah dahinku, e me: megenggeng aku i bas kai-kai pe, idahndu tanda-tanda sengget si kubahan, kulakoken perbahanen-perbahanen si ngelebihi kuasa manusia, bage pe perbahanen-perbahanen si mejin. 12:13 I bas kai kin kam kurang kuperdiateken ibandingken ras perpulungen-perpulungen si deban, seakatan la aku jadi tanggungenndu? Mahapkenlah kesalahenku e. 12:14 Enda me petelu kaliken aku enggo ersikap lako ndahi kam, janah i bas si e pe labo ateku aku jadi tanggungenndu. Labo sikerajangenndu, tapi kam kap ateku. Sabap labo metunggung anak-anak pepulung erta guna orang tuana, tapi orang tua nge si pepulung erta guna anakna. 12:15 Senang ukurku engkeriken si lit i bas aku, janah lebih asa si e, diringku jine pe nggit aku engkorbankenca guna kam. Reh kurangna kin kekelengenndu man bangku adi sampur kekelengenku man bandu? 12:16 Tentu iakuindu nge maka labo pernah kam kuberati. Tapi lit ka nge si ngatakenca maka kusidingi kam alu tipu ras akalku. 12:17 Kuga kin? Pernah kin kubuat untung i bas kam nari arah kalak si kusuruh ndahi kam? 12:18 Kupindo man Titus gelah idahinandu, bage pe kusuruh senina si deban ikut ras ia. Lit kin Titus muat untung i bas kam nari? Ma bali nge perukuren ras perbahanen kami? 12:19 Iakapndu kin kidekah enda iusahaken kami mbela diri kami i adep-adepenndu? Lang! I adep-adepen Dibata, i bas persadan ras Kristus nge si tuhuna kami ngerana. Janah kerina si ilakoken kami e, o si kukelengi, gunana majekken kam kap. 12:20 Mbiar aku maka adi reh pagi aku ndahi kam, kudapeti kam la bagi si kuarapken, bage pe aku la bagi si iarapkenndu. Mbiar aku maka kudapeti kam pagi rubat, sician-cianen, gara ukur, pengilas ukur teman alu peganjangken bana, mahan-mahani si la tuhu kerna teman, sicekurak-cekuraken, sigombang-gombangen, ras perpulungen la ratur. 12:21 Mbiar aku maka adi reh pagi aku ndahi kam, mela kuakap ibahan Dibatangku i lebe-lebendu erkiteken kegagalenku. Mbiar ka pe aku maka nterem kalak si enggo erbahan dosa i bas paksa si enggo lewat tangis aku ibahanna sabap lalap ia la nggit jera erlagu la mehuli, erlua-lua, dingen ndalanken perbahanen si la meteh mela.
13:1 Enda me petelu kaliken ateku reh ndahi kam. I bas Pustaka Si Badia lit tersurat, "Tep-tep pengadun maka banci esah arus lit dua tah telu kalak saksina." 13:2 Lit si man katankenku man bandu, kam si enggo erbahan dosa i bas paksa si enggo lewat, bage pe man kerina kalak si deban. Sanga kerehenku si pedua kaliken enggo kukataken e man bandu, janah genduari pe tupung aku la ras kam, kupersingeti ka maka adi reh ka aku, kerina kalak si erbahan dosa i bas paksa si enggo lepas la banci pulah i bas ukumen nari. 13:3 Tupung si e pagi idatndu nge bukti si ipindondu e, maka Kristus ngerana kap arah aku. Adi Kristus erbahan tindaken man bandu, labo Ia la megegeh, tapi icidahkenNa gegehNa i tengah-tengahndu. 13:4 Tuhu asum Ia ipakuken ku kayu persilang seh mate, Ia la kap ergegeh, tapi Ia nggeluh erkiteken gegeh Dibata. I bas persadan ras Ia, kami pe la kap ergegeh; tapi i bas dahin kami guna kam, kami pe nggeluh ras Kristus erkiteken kuasa Dibata. 13:5 Pereksalah man bandu: tuhu-tuhu kin kam erkiniteken? Ujilah man bandu! Ntah la kin ietehndu maka Jesus Kristus ringan i tengah-tengahndu? -- Pala la kin kam menang i bas ujian e. 13:6 Kuarap ietehndu maka kami jine labo talu i bas ujian e. 13:7 Ertoto kami man Dibata gelah ola ibahanndu si salah -- labo gelah teridah maka kami enggo menang i bas pengujin e, tapi gelah banci idalankenndu si mehuli, aminna pe tempa teridah kami talu i bas ujian e. 13:8 Sabap la kami ngasup ngelawan kebenaren, tapi ngikutkenca ngenca maka kami ngasup. 13:9 Senang nge ukur kami bicara la gia kami ergegeh, asal kam megegeh. Erkiteken si e ertoto kami man Dibata maka kam mehuli ka mulihken. 13:10 Perbahan si e me maka kubahan surat enda man bandu asum ndauh denga kita sirang; gelah pagi kenca aku reh, la pedah kasar perbahanenku i bas makeken kuasa si enggo ibereken Tuhan man bangku, kuasa si gunana majekken kam, labo ngeruntuhken kam. 13:11 Dungna, mejuah-juah man bandu o senina-senina! Pekenalah man bandu mulihi, janah tamakenlah ku bas ukurndu pemindon kami e. Ersadalah arihndu kerina janah erdamelah. Janah Dibata si dem keleng ate dingen kemalemen ate ras kam gelah. 13:12 Sisalam-salamenlah kam alu dem keleng ate bagi si ersenina. Kerina anak-anak Dibata si i jenda ngataken mejuah-juah man bandu. 13:13 Lias ate Tuhan Jesus Kristus, kekelengen Dibata, kerembaken Kesah Si Badia ras kam kerina gelah.
1:1 Surat enda i bas aku nari, Paulus, si enggo idilo jadi rasul, labo erkiteken manusia ntah pe erkelang-kelangken manusia, tapi erkiteken Jesus Kristus ras Dibata Bapa si enggo mpekeke Jesus i bas si mate nari. 1:2 Kerina senina-senina si i jenda ras aku ngataken mejuah-juah man perpulungen-perpulungen i Galati. 1:3 Dibata Bapanta ras Tuhan Jesus Kristus mereken lias ate ras kemalemen ate man bandu. 1:4 Guna mulahi kita i bas jaman si jahat enda nari, Kristus enggo ngendesken diriNa erkiteken dosa-dosanta, i bas kepatuhenNa nandangi sura-sura Dibata Bapanta. 1:5 Terpujilah Dibata seh rasa lalap! Amin. 1:6 Mamang ateku ngenehen kam! Sabap pedas kal kam nadingken Ia si enggo milih kam erpalasken lias ate Kristus, jenari ikutkenndu "berita si mehuli si deban". 1:7 Si tuhuna labo lit "berita si mehuli si deban", tapi si enda kukataken man bandu perbahan lit piga-piga kalak si ngguluti, atena nalihken Berita Si Meriah kerna Kristus e. 1:8 Tapi amin kami pe, ntah malekat i Surga nari, meritaken man bandu berita si mehuli si lain ras Berita Si Meriah si enggo iberitaken kami man bandu e, kena sumpahlah ia! 1:9 Si tuhuna si enda enggo pernah kukataken, tapi genduari kukataken sekali nari! Adi lit kalak meritaken berita si mehuli man bandu si lain ras Berita Si Meriah si enggo ialokenndu, kena sumpahlah ia! 1:10 Alu bage, kuarapken kin gelah aku iakui manusia? Lang! Pengakun i bas Dibata nari nge si kuarapken! Gelah ngena ate manusia kin si man daramenku? Adi e kin tujunku, labo aku suruh-suruhen Kristus. 1:11 O Senina-seninangku, kukataken man bandu maka Berita Si Meriah si kuberitaken e labo manusia erbahanca. 1:12 Labo kualoken i bas manusia nari; la bo ka ise pe ngajarkenca man bangku. Tapi Jesus Kristus jine nge si naksikenca man bangku. 1:13 Enggo ibegindu kuga nai kegeluhenku selaku kalak Jahudi si tutus eragama, kuga nai aku pesega-sega perpulungen-perpulungen Dibata alu kejam dingen kuusahaken ngkernepken ia. 1:14 Asangken kerina teman-temanku kalak Jahudi si sebekbek ras aku, lebihen aku i bas ndalanken agama Jahudi. Tutusen ateku nandangi adat-adat si isusurken nininta asangken ia kerina. 1:15 Tapi Dibata, i bas lias ateNa enggo milih aku ope denga aku tubuh pe, janah idiloNa aku. 1:16 Asum itetapken Dibata guna mpetangkas AnakNa arah aku gelah kuberitaken Berita Si Meriah kerna AnakNa e man bangsa si la kalak Jahudi, labo aku arih-arih ras ise pe. 1:17 Labo aku lawes ku Jerusalem guna njumpai si enggo jadi rasul leben asangken aku. Tapi minter aku lawes ku daerah Arab, jenari mulihken aku ku Damaskus. 1:18 Kenca telu tahun maka aku ku Jerusalem gelah kutandai Petrus. Dua minggu dekahna aku ras ia. 1:19 Ras rasul-rasul si deban la aku jumpa, seakatan Jakup senina Tuhan. 1:20 Kai si kusuratken enda tuhu. Kukataken i lebe-lebe Dibata maka labo aku erbual! 1:21 Kenca si e lawes aku ku daerah-daerah Siria ras Kiliki. 1:22 Paksa si e kalak Kristen si lit i daerah Judea la nandai aku. 1:23 Kai si ikataken kalak ngenca ietehna e me, "Si mbaru enda rusur pesega-sega kami, genduari sangana meritaken Berita Si Meriah kerna Kristus si nai ikernepken atena!" 1:24 Bage me ipujina Dibata erkiteken aku.
2:1 Sepulu empat tahun kenca si e mulihken ka aku nangkeng ku Jerusalem ras Barnabas. Ikut pe Titus kubaba. 2:2 Lawes aku nangkeng ku Jerusalem sabap ipetangkas Dibata man bangku maka aku arus berkat. Janah i bas perjumpan si khusus ras peminpin-peminpin si i Jerusalem, kubukaken man bana Berita Si Meriah si kuberitaken man kalak si labo Jahudi. Sabap la ateku sia-sia kai si enggo kudahiken i bas paksa si enggo lepas, ntah si genduari. 2:3 Temanku Titus, aminna pe ia kalak Junani, la ia ipaksa guna isunatken. 2:4 Aminna pe lit piga-piga kalak si pekulah-kulah jadi senina, bengket ku bas perpulungen e, janah ersura-sura nunatken ia. Ipepayona kami alu nangko-nangko, atena guna meteh kerna kebebasen si ialoken kami erkiteken persadan kami ras Kristus Jesus. Ibahanna atena kami jadi juak-juak. 2:5 Tapi sitik pe kami la surut, gelah kebenaren Berita Si Meriah e banci ijaga kami guna kam. 2:6 Tapi lit kalak si ipetempa-tempa peminpin. Maka bage ningku, sabap labo pangkatna kunehen. I bas Dibata la erpendobahen kerna pangkat manusia. Pangkat la nambahi kai pe nandangi Berita Si Meriah si kuberitaken e. 2:7 Tapi iakuina maka aku enggo isuruh Dibata guna meritaken Berita Si Meriah e man kalak si labo Jahudi, bali ras Petrus enggo isuruh Dibata guna meritaken Berita Si Meriah man kalak Jahudi. 2:8 Sabap alu kuasa Dibata aku enggo jadi rasul nandangi kalak si labo Jahudi, bali ras Petrus enggo jadi rasul nandangi kalak Jahudi. 2:9 Jakup, Petrus ras Johanes, si kepeken si jadi peminpin e ngenca ngidah bekas pemere Dibata si khusus man bangku, minter isalamina aku ras Barnabas. Selaku teman si sada dahin, ersada arih kami kerina maka aku ras Barnabas erdahin i tengah-tengah kalak si labo Jahudi, janah rasul-rasul si deban erdahin i tengah-tengah kalak Jahudi. 2:10 Sada ngenca pemindonna e me gelah ola kami lupa nandangi kalak si musil i daerah Judea. Janah si enda kal me tuhu-tuhu ateku kudalanken. 2:11 Asum reh Petrus ku Antiokia, kupandang ia i lebe-lebe jelma si nterem, sabap terang ia ersalah. 2:12 Ope denga piga-piga kalak si isuruh Jakup seh i Antiokia, enggo biasa Petrus man ras senina-senina si labo kalak Jahudi. Tapi kenca seh kalak e, surut Petrus, janah isirangina senina-senina si la kalak Jahudi e. Lanai ia ras man, sabap mbiar ia nandangi si erpengakap maka sunat e penting tuhu-tuhu. 2:13 Senina-senina kalak Jahudi si deban e pe ikut pekulah-kulah, bali ras Petrus, janah Barnabas pe ikut ipengaruhina pekulah-kulah. 2:14 Asum kuidah maka perbahanenna la rikutken Berita Si Meriah, ngerana aku man Petrus i lebe-lebe jelma si nterem e kerina, "Kam kalak Jahudi, tapi piga-piga wari si enggo lepas pergeluhndu bagi pergeluh kalak si labo kalak Jahudi. Dage, kuga nge nindu maksaken kalak si labo kalak Jahudi nggeluh bagi pergeluh kalak Jahudi?" 2:15 Tuhu, rikutken pertubuh kami, kami kalak Jahudi, janah la kami kalak si semal igelari: "kalak perbegu si perdosa". 2:16 Tapi amin bage gia ieteh kami maka manusia rembak ras Dibata, arah erkiniteken man Jesus Kristus ngenca, la arah ndalanken Undang-undang. Kami pe enggo tek man Kristus Jesus gelah iperembakken kami ras Dibata arah kiniteken man Kristus, janah labo arah ndalanken Undang-undang. Sabap labo lit sekalak pe iperembakken ras Dibata arah ndalanken Undang-undang. 2:17 E maka iusahaken kami gelah rembak ras Dibata arah persadan ras Kristus. Erkiteken si e lit piga-piga kalak ngataken maka kami enggo ka jadi kalak perdosa bali ras kalak perbegu. Bahanlah payo kai si ikatakenna e; adi bage Kristus kin si mabai kami gelah erdosa? Tentu lang! 2:18 Tapi adi mulihken ka kami ku cara ndalanken Undang-undang gelah rembak ras Dibata e me si enggo kutadingken, si e ertina maka tuhu-tuhu aku sekalak perdosa. 2:19 Nandangi Undang-undang e aku situhuna enggo mate, janah lanai lit sitik pe kuasa Undang-undang e nandangi aku seh maka banci aku nggeluh guna Dibata. Aku enggo ipakuken ras Kristus i kayu persilang. 2:20 Lanai aku si nggeluh, tapi Kristus kap si nggeluh i bas aku. Kegeluhenku si genduari i bas doni enda kugeluhken erkiteken kiniteken man Anak Dibata, si ngkelengi aku dingen ngendesken diriNa man gunangku. 2:21 La ateku nia-niaken lias ate Dibata. Adi sekalak jelma banci rembak ras Dibata arah ndalanken Undang-undang, si enda ertina maka sia-sia nge kematen Kristus e!
3:1 O kalak Galati bodoh! Ise kin erbahanca maka kam kena si bage? Kematen Kristus i kayu persilang enggo tangkas kugambarken i lebe-lebe matandu! 3:2 Jabaplah penungkunen enda: Erkiteken idalankenndu Undang-undang kin maka ialokenndu Kesah Dibata, ntah kin erkiteken ibegindu jenari tek kam Berita Si Meriah e? 3:3 Oh, seh kal bodohndu! Enggo ibenakenndu geluhndu si mbaru e alu Kesah Dibata; atendu kin kegeluhenndu e ibahanndu jadi serta alu kuasandu jine? 3:4 La kin lit gunana kerina pengalamenndu si pagit e? Tentu lit! 3:5 Dibata enggo mereken KesahNa man bandu janah ibahanNa tanda-tanda sengget i tengah-tengahndu: si enda jadi erkiteken idalankenndu Undang-undang kin ntah erkiteken ibegindu jenari tek kam Berita Si Meriah e? 3:6 Si enda bali ras si tersurat i bas Pustaka Si Badia kerna Abraham, "Tek Abraham man Dibata, janah kinitekenna e irkira Dibata jadi kebenaren Abraham si erbahanca ia rembak ras Dibata." 3:7 Dage arus ietehndu maka si tuhuna si jadi kesusuren Abraham e me kalak si tek man Dibata. 3:8 Pustaka Si Badia enggo leben ngidah maka Dibata ngerembakken si labo kalak Jahudi ras DiriNa erkiteken kinitekenna. Bage pe nai enggo leben iberitaken Dibata Berita Si Meriah man Abraham bagi si tersurat i bas Pustaka Si Badia nina, "Kupasu-pasu kerina manusia i doni enda arah kam." 3:9 Tek Abraham man Dibata, janah ipasu-pasuNa ia. Bage me pe kerina kalak si tek man Dibata ipasu-pasu bagi Abraham. 3:10 Kalak si ernalem man kengasupenna ndalanken Undang-undang geluhna tetap iancam ukumen Dibata. Sabap i bas Pustaka Si Badia lit tersurat, "Kalak si la tetap ndalanken kerina si tersurat i bas Kitap Undang-undang, isumpahi Dibata me ia!" 3:11 Tangkas dage maka labo ise pe iperembakken ras Dibata arah ndalanken Undang-undang; sabap lit tersurat i bas Pustaka Si Badia, "Kalak si iperembakken ras Dibata erkiteken kinitekenna, nggeluh me." 3:12 Undang-undang labo erpalasken kiniteken, tapi erpalasken perbahanen. Bagi lit tersurat i bas Pustaka Si Badia, "Kalak si ndalanken kerina si tersurat i bas Undang-undang nggeluh me i bas Undang-undang e nari." 3:13 Tapi Kristus enggo mulahi kita i bas ancamen ukumen si lit i bas Undang-undang e. Enda ibahanNa alu ngendesken diriNa iukum erkiteken kita. Sabap i bas Pustaka Si Badia lit tersurat, "Kalak si igantung i das batang kayu isumpahi Dibata kap." 3:14 Si enda igengken Kristus gelah pasu-pasu si enggo ipadanken Dibata man Abraham banci ibereken man si labo kalak Jahudi arah Kristus Jesus. Gelah kita, arah kiniteken, banci ngaloken Kesah Si Badia si ipadanken Dibata. 3:15 O senina-senina, kubuat sada contoh i bas kegeluhenta si tep-tep wari: Adi lit dua kalak si enggo ersada arihna dingen enggo iesahken i bas runggun, apai pe ia lanai banci ngataken maka arihna e la esah ntah pe nambahisa. 3:16 Dibata enggo erpadan man Abraham ras kesusurenna. I bas Kitap si Badia labo ikataken, "ras man kesusuren-kesusurenndu," ertina nterem jelma. Tapi isuratken, "ras man kesusurenndu," ertina sekalak saja, e me Kristus. 3:17 Maksudku e me: Dibata enggo erbahan sada iketen padan janah erpadan guna nehkenca. Undang-undang si reh empat ratus telu puluh tahun kenca si e la ngasup erbahanca mosar iketen padan e seh maka masap ibahanna padan Dibata e. 3:18 Sabap adi pemere si ibereken Dibata erpalasken Undang-undang kin, maka si e labo erpalasken padan Dibata. Tapi erkiteken Dibata enggo erpadan nge maka iberekenNa man Abraham. 3:19 Adi bage, kai kin tujun Undang-undang e? Undang-undang itambahken guna nuduhken si salah. Undang-undang e erguna seh reh sekalak i bas Kesusuren Abraham, si man baNa ibereken padan e. Undang-undang e isehken malekat-malekat arah sekalak kelang-kelang. 3:20 Tapi sekalak kelang-kelang labo perlu adi labo lit dua pihak; janah "Dibata sada kap", e me palas kinitekenta. Si enda la teridah alu tangkas arah mereken Undang-undang arah sekalak kelang-kelang, tapi tangkas i bas Dibata erbahan padan man Abraham secara langsung. 3:21 Ntah kin si enda ertina maka Undang-undang e erlawanen ras padan Dibata? Tentu lang! Adi banci kin kepe manusia ndat kegeluhen alu patuh nandangi Undang-undang, si enda ertina maka manusia banci rembak ras Dibata arah Undang-undang e. 3:22 Tapi rikutken si tersurat i bas Pustaka Si Badia kerina manusia i doni enda ikuasai dosa; erkiteken si e pemere si ipadanken erpalasken kiniteken man Jesus Kristus e banci ibereken man kalak si tek. 3:23 Ope denga kiniteken enda reh, kita ipenjaraken Undang-undang bagi kalak tahanen, seh maka kiniteken e ipetangkas. 3:24 Alu kata si deban Undang-undang e desken sekalak pengawas si tugasna naruhken kita kempak gurunta, e me kap Kristus, gelah kita iperembakken ras Dibata erkiteken kinitekenta. 3:25 Genduari erkiteken enggo seh kita i bas kiniteken e, Undang-undang e lanai erkuasa man banta. 3:26 Arah kiniteken me maka kam kerina jadi anak-anak Dibata i bas persadanndu ras Kristus Jesus. 3:27 Kam enggo ipersada ras Kristus arah lakon peridin, e maka enggo lit i bas kam biak-biak Kristus e. 3:28 Dage lanai bo erndobah kalak Jahudi tah kalak Junani, budak tah kalak bebas, dilaki ras diberu. Sabap kerina nge kam sada i bas Kristus Jesus. 3:29 Adi kam sikerajangen Kristus, kesusuren Abraham me kam, janah ialokenndu me kai si enggo ipadanken Dibata.
4:1 Tapi perlu kutambahken: Asum anak-anak denga si ngalo tading-tadingen, bagi budak ia ibahan aminna pe ia nge si tuhuna si mada kerinana. 4:2 Asum ia nguda denga, lit si ngepkep ia dingen si nggancih ia i bas kerina urusenna seh ku paksa si itetapken bapana. 4:3 Bage me pe nai, asum kita langa dewasa, kita pe jadi budak kuasa-kuasa si lit i doni enda. 4:4 Tapi kenca enggo genep paksana, enggo isuruh Dibata AnakNa. AnakNa e tubuh arah sekalak diberu, janah nggeluh i teruh Undang-undang kalak Jahudi. 4:5 Guna nebusi kalak si i teruh Undang-undang, gelah banci kita iangkat jadi anak-anak Dibata. 4:6 Tandana maka kam anak-anak Dibata, isuruh Dibata Kesah AnakNa ku bas pusuhta, e me Kesah si erlebuh, "Bapa, o Bapangku." 4:7 E maka lanai bo kam budak, tapi anak. Janah erkiteken kam anakNa, ibereken Dibata me man bandu kerina si enggo isikapkenNa guna anak-anakNa. 4:8 Nai la itandaindu Dibata, e maka kam iperbudak dibata-dibata situhuna si e labo Dibata. 4:9 Tapi genduari enggo itandaindu Dibata ntah pe ulin ikataken Dibata enggo nandai kam; ma la metunggung adi mulihken ka kam italuken kuasa-kuasa si la ergegeh dingen musil e? Engkai maka mulihken atendu jadi budakna? 4:10 Ipegermetkenndu kerna wari-wari, bulan, paksa-paksa erkerja ras tahun-tahun si tertentu. 4:11 Aru ateku nandangi kam. Sia-sia kin ndia kerina kelatihenku man bandu? 4:12 O senina-seninangku, kupindoken man bandu: jadilah kam bagi aku, sabap aku pe bali nge ras kam. Kam labo pernah ersalah man bangku. 4:13 Ingetndu denga kin ngkai maka kuberitaken Berita Si Meriah e man bandu tangtangna nai? E me perbahan penakitku. 4:14 Janah aminna pe penakit si lit i bas kulangku e jadi sada percuban man bandu, la aku ihinandu ntah pe itulakndu. Tapi ialokenndu aku tempa-tempa bagi malekat Dibata, tempa-tempa bagi Kristus Jesus. 4:15 Meriah kal ukurndu! Kai kin si enggo jadi? Kueteh maka paksa si e nai, adi banci nggit kam ncungkil matandu jenari merekenca man bangku. 4:16 Imbangndu kin iakapndu aku genduari erkiteken kuturiken man bandu si tuhu-tuhu e? 4:17 Kalak si deban ndai iperdiatekenna kal kam, tapi sura-surana la mehuli. Ia ersura-sura guna nirangken kam ras aku, gelah iperdiatekenndu ia bagi ia mperdiateken kam. 4:18 Mehuli nge mperdiateken kalak, adi mehulilah tujunna. Katawari pe mehuli bage labo saja paksa aku ras kam. 4:19 O anak-anakku si kukelengi! Erkiteken kam, ngenanami kiniseran aku sekali nari bagi sekalak pernanden asum mupus, seh biak Kristus lit i bas kam. 4:20 Mesikel kal aku ras kam genduari, gelah banci kusambari pengeranangku alu si deban man bandu. Aru kal ateku kerna kam! 4:21 Man bandu si ersura-sura nggeluh i teruh Undang-undang nungkun aku: La kin ibegindu kai si ikataken i bas Kitap Undang-undang? 4:22 I je lit tersurat maka Abraham dua anakna: Sekalak anak diberu budak, sekalak nari anak diberu si bebas. 4:23 Anakna si tubuh i bas diberu budak e nari, tubuh rikutken sura-sura manusia, tapi anakna si tubuh i bas diberu si bebas e nari tubuh erkiteken padan Dibata. 4:24 Enda banci ibahan jadi sada anding-andingen: diberu si dua kalak e, e me dua iketen padan, sada si Hagar asalna i Deleng Sinai nari, janah anak-anakna tubuh i bas perkawanen. 4:25 Hagar iandingken ras Deleng Sinai i taneh Arab, janah ia me iandingken ras kota Jerusalem si genduari, si jadi budak ras kerina si ngianisa. 4:26 Tapi Jerusalem si i datas, bebas, janah ia me nandeta. 4:27 Sabap i bas Pustaka Si Badia lit tersurat: "Meriahlah atendu o diberu si la banci mupus! Rendelah dingen ersuraklah alu meriah, o kam si la pernah ngenanami kiniseran mupus! Sabap teremen me anak diberu si itadingken perbulangenna, asangken anak diberu si erperbulangen." 4:28 Genduari o kam senina-seninangku, kam me anak-anak Dibata erkiteken padanNa e, bali ras si Isak. 4:29 Paksa si e nai igasgasi anak si tubuh rikutken sura-sura manusia e anak si tubuh erkiteken sura-sura Kesah Dibata. Bage me pe genduari. 4:30 Tapi kai si ikataken Pustaka Si Badia? I je lit tersurat, "Pelaweslah diberu budak e ras anakna; sabap anak diberu juak-juak e labo ikut dat bagin i bas tading-tadingen bapana ras anak diberu si bebas e." 4:31 Bage me o senina-seninangku, kita labo anak diberu budak tapi anak diberu si bebas.
5:1 Kita enggo bebas genduari, sabap Kristus enggo mbebasken kita! Erkiteken si e tetaplah bagi kalak bebas, janah olanai kam nggit itindih pasangen bagi budak. 5:2 Begikenlah! Aku, Paulus, ngataken man bandu: Adi ipelepasndu dirindu isunatken, e nuduhken maka Kristus la lit ertina man bandu. 5:3 Sekali nari kupersingeti: Kalak si mpelepas dirina isunatken, arus idalankenna kerina si tersurat i bas Kitap Undang-undang. 5:4 Janah kam si ersura-sura iperembakken ras Dibata arah ndalanken Undang-undang, isirangkenndu kap dirindu i bas Kristus nari. Kam enggo sirang i bas lias ate Dibata nari. 5:5 Adi kami, iarapken kami maka Dibata ngerembakken kami ras DiriNa. Enda me si itimai kami alu dem pengarapen, alu kuasa Kesah Dibata si erdahin arah kiniteken kami. 5:6 Sabap adi ersada kita ras Kristus Jesus, lanai bo jadi soal ersunat ntah la ersunat. Si pentingna kal e me erkiniteken man Jesus Kristus janah kiniteken e teridah arah nehken keleng ate. 5:7 Nai mehuli kal perbahanenndu! Ise kin erbahanca maka lanai kam patuh nandangi pengajaren si tuhu-tuhu e? Kuga ibahanna ngerintak kam? 5:8 Si ngerintak kam e labo Dibata si milih kam. 5:9 Bagi si ikataken kalak, "Ragi si sitik banci ibahanna macem tepung si melala." 5:10 Amin bage gia erkiteken persadanta ras Tuhan, tek denga nge aku maka labo sambar ukurndu, janah tek aku maka kalak si ngguluti ukurndu e, aminna ise gia ia, la banci lang iukum Dibata me. 5:11 Kerna aku o senina-senina, adi tetap kin kuberitaken maka ersunat e perlu, tentu aku lanai bo tetap iayak-ayak! Sabap adi tuhu kin si enda, tentu kai si kuberitaken kerna kayu persilang Kristus labo mpeturah permusuhen. 5:12 Ateku min maka kalak si ngguluti kam e labo saja isunatkenna bana, tapi pe iburihinalah bana. 5:13 Kerna kam o senina-seninangku, kam enggo ipilih Dibata gelah bebas. Tapi jagailah maka ola kebebasenndu e jadi alasen si erbahanca kam ikuasai perukurenndu secara manusia. Tapi berelah maka keleng ate njemba-njemba kam guna si sampat-sampaten. 5:14 Sabap kerina Undang-undang ipersada i bas sada pedah, e me, "Kelengilah temanndu manusia bagi kam ngkelengi dirindu." 5:15 Tapi adi bagi rubia-rubia perbahanenndu, si karaten dingen si atahen kam, metengetlah; adi la kam metenget nandangi kernep me persadanndu e. 5:16 Sura-surangku e me: Kesah Si Badia min si negu-negu kegeluhenndu maka ola iikutkenndu perukurenndu secara manusia. 5:17 Sura-sura ukur manusia erlawanen ras Kesah Si Badia, janah Kesah Si Badia erlawanen ras sura-sura ukur manusia. Si dua enda ermusuhen, janah si enda ertina maka la banci idalankenndu peratenndu. 5:18 Adi Kesah Si Badia negu-negu kam lanai bo kam iteruh Undang-undang. 5:19 Perbahanen-perbahanen si erpalasken sura-sura ukur manusia tangkas kap. Si enda teridah i bas: erlua-lua, si nggesuh, la meteh mela; 5:20 nembah man berhala ras erbahan ilmu sihir; simusuhen, rubati, mecimberu, perampus dingen kepentingenna saja ngenca iukurina. Erbahan perpecahen dingen erpihak-pihak. 5:21 Sician-cianen, mabuk, pesta minem-minem seh mabuk ras si debanna. Kukataken man bandu genduari, bagi enggo kukataken bandu nai maka, kalak si ndalanken perbahanen-perbahanen si bagi enda labo banci dat bagin i bas Kinirajan Dibata si reh pagin. 5:22 Tapi ulih Kesah Si Badia e me: lit kekelengen, lit keriahen dingen lit kemalemen ate, lit kesabaren, idalankenna perbahanen si mehuli, mehuli ia, setia. 5:23 Meteruk ukurna dingen ngasup engkuasai diri. Kerna si enda la lit isingetken pe i bas Undang-undang. 5:24 Bage me kalak si enggo jadi sikerajangen Kristus Jesus; perukurenna secara manusia enggo ibunuhna i kayu persilang rikut ras kerincuhen dagingna bage pe sura-surana. 5:25 Erkiteken Kesah Si Badia me si mereken kegeluhen man banta, e maka lagu langkahta pe arus rikutken peraten Kesah e. 5:26 La banci meganjang ukurta, ntah sitokoh-tokohen, ntah pe sician-cianen.
6:1 O senina-seninangku, adi lit sekalak si terdat ersalah, kam si nggeluh rikutken Kesah Si Badia arus min negu ia alu manjar-anjar gelah mulihken ia ku dalan si mehuli. Janah jagalah dirindu sekalak-sekalak sabap kam pe banci ka nge kena percuban. 6:2 Sisampat-sampatenlah kam i bas maba baban geluh enda. Alu bage isehkenndu kap Undang-undang Kristus. 6:3 Adi lit kalak erpengakap maka ia mehaga, tapi kai pe si lang, itipuna me bana. 6:4 Sekalak-sekalak arus nguji lagu langkahna jine. Alu bage banci megah kerna dirina jine alu la mbanding-mbandingken dirina ras kalak si deban. 6:5 Sabap sekalak-sekalak simaba babanna nge. 6:6 Kalak si ngaloken pengajaren Kristus arus iraskenna kerina si mehuli si lit i bas ia ras guruna. 6:7 Ola tipu bandu; ise pe labo ngasup nokohi Dibata. Si isuan manusia e ka nge iperanina. 6:8 Adi merdang kalak i bas juma perukuren secara manusia, iperanina, me ulihna si la banci la macik i bas juma perukurenna e nari. Adi nuan ia i bas juma Kesah Si Badia, iperanina me kegeluhen si rasa lalap i bas Kesah Si Badia e nari. 6:9 E maka ola min kita erleja-leja erbahan si mehuli; sabap adi tetap tutus ateta ndalanken si e, seh me paksana siperani ulihna. 6:10 E maka i bas tep-tep kesempaten, sibahanlah si mehuli man kerina manusia, terlebih-lebih man teman-temanta si sada kiniteken. 6:11 Nehenlah kuga belinna tulisenku enda si kusuratken alu tanku jine! 6:12 Kalak si peganjang-ganjangken bana janah si megah akapna kerna barang-barang si arah darat, ia me si ersura-sura maksa kam gelah isunatken. Si enda idalankenna gelah ola ia iayak-ayak erkiteken kayu persilang Kristus. 6:13 Sabap kalak si nunatken pe la ndalanken Undang-undang. Ersura-sura ia nunatken kam gelah megah iakapna erkiteken patuh kam man adat e. 6:14 Adi aku, kerna kayu persilang Tuhanta Jesus Kristus e ngenca kuakap megah. Sabap erkiteken kayu persilang e, doni enda enggo kuakap mate, janah aku pe enggo mate iakap doni enda. 6:15 E maka lanai jadi soal sekalak isunatken ntah lang. Si pentingna e me gelah kalak jadi tinepa si mbaru. 6:16 Janah man kalak si patuh nandangi cara si enda, kupindoken man Dibata gelah ibereken Dibata man bana kemalemen ate ras perkuah ate bage pe man kerina Israel Dibata. 6:17 Si perpudina, olanai min ise pe nuhsahi aku, sabap i bas kulangku lit cining-cining si nuduhken maka aku juak-juak Jesus. 6:18 Lias ate Tuhanta Jesus Kristus ras kam kerina min o senina-senina. Amin.
1:1 Surat enda i bas aku nari, Paulus, si enggo jadi rasul Kristus Jesus rikutken peraten Dibata. Man anak-anak Dibata i Epesus, kalak si tutus i bas kegeluhenna i bas persadan ras Kristus Jesus. 1:2 Lias ate Dibata Bapanta ras Tuhan Jesus Kristus dingen kemalemen ate man bandu gelah. 1:3 Terpujilah Dibata Bapa Tuhanta Jesus Kristus! Sabap erkiteken persadanta ras Kristus, enggo ipasu-pasuNa kita, alu erbage-bage pemere pertendin si lit i bas ingan si meganjang. 1:4 Ope denga ijadiken Dibata doni enda, enggo ipilihNa kita jadi sikerajangenNa arah persadanta ras Kristus gelah kita badia dingen la ersalah i lebe-lebeNa. Erkiteken keleng ateNa. 1:5 Enggo itetapkenNa maka arah Jesus Kristus ialokenNa kita jadi anak-anakNa. Enda me si ngena ateNa dingen sura-suraNa. 1:6 Terpujilah Dibata erkiteken kiniulinNa si mulia, si icidahkenNa man banta arah pemereNa i bas AnakNa si ikelengiNa. 1:7 Sabap erkiteken Kristus enggo kita itebusi, e me dosa-dosanta enggo ialemi Dibata. Seh kal belinna kiniulin Dibata. 1:8 Si ikusekenNa man banta seh riba-iba, alu dem kepentarenNa dingen pengertinNa. 1:9 Rikutken sura-suraNa, ipetangkasNa man banta sura-suraNa si terligen, si enggo kin itetapkenNa guna isehkenNa arah Kristus. 1:10 Rencana Dibata si isehkenNa kenca seh paksana e, e me guna mpersadaken kerina si nasa lit, subuk i Surga bage pe si i doni, gelah Kristus jadi kepalana. 1:11 Kerina ibahan Dibata sue ras si ngena ateNa dingen rikutken si enggo itetapkenNa. Tangtangna nari kita enggo ipilih Dibata sabap Ia ersura-sura gelah kita dat bagin i bas kai si enggo jadi sikerajangen Kristus. 1:12 Janah gelah kita, kalak si pemena erpengarapen man Kristus, nggeluh tama pujin man kemulian Dibata. 1:13 Bage pe kerna kam: Asum ibegindu berita si tuhu-tuhu, Berita Si Meriah si maba keselamaten man bandu, tek kam man Kristus, janah itamaken Dibata cap i bas kam, tandana kam sikerajangenNa, alu mereken Kesah Si Badia si enggo ipadankenNa. 1:14 Kesah e me jadi jaminen maka sialoken me kai si enggo ipadanken Dibata man anak-anakNa. Kesah e pe jadi jaminen man banta maka la banci lang idungi Dibata dahinNa guna nebusi kita, kalak si enggo jadi sikerajangenNa. Terpuji dingen ermulialah Dibata. 1:15 Erkiteken si e, kenca kubegi maka kam enggo erkiniteken man Tuhan Jesus, dingen keleng atendu man kerina anak-anak Dibata. 1:16 La aku erngadi-ngadi ngataken bujur man Dibata kerna kam. La aku lupa notoken kam. 1:17 Kupindoken man Dibata Tuhanta Jesus Kristus, Bapa si ermulia, gelah iberekenNa man bandu kesah kepentaren dingen ipetangkasNa diriNa man bandu gelah itandaindu Ia. 1:18 Kupindo man Dibata gelah italangiNa pusuh peratenndu gelah terang pengangkanndu. Alu bage banci ietehndu kai si banci iarapkenndu i bas Dibata si ndilo kam, bage pe gelah ietehndu maka seh kal buena erta-erta si mulia si isikapken Dibata man anak-anakNa. 1:19 Ras gelah ietehndu maka seh kal belinna Kuasa Dibata erdahin i bas kita si tek man Kristus. Kuasa si erdahin i bas kita e, bali ras kuasaNa si mbelin. 1:20 Si ipakeNa asum Ia mpekeke Kristus i bas si mate nari, janah ipekundulNa Ia arah kemuhenNa i bas ingan si meganjangna. 1:21 Kuasa Kristus e ndauh kal ganjangen asangken kerina kuasa pemerentah ras penguasa si la teridah, dingen ganjangen asangken kerina peminpin ras tuan-tuan si la teridah, janah pangkatNa ganjangen asangken kerina pangkat si terbelasken, subuk i bas paksa enda, bage pe i bas paksa si reh pagin. 1:22 Dibata namaken kerina si nasa lit ku teruh tapak-tapak nahe Kristus, janah ibereken Dibata Ia man perpulungen jadi kepala i bas kai-kai pe. 1:23 Perpulungen e me kula Kristus, janah kula e me si ngkuhi Ia, janah Kristus me si ngkuhi kerina si nasa lit subuk i japa pe.
2:1 I bas paksa si lewat, erkiteken salahndu ras dosa-dosandu, mate pertendinndu. 2:2 Paksa si e nai iikutkenndu kebiasan doni si jahat. Iikutkenndu peminpin penguasa-penguasa si lit i bas awang-awang, e me kesah si genduari erdahin i bas kalak si la nggit erkemalangen man Dibata. 2:3 Si tuhuna kita pe nai bali nge ras kalak enda. Kita nai nggeluh rikutken sura-suranta saja janah sidalanken si sentudu ras sura-sura kulanta ras ukurta. Sue ras biakta, kita pe bali ras kalak si deban, patut ngenanami pernembeh ate Dibata. 2:4 Tapi perkuah ate Dibata la ersibar, janah mbelin kal keleng ateNa man banta. 2:5 Seh maka asum kita mate i bas pertendin erkiteken salahta, ipegeluhNa kita mulihi radu ras Kristus. Erkiteken lias ate Dibata nge maka kam enggo terkelin. 2:6 I bas persadanta ras Kristus Jesus, ipekeke Dibata kita ras Kristus, janah ipekundulNa kita ras Ia i bas ingan si meganjang. 2:7 Si enda ibahan Dibata gelah seh rasa lalap icidahkenNa kiniulinNa si lanai kal lang-lang belinna, e me lias ateNa man banta i bas Kristus Jesus. 2:8 Sabap erkiteken lias ate Dibata nge maka kam enggo terkelin, erkiteken tek kam man Kristus. Labo bekas perbahanenndu, tapi pemere Dibata kap e. 2:9 Labo ulih pendahinndu e, e maka labo lit dalanna ise pe muji bana. 2:10 Tinepa Dibata kap kita; i bas persadanta ras Kristus Jesus, ijadikenNa kita guna ndahiken dahin-dahin si mehuli si enggo leben irencanakenNa, gelah sidahiken e. 2:11 Kam si labo kalak Jahudi, ingetlah kuga nai kam. Kalak Jahudi nggelari kam kalak si "la ersunat" tapi dirina igelarina kalak si "ersunat" e me kerna adat si ilakoken manusia nandangi kulana. 2:12 Paksa e nai kam sirang ras Kristus. Nai kam kalak tandang-tandang si la atan i bas warga Israel si terpilih. La lit baginndu i bas iketen padan si erpalasken padan Dibata man anak-anakNa. Kam nggeluh i doni enda la erpengarapen, dingen la er-Dibata. 2:13 Tapi genduari i bas persadanndu ras Kristus Jesus, kam si nai ndauh, genduari enggo ibaba rembak ras kami erkiteken kematen Kristus. 2:14 Sabap Kristus e kap si ndameken kita, alu njadiken si dua pihak e jadi sada. Kristus jine alu dareh dagingNa enggo ngeruntuhken tembok si nirangken bangsa-bangsa e dingen si erbahanca ia tetap ermusuhen. 2:15 ImasapkenNa Undang-undang agama Jahudi alu pedah-pedahNa ras aturen-aturenNa, gelah bangsa si dua e ijadikenNa jadi manusia si mbaru si ersada ras Kristus. Alu bage ibahanNa perdamen man banta. 2:16 Alu kematenNa i kayu persilang ikernepkenNa permusuhen e. Alu kayu persilang ipersadakenNa si dua bangsa e jadi sada kula janah iperdamekenNa ras Dibata. 2:17 Bage me Kristus reh, janah iberitakenNa Berita Si Meriah kerna perdamen man kerinana, subuk man bandu si nai ndauh sirang ras Dibata bage pe man kami si rembak ras Ia. 2:18 Erkiteken Kristus me maka kita dua mbelahna ndat hak ngadap man Bapa arah Kesah si Sada e. 2:19 E maka kam si labo kalak Jahudi lanai kam kalak asing ntah pe pertandang. Kam pe genduari enggo jadi sada warga ras anak-anak Dibata dingen enggo jadi anggota keluargaNa. 2:20 Kam pe ipajekken i babo palas si itamaken rasul-rasul ras nabi-nabi, janah Kristus jine me palas persukina. 2:21 Si nentuken susunen kerina bagin-bagin bahan-bahanen e. Bahan-bahanen e tambah belinna janah jadi Rumah Pertoton si Badia i bas Tuhan. 2:22 I bas persadanndu ras Kristus, kam pe ras kerina kalak si deban iranggut jadi sada rumah, i ja Dibata ringan alu KesahNa.
3:1 Erkiteken si enda me maka ertoto aku man Dibata, aku Paulus, si ipenjaraken erkiteken Kristus man gunandu kalak si labo Jahudi. 3:2 Tentu enggo ibegindu uga Dibata ngangkat aku jadi serayanNa guna nehken lias ateNa guna kepentingenndu. 3:3 Dibata nge si petangkassa man bangku maka kuertiken rahasiaNa si terbuni. Kerna si enda enggo kusuratken alu gendek man bandu, 3:4 janah adi iogendu kai si enggo kusuratken e, tentu iangkandu uga bagesna pengertinku kerna rahasia Kristus e. 3:5 Gelgel nari rahasia enda la ipebetehkenNa man manusia, tapi genduari enggo ipetangkas Dibata alu KesahNa man rasul-rasul ras nabi-nabiNa. 3:6 RahasiaNa enda e me: Arah Berita Si Meriah, kalak si labo Jahudi pe ikut dat bagin kai si enggo isikapken Dibata. Kalak enda enggo ikut jadi ring-ring i bas sada kula, janah ikut pe dat bagin i bas padan si enggo ibahan Dibata i bas Kristus Jesus. 3:7 Aku enggo iangkat jadi serayan Berita Si Meriah arah pemereNa si khusus, si iberekenNa alu gegeh kuasaNa. 3:8 Aku me si la metunggungna i bas kerina anak-anak Dibata. Amin bage pe erkiteken lias ateNa iberekenNa ka nge man bangku tugas istimewa, e me guna meritaken Berita Si Meriah man si labo kalak Jahudi kerna kinibayaken Kristus si la ersibar. 3:9 Janah gelah kerina manusia ngidah pelaksanan rencana Dibata si terbuni e. Dibata si njadiken kerina si nasa lit, muniken rahasia enda nai-nai nari. 3:10 Gelah genduari arah perpulungen, kerina peminpin penguasa-penguasa ingan si meganjang meteh kepentaren Dibata si melala tempasna. 3:11 Si enda ibahan Dibata rikutken rencana si kekal, si idungiNa arah Kristus Jesus Tuhanta. 3:12 I bas kita ersada ras Kristus dingen erkiteken tek kita man baNa lit hakta guna ngadap ku lebe-lebe Dibata alu la biar-biaren. 3:13 E maka kupindoken man bandu ola kam biar-biaren kerna kiniseran si kunanami erkiteken kam; si tuhuna kiniseranku enda arus erbahanca megah akapndu. 3:14 Erkiteken si e maka aku erjimpuh i lebe-lebe Bapa. 3:15 I bas Ia nari me kerina kinibapan i doni enda ras i Surga ndatken pengesahen. 3:16 Kupindoken man Dibata gelah i bas kinibayakenNa si la ersibar nari iberekenNa man bandu kuasa arah KesahNa guna mpegegehi pusuh peratenndu. 3:17 Janah gelah Kristus ringan i bas pusuhndu erkiteken kam tek man baNa. Ertoto aku gelah kam rurat dingen erpalas i bas keleng ate. 3:18 Gelah raduken kerina anak-anak Dibata ngasup kam ngangka kuga belangna, gedangna, ganjangna ras bagesna keleng ate Kristus e. 3:19 Tuhu, mbera-mbera ietehndu keleng ateNa e aminna gia keleng ateNa ngelebihi kerina pemeteh, seh maka kam idemi alu biak Dibata si serta. 3:20 Pujin man Dibata si ngasup erbahan kai pe ndauh beliden asangken ngasup kita mindosa ntah pe ngukurisa alu kuasaNa si sangana erdahin i bas kita. 3:21 Kemulian man baNa i bas perpulungen ras i bas Kristus Jesus, rasa lalap seh rasa lalap. Amin.
4:1 E maka aku, si i bas penjara erkiteken kudahi dahin Tuhan, mindo man bandu: Nggeluh lah sue ras kecibalndu si enggo iaturken Dibata man bandu, asum tangtangna kam idiloNa guna ngikut Kristus. 4:2 Meteruk min ukurndu, lemah lembut, dingen saber. Ola kam pergelut sapih-sapih kam, erkiteken kekelengen si lit i bas kam. 4:3 Usahakenlah tuhu-tuhu maka persadanndu si ibereken Kesah e tetap irakut alu enteguh i bas perdamen. 4:4 Sada ngenca kula, janah sada ngenca Kesah. Bage me pe kam kerina idilo ku bas sada pengarapen. 4:5 Sada ngenca Tuhan, sada kiniteken, sada peridin; 4:6 sada ngenca Dibata, e me Bapa kerinana. Ia i babo kerina si nasa lit, si erdahin arah kerina si nasa lit dingen si nggeluh i bas kerinana. 4:7 Man banta sekalak-sekalak enggo ibereken kengasupen si khusus sue ras baginta si patut si ibereken Kristus erpalasken lias ateNa. 4:8 Bagi lit tersurat i bas Pustaka Si Badia, "Asum Ia nangkih ku ingan si meganjangna, nterem ibabana kalak tabanen i bas barisen arak-arakenNa; dingen iberekenNa pemere-pemere man manusia." 4:9 Kai kin ertina "Ia nangkih" e? Ertina e me: perlebe Ia nusur ku ingan si meterukna kal, i doni enda. 4:10 Ia si nusur e, Ia ka si nangkih ku ingan si ganjangen dingen dauhen asa kerina langit, gelah idemiNa kerinana. 4:11 Ia si "mereken pemere-pemere man manusia." Deba ibahanNa jadi rasul, deba jadi nabi; lit deba jadi perBerita si Mehuli, lit deba jadi si mpermakani perpulungen ras guru-guru. 4:12 Si enda ibahanNa gelah kerina anak-anak Dibata sikap ndahiken dahin pelayanen majekken kula Kristus. 4:13 Alu bage dungna ersada kinitekenta ras penandainta kerina nandangi Anak Dibata; kita dewasa, janah dungna seh kita ku tingkat kedewasan Kristus si serta e. 4:14 Alu bage lanai kita bali ras anak-anak, iombang-ambingken galumbang dingen ijole-joleken ku jah ku je alu angin pengajaren kalak penipu; ibabaina kalak si deban papak alu penebu-nebuna si guak. 4:15 Tapi alu nuriken si tuhu-tuhu alu dem ate keleng, reh belinna kita jenari seh ku tingkat kesempurnan Kristus. Ia kap takal janah, 4:16 ku Ia me kerina kula e irakut. Kerina ringring e iranggut dingen ipersada alu penampat urat si lit i bas ringring e. 4:17 I bas gelar Tuhan kukataken man bandu gelah itengetindu enda: olanai kam nggeluh bagi kalak si la nandai Dibata, si la erguna perukurenna, 4:18 dingen gelap pengertinna. La lit baginna i bas kegeluhen si ibereken Dibata, sabap lanai kal lang-lang ia bodohna, dingen mersik ukurna. 4:19 Lanai sitik pe ia meteh mela; ipelepasna dirina italuken sura-surana si jahat, janah ilakokenna kerina si la mehuli alu la alang-alangen. 4:20 Labo e si ipelajarindu i bas Kristus. 4:21 Ma enggo ibegindu kerna Kristus, janah selaku ajar-ajarNa, ma enggo kam iajari kerna si mehuli si lit i bas Ia? 4:22 Dage tangtangilah manusia si male, si erbahanca kam nggeluh bagi si nggo-nggona. Manusia si male si meneken bana alu sura-surana si nipu. 4:23 Pusuh peratenndu ras perukurenndu kerina arus ipelimbarui. 4:24 Pakelah manusia si mbaru si itepa rikutken tempas Dibata, dingen encidahken bana i bas kegeluhen si tuhu-tuhu adil dingen badia. 4:25 Olanai erbual! Kerina arus nuriken si tuhu-tuhu man seninana, sabap kerina kita ringring i bas sada kula. 4:26 Adi merawa kam, ola seh erdosa. Janah ola simpan rawandu seh ben wari. 4:27 Ola bere kesempaten man si Iblis. 4:28 Kalak si nangko gelgel nari, olanai ia nangko. Erdahinlah ia alu mehuli guna ncariken keperlunna, janah gelah lit i bas ia guna nampati kalak si i bas kepiceten. 4:29 Adi kam ngerana ola sitik pe belasken cakap si la erturi-turin. Tapi kata-kata si ergunalah belasken, si banci nampati kalak si deban rikutken perluna, gelah kata-katandu e maba kiniulin man si megisa. 4:30 Ola ceda ate Kesah Dibata ibahanndu, sabap Kesah e kap capna maka kam sikerajangen Dibata. Kesah e jaminen maka reh me warina Dibata ndungi dahinNa mulahi kam. 4:31 Tadingken cian ate, perampus ras pernembeh. Olanai kam si isak-isaken ntah si cekurak-cekuraken. Olanai sitik pe erelem-elem. 4:32 Tapi melias dingen mesayanglah sapih-sapih kam. Si alem-alemenlah bagi Dibata enggo ngalemi kam i bas Kristus.
5:1 Erkiteken kam anak-anak kekelengen Dibata, usihlah Ia. 5:2 Geluhndu arus erpalasken keleng ate, bagi Kristus enggo engkelengi kita, dingen ngendesken kesahNa man gunanta. Ia enggo mpersembahken diriNa jadi persembahen si merim si ngena ate Dibata. 5:3 Erkiteken kam anak-anak Dibata, la patut terjadi i tengah-tengahndu erlua-lua, erlagu la mehuli ntah pe merangap; ibelasken pe ola. 5:4 Bage pe la patut ibelaskenndu cakap caram, cakap si lang-lang ntah pe cakap si kemali. Tapi pujilah Dibata. 5:5 Perlu ietehndu maka kalak si erlua-lua, kalak si erlagu la mehuli ntah pe kalak merangap (merangap bali kap ras nembah man berhala) la dat bagin i bas Kinirajan Kristus ras Dibata. 5:6 Ola pelepas ise pe nipu kam alu kata si sia-sia; sabap erkiteken si e me kerina maka reh rawa Dibata man kalak si la nggit ngikutken Ia. 5:7 E maka ola erkandu-kandu ras kalak si bage. 5:8 Kam gelgel nari i bas gelap, tapi genduari enggo i bas terang, erkiteken kam enggo jadi anak-anak Tuhan. E maka kam arus nggeluh bagi kalak i bas terang. 5:9 Sabap mbelin perulihen terang, e me erbage-bage si mehuli, si bujur ras si tuhu-tuhu. 5:10 Daramilah kai si ngena ate Tuhan. 5:11 Ola kam ikut i bas perbahanen kalak si gelap si sia-sia. Tapi bukakenlah perbahanen-perbahanen si bage. 5:12 Si tuhuna ncakapken kerna kai si ibahanna alu erbuni-buni e pe mereha nge. 5:13 Janah kai si ibukaken i bas terang, tangkas me. 5:14 Janah kerina si banci idah alu tangkas, e terang gelarna. E me sabapna maka ikataken i bas ende-enden: "Medakkenlah, o, kam si tunduh, janah kekekenlah i bas si mate nari! Ersinalsal me Kristus ku babondu." 5:15 E maka perdiatekenlah lagu langkahndu. Ola kam nggeluh bagi kalak motu, tapi bagi kalak pentar min. 5:16 Pergunakenlah kesempaten si lit i bas kam alu mehuli, sabap wari-wari enda la kap mehuli. 5:17 Dage ola bodoh, tapi pergermetkenlah kai si ngena ate Tuhan guna idalankenndu. 5:18 Ola kam mabuk ibahan anggur, sabap si e encedaken man bandu. Tapi idemi Kesah Dibata min kam. 5:19 Ercakap-cakaplah kam sapih-sapih kam alu make masmur, ende-enden pujin dingen ende-enden pertendin. Endekenlah ende-enden ras masmur man Tuhan alu ukur dem ngataken bujur. 5:20 Katawari pe katakenlah bujur man Dibata Bapa subuk kerna kai pe, i bas gelar Tuhanta Jesus Kristus. 5:21 Patuhlah sekalak nandangi si debanna, erkiteken kam mehamat man Kristus. 5:22 O kam ndehara, patuhlah man perbulangenndu bagi patuh man Tuhan. 5:23 Sabap perbulangen nge takal ndeharana, bali ras Kristus takal perpulungen, janah Kristus nge si Engkelini perpulungen si jadi kulaNa e. 5:24 Erkiteken si e ndehara arus patuh kal man perbulangenna i bas kai-kai pe, bali ras perpulungen patuh man Kristus. 5:25 Kam perbulangen, kelengilah ndeharandu, bagi Kristus engkelengi perpulungen, dingen ngendesken kesahNa guna perpulungen e. 5:26 Kristus erbahan bage guna mpersembahken perpulungen e man Dibata, alu kataNa, kenca ibersihkenNa e alu mbasuhsa alu lau. 5:27 Tole pe gelah iendeskenNa perpulungen e man DiriNa alu dem kinijilen desken sekalak penganten diberu bersih dingen la ersalah, la lit cungikna ntah ringutna, bage pe la lit si man pandangen. 5:28 Perbulangen arus engkelengi ndeharana bagi ia engkelengi kulana. Kalak si engkelengi ndeharana, engkelengi dirina kap. 5:29 Labo pernah lit kalak elem-elem nandangi kulana. Tapi ipekena-kenana dingen ikawalina kulana e bagi Kristus mpekena-kena dingen engkawali perpulungen. 5:30 Sabap kita me ringring kula Kristus. 5:31 Bagi lit tersurat i bas Pustaka Si Badia, "Erkiteken si e, sekalak dilaki nadingken nande bapana, jenari ersada ia ras ndeharana, janah si dua e jadi sada kula me." 5:32 Si enda ncidahken rahasia si mbelin kal ertina. Janah aku jine ngidah, maka si enda nuduhken persadan Kristus ras perpulungen. 5:33 Tapi pe kerna kam: Tep-tep perbulangen arus engkelengi ndeharana bagi ia engkelengi dirina, janah tep-tep ndehara arus mehamat man perbulangenna.
6:1 O kam anak-anak! Ikutkenlah ajar orang tuandu, sue ras peraten Tuhan sabap patut idalankenndu. 6:2 "Pehagalah nande-bapandu," e me pedah si pemena ibereken Dibata radu ras padanNa. 6:3 E me, "gelah mejuah-juah kam, janah ndekah kam nggeluh i doni enda." 6:4 Kam orang tua! Ola pesega-sega anakndu si erbahanca ia merawa. Tapi i bas mpebelin-belin ia ajari dingen tegu-tegulah ia bagi si ngena ate Tuhan. 6:5 O kam budak-budak, patuhlah man tuanndu alu mbiar dingen gentar; ikutkenlah alu bulat ukurndu, tempa-tempa idahikenndu e guna Kristus. 6:6 Bagelah ibahanndu labo saja tupung ia i je tempa-tempa kam ndarami pujin i bas manusia nari saja; tapi dalankenlah alu tutus kai si ngena ate Dibata, selaku budak-budak Kristus. 6:7 Dahilah dahinndu alu meriah ukur. Anggaplah kam erdahin guna Tuhan labo guna manusia. 6:8 Ingetlah! Kerina manusia, subuk budak-budak ntah si la budak-budak, ngaloken balasen i bas Tuhan nari erkiteken kerina dahinna si mehuli. 6:9 O kam tuan-tuan! Kam pe bage ka lah perbahanenndu nandangi budak-budakndu. Olanai ia ipesega-segandu. Ingetlah! Subuk kam, bage pe budak-budakndu sada kap Tuanndu i Surga. Janah labo erndobahen kam i lebe-lebeNa. 6:10 Kedungenna, megegehlah kam erkiteken persadanndu ras Tuhan dingen erkiteken KuasaNa si mbelin. 6:11 Pakekenlah kerina senjata si ibereken Dibata gelah ngasup kam tedis ngelawan akal Iblis si jahat e. 6:12 Sabap labo manusia si man lawanenta, tapi kuasa pemerentah ras penguasa si la teridah, kuasa doni si gelap enda, ras kesah si jahat i bas ingan si meganjang. 6:13 E maka genduari pakekenlah kerina senjata si ibereken Dibata, gelah adi reh pagi paksa si jahat e, ngasup kam ngelawan serangen-serangen musuh, janah kenca erperang seh ku kedungenna, tetap denga kam tedis alu megegeh. 6:14 E maka tedislah kam! Pakekenlah ketuhu-tuhun jadi bentingndu; pakekenlah kinibujuren jadi baju besi guna erperang. 6:15 Janah pakekenlah keriahen ukurndu meritaken Berita Si Meriah kerna kemalemen ate jadi sepatundu. 6:16 Bahanlah kinitekenndu jadi ampang-ampangndu katawari pe. Alu e banci inimpetindu kerina anak panah si gara si ipanahken si Jahat. 6:17 Alokenlah keterkelinen jadi topi waja man bandu, janah kata Dibata jadi pedang si ibereken Kesah Dibata man bandu. 6:18 Bahanlah si e kerina alu ertoto, mindo penampat man Dibata. Ertotolah i bas bukuna alu kuasa Kesah. Erkiteken si e erjaga-jaga dingen tutuslah kam i bas ertoto. Ertotolah rusur guna kerina anak-anak Dibata. 6:19 Janah ertoto pe man gunangku, gelah ibereken Dibata man bangku kata-kata si payo adi aku ngerana, dingen gelah pang aku ngerana dingen mpetangkas rahasia Berita Si Meriah e. 6:20 Sabap guna Berita Si Meriah e maka aku jadi utusen Dibata, janah ipenjaraken pe. Ertotolah kerna aku, gelah pang aku ngerana kerna Berita Si Meriah e, bagi arusna aku ngerana. 6:21 Gelah ietehndu kuga percibalku, Tikikus nurikenca man bandu. Seninanta Tikikus si ikelengi enda sekalak serayan si tutus i bas dahin Tuhan. 6:22 Kusuruh ia ndahi kam gelah iturikenna man bandu kerna percibal kami kerina, janah gelah alu bage reh tetapna ukurndu. 6:23 Dibata Bapa ras Tuhanta Jesus Kristus mereken kemalemen ate, kekelengen ras kiniteken man bandu gelah. 6:24 Lias ate Dibata rembak ras kerina kalak si erkeleng ate man Tuhanta Jesus Kristus alu keleng ate si la erkeri-kerin.
1:1 Surat enda i bas aku nari, Paulus ras Timotius, persuruhen-persuruhen Kristus. Surat enda man anak-anak Dibata si ringan i Pilipi, si ersada ras Kristus Jesus, bage pe man peminpin-peminpin ras si nampati i bas perpulungen. 1:2 Dibata Bapanta ras Tuhan Jesus Kristuslah mereken lias ate ras kemalemen ate man bandu. 1:3 Kuinget kenca kam, kukataken bujur man Dibatangku erkiteken kam. 1:4 Tep-tep aku ertoto kerna kam kerina, ertoto aku alu meriah ukur. 1:5 Nginget kuga kam nampati aku i bas dahin meritaken Berita Si Meriah, tangtangna nari seh genduari. 1:6 Bage pe tek aku maka iterusken Dibata nge dahin si mehuli si enggo ibenakenNa i bas kam seh ku warina Kristus reh mulihken. 1:7 Kuinget kam lalap! Janah patut nge bagenda penggejapenku kerna kam. Sabap kerina kam enggo ras aku ngenanami lias ate si ibereken Dibata man bangku, subuk genduari asum aku i bas penjara, bage pe nai asum aku bebas denga mpertahanken ras mpeteguhi Berita Si Meriah e alu tutus ate. 1:8 Tuhu-tuhu tedeh kal ateku nandangi kam kerina alu keleng ate si rehna i bas Jesus Kristus nari. Dibata saksingku maka kai si kukataken enda la guak. 1:9 Pertotonku kerna kam e me: Ertoto aku man Dibata gelah ertambahna min keleng atendu janah rikut ras pemeteh si tuhu-tuhu ras pengangkan si serta, 1:10 gelah ietehndu milihsa apai si mehulina. Alu bage bersih kam pagi dingen la erpandangen i bas warina Kristus reh pedua kaliken guna ngadili kerina manusia. 1:11 Geluhndu pagi itambahi alu biak si tuhu-tuhu mehuli. Si enda Jesus Kristus ngenca ngasup njadikenca, e me guna muji dingen pehagaken Dibata. 1:12 O senina-senina, gelah ietehndu, maka kai si enggo jadi man bangku erbahanca reh mbarna Berita Si Meriah e. 1:13 Seh maka kerina si erjaga i bas istana bage pe kerina kalak si ringan i jenda meteh maka aku ipenjaraken erkiteken aku suruh-suruhen Kristus. 1:14 Janah erkiteken aku ipenjaraken e, senina-senina si sada kiniteken teremen reh tekna man Tuhan, seh maka katawari pe reh pangna ia meritaken Berita Si Meriah e. 1:15 Tuhu lit piga-piga kalak si meritaken Kristus erkiteken cian ate ntah erkiteken ia kalak perubat-rubat, tapi si debanna meritakenca arah ukurna ersuruh. 1:16 Si e idalankenna erpalasken keleng ate, sabap ietehna maka enggo ibereken Dibata man bangku dahin guna mpertahanken Berita Si Meriah e. 1:17 Kalak si deban, labo arah ukurna ersuruh mberitaken Berita Si Meriah e, tapi erkiteken rangapna nge. Iakapna reh suhsahna kuakap ibahanna asum aku i penjara. 1:18 Labo dalih! Meriah nge ukurku subuk mehuli ntah la gia mehuli sura-surana, gelah Kristus e iberitaken asa bancina. Tetap nge meriah ukurku, 1:19 sabap kueteh maka bebas nge pagi aku erkiteken pertotonndu ras penampat Kesah Jesus Kristus. 1:20 Sura-surangku dingen si kuarapken kal e me maka ola kal min sia-sia aku i bas dahinku, tapi maka tetap min ergiah-giah ukurku alu la biar-biaren, terlebih-lebih genduari, gelah i bas kerina percibalku tama pujin man Kristus, subuk aku nggeluh ntah mate gia. 1:21 Sabap kai kin ertina nggeluh! Man bangku, nggeluh e me Kristus, janah mate reh untungna. 1:22 Tapi adi banci mbue kubahan dahin si mehuli i bas geluhku enda, lanai kueteh milihsa nggeluh ntah mate. 1:23 Duana ngerintak aku. Mesikel kal aku nadingken kegeluhenku enda gelah banci ras Kristus. Sabap e me si mehulina! 1:24 Tapi man gunandu ulin aku tetap nggeluh. 1:25 Tek kal aku kerna si enda. E me sabapna maka kueteh maka langa bo aku mate. Tetap denga nge aku ras kam kerina guna nambahi kemajun ras keriahenndu i bas kiniteken. 1:26 E maka kenca ras kam ka aku pagi, reh litna dalanna iakapndu megah kerna aku i bas kegeluhenndu i bas persadanndu ras Kristus Jesus. 1:27 Saja ngenca, sue min lagu-langkahndu bagi si iaturken Berita Si Meriah kerna Kristus e, gelah subuk aku reh ndahi kam ntah lang, tetap kubegi ersada ukurndu dingen ersada arihndu i bas mpertahanken kiniteken si turah erkiteken Berita Si Meriah. 1:28 Ola kam mbiar nandangi imbang-imbangndu; piherkenlah ukurndu. E me tanda man bana maka bene me ia janah selamat me kam. Sabap Dibata kap si mereken keterkelinen e man bandu. 1:29 Dibata enggo mereken kesempaten man bandu guna erdahin man Kristus, labo saja gelah kam tek man Kristus, tapi pe gelah kam ngenanami kiniseran guna Ia. 1:30 Genduari banci kam ikut ras aku i bas perbeben e. Perbeben e bali ras perbeben si iidahndu kunanami nai, dingen si ibegindu kunanami denga genduari.
2:1 Kegeluhenndu i bas Kristus erbahanca kam megegeh. Ma kin keleng ateNa e ngapuli kam? Ma rembak kin kam ras Kesah Dibata? Ma kin sikeleng-kelengen kam dingen mekuah atendu sekalak nandangi si debanna? 2:2 Gelah tuhu-tuhu malem ateku, kupindoken man bandu: Ersada min arihndu, sikeleng-kelengen min kam, ersada min geluhndu dingen ersada ukurndu. 2:3 Ola ibahanndu kai pe erpalasken kerangapen, ntah si erpalasken ukur meganjang. Tapi peteruklah ukurndu sekalak nandangi si debanna. Ola kal iakapndu ulin kam asangken kalak si deban. 2:4 Ola keperlunndu saja ngenca iperdiatekenndu tapi perdiateken pe keperlun kalak si deban. 2:5 Perukurenndu bali min ras perukuren Kristus Jesus: 2:6 Aminna gia tetap lit i bas Ia biak Dibata, erkuasa dingen ermulia Ia bali ras Dibata, tapi si enda la ipertahankenNa. 2:7 Arah ukurna jine itadingkenNa kerina si lit i bas Ia. Jadi seri Ia ras manusia; nggeluh bagi sekalak juak-juak. Janah teridah bagi sekalak jelma. 2:8 Meteruk ukurNa, janah erkemalangen Ia man Dibata seh matena pe; e me mate i kayu persilang. 2:9 Erkiteken si e ipehaga Dibata kal Ia. Ibereken Dibata man baNa kuasa si meganjangna kal. 2:10 Gelah kerina si enggeluh i Surga, i babo doni ras i teruh doni erjimpuh nembah man baNa. 2:11 Janah ngakuken maka Jesus Kristus e tuhu-tuhu Tuhan, guna kemulian Dibata Bapa. 2:12 E maka, o teman-temanku, bagi tetap ikutkenndu katangku, asum aku ras kam, terlebih pe genduari ikutkenlah katangku asum aku ndauh i bas kam nari. Tetaplah erdahin alu mbiar dingen gentar enggenepi keselamatenndu. 2:13 Sabap Dibata pe tetap erdahin i bas kam gelah kam nggit dingen ngasup ndalanken si ngena ateNa. 2:14 Dahikenlah kerina dahin alu la jungut-jungut ntah nimbak. 2:15 Gelah kam la ersalah dingen la erpandangen selaku anak-anak Dibata si serta si nggeluh i bas doni kalak si jahat dingen erdosa. Ersinalsal min kam i tengah-tengahna bagi bintang-bintang nerangi langit. 2:16 Asum iberitakenndu Berita Kegeluhen e man bana. Adi bage ibahanndu lit pagi dalanna megah kuakap kerna kam i bas Wari Kristus reh mulihken, sabap si e nuduhkenca maka kerina usahangku ras pendahinku la sia-sia. 2:17 Banci jadi mambur me darehku jadi persembahen i babo persembahen si ipersembahkenndu man Dibata alu kinitekenndu. Adi bage meriah ukurku, janah kerina kam kubahan ngenanami keriahenku e. 2:18 Bage pe min kam, meriahlah min ukurndu, janah bahanlah maka aku pe ngenanami keriahenndu e. 2:19 Tek aku maka arah penampat Tuhan Jesus banci pedas kusuruh Timotius ndahi kam, gelah alu megi berita kerna kam reh tetapna ukurku. 2:20 Timotius ngenca ngangka ukurku dingen si tuhu-tuhu nggit rukur kerna kam. 2:21 Kalak si deban ngukurken urusenna saja, labo dahin Jesus Kristus. 2:22 Kam jine pe ietehndu nge kuga Timotius enggo ncidahken kengasupenna, kuga ia ras aku, bagi sekalak anak ras bapa, ras-ras erdahin erkiteken Berita Si Meriah e. 2:23 E maka ngarap aku maka banci minter ia kusuruh ndahi kam, kenca kueteh kuga pagi keputusen perkarangku. 2:24 Tek aku maka alu penampat Tuhan, aku pe banci pagi minter reh ndahi kam. 2:25 Perlu pe kuakap kusuruh seninanta Epaproditus ndahi kam, si enggo erdahin janah erjuang ras aku dingen enggo isuruhndu erdahin nampati aku. 2:26 Mesikel kal ia jumpa ras kam kerina janah ndele atena sabap ibegindu berita kerna ia sakit. 2:27 Tuhu sakit ia mbaru enda, janah menam pe mate. Tapi mekuah ate Dibata ia; janah labo saja ia, tapi aku pe mekuah ka nge ate Dibata, ipulahiNa aku i bas ceda ate si mbelin e nari. 2:28 Reh tetapna ukurku nuruh ia ndahi kam gelah meriah mulihi ukurndu kenca kam jumpa ras ia, janah lesap pe ceda ateku. 2:29 E maka meriahlah ukurndu ngalo-ngalo ia, bagi sekalak senina i bas Tuhan. 2:30 Mehamatlah man kalak si bagi ia, sabap ia enggo ngasamken kesahna janah menam pe mate, erkiteken dahin Kristus, guna mereken penampat man bangku si la kam ngasup merekenca man bangku.
3:1 Kedungenna, o senina-seninangku, meriahlah iakapndu erkiteken persadanndu ras Tuhan. Labo kuakap dalih ngulihisa kai si enggo kusuratken man bandu, janah tama ngenana man bandu. 3:2 Metengetlah nandangi kalak si ndalanken perbahanen-perbahanen si jahat, e me biang, si tetap mpertahanken undang-undang sunat. 3:3 Sabap kita me si enggo ngaloken sunat si tuhu-tuhu, labo ia; sabap kita nembah man Dibata arah Kesah Dibata, janah meriah i bas kegeluhenta erkiteken kita nggeluh i bas persadan Kristus Jesus. Kita labo ernalem nandangi adat-adat si teridah. 3:4 Tentu saja aku pe banci nge ernalem man barang-barang si bage. Adi lit kalak erpengakap maka banci ia ernalem nandangi adat-adat si teridah, bancin aku erpengakap bage. 3:5 Aku isunatken asum umurku waluh wari. Aku tubuh selaku kalak Israel, suku Benyamin, janah kalak Heber asli me aku. Kerna ndalanken Undang-undang, kalak Parisi kap aku. 3:6 Janah perbahan tutusna ateku ndalanken Undang-undang e, kugasgasi pe gereja. Bicara sekalak jelma banci rembak ras Dibata arah ndalanken Undang-undang aku me si labo pernah ersalah. 3:7 Tapi kerina si nai kuakap untung, genduari kinirugin kuakap erkiteken Kristus. 3:8 Labo kerna si e saja, tapi kai pe kinirugin kuakap rimbangken si meherga e, e me penandai kerna Jesus Kristus Tuhanku. Erkiteken Kristus, enggo kuambekken kerinana, janah kupedirep si e kerina sampah-sampah, gelah banci kudat Kristus dingen. 3:9 Tuhu-tuhu ersada aku ras Ia. Lanai bo kuusahaken ngerembakken diringku man Dibata arah ndalanken Undang-undang. Tapi aku enggo rembak ras Dibata arah kinitekenku man Kristus. Dibata jine si enggo ngerembakken aku kempak diriNa erkiteken kinitekenku. 3:10 Sada ngenca sura-surangku e me gelah kutandai Kristus dingen kugejap kuasa kekekenNa janah ikut aku ngenanami kiniseranNa, dingen bali ras Ia i bas kematenNa, 3:11 alu pengarapen maka aku ipekeke Dibata i bas si mate nari ku kegeluhen. 3:12 Labo kukataken maka aku enggo ndatken si enda ntah pe enggo serta. Aku tetap erpala-pala guna ndatken pemere si enggo isikapken Kristus Jesus. Guna si e me aku iteguNa janah ijadikenNa jadi sikerajangenNa. 3:13 Situhuna o senina-senina, labo aku erpengakap maka enggo aku ndatken pemere e. Tapi sada ngenca si kubahan, e me ngelupaken kai si arah pudingku janah erpala-pala ndatken si arah lebe. 3:14 E maka pinter aku kiam ku tujun guna ndatken pemere e, e me pendilo Dibata guna kegeluhen i Surga, si ipesehNa man bangku arah Kristus Jesus. 3:15 Kerina kita si enggo mbages erkiniteken man Jesus Kristus bage min perukurenta. Tapi adi lit i bas kam si la bage perukurenna, Dibata me pagi mpetangkassa man bandu. 3:16 Kai gia jadi, siteruskenlah ngikutken usihen si enggo siikutken seh genduari. 3:17 O, senina-senina tetaplah usih aku. Enggo itamaken kami kalak si man usihenndu, e maka perdiatekenlah kalak si enggo ngikutken usihen e. 3:18 Enggo megati si enda kukataken man bandu, janah genduari kuulihi alu iluh mambur: nterem kalak si kegeluhenna erbahanca ia perimbang ras kayu persilang Kristus. 3:19 Kalak si bage lawesna la banci lang kempak kebenen, sabap dibatana, e me peraten kulana. Megah iakapna i bas si patut iakapna mela, janah si iukurina kerna barang doni ngenca. 3:20 Tapi kita, warga Surga kap. Genduari alu ate metedeh sitimai kerehen si Engkelini kita i Surga nari, e me Tuhanta Jesus Kristus. 3:21 IsalihkenNa me pagi kulanta si kote dingen si ermasap-masap enda, jadi bali ras kulaNa si mulia. Si e banci ilakokenNa erkiteken i bas Ia lit kuasa guna ngelakoken si e kerina.
4:1 Dage, o senina-seninangku si kukelengi, bagendalah min tetap pergeluhndu jadi kalak Kristen. Keleng kal ateku kam janah tedeh pe ateku! Malem kal ateku ibahanndu janah tuhu-tuhu megah kuakap kerna kam! 4:2 O Eiodia ras Sintike, mindo aku gelah ersadalah min arihndu bagi si ersenina i bas Tuhan. 4:3 Janah kam pe o temanku sada dahin si tutus, sampatilah diberu enda duana. Sabap duana ia enggo latih erdahin ras aku i bas meritaken Berita Si Meriah e, bage pe ras Klemen ras kerina temanku si deban, si gelarna kerina lit tersurat i bas Kitap Kegeluhen. 4:4 Meriahlah min akapndu katawari pe erkiteken persadanndu ras Tuhan. Sekali nari kukataken: Meriahlah! 4:5 Cidahkenlah perbahanenndu si mehuli man ise pe. Tuhan pedas me reh. 4:6 Ola aru atendu kerna kai pe, tapi i bas kerina pertotonndu, pindolah man Dibata kai si iperlukenndu, janah pindolah rusur man baNa alu pusuh si dem pengataken bujur. 4:7 Kemalemen ate si rehna i bas Dibata nari, si la terukuri manusia, ngarak-ngarak pusuh ras ukurndu erkiteken persadanndu ras Kristus Jesus. 4:8 Kedungenna o senina-seninangku, ukurilah kerna si mehuli, e me kerna si bujur, mulia, benar, bersih, mejile ras kerna kerina si patut ipuji. 4:9 Dalankenlah kai si enggo ipelajarindu dingen ialokenndu i bas aku nari, subuk arah pengeranangku bage pe arah perbahanenku. Janah Dibata si mereken kemalemen ate man banta nemani kam gelah. 4:10 Mbelin kal keriahen si kugejapken i bas geluhku erkiteken persadanku ras Tuhan. Kenca bage dekahna, lit ka kesempatenndu sekali nari ncidahken maka iperdiatekenndu kap aku. 4:11 Labo maksudku maka lanai aku iperdiatekenndu, saja lanai kin lit kesempatenndu ncidahkenca. Janah si enda kukataken labo erkiteken kugejap maka aku lanai iperdiatekenndu; sabap aku enggo erlajar encukupken alu kai si lit i bas aku. 4:12 Kueteh nge kai ertina nggeluh i bas kekurangen, janah kai ertina nggeluh i bas kelebihen. Enggo dat aku rahasiana, seh maka i ja gia ntah katawari gia, malem ateku subuk paksa aku besur bage pe paksa melihe, subuk paksa aku kelebihen bage pe paksa kekurangen. 4:13 Ngasup aku ngalaken kerina keadan erkiteken kuasa si ibereken Kristus man bangku. 4:14 Tapi mehuli kal perbahanenndu nampati aku, asum aku i bas kiniseran. 4:15 Kam o kalak Pilipi, ietehndu kal kap maka asum kutadingken Makedoni, asum tangtangna kuberitaken Berita Si Meriah kam ngenca perpulungen si nampati aku. Kam ngenca ikut ngenanami untung bage pe rugingku. 4:16 Asum perlu aku penampat i Tesalonika la sekali ngenca ikiremkenndu penampat. 4:17 Labo saja ateku ngaloken pemere-pemere e, tapi si kuarapken e me ngidah perkiran untungndu itambahi. 4:18 Enda dage tandana i bas aku nari maka enggo kualoken kerina si enggo iberekenndu man bangku. Janah lebih pe asa si kuperluken. Genduari enggo cukup kerina keperlunku, e me kenca ibaba Epaproditus kerina pemere-pemerendu. Pemere-pemerendu e jadi sada persembahen si merim man Dibata, persembahen si ialokenNa dingen si ngena ateNa. 4:19 Dibatangku si simpar alu kebayaken si lit i bas Kristus Jesus mereken kerina keperlunndu. 4:20 Terpujilah Dibata Bapanta seh rasa lalap! Amin. 4:21 Kataken mejuah-juah i bas aku nari man kerina anak-anak Dibata si lit i bas persadan ras Kristus Jesus. Senina-senina si i jenda ras aku mpeseh salam man bandu. 4:22 Kerina anak-anak Dibata si i jenda ngataken mejuah-juah, terlebih-lebih si ringan i istana Kaisar. 4:23 Lias ate Tuhan Jesus Kristus ras kam kerina gelah.
1:1 Surat enda i bas aku nari, Paulus rasul Kristus Jesus erkiteken ipilih Dibata, ras i bas seninanta Timotius nari. 1:2 Man perpulungen i Kolose: e me senina-senina si tutus erkiniteken man Jesus Kristus. Ngarap kami maka Dibata Bapanta, mereken lias ate ras kemalemen ate man bandu. 1:3 Adi kami ertoto kerna kam, ikataken kami bujur man Dibata, Bapa Tuhanta Jesus Kristus, 1:4 sabap enggo ibegi kami berita kam tek man Kristus Jesus janah keleng atendu anak-anak Dibata. 1:5 Kam tek dingen keleng atendu, sabap lit pengarapenndu kerna kai si enggo isikapken Dibata man bandu i Surga. Enggo ibegindu kerna si e, sanga Berita Si Meriah i bas Dibata nari ipeseh man bandu. Berita e berita si tuhu-tuhu. 1:6 Berita Si Meriah e tetap maba pasu-pasu janah enggo mbar i tengah-tengah doni enda, bagi mbarna i tengah-tengahndu. Tangtangna kin nai ibegindu lias ate Dibata, mulai kin nai iangkandu, geluhndu pe enggo ipasu-pasu Dibata. 1:7 Si enda ibegindu i bas Epapras nari teman si ikelengindu. Ia kalak tutus erdahin i bas dahin Kristus guna nampati kami. 1:8 Iturikenna man kami kerna keleng ate si ibereken Kesah Dibata man bandu. 1:9 Erkiteken si e me, maka mulai kin ibegi kami kerna kam, rusur kam itotoken kami man Dibata. Ipindoken kami man baNa gelah banci ietehndu kerina sura-suraNa, alu pemeteh ras kepentaren si ibereken KesahNa. 1:10 Alu bage ngasup kam nggeluh bagi si ngena ate Tuhan dingen erbahan meriah ukurNa. Seh maka kegeluhenndu erbuahken perbahanen si mehuli, janah erbagesna pe penandaindu Dibata. 1:11 Mbera-mbera reh gegehna kam ibahan gegeh si reh i bas kuasaNa si mbelin e nari, gelah megenggeng kam i bas kai pe. 1:12 Katakenlah bujur man Bapa alu meriah ukur, sabap Ia me si erbahanca kam metunggung dat bagin i bas si enggo isikapkenNa man anak-anakNa, i bas Kerajan Terang. 1:13 Kita enggo ipulahi Dibata i bas kuasa si gelap nari. IbabaNa kita ku bas Kinirajan Anak kekelengenNa. 1:14 Erkiteken anakNa maka kita enggo itebusi, dosa-dosanta enggo ialemi Dibata. 1:15 Dibata la teridah, Kristus nge rupa Dibata si teridah. Ia lit ope denga ijadiken kerina si nasa lit. 1:16 Sabap arah Ia Dibata njadiken kerina si nasa lit subuk i Surga bage pe i doni, barang si teridah bage pe barang si la teridah, ikut pe kerina kesah si erkuasa ras merentah. Kerina si nasa lit ijadiken Dibata arah Kristus guna Kristus. 1:17 Leben nge Kristus lit asangken kerinana, janah i bas persadan ras Ia kerina si nasa lit e ndatken inganna si payo. 1:18 Ia me takal kulaNa, e me kepala Gereja. Ia me ulu kegeluhen kulaNa. Ia me si tangtangna ipekeke Dibata i bas si mate nari gelah Ia ngenca banci ngaloken ingan si mehergana i bas kai pe. 1:19 Arah peraten Dibata i bas diri AnakNa ringan alu serta si lit i bas diri Dibata. 1:20 Arah Ia me pe itetapken Dibata ndameken kerina si nasa lit ras DiriNa. Dibata mereken perdamen arah kematen AnakNa i kayu persilang, gelah kerina si nasa lit, subuk i doni bage pe i Surga mulihken man baNa. 1:21 I bas sada paksa nai, sirang kam ras Dibata. Kam jadi imbangNa erkiteken perbahanen ras perukurenndu si jahat. 1:22 Tapi genduari, erkiteken kematen kula AnakNa, iperdameken Dibata kam ras DiriNa, gelah kam badia, bersih dingen la erpandangen i adep-adepenNa. 1:23 Erkiteken si e patut kam tetap patuh i bas palas si nteguh, janah ola pulahi pengarapen si enggo idatndu asum tangtangna nai ibegindu Berita Si Meriah i bas Dibata nari e. Sabap Berita Si Meriah i bas Dibata nari enggo mbar ku belang-belang doni enda. E me sabapna maka aku, Paulus enggo jadi sekalak si erdahin. 1:24 Genduari meriah ukurku ngenanami kiniseran guna kam. Sabap arah kiniseran kulangku, kudungi dahin si arus idahiken Kristus alu kiniseran guna kulaNa, e me perpulungen. 1:25 Aku ibahan Dibata jadi si erdahin guna perpulungen. Dahin ibereken Dibata man bangku guna keperlunndu. Dahin e mpembarken kata Dibata alu serta, 1:26 e me rahasia si ibuniken Dibata nai-nai nari man kerina manusia, tapi genduari ipetangkasNa man anak-anakNa. 1:27 Sura-sura Dibata mpetangkasken rahasiaNa man anak-anakNa, uga ulina dingen belinna rahasiaNa e man kalak si labo Jahudi pe. Rahasia e, e me: Kristus lit i bas kam, janah mereken pengarapen maka kam dat bagin i bas kemulian Dibata. 1:28 Kristus kap si ipembarken kami man kerina manusia. Kerina ipersingeti dingen iajari kami alu kepentaren, gelah ibaba kami ngadap man Dibata bagi kalak si enggo dewasa i bas persadan ras Kristus. 1:29 Guna si enda me aku latih dingen erbebe alu gegeh ras kuasa si ibereken Kristus, si erdahin i bas aku.
2:1 Ateku gelah ietehndu kuga latihna kuakap erdahin man gunandu, man guna kalak si ringan i Laodikea ras kerina kalak si langa pernah jumpa ras aku. 2:2 Si enda kubahan gelah tetap kal ukurna bage pe gelah banci ersada ia i bas keleng ate, gelah i bas ia dem kinibayaken pengertin si serta. Alu bage ietehna rahasia Dibata, e me Kristus. 2:3 Kristus me kunci si nalangi kerina erta-erta kepentaren ras pemeteh Dibata si terligen. 2:4 Enda kukataken bandu gelah ola kam itokoh-tokohi ise pe si nuriken cakap mehuli man bandu. 2:5 Sabap aminna gia ndauh aku sirang ras kam, tapi ukurku ras kam kap. Meriah ukurku ngidah kuga raturna dingen tetapna kam erkiniteken man Kristus. 2:6 Bagi enggo ialokenndu Kristus Jesus jadi Tuhanndu, nggeluhlah kam ersada ras Ia. 2:7 Ruratlah kam i bas Ia, geluhkenlah geluhndu i bas Ia, janah reh gegehna lah min kinitekenndu bagi si niajarken man bandu. Rusurlah ngataken bujur man Dibata. 2:8 E maka jagalah, gelah ola ise pe nebu-nebu kam, alu kepentaren si la erguna si dem taki pacik, si reh i bas pengajaren manusia nari erpalasken pengertinna kerna biak doni enda, janah labo i bas Kristus nari. 2:9 Sabap biak Dibata si serta lit i bas Kristus, i bas kemanusianNa. 2:10 Janah man bandu enggo ibereken kegeluhen si serta erkiteken persadanndu ras Ia. Sabap Kristus ganjangen asangken kerina kuasa-kuasa ras kerina pemerentah-pemerentah si la teridah. 2:11 I bas persadanndu ras Ia kam enggo isunatken, labo alu sunat si ibahan manusia, tapi alu sunat Kristus, e me kematenNa, si gunana mulahi kam i bas kuasa biak manusia si erdosa nari. 2:12 Sabap asum kam iperidiken, ikuburkenndu ras Kristus, janah alu peridinndu ipekekendu i bas si mate nari erkiteken tek kam man kuasa Dibata si enggo pekeke Kristus i bas si mate nari. 2:13 Nai mate pertendinndu erkiteken dosa-dosandu, dingen erkiteken kam langa isunatken, e me la ngikutken perentah-perentah Dibata. Tapi genduari enggo ipegeluh Dibata kam ras Kristus, kerina dosa-dosandu enggo ialemi Dibata. 2:14 ImasapkenNa surat utang si isina e me kap perentah si nuntut kita. Alu makuken surat utang e ku kayu persilang, isasapken Dibata kerina tuntutenNa man banta. 2:15 I kayu persilang Kristus ngerampas senjata kuasa-kuasa ras pemerentah si la teridah e. IbahanNa si e jadi dedahen kalak si nterem alu maba kuasa-kuasa e selaku tabanen i bas arak-araken kemenangenNa. 2:16 E maka ola pelepas ise pe erbahan aturen-aturen kerna pangan ras inemenndu, ntah kerna wari-wari mehuli, ntah kerna bulan nguda, ntah kerna wari Sabat. 2:17 Si enda kerina kerna awih-awih si nandangi reh nge ngenca. Tapi si tuhu-tuhuna e me Kristus. 2:18 Ola pelepas isalahken kalak kam si ngataken maka belinen ia asangken kam erkiteken sada-sada pengenehenen. Kalak si bage pekulah-kulah ermeteruk ukur dingen meseksek nembah man malekat-malekat. Kalak si bagenda megombang alu la lit alasenna sitik pe, sabap perukurenna e me perukuren manusia. 2:19 Janah lanai icikepna Kristus si jadi takal kula e, e me perpulungen. I bas kepkepen Kristus, kerinana kula e ikawali dingen ipersadaken alu buku-buku ras urat-urat, janah reh belinna bagi si ngena ate Dibata. 2:20 Kam enggo mate ras Kristus, janah enggo ibebasken i bas kuasa-kuasa si la teridah nari. Engkai maka kam nggeluh tempa-tempa kam sikerajangen doni enda? Engkai maka ikutkenndu aturen-aturen: 2:21 "Ola jemak si enda," "Ola cecap ah," "Ola kuit si deban ah!" 2:22 Kerina peraturen si enda ma kerna barang-barang si lanai bo lit gunana kenca ipake? Si enda aturen-aturen dingen ajaren-ajaren si ibahan manusia saja ngenca. 2:23 Aturen-aturen enda, aminna pe tempa-tempa dem kepentaren i bas ersembah man malekat alu paksan, mpeteruk ukur alu pekulah-kulah, bage pe nakiti kula, tapi la lit gunana i bas naluken peraten kula.
3:1 Kam enggo ipekeke Dibata ras Kristus. E maka darami lah erta-erta si i Surga, i bas ingan Kristus kundul arah kemuhen Dibata. 3:2 Bulatkenlah ukurndu nandangi erta-erta Surga, labo nandangi perkara-perkara doni enda. 3:3 Sabap kam enggo mate janah kegeluhenndu si tuhu-tuhu genduari la iidah doni enda sabap terbuni ras Kristus i bas Dibata. 3:4 Kegeluhenndu si tuhu-tuhu e me kap Kristus, janah asum Ia teridah pagin, kam pe ikut teridah ras Ia, dingen dat bagin i bas KemulianNa. 3:5 Dage bunuhlah biak-biak doni si la mehuli, umpamana: erlua-lua, erlagu la mehuli, peraten daging, sura-sura si jahat, bage pe rangap (sabap rangap e me nembah man berhala). 3:6 Sabap erkiteken si e maka reh rawa Dibata nandangi kalak si la ngikutken kataNa. 3:7 Nai kam nggeluh rikutken lagu langkah si la mehuli, e me asum kam ercebah i bas kubang dosa. 3:8 Tapi genduari ambekkenlah kerina si bage rupa: merawa, ngamuk, ras segat ate. Ola cekurak ntah pe melasken cakap melket. 3:9 Ola perguak, sabap enggo itangtangindu manusia si male ras kerina kebiasanna, 3:10 janah genduari enggo ipakendu manusia si mbaru. Kam genduari manusia si mbaru si tetap ipebarui Dibata si njadiken kam rikutken tempasNa jine. Tujunna e me gelah itandaindu alu serta Dibata. 3:11 E maka lanai bo erndobah kalak Jahudi ntah la kalak Jahudi, si ersunat ntah la ersunat; lanai erndobah suku-suku asing, kalak Sekyt si ianggap hina, budak ntah bebas; sabap Kristus kap kerina. Kristus ersada ras kerinana. 3:12 Kam anak-anak Dibata. Kam ikelengi dingen ipilih Dibata jadi sikerajangenNa. E maka pakekenlah paken ate perkuah, mehuli, rukur meteruk, lemah-lembut dingen saber. 3:13 Ola kam pergelut dingen si alem-alemen salah adi kitik ukurndu ibahan kalak. Kam arus sialem-alemen salah bagi Tuhan enggo ngalemi salahndu. 3:14 Janah i babo si e kerina, arus kam sikeleng-kelengen sabap keleng ate mpersadaken kerinana alu serta. 3:15 Dame si ibereken Kristus i bas pusuhndu min si ngajari kam i bas erbahan keputusen-keputusenndu. Sabap guna dame kam ipilih Dibata jadi sada kula. E maka ngataken bujurlah. 3:16 Kata Kristus si dem alu kinibayaken nggeluh min i bas pusuh peratenndu. Siajar-ajarenlah kam alu kepentaren. Endekenlah masmur, ende-enden pujin ras ende-enden pertendin. Rendelah muji Dibata dingen ngataken bujur i bas ukurndu. 3:17 Dage ntah kai gia ibahanndu, subuk i bas ngerana ntah i bas perbahanen, bahanlah e i bas gelar Tuhan Jesus janah ngataken bujur man Dibata Bapa arah Ia. 3:18 O, kam ndehara, patuhlah man perbulangenndu, sabap bage me arusna ibahanndu selaku kalak Kristen. 3:19 O, kam perbulangen, kelengilah ndeharandu janah ola kasar man bana. 3:20 O, kam anak-anak, kalak Kristen, patut kam tetap patuh man orang-tuandu sabap bage nge si ngena ate Dibata. 3:21 O, kam orang-tua ola rusursa junguti anakndu gelah ola bene ukurna. 3:22 O, kam budak-budak patuhlah man tuanndu i bas kai pe. Labo saja tupung ia i je tempa-tempa kam ndarami pujin i bas manusia nari saja; tapi bahanlah e alu ukurndu bulat, erkiteken kemalangenndu man Tuhan. 3:23 Kai pe si ibahanndu, dahikenlah e alu tutus, tempa-tempa kam erdahin guna Tuhan, labo guna manusia. 3:24 Ingetlah, i bas Tuhan nari kap upahndu. Ialokenndu me kai si enggo isikapken Tuhan man anak-anakNa. Sabap Kristus nge Tuanndu si tuhu-tuhu, janah kam budakNa. 3:25 Janah kalak si erbahan salah, ise pe jelmana iukum rikutken salahna, sabap kerina manusia la erndobah i lebe-lebe Dibata.
4:1 O, kam tuan-tuan, bujur dingen patutlah perbahanenndu man budak-budakndu. Ingetlah maka kam pe lit nge Tuanndu i Surga. 4:2 Tutuslah i bas ertoto, janah sanga kam ertoto ersikaplah dingen kataken bujur man Dibata. 4:3 Bage pe ertotolah kerna kami, gelah ibereken Dibata man kami kesempaten si mehuli guna meritaken kataNa, guna nuriken rahasia Kristus. Sabap erkiteken si e me aku genduari i bas penjara. 4:4 Ertotolah kerna aku gelah banci aku ngerana alu mehuli, maka banci kupetangkas rahasia e bagi patutna. 4:5 Pentar min kam i bas perbahanenndu nandangi si la tek man Kristus alu makeken kesempaten si lit alu mehuli. 4:6 Mehuli dingen ngena min ate kalak cakapndu. Janah arus ietehndu mereken jabap si tepat man ise pe. 4:7 Gelah ietehndu kuga percibalku, ituriken Tikikus me man bandu kerna aku. Seninanta Tikikus enda, kalak tutus i bas dahin Tuhan. 4:8 Kusuruh ia ndahi kam nuriken kerna percibal kami kerina, gelah meriah iakapndu. 4:9 Ikut pe ras ia seninanta si Erguna. Ia i bas golongenndu nari janah ia kalak tutus. Kalak enda me nurikenca man bandu kerina si jadi i jenda. 4:10 Seninanta Aristarkus, temanku i bas penjara, nehken salam man bandu, bage pe Markus, bebere Barnabas. (Enggo ibegindu berita kerna ia, gelah ia ialo-alondu pagi asum ia reh.) 4:11 Josua pe, si igelari Justus, nehken mejuah-juah man bandu. Kalak enda ngenca teluna kalak Jahudi si enggo tek man Kristus si erdahin ras aku i bas Kinirajan Dibata. Mbelin kal penampatna man bangku. 4:12 Mejuah-juah nina Epapras. Ia i bas golongenndu nari janah ia enggo jadi si erdahin i bas dahin Kristus Jesus. Rusur kam itotokenna man Dibata alu tutus ate. Ipindokenna man Dibata gelah tetap ukurndu, erpemeteh kam, la monce-once kinitekenndu, bage pe gelah patuh kam i bas si ngena ate Dibata. 4:13 Kuidah tutus kal atena erdahin man gunandu bage pe man guna kalak si ringan i Laodikea ras i Hierapolis. 4:14 Lukas, dokter si ikelengi kita ras Demas nehkenmejuah-juah man bandu. 4:15 Kataken mejuah-juah i bas kami nari man senina-seninanta si sada kiniteken si ringan i Laodikea, bage pe man Nimpa ras perpulungen si erbahan kebaktin i rumahna. 4:16 Kenca iogendu surat enda usahakenlah maka i perpulungen Laodikea pe iogeken. Janah raduken si e, ogeken pe surat si man perpulungen Laodikea si ikiremkenna pagi man bandu. 4:17 Janah kataken man Arkipus, "Usahakenlah ndungisa dahin si ibereken man bandu i bas ndahiken dahin Tuhan." 4:18 Alu tanku kusuratken kata pendungi enda: Mejuah-juah i bas aku nari, Paulus. Ola lupa maka aku sangana i bas penjara! Lias ate Dibata rembak ras kam gelah.
1:1 Surat enda i bas aku nari, Paulus, ras Silas bage pe Timotius. Surat enda isehken man perpulungen i Tesalonika, si enggo jadi sikerajangen Dibata Bapa ras Tuhan Jesus Kristus. Dibatalah si mereken lias ate ras dameNa man bandu. 1:2 Tetap kami ngataken bujur man Dibata erkiteken kam kerina, janah lalap pe kam inget kami i bas pertoton. 1:3 Sabap asum kami ertoto man Dibata Bapanta inget kami kuga kam ncidahken kinitekenndu arah perbahanenndu, kuga kam latih erdahin erkiteken keleng atendu, janah kuga tetapna ukurndu erpengarapen man Tuhanta Jesus Kristus. 1:4 Ieteh kami nge o senina-senina, maka keleng ate Dibata kam janah enggo ipilihNa jadi sikerajangenNa. 1:5 Sabap Berita Si Meriah e ibaba kami nai man bandu, labo saja alu kata, tapi pe alu kuasa ras Kesah Si Badia, ras alu kiniteken si tetap nandangi pengajaren si tuhu-tuhu e. Ietehndu kap kai si ibahan kami asum kami ringan i tengah-tengahndu; si e guna kiniulinndu kap. 1:6 Enggo iusihndu kami bage pe iusihndu Tuhan. Janah aminna pe melala kiniseran inanamindu, ialokenndu Berita Si Meriah e alu keriahen si reh i bas Kesah Si Badia nari. 1:7 Bage me kam enggo jadi usihen nandangi kerina kalak si tek si ringan i daerah Makedoni ras Akaya enda. 1:8 Sabap Berita Si Meriah kerna Tuhan enggo mbar i bas kam nari labo saja ku belang-belang daerah Makedoni ras ku Akaya, tapi berita kerna kam erkiniteken man Dibata e enggo mbar ku japa pe. Lanai lit si perlu man katanken kami. 1:9 Kerina kalak ncakapken kuga nai kam ngalo-ngalo kami asum kami reh ndahi kam, janah kuga kam nadingken sembah-sembahenndu guna ndahi Dibata, jenari nembah man Dibata si nggeluh dingen si tuhu-tuhu. 1:10 Icakapkenna pe kerna kuga kam nimai kerehen AnakNa i Surga nari, e me Jesus si ipekekeNa i bas si mate nari, dingen si mulahi kita i bas ukumen si nandangi reh i bas Dibata nari.
2:1 O senina-senina, ietehndu maka kerehen kami ku kam e labo sia-sia. 2:2 Ietehndu ope denga kami reh ndahi kam ku Tesalonika enggo leben kami isiksa dingen igombang-gombangi kalak i Pilipi. Tapi ipetetap Dibatanta ukur kami guna nuriken Berita Si Meriah man bandu, e me Berita Si Meriah si reh i bas Ia nari, aminna pe erbage-bage kiniseran si man bentasen. 2:3 Kata pengajuk si isehken kami man bandu labo erpalasken kepapaken, ntah sura-sura si la mehuli. Labo ate kami nipu ise pe. 2:4 Tapi kami tetap ngerana rikutken si ngena ate Dibata, sabap enggo ipetunggung Dibata kami guna meritaken Berita Si Meriah e. Kami ngerana labo gelah ngena ate manusia, tapi gelah ngena ate Dibata, si nguji sura-sura ukur kami. 2:5 Tangkas ietehndu labo alu ranan medate kami reh ndahi kam, ntah pe pekulah-kulah nutupi kinirangapen kami. Dibata jadi saksi. 2:6 Labo kami ersura-sura gelah ipujiken kalak, subuk i bas kam nari ntah i bas kalak si deban nari, 2:7 aminna pe lit hak kami mindo kai-kai pe i bas kam nari erkiteken kami rasul Kristus. Tapi asum kami i tengah-tengahndu melias kami man bandu, bagi sekalak nande nandangi anakna. 2:8 Erkiteken kelengna ate kami nandangi kam meriah ukur kami merekenca man bandu labo Berita Si Meriah si rehna i bas Dibata nari saja tapi geluh kami pe. Keleng kal ate kami kam! 2:9 O senina-senina, tentu ingetndu denga kelatihen kami erdahin! Erdahin kami suari ras berngi gelah ola kami jadi tanggungenndu kidekah kami meritaken Berita Si Meriah si rehna i bas Dibata nari man bandu. 2:10 Kam me saksi kami, bage pe Dibata; lagu langkah kami man bandu, kam si tek man Jesus Kristus mehuli nge, bujur dingen la salah. 2:11 Ietehndu kai si ibahan kami man bandu sekalak-sekalak bali ras perbahanen sekalak bapa nandangi anak-anakna. 2:12 Iajuk kami kam dingen ipetetap kami ukurndu, bage pe ipindo kami gelah kam nggeluh rikutken si ngena ate Dibata, e me Dibata si ndilo kam gelah ikut ngenanami kemalemen ate i bas KinirajanNa ras KemulianNa. 2:13 Janah lit denga sabap si deban si erbahanca kami tetap ngataken bujur man Dibata. Asum iberitaken kami man bandu Kata Dibata, ibegikenndu dingen ialokenndu Kata e labo bagi kata si rehna i bas manusia nari tapi bagi Kata si rehna i bas Dibata nari. Janah si tuhuna kin Kata e i bas Dibata nari. Sabap Dibata sangana erdahin i bas kam si tek man baNa. 2:14 O senina-seninangku, kai si enggo inanamindu bali me ras kai si enggo inanami perpulungen-perpulungen Dibata si lit i Judea, e me kalak si enggo jadi sikerajangen Kristus Jesus i jah. Kam pe ngenanami kiniseran-kiniseran si rehna i bas bangsandu nari bagi kalak e enggo ngenanami kiniseran i bas kalak Jahudi nari, 2:15 e me kalak Jahudi si munuh Tuhan Jesus ras nabi-nabi, dingen si pesega-sega kami. Seh kal jahatna ia i lebe-lebe Dibata! Ise pe jadi imbangna. 2:16 Tole pe, iambatina atena kami meritaken Berita si maba keselamaten e man bangsa si deban. Alu kejahatenna e itambahi kalak Jahudi e ku dosa-dosa si ibahanna gelgel nari seh enggo dem kal. E maka genduari ia enggo kena pernembeh ate Dibata. 2:17 Tapi kami, o senina-senina asum kami sirang kentisik ras kam labo i bas ukur, tapi i bas kula ngenca. Metedeh kal ate kami nandangi kam! Janah usahaken kami kal ndahi kam mulihi. 2:18 Ersura-sura kal kami gelah jumpa mulihi ras kam. Aku, Paulus, la sekali ngenca ersura-sura gelah mulihi ndahi kam, tapi iambati Iblis kami. 2:19 Ma kin kam nge pengarapen ras keriahen kami, sabap kam la kurang asangken kalak si deban? Erkiteken kam me maka megah iakap kami kerna kemenangen kami i lebe-lebe Tuhanta Jesus asum Ia reh pagi. 2:20 Tuhu-tuhu kam me erbahanca megah dingen meriah iakap kami.
3:1 Dungna lanai tergengken kami. E maka itetapken kami tading i kota Atena 3:2 janah isuruh kami Timotius berkat ndahi kam, e me seninanta si erdahin ras kami guna Dibata i bas meritaken Berita Si Meriah kerna Kristus. Isuruh kami ia ndahi kam guna nampati dingen mpegegehi kinitekenndu, 3:3 gelah ola kam murtad sekalak pe erkiteken kiniseran-kiniseran e. Ietehndu maka kiniseran-kiniseran e sada bagin i bas sura-sura Dibata nandangi kita. 3:4 Asum kami i tengah-tengahndu denga, enggo leben ikataken kami man bandu maka kita nandangi isiksa; janah genduari bagi enggo ietehndu si e tuhu-tuhu jadi. 3:5 Erkiteken si e maka terpaksa kusuruh Timotius. Lanai tergengken aku, e maka kusuruh ia ndahi kam guna pepayo ntah tetap denga kam tek man Dibata ntah lang. Labo mungkin kam icubai Iblis seh maka sia-sia kerina pendahin kami! 3:6 Genduari enggo mulih Timotius, janah ibabana berita kerna kiniteken ras keleng atendu. Iturikenna pe man kami, maka tetap nge mehuli pengakapndu kerna kami janah mesikel kal kam jumpa ras kami bagi kami pe mesikel jumpa ras kam. 3:7 E maka i bas kerina kesusahen ras kiniseran kami, o senina-senina terapul kami erkiteken kam. Kinitekenndu e erbahanca kami terapul. 3:8 Sabap genduari tuhu-tuhu kami nggeluh, adi tetap kam nggeluh rembak ras Tuhan. 3:9 Genduari banci kami ngataken bujur man Dibata erkiteken keriahen si lit i bas kami i lebe-lebe Dibatanta erkiteken kam. 3:10 Suari ras berngi ertoto kami man Dibata alu ukur tutus, gelah banci min kami jumpa ras kam, jenari itambahi kami kai si iperlukenndu guna kinitekenndu. 3:11 Dibata Bapanta, ras Tuhanta Jesus min nikapken dalan man kami gelah jumpa ras kam. 3:12 Ertambah-tambalah min ibahan Tuhan keleng atendu sekalak nandangi si debanna bage pe nandangi kerina manusia seh maka keleng atendu e bali belinna ras keleng ate kami nandangi kam. 3:13 Alu bage ipegegehi Tuhan me ukurndu, janah jadi serta dingen badia me kam i lebe-lebe Dibata Bapanta asum reh pagi Tuhanta Jesus ras kerina jelma si enggo jadi sikerajangenna.
4:1 Kedungenna, o senina-senina, kam enggo iajari kami kuga arus nggeluh gelah sentudu ras peraten Dibata. Tuhu bagenda nge kegeluhenndu gelgel nari. Janah genduari ipindoken kami kal man bandu i bas gelar Tuhan Jesus dalankenlah lebih asa si e! 4:2 Sabap ietehndu nge pedah si ipeseh kami man bandu alu kuasa Tuhan Jesus. 4:3 Sura-sura Dibata nandangi kam e me gelah kam iserapken jadi sikerajangenNa nggeluh la erlua-lua. 4:4 Kerina dilaki i tengah-tengahndu arus ietehna min kuga muat ndeharana alu cara badia dingen terpuji, 4:5 labo erpalasken sura-sura kula saja, bagi kalak si deban si la nandai Dibata. 4:6 I bas si enda, ola min ise pe erbahan salah nandangi senina si sada kiniteken ntah pe meneken ia. Enggo ikataken kami man bandu mbaru enda. Enggo ikataken kami man bandu alu terang-terangen maka kalak si ndalanken kesalahen-kesalahen si bage iukum Tuhan nge pagi. 4:7 Kita ipilih Dibata labo gelah nggeluh erlua-lua. Dibata ersura-sura gelah kita nggeluh badia. 4:8 E maka kalak si nulak pengajaren enda labo manusia si itulakna, tapi Dibata si mereken Kesah Si Badia man bandu nge si itulakna. 4:9 Labo perlu isuratken kami man bandu kerna keleng ate nandangi teman-temanndu si sada kiniteken. Dibata enggo ngajari kam kuga kam arus sikeleng-kelengen. 4:10 Janah kerna si enda enggo idalankenndu nandangi kerina senina-senina si enggo tek man Jesus Kristus i belang-belang Makedoni. E maka ipindo kami man bandu, o senina-senina dalankenlah lebih asa si e! 4:11 Usahakenlah nggeluh alu tenang, ola campuri perkara kalak si deban, janah erdahinlah guna keperlunndu, bagi si enggo ikataken kami nai man bandu. 4:12 Alu bage, mehamat me man bandu kalak si la tek man Jesus Kristus, janah la kam perlu ernalem man kalak si deban kerna keperlunndu. 4:13 O senina-senina, ate kami maka ietehndu min kuga si tuhuna kerna kalak si enggo mate, gelah ola ceda atendu bagi kalak si la erpengarapen. 4:14 Tek kita maka Jesus enggo mate janah enggo nggeluh mulihi. Bage pe tek kita maka kalak si enggo mate si tek man Jesus ibaba Dibata pagi ku Jesus gelah ersada ras Ia. 4:15 Pengajaren Tuhan si ituriken kami man bandu e me: Kita si nggeluh denga asum reh pagi Tuhan mulihken labo pagi silebei kalak si enggo mate. 4:16 Lit pagi sora erlebuh, sora malekat si mbelin ras sora terompet Dibata janah nusur me Tuhan i Surga nari. Kalak si enggo mate si tek man Kristus me pagin si pemenana ipegeluh mulihi. 4:17 Kenca bage maka kita si nggeluh denga paksa si e ipepulungNa ras kalak ndai i datas embun guna njumpai Tuhan i awang-awang. Kenca bage tetap kita ras Tuhan. 4:18 E maka si apul-apulenlah kam alu kata enda.
5:1 O senina-senina, la perlu isuratken kami man bandu kerna ndigan tah katawari si enda jadi. 5:2 Sabap kam pe tangkas ietehndu maka Wari Tuhan e reh bagi penangko si reh asum berngi. 5:3 Asum ikataken kalak, "Kerinana tenang dingen aman," paksa si e me reh rempet si ngkernepken ia! Kiniseran e rempet reh bagi suina iakap diberu si nandangi mupus. E maka lanai terkiamkenca. 5:4 Tapi kam, o senina-senina, labo kam i bas gelap, janah wari e pagi labo min aturenna kam sengget ibahanna bagi si ibahan penangko. 5:5 Kerina kam anak-anak terang dingen anak-anak suari. Asalta labo i bas berngi ntah pe i bas gelap nari. 5:6 E maka la kita patut tunduh bagi kalak si deban. Kita arus metenget dingen jore ukurta. 5:7 Berngi nge kalak tunduh; berngi nge kalak mabuk. 5:8 Tapi kita sikerajangen suari kap; arus maka jore ukurta. Arus sipake kiniteken ras keleng ate jadi ampang-ampang tententa, janah pengarapenta guna selamat e me jadi tengkulukta. 5:9 Kita ipilih Dibata labo gelah si nanami ukumen si reh i bas Ia nari, tapi gelah sialoken keselamaten arah Tuhanta Jesus Kristus, 5:10 si enggo mate man gunanta gelah banci kita nggeluh ersada ras Ia, subuk kita nggeluh denga ntah enggo mate asum Ia reh pagi. 5:11 Erkiteken si e sitatang-tatangenlah janah sisampat-sampatenlah kam bagi si sangana ibahan kam genduari e. 5:12 O senina-senina, ipindoken kami man bandu gelah ipehagandulah kalak si erdahin i tengah-tengahndu, e me kalak si enggo ipilih Tuhan guna ngepkep dingen ngajari kam. 5:13 Pehaga kal dingen kelengilah ia, erkiteken dahin si idahikenna. Ola kam si rubat-rubat. 5:14 Ipindoken kami man bandu o senina-senina: Ajarkenlah kalak si perkisat, tetapkenlah ukur kalak si perbiar, sampatilah kalak si kote janah sabarlah kam nandangi ise pe. 5:15 Metengetlah gelah ola lit si erbalas alu kesalahen nandangi kalak si erbahan salah, tapi bahanlah si mehuli nandangi teman bage pe nandangi kerina manusia. 5:16 Meriahlah atendu katawari pe. 5:17 Ertotolah katawari pe, 5:18 janah katakenlah bujur man Dibata i bas si kugapana pe. Enda me si ngena ate Dibata ibahanndu i bas geluhndu selaku kam kalak si enggo ersada ras Kristus Jesus. 5:19 Ola ambati pendahin Kesah Si Badia. 5:20 Ola kam anggap enteng nandangi berita kerna sura-sura Dibata. 5:21 Kai pe ujilah lebe; cikep si mehuli, 5:22 silahken kerina si jahat. 5:23 Dibata, si mereken kemalemen ate man banta, erbahanca kam badia i bas kai pe; janah Ia si engkawali kam, kesahndu, tendindu ras kulandu bersih i bas kesalahen nari asum kerehen Tuhanta Jesus Kristus pagi. 5:24 Dibata si ndilo kam e setia kap, janah Ia si erbahanca maka si enda banci jadi. 5:25 Ertotolah kerna kami pe o senina-senina. 5:26 Sisalam-salamenlah kam alu dem keleng ate bagi si ersenina. 5:27 Kupindoken man bandu alu kuasa Tuhan: Ogekenlah surat enda man kerina senina-senina si enggo tek man Kristus. 5:28 Lias ate Tuhan Jesus Kristus min nemani kam.
1:1 Surat enda i bas kami nari, Paulus, Silas ras Timotius. Surat enda man perpulungen i Tesalonika, si enggo jadi sikerajangen Dibata Bapanta ras Tuhan Jesus Kristus. 1:2 Ibereken Dibata Bapa ras Tuhan Jesus Kristus min lias ate ras kemalemen ate man bandu. 1:3 O senina-senina, patut iakap kami ngkataken bujur man Dibata katawari pe erkiteken kam. Enggo patut ibahan kami bage, sabap reh bagesna kal kinitekenndu dingen reh belinna keleng atendu sapih-sapih kam. 1:4 Perbahan si e ipujiken kami kam i bas perpulungen-perpulungen Dibata. Ipujiken kami kam, sabap i tengah-tengah kepiceten ras kiniseran si reh man bandu tetap kam megenggeng dingen tek man Kristus. 1:5 Si enda kerina ngataken, maka bujur ukumen si reh i bas Dibata nari, sabap erkiteken kiniseran si reh man bandu, ibahan Dibata kam metunggung bengket ku bas KinirajanNa. 1:6 Idalanken Dibata me pagi si bujur: ibahanNa me kiniseran man kalak si erbahanca kam ngenanami kiniseran, 1:7 janah man bandu si ngenanami kiniseran e, ibereken Dibata kemalemen ate, bage pe man kami. Si enda idalanken Dibata asum reh pagi Tuhan Jesus i Surga nari ras malekat-malekatNa si erkuasa, 1:8 dingen ras api si ernala-ernala, guna ngukum kalak si la nggit nandai Dibata, si la patuh nandangi Berita Si Meriah kerna Tuhanta Jesus. 1:9 Kalak enda pagi iukum Dibata bene rasa lalap. Ipedauh pagi i lebe-lebe Tuhan nari bage pe i bas kuasa Tuhan si mbelin nari, 1:10 asum Tuhan reh i bas wari e guna ngaloken pujin i bas kerina perpulungenNa nari, bage pe guna ipehaga kerina kalak si tek man baNa. Kam pe pagi ikut ras perpulungen e, sabap tek kam Berita Si Meriah si enggo ipeseh kami man bandu. 1:11 Erkiteken si e me maka katawari pe ertoto kami kerna kam. Ipindo kami man Dibatanta gelah ipetunggung Dibata kam guna kegeluhen si erkiteken si e kam ipilihNa. Mbera-mbera Dibata, alu kuasaNa, nehken kerina sura-surandu guna si mehuli, bage pe kerina usahandu si erpalasken kiniteken man Kristus sertalah min ibahanNa. 1:12 Alu bage ipehagandu me Tuhanta Jesus, janah kam pe ipehagaNa, erkiteken lias ate Dibatanta ras Tuhan Jesus Kristus.
2:1 Kerna kerehen Tuhanta Jesus Kristus bage pe kerna kita ipepulung ersada ras Ia, kupindoken man bandu o senina-senina: 2:2 Ola mesunahsa bene ukurndu adi ikataken kalak maka Wari Tuhan e enggo seh. Banci jadi si enda ikataken kalak si sangana ikuasai kesah-kesah, ntah kalak si ngajar. Ntah pe banci jadi ikataken kalak maka pernah isuratken kami bage i bas surat kami. 2:3 Ola bere kam itipu kalak i bas kai pe. Sabap Wari Tuhan e langa bo seh adi langa kin seh pemberontaken si perpudi dingen teridah si Jahat si itetapken ku bas naraka e. 2:4 Ilawan si Jahat e me pagi kerina si isembah manusia bage pe kerina dibata-dibata manusia. Ipeganjangkenna bana i babo si e kerina. Lebih asangken si e bengket dingen kundul pe ia i bas Rumah Pertoton Dibata janah ikatakenna ia Dibata. 2:5 Ma ingetndu denga kin si enda kerina enggo kuturiken bandu asum aku i tengah-tengahndu? 2:6 Amin bage gia lit si ngolangisa maka la jadi si e genduari, janah ietehndu nge kai si ngolangisa e. Denggo, i bas paksa si itetapken Dibata teridah me si Jahat e. 2:7 Kejahaten si terbuni e mulai erdahin, tapi kai si nandangi jadi e labo jadi adi langa kin iagui si ngolangisa e. 2:8 Kenca bage maka teridah si Jahat e. Jenari asum Tuhan Jesus reh ibunuhNa me si Jahat e alu kesah si ndarat i bas babahNa nari, janah ikernepkenNa alu kerehenNa si mulia. 2:9 Si Jahat e pagi reh alu kuasa Iblis. Ibahanna pagi erbage-bage tanda sengget ras tanda-tanda si palsu bage pe kejadin-kejadin si erbahanca mamang ate. 2:10 Itipuna pagi alu pertipun si Jahat kalak si nandangi bene. Kalak e bene erkiteken la ia nggit ngaloken dingen ngkelengi pengajaren si tuhu-tuhu, e me pengajaren si arah e ia maka selamat. 2:11 Erkiteken persuruhen Dibata erdahin i bas ia kuasa si erbahanca papak, gelah tek ia kai si la tuhu. 2:12 E maka, iukum Dibata kerina kalak si la tek nandangi pengajaren si tuhu-tuhu e, e me kalak si muat kesenangen i bas dosa. 2:13 O senina-senina, si ikelengi Tuhan, katawari pe arus ikataken kami bujur man Dibata erkiteken kam. Sabap kam ipilih Dibata jadi si pemenana guna iselamatken alu kuasa Kesah Si Badia dingen alu kinitekenndu nandangi pengajaren si tuhu-tuhu e. Ibahan Dibata kam jadi anak-anak si iserapken guna Ia. 2:14 Kam ipilih Dibata arah Berita Si Meriah si iberitaken kami man bandu. IpilihNa kam gelah ialokenndu baginndu i bas Tuhanta Jesus Kristus. 2:15 E maka, o senina-senina, tetaplah tek dingen ernalem nandangi pengajaren si tuhu-tuhu, si iajarken kami man bandu subuk asum kami ngajar bage pe arah surat kami. 2:16 Tuhanta Jesus Kristus, ras Dibata Bapanta, si ngkelengi kita dingen arah lias ateNa enggo mereken pengapul si tetap ras pengarapen si paguh man banta, 2:17 ipetetapNa min ukurndu janah ipegegehiNa kam guna ndahiken dingen nuriken kerina si mehuli.
3:1 Kedungenna o senina-senina, ertotolah kerna kami, gelah Kata Tuhan pedas min reh mbarna dingen ialoken kalak si nterem bagi enggo jadi i tengah-tengahndu. 3:2 Ertoto pe min gelah ipulahi Dibata kami i bas kalak si kejam dingen si jahat nari. Sabap labo kerina kalak tek nandangi berita e. 3:3 Tapi Tuhan e tetap setia. IpegegehiNa kam dingen ikawaliNa i bas si jahat nari. 3:4 Tetap ukur kami ngenehen kam ibahan Tuhan. Tek kami maka idalankenndu nge kai si enggo ikataken kami janah terus pe idalankenndu. 3:5 Mbera-mbera Tuhan negu-negu pusuhndu guna ngkelengi Dibata dingen megenggeng kam alu kinigenggengen si ibereken Kristus. 3:6 I bas gelar Tuhan Jesus Kristus ikataken kami man bandu o senina-senina, sirangindulah kerina senina-senina si perkisat, si la nggit ngikutken ajaren si ibereken kami. 3:7 Ietehndu maka arus idalankenndu bagi si ibahan kami. Labo kami perkisat asum kami i tengah-tengahndu. 3:8 La ipan kami nakan kalak la nggalar. Tapi erdahin kami alu latih. Erdahin kami suari ras berngi gelah ola lit i tengah-tengahndu si mberat iakapna erkiteken kami. 3:9 Si enda ibahan kami, labo perbahan la lit hak kami mindo penampat man bandu; si enda ibahan kami gelah jadi usihen si mehuli man bandu. 3:10 Asum kami ras kam usur ikataken kami man bandu, "Kalak si la nggit erdahin ola bere man." 3:11 Si enda ikataken kami perbahan ibegi kami lit piga-piga i bas kam perkisat, si la kai pe ibahanna seakaten ncampuri sikerajangen kalak. 3:12 I bas gelar Tuhanta Jesus Kristus, ikataken kami man kalak si bagenda dingen ipersingeti kami maka arus idalankenna kegeluhen si metunggung dingen erdahin ncariken keperlunna. 3:13 Tapi kam, o senina-senina, ola erleja-leja erbahan si mehuli. 3:14 Banci jadi lit i tengah-tengahndu kalak si la nggit ngikutken kai si ikataken kami i bas surat enda. Adi lit kin perdiatekenlah ia janah olanai perkuanken gelah mela iakapna. 3:15 Tapi ola kam erpengakap maka ia imbang; tapi ajarken ia bagi sekalak senina. 3:16 Mbera-mbera Tuhan, ulu kemalemen ateta, mereken kemalemen ate man bandu katawari pe dingen i bas kai pe. Tuhan min nemani kam kerina. 3:17 Alu tanku kusuratken bagin enda: Mejuah-juah i bas aku nari, Paulus. Bagenda me aku nandatangani kerina suratku; bagenda me aku nuratkenca. 3:18 Lias ate Tuhanta Jesus Kristus nemani kam kerina.
1:1 Surat enda i bas aku nari, Paulus, si enggo jadi rasul Kristus erkiteken isuruh Dibata Si Ngkelini kita ras Kristus Jesus pengarapenta. 1:2 Surat enda man Timotius, anakku si tuhu-tuhu i bas kiniteken. Dibata Bapa ras Kristus Jesus Tuhantalah mereken lias ate, perkuah ate, ras kemalemen ate man bandu. 1:3 Ateku min gelah tetap kam ringan i Epesus, bagi enggo kupindoken man bandu asum aku nerusken perdalanenku ku Makedoni. I Epesus lit piga-piga kalak si ngajar alu pengajaren si la tuhu. Pengadilah e. 1:4 Suruh gelah ingadikenna ngajarken turi-turin si la tuhu bage pe terombo nini-nininta nai si la erpeltep-peltep, sabap si enda peturah perubaten saja ngenca janah la erguna nandangi rencana Dibata si ieteh kita erdandan kiniteken. 1:5 Tujun perentahku enda guna mpekeke kekelengen si reh i bas pusuh peraten si bersih nari, i bas ukur si bujur nari, bage pe i bas kiniteken si tuhu-tuhu nari. 1:6 Tapi lit piga-piga si nilah i bas tujun enda nari, papak ia erkiteken cakap si sia-sia. 1:7 Sura-surana jadi guru Undang-undang Dibata, tapi cakapna pe la iangkana bage pe la iangkana kerna kai si ibelaskenna i bas kiniteken. 1:8 Sieteh maka Undang-undang e mehuli, adi ipakeken bagi patutna. 1:9 Arus pe i inget maka Undang-undang ibahan labo guna kalak si bujur, tapi guna kalak si ngelanggar undang-undang ras si erbahan jahat, la nandai Dibata, si erdosa, si la eragama dingen si la nggit rukur kerna pertendin, guna kalak si munuh nande-bapana, guna pemunuh-pemunuh, 1:10 guna kalak si erlua-lua, dingen kalak si campur sapih-sapih ia dilaki, guna penculik, guna kalak perguak kesaksinna dingen kalak si la tuhu cakapna, bage pe guna kerina kalak si ndalanken perbahanenna la rikutken pengajaren si payo. 1:11 Pengajaren si tuhu e lit i bas Berita Si Meriah si ibereken man bangku guna iberitaken. Berita Si Meriah e rehna i bas Dibata nari, e me Dibata si mulia si arus ipuji. 1:12 Kukataken bujur man Kristus Jesus Tuhanta, si enggo mereken gegeh man bangku i bas aku ndahiken dahinku. Kukataken bujur man baNa sabap metunggung iakapNa aku, itangkuhkenNa aku jadi si erdahinNa, 1:13 aminna pe nai kucekuraki Ia kusiksa dingen kugombang-gombangi. Tapi mekuah ate Dibata aku, sabap paksa si e nai langa aku tek man Jesus Kristus janah la kuangka kai si kubahan. 1:14 Iuseken Tuhanta man bangku lias ateNa si la erkeri-kerin radu ras kiniteken bage pe keleng ate si jadi sikerajangenta erkiteken persadanta ras Kristus Jesus. 1:15 Kata si tuhu-tuhu si patut ialoken dingen tek kal kita e me, "Kristus Jesus enggo reh ku doni enda guna nelamatken kalak perdosa." I bas si e aku me si perdosana kal. 1:16 Tapi erkiteken si e me maka mekuah ate Dibata aku, gelah Kristus Jesus banci ncidahken kesabarenNa si serta i bas nelamatken aku, kalak si mbelinna dosana enda. Janah si enda jadi usihen man kerina kalak si nandangi tek man baNa dingen ngaloken kegeluhen si rasa lalap. 1:17 Raja si rasa lalap, Dibata si sada, si rasa lalap, si la teridah, man baNalah kehagan ras kemulian seh rasa lalap. Amin. 1:18 O anakku Timotius, man bandu kusehken dahin enda. Si enda rikutken kata si enggo ndekah me inubuatken kerna kam. Bahanlah kata nubuat e jadi senjatandu asum kam erbebe kerna si mehuli. 1:19 Tetaplah kam tek man Jesus Kristus dingen bersihlah pusuh peratenndu. Piga-piga kalak lit si la nggit megiken isi pusuh peratenNa; janah kalak si bage ibunuhna kinitekenna. 1:20 Jelmana e me Himeneus ras Aleksander. Si dua kalak enda enggo kuendesken man Iblis, guna ngajarken ia gelah olanai ipebau-bauna Dibata.
2:1 Perlebe kukataken gelah isehkenndu sapaat, pemindon, pertoton ras pengataken bujur man Dibata guna kerina manusia; 2:2 guna raja-raja ras kerina si erkuasa, gelah banci kita nggeluh senang dingen dame, erkemalangen man Dibata alu lagu langkah si payo. 2:3 Enda me si mehuli dingen si ngena ate Dibata, Si Ngkelini kita, 2:4 si ersura-sura gelah kerina manusia selamat dingen meteh kai si tuhu-tuhu. 2:5 Sabap sada ngenca Dibata janah sada ka ngenca kelang-kelang si mpersadaken Dibata ras manusia, e me manusia Jesus Kristus. 2:6 Jesus Kristus e enggo ngasamken kesahNa guna nebusi kerina manusia i bas dosa-dosana nari. Enda jadi sada bukti maka i bas paksa si enggo itetapken Dibata, Ia ersura-sura gelah kerina manusia iselamatken. 2:7 Janah erkiteken si enda me maka aku jadi rasul dingen guru nandangi bangsa si labo kalak Jahudi, guna meritaken kerna kiniteken man Jesus Kristus. Si kukataken enda tuhu nge, labo aku erbual. 2:8 Sura-surangku gelah kerina dilaki amin i japa pe ertoto min man Dibata. Kerina min erkemalangen man Dibata janah ertoto ngelipat tanna alu la lit i bas ia ate nembeh ras perubaten. 2:9 Bage pe si diberu, mehamat dingen mehuli min peruisna. Potongen bukna sederhana saja; ola make perhiasen emas ntah mutiara ntah paken-paken si meherga. 2:10 Tapi cidahkenlah perbahanen si mehuli, si sentudu ras sekalak diberu si ngaku maka ia nembah man Dibata. 2:11 Diberu arus erlajar alu megi-megi saja, ola njabapi. 2:12 La ateku senang diberu ngajar ntah pe erkuasa nandangi dilaki. Ia arus sinik-sinik saja. 2:13 Sabap Adam nge lebe ijadiken Dibata, e maka Hawa. 2:14 Janah labo Adam si kena tipu, tapi diberu e nge, janah ia nge si ngelanggar pedah Dibata. 2:15 Tapi sekalak diberu selamat nge arah ia mupus, adi tutus atena erkiniteken, erkeleng ate dingen nggeluh badia janah mehamat.
3:1 Adi sekalak ersura-sura jadi peminpin perpulungen, ersura-sura kap ia nandangi dahin si mehuli. Kata enda tuhu me! 3:2 Sekalak si ngepkep perpulungen arus la erpandangen. Ndeharana arus sada ngenca. Ia arus ersabar, terkuasaisa dirina janah ratur lagu langkahna. Arus meriah ukurna ngalo-ngalo kalak si kesilang ku rumahna aminna pe la itandaina. Ia arus ngasup ngajari. 3:3 Ia la banci sekalak pemabuk, ntah pe sekalak perampang. Ia arus sekalak si lemah-lembut dingen ngena atena kedamen. Ia la banci mata duiten. 3:4 Arus ietehna ngepkep jabuna alu mehuli janah ngasup erbahanca anak-anakna ngikutken katana dingen mehamat man bana. 3:5 Sabap adi la ia ngasup ngepkep jabuna, labo ia ngasup ngepkep perpulungen Dibata. 3:6 Si ngepkep perpulungen la banci kalak si mbaru jadi Kristen, sabap banci pagi meganjang ukurna jenari iukum Dibata ia bagi Iblis nai. 3:7 Ia arus sekalak si ihamati jelma si nterem, gelah ola ia icekuraki kalak jenari kena siding Iblis. 3:8 Si nampati i bas perpulungen pe arus kalak bujur tutus. La banci mbuesa minem minuman keras, ntah pe merangap. 3:9 Arus tetap pusuh peratenna kerna pengajaren si enggo ibereken Dibata. 3:10 Ia arus iuji lebe, jenari adi la lit ibahanna si man pandangen, banci ia erdahin. 3:11 Ndeharana pe arus kalak si mehuli. Ndeharana e la banci ncekuraki kalak si deban. Ia arus ngasup ngkuasai dirina janah bujur i bas kai pe. 3:12 Si nampati i bas perpulungen e arus sada ngenca ndeharana. Arus ngasup ia ngepkep anak-anakna ras jabuna alu mehuli. 3:13 Kalak si ndahiken dahinna alu mehuli, reh hamatna kalak man bana, janah reh pangna ia ngerana man kalak kerna kinitekenna nandangi Kristus Jesus. 3:14 Asum kubahan surat enda man bandu, ngarap aku maka la nai ndekah sa reh aku ndahi kam. 3:15 Tapi adi ndekah denga maka aku reh, surat enda me mpebetehkenca man bandu kuga arusna perlangkahta i bas keluarga Dibata, perpulungen Dibata si nggeluh, binangun dingen palas ajaren si tuhu-tuhu. 3:16 Ise pe la ngasup nimbaksa kerna belinna rahasia agamanta. "Jesus Kristus reh i bas rupa manusia, ipetangkas Kesah Dibata Ia la ersalah, janah teridah man malekat-malekat. Kerna Ia ipembar ku kerina bangsa-bangsa, kerina manusia i doni tek man baNa, janah Ia enggo iangkat Dibata ku Surga."
4:1 Tangkas ikataken Kesah Dibata maka lit pagin piga-piga kalak si lanai tek man Jesus Kristus. Patuh ia man kesah-kesah si erbual janah iikutkenna pengajaren setan-setan. 4:2 Pengajaren-pengajaren e rehna i bas kalak si nipu nari, e me kalak perguak si enggo batu-batun pusuh peratenna, tempa-tempa enggo itutung alu besi si merara. 4:3 Kalak si bage, iajarkenna maka la banci kita erjabu, bage pe la banci sipan piga-piga erbage pangan. Tapi Dibata ngelitken pangan e kerina guna ipan kalak si erkiniteken man Kristus, si meteh kai si benar, kenca ertoto ngataken bujur man Dibata. 4:4 Kerina si enggo ijadiken Dibata e mehuli nge. Sada pe labo man pantangenken. Tapi alokenlah kerina alu ngataken bujur man Dibata, 4:5 sabap Kata Dibata ras pertoton njadikenca mehuli pangan e i lebe-lebe Dibata. 4:6 Adi iturikenndu pedah-pedah enda man senina-seninananta si enggo tek man Jesus Kristus, kam jadi suruh-suruhenNa si mehuli. Pegegehilah pertendinndu alu kata Dibata si iteki kita, ras alu ajaren-ajaren si benar si ikutkenndu alu tutus kidekah enda. 4:7 Sirangilah turi-turin si la tuhu si la erguna. Biasakenlah dirindu nggeluh bagi si ngena ate Dibata. 4:8 Latihen gerak badan lit piga-piga gunana, tapi latihen pertendin erguna i bas kai pe, sabap latihen pertendin e njamin geluhta subuk si genduari bage pe si pagin. 4:9 Kata enda tuhu janah arus kita tek dingen sialoken alu bulat ukur. 4:10 Erkiteken si e kita arus erbebe dingen erdahin. Sabap man Dibata si nggeluh saja ngenca kita erpengarapen, e me Dibata si enggo jadi Si Engkelini kerina manusia, terlebih-lebih Si Engkelini kalak si tek man baNa. 4:11 Suruh dingen ajarkenlah si enda. 4:12 Ola kal pelepas ise pe mapas man bandu erkiteken kam nguda denga. Tapi jadilah kam man usihen kalak si tek, subuk i bas pengeranandu, i bas lagu langkahndu, i bas kam nehken keleng ate, i bas kinitekenndu bage pe i bas ukurndu bujur. 4:13 Pakekenlah paksa si lit guna ngogeken Pustaka Si Badia man perpulungen seh aku reh pagi. Iah-iahi janah ajari kalak e. 4:14 Ola sia-siaken pemere si isehken Dibata man bandu asum nabi-nabi ernubuat dingen asum pertua-pertua nangkuhken kam. 4:15 Dalankenlah si enda kerina alu tutus, gelah kerina kalak ngidah kemajunndu. 4:16 Jagalah dirindu ras kai si iajarkenndu. Tetaplah dalanken si enda sabap i bas kam ndahiken dahin e iselamatkenndu me dirindu bage pe kalak si deban si megiken kam.
5:1 Ola rawai kalak si umurna tuan asangken kam, tapi beluhlah min kam muat ukurna, bahan ia tempa-tempa bagi bapandu. Kalak si nguda bahanlah bagi agindu. 5:2 Diberu si enggo metua bahanlah bagi nandendu, janah man diberu si nguda denga arus bersih lagu langkahndu, janah bahanlah bagi turangndu. 5:3 Mehamatlah kam nandangi diberu-diberu si enggo mbalu si lanai ersima-sima. 5:4 Tapi adi sekalak si enggo mbalu lit anakna ntah kempuna, anak ntah kempuna e lah lebe nehken tanggung jababna man keluargana e. I bas si e ersimulih ia man orang-tuana bage pe man ninina, sabap si enda me si ngena ate Dibata. 5:5 Diberu si tuhu-tuhu enggo mbalu, si lanai lit sima-simana, ia erpengarapen man Dibata. Ertoto ia man Dibata suari ras berngi mindo penampat. 5:6 Tapi diberu si enggo mbalu si nggeluh guna pesenangken dirina saja, ia enggo mate aminna pe ia nggeluh denga. 5:7 Pesehlah bana ajar enda gelah ia nggeluh alu la erpandangen. 5:8 Adi lit si la mperdiateken kade-kadena, terlebih-lebih keluargana, enggo ipersokenna kinitekenna. Jahaten me ia asangken kalak si la tek man Jesus Kristus. 5:9 Sekalak si enggo mbalu, adi langa dem umurna enem puluh tahun ola suratken gelarna ku bas gelar-gelar kalak si enggo mbalu. Arus pe maka sekali denga ngenca ia erjabu, 5:10 janah terberita kerna perbahanenna si mehuli: i bas ngepkep anak-anakna, i bas ngalo-ngalo kalak si kesilang ku rumahna, aminna pe la itandaina, i bas ia ngaloken kalak si erkiniteken i bas rumahna, i bas ia nampati kalak si ngenanami kiniseran, bage pe i bas ndahiken erbage-bage dahin si mehuli. 5:11 Ola suratken gelar kalak si mbalu e adi nguda denga ia. Sabap adi sereh denga atena la ia erkemalangen man Kristus, 5:12 ilanggarna padanna ndube si enggo ibahanna. 5:13 Tambah si e, isia-siakenna paksa si lit guna kirumah-kirumah alu la lit tujunna; janah si la mehulina i bas si e, e me erlajar cekurak ia, icampurina urusen kalak, bage pe icakapkenna si la perlu. 5:14 E maka ulin kuakap kalak si mbalu erjabu mulihi adi nguda denga ia. Ipupusna anak janah ipekena-kenana jabuna, gelah ola erkiteken ia, icekuraki imbang-imbangta kita. 5:15 Sabap lit piga-piga diberu si enggo mbalu papak jenari ikutkenna Iblis. 5:16 Tapi adi sekalak diberu si enggo tek man Jesus Kristus lit piga-piga kade-kadena enggo mbalu, isampatinalah kade-kadena si mbalu e. Alu bage perpulungen banci nampati diberu-diberu si enggo mbalu si lanai lit sima-simana. 5:17 Pertua-pertua si erdahin alu mehuli selaku peminpin patut iergaken dua kali lipat, terlebih-lebih kalak si tutus erdahin i bas meritaken Berita Si Meriah dingen ngajar. 5:18 Sabap lit tersurat i bas Pustaka Si Badia, "Ola tutupi babah lembu si ipake sangana ngerik," bage pe, "kalak si erdahin arus dat upah." 5:19 Ola begiken kalak si nalahken pertua, pala si nalahkenca e lit dua ntah telu kalak. 5:20 Si ersalah ajarkenlah i lebe-lebe perpulungen gelah teman si deban pe mbiar. 5:21 I lebe-lebe Dibata, Kristus Jesus, ras i lebe-lebe malekat-malekat si badia kupindoken kal man bandu gelah ikutkenlah pedah-pedah enda alu tutus janah rembang-tengahlah min kam rukur man ise pe. 5:22 Ola pedassa tangkuhken kalak si erdahin i bas dahin Tuhan. Adi kalak si deban erbahan dosa ola ikutken. Jagalah dirindu gelah tetap bersih. 5:23 Ola kam minem lau saja, tapi inem pe sitik anggur maka sikap beltekndu, sabap megati kam sakit. 5:24 Lit deba jelma minter teridah dosa-dosana, janah si e tangkas ope denga ia iadili. Tapi deba seh ndekah maka teridah dosa-dosana. 5:25 Bage pe perbahanen-perbahanen si mehuli minter nge teridah, tapi si mesera kal pe ngidahsa labo terbuniken.
6:1 Kerina si jadi budak arus erpengakap maka tuanna patut ndatken kerina kehamaten, gelah ola ipebau-bau kalak gelar Dibata ras pengajarenta. 6:2 Budak-budak si kalak Kristen tuanna, ola la mehamat man tuanna, sabap tuanna e seninana kap. Tapi reh ulina min perbahanenna man tuanna, sabap dahin si idahikenna e man guna kalak si tek, si ikelengina. Ajarken dingen beritakenlah enda. 6:3 Kalak si ngajarken kiniteken si deban si la sue ras Kata Tuhanta Jesus Kristus dingen la sue ras pengajaren kinitekenta, 6:4 petua-tuaken dingen pebeluh-beluhken kap ia. Kai pe labo ietehna. Sura-surana la mehuli. Nggit kal sisimbaken; janah si enda erbahanca turah cian ate, perubaten, cekurak, sangka-sangkan si la mehuli, 6:5 bage pe perubaten si la erngadi-ngadi ras kalak si la pinter ukurna dingen si lanai lit i bas ia kebujuren. Iakapna agama dalan ncari kebayaken. 6:6 Tuhu, agama erbahanca kalak bayak, adi puas iakapna erkiteken kai si lit i bas ia. 6:7 Lit kin tah kai gia sibaba ku doni enda? Lang! Banci ntah kai gia sibaba ndarat i doni enda nari? Lang! 6:8 E maka cukup min siakap adi lit nakanta ras uista. 6:9 Kalak si ersura-sura bayak ndabuh me ku bas percuban janah bene me ibahan erbage-bage sura-sura si bodoh dingen jahat, si erbahanca kalak gedap dingen kernep. 6:10 Sabap merangap nandangi duit e me sumbul kerina kejahaten. Enggo lit piga-piga kalak si merangap nandangi duit lanai tetap i bas kiniteken janah gulut ukurna ibahan erbage-bage kecedan ate. 6:11 Tapi kam, o suruh-suruhen Dibata, tadingkenlah si enda ndai kerina. Usahakenlah ndalanken si ngena ate Dibata, tutus ersembah man baNa, tetap ernalem ku Ia, cidahken keleng atendu, megenggeng dingen lemah lembut! 6:12 Erlumbalah asa gegehndu i bas perlumban kiniteken, guna ndatken kegeluhen si tuhu-tuhu man gunandu. Sabap guna kegeluhen si e me maka ipilih Dibata kam asum iakukenndu kinitekenndu i lebe-lebe nterem saksi. 6:13 I lebe-lebe Dibata, si mereken kegeluhen man si nasa lit bage pe i lebe-lebe Kristus Jesus, si erbahan pengakun si tuhu-tuhu i lebe-lebe Pontius Pilatus, kukataken man bandu gelah 6:14 ikutkenlah pedah-pedah e dingen jagalah gelah tetap bersih dingen la ceda, seh ku warina Tuhanta Jesus Kristus reh peduakaliken. 6:15 KerehenNa pagi Dibata ngaturkenca i bas paksana. Dibata Pemerentah Si Tonggal dingen Badia, Raja i bas kerina raja, dingen Tuhan i bas kerina tuan. 6:16 Dibata ngenca nggeluh rasa lalap. Ia nggeluh i bas sinalsal si ise pe la ngasup ndeherisa. Ise pe la pernah ngidah Ia, ise pe la banci ngidah Ia, terpujilah Ia janah iakuilah kuasaNa seh rasa lalap! Amin. 6:17 Ajarkenlah kalak bayak i bas erta doni gelah ola meganjang ukurna dingen gelah ola ia ernalem man erta-ertana si la tetap, e me kinibayakenna, tapi ernalemlah man Dibata, si mere alu melumbar kerina keperlunta guna kesenangenta. 6:18 Ajarkenlah gelah idalankenna si mehuli, gelah bayak ia i bas perbahanen si mehuli, gelah nggit ia mere janah meriah ukurna mereken si lit i bas ia man kalak si deban. 6:19 Alu bage ipepulungna erta guna dirina si banci iarapkenna i bas paksa si reh, gelah idatna kegeluhen si tuhu-tuhu. 6:20 O, Timotius, kepkeplah alu mehuli kai si enggo iendesken Dibata man kepkepenndu. Ola kam nggit ikut ibas percakapen-percakapen si la erguna si la ngena ate Dibata. Bage pe ola kam nggit ersoal kerna perkara-perkara si niakap kalak e "pemeteh" tapi si tuhuna labo. 6:21 Sabap lit piga-piga kalak si ngataken dirina erpemeteh, tapi erkiteken si e lanai ia tek man Jesus Kristus. Lias ate Dibata rembak min ras kam kerina.
1:1 Surat enda i bas aku nari, Paulus si enggo ipilih Dibata jadi rasul Kristus Jesus. Aku isuruhNa pembarken kegeluhen si ipadanken guna ialoken i bas persadanta ras Kristus Jesus. 1:2 Surat enda man Timotius, anakku si kukelengi. Dibata Bapa ras Kristus Jesus Tuhanta mereken lias ate, perkuah ate ras kemalemen ate min man bandu. 1:3 Bujur kukataken man Dibata, si kusembah alu tutus, bagi nini-niningku nai. Bujur kukataken man Dibata asum kuinget kam rusur i bas pertotonku subuk suari bage pe berngi. 1:4 Kuinget kuga pertangisndu, janah mesikel kal aku jumpa ras kam gelah meriah kal min kuakap. 1:5 Kuinget tutus atendu erkiniteken bali ras kiniteken nini tudungndu Lois ras nandendu Enike. Tek aku maka i bas kam pe lit kiniteken si bage. 1:6 Erkiteken si e kupersingeti man bandu gelah gara mulihken i bas kam pemere Dibata, si ialokenndu asum kutamaken tanku i babo takalndu. 1:7 Sabap Kesah si ibereken Dibata man banta labo erbahanca gelah kita percik-cik; tapi KesahNa e ndemi kita alu kuasa, kekelengen, bage pe gelah ngasup kita ngkuasai dirinta. 1:8 E maka ola kam mela ersaksi kerna Tuhanta; bage pe ola kam mela kerna aku si ipenjaraken erkiteken Kristus. Tapi buat baginndu i bas kiniseran guna Berita Si Meriah bagi ibereken Dibata man bandu gegeh guna si e. 1:9 Kita enggo iselamatkenNa janah enggo kita ipilihNa jadi sikerajangenNa, labo erkiteken kai si ibahan kita, tapi erkiteken sura-suraNa dingen lias ateNa nge. Lias ateNa e iberekenNa arah Kristus Jesus ope denga tembe si nasa lit enda. 1:10 Tapi genduari perkuah ateNa e enggo tangkas man banta arah kerehen Si Ngkelini kita, Kristus Jesus. Jesus enggo naluken kuasa kematen janah enggo ipetangkasNa kegeluhen si la erkeri-kerin arah Berita Si Meriah. 1:11 Aku enggo iangkat Dibata jadi rasul dingen guru guna pembarken Berita Si Meriah. 1:12 Janah erkiteken si me maka aku ngenanami kiniseran-kiniseran. Tapi tetap aku tek, sabap kutandai nge ise penalemenku. Janah tek aku Ia ngasup ngkawali aku ras si enggo iendeskenNa man bangku seh ku Wari pendungi e. 1:13 Tagangilah alu nteguh kata si kuajarken man bandu, jadi usihen si man ikutenkenndu. Janah tetaplah kam i bas kiniteken ras kekelengen si idat kita erkiteken persadanta ras Kristus Jesus. 1:14 Jagalah erta-erta si mehuli si enggo iendesken Dibata man bandu arah Kuasa Kesah Si Badia si ringan i bas kita. 1:15 Ietehndu maka kerina kalak si ringan i Propinsi Asia enggo nundalken aku, ikut pe Pigelus ras Hermogenes. 1:16 Icidahken Tuhan min perkuah ateNa man keluarga Onesiporus, sabap aku enggo megati iapulina. La mela iakapna aminna pe ietehna aku i bas penjara. 1:17 Tapi seh kenca ia i Roma minter aku idaramina ngayak jumpa. 1:18 Tuhanlah mereken perkuah ateNa man Onesiporus i bas Wari e pagi! Tangkas kal ietehndu maka megati aku isampatina i Epesus.
2:1 Tapi kam, o anakku, lias ate Dibatalah mpegegehi kam, si enggo jadi sikerajangenta erkiteken persadanta ras Kristus Jesus. 2:2 Kai si enggo ibegindu i bas aku nari i lebe-lebe nterem saksi, endeskenlah man kalak si ertanggung jabab, si ngasup ngajarkenca ka man kalak si deban. 2:3 Ikutlah kam i bas ngenanami kiniseran jadi laskar Kristus Jesus si tutus. 2:4 Sekalak laskar si sangana ertugas la icampurina urusen kegeluhen si deban gelah ngena ate komendanna. 2:5 Sekalak si ikut i bas perlumban labo banci menang adi la kin patuh nandangi peraturen-peraturen si lit i bas perlumban e. 2:6 Sekalak perjuma si enggo latih erdahin arus ndat bagin si pemena i bas ulih jumana nari. 2:7 Ukurkenlah kai si kukataken man bandu, sabap ibereken Tuhan man bandu kengasupen ngangka kerina si enda ndai. 2:8 Ingetlah Jesus Kristus, si enggo ipekeke Dibata i bas si mate nari. Ia kesusuren Daud, bagi ikataken i bas Berita Si Meriah si ku beritaken e. 2:9 Erkiteken kupembarken Berita Si Meriah e nge maka aku ngenanami kiniseran, janah igariken pe aku bagi kalak jahat. Tapi kata Dibata labo tergariken, 2:10 e maka megenggeng aku i bas kai pe guna kiniulin anak-anak Dibata si terpilih, gelah ia pe banci ngaloken keselamaten si reh arah Kristus Jesus, ras kemulian si rasa lalap. 2:11 Tuhu me kata enda, "Adi enggo kita mate ras Ia, kita pe pagi nggeluh ka ras Ia. 2:12 Adi tetap megenggeng kita, ras Ia ka pe kita pagi erkuasa. Adi si persoken Ia, ipersokenNa pe kita. 2:13 Adi la pe kita setia, Ia tetap nge setia, sabap labo banci ipersokenNa bana." 2:14 Ajarkenlah perpulungen janah persingeti i lebe-lebe Dibata gelah ola ia rubati kerna sada-sada cakap. 2:15 Usahakenlah gelah dat pujin kam i lebe-lebe Dibata, bagi sekalak si erdahin si la mela kerna dahinna, sekalak si ngajar alu pinter berita si benar i bas Dibata nari. 2:16 Sirangilah ranan si la tuhu dingen si sia-sia, si perasatna nirangken kalak ras Dibata. 2:17 Si iajarkenna e njajat bagi penakit kanker. Dua kalak i bas guru-guru e gelarna Himeneus ras Piletus. 2:18 Duana ia enggo nadingken pengajaren si benar. Genduari enggo kemamangen ibahanna piga-piga kalak si enggo tek man Jesus Kristus alu ngataken maka kekeken kalak si tek enggo jadi. 2:19 Tapi palas si nteguh si enggo ipanteki Dibata labo terugur. I babo palas e lit tersurat, "Itandai Tuhan sikerajangenNa," bage pe, "Ise ngakuken maka ia sikerajangen Tuhan arus itadingkenNa perbahanen-perbahanen si la payo." 2:20 I bas rumah si mbelin lit erbage-bage pinggan ras mangkuk, lit si ibahan i bas pirak nari bage pe i bas emas nari janah lit ka pe si ibahan i bas kayu nari bage pe i bas taneh dah nari; lit si ipake guna keperlun si mehaga, lit si ipake guna keperlun biasa. 2:21 Adi lit kalak si mbersihken dirina i bas kejahaten-kejahaten enda nari, ipakeken me ia guna si mehuli, sabap enggo iendeskenna dirina dingen erguna man tuanna. Enggo isikapken ia guna ipake i bas dahin si mehuli. 2:22 Tadingkenlah sura-sura si jahat i bas kalak nguda. Usahakenlah ndalanken kai si tuhu-tuhu ngena ate Dibata, nehken tanggung jababndu selaku kalak si tek, nehken keleng ate dingen nggeluh alu dame raduken kalak si tutus mindo penampat man Tuhan. 2:23 Ola campuri percakapen si sia-sia dingen la rorat. Ietehndu maka arah si e turah perubaten. 2:24 Suruh-suruhen Tuhan la banci rubat. Arus ia mehuli man ise pe, sekalak guru si mehuli dingen saber, 2:25 janah alu lemah-lembut ngajarken kalak si erlawanen ras kam. Banci jadi ibereken Dibata man kalak enda kesempaten jera i bas dosa-dosana nari dingen meteh si tuhu-tuhu ngena ate Dibata. 2:26 Alu bage jore ukurna mulihken janah pulah ia i bas siding Iblis nari, si enggo naban dingen maksa ia ngikutken sura-surana.
3:1 Ingetlah! I bas wari-wari pendungi pagi mbue reh kiniseran. 3:2 Sanga si e pagi manusia nggeluh ngukurken dirina saja, merangap, meganjang rukur dingen nipu. Cekurak ia, la ibegikenna kata nande-bapana, la ia nggit ngataken bujur, dingen lanai diatena eragama. 3:3 Lanai lit i bas ia kekelengen dingen ate mekuah. Ijurukenna kalak si deban. La ia ralang-alang merawa dingen merampus. La atena ngena si mehuli. 3:4 Idayakenna temanna, njulmit ukurna dingen meganjang ukurna. Lanai diatena Dibata, tapi kesenangen saja idaramina. 3:5 Tempa-tempa idalankenna aturen-aturen agama, tapi kuasa agama si tuhu-tuhu itulakna. Kalak si bagi enda ola deheri. 3:6 Piga-piga kalak pagi i bas si e lawes kirumah-kirumah, mpengaruh diberu-diberu si kote kinitekenna, si mberat baban dosana dingen dem erbage-bage kerincuhen kula, 3:7 e me diberu si megati erlajar atena tapi la pernah ietehna kai kin si tuhu-tuhu ngena ate Dibata. 3:8 Bagi Jannes ras Jambres nimbak Musa nai, bage pe kalak enda nimbak kai si tuhu-tuhu ngena ate Dibata. Lanai ia ngasup rukur, janah sia-sia kinitekenna. 3:9 Tapi labo banci sempat mbelang bekasna, sabap kerina pagi kalak meteh maka ia bodoh, bali ras si jadi nandangi Jannes ras Jambres. 3:10 Tapi kam enggo ikutkenndu kai si kuajarken, kai si kubahan bage pe kai tujun geluhku. Enggo iperdiatekenndu kinitekenku, kesaberenku, kekelengenku, kinigenggengenku. 3:11 Enggo idahndu aku isiksa bage pe ngenanami erbage-bage kiniseran. Ietehndu kerinana si jadi man bangku i Antiokia, i Ikoni ras i Listera. Melala kal kiniseran si enggo kunanami, tapi i bas si e kerina isampati Tuhan aku. 3:12 Kalak si nggit nggeluh rikutken si ngena ate Dibata i bas persadan ras Kristus Jesus, la banci la ngenanami kiniseran. 3:13 Kalak jahat ras penipu reh dekahna reh jahatna; itipuna kalak janah ia pe kena tipu. 3:14 Tapi kam, tetaplah ndalanken kebenaren si rehna i bas Dibata nari si enggo iajarken man bandu dingen enggo tuhu-tuhu kam tek. Ietehndu kap ise nai si ngajari kam. 3:15 Janah ingetndu pe maka kitik-kitikndu nari enggo ietehndu kerna Pustaka Si Badia, si ngasup mereken kepentaren man bandu, e me si mabai kam ku keselamaten arah kiniteken man Kristus Jesus. 3:16 Kerina si tersurat i bas Pustaka Si Badia rehna i bas Dibata nari janah erguna i bas ngajari kalak kerna si ngena ate Dibata, mandang si lepak, pekena si salah dingen erguna i bas mereken pedah-pedah gelah nggeluh alu mehuli. 3:17 Gelah kalak si nehken sura-sura Dibata cukup saratna ras ilengkapi guna erbahan kerina perbahanen si mehuli.
4:1 Jesus Kristus reh denga pagi jadi Hakim nandangi kalak si nggeluh ras si enggo mate. IpantekiNa pagin KinirajanNa. E maka kupindoken kal man bandu i lebe-lebe Dibata ras Jesus Kristus: 4:2 Pembarkenlah Berita e, subuk tengteng ras la tengteng paksana terusken gelah beritaken. Cidahken salah kalak, persingeti dingen pegegehi ia sanga iajarkenndu ia alu dem kesabaren. 4:3 Reh me pagi paksana lanai ibegiken kalak pengajaren si tuhu-tuhu. Sura-surana saja me idalankenna. Ipepulungna guru-guru guna ngajari ia kerna kai si iakapna ntabeh megikenca. 4:4 La ibegikenna pengajaren si tuhu-tuhu, tapi tutus atena megiken turi-turin si la tuhu. 4:5 Tapi kam, ntah kai gia jadi, ola bene ukurndu. Megenggenglah i bas ngenanami kiniseran. Dahikenlah dahin meritaken Berita Si Meriah e, janah dalankenlah tanggung jabapndu jadi suruh-suruhen Dibata. 4:6 Tapi aku, enggo seh paksana ipersembahken. Enggo seh paksana aku nadingken kegeluhen enda. 4:7 Enggo kupala-palai asa ngasupku i bas perlumban e, enggo seh aku ku garis batas, janah enggo kucikep kiniteken e. 4:8 E maka genduari enggo sikap pemere kemenangen e guna iendesken man bangku, e me rudang-rudang kebenaren si ibereken Tuhan, Hakim si adil, si iberekenNa man bangku i bas Wari e. Janah pemere e labo man bangku saja, tapi pe man kerina kalak si nimai kerehenNa alu erkeleng ate. 4:9 Usahakenlah maka pedas kam reh ndahi aku. 4:10 Demas enggo nadingken aku janah genduari ia erngena ate man doni si genduari enda. Enggo lawes ia ku Tesalonika. Si Kresens pe enggo lawes ku Galati janah Titus ku Dalmati. 4:11 Lukas nari ngenca ras aku. Legi Markus gelah ras kam ku jenda, sabap banci ia nampati aku i bas dahinku. 4:12 Tikikus enggo kusuruh ku Epesus. 4:13 Adi reh kam baba mantelku, tading kubahan i Troas i bas si Karpus. Baba pe kitap-kitapku, terlebih-lebih kitap kulit e. 4:14 Aleksander, tukang tembaga e, enggo megati erbahan jahat man bangku. Tuhanlah mbalassa perbahanenna e. 4:15 Kam pe metengetlah nandangi ia, sabap megegeh kal ia ngelawan kai si iberitaken kita. 4:16 Asum tangtangna aku iadili, ise pe la lit nemani aku; kerina nadingken aku. Mbera-mbera la itak-taki Dibata si enda man bana! 4:17 Tapi Tuhan tetap nemani aku, iberekenNa man bangku gegeh, seh maka tuhu-tuhu i bas paksa e ngasup aku meritaken Berita Si Meriah e man bangsa si erbage-bage. Ipulahi Tuhan aku tempa-tempa i bas babah singa nari. 4:18 Janah ipulahi Tuhan me pagi aku i bas kerina si jahat nari, jenari ibabaNa aku alu selamat ku bas KinirajanNa i Surga. Man baNalah kemulian seh rasa lalap. Amin. 4:19 Kataken mejuah-juah man Persila ras perbulangenna Akuila, bage pe man Onesiporus sada jabu. 4:20 Erastus genduari i Korinti, janah Tropimus kutadingken i Mileti, sabap sakit ia. 4:21 Usahaken kal gelah reh kam ope denga musim mbergeh. Eubulus, Pudens, Linus ras Klaudia ngataken mejuah-juah man bandu, bage pe kerina senina-senina si enggo tek man Jesus Kristus. 4:22 Tuhanlah nemani kam. Lias ate Dibata ras kam kerina gelah.
1:1 Surat enda i bas aku nari, Paulus, persuruhen Dibata dingen rasul Jesus Kristus. Aku ipilih Dibata jenari isuruhNa mpegegehi kiniteken anak-anakNa si terpilih janah mabai ia ku si ngena ate Dibata rikutken pengajaren agamanta, 1:2 si erpalasken pengarapen kerna kegeluhen si tuhu-tuhu si la erkeri-kerin. Kegeluhen si tuhu-tuhu si la erkeri-kerin enggo ipadanken Dibata man banta ope denga lit paksa-paksa; Dibata labo erbual. 1:3 Janah i bas paksa si itetapkenNa, enggo ipetangkasNa kegeluhen e arah KataNa. Enda me si niendeskenNa man bangku. E maka kupembarken KataNa e bekas persuruhen Dibata Si Engkelini kita. 1:4 Surat enda man Titus, anakku si tuhu-tuhu rikutken kinitekenta ersada. Dibata Bapa ras Kristus Jesus Singkelini kita mereken lias ate ras kemalemen ate man bandu gelah. 1:5 Kutadingken kam mbaru enda i Pulau Kreta gelah ipejorendu dahin si perlu idungi, bage pe gelah ngangkat pertua-pertua i bas tep-tep kuta. Ingetlah si kukataken man bandu: 1:6 sekalak pertua ola min lit si man pandangen; sekalak ngenca ndeharana, janah anak-anakna erkiniteken man Kristus dingen la icap kalak gutul ntah pe la terajarken. 1:7 Erkiteken dahin peminpin perpulungen e ngaturken dahin Dibata, ola min lit i bas ia si man pandangen. La banci meganjang ukurna ntah sukah merawa, ntah pemabuk, ntah pengamuk, merangap nandangi duit. 1:8 Arus ia pertemue, ngena atena si mehuli. Pentar, bersih, dingen terkuasaisa dirina. 1:9 Arus nteguh itagangina Berita si rehna i bas Dibata nari e, e me Berita si banci iteki bagi si enggo iajarken man bana. Alu bage ngasup ia mpegegehi kalak si deban alu pengajaren si tuhu-tuhu e, dingen ngasup ia ncidahken salah kalak si ngelawan pengajaren e. 1:10 Sabap nterem kalak lanai patuh, terlebih-lebih si teriket denga i bas sunat; itipuna kalak si deban alu cakapna si la erguna. 1:11 Kalak si bage ola bere ngerana, sabap ngguluti jabu kalak saja ngenca perasatna alu pengajaren si la bage arusna. Kai si ibahanna e man kemelanken, sabap sura-surana ndarami duit saja nge. 1:12 Sekalak nabi i Kreta nari pernah ngataken, "Kalak Kreta perguak, bali ras rubia-rubia si merawa, kalak rangap si perkisat." 1:13 Kai si ikataken nabi e tuhu, e maka ajarken ia alu la tangung-tanggung, gelah tuhu-tuhu kinitekenna, 1:14 janah gelah olanai ia tek turi-turin kalak Jahudi ras aturen-aturen manusia si erlawanen ras pengajaren si benar. 1:15 Nandangi kalak si bersih pusuh-peratenna kai pe bersih kap; tapi nandangi kalak si la bersih pusuh-peratenna dingen la erkiniteken, kai pe la bersih, sabap enggo meluat ukur ras pusuh-peratenna. 1:16 Ngaku ia maka itandaina Dibata, tapi arah perbahanenna teridah labo itandaina. Perukurenna mbau, janah la nggit patuh; kalak enda la ngasup erbahan kai pe si mehuli.
2:1 Tapi kam, ajarkenlah si sentudu ras pengajaren si payo. 2:2 Katakenlah man dilaki si enggo metua gelah jore min ukurna, mehuli lagu-langkahna, dingen ngasup min ngkuasai dirina; bage pe gelah tuhu-tuhu sehat kinitekenna, erkeleng-ate dingen megenggeng. 2:3 Bage pe kataken man diberu-diberu si enggo metua gelah bersih lagu-langkahna, bagi arusna. La banci ia ncekuraki kalak si deban, bage pe la banci nagih minem anggur. Ia arus ngajarken si mehuli: 2:4 ngajari diberu si nguda denga gelah keleng atena perbulangenna ras anak-anakna, 2:5 gelah ngasup ia ngkuasai dirina dingen nggeluh badia, gelah beluh ia ngaturken jabuna dingen jadi ndehara si patuh man perbulangenna; gelah alu bage ise pe la ncekuraki berita si rehna i bas Dibata nari. 2:6 Bage pe ajari anak-anak perana gelah ngasup ngkuasai dirina. 2:7 Janah kam, i bas kai pe arus jadi usihen kerna dahin si mehuli. Tutus min atendu dingen ergiah-giahlah ukurndu ngajar. 2:8 Pakelah kata-kata si payo si la banci ipandang kalak, gelah alu bage mela iakap imbang-imbangndu sabap la lit i bas kita si man pandangenna. 2:9 Budak arus ngikutken kata tuanna dingen i bas kai pe senang min ate tuanna ibahanna. La banci isimbakna kata tuanna, 2:10 ntah pe nangko barang-barang tuanna. Tapi arus icidahkenna maka ia tetap bujur dingen tutus, gelah i bas kerinana si ilakokenna tama ulina man pengajaren kerna Dibata si Engkelini kita. 2:11 Sabap enggo ipetangkas Dibata lias ateNa guna keselamaten kerina manusia. 2:12 Lias ateNa e ngajari kita nadingken kegeluhen si la ngena Dibata ras sura-sura doni, gelah nggeluh kita ngkuasai dirinta, bujur dingen si sembah Dibata alu kegeluhenta i doni enda. 2:13 Genduari kita paksa nimai Wari kemalemen ate si iarapken kita e me kerehen sinalsal Dibatanta si Mbelin ras si Engkelini kita Jesus Kristus. 2:14 Enggo iendeskenNa diriNa guna kita, lako nebusi kita i bas kerina si jahat nari, jenari ibahanNa kita jadi sikerajangenNa, jadi bangsa si bersih, si mesikel erbahan mehuli. 2:15 Ajarkenlah si enda kerina, janah pakelah kerina kuasandu i bas kam ngajuk dingen mandang kalak. Ola pelepas kalak mapas man bandu.
3:1 Persingetilah ia kerina gelah patuh man pemerentah ras si erkuasa. Ibegikennalah katana, dingen nggit ndalanken kerina dahin si mehuli. 3:2 Katakenlah man bana gelah ola ia ncekuraki kalak si deban, tapi erdame dingen meriahlah, janah mehulilah min perbahanenna katawari pe nandangi kerina manusia. 3:3 Sabap kita pe nai labo sieteh mehuli, nggit ngelawan dingen erbahan salah. Kita ikuasai kerincuhen kula ras erbage-bage sura-sura. Kita nggeluhken kegeluhen si jahat dingen dem ate cian. Segat ate kalak kita, janah kita pe segat ateta kalak. 3:4 Tapi asum Dibata si Engkelini kita nehken perkuah ate ras kiniulinNa man banta, 3:5 kita enggo ikeliniNa. Kita ikeliniNa labo erkiteken perbahanenta si mehuli, tapi erkiteken perkuah ateNa nge. Kita ikelini Dibata arah Kesah Si Badia si erbanca kita tubuh peduakaliken gelah sialoken kegeluhen si mbaru alu mbersihken kita. 3:6 Dibata nguseken Kesah Si Badia si la ersibar man banta arah Jesus Kristus si Engkelini kita, 3:7 gelah erkiteken lias ateNa banci kita rembak ras Ia dingen ngaloken kegeluhen si tuhu-tuhu si la erkeri-kerin, si iarapken kita. 3:8 Kata enda tuhu kap. Ateku min gelah igegehindu ngajarken kerna si enda, gelah kalak si enggo tek man Dibata tutus ndahiken dahin si mehuli, si metunggung dingen erguna man manusia. 3:9 Silahkenlah ranan sijabapen si sia-sia, kerna terombo nini-nini nai. Ola rubat, dingen ola sijabapen kerna Undang-undang. Enda kerina si lang-lang dingen la lit gunana. 3:10 Kalak si erbahan perpecahen i bas perpulungen ajarken seh dua kali jenari sirangi ia. 3:11 Ietehndu maka kalak si bage jahat kap. Dosa-dosana nuduhkenca maka ia ersalah. 3:12 Kenca kusuruh Artemas ntah Tikikus ndahi kam, usahakenndu kal ndahi aku ku Nikopolis, sabap enggo kutetapken ringan i jah asum musim mbergeh. 3:13 Usahakenndulah nampati Senas, si meteh undang-undang, ras Apolos i bas ia menaken perdalanenna, janah usahaken maka kerina keperlunna icukupi. 3:14 Teman-temanta arus erlajar make kesempaten si lit guna ndahiken dahin si mehuli, gelah icukupina kai si perluna kal. Ola min ia sia-sia nggeluh. 3:15 Kerina senina-seninanta si ras aku i jenda ngataken mejuah-juah man bandu. Kataken mejuah-juah i bas kami nari man teman-temanta si sada kiniteken. Lias ate Dibata ras kam kerina gelah.
1:1 Surat enda i bas aku nari, Paulus, si ipenjaraken erkiteken Kristus Jesus, bage pe i bas seninanta Timotius nari. Surat enda man bandu, Pilemon, si ikelengi kami, teman kami sada dahin 1:2 ras man perpulungen si pulung i rumahndu, bage pe man turangta Apia ras temanta seperjuangen Arkipus. 1:3 Dibata Bapanta ras Tuhan Jesus Kristus mereken lias ate ras kemalemen ate man bandu gelah. 1:4 Rusur kukataken bujur man Dibatangku tep-tep kali kam kuinget i bas pertotonku. 1:5 Sabap enggo kubegi kerna kekelengenndu man anak-anak Dibata ras kiniteken si lit i bas kam nandangi Tuhan Jesus. 1:6 Ertoto aku gelah arah persadanta kalak si erkiniteken mabai kita ku pengertin si terbagesen kerna kerina pemere si ialoken kita i bas kegeluhenta erkiteken persadanta ras Kristus. 1:7 O seninangku si kukelengi, kekelengenndu e erbahanca ateku malem dingen mpegegehi aku! Kerina anak-anak Dibata enggo ermeriah ukur ibahanndu. 1:8 Erkiteken si e pang kal aku seninandu i bas Kristus merentahken kam erbahan kai si arus ilakokenndu. 1:9 Tapi erkiteken keleng ateku kam, ulin kuakap aku mindo saja man bandu. Si enda kubahan aminna gia aku, Paulus, enggo metua, janah sangana ipenjaraken erkiteken Kristus Jesus. 1:10 E maka mindo aku man bandu kerna si Erguna, si enggo jadi anakku erkiteken kiniteken tupung aku sangana i bas penjara. 1:11 Nai la ia erguna man bandu, tapi genduari erguna ia labo saja man bandu tapi man bangku pe. 1:12 Buah ateku si kukelengi enda, genduari kusuruh mulihken man bandu. 1:13 Si tuhuna ateku min i jenda nge ia ras aku, kidekah aku i bas penjara erkiteken Berita Si Meriah, gelah banci ia jadi gancihndu nampati aku. 1:14 Tapi la ateku kupaksaken kam nampati aku; ateku min si e ibahanndu alu ukur meriah. Alu bage la aku nggit erbahan kai pe adi la leben isetujuindu. 1:15 Banci jadi si Erguna sirang ras kam kentisik gelah banci ia ras kam rasa lalap. 1:16 Genduari lanai bo ia budak ngenca, tapi ndauh ganjangen asangken sekalak budak. Ia me seninandu si meherga i bas Kristus. Keleng ateku ia, tentu lebihen ka pe kekelengenndu man bana, subuk selaku manusia bage pe i bas Tuhan. 1:17 E maka adi temanndu kin iakapndu aku, alokenlah ia mulihi bagi pengalokenndu aku. 1:18 Adi lit nai salahna man bandu, ntah lit utangna, jadi utangku bahan. 1:19 Aku jine nuratkenca bagin si enda, "Aku, Paulus, nggalarisa pagi kerina man bandu." (Tentu labo perlu kupersingeti man bandu maka kam jine pe rutang man bangku, e me dirindu jine.) 1:20 O seninangku, sampatindu min aku erkiteken Tuhan; pesenang min ukurku sabap kita ersenina i bas Kristus. 1:21 Asum aku erbahan surat enda, tek aku maka ialokenndu pemindonku enda. Si tuhuna kueteh maka lebih asang si e pe nggit nge kam. 1:22 Tambah si e sikapkenlah sada kamar man bangku, sabap ngarap aku maka pertotonndu kerina ibegiken Dibata, janah ibahanNa aku mulihken ndahi kam. 1:23 Epapras si ipenjaraken ras aku erkiteken Kristus Jesus, ngataken mejuah-juah man bandu, 1:24 bage pe Markus, Aristarkus, Demas, ras Lukas temanku sada dahin. 1:25 Lias ate Tuhan Jesus Kristus ras kam kerina gelah.
1:1 Nai enggo megati Dibata ngerana man nini-nininta arah nabi-nabi alu erbage-bage cara. 1:2 Tapi i bas paksa-paksa si arah pudi enda ngerana Ia man banta arah AnakNa. Arah AnakNa e me Dibata njadiken kerina si nasa lit; AnakNa e itetapkenNa jadi si mada kerina si nasa lit. 1:3 Arah Ia ersinalsal terang kemulian Dibata, janah Ia tuhu-tuhu gambar Dibata. Ia me si natang kerina si nasa lit alu kataNa si erkuasa. Kenca ibersihkenNa manusia i bas dosa-dosa nari, kundul Ia i Surga arah kemuhen Dibata si Mada Kuasa si meganjangna. 1:4 Anak e enggo jadi ndauh ganjangen asangken malekat-malekat, bagi gelarNa pe enggo ibereken Dibata ganjangen asangken gelar malekat-malekat. 1:5 Sabap man malekat-malekat labo pernah ikataken Dibata, "Kam me anakKu; sendah Aku jadi Bapandu." Man malekat si apai pe labo pernah ikataken Dibata, "Aku me jadi BapaNa, janah Ia me jadi AnakKu." 1:6 Tapi asum isuruh Dibata ateNa anakNa sintua ku doni enda, ikatakenNa, "Kerina malekat Dibata arus nembah man Anak e." 1:7 Kerna malekat-malekat ikataken Dibata, "Ibahan Dibata malekat-malekatNa angin, janah suruh-suruhenNa dilah api." 1:8 Tapi kerna Anak e ikataken Dibata, "Kursi pemerentahenNdu o Dibata, rasa lalap me! PemerentahenNdu e me pemerentahen si adil. 1:9 Ngena atendu si bujur, janah nembeh atendu nandangi si jahat; erkiteken si e me maka Dibata, e me Dibatandu, enggo ngangkat Kam, jenari ipehagaNa Kam lebih asa temanNdu, si erbahanca meriah ukurNdu." 1:10 IkatakenNa pe tole, "Kam o Tuhan, mula-mulana enggo njadiken doni enda, janah alu tanNdu jine enggo ijadikenNdu langit. 1:11 Masap me pagi si enda kerina, tapi Kam tetap nge rasa lalap; reh mawesna me pagi kerina bagi uis. 1:12 IlipatNdu me pagi kerina si nasa lit bagi uis, jenari isambari pagi alu si deban. Tapi Kam tetap nge rasa lalap, umurNdu la erkeri-kerin." 1:13 Man malekat-malekat si apai pe labo pernah ikataken Dibata, "Kundullah i jenda arah kemuhenKu, seh kutamaken imbang-imbangNdu jadi dedeh-dedehen naheNdu." 1:14 Adi bage kai dage malekat-malekat e? Malekat-malekat e, e me kesah penampat persuruhen Dibata guna nampati kalak si ngaloken keselamaten pagi.
2:1 Erkiteken si e arus nteguh sicikep pengajaren si enggo sibegi, gelah ola kita mombak. 2:2 Sepuluh Pedah Dibata si ipeseh malekat-malekat man Musa enggo tangkas maka tuhu, janah kalak si la ndalankenca ntah si la ngikutkenca iukum bagi patutna. 2:3 Adi bage banci kin kita pulah adi la siperdiateken berita keselamaten si bage belinna? Tuhan si tangtangna meritaken keselamaten e, jenari kalak si megisa enggo ncidahken man banta maka si e tuhu. 2:4 Bage pe arah erbahan tanda-tanda kuasa, kejadin-kejadin ras erbage-bage tanda sengget, itambahi Dibata maka tuhu kesaksin kalak e. Ielaken Dibata pe erbage-bage pemere Kesah Si Badia rikutken sura-suraNa. 2:5 Dibata labo njadiken malekat-malekat gelah erkuasa nandangi doni si nandangi reh e me doni si icakapken kita e. 2:6 Tapi bagi lit tersurat i bas Pustaka Si Badia, "O Dibata, kai kin manusia e maka ingetNdu ia; kai kin anak manusia e, maka iperdiatekenNdu ia? 2:7 I bas paksa si kentisik enggo ibahanNdu ia teruhen asangken malekat-malekat; ipehagaNdu ia alu kiniulin dingen pujin, 2:8 janah ibahanNdu ia erkuasa nandangi kerina si nasa lit." Ikataken pe maka ibahan Dibata manusia "erkuasa nandangi kerina si nasa lit"; adi bage labo lit kai pe si la i teruh kuasana. Genduari si idah manusia labo erkuasa i bas kerinana. 2:9 Tapi teridah man banta maka Jesus si erkuasa! I bas paksa si kentisik, ibahan Dibata Ia teruhen asangken malekat-malekat, gelah arah lias ate Dibata inanamiNa kiniseran kematen guna kerina manusia. Siidah genduari Ia ipehaga alu kiniulin dingen pujin erkiteken kematen si enggo inanamiNa. 2:10 Patut maka Dibata si njadiken dingen pekena-kena kerina si nasa lit, njadiken Jesus serta arah kiniseran. Gelah nterem kalak ibabaNa ngenanami kemulianNa ras Ia. Sabap Jesus ngenca mabai manusia ku keselamaten. 2:11 Ibersihken Jesus manusia i bas dosa-dosa nari, janah Ia ras si ibersihkenNa e kerina sada Bapa. Erkiteken si e maka Jesus la mela ngakui manusia jadi seninaNa. 2:12 Bagi ikatakenNa, "O Dibata, ngerana aku kerna Kam man agi-agingku kupujiken Kam i tengah-tengah perpulungen." 2:13 Tole pe ikatakenNa, "Ernalem Aku man Dibata." Bage pe ikatakenNa, "I jenda Aku ras anak-anak si enggo iendesken Dibata man bangKu." 2:14 Erkiteken anak-anak e, bagi si igelariNa, e me manusia si erdaging dingen erdareh, Jesus pe enggo bali ras anak-anak e i bas kemanusianNa. Si enda ibahanNa gelah arah kematenNa banci italukenNa Iblis si engkuasai kematen. 2:15 Alu bage ibebaskenNa kalak si kidekah geluhna iperbudak erkiteken kebiarenna nandangi kematen. 2:16 Tangkas maka labo malekat si isampatiNa. Tapi bagi lit tersurat i bas Pustaka Si Badia, "IsampatiNa kita manusia, e me kesusuren Abraham." 2:17 E me sabapna maka i bas kai pe arus bali Ia ras senina-seninaNa, gelah Ia jadi Imam si Mbelin si erkeleng ate dingen si tutus i bas ndahiken dahin Dibata gelah dosa-dosa manusia ialemi Dibata. 2:18 Janah genduari ngasup Ia nampati kalak si i bas percuban, sabap Ia pe enggo ngenanami percuban ras kiniseran.
3:1 O senina-seninangku si sada kiniteken, si enggo pe ipilih Dibata! Ukurilah mbages-mbages kerna Jesus, e me Rasul ras Imam si Mbelin, si iakuken kita i bas kinitekenta. 3:2 Jesus erkemalangen man Dibata si milih Ia guna dahin e, bagi Musa nai patuh ndahiken dahinna i bas rumah Dibata. 3:3 Kalak si majekken rumah lebih ipehaga asangken rumah e. Bage me Jesus, tunggungen Ia ipehaga asangken Musa. 3:4 Tuhu kerina rumah lit si majekkenca, tapi Dibata nge njadiken kerina si nasa lit. 3:5 Musa patuh erdahin i bas rumah Dibata bagi persuruhen. Iturikenna kai si pagin ikataken Dibata. 3:6 Tapi Kristus patuh bagi Anak si ertanggung jabap i bas rumah Dibata. Kita enda me rumah Dibata adi tetap ukurta ergiah-giah dingen tek kita maka sidat nge kai si iarapken kita. 3:7 E maka bagi si ikataken Kesah Si Badia, "Adi ibegindu sora Dibata wari enda, 3:8 ola pemersik ukurndu bagi asum nai isimbakndu Dibata, bagi nai asum kam i gurun pasir, asum iujindu Dibata. 3:9 I je me nai iuji ninindu Dibata, icubaina Aku nina Dibata, aminna pe idahna kai si enggo Kubahan kidekah empat puluh tahun. 3:10 Erkiteken si e maka nembeh ateKu ia, alu ngataken, 'Megati ia nimbak, la ikutkenna pedah-pedahKu.' 3:11 Merawa Aku dingen ersumpah, 'Ndigan pe ia la bengket ku bas pengadi-ngadinKu!' " 3:12 O senina-seninangku, metengetlah gelah ola sekalak pe i bas kam jahat ukurna dingen la tek seh maka itundalkenna Dibata si Nggeluh e! 3:13 Tapi gelah ola sekalak pe i bas kam itipu dosa seh maka mersik ukurna, siajar-ajarenlah kam tep-tep wari, kidekah kata "wari enda" bagi si tersurat i bas Pustaka Si Badia lit denga man banta. 3:14 Sabap kita kerina enggo dat bagin i bas Kristus adi tetap kita tek bagi si tangtangna nai seh ku kedungenna. 3:15 I bas Pustaka Si Badia lit tersurat, "Adi ibegindu sora Dibata sendah, ola pemersik ukurndu bagi nini-ninindu nai asum ia berontak ngelawan Dibata." 3:16 Ise kin megi sora Dibata jenari isimbakna Dibata? E me kerina si ibabai Musa ndarat i Mesir nari. 3:17 Ise kin si irawai Dibata kidekah si empat puluh tahun e? E me kalak si erbahan dosa, si mate i gurun pasir. 3:18 Ise kin kata Dibata asum Ia ersumpah, "Ndigan pe la ia bengket ku bas pengadi-ngadinKu?" Tentu kalak si nimbak Dibata! 3:19 Dage enggo sieteh maka labo ia banci bengket sabap la ia tek.
4:1 Genduari lit padan Dibata man banta maka kita banci bengket ku bas pengadi-ngadinNa. Dage metengetlah gelah ola lit sekalak pe i bas kam gagal bengket ku bas pengadi-ngadinNa e. 4:2 Sabap enggo sibegi Berita Si Meriah e, bali ras kalak ndai. Ibegina berita e tapi la erguna man bana sabap la ialokenna e alu kiniteken. 4:3 Tapi kita si tek, bengket ku bas pengadi-ngadin e. Bagi si ikataken Dibata, "Merawa Aku dingen ersumpah, 'Ndigan pe ia la bengket ku bas pengadi-ngadinKu!' " Si enda ikataken Dibata aminna pe enggo dung dahinNa kenca ijadikenNa doni enda. 4:4 Sabap kerna wari si pepituken lit tersurat i bas Pustaka Si Badia, "I bas wari si pepituken ngadi Dibata erdahin." 4:5 Tapi pe lit tersurat, "Asa ndigan pe ia la bengket ku bas pengadi-ngadinKu." 4:6 Kalak si tangtangna megi Berita Si Meriah la bengket ku bas pengadi-ngadin Dibata erkiteken la ia tek. Adi bage tentu lit kalak si deban si banci bengket ku bas pengadi-ngadin Dibata e. 4:7 Si enda tangkas sabap enggo itetapken Dibata sada wari si deban, si igelari "wari enda". Ndekah kenca si e ngerana Dibata kerna si e arah Daud bagi enggo tersinget arah lebe, "Adi ibegindu sora Dibata wari enda, ola pemersik ukurndu." 4:8 Adi enggo min ndai ibabai Josua bangsa e ku bas pengadi-ngadin Dibata, lanai nari bo min ndai Dibata ngerana kerna sada wari si deban. 4:9 Tapi genduari lit denga nge wari pengadi-ngadin guna anak-anak Dibata, bagi Dibata ngadi i bas wari si pepituken e. 4:10 Sabap kalak si bengket ku bas pengadi-ngadin Dibata, ngadi me ia i bas dahinna nari, bagi Dibata ngadi i bas dahinNa nari. 4:11 Dage sipala-palailah gelah kita bengket ku bas pengadi-ngadin Dibata. Ola lit sekalak pe i bas kita la patuh bagi kalak nai, seh maka la ia bengket ku bas. 4:12 Kata Dibata e nggeluh dingen erdahin. Kata Dibata e telapen asangken pedang si dua babahna. Mbages kal bekas penebakna seh maka isirangkenna tendi ras kesah, buku-buku ras utuk tulan. Ihakimina perukuren ras sura-sura manusia. 4:13 La lit kai pe si terligen man Dibata. Kerina si nasa lit tangkas dingen talang i lebe-lebeNa. Man baNa me sipertanggung jabapken kerina perbahanen-perbahanenta. 4:14 E maka tetaplah si gelem kiniteken si iakuken kita. Sabap lit kap Imam si Mbelinta si mulia si enggo seh ku lebe-lebe Dibata jine, e me Jesus Anak Dibata. 4:15 Imam si Mbelinta e labo kalak si la nggejapken kekoten-kekotenta. Tapi Imam si Mbelinta e pernah ngenanami percuban si kuga pa pe, bali ras kita; saja ngenca Ia la erdosa! 4:16 E maka marilah sideheri alu la biar-biaren Dibata si erkuasa si dem alu lias ate. I je sialoken perkuah ate ras lias ate gelah dat kita penampat i bas paksa si iperluken kita.
5:1 Kerina Imam si Mbelin ipilih i tengah-tengah manusia nari, jenari itangkuhken lako ndahiken dahin Dibata guna manusia, gelah ipersembahkenna pemere-pemere bage pe persembahen kerna dosa manusia. 5:2 Erkiteken ia pe melala kekotenna, e maka kepate ia nandangi kalak si la erpemeteh dingen si papak. 5:3 Janah erkiteken ia kote, arus ipersembahkenna persembahen, labo saja kerna dosa-dosa kalak tapi pe kerna dosa-dosana. 5:4 Labo lit kalak milih dirina ndatken kehamaten jadi Imam si Mbelin. Dibata nge si ndilo kalak jadi Imam si Mbelin, bagi Arun nai. 5:5 Bage me pe Kristus, labo Ia milih diriNa guna ipehaga jadi Imam si Mbelin. Tapi Dibata ngataken man baNa, "Kam me AnakKu; i bas wari enda Aku enggo jadi BapaNdu." 5:6 I bas bagin si deban i bas Pustaka Si Badia ikataken Dibata ka pe, "Jadi Imam me Kam rasa lalap, rikutken golongen Imam Malkisedek." 5:7 Paksa Jesus nggeluh i doni enda, ertoto Ia mindo alu serko ras iluh mambur man Dibata si ngasup nelamatken Ia i bas kematen nari. Erkiteken ipeteruk Jesus diriNa dingen erpengendes man Dibata, ibegiken Dibata pemindonNa. 5:8 Tapi aminna pe Jesus Anak Dibata, erlajar patuh Ia arah kiniseranNa. 5:9 Erkiteken si e me maka kenca Ia serta ibahan Dibata, Ia jadi ulu keselamaten si rasa lalap, nandangi kerina kalak si erkemalangen man baNa. 5:10 Janah itetapken Dibata Ia jadi Imam si Mbelin "rikutken golongen Imam Malkisedek." 5:11 Melala denga si arus ikataken kami kerna si enda, tapi mesera iakap kami nurikenca sabap kai pe melet kam ngangkasa. 5:12 Si tuhuna enggo cukup kesempaten man bandu gelah banci kam jadi guru, tapi seh asa genduari perlu denga kam iajari i bas bena-benana nari kerna ajaren-ajaren Dibata. Langa bo kam man nakan keras, tapi minem susu denga nge kam. 5:13 Kalak si arus denga minem susu, anak-anak denga kap ia, la ietehna kai si benar ras kai si salah. 5:14 Tapi nakan keras e me guna kalak si mbelin, si arah pengalamenna ngasup perukurenna meteh apai si bujur apai si jahat.
6:1 Erkiteken si e lanai pada siajarken ajaren-ajaren Kristen si pemena, tapi majulah kita ku pelajaren-pelajaren si terbagesen kerna kegeluhen Kristen. Olanai siulihi pelajaren si pemena, e me kerna nadingken perbahanen-perbahanen si la erguna janah arus tek man Dibata; 6:2 ntah kerna lakon-lakon pembersihen ras namaken tan ku babo kalak, ntah kerna kekeken i bas si mate nari ras ukumen si rasa lalap. 6:3 E maka marilah kita maju! Janah enda me sidalanken adi bage peraten Dibata! 6:4 Sabap kalak si enggo nundalken Dibata kuga banci ia ibaba mulihken seh jera? Enggo pernah ia nggeluh i bas terang Dibata. Enggo iakapina uga tabehna pemere Dibata, dingen ialokenna baginna i bas pemere Kesah Si Badia nari. 6:5 Enggo inanamina maka Kata Dibata mehuli, janah enggo igejapna kerna kuasa jaman si reh pagin. 6:6 Tapi kenca si e murtad ia! Ja nge ia tertegu mulihken seh jera sabap ipakukenna denga ka Anak Dibata erbahanca megombang kalak man baNa. 6:7 Taneh si ngaloken udan nge si ipasu-pasu Dibata, e me taneh si peturah sinuan-sinuan si erguna man kalak si nuanisa. 6:8 Tapi adi taneh e peturah rih ras dukut-dukut, labo ia erguna; banci jadi isumpahi Dibata ia janah kedungenna iciluk alu api. 6:9 Tapi o senina-senina si ikelengi kami, amin bage gia ikataken kami, kerna kam tek nge kami maka lit i bas kam si terulin si lit pertalinna ras keselamatenndu. 6:10 Dibata bujur nge. Labo pagi ilupakenNa dahin si enggo idahikenndu e. IingetNa nge keleng atendu nandangi Ia, si icidahkenndu arah nampati teman-temanndu kalak Kristen, subuk si enggo idalankenndu bage pe si paksana idalankenndu. 6:11 Ngarap kami gelah kerina kam tetap ergiah-giah ukurndu, gelah kai si iarap-arapkenndu e ialokenndu pagi dungna. 6:12 Ate kami ola min kam mekisat. Tapi nggeluhlah kam ngusih kalak si enggo tek dingen saber, gelah ialokenndu kai si enggo ipadanken Dibata. 6:13 Asum Dibata erpadan man Abraham, ersumpah Ia maka kai si enggo ipadankenkenNa e isehkenNa me. Erkiteken labo lit ise pe belinen asangken Ia, e maka gelarNa nge ipakeNa asum Ia ersumpah. 6:14 Nina, "Erpadan Aku maka Kupasu-pasu kam dingen nterem Kubahan kesusurenndu." 6:15 Erkiteken saber Abraham nimai padan e, e maka ialokenna kai si ipadanken Dibata e. 6:16 Adi manusia ersumpah, ipakena gelar kalak si belinen asangken ia. Sumpah e ndungi perubaten-perubaten si lit i tengah-tengah manusia. 6:17 Dibata ersura-sura kal petangkassa man kalak si patut ngaloken padaanNa, maka padanNa e tetap nge. Erkiteken si e maka ersumpah Ia kerna padanNa e. 6:18 Dage lit dua erbage si la banci mobah, e me padan ras sumpahNa, janah kerna si dua e tentu Dibata labo erbual. Erkiteken si e kita si enggo ndat perlindungen i bas Dibata, iajuk kal gelah tetap ncikep pengarapen si lit i lebe-lebenta. 6:19 Pengarapen enda bali ras jangkar i bas geluhta. Pengarapen e aman dingen tetap, janah enggo mentasi kire-kire rumah Dibata si i Surga, janah sangkut nteguh i bas ingan ersembah si arah bas. 6:20 Jesus enggo leben asangken kita bengket ku je man gunanta. Ia enggo jadi Imam si Mbelin seh rasa lalap rikutken golongen Imam Malkisedek.
7:1 Malkisedek Raja Salem, imam Dibata si Meganjangna. Asum Abraham mulih i bas erperang nari, kenca ibunuhna piga-piga kalak raja, ijumpai Malkisedek ia, jenari ipasu-pasuna. 7:2 Sepersepuluh i bas erta si lit ibaba Abraham, iberekenna man Malkisedek. (Malkisedek antusenna si pemena e me, "Raja si Bujur" janah erkiteken ia Raja Salem, gelarna e pe antusenna "Raja Dame".) 7:3 La lit turi-turin kerna nande-bapa Malkisedek ntah pe kerna nini-ninina. La lit ituriken kerna pertubuhna ntah kerna kematenna. Ia bali ras Anak Dibata; ia jadi imam seh rasa lalap. 7:4 Dage idahndu maka mbelin tuhu ia! Abraham, bapa bangsanta, mereken sepersepuluh i bas kerinana si idatna i bas peperangen man Malkisedek. 7:5 Kesusuren kalak Lewi si jadi imam, rikutken Undang-undang arus mpepulung sepersepuluh i bas erta-erta kalak Israel. Si sepersepuluh e ipepulung i bas kalak e nari aminna pe ia kesusuren Abraham. 7:6 Malkisedek labo kesusuren Lewi, tapi ialokenna si sepersepuluh e i bas Abraham nari, kenca bage ipasu-pasuna Abraham, e me kalak si enggo ngaloken padan Dibata. 7:7 Dage tangkas maka belinen nge si masu-masu asa si ipasu-pasu. 7:8 Imam-imam si mpepulung si sepersepuluh e, e me manusia biasa si mate i bas sada paksa, tapi lit tersurat i bas Pustaka Si Badia maka Malkisedek nggeluh rasa lalap. 7:9 Banci ikataken maka asum Abraham nggalari si sepersepuluh e, ikut pe Lewi nggalar (e me Lewi si kesusurenna mpepulung si sepersepuluh e). 7:10 Sabap asum Abraham ijumpai Malkisedek, Lewi langa tubuh. Banci ikataken Lewi enggo lit i bas dareh Abraham, e me nini-nini Lewi. 7:11 Erpalasken kiniimamen Lewi me maka Undang-undang ibereken man kalak Israel. Bicara serta nai imam-imam kalak Lewi e, labo min ndai perlu lit imam si deban. Tapi erkiteken keimamen Lewi la serta, perlu lit imam i bas golongen si deban nari, e me rikutken golongen Imam Malkisedek si ipadanken Dibata si la i bas golongen Imam Arun, kesusuren Lewi nari. 7:12 Adi sambar kiniimamen, Undang-undang pe la banci lang sambar. 7:13 Tuhanta si ikataken i jenda, i bas suku si deban nari kap. La pernah sekalak pe i bas suku e nari erdahin jadi imam. 7:14 Kerina kalak meteh maka Tuhan e tubuh i tengah-tengah suku Juda nari. Janah Musa la pernah ngingetken suku bangsa enda asum ia ngerana kerna imam-imam. 7:15 Kerna si e enggo reh tangkasna, enggo reh sekalak imam si deban, si bali ras Imam Malkisedek. 7:16 Ia jadi imam labo rikutken Undang-undang ntah pe aturen-aturen manusia. Ia jadi imam arah kuasa kegeluhen si la ermasap-masap. 7:17 Sabap i bas Pustaka Si Badia lit tersurat, "Kam jadi imam rasa lalap rikutken golongen Imam Malkisedek." 7:18 Alu bage, peraturen si ndekah lanai ipake, sabap la ergegeh dingen la erguna. 7:19 Sabap Undang-undang Musa la ngasup njadiken kai pe serta. E maka genduari i bas kita lit pengarapen si terulin, dalanta ngerembaki Dibata. 7:20 Tambah si e lit ka sumpah Dibata. Asum kalak Lewi jadi imam la lit sumpah Dibata e. 7:21 Tapi Jesus jadi imam arah sumpah; e me asum nina Dibata man baNa, "Tuhan enggo ersumpah, janah asa ndigan pe la mobah ukurNa, 'Kam jadi imam rasa lalap.' " 7:22 Kelebihen sumpah enda erbahan Jesus enggo jadi jaminen kerna iketen padan si terulin. 7:23 Kelebihen si deban e me imam-imam Lewi e nterem, sabap lawes mate ia kerina, e maka la ia ngasup nerusken dahinna. 7:24 Tapi Jesus nggeluh rasa lalap, janah dahinNa selaku imam la igantiken kalak si deban. 7:25 E maka kalak si ndahi Dibata arah Ia, ngasup Ia nelamatkenca seh rasa lalap alu serta, sabap Ia nggeluh rasa lalap guna ertoto man Dibata kerna kalak e. 7:26 Dage Jesus me Imam Simbelin si ncukupi kerina keperlunta. Ia badia; la lit salahNa ntah pe dosaNa. Ia enggo ipeserap Dibata i bas manusia si erdosa nari, dingen enggo ipeganjang Dibata ganjangen asa langit. 7:27 Labo bali Ia ras Imam-imam si Mbelin si deban. Ia la perlu mpersembahken persembahen tutungen tep-tep wari, subuk kerna dosaNa bage pe kerna dosa jelma si nterem. Sada ngenca ipersembahkenNa, sekali seh rasa lalap, e me asum ipersembahkenNa diriNa. 7:28 Undang-undang Musa netapken manusia si la serta jadi Imam si Mbelin; tapi padan Dibata si ibahanNa alu sumpah, si pudin reh asangken Undang-undang, netapken Anak e si enggo ibahan Dibata serta seh rasa lalap.
8:1 Palasna percakapenta enda e me: Lit sekalak Imam si Mbelinta si bage, si kundul arah kemuhen kursi Raja Sibadia i Surga. 8:2 Ia erdahin selaku Imam Simbelin i bas Ingan Sibadiana kal, e me i bas kemah si tuhu-tuhu, si ipanteki Tuhan, labo si ipanteki manusia. 8:3 Kerina Imam Simbelin itugasken gelah mpersembahken pemere ras persembahen rubia-rubia man Dibata. Bage me pe Imam si Mbelinta, arus lit si man persembahkenNa. 8:4 Bicara i doni enda Ia ringan, labo Ia imam, sabap enggo lit imam-imam si mpersembahken pemere rikutken Undang-undang kalak Jahudi. 8:5 Si tuhuna dahin si idahiken imam-imam e sada usihen dingen awih-awih kerna kai si lit i Surga nge ngenca. Bage me pe kerna Musa nai. Asum ipajekken Musa atena Kemah e nina Dibata man bana, "Perdiateken maka kerinana ibahanndu bali ras gambar si enggo icidahken man bandu i datas deleng e." 8:6 Tapi genduari, Jesus ngaloken dahin imam si ndauh ganjangen asa dahin imam si deban. Sabap padan si ibahan Dibata ras manusia erkelang-kelangken Jesus, e me padan si ndauh ulin, erkiteken palasna e me padan kerna barang si terulin. 8:7 Bicara la lit lepakna i bas padan si pemena, labo min ndai perlu padan si peduaken. 8:8 Tapi Dibata ndatken salah i bas bangsaNa, bagi si ikatakenNa i bas Pustaka Si Badia, "Nina Tuhan, 'Reh me warina Kubahan sada iketen padan si mbaru man bangsa Israel, bage pe man suku Juda.' 8:9 Padan e labo pagi bali ras iketen padan si enggo Kubahan man nini-ninina nai asum Kubabai ia ndarat i taneh Mesir nari. Nini-ninina e la patuh nandangi padan si Kubahan man bana, e me sabapna maka la ia Kuperdiateken nina Tuhan. 8:10 Genduari, enda me padan si Kubahan man kalak Israel i bas wari-wari si reh nina Tuhan: Kutamaken me Undang-undangKu ku bas ukurna, janah Kusuratken i bas pusuhna. Aku me jadi Dibatana janah ia me jadi bangsangKu. 8:11 Lanai bo pagi sekalak pe perlu ngajari temanna sada bangsa ntah ngataken man temanna sada kuta, 'Tandai min Tuhan.' Sabap kerina pagi ia nandai Aku, i bas si kitikna nari seh ku si mbelinna. 8:12 Kualemi pagi kerina salahna, janah Kulupaken dosa-dosana." 8:13 Alu ngerana kerna padan si mbaru e, icap Dibata maka padan si pemena enggo male; janah kerina si enggo male dingen la erguna e minter me masap.
9:1 I bas padan si pemena e, lit aturen-aturen cara ersembah bage pe cara erbahan ingan ersembah si ibahan manusia. 9:2 Sada kemah ipajekken, janah bagin si arah lebe igelari Ingan si Badia. I je lit tangke lampu, bage pe meja ras roti si ipersembahken man Dibata. 9:3 Bagin si arah bas, e me i pudi kire-kire si peduaken, lit ingan si igelari Ingan Sibadiana kal. 9:4 I je lit batar-batar emas si ipake man ingan nutung kumenen, bage pe Peti Perpadanen si ilapisi alu emas. I bas Peti e lit kudin emas si isin manna, bage pe ciken Arun si pernah ertunas, ras dua batu tulis si i je isuratken padan e. 9:5 I babo Peti e lit gana-gana mahluk si erkabeng, si nggambarken maka Dibata ringan i je. Kabengna kimbang i babo ingan e, e me ingan dosa-dosa ialemi. Tapi genduari la paksana nuriken si enda sada-sadai. 9:6 Bage me kerina barang-barang e iatur inganna. Imam-imam tep-tep wari bengket ku bas Kemah bagin si arah lebe e guna ndahiken dahinna. 9:7 Tapi si bengket ku bas Kemah bagin si arah bas, Imam Simbelin saja, e pe sekali setahun ngenca. Ibabana ku bas dareh si ipersembahken man Dibata man guna dirina bage pe man guna dosa-dosa si enggo ibahan bangsana alu la sengaja. 9:8 Arah litna aturen-aturen enda, tangkas iajarken Kesah Si Badia maka kidekah pajek denga Kemah bagin si arah lebe e, langa talang dalan ku Ingan Sibadiana kal. 9:9 Endame gambaren paksa si genduari. Ertina, maka kerina pemere ras persembahen rubia-rubia si ipersembahken man Dibata labo ngasup erbahan serta pusuh peraten kalak si ersembah e. 9:10 Peraturen-peraturen e kerina terjeng pangan, inemen ras erbage-bage cara lakon-lakon pembersihen nge ngenca. Si enda kerina aturen-aturen si arah darat, si ipake seh paksa ipebarui Dibata kerina si nasa lit ngenca. 9:11 Tapi Kristus enggo reh jadi Imam Simbelin kerna si mehuli si enggo lit i tengah-tengahta. Kemah inganNa erdahin terbelinen dingen tersertaan. Kemah inganNa erdahin e la manusia erbahanca; ertina Kemah e labo sada bagin i bas doni si itepa enda. 9:12 Sekali ngenca seh rasa lalap Kristus bengket ku bas Ingan Sibadiana kal. Asum Ia bengket ku je, la ibabaNa dareh kambing bajarna ntah anak lembu guna ipersembahken, tapi darehNa jine ipersembahkenNa lako ndatken keselamaten si rasa lalap man banta. 9:13 Dareh kambing bajarna ras dareh lembu jenggina bage pe abu lembu persembahen tutungen, ipirpirken ku kalak si la bersih rikutken aturen agama. Janah alu bage dareh ras abu ndai enggo mbersihken ia arah darat. 9:14 Adi dareh ras abu pe banci mbersihken, lebihen kap dareh Kristus! Arah kesah si la ermasap-masap ipersembahken Kristus diriNa jadi persembahen si serta man Dibata. DarehNa e mbersihken pusuh peratenta i bas perbahanen si sia-sia nari, gelah banci sisembah Dibata si nggeluh. 9:15 E me sabapna maka erkelang-kelangken Kristus, Dibata erbahan padan si mbaru, gelah kalak si enggo ipilih Dibata banci ngaloken pasu-pasu si la ermasap-masap si enggo ipadanken Dibata. Si enda banci seh sabap enggo lit sada kematen si nebusi manusia i bas salahna nari, asum ia i teruh kuasa padan si arah lebe e. 9:16 I ja lit surat wasiat i je arus ibuktiken maka si erbahan surat wasiat e enggo mate. 9:17 Sabap surat wasiat labo lit ertina adi nggeluh denga si erbahanca. Surat wasiat e esah adi enggo mate si erbahanca. 9:18 E me sabapna maka padan si arah lebe e pe merluken dareh guna pengesahenna. 9:19 Perlebe, ipebetehken Musa man bangsa e kerina pedah-pedah bagi si ikataken i bas Undang-undang. Jenari ibuatna dareh anak lembu ras lau, ipirpirkenna ku Kitap Undang-undang bage pe ku kerina bangsa e, alu hisop ras mbulu kambing si megara. 9:20 Nina Musa, "Enda me dareh si ngesahken padan si isuruh Dibata gelah idalankenndu." 9:21 Bage pe ipirpirken Musa dareh ndai ku babo Kemah ras ku kerina barang-barang si ipake i bas kebaktin. 9:22 Situhuna rikutken Undang-undang, menam kai pe ibersihken alu dareh. Bage pe dosa ialemi alu ngamburken dareh ngenca. 9:23 Dage kerina barang-barang si jadi gambar barang-barang Surga arus ibersihken alu cara si enda ndai. Tapi guna barang-barang Surga e, situhuna merluken persembahen si ndauh terulin. 9:24 Sabap Kristus labo bengket ku bas Ingan Sibadia si ibahan manusia, si jadi gambar Ingan Sibadia si tuhu-tuhu. Tapi Ia bengket ku Surga, i ja genduari ia ngadap ku Dibata man gunanta. 9:25 Imam si mbelin kalak Jahudi tep-tep tahun bengket ku Ingan si Badia alu maba dareh asuh-asuhen. Tapi Kristus labo rusur ku bas mpersembahken diriNa. 9:26 Sabap adi bage enggo minndai megati Ia ngenanami kiniseran kidekah tembe doni enda. Tapi situhuna sekali ngenca Ia reh seh rasa lalap, asum nandangi seh ku kedungenna jaman enda, guna nasapken dosa alu mpersembahken diriNa. 9:27 Kerina manusia la banci la mate sekali, janah kenca bage iadili Dibata. 9:28 Bage pe sekali ngenca Kristus mpersembahken diriNa guna ngangkut dosa jelma si nterem. Kenca bage reh me Ia sekali nari, e maka dosa pe masap, janah kalak si nimai Ia selamat.
10:1 Undang-undang kalak Jahudi labo Undang-undang si serta si la lit man pandangen. Tapi Undang-undang e awih-awih kerna si mehuli si reh pagin. Tep-tep tahun persembahen si gelgel saja ngenca ipersembahken. Banci kin serta kalak si ndahi Dibata ibahan Undang-undang arah nehken persembahen? 10:2 Adi tuhu-tuhu kin enggo bersih kalak si nembah Dibata e i bas dosa-dosana nari, lanai akapna salah bana, janah lanai ia perlu erbahan persembahen. 10:3 Tapi persembahen si ibahanna tep-tep tahun e ngingetken kalak kerna dosa-dosana. 10:4 Sabap dareh lembu jenggi ras dareh kambing bajarna ndigan pe la ngasup nasapken dosa. 10:5 Erkiteken si e me maka asum Kristus nandangi reh ku doni enda nina man Dibata bagi si tersurat i bas Pustaka Si Badia, "La atendu bage persembahen ras pemere, tapi enggo isikapkenNdu sada kula man bangKu. 10:6 La ateNdu ngena asuh-asuhen si itutung i babo batar-batar persembahen, ntah persembahen-persembahen guna nasapken dosa. 10:7 E maka ningku, 'I jenda Aku, o Dibata, guna ndalanken si ngena ateNdu, bagi isuratken kerna Aku i bas Pustaka.' " 10:8 Perlebe ikatakenNa, "La ateNdu bage dingen la ateNdu ngena persembahen ras pemere ntah rubia-rubia si itutung i babo batar-batar persembahen ras persembahen guna nasapken dosa." IkatakenNa si enda aminna pe kerina persembahen e ipersembahken rikutken Undang-undang. 10:9 Jenari nina, "I jenda Aku, o Dibata, guna ndalanken si ngena ateNdu." Erkiteken si e lanai ipake Dibata persembahen si ndekah, janah isambariNa alu persembahen Kristus. 10:10 Arah peraten Dibata kita enggo bersih i bas dosa nari, erkiteken Jesus Kristus enggo mpersembahken kulaNa sekali saja ngenca. 10:11 Kerina imam kalak Jahudi tedis ndahiken dahinna tep-tep wari. Bali lalap persembahen si ipersembahkenna. Tapi ndigan pe persembahen e la ngasup nasapken dosa. 10:12 Tapi Kristus sekali ngenca erbahan persembahen guna dosa, e me persembahen si erguna seh rasa lalap; jenari kundul Ia arah kemuhen Dibata. 10:13 I je me Ia genduari nimai, seh itamaken Dibata imbang-imbangNa jadi dedeh-dedehen naheNa. 10:14 Dage alu persembahen si serta, ibahan Kristus jadi serta kalak si ibersihken i bas dosa-dosana nari. 10:15 Kesah Si Badia pe ersaksi man banta. Perlebe nina, 10:16 "Enda me si nandangi Kubahan ras ia kerina i bas wari-wari si reh nina Tuhan: Kutamaken me Undang-undangKu ku bas pusuhna, janah Kusuratken me ku bas ukurna." 10:17 Tole nina, "Kulupaken me dosa-dosana ras perbahanenna si jahat." 10:18 Dage adi enggo ialemi dosa-dosa ras perbahanen si jahat e, lanai lit gunana nehken persembahen pengalemi dosa. 10:19 Dage erkiteken kematen Jesus, o senina-senina, enggo bebas kita bengket ku bas Ingan Sibadiana kal. 10:20 Enggo italangi Jesus man banta sada dalan si mbaru, sada dalan si nggeluh, arah kire-kire, e me kap kulaNa. 10:21 Lit Imam si Mbelinta; e me si jadi kepala i bas rumah Dibata. 10:22 Dage sirembakkenlah dirinta ku Dibata alu tutus ate dingen kiniteken si tetap. Alu pusuh peraten si bersih i bas penggejapen ersalah nari, bage pe alu kula si enggo ibersihken alu lau meciho, sideherilah Ia. 10:23 Tetaplah si gelem pengarapen si enggo siakui, sabap tek kita maka isehken Dibata nge padanNa. 10:24 Marilah kita sisampat-sampaten gelah keke ukurta guna nehken keleng ate ras ndalanken si mehuli. 10:25 Ola kita la reh ku perpulungen, bagi si ibahan piga-piga seninanta. Tapi lebih asa si e siiah-iahenlah kita sabap sieteh maka wari Tuhan, e me wari kerehenNa, reh me. 10:26 Sabap adi tetap denga kita sengaja erbahan dosa, aminna pe enggo sieteh kai si ngena ate Dibata, lanai lit persembahen si deban si banci nasapken dosanta. 10:27 Si lit denga e me si man kebiaren si nandangi jadi: ukumen ras api si merawa si engkernepken kalak si ngelawan Dibata! 10:28 Si la patuh man Undang-undang Musa iukum seh mate, alu la lit ampunen, kenca tereteh salahna arah dua ntah telu kalak saksi. 10:29 Apai denga ka kalak si la ngergaken Anak Dibata sitik pe! Kalak si mekarus nandangi padan Dibata si enggo mbersihken ia i bas dosa nari! Si megombang nandangi Kesah Dibata si melias man ia! Gejaplah maka ndauh beraten ukumenna! 10:30 Sabap sitandai nge si ngataken, "Kuukum me pagi! Kubalas me pagi!" Tole pe ikatakenNa, "Iadili Tuhan me pagi bangsaNa." 10:31 Ngeri kal adi ndabuh ku bas tan Dibata si nggeluh. 10:32 Ingetlah kuga nai pergeluhndu. Paksa e nai, kenca kam iterangi sinalsal Dibata, melala reh kiniseran man bandu, tapi la kam talu i bas perbeben e. 10:33 Megati nai kam igombangi dingen isakiti kalak i lebe-lebe jelma si nterem. Megati pe kam nggit ikut ras kalak si bage. 10:34 Ikut pe kam erceda ate ras kalak si ipenjaraken. Janah keri erta-ertandu irampas kalak, igengkenndu e alu meriah ukur, sabap ietehndu maka lit denga si terulin man bandu, si tahan seh rasa lalap. 10:35 Dage ola pulahi pengarapenndu, sabap ietehndu pengarapen e mbelin upahna. 10:36 Perlu kal kam megenggeng guna ndalanken si ngena ate Dibata gelah ialokenndu kai si ipadankenNa. 10:37 Sabap bagi lit tersurat i bas Pustaka Si Badia, "Lanai bo ndekah reh me si padan reh e, labo ipelawen-lawenna kerehenNa. 10:38 Kalak si bujur ndat kegeluhen arah kiniteken. Tapi adi lit si murtad la ateKu ngena ia." 10:39 Kita enda labo kalak si murtad dingen bene. Tapi kita kalak si erkiniteken seh tendinta selamat.
11:1 Erkiniteken ertina tek nandangi kai si iarapken kita, tek kerna si la idah. 11:2 Erkiteken kinitekenna kalak sinuria ipujiken Dibata. 11:3 Erkiteken tek man Dibata kap maka siangka kerina si nasa lit Dibata njadikenca arah kataNa; kerina si teridah ijadikenNa i bas si la teridah nari. 11:4 Erkiteken kiniteken Abil man Dibata maka ipersembahkenna man Dibata persembahen si ulin asangken persembahen Kain. Perbahan ia tek, dat pujin ia i bas Dibata nari maka ia kalak bujur, sabap ialoken Dibata persembahenna. Erkiteken tek maka ngerana denga ia genduari aminna pe ia enggo mate. 11:5 Erkiteken kiniteken Enoh man Dibata maka la ia mate. Tapi ia iangkat ku Dibata, janah ise pe la ngasup njumpai ia, sabap ia enggo iangkat Dibata. I bas Pustaka Si Badia lit tersurat maka ope denga Enoh iangkat enggo leben ibahanna si sentudu ras peraten Dibata. 11:6 Ise pe la ngasup ndalanken si sentudu ras peraten Dibata adi la kin erkiniteken. Sabap kerina si reh ndahi Dibata arus tek maka Dibata lit dingen iberekenNa upah man kalak si ndarami Ia. 11:7 Erkiteken tek Nuah man Dibata maka ibegina kata pertenget i bas Dibata nari, kerna si nandangi reh si la idahna. Ikutkenna kata Dibata, jenari ibahanna sada perahu si dungna nelamatken ia ras keluargana. Erkiteken si e doni isalahken, janah Nuah ikataken Dibata benar erkiteken kinitekenna. 11:8 Erkiteken tek Abraham man Dibata maka asum Dibata erdilo man bana, patuh ia, berkat ia ku negeri si ipadanken Dibata man bana. Itadingkenna negerina la ietehna ku ja ia lawes. 11:9 Erkiteken tek man Dibata maka ia nggit lajang i bas negeri si enggo ipadanken Dibata man bana. Ia ringan i bas kemah bali ras Isak ras Jakup si ngaloken padan si seri i bas Dibata nari. 11:10 Sabap Abraham nimai kuta si enggo irencanaken dingen ipanteki Dibata, e me kuta si nteguh palasna. 11:11 Erkiteken tek Sara man Dibata maka banci mupus aminna pe ia enggo metua. Tek ia maka isehken Dibata kai si enggo ipadankenNa. 11:12 Aminna pe paksa e nai Abraham tempa-tempa enggo mate, tapi i bas si sekalak enda nari reh kesusuren si nterem bagi bintang i langit dingen kersik i tepi lawit si la terbeligai. 11:13 Kerina kalak enda mate i bas kiniteken. Kai si ipadanken Dibata la ialokenna, tapi i dauh-dauh nari enggo idahna si e, e maka meriah iakapna. Terang-terang iakuina maka ia kalak perlajang dingen kesilang i doni enda. 11:14 Kalak si ngakui si e terang icidahkenna maka ia ndarami negeri si jadi negerina jine. 11:15 Lanai atena tedeh nandangi negerina si mbarenda si enggo itadingkenna. Adi tedeh kin atena banci denga nge min ndai ia mulihken ku je. 11:16 Tapi tedehen atena negeri si terulin, e me negeri si i Surga. E me sabapna maka la mela Dibata jadi Dibata kalak ndai, sabap enggo isikapkenNa sada kuta man kalak enda kerina. 11:17 Erkiteken tek Abraham man Dibata maka ipersembahkenna anakna Isak, asum ia iuji Dibata. Man Abraham me ibahan Dibata padan e, tapi amin bage gia nggit nge Abraham mpersembahken anakna si tonggal e. 11:18 Enggo ikataken Dibata man Abraham, "Arah Isak me iterusken kesusurenndu." 11:19 Tek Abraham maka Dibata erkuasa pekeke Isak i bas si mate nari; janah banci ikataken maka i bas si mate nari me ialoken Abraham si Isak. 11:20 Erkiteken tek Isak man Dibata maka erpadan ia mereken pasu-pasu man Jakup ras Esau kerna kegeluhen kalak enda denggo. 11:21 Erkiteken tek Jakup man Dibata me maka ipasu-pasuna anak Jusup sada-sadai ope denga ia mate. Alu erciken-ciken isembahna Dibata. 11:22 Erkiteken tek Jusup man Dibata maka ngerana ia muatna mate kerna perberkat kalak Israel i taneh Mesir nari bage pe kerna kai si arus ibahan nandangi tulan-tulanna. 11:23 Erkiteken tek orang tua Musa man Dibata maka ibunikenna Musa seh umur telu bulan. Idahna maka anak e seh kal jilena, la ia mbiar ngelawan peraturen si ibahan raja. 11:24 Erkiteken tek Musa man Dibata maka kenca ia mbelin lanai ia nggit ikataken anak Putri Raja Mesir. 11:25 Ulin iakapna ngenanami kiniseran ras bangsa Dibata asangken ntabeh kentisik i bas dosa. 11:26 Igejapna maka ndauh ergan ngenanami kiniseran igombang-gombangi kalak guna Mesias e asangken kerina erta-erta negeri Mesir, sabap ia ngenehen upah si reh pagin. 11:27 Erkiteken tek Musa man Dibata maka itadingkenna Mesir alu la mbiar man pernembeh raja. La ia nggit mulihken tempa-tempa idahna Dibata si la teridah e. 11:28 Erkiteken kinitekenna e me maka ia ngelitken Paskah, janah isuruhna kalak mirpirken dareh ku pintun, gelah anak sintua dilaki i bas jabu kalak Israel ola ibunuh Malekat Kematen. 11:29 Erkiteken tek man Dibata maka bangsa Israel banci ngepari Lawit Merah, tempa-tempa erdalan ia arah daraten. Asum kalak Mesir erdalan ka arah e, itelen lau e ia. 11:30 Erkiteken tek bangsa Israel man Dibata maka runtuh benteng kota Jeriho kenca kalak Israel erdalan engkeleweti kota e pitu wari dekahna. 11:31 Erkiteken Rahap, diberu si dahinna ndayaken dirina e, tek man Dibata me maka la ia ikut ibunuh ras kalak si ngelawan Dibata, sabap ialo-alona alu dame mata-mata kalak Israel e. 11:32 Perlu denga kin kuterusken? Lanai aku sempat nuriken kerna Gideon, Barak, Simson, Jepta, Daud ras Samuel, bage pe kerna nabi-nabi. 11:33 Erkiteken tek kalak enda man Dibata maka iperangina negeri-negeri dingen menang ia. Idalankenna kai persuruhen Dibata, e maka ialokenna kai si enggo ipadanken Dibata. Isompelna babah singa. 11:34 Inimpetina api si mejin pergarana. Pulah ia i bas babah pedang nari. Kote ia, tapi dungna jadi megegeh. Megegeh ia i bas perang. Italukenna serdadu-serdadu bangsa si deban. 11:35 Erkiteken tek diberu-diberu e man Dibata me maka ipekeke Dibata keluargana i bas si mate nari. Si debanna la nggit ngaloken kebebasen, tapi mate isiksa ia, gelah nggeluh ia mulihi ku bas kegeluhen si terulin. 11:36 Lit isaling-saling dingen icambuk. Lit pe si igariken dingen si ipenjaraken. 11:37 Lit ibenteri alu batu, lit ikeret duaken kulana alu gaji, janah lit ka pe ibunuh alu pedang. Perlajang ia erdalan-dalan makeken uis i bas kulit biri-biri ntah i bas kulit kambing nari; kalak enda musil, iayak-ayak, dingen isiksa. 11:38 Lanai metunggung doni enda inganna! Bagi kalak si mengongsi ia ku gurun pasir bage pe ku deleng-deleng. Cebuni ia i bas guha bage pe i bas lubang. 11:39 Mbelin kal kemenangen si idatken kalak enda erkiteken tek ia man Dibata. Amin bage gia langa bo ialokenna kai si enggo ipadanken Dibata. 11:40 Sabap lit sura-sura Dibata si terulin man banta. Dibata ersura-sura maka raduken kita ngenca kalak ndai banci jadi serta.
12:1 Dage man banta, nteremkap saksi si ngkeleweti kita. E maka siaguilah kerina si ngambati i bas perdalanenta, bage pe dosa e si lalap ncerawisi kita. Tutuslah ateta ngikuti perlumban si lit i lebe-lebenta. 12:2 Kempak Jesuslah kita natap, sabap ia me sumbul ras tujun kinitekenta. IgengkenNa ngenanami kiniseran i kayu persilang! Tapi erkiteken keriahen si nimai Ia, lanai iukuriNa mela mate i kayu persilang. Janah genduari kundul Ia arah kemuhen kursi kinirajan Dibata. 12:3 Ukurilah kuga belinna kiniseran Jesus ngalaken perlawanen si rehna i bas kalak perdosa nari. E maka ola kitik ukurndu, dingen ola kam putus asa. 12:4 Sabap i bas kam erbebe ngelawan dosa langa kam seh ngamburken dareh. 12:5 Lanai kin ingetndu pengajaren si ikataken Dibata man bandu selaku anak-anakNa? "O anakKu, perdiatekenlah adi iajarken Tuhan kam, janah ola kitik ukurndu adi irawaiNa kam. 12:6 Sabap iajarken Tuhan kalak si ikelengiNa, janah iligasNa tep-tep kalak si ialokenNa jadi anakNa." 12:7 Gengkenlah kiniseran si reh man bandu. Alokenlah e bagi ajar i bas sekalak bapa nari, sabap kiniseranndu e ncidahken maka ibahan Dibata kam bagi anak-anakNa. Lit kin sekalak anak si la ididik bapana? 12:8 Adi la kam iajarken bagi anak-anakNa si deban, labo kam anak si sah, tapi anak haram. 12:9 I doni enda lit bapanta. Bapanta e ndidik kita, janah mehamat kita man bana. Adi bage tentu arus pe lebihen sibahan nandangi Bapanta si i Surga, gelah kita nggeluh. 12:10 Bapanta si i doni enda kentisik ngenca kita iajarkenna, bagi mehuli iakapna. Tapi kita iajarken Dibata guna kiniulinta, gelah banci kita dat bagin i bas kebadianNa. 12:11 Asum kita iajarken, ceda ateta, la siakap meriah. Tapi dungna, kita si enggo terdidik, pengajaren e erbahanca kita nggeluh rikutken si ngena ate Dibata, seh maka malem ateta. 12:12 E maka angkatlah tanndu si kote, janah pegegehlah tiwenndu si la ergegeh! 12:13 Tetaplah kam erdalan i bas dalan si pinter gelah nahendu si tersiher la ersuina, tapi gelah malem. 12:14 Meriahlah ras ise pe, janah usahakenlah nggeluh bagi si ngena ate Tuhan, sabap adi la bage ise pe labo banci ngidah Tuhan. 12:15 Jagalah maka sekalak pe ola surut i bas lias ate Dibata. Jagalah maka sekalak pe ola bagi sinuan-sinuan si pagit uratna, si turah nuhsahi nterem jelma alu racunna. 12:16 Jagalah maka ola sekalak pe erlagu la mehuli ntah la ngergai si meherga iakap Dibata bagi si Esau, si ndayaken hakna selaku anak sintua, erkiteken sada mangkuk pangan. 12:17 Ietehndu maka dungna ersura-sura Esau ngaloken pasu-pasu i bas bapana nari; tapi itulak ia aminna pe ipindona alu iluh mambur, sabap la lit idatna dalan guna ngobah kai si enggo ibahanna. 12:18 Kam labo reh ku Deleng Sinai, deleng si banci idadap; i je lit api si gurlah, gelap mesangat, angin meter; 12:19 sora terompet, Sora Ngerana. Asum ibegi bangsa Israel sora e, mindo ia alu mesangat gelah olanai min ibegina. 12:20 La ia ngasup megisa sabap lit perentah i bas Sora e nari, "Kasa kai si ndadap deleng e, subuk jelma ntah asuh-asuhen, la banci la ibenteri alu batu seh mate." 12:21 Kai si teridah i je seh kal mejinna, seh maka Musa pe ngerana nina, "Mbiar dingen ngirgir kal aku!" 12:22 Tapi kam enggo reh ku Deleng Sion bage pe ku Kuta Dibata si nggeluh, e me Jerusalem si i Surga ras meribu-ribu malekatNa. 12:23 Kam enggo reh ku perpulungen si meriah, e me perpulungen kerina anak sintua i bas Dibata, si gelarna enggo tersurat i Surga. Kam enggo reh ku Dibata, Hakim kerina manusia, bage pe ku kerina tendi kalak bujur si enggo serta ibahan Dibata. 12:24 Kam enggo reh ku Jesus, e me kelang-kelang padan si mbaru, bage pe ku dareh si ipirpirken, si maba berita si ndauh ulin asangken si ibaba dareh Abil. 12:25 E maka jaga gelah ola la ibegikenndu Si Ngerana e. Adi kalak si la megiken Ia Si Ngerana i Deleng Sinai mbarenda pe la pulah, apai denga ka kita si la megiken Ia si ngerana i Surga nari, tentu la banci pulah i bas Ia nari! 12:26 Paksa si e nai meger doni enda ibahan soraNa. Tapi genduari enggo erpadan Ia, "Sekali nari ngenca pagi Kuugur, labo saja doni enda, tapi Surga pe." 12:27 Kata "sekali nari ngenca" ngataken maka kerina si nasa lit si enggo ijadiken Dibata si banci iugur nandangi isambari, gelah tading kai si la terugur. 12:28 E maka sikataken bujur man Dibata, sabap iberekenNa man banta kerajan si la terugur. Sikatakenlah bujur dingen sisembah Dibata bagi si ngena ateNa, alu mehamat dingen mbiar; 12:29 sabap Dibatanta situhuna api si ngkernepken kap.
13:1 Tetaplah kam sikeleng-kelengen bagi kalak si ersenina i bas Kristus. 13:2 Ingetlah ngalo-ngalo kalak si reh kesilang ku rumahndu. Lit piga-piga, asum ialo-alona kalak si kesilang ku rumahna, alu la ietehna enggo ialo-alona malekat. 13:3 Ingetlah kalak si i bas penjara, tempa-tempa kam pe i bas penjara. Ingetlah kalak si ngenanami kiniseran erkite-kiteken perbahanen kalak, tempa-tempa kam pe ikut ngenanami kiniseran. 13:4 Kerinalah kam ngergaken perjabun. Kegeluhen perbulangen ras ndehara i bas perjabun la banci melket. Dibata pagi ngukumsa kalak si erlagu la mehuli bage pe si erlua-lua. 13:5 I bas geluhndu ola kam merangap nandangi duit. Ermengkahlah atendu asa si lit i bas kam. Sabap nina Dibata, "Asa ndigan pe la kam Kutadingken, asa ndigan pe la kam Kupulahi." 13:6 E maka melciklah ukurta ngatakenca, "Tuhan kap si nampati aku. E maka labo aku mbiar. Kai kin banci ibahan kalak man bangku?" 13:7 Ingetlah peminpin-peminpin si nai, si peseh Kata Dibata man bandu. Ingetlah kuga nai pergeluhna ras perpatena, janah usihlah kinitekenna man Dibata. 13:8 Jesus Kristus bali kap nderbih, sendah, seh rasa lalap. 13:9 Ola pelepas erbage-bage pengajaren si geduk mabai kam papak. Simehulina, pegegehilah pertendinndu alu lias ate Dibata, labo alu ndalanken peraturen-peraturen kerna pangan. Kalak si ndalanken peraturen-peraturen e, labo lit gunana man bana. 13:10 Lit kap batar-batar ingan persembahenta; imam-imam kalak Jahudi si erdahin i bas Kemah e la banci muat pangan i bas batar-batar e nari. 13:11 Imam si Mbelin kalak Jahudi maba dareh ku Ingan si Badiana kal gelah ipersembahkenna jadi persembahen guna dosa; tapi daging asuh-asuhen e itutung i daraten ingan erkemah. 13:12 Rikutken si e me pe maka Jesus ngenanami kiniseran seh mate i darat gerbang kota, guna mersihken anak-anak Dibata i bas dosa nari alu darehNa. 13:13 Dage marilah kita lawes ndahi Ia ku darat ingan erkemah janah ikut igombang-gombangi kalak ras Ia. 13:14 Sabap labo lit kuta si tetap man banta i doni enda; kita ndarami kuta si tetap pagin. 13:15 E maka sisehkenlah puji-pujin man Dibata katawari pe, si jadi persembahenta arah Kristus, e me persembahen arah babah si ngakui maka Ia kap Tuhan. 13:16 Ola lupa erbahan si mehuli dingen sisampat-sampaten, sabap si e me persembahen si ngena ate Dibata. 13:17 Patuhlah kam man peminpinndu janah ikutkenlah katana. La erlatih-latih ikepkepna pertendinndu, sabap ia ertanggung jabap man Dibata. Adi patuh kam man bana, meriah ukurna erdahin. Tapi adi lang, ceda atena ndahi dahin e, janah adi bage la lit gunana man bandu. 13:18 Tetaplah ertoto kerna kami. Tek kami maka bersih pusuh peraten kami, sabap lalap nge kami ersura-sura ndalanken si mehuli. 13:19 Tole kupindoken man bandu, maka ertoto kam man Dibata gelah banci pedas aku mulih ndahi kam. 13:20 Dibata enggo mpekeke Tuhanta Jesus i bas si mate nari. Ia me Permakan Simbelin nandangi kita biri-biriNa. Janah arah kematenNa iesahken Dibata padan si rasa lalap e. 13:21 Dibata, sumbul kemalemen ate e gelah si ncukupi keperlunndu guna ndalanken si sentudu ras peratenNa. Janah Dibatalah erdahin i bas kita arah Jesus Kristus gelah kita ngelakoken kai si ngena ateNa. Man Kristuslah kemulian seh rasa lalap. Amin. 13:22 O senina-seninangku, kupindoken man bandu, begikenlah alu saber kata pengajuk enda; sabap surat si kubahan enda labo gedang kal. 13:23 Perlu kuakap ietehndu maka seninanta Timotius enggo ndarat i bas penjara nari. Adi pedas ia reh, ras kami pagi ndahi kam. 13:24 Kataken mejuah-juah i bas kami nari man kerina peminpinndu ras man kerina teman-temanta si sada kiniteken. Senina-seninanta kalak Itali ngataken mejuah-juah man bandu. 13:25 Lias ate Dibata ras kam kerina gelah.
1:1 Surat enda i bas aku nari, Jakup, persuruhen Dibata ras Tuhan Jesus Kristus. Mejuah-juah man bandu kerina anak-anak Dibata si merap i taneh perlajangen. 1:2 O senina-seninangku, sangap min iakapndu bandu adi reh erbage-bage percuban ngkenai kami. 1:3 Sabap ietehndu adi kinitekenndu tetap tahan ngalaken percuban-percuban e, kam jadi kalak megenggeng. 1:4 Tetaplah kam megenggeng seh kinigenggengenndu serta, maka kam dewasa i bas kai-kai pe, dingen la kekurangen. 1:5 Tapi adi lit i bas kam si kurang kepentarenna, ertotolah ia man Dibata si mereken kepentaren man bandu. Sabap Dibata kap mereken kepentaren man kerina jelma alu melumbar dingen dem perkuah ate. 1:6 Tapi ertoto arus tek, ola monce-once. Kalak si monce-once bali kap ras gelumbang i lawit si ibentuken angin ku jah ku jenda. 1:7-8 Kalak si bage ertupang ukurna; la ia ngasup muat keputusen i bas kerina si ibahanna. E maka la pada iarapkenna ndatken kai pe i bas Tuhan nari. 1:9 Megahlah iakap kalak musil adi ipeganjangken, 1:10 bage pe megahlah iakap kalak bayak adi ipeteruk. Sabap kalak bayak kernep me pagi bagi bunga dukut. 1:11 Asum matawari reh ganjangna, wari pe reh lasna, melus dukut e, e maka nartar bungana janah bene pe jilena. Bage me pe kalak bayak, kernep me sanga ndahiken dahinna. 1:12 Ketuahen kalak si megenggeng ibas erbage-bage percuban. Sabap kenca menang i bas percuban e, ialokenna me ulih kemenangenna, e me kegeluhen si enggo ipadanken Dibata man kalak si ngkelengi Dibata. 1:13 Adi lit kalak ikenai percuban, ola min nina, "Percuban enda rehna i bas Dibata nari." Sabap Dibata la banci icubai si jahat, janah ise pe labo icubai Dibata. 1:14 Tapi kalak kena percuban adi ia tergoda jenari kena siding sura-surana si jahat. 1:15 Janah adi sura-surana si jahat e ipejangjang, tubuh me dosa. Adi dosa e enggo ilakoken, buahna e me kematen. 1:16 Ola kam tertipu o senina-senina si kukelengi! 1:17 Kerina pemere si mehuli ras serta rehna i Surga nari; pemere e ipesusur Dibata, si njadiken kerina si ersinalsal i langit. Dibata tetap nge; labo Ia erdauhna i bas kita nari seh maka itadingkenNa awih-awih si gelap i sekelewetta. 1:18 Rikutken peratenNa kita enggo ipekuanakNa arah kataNa si tuhu-tuhu, gelah kita si meganjangna i bas kerina si ijadikenNa. 1:19 O senina-seninangku, ingetlah! Kerina arus metinggel, tapi ola minter ngerana, dingen ola sukah merawa. 1:20 Rawa manusia labo ngasup erbahan si mehuli si ngena ate Dibata. 1:21 E maka pedauhlah i bas kam nari kebiasan-kebiasan si melket ras lagu langkah si jahat. Alokenlah alu meteruk ukur kata si isuanken Dibata i bas pusuhndu, sabap kata e ngasup nelamatken kam. 1:22 Ola tipu bandu alu megi-megi kataNa saja, tapi dalankenlah kai si iajarken Kata e. 1:23 Kalak si megi Kata e tapi la idalankenna, bali me ia ras kalak si ercurmin, janah idahna kuga rupana jine. 1:24 Ipepayona dirina, jenari lawes ia, janah minter lupa ia kuga rupana. 1:25 Kalak si mperdiateken pedah Dibata alu mehuli, si terus mpergermetkenca, si la megi-megi saja, kalak si bage ipasu-pasu Dibata i bas kerina pendahinna. Sabap pedah Dibata e serta kap dingen ngasup mbebasken manusia. 1:26 Ise kin erpengakap maka ia kalak si eragama? Adi la ijagana dilahna sia-sia me ia eragama e, janah itipuna dirina. 1:27 Agama si tuhu-tuhu dingen si mehuli rikutken pengakap Dibata Bapanta e me: pekena-kena anak-anak melumang ras kalak si enggo mbalu si lit i bas kiniseran, bage pe njaga diri gelah ola icedaken doni enda.
2:1 O senina-seninangku, selaku kalak si tek man Tuhanta Jesus Kristus, Tuhan Simulia, ola kam rayo-ayo. 2:2 Umpamana reh ku perpulungenndu sekalak bayak, make cincin emas, ruisken uis mejile; bage pe reh ka sekalak musil, uisna merigat-rigat. 2:3 Adi hamaten kam man si mejile uisna janah nindu, "Mari, ku tengah kam kundul," tapi si musil ipelepasndu tedis ntah pe nindu, "Arah duru ena me kundulken," 2:4 salah kam. Rayo-ayo kam, dingen perbahanenndu e erpalasken sura-sura si la mehuli. 2:5 O senina-seninangku si kukelengi, begikenlah! Ipilih Dibata kalak musil i bas doni enda gelah bayak ia i bas kinitekenna. Kalak enda pagi dat bagin ngenanami kemalemen ate i bas kinirajan si ipadanken Dibata man kalak si erkeleng ate man baNa. 2:6 Tapi kam megombang man kalak musil! Ma kin kalak bayak nge si ndedeh kam dingen ngaduken kam ku pengadilen! 2:7 Ma kin ia nge si enggo megombang nandangi gelar si mehuli si enggo ibereken man bandu, e me gelar Kristus? 2:8 Adi iikutkenndu Undang-undang kinirajan Dibata, bagi lit tersurat i bas Pustaka Si Badia, "Kelengilah temanndu manusia bagi kam ngkelengi dirindu," mehuli kap perbahanenndu e. 2:9 Tapi adi rayo-ayo kam, erdosa kam, janah Undang-undang ngukum kam selaku kalak si ngelanggar Undang-undang. 2:10 Sada la idalanken kalak Undang-undang e, kerina enggo ilanggarna. 2:11 Sabap Ia si ngataken, "Ola erlua-lua," Ia pe si ngataken, "Ola munuh." Jadi aminna la pe kam erlua-lua, tapi adi munuh kam, kam enggo ngelanggar Undang-undang. 2:12 Ngerana dingen erdahinlah bagi kalak si nandangi iadili alu Undang-undang si erbahanca manusia bebas. 2:13 Kalak si la rate mekuah man kalak si deban, iukum alu la lit perkuah ate. Tapi perkuah ate gegehen asa ukumen. 2:14 O senina-seninangku! Kai gunana ikataken kalak, "Tek aku man Dibata," adi labo teridah arah perbahanenna? Banci kin kinitekenna e nelamatken ia? 2:15 Umpamana lit seninanta ntah turangta si sada kiniteken, si la lit uisna dingen la lit nakanna, 2:16 kai gunana ikatakenndu man bana, "Mejuah-juah! Pake pakenndu gelah ola kam bergehen, besuri man," adi labo iberekenndu keperlun geluhna? 2:17 Bage me pe kerna kiniteken. Adi kiniteken sue labo rikut ras perbahanen, kiniteken si bage mate kap. 2:18 Tapi lit si ngerana, "Sekalak lit kinitekenna, sekalak si deban lit perbahanenna." Jabapku man kalak si ngerana bage, "Cidahkenlah man bangku kuga banci kalak erkiniteken adi la rikut ras perbahanenna. Aku, kucidahken man bandu kinitekenku arah perbahanenku." 2:19 Ma tek kin kam maka sada ngenca Dibata? Merandal! Setan-setan pe tek nge, mbiar dingen nggirgir pe ia. 2:20 Oh, motu kal kam! Icidahken kin atendu man bandu maka kiniteken la rikut ras perbahanen e sia-sia nge? 2:21 Kuga nai nininta Abraham maka rembak ras Dibata? Arah perbahanenna nge; e me asum ipersembahkenna anakna Isak i babo batar-batar persembahen. 2:22 Langa kin iangkandu? Kinitekenna ras perbahanenna erdahin ras-ras. Kiniteken Abraham jadi serta arah perbahanenna. 2:23 Alu bage tuhu me si tersurat i bas Pustaka Si Badia, "Abraham tek man Dibata, janah erkiteken kinitekenna ialoken Dibata ia rembak ras diriNa." Erkiteken si e maka igelari ia teman Dibata. 2:24 Dage ietehndu maka manusia rembak ras Dibata labo erkiteken kinitekenna saja, tapi erkiteken perbahanenna. 2:25 Bage me pe kerna Rahap, diberu si dahinna ndayaken dirina e. Ia irembakken ras Dibata erkiteken perbahanenna, asum ialo-alona mata-mata e ku rumahna, bage pe isampatina kalak e lompat arah dalan si deban. 2:26 E maka bali ras kula la rikut ras kesah mate kap, bage me pe kiniteken la rikut ras perbahanen mate kap.
3:1 O senina-seninangku, ola kam nterem jadi si ngajari. Bagi ietehndu maka kita si ngajari lebihen pagi iadili asangken kalak si deban. 3:2 Kerina kita megati erbahan salah. Kalak si la enggo erbahan salah i bas ngerana serta kap, dingen terkuasaisa kap dirina. 3:3 I bas babah kuda lit sitamaken sangam gelah patuh ia man banta janah gelah banci sitegu ku ja ateta. 3:4 Bage pe kerna kapal, aminna pe galang kapal e, janah iembusken angin si meter, banci iatur dalanna alu kemudi si kitik. Kapal e erdalan rikutken sura-sura jurumudi. 3:5 Bage me pe kerna dilah, aminna kitik gia dilah e, banci nge megah akapna sabap mbelin pengaruhna. Nehenlah, sada kerangen si mbelang banci iciluk alu api si kitik. 3:6 Dilah e bali ras api. Dilah e kap ulu kejahaten. Dilah e ringan i bas kulanta janah icurnakenna kerina dirinta. Icilukna perdalanen kegeluhenta alu api si rehna i naraka nari. 3:7 Manusia ngasup pelemuk kerina rubia-rubia, janah enggo pe ipelemukna rubia-rubia si meliar, perik-perik, rubia-rubia si njoler, bage pe nurung. 3:8 Tapi ise pe la ngasup pelemuk dilah. Dilah e jahat dingen la terkuasai, dem racun si maba kematen. 3:9 Dilah e sipake guna ngataken bujur man Tuhan ras Bapanta, tapi sipake ka pe guna numpahi temanta manusia, si enggo ijadiken Dibata rikutken tempasNa. 3:10 Pengataken bujur ras sumpah ndarat i bas sada babah nari. O senina-seninangku, si enda la kal banci! 3:11 Labo lit ndarat lau si entebu ras lau si pagit i bas sada sumbul nari. 3:12 O seninangku, labo banci batang galiman erbuahken buah kembiri; labo banci batang anggur erbuahken galiman; bage pe labo banci sumbul lau masin pedarat lau malem. 3:13 Lit kin sekalak i tengah-tengahndu pentar dingen erpengangkan? Arus icidahkenna e arah kegeluhenna si mehuli, alu perbahanen mehuli si idalankenna alu meteruk ukur dingen kepentaren. 3:14 Tapi i bas ukurndu kam percian, perngilas, dingen dirindu saja ngenca iranakenndu. Ola megah iakapndu kerna si e, janah ola erbual nandangi si tuhu. 3:15 Si enda labo kepentaren si rehna i Surga nari, tapi biakna biak doni, biak binatang, biak setan. 3:16 I ja lit cian ate, ras ngukuri kepentingen diri sendiri saja, i je lit erbage-bage perubaten ras perjengilen. 3:17 Tapi kepentaren si rehna i datas nari si pemena e me bersih pusuh peraten, nggit erdame, lemah lembut, la megogo. Dem perkuah ate i bas ia dingen erbuahken perbahanen si mehuli. La rayo-ayo, ras tangkas ukur tangkas kata. 3:18 Tuhu payo maka si mehuli e me buah si iperani i bas benih perdamen si isuan kalak si erngena ate nandangi perdamen.
4:1 I ja nari kin rehna perjengilen ras perubaten si lit i tengah-tengahndu? Si e rehna i bas kerincuhenndu nandangi kesenangen, si la erngadi-ngadi erperang i bas dirindu. 4:2 Mengga atendu, tapi la idatndu, e maka munuh kam. Lit sura-surandu, tapi la seh, e maka erjengil ras rubat kam. La idatndu si isura-surakenndu perbahan la ipindondu man Dibata. 4:3 Janah adi ipindondu la idatndu, sabap erkiteken tujunndu la mehuli; kai si ipindondu guna pesenangken dirindu saja ngenca. 4:4 O kalak si erlua-lua i bas kiniteken! La kin ietehndu maka adi erteman kam ras doni enda, kam jadi imbang Dibata? Ise ersura-sura jadi teman doni enda, ibahanna kap dirina jadi musuh Dibata. 4:5 Ola iakapndu sia-sia si tersurat i bas Pustaka, "Kesah Si Badia si itamaken Dibata i bas kita ersura-sura gelah kita setia man baNa." 4:6 Amin bage gia belinen nge lias ate si iberekenNa asangken cemburuNa. Bagi lit tersurat i bas Pustaka Si Badia, "Itulak Dibata nge kalak si meganjang ukurna, tapi man kalak si meteruk ukurna iberekenNa lias ateNa." 4:7 E maka endeskenlah dirindu man Dibata. Lawanlah Iblis; kiam me Iblis e i bas kam nari. 4:8 Rembakkenlah dirindu ku Dibata, e maka Ia pe ngerembakken diriNa man bandu. Bersihkenlah tanndu o kam si erdosa! Bersihkenlah ukurndu o kalak si ertupang ukur! 4:9 Erceda atelah, tangis dingen ngandunglah; jadikenlah tawandu e jadi tangis; jadikenlah keriahenndu e jadi ndele ate! 4:10 Peteruklah bandu i lebe-lebe Tuhan, e maka ipeganjangNa kam. 4:11 O senina-seninangku, ola kam sipandang-pandangen. Ise mandang seninana, ntah nalahisa, mandang dingen nalahken Undang-undang kap ia. Adi isalahkenndu Undang-undang, ertina lanai ikutkenndu Undang-undang, tapi iadilindu. 4:12 Dibata ngenca si mereken Undang-undang dingen si ngadili manusia. Ia ngenca ngasup nelamatken ntah pe ngkernepken. Ise kin iakapndu kam maka iadilindu temanndu manusia? 4:13 Genduari bagikenlah katangku man bandu, o kam si ngataken, "Sendah ntah pagi berkat kami ku kuta si deban; i je kami ringan sada tahun dekahna, erbinaga ndatken untung si mbelin." 4:14 Si tuhuna kai jadi i bas geluhndu pagi pe la ietehndu! Kam bali ras remang si kentisik ngenca lit, jenari bene. 4:15 Arusna min ikatakenndu, "Adi ibere Tuhan, nggeluh denga kami janah ilakoken kami me si ah ntah si enda." 4:16 Tapi genduari meganjang ukurndu dingen meganjang kam ngerana. Kerina pengeranandu si meganjang e salah. 4:17 E maka erdosa me kalak si la ndalanken si mehuli si meteh kai patut idalankenna.
5:1 Genduari, begikenlah katangku, o kalak bayak! Tangis ras ngandunglah kam erkiteken kiniseran si nandangi reh ngkenai kam! 5:2 Kebayakenndu enggo macik, janah uisndu enggo ipangani ngetnget. 5:3 Emas ras pirakndu enggo tembesin, janah tembesina e me pagi ersaksi ngelawan kam. Itutungna me dagingndu bagi api. I bas wari-wari si arah pudi enda enggo ipepulungndu erta-erta. 5:4 La igalarindu upah kalak si rani i jumandu. Begikenlah penderkuhna! Penderkuh kalak si rani i jumandu enggo ibegi Dibata, Tuhan si Mada Kuasa. 5:5 Mewah dingen senang kal pergeluhndu i doni enda. Ipeburndu bandu guna wari penggelehen. 5:6 Kalak si la ersalah iukumndu dingen ibunuhndu, janah la kam ilawanna. 5:7 Dage o senina-seninangku, saberlah kam ngayak reh Tuhan. Nehenlah sekalak perjuma kuga ia saber nimai seh jumana mereken ulih si erguna. Saber ia nimai udan si reh nandangi merdang ras udan si reh kenca rumpah page. 5:8 Kam pe arus saber. Tetap min kam erpengarapen, sabap wari kerehen Tuhan seh me. 5:9 O senina-seninangku, ola kam jungut-jungut dingen sisalah-salahen, gelah ola kam iukum Dibata. Hakim e reh me; bengket me Ia. 5:10 O seninangku, ingetlah nabi si ngerana nai i bas gelar Tuhan. Usihlah saber atena ras kinigenggengenna i bas ngenanami kiniseran. 5:11 Sikataken malem atena erkiteken megenggeng ia. Enggo ibegindu kerna saber ate Jop, bage pe ietehndu maka dungna isampati Tuhan ia. Sabap Tuhan e perkuah dingen dem keleng ate. 5:12 I babo si e kerina o senina-seninangku, ola kam ersumpah tupung erpadan. Ola kam ersumpah alu gelar langit, ntah doni, ntah kai pe si debanna. Katakenlah "Ue" adi ue kin, janah "Lang" adi lang kin atendu, gelah ola kam kena ukumen. 5:13 Adi lit sekalak i bas kam ngenanami kiniseran, ertotolah ia man Dibata. Adi lit si ermeriah ukur, rendelah ia muji Dibata. 5:14 Adi lit si sakit, idilonalah pertua-pertua i bas perpulungen, gelah itotoken pertua-pertua e ia dingen iminakina i bas gelar Tuhan. 5:15 Pertoton si bage, si ibahan alu tek man Tuhan tentu pepalem kalak si sakit e. Malem me ia ibahan Tuhan i bas penakitna e nari, janah ialemi Tuhan me dosana si enggo ibahanna. 5:16 E maka akukenlah dosandu sekalak-sekalak i lebe-lebe temanndu, janah ertotolah kam pekepar kerna teman, gelah malem kam. Pertoton kalak si bujur ergegeh kal. 5:17 Nabi Elia pe manusia nge bali ras kita. Alu tutus ate ertoto ia gelah ola nusur udan, jenari lego telu setengah tahun dekahna. 5:18 Kenca ertoto ka ia mulihken, reh udan i langit nari, jenari taneh mereken asilna. 5:19 O senina-seninangku! Adi lit sekalak i tengah-tengahndu nari papak i bas pengajaren si tuhu-tuhu nari, jenari lit ka sekalak si negu ia mulihken, 5:20 ingetlah kata enda: Ise si negu kalak si erdosa gelah itadingkenna si papak e, iselamatkenna kap tendi si erdosa e i bas si mate nari, janah erkiteken ia, melala dosa ialemi Dibata.
1:1-2 Saudara-saudara umat pilihan Allah, yang tersebar di perantauan di daerah Pontus, Galatia, Kapadokia, Asia, dan Bitinia! Saya, Petrus, rasul Yesus Kristus, mengharap semoga Allah memberi berkat dan sejahtera kepadamu dengan berlimpah-limpah. Kalian dipilih menjadi umat Allah sesuai dengan rencana Allah Bapa. Dan Roh Allah sudah menjadikan kalian umat yang kudus, khusus untuk Allah, supaya kalian taat kepada Yesus Kristus dan disucikan oleh darah-Nya. 1:3 Marilah kita bersyukur kepada Allah, Bapa Tuhan kita Yesus Kristus! Ia sangat mengasihani kita, itu sebabnya Ia memberikan kepada kita hidup yang baru, dengan menghidupkan kembali Yesus Kristus dari kematian. Ini memberikan kita harapan yang kokoh. 1:4 Kita mengharap untuk memiliki berkat-berkat yang disediakan Allah bagi umat-Nya, yaitu berkat-berkat yang disimpan-Nya di surga, sehingga tidak dapat rusak, atau menjadi busuk ataupun luntur. 1:5 Semuanya itu adalah untukmu, karena kalian percaya kepada Allah. Maka kalian dijaga dengan kuasa Allah supaya kalian menerima keselamatan yang siap dinyatakan pada akhir zaman nanti. 1:6 Karena itu hendaklah kalian bersuka hati, meskipun sekarang untuk sementara waktu kalian harus menjadi sedih karena kalian mengalami bermacam-macam cobaan. 1:7 Tujuannya ialah untuk membuktikan apakah kalian sungguh-sungguh percaya kepada Tuhan atau tidak. Emas yang dapat rusak pun, diuji dengan api. Nah, iman kalian adalah lebih berharga dari emas, jadi harus diuji juga supaya menjadi teguh. Dan dengan demikian kalian akan dipuji dan dihormati serta ditinggikan pada hari Yesus Kristus datang kembali. 1:8 Kalian mengasihi-Nya, meskipun dahulu kalian tidak melihat-Nya. Dan kalian percaya kepada-Nya meskipun sekarang kalian tidak melihat-Nya. Itu sebabnya kalian bergembira, dan merasakan sukacita yang agung dan tak terkatakan. 1:9 Sebab tujuan imanmu tercapai, yakni keselamatan jiwamu. 1:10 Keselamatan inilah yang diteliti dan diselidiki oleh para nabi, dan mereka meramalkan tentang berkat yang diberikan Allah kepadamu. 1:11 Mereka menyelidiki bagaimana dan kapan hal itu akan terjadi, *bagaimana dan kapan hal itu akan terjadi: atau siapa orang itu dan kapan Dia akan datang.* yang dimaksudkan oleh Roh Kristus yang ada di dalam diri mereka. Pada waktu itu Roh-Nya menubuatkan kepada mereka tentang penderitaan-penderitaan yang harus dialami oleh Kristus dan tentang keagungan-Nya yang akan menyusul sesudah itu. 1:12 Kepada nabi-nabi itu Allah memberitahukan bahwa apa yang mereka lakukan bukan untuk kepentingan mereka, melainkan untukmu; yakni hal-hal yang sekarang ini kalian dengar dengan jelas dari para pemberita Kabar Baik tentang Yesus Kristus. Mereka menyampaikan hal-hal itu kepadamu dengan kuasa Roh Allah yang dikirim-Nya dari surga. Bahkan malaikat-malaikat pun ingin juga mengetahui kabar yang mereka beritakan itu. 1:13 Sebab itu, hendaklah kalian siap siaga. Waspadalah dan berharaplah sepenuhnya pada berkat yang akan diberikan kepadamu pada waktu Yesus Kristus datang nanti. 1:14 Taatlah kepada Allah, dan janganlah hidup menurut keinginanmu yang dahulu, pada waktu kalian masih belum mengenal Allah. 1:15 Sebaliknya, hendaklah kalian suci dalam segala sesuatu yang kalian lakukan, sama seperti Allah yang memanggil kalian itu suci. 1:16 Dalam Alkitab tertulis, "Hendaklah kamu suci, sebab Aku suci." 1:17 Kalian menyebut Allah itu Bapa pada waktu kalian berdoa kepada-Nya. Nah, Allah itulah yang menghakimi manusia setimpal dengan perbuatan masing-masing tanpa pandang bulu. Sebab itu selama kalian masih ada di dunia ini, hendaklah kalian mengagungkan Allah dalam hidupmu. 1:18 Kalian tahu apa yang sudah dibayarkan untuk membebaskan kalian dari kehidupan yang sia-sia yang diwariskan oleh nenek moyangmu. Bayarannya bukanlah sesuatu yang bisa rusak seperti perak atau emas, 1:19 melainkan sesuatu yang sangat berharga; yaitu diri Kristus sendiri, yang menjadi sebagai domba yang dikurbankan kepada Allah tanpa cacat atau cela. 1:20 Kristus dipilih oleh Allah sebelum dunia diciptakan. Dan pada hari-hari menjelang akhir zaman ini, Ia datang ke dunia supaya kalian diselamatkan. 1:21 Melalui Dialah kalian percaya kepada Allah yang sudah menghidupkan-Nya kembali dari kematian dan mengagungkan-Nya. Jadi, Allahlah yang kalian percayai dan kepada Allahlah juga kalian menaruh harapan. 1:22 Karena kalian taat kepada ajaran dari Allah, maka kalian membersihkan diri dan kalian mengasihi orang-orang seiman secara ikhlas. Sebab itu, hendaklah kalian mengasihi satu sama lain dengan sepenuh hati. *dengan sepenuh hati: beberapa naskah kuno: dengan hati yang murni.* 1:23 Sebab melalui sabda Allah yang hidup dan yang abadi itu, kalian sudah dijadikan manusia baru yang bukannya lahir dari manusia, melainkan dari Bapa yang abadi. 1:24 Dalam Alkitab tertulis begini, "Seluruh umat manusia bagaikan rumput, dan segala kebesarannya seperti bunga rumput. Rumput layu, bunganya pun gugur; 1:25 tetapi sabda Tuhan tetap untuk selama-lamanya." Sabda itu Kabar Baik yang sudah diberitakan kepadamu.
2:1 Sebab itu, buanglah dari dirimu segala yang jahat; jangan lagi berdusta, dan jangan berpura-pura. Jangan iri hati, dan jangan menghina orang lain. 2:2 Hendaklah kalian menjadi seperti bayi yang baru lahir, selalu haus akan susu rohani yang murni. Dengan demikian kalian akan tumbuh dan diselamatkan. 2:3 Di dalam Alkitab tertulis begini, "Kamu sudah merasakan sendiri betapa baiknya Tuhan." 2:4 Sebab itu, datanglah kepada Tuhan. Ia bagaikan batu yang hidup, batu yang dibuang oleh manusia karena dianggap tidak berguna; tetapi yang dipilih oleh Allah sebagai batu yang berharga. 2:5 Kalian seperti batu-batu yang hidup. Sebab itu hendaklah kalian mau dipakai untuk membangun Rumah Allah yang rohani. Dengan demikian kalian menjadi imam-imam, yang hidup khusus untuk Allah, dan yang melalui Yesus Kristus mempersembahkan kepada Allah, kurban rohani yang berkenan di hati Allah. 2:6 Karena di dalam Alkitab tertulis begini, "Aku telah memilih sebuah batu berharga, yang Kutempatkan di Sion sebagai batu utama; dan orang yang percaya kepada-Nya tidak akan dikecewakan." 2:7 Batu itu sangat berharga untuk kalian yang percaya. Tetapi bagi orang-orang yang tidak percaya, berlakulah ayat-ayat Alkitab berikut ini, "Batu yang tidak terpakai oleh tukang-tukang bangunan itu ternyata menjadi batu yang terutama," 2:8 dan "Itulah batu yang membuat orang tersandung, batu yang membuat mereka jatuh." Mereka tersandung sebab mereka tidak percaya akan perkataan Allah. Begitulah sudah ditentukan Allah mengenai mereka. 2:9 Tetapi kalian adalah bangsa yang terpilih, imam-imam yang melayani raja, bangsa yang kudus, khusus untuk Allah, umat Allah sendiri. Allah memilih kalian dan memanggil kalian keluar dari kegelapan untuk masuk ke dalam terang-Nya yang gemilang, dengan maksud supaya kalian menyebarkan berita tentang perbuatan-perbuatan-Nya yang luar biasa. 2:10 Dahulu kalian bukan umat Allah, tetapi sekarang kalian adalah umat Allah. Dahulu kalian tidak dikasihani oleh Allah, tetapi sekarang kalian menerima belas kasihan-Nya. 2:11 Saudara-saudara yang tercinta! Kalian adalah orang asing dan perantau di dunia ini. Sebab itu saya minta dengan sangat supaya kalian jangan menuruti hawa nafsu manusia yang selalu berperang melawan jiwa. 2:12 Kelakuanmu di antara orang yang tidak mengenal Tuhan haruslah sangat baik, sehingga apabila mereka memfitnah kalian sebagai orang jahat, mereka toh harus mengakui perbuatanmu yang baik, sehingga mereka akan memuji Allah pada hari kedatangan-Nya. 2:13 Demi Tuhan, hendaklah kalian tunduk kepada setiap penguasa manusia: baik kepada Kaisar yang menjadi penguasa yang terutama, 2:14 maupun kepada gubernur yang ditunjuk oleh Kaisar untuk menghukum orang yang berbuat jahat dan untuk menghormati orang yang berbuat baik. 2:15 Sebab Allah mau supaya dengan perbuatan-perbuatanmu yang baik kalian menutup mulut orang yang bercakap bodoh. 2:16 Hendaklah kalian hidup sebagai orang merdeka, tetapi janganlah memakai kemerdekaanmu itu untuk menutupi kejahatan, melainkan hiduplah sebagai hamba Allah. 2:17 Hargailah semua orang, kasihilah saudara-saudaramu sesama Kristen. Takutlah kepada Allah, dan hormatilah Kaisar. 2:18 Saudara-saudara yang menjadi pelayan, tunduklah kepada majikanmu dengan sehormat-hormatnya; bukan hanya kepada mereka yang baik hati dan peramah, tetapi juga kepada mereka yang kejam. 2:19 Allah akan memberkati kalian, kalau kalian karena sadar akan kemauan Allah, sabar menderita perlakuan yang tidak adil. 2:20 Sebab apakah istimewanya kalau kalian sabar menderita hukuman yang seharusnya kalian tanggung karena bersalah? Tetapi kalau kalian dengan sabar menanggung penderitaan yang menimpamu karena berbuat yang benar, maka Allah akan memberkatimu. 2:21 Untuk itulah Allah memanggilmu. Sebab Kristus sendiri sudah menderita untukmu, dan dengan itu Ia memberikan kepadamu suatu teladan, supaya kalian mengikuti jejak-Nya. 2:22 Ia tidak pernah berbuat dosa, dan tidak pernah seorang pun mendengar Ia berdusta. 2:23 Pada waktu Ia dicaci maki, Ia tidak membalas dengan caci maki. Sewaktu Ia menderita, Ia tidak mengancam; Ia hanya menyerahkan perkara-Nya kepada Allah, Hakim yang adil itu. 2:24 Kristus sendiri memikul dosa-dosa kita pada diri-Nya di atas kayu salib, supaya kita bebas dari kekuasaan dosa, dan hidup menurut kemauan Allah. Luka-luka Kristuslah yang menyembuhkan kalian. 2:25 Dahulu kalian seperti domba yang tersesat, tetapi sekarang kalian sudah dibawa kembali untuk mengikuti Gembala dan Pemelihara jiwamu.
3:1 Begitu juga kalian, istri-istri, harus tunduk kepada suami supaya kalau di antara mereka ada yang tidak percaya kepada berita dari Allah, kelakuanmu dapat membuat mereka menjadi percaya. Dan tidak perlu kalian mengatakan apa-apa kepada mereka, 3:2 sebab mereka melihat kelakuanmu yang murni dan saleh. 3:3 Janganlah kecantikanmu hanya kecantikan luar, seperti misalnya menghias rambut atau memakai perhiasan, atau berpakaian yang mahal-mahal. 3:4 Sebaliknya, hendaklah kecantikanmu timbul dari dalam batin, budi pekerti yang lemah lembut dan tenang; itulah kecantikan abadi yang sangat berharga menurut pandangan Allah. 3:5 Dengan cara inilah pada zaman dahulu wanita-wanita beragama yang berharap kepada Allah mempercantik diri dengan tunduk kepada suami mereka. 3:6 Sara pun begitu juga, ia taat kepada Abraham dan menyebut dia tuannya. Saudara sekarang adalah anak-anak Sara, kalau kalian melakukan hal-hal yang baik dan tidak takut kepada apa pun. 3:7 Dan kalian juga, suami-suami, hendaklah hidup dengan penuh pengertian terhadap istrimu, dan dengan kesadaran bahwa mereka adalah kaum yang lemah. Perlakukanlah mereka dengan hormat, sebab mereka bersama-sama dengan kalian, akan menerima anugerah hidup yang sejati dari Allah. Lakukanlah ini, supaya tidak ada yang menghalangi doamu. 3:8 Kesimpulannya ialah: hendaklah Saudara-saudara seia sekata dan seperasaan. Hendaklah kalian saling sayang-menyayangi seperti orang-orang yang bersaudara. Dan hendaklah kalian saling berbelaskasihan dan bersikap rendah hati. 3:9 Janganlah membalas kejahatan dengan kejahatan, atau caci maki dengan caci maki; sebaliknya balaslah dengan memohonkan berkat dari Allah. Sebab Allah memanggil kalian justru supaya kalian menerima berkat daripada-Nya. 3:10 Di dalam Alkitab tertulis begini, "Orang yang mau menikmati hidup dan mau mengalami hari-hari yang baik, harus menjaga mulutnya supaya tidak membicarakan hal-hal yang jahat dan tidak mengucapkan hal-hal yang dusta. 3:11 Ia harus menjauhi yang jahat dan melakukan yang baik; hendaklah ia berjuang sungguh-sungguh untuk mendapatkan perdamaian. 3:12 Sebab Tuhan selalu memperhatikan orang-orang yang menuruti kemauan-Nya, dan Tuhan selalu mendengar doa-doa mereka; tetapi Tuhan melawan orang-orang yang melakukan kejahatan." 3:13 Siapakah yang mau berbuat jahat kepadamu, kalau kalian senang berbuat baik? 3:14 Tetapi sekalipun kalian harus menderita karena melakukan hal-hal yang baik, kalian beruntung! Janganlah takut kepada siapa pun, dan jangan khawatir. 3:15 Tetapi di dalam hatimu, hendaklah kalian memberikan kepada Kristus penghormatan yang khusus yang sesuai dengan kedudukan-Nya sebagai Tuhan. Dan hendaklah kalian selalu siap untuk memberi jawaban kepada setiap orang yang bertanya mengenai harapan yang kalian miliki. 3:16 Tetapi lakukanlah itu dengan lemah lembut dan hormat. Dan hendaklah hati nuranimu murni, supaya kalau kalian difitnah karena kalian hidup dengan baik sebagai pengikut Kristus, maka orang yang memfitnah itu akan menjadi malu sendiri. 3:17 Lebih baik menderita karena berbuat baik -- kalau itu adalah kemauan Allah -- daripada menderita karena melakukan yang jahat. 3:18 Sebab Kristus sendiri mati *mati: banyak naskah kuno: menderita.* hanya sekali saja, untuk selama-lamanya karena dosa manusia -- seorang yang tidak bersalah, mati untuk orang yang bersalah. Kristus melakukan itu supaya Ia dapat membimbing kalian kepada Allah. Ia dibunuh secara jasmani, tetapi dihidupkan kembali secara rohani. 3:19 Dalam keadaan roh Ia pergi mengabarkan berita dari Allah kepada roh-roh yang dipenjarakan: 3:20 yaitu roh orang-orang yang tidak taat kepada Allah pada zaman Nuh. Pada waktu itu Allah menanti dengan sabar selama Nuh membuat kapalnya. Hanya orang-orang yang ada di kapal saja -- semuanya delapan orang -- yang diselamatkan melalui banjir besar itu. 3:21 Nah, kejadian itu merupakan kiasan dari baptisan yang sekarang ini menyelamatkan kalian. Baptisan ini bukanlah suatu upacara membersihkan badan dari semua yang kotor-kotor, melainkan merupakan janjimu kepada Allah dari hati nurani yang baik. Baptisan itu menyelamatkan kalian karena Yesus Kristus sudah hidup kembali dari kematian, 3:22 dan sudah naik ke surga. Sekarang Ia berkuasa bersama dengan Allah dan memerintah semua malaikat, semua penguasa serta semua kekuatan.
4:1 Karena Kristus sudah menderita secara jasmani, kalian juga harus memperkuat diri dengan pendirian yang seperti itu. Sebab orang yang menderita secara badani, tidak lagi berbuat dosa. 4:2 Sebab itu, hendaklah kalian hidup selanjutnya di dunia ini menurut kemauan Allah, dan bukan menurut keinginan manusia. 4:3 Pada masa yang lampau, kalian sudah cukup lama melakukan apa yang suka dilakukan oleh orang-orang yang tidak mengenal Tuhan. Kalian hidup tidak baik. Kalian menuruti hawa nafsu, mabuk-mabuk, berpesta-pora, minum-minum dan menyembah berhala secara menjijikkan. 4:4 Sekarang orang yang tidak mengenal Tuhan, heran bahwa kalian tidak ikut hidup seperti mereka, menikmati dosa tanpa batas. Itulah sebabnya mereka menghina kalian. 4:5 Tetapi mereka nanti harus memberi pertanggungjawaban kepada Allah yang sudah siap untuk mengadili orang yang hidup dan yang mati. 4:6 Itulah sebabnya Kabar Baik sudah diberitakan juga kepada orang-orang mati. Maksudnya supaya mereka, yang telah diadili dalam keadaan jasmani -- seperti halnya semua orang akan diadili -- dapat hidup secara rohani, menurut kehendak Allah. 4:7 Segala sesuatu sudah mendekati kesudahannya, sebab itu hendaklah kalian menguasai diri dan waspada, supaya kalian dapat berdoa. 4:8 Lebih daripada segala-galanya, hendaklah kalian sungguh-sungguh mengasihi satu sama lain, sebab dengan saling mengasihi kalian akan bersedia juga untuk saling mengampuni. 4:9 Hendaklah kalian menerima satu sama lain di rumah masing-masing, tanpa mengeluh. 4:10 Kalian masing-masing sudah menerima pemberian-pemberian yang berbeda-beda dari Allah. Sebab itu sebagai pengelola yang baik dari pemberian-pemberian Allah, hendaklah kalian menggunakan kemampuan itu untuk kepentingan bersama. 4:11 Orang yang menyampaikan berita, haruslah menyampaikan berita dari Allah; orang yang melayani orang lain, haruslah melayani dengan kekuatan yang dari Allah, supaya dalam segala hal, Allah dapat diagungkan melalui Yesus Kristus. Dialah yang berkuasa dan patut diagungkan untuk selama-lamanya. Amin. 4:12 Saudara-saudara yang tercinta! Kalian sekarang sangat menderita karena sedang diuji. Tetapi janganlah merasa heran, seolah-olah ada sesuatu yang luar biasa terjadi kepadamu. 4:13 Malah, hendaklah kalian merasa senang karena turut menderita bersama-sama dengan Kristus. Maka nanti kalau keagungan Kristus diperlihatkan, kalian akan bersukacita. 4:14 Kalian beruntung kalau kalian dihina sebab kalian pengikut Kristus. Itu berarti Roh yang mulia, yaitu Roh Allah, ada padamu. 4:15 Janganlah seorang pun dari antara kalian menderita karena ia pembunuh, atau pencuri, atau penjahat, atau karena ia mencampuri urusan orang lain. 4:16 Tetapi kalau kalian menderita sebab kalian orang Kristen, janganlah malu karena hal itu. Berterimakasihlah kepada Allah, bahwa kalian membawa nama Kristus. 4:17 Sudah sampai waktunya Allah mengadili dunia. Dan umat Allah sendirilah yang akan diadili terlebih dahulu. Nah, kalau Allah akan mulai dengan kita, bagaimanakah jadinya nanti dengan orang-orang yang tidak percaya kepada Kabar Baik dari Allah itu? 4:18 Dalam Alkitab tertulis begini, "Kalau orang-orang yang baik pun sudah sukar untuk diselamatkan, apa pula yang akan terjadi dengan orang-orang berdosa yang tidak mengenal Tuhan!" 4:19 Sebab itu, kalau ada orang-orang yang menderita karena Allah menghendaki demikian, hendaklah orang-orang itu hidup dengan benar dan mempercayakan diri kepada Pencipta mereka. Ia akan selalu menepati janji-Nya.
5:1 Saya minta perhatian para pemimpin jemaatmu. Saya menulis ini sebagai rekan pemimpin dan sebagai orang yang sudah menyaksikan sendiri penderitaan Kristus, dan yang akan turut juga diagungkan, apabila keagungan Kristus diperlihatkan kepada manusia. Saya minta dengan sangat 5:2 supaya kalian menggembalakan kawanan domba yang diserahkan Allah kepadamu. Gembalakanlah mereka dengan senang hati sebagaimana yang diinginkan oleh Allah, dan janganlah dengan berat hati. Janganlah pula melakukan pekerjaanmu guna mendapat keuntungan, melainkan karena kalian sungguh-sungguh ingin melayani. 5:3 Janganlah bertindak sebagai penguasa terhadap mereka yang dipercayakan kepadamu, melainkan jadilah teladan untuk mereka. 5:4 Dan pada waktu Gembala Agung itu datang nanti, kalian akan menerima mahkota yang gemilang, yang tidak akan pudar kegemilangannya. 5:5 Begitu juga Saudara, orang-orang muda. Tunduklah kepada orang-orang yang tua. Saudara semuanya harus merendahkan diri dan saling melayani dengan rendah hati. Sebab dalam Alkitab tertulis begini, "Allah menentang orang yang sombong, tetapi mengasihani orang yang rendah hati." 5:6 Sebab itu, rendahkanlah dirimu di bawah tangan Allah yang kuat, supaya Ia meninggikan kalian kalau sudah waktunya. 5:7 Serahkanlah segala kekhawatiranmu kepada Allah, sebab Ia mempedulikanmu. 5:8 Hendaklah kalian waspada dan siap siaga! Sebab Iblis adalah musuhmu. Ia seperti singa berjalan ke sana kemari sambil mengaum mencari mangsanya. 5:9 Lawanlah dia dengan iman yang teguh, sebab kalian tahu bahwa saudara-saudara sesama Kristen lainnya di seluruh dunia juga menderita seperti kalian. 5:10 Tetapi sesudah kalian menderita sebentar, Allah sendiri akan membuat kalian menjadi sempurna. Ia akan menegakkan dan menguatkan kalian serta mengokohkan kalian. Sebab Ia adalah Allah yang sangat baik hati, yang sudah memanggilmu untuk turut merasakan keagungan-Nya yang abadi melalui Kristus. 5:11 Ialah yang berkuasa sampai selama-lamanya! Amin. 5:12 Surat saya yang singkat ini saya tulis kepadamu dengan bantuan Silas, yang saya anggap seorang saudara Kristen yang setia. Saya ingin memberi dorongan kepadamu dan meyakinkan kalian bahwa apa yang saya tulis ini berita yang benar mengenai rahmat Allah. Hendaklah kalian berpegang teguh pada rahmat itu. 5:13 Teman-teman sejemaat di Babilon, *Babilon: Seperti dalam Buku Wahyu, mungkin Babilon menunjuk pada Roma.* yang juga terpilih oleh Allah, mengirim salam kepadamu; begitu juga anakku Markus yang tercinta. 5:14 Bersalam-salamanlah satu sama lain dengan penuh kasih sebagai saudara Kristen. Semoga Tuhan memberi sejahtera kepada Saudara semuanya yang menjadi milik Kristus. Hormat kami, Petrus
1:1 Surat enda i bas aku nari, Simon Petrus, suruh-suruhen dingen rasul Jesus Kristus. Surat enda man senina-senina si bali ras kami enggo ndat kengasupen gelah tek man Jesus Kristus, e me Dibata ras Singkelini kita. Ia me si enggo mereken kengasupen si meherga e man banta, sabap ateNa erbahan kai si benar. 1:2 Dibatalah si mereken dem lias ate ras kemalemen ate man bandu, erkiteken enggo itandaindu Dibata ras Jesus Tuhanta. 1:3 Dibata enggo ndilo kita gelah kita dat bagin i bas kemulian ras kiniulinNa. Alu kuasaNa ras arah penandainta kerna Ia enggo iberekenNa man banta kai keperlunta guna nggeluh nembah man baNa. 1:4 Arah padan si mbelin dingen meherga si iberekenNa man banta e, ngasup kam mulahi bandu i bas kerincuhen daging nari, si ncedaken si lit i doni enda, jenari dat bagin kam i bas kinidibatanna. 1:5 Erkiteken si e usahakenlah maka irakutkenndu ku kinitekenndu kai si mehuli, tapi aminna gia enggo ibahanndu kai si mehuli, rakutken ka lah ku perbahanen si mehuli e pemeteh kerna Dibata. 1:6 Adi enggo lit pemetehndu kerna Dibata, arus maka irakutkenndu ku pemetehndu e penguasan diri; janah adi enggo ngasup kam ngkuasai dirindu, rakutken ka ku je ate megenggeng. Adi enggo lit i bas kam ate megenggeng, arus irakutkenndu ku ate megenggeng e ate tutus er-Dibata. 1:7 Tapi aminna gia enggo lit i bas kam ate tutus ngikutken sura-sura Dibata, rakutken ka lah ku je ate keleng man teman sapih-sapih Kristen; janah adi enggo lit i bas kam ate keleng nandangi teman-teman sapih-sapih Kristen, arus maka irakutkenndu ku je ate keleng nandangi kerina manusia. 1:8 Enda me kerina biak-biak si iperlukenndu, janah adi biak-biak enda turah alu mehumur i bas kam, si e erbahanca maka pemetehndu kerna Tuhanta Jesus Kristus nggeluh janah erbuah. 1:9 Tapi kalak si la lit i bas ia biak-biak si bage, pentang kap mata perukurenna; la ia ngasup ngidahsa, janah enggo ilupakenna maka dosa-dosana si enggo lepas enggo ibersihken. 1:10 Dage, o senina-seninangku, usahaken tole gelah pendilo ras pemilihen Dibata nandangi kam tetap erteguhna. Adi bage perbahanndu, ndigan pe la kam banci ndabuh ku bas dosa. 1:11 Alu bage ibereken man bandu dem hak bengket ku bas Kinirajan si la ermasap-masap, Kinirajan Tuhanta ras Si Engkelini kita Jesus Kristus. 1:12 Erkiteken si e rusur ateku kam kupersingeti kerna perkara-perkara si enda, aminna pe enggo ietehndu janah kam tetap paguh i bas berita si rehna i bas Dibata nari si enggo ialokenndu. 1:13 Adi nggeluh dengalah aku, rutang kuakap aku mpersingeti kam kerna si enda kerina. 1:14 Sabap kueteh maka lanai ndekah mate me aku, sue ras si enggo ikataken Tuhanta Jesus Kristus alu terang-terang man bangku. 1:15 Dage, asa ngasupku kuusahaken nikapken dalan man bandu gelah iingetndu katawari pe si enda kerina kenca aku enggo mate. 1:16 Ipebetehken kami man bandu uga muliana kerehen Tuhanta Jesus Kristus. Si e la ituriken kami erpalasken turi-turin si iban-ban manusia. Alu mata kami jine nge kemulianNa enggo idah kami. 1:17 I je kap kami sanga Dibata Bapa mereken kehagan ras kemulian man baNa. Asum si e reh sora man baNa i bas Kemulian si Meganjangna nari nina, "Enda me Anakku si Kukelengi, senang kal ukurKu ibahanna!" 1:18 Kami jine megi sora e reh i Surga nari, sanga kami ras Ia i das deleng si badia e. 1:19 Erkiteken si e reh tekna kami nandangi berita si iberitaken nabi-nabi. Seh kal ulina adi iperdiatekenndu berita e, sabap berita e desken sada lampu si ersinalsal i bas ingan si gelap, seh wari enggo terang janah terang bintang erpagi-pagi ersinalsal i bas pusuhndu. 1:20 Tapi i babo si e kerina, ingetlah enda: nubuat-nubuat si lit i bas Pustaka Si Badia la banci iterangken rikutken penggejapen sekalak-sekalak. 1:21 Sabap la pernah lit kalak ngasup nehken berita nubuat arah peratenna jine. Tapi si njemba kalak ngerana nehken berita si rehna i bas Dibata nari e me Kesah Si Badia.
2:1 I bas paksa si lepas lit nabi-nabi perguak i tengah-tengah anak-anak Dibata. Bage pe nandangi reh me ku tengah-tengahndu guru-guru perguak. Guru-guru perguak e erbuni-buni maba ajaren-ajaren si ncedai ras mecah-mecah perpulungen. Janah la ia ngakui Tuanna si enggo nukur ia. Alu bage ilegina kap si erbahanca ia pedas kernep. 2:2 Aminna bage gia melala nge si ngikutken lagu langkahna si la meteh mela e; janah erkiteken lagu langkah guru-guru perguak e, nterem kalak ngerana megombang nandangi Dalan si Benar si ikuti kita e. 2:3 Alu merangap guru-guru perguak e ncari untung arah nuriken turi-turin si iban-banna saja. Ukumen man kalak enda enggo ndekah me isikapken, janah si erbahanca ia kernep enggo nimai! 2:4 Malekat-malekat si erdosa pe labo pulah i bas ukumen Dibata nari, tapi ibenterkenNa ku naraka. I je me malekat-malekat e iranteken i bas lubang si mbages si lanai kal langlang gelapna, nimai Wari Pengukumen. 2:5 Bage ka pe kerna doni i bas paksa si nai; la ipelepas Dibata ia pulah i bas ukumen nari. Irehken Dibata banjir si mbelin ku doni si ingani manusia si la nggit nembah man Dibata i bas paksa si e. Nuah ras pitu kalak si debanna nge ngenca si iselamatken Dibata, erkiteken ipembarken Nuah berita si ngena ate Dibata. 2:6 Kuta-kuta Sodom ras Gomora pe bage ka nge. Ikernepken Dibata kuta-kuta e alu api, gelah jadi sada usihen kerna kai si pagi jadi nandangi kalak si la nggit nembah man Dibata. 2:7 Tapi Dibata nelamatken Lut erkiteken ia ngikutken sura-sura Dibata; ia isuhsahi lagu langkah kalak si la meteh mela si la radat. 2:8 I tengah-tengah kalak si bage, Lut, kalak si bujur e, nggeluh alu pusuh si tersiksa, erkiteken tep-tep wari ia megi janah ngidah lagu langkah kalak si la meteh mela e. 2:9 Dage ieteh Tuhan nge uga engkelini kalak si tek man baNa i bas percuban-percuban nari, janah ietehNa ka pe kuga ngukum kalak jahat ngayaksa seh pagi Wari Pengadilen, 2:10 terlebih-lebih kalak si ngikutken kerincuhen dagingna si erbahanca ia melket janah la nggit iaturken Tuhan. Bage pangna ras metudana guru-guru perguak e seh maka kerina mahluk-mahluk si mulia pe la alang-alangen nggombangisa! 2:11 Sedangken malekat-malekat si ndauh gegehen ras belinen kuasana asangken guru-guru perguak e la nalahken mahluk-mahluk si mulia e alu nggombangisa i adep-adepen Tuhan. 2:12 Tapi pengelako guru-guru perguak e bali ras rubia-rubia si la rukur si tubuh guna itangkap ras ibunuh; kasa si la iangkana ipandangina ras igombangina. Nandangi ikernepken nge ia kerina bagi rubia-rubia merawa. 2:13 Nandangi ibalasken me man bana kiniseran sue ras kiniseran si enggo ibahanna nandangi kalak si deban. Si jadi kesenangen man bana e me i ciger wari e pe ilakokenna kai saja pe si banci pepuasken kerincuhen dagingna; asum kam man-man ras ia, kalak enda desken rintep si melket si erbahanca kam mbau, janah tupung si e meriah iakapna nipu kam. 2:14 La ia erleja-leja erbahan dosa, e maka kerincuhenna e me, ngenehen diberu-diberu alu mata perlua-lua. Kalak si la tetap ukurna, igodana. Pusuh peratenna enggo terbiasa merangap. Kalak enda kalak si kena sumpah Dibata kap. 2:15 Sabap la nggit ia ngikutken dalan pinter, e maka papak ia. Iikutkenna lagu langkah Bileam anak Beor nai. Bileam enda merincuh kal ndatken upah i bas perbahanenna si jahat nari. 2:16 Tapi dat persinget ia kerna kejahatenna sanga kaldena si biakna kin la banci ngerana e ngerana alu cakap manusia, gelah olanai iteruskenna perbahanenna si mehado e. 2:17 Guru-guru perguak e bali ras sumur si enggo kerah; ia bali ras remang si iembusken angin si meter. Dibata enggo nikapken sada ingan si seh kal gelapna man kalak enda. 2:18 Rananna seh kal ganjangna, tapi la lit isina; ipakena kerincuhen daging si la meteh mela e guna nidingi kalak si mbaru denga pulah i tengah-tengah manusia-manusia si geluhna enggo papak gelah kena ragum. 2:19 Erpadan ia mereken kebebasen, aminna ia jine iperbudak kebiasan-kebiasan si ncedaken, sabap kai si naluken sekalak jelma, ia jadi budak si naluken ia e kap. 2:20 Adi kalak enggo pulah i bas kemelketen doni enda nari erkiteken enggo itandaina Tuhanta ras Si Engkelini kita Jesus Kristus, janah kenca e mulihken ka ia kena siding ras ikuasai kemelketen doni enda, maka kedungenna kecibal kalak si bage ndauh melketen asangken si tangtangna ndube. 2:21 Madin kalak si bage la pernah nandai dalan si ngena ate Dibata asangken itandaina, tapi dungna la nggit ngikutken perentah si badia si ibereken man bana. 2:22 Kai si ilakoken kalak enda payo kal bagi si ikataken perumpaman enda, "Biang ipanna mulihken kai si enggo iutahkenna," janah "Babi si enggo iperidi mulihi ercebah i bas kubang."
3:1 O, teman-temanku si kukelengi, enda me suratku si peduaken si kubahan man bandu. I bas surat e duana enggo kucubaken pekeke perukuren si bersih i bas kam alu mpersingeti kai-kai si enggo ietehndu. 3:2 Ateku gelah iingetndu kata-kata si enggo ibelasken nabi-nabi si badia nai ras perentah si rehna i bas Tuhan dingen Si ngkelini nari si enggo ibereken rasul-rasulndu man bandu. 3:3 I babo si e kerina, arus iangkandu maka i bas wari si pendungi e pagi, reh me kalak si kegeluhenna ikuasai kerincuhen dagingna. Alu megombang, 3:4 nungkun ia nina, "Ma kin erpadan Tuhan maka Ia reh? I ja dage Ia? Bapa-bapanta enggo mate, tapi kerina bali denga ka nge ras asum doni enda ijadiken!" 3:5 Alu sengaja la ia nggit mperdiatekenca maka langit ras doni enggo ijadiken nai alu perentah Dibata. Doni ijadiken i bas lau nari, janah alu lau. 3:6 Bage pe maka alu lau ka, e me lau banjir si mbelin doni si nai enggo ikernepken. 3:7 Kata Dibata e ka nge miara langit ras doni si lit genduari enda guna ikernepken alu api. Langit ras doni e ipiara ngayak seh paksana kalak si la tek man Dibata iukum ras ikernepken. 3:8 Tapi, o teman-temanku si kukelengi, ola kam lupa si sada enda: I bas Tuhan sada wari bali kap ras seribu tahun janah seribu tahun bali ras sada wari. 3:9 Tuhan la kap melet ngelakoken kai si enggo ipadankenNa, bagi lit kalak si erpengakap bage. Tapi saber ia nandangi kam, sabap la ateNa sekalak pe ikernepken, tapi gelah kerina min jera i bas dosa-dosana nari. 3:10 Tapi wari kerehen Tuhan bali ras kerehen sekalak penangko. I bas wari e lesap me langit alu sora si erlenggur janah barang-barang si i langit meseng dingen ikernepken, janah doni ras kerina isina lesap me. 3:11 Adi si enda kerina bagenda me jadina, kuga nge arusna kegeluhenndu? Kam arus nggeluh bagi si ngena ate Tuhan, janah erpengendes man Dibata, 3:12 sanga itimaindu Wari Dibata janah ngusahakenca gelah reh pedasna Ia reh. I bas Wari e langit keri meseng, janah erkiteken lasna barang-barang si i langit jadi melebur. 3:13 Tapi kita nimai kai si enggo ipadnken Dibata e me langit si mbaru ras doni si mbaru; i je me inganna keadilen. 3:14 Erkiteken si e, o teman-temanku si kukelengi, i bas kam nimai Wari e, pala-palail gelah kam bersih dingen la erpandangen i lebe-lebe Dibata janah nggeluh alu dame ras Ia. 3:15 Bahanlah maka kesabaren Tuhan e jadi kesempaten man bandu gelah kam terkelin, bagi si enggo isuratken seninanta Paulus si ikelengi kita man bandu, rikutken kepentaren si ibereken Dibata man bana. 3:16 Kerna si enda me ituriken seninanta Paulus e i bas kerina sura-suratna. Tuhu lit piga-piga si mesera i bas suratna e, janah kalak si la erpemeteh ras si la tetap ukurna enggo pegeduk isi surat e, bagi ibahanna nandangi piga-piga bagin i bas Pustaka Si Badia. Kalak si bagenda perbahanenna ilegina kap si erbahanca ia bene. 3:17 Tapi kam o teman-temanku, enggo kap leben iangkandu si enda. E maka metengetlah gelah ola kam papak ibahan kesalahen-kesalahen kalak si la meteh aturen e, jenari ndabuh kam i bas inganndu si nteguh nari. 3:18 Tapi tetaplah kam ertambah-tambah i bas lias ate Dibata bage pe ertambahna pemetehndu kerna Tuhan ras Singkelini kita, Jesus Kristus. Terpujilah Ia genduari seh rasa lalap. Amin!
1:1 Surat enda i bas aku nari, Petrus rasul Jesus Kristus. Surat enda man anak-anak Dibata si enggo ipilih, e me kalak perlajang si merap i belang-belang propinsi Pontus, Galati, Kapadokia, Asia ras Bitinia. 1:2 Kam enggo ipilih rikutken sura-sura Dibata Bapa, janah ijadiken KesahNa jadi anak-anakNa si badia, gelah kam ngikutken Jesus Kristus dingen bersih kam ibahan darehNa. Lias ate ras kemalemen ate si la erkeri-kerin, si rehna i bas Dibata nari, jadi sikerajangenndu gelah. 1:3 Sikatakenlah bujur man Dibata, Bapa Tuhanta Jesus Kristus! Erkiteken perkuah ateNa si mbelin, iberekenNa man banta kegeluhen si mbaru, alu mpekeke Jesus Kristus i bas si mate nari. Si enda mereken pengarapen si nggeluh man banta. 1:4 Erkiteken si enda me maka siarapken pasu-pasu si mbelin jadi sikerajangenta, si isikapken Dibata man anak-anakNa. Pasu-pasu si man bandu e ibuniken Dibata i Surga, i ja pasu-pasu e la banci ceda, macik, ntah pe luntur. 1:5 Pasu-pasu e man bandu, e me kam si arah kiniteken ikawali kuasa Dibata guna keselamaten si enggo sikap guna ipetangkas Dibata i bas paksa pendungi pagi. 1:6 Ermeriah ukurlah kerna si enda, aminna pe genduari kam arus erceda ate i bas paksa si kentisik erkiteken erbage-bage percuban si inanamindu. 1:7 Percuban e tujunna guna ncidahken ntah kinitekenndu tuhu-tuhu ntah lang. Emas si banci ceda e pe isepuh alu api, apai denga ka kinitekenndu si ndauh ergan asangken emas e. Kinitekenndu arus isepuh gelah ermurnina. Kenca bage maka i bas wari e pagi, sanga kerehen Jesus Kristus ku doni enda, ialokenndu pujin, kemulian, dingen kehamaten. 1:8 Keleng atendu Kristus aminna pe langa idahndu Ia. Tek kam man baNa amin pe la Ia idahndu. Erkiteken si e ermeriah ukur kam alu keriahen si mbelin ras mulia si la terbelasken alu kata, 1:9 sabap ialokenndu keselamaten tendindu, e me ulih kinitekenndu man baNa. 1:10 Keselamaten enda me si idarami dingen si ipepayo nabi-nabi nai, janah ernubuat ia kerna pemere lias ate si nandangi ibereken Dibata man bandu. 1:11 Ipepayona ntah ndigan e jadi, janah uga kerehenna. Janah kerna si e enggo ipetangkas Kesah Kristus si erdahin i bas nabi-nabi e, asum kalak enda ernubuat kerna kiniseran-kiniseran si la banci lang ibentasi Kristus dingen kerna kemulian si reh kenca kiniseran e. 1:12 Ipetangkas Dibata man nabi-nabi e maka nabi-nabi e erdahin man gunandu labo man bana; e me kerna si genduari si enggo ibegindu alu tangkas arah perberita Berita Si Meriah kerna Jesus Kristus. Si enda kerina isehkenna man bandu alu kuasa Kesah Si Badia si ipesusur Dibata i Surga nari. Janah kerna si enda, malekat-malekat pe mesikel metehsa. 1:13 E maka sikapkenlah ukurndu katawari pe. Metengetlah dingen tuhu-tuhu lah erpengarapen nandangi pasu-pasu si pagin ibereken Dibata man bandu, sanga kerehen Jesus Kristus ku doni enda. 1:14 Erkemalangenlah man Dibata, janah ola pelepas geluhndu ibabai sura-surandu si ndekah, e me sura-sura paksa kam langa erpemeteh kerna Dibata. 1:15 Tapi badia min kam i bas kerina perbahanenndu, bagi Dibata si ndilo kam pe badia kap. 1:16 I bas Pustaka Si Badia ikataken Dibata, "Kam arus badia, sabap Aku pe badia." 1:17 Tupung kam ertoto man Dibata, ikatakenndu Ia Bapa. Ia me si ngadili kerina manusia alu la erndobahen rikutken perbahanen sekalak-sekalak. Erkiteken si e pakeken kesempaten si lit guna pemuliaken Dibata, kidekah kam nggeluh denga i doni enda. 1:18 Ietehndu kap alu kai kam itebusi i bas kegeluhenndu si la erguna, si ialokenndu i bas nini-ninindu nai nari. Kam itebusi labo alu barang si banci masap, umpamana emas ntah pirak. 1:19 Kam itebusi alu dareh Kristus si meherga, bagi sada anak biri-biri si la cacat dingen la erpandangen si igeleh. 1:20 Ia enggo ipilih Dibata ope denga doni enda ijadiken, janah enggo ipetangkas i bas wari-wari si arah pudi enda guna kiniulinndu. 1:21 Arah Ia, tek kam man Dibata si pekeke Ia i bas si mate nari dingen si mereken kemulian man baNa. E maka kiniteken ras pengarapenndu itamakenndu i bas Dibata. 1:22 Erkiteken patuh kam ngikutken pengajaren si tuhu-tuhu e, enggo ibersihkenndu dirindu seh maka lit i bas kam keleng ate si tuhu-tuhu nandangi temanndu si sada kiniteken. E maka sikeleng-kelengenlah kam alu bulat ukur. 1:23 Sabap arah kata Dibata si nggeluh dingen tetap rasa lalap, kam enggo tubuh jadi manusia si mbaru si labo tubuh arah manusia tapi i bas Bapa si rasa lalap nari. 1:24 Bagi lit tersurat i bas Pustaka Si Badia, "Kerina manusia desken dukut-dukut, janah kerina kemulianna desken rudang dukut. Dukut melus, rudangna pe nartar; 1:25 tapi kata Tuhan tetap seh rasa lalap." Kata enda me Berita Si Meriah si enggo iberitaken man bandu.
2:1 Erkitekiteken si e tadingkenlah kerina si jahat; olanai erbual, ntah pekulah-kulah, ntah ercian ate, ntah pe cekurak. 2:2 Bagi anak-anak si mbaru tubuh min kam, si rusur muas nandangi susu pertendin si la lit campurna, gelah alu nginem susu e reh belinna kam dingen selamat. 2:3 Bagi lit tersurat i bas Pustaka Si Badia, "Enggo inanamindu kap uga ulina Tuhan e." 2:4 Dahilah Tuhan, batu si nggeluh si itulak ras si la iergaken manusia, tapi ipilih dingen iergaken Dibata. 2:5 Rehlah kam bagi batu-batu si nggeluh janah berelah min dirindu ipake guna majekken rumah pertoton kesah. I bas ingan e me kam erdahin jadi imam-imam si badia, guna mpersembahken man Dibata persembahen pertendin si ngena ate Dibata erkelang-kelangken Jesus Kristus. 2:6 Sabap lit tersurat i bas Pustaka Si Badia, "Enggo kupilih sada batu si meherga, si kutamaken i Sion jadi batu palas, janah ise si tek man baNa, la ndigan pe kecewa." 2:7 Batu enda meherga kal man bandu, kam si tek. Tapi man kalak si la tek, "Batu si iambekken tukang e, kepeken e me batu si si jadi palas." 2:8 Bage pe lit tersurat i bas Pustaka Si Badia, "Enda me batu si erbahanca pagi kalak tertuktuk, batu si erbahanca kalak jongkang." Tertuktuk ia perbahan la ia tek kata e. Bage me kap peraten Dibata man bana. 2:9 Tapi kam e me bangsa pilihen, imam-imam Raja, bangsa sikerajangen Dibata, anak-anak Dibata si ipilih guna meritaken perbahanen-perbahanen Dibata si mbelin. Dibata enggo ndilo kam ndarat i bas si gelap nari ku bas terangNa si lanai kal langlang ulina. 2:10 Nai kam labo anak-anak Dibata, tapi genduari kam enggo jadi anak-anakNa. Nai la ietehndu perkuah ate Dibata, tapi genduari enggo ialokenndu perkuah ateNa. 2:11 O teman-temanku si kesilang ras mengongsi i bas doni enda, kupindo alu mesangat man bandu gelah ola ikutkenndu kininggiten daging si rusur erperang ras tendi. 2:12 Mehulilah min lagu langkahndu i tengah-tengah kalak si langa nandai Dibata, gelah adi ikatakennandu kalak jahat, idahna perbahanenndu si mehuli, e maka erkiteken si e ipujina Dibata i bas wari kerehenNa ku tengah-tengah kegeluhen kalak e. 2:13 Erkiteken Tuhan, patuhlah kam nandangi kerina pemerentah i doni enda subuk nandangi raja, pemerentah si meganjangna, 2:14 bage pe man gubernur-gubernur si itugasken raja guna ngukum kalak si erbahan jahat ras muji kalak si erbahan mehuli. 2:15 Sabap sura-sura Dibata e me kap gelah arah perbahanenndu si mehuli ipesinikndu kalak bodoh si luam cakapna. 2:16 Nggeluhlah bagi kalak bebas; tapi ola bahan kebebasenndu nutupi si jahat, tapi nggeluhlah bagi budak Dibata. 2:17 Mehamatlah man kerina manusia, kelengilah temanndu si sada kiniteken, erkemalangenlah man Dibata, janah mehamatlah man raja. 2:18 Kam budak-budak arus patuh nandangi tuanndu, janah cidahkenlah maka tuhu-tuhu kam mehamat man bana, labo saja man tuan si mehuli dingen si ngangka ukurndu, tapi pe man tuan si kejam. 2:19 Ipasu-pasu Dibata me kam erkite-kiteken si enda, adi megenggeng kam i bas kiniseran si la patut ialokenndu, sabap ietehndu kai si ngena ate Dibata. 2:20 Sabap kai kin si man pujinken adi igengkenndu gia parap-parap si patut ialokenndu erkiteken kam enggo erbahan salah? Tapi adi megenggeng kam i bas kiniseran aminna pe mehuli perbahanenndu, ipasu-pasu Dibata me kam erkiteken si e. 2:21 Guna si enda me kam idilo Dibata; sabap Kristus jine pe enggo ngenanami kiniseran man gunandu, janah itadingkenNa sada usihen si man usihenndu, gelah iikutkenndu dalanNa. 2:22 Ia la erdosa. Ise pe la enggo megi kata si la tuhu i bas biberNa nari. 2:23 Asum Ia igombang-gombangi kalak, la ibalasNa alu kata megombang. Janah asum Ia ngenanami kiniseran, la ilawanNa kalak, tapi erpengendes Ia man Dibata, Hakim si bujur. 2:24 Kristus jine enggo ngangkut dosa-dosanta i bas kulaNa i kayu persilang, gelah kita mate nandangi dosa, jenari nggeluh nandangi si ngena ate Dibata. Erkiteken lukaNa, kam enggo ipepalem. 2:25 Nai kam bagi biri-biri si enggo papak, tapi genduari kam enggo ibaba mulihken guna ngikutken Permakan Singkawali tendindu e.
3:1 Bage pe kam o ndehara, patuhlah man perbulangenndu, gelah adi perbulangen la tek nandangi Kata Dibata, banci ia tek erkiteken lagu langkahndu aminna gia la kam ngerana sengkebabah pe, 3:2 sabap idahna maka mehuli dingen mehamat lagu langkahndu. 3:3 La perlu ibahanndu barang-barang tambahen si arah darat guna nambahi jilendu, umpamana i bas kam pejile-jile bukndu, makeken perhiasen emas, ntah pe makeken uis mejile. 3:4 Tapi bahanlah maka jilendu e rehna i bas pusuhndu nari, kejilen si la ermasap-masap, e me lemah lembut dingen ukur teneng. Enda me kejilen si meherga kal i lebe-lebe Dibata. 3:5 Alu bagenda me diberu-diberu si nai si erkiniteken dingen erpengarapen man Dibata ipejilena bana alu patuh man perbulangenna. 3:6 Sarah pe nai bage nge, patuh ia man Abraham dingen igelarina Abraham, "Tuan". Kam me genduari anakna si diberu, adi idalankenndu perbahanen-perbahanen si mehuli dingen la kam mbiar i bas kai pe. 3:7 Bage pe kam o perbulangen nggeluhlah kam alu dem pengertin nandangi ndeharandu, janah arus iangkandu maka gegehen kam asang ia. Mehamatlah kam man bana, sabap ia pe radu ras kam, ngaloken kiniulin kegeluhen si ibereken Dibata. Bagendalah perbahanenndu gelah ola lit si ngolangi pertotonndu ku Tuhan. 3:8 Dage kedungenna ersada min ukurndu ras ersada min penggejapenndu. Sikeleng-kelengen min kam bagi ersenina, dingen mesayang janah meteruk min ukurndu sekalak nandangi si debanna. 3:9 Ola balas perbahanen si jahat alu si jahat, ntah sumpah alu sumpah. Tapi balaslah alu pasu-pasu, sabap pasu-pasu me si ipadanken Dibata iberekenNa man bandu, asum kam idiloNa. 3:10 Bagi lit tersurat i bas Pustaka Si Badia, "Kalak si mesikel nggeluh cawir metua dingen senang, la banci melasken si jahat, bage pe la banci erbual. 3:11 Arus jera ia i bas perbahanen-perbahanen si jahat nari, jenari ibahannalah si mehuli; arus idaramina tuhu-tuhu perdamen alu bulat ukur. 3:12 Sabap Tuhan tetap natap kempak kalak bujur, janah tetap ibegikenNa pertotonna; tapi ilawanNa kalak si ndalanken perbahanen si jahat." 3:13 Ise kin nuhsahi kam adi ergiah-giah ukurndu ndalanken si mehuli? 3:14 Tapi aminna pe arus kam ngenanami kiniseran erkiteken kam ndalanken si mehuli, malem me atendu! Ola kam mbiar nandangi ancamen kalak janah ola aru atendu. 3:15 Tapi mehamatlah kam man Kristus i bas pusuhndu, janah pehagalah Ia selaku Tuhan. Ersikaplah katawari pe guna njabap kalak si mindo gelah iterangkenndu pengarapen si lit i bas kam. 3:16 Tapi bahanlah e alu lemah lembut dingen mehamat. Jagalah maka pusuh peratenndu tetap bersih. Alu bage adi ihina kalak kam, kalak si ncekuraki lagu langkahndu si mehuli selaku kam pengikut Kristus, jadi mela iakapna erkiteken kai si ikatakenna. 3:17 Sabap ulin me ngenanami kiniseran erkiteken perbahanen si mehuli, adi kin enda sura-sura Dibata, asangken erkiteken perbahanen si jahat. 3:18 Sabap Kristus mate cukup sekali saja ngenca erkiteken dosa-dosa manusia, janah sekali saja ngenca Ia mate. Ia kalak bujur, mate man guna kalak perdosa, gelah banci kam ibabaiNa rembak ras Dibata. Ia mate secara daging, tapi ipegeluh secara Kesah Si Badia. 3:19 Janah i bas kuasa Kesah e lawes Ia meritaken berita i bas Dibata nari man tendi-tendi si tertaban, 3:20 e me kalak si la erkemalangen man Dibata asum Dibata alu saber nimai wari-wari Nuah ndungi perahuna. Lit piga-piga kalak ngenca si i bas perahu e, e me waluh kalak; janah kerina selamat arah lau e. 3:21 Lau e nggambarken lakon peridin si nelamatken kam genduari. Lakon peridin e labo mbersihken kula i bas si melket nari, tapi lakon peridin e, e me padan si ibahan man Dibata alu pusuh peraten si bersih. Lakon peridin e nelamatken kam arah kekeken Jesus Kristus i bas si mate nari, 3:22 si enggo lawes ku Surga, janah genduari Ia ringan arah kemuhen Dibata. Ia merentah subuk nandangi malekat-malekat ras penguasa-penguasa bage pe gegeh si debanna.
4:1 Erkiteken Kristus enggo ngenanami kiniseran kula, kam pe arus ipersenjataindu bandu alu perukuren si lit i bas Ia tupung e. Sabap kalak si ersada ras Kristus i bas kiniseranNa, enggo ngadi erbahan dosa. 4:2 E maka kidekah kam nggeluh denga i doni enda, kegeluhenndu arus ikuasai peraten Dibata, labo kerincuhen manusia. 4:3 I bas paksa si enggo lepas enggo cukup ndekah kam ngaloken perbahanen-perbahanen si merincuh usur kalak si la nandai Dibata ngelakokenca. Kam nggeluh alu la meteh mela, iikutkenndu kerincuhen dagingndu, mabuk-mabuk, pesta minem-minem si nggesuh, nagih minem inemen si erbahanca mabuk, janah nembah man berhala-berhala e me perbahanen si erbahanca manusia mbau. 4:4 Tapi genduari mamang ate kalak si la nandai Tuhan kenca lanai ikutkenndu ia i bas kegeluhen si la mehuli e. Perbahan si e me maka kam igombangina. 4:5 Tapi man Dibata arus ipertanggung jawabkenna dirina, e me man Dibata si enggo sikap ngadili kalak si nggeluh ras si enggo mate. 4:6 Erkiteken si e maka Berita Si Meriah enggo iberitaken man kalak si genduari enggo mate, gelah aminna pe ia enggo kena ukumen kematen secara daging bagi kerina manusia, tapi secara pertendin ia terus nggeluh alu kegeluhen Dibata. 4:7 Kerina si nasa lit enggo ndeher kedungenna. Dage kuasailah dirindu janah petenenglah ukurndu gelah ngasup kam ertoto. 4:8 I babo si e kerina, sikeleng-kelengenlah kam alu tutus, sabap keleng ate namburi melala dosa. 4:9 Metemue lah kam alu la jungut-jungut. 4:10 Sekalak-sekalak, selaku pengurus si mehuli i bas pemere Dibata si pelain-lain e, si iberekenNa erpalasken lias ateNa, arus nggunaken pemere e guna kiniulin kalak si deban. 4:11 Kalak si ngerana, ngeranalah alu kata-kata si tempa-tempa rehna i bas Dibata nari. Kalak si nampati, isampatinalah kalak alu gegeh si ibereken Dibata man bana, gelah i bas kai pe ipuji kalak Dibata arah Jesus Kristus. Ia me si mada kemulian kuasa seh rasa lalap. Amin! 4:12 O senina-seninangku si kukelengi, ola kam sengget erkiteken percuban si mberat si sangana ngkenai kam, tempa-tempa kejadin si luar biasa sangana reh man bandu. 4:13 Tapi meriahlah atendu sabap kam ikut muat bagin i bas kiniseran Kristus, gelah kam dem alu keriahen asum kemulian Kristus ipetangkas. 4:14 Ketuahen kam adi igombang-gombangi kalak kam erkiteken kam ajar-ajar Kristus. Si enda nuduhkenca maka i bas kam ringan kesah si mulia, e me Kesah Dibata. 4:15 Adi ngenanami kiniseran kin kam ola erkiteken ia sekalak pemunuh, ntah penangko, ntah kalak jahat, ntah pe icampurina urusen kalak si deban. 4:16 Tapi adi kam ngenanami kiniseran erkiteken kam kalak Kristen, ola iakapndu mela kerna si e. Tapi katakenlah bujur man Dibata erkiteken kam igelari alu gelar Kristus. 4:17 Enggo seh paksana Dibata mulai ngadili doni enda. Anak-anak Dibata me si perlebena iadili. Janah adi kita lebe iadili kuga nge dungna kalak si la nggit ngikutken Berita Si Meriah si rehna i bas Dibata e nari? 4:18 Bagi lit tersurat i bas Pustaka Si Badia, "Kalak si bujur pe mesera guna iselamatken, apai denga ka kalak si la ngakui Dibata ras kalak perdosa!" 4:19 E maka kalak si ngenanami kiniseran rikutken peraten Dibata, alu perbahanenna si mehuli iendeskenna min kerina geluhna man Si nepa ia, si tetap nehken padanNa.
5:1 Ngerana aku man pertua-pertua perpulungen si lit i tengah-tengahndu. Aku pe sekalak pertua nge bali ras kam. Kusaksiken kerna kiniseran Kristus janah dat bagin me aku i bas kemulianNa si ipetangkas pagi. 5:2 Kupindo man bandu gelah mpermakani rarasen biri-biri si enggo ibereken Dibata man bandu, janah kepkeplah e alu ukur meriah bagi si ngena ate Dibata, ola alu ukur mberat. Ola erkiteken mata duiten maka idalankenndu, tapi lakokenlah e erkiteken ukurndu ersuruh guna ngelayani. 5:3 Ola atendu iperentahindu kalak si enggo iendesken jadi si man kepkepenndu, tapi bahanlah kam jadi usihen biri-biri e. 5:4 Janah asum reh pagi Kepala Permakan e, ialokenndu me rudang-rudang tanda kehagan si la ermelus-melus. 5:5 Bage pe kam si nguda denga, patuhlah kam nandangi kalak si metua. Alu meteruk ukur erbentingkibullah kam kerina guna sisampat-sampaten. Sabap i bas Pustaka Si Badia lit tersurat, "Kalak si meganjang ukurna itulak Dibata, tapi man kalak si meteruk ukurna icidahkenNa lias ateNa." 5:6 E maka peteruklah bandu iteruh tan Dibata si erkuasa, gelah i bas paksa si payo, ipeganjangkenNa kam. 5:7 Ampekenlah kerina kearun atendu man Dibata, sabap Ia kap si mperdiateken kam. 5:8 Tenanglah kam tapi metengetlah! Sabap Iblis imbangndu e gawah-gawah ku jah ku je bagi sada singa si erngaung ndarami si man jerngemenna. 5:9 Tetaplah paguh kinitekenndu janah lawanlah imbangndu e, sabap ietehndu maka teman-temanndu si sada kiniteken i belang-belang doni enda ngenanami kiniseran bagi si inanamindu. 5:10 Tapi kenca kam ngenanami kiniseran kentisik, serta me kam ibahan Dibata, Si dem lias ate, Si ndilo kam gelah ngenanami kemulianNa si rasa lalap erkiteken persadanndu ras Kristus; ipetetapNa dingen ipegegehiNa kam janah iberekenNa man bandu palas si nteguh. 5:11 Dibata kap erkuasa seh rasa lalap. Amin! 5:12 Surat si gendek enda kubahan man bandu alu penampat Silas, e me sekalak seninanta kalak Kristen si kuakui kalak si tutus. Ateku pegegehi kam ras mereken kesaksinku maka enda lias ate Dibata si tuhu-tuhu. Tetaplah kam i bas lias ate e. 5:13 Teman-temanndu si sada kiniteken si ringan i Babil e me si ipilih Dibata ka, bage pe anakku Markus ngataken mejuah-juah man bandu. 5:14 Sisalam-salamenlah kam alu dem keleng ate bagi si ersenina. Dame man bandu kerina gelah, kam si enggo jadi sikerajangen Kristus.
1:1 I bas Pertua nari. Man Kemberahen si ipilih Dibata ras anak-anakna si kukelengi. Labo aku saja si erkeleng ate man bandu, tapi pe kerina kalak si meteh kai si benar ngkelengi kam. 1:2 Sabap kai si benar e ringan i bas kita janah lit i bas kita seh rasa lalap. 1:3 Dibata Bapa ras Jesus Kristus Anak Bapa e mereken lias ate, perkuah ate, ras kemalemen ate man banta gelah; kerina si enda jadi sikerajangenta i bas kita nggeluh alu bujur ras dem keleng ate. 1:4 Seh kal riahna kuakap meteh maka lit anak-anakndu si nggeluh i bas kebujuren bali ras si iperentahken Bapa e man banta. 1:5 Janah genduari kupindo man bandu o, Kemberahen: Sikeleng-kelengenlah kita. Labo perentah si mbaru si kusuratken man bandu enda, tapi si enggo lit i bas kita mula-mulana nari kin. 1:6 Kekelengen e ertina nggeluh sue ras perentah-perentah Dibata. Perentah e, sue ras si enggo ibegindu mula-mulana nari, arus jadi palas kegeluhenndu. 1:7 Nterem penipu enggo merap i doni enda si la ngakui maka Jesus Kristus reh jadi manusia. Kalak si bage penipu janah musuh Kristus kap. 1:8 Jagalah bandu, gelah ola bene kai si enggo idahikenndu e, tapi dem pagi ialokenndu upahndu. 1:9 Kalak si la ringan i bas ajaren Kristus, tapi ndarat i jenari, ia la er-Dibata. Ise si ringan i bas ajaren e, Bapa ras Anak e lit i bas ia. 1:10 Dage, adi lit kalak si ndahi kam la maba ajaren Kristus e, ola aloken ia i bas rumahndu, janah ola kataken mejuah-juah man bana. 1:11 Sabap ise si ngatakenca mejuah-juah man kalak si bage, ia ikut i bas perbahanenna si jahat e. 1:12 Melala kal ateku si kuturiken man bandu, tapi la pada kulakoken e alu kertas ras tinta, tapi kuarap maka banci kudahi kam janah ngerana sebabah ras kam, gelah dem kal keriahenta. 1:13 Anak-anak seninandu, si enggo ipilih Dibata, ngataken mejuah-juah man bandu.
1:1 I bas Pertua nari. Man kekelengenku Gayus, si kukelengi tuhu-tuhu. 1:2 O temanku si kukelengi, ertoto aku gelah kai si mehuli jadilah man bandu, janah mejuah-juahlah bagi kueteh maka kegeluhen pertendinndu pe mehuli. 1:3 Meriah kal kuakap kenca reh piga-piga kalak seninanta kalak Kristen, janah nuriken man bangku kuga bujurna kam bagi biasana pe kam nggeluh i bas kebujuren nge. 1:4 La lit si banci erbahanca ukurku teriahen asangken megi anak-anakku nggeluh i bas kebujuren. 1:5 Temanku si kukelengi, tutus kal atendu ndahiken dahin si ilakokenndu guna senina-seninanta kalak Kristen, aminna gia pe ia la itandaindu. 1:6 Enggo isaksiken senina-seninanta e i lebe-lebe perpulungen si i jenda kerna kekelengenndu e. Mehuli kal adi isampatindu ia rikutken si ngena ate Dibata i bas ia nerusken perdalanenna. 1:7 Sabap kalak enda lit i bas perdalanen guna Kristus, alu la ngaloken kai pe i bas kalak perbegu nari. 1:8 Dage kita kalak Kristen rutang nampati kalak si bage, gelah kita pe ikut muat bagin i bas pembarken Berita Si Meriah i bas Dibata nari e. 1:9 Pernah kukirim sada surat man perpulungen enda, tapi Diotrepes si pebeluh-beluhken minpin e, la mperdiateken aku. 1:10 Erkiteken si e, sanga aku reh pagi ku bongkar nge kai si enggo ibahanna e, e me penggombangi ras cakap si la tuhu si ikatakenna kerna kami. Labo terjeng je saja; lebih asa si e la ia nggit ngalokenca senina-seninanta kalak Kristen e adi ia reh, janah iambatina pe kalak gelah ola ngaloken senina-seninanta e, dingen iusahakenna pedaratsa i bas perpulungen nari! 1:11 Teman si kukelengi, ola usih kai si jahat, tapi usihlah kai si mehuli. Ise erbahan si mehuli asalna i bas Dibata nari; ise si erbahan jahat la enggo idahna Dibata. 1:12 Kerina kalak mujiken Demetrius; kebenaren e jine pe mujiken ia. Kami pe ikut nambahi kesaksin e, janah ietehndu maka kai si ikataken kami e tuhu kap. 1:13 Melala denga ateku si kuturiken man bandu, tapi la kubahan e alu pena ras tinta. 1:14 Kuarap maka lanai ndekahsa banci kita jumpa, gelah banci kita ngerana sebabah. 1:15 Kemalemen ate ras kam gelah. Teman-teman si i jenda ngataken mejuah-juah man bandu. Kataken pe mejuah-juah man teman-teman si i jena sada-sadai.
1:1 Surat enda i bas aku nari, Judas, suruh-suruhen Jesus Kristus dingen senina Jakup. Surat enda man kalak si enggo idilo Dibata, si nggeluh i bas keleng ate Dibata Bapa dingen i bas kepkepen Jesus Kristus. 1:2 Dibatalah mereken man bandu dem perkuah ate, kemalemen ate ras kekelengen. 1:3 O teman-teman si kukelengi! Aku ersura-sura erbahan surat man bandu kerna keselamaten si enggo sinanami ras-ras. Tapi genduari perlun kuakap erbahan surat man bandu guna pegegehi kam gelah tetap iperjuangkenndu kiniteken si enggo ibereken Dibata man anak-anakNa sekali seh rasa lalap. 1:4 Sabap lit piga-piga kalak si la ngakui Dibata alu la sieteh enggo bengket ku tengah-tengahta. Iputarbalikkenna berita kerna lias ate Dibatanta guna mbenarken perbahanen-perbahanenna si nggesuh e. Itulakna Jesus Kristus: Ia ngenca Penguasa, Ia ngenca Tuhanta, la lit sideban. Nai nari enggo leben lit tersurat i bas Pustaka Si Badia kerna ukumen si ialokenNa. 1:5 Aminna pe enggo ietehndu, kuturiken denga ateku man bandu kuga Tuhan mulahi kalak Israel i taneh Mesir nari, tapi kedungenna ikernepkenNa kalak si la tek man baNa. 1:6 Ingetlah malekat-malekat si la tetap tading ringan i bas batas-batas kuasana si patut, tapi tadingkenna inganna jine. Malekat-malekat e igariken Dibata alu rante si la banci ceda seh rasa lalap i teruh i bas ingan si gelap. Itaban Dibata malekat-malekat e i je seh ia iukum i bas Wari Pengukumen. 1:7 Ingetlah kota Sodom ras kota Gomora, ras kota-kota si i kelewetna. Anak kota e bali perbahanenna ras malekat-malekat e. Ia campur sapih-sapih ia la bagi oratna. Anak kota e iukum alu api si la ernimpet-nimpet gelah jadi pertenget si tangkas nandangi kerina jelma. 1:8 Bage me pe, kalak si la ngakui Dibata e, bagi nipi-nipin ia kerna perkara-perkara si meganjang si erbahanca ia erdosa nandangi badanna jine. Megombang ia nandangi kuasa Dibata janah ipersilahangna mahluk-mahluk si mulia si lit i datas. 1:9 Pengulu malekat Mikael pe la pernah erbahan si bage. I bas perubatenna ras Iblis, asum ia erjengil kerna ise empuna mait si Musa, Mikael la pang numpahi Iblis, tapi nina, "Tuhan ngerawai kam!" 1:10 Tapi kalak si la ngakui Dibata e ilawanna alu megombang kasakai si la iangkana. Janah kai si ietehna alu penggejapen, bagi rubia-rubia si merawa, e kal me si encedaken ia. 1:11 Cilaka kal me ia! Enggo ikutkenna dalan Kain. Erkiteken duit enggo iendeskenna dirina guna ndalanken kesalahen bagi si ibahan Bileam nai. Berontak kalak enda bagi Korah nai, e maka bage ka nge kalak enda ikernepken. 1:12 Asum kam ras man-man bagi kalak ersenina, kalak enda desken rintep-rintep si melket i tengah-tengahndu. Sabap kalak enda man alu merangap, la meteh mela janah dirina saja ngenca iranakenna. Bali ras embun si iembusken angin, tapi la mereken udan. Bali ras batang kayu si la erbuah aminna gia i bas perudan. Bali ras batang kayu si enggo iruah uratna enggo mate tuhu-tuhu. 1:13 Bali ras galumbang si mbelin i lawit teridah rugup-ugup; bage pe kalak enda ncidahken perbahanen-perbahanenna si man kemelanken e. Kalak enda bali ras bintang-bintang si erdalan ku jah-ku jenda, si man bana enggo isikapken Dibata ingan si seh kal gelapna seh rasa lalap. 1:14 Enoh, kesusuren pepituken i bas Adam nari enggo ernubuat nai kerna kalak enda nina, "Nehenlah! Reh me Tuhan ras meribu-ribu malekatNa si Badia; 1:15 iadiliNa me kerina jelma guna ngukum kerina kalak perdosa si la ngakui Dibata erkiteken perbahanen-perbahanenna si ngelawan Dibata ras kerina cakap si ibelaskenna nimbak Dibata!" 1:16 Kalak si la ngakui Dibata la erngadi-ngadi jungut-jungut janah nalahken kalak si deban. Sura-surana si jahat ngenca idalankenna. Ipeganjangna bana janah ipuji-pujina kalak si deban gelah erdalan sura-surana. 1:17 Tapi kam kerina o si kukelengi! Ingetlah kai si enggo nai ituriken rasul-rasul Tuhanta Jesus Kristus man bandu. 1:18 Nina man bandu, "Nandangi wari-wari pendungi e pagi reh me kalak si nggombang-gombangi kam, e me kalak si ngikutken sura-surana si nimbak Dibata e." 1:19 Kalak si bage me si mecah-mecah i bas perpulungen, e me kalak si ikuasai kerincuhen kulana, si la lit i bas ia Kesah Si Badia. 1:20 Tapi kam kerina o si kukelengi, tetaplah pegegehi bandu alu kinitekenndu si badia e. Ertotolah alu kuasa Kesah Si Badia, 1:21 janah tetaplah kam i bas keleng ate Dibata sedang kam nimai perkuah ate Tuhanta Jesus Kristus si mereken man bandu kegeluhen si tuhu-tuhu si la erkeri-kerin. 1:22 Cidahkenlah perkuah ate man kalak si la tetap ukurna. 1:23 Selamatkenlah kalak si deban alu ngerintakken ia i bas api nari; cidahken perkuah atendu man kalak si deban alu ukur mbiar, tapi cigalah atendu nandangi uisna si enggo melket erkiteken kerincuhen kulana si dem alu dosa. 1:24 Ia si ngasup ngkawali kam gelah ola celus, si ngasup pe maba kam ngadap ku adep-adepen Dibata si Mulia, alu dem keriahen ras la erpandangen -- 1:25 Ia ngenca Dibata Si Ngkelini kita arah Jesus Kristus Tuhanta, si akuilah kemulianNa, kedolatenNa, kuasaNa, ras pemerentahenNa nai-nai nari, genduari, ras seh rasa lalap. Amin.
1:1 Enda me ketangkasen si ibereken Dibata man Jesus Kristus guna ncidahken man persuruhen-persuruhen Dibata kai si nandangi pedas jadi. Si enda ipetangkas Kristus man persuruhenNa Johanes alu nuruh malekatNa ndahi Johanes. 1:2 E maka ituriken Johanes me kerina si enggo idahna e. Enda me si ipesehna kerna Kata Dibata dingen si ibenarken Jesus Kristus. 1:3 Ketuahen kalak si ngogeken Kitap enda. Ketuahen kalak si megiken kata nubuat dingen ngikutken kai si tersurat i bas Kitap enda! Sabap enggo ndeher paksana jadi me kerina si tersurat enda. 1:4 I bas Johanes nari, man perpulungen si pitu i Propinsi Asia. Simparlah man bandu keleng ate ras dame si rehna i bas Dibata nari, e me Dibata si nai nari lit seh asa genduari dingen si lit seh rasa lalap, bage pe si rehna i bas Kesah si pitu nari si ringan i lebe-lebe kursi kinirajan Dibata. 1:5 Bage pe alokenlah perkuah ate ras dame si rehna i bas Jesus Kristus nari, saksi si tutus, Anak sintua si enggo ipekeke Dibata i bas si mate nari, si erkuasa nandangi kerina raja-raja i doni enda. Keleng ate Jesus kita, janah arah kematenNa ipulahiNa kita i bas dosa-dosanta nari. 1:6 Ia me si erbahanca kita jadi kinirajanNa, e me jadi imam-imam guna ndahiken dahin Dibata, BapaNa. Iakuilah kemulian ras kuasaNa seh rasa lalap. Amin. 1:7 Nehenlah, ia reh ras embun! Kerina kalak ngidah Ia pagi, subuk kalak si enggo nebak ia pe. Kerina suku-suku bangsa i doni enda nangisi Ia. Payo, bage me jadina. Amin. 1:8 "Aku kap si perlebe ras si pendungina," nina Tuhan, Dibata si Mada Kuasa, nai nari, genduari, seh rasa lalap. 1:9 Aku Johanes, seninandu, erkiteken persadanta i bas Jesus Kristus. Aku ikut ras kam ngenanami kiniseran ras i bas kinirajanNa bage pe ikut megenggeng nimai kerehen Jesus. Aku ibuang ku Pulau Patmos erkiteken kuberitaken Kata Dibata ras ersaksi kerna Jesus. 1:10 I bas wari Tuhan ikuasai Kesah Dibata aku, jenari kubegi sora megang bagi sora terompet, ngerana i pudingku. 1:11 Nina, "Suratkenlah kai si idahndu, jenari kirimken Kitap e man perpulungen si pitu e me Epesus, Semirna, Pergamon, Tiatira, Sardes, Piladelpia ras Laodikea." 1:12 Kutulihken ku pudi guna ngenen ise si ngerana man bangku e. Kuidah pitu nahe lampu si ibahan i bas emas nari. 1:13 I tengah-tengahna lit kuidah tedis bagi Anak Manusia. ililetken i bas tentenNa. 1:14 Bukna mbentar bagi kapas, bagi embun si mbentar, janah mataNa ernala, bagi dilah api; 1:15 naheNa erkilat-kilat bagi tembaga si enggo ilebur i bas pertukangen jenari isepuh. SoraNa bali ras sora sampuren si mbelin. 1:16 TanNa si kemuhen njemak pitu bintang, i bas babahNa nari ndarat sada pedang si ntelap, ermata dua. AyoNa ersinalsal bagi matawari tupung ciger. 1:17 Asum kuidah Ia, nerunuk aku i lebe-lebe naheNa bali ras kalak mate. Jenari itamakenNa tanNa si kemuhen ku babongku, janah nina, "Ola mbiar! Aku kap si perlebena dingen si pendungina. 1:18 Aku kap si nggeluh! Mbarenda mate Aku, tapi nehenlah, Aku nggeluh rasa lalap. Aku njemaksa kunci kematen ras doni kematen. 1:19 E maka suratkenlah kai si enggo idahndu, si jadi genduari, bage pe kai si nandangi jadi pagin. 1:20 Enda me antusenna rahasia bintang si pitu si enggo idahndu i bas tanKu si kemuhen bage pe nahe lampu si pitu si ibahan i bas emas nari; bintang si pitu e, e me malekat-malekat perpulungen si pitu, janah nahe lampu si pitu e, e me perpulungen si pitu e."
2:1 "Man malekat perpulungen i Epesus suratkenlah bagenda: Enda me berita i bas Ia nari, Ia si njemak bintang si pitu i bas tanNa si kemuhen, si erdalan i tengah-tengah nahe lampu emas si pitu. 2:2 Kueteh kai si enggo idahikenndu; Kueteh kuga latihna iakapndu erdahin, janah Kueteh kerna saber atendu. Kueteh maka la atendu bage ngenehen kalak jahat. Kueteh maka enggo iujindu kalak si ngakuken dirina rasul tapi si tuhuna labo ia rasul, janah ietehndu maka perguak nge ia. 2:3 Kam megenggeng, enggo inanamindu kiniseran erkiteken Aku, tapi la kam surut. 2:4 Tapi pandangenKu nandangi kam, e me genduari lanai atendu keleng Aku bagi tangtangna nai. 2:5 E maka ingetlah uga dauhna kam enggo ndabuh! Jeralah kam! Bahanlah bagi si ilakokenndu tangtangna nai. Adi la kam jera Kudahi me kam janah Kubuat nahe lampundu i bas inganna nari. 2:6 Tapi kiniulinndu pe Kueteh nge, maka la atendu ngena perbahanen kalak Nikola, si Aku pe la ateKu ngena. 2:7 Adi lit kin cupingndu, begikenlah kai si ikataken Kesah Dibata man perpulungen-perpulungen! Man kalak si enggo menang, Kupelepas ipanna buah batang kayu kegeluhen si turah i bas Pardis." 2:8 "Man malekat perpulungen i Semirna, suratken bagenda: Berita enda i bas Ia nari, Ia si perlebe dingen si perpudina, si enggo mate tapi enggo nggeluh mulihken. 2:9 Kueteh nge kiniseranndu; Kueteh maka musil kam tapi si tuhuna bayak kap kam! Kueteh nge maka jahat ranan kalak kerna kam, e me kalak si ngaku bana kalak Jahudi, tapi si tuhuna labo ia kalak Jahudi; kalak enda anggota perpulungen Iblis kap! 2:10 Ola kam mbiar kerna kiniseran si nandangi inanamindu. Nehenlah! Iuji Iblis me kam. Piga-piga i bas kam ibuangkenna ku penjara. Sepuluh wari pagi dekahna kerina kam ngenanami kiniseran. Tapi tetaplah kinitekenndu man bangKu seh mate pe, gelah Kubereken man bandu rudang-rudang kegeluhen tanda kemenangenndu. 2:11 Adi lit kin cupingndu begikenlah kai si ikataken Kesah Dibata man perpulungen-perpulungen! Kalak si menang lanai pagi isakiti kematen si peduaken." 2:12 "Man malekat perpulungen i Pergamon, suratken bagenda: Berita enda i bas Aku nari, Ia si lit pedangNa ntelap, dua bobahua. 2:13 Kueteh i ja kam ringan genduari, e me i kursi kinirajan Iblis. Kam erkemalangen man bangKu, janah tetap kam tek man bangKu, subuk pe i bas paksa Antipas, saksingKu si tutus, si ibunuh i bas ingan Iblis. 2:14 Tapi pandangenKu nandangi kam e me kap: Lit piga-piga i bas kam si ngikutken pengajaren Bileam. Bileam nai ngajari Raja Bala. Mbabai kalak Israel erdosa alu man pangan si ipersembahken man berhala-berhala dingen erlua-lua. 2:15 Bage pe lit piga-piga i bas kam si ngikutken pengajaren kalak Nikola. 2:16 E maka jeralah! Adi lang minter me kam Kudahi janah Kulawan me kalak si la nggit jera e alu pedang si ndarat i bas babahKu nari. 2:17 Adi lit kin cupingndu begikenlah kai si ikataken Kesah Dibata man perpulungen-perpulungen! Man kalak si enggo menang Kubereken sada bagin i bas manna si terbuni nari. Bage pe Kubereken man sekalak-sekalak sada batu si mbentar, si enggo isurati alu gelar si mbaru, si labo ise pe metehsa, seakatan si ngaloken batu e." 2:18 "Man malekat perpulungen i Tiatira suratkenlah bagenda: Enda me berita i bas Anak Dibata nari, si mataNa erkinar-kinar bagi api, janah naheNa erkilat bagi tembaga si enggo isepuh. 2:19 Kueteh kai si idahikenndu. Kueteh nge kerna keleng atendu, kerna tutus atendu, kerna penampatindu, bage pe kerna saber atendu. Kueteh maka buen si idahikenndu genduari asangken si tangtangna nai. 2:20 Tapi pandangenKu nandangi kam e me kap: Ipelepasndu si Isebel, diberu e, ngakuken dirina nabi Dibata. Ngajar ia, janah ibabaina persuruhenKu papak erlagu la mehuli, dingen man pangan si enggo ipersembahken man berhala-berhala. 2:21 Enggo Kubereken kesempaten man bana gelah ia jera i bas dosa-dosana nari, tapi la ia nggit jera i bas erlagu la mehuli e nari. 2:22 Nehenlah, genduari Kusampetken me ia ku bas ingan medem kiniseran, janah temanna erlua-lua e ngenanami kiniseran si mberat, pala jera kin ia i bas perbahanen Isebel e nari. 2:23 Ajar-ajarna pe Kubunuh. Alu bage kerina perpulungen metehsa maka Aku me si meteh ukur ras sura-sura manusia. Kubalas me man bandu sekalak-sekalak rikutken kai si enggo ibahanndu. 2:24 Tapi temanndu si deban, si ringan i Tiatira la ngikutken pengajaren si jahat enda. La ipelajarindu kai si ikatakenna 'bagesna rahasia Iblis'. Kukataken man bandu maka labo Kutambahi babanndu. 2:25 Tapi tetaplah dalanken pengajaren si enggo lit i bas kam genduari seh Aku reh pagi. 2:26-28 Man kalak si menang, si tetap ndalanken si ngena ateKu seh ku kedungenna, Kubereken pagi bana kuasa bagi si Kualoken ibas BapangKu nari. Kubereken pagi man bana kuasa ngkuasai bangsa-bangsa alu ciken besi, dingen merperkenca bagi kudin taneh. Kubereken pe man bana bintang si cahar. 2:29 Adi lit cupingndu begikenlah kai si ikataken Kesah Dibata man perpulungen-perpulungen."
3:1 "Man malekat perpulungen i Sardis suratkenlah bagenda: Enda me berita i bas Ia nari, si lit i bas Ia pitu Kesah Dibata dingen bintang si pitu e. Kueteh kai si ibahanndu. Gelarna ngenca kam nggeluh tapi si tuhuna mate. 3:2 E maka kekekenlah, pegegehilah kai si lit denga i bas kam ope denga mate kerina. Sabap la lit Kuidah serta perbahanenndu i lebe-lebe DibatangKu. 3:3 Dage ingetlah kuga nai kam iajari dingen kuga nai kam megikenca. Ikutkenlah kai si iajarken man bandu e, janah jeralah. Adi la kam erjaga-jaga, reh me Aku ndahi kam bagi pinangko, janah la ietehndu katawari Aku reh. 3:4 Tapi lit piga-piga i tengah-tengahndu si i Sardis si tetap njaga pakenna bersih. Ras Aku pagi ia kerina erdalan make uis mbentar, sabap metunggung ia. 3:5 Kalak si menang iuisi me alu uis mbentar si bagenda, janah asa ndigan pe la Kusasapken gelarna i bas Kitap Kegeluhen nari. I lebe-lebe BapangKu, bage pe i lebe-lebe malekat-malekatNa terang-terangen Kuakui maka ia me sikerajangenKu. 3:6 Adi lit cupingndu begikenlah kai si ikataken Kesah Dibata man perpulungen-perpulungen!" 3:7 "Man perpulungen i Piladelpia suratkenlah bagenda: Enda me berita i bas Ia nari, Ia si Badia dingen Bujur, si njemak kunci Daud; adi italangiNa, ise pe la ngasup ngeruksa, janah adi ierukNa ise pe la ngasup nalangisa. 3:8 Kueteh kai si ibahanndu. Kueteh maka labo asa kai gegehndu; enggo ikutkenndu katangKu janah la ipersokenndu gelarKu. Nehenlah enggo Kutalangi pintun i lebe-lebendu, si ise pe la ngasup ngeruksa. 3:9 Nehenlah! Kalak si ngikutken peraten Iblis, kalak perguak si ngakuken dirina kalak Jahudi, kalak enda anggota perpulungen Iblis kap. Kubahan ia ngadap man bandu janah nembah erjimpuh i lebe-lebendu. Meteh me ia kerina maka keleng ateKu kam. 3:10 Erkiteken ijagandu dirindu tetap ngikutken perentahKu alu saber, e maka kam pe Kujaga gelah terkelin i bas paksa kesusahen, e me kesusahen si nandangi reh ku belang-belang doni enda, guna nguji kerina manusia. 3:11 Pedas Aku reh! Jagalah kai si lit i bas kam, gelah ola lit kalak si ngerebuti pemere kemenangenndu. 3:12 Kalak si menang Kubahan jadi binangun i bas Rumah Pertoton DibatangKu, janah asa ndigan pe la itadingkenNa ingan e. Kusuratken i bas ia gelar DibatangKu bage pe gelar Kuta DibatangKu, Jerusalem si Mbaru si nandangi nusur i Surga nari, i bas DibatangKu nari. Kusuratken pe i bas ia gelarKu si mbaru. 3:13 Adi lit kin cupingndu, begikenlah kai si ikataken Kesah Si Badia man perpulungen-perpulungen!" 3:14 "Man malekat perpulungen i Laodikea, suratkenlah bagenda: Enda me berita i bas si Amin nari, saksi si tutus dingen bujur, ulu kerina si enggo ijadiken Dibata. 3:15 Kueteh kai si enggo ibahanndu. Kueteh maka mbergeh pe kam lang janah melas pe kam lang. Ulin min kam mbergeh ntah melas. 3:16 Tapi perbahan kam mbernge, melas pe lang, mbergeh pe lang, Kuutahken kam i bas babahKu nari. 3:17 Ikatakenndu, 'Bayak aku janah terus tambah kebayakenku, e maka labo aku kurang kai pe.' Tapi si tuhuna la ietehndu maka musil nge kam janah ceda kal ate kalak ngidah percibalndu. Kam musil, pentang dingen manjang-anjang. 3:18 E maka Kukataken man bandu, tukurlah emas i bas aku nari, emas tulen, gelah kam bayak. Tukur pe uis si mbentar man pakenndu, guna nutupi kulandu si manjang-anjang, si man kemelanken e. Bage pe tukurlah salap mata guna tambar matandu gelah kam erpengidah. 3:19 Kalak si Kukelengi Kuligas ras Kuajarken. E maka tutus janah jeralah. 3:20 Nehenlah! Aku tedis i lebe-lebe pintun janah kutuktuk. Adi lit kalak megi sorangKu jenari italangina pintun, bengket me Aku ku bas rumahna jenari man Aku ras ia janah man ia ras Aku. 3:21 Kalak si menang Kuatanken kundul ras Aku i kursi KinirajanKu, bagi genduari Aku enggo menang, kundul Aku ras BapangKu i kursi KinirajanNa. 3:22 Adi lit kin cupingndu begiken kai si ikataken Kesah Dibata man perpulungen-perpulungen!"
4:1 Kenca bage kuidah ka sada nari pengenehenen. Kuidah talang pintun i Surga. Janah kubegi pe sora bagi sora terompet, si enggo kubegi ngerana man bangku. Nina sora e, "Mari ku datasken; Kucidahken man bandu kai arus jadi kenca si enda." 4:2 Jenari minter aku ikuasai Kesah Dibata. Kuidah sada kursi kinirajan i Surga, janah lit sekalak kundul i je. 4:3 Ayona ersinalsal bagi permata Jaspis ras permata Sardis. I kelewet kursi kinirajan e lit benteha si erbage-bage rupana. 4:4 Kursi kinirajan e ikeleweti dua puluh empat kursi kinirajan. Janah i bas si dua puluh empat kursi e kundul pertua-pertua, uisna mbentar janah ipakena mahkota emas. 4:5 I bas kursi kinirajan e nari ndarat kilap, sora ergeruhguh ras lenggur. I lebe-lebe kursi kinirajan e lit pitu lampu gara. E me Kesah Dibata si pitu e. 4:6 I lebe-lebe kursi kinirajan e lit bagi lawit kaca, meciho kal. I kelewet kursi kinirajan e lit empat mahluk si nggeluh, sada rep-tep dampar, si dem mata arah lebe ras arah pudi. 4:7 Mahluk si pemena bagi singa. Mahluk si peduaken bagi lembu jenggina. Mahluk si peteluken ayona bagi manusia. Mahluk si peempatken bagi rajawali kabang. 4:8 Teptep mahluk lit enem kabengna janah kerina kabeng e dem mata arah bas ras arah darat. Mahluk e la erngadi-ngadi rende suari ras berngi nina, "Badia, badia, badia me Tuhan, Dibata si Mada Kuasa, nai nari, genduari seh rasa lalap." 4:9 Mahluk si empat ngendeken puji-pujin, mpehaga dingen ngataken bujur man baNa si kundul i kursi Kinirajan e, si nggeluh rasa lalap seh rasa lalap. Asum rende mahluk si empat e, 4:10 erjimpuh pertua-pertua si dua puluh empat kalak i lebe-lebe si kundul i kursi Kinirajan e, janah isembahna Ia, si nggeluh rasa lalap seh rasa lalap e. Ibenterken pertua-pertua e mahkotana i lebe-lebe Kursi Kinirajan e jenari nina, 4:11 "O Tuhan Dibata kami Kam me si metunggung ngaloken kemulian, kehamaten ras Kuasa. Sabap Kam njadikenca kerina si nasa lit, janah erkiteken peratenNdu nge maka kerina e lit dingen nggeluh."
5:1 Kuidah sada Kitap i bas tan si kemuhen kalak si kundul i kursi kinirajan e. Kitap e isurati dua mbelahna, janah isegel alu pitu meterai. 5:2 Jenari kuidah sada malekat si mbisa ermomo alu sora megang nina, "Ise kin metunggung ngagui meterai-meterai dingen nalangi kitap e?" 5:3 Tapi subuk i Surga, ntah i doni, ntah i teruh doni, sekalak pe la lit si ngasup nalangi kitap e dingen ngenehenca ku bas. 5:4 Tangis kal aku dingen ceda kal ateku sabap la lit sekalak pe si metunggung nalangi kitap e ntah ngenehenca ku bas. 5:5 Jenari ngerana sekalak pertua e man bangku nina, "Ola kam tangis. Nehenlah! Singa i bas suku Juda nari, kesusuren si ipebelin i bas Daud enggo menang. Ia metunggung mecahken meterai si pitu e ras nalangisa." 5:6 Jenari kuidah sada Anak Biri-biri tedis i tengah-tengah kursi kinirajan e, ikeleweti mahluk si empat, ras pertua-pertua e. Anak Biri-biri e tempa enggo igeleh. Pitu tandukna ras pitu matana e me pitu Kesah Dibata si enggo isuruh Dibata ku belang-belang doni enda. 5:7 Erdalan Anak Biri-biri e ku lebe jenari ibuatNa kitap ndai i bas tan si kemuhen kalak si kundul i bas kursi kinirajan e nari. 5:8 Asum bage, mahluk si empat ras pertua-pertua si dua puluh empat ndai erjimpuh nembah i lebe-lebe Anak Biri-biri e. Sekalak-sekalak pertua e njemak sada kulcapi ras sada mangkuk emas isin kumenen, e me pertoton anak-anak Dibata. 5:9 Kerina ia ngendeken ende-enden si mbaru, "Kam me si metunggung muat kitap e dingen mecahken meterai-meteraina. Sabap Kam enggo ibunuh, janah erkiteken kematenNdu enggo itukurNdu manusia guna Dibata i bas kerina suku, cakap, negara ras bangsa nari. 5:10 Enggo ibahanNdu ia jadi Kinirajan imam-imam ndahiken dahin Dibatanta, janah irajaina pagi doni enda." 5:11 Jenari kunehen ka, janah kubegi sora malekat meribu-ribu dingen erjuta-juta teremna! Tedis ia kerina ngkeleweti kursi kerajan e, mahluk si empat ras pertua-pertua e. 5:12 Alu sora megang rende malekat-malekat e, "Anak Biri-biri si enggo igeleh e metunggung ngaloken kuasa, kinibayaken, kepentaren, gegeh, kehamaten, kemulian ras puji-pujin!" 5:13 Jenari kubegi rende kerina mahluk, subuk si i langit, i doni, i teruh doni, ras si i bas lawit; gendekna kerina si nggeluh si nasa lit, "Ia si kundul i kursi kinirajan e ras Anak Biri-biri e, man baNalah puji-pujin, kehamaten, kemulian, ras kuasa rasa lalap seh rasa lalap!" 5:14 Jenari ngaloi mahluk si empat ndai nina, "Amin!" Janah pertua-pertua e erjimpuh dingen ersembah.
6:1 Jenari kuidah Anak Biri-biri e mecahken meterai si pemena i bas meterai si pitu ndai, janah kubegi sada i bas mahluk si empat ndai ngerana alu sora si bali ras sora lenggur nina, "Mari!" 6:2 Kunehen, janah kuidah sada kuda mbentar. Si ngersak kuda e njemak panah janah ialokenna sada mahkota. Lawes ia ndarat bagi kalak si erperang ngerebut kemenangen. 6:3 Jenari ipecahken Anak Biri-biri e meterai si peduaken, janah asum e kubegi mahluk si peduaken ngerana nina, "Mari!" 6:4 E maka ndarat ka sada kuda gara. Si ngersak kuda e ngaloken pedang si mbelin ras ncedai perdamen i doni, gelah manusia si bunuhen. 6:5 Jenari ipecahken Anak Biri-biri e meterai si peteluken, janah asum e kubegi mahluk si peteluken ngerana nina, "Mari!" Kunehen, janah kuidah sada kuda mbiring. Si ngersak kuda e njemak sada timbangen. 6:6 Kubegi bagi sada sora i tengah-tengah mahluk si empat e nari nina, "Segantang beras gaji sada wari, telu gantang jaba gaji sada wari. Tapi ola cedaken batang seton ras batang anggur e." 6:7 Jenari ipecahken Anak Biri-biri e meterai si peempatken, janah asum e kubegi mahluk si peempatken ngerana nina, "Mari!" 6:8 Kunehen, janah kuidah sada kuda si mbulan rupana. Si ngersak kuda e gelarna Kematen, janah arah pudina ngikut Doni Kematen. Man bana ibereken kuasa nandangi seperempat doni enda, guna munuhisa alu pedang, kelihen, pinakit langket-langket janah alu rubia-rubia si merawa si lit i doni enda. 6:9 Jenari ipecahken Anak Biri-biri e meterai si pelimaken. Janah asum e kuidah i teruh batar-batar persembahen tendi kalak si enggo ibunuh erkite-kiteken iberitakenna Kata Dibata janah tutus atena i bas kesaksinna. 6:10 Alu sora megang erlebuh ia nina, "O Tuhan si Mada Kuasa, Badia dingen Bujur! Asakai nari dekahna la iadiliNdu bangsa i doni dingen la iukumNdu kalak si munuh kami?" 6:11 Kerina tendi e ngaloken jubah mbentar, janah man bana ikataken gelah pekesahken kentisik nari, seh kuh bilangenna suruh-suruhen ras senina-senina si nandangi ibunuh bali ras ia. 6:12 Jenari kuidah ipecahken Anak Biri-biri e meterai si peenemken. Asum e jadi linur si mehantu. Matawari jadi mbiring bagi uis kelam-kelam janah bulan megara bagi dareh. 6:13 Bintang-bintang nartar i langit nari ku doni bagi buah mbacang si langa tasak nartar i bas batangna nari asum rembus angin meter. 6:14 Langit talang, lit bali ras kire-kire si igulung, janah kerina deleng ras pulo miser i bas ingana nari. 6:15 Jenari kerina raja, pemerentah-pemerentah, puanglima-puanglima perang, kalak bayak ras kalak si erkuasa bage pe kerina manusia si deban, subuk budak ntah la budak, kerina cebuni i bas liang ras i selat-selat batu i deleng. 6:16 Erlebuh ia kempak deleng ras batu e nina, "Dabuhi kami janah tamburi gelah ola kami idah kalak si kundul i kursi Kinirajan e, janah gelah ola kami kena pernembeh Anak Biri-biri e! 6:17 Sabap enggo seh wari pernembehNa si mbelin e, janah ise kin ngasup ngelawansa?"
7:1 Kenca bage kuidah empat malekat tedis i empat penjuru doni. Iambangna empatna angin i doni enda gelah ola rembus kempak daraten, kempak lawit ntah kempak batang kayu apai pe. 7:2 Janah kuidah ka malekat si deban nangkih i Timur nari maba meterai Dibata e me Dibata si nggeluh. Alu sora megang erlebuh ia man malekat si empat, si man bana enggo ibereken Dibata kuasa ncedaken daraten ras lawit. 7:3 Nina malekat e, "Ola lebe cedaken daraten, lawit ntah batang kayu, adi langa dung sitamaken meterai i bas perdempaken suruh-suruhen Dibatanta." 7:4 Janah man bangku ipebetehken lit 144.000 kalak si itamaken meterai Dibata i bas perdempakenna. Kalak e ibuat i bas suku bangsa Israel si sepuluh dua; 7:5 12.000 kalak ibas tep-tep suku nari e me: 12.000 ibas suku Juda nari, 12.000 ibas suku Ruben nari, 12.000 ibas suku Gad nari, 7:6 12.000 ibas suku Aser nari, 12.000 ibas suku Naptali nari, 12.000 ibas suku Manase nari 7:7 12.000 ibas suku Simeon nari, 12.000 ibas suku Lewi nari, 12.000 ibas suku Isasar nari, 7:8 12.000 ibas suku Sebulon nari, 12.000 ibas suku Jusup nari, ras 12.000 i bas suku Benyamin nari. 7:9 Kenca bage kunehen ka, janah kuidah i je nterem kal jelma. Ise pe la ngasup meligaisa! Kalak si nterem e rehna i bas kerina bangsa, suku, negara ras i bas kerina cakap nari, janah kerina ia tedis i lebe-lebe kursi kinirajan dingen i lebe-lebe Anak Biri-biri e. Kerina ia make jubah mbentar janahna njemak lambe. 7:10 Kerina ia ngerana alu sora megang, "Keselamatenta reh i bas Dibatanta nari, e me si kundul i kursi kinirajan e dingen i bas Anak Biri-biri e nari!" 7:11 Kerina malekat tedis ngkeleweti kursi kinirajan, pertua-pertua ras mahluk si empat e. Jenari erjimpuh ia i lebe-lebe kursi kinirajan e ayona seh ku taneh janahna nembah man Dibata 7:12 nina, "Amin! Pujin ras kemulian, kepentaren ras pengataken bujur, kehamaten, gegeh, ras kuasa man Dibatanta seh rasa lalap. Amin!" 7:13 Jenari sekalak i bas pertua-pertua e nungkun man bangku nina, "Ise kerina kalak si erjubah mbentar enda, janah i ja nari kin ia?" 7:14 Erjabap aku, "La kueteh Pa! Kam me metehsa." Nina pertua e man bangku, "Enda me kalak si enggo ngasup mentasi kiniseran si mbelin e. Enggo ibersihkenna jubahna dingen ipebentarina alu Dareh Anak Biri-biri e. 7:15 Erkiteken si e maka tedis ia kerina i lebe-lebe kursi kinirajan Dibata, janah suari ras berngi isembahna Dibata i bas Rumah Pertoton. Ia, Si kundul i kursi kinirajan e, tetap ngampang-ngampangi ia. 7:16 Lanai ia muas ntah melihe bage pe lanai ia iparpari matawari ntah las; 7:17 sabap Anak Biri-biri si i tengah-tengah kursi kinirajan e jadi permakanna, janah Anak Biri-biri e si mabai ia ku ulu lau kegeluhen. Janah Dibata me ngapusi iluhna si mambur."
8:1 Asum ipecahken Anak Biri-biri e meterai si pepituken, setengah jam dekahna la lit sora kai pe i Surga. 8:2 Jenari kuidah pituna malekat si tedis i lebe-lebe Dibata ngaloken pitu terompet. 8:3 Reh sekalak malekat si deban, si lit i bas ia mangkuk emas ingan kumenen, jenari lawes ia tedis i lebe-lebe batar-batar persembahen. Ialokenna melala kumenen nambahi pertoton-pertoton anak-anak Dibata dingen mpersembahkenca i babo batar-batar persembahen emas si lit i lebe-lebe kursi kinirajan e. 8:4 Radu ras pertoton anak-anak Dibata, asap kumenen si gara e nangkih i bas tan malekat e nari kuadep-adepen Dibata. 8:5 Jenari ibuat malekat e ingan kumenen ndai, itamana ku bas rara api si ibuat i bas batar-batar persembahen, jenari iamburkenna ku doni. Kenca bage jadi me lenggur, sora si ergeruhguh, kilap, ras linur. 8:6 Jenari ersikap malekat si pitu e ngembus terompet si lit i bas ia. 8:7 Iembus malekat si pemena terompetna jenari reh udan baho bage pe api singgur ras dareh mambur ku doni. E maka meseng sepertelu doni enda, sepertelu batang kayu ras kerina dukut-dukut si meratah. 8:8 Jenari iembus malekat si peduaken terompetna. Paksa e lit meseng tempasna bagi deleng meganjang, iambengken ku lawit. E maka sepertelu lawit salih jadi dareh; 8:9 sepertelu rubia-rubia si nggeluh i lawit mate, janah sepertelu kapal kernep. 8:10 Jenari iembus malekat si peteluken terompetna. Paksa e ndabuh i langit nari sada bintang galang gara bagi obor. Idabuhina sepertelu lau mbelin ras sumbul-sumbul lau. 8:11 (Gelar bintang e Pagit.) E maka sepertelu lau e salih jadi pagit, janah nterem kalak mate erkiteken nginem lau si enggo salih jadi pagit e. 8:12 Jenari iembus malekat si peempatken terompetna. Paksa e gelap sepertelu matawari, sepertelu bulan ras sepertelu bintang janah bene terangna sepertelu. Bage pe sepertelu suari ras sepertelu berngi jadi gelap kerina. 8:13 Jenari kunehen, janah kubegi serko rajawali si paksa kabang meganjang i tengah awang-awang nina, "Cilaka! Cilaka! Cilaka kal kerina kalak si nggeluh i doni adi ibegina denggo sora terompet si iembus malekat si telu kalak nari!"
9:1 Jenari iembus malekat si pelimaken terompetna. Paksa e kuidah sada bintang si enggo ndabuh i langit nari ku doni. Man bana ibereken kunci embang si la ersibar bagesna. 9:2 Italangi bintang e embang si la ersibar bagesna ndai jenari erdipul cimber i bas nari bagi cimber dapur si mbelin. Sinalsal matawari ras awang-awang gelap ibahan cimber si reh i bas embang e nari. 9:3 Jenari rehen labang ku babo taneh enda i bas cimber e nari, janah man labang ibereken kuasa bali ras kuasa kacip gelang i doni enda. 9:4 Man labang e ipebetehken maka la banci icedakenna dukut-dukut, ntah batang kayu ntah sinuan-sinuan. Manusia si la lit meterai i bas perdempakenna ngenca banci icedakenna. 9:5 Labang e la banci munuh manusia, tapi seh kal akap kalak suina ibanna, dekahna lima bulan. Suina isiksa labang e bali ras, icit kacip gelang. 9:6 I bas si lima bulan e idarami manusia e kematen, tapi la idatca; merincuh ia mate, tapi kematen nilah i bas ia nari. 9:7 Labang e bagi kuda si enggo ersikap erperang. I babo takalna lit mahkota bali ras emas. Ayona bagi ayo manusia. 9:8 Bukna bagi buk diberu, janah ipenna bagi ipen singa. 9:9 Ampang-ampang tentenna tempa-tempa baju besi. Sora kabengna bagi sora gereta kuda kiam lawes erperang. 9:10 Kerina rikur bage pe serenna bali ras kacip-gelang. I bas ikur e lit kuasa pesega-sega manusia lima bulan dekahna. 9:11 Labang e lit rajana si ngaturken ia, e me malekat si ertanggung jawab kerna embang si la ersibar bagesna e. Gelar rajana e i bas cakap Heber e me Abaddon; i bas cakap Junani Apolion (ertina, si ngkernepken). 9:12 Cilaka si pemena enggo lepas. Kenca si e reh ka cilaka dua kali nari. 9:13 Jenari iembus malekat si peenemken terompetna. Paksa si e kubegi sora i bas empatna tanduk batar-batar persembahen nari, e me batar-batar persembahen emas si lit i lebe-lebe Dibata. 9:14 Nina sora e man malekat si ngembus terompet ndai, "Pulahi malekat si empat si irante i tepi Lau Eprat si mbelin e." 9:15 E maka ipulahi me malekat si empat e. Malekat e enggo isikapken i bas jam e, wari e, bulan e, dingen tahun e guna munuh sepertelu i bas kerina manusia. 9:16 Man bangku ipebetehken teremna barisen tentera si erkuda e lit dua ratus juta kalak. 9:17 Janah i bas pengenehenen ka kuidah kuda e ras si ngersaksa: Baju ampang-ampangna, rupana megara bagi api, megara metua bagi permata nilam janah megersing bagi kertah. Takal kuda e bagi takal singa, janah i bas babahna nari ndaraten api, cimber ras kertah. 9:18 Sepertelu manusia mate erkiteken mara si telu e; api, cimber ras kertah si ndarat i bas babah kuda e nari. 9:19 Sabap kuasa kuda e lit i bas babah ras i bas ikurna. Ikur kuda e bagi nipe, lit takal ikurna e janah alu takal ikurna e me ia pesega-sega manusia. 9:20 Manusia si deban, e me manusia si la mate kena mara enda ndai la ka bo ia jera i bas perbahanenna nari. La ingadikenna ersembah man setan-setan ras man berhala-berhala emas, pirak, tembaga, batu ras kayu, si la erpengidah, la erpemegi dingen la ngasup erdalan. 9:21 Bage pe la ia jera munuh, ndalanken kinigurun, erlua-lua ntah pe nangko.
10:1 Jenari kuidah sada nari malekat megegeh sanga nusur i Surga nari. Malekat e ruisken embun, janah i babo takalna lit benteha. Ayona bagi matawari janah nahena bagi binangun api. 10:2 I bas tanna lit talang kitap kitik. Nahena si kemuhen idedehkenna ku lawit, janah nahena si kawes i daraten. 10:3 Jenari ngerana ia alu sora megang bagi singa erdengum. Kenca ia ngerana, ngaloi lenggur si pitu. 10:4 Ngadi kenca lenggur si pitu e, kusuratken ateku. Tapi kubegi sora ngerana i Surga nari nina, "Rahasiaken kai si ikataken lenggur si pitu e, ola suratken." 10:5 Jenari malekat si kuidah ndedeh lawit ras daraten, ngangkat tanna si kemuhen ku langit. 10:6 Janah ersumpah ia i bas gelar Dibata si nggeluh rasa lalap, si njadiken langit ras kerina isina, doni ras kerina isina, bage pe lawit ras kerina isina. Nina malekat e, "Warina lanai bo icuncun! 10:7 Tapi asum iembus malekat si pepituken terompetna, ikuhi Dibata me rahasiaNa, bagi si enggo iberitakenNa berita si mehuli e man suruh-suruhenNa, e me nabi-nabi." 10:8 Jenari kubegi ka sora i Surga nari, nina, "To buat kitap si talang i bas tan malekat si tedis i bas lawit dingen i daraten." 10:9 Kudahi malekat e jenari kupindoken gelah iberekenna kitap si kitik e man bangku. Nina man bangku, "Buatlah jenari pan; i bas beltekndu salih me jadi pagit, tapi i bas babahndu ntebu bagi tengguli." 10:10 Kubuat kitap si kitik e i bas tanna nari jenari kupan, janah i bas babahku ntebu nanamna bagi tengguli. Tapi kenca kubelgek, salih jadi pagit i bas beltekku. 10:11 Jenari ipebetehken man bangku, "Arus kam ernubuat denga kerna pemerentahen, bangsa-bangsa, cakap, dingen raja-raja!"
11:1 Jenari man bangku ibereken sada kayu penibari bali ras ciken. Man bangku ikataken, "To sibari Rumah Pertoton Dibata ras batar-batar persembahen, janah beligai teremna kalak si ersembah i bas. 11:2 Tapi kesain si arah darat ola sibari, sabap si e enggo iendesken man bangsa si labo kalak Jahudi. Idedehina pagi Kuta si Badia empat puluh dua bulan dekahna. 11:3 Kusuruh pagi dua kalak saksingku make uis guni tanda ate ceda. Iturikenna pagi Kata Dibata dekahna 1260 wari." 11:4 Saksi si dua e, e me batang seton si dua ras lampu si dua si lit i lebe-lebe Tuhan doni enda. 11:5 Adi lit kalak si atena nggasgasisa ndarat api i bas babahna nari ngkernepken musuh-musuhna. Alu bage ise nggasgasi ia mate me. 11:6 Lit kuasana nutupi langit gelah ola nusur udan kidekah ia ernubuat denga. Lit me kuasana nandangi sumbul-sumbul lau, e me guna nalihkenca jadi dareh. Bage pe lit kuasana ngerehken erbage-bage mara ku doni enda piga-piga kali pe atena. 11:7 Kenca dung ia ersaksi, rubia-rubia si reh i bas embang e nari ngelawan ia. Italuken rubia-rubia e me ia duana dingen ibunuhna, 11:8 janah maitna ampar me i bas pasar kuta si meriah, i ja Tuhan ipakuken ku kayu persilang. Kuta e iumpamaken gelarna Sodom ntah Mesir. 11:9 Kerina pemerentahen, suku, cakap, ras bangsa ngenehen maitna telu setengah wari dekahna janah la iberena mait e ikuburken. 11:10 Meriah me ukur manusia si i doni e i bas kematen saksi si dua enda. Erpesta ia kerina dingen mereken luahna ia sekalak nandangi si debanna, sabap nabi si dua e enggo ngerehken kiniseran-kiniseran nandangi manusia si i doni enda. 11:11 Kenca si telu setengah wari e, reh kesah si nggeluh i bas Dibata nari, mengketi nabi si dua kalak e. Jenari tedis ia duana, janah mbiar kal kalak kerina si ngenehen ia. 11:12 Kenca bage ibegi nabi si dua e sora si megang i Surga nari, ngerana man bana nina, "Marilah ku datasken!" Asum itatap musuh-musuhna ia, nangkih ia ku Surga, ras embun. 11:13 Paksa si e kal pe jadi me linur si mesangat. Kernep sepersepuluh kuta e, janah mate pitu ribu kalak jelma ibahan linur e. Jelma si debanna mbiar kal janah iberekenna kemulian man Dibata si i Surga. 11:14 Cilaka si peduaken enggo lepas. Tapi nehenlah! Reh me cilaka si peteluken. 11:15 Jenari iembus malekat si pepituken e terompetna. Paksa si e terbegi sora-sora si megang i Surga nari nina, "Kuasa guna ngerajai doni enda genduari enggo i bas tan Tuhanta dingen Mesias si ipadankenNa janah Ia ngerajaisa rasa lalap seh rasa lalap." 11:16 Jenari pertua-pertua si dua puluh empat si kundul i bas kursi kinirajan i lebe-lebe Dibata erjimpuh dingen nembah man Dibata, 11:17 nina, "O Tuhan Dibata si Mada Kuasa si enggo lit genduari ras nai nari. Bujur ikataken kami man bandu sabap enggo ipakeNdu kuasaNdu, si mbelin e, janah enggo Kam ngerajaisa kerina. 11:18 Merawa kalak si la nandai Tuhan, sabap enggo seh paksana icidahkenNdu rawaNdu, janah iadiliNdu kalak si enggo mate. Genduari me paksana guna mereken upah man suruh-suruhenNdu, e me nabi-nabi bage pe man kerina anak-anakNdu, kerina kalak si erkemalangen man baNdu subuk si kitik bage pe si mbelin. Genduari me paksana guna ngkernepken kalak si ncedaken doni." 11:19 E maka talang Rumah Pertoton Dibata i Surga, janah teridah i je Peti Perpadanen. Jenari reh kilap, sora si ergeruhguh, lenggur, linur ras udan baho si mehantu.
12:1 Jenari lit teridah sada tanda si mbelin i langit, e me sekalak diberu si ruisken matawari; lit bulan i teruh nahena, janah i bas takalna lit mahkota, e me sepuluh dua bintang. 12:2 Diberu e sangana mehuli kula, janah erkiteken enggo ndeher paksa mupus, nderkuh-nderkuh ia perban suina. 12:3 Jenari teridah ka sada tanda si deban i langit, e me sada naga si galang, megara rupana. Naga e pitu takalna janah sepuluh tandukna. Pituna takalna ermahkota. 12:4 Alu ikurna isarenna sepertelu bintang-bintang i langit jenari isampetkenna ku doni. Naga e tedis i lebe-lebe diberu e, gelah kenca tubuh anak e minter itelenna. 12:5 E maka ipupus diberu e sada anak dilaki, si pagin mpermakani kerina bangsa alu ciken besi. Tapi anak e irebut i bas diberu e nari, jenari ibaba ku Dibata dingen ku kursi kinirajanNa. 12:6 Diberu e kiam ku taneh si melungun, ku ingan si enggo isikapken Dibata man bana, i ja ia ikepkep pagin seribu dua ratus enem puluh wari dekahna. 12:7 Kenca bage jadi perang i Surga. Mikael ras malekat-malekatna erperang ngelawan naga e. Janah naga e ras malekat-malekatna ngelawan Mikael, 12:8 tapi talu naga e. Naga e ras malekat-malekatna lanai ipelepas ringan i Surga. 12:9 Naga si galang e isampetken ndarat! Enda me nipe si nuria si igelari Iblis ntah Setan, si nipu i belang-belang doni enda. Isampetken ia ku doni ras kerina malekat-malekatna. 12:10 Jenari kubegi sora megang i Surga nina, "Genduari me paksana Dibata ngkelini bangsaNa! Genduari enggo icidahken Dibata kuasaNa selaku Raja! Genduari Mesias si ipadanken Dibata e pe ncidahken kuasaNa! Sabap si nalahken senina-seninanta, e me si ngaduken ia i lebe-lebe Dibata suari ras berngi enggo isampetken i Surga nari. 12:11 Senina-seninanta enggo menang ngelawan ia alu dareh Anak Biri-biri e, dingen alu Kata Dibata si isaksikenna; janah senina-seninanta e la ngkelengi kesahna seh mate pe. 12:12 E maka ersuraklah o Surga, bage pe kerina kam si ringan i bas! Tapi andiko, cilaka me doni enda ras lawit, sabap Iblis enggo nusur ku kam, janah merawa ia sabap ietehna maka kentisik nari ngenca kesempaten lit i bas ia." 12:13 Kenca ieteh naga e ia enggo isampetken ku doni, iayakina diberu si enggo mupus anak dilaki ndai. 12:14 Tapi man diberu e ibereken dua kabeng rajawali si galang, gelah banci ia kabang ku inganna i taneh si melungun, i ja ia ikepkep dekahna sada paksa, dua paksa ras setengah paksa ndauh i bas nipe e nari. 12:15 Jenari isemburken nipe e lau mbelin i bas babahna nari kempak diberu e, atena ngombakkenca. 12:16 Tapi isampati doni diberu e. Talang babah doni enda, jenari itelenna lau si ndarat i bas babah naga e nari. 12:17 Merawa kal ate naga e kempak diberu ndai, e maka lawes naga e merangi kesusuren diberu si deban, e me kerina kalak si ngikutken perentah Dibata dingen patuh ndalanken si ngena ate Dibata sue ras si ipetangkas Jesus. 12:18 Janah naga e tedis i babo kersik i tepi lawit.
13:1 Kenca bage kuidah sada rubia-rubia mulgap i bas lawit nari. Tandukna sepuluh janah takalna pitu. Pituna takalna ermahkota, janah i bas kerina takalna e lit tersurat gelar si nggombangi Dibata. 13:2 Rubia-rubia si kuidah e tempa-tempa bagi arimo tultul, nahena bagi nahe beruang, janah babahna bagi babah singa. Man rubia-rubia e ibereken naga ndai gegeh si lit i bas ia, kursi kinirajanna, ras kuasana si mbelin. 13:3 Sada takal rubia-rubia ndai tempa-tempa enggo luka mekelek si maba kematen, tapi luka si mekelek e enggo malem. Belang-belang doni kemamangen janah ikutkenna rubia-rubia e. 13:4 Kerina manusia nembah man naga ndai sabap enggo iberekenna kuasana man rubia-rubia e. Rubia-rubia e pe isembahna nina, "Ise kin seri ras rubia-rubia e? Ise kin ngasup ngelawan ia?" 13:5 Rubia-rubia e ipelepas melasken kerna si jahat kal, ia ipelepas erkuasa empat puluh dua bulan dekahna. 13:6 Mulai me ia ngerana nggombangi Dibata, gelar Dibata ras ingan Dibata bage pe kerina kalak si ringan i Surga. 13:7 Ipelepas ia ngelawan anak-anak Dibata dingen nalukenca. Man bana ibereken kuasa nandangi kerina suku, negara, cakap ras bangsa. 13:8 Kerina manusia si nggeluh i doni nembah me man bana: e me kerina kalak si langa isuratken i bas Kitap Kegeluhen. Gelar-gelar si lit i bas Kitap e enggo isuratken ope denga tembe doni enda, janah Kitap e Anak Biri-biri si enggo igeleh empuna. 13:9 Adi lit kin cupingndu begikenlah! 13:10 Kalak si enggo itetapken guna itaban, tentu itaban me. Janah kalak si enggo itetapken guna ibunuh alu pedang, tentu ibunuh me alu pedang. Erkiteken si enda me maka anak-anak Dibata arus megenggeng dingen tetap tek man Dibata. 13:11 Jenari kuidah sada rubia-rubia si deban mulgap i doni nari. Rubia-rubia e lit dua tandukna bagi tanduk anak biri-biri, janah pengeranana bagi naga. 13:12 I lebe-lebe rubia-rubia si pemena e ipakena kuasa si mbelin si lit i bas rubia-rubia si pemena e. Ipaksana doni ras kerina si ringan i doni guna nembah man rubia-rubia si pemena, si lukana enggo malem ndai. 13:13 Rubia-rubia si peduaken erbahan e tanda-tanda sengget si mbelin. I lebe-lebe kerina manusia ipesusurna ku doni api i langit nari. 13:14 Itipuna kerina manusia si nggeluh i doni alu tanda-tanda sengget si ibahanna i lebe-lebe rubia-rubia si pemena e. Isuruhna kerina manusia i doni enda erbahan sada gana-gana guna mpehaga rubia-rubia si la mate amin pe enggo ilukai alu pedang. 13:15 Man rubia-rubia e ibere kengasupen ngembusken kesah ku bas gana-gana rubia-rubia si pemena, seh maka gana-gana e banci ngerana, bage pe munuhi kerina kalak si la nggit nembah man bana. 13:16 Ipaksa rubia-rubia e kerina manusia, subuk si kitik bage pe si mbelin, subuk si bayak bage pe si musil, subuk juak-juak bage pe si la juak-juak, gelah itamaken sada cap i bas tanna si kemuhen ntah i bas perdempakenna. 13:17 Cap enda e me kap gelar rubia-rubia e ntah nombor gancih gelarna. Ise pe la banci erbinaga ntah nukur adi la lit i bas ia cap enda. 13:18 I bas si enda perlu kepentaren! Kalak si beluh ngasup ia ngangkasa nombor rubia-rubia e, sabap nombor e, e me kap sekalak manusia. Nomborna e, e me 666.
14:1 Jenari kuidah tedis Anak Biri-biri e i Deleng Sion, janah ras Ia lit jelma teremna 144.000 kalak. Ibas perdempakenna kerina enggo isuratken gelar Anak Biri-biri e ras gelar BapaNa. 14:2 Jenari kubegi sora i langit nari bagi sora sampuren si mbelin ntah pe bagi sora lenggur si megang. Sora si kubegi e bagi sora kalak erkulcapi. 14:3 Si 144.000 kalak e tedis ngalaken kursi kinirajan, bage pe ngalaken mahluk si empat ras pertua-pertua e. Kerina ia ngendeken ende-enden si mbaru. Ende-enden e, kalak si enggo itukur i bas doni enda nari ngenca ngasup mpelajarisa. 14:4 Kalak enda kerina bersih sabap la icemarkenna bana alu diberu. Tetap ia suci bagi singuda-nguda. Iikutkenna Anak Biri-biri e ku ja gia Ia lawes. Ia enggo itebusi i bas manusia si deban nari, janah ia me si pemena ipersembahken man Dibata ras man Anak Biri-biri e. 14:5 La ia pernah ketunduken erguak. La lit si man pandangen i bas ia. 14:6 Jenari kuidah sada malekat si deban kabang meganjang i awang-awang. Ibabana Berita Si Meriah si la ermasap-masap guna iberitaken man manusia i doni enda, man kerina bangsa, suku, cakap ras negara. 14:7 Alu sora megang nina malekat e, "Erkemalangenlah man Dibata janah pujilah Ia. Sabap enggo seh paksana Dibata ngadili manusia. Sembahlah Ia si njadiken langit, doni, lawit ras kerina ulu lau!" 14:8 Reh malekat si peduaken ngikutken malekat si pemena, alu sora megang nina, "Enggo tombang! Enggo tombang Negeri Babilon si mbelin e! Enggo iberekenna anggurna man kerina bangsa, seh maka bangsa-bangsa jadi mabuk dingen jadi perlua-lua!" 14:9 Reh ka malekat si peteluken ngikutken malekat si dua ndai janah alu sora megang nina, "Kalak si ersembah man rubia-rubia ras gana-ganana e, dingen si lit cap i bas perdempakenna ntah i bas tanna, 14:10 inemna me anggur Dibata e, e me anggur pernembeh Dibata si ikuseken la lit campurna ku bas calung pernembeh Dibata. Kerina kalak si bagenda, isiksa me i bas api ras i bas kertah i lebe-lebe malekat si Badia ras Anak Biri-biri e. 14:11 Cimber api si pesega-sega kalak e erdipul seh rasa lalap. Kalak si nembah rubia-rubia ras gana-ganana e, bage pe kalak si lit i bas ia cap gelar rubia-rubia e, la erngadi-ngadi, suari ras berngi ngenanami kiniseran." 14:12 Erkiteken si e maka anak-anak Dibata si ngikutken pedah-pedah Dibata dingen setia man Jesus arus megenggeng. 14:13 Jenari kubegi sora i Surga nari nina, "Suratkenlah enda, 'Ketuahen kalak si mate, si mate i bas kiniteken man Tuhan, mulai genduari nari!' Ngaloi Kesah Dibata, 'Payo bage me jadina!' Pekesahken me ia i bas latihna nari, sabap perbahanen-perbahanenna ngarak-ngarak ia." 14:14 Jenari kupernehen, e maka kuidah embun mbentar, janah lit tempa-tempa bagi manusia kundul i babo embun e. I bas takal si kundul e lit mahkota emas janah i bas tanna lit sada sabi-sabi si ntelap. 14:15 Jenari ndarat sekalak malekat si deban i bas Rumah Pertoton nari. Alu sora si megang nina man si kundul i babo embun e, "Sabikenlah sabi-sabindu janah ranilah genduari sabap enggo seh paksa peranin, doni enggo seh paksana iperani!" 14:16 Jenari iawatken si kundul i babo embun e sabi-sabina ku doni, janah mperani me doni enda. 14:17 Jenari kuidah ka sekalak nari malekat ndarat i bas Rumah Pertoton Dibata nari i Surga. Ia pe lit sabi-sabina ntelap. 14:18 Kenca bage ndarat ka i bas batar-batar persembahen nari sekalak malekat si erkuasa nandangi api. Alu sora megang erlebuh ia man malekat si ncikep sabi-sabi si ntelap e nina, "Sabiken sabi-sabindu, janah perani anggur si lit i kebun anggur i doni, sabap enggo tasak buahna!" 14:19 E maka iawatken malekat ndai sabi-sabina ku doni, isabina buah anggur i bas batangna nari, jenari iambekkenna ku bas ingan mereh anggur pernembeh Dibata si mbelin. 14:20 Buah anggur e ipereh i ingan mereh anggur i darat kuta. I bas ingan e nari maler dareh bagi lau mbelin, seh telu ratus kilometer dauhna janah bagesna menam dua meter.
15:1 Kenca bage, kuidah ka sada tanda si mbelin dingen si erbahanca ate mamang i langit. Lit pitu malekat maba pitu mara e me mara si pendungi, sabap enda me tanda pernembeh ate Dibata si perpudina. 15:2 Jenari lit kuidah tempa-tempa bagi lawit kaca singgur ras api. Kuidah pe kalak si enggo menang ngelawan rubia-rubia ras gana-ganana e, bage pe menang ngelawan kalak si gelarna itandai alu numbur. Kalak si enggo menang enda tedis i tepi lawit kaca e janah njemak kulcapi si enggo ibereken Dibata man bana. 15:3 Iendekenna ende-enden Musa, suruh-suruhen Dibata e, dingen ende-enden Anak Biri-biri nina, "O Tuhan, Dibata si Mada Kuasa, seh kal belinna perbahanenNdu, si erbahanca ate mamang. O Raja kerina bangsa, seh kal bujurna perbahanenNdu, seh kal payona pendalankenNdu. 15:4 Ise kin la erkemalangen man baNdu o Tuhan? Ise kin la nggit muji gelarNdu? Kam kap ngenca Badia. Reh me kerina bangsa nembah i lebe-lebeNdu, sabap kerina ia enggo ngidah perbahanenNdu si bujur." 15:5 Janah kuidah talang Rumah Pertoton i Surga, janah i bas lit kemah ingan Papan Batu Perpadanen. 15:6 Malekat si pitu si maba ukumen si pitu ndai ndarat i bas Rumah Pertoton e nari. Uisna kain si bersih erkilat-kilat janah 15:7 Jenari sada i bas mahluk si empat e mereken pitu mangkuk emas man malekat si pitu e, e me mangkuk emas si dem pernembeh ate Dibata, e me Dibata si nggeluh rasa lalap. 15:8 Rumah Pertoton e dem asap kemulian dingen Kuasa Dibata. Ise pe la banci bengket ku bas Rumah Pertoton e adi langa keri mara si pitu si ibaba malekat si pitu e.
16:1 Jenari kubegi sora megang i bas Rumah Pertoton e nari ngerana man malekat si pitu ndai nina, "Laweslah, tungtungken ku doni pituna mangkuk pernembeh ate Dibata e!" 16:2 Berkat malekat si pemena jenari itungtungkenna isi mangkukna ku daraten. E maka turah me bareh si jahat ras mesui i bas kalak si lit i bas ia cap rubia-rubia e, bage pe kalak si nembah gana-gana rubia-rubia e. 16:3 Kenca bage itungtungken malekat si peduaken isi mangkukna ku lawit. E maka salih lau lawit e bagi dareh kalak mate, janah kerina si nggeluh i bas lawit e mate. 16:4 Jenari itungtungken malekat si peteluken isi mangkukna ku kerina lau bage pe ku kerina ulu lau. E maka salih lau e jadi dareh. 16:5 Paksa e kubegi ngerana malekat si erkuasa nandangi lau e nina, "O si Badia, si lit genduari ras nai nari pe, adil kap Kam i bas ukumen-ukumen si enggo ibahanNdu! 16:6 Enggo iamburkenna dareh anak-anakNdu ras dareh nabi-nabiNdu, janah genduari ibahanNdu ia nginem dareh. Patut nge bage!" 16:7 Jenari kubegi sora i bas batar-batar persembahen nari nina, "Payo, bage me jadina. O Tuhan, Dibata si Mada Kuasa! Bujur dingen adil nge ukumen-ukumen si ibahanNdu!" 16:8 Jenari itungtungken malekat si peempatken isi mangkukna ku matawari. E maka lit kuasa i bas matawari guna nutung manusia alu lasna si nderngit. 16:9 Meseng manusia ibahan lasna si nderngit e, e maka isumpahina gelar Dibata, si erkuasa nandangi mara e. Tapi la ia jera janah la ia nggit pemuliaken Dibata. 16:10 Jenari itungtungken malekat si pelimaken isi mangkukna ku kursi kinirajan rubia-rubia e. Erkiteken si e gelap kerina kerajan rubia-rubia e. Ikerep manusia biberna perbahan suina akapna, 16:11 janah isumpahina Dibata si i Surga erkiteken suina dingen erkiteken bareh-barehna e. Tapi la ia jera kerna perbahanenna si jahat. 16:12 Kenca bage itungtungken malekat si peenemken isi mangkukna ku Lau Eprat si mbelin. E maka kerah me lau e, guna nikapken dalan man raja-raja si reh i Timur nari. 16:13 Jenari kuidah telu kesah si melket, si ndarat i bas babah naga nari, i bas babah rubia-rubia e nari, bage pe i bas babah nabi si perguak nari. Kesah si melket e tempa-tempa bagi katak. 16:14 Enda me kesah setan-setan si erbahan tanda-tanda sengget. Kesah si telu enda lawes ndahi raja-raja i belang-belang doni enda; ipepulungna raja-raja e guna erperang i bas wari si mbelin e, e me wari Dibata si Mada Kuasa! 16:15 "Nehenlah! Reh me Aku bagi sekalak penangko! Ketuahen kalak si la tunduh janah si la nangtangi uisna, gelah ola ia erdalan manjang-anjang, janah mela iakapna i lebe-lebe kalak si nterem!" 16:16 Kenca bage ipepulung kesah-kesah e raja-raja i bas sada ingan si igelari i bas cakap Heber, Harmagedon. 16:17 Jenari itungtungken malekat si pepituken isi mangkukna ku awang-awang. Paksa si e terbegi sora megang i bas kursi kinirajan i bas Rumah Pertoton nari nina, "Enggo dung!" 16:18 E maka jadi kilap, sora ergeruhguh, lenggur ras linur si mehantu. Kidekah lit manusia langa pernah jadi linur si adum e. Enda me linur si mehantuna kal! 16:19 Kuta si meriah e pecah jadi telu bagin, janah kuta bangsa-bangsa kernep kerina. Janah iinget Dibata Babilon si meriah e. IbahanNa kuta e minem i bas calung Dibata nari anggur pernembeh ate Dibata. 16:20 Masap kerina pulo-pulo janah deleng-deleng pe lanai teridah. 16:21 Udan baho si kegalangen, si beratna lit lima puluh kilo sada, ndabuhen i langit nari ngkenai manusia. E maka isumpahi manusia me Dibata erkiteken mara udan baho e, sabap seh kal mehantuna mara e.
17:1 Kenca bage reh ndahi aku sekalak i bas malekat si pitu si lit pitu mangkukna, janah nina, "Mari, maka kutuduhken man bandu ukumen si jadi nandangi diberu si pencarinna erlua-lua, e me kuta si mbelin si ipanteki i tepi-tepi lau. 17:2 Raja-raja doni erlua-lua ras diberu si perlua-lua si mbelin e, janah manusia i doni enda mabuk sabap iinemna anggur perlua-lua e." 17:3 Ibengketi Kesah Si Badia aku jenari ibaba ku taneh mesawang. I je kuidah sekalak diberu ngersak rubia-rubia si megara metua rupana; takal rubia-rubia e pitu janah tandukna sepuluh. I bas kerina kulana lit gelar-gelar si nggombangi Dibata. 17:4 Uis diberu e rupana bunga terong ras megara metua, itutupi alu barang-barang emas, permata ras mutiara. I bas tanna lit calung emas si dem alu si mbau ras si nggesuh, si rehna i bas perbahanenna erlua-lua nari. 17:5 I bas perdempakenna lit isuratken sada gelar rahasia e me, "Babilon si mbelin, indung kerina perlua-lua ras si nggesuh i doni enda." 17:6 Jenari kuidah diberu e mabuk erkiteken dareh anak-anak Dibata dingen erkiteken dareh kalak si enggo ibunuh perbahan kesaksinna kerna Jesus. Mamang kal ateku ngidah diberu e. 17:7 Tapi nina malekat e man bangku, "Engkai maka mamang atendu? Kuturiken me man bandu rahasia kerna diberu e bage pe kerna rubia-rubia si maba ia, rubia-rubia si pitu takalna janah tandukna sepuluh. 17:8 Rubia-rubia si iidahndu e, nai lit, tapi genduari lanai lit. Pagin mulgap ia i bas embang si la ersibar bagesna nari, tapi guna ikernepken. Manusia si nggeluh i doni enda, si gelarna langa isuratken i bas Kitap kegeluhen ope denga tembe doni enda, kemamangen me ngidah rubia-rubia e. Nai rubia-rubia e lit, genduari lanai, tapi pagin mulgap me ia mulihi. 17:9 I bas si e perlu kepentaren ras kebeluhen. Takal si pitu e me uruk si pitu ingan diberu e kundul. Bage pe takal si pitu e me raja si pitu: 17:10 lima i bas si pitu e enggo ndabuh, sekalak erkuasa denga janah si sekalak nari langa reh. Kenca ia pagi reh, arus ia erkuasa kentisik saja. 17:11 Janah rubia-rubia si nai lit e, tapi genduari lanai lit, e me raja si pewaluhken. Asalna i bas raja si pitu ndai nari, janah lawes guna ikernepken. 17:12 Tanduk si sepuluh si iidahndu e, e me sepuluh raja si langa mulai erkuasa tapi si pagin ibereken man bana kuasa jadi raja-raja sada jam dekahna ras rubia-rubia e. 17:13 Raja si sepuluh e ersada kerina tujunna. Kerina ia ngendesken gegehna ras kuasana man rubia-rubia e. 17:14 Erperang me ia ngelawan Anak Biri-biri e, tapi Anak Biri-biri e rikut ras kalak si enggo idiloNa, si enggo ipilihNa dingen ajar-ajarNa si setia, la banci lang naluken raja-raja e. Sabap Anak Biri-biri e kap Tuhan i babo kerina tuan-tuan dingen Raja i bas kerina raja-raja." 17:15 Tole ngerana malekat e man bangku, "Kerna lau si iidahndu, lau ingan diberu perlua-lua e kundul, e me negara-negara jelma si nterem, bangsa-bangsa bage pe kerina manusia i bas erbage-bage cakap nari. 17:16 Tanduk si sepuluh si iidahndu e bage pe rubia-rubia ndai nembeh atena man diberu perlua-lua e. Ibuatna me kerina si lit i bas diberu e janah itadingkenna diberu e manjang-anjang. Ipanganina me daging diberu e janah ikernepkenna alu api. 17:17 Sabap enggo itamaken Dibata ukur i bas pusuh raja-raja si sepuluh e guna ndalanken sura-sura Dibata; ersada ukurna guna mereken kerajanna man rubia-rubia e ngayak seh kai si enggo ikataken Dibata. 17:18 Diberu si enggo idahndu e, e me kuta si mbelin, si erkuasa nandangi raja-raja i doni enda."
18:1 Kenca bage kuidah sekalak nari malekat nusur i Surga nari. Lit kuasana si mbelin janah sinalsalna nerangi kerina doni enda. 18:2 Alu sora megang nina, "Enggo runtuh Babilon! Enggo runtuh diberu, e me Babilon si mbelin e. Genduari rehen setan-setan ras kesah-kesah si melket ndahi diberu e. Erbage-bage perik si melket dingen si ciga ate kalak rasar i bas ia. 18:3 Iberekenna anggurna man kerina bangsa janah ibahanna kerina bangsa e nginem anggur lagu langkahna si perlua-lua e. Raja-raja doni erlua-lua ras ia, janah saudagar-saudagar i doni jadi bayak erkiteken kerincuhen diberu e erlua-lua lanai tertahan." 18:4 Jenari kubegi ka sora si deban i Surga nari nina, "Ndaratlah o, bangsangKu! Ndaratlah i bas kuta e nari! Ola kam ngikut i bas dosa-dosana janah ikut i bas mara si reh man bana! 18:5 Sabap dosana ergun-gun seh ku langit, janah inget Dibata kap kerina perbahanenna si jahat. 18:6 Bahanlah man bana bali ras perbahanenna man bandu, balaslah dua kali lipat asa perbahanenna man bandu. Isilah calungna dua kali lipat kerasna asangken inemen keras si isikapkenna man bandu. 18:7 Bahanlah ia ngenanami kiniseran ras ceda ate rikutken buena pujin ras kemewahen si ibahanna nandangi dirina. Sabap katawari pe nina man dirina, 'I jenda aku kundul bagi kemberahen! Aku labo diberu balu-balu; asa ndigan pe la kunanami ate ceda!' 18:8 Erkiteken si enda me maka i bas sada wari reh man bana mara si erbage-bage: penakit, ate ceda ras kelihen. Meseng me ia ibahan api, sabap erkuasa kap Tuhan, Dibata Si ngadili ia e." 18:9 Tangis ngandung kerina raja-raja i doni si erlua-lua dingen ngikutken kerincuhen diberu e. Bage pe ngandung me raja-raja e ngidah cimber api si nutung kuta e. 18:10 Tedis ia idauh-dauh nari perbahan mbiar ngenehen kiniseranna e, janah nina, "Cilaka! Cilaka kota Babilon si mbelin dingen si nteguh e! I bas sada jam saja enggo kam iukum!" 18:11 Itangisi ras ingandungi saudagar-saudagar i doni me diberu e sabap lanai lit sekalak pe si nukur barang-barangna. 18:12 Lanai lit sekalak pe si nukur emas, pirak, permata, ntah mutiarana. Bage pe lanai lit sekalak pe si nukur barang-barangna e, e me: kain putih, uis ungu, sutera, uis megara metua, kayu si merim, erbage-bage perkakas si ibahan i bas kayu si meherga nari, i bas gading nari, tembaga, besi, marmar, 18:13 kulit manis, rempah-rempah, si merim-merim, mur, kumenen, anggur, minak, tepung ras gandum, lembu, biri-biri, kuda, gereta, juak-juak bage pe manusia. 18:14 Nina saudagar-saudagar e man kota Babilon e, "Kerina si atendu jadi sikerajangenndu enggo kernep janah kerina kinibayaken ras jilendu enggo bene. Asa ndigan pe lanai idatndu mulihi!" 18:15 Tokeh-tokeh si enggo bayak erkiteken perbinaganna i bas kuta e, tedis me i dauh-dauh nari, sabap mbiar ia ngenehen kiniseran kuta e. Tangis dingen ngandung me ia, 18:16 janah nina, "Cilaka! Cilaka kal kuta si mbelin e! Biasana ipakena kain putih, uis ungu, bage pe uis megara metua, janah ipakena barang-barang emas, batu permata ras mutiara! 18:17 Tapi i bas sada jam enggo bene kerina kinibayakenna enda!" Kerina kapten kapal, penumpang-penumpang ras pegawai-pegawai kapal bage pe kerina si erdahin i lawit tedis i dauh-dauh nari, 18:18 asum idahna cimber kuta e nina alu sora si megang, "Langa pernah lit kuta bagi kuta si mbelin enda!" 18:19 Icaburina takalna alu abu. Tangis dingen ngandung ia, nina, "Cilaka! Cilaka kal kuta si mbelin e! Kuta si erbahanca bayak kalak si lit kapalna erlayar ku lawit erkiteken kinibayaken kuta e! Tapi i bas sada jam saja kerina enggo kernep! 18:20 Ersuraklah, o Surga erkiteken kuta enggo kernep. Ersuraklah o anak-anak Dibata, o rasul-rasul bage pe kam nabi-nabi! Sabap ia enggo iukum Dibata sue ras kai si ibahanna man bandu!" 18:21 Kenca bage sekalak malekat si megegeh ngangkat sada batu penggilingen si galang, jenari iambekkenna ku lawit janah nina, "Bagenda me pagi kota Babilon si mbelin e iambekken ku teruh, janah asa ndigan pe lanai teridah. 18:22 Asa ndigan pe lanai ibegi i tengah-tengahndu sora kalak ngkuit kulcapi, musik dingen sora kalak ngembus suling ras terompet. Lanai pagi lit sekalak tukang pe i tengah-tengahndu subuk i bas dahin apai pe, sora batu gilingen pe lanai pagi ibegi. 18:23 Lanai pagi lit sinalsal lampu i tengah-tengahndu; asa ndigan pe lanai ibegi sora si empo ras si sereh i tengah-tengahndu nari. I belang-belang doni enda saudagar-saudagarndu me si mbelinna, janah alu ilmu sihirndu, itipundu kerina manusia i doni enda!" 18:24 Babilon iukum sabap dareh nabi-nabi ras dareh anak-anak Dibata terdat i bas ia, gendekna dareh kerina manusia si enggo ibunuh i doni enda.
19:1 Kenca bage kubegi tempa-tempa sora megang i bas perpulungen jelma si nterem si lit i Surga e nari nina, "Pujilah Dibata! Ia kap si mulahi kita, janah Ia kap si erkuasa. 19:2 Ukumen si iberekenNa bujur dingen adil kap. Enggo iukumNa diberu perlua-lua si mbelin, si mabai doni enda papak alu lagu langkahna si perlua-lua e. Enggo iukum Dibata diberu e perbahan ibunuh diberu e suruh-suruhen Dibata." 19:3 Tole nina sora e, "Pujilah Dibata! Cimber api si rehna i bas kuta e nari la erkeri-kerin nangkih." 19:4 Pertua-pertua si dua puluh empat ras rubia-rubia si empat e, erjimpuh nembah man Dibata si kundul i bas kursi kinirajan e nina, "Amin! Haleluya!" 19:5 Kenca bage terbegi sora i bas kursi kinirajan e nari nina, "O kerina juak-juakNa, subuk si mbelin bage pe si kitik, si erkemalangen man baNa, pujilah Dibata!" 19:6 Jenari kubegi bagi sora sada perpulungen si mbelin, bagi sora air sampuren si mbelin nina, "Pujilah Dibata! Sabap Tuhan Dibatanta si Mada Kuasa e, enggo kap jadi Raja! 19:7 Ersuraklah kita janah meriahlah siakap. Sipujilah Ia! Sabap enggo seh paksana kerja erdemu bayu Anak Biri-biri e, janah Pengantin si Diberu enggo dung ersikap guna kerja e. 19:8 Pengantin si Diberu e enggo make uis mbentar si erkilat-kilat." (Uis mbentar e, e me perbahanen si mehuli si ilakoken anak-anak Dibata.) 19:9 Kenca bage nina man bangku, "Suratkenlah enda, 'Ketuahen kalak si enggo iundang ku kerja erdemu bayu Anak Biri-biri e.' " Tole nina man bangku, "Kata-kata enda tuhu-tuhu i bas Dibata nari." 19:10 Erjimpuh aku i lebe-lebe naheNa, ateku nembah man bana, tapi nina man bangku, "Ola sembah aku, sabap aku pe suruh-suruhen nge, bali ras kam, bage pe bali ras senina-seninandu, e me kalak si tetap ncikep kebenaren si ipetangkas Jesus. Sembahlah Dibata!" Sabap si mpegegehi ukur nabi-nabi e me kebenaren si ipetangkas Jesus. 19:11 Jenari kuidah langit talang, janah i je lit sada kuda mbentar. Si ngersak kuda e gelarNa si Setia dingen Bujur. Ia ngadili alu bujur ras erperang pe alu bujur. 19:12 MataNa bagi gara api, janah i bas takalNa melala mahkota. I bas Ia lit tersurat sada gelar, tapi ise pe la ngangkasa seakatan Ia. 19:13 Jubah si ipakeNa icelup alu dareh. Gelar si igelarken man baNa e me Kata Dibata. 19:14 Tentera-tentera Surga ngikutken Ia alu ngersak kuda mbentar, dingen make baju mbentar si bersih. 19:15 I bas babahNa nari ndarat sada pedang si ntelap janah alu e pagi italukenNa bangsa-bangsa. IperentahNa me bangsa-bangsa alu ciken besi. IerikNa me anggur i bas ingan ngerik anggur pernembeh ate Dibata si Mada Kuasa. 19:16 I bas jubahNa bage pe i bas naheNa isuratken gelar, "Raja i babo kerina raja, dingen Tuan i babo kerina tuan." 19:17 Jenari kuidah sekalak malekat tedis i babo matawari. Alu sora si megang ngerana ia man kerina perik-perik si sangana kabang i tengah awang-awang nina, "Marilah ras-ras pulung guna kerja man-man si mbelin si ibahan Dibata! 19:18 Marilah man daging raja-raja, puanglima-puanglima ras prajurit-prajurit bage pe daging kuda ras si ngersaksa dingen daging kerina manusia, subuk juak-juak, bage pe la juak-juak, si mbelin bage pe si kitik!" 19:19 Jenari kuidah rubia-rubia e, ras raja-raja doni bage pe tentera-tenterana pulung guna ngelawan si ngersak-kuda ndai ras tentera-tenterana. 19:20 Tapi rubia-rubia e ipenjaraken ras nabi perguak si enggo erbahan tanda-tanda sengget i lebe-lebe rubia-rubia e. (Alu tanda-tanda sengget e me itipu rubia-rubia e kerina kalak si lit i bas ia cap rubia-rubia dingen kerina kalak si nembah gana-gana rubia-rubia e.) Rubia-rubia ras nabina si perguak e, duana iambekken geluh-geluhen ku bas lawit api si gara ras kertah. 19:21 Tentera-tenterana ibunuh alu pedang si ndarat i bas babah si ngersak kuda e nari; jenari kerina perik-perik e mangani dagingna asa besurna.
20:1 Kenca bage kuidah sekalak malekat nusur i Surga nari. I bas tanna lit kunci embang si la ersibar bagesna e ras rante galang. 20:2 Itangkapna naga, nipe si nuria e, e me Iblis ntah pe Setan, jenari igarikenna seh seribu tahun dekahna. 20:3 Kenca bage iambekkenna naga e ku bas embang e jenari ikuncina kelbung e janah itamana meteraina gelah olanai itipu Iblis e bangsa-bangsa seh lepas si seribu tahun e. Kenca lepas si seribu tahun e arus ia ipulahi kentisik. 20:4 Jenari kuidah melala kursi kinirajan ras si ngkundulisa, si enggo ibereken man bana kuasa guna ngadili. Bage pe kuidah tendi-tendi kalak si enggo mate itampul erkiteken meritaken Kata Dibata ras ersaksi kerna Jesus. Kalak si enggo mate enda ndai, la pernah nai isembahna rubia-rubia e ntah pe gana-ganana. Bage pe labo lit cap rubia-rubia e i bas perdempakenna ntah i bas tanna. Kalak enda ndai nggeluh mulihi janah erkuasa ras Kristus seribu tahun dekahna. 20:5 (Kalak mate si deban la nggeluh mulihi seh lepas paksa si seribu tahun e.) Enda me kekeken si pemena. 20:6 Ketuahen kalak si ikut i bas kekeken si pemena e sabap ia enggo iserapken jadi anak-anak Dibata. Kematen si peduaken lanai erkuasa nandangi ia. Ia me pagi jadi imam-imam Dibata ras Kristus. Ras Kristus kalak enda erkuasa i bas si seribu tahun e. 20:7 Lepas si seribu tahun e, ipulahi me Iblis i bas penjara nari, 20:8 jenari ndarat ia nipu bangsa-bangsa i belang-belang doni, e me Gog ras Magog. Ipepulung Iblis e me bangsa-bangsa e ku peperangen, bagi kersik i tepi lawit teremna. 20:9 Merap me ia kerina ku doni enda; ikepungna benteng anak-anak Dibata ras kuta si ikelengiNa. Tapi nusur api i Surga nari ngkernepken bangsa-bangsa e. 20:10 Jenari Iblis si enggo nipu bangsa-bangsa e, iambekken ku lawit api si singgur ras kertah, ingan ngambengken rubia-rubia ras nabi perguak e. Isiksa me kalak enda rasa lalap suari ras berngi. 20:11 Jenari kuidah sada kursi kinirajan ras si ngkundulisa. Kursi kinirajan e mbelin dingen mbentar rupana. Langit ras doni kiam i bas ia nari seh lanai teridah. 20:12 Jenari kuidah kalak si enggo mate, subuk si mbelin bage pe si kitik, tedis i lebe-lebe kursi kinirajan e. Kitap-kitap italangi. Jenari italangi ka sada Kitap nari, e me Kitap Kegeluhen. Kenca bage kalak si enggo mate iadili rikutken kai si enggo ibahanna, bagi lit isuratken i bas Kitap-kitap e. 20:13 E maka lawit ngendesken kalak mate si lit i bas ia. Kematen ras doni kematen pe ngendesken kalak mate si lit i bas ia, janah iadili me kerina rikutken perbahanenna sekalak-sekalak. 20:14 Kenca bage kematen ras doni kematen iambekken ku bas lawit api. (Lawit api enda me kematen si peduaken.) 20:15 Ise la lit gelarna tersurat i bas Kitap Kegeluhen e iambekken me ku bas lawit api e.
21:1 Jenari kuidah Surga si mbaru ras doni si mbaru. Langit si pemenana ras doni si pemenana enggo lesap, dingen lawit pe lanai lit. 21:2 Janah kuidah Kuta si Badia e, Jerusalem si mbaru, nusur i Surga nari, i bas Dibata nari, enggo sikap bagi sekalak penganten si enggo ipetik guna njumpai perbulangenna. 21:3 Kubegi sora si megang ngerana i bas kursi Kinirajan e nari, nina, "Genduari Kemah Dibata lit i tengah-tengah manusia! Ras manusia me Ia nggeluh, janah manusia jadi anak-anakNa me. Ringan me Ia i tengah-tengah manusia janah Ia me jadi Dibata manusia. 21:4 Iapusi Dibata me kerina iluh anak-anakNa e. Lanai pagi lit kematen, ceda-ate, tangis ntah pe si mesui. Sabap si pemena enggo lepas." 21:5 Jenari ngerana si kundul i bas kursi kinirajan e nina, "Nehenlah, genduari Kubahan kerina jadi mbaru!" Kenca bage nina, "Suratkenlah enda, sabap kata enda tuhu janah terteki kap." 21:6 Tole nina, "Enggo dung! Aku kap si erkuasa mula-mulana nari seh ku kedungenna. Aku kap Tuhan mula-mulana nari seh ku si pendungina. Man kalak si muas Kubereken me lau inemen i bas ulu lau kegeluhen nari la ertukur. 21:7 Kalak si menang ialokenna me si enda. Aku me Dibatana janah ia me jadi anakKu. 21:8 Tapi kalak si percikcik, si la erkiniteken, si mbau lagu langkahna, pemunuh, kalak si perlua-lua, tukang sihir, kalak si nembah berhala-berhala ras kerina si perguak, inganna e me lawit api ras kertah si gara, e me kematen si peduaken." 21:9 Sekalak i bas malekat si pitu si lit i bas ia pitu mangkuk dem pitu mara si perpudi, reh ndahi aku, jenari nina, "Mari, gelah kutuduhken man bandu Pengantin si Diberu, ndehara Anak Biri-biri e." 21:10 Ikuasai Kesah Dibata aku, jenari ibaba malekat e aku ku ancuk-ancuk deleng si seh kal ganjangna. Ituduhkenna man bangku Jerusalem, Kuta si Badia e, nusur i Surga nari, i bas Dibata nari, 21:11 ersinalsal ibahan kemulian si rehna i bas Dibata nari. Kuta e ersinalsal bagi permata, bagi batu jaspis, meciho bagi kaca kristal. 21:12 Kuta e meganjang tembokna, dingen lit sepuluh dua pintu gerbangna si niiani sepuluh dua kalak malekat. I babo pintu gerbang e lit tersurat gelar-gelar suku kalak Israel si sepuluh dua. 21:13 Gerbangna si sepuluh dua e, e me: telu arah Purba, telu arah Daksina, telu arah Utara janah telu arah Pustima. 21:14 Tembok kota e ipanteki i babo sepuluh dua palas batu, janah i bas batu e tersurat sepuluh dua gelar rasul Anak Biri-biri e. 21:15 Malekat si ngerana man bangku e lit ciken penibarina, si ibahan i bas emas nari, janah lakonna guna nibari kota e, pintu gerbangna ras tembokna. 21:16 Kuta e segi empat, bali gedangna ras bertengna. Isibari malekat ndai kota e alu ciken penibarina: gedangna 2400 kilometer, janah bertengna ras ganjangna bali ras gedangna. 21:17 Isibari malekat ndai pe tembok kuta e: ganjangna 72 meter sue ras patoken ukuren si ipakena. 21:18 Tembok kota e ibahan i bas batu jaspis nari, janah kota e ibahan i bas emas tulen nari, meciho bagi kaca. 21:19 Palas tembok kota e ipejile alu erbage-bage permata. Palas si pemena batu jaspis si meratah, si peduaken nilam biru, peteluken kasidon abu-abu, si peempatken jamrud si meratah, 21:20 si pelimaken sardonik si meruntik, si peenemken sardion si megara, si pepituken kerusolit si megersing, si pewaluhken beril si meratah biru, si pesiwahken topas si megersing, si pesepuluhken kerosoperas meratah-ratah, si pesepuluh sadaken huakin biru nguda, si pesepuluh duaken ametis bunga terong rupana. 21:21 Pintu gerbang si sepuluh dua e, e me sepuluh dua mutiara. Teptep gerbang sada mutiara. Pasar kota e ibahan i bas emas tulen nari, meciho bagi kaca. 21:22 La lit kuidah Rumah Pertoton i bas kota e sabap Rumah Pertoton e me Tuhan Dibata si Mada Kuasa ras Anak Biri-biri e. 21:23 Matawari ras bulan la perlu guna nerangi kota e, sabap kemulian Dibata ersinalsal ku kota e, janah Anak Biri-biri jadi lampuna. 21:24 Bangsa-bangsa doni enda erdalan-dalan me i teruh sinalsal kota e, janah raja-raja doni enda pe maba kebayakenna ku bas kota e. 21:25 Pintu gerbang kota e talang gedang-gedang wari. Lalap la ipintu sabap lanai bo lit i je berngi. 21:26 Kiniulin ras kebayaken bangsa-bangsa ibaba pagi ku bas kota e. 21:27 Tapi si ngelakoken perbahanen-perbahanen si meluat ras kalak perguak -- gendekna kerina si meluat -- la banci bengket ku bas kota e. Si bengket ku bas, e me kalak si gelarna lit tersurat i bas kitap Anak Biri-biri e, e me Kitap Kegeluhen.
22:1 Ituduhken malekat e man bangku lau si mereken kegeluhen. Lau e erkilat-kilat bagi kristal. Lau e rehna i bas kursi Kinirajan Dibata ras Anak Biri-biri e nari, 22:2 janah maler arah tengah-tengah pasar kota e. Arah kawes ras kemuhen lau e lit batang kayu kegeluhen, si erbuah sepuluh dua kali setahun, e me sebulan sekali. Bulungna ipake guna pepalem bangsa-bangsa. 22:3 La lit i bas kota e si kena sumpah Dibata. Kursi Kinirajan Dibata ras Anak Biri-biri e lit i bas kota e, janah suruh-suruhenNa nembah me man baNa. 22:4 Idah suruh-suruhen e me ayoNa, janah isuratken pe gelar Dibata i bas perdempaken suruh-suruhen e. 22:5 Lanai lit berngi, janah terang lampu ras sinalsal matawari pe lanai perlu sabap Tuhan Dibata me si nerangi suruh-suruhen e, janah kalak enda erkuasa jadi raja seh rasa lalap. 22:6 Jenari nina man bangku, "Kata enda kerina tuhu, janah terteki. Tuhan Dibata si mereken KesahNa man nabi-nabi, dingen si enggo nuruh malekatNa encidahken man suruh-suruhenNa kai si nandangi jadi minter." 22:7 "Nehenlah!" nina Yesus, "Minter Aku reh! Ketuahen kalak si ngikutken Kata nubuat si tersurat i bas Kitap enda!" 22:8 Aku, Johanes, enggo megi dingen ngidah si enda kerina. Janah kenca kubegi dingen kuidah si enda kerina, erjimpuh aku nembah i lebe-lebe malekat si ncidahkenca e man bangku. Kusembah ateku ia. 22:9 Tapi nina man bangku, "Ola sembah aku! Aku pe suruh-suruhen nge, bali ras kam, bali ras senina-seninandu nabi-nabi e; bage pe bali ras kerina kalak si ngikutken kata-kata si tersurat i bas Kitap enda. Sembahlah Dibata!" 22:10 Tole nina malekat e man bangku, "Ola tutupi Kata nubuat si tersurat i bas Kitap enda, sabap enggo ndeher paksana si enda kerina jadi. 22:11 Kalak jahat iteruskennalah erbahan jahat; kalak si melket lagu-langkahna iteruskennalah erlagu langkah si melket; kalak si mehuli iteruskennalah erbahan mehuli janah kalak si enggo iserapken guna Dibata teruslah ia nggeluh guna Dibata." 22:12 Nina Jesus, "Nehenlah! Pedas me Aku reh! Kubaba me upah man kerina jelma rikutken kai si enggo ibahanna. 22:13 Aku kap si erkuasa mula-mulana nari seh ku kedungenna; Aku kap Tuhan mula-mulana nari ku pendungina." 22:14 Ketuahen kalak si naptapi jubahna seh bersih. Lit hakna man buah batang kayu kegeluhen e ras bengket arah pintun-pintun gerbang ku bas kota e. 22:15 Idaraten kuta e ringan kalak si mbau lagu langkahna, tukang sihir, perlua-lua, pemunuh, kalak si nembah berhala bage pe kalak si perguak subuk i bas kata ras i bas perbahanen. 22:16 "Aku, Jesus, enggo nuruh malekatKu meritaken si enda man bandu kerina guna kiniulin perpulungen-perpulungen. Aku kap urat ras kesusuren Daud; Aku me bintang erpagi-pagi si terang e." 22:17 Nina Kesah Dibata ras Pengantin si Diberu e, "Marilah!" Kerina si megi kata enda pe arus ikatakenna, "Marilah!" Ise si muas rehlah ia! Janah ise si mesikel, ibuatnalah lau kegeluhen e, la pada nggalar. 22:18 Kusehken kata pertenget man kerina kalak si megi kata-kata nubuat si tersurat i bas kitap enda, "Adi lit kalak si nambah-nambahi isi kitap enda itambahi Dibata me man bana mara-mara si enggo isuratken i bas kitap enda. 22:19 Janah adi lit kalak si ngkurangi sitik lah gia kata-kata nubuat si tersurat i bas kitap enda, maka ikurangi Dibata baginna i bas buah batang kayu kegeluhen nari, bage pe baginna i bas kuta si Badia si enggo isuratken i bas kitap enda." 22:20 Ia, si naksiken kerina enda ngataken, "Payo, bage me jadina. Pedas Aku reh!" Amin. Marilah, o Tuhan Jesus! 22:21 Lias ate Tuhan Jesus ras kam kerina gelah.