The New Testament of our Lord and Saviour Jesus Christ

Mateus 1

1:1 On ma surat partuturan ni Jesus Kristus, anak ni si Daud, anak ni si Abraham. (2 Sam. 7:12, 13.) 1:2 Anak ni si Abraham si Isak; anak ni si Isak si Jakob; anak ni si Jakob si Juda ampa saninani ai. (1 Mus. 21:3, 12; 25:26; 29:35; 49:10.) 1:3 Anak ni si Juda si Peres pakon si Sera, humbani si Tamar; anak ni si Peres si Esrom; anak ni si Esrom si Aram. (1 Mus. 38:29, 30; Rut 4:18-22; 1 Kron. 2:5-9.) 1:4 Anak ni si Aram si Aminadab; anak ni si Aminadab si Nahason; anak ni si Nahason si Salmon. (1 Kron. 2:10-15.) 1:5 Anak ni si Salmon si Boas humbani si Rahab; anak ni si Boas si Obed humbani si Rut; anak ni si Obed si Jesse. (Rut 4:13-17.) 1:6 Anak ni si Jesse raja Daud; anak ni si Daud si Salomo, humbani binuat ni si Uria. (2 Sam. 12:24.) 1:7 Anak ni si Salomo si Rehabeam; anak ni si Rehabeam si Abia; anak ni si Abia si Asa. (1 Kron. 3:10-16.) 1:8 Anak ni si Asa si Josapat; anak ni si Josapat si Joram; anak ni si Joram si Usia. (1 Raj. 15:24; 22:51.) 1:9 Anak ni si Usia si Jotam; anak ni si Jotam si Ahas; anak ni si Ahas si Hiskia. 1:10 Anak ni si Hiskia si Manasse; anak ni si Manasse si Amon; anak ni si Amon si Josia. 1:11 Anak ni si Josia si Jekonya ampa sanina ai, ai ma bani panorang habuangan hu Babel. (1 Kron. 3:17.) 1:12 Jadi dob tarbuang sidea, tubuh ma si Sealtiel, anak ni si Jekonya, dob ai si Serubabel, anak ni si Sealtiel. (Esr. 3:2.) 1:13 Anak ni si Serubabel si Abiud; anak ni si Abiud si Eliakim; anak ni si Eliakim si Asor. 1:14 Anak ni si Asor si Sadok; anak ni si Sadok si Akim; anak ni si Akim si Eliud. 1:15 Anak ni si Eliud si Eleasar; anak ni si Eleasar si Mattam; anak ni si Mattam si Jakob. 1:16 Anak ni si Jakob si Josep, paramangon ni si Maria, na manubuhkon Jesus, na margoran Kristus. 1:17 Ase buei ni sundut humbani si Abraham das hubani si Daud ai ma sapuluh ompat sundut; anjaha humbani si Daud das hu habuangan Babel sapuluh ompat sundut, anjaha humbani habuangan Babel das hubani Kristus sapuluh ompat sundut. 1:18 Ia partubuh ni Jesus Kristus, sonon do: Sanggah tunangan ni si Josep ope inangni, si Maria ai, boratan rumah do ia humbani Tonduy Na pansing, sanggah lape marsidohoran sidea. (Luk. 1:35.) 1:19 Ia si Josep, paramangonni ai, paruhur na pintor do, anjaha seng sihol uhurni laho pabadorhonsi, gabe tubuh ma uhurni manirangkonsi sipsip. 1:20 Tapi sanggah sonai ope sura-sura ni uhurni, iidah ma ibagas nipini malekat ni Tuhan in, na mangkatahon hubani: O Josep, anak ni si Daud, ulang ma mabiar ho mangalop si Maria gabe parinangonmu, ai na adong bani ai, ai ma na humbani Tonduy Na pansing. (ay. 18.) 1:21 Tubuhan Anak ma ia, anjaha bahen ma goranni Jesus, ai paluahonNi do bangsani humbani dousa ni sidea. (Luk. 1:31; 2:21; Lah. 4:12.) 1:22 Masa pe haganupan ai, ase jumpah do na hinatahon ni Tuhan in marhitei nabini, na mangkatahon: (Jes. 7:14.) 1:23 Tonggor ma, boratan rumah ma sada anak boru, anjaha tubuhan anak, anjaha bahenonni ma goranni Immanuel, artini: Hasomanta do Naibata. 1:24 Jadi dob puho si Josep, idalankon ma songon na hinatahon ni malekat ai bani, saud ma ialop parinangonni ai. 1:25 Tapi seng idohori ia, paima tubuh anak bunga tubuhni ai, anjaha igoran ma ia Jesus. (Luk. 2:7, 21.)

Mateus 2

2:1 Ase dob tubuh Jesus i huta Betlehem, na i Judea, sanggah panorang ni raja Herodes, roh ma halak paruhur na hun hapoltakan hu Jerusalem, (Luk. 2:1-7.) 2:2 nini sidea ma: Ija do Raja ni Jahudi na baru tubuh in? Iidah hanami do bintangni i hapoltakan, anjaha halani ai do, ase roh hanami sihol manombahsi. (4 Mus. 24:17.) 2:3 Jadi dob ibogei raja Herodes ai, tarsonggot ma ia rap pakon haganup parJerusalem. 2:4 Jadi ipatumpu ma haganup sintua ni malim ampa sibotoh surat ni bangsa ai, anjaha ipapangkei humbani sidea, atap ija do huta hatubuhan ni Kristus in. 2:5 Jadi nini sidea ma hubani: I huta Betlehem, na i tanoh Judea do, ai sonon do tarsurat marhitei nabi ai: (Joh. 7:42.) 2:6 Ale Betlehem, na i tanoh Juda, sedo ho sietekan itongah-tongah ni huta na i tanoh Juda, ai ho do huta harohan ni Raja in, na sihol marmahan Israel, bangsangkin! (Mik. 5:1.) 2:7 Dob ai idilo raja Herodes ma paruhur ai marponop-ponop, anjaha ipatae ma humbani sidea dokahni, dob taridah bintang ai. 2:8 Dob ai isuruh ma sidea hu huta Betlehem, nini ma: Laho ma nasiam hujai, pangkei ma pindahi nasiam Dakdanak ai! Anjaha anggo domma jumpah nasiam Ia, patugah nasiam bangku, ase dihut ahu roh marsombah hu-Bani. 2:9 Ase dob ibogei sidea hata ni raja ai, misir ma sidea. Anggo bintang ondi, na dob iidah sidea hinan i hapoltakan, sai mardalan do ilobei ni sidea, paima soh ai ibabou ni ianan ni Dakdanak ai, 2:10 Mangidah bintang ai, malas tumang ma uhur ni sidea. 2:11 Imasuki sidea ma rumah ai, gabe iidah sidea ma Dakdanak ai rap pakon si Maria inangni ai. Dob ai manrogop ma sidea marsombah hu-Bani; ibuka sidea ma artani anjaha isombahkon ma Bani sibere-bere ni sidea: omas, dahupa ampa mir. (Ps. 72:10, 15; Jes. 60:6.) 2:12 Dob ai roh ma lumba-lumba bani sidea marhitei nipi, ase ulang pala be mulak sidea hubani si Herodes, jadi humbani dalan na legan ma sidea mulak hu nagori ni sidea. 2:13 Ase dob laho sidea, roh ma sada malekat ni Tuhan in iidah si Josep ibagas nipini, nini ma: Jongjong ma ho, boan ma Dakdanak in rap pakon inangni, maporus ma hanima hu tanoh Masir, anjaha ijai ma hanima lobei, paima roh use hatangku, ai ipindahi si Herodes do Dakdanak in, sihol bunuhonni. 2:14 Jadi puho ma ia, iboan ma Dakdanak ai rap pakon inangni bornginni ai, maporus laho hu tanoh Masir. 2:15 Lanjar ijai ma sidea marianan paima matei si Herodes, ase jumpah na hinatahon ni Tuhan in marhitei nabini, na mangkatahon: Hun Masir do hudilo Anakkin. (Hos. 11:1) 2:16 Dob tarbotoh bani si Herodes, na dob itipu halak paruhur ai ia, marah tumang ma ia; jadi isuruh ma hu Betlehem pakon hu nagori na inggot hujai, laho mamunuh sagala dakdanak na marumur dua tahun ampa na itoruh ni ai domu hubani panorang na dob pinapangkeini humbani halak paruhur ai. 2:17 Ijai ma jumpah na hinatahon marhitei nabi Jeremias: (Jer. 31:15.) 2:18 Tarbogei do i Rama sora partangison pakon doruh-doruh. Itangisi si Rahel do anakni, seng ra ia apohon, ai domma bois sidea. (1 Mus. 35:19.) 2:19 Jadi dob matei si Herodes, taridah ma malekat ni Tuhan in bani si Josep ibagas nipini i tanoh Masir, na mangkatahon: 2:20 Jongjong ma ho, boan ma Dakdanak in rap pakon inangni mulak hu tanoh Israel, ai domma matei na manguhurhon hosah ni Dakdanak in! 2:21 Jadi puho ma ia, iboan ma Dakdanak ai rap pakon inangni mulak hu tanoh Israel. 2:22 Tapi dob ibogei, si Arkelaus do hape raja i Judea gantih ni Bapani, si Herodes, jadi mabiar ma ia laho hujai. Dob ijalo podah humbani Naibata ibagas nipini, jadi laho ma ia hu nagori Galilea. 2:23 Dob das ijai, laho ma ia marianan bani sada huta na margoran Nasaret, gabe jumpah ma hata ni nabi, na mangkatahon: Goranon do Ia halak Nasaret. (Luk. 1:26; 2:39.)

Mateus 3

3:1 Bani panorang ai jongjong ma si Johannes Pandidi, anjaha marambilan ma ia i halimisan Juda, (Luk. 1:13.) 3:2 nini ma: Paubah nasiam ma uhurnasiam, ai domma dohor harajaon nagori atas in! 3:3 Pasalsi do na pinatugah ni nabi Jesayas marhitei na hinatahonni: Sora na dilo-dilo i halimisan! Pasirsir nasiam ma dalan bani Tuhan in; papintor nasiam ma sidalananni! 3:4 Ia si Johannes, ambulu ni unta do hiouni, huling-kuling do gonditni, anjaha sipanganonni balang pakon manisan ni lobah. (2 Raj. 1:8.) 3:5 Jadi roh ma halak marayaksi hun Jerusalem, hun sab Judea ampa hun haganup pamah Jordan. 3:6 Jadi ididi si Johannes ma sidea i bah Jordan ai, dob isopotkon sidea bei dousani. 3:7 Dob iidah buei halak Parisei pakon Sadukei marayak pandidionni ai, nini ma hubani sidea: Nasiam ginompar ni ulog darih! Ise do na mangajari nasiam, boi maluah nasiam humbani ringis na sihol roh? (bd. 23:33.) 3:8 Parbuahkon nasiam ma buah na tama, paboa na dob mubah uhurnasiam, 3:9 anjaha ulang ma nini uhurnasiam ibagas: Si Abraham do bapanami! Huhatahon ma bani nasiam: Tarjadihon Naibata do anak bani si Abraham humbani batu on. (Rom 2:28, 29; Joh. 8:33, 39.) 3:10 Domma tampei tangkei bani bona ni hayu. Ai pe, sirobohon do sagala hayu na so marbuahkon na madear, anjaha sigijigkononkon hubagas apuy! (Luk. 13:7-9.) 3:11 Ia ahu, bah do hudidihon bani nasiam, mangkatahon paubah uhur, tapi gogohan ope humbangku na roh hun pudingku, gari mamboan sipatuni seng talup ahu. Didihononni do bani nasiam Tonduy Na pansing ampa apuy. (Joh. 1:26, 27; Lah. 1:5.) 3:12 Bani tanganni do pamurpuran, paborsihonni ma pardogeianni, anjaha patumpuonni ma omeini hu tuanganni, tapi lamlamni tutungon do ai bani apuy na so ra mintop. (bd. 13:30.) 3:13 Ijia roh ma Jesus hun Galilea hu bah Jordan, laho padidihon dirini hubani si Johannes. 3:14 Tapi manjua do si Johannes, nini ma: Ahu do namin patut didionmu, mase ma Ham roh bangku? 3:15 Tapi ibalosi Jesus ma ia: Paturut ma sonai lobei, ai sonai do patut hita manggoki sagala hapintoron! Jadi ibalosi ma. 3:16 Ase dob tardidi Jesus, mintor naik ma Ia humbagas bah ai. Anjaha tonggor ma, mungkab ma langit, anjaha taridah ma susur hun langit Tonduy ni Naibata songon asas, lanjar sogop hu-Bani. 3:17 Lanjar nini sada sora ma hun nagori atas: On do Anak, haholongan ni uhurhu, marosuh do uhurhu mangidah-Si!(bd. 17:5; Jes. 42:1.)

Mateus 4

4:1 Dob ai ibobai Toduy in ma Jesus hu halimisan, ase ilajou sibolis Ia. (Heb. 4:15.) 4:2 Jadi dob marpuasa Ia ompat puluh ari ompat puluh borngin, loheian ma Ia. (2 Mus. 34:28; 1 Raj. 19:8.) 4:3 Jadi ijumpahkon sipanlajou ai ma Ia, anjaha nini ma: Anggo Anak ni Naibata do Ham, hatahon ma, ase gabe ruti batu on! (1 Mus. 3:1-7.) 4:4 Jadi nini ma mambalosi: Tarsurat do: Sedo ruti hansa hagoluhan bani jolma, tapi haganup hata ni Naibata, na luar humbani pamanganni. (5 Mus. 8:3.) 4:5 Dob ai iarahkon sibolis ai ma Ia hu huta na mapansing ai, ipajongjong ma Ia bani anjung-anjung ni rumah panumbahan ai, 4:6 anjaha nini ma hu-Bani: Anggo Anak ni Naibata do Ham, lumpathon Ham ma hu toruh, ai tarsurat do: SuruhonNi do malekatNi manatang-natang Ho, ase ulang antuk naheimu bani batu! (Ps. 91:11-12.) 4:7 Jadi nini Jesus ma hubani: Tapi tarsurat do homa: Seng bulih lajouonmu Tuhan Naibatamu! (5 Mus. 6:16.) 4:8 Dob ai iulakkon sibolis ai ma mamboansi hubani pakpak ni dolog na gijang tumang, anjaha ipatuduhkon ma hu-Bani haganup harajaon na i dunia on ampa hasangaponni. 4:9 Jadi nini ma hu-Bani: Haganupan in hubere pe Bamu, asal ma ra Ham marsombah hubangku. 4:10 Jadi nini Jesus ma hubani: Laho ma ho bolis! Ai tarsurat do: Tuhan Naibatamu do sisombahonmu, sahalaksi do sibalosanmu! (5 Mus. 6:13.) 4:11 Dob ai itadingkon sibolis ai ma Ia, jadi roh ma malekat-malekat marugas Bani. (Joh. 1:51; Heb. 1:6, 14.) 4:12 Dob ibogei Jesus na dob tartutup si Johannes, laho ma Ia hu Galilea. (bd. 14:3.) 4:13 Lanjar itadingkon ma huta Nasaret, gabe laho ma Ia marianan hu huta Kapernaum, na i topi ni tao ai, i nagori Sebulon ampa Naptali, 4:14 ase jumpah na hinatahon ni nabi Jesayas, na mangkatahon: (Jes. 9:1.) 4:15 Nagori Sebulon ampa Naptali, na i topi ni tao ai, i dipar ni bah Jordan, nagori Galilea, ianan ni sipajuh begu-begu, 4:16 bangsa na marianan ibagas na golap mangidah Panondang na bolon, anjaha poltak do Panondang bani na marianan bani linggoman ni hamateian. 4:17 Jadi olat ni ai mamungkah ma Jesus marambilan, anjaha nini ma: Paubah nasiam ma uhurnasiam, ai domma dohor harajaon nagori atas in! (bd. 3:2.) 4:18 Jadi, sanggah na mardalani Jesus i topi ni tao Galilea, iidah ma ijai dua halak na marsanina, na manampakkon jala ni sidea hu tao ai, ai pardengke do sidea, ai ma si Simon, na ginoran Petrus, ampa saninani si Andreas. 4:19 Jadi nini ma dompak sidea: Eta, ihutkon nasiam ma Ahu, hubahen pe nasiam gabe sijala jolma! (bd. 13:47.) 4:20 Jadi mintor itadingkon sidea ma jala ni sidea, laho mangihutkon-Si. (bd. 19:27.) 4:21 Dob laho Ia hunjai, iidah ma use dua halak na marsanina, ai ma si Jakobus, anak ni si Sebedeus, ampa si Johannes saninani ai, hundul ibagas parau rap pakon si Sebedeus, bapa ni sidea ai, pauli-ulihon jala ni sidea. Jadi idilo ma sidea. 4:22 Jadi mintor itadingkon sidea ma parau ai pakon bapa ni si sidea, laho mangirikkon-Si. 4:23 Jadi isiar Jesus ma ganup nagori Galilea, laho mangajari bani parguruan ni sidea, anjaha mangambilankon ambilan na madear pasal harajaon ai, lanjar pamalumhon sagala naborit ampa na niarou ni halak na ijai ai. (Luk. 4:15, 31; Lah. 10:38.) 4:24 Jadi tarambilan ma Ia das hu sab tanoh Siria; iboan halak ma hu lobeiNi sagala na boritan ampa na marsitaronon, na siniaran ni setan, na ubagon ampa na oyangon, gabe ipamalum ma sidea haganup. (Mrk. 6:55.) 4:25 Jadi buei halak na mangirikkon-Si, ai ma hun nagori Galilea, hun Dekapolis (Sapuluh huta), hun Jerusalem, hun Judea ampa hun nagori na i dipar ni bah Jordan. (Luk. 6:17.)

Mateus 5

5:1 Anjaha mangidah halak na mabuei ai, tangkog ma Ia hu sada dolog; dob hundul Ia, roh ma susianNi ai hu-Bani. 5:2 Dob ai ibuha ma pamanganNi, laho mangajari sidea, nini ma: 5:3 Martuah ma na sombuh tonduy, ai bani sidea do harajaon nagori atas in! (Jes. 57:15.) 5:4 Martuah ma na pusok uhur, ai siapohon do sidea! (Ps. 126:5; Jes. 61:2; Pangk. 7:17.) 5:5 Martuah ma na lamlam uhur, ai teanon ni sidea do tanoh on! (Ps. 37:11.) 5:6 Martuah ma na horahan loheian bani hapintoron, ai sipabosuron do sidea. 5:7 Martuah ma na idop uhur, ai siidopan do sidea. (Jak. 2:13.) 5:8 Martuah ma paruhur na borsih, ai idahon ni sidea do Naibata!(Ps. 51:12; 1 Joh. 3:2, 3.) 5:9 Martuah ma sibahen damei, ai goranon do sidea anak ni Naibata! (Heb. 12:14.) 5:10 Martuah ma na pinarburu ni halak halani hapintoron, ai bani sidea do harajaon nagori atas in! (1 Ptr. 3:14.) 5:11 Martuah ma hanima anggo irehei halak hanima barang iparburu barang ipatubuh-tubuh bagei ni hata na masambor, na so tongon dompak hanima halani Ahu! 5:12 Malas ma uhurnima anjaha marolob-olob, ai banggal do upahnima i nagori atas, ai sonai do iparburu nabi-nabi na parlobei hun bennima. (Jak. 5:10; Heb. 11:36-38.) 5:13 Hanima do garam ni dunia on! Tapi anggo mambar in, aha ma bahenon paporadkon? Seng marguna be in, siambukkononkon mando in ase idogei-dogei halak. (Mrk. 9:50; Luk. 14:34-35.) 5:14 Hanima do panondang ni dunia on! Seng boi ponop huta na iatas dolog. (Joh. 8:12.) 5:15 Seng irungkubhon halak tumba bani suluh na pinagarani, tapi huatas sagakan do ibahen, ase isondangi haganup na i rumah ai. (Mrk. 4:21.) 5:16 Sonai ma marsinalsal panondangnima ilobei ni halak, ase iidah horjanima na dear in, ase ipuji sidea Bapanima na i nagori atas in. (1 Ptr. 2:12.) 5:17 Ulang ma iagan uhurnima roh Ahu, laho manrumbakkon titah in pakon hata ni nabi-nabi; seng roh Ahu laho manrumbakkon, tapi laho pajongjongkon do. (bd. 3:15; Rom 3:31; 10:4.) 5:18 Ai na sintong do hatangkon bennima: Ronsi seda langit pakon tanoh on, na so bulih maseda humbani titah in sada titik atap sada garis pe, paima saud haganupan in. (Luk. 16:17; 21:33.) 5:19 ase barang ise na manrumbakkon sada pe humbani titah sietekan in, anjaha ipodahkon sonai bani jolma, ai do goranon sietekan i harajaon nagori atas in; tapi na mandalankon anjaha na mangajarhon in, ai do goranon na banggal i harajaon nagori atas in. 5:20 Ai huhatahon ma bennima: Anggo seng daoh dearan hapintoronnima marimbang hapintoron ni sibotoh surat ampa Parisei, sabonar na so boi do hanima masuk hu harajaon nagori atas in. 5:21 Ibogei hanima do hata hubani ompung nalobei: Ulang ho mamunuh! Ia pamunuh siuhumon do. (2 Mus. 20:13; 3 Mus. 24:17; 5 Mus. 17:8.) 5:22 Tapi Ahu mangkatahon bennima: Ise na marah bani sanina, maningon boanon do hu pangadilan. Anjaha ise na mangkatahon bani saninani "na oto", maningon boanon do hu pangadilan atas, anjaha na mangkatahon "e na gila", maningon iuhum ibagas naraka. (1 Joh. 3:15.) 5:23 Halani ai, anggo iboan ho galanganmu hu anjap-anjap, anjaha taringat uhurmu bani sogam ni uhur ni saninamu bam, (Mrk. 11:25.) 5:24 tadingkon ma galanganmai ilobei ni anjap-anjap ai, laho ma ho lobei mardear ampa saninamai, dob ai pe ase roh ho mangondoskon galanganmai! 5:25 Podas ma ho mardear pakon imbangmai, sanggah rap ope ho pakonsi i pardalanan, ase ulang iondoskon imbangmai holi ho hu panguhum, gabe iondoskon panguhum ai ho bani upasni, anjaha inahkon ho hubagas tutupan. (bd. 6:14; Luk. 12:58, 59.) 5:26 Sintong do na huhatahon on bam: Seng bulih ho maluah hunjai, anggo lape igalar ho haganup utangmu, ronsi sarimis. (bd. 18:34.) 5:27 Ibogei hanima do hata na mangkatahon: Ulang ho marbangkis! (2 Mus. 20:14.) 5:28 Tapi Ahu mangkatahon bennima: Barang ise na mangidah naboru anjaha oji ia, domma marbangkis ia ibagas uhurni. (Joh. 31:1; 2 Ptr. 2;14.) 5:29 Anggo sangsi ho halani mata siamunmu, pulsitkon ma in anjaha ambukkon, ai dearan do magou sada pagorimu, ulang hibul angkulamu igijigkon hubagas naraka. (bd. 18:9; Mrk. 9:47; Kol. 3:5.) 5:30 Anjaha anggo sangsi ho halani tanganmu siamun, rotap ma in anjaha ambukkon, ai dearan do magou sada pagorimu, ulang hibul angkulamu igijigkon hubagas naraka. 5:31 Ihatahon ope: Barang ise na manirangkon na binuatni, maningon bereonni do surat sirang. 5:32 Tapi Ahu mangkatahon bennima: Barang ise na manirangkon binuatni, anggo seng halani parbangkison, na pabangkishonsi do ai. Parbangkis do homa na mambuat na sirang ai. (Luk. 16:18; 1 Kor. 7:10, 11.) 5:33 Ambah ni ai, ibogei hanima do hata hubani ompung nalobei: Seng bulih bijahononmu na tongon! Na dob nibulawankon bani Naibata, maningon galaronmu do ai! (2 Mus. 20:7; 3 Mus. 19:12; 4 Mus. 30:3.) 5:34 Tapi Ahu mangkatahon bennima: Sabonar na so bulih do hanima marbija barang marbulawan pe, age hu langit, ai paratas ni Naibata do ai; (Jes. 66:1; Lah. 7:49.) 5:35 age hu tanoh, ai sidogeian ni naheini do in, age hu Jerusalem, ai huta ni Raja na banggal in do ai. (Ps. 48:3.) 5:36 Age bani ulumu seng bulih ho marbija, ai seng markuasa ho mambahen lopak atap birong jambulanmu age sada. 5:37 Sonon ma hatanima: Eak, anggo eak, lang, anggo lang. Lobih hunjai, humbani na jahat ma ai. (2 Kor. 1:17; Jak. 5:12.) 5:38 Ibogei hanima do hata na mangkatahon: Mata do gantih ni mata, ipon gantih ni ipon. (2 Mus. 21:23, 24.) 5:39 Tapi Ahu mangkatahon bennima: Ulang imbang hanima na jahat! Anggo adong na manompas huyummu siamun, tarehon homa age huyummu sambilou! (Joh. 18:22, 23; 3 Mus. 19:18.) 5:40 Anggo adong na mambahen pakara bam, laho mambuat bajumu, bere ma homa mantelmu bani! (1 Kor. 6:7.) 5:41 Anggo adong na mamaksa ho mardalan pakonsi sabatu, irikkon ma ia dua batu. 5:42 Bere ma halak na mangindo bam! Ulang tundali na sihol manginjam humbam! 5:43 Ibogei hanima do hata na mangkatahon: Holong ma uhurmu bani hasomanmu, tapi sogam ma bani munsuhmu! (3 Mus. 19:18.) 5:44 Tapi Ahu mangkatahon bennima: Haholongi hanima ma munsuhnima, anjaha tonggohon hanima ma na marburu hanima, (2 Mus. 23:4, 5; Luk. 23:34; Lah. 7:60; Rom 12:14, 20.) 5:45 ase gabe anak ni Bapanima na i nagori atas ai hanima, ai ipapoltak do mata ni arini bani parjahat ampa parbujur, anjaha iparoh do udan bani parpintor ampa pargeduk. (Ep. 5:1.) 5:46 Ai anggo holong uhurnima pitah bani na marholong ni uhur bennima, aha ma upahnima? Ai sijalo sohei pe, ai lang sonai do ibahen? 5:47 Anjaha anggo saninanima do hansa itabi hanima, aha ma hasurungannima? Ai sipajuh begu-begu pe, ai lang sonai do ibahen? 5:48 Ai pe, maningon gokan dear do hanima, songon Bapanima i nagori atas, na gokan dear in! (5 Mus. 19:2.)

Mateus 6

6:1 Jaga ma hanima, ase ulang idalankon hanima hapintoronnima ilobei ni halak, ase iidah sidea! Anggo sonai, seng adong be upahnima humbani Bapanima na i nagori atas ai. 6:2 Ai pe, anggo marsibere-bere ho, ulang pala tingtingkon, songon pambahen ni halak sipakulah-kulah i rumah parguruan atap i alaman, ase ipuji halak sidea. Na sintong do hatangkon bannima: Domma ijalo sidea upah ni sidea. 6:3 Ase anggo marsibere-bere ho, ulang ma pala ibotoh tanganmu sambilou na binere ni tanganmu siamun, (bd. 25:37, 38; Rom 12:8.) 6:4 ase ponop idop ni uhurmu; jadi Bapamu, siidah na ponop ai ma mambalas ai bam. 6:5 Anjaha anggo martonggo hanima, ulang ma songon halak sipakulah-kulah, na mangkarosuhkon jongjong martonggo i rumah parguruan atap bani sirpang-sirpang, ase iidah halak sidea. Na sintong do hatangkon bannima: Domma ijalo sidea upah ni sidea. 6:6 Tapi anggo martonggo ho, hu kamar ma ho laho, tutup ma labah ai, anjaha martonggo ma ho bani Bapamu, na adong bani ianan na ponop ai; jadi Bapamu, siidah na ponop ai ma mambalas ai bam. (2 Raj. 4:33.) 6:7 Sanggah na martonggo ai ulang ma marganjang-ganjang sahapnima songon sipajuh begu-begu, na mangagan tangihonon ni Naibata sidea, halani buei ni sahap ni sidea. (Jes. 1:15.) 6:8 Ai pe, ulang ma songon sidea hanima! Ibotoh Bapanima do na porlu bennima, sanggah lape ipindo hanima ai hum-Bani. (ay. 32.) 6:9 Ase sonon ma tonggonima: Ham Bapanami na i nagori atas. Sai pinapansing ma Goranmu. (Luk. 11:2-4.) 6:10 Sai roh ma harajaonmu. Sai saud ma harosuh ni uhurmu i nagori tongah on songon na i nagori atas. (bd. 7:21; Luk. 22:42.) 6:11 Bere Ham ma bannami sadari on hagoluhan ari-ari. 6:12 Sasap Ham ma dousanami songon panasapnami bani dousa ni hasoman, na mardousa dompak hanami. (ay. 14, 15; 18:21-35.) 6:13 Ulang ma bobai Ham hanami hu parlajouan, tapi paluah Ham ma hanami humbani pangagou. Ai Ham do simada harajaon ampa hagogohon ampa hasangapon sadokah ni dokahni. Amen. (1 Kron. 29:11-13.) 6:14 Ai anggo isasap hanima salah ni halak dompak hanima, sasapon ni Bapanima na i nagori atas ia do age dousanima. (Mrk. 11:25, 26.) 6:15 Tapi anggo seng isasap hanima salah ni halak dompak hanima, seng sasapon ni Bapanima age salahnima. (Mrk. 11:25, 26.) 6:16 Anggo marpuasa hanima, ulang ma borjot bohinima songon pambahen ni halak sipakulah-kulah, ai ipasambor sidea do bohi ni sidea, ase iidah halak sidea na marpuasa. Na sintong do hatangkon bennima: Domma ijalo sidea upah ni sidea. (Jes. 58:5, 6.) 6:17 Tapi anggo marpuasa ho, minaki ma ulumu, anjaha suhapi bohimu, 6:18 ase ulang tanda parpuasaanmai bani halak, tapi talar bani Bapamu na bani na ponop ai. Jadi Bapamu, siidah na ponop ai ma mambalaskon ai bam. 6:19 Ulang ma patumpu-tumpu hanima arta bennima i tanoh on, bani ianan na targagat tasik ampa ngitngit, bani ianan na tarhurak anjaha tartangko panangko! 6:20 Tapi patumpu-tumpu hanima ma arta bannima i nagori atas, bani ianan na so targagat tasik ampa ngitngit, bani ianan na so tarhurak anjaha tartangko panangko. (bd. 19:21-22; Luk. 12:33, 34; Kol. 3:1, 2.) 6:21 Ai ija artamu, ijai do uhurmu. 6:22 Palita ni angkula do mata. Anggo dear matamu, lihar ma ganup angkulamu. (Luk. 11:34-36.) 6:23 Tapi anggo sambor matamu, golap ma haganup angkulamu. Golap ni in tene, anggo golap ma panondang na ibagas ho. 6:24 Seng tarbalosi sada halak dua tuan. Sai sogam do uhurni bani na sada, haholonganni na sada nari; hombaranni do na sada, anjaha mapas uhurni bani na sada nari. Seng tarbalosi nasiam Naibata rap pakon Mammon! 6:25 Ai do ase huhatahon bannima: Ulang ma holsohan hanima pasal goluhnima pasari-sari sipanganon atap siinumon, sonai homa pasal angkulanima pasari-sari parhiouon. Ai lang harganan do hosah ase sipanganon, anjaha harganan angkula ase parhiouon? (Pil. 4:6; 1 Tim. 6:6; 1Ptr. 5:7; Heb. 13:5.) 6:26 Tonggor hanima ma manuk-manuk na i awang-awang, na so martidah, na so manabi anjaha na so patumpuhon hu sopou; tong do iparmudu Bapanima na i nagori atas ai sidea. Ai lang bueinan ope hasurungannima marimbang ai? (bd. 10:29-31.) 6:27 Ise ma hanima na mangasup paganjang ari-arini age saasta gelah marhitei na holsohan? 6:28 Mase ma holsohan hanima pasal parhiouon? Pardiatei hanima ma partubuh ni bunga silundat i talun in, na so pala marhorja barang manorha! 6:29 Tapi huhatahon ma bennima: Gari raja Salomo, sanggah hasangaponni ai, seng adong jenges ni hiouni songon sada bunga-bunga ai. (1 Raj. 10:10-29.) 6:30 Ase anggo sonai iparhioui Naibata poyon-poyon na i talun in, na adong sadari on, hape patar ipuruni, samintolah hanima ma lang parhiouonni? Ee hanima siotik haporsayaon! 6:31 Ase ulang ma holsohan hanima mangkatahon: Aha ma panganonnami, aha ma inumonnami, aha ma parhiouonnami? 6:32 Ai sipajuh begu-begu do na mangkaporluhon sisonai ai. Ibotoh Bapanima na i nagori atas ai do na porlu ai bennima. 6:33 Parlobei ma pindahi hanima harajaon ni Naibata ampa hapintoranni, dob ai tambahkononNi do ganupan ai bannima. (Rom 14:17.) 6:34 Ase ulang ma holsohan hanima pasal ari patar, ai sarihonon ni ari patar do na porlu ijai. Ganup ari sungkup bei do hasunsahanni. (ay. 11; 2 Mus. 16:19.)

Mateus 7

7:1 Ulang hanima manguhum-uhumi, ase ulang hona uhum hanima, (Rom 2:1; 1 Kor. 4:5.) 7:2 ai panguhumonnima do uhumhononkon bennima, anjaha parsuhatannima do suhathononkon bennima. (Mrk. 4:24.) 7:3 Mase ma patorih-torihonnima silbak-silbak na bani mata ni saninamu, hape na satiang na ibagas matamu seng iidah ho? 7:4 Sonaha ma boi hatahononmu bani saninamu: Dia, hupadarat ma lobei silbak-silbak na bani matamin, hape adong na satiang bani matamu? 7:5 Ee sipakulah-kulah! Parlobei ma padarat tiang na bani matamu, dob ai pe, ase uhurhon sonaha pangumpatmu bani silbak-silbak na bani mata ni saninamu. 7:6 Ulang ma bere hanima arta na mapansing bani baliang, anjaha ulang ma amburhon mutiaramu ilobei ni babuy, ase ulang idogei-dogei ai, dob ai marhusor ia laho mandorab ho. (bd. 10:11.) 7:7 Pindo hanima ma, sai na bereonNi do bannima, pindahi hanima ma, sai na jumpahan do hanima, hartuki hanima ma, sai na bukaonni do bannima.(Jer. 29:13, 14; Mrk. 11:24; Luk. 11:5-13.) 7:8 Ai sai na manjalo do na mangindo, jumpahan na mangindahi, anjaha ungkabon bani na mangkartuki. 7:9 Ai ise ma humbannima jolma, na mambere batu bani anakni, anggo ipangindo indahan, 7:10 atap anggo ipangindo dengke, gabe ibere bani ulog? 7:11 Gari hanima parjahat mambotoh mambere na madear bani anaknima, samintolah Bapanima na i nagori atas ai ma lang mambotoh mambere arta na madear bani na mangindo hum-Bani? (Jak. 1:17.) 7:12 Sagala na pinindo ni uhurnima, sibahenon ni halak bannima, ai ma bahen hanima bani sidea, ai in do hata ni titah ampa nabi-nabi. (bd. 22:40; Rom 13:8-10.) 7:13 Masuki hanima ma horbangan na sompit in, ai tahar do horbangan anjaha bolag do dalan hu hamagouan, anjaha buei do halak na masuk hujai. (Luk. 13:24.) 7:14 Tapi sompit do horbangan anjaha etek do dalan na dompak hagoluhan, anjaha otik do halak na jumpahan ai. (bd. 19:24; Lah. 14:22.) 7:15 Jaga ma hanima dompak nabi parladung, ai roh do sidea bannima marrupahon biri-biri, tapi uhurni ibagas begu panoroh do. (bd. 24:4, 5, 24; Lah. 20:29.) 7:16 Humbani buahni do tandaonnima sidea. Ai boi do buaton buah ni anggur humbani rimbang atap jambu humbani latong? (Gal. 5:19-22; Jak. 3:12.) 7:17 Ai marbuahkon na madear do sagala hayu na madear, tapi sambor do buah ni hayu na masambor. (bd. 12:33.) 7:18 Seng boi hayu na madear marbuahkon na masambor; sonai homa hayu na masambor seng tarbahen marbuahkon na madear. (bd. 3:10; Joh. 15:2, 6.) 7:19 Sirobohon do sagala hayu na so marbuah na madear, anjaha iambukkon hubagas apuy. 7:20 Ase humbani buahni do tandaonnima sidea. 7:21 Seng haganup halak na mangkatahon Bangku "Tuhan, Tuhan!" masuk hu harajaon nagori atas ai, pitah na mandalankon harosuh ni BapangKu na i nagori atas ai do. 7:22 Bani ari ai buei do halak na mangkatahon Bangku: Ham Tuhan, Tuhan, ai lang manjahai do hanami marhitei goranMu? Ai lang iusir hanami do setan-setan marhitei goranMu? Ai lang ibahen hanami do buei tanda halongangan marhitei goranMu? (Luk. 13:25-27; 1 Kor. 13:1-2.) 7:23 Jadi hatahononku ma bani sidea: Seng ongga hutandai hanima, misir ma hanima hun lambungku, hanima sihorjahon na ulang. (bd. 25:41.) 7:24 Ase na mambogei hatangKin anjaha ihorjahon, sipausihon ma in bani halak na maruhur, na pajongjong rumahni bani batu gingging. (ay. 21.) 7:25 Roh pe udan manalosou, marbanggal bah, anjaha doras logou mandorab rumah ai, seng marumbak, ai batu gingging do onjolanni. 7:26 Tapi na mambogei hatangkin, hape seng ihorjahon, usih ma ia bani halak na oto, na pajongjong rumahni bani horsik. 7:27 Dob ai roh ma udan manalosou, marbanggal bah, anjaha logou pe doras mandorab rumah ai, gabe marumbak ma rumah ai anjaha mareong. (Hes. 13:10, 11.) 7:28 Jadi dob siap ihatahon Jesus hata ai, longang tumang ma halak na mabuei ai mambogei podahni ai. (Mrk. 1:22; Luk. 4:32.) 7:29 Ai marhidorat do pangajarionNi bani sidea, sedo songon pamodahi ni sibotoh surat. (Joh. 7:46.)

Mateus 8

8:1 Sanggah tuad Jesus hun dolog ai, buei do halak na mangirikkonsi. 8:2 Jadi roh ma sada halak na gadamon marsombah hu-Bani, nini ma: Tuhan, anggo ra Ham, tarpasusi Ham do ahu! 8:3 Jadi isurdukkon Jesus ma tanganni, ijamah ma ia lanjar nini ma: Ra do Ahu, susi ma ham! Jadi mintor malum ma gadamni ai. 8:4 Dob ai ihatahon Jesus ma hubani: Jaga, ulang patugah ham age bani ise. Tapi laho ma, patidak ham ma dirimu bani malim, anjaha boan ham ma galangan, songon na niaturhon ni si Musa, gabe hasaksian bani sidea. (bd. 9:30; 2 Mus. 14:2; Mrk. 7:36; Luk. 17:14.) 8:5 Dob masuk Jesus hu huta Kapernaum, roh ma hubaNi sahalak kopala ni tentera mangelek-eleksi, nini ma: 8:6 Tuhan, tibal-tibal do i rumahku juak-juakku, oyangon do ia, borit do iahap. 8:7 Nini Jesus ma mambalosisi: Roh pe Ahu pamalumhonsi. 8:8 Dob ai nini kopala ni tentera ai ma mambalosi: Tuhan, seng talup ahu, roh Ham masuk hu rumahku; sangkababah hata gelah hatahon Ham, jadi malum ma juak-juakkai. 8:9 Gari ahu, jolma na i toruh ni parentah, anjaha na mamarentah tentara homa, anggo huhatahon bani sada halak: "Laho", jadi laho ma ia; bani halak na legan "Roh", jadi roh do ia; sonai homa bani juak-juakku "Horjahon on", jadi ihorjahon do ai. 8:10 Manangar ai, longang ma Jesus, jadi nini ma bani halak na mangirikkonsi ai: Na sintong do hatangkon bani nasiam: Gari bani halak Israel seng jumpah Ahu haporsayaon na sonin. (bd. 15:28.) 8:11 Tapi huhatahon ma bani nasiam: Buei do halak na roh magira hun hapoltakan pakon hun hasundutan gabe hasoman sapanganan ni si Abraham, si Isak ampa si Jakob ibagas harajaon nagori atas ai. (Jes. 49:12; Luk. 13:28, 29.) 8:12 Tapi anggo anak ni harajaon in hinan, siusiron do in bani na golap marimpot-impot; ijai ma masa partangison ampa na patungos-ngoson. (bd. 22:13; 24:51; 25:30.) 8:13 Dob ai ihatahon Jesus ma hubani kopala ni tentera ai: Laho ma ham, jumpah ham ma domu hubani haporsayaonmu ai! Jadi malum ma juak-juak ai bani panorang ai. (bd. 9:29; 15:28.) 8:14 Dob masuk Jesus hu rumah ni si Petrus, iidah ma tibal anturang ni si Petrus, pane-paneon. (1 Kor. 9:5.) 8:15 Jadi ijamah ma tanganni, lanjar laho ma pane-pane ai humbani. Hundul ma ia, anjaha iidangi ma Ia. 8:16 Dob golap ari, roh ma halak mamboan hu-Bani buei halak na setanon. Iusir ma setan-setan ai marhitei hatani, anjaha ipamalum ma sagala na boritan, 8:17 ase jumpah na hinatahon ni nabi Jesayas, na mangkatahon: Ia do mangusung hasombuhonta anjaha iporsan do naboritta. (Jes. 53:4, 5; 1 Ptr. 2:24.) 8:18 Sanggah iidah Jesus roh halak na mabuei manginggotisi, ihatahon ma hubani susianni ai, ase laho sidea mandipar. (Mrk. 4:35.) 8:19 Jadi roh ma sahalak sibotoh surat hu-Bani, nini ma: Guru, sihol do ihutkononku Ham, atap huja pe Ham laho! 8:20 Nini Jesus ma dompaksi: Na marliang do sorigala, anjaha na marasar do manuk-manuk na i awang-awang, tapi anggo Anak ni jolma in, seng dong Bani hatibalan ni uluni. (2 Kor. 8:9.) 8:21 Sada halak na legan humbani susianNi ai mangkatahon hu-Bani: Ham Tuhan, lopas Ham lobei laho ahu mananom bapangku! 8:22 Tapi nini Jesus ma dompaksi: Ahu ma ihutkon! Paturut ma na matei in mananom na mateini! 8:23 Dob ai masuk ma Jesus hubagas parau, jadi iihutkon susianNi ma Ia. 8:24 Jadi roh ma haba-haba na doras i tao ai, pala isangkobi gilumbang parau ai, tapi tarpodom do anggo Ia. 8:25 Jadi roh ma sidea mamuhoiSi, nini sidea ma: Tuhan, urupi, harom ma hita! 8:26 Ihatahon Jesus ma hubani sidea: Mase mabiar hanima? Otikni in haporsayaonnima! Jadi jongjong ma Ia, ihata ma logou pakon tao ai, gabe minop tumang ma. (bd. 14:31; 16:8.) 8:27 Longang bei do jolma ai, nini: Ise do halak on, ase logou ampa tao pe mambalosi parentahni? 8:28 Dob das Ia i dipar, i tanoh ni halak Gadara, roh ma hun tanoman dua halak na setanon manjumpahkonsi. Jangin tumang do sidea, pala seng tarbontas atap ise dalan ai. 8:29 Tonggor ma, mardilo-dilo do sidea mangkatahon: Mangaha Ham roh bennami, Ham Anak ni Naibata? Roh do Ham hape manunsahi hanami bani na so panorangni ope! (Luk. 4:41; 2 Ptr. 2:4.) 8:30 Seng pala daoh humbani sidea adong do sahulanan bolon babuy manggagati. 8:31 Jadi ipindo setan-setan ai ma hum-Bani: Anngo na maningon do usironmu hanami, suruh Ham ma hanami masuk hubagas babuy na sahulanan ai. 8:32 Nini Jesus ma hubani sidea: Misir ma! Jadi luar ma sidea, imasuki ma babuy ai. Anjaha tonggor ma, mardabuhan ma babuy na sahulanan ai hun salansah ai hubagas tao ai, gabe mogap ibagas bah ai. 8:33 Jadi maporus ma siparmahan babuy ai, anjaha dob das sidea i huta, ibaritahon sidea ma haganup, sonai homa na masa bani na setanon ai. 8:34 Anjaha tonggor ma, kaluar ma haganup parhuta ai manjumpahkon Jesus. Dob pajumpah, ipindohon sidea ma hu-Bani, ase misir Ia hun tanoh ni sidea.

Mateus 9

9:1 Dob ai masuk ma Ia hu parau, laho ma mandipar, gabe das ma Ia hu hutani. 9:2 Jadi iboan halak ma hu-Bani sada halak na oyangon, tibal bani podomanni. Jadi dob iidah Jesus haporsayaon ni sidea, nini ma dompak na oyangon ai: Tenger ma uhurmu ambia, domma sasap dousamu! 9:3 Anjaha tonggor ma, deba humbani sibotoh surat marpingkir ibagas uhurni: Na mangapasi Naibata do halak on! 9:4 Tapi ibotoh Jesus do pingkiran ni sidea ai, gabe nini ma: Mase ma jahat pingkirannasiam ibagas? (bd. 12:25; Joh. 2:25.) 9:5 Na ija do urahan hataonkon: "Domma sasap dousamu", atap mangkatahon: "Jongjong ma ho, mardalan ma ho?" 9:6 Tapi ase ibotoh nasiam, na markuasa do Anak ni jolma in manasap dousa i tanoh on, ihatahon ma bani na oyangon ai: Jongjong ma ho, boan ma podomanmu, mulak ma ho hu rumahmu! 9:7 Jadi jongjong ma ia, lanjar mulak hu rumahni. 9:8 Mangidah ai na mabuei ai, mabiar ma sidea anjaha ipuji ma Naibata, na mambere kuasa na sonai banggalni bani jolma. 9:9 Dob laho ia hunjai, iidah Jesus ma sada halak na margoran si Mateus, hundul i kantor sohei. Nini ma hubani: Irikkon Ahu! Jadi jongjong ma ia, lanjar iirikkon ma Jesus. 9:10 Jadi sanggah mangan Jesus i rumah ai, buei do sijalo sohei pakon pardousa rap mangan pakon Jesus ampa susianni ai. 9:11 Mangidah ai, nini Parisei ai ma hubani susianni ai: Mase ma rap mangan gurunima rap pakon sijalo sohei ampa pardousa? (Luk. 15:2.) 9:12 Ibogei Jesus ma ai, gabe nini ma: Seng porlu doktor bani halak na jorgit, bani na boritan do. 9:13 Laho ma nasiam, mangguruhon arti ni hata on: Idop ni uhur do harosuh ni uhurhu, sedo galangan. Ai roh pe Ahu, sedo mandilo parpintor, halak pardousa do. (1 Sam. 15:22; Hos. 6:6.) 9:14 Dob ai roh ma hu-Bani susian ni si Johannes manungkun: Mase marpuasa hanami pakon halak Parisei, hape susianmu lang? (Luk. 18:12.) 9:15 Jadi nini Jesus ma hubani sidea: Mintor tarbahen ma marhoru hasoman-hasoman ni siparunjuk sadokah rap ope siparunjuk ai pakon sidea? Tapi na roh ma arini, buaton ma siparunjuk ai humbani sidea, jadi ijai ma sidea marpuasa. (Joh. 3:29.) 9:16 Seng dong halak mandungkaphon hiou na baru bani hiou na dob madotei, ai rigatkonon ni hiou na baru ai do hiou na dob madotei ai, gabe roh bangbangni ma na marigat ai. (Joh. 1:17.) 9:17 Seng ipausei halak anggur na baru hubagas gusi huling-kuling na buruk, mapultak holi gusi ai, gabe mambur anggur ai anjaha maseda iananni ai. Hubagas gusi huling-kuling na baru do nahkonon anggur na baru, jadi simpan ma haduasi ai. 9:18 Sanggah marsahap Ia pasal ai hubani sidea, tonggor ma, roh ma sada halak kopala ni sinagoge (rumah parguruan), manrogop hu lobeini, lanjar nini ma: Tongkin on ope matei borungku; tapi roh ma Ham, anjaha tampeihon Ham ma tanganMu, ase manggoluh use ia. 9:19 Jadi jongjong ma Jesus, iirikkon ma ia, sonai homa susianNi ai. 9:20 Jadi adong ma sada naboru, na dob sapuluh dua tahun sai roh pantang ni hiouni; idohori ma Ia hun pudini lanjar ijamah ma rambu ni hiouNi, 9:21 ai nini uhurni ibagas: Hiouni gelah hujamah, malum ma ahu. (bd. 14:36.) 9:22 Jadi marhusor ma Jesus, ikawahkon ma ia, lanjar nini ma: Tenger ma uhurmu inang, haporsayaonmu do na pagoluhkon ham! Mintor malum ma naboru ai hunjia nari. 9:23 Ase dob das Jesus i rumah ni kopala ai, iidah ma gosou siparsulim ampa halak na mabuei, 9:24 jadi nini ma: Misir ma nasiam! Sedo na matei dakdanak on, na modom do. Jadi itartawai sidea ma Ia. (Joh. 11:11, 14-25.) 9:25 Ase dob ipalaho halak na mabuei ai, masuk ma Ia, ijolom ma tanganni, gabe jongjong ma dakdanak ai. 9:26 Jadi sar ma barita ai hu sab nagori ai. 9:27 Sanggah laho Jesus hunjai, adong ma dua halak na mapitung mangirikkonSi, dilo-dilo: Ham Anak ni si Daud! Idop ma uhurMu bennami! 9:28 Dob das Ia i rumah, roh ma na mapitung ai hu-Bani. Jadi nini Jesus ma hubani sidea: Porsaya do nasiam, paboa na margogoh do Ahu mangkorjahon in? Nini sidea ma hu-Bani: Eak Tuhan, porsaya do! 9:29 Jadi ijamah ma mata ni sidea, lanjar nini ma: Jumpah nasiam ma songon na hinaporsayaonnasiam ai! 9:30 Jadi buha ma mata ni sidea. Gogoh ma ipandang Jesus sidea, nini ma: Jaga ma nasiam, ulang adong na mambotoh in! 9:31 Tapi ai pe sidea luar, isahap-sahapkon sidea ma pasalSi hu sab nagori ai. 9:32 Sanggah na laho luar ai sidea, adong ma halak na mamboan hu-Bani sada halak na longah, na siniaran ni setan. 9:33 Dob iusir setan ai, marsahap ma na longah ai. Jadi longang ma halak na mabuei ai, nini sidea ma: Seng ongga ope masa na sonin i tanoh Israel. 9:34 Tapi halak Parisei mangkatahon: Marhitei kopala ni setan do iusir setan-setan ai. (bd. 12:24.) 9:35 Jadi isiar Jesus ma sagala huta ampa dusun; mangajari do Ia bani parguruan ni sidea, iambilankon do ambilan na madear pasal harajaon in, anjaha ipamalum do sagala naborit ampa na niarou ni sidea. (bd. 4:23.) 9:36 Jadi mangidah halak na mabuei ai, idop ma uhurNi, ai loja anjaha mambur merap do sidea songon biri-biri na so marparmahan. (bd. 14:14; Hes. 34:5; Mrk. 6:34.) 9:37 Nini ma dompak susianNi ai: Bolag do sisabion, tapi otik do siparhorja. (Luk. 10:2.) 9:38 Ai pe, elek-elek hanima ma simada sisabion in, ase ipaingkat siparhorja bani sisabionni in!

Mateus 10

10:1 Jadi idilo ma susianNi na sapuluh dua ai hu lobeiNi, anjaha ibere ma bani sidea kuasa dompak tonduy na mabutak, laho mangusir ai, sonai pamalum sagala na borit ampa sagala na niarou ni sidea. 10:2 Ia goran ni apostel na sapuluh dua ai, on ma: Na parlobei; si Simon, na ginoran homa si Petrus, ampa saninani si Andreas; dob ai si Jakobus ampa si Johannes saninani ai, ai ma anak ni si Sebedeus; 10:3 dob ai si Pilippus ampa si Bartolomeus; si Tomas pakon si Mateus, sijalo sohei ai; dob ai si Jakobus anak ni Alpeus ampa si Tadeus; 10:4 dob ai si Simon, halak Kana ai, pakon si Judas Iskariot, na mantahihonSi ai. 10:5 Na sapuluh dua ai ma isuruh Tuhan Jesus, ipodahi ma sidea: Ulang ma laho hanima hutanoh ni halak parbegu, anjaha ulang ma masuki hanima huta-huta ni Samaria, 10:6 tapi pitah hubani biri-biri na magou humbani Israel ma lah hanima laho. (bd. 15:24; Lah. 13:46.) 10:7 Laho ma hanima mangambilankon, paboa domma dohor harajaon nagori atas in. (bd. 3:2; 4:17; Luk. 10:9.) 10:8 Pamalum hanima ma naborit ni na boritan, pagoluh na matei, pamalum na gadamon, usir setan-setan! Silayak-layak do in bennima, ase layak-layakkon hanima ma! (Lah. 20:33.) 10:9 Ulang pala pasirsir hanima bennima omas barang pirak barang duit ibagas gonditnima, 10:10 barang bohal i pardalanan barang hiou dua, sonai sipatu atap tungkot pe, ai patut do dapotan bohalni siparhorja. (1 Tim. 5:18.) 10:11 Anggo masuk hanima hubagas sada huta atap dusun pe, pindahi hanima ma ijai na talup tondokannima, anjaha ijai ma hanima ronsi misir use. 10:12 Hatahon hanima ma tabinima, laho masuk hu rumah ai. (Luk. 10:5, 6.) 10:13 Jadi sogop ma dameinima bani rumah ai, anggo na talup do sidea manjalosi, tapi anggo lang, mulak ma bennima dameinima ai. 10:14 Anggo seng ijalo sidea hanima barang seng ra sidea manangihon hanima, tadingkon hanima ma rumah ampa huta ni sidea ai, anjaha pirpirhon hanima ma dompak sidea orbuk na longkot bani naheinima. (Lah. 13:52; 18:6.) 10:15 Na sintong do hatangkon bennima: Hampungan do sitaronon ni Sodom pakon Gomora bani ari paruhuman magira marimbang huta ai. (bd. 11:24; Luk. 20:47.) 10:16 Husuruh do hanima songon biri-biri hutongah-tongah ni begu, halani ai maruhur ma hanima songon ulog, anjaha bujur songon asas. (Luk. 10:3; Rom 16:19; Ep. 5:15.) 10:17 Jaga ma hanima dompak jolma, ai ondoskononni do hanima hu paruhuman, anjaha lonsingonni do hanima bani parguruan ni sidea. (bd. 24:9.) 10:18 Toguon ni sidea do hanima hulobei ni pamarentah pakon raja halani Ahu, gabe hasaksian bani sidea age bani sipajuh begu-begu. (bd. 24:14; Lah. 25:23; 27:24.) 10:19 Tapi anggo iondoskon sidea hanima, ulang ma pala holsohkon hanima pasal sihatahononnima, ai bereonni do bennima bani panorang ai hata sihatahononnima. (Luk. 12:11, 12.) 10:20 Ase, sedo hanima na marsahap ijai, tapi Tonduy ni Bapanima do na marsahap ibagas hanima. (1 Kor. 2:4.) 10:21 Ondoskonon ni sanina do saninani hu hamateian, sonai bapa dompak anakni. Manlawan do anak dompak orang tuani, laho mamunuhsi. (ay. 35.) 10:22 Domdoman ni haganup jolma do hanima halani goranku, tapi na tahan das hu ujungni, ai do paluahonni. (bd. 24:13.) 10:23 Anggo iparburu hanima bani sada huta, laho ma hanima hu huta na legan, ai na sintong do hatangkon bennima: Seng ope ganup isiari hanima huta ni Israel, roh ma Anak ni jolma in. (bd. 16:28.) 10:24 Seng lobihan susian humbani guruni atap lobihan jabolon humbani tuanni. (Luk. 6:40; Joh. 13:16, 15, 20.) 10:25 Dear ma sada susian anggo dos ia songon guruni, sonai jabolon dos pakon tuanni. Anggo igoran tuan rumah Beelsebul, samintolah parrumahni ai ma lang? (bd. 12:24.) 10:26 Halani ai ulang ma mabiar hanima mangidah sidea, ai seng dong na rungkub, na so tarbuka use, anjaha seng dong na ponop, na so tarbotoh use. (Mrk. 4:22; Luk. 8:17.) 10:27 Na hupatugah bannima bani na golap, hatahon hanima ma in bani na lihar, na huhusipkon bani pinggolnima, baritahon hanima ma in hun atas tayub. 10:28 Ulang ma pala mabiar hanima mangidah sibunuh daging, na so boi mamunuh tonduy; tapi na markuasa mangagou angkula pakon tonduy hu naraka, ai do sihabiarannima. (Jak. 4;12.) 10:29 Ai lang ijual halak do dua dingis sasen? Tapi seng madabuh ai age sada hu tanoh, anggo seng ibagas botoh ni Bapanima. 10:30 Anggo bennima, gari haganup jambulan na bani ulunima in, domma ibilang. 10:31 Halani ai, ulang ma hanima mabiar, ai harganan ope hanima humbani buei dingis. 10:32 Ai sagala na manaksihon Ahu ilobei ni jolma, saksihononKu do ai ilobei ni Bapa na i nagori atas ai, 10:33 tapi sagala, na marnalang Ahu ilobei ni jolma, parnalangonKu do ai ilobei ni Bapa na i nagori atas ai. (Luk. 9:26.) 10:34 Ulang ma nini uhurnima, na roh Ahu, laho mamboan damei hu tanoh on. Seng na roh Ahu mamboan damei, tapi podang do. 10:35 Na roh do Ahu tongon, paingorhon anak dompak bapani, boru dompak inangni, parumaen dompak simatuani, 10:36 anjaha hasomanni sarumah do gabe munsuh bani jolma in. (Mik. 7:6.) 10:37 Barang ise na mangkaholongi bapani barang inangni lobih hum-Bangku, seng talup ai Bangku; anjaha barang ise na mangkaholongi anakni atap boruni lobih hun-Bangku, seng talup ai Bangku. (Luk. 14:26, 27.) 10:38 Anjaha barang ise na so mamorsan silangni anjaha iirikkon Ahu, seng talup ai Bangku. (bd. 16:24, 25.) 10:39 Na manghargahon hosahni, ai do na magouan hosah, tapi na agouan hosah halani Ahu, ai do na jumpahan. (bd. 18:5; Luk. 17:33; Joh. 12:25.) 10:40 Na manjalo hanima, Ahu do jinaloni ai, anjaha na manjalo Ahu, na marsuruh Ahu do jinaloni ijai. (Luk. 10:16; Joh. 13:20.) 10:41 Na manjalo sada nabi, halani nabi ia, jaloonni do upah ni nabi, anjaha na manjalo sada halak parpintor, halani halak parpintor ia, jaloonni do upah ni halak parpintor. 10:42 Anjaha barang ise na mamberehon bah borgoh sasangkir gelah hubani sahalak na etek-etek on, halani susianKu ia, na sintong do hatangkon bennima, seng anjai magou upahni. (bd. 25:40; Mrk. 9:41.)

Mateus 11

11:1 Ase dob siap ipodahi Tuhan Jesus susianNi na sapuluh dua ai, misir ma Ia hunjai, laho mangajari pakon marambilan i huta ni sidea. 11:2 Jadi dob ibogei si Johannes ibagas tutupan pasal pambahenan ni Kristus, isuruh ma na manungkunsi marhitei susianni: 11:3 Ham do na sihol roh ia, atap na legan ope sipaimaonnami? (Mal. 3:1.) 11:4 Nini Jesus ma mambalosi sidea: Mulak ma, anjaha patugah nasiam ma bani si Johannes, aha na binogei ampa na niidahnasiam: 11:5 Gabe marpangidah do na mapitung, mardalan na repat, malum na gadamon, marpanangar na nengel, mulak manggoluh na matei, anjaha bani halak na masombuh iambilankon do ambilan na madear. (Jes. 35:5; 61:1.) 11:6 Martuah ma halak na so sangsi pasal Ahu. (bd. 13:57; 26:31.) 11:7 Dob mulak sidea, ipungkah Jesus ma mansahapkon pasal si Johannes hubani halak na mabuei ai: Aha do na sihol idahonnasiam, ase laho nasiam hu halimisan? Arung-arung na meol-eol do ibahen pangombus ni logou? (bd. 3:1, 5.) 11:8 Aha do na sihol idahonnasiam? Sada halak parhiou na lampot do? Tonggor ma, i rumah ni raja do parhiou na lampot. 11:9 Aha do na sihol idahonnasiam? Sihol mangidah nabi? Tongon do na huhatahon on bani nasiam, lobih do ia humbani sada nabi. (Luk. 1:76.) 11:10 Pasalsi do na tarsurat on: Tonggor ma, suruhonku do suruhanku i lobeimu, ase ipasirsir dalan i lobeimu. (Mal. 3:1.) 11:11 Sintong do na huhatahon on bennima: Humbani jolma, na tubuh humbani naboru, seng dong na bangkit banggalan marimbang si Johannes pandidi; tapi halak sietekan pe ibagas harajaon nagori atas, banggalan do ai humbani. (bd. 13:17.) 11:12 Humbani panorang ni si Johannes nari sigogohan do harajaon nagori atas ai, anjaha halak na manggogoghi do na dapotan ai. (Luk. 16:16; 13:24.) 11:13 Ai singgan si Johannes do panjahaion ni sagala nabi ampa titah; 11:14 anjaha anggo ijalo nasiam do in, ia do si Elias na sihol roh in. (Mal. 3:23; Mat. 17:10-13.) 11:15 Barang ise siparpinggol, itangar ma in! 11:16 Tapi hubani ise ma pausihonku bangsa on? Usih do sidea hubani dakdanak na hundul i tiga, mardilo-dilo bani hasomanni: 11:17 Isompul hanami do sulim bennima tapi seng ra hanima manortor, ipabogeihon hanami do tangis-tangis, tapi seng ra hanima tangis. (Pod. 29:9.) 11:18 Ai roh do si Johannes, seng parmangan, seng parminum, hape ihatahon sidea: Na setanon do ia. 11:19 Na roh do Anak ni jolma in, na ra mangan anjaha na ra minum, hape ihatahon sidea: Tonggor ma, halak sipapangan magou ampa sisobur anggur, huan-huan ni sijalo sohei ampa pardousa! Tapi gabe pintor do Hapentaran in marhitei pambahenanni. (bd. 9:15, 14.) 11:20 Dob ai ipapai Jesus ma huta, iananni sibueinan mangkorjahon hagogohonni ai, halani seng mubah uhur ni sidea, nini ma: 11:21 Bursik ma ho Korasin! Bursik ma ho Betsaida! Ai ambit i huta Tirus pakon Sidon ipamasa hagogohon songon na masa bannima, seng tarbahen lang mubah do uhur ni sidea, marhiou guni anjaha hundul bani abuan. (Joh. 3:6.) 11:22 Tapi huhatahon ma bennima: Hampungan do sitaronon ni Tirus ampa Sidon marimbang sitarononnima bani ari paruhuman ai. 11:23 Anjaha ho, ale Kapernaum, ai sipagijangon do ho ronsi langit? Sidabuhkononkon do ho ronsi apuy naraka. Ai ambit i huta Sodom ipamasa hagogohon songon na masa ibagas ho, seng tarbahen lang totap ope huta ai ronsi sadari on. (bd. 4:13; 8:5; 9:1.) 11:24 Tapi huhatahon ma bennima: Hampungan do sitaronon ni huta Sodom bani ari uhum ai marimbang sitarononnima! (bd. 10:15.) 11:25 Bani panorang ai ma ihatahon Tuhan Jesus: Hupuji Ham Bapa, Tuhan sigomgom langit ampa tanoh on, halani iponopkon Ham do in humbani halak na maruhur ampa na pentar, tapi ipatalar Ham do in bani dakdanak. (bd. 5:3; 1 Kor. 1:27.) 11:26 Eak, Bapa, ai sonin do rosuh ni uhurmu. 11:27 Haganupan in, domma iondoskon Bapa Bangku; seng dong, na mananda Anak in, sobali Bapa in, anjaha Bapa in pe, seng dong na manandaSi, sobali Anak in, ampa na pinodahan ni Anak in, domu hubani rosuh ni uhurNi. (bd. 28:18; Joh. 3:35; 17:2; Pil. 2:9.) 11:28 Roh ma nasiam hu-Bangku, nasiam na loja anjaha na boratan, ase hupasonang nasiam. (bd. 12:20; Jer. 31:25.) 11:29 Jalo nasiam ma pasanganku anjaha marguru ma nasiam hum-Bangku, ai na lamlam do Ahu anjaha na toruh maruhur, ase dapotan hasonangan tonduynasiam. 11:30 Ai lamlam do pasanganKu, anjaha hampung do na hupaporsankon.

Mateus 12

12:1 Bani panorang ai mardalan ma Jesus mamontas juma-juma na marisi gandum. Halani loheian iputiki susian ai ma gandum ai lanjar iguguti. 12:2 Mangidah ai halak Parisei, nini sidea ma dompak Jesus: Tonggor ma susianMu in! Ihorjahon susianMu do na so bulih horjaonkon bani ari Sabat. (2 Mus. 20:10.) 12:3 Jadi nini ma dompak sidea: Seng ongga gakni ibasa nasiam na binahen ni si Daud, sanggah loheian ia rap pakon hasomanni saodoran? (1 Sam. 21:7.) 12:4 Imasuki do rumah ni Naibata, gabe ipangan sidea do ruti galangan na so bulih panganonni barang panganon ni hasomanni pe, pitah malim do hansa. (3 Mus. 24:9.) 12:5 Barang na so ibasa nasiam do ibagas buku titah in, na so salah hape malim-malim sanggah ari Sabat i rumah panumbahan ai, age ilaosi titah ari Sabat in? (4 Mus. 28:9.) 12:6 Tapi huhatahon ma bani nasiam: Lobihan humbani rumah panumbahan do on! 12:7 Ambit iarusi nasiam, aha arti ni hata on: "Idop ni uhur do huharosuhkon, sedo galangan," tontu seng uhumon nasiam sidea, na so marsalah in. (bd. 9:13; Hos. 6:6.) 12:8 Ai Anak ni jolma in do tuan ni ari Sabat. 12:9 Jadi dob misir Ia hunjai, imasuki ma rumah parguruan ni sidea. 12:10 Adong do ijai sada halak, matei tanganni salopah. Jadi isungkun sidea ma Ia: Ai bulih do pamalumhon naborit ari Sabat? (Luk. 14:3.) 12:11 Tapi nini ma dompak sidea: Ise humbani nasiam, na marnah biri-biri sada, na so mandorab anjaha manarik ai hu atas, anggo madabuh ai hubagas godung sanggah ari Sabat? (Luk. 14:5.) 12:12 Ai lang daoh do harganan jolma marimbang biri-biri? Ase, bulih do mangkorjahon na madear bani ari Sabat. 12:13 Dob ai nini ma dompak halak ai: Papintor ma tanganmin! Jadi ipapintor ma, gabe suang ma malum songon tanganni na sada nari. 12:14 Jadi luar ma Parisei ai, manriah ma sidea, atap sonaha do bahenon ni sidea, laho mamunuhsi. (Joh. 5:16.) 12:15 Dob ibotoh Jesus riah ni sidea ai, surut ma Ia hunjai. Buei do halak na mangirikkonSi, gabe ipamalum ma naborit ni sidea haganup. (Mrk. 3:7-12.) 12:16 Tapi ipandang do sidea, ase ulang ipatugah-tugah pasalSi, (bd. 8:4.) 12:17 ase jumpah na hinatahon marhitei nabi Jesayas, na mangkatahon: (Jes. 42:1-4.) 12:18 Tonggor ma, juak-juakku na hupilih in, haholonganku anjaha harosuh ni uhurhu do Ia. Nahkononku do Tonduy Bani, anjaha ambilankononni do habonaron hubani bangsa parbegu. (bd. 3:17.) 12:19 Seng ra Ia maringor, seng ra Ia marsurak-surak anjaha seng marosuh Ia tarbogei hatani bani dalan-dalan. 12:20 Seng ponggolhononni arung-arung na dob marosak, anjaha seng intopkononni sumbu na dob miloh-iloh, paima monang bahenonni uhum. 12:21 Anjaha bani goranNi do marpangarapan bangsa-bangsa. 12:22 Dob ai tarboan ma hu-Bani sada halak na setanon, na pitung anjaha na longah, jadi ipamalum ma ia, gabe marsahap anjaha marpangidah ma na longah ai. 12:23 Jadi longang ma halak na mabuei ai haganup, nini sidea ma: Atap on ma Anak ni si Daud ia? 12:24 Mambogei ai halak Parisei, nini sidea ma: Marhitei si Beelsebul, kopala ni setan-setan do ipangunsagahkon mangusir setan-setan. (bd. 9:34.) 12:25 Halani ibotoh Jesus do pingkiran ni sidea, jadi nini ma dompak sidea: Ganup harajaon na marsalisih samah dirini, maseda do, anjaha ganup huta, atap rumah tangga na marsalisih samah dirini, seng totap ai. 12:26 Ai anggo iusir setan hasomanni setan, na pabolah ma ia ai samah dirini. Sonaha ma boi totap harajaonni? 12:27 Anjaha, anggo huusir setan marhitei Beelsebul, marhitei kuasa ni ise ma anaknasiam mangusirsi? Ai pe, sidea do na gabe panguhum bani nasiam. 12:28 Tapi, anggo marhitei Tonduy ni Naibata do huusir setan-setan, jadi, na dob sogop ma harajaon ni Naibata bani nasiam. (1 Joh. 3:8.) 12:29 Ai sonaha ma bulih masukan ni sada halak rumah ni sada halak na gogoh anjaha irampas ugas-ugasni, anggo seng palobei isangkut halak na gogoh ai? Dob ai pe, ase tarbuatsi ugas-ugasni. (Jes. 49:24.) 12:30 Na so mangkasomani Ahu, imbangKu do in, anjaha na so mangkasomani Ahu patumpuhon, na mangerap do in. (Mrk. 9:40.) 12:31 Halani ai huhatahon ma bani nasiam: Ganup dousa ampa panrisaion ni jolma sasapon do, tapi panrisaion dompak Tonduy in seng sasapon ai. (Heb. 6:4, 6; 10:26; 1 Joh. 5:16.) 12:32 Anjaha barang ise na mangkatahon hatani manlawan Anak ni jolma in, sasapon do ai, tapi barang ise na manluarhon hatani manlawan Tonduy Na pansing, seng sasapon ai, age bani dunia sonari,barang magira. (Luk. 12:10; 1 Tim. 1:13.) 12:33 Anggo dear sada hayu, dear ma buahni; anggo sambor sada hayu, sambor ma buahni; ai humbani buahni do tandaon hayu ai. (bd. 7:17.) 12:34 Nasiam ginompar ni ulog darih! Sonaha ma tarbahen nasiam mansahapkon na madear, ai na jahat do nasiam? Ai in na manggoki uhur, ai do iluarhon pamangan. 12:35 Halak na madear padaratkon hadearon humbani artani na madear ai, anjaha halak na masambor padaratkon na masambor humbani artani na masambor ai. 12:36 Tapi huhatahon ma bennima, maningon marbalos do jolma magira bani ari uhum ai pasal sagala hata na so margagan, na hinatahonni. 12:37 Ai marhitei hatamu do ho pintoranni, anjaha marhitei hatamu do ho uhumonni. 12:38 Jadi marbalos ma Bani piga-piga halak sibotoh surat pakon Parisei, nini sidea ma: Guru, sihol idahonnami do sada tanda humbaMu. (bd. 16:1.) 12:39 Tapi nini ma mambalosi sidea: Bangsa parjahat ampa parbangkis mangindo sada tanda, tapi seng sibereon ai bani, sobali tanda na bani si Jonas, nabi ai. 12:40 Ai songon si Jonas tolu ari tolu borngin ibagas bituha ni dengke na banggal ai, sonai ma use Anak ni jolma in tolu ari tolu borngin ibagas tanoh. (Jon. 2:1, 2.) 12:41 Na jongjong do magira halak Ninipe bani paruhuman ai rap pakon bangsa on, anjaha uhumon ni sidea do ia, ai ipaubah sidea do uhurni mambogei ambilan ni si Jonas. Tonggor ma, lobihan do na ijon on marimbang si Jonas! (Jon. 3:5.) 12:42 Na jongjong do magira bani paruhuman ai raja naboru, na hun dangsina rap pakon bangsa on, anjaha uhumonni do ia, ai roh do ia hun ujung ni tanoh on laho mambogei hapentaron ni si Salomo. Tonggor ma, lobihan do na ijon on marimbang si Salomo! (1 Raj. 10:1-10.) 12:43 Anggo luar ma tonduy na butak ai humbani jolma, mawat-awat ma ia bani ianan dorging-dorging, laho mangindahi parsaranan, tapi lang jumpahsi. 12:44 Jadi nini ma: Mulak ma lah ahu hubani ianan, na dob hutadingkon ondi. Dob das ia hujai, jumpahsi ma ianan ai lumei, hona sapu anjaha ipajagar. 12:45 Dob ai misir ma ia, laho mangarahkon pitu tonduy na legan, na jahatan humbani, imasuki sidea ma ia, lanjar marianan ijai. Jadi dobni jahatan ma parlahou ni jolma ai marimbang mulani ondi. Sonai ma masa bani bangsa na jahat on. (2 Ptr. 2:20.) 12:46 Jadi sanggah marsahapi ope Ia pakon halak na mabuei ai, jongjong do idarat inangNi pakon saninaNi, sihol marsahap pakonSi. 12:47 Jadi adong ma na patugahkon Bani: Tonggor ma, jongjong do i darat inangmu pakon saninamu, sihol marsahap pakon Ham. 12:48 Tapi nini ma dompak na patugahkon ai: Ise do inangKu? (Luk. 2:49.) 12:49 Jadi ipaherbang ma tanganni dompak susianNi ai, lanjar marsahap: Tonggor ma, on do inangKu ampa saninangKu. 12:50 Ai na mangkorjahon harosuh ni Bapa na i nagori atas ai, ai do anggingKu, ai do botouhu, ai do inangKu. (Rom 8:29; Heb. 2:11.)

Mateus 13

13:1 Bani ari ai itadingkon Jesus ma rumah ai, lanjar hundul ma Ia i topi ni tao ai. 13:2 Jadi martumpu ma buei halak hu lobeiNi, gabe inaiki Jesus ma sada parau laho hundul ijai, anjaha ganup halak na mabuei ai jongjong do i pasir ai. 13:3 Anjaha buei do ihatahon bani sidea marhitei limbaga, nini ma: Tonggor ma, laho do sada panabur manabur bonih. 13:4 Jadi sanggah na manabur ai ia, adong ma deba na madabuh hu dalan, dob ai roh ma manuk-manuk mamaguti. 13:5 Deba bonih ai madabuh do bani tanoh na batuon, bani na so sadiha hapal tanohni, jadi mintor tubuh ma, halani na so bagas ai tanohni. 13:6 Tapi sanggah na lambin gijang mata ni ari melus ma lanjar matei, halani na so marurat ai. 13:7 Anggo na deba, hu parhupi-hupian do madabuh, lanjar tubuh do hupi-hupi ai, gabe ipisat ma bonih ai. 13:8 Tapi na deba madabuh do bani tanoh na madear, gabe saud ma marbuah, saratus lompit do na deba, onom puluh lompit na deba, anjaha na deba nari tolu puluh lompit. 13:9 Barang ise na marpinggol, itangar ma ai! 13:10 Jadi roh ma susianNi ai manungkunSi: Mase ma marlimbaga Ham marsahap bani sidea? 13:11 Ibalosi ma sidea, nini ma: Hu bennima ibere do habotohon pasal rusia ni harajaon nagori atas ai, tapi bani sidea lang ibere. 13:12 Ai barang ise na marnadong, bereon do bani, ase marlobih-lobih ia. Tapi barang ise na so marnadong, na adong bani ai hinan pe buaton do humbani. (bd. 25:29; Mrk. 4:25; Luk. 8:18.) 13:13 Ai do halani ase marlimbaga Ahu marsahap bani sidea, halani marmata pe sidea seng marpangidah, anjaha marpinggol pe sidea seng marpambogei anjaha seng iarusi. (5 Mus. 29:3.) 13:14 Ase jumpah ma bani sidea panjahaion ni nabi Jesayas, na mangkatahon: Bogeion ni pinggolnasiam do in namin, tapi seng arusannasiam, idahon ni mata nasiam do in namin, tapi seng tandaonnasiam. (Jes. 6:9, 10.) 13:15 Ai na dob hengkeng do uhur ni bangsa on, pinggolni hurang marpanangar anjaha ipapitpit matani, ase ulang marpangidah matani, ulang marpambogei pinggolni, ulang marpangarusion uhurni, ase ulang mulak anjaha malum sidea bahenonku. 13:16 Tapi martuah do matanima halani marpangidah, ampa pinggolnima halani marpambogei. (Luk. 10:23, 24.) 13:17 Tapi sintong do na huhatahon on bennima: Buei do nabi pakon halak parpintor na sihol mangidah na dob niidahnima, tapi seng iidah, anjaha na sihol mambogei na dob binogeinima, tapi seng ibogei. 13:18 Ai pe, tangar hanima ma limbaga pasal panabur ai! 13:19 Anggo adong na manangar hata pasal harajaon ai, tapi seng iarusi, jadi roh ma parjahat ai manrampas na dob sinaburhon ai hubagas uhurni, ai ma na sinaburhon bani dalan ai. 13:20 Tapi na sinaburhon bani tanoh na batuon ai, ai ma na mambogei hata ai, anjaha mintor malas do uhurni manjalosi, 13:21 tapi seng marurat ibagas dirini, parsatongkinan do hansa ai. Anggo sogop hasunsahan atap pangarsik-arsikon halani hata ai, mintor sangsi do uhurni. 13:22 Ia na sinaburhon bani parhupi-hupian ai, ai ma na mambogei hata ai, tapi tarpisat do hata ai anjaha seng saud marbuah, halani pangkolsohkon ni uhurni bani na i dunia on ampa halani habayakon sipanipu in. (1 Tim. 6:9.) 13:23 Ia na sinaburhon bani tanoh na lambutan ai, ai ma na mambogei hata ai anjaha iarusi gabe saud marbuah, adong na saratus, adong na onom puluh, adong na tolu puluh lompit. 13:24 Dob ai ihatahon ma use limbaga na legan bani sidea, nini ma: Usih do harajaon nagori atas ai bani sada halak na manaburhon bonih na madear hu jumani. (ay. 36:43.) 13:25 Tapi sanggah na modom halak ai, roh ma munsuhni manaburhon simaromei-omei hu holang-holang ni omei ai, lanjar laho hunjai. 13:26 Tapi domma marbuhu tanoh anjaha sihol boltok omei ai, tanda ma simaromei-omei ai. 13:27 Jadi roh ma siparhorja ai bani tuanni, nini sidea ma: Tuannami, ai lang bonih na madear do isaburhon ham hu jumamu? Hunja do simaromei-omei ai? 13:28 Tapi nini ma dompak sidea: Munsuh do na mambahen ai. Nini parhorja ai ma hubani: Dear do nini uhurmu laho hanami patumpuhon ai? 13:29 Jadi nini ma: Lang, tarihut holi omei ai iorbat hanima, sanggah na patumpu simaromei-omei ai hanima. 13:30 Paturut hanima ma ai rap tubuh paima jumpah sabion. Bani panorang sabion ai huhatahon pe bani sipanabi: Patumpu nasiam ma lobei simaromei-omei in, sangkuti nasiam sasamborkos ase itutung; tapi anggo omei in, patumpu nasiam ma hubagas sopouhu. (bd. 3:12.) 13:31 Dob ai ihatahon ma use limbaga na legan bani sidea, nini ma: Usih do harajaon nagori atas ai bani batu ni loharum, na binuat ni sada halak laho manaburhonsi hu jumani. 13:32 Ai do sada silumatan humbani masam ni bonih, tapi dob tubuh, gabe banggalan do ai humbani sagala lowoh simaratah, pala do songon hayu, anjaha marrohan do manuk-manuk na i awang-awang marasar bani rantingni. 13:33 Dob ai ihatahon ma use limbaga na legan bani sidea: Usih do harajaon nagori atas ai bani ragi, na binuat ni sada parinangon, laho mangaguhon ai bani tolu tumba nitak paima migar haganup. (Luk. 3:20, 21.) 13:34 Haganupan ai ihatahon Jesus marhitei limbaga bani halak na mabuei ai; seng marsahap Ia bani sidea anggo seng marhitei limbaga, (Mrk. 4:33, 34.) 13:35 ase jumpah na hinatahon ni nabi ai, na mangkatahon: Ungkabonku do pamanganku mangkatahon limbaga, sahaphononku do na ponop humbani tombei ni dunia on. (Ps. 78:2.) 13:36 Dob ipalaho halak na mabuei ai, misir ma Ia hu rumah. Jadi roh ma hu-Bani susianni ai mangkatahon: Patorang Ham ma bennami limbaga pasal simaromei-omei na i juma ai! (ay. 24, 30.) 13:37 Jadi nini ma mambalosi: Ia na manaburhon bonih na madear ai, ai ma Anak ni jolma in. 13:38 Dunia on do juma ai; ia bonih na madear ai, ai ma anak ni harajaon ai, tapi anggo simaromei-omei ai, ai ma anak ni parjahat. (1 Kor. 3:9.) 13:39 Munsuh na manaburhon ai, ai ma sibolis; pariama ai, ai ma ajal ni dunia on, anjaha malekat ni Naibata do sipanabi ai. 13:40 Ase songon na pinatumpuni ai simaromei-omei ai anjaha itutung, sonai do masa bani ajal ni dunia on. 13:41 Ai suruhon ni Anak ni jolma in do malekatni, jadi patumpuon ni sidea ma humbani harajaon ai sagala sibahen parsangsian pakon sihorjahon na ulang, (bd. 25:31-46.) 13:42 gabe idabuh ma sidea hubagas liang pamurunan; ijai ma masa partangison ampa na patungosngoson. (bd. 8:12.) 13:43 Tapi anggo halak parpintor marsinalsal do songon mata ni ari ibagas harajaon ni Bapa ni sidea. Barang ise na marpinggol, itangihon ma! (Dan. 12:3.) 13:44 Usih do harajaon nagori atas ai bani arta na ponop ibagas sada juma, na jumpah sada halak gabe iponopkon. Dob ai laho ma ia ibagas malas ni uhurni manjuali na dong bani, jadi iboli ma juma ai. (bd. 19:29; Pil. 3:7.) 13:45 Usih do use harajaon nagori atas ai bani sada halak partiga-tiga, na mangindahi mutiara na maharga. 13:46 Jadi dob jumpahsi sada mutiara na maharga tumang, laho ma ia manjual haganup na dong bani, lanjar iboli ma ai. 13:47 Usih do homa harajaon nagori atas ai bani jala na sinampakkon hubagas laut, gabe ipatumpu bagei-bagei ni dengke. (bd. 29:9, 10.) 13:48 Dob gok, itarik ma ai hudarat. Dob ai hundul ma sidea mamilihi, na madear inahkon hubagas raga, tapi na so madear iambukkon do. 13:49 Sonai do masa bani ajal ni dunia on. Laho do malekat-malekat manirang halak parjahat humbani halak parpintor, (bd. 25:32.) 13:50 lanjar idabuh ma sidea hubagas liang pamurunan; ijai ma masa partangison ampa na patungosngoson. 13:51 Domma iarusi hanima haganupan ai? Nini sidea ma hu-Bani: Domma. 13:52 Jadi nini ma dompak sidea: Halani ai, ganup sibotoh surat, na dob niajaran pasal harajaon nagori atas ai, usih ma ai bani sada tuan rumah, na boi padarathon humbani artani na baru ampa madokah. 13:53 Jadi dob ipaujung Jesus pasal limbaga ai, laho ma Ia hunjai. 13:54 Jadi das ma Ia hu huta hagodanganNi, anjaha iajari ma sidea ibagas rumah parguruan ni sidea. Longang do sidea, nini ma: Hunja do dapot halak on hapentaran pakon hagogohon na sonin? 13:55 Ai lang Ia do anak tukang kayu in? Ai lang si Maria do goran ni inangNi, anjaha anggiNi ai ma si Jakobus, si Josep, si Simon ampa si Judas? 13:56 Anjaha botouNi, ai lang haganup do itongah-tongahta? Hunja do dapotSi haganupan in? (Joh. 7:15, 22.) 13:57 Ase sangsi do sidea pasalSi. Tapi nini Jesus ma dompak sidea: Seng dong nabi na so ihormati, sobali i huta hagodanganni ampa i rumahni. (Joh. 4:44.) 13:58 Anjaha seng buei tarhorjahonsi ijai horja hagogohon, halani na so porsaya ai sidea.

Mateus 14

14:1 Bani panorang ai tarbogei ma barita pasal Jesus bani raja Herodes, 14:2 gabe nini ma hubani juak-juakni: Si Johannes pandidi do ai; domma puho ia humbani na matei, ai do ase tarhorjahonsi horja na marhagogohon ai. 14:3 Ai na dob itangkap si Herodes do si Johannes, isangkut, dob ai ipatutupkon halani si Herodias, parinangon ni anggini, si Pilippus. 14:4 Ai ihatahon si Johannes do hubani: Seng patut bamu ia! (3 Mus. 18:16.) 14:5 Sihol do namin bunuhon ni si Herodes ia, tapi mabiar do ia bani halak na mabuei ai, ai nabi do ia, nini uhur ni sidea. (bd. 21:26.) 14:6 Tapi bani ari partubuh ni si Herodes, manortor do boruni si Herodias ai ilobei ni tamuei-tamuei, jadi marosuh ma uhur ni si Herodes mangidahsi, 14:7 pala ibagahkon marhitei bija, mamberehon bani atap aha pe sipindoonni. 14:8 Jadi nini ma, dob iajari inangni: Bere ham ma bangku ijon iatas ni pinggan ulu ni si Johannes pandidi! 14:9 Pusok do namin uhur ni raja ai, tapi halani bijani ampa halani tamueini ai, gabe ihatahon ma na mamberehon ai bani. 14:10 Isuruh ma na mamonggol ulu ni si Johannes ibagas tutupan ai. 14:11 Iboan ma uluni ai bani sada pinggan hubani anak boru ai, gabe ibere ma ai bani inangni. 14:12 Dob ai roh ma susian ni si Johannes mangalop bangkeini ai, lanjar itanom, anjaha iparayak sidea ma Jesus laho patugahkon ai. 14:13 Dob ibogei Jesus ai, misir ma Ia hunjai marparau hubani sada ianan na lungun, sahalakSi. Anjaha dob ibogei halak na mabuei ai pasal ai, iirikkon sidea ma Ia mardalan nahei, manlopusi huta-huta ai. 14:14 Dob mandarat Jesus, iidah ma halak na mabuei ai, gabe idop ma uhurNi mangidah sidea, anjaha ipamalum ma na boritan, na adong itongah-tongah ni sidea. (bd. 9:36.) 14:15 Jadi dob bod ari, roh ma susianNi ai hu lobeiNi mangkatahon: Halimisan do ijon anjaha bod ma ari. Palaho Ham ma halak na mabuei in, ase laho sidea hu huta-huta ai mamboli sipanganon! 14:16 Tapi nini Jesus ma bani sidea: Seng pala laho sidea, bere hanima ma sidea mangan! 14:17 Dob ai nini sidea ma hu-Bani: Pitah lima ruti ampa dua dengke do adong bannami ijon. 14:18 Tapi nini ma: Boan hanima ma ai Bangku hujon! 14:19 Jadi isuruh ma halak na mabuei ai hundul bani poyon-poyon ai. Dob ibuat ruti na lima ai ampa dengke na dua ai, mangkawah ma Ia dompak datas, laho mangkatahon tonggo tarima kasih; ipartopik ma ruti ai, ibere ma bani susianni ai, ase sidea mamberei halak na mabuei ai. 14:20 Jadi mangan ma haganup anjaha bosur bei, dob ai ipatumpu ma teba-teba ai, gok sapuluh dua bantei. (2 Raj. 4:44.) 14:21 Ia buei ni na mangan ai adong do hira-hira lima ribu halak dalahi, naboru pakon dakdanak seng ibilang. 14:22 jadi ijuljul Jesus ma susianNi ai masuk hu parau laho manlobeiSi hu dipar, anjaha na mabuei ai pe isuruh ma mulak. 14:23 Dob isuruh mulak haganup na mabuei ai, tangkog ma sahalaksi hu dolog laho martonggo. Dob golap ari, sahalaksi mando ijai. (Luk. 6:12; 9:18.) 14:24 Ia parau ai, domma tar daoh hun topi pasir, anjaha tarsosak do sidea ibahen gilumbang ai; hun lobei do roh logou ai bani sidea. 14:25 Jadi marayak tahuak dayok na parlobei, roh ma Jesus, manjumpahkon sidea mardalan iatas tao ai. 14:26 Jadi dob iidah susian ai Ia mardalan iatas tao ai, bajoraon ma sidea anjaha nini ma: Begu-begu do in! Doruh-doruh ma sidea halani biarni. (Luk. 24:37.) 14:27 Tapi mintor iparsahapkon Jesus ma sidea, nini ma: Tenger ma uhurnima, Ahu do on! Ulang mabiar! 14:28 Jadi nini si Petrus ma mambalosi: Tuhan, anggo Ham do in, hatahon Ham ma ahu roh Bamu, mardalan iatas bah on! 14:29 Nini ma: Roh ma! Jadi tuad ma si Petrus hun parau ai, mardalan iatas bah ai, laho manjumpahkon Jesus. 14:30 Tapi mangidah logou na doras ai, gabe mabiar ma ia, anjaha sanggah mulai ia mogap, mardilo ma ia: Tuhan, paluah ahu! 14:31 Jadi mintor isurdukkon Jesus ma tanganni laho manangkapsi, lanjar nini ma: Ale siotik haporsayaon, mase bungbang uhurmu? (bd. 8:26.) 14:32 Anjaha dob naik sidea hu parau ai, minop ma logou ai. 14:33 Jadi marsombah ma Bani halak na ibagas parau ai, nini ma: Tongon do Ham Anak ni Naibata! 14:34 Dob das sidea i dipar mandarat ma sidea i Genesaret, 14:35 Jadi dob itandai halak na ijai ai Ia, ipatugah sidea ma hu sab nagori ai, gabe ipamboan halak ma hu-Bani sagala na boritan. 14:36 Ipindo sidea do Bani, ase ilopas jamahon ni sidea age rambu ni hiouNi gelah, jadi sagala na manjamahsi malum do. (bd. 9:21; Luk. 6:19.)

Mateus 15

15:1 Jadi roh ma Parisei pakon sibotoh surat hun Jerusalem marayak Jesus, nini sidea ma: 15:2 Mase ma ilanggar susianMu adat na humbani ompung na lobei? Seng iburihi sidea tanganni laho mangan. (5 Mus. 4:2; Luk. 11:38.) 15:3 Jadi nini Jesus ma mambalosi sidea: Mase ma ilanggar nasiam titah ni Naibata, halani mardingat adatnasiam ai? 15:4 Naibata do mangkatahon: "Pasangap bapamu pakon inangmu!" ambahni ai: "Na mamurai bapani atap inangni, maningon do sipamateion!" (2 Mus. 20:12; 21:17.) 15:5 Tapi nasiam mamodahkon: Barang ise na mangkatahon bani bapani atap inangni: "na sahira pamberengku bamu, dearan ma nagalangkon ai!" 15:6 halak ai, seng pala be pasangaponni bapani atap inangni. Isedai nasiam do titah ni Naibata halani adatnasiam. 15:7 E nasiam sipakulah-kulah! Sintong do panjahaion ni si Jesayas pasal nasiam, na mangkatahon: (Jes. 29:13.) 15:8 Ipasangap pamangan ni bangsa on do Ahu, tapi anggo uhur ni sidea daoh do hum-Bangku. 15:9 Tapi soya do parpasangap ni sidea Bangku, ai podah ni jolma do ipodahkon sidea. 15:10 Jadi idilo ma halak na mabuei ai, nini ma hubani sidea: Bogei anjaha parimbagaskon nasiam ma! 15:11 Seng gabe butak jolma halani na masuk humbani pamanganni, tapi na luar humbani pamanganni ai do pabutakkonsi. (bd. 12:34; 1 Tim. 4:4.) 15:12 Dob ai iparayak susianni ai ma Ia, nini ma: Domma ibotoh Ham, na dob marah do Parisei ai mambogei hata ai? 15:13 Tapi nini ma mambalosi: Siorbaton do sagala suan-suanan, na so sinuan ni Bapa na i nagori atas ai. 15:14 Paturut hanima ma sidea; pambobai na mapitung do sidea manogu na mapitung. Tapi anggo na mapitung manogu na mapitung, tarrobung ma sidea haduasi. (bd. 23:24; Luk. 6:39; Rom 2:19.) 15:15 Nini si Petrus ma mambalosiSi: Patorang Ham bennami limbaga ai! 15:16 Jadi nini Jesus ma: Ai seng iarusi hanima ope homa? 15:17 Ai seng ibotoh hanima, sagala na masuk hubagas pamangan, laho hubagas boltok, dob ai mandarat bani ianan na suhi? 15:18 Tapi na luar hun pamangan humbagas uhur do ai roh, anjaha ai do na pabutakkon jolma. 15:19 Ai humbagas uhur do tubuh pingkiran na jahat, pamunuhon, parbangkison, parriah-riahon, panangkoon, hata ladung ampa panreheion. (4 Mus. 8:21.) 15:20 Sisonai do na pabutakkon jolma, tapi mangan seng marburih, seng butak jolma halani ai. 15:21 Dob ai misir ma Jesus hunjai, laho hu nagori Tirus pakon Sidon. 15:22 Jadi roh ma sada boru Kanaan hun nagori ai mardilo-dilo: Idop ma uhurMu bangku, Tuhan, Anak ni si Daud! Parah do iahap borungku, iarsik-arsik setan. 15:23 Tapi seng ibalosi, sangkababah hata pe lang. Jadi roh ma susianNi ai hu-Bani, nini ma: Palao Ham ma ia, ai sai iirikkon do hita anjaha dilo-dilo. 15:24 Tapi nini ma mambalosi: Pitah hubani biri-biri na magou humbani ginompar ni halak Israel do Ahu isuruh. (bd. 10:6.) 15:25 Jadi idohori naboru ai ma Ia, isombah ma Ia lanjar ihatahon: Tuhan, urupi Ham ahu! 15:26 Tapi nini ma mambalosi: Seng patut nabuat ruti humbani dakdanak, laho mamberehon ai bani baliang. 15:27 Balos ni puang-puang ai: Tongon, Tuhan, tapi ipangan baliang do rimah-rimah na matektek humbani meja ni tuanni. 15:28 Nini Jesus ma mambalosisi: Inang, banggal do haporsayaonmu, saud ma songon na pinindomu ai! Jadi jorgit ma boruni ai humbani panorang ai nari. (bd. 8:10, 13.) 15:29 Dob misir hunjai, das ma Jesus hu tao Galilea, jadi tangkog ma Ia bani sada dolog, lanjar hundul ijai. 15:30 Jadi roh ma buei tumang halak hu-Bani mamboan halak na repat, na tempang, na mapitung, na longah ampa buei na legan ope, anjaha iparpatibal ma sidea ilobei ni nahei ni Jesus, gabe ipamalum ma sidea haganup. 15:31 Jadi longang ma halak na mabuei ai, halani iidah, marsahap do na longah, malum na martikas, mardalan na repat, anjaha marpangidah na mapitung, gabe ipuji sidea ma Naibata ni Israel. (Mrk. 7:37.) 15:32 Tapi idilo Jesus ma susianNi ai hu lobeini, nini ma: Maidop do uhurhu mangidah na mabuei on, ai adong ma tolu ari sidea rapkon Ahu, anjaha seng dong sipanganon bani sidea, anjaha seng ra Ahu palaohon sidea sonin loheian, ase ulang tompas sidea itongah dalan. (bd. 14:14.) 15:33 Jadi nini susianNi ai ma hu-Bani: Hunja ma buatonta ruti i halimisan on sungkup pabosur halak na sain bueini? 15:34 Nini Jesus ma hubani sidea: Ai adong do piga ruti isimpan hanima? Jadi nini sidea ma: Pitu ruti ampa dengke otik. 15:35 Jadi isuruh ma na mabuei ai hundul bani tanoh, 15:36 ibuat ma ruti na pitu ai ampa dengke ai, anjaha dob ihatahon tarima kasih, ipartopik ma ai, anjaha iberei bani susianNi ai, ase susianNi ai mamberei halak na mabuei ai. 15:37 Jadi mangan ma sidea haganup ronsi bosur; lanjar ipatumpu sidea ma teba-tebani; gok pitu bantei. 15:38 Ia buei ni na mangan ai, adong do ompat ribu halak dalahi, sobali naboru pakon dakdanak. 15:39 Jadi dob isuruh mulak halak na mabuei ai, naik ma Ia hu parau, anjaha laho ma hu nagori Magdala.

Mateus 16

16:1 Dob ai roh ma Parisei pakon Sadukei manlajouSi; ipindo sidea do tanda hun langit sipatidakonNi bani sidea. (bd. 12:38.) 16:2 Jadi nini ma dompak sidea: Anggo bod ma ari, nini nasiam do: Logou ma ari, ai gerger do langit. (Luk. 12:54-56.) 16:3 Anjaha sogod-sogod: Laho roh do haba-haba sadari on, ai gerger do langit anjaha bonog. Ibotoh nasiam do manimbangi rupa ni langit, tapi tanda-tanda, na masa bani panorang on, seng ibotoh nasiam. (bd. 11:14.) 16:4 Bangsa parjahat anjaha parbangkis mangindo tanda; tapi seng sibereon tanda bani sidea, sobali ni tanda ni si Jonas. Jadi misir ma Ia, itadingkon ma sidea. (bd. 12:39, 40.) 16:5 Jadi das ma susianNi hu dipar, lupa do hape sidea mamboan ruti. 16:6 Ihatahon Jesus ma hubani sidea: Pangkei anjaha jaga ma hanima dompak ragi ni Parisei pakon Sadukei. (Luk. 12:1.) 16:7 Jadi isahapkon sidea ma ai samah sidea, nini ma: Halani na so mamboan ruti ai do hita ai! 16:8 Tapi ibotoh Jesus do ai, gabe nini ma: E hanima siotik haporsayaon! Mase ma isahap-sahapkon hanima na so mamboan ruti ai hanima? (bd. 6:30.) 16:9 Seng ope iarusi uhurnima? Seng idingat hanima be na lima ruti bani na lima ribu halak ondi, anjaha piga bantei buei ni na teba ipatumpu hanima? (bd. 14:17-21.) 16:10 Barang na pitu ruti bani na ompat ribu halak ondi, anjaha piga bantei buei ni na teba ipatumpu hanima? (bd. 15:34-38.) 16:11 Sonaha, ai lang iarusi hanima, na so pasal ruti hatangkai bennima? Jaga ma hanima pasal ragi ni halak Parisei ampa Sadukei! (ay. 6.) 16:12 Jadi dapot uhur ni sidea ma, paboa sedo hape ragi ni Parisei pakon Sadukei na hinatahonni ai sijagaon, tapi podah ni sidea do. 16:13 Jadi dob das Jesus hu nagori Kesarea Pilippi, isungkun ma susianNi: Ai ise do Anak ni jolma in, nini halak? 16:14 Jadi nini sidea ma: Deba mangkatahon si Johannes pandidi, na deba Elias, na legan use si Jeremias barang sahalak humbani nabi-nabi ai. (bd. 14:2; 17:10.) 16:15 Nini ma hubani sidea: Ia hanima. Ise do Ahu, nini hanima? 16:16 Jadi nini si Simon Petrus ma mambalosi! Ham do Kristus, Anak ni Naibata na manggoluh in! (Joh. 6:69.) 16:17 Dob ai nini Jesus ma mambalosi: Martuah do ho, Simon, anak ni si Jona, ai sedo daging pakon daroh patalarhon in bam, tapi Bapangku na i nagori atas ai do. (Gal. 1:16.) 16:18 Ahu pe huhatahon ma bam: Si Petrus (batu gingging) do ho, anjaha iatas ni batu gingging ai do pajongjongonku kuriangku, anjaha horbangan ni nagori toruh pe seng boi taluhononni ai. (Joh. 1:42; Ep. 2:20.) 16:19 Hubere pe bam anak kunsi ni harajaon nagori atas in, anjaha aha na sinangkutmu i dunia on, tarsangkut ma age ai i nagori atas, anjaha aha na tinanggalanmu i tanoh on, tanggal ma ai i nagori atas. (bd. 18:18.) 16:20 Dob ai ipandang do susianNi ai, ase ulang ipatugah-tugah sidea bani halak, paboa Ia do Kristus. (bd. 17:9.) 16:21 Hunjia nari ma ipungkah Jesus patugahkon hubani susianNi, na maningon laho do Ia hu Jerusalem, anjaha na maningon buei do Ia manaron humbani pangintuai-pangintuai, sintua ni malim ampa sibotoh surat, pala maningon bunuhon do Ia, tapi papuhoon do bani ari patoluhon. (bd. 12:40; Joh. 2:19.) 16:22 Jadi iarahkon si Petrus ma Ia, ihata ma Ia, nini ma: Idop ma uhur ni Naibata Bamu, Tuhan! Ulang ma masa ai Bamu! 16:23 Tapi marhusor ma Jesus, nini ma dompak si Petrus: Laho ma ho ne, bolis! Ai partolsuan do ho Bangku, ai seng na porlu bani Naibata iuhurhon ho, tapi na porlu bani jolma do. 16:24 Jadi nini Jesus ma dompak susianNi: Barang ise na sihol mangirikkon Ahu, iparnalang ma dirini, iporsan ma silangni, anjaha iirikkon ma Ahu! (bd. 10:38-39.) 16:25 Ai barang ise na sihol manramotkon hosahni, na mangagouhon do ai, tapi barang ise na agouan hosah halani Ahu, ai do na jumpahan. 16:26 Ai aha ma gunani bani jolma, age ganup dunia on bani, anggo magou do tonduyni? Aha ma tarbere jolma bahen tobus ni tonduyni? 16:27 Ai na roh do magira Anak jolma in ibagas hasangapon ni Bapani rap pakon malekatni, jadi balashononkonni ma bani haganup domu hubani horjani. (Rom 2:6.) 16:28 Na sintong do na huhatahon on bennima: Adong do deba humbani na jongjong ijon, na so mandai hamateian, anggo seng ope iidah sidea roh Anak ni jolma in ibagas harajaonni. (bd. 10:23.)

Mateus 17

17:1 Dob salpu onom ari, iarahkon Jesus ma si Petrus ampa si Jakobus ampa si Johannes saninani ai, iboan ma sidea pulig hu sada dolog na gijang. 17:2 Jadi mubah ma rupaNi iidah sidea, bohiNi marsinalsal songon mata ni ari, anjaha hiouNi lopak songon na lihar. (2 Ptr. 1:16-18.) 17:3 Anjaha tonggor ma, taridah ma bani sidea si Musa ampa si Elias, marsahapi pakonSi. 17:4 Jadi iparsahapkon si Petrus ma Jesus, nini ma: Sonang ni in ijon! Anggo marosuh Ham, hupauli ma ijon tolu lampo-lampo, sada Bamu, sada bani si Musa, anjaha na sada nari bani si Elias. 17:5 Mangkatahon ai ope ia, tonggor ma, roh ma sada hombun na lihar manlinggomi sidea, anjaha tarbogei ma sada sora hun hombun ai, na mangkatahon: On do Anak haholonganKu, marosuh do uhurhu Bani, tangihon hanima ma Ia! (bd. 3:17.) 17:6 Manangar ai susian ai, manrogop ma sidea anjaha mabiar tumang. 17:7 Jadi roh ma Jesus bani sidea, ijamah ma sidea, nini ma: Jongjong ma, anjaha ulang ma mabiar! 17:8 Tapi sanggah mangkawah sidea, seng dong atap ise iidah sidea ijai sobali Jesus tumang. 17:9 Sanggah tuad ai sidea hun dolog ai, iparentahkon Jesus ma hubani sidea, nini ma: Ulang ma patugah-tugah hanima na niidahnima ai atap bani ise pe, sadokah seng puho ope Anak ni jolma in humbani na matei. (bd. 16:20.) 17:10 Jadi isungkun susianNi ai ma Ia: Mase ma ihatahon sibotoh surat paboa maningon roh do lobei si Elias? (bd. 11:14; Mal. 3:23.) 17:11 Nini ma mambalosi sidea: Tongon, maningon roh do si Elias, laho patorsahon haganup. 17:12 Tapi huhatahon ma bennima: Domma roh si Elias, tapi seng itanda sidea ia; uhur-uhur ni sidea do ibahen sidea bani. (bd. 14:9, 10.) 17:13 Jadi iarusi susian ai ma, si Johannes pandidi do hape, na hinatahonNi ai bani sidea. (Luk. 1:17.) 17:14 Dob das sidea hubani halak na mabuei ai, roh ma sada halak marsombah hu Bani, anjaha nini ma: 17:15 Tuhan, idop ma uhurMu mangidah anakku. Ubagon do ia, parah tumang iahap. Gati do ia jomba hubagas apuy, anjaha gati homa hubagas bah. 17:16 Domma huboan namin ia bani susianmu, tapi seng tarpamalum sidea ia. 17:17 Jadi nini Jesus ma mambalosi: E bangsa, na so porsaya anjaha na jahat! Sadiha dokah nari Ahu rap pakon hanima? Sadiha dokah nari anjuonKu hanima? Boan hanima ma ia hujon. 17:18 Jadi isorgang Jesus ma ia, gabe luar ma sibolis ai humbani, anjaha jorgit ma ia humbani panorang ai nari. 17:19 Dob ai pulig ma iparayak susian ai Jesus, nini ma: Mase ma lang mangasup hanami mangusirsi? 17:20 Jadi nini Jesus ma dompak sidea: Halani otik ni haporsayaonnima do! Ai tongon do na huhatahon on bennima: Anggo adong haporsayaonnima na sabatu ni losabi, hatahononnima do bani dolog an: Mosor ma hunjon hujai, gabe saud do mosor ai, anjaha seng dong na so boi bahenonnima. (bd. 21:21; Luk. 17:6.) 17:21 Tapi anggo na samasam on, seng ra mandarat, anggo seng marhasoman tonggo ampa parpuasaon. 17:22 Sanggah martumpu sidea i Galilea, nini Jesus ma hubani sidea: Ondoskononhon ma Anak ni jolma in hubagas tangan ni halak, (bd. 16:21.) 17:23 gabe bunuhon ni sidea ma Ia, dob ai pagoluhon do Ia bani ari patoluhon. Jadi pusok tumang ma uhur ni sidea. 17:24 Jadi dob das sidea hu huta Kapernaum, roh ma situnggu guguan rumah panumbahan hubani si Petrus, nini ma: Ai seng manggalar guguan rumah panumbahan gurunima in? (2 Mus. 30:13.) 17:25 Nini ma: manggalar do. Sanggah na masuk ia hu rumah, ilobei Jesus ma manungkun hubani, nini ma: Sonaha do nini uhurmu, Simon? Raja-raja na itanoh on, humbani ise do sidea manjalo guguan atap balasting? Humbani anakni do atap humbani halak na legan do? 17:26 Dob ihatahon si Petrus: "Humbani halak na legan do", gabe ihatahon Jesus ma hubani: "Ase, seng hona anggo anak!" 17:27 Tapi, ase ulang marah sidea halani hita, laho ma ho mangkail hu tao, dob ai sintak ma dengke na parlobei mangankon, anjaha buha ma babahni, gabe dapot ho ma ijai sada rupiah. Ai ma buat, anjaha bere ma ai bani sidea bahen guguanta.

Mateus 18

18:1 Bani panorang ai, roh ma susian ai manjumpahkon Jesus, nini sidea ma: Ai ise do sibanggalan ibagas harajaon nagori atas? 18:2 Jadi idilo Jesus ma sada dakdanak, ipajongjong ma ia itongah-tongah ni sidea, lanjar nini ma: 18:3 Sintong do na huhatahon on bennima: Anggo lang mulak uhurnima songon sada dakdanak, sabonar na so boi do hanima masuk hubagas harajaon nagori atas ai. (bd. 19:14.) 18:4 Barang ise na patoruh uhurni songon dakdanak on, ai do sibanggalan ibagas harajaon nagori atas in. (1 Ptr. 5:6.) 18:5 Anjaha na manjalo dakdanak na sonon, halani goranKu, Ahu do na jinaloni ijai. (bd. 10:40.) 18:6 Tapi barang ise na mambahen sangsi sada humbani na etek-etek on, na porsaya hu-Bangku, dearan ma igantungkon losung batu bani borgokni, laho mannongnongkonsi hubagas laut sibagasan. (Luk. 17:1, 2.) 18:7 Bursik ma dunia on pangkorhon ni parsangsian! Seng tarbahen lang roh namin parsangsian, tapi bursik ma jolma na parohkonsi! 18:8 Halani ai, anggo tanganmin atap naheimin do na mambahen mardousa ho, rotap anjaha ambukkon ma in, ai dearan do martangan salopah atap tempang ho masuk hu hagoluhan, humbani na mardua tangan atap mardua nahei iambukkon hubagas apuy sisadokah ni dokahni. (bd. 5:29, 30.) 18:9 Anjaha anggo matamu do na mambahen mardousa ho, pulsitkon ma in anjaha ambukkon, ai dearan do marmata sada ho masuk hu hagoluhan, humbani na marmata dua iambukon hubagas naraka. 18:10 Jaga ma hanima, ase ulang mapas uhurnima mangidah sada humbani na etek-etek on. Ai huhatahon ma bennima: Iidah malekat ni sidea do tongtong bohi ni Bapangku na i nagori atas ai. (Heb. 1:14.) 18:11 (Ai na roh do Anak ni jolma in paluahkon na magou). (bd. 9:13; Luk. 19:10.) 18:12 Sonaha do nini uhurnima? Anggo adong biri-biri ni sada halak saratus, anjaha kahou sada hunjai, ai lang tadingkononni ma na siah puluh siah ai i dolog, laho mangindahi na magou ai? 18:13 Anjaha anggo jumpahsi ma ai, tongon huhatahon ma bennima, malasan do uhurni mangidah na sada ai marimbang na siah puluh siah, na so ongga kahou. 18:14 Sonai ma homa seng marosuh uhur ni Bapanima na i nagori atas ai, anggo magou sada humbani na etek-etek on. 18:15 Anggo mardousa saninamu, parayak anjaha ajari ma ia, hanima padua-dua. Anggo itangihon ho, gabe hasomanmu ma ia use. (3 Mus. 19:17; Luk. 17:3; Gal. 6:1.) 18:16 Tapi anggo seng itangihon ho, arahkon ma hasomanmu sada barang dua halak, ase sinaksihon ni dua atap tolu halak ma parsahapan ai. (5 Mus. 19:15.) 18:17 Tapi anggo seng itangihon age sidea, patugah ma ai bani kuria; anjaha anggo seng itangihon homa kuria ai, hira ma ia parbegu barang sijalo sohei. (1 Kor. 5:13.) 18:18 Na sintong do hatangkon bennima: Sagala na sinangkutnima iatas tanoh on, tarsangkut do homa ai i nagori atas, anjaha sagala na pinaluahnima i tanoh on, maluah do ai homa i nagori atas.(bd. 16:19; Joh. 20:23.) 18:19 Ambahni ai huhatahon ma bennima: Anggo adong dua humbannima i tanoh on, na mardos ni uhur manonggohon atap aha pe, sai na bereon ni Bapangku na i nagori atas ai do ai bani sidea. (Mrk. 11:24.) 18:20 Ai atap ija pe martumpu dua atap tolu halak marhitei goranKu, itongah-tongah ni sidea do Ahu. (bd. 28:20.) 18:21 Dob ai roh ma si Petrus, nini ma hubani: Tuhan, sibar piga hali do sasaponku salah ni hasomanku, na mardousa dompak ahu? Pala do pitu hali? 18:22 Nini Jesus ma dompaksi: Seng huhatahon bam pitu hali, tapi pitu puluh hali pitu do. (Luk. 17:4.) 18:23 Halani ai tarpausih do harajaon nagori atas ai hubani sada raja na mambahen parhiraan ampa juak-juakni. 18:24 Jadi dob ipungkah mambahen parhiraan, tarboan ma hulobeini sada halak, na marutang sapuluh ribu talenta. 18:25 Tapi halani seng dong panggalarni, ihatahon tuanni ai ma jualon ia, parinangonni ampa dakdanakni ronsi ganup na dong bani, bahen galar ni utangni. 18:26 Manrogop ma juak-juak ai i lobeini, nini ma: Palumbang ham ma uhurmu, hugalar pe ganupan ai bamu! 18:27 Jadi maidop ma uhur ni tuanni ai mangidah juak-juak ai, ipaluah ma ia anjaha ibalihon ma haganup utangni ai. 18:28 Tapi sanggah na luar juak-juak ai, jumpahsi ma hasomanni juak-juak sahalak, na marutang hubani saratus dinar, gabe itangkap ma ia anjaha isongkik, nini ma: Galar utangmu ondi! 18:29 Jadi manrogop ma hasomanni juak-juak ai, nini ma: Palumbang ham ma uhurmu, hugalar pe ai bamu! 18:30 Tapi seng ra ia, laho ma ia anjaha ipatutupkon ma hasomanni ai, paima igalar utangni ai. 18:31 Jadi dob iidah hasomanni juak-juak na masa ai, pusok ma uhur ni sidea, laho ma sidea, anjaha ipatugah ma bani tuan ni sidea ai haganup pasal na masa ai. 18:32 Gabe idilo tuanni ai ma ia, nini ma dompaksi: Ho juak-juak na jahat! Hubalihon do haganup utangmu, halani ielek-elek ho ahu. 18:33 Ai lang patut maridop ni uhur age ho hubani hasomanmu juak-juak songon ahu, na dob maridop ni uhur bam? 18:34 Jadi marringis ma tuanni ai hubani, gabe iondoskon ma ia hubani sipangarsik-arsik, paima igalar haganup utangni ai. (bd. 5:26.) 18:35 Sonai do bahenon ni Bapangku na i nagori atas ai bennima, anggo lang isasap hanima bei humbagas uhurnima salah ni hasomannima.

Mateus 19

19:1 Ase dob ipaujung Jesus parsahapan ai, itadingkon ma Galilea, gabe das ma Ia hu tanoh Judea, na i dipar ni bah Jordan. 19:2 Buei tumang do halak na mangirikkonSi, anjaha ipamalum ma sidea ijai. 19:3 Jadi roh ma halak Parisei hubani, nini sidea ma manlajouSi: Ai bulih do sirangkonon ni sada dalahi parinangonni, asal adong atap aha halani? (5 Mus. 24:1.) 19:4 Jadi nini ma mambalosi sidea: Ai seng ibasa hanima, paboa na humbani mulani do itompa Panompa in sidea dalahi pakon naboru, anjaha ihatahon: (1 Mus. 1:27.) 19:5 Halani ai tadingkonon ni dalahi do bapani pakon inangni, laho padomuhon dirini hubani jolmani, anjaha gabe sadaging do sidea na dua ai? (1 Mus. 2:24.) 19:6 Ase seng be dua sidea ai, tapi sada daging do. Ai pe, na dob pinadomu ni Naibata, seng bulih sirangon ni jolma. (1 Kor. 7:10, 11.) 19:7 Jadi nini sidea ma hu-Bani: Anggo sonai, mase ma ititahkon si Musa bereon surat sirang laho mansirangkon? (bd. 5:31, 32.) 19:8 Nini ma dompak sidea: Halani hengkeng ni uhurnasiam do, mambahen na ilopas si Musa nasiam paulakkon parinangonnasiam; tapi seng sonai anggo humbani mungkahni. 19:9 Huhatahon ma bani nasiam: Barang ise na manirangkon parinangonni, anggo seng halani parbangkison, gabe ibuat na legan, parbangkis do ia ai. (Luk. 16:18.) 19:10 Jadi nini susian ai ma dompakSi: Anggo sonai do hape ruhut ni parrumah-tanggaon, rahanan ma ulang mompo. 19:11 Tapi nini ma dompak sidea: Seng haganup halak tarbahen manjalo hata on, pitah haondosanni do hansa. (1 Kor. 7:7, 17.) 19:12 Ai adong do jolma na so boi mompo, sonai humbani partubuhni; adong deba, na kinasihkon ni halak na legan, anjaha adong deba nari, na pakasihkon dirini halani harajaon nagori atas ai. Barang ise na boi manjalo hata ai, ijalo ma! 19:13 Dob ai iboan halak ma dakdanak hu-Bani, ase itampeihon tanganni bani sidea, anjaha itonggohon sidea. Tapi ipinsang susian ai ma sidea. 19:14 Tapi nini Jesus ma: Paturut hanima ma roh dakdanak in hu-Bangku, ulang langlangi, ai bani sisonin do harajaon nagori atas ai. (bd. 18:2, 3.) 19:15 Jadi dob itampeihon tanganNi bani sidea, misir ma Ia hunjai. 19:16 Dob ai roh ma sada halak manjumpahkonSi, nini ma: Guru, aha do na madear sihorjahononku, ase dapot ahu hagoluhan sisadokah ni dokahni? 19:17 Tapi nini ma hubani: Mase ma ahu sungkunonmu pasal na madear? Sada do hansa paruhur na madear. Anggo sihol masuk ho hu hagoluhan, dalankon ma titah in! (Luk. 10:26-28.) 19:18 Nini ma dompakSi: Na ija? Gabe nini Jesus ma: Ulang ho mamunuh! Ulang ho marbangkis! Ulang ho manangko! Ulang ho ra manaksihon hata na so tongon! (2 Mus. 20:12-16.) 19:19 Pasangap amangmu pakon inangmu! Anjaha: Haholongi ma hasomanmu songon dirimu! (3 Mus. 19:18.) 19:20 Nini anak garama ai ma hu-Bani: Domma hudalankon haganupan ai. Aha ope hahuranganku? 19:21 Jadi nini Jesus ma hubani: Anggo sihol uhurmu gok dear ho, laho ma, jual ma haganup na dong bam, pambere ma bani na masombuh, ase mararta ho i nagori atas. Dob ai roh ma ho mangirikkon Ahu! (bd. 6:20; Luk. 12:33.) 19:22 Mambogei hata ai anak garama ai, laho ma ia ibagas pusok ni uhur, ai buei do artani. (Ps. 62:11.) 19:23 Jadi nini Jesus ma dompak susianNi ai: Payah do halak na bayak masuk hubagas harajaon nagori atas in. 19:24 Huhatahon ma use hubennima: Urahan do masukan ni unta pinggol ni jarum, ase halak na bayak masuk hu harajaon nagori atas in. 19:25 Mambogei ai susian ai, tarsonggot tumang ma sidea, nini ma: Ise mando maluah, anggo sonai? 19:26 Jadi ikawahkon Jesus ma sidea, nini ma dompak sidea: Marhitei jolma, seng boi ai, tapi marhitei Naibata haganupan do boi. 19:27 Dob ai nini si Petrus ma mambalosisi: Ia hanami, haganup do itadingkon hanami laho mangirikkon Ham, Aha ma ulih bannami? 19:28 Jadi nini Jesus ma hubani sidea: Na sintong do hatangkon bennima: Magira, bani habayuon ai, bani na hundul Anak ni jolma in bani paratas hasangaponni ai, dihut ma hanima hundul ijai bani sapuluh dua paratas, laho manguhumi halak Israel, na sapuluh dua marga in. (Luk. 22:30.) 19:29 Anjaha barang ise na manadingkon rumahni, saninani, botouni, bapani, inangni, niombahni barang jumani halani goranku, manjalo ma ai marlompit-lompit, ambahni ai teanonni ma hagoluhan sisadokah ni dokahni. (Heb. 10:34.) 19:30 Tapi buei do na parlobei hinan gabe parpudi, anjaha na parpudi hinan gabe parlobei. (bd. 20:16; Luk. 13:30.)

Mateus 20

20:1 Ai usih do harajaon nagori atas ai hubani sada tuan na bayak, na laho girah sogod mangindahi siparhorja bani pohon anggurni. 20:2 Jadi dob mardos ni uhur ia pakon sidea pasal upah ni sidea, ai ma sadinar sadari, isuruh ma sidea hu pohon anggurni. 20:3 Anjaha sanggah na luar ia pukul siah, iidah ma halak na legan jongjong sohsoh i tiga ai, 20:4 gabe ihatahon ma bani sidea: Dihut ma homa nasiam marhorja hu pohon anggurhu! Hubere pe na patut bani nasiam! Jadi laho ma sidea. 20:5 Jadi laho ma use ia pukul sapuluh dua ampa pukul tolu, lanjar sonai do ibahen. 20:6 Anjaha sanggah na laho ia pukul lima, jadi jumpahsi ma halak na legan sonin-sonin jongjong, gabe ihatahon ma bani sidea: Mase ma sohsoh tumang nasiam layur sadari on? 20:7 Nini sidea ma hubani: Seng dong na mangarahkon hanami. Jadi nini ma hubani sidea: Dihut ma nasiam marhorja hu pohon anggurhai! 20:8 Ase dob bod ari, nini simada pohon anggur ai ma dompak juru tulisni: Dilo ma haganup siparhorja ai, galar ma upah ni sidea, mamungkah humbani na masuk parpudi das hubani na parlobei ai! 20:9 Jadi roh ma na masuk bani pukul lima, ijalo bei ma sadinar. 20:10 Dob ai roh ma na masuk parlobei ai, iagan sidea ma lobih jaloon ni sidea, hape age sidea sadinar bei do ijalo. 20:11 Tapi manjalo ai, marungut-ungut ma sidea dompak tuan na bayak ai, 20:12 nini sidea ma: Ia halak na parpudi masuk on, na marhorja pitah sajam hansa, ipados ham do sidea pakon hanami, na manaronkon torik ni horja pakon milas ni ari layur sadari on. 20:13 Tapi nini ma marbalos dompak sahalak humbani sidea: Ambia, seng dong hubahen bam na so pintor! Ai lang na dob manriah do hita pasal na sadinar in! 20:14 Jalo ma bagianmu anjaha laho ma ho! Tapi sihol do uhurhu, mambere bani na parpudi on songon na bam ai. 20:15 Ai lang patut, domu hubani rosuhku hubahen pasal na dong bangku? Serleng matamu halani layak ahu? (Rom 9:16, 21.) 20:16 Sonai ma gabe parlobei na parpudi hinan, anjaha na parlobei hinan gabe parpudi. (bd. 19:30.) 20:17 Sanggah na laho Jesus tangkog hu Jerusalem, iarahkon ma pulig susianNi na sapuluh dua ai, anjaha nini ma bani sidea itongah dalan ai: 20:18 Na tangkog ma hita hu Jerusalem, ondoskononkon ma Anak ni jolma in bani sintua ni malim ampa sibotoh surat, anjaha uhumon ni sidea ma ia marutang hosah. (bd. 16:21; 17:22, 23.) 20:19 Dob ai ondoskonon ni sidea ma Ia hubani sipajuh begu-begu, ase ipahiri, ilonsingi anjaha iparsilangkon, anjaha bani ari patoluhon papuhoon do Ia. 20:20 Jadi roh ma inang ni anak ni si Sebedeus rap pakon anakni hu-Bani, isombah ma Ia laho padaskon pangindoanni. (bd. 10:2.) 20:21 Jadi nini ma hubani: Aha ipindo uhurmu? Nini ma mambalosi: Lopas Ham ma hundul anakku na dua on ibagas harajaonmu, sada bani siamunmu, na sada nari bani sambiloumu! (bd. 19:28.) 20:22 Tapi nini Jesus ma mambalosi: Seng ibotoh hanima na pinindonima. Mintor tarinum hanima ma siinumon, na sihol inumonku? Nini sidea ma: Tarbahen hanami do! (bd. 26:39; Luk. 12:50; Joh. 18:11.) 20:23 Dob ai nini ma dompak sidea: Tongon, inumonnima do siinumonkai, tapi seng saguru Bangku na mambahen hundul i siamunhu barang i sambilouhu; Bapa do pasirsirhon ai bani haondosanni. 20:24 Mambogei ai na sapuluh ai, sogam ma uhur ni sidea mangidah na dua halak na marsanina ai. 20:25 Tapi ipatumpu Jesus ma sidea, nini ma: Irajai sigomgomi bangsa do rayatni, anjaha ikuasai na sangap-sangapni do sidea. 20:26 Ulang ma sonai anggo bennima, tapi barang ise na sihol sangap itongah-tongahnima, ai ma gabe sipangidangi bennima, (bd. 23:11.) 20:27 anjaha barang ise hanima na sihol parlobei, ai ma gabe jabolon bennima. (Mrk. 9:35.) 20:28 Songon Anak ni jolma in pe, seng roh Ia ase iidangi halak, tapi ase mangidangi do, anjaha iberehon do hosahni bahen tobus ni buei jolma. (Joh. 13:4; Pil. 2:7; 1 Tim. 2:6.) 20:29 Sanggah luar sidea hun Jeriko, buei do halak na mangirikkonSi. 20:30 Anjaha tonggor ma, adong do dua halak na mapitung hundul itopi dalan; dob ibogei Jesus na mamontas ai, mardilo-dilo ma sidea: Ham Tuhan, Anak ni si Daud, idop ma uhurMu bennami! 20:31 Ipinsang na mabuei ai ma sidea ase sip namin, tapi lambin gogoh do sidea dilo-dilo: Ham Tuhan, anak ni si Daud, idop ma uhurMu bennami! 20:32 Jadi maronti ma Jesus anjaha isuruh ma sidea roh hu-Bani, nini ma: Aha ipindo uhurnasiam bahenonKu bani nasiam? 20:33 Nini sidea ma hu-Bani: Tuhan marpangidah ma namin matanami! 20:34 Jadi maidop ma uhur ni Jesus mangidah sidea, lanjar ijamah ma mata ni sidea; jadi mintor marpangidah ma matani sidea, gabe iirikkon ma Jesus.

Mateus 21

21:1 Sanggah roh sidea hundohor hu Jerusalem anjaha das sidea hu Betpage, na i dolog Jetun, isuruh Jesus ma dua halak susianni manlobeisi. 21:2 nini ma hubani sidea: Laho ma hanima hu dusun na i lobeinima ai, anjaha mintor dapot hanima do ijai tambat halode sada rap pakon anakni. Tanggali ma, anjaha boan ma hu-Bangku! 21:3 Jadi anggo adong na mangkatahon atap aha bennima, balosi hanima ma: "Porlu do in bani Tuhan in!" jadi mintor lopasonni. (bd. 26:18.) 21:4 Tapi masa pe sonin, ase jumpah na hinatahon ni nabi, 21:5 na mangkatahon: Hatahon ma bani boru Sion: Tonggor ma, Rajamu roh bam, lamlam maruhur, anjaha mangajak halode boru-boru ampa anak ni halode boban. 21:6 Jadi laho ma susian ai, anjaha ibahen sidea ma songon na hinatahon ni Jesus bani sidea. 21:7 Iboan sidea ma halode ai rap pakon anakni ai, itampeihon ma hiou ni sidea hu atasni, anjaha Jesus pe hundul ma i atasni. 21:8 Deba humbani halak na mabuei ai mangamparhon hiouni bani dalan ai, na deba nari managili ranting ni hayu lanjar ierap bani dalan ai. 21:9 Ia halak na mabuei ai, na mardalan i lobeiNi ampa na mangirikkonSi hun pudi, nini bei ma mangolobkon: Hosianna bani Anak ni si Daud! Pinasu-pasu ma na roh ibagas goran ni Tuhan. Hosianna ma i nagori atas. (Ps. 118:25, 26.) 21:10 Sanggah na masuk ai Ia hu Jerusalem, guntar ma ganup huta ai, nini bei ma: Ai ise do in? 21:11 Nini halak na mabuei ai ma: On ma nabi ai, Jesus, na hun huta Nasaret, na i nagori Galilea! 21:12 Jadi masuk ma Jesus hu rumah panumbahan, anjaha iusir ma hunjai sagala siparjualan ampa sipamboli, ipantunggalingkon ma meja ni situkari duit ampa bangku-bangku hundulan ni sijual asas, (Joh. 2:14-16.) 21:13 lanjar nini ma dompak sidea: Ihatahon surat in do: Rumah partonggoan do goran ni rumahKu, tapi gabe liang ni panamun do in ibahen hanima. (Jes. 56:7; Jer. 7:11.) 21:14 Dob ai marrohan ma hu-Bani, hu rumah panumbahan ai, na mapitung ampa na repat, gabe ipamalum ma sidea. (bd. 11:5.) 21:15 Dob iidah sintua ni malim ampa sibotoh surat tanda halongangan na binahen ni Jesus ampa dakdanak na marsurak-surak ai i rumah panumbahan, mangakatahon: "Hosianna bani Anak ni raja Daud!" marah ma sidea. 21:16 Nini sidea ma hu-Bani: Ibogei Ham do na hinatahon ni sidea in? Jadi nini Jesus ma hubani sidea: Hubogei do! Ai lang ongga ibasa nasiam: Humbani pamangan ni dakdanak ampa na inuman do ipasisir Ham puji-pujian Bamu? (Ps. 8:3.) 21:17 Dob ai itadingkon ma sidea, luar hun huta ai laho hu Betania, lanjar marborngin ijai. 21:18 Tapi patar ni ai, sogod, sanggah na laho mulak hu Jerusalem, malohei ma iahap. 21:19 Iidah ma sada hayu ara i topi dalan ai, jadi laho ma Ia hujai, tapi seng dong jumpahsi sobali bulung, gabe ihatahon ma bani hayu ai: Hunjon hujanan seng anjai marbuah be ho! Jadi mintor melus ma hayu ara ai. (Luk. 13:6.) 21:20 Mangidah ai susian ai, longang ma sidea, lanjar nini ma: Mase ma mintor melus hayu ara in? 21:21 Jadi nini Jesus ma mambalosi sidea: Na sintong do hatangkon bennima: Anggo porsaya hanima anjaha seng sangsi, seng pitah songon na bani hayu ara in tarbahen hanima, tapi lobih do hunjai; anggo ihatahon hanima bani dolog an: "Mosor ma anjaha madabuh hu laut!" gabe saud ma sonai. (bd. 17:20.) 21:22 Anjaha sagala na pinindonima ibagas tonggonima, sai na jaloonnima do, anggo porsaya hanima. 21:23 Sanggah na masuk ai Ia hu rumah panumbahan, roh ma sintua ni malim ampa pangintuai-pangintuai ni bangsa ai hu-Bani, tudu sanggah mangajari Ia, nini sidea ma: Marhitei kuasa aha do ibahen Ham ganupan in? Anjaha ise do na mambere kuasa in Bamu? (Joh. 2:18.) 21:24 Jadi nini Jesus ma mambalosi sidea: Ahu ma lobei manungkun nasiam, anjaha anggo domma ibalosi nasiam Ahu, Ahu pe patugahonku ma bani nasiam, atap marhitei kuasa aha do hubahen ai. 21:25 Ia pandidion ni si Johannes, na hunja do ai? Hun nagori atas do atap humbani jolma? Jadi martukar pingkiran ma sidea samah sidea, nini ma: 21:26 Anggo ihatahon hita: "Hun nagori atas do," hatahononni ma hubanta: "Mase lang ihaporsayai nasiam Ia?" Anggo ihatahon hita: "Humbani jolma do," sihabiaranta do halak na mabuei in, ai nabi do si Johannes, nini uhur ni jolma haganup. (bd. 14:5.) 21:27 Jadi nini sidea ma mambalosi Jesus: Seng ibotoh hanami! Anjaha Ia pe, nini ma dompak sidea: Ahu pe, seng patugahonku bani nasiam atap marhitei kuasa aha hubahen in. 21:28 Tapi sonaha do nini uhurnasiam? Adong ma dua anak ni sada halak. Laho ma ia hubani sikahanan, nini ma: Laho ma ho, anakku, sadari on mangkorja hu pohon anggurta! 21:29 Balosni: Dear tuan, tapi seng laho ia! 21:30 Dob ai laho ma bapa ai hubani na paduahon ai, anjaha ihatahon ma songon nongkan ai. Nini ma mambalosi: Seng ra ahu! Tapi manosal do ia use, gabe laho ma. (bd. 7:21.) 21:31 Ise do sidea na dua ai na mandalankon ai! Jadi nini sidea ma mambalosi: Sianggian ai! Gabe nini Jesus ma hubani sidea: Na sintong do hatangkon bani nasiam: Lobeian ni sijalo sohei pakon boru jalang do nasiam masuk hubagas harajaon ni Naibata. (Luk. 18:24.) 21:32 Ai na roh do si Johannes hubani nasiam bani dalan hapintoron, tapi seng porsaya nasiam bani, tapi anggo sijalo sohei ampa boru jalang porsaya do. Iidah nasiam do ai namin, tapi lanjar do seng isolsoli nasiam uhurnasiam laho mangkaporsayaisi. (Luk. 7:29.) 21:33 Bogei nasiam ma sada limbaga na legan. Adong ma sada tuan na bayak, na mamungkah sada pohon anggur. Ihondor ma ai, inggot, ihurak ma pangilangan ni anggur ibagas, anjaha ipauli ma sada manara. Ipasewahon ma pohon ai hubani piga-piga parjuma-juma, dob ai laho ma ia hu nagori na legan. (bd. 25:14; Jes. 5:1, 2.) 21:34 Dob jumpah panorang mambuat buahni, isuruh ma juak-juakni hubani parjuma-juma ai laho manjalo buahni. 21:35 Tapi itangkap parjuma-juma ai ma juak-juakni ai, adong na ibogbogi, adong na ibunuh anjaha adong na ipargijig bani batu. 21:36 Iulaki tuan ai ma use marsuruh juak-juakni, bueinan humbani na parlobei ai, tapi sonai do homa ibahen bani sidea. 21:37 Dob ni isuruh ma anakni bani sidea, ai nini uhurni: tontu malang do uhur ni sidea bani anakkin! 21:38 Dob iidah parjuma-juma ai anakni ai, nini sidea ma samah sidea: On do sitean pohon in! Eta, bunuh hita ma ia, ase banta siteanonni ai. (bd. 27:18.) 21:39 Jadi itangkap sidea ma ia, isarad hudarat ni pohon anggur ai, lanjar ibunuh. 21:40 Anggo roh simada pohon anggur ai, aha ma sibahenonni bani parjuma-juma ai? 21:41 Nini sidea ma hu-Bani: Tontu bunuhonni ma siparjahat ai, anjaha pohon anggurni ai ondoskononni hubani parjuma-juma na legan, na ra mamberehon buahni bani panorangni. 21:42 Jadi nini Jesus ma hubani sidea: Ai seng ongga ibasa nasiam ibagas Surat in: Batu na niambungkon ni tukang rumah, ai do gabe palas parsuhi; pinamasa ni Tuhan do in, anjaha halongangan do in bani matanta? (Ps. 118:22; Lah. 4:11; Rom 9:33; 1 Ptr. 2:6-8.) 21:43 Halani ai huhatahon ma bani nasiam: Sibuaton ma humbani nasiam harajaon ni Naibata, anjaha berehonon bani bangsa na legan, na ra mambere buahni. 21:44 Anjaha barang ise, na madabuh bani batu on, mapuntar do, anjaha barang ise nidabuhanni, marosak do. (Dan. 2:35, 44, 45.) 21:45 Mambogei limbaga ai mangahap ma malim pakon Parisei, ai sidea do na hinatahonni ijai. 21:46 Jadi ipindahi sidea ma dalan laho manangkapSi, tapi mabiar do sidea bani halak na mabuei ai, ai nabi do Ia nini uhur ni sidea. (Luk. 7:16.)

Mateus 22

22:1 Dob ai iulaki Jesus ma marsahap bani sidea marhasoman limbaga, nini ma: 22:2 Tarpausih do harajaon nagori atas ai bani sada raja, na mambahen pesta parunjokon bani anakni. (Joh. 3:29.) 22:3 Jadi isuruh ma juak-juakni mandilo na dob niontang ai hinan hubani pesta ai, tapi seng ra roh sidea. 22:4 Isuruh ma use juak-juak na legan, nini ma: Patugah hanima ma bani na dob niontang in: Tonggor ma, domma sirsir pestangku, domma isayat lombu pakon pinahan na dob pinamombur, domma sirsir haganup! Ai pe roh ma nasiam bani pesta parunjukon in. (bd. 21:36.) 22:5 Tapi hampung do uhur ni sidea pasal ontangan ai, gabe laho bei ma, deba hu jumani, na deba nari hu partiga-tigaonni. 22:6 Na legan manangkap juak-juakni ai, iarsik ma anjaha ibunuh. 22:7 Jadi manggila ma raja ai, gabe isuruh ma tenterani mamboiskon haganup pamunuh ai, anjaha manutung huta ni sidea. (bd. 24:2.) 22:8 Dob ai nini ma hubani juak-juakni: Domma namin sirsir pesta parunjukon in, tapi seng talup na niontang ai. 22:9 Halani ai, laho ma hanima bani ganup sirpang ni dalan, anjaha arahkon hanima ma hu pesta parunjukon on sagala halak na jumpah hanima. (bd. 13:47; 21:43.) 22:10 Jadi laho ma juak-juak ai hubani sagala dalan, anjaha ipatumpu sidea ma haganup jolma na jumpah sidea, parjahat age na bujur, gabe gok ma parpestaan ai bani tamuei-tamuei. 22:11 Sanggah na masuk raja ai manorih tamuei ai, iidah ma sada halak na so marpakeian pesta, 22:12 gabe nini ma hubani: Na sonaha do parmasukmu hujon ambia, ai seng marpakeian pesta ho? jadi sip ma ia. 22:13 Dob ai nini raja ai ma dompak juak-juakni: Sangkut hanima ma naheini pakon tanganni, anjaha usir hanima ma ia hu darat bani ianan na golap; ijai ma masa partangison ampa na patungosngoson. (bd. 8:12.) 22:14 Ai buei do na nidilo, tapi otik do na tarpilih. 22:15 Dob ai laho ma Parisei manriah samah sidea, atap sonaha do bahenon ni sidea mambahen tardapot Ia marhitei hatani. 22:16 Jadi isuruh sidea ma susian ni sidea rap pakon juak-juak ni si Herodes marayak Jesus, laho manungkun hu-Bani: Ham Guru, ibotoh hanami, na pintor do Ham, anjaha sintong-sintong do dalan ni Naibata iajarhon Ham; seng mabiar Ham age bani ise, ai seng siidah bohi Ham! (Mrk. 3:6.) 22:17 Ai pe, patugah Ham ma bennami atap sonaha do pingkiranMu: Ai patut do bereon balasting bani Kesar atap lang? 22:18 Tapi ibotoh Jesus do jahat ni uhur ni sidea ai, gabe nini ma: E nasiam sipakulah-kulah! Mase ma ilajou nasiam Ahu? 22:19 Patuduhkon nasiam ma hu-Bangku duit balasting in! Jadi ipatuduhkon sidea ma Bani sada dinar. 22:20 Jadi nini ma dompak sidea: Gambaran ampa surat ni ise do on? 22:21 Nini sidea ma: Gombaran ni Kesar! Jadi nini ma dompak sidea: Ai pe, bere ma bani Kesar, na humbani Kesar, anjaha bere ma bani Naibata, na humbani Naibata! (Rom 13:7.) 22:22 Mambogei ai longang ma uhur ni sidea, jadi laho ma sidea, itadingkon ma Ia. 22:23 Bani ari ai, roh ma hu-Bani Sadukei, ai ma, na so marhatongonkon adong parpuhoon humbani na matei, jadi isungkun sidea ma Ia, nini: (Lah. 23:6, 8.) 22:24 Guru, nini si Musa: Anggo adong matei sada halak, lang martinading, parayakon ni anggini ma parinangonni ai, laho pajongjong ginompar bani saninani ai. (5 Mus. 25:5, 6.) 22:25 Jadi adong ma bannami pitu halak na marsanina; mompo ma sikahanan ai, dob ai matei lang martinading, gabe bani tinodohkonni ai ma parinangon ni ai. 22:26 Sonai do na paduahon ampa na patoluhon ronsi na papituhon. 22:27 Parpudi humbani sidea haganup matei ma homa naboru ai. 22:28 Jadi bani ari parpuhoon ai, ise do humbani sidea na pitu ai simada naboru ai, ai ganup do sidea marjolmahonsi? 22:29 Tapi nini Jesus ma mambalosi sidea: Na kahou do nasiam, ai seng ibotoh nasiam Surat in age hagogohon ni Naibata! 22:30 Ai bani ari parpuhoon ai seng dong siparunjuk atap na laho, tapi songon malekat do sidea i nagori atas. 22:31 Tapi pasal parpuhoon ni na dob matei, ai seng ongga ibasa nasiam, na hinatahon ni Naibata bani nasiam: 22:32 Ahu do Naibata ni si Abraham, Naibata ni si Isak anjaha Naibata ni si Jakob? Ia Naibata, sedo Naibata ni na matei, tapi Naibata ni na manggoluh do. (2 Mus. 3:6.) 22:33 Jadi longang ma halak na mabuei ai mambogei pangajarionni ai. 22:34 Tapi dob ibogei Parisei, na dob ipasip Jesus halak Sadukei, jadi martumpu ma sidea. 22:35 Anjaha sada halak humbani sidea, ai ma sada sibotoh surat, mambahen sungkun-sungkun Bani laho mangujiSi. 22:36 Guru, na ija do titah sibanggalan humbani titah in? 22:37 Jadi nini Jesus ma: Maningon haholonganmu do Tuhan Naibatamu humbani gok ni uhurmu, humbani gok ni tonduymu ampa humbani gok ni pingkiranmu. (5 Mus. 6:5; 10:12.) 22:38 In ma titah sibanggalan anjaha na parlobei. 22:39 Na paduahon on pe dos do pakon in: Maningon haholonganmu do hasomanmu doskon dirimu. (3 Mus. 19:18.) 22:40 Titah na dua on do manrimpun sagala titah pakon hata ni nabi-nabi. (bd. 7:12; Rom 13:10; Gal. 5:14.) 22:41 Tapi sanggah na martumpu ai ope Parisei ai, isungkun Jesus ma sidea, nini ma: 22:42 Sonaha do pingkiran nasiam pasal Kristus in? Anak ni ise do Ia? Nini sidea ma hu-Bani: Anak ni si Daud! 22:43 Nini ma dompak sidea: Tapi sonaha ma ai, igoran si Daud do Ia Tuhan, niajaran ni Tonduy in, ai ihatahon do: 22:44 Nini Tuhan in do dompak Tuhanku: Hundul ma Ho hu siamunku, paima hubahen munsuhmu sidogei-dogeian ni naheimu! (bd. 26:64; Ps. 110:1.) 22:45 Anggo igoran si Daud do Ia Tuhan, sonaha ma Ia anakni? 22:46 jadi ise pe lang na boi mambalosiSi, anjaha humbani panorang ai nari sahalak pe lang be na pag manungkunSi.

Mateus 23

23:1 Dob ai iparsahapkon Jesus ma halak na mabuei ai ampa susianNi, 23:2 nini ma: Kursi ni si Musa do na hinundulan ni sibotoh surat pakon Parisei. 23:3 Halani ai, horjahon anjaha irikkon nasiam ma sagala niajarhon ni sidea bani nasiam, tapi ulang ma usihi nasiam pambahenan ni sidea, ai mangkatahon do hansa sidea, seng dong anggo ihorjahon. (Mal. 2:7, 8.) 23:4 Irahuti sidea do siboanon na borat, anjaha iampeihon ma ai bani abara ni jolma, tapi sidea sandiri marhitei jari-jari pe seng ra manggiut ai. 23:5 Sagala pambahenan ni sidea ihorjahon sidea do, ase iidah jolma. Halani ai ipabolag sidea do tali tonggo ni sidea anjaha ipaganjang rambu ni pakeianni. (bd. 6:1; 2 Mus. 13:9; 4 Mus. 15:38, 39.) 23:6 Marosuh do sidea, hundul bani ianan na sangap bani parpestaan, sonai homa bani hundulan lobei-lobei bani parguruan, (Luk. 14:7.) 23:7 ambahni ai, bani tabi ni halak i tiga, anjaha ase igoran halak sidea rabbi (guru). 23:8 Tapi anggo nasiam, ulang ma ra nasiam igoran halak rabbi (guru), ai sada do Guru bani nasiam, anjaha na marsanina do nasiam ganup. 23:9 Ulang ma parbapa nasiam atap ise i tanoh on, ai sada do Bapanasiam, ai ma na i nagori atas ai. 23:10 Ulang ma homa ra nasiam goranon pambobai, ai sada do Pambobai-nasiam, ai ma Kristus in. 23:11 Tapi barang ise sisangapan itongah-tongahnasiam, ia ma sipangidangi bani nasiam. (bd. 20:26, 27.) 23:12 Ai barang ise na pagijang dirini, sipatoruhon do, tapi barang ise na patoruh dirini, ai do sipagijangon. (Joh. 22:29; Pod. 29:23; Hes. 17:24; Luk. 18:14; 1 Ptr. 5:5.) 23:13 Bursik ma nasiam sibotoh surat ampa Parisei, nasiam sipakulah-kulah, ai itutup nasiam do harajaon nagori atas in ilobei ni jolma. Nasiam sandiri seng masuk, anjaha halak, na sihol masuk ilanglangi nasiam do masuk. (Hes. 22:25.) 23:14 Bursik ma nasiam sibotoh surat ampa Parisei, nasiam sipakulah-kulah, ai ibondut nasiam do rumah ni naboru na mabalu marhitei tonggo sipakulah-kulah na ganjang-ganjang. Halani ai borat do uhum na mangonai bani nasiam. 23:15 Bursik ma nasiam sibotoh surat pakon Parisei, nasiam sipakulah-kulah, na mandalani laut ampa tanoh, laho manarik pala sahalak bani ugamanasiam, anjaha dob saud ia masuk, gabe anak ni naraka do ia ibahen nasiam, lompit dua jahatan humbani nasiam. 23:16 Bursik ma nasiam pambobai na mapitung, na mangkatahon: Barang ise na marbija hu rumah panumbahan seng mahua ai, tapi barang ise na marbija hu omas na i rumah panumbahan, ai do na hona sibijaon. 23:17 E nasiam na oto anjaha na mapitung! Na ija do sisurungan, omas ai do atap rumah panumbahan na papansingkon omas ai? 23:18 Ambahni ai ihatahon nasiam do: Na marbija hu anjap-anjap seng mahua ai, tapi barang ise na marbija hu galangan na i atasni ai, ai do na hona sibijaon. (2 Mus. 29:37.) 23:19 E nasiam na mapitung! Na ija do sisurungan, galangan ai do atap anjap-anjap na papansingkon galangan ai? 23:20 Barang ise na marbija hu anjap-anjap marbija do ai hujai ampa hu haganup na i atasni ai. 23:21 Na marbija hu rumah panumbahan, marbija do ai hujai ampa hubani na mangiankon ai. 23:22 Na marbija hu nagori atas, marbija do ai hu paratas ni Naibata, ampa hubani na mangkunduli ai. (bd. 5:34.) 23:23 Bursik ma nasiam sibotoh surat ampa Parisei, nasiam sipakulah-kulah! Igalar nasiam do parsapuluhan ni hosaya, humangei ampa huning, tapi tading do ibahen nasiam titah siharganan, ai ma hapintoron, idop ni uhur ampa habujuron. Sihorjahononkon do na sada on, tapi ulang tading na legan. (3 Mus. 27:30; Mik. 6:8.) 23:24 Nasiam pambobai na mapitung! Itapis nasiam do rongit hu darat, tapi anggo unta ibondut nasiam do. 23:25 Bursik ma nasiam sibotoh surat pakon Parisei, nasiam sipakulah-kulah! Ai ipaborsih nasiam do darat ni mangkuk ampa pinggan, hape ibagas gok do ai marisi panrampokon ampa uhur haut. (Mrk. 7:4.) 23:26 E Parisei na mapitung! Parbagas ni panginuman in ma lobei borsih, ase borsih age pardaratni ai. (Tit. 1:15.) 23:27 Bursik ma nasiam sibotoh surat pakon Parisei, nasiam sipakulah-kulah! Ai usih do nasiam bani tanoman na hinapur, na dear idahon hun darat, tapi ibagas gok holi-holi ni na matei ampa sagala na mabutak. (Lah. 23:3.) 23:28 Sonai do homa nasiam, pintor idahon ni halak hun darat, tapi gok do sipakulah-kulah ampa hajahaton ibagas. 23:29 Bursik ma nasiam sibotoh surat pakon Parisei, nasiam sipakulah-kulah! Ai ipauli nasiam do tanoman ni nabi-nabi, anjaha ipajagar nasiam do tugu ni halak parpintor. 23:30 Nini nasiam: Ambit manggoluh hanami bani panorang ni ompung-ompungnami, seng anjai dihut hanami parsalah bani daroh ni nabi-nabi ai! 23:31 Ase isaksihon nasiam do hape, anak ni sibunuh nabi-nabi ai do nasiam! 23:32 Ai pe, goki nasiam ma suhat-suhat hajahaton ni ompung nasiam! 23:33 Nasiam ulog anjaha anak ni ulog darih! Sonaha ma panlembangi nasiam bani uhuman ni naraka? (bd. 3:7.) 23:34 Halani ai, tonggor ma, Ahu do marsuruh bani nasiam nabi-nabi, halak na maruhur ampa sibotoh surat, deba humbani sidea bunuhon anjaha parsilangkononnasiam do, anjaha deba nari humbani sidea lonsingannasiam do i rumah parguruannasiam anjaha parburuonnasiam hun huta na sada hu huta na sada nari, 23:35 ase mangonai bani nasiam ma sagala daroh ni halak parpintor, na madurus i tanoh on, olat ni daroh ni si Abel na pintor ai ronsi daroh ni si Sakarias, anak ni si Barakya, na binunuh nasiam iholang-kolang ni rumah panumbahan ampa anjap-anjap ai. (1 Mus. 4:8; 2 Kron. 24:20-21.) 23:36 Sintong do na huhatahon on bani nasiam: Haganupan in mangonai do bani bangsa on! 23:37 Jerusalem, Jerusalem, sibunuh nabi-nabi, anjaha sipargijig na sinuruh marayak ham! Domma piga hali sihol patumpuonku anakmu, songon indung ni dayok patumpuhon anakni hutoruh ni habongni, tapi seng ra ham. (Luk. 13:34, 35; Lah. 7:52.) 23:38 Tonggor ma, maningon tarulang ma rumahnasiam. (1 Raj. 9:7, 8.) 23:39 Ai huhatahon ma bani nasiam, seng idahonnasiam be Ahu humbani sonari nari, paima ihatahon nasiam: Pinasu-pasu ma na roh ibagas Goran ni Tuhan! (bd. 21:9; Ps. 118:26.)

Mateus 24

24:1 Dob ai laho ma Jesus luar hun rumah panumbahan ai. Jadi iparayak susianNi ai ma Ia, anjaha ipatuduhkon sidea ma Bani rumah-rumah na masuk hu rumah panumbahan ai. 24:2 Tapi nini ma hubani sidea: Iidah hanima do ganupan in? Sintong do na huhatahon on bennima: Seng paturuton ijai dua batu palindih na so rosakkononkon. (Luk. 19:44.) 24:3 Sanggah hundul Ia i dolog Jetun ai, roh ma pulig susian ai hu-Bani, nini ma: Patugah Ham ma bennami, antigan ma masa ai, anjaha aha ma tanda ni parohMu ampa ajal ni dunia on? 24:4 Jadi nini Jesus ma mambalosi sidea: Jaga ma, ulang ma ipakahou halak hanima! 24:5 Ai buei do halak na roh marhitei goranKu, na mangkatahon: "Ahu do Kristus" jadi buei ma na kahou bahenon ni sidea. (ay. 24; Lah. 5:36, 37; 1 Joh. 2:18.) 24:6 Tapi bogeionnima ma pasal porang ampa barita ni porang. jaga, ulang tarsonggot hanima, ai maningon masa do ai, tapi seng ope ai ujungni. 24:7 Ai marsilawanan do bangsa dompak bangsa, anjaha harajaon dompak harajaon, masa ma lohei ampa lalou bani buei nagori. 24:8 Tapi haganupan ai mungkah ni pangarouon ai ope. 24:9 Ondoskonon ni halak do hanima, ase iarsik anjaha ibunuh; anjaha domdoman ni sagala bangsa do hanima halani Goranku. (bd. 10:17; Joh. 16:2.) 24:10 Jadi buei ma halak na marbalik, gabe marsitahi-tahian anjaha marsidomdoman ma. 24:11 Buei ma marrohan nabi sipakulah-kulah, anjaha buei do na kahou ibahen. (bd. 7:15; 1 Joh. 4:1.) 24:12 Jadi halani martambah-tambah hajahaton, lambin borgohni ma holong ni uhur ni jolma bueinan. (2 Tes. 2:10; 2 Tim. 3:1-5.) 24:13 Tapi barang ise na tahan das hu ujung, ai do na maluah. (bd. 10:22; Pangk. 13:10.) 24:14 Anjaha ambilankononkon do ambilan na madear on pasal Harajaon in i sab dunia on, laho manaksihon bani haganup bangsa, dob ai pe ase roh ujungni. (bd. 10:18; 28:19.) 24:15 Halani ai, anggo iidah hanima ma bani ianan na mapansing in hasamboron na majangin ai, na dob nilumbahon ni nabi Daniel (iparuhurhon na mambasa on ma ai), (Dan. 9:26, 27; 12:11.) 24:16 jadi maporus ma halak na i Judea hu dolog. 24:17 Halak na iatas ni rumahni, ulang pala be tuad mangalop ugas-ugasni hun rumah ai. (Luk. 17:31.) 24:18 Na i juma ulang be mulak hu rumah mangalop pakeianni. 24:19 Tapi bursik ma na boratan rumah ampa na painumhon dakdanak bani panorang ai. 24:20 Tapi martonggo ma hanima ase ulang ma sanggah musim borgoh atap ari Sabat hanima na maporus ai. (Lah. 1:12.) 24:21 Ai banggal tumang do haparngiton ai, humbani mungkah ni dunia on ronsi sonari seng ongga masa ope na sonai ai, anjaha seng masa be na sonai. (Dan. 12:1.) 24:22 Anjaha, ambit seng ipapondok ari ai, sahalak pe seng adong na maluah. Tapi halani na tarpilih in do, ase ipapondok ari ai. 24:23 Anjaha anggo adong na mangkatahon bennima: "Tonggor ma, ijon do Kristus in", atap: "Ijai do Ia," ulang ma porsaya hanima. 24:24 Ai na roh do Kristus siparladung ampa nabi siparladung, mambahen tanda na banggal ampa halongangan, laho pakahouhon na dob tarpilih in, ambit na tarbahen. (ay. 5, 11: 2 Tes. 2:9.) 24:25 Tonggor ma, domma hupalumba hinan hanima. 24:26 Halani ai, anggo adong na mangkatahon bennima: "I halimisan do Ia," ulang ma laho hanima hujai. Atap ihatahon sidea: "I kamar do Ia," ulang ma porsaya hanima! 24:27 Ai songon hilap na mardejeb i hapoltakan anjaha marsinalsal das hu hasundutan, sonai do parroh ni Anak ni jolma in. (Luk. 17:24.) 24:28 Ai ija adong bangkei, hujai do roh marurup haluhuy. (Job 39:30; Hab. 1:8; Luk. 17:37.) 24:29 Tapi sompong, salpuhonsi haparngiton na bani panorang ai, manggolapi ma mata ni ari, seng be ibere bulan sinalsalni, mardabuhan ma bintang-bintang hun langit, anjaha dugur ma hagogohon ni parlangitan. (Jes. 13:10; 2 Ptr. 3:10.) 24:30 Jadi taridah ma i langit tanda ni Anak ni jolma in, gabe mandoruhi ma ganup bangsa na i tanoh on, ai idahon ni sidea ma Anak ni jolma in roh iatas ni hombun ni langit, marhasoman hagogohon ampa hasangapon banggal. (Pangk. 1:7.) 24:31 Anjaha suruhonni ma malekatni martarompet na gogoh parsorani, jadi patumpuon ni sidea ma halak na dob pinilih ai humbani deisa na ualuh in, hun ujung ni langit na sada das hubani na sada nari. (1 Kor. 15:52; 1 Tes. 4:16; Pangk. 8:2.) 24:32 Tapi humbani hayu ara an ma hanima marguru: Anggo martunasi ma anjaha marbulungi ibotoh hanima do, paboa dohor ma partahunan milas. 24:33 Sonai ma homa, anggo iidah hanima ma masa ai, botoh hanima ma, paboa dohor ma ai. (Jak. 5:9.) 24:34 Sintong do na Huhatahon on bannima: Seng anjai salpu na sasundut on paima masa haganupan ai. 24:35 Ai na laho salpu do langit pakon tanoh on, tapi anggo hatangKu seng anjai salpu. (bd. 5:18.) 24:36 Tapi anggo pasal arini ampa panorangni, seng dong na mambotohsi, age malekat na i nagori atas, age Anak in; pitah Bapa in do. (1 Tes. 5:1.) 24:37 Ai songon sanggah panorang ni si Noak, sonai do parroh ni Anak ni jolma in. (1 Mus. 6:11; Luk. 17:26, 27.) 24:38 Ai sanggah lape roh bah na sumbang ai, marmangan-mangan anjaha marminum-minum do sidea, marunjuk anjaha palahohon, paima jumpah ari parmasuk ni si Noak hubagas parau ai, (2 Ptr. 3:5, 6.) 24:39 anjaha lanjar do seng mambotoh sidea pasal ai, ronsi na roh bah na sumbang ai mangogapkon sidea haganup. Usih hujai do parroh ni Anak ni jolma in. 24:40 Bani panorang ai adong ma dua halak i juma, na sada ijalo, na sada nari itadingkon. (Luk. 17:35, 36.) 24:41 Dua halak rap manduda, na sada ijalo, na sada nari itadingkon. 24:42 Ai pe, jaga ma hanima, ai seng ibotoh hanima ari parroh ni Tuhannima! (bd. 25:13.) 24:43 Tapi ingat hanima ma on: Ambit ibotoh tuan rumah pukul piga borngin roh panangko, tontu marjaga-jaga do ia, anjaha lang palopasonni rumahni hona bongkar. (Luk. 12:39-46.) 24:44 Halani ai tagam ma hanima, ai na roh ma Anak ni jolma in bani panorang na so niagaknima. (Pangk. 16:15.) 24:45 Ai ise do juak-juak na bujur anjaha na maruhur, na pinabangkit ni tuanni, laho mambere jabolonni mangan bani panorangni? 24:46 Martuah ma juak-juak, na mangkorjahon sonai jumpah tuanni bani parrohni ai. 24:47 Sintong do na huhatahon on bennima: Pabangkitonni ma ia manramotkon haganup na dong bani. (bd. 25:21, 23.) 24:48 Tapi anggo juak-juak na jahat do ia, na marsahap ibagas uhurni: "Dokah ope ase roh tuankai", (Paramb. 8:11.) 24:49 gabe ipungkah ma mangarsik hasomanni juak-juak anjaha mangan minum rap pakon parmabuk, 24:50 jadi rohkonsi tuanni bani panorang na so niagakni, anjaha bani panorang na so binotohni, 24:51 gabe agouhononni ma ia, anjaha bereonni ma bani parbagianan dos pakon sipakulah-kulah. Ijai ma masa partangison ampa na patungosngoson. (bd. 8:12.)

Mateus 25

25:1 Anjaha tarpausih do harajaon nagori atas ai hubani sapuluh anak boru, na bingkat marsiboan suluhni, laho mangalo-alo siparunjuk. 25:2 Lima humbani sidea na oto do, tapi na lima nari maruhur do. (Luk. 12:36; Pangk. 19:7.) 25:3 Ia na oto ai iboan do namin suluhni, tapi seng mamboan minak sidea. 25:4 Tapi anggo na maruhur ai, iboan do minak bani iananni rap pakon suluh ni sidea. 25:5 Halani dokah ase roh siparunjuk ai, tartunduh ma sidea haganup lanjar tarpodom. 25:6 Tapi tongah borngin, adong ma na dilo-dilo: Tonggor ma, siparunjuk in! Roh ma mangalo-alosi! 25:7 Jadi puho ma ganup anakboru ai, anjaha ipasirsir bei ma suluhni. 25:8 Nini naboru na oto ai ma bani na maruhur ai: Bere nasiam ma deba minak nasiam in, ai na laho miloh ma suluhnami! 25:9 Tapi nini na maruhur ai ma mambalosisi: Lang! Seng sungkup holi bannami ampa bani nasiam. Dearan ma boli nasiam bani nasiam humbani panjual minak. 25:10 Tapi sanggah na laho ai ope sidea mamboli minak, roh ma siparunjuk ai, jadi masuk ma na dob sirsir ai hinan rap pakonsi hu pesta parunjukan ai, anjaha itutup ma labah ai. 25:11 Salpu ai roh ma naboru na legan ai, nini ma: Ham tuan, ham tuan, buha ham ma labah on bennami! (Luk. 13:25, 27.) 25:12 Tapi nini mambalosi: Sintong do hatangkon bennima: Seng hutandai hanima! (bd. 7:23.) 25:13 Halani ai jaga ma hanima, ai seng ibotoh hanima arini pakon panorangni. (bd. 24:42.) 25:14 Usih do homa ai bani sada halak, na laho mardalani hu nagori na legan, gabe idilo ma juak-juakni, laho mangondoskon artani bani sidea. (bd. 21:33.) 25:15 Ibere ma bani na sada lima talenta, bani na sada nari dua, anjaha bani na legan use sada, ganup domu hubani gogohni, dob ai misir ma ia. (Rom 12:6.) 25:16 Mintor do laho sijalo na lima talenta ai, mantiga-tigahon ai, gabe dapotsi ma lima talenta. 25:17 Sonai homa sijalo na dua talenta ai, dapotsi do dua talenta. 25:18 Tapi anggo na manjalo na sada talenta ai ihurak ma tanoh, laho mamonopkon duit ni tuanni ai. 25:19 Dob dokah mulak ma tuan ni juak-juak ai, anjaha ibahen ma parhiraan pakon sidea. 25:20 Jadi roh ma na manjalo silima talenta ai, anjaha ibere ma na lima talenta nari ai, nini ma: Tuannami, lima talenta do ipadas ham bangku; tonggor ma, lima talenta nari na husari. 25:21 Nini tuanni ai ma hubani: Dear ma ai, ale juak-juak sidear uhur anjaha hatengeran. Hatengeran ni uhur do ho bani na otik, ondoskononku ma buei hubam. Masuk ma ho hubagas pesta malas ni uhur ni tuanmu! (ay. 23; bd. 24:45-47; Luk. 16:10.) 25:22 Dob ai roh ma na manjalo sidua talenta ai, nini ma: Tuannami, dua talenta do ipadas ham bangku, tonggor ma, dua talenta nari na husari! 25:23 Nini tuanni ai ma hubani: Dear ma ai, ale juak-juak sidear uhur anjaha hatengeran. Hatengeran ni uhur do ho bani na otik, ondoskononkon ma buei hubam. Masuk ma ho hubagas pesta malas ni uhur ni tuanmu! (ay. 21.) 25:24 Roh ma homa na manjalo sisada talenta ai, nini ma: Tuannami, hubotoh paruhur na koras do ham, na manabi na so sinuanmu anjaha na patumpuhon na so tinidahkonmu. 25:25 Jadi mabiar do ahu, gabe laho ma ahu mamonophon talentamu ai hubagas, tanoh. Nam ma artamu on! 25:26 Tapi nini tuanni ai ma mambalosisi: E ho juak-juak na jahat anjaha parrayoh! Ibotoh ho do hape, ahu manabi na so sinuanku, anjaha patumpuhon na so tinidahkonku. 25:27 Anggo sonai, ai lang patut ma namin pasimpankononmu duitkon hubani halak sipabungahon duit, ase hujalo in rap pakon bungani bani parrohku? 25:28 Ai pe, buat nasiam ma talenta in, anjaha bere nasiam ma hubani simada na sapuluh ai. 25:29 Ai bereon do bani ganup na marnadong ase marlobih-lobih ia, tapi sibuaton do humbani na so marnadong na adong bani hinan. 25:30 Anjaha usir nasiam ma juak-juak na so margagan in hubani na golap marimpot-impot! Ijai ma masa partangison ampa na patungosngoson. (bd. 8:12.) 25:31 Tapi anggo roh ma Anak ni jolma in ibagas hasangaponni rap pakon haganup malekatni, hundulanni ma ijai paratas hasangaponni ai. (bd. 16:27; Pangk. 20:11-13.) 25:32 Dob ai martumpu ma hu lobeini haganup bangsa, jadi sirangonni ma sidea songon pambahen ni parmahan na manirang biri-biri boru-boru humbani biri-biri tunggal. (Rom 14:10.) 25:33 Jadi pajongjongonni ma boru-boru ai hu siamunni, tapi bajar ai hu sambilouni do. (Hes. 34:17.) 25:34 Dob ai hatahonon ni Raja ai ma hubani na i siamunni ai: Roh ma nasiam na pinasu-pasu ni Bapa, jalo nasiam ma harajaon in, na dob pinasirsir bani nasiam humbani mula ni tanoh on! 25:35 Ai na loheian do Ahu, ibere nasiam do Ahu mangan, na horahan do Ahu, ibere nasiam do Ahu minum; na mampar-ampar do Ahu, iarahkon nasiam do Ahu; (Jes. 58:7.) 25:36 seng marhiou Ahu, gabe iparhioui nasiam do Ahu; na boritan do Ahu, gabe itorih nasiam do Ahu, anjaha na tartutup do Ahu, gabe roh do nasiam marayak Ahu. 25:37 Dob ai hatahonon ni parpintor ai ma mambalosisi: Tuhan, nantigan iidah hanami Ham loheian, gabe ibere hanami Ham mangan, barang horahan, gabe ibere hanami Ham minum? (bd. 6:3.) 25:38 Nantigan iidah hanami Ham mampar-ampar, gabe ijalo hanami Ham, barang seng marhiou, gabe iparhioui hanami Ham? 25:39 Nantigan iidah hanami Ham boritan barang tartutup, gabe iparayak hanami Ham? 25:40 Dob ai balosan ni Raja ai ma sidea: Sintong do na huhatahon on bani nasiam: Haganup na binahen nasiam bani sada halak anggingKu na etek-etek on, na hu-Bangku do in ibahen nasiam. (Pod. 19:17; Heb. 2:11.) 25:41 Dob ai hatahononni ma bani na i sambilouni ai: Misir ma nasiam hum-Bangku, nasiam na binuraan, hubani apuy sisadokah ni dokahni, na pinasirsir bani sibolis ampa bani malekatni. (bd. 7:23; Pangk. 20:10, 15.) 25:42 Ai na loheian do Ahu, seng ibere nasiam mangan, na horahan do Ahu, seng ibere nasiam minum. 25:43 Na mampar-ampar do Ahu, seng iarahkon nasiam Ahu, na so marhiou do Ahu, seng iparhioui nasiam; na boritan do Ahu anjaha tartutup, seng itorih nasiam. 25:44 Sidea pe balosan ni sidea ma Ia, nini ma: Tuhan, nantigan iidah hanami Ham loheian, horahan, mampar-ampar, seng marhiou, boritan anjaha tartutup, hape lang ipatorsa-torsa hanami Ham? 25:45 Dob ai hatahononni ma mambalosi sidea: Sintong do na huhatahon on bani nasiam, na so binahen nasiam age aha bani sada halak na etek-etek on, hu-Bangku do na so binahen nasiam ijai. 25:46 Jadi misir ma sidea hubani na maparngit sadokah ni dokahni, tapi halak parpintor ai hu hagoluhan sadokah ni dokahni. (Joh. 5:29.)

Mateus 26

26:1 Ase dob marujung ihatahon Jesus haganup hata ondi, nini ma dompak susianNi: 26:2 Ibotoh hanima do, haduan ma pesta Paska, ijai ma ondoskononkon Anak ni jolma in, ase iparsilangkon. (bd. 20:18.) 26:3 Martumpu ma ijia sintua ni malim ampa pangintuai ni bangsa ai hu rumah ni sintua ni malim Kayafas; 26:4 marriah ma sidea atap akal ja do bahenon, laho manangkap Jesus ampa mamunuhSi. 26:5 Jadi ihatahon sidea ma: Ulang ma bani pesta ai, ase ulang geor halak na mabuei in. 26:6 Sanggah i huta Betania Jesus, i rumah ni si Simon, na gadamon ai, 26:7 roh ma hu-Bani sada naboru mamboan botol, na marisi minak na maharga tumang, lanjar iuseihon ma ai bani uluni, sanggah mangan Ia. 26:8 Mangidah ai susian ai, sogam ma uhur ni sidea, nini ma: Rugi ni in! 26:9 Boi do harga jualon in, anjaha bolini ai ibere bani na masombuh. 26:10 Tapi ibotoh Jesus do ai, gabe nini ma dompak sidea: Mase ma isunsahi hanima puang-puang on? Pambahenan na madear do na binahenni in Bangku. 26:11 Ai tongtong do adong na masombuh rap pakon hanima, tapi anggo Ahu, seng tong-tong rap pakon hanima. (5 Mus. 15:11.) 26:12 Ai iuseihon pe minak ai bani angkulangku, ibahen do ai na songon pananomhu. 26:13 Sintong do na huhatahon on bennima: Ija pe iambilankon ambilan na madear on i sab dunia on, baritahononkon do age na binahenni on, gabe pardingatan bani. 26:14 Dob ai laho ma sada halak humbani na sapuluh dua ai, ai ma na margoran si Judas Iskariot, marayak sintua ni malim, 26:15 nini ma: Aha sihol bereonnasiam bangku, ase hupadas Ia bani nasiam? Jadi igalar sidea ma bani tolu puluh duit pirak. (Sak. 11:12; Joh. 11:57.) 26:16 Anjaha hunjai nari ipindahi uhurni ma panorang na dearhonsi, laho mantahihon Jesus. (1 Tim. 6:9, 10.) 26:17 Bani ari parlobei ni mangankon ruti na so niigaran, roh ma susian ai bani Jesus, nini ma: Ija do ipangindo uhurMu pasirsironnami Bamu panganon Paska ai? (2 Mus. 2:18-20.) 26:18 Jadi nini ma: Laho ma hanima hu huta in, marayak si anu, anjaha hatahon ma hubani: Hata ni guru in: Dohor ma panorangku, ibagas rumahmu do Ahu sihol mangan Paska rap pakon susianku. (bd. 21:3.) 26:19 Jadi ibahen susian ai ma songon na hinatahon ni Jesus bani sidea; iugaskon sidea ma panganon Paska ai. 26:20 Ase dob bod ari hundul ma Ia mangan rap pakon susianNi na sapuluh dua ai. 26:21 Sanggah na mangan ai sidea, nini ma: Sintong do na huhatahon bennima: Sada humbennima sihol mantahihon Ahu! 26:22 Jadi pusok tumang ma uhur ni sidea, gabe ipangkatahon sidea bei ma hu-Bani: Sedo ahu ai? 26:23 Jadi nini ma mambalosi: Na manurdukkon tanganni rap pakon Ahu hu bagas pinggan, ai ma na mantahihon Ahu. 26:24 Tong do namin ujung ni Anak ni jolma in, songon na dob tarsurat hinan, tapi bursik ma halak na mantahihon Anak ni jolma in. Rahanan ma namin, ambit ulang tubuh jolma na sonai ai. 26:25 Dob ai si Judas pe, na mantahihonsi ai, marsahap ma: Ai ahu do ai, Guru? Jadi nini Jesus ma hubani: Ho do ai, songon na hinatahonmai 26:26 Jadi sanggah na mangan ai sidea, ibuat Jesus ma ruti, ipasu-pasu ma, iponggoli anjaha ibere ma hubani susianNi, lanjar ihatahon: Jalo hanima ma, anjaha pangan ma, dagingKu do on! 26:27 Dob ai ibuat ma panginuman ai, ihatahon ma tarima kasih, ibere ma ai bani sidea, lanjar ihatahon: Haganup ma hanima manginum hunjin! 26:28 Ai darohKu do on, daroh parpadanan, na niuseihon mangkopkop buei jolma, bahen hasasapan ni dousa. (2 Mus. 24:8; Jer. 31:31; Sak. 9:11.) 26:29 Tapi huhatahon ma bennima: Seng be inumonku humbani sonari nari humbani buah ni hayu anggur on das hubani panorang ai, ijai ma inumonKu na baru rap pakon hanima ibagas harajaon ni BapangKu. 26:30 Jadi dob idodingkon sidea doding puji-pujian ai, luar ma sidea laho hu dolog Jetun. (Luk. 22:39; Joh. 18:1; Ps. 113-118.) 26:31 Jadi nini Jesus ma dompak sidea: Haganup do hanima sangsi Bangku saborngin on, ai tarsurat do. Lonsinganku ma parmahan in, gabe marserak ma biri-biri na sahulanan in. (Sak. 13:7; Joh. 16:32.) 26:32 Tapi dob puho Ahu humbani na matei, lobeianKu ma hanima hu tanoh Galilea. (bd. 28:7.) 26:33 jadi nini si Petrus ma mambalosisi: Age pe ganup sidea sangsi Bamu, anggo ahu seng anjai sangsi. (Joh. 13:38.) 26:34 Nini Jesus ma hubani: Sintong do hatangkon bam: Ibagas borngin on, paima martahuak dayok, tolu hali do Ahu parnalangonmu. 26:35 Nini si Petrus ma hu-Bani: Age pe ipamatei ahu rap pakon Ham, seng parnalangonku Ham. Sonai do homa ni haganup susian ai. (ay. 56.) 26:36 Dob ai das ma Jesus rap pakon susian ai hu sada pohon na margoran Getsemane. Nini ma hubani susianNi: Hundul ma hanima lobei ijon, sadokah laho Ahu martonggo ijai. 26:37 Jadi iarahkon ma rap pakonsi si Petrus ampa anak ni si Sebedeus na dua ai. Sogop ma hu-Bani pusok ni uhur ampa habulinsahon, (Heb. 5:7.) 26:38 gabe nini ma hubani sidea: Pusok tumang do uhurHu, hira na matei do. Ijon ma hanima, anjaha puho ma hanima rap pakon Ahu. (Joh. 12:27.) 26:39 Laho ma Ia otik dompak lobei, manrogop ma Ia martonggo, nini ma: Ham Bapa, anggo boi, salpuhon Ham ma panginuman on hum-Bangku! Tapi seng marguru hubani rosuhKu, tapi marguru bani rosuhMu do. (Joh. 18:11; Heb. 5:8.) 26:40 Dob ai mulak ma Ia hubani susianNi ai, tarpodom do sidea jumpahSi, gabe nini ma dompak si Petrus: Seng tarbahen hanima hape puho rap pakon Ahu pala sajam? 26:41 Jaga ma anjaha puho ma, ase ulang masuk hanima hu parlajouan. Hinsah do namin tonduy, tapi galek do anggo daging. (Heb. 2:14; 4:15.) 26:42 Dob ai laho ma Ia padua-halihon martonggo, nini ma: Ham Bapa, anggo seng boi salpu panginuman on, anggo na maningon inumonKu do, sai saud ma harosuh ni uhurMu. 26:43 Mulak ma Ia use, gabe jumpahSi ma sidea tarpodom, ai borat do salibon ni sidea. 26:44 Jadi itadingkon ma sidea, iulakkon ma martonggo patolu halihon, ihatahon ma hata nongkan ai. (2 Kor. 12:8.) 26:45 Dob ai laho ma Ia manjumpahkon susianNi ai, nini ma dompak sidea: Nunutonnima ope modom ampa marsaran? Tonggor ma, domma dohor panorangni, ondoskononkon ma Anak ni jolma in hu tangan ni pardousa. 26:46 Jongjong ma hanima, laho ma hita! Tonggor ma, domma dohor na sihol mantahihon Ahu. 26:47 Sanggah na mangkatahon ai ope Ia, tonggor ma, roh ma si Judas, sada humbani na sapuluh dua ai, rap pakon buei halak na marpodang anjaha manjolom bogbog-bogbog, sinuruh ni sintua ni malim ampa pangintuai ni bangsa ai. 26:48 Ia sipartahi-tahi ai domma ibere hinan tanda bani sidea, nini: Ia in na husummah, ai ma Ia, tangkap nasiam ma! 26:49 Jadi mintor idohori ma Jesus, nini ma: Tabi ma Bamu, Guru! lanjar isummah ma Ia. 26:50 Tapi nini Jesus ma hu-Bani: Mangaha ho hujon, ambia? Dob ai marrohan ma sidea, ilaluhon sidea ma tanganni bani Jesus laho manangkapSi. 26:51 Anjaha tonggor ma, sada halak humbani na mangirikkon Jesus palaluhon tanganni, isintak ma podangni, lanjar itampulhon ma ai bani sada halak juak-juak ni sintua ni malim, gabe mistak ma pinggolni. 26:52 Jadi nini Jesus ma hubani: Sarungkon ma podangmin! Ai sagala na manampulhon podang, magou do bahenon ni podang. (1 Mus. 9:6.) 26:53 Ai na so tarbahen Ahu do, nini uhurmu, mangindo humbani Bapa, ase ipasirsir Bangku sonari lobih humbani sapuluh dua loksa malekat? 26:54 Tapi sonaha ma saud na hinatahon ni surat in, na mangkatahon, paboa na maningon masa do sonon? 26:55 Bani panorang ai ma ihatahon Jesus bani halak na mabuei ai: Songon na laho manangkap panrampok do nasiam roh manjumpahkon Ahu, marpodang anjaha manjolom bogbog-bogbog. Ari-ari do namin hundul Ahu i rumah panumbahan mangajari, tapi seng itangkap nasiam Ahu. 26:56 Tapi masa do ganup on, ase jumpah na hinatahon ni nabi-nabi. Jadi haganup ma susianNi ai manadingkonSi, laho maporus. (ay. 31.) 26:57 Ase dob itangkap sidea Jesus, iboan sidea ma Ia hubani sintua ni malim Kayapas, ai domma martumpu ijai sibotoh surat ampa pangintuai-pangintuai. (Luk. 22:54-55.) 26:58 Tapi iirikkon si Petrus do Ia mandaoh-daoh das hu alaman ni sintua ni malim ai. Masuk ma ia hubagas lanjar hundul pakon juak-juak ai, laho mangidah atap sonaha ujungni. 26:59 Tapi anggo sintua ni malim ai ampa haganup anggota ni pangadilan Tinggi ai mangindahi hasaksian ladung do dompak Jesus, ase boi Ia marutang hosah. 26:60 Tapi seng dong dapot sidea, age pe buei na mambere hasaksian ladung. Dobni adong ma dua halak, 26:61 na mangkatahon: Ihatahon halak on do: Tarbahen Ahu do manrumbakkon rumah ni Naibata, anjaha pajongjongkon ai use ibagas tolu ari. (Joh. 2:19, 21.) 26:62 Jadi jongjong ma sintua ni malim ai, ninima dompaksi: Ai seng balosanmu na sinaksihon ni sidea ai dompak Ho? (bd. 27:12.) 26:63 Tapi sai sip do Jesus. Dob ai nini sintua ni malim ai ma hu-Bani: Hupabija ma Ho bani Naibata na manggoluh in, ase ipatugah Ho bennami, barang na tongon do Ho Kristus, Anak ni Naibata! 26:64 Nini Jesus ma hubani: Songon na hinatahonmu ai ma tongon! Tapi huhatahon ma bani nasiam: Humbani sonari nari, idahon nasiam ma Anak ni jolma in hundul i siamun ni Pargogoh in, anjaha roh iatas ni hombun ni langit. (bd. 16:27; Ps. 110:1; Dan. 7:13, 14.) 26:65 Jadi irigatkon sintua ni malim ai ma bajuNi, nini ma: Iapasi do Naibata! Pindahan ope saksi? Tonggor ma, domma ibogei nasiam pangapasionNi in! (Joh. 10:33.) 26:66 Naha do nini uhurnasiam? Jadi nini sidea ma mambalosi: Maningon marutang hosah do Ia! (3 Mus. 24:16; Joh. 19:7.) 26:67 Jadi itijuri sidea ma bohiNi anjaha itenjui. Na legan mamastapisi, lanjar ihatahon: (Jes. 50:6.) 26:68 Manjahai ma Ho bannami, ale Kristus, ise do na mamastap Ho? 26:69 Ia si Petrus hundul do i darat i alaman ai. Jadi roh ma sada naboru manjumpahkonsi, nini ma: Ho pe hasoman ni Jesus na hun Galilea ai do! 26:70 Jadi iporsou ma ilobei ni sidea haganup, nini ma: Seng hubotoh na hinatahonmu ai! 26:71 Sanggah na luar ia hu horbangan ai, iidah sada naboru na legan ma ia, nini ma dompak halak na ijai ai: On ma sada hasoman ni Jesus, na hun Nasaret ai! 26:72 Jadi iulaki ma mamorsou, pala marbija: Seng hutandai Halak ai! 26:73 Tapi tongkin nari, marrohan ma na ijai ai manjumpahkon si Petrus, nini sidea ma dompaksi: Tongon, dihut do ho sada humbani sidea, ai parsahapmai do patandahon ho! 26:74 Jadi mamura-murai ampa marbijai ma ia, nini ma: Seng hutandai Halak ai! Jadi mintor martahuak ma dayok. 26:75 Gabe idingat si Petrus ma na hinatahon ni Jesus hubani: Paima martahuak dayok, tolu hali do porsouonmu Ahu. Dob ai laho ma ia hu darat tangis sosombopon. (ay. 34.)

Mateus 27

27:1 Siangkonsi ari, manriah ma haganup sintua ni malim pakon pangintuai-pangintuai ni bangsa ai pasal Jesus, laho pamateihonsi. (Mrk. 15:1; Luk. 22:66; Joh. 18:28.) 27:2 Isangkut ma Ia anjaha iboan, laho mangondoskonSi bani si Latus, panggomgomi ai. (Luk. 23:1; Joh. 18:31, 32.) 27:3 Dob iidah si Judas, na mantahihonsi ai, na hona uhum do hape Ia, manosal ma ia, ipaulak ma sitolu puluh pirak ondi bani sintua ni malim ampa pangintuai-pangintuai, (bd. 26:15.) 27:4 nini ma: Domma mardousa ahu, daroh ni Halak na so marsalah do hutahihon! Tapi nini sidea ma: Seng urusannami ai! Ho ma na pabotoh-botoh ai! 27:5 Jadi isampakkon ma pirak ai hubagas rumah panumbahan ai, dob ai laho ma ia mandoloskon dirini. (2 Sam. 17:23; Lah. 1:18.) 27:6 Tapi ibuat sintua ni malim ma duit ai, nini ma: Seng bulih pamasukon in hubagas parartaan ni rumah panumbahan, ai boli ni daroh do in! (Mrk. 12:41.) 27:7 Dob marriah sidea, ibolihon sidea ma ai bani tanoh ni sipauli hudon bahen tanoman ni halak dagang. (Lah. 1:19.) 27:8 Halani ai do, ase igoran ianan ai tanoh daroh ronsi sadari on. 27:9 Gabe jumpah ma hata ni nabi Jeremias, na mangkatahon: Ibuat sidea ma duit pirak na tolu puluh ai, ai ma boli na dob tinontuhon itongah-tongah ni anak ni Israel, (Jer. 32:6-9; Sak. 11:12, 13.) 27:10 anjaha ibere sidea ma ai mamboli tanoh ni sipauli hudon, songon na hinatahon ni Tuhan in bangku. 27:11 Jongjong do Jesus ilobei ni panggomgomi ai, anjaha isungkun panggomgomi ai ma Ia, nini ma: Atene, Ham do raja ni halak Jahudi? Jadi nini Jesus ma: Songon na hinatahonmu ai ma tongon. 27:12 Anjaha sanggah na mangadu-adu ai sintua ni malim ampa pangintuai ni bangsa ai dompakSi, seng dong marbalos Ia. (bd. 26:63; Jes. 53:7.) 27:13 Jadi nini si Latus ma hu-Bani: Ai seng itangar Ham buei ni na sinaksihon ni sidea ai dompak Ham? 27:14 Tapi sangkababah hata pe lang ibalosi ia, pala longang tumang panggomgomi ai. (Joh. 19:9.) 27:15 Tapi somal do ipaluah panggomgomi ai bani pesta ai sada halak na tartutup, atap ise na tinodoh ni halak na mabuei ai. 27:16 Jadi adong ma ijia sada halak na tartutup na tarbarita hajahatonni, na margoran si Barabas. 27:17 Jadi sanggah na tumpu ai sidea, nini si Latus ma dompak sidea: Ise do iparsinta nasiam paluahonku, si Barabas do, atap Jesus, na margoran Kristus? 27:18 Ai ibotoh do, halani subil ni uhur ni sidea do, ase iondoskon sidea Ia. (Joh. 11:47, 48.) 27:19 Anjaha sanggah na hundul ai si Latus bani kursi paruhuman ai, martonah ma parinangonni hubani, nini. Ulang das ikahua ham Halak na pintor in, ai susah tumang do huahap na borngin ibagas nipingku marhalanihonsi. 27:20 Tapi sai iojur-ojur sintua ni malim ampa pangintuai ni bangsa ai do halak na mabuei ai, ase ipangindo sidea paluahon si Barabas, tapi bunuhon anggo Jesus. 27:21 Nini panggomgomi ai ma mambalosi sidea: Ise humbani sidea na dua on iparsinta nasiam paluahonku? Jadi nini sidea ma: Si Barabas! 27:22 Nini si Latus ma hubani sidea: Jadi, aha ma sibahenonku bani Jesus, na ginoran Kristus? 27:23 Haganup do sidea mangkatahon: Parsilangkon ma Ia! 27:24 Jadi dob iidah si Latus, na so siat be hatani, lambin tambah tene georni, ia pe ibuat ma bah pamurihi tanganni ilobei ni halak na mabuei ai, anjaha nini ma: Seng marsalah ahu pasal daroh ni Halak on! Nasiam ma na pabotoh-botoh in! (5 Mus. 21:6.) 27:25 Nini haganup halak na mabuei ai ma mambalosi: Marsapata bennami ampa bani dakdanaknami pe darohni ai. (Lah. 5:28.) 27:26 Dob ai ipaluah ma si Barabas, tapi anggo Jesus, dob ilonsingi, iondoskon ma bani sidea, ase iparsilangkon. 27:27 Jadi iboan tentara ni panggomgomi ai ma Jesus hu rumah paruhuman, anjaha ipatumpu sidea ma ganup pasukan ai hu-Bani. 27:28 Itanggali sidea ma hiouNi, anjaha isorungkon ma bani baju sigerger. 27:29 Idandan sidea ma duri bahen sortaliNi, itampeihon ma ai bani uluNi; ibere ma tolong bani tangan siamunNi, dob ai marsombah ma sidea hu lobeiNi, laho pahiri-hirihonSi, nini sidea ma: Tabi ma Bamu, ale Raja ni Jahudi! 27:30 Lanjar itijuri sidea ma Ia, ibuat ma tolong ai humbani tanganNi anjaha ilonsingkon bani uluNi. (Jes. 50:6.) 27:31 Jadi siapkonsi ipahiri sidea Ia, itanggali sidea ma baju-baju sigerger ai hum-Bani, isorungkon sidea ma use bajuni hinan bani, dob ai iboan ma Ia, ase iparsilangkon. 27:32 Sanggah na luar sidea, jumpah sidea ma sada halak Kirene, na margoran si Simon, ia ma ipaksa sidea mamorsan hayu parsilangNi ai. 27:33 Jadi dob das sidea bani sada ianan, na margoran Golgata (artini partangkurakan), 27:34 ibere sidea ma Ia minum anggur na marsaor pogu; dob idai, seng ra be Ia minum ai. (Ps. 69:22.) 27:35 Dob iparsilangkon sidea Ia, ibagi-bagi sidea ma hiouNi marhitei na manjomput na sinurat; (Ps. 22:19.) 27:36 lanjar hundul ma sidea ijai manjagaSi. 27:37 Ilongkothon sidea do huatas ni uluni surat, na patugahkon salahNi. Hatani: On do Jesus, Raja ni Jahudi! 27:38 Rap pakonsi iparsilangkon sidea do dua halak panrampok, sada hampit siamunNi, na sada nari hampit sambilouNi. (Jes. 53:12.) 27:39 Anjaha halak na mamontas hunjai pahiri-hirihonSi, anjaha iupir-upirhon uluni, nini: (Ps. 22:8.) 27:40 E Ho, na sihol parsedahon rumah panumbahan in, anjaha na sihol pajongjongkonsi ibagas tolu ari! Paluah ma diriMu, anggo na tongon do Ho Anak ni Naibata! Turun ma Ho hun hayu parsilang in! (bd. 26:61; Joh. 2:19-21.) 27:41 Usih hujai do parpahiri ni sintua ni malim, sibotoh surat ampa pangintuai ni bangsa ai, nini sidea: 27:42 Na legan ipaluah, tapi dirini sandiri seng tarpaluahSi. Raja ni Israel do Ia, ai pe turun ma Ia hun hayu parsilang in, ase porsaya hanami Bani. (Ps. 22:9.) 27:43 Martenger ni uhur do Ia bani Naibata: Ia ma na paluahkonSi sonari, anggo na tongon do Naibata marosuh Bani, ai nini do: Anak ni Naibata do Ahu! 27:44 Lanjar sonai do parpahiri ni panrampok ai, na rap iparsilangkon pakonsi. 27:45 Tapi humbani tongah ari ronsi pukul tolu, golap do sab tanoh in. 27:46 Anjaha hira-hira pukul tolu marsora na gogoh ma Jesus, nini ma: Eli, Eli, lama sabachtani? Artini: Ale NaibatangKu, NaibatangKu, mase ma itadingkon Ham Ahu? (Ps. 22:2.) 27:47 Mambogei ai, nini deba halak na jongjong ijai ai ma: Na mandilo si Elias do Ia ai! 27:48 Jadi mintor marlintun ma sahalak humbani sidea mangalop limut, isornobkon ma ai bani na migar, anjaha ilongkothon bani tolong laho painumkonSi. (Ps. 69:22.) 27:49 Tapi na legan mangkatahon: Paturut lobei, ase naidah, atap na roh do si Elias paluahkonSi. 27:50 Iulaki Jesus ma use marsora na gogoh, dob ai iondoskon ma ToduyNi. 27:51 Anjaha tonggor ma, marigat ma tirei na i rumah panumbahan ai hun datas hu toruh, bolah dua, anjaha tanoh on dugur, batu gingging mangkabolah, (2 Mus. 26:31; Heb. 10:19, 20.) 27:52 tanoman mangkabuha, anjaha puho ma buei halak na mapansing, na dob matei, 27:53 luar do sidea hun tanoman, dob na puho ai Ia, anjaha laho hu huta na mapansing ai pataridahkon dirini bani buei halak. (Lah. 26:23.) 27:54 Ase dob iidah kopala ni tentara ai, ampa sidea sijagai Jesus lalou ampa haganup na masa ai, mabiar tumang ma sidea, nini ma: Tongon do Anak ni Naibata Ia! 27:55 Adong do ijai buei naboru, na jongjong manatap-natap humbani na daoh, ai ma na dob mangirikkon Jesus hun Galilea, laho marugas Bani. (Luk. 8:2, 3.) 27:56 Sidea ai, ai ma si Maria Magdalena, si Maria inang ni si Jakobus ampa si Josep, ampa inang ni anak ni si Sebedeus. 27:57 Jadi dob bod ari, roh ma sada halak na bayak, na margoran si Josep, na hun huta Arimatia, na dob gabe susian ni Jesus. (2 Mus. 34:25.) 27:58 Laho ma ia hubani si Latus mangindo bangkei ni Jesus, gabe isuruh si Latus ma na padaskon ai bani. 27:59 Jadi ijalo si Josep ma bangkeiNi, ibaluti ma bani hiou linnen na borsih; 27:60 itibalhon ma ai hubagas tanomanni sandiri, na baru ope, na pinatuhilhonni bani dolog batu, anjaha dob igulang batu banggal bani babah ni tanoman ai misir ma ia. (Jes. 53:9.) 27:61 Ia si Maria Magdalena ampa si Maria na sada nari, hundul-hundul do ijai, tontang ni tanoman ai. 27:62 Patarni ai, ai ma ari, dob salpu ari parugasan ai, martumpu ma sintua ni malim ampa Parisei hulobei ni si Latus, nini sidea ma: 27:63 Ham tuan, idingat hanami do, ongga do ihatahon sipangoto-otoi ondi sanggah goluhni: Na puho do Ahu bani ari patoluhon! (ay. 40; bd. 12:40.) 27:64 Ai pe, suruh ham ma, ase ijaga tanoman ai das hubani ari patoluhon, ase ulang roh susianni ai manangkonsi, gabe ihatahon hubani halak na mabuei in, na dob puho Ia humbani na matei, gabe samboran use holi sipaoto-oto na parpudi on humbani na parlobei ondi. 27:65 Jadi nini si Latus ma dompak sidea: Adong ma parjaga ai! Laho ma nasiam, jagai nasiam ma ai pangkei-pangkei! 27:66 Dob ai laho ma sidea, ramot ma ibahen tanoman ai marhitei na manlak ai ampa na mambahen parjaga hujai. (Dan. 6:18.)

Mateus 28

28:1 Tapi sanggah mulai ope marlangat-langat ari, bani ari parlobei dob salpu Sabat, roh ma si Maria Magdalena ampa si Maria na sada nari manonggor tanoman ai. 28:2 Anjaha tonggor ma, masa do lalou bolon, ai tuad do malekat ni Tuhan hun nagori atas, idohori ma batu ai, iguling ma ai lanjar hundul i atasni. 28:3 Ia rupani songon hilap do, anjaha pakeianni putih songon salju. (bd. 17:2; Lah. 1:10.) 28:4 Jadi hitir-hitir ma parjaga ai ibahen biar ni uhur ni sidea, hira na matei do. 28:5 Tapi nini malekat ai ma dompak naboru ai: Ulang mabiar nasiam! Ai hubotoh do, Jesus, na dob pinarsilangkon, ai do na pinindahan nasiam. 28:6 Seng ijon be Ia, ai domma puho Ia, songon na hinatahonNi hinan. Padohor nasiam ma, tonggor nasiam ge ianan hatibalanni on! (bd. 12:40; 16:21; Luk. 2:36.) 28:7 Podas ma nasiam laho hubani susianNi patugahkon na dob puho Ia humbani na matei. Lobeianni do nasiam laho hu Galilea, anjaha ijai ma idahonnasiam Ia. Tonggor ma, domma hupatugah ai bani nasiam. (bd. 26:32.) 28:8 Jadi podas ma sidea misir hun tanoman ai, mabiar anjaha marmalas ni uhur tumang; marlintun do sidea laho patugahkon ai bani susianNi ai. 28:9 Tapi roh ma Jesus manjumpahkon sidea, nini ma: Damei ma bani nasiam. Jadi idohori sidea ma Ia, irohop sidea ma naheiNi lanjar manrogop i lobeiNi. 28:10 Jadi ihatahon Jesus ma hubani sidea: Ulang nasiam mabiar, laho ma nasiam patugahkon bani susianKu, ase laho sidea hu Galilea. Ijai ma idahon ni sidea Ahu! (Heb. 2:11.) 28:11 Sanggah na misir ai sidea, tonggor ma, roh ma piga-piga parjaga ai hu huta, ibaritahon sidea ma haganup na masa ai bani sintua ni malim. 28:12 Jadi martumpu ma sidea rap pakon pangintuai-pangintuai ai, anjaha dob marriah, ibere sidea ma buei duit bani tentara ai, 28:13 nini sidea ma: Hatahon nasiam ma: Borngin, sanggah tarpodom hanami, roh do susianNi manangkoSi. (bd. 27:64.) 28:14 Anjaha anggo tarbotoh on bani panggomgomi, hanami pe marsahap pakonsi, ase ulang susah nasiam. 28:15 Jadi ijalo sidea ma duit ai, anjaha ibahen sidea ma songon na hinatahon ai bani sidea. Rarat do barita on itongah-tongah ni halak Jahudi ronsi sadari on. 28:16 Ia susian na sapuluh sada ai laho do hu Galilea, hu sada dolog, na dob pinatuduhkon ni Jesus hinan bani sidea. (ay. 7.) 28:17 Anjaha dob iidah sidea Ia, isombah sidea ma Ia, tapi adong ope na sangsi. 28:18 Jadi roh ma Jesus hundohor bani sidea, nini ma: Domma ondos Bangku sagala kuasa na i nagori atas ampa na i tanoh on. (bd. 11:27, 28; Ep. 1:20-22.) 28:19 Laho ma hanima, podahi hanima ma sagala bangsa, ase gabe susianKu sidea, anjaha didi hanima ma sidea hubagas goran ni Bapa, Anak ampa Tonduy Napansing. (Mrk. 16:15, 16.) 28:20 Ajari hanima ma sidea mangkorjahon sagala na dob hutitahkon bennima. Tonggor ma, sai na hasomananKu do hanima ganup ari, ronsi roh ujung ni dunia on. (bd. 18:20.)

Markus 1

1:1 On ma mula ni ambilan na madear pasal Jesus Kristus. 1:2 Songon na tarsurat bani nabi Jesayas: Tonggor ma, husuruh ma suruhanku parlobeimu, sipatorsa dalanmu! (Mal. 3:1; Mat. 11:10; Luk. 7:27.) 1:3 Sora ni na mardilo-dilo i halimisan: Pasirsir ma dalan ni Tuhan in, pintor ma bahen sidalananni. (Jes. 40:3.) 1:4 I halimisan do si Johannes mandidihon anjaha mangambilankon pandidion hamubahon ni uhur bahen hasasapan ni dousa. (Lah. 19:4.) 1:5 Jadi roh ma hubani haganup parnagori Judea pakon par-Jerusalem, gabe ipadidihon sidea ma dirini hubani i bah Jordan, dob isopotkon bei dousani. 1:6 Anggo si Johannes, ambulu ni unta do hiouni, huling-kuling gonditni anjaha sipanganonni balang pakon manisan ni lobah. (2 Raj. 1:8.) 1:7 On do ambilanni: Roh ma hun pudingku sigogohan humbangku, seng talup ahu paunduk diringku mangharhari tali ni sipatuni. (Lah. 13:25.) 1:8 Ia ahu, bah do hudidihon bani nasiam, tapi anggo Ia Tonduy Na pansing do didihononni bani nasiam. (Lah. 1:5.) 1:9 Bani panorang ai roh ma Jesus hun Nasaret na i Galilea, jadi tardidi ma Ia i bah Jordan, ididi si Johanes. (Luk. 2:51.) 1:10 Mandarathonsi Ia hun bah ai, iidah ma buha langit, anjaha sogop ma Tonduy ai hu-Bani marrupahon asas. 1:11 Anjaha tarbogei ma sora hun nagori atas: Ho do Anak na hinaholongan ni uhurhu, rosuh do uhurhu Bam. (bd. 9:7; Ps. 2:7; Jes. 42:1.) 1:12 Dob ai mintor ijuljul Tonduy ai ma Ia hu halimisan. 1:13 Ase i halimisan ma Ia ompat puluh ari dokahni ilajou sibolis; rap pakon binatang do Ia ijai, tapi malekat do marugas Bani. 1:14 Dob tartutup si Johannes, roh ma Jesus hu Galilea mangambilankon ambilan na madear ni Naibata: (bd. 6:17.) 1:15 Domma jumpah panorangni; domma dohor harajaon ni Naibata. Paubah nasiam ma uhurnasiam anjaha haporsayai nasiam ma ambilan na madear in! (Lah. 20:21; Gal. 4:4.) 1:16 Sanggah mardalan Ia i topi ni tao Galilea, iidah ma si Simon pakon si Andareas, sanina ni si Simon ai mangamburhon jala ni sidea; ai panjala do sidea. 1:17 Jadi nini Jesus ma dompak sidea: Eta, ihutkon nasiam ma Ahu, hubahen pe nasiam sijala jolma! 1:18 Jadi mintor itadingkon sidea ma jala ai anjaha irikkon ma Ia. 1:19 Dob idalani hundaoh otik, iidah ma si Jakobus, anak ni si Sebedeus, ampa si Johannes, saninani ai; ibagas parau do sidea paturei-tureihon jala ni sidea. 1:20 Jadi mintor idilo ma sidea; anjaha itadingkon sidea ma bapa ni sidea, si Sebedeus, ibagas parau ai rap pakon halak upahan ni sidea, lanjar laho ma sidea mangihutkonsi. 1:21 Jadi laho ma sidea hu huta Kapernaum; mintor masuk ma Ia hu rumah parguruan sanggah ari Sabat laho mangajari. 1:22 Longang ma uhur ni halak mambogei pangajaranni, ai marhidorat do pangajaranni, sedo songon sibotoh surat. 1:23 Adong ma i rumah parguruan ai sada halak na siniaran ni toduy na mabutak, mardilo ma ia, 1:24 nini: Mangaha Ham roh bannami, Ham Jesus par-Nasaret? Roh do Ham hape laho mangagou hanami. Hubotoh do ise Ham: Na pansing ni Naibata. 1:25 Jadi isorgang Jesus ma ia, nini ma: Sip ma ho, mandarat ma ho humbani! 1:26 Jadi isarad tonduy na mabutak ai ma ia, anjaha marsora na gogoh luar ma ia humbani. 1:27 Jadi longang ma sidea haganupan, pala marsisungkunan samah sidea, nini: Aha do on? Pangajaran na baru do on anjaha na marjumbalang; ipaksa do tonduy na butak, gabe ibalosi do ia. 1:28 Jadi mintor sar ma baritani inggot nagori Galilea. 1:29 Dob haluar hun rumah parguruan ai, mintor laho ma ia hu rumah ni si Simon pakon si Andareas rap pakon si Jakobus ampa si Johannes. 1:30 Tibal do anturang ni si Simon, pane-paneon, jadi mintor ipatugah sidea ma ai Bani. 1:31 Idohori ma ia, ijamah ma tanganni laho pajongjongkonsi, jadi itadingkon pane-pane ai ma ia, lanjar marugas ma ia bani sidea. 1:32 Tapi dob bod ari dob sundut mata ni ari, ipamboan halak ma hu-Bani na boritan pakon na setanon. 1:33 Haganup parhuta ai marhumpul do ilobei ni labah ai. 1:34 Jadi buei do na boritan, na marbagei-bagei naboritni, ipamalum, anjaha buei do setan-setan iusir, anjaha seng ilopas setan-setan mansahapkon, na dob itanda sidea Ia. 1:35 Girah sogod, golap-golap ope, puho ma Ia, lanjar luar misir bani ianan na lungun laho martonggo. 1:36 Jadi iirikkon si Simon pakon hasomanni ai ma Ia. 1:37 Dob jumpah sidea Ia, nini sidea ma dompaksi: Haganup halak mangindahi Ham! 1:38 Tapi ihatahon ma bani sidea: Laho ma hita bani ianan na legan, hu dusun-dusun na dohor an, ase dihut ijai Ahu marambilan; ai halani ai do, ase roh Ahu. 1:39 Jadi laho ma Ia marambilan bani parguruan ni sidea, bani sab nagori Galilea, anjaha iusir do setan-setan. 1:40 Jadi roh ma hu-Bani sada halak na gadamon, ielek-elek ma Ia anjaha isombah lanjar ihatahon: Anggo ra Ham, tarpasusi Ham do ahu! 1:41 Jadi maidop ma uhurni, isurdukkon ma tanganni, ijamah ma ia lanjar nini ma hubani: Ra do Ahu, susi ma ham! 1:42 Jadi mintor tanggal ma gadam ai humbani, gabe susi ma ia. 1:43 Ipaingat ma ia pangkei-pangkei, dob ai mintor isuruh ma ia laho, 1:44 lanjar ihatahon ma hubani: Jaga ham, ulang das ipatugah-tugah ham in age bani ise! Tapi laho ma ham patidakkon dirimu bani malim, galangkon ham ma na tinitahkon ni si Musa, paboa na dob susi ham, gabe hasaksian bani sidea. 1:45 Tapi ai pe ia luar, ipungkah ma mambaritahon ampa pasarhon na masa ai, gabe seng tarbahen Jesus be masuk hu huta bani na talar; tapi idarat bani ianan na lungun mando Ia, anjaha marrohan do halak hu-Bani hunja-hunja pe.

Markus 2

2:1 Mulakhonsi Ia hu huta Kapernaum, ai ma piga-piga ari ipudi ni ai, jadi tarbogei ma na dob i rumah Ia. 2:2 Jadi martumpu ma buei halak, pala seng siat be ilobei ni labah ai, gabe iambilankon ma bani sidea hata ai. 2:3 Dob ai roh ma halak mamboan na oyangon hu-Bani, ompat halak do na marusungsi. 2:4 Tapi halani seng boi idohori sidea Ia halani na mabuei ai, ibuha sidea ma tayub i babou ni ianan ai; jadi itantan ma hujai podoman hatibalan ni na oyangon ai. 2:5 Mangidah haporsayaon ni sidea ai Jesus, nini ma dompak na oyangon ai: Ambia, domma sasap dousamu! 2:6 Tapi dong do deba hundul ijai sibotoh surat, na mangkatahon ibagas uhurni: 2:7 Mase sonai parsahap ni halak on? Manrisai do Ia! Ise boi manasap dousa sobali Naibata tumang? 2:8 Jadi mintor ibotoh Jesus ma ibagas uhurni, na sonai pingkiran ni sidea ibagas, gabe nini ma dompak sidea: Mase sonai pingkiran ni uhurnasiam? 2:9 Naija do urahan hatahonon bani na oyangon on: "Domma sasap dousamu", atap nahatahon: "Jongjong ma ho, boan ma podomanmu, mardalan ma"? 2:10 Tapi ase ibotoh nasiam na markuasa do Anak ni Manisia in i tanoh on manasap dousa, nini ma dompak na oyangon ai: 2:11 Huhatahon ma bam: "Jongjong ma ho, boan ma podomanmu anjaha mulak ma hu rumahmu". 2:12 Jadi mintor jongjong ma ia, ibuat ma podomanni lanjar laho hu darat, inonoi haganup sidea, pala longang sidea haganup. Ipuji sidea ma Naibata, nini ma: Lape ongga iidah hanami na sonin! 2:13 Jadi laho ma Ia use hu darat, hu topi tao, jadi roh ma haganup na mabuei ai hu-Bani, gabe iajari ma sidea. 2:14 Jadi sanggah na mardalan ai, iidah ma si Lepi, anak ni si Alpeus, hundul i kantor sohei; jadi ihatahon ma bani: Irikkon ma Ahu! Jadi jongjong ma ia laho mangirikkonsi. 2:15 Jadi masa ma, sanggah na hundul Ia mangan i rumahni ai, buei do sijalo sohei pakon pardousa mangkasomani Jesus ampa susianni ai mangan; ai buei do sidea na mangirikkonsi. 2:16 Dob iidah sibotoh surat na humbani Parisei, mangan Ia rapkon pardousa pakon sijalo sohei, nini sidea ma dompak susianni: Rapkon sijalo sohei ampa pardousa do Ia mangan tene! 2:17 Tapi dob ibogei Jesus ai, nini ma dompak sidea: Seng porlu doktor bani na jorgit, bani na boritan do! Seng roh Ahu laho mandilo parpintor, tapi pardousa do. 2:18 Anggo susian ni si Johannes pakon halak parisei siparpuasa do. Jadi roh ma sidea, nini ma hu-Bani: Mase susian ni si Johannes pakon susian ni Parisei marpuasa do, hape susianmu lang? 2:19 Nini Jesus ma dompak sidea: Mintor tarbahen halak na marpesta parunjukon ma marpuasa, sadokah rap ope pakon sidea siparunjuk ai? Sadokah rap ope pakon sidea siparunjuk ai, seng tarbahen sidea marpuasa. 2:20 Tapi na roh ma arini, buaton ma siparunjuk ai humbani sidea; jadi bani ari ai ma sidea marpuasa. 2:21 Seng dong halak, na mandungkapkon hiou na baru bani hiou na dob madotei, ai rigat do use na nidungkapkon na bayu ai hubani na buruk ai, gabe roh bangbangni ma rigatni ai. 2:22 Anjaha seng dong halak, na pauseihon anggur na baru hubani gusi huling-kuling na buruk; ai rigatkonon ni anggur ai do gusi huling-kuling na buruk ai, gabe mambur ma anggur ai, anjaha maseda gusi ai. Tapi anggur na bayu bani gusi huling-kuling na bayu ma. 2:23 Jadi santorap sanggah ari Sabat, mamontas ma Ia hun tongah-tongah ni juma; jadi ipungkah susianni ma mamutiki buyur ni omei sanggah na mardalan ai. 2:24 Jadi nini Parisei ma dompaksi: Tonggor ma, na binahen ni sidea in, na so bulih horjahonon bani ari Sabat! 2:25 Jadi nini ma dompak sidea: Ai seng ongga ibasa nasiam nani na binahen ni si Daud, sanggah tarsosak ia anjaha na loheian ai ia rap pakon hasomanni? 2:26 Imasuki do rumah ni Naibata sanggah panorang ni si Abyatar, sintua ni malim ai, anjaha ipangan do ruti galangan ai, na so malo panganon ni age ise sobali ni malim-malim, anjaha ibere do homa hunjai bani hasomanni. 2:27 Anjaha nini ope bani sidea: Halani jolma do, ase iadongkon ari Sabat, sedo halani ari Sabat ase itompa jolma. 2:28 Halani ai Anak ni jolma in do Tuhan ni ari Sabat homa.

Markus 3

3:1 Dob ai masuk ma Ia use hubagas sada rumah parguruan. Dong ma ijai sahalak na matei lopah tanganni. 3:2 Igompangi sidea ma Ia atap ra do Ia pamalumkonsi bani ari Sabat, ase dong dalan bani sidea mangaduhonsi. 3:3 Jadi nini ma dompak halak partangan na matei lopah ai: Jongjong ma ho hu tongah-tongah on! 3:4 Lanjar ihatahon ma bani sidea: Aha do na patut bahenon bani ari Sabat, na madear do atap na jahat, pagoluhkon do atap mamunuh? Tapi sip ma sidea. 3:5 Jadi ikawahkon ma sidea ibagas marah pakon pusok ni uhur halani tendel ni uhur ni sidea. Anjaha ihatahon ma bani halak ai: Pagostong ma tanganmu! Jadi ipagostong ma tongon, jadi malum ma tanganni ai. 3:6 Jadi luarhonsi Parisei ai, mintor ibahen sidea ma partahian pakon halak Herodiani, barang sonaha bahenon ni sidea laho mamunuhsi. 3:7 Jadi surut ma Jesus rapkon susianni dompak tao ai. Buei tumang do halak hun Galilea pakon hun Judea mangirikkonsi, 3:8 sonai homa hun Jerusalem pakon nagori Idumea pakon na hun dipar ni bah Jordan pakon na hun Tirus ampa Sidon; buei do halak na roh hu-Bani, dob ibogei sidea buei ni na binahenni ai. 3:9 Jadi isuruh ma susianni pasirsirhon sada parau Bani halani na mabuei ai, ase ulang isosak sidea Ia. 3:10 Ai buei tumang do sidea ipamalum, gabe marurup ma sagala na boritan roh manjamahsi. 3:11 Anjaha sagala partonduy na mabutak, dob iidah sidea Ia, marsombah ma hu-Bani lanjar dilo-dilo: Ham do Anak ni Naibata! 3:12 Tapi gomos do sidea ipalumba, ase ulang ipatugah-tugah sidea pasal Ia. 3:13 Dob ai tangkog ma Ia hu sada dolog, jadi idilo ma hu lobeini halak harosuh ni uhurni, gabe roh ma sidea hu-Bani. 3:14 Ipabangkit ma sapuluh dua halak bahen hasomanni, sisuruhonni marambilan, 3:15 anjaha na markuasa mangusir setan-setan. 3:16 Ase ipabangkit ma na sapuluh dua on: Si Simon na igoran homa si Petrus; 3:17 si Jakobus, anak ni si Sebedeus, pakon si Johannes, sanina ni si Jakobus ai. Igoran do sidea Boanerges, artini: anak ni longgur. 3:18 Ambah ni ai si Andareas, si Pilippus, si Bartolomeus, si Mateus, si Tomas, si Jakobus anak ni si Alpeus, si Tadeus, si Simon halak Kana, 3:19 pakon si Judas Iskariot, partahi-tahi ai. 3:20 Jadi masuk ma Ia hubagas sada rumah. Marurup ma use roh jolma, pala seng sompat sidea mangan. 3:21 Dob ibogei sindohorni ai, roh ma sidea laho mangalopsi, halani nini halak: Na podouan do Ia. 3:22 Ia sibotoh surat na roh hun Jerusalem, nini sidea do: Na siniaran ni Belsebul do Ia, anjaha mangunsagahkon kopala ni setan do iusir setan-setan ai. 3:23 Jadi idilo ma sidea hu lobeini, anjaha marlimbaga ma Ia marsahap pakon sidea: Sonaha ma ra setan mangusir hasomanni setan? 3:24 Anggo marsalisih sada harajaon samahsi, seng anjai totap harajaon ai. 3:25 Anjaha anggo adong sada rumah tangga marsalisih samahsi, seng anjai totap be rumah tangga ai. 3:26 Ase anggo marsilawanan setan ai samahsi anjaha marsalisih, seng totap be ia, tapi na laho bois ma ia. 3:27 Seng boi imasuki halak rumah ni halak na gogoh, laho manrampas ugasni, anggo lang lobei isangkut na gogoh ai; dob ai pe ase tarbuatsi ugas-ugasni. 3:28 Na sintong do hatangkon bani nasiam: Tarsasap do sagala dousa ni jolma, ronsi panrisaion ni sidea; 3:29 tapi halak na mangapasi Tonduy Na pansing, seng dapotan hasasapan ni dousa ia ronsi sadokah ni dokahni; mangonai do bani utangni ai ronsi sadokah ni dokahni. 3:30 Sonai ma ihatahon, halani nini sidea: Partonduy na mabutak do Ia. 3:31 Jadi roh ma inangni pakon saninani, i darat do sidea jongjong, anjaha isuruh sidea ma na mandilosi. 3:32 Hundul do na mabuei ai manliotisi, nini sidea ma dompakSi: Tonggor ma, i darat an do inangmu, saninamu pakon botoumu, laho mangindahi Ham! 3:33 Ibalosi ma sidea, nini ma: Ise do goranon inangku anjaha ise do saninangku? 3:34 Jadi ikawahkon ma na hundul manliotisi ai, nini ma: On do inangku, on do saninangku! 3:35 Ai na mangkorjahon harosuh ni Naibata, ai do saninangku, ai do botouhu, ai do inangku!

Markus 4

4:1 Jadi iulaki Jesus ma use mangajari i topi tao ai. Martumpu ma buei halak hu lobeini, pala imasuki sada parau na i tao ai, lanjar hundul ma ijai. I topi tao ai do anggo halak na mabuei ai ganup. (bd. 2:13.) 4:2 Jadi buei ma iajarhon bani sidea marhitei limbaga, nini ma bani sidea marhitei pangajarionni ai: 4:3 Tangar ma! Na laho do sada halak panabur manaburhon bonihni. 4:4 Jadi sanggah na manabur ai ia, madabuh ma deba bonih ai hu dalan, gabe roh ma manuk-manuk mamagutisi. 4:5 Na deba nari madabuh hu tanoh na batuon, na so sadiha hapal tanohni, jadi mintor tubuh ma, halani na so bagas ai tanohni. 4:6 Tapi sanggah na lambin gijang ari, melus ma ai lanjar matei, halani na so marurat ai. 4:7 Ia na deba nari madabuh do hutongah-tongah ni parhupi-hupian; lambin marbanggal ma ai rap pakon hupi-hupi ai; ipisat ma ai, gabe seng saud marbuah. 4:8 Anjaha na deba nari use, madabuh do hu tanoh na madear; tubuh ma ai, manggargar anjaha marbuah, adong do na tolu puluh lompit ampa na saratus lompit. 4:9 Lanjar nini ma: Barang ise parpinggol na marpanangar, itangar ma ai! (ay. 23.) 4:10 Jadi sanggah sahalaksi mando tading, isungkun halak na mangkasomanisi ampa na sapuluh dua ai ma Ia pasal limbaga ai. (bd. 3:14.) 4:11 Gabe ihatahon ma bani sidea: Ibere do bannima rusia ni harajaon ni Naibata, tapi bani halak na idarat, marhitei limbaga do ganup ipadas ai, (1 Kor. 5:12.) 4:12 ase, age pe ikawahkon sidea ai, seng iidah, anjaha age pe ibogei, seng iarusi, ase ulang mubah uhur ni sidea anjaha sasap dousa ni sidea. (Jes. 6:9, 10.) 4:13 Dob ai nini ma dompak sidea: Seng iarusi hanima limbaga in? Anggo sonai, sonaha ma boi arusannima ganup limbaga in? 4:14 Ia sipanabur ai, hata ai do isaburhon. 4:15 Ia na bani dalan ai, ai ma halak panaburan ni hata ai; anjaha dob ibogei sidea hata ai, mintor roh do sibolis mambuat hata na dob sinaburhon hubagas uhur ni sidea ai. 4:16 Anjaha sonai do homa na sinaburhon bani tanoh na batuon ai, dob ibogei sidea hata ai, mintor malas do uhur ni sidea mambogei ai; 4:17 tapi seng marurat ai ibagas uhur ni sidea, tongkin hansa tahan sidea. Ai anggo masa hamarsikon atap parburuon halani hata in, mintor surut do sidea. (Kol. 2:7.) 4:18 Anjaha na deba nari ai ma na sinaburhon hu tongah-tongah ni hupi-hupi ai. Ibogei sidea do hata ai, 4:19 tapi masuk ma hubagas uhur ni sidea holsoh-holsoh parduniaon, panarik ni habayakon sipangoto-otoi in, ampa hisap-hisap na legan, jadi ipisat ma hata ai, gabe seng saud marbuah. 4:20 Tapi na sinaburhon bani tanoh na madear ai, ai ma halak na mambogei hata in anjaha na manjalosi, gabe marbuah, adong na tolu puluh lompit, onom puluh lompit ampa saratus lompit. 4:21 Dob ai ihatahon ma bani sidea: Ai adong do halak na pagara palita, ase inahkon ai itoruh ni tapongan atap itoruh ni podoman? Ai lang huatas ni parpalitaan do ai inahkon? 4:22 Ai seng dong na ponop, na so talar use, anjaha seng dong rusia, na so tarbotoh use. (Mat. 10:26; Luk. 12:2.) 4:23 Barang ise parpinggol na marpanangar, itangar ma in! 4:24 Nini ope dompak sidea: Paruhurhon hanima ma na binogeinima! Parsuhatan na sinuhatkonnima do suhatkonon bannima, tambahkononni ope tene bannima. (Mat. 7:2.) 4:25 Ai halak na marnadong, bereon ope bani, tapi halak na marnalang, buaton ope na adong bani hinan. (Mat. 13:12; 25:29.) 4:26 Dob ai nini ma: Ia harajaon ni Naibata, ai ma songon pambahen ni halak, na manaburhon bonih hu jumani. 4:27 Na modom do ia borngin, anjaha puho arian. Martumbor do ai, dob ai marbuhutanoh, na so pamotohan ni parjuma ai. (Ps. 127:2; Jak. 5:7.) 4:28 Ai humbani gogohni sandiri ipatubuh tanoh ai do lobei hayuni, dob ai buyurni, dob ai gandum na porngis ibagas buyurni ai. 4:29 Anjaha dob masak gandum ai, mintor isuruh ma panabi, ai jumpah ma pariama. (Pangk. 14:15.) 4:30 Dob ai nini ma: Hubani aha ma pausihonta harajaon ni Naibata? Hubani aha ma limbagahononta? 4:31 Usih do ai bani batu ni loharum. Sanggah isaburhon ai hu tanoh, ai do silumatan humbani sagala batu ni suan-suanan. 4:32 Tapi dob isaburhon, podas do ai banggal, gabe gijangan humbani sagala suan-suanan na boi siparlowohon; mardangkahi do ai banggal-banggal, gabe boi do marasari manuk-manuk na i awang-awang itoruh ni linggomni. 4:33 Isahapkon do hata ai bani sidea, marhitei buei limbaga na sonai, domu hubani na tarjalo sidea. (Joh. 16:12.) 4:34 Seng dong ihatahon bani sidea, anggo seng marhitei limbaga; tapi pulig do ipatorang haganupan ai bani susianni. 4:35 Lanjar bani na sadari ai, bodhonsi ari, nini Jesus ma dompak susianni: Laho ma hita marparau hu dipar ai! 4:36 Jadi isuruh sidea ma mulak halak na mabuei ai, anjaha iboan sidea ma Jesus, sonai tumang, ibagas parau ai. Adong do parau na legan mangirikkon sidea. 4:37 Dob ai roh ma haba-haba na doras, anjaha gilumbang pe mangkajomba ma hubagas parau, gabe igoki bah ma parau ai. 4:38 Tapi modom do anggo Jesus, marbantal, hampit pudi ni parau ai. Ipuhoi sidea ma Ia, nini: Ham Guru! Ai seng parduli Ham, age magou hita? 4:39 Jadi puho ma Ia, ihata ma logou ai, anjaha nini ma dompak tao ai: Sip ma! Soh! Jadi soh ma logou ai, anjaha minop tao ai. (bd. 6:51; Ps. 107:23-29; Pod. 30:4.) 4:40 Dob ai nini ma dompak sidea: Mase ma mabiar hanima? Ai seng dong ope haporsayaonnima? 4:41 Jadi mabiar tumang ma sidea, anjaha nini ma samah sidea: Ai ise do on, ase logou ampa tao pe mambalosisi?

Markus 5

5:1 Dob ai das ma sidea hu dipar ni tao ai, hu nagori Gerasa. (bd. 4:35.) 5:2 Jadi sanggah na mandarat ai Ia hun parau ai, mintor roh ma hun tanoman sada halak na setanon manjumpahkonsi. 5:3 I tanoman do ia marianan, anjaha seng dong na manangkutsi, age marhitei rantei. 5:4 Ai domma gati isangkut tangan ampa naheini, tapi irutuskon do rantei na bani tanganni ampa na bani naheini ai, seng dong na boi patundukkonsi. 5:5 Arian borngin sai i tanoman do ia atap i pardologan; sai doruh-doruh do ia, anjaha ibogbogi dirini bani batu. 5:6 Sanggah na tinatapni Jesus humbani na daoh, roh ma ia marlintun, lanjar manrogop i lobeini, 5:7 anjaha marsora na gogoh ma ia dilo-dilo, nini ma: Mangaha Ham roh bangku, Jesus, Anak ni Naibata, Sigijangan in? Marhitei goran ni Naibata, huelek-elek ma Ham, ulang ma arsik Ham ahu! (bd. 1:24; 3:11.) 5:8 Halani domma ihatahon Jesus hubani: Luar ma ho humbani halak on, ale setan! 5:9 Dob ai isungkun ma ia: Ai ise do goranmu? Jadi nini ma mambalosi: Legion do goranku, ai buei di hanami. (Luk. 8:2.) 5:10 Jadi sai ielek-elek ma Ia, ase ulang iusir sidea hun nagori ai. 5:11 Jadi adong ma bani raboyon na ijai ai sada hulanan banggal babuy, manggagati. 5:12 Jadi ielek-elek sidea ma Ia; Suruh Ham ma hanami hubani babuy ai, ase ai imasuki hanami. 5:13 Jadi ibalosi ma sidea, gabe luar ma tonduy na butak ai, anjaha imasuki ma babuy ai. Anjaha babuy na sahulanan ai pe, adong do ai hira-hira dua ribu; marpojong ma ai hun tolping ai hubagas tao ai, gabe marmateian ma, mogap ibagas tao ai. 5:14 Anjaha parmahan ai pe maporus ma; ibaritahon sidea ma ai bani halak na i huta-huta ampa na i juma. Jadi marrohan ma sidea, laho mangidah na dob masa ai. 5:15 Jadi das ma sidea bani Jesus, anjaha iidah sidea ma na setanon, na siniaran ni Legion ai hinan, hundul dear marpakeian anjaha torang maruhur, gabe mabiar ma sidea. 5:16 Anjaha halak na mangidah na masa ai pe, ibaritahon ma hubani sidea pasal na siniaran ni setan ai ampa pasal babuy ai. 5:17 Jadi ielek-elek sidea ma Ia, ase laho Ia hun nagori ni sidea ai. 5:18 Dob ai sanggah na laho masuk Ia hu parau ai, ielek-elek na setanon ondi ma Jesus, atap boi do ia mangkasomanisi. 5:19 Tapi seng ipalopas, tapi ihatahon ma hubani: Mulak ma ho hu rumahmu, hubani diha-dihamu! Patugah ma bani sidea, buei ni nabinahen ni Tuhan in bam, ampa pangidopini bam. (Ps. 66:16; 126:31.) 5:20 Ia pe mulak ma hu rumahni, anjaha ibaritahon ma i Dekapolis, banggal ni na binahen ni Jesus hubani, gabe longang ma halak haganup. (bd. 7:31; Mat. 4:5.) 5:21 Jadi dob das use Jesus marparau hu dipar ai, marurup ma roh halak na mabuei ai hu-Bani, sanggah i topi ni tao ai ope Ia. 5:22 Anjaha roh ma homa sada halak kopala ni parguruan ai, goranni si Jairus; jadi dob iidah Jesus, manrogop ma ia ilambung ni naheini, 5:23 anjaha sai ielek-elek ma Ia, nini ma: Mangkatarhatos do nuan borungku. Roh ma Ham, tampeihon Ham ma tanganmu bani, ase malum ia anjaha manggoluh. (bd. 7:32.) 5:24 Jadi laho ma Jesus rap pakonsi, anjaha buei do halak na mangirikkonsi, pala marsiasak-asakan sidea inggot hu-Bani. 5:25 Jadi adong ma ijai sada naboru, na dob sapuluh dua tahun sai roh marnunut pantang ni hiouni. (3 Mus. 15:25.) 5:26 Domma buei panaronanni humbani sipanambari, anjaha bois do artani bahen partambarni, tapi seng marnidok, lambin parahni do tente naboritni ai. 5:27 Jadi dob ibogei barita ni Jesus, roh ma ia rap pakon halak na mabuei ai hun pudi, anjaha ijamah ma hiouni, (bd. 6:56; Luk. 6:19.) 5:28 ai nini uhurni do ibagas: Hujamah gelah hiouni ai, malum ma huahap. 5:29 Jadi mintor maronti ma roh daroh ai, anjaha iahapkon ma bani angkulani, na dob malum ia. 5:30 Anjaha iahapkon Jesus ma, na luar ai gogoh humbani dirini, gabe marhusor ma Ia dompak halak na mabuei ai anjaha nini ma: Ise manjamah hiouhu? 5:31 Jadi nini susianni ai ma hu-Bani: Idah Ham ma panosak ni halak na mabuei in Bamu, mase ma ihatahon Ham: Ise manjamah hiouhu? 5:32 Tapi ikawahkon ma inggot laho mangidah atap ise do na mambahen ai. 5:33 Jadi mabiar ma naboru ai anjaha hitir-hitir, ai ibotoh do aha na dob masa bani, gabe roh ma ia manrogop hu lobeini, anjaha ipatugah ma haganup hu-Bani sonaha na sasintongni. 5:34 Tapi nini ma dompaksi: Haporsayaonmu do na paluahkon ham, inang! Mulak ma ham ibagas damei, anjaha malum ma naboritmu in! (bd. 10:52.) 5:35 Sanggah na marsahap ai ope ia, adong ma na roh hun rumah ni sintua ni parguruan ai na patugahkon: Domma matei borumu! Mase sunsahan be Guru in? 5:36 Tapi seng iparuhurhon Jesus hata ni halak na roh ai, gabe ihatahon ma hubani sintua ai: Ulang mabiar! Porsaya ma lah! 5:37 Anjaha ise pe lang na ilopas Jesus mangirikkonsi, sobali si Petrus, si Jakobus ampa si Johannes, sanina ni si Jakobus ai. 5:38 Jadi das ma sidea hu rumah ni sintua ni parguruan ai, gabe iidah ma na gosou, na tangis-tangis anjaha na mandoruhi gogoh-gogoh. 5:39 Anjaha dob masuk Ia, nini ma dompak sidea: Mase ma gosou nasiam anjaha tangis-tangis? Seng na matei dakdanak in, na modom do! (Joh. 11:11.) 5:40 Jadi itatawai sidea ma Ia. Dob isuruh sidea haganup mandarat, iarahkon ma bapa ampa inang ni dakdanak ai, sonai homa na mangkasomanisi ai, gabe masuk ma sidea hu kamar hatibalan ni dakdanak ai. 5:41 Ijolom ma tangan ni dakdanak ai, anjaha nini ma hubani: Talita kumi! artini: Ale Boru, Ahu mangkatahon bam, puho ma! (Luk. 7:14.) 5:42 Jadi mintor puho ma dakdanak ai, lanjar mardalan, ai domma das umurni sapuluh dua tahun, gabe longang tumang ma sidea. 5:43 Tapi gomos ma sidea ipandang, ase ulang adong na mambotoh ai; lanjar ihatahon ma ase ibere ia mangan. (bd. 1:44; 7:24, 36; 8:26, 30; 9:9, 30.)

Markus 6

6:1 Jadi bingkat ma Ia hunjai, laho hu huta hagodanganni, anjaha iirikkon susianni do Ia. 6:2 Anjaha sanggah ari Sabat mangajar ma Ia i rumah parguruan. Jadi longang ma halak simbuei na manangar ai, nini sidea ma: Hunja do in roh Bani? Hapentaran aha do na binere in Bani? Anjaha sonaha do, ase boi jadi halongangan na sonai marhitei tanganni? (Joh. 7:15.) 6:3 Ai lang Ia do tukang in, anak ni si Maria, abang ni si Jakobus, si Joses, si Judas ampa si Simon? Ai lang i lambungta do botouni? Jadi sangsi ma sidea pasalsi. 6:4 Tapi nini Jesus ma dompak sidea: Sabonar na so marsangap do nabi anggo i tanoh hagodanganni, itongah-tongah ni diha-dihani ampa i rumahni sandiri. (Joh. 4:44.) 6:5 Anjaha seng tarhorjahonsi tanda halongangan ijai, pitah piga-piga halak do hansa tarpamalumsi, marhitei na manampeihon tanganni bani sidea. 6:6 Jadi longang ma uhurni, halani na so porsaya ai sidea. Lanjar isiari ma huta-huta na i nagori ai, laho mangajari. 6:7 Dob ai idilo ma na sapuluh dua halak ai, lanjar isuruh ma sidea mardua-dua, anjaha ibere ma bani sidea kuasa dompak tonduy na mabutak. (Luk. 10:1.) 6:8 Ihatahon do bani sidea, ase ulang iboan atap aha hu pardalanan, barang ruti, barang tas, barang duit ibagas gondit sobali ni tungkot. 6:9 Boi do sidea marsipatu, tapi ulang ma marbaju dua lapis. 6:10 Ihatahon do homa bani sidea: Anggo masuk hanima hu sada rumah, ijai ma hanima soh, paima bingkat use. 6:11 Anggo adong sada huta, na so ra manjalo hanima, barang na so ra manangihon hanima, tadingkon hanima ma ai, anjaha pirpirhon hanima ma orbuk na longkot bani naheinima, bahen hasaksian bani sidea. (Lah. 13:51; 18:6.) 6:12 Jadi bingkat ma sidea marambilan mangkatahon paubahkon uhur. (Luk. 10:34; Jak. 5:14.) 6:13 Buei do setan iusir sidea, anjaha buei homa na boritan iminaki, gabe malum iahap sidea. 6:14 Tarbogei ma pasal Jesus bani raja Herodes, ai domma tarbarita goranni, gabe nini ma: Domma puho si Johannes Pandidi humbani na matei, ai do ase sonai marhagogohon Ia. 6:15 Na legan mangkatahon: Si Elias do in. Na legan use mangkatahon: Nabi do ia, usih songon nabi-nabi na legan ai. (bd. 8:28; Mat. 16:14.) 6:16 Tapi dob ibogei si Herodes ai, nini ma: Si Johannes, na dob hutampul ondi uluni, ai do na puho humbani na matei. 6:17 Ai isuruh si Herodes do ijia na manangkap si Johannes anjaha na manutupsi halani si Herodias, parinangon ni anggini, si Pilippus, na binuatni ai gabe jolmani. 6:18 Ai ihatahon si Johannes do hubani si Herodes: Seng bulih buatonmu nasianggimu! 6:19 Halani ai sogam ma uhur ni si Herodias mangidahsi; sai sihol do bunuhonni ia, tapi seng tarpasaudsi. (3 Mus. 18:16.) 6:20 Ai si Herodes pe mabiar do mangidah si Johannes, ai ibotoh halak parpintor do ia anjaha na susi, gabe iondingi ma ia. Anggo itangar ambilanni, sosak tumang do iahap, tapi marosuh do ia manangarsi. 6:21 Tapi jumpah ma panorang na dear honsi, ai ma ari partubuh ni si Herodes, sanggah na mambahen pesta-pesta ia bani pagawai-pagawai tinggi, panglima-panglima, ampa na sangap-sangap i Galilea. 6:22 Masuk ma ijia boru ni si Herodias lanjar manortor ilobei ni sidea, gabe malas ma uhur ni si Herodes ampa tamueini ai ibahen. Jadi nini raja ai ma bani anak boru ai: Pindo ma hubangku atap aha rosuh ni uhurmu, sai bereonku do ai bam. (Est. 5:3, 6.) 6:23 Pala do ibijahon bani: Atap aha pangindoanmu, ronsi satongah ni harajaonku, sai na bereonku do. 6:24 Jadi laho ma ia, isungkun ma inangni: Aha ma pindoonku? Jadi nini ma: Ulu ni si Johannes pandidi ma pindo! 6:25 Jadi tarolos ma ia masuk hulobei ni raja ai, nini ma mangindo: Bere ham ma bangku sonari ulu ni si Johannes pandidi iatas pinggan! 6:26 Pusok tumang ma uhur ni raja ai, tapi halani bijani ai bani tamueini ai, seng ra ia manulak pangindoanni ai. 6:27 Jadi mintor isuruh raja ai ma upasni sahalak, ihatahon ma mangalop ulu ni si Johannes. Laho ma halak ai, iponggol ma ulu ni si Johannes i tutupan; 6:28 iboan ma ai iatas ni sada pinggan, lanjar ibere ma bani anak boru ai, anjaha anak boru ai ma padaskon ai bani inangni. 6:29 Dob ibogei susianni pasal ai, roh ma sidea, ibuat sidea ma bangkei ni ai lanjar itanom. 6:30 Dob ai mulak ma susian ai bani Jesus, ipatugah sidea ma haganup na hinorjahon ampa na niajarhon ni sidea. (ay. 7; Luk. 9:10.) 6:31 Nini Jesus ma hubani sidea: Laho ma hita bani ianan na lungun, ase marsaran otik. Ai buei do halak na laho roh bani sidea, gari mangan seng sompat. (bd. 3:20.) 6:32 Jadi laho ma sidea marparau hu sada ianan na lungun, laho papuligkon diri, 6:33 tapi buei do halak mangidah anjaha na mambotoh huja sidea laho, gabe marrohan ma sidea hun huta-huta ai mardalan nahei laho hujai, anjaha ilobei sidea do Ia. 6:34 Sanggah mandarat Jesus, iidah ma halak na mabuei ai, jadi maidop ma uhurni mangidah sidea, ai songon biri-biri na so marparmahan do sidea, gabe buei ma ipodahkon bani sidea. (Mat. 9:36.) 6:35 Jadi marayak bod ari, roh ma susianni hu-Bani, nini ma: Ianan na lungun do on, anjaha domma bod ari. (bd. 8:1-9.) 6:36 Suruh Ham ma sidea, ase boi sidea laho hu dusun-dusun ampa huta-huta na inggot in, laho mamboli sipanganon bani sidea. 6:37 Tapi nini Jesus ma mambalosi sidea: Bere hanima ma sidea mangan! Nini sidea ma hu-Bani: Ai maningon laho do hanami mamboli ruti harga dua ratus dinar, laho mambere sidea mangan otik? 6:38 Jadi nini ma dompak sidea: Piga dong ruti bannima? Tonggor lobei! Dob ipapangkei sidea, nini ma: Lima ruti ampa dua dengke. 6:39 Dob ai isuruh ma sidea hundul ganupan bani poyon-poyon ai, sasaholmouan. 6:40 Jadi hundul ma sidea marsasaratus ampa marlima-lima puluh saholmouan. 6:41 Dob ai ibuat Jesus ma ruti na lima ampa dengke na dua ai, ikawahkon ma hu atas, ipasu-pasu ma ai anjaha ipartopik. Ipambere ma ai bani susianni ai, ase sidea use mamberei halak na mabuei ai. Anjaha dengke na dua ai pe ibagihon ma bani sidea haganup. (bd. 7:34; Joh. 11:41; 17:1.) 6:42 Mangan do sidea haganup, anjaha bosur bei. (bd. 8:8.) 6:43 Ipatumpu sidea ma teba-teba, humbani ruti ampa humbani dengke ai, gok sapuluh dua bantei. 6:44 Ia buei ni na mangan ruti ai, dong do lima ribu dalahi. 6:45 Sanggah na palaohon halak na mabuei ai ope Ia, mintor ijuljul Jesus ma susianni ai masuk hu parau, laho palobeihon hu dipar, hu Betsaida. 6:46 Anjaha dob misir halak ganup, tangkog ma Ia hu dolog, laho martonggo. (Luk. 6:12.) 6:47 Dob golap ari domma itongah tao parau ai, anjaha sahalak Jesus mando idarat. 6:48 Iidah ma sidea sunsah manlugai halani logou na roh hun lobei. Hira-hira tahuak dayok na parlobei roh ma Ia manjumpahkon sidea mardalan iatas bah, anjaha songon na sihol lopusanni ma sidea. 6:49 Tapi mangidahsi na mardalan ai iatas bah, iagan sidea ma begu-begu do ai, gabe mandoruhi ma sidea. (Luk. 24:37.) 6:50 Haganup do sidea na mangidah ai anjaha gobir bei do. Jadi mintor iparsahapkon ma sidea, nini ma: Tenger ma uhurnima! Ahu do on! Ulang mabiar! 6:51 Lanjar naik ma Ia manjumpahkon sidea hubagas parau ai, anjaha logou pe minop ma. Jadi lambin longang tumang ma sidea, (bd. 4:39.) 6:52 ai na masa pasal ruti ai pe seng ope iartihon sidea, ai mapir ope uhur ni sidea. (bd. 8:17.) 6:53 Dob mandipar das ma sidea hu nagori Genesaret, jadi marlabuh ma sidea ijai. 6:54 Anjaha mandaratkonsi sidea hun parau ai, mintor itanda halak do Ia. 6:55 Jadi idalani sidea ma ganup nagori ai, anjaha ipamboan sidea ma sagala na boritan bani podomanni bei barang ija ibogei sidea adong Jesus. 6:56 Anjaha huja pe Ia laho, hu dusun-dusun atap hu huta-huta atap hu kota pe, iparpatibal halak ma na boritan i alaman, anjaha ipindo sidea ma bani Jesus, ase ilopas sidea pala manjamah sisi ni pakeianni gelah. Anjaha haganup halak na manjamah ai, malum do. (bd. 5:28; Luk. 6:19.)

Markus 7

7:1 Dob ai, sanggah roh martumpu hu-Bani Parisei ampa deba humbani sibotoh surat, na roh hun Jerusalem, 7:2 jadi iidah sidea ma deba susianni mangan ruti marhitei tangan na butak, ai ma, seng palobei marburih. (Luk. 11:38.) 7:3 Ia halak Parisei ampa haganup halak Jahudi, seng ra mangan anggo lang palobei tangkas iusah tanganni mangihutkon adat ni na lobei. (Joh. 2:26.) 7:4 Anjaha anggo mulak hun tiga, seng mangan sidea, anggo lang palobei maridi; anjaha buei ope adat na legan idalankon sidea, songon na mamurihi panginuman, gendi ampa gusi tombaga. (Mat. 23:25.) 7:5 Jadi isungkun Parisei ampa sibotoh titah ai ma Ia: Mase ma lang iihutkon susianmu adat ni ompung na lobei, ai mangan ruti do sidea marhitei tangan na butak? 7:6 Jadi nini ma dompak sidea: Sintong do panjahaion ni si Jesayas pasal nasiam, ale sipakulah-kulah, songon na tarsurat ai: Ipasangap bangsa on do Ahu marhitei bibirni, tapi uhurni daoh do hum-Bangku! (Jes. 29:13.) 7:7 Soya do pambahenan ni sidea pasangapkon Ahu, ai titah-titah ni jolma do ipodahkon sidea. 7:8 Tading do titah ni Naibata ibahen nasiam, halani mandalankon adat na humbani jolma. 7:9 Nini ope bani sidea: Patut ma tongon iparnalang nasiam titah ni Naibata, halani mandalankon adatnasiam. 7:10 Ai ihatahon si Musa do namin: Pasangap ma bapamu ampa inangmu! Ambah ni ai: Barang ise na mamurai bapani atap inangni maningon bunuhon do. (2 Mus. 20:12; 21:17; Pod. 28:24.) 7:11 Tapi nasiam mangkatahon: Barang ise na mangkatahon bani bapani atap inangni: "Korban"! artini: Sagala na patut pangurupingku bamu, domma na galangkon. 7:12 Jadi seng be ilopas nasiam ia mambahen atap aha bani bapani atap inangni, 7:13 gabe iparseda nasiam do hata ni Naibata marhitei adat-adat na pinadalan nasiam in. Anjaha buei do na sonin idalankon nasiam. (ay. 8.) 7:14 Dob ai idilo ma use halak na mabuei ai, nini ma dompak sidea: Nasiam haganup, tangihon ma Ahu anjaha parimbagaskon nasiam ma. 7:15 Seng butak jolma halani na masuk hun darat hubagas dirini, tapi na luar humbani jolma ai, ai do na pabutakkonsi. (Rom. 14:14; Tit. 1:15; Lah. 10:15.) 7:16 Parpinggol na marpanangar, itangihon ma in! (bd. 4:23.) 7:17 Dob masuk Ia hu rumah, holang humbani na mabuei ai, isungkun susianni ma Ia pasal limbaga ai. 7:18 Jadi nini ma dompak sidea: Dihut do hape hanima seng mangarusi ai? Ai seng dapot uhurnima, na so tarbahen butak jolma bahenon ni sagala na masuk hun darat hubagas dirini? 7:19 Ai seng masuk ai hubagas uhurni; hubagas boltokni do ai laho, dob ai kaluar bani ianan na suhi. (Marhitei ai torang pansing do sagala sipanganon). 7:20 Tapi nini ma use: Na kaluar humbani jolma, ai do pabutakkonsi. 7:21 Ai humbagas, humbani uhurni jolma do roh uhur na jahat, parriah-riahon, panangkoon, pamunuhon, (Jak. 1:14, 15; Rom 7:14; Gal. 5:17; 1 Mus. 6:5.) 7:22 parbangkison, pangkauton, hajahaton, panipuon, parsondukbungkason, subil, panreheion, gijang ni uhur ampa pamunuhon. 7:23 Haganup hajahaton ai humbagas do rohni, ai do na pabutak jolma. 7:24 Dob ai bingkat ma Ia hunjai, laho hu nagori Tirus. Masuk ma Ia hubagas sada rumah, nini uhurni, ase ulang adong na mambotoh ai, tapi seng tarponopkon. 7:25 Tapi mintor tarbogei do ai bani sada naboru, adong do sada boruni siniaran ni setan. Jadi roh ma ia, manrogop hulobei ni naheini. 7:26 Ia naboru ai, parbegu do, bangsa Sirofenisia, jadi ipangindo ma hu-Bani, ase iusir setan ai humbani boruni ai. 7:27 Tapi nini ma mambalosisi: Bosur ma lobei dakdanak; ai seng patut buaton ruti humbani dakdanak, laho mamberehon ai bani baliang. 7:28 Jadi marbalos ma ia, nini ma hu-Bani: Tongon do ai Tuhan, tapi ipangan baliang na itoruh ni meja do rimah-rimah ni dakdanak. 7:29 Jadi nini Jesus ma hubani: Halani hatamu ai, laho ma ham, domma mandarat setan ai humbani borumu ai. 7:30 Laho ma tongon ia, jadi jumpahsi ma boruni ai modom-modom i podoman, anjaha setan ai domma luar. 7:31 Dob ai itadingkon ma use nagori Tirus, manlopusi Sidon laho dompak tao Galilea, gabe das ma Ia hu nagori Dekapolis. (Mat. 15:29, 31.) 7:32 Jadi adong ma na mamboban hu-Bani sada halak na nengel anjaha longah, anjaha ipindo ma hu-Bani, ase itampeihon tanganni hujai. (bd. 6:23.) 7:33 Jadi iarahkon Jesus ma ia hubani na suhi, holang humbani halak na mabuei ai; ipamasuk ma jari-jarini hubagas pinggol ni halak ai, martijur ma Ia anjaha ijamah ma dilahni, (bd. 8:23.) 7:34 lanjar mangkawah ma Ia dompak datas, marhosah ganjang, dob ai nini ma: Hepata! artini: Mungkab ma! (bd. 6:41; Joh. 11:41.) 7:35 Jadi mungkab ma tongon pinggolni anjaha harhar sangkut-sangkut ni dilahni, gabe dear ma parsahapni. 7:36 Ipandang ma sidea, ase ulang ipatugah-tugah na masa ai atap bani ise pe. Tapi lambin ipandang, lambin iompot sidea do mambaritahon ai. (bd. 1:43-54; 5:43.) 7:37 Jadi longang tumang ma sidea, nini ma: Dear do haganup ibahen: Gabe marpambogei do na nengel, anjaha marsahap ia na longah. (1 Mus. 1:31; Mat. 15:30, 31.)

Markus 8

8:1 Bani panorang ai, sanggah martumpu use buei halak, anjaha seng dong sipanganon bani sidea, jadi idilo Jesus ma susianni anjaha nini ma dompak sidea: 8:2 Maidop do uhurhu mangidah halak na mabuei on, ai domma tolu ari iihutkon sidea Ahu, anjaha seng dong sipanganon bani sidea. 8:3 Anggo husuruh sidea mulak lang palobei mangan, gayuran ma sidea itongah dalan, ai parhuta na daoh do sidea deba. 8:4 Jadi ibalosi susian ai ma Ia: Hunja ma boi buaton ruti, laho pabosur sidea i halimisan on? 8:5 Jadi isungkun ma sidea: Piga do adong ruti bannima? Nini sidea ma: Pitu! 8:6 Dob ai isuruh ma halak na mabuei ai hundul i tanoh. Ibuat ma ruti na pitu ai, anjaha dob ihatahon tonggo tarima kasih, ipartopik ma ai anjaha ipambere bani susianni, ase iidangkon sidea ai bani halak na mabuei ai. (2 Raj. 4:42-44.) 8:7 Dong do homa dengke otik bani sidea. Dob ipasu-pasu, isuruh ma ase ibagihon. 8:8 Jadi mangan ma sidea bosur bei, lanjar ipatumpu ma teba-teba ai gok pitu tapongan. 8:9 Adong do sidea ompat ribu halak. Dob ai isuruh ma sidea mulak, 8:10 anjaha Ia pe, masuk ma hubagas parau rap pakon susianni ai, gabe das ma sidea hu nagori Dalmanuta. 8:11 Roh ma halak Parisei, jadi ipungkah sidea ma marsual pakonsi. Ipindo sidea ma tanda hun langit, laho manlajousi. (Mat. 12:38; Luk. 11:29.) 8:12 Marhasoman hoih-hoih humbagas uhurni, nini Jesus ma: Mase ma mangindo tanda na sasundut on? Na sintong do hatangkon bani nasiam: Seng porlu bereon tanda bani na sasundut on! 8:13 Jadi itadingkon ma sidea, anjaha masuk ma use hubagas parau, lanjar laho mandipar. 8:14 Tapi lupa do susian ai mamboan ruti, anjaha pitah sada do hansa ruti ibagas parau ai. 8:15 Jadi ipalumba ma sidea, nini: Pangkei anjaha jaga ma hanima pasal ragi ni Parisei ampa ragi ni si Herodes. (bd. 3:6; Luk. 12:1; 1 Kor. 5:6; Gal. 5:9.) 8:16 Jadi marsahap ma sidea samah sidea: Ai ma da, halani na so mamboan ruti ai hita. 8:17 Jadi dob ibotoh ai nini ma dompak sidea: Mase ma isahapkon hanima, na so adong ai ruti bannima? Seng ope ibotoh hanima anjaha iarusi hanima? Tong ope mapir uhurnima? (bd. 6:52; Luk. 24:25.) 8:18 Ai lang marpangidah hanima, age adong matanima? Ai lang marpambogei hanima, age adong pinggolnima? (bd. 4:12.) 8:19 Ai seng idingat hanima be sanggah na hupartopik ondi lima ruti bani na lima ribu halak ondi, anjaha piga tapongan teba-tebani ipatumpu hanima? Nini sidea ma Bani: Sapuluh dua. (bd. 6:41-44.) 8:20 Anjaha na pitu ruti ondi bani na ompat ribu halak ondi, piga tapongan do teba-tebani ipatumpu hanima? Nini sidea ma hu-Bani: Pitu! (ay. 8.) 8:21 Jadi nini ma dompak sidea: Seng ope iarusi hanima? 8:22 Das ma sidea hu Betsaida. Adong ma na mamboban hu-Bani sada halak na mapitung, anjaha ielek-elek sidea ma Ia, ase ijamah halak ai. (bd. 6:56.) 8:23 Jadi ijamah ma tangan ni halak na mapitung ai, iarahkon ma ia hudarat ni huta ai, itijuri ma matani, itampeihon ma tanganni hubani, anjaha isungkun ma: Domma adong iidah ho? (bd. 7:33; Joh. 9:6.) 8:24 Jadi mangkawah ma ia, nini ma: Huidah do jolma, tapi songon bona ni hayu do huidah sidea mardalan. 8:25 Dob ai iulakkon Jesus ma mannahkon tanganni bani matani; ia pe mangkawah ma, gabe malum ma, anjaha lihar ma ganup iidah. 8:26 Dob ai isuruh ma ia mulak hu rumahni, nini ma: Ulang ma masuki huta in. (bd. 5:43; 7:36.) 8:27 Dob ai laho ma Jesus rap pakon susianni hu huta-huta dohorhon Kesarea Pilippi. Itongah dalan nini ma manungkun susianni: Ise do Ahu ihatahon halak? 8:28 Jadi ibalosi sidea ma Ia: Deba mangkatahon si Johannes Pandidi, na deba si Elias, anjaha na deba nari use, sada humbani nabi ai. (bd. 6:14, 15; Mat. 14:2; 17:10.) 8:29 Dob ai isungkun ma sidea: Ia hanima, ise do Ahu nini uhurnima? Nini si Petrus ma mambalosi: Ham do Kristus in! 8:30 Jadi ipalumba ma sidea, ase ulang ipatugah-tugah pasalsi age bani ise. (bd. 9:9.) 8:31 Dob ai ipungkah ma mangajari sidea: Ia anak ni jolma in, maningon buei do sitarononni, ambukkonon ni pangintuai-pangintuai, sintua ni malim ampa sibotoh surat do Ia, anjaha bunuhonni, anjaha dob salpu tolu ari mulak manggoluh. (bd. 9:31; 10:32-34.) 8:32 Anjaha torang-torang do ipatugah hata ai. Jadi iarahkon si Petrus ma Ia, anjaha ipaingat ma Ia. 8:33 Marhusor ma Ia, ikawahkon ma susianni ai, anjaha ihata ma si Petrus, nini ma: Laho ma ho bolis hun lambungkon! Ai seng uhur ni Naibata iparuhurhon ho, uhur ni jolma do. (2 Sam. 19:23.) 8:34 Dob ai idilo Jesus ma na mabuei ai rap pakon susianni ai, nini ma dompak sidea: Barang ise na sihol mangirikkon Ahu, iparnalang ma dirini, iporsan ma silangni, anjaha iirikkon ma Ahu. (Mat. 10:38.) 8:35 Ai barang ise na sihol paluahkon hosahni, ai do na magouan hosah, tapi barang ise na magouan hosah halani Ahu ampa halani ambilan na madear, ai do pagoluhkonsi. (bd. 10:29-30; Joh. 12:25.) 8:36 Ai aha ma gunani bani jolma, age ganup dunia on bani, anggo magou do tonduyni? 8:37 Ai aha ma tarbere jolma, bahen tobus ni tonduyni? 8:38 Ase anggo adong na maila halani Ahu barang halani hatangkin ilobei ni bangsa parbangkis anjaha pardousa on, Anak ni jolma in pe maila do pasalsi, anggo roh ma Ia ibagas hasangapon ni Bapani rap pakon malekat na mapansing in. (Mat. 10:33.)

Markus 9

9:1 Lanjar nini ma dompak sidea: Na sintong do hatangkon bani nasiam: Adong do deba humbani na jongjong ijon, na so mandagei hamateian, anggo lape iidah sidea roh harajaon ni Naibata ibagas hagogohon. (bd. 14:62; Mat. 26:64; Rom 1:4; 2 Kor. 13:4.) 9:2 Dob salpu onom ari iarahkon Jesus ma si Petrus, si Jakobus ampa si Johannes, iboan ma sidea pulig huatas dolog na gijang. Mubah ma rupani iidah sidea. (bd. 5:37.) 9:3 Marlinang-linang ma pakeianni, putih sahalian, seng dong sipanusi na boi mambahen sonai lopakni iatas tanoh on. (2 Mus. 34:29; Dan. 7:9.) 9:4 Dob ai taridah ma bani sidea si Elias ampa si Musa, marsahapi pakon Jesus. 9:5 Jadi nini si Petrus ma marsahapkon Jesus: Guru, dear ni in hita ijon. Ipauli hanami ma ijon tolu sopou-sopou, sada Bamu, sada bani si Musa, anjaha sada bani si Elias. 9:6 Ai seng ibotoh aha sihatahononni, ai mabiar tumang do sidea. 9:7 Roh ma sada hombun manlinggomi sidea, anjaha tarbogei ma sada sora humbagas hombun ai, na mangkatahon: On do Anakku haholongan ni uhurhu, tangihon ma Ia! (bd. 1:11; 2 Ptr. 1:17.) 9:8 Anjaha sanggah na mangkawah sidea inggot, ise pe lang adong iidah sidea sobali Jesus rap pakon sidea. 9:9 Jadi sanggah susur sidea hun dolog ai, ipalumba ma sidea, ase ulang ipatugah na niidah ni sidea bani halak, anggo seng ope puho Anak ni jolma in humbani na matei. (bd. 8:30.) 9:10 Iparimbagaskon sidea do hata ai, anjaha marsisungkunan do sidea pasal arti ni hata "na puho humbani na matei ai", 9:11 Jadi isungkun sidea ma Jesus: Mase ihatahon sibotoh surat, maningon palobei roh do si Elias? 9:12 Nini ma mambalosi sidea: Tongon, maningon roh do lobei si Elias patorsahon haganup. Tapi sonaha do tarsurat pasal Anak ni jolma in? Ai lang maningon buei do Ia manaron anjaha maningon apason do Ia? (Jes. 53:3; Mal. 3:23.) 9:13 Tapi huhatahon ma bannima: Domma roh si Elias, jadi uhur-uhur ni sidea do ibahen hubani, songon na dob tarsurat hinan pasalsi. (1 Raj. 19:2, 10; Mat. 11:14.) 9:14 Sanggah na das ai sidea hubani susian na legan ai, iidah sidea ma buei halak manginggoti sidea, anjaha sibotoh surat marsual pakon sidea. 9:15 Dob iidah halak na mabuei ai roh Jesus, longang ma sidea manjumpahkonsi laho manabisi. 9:16 Jadi isungkun ma sidea: Aha do na sinahapkon nasiam pakon sidea? 9:17 Jadi marbalos ma hu-Bani sada humbani halak na mabuei ai: Guru, huboan do anakkon Bamu, ai isiari setan silongah do ia. 9:18 Anggo siar ma setan ai bani, anjaha isontak-sontakkon ma ia, gabe marguboh ma pamanganni, derek-derek iponni anjaha jorgong angkulani. Domma hupindo namin bani susianmu, ase iusir setan ai, tapi seng mangasup sidea. 9:19 Tapi nini ma mambalosi sidea: Bangsa na so porsaya! Sadiha dokah nari Ahu pakon nasiam? Sadiha dokah nari paanju-anjuonku nasiam? Boan nasiam ma ia hu Bangku! 9:20 Jadi iboan sidea ma ia hu-Bani. Ijin iidah setan ai Jesus, mintor ipantompashon ma ia, gabe dabuh ma hu tanoh, marguling-guling anjaha marguboh babahni. 9:21 Isungkun Jesus ma bapani ai: Domma sadiha dokah mangonai on bani? Balos ni bapani ai: Humbani sietek-etekonni nari. 9:22 Domma gati igulangkon ia hubagas apuy ampa bah, sihol mambunuhsi. Tapi anggo dong do kuasamu, holong ma uhurmu, urupi Ham ma hanami. 9:23 Jadi ibalosi Jesus ma ia: Ihatahon ho, anggo adong do kuasamu. Haganup do boi bani na porsaya. 9:24 Mintor idilohon bapa ni dakdanak ai ma gogoh: Porsaya do ahu! Urupi Ham ma ahu na so marhaporsayaon on. 9:25 Dob iidah Jesus lambin marurup roh halak na mabuei ai, isorgang ma setan ai, nini ma: Ale setan silongah anjaha sinengel, Ahu mangkatahon bam: Luar ma ho humbani, anjaha ulang be masuk ho hubani! 9:26 Gabe mandoruh ma setan ai, ipantompaskon ma dakdanak ai lanjar luar ma. Hira bangkei mando dakdanak ai, pala buei halak na mangkatahon: Domma matei ia. 9:27 Tapi itangkap Jesus ma tanganni, itogu ma ia laho pajongjongkonsi. 9:28 Dob masuk Ia hubagas sada rumah, isungkun susianni ai ma Ia pulig: Mase ma lang mangasup hanami mangusirsi? 9:29 Jadi nini ma dompak sidea: Anggo tonduy na samasam on, seng tarusir, anggo lang marhitei tonggo ampa parpuasaon. 9:30 Dob bingkat sidea hunjai, ibontas sidea ma nagori Galilea. Tapi seng marosuh Jesus, ibotoh halak pasal ai, 9:31 ai na mangajari susianni ai do Ia, anjaha nini ma dompak sidea: Ondoskononkon do Anak ni jolma in hu tangan ni halak, anjaha bunuhon ni sidea ma Ia; tapi dob ibunuh, puho do Ia use, dob salpu tolu ari. (bd. 8:31; 10:33-34.) 9:32 Tapi seng iarusi sidea na hinatahonni ai, anjaha mabiar do sidea manungkun hu-Bani. (Luk. 18:34.) 9:33 Dob ai das ma sidea hu huta Kapernaum, anjaha dob das sidea i rumah, isungkun ma sidea: Aha do na sinahapkon nasiam itongah dalan ai? (Mat. 17:24.) 9:34 Tapi sip do sidea, ai isahapkon sidea do i dalan ai, barang ise sidea sibanggalan. 9:35 Jadi hundul ma Jesus, idilo ma na sapuluh dua ai, ihatahon ma bani sidea: Barang ise na sihol parlobei, parpudi ma ia bani haganup anjaha, juak-juak bani haganup halak. (bd. 10:43; Mat. 20:26.) 9:36 Jadi idilo ma sada dakdanak, ipajongjong ma ai itongah-tongah ni sidea anjaha ialehon, lanjar nini ma bani sidea: (bd. 10:16; 1 Mus. 48:10.) 9:37 Barang ise na manjalo sada dakdanak na sonon halani Goranku, Ahu do na jinaloni ijai, anjaha barang ise na manjalo Ahu, sedo Ahu jinaloni ijai, na marsuruh Ahu do. (Mat. 10:40; Joh. 13:20.) 9:38 Nini si Johannes ma hubani Jesus: Guru, iidah hanami do sada halak na so mangirikkon hita mangusir setan marhitei goranmu, jadi ilarang hanami ma ia halani na so hita ai iirikkon. (4 Mus. 11:27-29.) 9:39 Jadi nini Jesus ma: Ulang ma larang hanima ia, ai halak na mambahen horja hagogohon marhitei goranku, seng tumaram pahirionni Ahu. 9:40 Ai na so manlawan hita, hasomanta do ai. (Mat. 12:30.) 9:41 Na sintong do hatangkon bannima: Na mambere hanima bah inumon sasangkir ibagas Goranku, halani Kristus simada hanima, seng na magou upahni ai. 9:42 Tapi barang ise na mambahen sangsi sada humbani na etek-etek on, na porsaya Bangku, dearan ma igantungkon losung batu bani borgokni, laho mangunobkonsi hubagas laut. (Luk. 17:2; Rom 14:13.) 9:43 Anggo sangsi ho halani tanganmu, rotap ma in. Ai dearan do marsada tangan ho masuk hu hagoluhan, humbani na mardua tangan masuk hu naraka, hubagas apuy na so ra miloh, (Mat. 5:30.) 9:44 bani ianan, na so ra matei gilokni, anjaha na so ra miloh apuyni. 9:45 Anggo sangsi ho halani naheimu, rotap ma in. Ai dearan do tempang ho masuk hu hagoluhan, humbani na marnahei dua iambukkon ho hubagas naraka, 9:46 bani ianan na so ra matei gilokni, anjaha na so ra mintop apuyni. 9:47 Anggo sangsi ho ibahen matamu, pulsitkon ma in. Ai dearan do marmata salopah ho masuk hu harajaon ni Naibata, ulang mardua mata ho iambukkon hu naraka, (Mat. 5:29.) 9:48 bani ianan na so ra matei gilokni anjaha na so ra miloh apuyni. 9:49 Ai maningon garamon do haganup marhitei apuy. 9:50 Na marguna do garam ai. Tapi anggo mambar daini, aha ma bahenon paporadkon ai? Sai margaram ma hanima, anjaha mardamei samah hanima. (Mat. 5:13; Luk. 14:34; Rom 12:18; Kol. 4:5.)

Markus 10

10:1 Dob ai misir ma Jesus hunjai anjaha das ma Ia hu nagori Judea, na idipar ni bah Jordan. Jadi marrohan ma use halak na mabuei ai hu-Bani, gabe iajari ma sidea, songon na somal ibahen. (bd. 9:33.) 10:2 Roh ma piga-piga halak Parisei hu-Bani, anjaha isungkun sidea ma Ia, laho manlajousi, atap na bulih do sirangkonon ni halak parinangonni. 10:3 Tapi nini ma mambalosi sidea: Ai aha do ihatahon si Musa bani nasiam? 10:4 Balos ni sidea: Ipalopas si Musa do halak mambahen surat sirang, laho paulakkon parinangonni. (5 Mus. 24:1; Mat. 5:31.) 10:5 Jadi nini Jesus ma bani sidea: Halani hengkeng ni uhurnima do, ase isuratkon si Musa aturan ai. (5 Mus. 9:27.) 10:6 Tapi humbani mungkah ni panompaon pe dalahi ampa naboru do sidea itompa. (5 Mus. 1:27; 5:2.) 10:7 Halani ai tadingkonon ni dalahi do bapani ampa inangni, laho padomuhon dirini hubani parinangonni. (1 Mus. 2:24; Ep. 5:31.) 10:8 Gabe sada daging do sidea na dua ai. Ase seng be sidea dua, tapi sada daging do. (1 Kor. 6:16.) 10:9 Ai pe, na dob pinadomu ni Naibata, seng bulih sirangon ni jolma. (1 Kor. 7:10.) 10:10 Dob mulak sidea hu rumah, isungkun susianni ma Ia use pasal ai. 10:11 Jadi nini ma dompak sidea: Na paulakkon parinangonni, dob ai ibuat na legan, parbangkis do ia ijai. (Mat. 5:32; Luk. 16:18.) 10:12 Naboru ai pe, anggo isirangkon dirini humbani paramangonni, anjaha laho bani halak na legan, parbangkis do. 10:13 Dob ai adong ma na mamboan dakdanak hu-Bani, ase ijamah, tapi ipandang susianni ai do sidea. 10:14 Mangidah ai Jesus, sogam ma uhurni, nini ma dompak sidea: Paturut hanima ma dakdanak in roh hu Bangku, ulang pandang hanima sidea, ai bani halak sisonin do harajaon ni Naibata. 10:15 Na sintong do hatangkon bannima: Na so manjalo harajaon ni Naibata songon dakdanak, seng anjai masuk ia hujai. 10:16 Jadi irohop ma sidea anjaha itampeihon ma tanganni bani sidea, laho mamasu-masu sidea. (bd. 9:36.) 10:17 Sanggah na luar Ia hu dalan ai, roh ma sada halak marlintun hubani, lanjar manrogop ma ia manungkunsi: Ham Guru, sidear uhur! Aha do sibahenonku, ase dapot ahu hagoluhan sisadokah ni dokahni? (Luk. 10:25.) 10:18 Jadi nini Jesus ma hubani: Mase ma ihatahon ham Ahu sidear uhur? Seng dong sidear uhur sobali Naibata. 10:19 Ibotoh ham do titah in: Ulang ho mamunuh! Ulang ho marbangkis! Ulang ho manangko! Ulang ho ra manaksihon hata na so tongon! Ulang ho manrampok! Maningon pasangaponmu do bapamu pakon inangmu! (bd. 7:10; 2 Mus. 20:12-16; 5 Mus. 5:16-21.) 10:20 Tapi nini ma mambalosi: Ham guru! Haganupan ai domma hudalankon humbani sietek-etekonku nari. 10:21 Jadi holong ma uhur ni Jesus mangidahsi, nini ma hubani: Sada do na hurang bamu. Laho ma ham, jual ham ma haganup na dong bamu, anjaha pambere ma ai bani na masombuh, ase mararta ham i nagori atas. Dob ai roh ma ham, irikkon ham ma Ahu! (Mat. 6:20; Luk. 12:33; 16:9.) 10:22 Tapi mambogei hata ai borat ma uhurni, jadi mulak ma ia ibagas pusok ni uhur, ai pararta na buei do ia. 10:23 Jadi ikawahkon Jesus ma inggot, anjaha nini ma hubani susianni ai: Mahol ni ai masuk halak na marnah na dong hubagas harajaon ni Naibata. 10:24 Ia susian ai longang do pasal hata ni ai. Jadi nini Jesus ma use bani sidea: Ale ambia! Maholni ai halak na martenger ni uhur bani arta masuk hubagas harajaon ni Naibata! (Ps. 62:11; Pod. 11:28; 1 Tim. 6:17.) 10:25 Urahan do masukan ni unta lubang ni jarum, ase halak na bayak masuk hubagas harajaon ni Naibata. 10:26 Jadi lambin longang ma sidea, nini sidea ma samah sidea: Ise ma, anggo sonai, boi maluah? 10:27 Ikawahkon Jesus ma sidea, lanjar nini ma: Seng boi ai bani jolma, tapi bani Naibata boi do! Ai haganup do tarbahen Naibata. (bd. 14:36; Luk. 1:37.) 10:28 Dob ai nini si Petrus ma hubani Jesus: Tonggor ma, haganup do itadingkon hanami, laho mangihutkon Ham! 10:29 Nini Jesus ma hubani: Na sintong do hatangkon bannima: Sagala na manadingkon rumahni, saninani, botouni, inangni, bapani, dakdanakni barang jumani pe halani Ahu ampa halani ambilan na madear, (bd. 8:35.) 10:30 lompit saratus ma nuan jaloonni i tanoh on rumah, sanina, botou, inang, anak ampa juma sonai pakon parburuon; anjaha ambahni ai bani dunia na sihol roh hagoluhan sisadokah ni dokahni. 10:31 Tapi buei do na parlobei hinan gabe parpudi, anjaha na parpudi hinan gabe parlobei. (Mat. 20:16; Luk. 13:30.) 10:32 Sanggah mardalan sidea, tangkog hu Jerusalem, Jesus do mardalan ilobei ni sidea, gabe longang ma sidea, anjaha na mangirikkonsi ai mabiar do. Idilo ma use na sapuluh dua ai, anjaha ipatugah ma bani sidea, aha na laho masa Bani. 10:33 Na tangkog ma hita hu Jerusalem, jadi ondoshononkon ma Anak ni jolma in bani sintua ni malim ampa sibotoh surat. Uhumon ni sidea ma Ia marutang hosah, anjaha ondoshonon ni sidea ma Ia bani halak parbegu. (bd. 8:31; 9:31; Mat. 16:21.) 10:34 Pahirion ni sidea, tijuranni, lonsinganni, anjaha bunuhon ni sidea ma Ia, anjaha dob salpu tolu ari mulak manggoluh do ia. 10:35 Dob ai roh ma manjumpahkonsi, si Jakobus ampa si Johannes, anak ni si Sebedeus na dua ai, nini sidea ma hu-Bani: Ham guru, adong pangindoannami, sibereonmu bannami namin. 10:36 Jadi nini ma hubani sidea: Ai aha ipindo uhurnima sibahenonku bannima? 10:37 Nini sidea ma hu-Bani: Bahen Ham ma hanami hundul bani hasangaponmu in, sada hampit siamunmu, na sada nari hampit sambiloumu. 10:38 Tapi nini Jesus ma hubani sidea: Seng ibotoh hanima na pinindonima in. Mintor tarinum hanima ma panginuman siinumonkai? Mintor tarparidi hanima paridian siparidionkai? (bd. 14:36; Mat. 26:39; Luk. 12:50.) 10:39 Jadi nini sidea ma hu-Bani: Tarbahen hanami do. Nini Jesus ma hubani sidea: Tongon namin, inumonnima do panginuman siinumonkai, anjaha paridionnima do paridian siparidionkai, (Lah. 12:2.) 10:40 tapi na mambahen hundul i siamunhu atap i sambilouhu, seng guru Bangku ai, tapi bani na dob tinontuhon hinan do ai. 10:41 Dob tarbogei ai bani na sapuluh nari ai, marah ma sidea mangidah si Jakobus pakon si Johannes. 10:42 Jadi idilo Jesus ma sidea, nini ma dompak sidea: Ibotoh hanima do, irajai sigomgomi bangsa do rayatni, anjaha ikuasai na sangap-sangapni do sidea. (Luk. 22:25-27.) 10:43 Ulang ma sonai anggo bannima! Tapi barang ise hanima na sihol sangap, ai ma gabe juak-juak bennima! (bd. 9:35; Mat. 18:4; 23:11; Luk. 9:48; 1 Ptr. 5:3.) 10:44 Anjaha barang ise hanima na sihol parlobei, ai ma gabe jabolon ni haganup. 10:45 Ai Anak ni jolma in pe, seng roh Ia ase iidangi halak, tapi laho mangidangi do, anjaha mamberehon hosahni bahen tobus ni buei halak. 10:46 Jadi das ma sidea i Jeriko. Sanggah na misir ai Ia hun Jeriko rap pakon susianni ampa halak na mabuei ai, adong do na hundul itopi dalan ai, sada halak na mapitung, sipangindo-indo, ai ma si Bartimeus, anak ni si Timeus. 10:47 Dob ibogei, Jesus na hun Nasaret do ai hape, dilo-dilo ma ia, nini ma: Ham Jesus, Anak ni si Daud, idop ma uhurmu bangku! (bd. 1:9; 14:67.) 10:48 Buei do na maminsangsi ase sip namin, tapi lambin igogohi do mandilohon: Ham Anak ni si Daud, idop ma uhurmu bangku! 10:49 Jadi soh ma Jesus, nini ma: Dilo hanima ma ia! Jadi idilo sidea ma ia, nini ma hubani: Tenger ma uhurmu, jongjong ma ho, idilo do ho! 10:50 Ia pe ipadaoh ma salimutni, jongjong ma ia, lanjar laho bani Jesus. 10:51 Iparsahapkon Jesus ma ia, nini ma: Aha ipangindo uhurmu bahenonku bam? Jadi nini na mapitung ai ma hu-Bani: Ham Guru, marpangidah ma namin matangku! 10:52 Jadi nini Jesus ma hubani: Laho ma ho! Haporsayaonmin do na pagoluhkon ho! Jadi mintor marpangidah ma ia, lanjar iirikkon ma Jesus bani pardalananni.

Markus 11

11:1 Sanggah na lambin dohor sidea hu huta Jerusalem, ai ma hu Betpage ampa Betania, na bani dolog Jetun ai, isuruh Jesus ma dua halak humbani susianni, 11:2 nini ma hubani sidea: Laho ma hanima hu dusun na i lobeinima in, anjaha masukhonsi hanima hujai, jumpah hanima ma sada anak ni halode tambat, na so ongga ope hona ajak. Tanggali anjaha boan hanima ma ai hujon! 11:3 Jadi anggo adong na mangkatahon bannima: Aha do na binahennima in! Hatahon hanima ma: Porlu do in bani Tuhan in, anjaha podas do in paulakonni hujon. (bd. 14:14.) 11:4 Jadi laho ma sidea, anjaha jumpah sidea ma anak ni halode ai, tambat bani sada labah hampit darat i alaman ai, gabe itanggali sidea ma. 11:5 Jadi adong ma halak na jongjong ijai, na mangkatahon bani sidea: Aha do na binahennasiam in, itanggali nasiam do anak ni halode in! 11:6 Jadi ihatahon sidea ma songon na hinatahon ni Jesus bani sidea, gabe ipaturut ma. 11:7 Itogu sidea ma anak ni halode ai bani Jesus, ipaherbang sidea ma hiouni bani gurungni, dob ai iajak Jesus ma ai. 11:8 Buei do halak na paherbangkon hiouni bani dalan ai; na deba paserakkon bulung-bulung na maratah, na itagili sidea hun tongah juma. (2 Raj. 9:13.) 11:9 Halak na mardalan i lobei ampa na mangihut hun pudi mandilohon: Hosianna! Pinuji ma na roh ibagas goran ni Tuhan! 11:10 Pinuji ma harajaon ni Bapanta si Daud na sihol roh in! Hosianna ma bani ianan na gijang! (2 Sam. 7:16.) 11:11 Jadi masuk ma Ia hu Jerusalem, hu rumah panumbahan ai, anjaha dob ikawahkon haganup inggot, laho ma Ia hu Betania rap pakon susianni na sapuluh dua ai, ai domma bod ari. 11:12 Anjaha patarni ai, dob misir sidea hun Betania, malohei ma iahap Jesus. 11:13 Anjaha iidah ma humbani na daoh sada hayu ara na marbulung. Laho ma Ia hujai, laho mangindahi buahni Bani. Tapi dob das Ia hujai, pitah bulung tumang do jumpahsi, ai seng ope panorangni marbuah. 11:14 Jadi nini ma hubani hayu ai: Ronsi antigan pe seng panganon ni atap ise be buahmu! Ibogei susianni ai do nahinatahonni ai. 11:15 Dob ai das ma sidea hu Jerusalem. Jesus pe masuk ma hu rumah panumbahan ai, anjaha iusir ma siparjualan ampa sipamboli i rumah panumbahan ai. Ipantunggalingkon ma meja ni situkari duit ampa bangku-bangku ni sijual asas. (Joh. 2:14-16.) 11:16 Seng ipalopas bontason ni halak na marsiboanon rumah panumbahan ai. 11:17 Jadi iajari ma sidea, nini ma: Ai lang tarsurat do, rumah partonggoan ni haganup bangsa do goranon rumahku? Hape ibahen nasiam do in gabe liang ni panrampok. (Jes. 56:7; Jer. 7:11.) 11:18 Jadi ibogei sintua ni malim ampa sibotoh surat ma ai, gabe ipindahi sidea ma dalan laho mamunuhsi; ai mabiar do sidea, ai ganup do halak na mabuei ai longang mambogei podahni. 11:19 Anjaha anggo bod ma ari, luar do sidea manadingkon huta ai. (ay. 11.) 11:20 Anjaha sanggah na mamontas sidea patarni ai, iidah sidea ma na dob hangar hayu ai ronsi uratni. (ay. 14.) 11:21 Taringat ma si Petrus, gabe nini ma hu-Bani: Guru, tonggor Ham ma! Domma hangar hayu ara na pinapaanmu ondi. 11:22 Jadi nini Jesus ma mambalosi sidea: Porsaya ma hanima bani Naibata! 11:23 Na sintong do hatangkon bannima: Anggo adong na mangkatahon bani dolog on: Tarangkat ma, madabuh ma hu laut ai, anjaha seng sangsi ia ibagas uhurni, tapi porsaya do na maningon jadi do ai, sai na saud do ai idahonni. (bd. 9:23; Mat. 17:20; Luk. 17:6; 1 Kor. 13:2; Jak. 1:6.) 11:24 Halani ai huhatahon ma bennima: haganupan, na pinindonima bani tonggonima, sai na das do ai bannima, asal ma porsaya hanima, maningon jaloonnima do ai. (Mat. 18:19; 7:7; Joh. 14:13; 16:23.) 11:25 Anjaha anggo jongjong hanima martonggo, sasap hanima ma anggo adong pangkuranginima bani halak, ase isasap Bapanima na i nagori atas ai age salahnima. 11:26 Tapi anggo seng isasap hanima, seng homa sasapon ni Bapanima na i nagori atas ai age salahnima. (Mat. 6:15.) 11:27 Jadi das ma sidea use i Jerusalem. Anjaha sanggah mardalan-dalan Ia i rumah panumbahan ai, roh ma hu-Bani sintua ni malim, sibotoh surat ampa pangintuai-pangintuai, 11:28 anjaha nini sidea ma hu-Bani: Marhitei kuasa aha do ihorjahon Ham in? Ise do na mambere kuasa in Bamu, laho mangkorjahon in? (Joh. 2:18.) 11:29 Tapi nini Jesus ma hubani sidea: Adong do sungkunonku bani nasiam, balosi nasiam ma Ahu, ase hupatugah bani nasiam, atap kuasa ja hupangunsagahkon, mambahen ai. 11:30 Ia pandidion ni si Johannes, na hun nagori atas do ai atap humbani jolma do? Balosi nasiam ma Ahu! 11:31 Jadi martimbang-timbang ma sidea, nini ma: Anggo ihatahon hita hun surga, hatahononni ma: Mase ma lang porsaya nasiam bani? 11:32 Tapi porini ihatahon hita: Humbani jolma do? Mabiar do sidea bani bangsa ai, ai nabi do si Johannes nini uhur ni bangsa ai haganup. (Mat. 14:5.) 11:33 Jadi nini sidea ma mambalosi Jesus: Seng ibotoh hanami! Jesus pe nini ma hubani sidea: Ahu pe, seng patugahonku bani nasiam, atap marhitei kuasa aha hubahen ai.

Markus 12

12:1 Dob ai marsahap ma Ia marhitei limbaga bani sidea, nini ma: Adong ma sada halak na manombei pohon anggur, ihondor ma ai inggot, ihurak ma pangilangan, anjaha ipaturei ma sada manara. Ipasewahon ma pohon ai hubani parjuma-juma, dob ai laho ma ia hu nagori na legan. (Ps. 80:9; Jes. 5:1-2.) 12:2 Jadi bani panorangni isuruh ma juak-juakni marayak parjuma-juma ai, ase ijalo humbani sidea deba humbani buah ni pohon anggur ai. 12:3 Hape itangkap sidea do ia, ibogbogi, lanjar isuruh mulak sonin, mangambei. 12:4 Isuruh ma use bani sidea juak-juak na legan, tapi ibogbogi sidea ma ai anjaha ipahiri. (Lah. 7:52.) 12:5 Dob ai isuruh ma use na legan, tapi ibunuh sidea ma age ai. Buei ope na legan isuruh, ibogbogi do ai deba, na deba nari ibunuh. 12:6 Adong ope anakni sada hinaholongan ni uhurni. Ai ma parpudi isuruh bani sidea, ai nini uhurni: Tontu malang do uhur ni sidea mangidah anakhon. (bd. 1:11; 1 Mus. 22:2.) 12:7 Tapi nini parjuma-juma ai ma samah sidea: On do panean ai! Eta, bunuh hita ma ia, ase banta siteanonni in! 12:8 Jadi itangkap sidea ma ia, ibunuh ma, anjaha iambukkon hu darat ni pohon anggur ai. 12:9 Aha ma bahenon ni tuan simada pohon anggur ai? Roh ma ia, boiskononni ma parjuma-juma ai, anjaha ondoskononni ma pohon anggur ai bani halak na legan. 12:10 Ai seng ongga ibasa nasiam hata na tarsurat on: Batu, na niambukkon ni tukang rumah, ai do gabe batu palas parsuhi. 12:11 Tuhan do na mambahen ai, anjaha halongangan do ai bani matanta. (Ps. 118:22-23.) 12:12 Jadi ipindahi sidea ma dalan laho manangkapsi, tapi mabiar do sidea bani halak na mabuei ai. Ai ibotoh, sidea do tinuju ni limbaga nongkan. Jadi laho ma sidea, itadingkon ma Ia. 12:13 Dob ai isuruh sidea ma deba humbani halak Parisei ampa humbani juak-juak ni si Herodes, laho manangkapsi marhitei parsahapni. (bd. 3:6.) 12:14 Jadi roh ma sidea mangkatahon hu-Bani: Ham Guru, ibotoh hanami, pintor do Ham, seng mabiar age bani ise, ai seng sitonggor jumbak Ham, anjaha sintong-sintong do ipodahkon Ham dalan ni Naibata. Ai patut do bereon balasting bani Kesar atap lang? (5 Mus. 1:17.) 12:15 Tapi ibotoh Jesus do sipakulah-kulah ni sidea ai, gabe nini ma dompak sidea: Mase ma ilajou nasiam Ahu? Bere nasiam ma Bangku dinar sada, ase huidah! 12:16 Jadi iboan sidea ma. Nini ma hubani sidea: Gambaran pakon surat ni ise do on? Jadi nini sidea ma hu-Bani: Gombaran ni kesar do! 12:17 Jadi nini Jesus ma hubani sidea: Bere ma bani kesar na humbani kesar, anjaha na humbani Naibata bani Naibata. Jadi longang ma sidea pasalsi. (Rom. 13:7.) 12:18 Dob ai roh ma hu-Bani halak Sadukei, na so marhatongonkon, adong parpuhoon humbani na matei, jadi isungkun sidea ma Ia, nini ma: (Lah. 23:8.) 12:19 Ham Guru! Isuratkon si Musa do banta: Anggo matei sada halak, itadingkon parinangonni lang mardakdanak, maningon pagodangon ni anggini do naboru ai, laho pajongjong ginompar bani abangni ai. (5 Mus. 25:5-6.) 12:20 Ase adong ma pitu halak na marsanina: Mambuat boru ma sikahanan ai, jadi matei ma ia, lang martinading. 12:21 Jadi ibuat na paduahon ai ma naboru ai, lanjar matei ma ai, lang martinading. Patoluhon ai pe sonai do. 12:22 Sonai do sidea hapitusi, seng martinading. Ipudi ni ganupan ai, matei ma homa naboru ai. 12:23 Bani ari parpuhoon ai, ise do sidea simada naboru ai? Ai ganup do na pitu ai ongga marjolmahonsi. 12:24 Nini Jesus ma hubani sidea: Ai lang na kahou ma nasiam in, halani seng iarusi nasiam Surat in, age hagogohon ni Naibata? 12:25 Ai anggo puho ma sidea humbani na matei, seng be mompo atap laho sidea, tapi songon malekat na i nagori atas ai ma sidea. 12:26 Anjaha pasal parpuhoon ni halak na dob matei, ai seng ongga ibasa nasiam ibagas buku ni si Musa, ibagas barita pasal naporon ai, na hinatahon ni Naibata hubani si Musa: Ahu do Naibata ni si Abraham, si Isak ampa si Jakob? (2 Mus. 3:6; Heb. 11:16.) 12:27 Sedo Naibata ni na matei Ia, Naibata ni na manggoluh do. Kahou tumang do nasiam. 12:28 Jadi roh ma sada halak humbani Parisei ai, na dob mambogei parsualan ai, anjaha na mangahapkon tongon ni pambalosini ai bani sidea, nini ma manungkunsi: Na ija do sibanggalan humbani titah in ganupan? 12:29 Ibalosi Jesus ma: On do sibanggalan: Bogei ma, ale Israel, Tuhan, Naibatanta, sahalaksi do Tuhan. 12:30 Anjaha maningon haholonganmu do Tuhan Naibatamu humbani gok ni atei-ateimu, humbani gok ni hosahmu, humbani gok ni uhurmu ampa humbani gok ni gogohmu! 12:31 Na paduahon, ai ma: Maningon haholonganmu do hasomanmu doskon dirimu. Seng dong be titah na legan sibanggalan hunjon. (3 Mus. 19:18; Rom 13:8-10.) 12:32 Jadi nini sibotoh surat ai ma hu-Bani: Tongon do Guru, domu hu hasintongan do na hinatahonmu ai, ai ma, sada do Naibata, anjaha seng dong na legan sobalisi. (5 Mus. 4:35; Jes. 45:6.) 12:33 Anjaha mangkaholongisi humbani gok ni atei-atei, humbani gok ni uhur ampa humbani gok ni gogoh anjaha mangkaholongi hasoman doskon diri, banggalan do ai humbani ganup galangan situtungon age galangan na legan pe. (1 Sam. 15:22; Ps. 40:7; Hes. 6:6; Mat. 9:13.) 12:34 Dob ibogei Jesus pandeini ai marbalos, nini ma hubani: Seng sadiha daoh nari be ham hun harajaon ni Naibata! Anjaha ise pe lang be, na pag marsungkun-sungkun hu-Bani. (Lah. 26:27-29.) 12:35 Sanggah mangajari Jesus ibagas rumah panumbahan ai, nini ma hubani sidea: Mase ma ihatahon sibotoh surat, Anak ni si Daud do Kristus in? 12:36 Si Daud sandiri do mangkatahon marhitei Tonduy Na pansing: Nini Tuhan in do dompak Tuhanku: Hundul ma ho hu siamunhon, paima hubahen sagala munsuhmu sidogeian ni naheimu. (Ps. 110:1.) 12:37 Si Daud sandiri do manggoransi Tuhan, sonaha ma ia Anakni? Marosuh do halak na mabuei ai manangar hatani. (Joh. 7:48, 49.) 12:38 Lanjar ihatahon do ibagas pangajaranni ai: Jaga ma nasiam dompak sibotoh surat, na marosuh mardalani marbaju ganjang, na mangkarosuhkon, ase itabi halak i tiga, 12:39 na mangharosuhkon hundulan parlobei i rumah parguruan, ampa hundulan na sangap i parpestaan; 12:40 halak na mambondut rumah ni na mabalu, anjaha na marsipakulah-kulah marhitei tonggo na ganjang. Uhum siboratan do jaloon ni sidea. 12:41 Jadi sanggah na hundul Ia tontang ni poti idop ni uhur ai, ikawahkon ma pambahen ni halak na mabuei ai mandabuhkon duitni hubagas poti ai, anjaha buei do halak na bayak mandabuhkon buei-buei. 12:42 Anjaha roh do sada naboru na mabalu, na miskin, idabuhkon ma hujai dua rimis, ai ma sasen. 12:43 Jadi idilo Jesus ma susianni, nini ma hubani sidea: Sintong do na huhatahon on bannima: Bueinan do na nidabuhkon ni na mabalu na miskin an, hubagas poti idop ni uhur in, marimbang haganup na mandabuhkon ai. 12:44 Ai humbani lobih-lobihni do idabuhkon sidea bei; tapi anggo naboru an, ibagas hahuranganni idabuhkon do haganup na dong bani, haganup hagoluhanni. (2 Kor. 8:12.)

Markus 13

13:1 Sanggah luar Jesus hun rumah panumbahan ai, marsahap ma hu-Bani sada humbani susian ai: Guru, tonggor Ham ma, sonaha dear ni batu-batu ai ampa rumah-rumah ai! 13:2 Tapi nini Jesus ma hubani: Iidah ho do rumah-rumah na banggal ai? Seng paturuton age dua batu na palindih, na so rosakkononku. (Luk. 19:44.) 13:3 Anjaha, sanggah na hundul Ia i dolog Jetun tontang ni rumah panumbahan ai, pulig ma Ia isungkun si Petrus, si Jakobus, si Johannes pakon si Andreas. 13:4 Patugah Ham ma bennami, antigan ma masa ai, anjaha aha tandani, paboa laho masa ma ganupan ai? 13:5 Jadi ihatahon Jesus ma hubani sidea: Jaga ma hanima, ase ulang ipakahou halak hanima. 13:6 Ai buei ma halak na roh marhitei Goranku, na mangkatahon: Ahu do in! Anjaha buei do na kahou bahenon ni sidea. 13:7 Anjaha anggo ibogei hanima porang ampa barita ni porang, ulang ma hanima tarsonggot! Ai maningon masa do ai, tapi seng ai ope ujungni. 13:8 Ai marsilawanan ma bangsa-bangsa anjaha harajaon samah harajaon, masa ma homa lalou marsasanagori, sonai homa lohei. Pamungkah ni pangarouon ai ma ai. 13:9 Tapi jaga ma hanima bani dirinima! Ai ondoskonon ni sidea do hanima hu pangadilan, longsinganni do hanima i parguruan, anjaha pajongjongon ilobei ni panguhum ampa raja halani Ahu, gabe hasaksian bani sidea. (Joh. 16:2.) 13:10 Anjaha ambilankonon do lobei ambilan na madear in bani ganup bangsa. (bd. 16:15.) 13:11 Anjaha anggo itogu halak hanima laho ondoskononkon, ulang ma sunsah uhurnima pasal sihatahononnima, tapi aha na iberehon bannima bani panorang ai, ai ma hatahon hanima, ai sedo hanima na marsahap ijai, tapi Tonduy Na pansing do. (Mat. 10:19; Luk. 12:11.) 13:12 Anjaha ondoskononkon ni sanina do saninani ase ibunuh, sonai homa bapa dompak anakni. Anjaha anak pe manlawan do dompak namatorasni anjaha ibunuh sidea. 13:13 Anjaha domdoman ni haganup halak do hanima halani GoranKu. Tapi na tahan ronsi ujung ai do paluahon. 13:14 Tapi anggo iidah hanima hasamboron na majangin ai, ai ma bani na so patut iananni (iparimbagaskon na mambasa on ma ai), ijai ma maporus na i nagori Judea hu dolog! (Dan. 9:27; 11:31.) 13:15 Halak na iatas ni rumahni, ulang ma pala tuad ia, anjaha ulang ma pala masuk ia hubagas rumah, laho mambuat atap aha hunjai. 13:16 Na i juma pe ulang ma pala mulak mangalop hiouni. 13:17 Tapi magou ma naboratan rumah ampa na painumhon bani panorang ai. 13:18 Tapi martonggo ma hanima, ase ulang masa ai sanggah musim borgoh. 13:19 Ai masa do bani ari ai sitaronon, na so ongga masa olat ni panompaon ni Naibata bani na tinompani ai ronsi nuan, hu lobeian on pe seng masa be. (Joel 12:2; Dan. 12:1.) 13:20 Anjaha ambit lang iorui Tuhan ari ai, seng anjai maluah age sada jolma. Tapi halani na pinilihni ai do, ase iorui. 13:21 Anjaha anggo adong na mangkatahon bennima: "Tonggor ma, ijon do Kristus in!" atap: "Tonggor ma, ijai do Ia," ulang ma haporsayai hanima ai. 13:22 Ai na roh do Kristus parladung pakon nabi parladung, anjaha bahenon ni sidea do tanda pakon halongangan laho pakahouhon na tarpilih in, ambit na tarbahensi. (Mat. 7:15, 22; 2 Tes. 2:9.) 13:23 Tapi jaga ma hanima, domma hulumbahon hinan in bannima! 13:24 Tapi bani panorang ai, dob salpu sitaronon ondi, manggolapi ma mata ni ari, anjaha seng marsinalsal be bulan. 13:25 Mardabuhan ma bintang hun langit, anjaha hagogohon ni parlangitan pe mandugur ma. 13:26 Dob ai idahon ni sidea ma Anak ni jolma in roh marhitei hombun marhasoman hagogohon ampa hasangapon banggal. (bd. 14:62; Dan. 7:13.) 13:27 Dob ai suruhonni ma malekatni patumpuhon na pinilihni ai humbani desa na ualuh in, hun ujung ni tanoh das hu ujung ni langit. 13:28 Tapi humbani hayu ara in ma guruhon hanima usihanni ai. Anggo martunasi ma pusukni anjaha luar bulungni, ibotoh hanima do, dohor ma partahunan milas. 13:29 Usih hujai, anggo iidah hanima ma masa ondi, botoh hanima ma, na dohor ma parrohni ai. (Jak. 5:5.) 13:30 Sintong do na huhatahon on bannima: Seng anjai salpu na sansundut on, anggo lang lobei masa haganupan ai. 13:31 Salpu pe langit ampa tanoh on, anggo hatangkin seng anjai salpu in. 13:32 Tapi anggo ari ampa panorangni seng dong na mambotoh ai age malekat i nagori atas, age Anak ni jolma in pe, sobali Bapa in. 13:33 Jaga anjaha puho ma hanima, ai seng ibotoh hanima, sadihari panorangni ai. 13:34 Usih do ai songon bani sada halak, ma laho hu tanoh na legan: Itadingkon do rumahni, ibere kuasa bani juak-juakni, ganup marsihorjahon horjani bei, anjaha sijaga labah iparentahkon, ase marjaga-jaga. 13:35 Halani ai jaga ma hanima, ai seng ibotoh hanima parroh ni tuan simada rumah ai, barang bod ari, barang tongah borngin, barang tahuak dayok, barang girah sogod. (Luk. 12:38; 1 Tes. 5:2, 6.) 13:36 Anjaha ulang ma jumpahsi hanima tarpodom, bani na roh ai Ia sompong. 13:37 Na huhatahon bannima, bani haganup do ai huhatahon: Puho ma hanima!

Markus 14

14:1 Dua ari nari marayak pesta Paska ampa mangan ruti na so niigaran, ipindahi sintua ni malim ampa sibotoh surat ma akal, laho manangkap anjaha mamunuh Jesus. (2 Mus. 12; 3 Mus. 23:5 ps; Joh. 11:47.) 14:2 Tapi nini sidea ma: Ulang ma sanggah mata ni pesta ai, ase ulang lutu halak na mabuei in 14:3 Jadi sanggah i Betania Ia, i rumah ni si Simon na gadamon hinan ai, sanggah na hundul Ia laho mangan, roh ma sada naboru mamboan sada botol, na marisi minak nardus na maharga, na so maragu. Ibolahkon ma botol ai, iuseihon ma minak ai bani ulu ni Jesus. 14:4 Tapi adong ma na marungut-ungut samah sidea: Mase ma iporsoya-soya minak in? 14:5 Boi hinan do jualon minak in lobih tolu ratus dinar, laho mangidopi na masombuh. Jadi igilai sidea ma naboru ai. 14:6 Tapi nini Jesus ma: Paturut ma ia. Mase ma isunsahi hanima ia? Na dear do na binahenni in Bangku! 14:7 Ai tongtong do adong na masombuh itongah-tongahnima, anjaha sadihari marosuh hanima, boi do bahenonnima na madear bani sidea; tapi anggo Ahu seng tongtong rap pakon hanima. (5 Mus. 15:11.) 14:8 Olat ni na tarbahensi do na binahenni in; na manlobei do ia mamminaki angkulangku songon na laho mananom. 14:9 Sintong do na huhatahon on bennima: Barang ija pe i sab dunia on iambilankon use ambilan na madear on, sahapkononkon do age na binahenni in gabe baritani. (bd. 13:10; Mat. 24:14.) 14:10 Ia si Judas Iskariot, ai ma sada humbani na sapuluh dua ai, laho do marayak sintua ni malim, laho mantahihon Jesus bani sidea. 14:11 Mambogei ai, malas ma uhur ni sidea, lanjar ibagahkon sidea ma mambere duit bani. Jadi ipindahi si Judas ma panorang na dearhonsi, laho mangondoskonsi. 14:12 Bani ari parlobei ni mangankon ruti na so niigaran, ai ma bani ari panayaton ni biri-biri Paska, nini susian ai ma bani Jesus: Huja ma hanami laho ipindo uhurmu, laho pasirsirhon panganon Paska ai? 14:13 Jadi isuruh ma dua halak susianni, nini ma hubani sidea: Laho ma hanima hu huta in, pajumpah ma hanima holi pakon sada halak, na mamboban bah sahudon. Irikkon hanima ma ia! 14:14 Hatahon hanima ma hubani siparrumah, na nimasukannima ai: Tonah ni Guru in: Ija do adong kamar, iananku mangan Paska rap pakon susianku? (bd. 11:13.) 14:15 Jadi patuduhkononni ma bannima sada kamar pardatas na lumbang, na dob dear ipasirsir. Ijai ma patorsa hanima banta! 14:16 Susian ai pe laho ma, imasuki sidea ma huta ai, jadi jumpah sidea ma songon na hinatahonni ai bani sidea, gabe ipasirsir sidea ma Paska ai. 14:17 Ase dob bod ari, roh ma Jesus ampa susianni na sapuluh dua ai. 14:18 Anjaha sanggah na hundul ai sidea mangan, nini Jesus ma: Na sintong do hatangkon bannima, sada humbannima, na rap mangan pakon Ahu, mangondoskon Ahu. 14:19 Jadi pusok ma uhur ni sidea, sada-sada ma sidea mangkatahon hu-Bani: Sedo ahu ai? 14:20 Jadi nini ma hubani sidea: Sada humbanima na sapuluh dua, ai ma na rap pakon Ahu manornopkon hubagas pinggan on. (Joh. 13:18.) 14:21 Tongon, sai na marujung do namin Anak ni jolma in songon na tarsurat in, tapi bursik ma halak na mangondoskon Anak ni jolma in. Rahanan ma ambit ulang tubuh jolma na sonai ai! 14:22 Jadi sanggah na mangan ai sidea, ibuat Jesus ma ruti, ipasu-pasu ma, ipartopik anjaha ibere ma hubani sidea, lanjar ihatahon: Jalo hanima ma, dagingku do on! 14:23 Dob ai ibuat ma panginuman, anjaha dob ihatahon tarima kasih, ibere ma ai bani sidea, gabe haganup ma sidea minum hunjai. 14:24 Lanjar ihatahon ma bani sidea: Darohku do on, daroh parpadanan in, na niduruskon mangkopkop buei halak. (2 Mus. 24:8.) 14:25 Na sintong tumang do na huhatahon on bannima: Seng anjai inumonku be humbani buah ni hayu anggur in das hubani ari ai; ijai ma inumonku na baru ibagas harajaon ni Naibata. 14:26 Jadi dob idodingkon sidea doding puji-pujian ai, laho ma sidea hu dolog Jetun. (Ps. 113-118.) 14:27 Jadi nini Jesus ma hubani sidea: Haganup do hanima laho sangsi Bangku songon na tarsurat ai: Bogboganku ma parmahan in, gabe mambur merap ma biri-biri in. (Sak. 13:7.) 14:28 Tapi dob puho Ahu humbani na matei lobeianku ma hanima hu Galilea. (bd. 16:7.) 14:29 Jadi ihatahon si Petrus ma hu-Bani: Age ganup sidea sangsi, tapi ahu lang. 14:30 Tapi nini Jesus ma hubani: Na sintong do na huhatahon on bam: Saborngin on, sanggah lape martahuak dayok padua halihon porsouonmu ma Ahu tolu hali. (Joh. 13:38.) 14:31 Tapi lambin igogohkon do mangkatahon: Age pe ipamatei ahu arap pakon Ham, seng anjai parnalangonku Ham. Lanjar sonai do hata ni sidea ganup. 14:32 Das ma sidea bani sada ianan na margoran Getsemane. Ihatahon Jesus ma hubani susianni: Hundul ma hanima ijon, sanggah martonggo Ahu. (Joh. 18:1.) 14:33 Dob ai iarahkon ma si Petrus, si Jakobus ampa si Johannes. Jadi mulai ma majangin anjaha bulinsah iahap. (bd. 5:37; 9:2.) 14:34 Jadi nini ma hubani sidea: Pusok tumang do uhurhu, songon na matei do. Ijon ma hanima lobei soh anjaha puho! (Joh. 12:27.) 14:35 Dob ai laho ma Ia dompak lobei otik, manrogop ma Ia i tanoh anjaha martonggo, andohar isalpuhon panorang ai humbani anggo tarbahen. 14:36 Nini do: Abba, Bapa, haganup do tarbahen Ham! Salpuhon Ham ma panginuman on hum-Bangku, tapi sedo saguru rosuh ni uhurhu, uhurmu do! (Joh. 6:38; Rom 8:15.) 14:37 Dob ai roh ma Ia, jadi modom do sidea jumpahsi, gabe ihatahon ma hubani si Petrus: O Simon modom do ho hape? Seng mangasup ho puho pala sajam? 14:38 Puho ma hanima anjaha martonggo, ase ulang masuk hanima hubagas parlajouan. Ai rosuh do namin tonduy, tapi galek do daging. 14:39 Dob ai laho ma use Ia martonggo, lanjar hata nongkan ai do ihatahon. 14:40 Jadi sanggah na roh ai Ia use, modom do sidea jumpahsi, ai tartunduh tumang do mata ni sidea. Jadi seng ibotoh sidea be, aha hatahononni Bani. 14:41 Dob ai sanggah na roh Ia patolu halihon, nini ma dompak sidea: Nunutannima ope modom anjaha marsaran? Sungkup ma in! Domma jumpah panorangni! Tonggor ma, ondoskononkon ma Anak ni jolma in hubagas tangan ni halak pardousa. 14:42 Jongjong ma hanima, laho ma hita! Tonggor ma, domma dohor sipantahihon Ahu! 14:43 Mangkatahon ai ope Ia, mintor das ma si Judas, ai ma sahalak humbani na sapuluh dua ai; anjaha rap pakonsi buei do halak na marpodang, na marpukul-pukul, suruhan ni sintua ni malim, sibotoh surat ampa pangintuai-pangintuai. 14:44 Tapi domma ipabotohkon sipantahihon ai hinan tanda bani sidea, nini: Ia in na husummah, ai ma Ia. Tangkap nasiam ma Ia, anjaha pangkei-pangkei ma boan nasiam Ia! 14:45 Jadi daskonsi ia, mintor ijumpahkon ma Jesus, anjaha nini ma: Rabbi! Lanjar isummah ma Ia. 14:46 Mardas tangan ma sidea Bani, lanjar itangkap ma Ia. 14:47 Sada humbani na jongjong ijai ai manintak podangni, itampul ma juak-juak ni sintua ni malim ai, gabe mistak ma pinggolni. 14:48 Jadi nini Jesus ma hubani sidea: Songon na mandompakkon panamun do parrohnasiam on, marpodang anjaha marpukul-pukul, laho manangkap Ahu. 14:49 Ari-ari do namin Ahu rap pakon nasiam i rumah panumbahan mangajari, seng itangkap nasiam Ahu! Tapi tene maningon saud do na tarsurat in. 14:50 Jadi ganup ma sidea manadingkonsi, lanjar maporus. 14:51 Adong do sada garama, na marpakeian sanlambar hiou putih tumang, mangirikkonsi. Itangkap sidea ma ia, 14:52 tapi ihallushon ma hiouni ai, lanjar lintun seng marpakeian. 14:53 Halak ai pe iboan ma Jesus hu lobei ni sintua ni malim; anjaha ganup sintua ni malim, pangintuai ampa sibotoh surat pe domma martumpu. 14:54 Anjaha si Petrus pe iirikkon do Ia mandaoh-daoh hun pudi das hu alaman parbagas ni rumah ni sintua ni malim ai; jadi hundul ma ia ijai rap pakon upas-upas ai mandadang. 14:55 Ia sintua ni malim ai ampa haganup Sanhedrin ai mangindahi hasaksian do dompak Jesus, ase boi marutang hosah Ia, tapi seng dong jumpah sidea. (5 Mus. 17:6; 19:15.) 14:56 Ai buei namin na manaksihon ladung dompaksi, tapi seng mardomu na sinaksihon ni sidea ai. 14:57 Deba jongjong manaksihon ladung dompaksi, nini ma: 14:58 Itangar hanami do Ia mangkatahon: Parsedaonku do rumah panumbahan, na pinauli ni tangan on, anjaha ibagas tolu ari pajongjongonku ma na legan, na so pinauli ni tangan. (Joh. 2:19; Lah. 6:13; Heb. 9:11.) 14:59 Tapi age pe sonai, seng mardomu hasaksian ni sidea ai. 14:60 Dob ai jongjong ma sintua ni malim ai hu tongah-tongah, nini ma manungkun Jesus: Ai seng balosanmu na sinaksihon ni sidea ai dompak Ho? 14:61 Tapi sip do Jesus, seng ibalosi age aha. Jadi isungkun sintua ni malim ai ma Ia use, nini ma: Kristus do Ho tongon, Anak ni Sipujion in? (bd. 15:5; Jes. 53:7.) 14:62 Jadi nini Jesus ma: Ahu ma tongon! Anjaha idahonnasiam do Anak ni jolma in hundul i siamun ni Hagogohon in, anjaha roh marhitei hombun na i langit. (bd. 13:26; Mat. 24:30.) 14:63 Jadi irigatkon sintua ni malim ai ma pakeianni, anjaha nini ma: Naha, porlu ope banta saksi? 14:64 Domma ibogei nasiam pangapasionni ai bani Naibata. Naha do nini uhurnasiam? Gabe ganup ma sidea manguhumisi, ase marutang hosah. (Joh. 19:7.) 14:65 Deba humbani sidea manijurisi, manutup bohini anjaha mamastapisi, lanjar ihatahon: Manjahai ma Ham! Anjaha juak-juak ai mambogbogisi do. 14:66 Sanggah i toruh si Petrus, i alaman parbagas ai, roh ma sada juak-juak naboru ni sintua ni malim ai, 14:67 anjaha dob iidah si Petrus mandadang, ikawahkon ma ia, lanjar nini ma: Ho pe nongkan rap do ampa Jesus, halak Nasaret ai! (bd. 10:47; Joh. 1:46.) 14:68 Tapi iporsou si Petrus do, nini ma: Seng hubotoh anjaha seng huarusi na hinatahonmu in. Lanjar luar ma ia hu alaman lobei-lobei, anjaha martahuak ma dayok. 14:69 Iidah juak-juak naboru ai ma ia, anjaha nini ma use hubani halak na jongjong ijai: Hasoman ni sidea do age halak on! 14:70 Tapi mamorsou ma ia use. Lang sadiha dokah nari nini halak na jongjong ai ma hubani si Petrus: Tongon do hasoman ni sidea, ai halak Galilea do ho! 14:71 Jadi ipapai ma dirini anjaha marbijai: Lang hutandai halak, na hinatahon nasiam ai! 14:72 Dob ai mintor martahuak ma dayok padua-halihon. Jadi idingat si Petrus ma na hinatahon ni Jesus hubani: Tolu hali do parnalangonmu Ahu, sanggah lape martahuak dayok paduahalihon. Jadi tangis-tangis ma ia.

Markus 15

15:1 Jadi sianghonsi ari mambahen panriahan ma sintua ni malim rap pakon pangintuai-pangintuai, sibotoh surat ampa Sanhedrin. Isangkut sidea ma Jesus lanjar iboan, ipadas hubani si Latus. 15:2 Isungkun si Latus ma Ia: Atene, raja ni halak Jahudi do Ham? Jadi nini ma mambalosisi: Songon na hinatahonmu ai ma tongon! 15:3 Buei do tukas-tukas ni sintua ni malim hu-Bani. 15:4 Jadi iulaki si Latus ma manungkunsi: Ai seng balosanmu ai? Tonggor ma buei ni tukas-tukas ni sidea ai dompak Ham! 15:5 Tapi aha pe lang ibalosi Jesus, pala longang uhur ni si Latus. (bd. 14:61; Jes. 52:7.) 15:6 Tapi sanggah ari pesta, somal do ipaluah bani sidea sada halak na tartutup domu hubani pangindoan ni sidea. 15:7 Anjaha adong ma sada halak na margoran si Barabas, na rap tartutup pakon halak panggeori, na mambunuh jolma sanggah na geor ai. 15:8 Jadi naik ma halak na mabuei ai mangindohon, ase ibahen bani sidea songon na somal. 15:9 Balos ni si Latus hubani sidea: Dear do uhurnasiam, ase hupaluah bani nasiam Raja ni Jahudi in? 15:10 Ai ibotoh, halani subil ni uhur do, ase iondoskon sintua ni malim Ia. 15:11 Tapi ijuljul sintua ni malim ai ma halak na mabuei ai, ase si Barabas ipaluah bani sidea. (Lah. 3:14.) 15:12 Jadi nini si Latus ma use mambalosi sidea: Anggo sonai, aha ma ipindo uhurnasiam sibahenonku bani halak, na ginoran on: Raja ni Jahudi? 15:13 Idilohon sidea ma: Parsilangkon ma Ia! 15:14 Jadi nini si Latus ma: Ai aha do na jahat ibahen? Tapi lambin igogohi sidea ma mandilohon: Parsilangkon ma Ia! 15:15 Tapi halani sihol mambuat uhur ni halak na mabuei ai si Latus, gabe ipaluah ma si Barabas; dob hona lonsingan, iondoskon ma Jesus, ase iparsilangkon. 15:16 Tentara ai pe iboan ma Ia hu emper paruhuman ai (ai ma Pretorion), anjaha ipatumpu sidea ma ganup pasukan tentara ai hujai. 15:17 Isorungkon sidea ma hubani baju sigerger, anjaha idandan ranting-ranting na marduri-duri bahen sortali, lanjar inahkon sidea ma ai bani ulu ni Jesus. 15:18 Dob ai roh ma sidea marsombahsi, nini ma: Tabi ma Bamu, Raja ni Jahudi! 15:19 Ipukuli ma uluni bani tolong, itijuri ma Ia, anjaha manrogop ma sidea laho manombahsi. (bd. 14:65.) 15:20 Ase dob ipahiri-hiri sidea Ia, itanggali sidea ma hum-Bani baju sigerger ondi, anjaha isorungkon ma pakeianni hinan. Dob ai iboan ma Ia hu darat, laho mamparsilangkonsi. (Heb. 13:12.) 15:21 Jadi ipaksa sidea ma sada halak, na montas hunjai roh hunjumani, laho mamorsan silang ai, ai ma si Simon na hun Kirene, bapa ni si Alexander ampa si Rupus. (Rom 16:13.) 15:22 Iboan sidea ma Ia hu Golgata (artini partangkurakan). 15:23 Ibere sidea ma hubani anggur na marsaor mir, tapi seng ijalo. 15:24 Dob iparsilangkon sidea Ia, ibagi sidea ma hiouni; marjomput na sinurat do sidea, laho mambagi ai. 15:25 Pukul siah do iparsilangkon sidea Ia. 15:26 Tarsurat do i atasni pasal halani, ase iuhum ia, ai ma: Raja ni Jahudi. 15:27 Rap pakon Jesus adong do iparsilangkon dua halak panrampok, sada hampit siamunni, na sada nari hampit sambilouni. 15:28 Gabe jumpah ma na hinatahon ni surat in: Tarhira do Ia bani halak parjahat. (Jes. 53:12.) 15:29 Jadi irisai sagala na montas ai ma Ia, iupir-upirhon sidea ma uluni, lanjar nini bei: Pe Ho, na sihol parsedahon rumah panumbahan in, anjaha pajongjongkonsi use ibagas tolu ari! (bd. 14:58.) 15:30 Paluah ma dirimu, anjaha susur ma Ho tongon humbani hayu parsilang in! 15:31 Sonai homa do pangapasi ni sintua ni malim ampa sibotoh surat, nini ma: Ia halak na legan ipaluah, hape dirini sandiri seng tarpaluahsi. 15:32 Ale Kristus, Raja ni Jahudi! Susur ma Ho tongon humbani hayu parsilang in, ase iidah hanami, ase porsaya hanami! Anjaha hasomanni na tarsilang ai pe mangapasi do. (Joh. 1:49; 12:13.) 15:33 Mulai pukul sapuluh dua das hu pukul tolu sogop ma na golap hu sab tanoh in. 15:34 Anjaha pukul tolu gogoh ma Jesus mandilohon: Eloi, Eloi, lama sabachtani! artini: Ale Naibatangku, Naibatangku, mase ma tadingkononmu Ahu? (Ps. 22:2.) 15:35 Mambogei ai nini halak na jongjong ai ma: Bogei ma, idilo do si Elias! 15:36 Jadi laho ma sada halak mambuat limut, isornobhon ma ai bani na migar, anjaha ilongkothon ma ai bani tolong laho mamberesi minum. Nini sidea ma: Torih hita ma, atap roh do si Elias patuadhonsi! 15:37 Marsora na gogoh ma Jesus, jadi rotap ma hosahni. 15:38 Marigat ma tirei na i rumah panumbahan ai, bolah dua hun datas hu toruh. 15:39 Dob iidah kopala ni tentera, na jongjong ai ijai, sonai parmateini, nini ma: Tongon do Anak ni Naibata halak on! 15:40 Manatap-natap do humbani na daoh piga-piga naboru songon si Maria Magdalena, si Maria inang ni si Jakobus siposonan, ambah ni ai inang ni si Josep, ampa si Salome. 15:41 Sanggah i Galilea ope Ia, domma iirikkon sidea Ia, laho marugas hu-Bani. Buei do parinangon na legan na tangkog pakonsi hu Jerusalem. 15:42 Jadi dob bod ari, anjaha halani parugasonkon ma ai, ai ma ari marayak ari Sabat, 15:43 roh ma si Josep par, Arimatea, pagori ni pangadilan tinggi, sada halak na sangap, na paima-imahon harajaon ni Naibata; ibaranihon ma dirini laho hulobei ni si Latus mangindo bangkei ni Jesus. 15:44 Longang do si Latus manangar na dob matei Jesus, gabe idilo ma kopala ni tentara ai anjaha isungkun ma ia, atap na dob dokah ma Jesus matei. 15:45 Ase dob ibotoh pasal ai humbani kopala ni tentara ai, iondoskon ma bangkei ni Jesus bani si Josep. 15:46 Iboli si Josep ma hiou linen na alus, anjaha ipasusur ma bangkei ai humbani parsilang ai. Ibaluti ma Ia bani hiou linen ai, anjaha ipatibal hubagas tanoman na dob niliang, dob ai igulang ma sada batu bani babah ni tanoman ai. 15:47 Iidah si Maria Magdalena ampa si Maria inang ni si Joses do, atap huja do Ia itibalhon. (ay. 40.)

Markus 16

16:1 Ase dob salpu ari Sabat ai, iboli si Maria Magdalena pakon si Maria inang ni si Jakobus ampa si Salome ma minak na misbou, laho maminaki Jesus. (bd. 14:8; 1 Mus. 50:2.) 16:2 Jadi girah sogod, bani ari parlobei dob Sabat ai, laho ma sidea hu tanoman ai, bani poltak ni mata ni ari. 16:3 Nini sidea ma samah sidea: Ise ma manggulang batu ai banta hun babah ni tanoman ai? 16:4 Anjaha sanggah na mangkawah sidea, iidah sidea ma na dob igulang batu ai; borat tumang do batu ai. 16:5 Imasuki sidea ma tanoman ai, jadi iidah sidea ma sada garama, marpakeian na lopak, hundul hampit siamun, gabe mabiar tumang ma sidea. 16:6 Tapi nini ma dompak sidea: Ulang nasiam mabiar! Ipindahi nasiam do Jesus na hun Nasaret, na dob pinarsilangkon ai. Domma puho Ia, seng ijon be Ia. Tonggor nasiam ge ianan hatibalanni on hinan! 16:7 Tapi laho ma nasiam, patugah nasiam ma bani susianni ampa bani si Petrus: Lobeianni do nasiam hu Galilea, songon na dob hinatahonni hinan bani nasiam! (bd. 14:28.) 16:8 Sidea pe luar ma hun tanoman ai, hitir-hitir anjaha tarsonggot. Halani mabiar sidea seng ipatugah sidea ai atap hubani ise pe. 16:9 Dob puho Ia girah sogod, bani ari parlobei ni Minggu ai, ipataridahkan ma dirini parlobei hubani si Maria Magdalena; humbani do iusir ijia pitu setan. (Luk. 8:2; Joh. 20:11-18.) 16:10 Ia pe laho ma patugahkon ai hubani halak na mangkasomani Jesus hinan, na marhoru anjaha tangis ai. 16:11 Tapi dob ibogei sidea, na dob mulak manggoluh Ia anjaha ipataridahkon dirini bani si Maria Magdalena, seng dong porsaya sidea. 16:12 Dob ai ipataridahkon ma use Dirini ibagas rupa na legan hubani dua halak humbani sidea, sanggah laho sidea hu huta na legan. (Luk. 24:13-35.) 16:13 Jadi laho ma sidea patugahkon na masa ai bani na legan ai, tapi seng porsaya age sidea. 16:14 Ipudini ai ipataridahkon ma Dirini bani na sapuluh sada ai, sanggah na hundul sidea mangan. Ipinsang ma sidea halani hurang porsaya sidea anjaha hengkeng uhur ni sidea, ai seng porsaya sidea bani halak na mangidahsi, dob puho Ia. (1 Kor. 15:5.) 16:15 Dob ai nini ma hubani sidea: Laho ma hanima hu sab dunia on, ambilankon hanima ma ambilan na madear in bani sagala na tinompa. (bd. 13:10; Mat. 28:18-20.) 16:16 Na porsaya anjaha tardidi dapotan haluahon tapi na so porsaya hona uhum do! (Joh. 3:18, 36.) 16:17 Anjaha on ma tanda na mangihut bani na porsaya: Marhitei Goranku usiron ni sidea do sibolis, anjaha marsahap na baru do sidea. (Lah. 2:4; 16:18.) 16:18 Jomputon ni sidea do ulog, anjaha age pe iinum rasun hamateian, seng pala mahua sidea; tampeihonon ni sidea do tanganni bani na boritan gabe malum ma sidea. (Lah. 28:3-6, 8; Jak. 5:14.) 16:19 Ia Tuhan Jesus, dob marsahap Ia pakon sidea, tarangkat ma hu nagori atas, anjaha hundul ma i siamun ni Naibata. (Heb. 1:3, 13.) 16:20 Tapi laho ma anggo sidea mangambilankon ambilan na madear in, huja-huja pe. Iurupi Tuhan in do sidea, anjaha ipatotap do ambilan ni sidea ai marhitei tanda na mangihut ai. (Lah. 3:16; 5:15; 14:3; Heb. 2:4.)

Lukas 1

1:1 Domma buei namin halak na manlajou manuratkon barita ni na masa, na tarjadi itongah-tongahta, 1:2 songon na pinadas hubanta marhitei sidea na mangidah ai humbani mungkahni, anjaha na dob gabe juak-juak bani hata in; 1:3 anjaha ahu pe huputushon do uhurhu manuratkon ai jojor bamu, ale Teopilus, na pinarsangapan, dob lobei hupareksa ganupan ai humbani mungkahni. (Lah. 1:1.) 1:4 ase ibotoh ham hasintongan ni sagala pahara, na dob niajarhon bamu. 1:5 Sanggah si Herodes raja i tanoh Judea, adong ma sada malim humbani golongan ni si Abia, na margoran si Sakarias, ampa parinangonni, boru Aron, na margoran si Elisabet. (1 Kron. 24:10.) 1:6 Pintor do sidea haduasi ilobei ni Jahowa, anjaha iparlahouhon sidea do titah ampa aturan ni Tuhan in, seng dong sipandangon. 1:7 Seng dong anak bani sidea, ai na lambang do si Elisabet, anjaha matua ma sidea haduasi. 1:8 Jadi masa ma, sanggah si Sakarias, mangihuthon horin ni golonganni mandalankon horja hamalimon ilobei ni Naibata, 1:9 gabe ia ma masuk hu rumah ni Tuhan in manutung dahupa, dob marjomput na sinurat sidea mangihuthon hasomalan ni malim. (2 Mus. 30:7.) 1:10 I darat do ango halak na mabuei ai martonggo sanggah panorang manutung dahupa ai. 1:11 Jadi taridah ma hubani malekat ni Tuhan in, jongjong hampit siamun ni anjap-anjap pardahupaan ai. 1:12 Tarsonggot ma si Sakarias mangidah ai anjaha mabiar. 1:13 Tapi nini malekat ai ma hubani: Ulang ho mabiar, ale Sakarias, ai domma hona tangihon tonggomu; tubuhkonon ni parinangonmu ma bam sada anak, anjaha bahen ma goranni si Johannes. 1:14 Malas ma uhurmu anjaha marmegah-megah, anjaha buei do halak na marmalas ni uhur halani partubuhni ai. 1:15 Ai banggal do ia ilobei ni Tuhan in. Seng siinum anggur ampa sagala minuman na koras ia, anjaha gokan ni Tonduy Na pansing do ia humbani partapaan nari. (Panguh. 13:4, 5.) 1:16 Buei do anak ni Israel pasuangonni bani Tuhan, Naibata ni sidea. 1:17 Anjaha ia ma parlobei ni Tuhan ibagas tonduy ampa hagogohon ni si Elias, laho pasuangkon uhur ni bapa bani anakni, ampa uhur na so ra mambalosi hubani uhur na bonar, laho pasirsirhon bani Tuhan in sada bangsa na torsa. (Mal. 3:1; Mat. 17:11-13.) 1:18 Jadi nini si Sakarias ma bani malekat ai: Hunja ma botohonku ai? Ai domma matua ahu, anjaha parinangonku pe domma matua. (1 Mus. 18:11.) 1:19 Nini malekat ai ma mambalosisi: Si Gabriel do ahu, na jongjong ilobei ni Naibata, isuruh do ahu marsahap pakon ho, ampa mamboan ambilan malas ni uhur on bam. (Dan. 8:16; Heb. 1:14.) 1:20 Tapi longah ma ho, seng tarbahen ho be marsahap das bani ari parmasa ni ai, halani na so porsaya ai ho bani hatangkin, ai ma na sihol sipamasaon bani panorangni. 1:21 Ia halak na mabuei ai, sai paima-imahon do bani si Sakarias, anjaha longang do sidea, mase sonai dokahni ia i rumah panumbahan ai. 1:22 Dob luar ia, seng be boi ia marsahapkon sidea, gabe mangahap ma sidea, na dob adong do niidahni i rumah panumbahan ai. Marusihan mando ia bani sidea, tapi anggo ia lanjar longah ma. 1:23 Ase dob gok panorangni marugas, mulak ma ia hu rumahni. 1:24 Seng piga dokah nari boratan rumah ma si Elisabet, parinangonni ai; marponop-ponop ma ia lima bulan dokahni. 1:25 Nini: Pambahen ni Tuhan do on bangku, sanggah na kinawahkonni ai ahu, laho mambuat habadoronku ilobei ni halak. (1 Mus. 30:23.) 1:26 Salpu onom bulan isuruh Naibata ma malekat Gabriel hu sada huta i tanoh Galilea, na margoran Nasaret, 1:27 marayak sada anak-boru, tunangan ni sada dalahi, na margoran si Josep, humbani ginompar ni si Daud; si Maria do goranni. (bd. 2:5; Mat. 1:16, 18.) 1:28 Masuk ma malekat ai marayaksi, anjaha nini ma: Tabi ma bamu, ale na niidopan! Ihasomani Tuhan do ham! 1:29 Tapi tarsonggot do ia pasal hata ai, anjaha iparuhurhon do, atap aha do arti ni hata tabi ai. 1:30 Jadi nini malekat ai ma hubani: Ulang ma mabiar ham Maria, ai dapotan idop ni uhur do ham humbani Naibata. 1:31 Tonggor ma, boratan rumah ma ham anjaha tubuhan anak; bahen ma goranni Jesus. (Jes. 7:14; Mat. 1:21-23.) 1:32 Banggal do Ia use, goranon do Ia Anak ni Sitimbulan in; bereon ni Naibata do Bani paratas ni si Daud, bapani ai. (2 Sam. 7:12-13.) 1:33 Rajaanni do ginompar ni si Jakob sadokah ni dokahni, anjaha seng dong ujung ni harajaonni ai. 1:34 Dob ai nini si Maria ma hubani malekat ai: Sonaha ma parjadi ni ai, ai seng dong hutanda dalahi? 1:35 Jadi nini malekat ai ma mambalosisi: Sogopan ni Tonduy Na pansing ma ham, anjaha linggoman ni hagogohon ni Sitimbulan in; halani ai; Na pansing do goranon na sihol tubuh in, Anak ni Naibata. (Mat. 1:18, 20.) 1:36 Anjaha tonggor ma, si Elisabet pe, sindohormu ai, na dob targoran lambang, domma boratan rumah, paonom bulankon ma nuan. 1:37 Ai seng dong na so boi bani Naibata. (1 Mus. 18:14.) 1:38 Jadi ihatahon si Maria ma: Tonggor ma, jabolon ni Tuhan in do ahu. Sai saud ma hubangku songon na hinatahonmu in! Dob ai itadingkon malekat ai ma ia. 1:39 Bani panorang ai laho ma si Maria, ipapodas ma laho hu tanoh pardologan ai, hu sada huta na i Juda. 1:40 Masuk ma ia hu rumah ni si Sakarias, anjaha itabi ma si Elisabet. 1:41 Mambogei tabi ni si Maria ai mangunsal ma na etek-etek, na ibagas partapaanni ai, jadi gok Tonduy Na pansing ma si Elisabet. (ay. 15.) 1:42 Marsora na gogoh ma ia, lanjar nini ma: Ho do na pinasu-pasu itongah-tongah ni parinangon, anjaha na pinasu-pasu do na pinarorotmin. 1:43 Mase ma masa on bangku, inang ni Tuhanku roh marayak ahu? 1:44 Ai tonggor ma, ijin das sora ni tabimai bani pinggolhu, mintor mangunsal do dakdanak, na ibags boltokku, halani malas ni uhurni. 1:45 Martuah ma ho, halani ihaporsayai ho, na maningon saud do na hinatahon ni Tuhan bam! (bd. 11:28.) 1:46 Jadi nini si Maria ma: Ipatimbul uhurhu do Tuhan in! 1:47 Marmegah-megah do tonduyhu mangidah Naibata, Sipaluah ahu. 1:48 Ai itatap do haetekon ni jabolonni on. Tonggor ma, ai olat ni on parhatuahon ni sagala sundut ma ahu. (bd. 11:27; Ps. 113:5, 6.) 1:49 Ai banggal do na binahen ni Pargogoh in bangku. Na pansing do goranni ai. 1:50 Ai marsundut-sundut do idop ni uhurni bani na mangkabiarisi. (Ps. 103:13, 17.) 1:51 Hagogohon do ihorjahon tanganni; mambur merab do ibahen sigijang maruhur. (2 Sam. 22:28.) 1:52 Ipaturun do siparkuasa humbani paratas ni sidea, tapi ipatimbul do halak na etek. (Ps. 147:6.) 1:53 Na madear do igoki bani na loheian, tapi halak na bayak lumei do ipalaho. (Ps. 34:11; 107:9.) 1:54 Iurupi do Israel, juak-juakni in, mardingat idop ni uhurni ai, 1:55 songon na hinatahonni bani ompungta, hubani si Abraham ampa hubani ginomparni sadokah ni dokahni. (1 Mus. 17:7; 18:18.) 1:56 Hira-hira tolu bulan do si Maria marianan rap pakon si Elisabet, dob ai mulak ma ia hu rumahni. 1:57 Jadi gok ma panorang bani si Elisabet, ase tubuhan tuah ia, gabe itubuhkon ma sada anak. 1:58 Dob ibogei romban rumahni ampa sindohorni, na dob maridop ni uhur banggal Tuhan in hubani, marmalas ni uhur ma sidea rap pakonsi. 1:59 Bani ari paualuhkon roh ma sidea, laho manunat na etek-etek ai; ibahen sidea ma goranni si Sakarias mangihutkon goran ni bapani. 1:60 Tapi nini inangni ai ma mambalosi: Lang ai, si Johannes do goranni bahenon! (ay. 13.) 1:61 Jadi nini sidea ma: Seng dong na margoran sisonai sindohormu! 1:62 Marusihan ma sidea mangindo humbani bapani, atap ise do goranni bahenon ipangindo uhurni. 1:63 Jadi ipangindo ma panuratan, isuratkon ma: Si Johannes do goranni! Jadi longang ma sidea ganup. 1:64 Anjaha mintor mungkab ma pamanganni, suang parsahapni, anjaha marsora ma ia mamuji Naibata. 1:65 Jadi mabiar ma ganup romban rumahni, anjaha isahap-sahapkon halak do na masa ai i sab pardologan Juda. 1:66 Anjaha ganup na manangar ai iparuhurhon do barita ai, nini sidea ma: Na gabe aha ma holi nani dakdanak ai? Ai ihasomani tangan ni Tuhan do ia. 1:67 Jadi gok Tonduy Na pansing ma si Sakarias, bapani ai, gabe manjahai ma ia, nini ma: 1:68 Pinuji ma Naibata ni Israel, halani itohu do bangsani anjaha ibahen partobusni. (bd. 7:16.) 1:69 Ipajongjong do banta tanduk haluahon i rumah ni si Daud, juak-juakni ai, (Ps. 132:17.) 1:70 songon na hinatahonni marhitei pamangan ni nabini na susi in humbani sapari nari, ai ma: 1:71 Paluahonni do hita humbani munsuhta, ampa humbani tangan ni sagala na marsogam ni uhur banta; 1:72 idopanni do bapanta, anjaha ingatonni do padanni na mapansing ai. (1 Mus. 17:7; 3 Mus. 26:42.) 1:73 Ai ma bulawanni, na binulawanhonni bani si Abraham, bapanta ai, (1 Mus. 22:16, 17; Mik. 7:20.) 1:74 paboa bereonni do hubanta, ase hita, dob marhaluahon humbani tangan ni munsuhta, seng marhabiaran boi marugas i lobeini. (Tit. 2:12, 14.) 1:75 ibagas hapansingon ampa hapintoron, sadokah hita manggoluh. 1:76 Ia ho, ale ambia, goranon do ho nabi ni Sitimbulan, ai parlobei ni Tuhan in do ho, laho patureihon dalanni, (Mat. 3:3.) 1:77 laho mambere bani bangsani habotohon pasal haluahon marhitei hasasapan ni dousa ni sidea, (Jer. 31:34.) 1:78 halani idop ni uhur ni Naibatanta do mambehen roh sinalsal hun datas marayak hita, (4 Mus. 24:17; Jes. 60:1-2; Mal. 3:20.) 1:79 laho manondangi halak na hundul ibagas hagolapan ampa linggom ni hamateian, anjaha patuduhkon langkahta bani dalan hadameion. (Jes. 9:1.) 1:80 Ia dakdanak ai lambin banggal do anjaha margogoh ibagas tonduy; anjaha sai i halimisan do ia das bani panorang talar ia bani bangsa Israel. (Mat. 3:1.)

Lukas 2

2:1 Jadi roh ma ijia parentah humbani kesar Augustus, ase isurathon sagala jolma na ibagas gomgomanni. 2:2 Panuratan na parlobei ma ai, sanggah si Kerenius manggomgomi tanoh Siria. 2:3 Jadi misir ma haganup, ase isuratkon, ganup hu huta hasusuranni bei. 2:4 Misir ma homa si Josep hun Galilea, hun huta Nasaret, laho hu Judea, hu huta ni si Daud, na margoran Betlehem, halani hun marga ampa humbani ginompar ni raja Daud ia. 2:5 laho ma pasuratkon dirini rap pakon si Maria, tunanganni ai, na dob boratan rumah ai. 2:6 Anjaha sanggah na ijai sidea, jumpah ma panorangni tubuhan tuah ia. 2:7 Jadi itubuhkon ma anak bunga tubuhni, ibaluti ma bani ampan, anjaha ipatibal bani panggagatan, halani seng dong ianan bani sidea i rumah parbornginan. (Mat. 1:25.) 2:8 Jadi adong ma parmahan marborngin i sampalan na bani ianan ai, manjagai pinahan ni sidea. 2:9 Jadi roh ma sada malekat marayak sidea, anjaha marsinalsal ma sangap ni Tuhan inggot sidea, gabe mabiar tumang ma sidea. 2:10 Tapi nini malekat ai ma hubani sidea: Ulang mabiar hanima! Tonggor ma, ai ambilan malas ni uhur banggal do huboan bannima, parulihan ni ganup bangsa. 2:11 Ai domma tubuh bannima saborngin on, i huta ni si Daud, Sipaluah in, in ma Kristus Tuhan in! 2:12 On ma partinandaan bannima: Jumpahonnima do sada na etek-etek, ibaluti bani ampan, tibal bani panggagatan. 2:13 Jadi sompong adong ma hasoman ni malekat ai, buei bala parnagori atas, ipuji sidea ma Naibata, nini ma: (Dan. 7:10.) 2:14 Hasangapon ma bani Naibata na i babou, damei ma i tanoh on bani jolma hinarosuhkonni in. (bd. 19:38; Jes. 57:19; Ep. 2:14-7.) 2:15 Dob laho malekat ai humbani sidea dompak nagori atas, nini parmahan ai ma samah sidea: Laho ma hita hu Betlehem mengidah na masa ai, na pinabotohkon ni Tuhan in banta. 2:16 Jadi podas ma sidea laho hujai, anjaha jumpah sidea ma tongon si Maria ampa si Josep ampa Dakdanak ai ibagas panggagatan. 2:17 Ase dob iidah sidea Ia, ipatugah sidea ma sahap na dob ihatahon bani sidea pasal Dakdanak ai. 2:18 Anjaha haganup na manangar ai, longang bei do pasal na hinatahon ni parmahan ai bani sidea. 2:19 Ia si Maria iparimbagaskon do haganup hata ai, anjaha ipingkirpingkiri ibagas uhurni. (ay. 51.) 2:20 Mulak ma parmahan ondi, ipasangap anjaha ipuji sidea do Naibata halani haganup na tinangar ampa na niidah ni sidea, songon na dob hinatahon hinan bani sidea. 2:21 Dob jumpah ari paualuhkon ai ma panorang parsunatonkon Bani, jadi ibahen ma goranni Jesus, songon panggoran ni malekat ai paima solat ia. (bd. 31:59.) 2:22 Ase dob gok panorang pangurasion Bani magihutkon aturan ni si Musa, iboan sidea ma Ia hu huta Jerusalem, laho mangondoskonsi bani Tuhan in, 2:23 songon na tarsurat ibagas titah ni Tuhan in; "Sagala dalahi bunga tubuh ni inangni, maningon pansing do goranon bani Tuhan in", (2 Mus. 13:2.) 2:24 lanjar mamboan galangan, songon na niaturhon ibagas titah ni Tuhan in, ai ma dua kuhuy atap dua anak ni asas. (3 Mus. 12:8.) 2:25 Jadi adong ma sada halak i Jerusalem, na margoran si Simeon, halak na bonar anjaha na daulat, na paimaimahon Sipangapoh na bani Israel; marianan do Tonduy Na pansing bani. (Jes. 40:1; 49:13.) 2:26 Anjaha domma ipabotohkon Tonduy Na pansing bani, na so idahonni hamateian, anggo seng palobei iidah Kristus ni Tuhan in, 2:27 Jadi roh ma ia hu rumah panumbahan ijuljul Tonduy ai. Anjaha sanggah na iboan namatorasni Jesus, Dakdanak ai hu bagas laho mambahen hu-Bani mangihutkon adat na niaturhon ni titah ai, 2:28 jadi iabing si Simeon ma Dakdanak ai, ipuji ma Naibata, nini ma: 2:29 Lopas Ham ma sonari Tuhan jabolonmu misir ibagas damei, songon na hinatahonmu in, 2:30 ai domma iidah matangku haluahon na hum-Bamu, 2:31 na pinasirsirmu ilobei ni sagala bangsa, 2:32 sada Panondang, na laho manondangi sipajuh begu-begu, anjaha hasangapon bani bangsamu halak Israel. 2:33 Jadi longang ma uhur ni bapani pakon inangni mambogei hatani ai, ai ma pasal Na etek-etek ai. 2:34 Anjaha ipasu-pasu si Simeon ma sidea, nini ma bani si Maria, inangni ai: Tonggor ma, na tinaktakkon do on gabe pardabuhan ampa parjongjongan bani buei Israel, anjaha gabe tanda silawanon. (Jes. 8:14; Mat. 21:42; 1 Kor. 1:23.) 2:35 Anjaha ho pe tolpusan ni podang do tonduymu; masa pe ganupan ai, ase talar pingkiran ni buei uhur. 2:36 Anjaha adong do homa sada nabi naboru, na margoran si Hanna, boru ni si Penuel, humbani marga Aser. Domma matua ia, anjaha pitu tahun do ia marparamangon, dob laho. 2:37 Domma mabalu ia, anjaha ualuh puluh ompat tahun ma umurni. Seng meret ia hun rumah panumbahan ai, sai marpuasa anjaha martonggo do ia mangidangi Naibata arian pakon borngin. (1 Tim. 5:5.) 2:38 Roh do ia homa bani panorang ai, ipuji ma Naibata anjaha isahap-sahapkon do pasalsi bani haganup na mangkasiholhon haluahon ni Jerusalem. (Jes. 52:9.) 2:39 Ase dob idobkon sidea haganupan ai mangihutkon titah ni Tuhan in, mulak ma sidea hu Galilea, hu Nasaret, huta ni sidea ai. 2:40 Ia Dakdanak ai lambin banggalni do, lambin margogoh anjaha maruhur tumang, anjaha ihasomani idop ni uhur ni Naibata do Ia. (ay. 52; bd. 1:80.) 2:41 Anjaha siap tahun do laho namatorasni hu Jerusalem marpesta Paska. (2 Mus. 23:14-17.) 2:42 Jadi dob marumur Ia sapuluh dua tahun, rap tangkog ma sidea songon na somal hu pesta ai. 2:43 Dob salosei sidea na marpesta ai sanggah na mulak ai sidea, tading do Jesus, Dakdanak ai, i Jerusalem, seng pamotohan ni namatorasni. (2 Mus. 12:18.) 2:44 Iagan sidea, na dob rap Ia pakon odoran ni sidea, jadi idalani sidea ma parsadarian, laho mangindahisi itongah-tongah ni sindohor ampa na tinanda. 2:45 Jadi halani lang jumpah, mulak ma sidea hu Jerusalem, laho mangindahisi. 2:46 Dob salpu tolu ari, jumpah sidea ma Ia i rumah panumbahan, hundul itongah-tongah ni guru-guru, manangihon hata ni sidea lanjar manungkun-nungkun. 2:47 Longang do haganup na mabogeisi, halani torus ni uhurni ampa balosni. 2:48 Jadi dob iidah sidea Ia, tarsonggot ma sidea. Nini inangni ma hu-Bani: Mase ma sonin pambahenmu, anaha? Tonggor ma, rusak do uhurhu pakon bapamu mangindahi Ho! 2:49 Jadi nini ma hubani sidea: Mase ma pala pindahannasiam Ahu? Ai lang ibotoh nasiam, na patut do Ahu ibagas rumah ni Bapangku? (Joh. 2:16.) 2:50 Tapi seng iarusi sidea hata na hinatahonni ai bani sidea. 2:51 Jadi mulak ma Ia rap pakon sidea hu Nasaret, anjaha pambalosi do Ia bani sidea. Iparimbagaskon inangni do ganup na masa ai ibagas uhurni. 2:52 Anjaha lambin tambah do hapentaran ni Jesus sonai angkulani, anjaha iharosuhkon Naibata ampa jolma do Ia. (1 Sam. 2:26; Pod. 3:4.)

Lukas 3

3:1 Pasapuluh-lima-tahunkon dob manrajai Kesar Tiberias, sanggah si Pontius Latus manggomgomi Judea, sanggah si Herodes manrajai i Galilea, si Pilipus saninani ai i Iturea ampa Tarakonitis, si Lusanias i nagori Abilene, 3:2 sanggah hasintua-malimon ni si Hannas ampa si Kayapas, roh ma hata ni Naibata hubani si Johannes, anak ni si Sakarias, i halimisan. 3:3 Jadi laho ma ia hu sab nagori na bani bah Jordan, anjaha iambilankon ma ambilan hamubahon ni uhur, laho pasasapkon dousa, 3:4 songon na tarsurat ibagas buku panjahaion ni nabi Jesayas: Sora ni na mardilo-dilo i halimisan: Parsirsir ma dalan bani Tuhan in, pintor ma bahen sidalananni! (Jes. 40:3-5.) 3:5 Maningon tambusan do sagala habungan anjaha parondohon sagala dolog ampa buntu-buntu; maningon papintoron do na mareluk-eluk, anjaha padosdoson do dalan na marholbung-holbung. 3:6 Anjaha idahon ni sagala jolma ma haluahon na humbani Naibata! 3:7 Jadi ihatahon ma bani halak na mabuei ai na roh padidihon dirini hubani: Nasiam ginompar ni ulog! Ise do na mangajarhon bani nasiam, boi nasiam maluah humbani ringis na sihol roh in? (Mat. 23:33.) 3:8 Parbuahkon nasiam ma buah, tanda ni na dob mubah uhur! Ulang das ihatahon nasiam ibagas uhurnasiam: Si Abraham do bapanami! Ai huhatahon ma bani nasiam, tarjadihon Naibata do anak ni si Abraham humbani batu on. 3:9 Domma tampei hapak bani urat ni hayu. Sirobohon do sagala hayu na so madear parbuahni, anjaha sigijigkonon do hubagas apuy. 3:10 Jadi isungkun na mabuei ai ma ia; Aha ma sibahenonnami? 3:11 Nini ma mambalosi sidea: Ise na marbaju dua, ibere ma sada bani na so marbaju, anjaha na marnah sipanganon pe, sonai ma ibahen. 3:12 Roh do age sijalo sohei padidihon dirini, nini sidea ma: Guru, aha do sibahenonnami? 3:13 Jadi ihatahon ma bani sidea: Ulang ma tunggu nasiam lobih humbani na niaturhon bani nasiam! 3:14 Dihut do tentara roh manungkunsi: Ia hanami, aha do sibahenonnami! Jadi ibalosi ma: Ulang ma sunsahi, anjaha ulang ma dalankon nasiam odoh-odoh age bani ise! Hasonangkon nasiam ma gajinasiam! 3:15 Halani ibagas na paima-imahon do bangsa ai, anjaha ganup sidea sungkun-sungkun uhurni ibagas pasal si Johannes, atap Ia do Kristus ai, (Joh. 1:19-28.) 3:16 gabe nini si Johannes ma mambalosi sidea haganup: Ahu do tongon mandidihon nasiam bani bah, tapi na roh ma sigogohan humbangku, anjaha mananggali tali ni sipatuni pe seng talup ahu. Didihononni ma bani nasiam Tonduy Na pansing pakon apuy. 3:17 Bani tanganni do pamurpuran, anjaha paborsihonni ma pardogeianni; patumpuonni ma omei husopouni, tapi tutungonni do anggo lam-lamni hubagas apuy na so ra miloh. 3:18 Buei ope na legan itarsingati bani bangsa ai, laho mangambilankon ambilan na madear bani sidea. 3:19 Ia raja Herodes, hona hata do ia ibahen si Johannes, halani si Herodias, parinangon ni saninani, ampa halani sagala hajahaton na hinorjahon ni si Herodes ai. (Mat. 14:3, 4; Mrk. 6:17-18.) 3:20 Tapi tambah ni ganupan ai, ipamasuk ma si Johannes hubagas tutupan. 3:21 Sanggah na tardidi halak na mabuei ai haganup, dihut do Jesus tardidi. Jadi, sanggah martonggo Ia, mungkab ma langit. 3:22 anjaha susur ma Tonduy Na pansing marrupa asas hu-Bani, anjaha tarbogei ma sora hun langit, na mangkatahon: Ho do anak haholonganku, marosuh do uhurhu Bam! 3:23 Ia Jesus, sanggah mulai mangajari Ia, adaong ma umurni kira-kira tolu puluh tahun, anjaha mangihutkon pingkiran ni halak, Ia, ai ma anak ni si Josep, anak ni si Eli, (bd. 4:22.) 3:24 anak ni si Mattat, anak ni si Lepi, anak ni si Melki, anak ni si Janai, anak ni si Josep, 3:25 anak ni si Mattatias, anak ni si Amos, anak ni si Nahum, anak ni si Hesli, anak ni si Naggai, 3:26 anak ni si Maat, anak ni si Mattatias, anak ni si Semein, anak ni si Josek, anak ni si Joda, 3:27 anak ni si Johanan, anak ni si Resa, anak ni si Serubabel, anak ni si Sealtiel, anak ni si Neri, 3:28 anak ni si Melki, anak ni si Addi, anak ni si Kosam, anak ni si Elmadam, anak ni si Er, 3:29 anak ni si Josua, anak ni si Elieser, anak ni si Jorim, anak ni si Mattat, anak ni si Lepi, 3:30 anak ni si Simeon, anak ni si Juda, anak ni si Josep, anak ni si Jonam, anak ni si Eliakim, 3:31 anak ni si Melea, anak ni si Menna, anak ni si Mattata, anak ni si Natan, anak ni si Daud, 3:32 anak ni si Jessei, anak ni si Obed, anak ni si Boas, anak ni si Salmon, anak ni si Nahasson, 3:33 anak ni si Aminadab, anak ni si Admin, anak ni si Arni, anak ni si Hesron, anak ni si Peres, anak ni si Juda, 3:34 anak ni si Jakob, anak ni si Isak, anak ni si Abraham, anak ni si Tera, anak ni si Nahor, 3:35 anak ni si Seruk, anak ni si Rehu, anak ni si Peleg, anak ni si Heber, anak ni si Sala; 3:36 anak ni si Kainan, anak ni si Arpaksad, anak ni si Sem, anak ni si Noak, anak ni si Lamek, 3:37 anak ni si Metusala, anak ni si Henok, anak ni si Jared, anak ni si Mahaleel, anak ni si Kenan; 3:38 anak ni si Enos, anak ni si Set, anak ni si Adam, anak ni Naibata.

Lukas 4

4:1 Gok bani Tonduy na pansing mulak ma Jesus hun bah Jordan. Ibobai Tonduy ai ma Ia hu halimisan, 4:2 anjaha ilajou sibolis ai ma Ia ompat puluh ari dokahni. Seng dong mangan atap aha pe Ia bani panorang ai, jadi dob salpu ai, malohei ma iahap. 4:3 Jadi nini sibolis ai ma hu-Bani: Anggo tongon do Ham anak ni Naibata, hatahon Ham ma batu on gabe ruti! 4:4 Tapi ibalosi Jesus ma ia: Tarsurat do: Seng pitah ruti tumang hagoluhan ni Jolma. (5 Mus. 8:3.) 4:5 Dob ai ibobai ma Ia bani ianan na gijang, anjaha ibagas na sangkidop mata ipatuduhkon ma Bani sagala harajaon na i dunia on. 4:6 Lanjar ihatahon sibolis ai ma hu-Bani: Bamu pe hubere ganup kuasa on ampa hasangaponni ai, ai domma bangku iondoskon ai, anjaha hubere do ai hubani halak harosuh ni uhurhu. 4:7 Anggo ra Ham marsombah bangku, Bamu ma haganupan in. 4:8 Jadi nini Jesus ma mambalosisi: Tarsurat do: Tuhan Naibatamu do sisombahonmu, anjaha sahalaksi do hansa sibalosanmu! (5 Mus. 6:13, 14.) 4:9 Dob ai ibobai ma Ia hu Jerusalem, ipajongjong ma Ia bani anjung-anjung ni rumah panumbahan ai, anjaha nini ma hu-Bani: Anggo Anak ni Naibata do Ham, lumpatkon Ham ma hunjon hu toruh. 4:10 Ai tarsurat do: Hatahononni do malekatni halani ho, ase ijagai ho, (Ps. 91:11, 12.) 4:11 anjaha tatang-tatangon ni sidea ma ho, ase ulang tarantuk naheimu bani batu! 4:12 Tapi nini Jesus ma mambalosisi: Ihatahon do homa: Seng bulih lajouonmu Tuhan Naibatamu! (5 Mus. 6:16.) 4:13 Jadi, dob salpu idalankon sibolis ganup parlajouan ai, itadingkon ma Ia, paima jumpah panorangni use. (Heb. 4:15.) 4:14 Jadi mulak ma Jesus hu Galilea, ibagas hagogohan ni Tonduy ai, anjaha sar ma baritani bani ganup nagori ai inggot. 4:15 Mangajari do Ia bani parguruan ni sidea, anjaha haganup do mamujisi. (Mat. 4:12-17; Mrk. 1:14, 15.) 4:16 Jadi roh ma Ia hu Nasaret, huta hagodanganni ai; mangihutkon hasomalanni, masuk ma Ia hu parguruan ai sanggah ari Sabat, anjaha jongjong ma Ia laho mambasa. 4:17 Jadi ibere ma hu-Bani buku ni nabi Jesayas; iungkab ma ai, gabe jumpahsi ma na tarsurat sonon: (Jes. 61:1, 2.) 4:18 Tonduy ni Tuhan in do sogop hu-Bangku, ai iminaki do Ahu, laho mangambilankon ambilan na madear bani halak na masombuh. Isuruh do Ahu laho patugahkon haluahon bani na tartutup ampa mambahen marpangidah use na mapitung, laho paluahkon halak na niodoh-odoh, 4:19 ampa patugahkon tahun paridop ni uhuran ni Tuhan in. (3 Mus. 25:10.) 4:20 Dob ai igulung ma buku ai, ipaulak ma ai bani siparugas, lanjar hundul. Jadi nono ma hu-Bani ganup mata ni halak na i parguruan ai. 4:21 Jadi ihatahon ma hubani sidea: Sadarion ma jumpah na tarsurat in, na binogei nasiam in. 4:22 Haganup do sidea marhatongonkon, anjaha longang bei do sidea manangar hata na mantin, na luar humbani pamanganni ai, gabe nini sidea ma: Ai lang anak ni si Josep do Ia? (Joh. 6:42.) 4:23 Jadi nini ma hubani sidea: Hatahononnasiam do namin Bangku hata ni limbaga on: Ale doktor, pamalum dirimu! Sagala na binogeinami pasal na binahenmu i Kapernaum, lanjar ai ma bahen ijon, i huta hagodanganmon! (Mat. 4:13.) 4:24 Tapi nini ma: Sintong do na huhatahon on bani nasiam: Seng adong nabi na marsangap i nagorini sandiri. (Joh. 4:44.) 4:25 Ibagas hasintongan huhatahon ma bani nasiam: Buei do namin naboru na mabalu i tanoh Israel bani panorang ni si Elias, sanggah na tartutup langit ai tolu tahun onom bulan, sanggah na masa lohei maningting i tanoh on, (1 Raj. 17:1, 9; 18:1; Jak. 5:5, 17.) 4:26 tapi seng isuruh si Elias atap hubani ise sidea, tapi hu Sarpat do, na i nagori Sidon, hubani sada naboru na mabalu. 4:27 Anjaha buei do na gadamon i Israel bani panorang ni nabi Elisa, tapi seng dong humbani sidea na gabe malum, pitah si Naeman halak Siria ai do, (2 Raj. 5:14.) 4:28 Jadi marah tumang ma haganup na i parguruan ai, dob ibogei sidea ai, 4:29 gabe jongjong ma sidea, iusir sidea ma Ia hu darat ni huta ai, das hu salansah ni dolog, hajongjongan ni huta ni sidea ai, laho manggulangkonsi hu toruh. 4:30 Tapi laho ma Ia, montas hun tongah-tongah ni sidea. 4:31 Jadi tuad ma Ia hu Kapernaum, ai ma sada huta i Galilea, anjaha iajari ma sidea sanggah ari Sabat. (Mat. 4:13; Joh. 2:12.) 4:32 Jadi longang ma sidea pasal pangajarionni ai, ai marhidorat do hatani ai. (Mat. 7:28, 29; Joh. 7:46.) 4:33 Anjaha adong do i parguruan ai sada halak partonduy setan na mabutak. Gogoh-gogoh do ia mardilo-dilo: 4:34 Ham Jesus na hun Nasaret! Ai roh do Ham sihol mangagou hanami? Hubotoh do atap ise Ham, ai ma na pansing ni Naibata! 4:35 Tapi isorgang Jesus ma ia, nini ma: Sip anjaha luar ma humbani! Jadi isampakkon setan ai ma ia hu tongah-tongah, anjaha luar ma ia humbani, tapi seng mahua ia ibahen. 4:36 Jadi longang ma uhur ni sidea ganupan, anjaha nini sidea ma samah sidea: Hata na sonaha do on? Ipaksa do tonduy na mabutak marhitei kuasa ampa gogoh, gabe mandarat do. 4:37 Jadi sar ma baritani ai bani ganup ianan, bani nagori na inggot hujai. 4:38 Laho ma Jesus hun parguruan ai, anjaha masuk ma Ia hu rumah ni si Simon. Ia anturang ni si Simon, parah do pane-paneni, gabe itarsingathon sidea ma pasalsi hu-Bani. 4:39 Jadi roh ma Ia jongjong hu lambungni, anjaha mangonai hata ma Ia bani pane-pane ai, gabe laho ma pane-pane ai humbani. Mintor jongjong ma ia, marugas bani sidea. 4:40 Dob sundut mata ni ari, ipamboan halak ma hu-Bani na boritan ni bei, na marbagei-bagei niarouni. Itampeihon ma tanganni bani ganup sidea, laho pamalum sidea. 4:41 Kaluar do setan-setan humbani buei halak, lanjar mardilo-dilo: Anak ni Naibata do Ham! Tapi isorgangi do sidea, anjaha lang ilopas sidea marsahap, halani ibotoh sidea, Ia do Kristus ai. (Mat. 8:29; Mrk. 3:11, 12; Lah. 16:17, 18.) 4:42 Tapi dob siang ari, laho ma Ia hudarat bani ianan na lungun. Ipindahi halak na mabuei ai do Ia, anjaha dob jumpah sidea, sihol do jolomon ni sidea Ia, ase ulang laho Ia humbani sidea. 4:43 Tapi nini ma hubani sidea: Maningon ambilankononku do homa ambilan na madear pasal harajaon ni Naibata age bani huta na legan ai, ai halani ai do ase isuruh Ahu. (bd. 8:1.) 4:44 Jadi laho ma Ia marambilan bani sagala parguruan ni halak Jahudi. (Mat. 4:23.)

Lukas 5

5:1 Bani na sahali, sanggah jongjong Jesus i topi ni tao Galilea, anjaha halak na mabuei ai marurup roh hu-Bani, laho manangar hata ni Naibata, 5:2 iidah ma dua parau i topi pasir ni tao ai; ai pardengke ai domma luar mamurihi jala ni sidea. 5:3 Jadi imasuki ma sada parau ai, si Simon do ompunganni ai, anjaha ipangindo ma hubani, ase ilugahon parau ai ganggang otik hun pasir. Hundul do anggo Ia mamodahi na mabuei ai hun parau ai. 5:4 Ase dob maronti Ia marambilan, nini ma hubani si Simon: Lugahon ma hubani sibagasan, anjaha sampakkon hanima ma jalanima, ase jumpahan hanima. (Joh. 21:6.) 5:5 Jadi nini si Simon ma mambalosi: Guru, torus do hanami saborngin on loja manjalai, tapi seng dong dapotan; tapi mangusagahkon hatamu ra do ahu mangamburhon jala ai. 5:6 Jadi dob ibahen sidea sonai, gabe dapot sidea ma buei dengke, pala marigat jala ni sidea. 5:7 Jadi ihilap sidea ma hasoman ni sidea na bani parau na legan ai, ase roh sidea mangurupi. Roh ma sidea, anjaha igoki sidea ma haduasi parau ai, pala narus-narus harom. 5:8 Mangidah ai si Simon Petrus, manrogop ma ia ilobei ni nahei ni Jesus anjaha nini ma: Laho ma Ham humbangku Tuhan, ai halak pardousa do ahu! 5:9 Ai longang do uhurni ampa uhur ni hasomanni halani dengke na dapot sidea ai, 5:10 sonai homa si Jakobus ampa si Johannes, anak ni si Sebedeus, hasoman ni si Simon ai. Jadi nini Jesus ma hubani si Simon: Ulang ho mabiar! Hunjon hujanan gabe sijala jolma ma ho. (Mat. 13:47.) 5:11 Dob itogu sidea parau ai hu darat, itadingkon sidea ma haganupan ai, anjaha iirikkon sidea ma Ia. (Mat. 19:27.) 5:12 Sanggah bani sada huta Jesus, adong ma sada halak na parah gadamni. Dob iidah Jesus manrogop ma ia mangindohon: Ham Tuhan, anggo ra Ham, tarpasusi Ham do ahu! 5:13 Jadi isurdukkon Jesus ma tanganni, ijamah ma ia, anjaha nini ma: Ra do Ahu, borsih ma ho! Jadi mintor magou ma gadam ai humbani. 5:14 Ipandang Jesus ma ia, ase ulang ipatugah-tugah ai bani halak. Tapi ihatahon do hubani: Laho ma ho, patuduhkon ma dirimu hubani malim. Dob ai galangkon ma na tinitahkon ni si Musa, halani na dob borsih ho, bahen hasaksian bani sidea! (3 Mus. 14:2-32.) 5:15 Tapi lambin sar ma baritani, gabe roh ma martumpu buei halak, laho manangar hatani ampa laho mangindo hamalumon humbani naborit ni sidea. 5:16 Tapi surut ma Ia bani ianan na lungun, anjaha martonggo ma Ia ijai. (Mrk. 1:35.) 5:17 Bani na sadari mangajari do Ia, anjaha adong do hundul ijai Parisei ampa guru siajarhon titah, ai ma na roh humbani huta-huta na i Galilea ampa Judea, age na hun Jerusalem. Anjaha marhorja do kuasa ni Tuhan in Bani laho pamalumhon. 5:18 Anjaha tonggor ma, roh do piga-piga halak mamboan sada halak na oyangon, na tibal bani podomanni; iuji sidea do mamboansi hu bagas, laho patibalhonsi ilobei ni Jesus. 5:19 Tapi seng tarpamasuk sidea ia halani ponjotni, gabe ipanaik sidea ma tayub ai. Iungkab sidea ma ai, anjaha itantan sidea ma tibal ia, bani podomanni, sangkan hulobei ni Jesus. 5:20 Mangidah haporsayaon ni sidea ai Jesus, nini ma: Domma sasap dousamu ambia! 5:21 Jadi marpingkir-pingkir ma sibotoh titah ampa Parisei ai ibagas uhur ni sidea, nini ma: Ise do on? Sipahiri Naibata do on! Ise boi manasap dousa sobali Naibata tumang? 5:22 Tapi ibotoh Jesus do pingkiran ni uhur ni sidea ai, jadi nini ma mambalosi sidea: Aha do ipingkiri nasiam ibagas uhurnasiam? 5:23 Na ija do urahan hatahonon: Domma sasap dousamu, atap hatahonon: Jongjong ma anjaha mardalan ma ho? 5:24 Tapi ase ibotoh nasiam, na markuasa do Anak ni jolma in i tanoh on manasap dousa nini ma hubani na oyangon ai: Ahu mangkatahon bam: Jongjong ma ho, boan ma podomanmin, anjaha mulak ma ho hu rumahmu! 5:25 Jadi mintor jongjong ma ia iidah sidea; iangkat ma podomanni ai, mulak ma ia hu rumahni, anjaha ipapuji-puji do Naibata. 5:26 Gabe longang ma haganup, anjaha ipuji sidea ma Naibata. Gok biar ma sidea, nini ma: Halongangan na so ongga masa do iidah hanami sadari on. 5:27 Dob salpu ai luar ma Ia, anjaha iidah ma sada halak sijalo sohei, na margoran si Lepi, hundul i kantor sohei. Nini ma hubani: Irikkon ahu! 5:28 Jadi jongjong ma ia, itadingkon ma haganup, laho mangirikkonsi. 5:29 Ibahen si Lepi ma pesta mangan-mangan na banggal bani Jesus i rumahni, anjaha buei do sijalo sohei ampa halak na legan rap mangan pakon sidea ijai. (bd. 15:1.) 5:30 Jadi marungut-ungut ma Parisei ampa sibotoh surat pasal ai, nini ma hubani susianni: Mase ma mangan anjaha minum nasiam rap pakon sijalo sohei ampa pardousa? 5:31 Jadi nini Jesus ma mambalosi sidea: Seng porlu doktor bani na jorgit, bani na boritan do! 5:32 Seng roh Ahu mandilo halak parpintor, tapi halak pardousa do, ase ipaubah uhurni. 5:33 Tapi nini sidea ma hu-Bani: Gati do marpuasa anjaha martonggo susian ni si Johannes, sonai homa susian ni Parisei, tapi mangan minum do anggo susianmu. 5:34 Jadi nini Jesus ma hubani sidea: Ai tarbahen do marpuasa hasoman-hasoman ni siparunjuk, sadokah rap ope siparunjuk ai ampa sidea? 5:35 Tapi na roh ma panorangni, buaton ma siparunjuk ai humbani sidea, jadi bani panorang ai ma sidea marpuasa. 5:36 Anjaha ihatahon ma sada limbaga bani sidea: Seng dong halak na ra manrigatkon hiou na baru, laho mandungkaphon ai bani hiou na buruk. Anggo sonai rigat ma hiou na baru ai, anjaha seng homa tangkup pandungkap na baru ai bani na buruk ai. 5:37 Anjaha seng homa ipausei halak anggur na baru hubani gusi huling-huling na buruk; anggo ibahen sonai, pultakkonon ni anggur na bayu ai ma iananni ai, gabe mambur ma anggur ai, anjaha iananni ai pe seda ma. 5:38 Tapi anggur na baru hubagas gusi huling-huling na baru do ipausei ai. 5:39 Anjaha na somal manginum anggur na madokah seng ipangindo na baru, ai nini do: Dear do anggur na madokah ai.

Lukas 6

6:1 Bani sada ari Sabat, sanggah na mamontas Ia hun juma, ipamputikkon susianni ma buyur-buyur ni gandum, ipuyu-puyu ma ai, lanjar ipangan ma. 6:2 Jadi dong ma deba halak Parisei na mangkatahon: Mase ma ihorjahon hanima na so patut bani ari Sabat? 6:3 Nini Jesus ma mambalosi sidea: Seng ongga ibasa nasiam aha ibahen si Daud sanggah loheian ia, ia ampa hasomanni saodoran? (1 Sam. 21:7.) 6:4 Masuk do ia hu rumah ni Naibata, ibuat anjaha ipangan do ruti galangan, ai ma na so bulih panganon ni atap ise sobali malim, anjaha ibere do deba ai bani hasomanni. (3 Mus. 24:9.) 6:5 Lanjar ihatahon ma bani sidea: Tuhan ni ari Sabat do homa Anak ni Jolma in. 6:6 Bani ari Sabat na legan masuk ma Jesus hu rumah parguruan laho mangajari. Adong do ijai sada halak, matei tangan siamunni. 6:7 Ionggopi sibotoh surat ampa Parisei ai do Ia, ai ma atap ra do Ia pamalum naborit sanggah ari Sabat, ase adong dalan ni sidea mangaduhonsi. (bd. 14:1.) 6:8 Tapi ibotoh Jesus do pingkiran ni sidea ai, jadi nini ma dompak partangan na matei ai: Jongjong ma ho hu tongah-tongah on! Jadi jongjong ma ia hujai. 6:9 Jadi nini Jesus ma dompak sidea: Aha do na patut horjahonon sanggah ari Sabat, mambahen na madear do atap mambahen na jahat, pagoluhkon hosah do atap parsedahon ai? 6:10 Jadi sanggah na kinawahkonni ai sidea haganup inggot, nini ma dompak halak ai: Pagostong ma tanganmin! Ibahen ma sonai, gabe malum ma tanganni ai. 6:11 Marah tumang ma sidea, lanjar manriah ma sidea atap aha do sibahenon dompak Jesus. 6:12 Bani panorang ai tangkog ma Jesus hu dolog, laho martonggo; layur saborngin ai martonggo Ia hubani Naibata. 6:13 Anjaha dob siang ari, idilo ma susianni ai, anjaha ipilih ma sapuluh dua humbani sidea, anjaha igoran ma sidea apostel, 6:14 ai ma: si Simon, na ginoran si Petrus, ampa si Andreas saninani ai; si Jakobus ampa si Johannes; si Pilippus ampa si Bartolomeus; 6:15 si Mateus ampa si Tomas; si Jakobus anak ni si Alpeus ampa si Simon, na margoran Zelot; 6:16 si Judas anak ni si Jakobus, ampa si Judas Iskariot, na gabe sipartahi-tahi ai. 6:17 Jadi tuad ma Ia pakon sidea, lanjar jongjong ma Ia bani sada ianan na hanopan, rap pakon buei susianni ampa buei halak hun sab Judea ampa Jerusalem, hun topi laut ni Tirus ampa Sidon, 6:18 na marrohan, laho manangar hatani ampa ase ipamalum sidea humbani naborit ni sidea; ipamalum do age na niodar-odar ni setan. 6:19 Haganup na mabuei ai sihol manggiutsi, ai luar do gogoh humbani, na pamalum haganup. 6:20 Jadi sanggah na kinawahkonni ai susianni ai, nini ma: Martuah ma hanima na masombuh, ai bannima do harajaon ni Naibata! 6:21 Martuah ma hanima na loheian nuan, ai sipabosuran do hanima! Martuah ma hanima na tangis nuan, ai tartawa do hanima use!(Jes. 61:3; Ps. 126:5, 6; Pangk. 7:16, 17.) 6:22 Martuah ma hanima anggo ihasogamhon anjaha itulak halak hanima, anggo irisai hanima anjaha iambukkon gorannima, halani sambor nini uhurni, halani Anak ni jolma in. 6:23 Malas ma uhurnima bani panorang ai anjaha marolob-olob, ai tonggor ma, banggal do upahnima i nagori atas, ai sonai do ibahen bapa ni sidea bani nabi-nabi. 6:24 Tapi bursik ma hanima na bayak, ai domma ijalo hanima apoh-apoh na bannima. (Jak. 5:1.) 6:25 Bursik ma hanima na marbosur-bosur nuan, ai loheian ma hanima use. Bursik ma hanima na tartawa nuan, ai tangis anjaha doruh-doruh ma hanima use. (Jes. 5:22.) 6:26 Bursik ma hanima, anggo haganup halak mamuji-muji hanima, ai sonai do ibahen bapa ni sidea bani nabi sipakulah-kulah ai. (Mik. 2:11; Jak. 4:4.) 6:27 Tapi huhatahon ma bani nasiam sipanangi-nangi: Haholongi nasiam ma munsuhnasiam, na madear ma bahen nasiam bani na marsogam ni uhur bani nasiam. 6:28 Pasu-pasu nasiam ma na mamurai nasiam, tonggohon nasiam ma na mandoruni nasiam. 6:29 Anggo adong na mamastap huyummu, tarehon ma na salopah nari; anjaha anggo ibuat hioumu, ulang engkar age baju-bajumu. 6:30 Sagala na mangindo humbamu, bere; anjaha halak na dob mambuat barangmu, ulang tunggu ai humbani. 6:31 Songon na pinindo nasiam bahenon ni halak bani nasiam, sonai ma bahen nasiam bani sidea.(Mat. 7:12.) 6:32 Ai anggo ihaholongi nasiam na marholong ni uhur bani nasiam, aha ma ulihnasiam ijai? Ai age pardousa ihaholongi do na marholong ni uhur bani sidea. 6:33 Anjaha anggo ibahen nasiam na madear hubani sibahen na madear bani nasiam, aha ma ulihnasiam ijai? Ai age pardousa sonai do ibahen. 6:34 Anjaha anggo papinjamkon nasiam bani halak, laho mangarapkon balas humbani, aha ma ulihnasiam ijai? Ai halak sipardousa pe painjamkon do hubani hasomanni pardousa, anjaha ijalo do use ulak ni duitni. (3 Mus. 25:35, 36.) 6:35 Tapi haholongi nasiam ma munsuhnasiam, bahen nasiam ma na madear, anjaha papinjamhon nasiam ma, ulang pala mangarapkon balos. Jadi banggal ma upahnasiam, gabe anak ni Sitimbulan in ma nasiam; ai layak do Ia, age bani halak, na so mambotoh martarima kasih ampa bani halak parjahat. 6:36 Gabe paridop ni uhur ma nasiam, songon Bapanasiam, paridop ni uhur in. 6:37 Ulang ma nasiam manguhum-uhumi, ase ulang hona uhum nasiam! Ulang ma nasiam mamapai, ase ulang hona papa nasiam! Paluah nasiam, ase ipaluah nasiam! (Mat. 6:14.) 6:38 Bere nasiam ma, ase ibere bani nasiam! Parsuhatan na madear, na nionjat, na nidugur anjaha na pinajunjun bereonni bani abingannasiam; ai parsuhatan, na sinuhatkon nasiam do, suhatkonon bani nasiam. (Mrk. 4:24.) 6:39 Ihatahon do homa limbaga on bani sidea: Mintor tartogu na mapitung ma hasomanni na mapitung? Ai lang rap tarrobung ma sidea haduasi? (Mat. 15:14.) 6:40 Seng lobih susian marimbang guruni; tapi ganup, anggo gok ma parguruanni, dos ma ia songon guruni. (Mat. 10:24, 25; Joh. 15:14.) 6:41 Mase ma pala patorih-torihanmu silbak-silbak na bani mata ni hasomanmu, hape tiang na bani matamu lang iidah ho? 6:42 Mase ma hatahononmu bani hasomanmu: Mahua huumpat lobei silbak-silbak na bani matamin, ambia, hape tiang na bani matamin lang iidah ho? Ee ho sipakulah-kulah, parlobei ma umpat tiang na bani matamin, dob ai pe, ase iidah ho torang sonaha pangumpatmu bani silbak-silbak na bani mata ni hasomanmu. 6:43 Seng dong hayu na madear marbuahkon na bajan, barang hayu na bajan marbuahkon na madear. 6:44 Ai humbani buahni do tartandai ganup hayu. Ai seng tarbuat jambu humbani tatada, anjaha seng tarbuat buah anggur humbani rimbang. 6:45 Halak sidear uhur padaratkon na madear humbagas arta na madear na ibagas uhurni; anjaha halak na jahat padarathon na jahat humbagas arta na jahat na ibagas uhurni. Ai in na manggoki uhur, ai do iluarhon pamangan. 6:46 Mase ma ihatahon nasiam bangku: Tuhan, Tuhan! hape lang ihorjahon nasiam na huhatahon? (Mal. 1:6.) 6:47 Sagala na roh hubangku, anggo ibogei hatangkin anjaha ihorjahon, hupatugah ma bani nasiam usihanni ai: 6:48 Usih do ia ai bani sada halak, na pajongjong rumah, na mangkurak bagas anjaha na pajonamhon ai bani batu gingging. Marbanggal pe bah, anjaha idorab pe rumah ai, tapi seng tardugursi, halani toguh do ipajonam. 6:49 Tapi na mambogei hatangkai, tapi seng idalankon, usih ma ai bani halak, na pajongjong rumah bani tanoh, na seng maronjolan bani batu; idorab bah ai ma ai, gabe mintor marumbak ma, anjaha jangin do parrumbak ni rumah ai.

Lukas 7

7:1 Ase dob salpu ihatahon Jesus haganup hatani ondi bani na mabuei ai, masuk ma Ia hu Kapernaum. 7:2 Jadi adong ma ijai sada juak-juak ni kopala ni tentara, na hinarga ni tuanni, boritan do ia, pala mangkatarhatos. 7:3 Dob ibogei kopala ni tentara ai barita ni Jesus, isuruh ma pangintuai ni halak Jahudi marayaksi, laho mangelek-eleksi, ase roh Ia pamalum juak-juakni ai. 7:4 Jadi dob das sidea bani Jesus, gomos ma pangajar-ajari ni sidea bani, nini ma: Patut do tangihononmu ia. 7:5 Ai holong do uhurni bani bangsanta, anjaha ia do na pajongjong parguruanta. 7:6 Jadi laho ma Jesus rap pakon sidea. Tapi sanggah lang daoh be Ia hun rumah ai, isuruh kopala ni tentara ai ma hasomanni mangkatahon hu-Bani: Tuhan, ulang pala loja Ham! Ai lang talup ahu, masukanmu pala rumahku. 7:7 Halani ai do homa, ase seng talup huahap ahu sandiri marayak Ham. Hatahon Ham ma sangkababah hata gelah, ase malum juak-juakkai. 7:8 Ai halak na i toruh ni parentah do ahu, anjaha i toruhku pe adong do tentara. Anggo huhatahon bani na sada: Laho! gabe laho do ia. Atap hubani na legan: Roh! gabe roh do ia. Atap hubani juak-juakku: Bahen ai! jadi ibahen do. 7:9 Mambogei ai longang ma Jesus, lanjar marhusor ma Ia marsahap bani halak na mabuei, na mangirikkonsi ai: Huhatahon ma bani nasiam: Gari bani halak Israel, seng adong jumpah Ahu haporsayaon na sonon. 7:10 Jadi mulak ma hu rumah na sinuruh ai, anjaha domma malum jumpah sidea juak-juak ai. 7:11 Dob salpu ai, laho ma Ia hubani sada huta na margoran Nain; susianni do hasomanni saodoran ampa buei jolma. 7:12 Marayak horbangan ni huta ai sidea, tonggor ma, iusung halak ma hu darat sada halak na matei, ai ma anak ni sada puang-puang na mabalu; buei do singkuta ai manaruhkon. (1 Raj. 17:17.) 7:13 Mangidah na mabalu ai Tuhan in, mabangor ma uhurni, jadi ihatahon ma hubani: Ulang tangis ham! 7:14 Lanjar idohori ma batang ai, ijamah ma, jadi sonto ma na mangusung ai, anjaha ihatahon ma: Ale garama, Ahu mangkatahon bam, puho ma! 7:15 Jadi hundul ma halak na dob matei ai, ipungkah ma marsahap, anjaha iondoskon ma ia bani inangni ai. (1 Raj. 17:23; 2 Raj. 4:36.) 7:16 Gabe mabiar ma sidea haganup, anjaha ipuji sidea ma Naibata, nini ma: Domma jongjong itongah-tongahta sada nabi bolon, anjaha itatap Naibata do bangsani. (bd. 1:68.) 7:17 Sar ma baritani ai hu sab nagori Judea, ronsi hu ganup nagori na inggot ai. (ay. 18, 35; Mat. 11:2-19.) 7:18 Ibaritahon susian ni si Johannes ma ganupan ai hubani. 7:19 Jadi idilo ma susianni dua halak hu lobeini, lanjar isuruh ma sidea marayak Tuhan in, laho manungkun hu-Bani: Ai Ham do na sihol roh in, atap na legan ope paimaonnami? 7:20 Ase dob das halak ai hu lobeini, ihatahon sidea ma: Isuruh si Johannes pandidi do hanami marayak ham, laho manungkun: Ai Ham do na sihol roh ai, atap na legan ope paimaonnami? 7:21 Bani panorang ai, sanggah pamalumhon buei halak do Ia humbani bagei-bagei ni naborit, sitaronon ampa tonduy na jahat, anjaha buei do na mapitung marpangidah ibahen. 7:22 Ibalosi ma sidea nini ma: Laho ma nasiam mambaritahon bani si Johannes na niidah ampa na binogeinasiam: Na gabe marpangidah do na mapitung, mardalani na repat, gabe borsih na gadamon, marpanangar na nengel, mulak manggoluh na matei, ambilan na madear iambilankon do bani halak na masombuh, 7:23 anjaha martuah ma na so sangsi Bangku! 7:24 Anjaha dob laho suruhan ni si Johannes ai, itarsingati ma si Johannes bani halak na mabuei ai: Aha do na sihol idahonnasiam, ase roh nasiam hu halimisan on? Arung-arung na niombus ni logou do? 7:25 Na sihol mangidah aha do, ase luar nasiam? Halak parhiou na lampot do? Tonggor ma, i rumah bolon do siparhiou na jenges ampa sipangan na mantin-mantin. 7:26 Na sihol mangidah aha do, ase luar nasiam? Nabi do? Ai ma tongon. Huhatahon ma bani nasiam: Lobihan do ia humbani nabi. (bd. 1:76) 7:27 Ia do na hinatahon ni surat in: Suruhonku ma suruhanku, parlobeimu, sipaturei dalanmu i lobeimu! (Mal. 3:1.) 7:28 Huhatahon ma bani nasiam: Seng dong na tubuh humbani naboru sibanggalan marimbang si Johannes; tapi sietekan pe ibagas harajaon ni Naibata, banggalan do ai humbani. (bd. 1:15.) 7:29 Ia na mabuei ai haganup, na manangar ai, ampa sijalo sohei, pintor do Naibata iahap sidea, ai ijalo do pandidion humbani si Johannes. (bd. 3:7, 12; Mat. 21:32.) 7:30 Tapi anggo halak Parisei ampa sibotoh surat itulak sidea do sura-sura ni Naibata na bani sidea, ai seng ra sidea padidihon dirini hubani. (Lah. 13:46.) 7:31 Ase hubani ise ma pausihonku halak na sasundut on? Usih hubani ise ma sidea? 7:32 Usih do sidea hubani dakdanak na hundul i tiga, na marsidiloan: Isompul hanami do sarunei i lobeinima, tapi seng manortor hanima, ipabogeihon hanami do tangis-tangis, tapi seng tangis hanima. 7:33 Ai roh do si Johannes pandidi, na seng mangan ruti anjaha na seng minum anggur, hape ihatahon nasiam: Na setanon do ia. (bd. 1:15; Joh. 10:20.) 7:34 Roh do Anak ni jolma in, na mangan anjaha minum, hape ihatahon nasiam: Tonggor ma sipangan magou ampa siparminum-minum, huan-huan ni sijalo sohei ampa pardousa. (bd. 15:2.) 7:35 Tapi gabe pintor do Hapentaran in marhitei haganup anak-anakni. 7:36 Dob ai iarahkon sada halak Parisei ma Ia mangan, jadi masuk ma Ia hu rumah ni Parisei ai, lanjar hundul ma ijai. 7:37 Anjaha tonggor ma, roh ma sada naboru pardousa, pangisi ni huta ai, dob ibotoh, na dob hundul Ia i rumah ni Parisei ai; iboan do sada botol alabaster marisi minak na morum. 7:38 Mariluh-iluh do ia roh hun pudi mandohori nahei ni Jesus; iarbahi ma naheini ai marhitei iluh-iluhni, iapusi ma ai marhitei jambulanni, isummah ma anjaha iminaki ma naheini ai marhitei minak na misbou ai. 7:39 Mangidah ai, marpingkir ma Parisei na mangarahkonsi ai hu rumahni: Ambit nabi do halak on, tandaonni do naboru na manjamahsi on, anjaha botohonni do parlahouni, ai pardousa do ia. 7:40 Jadi nini Jesus ma mambalosisi: Ale Simon, adong do sihatahononku bamu. Balosni: Ham Guru, hatahon Ham ma! 7:41 Adong ma dua halak paridouan ni sada halak sipaanakkon duit; utang ni na sahalak lima ratus dinar, na sada nari lima puluh. 7:42 Halani seng targalar sidea ai, ibalihon ma utang ni sidua halak ai. Ise do humbani sidea siholongan uhurni bani? 7:43 Nini si Simon ma mambalosi: Nini uhurhu, parutang sibueinan, na binalihon ai do. Balos ni Jesus hubani: Sintong do timbanganmu ai. 7:44 Sanggah na nidompakkonni ai naboru ai, nini Jesus ma dompak si Simon: Iidah ham do naboru on? Roh do Ahu hu rumahmu, seng ibere ham bah pamurihi ni naheihu, tapi anggo ia, iluhni do ibahen mangarbahi naheihu anjaha iapusi bani jambulanni. (1 Mus. 18:4.) 7:45 Seng isummah ham Ahu, tapi anggo ia, masukkonsi Ahu, seng marparsaranan manummah naheihu. (Rom 16:16.) 7:46 Seng homa iminaki ham ulungku, tapi anggo ia, iminaki do naheihu bani minak na misbou. 7:47 Halani ai huhatahon ma bamu: Domma sasap dousani na buei in, mambahen banggal holong ni uhurni. Halak na otik hona sasap dousani, otik do holong ni uhurni. 7:48 Lanjar nini ma hubani naboru ai: Domma sasap ganup dousamu ai! 7:49 Gabe nini hasomanni sapanganan ma samah sidea: Ise do on, ase dihut ampa dousa isasap? 7:50 Ambahni ai ihatahon Jesus ma bani naboru ai: Haporsayaonmu do na paluahkon ham. Mardamei ma ham mulak. (bd. 8:48; 17:19; 18:42.)

Lukas 8

8:1 Salpu ai ibontas Jesus ma sagala huta-huta ampa dusun, laho marambilan, mamaritahon harajaon ni Naibata. Na sapuluh dua ai do hasomanni, (bd. 4:43.) 8:2 sonai homa deba naboru, na dob pinamalumni humbani tonduy na jahat ampa naborit, ai ma si Maria, na margoran si Magdalena, na tinadingkon ni pitu setan. (Mrk. 15:40, 41; 16:9.) 8:3 ampa si Johanna, parinangon ni si Kusa, sijolom anak kunsi ni si Herodes, ampa si Susanna ampa buei halak na legan, na mangurupi sidea marhitei na dong bani. 8:4 Ase dob martumpu buei jolma anjaha marrohan hu-Bani halak humbani huta-huta ai, nini ma marhitei limbaga: 8:5 Laho ma sada halak panabur manaburhon bonih. Jadi sanggah na manabur ai ia, adong ma deba na madabuh hu dalan, gabe tardogei ma anjaha ipaguti manuk-manuk na i awang-awang. 8:6 Na deba madabuh bani batu, tapi dob tubuh, melus ma, halani lang marbah. 8:7 Na deba madabuh hutongah-tongah ni parhupi-hupian; rap tubuh ma hupi-hupi ai pakon ai, gabe ipisat ma. 8:8 Ia na legan ai madabuh ma bani tanoh na madear, anjaha dob tubuh iparbuahkon ma saratus lompit. Dob ihatahon sonai, idilohon ma: Barang ise na marpinggol, na marpambogei, itangihon ma! 8:9 Jadi dob isungkun susian ai, atap aha do arti ni limbaga ai, 8:10 gabe nini ma: Ibere do bennima habotohon pasal rusia ni harajaon ni Naibata, tapi bani halak na legan pitah marhitei limbaga do, ase ulang iidah age pe ikawahkon, anjaha seng iarusi age pe ibogei. (Jes. 6:9, 10.) 8:11 Anjaha on do arti ni limbaga ai: Ia bonih ai; ai ma hata ni Naibata. (1 Ptr. 1:23.) 8:12 Anggo na bani dalan ai, ai ma na mambogei ai; dob ai roh ma sibolis, ibuat ma hata ai humbagas uhur ni sidea, ase ulang porsaya anjaha maluah sidea. 8:13 Ia na bani batu ai, ai ma na marmalas ni uhur manjalo hata ai dob ibogei; tapi seng marurat ai, sangombas do sidea hansa porsaya, anjaha bani panorang parlajouan marbalik ma sidea. 8:14 Tapi anggo na madabuh hubani parhupi-hupian ai, ai ma na mambogei ai; tapi tarpisat do hata ai ibagas goluh ni sidea halani holsoh, habayakon ampa hisap-hisap ni goluh on, gabe seng saud matoras buahni. 8:15 Tapi anggo na bani tanoh na madear ai, ai ma na manimpan hata na binogeini ai ibagas uhur na bonar anjaha na madear, gabe saud ma marbuah ibagas sabar ni uhur.(Lah. 16:14; Heb. 10:36.) 8:16 Seng dong halak na mannahiti palita, dob ai irongkobkon tumba hujai, barang inahkon ai hutoruh ni podoman; hu parpalitaan do ibahen, ase iidah sagala na roh palita ai. (Mat. 5:15.) 8:17 Ai seng dong na ponop, na so talar use; anjaha seng dong rusia na so tarbotoh use anjaha talar. (Mat. 10:26.) 8:18 Halani ai, pangkei ma hanima, sonaha pambogeinima! Ai bani na marnadong, bereon ope bani, tapi na so marnadong, buaton ope humbani na adong ai bani, nini uhurni. (bd. 19:26.) 8:19 Dob ai roh ma inangni pakon anggini marayaksi, tapi seng tarbahen sidea das hu lobeini halani buei ni jolma. 8:20 Jadi adong ma na patugahkon hu-Bani: Jongjong do idarat an inang ampa anggimu; sihol idahon ni sidea do Ham. 8:21 Tapi nini Jesus ma mambalosi sidea: Ia inangku ampa anggingku, ai ma na mambogei ampa na mangkorjahon hata ni Naibata. 8:22 Bani na sadari masuk ma Ia hu parau rap pakon susianni, lanjar nini ma hubani sidea: Dipari hita ma tao on! Dob ai laho ma sidea. 8:23 Sanggah na marparau ai sidea, tarpodom ma Ia. Roh ma ampilaos hu tao ai, gabe masuk ma bah hubagas parau ai, jadi tarsosak ma sidea. 8:24 Ijumpahkon sidea ma Ia, nini sidea ma mamuhoisi: Guru, guru, magou ma hita. Jadi dob puho Ia, hona hata ma logou ampa bah na margilumbang ai ibahen, gabe soh ma anjaha minop. 8:25 Tapi nini ma dompak sidea: Ija do haporsayaonnima? Mabiar do anggo sidea anjaha longang, anjaha nini sidea ma samah sidea: Ise do nani halak on? Logou ampa bah pe iparentah do, anjaha itangihon do Ia! 8:26 Jadi marlayar ma sidea hu nagori Gerasa, na padipar-dipar pakon Galilea. 8:27 Sanggah na mandarat ai Ia, pajumpah ma Ia pakon sada halak parhuta ai, na setanon do ia; anjaha domma dokah seng ra be ia marhiou anjaha seng be i rumah marianan, tapi i tanoman mando. 8:28 Dob iidah Jesus, mandoruhi ma ia lanjar manrogop i lobeini, anjaha nini ma marsora na gogoh: Mangaha Ham roh bangku, Jesus, Anak ni Naibata Sitimbulan in? Huelek-elek ma Ham, ulang arsik Ham ahu! 8:29 Ai ihatahon Jesus do luar setan ai humbani jolma ai. Domma gati isoroh setan ai ia, gabe igari anjaha ibayangkon ma ia, laho manjagaisi, tapi irutuskon do gari ai anjaha ialai setan ai ma ia hu halimisan. 8:30 Jadi isungkun Jesus ma ia: Ise do goranmu? Gabe ibalosi ma: Legiun. Ai buei do setan-setan siar bani. 8:31 Lanjar ielek-elek sidea ma Ia, ase ulang ipaksa sidea tuad hu nagori toruh. 8:32 Tapi adong do ijai, bani raboyon ai, babuy sahulanan bolon manggagati; jadi ipindo ma, ase ilopas sidea masuk hujai, gabe ibalosi ma. 8:33 Jadi luar ma setan-setan ai humbani jolma ai, anjaha imasuki sidea ma babuy ai, gabe mardabuhan ma babuy na sahulanan ai hun raboyon ai hubagas tao ai, lanjar marmogapan. 8:34 Dob iidah parmahan ai na masa ai, maporus ma sidea, ibaritahon sidea ma ai i huta ai ampa i ladang. 8:35 Jadi marrohan ma halak ai, laho mangidah na masa ai. Das ma sidea bani Jesus, anjaha jumpah sidea ma halak, na dob tinadingkon ni setan-setan ai, marhiou anjaha torang maruhur, hundul ilambung nahei ni Jesus, gabe mabiar ma sidea. 8:36 Jadi ipatugah halak na mangidah ai ma bani sidea, sonaha parmalum ni na siniaran ni setan-setan ai. 8:37 Jadi ielek-elek haganup pangisi ni nagori inggot ni Gerasa ai ma Ia, ase surut Ia humbani sidea, ai mabiar tumang do sidea. Jadi masuk ma Ia hu parau ai, lanjar mulak ma. 8:38 Ia halak, na tinadingkon ni setan-setan ondi, ipangindo do bani, atap boi do ia mangkasomanisi. Tapi isuruh ma ia mulak, nini ma: 8:39 Mulak ma ho hu rumahmu, baritahon ma haganup na binahen ni Naibata hu bam! Jadi laho ma ia, ibaritahon ma bani haganup huta ai, haganup na binahen ni Jesus hubani. 8:40 Ase dob mulak Jesus, ialo-alo halak na mabuei ai ma Ia, ai haganup do sidea paima-imahonsi. 8:41 Jadi roh ma sada halak, na margoran si Jairus; sintua ni parguruan do ia. Manrogop ma ia ilobei ni nahei ni Jesus mangindohon, ase roh Ia hu rumahni, 8:42 ai laho matei do boru sasadani, na marumur sapuluh dua tahun. Sanggah na laho hujai Ia, iasak-asak halak na mabuei do Ia. 8:43 Jadi adong ma sada naboru, na dob sapuluh dua tahun sai marnunut roh pantang ni hiouni, anjaha seng dong na boi pamalumhonsi. 8:44 Roh ma ia hun pudini, anjaha ijamah ma rambu ni hiouni, gabe mintor soh ma daroh ai. 8:45 Jadi nini Jesus ma: Ise do, na manjamah Ahu in? Dob haganup mangkatahon lang, nini si Petrus ampa hasomanni ai ma: Guru, na mabuei in do maronjat-onjat manosak Ham! 8:46 Tapi nini Jesus ma: Adong do na manjamah Ahu, ai huahap do luar gogoh humbangku. 8:47 Ase dob iidah naboru ai, na so tarponopkon hape pambahenan ai, roh ma ia hitir-hitir, ipajojor ma ilobei ni haganup na mabuei ai aha halani, ase ijamah Ia, ampa parmalumni bani na satongkin ai. 8:48 Jadi nini ma hubani: Haporsayaonmu do na pamalum ham inang, mulak ma ham ibagas damei! (bd. 7:50.) 8:49 Mangkatahon ai ope Ia, adong ma na roh hun rumah ni sintua ni parguruan ai, na mangkatahon; Domma matei borumu, ulang pala be lojai ham Guru in! 8:50 Mambogei ai Jesus, ibalosi ma ia: Ulang ham mabiar, porsaya ma lah, sai manggoluh do ia. 8:51 Dob das Ia hu rumah ai, seng ilopas barang ise pe masuk sobali si Petrus, si Johannes ampa si Jakobus, ambah ni ai bapa ampa inang ni dakdanak ai. 8:52 Doruh-doruh do haganup manangisi na matei ai. Tapi nini Jesus ma: Ulang nasiam tangis! Ai seng matei ia, na modom do! (bd. 7:13.) 8:53 Jadi ipartatawai sidea ma Ia, halani ibotoh sidea, na dob matei do ia. 8:54 Tapi itangkap ma tanganni, idilohon ma: Puho ma ho, boru! 8:55 Gabe mulak ma tonduyni, jadi mintor puho ma, anjaha ihatahon Jesus ma bereon ia mangan. 8:56 Longang do namatorasni ai; tapi ihatahon ma bani sidea, ase ulang ipatugah-tugah na masa ai. (bd. 5:14; Mrk. 7:36.)

Lukas 9

9:1 Dob ai ipatumpu ma na sapuluh dua ai; ibere ma bani sidea gogoh ampa kuasa mangimbang sagala setan-setan ampa pamalum naborit. 9:2 Isuruh ma sidea mamaritahon harajaon ni Naibata ampa pajorgithon halak. 9:3 Nini ma hubani sidea: Ulang ma boan hanima atap aha pe hu pardalanan, barang tungkot, barang ranjut, barang ruti, barang duit, barang dua baju pe. 9:4 Anggo masuk hanima bani sada rumah, ijai ma hanima tondok, lanjar hunjai ma hanima misir use. (bd. 10:5-7.) 9:5 Anggo adong na so manjalo hanima, pirpirhon hanima ma orbuk na longkot bani naheinima, sanggah na laho hanima hun huta ai bahen hasaksian dompak sidea. (bd. 10:11.) 9:6 Jadi laho ma sidea, idalani sidea ma huta-huta ai, laho mangambilankon ambilan na madear, ampa pamalumhon atap ija-ija pe. 9:7 Raja Herodes pe, ibogei do haganup na masa ai, gabe mabiar ma ia, halani adong deba halak na mangkatahon, na dob ipapuho do si Johannes humbani na matei; 9:8 na deba nari mangkatahon na dob roh do si Elias, anjaha na legan use, paboa na dob mulak manggoluh do sada halak humbani nabi na basaia. 9:9 Tapi ihatahon si Herodes ma: Anggo si Johannes domma hutampul uluni, tapi ise do on, na hubogei on baritani? Anjaha ipangindo uhurni do sihol idahonni Ia. (bd. 23:8.) 9:10 Dob mulak apostel ai ibaritahon sidea ma hubani Jesus haganup na binahen ni sidea ai, gabe iarahkon ma sidea surut bani sada huta na margoran Betsaida. 9:11 Dob ibotoh na mabuei ai pasal ai, irikkon sidea ma Ia; ijalo Jesus ma sidea, ibaritahon ma bani sidea pasal harajaon ni Naibata, anjaha ipamalum ma sagala na porlu sipamalumon. 9:12 Marayak bod ari, roh ma na sapuluh dua ai mangkatahon hu-Bani; Pamisir Ham ma na mabuei in, ase laho sidea hu huta-huta ampa hu parjuma-juma na inggot in, mangindahi tondokan ampa sipanganon, ai halimisan do iananta on. 9:13 Tapi nini ma hubani sidea: Bere hanima ma sidea mangan! Jadi nini sidea ma: Seng dong banta lobih humbani lima ruti ampa dua dengke, anggo seng laho hanami mamboli sipanganon bani halak na mabuei on ganup. 9:14 Ai adong do ijai hira-hira lima ribu halak dalahi. Anjaha nini ma hubani susianni ai: Hatahon hanima ma sidea hundul marsasatumpuan, lima puluh satumpuan. 9:15 Ibahen sidea ma sonai, ipahumpul ma sidea haganup. 9:16 Jadi ibuat Jesus ma ruti na lima ai ampa dengke na dua ai, anjaha dob mangkawah Ia dompak datas anjaha ihatahon tarimakasih, ipartopik ma ai, anjaha iberei ma bani susianni, ase sidea mambagihon bani na mabuei ai. 9:17 Mangan ma sidea anjaha bosur bei do haganup; ipatumpu do teba-teba na lobih ai, gok sapuluh dua bantei. 9:18 Bani na sahali, sanggah martonggo Ia sahalaksi, rapkonsi do susian ai. Jadi isungkun ma sidea: Ise do Ahu, nini halak simbuei? 9:19 Jadi nini sidea ma mambalosi: Si Johannes pandidi do; na legan mangkatahon si Elias, anjaha na legan use sada humbani nabi na basaia, na dob mulak manggoluh. 9:20 Tapi nini ma hubani sidea: Ia hanima, ise do Ahu nini hanima? Jadi nini si Petrus ma mambalosi: Kristus ni Naibata do Ham! 9:21 Jadi pangkei ma sidea ipalumba, ase ulang ipatugah-tugah ai age bani ise. 9:22 Lanjar ihatahon ma: Ia Anak ni jolma in, maningon buei do sitarononni, ambukkonon ni pangintuai-pangintuai, sintua ni malim ampa sibotoh surat do Ia, dob ai bunuhonni, anjaha mulak manggoluh do bani ari patoluhon. (ay. 44; bd. 18:32, 33.) 9:23 Tapi nini ma hubani sidea haganup: Barang ise na sihol mangirikkon Ahu, iparnalang ma dirini, iporsan ma silangni ari-ari laho mangihutkon Ahu. 9:24 Ai magouan hosah do na sihol paluahkon hosahni, tapi na magouan hosah halani Ahu, ai do na pagoluhkonsi. (bd. 17:33; Mat. 10:39; Joh. 12:25.) 9:25 Ai aha ma gunani bani jolma, age ganup dunia on dapotsi, anggo magou anjaha hona uhum ia marhitei ai? 9:26 Ai barang ise na maila halani Ahu ampa halani hatangkin, pailaon ni Anak ni jolma in do ia, sanggah na roh Ia ibagas hasangaponni ampa hasangapon ni Bapa in rap pakon malekat na susi in. (Mat. 10:33.) 9:27 Tapi tongon do na huhatahon on bannima: Adong do deba na jongjong on ijon, na so mangahap hamateian ope, anggo lape iidah roh harajaon in Naibata. 9:28 Hira-hira ualuh ari, dob salpu parsahapan ai, iarahkon Jesus ma si Petrus, si Johannes ampa si Jakobus tangkog hu sada dolog, laho martonggo. 9:29 Jadi, sanggah na martonggo ai Ia, mubah ma rupa ni bohini, anjaha pakeianni pe lopak ma marlinang-linang. 9:30 Anjaha tonggor ma, adong do dua halak marsahap-sahap pakonsi, ai ma si Musa ampa si Elias, 9:31 na marhasangapon idahon, anjaha isahapkon sidea do pasal ujung ni langkahni, sidobkononni i Jerusalem. (ay. 22.) 9:32 Tarpodom do anggo si Petrus ampa hasomanni na dua ai. Tapi dob puho sidea, iidah sidea ma Jesus ibagas hasangaponni ampa sidua halak, na jongjong i lambungni ai. 9:33 Anjaha sanggah na sihol laho ai sidea humbani Jesus, nini si Petrus ma hu-Bani: Guru, dearni in ijon hita! Ipauli hanami ma tolu sopou-sopou, sada Bamu, sada bani si Musa anjaha sada bani si Elias; seng ibotoh, aha na hinatahon ni ai. 9:34 Mangkatahon ai ope ia, roh ma sada hombun manlinggomi sidea, gabe mabiar ma sidea, sanggah na masuk sidea hubagas hombun ai. 9:35 Jadi roh ma sada sora humbani hombun ai, na mangkatahon: On do Anakku, na hupilih in, tangihon nasiam ma Ia! (bd. 3:22.) 9:36 Dob salpu marhata sora ai, sasada Jesus mando jumpah sidea ijai. Sip do sidea, seng ipatugah sidea na niidah ni sidea ai atap hubani ise pe bani panorang ai. 9:37 Patarni ai, sanggah tuad sidea hun dolog ai, roh ma buei halak manjumpahkonsi. 9:38 Jadi tonggor ma, adong ma sada dalahi humbani na mabuei ai mandilohon: Guru, sombahku Bamu, marpanatap ma Ham bani anakkon, sasadasi do anakku. 9:39 Tonggor Ham ma, anggo irotol setan ai ia, sompong ma ia mandoruh; isontap-sontap do ia ronsi na marguboh pamanganni; igosam-gosam do ia, anjaha mahol do ia surut humbani. 9:40 Domma huelek-elek namin susianmu on, ase iusir namin setan ai, tapi seng mangasup sidea. 9:41 Jadi nini Jesus ma mambalosi: Bangsa, na so porsaya anjaha kahou! Sadiha dokah nari Ahu rap pakon hanima, anjaha paanju-anjuonku hanima? Boan ham ma anakmu in hujon! 9:42 Sanggah na roh ai ia, idorab setan ai ma ia anjaha ipugulhon. Tapi isorgang Jesus ma setan na jahat ai anjaha ipamalum ma dakdanak ai; iondoskon ma ia bani bapani. (bd. 7:15.) 9:43 Haganup do longang pasal kuasa ni Naibata na banggal ai. 9:44 Tangihon hanima ma hatangkon: Ondoshononkon ma Anak ni jolma in hu tangan ni halak. (ay. 22.) 9:45 Tapi seng iarusi sidea hata ai, ponop do ai humbani sidea; anjaha mabiar do sidea manungkunsi pasal hata ai. 9:46 Jadi tubuh ma pingkiran itongah-tongah ni sidea pasal ise do sidea sibanggalan. 9:47 Tapi ibotoh Jesus do pingkiran ni sidea ai, gabe ialop ma sada dakdanak, ipajongjog ma ai i lambungni, 9:48 anjaha ihatahon ma bani sidea: Na manjalo dakdanak on ibagas goranku, Ahu do na jinaloni ijai, anjaha na manjalo Ahu, na marsuruh Ahu do jinaloni ai. Ai barang ise sietekan itongah-tongahnima, ia do na banggal. (Mat. 10:40.) 9:49 Tapi nini si Johannes ma mambalosi: Guru, iidah hanami do sada halak mangusir setan marhitei goranmu, gabe ipandang hanami ma ia, halani seng siirikkon Ham ia songon hanami. 9:50 Tapi nini Jesus ma hubani: Ulang pandang hanima ia, ai ise na so mangimbang hanima, hasomannima do. (bd. 11:22; Pil. 1:18.) 9:51 Jadi dob lambin dohor ari parbankitni, idompakkon ma bohini mardalan hu Jerusalem. (Mrk. 10:32.) 9:52 Isuruh ma suruhan parlobeini. Jadi laho ma sidea, imasuki sidea ma sada huta ni halak Samaria, laho patorsa parbornginan Bani. (Joh. 4:4.) 9:53 Tapi seng ra sidea manjalosi, halani na laho hu Jerusalem ai Ia. 9:54 Mangidah ai susianni, si Jakobus ampa si Johannes, ihatahon sidea ma: Tuhan, dear do uhurmu ihatahon hanami turun apuy hun datas, mamboiskon sidea? (2 Raj. 1:10, 12.) 9:55 Tapi marhusor ma Ia, anjaha ihata ma sidea, nini ma: Lang ibotoh hanima, atap tonduy aha do na bannima? 9:56 Jadi hu huta na legan ma sidea laho. 9:57 Sanggah mardalani sidea, nini sada halak ma hu-Bani: Sai irikononku do Ham, barang huja pe Ham laho! 9:58 Tapi nini Jesus ma hubani: Na marliang do sorigala, anjaha na marasar do manuk-manuk na i awang-awang, tapi anggo Anak ni jolma in, hatibalan ni uluni pe seng dong. 9:59 Bani na legan ihatahon: Irikkon ma Ahu! Tapi nini ma: Lopas Ham lobei ahu, laho mananom bapa! 9:60 Tapi nini hubani: Paturut ma na matei mananom na mateini, tapi anggo ho, laho ma mamaritahon harajaon ni Naibata. 9:61 Sada halak na legan use mangkatahon: Huirikkon pe Ham Tuhan, tapi lopas Ham lobei ahu martading hata hubani sinrumahku. 9:62 Tapi nini Jesus ma hubani: Na manjamah tinggala anjaha na mangkawah dompak pudi, seng talup masuk ai bani harajaon ni Naibata.

Lukas 10

10:1 Dob salpu ai ipilih Tuhan Jesus ope pitu puluh halak nari, anjaha isuruh ma sidea mardua-dua gabe parlobeini hubani ganup huta ampa ianan, na sihol si parayakonni. (Mrk. 6:7.) 10:2 Ihatahon do bani sidea: Bolag do namin sabion, tapi otik do siparhorja. Ai pe pindo hanima ma bani Simada sisabion in, ase isuruh siparhorja bani sisabionni in. (Joh. 4:35; Mat. 9:37-38.) 10:3 Laho ma hanima. Songon biri-biri do hanima hasuruh hutongah-tongah ni begu. 10:4 Ulang boan hanima parduitan, barang tas barang sipatu; anjaha ulang tabi hanima halak itongah dalan. (bd. 9:3-5; 2 Raj. 4:29.) 10:5 Laho masuk hu sada rumah, parlobei ma hatahon hanima: Damei ma bani nasiam i rumah on! 10:6 Anjaha anggo adong ijai anak hadameion, sogop ma bani dameinima; tapi anggo seng dong, mulak ma ai bennima. 10:7 I rumah ai ma hanima tondok, pangan anjaha inum hanima ma humbani na adong bani sidea, ai patut do dapotan upah siparhorja; ulang ma mosor-osor tondokannima. (1 Tim. 5:18.) 10:8 Anggo masuk hanima bani sada huta, anjaha ijalo do hanima, pangan hanima ma na niidangkon bennima. 10:9 Pamalum hanima ma na boritan, na adong ijai, anjaha hatahon hanima ma bani sidea: Domma dohor harajaon ni Naibata bani nasiam! 10:10 Tapi anggo imasuki hanima sada huta, hape seng ijalo sidea hanima, laho ma hanima hu alaman ni sidea, anjaha hatahon hanima ma: 10:11 Age orbuk ni hutanasiam on, na longkot bani naheinami, ipirpirhon hanami ma mulak bani nasiam; tapi botoh nasiam ma, domma dohor parroh ni harajaon ni Naibata. 10:12 Huhatahon ma bannima: Hampungan do sitaronon ni Sodom bani ari ai marimbang sitaronon ni huta sisonai. 10:13 Bursik ma ho Korasin. Bursik ma ho Betsaida! Ai ambit i huta Tirus ampa Sidon ipamasa hagogohon, na dob pinamasa bannima, girah do paubahon ni sidea uhur ni sidea, marhiou guni, hundul bani orbuk. (Mat. 11:21-23.) 10:14 Ase hampungan do sitaronon ni Tirus ampa Sidon bani ari uhum ai, marimbang sitarononnima. 10:15 Anjaha ho Kapernaum, ai sipagijangon do ho ronsi langit? Sidabuhkononkon do ho das hu nagori toruh! 10:16 Na manangihon hanima, Ahu do tinangihonni, anjaha na manulak hanima, Ahu do tinulakni; tapi na manulak Ahu, na marsuruh Ahu do tinulakni ijai. (Mat. 10:40.) 10:17 Ibagas malas ni uhur do mulak sipitu puluh halak ai, nini sidea ma: Tuhan, tunduk do age setan-setan bannami halani goranmu. 10:18 Tapi nini ma dompak sidea: Huidah do sibolis in madabuh hun langit songon hilap. (Joh. 12:31; Pangk. 12:8, 9.) 10:19 Tonggor ma, domma hubere bannima kuasa mandogei ulog ampa gansip golang, sonai kuasa manlawan sagala hagogohon ni munsuh in; anjaha seng tarkahua sidea hanima. (Ps. 91:13; Mrk. 16:18.) 10:20 Tapi ulang ma malas uhurnima, halani na tunduk ai setan-setan bannima, tapi malas ma uhurnima, halani domma tarsurat gorannima i nagori atas. (2 Mus. 32:32; Pil. 4:3; Pangk. 3:5.) 10:21 Anjaha bani panorang ai marolob-olob ma Ia ibagas Tonduy Na pansing, nini ma: Hupuji Ham Bapa, Tuhan sigomgom nagori atas ampa tanoh on, halani iponophon Ham do in humbani halak na pentar ampa na maruhur, hape ipatalar Ham do in hubani na saluju maruhur. Eak Bapa, sonin do iharosuhkon uhurmu. 10:22 Haganupan do iondoskon Bapa Bangku, anjaha seng dong na mananda Anak in, sobali Bapa in, anjaha Bapa in pe, seng dong na manandasi sobali Anak in, ambah ni ai na pinodahan ni Anak in mangihutkon rosuh ni uhurni. 10:23 Dob ai idompakkon ma pulin susianni ai, nini ma: Martuah ma mata, na mangidah na niidahnima. (Mat. 13:16, 17.) 10:24 Ai huhatahon ma bannima: Buei do nabi-nabi ampa raja-raja, na masihol mangidah na niidahnima, hape seng iidah, anjaha na sihol, mambogei na dob binogeinima, hape seng ibogei. (1 Ptr. 1:10.) 10:25 Dob ai jongjong ma sada sibotoh titah manlajousi, nini ma: Guru, aha do sibahenonku, ase tartean ahu hagoluhan sisadokah ni dokahni? (bd. 18:18-20.) 10:26 Gabe nini Jesus ma hubani: Aha do tarsurat bani titah in? Sonaha do ibasa ham? 10:27 Jadi nini mambalosi: Maningon haholonganmu do Tuhan Naibatamu humbani putih ni atei-ateimu, humbani gok ni tonduymu, humbani bois ni gogohmu ampa humbani gok ni uhurmu, anjaha hasomanmin songon dirimu! (3 Mus. 19:18; 5 Mus. 6:5.) 10:28 Dob ai nini ma hubani: Sintong do balosmu in; bahen ham ma sonai, gabe manggoluh ma ham! (3 Mus. 18:5; Mat. 19:17.) 10:29 Tapi sihol do pintoranni dirini, gabe nini ma dompak Jesus: Ai ise do goranon hasomanku? 10:30 Jadi nini Jesus ma mambalosi: Adong ma sada halak na tuad hun Jerusalem, laho hu huta Jeriko, gabe isamun panamun ma ia. Irampas sidea do ia, ibalbali, dob ai laho, itadingkon ia tarhatos. 10:31 Tudu ma mamontas sada malim hun dalan ai, iidah do ia, tapi ilaosi do. 10:32 Sonai homa sada halak Lepi, das do bani ianan ai, iidah do ia, tapi ilaosi do homa. 10:33 Tapi mamontas ma hujai sada halak Samaria; dob iidah ia, idop ma uhurni bani, 10:34 idohori ma ia, ibaluti ma ugahni ai, anjaha idaisi ma ai bani minak ampa anggur. Dob ia ipahundul ma ia bani halodeni sandiri, iboan ma ia hu parbornginan, lanjar ipatorsa-torsa. 10:35 Patarni ai ibuat ma dua dinar, ibere ma ai bani simada rumah ai, anjaha nini ma: Patorsa-torsa ham ma ia, anjaha anggo lobih hunjon harugianmu, hugalari pe sanggah mulak ahu. 10:36 Ise do humbani sitolu halak ai, hasoman bani na tarsamun ai, nini uhurmu? 10:37 Jadi nini ma: Na maridop ni uhur bani. Gabe nini Jesus ma hubani: laho ma ham, bahen ma sonai! 10:38 Sanggah na mardalani sidea, masuk ma Jesus hubagas sada huta, anjaha dong ma ijai sada naboru, na margoran si Marta, na manjalosi hu rumahni. (Joh. 11:1; 12:2, 3.) 10:39 Ia anggini, na margoran si Maria, hundul-hundul do ilobeini Tuhan in manangihon hatani, 10:40 tapi anggo si Marta, hosei tumang do marugas. Jadi ipadohor ma bani Jesus anjaha nini ma: Tuhan, ai lang iidah Ham, na ipaturut anggingkin do sahalak ahu marugasi? Hatahon Ham ma ia mangurupi ahu! 10:41 Jadi nini Tuhan in ma mambalosisi: Marta! Marta! Buei do isarihon anjaha isunsahkon uhurmu! 10:42 Sada do na porlu! Ipilih si Maria do rupei sidearan, seng sibuaton ai humbani. (Mat. 6:33.)

Lukas 11

11:1 Martonggo ma Jesus santorap bani sada ianan, anjaha salpuhonsi ai, nini sahalak susianni ma hu-Bani: Tuhan, ajari Ham ma hanami martonggo, songon na binahen ni si Johannes hubanisusianni. 11:2 Jadi nini ma hubani sidea: Anggo martonggo hanima, sonon ma hatahon hamina: Ham Bapanami, sai pinapansing ma goranmu. Sai roh ma harajaonmu. 11:3 Bere Ham ma bannami hagoluhannami siganup ari. 11:4 Sasap Ham ma dousanami, ai hanami pe isasap hanami do haganup na marsalah dompak hanami. Anjaha ulang ma bobai Ham hanami hu parlajouan. 11:5 Lanjar nini ma dompak sidea: Ise humbannima, na marhuan-huan bani sada halak, gabe laho ia tongah borngin hubani mangkatahon: Ambia, bere lobei bangku tolu kibul rutimin, 11:6 ai roh do hasomanku hun pardalanan, anjaha seng dong sipanganon berehononku bani. 11:7 Jadi marbalos ma ia humbagas, nini ma: Ulang sunsahi ahu! Domma tutup labah, anjaha domma modom dakdanakku rap pakon ahu. Seng tarbahen ahu be jongjong, laho mamberehon ai bam. 11:8 Huhatahon ma bannima: Anggo lang ra puho ia, laho mambere ai bani, halani parhuan-huanon, tapi lang tarbahensi lang puho, laho mambere sagala na porlu bani, halani hajungilonni mangindo. (bd. 18:5.) 11:9 Halani ai huhatahon ma bannima: Pangindo hanima ma, sai na bereon do bannima; pindahi hanima ma, sai na jumpahan do hanima, anjaha hartuki hanima ma, sai na ungkabon do bannima! 11:10 Ai sai na manjalo do sagala na mangindo, sai na jumpahan do sagala na mangindahi, anjaha sai na ungkabon do bani sagala na mangkartuki. 11:11 Ise humbani nasiam bapa, na mambere batu bani anakni anggo ipangindo ruti, atap ulog anggo ipangindo dengke, 11:12 atap gansip golang anggo ipangindo tolur? 11:13 Gari nasiam na jahat mambotoh mambere na madear bani anaknasiam, samintolah Bapanasiam na i nagori atas ai ma lang bereonni Tonduy Na pansing bani sagala na mangindo hum-Bani? 11:14 Santorap iusir Jesus ma sada setan silongah. Jadi dob mandarat setan ai, marsahap ma na longah ai, gabe longang ma halak na mabuei ai. 11:15 Tapi deba humbani sidea mangkatahon: Marhitei Beelsebul, raja ni setan do iusir setan-setan ai. 11:16 Na legan use mangindo tanda hun langit laho manlajousi. (Mrk. 8:11.) 11:17 Tapi itanda Jesus do pingkiran ni sidea, gabe ihatahon ma bani sidea: Maseda do sagala harajaon, na marsalisih samah dirini anjaha marsirumbakan ma rumahni. 11:18 Anjaha anggo marsalisih sibolis samah dirini, mintor sonaha ma pardong ni harajaonni ai? Ihatahon nasiam tene, huusir setan ai marhitei Beelsebul! 11:19 Tapi, anggo huusir setan-setan mangunsagahkon Beelsebul, ise ma ipangunsagahkon anaknasiam laho mangusirsi? Ai pe sidea ma na manguhumi nasiam. 11:20 Tapi anggo huusir setan-setan marhitei tangan ni Naibata, na dob sogop ma harajaon ni Naibata bani nasiam. 11:21 Anggo ijagai sada halak na gogoh, siparsinjata na sirsir rumahni, sonang ma ugas-ugasni. 11:22 Tapi anggo roh mandorabsi sigogohan humbani anjaha italuhon ia, buatonni ma humbani sagala sinjata hatengeran ni uhurni ai, anjaha bagi-bagihononni ma ai. (Kol. 2:15.) 11:23 Na so mangkasomani Ahu, imbangku do ai, anjaha na so hasomanku patumpuhon, na mangerap do ai.(bd. 9:50.) 11:24 Anggo mandarat tonduy na mabutak ai humbani sada jolma, idalani ma ianan na horah, laho mangindahi parsaranan, tapi halani seng dong jumpahsi nini ma: Mulak ma ahu bani ianan, na dob hutadingkon ondi. 11:25 Jadi, dob roh ia, domma isapu anjaha ipajagar jumpahsi. 11:26 Dob ai laho ma ia, iarahkon ma pitu setan na legan sijahatan humbani, jadi imasuki ma ai laho marianan ijai, gabe bajanan ma parlahou ni jolma ai bani ujungni marimbang mungkahni. (Joh. 5:14.) 11:27 Sanggah na mangkatahon ai Ia, marsora na gogoh ma sada naboru hun tongah-tongah ni jolma na mabuei ai, nini ma hu-Bani: Martuah ma na manubuhkon anjaha na painumhon Ham! (bd. 1:28, 48.) 11:28 Tapi nini ma: Martuah ma na mambogei hata ni Naibata anjaha na marimbagashon ai!(bd. 8:15, 21.) 11:29 Jadi sanggah na lambin martumpu ai halak na mabuei ai, ipungkah ma mangkatahon: Na jahat do na sasundut on. Tanda do ipangindo, tapi seng bereon tanda bani sidea sobali tanda ni si Jona. 11:30 Ai songon si Jona gabe tanda bani parhuta Ninipe, sonai ma Anak ni jolma in bani na sasundut on. 11:31 Na jongjong do magira bani paruhuman ai raja naboru na hundangsina dompak bangsa on, laho manguhumi sidea, ai roh do ia hun ujung ni tanoh on, laho mambogei hapentaron ni si Salomo. Tonggor ma, lobihan do on marimbang raja Salomo. (1 Raj. 10:1.) 11:32 Na jongjong do magira bani paruhuman ai halak Ninipe dompak na sasundut on, laho manguhumi in, ai ipaubah sidea do uhur ni sidea, mambogei ambilan ni si Jona. Tonggor ma, lobihan do on marimbang si Jona. (Jon. 3:5.) 11:33 Seng dong halak na mannahiti lampu, anjaha inahkon ai bani ianan na ponop barang hutoruh ni tapongan, tapi huatas ni sagakan do ai ibahen, ase iidah halak na roh sinalsalni ai. (bd. 8:16; Mat. 5:15.) 11:34 Palita ni daging do mata. Anggo jorgit matamu, lihar ma ganup angkulamu, tapi anggo sambor do, golap ma angkulamu. 11:35 Ai pe, jaga ma, ase ulang golap sondang na ibagas ham in. 11:36 Ase anggo lihar do haganup angkulamu, seng dong na golap ijai, gabe lihar ma haganupan ai, songon sanggah marsinalsal suluh bamu. 11:37 Sanggah na marsahap ai ope Ia, iarahkon sada halak Parisei ma Ia mangan; jadi masuk ma Ia lanjar hundul ma. (bd. 7:36; 14:1.) 11:38 Tapi longang do Parisei ai, halani iidah, lang palobei marburih Ia laho mangan. (Mat. 15:2.) 11:39 Jadi nini Tuhan in ma hubani: Anggo nasiam Parisei, darat ni panginuman ampa pinggan do ipaborsih nasiam; tapi uhurnasiam parbagas ai gok uhur haut do ampa hajahaton. 11:40 Ee, hanima na oto! Sitompa pardaratni, ai lang ia do homa sitompa parbagasni? 11:41 Tapi bere ma na ibagas ai songon silayak-layak, gabe borsih ma haganup bennima. 11:42 Tapi bursik ma hanima Parisei, ai igalar hanima do parsapuluhan ni hosaya, longa ampa lowoh simaratah, tapi seng parduli hanima bani uhum ampa holong na humbani Naibata. Sihorjahononkon do on, tapi ulang ma tading na legan. 11:43 Bursik ma hanima Parisei, ai iharosuhkon hanima do hundul bani hundulan lobei-lobei i parguruan ampa bani hata tabi itongah tiga. (bd. 20:46.) 11:44 Bursik ma hanima, ai usih do hanima bani tanoman na so tanda, gabe idogei halak, na so pambotohanni. 11:45 Jadi marbalos ma sahalak sibotoh titah, nini ma hu-Bani: Ham Guru, marhitei hatamu ai dihut do hanami sambor ibahen Ham. 11:46 Jadi nini ma: Bursik ma age hanima sibotoh titah, ai ipaporsankon hanima do bani jolma siporsanon na so tarboan, tapi hanima sandiri seng ra manggiut ai age marhitei jari-jari tumang. 11:47 Bursik ma hanima, ai ipauli hanima do tanoman ni nabi-nabi, hape ompungnima do mambunuh sidea. 11:48 Ase isaksihon hanima do pambahenan ni ompungnima, anjaha iharosuhkon hanima do pambahenan ni sidea ai; sidea do na mambunuh nabi-nabi ai, hanima paulihon tanoman ni sidea. 11:49 Halani ai nini hapentaran ni Naibata do: Suruhonku do bani sidea nabi ampa apostel, bunuhon anjaha pardakdakon ni sidea ma deba hunjai, 11:50 ase hubalaskon bani na sasundut on daroh ni haganup nabi ampa apostel, na dob durus humbani tombei ni tanoh on, 11:51 mamungkah humbani daroh ni si Abel das hubani daroh ni si Sakarias, na tarbunuh iholang-holang ni anjap-anjap ampa rumah panumbahan. Sintong do hatangkon bannima: Luluhononku do in bani na sasundut on. 11:52 Bursik ma hanima sibotoh titah, ai irampok hanima do anakkunsi ni habotohon. Hanima sandiri seng masuk, anjaha halak na sihol masuk, ilanglangi hanima do. 11:53 Ase dob misir Jesus hunjai, ipungkah sibotoh surat ampa Parisei ma manggompangisi pangkei-pangkei, anjaha marbagei-bagei ma na isungkunhon sidea hu-Bani; 11:54 igompangi sidea do Ia, andohar hona Ia marhitei hatani. (bd. 20:20.)

Lukas 12

12:1 Sanggah na marrohan halak na mabuei, na marribu-ribu ai, pala marsidogeian sidea, gabe ipungkah Jesus ma marsahap bani susianni ai, nini ma: Jaga ma hanima pasal ragi ai, ai ma sipakulah-kulah ni Parisei. 12:2 Ai seng dong na rungkub, na so tidak use, anjaha seng dong rusia, na so botohon use. (bd. 8:17.) 12:3 Halani ai sagala na hinatahonnima ibagas na golap, tarbogei do ai use ibagas na lihar, anjaha na hinusipkonnima bani pinggol ibagas kamar, tingtingkononkon do ai use hun tayub ni rumah. 12:4 Tapi huhatahon ma bannima huanhuanku: Ulang ma habiari hanima sibunuh angkula, ai legan ni ai aha pe lang tarkahua sidea be. 12:5 Tapi hupatuduhkon ma bannima na patut sihabiarannima. Habiari hanima ma Ia, na markuasa mambunuh anjaha na mambuangkon hubagas apuy naraka. Eak, huhatahon ma bannima, Ia ma habiari hannima! 12:6 Ai lang ijual halak do lima dingis harga lima sen? Tapi sada pe lang hunjai, na ihalupahon Naibata. 12:7 Gari jambulan na bani ulunima haganup do ibilang. Ulang ma mabiar, harganan do hanima marimbang buei dingis. (bd. 21:18.) 12:8 Huhatahon ma bannima: Ganup na manaksihon Ahu ilobei ni jolma saksihonon ni Anak ni jolma in do ia ilobei ni malekat ni Naibata. 12:9 Tapi na marnalangkon Ahu ilobei ni jolma, parnalangon do ai ilobei ni malekat ni Naibata. (bd. 9:26.) 12:10 Anjaha ganup na mangkatahon hatani dompak Anak ni jolma in, tarsasap do ai, tapi na mangapasi Tonduy Na pansing, seng tarsasap ai. (Mat. 12:32; Mrk. 3:28-29.) 12:11 Anggo tarboan hanima hulobei ni parguruan, hulobei ni kopala-kopala ampa siparkuasa, ulang ma haru hanima pasal balos ampa sihatahononnima. (bd. 21:14, 15; Mat. 10:19, 20.) 12:12 Ai Tonduy Na pansing do mangajarhon bannima bani panorang ai pasal sihatahononnima. 12:13 Adong ma sahalak humbani halak na mabuei ai, na mangkatahon hu-Bani: Guru, hatahon Ham ma saninangku, ase ibagi siteanonnami ai rap pakon ahu. 12:14 Tapi nini ma hubani: Ambia! Ise pabangkit Ahu gabe panguhum barang sibagi tean-teanan bannima? 12:15 Lanjar ihatahon ma bani sidea: Jaga ma hanima ramotkon hanima ma dirinima dompak sagala uhur haut! Ai age marlobih-lobih halak, seng humbani artani ai goluhni. (1 Tim. 6:9, 10.) 12:16 Gabe ihatahon ma sada limbaga bani sidea, nini ma: Adong ma sada halak na bayak, buei do gogoh ni jumani. 12:17 Jadi marpingkir ma ia ibagas uhurni sonon: Aha ma sibahenonku? Ai seng dong be hasiatan ni gogoh ni jumangku. 12:18 Gabe nini ma: On ma hubahen: Huparseda ma tuanganku, anjaha hupauli ma sibanggalhononni ai, ase hujai hupatumpu ganup omei ai ampa artangku haganup. 12:19 Anjaha ningku ma bani tonduyhu: Ale tonduyhu, domma sirsir buei artamu, sungkup piga-piga tahun on. Ai pe, marsaran ma ho, mangan, minum anjaha marmalas ni uhur. 12:20 Tapi nini Naibata ma hubani: Ee ho na oto! Saborngin on ma buaton hosahmu humbam. Anjaha na pinasirsirmin bani ise ma in? 12:21 Sonai ma ujung ni halak, na patumpu-tumpu arta bani dirini, anggo seng bayak ia bani Naibata. (Mat. 6:20.) 12:22 Jadi nini Jesus ma dompak susianni: Halani ai huhatahon ma bannima: Ulang ma holsohkon hanima hosahnima pasari-sari sipanganon barang angkulanima mansarihon parhiouon. 12:23 Ai harganan do hosah humbani sipanganon sonai angkula humbani parhiouon. 12:24 Tonggor hanima ma kawak ai: Seng martidah sidea, seng manabi, seng margudang anjaha seng marsopou, tapi iparmudu-mudu Naibata do sidea. Ai lang daoh do surungan hanima marimbang manuk-manuk? (Ps. 147:9.) 12:25 Ise hanima boi paganjang ari-ari ni goluhni age saasta gelah, marhitei holsoh ni uhurni? 12:26 Ase, anggo mambahen na otik ai pe lang mangasup hanima, mase ma pala holsohan hanima pasal na legan-legan ai? 12:27 Papangkei hanima ma partubuh ni silundat in, na so pala manorha atap martonun. Huhatahon ma bannima: Gari si Salomo ibagas sagala hasangaponni ai, seng ongga marpakeian songon sada humbani bunga-bunga in. 12:28 Ase anggo sonai iparhioui Naibata poyon-poyon, na dong sadari on i ladang in, hape patar domma ipuruni, samintolah hanima ma lang parhiouanni? E hanima siotik haporsayaon? 12:29 Ase ulang ma pindah-pindah uhurnima bani sipanganon atap siinumon, anjaha ulang ma bungbang pasal ai. 12:30 Halak parbegu na i tanoh on do mangindahi sisonai ai, tapi ibotoh Bapanima do, na porlu do ai bennima. 12:31 Asal ma ipindahi hanima harajaonni, dob ai tambahkononni do ai bannima. 12:32 Ulang ma mabiar, ale hulanan na etek! Ai na dob iharosuhkon Bapanima do, mamberehon harajaonni ai bannima. 12:33 Jual hanima ma na adong bannima anjaha marsibere-bere ma. Bahen hanima ma bennima ranjut na so ra buruk, arta i nagori atas, na so ra bois, na so tardohori panangko anjaha na so targagat ngitngit. (bd. 18:22.) 12:34 Ai atap ija artanima, ijai do uhurnima. 12:35 Sai margondit ma binongeinima anjaha gara ma lampunima. (2 Mus. 12:11; Mat. 25:1-13; 1 Ptr. 1:13.) 12:36 Anjaha usih ma hanima bani jolma na paima-imahon tuanni, sadihari ia roh hun parunjukan, ase mintor iungkab ia rohkonsi ia mangkartuki. 12:37 Martuah ma juak-juak ai, na puho jumpah tuanni bani parrohni ai. Na sintong do hatangkon bannima: Gonditanni ma dirini, hatahononni ma sidea hundul mangan, anjaha jongjong ma ia marugas bani sidea. 12:38 Anggo roh ia bani runda paduahon atap patoluhon, anjaha jumpahsi sidea sonai, martuah ma sidea. 12:39 Tapi botoh hanima ma on: Anggo ibotoh tuan rumah, sadihari panorang ni panangko roh, puho do ia, seng palopasonni rumahni hona bongkar. (1 Tes. 5:2.) 12:40 Hanima pe, jaga ma, ai na roh do Anak ni jolma in bani panorang, na so panagamannima. (bd. 17:26-30.) 12:41 Jadi nini si Petrus ma: Tuhan, bannami do ihatahon Ham limbaga ai atap bani haganup do? 12:42 Gabe ihatahon Tuhan in ma: Ise ma sijolom anakkunsi, hatengeran ni uhur anjaha na maruhur, sipabangkiton ni tuanni manggomgom juak-juakni, laho mambere bohal ni sidea bani panorangni. 12:43 Martuah ma juak-juak ai, na mangkorjahon sonai jumpahon ni tuanni bani parrohni ai. 12:44 Sintong do na huhatahon on bennima: Pabangkitonni do ia manramotkon sagala na adong bani. 12:45 Tapi anggo ihatahon juak-juak ai ibagas uhurni: Dokah ope, ase roh tuankai, gabe ipungkah ma mambogbogi juak-juak dalahi ampa juak-juak naboru ai, anjaha mangan minum ia marmabuk-mabuk, 12:46 Jadi roh ma tuan ni juak-juak ai bani panorang na so panagamanni, ampa bani panorang na so binotohni, anjaha tampulonni ma ia, anjaha bahenonni ma rupeini dos songon na so porsaya. 12:47 Ia juak-juak, na mambotoh harosuh ni tuanni, hape seng marugas ia, anjaha seng ihorjahon harosuh ni uhurni, buei ma lonsing-lonsing tarononni, (Jak. 4:47.) 12:48 Tapi na so mambotohsi, gabe ihorjahon na patut sihataon, otik do tarononni. Ai buei do situngguon humbani pamberean na buei, anjaha bani ise buei iondoskon, lambin buei do ipindahi humbani. 12:49 Na roh do Ahu manggijigkon apuy hu tanoh on, anjaha masihol do uhurhu ase gara ai? 12:50 Adong do paridian na maningon siparidihononkon bangku, anjaha bobor tumang do uhurhu paima saud ai. (Mat. 20:22; 26:38; Joh. 12:27.) 12:51 Ai iagan uhurnima do, roh Ahu, laho mambere damei hu atas tanoh on? Lang, huhatahon ma bannima, panirangon do tene. 12:52 Ai hunjon hujanan marsilawanan do lima halak ibagas sada jabu, na tolu manlawan na dua, anjaha na dua manlawan na tolu. 12:53 Adong do parlawanon, bapa dompak anakni anjaha anak dompak bapani, inang dompak boruni anjaha boru dompak inangni, simatua dompak parumaenni anjaha parumaen dompak simatuani. 12:54 Ihatahon do homa dompak halak na mabuei ai: Anggo iidah nasiam naik hombun i hasundutan, mintor ihatahon nasiam do: Na roh ma udan, jadi saud do sonai. 12:55 Anjaha sanggah marombus logou hun dangsina, ihatahon nasiam do: Na roh ma logou ni ari, jadi saud do. 12:56 E nasiam sipakulah-kulah, ibotoh nasiam do manimbangi rupa ni tanoh on ampa langit ai, tapi panorang on, mase lang iartihon nasiam? 12:57 Mase ma lang itimbangi nasiam bani nasiam, aha na pintor? 12:58 Sanggah laho ho rap pakon imbangmu marayak pamarentah, porluhon ma mardear pakonsi sanggah itongah dalan, ase ulang itogu ho hubani panguhum, gabe iondoskon panguhum ai ho bani upas, anjaha upas ai pamasuk ho hubagas tutupan. 12:59 Huhatahon ma bam, seng anjai luar ho hunjai, paima igalar ho ronsi na sarimis.

Lukas 13

13:1 Bani panorang ai adong ma na roh patugahkon hu-Bani pasal halak Galilea, na dob madurus darohni ibahen si Latus, anjaha saor bani galangan ni sidea. 13:2 Jadi nini Jesus ma mambalosi sidea: Na iagan uhurnima do mardousanan halak Galilea ai marimbang haganup halak Galilea, halani sonai mangonai bani sidea? (Joh. 9:2.) 13:3 Huhatahon ma bennima: Lang, tapi anggo seng mubah uhurnima, lanjar sonai do hanima haganup magou use. (Ps. 7:13.) 13:4 Barang na iagan hanima do banggalan salah ni sisapuluh ualuh halak ai, na matei idondoni manara na i Siloa ai, marimbang haganup halak na marianan i Jerusalem? 13:5 Huhatahon ma bennima: Lang, tapi anggo seng mubah uhurnima, lanjar sonai do hanima haganup magou use. 13:6 Dob ai ihatahon ma limbaga on: Adong ma hayu ara ni sada halak, na sinuanni i pohon anggurni; jadi roh ma ia mangindahi buahni, hape seng dong jumpahsi. (Mat. 21:19.) 13:7 Gabe ihatahon ma hubani sihorjahon pohon anggurni ai: Tonggor ma, domma pala patolu-tahunkon roh ahu mangindahi buah ni hayu anggur on, hape seng dong. Roboh ma in, mase ma soya tanoh in bahenon ni in? 13:8 Tapi nini mambalosi: Tuannami, paturut ham ma lobei in satahun on, ase sompat husangkul tanoh inggot ni in, anjaha hubahen napu hujin, (2 Ptr. 3:9, 15.) 13:9 andohar marbuah hu lobeian on; tapi anggo seng ra be, naroboh ma. 13:10 Jadi mangajari ma Ia bani sada parguruan sanggah ari Sabat. 13:11 Anjaha tonggor ma, adong ma ijai sada naboru na siniaran ni tonduy na jahat. Domma sapuluh ualuh tahun ia boritan, suhung do angkulani, anjaha seng boi ia jongjong dirgak. 13:12 Dob iidah Jesus ai, idilo ma ia anjaha nini ma hubani: Ham inang, maluah ma ham humbani naboritmu in! 13:13 Lanjar itampeihon ma tanganni hubani; gabe mintor dirgak ma ia, anjaha ipuji ma Naibata. (Mrk. 7:32.) 13:14 Ia sintua ni parguruan ai, sogam do uhurni, halani na pamalum naborit ai Jesus sanggah ari Sabat, gabe nini ma hubani halak na mabuei ai: Onom ari do pangkorjahononkon; ijai ma nasiam roh, ase ipamalum nasiam, ulang ma sanggah ari Sabat. 13:15 Jadi nini Tuhan in ma mambalosisi: Ale sipakulah-kulah, ai lang haganup do nasiam, age bani ari Sabat paluahkon lombuni atap halodeni humbani harang, laho pasiburhon ai? (bd. 14:5.) 13:16 Ia naboru on, ai ma boru ni si Abraham, na dob sinangkut ni setan sapuluh ualuh tahun dokahni, mintor lang ma patut tanggalan sangkut-sangkut on bani ari Sabat? (bd. 19:9.) 13:17 Jadi dob ihatahon sonai, maila ma haganup imbang-imbangni ai, tapi marmalas ni uhur do haganup halak na mabuei ai, halani haganup pambahenanni na marmulia ai. 13:18 Dob ai ihatahon ma: Usih huja do harajaon ni Naibata, anjaha huja do ai pausihonku? 13:19 Usih do ai hubani batu ni loharum, na binuat ni halak laho manaburhon ai hu jumani. Jadi tubuh ma, anjaha roh do manuk-manuk na i awang-awang marasar bani dangkahni. 13:20 Jadi nini ma use: Huja do pausihonku harajaon ni Naibata? 13:21 Usih do ai bani ragi, na binuat ni sada naboru, laho manaorhon ai bani itak tolu tumba, paima marragi ganupan ai. 13:22 Jadi ibontas Jesus ma huta ampa dusun laho mangajari, sanggah bani pardalananni dompak Jerusalem. 13:23 Jadi nini sada halak ma hu-Bani: Tuhan, otik do gakni na saud maluah? 13:24 Tapi nini ma dompak sidea: Maruntol ma nasiam masuk hun labah na sompit in! Ai huhatahon ma bani nasiam: buei do namin na manlajou masuk, tapi lang boi. (Mat. 7:13, 14; Pil. 3:12.) 13:25 Anggo jongjong ma holi simada rumah ai, anjaha itutup labah ai, idarat ma nasiam jongjong hartuk-hartuk marsahap: Tuhan, ungkab Ham ma! tapi hatahononni ma: Seng hubotoh na roh hunja nasiam! (Mat. 25:11-12.) 13:26 Gabe hatahonon nasiam ma: Na rap mangan minum do hanami pakon Ham, anjaha iajari Ham do hanami i alamannami. (Mat. 7:22-23.) 13:27 Dob ai hatahononni ma: Seng hubotoh na roh hunja nasiam. Laho ma hun lobeihu, nasiam ganup sihorjahon na so pintor! 13:28 Ijai ma masa doruh-doruh ampa na patungosngoson, sanggah na iidah nasiam si Abraham, si Isak, si Jakob ampa haganup nabi-nabi ai ibagas harajaon ni Naibata, tapi anggo nasiam tarbuang hu darat. 13:29 Ijai ma roh na hun hapoltakan ampa hasundutan, na hun utara ampa dangsina, hundul mangan ibagas harajaon ni Naibata. (bd. 14:15.) 13:30 Anjaha tonggor ma, adong do na parpudi gabe parlobei, anjaha na parlobei gabe parpudi. (Mat. 19:30.) 13:31 Bani panorang ai roh ma deba Parisei mangkatahon hu-Bani: Laho ma Ham, misir hunjon, ai sihol bunuhon ni si Herodes do Ham. 13:32 Gabe nini ma dompak sidea: Laho ma nasiam, hatahon nasiam ma bani sorigala ai: Tonggor ma, Ahu mangusir setan-setan ampa pamalum na boritan sadari on ampa patar, anjaha ari patoluhon marujung ma langkahku. 13:33 Tapi maningon mardalan do Ahu sadari on, patar ampa bani ari na mangihut hujai, ai seng bulih matei nabi anggo idarat ni Jerusalem. 13:34 Jerusalem, Jerusalem, sibunuh nabi-nabi anjaha sipargijig bani batu halak na sinuruh marayak ham! Gati do namin sihol patumpuonku anakmu, songon indung ni dayok, na patumpuhon anakni hu toruh ni habongni, tapi seng ra ham! 13:35 Tonggor ma, tarulang ma rumahnasiam. Tapi huhatahon ma bani nasiam: Seng idahon nasiam be Ahu, paima ihatahon nasiam: Pinasu-pasu ma na roh marhitei goran ni Tuhan! (Ps. 118:26.)

Lukas 14

14:1 Jadi masa ma, sanggah na masuk Ia hu rumah ni sada halak sintua ni Parisei bani ari Sabat, laho mangan domma ijai sidea manggompangisi. (bd. 11:37; Mrk. 3:2.) 14:2 Jadi adong ma ijai, i lobeini, sada halak na busungon. 14:3 Jadi nini Jesus ma manungkun sibotoh titah ampa Parisei ai: Ai bulih do pamalumon naborit bani ari Sabat atap lang? 14:4 Tapi sip do anggo sidea. Jadi ijamah ma halak ai, ipamalum ma, lanjar isuruh ma mulak. 14:5 Anjaha nini ma hubani sidea: Ise humbani nasiam, anggo tarrobung hubagas parigi halode atap lombunasiam, ai lang mintor itarik nasiam do ai hu atas, age bani ari Sabat? (bd. 13:15; Mat. 12:11.) 14:6 Tapi seng tarbalosi sidea hatani ai. 14:7 Dob ai ihatahon ma sada limbaga bani na nidilo ai, halani iidah mamilihi ianan situnggungan sidea, nini ma dompak sidea: (Mat. 23:6.) 14:8 Anggo idilo ham hu pesta parunjukan, ulang ma hundul ham bani hundulan ianan sisangapan, atap adong niontangni sangapan humbamu, 14:9 gabe roh holi suhut ai, na mangontang ham ampa ia, mangkatahon bamu: Bani ma ianan in! Jadi maila ma ham hundul bani ianan sitoruhan. 14:10 Tapi anggo hona ontang ham, laho anjaha hundul ma ham bani ianan sitoruhan, ase anggo roh na mangontang ham ai, mangkatahon bamu: Huatashon ma ham hundul! Jadi sangap ma ham idahon ni ganup hasomanmu na niontang ai. 14:11 Ai sagala na pagijang dirini, patoruhon do, tapi na patoruh dirini, sipagijangon do. 14:12 Ihatahon ma homa hubani na mangontangsi ai: Anggo ibahen ham pesta-pesta sanggah arian atap bodari, ulang ma dilo ham huan-huan atap saninamu, hade-hade atap parhutamu na bayak-bayak, ase ulang idilo sidea use ham, gabe ibalas ai use bamu. 14:13 Tapi anggo mambahen pesta-pesta ham, dilo ham ma na masombuh, na marsining, na repat ampa na mapitung. (5 Mus. 14:29.) 14:14 Gabe martuah ma ham, ai seng tarbalos sidea ai bamu, tapi marbalos do ai bamu bani parpuhoon ni halak parpintor. (Joh. 5:29.) 14:15 Sada humbani na mangan ai, dob ibogei ai, nini ma hu-Bani: Martuah ma na mangan i harajaon ni Naibata! (bd. 13:29.) 14:16 Jadi nini Jesus ma mambalosi: Adong ma sada halak na marpesta banggal; buei do iontang hujai. 14:17 Jadi bani mata ni pesta ai isuruh ma juak-juakni mangkatahon bani na dob niontangni ai: Roh ma nasiam, ai domma sirsir haganup! 14:18 Tapi adong bei do sidalian ni sidea haganup. Nini na parlobei ai ma hubani: Baru mamboli juma do ahu, maningon laho do ahu manorih ai. Ulang pala sonaha uhurmu! 14:19 Na legan mangkatahon: Baru mamboli horbou do ahu lima pasang; laho ma ahu mamareksa ai. Ulang pala sonaha uhurmu! 14:20 Na legan use mangkatahon: Baru mambuat boru ope ahu, halani ai seng tarbahen ahu roh. 14:21 Dob mulak juak-juak ai, ipatugah ma ai bani tuanni ai. Jadi marah ma tuan ai, ihatahon ma bani juak-juakni ai: Laho ma ho podas hu pasar ampa hu dalan na i huta on, arahkon ma halak na masombuh, na marsining, na mapitung ampa na repat. 14:22 Jadi, dob mulak, nini juak-juak ai ma: Domma saud na hinatahonmu ai, ale tuannami, tapi lumbang ope. 14:23 Jadi ihatahon tuan ai ma bani juak-juak ai: Laho ma ho hu darat bani dalan na bolon ampa topi ni dalan, gogohkon ma sidea masuk ase gok rumahku! 14:24 Tapi huhatahon ma bennima: Sahalak pe lang humbani na niontang hinan bulih mandai sipanganon na hupasirsir in. 14:25 Sahali sanggah buei jolma mardalan mangirikkonsi, jadi marhusor ma Ia mandompakkon sidea, lanjar nini ma: 14:26 Barang ise na roh hu-Bangku, seng tarbahensi gabe susianku, anggo seng sogam uhurni bani bapani, inangni, parinangonni, niombahni, saninani, botouni ronsi hosahni sandiri. (bd. 18:29, 30; 5 Mus. 33:9, 10.) 14:27 Seng tarbahen gabe susianku halak, na so mamorsan silangni, laho mangirikkon Ahu! (bd. 9:23.) 14:28 Ise ma humbani nasiam, na sihol pajongjong sada menara, na so hundul lobei mangetong na porlu hujai, atap na sungkup do laho mandobkon horja ai? 14:29 Ase ulang holi, anggo domma ipauli onjolanni, hape seng tuk gogohni mandobkon, gabe igora-gopra halak na mangidah ai ia. 14:30 nini sidea hubani: Ipungkah halak on do pajongjongkon, hape seng tardobkonsi. 14:31 Atap raja ja ma, na laho marporang pakon raja na legan, na so parlobei hundul marpingkir-pingkir, atap na tardompakkonsi do marhasoman salaksa tentara imbangni ai, na roh mandorabsi marhasoman dua laksa? 14:32 Tapi anggo seng tarbahensi, tontu suruhonni do suruhan mangindo pardameian, sanggah daoh ope munsuh ai. 14:33 Nasiam pe, seng tarbahen atap ise pe humbani nasiam gabe susianku, anggo seng tartadingkonsi haganup na dong bani. 14:34 Na marguna do garam, tapi anggo mambar daini, aha ma bahenon paporadkon ai? 14:35 Seng marguna ai hu juma atap bahen napu, siambukkonon mando ai. Barang ise na marpinggol, na marpanangar, itangihon ma ai.

Lukas 15

15:1 Somal do sijalo sohei ampa sipardousa roh hundohor hu-Bani, laho manangar hatani. 15:2 Jadi marungut-ungut ma halak Parisei ampa sibotoh surat, nini sidea ma: Ijalo on do sipardousa, anjaha rap mangan do Ia pakon sidea. 15:3 Gabe ihatahon Jesus ma limbaga on bani sidea: 15:4 Ise ma humbani nasiam sahalak parbiri-biri saratus, anggo magou sada hunjai, na so manadingkon na siah puluh siah nari ai i parmahanan, laho mangindahi na so taridah ai, ronsi na jumpahsi ai? (bd. 19:10; Hes. 34:11, 16.) 15:5 Anjaha dob jumpahsi, itampeihon ma ai bani abarani halani malas ni uhurni. 15:6 Daskonsi ia hu rumahni, idilo ma martumpu huan-huanni ampa romban rumahni, nini ma bani sidea: Marmalas ni uhur ma nasiam rap pakon ahu, halani jumpah ahu do biri-biringku na magou ai. 15:7 Huhatahon ma bani nasiam: Usih hujai, bueinan do malas ni uhur i nagori atas mangidah sada pardousa, na ra paubahkon uhurni, ase mangidah siah puluh siah parpintor, na so pala paubahkon uhur ni sidea. 15:8 Atap dong do nani naboru siparduit sapuluh rupiah, anggo magou sada hunjai, na so pagarahon palita, anjaha manapui rumahni, laho mangindahi duitni na magou ai, paima jumpahsi ai? 15:9 Anjaha dob jumpahsi, idilo ma martumpu huan-huanni ampa romban rumahni, nini ma: Marmalas ni uhur ma nasiam rap pakon ahu, ai domma jumpah ahu duitku na magou ai. 15:10 Huhatahon ma bani nasiam: Usih hujai do masa malas ni uhur ilobei ni malekat ni Naibata mangidah sahalak sipardousa, na paubahkon uhurni. (Ep. 3:10.) 15:11 Dob ai nini ma use: Adong ma dua anak ni sada halak. 15:12 Gabe ihatahon sianggian ai ma dompak bapani ai: Bapa, bere ham ma bangku humbani arta in, na sahira parbagiananku. Jadi ibagihon ma artani ai bani sidea. 15:13 Anjaha seng pala piga ari ipudi ni ai, ipatumpu sianggian ai ma haganup parbagiananni ai, dob ai laho ma ia hu nagori na daoh, anjaha ijai ma iparbois-bois artani ai marhitei goluh na so marrantei. 15:14 Dob iboiskon haganupan ai, masa ma lohei maningting i nagori ai, anjaha ia pe mulai ma marhahurangan. 15:15 Jadi laho ma ia tondok bani sada halak parnagori ai, gabe isuruh ma ia marmahan babuy hu jumani. 15:16 Ipindo uhurni do manggoki boltokni bani hulit-hulit ni indahan ni babuy ai, tapi seng dong na mamberesi bani. (Pod. 23:21.) 15:17 Jadi ipaulak ma uhurni hu bagas, nini ma: Buei ni in gajian ni bapa, na marlobih-lobih bani sipanganon, hape ahu, matei gayuran do ijon. 15:18 Misir mando ahu marayak bapa, huhatahon ma hubani: Ham bapa, domma mardousa ahu hu nagori atas ampa bamu. (Ps. 51:6; Jer. 3:12, 13.) 15:19 Seng talup be ahu goranon anakmu, bahen ham ma ahu songon sada halak gajian bamu. 15:20 Jadi misir ma ia marayak bapani ai. Tapi daoh ope ia, domma itatap bapani ai ia, gabe maidop ma uhurni; marlintun ma ia manjumpahkonsi, irohop ma ia anjaha isummah. 15:21 Marsahap ma anak ai bani: Ham bapa, domma mardousa ahu hu nagori atas ampa hubamu, seng talup be goranon ahu anakmu! 15:22 Tapi nini bapa ai ma dompak jabolonni: Boan hanima ma pakeian sijengesan, anjaha pakeihon hanima ma ai bani! Bahen hanima ma sada tintin bani jari-jarini ampa sipatu bani naheini! 15:23 Alop hanima ma anak ni lombu na pinamombur ai, anjaha sayat ma, ase mangan hita anjaha marmalas ni uhur. 15:24 Ai na dob matei do anakkon gabe mulak manggoluh, na dob magou do ia, gabe jumpah use. Jadi marmalas ni uhur ma sidea. (Ep. 2:1, 5; 5:14.) 15:25 Tapi i juma do anakni sikahanan ai. Jadi rohkonsi ia hun dohor hu rumah, ibogei ma sora ni musik ampa na manortor. 15:26 Gabe idilo ma sahalak humbani jabolon ai, ipapangkei ma atap aha do na masa. 15:27 Jadi nini ma hubani: Domma roh anggimu, jadi isayat bapanta do lombu pinamombur ai, halani jorgit do ia mulak. 15:28 Jadi marah ma ia, anjaha seng ra roh hu rumah, gabe roh ma bapani mangajar-ajarisi. 15:29 Tapi nini ma mambalosi bapani ai: Martahun-tahun ma ahu mambalosi ham, anjaha seng ongga hulanggar parentahmu. Tapi anak ni hambing pe lang ongga ibere ham bangku, ase marmalas ni uhur ahu ampa huan-huanku. 15:30 Hape rohkonsi anakmu, na mamboiskon artamu rap pakon boru jalang, gabe isayat ham do anak ni lombu na pinamombur in. 15:31 Jadi nini ma hubani: Ambia, tongtong do ho rap pakon ahu, anjaha haganup na dong bangku in, ho do simadasi. 15:32 Tapi patut do hita marmalas ni uhur anjaha marmegah-megah, ai na dob matei do anggimon gabe manggoluh, anjaha na dob magou do ia, gabe jumpah.

Lukas 16

16:1 Ihatahon ope homa bani susianni ai: Adong ma sada halak na bayak, anjaha adong do sada sijolom anak kunsi bani. Tarbogei ma hubani, na iparbois-bois sijolom anak kunsi ai do artani. 16:2 Jadi idilo ma ia, nini ma hubani: Aha do in, na hutangar pasal ho? Patuduh ma paretongan ni na hinorjahonmu! Ai seng tarbahen be ho sijolom anak kunsi. 16:3 Jadi marpingkir ma sijolom anak kunsi ai ibagas uhurni: Aha ma sibahenonku, ai lopaskonon ni tuanku mando ahu humbani horjangku? Manangkul seng dong gogohku, mangindo-indo mela do ahu. 16:4 On ma tene sibahenonku, ase ijalo sidea ahu hu rumah ni sidea, anggo lopas ahu humbani horjangkai. 16:5 Jadi sada-sada ma idilo sagala paridouan ni tuanni ai hu lobeini, nini ma hubani na parlobei roh ai: Sadiha utangmu bani tuanta? 16:6 Balosni: Saratus gusi minak. Jadi nini ma hubani: On ma surat ni utangmu, podashon hundul anjaha suratkon ma: lima puluh! 16:7 Bani na legan use ihatahon: Ia ho, sadiha do utangmu? Nini ma: Saratus sumpit omei. Ihatahon ma hubani: On ma surat ni utangmu, suratkon ma: ualuh puluh! 16:8 Jadi ipuji tuan ai ma sijolom anak kunsi paruhur na geduk ai, halani pentar ni pambahenanni ai. Ai pandeinan do anak ni dunia on humbani anak haliharon in marsaor pakon hasomanni sauhur. (Ep. 5:9; 1 Tes. 5:5.) 16:9 Ahu pe, huhatahon ma bennima: Pindahi hanima ma bannima huan-huan marhitei Mammon na geduk in, ase anggo bois in, ijalo hanima hubagas ianan sisadokah ni dokahni. (bd. 14:14; Mat. 6:20; 10:40; 19:21.) 16:10 Anggo hatengeran ni uhur halak bani na otik, hatengeran ni uhur do ia age bani na buei, anjaha anggo geduk ia bani na otik, geduk do homa age bani na buei. (bd. 19:17.) 16:11 Anggo seng hatengeran ni uhur hanima pasal Mammon na geduk in, ise ma na ra mangondoskon bannima arta na tongon ai? 16:12 Anjaha anggo seng hatengeren ni uhur hanima pasal barang ni halak na legan, ise ma na ra mamberehon bannima na dong Bannami. 16:13 Seng tarbalosi sada jabolon dua tuan, sogamanni do na sada, haholonganni do na sada nari; hombaranni do na sada, anjaha mapas bani na sada nari. Seng tarbalosi hanima Naibata rap pakon Mammon. (Mat. 6:24.) 16:14 Haganupan ai itangar halak Parisei, na surakah bani duit, gabe irisa-risai sidea ma Ia. 16:15 Jadi nini ma dompak sidea: Ia nasiam, ipapintor-pintor nasiam do dirinasiam ilobei ni jolma, tapi itanda Naibata do uhurnasiam, ai na timbul bani jolma, ai do hagigi bani Naibata. (bd. 18:9-14; Ps. 7:10; Pod. 6:16-17.) 16:16 Sibar si Johannes do titah in ampa nabi-nabi. Hunjai nari iambilankon ma ambilan na madear pasal harajaon ni Naibata, anjaha haganup do halak marompot sihol masuk hu bagas. (Mat. 11:12, 18.) 16:17 Tapi urahan do salpu langit ampa tanoh humbani sada titik ni titah in magou. (Mat. 5:18.) 16:18 Parbangkis do ganup na manirangkon parinangonni anjaha ibuat na legan; parbangkis do homa na mambuat naboru na sinirangkon ni dalahi ni ai. (Mat. 5:32; 19:9.) 16:19 Adong ma sada halak na bayak, na marpakeian beledu sigerger ampa hiou putih na alus, ari-ari do ia marpesta. 16:20 Tapi adong ma sada halak na masombuh, na margoran si Lasarus, tibal-tibal ilobei ni labah ni na bayak ai; gok bayoh do angkulani. 16:21 Iparsinta uhurni do mangankon rima-rima, na mardabuhan humbani meja ni halak na bayak ai; tapi baliang do na roh mandilati bayohni ai. 16:22 Matei ma halak na masombuh ai, anjaha iboan malekat ma ia hu abingan ni si Abraham. Matei ma homa na bayak ai, lanjar itanom ma, 16:23 anjaha hun nagori toruh ai, iananni mandagei na parngit ai, mangkawah ma ia hu babou, gabe iidah ma bani na daoh, si Abraham ampa si Lasarus i abinganni. 16:24 Jadi dilo-dilo ma ia, nini ma: Ale ompung Abraham! Idop ma uhurmu bangku, suruh ham ma si Lasarus manornobhon ujung ni jari-jarini bani bah, laho palamlam dilahku, ai borit do huahap ibagas apuy on. 16:25 Tapi nini si Abraham ma: Ingat ma, ambia, na dob ijalo ho na madear, sanggah manggoluh ho, tapi anggo si Lasarus on na maparngit do. Anggo nuan apohon ma ia ijon, tapi mandagei na parngit mando anggo ho. 16:26 Ambah ni ai, lombang bagas do holang-holangnami ampa hanima, ase ulang boi halak na hunjon hujin, anjaha na hunjin pe seng boi mandipar bennami hujon. 16:27 Nini ma use: Anggo sonai do, hupangindo ma bamu ompung, suruh ham ma ia hu rumah ni bapa, 16:28 ai adong ope lima nari saninangku, ase ipalumba sidea, ase ulang dihut sidea masuk bani ianan na parngit on. 16:29 Tapi nini si Abraham ma: Adong do bani sidea surat ni si Musa ampa nabi, ai ma itangihon. (2 Tim. 3:16.) 16:30 Jadi nini ma: Lang sonai, ompung Abraham; tapi ambit adong sahalak humbani na dob matei roh marayak sidea, sai na paubahon ni sidea do uhur ni sidea. 16:31 Tapi ibalosi ma: Anggo seng itangihon sidea si Musa pakon nabi-nabi, seng anjai balosan ni sidea, age adong na puho humbani na matei.

Lukas 17

17:1 Ihatahon ma hubani susianni ai: Seng tarbahen lang roh parsangsian, tapi bursik ma na parohkonsi. 17:2 Dearan do bani halak sisonai ai, igantungkon losung batu bani borgokni anjaha inongnongkon ia hu laut, humbani na sangsi ibahen sahalak na etek-etek on. 17:3 Jaga hanima ma dirinima! Anggo mardousa hasomanmu, pagolpa ma ia, jadi anggo ipaubah uhurni, sasap ma dousani. 17:4 Anjaha porini pitu hali ia ibagas na sadari marsalah dompak ho, anjaha pitu hali ia roh hubam mangkatahon: "Jora ma ahu", maningon sasaponmu do ai. 17:5 Dob ai nini apostel ai ma dompak Tuhan in: Tambahi Ham ma haporsayaonnami! (Mrk. 9:24.) 17:6 Jadi nini Tuhan in ma: Anggo adong haporsayaonnima na sabatu ni loharum, boi do hatahononnima bani hayu ara on: Morbat ma ho, anjaha tarsuan ma ho hu laut! gabe balosanni do hanima. (Mat. 17:20; 21:21.) 17:7 Porini adong humbannima na marnah jabolon, sipaninggala atap siparmahan pe ai, mintor hatahononni ma hubani, sanggah mulak ia hun juma: Podas ma roh hujon, hundul ma ho mangan? 17:8 Tapi ai lang hatahononnima do hubani: Patorsa sipanganonku, mamonting ma, idangi ma ahu mangan ampa minum, dob ai pe ase mangan anjaha minum ho! 17:9 Mintor martarima kasih ma ia hubani jabolon ai, halani ihorjahon na niaturhoni ai! 17:10 Sonai do homa hanima: Anggo domma ihorjahon hanima ganup na pinarentahkon bannima, hatahon hanima ma: Jabolon na so margagan do hanami, sibar horja na patut do hansa ilahoi hanami. 17:11 Sanggah mardalan Ia dompak Jerusalem, ibontas ma parbalogan ni Samaria ampa Galilea. 17:12 Sanggah na laho masuk ia hubagas sada huta, ijumpahkon sapuluh halak na gadamon ma Ia, na jongjong mandaoh-daoh. (3 Mus. 13:45-46.) 17:13 Ipagomos sidea ma sorani, nini ma: Jesus, Guru, idop ma uhurmu bannami! 17:14 Dob iidah sidea, nini ma: Laho ma nasiam, patuduhkon nasiam ma dirinasiam bani malim! Anjaha sanggah na laho ai sidea, gabe susi ma sidea. (bd. 5:14; 3 Mus. 14:2, 3.) 17:15 Sada humbani sidea, dob iidah na dob malum ia, mulak ma, lanjar ipuji do Naibata marhasoman sora na gogoh. 17:16 Manrogop ma ia hulobei ni Jesus, mangkatahon tarima kasih Bani. Anjaha halak Samaria do ai. 17:17 Tapi nini Jesus ma mambalosi: Ai lang sapuluh do sidea na dob malum ai? Ija do na siah nari? 17:18 Ai seng dong hape na ra mulak pasangaphon Naibata, sobali halak na legan bangsa on? 17:19 Lanjar nini ma hubani: Jongjong ma ham, laho ma! Haporsayaonmu do na paluahkon ham! 17:20 Isungkun Parisei ma Ia: Antigan ma roh harajaon ni Naibata? Jadi nini ma mambalosi sidea: Seng marpanrantam idahon parroh ni harajaon ni Naibata. (Joh. 3:3; 18:36.) 17:21 Anjaha seng tarhatahon: Tonggor ma "ijon do!" atap: "ijai do!" Ai itongah-tongahnasiam do harajaon ni Naibata. (Mat. 24:23.) 17:22 Dob ai nini ma hubani susianni ai: Na roh ma arini, siholan ma hanima sihol mangidah sada ari ni Anak ni jolma in, tapi seng idahonnima ai. 17:23 Anjaha hatahonon ni sidea do bannima: Tonggor ma, ijai do! Tonggor ma, ijon do! Ulang ma laho hanima hujai anjaha ulang ma irikkon! (bd. 21:8.) 17:24 Ai songon hilap na mardejep, na mambahen siang langit hun ujung hu ujung, sonai do pasal Anak ni jolma in bani arini ai. (Mat. 24:26, 27.) 17:25 Tapi maningon buei do lobei tarononni; ambukkonon ni na sasundut on do Ia. (bd. 9:22.) 17:26 Songon na masa bani panorang ni si Noak, sonai do masa bani panorang ni Anak ni jolma in. (Mat. 24:37-39.) 17:27 Mangan minum do sidea, mambuat boru anjaha palahohon boru, das bani panorang ni si Noak masuk hubagas parau ai; jadi roh ma bah na sumbang ai mamboiskon sidea haganup. (1 Mus. 7:7-23; 2 Ptr. 2:5.) 17:28 Songon na masa bani panorang ni si Lot: Mangan minum do sidea, mamboli anjaha manjual, manuan anjaha pajongjong rumah. 17:29 Tapi bani panorang parlaho ni si Lot hun huta Sodom, turun ma udan apuy pakon hirtah hun babou, laho mamboishon sidea haganup. (1 Mus. 19:15, 24, 25; 2 Ptr. 2:7.) 17:30 Sonai ma masa bani ari ai, talarhonsi Anak ni jolma in. 17:31 Ise bani ari ai iatas tayub, anjaha ugas-ugasni adong ibagas rumah ai, ulang ma pala ia turun laho mangalop ai; anjaha na i juma pe ulang ma pala mulak. (Mat. 24:17-18; Mrk. 13:15, 16.) 17:32 Ingat ma parinangon ni si Lot, (1 Mus. 19:26.) 17:33 Agoan hosah ma na sihol paluahkon hosahni, tapi na agoan hosah, ai do na pagoluhkonsi. 17:34 Huhatahon ma bannima: Bani na saborngin ai adong ma dua halak sapodoman, sada ijalo, na sada nari itadingkon do. 17:35 Rap manduda ma dua naboru, sada ijalo, tapi na sada nari itadingkon do. (Mat. 24:40, 41.) 17:36 Adong ma dua halak i juma, sada ijalo, tapi na sada nari itadingkon do. 17:37 Jadi nini sidea ma mambalosisi: Ija ma ai Tuhan? Jadi nini ma bani sidea: Ija adong bangkei, hujai do martumpu kawak. (Mat. 24:28.)

Lukas 18

18:1 Dob ai ihatahon ma bani sidea sada limbaga, laho patorangkon paboa maningon tongtong do sidea martonggo, seng bulih lengah, 18:2 nini ma: Adong ma sada panguhum ibagas sada huta, seng mabiar ia bani Naibata anjaha seng parduli bani jolma. 18:3 Anjaha adong do homa i huta ai sada naboru na mabalu, na marnunut roh marayaksi, mangkatahon: Pintori ham ma ahu dompak imbangkai! 18:4 Dokah do seng ra ia lobei. Tapi nini ma use ibagas uhurni: Tongon, seng huhabiari Naibata, anjaha seng parduli ahu bani jolma, 18:5 tapi huurus ma lah parkara ni naboru na mabalu on, ase ulang roh be ia manunsahi ahu. (bd. 11:7, 8.) 18:6 Dob ai nini Tuhan in ma: Tangar hanima ma hata ni panguhum na geduk ai! 18:7 Ia Naibata, mintor lang ma pntoranni na pinilihni, na mandilosi arian pakon borngin? Ai padokah-dokahonni ma bani sidea? 18:8 Huhatahon ma bennima: Podas ma sidea pintoranni!Tapi anggo roh Anak ni jolma in, adong do nani jumpahonni haporsayaon iatas tanoh on? 18:9 Dob ai ihatahon ma sada limbaga pasal halak na martenger ni uhur bani dirini, na mangkatahon pintor sidea, na mapas bani hasomanni, nini ma: 18:10 Adong ma dua halak na tangkog hu rumah panumbahan martonggo, halak Parisei do na sada, anjaha sijalo sohei do na sada nari. 18:11 Jadi dorgak ma Parisei ai jongjong, anjaha sonon ma tonggoni ibagas uhurni: Ham Naibata, tarima kasih ma huhatahon Bamu, halani seng dos ahu pakon halak na legan, panrampok, pargeduk, parbangkis barang songon sijalo sohei an. (Jes. 58:2, 3.) 18:12 Dua hali saminggu ahu marpuasa, anjaha huparsapuluh do sagala sinaringku. (Mat. 23:23.) 18:13 Ia halak sijalo sohei ai mandaoh-daoh do ia jongjong, gari mangkawah dompak nagori atas seng barani ia. Tapi itompas ma tontonni, lanjar nini ma: Ham Naibata, idop ma uhurmu bangku pardousa on! (Ps. 51:3.) 18:14 Huhatahon ma bennima: Pintoran do on laho mulak ase na sada an. Ai sipatoruhon do sagala na pagijang dirini, tapi na patoruh dirini sipagijangon do! (bd. 14:11; Mat. 23:12.) 18:15 Iboan sidea do homa dakdanak hu lobeini, ase ijamah sidea. Tapi mangidah ai susian ai, ipandang ma sidea. 18:16 Tapi idilo Jesus ma sidea, nini ma: Lopas hanima ma roh dakdanak in bangku, ulang ma pandang hanima sidea, ai bani sisonin do harajaon ni Naibata! 18:17 Sintong do na huhatahon on bennima: Na so manjalo harajaon ni Naibata songon dakdanak, seng anjai masuk ia hujai. (Mat. 18:3.) 18:18 Jadi isungkun sada halak sipambobai ma Ia, nini ma: Ham Guru, sidear uhur, aha do sibahenonku, ase tartean ahu hagoluhan na sadokah ni dokahni? 18:19 Jadi nini Jesus ma hubani: Mase ihatahon ham Ahu sidear uhur? Seng dong sidear uhur sobali Naibata. 18:20 Ibotoh ham do titah in: Ulang ho marbangkis! Ulang ho mamunuh! Ulang ho manangko! Ulang ra ho manaksihon hata na so tongon! Pasangap bapamu pakon inangmu! (2 Mus. 20:12-16.) 18:21 Jadi nini ma: Haganupan ai domma hudalankon humbani sietek-etekonku nari. 18:22 Manangar ai Jesus, nini ma hubani: Sada mando na hurang bamu! Jual ham ma haganup na dong bamu, anjaha pambere ma ai bani halak na masombuh, gabe mararta ma ham i nagori atas. Dob ai roh ma ham, irikkon ham ma Ahu! (Mat. 6:20.) 18:23 Manangar ai pusok ma uhurni, ai na bayak tumang do ia. 18:24 Mangidah ai Jesus, nini ma: Maholni in masuk halak na bayak hubagas harajaon ni Naibata! 18:25 Urahan do masukan ni unta ruang ni jarum, ase sada halak na bayak masuk hubagas harajaon ni Naibata. 18:26 Jadi nini halak na manangar ai ma: Anggo sonai, ise ma boi maluah? 18:27 Nini ma: Na so tarbahen bani jolma, tarbahen Naibata do. 18:28 Jadi nini si Petrus ma: Itadingkon hanami do na dong bannami, laho mangirikkon ham. 18:29 Gabe ihatahon ma bani sidea: Na sintong do hatangkon bannima: Sagala na manadingkon rumahni barang parinangonni barang saninani barang namatorasni barang niombahni halani harajaon ni Naibata, 18:30 maningon marlompit do jaloonni i dunia on, ambahni ai hagoluhan sisadokah ni dokahni bani dunia magira. 18:31 Jadi iarahkon Jesus ma na sapuluh dua ai, nini ma dompak sidea: Tonggor ma, na tangkog ma hita hu Jerusalem, anjaha saud ma bani Anak ni joma in haganup, na dob tarsurat marhitei sagala nabi. 18:32 Ai ondoshonon ma Ia bani sipajuh begu-begu, gabe apasanni anjaha pahirionni anjaha tijuranni ma Ia, 18:33 lonsingan anjaha bunuhonni ma Ia, dob ai mulak manggoluh do Ia bani ari patoluhon. 18:34 Tapi otik pe lang iarusi sidea pasal ai; ponop do hata ai humbani uhur ni sidea, seng ibotoh sidea na hinatahonni ai. (Mrk. 9:32.) 18:35 Jadi sanggah na dohor Ia hu Jeriko, adong ma sada halak na mapitung, hundul-hundul i dalan ai mangindo-indo. 18:36 Manangar halak na mabuei, na mamontas ai, ipapangkei ma atap aha do na masa. 18:37 Gabe ipatugah halak ma bani: Jesus na hun Nasaret montas. 18:38 Jadi dilo-dilo ma ia, nini ma: Ham Jesus, Anak ni si Daud, idop ma uhurmu bangku! 18:39 Jadi ihata halak na parlobei ai ma ia, ase sip namin. Tapi lambin ipagomos do dilo-dilo: Ham Anak ni si Daud, idop ma uhurmu bangku! 18:40 Jadi soh ma Jesus, anjaha ihatahon ma, ase iboan ia hu lobeini. Dob dohor ia, isungkun ma ia: 18:41 Aha ipindo uhurmu bahenonku bamu? Jadi ihatahon ma: Ham Tuhan, marpangidah ma namin matangku! 18:42 Jadi ihatahon Jesus ma hubani: Marpangidah ma ham! Haporsayaonmu do na paluahkon ham. (bd. 17:19.) 18:43 Jadi mintor marpangidah ma matani, iirikkon ma Jesus lanjar ipuji ma Naibata. Mangidah ai halak na mabuei ai, ipuji sidea ma Naibata.

Lukas 19

19:1 Masuk ma Jesus hu Jeriko, lanjar montas ma Ia hunjai. 19:2 Jadi adong ma ijai sada halak, kopala ni sijalo sohei, na margoran si Sakeus; na bayak do ia. 19:3 Ipindo uhurni do sihol mangidah rupa ni Jesus, tapi seng tarbahensi halani halak na mabuei ai, ai parbadan na pondok do ia. 19:4 Gabe marlintun ma ia dompak lobei, ipanangkih ma sada hayu anak, ase taridahsi Ia, ai hunjai do dalan sibontasonni. 19:5 Dob das Jesus bani ianan ai, mangkawah ma Ia hu atas, anjaha nini ma hubani: Ale Sakeus! Podas ma susur, ai maningon tondok do Ahu i rumahmu sadari on! 19:6 Jadi podas ma ia susur, anjaha ijalo ma Ia ibagas malas ni uhur. 19:7 Jadi mangidah ai, marungut-ungut ma sidea haganup, nini ma: Tondok do Ia hape bani sada halak pardousa! (bd. 15:2.) 19:8 Jongjong ma si Sakeus, ihatahon ma bani Tuhan in: Eak Tuhan, satongah humbani artangku hubere ma bani halak na masombuh, anjaha anggo adong na hutipu, ompat lompit ma ai hupaulak. (2 Mus. 21:37.) 19:9 Jadi ihatahon Jesus ma hubani: Jumpahan haluahon do rumah on sadari on, ai anak ni si Abrahan do homa ia. (bd. 13:16.) 19:10 Ai na roh do Anak ni jolma in mangindahi anjaha paluahkon na magou. (bd. 5:32; 1 Tim. 1:15.) 19:11 Sanggah na tangi ai sidea bani hatani, inunut Jesus ma marlimbaga, halani dohor ma Ia hu Jerusalem, anjaha iagan sidea, mintor sipatalaron ma harajaon ni Naibata. 19:12 Jadi nini ma: Adong ma sada halak na sangap, na laho hu nagori na daoh, laho manjalo harajaon bani, dob ai mulak do ia use. (Mrk. 13:34.) 19:13 Jadi idilo ma sapuluh halak juak-juakni, ibere ma bani sidea sapuluh kati pirak, anjaha nini ma hubani sidea: Tiga-tigahon hanima ma on ronsi na mulak ahu! 19:14 Tapi sogam do uhur ni hasomanni warga negara mangidahsi, gabe i suruh sidea ma suruhan hun pudini, mangkatahon: Seng ra hanami, halak on manrajai hanami! (Joh. 1:11.) 19:15 Ase dob ijalo harajaon ai, mulak ma ia, anjaha isuruh ma na mandilo juak-juakni ai, na dob manjalo duit ai, sihol mambotoh pasal untung ni sidea bei. 19:16 Jadi roh ma na parlobei ai, nini ma: Ham tuannami, sapuluh kati do untung ni na sakati ondi! 19:17 Gabe nini ma hubani: Dear ma ai, ale juak-juak na madear! Halani hatengeran do ho bani na otik, sapuluh huta ma kuasaanmu. (bd. 16:10.) 19:18 Dob ai roh ma na paduahon ai, nini ma: Ham tuannami, lima kati do untung ni na sakati ondi! 19:19 Jadi nini ma homa hubani: Ia ho, lima huta ma gomgomanmu! 19:20 Dob ai roh ma na legan ai, nini ma: Ham tuannami, na ham ma pirakta na sakati ondi, ai hubungkus do in ibagas saputanganku. 19:21 Ai biar do uhurhu mangidah ham, halani halak na koras do ham. Ibuat ham do na so ninahkonmu anjaha ipariamai ham do na so sinuanmu. 19:22 Nini ma hubani: Ale juak-juak na jahat, domu hubani hatamin do uhumanku ho! Ibotoh ho do hape halak na koras do ahu, sibuat na so hunahkon anjaha na marpariamai na so husuan. 19:23 Mase ma lang ipabungahon ho duitkin, ase hutunggu in rap pakon bungani bani parrohku? 19:24 Jadi nini ma hubani na jongjong ijai: Buat hanima ma bagianni ai, anjaha bere hanima ma ai bani parbagian na sapuluh ai! 19:25 Jadi nini sidea ma hubani: Ham tuannami, domma sapuluh hati bani! 19:26 Huhatahon ma bennima: Bani ganup na marnadong bereon do, tapi buaton do humbani na so marnadong na adong bani hinan. (bd. 8:18; Mat. 13:12.) 19:27 Tapi anggo munsuhkai, na so ra rajaankai, boan hanima ma hujon, anjaha bunuh ma sidea i lobeihu. 19:28 Jadi dob ihatahon sonai, itoruskon Jesus ma mardalan, laho tangkog hu Jerusalem. 19:29 Jadi dashonsi Ia dohorhon Betpage ampa Betania, na bani dolog, na margoran Jetun ai, isuruh ma dua halak humbani susian ai, 19:30 anjaha nini ma: Laho ma hanima hu huta na i lobeinima in, anjaha masukhonsi hanima, jumpah hanima ma tambat ijai anak ni halode, na so ongga ihunduli halak. Tanggali hanima ma ai, lanjar boan ma hujon! 19:31 Jadi anggo adong na manungkun hanima: Mase itanggali hanima in? hatahon hanima ma: Porlu do in bani Tuhan in. 19:32 Dob ai laho ma na sinuruh ai, anjaha jumpah sidea ma songon na hinatahonni ai bani sidea. 19:33 Sanggah na mananggali anak ni halode ai sidea, ihatahon simadasi ai ma bani sidea: Mase itanggali nasiam anak ni halode in? 19:34 Jadi ibalosi sidea ma: Na porlu do in bani Tuhan in! 19:35 Jadi itogu sidea ma ai bani Jesus; iamparhon sidea ma hiou ni sidea huatas ni halode ai, anjaha ipahundul sidea ma Jesus huatas ni ai. 19:36 Anjaha, sanggah na montas ai Ia, iamparhon sidea ma hiou ni sidea bani dalan ai. 19:37 Tapi laho manjumpahkon tuadan na i dolog Jetun ai, mamungkah malas ma uhur ni susian na buei ai, ipuji sidea ma Naibata marsora na gogoh halani haganup hagogohon, na dob niidah ni sidea, 19:38 nini ma: Napuji ma Raja in, na roh marhitei goran ni Tuhan! Damei do i surga, anjaha hasangapon ma i babou! (bd. 2:14.) 19:39 Deba humbani Parisei, na adong itongah-tongah ni halak na mabuei ai, mangkatahon hu-Bani: Guru, pandang ham ma susianmu in. 19:40 Jadi nini ma marbalos: Huhatahon ma bani nasiam: Porini sip sidea, dilo-dilo ma batu in! 19:41 Jadi, sanggah na lambin dohor Ia, anjaha taridah ma huta ai, gabe itangisi ma ai, (2 Raj. 8:11; Joh. 11:35.) 19:42 nini ma: Ambit itanda ham ma namin bani ari on na padamei ham! Tapi ponop do in nuan humbani matamu. (5 Mus. 32:29.) 19:43 Na roh ma ari bamu, hubuon ni munsuhmu ma ham, inggotanni anjaha sosakanni ma ham liot. 19:44 Anjaha panepneponni ma ham rap pakon anakmu, na itongah-tongahmu in, anjaha seng paturutonni age dua batu patindih, halani seng itandai ham panorang panohuon bamu. 19:45 Dob ai masuk ma Jesus hu rumah panumbahan ai, jadi iusir ma hunjai siparjualan. 19:46 Nini ma hubani sidea: Tarsurat do, rumah partonggoan do rumahku, hape liang ni panamum do in ibahen nasiam. (Jes. 56:7; Jer. 7:11.) 19:47 Anjaha ari-ari do Ia mangajari i rumah panumbahan ai. Ia sintua ni malim ai ampa sibotoh titah ai ampa pambobai ni bangsa ai, ipindahi sidea do dalan laho mamunuhsi, 19:48 tapi seng ibotoh sidea, aha sibahenon ni sidea, ai sai longkot do uhur ni na mabuei Bani, marosuh do sidea mambogeisi.

Lukas 20

20:1 Bani na sadari, sanggah na mangajari halak na mabuei ai Ia i rumah panumbahan, anjaha mangambilankon ambilan na madear, roh ma marayaksi sintua ni malim pakon sibotoh surat ampa pangintuai-pangintuai, 20:2 anjaha nini sidea ma hu-Bani: Hatahon Ham ma bannami: Marhitei kuasa ja do ibahen Ham in? Atap: Ise do na mambere kuasa in Bamu? 20:3 Jadi nini ma mambalosi: Ahu pe, adong do sisungkunonku bani nasiam. Hatahon nasiam ma bangku. 20:4 Ia pandidion ni si Johannes, na hun surga do ai, atap humbani jolma? 20:5 Jadi martimbang ma sidea samah sidea: Anggo ihatahon hita: Hun surga, gabe hatahononni ma hubanta: Mase ma lang porsaya nasiam bani? 20:6 Tapi anggo ihatahon hita: Humbani jolma do, pargijigon ni halak na mabuei in ma hita bani batu, ai porsaya do sidea, nabi do si Johannes. 20:7 Jadi ibalosi sidea ma: Seng ibotoh hanami, atap na hunja do ai. 20:8 Jesus pe ihatahon ma bani sidea: Ahu pe seng patugahonku bani nasiam, atap marhitei kuasa ja hubahen in. 20:9 Anjaha ihatahon ma limbaga on bani halak na mabuei ai: Adong ma sada halak na mambuka pohon anggur, jadi ipasewahon ma ai bani piga-piga halak parjuma-juma, dob ai laho ma ia hu nagori na legan, mardokah-dokah. 20:10 Bani panorangni isuruh ma juak-juakni bani parjuma-juma ai, ase ibere sidea deba gogoh ni pohon anggur ai bani. Tapi ibogbogi parjuma-juma ai do ia, anjaha isuruh ma ia mulak sonin. (2 Kron. 36:15-16.) 20:11 Jadi isuruh use ma juak-juakni na legan; tapi ia pe homa hona bogbog anjaha bador do ibahen sidea, anjaha isuruh ma ia mulak mangambei tangan tumang. 20:12 Isuruh ma use na patoluhon, tapi ia pe hona ugahan do anjaha hona usir. 20:13 Dob ai nini simada pohon anggur ai ma: Aha ma sibahenonku? Husuruh ma anak haholongan ni uhurhin, ra malang do sidea bani. 20:14 Tapi dob iidah parjuma-juma ai ia, manriah ma sidea, nini ma samah sidea: On do sipanean ai. Bunuh hita ma ia, ase hita simada parbagiananni ai. 20:15 Jadi isarad sidea ma ia hu darat ni pohon ai, lanjar ibunuh ma. Aha ma nani bahenon ni simada pohon ai bani sidea? 20:16 Na roh ma ia mamunuh parjuma-juma ai, anjaha ondoskononni ma pohon anggur ai bani halak na legan. Tapi manangar ai, nini sidea ma: Palis ma in! 20:17 Tapi ikawahkon ma sidea, lanjar nini ma: Ai aha do arti ni na tarsurat on: Batu na niambukkon ni tukang rumah in, ai do gabe batu palas parsuhi-suhi. 20:18 Marosak do sagala na dabuh bani batu in, anjaha maropuk sagala na nidabuhanni. 20:19 Jadi ipindahi sibotoh surat ampa sintua ni malim ma dalan, laho manangkapsi bani panorang ai, ai ibotoh sidea, sidea do tinuju ni limbaga ai, tapi mabiar do sidea bani halak na mabuei ai. 20:20 Laho manggompangisi, isuruh sidea ma mata-mata, na maruhur sipakulah-kulah, andohar tartangkap sidea Ia marhitei parsahapni, ase tarondoskon sidea Ia bani pamarentah, bani kuasa ni panguhum ai. (bd. 11:54.) 20:21 Jadi nini sidea ma manungkunsi: Guru, ibotoh hanami pintor do parsahapmu ampa pamodahionmu, anjaha seng siidah bohi Ham, sintong do tene ipodahkon Ham dalan ni Naibata. 20:22 Patut do bereonta balasting bani Kesar, atap lang? 20:23 Tapi ibotoh Jesus do akal ni sidea ai, gabe nini dompak sidea: 20:24 Patuduh nasiam ma bangku sada dinar! Gambaran pakon surat ni ise do on? Jadi nini sidea ma: Gambaran ni Kesar. 20:25 Gabe nini ma dompak sidea: Anggo sonai, bere nasiam ma bani Kesar na Kesar simadasi, anjaha bani Naibata na Naibata simadasi. 20:26 Ase seng mangasup sidea, mambahen halilitan Ia marhitei sahapni ilobei ni halak na mabuei in. Tapi longang do sidea halani balosni ai, lanjar sip mando sidea. 20:27 Gabe roh ma deba halak Sadukei, ai ma na so marhatongonkon adong parpuhoon humbani na matei, jadi isungkun sidea ma Ia: 20:28 Gurunami, isuratkon si Musa do bannami: Anggo matei sada halak na dob marhajabuan, tapi lang martinading, maningon paganjangon ni anggini do parinangon ai, laho pajongjong ginompar bani saninani ai. (5 Mus. 25:5, 6.) 20:29 Ase adong ma pitu halak na marsanina. Mompo ma sikahanan, dob ai matei ma ia, seng martinading. 20:30 Dob ai ipaganjang na paduahon ma naboru ai, 20:31 dob ai na patoluhon, sonai torus das bani na papituhon. Seng martinading sidea bani parmatei ni sidea. 20:32 Dobni naboru ai pe matei ma. 20:33 Ai pe, bani parpuhoon ai, ise ma humbani sidea simada parinangon ai, ai hapitusi do sidea marjolmahonsi. 20:34 Jadi nini Jesus ma bani sidea: Anak ni dunia on do na mompo anjaha na laho, 20:35 tapi halak na dob talub hu hagoluhan simagira ampa hu parpuhoon humbani na matei, seng marunjuk barang laho be. 20:36 Ai seng tarbahensi be matei, usih ma sidea bani malekat, anjaha anak ni Naibata ma sidea, dob parrupei sidea bani parpuhoon ai. (1 Joh. 3:1, 2.) 20:37 Paboa sipapuhoon do magira na dob matei ai, si Musa pe itarsingati do pasal ai, sanggah bani naporon na sampurguk ai, ai igoran do ijai Tuhan in "Naibata ni si Abraham, Naibata ni si Isak anjaha Naibata ni si Jakob." (2 Mus. 3:26.) 20:38 Sedo Naibata ni na matei Ia, Naibata ni na manggoluh do, ai haganup do sidea manggoluh Bani. 20:39 Jadi nini deba sibotoh surat ma mambalosi: Sintong do hatamu ai! 20:40 Anjaha seng be pag sidea manungkun atap aha pe Bani. 20:41 Jadi nini Jesus ma dompak sidea: Mase ma adong na mangkatahon, anak si Daud do Kristus in? 20:42 Ai si Daud sandiri do mangkatahon bani buku Psalmen; Nini Tuhan in do bani Tuhanku; Hundul ma Ho hu siamunkon, (Ps. 110:1.) 20:43 paima hubahen sagala munsuhmu gabe sidogeian ni naheimu. 20:44 Ase igoran si Daud do Ia Tuhan, mase ma anakni Ia? 20:45 Jadi sanggah na tangi halak na mabuei ai haganup, nini ma hubani susianni ai: 20:46 Jaga ma hanima mangidah sibotoh surat, na marosuh medang-edang marbaju ganjang, na sihol hona tabi i tiga, na mangkaporluhon hundul i lobei-lobei i parguruan ampa bani ianan sisangapan i parpestaan. (bd. 11:43.) 20:47 Ibondut sidea do rumah ni na mabalu marhitei tonggo sipakulah-kulah na ganjang. Uhum siboratan do jaloon ni sidea use.

Lukas 21

21:1 Sanggah mangkawah Ia, iidah ma halak na bayak mandabuhkon sibere-bereni hubagas poti parartaan. 21:2 Iidah ma homa naboru na mabalu, na masombuh, mannahkon dua rimis. 21:3 Jadi ihatahon ma: Sintong do na huhatahon on bani nasiam: Bueinan do na ninahkon ni na mabalu na masombuh on marimbang haganupan ai. (2 Kor. 8:12.) 21:4 Ai haganup sidea humbani lobih-lobihni bei do inahkon sidea gabe sibere-bereni, tapi ia parinangon on, humbani hahuranganni do inahkon haganup na adong bani, na sahira goluhni. 21:5 Adong ma deba halak, na manarsingati rumah panumbahan ai, na dob pinajagar marhitei batu na majenges ampa siluah ni halak, gabe nini Jesus ma: 21:6 Iidah hanima pe haganupan in, na roh ma arini, seng paturuton be ijin dua batu patindih, na so rosakkononkon. (bd. 19:44.) 21:7 Jadi isungkun sidea ma Ia, nini ma: Andigan ma masa ai, Guru? Anjaha aha ma tandani, laho masa ai? 21:8 Jadi nini ma: Jaga ma hanima, ulang ma kahou hanima! Ai buei ma na roh manoluk Goranku, na mangkatahon: Ahu do Ia, ampa, "Domma jumpah panorangni". Ulang ma iirikkon hanima sidea. 21:9 Tapi anggo ibogei hanima barita ni hamunsuhon ampa hageoron, ulang ma hanima tarsonggot, ai maningon masa do ai lobei, tapi lang ope mintor dapot ujungni. 21:10 Nini ope bani sidea: Marsiporangan do holi bangsa hu bangsa, harajaon hu harajaon. 21:11 Masa ma lalou na maparah, sampar marsasanagori ampa lohei sonai homa panonggoti ampa tanda na banggal hun langit. 21:12 Tapi paima masa ai, tangkapon anjaha pardakdakon ni sidea do hanima. Ondoshonon do hanima hu parguruan anjaha masukkonon hubagas tutupan, boanon do hanima hulobei-lobei ni raja-raja ampa siparkuasa halani goranku. 21:13 Lanjar in ma dalan bennima, laho manaksihon Ahu. 21:14 Ingat hanima ma: Seng pala sarihononnima pasal sihatahononnima ijai. (Mat. 10:19.) 21:15 Ai Ahu do mamberehon bannima kuasa marsahap ampa hapentaron, na so boi imbangon atap jabapon ni munsuhnima. (Lah. 6:10.) 21:16 Gari namatoras ampa sanina, sindohor ampa huan-huan mangondoshon hanima; anjaha bunuhonni do deba hanima. 21:17 Domdoman ni haganup jolma do hanima halani Goranku. (Mat. 10:21-22.) 21:18 Tapi sada jambulan pe lang bulih magou humbani ulunima. (bd. 12:7.) 21:19 Marhitei hasabaron do maluah hosahnima. (2 Kron. 15:7; Heb. 10:36.) 21:20 Tapi anggo iidah hanima huta Jerusalem iinggoti tentara, botoh hanima ma, dohor ma parsedani. 21:21 Ai pe maporus ma hu dolog na i Judea, na ibagas huta in kaluar ma hunjin, anjaha na i juma ulang mulak hu huta in. 21:22 Ai ari pambalasan do in, ase saud ganup na tarsurat in. (Jer. 5:29.) 21:23 Sunsah ma na boratan rumah ampa ni painumhon bani panorang ai, ai sogop ma hasosakan banggal hu tanoh on ampa ringis bani bangsa on. 21:24 Ragei ma sidea bunuhon ni mata ni podang, anjaha hona boan tartaban hu tongah-tongah ni sagala bangsa. Dogei-dogeian ni halak parbegu ma huta Jerusalem, paima gok panorang ni parbegu. (Rom 11:25; Pangk. 11:2.) 21:25 Dob ai masa ma tanda bani mata ni ari, bani bulan ampa bani bintang pe, anjaha rusak ma sagala bangsa i tanoh on anjaha bajoraon halani hasak ni laut in ampa gilumbangni. 21:26 Tarhatos ma jolma in halani biarni managam na sihol masa hu atas tanoh on, ai dugur ma hagogohon ni parlangitan. 21:27 Dob ai idahon ni sidea ma Anak ni jolma in roh marhitei hombun ibagas hagogohon ampa hasangapon banggal. (Dan. 7:13.) 21:28 Anggo mamungkah masa ma ganupan ai, jongjong ma nasiam, padirgak ma ulunasiam, ai dohor ma haluahonnasiam. (Pil. 4:4, 5.) 21:29 Jadi ihatahon ma sada limbaga bani sidea: Tonggor hanima ma hayu ara in ampa hayu na legan in! 21:30 Anggo marpusuki ma iidah hanima, botoh hanima ma, na dohor ma partahunan milas. 21:31 Usih hujai ma, dob iidah hanima masa ganupan ai, botohonnima ma na dohor ma harajaon ni Naibata. 21:32 Tongon do na huhatahon on bannima: Seng anjai salpu na sansundut on, anggo lape masa ganupan ai. 21:33 Langit ampa tanoh salpu do, tapi anggo hatangkai seng anjai salpu. (bd. 16:17.) 21:34 Tapi jaga ma hanima bani dirinima, ulang ma boratan uhurnima halani parminum-minumon ampa parmabukon ampa holsoh-holsoh bani na i dunia on, gabe sompong songon tirangkap roh ari ai mandorab hanima. 21:35 Ai maningon roh do ai bani haganup na marianan iatas tanoh on. (1 Tes. 5:3.) 21:36 Tapi jaga ma hanima anjaha martonggo ma tongtong, ase margogoh hanima manimbili sagala na sihol roh ai, laho jongjong ilobei ni Anak ni jolma in. (Mrk. 13:33.) 21:37 Arian i rumah panumbahan ai do Ia mangajari, tapi borngin luar do Ia, marborngin i dolog, na margoran Jetun. 21:38 Anjaha girah sogod roh ma halak na mabuei ai manjumpahkonsi i rumah panumbahan laho manangar hatani.

Lukas 22

22:1 Tapi dohor ma ari raya mangan ruti na so marragi, na ginoran Paska. 22:2 Anjaha sai ipingkiri sintua ni malim ampa sibotoh surat do dalan, laho mamunuh Jesus, ai mabiar do sidea bani halak na mabuei ai. (bd. 20:19.) 22:3 Tapi imasuki setan ma si Judas, na margoran Iskariot, ai ma sada halak humbani na sapuluh dua ai. (Joh. 13:2, 27.) 22:4 Gabe laho ma ia marriah pakon sintua ni malim ampa kopala ni sijaga rumah panumbahan ai, atap sonaha do dalan, laho mangondoskonsi bani sidea. 22:5 Jadi malas ma uhur ni sidea, anjaha ibagahkon sidea ma mamberehon duit bani. 22:6 Ihadearhon uhurni ma ai, lanjar ipindahi ma panorang na dearhonsi, laho mangondoskon Jesus bani sidea, seng pala ibotoh halak na mabuei in. 22:7 Dob ai jumpah ma panorangni mangan ruti na so marragi, ai ma panayatonkon bani biri-biri Paska. 22:8 Jadi isuruh Jesus ma si Petrus ampa si Johannes, nini ma: Laho ma hanima pasirsirhon Paska banta, ase mangan hita. 22:9 Gabe nini sidea ma hu-Bani: Huja ma nini uhurmu parsirsironnami ai? 22:10 Dob ai nini ma dompak sidea: Masukhonsi hanima hu huta in, pajumpah ma hanima pakon sada halak na mamboan gusi na marisi bah; irikkon hanima ma ia hu rumah na minasukanni. 22:11 Hatahon hanima ma hubani simada rumah ai: Tonah ni Guru in bamu: Ija do kamar, iananku mangan Paska rap pakon susianku? 22:12 Jadi patuduhononni ma bannima sada kamar pardatas na lumbang, na dob niamparan; ijai ma pasirsir hanima. 22:13 Jadi laho ma sidea, jumpah sidea ma na pinatugahni ai bani sidea, gabe ipasirsir sidea ma Paska ai. (bd. 19:32.) 22:14 Ase dob jumpah panorangni, hundul ma Ia rap pakon Apostel ai. 22:15 Dob ai nini ma dompak sidea: Masihol tumang do uhurhu mangankon biri-biri Paska on rap pakon hanima, paima sogop bangku sitarononkai. 22:16 Ai huhatahon ma bannima: Seng anjai panganonku be in, ronsi hagogokni ai ibagas harajaon ni Naibata. 22:17 Dob ai ibuat ma sada panginuman, anjaha dob ihatahon tonggo tarima kasih, nini ma: Jalo hanima ma, anjaha bagi hanima ma samah hanima! 22:18 Ai huhatahon ma bannima: Mulai humbani sonari, seng inumonku be humbani buah ni anggur, das bani na roh harajaon ni Naibata. 22:19 Jadi ibuat ma ruti, anjaha dob ihatahon tonggo tarima kasih, itopiki anjaha ibere ma ai bani sidea, lanjar nini ma: Dagingku do on, na binere mangkopkop hanima; bahen hanima ma sonin, gabe pardingatan Bangku. (1 Kor. 11:23-25.) 22:20 Sonai homa do panginuman ai, dob salpu sidea mangan, ihatahon ma: Ia panginuman on, padan na baru do in, marhitei darohku, na niduruskon mangkopkop hanima. 22:21 Tapi tonggor ma, tangan ni halak na mantahihon Ahu do hape rap pakon Ahu i meja on! (Joh. 13:21-22.) 22:22 Dalanan ni Anak ni jolma in do namin songon na dob tinontuhon Bani, tapi bursik ma halak na mantahihonsi. 22:23 Jadi marsisungkunan ma samah sidea, atap ise do humbani sidea na sihol mandalankon ai. 22:24 Jadi tubuh ma paringoran itongah-tongah ni sidea, ai ma pasal atap ise do sidea sibanggalan. 22:25 Gabe nini Jesus ma dompak sidea: Raja-raja ni bangsa-bangsa do mandalankon kuasa bani rayatni, anjaha na sangap-sangap ni sidea igoran do sidear gabei. 22:26 Tapi ulang ma sonai anggo bannima! Sibanggalan bannima, ai ma gabe songon siposoan, anjaha na mamarentah, ai ma gabe songon siparugas. (Joh. 13:4-14.) 22:27 Ai ise do sibanggalan, na hundul mangan ai do atap siparugas ai do? Tapi itongah-tongahnima, Ahu do songon siparugas. (Joh. 13:4-14.) 22:28 Hanima do na tahan i lambungku ibagas haganup sitarononku. 22:29 Anjaha ondoskononku ma bannima Harajaon in, songon na dob iondoskon Bapa in hu Bangku, 22:30 ase mangan anjaha minum hanima bani mejangku bani harajaonkai, hundul bani paratas, laho manguhumi halak Israel na sapuluh dua marga in. (Mat. 19:28.) 22:31 O Simon, Simon, domma ipangindo sibolis in, sihol segeonni hanima songon boras. (2 Kor. 2:11.) 22:32 Tapi Ahu do manonggohon ho, ulang miloh haporsayaonmu, anjaha dob mulak use uhurmu, pargogohi ma uhur ni saninamu. (Ps. 51:15; Joh. 17:11, 15, 20.) 22:33 Tapi nini si Petrus ma: Tuhan, sirsir do ahu rap tartutup ampa matei ampa Ham. 22:34 Nini Jesus ma: Huhatahon ma bam Petrus: Seng martahuak dayok ope borngin on, paima iparnalang ho tolu hali, na so tinandamu Ahu. 22:35 Lanjar nini ma dompak sidea: Sanggah husuruh hanima seng marparduitan, seng marranjut anjaha seng marsipatu, ongga do hanima hurangan? Jadi ihatahon sidea ma: Lang! 22:36 Gabe nini ma dompak sidea: Tapi anggo nuan, na marparduitan iboan ma ai, sonai homa ranjut, anjaha na so marpodang, ijual ma sabingni, laho mamboli podang. 22:37 Ai huhatahon ma bannima: Maningon saud do na tarsurat pasal Ahu, na mangkatahon: Tarhira do Ia bani parjahat! Ai na dob tinontuhon pasal Ahu, saud ma nuan. (Jes. 53:12.) 22:38 Gabe ihatahon sidea ma: Tuhan, adong do dua podang ijon. Nini ma hubani sidea: Sungkup ma in! 22:39 Dob ai laho ma Ia hu darat, hu dolog Jetun, songon na somal; anjaha susianni ai do mangirikkonsi. (Joh. 18:1, 2.) 22:40 Ase dob das Ia hujai, nini ma dompak sidea: Martonggo ma hanima, ase ulang masuk hanima hubagas parlajouan! 22:41 Jadi ipapulig ma dirini humbani sidea, tuk gijigon batu daohni; manrogop ma Ia lanjar martonggo sonon: 22:42 Ham Bapa, anggo dear uhurmu, salpuhon Ham ma panginuman on hum Bangku! Tapi sedo uhurhu, uhurmu do na saud. 22:43 Jadi taridah ma Bani sada malekat hun nagori atas, laho mampargogohisi. (1 Raj. 19:5.) 22:44 Anjaha bani paruntolonni ai, lambin igogohi ma martonggo, jadi mangkatektek ma songon daroh hadogasni hu tanoh. 22:45 Jadi jongjong ma Ia humbani na martonggo ai, ijumpahkon ma susianni ai, hape tarpodom do sidea dapotsi halani pusok ni uhur. 22:46 Jadi nini ma dompak sidea: Mase modom hanima? Puho ma hanima anjaha martonggo, ase ulang masuk hanima hubagas parlajouan! 22:47 Mangkatahon ai ope Ia, roh ma buei halak, nibobahon ni sada halak, na margoran si Judas, ai ma sada halak humbani na sapuluh dua ai. Ijumpahkon ma Jesus, laho manummahsi. 22:48 Tapi nini Jesus ma dompaksi: O Judas, panummahon do hape ibahen ho mangondoskon Anak ni jolma in? 22:49 Jadi dob iidah hasoman ni Jesus na sihol masa ai, nini sidea ma: Tuhan, itampulhon hanami ma podang on? 22:50 Jadi itampul sahalak humbani sidea ma juak-juak ni sintua ni malim ai, gabe rotap ma pinggolni siamun. 22:51 Jadi nini Jesus ma mambalosi: Sungkup ma ai! Ijamah ma pinggol ai, anjaha ipamalum ma ia. 22:52 Jadi nini ma hubani sintua ni malim, kopala upas ni rumah panumbahan ampa pangintuai-pangintuai ai, na roh manangkapsi: Songon na manjumpahkon panrampok do parrohnasiam, marpodang anjaha marantuk-antuk. 22:53 Ari-ari do Ahu rap pakon nasiam i rumah panumbahan, seng itangkap nasiam Ahu. Tapi on ma panorangnasiam ampa kuasa ni hagolapan in. (Joh. 7:30; 8:20.) 22:54 Dob itangkap Ia, iboan sidea ma Ia hu rumah ni sintua ni malim ai, tapi mandaoh-daoh do si Petrus mangirikkonsi. 22:55 Ipagara sidea do apuy itongah ni alaman lanjar hundul ma maringgot, si Petrus pe hundul do rap pakon sidea ijai. 22:56 Iidah sada juak-juak naboru ma ia hundul ibagas sinalsal ni apuy ai, iserleng ma ia, anjaha nini ma: Hasomanni do age halak on! 22:57 Tapi iporsou do, nini ma: Seng hutandai Ia, inang! 22:58 Tongkin nari iidah sada halak na legan ma ia, nini ma: Ai lang hasoman ni sidea do ho? Tapi nini si Petrus ma: Lang, dahkam! 22:59 Dob salpu hira-hira sajam, nini sada halak na legan ma mangonjolhon: Tongon do ai, dihut do ia hasomanni, ai halak Galilea do ia. 22:60 Tapi nini si Petrus ma: Seng hubotoh na hinatahonmu ai, dahkam! Mangkatahon ai ope ia, mintor martahuak ma dayok. 22:61 Jadi marhusor ma Tuhan in, ikawahkon ma si Petrus, gabe idingat si Petrus ma hata ni Tuhan in, na hinatahonni hubani: Lape martahuak dayok borngin on, domma, parnalangonmu Ahu tolu hali. (ay. 34.) 22:62 Jadi luar ma ia hu darat, tangis gogoh-gogoh. 22:63 Ia halak na manjolomi Jesus, ipahiri-hiri anjaha ilonsingi do Ia. 22:64 Itutup sidea do mata ni Jesus anjaha isungkun ma: Jahai ma: Ise do na manlonsingi Ho? 22:65 Buei ope panghirion na legan ihatahon sidea Bani. 22:66 Anjaha dob siang ari, marrunggu ma pangintuai ni bangsa ai, sintua ni malim ampa sibotoh surat, anjaha tarboan ma Ia hulobei ni harungguan ni sidea. Nini sidea ma: Anggo Ho do Kristus in, hatahon ma bennami! (Joh. 18:24.) 22:67 Jadi nini ma dompak sidea: Age hupatugah ai bani nasiam, seng anjai porsaya nasiam. 22:68 Anjaha anggo manungkun Ahu, seng balosannasiam. 22:69 Tapi hunjon hujanan hundul ma Anak ni jolma in hampit siamun ni hagogohon ni Naibata. 22:70 Jadi haganup ma sidea mangkatahon: Ase Anak ni Naibata do Ho? Jadi ihatahon ma dompak sidea: Songon na hinatahon nasiam: Ahu do in tongon! 22:71 Dob ai nini sidea ma: Ai pala ope pindahanta saksi? Ai domma itangar hita sandiri ai humbani pamanganni.

Lukas 23

23:1 Dob ai misir ma sidea haganup na marrunggu ai, iboan sidea ma Ia hulobei ni si Latus. 23:2 Iaduhon sidea ma Ia, nini ma: Na dapot hanami do on pakahouhon bangsanami, anjaha ipandang do bereon balasting bani Kesar, anjaha ihatahon, Kristus, Raja do Ia. (bd. 20:25.) 23:3 Jadi nini si Latus ma manungkunsi: Raja ni Jahudi do Ham tongon? Jadi nini ma mambalosisi: Songon na hinatahonmu ai ma! 23:4 Jadi nini si Latus ma dompak sintua ni malim ampa halak na mabuei ai: Seng dong dapot ahu salah ni Halak on. 23:5 Tapi lambin igogohi sidea do mangkatahon: Geor do ibahen bangsa in marhitei pangajarionni i sab tanoh Judea, mamunkgah hun Galilea das hujon. 23:6 Manangar ai si Latus, isungkun ma atap halak Galilea do Ia. 23:7 Anjaha dob ibotoh, na humbani gomgoman ni si Herodes do Ia, isuruh ma Ia hulobei ni si Herodes, ai tudu i Jerusalem do ia ijia. (bd. 3:1.) 23:8 Dob iidah si Herodes Jesus, malas ma uhurni, ai domma dokah hinan sihol idahonni Ia, dob itangar baritani, anjaha iarap uhurni do, idahonni sada tanda sibahenonni. (bd. 9:9.) 23:9 Buei do isungkun hu Bani, tapi seng ibalosi Jesus ia. 23:10 Ijai do sintua ni malim ampa sibotoh surat, anjaha gogoh do pangaduhon ni sidea Bani. 23:11 Ia si Herodes ampa tentarani, ipahiri anjaha iapasi do Ia, dob ai isuruh ma Ia mulak hubani si Latus marpakeian na harga. 23:12 Mulai bani ari ai marhuan ma si Herodes ampa si Latus, ilobei ni ai marsidomdoman do sidea. 23:13 Dob ai idilo si Latus ma martumpu sintua ni malim, pangintuai-pangintuai ampa halak na mabuei ai, gabe nini ma dompak sidea: 23:14 Iboan nasiam do bangku Halak on, sipabalik bangsa, nini nasiam. Ilobei nasiam do hupareksa Ia, tapi seng dong jumpah ahu salah bani Halak on, domu hubani pangaduannasiam ai. 23:15 Si Herodes pe sonai do, isuruh do Ia mulak bennami, ase seng dong pambahenanni, na patut mambahen marutang hosah Ia. 23:16 Halani ai nalonsingi ma Ia, ase napaluah. 23:17 Ai aturan do ai, paluahonni sada halak bani sidea sanggah pesta ai. 23:18 Tapi sasora do sidea haganup mandilohon: Bunuh Ia! Si Barrabas ma paluah bannami! 23:19 Ia si Barrabas on hona tutup do halani pambarontakan ampa pambunuhon na masa i kota ai. 23:20 Jadi iulaki si Latus ma marsahapkon sidea, ai sihol paluahonni do Jesus. 23:21 Tapi sai dilo-dilo ma sidea: Parsilangkon ma Ia, parsilangkon ma! 23:22 Dob ai ihatahon ma patolu-halihon bani sidea: Ai aha do na jahat ibahen? Seng dong jumpah ahu Bani na boi mambahen marutang hosah Ia. Halani ai nalonsingi ma Ia, ase napaluah. 23:23 Tapi ipagogoh sidea bei ma sorani mangindohon hubani, ase iparsilangkon Ia, gabe saud ma surak-surak ni sidea ai. 23:24 Jadi iputushon si Latus ma pasaudkon pangindoan ni sidea ai. 23:25 Ipaluah ma halak na pinindo ni sidea ai, na tinutup ai halani manggeori ampa mambunuh, tapi Jesus ipadas ma bani rosuh-rosuh ni sidea. 23:26 Sanggah na mamboansi ai sidea, itangkap sidea ma sada halak, na margoran si Simon, na hun Kirene, na roh hun jumani; hubani ma ipaporsankon sidea silang ai, laho mamboan ai paihut-ihut Jesus. (Mat. 27:32; Mrk. 15:21.) 23:27 Buei do halak humbani bangsa ai ampa puang-puang na mangirikkonsi, na marhoru anjaha na tangis-tangis marhalanisi. 23:28 Jadi idompakkon Jesus ma sidea, nini ma: Nasiam boru Jerusalem, ulang ma Ahu tangisi nasiam, tapi dirinasiam ma tangisi nasiam ampa anaknasiam! 23:29 Ai na roh ma arini, hatahonon ni halak ma ijai: Martuah ma na lambang, ampa parinangon na so ongga tubuhan tuah, ampa adop na so ongga painumhon! 23:30 Ijai ma hatahonon ni halak bani dolog: "Jobjobi ma hanami!" ampa bani dolog-dolog: "Rungkubi ma hanami!" (Hos. 10:8; Pangk. 6:16; 9:6.) 23:31 Ai anggo sonon pambahen ni sidea bani hayu na matah, bani hayu na masak, sonaha ma nani? (1 Ptr. 4:17.) 23:32 Adong ope iboan dua halak nari parjahat, sibunuhon rap pakonsi. 23:33 Ase dob das sidea bani ianan na margoran partangkurakan, iparsilangkon sidea ma Ia ijai rap pakon parjahat na dua ai, na sada hu siamunni anjaha na sada nari hu sambilouni. 23:34 Jadi nini Jesus ma: Ham Bapa, marpangulaki ma uhurmu, ai seng ibotoh sidea na binahenni ai! Marjomput sinurat do sidea marbagi hiouni. (Mat. 5:44; Jes. 53:12; Ps. 22:19.) 23:35 Jongjong do ijai halak na mabuei ai manonggor, tapi manrehei do pambobai ni sidea, nini ma: Na legan ipaluah, mahua dirini ma ipaluah, anggo na tongon do Ia Kristus, na pinilih ni Naibata! 23:36 Tapi dihut do tentara ai mandorunisi, ipadohor sidea ma, laho mamberehon na migar Bani, 23:37 lanjar nini sidea ma: Anggo raja ni Jahudi do Ho, paluah ma dirimu! 23:38 Dong do homa tarsurat i babouni: On do raja ni Jahudi. 23:39 Tapi sada humbani parjahat na gantung ai manreheisi: Ai lang Kristus do Ho? Paluah ma dirimu ampa hanami! 23:40 Jadi marbalos ma hasomanni ai, nini ma mangkatasi: Seng ihabiari ho hape Naibata, age pe rap hona uhum hita? 23:41 Uhum na pintor do mangonai banta, ai ijalo hita do upah ni pambahenanta. Tapi anggo Ia, seng dong ihorjahon na so patut. 23:42 Lanjar nini ma: Ham Jesus, ingat Ham ma Ahu, anggo das ma Ham bani harajaonmu. (Mat. 16:28.) 23:43 Jadi nini Jesus ma hubani: Sintong do hatangkon bam: Sadari on rap pakon Ahu ma ho i Paradeiso! 23:44 Anjaha hira-hira pukul sapuluh dua, sogop ma na golap hu sab tanoh in das hu pukul tolu. 23:45 Ai manggolapi do mata ni ari, anjaha marigat do tirei, na i rumah panumbahan ai, bolah dua. (2 Mus. 36:35.) 23:46 Dob ai marsora na gogoh ma Jesus, nini ma: Ham Bapa! Hubagas tanganmu ma huondoshon tonduyhu. Jadi dob ihatahon sonai, rotap ma hosahni. (Ps. 31:6; Lah. 7:59.) 23:47 Mangidah na masa ai kopala ni tentara ai, ipasangap ma Naibata, nini ma: Tongon do, halak na pintor do on! 23:48 Anjaha ganup halak na mabuei ai, na roh hujai, marsitompuk tontonni bei ma mangidah na masa ai, lanjar mulak ma. 23:49 Tapi mandaoh-daoh do jongjong mangidahsi sagala na manandaisi, sonai naboru na mangirikkonsi hun tanoh Galilea. (bd. 8:2.) 23:50 Jadi adong ma sada halak na margoran si Josep, pagori ni rapot bolon, paruhur na bujur anjaha na pintor. 23:51 Seng dear uhurni bani riah ampa pambahenan ni sidea ai. Hun Arimatea, nai tanoh Judea do ia, anjaha dihut do ia paima-imahon harajaon ni Naibata. (bd. 2:25-38.) 23:52 Laho ma ia bani si Latus mangindo bangkei ni Jesus. 23:53 Ipaturun ma bangkei ai, ibaluti ma bani hiou putih, anjaha ipatibal ma hubagas tanoman na niliangkon bani batu, seng ongga ope tibal barang ise ijai. 23:54 Ari parugasonkon do ijia, anjaha laho mulai ma Sabat. 23:55 Tapi dihut do deba naboru-naboru, na roh rap pakonsi hun Galilea; ipardiatei sidea do tanoman ai ampa partibal ni bangkei ai. (ay. 49.) 23:56 Dob ai mulak ma sidea, anjaha ipasirsir sidea ma rium-riuman ampa minak na misbou. Layur ari Sabat ai marsaran do sidea, domu hubani titah in. (2 Mus. 20:10.)

Lukas 24

24:1 Tapi bani ari parlobei dob Sabat ai, roh ma sidea girah sogod hu tanoman ai mamboan rium-riuman, na dob pinasirsir ni sidea ai. 24:2 Tapi domma igulingkon batu ai hun tanoman ai jumpah sidea. 24:3 Anjaha dob masuk sidea, seng dong be jumpah sidea bangkei ni Tuhan Jesus. 24:4 Anjaha sanggah na jut ai uhur ni sidea pasal ai, jadi jongjong ma i lambung ni sidea dua halak parhiou na marlinang-linang. 24:5 Tapi sanggah tarsonggot ai sidea anjaha unduk mangkawah dompak tanoh, jadi nini halak ondi ma hubani sidea: Mase ipindahi nasiam na manggoluh bani ianan ni na matei? 24:6 Seng ijon Ia, domma puho. Ingat nasiam ma na hinatahonni ai bani nasiam, sanggah i Galilea ope Ia. 24:7 Ai ihatahon do, paboa maningon ondoshonon do Anak ni jolma in hubagas tangan ni pardousa anjaha parsilangkononkon, tapi mulak manggoluh do ari patoluhon. (bd. 9:22; Mat. 17:22, 23.) 24:8 Jadi idingat sidea ma hatani ondi. 24:9 Mulak ma sidea hun tanoman ai, ibaritahon sidea ma haganupan ai bani na sapuluh sada ai ampa bani haganup na legan ai. 24:10 Si Maria Magdalena ma ai, ambahni ai si Johanna ampa si Maria, inang ni si Jakobus, ampa na legan ai na rap pakon sidea, ipatugah sidea ma ai bani apostel ai. (bd. 8:2, 3.) 24:11 Hira turi-turian do ai, nini uhur ni sidea, seng ihaporsayai sidea ai. 24:12 Tapi laho ma si Petrus marlintun hu tanoman ai, itungkir ma hubagas, tapi seng dong iidah sobali hiou putih pambalutini ai. Dob ai mulak ma ia, longang uhurni pasal na masa ai. 24:13 Bani na sadari ai adong ma dua halak humbani sidea na laho hu sada huta, na margoran Emmaus, hira-hira sapuluh sada batu do daohni hun Jerusalem, 24:14 anjaha marsahapi do sidea samah sidea pasal na masa ai. 24:15 Jadi sanggah na marsahapi ai sidea anjaha marsipatorangan, roh ma Jesus mandohori sidea, rap mardalan pakon sidea. (Mat. 18:20.) 24:16 Tapi mubah do panonggor ni sidea ibahen, ase ulang itanda sidea Ia. 24:17 Jadi nini ma dompak sidea: Aha do na sinahapkon nasiam in itongah dalan on? Sonto ma sidea, anjaha horu do sidea idahon. 24:18 Dob ai marbalos ma sada halak, na margoran si Kleopas, nini ma dompaksi: Pitah Ham do gakni na marianan i Jerusalem na so mambotoh na masa ijai bani panorang on? 24:19 Jadi nini ma dompak sidea: Sonaha? Nini sidea ma mambalosi: Ai ma pasal Jesus, halak Nasaret in, ai ma nabi na gogoh ibagas horja ampa hata ilobei ni Naibata ampa haganup bangsa in, (Mat. 21:11.) 24:20 anjaha sonaha pangondoskon ni sintua ni malim ampa pambobainta Bani ase hona uhum Ia, marutang hosah anjaha iparsilangkon. 24:21 Tapi mangarap hinan do hanami, Ia ma na paluahkon Israel. Anjaha patolu-arihon ma sadari on, dob na masa ai. (Lah. 1:6.) 24:22 Anjaha adong do deba naboru hun tongah-tongahnami, na mambahen tarsonggot hanami, girah do sidea nasogod laho hu tanoman ai. (ay. 1-11.) 24:23 Seng dong jumpah sidea bangkeini ai, tapi mulak do sidea patugahkon, na dob iidah sidea do malekat, na mangkatahon, na manggoluh do Ia. 24:24 Anjaha dong do deba humbannami na laho hu tanoman ai; jumpah sidea do tongon songon na hinatahon ni puang-puang ai, tapi anggo Ia, seng adong iidah. (ay. 12; Joh. 20:3-10.) 24:25 Jadi nini ma dompak sidea: E nasiam, na hurang uhur, anjaha na mahol mangkaporsayai na hinatahon ni nabi-nabi! 24:26 Ai lang maningon sonai do marsitaronon Kristus in, laho masuk hu hasangaponni in? 24:27 Jadi jojor ma humbani si Musa ampa humbani sagala nabi ipatorang bani sidea sagala na tarsurat pasalsi. 24:28 Jadi dohor ma sidea bani huta siparayakon ni sidea ai, anjaha ipakulah ma manorushon pardalananni, 24:29 tapi igogohkon sidea ma mangarahkonsi, nini ma: Tondok ma Ham bannami, ai laho bod ma ari anjaha manabad ma mata ni ari! Jadi masuk ma Ia, tondok bani sidea. 24:30 Anjaha sanggah na hundul Ia rap pakon sidea mangan, ibuat ma ruti, ihatahon ma tonggo tarima-kasih, dob ai itopiki ma ai anjaha ibere ma bani sidea. (bd. 22:19.) 24:31 Ijai ma buka mata ni sidea, gabe itanda sidea ma Ia; anjaha Ia pe magou ma humbani pangidah ni sidea. 24:32 Jadi nini sidea ma samah sidea: Ai lang gara do uhurta ibagas, sanggah na pinarsahapkonni ai hita itongah dalan, laho patorangkon banta na tarsurat in? 24:33 Jadi mintor misir ma sidea mulak hu Jerusalem, gabe tumpu ma jumpah sidea na sapuluh sada ai ampa hasoman ni sidea. 24:34 Nini sidea ma: Tongon do, domma puho Tuhan in, anjaha ipataridahkon do dirini bani si Simon! 24:35 Anjaha sidea pe ibaritahon ma na masa itongah dalan ai, ampa panandai ni sidea Bani, sanggah na manopiki ruti ai Ia. 24:36 Mangkatahon ai ope sidea, jongjong ma Jesus itongah-tongah ni sidea. 24:37 Gabe tarsonggot ma sidea anjaha mabiar, iagan sidea begu-begu do na niidah ni sidea ai. (Mat. 14:26.) 24:38 Jadi nini ma dompak sidea: Mase ma tarsonggot hanima? Mase ma sungkun-sungkun uhurnima ibagas? 24:39 Tonggor hanima ma tanganku ampa naheihu, paboa Ahu do on. Jamah hanima ma Ahu, anjaha tonggor ma, ai anggo tonduy seng mardaging barang marholi-holi, songon na adong iidah hanima Bangku. 24:40 Sanggah na mangkatahon ai ipatuduhkon ma tanganni ampa naheini bani sidea. 24:41 Tapi lanjar ope seng porsaya sidea, halani malas ampa longang ni uhur ni sidea, gabe ihatahon ma bani sidea: Adong do ijon bannima sipanganon? 24:42 Jadi ibere sidea ma Bani dengke na pinanggang samponggol. (Joh. 21:10.) 24:43 Ai ma ijalo, lanjar ipangan ma ai ipaidah-idah sidea. 24:44 Jadi nini ma dompak sidea: On ma hatangku, na dob huhatahon bannima, sanggah rap ope Ahu pakon hanima, ai ma, maningon saud do haganup na tarsurat pasal Ahu ibagas titah ni si Musa, buku ni nabi-nabi ampa bani buku Psalm. (ay. 27; bd. 9:22; 18:31-33.) 24:45 Jadi ibuhai ma uhur ni sidea, ase iarusi ma na tarsurat ai. 24:46 Ihatahon ma bani sidea: Sonai do tarsurat, maningon marsitaronon do Kristus in, anjaha mulak manggoluh bani ari patoluhon. 24:47 Anjaha ambilanonkon do marhitei Goranni hamubahon ni uhur bahen hasasapan ni dousa, hubani sagala bangsa, mamungkah hun Jerusalem. 24:48 Hanima do saksi pasal ai. 24:49 Anjaha suruhonku do bennima na pinarbagah-bagah ni Bapa in. Tapi soh ma lobei hanima i huta on, paima isorungkon bannima hagogohon na hun datas. (Joh. 15:26; 16:7; Lah. 1:4.) 24:50 Jadi iarahkon ma sidea hu darat, dohor hu Betania. Jadi ipaherbang ma tanganni laho mamasu-masu sidea. 24:51 Jadi sanggah na mamasu-masu ai Ia, sirang ma Ia humbani sidea, tarangkat hu surga. 24:52 Manrogop ma sidea manombahsi, dob ai mulak ma sidea hu Jerusalem, marmalas ni uhur banggal. 24:53 Anjaha tongtong do sidea i rumah panumbahan mamuji-muji Naibata.

Johannes 1

1:1 Bani mungkahni domma adong Hata in, anjaha rap pakon Naibata do Hata in, anjaha Naibata do Hata in. (bd. 17:5; 1 Mus. 1:1; 1 Joh. 1:1, 2; Pangk. 19:13.) 1:2 Rap do In pakon Naibata bani mungkahni. (Pod. 8:22.) 1:3 Haganup marhiteihonsi do ase adong, anjaha seng dong na dob dong in, na so marhiteihonsi. (Kol. 1:16, 17; Heb. 1:2.) 1:4 Ibagas Hata in do hagoluhan, anjaha hagoluhan in do panondang ni hajolmaon, (bd. 5:26.) 1:5 Na marsinondang do panondang in ibagas na golap, tapi seng ijalo na golap in. (bd. 3:19.) 1:6 Bangkit ma sada halak, na sinuruh ni Naibata, na margoran si Johannes. (Mat. 3:1.) 1:7 Laho manaksihon do ia ase roh, ase isaksihon panondang in, ase haganup porsaya marhiteihonsi. 1:8 Seng ia panondang in, tapi sisaksihon panondang in do ia. (ay. 20.) 1:9 Panondang na sintong in, na manondangi ganup jolma do, na roh hu dunia on. 1:10 I dunia on hinan do Ia, anjaha marhiteihonsi do adong dunia on, hape seng itanda dunia on Ia. (ay. 3-5.) 1:11 Na roh do Ia marayak na dong Bani, tapi seng ijalo na dong Bani in Ia. 1:12 Tapi barang piga na manjalosi, hujai do ibere kuasa, ase gabe anak ni Naibata sidea, ai ma na porsaya bani goranni. (Gal. 3:26.) 1:13 Ai ma na so tubuh humbani daroh barang humbani rosuh ni daging barang humbani rosuh ni dalahi, tapi humbani Naibata do. (bd. 3:5, 6.) 1:14 Gabe daging ma Hata in, anjaha marianan itongah-tongahta; jadi iidah hanami ma hasangaponni songon hasangapon ni anak sasada na humbani Bapa in, gok idop ni uhur ampa hasintongan.(Jes. 7:14; 60:1; 2 Ptr. 1:16-17.) 1:15 Isaksihon si Johannes do Ia, nini do marsora na gogoh: On do Ia na huhatahon ai, na roh hun pudingku; lobeinan do Ia adong ase ahu, ai parlobei hinan do Ia. (ay. 27, 30.) 1:16 Humbani habayakonni do haganup hita manjalo, ai ma idop ni uhur na marnunut.(ay. 3, 34; Kol. 1:19.) 1:17 Marhitei si Musa do ibere titah, tapi marhitei Jesus Kristus do manjadi idop ni uhur ampa hasintongan. (Rom 10:4.) 1:18 Ise pe lang na ongga mangidah Naibata; Anak na sasada in, na bani abingan ni Bapa in, Ia do na pabotohkonsi. (bd. 6:64; Mat. 11:27; 1 Joh. 4:12.) 1:19 On do hasaksian ni si Johannes, sanggah roh hubani malim ampa halak Lepi hun Jerusalem, na sinuruh ni halak Jahudi na ijai ai, laho manungkunsi, atap ise do ia. 1:20 jadi iakuhon do, seng iporsou, nini ma: Sedo Ahu Kristus in. 1:21 Isungkun sidea ma ia: Ise do, anggo sonai? Ai si Elias do ham? Jadi nini ma: Seng ahu ai! Ham do nabi na pinarbagah ai? Balosni: Lang! 1:22 Dob ai nini sidea ma hubani: Ise do anggo sonai, ase tarbalosi hanami na marsuruh hanami. Aha do hatahononmu pasal ham? 1:23 Jadi nini ma: Ahu, ai ma sora na dilo-dilo i halimisan: "Papintor ma dalan ni Tuhan in!" songon na hinatahon ni nabi Jesayas. 1:24 Ia na sinuruh ai humbani halak Parisei do. 1:25 Jadi nini sidea ma manungkunsi: Mase ma mandidi ham, anggo seng Kristus ham, atap si Elias atap Nabi ai? 1:26 Jadi nini si Johannes ma mambalosi sidea: Ia ahu bah do hudidihon, tapi domma jongjong itongah-tongahnasiam Ia, na so tinanda nasiam in, (Mat. 3:11.) 1:27 na roh hun pudingku, anjaha na hurang talup do ahu, mananggali tali ni sipatuni. 1:28 I Betania do ai masa, idipar ni bah Jordan, ijai do ianan ni si Johannes mandidi. 1:29 Patarni ai iidah si Johannes ma Jesus roh hubani, gabe nini ma: Tonggor ma, Ia do biri-biri ni Naibata, na mamorsan dousa ni dunia on!(ay. 36; Jes. 53:7.) 1:30 Ia do ai na huhatahon ai: I pudingku roh do sada halak, na dob parlobei do Ia adong ase ahu, ai parlobei do Ia adong ase ahu. (ay. 15:27.) 1:31 Ahu pe seng hutanda hinan Ia, tapi ase talar Ia bani bangsa Israel, ai do ase roh ahu mandidihon bah. 1:32 Dob ai isaksihon si Johannes ma, nini ma: Huidah do Tonduy in susur songon asas hun nagori atas anjaha marianan Bani. (Mat. 3:16.) 1:33 Ahu pe seng hutanda hinan Ia. Tapi Ia na marsuruh ahu mandidihon bah, Ia do mangkatahon hubangku: Ia hubani ise iidah ho susur Tonduy in anjaha marianan Bani, Ia ma sididihon Tonduy Na pansing. (Luk. 3:2.) 1:34 Ase domma huidah anjaha husaksihon: Ia do Anak ni Naibata. 1:35 Patarni ai jongjong ma use si Johannes ijai rap pakon dua susianni. 1:36 Jadi sanggah niidahni ai Jesus montas, nini ma: Tonggor ma, Ia do biri-biri ni Naibata! (ay. 29.) 1:37 Dob ibogei susianni na dua ai hatani ai, jadi iirikkon sidea ma Jesus. 1:38 Marhusor ma Jesus, gabe iidah ma sidea mangirikkonsi, jadi nini ma hubani sidea: Aha do na panindahannima? Jadi nini sidea ma hubani: Rabbi (artini: guru), ija do Ham marianan? 1:39 Nini ma hubani sidea: Roh ma hanima, ase iidah hanima! Jadi roh ma sidea, iidah ma iananni ai, jadi rap ma sidea pakonsi sadarini ai. Tar pukul ompat ma ai. 1:40 Si Andreas, sanina ni si Simon Petrus do sada humbani na dua ai, na mambogei hata ni si Johannes ai, anjaha na mangirikhon Jesus ai. 1:41 Dob ai jumpahsi ma lobei si Simon, saninani ai, jadi nini ma dompaksi: Domma jumpah hanami Mesias in (artini: Kristus) (1 Sam. 2:10; Ps. 2:2.) 1:42 Ibobai ma ia bani Jesus, ikawahkon Jesus ma ia, lanjar nini ma hubani: Si Simon do ho, anak ni si Jonas; si Kepas ma ho goranon (artini: Petrus; batu gingging)! (Mat. 16:18.) 1:43 Patar ni ai, sanggah na sihol laho Ia hu Galilea, jumpahsi ma si Pilippus. Jadi nini Jesus ma hubani: Irikkon ma Ahu! 1:44 Ai si Pilippus ai hun Betsaida do, ai ma huta ni si Andreas ampa si Petrus. 1:45 Jumpah si Pilippus ma si Natanael, jadi ihatahon ma hubani: Domma jumpah hanami Ia, na sinahapkon ni si Musa ibagas titah in, sonai homa nabi-nabi ai ma Jesus, anak ni si Josep, na hun huta Nasaret. (5 Mus. 18:18; Hes. 34:23.) 1:46 Dob ai nini si Natanael ma hubani: Mintor tarbahen ma roh na madear hun Nasaret? Jadi ihatahon si Pilippus ma: Roh ma ho, ase iidah ho! (bd. 7:41.) 1:47 Iidah Jesus ma si Natanael roh hubani, jadi nini ma pasalsi: On ma sada halak Israel na sintong, na so maruhur lekluk ibagas. 1:48 Nini si Natanael ma hubani: Hunja itanda Ham ahu? Jadi nini Jesus ma mambalosisi: Sanggah lape idilo si Pilippus ho, domma huidah ho itoruh ni hayu ara ai. 1:49 Nini si Natanael ma hubani: Rabbi, Ham do Anak ni Naibata, Ham do Raja ni Israel. (bd. 6:69; Mat. 14:33; 16:16.) 1:50 Jadi nini Jesus ma mambalosisi: Halani na huhatahon ai do bam: Huidah do ho itoruh ni hayu ara ai, ase porsaya ho. Sibanggalhonon ni ai ope idahonmu! 1:51 Lanjar nini ma hubani: Na sintong tumang do na huhatahon bannima: Idahonnima do mungkab nagori atas anjaha naik-turun malekat ni Naibata marayak Anak ni jolma in. (1 Mus. 28:12.)

Johannes 2

2:1 Anjaha bani ari patoluhon adong ma na marunjuk i huta Kana, na i nagori Galilea, anjaha ijai do inang ni Jesus. 2:2 Jesus pe ampa susianni ai iontang do bani pesta ai. 2:3 Jadi dob hurangan anggur sidea, ihatahon inang ni Jesus ma hubani: Seng dong be anggur ni sidea! 2:4 Jadi nini Jesus ma hubani: Aha urusanmu bangku, inang? Seng roh ope panorangku. (bd. 19:26; Mat. 12:48.) 2:5 Nini inangni ai ma hubani siparugas ai: Barang aha ihatahon bani nasiam, bahen nasiam ma! 2:6 Mangihutkon adat parburihon ni halak Jahudi, adong do ijai onom gusi siat dua ronsi tolu bat (sada bat ai ma *_ 40 liter). (Mrk. 7:3, 4.) 2:7 Ihatahon Jesus ma hubani sidea: Goki nasiam ma gusi in bani bah! Jadi gok tumang ma ibahen sidea. 2:8 Dob ai nini ma hubani sidea: Tahui nasiam ma hunjin, anjaha boan nasiam ma hubani kopala ni pesta on! Jadi iboan sidea ma. 2:9 Dob idai kopala ni pesta ai bah na dob salih gabe anggur ai, seng ibotoh hunja harohanni ai, pitah siparugas na manahui ai do hansa mambotoh ai, idilo ma siparunjuk ai, 2:10 anjaha nini ma hubani: Haganup halak mambere parlobei anggur sidearan, dob bosur pe, ase ibere tar na hurang daini. Tapi anggo ham, isimpan ham do anggur sidearan ronsi sonari. 2:11 Ase ai ma tanda na parlobei, na binahen ni Jesus i huta Kana, na i Galilea, laho patalar hasangaponni, gabe porsaya ma susianni Bani. (bd. 1:14.) 2:12 Dob salpu ai, tuad ma Ia hu Kapernaum rap pakon inangni, ampa saninani ampa susianni, anjaha ijai ma sidea tar hundokah. (bd. 7:3.) 2:13 Halani domma dohor pesta Paska ni Jahudi, jadi tangkog ma Jesus hu huta Jerusalem. 2:14 Jadi jumpahsi ma hundul i rumah panumbahan ai partiga-tiga lombu, biri-biri pakon asas ampa situkari duit. 2:15 Jadi ipauli Jesus ma tali bahen lonsing-lonsing, anjaha iusir ma sidea haganup hun rumah panumbahan ai rap pakon biri-biri ampa lombu; isampakkon ma duit ni sipanukari ai, anjaha ipantunggalingkon ma meja ni sidea. 2:16 Dob ai nini ma hubani partiga-tiga asas ai: Boan nasiam ma in hunjon! Ulang bahen nasiam rumah ni Bapa gabe rumah partiga-tigaan! 2:17 Jadi idingat susianni ma hata na tarsurat in: Ringis mangkopkop rumahmu do mangankon ahu. 2:18 Dob ai nini Jahudi ma mambalosisi: Aha ma tanda patuduhonmu bannami, paboa na boi sonin bahenonmu? (Mat. 21:23.) 2:19 Jadi nini Jesus ma mambalosi sidea: Parseda nasiam ma rumah panumbahan on, dob ai pajongjongonku ma in ibagas tolu ari. 2:20 Dob ai nini Jahudi ma: Ompat puluh onom tahun do dokahni ipauli rumah panumbahan on, ia Ham, ibagas tolu ari nimu pajongjongonmu in? 2:21 Tapi angkulani ai do rumah panumbahan, na hinatahoni ai ijai. (1 Kor. 6:19.) 2:22 Ase, dob puho Ia humbani na matei idingat susianni ai ma hata ondi, gabe porsaya ma sidea bani hata ni surat in ampa bani hata na hinatahon ni Jesus. 2:23 Anjaha sanggah i huta Jerusalem Ia, bani pesta Paska ai, buei do na gabe porsaya bani goranni, dob iidah sidea tanda na binahenni ai. 2:24 Tapi seng ihaporsayai Jesus sidea, halani itanda do sidea haganup. 2:25 Anjaha seng porlu Bani hasaksian ni atap ise pe pasal jolma in, ai ibotoh do na ibagas uhur ni jolma in. (Mrk. 2:8.)

Johannes 3

3:1 Ase adong ma sada halak humbani Parisei, na margoran si Nikodemus, pangintuai ni halak Jahudi. (bd. 7:50; 19:39.) 3:2 Na roh do ia borngin-borngin marayaksi, anjaha nini ma hubani: Rabbi, ibotoh hanami do Ham guru na roh humbani Naibata, ai seng tarhorjahon atap ise tanda songon na binahenmu in, anggo seng Naibata hasomanni. 3:3 Dob ai nini Jesus ma mambalosisi: Na sintong tumang do na huhatahon bamu: Anggo seng tubuh halak paduahalihon, seng tarbahensi mangidahharajaon ni Naibata! (1 Ptr. 1:23.) 3:4 Ihatahon si Nikodemus ma hubani: Sonaha ma tarbahen use tubuh halak, anggo domma matua? Mintor tarulakisi ma masuk hu partapaan, ase itubuhkon inangni use! 3:5 Nini Jesus ma mambalosisi: Na sintong tumang do na huhatahon on bamu: Anggo seng tubuh halak humbani bah pakon Tonduy, seng tarmasukisi harajaon ni Naibata.(Hes. 36:25-27; Ep. 5:26; Tit. 3:5.) 3:6 Aha tubuh humbani daging, ai ma daging, anjaha aha tubuh humbani Tonduy, ai ma tonduy. (bd. 1:13; 1 Mus. 5:3; Ps. 51:7.) 3:7 Ulang ma longang uhurmu, halani huhatahon bamu: Maningon tubuh nasiam padua-halihon. 3:8 Na mangombus do logou dompak rosuh ni uhurni, ibogei ham do pardongosni, tapi seng ibotoh ham hunja rohni atap huja lahoni. Sonai do ganup na dob tubuh humbani Tonduy. 3:9 Dob ai nini si Nikodemus ma mambalosisi: Sonaha ma parjadini ai? 3:10 Jadi nini Jesus ma mambalosisi: Ham guru ni halak Israel, lang ibotoh ham in? 3:11 Na tongon tumang do na huhatahon on bamu: Na bibotohnami do ihatahon hanami, anjaha na niidahnami do isaksihon hanami, tapi seng ijalo nasiam hasaksiannami. (bd. 7:16; 8:26, 28.) 3:12 Gari na i dunia on huhatahon bani nasiam, seng porsaya nasiam, mintor porsaya ma nasiam, anggo huhatahon bani nasiam na i nagori atas? 3:13 Anjaha seng dong na naik hu nagori atas, sobali na susur hun nagori atas in, in ma Anak ni jolma in. (Ep. 4:9.) 3:14 Anjaha songon na dob pinagijang ni si Musa ulog i halimisan, sonai do pagijangon Anak ni jolma in, (4 Mus. 21:8, 9.) 3:15 ase dapotan hagoluhan na sadokah ni dokahni sagala na porsaya Bani. 3:16 Ai sonon do holong ni uhur ni Naibata bani dunia on, pala do Anakni na sasada in iberehon, ase ulang magou ganup na porsaya Bani, tapi ase hagoluhan na sadokah ni dokahni bani. (Rom. 5:8; 8:32; 1 Joh. 4:9.) 3:17 Ai seng isuruh Naibata Anakni in hu dunia on, laho manguhumi dunia on, tapi ase maluah do dunia on marhiteihonsi. (bd. 12:47.) 3:18 Seng siuhumon na porsaya Bani, tapi na so porsaya domma hona uhum, halani lang porsaya ia bani Goran ni Anak sasada ni Naibata. (ay. 36; bd. 5:24.) 3:19 Tapi on ma uhum ai: Domma roh na lihar in hu dunia on, tapi holongan do uhur ni jolma bani na golap in ase bani na lihar in, ai na jahat do horja ni sidea. (bd. 1:5, 9-11.) 3:20 Ai ganup na mangkorjahon na masambor, sogam do uhurni bani na lihar in, anjaha seng ijumpahkon na lihar in, ase ulang talar horjani ai. (Ep. 5:13.) 3:21 Tapi na mangkorjahon hasintongan in, ijumpahkon do na lihar in, ase talar horjani ai, ai ibagas Naibata do ihorjahon ai. 3:22 Dob ai laho ma Jesus rap pakon susianni hu tanoh Judea, anjaha soh ijai lobei rap pakon sidea lanjar mandidi. (bd. 4:1-3.) 3:23 Anjaha si Johannes pe mandidi do i Aenon, dohorhon huta Salim, ai buei do bah ijai. Marrohan do halak hujai, laho padidihon dirini. 3:24 Ai seng tartutup ope si Johannes ijia. (Mat. 14:3.) 3:25 Jadi tarjadi ma parsualon bani susian ni si Johannes ampa sada halak Jahudi pasal parburihan. 3:26 Roh ma sidea bani si Johannes, anjaha nini sidea ma dompaksi: Rabbi, halak ondi, na roh hubamu i dipar ni bah Jordan, ai ma na sinaksihonmu ondi, tonggor ham ma, mandidihon do Ia nuan, anjaha marrohan do ganup halak Bani. (bd. 1:26-34.) 3:27 Dob ai nini si Johannes ma mambalosi: Seng tarbuat jolma atap aha pe, anggo seng na binere ai bani hun nagori atas. (Heb. 5:4.) 3:28 Hanima sandiri do saksingku, sanggah huhatahon: Sedo ahu Kristus in, tapi na sinuruh do ahu parlobeini. (bd. 1:20, 23, 27.) 3:29 Simada tunangan, ai do siparunjuk. Ia huan-huan ni siparunjuk, na jongjong patangi-tangisi, marmalas ni uhur do halani sora ni siparunjuk ai. Malas ni uhur na sonai do na adong bangku. (Mat. 22:2.) 3:30 Anggo Ia, patut do lambin banggal, tapi ahu lambin etek ma. 3:31 Na roh hun datas, Ia do na mangatasi haganup. Na hun tanoh on, partanoh on do ai, anjaha pasal na i tanoh on do isahapkon; na roh hundatas, Ia do na mangatasi haganup. 3:32 Na niidahni ampa na binogeini do isaksihon, tapi seng dong na manjalo hasaksianni ai. (ay. 11.) 3:33 Halak na manjalo hasaksianni ai, iakui do, paboa parsintong do Naibata. 3:34 Ai na sinuruh ni Naibata, Ia do na mansahapkon hata ni Naibata, anjaha seng marsibar Ia mambere Tonduy in. (bd. 1:33, 34.) 3:35 Holong do uhur ni Bapa in bani Anak in, anjaha haganup do iondoskon hubagas tanganni. (Mat. 11:27.) 3:36 Na porsaya bani Anak in, dapotan hagoluhan na sadokah ni dokahni, tapi na so mambalosi Anak in, seng idahonni ai hagoluhan, tapi ringis ni Naibata do totap bani. (ay. 18.)

Johannes 4

4:1 Jadi dob ibotoh Tuhan in, na dob ibogei Parisei, bueinan do susian ampa na nididini marimbang si Johannes. (bd. 3:22, 26.) 4:2 age pe seng Jesus sandiri mandidihon, tapi susianni do, 4:3 itadingkon ma Judea, anjaha mulak ma Ia hu Galilea. 4:4 Tapi maningon bontasonni do nagori Samaria. 4:5 Jadi das ma Ia hu sada huta na i Samaria, na margoran Sikar, dohorhon juma, na binere ni si Jakob bani si Josep, anakni ai. (1 Mus. 48:22; Jos. 24:32.) 4:6 Ijai do parigi ni si Jakob. Jadi halani na dob loja Jesus na mardalan ai, hundul ma Ia ilambung ni parigi ai, anjaha tar tongah arian ma ai. 4:7 Dob ai roh ma sada boru Samaria, laho manahui bah. Jadi nini Jesus ma hubani: Bere ham ma bangku bahmu in otik! 4:8 Ia susianni ai, domma laho hu huta mamboli bohal. 4:9 Jadi nini boru Samaria ai ma hu-Bani: Mase Ham, halak Jahudi, mangindo bah inumon humbangku, boru Samaria? Ia halak Jahudi seng marparsaoran ai pakon halak Samaria. 4:10 Dob ai nini Jesus ma mambalosisi: Ambit itanda ham sibere-bere ni Naibata ampa na mangindo bah inumon humbamu, gabe ham ma mangindo hum-Bani, jadi bereonni ma bamu bah na maggoluh. (bd. 7:38, 39.) 4:11 Jadi nini naboru ai ma hubani: Tuan, gari tahu-tahu seng dong Bamu, anjaha bagas do parigi on; mintor hunja ma adong Bamu bah na manggoluh? 4:12 Mintor banggalan ma Ham ase ompungta si Jakob, na mamberehon parigi on bannami? Ia do na minum hunjin, anakni ampa pinahanni. 4:13 Dob ai nini Jesus ma mambalosisi: Sagala na minum humbani bah on mangulaki horahan do, (bd. 6:58.) 4:14 tapi na manginum bah sibereonkai, seng horahan be ia sadokah ni dokahni. Ia bah sibereonkai gabe bah tubuh do ai ibagas dirini, na marjullak-jullak ronsi hagoluhan sisadokah ni dokahni. (bd. 6:27, 35.) 4:15 Dob ai nini naboru ai ma hubani: Tuan, bere Ham ma bangku bah na sonai ai, ase ulang horahan be ahu, anjaha ulang pala be sai roh hujon laho manahui. 4:16 Ihatahon Jesus ma hubani: Laho ma ham, dilo ham ma pargotongmu, dob ai roh ma ham hujon! 4:17 Dob ai nini naboru ai ma mambalosi: Seng dong pargotongku. Nini Jesus ma hubani: Tongon do hatamu, seng dong pargotongmu. 4:18 Ia ham domma lima hali laho, anjaha dalahi na rap pakon ham sisonari ai, sedo pargotongmu ai; ase na sintong do na hinatahonmu ai. 4:19 Jadi nini naboru ai ma hu-Bani: Tuan, huahap nabi do Ham! 4:20 Ia ompungnami i dolog an do martonggo, hape nasiam mangkatahon, Jerusalem do ianan martonggo. (5 Mus. 12:5; Ps. 122.) 4:21 Nini Jesus ma hubani: Porsaya ma ham Bangku inang, na roh ma panorangni, seng be i dolog an atap i Jerusalem nasiam marsombah bani Bapa in. 4:22 Isombah nasiam do na so tinanda nasiam, tapi anggo hanami na tinandanami do isombah hanami, ai halak Jahudi do harohan ni haluahon. (2 Raj. 17:29-41.) 4:23 Na roh ma panorangni, anjaha domma roh ai nuan, gabe ibagas Tonduy ampa hasintongan ma sagala partonggo na sintong martonggo hubani Bapa in, ai partonggo na sonai do ipangindo Bapa in. 4:24 Tonduy do Naibata, ase sagala na martonggo hu-Bani, maningon do martonggo ibagas Tonduy ampa hasintongan. (2 Kor. 3:17.) 4:25 Nini naboru ai ma hu-Bani: Hubotoh, ia Mesias in (ai ma Kristus), maningon do roh. Roh honsi Ia, baritahononni ma ganupan ai bannami. (bd. 1:41.) 4:26 Ihatahon Jesus ma hubani: Ahu do in, na marsahap pakon ham! (bd. 9:37.) 4:27 Dob sonai, roh ma susianni, anjaha longang do uhur ni sidea, halani na marsahapi ai Ia pakon naboru ai. Tapi sahalak pe seng dong na manungkun: Aha sungkunonmu? atap: Aha sahapkononmu bani? 4:28 Itadingkon naboru ai ma pangalopan ni bahni, mulak ma ia hu huta lanjar nini ma hubani halak na ijai ai: 4:29 Eta nasiam! Tonggor nasiam ma sada halak, na patugahkon bangku haganup na dob ongga huhorjahon, atap Ia do Kristus in. 4:30 Gabe luar ma sidea hun huta ai laho marayaksi. 4:31 Sanggah sonai, nini susianni ai ma mangojursi: Mangan ma Guru in! 4:32 Tapi nini ma bani susianni ai: Adong do sipanganon Bangku, na so binotohnima! (ay. 34.) 4:33 Gabe nini susian ai ma samah sidea: Ai adong do nani, na mamboban sipanganon hu-Bani? 4:34 Ihatahon Jesus ma hubani sidea: Sipanganon do ai Bangku, mangkorjahon rosuh ni na marsuruh Ahu ampa mandobkon lahoanni. (bd. 17:4.) 4:35 Ai lang ihatahon hanima: Ompat bulan nari jumpah ma pariama? Tapi huhatahon ma bannima: Mangkawah ma hanima, tonggor hanima ma juma in, domma gorsing, boi ma sabion. (Mat. 9:37; Luk. 10:2.) 4:36 Manjalo upah ma sipanabi anjaha patumpuhon buah hu hagoluhan na sadokah ni dokahni, ase rap marmalas ni uhur sipartidah pakon sipanabi. 4:37 Ai ijon ma sintong hata, na mangkatahon: Na sada martidah, na legan manabi. 4:38 Ahu do marsuruh hanima manabi na so hinalojahonnima. Na legan do mangkorjahon, gabe isambat hanima do horja ni sidea. 4:39 Jadi buei ma halak Samaria na i huta ai na gabe porsaya Bani, halani hasaksian ni naboru ai na mangkatahon: Haganup, na dob huhorjahon ipatugah do bangku. 4:40 Das-honsi halak Samaria ai bani Jesus, ielek-elek sidea ma Ia tondok bani sidea, jadi ijai ma Ia dua ari. 4:41 Anjaha lambin bueini do na porsaya bani hata ni Jesus. 4:42 Nini sidea ma bani puang-puang ai: Seng be halani hatamai mambahen porsaya hanami. Domma itangar hanami sandiri, anjaha ibotoh hanami, Ia do tongon Sipaluah dunia on. 4:43 Jadi dob salpu na dua ari ai, misir ma Ia hunjai laho hu Galilea. (Mat. 4:12.) 4:44 Ai Jesus sandiri do manaksihon, na so marsangap nabi i tanoh hagodanganni. (Mat. 13:57; Mrk. 6:4; Luk. 4:24.) 4:45 Jadi dashonsi Ia i Galilea, ijalo halak Galilea do Ia, halani na dob iidah sidea haganup na binahenni i Jerusalem bani ari raya ai, ai sidea pe dihut do bani pesta ai. (bd. 2:23.) 4:46 Anjaha laho do Ia use hu Kana, na i Galilea, iananni ondi mambahen anggur humbani bah. Jadi adong ma ijai pagawai ni raja, boritan do anakni i Kapernaum. (bd. 2:1, 9.) 4:47 Jadi dob ibogei, na dob roh Jesus hun nagori Judea hu nagori Galilea, ijumpahkon ma Ia, ielek-elek ma, ase tuad Ia pamalum anakni, na mangkatarhatos ai. 4:48 Jadi ihatahon Jesus ma hubani: Anggo seng iidah nasiam tanda ampa halongangan, seng na porsaya nasiam. (bd. 2:18; 1 Kor. 1:22.) 4:49 Jadi iahatahon pagawai ai ma: Sai tuad ma Ham tuan sanggah lape matei anakkai. 4:50 Ihatahon Jesus ma hubani: Mulak ma ham, manggoluh ma anakmu ai! Porsaya do halak ai bani hata, na hinatahon ni Jesus bani, lanjar laho ma ia. 4:51 Sanggah tuad ia, ialo-alo jabolonni ma ia, laho patugahkon, na dob manggoluh anakni ai. 4:52 Ipapangkei ma humbani sidea panorangni, barang sadihari malum iahap. Jadi nini sidea ma: Nantuari, hira-hira pukul sada do surut pane-pane ai humbani. 4:53 Idingat bapani ai ma, pala ai ma tongon panorangni sanggah ihatahon Jesus bani: Na manggoluh ma anakmu ai. Gabe porsaya ma ia pakon haganup parrumahni. 4:54 Ase ai ma tanda na paduahon, na binahen ni Jesus use, dob mulak Ia hun Judea hu Galilea.

Johannes 5

5:1 I pudi ni ai adong ma pesta ni halak Jahudi, jadi tangkog ma Jesus hu Jerusalem. 5:2 I Jerusalem, i lambung ni horbangan biri-biri ai, adong do sada paridian, na margoran Bethesda bani hata Heber, adong do lima sopou-sopou ijai. 5:3 Martibalan do ijai buei halak na boritan, na mapitung, na oyangon ampa na matei lopah, na paima-imahon bani pargunsang ni bah ai, 5:4 ai turun do marnombas malekat ni Naibata manggunsang bah ai. Anjaha na parlobei masuk hu bagas, dob hona gunsang bah ai, malum ma atap aha pe naboritni. 5:5 Adong do ijai sada halak, na dob tolu puluh ualuh tahun dokahni boritan. 5:6 Dob iidah Jesus ia tibal ijai, anjaha ibotoh, sonai ma dokahni ijai, gabe nini ma dompaksi: Sihol malum ham? 5:7 Nini na boritan ai ma mambalosisi: Ham tuannami, seng dong dihadihangku, na mangabingkon ahu hu paridian in bani pargunsang ni bah in, ai rohhonsi ahu, domma adong na legan manlobei ahu turun. 5:8 Nini Jesus ma hubani: Jongjong ma ham, angkat ma podomanmu in, laho ma ham! (Mat. 9:6.) 5:9 Jadi mintor jorgit ma halak ai, iangkat ma podomanni, lanjar laho ma ia. Tapi ari Sabat do na sadari ai. 5:10 Jadi ihatahon halak Jahudi ma bani halak na pinamalum ai: Ari Sabat do arian on, seng bulih boanonmu podomanmu! (Jer. 17:21.) 5:11 Nini ma mambalosi: Halak, na pamalum ahu, Ia do mangkatahon bangku: Angkat ma podomanmu, anjaha laho ma. 5:12 Isungkun sidea ma ia: Ise mangkatahon bam: Angkat ma anjaha laho ma? 5:13 Tapi seng itandai na boritan ai Ia, ai domma laho Jesus, halani buei do jolma bani ianan ai. 5:14 Dob salpu ai, jumpah Jesus ma ia i rumah panumbahan, gabe nini ma hubani: Tonggor ma, domma jorgit ham. Ulang be nunut mardousa, ase ulang sogop bamu siparahan. (bd. 8:11.) 5:15 Jadi laho ma halak ai, ihatahon ma bani halak Jahudi, paboa Jesus do na pamalumkonsi. 5:16 Jadi iparburu halak Jahudi ma Jesus, halani ibahen sonai bani ari Sabat. (Mat. 12:14.) 5:17 Tapi nini Jesus ma mambalosi sidea: Na marhorja do Bapa ronsi nuan, Ahu pe marhorja do. (bd. 9:4.) 5:18 Halani ai lambin ipindahi Jahudi ma dalan laho mamunuhsi, ai seng be pitah ari Sabat isedai, tapi igoran do homa Naibata Bapani, anjaha ipados dirini pakon Naibata. (bd. 7:30; 10:33.) 5:19 Jadi nini Jesus ma mambalosi sidea: Na sintong tumang do na huhatahon on bani nasiam: Aha pe lang tarhorjahon Anak in humbani dirini sandiri, pitah na niidahni do ihorjahon Bapa in. Ai aha na hinorjahon ni Bapa in, ai do homa ihorjahon Anak in. (bd. 3:11, 32.) 5:20 Ai holong do uhur ni Bapa in bani Anak in, anjaha haganup do ipatuduhkon Bani na hinorjahonni, anjaha patuduhkononni ope Bani horja sibanggalan hunjon, ase longang uhurnasiam. (bd. 3:35.) 5:21 Ai songon pamuhoi ni Bapa in bani na matei, laho pagoluhkon sidea, sonai do Anak in, ipagoluh do atap ise, na sihol pagoluhonni. 5:22 Ai seng dong na iuhumi Bapa in, tapi domma iondoskon haganup panguhumon in bani Anak in. (Dan. 7:13, 14; Lah. 7:31.) 5:23 Ase haganup pasangap Anak in, songon parpasangap ni sidea bani Bapa in. Na so pasangaphon Anak in, ai ma na so pasangap Bapa in, na marsuruhsi. (Pil. 2:10, 11; 1 Joh. 2:23.) 5:24 Na sintong tumang do na huhatahon on bani nasiam: Barang ise, na manangihon hatangku anjaha porsaya bani na marsuruh Ahu, domma das bani hagoluhan na sadokah ni dokahni; seng pala be ia hu paruhuman, domma mandipar ia humbani hamateian hu hagoluhan. (bd. 3:16, 18.) 5:25 Na sintong tumang do na huhatahon bani nasiam: Na roh ma panorangni, anjaha domma masa ai nuan, bogeion ni na matei in ma sora ni Anak ni Naibata, gabe manggoluh ma na mambogeisi. (Ep. 2:5, 6.) 5:26 Ai songon Bapa in pargoluh ibagas dirini, lanjar sonai do ibere bani Anak in, ase pargoluh Ia ibagas dirini. (bd. 1:1-4.) 5:27 Anjaha ibere do Bani kuasa manguhumi, halani Anak ni jolma Ia. (ay. 22.) 5:28 Ulang ma longang uhurnasiam pasal ai, ai na roh ma panorangni, bogeion ni haganup halak na i tanoman in ma sorani, 5:29 jadi mandarat ma, sihorjahon na madear puho hu hagoluhan, tapi sihorjahon na jahat puho bani uhum. (bd. 6:40.) 5:30 Seng tarhorjahon Ahu atap aha pe humbani diringku sandiri, domu hubani na hubogei do panguhumhu, anjaha pintor do uhumhu, halani seng hupindahi rosuh ni uhurhu, rosuh ni na marsuruh Ahu do. (ay. 19; bd. 6:38.) 5:31 Anggo Ahu manaksihon pasal diringku, seng na sintong hasaksiankai. 5:32 Adong do na legan manaksihon Ahu, anjaha hubotoh sintong do hasaksianni ai pasal Ahu. (ay. 36; Mat. 3:17.) 5:33 Domma isuruh nasiam na marayak si Johannes, anjaha domma isaksihon hasintongan ai. (bd. 1:19.) 5:34 Ia Ahu, seng huporluhon hasaksian ni jolma, tapi husahapkon pe ai, andohar maluah nasiam. 5:35 Palita na gara anjaha na marsinalsal do ia, anjaha marosuh do nasiam tongkin marmalas ni uhur ibagas sondangni ai. 5:36 Adong do hasaksian bangku na surungan humbani si Johannes; ai horja, na niondoskon ni Bapa in Bangku, sidobhononku, in ma horja na hubahen in, in do manaksihon paboa na isuruh Bapa in do Ahu. (bd. 1:33; 3:2; 1 Joh. 5:9.) 5:37 Anjaha Bapa na marsuruh Ahu pe isaksihon do Ahu. Seng ongga ibogei nasiam sorani, anjaha rupani pe seng ongga iidah nasiam. (Mat. 3:17.) 5:38 Hatani pe seng marianan ibagas nasiam, ai seng porsaya nasiam bani na sinuruhni. 5:39 Ipareksa nasiam do Surat in, ai jumpah nasiam do ijin, nini uhurnasiam, hagoluhan na sadokah ni dokahni. Surat in do tongon na manaksihon pasal Ahu. (Luk. 24:27; 2 Tim. 3:15-17.) 5:40 Tapi seng ra nasiam roh hu-Bangku, ase dapotan hagoluhan nasiam. (bd. 6:35.) 5:41 Seng hujalo hasangapon humbani jolma. (1 Tes. 2:6; Heb. 5:5.) 5:42 Tapi hutanda do nasiam, seng dong holong dompak Naibata bani nasiam. 5:43 Roh do Ahu ibagas goran ni Bapa, hape seng ijalo nasiam Ahu. Tapi anggo roh na legan ibagas goranni sandiri, ijalo nasiam do anggo ai. 5:44 Sonaha ma tarbahen nasiam porsaya, ai marsijaloan sangap do nasiam samah nasiam; tapi anggo sangap na humbani Naibata na sasada in, seng ipindahi nasiam. (bd. 12:43.) 5:45 Ulang ma iagan nasiam, Ahu mangaduhon nasiam bani Bapa in. Adong do na mangaduhon nasiam, ai ma si Musa, hatengeran ni uhurnasiam ai. (5 Mus. 31:26.) 5:46 Ai ambit na porsaya nasiam bani si Musa, porsaya do nasiam age Bangku, ai pasal Ahu do isuratkon. (1 Mus. 3:15; 49:10; 5 Mus. 18:15.) 5:47 Tapi anggo seng porsaya nasiam bani suratni, sonaha ma porsaya nasiam bani hatangku? (Luk. 16:31.)

Johannes 6

6:1 Dob salpu ai, idipari Jesus ma tao Galilea, ai ma tao Tiberias. 6:2 Buei do halak mangirikkonsi, halani iidah sidea tanda halongangan, na binahenni bani halak na boritan. 6:3 Jadi tangkog ma Jesus hu dolog, laho hundul hujai rap pakon susianni. 6:4 Tapi dohor ma Paska, ai ma ari raya ni Jahudi. (bd. 2:13; 11:55.) 6:5 Sanggah mangkawah Jesus anjaha iidah roh buei halak hu lobeini, jadi nini ma dompak si Pilippus: Hunja ma bolionta ruti, ase mangan sidea in? 6:6 Tapi ihatahon pe sonai, na laho manlajousi do, ai ibotoh do aha sibahenonni. 6:7 Ibalosi si Pilippus ma Ia: Harga dua ratus dinar pe ruti seng sungkup bani sidea, ase ganup sidea manjalo otik bei. 6:8 Jadi marbalos ma hubani sahalak humbani susianni ai, ai ma si Andreas, anggi ni si Simon. 6:9 Adong do ijon sada dakdanak, na mamboan lima ruti pakon dua dengke, tapi sadiha ma in bani na sain buei? 6:10 Tapi nini Jesus ma: Hatahon hanima ma hundul jolma in! Adong do bolag sampalan ijai, gabe hundul ma dalahi ijai hira-hira lima ribu halak bueini. 6:11 Ase ibuat Jesus ma ruti ai, anjaha dob ihatahon tarima kasih, ipambere ma bani na hundul ai; anjaha sonai do homa dengke ai, atap sadiha nini uhur ni sidea. 6:12 Ase dob bosur sidea, nini ma dompak susianni ai: Patumpu hanima ma teba-teba in, ase ulang soya. 6:13 Jadi ipatumpu sidea ma, anjaha adong do sapuluh dua bantei teba-teba humbani na lima ruti ai, na so bois na mangan ai. 6:14 Ase dob iidah simbuei ai tanda na binahen ni Jesus ai, nini sidea ma: On ma tongon nabi ia, na sihol roh hu dunia on. (5 Mus. 18:15.) 6:15 dob ibotoh Jesus, na sihol roh sidea manangkapsi, laho pabangkithonsi gabe raja, jadi surut ma sahalaksi hu dolog. (bd. 18:36.) 6:16 Ase dob bod ari, tuad ma susianni ai hu tao ai. 6:17 Imasuki sidea ma sada parau, anjaha idipari sidea ma tao ai laho hu Kapernaum. Domma pala golap ari, tapi lalab do seng roh Jesus manjumpahkon sidea. 6:18 Anjaha mangombus ma logou na gogoh, gabe margilumbang ma tao ai. 6:19 Jadi dob marluga sidea hira-hira dua atap tolu paal daohni, iidah sidea ma Jesus mardalan iatas tao ai, roh mandohori parau ai, gabe mabiar ma sidea. 6:20 Tapi nini ma dompak sidea: Ahu do on, ulang mabiar! 6:21 Sihol pamasukon ni sidea ma Ia hu parau ai; mintor das ma parau ai hu pasir situjuon ni sidea ai. 6:22 Patarni ai ibotoh na mabuei, na i dipar ni tao ai ma, na so adong ijai parau na legan sobali na sasada ai, anjaha na so dihut Jesus masuk hu parau ai rap pakon susianni, pitah susianni ai do na misir. 6:23 Tapi marrohan do parau hun Tiberias dohor hu ianan parmanganan ruti, na tinonggohon ni Tuhan in. (ay. 11.) 6:24 Ase dob iidah halak na mabuei ai, na so ijai be Jesus, age susianni ai pe, imasuki sidea ma use parau ai, anjaha laho ma sidea hu Kapernaum mangindahi Jesus. 6:25 Jadi dob jumpah sidea Ia i dipar ni tao ai, nini sidea ma hu-Bani: Guru, sadihari do Ham hujon? 6:26 Nini Jesus ma mambalosi sidea: Na sintong tumang do na huhatahon on bani nasiam, ipindahi nasiam pe Ahu, sedo halani na dob iidah nasiam tanda in, tapi halani na bosur ai do nasiam mangan ruti ai. 6:27 Ulang ma sipanganon na laho salpu horjahon nasiam, tapi sipanganon na totap ronsi hagoluhan sisadokah ni dokahni ma, na sihol bereon ni Anak ni jolma in bani nasiam. Ai Ia do na tinokanhon ni Bapa in, Naibata. (bd. 4:14; 5:36.) 6:28 Dob ai nini sidea ma hu-Bani: Aha ma sibahenonnami, ase ihorjahon hanami horja harosuh ni Naibata? 6:29 Nini Jesus ma mambalosi sidea: On do horja harosuh ni Naibata, ase porsaya nasiam bani Na sinuruhni. (1 Joh. 3:23.) 6:30 Dob ai nini sidea ma: Aha tanda ibahen Ham, ase iidah hanami gabe porsaya hanami Bamu? Aha ihorjahon Ham? (bd. 2:18.) 6:31 Ia ompungnami, mangan manna do i halimisan, songon na tarsurat in: Ibere do ruti hun nagori atas panganon ni sidea. (2 Mus. 16:14, 13-15; Ps. 78:24.) 6:32 Jadi nini Jesus ma hubani sidea: Sedo si Musa na mambere ruti bani nasiam hun bagori atas, tapi Bapangku do mambere ruti na tongon bani nasiam hun nagori atas. (ay. 49.) 6:33 Ai na susur hun nagori atas, in do sibere hagoluhan hu dunia on, in do ruti na humbani Naibata. 6:34 Dob ai nini sidea ma: Tuhan, ruti na sonin ma tongtong bere Ham bannami. 6:35 Nini Jesus ma hubani sidea: Ahu do ruti hagoluhan in. Barang ise na roh hu-Bangku, seng anjai loheian be ia, anjaha na porsaya Bangku, seng anjai horahan be ia. (ay. 48; bd. 4:14; 7:37.) 6:36 Tapi domma huhatahon bani nasiam: Iidah nasiam do namin Ahu, tapi seng porsaya nasiam. (ay. 26, 29.) 6:37 Haganup na binere ni Bapa in Bangku, in do na roh hu-Bangku, anjaha seng anjai pabalionku na roh hu-Bangku. (bd. 17:6-8; Mat. 11:28.) 6:38 Ai seng susur Ahu hun nagori atas, laho mambahen rosuh ni uhurhu, rosuh ni uhur ni na marsuruh Ahu do. (bd. 4:34.) 6:39 Anjaha on do rosuh ni uhur ni na marsuruh Ahu, ase ulang magou hubahen age sada humbani haganup, na dob niondoskonni in Bangku, ase hupagoluh in tene bani ari parpudi. (bd. 10:28, 29; 17:12.) 6:40 Ai on do rosuh ni uhur ni na marsuruh Ahu, ase haganup na mangidah Anak in anjaha porsaya Bani, dapotan hagoluhan na sadokah ni dokahni, anjaha papuhoonku do ia bani ari parpudi. (bd. 5:29; 11:24.) 6:41 Jadi marungut-ungut ma halak Jahudi dompaksi halani hatani ai: "Ahu do ruti, na susur hun nagori atas," 6:42 gabe nini sidea ma: Ai lang Ia do Jesus, anak ni si Josep, anjaha ai lang itandai hita do bapani pakon inangni? Mase ma ihatahon: Na susur hun nagori atas do Ahu? (Luk. 4:22.) 6:43 Nini Jesus ma mambalosi sidea: Ulang nasiam marungut-ungut! 6:44 Ise pe lang na boi roh hu-Bangku, anggo seng Bapa in, na marsuruh Ahu, manogusi; anjaha Ahu do na papuhohonsi bani ari parpudi. (ay. 65.) 6:45 Adong do tarsurat bani buku ni nabi-nabi: Na niajaran ni Naibata do sidea ganupan. Haganup na manangihon Bapa in anjaha marguru hu-Bani, in do na roh hu-Bangku. (Jes. 54:13; Jer. 31:33-34.) 6:46 Seng dong halak na dob ongga mangidah Bapa in, sobali na roh humbani Bapa in; Ia do na dob mangidah Bapa in. (bd. 1:18.) 6:47 Na tongon tumang do na huhatahon on bani nasiam: Barang ise na porsaya, parrupei do ia bani hagoluhan sisadokah ni dokahni. (bd. 3:16.) 6:48 Ahu do ruti hagoluhan in. (ay. 35.) 6:49 Na mangan manna do ompungnasiam i halimisan, anjaha matei do. (ay. 31, 32; 1 Kor. 10:3, 5.) 6:50 On do ruti na susur hun nagori atas, ase ulang matei na mangankonsi. 6:51 Ahu do ruti na manggoluh, na susur hun nagori atas. Barang ise na mangan ruti on, manggoluh do ia sadokah ni dokahni. Ia ruti sibereonkai bahen hagoluhan ni dunia on, in ma dagingku. (Heb. 10:5, 10.) 6:52 Dob ai marsual ma halak Jahudi samah sidea, nini ma: Sonaha ma boi Halak on mambere dagingni in panganonta? 6:53 Jadi ihatahon Jesus ma hubani sidea: Anggo seng ipangan nasiam daging ni Anak ni jolma in, anjaha seng iinum nasiam darohni, seng dapot nasiam hagoluhan in. 6:54 Na mangankon dagingku anjaha na manginum daroh ku dapotan hagoluhan na sadokah ni dokahni, anjaha papuhoonku do ia bani ari parpudi. 6:55 Ai sipanganon na tongon do dagingku, anjaha siinumon na tongon do darohku. 6:56 Barang ise na mangankon dagingku anjaha na manginum darohku, ai do na marianan ibagas Ahu anjaha Ahu ibagas ia. (bd. 15:4; 1 Joh. 3:24.) 6:57 Songon parsuruh ni Bapa Sipargoluh in Bangku, gabe manggoluh Ahu marhitei Bapa in, sonai do manggoluh marhitei Ahu na mangankon Ahu. 6:58 On do ruti na susur hun nagori atas, tapi seng songon na pinangan ni ompung-ompung ondi, hape matei do. Na mangankon ruti on manggoluh do ronsi sadokah ni dokahni. 6:59 In ma hata ni Jesus, sanggah mangajari Ia i parguruan i huta Kapernaum. 6:60 Ase buei ma humbani susianni na manangar hata ai, mangkatahon: Hata na koras do in, ise ma ra pabogei-bogei in? 6:61 Ibotoh Jesus ma, na dob marungut-ungut susianni ai pasal ai, gabe nini ma dompak sidea: Mintor halani in ma hanima sangsi? 6:62 Sonaha ma anggo iidah hanima holi Anak ni jolma in naik hu iananni hinan? (bd. 3:13.) 6:63 Tonduy in do pagoluhkon, seng marguna anggo daging in. Ia hata na huhatahon bannima, Tonduy do in ampa hagoluhan. (2 Kor. 3:6.) 6:64 Tapi adong do deba humbannima na so porsaya. Ia Jesus ibotoh hinan do humbani mungkahni, ise sidea na so porsaya ampa na sihol mantahihonsi. (bd. 13:11.) 6:65 Jadi nini ma: Halani ai ma ase huhatahon bannima, paboa na so tarbahen atap ise roh hu-Bangku, anggo seng na binerehon ai bani marhitei Bapa in. (ay. 44.) 6:66 Buei ma humbani susianni ai, na manadingkonsi hunjia nari, seng be ihasomani sidea Ia. 6:67 Jadi nini Jesus ma hubani na sapuluh dua ai: Ai seng dihut hanima sihol laho? 6:68 Ibalosi si Petrus ma Ia: Hubani ise ma hanami laho Tuhan? Bamu do hata hagoluhan sisadokah ni dokahni!(ay. 63.) 6:69 Anjaha domma ihaporsayai anjaha itanda hanami: Ham do Na pansing ni Naibata!(bd. 1:49; 11:27; Mat. 16:16.) 6:70 Ibalosi Jesus ma sidea: Ai lang sapuluh dua do hanima, na dob hupilih in? Tapi sibolis do sada humbannima. 6:71 Si Judas, anak ni si Simon Iskariot do, na hinatahonni ai. Ia do na mantahihonsi use, ai ma sahalak humbani na sapuluh dua in.

Johannes 7

7:1 Dob salpu ai, idalani Jesus ma tanoh Galilea; seng ra Ia mardalani i Judea halani sihol do bunuhon ni halak Ia. (bd. 6:1.) 7:2 Anjaha dohor ma pesta lampo-lampo ni halak Jahudi. 7:3 Jadi ihatahon saninani ai ma hu-Bani: Misir ma Ho hunjon laho hu Judea, ase dihut susianmai mangidah horja na hinorjahonmin. (bd. 2:12.) 7:4 Ai seng bani na ponop ihorjahon halak sibahenonni, anggo sihol tarbarita Ia. Anggo sapala ihorjahon Ho na sonin, patalar ma dirimu bani dunia on. 7:5 Ai age saninani ai, seng porsaya Bani. 7:6 Jadi nini Jesus ma hubani sidea: Seng jumpah ope panorangku, tapi tongtong do sirsir anggo panorangnasiam. (bd. 2:4.) 7:7 Sonaha ma boi sogam uhur ni dunia on bani nasiam; anggo Ahu ihasogamhon do, halani husaksihon na jahat do horjani. (bd. 15:18.) 7:8 Nasiam ma tangkog marpesta, anggo Ahu, seng tangkog hu pesta ai, halani seng jumpah ope panorangku. 7:9 Dob ihatahon sonai, soh ma Ia i Galilea. 7:10 Tapi dob tangkog saninani ai hu pesta ai, Ia pe tangkog ma, seng talar, tapi ponop do. 7:11 Ase ipindahi halak Jahudi ma Ia bani pesta ai, nini sidea ma: Ai ija do Ia? 7:12 Jadi buei ma sahap-sahap pasalsi itongah-tongah ni halak na mabuei ai. Adong na mangkatahon: Paruhur na madear do Ia. Na legan mangkatahon: Lang, sipakahou halak na mabuei do Ia. 7:13 Tapi seng dong na pag marsahap torang-torang pasalsi, halani biar dompak Jahudi ai. (bd. 9:22; 12:42; 19:38.) 7:14 Bani partongahan ni pesta ai, tangkog ma Jesus hu rumah panumbahan ai mangajari. 7:15 Jadi longang ma halak Jahudi, nini ma: Sonaha do pambotoh ni On pasal na tarsurat in, ai seng ongga marguru Ia? (Mat. 13:54.) 7:16 Jadi nini Jesus ma mambalosi sidea: Ia podahku seng na hum-Bangku ai, tapi humbani na marsuruh Ahu do. 7:17 Barang ise na ra mangkorjahon rosuh ni uhurni, botohonni do, barang na humbani Naibata podahku, barang na huhatahon in humbani diringku sandiri. 7:18 Barang ise na mangkatahon humbani dirini sandiri, sangapni do na pinindahanni. Tapi na mangindahi sangap ni na marsuruhsi, in do parsintong, seng dong na geduk ibagas dirini. (bd. 5:41, 44.) 7:19 Ai lang domma ibere si Musa bani nasiam titah in? Hape sahalak pe seng dong humbani nasiam na mangkorjahon titah in. Mase ma iuhurhon nasiam sihol mamunuh Ahu? (bd. 5:16, 18; Lah. 7:53.) 7:20 Jadi nini na mabuei ai ma: Na isorapi setan do Ham. Mintor ise na mangindahi dalan laho mamunuh Ham? 7:21 Jadi nini Jesus ma mambalosi sidea: Hubahen sada horja, gabe longang nasiam haganup halani ai. (bd. 5:16.) 7:22 Ibere si Musa do bani nasiam aturan parsunaton (seng humbani si Musa namin ai, tapi humbani ompungta do), gabe bani ari Sabat pe isunat nasiam do jolma. (1 Mus. 17:10-12.) 7:23 Anggo boi do sunaton jolma bani ari Sabat, ase ulang hona langgar titah ni si Musa, mase ma manggila nasiam Bangku, halani hibul sada jolma hupamalum ari Sabat? 7:24 Ulang ma marguru bani pangidah tumang panguhumionnasiam, tapi pintor ma panguhum nasiam. 7:25 Dob ai nini deba halak na hun Jerusalem ma: Ai lang Ia do na sihol bunuhon ni sidea in? (ay. 19.) 7:26 Tonggor ma, torang ni parsahapni in, anjaha aha pe lang ihatahon sidea Bani. Ai na dob torang do nani ibotoh pambobainta, Ia do Kristus in? 7:27 Tapi tene, ibotoh hita do harohan ni Halak on! Anggo roh Kristus in, seng dong na mambotoh atap hunja harohanni. (ay. 41.) 7:28 Dob ai ipagogoh Jesus ma sorani mangajari i rumah panumbahan ai, nini ma: Tongon, itanda nasiam do Ahu, anjaha ibotoh nasiam do hunja harohanku. Tapi seng humbani diringku sandiri Ahu roh; adong do Parsintong in, na marsuruh Ahu, na so tinanda nasiam. 7:29 Hutanda do Ia, ai hum-Bani do Ahu, Ia do na marsuruh Ahu. (Mat. 11:27.) 7:30 Jadi ipindahi sidea ma dalan laho manangkapsi, tapi ise pe lang na mardas tangan hu-Bani, halani lape jumpah panorangni. (bd. 8:20; Luk. 22:53.) 7:31 Tapi buei do humbani na mabuei ai, na gabe porsaya Bani, nini sidea: Anggo roh Kristus, tagamon bueinan tanda bahenonni humbani na binahen ni Halak on? (bd. 8:30.) 7:32 Ibogei Parisei ai ma husip-husip ni na mabuei ai pasalsi, jadi isuruh sintua ni malim ampa Parisei ma upas laho manangkapsi. 7:33 Jadi nini Jesus ma: Tongkin nari mando Ahu rap pakon nasiam, dob ai laho ma Ahu marayak na marsuruh Ahu. (bd. 13:33.) 7:34 Pindahannasiam ma Ahu, tapi seng jumpah nasiam. Seng tarbahen nasiam roh bani ianankai. (bd. 8:21.) 7:35 Jadi nini halak Jahudi ma samah sidea: Huja do nani sihol misir Ia, ase lang jumpah hita be Ia? Sihol misir Ia nani hubani hasoman na manrantou i tanoh Gorik, laho mangajari halak Gorik ai? 7:36 Aha do arti ni hata, na hinatahonni ai: "Pindahannasiam ma Ahu, tapi seng jumpah. Seng tarbahen nasiam roh bani ianankai?" 7:37 Dob ai bani ari parpudi ni pesta ai, bani matani ai, jongjong ma Jesus ijai, ipagogoh ma sorani mangkatahon: Barang ise na horahan, hu-Bangku ma ia roh minum. (bd. 4:10; 3 Mus. 23:36.) 7:38 Songon na hinatahon ni surat in: Bah na manggoluh do mabaor humbani na porsaya Bangku!(Jes. 44:3; Joel 3:1.) 7:39 Pasal Tonduy in do na hinatahonni ai, sijaloon ni halak na porsaya Bani, ai seng ope roh Tonduy in, halani seng ipasangap ope Jesus. (bd. 16:7.) 7:40 Deba humbani na mabuei ai, na mambogei hata ai, mangkatahon: On ma tongon Nabi ai. (bd. 6:14; 5 Mus. 18:15.) 7:41 Na legan mangkatahon: On ma Kristus ai! Tapi na legan use mangkatahon: Mintor hun Galilea ma roh ni Kristus in? 7:42 Ai lang ihatahon Surat in do, ia harohan ni Kristus, ai ma humbani ginompar ni si Daud anjaha hun huta Betlehem, huta ni si Daud? (Mik. 5:1; Mat. 2:5, 6; 22:42.) 7:43 Masa ma parsalisihan itongah-tongah ni bangsa in marhalani Ia. (bd. 9:16.) 7:44 Deba humbani sidea sihol manangkapsi, tapi seng dong na pag mardas tangan Bani. (ay. 30.) 7:45 Jadi mulak ma upas ai bani sintua ni malim ampa Parisei, gabe ihatahon sidea ma bani sidea: Mase lang iboban nasiam Ia? 7:46 Balos ni upas ai: Seng ongga ope adong halak na marsahap songonsi ai. (Mat. 7:28-29.) 7:47 Jadi nini Parisei ai ma bani sidea: Ai dihut do homa nasiam ipakahou? 7:48 Ai adong do humbani pambobai atap humbani Parisei, na porsaya Bani? 7:49 Tapi pitah halak na mabuei in, na so mambotoh titah in do; bursik ma sidea. 7:50 Dob ai nini si Nikodemus ma, ai ma sada halak humbani sidea, na roh ijia marayak Jesus: (bd. 3:1, 2.) 7:51 Ai iuhumi titahta do halak, anggo lang palobei nabogei hatani, ase na botoh atap aha na hinorjahonni? (5 Mus. 1:16, 17.) 7:52 Jadi nini sidea ma mambalosisi: Ai halak Galilea do homa ho? Papangkei ma, ase ibotoh ho, na so adong bangkit nabi hun Galilea. (ay. 41) 7:53 Jadi misir ma sidea ganup hu rumahni bei.

Johannes 8

8:1 Dob ai laho ma Jesus hu dolog Jetun. 8:2 Tapi patarni ai laho ma Ia use hu rumah panumbahan; roh ma halak na mabuei ai hu lobeini, jadi hundul ma Ia laho mangajari sidea. 8:3 Jadi iboan sibotoh surat ampa Parisei ma puang-puang, na tarjumpah marbangkis, hu lobeini, ipajongjong ma ia hu tongah-tongah, 8:4 anjaha nini sidea ma hu-Bani: Guru, na tardapot do puang-puang on marbangkis. 8:5 Nini titah ni si Musa, sipargijigon do bani batu halak na sonon; ia Ham, sonaha do nimu? (3 Mus. 20:10.) 8:6 Ihatahon sidea pe sonai, na laho manlajousi do, ase adong dalan mangaduhonsi. Tapi ipaunduk Jesus ma dirini, lanjar manurat-nurat i tanoh marhitei jari-jarini. 8:7 Tapi halani sai i nunut sidea manungkunsi, Jesus pe dirgak ma, anjaha ihatahon ma bani sidea: Barang ise na so mardousa humbani nasiam, ia ma parlobei manggijigisi bani batu. 8:8 Dob ai ipaunduk ma use dirini, anjaha manurati bani tanoh. 8:9 Tapi mambogei ai, misiran ma sidea sada-sada, pangintuai parlobei, gabe tading ma sahalaksi ampa puang-puang ai, na jongjong ijai. (Rom 2:22.) 8:10 Ipadirgak Jesus ma dirini, nini ma dompaksi: Ija do sidea inang? Seng dong na manguhumi ham? 8:11 Nini ma: Seng dong Tuhan. Jadi ihatahon Jesus ma: Ahu pe, seng uhumonku ham. Laho ma ham, ulang be nunut ham mardousa hunjon hujanan! 8:12 Dob ai nini Jesus ma use mangkatahon bani sidea: Ahu do panondang ni dunia on. Seng anjai mardalan bani na golap na mangirikkon Ahu, bani do tene Panondang hagoluhan in. (bd. 1:5, 9; Jes. 49:6.) 8:13 Jadi nini halak Parisei ma hu-Bani: Ia Ham, dirimu do isaksihon Ham; seng sintong hasaksianmu in. 8:14 Jadi nini Jesus ma mambalosi sidea: Age pe pasal diringku husaksihon, sintong do hasaksiankin, ai hubotoh do, hunja Ahu roh anjaha huja Ahu sihol laho. Tapi anggo nasiam, seng ibotoh nasiam hunja Ahu roh anjaha huja sihol laho Ahu. (bd. 5:31.) 8:15 Mangihutkon pardagingon do nasiam manguhumi. Anggo Ahu, seng dong huuhumi age ise. 8:16 Anjaha anggo manguhum Ahu, sintong do uhumhu, ai seng pitah Ahu na manguhum ai, tapi na marsuruh Ahu do hasomanku. (ay. 29.) 8:17 Anjaha bani titahnasiam pe tarsurat do: Sintong do sinaksihon ni dua halak. (5 Mus. 17:6; 19:15.) 8:18 Ahu do na manaksihon pasal diringku, anjaha Bapa in pe, na marsuruh Ahu, isaksihon do Ahu. 8:19 Nini sidea ma hu-Bani: Ai ija do Bapamu? Ibalosi Jesus ma: Ahu atap Bapa pe, seng itandai nasiam. Ambit itandai nasiam Ahu, tandaon-nasiam do age Bapa. 8:20 Ai ma ihatahon i kamar parartaan, sanggah na mangajari Ia i rumah panumbahan. Ise pe lang na manangkapsi, ai seng jumpah ope panorangni. 8:21 Jadi nini ma use mambalosi sidea: Na laho ma Ahu, jadi pindahannasiam ma Ahu, anjaha matei ma nasiam ibagas dousanasiam. Anjaha seng boi nasiam roh hu siparayakonkai. (bd. 7:34; 13:33.) 8:22 Dob ai nini halak Jahudi ma: Na laho mandolos do Ia nani, ase ihatahon: Seng boi nasiam roh hu siparayakonkai? (bd. 7:35.) 8:23 Jadi nini ma hubani sidea: Na hun toruh on do nasiam, na hun babou do anggo Ahu. Na hun dunia on do nasiam, seng hun dunia on anggo Ahu. (bd. 3:31.) 8:24 Halani ai do ase huhatahon bani nasiam: Na matei ma nasiam ibagas dousanasiam. Ai anggo seng porsaya nasiam, Ahu do In, matei ma nasiam ibagas dousanasiam. 8:25 Nini sidea ma hu-Bani: Ai ise do Ham? Ibalosi Jesus ma sidea: Songon na dob huhatahon ai bani nasiam! 8:26 Buei do sihatahononku ampa sipinsangonku pasal nasiam. Parsintong do na marsuruh Ahu, anjaha na hubogei hum-Bani, ai do husaksihon bani dunia on. 8:27 Seng ibotoh sidea, Bapa in do na sinahapkonni bani sidea marhitei ai. 8:28 Dob ai nini Jesus ma hubani sidea: Dob pe ipagijang nasiam Anak ni jolma in, ase ibotoh nasiam Ahu do in, anjaha na so adong hubahen humbani diringku, tapi songon na pinodahkon ni Bapa hu-Bangku, sonai do huhatahon. (bd. 3:14; 12:32.) 8:29 Anjaha na marsuruh Ahu, Ia do hasomanku. Seng ongga itadingkon sahalak Ahu, ai rosuh ni uhurni do tongtong huhorjahon. (ay. 16.) 8:30 Dob ihatahon sonai, buei ma na gabe porsaya Bani. 8:31 Jadi ihatahon Jesus ma dompak halak Jahudi na dob porsaya ai Bani: Anggo totap nasiam ibagas hatangku, sintong ma nasiam susianku. (bd. 15:14.) 8:32 Tandaonnasiam ma hasintongan in, anjaha paluahon ni hasintongan in ma nasiam. 8:33 Ibalosi sidea ma Ia: Gonompar ni si Abraham do hanami, anjaha seng ongga hanami hona parjabolonan. Mase ma ihatahon Ham. Maningon paluahon do nasiam? 8:34 Ibalosi Jesus ma sidea: Na sintong tumang do hatangkon bani nasiam: Sagala na mangkorjahon dousa, jabolon ni dousa do ai.(Rom 6:16-20; 1 Joh. 3:8.) 8:35 Anjaha jabolon, seng totap ai i rumah; anak do na totap tongtong. 8:36 Anggo ipaluah Anak in nasiam, na maluah botul ma nasiam.(Rom 6:18, 22.) 8:37 Hubotoh, ginompar ni si Abraham do nasiam, tapi ipindahi nasiam do dalan mamunuh Ahu, ai seng siat hatangku bani nasiam. 8:38 Na huidah bani Bapa, ai do huhatahon; nasiam pe, na binogeinasiam humbani bapanasiam, ai do ihorjahon nasiam. 8:39 Jadi nini sidea ma mambalosisi: Ia bapanami, ai ma si Abraham. Nini Jesus ma bani sidea: Ambit anak ni si Abraham do nasiam, ihorjahon nasiam do horja ni si Abraham. 8:40 Tapi ipindahi nasiam do dalan laho mamunuh Ahu, na patugahkon bani nasiam hasintongan, na hubogei humbani Naibata. Seng sonai pambahen ni si Abraham. 8:41 Horja ni bapanasiam do na hinorjahonnasiam. Nini sidea ma hu-Bani: Sedo anak salong-salongan hanami, sada do bapanami, ai ma Naibata. 8:42 Nini Jesus ma hubani sidea: Ambit Naibata do bapanasiam, holong do uhurnasiam Bangku, ai humbani Naibata do Ahu roh hujon; seng humbani diringku Ahu na roh on, Ia do na marsuruh Ahu. 8:43 Mase ma lang iarusi nasiam hatangku? Ai ma, halani seng tartangihon nasiam hatangku. 8:44 Na marbapa hubani sibolis do nasiam, anjaha rosuh ni bapanasiam do sihol bahenonnasiam. Sibunuh jolma do ia humbani mungkahni, anjaha seng jongjong ia ibagas hasintongan, ai seng dong hasintongan ibagas dirini. Anggo ihatahon ladung, domu hubani hadirionni do na hinatahonni ai, ai siparladung do ia anjaha bapa ni ladung. (1 Mus. 3:4; 2 Ptr. 2:4; 1 Joh. 3:8-10.) 8:45 Tapi hasintongan do huhatahon, hape seng porsaya nasiam Bangku. 8:46 Ise humbani nasiam boi mambuktihon, pardousa Ahu? Anggo huhatahon na sintong, mase ma lang porsaya nasiam Bangku? (2 Kor. 5:21; 1 Ptr. 2:22.) 8:47 Barang ise na humbani Naibata, tangihononni ai do hata ni Naibata. Halani na so humbani Naibata do nasiam mambahen lang itangihon nasiam Ahu. (bd. 18:37.) 8:48 Jadi nini halak Jahudi ma mambalosisi: Ai lang sintong do hatanami, halak Samaria do Ham anjaha na sibolison? (bd. 7:20.) 8:49 Ibalosi Jesus ma: Seng na sibolison Ahu; hupasangap do Bapa in, jadi iapasi nasiam do Ahu. 8:50 Ia Ahu seng hupindahi sangaphu; adong do na mangindahi ai anjaha na manguhumi. (bd. 5:41.) 8:51 Na sintong tumang do hatangkon bani nasiam: Barang ise na mangkorjahon hatangku, seng idahonni hamateian sadokah ni dokahni.(bd. 6:40, 47.) 8:52 Nini halak Jahudi ma hu-Bani: Sonari ibotoh hanami ma, na sibolison do Ham. Na matei do si Abraham ampa nabi-nabi, hape Ham mangkatahon: Barang ise na mangkorjahon hatangkin, seng dageion ni in hamateian sadokah ni dokahni. 8:53 Ai banggalan do Ham humbani bapanami si Abraham, na dob matei in? Anjaha nabi-nabi pe matei do. Ai ise do Ham, nini uhurmu? 8:54 Ibalosi Jesus ma: Anggo Ahu pasangap diringku, na so adong ma sangaphu. Adong do Bapangku, na pasangap Ahu, in ma na hinatahonnasiam Bapanasiam. 8:55 Anjaha seng itanda nasiam Ia, tapi anggo Ahu hutanda do. Ambit huhatahon, seng hutanda Ia, parladung ma Ahu songon nasiam. Tapi hutanda do Ia, anjaha hudalankon do hatani. (bd. 7:28.) 8:56 Marolob-olob do si Abraham, bapanasiam in, halani sihol idahonni aringkin, jadi saud do iidah, gabe malas ma uhurni. 8:57 Dob ai nini halak Jahudi ma hu-Bani: Lima puluh tahun pe lape das umurmu, mintor ongga ma iidah Ham si Abraham? 8:58 Nini Jesus ma hubani sidea: Na sintong tumang do na huhatahon on bani nasiam: Lape tubuh si Abraham, domma adong Ahu. 8:59 Jadi ibuat sidea ma batu, laho manggijigisi, tapi ponop ma Jesus misir hun rumah panumbahan ai. (bd. 10:31; Luk. 4:30.)

Johannes 9

9:1 Dob ai sanggah na montas Ia, iidah ma sada halak, na pitung humbani partubuhni. 9:2 Jadi nini susianni ai ma manungkunsi: Guru, ise do na mardousa, halak on do atap namatorasni, ase pitung ia humbani partubuhni? 9:3 Ibalosi Jesus ma: Sedo halani dousani atap halani dousa ni namatorasni, tapi ase ipatalar bani horja ni Naibata. (bd. 11:4.) 9:4 Maningon horjahononku do horja ni na marsuruh Ahu, sadokah siang ari; ai rohkonsi borngin, seng tarbahen atap ise pe marhorja. (bd. 5:17.) 9:5 Sadokah i dunia on ahu, panondang ni dunia on do Ahu. (bd. 8:12.) 9:6 Dob ihatahon sonai, martijur ma Ia hu tanoh, laho pamalhot tanoh otik marhitei tijurni ai, idaiskon ma na malhot ai bani matani, (Mrk. 8:23.) 9:7 lanjar nini ma hubani: Laho ma ham marsuhap hu bongbongan Siloam (artini: na sinuruh). Jadi laho ma ia marsuhap, gabe marpangidah ma ia mulak hunjai. 9:8 Jadi nini romban rumahni ma, sonai age na ongga mangidahsi hinan mangindo-indo: Ai lang on do, na hundul mangindo-indo ondi? 9:9 Na deba mangkatahon: Ia do in! Na deba nari mangkatahon: Lang, tapi usih do ia hujai! Ia sandiri mangkatahon: Ahu do in! 9:10 Nini sidea ma hubani: Sonaha do parmungkab ni matamu in? 9:11 Nini ma mambalosi: Sada halak, na margoran Jesus pamalhot tanoh. Idaiskon ma ai bani matangku, anjaha ihatahon ma ahu marsuhap hu bongbongan Siloam. Jadi laho ma ahu marsuhap, gabe marpangidah ma. 9:12 Dob ai nini sidea ma bani: Ija do Ia? Balosni: Seng hubotoh! 9:13 Jadi iarahkon sidea ma na pitung hinan ai hulobei ni Parisei. 9:14 Tapi ari Sabat do tudu, sanggah na pinamalhot ni Jesus tanoh ai, anjaha na niungkabni ai matani ai. (bd. 5:9.) 9:15 Lanjar isungkun Parisei ai ma ia, atap sonaha do, ase marpangidah ia. Jadi nini ma hubani sidea: Tanoh na pinamalhot do idaiskon bani matangku, dob ai marsuhap ma ahu, gabe marpangidah ma ahu. 9:16 Piga-piga halak Parisei ai mangkatahon: Seng na humbani Naibata Halak ai, ai seng ihargahon ari Sabat. Na legan mangkatahon: Mintor tarhorjahon pardousa ma tanda na sonai ai? Jadi marsalisih ma sidea samah sidea. (ay. 31, 33; bd. 7:43.) 9:17 Dob ai ihatahon sidea ma use bani halak na pitung ai: Ia ho, sonaha do pangkatahonmu pasalsi, halani iungkab matamu? Jadi nini ma: Nabi do Ia. 9:18 Seng iparhatongon Jahudi ai, na pitung hinan do ia, dob ai marpangidah use, pala idilo sidea namatoras ni na gabe marpangidah ai, 9:19 anjaha isungkun ma sidea: Anak nasiam do on, na hinatahon nasiam ai pitung humbani partubuhni? Na sonaha do, ase marpangidah ia nuan? 9:20 Jadi nini namatorasni ai ma mambalosi sidea: Tongon do on anaknami, anjaha pitung do ia tubuh. 9:21 Sonaha, ase marpangidah ia sonari, seng ibotoh hanami, anjaha ise na mangungkab matani in, seng itanda hanami. Ia ma sungkun nasiam, domma sungkup umurni, domma boi ia marsahap pasal dirini. 9:22 Ase sonai pe hata ni namatorasni ai, halani mabiar do sidea mangidah halak Jahudi ai. Ai domma manriah halak Jahudi, maningon sipabalion do hun kuria, barang ise na marhatongonhon Kristus do Ia. (bd. 7:12; 12:42.) 9:23 Halani ai do ase ihatahon namatorasni ai: Domma sungkup umurni, ia ma sungkun nasiam. 9:24 Dob ai idilo sidea ma paduahalihon na pitung ondi, nini sidea ma hubani: Pasangap ma Naibata! Ibotoh hanami, pardousa do Halak ai! (Jes. 7:19.) 9:25 Jadi nini ma mambalosi: barang pardousa ia seng hubotoh. Pitah on do na hubotoh: Mapitung do ahu hinan, tapi marpangidah do nuan. 9:26 Dob ai nini sidea ma hubani: Ai aha ibahen bam? Sonaha do ibahen mangungkab matamu? 9:27 Ibalosi ma sidea: Domma hupatugah ai bani nasiam, na so ibogei nasiam do in? Sonaha, sihol bogeionnasiam use? Sihol nasiam gabe susianni? 9:28 Jadi isuraki sidea ma ia, nini ma: Ho do susianni, anggo hanami susian ni si Musa do. 9:29 Ibotoh hanami, na iparsahapkon Naibata do si Musa, tapi anggo Halak on, seng nabotoh, atap na hunja Ia. 9:30 Jadi nini ma mambalosi sidea: Halongangan ma in tongon na so ibotoh nasiam atap na hunja Ia, hape iungkap do matangku! 9:31 Ibotoh hita do, na so itangihon Naibata pardousa, tapi na marhabiaran bani, anjaha sihorjahon rosuh ni uhurni, ai do itangihon. (Pod. 15:29; Jes. 1:15.) 9:32 Humbani sapari, seng ongga nabogei, adong na mangungkab mata ni halak na mapitung tubuh. 9:33 Ambit seng humbani Naibata Ia, seng tarbahensi age aha. (ay. 16.) 9:34 Jadi nini sidea ma hubani: Hibul do ho tubuh ibagas dousa, hape sihol ajaranmu hanami? Jadi ipabali sidea ma ia. (ay. 2.) 9:35 Itangar Jesus ma, na dob ipabali sidea ia. Dob jumpahsi ia, nini ma: Porsaya do ho bani Anak ni jolma in? 9:36 Jadi nini ma mambalosi: Ai ise do ai Tuhan, ase porsaya ahu Bani? 9:37 Nini Jesus ma hubani: Na niidahmu, anjaha na marsahap pakon ho, in ma Ia. (bd. 4:26.) 9:38 Jadi nini ma: Na porsaya do Ahu, Tuhan! Lanjar isombah ma Ia. 9:39 Dob ai ihatahon Jesus ma: Mamboan uhum do, ase roh Ahu hu dunia on, ase marpangidah na so marpangidah hinan, anjaha na marpangidah hinan gabe mapitung. (Mat. 13:11-15.) 9:40 Ibogei deba halak Parisei na rap pakonsi ai ma ai, gabe nini ma dompaksi: Ai dihut do hanami pitung? 9:41 Nini Jesus ma hubani sidea: Ambit pitung nasiam, seng mardousa nasiam. Tapi halani ihatahon nasiam: "Marpangidah do hanami," gabe totap ma dousanasiam. (Pod. 26:12.)

Johannes 10

10:1 Na sintong tumang do na huhatahon on bani nasiam: Barang ise, na so masuk hun labah, laho hu harang ni biri-biri, tapi manangkih humbani dalan na legan, panangko do ai anjaha panrampok. 10:2 Tapi na masuk hun labah, ai do siparmahan bani biri-biri ai. 10:3 Ungkabon ni sijaga labah ai ma bani, anjaha itangihon biri-biri ai do sorani; idilo do sidea bani goranni bei, anjaha iboan hu darat. 10:4 Dob ipadarat haganup na adong bani ai, sai ilobei do ia mardalan, anjaha iirikkon biri-biri ai do ia, ai itanda sidea do sorani. 10:5 Halak na legan nani, seng ra sidea mangihutkon ai, tapi maporus do sidea humbani, ai seng itanda sidea sora ni na legan ai. 10:6 Limbaga on ma ihatahon Jesus bani sidea, tapi seng iarusi sidea, na hinatahonni ai bani sidea. 10:7 Jadi nini Jesus ma use bani sidea: Na sintong tumang do na huhatahon on bani nasiam: Ahu do labah laho hubani biri-biri in. 10:8 Haganup na manlobei Ahu panangko do in anjaha panrampok, tapi seng itangihon biri-biri in sidea. (Jer. 23:1, 2.) 10:9 Ahu do labah in; barang ise na masuk hum-Bangku, maluah do, kaluar masuk ma ia, anjaha dapotan sampalan. 10:10 Roh pe panangko, pitah na laho manangko, na manayati ampa mangagou do hansa. Roh do Ahu, ase dong hagoluhan bani sidea, anjaha marlobih-lobih. (Ps. 23:1.) 10:11 Parmahan na madear do Ahu. Ibere parmahan na madear do hosahni mangkopkop biri-birini.(bd. 15:13; Jes. 40:11; Hes. 34:11-23; 37:24.) 10:12 Tapi anggo sipangan gaji, na so siparmahan, na so simada biri-biri in, iidah pe roh begu, itadingkon do biri-biri in laho lintun, gabe isoroh begu ai ma biri-biri in anjaha mambur merap ibahen, 10:13 ai sipangan gaji do ia, na so mansarihon biri-biri in. 10:14 Ahu do parmahan na madear, hutanda do na Bangku, anjaha itanda sidea do Ahu, (2 Tim. 2:19.) 10:15 songon Bapa mananda Ahu, anjaha Ahu mananda Bapa. Hubere do hosahku mangkopkop biri-biringku, (Mat. 11:27.) 10:16 Adong ope biri-biringku na legan, na so humbani harang on. Sidea pe dihut do arahkononku, anjaha tangihonon ni sidea do sorangku, gabe sada hulanan ma ai anjaha sada parmahan. (bd. 11:52.) 10:17 Halani on do, ase ihaholongi Bapa in Ahu, halani huberehon hosahku, ase hujalo ai use. 10:18 Seng dong na mambuat in hum-Bangku, humbani rosuhku do in hubere. Na markuasa do Ahu mamberehon, anjaha na markuasa do Ahu use manjalo in. In ma titah na hujalo humbani Bapa. (bd. 5:26.) 10:19 Tubuh ma use parsalisihan itongah-tongah ni halak Jahudi halani hata ai. (bd. 7:43; 9:16.) 10:20 Buei do humbani sidea na mangkatahon: Na sibolison do In anjaha na podouan! Mase ma patangi-tangionnima in? (bd. 7:20.) 10:21 Na legan mangkatahon: Sedo sahap ni na sibolison in! Mintor tarungkab sibolis ma mata ni na mapitung? 10:22 Dob ai jumpah ma use pesta pabayu rumah panumbahan i Jerusalem, musim borgoh do ijia. 10:23 Mardalan-dalan do Jesus i emper ni si Salomo, na i rumah panumbahan ai. (Luk. 3:11.) 10:24 Roh ma halak Jahudi manginggotisi, nini sidea ma: Sadiha dokah on sungkun-sungkun uhurnami bahenonmu? Anggo Ham do Kristus in, hatahon Ham ma torang bennami. (bd. 16:29.) 10:25 Balos ni Jesus bani sidea: Domma hupatugah bani nasiam, tapi seng porsaya nasiam. Horja na huhorjahon marhitei goran ni Bapa, ai do manaksihon pasal Ahu. 10:26 Tapi seng porsaya nasiam, ai seng masuk biri-biringku nasiam. (bd. 8:45.) 10:27 Itangihon biri-biringku do sorangku, anjaha itanda sidea do Ahu, iirikkon sidea do Ahu. (ay. 3, 4; bd. 8:47.) 10:28 Hubere do bani sidea hagoluhan na sadokah ni dokahni; seng magou sidea sadokah ni dokahni, anjaha ise pe lang boi manrampas sidea humbani tanganku. 10:29 Banggalan humbani haganup do Bapa, na mamberehon sidea ai Bangku, anjaha ise pe lang boi manrampas sidea humbani tangan ni Bapa. 10:30 Sada do Ahu pakon Bapa in. 10:31 Dob ai ibuat halak Jahudi ma use batu, laho manggijigsi. 10:32 Tapi nini Jesus ma hubani sidea: Buei do horja na madear humbani Bapa hupatuduhkon bani nasiam. Halani horja do, ase sihol pargijigon nasiam Ahu? (bd. 8:59.) 10:33 Balos ni halak Jahudi: Sedo halani horja na madear, ase sihol pargijigonnami Ham, tapi halani pangapasimu ai do, ai ipados Ham do dirimu pakon Naibata, age pe jolma do Ham. (bd. 5:18; Mat. 26:65.) 10:34 Dob ai ibalosi Jesus ma sidea: Ai lang adong do tarsurat bani titahnasiam: Domma huhatahon, Naibata do nasiam? (Ps. 82:6.) 10:35 Anggo igoran Naibata, hadasan ni hata ni Naibata, anjaha seng tarkahua Surat in, 10:36 mase ma hatahononnasiam hubani na pinapansing ni Naibata, anjaha na sinuruhni hu dunia on: "Siapasi Naibata do Ham", halani huhatahon: Anak ni Naibata do Ahu? (bd. 5:17-20) 10:37 Ambit lang huhorjahon horja ni Bapa, age ulang porsaya nasiam Bangku. 10:38 Tapi anggo huhorjahon do, hape lang porsaya nasiam Bangku, bani horja in ma nasiam porsaya, ase ibotoh anjaha itanda nasiam, ibagas Ahu do Bapa in, anjaha Ahu ibagas Bapa in. 10:39 Dob ai sihol ma tangkapon ni sidea Ia, tapi maluah do Ia hun tangan ni sidea. (bd. 8:59; Luk. 4:30.) 10:40 Dob ai laho ma Ia use hu dipar ni bah Jordan, ai ma hu pandidian ni si Johannes hinan, lanjar marinan ijai. 10:41 Anjaha buei do halak na roh marayaksi, nini sidea ma: Seng adong namin ibahen si Johannes tanda halongangan, tapi haganup na hinatahon ni si Johannes pasal Halak on, sintong do. 10:42 Jadi buei do halak, na gabe porsaya Bani ijai.

Johannes 11

11:1 Adong ma sada halak na boritan, si Lasarus, na hun Betania, ai ma huta ni si Maria ampa si Marta saninani ai. (Luk. 10:38, 39.) 11:2 Ai ma si Maria, na ongga mamminaki Tuhan in, dob ai na mangapusi naheini marhitei jambulanni. Botouni do si Lasarus na boritan ai. (bd. 12:3.) 11:3 Isuruh botouni ai ma na mangkatahon Bani: Ham Tuhan, boritan do na hinaholongan ni uhurmu! 11:4 Mambogei ai Jesus, nini ma: Sedo hamateian ujung ni naborit ai, tapi bahen hasangapon ni Naibata do ai, ase marsangap Anak ni Naibata marhitei ai. (bd. 9:3.) 11:5 Tapi holong do uhur ni Jesus bani si Marta, bani saninani ai ampa bani si Lasarus. 11:6 Anjaha dob ibogei na boritan do ia, soh ope Ia dua ari nari bani iananni ai. 11:7 Dob salpu ai, nini ma hubani susianNi ai: Eta, laho ma hita use hu Judea! 11:8 Nini susianni ai ma hu-Bani: Guru baru ope sihol pargijigon ni halak Jahudi Ham, ai ulakanmu ope hujai? (bd. 8:59; 10:31.) 11:9 Balos ni Jesus: Ai lang sapuluh dua jam do sadari? Barang ise na mardalan arian, seng tartolsu ai, ai iidah do panondang ni dunia on. (bd. 9:4, 5.) 11:10 Tapi barnag ise na mardalan borngin, tartolsu do, ai seng dong panondang bani. (bd. 12:35.) 11:11 Dob ihatahon sonai, nini ma hubani sidea: Ia si Lasarus, huan-huanta ai, domma modom; tapi na laho ma Ahu hujai mamuhoisi. (Mat. 9:24.) 11:12 Jadi nini susianni ai ma hu-Bani: Ham Tuhan, anggo na modom do ia, na laho malum do. 11:13 Pasal parmateini do na hinatahon ni Jesus ai; tapi nini uhur ni sidea pasal na sinok modom do. 11:14 Jadi ihatahon Jesus ma torang bani sidea: Domma matei si Lasarus, 11:15 anjaha halani hanima malas do uhurhu lang ijai ahu, ase porsaya hanima; tapi laho ma hita marayaksi. 11:16 Marsahap ma si Tomas, na ginoran si Rindu-rindu, hubani hasomanni susian ai: Eta ma tongon laho, ase rap matei hita pakonsi! 11:17 Jadi dob das ijai, domma pala ompat ari ia ibagas tanoman jumpahsi. 11:18 Ia huta Betania, dohor do ai hun Jerusalem, hira-hira tolu batu do daohni. 11:19 Buei do roh halak Jahudi marayak si Marta pakon si Maria, laho mangapoh sidea halani botou ni sidea ai. 11:20 Dob ibogei si Marta na dob roh Jesus, laho ma ia mangalo-alosi; tading i rumah do anggo si Maria. 11:21 Jadi nini si Marta ma bani Jesus: Ambit ijon Ham Tuhan, seng matei botouhin! 11:22 Tapi sonari pe, hubotoh do, atap aha pe ipindo Ham humbani Naibata, sai na bereonni do Bamu. 11:23 Ihatahon Jesus ma hubani: Na laho puho do botoumai! 11:24 Nini si Marta ma hu-Bani: Eak, hubotoh do, na puho do ia bani parpuhoon simagira. (bd. 5:29; 6:40; Luk. 14:14.) 11:25 Ihatahon Jesus ma hubani: Ahu do parpuhoon ampa hagoluhan. Sai manggoluh do na porsaya Bangku, age pe matei ia. 11:26 Anjaha ganup na manggoluh anjaha na porsaya Bangku, seng anjai matei ia sadokah ni dokahni! Porsaya do ho ijai? (bd. 8:51.) 11:27 Nini ma hu-Bani: Eak Tuhan, porsaya do ahu, Ham do Kristus, Anak ni Naibata, na roh hu dunia on. (bd. 6:69.) 11:28 Jadi dob ihatahon sonai, laho ma ia mandilo si Maria, anggini ai, ihusipkon ma: Domma roh Guru in, idilo do ho! 11:29 Mambogei ai si Maria tarolos ma ia jongjong, laho manjumpahkonsi, 11:30 ai lape das Jesus i huta ai, tapi bani parjumpahanni pakon si Marta ai ope Ia. (ay. 20.) 11:31 Ia halak Jahudi na adong i rumah ai rap pakon si Maria, laho mangapohsi, dob iidah sidea tarolos si Maria jongjong laho hu darat, iirikkon sidea ma ia, ai iagan sidea na laho hu tanoman do ia tangis. 11:32 Dashonsi si Maria hu parsaranan ni Jesus, anjaha ijin iidah Ia, manrogop ma ia hulobeini, anjaha ihatahon ma: Ambit ijon Ham Tuhan, seng matei botouhai! 11:33 Dob iidah Jesus ia na tangis ai, sonai homa halak Jahudi hasomanni na roh ai tangis-tangis do, jadi manringis ma Ia anjaha bulinsah, 11:34 lanjar nini ma: Ija do itibalhon nasiam ia? Nini sidea ma hu-Bani: Roh ma Ham, anjaha idah Ham ma, Tuhan! 11:35 Jesus pe tangis ma. (Luk. 19:41.) 11:36 Jadi nini halak Jahudi ma: Tongor ma, holong ni uhurni in bani! 11:37 Tapi deba humbani sidea mangkatahon: Ia, na mangungkab mata ni na mapitung, seng tarbahensi gakni, ase ulang matei halak on? 11:38 Jadi manringis ma use Jesus, dashonsi Ia hu tanoman ai. Batu na niliang do ai, lanjar batu do tutupni. (Mat. 27:60.) 11:39 Nini Jesus ma: Angkat nasiam ma batu in! Jadi nini si Marta, botou ni na dob matei ai ma: Tuhan, domma marbau, ai domma pala ompat ari ia matei. 11:40 Nini Jesus ma hubani: Ai lang domma huhatahon bam, idahonmu do hasangapon ni Naibata, anggo porsaya ho? (ay. 4, 23, 25, 26.) 11:41 Jadi iangkat sidea ma batu ai. Mangkawah ma Jesus dompak babou anjaha nini ma: Ham Bapa, tarima kasih ma Bamu, halani itangihon Ham Ahu! 11:42 Hubotoh do, tongtong do Ahu itangihon Ham, tapi halani na mabuei, na jongjong maringgot on do, ase huhatahon in, ase porsaya sidea, na sinuruhmu do Ahu. (bd. 12:30.) 11:43 Jadi dob ihatahon sonai, ipagogoh ma sorani mandilohon: Lasarus, kaluar ma ho! 11:44 Jadi luar ma tongon na matei ai; lilit ope hiou bani naheini ampa tanganni sonai hiou panrungkub bani bohini. Ihatahon Jesus ma: Tanggali nasiam ma ia, ase boi ia mardalan. 11:45 Jadi buei ma humbani halak Jahudi, na roh hubani si Maria ai, na gabe porsaya Bani, dob iidah sidea na binahen ni Jesus. 11:46 Tapi deba humbani sidea laho do marayak halak Parisei, laho patugahkon na binahen ni Jesus ai bani sidea. 11:47 Jadi iadongkon sintua ni malim ampa Parisei ma rapot banggal, ihatahon sidea ma: Aha ma bahenonta? ai buei do tanda ibahen Halak in! 11:48 Anggo ipaturut hita Ia sonin, porsaya ma halak haganupan Bani, gabe roh ma holi halak Rom manrampas tanohta ampa bangsanta. (Mat. 27:18.) 11:49 Tapi sada humbani sidea, ai ma si Kayapas, sintua ni malim bani na satahun ai mangkatahon bani sidea: Na hurang uhur do nasiam! 11:50 Seng ipingkirhon nasiam, paboa dearan do matei sada halak manghophop halak na mabuei in, humbani na magou ganup bangsa in. (bd. 18:14.) 11:51 Sedo humbani dirini ihatahon ai; tapi halani sintua ni malim do ia bani na satahun ai, ase ijahai, na sihol matei ma Jesus mangkopkop bangsa in. (2 Mus. 28:30; 4 Mus. 27:21.) 11:52 Seng pitah mangkopkop bangsa in, tapi sihol patumpuonni do age anak ni Naibata na marserak in ase gabe sada in. (bd. 10:16.) 11:53 Mulai humbani ari ai manriah ma sidea laho mamunuhsi. 11:54 Jadi lang be talar-talar mardalani Jesus itongah-tongah ni halak Jahudi, tapi laho ma Ia hunjai hu sada nagori, dohorhon halimisan, hu huta na margoran Efraim; ijai ma Ia marianan ampa susianni ai. 11:55 Tapi dohor ma Pesta Paska ni Jahudi, jadi buei ma halak na tangkog hun nagori ai hu Jerusalem, paima Paska ai, laho manguras dirini. (2 Kron. 30:17.) 11:56 Ipindahi sidea ma Jesus, anjaha marsisungkunan ma sidea, sanggah jongjong-jongjong sidea i rumah panumbahan ai. Sonaha do nini uhurnasiam? Na so roh do Ia nani hu pesta on? 11:57 Ai domma iparentahkon sintua ni malim ampa Parisei, ase ipatugah anggo adong na mambotoh, atap ija Ia marianan, ase boi tangkapon ni sidea Ia.

Johannes 12

12:1 Onom ari nari paima Paska ai, das ma Jesus hu huta Betania, ianan ni si Lasarus, na pinuhoan ni Jesus humbani na matei. (bd. 11:1, 43.) 12:2 Jadi ipasirsir sidea ma ijai sipanganon Bani, anjaha si Marta do marugas; si Lasarus ma sada hasomanni, na mangan ai ijai. 12:3 Jadi ibuat si Maria ma sakati minak nardus na maharga anjaha na so maragu; iminaki ma nahei ni Jesus, anjaha jambulanni do ibahen manlapui. Jadi igoki misbou ni minak ai ma rumah ai. (Luk. 7:38.) 12:4 Sada humbani susianni, ai ma si Judas Iskariot, na sihol mantahihonsi ai, mangkatahon: 12:5 Mase ma lang najual minak in harga tolu ratus dinar, ase naberehkon in bani halak na masombuh? 12:6 Ihatahon pe sonai, sedo na masombuh sinarihonni ijai; panangko do ia tene, anjaha halani ia sijolom parduitan, somal do ia buat-buat hunjai. (Luk. 8:3.) 12:7 Jadi nini Jesus ma: Paturut ma ia, ai ibahen do in sahira hubani ari pananomhu. 12:8 Ai tongtong do adong na masombuh itongah-tongahnima, tapi anggo Ahu, seng totap i lambungnima. (5 Mus. 15:11.) 12:9 Jadi buei ma humbani halak Jahudi na mambotoh, na dob ijai Ia; jadi marrohan ma sidea, sedo pitah halani Jesus, tapi sihol idahon ni sidea do homa si Lasarus na dob pinapuho ai humbani na matei. 12:10 Ia sintua ni malim domma manriah hinan sihol mamunuh si Lasarus homa, 12:11 ai halanisi buei do halak Jahudi na laho hujai, gabe porsaya bani Jesus. 12:12 Patarni ai, dob ibogei halak na mabuei, na roh bani pesta ai, na roh ma Jesus hu Jerusalem, 12:13 jadi ibuat sidea ma bulung-bulung ni palem, laho mangalo-alosi lanjar mandilo-dilohon: Hosianna! Pinasu-pasu ma na roh marhitei goran ni Tuhan in, Raja ni Israel! (Ps. 118:25, 26.) 12:14 Jadi dapot Jesus ma sada halode ajar-ajar, ai ma iajak domu hubani na tarsurat in: (Sak. 9:9.) 12:15 Ulang ho mabiar, ale boru Sion. Tonggor ma, Rajamu do na roh, mangajak halode poso-poso. 12:16 Seng dong iarusi susianni ai hinan pasal ai; dob pe marsangap Jesus, ase idingat sidea, na marhahonaan hu-Bani do hape na tarsurat ai ampa pambahen ni sidea hu-Bani. 12:17 Lanjar isaksihon halak na mabuei, na rap pakonsi ai do, paboa na dob idilo do si Lasarus humbani tanoman, laho mamuhoisi humbani na matei. 12:18 Ase ialo-alo halak na mabuei ai pe Ia, halani na dob ibogei sidea do tanda halongangan na binahenni ai. 12:19 Jadi nini halak Parisei ma samah sidea: Tonggor ma, na so marguna do hape na binahen nasiam in, ai ganup do dunia on mangirikkonsi. (bd. 11:48.) 12:20 Adong do deba halak Gorik itongah-tongah ni halak na tangkog ai, laho martonggo bani ari Pesta ai. 12:21 Jadi iparayak sidea ma si Pilippus, na hun Betsaida, na i Galilea, nini sidea ma: Tuannami, sihol do idahonnami Jesus. (bd. 1:44.) 12:22 Laho ma si Pilippus patugahkon ai bani si Andreas; si Andreas pe laho ma rap pakon si Pilippus patugahkon ai bani Jesus. 12:23 Jadi nini Jesus ma mambalosi sidea: Na dob jumpah ma panorangni, ase marsangap Anak ni jolma in! 12:24 Na sintong tumang do na huhatahon on bannima: Seng na ganda omei in, anggo seng madabuh hu tanoh anjaha matei, dob pe matei, ase buei buahni. (Rom 14:9.) 12:25 Agouan hosah do na mangkaholongi hosahni, tapi na mangkasogamhon hosahni i dunia on, ai do na manramotkonsi das hu hagoluhan sisadokah ni dokahni. (Mat. 10:39; Luk. 17:33.) 12:26 Barang ise na sihol mambalosi Ahu, iirikkon ma Ahu; anjaha ia ija Ahu, ijai do juak-juakku. Barang ise na mambalosi Ahu, pasangapon ni Bapa in do ia. (bd. 14:3; 17:24; 1 Sam. 2:30.) 12:27 Na bulinsah do uhurhu nuan. Aha ma sihatahononku? Ham Bapa, paluah Ham ma Ahu humbani panorang on. Tapi nene, halani in do ase das Ahu bani panorang on. (Mat. 26:38.) 12:28 Ham Bapa, pasangap Ham ma goranmu! Dob ai roh ma sora hun nagori atas: Domma hupasangap, lanjar pasangaponku do use! 12:29 Ibogei halak na mabuei, na jongjong ijai ma ai, gabe ihatahon sidea ma: Longgur do ai! Na legan mangkatahon: Malekat do, na marsahap pakonsi! 12:30 Nini Jesus ma mambalosi: Sedo halani Ahu, ase roh sora ai, halani nasiam do. (bd. 11:42.) 12:31 Sonari ma mardalan uhum bani dunia on, sonari ma sipabalion raja ni dunia on. (bd. 14:30; 16:11; Luk. 10:18.) 12:32 Anggo Ahu, dob ipagijang Ahu hun dunia on, tarikonku do haganup sidea Bangku. 12:33 Ihatahon do ai, laho patidakkon parmateini holi. 12:34 Ibalosi halak na mabuei ai ma Ia: Ibogei hanami humbani titah in, na totap do Kristus in ronsi sadokah ni dokahni. Mase ma ihatahon Ham: Maningon pagijangon do Anak ni jolma in? Ise do Anak ni jolma in? (Ps. 110:4; Dan. 7:14.) 12:35 Jadi ihatahon Jesus ma bani sidea: Tongkin nari mando Panondang in bani nasiam. Mardalan ma nasiam, sanggah bani nasiam ope Panondang in, ase ulang idorab na golap in nasiam; na mardalan bani na golap, seng ibotoh, atap dompak ja do ia laho. (bd. 1:9; 8:12; 11:10.) 12:36 Sanggah bani nasiam ope Panondang in, porsaya ma nasiam bani Panondang in, ase gabe anak ni Panondang in nasiam! Ai ma ihatahon Jesus, dob ai itadingkon ma sidea laho marponop. (Ep. 5:9.) 12:37 Age pe sonai buei ni tanda ibahen ilobei ni sidea, seng porsaya sidea Bani, 12:38 ase jumpah na hinatahon ni nabi Jesayas: Ham Tuhan, ise ma na porsaya bani ambilannami? Anjaha hagogohon ni Tuhan, bani ise ma in talar? (Jes. 53:1; Rom 10:16.) 12:39 Seng tarbahen sidea porsaya, ai sonon ope hata ni si Jesayas: (Jes. 6:9, 10; Mat. 13:14, 15.) 12:40 Ipapitung do mata ni sidea, anjaha ipahengkeng uhurni, ase ulang marpangidah mata ni sidea, anjaha ulang marpangarusion uhur ni sidea; ulang mulak sidea, ulang malum sidea hubahen. (Lah. 28:26.) 12:41 Sonai do ihatahon si Jesayas, halani iidah hasangaponni ai, anjaha isahapkon pasalsi. (Jes. 6:1.) 12:42 Age humbani sipambobai buei do na porsaya Bani, tapi halani biar ni sidea mangidah Parisei, seng ibagas na talar, ase ulang ipabali sidea humbani kuria, (bd. 9:22.) 12:43 ai holongan do uhur ni sidea bani hasangapon na humbani jolma, ase hasangapon na humbani Naibata. (bd. 5:44.) 12:44 Dob ai dilo-dilo ma Jesus, nini ma: Na porsaya Bangku, sedo Ahu na hinaporsayaanni ai, tapi na marsuruh Ahu do. 12:45 Na mangidah Ahu, mangidah na marsuruh Ahu do. (bd. 14:9.) 12:46 Ahu do Panondang na roh hu dunia on, ase ulang marianan ibagas na golap sagala na porsaya Bangku. (ay. 35.) 12:47 Anggo adong na manangar hatangku, hape seng ihorjahon, seng Ahu na manguhumisi; ai seng roh Ahu, laho manguhum dunia on, tapi laho paluahkon do. (bd. 3:17; Luk. 9:56.) 12:48 Na manulak Ahu, anjaha na so manjalo hatangku, domma adong na manguhumsi; hata na huhatahon ai do manguhumsi bani ari parpudi. 12:49 Ai seng humbani diringku Ahu marsahap, tapi Bapa, na marsuruh Ahu, Ia do na mangaturhon Bangku pasal sisahapkononku ampa sihatahononku. 12:50 Anjaha hubotoh, hagoluhan sisadokah ni dokahni do titahni in. Ase na huhatahon in, sonin ihatahon Bapa in Bangku, sonai do huhatahon.

Johannes 13

13:1 Paima pesta Paska ai, dob ibotoh Jesus, na roh ma panorangni manadingkon dunia on, laho marayak Bapa in, ipataridahkon ma holongni ronsi ujungni na dong Bani i dunia on, songon pangkaholongini hinan bani sidea. 13:2 Sanggah na mangan ai sidea, domma isuanhon sibolis in partahi-tahian hubagas uhur ni si Judas Iskariot, anak ni si Simon. (Luk. 22:3.) 13:3 Halani ibotoh Jesus do, na dob iondoskon Bapa in haganup hubagas tanganni, Ia roh humbani Naibata anjaha mulak ma hubani Naibata, (bd. 3:35; 16:28.) 13:4 gabe jongjong ma Ia humbani na mangan ai, itanggali ma baju ganjang ni, ibuat ma basahan lanjar igonditkon ma. 13:5 Dob ai iuseihon ma bah hu sambung, iburihi ma nahei ni susianni ai, anjaha iapusi ma ai merhitei basahan na ginonditkonni ai. 13:6 Das ma Ia hubani si Simon Petrus, jadi nini si Petrus ma hu-Bani: Mintor Ham ma Tuhan mamurihi naheihu? 13:7 Nini Jesus ma mambalosisi: Seng iarusi ho nuan na hubahen on, tapi arusanmu do ai use. 13:8 Nini si Petrus ma hubani: Lalap ma lang bulih Ham mamburihi naheihu. Nini Jesus ma mambalosisi: Anggo seng huburihi ho, seng parrupei ho Bangku. 13:9 Nini si Simon Petrus ma: Tuhan, ulang ma pitah naheihu, dihut ma tangan pakon ulungku! 13:10 Dob ai nini Jesus ma hubani: Halak na dob pinaridi, seng pala burihan be (sobali naheini), ai domma borsih ia ganupan. Na dob borsih do hanima, tapi seng haganup. (bd. 15:3.) 13:11 Ai ibotoh do, na sihol mantahihonsi, halani ai do, ase ihatahon: Seng haganup hanima borsih! (bd. 6:64, 70-71.) 13:12 Ase, dob iburihi Jesus nahei ni sidea, ipakei ma use baju ganjangni, hundul ma Ia, lanjar nini ma bani sidea: Ai iarusi hanima do na hubahen in bennima? 13:13 Igoran hanima do Ahu Guru anjaha Tuhan, anjaha sintong do pangkatahonnima in, ai in do Ahu tongon. (Mat. 23:8, 10.) 13:14 Ase anggo Tuhan anjaha Gurunima mamurihi naheinima, patut ma age hanima marsiburihan nahei! (Luk. 22:27.) 13:15 Ai sitiruon do hubere bannima, ase ibahen hanima songon na hubahen in bennima. (Pil. 2:5; Kol. 3:13.) 13:16 Na sintong tumang do na huhatahon on bannima: Seng banggalan juak-juak marimbang tuanni, anjaha seng banggalan na sinuruh marimbang na marsuruhsi. (Mat. 10:24.) 13:17 Anggo ibotoh hanima ma in, martuah ma hanima na mangkorjahonsi. (Mat. 7:24.) 13:18 Seng dompak hanima ganupan hatangkin, hutanda do na dob hutodoh. Tapi ase saud na tarsurat in: Na mangan ruti rap pakon Ahu, in do na manadahkon neheini dompak Ahu. (Ps. 41:10.) 13:19 Hupatugah hinan in bannima, paima masa, ase porsaya hanima, anggo masa ma in, paboa Ahu do in. 13:20 Na sintong tumang do na huhatahon on bannima: Na manjalo na husuruh, Ahu do na jinaloni ai, anjaha na manjalo Ahu, manjalo na marsuruh Ahu do. (Mat. 10:40.) 13:21 Dob ihatahon Jesus ai, bulinsah ma Ia, nini ma manaksihon: Na tongon tumang do na huhatahon on bennima: Sahalak humbannima sihol mantahihon Ahu. (bd. 12:27.) 13:22 Marsikawahan ma susian ai, jut ma uhur ni sidea, atap ise do na hinatahonni ai. 13:23 Sada humbani susian ai, na hinaholongan ni Jesus, hundul dohor i lambungni. 13:24 jadi ihilap si Petrus ma ia, ihatahon ma bani: Sungkun ma, ise do na hinatahonni in! 13:25 Ipadohor ma hu lambung ni Jesus, nini ma hu-Bani: Tuhan, ise do in? 13:26 Ibalosi Jesus ma ia: Hubani ise huberehon na santopik on, dob husornobhon, ai ma ia. Jadi isornobkon ma ruti na santopik ai, iberehon ma ai bani si Judas Iskariot, anak ni si Simon ai. 13:27 Jadi dob ijalo ai, masuk ma sibolis bani. Ihatahon Jesus ma hubani: Podas ma bahen sibahenonmin! (ay. 2.) 13:28 Tapi seng dong humbani sidea na mangan ai, na mangarusi na hinatahonni ai. 13:29 Ai halani si Judas do sijolom parduitan ai, gabe iagan na deba ma, na ihatahon Jesus do ia mamboli na porlu bani pesta ai, atap marsibere-bere bani na masombuh. (bd. 12:6.) 13:30 Ase dob ijalo si Judas na santopik ai, mintor laho ma ia hu darat. Tapi domma bagas borngin. 13:31 Jadi dob laho ia hu darat, ihatahon Jesus ma: Sipasangapon ma nuan Anak ni jolma in, anjaha Naibata marsangap marhiteihonsi. 13:32 Anggo marsangap Naibata marhiteihonsi, pasangapon ni Naibata ma Ia ibagas Dirini, anjaha barah ma Ia pasangaponni. (bd. 12:23; 17:1-5.) 13:33 Hanima anak-anakku, tongkin nari mando Ahu rap pakon hanima. Pindahannima ma Ahu; songon na dob huhatahon bani halak Jahudi, sonai do hatahononku bannima: Seng tarbahen hanima roh hubani siparayakonkai. (bd. 8:21.) 13:34 Titah na baru do hubere bannima, ai ma, ase marsihaholongan hanima samah hanima. Songon holong ni uhurhu bannima, sonai ma marsihaholongan hanima. (bd. 15:12, 13, 17.) 13:35 Hunjon ma botohon ni ganup halak susianku hanima, anggo marsihaholongan hanima. 13:36 Nini si Simon Petrus ma: Tuhan, huja Ham laho? Balos ni Jesus: Seng tarihutkon ho ope Ahu bani siparayakonkai anggo sonari, use pe ase ihutkononmu Ahu. (bd. 7:34; 21:18.) 13:37 Nini si Petrus ma hu-Bani: Tuhan, mase lang tarihutkon ahu Ham sonari? Hosahku pe ra do ahu memberehon mangkopkop Ham! 13:38 Balos ni Jesus: Hosahmu berehononmu mangkopkop Ahu? Na sintong tumang do na huhatahon on bam: Lape martahuak dayok, domma tolu hali Ahu parnalangonmu.

Johannes 14

14:1 Ulang ma tonjan uhurnima! Porsaya ma hanima bani Naibata, anjaha porsaya ma homa Bangku! 14:2 Buei do ianan i rumah ni Bapa. Ambit lang sonai, mintor hatahononku ma bannima, na laho do Ahu pasirsirhon ianan bannima? 14:3 Anjaha laho pe Ahu pasirsirhon ianan bannima, mulak do Ahu, use mangalop hanima, ase rap hanima pakon Ahu. (bd. 12:26; 17:24.) 14:4 Anjaha ibotoh hanima do dalan hu ianan siparayakonkai. 14:5 Nini si Tomas ma hu-Bani: Seng ibotoh hanami, atap huja do Ham laho Tuhan! Sonaha ma pambotohnami bani dalan ai? 14:6 Nini Jesus ma hubani: Ahu do dalan in pakon hasintongan ampa hagoluhan. Seng dong na das hubani Bapa in, anggo seng marhiteihon Ahu. (bd. 11:25; Mat. 11:27; Rom 5:1-2; Heb. 10:19, 20.) 14:7 Anggo itanda hanima Ahu, tandaonnima do age Bapa in. Olat ni on tandaonnima ma Ia anjaha idahonnima. 14:8 Nini si Pilippus ma hu-Bani: Tuhan, patuduhkon Ham ma bannami Bapa in, ase sombuh uhurnami! 14:9 Nini Jesus ma hubani: Domma pala nasain dokah Ahu rap pakon hanima, lanjar seng itandai ho ope Ahu, ale Pilippus? Na mangidah Ahu, na mangidah Bapa in do. Mase ma hatahononmu: Patuduhkon Ham ma bannami Bapa in? (bd. 12:45; Heb. 1:3.) 14:10 Seng porsaya ho, Ahu ibagas Bapa in anjaha Bapa in ibagas Ahu? Hata na huhatahon bannima, seng humbani diringku huhatahon in. Bapa in, na marianan ibagas Ahu, Ia do na mandalankon horjani. (bd. 12:49.) 14:11 Porsaya ma hanima Bangku: Ibagas Bapa in do Ahu, anjaha ibagas Ahu do Bapa in. Anggo lang, halani horja in ma hanima porsaya! (ay. 20; bd. 5:38; 16:25, 28.) 14:12 Na sintong tumang do na huhatahon on bannima: Horjahonon ni na porsaya Bangku do songon horja na hubahen in; lobih hunjai ope bahenonni, ai na laho ma Ahu hubani Bapa in. (Mrk. 16:19, 20.) 14:13 Ase barang aha pe sipindoonnima marhitei Goranku, bahenonku do, ase marsangap Bapa in ibagas Anak in. (bd. 15:7; Mrk. 11:24.) 14:14 Barang aha ipindo hanima hum-Bangku marhitei Goranku, bahenonku do ai. (bd. 16:23, 24.) 14:15 Anggo na holong do uhurnima Bangku, dalankononnima do titahku. (bd. 15:7; Mrk. 11:24.) 14:16 Anjaha pindoonku ma bani Bapa in, ase ibere bannima sada Pangapiti na legan, ase Ia ma mangkasomani hanima lalab, (ay. 26; 15:26; 16:7.) 14:17 in ma Tonduy hasintongan in, na so tarjalo dunia on, ai seng iidah anjaha seng itanda. Tapi itanda hanima do Ia, ai na rap ma Ia pakon hanima, anjaha ibagas hanima ma Ia. (bd. 7:39; 16:13.) 14:18 Seng tadingkononku hanima tading maetek; na roh ma Ahu marayak hanima. 14:19 Tongkin nari mando, seng be idahon ni dunia on Ahu, tapi idahonnima do Ahu, ai manggoluh do Ahu, hanima pe manggoluh do. (bd. 16:19.) 14:20 Bani na sadari ai ma botohonnima. Ahu ibagas Bapa, hanima ibagas Ahu anjaha Ahu ibagas hanima. (bd. 17:21, 23.) 14:21 Barang ise na manjolom titahku anjaha idalankon, ai do na marholong ni uhur Bangku. Ihaholongi Bapa do na marholong ni uhur Bangku, anjaha Ahu pe holong do uhurhu bani, anjaha patalaronku do Diringku bani. (2 Kor. 3:18.) 14:22 Ihatahon si Judas ma Bani (sedo si Iskariot ai): Tuhan, aha do halani, ase pitah bannami patalaronmu dirimu, seng bani dunia on? 14:23 Nini Jesus ma mambalosisi: Barang ise na marholong ni uhur Bangku, horjahononni in do hatangku, jadi haholongan ni Bapa ma ia, gabe roh ma hanami marayaksi, anjaha marianan bani. (ay. 21; Pod. 8:17; Ep. 3:17.) 14:24 Na so marholong ni uhur Bangku, seng dalankononni in hatangku, anjaha hata na binogeinima in, sedo Ahu simada in, tapi Bapa, na marsuruh Ahu do. (bd. 7:16.) 14:25 In ma huhatahon bennima, sanggah rap ope Ahu pakon hanima. 14:26 Tapi anggo pangapiti in, sisuruhon ni Bapa in marhitei Goranku, ajarhonon anjaha pagolpaon ni In do bannima sagala na huhatahon in bannima. (ay. 16; bd. 15:26.) 14:27 Damei do hutadingkon bannima, damei na adong Bangku do hubere bannima.Seng songon pambere ni dunia on pamberengku bannima. Ulang ma tonjan anjaha ulang ma mabiar uhurnima. (bd. 16:33; Pil. 4:7.) 14:28 Domma ibogei hanima hatangku bannima: Na laho ma Ahu, anjaha na roh ma Ahu marayak hanima. Ambit na holong uhurnima Bangku, malas do uhurnima halani laho Ahu marayak Bapa in, ai banggalan do Bapa in ase Ahu. (ay. 3, 18.) 14:29 Anjaha sonari hupatugah hinan ma in bannima, paima masa, ase porsaya hanima masa honsi. 14:30 Seng be buei sahapkononku bannima, ai na roh ma raja ni dunia on. Seng dong kuasani Bangku; (bd. 12:31; Ep. 2:2.) 14:31 tapi sihol do botohon ni dunia on, na holong do uhurhu bani Bapa in, anjaha sonaha ihatahon Bapa in, sonai do huhorjahon. Ai pe jongjong ma hanima, laho ma hita hunjon! (bd. 10:18.)

Johannes 15

15:1 Ahu do hayu anggur na tongon, anjaha Bapa do sihorjai pohon in. 15:2 Irotap do sagala rantingku na so marbuah, anjaha ipaborsih do sagala na marbuah, ase ganda buahni. 15:3 Domma borsih hanima halani hata in, na huhatahon bannima. 15:4 Totap ma hanima ibagas Ahu, songon Ahu ibagas hanima! Songon ranting in, na so tarbahen marbuah humbani dirini sandiri, anggo seng totap bani hayu anggur in, sonai ma hanima, anggo seng totap hanima ibagas Ahu. 15:5 Ahu do hayu anggur in, hanima do ranting in. Na marianan ibagas Ahu, anjaha Ahu ibagas dirini, in ma na marbuahkon buei, seng tarhorjahon hanima age aha, anggo seng marhasoman Ahu. (2 Kor. 3:5.) 15:6 Barang ise, na so marianan ibagas Ahu, ambukkonon do ai songon ranting ai gabe masak; ipatumpu ma ai, igijigkon hubagas apuy, jadi mosog ma. 15:7 Anggo marianan hanima ibagas Ahu, anjaha marianan hatangKu ibagas hanima, Ahu bannima, jumpah hanima do barang aha pe ipindo uhurnima. (Mrk. 11:24.) 15:8 Marhitei ai marsangap ma BapangKu, anggo ramos buahnima, anjaha gabe susianku hanima. 15:9 Songon pangkaholongi ni Bapa Bangku, sonai do holong ni uhurhu bannima. Totap ma hanima ibagas holong ni uhurhu. 15:10 Anggo ihorjahon hanima titahku, marianan ma hanima ibagas holong ni uhurhu, songon Ahu na mangkorjahon titah ni Bapa, gabe marianan ibagas holong ni uhurni, (bd. 14:15.) 15:11 Ase huhatahon pe in bannima, ase marianan malas ni uhurhu ibagas hanima, anjaha gok malas ni uhurnima. (bd. 17:13.) 15:12 On ma titahku, ase marsihaholongan hanima samah hanima, songon Ahu na mangkaholongi hanima. (bd. 13:34.) 15:13 Seng dong holong sibanggalan, anggo iberehon sada halak hosahni mangkopkop hasomanni. (bd. 10:12; 1 Joh. 3:16.) 15:14 Huanku ma hanima, anggo ihorjahon hanima na hutitahkon in bannima. (bd. 8:31.) 15:15 Seng hugoran be hanima jabolon, ai seng ibotoh jabolon na hinorjahon ni tuanni; huan-huan do hanima huhatahon, ai domma hupabotohkon bannima, na hutangar humbani Bapa. 15:16 Sedo hanima mamilih Ahu, tapi Ahu do mamilih hanima, anjaha hupabangkit do hanima, ase laho hanima marbuah, anjaha ase totap buahnima ai, ase ibere bannima sagala sipindoonnima humbani Bapa in marhitei Goranku. 15:17 On ma hutitahkon bannima: Marsihaholongan ma hanima samah hanima! 15:18 Anggo idomdomi dunia on hanima, botoh hanima ma, na dob parlobei do Ahu idomdomi. (bd. 7:7.) 15:19 Ambit na hun dunia on hanima, haholongan ni dunia on do hasomanni, halani seng hun dunia on hanima, tapi Ahu do mamilih hanima hun dunia on, ai do ase idomdomi dunia on hanima. (bd. 17:14; 1 Joh. 4:5.) 15:20 Ingat hanima ma hata na dob huhatahon bannima: Seng banggalan jabolon humbani tuanni. Anggo iparburu sidea Ahu, hanima pe parburuonni do. Anggo idalankon sidea hatangku, dalankononni do age hatanima. (bd. 13:16.) 15:21 Tapi haganupan ai bahenon ni sidea do bannima halani goranku, ai seng itanda sidea na marsuruh Ahu. (bd. 16:3.) 15:22 Ambit seng roh Ahu mansahapkon ai bani sidea, seng mardousa sidea ijai; tapi sonari seng dong be sidalian ni sidea manrungkub dousa ni sidea. 15:23 Na marsogam ni uhur dompak Ahu, sogam do uhurni homa age dompak Bapa. (bd. 5:23.) 15:24 Ambit lang huhorjahon horja itongah-tongah ni sidea, na so ongga hinorjahon ni jolma, seng mardousa sidea ijai; tapi domma iidah sidea in sonari, anjaha sogam do uhur ni sidea Bangku age bani Bapa. (bd. 14:11.) 15:25 Tapi maningon saud do hata na tarsurat ibagas buku titah ni sidea: Sogam do uhur ni sidea Bangku, seng dong marhala! (Ps. 69:5.) 15:26 Ase rohhonsi Sipangapiti in, sisuruhonku bannima humbani Bapa in, in ma Tonduy Hasintongan in, na roh humbani Bapa in, Ia do manaksihon pasal Ahu. (bd. 14:26; Luk. 24:49.) 15:27 Tapi dihut ma hanima manaksihon, ai hasomanku do hanima humbani mungkahni.

Johannes 16

16:1 Haganupan in huhatahon bennima, ase ulang sangsi hanima holi. (bd. 14:29.) 16:2 Pabalion ni sidea do hanima hun rumah parguruan (sinagoge), anjaha na roh ma panorangni gabe songon na manggalang bani Naibata do na mamunuh hanima, nini uhur ni sidea. (Mat. 10:17; 24:9.) 16:3 Sonai do bahenon ni sidea halani lang itandai sidea Bapa in, age Ahu. (bd. 15:21.) 16:4 Tapi hupatugah hinan in bannima, ase idingat hanima bani panorangni masa in, paboa na dob huhatahon do in bannima. Seng humbani mungkahni hupatugah in bannima, halani rap ope Ahu pakon hanima. 16:5 Tapi na laho ma Ahu nuan marayak na marsuruh Ahu, anjaha seng dong age ise humbennima na manungkun Ahu: Na laho huja do Ham? (bd. 7:33.) 16:6 Lambin pusok tene uhurnima, halani huhatahon in bannima. 16:7 Tapi na sintong do na huhatahon on bannima: Ulihnima do in anggo laho Ahu. Ai ambit seng laho Ahu, seng anjai roh Sipangapiti in bannima, tapi anggo laho Ahu, suruhonku do Ia bannima. (bd. 14:16, 26.) 16:8 Anggo roh Ia, ajaranni do dunia on pasal dousa, pasal hapintoran ampa pasal uhum. (1 Kor. 14:24.) 16:9 Anggo pasal dousa, ai ma na so porsaya sidea Bangku. (bd. 3:18.) 16:10 Anggo pasal hapintoran, ai ma na laho Ahu marayak Bapa, gabe seng idahonnima be Ahu. (Lah. 5:31; Rom. 4:25.) 16:11 Anggo pasal uhum, ai ma na dob hona uhum raja ni dunia on. (bd. 12:31; 14:30.) 16:12 Buei ope namin sihatahononku bannima, tapi seng tarboan hanima ope ai sonari. (1 Kor. 3:1.) 16:13 Tapi rohhonsi Tonduy Hasintongan in, arahkononni do hanima hubagas sagala hasintongan; ai seng adong humbani Dirini sihatahononni, tapi na binogeini, ai do hatahononni, anjaha patugahonni do bannima na sihol masa ope. (bd. 14:26; 1 Joh. 2:27.) 16:14 Pasangaponni do Ahu, ai buatonni do na dong Bangku, laho mangambilankonsi bannima. 16:15 Haganup na bani Bapa in, na dong Bangku do in; halani ai do ase huhatahon, buatonni do na dong Bangku, laho mangambilankonsi bannima. (bd. 17:10.) 16:16 Tongkin nari mando, gabe seng idahonnima be Ahu, dob ai tongkin nari use, idahonnima ma Ahu. (bd. 14:19.) 16:17 Gabe nini susian ai ma samah sidea: Aha do arti ni na hinatahonni in banta: Tongkin nari mando seng idahonnima be Ahu, dob ai tongkin nari use, idahonnima ma Ahu, ambah ni ai: Na laho ma Ahu bani Bapa in? 16:18 Jadi nini sidea ma: Aha do artini hata: tongkin nari mando? Seng ibotoh hita artini ai. 16:19 Ibotoh Jesus ma, sihol roh sidea manungkunsi, gabe nini ma dompak sidea: Na marsisungkunan do hanima pasal na huhatahon in: Tongkin nari mando seng idahonnima be Ahu, dob ai: Tongkin nari use idahonnima ma Ahu? 16:20 Na sintong tumang do na huhatahon on bannima: Na laho tangis ma hanima anjaha mandoruhi, tapi malas ma uhur ni dunia on. Pusok do anggo uhurnima, tapi marubah ma pusok ni uhurnima gabe malas ni uhur. 16:21 Pusok do uhur ni parinangon manubuhkon dakdanakni, anggo jumpah ma panorangni. Tapi dob tubuh dakdanak ai, seng be idingat na maborit ai, ibahen malas ni uhurni, halani na dob tubuh sada jolma hu dunia on. (Jes. 26:17.) 16:22 Bannima pe nuan pusok ni uhur do, tapi idahonku do hanima use, gabe marmalas ni uhur ma hanima, anjaha ise pe lang boi mambuat malas ni uhur ai humbannima. 16:23 Seng sungkunonnima be Ahu bani na sadari ai. Na tongon tumang do na huhatahon on bannima: Atap aha pe sipindoonnima humbani Bapa in, sai na bereonni do marhitei Goranku. (bd. 14:13, 14; Mrk. 11:24.) 16:24 Ronsi sonari seng ope mangindo hanima marhitei Goranku. Pindo hanima ma, ase manjalo hanima, ase gok malas ni uhurnima! (bd. 15:11.) 16:25 Marhitei limbaga do husahapkon in bannima. Na roh ma panorangni, seng marlimbaga be Ahu marsahap pakon hanima, tapi torang-torang ma baritahononku bannima pasal Bapa in. 16:26 Bani ari ai ma hanima mangindo marhitei Goranku, anjaha seng huhatahon bannima, Ahu manonggohon hanima bani Bapa in, 16:27 ai Bapa in sandiri mangkaholongi hanima, halani na dob holong uhurnima Bangku, anjaha na dob porsaya hanima, Ahu roh humbani Naibata. (bd. 14:21.) 16:28 Na bingkat humbani Bapa in do Ahu roh hu dunia on; tadingkononku ma use dunia on, laho marayak Bapa in. 16:29 Nini susianni ai ma: Sonari pe, ase torang hatamu, seng songon limbaga be. 16:30 Sonari ma ibotoh hanami, paboa ibotoh Ham do haganup, anjaha seng pala porlu Bamu, sungkunon ni atap ise Ham. Halani ai ma, ase porsaya hanami, na bingkat humbani Naibata do Ham. 16:31 Ibalosi Jesus ma sidea: Porsaya ma hanima sonari? 16:32 Na roh ma panorangni anjaha domma roh in nuan, mambur merap ma hanima, ganup marsitohu dalanni, anjaha tadingkononnima ma Ahu punjung; tapi seng punjung Ahu tene, ai Bapa in do hasomanku. (bd. 8:29; Sak. 13:7; Mat. 26:31.) 16:33 Huhatahon hinan in bannima, ase mardamei hanima ibagas Ahu. Hamarsikon do rupeinima i dunia on, tapi tenger ma uhurnima, domma hutaluhon dunia on.(bd. 14:27; Rom 5:1; 1 Joh. 5:4.)

Johannes 17

17:1 In ma ihatahon Jesus. Dob ai mangkawah ma Ia dompak babou, nini ma: Ham Bapa, domma jumpah panorangni, pasangap Ham ma Anakmu, ase ipasangap Anakmu Ham. 17:2 Ai domma ibere Ham kuasa Bani manrajai sagala jolma, laho mamberehon hagoluhan na sadokah ni dokahni bani haganup jolma, na binerehonmu Bani. (Mat. 11:27.) 17:3 Ia hagoluhan sisadokah ni dokahni, in ma, anggo itanda sidea Ham, Naibata sisada-sada in, na sintong in, ampa Jesus Kristus, na sinuruhmu.(1 Joh. 5:20.) 17:4 Domma hupasangap Ham i tanoh on, ai domma hudobkon horja, na binerehonmu Bangku, sihorjahononku. 17:5 Sonari pe Bapa, pasangap Ham ma Ahu hu lambungmu, songon sangaphu sanggah i lambungmu Ahu, sanggah lape adong dunia on. (ay. 24; bd. 1:1; Pil. 2:6.) 17:6 Domma hupatalar Goranmu bani jolma na bineremu in Bangku hun dunia on. Ham hinan do simada sidea, anjaha ibere Ham do sidea Bangku; iramotkon sidea do hatamu. (ay. 9.) 17:7 Sonari, domma ibotoh sidea, na hum Bamu do haganup na bineremu in Bangku. 17:8 Ai domma huondoskon bani sidea hata na bineremu in Bangku; domma ijalo sidea hata in, anjaha torang ibotoh sidea Ahu bingkat hum-Bamu, anjaha domma porsaya sidea, Ham do marsuruh Ahu. (bd. 16:30.) 17:9 Hutonggohon do sidea. Sedo dunia on hutonggohon, sidea on do, na bineremu in Bangku, ai Ham do simada sidea. (bd. 6:37, 44.) 17:10 Anjaha sagala na adong Bangku, na adong Bamu do in, anjaha na adong Bamu, na adong Bangku do in, anjaha domma marsangap Ahu ibagas sidea. (bd. 16:15.) 17:11 Seng be i dunia on Ahu, tapi i dunia on ope sidea, anjaha na roh ma Ahu marayak Ham. Ham Bapa na mapansing, ramotkon Ham ma ibagas Goranmu, sidea na bineremu in Bangku, ase sada sidea songon Hita. 17:12 Sadokah rap Ahu pakon sidea, Ahu do manramotkon ibagas Goranmu, sidea na bineremu in Bangku, anjaha hujagai, gabe seng dong na magou humbani sidea, sobali jolma magou in, ase saud hata ni Surat in. (bd. 6:39; Ps. 41:10; 109:8.) 17:13 Tapi na roh ma Ahu nuan marayak Ham, anjaha ganupan in husahapkon sanggah i dunia on ope Ahu, ase gok bani sidea malas ni uhur na Bangku in. (bd. 15:11.) 17:14 Domma huondoskon hatamu bani sidea; sogam do uhur ni dunia on bani sidea, ai seng humbani dunia on sidea, songon Ahu na so hun dunia on. (bd. 15:19.) 17:15 Seng hupindo, ase buatonmu sidea hun dunia on, tapi ase iramotkon Ham do sidea dompak pangagou. (2 Tes. 3:3.) 17:16 Seng hun dunia on sidea, songon Ahu na so hun dunia on. 17:17 Papansing Ham ma sidea ibagas hasintongan; hatamu do hasintongan.(bd. 6:33.) 17:18 Songon parsuruhmu Bangku hu dunia on, sonai do husuruh sidea hu dunia on. (bd. 20:21.) 17:19 Hupapansing do diringku mangkopkop sidea, ase gabe pansing sidea ibagas hasintongan. (Heb. 10:10.) 17:20 Sedo pitah sidea hutonggohon, tapi dihut do na sihol porsaya Bangku, halani hata ni sidea, (bd. 20:31.) 17:21 ase sada sidea haganup, songon Ham Bapa ibagas Ahu, anjaha Ahu ibagas Ham, sonai ma age sidea ibagas Hita, ase porsaya dunia on, Ham do marsuruh Ahu. (Gal. 3:28.) 17:22 Domma huberehon bani sidea hasangapon na bineremu in Bangku, ase sada sidea, songon Hita na sada. (Lah. 4:32.) 17:23 Ahu ma ibagas sidea, anjaha Ham ibagas Ahu, ase gok dear ni hasadaon ni sidea, gabe ibotoh dunia on, Ham do na marsuruh Ahu anjaha na holong do uhurmu bani sidea, songon holong ni uhurmu Bangku. (1 Kor. 6:17.) 17:24 Ham Bapa, sihol do uhurhu, ia ijin Ahu,ijin ma pakon na bineremu in Bangku, ase iidah sidea hasangaponku, na bineremu in Bangku, ai domma holong uhurmu Bangku, paima tombei dunia on. (bd. 12:26.) 17:25 Ham bapa na bonar, ia lang pe itanda dunia on Ham, anggo Ahu hutanda do Ham, anjaha ibotoh sidea on, Ham do marsuruh Ahu. 17:26 Domma hupabotohkon bani sidea Goranmu, anjaha pabotohkononku do ope, ase ibagas sidea holong ni uhurmu na hu-Bangku in, anjaha ase Ahu ibagas sidea.

Johannes 18

18:1 Jadi dob ihatahon Jesus sonai, misir ma Ia rap pakon susianni hu dipar ni bah Kidron. Adong ma ijai sada pohon, hujai ma Ia laho pakon susianni. (2 Sam. 15:23; Mat. 26:36; Mrk. 14:32; Luk. 22:39.) 18:2 Tapi ibotoh si Judas, sipartahi-tahi ai do homa ianan ai, ai gati do Jesus hujai rap pakon susianni. (Luk. 21:37.) 18:3 Ia si Judas, iarahkon ma tentara ampa juak-juak ni malim ampa Parisei, jadi ijumpahkon ma hujai, marrigapan, marsuluh ampa marsinjata. 18:4 Halani ibotoh Jesus do haganupan na sihol masa Bani, roh ma Ia manjumpahkon sidea, nini ma hubani sidea: Ise do na pinindahannasiam? (bd. 1:38.) 18:5 Nini sidea mambalosi: Jesus, na hun Nazaret! Nini Jesus ma hubani sidea: Ahu do in! Dihut do si Judas sipartahi-tahi ai jongjong ilambung ni sidea. 18:6 Sanggah ihatahon hubani sidea: "Ahu do in", surut ma sidea mangkatompas hu tanoh. 18:7 Dob ai iulaki ma manungkun sidea: Ise do na pinindahannasiam? Jadi nini sidea ma: Jesus na hun Nazaret! 18:8 Balos ni Jesus: Domma huhatahon bani nasiam: Ahu do in! Anggo Ahu do na pinindahannasiam, palopas nasiam ma laho halak on. (bd. 17:12.) 18:9 Ase saud hata na hinatahon in: Seng dong na magou age sada humbani na bineremu in Bangku. (bd. 17:12.) 18:10 Ia si Simon Petrus marpodang do, isintak ma ai anjaha itampulhon hubani jabolon ni sintua ni malim ai, gabe rotap ma pinggolni siamun. Si Malkus do goran ni jabolon ai. 18:11 Ihatahon Jesus ma hubani si Petrus: Sarungkon ma podangmin! Ai lang maningon inumonku do panginuman, na binere ni Bapa in Bangku? (Mat. 26:39.) 18:12 Dob ai itangkap tentera ampa kopala ni sidea pakon juak-juak ni Jahudi ai ma Jesus, lanjar isangkut ma. 18:13 Jadi iboan sidea ma Ia parlobei bani si Hannas, ai ma tulang ni si Kayapas, sintua ni malim bani na satahun ai. 18:14 Ai ma si Kayapas, na mangkatahon hinan bani Jahudi: Dearan do matei sada halak mangkopkop bangsa in. (bd. 11:49, 50.) 18:15 Ia si Simon Petrus pakon susian na sada nari, iirikkon sidea do Jesus. Na marsitandaan do susian na sada ai ampa sintua ni malim ai, jadi masuk ma ia rap pakon Jesus hu alaman ni rumah ni sintua ni malim ai. 18:16 Tapi jongjong do si Petrus idarat dohorhon labah. Jadi luar ma susian na sada ai, na marsitandaan pakon sintua ni malim ai, marsahap ma ia pakon naboru sijaga labah ai, gabe iarahkon ma si Petrus hubagas. 18:17 Jadi nini naboru sijaga labah ai ma bani si Petrus: Ai lang ho do sada susian ni halak on? Balos ni si Petrus: Sedo ahu in! 18:18 Tapi na jongjong do ijai jabolon pakon juak-juak mandadang bani pandadangan, na pinagara ni sidea halani borgohni. Rap pakon sidea do jongjong si Petrus mandadang ijai. 18:19 Jadi isungkun sintua ni malim ai ma Jesus pasal susianni ampa pasal podahni. 18:20 Ibalosi Jesus ma ia: Torang-torang do hatangku bani halak na mabuei. Tongtong do Ahu mangajari i parguruan pakon i rumah panumbahan, ai ma ianan partumpuan ni ganup halak Jahudi, anjaha seng dong marponopan Ahu marsahap. (bd. 7:14, 26.) 18:21 Mase Ahu isungkun Ham? Sungkun Ham ma sidea, na mambogei hatangkai! Ibotoh sidea do na huhatahon ai. 18:22 Dob ihatahon Jesus sonai, ipastap sada juak-juak na jongjong ijai ma Ia, lanjar nini ma: Mintor sonai ma parbalosmu bani sintua ni malim in? 18:23 Nini Jesus ma mambalosisi: Anggo na salah parsahapkai, patugah ham ma salahni, tapi anggo na sintong do, mase ma ipastap ham Ahu? 18:24 Ase isuruh si Hannas ma Ia sangkut hubani sintua ni malim, na margoran si Kayapas. 18:25 Ia si Simon Petrus ijai ope jongjong mandadang. Jadi nini sidea ma hubnai: Ai lang ho do sada susianni? Jadi iporsou ma nini ma: Seng ahu in! 18:26 Dob ai roh ma sada halak humbani juak-juak ni sintua ni malim, ai ma sindohor ni parpinggol na tinampul ni si Petrus ai, mangkatahon hubani: Ai lang huidah do ho rap pakonsi i pohon ai? 18:27 Jadi iporsou si Petrus ma use, dob ai mintor martahuak ma dayok. 18:28 Jadi girah sogod, iboan sidea ma Jesus hun lobei ni si Kayapas, hu benteng ai. Tapi seng masuk sidea hu benteng ai, ase ulang tarpantang sidea, laho mangankon Paska ai. 18:29 Jadi luar ma si Latus manjumpahkon sidea, nini ma: Pasal aha do pangaduannasiam dompak halak on? 18:30 Nini sidea ma mambalosisi: Ambit seng siparjahat halak on, seng anjai ondoskononnami Ia bamu. 18:31 Nini si Latus ma hubani sidea: Boan nasiam ma Ia, uhumi nasiam ma Ia domu hubani aturannasiam. Nini halak Jahudi ma hubani: Seng bulih bunuhonnami atap ise pe. (bd. 19;6, 7.) 18:32 Ase jumpah ma ijai na hinatahon ni Jesus hinan pasal dalan ni parmateini. (bd. 12:32, 33; Mat. 20:19.) 18:33 Jadi masuk ma use si Latus hubagas benteng ai, idilo ma Jesus anjaha nini ma hu-Bani: Atene, Ham do Raja ni Jahudi? 18:34 Ibalosi Jesus ma: Na humbagas uhurmu do na hinatahonmu in, atap hata ni halak do in bamu pasal Ahu? 18:35 Ibalosi si Latus ma: Ai halak Jahudi do ahu? Bangsamu ampa sintua ni malim ai do padashon Ham bangku. Ai aha dong ihorjahon Ham? 18:36 Balos ni Jesus: Ia harajaonku seng na hun dunia on ai. Ambit na hun dunia on harajaonku, seng tarbahen lang manlawan juak-juakku, ase ulang hona ondoskon Ahu hubani halak Jahudi; tapi seng sisonin harajaonkin! 18:37 Jadi nini si Latus ma hu-Bani: Ase raja do Ham? Balos ni Jesus: Songon na hinatahonmu in ma tongon. Raja do Ahu! Ase tubuh pe Ahu, anjaha ase roh pe Ahu hu dunia on, laho manaksihon hasintongan in do. Barang ise na humbani hasintongan, tangihononni in do sorangku. (1 Tim. 6:13.) 18:38 Nini si Latus ma hu-Bani: Aha do hasintongan? Jadi dob ihatahon sonai, luar ma ia use marayak Jahudi, nini ma hubani sidea: Seng dong jumpah ahu salahni! 18:39 Tapi tene, somal do hupaluah sada halak bani nasiam sanggah Paska. Marosuh do nasiam, ase hupaluah bani nasiam Raja ni Jahudi in? 18:40 Gabe isurakkon sidea ma use: Ulang Ia! Si Barabas ma! Tapi panrampok do anggo si Barabas.

Johannes 19

19:1 Dob ai itogu si Latus ma Jesus, anjaha ihatahon ma Ia lonsingan. 19:2 Idandan tentara ai ma sada sortali humbani ranting-ranting na marduri, anjaha inahkon ma ai hubani uluni; ibahen ma Ia homa marbaju sigerger. 19:3 Dob ai roh ma sidea hu lobeini, nini ma: Tabi ma Bamu, ale Raja ni Jahudi! Lanjar ipastapi ma Ia. 19:4 Luar ma si Latus, ihatahon ma hubani halak Jahudi: Tonggor ma, huboan do Ia hu lobeinasiam, ase ibotoh nasiam, na so adong jumpah ahu salahni. 19:5 Jadi luar ma Jesus marsotali duri anjaha marbaju sigerger. Ihatahon si Latus ma bani sidea: Tonggor nasiam ma jolma in! 19:6 Jadi dob iidah sintua ni malim ampa juak-juak ai Ia, idilohon sidea ma: Parsilangkon, parsilangkon ma Ia! Ihatahon si Latus ma bani sidea: Boan nasiam ma Ia anjaha parsilangkon nasiam ma! Seng dong jumpah ahu salahni. 19:7 Ibalosi halak Jahudi ma Ia: Adong do undang-undang bannami, anjaha mangihutkon undang-undang ai maningon marutang hosah do Ia, ai anak ni Naibata do Ia, nini. (bd. 10:33; 3 Mus. 24:15, 16.) 19:8 Mambogei ai si Latus, lambin mabiar ma ia, 19:9 gabe masuk ma ia use hu kantorni, ihatahon ma hubani Jesus: Ai na hunja do Ham? Tapi seng ibalosi Jesus Ia. (Mat. 27:12.) 19:10 Dob ai ihatahon si Latus ma hu-Bani: Mase lang ra Ham marsahapkon ahu? Ai lang ibotoh Ham, na markuasa do ahu paluahkon Ham, anjaha na markuasa do ahu mamparsilangkon Ham? 19:11 Balos ni Jesus: Seng markuasa ham Bangku, ambit lang na ibere ai bamu hun datas. Halani ai banggalan do dousa ni na mangondoskon Ahu bamu. 19:12 Olat ni ai nari ipindahi si Latus ma dalan laho paluahkonsi. Tapi marsurak-surak ma halak Jahudi, nini sidea ma: Anggo ipaluah ham Ia, seng hasoman ni Kesar in be ham! Ai barang ise na mangangkat dirini gabe raja, na mangimbang Kesar do ai. 19:13 Ase dob ibogei si Latus hata ai, iboan ma Jesus hudarat lanjar hundul ma ia bani hotak paruhuman, bani ianan na margoran Dasor batu, bani hata Heber: Gabbatha. 19:14 Ai ma na masa bani ari parugason Paska, marayak tongah ari. Ihatahon si Latus ma hubani halak Jahudi: Tonggor nasiam ma Rajanasiam on! 19:15 Tapi mardilo-dilo ma sidea: Padaoh, padaoh ma Ia! Parsilangkon ma! Nini si Latus ma hubani sidea: Mintor parsilangkononku ma Rajanasiam? Jadi ibalosi sintua ni malim ma: Seng dong rajanami sobali Kesar! (ay. 6.) 19:16 Dob ai iondoskon ma Ia bani sidea, ase iparsilangkon; jadi ijalo sidea ma Jesus. 19:17 Lanjar Ia do mamorsan hayu parsilang ai, laho hu ianan, na margoran partangkurakan; Golgata do goranni bani hata Heber. 19:18 Ijai ma iparsilangkon sidea Ia rap pakon dua halak na legan, sada i siamun, sada i sambilou, anjaha Jesus itongah-tongah ni sidea. 19:19 Ibahen si Latus ma sada surat, anjaha ilongkothon ma ai bani hayu parsilang ai. Sonon do hatani: Jesus, halak Nazaret, Raja ni Jahudi. 19:20 Buei do halak Jahudi, na mambasa surat ai, ai dohor do hun huta ai iparsilangkon Jesus, anjaha tarsurat do ai bani hata Heber, hata Rom ampa hata Gorik. 19:21 Dob ai ihatahon pangintuai ni halak Jahudi ma hubani si Latus: Ulang suratkon ham: Raja ni Jahudi, tapi na hinatahonni ai ma: Ahu do Raja ni Jahudi! 19:22 Balos ni si Latus: Na dob husurat, na dob husurat ma in! 19:23 Ase dob iparsilangkon tentara ai Ia, ibuat sidea ma hiouni, ibagi ompat ma ai, ganup sidea sabagian, ambah ni ai baju ganjangni ai. Ia baju ganjang ai seng marpanjaruman, na tinonun do ai torus. 19:24 Nini sidea ma samah sidea: Ulang ma rigat hita on, manjomput na sinurat ma hita pasal on, atap bani ise on. Jadi jumpah ma na tarsurat in, na mangkatahon: Ibagi sidea do hiouhu, anjaha manjomput na sinurat do sidea pasal bajungku. Ase sonai ma pambahen ni tentara ai. 19:25 Jongjong do ilambug parsilang ni Jesus ai inangni, sanina ni inangni, si Maria parinangon ni si Kleopas, ampa si Maria Magdalena. 19:26 Anggo Jesus, dob iidah ijai do inangni ampa susian haholongan ni uhurni ai ilambungni, ihatahon ma bani inangni ai: Andin ma inang, anakmu!(bd. 13:23.) 19:27 Dob ai ihatahon ma bani susianni ai: Andin ma inangmu! Olat ni ai nari ijalo susian ai ma ia hu rumahni. 19:28 Jadi dob ibotoh Jesus, na dob marujung haganup, ase jumpah na tarsurat ai nini ma: Horahan Ahu!(bd. 13:3; 18:4; Ps. 22:16.) 19:29 Jadi adong ma ijai gusi na marisi anggur na migar. Isornobkon sidea ma limut hubagas anggur na migar ai, ilongkothon sidea ma ai bani hayu ni hisop, anjaha isurdukkon ma hubani pamanganni. (Ps. 69:22.) 19:30 Dob ijalo Jesus na migar ai, nini ma: Domma salosei! dob ai ipaunduk ma uluni anjaha iondoskon ma tonduyni. 19:31 Halani ari parugasonkon do ai, anjaha ase ulang bani parsilang ai bangkei ai sanggah ari Sabat (ai ari na banggal do ari Sabat ai), jadi laho ma halak Jahudi hubani si Latus mangindohon, ase iparponggol ma nahei ni sidea anjaha ipasusur. (5 Mus. 21:23.)tx 19:32 Jadi laho ma tentara ai, iparponggol sidea ma nahei ni sidua halak ai, na tarsilang rap pakon Jesus. 19:33 Tapi dashonsi sidea bani Jesus, iidah ma na dob matei Ia, gabe seng be pala iparponggol sidea naheini. 19:34 Tapi ipantomhon sahalak humbani tentara ai ma tanjani bani tontonni, gabe mintor luar ma daroh ampa bah. 19:35 Anjaha na mangidah ai do na manaksihon ai, anjaha sintong do na sinaksihonni ai. Ibotoh do, na sintong do na hinatahonni ai, andohar porsaya age nasiam. 19:36 Ase masa pe ai, ase saud do na tarsurat in: Seng bulih ponggolhonon holi-holini! (2 Mus. 12:46; Ps. 34:21.) 19:37 Anjaha surat na legan use mangkatahon: Idahon ni sidea do na pinantom ni sidea in. (Sak. 12:10; Pangk. 1:7.) 19:38 Dob salpu ai ipindohon si Josep, na hun Arimatea ma hubani si Latus, atap boi do pasusuronni bangkei ni Jesus. Dihut do ia susian n Jesus, tapi ponop do, halani biarni mangidah Jahudi. Jadi ibalosi si Latus ma ai, gabe laho ma ia pasusurhon bangkei ni Jesus. 19:39 Roh do homa si Nikodemus, ai ma na ongga roh marayak Jesus borngin-borngin, iboan do mir na maragu aloe hira-hira saratus kati. (bd. 3:2; Mat. 2:11.) 19:40 Dob ai ibuat sidea ma bangkei ni Jesus, ibaluti ma ai bani hiou putih rap pakon na morum-morum ai, mangihuthon adat pananomon ni Jahudi. 19:41 Dohor bani ianan ni Jesus tarsilang ai, adong do sada pohon, anjaha ibagas pohon ai adong do sada tanoman na baru, seng ongga ope inahkon bangkei hujai. 19:42 Ase hujai ma itibalhon sidea Jesus, halani ari parugasonkon ai, ai dohor do tanoman ai.

Johannes 20

20:1 Dob ai bani ari parlobei, dob salpu ari Sabat, laho ma si Maria hu tanoman, girah sogod, golap-golap ope, gabe iidah ma, na dob tarangkat batu ai hun tanoman ai. 20:2 Jadi marlintun ma ia mangayaki si Simon Petrus ampa susian na sada nari, haholongan ni uhur ni Jesus, anjaha nini ma hubani sidea: Adong do na mambuat Tuhan in hun tanoman, anjaha seng ibotoh hanami, huja Ia inahkon! (bd. 13:23.) 20:3 Jadi laho ma si Petrus ampa susian na sada nari, gabe das ma sidea hu tanoman ai. 20:4 Na rap marlintun do sidea na dua ai, tapi hinsahan do susian na sada nari ai humbani si Petrus, gabe parlobei ma ia das hu tanoman ai. 20:5 Jadi ipaunduk ma dirini, iidah ma tibal pambaluti ai, tapi seng masuk anggo ia. 20:6 Roh ma homa si Petrus hun pudini, imasuki ma tanoman ai, jadi iidah ma tibal pamaluti ai. 20:7 Ia hiou pamalut ni uluni, seng rap ai pakon pamaluti ai, pulig do ai ilompit bani ianan na legan. (bd. 11:44.) 20:8 Dob ai masuk ma homa susian na sada nari ai, na parlobei das hu tanoman ai, iidah ma, gabe porsaya ma ia. 20:9 Ai seng iarusi sidea ope hata ni Surat in, na mangkatahon: Maningon puho do Ia humbani na matei. (1 Kor. 15:4; Lah. 21:24-32.) 20:10 Dob ai mulak ma susian na dua ai. 20:11 Ia si Maria, jongjong do idarat ni tanoman ai, tangis-tangis, anjaha sanggah na tangis ai ia, ipaunduk ma dirini manonggor hubagas tanoman ai. 20:12 Gabe iidah ma hundul dua malekat ijai, marhiou silopak, sada hampit uluni, na sada nari hampit hatibalan ni nahei ni Jesus. 20:13 Jadi ihatahon sidea ma hubani: Mase tangis ham inang? Ihatahon ma bani sidea: Adong do na mambuat Tuhanku, anjaha seng hubotoh huja Ia inahkon. 20:14 Dob ihatahon sonai, marhusor ma ia dompak pudi, gabe iidah ma Jesus jongjong ijai, tapi seng ibotoh Jesus do ai hape. 20:15 Nini Jesus ma hubani: Ham inang, mase tangis ham? Ise ipindahi ham? Jadi iagan ma, sijaga pohon do Ia, gabe ihatahon ma Bani: Anggo ham do mambuatsi, tuan, patugah ham ma bangku, atap huja do Ia inahkon ham, ase hualop! 20:16 Dob ai nini Jesus ma hubani: Maria! Jadi idompakkon si Maria ma Ia, nini ma ibagas hata Heber: Rabbuni! (artini: Guru.) 20:17 Ihatahon Jesus ma hubani: Ulang jamah Ahu, ai seng naik ope Ahu hubani Bapa in! Tapi laho ma ho hubani saninangku, hatahon ma hubani sidea: Na laho tangkog ma Ahu hubani Bapangku anjaha Bapanima, hubani Naibatangku anjaha Naibatanima. (Heb. 2:11, 12.) 20:18 Jadi laho ma si Maria Magdalena, ibaritahon ma hubani susian ai: Domma huidah Tuhan in, anjaha on do hatani bangku! 20:19 Jadi dob bod ari, bani ari parlobei dob salpu ari Sabat ai, sanggah tutup sagala labah ni rumah, niiankon ni susian ai, halani biar ni uhur ni sidea mangidah halak Jahudi, roh ma Jesus jongjong hutongah-tongah ni sidea, anjaha ihatahon ma bani sidea: Damei ma bannima! 20:20 Jadi dob ihatahon sonai, ipatuduhkon ma tanganni ampa tontonni bani sidea, gabe malas ma uhur ni susian ai, halani na dob iidah sidea Tuhan in. (1 Joh. 1:1.) 20:21 Dob ai ihatahon Jesus ma use bani sidea: Damei ma bannima! Songon sinuruh ni Bapa in Ahu, sonai do suruhonku hanima! (bd. 17:18.) 20:22 Dob ihatahon sonai, manompul ma Ia dompak sidea, anjaha nini ma hubani sidea: Jalo hanima ma Tonduy Na pansing! 20:23 Anggo isasap hanima dousa ni atap ise pe, na dob sasap ma ai, anjaha anggo ipatotap hanima dousa ni atap ise pe, na totap ma ai. (Mat. 16:19; 18:10, 18.) 20:24 Tapi anggo si Tomas, sada humbani na sapuluh dua in, na margoran si Rindu-rindu, seng rap pakon sidea ia, sanggah na roh ai Jesus. (bd. 11:16; 14:5.) 20:25 Jadi ihatahon susian na legan ai ma dompaksi: Domma iidah hanami Tuhan in! Tapi ibalosi ma sidea: Anggo seng huidah bani tanganni ai bokas ni paku ondi, anjaha ijamah jari-jaringku bokas ni paku ondi, anjaha anggo seng hujamah tontonni ai, seng porsaya ahu. (bd. 19:34.) 20:26 Dob salpu ualuh borngin, tumpu ma use susian ai i rumah ondi, rap pakon si Tomas. Jadi roh ma Jesus, sanggah na tutup ai sagala labah, jongjong hu tongah-tongah ni sidea, nini ma dompak sidea: Damei ma bannima! (ay. 19.) 20:27 Ihatahon ma hubani si Tomas: Bahen hujon jari-jarimin, anjaha torih ma tanganku! Surdukkon ma tanganmin, manjamah tontonhu. Ulang sangsi uhurmu, porsaya ma! 20:28 Jadi nini si Tomas ma mambalosisi: Ham Tuhanku anjaha Naibatangku!(bd. 1:1.) 20:29 Jadi ihatahon Jesus ma hubani: Halani iidah ho Ahu, ai do ase porsaya ho. Martuah ma na porsaya, age pe lang iidah! (1 Ptr. 1:8.) 20:30 Buei ope tanda na legan, na binahen ni Jesus ilobei ni susianni, na so sinuratkon ibagas buku on. 20:31 Ase na suratkon pe on, ase porsaya nasiam, Jesus do Kristus, Anak ni Naibata, anjaha marhitei na mangkaporsayai ai dapotan hagoluhan nasiam ibagas Goranni. (1 Joh. 5:13.)

Johannes 21

21:1 Dob ai ipataridahkon Jesus ma use dirini hubani susian ai i topi ni tao Tiberias. Sonon ma pardalanni. 21:2 Tumpu ma si Simon Petrus pakon si Tomas, na margoran si Rindu-rindu, rap pakon si Natanael, na hun Kana i Galilea, pakon anak ni si Sebedeus ampa dua halak nari humbani susianni ai. (bd. 1:45.) 21:3 Jadi nini si Simon Petrus ma hubani sidea: Laho ma ahu mardengke. Ihatahon sidea ma hubani: Dihut ma hanami! Jadi laho ma sidea, masuk ma hu parau, tapi aha pe lang dapot sidea na saborngin ai. 21:4 Anjaha dob siang ari, jongjong ma Jesus i pasir ai, tapi seng itanda sidea Ia. (bd. 20:14; Luk. 24:16.) 21:5 Jadi ihatahon Jesus ma hubani sidea: Ambia, adong do dengkenima ijin? Ibalosi sidea ma Ia: Seng dong! (Luk. 24:41.) 21:6 dob ai ihatahon ma bani sidea: Dabuh hanima ma jalanima hu siamun ni parau in, ase dapotan hanima! Jadi idabuh sidea ma, gabe seng tartarik sidea be jala ai halani buei ni dengke ai. (Luk. 5:4-7.) 21:7 Jadi ihatahon susian haholongan ni Jesus ai ma hubani si Petrus: Tuhan in do in! Jadi dob itangar si Simon Petrus, Tuhan in do ai hape, ialithon ma hiouni, ai seng marhiou ia hinan, gabe manlumpat ma ia hu tao ai. (bd. 13:23.) 21:8 Tapi marparau do anggo susian na legan ai, lanjar manarad jala na marisi dengke ai, ai seng sadiha daoh sidea hundarat, hira-hira dua ratus asta do. 21:9 Dashonsi sidea hu darat, iidah sidea ma narnar ijai ampa dengke i atasni, ambah ni ai ruti. 21:10 Ihatahon Jesus ma hubani sidea: Boan hanima ma deba dengke in, na dapot hanima in! 21:11 Jadi naik ma si Petrus hu parau ai, isarad ma jala ai hu darat, gok dengke na banggal-banggal, saratus lima puluh tolu bueini, anjaha age pe sonai bueini, seng marigat anggo jala ai. 21:12 Dob ai nini Jesus ma hubani sidea: Roh ma hanima! Tapi seng dong humbani susian ai, na pag manungkunsi: Ise do Ham? Ibotoh sidea, Tuhan in do ai. 21:13 Ase roh ma Jesus, ibuat ma ruti ai, ipambere ma ai bani sidea, sonai homa dengke ai. (bd. 6:11.) 21:14 Ai ma na patoluhalihon ipataridahkon Jesus dirini hubani susianni, dob puho Ia humbani na matei. 21:15 Ase dob mangan sidea, ihatahon Jesus ma hubani si Simon Petrus: Ale Simon, anak ni si Jonas, holongan do uhurmu Bangku ase halak on? Nini ma hu-Bani: Eak Tuhan, ibotoh Ham do holong ni uhurhu Bamu! Ihatahon Jesus ma hubani: Parmahani ma anak ni biri-biringku! (bd. 1:42.) 21:16 Ihatahon ma use padua-halihon bani: Ale Simon, Anak ni si Jonas, holong do uhurmu Bangku? Nini ma hu-Bani: Eak Tuhan, ibotoh Ham do holong ni uhurhu Bamu! Jadi ihatahon ma hubani: Parmahani ma biri-biringku! (1 Ptr. 5:2, 4.) 21:17 Dob ai ihatahon ma patolu-halihon hubani: Ale Simon, anak ni si Jonas, holong do uhurmu Bangku? Jadi pusok ma uhur ni si Petrus, halani patolu-halihon ma ihatahon hubani: Holong do uhurmu Bangku? Jadi ihatahon ma: Haganup do, ale Tuhan, ibotoh Ham; ibotoh Ham do holong ni uhurhu Bamu! Dob ai ihatahon Jesus ma hubani: Parmahani ma biri-biringku! (bd. 13:38; 16:30.) 21:18 Na tongon tumang do na huhatahon on bam: Sanggah poso ho, ho do manggonditi dirimu, anjaha laho ho huja rosuh ni uhurmu. Tapi dob matua holi ho, surdukkononmu ma tanganmu, jadi gonditan ni halak na legan ma ho, anjaha boanonni ma ho hubani na so harosuh ni uhurmu. 21:19 Tapi ihatahon pe ai, laho patugahkon parmateini do use, laho pasangaphon Naibata. Jadi, dob ihatahon sonai, nini ma hubani: Ihutkon ma Ahu! (bd. 13:36.) 21:20 Jadi marhusor ma si Petrus, gabe iidah ma mangihut susian haholongan ni uhur ni Jesus, ai ma na hundul darngos bani Jesus, sanggah na mangan ondi sidea, anjaha na manungkunsi ijia: Ise do in Tuhan, na sihol mantahihon Ham? (bd. 13:23.) 21:21 Ase dob iidah si Petrus ia, nini ma hubani Jesus: Ham Tuhan, sonaha ia ambia on? 21:22 Nini Jesus ma hubani: Anggo marosuh Ahu, totap ia, ronsi roh Ahu, mase ma pala pasari-sarionmu ai? Tapi anggo ho, ihutkon ma Ahu! 21:23 Ase sar ma hata ai bani hasoman-hasoman ai, na so matei susian ai. Tapi seng ihatahon Jesus hubani, na so matei ia, tapi sonon do nini: Anggo marosuh Ahu, totap ia ronsi roh Ahu, mase ma pala pasari-sarionmu ai? 21:24 Ai ma susian, na manaksihon pasal on anjaha na manuratkon, anjaha ibotoh hanami, na sintong do na sinaksihonni in. (bd. 15:27; 19:35.) 21:25 Tapi buei ope na legan, na binahen ni Jesus; ambit nasuratkon ai sada-sada, nini uhurhu, ra seng siat i dunia on, buku na sinurat ai.

Lahoan ni Apostel 1

1:1 Bani surathu na parlobei in, ale Teopilus, husurathon do pasal haganup na binahen ampa podah na pinungkah ni Jesus, (Luk. 1:3.) 1:2 das ronsi na tarangkat Ia, dob lobei ibere parentah marhitei Tonduy Na pansing bani apostel-apostel, na dob pinilihni ai. 1:3 Dob salpu hamarsikon na tinaronni ai, ipataridahkon do diriNi manggoluh bani sidea marhitei buei tanda, ai ma ibagas siompatpuluh ari na pinataridahkonni ai dirini bani sidea, lanjar mansahapkon pasal harajaon ni Naibata. 1:4 Sanggah na rap Ia pakon sidea, iparentahkon ma bani sidea: Ulang ma laho hanima hun Jerusalem, tapi paima hanima ma na binagahkon ni Bapa, na dob ibogei hanima hum-Bangku. (Luk. 24:49; Joh. 15:26.) 1:5 Ia si Johannes bah do ididihon, tapi Tonduy Na pansing do didihononku bani nasiam, seng pala piga ari nari. (bd. 2:4; 11:15; Mat. 3:11.) 1:6 Jadi sanggah na martumpu ai sidea, isungkun sidea ma Ia, nini ma: Ham Tuhan, pajongjongonmu ma sonari use harajaon in bani Israel? (Luk. 19:11; 24:21.) 1:7 Nini ma hubani sidea: Seng urusannima ai, mambotoh adanganni atap panorangni, na dob tinontuhon ni Bapa in ibagas kuasani sandiri. (Mat. 24:36.) 1:8 Tapi jaloonnima ma hagogohon ni Tonduy Na pansing na sogop bennima, anjaha gabe saksingku ma hanima i Jerusalem ampa i sab Judea ampa i Samaria ampa das hu ujung ni tanoh on. (Luk. 24:47; Joh. 15:27; Lah. 5:32.) 1:9 Jadi dob ihatahon sonai, tarangkat ma Ia inonoi sidea, dob ai ilingodi hombun ma Ia humbani panonggor ni sidea. (Mrk. 16:19; Luk. 24:51.) 1:10 Sanggah na ituludkon sidea ai Ia laho hu nagoriatas, jongjong ma dua halak parhiou silopak ilambung ni sidea, (Luk. 24:4; Joh. 20:12.) 1:11 na mangkatahon: Nasiam halak Galilea, mase ma sai jongjong nasiam kawah-kawah dompak datas? Anggo Jesus ai, na tarangkat hun lobeinasiam hu nagori atas, sonai do roh Ia, songon na niidah nasiam ai Ia naik hu nagoriatas. (Luk. 21:27; Pangk. 1:7.) 1:12 Dob ai mulak ma sidea hu Jerusalem hun dolog ai, na margoran dolog Jetun; dohor do ai hun Jerusalem, sada pardalanan Sabat do daohni. (Luk. 24:50-53.) 1:13 Dob das sidea, tangkog ma sidea hu kamar pardatas ai, ianan ni sidea ai, ai ma si Petrus ampa si Johannes, si Jakobus ampa si Andreas, si Pilippus ampa si Tomas, si Bartolomeus ampa si Mateus, si Jakobus anak ni si Alpeus, ampa si Simon Selotes, ampa si Judas anak ni si Jakobus. (Mat. 10:2-4; Luk. 6:13-16.) 1:14 Sidea ai do haganup na mannunut marsada ni uhur martonggo rap pakon parinangon-parinangon ampa si Maria, inang ni Jesus, sonai homa anggini ai. (bd. 2:1; Joh. 7:3-5.) 1:15 Bani panorang ai ma jongjong si Petrus itongah-tongah ni sanina-sanina ai, bueini adong do hira-hira saratus dua puluh halak, nini ma: 1:16 Nasiam hasoman sanina, maningon saud do hata ni Surat in, na dob nilumbahon ni Tonduy Na pansing hinan marhitei pamangan ni si Daud, ai ma pasal si Judas, na gabe pambobai ni sitangkap Jesus. (Ps. 41:10; Mat. 26:47.) 1:17 Masuk hinan do ia hubani bilangannami, anjaha dihut do ia bani jabatan on. (Luk. 6:16.) 1:18 Dapotsi do sanlambar tanoh humbani upah hajahaton ai; anjaha sanggah na tungkap ia madabuh, mapultak ma dagingni, gabe mandarat ma ganup bituhani. (Mat. 27:3-10.) 1:19 Anjaha haganup do pangisi ni Jerusalem mambotoh ai, mambahen igoran tanoh ai ibagas sahap ni sidea: Akeldamah, artini: tanoh daroh. 1:20 Ai tarsurat do ibagas buku Psalm: Sai halong ma iananni ai, anjaha ulang ma adong na mangiankon ai! Ambah ni ai: Jaloon ni na legan ma jabatanni! (Ps. 69:26; 109:8.) 1:21 Halani ai maningon adong do humbani sidea na mangkasomani hanami, sadokah marhujai-hujon Tuhan Jesus itongah-tongahta, (Joh. 15:27.) 1:22 olat ni pandidion ni si Johannes nari das hubani partarangkat ni ai humbanta, na gabe hasomannami manaksihon pasal parpuhoonni ai. (bd. 2:33; 10:37-41.) 1:23 Jadi ipajongjong sidea ma dua halak, ai ma si Josep, na margoran si Barsabas anjaha na ginoran homa si Justus, ampa si Matias. 1:24 Jadi martonggo ma sidea, nini ma: Ham Tuhan, sitanda uhur ni haganup jolma, patuduh Ham ma barang ise do humbani na dua on ipilih Ham, 1:25 gabe sijalo jabatan diakon ampa apostel, na dob tinadingkon ni si Judas, na dob laho marayak siparayakonni. 1:26 Lanjar manjomput na sinurat ma sidea, jadi dapot ma si Matias, gabe tarhira ma ia hasoman ni apostel na sapuluh dua ai. (Pod. 16:33.)

Lahoan ni Apostel 2

2:1 Jadi sanggah jumpah ari Pentakosta, martumpu do sidea haganup bani sada ianan. (bd. 1:14; 3 Mus. 23:15-16.) 2:2 Jadi roh ma sompong sora hun langit songon parombus ni logou na gogoh montas, gabe igoki ma rumah ianan ni sidea na hundul ai. 2:3 Jadi taridah ma bani sidea usih hubani dilah ni apuy na marjilam-jilam, anjaha sogop ma bani ganup sidea. (Mat. 3:11.) 2:4 Gabe gok Tonduy Na pansing ma sidea ganupan, jadi mamungkah marsahap na legan ma sidea ganupan, songon pambere ni Tonduy in bani sidea mansahapkonsi. (bd. 4:31; 10:44-46; 11:15; Mrk. 16:17.) 2:5 Tapi adong ma halak Jahudi na marianan i Jerusalem, ai ma halak na daulat humbani sagala bangsa na itoruh ni langit. 2:6 Sanggah na masa ai sora ai, martumpu ma na mabuei ai; jadi longang ma sidea, ai ganup do sidea mambogei hata ai ibagas sahapni bei. 2:7 Jadi malitonduy ma sidea anjaha longang, nini sidea ma: Ai lang halak Galilea do sidea haganup na marsahap in? (Joh. 7:52.) 2:8 Mase ma ganup hita mambogei ibagas hata ni tanoh hatubuhanta bei? 2:9 Hita, halak Partia pakon Media pakon Elamit ampa na marianan i Mesopotamia, i Judea ampa Kappadosia, i Pontus ampa i Asia, (1 Ptr. 1:1.) 2:10 i Prigia, Pampilia, Masir ampa i nagori Libia na hampit Kirene, ampa halak Rom na marianan ijon, halak Jahudi ampa parguru, 2:11 halak Kreta ampa halak Arab; ibagas hatanta bei do ibogei hita sidea mansahapkon habanggalon ni Naibata. 2:12 Jadi longang ma sidea haganup, jut bei ma uhurni, nini ma samah sidea: Ai aha do artini in? 2:13 Tapi manrisai do na deba, nini ma: Na bosurtu do in bani anggur na matobu. 2:14 Jadi jongjong ma si Petrus rap pakon na sapuluh sada ai, ipagogoh ma sorani anjaha iparsahapkon ma sidea: Nasiam halak Jahudi ampa haganup na marianan i Jerusalem, botoh nasiam ma on, anjaha parimbagaskon nasiam ma hatangku! 2:15 Seng na mabuk hanami on, songon pangagan ni uhurnasiam, ai pukul siah ope ari, 2:16 tapi na hinatahon ni nabi Joel do na masa on, ai nini do: (Joel 3:1-5.) 2:17 Bani ari parpudi, nini Naibata, useihononku do humbani Tonduyhu bani sagala daging, jadi manjahai ma anaknasiam, sonai borunasiam, anjaha marnipi ma na matuanasiam. 2:18 Age bani jabolonku dalahi ampa jabolonku naboru bani panorang ai, useihononku do humbani Tonduyhu, ase manjahai sidea. 2:19 Anjaha bahenonku do halongangan bani langit ibabou, anjaha tanda bani tanoh itoruh, ai ma daroh apuy ampa timus na maripul. 2:20 Mata ni ari ai gabe golap ma, anjaha bulan gabe daroh, parlobei ni ari parroh ni Tuhan in, na banggal anjaha na marmulia in. (Mat. 24:29.) 2:21 Jadi sagala na mandilo Goran ni Tuhan in, maluah ma. (Rom 10:13.) 2:22 Nasiam halak Israel, tangihon nasiam ma hata on: Ia Jesus, na hun Nasaret in, in ma na dob pinatandahon ni Naibata bani nasiam marhitei hagogohon, halongangan ampa tanda, na binahen ni Naibata marhiteihonsi itongah-tongahnasiam, songon na binotohnasiam, 2:23 na dob niondoskon mangihutkon sura-sura ni Naibata na totap in ampa humbani pamotohanni hinan, Ia do na dob iparsilangkon anjaha ibunuh nasiam marhitei tangan ni na so martitah. (bd. 3:13; 4:28.) 2:24 Tapi ipapuho Naibata do Ia, dob itanggali haparngiton ni hamateian, ai seng tarjolomi hamateian in Ia. (bd. 3:15.) 2:25 Ai ihatahon si Daud do pasal ai: Huidah do Tuhan in tongtong i lobeihu, ai i siamunhu do Ia, ase ulang dugur ahu. (Ps. 16:8, 11.) 2:26 Halani ai malas do uhurhu, anjaha marolob-olob dilahku; dagingku pe marsaran do halani pangarapan. 2:27 Ai seng paturutonmu tonduyhu i nagori toruh, anjaha seng lopasonmu na pansingmu mangidah hamarsikon. (bd. 13:35.) 2:28 Ipabotohkon Ham do bangku dalan hagoluhan, gokanmu do bangku malas ni uhur i lobeimu. 2:29 Nasiam sanina, huhatahon ma bani nasiam torang-torang, ia ompungta si Daud matei do anjaha hona tanom, anjaha itongah-tongahta do tanomanni ronsi sadari on. (bd. 13:36; 1 Raj. 2:10.) 2:30 Halani nabi do ia, anjaha ibotoh, na dob ibijahon Naibata do bani, pabangkiton sahalak humbani ginomparni bani paratasni, (2 Sam. 7:12, 13; Ps. 89:4, 5; 132:11.) 2:31 ibagas botohni hinan domma isahapkon pasal parpuhoon ni Kristus in, ai ma na so paturuton Ia i nagori toruh, atap idahon ni dagingni hamasikon. 2:32 In ma Jesus, na dob pinapuho ni Naibata, haganup do hanami manaksihon ai. (bd. 1:8; 3:15.) 2:33 Dob ipagijang Ia hu siamun ni Naibata, anjaha ijalo Tonduy Na pansing na pinarbagah-bagah in humbani Naibata, gabe iuseihon ma in songon na niidah anjaha ibogeinasiam. (bd. 5:31; Ps. 68:19; Joh. 12:32.) 2:34 Ai seng si Daud naik hu nagori atas, tapi ihatahon do: Nini Tuhan in dompak Tuhanku: Hundul ma ho hu siamunhon, (Ps. 110:1.) 2:35 paima hubahen munsuhmu, gabe sidogei-dogeian bani naheimu. 2:36 Ase torang ma ibotoh haganup bangsa Israel: Ia Jesus na pinarsilangkonnasiam in, domma ipabangkit Naibata gabe Tuhan anjaha Kristus. (bd. 5:31; Pil. 2:9-11.) 2:37 Manangar ai, itorusi ma uhur ni sidea, gabe ihatahon sidea ma hubani si Petrus ampa hubani hasomanni Apostel: Aha ma sibahenonnami, nasiam hasoman! (bd. 16:30; Heb. 4:12.) 2:38 Ihatahon si Petrus ma hubani sidea: Paubah nasiam ma uhurnasiam, anjaha padidihon nasiam ma ganup nasiam hubagas Goran ni Jesus Kristus, bahen hasasapan ni dousanasiam, ase ijalo nasiam sibere-bere ni Tonduy Na pansing.(bd. 3:16-19; 10:45; Luk. 24:47.) 2:39 Ai bani nasiam do bagah-bagah in ampa bani anaknasiam ampa bani haganup halak na daoh, sidiloon ni Tuhan Naibatanta ope. (Joel 3:5; Joh. 10:16; Ep. 2:13.) 2:40 Buei ope hata na legan isaksihon, laho mangojur sidea, nini do: Paluah nasiam ma dirinasiam, humbani bangsa na geduk on! (Pil. 2:15.) 2:41 Jadi tardidi ma haganup na manjalo hatani ai, anjaha adong do hira-hira tolu ribu halak na tambah bani na sadari ai. (Jes. 53:11, 12.) 2:42 Anjaha totap do sidea bani podah ni apostel ampa ibagas parsaoran, ibagas na manopiki ruti ampa na martonggo. (bd. 20:7.) 2:43 Sogop do uhur na mabiar bani haganup; buei do halongangan ampa tanda ibahen apostel ai. 2:44 Sai sada do ganup na porsaya ai, anjaha parbagianan rup do ihira sidea arta ni sidea. (bd. 4:32.) 2:45 Ijuali sidea do arta ampa barang-barang ni sidea, ibagihon ma ai bani haganup, domu hubani haporluanni bei. 2:46 Anjaha ganup ari do sidea sauhur i rumah panumbahan; jojor rumah do sidea manopiki ruti, anjaha ibagas malas ni uhur ampa uhur na bulus do ijalo sidea sipanganon ai. (ay. 42.) 2:47 Ipuji sidea do Naibata anjaha rosuh do uhur ni simbuei mangidah sidea. Anjaha ganup ari do itambahi Tuhan in na dapotan haluahon bani kuria ai. (bd. 4:4; 5:14; 11:21.)

Lahoan ni Apostel 3

3:1 Jadi rap tangkog ma si Petrus ampa si Johannes hu rumah panumbahan, pukul tolu, bani panorang martonggo. (bd. 10:3.) 3:2 Anjaha adong ma sada halak na repat humbani partubuhni iboan halak hujai. Siap ari do itaruhkon sidea ia hu lambung ni horbangan ni rumah panumbahan ai, na margoran horbangan na jenges, laho mangindo sibere-bere humbani halak na masuk hu rumah panumbahan ai. (bd. 14:8.) 3:3 Jadi sanggah iidah halak na repat ai si Petrus ampa si Johannes sihol masuk hu rumah panumbahan ai, ipindo ma sibere-bere. 3:4 Tapi ikawahkon si Petrus ampa si Johannes ma ia, nini sidea ma: Tonggor dompak hanami! 3:5 Jadi ikawahkon ma sidea, iarap uhurni adong jaloonni humbani sidea atap aha. 3:6 Tapi nini si Petrus ma: Pirak pakon omas seng dong bangku, tapi na dong bangku ai ma hubere bam: Marhitei goran ni Jesus Kristus na hun Nasaret in, mardalan ma ho! 3:7 Lanjar itangkap ma tanganni siamun, laho pajongjongkonsi, jadi mintor totap ma hae-haeni ampa towodni. 3:8 Mintor ijongjongkon ma lanjar mardalan, masuk ma ia rap pakon sidea hu rumah panumbahan ai mangentes-entes anjaha mirjak-irjak lanjar mamuji Naibata. (Jes. 35:6; Luk. 5:25.) 3:9 Iidah haganup halak na mabuei ai do ia, na mardalan anjaha na mamuji-muji ai bani Naibata. 3:10 Tapi ibotoh sidea do, ia do na hundul mangindo-indo ilambung ni horbangan na majenges ai; longang do sidea anjaha himong mangidah na masa bani ai. (Luk. 5:26.) 3:11 Tapi halani na sai odor ai ia pakon si Petrus ampa si Johannes, marurup ma roh haganup halak na mabuei ai bani sidea, bani ianan na margoran surambih ni si Salomo, halani longang ni uhur ni sidea. (bd. 5:12; Joh. 10:23.) 3:12 Mangidah ai si Petrus, nini ma dompak halak na mabuei ai: Nasiam halak Israel, mase longang uhurnasiam pasal on, mase ma sai hanami ikawahkon nasiam, songon gogohnami sandiri atap hadaulatonnami mambahen na mardalan halak on? 3:13 Na ipasangap Naibata ni si Abraham, si Isak ampa si Jakob, Naibata ni ompungta in do Jesus juak-juakni in, na iondoskon anjaha na iparsilangkon nasiam in ilobei ni si Latus, age pe paluahon do Ia namin mangihutkon timbanganni. (bd. 2:3; 5:30; Luk. 23:22, 23.) 3:14 Iparnalang nasiam do Na pansing anjaha na pintor in, tapi ipindo nasiam do paluahon bani nasiam pamunuh in. (Mat. 27:20.) 3:15 Pambobai hu hagoluhan do ibunuh nasiam. In ma na dob ipapuho Naibata humbani na matei, anjaha hanami do saksi pasal ai. (bd. 5:30; Luk. 24:48.) 3:16 Halani haporsayaon bani Goranni do, ase ipargogohi Goranni halak on, songon na niidah, anjaha na tinanda nasiam on; ibere haporsayaon na humbani Tuhan in do hamalumon bani i lobeinasiam haganupan. (bd. 4:10.) 3:17 Ai pe, nasiam sanina, huahap, na hurang botoh do nasiam, ase ihorjahon nasiam in, sonai age pangintuainasiam. (bd. 13:27; Luk. 23:34; 1 Kor. 2:8.) 3:18 Tapi na ipasaud do na dob pinatugahni hinan marhitei pamangan ni ganup nabi, ai ma: Sitaron na marsik do Kristusni. (Jes. 53:5; Luk. 24:25-27.) 3:19 Ase paubah nasiam ma uhurnasiam, anjaha mulak ma nasiam, ase tarsasap dousanasiam, (bd. 2:38.) 3:20 andohar roh panorang malas ni uhur hun lobei ni Tuhan in, anjaha ase isuruh bani nasiam Jesus Kristus, songon na dob sinurahonni hinan, 3:21 ai ma na dob ijalo nagori atas lobei, paima roh panorang parsuang ni haganup, na dob hinatahon ni Naibata humbani na hinan marhitei pamangan ni nabini na pansing in. 3:22 Ai ihatahon si Musa do: Pajongjongon ni Tuhan Naibata do sada nabi humbani saninanasiam songon ahu on, Ia do sitangihononnasiam pasal haganup sihatahononni bani nasiam. (5 Mus. 18:15, 19.) 3:23 Tapi sagala na so manangihon nabi ai, boishononkon do humbani bangsa in! 3:24 Anjaha sagala nabi na ongga marsahap, mamungkah humbani si Samuel ampa na ipudini ai, pasal ari on do ibaritahon sidea. (Luk. 1:70-75.) 3:25 Nasiam do anak ni nabi-nabi ai anjaha parrupei bani padan na binahen ni Naibata bani ompungta, sanggah na hinatahonni ai bani si Abraham: Anjaha marhitei ginomparmai dapotan pasu-pasu do haganup bangsa na i tanoh on. (1 Mus. 12:3; 22:18.) 3:26 Bani nasiam do parlobei ipapuho Naibata juak-juakni, anjaha isuruh do ia, mamasu-masu nasiam, sagala na mulak humbani hajahatonni bei. (bd. 13:46; Mat. 10:6.)

Lahoan ni Apostel 4

4:1 Sanggah na marsahap ai ope sidea bani na mabuei ai, roh ma mandorab sidea malim, kopala ni rumah panumbahan ai ampa halak Sadukei, (Luk. 22:4, 52.) 4:2 marah, halani iajari sidea na mabuei ai, anjaha iambilankon sidea parpuhoon humbani na matei ibagas Jesus. (bd. 23:8.) 4:3 Itangkap ma sidea, anjaha ipamasuk hubagas tutupan ronsi patar ni ai, ai domma bod ari. 4:4 Tapi buei do na manangar ambilan ai, gabe porsaya, anjaha adong do bilangan ni dalahi na gabe porsaya lima ribu halak. (bd. 2:41, 47; 5:14.) 4:5 Patarni ai martumpu ma i Jerusalem pangintuai-pangintuai ampa sibotoh surat, 4:6 rap pakon si Hannas, sintua ni malim ai, si Kayapas, si Johannes, si Aleksander ampa haganup sindohor ni sintua ni malim ai. (Joh. 18:13.) 4:7 Jadi ipajongjong ma sidea hu tongah-tongah anjaha isungkun ma sidea: Marhitei kuasa aha atap marhitei goran ni ise do ibahen nasiam ai? (Mat. 21:23.) 4:8 Jadi gok Tonduy Na Pansing ma si Petrus, ihatahon ma bani sidea: Nasiam pambobai ampa pangintuai-pangintuai ni bangsa on. (Mat. 10:19, 20; Luk. 12:11, 12.) 4:9 Anggo pareksaon ma hanami sadari on, halani pambahenan na madear bani sada halak na boritan, atap marhitei aha do ia, ase malum, 4:10 botoh nasiam ma haganup ampa haganup bangsa Israel: Marhitei goran ni Jesus Kristus na hun Nasaret ai do, ai ma na pinarsilangkon nasiam, tapi na pinapuho ni Naibata humbani na matei, marhitei ai do, ase jongjong halak on malum itongah-tongahnasiam. (bd. 3:15, 16; 5:30.) 4:11 Ia do in, batu na niambukkon ni nasiam tukang, na dob gabe batu parsuhi. (Ps. 118:22; Mat. 21:42.) 4:12 Anjaha seng dong haluahon ibagas atap ise na legan, ai seng dong goran na legan itoruh ni langit ibere bani jolma, parhiteianta hu haluahon.(bd. 10:43; Mat. 1:21.) 4:13 Dob iidah sidea hinsah ni uhur ni si Petrus ampa si Johannes ai, anjaha ibotoh homa, sedo halak sijamah surat sidea, tapi jolma na somal do, gabe longang ma uhur ni sidea; itanda do sidea, ai ma, na rap pakon Jesus do sidea hinan. 4:14 Anjaha iidah sidea do homa jongjong ijai rap pakon sidea halak na dob pinamalum ai, gabe seng tarhatahon sidea be atap aha pe. (bd. 3:8, 9.) 4:15 Ihatahon sidea ma, ase luar sidea lobei hun parrapotan ai, gabe manriah ma sidea samah sidea: 4:16 Aha ma sibahenonta bani halak on? Ai torang do talar, na binahen ni sidea ai, ibotoh ganup parhuta Jerusalem, seng tarporsou hita. (bd. 3:8-10; Joh. 11:47.) 4:17 Tapi, ase ulang lambin rarat ai bani halak na mabuei in, gogoh ma sidea palumba hita, ase ulang be sidea marsahap atap hubani ise pe marhitei Goran ai. (bd. 5:28.) 4:18 Dob ai idilo ma sidea, anjaha ilarang ma, na so bulih be sidea marsahap atap mangajari marhitei Goran Jesus. 4:19 Tapi nini si Petrus ampa si Johannes ma mambalosi sidea: Nasiam ma manimbangi, atap na pintor ma ai ilobei ni Naibata, anggo balosan hanami bani nasiam ase bani Naibata. (bd. 5:29.) 4:20 Ai seng tarbahen hanami lang mangkatahon na dob iidah ampa ibogei hanami. (1 Joh. 1:1-4.) 4:21 Jadi dob ipalumba sidea gomos, ipaluah ma sidea, ai seng jumpah sidea dalan, laho manguhumi sidea halani na mabuei ai, ai haganup do mamuji Naibata halani na masa ai. 4:22 Ai lobih ma ompat puluh tahun umur ni halak na pinamalum ai marhitei tanda halongangan ai. 4:23 Dob maluah sidea, laho ma sidea marayak hasoman ni sidea, anjaha ibaritahon ma bani sidea haganup, na hinatahon ni sintua ni malim ampa pangintuai ai bani sidea. 4:24 Jadi dob ibogei sidea ai, sasora ma sidea martonggo bani Naibata, nini ma: Ham Tuhan, Ham do sijadihon langit, tanoh pakon laut ampa haganup isini! (Neh. 9:6.) 4:25 Ham do marsahap marhitei Tonduymu, humbani pamangan ni ompungnami si Daud, juak-juakmu ai, sonon: Mase oga-oga bangsa parbegu, anjaha na so marguna ipingkiri bangsa-bangsa? (Ps. 2:1, 2.) 4:26 Jongjong do raja-raja ni tanoh on, anjaha martumpu do siparkuasa, laho mangimbang Tuhan in, ampa na mininakanni? 4:27 Ai tongon do, na dob martumpu do i huta on si Herodes, si Pontius Latus, rap pakon bangsa parbegu ampa bangsa Israel, laho mangimbang Jesus, juak-juakmu na pansing in, na dob mininakanmu in, (Luk. 23:12.) 4:28 laho pasaudkon, na dob tinontuhonmu hinan marhitei kuasamu ampa sura-suramu. (bd. 2:23.) 4:29 Ai pe, Ham Tuhan, tonggor Ham ma asup-asup ni sidea in, anjaha bere Ham ma bani jabolonmu hinsah ni uhur, laho mangkatahon hatamu! (Ep. 6:19.) 4:30 Surdukkon Ham ma tanganmu, laho mambahen hamalumon, tanda ampa halongangan marhitei Goran ni Jesus, juak-juakmu na pansing in! 4:31 Jadi dob martonggo sidea, dugur ma ianan partumpuan ni sidea ai, anjaha gok Tonduy Na pansing ma sidea haganup, gabe marhinsah ni uhur ma sidea mangkatahon hata ni Naibata. (bd. 2:4; 13:52.) 4:32 Ia halak na porsaya na satumpuan ai sauhur do anjaha sada tonduy. Seng dong humbani sidea na mangkatahon ia sandiri simada na dong bani, tapi parbagianan rup do ai ihira. (bd. 2:44; Joh. 17:21, 22.) 4:33 Anjaha marhagogohon banggal do apostel ai manaksihon parpuhoon ni Tuhan Jesus, anjaha igoki idop ni uhur banggal do sidea haganup. (bd. 2:47.) 4:34 Ai seng dong atap ise sidea na hurangan; ai haganup siparjuma atap siparrumah, ijual do ai, anjaha iboan ma boli ni na jinual ni sidea ai, (bd. 2:45; Luk. 12:33.) 4:35 itibalhon ma ai hulobei ni apostel ai, dob ai ibagihon hubani na hurangan. 4:36 Umpamani si Josep, na ginoran ni apostel-apostel ai si Barnabas, artini anak ni pangapohon, sada halak Lepi, hun pulou Kiprus, (bd. 11:22, 24.) 4:37 ijual do jumani, anjaha iboan ma bolini ai lanjar itibalhon ma ilobei ni apostel ai.

Lahoan ni Apostel 5

5:1 Adong ma ijia sada halak na margoran si Ananias, rap pakon parinangonni, na manjualhon tanohni. 5:2 Ibagas botoh ni parinangonni, iponopkon do deba bolini ai, deba iboan anjaha iberehon ilobei ni apostel ai. (bd. 4:35, 37.) 5:3 Tapi nini si Petrus ma: Ale Ananias, mase ma igoki sibolis uhurmu, gabe iladungi ham Tonduy Na pansing, anjaha iponophon ham deba boli ni tanoh ai? (Luk. 22:3; Joh. 8:44; 13:2.) 5:4 Anggo ijolomi ham in, ai lang saguru bamu do, anjaha ijual ham pe in, ai lang tong do saguru bamu? Mase ma tubuh uhurmu mambahen na sonin? Sedo jolma na niladunganmu ijin, Naibata do! (1 Tes. 4:8.) 5:5 Tapi ijin ibogei si Ananias hata ai, tompas ma ia lanjar rotap hosahni. Jadi mabiar tumang ma haganup na mambogeisi. 5:6 Jadi roh ma halak siposonan, ibaluti sidea ma bangkeini ai, dob ai iusung ma hudarat laho mananom. (3 Mus. 10:1-5.) 5:7 Dob salpu hira-hira tolu jam roh ma parinangonni ai, tapi lape ibotoh na masa ai. 5:8 Jadi iparsahapkon si Petrus ma ia: Hatahon ma bangku, na sa on do ijual nasiam tanoh ai? Eak, na sa in do, nini. 5:9 Tapi nini si Petrus ma hubani: Mase ma sauhur nasiam manlajou Tonduy ni Tuhan in? Tonggor ma, bokas ni nahei ni na mananom paramangonmu, ham pe usungon ni sidea ma hu darat! 5:10 Jadi mintor tompas ma ia ilobei ni nahei ni si Petrus, lanjar rotap ma hosahni. Jadi sanggah masuk halak siposonan ai, domma matei ia jumpah sidea, iusung sidea ma ia hu darat, anjaha itanom ma hulambung ni paramangonni. 5:11 Jadi mabiar tumang ma haganup na sakuria ai ampa haganup na mambogei ai. 5:12 Jadi masa ma buei tanda ampa halongangan marhitei tangan ni apostel ai bani na mabuei ai; sauhur do sidea haganup, martumpu do sidea i surambih ni si Salomo. (bd. 2:43; 3:11.) 5:13 Tapi humbani na legan ai, seng dong na pag pasaorhon dirini hubani sidea; sangap do sidea iidah jolma simbuei. 5:14 Anjaha lambin tambah do na porsaya bani Tuhan in, buei dalahi sonai age naboru, (bd. 2:47; 4:4; 6:7.) 5:15 pala ipamboan sidea na boritan hu alaman, anjaha ipatibal bani podoman ampa apei, andohar hona halinoh ni si Petrus sidea sanggah montas ia. (bd. 19:11, 12; Joh. 14:12.) 5:16 Dihut do hun huta-huta na inggot ai roh buei halak hu Jerusalem, mamboan na boritan ampa na niodar-odar ni tonduy na mabutak, gabe malum ma sidea haganup. (bd. 8:7; Mrk. 16:17.) 5:17 Jadi martindak ma sintua ni malim ai ampa haganup na mangkasomanisi, ai ma golongan Sadukei, igoki ringis do simburu ni uhur ni sidea, (bd. 4:1, 6.) 5:18 itangkap sidea ma apostel ai anjaha imasukkon ma sidea hu tutupan umum. 5:19 Tapi bornginni ai, ibuha sada malekat ni Tuhan in ma labah ni tutupan ai, iboan ma sidea hu darat lanjar nini ma: (bd. 12:7.) 5:20 Laho ma nasiam hu rumah panumbahan, hatahon nasiam ma bani halak na mabuei ai pasal hata hagoluhan in! 5:21 Mambogei ai, jadi sogod ma sidea misir hu rumah panumbahan ai laho mangajari. Ia sintua ni malim ampa na mangkasomanisi, iadongkon sidea ma rapot bolon rap pakon pangintuai-pangintuai ni bangsa Israel, anjaha isuruh ma hu tutupan na mangalop sidea. 5:22 Tapi dob das hujai juak-juak ai, seng adong jumpah sidea ijai, gabe mulak ma sidea patugahkon ai, nini ma: 5:23 Tutup tumang do namin tutupan ai jumpah hanami, anjaha parjaga jongjong ilobei ni labah ai; tapi dob iungkab hanami, ise pe lang jumpah hanami ibagas. 5:24 Ase dob ibogei kopala ni rumah panumbahan ampa sintua ni malim ai hata ai, haru ma uhur ni sidea mamingkiri, atap na sonaha do holi dobni ai. 5:25 Tapi roh ma sada halak na patugahkon bani sidea: Tonggor nasiam ma, i rumah panumbahan do halak na pinatutupkonnasiam ondi mangajari halak na mabuei! 5:26 Jadi laho ma kopala ni rumah panumbahan ai rap pakon juak-juak ai mangalop sidea, tapi seng marhasoman paksa, halani mabiar sidea ipargijig halak na mabuei ai. (bd. 4:21.) 5:27 Iboan ma sidea anjaha ipajongjong ilobei ni rapot bolon ai. Jadi ipareksa sintua ni malim ai ma sidea, nini ma: 5:28 Gomos do ilarang hanami hanima mangajari marhitei Goran ai, hape lambin igoki hanima do huta Jerusalem marhitei podahnima, ase marsapata bannami daroh ni Halak ondi, nini uhurnima. (bd. 4:18; Mat. 27:25.) 5:29 Jadi nini si Petrus ampa apostel-apostel ai ma mambalosi: Maningon balosan do diri bani Naibata ase bani jolma!(bd. 4:19; Dan. 3:18.) 5:30 Ipapuho Naibata ni ompungta do Jesus, na binunuhnasiam marhitei na manggantungkonsi bani hayu na marsilang. (bd. 3:15; 10:39, 40.) 5:31 Ipagijang Naibata do Ia hu siamunni gabe Pambobai anjaha Sipaluah, laho mambere hubani Israel hamubahon ni uhur ampa hasasapan ni dousa. (bd. 2:33-36.) 5:32 Hanami do saksi pasal ai ampa Tonduy Na pansing, na binere ni Naibata bani na mambalosiSi. (Luk. 24:48; Joh. 15:26-27.) 5:33 Tapi mambogei ai marah tumang ma sidea, gabe iputushon sidea ma sihol mambunuh sidea. 5:34 Tapi jongjong ma bani rapot ai sada halak Parisei, na margoran si Gamaliel, sada sibotoh titah, na sangap bani uhur ni bangsa ai, jadi ihatahon ma, ase isuruh sidea hu darat tongkin. (bd. 22:3.) 5:35 Dob ai nini ma hubani sidea: Nasiam halak Israel, pangkei ma nasiam pasal sibahenonnasiam bani halak on! 5:36 Jongjong do ijia si Toidas, ipabanggal do dirini, pala adong ompat ratus halak na mangirikkonsi. Tapi tarbunuh do ia, gabe merap do ganup na mangirikkonsi, anjaha seng dong be. (bd. 21:38.) 5:37 I pudini ai, jongjong do use si Judas, halak Galilea ai, sanggah panorang sensus ondi, anjaha buei do halak na mamberontak iarahkon; tapi ia pe tarbunuh do, anjaha merap do na mangirikkonsi ai. 5:38 Ase ai pe, ulang ma kahua nasiam halak on, paturut nasiam ma sidea, ai anggo humbani jolma do sura-sura ampa horja on, sai na maseda do in. (Mat. 15:13.) 5:39 Tapi anggo humbani Naibata do, seng tarkahua nasiam sidea, ulang gabe siimbang Naibata nasiam holi. Jadi iparhatongon sidea ma hatani ai. 5:40 Dob ai idilo sidea ma apostel ai; isuruh ma na manlonsingi sidea anjaha ilarang ma sidea mansahapkon Goran Jesus; salpu ai ipaluah ma sidea. (bd. 4:17, 18; 22:19.) 5:41 Tapi malas do uhur ni sidea luar hun rapot ai, halani boi sidea manaron hiri-hiri mangkopkop Goran ni Jesus. (Mat. 5:10-12; 1 Ptr. 4:13.) 5:42 Anjaha seng marnamaronti sidea i rumah panumbahan age marrumah-rumah pe, mangajari ampa mangambilankon Kristus Jesus. (Mrk. 16:15.)

Lahoan ni Apostel 6

6:1 Bani panorang ai, dob lambin martambah buei ni susian ai, tubuh ma ungut-ungut ni halak parsahap Gorik dompak parsahap Heber, halani hurang panatapan bani na mabalu humbani sidea ibagas pangurupion ari-ari. 6:2 Jadi ipahumpul na sapuluh dua ai ma haganup susian ai, nini ma: Seng patut iahap hanami papudionnami parambilanon bani hata ni Naibata, halani na patorsa-torsa idop ni uhur. 6:3 Ai pe nasiam sanina, pindahi nasiam ma hun tongah-tongahnasiam pitu halak, na dear baritani, na ginokan ni Tonduy anjaha na pantas maruhur, sipabangkitonta bani horja in. (1 Tim. 3:7, 8.) 6:4 Tapi, anggo hanami, tonggo ampa horja parambilannon ai ma horjahononnami. 6:5 Jadi rosuh ma uhur ni na sakuria ai bani hata ai, gabe ipilih sidea ma si Stepanus, sada halak na gok haporsayaon ampa Tonduy Na pansing, dob ai si Pilippus, si Porkorus, si Nikanor, si Timon pakon si Parmenas, ambah ni ai si Nikolaos, sada parguru hun Antiokia. (bd. 8:5; 21:8.) 6:6 Ipajongjong ma sidea ilobei ni apostel ai, anjaha dob martonggo sidea, itampeihon sidea ma tanganni bani sidea. (bd. 1:24; 13:3; 14:23.) 6:7 Jadi lambin rarat ma hata ni Naibata, anjaha tambah bilangan ni susian ai i huta Jerusalem; buei do age malim, na gabe porsaya. (bd. 19:20.) 6:8 Ia si Stepanus gok idop ni uhur do ampa hagogohon; boi do ia mambahen halongangan ampa tanda na banggal ilobei ni na mabuei ai. 6:9 Jadi roh ma deba halak marsual dompak si Stepanus, ai ma halak na humbani parguruan, na margoran Libertini, ampa na hun Kirene, hun Alexandria, hun Kilikia ampa Asia. 6:10 Tapi seng tarimbang sidea hapentaranni ampa Tonduy ai, na mangajarisi. (Luk. 21:15.) 6:11 Jadi ijuljul sidea ma deba halak, na mangkatahon: Ibogei hanami do halak on mangkatahon hata apas-apas dompak si Musa ampa Naibata. 6:12 Ipajobu-jobu sidea do halak na mabuei ai ampa pangintuai ampa sibotoh surat, gabe idorab sidea ma si Stepanus, anjaha isarad hu lobei ni rapot bolon ai. 6:13 Ipajongjong sidea do saksi siparladung, na mangkatahon: Seng na marnamaronti halak on mangkatai ianan na pansing in age titah in, (Jer. 26:11.) 6:14 ai ibogei hanami do ihatahon: Parsedaon ni Jesus na hun Nasaret ma rumah panumbahan in, anjaha paubahonni do adat, na ijalo hita humbani si Musa. 6:15 Anjaha ganup do parrapot ai mannonoisi; songon bohi ni malekat do bohini iidah sidea.

Lahoan ni Apostel 7

7:1 Jadi nini sintua ni malim ai ma: Atene, tongon do sonai? 7:2 Jadi nini si Stepanus ma: Nasiam sanina ampa bapa-bapa, tangar nasiam ma lobei! Ipataridahkon Naibata na sangap in do Dirini hubani ompungta si Abraham, sanggah i Mesopotamia ia, sanggah lape ope ia marianan i Haran. 7:3 Ihatahon do hubani: Bungkas ma ho hun tanohmin ampa humbani sindohormu, laho ma ho hu tanoh sipatuduhononku bam! 7:4 Jadi bungkas ma ia hun tanoh Kaldea, marianan ma ia i Haran. Dob matei bapani, isuruh Naibata ma ia pindah hunjai hu tanoh na niiankon nasiam on sonari. (1 Mus. 11:31, 32; 12:5.) 7:5 Seng ibere ope bani parbagianan ijai, sanjongkal pe lang, tapi iparbagah do, berehononni tanoh in bani, ase ia simada in ampa ginomparni, age pe seng dong anakni. (1 Mus. 12:7; 13:15.) 7:6 Ai sonon do nini Naibata: Gabe panginsolat do ginomparmu i tanoh na legan; parjabolonon anjaha arsik-arsikon ni halak do sidea ompat ratus tahun dokahni. (1 Mus. 15:13; 2 Mus. 12:40.) 7:7 Dob ai uhumonku do bangsa na binalosan ni sidea ai, nini Naibata; salpu ai bungkas ma sidea hunjai, anjaha sombahon ni sidea ma Ahu bani ianan on. 7:8 Lanjar ibere ma bani sidea padan parsunaton. Dob sonai, tubuh ma bani si Abraham si Isak, bani si Isak tubuh si Jakob, anjaha bani si Jakob ompungta na sapuluh dua ai. (1 Mus. 17:10.) 7:9 Halani subil ni ompungta ai bani si Josep, ijual sidea do ia hu tanoh Masir. Tapi ihasomani Naibata do ia, (1 Mus. 37:28; 39:1, 2, 21.) 7:10 ipaluah do ia humbani haganup hasunsahanni, anjaha ibere bani idop ni uhur ampa hauhuron ilobei ni Parao, raja ni Masir, gabe ipabangkit ma ia gabe panrajai ni tanoh Masir ampa haganup rumahni. (1 Mus. 41:40, 41.) 7:11 Jadi masa ma lohei i sab tanoh Masir ampa tanoh Kanaan, na mangkorhon hasunsahan banggal, seng jumpahan sipanganon be ompungta. 7:12 Anjaha dob ibogei si Jakob adong gandum i tanoh Masir, gabe isuruh ma hujai ompungta, ai ma na parlobei sahali. (1 Mus. 42:1.) 7:13 Bani na paduahalihon ipatandahon si Josep ma dirini bani saninani ai, gabe torang ma bani Parao pasal partuturan ni si Josep. (1 Mus. 45:3, 4, 16.) 7:14 Jadi isuruh si Josep ma na mangalop si Jakob ampa haganup na sapanganan bani, pitu puluh lima bueini. (1 Mus. 45:9-11.) 7:15 Ase tuad ma si Jakob hu tanoh Masir, dob ai matei ma ia rap pakon ompungta ai. (1 Mus. 46:1-7; 49:33.) 7:16 Iboan sidea do ia hu Sikem, anjaha inahkon hu tanoman, na binoli ni si Abraham marhitei duit pirak humbani ginompar ni si Hemor i Sikem. (1 Mus. 23:16, 17; Jos. 24:32.) 7:17 Jadi dob lambin dohor panorang na pinarbagah ni Naibata, ai ma na binulawankonni hinan bani si Abraham, lambin tambah anjaha manggargar ma bangsanta i tanoh Masir, (2 Mus. 1:7.) 7:18 paima bangkit sada raja na legan, na so manandai si Josep. 7:19 Akal do ibahen mangagou bangsanta, gabe tarpaksa do ompungta mangambukkon dakdanak ni sidea na baru tubuh, ase ulang torus manggoluh. (2 Mus. 1:10, 22.) 7:20 Bani panorang ai tubuh ma si Musa, anjaha marosuh do Naibata mangidahsi. Tolu bulan do ia iparmudu-mudu i rumah ni bapani, (2 Mus. 2:2; Heb. 11:23.) 7:21 dob ai itaruhkon ma hu darat, tapi ibuat boru ni Parao ma ia, anjaha ipagodang-godang ma songon anakni sandiri. (2 Mus. 2:5-10.) 7:22 Iajarhon do hubani sagala hapentaran ni halak Masir, gabe margogoh ma ia bani hata ampa pambahenan. 7:23 Dob marumur ia ompat puluh tahun, tubuh ma uhurni manonggor saninani, halak Israel. (2 Mus. 2:11-15.) 7:24 Anjaha sanggah iidah sada halak hona arsik, iurupi ma na hona arsik ai, iluluhon ma ia marhitei na mambunuh halak Masir ai. 7:25 Iagan, dapot uhur ni saninani ai ma, paboa urupan ni Naibata ma sidea marhitei tanganni, tapi seng dapot uhur ni sidea ai. 7:26 Patar ni ai, roh use ma ia, tudu sanggah maringori sidea, anjaha iojur ma sidea ase mardamei, nini ma: Na marsanina do nasiam, mase maringori nasiam samah nasiam? 7:27 Tapi itulak na marsalah ai do ia, nini: Ise pabangkit ho gabe panrajai ampa panguhum bannami? 7:28 Ai sihol bunuhonmu do ahu, songon na binunuhmu halak Masir nantuari? 7:29 Manangar hata ai lintun ma si Musa, laho manginsolat i tanoh Midian, anjaha tubuh ma dua anak bani ijai. (2 Mus. 2:15, 22; 18:34.) 7:30 Jadi dob salpu ompat puluh tahun, taridah ma sada malekat bani i halimisan ni dolog Sinai, ibagas jilam ni apuy bani naporon. 7:31 Longang do si Musa mangidah na niidahni ai, anjaha dob idohori laho papangkeihon, tarbogei ma sora ni Tuhan in: 7:32 Ahu do Naibata ni ompungmu, ai ma Naibata ni si Abraham, si Isak, ampa si Jakob. Jadi hitir-hitir ma si Musa, seng pag be ia papangkeihon. (2 Mus. 3:6; Mat. 22:32.) 7:33 Tapi nini Tuhan in ma hubani: Tanggali ma sipatumin humbani naheimu, ai tanoh na susi do ianan hajongjonganmin. 7:34 Domma tangkas huidah hamarsikon na tinaron ni bangsaku i tanoh Masir, domma hutangar hoih-hoih ni sidea; anjaha turun do Ahu laho paluahkon sidea. Ai pe roh ma ho, sihol suruhonku do ho hu tanoh Masir. 7:35 Si Musa, na tinulak ni sidea ai, marhitei na mangkatahon: "Ise pabangkit ho gabe panrajai ampa panguhum?" ia do isuruh Naibata, gabe panrajai ampa sipaluah marhitei malekat na niidahni ai bani naporon ai. (2 Mus. 2:14; Jes. 63:9-12.) 7:36 Iarahkon do sidea bungkas, marhitei halongangan ampa tanda na binahenni ai i tanoh Masir, i laut Sigerger ampa halimisan ompat puluh tahun dokahni. (2 Mus. 7:10-25; 14:21.) 7:37 Si Musa, ai ma na mangkatahon bani halak Israel: Pajongjongon ni Naibata do sada nabi bani nasiam, hun tongah-tongahnasiam songon ahu on. (5 Mus. 18:15.) 7:38 Ia do ai, bani kuria na i halimisan ai rap pakon ompungta ampa malekat ai, na marsahap pakonsi i dolog Sinai. Ia do na manjalo hata na manggoluh sipadasonni hubanta. (2 Mus. 19:3; 5 Mus. 32:47.) 7:39 Tapi seng itangihon ompungta ia, itulak sidea do ia, anjaha mulak do uhur ni sidea hu tanoh Masir. (4 Mus. 14:3, 4.) 7:40 Ihatahon sidea do bani si Aron: Bahen ma bannami Naibata, na mambobai hanami, ai seng ibotoh hanami, atap aha do na masa bani si Musa, na dob mangarahkon hanami luar hun tanoh Masir. (2 Mus. 32:1.) 7:41 Jadi igana sidea ma ijia sada anak ni lombu, iboan sidea ma galangan bani gana-gana ai, anjaha marmalas ni uhur ma sidea halani bahen-bahenan ni tangan ni sidea ai. 7:42 Tapi itundali Naibata ma sidea, ipaturut ma sidea marsombah bani na pinarnaibata ni sidea i langit ai, songon na tarsurat ibagas buku ni nabi-nabi: Ai adong do isombahkon nasiam Bangku galangan sisayaton ampa sibere-bere ibagas siompat puluh tahun na i halimisan ai, ale bangsa Israel? (Ams. 5:25-27; Rom 1:24.) 7:43 Ipausung-usung nasiam do rumah ni Molok ampa bintang ni naibata Rephan ampa gana-gana na binahen nasiam gabe sisombahonnasiam. Hu dipar ni Babel ope buangkononku nasiam. (1 Raj. 11:7.) 7:44 Adong do bani ompungta lampo-lampo hasaksian, usih songon na dob niaturhon ni Naibata hubani si Musa marhitei hatani, ai ma, ase ibahen ai domu hubani usihan, na dob niidahni ai. (2 Mus. 25:9, 40; 26:30.) 7:45 Ai ma na ijalo ompungta, lanjar iboan rap pakon si Josua laho patundukkon bangsa-bangsa, na niusir ni Naibata ilobei ni ompungta ai, das hubani panorang ni si Daud. (2 Mus. 34:11; Jos. 3:14.) 7:46 Jumpahan idop ni uhur do ia ilobei ni Naibata, gabe ipindo ma, ase ipalopas ia laho pasirsirhon ianan bani Naibata ni si Jakob. (2 Sam. 7:2; Ps. 132:5.) 7:47 Tapi si Salomo do saud pajongjong rumah Bani. (1 Raj. 6.) 7:48 Tapi lang marianan Sitimbulan in ibagas rumah na pinauli ni tangan, songon na hinatahon ni nabi ai: 7:49 Langit do paratas Bangku, anjaha tanoh onjolan bani naheihu. Rumah aha ma in, na sihol paulionmu Bangku, nini Tuhan in, atap ianan aha ma na boi gabe parsaranan Bangku? 7:50 Ai lang tanganku do paulihon in ganup? 7:51 E nasiam sihengkeng uhur, na so marsunat uhur ampa pinggolni, ilawan nasiam do tongtong Tonduy Na pansing in; usih do nasiam songon ompungnasiam ai. (2 Mus. 32:9; 5 Mus. 10:16.) 7:52 Ise ma humbani nabi ai, na so pinarburu ni ompungnasiam? Ibunuh sidea do na manjaha pasal parroh ni Parpintor in, ai ma na dob tinahihon ampa na binunuhnasiam, (2 Kor. 36:16; Mat. 23:31.) 7:53 nasiam sijalo titah in, na pinadas marhitei malekat, hape seng idalankon nasiam. (2 Mus. 20; Heb. 2:2; Gal. 3:19.) 7:54 Mambogei ai marah tumang ma uhur ni sidea, harat-harat ipon ma sidea hubani. (bd. 5:33.) 7:55 Gok Tonduy Na pansing ma si Stepanus; mangkawah ma ia dompak langit, gabe iidah ma hasangapon ni Naibata ampa Tuhan Jesus jongjong i siamunni. (bd. 6:5; Mat. 26:64.) 7:56 Jadi nini ma: Tonggor ma, huidah do mungkab langit, anjaha Anak ni jolma in jongjong hampit siamun ni Naibata! (Luk. 22:69; 1 Ptr. 3:22.) 7:57 Jadi marsurak-surak ma sidea anjaha marsitutup pinggolni bei; lanjar rap ma sidea mandorabsi. 7:58 Isarad sidea ma ia hu darat ni huta ai, anjaha ipargijig bani batu. Ia saksi-saksi ai, itibalhon bei do pakeianni ilobei ni sada garama, na margoran si Saulus. (bd. 22:20; 5 Mus. 17:7.) 7:59 Sanggah na ipargijig sidea ai si Stepanus bani batu, dilo-dilo do ia, nini: Ham Tuhan Jesus, jalo Ham ma tonduyhu!(Ps. 31:6; Luk. 23:46.) 7:60 Manrogop ma ia anjaha ipagomos ma sorani mangkatahon: Ham Tuhan, ulang ma hira Ham dousa ni sidea in! Jadi dob ihatahon sonai, matei ma ia. (Mat. 5:44; Luk. 23:34.)

Lahoan ni Apostel 8

8:1 Ia si Saulus rosuh do uhurni pasal pambunuhon ai. Jadi masa ma bani panorang ai pangayak-ayakon banggal dompak kuria na i Jerusalem. Haganup sidea, merap ma hu nagori Judea ampa Samaria, sobali ni apostel-apostel ai. (bd. 7:58; 11:19.) 8:2 Itanom halak na daulat maruhur ma si Stepanus, anjaha tangis tumang do sidea halani ai. (Mat. 14:12.) 8:3 Ia si Saulus, iparseda do kuria ai; imasuki do rumah-rumah, anjaha isarad ma hunjai dalahi ampa naboru laho padaskon hu tutupan. (bd. 9:1; 13:21; 22:4.) 8:4 Ia halak na merap ai, isiar sidea ma sab tanoh ai lanjar mangambilankon ambilan na madear. (bd. 11:9.) 8:5 Anjaha si Pilippus pe tuad ma hu huta Samaria, iambilankon ma bani sidea Kristus in. (bd. 6:5.) 8:6 Jadi dob ibogei na mabuei ai ambilan ni si Pilippus, anjaha iidah homa tanda-tanda na binahenni ai, sauhur ma sidea marimbagaskonsi. 8:7 Ai buei do humbani na setanon luar tonduy na mabutak marhasoman sora na mardilo-dilo. Buei do homa na oyangon ampa na tempang ipamalum. (bd. 5:16; Mrk. 16:17.) 8:8 Jadi malas tumang ma uhur ni sidea na sahuta ai. 8:9 Tapi adong do ibagas huta ai hinan sada halak na margoran si Simon, parsibalik mata, na paoto-otohon halak Samaria ai, ai ihatahon na lobih do ia. (bd. 13:6, 8.) 8:10 Jadi haganup ma naetek na magodang porsaya bani, nini sidea: On ma hagogohon ni Naibata, na ginoran: Tang na-Banggal! 8:11 Ase ipairik-irik sidea pe ia, halani na dob dokah do sidea ipaoto-oto marhitei parsibalik-mataonni ai. 8:12 Tapi dob porsaya sidea bani na niajarhon ni si Pilippus, ai ma pasal harajaon ni Naibata ampa Goran Jesus, gabe tardidi ma sidea dalahi ampa naboru. (Mat. 28:19.) 8:13 Si Simon pe porsaya ma, anjaha dob tardidi ia, sai ipairik-irik ma si Pilippus, longang tumang ia mangindah tanda ampa hagogohon na banggal, na masa ai. 8:14 Anjaha dob ibogei apostel-apostel na i Jerusalem, na dob ijalo halak Samaria ai hata ni Naibata, isuruh sidea ma si Petrus ampa si Johannes marayak sidea. 8:15 Tuad ma sidea anjaha itonggohon ma sidea ase ijalo sidea Tonduy Na pansing, 8:16 ai seng ope sogop Tonduy Na pansing atap bani ise pe sidea, pitah tardidi ope sidea hubagas goran ni Tuhan Jesus. 8:17 Jadi itampeihon apostel ai ma tanganni bani sidea, gabe ijalo sidea ma Tonduy Na pansing. 8:18 Dob iidah si Simon apostel ai mambere Tonduy Na pansing marhitei na manampeihon tangan, roh ma ia mamboan duit bani sidea, 8:19 nini ma: Bere nasiam ma homa kuasa na sonin bangku, ase manjalo Tonduy Na pansing halak, anggo hutampeihon tanganku bani. 8:20 Jadi nini si Petrus ma hubani: Magou ma ho rap pakon pirakmin, ai iagan ho gakni tarboli sibere-bere ni Naibata marhitei duit! (Mat. 10:8.) 8:21 Seng parrupei atap marhak ho bani kuasa on, ai seng pintor uhurmu dompak Naibata. (Neh. 2:20.) 8:22 Ai pe, paubah ma uhurmu humbani hajahatonmin, dob ai pindo ma humbani Naibata, andohar boi tarsasap tahi-tahi ni uhurmin. 8:23 Ai huidah gok pogu na paet ampa jorat hagedukon do ho. (5 Mus. 29:17.) 8:24 Jadi nini si Simon ma marbalos: Tonggohon nasiam ma ahu hubani Tuhan in, ase ulang mangonai bangku na hinatahonmu ai. (2 Mus. 10:17; 1 Sam. 12:19.) 8:25 Ase dob isaksihon anjaha ihatahon sidea hata ni Tuhan in, mulak ma sidea hu Jerusalem, lanjar mangambilankon ambilan na madear bani buei huta ni nagori Samaria. 8:26 Tapi iparsahapkon malekat ni Tuhan in ma si Pilippus, nini ma: Jongjong ma ho, laho ma ho marayak tongah ari hu dalan ai, na tuad hun Jerusalem hu Gaza. Ia dalan ai lungun do. 8:27 Jadi jongjong ma ia lanjar misir. Anjaha tonggor ma, adong do ijai sada halak Etiopia, sada pegawai istana, manteri ni Kandake, Raja naboru ni Etiopia, siramotkon haganup artani. Na laho do ia hu Jerusalem martonggo, 8:28 anjaha na mulak ma ia nuan, hundul ibagas garetani mambasa buku ni nabi Jesayas. 8:29 Ihatahon Tonduy in ma hubani si Pilippus: Laho ma hujai, dohori ma gareta ai! 8:30 Laho ma si Pilippus, ibogei ma ia mambasa surat ni nabi Jesayas. Nini ma: Iarti ham do na binasamu in? 8:31 Jadi nini ma: Sonaha ma boi huartihon in, anggo seng dong na patorangkonsi bangku. Lanjar iojur ma si Pilippus naik, hundul i lambungni. 8:32 Ia hata ni surat, na binasani ai, ai ma: Itogu do Ia songon biri-biri hu panayatan anjaha songon anak ni biri-biri, na sipsip ilobei ni sipangguntingisi, sonai do Ia seng ibuha pamanganni. (Jes. 53:7, 8.) 8:33 Ibagas hadorunon salosei do uhum na bani ai. Ise ma na boi manghira ginomparni? Ai tarangkat do goluhni hun tanoh on. 8:34 Dob ai nini pagawei istana ai ma hubani si Pilippus: Husungkun ma ham, ise do na hinatahon ni nabi ai ijin? Pasal dirini do atap pasal halak na legan do? 8:35 Dob ai marsahap ma si Pilippus marbona humbani hata ondi, ibaritahon ma bani pasal Jesus. 8:36 Anjaha sanggah na mannunuti dalan ai, das ma sidea hubani sada bah; jadi nini pagawei ai ma: Andon ma bah! Adong ope na manlanglangi ase tardidi ahu? (bd. 10:47.) 8:37 Jadi nini si Pilippus ma: Anggo na porsaya do ham humbani gok ni uhurmu, dear do! Ibalosi ma ia: Na porsaya do ahu, Anak ni Naibata do Jesus Kristus! (Mat. 16:16; Mrk. 16:16.) 8:38 Ihatahon ma marsaran gareta ai, gabe tuad ma sidea haduasi, si Pilippus ampa parpangkat ai hu bah ai, lanjar ididi ma ia. 8:39 Tapi sanggah na tangkog ai sidea humbani bah ai, jadi iluahon Tonduy ni Tuhan in ma si Pilippus, gabe seng iidah parpangkat ai be ia; marmalas ni uhur ma ia mannunuti sidalanni. (1 Raj. 18:12.) 8:40 Ia si Pilippus, i Asdod do ia jumpah; sanggah na montas ai ia, iambilankon do ambilan na madear bani ganup huta-huta ai ronsi na das ia hu Kesarea. (bd. 21:8, 9.)

Lahoan ni Apostel 9

9:1 Ia si Saulus sai tong ope iondamhon ondam-ondam ampa pamunuhon dompak susian ni Tuhan in. Laho ma ia hubani sintua ni malim, (bd. 8:3.) 9:2 ipindo ma humbani surat, siboanonni hu Damaskus bani parguruan na ijai ai, ase anggo adong jumpahsi siirikkon ugama ai, dalahi atap naboru pe, boi sangkutonni anjaha boanonni ai hu Jerusalem. 9:3 Tapi sanggah itongah dalan ia, mandohori huta Damaskus, sompong ma marsinalsal sondang hun langit, inggot hu bani, (1 Kor. 15:8.) 9:4 gabe tompas ma ia hu tanoh, anjaha ibogei ma sada sora, na marsahap hubani: Saul, Saul, mase pardakdakonmu Ahu? (Mat. 25:40, 45.) 9:5 Jadi nini ma: Ise do Ham Tuhan? Roh balos: Jesus do Ahu, na pinardakdakmin. (bd. 5:39.) 9:6 Tapi jongjong ma ho, masuki ma huta in, ijai pe patugahon bam sibahenonmu! 9:7 Ia hasomanni na saodoran ai, jonong do hansa, ai ibogei sidea do sora ai, tapi ise pe lang iidah. 9:8 Jadi jongjong ma si Saulus hun tanoh ai; age pe bodak matani, aha pe lang iidah. Gabe itogu sidea mando ia, laho mambobansi hu Damaskus. 9:9 Tolu ari dokahni seng marpangidah ia, anjaha seng mangan atap minum pe. 9:10 Jadi adong ma sada susian i Damaskus, na margoran si Ananias. Ihatahon Tuhan in ma hubani ibagas sada panonggoran: Ale Ananias! Balosni: Ijon do ahu, Tuhan! 9:11 Jadi ihatahon Tuhan in ma hubani: Jongjong ma, laho ma ho hu dalan na margoran Dalan Sipintor, anjaha sungkun ma ijai, i rumah ni si Judas pasal sada halak na margoran si Saulus, na hun Tarsus. Jumpah ho do ia martonggo, (bd. 21:39.) 9:12 anjaha domma iidah masuk sada halak, na margoran si Ananias, manampeihon tanganni bani, ase mulak marpangidah ia. 9:13 Tapi nini si Ananias ma mambalosi: Tuhan, hubogei do humbani buei halak pasal buei ni na jahat, ibahen hubani halak na mapansing i Jerusalem. 9:14 Ijon pe markuasa do ia humbani sintua ni malim, manangkuti haganup na mandilo Goranmu. (1 Kor. 1:2.) 9:15 Jadi nini Tuhan in ma hubani: Laho ma ho, ai ia do parugas pilihonku laho mamboan Goranku hulobei ni bangsa-bangsa, raja-raja ampa anak ni Israel. (bd. 25:13; 27:24; Rom 1:5.) 9:16 Ahu sihol patuduhkon hubani pasal buei ni sitaronon sidageionni halani Goranku. (ay. 23, 29; 2 Kor. 11:23-27; 2 Tim. 3:11.) 9:17 Jadi laho ma si Ananias, imasuki ma rumah ai. Itampeihon ma tanganni hubani, anjaha nini ma: Ale Saul, saninangku, isuruh Tuhan in do ahu, ai ma Jesus, na niidahmu bani pardalananmu hujon, ase suang marpangidah ho, anjaha gok Tonduy Na pansing ho. (bd. 8:17.) 9:18 Jadi mintor mangkatektek ma humbani matani songon sisik, gabe mulak ma ia marpangidah; dob ai jongjong ma ia lanjar tardidi. 9:19 Anjaha mangan ma ia, gabe suang ma gogohni. Soh ope ia piga-piga dokah ijai rap pakon susian na i Damaskus ai. 9:20 Anjaha mintor marambilan do ia ibagas parguruan-parguruan ai, isaksihon do Jesus, paboa Anak ni Naibata do Ia. 9:21 Longang do haganup halak na mambogeisi, nini sidea do: Ai lang ia do in, na mardakdak i Jerusalem haganup halak na mandilo Goran in? Na nilangkahkonni pe hujon, ai lang laho manangkuti anjaha mamboan sidea do hu sintua ni malim? (ay. 1, 14; bd. 8:1; 26:10.) 9:22 Tapi lambin margomos do si Saulus, gabe jut ma ibaen uhur ni Jahudi, na i Damaskus, marhitei hatorangan-hatonangan, paboa Jesus do Kristus in. (bd. 18:28.) 9:23 Jadi, dob hundokah, manriah ma halak Jahudi, laho mamunuhsi. (bd. 23:12.) 9:24 Tapi tarbogei do hubani si Paulus tahi-tahi ni sidea ai. Gabe ijagai sidea ma sagala horbangan arian pakon borngin, ase boi bunuhon ni sidea ia. 9:25 Tapi iarahkon susian ai ma ia borngin-borngin, anjaha itantan sidea ma ia ibagas karanjang hu darat ni tembok ai. (2 Kor. 11:32, 33.) 9:26 Ase dob das ia i Jerusalem, isuba ma pasaorhon dirini bani susian ai, tapi haganup do sidea mabiar mangidahsi, ai seng porsaya sidea, na dob gabe susian ia. (Gal. 1:17-19.) 9:27 Tapi ijalo si Barnabas ma ia, anjaha iarahkon ma hubani apostel ai; ibaritahon ma bani sidea sonaha pangidahni bani Tuhan in, na marsahapkonsi, anjaha sonaha torang ni parambilanonni i Damaskus ibagas Goran ni Jesus. (ay. 20.) 9:28 Dob ai sai rap ma ia pakon sidea mardalani i huta Jerusalem, marhinsah ni uhur marambilan ibagas Goran ni Tuhan in. 9:29 Marsahap anjaha marsual do ia pakon halak Jahudi parhata Gorik; tapi martahi-tahi do sidea, sihol mambunuhsi. 9:30 Dob tarbotoh ai bani sanina-sanina ai, itaruhkon sidea ma ia tuad hu Kesarea, lanjar isuruh ma laho hu Tarsus. (bd. 11:25; Gal. 1:21.) 9:31 Ase mardamei-damei ma kuria ai i sab Judea, Galilea ampa Samaria, anjaha lambin toguhni marparlahou ibagas biar bani Tuhan in, anjaha lambin roh bueini do sidea halani pangojur ni Tonduy Na pansing. (Jud. 20; Joh. 14:16.) 9:32 Sanggah na mardalani ai si Petrus itongah-tongah ni haganup sidea, laho do ia homa marayak halak na mapansing na i Lidda. (bd. 8:14.) 9:33 Jadi jumpahsi ma ijai sada halak, na margoran si Eneas, na oyangon anjaha na tibal-tibal bani podomanni ualuh tahun dokahni. 9:34 Jadi nini si Petrus ma hubani: Ale Eneas, ipamalum Jesus Kristus ma ho! Jongjong ma ho, anjaha patorsa ma podomanmu! Jadi mintor jongjong ma ia. (bd. 3:6; Mat. 9:6.) 9:35 Anjaha haganup do pangisi ni Lidda ampa tanoh Saron mangidahsi, gabe idompakkon sidea ma Tuhan in. 9:36 Ia i Joppe, adong do sada halak susian naboru, na margoran si Tabita, artini Balua, na surung mangkorjahon na madear ampa mambahen idop ni uhur. (bd. 10:2.) 9:37 Boritan do ia bani panorang ai lanjar matei. Dob iparidi ia, inahkon ma bani kamar pardatas. 9:38 Dohor do huta Lidda hun Joppe; jadi dob ibogei susian ai, na i Lidda do si Petrus, gabe isuruh sidea ma dua halak laho marayaksi, mangindohon bani, ase sapodas-podasni ia roh marayak sidea. 9:39 Jadi mintor bingkat do si Petrus, mangkasomani sidea, anjaha dob das iboan ma ia hu kamar pardatas ai. Jadi marrohan ma hubani sagala na mabalu, tangis-tangis, anjaha ipatuduhkon sidea ma bani baju-baju ampa mantel, na pinauli ni si Tabita, sanggah rap ope ia pakon sidea. 9:40 Jadi isuruh si Petrus ma sidea hu darat, anjaha manrogop ma ia laho martonggo. Idompakkon ma bangkei ai, lanjar nini ma: Ale Tabita, jongjong ma! Gabe ipabodak ma matani, anjaha, dob iidah si Petrus, hundul ma ia. (Mrk. 5:41.) 9:41 Isurdukkon si Petrus ma tanganni, laho pajongjongkonsi. Dob ai idilo ma halak na mapansing ai ampa na mabalu ai, gabe iarahkon ma naboru ai manggoluh hu lobei ni sidea. (ay. 32.) 9:42 Jadi sar ma barita ai i sab Joppe, gabe buei ma na porsaya bani Tuhan in. 9:43 Hundokah do ia marianan i Joppe, tondok bani sada halak, na margoran si Simon, tukang sipatu ai. (bd. 10:6.)

Lahoan ni Apostel 10

10:1 Tapi adong ma i Kesarea sada halak, na margoran si Kornelius, kopala tentara bani pasukan Italia. (Mat. 8:5.) 10:2 Na daulat do ia anjaha na marhabiaran bani Naibata rap pakon ganup rumah tanggani. Buei do ia marsibere-bere bani bangsa in, anjaha tongtong do ia martonggo bani Naibata. (Ps. 112:9.) 10:3 Bani na sadari, hira-hira pukul tolu, arian, iidah ma torang bani panonggoranni sada malekat ni Naibata, na roh marayaksi anjaha marsahap hubani: Ale Kornelius! 10:4 Ikawahkon ma ia anjaha ihatahon ibagas biar: Ai aha in Tuhan? Gabe nini ma: Ia tonggomu ampa idop ni uhurmu domma das ai hulobei ni Naibata, anjaha idingat do ai. (Ps. 141:2.) 10:5 Ai pe suruh ma halak hu Joppe mangalopi si Simon, na margoran homa si Petrus, 10:6 na tondok bani si Simon, tukang sipatu ai, na marrumah i topi laut. (bd. 9:43.) 10:7 Ase laho honsi malekat na marsahap pakonsi ai, idilo ma juak-juakni dua halak ampa sada tentara na daulat maruhur, na mangkasomanisi tongtong. 10:8 Ipatugah ma haganup ai bani sidea, dob ai isuruh ma sidea hu Joppe. 10:9 Patarni ai, sanggah itongah dalan ope sidea marayak huta ai, naik do si Petrus hu kamar pardatas laho martonggo, ai ma hira-hira tongah arian. (Dan. 6:11.) 10:10 Gabe loheian ma ia, sihol mangan ma ia. Jadi sanggah na pasirsirhon ai sidea bani, marpanonggoran ma ia. (bd. 22:17.) 10:11 Iidah ma buha langit, anjaha turun ma songon hiou bolag, martali bani suhi-suhini na ompat ai, itantan hu toruh. (bd. 11:5-17.) 10:12 Ibagas ai adong do bagei ni siompat nahei ampa na manjulur iatas tanoh on ampa manuk-manuk na i awang-awang. 10:13 Dob ai adong ma sada sora na marsahap hubani: Ale Petrus, jongjong ma, sayati anjaha pangan ma! 10:14 Jadi nini si Petrus ma: Pantang Tuhan! Seng ongga hupangan na butak atap na so borsih. (3 Mus. 11:47; Hes. 4:14.) 10:15 Dob ai roh ma use sada sora padua halihon, mangkatahon hubani: Na dob pinapansing ni Naibata ulang hatahon butak! 10:16 Tolu hali do masa sonai, dob ai mintor tarangkat ma hiou ai hu langit. 10:17 Sanggah sungkun-sungkun ope si Petrus pasal arti ni panonggoran, na niidahni ai, domma jongjong ilobei ni labah ai suruhan ni si Kornelius, na mangindahi rumah ni si Simon ai. 10:18 Idilohon sidea ma manungkun, atap ijai do tondok si Simon, na margoran si Petrus. 10:19 Anjaha sanggah na marpingkir ai ope si Petrus pasal na niidahni ai, nini Tonduy in ma hubani: Adong do dua halak, na mangindahi ho! (bd. 8:29.) 10:20 Jongjong ma ho, susur ma; laho ma ho rap pakon sidea, ulang sangsi uhurmu, ai Ahu do na marsuruh sidea! 10:21 Jadi susur ma si Petrus manjumpahkon halak ai, nini ma: Ahu do na pinindahannasiam ai! Aha do halani ase roh nasiam? 10:22 Dob ai nini sidea ma: Ia si Kornelius, sada kopala ni tentara, sada halak na pintor uhur anjaha sihabiari Naibata, na dear baritani bani haganup halak Jahudi, dapotan parentah do ia humbani sada malekat na mapansing, ase ialopi ham hu rumahni, laho manangihon hata humbamu. 10:23 Jadi iarahkon ma sidea hu rumah, anjaha itamuei ma. Patarni ai bingkat ma ia rap pakon sidea, anjaha dihut do deba hasoman na hun Joppe mangkasomanisi. (bd. 11:12.) 10:24 Patarni ai das ma sidea i Kesarea. Domma paima-imahon si Kornelius, anjaha domma ipatumpu diha-diha ampa huan-huanni. 10:25 Sanggah na masuk ai si Petrus, ialo-alo si Kornelius ma ia, manrogop ma ia marsombah hubani. 10:26 Tapi itogu si Petrus ma ia, nini ma: Jongjong ma ham, ahu pe jolma do. (bd. 14:15; Pangk. 19:10; 22:8, 9.) 10:27 Anjaha turut marsahapi masuk ma sidea, anjaha domma buei halak tumpu dapotsi ijai. 10:28 Dob ai nini ma hubani sidea: Ibotoh nasiam do, pantang do bani halak Jahudi marayak atap marsaor bani bangsa na legan. Tapi domma ipatuduhkon Naibata bangku, na so bulih goranon halak butak atap lang borsih. 10:29 Halani ai do, ase lang manjua ahu roh, sanggah na ialopi ahu. Husungkun ma sonari: Aha do halani, ase isuruh nasiam na mangalopi ahu? 10:30 Dob ai nini si Kornelius ma: Ompat ari na salpu, sangkan sanggah sonari, ai ma pukul tolu, martonggo do ahu i rumah on, jadi jongjong ma i lobeihu sada halak parhiou na marsinalsal. (bd. 1:10.) 10:31 Nini hubangku: Ale Kornelius, itangihon Naibata do tonggomu anjaha idingat do sibere-beremu. 10:32 Ai pe suruh ma hu huta Joppe na mandilo si Simon, na margoran si Petrus, tondok i rumah ni si Simon, tukang sipatu ai, i topi laut. 10:33 Jadi mintor husuruh ma na mangalopi ham, dear do pambahenanmu in, ai mintor roh do ham. Ai pe, domma tumpu hanami haganup ijon ilobei ni Naibata, sihol manangihon haganup na tinonahkon ni Tuhan in bamu. 10:34 Dob ai marsahap ma si Petrus, nini ma: Domma tangkas iidah uhurhu, na so siidah bohi Naibata.(5 Mus. 10:17; 1 Sam. 16:17; Rom 2:11.) 10:35 Humbani sagala bangsa tene, ijalo do sagala na mangkabiarisi anjaha na mangkorjahon hapintoran.(bd. 2:39; 15:9; Joh. 10:16.) 10:36 Itongos do hatani hubani anak ni Israel, anjaha iambilankon do damei marhitei Jesus Kristus; Ia do Tuhan ni haganup. (Jes. 52:7; Mat. 28:18.) 10:37 Ibotoh nasiam do haganup na masa i sab tanoh Jahudi, mamungkah i nagori Galilea, dob salpu pandidion na binaritahon ni si Johannes, (Mat. 4:12, 13.) 10:38 ai ma pasal Jesus, na hun Nasaret, na mininakan ni Naibata marhitei Tonduy Na pansing ampa hagogohon. Mardalani do Ia mambahen na madear ampa pamalumhon haganup na siniaran ni setan, ai ihasomani Naibata do Ia. (Jes. 61:1; Mat. 9:35; Luk. 4:14, 18.) 10:39 Hanami do saksi pasal haganup na binahenni i tanoh Jahudi age i Jerusalem. Ibunuh sidea do Ia, igantungkon bani hayu. (bd. 1:8; 2:23; 3:15.) 10:40 Ipapuho Naibata do Ia bani ari patoluhon, anjaha ipatalar do dirini, (Mat. 28.) 10:41 Seng hubani haganup, tapi pitah hubani saksi-saksi do, na dob ipilih Naibata hinan, ai ma hanami, na rap mangan ampa minum pakonsi dob puho Ia humbani na matei. (Luk. 24:43; Joh. 14:22; 15:27.) 10:42 Iparentahkon do bannami, mangambilankon anjaha manaksihon bani halak na mabuei, paboa Ia do in, na dob tinotapkon ni Naibata hinan, gabe panguhum bani na manggoluh ampa na matei. (bd. 17:31; Joh. 5:22; Rom 14:10.) 10:43 Haganup do nabi manaksihon pasalSi, paboa jaloon ni sagala na porsaya Bani do hasasapan ni dousa marhitei Goranni. (Jes. 53:5, 6, 11; Jer. 31:34; Hes. 34:16; Dan. 9:24.) 10:44 Jadi sanggah ihatahon si Petrus hata ai, sogop ma Tonduy Na pansing bani haganup na manangar hata ai. (bd. 11:15.) 10:45 Haganup halak na porsaya ai, ai ma halak Jahudi, na roh mangkasomani si Petrus, longang do, halani iuseihon do homa sibere-bere ni Tonduy Na pansing bani halak parbegu. (bd. 2:38.) 10:46 Ai ibogei do sidea marsahap bani hata na legan mamuji Naibata. (bd. 2:4; Mrk. 16:17.) 10:47 Jadi nini si Petrus ma: Ai pag ma diri mamandang didion halak on, na dob manjalo Tonduy Na pansing songon hita? (bd. 11:17; 8:36; Mat. 28:19.) 10:48 Gabe ihatahon ma didion sidea marhitei Goran ni Tuhan Jesus Kristus. Dob ai ielek-elek sidea ma ia, ase marianan lobei ia itongah-tongah ni sidea piga-piga dokah. (Joh. 4:40.)

Lahoan ni Apostel 11

11:1 Jadi ibogei apostel ampa sanina na i Judea ma, na dob dihut do hape sipajuh begu-begu manjalo hata ni Naibata. 11:2 Gabe ihata na porsaya humbani Jahudi ma si Petrus, daskonsi ia i Jerusalem, nini sidea ma: (bd. 10:45.) 11:3 Masuk do ham hape hu rumah ni halak na so marsunat, anjaha rap mangan do ham pakon sidea! (bd. 10:28; Gal. 2:12.) 11:4 Jadi jojor ma humbani mulani ipatorang si Petrus na masa ai, nini ma: 11:5 Sanggah martonggo ahu i huta Joppe, huidah ma ibagas panonggoran sada ianan songon hiou na bolag, martali haompatsi suhi-suhini, turun hun langit, itantan hu lobeihu. (bd. 10:10, 11.) 11:6 Jadi sanggah na hukawahkon ai, laho papangkeihon, huidah ma binatang siompat nahei ni tanoh on, binatang sipanjulur ampa na liar ampa manuk-manuk na i awang-awang. 11:7 Anjaha hubogei ma sora na mangkatahon hubangku: Jongjong ma, Petrus, sayati ma anjaha pangan ma! 11:8 Tapi ningku ma: Lang, Tuhan! Ai lang ongga ope na butak atap na so pansing masuk hu pamanganku. 11:9 Jadi marbalos ma sora ai paduahalihon hun langit: Na dob pinapansing ni Naibata, ulang hatahon ai butak! 11:10 Tolu hali do masa na sonai, dob ai itarik ma haganupan ai hu langit. 11:11 Bani panorang ai jongjong ma tolu halak ilobei ni rumah ianannami, ai ma na sinuruh hun Kesarea, marayak ahu. (bd. 10:7.) 11:12 Anjaha ihatahon Tonduy in do bangku, ase ulang sangsi uhurhu mangirikkon sidea. Sanina na onom halak on do mangkasomani ahu, gabe masuk ma hanami hu rumah ni halak ai. (bd. 10:23.) 11:13 Ibaritahon do bannami sonaha pangidahni bani malekat ai jongjong i rumahni, na mangkatahon bani: Suruh ma hu Joppe na mangalopi si Simon, na margoran si Petrus. 11:14 Hatahononni do bamu hata na sihol paluahkon ham ampa haganup sinrumahmu! (bd. 16:30, 31.) 11:15 Tapi sanggah mulai ope ahu marambilan ijai, sogop ma Tonduy Na pansing bani sidea, songon na hubanta mungkahni ondi. (bd. 10:44.) 11:16 Jadi taringat ma ahu bani hata ni Tuhan in, na mangkatahon: Bah do ididihon si Johannes, tapi Tonduy Na pansing do didihononkon bani nasiam! (bd. 1:5; Mat. 3:11.) 11:17 Jadi, anggo ibere Naibata do bani sidea sibere-bereni songon na hubanta, dob porsaya sidea bani Tuhan Jesus Kristus, sonaha ma boi ahu manlanglangi Naibata? 11:18 Ase dob ibogei sidea ai, sip ma sidea. Ipuji sidea ma Naibata, nini ma: Ase dihut do hape bani sipajuh begu-begu ibere Naibata hamubahon ni uhur, ase manggoluh. (bd. 5:31.) 11:19 Ia halak na merap ai, pangkorhon ni parburuon marhalanihon ni si Stepanus, laho ma hu Penesia, hu pulou Kiprus ampa hu Antiokia, anjaha marambilani do sidea, tapi pitah hubani halak Jahudi do hansa. (bd. 8:1-4.) 11:20 Tapi adong do deba humbani sidea, na marasal hun Kiprus ampa Kirene, na roh hu Antiokia, gabe ibaritahon sidea do homa ijai Tuhan Jesus hubani halak Gorik. 11:21 Anjaha ihasomani tangan ni Tuhan in do sidea; gabe buei do na gabe porsaya, na mandompakkon Tuhan in. (bd. 2:47.) 11:22 Tarbogei ma pasal ai hu kuria na i Jerusalem, gabe isuruh sidea ma si Barnabas hu Antiokia. (bd. 4:36; 9:27.) 11:23 Das ma ia hujai, iidah ma idop ni uhur ni Tuhan in, gabe malas ma uhurni; iojur ma sidea haganup, ase poltik uhur ni sidea marsijoloman bani Tuhan in, (bd. 13:43.) 11:24 ai halak sidear uhur do ia, gok Tonduy Na pansing ampa haporsayaon; buei do halak na gabe tartogu bani Tuhan in. (bd. 5:14; 6:5.) 11:25 Jadi laho ma ia hu Tarsus, mangindahi si Saulus, anjaha dob jumpahsi iboan ma ia hu Antiokia. (bd. 9:30; Gal. 2:11.) 11:26 Anjaha adong do sidea, na rap ai pakon kuria ai, satahun dokahni; buei do halak na iajari sidea. I Antiokia do mulai igoran susian ai halak Kristen. (bd. 26:28; 1 Ptr. 4:16.) 11:27 Bani panorang ai roh ma nabi-nabi hun Jerusalem hu huta Antiokia. (bd. 13:1; 15:32; Ep. 4:11.) 11:28 Jadi roh ma sada halak humbani sidea, na margoran si Agabus, gabe ipatugah ma marhitei Tonduy in pasal lohei maningting, na sihol sogop hu sab tanoh on, ai ma na tongon masa sanggah panrajaion ni si Klaudius. (bd. 21:10.) 11:29 Jadi sapanriah ma susian ai manongos tumpak, domu hubani na tarbahensi bei, hubani sanina na i Judea. (Rom 15:25, 26; Gal. 2:10.) 11:30 Saud ma ibahen sidea ai, itongos ma ai hubani sintua-sintua na ijai ai marhitei si Barnabas ampa si Saulus. (bd. 12:25.)

Lahoan ni Apostel 12

12:1 Hira-hira bani panorang ai ma mardas tangan raja Herodes bani piga-piga halak pagori ni kuria ai, laho mangarsik sidea. (bd. 4:3; Luk. 21:12.) 12:2 Ibunuh do si Jakobus, ai ma sanina ni si Johannes, marhitei podang. (Mat. 4:21.) 12:3 Anjaha dob iidah, marosuh do Jahudi mangidah ai, gabe inunut ma, itangkap ma pakon si Petrus, ai ma sanggah panorang mangankon ruti na so marragi. (Mrk. 14:1.) 12:4 Jadi dob itangkap, ipamasuk ma ia hubagas tutupan, anjaha iondoskon ma ia jagaon ni ompat bagian siparjaga, ganup bagian ompat halak, ase dob salpu pesta ai, arahkonon ma ia hulobei ni na mabuei, nini uhurni. 12:5 Ase sonai ma hona jaga si Petrus ibagas tutupan ai; ia kuria ai sai inunut do manonggohonsi bani Naibata. (Ep. 6:18.) 12:6 Bornginni ai, paima ondoskononkon ni si Herodes ia, modom do ia iholang-kolang ni dua tentera, tarsangkut bani dua gari, anjaha adong do homa na manjaga ilobei ni tutupan ai. 12:7 Tapi tonggor ma, roh ma sada malekat ni Tuhan in, anjaha marsinalsal ma sada panondang i kamar ai. Idugur ma lambung ni si Petrus, laho mamuhoisi, nini ma: Podas ma puho! Anjaha mangkatektek ma gari ai humbani tanganni. (bd. 5:19; 27:23.) 12:8 Nini malekat ai ma hubani: Marpakeian ma ho! Jadi ibahen ma sonai. Ihatahon ope bani: Pakei ma mantelmu, anjaha irikkon ma ahu! 12:9 Jadi luar ma ia anjaha irikkon ma ia; seng ibotoh atap na tongon do sonai masa bani ibahen malekat ai, ai nini uhurni, na marpanonggoran do hansa ia. 12:10 Jadi dob ibontas sidea parjaga na parlobei ampa na paduahon, das ma sidea hu horbangan bosi, dalan dompak huta ai. Jadi buha sandiri ma ai ilobei ni sidea, gabe luar ma sidea bani sada dalan na i huta ai, dob ai malekat ai pe sirang ma humbani. 12:11 Jadi tarjolma ma si Petrus, nini ma: Sonari ma hubotoh torang, na dob isuruh Tuhan in do malekatni laho paluahkon ahu humbani tangan ni si Herodes ampa humbani sura-sura ni halak Jahudi. (Ps. 34:8; 91:11.) 12:12 Anjaha dob torang ai bani, laho ma ia hu rumah ni si Maria, inang ni si Johannes, na margoran homa si Markus; buei do ijai na martumpu, anjaha martonggo. (bd. 15:37; 2 Tim. 4:11.) 12:13 Anjaha dob ihartuk labah pardarat, laho ma sada juak-juak naboru, margoran si Rode, manangihon ai. 12:14 Dob itandai sora ni si Petrus do ai, halani malas ni uhurni, seng mintor ibuka labah ai, tapi marlintun ma ia hubagas anjaha ipatugah ma, na dob i labah ai do hape jongjong si Petrus. 12:15 Jadi ihatahon sidea ma bani: Na podoan do ho! Tapi sai ionjolhon do hatani ai. Gabe nini sidea ma: Malekatni do ai! (Luk. 24:37.) 12:16 Tapi sai inunut si Petrus do mangkartuki. Dob ibuha, iidah sidea ma ia, gabe longang ma uhur ni sidea. 12:17 Jadi ihilaphon ma tanganni bani sidea mangkatahon sip, gabe ibaritahon ma, sonaha parpadarat ni Tuhan in bani hun tutupan ai. Ihatahon ma: Patugah nasiam ma in bani si Jakobus ampa bani sanina-sanina in. Dob ai misir ma ia, laho bani ianan na legan. 12:18 Anjaha dob siang ari, bulinsah tumang ma tentera ai, manguhurhon pasal na masa ai bani si Petrus. 12:19 Dob isuruh si Herodes na mangindahisi, hape lang jumpah, ipareksa ma parjaga ai, anjaha iparentahkon ma bunuhon sidea. Dob ai tuad ma ia hun Jerusalem hu Kesarea, anjaha ijai ma ia marianan. 12:20 Ia si Herodes, sogam do uhurni mangidah halak Tirus ampa Sidon. Gabe sauhur ma sidea roh manjumpahkonsi, anjaha dob jumpah sidea uhur ni si Blastus, manteri ni raja ai, ipindo sidea ma mardamei, halani humbani tanoh ni raja ai do roh ni sipanganon bani sidea. (Hes. 27:17; 1 Raj. 5:15-26.) 12:21 Bani ari na dob tinotapkon ipakei si Herodes ma pakeian harajaonni; hundul ma ia bani paratasni anjaha ipadas ma hatani bani sidea. 12:22 Jadi idilohon na mabuei ai ma: Sora ni Naibata do in, sedo sora ni jolma! (Ps. 73:9; Hes. 28:2.) 12:23 Tapi mintor ipukul malekat ni Tuhan in ma ia, halani seng bani Naibata ibere hasangapon; iharati gilok-gilok ma angkulani, lanjar matei. (Dan. 5:20.) 12:24 Tapi lambin manrarat do anggo hata ni Naibata. (bd. 6:7; Jes. 55:10, 11.) 12:25 Ia si Barnabas ampa si Saulus mulak ma hun Jerusalem, dob ipadas sidea pangurupion ai. Iboan sidea do si Johannes, na margoran homa si Markus. (bd. 11:29, 30; 15:37.)

Lahoan ni Apostel 13

13:1 Adong do i Antiokia, bani kuria na ijai ai, nabi ampa guru, ai ma si Barnabas ampa si Simon, na ginoran si Niger, si Lucius na hun Kirene, si Manahen hasoman magodang ni raja Herodes ampa si Saulus. (bd. 11:27.) 13:2 Jadi sanggah martonggo anjaha marpuasa sidea bani Tuhan in, nini Tonduy Na pansing ma: Papulig hanima ma bangku si Barnabas ampa si Saulus hubani horja siondoskononku bani sidea. (bd. 9:15; Rom 1:1.) 13:3 Jadi marpuasa ma sidea anjaha martonggo, itampeihon ma tanganni bani sidea, laho paingkathon. (bd. 14:23; 1 Tim. 4:14; 2 Tim. 1:6.) 13:4 Sidea pe, dob isuruh Tonduy Na pansing, tuad ma hu Seloikia; hunjai markapal ma sidea hu pulou Kiprus. 13:5 Dashonsi sidea hu Salamis, iambilankon sidea ma hata ni Naibata bani rumah-rumah parguruan ni Jahudi; si Johannes do pangurupi bani sidea. (bd. 12:12, 25.) 13:6 Dob ibontas sidea ganup pulou ai das hu Papos, jumpah sidea ma sada halak Jahudi, parsibalik mata anjaha nabi sipakulah-kulah, na margoran Bar-Jesus. (bd. 8:9-24.) 13:7 Tondok do ia bani panggomgomi Sergius-Paulus, sada halak na pantas maruhur. Idilo ma si Barnabas ampa si Saulus, sihol do bogeionni hata ni Naibata. 13:8 Ia si Elimas, parsibalik mata ai (ai do arti ni goranni ai), ilawan do sidea, laho manlanglangi panrajai ai, ase ulang porsaya. (2 Tim. 3:8.) 13:9 Gabe inolnol si Saulus, na margoran homa si Paulus, na ginokan ni Tonduy Na pansing ai ma ia, (bd. 3:4; Mat. 19:26.) 13:10 nini ma: Ho, na gok akal-akal ampa hajahaton, anak ni sibolis, imbang ni sagala hapintoron! Seng maronti ope ho, papeolhon dalan ni Tuhan na pintor in? 13:11 Ai pe, tonggor ma, mangonai ma bam tangan ni Tuhan in! Ai pe pitung ma ho, seng be idahonmu mata ni ari. Jadi mintor rambon anjaha golap ma iidah, dadap-dadap mando ia mangindahi na mambobaisi. 13:12 Jadi porsaya ma panrajai ai, dob iidah na masa ai, anjaha longang do uhurni bani podah ni Tuhan in. 13:13 Jadi marparau ma si Paulus ampa hasomanni hun Papos, gabe das ma sidea hu Perge, na i Pampilia. Tapi itadingkon si Johannes do sidea, mulak ma ia hu Jerusalem. (bd. 15:37-39.) 13:14 Itoruskon sidea do mardalan hun Perge, gabe das ma sidea hu Antiokia, na i Pisidia. Bani ari Sabat, laho ma sidea hu rumah parguruan lanjar hundul ma. 13:15 Dob salpu ibasa titah ampa surat ni nabi-nabi, isuruh sintua ni parguruan ai ma mangkatahon bani sidea: Nasiam sanina, anggo adong hata sihatahononnasiam bani na mabuei on, hatahon nasiam ma! 13:16 Jadi jongjong ma si Paulus, ihilaphon ma tanganni anjaha nini ma: Nasiam halak Israel ampa nasiam na mangkabiari Naibata, tangar nasiam ma! 13:17 Naibata ni bangsa Israel do mamilih ompungta, anjaha ipatimbul do bangsanta sanggah manginsolat i tanoh Masir, anjaha ipadarat do sidea hunjai marhitei tangan na pinagostong. (2 Mus. 12:37, 41; 14:8; Jes. 1:2.) 13:18 Ianju-anju do sidea hira-hira ompat puluh tahun i halimisan. (4 Mus. 14:34; 5 Mus. 1:31.) 13:19 Dob iboiskon pitu bangsa i tanoh Kanaan, ibere Naibata ma tanoh ni sidea ai bahen parbagianan ni sidea, ai ma hira-hira ompat ratus lima puluh tahun dokahni. (5 Mus. 7:1.) 13:20 Dob ai, ibere ma bani sidea panguhum das bani si Samuel, nabi ai. (Panguh. 2:16; 3:9; 1 Sam. 3:20.) 13:21 Dob ai mangindo raja ma sidea, gabe ibere Naibata ma bani sidea si Saul, anak ni si Kis, marga Benyamin, dokahni ompat puluh tahun. (1 Sam. 8:5; 10:21-24.) 13:22 Jadi dob ipaturun ia, ipabangkit Naibata ma si Daud gabe raja bani sidea, isaksihon do pasalsi, nini: Domma jumpah Ahu si Daud, anak ni si Jesse, harosuh ni uhurhu, sipadas sura-surangku. (1 Sam. 16:12, 13; 13:14; Ps. 89:21.) 13:23 Humbani ginomparni do iparoh Naibata bani Israel sipaluah in, in ma Jesus, na pinarbagah-bagah in. (2 Sam. 7:12; Jes. 11:1.) 13:24 Paima roh Ia, iambilankon si Johannes do pandidion hamubahon ni uhur bani haganup halak Israel. 13:25 Anjaha laho marujung horja ni si Johannes, nini do: Ise do ahu nini uhur nasiam? Sedo ahu Ia, niarapkon nasiam ai. I pudingku do Ia roh, hurang talup do ahu mananggali sipatuni. (Mrk. 1:7; Luk. 3:16; Joh. 1:20.) 13:26 Nasiam sanina, ginompar ni si Abraham, na mangkabiari Naibata! Hubanta do itongos hata haluahon on. (ay. 46; bd. 3:25.) 13:27 Ia pangisi ni Jerusalem ampa kopala-kopala ni sidea, halani seng itanda sidea Ia anjaha iarusi hata ni nabi, na binasa ganup ari Sabat, gabe iuhumi sidea ma Ia, laho pasaudkon ai. (bd. 3:17, 18; Joh. 16:3; 1 Kor. 2:8.) 13:28 Age pe seng dong jumpah sidea halani, ase marutang hosah Ia, ipindo sidea do humbani si Latus ase ibunuh ia. 13:29 Ase dob ipasaud sidea haganup na tarsurat pasalsi, ipasusur sidea ma Ia humbani hayu ai, anjaha ipatibal ibagas tanoman. (Mat. 27:59, 60; Luk. 23:53.) 13:30 Tapi ipapuho Naibata do Ia humbani na matei. (bd. 3:15.) 13:31 Hundokah do ipataridahkon dirini hubani halak, hasomanni tangkog hun Galilea hu Jerusalem, ai ma sonari, na manaksihon bani bangsa in. (bd. 1:3; 1 Kor. 15:3-8.) 13:32 Ambilan madear on do iboan hanami bani nasiam, ai ma: Domma ipasaud Naibata bagah-bagahni na bani ompungta, hubanta, ginompar ni sidea, marhitei na papuho Jesus, (ay. 23.) 13:33 songon na tarsurat bani Psalm dua: Anakku do Ho, sadari on do Ho hutubuhkon. (Ps. 2:7; Heb. 1:5.) 13:34 Anjaha, paboa na maningon puho do Ia humbani na matei, anjaha na so mulak be Ia hu hamasikon, sonon do ihatahon: Berehononku do Bam pasu-pasu na mapansing ampa na totap, na bani si Daud ai. (Jes. 55:3.) 13:35 Anjaha bani Psalm na legan ihatahon do: Seng paturutonmu Na pansingmu mangidah hamasikon. (Ps. 16:10.) 13:36 Ia si Daud, dob ipasaud rosuh ni Naibata bani goluhni, matei do ia, anjaha itanom hulambung ni ompungni, gabe iidah do hamasikon. (bd. 2:29; 1 Raj. 2:10.) 13:37 Tapi anggo na pinapuho ni Naibata, seng iidah hamasikon. 13:38 Ase nasiam sanina, botoh nasiam ma, naambilankon do bani nasiam hasasapan ni dousa marhiteihonsi, 13:39 anjaha marhiteihonsi ipintori do sagala na porsaya humbani haganup, na so boi pintor nasiam marhitei titah ni si Musa. (bd. 10:43; Rom 8:3; 10:4; Gal. 2:16.) 13:40 Ase, jaga nasiam ma, ase ulang mangonai bani nasiam, na hinatahon ni nabi-nabi: (Hab. 1:5.) 13:41 Tonggor ma, nasiam sipanrehei, longang ma anjaha magou; ai hubahen do sada horja bani panorangnasiam, sada horja na so hinaporsayaannasiam, age pe adong na mambaritahon bani nasiam! 13:42 Sanggah na luar ai sidea, ipindo halak ai ma, ase ihatahon use hata ai bani sidea bani ari Sabat na mangihut hujai. 13:43 Dob salpu partumpuan ai, buei ma humbani halak Jahudi ampa parguru na daulat mangihutkon si Paulus ampa si Barnabas, gabe iambilani anjaha iojur ma sidea, ase totap sidea marianan ibagas idop ni uhur ni Naibata. (bd. 11:23.) 13:44 Anjaha bani ari Sabat na mangihut hujai, martumpu ma hira haganup pangisi ni huta ai, laho mambogei hata ni Tuhan in. 13:45 Tapi dob iidah Jahudi buei ni jolma ai, marsimburu ma sidea, iimbang anjaha irehei sidea ma ambilan ni si Paulus. (ay. 50; 14:2; 1 Tes. 2:14-19.) 13:46 Dob ai nini si Paulus ampa si Barnabas ma ibagas hinsah ni uhur: Patut namin bani nasiam parlobei ambilanhononkon hata ni Naibata; tapi halani itulak nasiam do in, anjaha lang talup nasiam nini uhurnasiam parrupei bani hagoluhan sisadokah ni dokahni, jadi hubani halak sipajuh begu-begu ma hanami laho. (bd. 3:26; Mat. 10:6; Luk. 7:30.) 13:47 Ai sonon do itonahkon Tuhan in bennami: Hupajongjong do ho gabe panondang bani halak parbegu, ase iboan ho haluahon ronsi ujung ni tanoh on!(Jes. 49:6; Luk. 2:32.) 13:48 Mambogei ai marmalas ni uhur ma parbegu, anjaha ipuji sidea ma hata ni Tuhan in, gabe porsaya ma na dob tinontuhon hinan hu hagoluhan sisadokah ni dokahni. (Rom 8:29-30.) 13:49 Gabe rarat ma hata ni Tuhan in hu sab tanoh on. 13:50 Tapi ipajobu-jobu halak Jahudi ma puang-puang na sangap anjaha na daulat, sonai na sangap-sangap ni huta ai, gabe ibahen sidea ma pangayak-ayakon dompak si Paulus ampa si Barnabas, lanjar iusir ma sidea hun nagori ai. (bd. 14:2; 17:5.) 13:51 Jadi ipaspaskon sidea ma orbuk na longkot bani nahei ni sidea, lanjar laho ma sidea hu Ikonium. (bd. 18:6; Mat. 10:14.) 13:52 Ia susian ai gok do bani malas ni uhur ampa Tonduy Na pansing.

Lahoan ni Apostel 14

14:1 I Ikonium pe masuk do sidea hu rumah parguruan ni Jahudi, anjaha sonai do homa ambilanni, gabe buei tumang ma na porsaya, halak Jahudi age halak Gorik. (bd. 11:20, 21.) 14:2 Ia halak Jahudi, na so ra porsaya, ipajobu-jobu anjaha ipamilas sidea ma uhur ni halak sipajuh begu-begu dompak sanina-sanina ai. (bd. 13:45, 50.) 14:3 Hundokah do sidea ijai, marhinsah ni uhur do sidea marambilan, mangunsagahkon Tuhan in, na mambere tanda ampa halongangan sibahenon ni sidea, laho manaksihon hata idop ni uhur in. (bd. 19:11; Heb. 2:4; Mrk. 16:20.) 14:4 Marbolah dua ma pangisi ni huta ai, na deba hampit halak Jahudi, anjaha na deba nari hampit apostel ai. 14:5 Jadi manriah ma halak sipajuh begu-begu, halak Jahudi ampa kopala-kopalani sihol manggosam ampa manggijigi sidea. (ay. 19; 2 Tim. 3:11.) 14:6 Dob tarbogei ai bani sidea, gabe lintun ma sidea hu huta na i nagori Likaonia, ai ma huta Listra ampa Derbe ampa huta-huta na inggot hujai; (Mat. 10:23.) 14:7 ijai pe iambilankon sidea do ambilan na madear in. 14:8 Jadi adong ma sada halak i Listra, na hundul-hundul, seng margogoh naheini, repat humbani partubuhni, seng ongga boi ia mardalan. (bd. 3:2-8.) 14:9 Ibogei do si Paulus marambilan. Ikawahkon si Paulus ma ia anjaha iidah, na porsaya do ia, boi malum naboritni ai, (Mat. 9:28.) 14:10 gabe ipagogoh ma sorani mangkatahon: Pintor ma onjolhon naheimin! Jadi mintor jongjong ma ia anjaha mardalani. 14:11 Jadi dob iidah na mabuei ai na binahen ni si Paulus ai, ipagogoh sidea ma sorani, nini sidea ma ibagas hata Likaonia: Domma susur banta naibata marrupa songon jolma! (bd. 28:6.) 14:12 Igoran sidea ma si Barnabas naibata Sois, anjaha si Paulus naibata Hermes, halani ia siparsahap. 14:13 Anjaha malim-malim ni Sois ai pe, na pinajongjong bani rumah panumbahan ilobei ni huta ai, iboan sidea ma lombu jonggi ampa bunga hu horbangan ai, laho manggalang rap pakon halak na mabuei ai. 14:14 Mambogei ai apostel Paulus ampa si Barnabas, irigati sidea ma hiouni, marlintun ma sidea manjumpahkon halak na mabuei ai, anjaha idilohon ma: 14:15 Nasiam hasoman, aha do na binahen nasiam on? Jolma do age hanami, na marpangahapan songon nasiam, na mamboan ambilan na madear bani nasiam, ase mulak nasiam humbani naibatanasiam na lang in hubani Naibata na manggoluh, na manompa langit, tanoh, laut ampa haganup isini. (bd. 10:26.) 14:16 Ipaturut do bani sundut na dob salpu haganup bangsa-bangsa marsidalani dalanni, (bd. 17:30; Rom 1:24.) 14:17 tapi age pe sonai, isaksihon do dirini marhitei dear layak, ai ibere do bani nasiam udan hun langit ampa partahunan na madear, anjaha ipasabou do uhurnasiam marhitei sipanganon ampa malas ni uhur. (Ps. 147:8; Jer. 5:24.) 14:18 Age sonai hata ai, mahol do tarlanglangi sidea halak na mabuei ai laho manggalang bani sidea. 14:19 Tapi roh do hujai halak Jahudi na hun Antiokia ampa Ikonium; iojur-ojur ma halak na mabuei ai, gabe ipargijig sidea ma si Paulus anjaha isarad hu darat ni huta ai, anjaha iagan sidea, domma matei ia. (bd. 13:14, 50; 2 Kor. 11:25.) 14:20 Tapi dob maringgot roh susian ai hubani, jongjong ma ia, anjaha masuk ma hu huta ai. Patarni ai laho ma ia pakon si Barnabas hu Derbe. 14:21 Dob iambilankon sidea ambilan na madear i huta ai, anjaha buei do iajari sidea na gabe susian, mulak ma sidea hu Listra, Ikonium ampa Antiokia, 14:22 laho patoguhkon uhur ni susian ai, anjaha mangojur sidea ase totap marhaporsayaon, nini sidea ma: Maningon bontasonta do buei sitaronon laho masuk hu bagas harajaon ni Naibata. (bd. 11:23; 13:43; 1 Tes. 3:3; 2 Tim. 3:12.) 14:23 Dob ipabangkit sintua bani sidea bani ganup kuria, marhasoman tonggo ampa puasa, iondoskon ma sidea bani Tuhan, na hinaporsayaan ni sidea. (bd. 13:3; 20:28.) 14:24 Jadi ibontas sidea ma nagori Pisidia, gabe das ma hu Pampilia. 14:25 Anjaha dob ihatahon sidea hata in i Perge, tuad ma sidea hu Atalia. 14:26 Hunjai ma sidea marparau hu Antiokia; ijai do hinan iondoskon sidea hubani idop ni uhur ni Naibata, laho mangkorjahon horja na hinorjahon ni sidea ai. (bd. 13:1-3; 15:40.) 14:27 Anjaha dob das sidea, ipatumpu sidea ma kuria ai, anjaha ibaritahon sidea ma haganup na binahen ni Tuhan in marhitei sidea, ampa sonaha pangungkap ni Tuhan in labah haporsayaon bani sipajuh begu-begu. (bd. 21:19; 1 Kor. 16:9.) 14:28 Anjaha hundokah do sidea ijai rap pakon susian ai.

Lahoan ni Apostel 15

15:1 Tuad ma piga-piga halak hun Judea, na mangajarhon bani sanina-sanina ai: Anggo lang tarsunat nasiam mangihuthon aturan, na binahen ni si Musa, seng boi nasiam maluah. (Gal. 5:2, 3.) 15:2 Jadi gogoh ma sidea isual anjaha ilawan si Paulus ampa si Barnabas, gabe isuruh ma si Paulus ampa si Barnabas ampa hasoman deba nari hu Jerusalem marayak apostel-apostel ampa pangintuai-pangintuai, laho patorangkon parsalisihan ai. (bd. 11:30; Gal. 2:1.) 15:3 Dob ipaingkat kuria ai sidea, idalani sidea ma tanoh Penisia ampa Samaria, ibaritahon sidea ma ijai parmubah ni uhur ni halak sipajuh begu-begu, gabe malas tumang ma uhur ni sanina-sanina ai ibahen. 15:4 Das honsi sidea hu Jerusalem, ialo-alo kuria ai, pakon apostel-apostel ampa pangintuai ai ma sidea, gabe ibaritahon sidea na roh ai ma buei ni na binahen ni Naibata marhitei sidea. (bd. 14:27.) 15:5 Tapi jongjong ma deba humbani golongan Parisei, na dob gabe porsaya, ihatahon maningon sunaton do sidea anjaha ojuron mandalankon titah ni si Musa. (bd. 26:5.) 15:6 Dob ai martumpu ma apostel ai ampa pangintuai ai laho mansahapkon parsahapan ai. 15:7 Dob dokah sidea marsual, jongjong ma si Petrus, nini ma bani sidea: Nasiam sanina, ibotoh nasiam do, na girah do ahu ipilih Naibata itongah-tongahnasiam, laho patugahkon ambilan na madear in bani halak sipajuh begu-begu, ase porsaya sidea. (bd. 10:34, 35.) 15:8 Naibata, sitanda uhur in do manaksihon sidea marhitei na mambere Tonduyni bani sidea, songon na hubanta. (bd. 11:15.) 15:9 Seng adong ubah ni hita pakon sidea ibahen Naibata, dob ipaborsih uhur ni sidea marhitei haporsayaon. 15:10 Anggo sonai, mase ma lajouon nasiam nuan Naibata, marhitei na manampeihon pasangan bani tangkuhuk ni susian in, na so tarusung bapanta atap hita pe? (Gal. 3:10; 5:1; Mat. 23:4.) 15:11 Marhitei idop ni uhur ni Tuhan Jesus do, ase maluah hita ihaporsayai uhurta; sidea pe sonai do.(Rom 3:23, 24; Gal. 2:16; Ep. 2:4-10.) 15:12 Dob ai sip ma haganup na martumpu ai, manangar hata ni si Barnabas ampa si Paulus, na mambaritahon buei ni tanda ampa halongangan na binahen ni Naibata itongah-tongah ni sipajuh begu-begu marhitei sidea. 15:13 Ase dob salosei sidea marsahap, marbalos ma si Jakobus, nini: Nasiam sanina, tangihon nasiam ma hatangkon! (bd. 21:18; Gal. 2:9.) 15:14 Domma ipatugah si Simon, sonaha baru on panatap ni Naibata, mamilih bani dirini na gabe bangsani humbani halak sipajuh begu-begu. (ay. 7-9; bd. 10:44.) 15:15 Anjaha mardomu do ai bani hata ni nabi-nabi, songon na tarsurat in: 15:16 Dob salpu in mulak ma Ahu, laho patureihon use lampo-lampo ni si Daud na dob marumbak in; ulakanku do padearhon na dob maseda in, pajongjongonku do use in, (Ams. 9:11, 12.) 15:17 ase ipindahi na tading in ma Tuhan, ampa haganup sipajuh begu-begu, na manjujung goranku, 15:18 nini Tuhan, sibahen in, ai ma dob binotoh humbani na basaia. 15:19 Halani ai, mangihutkon timbanganku, lang be sisunsahan halak sipajuh begu-begu na mandompakkon Naibata. 15:20 Tapi naaturhon ma bani sidea, ase ipantangkon ma parnaibataon na legan, parriah-riahon, mangankon daging ni pinahan na matei seng sinayat ampa daroh. (1 Mus. 9:4; 3 Mus. 3:17; 17:10-16.) 15:21 Ai humbani na basaia pe adong do bani ganup huta na mangambilankon si Musa, ai ibasa do suratni ganup ari Sabat bani parguruan. (bd. 13:15.) 15:22 Dob ai iputushon apostel-apostel, pangintuai-pangintuai ampa haganup kuria ai ma mamilih piga-piga halak hun tongah-tongah ni sidea, sisuruhon hu Antiokia rap pakon si Paulus ampa si Barnabas, ai ma si Judas, na igoran homa si Barnabas, ampa si Silas, si pambobai bani sanina-sanina ai. 15:23 Ia hata ni surat, siboanon ni sidea ai, ai ma: Hanami saninanasiam, apostel-apostel ampa pangintuai-pangintuai, manongos tabi do bani nasiam hasoman na humbani sipajuh begu-begu, na marianan i huta Antiokia, nagori Siria ampa Silisia. 15:24 Ibogei hanami, adong do piga-piga halak hun tongah-tongahnami, na so sinuruhnami, roh manggeori ampa mambumbangi uhurnasiam marhitei podah ni sidea. (ay. 1.) 15:25 Halani ai sauhur do hanami mamilih halak sisuruhon bani nasiam rap pakon si Barnabas ampa si Paulus, na hinaholongan in, 15:26 na ra marnalangkon hosahni halani goran ni Tuhan Jesus Kristus. (bd. 14:19.) 15:27 Ase isuruh hanami do si Judas ampa si Silas, ase dihut sidea padashon hata in bani nasiam. 15:28 Dear ma nini Tonduy Na pansing ampa hanami, na so paporsanonkon be bani nasiam, sobali na porlu on: 15:29 Pantangkon nasiam ma galangan bani sisombahon, daroh, daging ni pinahan na matei seng sinayat ampa parriah-riahon. Anggo ibalosi nasiam in, dear ma in. Horas ma! (Pangk. 2:14, 20.) 15:30 Ase ipaingkat ma sidea, gabe das ma hu Antiokia; dob ipatumpu sidea na mabuei ai, ipadas ma surat ai bani sidea. 15:31 Anjaha dob ibasa surat ai, malas ma uhur ni sidea, halani hata pangapohon ai. 15:32 Ia si Judas ampa si Silas, nabi do homa; buei do marsahap sidea ampa sanina ai, laho margogohi sidea. 15:33 Dob hundokah sidea ijai, ipaingkat sanina ai ma sidea ibagas damei, mulak hubani na marsuruh sidea. 15:34 Ia si Silas, marosuh do uhurni tading ijai. 15:35 Ia si Paulus ampa si Barnabas soh do lobei i Antiokia, gabe iambilankon sidea ma hata ni Tuhan in rap pakon halak na legan. 15:36 Dob salpu piga-piga ari, nini si Paulus ma hubani si Barnabas: Laho ma hita use mangidah saninanta in, bani ganup huta na dob niambilananta bani hata ni Naibata, atap na sonaha do sidea. (1 Tes. 3:5.) 15:37 Nini uhur ni si Barnabas, sihol ma dihut arahkononkon si Johannes, na margoran si Markus. (bd. 12:12, 25; Kol. 4:10.) 15:38 Tapi nini uhur ni si Paulus, seng dear be dihut ia, halani na dob itadingkon sidea i Pampilia, anjaha seng ihasomani sidea bani horja ai. (bd. 13:13.) 15:39 Gabe tubuh ma paringoran itongah-tongah ni sidea, pala sirang, gabe iarahkon si Barnabas ma si Markus marparau hu pulou Kiprus. (2 Tim. 4:11.) 15:40 Jadi ipilih si Paulus ma si Silas bahen hasomanni, gabe bingkat ma sidea, dob iondoskon sanina-sanina ai sidea, bani idop ni uhur ni Tuhan in. (ay. 22; bd. 14:26.) 15:41 Jadi idalani sidea ma Siria pakon Kilikia, laho patoguhkon uhur ni kuria ai. (bd. 14:22.)

Lahoan ni Apostel 16

16:1 Dob ai das ma sidea hu Derbe ampa Listra. Ijai adong ma sada susian, na margoran si Timoteus, anak ni sada boru Jahudi na porsaya, tapi halak Gorik do anggo bapani. (bd. 17:14; 19:22; 2 Tim. 1:5.) 16:2 Dear do baritani isaksihon hasoman na i Listra ampa Ikonium. (bd. 6:3; 1 Tes. 3:2.) 16:3 Jadi ipangindo uhur ni si Paulus ma ia hasomanni laho. Iboan ma ia anjaha isunat, halani halak Jahudi na ijai ai, ai ganup do mambotoh halak Gorik do bapani. (1 Kor. 9:20; Gal. 2:3.) 16:4 Tapi sanggah na isiari sidea huta-huta ai, iondoskon ma bani sidea aturan sidalankonon ai, na dob tinotapkon ni apostel ampa pangintuai-pangintuai ai i Jerusalem. (bd. 15:20-29.) 16:5 Gabe lambin toguhni ma haporsayaon ni kuria ai, anjaha lambin tambah do bilangan ni sidea ganup ari. 16:6 Tapi ibolus sidea ma nagori Prigia ampa Galatia, halani ilanglangi Tonduy Na pansing sidea mangkatahon hata in i Asia. (bd. 18:23.) 16:7 Jadi dob das sidea hampit nagori Misia, iuji sidea ma laho hu Bitinia, tapi lang ilopas Tonduy ni Jesus sidea. 16:8 Gabe ilopusi sidea ma Misia, anjaha tuad ma hu Troas. 16:9 Jadi taridah ma bani si Paulus sada panonggoran borngin-borngin. Jongjong ma sada halak Makedonia mangelek-eleksi, nini: Mandipar ma ham hu Makedonia, urupi ham ma hanami! (bd. 18:9; 9:12.) 16:10 Jadi dob iidah panonggoran ai, mintor iuhurhon hanami ma laho hu Makedonia, ai itimbangi hanami, Naibata do na mandilo hanami, laho mangambilankon ambilan na madear bani sidea. 16:11 Dob ai marparau ma hanami hun Troas torus hu Samotrake, anjaha sadari patarni ai hu Neapolis. 16:12 Hunjai hu Pilippi, ai ma huta pamatang ni Makedonia anjaha jajahan ni Rom. I huta ai ma hanami soh piga-piga ari. 16:13 Sanggah ari Sabat luar ma hanami hudarat ni huta ai, hubani sada bah; hu partonggoan na niarapkon ni uhurnami, anjaha hundul-hundul ma hanami ijai marsahap-sahap pakon naboru na martumpu ijai. 16:14 Jadi adong ma sada naboru, na margoran si Lidia, partiga-tiga hiou sigerger, hun huta Tiatira, sisombah Naibata. Ibuka Naibata ma uhurni gabe iparimbagaskon ma na hinatahon ni si Paulus. (Joh. 6:44.) 16:15 Ase dob tardidi ia rap pakon parrumahni, iojur ma hanami, nini: Anggo na tongon do ahu porsaya bani Tuhan in, nini uhurnasiam, roh ma nasiam tondok hu rumahku. Igogohkon do mangojur-ojur hanami. (ay. 34.) 16:16 Jadi masa ma, sanggah laho hanami hu partonggoan, pajumpah ma hanami pakon sada jabolon naboru sipartondung; buei do untung ni tuanni humbani partondungonni ai. (bd. 19:24; 1 Sam. 28:7.) 16:17 Ipaihut-ihut ma si Paulus ampa hanami lanjar mardilo-dilo: Juak-juak ni Naibata Sitimbulan in do halak on, na patugahkon dalan haluahon bani nasiam! (Mrk. 16:17.) 16:18 Sonai ma ibahen ganup ari. Tapi sogam do uhur ni si Paulus mangidah ai, marhusor ma ia, marsahap bani tonduy ai, nini ma: Huparentahkon ma bam marhitei Goran ni Jesus Kristus, luar ma ho humbani. Jadi luar ma ia bani na satongkin ai. (Mrk. 16:17.) 16:19 Tapi dob iidah tuanni ai, na so adong be pansarian siaraphonon humbani, itangkap sidea ma si Paulus ampa si Silas anjaha isarad ma hu tiga hulobei ni pamarentah. 16:20 Anjaha dob iboan sidea ia hubani panguhum ai, nini sidea ma: Halak Jahudi do halak on, na manggeori hutanta on. (bd. 17:6; 1 Raj. 18:17.) 16:21 Ibaritahon sidea do adat, na so bulih jaloon barang horjahononnami, ai halak Rom do hanami. 16:22 Halak na mabuei ai pe marurup do manlawan sidea, gabe ihatahon panguhum ai ma rintakon hiou ni sidea, ase ilonsingi. (2 Kor. 11:25; Pil. 1:30; 1 Tes. 2:2.) 16:23 Dob dokah sidea hona lonsingan, idabuh ma sidea hubagas tutupan, anjaha iparentahkon ma bani sijaga tutupan, ase pangkei sidea ijaga. 16:24 Domu hubani parentah, na jinaloni ai, ipamasuk ma sidea hu tutupan parbagas, anjaha poltik ma ibayangkon nahei ni sidea. 16:25 Tapi marayak tongah borngin, martonggo ma si Paulus ampa si Silas mamuji Naibata ipatangi-tangi na tartutup ai. (bd. 5:41.) 16:26 Tapi sompong ma masa lalou bolon, pala dugur onjolan ni tutupan ai, gabe mintor mangkabuha ma haganup labah, tanggal ma age gari ni sidea haganupan. (bd. 5:19; 12:7.) 16:27 Jadi tarpuho ma sijaga tutupan ai, anjaha dob iidah domma buha ganup labah ni tutupan ai, isintak ma podangni laho mamunuh dirini, ai iagan domma maporus ganup na tartutup ai. (bd. 12:19.) 16:28 Tapi ipagogoh si Paulus ma sorani mandilohon: Ulang bahen ham hasedaon bamu, ai ijon do hanami haganup! 16:29 Jadi ipindo ma suluh, marlintun ma ia hubagas, anjaha manrogop ma ia hitir-hitir ilobei ni si Paulus ampa si Silas. 16:30 Iarahkon ma sidea hudarat, nini ma: Aha ma sibahenonku, nasiam tuannami, ase maluah ahu? (bd. 2:37; 9:6.) 16:31 Jadi nini sidea ma: Haporsayai ma Tuhan Jesus, ase maluah ham pakon parrumahmu! (Mrk. 16:16; Joh. 3:36.) 16:32 Anjaha ihatahon sidea ma hata ni Tuhan in bani pakon bani haganup parrumahni. 16:33 Anjaha bani panorang ai, bornginni ai, iarahkon ma sidea anjaha iburihi ma ugah ni sidea; dob ai mintor tardidi ma ia ampa haganup sidea na satangga. 16:34 Iboan ma sidea hu rumahni, anjaha ipatorsa ma sipanganon bani sidea. Jadi malas ma uhurni ampa haganup sidea na sarumah, halani na dob porsaya ai sidea bani Naibata. (bd. 18:8; Joh. 4:53.) 16:35 Jadi dob siang ari, isuruh panguhum ai ma upas na mangkatahon: Paluah ma halak in! 16:36 Jadi ipadas sijaga tutupan ai ma hata ai bani si Paulus, nini ma: Domma isuruh panguhum ai na mangkatahon, ase paluahon nasiam. Ai pe hudarat ma nasiam, anjaha laho ma ibagas damei! 16:37 Tapi nini si Paulus ma bani sidea: Halak Rom do hanami, hape ilonsingi do hanami ilobei ni halak na mabuei, seng palobei ipareksa, dob ai idabuh hu tutupan. Mintor sonai ma marponop-ponop sidea, sihol paluahkon hanami? Lang sonai, maningon sidea do roh padarat hanami! (bd. 22:25, 28.) 16:38 Jadi ipatugah upas ai ma hata ai bani panguhum ai, gabe mabiar ma sidea dob ibogei halak Rom do hape sidea. 16:39 Jadi roh ma sidea, mangelek ma sidea bani apostel ai. Dob iarahkon hu darat, iojur ma sidea, ase itadingkon huta ai. 16:40 Ase dob mandarat sidea hun tutupan ai, laho ma sidea hu rumah ni si Lidia. Jadi dob iidah anjaha iapohi sanina-sanina ai, laho ma sidea.

Lahoan ni Apostel 17

17:1 Anjaha ibontas sidea ma Ampipolis ampa Apollonia, gabe das ma sidea hu Tessalonika. Adong do ijai rumah parguruan ni halak Jahudi. (1 Tes. 2:2.) 17:2 Jadi songon na somal, masuk ma si Paulus hujai, anjaha marsahap ma ia bani sidea tolu ari Sabat tuntun humbani surat in, (bd. 18:4.) 17:3 patugahkon ampa patorangkon, paboa na maningon marsitaronon anjaha puho do use Kristus in humbani na matei, anjaha ihatahon: Jesus, na hubaritahon in bani nasiam, in do Kristus in. (Luk. 24:27, 45.) 17:4 Deba humbani sidea marhatongonkon ai, gabe mardomu hubani si Paulus ampa si Silas; sonai homa halak Gorik sihabiari Naibata, buei tumang, age naboru na sangap pe humbuei do. (bd. 13:16, 50.) 17:5 Tapi subil do uhur ni halak Jahudi, gabe iarahkon sidea ma piga-piga jolma na jahat laho pajobu-jobu halak na mabuei ai, gabe geor ma haganup huta ai. Martumpu ma sidea i lobei ni rumah ni si Jason laho mamboan si Paulus ampa si Silas hulobei ni sidang rayat. (bd. 14:2.) 17:6 Tapi halani seng jumpah sidea, isarad ma si Jason ampa piga-piga hasoman ai hulobei ni pamarentah kota ai, lanjar mardilo-dilo: Roh do homa hubanta on sigeori sab dunia on, (bd. 16:20; Rom 16:21.) 17:7 anjaha si Jason do manjalo sidea ibagas rumahni. Haganup do sidea siimbang aturan ni Kesar, ai ihatahon, adong do raja na legan, ai ma Jesus. (Luk. 23:2.) 17:8 Geor do ibahen sidea halak na mabuei ampa pamarentah kota pabogei-bogei ai. 17:9 Dob ijalo sidea pe jaminan humbani si Jason ampa halak na legan ai, ase ipaluah sidea. 17:10 Jadi mintor ipabingkat sanina ai ma si Paulus ampa si Silas, bornginni ai hu Beroa, anjaha dob das hujai, laho ma sidea hu rumah parguruan ni Jahudi. 17:11 Bujuran do halak na ijai ai ase na i Tessalonika, ai malas do uhur ni sidea manjalo hata in, anjaha ganup ari do itangkasi Surat in atap na sintong do sonai. (Joh. 5:39; Jes. 34:16.) 17:12 Buei do humbani sidea na gabe porsaya, nai homa buei humbani halak Gorik, na sangap naboru age dalahi. 17:13 Tapi dob ibotoh halak Jahudi na i Tessalonika, na dob ibaritahon si Paulus homa hata ni Naibata i Beroa, roh ma sidea hujai, laho pajobu-jobuhon ampa manggeori halak na mabuei ai. (Tes. 2:14, 16.) 17:14 Jadi mintor ipaingkat hasoman ai ma si Paulus laho dompak laut; tading ma anggo si Silas ampa si Timoteus ijai. (bd. 16:1.) 17:15 Das do si Paulus itaruhkon sidea ronsi Aten, anjaha dob ai mulak ma sidea, dob ijalo sidea tonahni bani si Silas ampa si Timoteus mangkatahon, ase roh sidea sapodas-podasni, mangkasomanisi. 17:16 Sanggah na ipaima-ima Paulus sidea i Aten, gok ringis tumang ma uhurni ibagas, mangidah buei ni gana-gana i huta ai. 17:17 Jadi sai iparsahapkon do i rumah parguruan halak Jahudi ampa sihabiari Naibata, sonai homa ari-ari i tiga halak na roh hujai. 17:18 Marsual ma deba parpilsafah Epikurei ampa Stoiki pakonsi. Deba mangkatahon: Aha do na sihol hatahonon ni sibuei sahap in? Na deba mangkatahon: Siambilankon naibata na legan do gakni on, ai ibaritahon do Jesus ampa parpuhoon humbani na matei. (1 Kor. 1:23; 4:12.) 17:19 Jadi ialop sidea ma ia, iboan ma hu Areopagus, anjaha nini sidea ma: Boi do botohonnami. Atap podah baru aha do na hinatahonmin? 17:20 Ai songon na legan do podah na binobanmin bennami, sihol botohannami do pasal in. 17:21 Ia halak Aten haganup ampa halak na legan na ijai, seng dong panorangni dompak na legan sobali na mansahapkon ampa na mambogei pingkiran baru. 17:22 Ase jongjong ma si Paulus itongah-tongah ni Areopagus ai, nini ma: Nasiam halak Aten, huidah bani haganup, pongkut do nasiam bani parugamaon. 17:23 Ai sanggah na mardalani ahu, paidah-idah sisombahonnasiam, gabe jumpah ahu ma sada anjap-anjap na marsurat: Bani Naibata na so tinanda. Jadi na so tinanda, na sinombah nasiam ai, in do na sihol baritahononku bani nasiam. 17:24 Ia Naibata, sitompa dunia on ampa haganup isini, in ma Tuhan ni langit ampa tanoh, seng marianan Ia i rumah pinauli ni tangan. (bd. 7:48; 14:15.) 17:25 Seng hurangan Ia, mambahen pala idangan ni tangan ni jolma Ia, ai Ia do sibere bani ganup na tinompa hagoluhan ampa hosah ampa haganupan ai. (Ps. 50:8-13; Jak. 1:17.) 17:26 Humbani sada jolma do ijadihon bangsa ni manisia, ase iiani haganup sisik ni tanoh on. Itotaphon hinan do panorang ni ganup bangsa ampa parbalogan ni ianan bani sidea, (1 Mus. 1:27; 27; 5 Mus. 32:8; Ps. 74:17.) 17:27 ase ipindahi sidea Naibata, andohar tardadap sidea Ia, anjaha jumpahsi, ai seng daoh Ia humbani ganup hita. (5 Mus. 4:29; Jes. 55:6.) 17:28 Ai ibagas Dirini do hita manggoluh, miut anjaha marhosah, songon na hinatahon ni deba pandodingnasiam: Ginomparni do tongon hita. (Job 12:10.) 17:29 Ai pe, anggo ginompar na marasal humbani Naibata do hita, ulang ma iagan uhurta, usih Naibata bani omas, barang bani pirak, barang bani batu na tinukangan atap na piningkiran ni uhur ni jolma. (1 Mus. 27; Jes. 40:18; 44:9.) 17:30 Domma isalpuhon panonggor ni Naibata tahun haotoon, tapi anggo nuan ihatahon do bani haganup hajolmaon, ija-ija pe, ase ipaubah uhurni, (bd. 14:16; 20:21; Luk. 24:47.) 17:31 ai domma itontuhon sada ari paruhuman bani dunia on, ibagas hapintoran, marhitei sada halak na pinilihni. Anjaha ibere do bani haganup jolma dalan ase boi porsaya Bani, marhitei na ipuhoi Ia humbani na matei. (Joh. 5:27; Rom 10:14; 2 Kor. 5:10.) 17:32 Tapi dob ibogei sidea hatani ai pasal parpuhoon, manrisai ma na deba, anjaha na deba mangkatahon: Sihol bogeionnami ope hatamu sahali nari pasal ai. 17:33 Dob sonai, laho ma si Paulus hun tongah-tongah ni sidea. 17:34 Tapi adong do deba na mangihutkonsi, na gabe porsaya, songon si Dionisius, sada pagori ni Areopagus ai, ambah ni ai sada naboru, na margoran si Damaris, ampa deba nari hasoman ni sidea.

Lahoan ni Apostel 18

18:1 Dob ai bingkat ma si Paulus hun huta Aten laho hu huta Korint. (1 Kor. 1:2.) 18:2 Jadi jumpahsi ma ijai sada halak Jahudi, na margoran si Akila, na tubuh i Pontus, na roh baru hun Italia rap pakon parinangonni, si Priskilla, halani iparentahkon si Klaudius, maningon haganup halak Jahudi bungkas hun huta Rom. (Rom 16:3; 1 Kor. 16:19.) 18:3 Bani sidea ma ia marianan anjaha rap marhorja pakon sidea, halani sada hapandeian do sidea, ai ma martonun hiou tenda. (bd. 20:34; 1 Kor. 4:12; 1 Tes. 2:9.) 18:4 Marambilan do ia ganup ari Sabat i rumah parguruan, andohar marhatongon halak Jahudi ampa Gorik. (bd. 17:2, 3.) 18:5 Ase dob roh si Silas ampa si Timoteus hun Makedonia, igogohi si Paulus ma marambilan, laho manaksihon bani Jahudi, paboa Jesus do Kristus in. (bd. 9:22; 17:14, 15.) 18:6 Halani manlawan sidea anjaha manrehei, ipaspas si Paulus ma hiouni, anjaha nini ma bani sidea: Marsapata bani nasiam ma darohnasiam! Borsih do anggo ahu. Hunjon-hujanan bani halak sipajuh begu-begu ma ahu laho. (bd. 13:45, 51; 20:26.) 18:7 Lanjar misir ma ia hunjai, tondok ma ia bani sada halak na margoran si Titius Justus, sihabiari Naibata; rombankon rumah parguruan ai do rumahni. 18:8 Ia si Krispus, kopala ni rumah parguruan ai, porsaya do bani Tuhan in sonai haganup parrumahni; anjaha buei do halak Korint, dob ibogei ai, na gabe porsaya anjaha tardidi. (1 Kor. 1:14.) 18:9 Jadi nini Tuhan in ma bani si Paulus borngin-borngin marhitei sada panonggoran: Ulang ho mabiar, tapi hatahon ma, ulang ho sip! (bd. 23:11; Jes. 41:10; 1 Kor. 2:3.) 18:10 Ai huhasomani pe ho, sahalak pe lang dong na mangkahua ho, na sihol mangagou ho; ai buei do halak Bangku i huta on! (Jer. 1:17; 18; Hos. 2:25; Joh. 10:16.) 18:11 Ijai ma ia marianan satahun onom bulan dokahni, mangajarhon hata ni Naibata bani sidea. 18:12 Tapi sanggah si Gallio panggomgomi i Akaya, sapanriah ma halak Jahudi manlawan si Paulus, anjaha iboan ma ia hu paruhuman. 18:13 Nini sidea ma: Isahap-sahapi halak on do jolma mambalosi Naibata marsilawanan bani titah in. (bd. 6:13.) 18:14 Jadi sanggah sihol marsahap si Paulus, nini si Gallio ma dompak Jahudi: Nasiam halak Jahudi! Ambit halani parkara hasalahan atap hajahaton, patut do bantuanku nasiam. (bd. 25:11, 18, 19.) 18:15 Tapi halani parsalisihan pasal podah ampa goran ampa titah nasiam do in, uhurnasiam ma ijin; seng ra ahu manguhumi na sonin. (bd. 23:29; Joh. 18:31.) 18:16 Jadi ipalaho ma sidea hun paruhuman ai. 18:17 Gabe roh ma sidea haganup manangkap si Sostenes, kopala ni rumah parguruan ai, ibogbogi sidea ma ia ilobei ni paruhuman ai, tapi seng isampuri si Gallio ai. (1 Kor. 1:1.) 18:18 Tapi hundokah ope si Paulus ijai; dob ai mamuhun ma ia humbani sanina-sanina ai, anjaha marparau ma ia hu Siria, rap pakon si Priskilla ampa si Akilla. I Kenkerea, ipasuhurhon do jambulanni halani adong bagah-bagahni. (bd. 21:24; 4 Mus. 6:9, 18.) 18:19 Das ma sidea hu Epesus, anjaha itadingkon ma sidea ijai; ia sandiri, laho do hu rumah parguruan, laho marsahap pakon halak Jahudi. 18:20 Ipindo sidea do, ase hundokah ia ijai, tapi seng ra ia. 18:21 Tapi sanggah na laho marsirang humbani sidea, ihatahon do: Anggo marosuh Naibata, mulak do ahu bani nasiam. Dob ai misir ma ia marparau hun Epesus. (bd. 19:21; 1 Kor. 4:19; Jak. 4:15.) 18:22 Dob das hu Kesarea, tangkog ma ia hu Jerusalem, anjaha dob itabi kuria ai, tuad ma ia hu Antiokia. (bd. 21:15.) 18:23 Ase dob hundokah ia ijai, bingkat ma ia; ibontas ma nagori Galatia ampa Prigia, laho patoguhkon uhur ni haganup susian ai. (bd. 14:22.) 18:24 Tapi roh ma hu huta Epesus sada halak Jahudi, na margoran si Apollos, tubuh i huta Aleksandria; halak na pentar do ia, na torang mambotoh surat in. (1 Kor. 3:5, 6.) 18:25 Domma iajari ia pasal dalan ni Tuhan in, hinsah do uhurni marsahap anjaha torang do pamodahionni pasal Jesus; tapi pitah pandidion ni si Johannes do ibotoh. (bd. 19:1-3.) 18:26 Ipungkah ma ibagas hinsah ni uhur marsahap ibagas rumah parguruan. Ibogei si Akilla ampa si Priskilla ma ai, gabe iarahkon sidea ma ia, anjaha ipatorang sidea ma bani tulimat pasal dalan ni Naibata. 18:27 Jadi sanggah na sihol laho ia hu Akaya, ihadearhon sanina-sanina ai do ai, anjaha manongos surat do sidea, mangkatahon, ase ijalo sidea ia. Anjaha dob das ijai, gabe pangurupi na banggal do ia bani halak na porsaya, marhitei idop ni uhur ni Naibata, (1 Kor. 3:6.) 18:28 ai torang-torang do italuhon halak Jahudi ilobei ni halak na mabuei, marhitei na mambuktihon humbani surat in, paboa Jesus do Kristus in. (bd. 9:22; 17:3.)

Lahoan ni Apostel 19

19:1 Tapi sanggah i huta Korint si Apollos, ibontas si Paulus ma bagian pardologan ni tanoh ai, anjaha das ma ia hu huta Epesus, gabe jumpahsi ma ijai deba susian ai. (bd. 18:24.) 19:2 Ihatahon ma hubani sidea: Domma ijalo nasiam Tonduy Na pansing, sanggah na gabe porsaya nasiam? Jadi nini sidea ma hubani: Seng ongga ibogei hanami adong Tonduy Na pansing! (bd. 8:16; 10:44; Joh. 7:39.) 19:3 Isungkun ma sidea: Ai pandidion aha do ijalo nasiam? Balos ni sidea: Pandidion ni si Johannes do. (bd. 18:25.) 19:4 Nini si Paulus ma: Ia pandidion ni si Johannes, na mangkatahon paubahkon uhur do, ai iojur do halak na mabuei mangkaporsayai na sihol roh hun pudini, ai ma Jesus. (bd. 1:5; 13:24, 25; Mat. 3:11.) 19:5 Mambogei ai, ipandidihon sidea bei ma dirini hubagas Goran ni Tuhan Jesus. (bd. 2:38.) 19:6 Anjaha sanggah itampeihon si Paulus tanganni bani sidea, sogop ma Tonduy Na pansing bani sidea, jadi marhata na legan ma sidea anjaha manjahai. (bd. 8:17; 10:44, 46.) 19:7 Adong do sidea haganup tarsapuluh dua halak na martumpu ai. 19:8 Laho do ia hu rumah parguruan, anjaha marambilani ma ia ijai tolu bulan dokahni, laho patorangkon ampa mangajarhon pasal harajaon ni Naibata. 19:9 Tapi halani ipahengkeng na deba do uhurni, anjaha lang ra porsaya, ipabajan-bajan ope tene ugama ai ilobei ni na mabuei ai, gabe itadingkon ma sidea; iarahkon ma susian ai jadi i sikolah ni si Tiranus ma ia marambilan ganup ari. (bd. 13:45.) 19:10 Adong do dua tahun masa sonai, gabe haganup ma na marianan i Asia, mambogei hata ni Tuhan in, halak Jahudi age halak Gorik pe. (bd. 20:31.) 19:11 Hagogohon na sumurung do ibahen Naibata marhitei tangan ni si Paulus, (bd. 14:3.) 19:12 pala do saputanganni atap gonditni humbani angkulani iboan halak bani na boritan, gabe laho ma naborit ai humbani sidea anjaha luar tonduy na mabutak. (bd. 5:15; Luk. 8:44.) 19:13 Tapi adong ma deba halak Jahudi, na mardalan-dalan, halak siusir setan, na mansuba manobut Goran ni Tuhan Jesus bani na setanon, nini: Huusir ma hanima, marhitei Jesus, na niambilankon ni si Paulus! (Mat. 12:27; Luk. 9:49.) 19:14 Ai adong do pitu halak, anak ni sada malim ni Jahudi, na margoran si Skoia, na mambahen sisonai ai. 19:15 Tapi nini tonduy na butak ai ma mambalosi sidea: Hutanda do Jesus, pasal si Paulus pe hubotoh do, tapi ise do hanima? 19:16 Anjaha halak partonduy na butak ai pe, idorab anjaha magosam tumang ma sidea haganupan ibahen, gabe lintun ma sidea hun rumah ai, talanjang anjaha mangkaluha. 19:17 Ia na masa ai, tarbotoh do ai bani haganup halak Jahudi ampa halak Gorik, na marianan i huta Epesus, gabe roh ma biar bani sidea haganup, anjaha tunggung ma Goran ni Tuhan Jesus. (bd. 5:5, 11.) 19:18 Gabe roh ma buei halak na dob porsaya, mansopotkon anjaha patugahkon horja ponopan ni sidea. (Mat. 3:6.) 19:19 Anjaha buei do sihorjahon hadatuon hinan, mamboan pustaha-pustahani, lanjar itutung ma ai ilobei ni halak na mabuei; hargani, adong do itaksir lima ribu duit pirak. 19:20 Sonai ma lambin rarat hata ni Tuhan in anjaha lambin margogoh. 19:21 Dob salpu na masa ai, isurahon si Paulus ma mandalani nagori Makedonia ampa Akaya, dob ai laho hu Jerusalem, nini: Dob hunjai ahu, maningon dihut do huta Rom idahonku. (bd. 18:21; 23:11; Rom 1:15; 15:25, 28.) 19:22 Jadi isuruh ma deba halak siparugas bani, ai ma si Timoteus ampa si Erastus, hu Makedonia; ia sandiri soh ope tongkin i Asia. (bd. 16:1; 17:14; Rom 16:21, 23.) 19:23 Tapi tubuh ma ijia hageoron banggal halani ugama ai. (2 Kor. 1:8.) 19:24 Ai adong ma sada halak, tukang pirak, na margoran si Demetrius, sipauli rumah-rumah ni naibata Artemis; buei do untung iparoh bani tukang-tukang ai. (bd. 16:16.) 19:25 Ipatumpu ma tukang ai ampa parhorja ni sidea, jadi nini ma: Ibotoh nasiam do, humbani horja on do pansarianta. 19:26 Iidah anjaha ibogei nasiam do, seng pitah i Epesus on, tapi bani haganup Asia do, iojur lanjar ipagoling si Paulus buei halak. Nini, sedo na tongon naibata na pinauli ni tangan. 19:27 Anjaha seng pitah pansarianta marmara laho seda, dihut do naibata Artemis na banggal in, na sinombah i sab dunia on, gabe hiri ma rumahni anjaha magou hamuliaonni. 19:28 Mambogei ai gok marah ma uhur ni sidea, anjaha mardilo-dilo, nini ma: Na banggal do Artemis ni halak Epesus! 19:29 Jadi lutu ma huta ai, anjaha marurup ma sidea, laho hu ianan panontonan, lanjar isarad ma hujai si Gayus ampa si Aristarkus, halak Makedonia ai, hasoman sapardalanan ni si Paulus. (bd. 20:4, 2; 1 Kor. 15:32; 2 Kor. 1:8, 9.) 19:30 Sihol do si Paulus laho hu tongah-tongah ni halak ai, tapi seng ilopas susian ai. 19:31 Pala do deba pangintuai na hun Asia, na marhuan pakonsi, marsuruh na mangkatahon hubani, ase ulang laho ia hu panontonan ai. 19:32 Palegan-legan do hata ni surak-surak ni sidea, ai lutu tumang do partumpuan ai, anjaha bueinan do sidea na so mambotoh, atap halani aha do sidea martumpu. (bd. 21:24.) 19:33 Domu hubani ojur ni halak Jahudi, ipalobei ma si Aleksander humbani halak na mabuei ai, anjaha ia pe, ihilaphon ma tanganni laho mambere hatorangan bani halak na mabuei ai. 19:34 Tapi dob ibotoh sidea, halak Jahudi do ia hape, rap marsurak-surak ma sidea, hira dua jam dokahni: Banggal do Artemis ni halak Epesus! 19:35 Jadi ipasonang juru-tulis ni huta ai ma halak na mabuei ai, nini: Nasiam halak Epesus, ise na so mambotoh, paboa huta Epesus on do siparugas bani naibata Artemis na banggal in, ampa bani gombaranni, na madabuh hun langit? 19:36 Halani na so tarparnalang do ai, ai pe sonang ma nasiam, anjaha ulang ma tarolos atap mambahen aha pe. 19:37 Iboan nasiam do halak on hujon, seng sirampok rumah panumbahan sidea, atap pe sipahiri sisombahonta. 19:38 Ai pe anggo adong pangaduan ni si Demetrius ampa hasomanni tukang dompak atap ise pe, adong do paruhuman atap panguhum; sidea ma marsiaduan. 19:39 Tapi anggo adong pangaduannasiam na legan, bani pangadilan ma ai iputushon. 19:40 Ulang das hona aduhon hita halani halutuon sisadari on, ai seng dong tarbere hita alasan pasal halutuon on. 19:41 Anjaha dob ihatahon ai, ipalaho ma tumpuan ai.

Lahoan ni Apostel 20

20:1 Dob maronti na lutu ai, idilo si Paulus ma susian ai, anjaha dob marhata partadingan ia hubani sidea, bingkat ma ia hu Makedonia. 20:2 Dob idalani nagori ai, anjaha ipatoguh uhur ni sidea marhitei hatani, jadi das ma sidea hu tanoh Gorik. (bd. 19:21.) 20:3 Tolu bulan do ia soh ijai, anjaha halani ionggopi halak Jahudi ia, sanggah na laho marparau hinan ia hu Siria, gabe ipaputus ma uhurni mulak hun Makedonia. 20:4 Na mangkasomanisi ai ma si Sopater, anak ni si Pirus, hun Beroa, si Aristarkus ampa si Sekundus, halak Tessalonik, si Gayus, hun huta Derbe pakon si Timoteus, si Tikikus, pakon si Tropimus na hun Asia. (bd. 17:10; 19:22, 29; 2 Tim. 4:24, 20.) 20:5 Hun lobei do sidea laho, anjaha i Troas do hanami ipaima sidea. (bd. 16:8.) 20:6 Dob salpu pesta Paska, bingkat ma hanami marparau hu Pilipi, anjaha palima-arihon pajumpah ma hanami pakon sidea i Troas, anjaha soh ma hanami ijai pitu ari dokahni. 20:7 Bani ari parlobei ni minggu ai, sanggah martumpu hanami manopiki ruti, marambilan ma si Paulus bani sidea anjaha ipaganjang do ambilanni ai pala das tongah borngin halani sihol misir ia patarni ai. 20:8 Buei do suluh bani kamar pardatas ai, ianannami martumpu ai. 20:9 Jadi adong ma sada garama, na margoran si Oitikus, na hundul bani jandela; tartunduh do ia, sanggah na inunut si Paulus marambilan, gabe madabuh hu toruh humbani loteng patoluhon, anjaha domma matei sanggah hona angkat. 20:10 Jadi turun ma si Paulus, ijomba ma ia lanjar iabing, anjaha nini ma: Ulang nasiam lutu, ai ibagas dirini ope tonduyni! (1 Raj. 17:21, 22.) 20:11 Dob ai mulak ma ia hu atas, itopiki ma ruti, lanjar mangan ma; dokah ope ia marsahap-sahap pakon sidea, ronsi marayak siang ari, dob ai pe ase misir. 20:12 Manggoluh do garama ondi mulak hu rumahni, gabe tarapoh ma uhur ni sidea. 20:13 Parlobei do hanami masuk parau laho marlayar hu Assos, ijai do ia jaloonnami masuk parau; ai sonai do iaturhon, halani sihol mardalan darat ia. 20:14 Anjaha dob jumpahsi hanami i Assos, ijalo hanami ma ia masuk parau, gabe misir ma hanami marlayar hu Mitelene. 20:15 Dob marlayar hanami hunjai, das ma hanami patarni hu pulou Kios, patarni ai dohorhon pulou Samos, dob ai patarni ai use das ma hanami hu Miletos. (2 Tim. 4:20.) 20:16 Ai domma iputuskon si Paulus manlopusi Epesus, ase ulang magou panorang i Asia, ai tarolos do ia, andohar das ia i Jerusalem bani ari Pentakosta. (bd. 18:21.) 20:17 Tapi isuruh do hun Miletus hu Epesus na mandilo sintua-sintua ni kuria ai. 20:18 Jadi dob das sidea hubani, nini ma hubani sidea: Ibotoh nasiam do parlahouhu, sadokah rap ahu pakon nasiam, olat ni ari parlobei, dob hudogei Asia. (bd. 18:19; 19:10.) 20:19 Hubalosi do Tuhan in ibagas toruh ni uhur, mariluh-iluh manaron parlajouan na roh hubangku halani tahi-tahi ni Jahudi. (ay. 3; bd. 13:45.) 20:20 Seng adong huponopkon barang aha na marguna, na so niambilankon barang pinodahkon bani nasiam ilobei ni halak na mabuei atap marrumah-rumah pe. (2 Tim. 2:15; 4:2.) 20:21 Tongtong do husaksihon bani halak Jahudi age bani halak Gorik, hamubahon ni uhur bani Naibata ampa haporsayaon bani Tuhanta Jesus Kristus. (bd. 17:30, 31; 26:20; Mrk. 1:15; Heb. 6:1.) 20:22 Anggo sonari, songon na tarsangkut do ahu ibahen Tonduy in laho hu Jerusalem, anjaha seng hubotoh, barang aha na sihol masa bangku ijai. (bd. 18:21; 19:21.) 20:23 Pitah on: Bani haganup huta ilumbahon Tonduy in do, paboa tali ampa hamarsikon do sitagamonku ijai. (bd. 9:16; 21:4, 11.) 20:24 Tapi seng pala harga huhira hosahku, asal ma boi hupaujung langkahku ampa horja na dob hujalo humbani Tuhan Jesus, ai ma na manaksihon ambilan na madear pasal idop ni uhur ni Naibata. (bd. 21:13; 2 Tim. 4:7.) 20:25 Anjaha sonari, hubotoh do lang idahon ni nasiam be bohingku, haganup nasiam na huparayak laho mangambilankon harajaon ni Naibata. 20:26 Halani ai husaksihon ma bani nasiam sadari on, na dob borsih do ahu humbani sapata ni darohnasiam, (bd. 18:6; Hes. 3:19.) 20:27 ai seng dong hubuati age aha, hupabotohkon do bani nasiam ganup rosuh ni Naibata. (Ep. 1:9.) 20:28 Halani ai jaga nasiam ma dirinasiam ampa haganup hulanan in, ai na dob ipabangkit Tonduy Napansing do nasiam mardimata in, ase iparmahani nasiam kuria ni Tuhan in, na tinobusni marhitei darohni sandiri.(1 Tim. 4:16; 1 Ptr. 5:2; Pangk. 5:9.) 20:29 Ai hubotoh, anggo dob laho ahu, masuk ma bani nasiam begu panoroh, na so manarihon hulanan in. (Sak. 11:4, 5; Mat. 7:15.) 20:30 Gari hun tongah-tongahnasiam jongjong do halak na mamodahkon na lepak, laho mangojur-ojur susian in mangirikkonsi. (Mrk. 13:22; 1 Tim. 1:10.) 20:31 Halani ai jaga ma nasiam, ingat nasiam ma, na so marnamaronti ahu arian pakon borngin tolu tahun dokahni pagolpahon nasiam marhasoman iluh. (Mat. 24:42; Heb. 13:7, 17.) 20:32 Ai pe huondoskon ma nasiam hubani Naibata ampa hubani hata idop ni uhurni, na margogoh patoguhkon uhur anjaha mambere siteanon bani haganup na mapansing in. (bd. 26:18.) 20:33 Seng ongga ipindo uhurhu omas atap pirak ampa hiou humbani atap ise pe. (4 Mus. 16:15; 1 Sam. 12:3; 1 Kor. 9:12.) 20:34 Ibotoh nasiam do, tanganku do mansarihon na porlu bangku ampa bani na mangkasomani ahu. (bd. 18:3; 1 Kor. 4:12; 9:13, 15; 1 Tes. 2:9.) 20:35 Bani haganup do hupatuduhkon bani nasiam, maningon sonai do hita laho mangurupi halak na so margogoh, mardingat hata ni Tuhan Jesus, ai Ia do mangkatahon: Martuahan do na mambere ase na manjalo. 20:36 Dob ihatahon sonai, manrogop ma ia martonggo rap pakon sidea haganup. (bd. 21:5.) 20:37 Anjaha tangis ma sidea haganup, irohop anjaha isummah sidea ma si Paulus. 20:38 Na parahni ipusokkon uhur ni sidea, ai ma hatani na hinatahonni, na so idahon ni sidea be bohini. Lanjar itaruhkon sidea ma ia hu kapal. (ay. 25.)

Lahoan ni Apostel 21

21:1 Dob sirang hanami humbani sidea, marlayar ma hanami torus hu Kos, anjaha patarni ai hu Rodus, hunjai hu Patara. 21:2 Anjaha dob dapot hanami kapal na laho hu Penesia, ai ma imasuki hanami, lanjar marlayar ma hanami. 21:3 Dob ai iidah hanami ma pulou Kiprus, ilopusi hanami ma ai hampit sambilounami, anjaha marlayar ma hanami dompak Siria, gabe das ma i Tirus; ai ijai do bongkaron muatan ni kapal ai. 21:4 Iparayak hanami ma susian ai anjaha marsaran ijai pitu ari dokahni. Marhitei Tonduy in ipalumba sidea do si Paulus, ulang tangkog namin hu Jerusalem. (ay. 11, 12; bd. 20:23.) 21:5 Dob salpu arini hanami ijai, misir ma hanami manorushon pardalanan. Haganup do sidea manaruhkon hanami hu darat ni huta ai, parinangon age dakdanak. I topi laut ai manrogop do hanami anjaha martonggo. (bd. 20:36.) 21:6 Anjaha dob marjabat tangan, masuk ma hanami hu kapal, anjaha sidea pe mulak ma. 21:7 Hun Tirus marlayar ma hanami hu Ptolomais; anjaha ijai ma ujung ni parlayarannami; ijabat-tangani hanami ma hasoman-hasoman ai, anjaha ijai ma hanami marsaran sadari. 21:8 Patarni ai bingkat ma hanami, anjaha das ma hu Kesarea. Masuk ma hanami hu rumah ni si Pilippus, evangelis ai, ai ma sada humbani na pitu ai, gabe tondok bani ma hanami. (bd. 8:5, 40.) 21:9 Adong ompat boruni, sipanjahai. (bd. 2:17.) 21:10 Sanggah na marsaran ai hanami piga-piga ari ijai, tuad ma hun Judea sada halak, na margoran si Agabus. (bd. 11:28.) 21:11 Ijumpahkon ma hanami, ibuat ma gondit ni si Paulus, anjaha isangkuthon ma ai bani tanganni ampa naheini, lanjar ihatahon ma: anjaha ondoshononkon hubagas tangan ni sipajuh begu-begu. (bd. 20:23.) 21:12 Mambogei hata ai, ielek-elek hanami ma rap pakon halak na ijai ai, ase ulang tangkog ia hu Jerusalem. (Mat. 16:22.) 21:13 Tapi nini si Paulus ma: Aha do na binahennasiam in, tangis mambahen galek uhurhu? Sirsir do ahu sangkuton ronsi matei i Jerusalem halani goran ni Tuhan Jesus. (bd. 20:24.) 21:14 Halani seng ra ia ojuron, sip ma hanami, nini hanami ma: Sai saud ma harosuh ni Tuhan in! (1 Sam. 3:18; Mat. 6:10.) 21:15 Ase dob salpu ari ai, marugas ma hanami, laho tangkog hu Jerusalem. 21:16 Anjaha dihut do deba susian na hun Kesarea mangkasomani hanami, anjaha ibobai do hanami tondok hubani si Manason, na hun Kiprus, ai ma sada halak na dob dokah gabe susian. 21:17 Daskonsi hanami i Jerusalem, malas do uhur ni sanina-sanina ai manjalo hanami. 21:18 Anjaha patarni ai laho ma si Paulus rap pakon hanami marayak si Jakobus, anjaha roh do ganup sintua-sintua. (bd. 12:17; 15:13; Gal. 1:19; 2:9.) 21:19 Jadi dob ipadas tabini bani sidea, ipajojor ma na binahen ni Naibata bani halak sipajuh begu-begu marhitei horjani. (bd. 15:4, 12.) 21:20 Mambogei ai ipasangap sidea ma Naibata. Dob ai ihatahon sidea ma bani: Iidah ho do sanina, marribu-ribu do halak Jahudi na dob porsaya, anjaha haganup do sidea mamponguthon titah in. (bd. 15:1.) 21:21 Ibogei sidea, ipodahi ho do halak Jahudi, na itongah-tongah ni sipajuh begu-begu, ase itadingkon si Musa, anjaha ihatahon ho bani sidea, seng pala be sunaton anak ni sidea atap dalankonon adat-adat in. (bd. 16:3; Rom 10:4.) 21:22 Ai pe sonaha ma? Tontu ibogei do na dob roh ho. 21:23 Halani ai bahen ma songon na hinatahonnami on bam! Adong do bannami ompat halak, na marutang bagah-bagah. 21:24 Arahkon ma sidea, uras ma dirimu rap pakon sidea, anjaha harugihon ma papangkashon jambulan ni sidea, gabe botohon ni haganup halak ma, na so tongon do hape barita pasal ho ai, anjaha na dihut do homa ho mangkorjahon titah in. (bd. 18:18; 4 Mus. 6.) 21:25 Ia sipajuh begu-begu, na dob gabe porsaya, domma iputushon hita anjaha na parentahkon, ase ijaga bei dirini dompak galangan bani sisombah-sombahon, daroh, na matei seng sinayat ampa panriah-riahon. (bd. 15:20, 29.) 21:26 Jadi patarni ai iarahkon si Paulus ma halak ondi, anjaha dob iuras dirini rap pakon sidea, laho ma sidea hu rumah panumbahan, laho patugahkon sadihari marujung panorang pangurason ai, anjaha sadihari padason galangan ni sidea bei. 21:27 Tapi sanggah na laho marujung sipitu ari ai, iidah halak Jahudi na hun Asia ma ia i rumah panumbahan, jadi ipajobu-jobu sidea ma haganup halak na mabuei ai, itangkap ma ia, (bd. 24:18.) 21:28 lanjar idilo-dilohon: Nasiam halak Israel, urupi nasiam ma hanami on! On ma halak ia, na mangajar-ajari halak ija-ija pe manlawan bangsanta, ampa titah in ronsi ianan on. Ambahni ai dihut do halak Gorik iarahkon hu rumah panumbahan on, anjaha ibutaki do ianan na pansing on! (bd. 6:13, 14; Hes. 44:7.) 21:29 Ai iidah sidea do si Tropimus, na hun huta Epesus rap pakonsi i huta ai, gabe iagan, na dob iarahkon si Paulus do ia hu rumah panumbahan ai. (bd. 20:4; 2 Tim. 4:20.) 21:30 Jadi lutu ma ganup huta ai, anjaha martumpu ma ganup halak na mabuei ai; itangkap sidea ma si Paulus, isarad ma ia hudarat ni rumah panumbahan ai, anjaha mintor itutup ma sagala labah. 21:31 Anjaha sanggah na sihol bunuhon ni sidea ia, das ma hata hubani kapiten, na dob lutu do huta ai. 21:32 Jadi mintor iarahkon ma tentara ampa letnan, laho mandorab sidea; dob iidah sidea kapiten ai ampa tentarani, iparontihon sidea ma mambalbali si Paulus. (bd. 23:27.) 21:33 Laho ma kapiten ai hujai, itangkap ma si Paulus, anjaha ihatahon ma garion ia bani dua gari; ai ipareksa ma atap parja do ia ampa aha do na binahenni. (ay. 11; bd. 20:23.) 21:34 Tapi marsihatahon hatani do na mabuei ai; anjaha halani seng jumpahsi hatorangan na sintong, halani na lutu ai, ihatahon ma boanon ia hu tangsi. (bd. 19:32.) 21:35 Anjaha dob das ia bani andar ai, tentara ai mando mangusungsi, halani parurup ni halak na mabuei ai, 21:36 ai sai mangihut do halak na mabuei ai, lanjar dilo-dilo: Bunuh ia! (bd. 22:22; Luk. 23:18; Joh. 19:15.) 21:37 Sanggah na sihol arahkonon ni sidea ia hubagas tangsi ai, ihatahon ma hubani kapiten ai: Boi do ahu manluar bamu? Gabe nini ma: Ibotoh ho do hape hata Gorik? 21:38 Sedo ho hape halak Masir ai, na manlutui baru on anjaha na mangarahkon ompat ribu halak gerombolan hu halimisan? (bd. 5:36, 37.) 21:39 Jadi nini si Paulus ma: Halak Jahudi do ahu, marasal hun Tarsus na i nagori Silisia, warga kota na tarbarita ai. Hupindo atap na boi do ahu marsahap hubani halak na mabuei in! (bd. 9:11.) 21:40 Jadi halani ilopas do, jongjong ma si Paulus bani andar ai, anjaha ihilaphon ma tanganni bani halak na mabuei ai. Jadi dob sip bei, marsahap ma ia bani sidea ibagas hata Heber, nini ma: (bd. 13:16; 19:33.)

Lahoan ni Apostel 22

22:1 Nasiam sanina ampa bapa, tangar nasiam ma sonari pangapition diri na huhatahon ilobei nasiam! (bd. 7:2; 13:26.) 22:2 Ase dob ibogei sidea, na iparsahapkon ai sidea ibagas hata Heber, lambin sip ma sidea. (ay. 3, 16; bd. 9:1-22; 21:40; 26:9-18.) 22:3 Halak Jahudi do ahu, tubuh i Tarsus na i Silisia, tapi magodang i huta on; ilobei ni si Gamaliel do ahu iajari domu hubani hatulimaton ni titah ni ompungta, pongkut do ahu mangirikkon Naibata, songon haganup nasiam sadari on. (bd. 5:34; 21:39; Gal. 1:14.) 22:4 Huparburu do ronsi matei parugama on, husangkut anjaha hu patutupkon do dalahi age naboru, (bd. 8:3.) 22:5 anjaha pasal ai, sintua ni malim ampa harungguan ni pangintuai-pangintuai do saksi bangku. Humbani sidea do hujalo surat siboanon hubani sanina-sanina ai, anjaha laho ma ahu hu Damaskus, sihol manangkapi na ijai ai homa, anjaha mamboan sidea ibagas gari hu Jerusalem, ase iuhumi. 22:6 Tapi masa ma, sanggah itongah dalan ahu, dohorhon Damaskus, hira-hira tongah arian, sompong ma marsinalsal hun datas, inggot hubangku, sinalsal na lihar tumang. 22:7 Tompas ma ahu hu tanoh, anjaha hubogei ma sora na mangkatahon hubangku: Saul! Saul! Mase ma pardakdakonmu Ahu? 22:8 Jadi ningku ma mambalosi: Ise do Ham Tuhan? Nini ma hubangku: Jesus do Ahu, na hun Nasaret, na pinardakdakmin! 22:9 Iidah hasomanku do namin sinalsal ai, tapi anggo sora ai, na marsahap pakon ahu, seng ibogei sidea. 22:10 Jadi ningku ma: Aha ma sibahenonku, Tuhan? Jadi ihatahon Tuhan in ma hubangku: Jongjong ma ho, laho ma ho hu Damaskus, ijai ma patugahon bam haganup na patut sihorjahononmu. 22:11 Tapi seng marpangidah be ahu ibahen sinalsal ni sondang ai, gabe itogu hasomanku mando ahu das hu Damaskus. 22:12 Anjaha dong ma ijai sada halak, na margoran si Ananias, halak na daulat domu hubani titah in, dear do baritani bani haganup Jahudi na marianan ijai. 22:13 Roh do ia hubangku nini: Ambia Saul, marpangidah ma ho! Jadi mintor marpangidah ma ahu anjaha huidah ma ia. 22:14 Dob ai nini ma: Domma ipilih Naibata ni ompungta ho, ase itanda ho rosuh ni uhurni, iidah ho Parpintor in anjaha ibogei ho sandiri sorani, 22:15 ase gabe saksini ho bani haganup jolma pasal na niidah ampa na binogeimu. 22:16 Ai pe, mase ma sonai sangsi-sangsi uhurmu? Jongjong ma anjaha tardidi, paburihkon dousamu marhitei na mandilo Goranni. 22:17 Dob mulak ahu hu Jerusalem anjaha martonggo i rumah panumbahan, marpanonggoran do ahu. (bd. 9:26; 2 Kor. 12:2.) 22:18 Huidah do Ia mangkatahon bangku: Papodas ma misir hun Jerusalem, ai seng ra sidea manjalo hasaksianmu pasal Ahu. 22:19 Jadi ningku ma: Ibotoh sidea do Tuhan, na hupatutupkon anjaha hulonsingi do na porsaya Bamu bani ganup rumah parguruan. 22:20 Anjaha sanggah na hona duruskon daroh ni si Stepanus, saksimu ondi, jongjong do au homa ijai, huhadearhon do ai, anjaha ahu manjaga pakeian ni na mambunuhsi. (bd. 7:58; 8:1.) 22:21 Jadi nini ma dompak ahu: Laho ma, ai hubani na daoh do ho suruhonku, ai ma hubani sipajuh begu-begu. 22:22 Das hubani hatani on, itangihon sidea do ia; dob ai ipagogoh sidea ma sorani, nini ma: Padaoh ma jolma sisonin hun tanoh on, seng patut ia manggoluh! (bd. 21:36; 25:24; Luk. 23:18.) 22:23 Tapi sai mardilo-dilo do sidea, ihilap-hilapkon pakeianni anjaha ipansaburhon orbuk hu atas. 22:24 Jadi ihatahon kapiten ai ma ia boanon hubagas tangsi, anjaha isuruh ma pareksaon ia marhitei na manlonsingisi, ase ibotoh mase sonai parsurak-surak ni sidea dompaksi. (bd. 21:34.) 22:25 Tapi dob isangkut sidea ia bani tali huling-kuling, nini si Paulus ma dompak letnan na jongjong ijai: Ai bulih do lonsingan nasiam warga negara Rom, age lape na pareksa parkarani? (bd. 16:37; 23:27.) 22:26 Mambogei ai letnan ai, laho ma ia bani kapiten ai, patugahkon ai, nini ma: Ai aha do na sihol bahenonmu? Halak Rom do hape halak ai. 22:27 Jadi roh ma kapiten ai hubani, nini ma: Patugah bangku, halak Rom do ho tongon? Balosni: Ai do! 22:28 Dob ai marbalos ma kapiten ai: Anggo ahu, buei do rugi mamboli hak warga negara in. Tapi nini si Paulus ma: Anggo ahu, humbani partubuhku do sonai. 22:29 Jadi mintor surut ma halak na sihol mamareksa ai. Kapiten ai pe mabiar ma, dob ibotoh halak Rom do hape si Paulus, na dob sinuruhni sangkuton. (bd. 4:33; 16:38.) 22:30 Patarni ai sihol ma torang botohonni, aha halani mambahen na iaduhon halak Jahudi ia; ipadarat ma ia, ihatahon ma martumpu sintua ni malim ampa rapot bolon ai, anjaha si Paulus pe itogu ma hutongah-tongah ni sidea. (bd. 23:28.)

Lahoan ni Apostel 23

23:1 Jadi ikawahkon si Paulus ma rapot bolon ai, nini ma: Nasiam hasoman, na marparlahou do ahu humbani gok ni uhurhu ilobei ni Naibata ronsi sadari on. (bd. 22:1; 24:16.) 23:2 Tapi ihatahon sintua ni malim Ananias ma halak na jongjong ijai mamastap babahni. (Jer. 20:1, 2; Joh. 18:22.) 23:3 Jadi nini si Paulus ma hubani: Pastapon ni Naibata ma ho, ale dingding na hinapur! Na hundul do ho manguhumi ahu marguru hubani titah, hape ihatahon ho do ahu pastapon marlawan bani titah! (Mat. 23:27; Joh. 7:51.) 23:4 Dob ai nini halak na jongjong ijai ma: Ai pahirion do sintua ni malim ni Naibata? 23:5 Jadi nini si Paulus ma: Lang na hubotoh, ale hasoman, ia sintua ni malim. Ai tarsurat do: Seng bulih pahirionmu sintua ni bangsamu. (2 Mus. 22:28.) 23:6 Tapi ibotoh si Paulus ma deba humbani sidea, ai ma Sadukei, na deba nari halak Parisei, gabe idilohon ma i rapot ai: Nasiam sanina! Halak Parisei do ahu, anjaha anak ni Parisei. Halani pangarapan ai ampa parpuhoon humbani na matei do, ase hu paruhuman on ahu. (bd. 22:3; 24:15, 21.) 23:7 Jadi dob ihatahon sonai, marsalisih ma halak Parisei pakon halak Sadukei, gabe marbolah ma rapot ai. 23:8 Ai ihatahon Sadukei do, paboa seng dong parpuhoon humbani na matei, sonai age malekat, age tonduy. Tapi anggo Parisei, iparhatongon do haduasi. (bd. 4:2; Mat. 22:23.) 23:9 Gabe lutu tumang ma. Tapi jongjong ma deba sibotoh surat humbani golongan ni Parisei manlawan, nini ma: Seng dong jumpah hanami na jahat bani halak on. Atap na tongon do iparsahapkon Tonduy ia atap malekat ni Naibata? (bd. 25:25.) 23:10 Tapi lambin banggalni ma paringoran ai, jadi mabiar ma kapiten ai, atap sonaha iparsirak sidea si Paulus, gabe ihatahon ma tuad tentara ai laho manariksi hun tongah-tongah ni sidea, anjaha ase iboan hu tangsi. (bd. 22:24.) 23:11 Anjaha bornginni ai jongjong do Tuhan in i lambungni, nini ma: Tenger ma uhurmu! Songon na dob sinaksihonmu Ahu i Jerusalem, sonai do saksihononmu Ahu i huta Rom. (bd. 18:9; 19:21; 27:24.) 23:12 Dob siang ari, mambahen panriahan ma halak Jahudi, marbulawan ma sidea, seng mangan atap minum sidea, anggo lape hona bunuh si Paulus. 23:13 Adong do lobih ompat puluh halak sidea, na mambahen parbulawanan ai. 23:14 Iparayak sidea ma sintua ni malim ampa pangintuai-pangintuai, nini ma: Domma marbulawan hanami, na so bulih daionnami age aha, anggo seng ibunuh hanami ope si Paulus. 23:15 Ai pe, rap ma nasiam pakon rapot in mangindohon bani kapiten ai, ase iboan ia hu lobeinasiam, songon na laho mamareksa parkara ai hun torang, anjaha hanami pe marsiap-siap ma mambunuhsi sanggah itongah dalan ope. 23:16 Tapi tarbogei do partahi-tahian ai bani panogolan ni si Paulus, gabe laho ma ia hu tangsi, patugahkon ai bani si Paulus. 23:17 Jadi idilo si Paulus ma sada letnan, anjaha ihatahon ma dompaksi: Arahkon ham lobei parana on bani kapiten ai, ai adong do sipatugahonni bani. 23:18 Jadi iarahkon ma ia, anjaha iboan ma bani kapiten ai, nini ma: Na idilo si Paulus na tartutup ai do ahu; ipindo hubangku, ase huboan parana on bamu, halani adong sihatahononni bamu. 23:19 Ijolom kapiten ai ma tanganni, iarahkon ma ia bani na suhi, anjaha isungkun ma ia: Ai aha do sipatugahonmu bangku? 23:20 Jadi nini ma: Na dob manriah do halak Jahudi, mangindohon bamu, ase boanon patar si Paulus hulobei ni rapot bolon, songon na laho mamareksa parkarani in huntorang. 23:21 Ai pe, ulang ma balosi ham sidea, ai lobih do ompat puluh halak humbani sidea, na dob marbulawan, seng mangan atap minum pe, anggo lape ibunuh sidea ia; domma marsiap-siap sidea, pitah na paimahon hatamu mando. 23:22 Dob sonai isuruh kapiten ai ma parana ai mulak, ihatahon ma bani: Ulang patugah atap bani ise pe, na dob ipadas ho on bangku. 23:23 Jadi idilo ma dua letnan hu lobeini, nini ma: Pasirsir nasiam ma dua ratus tentara laho hu Kesarea, rap pakon pitu puluh halak tentara siajak huda, ambah ni ai dua ratus sipartanja, pukul tolu borngin. 23:24 Pasirsir homa huda siajakon ni si Paulus, laho mamboansi horas-horas hubani gubernus Feliks. 23:25 Lanjar ibahen ma surat sonon isini: 23:26 Klaudius Lisias hubani na pinarsangapan gubernur Feliks. (bd. 24:3.) 23:27 Na itangkap halak Jahudi do halak on; sanggah sihol bunuhon ni sidea ia, roh do ahu ampa tentera paluahkonsi, dob hubotoh halak Rom do ia. (bd. 21:30, 33; 22:25.) 23:28 Laho mambotoh atap halani aha do, ase isalahkon sidea ia, gabe huarahkon ma ia hulobei ni rapot ni sidea. (bd. 22:30.) 23:29 Jadi jumpah ahu ma, halani parsalisihan pasal titah ni sidea do ase iaduhon sidea ia; seng dong alasan mambahen marutang hosah ia atap tartutup. (bd. 18:14, 15; 25:18, 19.) 23:30 Tapi adong ma na patugahkon bangku pasal partahi-tahian ni sidea dompak halak on, gabe mintor ma husuruh ia bamu, anjaha huhatahon homa bani sipangadu, ase bamu ma isahapkon sihatahononni. (bd. 24:8.) 23:31 Ase iboan tentara ai ma si Paulus domu hubani parentah ai, iarahkon ma ia bani na saborngin ai das hu Antipatris. 23:32 Patarni ai isuruh ma siparhuda manaruhkonsi torus; mulak hu tangsi ma anggo sidea. 23:33 Jadi das ma sidea hu Kesarea, ipadas sidea ma surat ai hubani gubernur ai, anjaha si Paulus pe iarahkon ma hu lobeini. 23:34 Jadi dob ibasa surat ai, isungkun ma, barang hun nagori ja do ia. Anjaha dob ibotoh na hun Silisia do ia, nini ma: (bd. 22:3.) 23:35 Hupareksa pe ho, anggo roh na mangaduhon ho ai. Jadi ihatahon ma, ase itahan ia i rumah paruhuman ni raja Herodes. (bd. 25:16.)

Lahoan ni Apostel 24

24:1 Ase dob salpu lima ari, tuad ma si Ananias, sintua ni malim ai, rap pakon deba pangintuai ampa sada siparhata, na margoran si Tertullus; jadi ipadas sidea ma pangaduanni pasal si Paulus bani gubernur ai. (bd. 23:2.) 24:2 Jadi dob idilo ia, ihatahon si Tertullus ma pangaduanni, nini ma: 24:3 Paboa na dapotan damei na buei do hanami marhitei usahamu, anjaha marhitei panarihonmu buei ma tambah hadearon bani bangsa on, pasal ai iakui hanami do tongtong atap ija-ija pe marhasoman tarima kasih banggal, ham Feliks, na pinarsangapan. 24:4 Tapi ase ulang madokahtu hanami patangi-tangionmu, hupangindo ma bamu, ase ra ma ham, domu hubani rosuh ni uhurmu, manangihon hanami tongkin. 24:5 Jumpah hanami do halak on songon sampar ampa panggeori bani haganup halak Jahudi i sab dunia on, anjaha pambobai ni sekte Nasarani do ia. (bd. 17:6; 1 Kor. 4:13.) 24:6 Iuji do homa pabutakkon rumah panumbahan, halani ai do, ase itangkap hanami ia, ase iuhumi hanami ia domu hubani titahnami. 24:7 Tapi roh ma kapiten Lisias, anjaha ibuat ma ia marhasoman paksa humbennami, 24:8 anjaha iparentahkon sagala sipangadu roh mangadap ham. Anggo isungkun ham ia, boi do botohonmu, paboa sintong do pangaduannami in. 24:9 Halak Jahudi pe dihut do mambahen pangaduan, anjaha ionjolhon sidea do, paboa sonai do tongon parkara ai. 24:10 Jadi dob ihilaphon gubernur ai tanganni mangkatahon, ase marsahap ia, gabe nini si Paulus ma mambalosi: Halani hubotoh, domma dokah ham panguhum bani bangsa on, hinsah do uhurhu mansahapkon hata pangapition bani diringku. 24:11 Boi do patangkasonmu, paboa sapuluh dua ari ope salpu, dob tangkog ahu hu Jerusalem laho martonggo. (bd. 21:17.) 24:12 Seng dong jumpah sidea ahu marsual pakon atap ise pe, barang manlutui halak na mabuei, age i rumah panumbahan, age i rumah parguruan barang ibagas huta pe. (bd. 25:8.) 24:13 Anjaha seng tarbuktihon sidea bamu pasal pangaduan ni sidea ai dompak ahu. 24:14 Tapi pasal on huakui do bamu, na hubalosi do Naibata ni ompung, mangihutkon podah ai, na ginoran ni sidea sekte, anjaha huhaporsayai do haganup na tarsurat bani titah atap marhitei nabi-nabi pe. (ay. 5; bd. 26:22.) 24:15 Na marpangarapan do ahu bani Naibata, paboa mulak manggoluh parpintor ampa pargeduk, songon na niarapkon ni sidea ai. (bd. 26:6-8; Dan. 12:2; Joh. 5:20.) 24:16 Halani ai do mambahen huhabujurhon, ase maruhur na borsih ahu tongtong ilobei ni Naibata ampa ilobei ni jolma. (bd. 23:1; 2 Kor. 1:12.) 24:17 Tapi dob salpu piga-piga tahun, roh ma ahu mamboan sibere-bere ampa galangan bani bangsangku. (bd. 11:29; Rom 15:25; Gal. 2:10.) 24:18 Anjaha sanggah na hudalankon ai, dob salosei pangurasion, jumpah piga-piga halak Jahudi na hun Asia ma ahu, tapi seng adong marhasoman halak na mabuei barang ibagas na geor pe. (bd. 21:27.) 24:19 Sidea do na patut mangadap ham laho mangaduhon, anggo adong pangaduan ni sidea dompak ahu. 24:20 Age sidea on pe ihatahon ma barang aha do salahku jumpah sidea, sanggah na jongjong ahu i rapot bolon ai. 24:21 Pitah hata on do na husahapkon, sanggah na jongjong ahu itongah-tongah ni sidea: Halani parpuhoon humbani na matei do, ase jongjong ahu ilobei ni paruhumannasiam sadari on. (bd. 23:6.) 24:22 Tapi ilalap-lalapi si Feliks ma sidea, halani torang tumang do ibotoh pasal podah ai, nini ma: Dob tuad pe kapiten Lisias, ase huputuskon parkara nasiam on. 24:23 Jadi iparentahkon ma hubani kopala ni tentara, ase itahan si Paulus, tapi bebas otik, anjaha seng bulih larangon hasomanni marugas bani. 24:24 Dob salpu piga-piga ari, roh ma si Feliks ampa parinangonni si Drusilla, boru Jahudi; isuruh ma na mangalopi si Paulus, laho mambogei hatani pasal haporsayaon bani Kristus Jesus. 24:25 Tapi sanggah na marsahap ia pasal hapintoran, na manrajai diri ampa uhum magira, mabiar ma si Feliks, gabe nini ma: Mulak ma ho lobei; anggo adong panorangku use, hudilo pe ho. 24:26 Mangarap do ia, ra si Paulus mambere duit bani, halani ai gati do isuruh na mangalop si Paulus, lanjar marsahap-sahap pakonsi. 24:27 Tapi dob salpu dua tahun, roh ma si Porkius Festus manggantih si Feliks. Anjaha halani sihol do uhurni mambuat uhur ni halak Jahudi, gabe ipaturut si Feliks ma si Paulus tartahan. (bd. 25:9.)

Lahoan ni Apostel 25

25:1 Dob adong tolu ari si Festus manjolom pamarentahan, tangkog ma ia hun huta Kesarea hu Jerusalem. (bd. 23:23; 24:27.) 25:2 Jadi roh ma hu lobeini sintua ni malim ampa kopala-kopala ni halak Jahudi mangaduhon si Paulus. 25:3 Ipindohon sidea ma hubani, songon idop ni uhurni bani sidea manlawan si Paulus, ase isuruh ia hu Jerusalem, tapi domma iranggihon sidea hinan manggompangisi itongah dalan, laho mambunuhsi. (bd. 23:15.) 25:4 Tapi nini si Festus ma mambalosi: Na dob tartahan do si Paulus i Kesarea, ahu pe podas ma mulak hujai. 25:5 Ai pe, rap tuad ma na sangap-sangapnasiam pakon ahu, anjaha anggo adong na salah bani halak ai, ase sidea ma mangaduhonsi. 25:6 Ase dob adong ia itongah-tongah ni sidea ualuh ronsi sapuluh ari, tuad ma ia hu Kesarea; anjaha patarni ai hundul ma ia bani kursi paruhumanni, anjaha ihatahon ma boanon si Paulus hu lobeini. 25:7 Ase dob roh ia, iinggoti halak Jahudi, na tuad hun Jerusalem ma ia, anjaha ipangkatahon sidea ma dompaksi pangaduan na borat, tapi seng tarbuktihon sidea. (bd. 24:13.) 25:8 Tapi nini si Paulus ma bani hata pangapition dirini: Seng mardousa ahu dompak titah ni Jahudi, barang dompak rumah panumbahan barang dompak Kesar pe. (bd. 24:12; 28:17.) 25:9 Tapi laho mambuat uhur ni Jahudi, nini si Festus ma mambalosi si Paulus: Ra do ho tangkog hu Jerusalem, ase ijai ho huuhumi pasal haganupan ai? 25:10 Jadi nini si Paulus ma: Na jongjong do ahu nuan ilobei ni paruhuman ni Kesar, anjaha ijon do ahu patut iuhumi. Hubani halak Jahudi seng dong marsalah ahu, songon na torang ibotoh ham. (bd. 26:32.) 25:11 Ai pe, anggo adong huhorjahon na jahat, na patut mambahen marutang hosah ahu, seng manjua ahu matei; tapi anggo seng tongon na tinukaskon ni sidea ai bangku, ise pe lang boi na padas ahu bani sidea. Naik apel do ahu bani Kesar. 25:12 Ia si Festus, dob manriah ia pakon hasomanni sapanriahan, nini ma mambalosi: Mangindo apel do ho bani Kesar, ai pe bani Kesar ma ho laho! (bd. 27:24.) 25:13 Dob salpu piga-piga ari roh ma raja Agrippa pakon si Bernike hu Kesarea, laho manghormat si Festus. 25:14 Sanggah na ijai sidea barang piga-piga ari, ipatugah si Festus ma bani raja ai pasal parkara ni si Paulus, nini ma: Adong do ijon sada halak na tartutup, itadingkon si Feliks. (bd. 24:27.) 25:15 Sanggah na i Jerusalem ahu, mangadap do hubangku sintua ni malim ampa kopala-kopala ni halak Jahudi, ipindo ase hona uhum ia. 25:16 Jadi ningku ma mambalosi sidea: Seng adat ai bani halak Rom mangondoskon sada halak, anggo lang palobei mardumpar bohi nabahen na niaduhon ampa sipangadu, anjaha nabere panorang mangapiti dirini dompak pangaduan ai. 25:17 Halani ai dob tumpu sidea ijon, seng hupadokah-dokah be; patarni ai mintor hundul ma ahu bani paruhuman, anjaha huhatahon ma boanon dalahi ai. 25:18 Sanggah jongjong sipangadu ai, seng adong age sada salahni tarbuktihon sidea, songon niagan ni uhur hinan. 25:19 Tapi adong do parsalisihan ni sidea pasal ugama ni sidea pakon pasal sada halak, na margoran Jesus, na dob matei gabe mulak manggoluh, nini si Paulus. (bd. 18:15.) 25:20 Tapi sanggah na sosak ahu pasal parkara ai, hasungkun ma, atap na marosuh do ia laho hu Jerusalem, ase ijai ia iuhumi pasal ai. 25:21 Tapi ipindo si Paulus do ramotkononkon ia, paimahon haputusan ni na marmulia in; jadi huhatahon ma jagaon ia, paima husuruh ia bani Kesar. 25:22 Tapi nini si Agrippa ma hubani si Festus: Sihol do bogeionku hata ni halak ai. Jadi nini ma: Anggo sonai, patar ma bogei ham ia! (Luk. 23:8.) 25:23 Jadi patarni ai, roh ma si Agrippa ampa si Bernike marhasangapon banggal, masuk ma sidea hu kamar paruhuman rap pakon panglima-panglima ampa na sangap-sangap i huta ai, anjaha ihatahon si Festus ma boanon si Paulus hujai. 25:24 Jadi ihatahon si Festus ma: Ham raja Agrippa ampa haganup na adong ijon rap pakon hanami, tonggor nasiam ma halak in! Halani ia do ase iparayak halak Jahudi ahu, i Jerusalem age ijon, anjaha sai idilo-dilohon, na so patut be manggoluh ia. (ay. 2, 7; bd. 22:22.) 25:25 Tapi torang do hubotoh na so adong do salahni mambahen patut marutang hosah ia. Halani naik apel do ia bani Kesar huputushon ma marsuruhsi hubamu. 25:26 Tapi seng dong tarsuratkon ahu pasalsi bani tuanku; halani ai do ase huboan ia hulobeinasiam, tapi tarlobih ma ai hu lobeimu, ale raja Agrippa, ase adong sisurathononku, dob napareksa ia. 25:27 Ai haru do huahap, suruhon na tartahan, lang napatugah hasalahanni.

Lahoan ni Apostel 26

26:1 Dob ai ihatahon si Agrippa ma hubani si Paulus: Dear ma marsahap ho pasal dirimu! Jadi iangkat si Paulus ma tanganni, lanjar marsahap ma ia mangapiti dirini. 26:2 Na martuah do ahu huahap, ham raja Agrippa, halani boi ahu sadari on mambahen pangapition pasal diringku dompak sagala pangaduan ni Jahudi, 26:3 halani botoh tumang do ham pasal adat ampa parsalisihan ni halak Jahudi; halani ai mangindo ma ahu bamu: Sabar ma ham manangihon hatangku! 26:4 Ibotoh halak Jahudi do ganup parlahouhu humbani haetek-etekonku nari itongah-tongah ni bangsangku i Jerusalem. (bd. 22:3; Gal. 1:13.) 26:5 Tongon domma dokah itandai sidea ahu, anjaha ambit ra sidea, tarsaksihon sidea do, paboa na huirikkon do golongan Parisei, ai ma situlimatan pasal ugamanta. (bd. 23:6; Pil. 3:5.) 26:6 Anjaha sonari jongjong do ahu i paruhuman, halani pangarapan ni uhur bani bagah-bagah, na binere ni Naibata bani ompungta. (bd. 28:20.) 26:7 Sihol das hujai do na niarapkon ni bangsanta na sapuluh dua marga in, mambahen na ibalosi sidea Naibata arian pakon borngin humbani bois ni gogoh ni sidea. Halani pangarapan ai do, ale rajanami, mambahen na iaduhon halak Jahudi ahu. (bd. 24:15.) 26:8 Sonaha ma, ase adong itongah-tongahnasiam na so mangkaporsayai, paboa pagoluhon ni Naibata do na matei? (ay. 9-18; bd. 4:2; 9:1-22; 22:3-16.) 26:9 Ahu sandiri huagan do lobei, maningon patut do lawanon Goran ni Jesus na hun Nasaret in sagogoh-gogohni. 26:10 Anjaha sonai do hubahen i Jerusalem. Seng pitah hupatutupkon buei humbani halak na mapansing ai, marhitei kuasa na humbani sintua ni malim, tapi anggo tarbunuh sidea, huhadearhon do ai. 26:11 Gati do huarsik sidea bani haganup rumah parguruan, andohar ra sidea manrisai; halani gila ni uhurhu, huparburu do sidea ronsi huta sidaohan. 26:12 Sonai homa laho do ahu hu Damaskus marhitei kuasa ampa parpaingkat ni sintua ni malim. 26:13 Tapi sanggah itongah dalan, ham rajanami, sanggah tongah arian, huidah ma sinalsal na liharan marimbang mata ni ari roh hun langit, manondangi ahu inggot ampa hasomanku saodoran. 26:14 Jadi martompasan ma hanami haganup hu tanoh, anjaha hutangar ma sada sora ibagas hata Heber: Saul, Saul! Mase pardakdakonmu ahu? Sunsah ma ho manandaki suga-suga! 26:15 Tapi ningku ma: Ise do Ham, Tuhan? Jadi nini Tuhan in ma: Jesus do Ahu, na pinardakdakmin! 26:16 Tapi jongjong ma ho! Ase hupataridahkon pe diringku bam, on do sura-surangku, ai ma pabangkit ho gabe juak-juak ampa saksingku, laho manaksihon na dob niidahmu ampa na sihol pataridahonku ope bam! (Gal. 1:2.) 26:17 Hupaluah pe ho humbani bangsa on ampa humbani bangsa sipajuh begu-begu, ai hubani sidea do ho suruhonku, (Jer. 1:18, 19.) 26:18 laho mambuka mata ni sidea, ase mulak sidea humbani hagolapan hubani haliharon, anjaha humbani kuasa ni sibolis hubani Naibata, ase ijalo sidea hasasapan ni dousa ampa rupei rap pakon halak na pansing, halani haporsayaon Bangku. (bd. 20:32; Jes. 42:7; Kol. 1:12-17.) 26:19 Halani ai, ale raja Agrippa, seng mangengkar ahu bani panonggoran na hun nagori atas ai, (Gal. 1:16.) 26:20 gabe huambilankon ma parlobei bani halak na i Damaskus, dob ai bani na i Jerusalem, sonai homa bani haganup na i Judea ampa halak sipajuh begu-begu, ase ipaubah uhur ni sidea anjaha mulak bani Naibata, anjaha iparlahouhon na patut domu bani uhur na dob mubah. (bd. 9:20, 28, 29; 20:21; Mat. 3:8.) 26:21 Halani ai do ase itangkap Jahudi ahu i rumah panumbahan, anjaha domma sihol bunuhon ni sidea ahu. (bd. 21:30, 31.) 26:22 Tapi iurupi Naibata do ahu ronsi sadari on, mambahen boi ahu jongjong marambilan bani na etek-etek ampa na magodang, anjaha seng dong na huhatahon na so domu hubani na jinahaan ni nabi-nabi ampa si Musa, (Luk. 24:44-47.) 26:23 paboa, na maningon manaron do Kristus, anjaha Ia parlobei puho humbani na matei, laho mamaritahon haliharon bani bangsa in ampa bani bangsa sipajuh begu-begu.(bd. 13:47; Luk. 24:26; 1 Kor. 15:4, 20.) 26:24 Halani sonai pangkatahonni mambela dirini, nini si Festus ma marsora na gogoh: Na podoan do ho Paulus! Parbinotohanmu na buei in do mambahen podoan ho. 26:25 Nini si Paulus ma: Seng na podoan ahu, ham Festus, na pinarsangapan, tapi hata na tongon anjaha na torang do na huhatahon. 26:26 Halani torang do in ibotoh raja in, mambahen na hinsah uhurhu mansahapkon ai bamu; ai tenger do uhurhu seng adong age sada hunjai na lingod i lobeimu, ai seng masa ai bani na ponop. (Joh. 18:20.) 26:27 Ham raja Agrippa, porsaya do ham bani nabi? Hubotoh na porsaya do ham! 26:28 Jadi nini si Agrippa ma hubani si Paulus: Tongkin nari mando ase gabe Kristen ahu ibahen ho. 26:29 Jadi nini si Paulus ma: Ipangindo uhurhu humbani Naibata, tongkin atap dokah, seng pitah ham, tapi haganup halak na adong ijon na mambogei hatangku, gabe songon ahu on ma namin sobali gari on. (bd. 28:20.) 26:30 Jadi jongjong ma raja ai ampa gubernur ai ampa si Bernike ampa hasoman ni sidea, (bd. 25:23.) 26:31 anjaha dob holang sidea, nini sidea ma samah sidea: Seng dong ihorjahon ia, na mambahen marutang hosah ia barang tartutup pe. 26:32 Lanjar nini si Agrippa ma hubani si Festus: Na boi do namin maluah halak ai, ambit lang apel ia bani Kesar. (bd. 25:11.)

Lahoan ni Apostel 27

27:1 Dob iputushon, na maningon marlayar ma hanami hu Italia, gabe iondoskon ma si Paulus ampa deba hasomanni na tartutup hubani sada letnan, na margoran si Julius, humbani pasukan ni Kesar. (bd. 25:12, 21.) 27:2 Masuk ma hanami hubagas sada kapal na hun Adramitium, na laho hu pelabuhan na i Asia; dob ai bingkat ma hanami, ihasomani si Aristarkus, halak Makedonia, na hun Tessalonik ai. (bd. 19:29; 20:4.) 27:3 Patarni ai mandarat ma hanami i Sidon; basar do si Julius hubani si Paulus, ilopas do ia marayak hasoman, ase itamuei sidea ia. (bd. 24:23; 28:16.) 27:4 Hunjai marlayar ma hanami manopi-nopi pulou Kiprus, halani manuhar logou, 27:5 anjaha dob nabontas laut ni Silisia ampa Pampilia, das ma hanami hu Mira na i Likia. 27:6 Ijai jumpah letnan ai ma sada kapal Aleksandria, na sihol marlayar hu Italia, gabe hujai ma hanami ipamasuk. 27:7 Piga-piga ari nanget do parlayaronnami, anjaha mahol do hanami das hu Knidus. Anjaha, torus do manuhar logou bannami; i laut ni Salmone marlayar ma hanami manopi-nopi pulou Kreta. 27:8 Anjaha dob marhasunsahan hanami na manopi-nopi ai das ma hanami bani sada ianan, na margoran Palabuhan na majenges, dohorhon huta Lasea. 27:9 Domma buei bois panorang parlayaron ai anjaha domma homa salpu panorang puasa, halani ai marmara ma manoruskon parlayaron ai, gabe ipaingat si Paulus ma sidea, nini ma: (3 Mus. 16:29; 2 Kor. 11:25-26.) 27:10 Nasiam hasoman, ia parlayaronta on huidah marhasunsahan anjaha marharugian banggal do, seng pitah bani muatan ampa kapal on tumang, tapi dihut do pakon bani hosahta. 27:11 Tapi porsayaan do letnan ai bani jurumudi ai ampa bani simada kapal ai, ase bani hata ni si Paulus. 27:12 Halani hurang dear do palabuhan ai ianan pasalpuhon musim borgoh, sihol marlayar ma sidea hunjai nini uhur ni sidea bueinan, andohar boi sidea das i Penike pasalpuhon musim borgoh, ai ma sada palabuhan i Kreta, na buha dompak nariti ampa manabia. 27:13 Anjaha, sanggah jenges parombus ni logou hun dangsina gabe tarpasaud ma sura-sura ai nini uhur ni sidea, jadi iangkat sidea ma sauh, anjaha marlayar ma sidea manopi-nopi pulou Kreta. 27:14 Tapi seng pala piga dokah roh ma hun pulou ai haba-haba bolon, na margoran haba-haba irisanna. 27:15 Iluahon ma kapal ai; halani seng tardompakkonsi logou ai gabe ipaturut hanami mando, lanjar iboan ma hanami mayub-ayub. (Ps. 107:25-30.) 27:16 Sanggah mayub-ayub hanami i topi ni sada pulou na etek, na margoran Klauda, ikuasai hanami ma sikosi ai, tongon marhasonam buei hasunsahan. 27:17 Anjaha dob iangkat sikosi ai huatas kapal, iusahahon sidea ma manlilit kapal ai bani tali. Anjaha halani mabiar sidea tardempar hu Sirtis, ipaturun mando layar, jadi sonai mando hanami mayub-ayub. 27:18 Halani sosak tumang hanami ibahen haba-haba ai, patarni ai ibuang ma muatan ni kapal ai, 27:19 anjaha bani ari patoluhon iambukkon sidea ma homa parugas-parugas ni kapal ai marhitei tangan ni sidea sandiri. (Jon. 1:5.) 27:20 Anjaha halani domma piga-piga ari seng taridah mata ni ari barang bintang pe, anjaha torus do homa gogoh haba-haba, putus ma arapannami boi hanami maluah. 27:21 Anjaha halani dokah ma sidea lang mangan, jongjong ma si Paulus itongah-tongah ni sidea, nini ma: Nasiam hasoman, ambit ma namin itangihon nasiam ahu, ulang laho hun Kreta, lang pala manaron hasunsahan ampa harugian on hita! 27:22 Ai pe, huojur ma nasiam marhinsah ni uhur, ai sahalak pe lang humbanta on na mahua, pitah kapal on do hansa. 27:23 Ai na jongjong do na borngin i lambungku malekat ni Naibata, simada ahu anjaha na hubalosi, 27:24 nini: Ulang ho mabiar, ale Paulus, ai maningon jongjong do ho ilobei ni Kesar, anjaha domma iondoskon Naibata bam haganup hasomanmu na sakapal in. (bd. 23:11.) 27:25 Halani ai, tenger ma uhurnasiam hasoman, ai porsaya do ahu bani Naibata, maningon saud do na hinatahonni ai bangku. 27:26 Tapi maningon tardempar do hita bani sada pulou. (bd. 28:1.) 27:27 Pasapuluh-ompat-bornginkon na mumbang-umbang ai hanami i laut Adria, hira-hira tongah borngin, iahap uhur ni parkapal ai ma dohor daratan. 27:28 Jadi idabuh sidea ma tali panibar, gabe dapot ma dua puluh holag bagasni; dob maju otik hunjai iulakkon ma use isibar, gabe dapot ma sapuluh lima holag. 27:29 Halani mabiar tombom holi hanami bani batu karang, gabe idabuh ma ompat sauh hampit pudi-pudi ni kapal ai, paima siang ari. 27:30 Dob ai sihol lintun ma anak kapal ai hun kapal ai, ipatoruh ma sikosi ai hu laut, iparsidalian sihol mandabuh sauh hun lobei-lobei ni kapal ai. 27:31 Jadi ihatahon si Paulus ma hubani letnan ai ampa hubani tentara ai: Anggo seng soh sidea i kapal on, seng tarbahen nasiam maluah. 27:32 Jadi irotap tentara ai ma tali ni sikosi ai, lanjar ipaturut mayub. 27:33 Tapi marayak siang ari, iojur si Paulus ma sidea mangan, nini ma: Pasapuluh-ompat arihon ma sadari on, nasiam paima-imahon, seng mangan, aha pe lang idai nasiam. (ay. 27; Ps. 102:5.) 27:34 Halani ai huojur ma ase mangan nasiam, ai panumpak do in bani haluahonnasiam, ai sada jambulan pe lang marurus humbani ulunasiam bei. (Mat. 10:30; Luk. 21:18.) 27:35 Ase dob ihatahon sonai, ibuat ma ruti ai, ihatahon ma tarimakasih bani Naibata ilobei ni sidea ganup, iponggoli ma ai, lanjar ipungkah ma mangankon. (Mat. 14:19; Joh. 6:11; 1 Tim. 4:4.) 27:36 Jadi hinsah ma uhur ni sidea lanjar mangan bei ma. 27:37 Ia bueinami i kapal ai, dua ratus pitu puluh onom halak do. 27:38 Dob bosur sidea idabuh ma gandum ai hu laut laho pahampung parau ai. 27:39 Dob torang ari, iidah sidea ma daratan, tapi lang itanda sidea. Iidah sidea ma sada teluk na marpasir, gabe hujai ma isura sidea padason kapal ai, anggo tarbahen. 27:40 Jadi irotap sidea ma tali-tali ni sauh ai, ipaturut i laut ai, anjaha itanggali ma homa tali ni amudi ai; ipasang ma layar lobei-lobei dompak logou, ase iboan sidea hu pasir ai. 27:41 Jadi tarlanggar ma kapal ai bani sada gosong, lanjar ipaturut tardempar ijai. Longkot ma lobei-lobei ni kapal ai ijai, seng miut be, anjaha pudi-pudi ni kapal ai maseda ibahen gilumbang. (2 Kor. 11:25.) 27:42 Sihol do tentara ai mambunuh sagala halak tahanan, ase ulang lintun sidea marhitei na marlanguy, (bd. 16:27.) 27:43 tapi ilanglangi letnan ai do sura-sura ni sidea ai, halani sihol do pagoluhonni si Paulus. Iparentahkon ma na pandei marlanguy manlumpat hu laut, ase parlobei hu darat, 27:44 anjaha na legan ai hun pudi martilampung papan-papan ampa ponggol-ponggol ni kapal ai. Sonai ma boi sidea ganup maluah hu darat. (ay. 22-25.)

Lahoan ni Apostel 28

28:1 Dob das hanami hu darat, ibogei hanami ma Malta do goran ni pulou ai. (bd. 27:26, 39.) 28:2 Basar tumang do parpulou ai bannami. Halani roh udan anjaha borgoh homa ari, ipagara sidea ma apuy banggal anjaha isuruh hanami hundul maringgot. (2 Kor. 11:27.) 28:3 Jadi sanggah na patumpuhon ranting-ranting si Paulus, laho mannahkon ai hubagas apuy, luar ma hunjai sada ulog darih halani milasni, lanjar ipagut ma tanganni. 28:4 Mangidah ulog ai gantung-gantung bani tangan ni si Paulus, nini parpulou ai ma samah sidea: Tontu pamunuh do halak on. Ai age pe maluah ia hun laut in, seng ipalopas sipambalas in ia manggoluh. (5 Mus. 32:24; Ams. 9:3; Luk. 13:2.) 28:5 Tapi ipirpirhon ma ulog ai hubagas apuy, anjaha seng pala mahua ia. (Mrk. 16:18.) 28:6 Tapi anggo sidea iagan do maningon butong ma ia barang mintor matei jurgang, anjaha dob dokah ipaima sidea, tapi seng mahua ia iidah, mubah ma pingkiran ni sidea, gabe ihatahon ma, naibata do ia. (bd. 14:11.) 28:7 Lang daoh humbani ianan ai, adong do kobun ni kopala ni pulou ai, na margoran si Publius. Dear do panjaloni bannami, anjaha itamuei do hanami tolu ari dokahni. 28:8 Bani panorang ai tibal-tibal do bapa ni si Publius, pane-paneon anjaha disentrion. Jadi masuk ma si Paulus marayaksi, anjaha dob martonggo, itampeihon ma tanganni hubani, gabe malum ma. (Mat. 18:4; Jak. 5:14.) 28:9 Dob sonai, roh ma na boritan na legan i pulou ai, jadi malum bei ma. (Mat. 4:24.) 28:10 Gabe sangap tumang ma hanami ibahen sidea, anjaha sanggah na misir hanami marlayar, ipasirsir sidea do na porlu bennami. 28:11 Jadi dob salpu tolu bulan, bingkat ma hanami marlayar bani sada kapal Aleksandria, na martanda silinduat, na dob pasalpuhon musim borgoh i pulou ai. 28:12 Das ma hanami hu Sirakusa, anjaha marsaran ma ijai tolu ari dokahni. 28:13 Hunjai manopi-nopi pasir ma hanami, anjaha das ma i Regium. Patarni marombus ma logou dangsina, gabe das ma hanami ari paduahon i Putioli. 28:14 Ijai pajumpah ma hanami pakon sanina-sanina, anjaha iontang do hanami rap pakon sidea pitu ari dokahni. Dob sonai, bingkat ma hanami hu huta Rom. (bd. 21:4.) 28:15 Dob ibogei sanina-sanina na ijai ai pasal hanami, roh ma sidea mangalo-alo hanami hu Appiiporum ampa Tres Taberne. Mangidah sidea ai, mangkatahon tarimakasih ma si Paulus bani Naibata, anjaha lambin tenger ma uhurni. (Rom 1:10.) 28:16 Anjaha dob das hanami hu huta Rom ilopas do si Paulus, marianan sandirian rap pakon sada tentera na manjagaisi. (bd. 23:11; 27:3.) 28:17 Dob salpu tolu ari, idilo si Paulus ma kopala-kopala ni halak Jahudi, anjaha dob roh sidea, nini ma hubani sidea: Ia ahu, nasiam hasoman, seng dong hubahen barang aha bani bangsanta barang bani adat ni ompungta, hape isangkut do ahu i Jerusalem anjaha iondoskon bani halak Rom. 28:18 Dob ipareksa sidea ahu, sihol paluahon ni sidea do ahu, halani seng dong jumpah salahku, na mambahen marutang hosah ahu. 28:19 Tapi halani sai manlawan do halak Jahudi ai, gabe tarpaksa ma ahu mangindo apel bani Kesar, sedo halani adong siaduhononku dompak bangsanta. (bd. 25:12; 26:32.) 28:20 In do halani, ase hudilo nasiam, ase huidah anjaha huparsahapkon, ai halani pangarapan ni bangsa Israel do mambahen na hona gari ahu. (bd. 26:6, 7; 2 Tim. 1:16.) 28:21 Jadi nini sidea ma dompaksi: Seng dong ijalo hanami surat ni sidea pasal ham, anjaha hasoman na roh hunjai pe, seng dong patugahkon atap aha pe na jahat pasal ham. 28:22 Tapi sihol do bogeionnami pingkiranmu, halani ibotoh hanami ia sekte in jumpahan parlawanan do atap ija-ija pe. (bd. 24:14; Luk. 2:34.) 28:23 Ase dob itontuhon sidea arini rap pakonsi, roh ma sidea buei marayaksi hubani iananni ai. Jadi ipatorang anjaha isaksihon ma bani sidea humbani sogod das hubani bodari pasal harajaon ni Naibata, anjaha ilajou ma mambahen marhatongon sidea pasal Jesus maronjolan bani titah ni si Musa ampa nabi-nabi. (bd. 18:5; 19:8; Luk. 24:27.) 28:24 Deba porsaya do marhitei na hinatahonni ai, tapi na deba lang porsaya. (bd. 14:4; 17:4.) 28:25 Jadi marsalisih ma sidea samah sidea, gabe laho bei ma, dob lobei ihatahon si Paulus bani sidea: Sintong ma na hinatahon ni Tonduy Na pansing marhitei nabi Jesayas bani ompungnasiam, (2 Ptr. 1:21.) 28:26 ai nini do: Laho ma ho bani bangsa in, anjaha hatahon: Sai na bogeionmu do in, tapi lang arusanmu, anjaha sai na idahonmu do in, tapi lang tandaonmu. (Jes. 6:9, 10; Mat. 13:14-15.) 28:27 Ai domma mapir uhur ni bangsa on, anjaha pinggol ni sidea borat marbinogei; mata ni sidea itutup sidea, ase ulang marpangidah mata ni sidea, ulang marpanangar pinggolni, ulang mangarusi uhurni anjaha mulak sidea Bangku, gabe hupamalum sidea. 28:28 Botoh nasiam ma, domma itongos Naibata haluahon on bani halak sipajuh begu-begu, anjaha tangihonon ni sidea do in. (bd. 13:38, 46.) 28:29 Ase dob ihatahon ai laho ma Jahudi ai hunjai; buei do parsualan ni sidea samah sidea. 28:30 Dua tahun do si Paulus marianan bani rumah sewaanni ai, ijalo do sagala na roh hubani. 28:31 Marhinsah ni uhur do ia mangambilankon harajaon ni Naibata, ampa mangajarhon pasal Tuhan Jesus Kristus, anjaha seng dong na mangambat. (ay. 23; Ep. 6:18-20.)

Rom 1

1:1 Ahu Paulus, juak-juak ni Jesus Kristus, na tardilo gabe apostel, na pinapulig mangambilankon ambilan na madear na humbani Naibata, (Lah. 9:15, 13:2; Gal. 1:15.) 1:2 na pinarbagahni ai hinan ibagas Surat na pansing in marhitei nabi-nabini, (bd. 16:25, 26; Tit 1:2.) 1:3 pasal Anakni, na tubuh humbani ginompar ni si Daud ia dagingni, (bd. 9:5; 2 Sam. 7:12; Mat. 22:42.) 1:4 anjaha na pinabangkit gabe Anak ni Naibata ibagas hagogohon, mangihutkon Tonduy Na pansing, marhitei na puho humbani na matei, ai ma Jesus Kristus, Tuhanta in. (Lah. 13:33.) 1:5 Hum-Bani do ijalo hanami idop ni uhur ampa jabatan apostel, laho manuankon haporsayaon ampa pambalosion bani Goranni, itongah-tongah ni bangsa sipajuh begu-begu, (bd. 15:18; Lah. 26:16-18; Gal. 2:7-9.) 1:6 humbani sidea do homa nasiam, nasiam na dob nidilo ni Jesus Kristus. 1:7 Nasiam haganup, na i huta Rom, na hinaholongan ni Naibata, na mapansing anjaha na tardilo: Idop ni uhur ma bani nasiam ampa damei humbani Naibata Bapanta ampa Tuhan Jesus Kristus! (4 Mus. 6:25-26; 1 Kor. 1:2; 2 Kor. 1:1; Ep. 1:1.) 1:8 Parlobei huhatahon ma tarima kasih bani Naibatangku marhitei Jesus Kristus halani nasiam haganup, ai tarambilan do haporsayaonnasiam i sab dunia on. (bd. 16:19; 1 Tes. 1:8.) 1:9 Naibata, na hubalosi ibagas tonduyhu marhitei na mangambilankon ambilan na madear ni Anakni in, Ia do saksingku, paboa na so marnamaronti ahu mardingat nasiam. (Pil. 1:8; Ep. 1:16.) 1:10 Tongtong do hupangindo ibagas tonggongku, andohar boi ahu marayak nasiam, atap antigan pe, domu hubani rosuh ni Naibata. (bd. 15:23, 32; Lah. 19:21.) 1:11 Ai masihol do uhurhu mangidah nasiam, andohar tarbere ahu deba bani nasiam sibere-bere partonduyon, laho patoguhkon haporsayaonnasiam, (Lah. 28:31.) 1:12 artini ai, ase dapotan gogoh age ahu humbani nasiam halani haporsayaonta rombang. (2 Ptr. 1:1.) 1:13 Tapi sihol ma botohonnasiam, ale hasoman, na dob gati do husurahon marayak nasiam, ase marbuah ahu bani nasiam songon na bani bangsa na legan, tapi tarlanglang do ronsi sonari. 1:14 Parutang do ahu bani halak Gorik age bani bangsa na legan, bani halak na pentar-pentar age bani halak na bodoh, 1:15 halani ai do ase husurahon mangambilankon ambilan na madear in age bani nasiam i huta Rom. 1:16 Ai seng huhailahon ambilan na madear in, ai hagogohon ni Naibata do in paluahkon sagala na porsaya, halak Jahudi parlobei, dob ai halak Gorik. (Ps. 119:46; Lah. 13:46; 1 Kor. 1:18, 24.) 1:17 Ai ipatalar do ijin hapintoron ni Naibata, humbani haporsayaon hubani haporsayaon, songon na dob tarsurat in: Na manggoluh do parpintor in halani haporsayaonni. (bd. 3:21, 22; Hab. 2:4.) 1:18 Ai ipatalar do ringis ni Naibata hun nagori atas dompak sagala jolma na so daulat anjaha na geduk, na mangambat hasintongan in marhitei hagedukon. 1:19 Halani pambotoh pasal Naibata, torang do bani sidea, ai Naibata sandiri do pabotohkon ai bani sidea. (Lah. 14:15-17; 17:24-28.) 1:20 Ai boi do taridah biak ni Naibata na ponop in, ai ma hagogohonni na manongtong in ampa hanaibataonni, timbangon ni uhur humbani pambahenanni ai, dob itompa dunia on, ase ulang adong sidalian ni sidea. (Ps. 19:2; Heb. 11:3.) 1:21 Halani age pe ibotoh sidea adong Naibata, seng ipasangap sidea, Ia songon Naibata, anjaha seng ipuji, gabe ipaoto-oto pingkiranni ma sidea, anjaha golap ma pingkiran ni sidea na so marpangarusion ai. (Ep. 4:18.) 1:22 Iagan na maruhur sidea, hape na oto do. (Jer. 10:14; 1 Kor. 1:20.) 1:23 Itukar sidea do hasangapon ni Naibata na manongtong in bani gana-gana ni jolma na laho salpu in, bani manuk-manuk, binatang ampa sipanjulur. (5 Mus. 4:15-19.) 1:24 Halani ai iondoskon Naibata do sidea ibagas hisap-hisap ni uhur ni sidea hu habutakon, pala ipabutak sidea dagingni samah sidea. (Lah. 14:16.) 1:25 Itukar sidea do hasintongan ni Naibata gabe ladung, gabe isombah anjaha ibalosi sidea ma na tinompa gantih ni Panompa, sipujion ronsi sadokah ni dokahni. Amen. 1:26 Halani ai iondoskon Naibata ma sidea bani hisap-hisap habadoron; iubah parinangon ni sidea do hasomalan na patut hubani ulah na so somal. 1:27 Sonai homa dalahi, itadingkon do ruhut pardomuan bani parinangonni, gabe garang ma sidea ibagas hahisapon, pala dalahi samah dalahi mambahen habadoron, gabe sonai ma ijalo sidea upah ni hakahouon ni sidea bani dirini bei. (3 Mus. 18:22; 20:13; 1 Kor. 6:9.) 1:28 Halani lang iporluhon sidea na mananda Naibata, gabe iondoskon Naibata ma sidea bani paruhumon na so margagan, ase ihorjahon na so patut. 1:29 Gok do sidea bani masam ni hagedukon, hajahaton, hasamboron, uhur haut, latei, pamunuhon, paringoran, uhur sipakulah-kulah ampa akal-akal. 1:30 Sidea, ai ma sipanghata-hatai, munsuh ni Naibata, sipanrisai, na jungkat, sigijang uhur, sibuei hata, paruhur na masambor, silawan na matoras, 1:31 na so maruhur, siosei padan, na so mambotoh holong ampa idop ni uhur. 1:32 Ibotoh sidea do namin aturan ni Naibata, na mangkatahon patut do marutang hosah na mangkorjahon sisonai, hape tong do ihorjahon, tapi seng pitah ihorjahon sidea, marosuh do sidea tene bani na mangkorjahon ai.

Rom 2

2:1 Halani ai seng tarapiti ho dirimu, ale jolma sipanguhum, atap ise pe ho. Ai marhitei na manguhum halak na legan, iuhum ho do dirimu sandiri, ai na sonai do homa idalankon ho, ale sipanguhum! (Mat. 7:2; Joh. 8:7.) 2:2 Ai ibotoh hita, domu hubani hasintongan do mangonai uhum ni Naibata hubani na mangkorjahon na sonai ai. 2:3 Ai iagan ho, ale jolma, tarsimbili ho uhum ni Naibata, anggo iuhum-uhumi ho na mangkorjahon na sonai, hape dihut do ho mambahensi? 2:4 Atap na mapas do uhurmu bani dear ni layakni na buei in, bani panganjuonni age lumbang ni uhurni? Seng ibotoh ho, dear layak ni Naibata sihol manogu ho bani hamubahon ni uhur? (2 Ptr. 3:15.) 2:5 Tapi halani hengkeng ni uhurmu ampa uhurmu na so ra mubah in, ipajunjun ho do bam ringis bani ari parsogop ni ringis ai ampa partalar ni uhum ni Naibata na pintor ai, 2:6 na mambalaskon bani ganup domu hubani horjani bei: (Mat. 16:27; Joh. 5:29; 2 Kor. 5:10.) 2:7 Ai ma hagoluhan na sadokah ni dokahni bani halak na golgol mangkorjahon na madear, anjaha na mangindahi hasangapon, hamuliaon ampa na manongtong ai, 2:8 tapi ringis ampa gila do bani halak sipanlawan anjaha na so ra mambalosi hasintongan in, ai ma sipambalosi bani hagedukon. (2 Tes. 1:8.) 2:9 Hamarsikon ampa biar do sogop bani uhur ni sagala jolma, na mangkorjahon hajahaton, bani halak Jahudi parlobei, sonai homa bani halak Gorik. (bd. 1:16; 3:9.) 2:10 Tapi hasangapon, hamuliaon ampa damei do bani sagala na mangkorjahon na madear, halak Jahudi parlobei, sonai homa halak Gorik. 2:11 Ai seng siidah rupa Naibata. (Lah. 10:34; 1 Ptr. 1:17.) 2:12 Ai sagala sipardousa, na so martitah, magou do homa lang martitah; anjaha sagala na mardousa, sipartitah, uhumon ni titah do. (Mat. 7:21; 1 Joh. 3:7.) 2:13 Ai seng na mambogei titah in pintor ilobei ni Naibata, tapi na mangkorjahon titah in do pintoranni. (Mat. 7:21; 1 Joh. 3:7.) 2:14 Ai sipajuh begu-begu pe, na so martitah in, ihorjahon do humbani biakni na pinindo ni titah in; ase sidea sandiri ma gabe titah bani sidea na so martitah in. (Lah. 10:35.) 2:15 Hujai ma taridah, paboa na dob tarsurat do na pinindo ni titah in ibagas uhur ni sidea. Anjaha panggora ni uhur ni sidea pe dihut do manaksihon, anjaha pingkiran ni sideea marsiaduan atap marsiapitan, (bd. 1:32.) 2:16 ai ma bani ari, rohkonsi Naibata, manguhumi sagala na ponop bani jolma in marhitei Kristus Jesus, domu hubani na huambilanhon in. 2:17 Igoran ho do dirimu Jahudi, marhatengeran do ho bani titah in, anjaha Naibata ipangunsagahkon ho. 2:18 Ibotoh ho do rosuhni, anjaha ibotoh ho do manimbangi na malo ampa na so malo, niajaran ni titah in. 2:19 Talup do ho, nini uhurmu pambobai na mapitung, panondang bani halak na ibagas hagolapan, (Mat. 15:14.) 2:20 pamodahi bani na hurang uhur, sipangajari bani na etek, ai dong do bam habotohon ampa hasintongan pasal titah in. 2:21 Hape halak na legan ipodahi ho, tapi dirimu sandiri lang ipodahi ho. Ho do mangkatahon, seng bulih manangko. (Ps. 50:16-21; Mat. 23:3, 4.) 2:22 Ihatahon ho, ulang marbangkis, hape ho do marbangkis. Magigi do ho bani gana-gana, hape panrampok do ho i rumah panumbahan. 2:23 Ipangunsagahkon ho do titah in, tapi ipahiri ho do Naibata marhitei panlanggaronmu bani titah in. 2:24 Songon na tarsurat in: Mahiri do goran ni Naibata itongah-tongah ni sipajuh begu-begu halani nasiam. (Jes. 52:5; Hes. 36:20.) 2:25 Marguna do parsunaton in, anggo idalankon ho titah in. Tapi anggo panlanggar do ho bani tiah in, gabe seng marguna be parsunaton in bam. (Jer. 4:4; 9:24, 25.) 2:26 Ase anggo idalankon na so tarsunat in pinindo ni titah in, ai lang hiraon ma ia, na so tarsunat ai, songon na tarsunat? (Gal. 5:6.) 2:27 Ai lang na so marsunat ai ma, anggo idalankon titah in, na manguhumi ho, simada hata ampa parsunaton in, anggo ilanggar ho titah in? 2:28 Ai sedo pardarat ai Jahudi na sintong, anjaha sedo bani daging ai parsunaton na tongon. (Joh. 8:39.) 2:29 Tapi Jahudi na sintong, ai ma Jahudi parbagas ai, anjaha parsunaton na botul, ai ma na ibagas uhur ai, marhitei Tonduy sedo marhitei surat ni titah. Sisonai ma dapotan puji-pujian, sedo humbani jolma, tapi humbani Naibata do. (5 Mus. 30:6; Kol. 2:11.)

Rom 3

3:1 Ase aha ma hasurungan ni Jahudi, anjaha aha ma gunani parsunaton ai? 3:2 Buei do, ibagas haganup. Parlobei, ondosan ni hata ni Naibata do sidea. (bd. 9:4; 5 Mus. 4:7, 8; Ps. 147:19, 20.) 3:3 Ai sonaha? Anggo seng porsaya deba, mintor halani na so porsaya ai ma sidea gabe seda habujuron ni Naibata? (bd. 9:6; 11:29; 2 Tim. 2:13.) 3:4 Seng sonai. On do tene, parsintong do Naibata, tapi parladung do haganup jolma, songon na tarsurat in: Ase pintor Ham bani hatamu, anjaha monang Ham ibagas panguhumonmu. (Ps. 51:6; 116:11.) 3:5 Tapi anggo hagedukonta mambahen jongjong hapintoran ni Naibata, aha ma sihatahononta? Ai na so adil ma Naibata, anggo ipadalan ringisni? Sahap hajolmaon do sahapkai. 3:6 Seng sonai. Ambit sonai, ija ma taruhum Naibata dunia on? 3:7 Tapi anggo ladungku pabanggal habonaron ni Naibata gabe hasangaponni, mase uhumonni ope ahu songon pardousa? 3:8 Ai lang dearan ma horjahon hita na masambor ase roh na madear? Patut do hona uhum halak sisonai ai. (bd. 6:1, 2.) 3:9 Ase sonaha ma? Marhasurungan do hita? Otik pe lang. Domma hupatorang: Halak Jahudi pe atap halak Gorik, rap ginom-goman ni dousa do, (bd. 1:18--2:24.) 3:10 songon na tarsurat in: Seng dong na pintor, sahalak pe lang. (Ps. 14:1-3; 53:2-4.) 3:11 Seng dong na maruhur, seng dong na pindah-pindah bani Naibata. 3:12 Haganup do manlembang, rap na so margagan do sidea; seng dong sihorjahon na madear, sahalak pe lang. 3:13 Tanoman na ngangang do tolonan ni sidea, dilah ni sidea mansahapkon ladung; bisa ni ulog darih do itoruh ni bibir ni sidea. (Ps. 5:10; 140:4.) 3:14 Gok do babah ni sidea bani bura-bura ampa hata podou. (Ps. 10:7.) 3:15 Hinsah do nahei ni sidea manduruskon daroh. (Jes. 59:7, 8.) 3:16 Hamagouan ampa hamarsikon do ibagas dalan ni sidea, 3:17 ia dalan hadameion in, seng ibotoh. 3:18 Seng dong biar dompak Naibata ibagas pangidah ni sidea. (Ps. 36:2.) 3:19 Tapi ibotoh hita do, bani na ginom-goman ni titah in do haganup hata ni titah in, ase sip sagala pamangan, anjaha marsalah ganup sindunia on ilobei ni Naibata. (bd. 2:12; Gal. 3:22.) 3:20 Ai marhitei na mangkorjahon titah seng adong jolma na dapotan hapintoran ilobei ni Naibata. Ai marhitei titah panandaon bani dousa do roh. (bd. 7:7; Ps. 143:2; Gal. 2:16.) 3:21 Tapi sonari domma torang hapintoran ni Naibata, sedo humbani titah, songon sinaksihon ni titah in ampa nabi-nabi, (Lah. 10:43.) 3:22 ai ma hapintoran ni Naibata, na das marhitei haporsayaon bani Jesus Kristus hubani haganup na porsaya. 3:23 Ai seng dong ubahni, sabonar haganup do sidea mardousa, anjaha seng dong sipujion ilobei ni Naibata. (ay. 9, 19; 5:2.) 3:24 Gabe ipintori do sidea marhitei silayak-layak halani idop ni uhurni, hinorhon ni panobusion na ibagas Kristus Jesus. (bd. 5:1; Ep. 2:8.) 3:25 Ia do ipajongjong Naibata gabe hitei pardearan marhitei haporsayaon bani darohni ai, laho patalar hapintoranni, halani domma isalpuhon dousa sapari ibagas sabar ni uhurni, (3 Mus. 16:12-15; Heb. 4:16.) 3:26 laho patalar hapintoranni bani panorang sonari, ase pintor Ia, anjaha ipintori na porsaya bani Jesus. 3:27 Ase adong ope siunsagahhononkon? Seng dong be ai. Marhitei titah ja do? Marhitei titah horja do? Lang, tapi marhitei titah haporsayaon in do. (1 Kor. 1:29, 31.) 3:28 Ase on do ijolom uhurta: Marhitei haporsayaon do ipintori jolma, sedo marhitei na mangkorjahon titah. (Gal. 2:16.) 3:29 Ai pitah Jahudi do simada Naibata? Ai lang dihut do bangsa sipajuh begu-begu? Nai ma tongon, dihut do bangsa sipajuh begu-begu! (bd. 10:12.) 3:30 Ai sada do Naibata na mamintori na tarsunat marhitei haporsayaon ni sidea ampa na so marsunat halani haporsayaon ni sidea. (bd. 4:11, 12.) 3:31 Ase na manrumbakkon titah do hita halani haporsayaon in? Seng sonai, tapi na pajongjongkon titah in do hita. (bd 4:3; 8:4; Mat. 5:17.)

Rom 4

4:1 Jadi aha ma hatahononta, na dapot si Abraham, ompungta ai mangihuthon pardagingon? 4:2 Porini ipintori si Abraham halani horjani, adong do sipangunsagahkononni, tapi seng dompak Naibata. 4:3 Aha do na hinatahon ni Surat in? Na porsaya do si Abraham bani Naibata, gabe ai ma ihira gabe hapintoranni. (1 Mus. 15:6; Gal. 3:6.) 4:4 Bani halak siparhorja, upah do ai ihira, sedo songon idop ni uhur, tapi songon hakni do. (bd. 11:6; Mat. 20:7, 14.) 4:5 Bani halak na so marhorja, tapi na porsaya bani Sipintori halak na jahat in, haporsayaonni ai do ihira gabe hapintoranni. 4:6 Sonai homa si Daud, iparhatuah do halak na gabe pintor ihira Naibata, seng humbani horjani: (Ps. 32:1, 2.) 4:7 Martuah ma halak na dob sinasap salahni, anjaha na dob nirungkub dousani! 4:8 Martuah ma halak, anggo lang ihira Tuhan in dousani bani! 4:9 Ise do na iparhatuah ijai? Halak na marsunat do hansa, atap dihut do na so marsunat? Ai ihatahon hita do: Ihira do haporsayaon ni si Abraham gabe hapintoranni. 4:10 Ai sonaha do iparhirahon bani? Dob marsunat do ia, atap lape marsunat? Sedo dob marsunat, tapi sanggah lang marsunat ope. 4:11 Ijalo do parsunaton ai songon tanda atap lak ni hapintoran na humbani haporsayaon ai, sanggah lape tarsunat ia, ase bapa ia bani sagala na porsaya na so marsunat, gabe iparhirahon homa bani sidea hapintoran ai. (1 Mus. 17:10, 11.) 4:12 Bapa do ia homa bani na marsunat, tapi seng asal tarsunat, sihol maiirikkon haporsayaon ni si Abraham, bapanta ondi, sanggah lape marsunat ia. (Mat. 3:9.) 4:13 Ai seng marhitei titah in roh bagah-bagah bani si Abraham atap bani ginomparni, paboa ia do sitean dunia on, tapi marhitei hapintoran na humbani haporsayaon in do. (1 Mus. 18:18; 22:17, 18.) 4:14 Ai ambit sihorjahon titah in do gabe sipanean, seng marguna be haporsayaon in, anjaha seng be asi bagah-bagah in. 4:15 Ai ringis do ihorjahon titah in, tapi anggo seng dong titah, seng dong panlanggaron. 4:16 Ase humbani haporsayaon in do in, ase maronjolan bani idop ni uhur, totap bagah-bagah in bani haganup ginomparni, seng pitah bani na humbani sipartitah, tapi dihut do bani na porsaya songon si Abraham. Ia do bapa ni hita haganup, 4:17 (songon na tarsurat in: Hubahen do ho gabe bapa ni buei bangsa) ilobei ni Naibata, na hinaporsayaanni ai, sipagoluh na dob matei anjaha na mandilo na so adong hinan gabe adong. (1 Mus. 17:5.) 4:18 Marimbang sagala pangarapan do haporsayaonni na mangarap ai, ase gabe bapa ni buei bangsa ia, domu hubani hata ai: Sonai ma magira ginomparmu. (1 Mus. 15:5.) 4:19 Anjaha seng roh galekni haporsayaonni paidah-idah angkulani na matei-matei ai, age pe domma hira-hira saratus tahun umurni, sonai age mangidah si Sara na dob hasayoban ai. (1 Mus. 17:17.) 4:20 Seng ra bungbang uhurni manadingkon haporsayaonni bani bagah-bagah ni Naibata, tapi lambin toguhni do tene haporsayaonni anjaha ipasangap do Naibata. (Heb. 11:7, 11.) 4:21 Tenger tumang do uhurni, paboa tuk do kuasa ni Naibata pasaudkon bagah-bagahni. 4:22 Halani ai do ase ihira ai gabe hapintoranni. (ay. 3.) 4:23 Hata "iparhirahon bani", seng pitah halani ia tumang, ase tarsurat ai, (bd. 15:4.) 4:24 tapi dihut do halani hita, anjaha iparhirahon do ai banta, na porsaya bani Sipapuho Jesus, Tuhanta in, humbani na matei. 4:25 Ai iondoskon do Ia halani panlanggaronta, anjaha ipagoluh halani pamintorion banta. (Jes. 53:4, 5; 1 Kor. 15:17.)

Rom 5

5:1 Ase, dob ipintori hita halani haporsayaon, mardamei ma hita pakon Naibata, marhitei Tuhanta Jesus Kristus. (bd. 3:24, 28; 4:24; Jes. 53:5.) 5:2 Marhiteihonsi do boi masuk hita hubani idop ni uhur haporsayaon, ai ma hajongjanganta nuan, anjaha megah do hita halani pangarapan bani hasangapon ni Naibata. (Ep. 3:12.) 5:3 Tapi seng pitah ai, megah do homa hita ibagas hamarsikon, ai ibotoh hita, ihorhon hamarsikon ai do hasabaron; (Jak. 1:2, 3.) 5:4 hasabaron ai mangkorhon hatalupon, anjaha hatalupon ai mangkorhon pangarapan. 5:5 Anjaha pangarapan ai seng paroh habadoron, ai domma iuseihon hubagas uhurta holong ni uhur ni Naibata marhitei Tonduy Na pansing, na dob binereni banta. (Heb. 6:18, 19.) 5:6 Ai sanggah galek ope hita, ijai ma tongon matei Kristus mangkophop parjahat. 5:7 Ai payah do dong na ra matei manghophop parpintor; ra, adong do na barani matei manghophop halakna bujur. 5:8 Tapi Naibata, domma ipatalar holong ni uhurni ai banta, ai ma marhitei na matei Kristus manghophop hita, sanggah pardousa ope hita. (Joh. 3:16; 1 Joh. 4:10.) 5:9 Ase lambin maluah ma hita nuan humbani ringis in marhiteihonsi, dob ipintori hita ibagas darohni ai. (1:18; 2:5, 8.) 5:10 Ai anggo ipadamei hita pakon Naibata sanggah munsuhni ope hita, marhitei parmatei ni Anakni in, ai lang lambin maluah ma hita, na dob pinadameini in, dob manggoluh Ia? 5:11 Tapi seng pitah ai, megah do homa hita ibagas Naibata, marhitei Tuhanta Jesus Kristus, ai marhiteihonsi do ijalo hita nuan pardameian in. 5:12 Halani ai, songon na masuk dousa in hu dunia on marhitei sada halak, anjaha marhitei dousa in roh hamateian, anjaha sonai ma das hamateian in bani haganup jolma, halani haganup sidea mardousa. (bd. 6:23; 1 Mus. 2:17; 3:19.) 5:13 Ia duosa domma i dunia on hinan, age seng roh hinan ope titah in, tapi dousa seng ihira, anggo seng dong titah. (bd. 4:15.) 5:14 Tapi hamateian in domma manggomgomi humbani si Adam nari das hubani si Musa, age pe seng dos pardousaon ni sidea hubani panlanggaron ni si Adam; usihan ni na sihol roh do ia. (1 Kor. 15:21, 22, 45, 55.) 5:15 Tapi silayak-layak ai seng songon panlanggaron ai. Ai anggo halani panlanggaron ni sada halak matei na mabuei in, daoh do surungan das bani na mabuei in idop ni uhur ni Naibata ampa silayak-layak, marhitei pangidopi ni sada jolma, in ma Jesus Kristus in. 5:16 Anjaha silayak-layak ai pe seng songon pangkorhon ni duosa ni na sada halak ai. Ai ihorhon uhum halani sada panlanggaron do hamagouan, tapi ihorhon silayak-layak ai do pamintorion humbani buei panlanggaron. 5:17 Ai anggo manggomgomi hamateian marhitei na sada halak ai halani panlanggaronni ai, lobihni ai ma halak na manjalo idop ni uhur na marlobih-lobih ampa silayak-layak hapintoran in, manggoluh anjaha manggomgomi marhitei na sada in, in ma Jesus Kristus. 5:18 Ase songon panlanggaron ni sada halak mangkorhon uhum hamagouan bani haganup jolma, do marhitei pamintorion ni sada halak das hapintoran na pagoluhkon bani haganup jolma. (1 Kor. 15:22.) 5:19 Ai songon marhitei panlawanon ni sada jolma gabe mardousa simbuei in, sonai do marhitei pambalosion ni na Sada in bahenonni pintor simbuei in. (Jes. 53:11.) 5:20 Jadi roh ma titah in patambah panlanggaron; tapi tambah pe dousa, lambin tambah do idop ni uhur. (bd. 4:15; 7:8; Gal. 3:19.) 5:21 Ase, songon na manggomgomi lobei dousa marhitei hamateian, sonai do age idop ni uhur in manggomgomi marhitei hapintoran na mangkorhon hagoluhan na sadokah ni dokahni marhitei Jesus Kristus Tuhanta in. (bd. 6:23.)

Rom 6

6:1 Ase, aha ma hatahononta? Nunutonta ma mardousa, ase lambin tambah idop ni uhur? (bd. 3:5-8.) 6:2 Seng sonai! Hita, na dob matei bani dousa in, sonaha tarbahen hita be manggoluh ibagas in? 6:3 Na so ibotoh nasiam do, haganup hita, na tardidi ibagas Kristus Jesus, hubagas hamateianni do hita tardidi? (Gal. 3:27.) 6:4 Jadi na dob rap tartanom do hita rap pakonsi marhitei pandidion in, ase songon Kristus Jesus, na dob pinapuho humbani na matei marhitei hasangapon ni Bapani, sonai homa hita mardalan ibagas goluh na baru. (Kol. 2:12; 1 Ptr. 3:21.) 6:5 Ai anggo domma sangkabona hita pakonsi ibagas na songon parmateini ai, sada do homa hita pakonsi ibagas parpuhoni ai. (Pil. 3:10, 11.) 6:6 Ai ibotoh hita, na dob tarsilang do hajolmaonta na buruk in rap pakonsi, ase iparseda badan pardousaon, ase ulang ra be hita parjabolonan ni duosa, (Gal. 5:24.) 6:7 ai barang ise na dob matei, maluah do ia humbani dousa. 6:8 Tapi, anggo domma matei hita rap pakon Kristus ihaporsayai uhurta, rap manggoluh ma hita homa pakonsi. (ay. 4.) 6:9 Ibotoh hita, ia Kristus, dob puho Ia humbani na matei, seng matei be; seng irajai hamateian in be Ia. 6:10 Ia matei pe Ia, sahali ai do matei halani dousa; ia manggoluh nuan, manggoluh bani Naibata do. (Heb. 9:26-28.) 6:11 Sonai ma hira nasiam dirinasiam: Matei bani dousa, tapi manggoluh bani Naibata ibagas Kristus Jesus. (2 Kor. 5:15; 1 Ptr. 2:24.) 6:12 Ase, ulang be dousa ai manrajai ibagas badannasiam na ra matei in, laho mambalosi hisap-hisapni. (1 Mus. 4:7.) 6:13 Anjaha ulang ma ondoskon nasiam pagorinasiam bani dousa in, gabe sinjata ni hajahaton, tapi ondoskon nasiam ma dirinasiam bani Naibata, songon na dob pinagoluh humbani na matei, anjaha pagorinasiam pe, bani Naibata ma in, gabe sinjata ni hapintoran. (bd. 12:1.) 6:14 Ai seng rajaan ni dousa in be nasiam, ai seng titah be manggomgomi nasiam, tapi idop ni uhur do. (1 Joh. 3:6.) 6:15 Ase, sonaha do? Mardousai mahita, halani seng be titah manggomgomi hita, tapi idop ni uhur do? Seng sonai! (bd. 5:17, 21.) 6:16 Ai lang ibotoh nasiam, bani ise iondoskon nasiam dirinasiam gabe jabolon pambalosi, jabolon ma nasiam bani na binalosannasiam ai, atap jabolon ni dousa hu hamateian, barang pambalosi bani hapintoran. (Joh. 8:34.) 6:17 Tapi tarima kasih ma bani Naibata, ai age pe jabolon ni dousa hinan nasiam, tapi gabe pambalosi do nasiam sonari humbani gok ni uhurnasiam bani ruhut ni pangajarion, na dob das bani nasiam. 6:18 Ai dob lopas nasiam humbani dousa in, gabe pambalosi do nasiam bani hapintoran. (Joh. 8:32.) 6:19 Ruhut ni jolma ma huhatahon halani hagalekon ni dagingnasiam. Ai songon na dob niondoskonnasiam pagorinasiam pambalosi bani habutakon ampa na so uhum, laho mangkorjahon na so uhum in, sonai ma nuan ondoskon nasiam pagorinasiam bani hapintoran, laho papansingkonsi. 6:20 Tongon sanggah jabolon ni dousa nasiam, bebas do nasiam humbani hapitoran. 6:21 Tapi aha do buahni jumpah nasiam? Sihailaonkon anggo sonari bani nasiam, ai hamateian do ujungni. (bd. 8:6, 13; Hes. 16:61, 63.) 6:22 Tapi sonari, dob bebas nasiam humbani dousa, dob gabe pambalosi nasiam bani Naibata, adong do buahnasiam hu hapansingon; anjaha ujungni ai ma hagoluhan na sadokah ni dokahni. (1 Ptr. 1:9.) 6:23 Ai upah halani dousa, ai ma hamateian, tapi silayak-layak ni Naibata do hagoluhan na sadokah ni dokahni marhitei Kristus Jesus Tuhanta in. (bd. 5:12.)

Rom 7

7:1 Ai lang ibotoh nasiam, nasiam sanina (hubani na mambotoh titah do hatangkon), na igomgomi titah do jolma, sadokah manggoluh ia? 7:2 Sada naboru, na dob tarsangkut do ia marhitei titah bani paramangonni, sadokah manggoluh dalahi ai, tapi anggo domma matei dalahi ai, bebas ma naboru ai humbani titah dompak dalahi ai. 7:3 Halani ai parbangkis do ia goranon, anggo laho ia bani dalahi na legan, sanggah manggoluh ope paramangonni. Tapi, anggo domma matei dalahi ai, bebas ma ia humbani titah, seng be parbangkis ia goranon, anggo laho ia bani dalahi na legan. 7:4 Sonai ma nasiam, ale hasoman, domma matei nasiam bani titah in marhitei daging ni Kristus, ase na legan simada nasiam, ai ma na dob puho humbani na matei in, ase marbuah hita bani Naibata. (Kol. 2:14.) 7:5 Ai, sanggah ibagas daging hita, margogoh do hisap pardousaon in ibagas pagorinta halani titah in, gabe na parbuahkon hamateian. (ay. 7-25.) 7:6 Tapi sonari domma sirang hita humbani titah in, matei bani sipanjolomi hita hinan, ase pambalosi hita ibagas habayuon ni Tonduy in, ulang be ibagas haburukon ni surat ni titah in. (bd. 6:2, 4; 8:1, 2.) 7:7 Ase sonaha ma hatahononta? Dousa do titah in? Seng sonai! Tapi seng nahutanda dousa, anggo seng marhitei titah in. Ai seng na hubotoh hisap-hisap in, ambit lang ihatahon titah in: Ulang ho marhahisapon. (2 Mus. 20:17.) 7:8 Marbona humbani titah in, ipuhoi dousa in do ibagas ahu bagei ni hisap-hisap; ai matei do dousa, anggo seng adong titah. (ay. 11; bd. 5:13.) 7:9 Manggoluh do ahu hinan, seng martitah. Tapi roh ma titah in, gabe manggoluh ma dousa in. 7:10 Tapi anggo ahu matei do, ase gabe hamteian do bangku titah in, sihorhon hagoluhan namin. (3 Mus. 18:5; Jak. 1:15.) 7:11 Ai marbona hunjai, ipaoto-oto anjaha ipamatei dousa in do ahu marhitei titah in. (Heb. 3:13.) 7:12 Ase na pansing do titah in, pansing do tonah ni Naibata, pintor anjaha dear. (1 Tim. 1:8.) 7:13 Ai gabe hamateian do bangku na madear in? Seng sonai! Tapi dousa in do paroh hamateian bangku marhitei na madear, ase talar dousa in, anjaha tidak jahatni na tarlobih in marhitei titah in. (bd. 5:20.) 7:14 Ai ibotoh hita, partonduyon do titah in; tapi paruhur daging do ahu, na dob tarjual bani dousa. (ay. 18; Joh. 3:6.) 7:15 Ai seng huarusi na hubahen in; ai seng na huharosuhkon ai huhorjahon, tapi na huhagigihon ai do hulahoi. 7:16 Tapi anggo huhorjahon na so huharosuhkon, na husatujui ma hadearon ni titah in. (ay. 12.) 7:17 Ase sedo ahu, na mangkorjahon ai, tapi dousa ai do na marianan ibagas ahu. 7:18 Ai hubotoh do, seng dong na madear marianan ibagas ahu, ai ma ibagas dagingku. Ia sihol ni uhur jumpah do namin bangku, tapi na mandalankon na madear seng dong jumpah. (1 Mus. 6:5; bd. 8:21.) 7:19 Ai seng huhorjahon na madear, na hinarosuhkonkai, tapi na sambor, na so huharosuhkon do hubahen. 7:20 Jadi anggo hubahen na so huharosuhkon, seng ahu na mangkorjahon ai, tapi dousa ai do na marianan ibagas ahu. 7:21 Ase on ma titah na jumpah ahu ibagas diringku: Na madear do husurahon sihol bahenonku, tapi na masambor do huhorjahon. 7:22 Ai ihamalaskon jolma parbagas na bangku ai do namin titah ni Naibata, 7:23 tapi huidah do titah na legan ibagas pagori ni dagingku, na marmunsuh dompak titah na ibagas uhurhu, gabe ipatunduk do ahu bani titah ni dousa, na adong ibagas pagoringku. (Gal. 5:17.) 7:24 Aih, ahu jolma na masombuh on. Ise ma na paluahkon ahu humbani angkula hamateian on? 7:25 Tarima kasih ma bani Naibata marhitei Jesus Kristus Tuhanta in. Ase, sonai ma nuan: Ahu sandiri mambalosi titah ni Naibata marhitei uhurhu ibagas, tapi marhitei daging, titah ni dousa do. (1 Kor. 15:57.)

Rom 8

8:1 Ase, seng mangonai be nuan uhum bani halak na ibagas Kristus Jesus, (na so marparlahou marguru hubani daging, tapi marguru bani Tonduy do). (ay. 31-39.) 8:2 Ai titah ni tonduy hagoluhan na ibagas Kristus Jesus do na mamardekahon ahu humbani titah ni dousa ampa hamateian. (bd. 3:27; 7:23, 24.) 8:3 Ai dob seng margogoh be titah in, pinagalek ni daging, isuruh Naibata ma Anakni sandiri marrupa daging pardousaon, marhalanihon ni dousa. Gabe sonai ma ihonahon uhum bani dousa in, ibagas daging ai, (Lah. 13:38; 15:10; Heb. 2:17.) 8:4 ase jumpah ma hapintoran na pinangindo ni titah in banta, hita na marparlahou mangihutkon Tonduy, seng mangihutkon daging. (Gal. 5:16, 25.) 8:5 Ai pardagingon do iparuhurhon na mangihutkon daging, tapi partonduyon do iparuhurhon na mangihutkon Tonduy in. 8:6 Ai hamateian do hauhuron ni daging, tapi hauhuron ni Tonduy ai ma hagoluhan ampa hadameion. (bd. 6:21.) 8:7 Ia hauhuron ni daging ai ma hamunsuhon dompak Naibata; seng ra tunduk in bani titah ni Naibata, ai seng tarbahensi. (Jak. 4:4.) 8:8 Halak na ibagas daging seng tarbahensi pamalas uhur ni Naibata. 8:9 Ia nasiam, seng ibagas daging, tapi ibagas Tonduy do, anggo tongon Tonduy ni Naibata marianan ibagas nasiam. Tapi anggo seng Tonduy ni Kristus bani jolma, seng Kristus simadasi. (1 Kor. 3:16.) 8:10 Tapi anggo Kristus ibagas nasiam, matei do tongon badan halani dousa, tapi manggoluh do tonduy halani hapitoran. 8:11 Tapi anggo marianan ibagas nasiam Tonduy ni na mamuhoi Jesus humbani na matei, pagoluhon ni Sipuhoi Jesus humbani na matei in do age badannasiam na ra matei in, marhitei Tonduyni na marianan ibagas nasiam. 8:12 Ai pe ale hasoman, parutang do hita, tapi sedo bani daging, ase marparlahou marguru hubani daging. (bd. 7:18.) 8:13 Ai anggo marguru hu daging nasiam marparlahou, maningon matei do nasiam; tapi anggo ipamatei nasiam horja ni daging marhitei Tonduy in, manggoluh ma nasiam. (Gal. 6:8; Ep. 4:22-24.) 8:14 Ai sagala na binobahon ni Tonduy ni Naibata, ai ma anak ni Naibata. 8:15 Ai seng ijalo nasiam tonduy jabolon ase mangulaki biar, tapi tonduy anak do ijalo nasiam; marhitei in do hita mardilo: Abba, Ham Bapa! (Gal. 4:5, 6; 2 Tim. 1:7.) 8:16 Tonduy in do manaksihon rap pakon tonduyta, paboa anak ni Naibata do hita. (2 Kor. 1:22.) 8:17 Ai anggo anak hita, dihut ma panean, panean bani Naibata, hasoman panean ni Kristus. Anggo hasomanni hita manaron, gabe hasomanni ma homa hita ibagas hasangapon. (Gal. 4:7; Pangk. 21:7.) 8:18 Ai huhira, sitaronon bani panorang sisonari seng satimbang in marimbang hasangapon, na sihol sipatalaron ope banta. 8:19 Ai masihol do sagala na tinompa in paima-imahon panorangni, ase ipatalar anak ni Naibata. (Kol. 3:4.) 8:20 Ai bani na lang do ipatunduk na tinompa in, seng humbani rosuhni, tapi halani na patundukkonsi do, ase dong pangarapan, (1 Mus. 3:17-19; 5:29.) 8:21 ai simardekahononkon do age na tinompa in, humbani parjabolonan ni hamagouan hu hamardekaon hasangapon ni anak ni Naibata. (2 Ptr. 3:13.) 8:22 Ai ibotoh hita do, rap marhoih anjaha mangarou do sagala na tinompa in ronsi sonari. 8:23 Ambah ni ai, age hita, na dob manjalo limbuah ni Tonduy in, marhoih do ibagas uhurta, paima-imahon haanakon, ase maluah pamatangta. (2 Kor. 5:2.) 8:24 Ai ase marpangarapan do, ase ipaluah hita. Ai anggo naidah na niarapkon in, seng pangarapan be ai; ai anggo domma naidah, mase arapkonon be ai. (2 Kor. 5:7.) 8:25 Tapi, anggo mangarap do hita bani na so niidah ope, sabar ma hita paima-imahonsi. 8:26 Tapi age Tonduy in, iurupi do hita bani hagalekonta. Ai seng ibotoh hita, barang aha do na patut sipindoonta, gabe iapiti Tonduy in do hita marhitei hoih na so tarhatahon. 8:27 Tapi ibotoh Sitanda uhur in do paruhuron ni Tonduy in, ai marguru bani rosuh ni Naibata do pangapitini bani halak na mapansing in. 8:28 Ai ibotoh hita do, haganup do manumpak hubani na ma-dear bani sagala na marholong ni uhur bani Naibata, na nidiloni humbani sura-surani hinan. (Ep. 1:11; 3:11.) 8:29 Ai na tinandani hinan, ai do itodoh, ase usih sidea hubani rupa ni Anakni in, ase Ia ma na parlobei tubuh humbani sanina na buei in. (Kol. 1:18; Heb. 1:6.) 8:30 Ai na tinandani hinan, ai do idilo, anjaha na nidiloni, ai do ipintori, anjaha na pinintoranni, ai do ipasangap. 8:31 Ai pe, aha ma hatahononta pasal ai? Anggo Naibata hasomanta, ise ma imbangta? (Ps. 118:6.) 8:32 Seng ilioi Anakni sandiri, tapi iondoskon do mangkophop hita haganup; mintor lang ma layak-layakkononni rap pakonsi haganupan ai banta? (Joh. 3:16.) 8:33 Ise ma na mangaduhon na pinilih ni Naibata? Naibata do na mamintori. 8:34 Ise ma na mandabuh uhum? Domma matei Kristus Jesus, lobih ni ai ope tene, domma mulak manggoluh, i siamun ni Naibata do Ia mangapiti hita. (1 Joh. 2:1.) 8:35 Ise manirang hita humbani holong ni uhur ni Kristus? Hamarsikon do atap hasosakan, parburuon do atap lohei, hatalanjangon do atap mara atap podang do? 8:36 Songon na tarsurat in: Halani Ham do hanami ibunuhi layur ari, songon biri-biri si sayaton do hanami ihira. (Ps. 44:23; 2 Kor. 4:11.) 8:37 Tapi ibagas haganupan ai monang do hita halani na mangkaholongi hita ai. 8:38 Tenger do uhurhu, seng tarbahen sirang hita humbani holong ni uhur ni Naibata, na ibagas Kristus Jesus Tuhanta in, barang bahenon ni hamateian, barang hagoluhan, barang malekat, barang siparkuasa, barang na masa sonari, barang na sihol masa, barang hagogohon pe, 8:39 barang bahenon ni na iatas age na itoruh, ronsi sagala na tinompa na legan pe.

Rom 9

9:1 Sintong do na huhatahon on ibagas Kristus, seng marladung ahu, dihut do panggora ni uhurhu manaksihon marhitei Tonduy Na pansing, 9:2 paboa pusok tumang do uhurhu anjaha tongtong marborit ni uhur ibagas. 9:3 Ipangindo uhurhu do age bali humbani Kristus halani saninangku, hasomanku sabangsa mangihutkon pardagingon. (2 Mus. 32:32.) 9:4 Bangsa Israel do sidea, simada hak haanakon, hasangapon, parpadanan, titah, parugamaon, bagah-bagah, (2 Mus. 4:22; 5 Mus. 7:6; 14:1.) 9:5 ampa ompung ni bangsa in, anjaha humbani sidea do roh Kristus mangihutkon pardagingon, Naibata na mangatasi haganup, na tarpuji ronsi sadokah ni dokahni, Amen. (Mat. 1; Luk. 3; Joh. 1:1.) 9:6 Tapi sedo na gabe lang asi hata ni Naibata. Ai seng haganup na marasal humbani Israel, margoran Israel ai. (bd. 2:28.) 9:7 Anjaha seng haganup ginompar ni si Abraham anak ni si Abraham, tapi: Na susur humbani si Isak do goranon ginomparmu. (1 Mus. 21:12.) 9:8 Artini ai: Sedo anak ni daging anak ni Naibata, tapi anak na pinarbagah-bagah ai do ihira anak na tongon. 9:9 Ai sonon do hata ni bagah-bagah ai: Sonon musimni use, roh do Ahu, anjaha adong ma ijai sada anak bani si Sara. (1 Mus. 18:10.) 9:10 Seng pitah ai buktini, tapi dihut do si Rabekka, na boratan rumah humbani sada halak, ai ma si Isak, ompungta ai. (1 Mus. 25:21.) 9:11 Ai sanggah lape tubuh ope sidea, lang ope ihorjahon na madear barang na masambor, ase totap sura-sura ni Naibata domu hubani pamilihonni, 9:12 Seng marguru bani pambahenan, tapi pitah bani na mandilo tumang do, ihatahon do hubani: Maningon sikahanan do pambalosi bani sianggian. (1 Mus. 25:23.) 9:13 Songon na tarsurat ai homa: Holong do uhurhu bani si Jakob, tapi sogam do bani si Esau. (Mat. 1:2, 3.) 9:14 Ai pe, aha ma hatahononta? Ai lang songon na geduk ma Naibata? Seng sonai. (5 Mus. 32:4.) 9:15 Ai ihatahon do hubani si Musa: Maidop do uhurhu bani na huidopi, anjaha marontou do uhurhu bani siontouan ni uhurhu. (2 Mus. 33:19.) 9:16 Ase seng marguru bani rosuh ni jolma atap horjani, tapi bani idop ni uhurni Naibata do. (Ep. 2:8.) 9:17 Ai sonon do nini surat in hubani Parao: Halani on do ase hupabangkit ho, ase hupatalar kuasangku marhitei ho, ase tarambilan Goranku hu sab dunia on. (2 Mus. 9:16.) 9:18 Ase iidopi do na sihol siidopanni, anjaha ipahengkeng do na sihol sipahengonni. (2 Mus. 4:21.) 9:19 Ra ihatahon ham do bangku: Mase mansalahkon ope Ia? Ai ise boi manlawan harosuhni? 9:20 Ale jolma, ai ise ma ho, na pag manjabab Naibata? Mintor hatahonon ni na pinauli ma na paulihonsi: Mase ma sonon ahu ibahen ham? (Jes. 45:9.) 9:21 Ai lang markuasa sitopa hudon, laho manjadihon humbani sangkimpal tanoh halampung, deba parugas bani na sangap anjaha deba nari bani na dorun? 9:22 Tapi sonaha ma, laho pataridahkon ringisni anjaha pabotohkon kuasani, marsabar ni uhur do Naibata manganju parugas siringisan, na pinasirsir hinan hu hamagouan. 9:23 ase ipabotohkon habayakon ni hasangaponni bani parugas siidopan, ai ma na pinasirsirni hinan bani hasangapon, (bd. 8:29; Ep. 1:3-12.) 9:24 ai ma hita, na dob nidiloni, seng pitah humbani Jahudi tumang, tapi dihut do homa humbani sipajuh begu-begu? 9:25 Songon na hinatahonni ai bani surat ni si Hosea: Goranonku ma na so bangsangku hinan bangsangku, anjaha na so hinaholongan hinan haholonganku. (Hos. 2:25.) 9:26 Anjaha, bani ianan ai, dob hinatahon lobei bani sidea: "Seng bangsangku hanima", pala ijai ma sidea goranon anak ni Naibata na manggoluh in. (Hos. 2:1.) 9:27 Ai idilohon si Jesayas do pasal bangsa Israel: Age pe na sa buei ni horsik na i topi ni laut buei ni anak ni Israel, pitah teba-tebani do na maluah. (bd. 11:5; Jes. 10:22, 23.) 9:28 Ai pasaudon ni Tuhan in do hatani i tanoh on gok anjaha podas. 9:29 Songon na dob jinahaan ni si Jesayas hinan: Ambit lang itebai Tuhan Zebaot bonih banta, usih do hita bani Sodom ampa Gomora. (Jes. 1:9.) 9:30 Ase aha ma hatahononta? Sipajuh begu-begu na so mangindahi hapintoran, manjalo hapintoran, ai ma hapintoran na humbani haporsayaon. (bd. 10:20.) 9:31 Tapi Israel, na mangindahi titah hapintoran in, seng das hujai. (bd. 10:2, 3.) 9:32 Halani aha? Ai ma halani seng humbani haporsayaon, tapi humbani horja do, gabe tartolsu sidea bani batu partolsuan in, 9:33 songon na tarsurat in: Tonggor ma, hupatibal do i Sion sada batu partolsuan ampa sada batu gingging parsangsian, anjaha seng sipabadoron na porsaya Bani. (Jes. 8:14; 28:16; Mat. 21:42-44.)

Rom 10

10:1 Ale hasoman, ipangindo uhurhu do anjaha hutonggohon do sidea bani Naibata, andohar maluah. 10:2 Ai husaksihon ma pasal sidea, paboa na pongkut uhur ni sidea dompak Naibata, tapi seng maruhur. 10:3 Ai seng itanda sidea hapintoran ni Naibata anjaha ipindahi sidea do, pajongjongkon hapintoran ni sidea sandiri, seng unduk sidea bani hapintoran ni Naibata. (bd. 9:31, 32.) 10:4 Ai Kristus do ujung ni titah in, laho mamintori sagala na porsaya. (Mat. 5:17; Joh. 3:18; Heb. 8:13.) 10:5 Ai isurathon si Musa do, paboa jolma na mangkorjahon hapintoran, na maronjolan bani titah, ai do na manggoluh marhitei ai. (3 Mus. 18:5.) 10:6 Tapi hapintoran na humbani haporsayaon mangkatahon sonon: Ulang ma hatahon ibagas uhurmu: Ise ma na manaik hu nagori atas, ai ma, mangalop Kristus hunjai? (5 Mus. 30:12, 13.) 10:7 Atap: Ise ma tuad hu nagori toruh, ai ma, mangarahkon Kristus humbani na matei? 10:8 Tapi sonon do ihatahon: Dohor do bamu hata in, ibagas pamanganmu anjaha ibagas uhurmu, Ai ma hata haporsayaon, na niambilankonnami. (5 Mus. 30:14.) 10:9 Ai maluah ma ham, anggo isaksihon ham marhitei pamanganmu Tuhan Jesus, anjaha ihaporsayai ham ibagas uhurmu, na dob ipuhoi Naibata Ia humbani na matei. (2 Kor. 4:5.) 10:10 Ai marhitei uhur do halak porsaya, laho hu hapintoran, anjaha marhitei pamangan manaksihon laho hu haluahon. 10:11 Ai ihatahon surat in do: Sagala na porsaya Bani, seng pabadoron. (Jes. 28:16.) 10:12 Ai seng dong ubahni halak Jahudi age halak Gorik, ai Sada do Tuhan ni haganup, na manlayak-layakkon habayakonni bani haganup na mandilosi. 10:13 Ai sagala na mandilo Goran ni Tuhan in, sai paluahon do. 10:14 Tapi sonaha ma pardilo ni sidea Bani na so hinaporsayaon ni sidea? Tapi sonaha ma pangkaporsayai ni sidea bani na seng ongga ibogei sidea? Sonaha ma pambogei ni sidea, anggo seng dong na mangambilankon? 10:15 Sonaha ma marambilan sidea, anggo lang adong na marsuruh? Songon na tarsurat in: Jenges ni in langkah ni siambilankon na madear. (Jes. 52:7.) 10:16 Tapi seng haganup na mambalosi ambilan na madear in, ai nini si Jesayas do: Ham Tuhan, ise ma na porsaya bani ambilannami? (Jes. 53:1.) 10:17 Ai humbani na manangar ambilan do roh ni haporsayaon, anjaha ambilan ai roh humbani hata ni Kristus. (Joh. 17:20.) 10:18 Tapi on ma hatahononku: Ai na so ibogei sidea do nani? Domma namin! Na dob das do sora ni sidea hu sab tanoh on, anjaha ronsi ujung ni dunia on do barita ni sidea. (Ps. 19:5.) 10:19 Tapi ningku use: Seng nani ibotoh Israel ai? Parlobei si Musa do na mangkatahon: Bahenonku ma hanima marsimburu mangidah na so bangsa in, anjaha papuhoonku ma ringisnima dompak bangsa na so maruhur. (Mus. 32:21.) 10:20 Pag do si Jesayas mangkatahon: Na so mangindahi Ahu, ai do jumpahan, anjaha talar do Ahu bani na so sungkun-sungkun Bangku. (Jes. 65:1.) 10:21 Tapi bani Israel ihatahon do: Layur-layur ari do hupaherbang tanganku bani bangsa na so mambalosi anjaha na manlawan. (Jes. 65:2.)

Rom 11

11:1 Ase husungkun ma: Ai na iambukkon Naibata do bangsani? Seng sonai! Ai halak Israel do age ahu, humbani ginompar ni si Abraham, marga Benjamin. (Pil. 3:5.) 11:2 Seng iambukkon Naibata bangsani, na dob tinandani hinan. Na so ibotoh nasiam do na hinatahon ni surat in pasal si Elias, sanggah na mangadu-adu Ia bani Naibata pasal halak Israel: (1 Raj. 19:10, 14.) 11:3 Ham Tuhan, domma ibunuhi sidea nabi-nabimu, iparreong anjap-anjapmu, anjaha sahalak ahu mando na tading manggoluh, anjaha hosahku pe sihol do buaton ni sidea. 11:4 Tapi aha do balos ni Naibata na roh hubani? Husarihon do Bangku pitu ribu halak, na so marsombah bani naibata Baal! (1 Raj. 19:18.) 11:5 Sonai homa bani panorang sonari, adong do teba-teba na tading, na pinilih marhitei idop ni uhur. (bd. 9:27.) 11:6 Tapi anggo humbani idop ni uhur, seng be humbani horja, ai ambit sonai, seng goranon be ai idop ni uhur. 11:7 Ase sonaha do? Na pinindahan ni halak Israel, seng jumpah sidea, tapi halak na pinilih ai jumpahsi do ai; ia na legan ai domma ipahengkeng uhurni, (bd. 9:31.) 11:8 songon na tarsurat ai: Ibere Naibata do bani sidea tonduy na tarpodom, mata na so marpangidah ampa pinggol na so marbinogei ronsi sadari on. (5 Mus. 29:3; Jes. 29:10.) 11:9 Anjaha si Daud pe ihatahon do: Meja ni sidea gabe tirangkap ampa siding ma bani sidea, gabe partolsuan ampa pambalason ma tene! (Ps. 69:23, 24.) 11:10 Ipagolap ma mata ni sidea, ase ulang marpangidah, anjaha tanggurung ni sidea gundung ma tongtong! 11:11 On do na huhatahon: Na sihol tompas do sidea, ase tartolsu? Seng sonai! Tapi panlanggaron ni sidea do gabe haluahon bani halak sipajuh begu-beegu, ase marsimburu sidea pasal ai. (bd. 10:19; Lah. 13:46.) 11:12 Tapi, anggo panlanggaron ni sidea gabe habayakon ni dunia on, anjaha hahurangan ni sidea ai gabe habayakon ni sipajuh begu-begu, ai lang lobih ni ai ma, anggo masuk sidea haganup? 11:13 Hubani nasiam sipajuh begu-begu do hatangkon: Halani apostel bani sipajuh begu-begu do ahu, sangap do hubahen jabatankin, 11:14 andohar marsimburu hubahen hasomanku sabangsa, andohar maluah deba humbani sidea. (1 Tim. 4:16.) 11:15 Ai anggo gabe pardameian do bani dunia on na tarbuang ai sidea, ai lang hagoluhan humbani na matei ma in, anggo tarjalo use sidea? 11:16 Ai anggo pansing ruti na parlobei igalangkon ai, pansing ma age aguan na tading ai; anjaha anggo pansing uratni, pansing ma age dangkahni. 11:17 Tapi anggo irampingkon deba rantingni, ase boi ho, na marasal humbani hayu jetun harangan hinan, isumbathon hujai, gabe parrupei ho bani hayu jetun, na gok minak ai, (Ep. 2:11-14, 19.) 11:18 ulang ma gijang uhurmu dompak ranting ai. Anggo gijang uhurmu, ingat ma, sedo ho na mangusung urat ai, tapi niusung ni urat ai do ho. 11:19 Sihol hatahononmu: Irampingkon pe ranting ai, ase ahu do isumbatkon hujai! 11:20 Dear! Halani na so porsaya do sidea ase irampingkon, tapi halani haporsayaon do ase jongjong ho. Ulang magijang uhurmu, tapi mabiar ma tene! 11:21 Ai anggo seng ipaturut Naibata ranting hinan, ho pe sabonar seng paturutonni. 11:22 Ai, pe tonggor ma layak ni Naibata ampa korasni: Koras do Ia dompak na dob tompas ai; layak do Ia dompak ho, anggo totap ho ibagas halayakonni in, anggo lang, rotaponni do age ho! (Joh. 15:2, 4; Heb. 3:14.) 11:23 Sidea pe, anggo seng martahan sidea ibagas na lang porsaya ai, sumbathononni do; margogoh do Naibata manumbathon sidea use. (2 Kor. 3:16.) 11:24 Ai anggo irampingkon ho humbani hayu jetun harangan hinan, gabe isumbathon ho hubani hayu jetun na sinuan, marlawanan hubani biak hinan, lambin sidea ma lang tarsumbathonsi bani hayu jetun hinan? 11:25 Seng marosuh uhurhu, ale hasoman, seng ibotoh nasiam pasal rusia on, ase ulang mangunsagah nasiam bani pambotohnasiam. Na dob sogop do lobei hahengkengon bani deba bangsa Israel, paima gok bilangan ni sipajuh begu-begu masuk, (Luk. 21:24; Joh. 10:16.) 11:26 anjaha marhitei na sonai maluah haganup Israel, songon na tarsurat in: Na roh ma hun Sion Sipaluah, padaohonni ma hajahaton hun Jakob! (Mat. 23:39; Jes. 59:20; 27:9; Ps. 14:7.) 11:27 Anjaha on ma padanku pakon sidea, anggo hubuat ma dousa ni sidea. (Jes. 27:9; Jer. 31:33, 34.) 11:28 Ase domu hubani ambilan na madear in, munsuh do sidea halani nasiam, tapi domu hubani pamilihon in, haholongan do sidea halani ompung na lobei. 11:29 Ai seng ongga manosal Naibata pasal sibere-bereni ampa pandiloonni. 11:30 Ai hinan seng sibalosi Naibata nasiam, tapi sonari jumpahan idop ni uhur do, halani na so porsaya ai sidea. 11:31 Sonai ma sidea sonari seng pambalosi, gabe dapotan idop ni uhur nasiam, ase jumpahan idop ni uhur homa sidea. 11:32 Ai domma iondoskon Naibata haganup hubani uhur na so mambalosi, ase idopanni use haganup.(Gal. 3:22; 1 Tim. 2:4.) 11:33 Bagasni in tene habayakon, hapentaran ampa habotohon ni Naibata! Na so tarpareksa do uhumni, anjaha na so taririk-irik do dalanni! (bd. 9:23; 10:12; Jes. 45:15.) 11:34 Ai ise ma na mambotoh pingkiran ni Tuhan in? Ise do sipanuturi Bani?(Joh. 15:8; Jes. 40:13; Jer. 23:18; 1 Kor. 2:16.) 11:35 Ise do na parlobei mambere Bani, ase Ia mambalas use bani? 11:36 Ai hum-Bani, marhiteihon-Si anjaha hu-Bani do haganupan in. Bani ma hasangapon sadokah ni dokah ni Amen!

Rom 12

12:1 Ai pe, hupaingat ma nasiam sanina marhitei idop ni uhur ni Naibata: Ondoskon nasiam ma angkulanasiam gabe galangan na manggoluh, na susi anjaha na hinarosuhkon ni Naibata, in ma parsombahonnasiam na maruhur! (bd. 6:13; 1 Ptr. 2:5) 12:2 Anjaha ulang ma sarupa nasiam pakon dunia on, tapi mubah ma marhitei habayuon ni uhur, ase boi nasiam manimbangi atap aha do rosuh ni uhur ni Naibata, ai ma na madear, harosuh ampa na gokan dear. (Ep. 4:23; 5:10, 17.) 12:3 Ase marhitei idop ni uhur na binereni hubangku, huhatahon ma bani ganup nasiam: Ulang ma gijang hira nasiam dirinasiam lobih humbani na patut, tapi pandei ma nasiam maruhur, ganup ma domu hubani banggal na haporsayaon, na binagihon ni Naibata bani. (1 Kor. 12:11; Ep. 4:7.) 12:4 Ai songon hita marpagori na buei do bani sada badan, tapi seng sahorja pagori ai haganup, (1 Kor. 12:12.) 12:5 sonai do homa hita, na buei ai, sada badan ibagas Kristus, tapi pagori bei do hita samah hita. (1 Kor. 12:27; Ep. 4:25.) 12:6 Palegan-legan do sibere-bere banta domu hubani idop ni uhur na binere banta. Anggo panjahaion, sihol ma domu hubani haporsayaon. (1 Kor. 12:4.) 12:7 Anggo horja marugas, horja marugas ma; anggo pangajarion, mangajari ma! (1 Ptr. 4:10, 11.) 12:8 Anggo horja mamodahi, ai ma; anggo na marsibere-bere, ibagas bulus ni uhur ma; anggo na mambobahon, marringgas ni uhur ma; anggo na marsilayak-layak, humbani malas ni uhur ma. (Mat. 6:3; 2 Kor. 8:2; 9:7.) 12:9 Ulang ma marsipakulah-kulah holong ni uhur in! Hagigihon nasiam ma na jahat in, parayak ma na madear! (Ams. 5:15; 1 Tim. 1:5.) 12:10 Marsihaholongan ma nasiam ibagas holong parsaninaon! Marsilobei-lobeian ma nasiam marsipasangapan! (Pil. 2:3; 2 Ptr. 1:7.) 12:11 Ulang ma surut ringgas ni uhurnasiam, hinsah ma ibagas tonduy, sisir ma mambalosi Tuhan in! (Pangk. 3:15.) 12:12 Marmalas ni uhur ma nasiam mangarap, sabar bani hamarsikon, golgol bani tonggo! (1 Tes. 5:17.) 12:13 Sarihon nasiam ma na porlu bani halak na mapansing; haporluhon ma partamueion! (Heb. 13:2.) 12:14 Pasu-pasu nasiam ma na marburu nasiam, pasu-pasu ma, ulang burai! (Mat. 5:44; Lah. 7:60; 1 Kor. 4:12.) 12:15 Marmalas ni uhur ma nasiam rap pakon na marmalas ni uhur, tangis ma pakon na tangis!(Ps. 35:13.) 12:16 Sada ma uhurnasiam samah nasiam; ulang ma hagijangon ai pingkiri nasiam, tapi hatoruhon ma parayak; ulang ma na pandei nasiam iagan uhurnasiam! (bd. 15:5; Jes. 5:21.) 12:17 Ulang ma balaskon nasiam na jahat balas ni na jahat; porluhon nasiam ma na madear ilobei ni haganup halak. (1 Tes. 5:15.) 12:18 Anggo tarbahen, sibar ni na tarhorjahon nasiam, mardamei ma nasiam pakon haganup halak. (Mrk. 9:50; Heb. 12:14.) 12:19 Nasiam, na hinaholongan, ulang ma nasiam mambalas, tapi padas nasiam ma ringis in bani Naibata, ai tarsurat do: Bangku do pambalason, Ahu pe mambalaskon, nini Tuhan in. (3 Mus. 19:18; 5 Mus. 32:35; Mat. 5:39.) 12:20 Ai pe, anggo loheian munsuhmu, bere mangan ia; anggo horahan ia, bere minum! Ai anggo ibahen ham sonai, na pajunjun narnar do ham bani uluni. (Pod. 25:21, 22; Mat. 5:44.) 12:21 Ulang ma talu ham ibahen na jahat, tapi taluhon ham ma na jahat in marhitei na madear.

Rom 13

13:1 Unduk ma ganup halak bani pamarentah na markuasa. Ai seng dong pamarentah anggo seng na humbani Naibata, na dong ai pe Naibata do manotapkon ai. (Pod. 8:15; Joh. 19:11; Tit. 3:1.) 13:2 Ase, na manlawan aturan ni Naibata do na manlawan pamarentah. Anjaha na manlawan ai, jaloonni do uhum bani. 13:3 Ia pamarentah seng sihabiaran ai bani sihorjahon na madear, tapi bani sihorjahon na jahat do. Marosuh ham seng mabiar bani pamarentah? Na dear ma horjahon, ase dapotan puji-pujian ham humbani sidea. (1 Ptr. 2:13, 14.) 13:4 Juak-juak ni Naibata do sidea, laho mambahen na madear bamu. tapi, anggo na jahat ihorjahon ham, patut do mabiar ham, ai seng gurou-gurou podang na binoanni ai. Juak-juak ni Naibata do sidea, laho mangkonahon uhum bani sihorjahon hajahaton. (Ps. 82:6.) 13:5 Halani ai patut do unduk hita, seng pitah ringis ai, tapi homa halani panggora ni uhur in. 13:6 Halani ai galar nasiam ma balasting. Pagawei ni Naibata do sidea na tongtong mardiateihon pasal in. 13:7 Galar nasiam ma bani ganup halak na patut situngguonni. Balasting bani na patut manjalosi, sohei bani haondosanni, biar bani na patut habiaran anjaha sangap bani na patut pasangapon. (Mat. 22:21.) 13:8 Ulang ma marutang nasiam age bani ise pe, sobali na marsihaholongan, ai na mangkaholongi hasoman, in do na manggoki titah in. (Gal. 5:14; 1 Tim. 1:5.) 13:9 Ai titah na mangkatahon: "Ulang ho marbangkis, ulang ho mamunuh, ulang ho manangko, ulang ho manguhur-uhuri," ronsi titah na legan pe, on do rimpunni: Haholongi ma hasomanmin songon dirimu! (2 Mus. 20:13-17; 3 Mus. 19:18.) 13:10 Ia holong in seng ibahen na jahat dompak hasamon; ase holong do hagogok ni titah in.(Mat. 22:40; 1 Kor. 13:4.) 13:11 Ambah ni ai, ibotoh nasiam do, sonaha panorang on, paboa na jumpah ma panorangni puho humbani na modom, ai domma lambin dohor haluahonta nuan, marimbang mulai porsaya hita. (Ep. 5:14; 1 Tes. 5:6, 7.) 13:12 Na laho salpu ma borngin, na dohor ma siang ni ari. Ai pe, tanggali hita ma pambahenan hagolapan, anjaha pakei hita ma sinjata haliharon! (Ep. 5:11; 1 Joh. 2:8.) 13:13 Tipak ma parlahouta songon na patut arian, ulang marmangan-mangan ampa marminum-minum, ulang marhabutakon ampa uhur na so maila, ulang maringor ampa marsimburu! (Luk. 21:34; Ep. 5:18.) 13:14 Tapi pakei nasiam ma Tuhan Jesus Kristus, anjaha ulang ma balosi nasiam dagingnasiam, laho mamuhoi hisap-hisapni. (Gal. 3:27.)

Rom 14

14:1 Anju nasiam ma na galek marhaporsayaon, ulang ma marsalisih pasal pingkiran. (bd. 15:1; 1 Kor. 8:9.) 14:2 Porsaya do na sada boi panganonni haganup, tapi na galek ai sayur-sayuran do hansa ipangan. (1 Mus. 1:29; 9:3.) 14:3 Na mangankon ulang ma mapas uhurni bani na so mangankon; anjaha na mangorom pe ulang ma iuhum-uhumi na mangankon, ai na dob ijalo Naibata do age ia. (Kol. 2:16.) 14:4 Ai ise do ham, mambahen na iuhumi ham jabolan ni halak na legan? Marguru bani tuanni do ia, atap na jongjong ia barang na tompas. Tapi totap do ia, ai tarpatotap Tuhan in do ia. (Mat. 7:1; Jak. 4:11, 12.) 14:5 Bani uhur ni na deba, marsisurungan do ari, bani uhur ni na legan, dos do ari in. Ganup ma marsijoloman bani hatengeran ni uhurni bei. (Gal. 4:10.) 14:6 Na papansing ari in, bani Tuhan in ma ipapansing in: na mangankon, halani Tuhan in ma ipangan, ai bani Naibata do ia martarima kasih; anjaha na mangorom, halani Tuhan ma ia mangorom, anjaha bani Naibata ma ia martarima kasih. 14:7 Ai ganup hita seng manggoluh bani dirinta, anjaha ganup hita seng matei bani dirinta. 14:8 Ai manggoluh pe hita, manggoluh bani Tuhan in do, anjaha matei pe hita, matei bani Tuhan in do. Ase manggoluh barang matei pe hita, tong do bani Tuhan in hita.(Gal. 2:20; 1 Tes. 5:10.) 14:9 Ai ase matei pe Kristus anjaha mulak manggoluh, ase Ia do Tuhan ni na matei age na manggoluh. 14:10 Ia ham, mase ma uhum-uhumonmu hasomanmu, anjaha mase ma mapas uhurmu bani hasomanmu? Ai lang haganup do hita maningon jongjong ilobei ni paratas ni Naibata? 14:11 Ai tarsurat do: Na manggoluh do Ahu, nini Tuhan. Bangku do manrogop sagala towod, anjaha sagala dilah mangakui Naibata. (Jes. 45:23; Pil. 2:10, 11.) 14:12 Ase ganup do hita marbalos pasal dirinta bei ilobei ni Naibata. (Gal. 6:5.) 14:13 Ase ulang be hita marsiuhum-uhuman! Tapi dearan ma naputushon, ulang be nabahen partolsuan atap parsangsian bani sanina. 14:14 Torang do hubotoh marhitei Tuhan Jesus, na so adong na butak hinan, tapi gabe butak do ai bani na mangahapkon ai butak. (Mat. 15:11; Lah. 10:15; Tit. 1:15.) 14:15 Ai anggo ipusoki ham uhur ni hasomanmu marhitei na pinanganmu, seng be mardalan ibagas holong ham. Ulang ma magou hasomanmu halani sipanganon, ai na dob matei do Kristus manghophopsi. (1 Kor. 8:11-13.) 14:16 Ulang ma na madear ai bani nasiam, gabe sirisaon ni halak. (Tit. 2:5.) 14:17 Ai sedo sipanganon barang siinumon harajaon ni Naibata, tapi hapintoran ampa damei ampa malas ni uhur do ibagas Tonduy Na pansing. (Luk. 17:20.) 14:18 Ai anggo pambalosi ham bani Kristus pasal ai, harosuh ni Naibata ma ham anjaha harga bani jolma. 14:19 Halani ai parayak hita ma na padameihon ampa na patorsa-torsahon hita samah hita! (bd. 12:18; 15:2.) 14:20 Ulang ma parseda horja ni Naibata halani sipanganon. Haganup do namin pansing, tapi gabe hasedaon do ai bani sada halak, anggo sangsi ia ibagas na mangankon ai. (ay. 14.) 14:21 Dearan ma, ulang mangan gulei, ulang minum anggur, atap mangkorjahon aha pe, anggo mambahen parsangsian do ai bani hasomanmu. (1 Kor. 8:13.) 14:22 Ia adong pe haporsayaonmu, bamu ma ai ilobei ni Naibata. Martuah ma halak, na so mansalahkon dirini be, pasal na dob hinadearhon ni uhurni. 14:23 Ise na sangsi, tapi ipangan do, domma hona uhum, halani seng humbani haporsayaon ai. Ai sagala na so tubuh humbani haporsayaon, dousa do. (Tit. 1:15.)

Rom 15

15:1 Tapi hita na margogoh in, patut do manganju hagalekon ni na hurang gogoh, anjaha ulang ma rosuhta sandiri pindahi hita. (bd. 14:1.) 15:2 Ganup ma hita mambahen rosuh ni uhur ni hasoman, gabe hadearonni, laho pauli-ulihonsi. (1 Kor. 9:19; 10:23, 24.) 15:3 Ai Kristus pe seng rosuhni sandiri ipindahi, songon na tarsurat in: Risa-risa ni na manrisai Ham mangonai do hu-Bangku! (Ps. 69:10.) 15:4 Ai sagala na tarsurat hinan, bahen podah banta do ai, ase tarsurat ai, ase marpangarapan hita halani hasabaron ampa apoh-apoh na ibagas Surat in. (bd. 4:23, 24; 1 Kor. 10:11.) 15:5 Tapi Naibata, simada hasabaron ampa apoh-apoh ma mambere bani nasiam hasadaon ni uhur samah nasiam mangihutkon rosuh ni Kristus Jesus, (Pil. 3:16.) 15:6 ase sauhur anjaha sasora ma nasiam mamuji Naibata, Bapa ni Tuhanta Jesus Kristus. 15:7 Halani ai marsijaloan ma nasiam, songon panjalo ni Kristus banta, bahen hasangapon ni Naibata. 15:8 Ai huhatahon ma bani nasiam, na dob gabe pambalosi do Kristus bani na tarsunat halani hasintongan ni Naibata, laho patotapkon bagah-bagah, na hubani ompung na lobei, (Mat. 15:24; Lah. 3:25.) 15:9 anjaha sipajuh begu-begu pe pasangaphon Naibata do halani idop ni uhurni, songon na tarsurat in: Halani ai pujionku do Ham itongah-tongah ni sipajuh begu-begu, anjaha dodingkononku do Goranmu. (bd. 11:30; Ps. 18:50.) 15:10 Anjaha ihatahon use: Marmalas ni uhur ma nasiam sipajuh begu-begu rap pakon bangsani! (5 Mus. 32:43.) 15:11 Dob ai use: Puji ma Tuhan in, nasiam haganup sipajuh begu-begu, anjaha haganup ma bangsa mamujisi. (Ps. 117:1.) 15:12 Anjaha si Jesayas pe, nini do: Adong ma urat ni si Jesse, anjaha jongjong ma na manggomgom sipajuh begu-begu. Bani do mangarap sipajuh begu-begu. (Jes. 11:10; Pangk. 5:5.) 15:13 Tapi Naibata, simada pangarapan in ma manlayak-layakhon bani nasiam hagogok ni malas ni uhur ampa damei marhitei haporsayaon, ase lambin tambah nasiam marpangarapan marhitei gogoh ni Tonduy Na pansing. 15:14 Ahu pe torang do hubotoh, nasiam saninangku, paboa na dob gok do nasiam bani na madear, marisi bani haganup habotohon, anjaha boi marsipodah-podah samah nasiam. 15:15 Tapi sonai pe, mapagtu do ahu manurat bani deba surathu bani nasiam, songon na pasingatkon nasiam, halani idop ni uhur na binere ni Naibata bangku, (bd. 1:5; 12:2.) 15:16 ai gabe siparugas bani Kristus Jesus ampa gabe malim ni ambilan na madear na humbani Naibata bani bangsa sipajuh begu-begu, ase gabe galangan na hinarosuhkon ni Naibata sidea haganup, na pinapansing ibagas Tonduy Na pansing. (bd. 11:13; Pil. 2:17.) 15:17 Ibagas Kristus Jesus, adong do na mambahen megah uhurhu pasal horjangku ilobei ni Naibata. 15:18 Ai seng barani ahu, mangkatahon atap aha pe, sobali na binahen ni Kristus marhitei ahu, ai ma laho manogunogu sipajuh begu-begu, hu pambalosion ibagas hata ampa pambahenan, (bd. 1:5; 2 Kor. 3:5.) 15:19 marhasoman hagogohon ni tanda ampa halongangan, ibagas hagogohon ni Tonduy Na pansing, gabe das huambilankon ambil na madear na humbani Kristus, mamungkah hun Jerusalem ampa nagori inggotni ai das ronsi Iliria. (Mrk. 16:17.) 15:20 Hasangaponku do huhira na mangambilankon ambilan na madear in bani ianan, na so tarbogei ope ijai Goran ni Kristus, ase ulang ahu songon na pauli rumah bani onjolan ni halak na legan, (2 Kor. 10:15, 16.) 15:21 tapi songon na tarsurat in ma: Marpangidah ma na so dapotan barita pasalsi, anjaha mangarusi ma na so ongga mambogeisi. (Jes. 52:15.) 15:22 On do halani mambahen gari tarabat ahu marayak nasiam. (bd. 1:13.) 15:23 Tapi anggo nuan, seng adong be sihorjahononku i nagori ai; anjaha domma piga-piga tahun hinan ihasiholli uhurhu marayak nasiam, bani pardalananku na laho hu Spania. (bd. 1:10, 11.) 15:24 Ai arap do uhurhu, idahonku nasiam sanggah na montas ahu, anjaha taruhkonnasiam ahu hujai, dob lobei sombuh uhurhu otik mangidah nasiam. (1 Kor. 16:6.) 15:25 Tapi hu Jerusalem ope langkahku sonari, laho marugas bani halak na pansing ai, (Lah. 18:2; 19:21; 20:22.) 15:26 ai iputushon kuria na i Mekedonia ampa na i Akaya do, mambahen tumpak pangurupion bani hasoman na mapansing na hurangan i Jerusalem. (1 Kor. 16:1; 2 Kor. 8:1-4; 9:2, 12.) 15:27 Domma sonai iputuskon sidea, ai parutang do sidea tongon bani sidea ai. Ai anggo gabe parrupei sipajuh begu-begu bani arta partonduyon na adong bani sidea, patut do sipajuh begu-begu mangurupi sidea pasal na porlu bani pardagingon. (bd. 9:4; 1 Kor. 9:11.) 15:28 Anggo domma husaloseihon ai anjaha hupadas buah ai bani sidea, sihol do ahu bingkat hu Spania, anjaha singgah bani nasiam. 15:29 Tapi hubotoh do, anggo roh ahu bani nasiam, ibagas hagogok ni pasu-pasu ni Kristus do ahu roh. (bd. 1:11.) 15:30 Tapi ojur-ojurhu bani nasiam, ale hasoman, marhitei Tuhanta Jesus Kristus ampa marhitei holong ni uhur ni Tonduy in: Hasomani nasiam ma ahu maruntol marhitei na manonggohon ahu bani Naibata, (2 Kor. 1:11; Pil. 1:27; 2 Tes. 3:1.) 15:31 andohar ipaluah ahu humbani halak na so porsaya i Judea, anjaha iharosuhkon halak na mapansing ai horjangku na hu Jerusalem ai, 15:32 andohar marmalas ni uhur ahu das bani nasiam, domu hubani rosuh ni Naibata, boi marsaran bani nasiam. 15:33 Naibata Pardamei in ma mangkasomani nasiam ganup. Amen. (bd. 16:20.)

Rom 16

16:1 Huondoskon ma bani nasiam botouta si Poibe, siparugas i kuria Kenkerea, 16:2 ase ijalo nasiam ia ibagas Tuhan in, songon na patut bani halak na mapansing, anjaha iurupi nasiam ia bani sagala horja, anggo porlu urupan. Ai na dob gabe sipangurupi do ia bani buei halak, age bangku pe. 16:3 Padas nasiam ma tabingku bani si Priska ampa bani si Akila, hasomanku pangkorja ibagas Kristus Jesus, (Lah. 18:2, 26.) 16:4 na ra mamberehon borgokni laho mangkophop ahu, gabe seng pitah ahu martarima kasih bani sidea, tapi haganup kuria na humbani sipajuh begu-begu. 16:5 Tabingku homa bani kuria na martumpu i rumahni. Tabingku bani si Epenetus, haholongankin, bunga tubuh bani Kristus i Asia. 16:6 Tabingku bani si Maria, na buei mangkalojahon nasiam. 16:7 Tabingku bani si Andronikus ampa si Junias, hasomanku samarga anjaha hasomanku tartutup, sidear barita bani apostel-apostel in, anjaha na parlobei ibagas Kristus ase ahu. (2 Kor. 8:23.) 16:8 Tabingku bani si Ampliatus, na huhaholongi ibagas Tuhan in. 16:9 Tabingku bani si Urbanus, hasomanta sahorja ibagas Kristus, sonai bani si Stakis, haholongankin. 16:10 Tabingku bani si Apelles, natahan ibagas Kristus. Tabingku bani hasoman sarumah ni si Aristobulus. 16:11 Tabingku bani si Herodion, hasomanku samarga. Tabingku bani hasoman sarumah ni si Narkissus, na adong ibagas Tuhan in. 16:12 Tabingku bani si Tripena ampa si Triposa, na ra loja halani Tuhan in. Tabingku bani si Persis, haholongan in, na ra loja tumang halani Tuhan in. 16:13 Tabingku bani si Rupus, na pinilih ni Tuhan in, sonai bani inangni, na songon inang homa bangku. (Mrk. 15:21.) 16:14 Tabingku bani si Asinkritus, si Plegon, si Hermes, si Patrobas, si Hermas, age bani sanina na rap pakon sidea. 16:15 Tabingku bani si Pilologus, si Julia, si Nereus ampa botouni ai, bani si Olimpas ampa bani haganup hasoman ni sidea na pansing in. 16:16 Marsitabian ma nasiam marhitei summah na mapansing. Padas tabi do bani nasiam ganup kuria ni Tuhan in. (1 Kor. 16:20.) 16:17 Hupaingat ma nasiam, saninangku, jaga ma nasiam bani halak, na mambahen parsalisihan ampa parsangsian marhitei na manlawan podah, na dob jinalo nasiam. Padaoh nasiam ma dirinasiam humbani sidea. (Mat. 7:15; Tit. 3:10.) 16:18 Ai halak na sonai, sedo Tuhanta Kristus in na binalosanni ai, tapi boltokni do, anjaha marhitei sahap na lampot-lampot ampa na mantin-mantin ipaoto-oto sidea do halak paruhur na saluju. (Hes. 13:18; Pil. 3:19; Kol. 2:4.) 16:19 Na tarbarita do age ija pambalosionnasiam, anjaha malas do uhurhu pasal ai. Tapi huparsinta do ase pentar ma nasiam pasal na madear, anjaha pitah dompak na masambor. (bd. 1:8; 1 Kor. 14:20.) 16:20 Tapi Naibata Pardamei in podas do ropukanni sibolis hu toruh ni naheinasiam. Idop ni uhur ni Tuhanta Jesus Kristus ma mangkasomani nasiam! (bd. 15:33.) 16:21 Manongos tabi do bani nasiam si Timoteus, hasomanku sahorja, sonai si Lusius, si Jason ampa si Sosipater, hasomanku samarga. (Lah. 16:12; 19:22; 20:4; Pil. 2:19.) 16:22 Mangkatahon tabi bani nasiam ibagas Tuhan in, ahu si Tertius, sisurat surat on. 16:23 Mangkatahon tabi bani nasiam si Gayus, na manamuei ahu ampa haganup kuria in, sonai homa si Erastus, bendahara kota in, ampa si Kuartas, sanina in. (Lah. 19:22; 1 Kor. 1:14.) 16:24 Idop ni uhur ni Tuhanta Jesus Kristus ma mangkasomani nasiam ganup! Amen. 16:25 Tapi Bani ma, na boi margogohi nasiam, domu hubani ambilan na madear na huambilankon ampa barita pasal Jesus Kristus, domu hubani pangungkabon ni rusia in, na pinonophon humbani na basaia, (Ep. 1:9; 3:5, 9.) 16:26 tapi domma ipatalar anggo nuan, anjaha marhitei surat ni nabi-nabi ipabotohkon bani sagala bangsa, domu hubani tonah ni Naibata na manongtong in, laho mamboan sidea hu haporsayaon ampa pambalosion: (bd. 1:5; 2 Tim. 1:10.) 16:27 Bani Naibata parhapentaran na sasada in ma hasangapon ronsi sadokah ni dokahni marhitei Jesus Kristus! Amen. (1 Tim. 1:17; Jud. 25.)

1 Korint 1

1:1 Humbani si Paulus, na tardilo gabe apostel ni Kristus Jesus mangihutkon rosuh ni Naibata, ampa si Sostenes sanina in, 1:2 hubani kuria ni Naibata na i Korint, na dob pinapansing ibagas Kristus Jesus, halak na mapansing, na tardilo rap pakon haganup halak na mandilo Goran ni Tuhanta Jesus Kristus atap ija pe Tuhan ni sidea ampa Tuhanta: (ay. 6, 11; Lah. 9:14.) 1:3 Idop ni uhur ma bani nasiam ampa damei humbani Naibata Bapanta ampa humbani Tuhan Jesus Kristus! (Rom 1:7.) 1:4 Mangkatahon tarima kasih do ahu tongtong bani Naibata halani nasiam, mardingat idop ni uhur ni Naibata na binereni bani nasiam ibagas Kristus Jesus. 1:5 Ai na dob bayak do nasiam ibagas Ia pasal haganup, ibagas ganup hata in ampa bani ganup pangarusion, 1:6 halani hasaksian pasal Jesus domma totap bani nasiam, 1:7 gabe seng marhahurangan be nasiam pasal haganup masam ni sibere-bere partonduyon ibagas na paimahon nasiam bani partalar ni Tuhanta Jesus Kristus. (Tit. 2:13.) 1:8 Patotaponni do nasiam ronsi ujungni, gabe seng sihataon be bani ari ni Tuhan Jesus Kristus. (Pil. 1:6; 1 Tes. 3:13; 5:23.) 1:9 Haposan do Naibata, na mandilo nasiam hu parsaoran pakon Anakni Jesus Kristus Tuhanta in.(1 Tes. 5:24.) 1:10 Tapi hupodahi ma nasiam, nasiam saninangku, marhitei Goran ni Tuhanta Jesus Kristus, ase sahata ma nasiam haganup, ulang ma adong parbolah-bolahan bani nasiam, tapi totap ma nasiam sada marhitei sada ni uhur ampa sada ni pingkiran. (Pil. 2:2; 3:16.) 1:11 Ai das do hubangku marhitei parrumah ni si Kloe pasal nasiam, saninangku, paboa adong do paringoran itongah-tongahnasiam. 1:12 On do na huhatahon: Ganup do nasiam mangkatahon: Ahu susian ni si Paulus! Ahu susian ni si Apollos! Ahu susian ni si Kepas! Ahu susian ni Kristus! (bd. 3:4; Joh. 1:42; Lah. 18:24-27.) 1:13 Ai na binagi do Kristus in? Ai na dob tarsilang do si Paulus manghophop nasiam? Ai hubagas goran ni si Paulus do nasiam tardidi? 1:14 Tarima kasih ma huhatahon, halani seng dong hudidi humbani nasiam sobali si Krispus ampa si Gayus, (Lah. 18:8; Rom 16:23.) 1:15 ase ulang adong na mangkatahon hubagas goranku sandiri nasiam tardidi. 1:16 Tapi dihut do tene parrumah ni si Stepanas hudidi; na legan, seng hubotoh atap adong ope, na dob hudidi. (bd. 16:15, 17.) 1:17 Ai seng isuruh Kristus ahu mandidihon, tapi mangambilankon ambilan na madear do, anjaha ai pe seng marhata hapentaron, ase ulang lumei kuasa ni silang ni Kristus. (bd. 2:4; Mat. 28:19; Joh. 4:2.) 1:18 Ai haotoon do hata pasal silang in bani halak na laho magou, tapi hagogohon ni Naibata do in banta, na jumpahan haluahon.(Rom 1:16; 2 Kor. 4:3.) 1:19 Ai tarsurat do: Huparseda do hapentaron ni na pentar, anjaha huambukkon do uhur ni siparuhur. (Jes. 29:14.) 1:20 Ija do halak na pentar? Ija do sibotoh surat? Ija do siparsual-sual ni dunia on? Ai lang gabe haotoon do hapentaron ni dunia on ibahen Naibata? 1:21 Ai halani ibagas hapentaron ni Naibata, seng itanda dunia on Naibata marhitei hapentaron, gabe iharosuhkon Naibata ma paluahon na porsaya in marhitei ambilan haotoon. (Mat. 11:25.) 1:22 Ai na mangindo tanda do halak Jahudi, anjaha mangindahi hapentaron halak Gorik. (Mat. 12:38; Joh. 4:48; Lah. 17:18, 32.) 1:23 Tapi anggo hanami, Kristus na tarsilang in do iambilankon hanami; parsangsian do in bani Jahudi anjaha haotoon bani halak sipajuh begu-begu. (bd. 2:14; Rom 9:32.) 1:24 Tapi bani na dob tardilo ai, halak Jahudi age halak Gorik, Kristus, ai ma hagogohon ni Naibata ampa hapentaron ni Naibata. (ay. 18; Kol. 2:3.) 1:25 Ai haotoon ni Naibata, pentaran do ai ase jolma in, anjaha hagalekon ni Naibata, gogohan do ai ase jolma in. (2 Kor. 13:4.) 1:26 Tonggor nasiam ma pandiloonni in bani nasiam, saninangku, seng piga nasiam na pentar mangihutkon pardagingon, seng piga na markuasa, seng piga na sangap. (Mat. 11:25; Joh. 7:48; Jak. 2:1-5.) 1:27 Tapi na oto nini uhur ni dunia on, ipilih Naibata laho pailahon na pentar, anjaha na galek nini uhur ni dunia on, ipilih Naibata laho pailahon na gogoh. 1:28 Na toruh anjaha na mahiri i dunia on ipilih Naibata, na lang in do tene, ase langkononni na adong hinan, 1:29 ase ulang adong hajolmaon na mangunsagah ilobei ni Naibata. (Rom 3:27; Ep. 2:9.) 1:30 Tapi marhiteihonsi do ase ibagas Kristus Jesus nasiam, ai Ia do gabe hapentaron banta humbani Naibata, hapintoron ampa hapansingon ampa haluahon,(Jer. 23:5, 6; Joh. 17:19; 2 Kor. 5:21.) 1:31 ase saud na dob tarsurat in: Na mamuji dirini, ibagas Tuhan in ma ia mamuji!

1 Korint 2

2:1 Ahu pe nasiam sanina, sanggah na roh ahu bani nasiam, seng roh ahu mangambilankon hasaksian pasal Naibata marhitei hata hamaloon atap hapentaron pe. (bd. 1:17.) 2:2 Ai huputuskon do ibagas uhurhu, aha pe lang sihol batohonku itongah-tongahnasiam sobali Jesus Kristus, ai ma na dob tarsilang ai. (Gal. 6:14.) 2:3 Ia ahu, ibagas hagalekon, biar ampa hagobiron do itongah-tongahnasiam. (Lah. 18:9; 2 Kor. 10:11.) 2:4 Hatangku ampa parambilanonku pe, seng marhata hapentaron na manarik ai, tapi marhasoman hagogohon pakon Tonduy do, (ay. 1.) 2:5 ase maronjolan haporsayaonnasiam bani hagogohon ni Naibata, ulang ma bani hapentaron ni jolma. (Ep. 1:17, 19; 1 Tes. 1:5.) 2:6 Tapi hapentaron do, na sinahapkonnami ai bani halak na dob matoras, tapi sedo hapentaron ni dunia on atap hapentaron ni pambobai ni dunia on, na laho salpu in. 2:7 Tapi hapentaron na sinahapkonnami ai, ai ma hapentaron ni Naibata, gok rusia anjaha ponop, na dob tinotapkon ni Naibata, paima dong dunia on bahen hamuliaonta. (Rom 16:25.) 2:8 Ai ma na so tinanda ni pambobai ni dunia on, ai ambit itandai, tontu seng parsilangkononni Tuhan ni hamuliaon in. (Luk. 23:24; Jak. 2:1.) 2:9 Tapi songon na tarsurat in: Na so ongga niidah ni mata, na so ongga binogei ni pinggol anjaha na so ongga tubuh ibagas uhur ni jolma, ai do ipasirsir Naibata bani na manghaholongi-Si. (Jes. 64:3.) 2:10 Tapi ipatalar Naibata do ai banta marhitei Tonduy in. Ai haganup do idadap Tonduy in, ronsi na ibagas uhur ni Naibata. (Mat. 13:11.) 2:11 Ai ise jolma mambotoh na bani jolma in, sobali tonduy ni jolma na ibagas dirini? Sonai ma homa, seng dong na mananda na bani Naibata, sobali Tonduy ni Naibata. 2:12 Tapi seng ijalo hita tonduy ni dunia on, tapi Tonduy na humbani Naibata do, ase ibotoh hita na nilayak-layakkon ni Naibata banta. 2:13 Anjaha in do na hinatahonnami, seng ibagas hata hapentaron ni jolma na targuruhon, tapi na pinodahan ni Tonduy do, laho patorangkon partonduyon bani halak na dob igoki Tonduy. (ay. 1, 4.) 2:14 Ia jolma pardunia on, seng tarjalosi na humbani Tonduy ni Naibata, ai haotoon do ai bani, anjaha seng tartandasi, ai marhitei Tonduy do hansa boi dadapon ai. (bd. 1:23; Joh. 8:47.) 2:15 Tapi sipartonduy idadap do haganupan ai, tapi ia sandiri seng tardadap atap ise pe. 2:16 Ai ise ma na mananda pingkiran ni Tuhan in, ase ia ma mangajari-Si? Tapi uhur ni Kristus do banta. (Jes. 40:13; Rom 11:34.)

1 Korint 3

3:1 Ahu pe, nasiam sanina, seng tarbahen ahu hinan marsahap bani nasiam songon bani partonduy, tapi songon dompak pardaging do, anjaha poso-poso ibagas Kristus. (Joh. 16:12.) 3:2 Dadih do hupainumkon bani nasiam, sedo sipanganon hinan, ai seng tarjalo nasiam ope in; gari sonari, seng tarjalo nasiam ope, (Rom 5:12, 13; 1 Ptr. 2:2.) 3:3 ai tong ope nasiam pardaging. Ai anggo masa bani nasiam parsimburuon ampa parsalisihan, ai lang pardaging do nasiam, anjaha marparlahou domu hubani biak hajolmaon? (bd. 1:10; 11:18.) 3:4 Ai anggo adong na mangkatahon: "Susian ni si Paulus do ahu", anjaha na legan use mangkatahon, "Susian ni si Apollos do ahu", ai lang paruhur hajolmaon do nasiam ai? (bd. 1:12.) 3:5 Ai ise do si Apollos? Ise si Paulus? Juak-juak do sidea, parhiteiannasiam gabe porsaya, anjaha ganup domu hubani pambere ni Tuhan bani. (Lah. 18:24, 27.) 3:6 Ahu do manuan, si Apollos mangarbahi, tapi Naibata do patubuhkon. (Lah. 18:4, 11.) 3:7 Sedo sipanuan atap sipangarbahi na penting, tapi Naibata, na patubuhkon ai do. 3:8 Dos do sipanuan ampa sipangarbahi, anjaha ganup manjalo upahni domu hubani horjani bei. (bd. 4:5.) 3:9 Ai hasoman parhorja ni Naibata do hanami; juma ni Naibata anjaha rumah ni Naibata do ia nasiam. (Mat. 13:3-9; Ep. 2:20.) 3:10 Domu hubani idop ni uhur ni Naibata, na binereni bangku, hupauli onjolan ai, songon binahen ni tukang na pandei; tapi na legan do na pajongjongkon iatasni. Tapi ganup ma mardiateihon, sonaha parpajongjongni iatas ni ai. (bd. 15:10.) 3:11 Ai seng tarpauli onjolan na legan, sobali na dob pinajonam in, ai ma Jesus Kristus in.(1 Ptr. 2:4-6.) 3:12 Ase anggo adong halak na paulihon iatas ni ai, omas, pirak, batu na maharga, hayu, lamlam atap anggala pe, 3:13 hinorjahon ni ganup halak maningon talar do ai. Ai ari simagira ai do patandahon ai, halani marhitei apuy do ai roh, anjaha apuy ai do manguji barang sonaha horja ni ganup halak. (bd. 4:5.) 3:14 Anggo totap horja ni atap ise pe, na pinajongjongni iatas ni ai, jaloonni do upah. 3:15 Tapi anggo bois mosog hinorjahonni, rugi ma ia; maluah do anggo ia sandiri namin, tapi songon na manlopusi apuy ma. 3:16 Ai seng ibotoh nasiam, rumah ni Naibata do nasiam anjaha Tonduy ni Naibata marianan ibagas nasiam? (bd. 6:19; 2 Kor. 6:16.) 3:17 Anggo adong na parsedahon rumah ni Naibata, parsedaon ni Naibata do ia, ai na pansing do rumah ni Naibata, ai ma nasiam. 3:18 Ulang ma adong na paoto-otohon dirini. Anggo adong itongah-tongahnasiam na mamingkir na pentar ia i tanoh on, gabe oto ma ia lobei, andohar pentar use. (Pangk. 3:17, 18.) 3:19 Ai hapentaron ni dunia on, haotoon do in ilobei ni Naibata, ai tarsurat do: Itangkap do halak na pentar ibagas akal ni sidea. (Job 5:12, 13.) 3:20 Dob ai use: Ibotoh Tuhan in do, sisoya-soya do pingkiran ni halak na pentar. (Ps. 94:11.) 3:21 Ase ulang ma adong na mangunsagah bani jolma. Ai haganup in nasiam do simadasi, 3:22 barang si Paulus, si Apollos, si Kepas, dunia on, hagoluhan, hamateian, na masa sonari ampa na sihol masa, haganup do bani nasiam, (bd. 1:12.) 3:23 tapi Kristus do simada nasiam anjaha Naibata do simada Kristus.

1 Korint 4

4:1 Ihira jolma in ma hanami juak-juak ni Kristus anjaha sijolom anak-kunsi ni rusia ni Naibata. (Tit. 1:7.) 4:2 Na parlobei ipindo humbani sijolom anak kunsi, ai ma ase haposan sidea jumpah. (Luk. 12:42.) 4:3 Anggo bangku, parkara na hampung do ai, ia iuhumi nasiam pe ahu, atap pangadilan ni jolma pe; tapi ahu pe, seng huuhumi diringku. 4:4 Ai seng dong salahku, anggo na hubotoh, tapi seng pintor ahu halani ai, Tuhan in do na manguhumi ahu. (Ps. 143:2.) 4:5 Halani ai ulang ma nasiam manguhumi ilobei ni panorangni, ilobei ni parroh ni Tuhan in, na manondangi sagala na ponop ibagas na golap, anjaha na patalarhon sagala sura-sura ni uhur. Jadi ganup ma bani panorang ai dapotan puji-pujian humbani Naibata. (bd. 3:8.) 4:6 Tapi hubangku ampa hubani si Apollos do, nasiam sanina, hutarik hata ai, halani nasiam, ase marhitei hanami iguruhon nasiam, ulang ma nalobihi na tarsurat in: Ulang ma adong humbani nasiam na pabanggal dirini manghasomani na sada, laho mangimbang na sada nari. (Rom 12:3.) 4:7 Ai ise mambahen marhasurungan ham? Ai aha na adong bamu, na so jinalomu? Anggo na manjalo do, mase ma mangenjeng ham songon na so manjalo? (Rom 12:6.) 4:8 Domma bosur nasiam, domma bayak. Domma gabe raja nasiam, hanami lape. Ambit ma namin gabe raja nasiam, ase dihut hanami raja rap pakon nasiam! (Pangk. 3:17, 21.) 4:9 Ai nini uhurhu, na dob ibahen Naibata do hanami apostel, gabe sitoruhan, songon na dob ipadas hu hamateian; gabe sitontonan do hanami bani dunia on, bani malekat ampa jolma. (Rom 8:36; Heb. 10:33.) 4:10 Na oto do hanami halani Kristus, tapi nasiam, na pentar do ibagas Kristus. Hanami na galek, tapi nasiam na gogoh. Hanami na dorun, tapi nasiam na sangap. (bd. 3:18.) 4:11 Ronsi panorang on loheian anjaha horahan do hanami, hurang bani parhiouan, hona bogbogan anjaha seng marianan na totap, (2 Kor. 11:23-27.) 4:12 loja marhorja marhitei tangannami sandiri. Anggo hona parpahiri mamasu-masu do hanami, anggo hona parburu, sabar do hanami, (Rom 12:14; 1 Tes. 2:9.) 4:13 anggo ipahata-hata, basar do hanami. Gabe songon tompoh-tompoh ni dunia on do hanami, songon apus-apus ni nahei ni haganup halak ronsi sonari. 4:14 Sedo na laho pailahon nasiam ase husurat on, laho paingat nasiam do songon anak na hinaholongan. 4:15 Ai age pe adong salaksa pangajari bani nasiam marhitei Kristus, seng piga anggo bapa, ai ahu do manubuhkon nasiam ibagas Kristus Jesus, marhitei ambilan na madear. (Gal. 4:19.) 4:16 Halani ai huojur ma nasiam, gabe sitiru ahu ma nasiam! (bd. 11:1.) 4:17 Halani ai do ase husuruh bani nasiam si Timoteus, ai ma anak bangku, na hinaholongan anjaha hatengeran ni uhur ibagas Tuhan, ase ia ma paingatkon nasiam pasal dalanku ibagas Kristus Jesus, songon na huajarhon ija-ija pe bani haganup kuria in. (Lah. 19:22.) 4:18 Adong do deba na pabanggal-banggal dirini, songon na so roh be ahu bani nasiam. 4:19 Tapi podas do ahu roh marayak nasiam, anggo marosuh Tuhan, anjaha botohonku ma ijin gogoh ni na pabanggal-banggal dirini, sedo hata ni sidea. (Luk. 17:20; Lah. 18:21.) 4:20 Ai sedo ibagas hata harajaon ni Naibata, tapi ibagas hagogohon do.(bd. 2:4; Luk. 17:20.) 4:21 Aha do ipangindo uhurnasiam? Marlonsing-lonsing do ahu roh bani nasiam, barang ibagas holong atap lamlam ni uhur do?

1 Korint 5

5:1 Tongon, tarbogei do, masa parriah-riahon bani nasiam, anjaha gari bani sipajuh begu-begu parriah-riahon na sonai seng masa, ai ma, pala iparjolma parinangon ni bapani. (3 Mus. 18:7, 8.) 5:2 Anjaha sonai pe, ipagijang nasiam do dirinasiam. Ai lang dearan ma namin marpusok ni uhur nasiam, ase ipabali hun tongah-tongahnasiam na mangkorjahon na sonai? 5:3 Anggo ahu, age pe daoh pamatangku, itongah-tongahnasiam do mangihutkon partonduyon; domma songon na itongah-tongahnasiam ahu mandabuh uhum bani na mangkorjahon sisonai ai, (Kol. 2:5.) 5:4 ibagas Goran ni Tuhan Jesus. Anggo martumpu nasiam, anjaha tonduy hurap pakon nasiam, marhasoman hagogohon ni Tuhanta Jesus, (Mat. 16:19; 18:18; 2 Kor. 13:10.) 5:5 padason ma halak na sonai bani setan, laho mangagou dagingni, andohar maluah tonduyni bani ari ni Tuhan Jesus. (1 Tim. 1:20.) 5:6 Seng dear pangenjengonnasiam in. Lang ibotoh nasiam, otik pe na migar in, iigari do ganup niagu in? (Gal. 5:9.) 5:7 Borsih ma padarat nasiam na migar na dob dokah in, ase na niagu na baru nasiam, halani seng niigaran nasiam. Ai domma ibunuh Biri-biri paska banta, in ma Kristus. (2 Mus. 13:7; 1 Ptr. 1:19.) 5:8 Ai pe marpesta ma hita, ulang marhitei na migar na dob madokah, ulang marhitei na migar hajahaton atap hasamboron, tapi marhitei ruti na so niigaran ma ibagas hasusion ampa hasintongan. (2 Mus. 12:3-20.) 5:9 Domma husuratkon bani nasiam, na so bulih saor nasiam pakon parriah-riah. (Mat. 18:17; 2 Tes. 3:14.) 5:10 Seng huhatahon ganup parriah-riah na i dunia on atap paruhur haut atap panrampok atap sisombah gana-gana; ambit sonai, maningon mandarat ma nasiam hun dunia on. 5:11 On do tene na huhatahon bani nasiam bani surat in. Ulang ma saor nasiam bani halak na margoran sanina, hape parriah-riah do, atap bani paruhur haut atap sisombah gana-gana atap sipanrisai atap siparmabuk atap sipanrampok. Gari rap mangan pakon halak sisonai ai seng bulih. (2 Tes. 3:6; Tit. 3:10; 2 Joh. 10.) 5:12 Ai mase ma uhumonku do na idarat ni kuria? Ai lang nasiam siuhumi na ibagas kuria? (Mrk. 4:11.) 5:13 Na i darat, Naibata do na manguhumi ai. Padarat nasiam ma siparjahat in hun tongah-tongahnasiam! (5 Mus. 13:6.)

1 Korint 6

6:1 Anggo adong humbani nasiam na marpakara dompak hasomanni, pag do ia pauhumhon dirini bani halak sipargeduk, anjaha sedo bani halak na mapansing? 6:2 Ai lang ibotah nasiam, halak na pansing do na sihol manguhum dunia on? Jadi, anggo nasiam do na manguhumi dunia on, ai lang talup do homa nasiam manguhumi parkara no sonin etekni? (Pangk. 3:21; Dan. 7:22.) 6:3 Ai lang ibotoh nasiam, malekat pe uhumonta do? Lambin pasal pargoluhon ari-ari on ma lang? 6:4 Hape anggo adong parkaranasiam pasal pargoluhan ari-ari, mase ma ipauhumhon nasiam in bani halak na madorun bani kuria in? 6:5 Na pailahon nasiam do hatangkon: Na so adong do na maruhur bani nasiam, age sahalak, na boi manguhumi sanina samah sanina? 6:6 Na marpakara do hape sanina samah sanina, anjaha ilobei ni na so porsaya? 6:7 Tongon, hataluonnasiam do in, anggo marpakara nasiam samah nasiam. Mase ma lang rahanan itaron nasiam na so pintor? Mase ma lang rahanan balosannasiam hona rampas? (Mat. 5:39; 1 Tes. 5:15; 1 Ptr. 3:9.) 6:8 Hape nasiam sandiri do mambahen na so pintor anjaha manrampasi, anjaha samah na marsanina. 6:9 Ai lang ibotoh nasiam, na so sitean harajaon ni Naibata do halak pargeduk? Ulang nasiam kahou! Seng sitean harajaon ni Naibata parriah-riah atap sisombah gana-gana atap parbangkis atap na marjolmahon dalahi, 6:10 atap panangko atap paruhur haut atap parmabuk atap panrisai atap panrampok pe. (Gal. 5:19-21.) 6:11 Anjaha sisonai do nasiam deba lobei. Tapi domma nasiam iburihi, domma ipapansing, domma ipintori marhitei Goran ni Tuhan Jesus Kristus ampa marhitei Tonduy ni Naibatanta. (Tit. 3:3-7.) 6:12 Haganup do bulih bangku, tapi seng haganup marguna. Haganup do bulih bangku, tapi seng bulih palopasonku diringku patundukon ni atap aha pe. (bd. 10:23.) 6:13 Bani boltok do sipanganon anjaha boltok bani sipanganon, tapi rap parontihonon ni Naibata do in. Tapi anggo angkula in, ulang bani parriah-riahon, bani Tuhan ma in, anjaha bani angkula in do Tuhan. (1 Tes. 4:3-5.) 6:14 Naibata do na dob papuho Tuhan in, anjaha papuhoonni do age hita marhitei hagogohonni ai. (bd. 15:15, 20; 2 Kor. 4:14.) 6:15 Ai lang ibotoh nasiam pagori ni Kristus do angkulanasiam? Mintor pakeionku ma pagori ni Kristus in gabe pagori ni boru jalang? Lang ale! (bd. 12:27.) 6:16 Ai lang ibotoh nasiam, na padomu dirini bani boru jalang, na gabe sada angkula do ai? Ai nini do: Na gabe sada daging do na dua ai. (1 Mus. 2:24.) 6:17 Tapi na padomu dirini bani Tuhan in, gabe sada tonduy do ia pakonSi. (Joh. 17:21, 22; Ep. 5:30.) 6:18 Maporus ma nasiam humbani parriah-riahon! Sagala dousa na hinorjahon ni jolma, idarat ni angkulani do ai, tapi na marriah-riah, bani angkulani do ia na mardousa ai. 6:19 Ai lang ibotoh nasiam, angkulanasiam do rumah ni Tonduy Na pansing, na adong ibagas nasiam, na dob jinalo nasiam humbani Naibata, anjaha sedo nasiam simada nasiam? (bd. 3:16.) 6:20 Ai harga do nasiam itobus, halani ai pasangap nasiam ma Naibata marhitei angkulanasiam.(Pil. 1:20; 1 Ptr. 1:18, 19; 7:23.)

1 Korint 7

7:1 Tapi pasal na sinuratkonnasiam, on ma balosku: Dear do bani dalahi, ulang manjamah naboru. 7:2 Tapi laho manlembangi parriah-riahon, dear ma ganup dalahi adong parinangonni sandiri, anjaha ganup naboru adong paramangonni sandiri, 7:3 Idalankon paramangon ma hawajipanni bani parinangonni, sonai homa parinangon dompak paramangonni. 7:4 Seng saguru bani parinangon in angkulani, tapi bani paramangonni do; sonai homa, seng saguru bni paramangon angkulani, tapi bani parinangonni do. 7:5 Ulang ma marsipadaohan nasiam, anggo seng humbani dos ni riah anjaha marpanorang, ase sompat martonggo; dob ai marsipadohoran ma use, ase ulang ilajou sibolis in nasiam, halani seng tahan mangorom. 7:6 Tapi huhatahon pe sonai, na mambere partimbangan do ahu, sedo na mamarentah. 7:7 Huparsinta do ase ganup jolma songon ahu on; tapi bani ganup do adong silayak-layak humbani Naibata, na sada sonon, na sada nari sonin. (Mat. 19:12.) 7:8 Tapi on ma hatangku bani na so mompo ampa bani naboru na mabalu: Dear ma bani sidea, totap songon ahu on. 7:9 Tapi anggo seng tarrajai sidea diri ni sidea, marhajabuan ma; ai dearan do marhajabuan humbani na garang. (1 Tim. 5:14.) 7:10 Bani na dob marhajabuan huparentahkon ma, sedo ahu tene tapi Tuhan do: Seng bulih sirang naboru ai humbani paramangonni. (Mat. 5:32.) 7:11 Tapi anggo domma sirang, ulang be laho, atap mardomu ma use bani paramangonni hinan. Anjaha dalahi pe, seng bulih sirangkononni parinangonni. 7:12 Bani na legan ai ahu mangkatahon, sedo Tuhan in: Anggo adong sada sanina na marparinangon na so porsaya, anggo marosuh do uhur ni naboru ai rap pakonsi, ulang ma isirangkon ia. 7:13 Anjaha anggo seng porsaya halahoan ni sada naboru, anggo marosuh do dalahi ai rap pakonsi, ulang ma itadingkon ia. 7:14 Ase gabe pansing do dalahi na so porsaya ai marhitei parinangon ai, anjaha gabe pansing do naboru na so porsaya ai marhitei sanina ai. Ambit lang, butak ma niombahnasiam, tapi tongon pansing do sidea. (Rom 11:16.) 7:15 Tapi anggo isirangkon na so porsaya ai dirini, paturut ma sirang. Seng sangkut sanina atap botou na dob Kristen bani na sonai ai; tapi bani pardameian do idilo Naibata nasiam. (Rom 4:19.) 7:16 Ai sonaha ma ibotoh ham inang, atap na tarpaluah ham do paramangonmu? Ham bapa, ai sonaha ma ibotoh ham, atap na tarpaluah ham do parinangonmu? (1 Ptr. 3:1.) 7:17 Tapi ganup ma marpalahou domu hubani na binere ni Tuhan bani, domu hubani pandilo ni Naibata bani. Lanjar in do bani ganup kuria in hutaurhon. (ay. 20, 24.) 7:18 Anggo domma tarsunat sada halak tardilo, ulang ma ipaubah ai; na so tarsunat, sanggah tardilo ia, ulang ma ipasunatkon dirini. 7:19 Ai na marsunat atap na so marsunat seng adong harga ni ai, tapi na mandalankon titah ni Naibata do. (Gal. 5:6; 6:15.) 7:20 Ganup ma totap songon sanggah na tardilo ai ia. (ay. 17, 24.) 7:21 Anggo jabolon ham sanggah na tardilo ai, ulang ma haru uhurmu pasal ai. Tapi anggo boi do maluah ham, dearan ma maluah. 7:22 Ai jabolon na tardilo ibagas Tuhan in, halak na maluah do ai bani Tuhan in; sonai homa, halak na maluah na tardilo ai, jabolon ni Kristus do. (Ep. 6:6; Pilem. 16.) 7:23 Harga do nasiam itobus, ulang ma ra nasiam parjabolonon ni jolma. (bd. 6:20.) 7:24 Ganup ma nasiam sanina, sonin ia tardilo, sonai ma ia totap ilobei ni Naibata. 7:25 Ia pasal anak boru, seng adong bangku parentah ni Tuhan in. Tapi pingkiranku ma huhatahon songon sada halak hatengeran, halani idop ni Tuhan in. (1 Tim. 1:12, 13.) 7:26 Nini uhurhu, mangidah hasunsahan na masa sonari, dear ma sada halak totap ia songon sisonari ai. (ay. 29; bd. 10:11.) 7:27 Domma sangkut ham bani sada naboru? ulang pindahi dalan sirang! Seng sangkut ham bani sada naboru? Ulang pindahi naboru! 7:28 Anggo mompo ham, seng mardousa ham ijai, anjaha anggo laho anak boru seng mardousa ia. Tapi marhasunsahan do halak sisonai bani daging, anjaha sihol do uhurhu maluah nasiam hunjai. 7:29 Tapi on do na huhatahon, nasiam sanina: Pondok mando panorangni. Sonon ma hu lobeian on: Songon na so marparinangon ma na marparinangon, (Luk. 14:26; Rom 13:11.) 7:30 anjaha na tangis songon na so tangis, anjaha na marmalas ni uhur songon na so marmalas ni uhur, anjaha na mamboli songon na so marnah, 7:31 anjaha na mamorluhon dunia on songon na so mamorluhon, ai na laho salpu do ruhut ni dunia on. (1 Joh. 2:15-17.) 7:32 Tapi sihol do uhurhu ulang sunsah nasiam. Isarihon na so marhajabuan do na porlu bani Tuhan in, ai ma, sonaha mambahen rosuh ni Tuhan in. 7:33 Tapi na marparinangon mansarihon na porlu i dunia on, sonaha ia boi mambuat uhur ni parinangonni, jadi mardua uhur do ia. (Luk. 14:20; Ep. 5:27.) 7:34 Anjaha puang-puang na so marparamangon pakon anak boru, isarihon do na porlu bani Tuhan in, ai ma sonaha ase pansing sidea bani angkula age bani tonduy. Tapi na dob marparamangon isarihon do na porlu i dunia on, sonaha ase boi ia mambuat uhur ni paramangonni. 7:35 Tapi huhatahon pe sonin, ase marguna do bani nasiam, sedo na laho manidingi nasiam, tapi ase porman do nasiam anjaha totap bani Tuhan in, seng manirpang-nirpang. 7:36 Tapi anggo hurang patut do iahap sada halak paturutonni sonin boruni, na dob anak boru, na dob torasan, anggo maningon do laho, ipasaud ma rosuhni ai; seng mardousa ia ijai, marhajabuan ma sidea. 7:37 Tapi barang ise na dob martotap ni uhur, sedo na tarpaksa, tapi humbani rosuhni do sura-surani ai, anjaha domma iputuskon ai ibagas uhurni torus manramotkon boruni ai, dear do pambahenni ai. 7:38 Ase, atap ise na palaho boruni na dob anak boru, dear do pambahenni ai, tapi dearan do pambahen ni na so palahohonsi. 7:39 Sangkut do naboru na dob laho sadokah manggoluh paramangonni, tapi anggo matei paramangonni, maluah ma ia anjaha boi laho atap bani ise harosuh ni uhurni, asal ma ibagas Tuhan in. (Rom 7:2.) 7:40 Tapi nini uhurhu, sonangan ma ia, anggo sonai totap ia, anjaha porsaya do ahu adong do homa bangku Tonduy ni Naibata. (ay. 25.)

1 Korint 8

8:1 Tapi pasal gulei na dob ginalangkon, ibotoh hita do, paboa haganup do hita marnah habotohon. Na pabanggal-banggalhon diri do habotohon, tapi na padear-dearhon do holong ni uhur. (Lah. 15:29.) 8:2 Anggo adong na mangagan, na dob dong binotohni, seng ibotoh ai ope sonaha habotohon na sasintongni. (Gal. 6:3.) 8:3 Tapi barang ise na mangkaholongi Naibata, ai do na tinanda ni Naibata. (Gal. 4:9.) 8:4 Pasal na mangankon gulei na dob ginalangkon, ibotoh hita do, paboa seng dong naibata-naibata i dunia on, anjaha seng adong Naibata sobali Sisada-sada in. (10:19.) 8:5 Ai age pe dong igoran naibata i langit sonai i tanoh on, ai buei do tongon iparnaibata ampa ipartuhan, 8:6 tapi banta sada do Naibata, Bapa in, parmulaan ni haganup anjaha hita hu-Bani; anjaha sada do Tuhan, in ma Jesus Kristus, parhiteian ni haganup, anjaha marhiteihonsi do hita adong.(bd. 12:5, 6; Kol. 1:16.) 8:7 Tapi seng haganup simada habotohon ai. Adong ope na mangankon ai songon galangan tongon, halani somal iparhatongon naibata-naibata ronsi nuan, gabe butak ma panggora ni uhur ni sidea na hurang toguh in. (bd. 10:27.) 8:8 Tapi seng ipadohor sipanganon hita bani Naibata. Anggo seng napangan ai, seng harugian hita, anjaha napangan pe seng maruntung hita. (Rom 14:17.) 8:9 Tapi jaga ma, ulang ma kuasanasiam in gabe parsangsian bani halak na galek. (Gal. 5:12.) 8:10 Ai anggo adong na mangidah ham, simada habotohon ondi, hundul mangan i rumah panumbah-numbahan, ai lang na mangojur panggora ni uhurni na galek ai ma ai, mangankon gulei sigalanghononkon bani naibata-naibata? 8:11 Gabe magou ma na galek in halani habotohonmu in, ai ma sanina, na hinopkop ni Kristus marhitei parmateini. (Rom 14:15.) 8:12 Anggo mardousa nasiam sonai bani sanina ai, anjaha isedai nasiam panggora ni uhur ni na galek ai, mardousa do nasiam homa ijai bani Kristus. 8:13 Halani ai, anggo sangsi do saninangku halani sipanganon, sabonar lang be panganonku gulei lalab, ase ulang sangsi saninangku hubahen. (Rom 14:21.)

1 Korint 9

9:1 Ai lang bebas do ahu? Ai lang apostel do ahu? Ai lang domma huidah Jesus, Tuhanta in? Ai lang horjangku do nasiam ibagas Tuhan in? (bd. 15:8; Lah. 22:17; 26:16.) 9:2 Anggo lang apostel ahu bani halak na legan, tapi apostel do anggo ahu bani nasiam, ai nasiam do lak ni haapostelonku ibagas Tuhan in! (2 Kor. 3:2, 3.) 9:3 On ma balosku bani halak na sihol mamareksai ahu. 9:4 Na so marhak do hanami mangan ampa minum? (Luk. 10:8.) 9:5 Na so marhak do hanami ase adong na gabe sinrumah pangkasomani bennami, songon apostel na legan ai, pakon anggi ni Tuhan in ampa si Kepas? (Joh. 1:42.) 9:6 Ai pitah ahu ampa si Barnabas do na maningon marhorja laho mansarihon goluhnami? 9:7 Ija ma adong tentara, na mambalanjai dirini sandiri? Ise ma na mambahen pohon anggur, na so mangankon humbani buahni? Ise ma na marmahan pinahan, na so minum dadih humbani na pinarmahanni? 9:8 Domu hubani hasomalan ni jolma do na huhatahon in? Ai lang sonin do homa hata ni titah in? 9:9 Ai bani titah ni si Musa pe tarsurat do: Seng bulih huntamonmu babah ni lombu na mardogei! Ai lombu do sinarihon ni Naibata ijai? (5 Mus. 25:4; 1 Tim. 5:18.) 9:10 Ai lang hubanta do hata ai? Ai halani hita do ase tarsurat: Patut do mangarap paninggala humbani na tininggalaanni, anjaha pardogei mangarap bani parbagiananni. 9:11 Anggo isuan hanami bani nasiam partonduyon, ai banggal ma ai anggo marpariama hanami humbani nasiam na porlu bani pardagingon? (Rom 15:27.) 9:12 Ai anggo marrupei na legan humbani nasiam, samintolah hanami ma lang? Tapi seng ipakei hanami hak in, tapi sabar do hanami bani haganup. ase ulang tarambat ambilan na madear ni Kristus ibahen hanami. (Lah. 20:34, 35; 2 Kor. 11:9.) 9:13 Ai lang ibotoh nasiam, na mangkorja i rumah panumbahan mangan hun rumah panumbahan, anjaha na marugas bani anjap-anjap, dapotan hunjai? (4 Mus. 18:8, 31; 5 Mus. 18:1-3.) 9:14 Lanjar sonai do iaturhon Tuhan in bani siparambilan na madear: Humbani ambilan na madear in ma sidea manggoluh. 9:15 Tapi anggo ahu, sada pe lang hudalankon ai; anjaha seng husurathon on, ase ipadalan in bangku. Ai rahanan do matei ahu, humbani na maseda hasurungankai. (Lah. 18:3.) 9:16 Ai anggo huambilankon ambilan na madear in, seng hasurungan in bangku, ai na maningon do in bangku. Bursik ma ahu, anggo seng huambilankon ambilan na madear in. (Jer. 20:9.) 9:17 Ai anggo huhorjahon in humbani rosuh ni uhurhu, marupah ma ahu. Tapi anggo seng humbani rosuh ni uhurhu, na niondoskon ma jabatan in bangku. (bd. 4:1.) 9:18 Ase aha do upahku? Ai ma, huambilankon do ambilan na madear in, seng pala marupah, ase ulang hupakei hakku na mardomu bani ambilan na madear in. (bd. 8:9.) 9:19 Ai age pe bebas ahu humbani ganup halak, huparjabolon do diringku bani haganup, ase humbuei sidea dapot ahu. (Mat. 20:26, 27.) 9:20 Gabe songon Jahudi do ahu bani Jahudi, ase dapot ahu Jahudi. Bani na ginomgoman ni titah in, songon na ginomgoman ni titah do ahu, age pe lang ginomgoman ni titah in ahu, andohar dapot ahu na ginomgoman ni titah in. (bd. 21:20-26; Lah. 16:3.) 9:21 Bani na so martitah songon na so martitah, age pe sedo na so martitah ahu humbani Naibata, tapi itoruh ni titah ni Kristus do, ase jumpah ahu na so martitah. (Gal. 2:3.) 9:22 Bani na galek, gabe songon na galek do ahu, ase dapot ahu na galek in. Huparomban do diringku bani haganup, andohar siotikanni maluah deba hubahen. (2 Kor. 11:29; Rom 11:14.) 9:23 Tapi haganupan in huhorjahon halani ambilan na madear, andohar dihut ahu marrupei bani pasu-pasuni. 9:24 Ai lang ibotoh nasiam, ia na marlumba haganup do namin na marlintun, tapi sada do na manjalo upah hamonangan. Sonai ma bujur nasiam marlintun, ase dapotan nasiam. (2 Tim. 4:7.) 9:25 Tapi sagala siparlumba mangorom do bani haganup. Ibahen sidea do sonai, ase ijalo sidea sortali rudang na ra seda, tapi hita na so ra maseda. (2 Tim. 2:4, 5; 1 Ptr. 5:4.) 9:26 Ia ahu, sedo na so martujuan parlintunonku, sedo songon na manenju logou ahu martenju. 9:27 Tapi hupukpuki do angkulangku anjaha hupatunduk, ase ulang halak na legan huambilani, hape ahu magou. (bd. 13:14; Rom 8:13.)

1 Korint 10

10:1 Seng dear uhurhu lang ibotoh nasiam, nasiam saninangku; Ia ompungta haganup do sidea nilinggoman ni hombun ai, anjaha ganup do sidea mandipari laut ai, (2 Mus. 13:21; 14:22.) 10:2 anjaha haganup do sidea tardidi hubani si Musa ibagas hombun ai ampa ibagas laut ai, 10:3 anjaha haganup do sidea mangan sipanganon partonduyon na samasam ai, (2 Mus. 16:14; 5 Mus. 8:3.) 10:4 lanjar haganup do sidea manginum siinumon partonduyon na samasam ai. Ai minum do sidea humbani dolog batu partonduyon na mangirikkon sidea ai, anjaha Kristus do dolog batu ai. (2 Mus. 17:6.) 10:5 Tapi seng marosuh Naibata bani bueinan humbani sidea, ai rasei do sidea i halimisan ai. (4 Mus. 14:23, 30.) 10:6 Tapi gabe panjoraan ma ai banta, ase ulang hisapan hita bani na masambor songon sidea na hisapan ai. (4 Mus. 11:4, 39.) 10:7 Anjaha ulang ma sibalosi naibata na legan nasiam songon deba humbani sidea, ai tarsurat do: Hundul ma bangsa ai mangan ampa minum, anjaha jongjong ma sidea manortori. (2 Mus. 32:6.) 10:8 Ulang ma hita marriah-riah, songon deba humbani sidea na marriah-riah ai, gabe rasei ibagas sadari dua puluh tolu ribu halak. (4 Mus. 25:1, 9.) 10:9 Ulang ma lojou hita Tuhan in songon deba humbani sidea na manlajou ai, gabe marmateian sidea ibahen ulog ai. (4 Mus. 21:5, 9.) 10:10 Ulang ma nasiam marungut-ungut songon deba humbani sidea na marungut-ungut ai, gabe magou sidea ibahen sipangagou. (4 Mus. 14:2, 36; Heb. 3:11, 17.) 10:11 Gabe usihan do na masa bani sidea, tapi isurathon do ai bahen lumba-lumba banta, na manggoluh ibagas panorang ni ujung ni dunia on. (1 Ptr. 4:7.) 10:12 Halani ai, halak na mangagan jongjong ia, pangkei ma, ase ulang tompas ia. 10:13 Parlajouan na somal bani jolma do masa bani nasiam: Hatengeran do Naibata, seng paturutonni nasiam lajou on lobih humbani gogoh-nasiam; tapi rap pakon parlajouan ai bahenonni do homa hadobanni, ase tartaron nasiam. 10:14 Halani ai, nasiam na huhaholongi, maporus ma nasiam humbani parsombahon bani sisombah-sombahon. (1 Joh. 5:21.) 10:15 Hubani na maruhur do hatangku. Timbangi nasiam ma aha na huhatahon. 10:16 Panginuman pasu-pasu, na tinarima kasihkonta in, ai lang parsaoran pakon daroh ni Kristus do in? Anjaha ruti na ipartopik hita in, ai lang parsaoran pakon badan ni Kristus do in? (Mat. 26:27; Lah. 2:42.) 10:17 Halani sada do ruti ai, gabe sada daging do hita buei, ai haganup do hita parrupei bani ruti na sada ai. (bd. 12:27; Rom 12:5.) 10:18 Tonggor nasiam ma Israel mangihutkon pardagingon! Ai lang gabe marpardomuan do sidea, na mangan humbani galangan ai ampa anjap-anjap ai? (3 Mus. 7:6, 15.) 10:19 Aha do na huhatahon? Na marnidok do gulei na ginalangkon, atap na margogoh do sisombah-sombahon? (bd. 8:4.) 10:20 Ai lang ginalangkon ni sidea ai, bani tonduy na jahat do igalangkon sidea ai, sedo bani Naibata? Tapi seng dear uhurhu saor nasiam bani tonduy na jahat. (3 Mus. 17:7; 5 Mus. 32:17.) 10:21 Seng tarbahen nasiam minum humbani panginuman ni Tuhan in, sonai homa humbani panginuman ni tonduy na jahat. Seng tarbahen nasiam parrupei humbani meja ni Tuhan in, sonai homa humbani meja ni tonduy na jahat. (2 Kor. 6:15, 16.) 10:22 Puhoanta ma simburu ni Tuhan in? Ai gogohan do hita hum-Bani? 10:23 Haganup do boi, tapi lang haganup marguna. Haganup do boi, tapi lang haganup padearhon. (bd. 6:12.) 10:24 Ulang ma marsisarihon na bani dirini bei, tapi na bani hasoman ma. (ay. 33; Rom 15:2.) 10:25 Pangan nasiam ma haganup na jinual i pajak gulei, ulang pala martimbang-timbang halani panggora ni uhur in, (Rom 14:2-10, 22.) 10:26 ai gok bani Tuhan in do tanoh on ampa isini. (Ps. 24:1.) 10:27 Anggo iontang na so porsaya nasiam, anjaha marosuh do uhurnasiam laho, pangan nasiam ma haganup na pinatibal ilobei nasiam, ulang pala martimbang-timbang halani panggora ni uhur in! 10:28 Tapi anggo adong na mangkatahon bani nasiam: "Gulei na ginalangkon do on," ulang ma pangan nasiam ai, halani halak na mangkatahon ai, ampa halani panggora ni uhur in. (bd. 8:7.) 10:29 Sedo panggora ni uhurmu na huhatahon ai, tapi panggora ni uhur ni na legan ai do. Ai mase ma uhuman ni panggora ni uhur ni na legan ahu, bani hamardekaonku? 10:30 Ai anggo hupangan ai marhasoman tarima kasih, mase ma pala hona risa ahu, halani na dob hujalo marhasoman tarima kasih? (1 Tim. 4:4.) 10:31 Ai pe, atap na mangan atap na minum nasiam, atap aha pe ihorjahon nasiam, bahen nasiam ma haganup ai pasangaphon Naibata.(Kol. 3:17.) 10:32 Ulang ma bahen nasiam parsangsian bani halak Jahudi, barang bani halak Gorik, barang bani kuria ni Naibata pe. (Rom 14:13.) 10:33 Songon ahu pe, hubuat do uhur ni halak bani haganup, ai seng hupindahi na marguna bangku, na marguna bani na mabuei in do, andohar maluah sidea. (bd. 9:20-22.)

1 Korint 11

11:1 Usihi nasiam ma ahu, songon ahu na mangusihi Kristus. (bd. 4:16; Pil. 3:17.) 11:2 Tapi hupuji do nasiam, halani idingat nasiam do ahu bani haganup, anjaha ijolom nasiam do aturan in, songon na dob huaturhon bani nasiam. 11:3 Tapi sihol ma botohonnasiam, nini uhurhu: Kristus do ulu ni haganup paramangon, paramangon ulu ni parinangon, anjaha Naibata do ulu ni Kristus in. (bd. 3:23; Ep. 5:23.) 11:4 Sagala paramangon, na martangkuluk martonggo atap manjahai, pahiri uluni do ai. (bd. 12:10; 14:1.) 11:5 Tapi sagala parinangon, na martonggo barang manjahai, seng marpanrungkub uluni, na pahiri uluni do ai, ai doshon na jinambak do sidea ai. 11:6 Ai anggo seng irungkub parinangon ai uluni, dearan ma ipaguntingkon. Tapi, anggo mahiri iahap parinangon igunting atap ijambak, irungkub ma dearan. 11:7 Ia paramangon, seng pala irungkub uluni, ai usihan ampa sinalsal ni hasangapon ni Naibata do ia. Tapi parinangon ai, sinalsal ni hasangapon ni paramangonni do. (1 Mus. 1:27.) 11:8 Ai seng humbani naboru roh ni dalahi, tapi humbani dalahi do roh ni naboru. (1 Mus. 2:22, 23.) 11:9 Anjaha sedo halani naboru tartompa dalahi, tapi naboru halani dalahi do. (1 Mus. 2:18.) 11:10 Halani ai, patut do marpanrungkub hasangapon parinangon bani uluni, halani malekat-malekat in. 11:11 Tapi age sonai, ibagas Tuhan parinangon marguru bani paramangon do, anjaha paramangon marguru bani parinangon. 11:12 Ai songon naboru marharohan humbani dalahi, sonai do homa dalahi marharohan humbani naboru; tapi haganup marharohan humbani Naibata do. 11:13 Nasiam sandiri ma manimbang, atap na patut do naboru martonggo bani Naibata, seng marpanrungkub uluni? 11:14 Ai lang biak pe iajarhon do bani nasiam, anggo marjambulan ganjang dalahi, hadorunon do ai bani? 11:15 Tapi anggo marjambulan ganjang naboru, hasangapon do ai bani, ai jambulan ganjang ai do ibere bani sidea gabe panrungkub. 11:16 Tapi anggo adong na sihol manlawan, adat na sonai seng adong banta, sonai age bani kuria ni Naibata. 11:17 Tapi ibagas na sihol mangaturhon on, seng hupuji nasiam, ai seng lambin dearni, tapi lambin samborni do anggo martumpu nasiam. (ay. 22.) 11:18 Parlobei hubogei, anggo martumpu nasiam ibagas kuria in, adong do parbolah-bolahan itongah-tongah nasiam, anjaha huparhatongon do ai deba. (bd. 1:10-12; 3:3.) 11:19 Ai maningon do adong golongan-golongan, ase talar paruhur na totap bani nasiam. (5 Mus. 13:4; 1 Joh. 2:19.) 11:20 Anjaha sanggah martumpu nasiam, seng tongon nasiam mangankon parpadanan ni Tuhan in. 11:21 Ai sanggah na mangan nasiam, mintor marsipangan panganonni bei do nasiam, gabe loheian ma na deba, mabuk na deba nari. 11:22 Ai na so adong do rumahnasiam, ase ijai nasiam mangan anjaha minum? Atap na mapas do nasiam bani kuria ni Naibata, gabe ipaila nasiam na marhahurangan? Aha ma hatahononku? Pujionku do nasiam? Pasal on seng hupuji nasiam. (Jak. 2:5, 6.) 11:23 Ai na hujalo humbani Tuhan, ai do hupadas bani nasiam: Ia Tuhan Jesus, bani borngin sanggah hona partahian Ia, ibuat ma ruti,(Mat. 26.36-38; Mrk. 11:22-24; Lah. 22:19-20.) 11:24 ihatahon ma tarima kasih, ipartopik, anjaha ihatahon ma: Dagingku do on, na mangkopkop nasiam. Bahen nasiam ma sonin, gabe pardingatan Bangku! 11:25 Lanjar sonai do homa panginuman ai dob salpu na mangan ai, nini: Ia panginuman on, padan na baru ma on ibagas darohku. Bahen nasiam ma sonin, gabe pardingatan Bangku, ganup hali iinum nasiam in. 11:26 Ai ganup hali ipangan nasiam ruti na sonin, anjaha iinum nasiam humbani panginuman in, parmatei ni Tuhan in do iambilankon nasiam, ronsi roh Ia. (Mat. 26:29.) 11:27 Ase anggo adong na mangankon ruti in, anjaha na minum humbani panginuman ni Tuhan in ibagas na so talup, parsalah do ia bani badan ampa daroh ni Tuhan in. (Heb. 6:6.) 11:28 Tapi ipareksa jolma in ma dirini, dob ai pe ase ipangan ruti in, anjaha iinum humbani panginuman in. (Mat. 26:22; 2 Kor. 13:5.) 11:29 Ai barang ise na mangankon anjaha na manginum in, uhum bani dirini do na pinangan anjaha na niinumni ijin, anggo seng itimbangi daging in. 11:30 Halani in do ase buei na galek anjaha na boritan bani nasiam, anjaha hundong ma na dob modom. (bd. 15:20.) 11:31 Tapi anggo iuhumi hita dirinta, seng siuhumon be hita. 11:32 Tapi hita na niuhuman ni Tuhan in, hona ajar do hita marhitei ai, ase ulang hona uhum hita rap pakon dunia on. (Heb. 12:5, 6.) 11:33 Halani ai, nasiam saninangku, anggo martumpu nasiam laho mangan, marsipaimaan ma nasiam. 11:34 Anggo dong na loheian, i rumahni ma ia mangan, ase ulang paroh uhum partumpuannasiam. Ia na legan ai, dob roh pe ahu ase huatur.

1 Korint 12

12:1 Anjaha pasal sibere-bere partonduyon ai, nasiam sanina, seng dear uhurhu lang marpambotoh nasiam. 12:2 Ibotoh nasiam do, sanggah sipajuh begu-begu ope nasiam, na dob itogu anjaha isarad do nasiam bani gana-gana na longah. (Heb. 2:18, 19.) 12:3 Halani ai hupabotohkon ma bani nasiam: Seng adong halak, na marsahap marhitei Tonduy ni Naibata mangkatahon: "Hona papa ma Jesus," anjaha seng adong na boi mangkatahon "Jesus ai ma Tuhan," anggo lang marhitei Tonduy Na pansing. 12:4 Bagei do sibere-bere partonduyon, tapi sada do Tonduy.(Rom 12:6; Ep. 4:4.) 12:5 Bagei do horja pangidangion, tapi sada do Tuhan. (ay. 28; Ep. 4:11.) 12:6 Bagei do hagogohon, tapi sada do Naibata, na mangkorhon haganupan ai ibagas haganup. 12:7 Bani ganup do ibere partalar ni Tonduy in bahen hadearon ni ganup. (bd. 14:26.) 12:8 Bani na sada ibere marhitei Tonduy in hata hapentaran, bani na sada nari hata habotohon romban hubani Tonduy na sasada in. 12:9 Bani na legan use haporsayaon marhitei Tonduy na sada in, bani na legan sibere-bere pamalumhon marhitei Tonduy na sada in. 12:10 Bani na legan hagogohon mambahen halongangan, bani na legan panjahaion, bani na legan panimbangion pasal bagei ni tonduy, bani na legan marsahap ibagas hata na legan, anjaha bani na legan use patorangkon sahap ai. 12:11 Tapi haganupan ai ihorjahon Tonduy na sada in, palegan-legan ibagihon bani ganup romban bani rosuh ni uhurni. 12:12 Ai songon badan, sada do in, anjaha marpagori buei, tapi haganup pagorini in, age pe buei in, sada badan do in; sonai do age Kristus. (ay. 27; bd. 10:17.) 12:13 Ai ibagas sada Tonduy do haganup hita tardidi hubagas sada badan, age Jahudi, age Gorik, age jabolon age halak na bebas, anjaha sada do Tonduy ipainumhon bani hita haganup. (Gal. 3:28.) 12:14 Ai badan in pe, seng sada pagori, tapi buei do. (ay. 20.) 12:15 Porini ihatahon nahei: Halani seng tangan ahu, seng masuk ahu bani badan, mintor lang masuk badan ma ai halani ai? 12:16 Anjaha porini ihatahon pinggol: Halani seng mata ahu, seng masuk ahu bani badan, mintor lang ma masuk badan ai halani ai? 12:17 Anggo mata haganup badan, ija ma parbinogeian? Anggo haganup pinggol, ija ma panganggoh? 12:18 Tapi iatur Naibata do pagori in, ganup bani iananni bei bani badan, domu hubani rosuh ni uhurni. 12:19 Porini sada pagori haganup, ija ma badan? 12:20 Ase age pe buei pagori, sada do badan. (ay. 14.) 12:21 Ase seng boi hatahonon ni mata bani tangan: "seng benahangku ho!"; atap ulu mangkatahon bani nahei: "Seng benahangku ho!" 12:22 Tapi tene, pagori na tar hurang idahon, ai do siporlunan, 12:23 anjaha pagori ni angkulanta, na hurang harga nini uhurta, ai do sangapan ibahen hita, anjaha na hurang sangap nini uhurta sarinan do hita pasal ai. 12:24 Tapi seng pala porlu ai bani pagori na sangap hinan. Ia Naibata, iatur do angkula in, anjaha sangapan ibahen pagori na dorun hinan, 12:25 ase ulang adong parbolah-bolahan ibagas badan, tapi ase marsiurupan pagori samah pagori. 12:26 Anggo mangarou sada pagori, rap mangarou do haganup pagori in, anjaha anggo ipasangap sada pagori, rap marmalas ni uhur do ganup pagori in. 12:27 Nasiam do badan ni Kristus in, anjaha pagori do nasiam samah nasiam. (Rom 12:5; Ep. 5:30.) 12:28 Anjaha ipabangkit Naibata do ibagas kuria in parlobei apostel, paduahon nabi, patoluhon sipangajari, dob ai hagogohon mambahen halongangan, dob ai sibere-bere pamalumkon, gogoh laho mangurupi, hapentaran mambobai, marsahap na legan. (Ep. 4:11, 12.) 12:29 Ai haganup do gabe apostel? Ai haganup do gabe nabi? Ai haganup do gabe sipangajari? Ai haganup do margogoh mambahen halongangan? 12:30 Ai haganup do dapotan sibere-bere pamalumkon? Ai haganup do marhata na legan? Ai haganup do pandei patorangkon? 12:31 Tapi pindahi nasiam ma sibere-bere sibanggalan. Anjaha patuduhononku ope bani nasiam dalan sisurungan. (bd. 14:1.)

1 Korint 13

13:1 Porini pe husahapkon sagala sahap ni jolma ampa malekat pe, anggo seng adong holong bangku, songon gung na marolol do ahu atap giring-giring na mardiring. 13:2 Porini pe adong bangku sibere-bere panjahaion, anjaha hubotoh haganup rusia ampa haganup habotohon, anjaha porini pe parhaporsayaon na botul ahu gabe tarpaosor ahu dolog, anggo seng adong holong bangku, na lang do ahu. 13:3 Anjaha porini hulayak-layakkon haganup artangku anjaha huondoskon badanku ase itutung, anggo seng adong haholongon bangku, sabonar na so marguna do ai bangku. (Mat. 6:2.) 13:4 Na sabar do haholongon in anjaha na basar, seng subil haholongon in, seng mangunsagah anjaha ipajuntul-juntul dirini. 13:5 Hormat do haholongon in, seng ipindahi na bani sandiri, seng urah marah, anjaha seng ipadingat-dingat na jahat. (Pil. 2:24, 21.) 13:6 Seng malas uhurni mangidah hagedukon, tapi malas do uhurni bani hasintongan. (Rom 12:9.) 13:7 Bani haganup do ia tahan, haganup do ihaporsayai, haganup do iarapkon, sabar do ia manaron haganup. (Pod. 10:12; Rom 15:1.) 13:8 Seng na ra salpu haholongan in. Ia panjahaion maronti do, mangadi do age sahap, habotohon pe maronti do. 13:9 Ai mardeba-deba do habotohonta, anjaha mardeba-deba do age panjahaionta. 13:10 Anggo roh na gokan dear ai, parontihonon ma na mardeba-deba. 13:11 Sanggah dakdanak ahu, danak do parsahapku, danak paruhuronku, danak pingkiranku, tapi dob mangodang ahu, hutadingkon do biak hadanakon ai. 13:12 Anggo sonari, mangkawah do hita songon bani sormin, samak hansa, tapi use padumpar bohi ma. Mardeba-deba do panandaionku nuan, tapi anggo use gok ma panandaionku, songon na dob tinandani ahu. (2 Kor. 5:7.) 13:13 Ase tolu do na totap, ai ma haporsayaon, pangarapan ampa haholongan tapi haholongan ai do sibanggalan.(1 Tes. 1:3; 1 Joh. 4:16.)

1 Korint 14

14:1 Parayak nasiam ma haholongon in, porluhon nasiam partonduyon, tapi siporlunan, ai ma panjahaion. (bd. 12:10, 31.) 14:2 Ia na marhata na legan, sedo jolma na pinarsahapkonni, tapi Naibata do. Ise pe lang na mangarusi, ai rusia do ihatahon ibagas tonduy. 14:3 Tapi na manjahai, jolma do iparsahapkon, laho pauli-ulihon, mamodahi ampa mangapohi. 14:4 Na pauli-ulihon dirini do na marhata na legan, tapi kuria in do ipauli-uli na manjahai. 14:5 Marosuh do uhurhu namin, anggo haganup nasiam marhata na legan, tapi harganan do na manjahai. Halak na manjahai surungan do ai humbani na marhata na legan, anggo seng lanjar ipatorang, laho pauli-ulihon kuria in. (bd. 12:10; 4 Mus. 11:29.) 14:6 Ai pe, nasiam sanina, anggo roh ahu bani nasiam marhata na legan, aha ma gunani ai bani nasiam, anggo seng huhatahon bani nasiam pangungkabon atap habotohon atap panjahaion atap pangajarion? (bd. 12:8.) 14:7 Umpamani parugas na so manggoluh, songon sordam atap husapi, anggo samak sorani, sonaha ma boi botohon atap na isordamhon atap na ihusapihon? 14:8 Anjaha anggo seng torang sora ni tarompet, ise ma na ra marugas laho hu parporangan? 14:9 Sonai ma nasiam pasal sahap na legan ai. Anggo isahapkon nasiam hata na so torang, sonaha ma boi botohon na hinatahon nasiam? Ai lang songon na marsahap bani logou mando in? 14:10 Buei do tongon bagei ni sahap i dunia on, anjaha sada pe lang na so adong artini. 14:11 Anggo lang hubotoh arti ni hata ai, gabe bangsa na legan ma ahu bani na marsahap ai, anjaha na marsahap ai pe gabe bangsa na legan ma bangku. 14:12 Anjaha sonai ma nasiam, halani ihaporluhon nasiam do partonduyon, pindahi nasiam ma hasurungan, laho pauli-ulihon kuria in. (ay. 1-11.) 14:13 Halani ai martonggo ma parhata na legan ai, ase tarpatorangsi. (bd. 12:10.) 14:14 Anggo martonggo ahu ibagas hata na legan, tonduyhu do na martonggo soh do anggo pingkiranku. 14:15 Ase sonaha ma bahenon? Martonggo ma ahu ibagas tonduyhu, tapi sihol martonggo do ahu homa ibagas pingkiranku. Mandoding ma ahu ibagas tonduyhu, tapi sihol mandoding do ahu homa ibagas pingkiranku. (Ep. 5:19.) 14:16 Ai anggo mamuji ham ibagas tonduymu, sonaha ma tarbahen halak na dihut ijai mangkatahon amen bani hata tarimakasihmu ai, anggo seng iarusi? 14:17 Dear do namin hata tarima kasih ai, tapi seng paulihon ai bani hasoman. 14:18 Tarima kasih do uhurhu bani Naibata, halani pandeinan ahu marhata na legan marimbang nasiam haganup. 14:19 Tapi anggo ibagas kuria in, rosuhan do uhurhu mangkatahon lima hata na tararusi humbani saloksa ibagas hata na legan, ase tarajari ahu na legan. 14:20 Nasiam sanina, ulang ma dakdanak nasiam ibagas paruhuron, dakdanak ma nasiam pasal hajahaton, tapi matoras ma bani paruhuron. (Ep. 4:14; Pil. 3:12, 15.) 14:21 Bani titah in tarsurat do: Marhitei parhata na legan ampa marhitei bibir ni halak na legan sihol marsahap do ahu bani bangsa in, tapi age pe sonai, seng tangihonon ni sidea Ahu, nini Tuhan in. (5 Mus. 28:49; Jes. 28:11, 12.) 14:22 Ase tanda do sahap na legan, sedo bani na porsaya, tapi bani na so porsaya do; tapi anggo panjahaion sedo bani na so porsaya, tapi bani na porsaya do. 14:23 Ase anggo martumpu haganup kuria in, anjaha marhata na legan haganupan, anjaha adong masuk parguru atap na so porsaya, ai lang hatahonon ni sidea ma na gila nasiam? 14:24 Tapi anggo haganup manjahai, anjaha adong masuk na so porsaya atap parguru, gabe haganup ma marsipaingat bani, anjaha haganup ma manguhumi na ibagas uhurni, 14:25 Gabe talar ma ponopan na ibagas uhurni, gabe manrogop ma ia, marsombah bani Naibata, anjaha marhatongonkon, na tongon do Naibata itongah-tongahnasiam. (Joh. 16:8.) 14:26 Ase sonaha do, nasiam sanina? Anggo martumpu nasiam, adong do bani na sada doding, bani na sada pangajarion, bani na sada pangungkabon, bani na sada sahap na legan, bani na sada hatorangan. Tapi haganupan ai laho pauli-ulihon kuria in ma namin. (bd. 11:18, 20; 12:8-10; Ep. 4:12.) 14:27 Anggo adong na marhata na legan, sungkup ma dua atap sibueinan ma tolu halak, anjaha sada-sada ma, anjaha sahalak ma na patorangkon. 14:28 Tapi anggo seng adong na patorangkon, sip ma ia ilobei ni kuria in; bani dirini ampa bani Naibata ma ai ihatahon. 14:29 Anggo nabi, dear ma dua atap tolu halak manjahai, anjaha na legan ai manimbangi. (Lah. 17:11; 1 Tes. 5:21.) 14:30 Tapi anggo dapotan pangungkabon sada halak na hundul ijai, sip ma na parlobei ai. 14:31 Ai bulih do nasiam haganup manjahai sada-sada, ase haganup dapotan podah ampa sipaingat; 14:32 anjaha pambalosi do tonduy ni nabi bani nabi in, 14:33 ai seng iharosuhkon Naibata na geor, tapi damei do. Songon bani haganup kuria ni halak na mapansing in, 14:34 parsip ma naboru ibagas kuria in; ai seng patut mangkatahon hata sidea, tapi pambalosi ma, songon na hinatahon ni titah in. (1 Mus. 3:16; 1 Tim. 2:12.) 14:35 Tapi anggo adong na sihol sibotohon ni sidea, isungkun ma i rumah paramangonni, ai pantang do bani parinangon marsahap i kuria in. 14:36 Ai humbani nasiam do luar hata ni Naibata? Atap hubani nasiam do hansa das in? 14:37 Ganup ma mamingkir, nabi atap partonduy ia ibotoh ma, ia na husuratkon bani nasiam, in ma parentah ni Tuhan. (1 Joh. 4:6.) 14:38 Tapi anggo adong na mangakui in, seng siakuan ia! 14:39 Ai pe, nasiam sanina, haporluhon nasiam ma na manjahai, tapi ulang ma pandang nasiam na marhata na legan. 14:40 Asal ma haganup mardalan dear anjaha maratur. (Kol. 2:5.)

1 Korint 15

15:1 Nasiam sanina, hupaingat ma nasiam pasal ambilan na madear, na dob huambilankon bani nasiam, na dob jinalonasiam, na gabe hajongjongannasiam, 15:2 anjaha parhiteiannasiam maluah, anggo poltik panjolom-nasiam bani na dob huambilankon bani nasiam; anggo na so soya do nasiam porsaya. 15:3 Ai parlobei do hupadas bani nasiam, na dob hujalo sandiri, ai ma: Na dob matei do Kristus halani dousanta domu hubani na tarsurat in. (Jes. 53:8, 9.) 15:4 Na dob tartanom do Ia, anjaha ipapuho bani ari patoluhon, domu hubani na tarsurat in. (Ps. 16:10.) 15:5 Anjaha ipataridahkon do dirini bani si Kepas, dob ai bani na sapuluh dua ai. (Mrk. 16:14; Luk. 24:34.) 15:6 Dob ai ipataridahkon do dirini sahali bani lobih lima ratus sanina; bueinan ope hunjai na manggoluh ronsi nuan, deba do na dob modom. 15:7 Dob ai ipataridahkon do dirini bani si Jakobus, dob ai bani haganup apostel in. (Luk. 24:50.) 15:8 Tapi ipudi ni haganupan ai, ipataridahkon do dirini bangku, na tarhatahon tubuh bani na so panorangni. (bd. 9:1.) 15:9 Ai ahu do sietekan humbani apostel in, na seng talup namin goranon apostel, halani na dob huparburu kuria ni Naibata. (Ep. 3:8.) 15:10 Tapi halani idop ni uhur ni Naibata do, ase sonon ahu nuan, anjaha seng soya idop ni uhurni na hubangku in, ai bueinan do na huhorjahon humbani sidea haganup; sedo ahu tene, tapi idop ni uhur ni Naibata do na mangkasomani ahu. (2 Kor. 11:5, 23.) 15:11 Atap ahu pe atap sidea, sonin do parambilanonnami, anjaha sonin do nasiam gabe porsaya. 15:12 Tapi anggo domma na ambilankon Kristus, paboa na dob puho do Ia humbani na matei, mase ma adong deba itongah-tongahnasiam, na mangkatahon, na so adong parpuhoon humbani na matei? 15:13 Tapi, anggo seng adong parpuhoon humbani na matei, Kristus pe seng puho humbani na matei. 15:14 Tapi, anggo seng puho Kristus humbani na matei, jadi lumei ma ambilannami, anjaha lumei ma homa haporsayaonnasiam. 15:15 Tardapot ma age hanami saksi palsu ni Naibata, halani isaksihon hanami pasal Naibata, na dob papuho Kristus, hape seng ipapuho, anggo na tongon do seng mulak manggoluh na matei. (Lah. 1:22.) 15:16 Ai, anggo seng ipapuho na matei, seng tongon puho age Kristus. 15:17 Tapi, anggo seng ipapuho Kristus in, soya ma haporsayaonnasiam, anjaha tong ope nasiam ibagas dousanasiam. (ay. 14.) 15:18 Anjaha na dob matei pe ibagas Kristus magou ma. 15:19 Anggo sanggah manggoluh on do hansa mangarap hita bani Kristus, hita ma sisombuhan humbani haganup. 15:20 Tapi domma puho Kristus humbani na matei, Ia do parlobei ni sagala na dob modom in.(bd. 11:30; Kol. 1:18.) 15:21 Ai songon marhitei sada jolma roh hamateian, sonai do marhitei sada jolma adong parpuhoon humbani na matei. (1 Mus. 3:17-19; Rom 5:12, 18.) 15:22 Ai songon ibagas si Adam haganup matei, sonai do ibagas Kristus haganup ipagoluh. 15:23 Tapi ganup ma mangihutkon parjojorni; parlobei Kristus, dob ai na bani Kristus bani parrohni ai. (ay. 20; 1 Tes. 4:16; Pangk. 20:5.) 15:24 Dob ai roh ma ujungni; ijai ma ondoshononni harajaon in bani Naibata anjaha Bapa, dob iparontihon sagala pamarentahan, kuasa ampa hagogohon. (Dan. 2:44.) 15:25 Ai maningon manrajai do Ia, ronsi ipatunduk haganup munsuh in hutoruh ni naheini. (Ps. 110:1; Mat. 22:44.) 15:26 Munsuh na parpudi siparontihononni, ai ma hamateian. (bd. 21:4; Pangk. 20:14.) 15:27 Ai haganup do patundukon ni Naibata hutoruh ni naheini. Tapi anggo ihatahon haganup do ipatunduk, torang ma ijai seng dihut Ia, na patundukkon haganup hu-Bani. (Ps. 8:7.) 15:28 Tapi dob tunduk haganup ai hu-Bani, gabe dihut ma Anak in sandiri unduk hubani sipatunduk haganup Bani, ase Naibata gabe haganup ibagas haganup. 15:29 Anggo seng sonai, aha do guna ni pambahenan ni halak na padidihon dirini mangkophop halak na matei? Ai anggo sabonar na so puho do na matei, mase ma padidihonon ni sidea dirini mangkophop na matei? 15:30 Anjaha hanami pe, mase ma pala tarononnami parmaraan ganup panorang? (Rom 8:36.) 15:31 Narus-narus matei do ahu ganup ari; tongon, nasiam sanina, halani hamegahonku pasal nasiam, na adong bangku ibagas Kristus Jesus, Tuhanta in. (2 Kor. 4:10, 11.) 15:32 Ai anggo mangihutkon hajolmaon do maringor ahu ampa binatang panoroh i Epesus, aha ma gunani ai bangku? Anggo seng puho na matei, mangan minum ma lah hita, ai matei do hita patar. (Jes. 22:13.) 15:33 Ulang nasiam kahou! Magou do biak na madear, anggo nahombari na masambor. 15:34 Patut ma nasiam tarjolma, ulang be mardousa, ai adong do deba na so mananda Naibata. Laho pailahon nasiam do na huhatahon. (Rom 13:11; Ep. 5:14.) 15:35 Tapi nini halak deba: Sonaha ma parpuho ni na dob matei? Marbadan na sonaha ma sidea na roh ai? 15:36 E, ham na oto! Na sinaburhonmu ai, seng manggoluh ai, anggo seng matei lobei. (Joh. 12:24.) 15:37 Anjaha sanggah manabur ham, seng badan ni na sihol roh ai isaburhon ham, tapi sangkamata gandum do atap na legan. 15:38 Tapi Naibata do mambere badan hujai, domu hubani rosuh ni uhurni, bani ganup bonih ibere badanni bei. (1 Mus. 1:11.) 15:39 Seng sarupa ganup masam ni daging in, tapi legan do na bani jolma, legan na bani pinahan, legan na bani manuk-manuk, anjaha legan na bani dengke. 15:40 Adong do badan parnagori atas anjaha adong do badan parnagori tongah on, tapi legan do sangap ni na i nagori atas, legan na i tanoh on. 15:41 Legan do sondang ni mata ni ari, legan do sondang ni bulan, anjaha legan do homa sondang ni bintang-bintang. Ai bintang pe palegan-legan do sinondangni. 15:42 Sonai do homa bani parpuhoon ni na dob matei. Isaburhon do na ra maseda, tapi ipapuho na so ra maseda. 15:43 Tarsabur do ibagas hahirion, tapi ipapuho do ibagas hasangapon. Tarsabur do ibagas hagalekon, tapi ipapuho do ibagas hagogohon.(Pil. 3:20, 21.) 15:44 Na isaburhon, ai ma badan pardagingon, ipapuho badan partonduyon. Anggo adong pardagingon, adong do age badan partonduyon. 15:45 Domu hubani na tarsurat in: Jolma na parlobei, ai ma si Adam, gabe hosah na manggoluh do. Si Adam na parpudi gabe Tonduy na pagoluhkon. (1 Mus. 2:7; 2 Kor. 3:17.) 15:46 Tapi sedo badan partonduyon na parlobei, tapi badan pardagingon do, dob ai pe ase badan partonduyon. 15:47 Jolma na parlobei ai ma hun tanoh on, anjaha marbiak tanoh on, jolma na paduahon hun nagori atas do. 15:48 Domu hubani biak ni na hun tanoh on do sagala na i tanoh on; anjaha domu hubani biak ni na hun nagori atas do sagala na i nagori atas. 15:49 Anjaha songon na dob ipakei hita rumang tanoh on, sonai do pakeionta rumang na hun nagori atas. (1 Mus. 5:3.) 15:50 Nasiam sanina, on do na huhatahon: Seng tarbahen daging ampa daroh manean harajaon ni Naibata, seng tartean na ra salpu on na totap ai. 15:51 Tonggor ma, hupatugah ma bani nasiam sada rusia: Seng haganup hita matei, tapi haganup do hita paubahon. (1 Tes. 4:15, 17.) 15:52 Sompong ibagas sangkidop mata, bani parsora ni tarompet na parpudi ai, ai marsora ma tarompet, gabe puho ma na matei hu hatongtongon, lanjar paubahonni ma anggo hita. (Mat. 24:31; 1 Tes. 4:16.) 15:53 Ai maningon na totap ai do solukhononkon bani na ra salpu on, anjaha goluh na totap ai solukhononkon bani na ra matei on. (2 Kor. 5:4.) 15:54 Tapi dob isolukhon, na totap ai bani na ra salpu on, anjaha dob isolukhon goluh na totap ai bani na ra matei on, ijai ma jumpah hata na tarsurat in: Domma tarbondut hamateian hubagas hamonangan.(Jes. 25:8; Hes. 13:14.) 15:55 O hamateian, ija do hamonanganmu? O hamateian, ija do sorodmu? 15:56 Sorod ni hamateian ai ma dousa, anjaha gogoh ni dousa ai ma titah. 15:57 Tapi tarima kasih ma bani Naibata, na pamonang hita marhitei Tuhanta Jesus Kristus.(Rom 6:14; 7:13.) 15:58 Ai pe, nasiam sanina na hinaholongan, totap ma nasiam, ulang mubah-ubah, anjaha lambin surung ma ibagas horja ni Tuhan in, ai ibotoh nasiam, sedo na soya halojaonnasiam ibagas Tuhan in. (2 Kor. 15:7.)

1 Korint 16

16:1 Ia pasal tumpak na hubani halak na mapansing ai, bahen nasiam ma, songon na dob huaturhon bani kuria Galatia. (Lah. 11:29; 2 Kor. 8:9; Gal. 2:10.) 16:2 Siap ari minggu ma ganup nasiam papulighon sibar na tarbahensi, anjaha isimpan ma ai, ase lang pala be patumpuhon tumpak rohhonsi ahu. (Lah. 20:7.) 16:3 Anjaha rohhonsi ahu, suruhhonku ma hasoman na patut nini uhurnasiam, marhasoman surat hu Jerusalem, laho padaskon tumpak idop ni uhurnasiam ai. 16:4 Tapi anggo humbanggal do, gabe pala dihut ahu misir, rap pakon ahu ma sidea laho. 16:5 Roh do ahu bani nasiam, dob hudalani Makedonia; ai dalananku do lobei Makedonia, (Lah. 19:21.) 16:6 tapi ra soh do ahu bani nasiam, atap pasalpuonku do musim borgoh ai rap pakon nasiam, ase boi taruhkononnasiam ahu barang huja ahu laho. (Rom 15:24.) 16:7 Ai seng marosuh uhurhu asal tuluy bani nasiam sahali on, tapi arap do uhurhu marianan hundokah rap pakon nasiam, anggo ilopas Tuhan in. (Lah. 18:20; 20:2.) 16:8 Tapi i Epesus do ahu soh, das ronsi pesta Pentakosta. (Lah. 19:1, 10.) 16:9 Ai mungkab do bangku labah na banggal, na marpangkorhon tumang, tapi buei do homa imbang. 16:10 Tapi anggo roh si Timoteus, jaga nasiam ase ulang mabiar ia itongah-tongahnasiam. Ai horja ni Tuhan in do ihorjahon, usih songon ahu. (bd. 4:17; Pil. 2:20.) 16:11 Ulang ma adong na mapas bani. Tapi taruhkon nasiam ma ia ibagas damei, ase roh ia marayak ahu, ai hupaima-ima do ia rap pakon sanina in. (1 Tim. 4:12.) 16:12 Tapi anggo saninanta, si Apollos, domma gogoh namin huojur, ase itohu nasiam rap pakon sanina on. Seng ra ope ia sonari, tapi sihol roh do ia, anggo adong panorang na dear bani. (bd. 1:12.) 16:13 Puho ma nasiam; totap ma jongjong ibagas haporsayaon, gopas songon dalahi anjaha margogoh.(Ep. 6:10.) 16:14 Dalankon nasiam ma haganup pambahenannasiam ibagas holong. 16:15 Ibotoh nasiam do, nasiam sanina, ia si Stepanas ampa keluargani, ai ma limbuah ni nagori Akaya, anjaha iondoskon sidea do dirini marugas bani halak na mapansing in. (bd. 1:16; Rom 16:5.) 16:16 Huojur ma, ase marunduk ni uhur nasiam bani halak sisonai, age bani haganup halak na dihut marhorja anjaha loja. (Pil. 2:29.) 16:17 Malas do uhurhu bani parroh ni si Stepanas, si Fortunas ampa si Akaikus; ai sidea do manggoki na lang tarbahen nasiam, 16:18 ai tarapoh do tonduyhu ibahen sidea, tontu age tonduynasiam. Harga ma bahen nasiam halak na sonin. (1 Tes. 5:12.) 16:19 Manongos tabi do bani nasiam kuria na i Asia. Manongos tabi na buei do bani nasiam ibagas Tuhan in, si Akila ampa si Priska rap pakon kuria, na martumpu i rumah ni sidea. (Lah. 8:2, 18, 26; Rom 16:3, 5.) 16:20 Das ma tabi ni haganup sanina in bani nasiam. Marsitabian ma nasiam samah nasiam, marhitei summah na mapansing. (2 Kor. 13:12.) 16:21 Ahu, si Paulus, manuratkon hata tabi on marhitei tanganku sandiri. (Kol. 4:18; 2 Tes. 3:17.) 16:22 Hona papa ma na so marholong ni uhur bani Tuhan in! Maranata (Na roh ma Tuhanta)! (Gal. 1:8, 9.) 16:23 Ihasomani idop ni uhur ni Tuhan Jesus ma nasiam! 16:24 Ihasomani holong ni uhurhu ma nasiam haganup ibagas Kristus Jesus!

2 Korint 1

1:1 Humbani si Paulus, apostel ni Kristus Jesus, marhitei rosuh ni Naibata, pakon si Timoteus, sanina ni, humbani kuria ni Naibata, na i Korint, ampa hubani haganup halak na mapansing, na i sab Akaya. (1 Kor. 1:1.) 1:2 Idop ni uhur ma bani nasiam ampa damei humbani Naibata Bapanta ampa humbani Tuhan Jesus Kristus. (Rom 1:7.) 1:3 Puji-pujian ma bani Naibata, Bapa ni Tuhan Jesus Kristus, Bapa paridop ni uhur ampa Naibata sipangapoh in, (Rom 15:5.) 1:4 na mangapoh hanami ibagas sagala sitarononnami, ase tarapoh hanami hasoman na ibagas bagei ni sitaronon, hinorhon ni apoh-apoh na jinalonami sandiri humbani Naibata. 1:5 Ai songon surung ni sitaronon ni Kristus sogop bannami, sonai do homa surung ni pangapohon bannami marhitei Kristus. (Ps. 34:20; 94:19; Kol. 1:14.) 1:6 Ia marsik pe iahap hanami, bahen apoh-apoh ampa huluahon do in bani nasiam; ia tarapoh hanami, gabe apoh-apoh bani nasiam do in, ase margogoh nasiam manaron sitarononnasiam, na dos songon tinaronnami. (bd. 4:15, 17.) 1:7 Anjaha pangarapannami pasal nasiam totap do, ai ibotoh hanami: Songon na dihut nasiam parrupei bani sitaronon, sonai do homa bani apoh-apoh. 1:8 Ai seng marosuh hanami, nasiam sanina, lang ibotoh nasiam sitaronon na mangonai bannami i Asia borat tumang, lobih humbani na tarporsan, pala putus ma pangarapannami manggoluh. (Lah. 19:23; 1 Kor. 15:32.) 1:9 Tongon, matei mando hanami nini uhurnami, ase ulang dirinami ihatengerhon hanami, tapi Naibata ma, sipuhoi na dob matei. 1:10 Ia do na paluahkon hanami humbani hamateian, anjaha paluahonni ope, anjaha tenger do uhurnami Bani, paluahonni do age hunjon-hunjanan, (2 Tim. 4:18.) 1:11 marhitei na iurupi nasiam homa hanami marhitei tonggo, andohar buei hasoman na manghatarima-kasihkon idop ni uhur na jinalonami, pangkorhon ni tonggo ni sidea na buei ai. 1:12 On do onjolan ni puji-pujiannami: Isaksihon panggora ni uhurnami do, na marparlahou hanami ilobei ni dunia on, tarlobih ma ilobeinasiam, ibagas hapansingon ampa hapolinon na humbani Naibata, sedo ibagas hapentaron pardagingon, tapi ibagas idop ni uhur ni Naibata do. (bd. 2:17; Heb. 13:18.) 1:13 Ai seng legan arti ni suratnami humbani na binasa ampa na niarusannasiam. Anjaha huarapkon do, ase gok ma pangarusionnasiam, 1:14 songon na dob mamungkuh iarusi nasiam hanami, paboa hanami do puji-pujian bani nasiam anjaha nasiam puji-pujian bannami bani ari ni Tuhanta Jesus. (bd. 5:12; Pil. 2:16.) 1:15 Mangunsagahkon in, adong hinan do sura-surangku marayak nasiam, ase lompit idop ni uhur jaloonnasiam, 1:16 Sihol tuluy do ahu hubani nasiam laho hu Makedonia, anjaha dob hun Makedonia, mulak use bani nasiam, ase nasiam paingkathon ahu laho hu judea. (1 Kor. 16:5, 6.) 1:17 Marhampung ni uhur do ahu mansura-surahon in? Atap marguru hubani daging do sura-surangkin, gabe rap jumpah bangku hata eak ampa hata lang? 1:18 Tapi songon Naibata hatengeran ni uhur, seng marhata eak anjaha marhata lang hanami bani nasiam. 1:19 Ai Jesus Kristus, Anak ni Naibata, na iambilankon hanami bani nasiam, ai ma ahu, si Siluanus ampa si Timoteus, seng rap dong Bani hata eak ampa hata lang, tapi hata eak do hansa adong Bani. 1:20 Ai sagala bagah-bagah ni Naibata marhiteihonSi do ai saud. Halani ai marhiteihonSi do hita mangkatahon Amen, bahen hasangapon ni Naibata.(Pangk. 3:14.) 1:21 Tapi Naibata do na patotapkon hanami pakon nasiam ibagas Kristus, anjaha iminaki do hanami. (1 Joh. 2:27.) 1:22 Lanjar Ia do mambahen lak bannami, anjaha ibere do Tonduyni hubagas uhurnami songon jaminan. (bd. 5:5; Rom 8:16; Ep. 1:13, 14.) 1:23 Tapi Naibata do hudilo saksi bani tonduyhu, halani manimbangi nasiam do, ase lang roh ope ahu hu Korint. (bd. 11:31; Rom 1:9.) 1:24 Ai sedo na laho manrajai haporsayaonnasiam hanami, tapi hasoman parhorja do hanami bani malas ni uhurnasiam, ai na dob jongjong do nasiam ibagas haporsayaon. (1 Ptr. 5:3.)

2 Korint 2

2:1 Domma hupaputus ibagas uhurhu, na so ulakanku be roh bani nasiam ibagas pusok ni uhur. (bd. 12:21; 1 Kor. 4:21.) 2:2 Ai anggo hupusoki uhurnasiam, ise ma na boi pamalas uhurhu, ai lang na hupusoki in do? 2:3 Anjaha husurat pe on, ase ulang, anggo roh ahu, marpusok ni uhur ahu humbani na patut pamalas uhurhu; ai tenger do uhurhu bani nasiam haganup, paboa malas ni uhurhu, malas ni uhurnasiam do homa ai. (1 Kor. 5.) 2:4 Ai ibagas buei sitaronon ampa pusok ni uhur do hubahen surat on bani nasiam, marhasoman buei iluh-iluh, sedo ase pusok uhurnasiam, tapi ase ibotoh nasiam do holong ni uhurhu na tarlobih in bani nasiam. 2:5 Tapi na mambahen pusok ni uhur ai, sedo ahu tumang pinusokanni, tapi hinaotikni, ase ulang salputu parsahaphu, nasiam haganup do tene. (1 Kor. 5:1.) 2:6 Sungkup ma bani halak sisonai ai pinsang-pinsang humbani halak simbuei. 2:7 Tapi suharni ai, dearan ma sasap nasiam salahni, anjaha apoh nasiam ma ia, ase ulang ibondut pusok ni uhur na tarlobih in ia. 2:8 Halani ai huojur ma nasiam, manotapkon holong ni uhur bani. 2:9 Lanjar in do tujuan ni surathu bani nasiam, laho manguji nasiam, ase hubotoh atap pambalosi do nasiam bani haganup. 2:10 Barang ise na dob isasap nasiam salahni, ahu pe husasap do. Anjaha ahu pe, barang aha na husasap, halani nasiam do husasap ai, ilobei ni Kristus, (Luk. 22:31.) 2:11 ase ulang iakali sibolis in hita, ai sedo na so ibotoh hita uhurni ai. (Luk. 22:31.) 2:12 Tapi dob das ahu i Troas, laho mangambilankon ambilan na madear ni Kristus, mungkab do labah bangku ibagas Tuhan in, (Lah. 14:27; 1 Kor. 16:9.) 2:13 tapi seng sonang uhurhu, halani seng jumpah ahu si Titus, sanina in ijai. Jadi mamuhun ma ahu hubani sidea, anjaha laho ma ahu hu Makedonia. (Lah. 20:1.) 2:14 Tapi tarima kasih ma bani Naibata, na tongtong manogu-nogu hanami ibagas hamonanganni marhitei Kristus, anjaha ipatalar do misbou ni habotohon pasalsi marhitei hanami bani haganup ianan. 2:15 Ai uap na misbou ni Kristus do hanami ilobei ni Naibata bani halak na maluah, age bani halak na laho magou, (1 Kor. 1:18.) 2:16 bani na deba ai uap hamateian hu hamateian, bani na deba nari uap hagoluhan hu hagaluhon. Anjaha ise do na talup hujai? (bd. 3:5, 6; Luk. 2:34.) 2:17 Ai seng usih hanami songon na mabuei in, na mambuat untung bani diri sandiri marhitei hata ni Naibata, tapi humbani pitah ni uhur do, sinuruh ni Naibata, ihatahon hanami in ilobei ni Naibata, ibagas Kristus. (bd. 1:12.)

2 Korint 3

3:1 Ai na mamuji-muji diri do hanami use? Atap na porlu do bannami surat hasaksian bani nasiam atap humbani nasiam, songon bani na deba? (bd. 5:12.) 3:2 Nasiam do suratnami, na dob sinurat ibagas uhurnami, na tinanda anjaha na binasa ni haganup halak, (1 Kor. 9:2.) 3:3 anjaha tanda do nasiam surat ni Kristus, na sinuratnami, na sinurat sedo marhitei tinta, tapi marhitei Tonduy ni Naibata na manggoluh in do; seng bani panuratan batu, tapi bani panuratan daging do, ai ma pusu-pusu. (2 Mus. 24:12.) 3:4 Sonai do tenger ni uhurnami marhitei Kristus bani Naibata. 3:5 Seng mangasup hanami humbani dirinami, mamingkiri atap aha pe humbani dirinami, tapi Naibata do na mambahen mangasup hanami. (bd. 2:16.) 3:6 Ia do na mambahen mangasup hanami, gabe siparugas bani padan na baru, sedo bani surat, tapi bani Tonduy in do; ai na mamunuh do surat, Tonduy in do na pagoluhkon. (Jer. 31:31; Joh. 6:63.) 3:7 Ai gari parugason hamateian, na marsurat, na niuhir bani batu, marhasangapon do, pala seng tarbahen halak Israel mangkawahkon bohi ni si Musa halani sangap na ra salpu, na bani bohini ai, (2 Mus. 34:30.) 3:8 ai lang sangapan ma parugason bani Tonduy in? (Gal. 3:2, 5.) 3:9 Ai anggo sangap parugason na bani uhum, ai lang sangapan ma parugason na bani hapintoran? (5 Mus. 27:26; Rom 1:17; 3:21.) 3:10 Tongon, seng sangap be na marsangap hinan ijai, halani surung ni hasangapon on. 3:11 Ai anggo sangap na ra salpu, jadi lobihan ma sangap ni na manongtong. 3:12 Halani adong bannami pangarapan na sonai, pag tumang do hanami, 3:13 seng songon si Musa, na mambahen panrungkub bani bohini, ase ulang tarkawahkon halak Israel ujung ni na laho salpu ai. (2 Mus. 34:33, 35.) 3:14 Tapi gabe hengkeng do uhur ni sidea. Ai ronsi sadari on, anggo ibasa sidea padan na basaia, tong do rungkub ai; lanjar seng ibuha ope, halani marhitei Kristus do hansa tarpadaoh ai. (Rom 11:25.) 3:15 Tongon, ronsi sadari on, tibal do panrungkub ai iatas uhurni sidea, anggo ibasa surat ni si Musa. 3:16 Tapi sadihari mulak uhur ni sidea bani Tuhan in, ibuat ma panrungkub ai. (Rom 11:23, 26.) 3:17 Ia Tuhan in Tonduy in do in; anjaha ija Tonduy ni Tuhan in,ijai do haluahon. 3:18 Tapi hita haganup, marbohi na so marpanrungkub, mangidah hasangapon ni Tuhan in, songon ibagas sormin, gabe salih songon rupani, humbani hasangapon hu hasangapon, halani Tuhan, Tonduy in.

2 Korint 4

4:1 Ai pe, halani na dob ijalo hanami jabatan on humbani idop ni uhur, seng marnaloja hanami. (bd. 3:6; 1 Kor. 7:25.) 4:2 Iambukkon hanami do na ponop-ponop,sihailahononkon; seng marakal-akal hanami, anjaha seng ipalsuhon hanami hata ni Naibata, tapi marhitei na mambaritahon hasintongan in talar-talar, gabe ipataridahkon hanami do dirinami bani haganup uhur panimbangion ni jolma ilobei ni Naibata. (bd. 2:17; 1 Tes. 2:5.) 4:3 Anjaha anggo tartutup ambilan na madear, na niambilankonnami, bani na laho magou do in tartutup. (1 Kor. 1:18.) 4:4 Ai ipapitung Naibata ni dunia on do pingkiran ni na so porsaya, ase ulang iidah sidea sondang ni ambilan na madear pasal hasangapon ni Kristus, ai ma usihan ni Naibata. (Heb. 1:3.) 4:5 Ai sedo dirinami iambilankon hanami, tapi Kristus Jesus, Tuhan in do; ia hanami juak-juaknasiam do halani Jesus. (bd. 1:24.) 4:6 Halani Naibata, na dob mangkatahon; "Marsinalsal ma na lihar humbani na golap," Ia do paliharhon uhurnami, papoltak habotohon pasal sangap ni Naibata, na ibagas bohi ni Kristus. (bd. 3:18; 1 Mus. 1:3.) 4:7 Tapi ibagas ianan na urah mabolah do iboan hanami arta on, ase Naibata simada hagogohon na sumurung in, ulang hanami. (bd. 5:1.) 4:8 Ibagas haganup do hanami hona odoh-odoh, tapi lang tarpisat; marhabiaran, tapi lang putus pangarapan; (bd. 1:8; 7:5.) 4:9 hona ayak-ayak, tapi lang itadingkon; ipatompaskon, tapi lang maropuk. 4:10 Tongtong do iboan-boan hanami parmatei ni Jesus bani angkulanami, ase talar homa goluh ni Jesus ibagas angkulanami. (1 Kor. 15:31.) 4:11 Ai tongtong do hanami, na manggoluh ope, iondoskon hu hamateian halani Jesus, ase talar homa goluh ni Jesus bani dagingnami na ra matei on. (Rom 8:36.) 4:12 Ase hamateian do marhorja ibagas hanami, tapi hagoluhan do ibagas nasiam. 4:13 Tapi halani adong do bannami Tonduy haporsayaon in, songon na tarsurat in: "Na porsaya do ahu, halani ai do ase husahaphon,"hanami pe porsaya do, ai do ase marsahap age hanami, (Ps. 116:10.) 4:14 halani ibotoh hanami, paboa Si puhoi Jesus in, papuhoonni do age hanami rap pakon Jesus in, anjaha pajongjongonni rap pakon nasiam hulobeini. (1 Kor. 6:14.) 4:15 Tapi haganupan in halani nasiam do, ase lambin gandani idop ni uhur in, gabe marhitei buei jolma lambin surungni homa hatarimakasihon bahen hasangapon ni Naibata. (bd. 1:3-6.) 4:16 Halani ai seng marnaloja hanami, ai lambin roh burukni pe hajolmaonnami pardarat on, tapi parbagas ai, ari-ari do ipabayu. (Ep. 3:16.) 4:17 Ai sitaronnami sisonari anjaha na hampung porsanon, in do manjadihon bannami hasangapon na tarsulur, na tarlobih hamuliaonni sadokah ni dokahni,(Rom 8:17, 18.) 4:18 halani ikawahkon hanami na so taridah in, sedo na taridah in; ai tongkin do na taridah in, tapi totap do ronsi sadokah ni dokahni na so taridah in.(Heb. 11:1, 3.)

2 Korint 5

5:1 Ai ibotoh hanami do, anggo irumbakkon lampo-lamponami na i dunia on, adong do bannami rumah humbani Naibata, rumah na so pinauli ni tangan, na totap sadokah ni dokahni i nagori atas. (Joh. 4:19; 2 Ptr. 1:13, 14.) 5:2 Ai sadokah ijon marhoih do hanami, anjaha masihol manolukkon ianannami na hun nagori atas ai, (Rom 8:23.) 5:3 ase marhitei na manolukkon ai, seng talanjang hanami dapot. 5:4 Ai sanggah i parlampo-lampoan on hanami, marhoih do hanami anjaha boratan, halani sihol uhurnami, ase ulang itanggali, tapi isolukkon ma lah, ase ibondut hagoluhan ai na ra matei on. (1 Kor. 15:53.) 5:5 Tapi na pasirsirhon hanami hujai, ai ma Naibata, na mambere bannami Tonduy in songon sikoram. (bd. 1:22; Rom 8:16, 23; Ep. 1:13, 14.) 5:6 Ase tenger do uhurnami tongtong, anjaha ibotoh hanami, daoh ope hanami humbani Tuhan in, sadokah marianan hanami ibagas angkula on, (Heb. 11:13.) 5:7 ai ibagas haporsayaon do pardalanannami, lape ibagas na mangidah.(1 Kor. 13:12.) 5:8 Tenger do uhurnami, anjaha malasan do uhurnami pindah humbani angkula on, laho marianan rap pakon Tuhan in. (Pil. 1:23.) 5:9 Halani ai iporluhon hanami do, ase harosuhni hanami, atap sanggah ibagas angkula atap dob tanggal humbani angkula. (Ps. 39:13.) 5:10 Ai maningon talar do hita haganup ilobei ni paruhuman ni Kristus, ase ijalo bei domu hubani na hinorjahonni, sanggah ibagas angkula, atap na madear atap na masambor.(Lah. 17:31; Rom 2:16; 14:10.) 5:11 Ai pe, halani ibotoh hanami, biar bani Tuhan in, iojur hanami do jolma in ase porsaya; tapi talar do hanami bani Naibata, anjaha arap do uhurnami, talar do homa hanami ibagas panggora ni uhurnasiam. 5:12 Sedo na mangulaki hanami na mamuji-muji dirinami i lobeinasiam, tapi mambere dalan do bani nasiam, ase adong pamujionnasiam pasal hanami marimbang hasoman, na mamuji-muji diri pasal pardarat sedo pasal paruhuran. (bd. 3:1.) 5:13 Ai anggo siaran hanami, halani Naibata do ai; anjaha anggo maruhur hanami, halani nasiam do. 5:14 Ai holong ni uhur ni Kristus do na mangatur hanami, halani ibotoh hanami, anggo domma matei Na sada in manghophop haganup, na dob matei do sidea haganup. (Rom 14:7, 8.) 5:15 Anjaha manghophop haganup do Ia matei, ase ulang manggoluh bani dirini bei na manggoluh in, tapi ase manggoluh sidea Bani, na dob matei anjaha mulak manggoluh manghophop sidea. (1 Tim. 2:6.) 5:16 Halani ai seng itanda hanami be atap ise mangihutkon pardagingon; anjaha anggo itanda hanami pe na ijia Kristus mangihutkon pardagingon, tapi seng be sonai panandaionnami sonari. 5:17 Ase barang ise ibagas Kristus, na tinompa na baru ma in. Domma salpu sisapari, tonggor ma, domma gabe na baru. (Rom 8:1, 10; Gal. 6:15; Pangk. 21:5.) 5:18 Haganupan ai humbani Naibata do; ai Ia do padearhon hita Bani marhitei Kristus, anjaha ibere do bannami jabatan pardearan in. (Rom 5:10.) 5:19 Ai ipadear Naibata do dunia on Bani ibagas Kristus, marhitei na so i hira bani sidea panlanggaron ni sidea, anjaha iondoskon do bannami ambilan pardearan in. (Rom 3:24, 25; Kol. 1:19, 20.) 5:20 Ase utusan ni Kristus do hanami, sahira Naibata do mangojur marhitei hanami. Gantih ni Kristus do hanami mangelek: Sai ra ma nasiam padearon bani Naibata! (Jes. 52:7.) 5:21 On do ibahen Naibata: Manghophop hita gabe dousa do Ia, na so mananda dousa, ase gabe hapintoran ni Naibata hita ibagas Ia.(Gal. 3:13; Pil. 3:9; Heb. 4:15.)

2 Korint 6

6:1 Songon hasoman pangkorja, ipalumba hanami ma nasiam, ase ulang soya panjalonasiam bani idop ni uhur ni Naibata, (bd. 1:24; 5:20.) 6:2 ai nini do: Bani panorang idop ni uhur do ho hutangihon, anjaha bani panorang haluahon do ho huurupi. Tonggor ma, sonari ma panorang idop ni uhur, tonggor ma, sonari ma panorang haluahon. (Jes. 49:8; Luk. 4:9, 21.) 6:3 Seng mambahen partolsuan hanami atap bani aha pe, ase ulang hona risa jabatannami. 6:4 Ibagas haganup do ipatuduhkon hanami dirinami songon juak-juak ni Naibata: Ibagas hasabaron banggal, ibagas hamarsikon, ibagas hasunsahan, ibagas hasosakan, (bd. 11:23-27.) 6:5 ibagas na hona pukul, ibagas na tartutup, ibagas hageoron, ibagas halojaon, ibagas mangkar ni mata, ibagas parpuasaon, (bd. 11:23-27.) 6:6 ibagas hasusion, ibagas habotohon, ibagas lumbang ni uhur, ibagas habasaron, ibagas Tonduy Na pansing, ibagas holong ni uhur na so marsipakulah-kulah, (1 Tim. 4:12.) 6:7 ibagas hata hasintongan, ibagas hagogohon ni Naibata, ai ma marhitei sinjata hapintoran i siamun ampa i sambilou; (1 Kor. 2:4.) 6:8 marhitei na tarpuji ampa na hona parpahiri, marhitei hata-hata na masambor ampa hata na madear; songon halak na pakahouhon, hape parsintong do; 6:9 songon na so tinanda, hape na tinanda do; songon na laho matei, hape tonggor ma manggoluh do; songon halak na niarsik-arsik, hape seng tarbunuh;(bd. 4:10, 11; Ps. 118:18.) 6:10 songon na marhoru, hape tongtong do marmalas ni uhur; songon na miskin, hape buei do na ipabayak songon na so marnadong, hape haganup do adong bani.(Pil. 4:12, 13.) 6:11 Torang-torang do panluarnami bani nasiam, halak Korint, ungkab do uhurnami. 6:12 Seng sompit uhurnami mangidah nasiam, tapi uhurnasiam do na sompit. 6:13 Songon na bani anakku do hatangkon: Balos na dos hujai ma homa bahen nasiam: Palumbang nasiam ma homa uhurnasiam! (1 Kor. 4:14.) 6:14 Ulang ma sapasangan nasiam pakon na so porsaya! Ai aha ma pardomuan ni hapintoran ampa na so uhum, anjaha aha ma parsaoran ni haliharon ampa hagolapan? (Ep. 5:11.) 6:15 Aha ma pardomuan ni Kristus ampa Belial? Aha ma hasadaon ni na porsaya ampa na so porsaya? 6:16 Mintor ra ma mardomu rumah na mapansing ni Naibata ampa sisombah-sombahon? Ai hita do rumah na mapansing ni Naibata na manggoluh in, songon na hinatahon ni Naibata: Sihol marianan do Ahu itongah-tongah ni sidea anjaha mardalani, gabe Naibata ni sidea ma Ahu, anjaha sidea gabe bangsangku. (3 Mus. 26:12; 1 Kor. 3:16.) 6:17 Halani ai, luar ma hanima hun tongah-tongah ni sidea, anjaha paholang hanima ma dirinima, nini Tuhan in; ulang ma jamah hanima na butak, ase hujalo hanima! (Jes. 52:11; Pangk. 18:4.) 6:18 Jadi gabe Bapa ma Ahu bannima, anjaha hanima gabe anak ampa boru bangku, nini Tuhan, Sigomgom haganup. (Jer. 31:9; 32:38.)

2 Korint 7

7:1 Halani adong banta bagah-bagah na sonai, nasiam hinaholongan, paborsih hita ma dirinta humbani sagala na pabutakkon daging ampa tonduy, laho marayak hapansingon ibagas biar dompak Naibata. 7:2 Jalo nasiam ma hanami; seng adong na ijahati hanami, seng adong na iparseda hanami, anjaha seng adong na iuhur-uhuri hanami. (bd. 12:17; Lah. 20:33.) 7:3 Seng na laho manguhumi nasiam ase huhatahon in, ai domma huhatahon, na dob ibagas uhurnami do nasiam, ase rap matei anjaha rap manggoluh hita. (bd. 6:11-13.) 7:4 Banggal do tenger ni uhurhu bani nasiam, banggal do age pamujingku bani nasiam; tarapoh tumang uhurhu, marmalas ni uhur tumang do uhurhu ibagas haganup sitarononnami. 7:5 Ai age bani parrohnami hu Makedonia, seng marparsaranan dagingnami tapi sosak do ibagas haganup, parlawanan hun darat, biar hun bagas. (Lah. 20:1, 2.) 7:6 Tapi Naibata, siapoh na toruh maruhur. Ia do mangapoh hanami marhitei, parroh ni si Titus, (bd. 1:3, 4; 2:13.) 7:7 seng marhitei parrohni tumang, dihut do marhitei pangapohon, na jinaloni humbani nasiam; ai ibaritahon do bannami sihol ni uhurnasiam, partangisnasiam, ampa ringgas ni uhurnasiam manghophop ahu, gabe lambin malas ma uhurhu. 7:8 Ai pusok pe uhurnasiam hubahen marhitei surat ondi, seng husolsoli uhurhu. Anggo husolsoli pe lobei uhurhu, ai huidah pusok uhurnasiam tongkin ibahen surat ondi, (bd. 2:4.) 7:9 sonari nani malas do uhurhu, sedo halani na dob pusok ai uhurnasiam, tapi halani hamubahon ni uhur, pangkorhon ni pusok uhur ai do. Ai hunbani Naibata do pusok ni uhurnasiam, ase ulang rugi nasiam halani hanami ibagas atap aha pe. 7:10 Ai ihorhon pusok ni uhur na humbani Naibata do hamubahon ni uhur huluahon, seng marpanosalan; tapi pusok ni uhur dunia on mangkorhon hamateian.(Mat. 27:3-5.) 7:11 Tanda nasiam ma pusok ni uhur na humbani Naibata, na mangkorhon ibagas nasiam sonai buei ni ringgas ni uhur, pangapition, ringis, biar, sihol ni uhur, pongkut ni uhur ampa paminsangon. Ibagas haganupan ai domma ipatuduhkon nasiam, paboa borsih do nasiam ijai. 7:12 Ase hutongos pe surat ai bani nasiam; sedo halani parjahat ai, atap halani na jinahatanni, tapi ase talar do bani nasiam ilobei ni Naibata, ringgas ni uhurnasiam manghophop hanami. 7:13 Halani ai tarapoh do hanami. Ambah ni pangapohon na bannami ai, lambin malas do uhurnami halani malas ni uhur ni si Titus, ai sonang do tonduyni ibahen nasiam haganup. 7:14 Ai seng tarmela ahu, na hupapuji-puji ai nasiam dompaksi, tapi songon na ihatahon hanami haganupan in bani nasiam sintong-sintong, sonai do homa gabe sintong pamujinami dompak si Titus. 7:15 Anjaha lambin banggalni do holong ni uhurni bani nasiam, mardingat pambalosionnasiam haganup, sonaha panjalonasiam bani ibagas biar ampa hitir. (bd. 2:9.) 7:16 Malas do uhurhu, halani boi ahu martenger ni uhur bani nasiam ibagas haganup.

2 Korint 8

8:1 Tapi nasiam sanina, ipabotohkon hanami ma bani nasiam pasal idop ni uhur ni Naibata, na binereni bani kuria-kuria na i Makedonia. (Rom 15:26.) 8:2 Ai age pe ibagas parlajouan ampa sitaronon banggal sidea, tapi ibagas haganupan ai malas tumang do uhur ni sidea, gabe surung do halayakon ni sidea, age pe miskin tumang sidea. 8:3 Ibere sidea do domu hubani na tarbahen sidea, husaksihon do ai, lobih humbani na tarbahen sidea tene, humbani rosuh ni sidea. 8:4 Gogoh do ipindo sidea humbannami, ase boi dihut sidea mandalankon horja idop ni uhur, laho mangurupi halak na mapansing ai. (bd. 9:1; Lah. 11:29.) 8:5 Anjaha lobih humbani na niarapkonnami, ai diri ni sidea do parlobei ibere sidea bani Tuhan in, pakon hubannami, domu hubani rosuh ni Naibata, 8:6 gabe iojur hanami ma si Titus, ase itoruskon i itongah-tongahnasiam horja idop ni uhur on, songon na dob pinungkahni hinan. 8:7 Tapi songon bani haganup marhasurungan nasiam, ai ma bani haporsayaon, bani hata, bani habotohon, bani sagala haringgason, bani holong dompak hanami, sihol ma sonai hasurungannasiam age bani horja idop ni uhur on. (1 Kor. 1:5; 16:1, 2.) 8:8 Sedo songon parentah hatangkon, tapi laho manguji sintong ni holong ni uhurnasiam do marimbang habujuron ni halak na legan. 8:9 Ai ibotoh nasiam do idop ni uhur ni Tuhanta Jesus Kristus, na bayak hinan, gabe miskin halani nasiam, ase bayak nasiam halani sombuhni ai.(Mat. 8:20.) 8:10 Ibagas pahara on sonon do pingkiranku sihatahononku: Dear ma ai bani nasiam, ai domma ipungkah nasiam tahun na salpu, sedo pitah na mandalankon, tapi dihut do na mansurahon. 8:11 Ase sonari pe dalankon nasiam ma homa in, ase songon porlu ni uhur laho manriahkon, sonai ma homa mandalankon, domu hubani na tarbahen. 8:12 Ai anggo adong porlu ni uhur, si hamalashononkon do ai domu hubani na adong, seng domu hubani na so adong. (Pod. 3:27, 28; Mrk. 12:43.) 8:13 Artini ai sedo ase sonang na legan, hape susah nasiam; marsipadosan ma namin. 8:14 Anggo sonari na lobih bani nasiam ma manggoki na hurang bani sidea, ase na lobih bani sidea manggoki na hurang bani nasiam, ase dos, 8:15 songon na tarsurat in: Na marnah na buei seng marlobih-lobih, anjaha na marnah na otik seng hurangan. (2 Mus. 16:18.) 8:16 Tapi tarimakasih ma bani Naibata, na mamberehon ringgas ni uhur na sonin hubagas uhur ni si Titus, laho manghophop nasiam. 8:17 Na ra do ia ojuron, anjaha lambin hinsah do uhurni roh marayak nasiam humbani rosuhni sandiri. 8:18 Anjaha rap pakonsi isuruh hanami do sanina in, na tarpuji bani ganup kuria in, halani ambilan na madear in. 8:19 Anjaha seng pitah ai, tapi na ipabangkit kuria in do ia mangkasomani hanami bani horja idop ni uhur on, na idalankon hanami bahen hasangapon ni Tuhan in ampa laho patuduhkon ringgas ni uhurnami. (Gal. 2:10.) 8:20 Ibahen hanami sonai, ase ulang adong na manghata-hatai hanami pasal tumpak na banggal, na nidalankonnami, 8:21 ai ipingkiri hanami do na madear, seng pitah ilobei ni Tuhan in, tapi dihut do homa ilobei ni jolma. 8:22 Anjaha rap pakon sidea isuruh hanami do saninanami na legan, dob gati iuji hanami ringgas ni uhurni ibagas buei pahara, anjaha sonari lambin tambah do ringgas ni uhurni, halani banggal ni tenger ni uhurni bani nasiam. 8:23 Ia si Titus, ai ma hasomanku anjaha hasoman sahorja bani nasiam, anjaha hasomannami ai, ai ma suruhan ni kuria-kuria, sipasangap Kristus. (bd. 7:13; 12:18.) 8:24 Ai pe, pataridahkon nasiam ma bani sidea holong ni uhurnasiam ampa pamujinami bani nasiam, ilobei ni kuria in! (bd. 7:14.)

2 Korint 9

9:1 Ia pasal pangurupion na bani halak na mapansing, seng porlu be surathononku ai bani nasiam. (bd. 8:4, 20.) 9:2 Ai hubotoh do ringgas ni uhurnasiam, na dob pala hupapuji-puji ilobei ni halak Makedonia, paboa na dob marugas Akaya humbani na tahun in ope, anjaha haringgasonnasiam ai do manjuljul sibueian hasoman ai. (bd. 8:19.) 9:3 Tapi husuruh do sanina in, ase ulang lang mararti pamujinami bani nasiam pasal ai, ase sirsir ma nasiam tongon, songon na dob huhatahon hinan; (bd. 8:24.) 9:4 ase ulang, anggo roh halak Makedonia rap pakon ahu, jadi jumpah nasiam lang sirsir, gabe maila hanami, ulang ma lobei nasiam ihatahon hanami, halani tenger ni uhurnami in. 9:5 Halani ai porlu do nini uhurhu, marsuruh sanina in parlobei bani nasiam, laho pasirsirhon sibere-bere hatarimakasihon, na dob ipadankon nasiam, ase sirsir ma in, songon sibere-bere na unjah, ulang ma na hinolit. 9:6 Tapi ingat nasiam ma on: Na mantidahkon otik, otik do sabionni; na mantidahkon buei, buei do sabionni.(Pod. 11:24; 19:17.) 9:7 Ganup ma jinuljul ni uhurni, ulang ma humbani borat ni uhur atap halani paksa, ai ihaholongi Naibata do halak na malas uhur mambere. (Rom 12:8.) 9:8 Ai markuasa do Naibata mambere unjah sagala pasu-pasu bani nasiam, ase sungkupan nasiam tongtong bani haganup, anjaha marlobih-lobih nasiam bani ganup horja na madear, 9:9 domu hubani na tarsurat in: Ia do na mambagihon, ibere do bani na miskin; totap do hapintoranni ronsi sadokah ni dokahni. (Ps. 112:9.) 9:10 Anjaha na pasirsirhon bonih bani sipanabur ampa indahan bani na mangankon, pasirsiron anjaha pagandaonni do bani nasiam sisaburhononkon anjaha pabueionni buah ni hapintoronnasiam. (Jes. 55:10; Hos. 10:12.) 9:11 ase bani haganup nasiam ipabayak, laho mandalankon halayakon, na mangkorhon tarima kasih bani Naibata, marhitei hanami. (bd. 1:11; 4:15.) 9:12 Ia horja panumpakion on seng pitah na manungkupi hahurangan ni halak na mapansing ai in, tapi surung do pangkorhon ni ai homa marhitei buei martarima kasih bani Naibata. (bd. 8:14.) 9:13 Ai marhitei habujuronnasiam bani horja panumpakion on ipuji sidea do Naibata, halani ibalosi nasiam do ambilan na madear ni Kristus marhitei hasaksiannasiam, anjaha halani unjah nasiam marsibere-bere ibagas parsaorannasiam pakon sidea ampa haganup halak na legan. 9:14 Anjaha itonggohon sidea do nasiam ibagas sihol ni uhur bani nasiam, mardingat idop ni uhur na tarsulur, na humbani Naibata bani nasiam. 9:15 Tapi tarima kasih ma bani Naibata halani sibere-bereni, na so tarpajojor in.

2 Korint 10

10:1 Ahu, si Paulus, hupodahi ma nasiam marhitei halamlamon ampa hasabaron ni Kristus, ahu na toruh maruhur dompak nasiam anggo dumpar bohi bei, tapi na barani anggo padaoh-daoh, (1 Kor. 2:3.) 10:2 ahu mangindohon, ase anggo padumpar bohi holi, ulang pala tarpaksa ahu patuduhkon habaranionku, songon na dob husurahon martindak koras dompak deba halak, na manghira hanami manggoluh mangihutkon pardagingon. (ay. 11; 1 Kor. 4:21.) 10:3 Tongon ibagas daging ope hanami, tapi seng mangihutkon pardagingon hanami marporang. 10:4 Ia sinjatanami marporang sedo sinjata pardagingon, tapi gok hagogohon do humbani Naibata, laho manrumbakkon benteng-benteng. (Ep. 6:3-17.) 10:5 Irumbakkon hanami do sura-sura ampa uhur hagijangon na manlawan habotohon na humbani Naibata, anjaha itaban hanami do sagala pingkiran, ase pambalosi ai bani Kristus. 10:6 Anjaha sirsir do hanami maminsang sagala naso mambalosi, anggo domma gok pambalosionnasiam. 10:7 Tonggor nasiam ma na talar ilobei nasiam in! Anggo adong na mangahap, Kristus do simadasi, iuhurhon ma on homa, paboa songon Kristus simadasi, sonai do homa hanami. 10:8 Ai anggo hutambahi pe pamujingku bani kuasa, na binere ni Tuhan in bannami, laho pauli-ulihon do, sedo laho parsedahon nasiam, seng maila ahu ibagas ai. (bd. 12:6; 1 Kor. 5:4, 5.) 10:9 Ulang ma adong na mangagan, na mambiar-biari nasiam do ahu marhitei surat in. 10:10 Ai adong do na mangkatahon: Koras anjaha margogoh do suratni in, tapi anggo dumpar, galek do ia anjaha seng maharga hatani. (ay. 1.) 10:11 Ipingkiri halak ai ma on, paboa sonin hadirionnami ibagas hatanami marhitei surat sanggah daoh, sonai do homa ibahen hanami sanggah dumpar. 10:12 Seng barani hanami padoskon atap pausihkon dirinami bani halak na pajuntul-juntulhon dirini, na mangukur dirini marhitei ukuran ni sidea sandiri, na pausihkon dirini marhitei dirini sandiri homa. Seng dong pangarusion ni sidea. (bd. 3:1; 5:12.) 10:13 Tapi seng ra hanami mamuji-muji dirinami ibagas na so marukuran, tapi mangihutkon ukur-ukuran na dob tinontuhon ni Naibata do bannami, na das ronsi bani nasiam homa. (Rom 12:3.) 10:14 Seng na manalpui hawajibannami hanami, songon na so ongga bani nasiam. Ai lang hanami do, na roh mamboan ambilan na madear pasal Kristus bani nasiam? 10:15 Anjaha seng tarlanjur hanami, gabe ipuji hanami dirinami marhitei buah ni horja ni halak na legan. Tapi arap do uhurnami lambin toguhni ma haporsayaonnasiam ibagas nasiam, ase lambin bolagni ma parhorjaan, na itotapkon bannami, (Rom 15:20.) 10:16 laho mangambilankon ambilan na madear bani nagori-nagori sidaohan ope humbani nasiam, tapi lang pala manalpui balog parhorjaan ni halak na legan, anjaha manghamegahkon buah ni horja ni sidea. (Lah. 19:21.) 10:17 Tapi na mamuji dirini, marhitei Tuhan in ma ia mamuji! (Jer. 9:22, 23; 1 Kor. 1:31.) 10:18 Ai sedo halak na mamuji dirini, na totap botul, tapi na niuji ni Tuhan in do. (1 Kor. 4:5.)

2 Korint 11

11:1 Sai ra ma nasiam otik manganju habodohonku! Nai ma tene, anju nasiam ma ahu! 11:2 Ringis ni Naibata do na adong bangku manghophop nasiam; ai domma hupatunangankon nasiam bani sada Dalahi, anjaha hupasirsir nasiam bani Kristus songon sada anak boru na so haliaban. (Ep. 5:26, 27.) 11:3 Tapi biar do uhurhu songon si Hawa nasiam, na pinaoto-oto marhitei akal-akal ni ulog, gabe seda pingkiran nasiam, anjaha manirpang humbani bulus ni uhur dompak Kristus. (1 Mus. 3:4, 13.) 11:4 Halani ihadearhon nasiam do, anggo adong na roh mangambilankon Kristus legan humbani na iambilankon hanami, anjaha ijalo nasiam do tunduy na legan, na so jinalonasiam hinan, barang ambilan na madear na legan, na so jinalonasiam hinan. (Gal. 1:8, 9.) 11:5 Tapi nini uhurhu, seng etekan ahu marimbang apostel na banggal in. (bd. 12:11; 1 Kor. 15:10; Gal. 2:6, 9.) 11:6 Tapi anggo hurang pandei pe ahu bani hata, tapi lang anggo bani habotohon; tongtong do ipataridahkon hanami ai bani nasiam ibagas haganup. (1 Kor. 2:2, 13; Ep. 3:4.) 11:7 Atap na mardousa do ahu, halani hupatoruh diringku, ase ipagijang nasiam, ai ma, halani huambilankon ambilan na madear na humbani Naibata bani nasiam, seng pala mangindo upah? (1 Kor. 9:12, 18.) 11:8 Humbani kuria na legan do hubuati, hujalo upah humbani sidea, laho marhorja bani nasiam. (Pil. 4:10, 15.) 11:9 Anjaha ia hurangan pe ahu itongah-tongah nasiam, seng husunsahi age ise; ai sanina, na roh hun Makedonia, ai do patukkon na hurang bangku. Tongtong do hujaga diringku, ase ulang husunsahi nasiam, sonai do homa hulobeian on. (bd. 12:13.) 11:10 Halani hasintongan ni Kristus na ibagas ahu, puji-pujian on seng bulih langlangon bangku i nagori Akaya. (1 Kor. 9:15.) 11:11 Halani aha? Halani na so holong do uhurhu bani nasiam? Naibata do mambotohsi. 11:12 Tapi na hubahen nuan, age hulobeian on pe bahenonku do, laho manlanglangi paruhuran ni halak do, na marsura-surahon ase dos hanami pakon sidea bani pamujion in. 11:13 Ia sidea, apostel parladung do, parhorja sipakulah-kulah, na pausih-usihkon dirini bani apostel ni Kristus. (bd. 2:17; Pil. 3:2.) 11:14 Seng pala longang uhur ijai, ai age sibolis ipausih-usih do dirini bani malekat haliharon. 11:15 Seng pala ganjil ai, anggo juak-juakni pausih-usihkon dirini bani juak-juak ni hapintoran. Domu hubani horjani do ujung ni sidea bei. 11:16 Huulaki ma mangkatahon: Ulang ma adong na mangagan na bodoh ahu. Tapi anggo sonai do, jalo nasiam ma ahu songon na bodoh, ase tarpuji-puji ahu diringku otik. (bd. 12:6.) 11:17 Ia na huhatahon on, seng huhatahon in mangihutkon pingkiran ni Tuhan in, tapi songon na bodoh do, domu hubani pambahen ni na mamuji-muji diri. 11:18 Halani buei na mamuji-muji diri mangihutkon pardagingon, dihut ma ahu mamuji-muji diri. 11:19 Ai lang malas do uhurnasiam manganju halak na bodoh, halani pentar nasiam? 11:20 Tongon sabar do nasiam, anggo iparjabolon halak nasiam, anggo ionsop darohnasiam, anggo ibuati parbagianannasiam, anggo adong na pagijang-gijang dirini, anggo ipastap nasiam. 11:21 Hamelaon do namin hatangkon, ra na galek do hanami ijai. Tapi, anggo adong barang ise na pag mangunsagahkon atap aha pe, ahu pe barani do mangunsagah. Haotoon do namin hatangkon. 11:22 Halak Heber do sidea? Ahu pe homa. Halak Israel do sidea? Ahu pe homa. Ginompar ni si Abraham do sidea? Ahu pe homa. (Pil. 3:5.) 11:23 Juak-juak ni Kristus do sidea? Haotoon do hatangkon: Lobihan do ahu. Lobihan manaron torik ni horja, gati tartutup, gati hona bogbog, gati ibagas parmaraan hamateian. (1 Kor. 15:10.) 11:24 Lima hali ma ahu ilonsingi halak Jahudi, ompat-ompat puluh pukul hurang sada. (5 Mus. 25:3.) 11:25 Tolu hali ma ahu ibogbogi, sahali ipargijig bani batu, tolu hali harom, sadari saborngin mumbang-umbang i laut bolag, (Lah. 14:19; 16:22.) 11:26 gati ipardalanan, marmara i bah banggal, marmara ibahen panrampok, marmara humbani bangsangku sandiri, marmara humbani bangsa sipajuh begu-begu, marmara ibagas huta, marmara i halimisan, marmara i laut, marmara itongah-tongah ni sanina sipakulah-kulah. 11:27 Loja do ahu anjaha sunsah, gati mangkar matangku, loheian anjaha horahan, gati marpuasa, marborgoh anjaha hurangan hiou. (bd. 6:5.) 11:28 Sobali ni in, adong ope na mandondon ahu ari-ari, ai ma na mansarihon haganup kuria in. (Lah. 20:18-21.) 11:29 Ise na galek, seng dihut ahu galek? Ise na gabe sangsi ibahen halak, seng dihut milas uhurhu? (1 Kor. 9:22.) 11:30 Anggo maningon mamuji diri ahu, hagalekonkin ma hupapuji-puji. (bd. 12:5.) 11:31 Ia Naibata, Bapa ni Tuhan Jesus, na tarpuji ronsi sadokah ni dokahni, ibotoh do na so marladung ahu. (bd. 1:23.) 11:32 I Damaskus, ijagai wakil ni raja Aretas do huta Damaskus, laho manangkap ahu. 11:33 Jadi ibagas karanjang ma ahu itantan humbani jandela hudarat ni tembok, gabe maluah humbani tanganni. (Lah. 9:24-25.)

2 Korint 12

12:1 Maningon mamuji diri, age seng marguna namin; ase patugahonku ma panonggoran ampa pangungkabon na humbani Tuhan in. 12:2 Hutanda sada jolma ibagas Kristus; sapuluh ompat tahun ma dob salpu ai (atap na ibagas angkula ia seng hubotoh, atap na idarat ni angkula ia seng hubotoh, Naibata do mambotohsi), na tarangkat do halak ai ronsi lapis patoluhon ni nagori atas. 12:3 Anjaha hutanda do jolma ai (tapi atap na ibagas angkula ia ijia, atap sirang humbani angkula, seng hubotoh, Naibata do mambotohsi), 12:4 na tarangkat do ia ronsi Paradeiso, anjaha ibogei do hata, na so tarhatahon, na so boi tarsahaphon jolma. 12:5 Pasal halak ai mamuji-muji ma ahu, tapi pasal diringku seng mamuji-muji ahu sobali halani hagalekonkin. (bd. 11:30.) 12:6 Ai anggo hupapuji-puji pe diringku, seng na so maruhur ahu ijai, ai na sintong do hatangku. Tapi huhorom mando ai, ase ulang lobih ahu ihira halak humbani na niidahni bangku ampa na binogeini humbangku. (bd. 10:8; 11:16.) 12:7 Anjaha, ase ulang huhagijangkon pangungkabon na tarsulur na hubangku ai, ibere do bangku sada duri ibagas dagingku, ai ma suruhan ni sibolis, na manghantam ahu, ase ulang hupagijang diringku. (Job 2:6.) 12:8 Tolu hali ma hupangindo humbani Tuhan in, ase tanggal in humbangku. 12:9 Jadi nini ma hubangku: Sungkup do idop ni uhurhu bam, ai ibagas hagalekon do gabe gok hagogohon.Ase dearan ma hupuji diringku halani hagalekon, ase sogop bangku hagogohon ni Kristus. 12:10 Halani ai sonang do uhurhu ibagas hagalekon, hahirion, hasunsahan, parburuon ampa hasosakan halani Kristus, ai sanggah galek ahu, iuji do ahu margogoh. (Pil. 4:13.) 12:11 Na dob gabe maoto ahu hape! Nasiam do na mamaksa ahu sonai. Patut do namin palobeionnasiam ahu. Ai seng adong tadingku humbani apostel na banggal in, age pe na lang ahu. (bd. 11:5.) 12:12 Napamasa do namin tanda ni apostel itongah-tongahnasiam ibagas sagala hasabaron, marhitei tanda ampa halongangan pakon hagogohon. (Rom 15:19.) 12:13 Ai aha ma adong hatadingannasiam marimbang kuria na legan in, sobali ni na so husunsahi in nasiam? Sasap nasiam ma hasalahankin! (bd. 11:9.) 12:14 Tonggor nasiam ma, domma pala patoluhalihon sirsir ahu marayak nasiam, anjaha sedo na laho manunsahi ahu. Ai sedo na adong bani nasiam sihol pindahanku, tapi nasiam sandiri do. Ai seng patut anak patumpu-tumpu arta bani namatorasni, tapi namatorasni do bani anakni. (bd. 13:1.) 12:15 Tapi malas do uhurhu mambere, lanjar mamberehon diringku manghophop tonduynasiam. Anggo lobih panghaholongingku bani nasiam, mase ma hurang ahu ihaholongi? (Pil. 2:17.) 12:16 Sonai pe ai, seng husunsahi nasiam, tapi halani parakal ahu, gabe hubuat do uhurnasiam ibagas akal. 12:17 Ai adong mambuat untung ahu humbani nasiam, marhitei halak na husuruh bani nasiam? 12:18 Huojur do tongon si Titus, anjaha husuruh sanina in manghasomanisi. Ai adong do mambuat untung si Titus humbani nasiam? Ai lang ibagas sada Tonduy do hanami marparlahou? Ai lang sada do bokas iirikkon hanami? (bd. 8:6, 16-18.) 12:19 Domma ipingkir uhurnasiam hinan, na mamintori diri do hanami ilobei nasiam? Ilobei ni Naibata, ibagas Kristus ihatahon hanami: Haganupan ai, nasiam hinaholongan, laho pauli-ulihon nasiam do. 12:20 Ai mabiar do ahu, atap lang dapot ahu nasiam bani parrohku, domu hubani na pinindo ni uhurhu, anjaha ahu pe seng jumpah nasiam songon na pinindo ni uhurnasiam, anjaha mabiar do ahu, atap adong do itongah-tongahnasiam paringoran, parsimburuon, ringis, uhur haut, hata tundal, panrisaon, uhur hagijangon ampa hageoron. (bd. 10:2; 1 Kor. 4:6.) 12:21 Sai ulang ma ipatoruh Naibatangku ahu itongah-tongahnasiam bani parrohku use, gabe pala tangis ahu halani buei halak na mardousa hinan, na so manolsoli uhurni pasal habutakon, parriah-riahon ampa hasumsamon, na hinorjahon ni sidea. (bd. 2:1; 13:2.)

2 Korint 13

13:1 Patoluhalihon ma ahu roh sonari marayak nasiam. Sipaputuson do sagala parsahapan marhitei hasaksian ni dua atap tolu halak saksi. (5 Mus. 19:15; 1 Tim. 5:19.) 13:2 Songon na dob hupatugah bani parrohku paduahalihon ijia, sonai age sonari, age pe lang ijin ahu, ahu patugahkon use bani sidea, na mardousa hinan, sonai homa bani haganup halak na legan, paboa rohhonsi ahu holi, seng maralang-alang ahu atap bani ise pe. 13:3 Ipangindo nasiam do tene tanda, atap na tongon do marsahap Kristus marhitei ahu, na seng galek bani nasiam, tapi marhagogohon do itongah-tongahnasiam. 13:4 Ai tarsilang pe Ia halani hagalekon, tapi manggoluh do Ia marhitei hagogohon ni Naibata. Anjaha hanami pe galek do ibagas Ia, tapi manggoluh do rap pakonsi marhitei hagogohon ni Naibata itongah-tongahnasiam. (Pil. 2:7, 8.) 13:5 Lajou nasiam ma dirinasiam, atap na ibagas haporsayaon do nasiam, pareksa nasiam ma dirinasiam. Ai na so ibotoh nasiam do bani dirinasiam, paboa na ibagas nasiam do Jesus Kristus? Anggo lang, na so talup ma nasiam. (1 Kor. 11:28.) 13:6 Tapi arap do uhurhu, botohonnasiam do, paboa sedo na so talup hanami. 13:7 Tapi martonggo do hanami bani Naibata, ase ulang ihorjahon nasiam na jahat, sedo ase talup hanami idahon, tapi ase ihorjahon nasiam do na madear, hanami na songon na so talup idahon. 13:8 Ai seng adong gogohnami mangimbang hasintongan in, tapi manghophop hasintongan in do. 13:9 Ai malas do uhurnami anggo galek hanami, tapi margogoh ia nasiam. Lanjar in do tonggonami, ase lambin toguh uhurnasiam. 13:10 Husurat do on, sanggah holang ope ahu, ase ulang rohkonsi ahu, koras ahu mamakei kuasa na binere ni Tuhan in bangku. laho pauli-ulihon, sedo laho parsedahon. (bd. 11:8.) 13:11 Ambah ni ai, nasiam sanina, malas ma uhur nasiam, sai ra ma nasiam patorsaon, sai ra ma nasiam palumbaon, sauhur ma nasiam, sai mardamei ma nasiam, anjaha ihasomani Naibata parholong anjaha pardamei in ma nasiam. (Rom 15:33; Pil. 4:4.) 13:12 Marsitabian ma nasiam marhitei summah na mapansing. (1 Kor. 16:20.) 13:13 Idop ni uhur ni Tuhanta Jesus kristus ampa holong ni uhur ni Naibata pakon parsaoran ni Tonduy Na pansing ma manghasomani nasiam haganup!(Rom 5:5; Gal. 6:18.)

Galatia 1

1:1 Humbani si Paulus, ai ma apostel, sedo humbani jolma atap marhitei sada jolma, tapi marhitei Jesus Kristus anjaha marhitei Naibata Bapa do, na dob papuhohonSi humbani na matei, (ay. 11, 12.) 1:2 rap pakon sanina in haganup, na mangkasomani ahu, hubani kuria-kuria na i nagori Galatia. 1:3 Idop ni uhur ma bani nasiam ampa damei humbani Naibata Bapa pakon humbani Tuhanta Jesus Kristus, (Rom 1:7.) 1:4 na dob mamberehon dirini halani dousanta, laho paluahkon hita humbani dunia sisonari, na jahat on, mangihutkon uhur ni Naibata Bapanta. (bd. 2:20; 1 Tim. 2:6; 1 Joh. 5:19.) 1:5 Bani ma hasangapon ronsi sadokah ni dokahni. Amen. 1:6 Longang do uhurhu, halani sonin podasni nasiam marbalik hum-Bani, na dob mandilo nasiam marhitei idop ni uhur ni Kristus, laho mangihutkon ambilan na madear na legan, 1:7 ai seng adong na legan. Tapi adong do halak na manggeori uhurnasiam, anjaha na sihol paubahkon ambilan na madear ni Kristus. (Lah. 15:1, 24.) 1:8 Tapi porini hanami, atap malekat na hun nagori atas pe, mangambilankon ambilan na madear bani nasiam, legan humbani na dob niambilankonnami, hona papa ma ia. (1 Kor. 16:22.) 1:9 Songon na dob ihatahon hanami hinan, sonari pe sonai do huhatahon: Anggo adong na mangambilankon ambilan na madear bani nasiam, legan humbani na dob jinalonasiam, hona papa ma ia. 1:10 Rosuh-rosuh ni jolma do na hupindahi ijai, atap rosuh ni Naibata do? Na mantin bani pinggol ni jolma do na hupindahi?Ambit sonai, seng sintong ahu juak-juak ni Kristus. (1 Tes. 2:4.) 1:11 Ai hupatugah ma bani nasiam sanina, ia ambilan na madear na huambilankon in, sedo na humbani jolma in. 1:12 Ai seng hujalo atap huguruhon in humbani jolma, tapi marhitei pangungkabon ni Jesus Kristus do. 1:13 Ai domma ibogei nasiam parlahouhu, sanggah ibagas ha-Jahudion ope ahu, sonaha parahni parburungku bani kuria ni Naibata, laho parsedahon ai. (Lah. 26:9-18.) 1:14 Surungan do ahu humbani buei hasomanku magodang mangkorjahon ha-Jahudion, ai na tarlobih do pongkut ni uhurhu manghaporluhon aturan-aturan na humbani ompungnami. 1:15 Tapi ipapulig Naibata do ahu, humbani parnaibatan nari, anjaha idilo do ahu halani idop ni uhurni, (Jer. 1:5; Rom 1:1.) 1:16 anjaha marosuh do Ia patalarhon Anakni in bangku, ase huambilankon Ia bani halak sipajuh begu-begu. Seng lobei marguru ahu ijia bani daging ampa daroh, (bd. 2:7; Mat. 16:17.) 1:17 anjaha seng tangkog ahu hu Jerusalem, marayak apostel, na dob parlobei humbangku; tapi hu tanoh Arab do ahu laho. Dob ai use mulak ma ahu hu Damaskus. 1:18 Dob salpu tolu tahun, tangkog ma ahu hu Jerusalem, laho marayak si Kepas, anjaha tondok ma ahu bani sapuluh lima ari dokahni. (Lah. 9:26.) 1:19 Tapi seng adong huidah apostel na legan, sobali si Jakobus, sanina ni Tuhan in. (Mat. 13:55.) 1:20 Ia na husurat on bani nasiam, ilobei ni Naibata do on, paboa sedo na marladung ahu. 1:21 Dob ai laho do ahu hu nagori Siria ampa Silisia. (Lah. 9:30.) 1:22 Tapi seng itanda kuria ni Kristus, na i nagori Judea, anggo bohingku. 1:23 Pitah na tarbogei do bani sidea: "Na marburu hita ijia, ia do sonari mangambilankon haporsayaon, na pinarsedani ijia." 1:24 Jadi ipasangap sidea ma Naibata halani ahu.

Galatia 2

2:1 Ipudi ni ai, dob salpu sapuluh ompat tahun, tangkog ma ahu use hu Jerusalem rap pakon si Barnabas; anjaha huboan do homa si Titus. (Lah. 15:2.) 2:2 Tapi mangihutkon pangungkabon do na tangkog ai Ahu. Anjaha hupatorang ma bani sidea ambilan na madear na huambilankon bani halak sipajuh begu-begu, tarlobih ma ai hubani na sangap-sangap ai, ase ulang soya parlintunonku hu lobeian on age na dob in. (ay. 6, 9.) 2:3 Gari si Titus, hasomankin, halak Gorik in, seng ipaksa ase tarsunat. (Lah. 16:3.) 2:4 Tapi adong do deba sanina na so haru sanina, na pasamak-samakkon dirini, na roh masuk bannami, laho manggompangi hamardekaon na adong bannami ibagas Jesus Kristus, laho patunduk hanami bani parjabolonon. (Lah. 15:1, 24.) 2:5 Tapi tongkin pe lang tunduk hanami bani sidea, ase totap bani nasiam hasintongan ni ambilan na madear in. (bd. 3:1.) 2:6 Tapi sidea na marsangap ai (atap ise sidea hinan, seng penting bangku ai, ai seng siidah bohi Naibata), seng adong itambahi sidea bani na adong bangku hinan. 2:7 Tapi suharni ai do, iidah sidea do, na dob iondoskon do bangku ambilan na madear hubani halak na so marsunat, songon si Petrus hubani halak na marsunat. (Lah. 9:15; 15:12; 22:21.) 2:8 Ai Ia, na pabangkithon si Petrus gabe apostel bani halak na tarsunat, lanjar Ia do pabangkithon ahu bani halak na so marsunat. 2:9 Anjaha dob iidah sidea idop ni uhur na dob binere bangku, ai ma si Jakobus, si Kepas ampa si Johannes, na songon tiang iahap hasoman, gabe ijabat-tangani sidea ma ahu pakon ni Barnabas, ai ma tanda ni parsaoran, paboa hanami hubani sipajuh begu-begu, tapi sidea hubani na marsunat, (Joh. 1:42.) 2:10 asal ma iingat hanami halak na masombuh; anjaha saud do huporluhon mandalankon ai. (Lah. 11:30; 12:25.) 2:11 Tapi sanggah roh si Kepas hu Antiokia, dumpar do hulawan ia, halani torang adong salahni. 2:12 Ai paima roh piga-piga halak suruhan ni si Jakobus, rap mangan do ia pakon sipajuh begu-begu, tapi dob roh sidea, surut ma ia anjaha ipaholang ma dirini, halani biar ni uhurni bani sidea na marsunat ai. (Lah. 11:3.) 2:13 Anjaha halak Jahudi na legan ai pe dihut do marsipakulah-kulah, pala do age si Barnabas dihut bani hasipakulah-kulahon ni sidea ai. 2:14 Tapi dob huidah, na so pintor be langkah ni sidea domu hubani hasintongan ni ambilan na madear in, ningku ma dompak si Kepas ilobei ni sidea haganup: Anggo ham, sada halak Jahudi, manggoluh mangihutkon adat ni sipajuh begu-begu, sedo adat ni Jahudi, sonaha ma boi paksaonmu halak sipajuh begu-begu, mangihutkon adat Jahudi? 2:15 Halak Jahudi do hanami mangihutkon partubuh, sedo pardousa humbani sipajuh begu-begu. 2:16 Tapi ibotoh hanami do, na so dapotan hapintoran jolma marhitei na mangkorjahon titah, tapi marhitei haporsayaon bani Jesus Kristus do. Halani ai, hanami pe, marhaporsayaon do bani Kristus Jesus, ase ipintori hanami marhitei haporsayaon bani Kristus, sedo marhitei na mangkorjahon titah, ai marhitei na mangkorjahon titah, seng adong na dapotan hapintoran. (Rom 3:20, 28; 4:5; 11:6; Ep. 2:8.) 2:17 Tapi anggo pardousa do jumpah age hanami, na sihol pintor marhitei Kristus, ai lang juak-juak ni dousa ma age Kristus? Lang ale! 2:18 Tapi anggo hupauli ase na dob huparseda, hupajongjong do diringku sipanlanggar. 2:19 Ai domma matei ahu bani titah in marhitei titah in, ase manggoluh ahu bani Naibata. Raphon Kristus in do ahu tarsilang. (Rom 7:6.) 2:20 Seng be ahu na manggoluh in nuan, tapi Kristus do manggoluh ibagas ahu. Ia manggoluh pe ahu nuan ibagas daging, ai ma manggoluh ibagas haporsayaon bani Anak ni Naibata, na manghaholongi ahu anjaha na mamberehon dirini manghophop ahu. (bd. 1:4; Joh. 17:23.) 2:21 Seng hutulak idop ni uhur ni Naibata, ai ambit adong hapintoran marhitei titah, soya ma parmatei ni Kristus.

Galatia 3

3:1 E nasiam, halak Galatia na so maruhur! Ise do na mandormai nasiam? Ai domma pala targambar bani panonggornasiam Jesus na tarsilang in. 3:2 Pitah on sihol botohonku humbani nasiam: Humbani horja titah do ijalo nasiam Tonduy in, atap humbani ambilan haporsayaon do? 3:3 Sonin ma hape nasiam maoto? Ibagas Tonduy do ipungkah nasiam; hape sonari ibagas daging do pangujungini ibahen nasiam? 3:4 Mintor soya ma panarononnasiam na buei in? Eak, anggo tongon soya-soya. 3:5 Ia, na mambere Tonduy in bani nasiam, anjaha na mangkorjahon hagogohon ibagas nasiam, ai sonaha, marhitei horja titah atap marhitei ambilan haporsayaon do in? 3:6 Songon si Abraham: Porsaya do ia bani Naibata, jadi ai do ihira bani gabe hapintoranni. (1 Mus. 15:6.) 3:7 Ase botoh nasiam ma, halak na porsaya, ai do anak ni si Abraham. 3:8 Surat in pe domma ibotoh hinan, paboa marhitei haporsayaon do pintoran ni Naibata sipajuh begu-begu, gabe ibaritahon do hubani si Abraham: Marhitei ho do pasu-pasuon haganup bangsa. (1 Mus. 12:3.) 3:9 Ase, halak na porsaya in do ipasu-pasu rap pakon si Abraham na porsaya in. (Rom 4:16.) 3:10 Ai haganup halak, na sihol manggoluh humbani na mangkorjahon titah, ikuasai papa do, ai tarsurat do: Hona papa do ganup, na so totap ibagas haganup na tarsurat ibagas buku titah in, ase ihorjahon ai. (5 Mus. 27:26.) 3:11 Tapi torang do, paboa seng adong na pintor ilobei ni Naibata bahenon ni titah in, ai "Parpintor humbani haporsayaon do na manggoluh". (Hab. 2:4; Rom 1:17.) 3:12 Tapi seng humbani haporsayaon anggo titah in, ai na mangkorjahonsi, ai do na manggoluh bahenonni in. (3 Mus. 18:5.) 3:13 Itobus Kristus do hita humbani papa ni titah in, marhitei na hona papa Ia manghophop hita, ai tarsurat do: Hona papa do haganup na targantung bani hayu,(Rom 8:3; 2 Kor. 5:21.) 3:14 ase ibagas Kristus Jesus sogop bani halak sipajuh begu-begu pasu-pasu na bani si Abraham, ase marhitei haporsayaon ijalo hita Tonduy na pinarbagah-bagah in. 3:15 Nasiam sanina, hasomalan na masa bani jolma ma huhatahon: Parpadanan ni jolma, anggo domma totap ai, seng iosei ai, atap itambahi. 3:16 Ia bagah-bagah ai, hubani si Abraham ampa hubani ginomparni do ihatahon. Seng ihatahon: "Ampa bani sagala ginomparni", songon hubani na buei, tapi hubani sada halak do: "Ampa hubani ginomparmu", ai ma Kristus. (1 Mus. 22:18.) 3:17 On do na huhatahon ijai: Ia padan, na dob pinatotap ni Naibata, seng boi sundat in bahenon ni titah, na roh ompat ratus tolu puluh tahun i pudini in, gabe lumei bagah-bagah in ibahen. (2 Mus. 12:40.) 3:18 Ai anggo humbani titah do paneanon in, seng be humbani bagah-bagah in; tapi marhitei bagah-bagah do ibere Naibata in bani si Abraham. (Rom 11:6.) 3:19 Ase bahen aha do titah in? Itambahkon do in halani panlanggaron, paima roh Ginompar, simada bagah-bagah in, iparentahkon marhitei malekat-malekat marparhiteian sada siholang. (Lah. 7:53; Rom 5:20.) 3:20 Ia siholang sedo na paturei-tureihon salopah tumang, tapi sada do anggo Naibata. 3:21 Ase na mangimbang bagah-bagah ni Naibata do titah in? Lang ale! Ai ambit ibere titah na margogoh pagoluhkon, humbani titah in ma tongon hapintoran. (Rom 8:2-4.) 3:22 Tapi itutup Surat in do haganup hubagas dousa, ase marhitei haporsayaon bani Jesus Kristus ibere bagah-bagah in bani na porsaya. (Rom 3:9; 11:32.) 3:23 Tapi paima roh haporsayaon, tartutup do hita ibagas kuasa ni titah, anjaha ikunsi managam haporsayaon, na sihol sipatalaron ope. (bd. 4:3.) 3:24 Ase siparorot do titah in banta, paima roh Kristus, ase humbani haporsayaon hita ipintori. 3:25 Tapi dob roh haporsayaon in, seng be ibagas kuasa ni siparorot in hita. (Rom 10:4.) 3:26 Ai haganup do nasiam anak ni Naibata marhitei haporsayaon bani Kristus Jesus.(Joh. 1:12; Rom 8:17.) 3:27 Ai haganup nasiam, na tardidi hubagas Kristus, Kristus do iparhiouhon nasiam. (Rom 6:3; 13:14.) 3:28 Seng dong be ijai Jahudi barang Gorik, jabolon barang halak na mardeka, dalahi barang naboru, ai sada do nasiam haganup ibagas Kristus Jesus. (Rom 10:12; 1 Kor. 12:13.) 3:29 Tapi anggo Kristus simada nasiam, ginompar ni si Abraham do nasiam, anjaha panean mangihutkon bagah-bagah in. (ay. 7; Rom 8:7.)

Galatia 4

4:1 Tapi on do na huhatahon: Sadokah danak ope panean in, seng dong leganni humbani jabolon, age pe ia tuan simada haganup, 4:2 tapi itoruh ni kuasa ni sipanramoti ampa sijolom anakkunsi do ia, das bani panorang, na tinontuhon ni bapani hinan. 4:3 Sonai do homa hita: Sadokah danak hita, iparjabolon kuasa ni unsur-unsur ni dunia on do hita. (bd. 3:23; 5:1; Kol. 2:20.) 4:4 Tapi dob gok panorangni, isuruh Naibata ma Anakni, tubuh humbani naboru, ginomgoman ni titah,(Ep. 1:10.) 4:5 ase itobus na ginomgoman ni titah in, ase ijalo hita hak haanakon. (bd. 3:13.) 4:6 Tapi halani anak nasiam, isuruh Naibata do hubagas uhurta Tonduy ni Anakni in, na mandilohon: Abba, Bapa! (Rom 8:15.) 4:7 Ase, seng be jabolon ham, tapi anak do. Tapi anggo anak, lanjar panean ma, marhitei Naibata. (bd. 3:29; Rom 8:16, 17.) 4:8 Tapi ijia, sanggah lape itandai nasiam Naibata, ibalosi nasiam do naibata-naibata, na so Naibata mangihutkon hadirionni. 4:9 Tapi sonari, domma itanda nasiam Naibata, atap sasintongni, Naibata do na mananda nasiam. Mase ma nasiam marbalik use, mulak hubani kuasa ni unsur-unsur na so margogoh anjaha na lumei, ase balosannasiam ai use? 4:10 Gabe siramotkon ari, bulan, panorang na tinontuhon pakon tahun do nasiam. (Rom 14:5; Kol. 2:16.) 4:11 Mabiar do uhurhu pasal nasiam, atap na soya do halojaonku manghophop nasiam. (2 Joh. 8.) 4:12 Nasiam sanina, hupindo ma bani nasiam, songon ahu ma nasiam, ai ahu pe songon nasiam do. Seng ongga na so pintor ibahen nasiam bangku. (2 Kor. 2:5.) 4:13 Tapi ibotoh nasiam do, ibagas hagalekon ni daging do huboan ambilan na madear bani nasiam bani mulani ondi. (Lah. 16:6; 1 Kor. 2:3.) 4:14 Anjaha sanggah na tarlajou nasiam halani pardagingonku, seng magigi barang mapas uhurnasiam pasal ai, tapi songon malekat ni Naibata do ijalo nasiam ahu, songon Kristus Jesus do tene. 4:15 Ija do nuan hatuahonnasiam in? Ai husaksihon ma bani nasiam, sihol buatonnasiam do ijia matanasiam, laho mambere ai bangku, ambit na tarbahen. 4:16 Ai na gabe imbangnasiam do ahu, halani huhatahon bani nasiam hasintongan? (Ams. 5:10.) 4:17 Seng pitah haringgason ni sidea ai bani nasiam, tapi sihol padaraton ni sidea do nasiam, ase ringgas nasiam manghophop sidea. (bd. 1:7.) 4:18 Dear do tongtong marringgas ni uhur nasiam dompak na madear, anjaha ulang ma pitah sanggah i lambungnasiam ahu. 4:19 Nasiam niombahku, na dob huarou use, paima manjadi rupa ni Kristus ibagas nasiam. (1 Kor. 4:15.) 4:20 Iparsinta uhurhu do, ase itongah-tongahnasiam ahu sonari, anjaha tarpadear-dear ahu sorangku, ai jut do uhurhu pasal nasiam. 4:21 Nasiam na marosuh gomgoman ni titah in, hatahon nasiam ma bangku: Ai lang domma ibogei nasiam titah in? (ay. 9; 3:23.) 4:22 Tarsurat do ijai: Dua do anak ni si Abraham, sada humbani jabolonni naboru anjaha na sada nari humbani boru mardeka ai. (1 Mus. 16:15; 21:2.) 4:23 Tapi mangihutkon daging do partubuh ni na humbani boru jabolon ai, tapi humbani bagah-bagah do na humbani boru mardeka ai. (Rom 9:7-9.) 4:24 Limbaga na mararti do in. Ai padan na dua in do sidea: Na sada hun dolog Sinai, na manubuhkon anak gabe jabolon, ai ma si Hagar. (bd. 5:1; Rom 8:15.) 4:25 Ai Hagar ai ma dolog Sinai i tanoh Arab, anjaha usih ma ai bani Jerusalem sisonari, ai jabolon do ai rap pakon niombahni. 4:26 Tapi Jerusalem na iatas ai, ai do boru mardeka ai, anjaha ai do inang banta. (Heb. 12:22.) 4:27 Ai tarsurat do: Marmalas ni uhur ma ho na lambang, na so tubuhan tuah; marolob-olob ma ho anjaha marsora na gogoh, na so mangarou anak. Ai buei do niombah ni na punjung in, bueinan humbani na marparamangon. (Jes. 54:1.) 4:28 Tapi nasiam sanina, anak bagah-bagah do nasiam mangihuthon si Isak. (Rom 9:7, 10.) 4:29 Tapi ijia age sonari, iparburu na tubuh mangihutkon daging do na tubuh mangihutkon Tonduy. (1 Mus. 21:9; 2 Tim. 3:12.) 4:30 Tapi aha do nini Surat in? Usir ma boru jabolon in rap pakon anakni, ai seng bulih anak ni boru jabolon in rap manean pakon anak ni boru mardeka in. (1 Mus. 21:10, 12.) 4:31 Ase, nasiam sanina, sedo anak ni boru jabolon hita, tapi anak ni boru mardeka do. (bd. 3:29.)

Galatia 5

5:1 Ase mardeka hita, ai do ase imardekahon Kristus hita. Totap ma nasiam jongjong, anjaha ulang be ra nasiam patundukon ni pasangan parjabolonon! (bd. 4:5, 31; Lah. 15:10.) 5:2 Ahu si Paulus manghatahon bani nasiam: Anggo ipasunathon nasiam dirinasiam, otik pe lang marguna be Kristus bani nasiam. 5:3 Huulaki ma manaksihon bani haganup jolma: Na pasunathon diri, maningon horjahononni do haganup titah in. 5:4 Na dob sirang do nasiam humbani Kristus, anggo sihol pintor nasiam marhitei na mangkorjahon titah, domma madabuh nasiam humbani idop ni uhur. 5:5 Ai na paima-imahon do hita bani hapintoran siaraphonon ai marhiteihon Tonduy, maronjolan bani haporsayaon. 5:6 Ai ibagas Kristus Jesus marsunat atap lang marsunat, seng dong gogoh ni ai, tapi haporsayaon sihorjahon holong ai do. (bd. 6:15; 1 Kor. 7:19.) 5:7 Dear hinan do pardalannasiam, ise do na manlanglangi nasiam, gabe seng be pambalosi nasiam bani hasintongan in? 5:8 Pangojur-ojuron na sonai, seng humbani na mandilo nasiam roh ni ai. (bd. 1:6.) 5:9 Ragi na otik mambahen migar ganup itak na niagu. (1 Kor. 5:6.) 5:10 Tenger do uhurhu bani nasiam marhitei Tuhan in, seng na margoling uhurnasiam. Tapi barang ise pe na manggeori nasiam, sai porsanonni do uhum na hubani. (bd. 1:7; 2 Kor. 11:15.) 5:11 Anjaha ahu, nasiam sanina, ambit huambilankon parsunaton, mase ma pala parburuon ahu? Ambit sonai, maronti ma parsangsian halani silang in. (1 Kor. 1:23.) 5:12 Ikasih ma namin na manggeori nasiam. (Ps. 12:4.) 5:13 Ai hu hamardekaan do nasiam tardilo, nasiam sanina, tapi ulang ma pakei nasiam hamardekaonnasiam in gabe bonsir mambalosi daging, tapi marsibalos-balosan ma nasiam ibagas holong. (1 Ptr. 2:16.) 5:14 Ai haganup titah in ibagas hata na sangkababah on do rimpunni: Haholongi ma hasomanmin songon dirimu! (3 Mus. 19:18.) 5:15 Tapi anggo marsiharatan anjaha marsipanganan nasiam samah nasiam, jaga ma nasiam, ase ulang marsisedaan nasiam. 5:16 Tapi on do na huhatahon: Marguru bani Tonduy in ma nasiam marparlahou, anjaha ulang ma suhun-suhuni nasiam hisap-hisap ni daging in. (ay. 25.) 5:17 Ai na mangimbang tonduy do sura-sura ni daging, anjaha na mangimbang daging do sura-sura ni tonduy; na marsilawanan do in, ase lang tarpasaud nasiam, pinindo ni uhurnasiam. (Rom 7:15, 23.) 5:18 Tapi, anggo Tonduy do na mambobahon nasiam, seng be ginomgoman ni titah in nasiam. (Rom 8:14.) 5:19 Tapi talar do horja ni daging, ai ma: Parriah-riahon, habutakon, goluh na so marrantei, (1 Kor. 6:9.) 5:20 marnaibata na legan, hadatuon, parmunsuh-munsuhon, partinggilon, parsimburuon, ringis, uhur haut, parbolah-bolahon, parlegan-leganon, 5:21 subil, parmabukon, marpoya-poya ampa na usih hujai. Songon na dob huhatahon bani nasiam ijia, sonai do age sonari: Sihorjahon na sonai, seng teanon ni ai harajaon ni Naibata. (Ep. 5:5; Pangk. 22:15.) 5:22 Tapi on do buah ni Tonduy: Holong, malas ni uhur, damei, lumbang ni uhur, habasaron, halayakon, haporsayaon, halamlamon ampa panrajaion diri.(Ep. 5:9.) 5:23 Seng marlawan titah dompak na sonai ai. (1 Tim. 1:9.) 5:24 Tapi halak na ginomgoman ni Kristus Jesus, iparsilangkon do dagingni, hisap-hisapni ampa rosuh-rosuhni. (Rom 6:6; Kol. 3:5; 1 Ptr. 2:11.) 5:25 Anggo domma ipagoluh Tonduy in hita, mardalan ma hita homa mangihuthon Tonduy in. (ay. 16; Rom 8:4.) 5:26 Ulang ma parayak hita hasangapon na lumei, ulang ma marsipagila-gilaan, anjaha ulang ma marsilateian. (Pil. 2:3.)

Galatia 6

6:1 Nasiam sanina, anggo dong tardapot halak ibagas sada panlanggaron, nasiam na marpartonduyon ma patorsa-torsahonsi marhitei tonduy halamlamon, tapi jaga dirimu, ase ulang dihut ham tarlajou. (Mat. 18:15; Jak. 5:19.) 6:2 Marsiurupan ma nasiam, mamorsan na borat in, ai marhiteihon ni in idalankon nasiam do titah ni Kristus. (Rom 14:1.) 6:3 Ai anggo ipajuntul-juntul halak dirini, hape aha pe lang ia, na paoto-otohon dirini do ai. 6:4 Tapi ganup ma mamareksa horjani bei; jadi halani dirini tumang ma ia mamuji-muji diri, sedo halani na legan, (2 Kor. 13:5.) 6:5 ai ganup do adong siporsanonni bei. (Rom 14:12; 2 Kor. 5:10.) 6:6 Tapi patut do na niajaran bani hata ni Naibata mambere humbani sagala artani bani na mangajarisi. (1 Kor. 9:14.) 6:7 Ulang ma kahou nasiam, seng ra Naibata apasan! Ai ia in itidahkon halak, ai do sabionni. 6:8 Na manidahkon bani dagingni, manabi do humbani dagingni hamagouan; tapi na manidahkon bani tonduy, manabi do humbani tonduy hagoluhan sisadokah ni dokahni.(Rom 8:13.) 6:9 Tapi ulang ma marnaloja hita mambahen na madear, ai na manabi do use hita bani panorangni, anggo seng gabe galek hita sonari. (2 Tes. 3:13.) 6:10 Ai pe, halani sompat ope, horjahon hita ma na madear bani haganup halak, tapi bueinan bani hasomanta sahaporsayaon. (2 Ptr. 1:7.) 6:11 Tonggor nasiam ma, sonaha banggal-banggal ni huruf na husurat bani nasiam marhitei tanganku sandiri. 6:12 Haganup na marsura-sura sangap bani pardagingon, ai do na mamaksa nasiam ase tarsunat, pitah, ase ulang marsitaronon sidea halani silang ni Kristus. (bd. 5:11; Pil. 3:18.) 6:13 Ai gari sidea, siparsunat ai, seng idalankon titah in, tapi ihasiholhon sidea do, ase tarsunat nasiam, ase boi sidea mamuji diri marhitei dagingnasiam. 6:14 Tapi daoh ma humbangku na mamuji diri, anggo lang halani silang ni Tuhan Jesus Kristus! Marhiteihonsi domma tarsilang dunia on bangku, anjaha ahu bani dunia on. (1 Kor. 1:31; 2:2.) 6:15 Atap na marsunat atap na so marsunat, seng dong age aha artini ai, tapi na tinompa na baru ai do. (bd. 5:6; 1 Kor. 7:19.) 6:16 Anjaha haganup na marparlahouhon ruhut sisonai ai, damei ampa idop ni uhur ma bani sidea, sonai homa bani Israel ni Naibata. 6:17 Hu lobeian on ulang adong be na manlojai ahu, ai hupaboan-boan do tanda ni ugah ni Jesus bani angkulangku. (2 Kor. 4:10.) 6:18 Idop ni uhur ni Tuhanta Jesus Kristus ma mangkasomani tonduynasiam, nasiam sanina! Amen.

Epesus 1

1:1 Humbani si Paulus, apostel ni Kristus Jesus, humbani rosuh ni uhur ni Naibata, hubani halak na pansing i Epesus, na porsaya bani Kristus Jesus. (Rom 1:7; 1 Kor. 1:2.) 1:2 Idop ni uhur ma bani nasiam ampa damei humbani Naibata Bapanta, pakon Tuhan Jesus Kristus. 1:3 Napuji ma Naibata, Bapa ni Tuhan Jesus Kristus, na dob mamasu-masuhon banta bagei ni pasu-pasu partonduyon hun nagori atas ibagas Kristus.(bd. 2:6.) 1:4 Ai ipilih do hita ibagas Ia, sanggah lape itombei dunia on, ase pansing hita anjaha lang panurakon i lobeiNi, ibagas holong ni uhur. (Joh. 15:16; 2 Tim. 1:9.) 1:5 Itotapkon hinan do hita Bani, gabe anak niainNi marhitei Jesus Kristus, mangihutkon rosuh ni uhurNi, (Joh. 1:12.) 1:6 gabe puji-pujian bani idop ni uhurni na marmulia in, na niidopkonNi banta ibagas na Hinaholonganni in. (Mat. 3:17.) 1:7 Ibagas Ia do dapot hita haluahon marhitei darohni, ai ma hasasapan ni panlanggaron, domu hubani habayakon ni idop uhurNi, (bd. 2:7, 18; 3:8, 16; Kol. 1:14.) 1:8 na unjah binerehonni banta ibagas hapentaron ampa hauhuron. 1:9 Ipabotohkon do banta rusia ni sura-sura ni uhurni domu hubani haputusan ni uhurni, na dob tinotaphonni hinan ibagas Dirini. (bd. 3:9; Rom 16:25.) 1:10 Isurahon do bani gok ni panorangni, pasadahon haganup, na adong i nagori atas ampa na iatas tanoh on, itoruh ni sada ulu, ai ma Kristus. (Gal. 4:4.) 1:11 Ibagas Ia do ipilih hita, na dob tinontuhonNi hinan domu hubani sura-suraNi, ai ma Naibata sipasaud haganupan ai, domu hubani rosuh ni uhurNi, (Rom 8:28; Kol. 1:12.) 1:12 ase tarpuji hasangaponNi marhitei hita, na dob mangarap hinan bani Kristus in. 1:13 Anjaha ibagas Ia do nasiam, dob ibogei nasiam hata hasintongan in, ai ma ambilan na madear pasal haluahonnasiam, anjaha ibagas Ia dob porsaya nasiam Bani, ilak nasiam marhitei Tonduy Na pansing, na pinarbagah-bagah in, (bd. 4:30.) 1:14 ai ma sikoram ni siteanonta in, bahen haluahon ni na hinophopni, ase tarpuji hasangaponNi in. (2 Kor. 1:22; 5:5.) 1:15 Ase ahu pe, dob hubogei, pasal haporsayaonnasiam bani Tuhan Jesus ampa holong ni uhurnasiam bani haganup halak na pansing in, (Kol. 1:4, 9.) 1:16 seng maronti ahu mangkatahon tarima kasih halani nasiam, mardingat nasiam, sanggah na martonggo ahu, 1:17 andohar ibere Naibata ni Tuhanta Jesus Kristus, Bapa ni hasangapon in bani nasiam Tonduy hapentaron ampa pangungkabon, laho mananda-Si. 1:18 Sai ipalihar Naibata ma mata ni uhurnasiam, ase ibotoh nasiam aha do arta siaraphononkon halani pandiloonNi ai, anjaha sonaha surung ni hasangapon, siteanon na hum-Bani, bani halak na mapansing in; 1:19 anjaha sonaha sulur ni habanggalon ni Kuasani in banta, na porsaya halani horja hagogohon na surung in, 1:20 na hinorjahonni bani Kristus, sanggah na pinapuhoNi ai Ia humbani na matei, anjaha ipahundul hu siamunni i nagori atas, (Ps. 110:1.) 1:21 hu atas ni sagala harajaon ampa kuasa ampa hagogohon ampa hamuliaon, ampa haganup goran, na targoran, seng pitah i dunia on, tapi dihut do bani na roh magira. (Kol. 2:10.) 1:22 Haganup do ipatunduk hu toruh ni naheiNi, anjaha ipabangkit do Ia kopala ni haganup, bani kuria in, (bd. 4:15; Ps. 8:7; Mat. 28:18.) 1:23 in ma angkulaNi, hagogokNi, na manggoki haganup ibagas haganup. (bd. 4:10; Rom 12:5; 1 Kor. 12:27.)

Epesus 2

2:1 Nasiam pe, na dob matei hinan halani panlanggaron ampa dousanasiam, (Kol. 2:13.) 2:2 ai ma na hinorjahon nasiam hinan mangihutkon panorang ni dunia on, mangihutkon rosuh ni na markuasa i awang-awang ai, ai ma tonduy na marhorja nuan ibagas jolma na so siat hata. (bd. 6:12; Joh. 12:31; Tit. 3:3.) 2:3 Raphon sidea do hinan age hita haganup manghorjahon hisap-hisap ni dagingta, ai ma ibagas na ipaihut-ihut hita sura-sura ni daging in hinan ampa rosuh-rosuhni; jadi jolma sigilaan do hita humbani biakta hinan, songon na legan ai. (Kol. 3:6.) 2:4 Tapi Naibata, na bayak bani idop ni uhur, halani holongNi na banggal in banta, 2:5 ipagoluh do hita raphon Kristus, sagala na dob matei ibagas panlanggaron (halani idop ni uhur do, ase maluah nasiam). (Luk. 15:24.) 2:6 Anjaha rap pakon Kristus Jesus do hita ipapuho, anjaha ipabangkit do hita hu gomgoman nagori atas ibagas Kristus Jesus, (Rom 8:10; Pil. 3:20.) 2:7 ase ipatuduhkon bani panorang na sihol roh ope, surung ni habayakonNi marhitei banggal ni habasaronni banta ibagas Kristus Jesus. (bd. 1:7.) 2:8 Ai humbani idop ni uhur do ase maluah nasiam, marhitei haporsayaon; sedo binahen nasiam, sibere-bere ni Naibata do. (Gal. 2:16.) 2:9 Sedo humbani horja, ase ulang adong na mamuji diri. (1 Kor. 1:29.) 2:10 Ai jadi-jadianNi do hita, na tinompa ibagas Kristus Jesus, bani horja na madear; hujai do hita ipasirsir Naibata hinan, ase ibagas ai hita marparlahou. (Tit. 2:14.) 2:11 Halani ai, nasiam sipajuh begu-begu hinan ibagas pardagingon, nasiam "na so siparsunat" igoran halak siparsunat ibagas daging marhitei tangan, ingat nasiam ma: (bd. 5:8.) 2:12 Ijia sirang do nasiam humbani Kristus; idarat ni warga Israel do nasiam, seng marulih bani padan bagah-bagah, seng marpangarapan, anjaha seng adong Naibata bani nasiam i tanoh on. (Rom 9:4.) 2:13 Tapi anggo sonari, ibagas Kristus Jesus do nasiam; anjaha daoh pe nasiam ijia, gabe ipadohor daroh ni Kristus do nasiam sonari. 2:14 Ai Ia do pardameian banta, na pasadahon na dua ai, anjaha na parsedahon dingding bolat-bolat ai, ai ma hamunsuhon ai. (Jes. 9:5; Gal. 3:28.) 2:15 Ai ibagas dagingNi do iparseda titah in rap pakon tonah-tonah ampa aturan-aturanNi, ase itompah ibagas diriNi na dua ai, gabe sada jolma na baru, bani na pinajongjongNi damei. (2 Kor. 5:17; Kol. 2:14.) 2:16 Anjaha ipadear do na dua ai ibagas angkula na sada ai bani Naibata marhitei silang ai; ai ijai do ibunuh hamunsuhon ai. 2:17 Dob roh Ia, ibaritahon do damei bani nasiam na daoh, damei homa bani na dohor. (Jes. 57:19; Sak. 9:10.) 2:18 Ai marhiteihonsi adong do dalan marayak Bapa in, banta haduasi ibagas sada Tonduy. (bd. 3:12.) 2:19 Ase lang be panginsolat atap partoloh nasiam, tapi hasoman saharajaon ni halak na mapansing do, anjaha hasoman sarumah ni Naibata.(Pil. 3:20; Heb. 12:22, 23.) 2:20 Ipauli do nasiam iatas ni onjolan ni apostel ampa nabi; Kristus Jesus sandiri do batu parsuhi ijin.(Jes. 28:16; Mat. 16:18.) 2:21 Ibagas Ia do mardomu ganup rumah in anjaha lambin banggalni, gabe rumah panumbahan na mapansing ibagas Tuhan in. 2:22 Ibagas Ia do homa nasiam ipauli-uli, gabe ianan ni Naibata ibagas Tonduy in. (1 Ptr. 2:5.)

Epesus 3

3:1 Halani ai, ahu si Paulus, na tarrantei halani Kristus Jesus, halani nasiam sipajuh begu-begu. 3:2 Tontu domma ibogei nasiam pasal jabatan mandalankon idop ni uhur ni Naibata, na dob pinadasni ai hubangku, laho paturei-tureihon nasiam. 3:3 Marhitei pangungkabon do ipabotohkon bangku rusia ai, songon na dob husuratkon hinan otik pasal ai. (bd. 1:9, 10.) 3:4 Bani na mambasa ai, boi ma botohonnasiam sonaha pangarusionku bani rusia ni Kristus. 3:5 Seng ipabotohkon ope ai bani anak ni jolma bani sundut sapari, tapi domma ipatalar ai nuan bani apostelni na pansing in ampa nabi-nabini, ibagas Tonduy, (Kol. 1:26.) 3:6 paboa dihut halak sipajuh begu-begu hasoman panean anjaha hasoman saangkula anjaha hasoman parrupei bani bagah-bagah na ibagas Kristus Jesus, marhitei ambilan na madear in. (bd. 2:13, 18, 19.) 3:7 Na dob gabe siparugas ni ai do ahu, domu hubani idop ni uhur na binere ni Naibata hubangku, domu hubani pangkorhon ni hagogohon ni ai. 3:8 Hubangku, sietekan humbani haganup halak na mapansing in, ibere idop ni uhur on, ai ma mangambilankon bani sipajuh begu-begu habayakon ni Kristus, na so tardadap in, (bd. 1:7; 1 Kor. 15:9, 10; Gal. 1:10.) 3:9 anjaha patorangkon sonaha dalan parsaud ni rusia ai, na ponop humbani mulani ibagas Naibata, Sitompa haganup, (Rom 16:25; Kol. 1:16.) 3:10 ase ipatandahon ma sonari, marhitei kuria in, buei ni masam ni hapentaron ni Naibata bani sipanrajai anjaha na markuasa i nagori atas, (Rom 11:33; 1 Ptr. 1:12.) 3:11 domu hubani na sinurahon-Ni humbani mula ni mulani, gabe ipasaud ibagas Kristus Jesus, Tuhanta in. (bd. 1:11.) 3:12 Marhiteihonsi jumpah hita do hinsah ni uhur ampa dalan masuk ibagas tenger ni uhur halani haporsayaon Bani. (Joh. 14:6; Rom 5:2; Heb. 4:16.) 3:13 Halani ai, hupindo ma bani nasiam, ase ulang mandolei nasiam mangidah sitarononku, na manghopkop nasiam, ai hasangaponnasiam do in. (Kol. 1:24.) 3:14 Halani ai, manrogop do ahu ilobei ni Bapa in. 3:15 Marpanggorani hu-Bani do sagala bapa ni bangsa-bangsa, na i nagori atas age nai tanoh on, 3:16 ase, domu hubani habayakon ni hasangaponNi in, ibere gogoh ampa kuasa marhitei Tonduyni bani jolma parbagas nasiam, (bd. 1:7; 6:10.) 3:17 ase marianan Kristus marhitei haporsayaon ibagas uhurnasiam, gabe totap nasiam marurat anjaha maronjolan bani holong,(Joh. 14:23; Kol. 2:7.) 3:18 ase boi nasiam rap pakon haganup halak na pansing in mangarusi sonaha ganjangni ampa bolagni, bagasni ampa gijangni, 3:19 anjaha mananda holong ni uhur ni Kristus, na mangatasi sagala pangarusion, ase das ma bani nasiam haganup hagogok ni Naibata. 3:20 Tapi tarbahen-Si do lobih humbani na pinindonta barang na piningkiranta, domu hubani hagogohon na marhorja ibagas hita. 3:21 Bani ma hasangapon ibagas kuria in ampa ibagas Kristus marsundut-sundut ronsi sadokah ni dokahni Amen.

Epesus 4

4:1 Ase ahu, na tarsangkut halani Tuhan in, huelek-elek ma nasiam: Parlahouhon nasiam ma na talup, domu hubani pandiloon na dob das bani nasiam! (Kol. 1:10.) 4:2 Martoruh ni uhur botul ma, marlamlam anjaha marlumbang ni uhur, marsianjuan ma nasiam ibagas uhur na holong! (Kol. 3:12.) 4:3 Haporluhon nasiam ma manramothon hasadaon ni tonduy, marhitei panrahut ni damei. 4:4 Sada daging anjaha sada tonduy, songon nasiam na tardilo ibagas sada pangarapan bani pandiloon ai,(Rom 12:5.) 4:5 sada Tuhan, sada haporsayaon, sada pandidion,(1 Kor. 8:6.) 4:6 sada Naibata, ai ma Bapa ni haganup, sigomgomi haganup, sitorusi haganup ampa siiani haganup.(1 Kor. 12:6.) 4:7 Tapi bani ganup do hita ibere idop ni uhur ai domu hubani ukuran ni pambere ni Kristus. (Rom 12:3, 6; 1 Kor. 12:11.) 4:8 Ai do ase nini: Naik do Ia hu atas, iboan raphon-Si na tartaban; ibere do sibere-bere bani jolma. (Ps. 68:19; Kol. 2:15.) 4:9 Tapi naik ma Ia, ai lang mararti ma ai, paboa na dob tuad do Ia lobei hubani ianan na itoruh ni tanoh? (Joh. 3:13.) 4:10 Ia, na dob tuad ai, lanjar Ia do na naik huatas ni haganup nagori atas, ase igoki haganup. 4:11 Lanjar Ia do mambere deba gabe apostel, deba nabi, deba evangelis, deba use parmahan ampa pangajari, (Lah. 21:8; 1 Kor. 12:28.) 4:12 laho pasirsirhon na mapansing in bani horja diakoni, laho pauli-ulihon daging ni Kristus in, (1 Ptr. 2:5.) 4:13 ase das hita haganup hu hasadaon ni haporsayaon ampa habotohon bani Anak ni Naibata, gabe jolma na gok, matoras anjaha gok songon Kristus, 4:14 ase ulang be hita danak, na pinalindak-lindak anjaha na binoanboan ni ganup logou ni ajaran, marhitei horja akal-akal ni jolma, marhitei sipaoto-oto na laho pakahouhon. (1 Kor. 14:20; Heb. 13:9.) 4:15 Gabe parhasintongan hita tene ibagas holong, anjaha lambin magodang ibagas haganup, mangayaki Ia, Ulu in, in ma Kristus. (bd. 1:22; 5:23; Kol. 1:18.) 4:16 Hum-Bani do haganup angkula in ipadomu anjaha iparapat, marhitei ganup urat-urat pangurupi, gabe lambin magodang daging in domu hubani horja ni ganup pagori bani bagianni bei, pinauli-uli ibagas holong. (Kol. 2:19.) 4:17 On do hatangku anjaha husaksihon ibagas Tuhan in: Ulang ma nasiam marparlahou songon halak sipajuh begu-begu, na mangihutkon pingkiran sisoya-soya. (Rom 1:21.) 4:18 Paruhur na golap do sidea, holang humbani goluh ni Naibata, halani haotoon ni uhur ni sidea, pakon halani mapir ni uhur ni sidea. (bd. 2:12.) 4:19 Lang be ibotoh sidea na maila, gabe iondoskon ma dirini hubani na marpoya-poya anjaha ihorjahon sagala habutakon marhasoman uhur haut. 4:20 Tapi anggo nasiam, seng sonai iguruhon nasiam pasal Kristus. 4:21 Ai Lang domma ibogei nasiam baritaNi, anjaha iajarhon pasal-Si domu hubani hasintongan na adong ibagas Jesus? (bd. 1:13.) 4:22 Tanggali nasiam ma jolma na buruk in, ai ma parlahou sisapari ai, ai laho magou do in hinorhon ni hisap-hisap sipaoto-oto. (Rom 8:13; Gal. 6:8; Kol. 3:9.) 4:23 Anjaha gabe bayu ma nasiam ibagas tonduy ni uhurnasiam (Rom 12:2.) 4:24 Anjaha pakei nasiam ma jolma na baru, na tinompa usih hubani Naibata, ibagas hapintoran ampa hapansingon na botul. (1 Mus. 1:26.) 4:25 Halani ai ambukkon nasiam ma ladung in anjaha hatahon nasiam ma na sintong, ganup dompak hasomanni jolma, ai pagori do hita samah hita. 4:26 Anggo manggila nasiam ulang ma mardousa! Ulang ma sundut mata ni ari, lang mintop ringis nasiam. (Ps. 4:5; Jak. 1:19, 20.) 4:27 Ulang ma pasiat nasiam sibolis in! 4:28 Sipanangko hinan, ulang be manangko, tapi ra ma ia loja, anjaha ihorjahon tanganni ma na madear, ase adong siberehononni bani na hurangan. 4:29 Ulang ma luar hata na mabutak humbani pamangannasiam, tapi na madear ma, na boi pauli-ulihon na hurang, ase dapotan ulih, na mambogeisi. (bd. 5:4; Kol. 3:16, 17; 4:6.) 4:30 Anjaha ulang ma pusoki nasiam Tonduy na pansing ni Naibata, na dob tinokanhon bani nasiam bani ari haluahon in. (bd. 1:13; Jes. 63:10.) 4:31 Sagala riting ni uhur, gila, marah, sorgang-sorgang, panrisaon ampa sagala hajahaton, sai ipadaoh ma humbani nasiam. (Kol. 3:8.) 4:32 Tapi basar ma nasiam samah nasiam, paridop ni uhur, anjaha sirsir marsisasapan dousa, songon panasap ni Naibata bani dousanasiam ibagas Kristus. (Mat. 6:14; 18:23-25.)

Epesus 5

5:1 Ai pe, sitiru Naibata ma nasiam, songon anak na hinaholongan! (Mat. 5:48.) 5:2 Anjaha marparlahou ma nasiam ibagas haholongan, songon Kristus na manghaholongi nasiam, anjaha ibere do dirini manghophop hita, gabe siluah ampa galangan bani Naibata, gabe uap na misbou. (ay. 25; Gal. 2:20; Heb. 10:10.) 5:3 Tapi parriah-riahon ampa bagei ni habutakon atap uhur haut pe, ulang ma tarsobut bani nasiam, songon na patut bani halak na pansing. 5:4 Sonai homa sihamelahononkon, hata sumsam, atap huria-huria na so patut, tapi sidearan ma sahap tarima kasih. (bd. 4:29.) 5:5 Ai botoh anjaha ingat nasiam ma: Anggo bani harajaon ni Kristus ampa Naibata, seng dong siteanon ni siparriah-riah, barang halak na mabutak, barang paruhur haut, ai sibalosi na so Naibata do in. (1 Kor. 6:9, 10.) 5:6 Ulang ma ra nasiam paoto-otoon ni atap ise pe marhitei hata-hata na lumei, ai halani ai do mangonai ringis ni Naibata bani halak na so mambalosi. 5:7 Halani ai, ulang ma nasiam ra marhasomanhon sidea! 5:8 Ai golap hinan do nasiam, tapi sonari lihar do nasiam ibagas Tuhan in; marparlahou ma nasiam songon anak haliharon; (bd. 2:11, 13; 1 Ptr. 2:9.) 5:9 ai buah-buah ni haliharon ai ma sagala halayakon, hapintoran ampa hasintongan. (Luk. 16:8; Joh. 12:36.) 5:10 Paruhurhon nasiam ma, atap aha do harosuh ni Tuhan in! (Rom 12:2.) 5:11 Ulang ma saor nasiam bani horja hagolapon, na so adong buahni, tapi patalar nasiam ma ai rahanan. 5:12 Ai gari manarsingati na hinorjahon ni sidea ibagas na ponop, hamelaon do ai. (Rom 1:24.) 5:13 Tapi maningon talar do ai, haganup, pinatalar ni haliharon in, ai sagala na pinatalar, lihar ma ai. (Joh. 3:20, 21.) 5:14 Halani ai, nini do: Puho ma ho na modom in, anjaha puho ma humbani na matei, gabe sondangan ni Kristus ma ho. 5:15 Halani ai paruhurhon ma, sonaha patut parlahounasiam, ulang ma songon halak na so maruhur, tapi songon halak siparuhur ma, (Mat. 11:16; Kol. 4:5.) 5:16 pangkei manggunahon panorang, ai ari hasunsahan do nuan. (Rom 12:11.) 5:17 Halani ai ulang ma maoto nasiam, tapi arusi nasiam ma, atap aha harosuh ni Tuhan in. (ay. 10.) 5:18 Anjaha ulang ma mabuk nasiam halani anggur, ai hamagouan do ibagas ai, tapi gok Tonduy ma nasiam! (Luk. 21:34.) 5:19 Marsahap ma nasiam samah nasiam marhitei doding psalm, doding puji-pujian ampa doding partonduyon, dodingkon anjaha puji nasiam ma Tuhan in ibagas uhurnasiam! (Ps. 33:2, 3; Kol. 3:16.) 5:20 Tongtong ma nasiam mangkatahon tarima kasih halani haganup bani Naibata Bapa, ibagas goran ni Tuhanta Jesus Kristus! 5:21 Marsibalosan ma nasiam, ibagas biar mangidah Kristus! (1 Ptr. 5:5.) 5:22 Nasiam parinangon, balosi nasiam ma paramangonnasiam, songon pambalosinasiam bani Tuhan in. (1 Mus. 3:16; Kol. 3:18; 1 Ptr. 3:1.) 5:23 Ai paramangon in do ulu ni parinangonni, songon Kristus ulu ni kuria in, sipaluah angkula, (kuria in). (1 Kor. 11:3.) 5:24 Songon pambalosi ni kuria in bani Kristus, sonai ma pambalosi parinangon bani paramangonni ibagas haganup. 5:25 Nasiam paramangon, haholongi nasiam ma parinangonnasiam, songon Kristus na manghaholongi kuria in anjaha ibere diriNi manghophopsi, (Kol. 3:19.) 5:26 ase ipapansing in, marhitei na ipaborsih marhitei na mandidihon bah ibagas Hata in, (Tit. 3:5.) 5:27 ase Ia sandiri pasirsir Kuria in Bani, sangap, seng martikas, seng marringut barang marhahurangan atap aha pe, tapi ase pansing tene anjaha seng dong sihataon. (Ps. 45:14; 2 Kor. 11:2.) 5:28 Sonai do patut haholongan ni paramangon parinangonni bei, songon angkulani sandiri. Na mangkaholongi parinangonni, dirini do hinaholonganni ijai. 5:29 Seng ongga isogami jolma daging ni, tapi iparmudu-mudu anjaha isarihon do ai, songon pambahen ni Kristus bani kuria in, 5:30 ai pagori ni angkulani do hita. (bd. 1:23; 1 Kor. 6:15.) 5:31 Halani ai tadingkonon ni halak do bapani ampa inangni, laho mangkasomani parinangonni, anjaha gabe sada daging do sidea na dua ai. (1 Mus. 2:24.) 5:32 Ia rusia on banggal do; tapi bani Kristus ampa kuria in do hulimbagahon in. 5:33 Ase ganup ma nasiam marsihaholongi parinangonni bei songon dirini sandiri, anjaha parinangon pe ihabiari ma paramangonni.

Epesus 6

6:1 Nasiam dakdanak, balosi nasiam ma namatorasnasiam ibagas Tuhan in, ai in do na pintor. (Kol. 3:20.) 6:2 "Pasangap bapamu pakon inangmu!" in do titah na parlobei marhasoman bagah-bagah, (2 Mus. 20:12.) 6:3 ai ma, "ase martuah ho anjaha dokah manggoluh i tanoh on!" (5 Mus. 5:10.) 6:4 Nasiam bapa, ulang pasoru-soru nasiam dakdanaknasiam; pagodang-godang nasiam ma sidea ibagas ajar ampa podah ni Tuhan in! (5 Mus. 6:7; Ps. 78:4; Pod. 19:18; 1 Kor. 3:21.) 6:5 Anjaha nasiam jabolon, balosi nasiam ma kopalanasiam na i tanoh on, marhasoman biar ampa gobir, ibagas bujur ni uhur, songon bani Kristus. (Tit. 2:9, 10; 1 Ptr. 2:18.) 6:6 Ulang ma pambalosi sanggah iidah tuannasiam tumang, songon na mambuat-buat uhur ni jolma, tapi songon jabolon ni Kristus ma horjahon nasiam rosuh ni Naibata, humbani gok ni uhur nasiam. 6:7 Humbani bujur ni uhur ma nasiam mambalosi, songon bani Tuhan in, sedo bani jolma. 6:8 Ai ibotoh nasiam do, suang do jaloon ni ganup humbani Tuhan in, anggo adong na madear na hinorjahonni, barang jabolon ia atap jolma na bebas pe. 6:9 Anjaha nasiam kopala-kopala, sonai ma bahen nasiam bani sidea, anjaha parontihon nasiam ma na sorgang-sorgang in, ai ibotoh nasiam do, i nagori atas do Tuhan ni sidea ampa Tuhannasiam, anjaha seng siidah bohi Ia. (Lah. 10:34; Kol. 4:1.) 6:10 Ambahni ai, Lambin margogoh ma nasiam ibagas Tuhan in ampa ibagas gogoh ni kuasaNi in.(1 Kor. 16:13; 1 Joh. 2:14.) 6:11 Pakei nasiam ma pakeian sinjata na humbani Naibata, ase boi tahan nasiam dompak akal-akal ni sibolis in. (2 Kor. 10:4.) 6:12 Ai seng maruntol hita manlawan daroh pakon daging, tapi dompak sipanrajai do, siparkuasa, sigomgomi dunia hagolapan on, tonduy hajahaton na i awang-awang ai. (bd. 2:2; Joh. 14:30.) 6:13 Halani ai, jalo nasiam ma pakeian sinjata na humbani Naibata, ase tarbahen nasiam manlawan bani ari na jahat ai, anjaha totap jongjong, dob italuhon nasiam ganupan in. 6:14 Ase, jongjong ma nasiam, margondit hasintongan bani binongeinasiam, marbaju bosi hapintoran, 6:15 anjaha nahei marsipatu ringgas ni uhur, laho mangambilankon ambilan na madear, pardameian in. (Mrk. 6:9.) 6:16 Ambah ni ganupan in, jalo nasiam ma gantar haporsayaon in, ai tarintopi nasiam do marhitei in haganup panah apuy ni parjahat in.(1 Ptr. 5:9; 1 Joh. 5:4.) 6:17 Jalo nasiam ma homa tangkuluk bosi haluahon ampa podang ni tonduy, ai ma hata ni Naibata.(1 Tes. 5:8; Heb. 4:12.) 6:18 Martonggo ma nasiam barang sadihari pe ibagas Tonduy in, ibagas tonggo ampa elek-elek, anjaha puho ampa golgol manonggohon haganup halak na susi in, (Mat. 26:41.) 6:19 age ahu pe, ase ibere bangku hatani, anjaha iungkab pamanganku laho pabotohkon rusia ni ambilan na madear in marhasoman hinsah ni uhur, (Lah. 4:29; Kol. 4:3; 2 Tes. 3:1.) 6:20 (halani in do ase marhorja ahu songon suruhan na tarrantei), ase marhinsah ni uhur ahu manghatahonsi, songon na patut. (2 Kor. 5:20.) 6:21 Tapi, ase ibotoh nasiam na masa bangku ampa horjangku, patugahon ni si Tikikus do bani nasiam ganupan in, ai ia do sanina na hinaholongan anjaha siparugas hatengeran ni uhur ibagas Tuhan in. (Lah. 20:4; 2 Tim. 4:12.) 6:22 Halani in do ase husuruh ia marayak nasiam, ase boi botohon nasiam na masa bannami, anjaha ase iapohi uhurnasiam. 6:23 Damei ma bani sagala sanina ampa holong raphon haporsayaon humbani Naibata Bapa in ampa humbani Jesus Kristus. (Kol. 4:7, 8.) 6:24 Idop ni uhur ma manghasomani haganup, na marholong ni uhur bani Tuhanta Jesus Kristus, na totap sadokah ni dokahni.

Pilipi 1

1:1 Humbani si Paulus ampa si Timoteus, juak-juak ni Kristus Jesus, bani haganup halak na pansing ibagas Kristus Jesus, na marianan i Pilippi, raphon sintua ampa siparugas: (1 Kor. 1:2; 1 Tim. 3:18.) 1:2 Idop ni uhur ma bani nasiam ampa damei humbani Naibata Bapanta ampa humbani Tuhan Jesus Kristus! (Rom 1:7.) 1:3 Mangkatahon tarima kasih do ahu bani Naibatangku siap huingat nasiam. (Rom 1:8; 1 Kor. 1:4.) 1:4 Tongtong ibagas ganup tonggongku pasal nasiam ganup, ibagas malas ni uhur do ahu na martonggo ai, 1:5 mardingat saornasiam bani ambilan na madear in humbani mungkahni ronsi nuan. 1:6 Anjaha tenger do uhurhu: Ia, na dob mamungkah horja na madear ibagas nasiam, dobhononNi do in das ronsi ari ni Kristus Jesus.(bd. 2:13; 1 Kor. 1:6-8.) 1:7 Patut do sonin uhurhu pasal nasiam haganup, halani ibagas uhurhu do nasiam, ai parrupei do nasiam ganup bani idop ni uhur na hubangku, sanggah na tartutup ai ahu age sanggah na martahankon ampa na pajonamkon ambilan na madear ai. 1:8 Ai Naibata do saksingku pasal banggal ni siholhu bani nasiam haganup marhitei holong ni atei ni Kristus Jesus. 1:9 Anjaha on do hutonggohon, ase lambin marbanggal holong ni uhurnasiam marisi habotohon ampa pangarusion nagok, 1:10 gabe boi nasiam mananda na ija siporlunan, ase pitah nasiam, anjaha seng dong sihataon bani ari ni Kristus, (Rom 12:2; 1 Tes. 5:23.) 1:11 gok bani buah-buah hapintoran, na roh marhitei Jesus Kristus, bahen hasangapon ampa puji-pujian bani Naibata. (Ep. 5:9.) 1:12 Ipangindo uhurhu do nasiam sanina, ase ibotoh nasiam, paboa lambin manumpak bani hamajuon ni ambilan na madear do na masa bangku, (2 Tim. 2:9.) 1:13 pala do tarbotoh bani ganup pangisi ni tangsi ai ampa bani haganup na legan ai, paboa halani Kristus do na targari ai ahu, 1:14 gabe roh tengerni do uhur ni bueinan sanina ai bani Tuhan in, anjaha roh boranini mangkatahon hata ni Naibata seng mabiar-biar. 1:15 Deba tongon homa manaksihon Kristus humbani uhur subil ampa paringoran, tapi deba nari humbani bujur ni uhur do. 1:16 Humbani jinuljul ni holong ma anggo on, halani ibotoh sidea, halani na martahankon ambilan na madear do, ase tartutup ahu. (ay. 7.) 1:17 Tapi na legan ai nani mangambilankon Kristus humbani uhur na maringor, seng humbani uhur na pitah, ase tambah nini uhur ni sidea sitaronon bangku na targari on. 1:18 Ase sonaha do? Atap na sonaha pe pardalan ni ai, marsipakulah-kulah atap maruhur na sintong, asal ma tarambilan Kristus; pasal ai malas do uhurhu. (bd. 2:17, 18.) 1:19 Tongon, malas do uhurhu, ai hubotoh gabe marujung bani hatuahon do on bangku halani tonggonasiam ampa halani pangurupi ni Tonduy ni Jesus Kristus. (2 Kor. 1:11.) 1:20 Ai in do na huhasiholhon, anjaha mangarap ahu seng anjai tarmela ahu ibagas atap aha pe, tapi marhasoman hinsah ni uhur, songon nasaindokah age sonari, maningon marsangap Kristus marhitei angkulangku, marhitei goluhku barang parmateihu. (1 Ptr. 4:16.) 1:21 Ai Kristus do hagoluhan bangku, anjaha untung do hamateian.(Gal. 2:20.) 1:22 Tapi anggo marbuah do horjangku hinorhon ni goluh ni daging on, gabe lang hubotoh barang aha do sipilihonku. (Rom 1:13.) 1:23 Haduasi do manosak ahu: Masihol do uhurhu misir, ase rap pakon Kristus, ai daoh do dearan ai, 1:24 tapi porlunan do marianan ibagas daging halani nasiam. (1 Raj. 19:2; 2 Kor. 5:8.) 1:25 Anjaha marhatengeran hujai, hubotoh do, paboa manggoluh ope ahu anjaha marianan pakon nasiam haganup, laho pamajuhon ampa pahinsah haporsayaonnasiam, 1:26 ase lambin tambah pamujinasiam bani Kristus Jesus marhitei ahu, rohkonsi ahu use bani nasiam. 1:27 Hansa, marparlahou ma nasiam domu hubani ambilan na madear ni Kristus, ase barang sanggah na roh ai ahu, huidah bani nasiam, barang age sanggah padaoh-daoh, hubogei bani nasiam, totap nasiam jongjong ibagas hasadaon ni tonduy, marsada ni uhur, marporang manghophop haporsayaon bani ambilan na madear in. 1:28 Anjaha ulang ma ra nasiam pabiar-biaran ni imbang pasal atap aha pe, ai ma tanda ni hamagouan bani sidea, tapi bani nasiam tanda ni haluahon do, anjaha humbani Naibata do in. 1:29 Ai domma ibere bani nasiam, seng pitah porsaya bani Kristus, tapi dihut do marsitaronon halani-Si. 1:30 Maruntol do nasiam nuan, songon na niidah nasiam ijia bangku, anjaha na binogeinasiam nuan bangku. (Lah. 16:22.)

Pilipi 2

2:1 Anggo adong apoh-apoh ibagas Kristus, pakon ojur-ojur ibagas holong ni uhur, pakon parsaoran ni Tonduy, pakon ontou ni uhur ampa idop ni uhur, 2:2 goki nasiam ma malas ni uhurhon: Sada ma paruhuronnasiam, sada ma haholongonnasiam, sauhur, sapingkiran ma nasiam! 2:3 Ulang ma maruhur haut atap marhasangapon na lumei, tapi ibagas toruh ni uhur hira nasiam ma hasomannasiam lobihan humbani nasiam sandiri! (Rom 12:10; Gal. 5:26.) 2:4 Ulang ma na porlu bani nasiam paruhurhon nasiam, tapi dihut ma na bani hasoman! (1 Kor. 10:24, 33.) 2:5 Songon paruhuron ni Kristus Jesus ma paruhuronnasiam! 2:6 Age pe marrupa Naibata Ia, sedo songon nirampas ihira uhurni usihni ai bani Naibata,(1 Mus. 3:5; Joh. 1:1, 2.) 2:7 tapi ipalumei do diriNi anjaha ipakei rupa ni jabolon, gabe usih bani jolma do Ia, anjaha rumang jolma jumpah Bani. (Jes. 53:3; 2 Kor. 8:9; Heb. 2:14, 17.) 2:8 Ipatoruh do diriNi, na gabe pambalosi do Ia ronsi matei, pala matei tarsilang.(Heb. 5:8; 12:2.) 2:9 Halani ai do ase ipagijang Naibata Ia, anjaha ilayak-layakkon Bani sada goran, na mangatasi sagala goran, (Lah. 2:33; Ep. 1:21; Heb. 1:3, 4.) 2:10 ase manowod anjaha marsombah ibagas goran ni Jesus sagala na i nagori atas pakon na iatas tanoh on, age na itoruh ni tanoh,(Jes. 45:23; Joh. 5:23; Pangk. 5:13.) 2:11 anjaha sagala pamangan marhatongonkon, Jesus Kristus do Tuhan, bahen hasangapon ni Naibata Bapa. 2:12 Ai pe nasiam na hinaholongan ni uhurhu, songon totap ni pambalosionnasiam na saindokah, lang pitah sanggah ilambung nasiam ahu, tapi tarlobih ma nuan, sanggah daoh ahu: Marhasoman biar pakon gobir ma haporluhon nasiam haluahonnasiam;(Ps. 2:11; 1 Ptr. 1:17.) 2:13 ai Naibata do mangkorjahon ibagas nasiam sura-sura ampa na pasaudhon ai, mangihutkon rosuh ni uhurNi.(Joh. 15:5; 2 Kor. 3:5.) 2:14 Bani sagala pambahennasiam, ulang ma nasiam marungut-ungut barang maruhur sangsi, (1 Ptr. 4:9.) 2:15 ase ulang adong sihataon bani nasiam, tapi pitah ma, gabe anak ni Naibata, na so martikas itongah-tongah ni sundut na geduk anjaha siparbalik; ijin ma nasiam marsinondang songon bintang i dunia on, (bd. 1:10; Mat. 5:14; Ep. 5:8.) 2:16 marsijoloman bani hata hagoluhan in, bahen puji-pujian bangku bani ari ni Kristus, paboa na so soya parlumbaonku anjaha sedo na so marguna halojaonku. (Jes. 49:4; Gal. 2:2; 1 Tes. 2:19.) 2:17 Ai porini iduruskon darohku gabe galangan ampa parsombahon, mangkopkop haporsayaonnasiam, malas anjaha megah do uhurhu rap pakon nasiam haganup. (2 Tim. 4:6.) 2:18 Sonai ma homa malas ma uhur nasiam, anjaha marmalas ni uhur ma nasiam rap pakon ahu. (bd. 3:1; 4:4.) 2:19 Tapi arap do uhurhu ibagas Tuhan Jesus, podas ma si Timoteus suruhonku bani nasiam, andohar marhinsah ni uhur age ahu, anggo domma hubogei sonaha pasal nasiam. 2:20 Ai seng adong be hasomanku na marparuhuron songonsi, na ra mansarihon nasiam humbani uhur na bujur. (1 Kor. 16:10.) 2:21 Ai haganup do sidea mangindahi na porlu bani dirini bei, seng be na porlu bani Kristus Jesus. (2 Tim 4:10, 16.) 2:22 Pasal hataluponni ibotoh nasiam do: Songon anak rap pakon bapa marhorja do ia pakon ahu bani ambilan na madear in. 2:23 Arap do uhurhu mintor suruhonku do ia, ijin hubotoh, sonaha pasal langkahku. 2:24 Tapi tenger do uhurhu ibagas Tuhan in, ahu sandiri pe podas do roh. (bd. 1:25.) 2:25 Anjaha domma huputuskon porlu do marsuruh bani nasiam si Epaproditus, sanina in, hasomanku sahorja ampa saparuntolon, na sinuruhnasiam, mamboan na porlu bangku, (bd. 4:18.) 2:26 ai masihol do ia bani nasiam haganup, anjaha rusak do ia, halani tarbogei bani nasiam naboritni ai. 2:27 Anjaha tongon parah hinan do naboritni, pala narus matei; tapi maidop do uhur ni Naibata mangidahsi, seng pitah mangidahsi tene, dihut do mangidah ahu, ase ulang mardapot-dapot pusok ni uhurhu. 2:28 Domma hupapodas marsuruhsi, ase marmalas ni uhur nasiam mangidahsi, anjaha ahu pe hunlumbang uhurhu. 2:29 Ai pe, malas ma panjalonasiam bani ibagas Tuhan in, anjaha sangap ma bahen nasiam halak na sonin. (1 Kor. 16:16.) 2:30 Ai halani horja ni Kristus narus do ia matei, anjaha iasamkon do hosahni laho manggoki pangidangionnasiam bangku.

Pilipi 3

3:1 Ambah ni ai, nasiam sanina, marmalas ni uhur ma nasiam ibagas Tuhan in! Manurathon in hun gati bani nasiam, seng borat uhurhu, ai patotap uhurnasiam do in. (bd. 2:18; 4:4.) 3:2 Jaga ma nasiam bani baliang, jaga bani parhorja na jahat, jaga bani parsunaton na lepak! (Pangk. 22:15.) 3:3 Ai hita do siparsunat na tongon, siparsombah ibagas Tonduy ni Naibata siparmegah-megah ibagas Kristus Jesus, na so martenger ni uhur bani daging, (Rom 2:29.) 3:4 porini pe adong do namin sipangunsagahkononku ibagas daging. Ai anggo adong halak na legan, na mangagan adong sipangunsagahkononni ibagas daging, ahu bueinan: (2 Kor. 11:18, 22.) 3:5 Tarsunat bani ari paualuhkon, marasal humbani halak Israel, humbani marga Benjamin, halak Heber anjaha tubuh humbani halak Heber, halak Parisei mangihutkon titah in, 3:6 garang mardakdaki kuria in, seng dong sihataon ibagas hapintoran mangihutkon titah. 3:7 Tapi paruntungan hinan pe bangku, harugian do in huhira halani Kristus. (Mat. 13:44, 46.) 3:8 Tongon haganup do harugian huhira marimbang hamuliaon ni panandaion bani Kristus Jesus, Tuhankin. Marhalanisi harugian do bangku ganupan ai, anjaha tompoh-tompoh do ai huhira, ase bangku Kristus, 3:9 ase ibagas Ia ahu jumpah, seng marhapintoran sandiri marhitei titah, tapi marhitei haporsayaon ibagas Kristus do, ai ma hapintoran na humbani Naibata, maronjolan bani haporsayaon, (Rom 3:21, 22.) 3:10 ase hutanda Ia ampa hagogohon ni parpuhoonni ai ampa hasadaon bani sitarononni ai, gabe songonsi ibagas parmateini, (Rom 8:3-5; 8:17; Gal. 6:17.) 3:11 andohar das ahu hubani parpuhoon humbani na matei. 3:12 Seng ope, na dob jumpah ahu ma ai, atap na dob gokan dear ma ahu; tapi sai huparayak do ase jumpah ahu, halani na dob tinangkap ni Kristus Jesus ahu. (Lah. 9:6; 1 Tim. 6:12.) 3:13 Nasiam sanina, lape huhira, na dob jumpah ahu ai, tapi on do tene: Huhalupahon do na i pudingku, huparayak na i lobeihu, 3:14 dompak tujuan ai do hupojong, dompak upah hamonangan ni pandiloon na humbabou, na humbani Naibata ibagas Kristus Jesus.(1 Kor. 9:24.) 3:15 Barang piga hita na gokan dear, in ma paruhurhon hita; anjaha anggo legan ope pingkirannasiam pasal atap aha pe, age ai patalaron ni Naibata do bani nasiam. (1 Kor. 2:6.) 3:16 Asal ma torus dalani hita dalan, na dob nidalananta. 3:17 Nasiam sanina, usihi nasiam ma ahu, anjaha pardiatei nasiam ma na marparlahou songon hanami, siusihan nasiam. (1 Kor. 11:1.) 3:18 Ai buei do na marparlahou, gabe munsuh ni silang ni Kristus; anjaha pasal sidea domma gati huhatahon bani nasiam, anjaha anggo sonari marhasoman iluh do huhatahon bani nasiam. (1 Kor. 1:23; Gal. 6:12.) 3:19 Hamagouan do ujung ni sidea, boltokni do iparnaibata, sihamelahononkon do ihasangapkon, anjaha na i tanoh on iparuhurhon. (Rom 16:18.) 3:20 Ai warga nagori atas do hita, hunjai do ipaima-ima hita Sipaluah hita, in ma Tuhanta Jesus Kristus in,(Ep. 2:6; Kol. 3:1; Heb. 12:22.) 3:21 PaubahonNi do angkulanta na dorun on, gabe doshon angkulaNi na sangap in, domu hubani hagogohonNi, na boi patundukkon haganupan ai Bani.(1 Kor. 15:43; 49:53.)

Pilipi 4

4:1 Halani ai, nasiam sanina, na huhaholongi anjaha na huhasiholi, malas ni uhur bangku ampa sortalingku, sai sonin ma nasiam totap ibagas Tuhan in, nasiam hinaholongan. (2 Kor. 1:14; 1 Tes. 2:19-20.) 4:2 Nasiam Oiodia ampa Sintike, hupaingat ma nasiam marsada ni uhur ibagas Tuhan in. 4:3 Anjaha hupindo homa bamu, ham hasomanku sahorja na botul, urupi ma parinangon in, in ma hasomanku marporang manghophop ambilan na madear in, rap pakon si Klemens ampa hasomanku sahorja na legan ai, na dob ibagas buku hagoluhan in goran ni sidea. (Luk. 10:20.) 4:4 Marmalas ni uhur ma nasiam tongtong ibagas Tuhan in; huulaki ma mangkatahon: Marmalas ni uhur ma!(bd. 3:1; 2 Kor. 13:11.) 4:5 Habasaronnasiam ai, sihol ma talar ai bani haganup halak! Dohor do Tuhan in. 4:6 Ulang ma haru uhurnasiam pasal atap aha pe, tapi pabotohkon nasiam ma pangindoannasiam bani Naibata marhasoman tonggo, elek-elek ampa tarima kasih.(Ps. 145:18; Mat. 6:25-34; 1 Ptr. 5:7.) 4:7 Anjaha damei ni Naibata, na mangatasi haganup paruhuron, in ma manramothon uhur ampa pingkirannasiam ibagas Kristus Jesus! (Joh. 14:27; Kol. 3:15.) 4:8 Ambahni ai, nasiam sanina, paruhurhon nasiam ma sagala na sintong, na hormat, na pintor, na borsih, na jenges, na dear bogeion atap biak na madear atap na patut sipujion. (Rom 12:17.) 4:9 Anjaha aha na ginuruhon nasiam, na jinalo, na binogei ampa na niidahnasiam humbangku, ai ma horjahon nasiam; anjaha Naibata Sipardamei in ma mangkasomani nasiam. (1 Tes. 5:23.) 4:10 Malas tumang do uhurhu ibagas Tuhan in, halani mangulaki use nasiam nuan mansarihon na porlu bangku. Tongtong do ipingkirhon nasiam pasal ai, tapi na so adong do hasompatan bani nasiam. 4:11 Seng halani hurangan ahu, ase huluarhon ai, ai domma huguruhon, mangkadearhon na adong. (1 Tim. 6:6.) 4:12 Hubotoh do manggoluh ibagas na hurang, hubotoh do ibagas na marlobih-lobih; domma ilatih ahu bani haganup, bosur pakon loheian, marlobih-lobih pakon hurangan pe. (2 Kor. 6:10.) 4:13 Haganup do tarhorjahon ahu marhiteihon Ia, na margogohi ahu.(2 Kor. 12:10.) 4:14 Tapi tene, dear do pambahenan nasiam in, ai itatap nasiam do hasosakanku. 4:15 Ai ibotoh nasiam halak Pilippi do, na so adong, sobali nasiam, kuria na hubahen hasomanku, mambahen parhiraan pasal na binere pakon na nijalo, sanggah na mamungkah mangambilankon ambilan na madear in, dob na hutadingkon Makedonia; 4:16 ai hu Tessalonika pe domma itongos nasiam na porlu bangku sahali dua hali. 4:17 Sedo sibere-bere ai na hupindahi; tapi buahni ai do na hupindahi, na gabe idou bani nasiam. (1 Kor. 9:11.) 4:18 Domma hujalo haganup, anjaha marlobih-lobih do ahu. Marlobih-lobih tumang do ahu nuan, dob hujalo tinongosnasiam marhitei si Epaproditus, ai ma uap na misbou, galangan na hinamalaskon ampa hinarosuhkon ni Naibata. (bd. 2:25.) 4:19 Tapi gokan ni Naibatangku do sagala na porlu bani nasiam, domu hubani habayakonni na sangap ai, ibagas Kristus Jesus! 4:20 Anjaha hasangapon ma bani Naibata, Bapanta in, ronsi sadokah ni dokahni. Amen. 4:21 Padas nasiam ma hata tabi humbangku bani ganup halak na mapansing in ibagas Kristus Jesus! Manongos tabi do homa bani nasiam sanina-sanina, na rap pakon ahu. 4:22 Manongos tabi do haganup halak na mapansing in bani nasiam, tarlobih ma ai na hun rumah ni Kesar. 4:23 Idop ni uhur ni Tuhan Jesus Kristus ma mangkasomani tonduynasiam.

Kolosse 1

1:1 Humbani si Paulus, apostel ni Kristus Jesus Marhitei rosuh ni Naibata, ampa si Timoteus sanina in, 1:2 marayak halak na mapansing na i Kolosse ampa sanina na porsaya bani Kristus in: Idop ni uhur ma bani nasiam ampa damei humbani Naibata, Bapanta in. (Rom 1:7.) 1:3 Mangkatahon tarima kasih do hanami tongtong bani Naibata, Bapa ni Tuhanta Jesus Kristus, ibagas tonggonami bani nasiam, 1:4 ai ibogei hanami do pasal haporsayaonnasiam bani Kristus Jesus ampa holong ni uhurnasiam dompak haganup halak na mapansing in, (Ep. 1:15.) 1:5 halani pangarapan, na dob pinasirsir bani nasiam i nagori atas. Domma ibogei nasiam hinan pasal in marhitei hata hasintongan in, in ma ambilan na madear in. 1:6 In ma na dob adong bani nasiam, age i sab dunia on; na marbuah do in anjaha lambin marbanggal, songon na bani nasiam, mulai humbani panorang, dob ibogei nasiam anjaha itanda nasiam idop ni uhur ni Naibata ibagas hasintongan. 1:7 Sonin do iguruhon nasiam humbani si Epapras, hasomannami juak-juak, na hinaholongan, ia do parugas hatengeran ni Kristus manghopkop nasiam, (bd. 4:12.) 1:8 anjaha ia do patugahkon bannami holong ni uhurnasiam ibagas Tonduy. 1:9 Halani ai, mulai humbani panorang dob ibogei hanami in, seng maronti hanami manonggohon nasiam anjaha mangindo, ase igoki bani nasiam panandaion pasal rosuh ni uhurni, marhasoman sagala hapentaran ampa pangarusion partonduyon, (Ep. 1:16, 17.) 1:10 ase marparlahou na talup nasiam bani Tuhan in, gabe harosuh tumang Bani, marbuah nasiam bani sagala horja na madear, anjaha martambah bani nasiam panandaion pasal Naibata, (Ep. 4:1; Pil. 1:27.) 1:11 gabe ipargogohi tumang nasiam domu hubani gogoh ni hasangaponni in, mangkorhon hasabaron ampa hatahanon marhasoman malas ni uhur; 1:12 martarima kasih bani Naibata, na dob pataluphon nasiam marparbagianan bani siteanon ni halak na mapansing ibagas haliharon.(Ep. 1:11.) 1:13 Ia do, na paluahkon hita humbani kuasa ni hagolapan, anjaha ipapindah do hita hubagas harajaon ni Anak, na hinaholongan ni uhurni in.(bd. 2:15.) 1:14 Ibagas Ia do adong banta haluahon, ai ma hasasapan ni dousa.(Ep. 1:7.) 1:15 Anjaha Ia do usihan ni Naibata na so taridah in, na parlobei tubuh humbani sagala na tinompa,(Heb. 1:3.) 1:16 ai marhiteihonsi do itompa haganup, na i nagori atas ampa na i tanoh on, na taridah pakon na so taridah, atap paratas pe ai atap harajaon atap gomgoman atap kuasa. Haganupan ai itompa marhiteihonsi anjaha marhadoban hu-Bani.(Joh. 1:3, 10.) 1:17 Parlobei do Ia humbani haganup, anjaha ganupan in marhiteihonsi do torus adong. (Pod. 8:25-27.) 1:18 Ia do ulu ni badan in, in ma kuria in. Ia do parmulaan, na parlobei tubuh humbani na matei, ase Ia na parlobei bani haganup. (Lah. 26:23; Ep. 1:22; Pangk. 1:5.) 1:19 Ai ibagas Ia do itontuhon Naibata, marianan hagogokni in, (bd. 2:9; Joh. 1:16.) 1:20 anjaha padear haganup marhiteihonsi bani Dirini, na i tanoh on age na i nagori atas, dob ipajongjong damei marhitei darohni na madurus in bani hayu pinarsilang. (Joh. 2:2; Ep. 1:10.) 1:21 Anjaha nasiam na daoh hinan anjaha munsuh marhitei paruhuron ampa horja hajahaton, (Rom 5:10; Ep. 2:12; 3:18.) 1:22 ipadear Jesus nuan ibagas daging hajolmaonni, marhitei parmateini, laho pajongjongkon nasiam pansing, lang dong sihataon anjaha sipinsangon i lobeini. (Ep. 5:27.) 1:23 Asal ma marianan nasiam jonam, anjaha toguh ibagas haporsayaon, anjaha lang ra mosor humbani pangarapan na binogeinasiam ibagas ambilan na madear, na binaritahon bani haganup na tinompa, na itoruh ni langit, anjaha ahu, si Paulus do gabe siparugas bani in. 1:24 Malas do uhurhu nuan ibagas sitaronon manghophop nasiam, anjaha ibagas dagingku hugoki na so jumpah ope bani na tinaron ni Kristus, laho manghophop angkulani, in ma kuria in. (Ep. 3:13.) 1:25 Na dob gabe siparugas ni in do ahu, domu hubani jabatan, na pinadas ni Naibata bangku halani nasiam, laho padaskon hata ni Naibata, 1:26 in ma rusia in, na ponop marabad-abad ampa marsundut-sundut; tapi sonari ipatalar do bani halak na mapansingni in. (Rom 16:25, 26.) 1:27 Hubani sidea do pabotohkonon ni Naibata surung ni hamuliaon ni rusia on, itongah-tongah ni sipajuh begu-begu, ai ma: Kristus ibagas nasiam, pangarapan in bani hasangapon. (1 Tim. 1:1.) 1:28 Ia do ibaritahon hanami; ipaingat anjaha iajari hanami do sagala jolma pasal sagala hapentaron, laho pajongjongkon ganup jolma gokan dear ibagas Kristus. (ay. 22) 1:29 Halani in do loja anjaha maruntol ahu, domu hubani hagogohonNi na marhorja gogoh ibahen ibagas ahu.

Kolosse 2

2:1 Tapi ipangindo uhurhu do, ase ibotoh nasiam, sonaha banggal ni halojaonku manghophop nasiam ampa sidea na i Laodikea, ampa haganup, na so ongga mangidah bohingku ope, 2:2 ase tarapoh uhur ni sidea, ase marpardomuan ibagas holong, ase bayak bani pangarusion na gok, anjaha ase itandai sidea pasal rusia ni Naibata, in ma Kristus in. 2:3 Ibagas Ia do ponop sagala arta na marisi hapentaran ampa habotohon.(1 Kor. 1:24, 30.) 2:4 Huhatahon pe in, ase ulang adong na mangoto-otoi nasiam marhitei pandei ni parsahap. (Rom 16:18.) 2:5 Ai padaoh-daoh pe ibagas pardagingon, rap pakon nasiam do ahu ibagas tonduy, marmalas ni uhur mangidah partorsani bani nasiam ampa partotap ni haporsayaonnasiam bani Kristus. (1 Kor. 5:3; 14:40.) 2:6 Ai pe, songon panjalonasiam bani Kristus Jesus, Tuhan in, sonai ma marparlahou nasiam ibagas Ia, 2:7 marurat anjaha ipauli-uli ibagas Ia, jonam marhaporsayaon, songon na dob niajarhon bani nasiam, anjaha lambin martarima kasih. (Ep. 2:22; 3:17.) 2:8 Jaga ma nasiam, ase ulang adong halak na mangagou nasiam marhitei hapentaron dunia ampa sipaoto-oto na lumei, na maronjolan bani tonah-tonah ni jolma, bani kuasa ni unsur-unsur dunia on, seng bani Kristus. (ay. 20.) 2:9 Ai ibagas Ia do marianan haganup hagogok ni hanaibataon marrupahon angkula,(Joh 1:14, 16.) 2:10 anjaha ibagas Ia do gabe gok nasiam; Ia do kopala ni sagala pamarentahan ampa kuasa. (Ep. 1:21.) 2:11 Lanjar ibagas Ia do nasiam tarsunat, sedo binahen ni tangan, ai ma mananggalhon daging pardousaon, marhitei parsunaton na ibagas Kristus. (Rom 2:29; 1 Ptr. 3:21.) 2:12 Ai tartanom do nasiam rap pakonsi ibagas pandidion in, anjaha ibagas ai do homa nasiam ipapuho rap pakonsi marhitei haporsayaon bani hagogohon ni Naibata, na papuhohonsi humbani hamateian. (bd. 3:1-4; Rom 6:4.) 2:13 Ase nasiam, na matei hinan ibagas panlanggaron ampa ibagas daging na so tarsunat in, rap pakonsi do nasiam ipapuho, dob isasap sagala panlanggaronta, (Ep. 2:1, 5.) 2:14 marhitei na isasap surat utang na dompak hita, ai ma paraturan na mangimbang hita, anjaha ipadaoh do ai hun tongah-tongahta, ipakuhon bani silang ai. (Ep. 2:15.) 2:15 Irampas do sinjata humbani siparkuasa ampa sipargogoh; talar do ipatontonkon sidea, marhamonangan do Ia dompak sidea. (bd. 1:13.) 2:16 Ai pe, ulang ma iuhumi halak nasiam halani sipanganon ampa siinumon barang halani pesta barang poltak ni bulan barang halani ari Sabat pe. (Rom 14:1-12.) 2:17 Halinoh ni na sihol roh ai do in, tapi Kristus do anggo badanni. (Heb. 8:5; 10:1.) 2:18 Ulang ma ra nasiam rampason pasal upah hamonangannasiam marhitei halak, na mangkarosuhkon parnalangon diri ampa parsombahon bani malekat, na mangunsagah bani na niidahni ibagas alatan ni tonduyni, na pabanggal-banggal diri, lang maralasan, marhitei pingkiran pardagingon, (ay. 23.) 2:19 tapi lang totap marsijoloman bani ulu in, ai ma na mansarihon angkula in anjaha padomuhon marhitei urat-urat ampa ringring, gabe marbanggal domu hubani ranggian ni Naibata. (Ep. 4:15, 16.) 2:20 Anggo domma matei nasiam rap pakon Kristus dompak kuasa unsur-unsur ni dunia on, mase ma ranasiam paksaon marhitei paraturan-paraturan, songon halak na manggoluh i dunia on: (Gal. 4:3, 9.) 2:21 Ulang jamah on, ulang pangan, ulang giut! 2:22 Haganupan ai magou do anggo domma hona pakei. Titah ampa podah-podah ni jolma tumang do ai. (Jes. 29:13; Mat. 15:9.) 2:23 Tongon, songon na marisi hapentaran do ai idahon, ai ionjolhon do hadaulaton, na marnalangkon diri, na mangarsik-arsik angkula; tapi seng na marguna ai manlawan hisap ni daging. (Rom 13:14; 1 Tim. 4:3.)

Kolosse 3

3:1 Ase anggo domma ipapuho nasiam rap pakon Kristus, pindahi nasiam ma na iatas ai; ijai do Kristus hundul i siamun ni Naibata. (bd. 2:12.) 3:2 Na i babou ai ma paruhurhon nasiam, ulang ma na iatas tanoh on.(Mat. 6:33.) 3:3 Ai domma matei nasiam, anjaha ponop do goluhnasiam rap pakon Kristus ibagas Naibata.(Rom 6:2.) 3:4 Tapi, anggo talar ma Kristus, hagoluhanta in, ijai ma talar age nasiam rap pakonsi ibagas hasangapon.(1 Kor. 15:43; Pil. 1:21.) 3:5 Ai pe, bunuh nasiam ma pagorinasiam, na i tanoh on: Parriah-riahon, habutakon, hisap-hisap, sura-sura jahat ampa uhur haut, ai ma parnaibataon na legan, (Rom 6:6; 8:13.) 3:6 ai halani ai do roh ringis ni Naibata. (Ep. 5:6.) 3:7 Anjaha ai do idalankon nasiam hinan, sanggah ibagas ai ope goluhnasiam. 3:8 Tapi sonari, ambukkon nasiam ma haganupan in: Ringis, gila hajahaton, panrisaon ampa hata sumsam humbani pamangannasiam. (Ep. 4:29, 31.) 3:9 Ulang ma marsiladungan nasiam, ai domma itanggali nasiam jolma na buruk in rap pakon pambahenanni, (Sak. 8:16; Ep. 4:22, 23.) 3:10 anjaha domma ipakei nasiam na baru in, na pinabaru domu hubani rupa ni na manompasi, ase marpangarusion. (1 Mus. 1:27; Ep. 4:24.) 3:11 Ijai seng dong ubah ni halak Gorik atap halak Jahudi, na marsunat atap na so marsunat, bangsa na legan atap na so maju, jabolon atap halak na bebas, ai Kristus do haganup ibagas haganup. (Gal. 3:28.) 3:12 Ai pe, nasiam na dob pinilih ni Naibata, na mapansing anjaha na hinaholongan, pakei nasiam ma biak paridop ni uhuran, habasaron, toruh ni uhur, halamlamon, ampa lumbang ni uhur, (1 Ptr. 2:9.) 3:13 marsianju-anjuan anjaha marsisasapan dousa, anggo marpanghurangi uhur ni na sada dompak hasomanni; songon na dob isasap Kristus dousanasiam, sonai ma homa nasiam marsisasapan. (Mat. 6:14; Ep. 4:2, 32.) 3:14 Iatas ni ganupan ai dalankon nasiam ma holong, ai in do rahut-rahut ni sagala hadearon. (Rom 13:8, 10.) 3:15 Anjaha damei ni Kristus ma manrajai ibagas uhurnasiam, ai hujin do nasiam tardilo gabe sada angkula. Gabe sipartarima kasih ma nasiam. (1 Kor. 12:13, 27; Pil. 4:7.) 3:16 Gugun ma hata ni Kristus marianan itongah-tongahnasiam; marhasoman gok hapentaron ma nasiam marsiajaran anjaha marsipaingatan marhitei doding Psalm, doding puji-pujian ampa doding partonduyon; dodingkon nasiam ma Naibata ibagas uhurnasiam maruhur tarima kasih.(Ep. 5:19.) 3:17 Anjaha sagala horjanasiam, marhitei hata atap pambahenan, horjahon nasiam ma haganup in ibagas goran ni Tuhan Jesus, anjaha martarima kasih bani Naibata, Bapa in, marhiteihonsi.(1 Kor. 10:31.) 3:18 Nasiam parinangon, balosi nasiam ma paramangonnasiam, songon na talup ibagas Tuhan in. (Ep. 5:22-24.) 3:19 Nasiam paramangon, haholongi nasiam ma parinangonnasiam, anjaha ulang ma kasar dompak sidea. (1 Ptr. 3:7.) 3:20 Nasiam dakdanak, balosi nasiam ma namatorasnasiam ibagas haganup, ai in do rosuh ni Tuhan in. (Ep. 6:1.) 3:21 Nasiam bapa, ulang ma makorastu nasiam dompak niombahnasiam, ase ulang mandolei sidea. 3:22 Nasiam jabolon, balosi nasiam ma tuannasiam na i tanoh on ibagas haganup; ulang ma pambalosi bani mata nasiam, songon na mambuat uhur ni jolma, humbani bulus ni uhur ma, halani biar bani Tuhan in! (Ep. 6:5-8.) 3:23 Humbani gok ni uhur ma horjahon nasiam sagala horjanasiam, songon na bani Tuhan in, sedo bani jolma, 3:24 ai ibotoh nasiam, jaloonnasiam do humbani Tuhan in siteanon ai balos ni in; sibalosi Kristus Tuhan in ma nasiam. 3:25 Ai na mangkorjahon hagedukon, jaloonni do pambalason bani hagedukon, na hinorjahonni ai, ai seng dong na martonggor jumbak ijai. (Rom 2:11.)

Kolosse 4

4:1 Nasiam tuan-tuan, bahen nasiam ma na pintor ampa na patut bani jabolonnasiam, ingat nasiam: Adong do homa bani nasiam Tuhan i nagori atas. (3 Mus. 25:43, 53; Ep. 6:9.) 4:2 Tongtong ma nasiam martonggo, anjaha puho ma pasal ai marhasoman tarima kasih. (1 Tes. 5:17.) 4:3 Tonggohon nasiam ma homa hanami, ase ibere Naibata labah na ungkab bannami mangambilankon hata in, mangkatahon rusia pasal Kristus, ai halani in do ahu targari, (Rom 15:30; Ep. 6:19; 2 Tes. 3:1.) 4:4 ase hupatalar in, songon na patut pangkatahonku. 4:5 Marpantas ni uhur ma nasiam marparlahou dompak halak na idarat; pargunahon nasiam ma panorang. (Ep. 5:15, 16.) 4:6 Sai tongtong ma jenges hatanasiam, songon na ginaraman, ase ibotohnasiam, sonaha patut marbalos bani ganup halak. (Mrk. 9:50; Ep. 4:29.) 4:7 Patugahon ni si Tikikus do bani nasiam haganup na masa bangku; sanina na hinaholongan do ia, siparugas na bujur, anjaha hasoman sahorja ibagas Tuhan in. 4:8 Husuruh do ia bani nasiam, ase ibotoh nasiam na masa bannami, anjaha ase iapoh uhurnasiam. (Ep. 6:22.) 4:9 Dihut do homa si Onesimus, sanina na hinaholongan, na bujur in, ai ma na humbani nasiam on ai. Patugahon ni sidea ma bani nasiam sagala na masa bannami. (Pilem. 10.) 4:10 Manongos tabi do bani nasiam si Aristarkus, hasomanku tartutup, ampa si Markus, panogolan ni si Barnabas. Domma ijalo nasiam hata pasalsi, ase anggo roh ma ia bani nasiam, jalo nasiam ma ia. (Lah. 19:29; 27:2.) 4:11 Sonai homa si Jesus, na margoran si Justus. Pitah sidea do humbani halak Jahudi hasomanku sahorja ibagas harajaon ni Naibata; na gabe apoh-apoh do sidea bangku. 4:12 Manongos tabi do bani nasiam si Epapras, na roh humbani nasiam on, juak-juak ni Kristus Jesus; tongtong do ia maruntol manonggohon nasiam, ase gokan dear nasiam jongjong anjaha atok ibagas haganup, na hinarosuhkon ni Naibata. (bd. 1:7.) 4:13 Ahu ma manaksihon pasalsi, paboa buei tumang do halojaonni manghophop nasiam ampa hasoman na i Laodikea pakon na i Hierapolis. 4:14 Manongos tabi do bani nasiam si Lukas, doktor in. (2 Tim. 4:10, 11; Pilem. 24.) 4:15 Padas nasiam ma tabingku bani sanina na i Laodikea ampa bani si Nimpas ampa bani kuria na martumpu i rumahni. 4:16 Dob ibasa surat on itongah-tongahnasiam, ibasa ma homa on i kuria Laodikea; anjaha surat na hu Laodikea ai pe basa nasiam ma homa. 4:17 Hatahon nasiam ma hubani si Arkippus: Jaga ma, ase tohonan, na dob jinalomu ibagas Tuhan in, torsa idalankon ho in! (Pilem. 2.) 4:18 On ma tabi humbangku, si Paulus, na sinurat ni tanganku. Dingat nasiam ma ahu, na tarrantei on. Idop ni uhur ma bani nasiam. (1 Kor. 16:21; 2 Tes. 3:17.)

1 Tessalonika 1

1:1 Humbani si Paulus, si Silpanus pakon si Timoteus, hubani kuria na i Tessalonik, na ibagas Naibata Bapa pakon Tuhan Jesus Kristus: Idop ni uhur ma bani nasiam ampa damei! (Lah. 16:19; 17:1, 10; 2 Tes. 1:1.) 1:2 Mangkatahon tarima kasih do hanami tongtong hubani Naibata halani nasiam haganup, anjaha itarsingati hanami do nasiam ibagas tonggonami. 1:3 Idingat hanami do totap ilobei ni Naibata horja haporsayaonnasiam, horja holongnasiam ampa hatotapon ni pangarapannasiam bani Tuhanta Jesus Kristus. (1 Kor. 13:13.) 1:4 Ai ibotoh hanami do, nasiam na hinaholongan ni Naibata, na dob pinilihni do nasiam, (Kol. 3:12.) 1:5 ai pangambilankonnami bani ambilan na madear in bani nasiam seng pitah ibagas hata masa ai bani nasiam, tapi homa ibagas hagogohon ampa ibagas Tonduy na Pansing do, marhasoman atok ni uhur na gok. Ibotoh nasiam do, sonaha marparlahou hanami itongah-tongahnasiam, halani nasiam. (1 Kor. 2:5.) 1:6 Ase domma gabe sipaniru nasiam bannami ampa bani Tuhan in, ai ibagas buei sitaronon do ijalo nasiam hata in, marhasoman malas ni uhur na humbani Tonduy na Pansing, (1 Kor. 4:16.) 1:7 gabe siusihan do nasiam bani sagala na porsaya i Makedonia ampa i Akaya. 1:8 Ai humbani nasiam do tarambilan hata in, seng pitah i Makedonia ampa Akaya, tapi bani ganup ianan do sar haporsayaonnasiam bani Naibata, gabe seng pala be taringatannami pasal ai. (Rom 1:8.) 1:9 Ai sidea sandiri do mambaritahon pasal sonaha parmasuknami bani nasiam, anjaha sonaha parmubahnasiam humbani sisombah-sombahon hubani Naibata, laho mambalosi Naibata na manggoluh ampa na sintong in, (Lah. 14:15; 1 Kor. 12:2.) 1:10 anjaha paima-imahon bani Anakni roh hun nagori atas, na pinapuhoni humbani na matei, ai ma Jesus, na paluahkon hita humbani ringis na sihol roh. (Tit. 2:13.)

1 Tessalonika 2

2:1 Ai ibotoh nasiam sandiri do, nasiam sanina, na so soya parrohnami bani nasiam. (bd. 1:5, 9.) 2:2 Ai age pe marsitaronon hinan anjaha hona arsik hanami i Pilippi, songon na binotohnasiam, marhinsah ni uhur do hanami ibagas Naibata, mangambilankon bani nasiam ambilan na madear na humbani Naibata, ibagas buei parlawanan. (Lah. 16:22; 17:5.) 2:3 Ia pamodahionnami, sedo ibagas hakahouon ai barang hasipakulah-kulahon barang akal-akal, 2:4 tapi songon na dob niakuhon ni Naibata hanami gabe haondosan ni ambilan na madear in, sonai do ihatahon hanami, sedo ase harosuh hanami bani jolma, tapi bani Naibata do, siuji uhurnami. (Gal. 1:10; 1 Tim. 1:11.) 2:5 Ai seng ongga hanami marhata lemes-lemes, songon na binotohnasiam, barang marakal-akal laho mambuat arta, Naibata do saksi pasal ai; (Lah. 20:33.) 2:6 barang mangindahi sangap hanami humbani jolma, atap humbani nasiam, atap humbani na legan pe, age pe songon apostel ni Kristus boi hanami namin marhatunggungon, (Joh. 5:41, 44.) 2:7 Tapi basar do hanami itongah-tongahnasiam songon parinangon patorsa-torsa niombahni. 2:8 Sonai ma, halani masihol hanami bani nasiam, ihamalashon uhurnami do mamberehon bani nasiam, sedo pitah ambilan na madear in, tapi dihut do hosahnami, halani na dob holong uhurnami bani nasiam. 2:9 Ai idingat nasiam do, nasiam sanina, halojaon ampa hasunsahannami: Arian pakon borngin do hanami marhorja, ase ulang marhaboratan age ise nasiam. Sonin do pangambilankonnami bani nasiam ambilan na madear na humbani Naibata. (1 Kor. 4:12.) 2:10 Nasiam do saksi, Naibata homa, paboa daulat, pintor anjaha seng panurakon parlahounami dompak nasiam, na porsaya, 2:11 ai ibotoh nasiam do, sonaha hanami songon bapa hubani niombahni mamodahi nasiam sada-sada, mangojur anjaha pabijahon nasiam, 2:12 ase marparlahou na patut nasiam dompak Naibata, na dob mandilo nasiam hubagas harajaonni ampa hasangaponni. (Ep. 4:1; Pil. 1:27.) 2:13 Halani ai mangkatahon tarima kasih do hanami tongtong bani Naibata, ai ijalo nasiam do hata ni Naibata, na binogeinasiam humbannami, ijalo nasiam do in, sedo songon hata ni jolma, tapi songon hata ni Naibata do, ai in do in tongon, gabe marpangkorhon ibagas uhurnasiam na porsaya. (bd. 1:5; Gal. 1:11.) 2:14 Nasiam sanina, na dob gabe paniru do nasiam bani kuria ni Naibata na i nagori Judea, na ibagas Kristus Jesus, ai manaron na parngit do nasiam humbani hasomannasiam sabangsa, songon sidea na niarsik-arsik ni halak Jahudi, 2:15 na mambunuh Tuhan Jesus ampa nabi-nabi, na mangayak-ayak hanami anjaha na mambahen sogam ni uhur ni Naibata, imbang ni haganup jolma, (Lah. 2:23; 7:52.) 2:16 na manlarang hanami mangambilankon ambilan na madear bani sipajuh begu-begu, ase andohar maluah sidea. Sonai ma tongtong igoki sidea suhat-suhat ni dousa ni sidea. Jadi sogop ma bani sidea ringis ai bani ujungni. (Mat. 23:32, 33.) 2:17 Ia hanami, nasiam sanina, dob lingod nasiam tongkin humbannami lingod bani panonggor, tapi sedo bani uhur, lambin ihaporluhon hanami do marhasoman uhur na masihol tumang sihol mangidah bohinasiam. (Rom 1:11, 13.) 2:18 Halani ai, sihol roh do hanami marayak nasiam, ahu tene si Paulus, sahali barang dua hali, tapi tarlanglang do hanami ibahen sibolis in. 2:19 Ai ise do pangarapan bannami, malas ni uhur ampa sortali puji-pujian sobali nasiam ilobei ni Tuhanta Jesus Kristus, bani parrohni ai? (Pil. 2:16; 4:1.) 2:20 Tongon, nasiam do hasangapon ampa malas ni uhur bannami.

1 Tessalonika 3

3:1 Jadi halani lang be tartahan hanami siholnami, gabe isurahon hanami ma, ase pitah hanami ma lobei tading i huta Aten, (Lah. 17:14, 15.) 3:2 anjaha isuruh hanami ma si Timoteus, sanina in, anjaha juak-juak ni Naibata bani ambilan na madear ni Kristus, laho patotaphon nasiam ibagas haporsayaonnasiam anjaha pagolpa-golpa nasiam, 3:3 ase ulang adong na madabuh halani hamarsikon on. Ibotoh nasiam sandiri do, in do rupeita. (Ep. 3:13; 2 Tim. 3:12.) 3:4 Ai sanggah rap ope hanami pakon nasiam, domma ilumbahon hanami hinan bani nasiam, na maningon sogop do sitaronon banta, songon na dob masa torang ibotoh nasiam. 3:5 Jadi halani seng tartaron ahu be, gabe husuruh ma, ase boi botohonku pasal haporsayaonnasiam, ai mabiar do ahu, atap na dob hona lajou do nasiam ibahen sipanlajou in, gabe soya ma halojaonnami. (Pil. 2:16.) 3:6 Tapi sonari, dob mulak si Timoteus humbani nasiam, anjaha iboan barita na madear pasal haporsayaonnasiam pakon holong ni uhurnasiam, anjaha ipatugah habujuronnasiam mardingat hanami ampa sihol ni uhurnasiam mangidah hanami, songon sihol ni uhurnami bani nasiam, (Lah. 18:5.) 3:7 gabe tarapoh ma hanami halani nasiam, nasiam sanina, halani haporsayaonnasiam, ibagas haganup hasunsahan ampa sitarononnami, 3:8 ai na manggoluh ma hanami sonari, anggo totap nasiam jongjong ibagas Tuhan in. 3:9 Ai tarima kasih na sonaha ma boi hatahononnami bani Naibata, bahen balos ni haganup malas ni uhur na iahap hanami ilobei ni Naibata mardingat nasiam? 3:10 Borngin ampa arian gomos do hanami martonggo, andohar boi idahonnami bohinasiam anjaha gokannami atap aha na hurang bani haporsayaonnasiam. 3:11 In pe, Naibata Bapanta ampa Tuhanta Jesus ma na parandang langkahnami bani nasiam! 3:12 Anjaha Tuhan in ma na manggoki ampa na manambahi holong ni uhurnasiam samah nasiam, age bani haganup, songon hanami mangkaholongi nasiam. 3:13 Sai ipatoguh ma uhurnasiam, gabe boi nasiam jongjong ilobei ni Naibata Bapanta, pansing anjaha seng panurakon bani parroh ni Tuhanta Jesus rap pakon haganup na pansingni.

1 Tessalonika 4

4:1 Ambah ni ai, nasiam sanina, ipangindo anjaha ipodahi hanami ma nasiam ibagas Tuhan Jesus; songon na dob ibogei nasiam humbennami, ai ma pasal sonaha nasiam patut manggoluh anjaha gabe harosuh bani Naibata, anjaha songon na nidalankon nasiam nuan ai, lambin martambah ma nasiam ibagas ai. 4:2 Ai ibotoh nasiam do aturan na binerenami bani nasiam marhitei Tuhan Jesus. 4:3 On do harosuh ni Naibata, ase pansing ma nasiam,ase daoh ma nasiam humbani parriah-riahon, 4:4 ase ganup ma nasiam mambotoh marbinuat ibagas hapansingon ampa hahormaton, 4:5 ulang ma mangihuthon hisap-hisap na garang, songon sipajuh begu-begu, na so mananda Naibata, 4:6 ase ulang adong na manlanggar, anjaha irugii saninani ibagas pahara ai (pansarian), ai parlulu do Tuhan in pasal haganupan ai, songon na dob ipatugah anjaha isaksihon hanami hinan bani nasiam. 4:7 Ai seng hu habutakon hita idilo Naibata, tapi bani hapansingon do. 4:8 Halani ai, barang ise na manulak ai, sedo jolma na tinulakni, tapi Naibata do, na mambere Tonduyni na Pansing bani nasiam. (Luk. 10:16.) 4:9 Tapi pasal holong ni uhur dompak sanina, seng pala porlu be pasingaton nasiam marhitei surat, ai Naibata sandiri do mangajari nasiam marsihaholongan, (Jer. 31:33, 34; Joh. 13:24.) 4:10 anjaha tongon idalankon nasiam do sonai bani haganup sanina na i Makedonia. Tapi ipodahi hanami do, nasiam sanina, ase lambin sonai ibahen nasiam. 4:11 Anjaha haporluhon nasiam ma ase parsip nasiam marsiurus urusanni bei anjaha marhorja ma tangannasiam, songon na dob iparentahkon hanami bani nasiam. (Ep. 4:28; 2 Tes. 3:8, 12.) 4:12 ase marparlahou na patut ma nasiam idahon ni pardarat, anjaha ulang mangarap humbani halak. (Kol. 4:5.) 4:13 Seng marosuh hanami, nasiam sanina, seng dong pambotohnasiam pasal halak na dob modom in, ase ulang pusok uhurnasiam songon halak na legan, na so marpangarapan. (1 Kor. 15:20; Ep. 2:12.) 4:14 Ai anggo porsaya hita, na dob matei do Jesus anjaha puho, sonai ma homa marhitei Jesus, arahkonon ni Naibata do na dob modom in rap pakonsi. (Rom 14:9; 1 Kor. 15:3, 4, 12.) 4:15 Ai hata ni Tuhan in do na ihatahon hanami bani nasiam: Hita, na manggoluh, na tading ronsi parroh ni Tuhan in, seng lobeianta sidea, na dob modom in. (1 Kor. 15:51.) 4:16 Ai Tuhan in sandiri ma tuad hun nagori atas marhasoman surak-surak, parentah pakon hata ni raja ni malekat, anjaha tarbogei ma tarompit ni Naibata. Jadi puho ma parlobei na matei ibagas Kristus. (1 Kor. 15:23, 52.) 4:17 Dob sonai, hita na manggoluh in, na tading in ope, tarikonni ma hita rap pakon sidea ibagas hombun, laho mangalo-alo Tuhan in hu awang-awang, jadi tongtong ma hita rap pakon Tuhan in. (Joh. 12:26; 17:24.) 4:18 Ase marsiapohan ma nasiam marhitei hata in.

1 Tessalonika 5

5:1 Tapi anggo pasal panorangni atap musimni, nasiam sanina, seng pala suratonnami bani nasiam. (Mat. 24:36.) 5:2 Ai ibotoh nasiam sandiri do torang, paboa songon panangko borngin do parroh ni ari ni Tuhan in. (Mat. 24:42-44; 2 Ptr. 3:10; Pangk. 3:3; 16:15.) 5:3 Anggo ihatahon halak: "Damei do anjaha sonang", jadi sompong ma roh hamagouan ai bani sidea, songon pangarouan bani na boratan rumah, anjaha seng dong haporusan (Jer. 6:14; Mat. 24:39.) 5:4 Tapi nasiam sanina, seng ibagas na golap nasiam, ulang ma hasiangan nasiam songon panangko. 5:5 Ai haganup do nasiam anak ni na lihar anjaha anak arian, seng borngin atap na golap simada hita. (Rom 13:12; Ep. 5:9.) 5:6 Ase ulang ma hita tarpodom songon halak na legan, tapi puho ma hita anjaha torang maruhur. 5:7 Ai borngin do modom na modom in, anjaha borngin do mabuk na mabuk in, 5:8 Tapi, halani humbani na siang hita, torang ma uhurta, anjaha pakei hita ma baju bosi haporsayaon ampa haholongan ampa tangkuluk pangarapan bani haluahon, (Ep. 6:14-17.) 5:9 Ai seng, ase sigilaan hita itotaphon Naibata, tapi ase jumpahan hagoluhan do marhitei Tuhanta Jesus Kristus, 5:10 na dob matei manghophop hita, ase barang na puho hita, barang na modom, manggoluh hita rap pakonsi. (bd. 4:14; Rom 14:8, 9.) 5:11 Halani ai marsipodahan ma nasiam anjaha marsipauli-ulian, songon na binahen nasiam. (Jud. 20.) 5:12 Tapi ielek-elek hanami ma nasiam sanina: Hormat ma bani na manghalojahon nasiam, bani na mambobahon nasiam ibagas Tuhan in, bani na mamodahinasiam, (1 Kor. 16:18.) 5:13 anjaha sangap tumang ma bahen nasiam sidea ibagas holong halani horja ni sidea. Mardamei ma nasiam samah nasiam. 5:14 Anjaha iojur hanami do nasiam sanina: Palumba nasiam ma halak, na so torsa marparlahou, apohi nasiam siotik uhur, anju bani na galek, marlumbang ni uhur dompak haganup. 5:15 Jaga ma nasiam, ase ulang adong mambalaskon na jahat balas ni na jahat, tapi na madear ma parayak nasiam tongtong samah nasiam, age bani haganup halak. (Pod. 20:22; Rom 12:17; 1 Ptr. 3:9.) 5:16 Tongtong ma nasiam marmalas ni uhur, (Pil. 4:4.) 5:17 totap martonggo, (Luk. 18:1; Rom 12:12; Kol. 4:2.) 5:18 martarima kasih pasal haganup, ai in do na pinindo ni Naibata humbani nasiam marhitei Kristus Jesus. (Ep. 5:20.) 5:19 Ulang ma intopi nasiam Tonduy in, (1 Kor. 14:30, 39.) 5:20 ulang ma marhampung ni uhur pasal panjahaion, (1 Kor. 14:1.) 5:21 tapi uji nasiam haganup, jolom nasiam ma na madear. (1 Kor. 14:29; 1 Joh. 4:1.) 5:22 anjaha simbili nasiam ma sagala masam ni na masambor. 5:23 Naibata sipardamei in ma mambahen tang pansing nasiam, anjaha Ia ma manramothon tonduy, uhur ampa dagingnasiam, ase pansing, seng panurakon bani parroh ni Tuhanta Jesus Kristus! 5:24 Hatengeran ni uhur do Ia, na mandilo nasiam, anjaha pasaudonni do in.(1 Kor. 1:9; 2 Tes. 3:3.) 5:25 Nasiam sanina, tonggohon nasiam ma hanami. 5:26 Padas nasiam ma tabi bani haganup sanina in marhitei summah na mapansing. (Rom 16:16; 1 Kor. 16:20; 2 Kor. 13:12.) 5:27 Hupabija ma nasiam bani Tuhan in, pabasahon nasiam surat on bani haganup sanina. 5:28 Idop ni uhur ni Tuhanta Jesus Kristus mangkasomani nasiam!

2 Tessalonika 1

1:1 Humbani si Paulus, si Silpanus, ampa si Timoteus, hubani kuria Tessalonik, na ibagas Naibata Bapanta ampa Tuhan Jesus Kristus. (1 Tes. 1:1.) 1:2 Idop ni uhur ma bani nasiam ampa damei humbani Naibata Bapanta ampa Tuhan Jesus Kristus. (Rom 1:7.) 1:3 Patut tumang do hanami, nasiam sanina, tongtong mangkatahon tarima kasih bani Naibata halani nasiam. Patut do sonai, ai lambin ganda tumang do haporsayaonnasiam, anjaha martambah do holong ni uhur ni ganup nasiam samah nasiam. (bd. 2:13; 1 Tes. 1:2, 3.) 1:4 Hanami sandiri mamuji-muji dirinami halani nasiam ilobei ni ganup kuria ni Naibata, halani hatotapon ampa haporsayaonnasiam ibagas sagala parburuon ampa hamarsikon, na tinaronnasiam. (2 Kor. 7:4.) 1:5 In ma na patandahon pintor ni paruhuman ni Naibata, gabe talup nasiam ihira masuk hu harajaon ni Naibata; halani ai do manaron nasiam nuan. (Luk. 21:36; Pil. 1:28.) 1:6 Pintor do in tongon, nini uhur ni Naibata, mambalaskon hamarsikon bani na mangarsik-arsik nasiam, (Pangk. 18:6, 7.) 1:7 tapi hasonangan bani nasiam, na niarsik-arsik, rap pakon hanami, bani partalar ni Tuhan Jesus tuad hun nagori atas rap pakon malekat ni hagogohonni, (Mat. 25:31.) 1:8 ibagas apuy na marjilam-jilam, laho mandabuh uhum bani na so mananda Naibata, anjaha na so ra mambalosi ambilan na madear ni Tuhanta Jesus. (Rom 2:8.) 1:9 Hona uhum ma sidea, ai ma hamagouan sisadokah ni dokahni, humbani bohi ni Naibata ampa humbani hasangapon ni hagogohonni, (Jer. 2:10, 19.) 1:10 sanggah roh Ia bani ari ai, ase marsangap Ia humbani na mapansingni anjaha longang sagala na porsaya bani, ai porsaya do nasiam tongon bani hasaksian na binoannami bani nasiam. (Kol. 3:4.) 1:11 Jadi martonggo do hanami tongtong pasal nasiam, ase Naibatanta ma na patalup nasiam domu hubani pandiloonni ai, anjaha ipasaud ma ganup sura-sura na madear ampa ganup horja haporsayaon marhitei hagogohonni, 1:12 ase marsangap ma goran ni Tuhanta Jesus Kristus ibagas nasiam, sonai homa nasiam ibagas Ia, domu hubani idop ni uhur ni Naibatanta ampa Tuhan Jesus Kristus.

2 Tessalonika 2

2:1 Tapi anggo pasal parroh ni Tuhanta Jesus Kristus ampa pardasta hubani, mangindo ma hanami, bani nasiam sanina, (1 Tes. 4:13-17.) 2:2 ase ulang urah idugur nasiam humbani totap ni paruhuron, anjaha rusak ibahen marhitei tonduy ni sipartonduy atap hata, barang marhitei surat na ihatahon roh humbannami, na patugahkon, paboa na dob roh do ari ni Tuhan in. 2:3 Ulang ma adong na paoto-otohon nasiam atap marhitei aha pe. Ai seng anjai roh ari ai, anggo seng masa lobei parbalikon, anjaha ipatalar jolma na so parduli bani titah in, ai ma anak hamagouan ai, (1 Tim. 4:1; 1 Joh. 2:18; 4:3.) 2:4 na manlawan anjaha na pabangkit dirini dompak haganup na targoran naibata ampa sisombahon, na pahundul dirini i rumah ni Naibata, na maningtingkon, paboa ia do Naibata. (Dan. 11:36.) 2:5 Ai lang idingat nasiam, na dob hupatugah in hinan, sanggah rap ope ahu pakon nasiam? 2:6 Ambahni ai, ibotoh nasiam do, aha na mangambatsi nuan, paima roh panorangni patalaron ia. 2:7 Ai domma marhorja nuan gogoh ni rusia ni hajahaton ai, paima ipadaoh na mangambatsi nuan. (Lah. 20:29.) 2:8 Dob ai pe ase patalaron siparjahat ai, tapi ripashonon ni Tuhan Jesus ma ia marhitei hosah ni pamanganni, anjaha siaphononni ma ia talarhonsi Ia bani parrohni ai. (Jes. 11:4; Pangk. 19:15, 20.) 2:9 Humbani kuasa ni sibolis do parroh ni parjahat ai, marhasoman haganup bagei ni hagogohon ampa tanda ampa halongangan ladung, (Mat. 24:24; Pangk. 13:11-13.) 2:10 ambahni ai marhasoman haganup bagei ni hajahaton sipaoto-oto bani halak na laho magou, halani lang ijalo sidea holong na humbani hasintongan in, ase maluah namin sidea. (2 Kor. 2:15; 14:3.) 2:11 Halani ai isuruh Naibata do bani sidea tonduy na pakahouhon, ase porsaya sidea bani ladung, (Rom 1:28; 2 Tim. 4:4.) 2:12 ase hona uhum sagala na so porsaya bani hasintongan in, na marosuh bani hagedukon. 2:13 Tapi na patut do hanami manghatahon tarima kasih tongtong bani Naibata halani nasiam, sanina na hinaholongan ni Tuhan in, ai ipilih Naibata do nasiam humbani mulani, ase saud nasiam maluah marhitei pangurasion ni Tonduy in ampa haporsayaon bani hasintongan in. (bd. 1:3, 4; Ep. 1:4.) 2:14 Ai hujai do nasiam idilo marhitei ambilan na madear, na niambilankonnami, ase parrupei nasiam bani hasangapon ni Tuhan Jesus Kristus. 2:15 Ase nasiam sanina, totap ma nasiam jongjong anjaha marsijoloman bani podah, na niajarhonnami bani nasiam, marhitei hata atap surat pe. (bd. 3:6.) 2:16 Ase Tuhanta Jesus Kristus pakon Naibata Bapanta, na mangkaholongi hita anjaha na mambere banta apoh-apoh na manongtong ampa pangarapan na madear marhitei idop ni uhur, 2:17 Ia ma mangapohi anjaha patotaphon uhurnasiam bani sagala horja ampa hata na madear.

2 Tessalonika 3

3:1 Ambahni ai, nasiam sanina, tonggohon nasiam ma hanami, ase rarat hata ni Tuhan in anjaha marsangap songon na bani nasiam, (Kol. 4:3.) 3:2 anjaha hanami maluah humbani halak na jungkat anjaha na jahat, ai seng haganup halak porsaya bani ambilan na madear. 3:3 Tapi hatengeran ni uhur do Tuhan in; pargogohanni do nasiam anjaha ondinganni dompak hajahaton. (1 Tes. 5:24.) 3:4 Anjaha tenger do uhurnami bani Tuhan in pasal nasiam, paboa horjahononnasiam do na hinatahonnami bani nasiam, sonari age hu lobeian on. (2 Kor. 7:16; Gal. 5:10.) 3:5 Sai itogu-togu Tuhan in ma uhurnasiam marholong songon Naibata, ampa marhasabaron songon Kristus. 3:6 Tapi ibagas goran ni Tuhanta Jesus Kristus, nasiam sanina, ipaingat hanami ma nasiam, sai surut ma nasiam humbani sanina na so torsa marparlahou, na so mangihutkon podah, na jinalonasiam humbannami. (Mat. 18:17; Rom 16:17.) 3:7 Ai ibotoh nasiam sandiri do, sonaha patut usihannasiam hanami, ai sedo na so torsa marparlahou hanami itongah-tongahnasiam; (1 Tes. 1:6.) 3:8 seng dong ipangan hanami ruti ni atap ise pe seng margalar, tapi loja anjaha sunsah do hanami marhorja arian pakon borngin, ase ulang adong humbani nasiam na isunsahi hanami. (1 Kor. 4:12.) 3:9 Sedo na so marhak hanami namin pasal ai, tapi mambere usihan do hanami bani nasiam marhitei parlahounami ibagas ai. 3:10 Ai age sanggah rap ope hanami pakon nasiam, domma iaturhon hanami bani nasiam: Barang ise, na so ra marhorja, ulang ma ia mangan. (1 Mus. 3:19.) 3:11 Ai tarbogei do bannami, paboa adong do deba humbani nasiam, na so torsa parlahouni, na so ra marlahoan, tapi manghorjahon na so horja do. 3:12 Bani halak sisonai ai iparentahkon anjaha ipalumba hanami ma ibagas Tuhan Jesus Kristus: Marhorja ma sidea nunut, sinarini ma ipangan! (1 Tes. 4:11.) 3:13 Tapi nasiam sanina, ulang ma marnaloja nasiam mambahen na madear! (Gal. 6:9.) 3:14 Anggo adong na manjua mambalosi hatanami na tarsurat on, pardiatei nasiam ma ia, ulang ma ra nasiam marsaor pakonsi, ase maila ia. (ay. 6; 1 Kor. 5:9, 11.) 3:15 Ulang songon munsuh ia ihira nasiam, tapi palumba nasiam ma ia songon sanina. 3:16 Tuhan Sipardamei in ma mambere damei bani nasiam tongtong marhitei haganup pambahenanni! Tuhan in ma manghasomani nasiam! 3:17 Ahu, si Paulus, manurat hata tabi on marhitei tanganku sandiri. Sonon do tanda tanganku bani sagala surathu, sonon do surathu. (1 Kor. 16:21.) 3:18 Idop ni uhur ni Tuhanta Jesus Kristus ma manghasomani nasiam haganup!

1 Timoteus 1

3:1 Ambahni ai, nasiam sanina, tonggohon nasiam ma hanami, ase rarat hata ni Tuhan in anjaha marsangap songon na bani nasiam, (Kol. 4:3.) 3:2 anjaha hanami maluah humbani halak na jungkat anjaha na jahat, ai seng haganup halak porsaya bani ambilan na madear. 3:3 Tapi hatengeran ni uhur do Tuhan in; pargogohanni do nasiam anjaha ondinganni dompak hajahaton. (1 Tes. 5:24.) 3:4 Anjaha tenger do uhurnami bani Tuhan in pasal nasiam, paboa horjahononnasiam do na hinatahonnami bani nasiam, sonari age hu lobeian on. (2 Kor. 7:16; Gal. 5:10.) 3:5 Sai itogu-togu Tuhan in ma uhurnasiam marholong songon Naibata, ampa marhasabaron songon Kristus. 3:6 Tapi ibagas goran ni Tuhanta Jesus Kristus, nasiam sanina, ipaingat hanami ma nasiam, sai surut ma nasiam humbani sanina na so torsa marparlahou, na so mangihutkon podah, na jinalonasiam humbannami. (Mat. 18:17; Rom 16:17.) 3:7 Ai ibotoh nasiam sandiri do, sonaha patut usihannasiam hanami, ai sedo na so torsa marparlahou hanami itongah-tongahnasiam; (1 Tes. 1:6.) 3:8 seng dong ipangan hanami ruti ni atap ise pe seng margalar, tapi loja anjaha sunsah do hanami marhorja arian pakon borngin, ase ulang adong humbani nasiam na isunsahi hanami. (1 Kor. 4:12.) 3:9 Sedo na so marhak hanami namin pasal ai, tapi mambere usihan do hanami bani nasiam marhitei parlahounami ibagas ai. 3:10 Ai age sanggah rap ope hanami pakon nasiam, domma iaturhon hanami bani nasiam: Barang ise, na so ra marhorja, ulang ma ia mangan. (1 Mus. 3:19.) 3:11 Ai tarbogei do bannami, paboa adong do deba humbani nasiam, na so torsa parlahouni, na so ra marlahoan, tapi manghorjahon na so horja do. 3:12 Bani halak sisonai ai iparentahkon anjaha ipalumba hanami ma ibagas Tuhan Jesus Kristus: Marhorja ma sidea nunut, sinarini ma ipangan! (1 Tes. 4:11.) 3:13 Tapi nasiam sanina, ulang ma marnaloja nasiam mambahen na madear! (Gal. 6:9.) 3:14 Anggo adong na manjua mambalosi hatanami na tarsurat on, pardiatei nasiam ma ia, ulang ma ra nasiam marsaor pakonsi, ase maila ia. (ay. 6; 1 Kor. 5:9, 11.) 3:15 Ulang songon munsuh ia ihira nasiam, tapi palumba nasiam ma ia songon sanina. 3:16 Tuhan Sipardamei in ma mambere damei bani nasiam tongtong marhitei haganup pambahenanni! Tuhan in ma manghasomani nasiam! 3:17 Ahu, si Paulus, manurat hata tabi on marhitei tanganku sandiri. Sonon do tanda tanganku bani sagala surathu, sonon do surathu. (1 Kor. 16:21.) 3:18 Idop ni uhur ni Tuhanta Jesus Kristus ma manghasomani nasiam haganup!

1 Timoteus 2

2:1 Ai pe on do sipaingathu parlobei humbani haganup. Sihol ma dalanhononkon pangindoan, partonggoon, pangapition ampa hatarimakasihon manghophop haganup jolma, (Pil. 4:6.) 2:2 manghophop raja-raja ampa haganup siparkuasa, ase boi hita sonang anjaha mardamei-damei manggoluh, daulat anjaha hormat ibagas haganup. 2:3 Dear do in, anjaha harosuh ni Sipaluah hita, ai ma Naibata, (bd. 1:1; 4:10.) 2:4 na mangkarosuhkon, ase haganup jolma maluah anjaha das mananda hasintongan in. (Hes. 18:23; 2 Ptr. 3:9.) 2:5 Ai sada do Naibata, anjaha sada do siholang ni Naibata pakon jolma, ai ma jolma Kristus Jesus in,(Rom 3:29, 30; Heb. 12:24.) 2:6 na mamberehon dirini gabe tobus manghophop haganup; in ma sisaksihononkon bani panorang na dearhonsi.(Gal. 1:4; 2:20; Tit. 2:14.) 2:7 Hujin do ahu ipabangkit gabe parambilan ampa apostel, guru bani sipajuh begu-begu ibagas haporsayaon ampa hasintongan; sintong do hatangku, seng marladung ahu. (Gal. 3:7, 8; 2 Tim. 1:11.) 2:8 Ai pe iparsinta uhurhu do, sihol ma martonggo sagala dalahi bani ganup ianan, manombahkon tangan na pansing, ulang ibagas ringis atap paringoran. 2:9 Anjaha naboru-naboru pe, hormat anjaha bulus ma pamakeini, ulang ma marjambulan na marpanjagar na malobihtu, barang irungkub dirini bani omas atap mata intan atap pakeian-pakeian na maharga-maharga, (1 Ptr. 3:3-5.) 2:10 tapi marhitei pambahenan na madear ma, songon na patut bani naboru, na mangaku, na daulat ia ilobei ni Naibata. (bd. 5:10.) 2:11 Masip ma naboru ibagas na marguru, marunduk ni uhur tumang. (Ep. 5:22.) 2:12 Seng hulopas naboru mangajari barang manrajai dalahi, tapi sip ma ia. (1 Mus. 3:16; 1 Kor. 14:34.) 2:13 Ai parlobei do si Adam itompa, dob ai pe ase si Hawa; (1 Mus. 1:27; 2:7, 22.) 2:14 anjaha sedo si Adam hona paoto-oto; naboru ai do hona paoto-oto, gabe manlanggar. (1 Mus. 3:6; 2 Kor. 11:3.) 2:15 Tapi maluah do ia marhitei na mantubuhkon anak, anggo totap ia ibagas haporsayaon ampa holong pakon hapansingon marhasoman hahormaton.

1 Timoteus 3

3:1 Hata na sintong do on: Halak na sihol gabe parmahan ibagas kuria, sipindahi horja na madear do ai.(Lah. 20:28.) 3:2 Halani ai, ia parmahan ibagas kuria, ulang ma adong sihataon bani, pargotong ni sada naboru, torang maruhur, pandei, hormat marparlahou, sipartamuei, na pandei mangajari, (Tit. 1:6, 7.) 3:3 ulang parminum, ulang parringis tapi parlamlam ma; ulang siparingor, anjaha ulang simata duit. 3:4 Halak na pandei mangatur rumah tanggani ma ai, pardakdanak sibalosi ajar, hormat ibagas haganup. (1 Sam. 2:12.) 3:5 Ai anggo seng ibotoh manrajai rumah tanggani, sonaha ma boi ia patorsahon kuria ni Naibata? 3:6 Ulang ma halak na baru masuk Kristen, ase ulang gabe gijang uhurni jadi madabuh hubagas uhum ni sibolis. 3:7 Maningon dear baritani bani halak pardarat, ulang madabuh ia jadi sirisaan ampa hubagas siding ni sibolis. (bd. 5:10; 1 Kor. 5:12, 13.) 3:8 Sonai homa siparugas maningon hormat do, seng sipardua hata, seng parminum, seng simata duit. (Lah. 6:2; Pil. 1:1.) 3:9 Maningon marsijoloman sidea bani rusia ni haporsayaon in ibagas panggora ni uhur na borsih. 3:10 Maningon siujion do homa lobei sidea; dob torang nani, seng dong sihataon bani sidea, ai pe ase boi sidea gabe siparugas. 3:11 Sonai homa parinangon ni sidea maningon hormat do, ulang sihata-hatai hasoman, torang maruhur anjaha bujur bani haganup. (Tit. 2:3.) 3:12 Ia siparugas, maningon paramangon ni sada naboru do, na mambotoh manrajai anakni ampa rumah tanggani. (ay. 2.) 3:13 Sidalankon horja parugason ai dear-dear, tontu lambin marsangap do, anjaha lambin martenger ni uhur ibagas haporsayaon bani Kristus Jesus. 3:14 Mangarap do ahu, podas do ahu roh marayak ho, tapi husurathon do on bam, ase, 3:15 porini hun dokah ahu roh, gabe ibotoh ho sonaha patut marparlahou ibagas rumah ni Naibata, in ma kuria ni Naibata na manggoluh in, tiang ampa onjolan ni hasintongan in. (Ep. 2:19-22; 2 Tim. 2:20.) 3:16 Banggal do tongon rusia ni hadaulaton in: Ia, domma talar ibagas daging, iparhatongon hapintoranni marhitei Tonduy, taridah bani malekat, iambilankon bani sipajuh begu-begu, ihaporsayai i dunia on, tarangkat hu hasangapon.(Mrk. 16:19; Joh. 1:14; 16:10; Rom 1:4.)

1 Timoteus 4

4:1 Tapi torang do ihatahon Tonduy in, paboa bani panorang parpudi adong ma deba na marbalik humbani haporsayaon in, marhitei na mambalosi tonduy sipangoto-otoi ampa podah-podah ni sibolis, (2 Tim. 3:1; 2 Ptr. 3:3; 1 Joh. 2:18.) 4:2 marhitei hasipakulah-kulahon ni sihatahon ladung, na pinapaan ni panggora ni uhurni: 4:3 Ilarang sidea do marhajabuan anjaha iparentahkon mangorom sipanganon, na jinadihon ni Naibata, na patut sijaloon ni halak na porsaya ampa na dob mananda hasintongan in namin marhasoman tarima kasih. (1 Mus. 9:3; 1 Kor. 10:30, 31.) 4:4 Ai sagala na jinadihon ni Naibata dear do ai, anjaha seng pantang, anggo marhasoman tarima kasih najalo ai, (1 Mus. 1:31; Lah. 10:15.) 4:5 halani gabe pansing do ai marhitei hata ni Naibata ampa tonggo. 4:6 Anggo in ipodahkon ho bani sanina in, juak-juak na madear ma ho bani Kristus Jesus, manggoluh humbani hata haporsayaon ampa humbani pangajaran na madear, na niirikkonmin. 4:7 Turi-turian na so margagan, na hinarosuhkon ni naboru-naboru na matua, tulakkon ma ai. Pasomal-somal ma dirimu mangkorjahon hadaulaton.(bd. 1:4; 6:20; 2 Tim. 2:16, 23; Tit. 1:14; 3:9.) 4:8 Ai otik do guna ni latihan badan, tapi hubani haganup do marguna hadaulaton in, ai hagoluhan sisonari ampa simagira iparbagah.(bd. 6:6.) 4:9 Hatengeran do hata in, anjaha talup jaloon ni haganup jolma. (bd. 1:15.) 4:10 Ai do ase loja hita anjaha maruntol, halani mangarap hita bani Naibata na manggoluh in, Sipaluah bani haganup jolma, tarlobih bani na porsaya. 4:11 In ma titahkon anjaha ajarhon! 4:12 Ulang ma adong na marmapas ni uhur bam halani haposoonmu, tapi gabe siusihan ma ho bani na porsaya, ibagas hata, parlahou, holong ni uhur, haporsayaon age hapormanon. (Tit. 2:15.) 4:13 Nunuti ma mambasa surat na mapansing in, mamodahi ampa mangajari paima roh ahu. 4:14 Ulang ma hampung uhurmu pasal sibere-bere idop ni uhur na adong bam in, na pinadas hu bam marhitei panjahaion ampa na manampeihon tangan marhitei sintua-sintua. (bd. 5:22; Lah. 6:6; 8:17.) 4:15 Dalankon ma in anjaha parlahouhon, ase talar hasurunganmu bani ganup halak. 4:16 Jaga ma ho bani dirimu ampa bani pangajaran in; totap ma ho ibagas in, ai anggo ihorjahon ho in, na paluahkon dirimu do ho ijin sonai age na manangihon ho. (Rom 11:14.)

1 Timoteus 5

5:1 Ulang ma sorgangi na matua, tapi paingat ma ia songon bapa, anjaha na maposo songon sanina, (3 Mus. 19:32.) 5:2 naboru na matua songon inang anjaha naboru siposonan songon botou, ibagas sagala hahormaton. 5:3 Pasangap ma naboru na mabalu, na botul mabalu. (ay. 5.) 5:4 Tapi, anggo marniombah atap marpahompu do na mabalu ai, iparlajari sidea ma lobei mansarihon ibagas hadaulaton parrumah ni sidea sandiri, mambahen pambalason dompak toras-toras ni sidea ai, ai do harosuh ni Naibata. 5:5 Anggo na mabalu na botul, na seng mardiha-diha, mangarap do ia bani Naibata, anjaha torus do ia, mangindo ampa martonggo arian pakon borngin; (Luk. 2:37.) 5:6 tapi sihorjahon hisap-hisap, na dob matei do ai, age manggoluh ope ia. 5:7 In ma parentahkon, ase ulang sihataon sidea. 5:8 Tapi, anggo adong ise, na so mansarihon diha-dihani, tarlobih ma parrumahni sandiri, na dob marnalangkon haporsayaon do ia ai, anjaha jahatan do ia marimbang na so porsaya. 5:9 Naboru na mabalu, na boi sidaftarhononkon, ai ma na dob marumur onom puluh tahun, sahali ope hansa laho, 5:10 na dear horjani isaksihon halak, na pagodang-godangkon anakni dear-dear, malas uhurni martamuei, ra mamburihi nahei ni halak na mapansing, sipangurupi bani halak na tarsosak, anjaha iporluhon sagala horja na madear. (Heb. 13:2.) 5:11 Tapi ulang ma daftarhon naboru na mabalu na poso, ai anggo oji tumang sidea holi, ai ma na manirang sidea humbani Kristus, sihol do ase sidea marhajabuan, 5:12 gabe hona uhum, marhitei na iosei sidea padanni ai hinan. 5:13 Ambah ni ai, parrayoh do sidea, martandangi hun rumah hu rumah; seng pitah parrayoh, tapi hertep do sidea anjaha mangalop manaruhkon hata, mansahapkon na so patut sihatahononkon. 5:14 Halani ai, ipangindo uhurhu do ase marhajabuan na maposo na mabalu, tubuhan tuah, iurus rumah tanggani, ase ulang adong dalan bani imbang, laho manrisai hita, (1 Kor. 7:9.) 5:15 ai domma adong deba na marbalik mangirikkon sibolis in. 5:16 Tapi anggo adong naboru na mabalu bani sada halak naboru na porsaya, ia ma lobei patorsa-torsahonsi; ulang ma iborati kuria in, ase tarpaturei-turei na mabalu na botul. 5:17 Sintua-sintua na bujur mandalankon hasintuaonni, lompit do hiraon hasangapon hubani sidea, tarlobih hubani na mandalankon parambilanon ampa pangajarion. (Rom 12:8.) 5:18 Ai ihatahon surat in do: "Seng bulih tutupon babah ni lombu na mardogei," anjaha: "Na patut do marupah siparhorja". (5 Mus. 25:4; Luk. 10:7; 1 Kor. 9:9.) 5:19 Ulang tangihon pangaduan dompak sada sintua, anggo seng sinaksihon ni dua atap tolu halak. (5 Mus. 19:15; 2 Kor. 13:1.) 5:20 Pinsang ma sipardousa ilobei ni sagala hasoman, ase mabiar halak na legan. (Gal. 2:14.) 5:21 Ilobei ni Naibata, ampa Kristus Jesus, ampa malekat na tarpilih in, hu parentahkon ma bam manramotkon haganupan in, ulang maralang-alang, ulang manonggor jumbak. 5:22 Ulang mapodastu ho manampeihon tangan bani halak, anjaha ulang saor ho bani dousa ni na legan; ramothon dirimu, ase borsih ho. (bd. 4:14.) 5:23 Ulang be pitah bah inum, tapi inum ma anggur otik-otik, halani boltokmu, ai gati do ho boritan. 5:24 Bani na deba halak, talar do dousani, sanggah lape sogop uhum; tapi bani na legan mangihut hun pudi. 5:25 Sonai homa horja na madear talar do, anjaha age na so talar ai ope, seng boi ponop ai.

1 Timoteus 6

6:1 Sagala halak na marhorja songon jabolon, ihira ma tuanni patut sipasangapon ibagas haganup, ase ulang hona risa goran ni Naibata ampa ajaran in. (Ep. 6:5; Tit. 2:9, 10.) 6:2 Tapi jabolon, na martuankon halak na porsaya, ulang ma moru parpasangapni bani, halani sanina ia; tapi lambin ibalosi ma ia, halani na porsaya ia anjaha sanina na hinaholongan, na buei marsilayak-layak. In ma ajarhon anjaha podahkon. (Pilem. 16.) 6:3 Barang ise na mangajarhon ajaran na legan, na so romban hubani hata hasintongan ni Tuhanta Jesus Kristus ampa ajaran na mardomu hubani hadaulaton in, (Gal. 1:6-9; 2 Tim. 1:13.) 6:4 na pajuntul-juntulhon diri do ai, anjaha na so marpambotoh. na gila marsual-sual do ai ampa martongkar, na parohkon subil, paringoran, risa-risa, tukas-tukas na jahat, 6:5 ampa parsalisihan na manorus humbani halak na dob seda uhurni, na dob magouan hasintongan in, na mangagan pansarian do hadaulaton in. 6:6 Pansarian banggal do tongon hadaulaton in, anggo marhasoman uhur na sonang. (bd. 4:8; Pil. 4:11, 12; Heb. 13:5.) 6:7 Ai seng adong iboan hita hu tanoh on, anjaha aha pe lang tarboan hita laho luar.(Job 1:21; Par. 5:14.) 6:8 Halani ai, anggo adong banta sipanganon ampa parhiouon, hasonangkon hita ma in. (Pod. 30:8.) 6:9 Ia halak na sihol bayak, madabuh do hubagas parlajouan ampa siding ampa bagei ni hisap-hisap haotoon, na mangagou anjaha na mandabuhkon jolma in hubagas hamagouan ampa hasedaon. (Pod. 23:4; 28:22.) 6:10 Ai urat ni sagala hajahaton do uhur na holongan bani duit, in do isura-surahon na deba, mambahen kahou humbani haporsayaon, gabe iaikkon buei sitaronon bani dirini. (Ep. 5:5.) 6:11 Tapi ho, siminik ni Naibata, maporus ma ho hunjai. Parayak ma hapintoran, hadaulaton, haporsayaon, holong ni uhur, hasabaron ampa lamlam ni uhur. (2 Tim. 2:22.) 6:12 Habujurhon ma porang haporsayaon na madear in, tangkap hagoluhan sisadokah ni dokahni, ai hujai do ho idilo, anjaha ibahen ho do pangakuan na madear in ilobei ni buei saksi. (1 Kor. 9:25, 26.) 6:13 Huparentahkon ma bam ilobei ni Naibata, sipagoluh haganup, ampa ilobei ni Kristus Jesus, na mambahen hasaksian na madear ilobei ni si Pontius Latus: (Joh. 18:36, 37; 19:11.) 6:14 Dalankon ma titah in, seng martikas, seng panurakon, ronsi talar Tuhanta Jesus Kristus. 6:15 Ai jumpahkonsi panorangni, talar ma la bahenon ni Na martuah in, Pargogoh sisada-sada in, Raja ni sagala raja anjaha Tuhan ni sagala tuan, (bd. 1:11; 5 Mus. 10:17; Pangk. 17:14.) 6:16 na sada in, na so ra matei, siiani haliharon na so tardohori, na so ongga niidah ni jolma, anjaha seng boi idahon. Bani ma hasangapon ampa hagogohon sadokah ni dokahni. Amen. (2 Mus. 33:20.) 6:17 Hatahon ma bani na bayak i dunia on: Ulang gijang uhur ni sidea, ulang marhatengeran bani habayakon na so totap in; tapi bani Naibata ma martenger ni uhur, na unjah mamberehon banta sihamalashononta. (Ps. 62:11; Luk. 12:20.) 6:18 Mangkorjahon na madear ma sidea, bayak bani horja na madear, paruhur na unjah anjaha ringgas marsilayak-layak, 6:19 ai ma parhiteian bani sidea, patumpuhon arta na madear bani panorang na sihol roh, ase itangkap sidea goluh na sintong. (Mat. 6:20.) 6:20 Ale Timoteus, ramothon ma na dob jinalomu; lembangi parsahapan na so daulat ampa parsual-sualan, na salah ginoran "habotohon". (bd. 4:7; 2 Tim. 1:14.) 6:21 In do iirikkon deba halak, gabe manlembang humbani haporsayaon. Idop ni uhur ma mangkasomani nasiam! (bd. 1:6; 2 Tim. 2:18.)

2 Timoteus 1

1:1 Humbani si Paulus, apostel ni Kristus Jesus marhitei rosuh ni Naibata, domu hubani bagah-bagah hagoluhan, na ibagas Kristus Jesus. 1:2 Hubani si Timoteus, anakku na hinaholongan: idop ni uhur, holong ampa damei ma bam humbani Naibata Bapa ampa Kristus Jesus, Tuhanta in. 1:3 Mangkatahon tarima kasih do uhurhu bani Naibata, na huidangi humbani borsih ni panggora ni uhur, songon pangidangi ni ompung-ompungta, sanggah na hudingat ho tongtong ibagas tonggongku, arian pakon borngin. (Lah. 23:1; 24:16; Pil. 3:5.) 1:4 Anggo hudingat iluh-iluhmu, ma sihol do ahu mangidah ho, ase dapotan malas ni uhur na gok ahu. 1:5 Ai hudingat do haporsayaonmu na so sipakulah-kulah in, haporsayaon, na marianan hinan homa ibagas uhur ni ompungmu naboru, si Lois, ampa inangmu, si Oinike, anjaha tenger do uhurhu, marianan homa bam. (Lah. 16:1.) 1:6 Halani ai, hupagolpa do ho, ase iparatah-ratah ho sibere-bere ni Naibata, na bam in, marhitei na hutampeihon tanganku bam. (1 Tes. 5:19; 1 Tim. 4:14.) 1:7 Ai seng tonduy biar ibere Naibata banta, tapi tonduy hagogohon, holong ampa panrajaion diri do. (Rom 8:15.) 1:8 Ai pe, ulang ma ho maila manaksihon Tuhanta, anjaha ulang homa maila ho pasal ahu, na tartutup halanisi; tapi dihut ma ho tene manaron halani ambilan na madear in ibagas gogoh na humbani Naibata. (Rom 1:16.) 1:9 Ai ipaluah anjaha idilo do hita marhitei pandiloon na mapansing, sedo halani pambahenanta, tapi mangihutkon sura-sura ampa idop ni uhurni do, na binereni banta ibagas Kristus Jesus, humbani mulani nari; 1:10 sonari nani, ipatidak marhitei partalar ni Sipaluah hita, Kristus Jesus, na parontihon hamateian, anjaha na paulgaphon hagoluhan ampa biak na so ra matei marhitei ambilan na madear in. (Rom 16:26; 1 Kor. 15:55, 57; Heb. 2:14.) 1:11 Hujin do ahu ipabangkit gabe siparambilan, apostel ampa guru, (1 Tim. 2:7.) 1:12 anjaha halani in do ase manaron ahu sonon; tapi seng maila ahu, ai hutanda do Ia, na huhaporsayai, anjaha tenger do uhurhu, margogoh Ia manramothon na pinasimpanhonni in bangku das hubani ari simagira. 1:13 Marsijoloman ma ho bani hata hasintongan, na binogeimu humbangku; ai ma tiru marhitei haporsayaon ampa holong bani Kristus Jesus. (1 Tim. 6:3; Tit. 2:1.) 1:14 Ramothon ma arta na madear, na pinasimpanhon in bam marhitei Tonduy Na pansing, na marianan ibagas hita. (ay. 12; 1 Tim. 6:20.) 1:15 Ibotoh ho do, na dob itadingkon haganup halak na hun Asia do ahu, deba humbani sidea ai ma si Pegelus ampa si Hermogenes. (bd. 4:16.) 1:16 Sai maidop ma uhur ni Tuhan in bani rumah tangga ni si Onesiporus, ai gati do malas uhurhu ibahen, anjaha seng maila ia halani garingku. (bd. 4:19.) 1:17 Ai sanggah roh ia hu huta Rom, iporluhon do mangindahi ahu, ronsi jumpahsi ahu. 1:18 Sai ibere Tuhan in ma, ase jumpahan idop ni uhur ia humbani Tuhan in bani ari simagira. Anjaha ibotoh ho do torang, sonaha pangidangini bangku i huta Epesus.

2 Timoteus 2

2:1 Ho pe, ale anakku, margogoh ma ho marhitei idop ni uhur ni Kristus Jesus, 2:2 anjaha na binogeimu humbangku ilobei ni buei saksi, ai ma padas hubani hasoman hatengeran ni uhur, na boi mangajari halak na legan. 2:3 Ra ma ho marsitaronon, songon tentara ni Kristus Jesus na bujur. (bd. 1:8; 4:5.) 2:4 Sada tentara na mandalankon tugas, seng ra ia taralit bani urusan-urusan goluh siganup ari, ase harosuh ia bani kopalani. 2:5 Halak siparlumba pe, seng boi jumpahan sortali rudang ia, anggo seng pambalosi ia bani paraturan-paraturanni.(bd. 4:8.) 2:6 Siparjuma, na torik marhorja, ai do na patut parlobei jumpahan gogoh ni juma ai. (1 Kor. 9:7.) 2:7 Paruhurhon ma na huhatahon in, ai bereon ni Tuhan in do bam hauhuron ibagas haganupan in. 2:8 Padingat-dingat ma Jesus Kristus, na dob pinapuho humbani na matei, na humbani ginompar ni si Daud, domu hubani na huambilankon in. (2 Sam. 7:12; 1 Kor. 15:4, 20.) 2:9 Marhalanihon-Si do ase marsitaronon ahu, pala hona garihon songon parjahat; tapi hata ni Naibata, seng targarihon. (Ep. 3:1, 13; Pil. 1:12-14; 2:17.) 2:10 Tapi hutaron do haganupan in halani na tarpilih in, ase dihut sidea marulih bani haluahon, na ibagas Kristus Jesus ampa bani hasangapon sisadokah ni dokahni. (Kol. 1:24.) 2:11 Hatengeran ni uhur do hata on: Anggo rap matei hita pakonsi, rap manggoluh ma homa hita pakonsi. (Rom 6:8; 2 Kor. 4:11.) 2:12 Anggo sabar hita manaron, rap manrajai ma hita pakonsi; anggo iparnalang hita Ia, parnalangonni ma age hita. (Mat. 10:33; Rom 8:17.) 2:13 Ia lang pe hatengeran ni uhur hita hatengeran ni uhur do anggo Ia, ai seng tarparnalangsi dirini. (3 Mus. 23:19; Rom 3:2-3.) 2:14 In ma pasingat anjaha lumbahon ilobei ni Naibata, ase ulang marsual-sual na so marguna sidea, gabe hasedaon bani na mambogeisi. (1 Tim. 6:4; Tit. 3:9.) 2:15 Haringgashon ma patuduhkon, paboa na bujur ho ilobei ni Naibata, songon sada parhorja na so tarbador, na padalankon hata hasintongan in pintor-pintor. (1 Tim. 4:6; Tit. 2:7, 8.) 2:16 Tapi simbili ma parsahapan na so marisi, na so margagan, ai lambin tambah do hajahaton ni sidea pangkorhonni ai, (1 Tim. 4:7.) 2:17 ai songon kanker do panggagat ni podah ni sidea ai inggot, si Hemeneus ampa si Piletus ma deba sidea ai. (1 Tim. 1:20.) 2:18 Na kahou do sidea humbani hasintongan in, ai ihatahon sidea do: "Domma masa parpuhoon in," gabe seda ibahen haporsayaon ni deba halak. (1 Tim. 6:21.) 2:19 Tapi totap do onjolan na humbani Naibata na toguh in, anjaha hata on ma surat ni lakni: "Itanda Tuhan in do halak, na Ia simadasi; anjaha: Barang ise na mandilo goran ni Tuhan in, maningon sirang ma ia humbani hajahaton".(4 Mus. 16:5; Joh. 10:14.) 2:20 Ibagas rumah na banggal, seng pitah parugas omas barang pirak adong, dihut do parugas hayu ampa tanoh, deba bani horja na sangap, na legan bani horja na so sangap. 2:21 Halak, na paborsih dirini humbani nongkan ai, ai ma gabe parugas na mapansing, na bani horja hasangapon, na marguna bani simada rumah ai, sirsir bani sagala horja na madear. 2:22 Lembangi ma hisap-hisap haposoon, tapi parayak ma hapintoran, haporsayaon, holong ampa damei, rap pakon halak, na mandilo goran ni Tuhan in humbani uhur na borsih. (1 Tim. 6:11.) 2:23 Tapi parsual-sualon haotoon ampa na so patut, simbili ma ai, ai ibotoh ho, na paroh paringoran do ai. (1 Tim. 4:7.) 2:24 Seng patut paringor-ingor anggo juak-juak ni Tuhan in, tapi parbasar do dompak haganup, pandei mangajari, sabar manaron na jahat, (Tit. 1:7.) 2:25 parlamlam mamodahi sipanlawan, andohar ibere Naibata bani sidea hamubahon ni uhur, laho mananda hasintongan in, 2:26 ase tarjolma sidea, maluah humbani siding ni sibolis in, na dob manangkap sidea, laho pasaudhon rosuh-rosuhni ai. (1 Tim. 3:7.)

2 Timoteus 3

3:1 Tapi botoh ma, na roh ma ari hasunsahan bani panorang parpudi. (1 Tim. 4:1.) 3:2 Ai manghaholongi dirini ma jolma ijai, paruhur duit, parhata toal, paruhur gijang, panrisai, seng pambalosi bani na matorasni, na so mambotoh martarima kasih, parhabutakon, (Mat. 24:12.) 3:3 seng parholong, na so ra madear, na so ra mardamei, si panukas-nukasi, seng ibotoh mangorom, parringis-ringis, magigi bani na madear, 3:4 sipartahi-tahi, na hampung maruhur, na pajuntul-juntulhon diri, na holongan bani hisap ni daging ase bani Naibata. (Pil. 3:19.) 3:5 Songon-songon na daulat do sidea, tapi iparnalang sidea do gogoh ni ai. Ai pe simbili ma sisonai ai. (Mat. 7:5, 21; Tit. 1:16.) 3:6 Halak sisonai do na ra marponop-ponop mammasuki rumah ni halak, mandormai naboru, na dob boratan ibahen dousa, na niarsik-arsik ni bagei ni hisap-hisap, (Mat. 23:14; Tit. 1:11.) 3:7 na tongtong marlajar, tapi lanjar seng boi mananda hasintongan in. 3:8 Songon si Jannes ampa si Jamberes panlawan bani si Musa, sonai do homa sidea panlawan bani hasintongan in, ai ma halak, na dob seda pingkiranni anjaha na talu ibagas haporsayaon. (2 Mus. 7:11, 22; 1 Tim. 6:5.) 3:9 Tapi seng anjai tarpasaud sidea ai torus, ai idahon ni ganup halak do haotoon ni sidea ai, songon na bani sidea halak ondi. 3:10 Tapi iihuthon ho do ahu bani podah, parlahou, tujuan, haporsayaon lumbang ni uhur, holong ampa hasabaron, 3:11 bani parburuon, sitaronon, na mangonai bangku i Antiokia, Ikonium ampa Listra. Ai ma pangayak-ayakon na hutaron, tapi ipaluah Tuhan in do ahu humbani haganupan in, (Ps. 34:20; Lah. 13:50; 14:5, 19.) 3:12 Tapi sagala na sihol daulat marparlahou ibagas Kristus Jesus, hona parburu do.(Mat. 16:24; Lah. 14:22.) 3:13 Ia halak parjahat ampa sipangoto-otoi sai na lambin jahat do; na mangoto-otoi do sidea anjaha hona oto-otoan. (1 Tim. 4:1.) 3:14 Tapi anggo ho, totap ma ho bani na dob ginuruhonmu ampa na hinaporsayaanmu, ai ibotoh ho do ise na mangajarhonsi bam, (bd. 2:2.) 3:15 anjaha ibotoh ho do humbani haetek-etekonmu nari, Surat na pansing in do, na margogoh papentarhon ho, ase marulih ho bani haluahon marhitei haporsayaon bani Kristus Jesus. (Joh. 5:39.) 3:16 Ai sagala Surat in sinahapkon ni Naibata do, anjaha marguna mamodahi, maminsang, pauli-ulihon ampa manogu-nogu hu hapintoran,(2 Ptr. 1:19-21.) 3:17 ase gokan dear siminik ni Naibata, mangasup bani sagala horja na madear.

2 Timoteus 4

4:1 Huparentahkon ma bam ilobei ni Naibata ampa Kristus Jesus, na sihol manguhumi na manggoluh ampa na matei, ampa halani partalarni ampa harajaonni: (1 Ptr. 4:5.) 4:2 Ambilankon ma hata in, haringgashon ma bani panorang na dear atap na lang dear pe, pinsang, paingat, podahi marhitei lumbang ni uhur banggal ampa pangajarion.(Lah. 20:20, 31.) 4:3 Ai roh ma panorangni, seng tartahan halak be ijai pangajaran na sintong in, tapi domu hubani rosuh ni sidea diloonni ma buei guru bani sidea, laho mambogei na mantin-mantin tangaron, (bd. 1:13; 1 Tim. 4:1.) 4:4 anjaha pagolingon ni sidea ma pinggolni humbani hasintongan hubani turi-turian. (1 Tim. 4:7; 2 Tes. 2:11.) 4:5 Tapi anggo ho, torang ma uhurmu pasal haganup, tahan ibagas hasunsahan, dalankon horja parambilanon anjaha gok dalankon tugasmu. (bd. 2:3.) 4:6 Ia ahu, galanghononkon ma; domma roh panorangku laho matei. (Pil. 2:17.) 4:7 Domma hudobkon parlawanan na madear in, hupaujung parlumbaonku anjaha ramot hubahen haporsayaon in.(1 Kor. 9:25; Pil. 3:14; 1 Tim. 6:12.) 4:8 Domma sirsir i lobeihu sortali hapintoran in, sibereon ni Tuhan, Panguhum na pintor in bangku bani ari simagira; tapi seng pitah bangku, bani haganup do, na manghasiholi partalarni ai. (bd. 1:12; 2:5; 1 Ptr. 5:4; Pangk. 2:10.) 4:9 Papodas ma roh marayak ahu! (ay. 21; bd. 1:4.) 4:10 Ai domma itadingkon si Demas ahu, halani na dob holong uhurni bani dunia on, lanjar laho hu Tessalonik; si Kreskens laho do hu Galatia, si Titus hu Dalmatia. (Kol. 4:14.) 4:11 Sahalak si Lukas mando hasomanku. Arahkon si Markus, boan ia hasomanmu, ai porlu do ia marugas bangku. (Lah. 15:37; Kol. 4:10.) 4:12 Si Tikikus, husuruh do hu Epesus. (Lah. 20:4; Ep. 6:21; Kol. 4:7.) 4:13 Anggo roh ho, boan ma baju panas, na hutadingkon bani si Karpus, huta Troas; sonai homa buku-buku in, siporlunan ai ma pustaha (perkamen) in. 4:14 Buei do hajahaton ibahen si Aleksander, tukang bosi ai, bangku; Tuhan in ma mambalashon bani domu hubani pambahenanni ai. (1 Tim. 1:20.) 4:15 Ho pe, jaga ma ho bani, ai gomos do panlawanni bani hatanami. 4:16 Bani na marpartahankon diringku na parlobei ahu, sahalak pe lang adong na mangurupi, haganup do manadingkon ahu; ulang ma ibalaskon in bani sidea. (bd. 1:15.) 4:17 Tapi Tuhan in do mangkasomani anjaha margogohi ahu, ase mardalan parambilanon in marhitei ahu, gabe haganup sipajuh begu-begu mambogeisi; anjaha maluah do ahu humbani babah ni singa ai. (Lah. 23:11; 27:23.) 4:18 Paluahon ni Tuhan in do ahu humbani haganup hajahaton, anjaha pamasukonni ahu hubagas harajaonni na i nagori atas ai. Bani ma hasangapon ronsi sadokah ni dokahni. Amen. 4:19 Padas ma tabingku bani si Priska ampa si Akila, sonai hubani keluarga ni si Onesiporus. (bd. 1:16; Lah. 18:2; Rom 16:3.) 4:20 Tading do si Erestus i Korint; tapi boritan do hutadingkon si Tropinus i Milete. (Lah. 19:22; 20:4; 21:29.) 4:21 Podas ma ho roh paima musim borgoh. Tabi bam humbani si Oibulus, si Pudens, si Linus, si Klaudia ampa haganup sanina. 4:22 Ihasomani Tuhan in ma tonduynasiam! Idop ni uhur ma bani nasiam!

Titus 1

1:1 Humbani si Paulus, juak-juak ni Naibata anjaha apostel ni Jesus Kristus, laho manogu-nogu halak na pinilih ni Naibata hubani haporsayaon ampa pangarusion bani hasintongan in, na mardomu hubani hadaulaton, 1:2 maronjolan hubani pangarapan bani hagoluhan na so ra bois, na dob humbani mulani iparbagah Naibata, na so siparladung in, 1:3 anjaha ipatalar do hatani in bani panorangni, marhitei parambilanon na dob niondoskonni bangku, romban hubani pangkatahon ni Naibata, Sipaluah hita, (Ep. 1:9, 10; 1 Tim. 1:1, 11.) 1:4 marayak si Titus, anakku na tongon, marhitei haporsayaon riap in: Idop ni uhur ma bam ampa damei humbani Naibata Bapa ampa humbani Kristus Jesus, Sipaluah hita. (1 Tim. 1:2; 2 Tim. 1:2.) 1:5 Ase hutadingkon pe ho i Kreta, ai ma, ase ipatorsa ho horja na tading ope, anjaha ipabangkit ho sintua bani ganup huta, songon na dob huaturhon bam, (Lah. 14:23; 2 Tim. 2:2.) 1:6 ai ma dalahi na so dong sihataon bani, paramangon ni sada naboru, pardakdanak na porsaya, na so adong pamandangon bani parlahou anjaha seng jungil. (1 Tim. 3:2-4.) 1:7 Ia parmahan, sijolom anakkunsi ni Naibata, ulang ma panurakon; ulang sihorjahon uhur-uhurni, ulang pargila-gila, ulang parmabuk, ulang paringor, ulang na marpansarian humbani na so dalanni, (1 Kor. 4:1; 2 Tim. 2:24.) 1:8 tapi sipartamuei ma, na malas uhur bani na madear, siparuhur, na bonar, na pansing, sirajai diri, 1:9 na marsijoloman bani hata na sintong in, domu bani pangajaran in, ase margogoh ia, mangojur marhitei pangajaran na pintor in, age maminsang sipanlawan. 1:10 Tapi buei do halak, na jungil, sibuei sahap ampa na pakahouhon, tarlobih humbani parugama Jahudi. 1:11 Maningon pasipon do pamangan ni sidea, ai igeori sidea do bulat-bulat rumah tangga marhitei na mangajarhon na so patut, laho mambuat duit sihailahononkon. (2 Tim. 3:6.) 1:12 Sahalak humbani sidea, ai ma nabi ni sidea sandiri, mangkatahon: Halak Kreta, parladung do ai tong, binatang panoroh, sitahar boltok. 1:13 Sintong do hasaksian ai; halani ai gomos ma paminsangmu bani sidea, ase dear sidea ibagas haporsayaon, (2 Tim. 4:2.) 1:14 anjaha ulang be ipatangi-tangi sidea turi-turian ni halak Jahudi pakon titah-titah ni jolma, na marbalik humbani hasintongan in. (1 Tim. 4:7.) 1:15 Borsih do haganup bani halak na borsih; tapi bani halak na butak, na so porsaya, seng dong na borsih, ai domma butak uhur ni sidea ampa panggora ni uhur ni sidea. (Mat. 15:11; Rom 14:20.) 1:16 Ihatahon sidea, domma itanda Naibata, tapi iparnalang do Ia marhitei horja ni sidea; ai hagigi do sidea anjaha seng sipambalosi, seng tarpakei bani atap aha pe horja na madear.

Titus 2

2:1 Tapi anggo ho, hatahon ma, na domu hubani pangajaran na pintor in: (1 Tim. 6:3; 2 Tim. 1:13.) 2:2 Ojur ma dalahi na matua maruhur na torang, daulat, porman, sintong ibagas haporsayaon, ibagas holong pakon ibagas hasabaron. (1 Tim. 5:1.) 2:3 Sonai homa naboru na matua, marparlahou ma sidea songon halak na mapansing, ulang sipanukas, ulang homa hatagihan bani anggur, tapi sipodahkon na madear ma, (1 Tim. 3:11.) 2:4 ase tartogu-togu sidea naboru na poso ope mangkaholongi paramangonni ampa dakdanakni, 2:5 porman, sopan, na bujur mamorluhon horja i rumah, unduk dompak paramangonni bei, ase ulang hona risa hata ni Naibata. 2:6 Podahi homa dalahi na maposo, ase marhahormaton. 2:7 Ia ho, ibagas haganup, maningon sitiruan ma ibagas horja na madear, pitah anjaha ringgas bani pangajarion; (1 Tim. 4:12; 1 Ptr. 5:3.) 2:8 sihatahon podah na sintong, na seng dong sihataon, ase maila sipanlawan ai, halani seng dong na bajan sihatahononni dompak hita. (1 Ptr. 2:5.) 2:9 Jabolon pe maningon balosanni do tuanni, pamalasonni uhurni ibagas haganup, ulang manlawan-lawan, (Ep. 6:5; 1 Tim. 6:1; 1 Ptr. 2:18.) 2:10 ulang manangko, tapi ipatuduhkon ma haganup habujuron, ase marsangap pangajaran na humbani Naibata, Sipaluah hita, ibagas haganup. 2:11 Ai domma mulgap idop ni uhur ni Naibata bahen haluahon ni haganup jolma. 2:12 Iajari do hita marhiteihon idop ni uhurni marnalangkon uhur na so daulat ampa hisap-hisap dunia on, ase iparlahouhon hita hapormanon, hapintoran, ampa hadaulaton i dunia on, (Ep. 1:4.) 2:13 sanggah na paima-imahon hita bani hatuahon na niaraphonta in pakon partalar ni hamuliaon ni Naibata na banggal in ampa Kristus Jesus, Sipaluah hita, (1 Kor. 1:7; Pil. 3:20.) 2:14 na mamberehon dirini manghophop hita, laho manobus hita humbani haganup hajahaton, anjaha urasonni bani dirini sada bangsa, ase Ia simadasi, na mangkaringgashon sagala horja na madear. (Gal. 1:4; Ep. 2:10; 1 Tim. 2:6.) 2:15 In ma hatahon, podahkon anjaha akimhon hubani halak humbani gok ni uhurmu. Ulang ma dong na mapas bam. (1 Tim. 4:12.)

Titus 3

3:1 Paingat ma sidea, ase unduk anjaha pambalosi bani pamarentah ampa siparkuasa, janah sirsir bani sagala horja na madear, (1 Ptr. 2:1.) 3:2 ulang sipanrisai atap bani ise pe, ulang siparingor, basar anjaha lamlam bani haganup halak. (Pil. 4:5.) 3:3 Ai dihut do hita hinan halak na oto, seng sipambalosi, na kahou, pinarjabolon ni bagei ni hisap-hisap ampa rosuh-rosuh, ibagas hajahaton ampa subil; jolma hagigi do hita anjaha na marsidomdoman. (1 Kor. 6:11; Ep. 2:2; 5:8.) 3:4 Tapi talarhonsi halayakon ampa holong ni uhur ni Naibata, Sipaluah hita,(bd. 2:11.) 3:5 ipaluah do hita, sedo halani horja hapintoran na binahenta, tapi halani idop ni uhurni do, marhitei pandidion pangulakion tubuh ampa habayuon marhitei Tonduy Na pansing, (Ep. 2:8, 9; 5:26; Joh. 3:5.) 3:6 na dob niuseihonni banta unjah, marhitei Jesus Kristus, Sipaluah hita,(Joel 3:1.) 3:7 ase gabe pintor hita halani idop ni uhurni, anjaha gabe sitean hagoluhan na sadokah ni dokahni, domu hubani pangarapan in. 3:8 Hatengeran ni uhur do hata in, anjaha ipindo uhurhu, ase gomos ma panaksihonmu bani hata in, ase sidea, na dob porsaya bani Naibata, ra mangkaringgashon horja na madear; in ma na madear anjaha na marguna bani jolma. (ay. 14.) 3:9 Tapi lembangi ma sual-sual haotoon ampa pasal tarombo-tarombo, parsalisihan ampa paringoran pasal titah in, ai seng marguna in anjaha sisoya-soya do. (1 Tim. 4:7.) 3:10 Siparpodah na kahou, dob ipaingat ho ia sahali dua hali, tulak ma ia, (Mat. 18:15; 2 Joh. 10.) 3:11 ai ibotoh ho do, na dob marbalik do halak sisonai anjaha mardousa; anjaha ia sandiri mamapaisi. (1 Tim. 6:4, 5.) 3:12 Ia dob husuruh si Artemas ampa si Tikikus bam, papodas ma roh manjumpahkon ahu hu Nikopolis, ai ijai do ahu sihol soh sanggah musim borgoh. (2 Tim. 4:12.) 3:13 Si Semas, sibotoh titah in, ampa si Apollos, porluhon ma pabingkathon sidea, ase ulang hurangan sidea atap bani aha pe. (Lah. 18:24; 1 Kor. 3:5, 6.) 3:14 Hasomanta pe iguruhon ma mamponguthon horja na madear, laho mansarihon na porlu pakeion, ase ulang lang marbuah sidea. (bd. 2:14; Mat. 7:19; Ep. 4:28.) 3:15 Manongos tabi do bam haganup na rap pakon ahu. Padas tabinami bani na manghaholongi hanami ibagas haporsayaon. Idop ni uhur ma mangkasomani nasiam haganup!

Pilemon 1

1:1 Humbani si Paulus, na tartutup halani Kristus Jesus, ampa si Timoteus, sanina in, hubani si Pilemon, na hinaholongan ampa hasoman sahorjanami, (Ep. 3:1.) 1:2 ampa hubani si Appia, botounami, ampa hubani si Arkippus, hasomannami maruntol, ampa hubani kuria na martumpu i rumahmu: (Kol. 4:17.) 1:3 Idop ni uhur ma bani nasiam ampa damei humbani Naibata, Bapanta, ampa humbani Tuhan Jesus Kristus. 1:4 Mangkatahon tarima kasih do ahu tongtong bani Naibatangku, siap hudingat ham bani tonggongku. (Rom 1:8; Ep. 1:15, 16.) 1:5 Ai hubogei do holong ni uhurmu ampa habujuronmu bani Tuhan Jesus pakon dompak haganup halak na mapansing. (Kol. 1:4, 9.) 1:6 Anjaha hutonggohon do, ase parsaoranmu ibagas haporsayaon in mangkorhon panandaion ma in bani haganup na madear na adong banta ibagas Kristus. (Pil. 9:10.) 1:7 Holongmu ai, ham saninangku, ihorhon do bangku buei malas ni uhur ampa apoh-apoh, ai ipahinsah ham do uhur ni halak na mapansing in. (2 Kor. 7:4.) 1:8 Halani ai, age pe barani do namin ahu ibagas Kristus, mamarentahkon bamu mambahen na patut, 1:9 tapi dearan ma halani uhur holong ahu mangindo bamu, ahu, si Paulus, sada halak na dob matua, na targari nuan halani Kristus Jesus. 1:10 Ase huelek-elek ma ham pasal si Onesimus (na marguna), anakku ibagas Kristus, na hutubuhkon sanggah na tartutup on ahu. (1 Kor. 4:15; Gal. 4:19; Kol. 4:9.) 1:11 Seng marguna hinan ia bamu, tapi sonari marguna ma bamu age bangku. 1:12 Husuruh do ia mulak bamu, tampuk ni atei-ateihu do ia. 1:13 Sihol do namin jolomanku ia, ase gantihmu ia laho patorsa-torsahon ahu, na tartutup on halani ambilan na madear in. (Pil. 2:30.) 1:14 Tapi seng ra ahu mambahen age aha pe, anggo seng humbani dear ni uhurmu, ase ulang ma songon paksaan dear ni layakmu, tapi humbani rosuh ni uhurmu ma. (2 Kor. 9:7.) 1:15 Ra, ase sirang pe ia tongkin humbamu, ase lalab do ia bamu, 1:16 seng be songon sada jabolon, tapi lobih ma humbani jabolon, ai ma sanina na hinaholongan, tarlobih hubangku, tontu lobihan ma bamu, ibagas daging ampa ibagas Tuhan in. (1 Tim. 6:2.) 1:17 Ase anggo huanmu do ahu ihira ham, jalo ham ma ia songon ahu. 1:18 Tapi, anggo adong salahni atap utangni bamu, hubangku ma ai parkirahon ham. 1:19 Ahu, si Paulus, manuratkon on marhitei tanganku sandiri: Ahu ma manggalar ai; seng pala tarsingatanku, na marutang do ham namin pasal dirimu hubangku. 1:20 Ham saninangku, sihol do humbamu maruntung ahu ibagas Tuhan in; pahinsah ham ma uhurhu ibagas Kristus. 1:21 Tenger do uhurhu, sanggah na manurat on, balosanmu do na hupindohon, lobih tene humbani na huhatahon. 1:22 Ambah ni ai pasirsir ham ma ianan bangku, ai mangarap do ahu, halani tonggonasiam bereonNi do mulak ahu bani nasiam. (Pil. 1:25; 2:24.) 1:23 Manongos tabi bamu, si Epapras, hasomanku tartutup ibagas Kristus Jesus, (Kol. 1:7; 4:12.) 1:24 sonai homa si Markus, si Aristarkus, si Demas ampa si Lukas, hasomanku sahorja. (Lah. 12:12; 27:2; Kol. 4:10, 14; 2 Tim. 4:10.) 1:25 Ihasomani idop ni uhur ni Tuhan Jesus Kristus ma tonduynasiam. (Pil. 4:23.)

Heb 1

1:1 Gati anjaha bagei do sapari dalan ni Naibata marsahapkon ompungta marhitei nabi-nabi in; 1:2 tapi bani panorang parpudi on iparsahapkon do hita marhitei Anakni, ai ma na pinabangkitni gabe sitean haganup, parhiteianni homa manompa sagala na adong. (Ps. 2:8; Joh. 1:3; Kol. 1:16.) 1:3 Sinalsal ni hasangaponni ampa usihan ni hadirionni do Ia, anjaha Ia do na manatang haganup na adong in marhitei hatani na marhagogohon in. Dob iadongkon haborsihon humbani sagala dousa, laho do Ia hundul hu siamun ni Hamuliaon in, na i babou ai. (bd. 9:14, 26; Mrk. 16:19; 2 Kor. 4:4; Kol. 1:15.) 1:4 Songon lobih ni goran, na tineanni ai, humbani goran ni sagala malekat, sonai do surung ni hasangaponni humbani sidea. 1:5 Ai hubani malekat na ija ma ongga ihatahon: "Anakku do ho, sadari on do ho hutubuhkon?" "Dob ai use Ahu do gabe Bapa bani, anjaha Ia anak Bangku?" (Ps. 2:7; 2 Sam. 7:14.) 1:6 Anjaha, sanggah na sihol arahkononni hu dunia on Anakni, na parlobei tubuh in, ihatahon do: "Maningon do manrogop hulobeini sagala malekat ni Naibata." (Ps. 97:7; Rom 8:29.) 1:7 Tongon, ihatahon do pasal malekat: Ia mambahen logou malekatni, apuy na marjimbur-jimbur do juak-juakni. (Ps. 104:4.) 1:8 Tapi pasal Anak in, ihatahon do: "Ronsi sadokah ni dokahni do paratasmu, Hata Naibata, tungkot hapintoran do tungkot ni harajaonmu. 1:9 Holong do uhurmu bani hapintoron anjaha magigi bani na salah; halani ai do ase iminakkon Naibatamu minak malas ni uhur Bamu, Ham Naibata, lobih humbani hasomanmu." (Ps. 45:7-8.) 1:10 Ihatahon do homa: "Ham do, ale Tuhan, na pajonam tanoh on bani mulani, anjaha jadi-jadian ni tanganmu do langit in. (Ps. 102:26-28.) 1:11 Magou do ganupan in use, tapi totap do anggo Ham; laho buruk do in ganup songon hiou. 1:12 Sorpihonmu do in ganup songon baju mantel, gabe mubah ma; tapi anggo Ham, totap do, anjaha tahunmu pe seng marujung". 1:13 Tapi bani malekat na ija ma ongga ihatahon: "Hundul ma ho hu siamunhon, paima hubahen munsuhmin sidogeian Ni naheimu?" (Ps. 110:1.) 1:14 Ai lang tonduy siparugas do sidea haganup, na sinuruh mangidangi halani sitean haluahon in? (Dan. 7:10; Ps. 34:8; 91:11.)

Heb 2

2:1 Halani ai, maningon lambin poltikni do panjolomta bani hata, na dob binogeita, ase ulang mayub hita. 2:2 Hata, na hinatahon ni malekat, totap do, anjaha sagala panlanggaron ampa pangengkaron dapot pambalason na pintor. (Lah. 7:53; Gal. 3:19.) 2:3 Tumaram ma boi maporus hita, anggo lansei hita bani haluahon na sain banggal? Tuhan in sandiri do manghatahon haluahon ai lobei, anjaha na mambogei ai manaksihon banta hasintonganni ai, (bd. 10:29; 12:25.) 2:4 anjaha isaksihon Naibata ope ai marhitei tanda, halongangan, bagei-bagei ni hagogohon ampa Tonduy Na pansing, na binagihonni domu hubani rosuh ni uhurni. (Mrk. 16:20; 1 Kor. 12:4, 11.) 2:5 Ai seng malekat ibahen Naibata panrajai bani dunia na sihol roh ai, ai ma dunia na sinahapkonta on. 2:6 Tapi adong do isaksihon ibagas Surat in: Aha do jolma in, ase idingat Ham ia, barang anak ni jolma in, ase itatap Ham ia? (Ps. 8:5-7.) 2:7 Ipatoruh Ham do ia tongkin toruhan marimbang malekat; hasangapon ampa hamuliaon do isortalihon Ham bani. 2:8 Haganup do ipatunduk Ham hutoruh ni naheini. Marhitei na pinatundukni ai haganup hu-Bani, seng adong na tading ibahen, na so unduk hu-Bani; tapi anggo sonari, lang iidah hita ope, na dob tunduk hu-Bani haganup. 2:9 Tapi Ia, na pinatoruh ai tongkin itoruh ni malekat, ai ma Jesus, iidah hita do marsortali hasangapon ampa hamuliaon, halani na dob itaron hamateian, ase marhitei idop ni uhur ni Naibata ihophop haganup marhitei hamateian na tinaronni ai, (Pil. 2:8, 9.) 2:10 Ai patut do, Ia parmulaan ampa na mandobhon haganup, ibagas na sihol boanonni buei anak hu hasangapon, pajongjongonni gokan dear marhitei sitaronon pambobai in, na mamboan sidea hu haluahon. (Rom 11:36.) 2:11 Ai Ia, na papansingkon ai ampa na pinapansingni ai, sada do harohanni haganup. Halani ai, seng maila Ia manggoran sidea saninani, (Mat. 25:40; Mrk. 3:34, 35; Joh. 20:17.) 2:12 ai nini do: Ambilanhononku do goranmu hubani saninangku; itongah-tongah ni kuria in do dodinghononku Ham. (Ps. 22:23.) 2:13 Dob ai use: "Ia do bahenonku hatengeran ni uhurhu". Ambah ni ai: "Ijon do Ahu ampa dakdanak in, na binere ni Naibata hubangku". (Jes. 8:17, 18.) 2:14 Ase, songon dakdanak parrupei bani daging ampa daroh, sonai do homa Ia parrupei ijai, ase marhitei hamateian ai iparseda sibolis in, na markuasa bani hamateian, (ay. 17; Joh. 12:31; 2 Tim. 1:10.) 2:15 ase ipaluah haganup na pinarjabolon ni biar bani hamateian, sadokah manggoluh. 2:16 Ai sedo malekat na sinarihonni, tapi ginompar ni si Abraham do. 2:17 Halani ai maningon gabe dos do Ia pakon saninanin pasal haganup, ase gabe paridop ni uhur Ia ampa Sintua ni malim hatengeran ni uhur ilobei ni Naibata, laho pasaloseihon dousa ni bangsa in.(Pil. 2:7.) 2:18 Ai, halani dob marsitaronon Ia anjaha tarlajou, margogoh do Ia mangurupi sagala na tarlajou. (bd. 4:15.)

Heb 3

3:1 Halani ai, nasiam sanina na mapansing, siparrupei bani pandiloon na hun nagori atas, tonggor nasiam ma Apostel anjaha Sintua ni malim in, na sinaksihonta in, ai ma Jesus. (bd. 4:14.) 3:2 Hatengeran ni uhur do Ia bani na pabangkithonsi, songon si Musa ibagas ganup rumahNi ai. (4 Mus. 12:7.) 3:3 Tapi bueian do hasangapon ibere Bani ase hubani si Musa, domu hubani surung ni hasangapon bani na pajongjong rumah marimbang rumah na pinajongjongni ai. 3:4 Ai ganup rumah, adong do na paulihonsi, tapi Naibata do na mangadongkon haganup. 3:5 Ia si Musa tongon, haposan do ia irumah ni Naibata, songon siparugas, laho manaksihon na sihol sisahaphononkon ope use, 3:6 tapi anggo Kristus haposan do songon Anak, na manggomgomi rumah ni Naibata; anjaha hita do rumahni ai, anggo poltik ijolom hita ronsi ujungni hinsah ni uhur ampa tenger ni uhur bani na niaraphon ai. (Ep. 2:19.) 3:7 Halani ai, songon na hinatahon ni Tonduy Na pansing: "Sadari on, sanggah na binogei nasiam sorani,(Ps. 95:7-11.) 3:8 ulang ma pamapir nasiam uhurnasiam, songon sanggah ari panlawan on ai, sanggah ari parlajouan ai i halimisan.(2 Mus. 17:7; 4 Mus. 20:2-5.) 3:9 Ijai ilajou anjaha isuba ompungnasiam do Ahu, age pe iidah sidea na huhorjahon ompat puluh tahun dokahni. 3:10 Halani ai manggila do Ahu bani na sansundut ai, anjaha huhatahon: Tongtong do kahou uhur ni sidea, seng itanda sidea dalanku, 3:11 pala marbija Ahu ibagas ringishu: Sabonar seng bulih masuk sidea hu parsarananku". (4 Mus. 14:21-23.) 3:12 Nasiam sanina, jaga ma nasiam, ase ulang adong paruhur na jahat, na so porsaya humbani nasiam, na manundali Naibata na manggoluh in. 3:13 Tapi marsipagolpaan ma nasiam ganup ari, sadokah hata "Sadari on" marlaku ope, ase ulang adong humbani nasiam, na gabe mapir uhurni halani dousa, na paoto-otohon in. (1 Tes. 5:11.) 3:14 Ai domma parrupei hita bani Kristus, anggo poltik ijolom hita tenger ni uhur, na dob adong banta bani mulani ronsi ujungni. (bd. 6:11.) 3:15 On do na hinatahon ni Surat in: Sadari on, sanggah na binogeinasiam sorani, ulang ma pamapir nasiam uhur nasiam, songon sanggah ari panlawanon ai. (ay. 7.) 3:16 Ise do sipanlawan ai, age pe ibogei sorani? Ai lang haganup do sidea, na mandarat hun Masir, binobahon ni si Musa? 3:17 Ise do na ginilaanni ai pala ompat puluh tahun dokahni? Ai lang sidea, na mardousa ai do? Radag do bangkei ni sidea i halimisan ai. (1 Kor. 10:10.) 3:18 Dompak ise do Ia marbija, paboa na so bulih sidea masuk hu parsarananni ai? Ai lang dompak sidea na so si pambalosi ai do? 3:19 Jadi iidah hita ma: Halani na so porsaya do sidea, ase lang tarbahen sidea masuk.

Heb 4

4:1 Halani ai, sadokah adong ope bagah-bagah boi masuk hita hu parsarananni ai, marhabiaran ma hita, ase ulang adong atap ise humbanta na tading. 4:2 Ai dihut do hubanta roh ambilan na madear, songon na hubani sidea; tapi seng marguna bani sidea hata na binogei ni sidea ai, halani sanggah ibogei sidea ai, seng ijalo sidea ai marhasoman haporsayaon. 4:3 Ia hita, na dob gabe porsaya, masuk do hu parsaranan ai, songon na hinatahonni ai: "Songon na hubijahon ibagas ringishu: Sabonar seng bulih masuk sidea hu parsarananku," age pe horja ai domma siap humbani partombei ni dunia on. (bd. 3:11; Ps. 95:11.) 4:4 Halani ongga do ihatahon pasal ari na papituhon ai: "Jadi marsaran ma Naibata bani ari papituhon in humbani ganup horjani." (1 Mus. 2:2.) 4:5 Dob ai use: "Na so bulih do masukan ni sidea parsaranankin!" 4:6 Ase adong ope deba na boi masuk hu parsaranan ai, tapi na parlobei ni ambilanan ai lang masuk, halani seng mambalosi. 4:7 Halani ai itotaphon ma use sada nari: " Sadari on", ibagas na ihatahon marhitei si Daud, dob sonai dokahni ipudini ai, songon na dob hinatahon nongkan: Sadari on, sanggah na binogeinasiam uhurnasiam.(bd. 3:7; Ps. 95:7, 8.) 4:8 Ai ambit si Josua na pamasukkon sidea hu parsaranan ai, seng hatahononni be i pudini ai pasal ari na legan. (5 Mus. 31:7; Jos. 22:4.) 4:9 Ase, adong ope parsaranan Sabat bani bangsa ni Naibata. 4:10 Ai barang ise na masuk hu parsaranan ni Naibata, marsaran do homa humbani horjani, songon Naibata na marsaran humbani horjani. 4:11 Halani ai, porluhon hita ma masuk hu parsaranan ai, ase ulang adong na tompas, mangihutkon usihan ni sidea, na so sipambalosi ai. 4:12 Ai na manggoluh do hata ni Naibata anjaha marhagogohon, marotan humbani ganup podang sidua mata, anjaha torus masuk hubagas; isirang do tonduy pakon uhur, sonai homa ringring ampa utok-utokni, lanjar iuhumi do na piningkir ampa sura-sura ni uhur.(Jer. 23:29.) 4:13 Anjaha seng dong na tinompa, na lingod hun lobeini, haganup do tene tidak anjaha ungkab bani pangidahni, hu-Bani do hita martanggung jawab. 4:14 Ai pe, halani adong do banta Sintua ni malim na bolon, na dob torus das hu nagori atas, ai ma Jesus, Anak ni Naibata, poltik ma jolom hita hata haporsayaonta in. (bd. 3:1; 6:20; 7:26; 8:1; 9:11.) 4:15 Ia Sintua ni malim na adong banta, sedo na so tarbahen Ia hasoman mangahap bani hagalekonta; na tarlajou do Ia bani haganup songon hita, tapi seng mardousa.(bd. 2:17.) 4:16 Ase marhinsah ni uhur ma hita marayak paratas idop ni uhur ai, ase dapotan parontou ampa idop ni uhur hita bahen pangurupion bani panorang haporluanni.(Rom 3:21, 25.)

Heb 5

5:1 Ai sagala sintua ni malim, na pinilih humbani jolma, ipabangkit do halani jolma, laho marugas ilobei ni Naibata, ase igalangkon sibere-bere ampa galangan halani dousa. 5:2 Na tarbahen do ia mangahapkon ahap ni na oto ampa na kahou, ai ia pe ibagas hagalekon do. (bd. 4:15.) 5:3 Halani ai maningon mamboan galangan pardousaon do ia, sedo halani bangsa ai hansa, tapi dihut do halani dirini. (3 Mus. 9:7; 16:6.) 5:4 Anjaha seng adong na mambuat hamuliaon na sonai bani dirini, tapi na nidilo ni Naibata do ia hujai songon si Aron. (2 Mus. 28:1.) 5:5 Sonai do homa Kristus in, seng Ia pasangap dirini gabe Sintua ni malim, tapi Naibata do, na dob manghatahon hu-Bani: "Anakku do Ho, sadari on do ho hutubuhkon." (Ps. 2:7.) 5:6 Bani ianan na legan homa ihatahon do: Malim do Ho ronsi sadokah ni dokahni mangihutkon orde ni si Melkisedek. 5:7 Sanggah jolma Ia, igalangkon do pangindoanni ampa elek-elekni marhasoman doruh banggal ampa iluh hubani na boi paluahkonsi humbani hamateian, anjaha itangihon do Ia, gabe maluah humbani habiaran ai. (Mat. 26:39-46.) 5:8 Ai age pe Anak Ia, iguruhon do pambalosion marhitei na tinaronni ai. (Pil. 2:8.) 5:9 Anjaha dob gabe gokan dear Ia, jadi bona ni haluahon sisadokah ni dokahni do Ia bani haganup, na mambalosisi. (Joh. 17:1, 5.) 5:10 Igoran Naibata do Ia malim mangihutkon orde ni si Melkisedek. 5:11 Buei ope namin sihatahononnami pasal ai, tapi payah do patorangkon ai bani nasiam, halani na so marpangarusion ai nasiam. 5:12 Ai marimbang dokahni ai domma patut jadi guru nasiam, hape maningon porlu ope ajarhonon bani nasiam humbani pangajaran pamungkah ni hata ni Naibata, gabe dadih mando porlu bani nasiam, sedo sipanganon na koras. (1 Kor. 3:1-3.) 5:13 Ai sagala siinum dadih, seng marpambotoh ope ai bani ajaran na sasintongni, halani dakdanak ope ai. (Ep. 4:14.) 5:14 Tapi sipanganon na koras, ai ma bani na dob matoras, na dob pasomal-somalhon dirini, gabe ibotoh parleganan ni na madear ampa na masambor. (Pil. 1:10; Rom 16:19.)

Heb 6

6:1 Halani ai tadingkon hita ma lobei podah pamungkah pasal Kristus, anjaha torushon hita ma hubani podah bani halak na dob matoras. Ulang be naulaki pauli onjolan pasal na paubahkon uhur humbani horja hamateian ampa na manghaporsayai Naibata, 6:2 podah pasal pandidion ampa na manampeihon tangan, pasal parpuhoon ni halak na dob matei ampa paruhuman sisadokah ni dokahni. 6:3 Anjaha bahenonta do ai, anggo ilopas Naibata. 6:4 Ia sidea, na dob ongga santorap ipalihar, idai sibere-bere parnagori atas ai, gabe parrupei bani Tonduy Na pansing, (bd. 10:26, 27; Mat. 12:31; 1 Joh. 5:6.) 6:5 na dob idai hata na mantin na humbani Naibata ampa hagogohon ni dunia simagira, 6:6 anggo marbalik sidea, sabonar na so tarpabayu be sidea, ase mubah use, ai na dob mangulaki mansilangkon Anak ni Naibata do sidea ijai anjaha ipabador, gabe hamagouan ni sidea sandiri. 6:7 Ai tanoh, na mangonsop bah udan, na sai roh hujai, anjaha itubuhkon suan-suanan na marguna bani na mangkorjahonsi, ai do na dapotan pasu-pasu humbani Naibata; 6:8 tapi tanoh na manubuhkon hupi-hupi ampa duri-duri, seng na marguna ai; sipapaan ma ai podas anjaha mosoghonon bani ujungni. 6:9 tapi age pe sonai hatanami, nasiam na hinaholongan, tenger do uhurnami sidearan ai do bani nasiam, ai ma na mamboan hu haluahon. 6:10 Ai sedo na geduk Naibata, gabe lupa Ia bani pambahenannasiam ampa bani holong ni uhurnasiam, na pinatuduhkon nasiam bani Goranni, marhitei pangidanginasiam hinan ampa sorani bani halak na mapansing in. (bd. 10:32-34.) 6:11 Tapi ipindo uhurnami do, ase ganup ma nasiam patuduhkon porlu ni uhur na sonai, ai ma marsijoloman botul bani pangarapan in ronsi ujungni, (bd. 3:14; Pil. 1:6.) 6:12 ase ulang gabe rayohan nasiam, tapi tiru nasiam ma sidea, sitean bagah-bagah ai, marhitei na marhaporsayaon ampa marsabar ni uhur. 6:13 Ai sanggah na mambere bagah-bagahni Naibata bani si Abraham, halani seng dong be sibanggalhononni parbijaanni, hubani dirini sandiri do Ia marbija, (1 Mus. 22:16, 17.) 6:14 nini: Tongon pasu-pasuonku do ho, anjaha tongon pabueionku tumang do ho. 6:15 Jadi, halani sabar ia paima-imahon, gabe dapotsi do bagah-bagah ai. 6:16 Ia jolma, sibanggalhonni do ibahen parbijaanni, anjaha bija ai do mangujungi sagala parsalisihan lanjar songon jaminan do ai. (2 Mus. 22:10.) 6:17 Halani ai, Naibata pe, bija do ipakei manjamin, laho patuduhkon bani sitean bagah-bagah ai sura-surani na so ra mubah ai, 6:18 ase marhitei na adong banta dua fakta na so mubah-ubah in, ibagas ai seng boi Naibata marladung, adong do banta apoh-apoh na margogoh, banta na marhaporusan hujai laho marsijoloman hubani pangarapan na i lobeita ai. 6:19 Ia pangarapan in, ai ma songon sauh bani tonduyta, na totap anjaha na toguh, na masuk das hubagas hirei-hirei ai. 6:20 Hujai do masuk, gabe parlobeita, Jesus, na dob gabe Sintua ni malim sadokah ni dokahni, mangihutkon aturan ni si Melkisedek. (bd. 5:6.)

Heb 7

7:1 Ia si Melkisedek, ai ma raja ni Salem, malim ni Naibata na Timbul in, ialo-alo anjaha ipasu-pasu do si Abraham sanggah mulak, dob italuhon raja-raja; (1 Mus. 14:18-20.) 7:2 anjaha ibere si Abraham do bani saparsapuluh ni haganup na adong bani. Parlobei arti ni goranni ai: "Raja hapintoran", dob ai "Raja Salem", artini: Raja hadameion. 7:3 Anggo ia, seng marbapa, seng marinang, seng marpartuturan, seng dong parmulaan ni arini barang ujung ni goluhni, anjaha halani hadosanni pakon Anak ni Naibata, ia pe malim do tongtong ronsi sadokah ni dokahni. 7:4 Tapi tonggor nasiam ma sangapni in: Si Abraham, ompungta parsadaan ai pe, mambere do bani saparsapuluh humbani taban-tabanni. 7:5 Tongon, ginompar ni si Levi pe, na manjalo jabatan hamalimon in, adong do bani sidea aturan mangihutkon titah in manjalo parsapuluhan humbani bangsa in, ai ma humbani sanina ni sidea, age pe ginompar ni si Abraham homa. (4 Mus. 18:21.) 7:6 Tapi si Melkisedek, na so adong partuturanni hubani sidea, manjalo parsapuluhan do humbani si Abraham, anjaha ipasu-pasu do haondosan ni bagah-bagah ai. 7:7 Anjaha seng tarparnalang on: Sisangapan do na mamasu-masu sietekan. 7:8 Ambahni ai, ia halak Levi, na manjalo parsapuluhan ai, jolma na ra matei do, tapi pasal na legan ai isaksihon do, manggoluh do ia. 7:9 Ase tarhatahon ma: ibagas si Abraham sibere parsapuluhan do age si Levi, sijalo parsapuluhan ai namin, 7:10 ai ibagas angkula ni ompungni si Abraham ope ia, sanggah na roh si Melkisedek mangalo-alosi. 7:11 Ambit domma dapot hadearon na gok marhitei hamalimon ni halak Levi (ai maronjolan hujai do ijalo bangsa ai titah in), mase ma pala pajongjongon malim na legan, mangihutkon aturan ni si Melkisedek, na so mangihutkon aturan ni si Aron. (ay. 18, 19.) 7:12 Ai anggo marubah hamalimon, tontu maningon marubah ma homa titah. 7:13 Anjaha Ia, na tinarsingatan ni hata on, masuk marga na legan do; seng ongga adong na humbani marga ai na marugas bani anjap-anjap in. (Ps. 110:4.) 7:14 Ai torang do, humbani marga Juda do marharorohan Tuhanta, anjaha seng adong itarsingati si Musa hamalimon ni na samarga on. (1 Mus. 49;10; Jes. 11:1.) 7:15 Lambin torangni ma homa ai, halani ipabangkit do sada malim na legan, na usih hubani si Melkisedek, 7:16 na so marhitei aturan pardagingon gabe malim, tapi marhitei gogoh ni goluh na so marpunsa do. 7:17 Ai isaksihon do pasalsi: Malim do Ho ronsi sadokah ni dokahni mangihutkon orde ni si Melkisedek. (bd. 5:6; Ps. 110:5, 6.) 7:18 Marhitei ai iparontihon ma titah na parlobei ai, halani seng margogoh anjaha marguna. 7:19 Ai aha pe lang, na pinajongjong ni titah in na gabe gokan dear. Halani ai ipamasuk ma pangarapan sidearan, parhiteianta mandohori Naibata. (bd. 9:9.) 7:20 Anjaha seng masa ai, anggo lang marhitei bija. Sidea tongon, gabe malim do, seng pala marbija, 7:21 tapi anggo On, marhitei bija do, na binijahon ni na manghatahon ai hu-Bani: Domma marbija Tuhan in, anjaha seng solsolanni dirini: Ho do malim sadokah ni dokahni. 7:22 Mardomu hujai, surungan do padan, na jinalomin marhitei Jesus. 7:23 Anjaha buei do sidea na gabe malim, halani seng torus sidea malim pambahen ni hamateian. 7:24 Tapi anggo Ia, halani totap do ronsi sadokah ni dokahni, seng boi mandipar hamalimonni bani halak na legan. 7:25 Halani ai, tarbahensi do mambere haluahon na totap bani sagala na mandohori Naibata marhiteihonsi, ai na manggoluh do Ia tongtong laho mangapiti sidea. (Rom 8:34; 1 Joh. 2:1.) 7:26 Sintua ni malim na sonin do patut banta, na pansing, na so ongga marsalah, na so martikas, sirang humbani pardousa, na dob gabe gijangan humbani nagori atas,(bd. 4:14.) 7:27 na so pala songon sintua ni malim na legan, padashon ganup ari parlobei galangan halani dousani sandiri, dob ai pe halani dousa ni bangsa ai, ai sahali do ihorjahon in, sanggah ginalangkonni ai dirini. (2 Mus. 16:6, 15.) 7:28 Ai ipabangkit titah in do jolma na galek gabe sintua ni malim, tapi bija, na pudinan humbani titah in do na pabangkithon Anak in, na dob gabe gokan dear ronsi sadokah ni dokahni. (bd. 5:1-2.)

Heb 8

8:1 Ia siporlunan bani na dob hinatahon ai, ai ma: Adong do banta Sintua ni malim, na dob laho hundul hu siamun ni paratas ni Hamuliaon in i nagori atas, (bd. 4:14.) 8:2 siparugas bani ianan na tang pansing, ai ma lampo-lampo na sintong ai, na pinauli ni Tuhan in, sedo jolma. 8:3 Ai sagala sintua ni malim ipabangkit do, laho manggalangkon sibere-bere ampa galangan; ase maningon adong do age Bani sigalanghononni. (bd. 5:1.) 8:4 Ambit i dunia on Ia sonari, tontu seng malim Ia, ai adong ijin malim, na manggalangkon sibere-beere mangihutkon titah. 8:5 Parugason ni sidea ai ma usihan ampa halinoh ni na i nagori atas ai, songon na dapotan parentah si Musa hun babou, sanggah sihol paulionni rumah panumbahan: "Ingat ma," nini mangkatahon, "paulihon ganupan in domu hubani usihan, na dob pinatuduhkon bam iatas dolog in!" (2 Mus. 25:40; Kol. 2:17.) 8:6 Tapi Jesus, dapotsi do jabatan hamalimon sisurungan, ai Ia do siholang bani parpadanan sidearan, na itotapkon maronjolan bani bagah-bagah sidearan. (bd. 7:22; 12:24; 2 Kor. 3:6.) 8:7 Ai ambit lang adong sihataon bani padan na parlobei ai, tontu seng pala porlu na paduahon on. 8:8 Tapi hona hata do sidea, nini: "Tonggor ma, nini Tuhan in, na roh ma ari, pajongjongonku ma ijai padan na baru bani ginompar ni Israel pakon Juda!" (bd. 10:16, 17; Jer. 31:31-34.) 8:9 Seng songon padan na hubahen bani ompung ni sidea, sanggah na hutangkap tangan ni sidea, laho mamboan sidea luar hun tanoh Masir; ai seng totap sidea bani padankin, anjaha Ahu pe seng husarihon be sidea, nini Tuhan in. 8:10 Tapi on do padan, sibahenonku hubani ginompar ni Israel, dob salpu panorang ai, nini Tuhan in: Hubagas uhur ni sidea do nahkononku titahku, anjaha hubani atei-atei ni sidea do surathononku ai, gabe Ahu do Naibata ni sidea, anjaha sidea gabe bangsangku. 8:11 Anjaha seng pala be ajaran ni sada halak hasomanni sabangsa barang hatahononni hubani saninani: "Tanda ma Tuhan in," ai haganup do sidea manandai Ahu, na etek age pe na magodang. 8:12 Marpangulaki do uhurhu pasal panlanggaran ni sidea, anjaha seng be paingat-ingatonku dousa ni sidea. 8:13 Marhitei na isahapkon padan na baru, ihira Naibata do padan na parlobei ai domma matua. Anjaha sagala na dob buruk anjaha matua, podas ma laho salpu ai. (Rom 10:4.)

Heb 9

9:1 Adong do, tongon, age bani padan na parlobei ai aturan-aturan parugamaon ampa rumah panumbahan, marbiak dunia. 9:2 Ai ipauli do ianan lobei-lobei ai, ijai do parsuluhan ai ampa meja ampa ruti sigalanghonon ai; ai ma na margoran kamar na mapansing. (2 Mus. 25:23, 30, 31.) 9:3 Ipudi ni hirei-hirei na paduahon ai do ianan, na margoran kamar na tang sipansingan. (2 Mus. 26:33.) 9:4 Ijai do anjap-anjap pardahupaan omas ampa poti parpadanan ai, na ilampis haganup bani omas, na marisi gusi omas, ianan ni manna ai, ampa tungkot ni si Aron na martunas ai, sonai homa batu panuratan ni padan ai. (2 Mus. 16:33; 25:16, 21; 4 Mus. 17:25.) 9:5 Iatas ni poti parpadanan ai Herubin na marmulia, na manlinggomi tutup pardearan na iatas ni poti parpadanan ai; seng tarpajojor ai haganup nuan sada-sada. (2 Mus. 25:18; 26:34.) 9:6 Dob ipauli sonai haganup, gabe masuk ma tongtong malim hu ianan lobei-lobei ai, laho mandalankon horja parsombahon ai. (4 Mus. 18:3, 4.) 9:7 Tapi bani ianan na paduahon ai, pitah sintua ni malim do hansa, sahali satahun, anjaha seng tarbahen lang mamboan daroh, sigalanghononni halani ia sandiri ampa halani dousa haotoon ni bangsa in. (3 Mus. 16:2, 14, 15.) 9:8 Anjaha marhitei ai ipatuduhkon Tonduy na pansing do, paboa na so ungkab ope dalan hubani na mapansing ai, sadokah totap ope rumah panumbahan na parlobei ai. (bd. 10:19.) 9:9 Na martuduh-tuduh hubani sisonari do ai; ai igalangkon do ijai sibere-bere ampa galangan, na so tuk pasonangkon botul panggora ni uhur ni halak na marsombah ai. (bd. 10:1, 2.) 9:10 Pitah mangonai pasal paraturan-paraturan pardagingon do hansa ai, ai ma pasal sipanganon, siinumon ampa bagei ni pamurihion, na itotaphon paima roh panorang ni paraturan na sintong. (3 Mus. 11:2; 15:18; 4 Mus. 19:13.) 9:11 Tapi roh do Kristus, Sintua ni malim ni arta na sihol roh in. Anjaha sahali do imasuki ianan na mapansing ai, dob ibontas ianan panumbahan sibanggalan anjaha sidearan ai, ai ma na so pinauli ni tangan, na so humbani panompaon on; (bd. 6:20; 10:1.) 9:12 seng marhitei daroh ni hambing tunggal pakon anak ni lombu, tapi marhitei daroh ni sandiri do, gabe dapot haluahon sadokah ni dokahni. 9:13 Gari daroh ni hambing tunggal ampa lombu jonggi ampa abuan ni anak ni lombu, na pinispishon bani na mabutak mangkorhon hapansingon ni parangkulaon do; (3 Mus. 16:14, 15; 4 Mus. 19:9.) 9:14 ai lang lobihan ma daroh ni Kristus in paborsihkon panggora ni uhurta humbani horja hamateian, laho mangidangi Naibata Sipargoluh in? Ai igalangkon do dirini seng martikas bani Naibata, marhitei Tonduy na manongtong in.(1 Ptr. 1:18, 19; 1 Joh. 1:7; Pangk. 1:5.) 9:15 Anjaha in do halani, ase gabe siholang Ia bani padan na baru, ai ma, ase ijalo na tardilo in na binagahkon ai, in ma siteanon na so ra mubah in, dob lobei matei Ia, laho pasaloseihon panlanggaron, na tarjadi bani padan na parlobei ai. (bd. 12:24; 1 Tim. 2:5.) 9:16 Ai anggo adong padan (testament), maningon torang do lobei matei sibahen testament ai, ase sah ai. 9:17 Ai dob matei pe halak ai, ase totap testament ai; seng margogoh ai sadokah manggoluh ope na mambahensi. 9:18 Ai padan na parlobei ai pe, marhitei daroh do isahkon. 9:19 Ai dob ihatahon si Musa hubani ganup bangsa ai sagala parentah domu hubani titah ai, ibuat ma daroh ni anak ni lombu ampa hambing tunggal marhasoman bah, wol na gerger ampa hisop, anjaha ipispisi ma marhitei ai buku ai ampa haganup bangsa ai, (2 Mus. 24:6-8.) 9:20 lanjar ihatahon: On do daroh ni parpadanan, na niaturhon ni Naibata bani nasiam. 9:21 Sonai homa lampo-lampo panumbahan ai ampa haganup parugas na mapansing ai ipispisi do bani daroh ai. (3 Mus. 8:15, 19.) 9:22 Anjaha hira haganup do iuras marhitei daroh domu hubani titah in; anjaha seng adong hasasapan ni dousa, anggo seng madurus daroh. (3 Mus. 7:11; Ep. 1:7.) 9:23 Ase maningon sonai ma iuras tiruan ni na hun nagori atas ai, tapi na i nagori atas ai, marhitei galangan na surungan hunjai. (bd. 8:5.) 9:24 Ai seng masuk Kristus hubagas na mapansing, na pinauli ni tangan, gambaran ni na sintong ai, tapi hu nagori atas sandiri do, laho patuduhkon dirini nuan ilobei ni Naibata manghophop hita, (ay. 11, 12; 1 Joh. 2:1.) 9:25 anjaha seng homa laho manggalangkon dirini gati, songon sintua ni malim ai, na mammasuki ianan na mapansing ai siap tahun marhitei daroh ni na legan. 9:26 Ambit sonai, maningon gati do Ia marsitaronon olat ni partombei ni dunia on: tapi sahali tumang do talar Ia bani ujung ni panorang, laho parontihon dousa in, marhitei galangan dirini. (ay. 12; 1 Kor. 10:11; Gal. 4:4.) 9:27 Songon na dob itotaphon bani jolma, matei sahali dob ai uhum ai, (1 Mus. 3:19.) 9:28 sonai do age Kristus, dob hona galanghon sahali, laho mamorsan dousa ni jolma na mabuei in; paduahalihon talar ma Ia, sedo halani dousa, tapi laho mamboan haluahon do bani na paima-imahonsi. (bd. 10:10, 12, 14; Jes. 53:12.)

Heb 10

10:1 Jadi halani halinoh ni parulihan na sihol roh do hansa titah in, sedo anggo badanni sandiri, halani ai seng tarbahen titah in mambahen gokan dear sagala na roh hujin, mamboan galangan na dos torus siap tahun. (bd. 7:19; 8:5.) 10:2 Ai ambit sonai, parontihonon ma na manggalang ai, halani seng adong be dousa idingat sidea siparsombah ai, anggo domma borsih hinan sidea santorap. 10:3 Tapi halani galangan ai, puho do pardingat bani dousa ai ganup tahun. (3 Mus. 16:21.) 10:4 Ai seng tarbahen daroh ni lombu jonggi atap hambing tunggal pasaloseihon dousa. 10:5 Halani ai, nini do bani parmasukni hu dunia on: "Seng ihasiholhon uhurmu galangan atap sibere-bere, tapi badan do ipasirsir Ham bangku. 10:6 Seng marosuh uhurmu bani galangan situtungon barang bani galangan pardousaon. 10:7 Jadi ningku ma: Tonggor ma, na roh ma Ahu mangkorjahon rosuh ni uhurmu, ale Naibata; bani buku gulungan in do tarsurat pasal Ahu." (Ps. 40:7-9.) 10:8 Ase, anggo ihatahon lobei: "Seng ihasiholhon uhurmu anjaha seng marosuh uhurmu bani galangan, sibere-bere, galangan situtungon barang galangan pardousaon", age pe igalangkon namin ai romban hubani titah, 10:9 anjaha dob ai use ihatahon: "Tonggor ma, na roh ma Ahu mangkorjahon rosuh ni uhurmu!", ijai ma iparontihon na parlobei ai, laho pajongjongkon na paduahon ai. 10:10 Anjaha marhitei rosuhni ai gabe pansing do hita, halani badan ni Jesus Kristus, na dob ginalangkonni ai, torus lalab marhitei na sahali ai. (bd. 9:12, 28.) 10:11 Ia malim-malim, ganup do jongjong ari-ari marugas, laho manggalangkon galangan na sarupa marnunut, na so boi ongga tongon pasaloseihon dousa. (ay. 1; 2 Mus. 29:38.) 10:12 Tapi anggo Ia, sada galangan hansa iboan laho pasaloseihon dousa; dob ai laho ma Ia hundul sadokah ni dokahni hu siamun ni Naibata. (ay. 10, 14.) 10:13 Na paima-imahon ma Ia hunjai nari, ronsi ipatunduk munsuhni gabe sidogei-dogeian ni naheini. (Ps. 110:1.) 10:14 Ai marhitei sada galangan, gok do dearni ipajongjong ronsi sadokah ni dokahni, sagala na ra papansingonni. (ay. 12.) 10:15 Dihut do Tonduy Na pansing manaksihon ai banta, ai ihatahon do lobei: 10:16 "On do padan sibahenonku bani sidea, dob salpu panorang ai", nini Tuhan in: "Nahkononku do titahku hubagas uhur ni sidea, anjaha surathononku do ai hubagas atei-atei ni sidea." (bd. 8:10; Jer. 31:33, 34.) 10:17 Dob ai use: "Anjaha seng be ingatonku dousa ni sidea pakon hajahaton ni sidea." (bd. 8:12.) 10:18 Ase anggo domma sasap ai, seng be masa galangan pardousaon. 10:19 Ai pe nasiam sanina, halani domma adong banta hinsah ni uhur laho masuk hubagas ianan na mapansing ai ibagas daroh ni Jesus, (Mat. 27:51.) 10:20 humbani dalan na baru anjaha na manggoluh ai, na ibuka banta, manlopusi hirei-hirei ai, ai ma dagingni ai, (bd. 9:8.) 10:21 anjaha domma adong homa banta malim bolon, na manggomgom rumah ni Naibata, 10:22 halani ai, dohori hita ma Naibata, maruhur na sintong, ibagas haporsayaon na gok, maruhur na dob hona uras humbani panggora ni uhur na sambor ampa ibagas angkula na dob pinapansing marhitei bah na borsih.(bd. 4:16; Ep. 5:26.) 10:23 Poltik ma jolom hita pangarapan, na dob niakuhonta in, ai hatengeran ni uhur do na marbagahkonsi.(ay. 12.) 10:24 Pardiateihon hita ma samah hita, ase marsiojuran hita mandalankon holong ampa horja na madear, (bd. 13:1.) 10:25 anjaha ulang ma tadingkon hita partumpuanta, songon na dob somal bani deba halak, tapi lambin marsipagolpaan ma hita, halani na lambin dohor ma ari ai iidah nasiam. (ay. 37; 3:13.) 10:26 Ai anggo ituntun hita mardousa dob sompat ijalo hita panandaion bani hasintongan in, seng adong be dapot galangan pasaloseihon dousa. (bd. 6:4-8.) 10:27 Uhum mando sipaimaon ibagas biar ampa apuy ringis, na mangagouhon sagala sipanlawan. 10:28 Na manlanggar titah ni si Musa, maningon do matei, seng dong be idop ni uhur, anggo adong dua barang tolu halak na manaksihon ai. (4 Mus. 15:30; 5 Mus. 17:6.) 10:29 Timbang nasiam ma, ai lang boratan ma uhum mangonai bani jolma, na mandogei-dogei Anak ni Naibata anjaha na so manghargai daroh parpadanan in, na dob papansingkonsi, anjaha na pahirihon Tonduy Paridop ni uhur in? (bd. 2:3.) 10:30 Ai itanda hita do Ia, na mangkatahon: Ahu do simada pambalason, sai na balashononku do! Dob ai use ihatahon do: Uhumon ni Tuhan in do bangsani. (5 Mus. 32:35, 36.) 10:31 Jangin ni in, madabuh hu tangan ni Naibata na manggoluh in! 10:32 Tapi ingat nasiam ma panorang na dob salpu ondi. Ijia, dob ipalihar nasiam, tahan do nasiam ibagas buei paruntolon na marhamarsikon. (bd. 6:4.) 10:33 Deba nasiam gabe sitontonan halani apas-apas ampa hamarsikon, na deba nari dihut manaron homa halani halak na manaron ai. (1 Kor. 4:9.) 10:34 Ai rap manaron do nasiam pakon halak na tartutup, anjaha age hona rampas artanasiam, malas do uhurnasiam ijai, halani ibotoh nasiam, adong ope bani nasiam arta sidearan anjaha na totap. (Mat. 6:20; 19:21, 29.) 10:35 Ai pe, ulang ma ambukkon nasiam hinsah ni uhurnasiam, ai banggal do upah balas ni in! 10:36 Hasabaron do na porlu bani nasiam, laho mandalankon rosuh ni uhur ni Naibata, ase dapot nasiam bagah-bagah in. (Luk. 21:19.) 10:37 Ai tongkin nari tumang mando, roh ma na sihol roh, anjaha seng padokah-dokahonni. (Hab. 2:3.) 10:38 Tapi humbani haporsayaon do manggoluh parpintor in, anjaha seng marosuh uhurhu bani halak na surut. (Hab. 2:4; Rom 1:17.) 10:39 Tapi seng surut anggo hita ase hu hamagouan; na porsaya do laho paluahkon tonduy.

Heb 11

11:1 Ia haporsayaon, ai ma tenger ni uhur bani siaraphononkon, ampa na mambahen torang pasal na so niidah.(2 Kor. 5:7.) 11:2 Marhitei haporsayaon ai do dapotan hasaksian na madear ompung-ompungta hinan. 11:3 Marhitei haporsayaon do tararusi hita, paboa marhitei hata ni Naibata do ijadihon dunia on, gabe manjadi na taridah on humbani na so taridah. 11:4 Marhitei haporsayaon do igalangkon si Abel hubani Naibata galangan sidearan marimbang si Kain, gabe isaksihon ia parpintor marhitei ai, ai isaksihon Naibata do galangan ai sanggah na ijalo ai; matei do ia, tapi marsahap ope ia marhitei haporsayaonni ai. (1 Mus. 4:4; Mat. 23:35.) 11:5 Marhitei haporsayaon do tarangkat si Henok, gabe seng iidah hamateian; seng jumpah be ia, halani domma iangkat Naibata. Ai paima tarangkat ia, isaksihon do pasalsi, paboa rosuh do uhur ni Naibata bani. (1 Mus. 5:24.) 11:6 Tapi anggo seng porsaya halak, seng tarbahen harosuh ia bani Naibata, ai halak na sihol mandohori Naibata, maningon porsaya do ia adong Naibata, anjaha Ia mambere upah bani na mangindahisi. 11:7 Marhitei haporsayaon do ipauli si Noak ibagas biar parau bahen haluahon ni sidea na sajabu, dob ijalo pangungkabon pasal na so boi idahon ope; marhitei ai iuhum si Noak do dunia on, anjaha gabe itean ma hapintoran na humbani haporsayaon. (1 Mus. 6; Rom 3:22, 24; 4:20.) 11:8 Marhitei haporsayaon do mambalosi si Abraham, sanggah na idilo ia, bungkas hu tanoh sijaloonni gabe tean-teanan; anjaha bungkas do ia, age pe lang ibotoh siparayakonni ai. (1 Mus. 12:1-4.) 11:9 Marhitei haporsayaon do ia manginsolat i tanoh, na dob pinarbagah in, songon i tanoh na legan, marianan ibagas tenda rap pakon si Isak ampa si Jakob, hasomanni panean bani bagah-bagah na sada in. (1 Mus. 26:3; 35:12.) 11:10 Ai ipaima-ima do huta na maronjolan na totap, na niranggi ampa na pinauli ni Naibata. 11:11 Marhitei haporsayaon do ijalo si Sara gogoh manubuhkon, age pe domma matua ia, halani hatengeran ni uhur do ihira na marbagahkonsi. (1 Mus. 21:2.) 11:12 Halani ai tubuh do humbani na sada halak ai, na dob matei tarhatahon, ansa buei ni horsik ni bintang na i langit, ansa buei ni horsik ni na i topi ni laut, na so tarbilangi. (1 Mus. 22:17; Rom 4:19.) 11:13 Ibagas haporsayaon do sidea matei haganup, seng sompat ijalo na pinarbagah ai; humbani na daoh mando itatap anjaha ihamalaskon sidea ai, anjaha iparhatongon sidea: Halak na legan anjaha panginsolat do sidea i tanoh on, (1 Mus. 23:4; 47:9.) 11:14 Ai marhitei na mangkatahon sisonai ai, ipatuduhkon do, na mangindahi do sidea bani tanoh hasusuran. 11:15 Ambit idingat sidea tanoh habungkason ni sidea ai, sompat do sidea mulak hujai. 11:16 Tapi sidearan do ihasiholhon sidea, ai ma na i nagori atas ai. Halani ai, lang maila Naibata bani sidea, ra do Ia goranon Naibata ni sidea, ai domma ipauli bani sidea sada huta. (2 Mus. 3:6.) 11:17 Marhitei haporsayaon do igalangkon si Abraham si Isak, sanggah na tarlajou ai ia, tongon anakni na sasada ai do igalangkon, sijalo bagah-bagah ai. (1 Mus. 22.) 11:18 Hubani do ihatahon hinan: Ibagas si Isak do targoran bam ginompar! (1 Mus. 21:12.) 11:19 Ihira uhurni do, markuasa Naibata mamuhoi age dob matei, anjaha halani ai do ia ijalo, songon usihan. (Rom 4:17.) 11:20 Marhitei haporsayaon do ipasu-pasuhon si Isak hubani si Jakob ampa hubani si Esau pasal na sihol masa ope. ( 1 Mus. 27:28-29; 39:40.) 11:21 Marhitei haporsayaon do, sanggah laho matei ia, ipasu-pasu si Jakob anak ni si Josep sada-sada; marsijoloman bani tungkotni marsombah do ia bani Naibata. (1 Mus. 47:31; 48:15, 16.) 11:22 Marhitei haporsayaon do itarsingathon si Josep, bani na laho matei ia, pasal parluar ni halak Israel, anjaha martonah ia pasal holi-holini. (1 Mus. 50:24.) 11:23 Marhitei haporsayaon do si Musa, dob tubuh ia, iponophon namatorasni, tolu bulan dokahni, halani anak na jenges ia iidah, anjaha seng mabiar sidea bani parentah ni raja ai. (2 Mus. 2:2.) 11:24 Marhitei haporsayaon do, dob magodang, manjua si Musa goranon anak ni boru ni Parao. (2 Mus. 2:11-12.) 11:25 Rahanan do ia manaron na marsik rap pakon bangsa ni Naibata, humbani na marsonang-sonang tongkin ibagas dousa. 11:26 Manaron hadorunon ni Kristus, ai do ihira habayakon sibanggalan humbani arta na i tanoh Masir, ai pambalason ai do itonggor. (bd. 10:34, 35; 13:13.) 11:27 Marhitei haporsayaon do itadingkon tanoh Masir, seng mabiar bani ringis ni raja ai; ai totap do ia marsijoloman bani na so taridah ai, songon na dob iidah. (2 Mus. 2:15; 12:51.) 11:28 Marhitei haporsayaon do idalankon Paska ai ampa na mamispishon daroh ai, ase ulang mahua bunga tubuh ni sidea ibahen sipangagou ai. (2 Mus. 12:12, 13.) 11:29 Marhitei haporsayaon do ibontas laut Sigerger songon tanoh na horah; iuji halak Masir ma ai, gabe matei mogap ma sidea. (2 Mus. 14:22, 27.) 11:30 Marhitei haporsayaon do mareong tembok ni huta Jeriko, dob pitu ari dokahni iinggoti. (Jos. 6:26.) 11:31 Marhitei haporsayaon do ase lang matei si Rahab, boru jalang ai, rap pakon na so mambalosi; ai ibagas damei do ijalo parkahap ai. (Jos. 2:2; 11:12; 6:17, 23; Jak. 2:25.) 11:32 Aha ope hatahononku? Seng dong be panorang bangku, laho mambaritahon pasal si Gideon, si Barak, si Simson, si Jepta, si Daud, si Samuel pakon nabi-nabi ai. (Panguh. 4:6; 12:7; 15:20.) 11:33 Marhitei haporsayaon do italuhon sidea harajaon, ihorjahon hapintoran, ijalo bagah-bagah, itutup babah ni singa, (Panguh. 14:6; 1 Sam 17:34, 35; Dan. 6:23.) 11:34 iintopi gogoh ni apuy, maluah humbani mata ni podang, suang margogoh humbani hagalekon, gabe margogoh i parporangan anjaha ibahen maporus tentara ni bangsa na legan. (Dan. 3:23-25.) 11:35 Ijalo puang-puang do na mateini mulak manggoluh. Tapi deba na legan ai iarsik-arsik do, seng saud maluah, ase marulih bani parpuhoon sidearan. (1 Raj. 17:23; 2 Raj. 4:36.) 11:36 Na deba nari manaron risa-risa ampa lonsing-lonsing, seng pitah sonai, tapi isangkut do anjaha itutup. (Jer. 20:37, 38.) 11:37 ipargijig, ilajou koras, igargaji, matei hona bunuh ibahen podang, minsah-insah marhiou bobak ni biri-biri atap hambing pe, marhahurangan, hona odoh-odoh ampa hona jahatan. (2 Kor. 24:21.) 11:38 Seng maharga be dunia on bani sidea, gabe laho sidea hu halimisan, hu dolog, hu liang-liang ampa lombang-lombang ni tanoh on. 11:39 Anjaha sidea, age pe dapotan hasaksian na madear marhitei haporsayaon ni sidea, seng ijalo ope na pinarbagah-bagah ai, 11:40 ai sidearan do isurahon Naibata bereonni banta, ase ulang das sidea hubani na gokan dear, anggo lang rap pakon hita.

Heb 12

12:1 Ase, halani domma songon hombun buei ni saksi manginggoti hita, tadingkon hita ma sagala na paborathon ampa dousa na manrahuti hita, anjaha marsabar ni uhur ma hita marlintun bani parlumbaan, na adong i lobeita. (bd. 10:36; Rom 7:21; 1 Kor. 9:24.) 12:2 Ibagas ai mangkawah ma hita dompak Jesus, sipungkah ampa sidobkon haporsayaon in, na manaronkon parsilang ai, gantih ni malas ni uhur na i lobeini, anjaha seng ihira hailaon ai, gabe hundul i siamun ni paratas ni Naibata. 12:3 Ingat nasiam ma Ia, na manaronkon parlawanon na sonai dompaksi humbani pardousa, ase ulang marnaloja nasiam mandolei uhurnasiam. (Luk. 2:34.) 12:4 Bani paruntolonnasiam mangimbang dousa, seng ongga ope tiris daroh nasiam maruntol. 12:5 Ai domma lupa nasiam bani sipaingat, na hinatahon bani nasiam songon na bani anak: Ale anakku, ulang ma hampung uhurmu bani pangajarion ni Tuhan in, anjaha ulang ma mandolei anggo ipinsang, (Pod. 3:11, 12.) 12:6 ai iajar Tuhan in do na hinaholongan ni uhurni, anjaha ilonsing do anak na niainni.(Pangk. 3:19.) 12:7 Sabar ma nasiam, gabe pangajarion do on bani nasiam, ai anakni do nasiam ijai ihira Naibata. Ai ija adong anak, na so niajar ni bapani? 12:8 Ai anggo seng hona ajar nasiam, songon na dob mangonai ai bani haganup, anak salong-salongan ma nasiam ai, seng anak na botul. (Ps. 73:14, 15.) 12:9 Ambah ni ai, bapanta pardagingon do sipangajar banta, anjaha mabiar do hita bani sidea; ai lang patut ma lambin marunduk ni uhur hita bani Bapa ni tonduy, ase manggoluh hita? (4 Mus. 16:22.) 12:10 Ai anggo sidea, tongkin do hita iajar domu hubani partimbangan ni sidea, tapi Ia, hubani na marguna banta do, ase parrupei hita bani hapansingonni. 12:11 sagala pangajaran tongon, sanggah hamamasani seng malas ni uhur, tapi pusok ni uhur do ai ahaphonon; tapi use ihorhon ai do buah hapintoran na marisi damei bani sagala na dob tarlatih ibagas ai.(2 Kor. 4:17, 18.) 12:12 Halani ai, pagostong nasiam ma tangan na galek-galek, anjaha patotap nasiam ma towod na hitir-hitir. (Jes. 35:3.) 12:13 Papintor nasiam ma dalan sidalanan ni naheinasiam, ase ulang puhei nahei na repat in, tapi malum ma namin. (Pod. 4:26.) 12:14 Porluhon nasiam ma, ase mardamei nasiam hubani haganup halak anjaha margoluh na mapansing, halani anggo seng sonai, seng boi idahon ni atap ise Tuhan in.(Rom 12:18; 2 Tim. 2:22.) 12:15 Jaga nasiam ma, ase ulang adong na liah bani idop ni uhur ni Naibata, ase ulang martumbor urat na paet, na mangkorhon hasunsahan anjaha buei halak butak ibahen. (5 Mus. 29:17.) 12:16 Ulang ma adong sipanriah-riah atap na marhabutakon songon si Esau, na manjualhon hak sikahanan halani sipanganon na otik. (1 Mus. 25:33, 34.) 12:17 Ai ibotoh nasiam do dobni, sanggah na sihol teanonni pasu-pasu ai namin, hona tulak do ia; ai seng jumpahsi be panorang paubahkon uhur age pe mariluh-iluh ia mangindohon. (1 Mus. 27:30-40.) 12:18 Ia sijumpahkononnasiam ai sedo na tarjamah, apuy na gajag, barang na golap, barang na lotir, barang haba-haba, (2 Mus. 19:12, 16, 18; 5 Mus. 4:11.) 12:19 barang parhata ni tarompet ampa sora ni hata, pala mangelek-elek na mambogeisi, ase ulang hubani sidea ipadompak hata ai; 12:20 ai seng tartahan sidea parentah ai, na mangkatahon: "Age pinahan, anggo dais hu dolog ai, maningon matei do pargijigon," (2 Mus. 19:13.) 12:21 Pala do ihatahon si Musa, halani jangin ni na niidahni ai: Mabiar do ahu anjaha hitir-hitir. 12:22 Tapi dolog Sion in do iparayak nasiam ampa huta ni Naibata na manggoluh in, ai ma Jerusalem na i nagori atas ai, ampa malekat na marlaksa-laksa ai, ampa humpulan pesta, (Gal. 4:26; Pangk. 14:1; 21:2; 5:11.) 12:23 ampa kuria ni na parlobei tubuh ai, na dob tarsurat i nagori atas, ampa Naibata, siuhum haganup, ampa tonduy ni parpintor na dob gokan dear ai, (Luk. 10:20.) 12:24 ampa Jesus, siholang ni parpadanan na baru ampa daroh, na pinispiskon ai, parsora sidearan humbani daroh ai, parsora sidearan humbani daroh ni si Abel. (bd. 9:15; 11:4; 1 Mus. 4:10.) 12:25 Jaga ma nasiam, ulang das itulak nasiam Ia, na marsahap in. Ai anggo seng maluah sidea, halani ijua sidea na palumbahon sidea i tanoh on, lambin sonaha ma hita, anggo itundali hita Ia, na hun nagori atas in? (bd. 2:2; 10:28, 29.) 12:26 Tanoh on do idugur sonari ijia, tapi sonari marlumba-lumba do Ia: "Duguronku do sahali nari, seng pitah tanoh on, dihut do nagori atas." (Hag. 2:6.) 12:27 Hata na mangkatahon: "Sahali nari," patuduhkon, na mubah ma na tardugur on, in ma na tinompa on, ase totap na so tardugur ai. 12:28 Halani ai mangkatahon tarima kasih ma hita, ai ijalo hita do harajaon na so tardugur, anjaha ibagas ai iidangi hita ma Naibata, domu hubani rosuhni, marhasoman hormat ampa biar, 12:29 ai apuy na mangankon do Naibatanta. (5 Mus. 4:24; 9:3.)

Heb 13

13:1 Holong ni uhur bani sanina, sai totap ma ai. (Joh. 13:34; 2 Ptr. 1:7.) 13:2 Ulang ma halupahon nasiam partamueion, ai marhitei na sonai ongga do itamuei halak malekat, seng ibagas botohni. (1 Mus. 8:3; 19:23; Rom 12:13; 1 Ptr. 4:9.) 13:3 Ingat nasiam ma na tartutup, songon na dihut nasiam tartutup; sonai homa na hona arsik-arsik, ai nasiam pe ibagas angkula do. (Mat. 25:36.) 13:4 Sangap ma parunjukon bani haganup halak, ulang butak podoman, ai uhumon ni Naibata do parriah-riah ampa parbangkis. (Gal. 5:19, 21; Ep. 5:5.) 13:5 Ulang ma mata duiton parlahounasiam, hasonangkon nasiam ma na adong; ai Ia sandiri do mangkatahon: Sabonar na so tadingkononku do ho, sabonar na so paturutonku do ho! (Jes. 1:5; 1 Tim. 6:6.) 13:6 Halani ai, tenger do uhurta mangkatahon: "Tuhan in do pangurupi bangku, seng mabiar ahu; aha ma boi bahenon ni jolma bangku?" (Ps. 118:6.) 13:7 Dingat nasiam ma na mambobahon nasiam, na mangkatahon hata ni Naibata bani nasiam; ujung ni pardalanan ni sidea ma tonggor nasiam, anjaha tiru nasiam ma haporsayaon ni sidea. (ay. 17; 1 Kor. 4:16.) 13:8 Ia Jesus Kristus totap do, sonai nantuari, sonai do sadari on, lanjar sonai do ronsi sadokah ni dokahni.(1 Kor. 3:11; Pangk. 1:17.) 13:9 Ulang ma ra nasiam taruyun halani podah na marbagei-bagei anjaha na legan. Dear ma gabe toguh uhurta marhitei idop ni uhur, sedo halani aturan-aturan pasal sipanganon, na so marguna bani na mandalankonsi. (Rom 14:17; 2 Kor. 1:21; Ep. 4:14.) 13:10 Adong do banta anjap-anjap; seng marhak mangankon hunjai siparugas na i lampo-lampo ai. (bd. 8:4, 5.) 13:11 Ai idarat ni parsaranan ai do itutung diging ni pinahan, dob iboan sintua ni malim daroh ai hubagas kamar na pansing ai, halani dousa. (3 Mus. 16:27.) 13:12 Halani ai Jesus pe idarat ni horbangan ai do Ia marsitaronon, ase ipapansing bangsani marhitei darohni sandiri. (Mat. 21:39; Joh. 9:22) 13:13 Ase, laho ma hita hubani Jesus hudarat ni parsaranan ai, mamorsan hadorunonni ai. (bd. 11:26; 12:2.) 13:14 Ai seng dong banta ijon huta na totap, tapi ipindahi hita do na sihol roh ai.(bd. 11:10; 12:22.) 13:15 Anjaha marhiteihonsi ma galangkon hita tongtong bani Naibata galangan puji-pujian, ai ma buah ni bibir, na mangakui goranni in. (Ps. 50:14, 25; Hos. 14:3.) 13:16 Mambahen na madear ampa na marsibere-bere, ulang ma halupahon nasiam ai, ai galangan na sonai do iharosuhkon Naibata. (Pil. 4:18.) 13:17 Tangihon nasiam ma na mambobahon nasiam, anjaha balosi nasiam ma sidea. Ai sidea do manjagai tonduy nasiam, anjaha martanggung jawab pasal ai. Sihol ma marmalas ni uhur sidea mandalankon ai, ulang marhoih-hoih, ai seng marguna ai bani nasiam. (Hes. 3:18; 1 Tes. 5:12.) 13:18 Tonggohon nasiam ma hanami. Ai tenger do uhurnami, paboa borsih do panggora ni uhurnami, halani ihaporluhon hanami marparlahou na madear ibagas haganup. (2 Kor. 1:12.) 13:19 Lambin iojur hanami do nasiam mangkorjahon ai, andohar lambin podasni ahu ipaulak bani nasiam. 13:20 Tapi Naibata Sipardamei in, ma mangarahkon humbani na matei Siparmahan bolon ni biri-biri in, marhitei daroh parpadanan sisadokah ni dokahni, in ma Tuhanta Jesus. (Jos. 10:12; 1 Ptr. 2:25.) 13:21 Ia ma pasirsirhon nasiam bani sagala na madear, laho mangkorjahon rosuh ni uhurni, anjaha manjadihon ibagas hita, rosuh ni uhurni marhitei Jesus Kristus! Bani ma hasangapon ronsi sadokah ni dokahni! Amen. 13:22 Tapi huojur ma nasiam, sanina, jalo nasiam ma hata podah in ai pondok do husurathon bani nasiam. 13:23 Botoh nasiam ma, na dob maluah do saninanta si Timoteus; ai ma hasomanku mangidah nasiam, anggo podas ia roh. 13:24 Padas nasiam ma tabinami bani haganup na mambobahon nasiam ampa haganup halak na mapansing. Manongos tabi do bani nasiam hasoman na hun Italia. 13:25 Idop ni uhur ma bani nasiam haganup!

Jakobus 1

1:1 Humbani si Jakobus, juak-juak ni Naibata ampa Tuhan Jesus Kristus, marayak na sapuluh dua marga na merap in: Tabi ma bani nasiam! (1 Ptr. 1:1.) 1:2 Nasiam sanina, hira nasiam ma in malas ni uhur tumang, anggo madabuh nasiam hubagas bagei ni parlajouan, (Rom 5:3-5.) 1:3 anjaha botoh nasiam ma, na mangkorhon hasabaron do parlajouan na hubani haporsayaonnasiam. 1:4 Anjaha hasabaron ai mangkorhon horja na gokan dear, ase gabe gokan dear nasiam, seng dong sihataon anjaha seng marhahurangan. 1:5 Tapi anggo adong itongah-tongahnasiam na hurangan bani hauhuron, ipindo ma ai hubani Naibata, na layak mambere bani haganup, anjaha seng marpangayah, jadi bereonni ma ai hubani. (Pod. 2:3-6.) 1:6 Tapi ibagas haporsayaon ma ia mangindo, ulang bungbang, ai halak na bungbang uhur usih do ai hubani gilumbang ni laut, na pinalindak-lindak anjaha nionjar ni logou. (Mrk. 11:24.) 1:7 Ulang ma iagan uhur ni halak sisonai, adong jaloonni atap aha humbani Tuhan in, 1:8 ai halak na mardua uhur, na geor do ai bani haganup dalanni. 1:9 Ipuji sanina na toruh uhur in ma dirini halani hagijangonni, 1:10 tapi na bayak in halani hatoruhonni; ai na laho salpu do ia songon bunga ni poyon-poyon. (1 Ptr. 1:24.) 1:11 Ai na poltak ma mata ni ari rap pakon milasni, jadi melus ma poyon-poyon ai, marurus bungani, anjaha rupani na jenges ai pe magou ma. Sonai ma laho melus na bayak in ibagas langkah-langkahni. (Jes. 40:67.) 1:12 Martuah ma halak na tahan bani parlajouan, ai dob monang ia bani parlajouan ai, jaloonni ma sortali hagoluhan, na dob pinarbagah ni Naibata bani na marholong ni uhur bani. (2 Tim. 4:8.) 1:13 Ulang ma adong na mangkatahon, sanggah na tarlajou ia: Na tarlajou do ahu humbani Naibata! Ai seng boi hona lajou Naibata laho mangkorjahon na jahat, anjaha Ia sandiri seng adong na ilajou. 1:14 Tapi hona lajou do halak, anggo itarik-tarik anjaha iompan-ompani hisap-hisap ni uhurni sandiri ia. (Rom 7:7, 8.) 1:15 Jadi anggo marbanggal ma hisap-hisap ni uhur ai, itubuhkon ma dousa, anjaha dob gok dousa ai, itubuhkon ma hamateian. (Rom 7:10.) 1:16 Ulang ma nasiam kahou, nasiam sanina na hinaholongan. 1:17 Haganup sibere-bere na madear, anjaha haganup silayak-layak na gokan dear, ai ma na roh hun datas, humbani Bapa ni na lihar; seng ra mubah Ia anjaha seng dong na golap Bani halani partukaran. (1 Joh. 1:5.) 1:18 Marhitei sura-sura ni uhurni itubuhkon do hita marhitei hata hasintongan in, ase hita gabe limbuah ni sagala na tinompani. (Joh. 1:13; 1 Ptr. 1:23.) 1:19 Ingat nasiam ma, nasiam sanina na hinaholongan: Ganup halak, ringgas ma ia manangi-nangi, asok marsahap anjaha lambat manringis. (Par. 7:9.) 1:20 Ai seng ihorhon marah ni jolma hapintoran ilobei ni Naibata. (Ep. 4:26.) 1:21 Halani ai ambukkon nasiam ma sagala na mabutak ampa sagala masam ni hajahaton, anjaha jalo nasiam ma ibagas halamlamon hata na sinuan ibagas uhurnasiam, na tarbahen paluahkon tonduynasiam. (Kol. 3:8; 1 Ptr. 2:1.) 1:22 Gabe sihorjahon hata in ma nasiam, ulang panangi-nangi tumang, na paoto-otohon dirini sandiri. (Mat. 7:26; Rom 2:13.) 1:23 Ai panangi-nangi bani hata in, anggo seng ihorjahon, usih ma ai bani halak na patonggor-tonggor rupa ni bohini bani sormin. 1:24 Iidah do namin rupani, dob ai laho ma ia, gabe mintor lupa ma ia, atap sonaha do rupani ai. 1:25 Tapi na manorih torus hubagas titah hamardekaon na gokan dear ai, anjaha totap ijai, seng sipanangi-nangi na urah lupa ia, tapi sihorjahon hata in ma ia tene, martuah ma ia ibagas na mandalankon ai. (bd. 2:12; Joh. 13:17; Rom 8:2.) 1:26 Anggo adong na mangkatahon ibagas uhurni, na daulat ia, hape lang irantei dilahni, ipaoto-oto uhurni do ia ai, na parsuma do parugamaonni ai. (Ps. 34:14.) 1:27 On do parugamaon na borsih anjaha na so dong sihataon bani uhur ni Naibata, Bapa in, ai ma manorih na tading maetek ampa na mabalu ibagas hamarsikonni, anjaha manjagai diri ulang butak marhitei dunia on.

Jakobus 2

2:1 Nasiam saninangku, ulang ma ibagas na mangidah-idah bohi nasiam marhaporsayaon bani Tuhanta Jesus Kristus, na marmulia in. (1 Kor. 2:8.) 2:2 Umpamani, roh ma sada halak partintin omas ampa na marpakeian na majenges hu parguruannasiam, anjaha roh homa sada halak na miskin marhiou na marigat-rigat. 2:3 Jadi dob iidah nasiam parhiou na majenges ai, gabe ihatahon nasiam hubani: "Hundul ma ham ijon, bani sidearan on," tapi bani na miskin ai ihatahon nasiam: "Ijai ma ho jongjong barang hundul ijon ilambung ni naheihon," 2:4 ai lang domma mambahen parlegan-leganan nasiam ijai itongah-tongah nasiam, anjaha manguhumi nasiam marhitei pingkiran na jahat? 2:5 Tangihon nasiam ma, ale sanina na hinaholongan: Ai lang na masombuh i dunia on do ipilih Naibata, ase bayak sidea ibagas haporsayaon anjaha panean bani harajaon, na dob pinarbagahni hinan bani na marholong ni atei Bani? (Luk. 12:21; 1 Kor. 1:26-28.) 2:6 Tapi idoruni nasiam do na masombuh in. Ai lang halak na bayak in do na mangarsik-arsik anjaha na manarad-narad nasiam hu paruhuman? 2:7 Ai lang sidea do na pasambor-samborhon Goran na dear in, na dob ipartigorankon bani nasiam? 2:8 Sibahen na madear ma nasiam tongon, anggo gok idalankon nasiam titah ni Harajaon in, domu hubani hata ni Surat in: Haholongi ma hasomanmin songon dirimu! (3 Mus. 19:18.) 2:9 Tapi, anggo siidah-idah bohi nasiam, na mardousa do nasiam ijai, gabe patalaron ni titah in ma nasiam songon sipanlanggar. (5 Mus. 1:17.) 2:10 Porini pe idalankon sada halak haganup titah in, hape ilanggar sada, parsalah do ia bani haganup. (Mat. 5:19.) 2:11 Ai Ia na mangkatahon: "Ulang ho marbangkis!" lanjar Ia do mangkatahon: "Ulang ho mamunuh!" Ase pori ni pe seng marbangkis ho, hape mamunuh do, panlanggar do ho bani titah in. (2 Mus. 20:13, 14.) 2:12 Bani parsahap atap horja pe ingat nasiam ma: Siuhumon do nasiam bahenon ni titah hamardekaon in. 2:13 Ai uhum na so maridop ni uhur do bani na so mandalankon idop ni uhur, tapi monang do idop ni uhur marimbang uhum. (Mat. 5:7; 18:30, 34; 25:45, 46.) 2:14 Aha ma gunani, nasiam saninangku, anggo ihatahon sada halak, adong bani haporsayaon, tapi seng dong pangkorjahonni? (Mat. 7:21.) 2:15 Porini dong sanina atap botou, na so marhiou anjaha hurangan bani sipanganon ari-ari, 2:16 gabe adong humbani nasiam, na mangkatahon hubani: "Laho ma nasiam ibagas damei, malas ma pangahapnasiam anjaha bosur ma nasiam," hape seng dong ibere nasiam bani, aha ma gunani ai? (1 Joh. 3:17.) 2:17 Haporsayaon in pe sonai do. Anggo seng dong horjani, na dob matei do ai ibagas dirini. 2:18 Tapi ra do adong halak na mangkatahon: Bamu ma haporsayaon, bangku parhorjaan! Patuduhkon ham ma bangku haporsayaonmu, na so pala adong horjani, ase hupatuduhkon bamu haporsayaon in marhitei horjangku. (Gal. 5:6.) 2:19 Na porsaya do ham: Sada do hansa Naibata. Dear ma ai. Setan-setan pe porsaya do anjaha hitir-hitir. 2:20 Tapi sihol ma botohonmu, ale jolma na oto, na so marguna do haporsayaon, anggo seng adong horjani. 2:21 Ai lang humbani horja do ipintori ompungta si Abraham, dob na binoanni ai si Isak, anakni ai, hu panggalangan? (1 Mus. 22:9, 10, 12.) 2:22 Iidah ham ma ijai, na rap marhorja do haporsayaonni ampa pangkorjahonni, anjaha marhitei horja ai gabe gokan dear haporsayaon ai. 2:23 Jadi jumpah ma na hinatahon ni Surat in: Ihaporsayai si Abraham do Naibata, anjaha ai ma ihira bani gabe hapintoranni, anjaha igoran do ia "huan-huan ni Naibata". (1 Mus. 15:6; Jes. 41:8.) 2:24 Ase idah nasiam ma: Humbani horja do ipintori jolma, seng humbani haporsayaon tumang. 2:25 Sonai do age si Rahab, boru jalang ai, ai lang humbani horjani do ia ipintori, dob na jinaloni ai suruhan ai, anjaha isuruh sidea humbani dalan na legan? (Jos. 2:4, 15; Heb. 11:13.) 2:26 Ai songon badan, na so martonduy, matei do, sonai do matei age haporsayaon, na so marhorja. (ay. 17.)

Jakobus 3

3:1 Nasiam sanina, ulang ma buei nasiam na ra gabe guru, ai ibotoh hita, uhum na lobih borat do jaloonta. 3:2 Ai ganup hita gati marsalah; anggo adong na so marsalah bani sahap, ai ma halak na gokan dear, na boi manrantei haganup angkulani. 3:3 Anggo ibahen hita rantei bani babah ni huda, ase ibalosi hita, gabe marguru hubanta do ganup badanni ai. 3:4 Tonggor ma, age kapal ai, na sonai banggalni, anjaha nionjar-onjar ni logou na gogoh, ipatontang-tontang do marhitei amudi na etek tumang, atap dompak ja uhur ni pangamudi ai. 3:5 Sonai do homa dilah in, pagori na etek do in, tapi buei do sahap-sahapni. Tonggor ma, etek pe apuy, boi do mosog ibahen harangan na bolag. 3:6 Apuy do age dilah in. Dunia na gok hagedukon do dilah in itongah-tongah ni pagorinta, ipabutak do haganup dagingta anjaha ipagajag panggulmiton ni goluhta, marhitei apuy na roh hun naraka. (Mat. 12:36, 37; 15:11, 18, 19.) 3:7 Ia sagala bagei ni binatang, manuk-manuk, ulog ampa dengke tarpalomuk do, anjaha domma lomuk ibahen jolma, 3:8 tapi seng tarpalomuk age sada jolma pe anggo dilah in, panjahati na so ra soh do in, gok bisa hamateian. (Ps. 140:4.) 3:9 Marhitei in do hita mamuji Tuhanta, Bapa in; lanjar in do ipakei hita mamurai jolma, na tinompa domu hubani rupa ni Naibata. (1 Mus. 1:27.) 3:10 Humbani sada pamangan kaluar pasu-pasu ampa papa-papa. Nasiam sanina, ulang ma sonai! 3:11 Mintor adong ma sada bah tubuh, na marjullak-jullakkon na matobu ampa na mapaet? 3:12 Nasiam sanina, mintor tarbuahkon hayu ara ma buah ni hayu jetun, atap hayu anggur marbuahkon buah ni hayu ara? Sonai do homa, seng tarjullak-jullakkon bah tubuh na porad bah na matobu. 3:13 Ise humbani nasiam na maruhur anjaha na pentar? Ipatuduhkon ma horjani marhitei parlahouni na madear, ibagas halamlamon ni hapentaran. (bd. 2:18.) 3:14 Tapi anggo ijolom-jolom nasiam ibagas uhurnasiam parsimburuon na mapaet ampa paringoran, ulang ma puji nasiam dirinasiam anjaha marladung nasiam dompak hasintongan. (Ep. 4:31.) 3:15 Sedo in hauhuron na roh hun datas; na hun tanoh on do in, humbani uhur ni jolma, humbani sibolis. (bd. 1:5, 17.) 3:16 Ai ijin adong parsimburuon ampa paringoran, ijai ma adong hageoron ampa haganup bagei ni horja hajahaton. 3:17 Tapi ia hauhuron na humbabou ai sabonar borsih do ai, ambah ni ai ra mardamei, lamlam, pambalosi, gok idop ni uhur ampa buah-buah ni hadearon, seng singapit-apit ampa lang marsipakulah-kulah. 3:18 Anjaha buah ni hapintoran ibagas damei do ai isaburhon bani halak na mangkorjahon hadameion.(Jes. 32:17; Mat. 5:9.)

Jakobus 4

4:1 Hunja do roh ni parmunsuhon ampa partinggilon, na bani nasiam? Ai lang humbani hisap-hisap nasiam do, na marsilawanan ibagas pagorinasiam? (1 Ptr. 2:11.) 4:2 Na marsura-sura do nasiam, tapi lang dapotan; mamunuh nasiam anjaha marsimburu, lanjar seng marulih nasiam. Na marsiimbangan do nasiam anjaha marporang, tapi seng dong bani nasiam, halani seng ipindo nasiam. 4:3 Mangindo do namin nasiam, tapi seng manjalo, halani salah pangindonasiam, ai sihol parbois-boiskononnasiam do ai marhitei hisap-hisapnasiam. 4:4 Nasiam parbangkis, ai lang ibotoh nasiam, ia parhuan-huanon dompak dunia on hamunsuhon dompak Naibata do in? Ase, na sihol huan-huan ni dunia on, ipajongjong do dirini gabe munsuh ni Naibata. (Luk. 6:26; Rom 8:7; 1 Joh. 2:15.) 4:5 Atap iagan nasiam, gurou-gurou do na hinatahon ni Surat in: Parsimburu do Tonduy in, na dob ibahen marianan ibagas hita? (2 Mus. 20:3, 5; Mat. 6:24.) 4:6 Tapi lambin bueini do idop ni uhur ibere. Halani ai do ase ihatahon: Ilawan Naibata do sigijang uhur, tapi ibere do idop ni uhur bani na toruh maruhur. (Mat. 23:12; 1 Ptr. 5:5.) 4:7 Ai pe, ondoskon nasiam ma diri nasiam bani Naibata; lawan nasiam ma sibolis in, jadi maporus ma ia humbani nasiam. (Ep. 6:12; 1 Ptr. 5:8, 9.) 4:8 Padohor nasiam ma bani Naibata, jadi padohoronni ma bani nasiam.Paborsih nasiam ma tangannasiam, nasiam pardousa, anjaha papitah nasiam ma uhurnasiam, nasiam na mardua uhur! (Jes. 1:16; Sak. 1:3.) 4:9 Marhoru ma nasiam, tangis anjaha doruh-doruh. Mubah ma tawanasiam gabe partangison, malas ni uhurnasiam gabe pusok ni uhur! 4:10 Patoruh nasiam ma uhurnasiam ilobei ni Tuhan in, jadi pagijangonni ma nasiam. (1 Ptr. 5:6.) 4:11 Ulang ma nasiam marsipahata-hataan, nasiam sanina! Barang ise na manghatai anjaha na manguhum-uhumi hasomanni, na manghatai anjaha na manguhum-uhumi titah in do ia ai. Tapi anggo iuhumi ham titah in, seng be sihorjahon titah in ham ai, tapi panguhum do. 4:12 Sada do Sibere titah anjaha Panguhum, na boi paluahkon ampa mangagou. Tapi, ise ma ham, ase uhumonmu hasomanmu? (Mat. 7:1; Rom 2:1; 14:4.) 4:13 Ee nasiam, na mangkatahon: Sadari on atap patar laho ma hanami hu kota ai, ase ijai hanami soh pala satahun on, martiga-tiga ampa mansari-sari. (Pod. 27:1.) 4:14 Hape pasal ari patar pe seng ibotoh nasiam. Ai aha do goluhnasiam in? Usih do nasiam bani timus, na taridah tongkin, dob ai seng taridah be. (Luk. 12:20.) 4:15 Gantih ni ai, sonon ma patut hatahononnasiam: Anggo marosuh Tuhan in anjaha manggoluh hanami, bahenonnami ma on atap ai. (Lah. 18:21.) 4:16 Hape mangenjeng do nasiam anjaha sombong; na jahat do pangenjengon na sonai ai. 4:17 Ase, na mambotoh mambahen na madear, hape seng ihorjahon, na mardousa do ia ijai.(Luk. 12:47.)

Jakobus 5

5:1 Ee nasiam na bayak, tangis anjaha doruh-doruh ma nasiam halani sitaronon, na sihol roh bani nasiam. (Luk. 6:24.) 5:2 Domma busuk habayakonnasiam, domma ngitngiton hiounasiam. (Mat. 6:19.) 5:3 Domma tasikon omas ampa piraknasiam, anjaha tasik ai, saksi ma ai dompak nasiam, anjaha gagatonni ma dagingnasiam songon apuy. Na patumpu-tumpu arta do hape nasiam sanggah panorang parpudi. 5:4 Tonggor ma, upah ni halak siparhorja, na manabi i juma-nasiam, na ijolomi nasiam ai, doruh-doruh do, anjaha dilo-dilo ni sipanabi ai domma das bani pinggol ni Tuhan Zebaot. (5 Mus. 24:14, 15.) 5:5 Marmewah-mewah anjaha marlobih-lobih do goluhnasiam i tanoh on. Ipamombur-mombur nasiam do dirinasiam hubani ari pamotongan. (Jer. 12:3; Luk. 16:19, 25.) 5:6 Iuhum anjaha ibunuh nasiam do halak parpintor; seng dong ilawan sidea nasiam. 5:7 Ai pe, nasiam sanina, sabar ma nasiam das hubani ari parroh ni Tuhan in! Ai parjuma pe, ipaima-ima do buah na maharga hun tanoh in, anjaha sabar do ia paima-imahon udan partidahonkon ampa udan paima pariama. (Luk. 21:19; Heb. 10:36.) 5:8 Nasiam pe sabar ma, patotap nasiam ma uhurnasiam, ai dohor ma parroh ni Tuhan in. 5:9 Ulang ma nasiam marsiungut-ungutan samah nasiam, nasiam sanina, ase ulang hona uhum nasiam. Tonggor ma, domma jongjong Panguhum in bani labah. 5:10 Nasiam sanina, nabi-nabi, na marsahap ibagas Goran ni Tuhan in, sidea ma bahen nasiam tiruan ibagas sitaronon ampa hasabaron. (Mat. 5:12.) 5:11 Iparhatuah hita do halak na sabar. Ibogei nasiam do hasabaron ni si Job, anjaha iidah nasiam do sonaha dobni ibahen Tuhan in, ai parontou ni uhur banggal do Tuhan in anjaha paridop ni uhur. (Job. 1:21, 22.) 5:12 Tapi ilobei ni haganup, nasiam saninangku, ulang ma nasiam marbija, barang hubani langit barang hubani tanoh barang hubani na legan. Hatahon nasiam ma: "Eak" anggo eak ma, atap "Lang," anggo lang ma, ase ulang hona uhum nasiam. (Mat. 5:34-37.) 5:13 Anggo adong na marsitaronon itongah-tongahnasiam, martonggo ma ia. Anggo adong na marmalas ni uhur, idodingkon ma doding puji-pujian. (Ps. 50:15; Kol. 3:16.) 5:14 Anggo adong na boritan itongah-tongahnasiam, idilo ma sintua ni kuria in, ase itonggohon anjaha iminaki ia ibagas goran ni Tuhan in. (Mrk. 6:13.) 5:15 Jadi paluahon ni tonggo haporsayaon in ma na boritan ai, anjaha pajongjongon ni Tuhan in ma ia; anjaha sasap ma dousani, anggo adong ihorjahon. (Mrk. 16:18.) 5:16 Ai pe, marsisopothon dousani bei ma nasiam anjaha marsitonggoan, ase malum nasiam. Na margogoh tumang do pangkorhon ni tonggo ni halak parpintor, anggo ihabujurhon. 5:17 Jolma do si Elias, sabiak pakon hita; pongkut do ia martonggo, ase ulang roh udan, gabe seng roh udan i tanoh in tolu tahun onom bulan dokahni. (1 Raj. 17:1; Luk. 4:25.) 5:18 Dob ai iulaki ma martonggo, gabe ibere langit in ma udan, anjaha ipantubuhkon tanoh in buahni. (1 Raj. 18:42.) 5:19 Nasiam sanina, anggo adong humbani nasiam na kahou humbani hasintongan in, hape adong na mambobansi mulak, (Gal. 6:1.) 5:20 ibotoh ma: Barang ise na mamboan pardousa mulak humbani hakahouonni, na paluahkon tonduyni do ia ai humbani hamateian anjaha manrungkub buei dousa. (Ps. 51:15; Pod. 10:12; 1 Ptr. 4:8.)

1 Petrus 1

1:1 Humbani si Petrus, apostel ni Jesus Kristus, hubani sagala panginsolat, na merap i Pontius, Galatia, Kappadosia, Asia ampa Bitinia, na dob tarpilih in, (Jak. 1:1.) 1:2 domu hubani panandaion ni Naibata Bapa hinan, marhitei na pinapansing ibagas Tonduy Na pansing, ase pambalosi bani Jesus Kristus, anjaha iuras marhitei pamispison bani darohni in. Sai martambah-tambah ma idop ni uhur ampa damei bani nasiam. (Rom 8:29.) 1:3 Pinuji ma Naibata, Bapa ni Tuhanta Jesus Kristus, na dob manubuhkon hita paduahalihon, domu hubani banggal ni idop ni uhurni, marhitei parpuhoon ni Jesus Kristus humbani na matei, ase marpangarapan na manggoluh hita, (Tit. 3:5-7; Jak. 1:18.) 1:4 ase banta siteanon na so ra seda, na so martikas, na so ra melus, na sinimpan banta i nagori atas. (Kol. 1:12.) 1:5 Iramotkon do hita hinorhon ni gogoh ni Naibata, marhitei haporsayaon, ase das hita hu haluahon, na dob sirsir sipatalaron bani panorang parpudi. (Joh. 10:28; 17:11.) 1:6 In do ihamalashon nasiam, age pe marhoru nasiam tongkin sonari, anggo porlu ibagas bagei ni parlajouan (bd. 5:10; Rom 5:2; 2 Kor. 4:7.) 1:7 ase taridah ma pitah ni haporsayaonnasiam, na harganan marimbang omas na ra seda, age pe domma iuji ibagas apuy, bahen puji-pujian, hasangapon ampa hamuliaon bani partalar ni Jesus Kristus. (Pod. 17:3; Mal. 3:3.) 1:8 Ihaholongi nasiam do Ia, age pe seng iidah nasiam Ia; ihaporsayai nasiam do Ia, age pe seng iidah nasiam Ia sonari, gabe marolob-olob do nasiam ibagas malas ni uhur na marhasangapon, na so tarpajojor pamangan, (Joh. 20:29; 2 Kor. 5:7.) 1:9 halani dapot nasiam tujuan ni haporsayaonnasiam, ai ma haluahon ni tonduynasiam. (Rom 6:22.) 1:10 In ma haluahon, na pinindahan anjaha na pinapangkei-pangkei ni nabi-nabi, na dob manjahai pasal idop ni uhur, na bani nasiam in. (Luk. 10:24.) 1:11 Ipapangkei-pangkei sidea do barang sadihari panorangni ai, anjaha sonaha do ai, domu hubani na pinatalar ni Tonduy ni Kristus, na ibagas sidea, na manaksihon hinan pasal sitaronon, na sihol sogop bani Kristus, ampa hamuliaon na i pudi ni ai. (Ps. 22:7; Jes. 53:3.) 1:12 Ipatalar pe ai bani sidea, sedo bani sidea sandiri, nasiam do na sinarihon ni sidea ijai. Lanjar in do na pinatugah ni parambilan na madear nuan bani nasiam marhitei Tonduy Na pansing, na sinuruh hun nagori atas. Masihol do malekat-malekat mangkawah hubagas ai. (Ep. 3:10.) 1:13 Halani ai, gonditi nasiam ma uhurnasiam; torang ma uhurnasiam, anjaha sabonar mangarap ma nasiam bani idop ni uhur, na sihol bereon bani nasiam bani partalar ni Jesus Kristus. (Luk. 12:35.) 1:14 Songon dakdanak sipambalosi, ulang be paihut-ihut nasiam hisap-hisap, na binalosannasiam hinan sanggah haotoonnasiam, (Rom 12:2.) 1:15 tapi songon Sipandilo nasiam pansing, sonai ma homa nasiam pansing ibagas haganup parlahounasiam. (Mat. 5:48.) 1:16 Ai tarsurat do: Pansing ma nasiam, ai na pansing do Ahu! (3 Mus. 19:2.) 1:17 Anggo Bapa igoran nasiam Ia, na so siidah-idah bohi manguhumi ganup jolma pasal pambahenanni bei, marhasoman biar ma nasiam marparlahou sanggah panginsolatanasiam on. (Ps. 89:27; Rom 2:11.) 1:18 Ai ibotoh nasiam do: Sedo marhitei arta na ra maseda, omas barang pirak, ase maluah nasiam humbani pargoluhonnasiam na so margagan in, na tinean nasiam humbani bapanasiam,(bd. 4:3; 1 Kor. 6:20; 7:23.) 1:19 tapi marhitei daroh ni Kristus na maharga in do, na songon daroh ni biri-biri na so martikas, na so marsining. (Jes. 53:7; Heb. 9:14.) 1:20 Na dob ipilih do Ia, sanggah lape jonam dunia on, anjaha ipatalar bani ujung ni panorang halani nasiam. (Rom 16:25, 26; Ep. 1:4.) 1:21 Marhiteihonsi do nasiam porsaya bani Naibata, na papuhohonsi humbani na matei, anjaha na mamberehon hasangapon Bani, ase bani Naibata nasiam porsaya anjaha marpangarapan. (Joh. 14:6, 7.) 1:22 Halani domma ipapansing nasiam dirinasiam marhitei na mambalosi hasintongan in, laho mandalankon holong na so sipahulah-kulah bani hasoman, sai marsihaholongan ma nasiam humbani gok ni uhur. 1:23 Ai domma mangulaki tubuh nasiam, sedo humbani bonih na ra maseda, tapi humbani na so ra maseda do, ai ma marhitei hata na manggoluh anjaha na totap in, na humbani Naibata. (Joh. 1:13; Jak. 1:18.) 1:24 Ai sagala daging songon poyon-poyon do, anjaha sagala hasangaponni ai songon bunga ni poyon-poyon ai. Melushonsi poyon-poyon ai, bungani pe marurus ma. (Jes. 40:6-8; Jak. 1:10, 11.) 1:25 Tapi anggo hata ni Tuhan in, totap do ronsi sadokah ni dokahni. In ma hata, na niambilankon bani nasiam.

1 Petrus 2

2:1 Ai pe, ambukkon nasiam ma sagala hajahaton, sagala pangoto-otoion, hasipakulah-kulahon, subil ampa sagala tukas-tukas. 2:2 Songon dakdanak na baru tubuh, horahan ma nasiam bani tadah partonduyon na pitah, ase lambin magodang nasiam halani ai anjaha maluah, (Mat. 18:3; Heb. 5:13.) 2:3 anggo na tongon ma domma idai nasiam dear layak ni Tuhan in. (Ps. 34:9.) 2:4 Hubani ma nasiam roh, batu na manggoluh in, na niambukkon ni jolma tongon, tapi na pinilih anjaha na maharga bani Naibata. (Ps. 118:22.) 2:5 Sai ra ma nasiam paulion songon batu na manggoluh, jadi rumah partonduyon ampa hamalimon na mapansing, laho mamboan galangan partonduyon, harosuh ni uhur ni Naibata, marhitei Jesus Kristus. (ay. 9; Rom 12:1; Ep. 2:21.) 2:6 Ai tarsurat do bani Surat in: Tonggor ma, hupatibal do i Sion sada batu parsuhi na pinilih anjaha na maharga; sabonar seng tarbador na porsaya Bani. (Jes. 28:16.) 2:7 Anjaha harga do Ia bani nasiam na porsaya. Tapi bani na so porsaya: Batu na niambukkon ni tuhang ai, ai ma na gabe batu parsuhi ai, 2:8 anjaha batu partolsuan ampa batu parsangsian. Ai tartolsu do sidea hujai, halani seng porsaya sidea bani hata in, age pe hujai do sidea namin ipasirsir. (Jes. 8:14; Rom 9:33.) 2:9 Tapi marga na pinilih do nasiam, harajaon hamalimon, bangsa-na mapansing, bangsa ni Naibata sandiri, ase iambilankon nasiam dear ni hauhuronni, na dob mandilo nasiam humbani na golap hu haliharonni, na gok halongangan in.(2 Mus. 19:6; Pangk. 1:6.) 2:10 Hinan seng bangsa ni Naibata nasiam, sonari nani bangsani ma; hinan seng dapotan idop ni uhur nasiam, sonari nani dapotan idop ni uhur ma. (Hos. 2:25; Rom 9:25.) 2:11 Nasiam na hinaholongan, huojur ma nasiam songon panginsolat ampa halak dagang: Horom nasiam ma hisap-hisap pardagingon, na marlawan dompak tonduy. (Ps. 39:13; Jak. 4:1.) 2:12 Marpangabak na madear ma nasiam itongah-tongah ni sipajuh begu-begu, ase, anggo adong na pahata-hata nasiam songon parjahat, gabe ipasangap sidea Naibata bani ari parrohni, dob iidah sidea horjanasiam na madear in. 2:13 Unduk ma nasiam dompak sagala paraturan, na tinotapkon ni jolma, halani Tuhan, age dompak raja, parkuasa sigijangan, (Rom 13:1-7; Tit. 3:1.) 2:14 age dompak sipanrajai, ai ma sinuruhni, laho maminsang sibahen na jahat, tapi laho mamuji sihorjahon na madear. 2:15 Ai on do rosuh ni uhur ni Naibata: Sihol ma marhitei horja na madear pasiponnasiam haotoon ni halak na hurang uhur, (bd. 3:16.) 2:16 songon halak na bebas, tapi ulang ma na pakei habebason ai, laho manrungkub na masambor; songon juak-juak ni Naibata ma tene. (Gal. 5:13.) 2:17 Hormat ma nasiam bani haganup, marholong ni uhur bani hasoman, mabiar bani Naibata anjaha pasangap ma raja. (Pod. 24:21; Mat. 22:21; Rom 12:10.) 2:18 Unduk ma nasiam juak-juak bani tuannasiam, marhasoman biar; ulang pitah dompak paruhur na dear ampa na basar, tapi dihut do dompak paruhur na jungkat. (Ep. 6:5; Tit. 2:9.) 2:19 Ai idop ni uhur do ai, anggo tahan halak manaron na marsik ampa pambahenan na so patut, halani ingat ia bani Naibata. 2:20 Ai aha ma sipujion ijai, porini sabar pe nasiam hona lonsingan anggo halani salahnasiam do? Tapi anggo sabar nasiam manaron halani pambahenan na madear, ai ma na hinarosuhkon ni Naibata. (bd. 3:14, 17; 4:13, 14; Mat. 5:10.) 2:21 Ai hujin do nasian tardilo, ai Kristus pe manaron na marsik do halani nasiam, mambere siusihan bani nasiam, ase iirikkon nasiam bokas ni naheini. (bd. 3:18; 4:1; Mat. 16:24.) 2:22 Seng dong dousa ihorjahon, anjaha seng dong jumpah akal-akal ibagas pamanganni. (Jes. 53:9; Joh. 8:46; 2 Kor. 5:21.) 2:23 Seng manrisai Ia, sanggah na hona risa; seng asup-asup Ia, sanggah manaron na marsik; tapi iondoskon do ai bani Panguhum na pintor in. 2:24 Iporsan do dousanta ibagas angkulani hubani hayu ai, ase matei hita bani dousa, gabe manggoluh bani hapintoran. Anjaha marhitei ugahni ai do malum nasiam.(Jes. 53:5; Rom 6:6, 11; 1 Joh. 3:5.) 2:25 Ai songon biri-biri na kahou do nasiam ijia, tapi domma idompakkon nasiam nuan Parmahan anjaha Sijaga tonduynasiam in. (bd. 5:4; Jes. 53:6; Hes. 34:5; Joh. 10:12.)

1 Petrus 3

3:1 Sonai homa nasiam parinangon, unduk ma nasiam bani paramangonnasiam, ase porini adong deba na so pambalosi bani Hata in, gabe tartarik uhurni marhaporsayaon marhitei parlohou ni parinangon ai, seng pala marhasoman hata, (Ep. 5:22.) 3:2 anggo iidah sidea nasiam marparlahou ibagas hasusion ampa biar dompak Naibata. 3:3 Ulang ma ipajagar-jagar rupani hun darat, marhitei na mangkariting-karitingkon jambulan, na mamakei-makei omas barang na pajenges-jenges pakeian. (Jes. 3:18-24; 1 Tim. 2:9.) 3:4 Tapi jolma parbagas na ponop ai, na tongtong martonduy na lamlam anjaha na mardamei, ai do na harga bani Naibata. (Ep. 3:16.) 3:5 Sonin do sapari parinangon na mapansing, na mangarap bani Naibata, somal pajengeshon dirini anjaha unduk bani paramangonni. 3:6 Umpamani si Sarah, ibalosi do si Abraham, anjaha igoran do ia "tuanni". Anjaha gabe boruni ma nasiam, anggo ihorjahon nasiam na madear, anjaha seng mabiar bani asup-asup aha pe. (1 Mus. 18:12.) 3:7 Paramangon pe sonai ma, maruhur ma nasiam manghasomani sidea, halani galekan do hadirion ni parinangon. Sangap ma bahen nasiam sidea, halani dihut do sidea hasoman panean bani sibere-bere hagoluhan na humbani Naibata, ase ulang tarlanglang tonggonasiam. (1 Kor. 7:3; Ep. 5:25.) 3:8 Na songon rimpunni: Sauhur ma nasiam haganup, sapangahapan, parholong ni uhur bani hasoman, paridop ni uhur anjaha partoruh ni uhur. 3:9 Ulang ma balaskon nasiam na jahat imbang ni na jahat, risa-risa imbang ni risa-risa; lambin mamasu-masu ma nasiam, ai sihol teanonnasiam do pasu-pasu, ase tardilo nasiam.(1 Tes. 5:15.) 3:10 Ai ise na holong uhur bani hosahni, anjaha sihol mangidah ari na sonang, iparontihon ma dilahni humbani na jahat, age bibirni ulang ma isahapkon ladung. (Ps. 34:13-17; Jak. 1:26.) 3:11 Isimbili ma hajahaton anjaha ihorjahon na madear; ipindahi ma damei, ai ma iparayak. 3:12 Ai hubani paruhur na pintor do pangkawah ni Tuhan in, anjaha bani pangindoan ni sidea do pinggolni; tapi iimbang bohi ni Tuhan in do sihorjahon na jahat. 3:13 Anjaha ise do na manjahati nasiam, anggo na madear iporluhon nasiam? 3:14 Tapi anggo manaron nasiam halani hapintoran, na martuah do nasiam ai. Ulang ma mabiar nasiam bani pambibiari ni sidea, anjaha ulang ma gobir uhurnasiam. (bd. 2:20.) 3:15 Tapi papansing nasiam ma Kristus Tuhan in ibagas uhurnasiam, tongtong ma nasiam sirsir patorangkon bani haganup halak na manungkun nasiam pasal onjolan ni pangarappannasiam, tapi marhasoman lamlam ampa hormat ma. (Jes. 8:13.) 3:16 Anjaha marpanggora ni uhur na borsih ma nasiam, ase maila sidea na manukas-nukasi nasiam, na manrisai parlahounasiam na madear ibagas Kristus. (bd. 2:12; Mat. 5:10.) 3:17 Ai rahanan ma nasiam manaron na marsik halani horja na madear, anggo sonai rosuh ni Naibata, ulang ma halani horja na masambor. (ay. 14; 2:20.) 3:18 Ai Kristus pe matei do sahali halani dousa, Ia parpintor ai halani pargeduk, ase iboban hita hubani Naibata. Na tarbunuh do Ia ibagas pardagingon, tapi ipagoluh do ibagas partonduyon. (bd. 2:21-24; Ep. 2:18.) 3:19 Ibagas tonduy laho do Ia marambilan bani tonduy na ibagas tutupan ai, (bd. 4:6.) 3:20 ai ma na so mambalosi ijia, sanggah na paima-imahon lumbang ni uhur ni Naibata bani panorang ni si Noak, sanggah na paulihon parau ai. Halak na otik i parau ai, ualuh halak haganup, maluah do marhitei na manlopusi bah ai. (1 Mus. 7:7, 17.) 3:21 Ai do usihan ni pandidion in, na paluahkon nasiam nuan: sedo ai songon na mangambukkon na mabutak humbani angkula, tapi ipindo hita do ijin humbani Naibata panggora ni uhur na borsih, marhitei parpuho ni Jesus Kristus. (Ep. 5:26.) 3:22 I siamun ni Naibata do Ia hundul dob laho hu nagori atas; tunduk do hubani haganup malekat, kuasa ampa hagogohon. (Ep. 1:20, 21.)

1 Petrus 4

4:1 Ai pe, halani na dob marsitaronon Kristus ibagas pardagingon, uhur sisonai ma gabe sinjata age bani nasiam, ai barang ise na manaron bani pardagingon, maronti do ia mangkorjahon dousa, (bd. 2:21, 24; 3:18.) 4:2 ase ulang be nasiam manggoluh marguru hubani hisap-hisap hajolmaon, tapi marguru bani rosuh ni Naibata ma, barang sadiha dokah nari nasiam ibagas goluh on. 4:3 Ai sungkup ma panorang na dob salpu in marpambahenan nasiam domu hubani harosuh ni sipajuh begu-begu, ai ma marparlahou ibagas goluh na so marrantei, hahisapon, parmabukon, parmangan-manganon, parminum-minumon, ampa pambalosion bani gana-gana sihagigihonon ai. (Ep. 2:2, 3; Tit. 3:3.) 4:4 Ai na ganjil ma ai nini uhur ni sidea, na so dihut ai be nasiam mandalankon pambahenan ni sidea na butak anjaha na so margagan ai, gabe manrisai ma sidea. 4:5 Tapi maningon martanggung jawab do holi sidea bani Naibata, na sirsir manguhum na manggoluh ampa na matei. (2 Tim. 4:1.) 4:6 On do halani ase iambilankon ambilan na madear age bani na dob matei, ase manggoluh sidea ibagas partonduyon halani Naibata, age pe hona uhum ibagas pardagingon mangihutkon hajolmaonni. (bd. 3:19.) 4:7 Tapi domma dohor ujung ni haganup. Ai pe maruhur ma nasiam, anjaha torang ma uhurnasiam martonggo. (1 Kor. 10:11; Jak. 5:8; 1 Joh. 2:18.) 4:8 Ilobei ni haganup, marsihaholongan botul ma nasiam, ai irungkub holong ni uhur in do buei dousa. (Pod. 10:12; Jak. 5:20.) 4:9 Marsitamueian ma nasiam, ulang ibagas ungut-ungut. 4:10 Marsipadear-dearan ma nasiam marhitei sibere-bere idop ni uhur na jinaloni bei songon sijolom anakkunsi na bujur bani bagei-bagei ni idop ni uhur ni Naibata. (Rom 12:6.) 4:11 Anggo adong na marsahap songon pangkatahon ni Naibata ma, anggo adong na marugas, domu hubani gogoh na binere ni Naibata ma, ase bani haganupan ai ipasangap Naibata marhitei Jesus Kristus. Bani ma hasangapon ronsi sadokah ni dokahni. Amen. (bd. 5:11; Rom 12:7.) 4:12 Nasiam hinaholongan, ulang ma pala longang nasiam pasal hamilason in, na roh manguji nasiam; ulang ma pala songon na ganjil in, nini uhurnasiam. (bd. 1:6, 7.) 4:13 Tapi malas ma uhurnasiam, anggo saor nasiam bani sitaronon ni Kristus in, ase bani partalar ni hasangaponni ai marmalas ni uhur homa nasiam anjaha marolob-olob. (Lah. 5:41; Rom 8:17; Jak. 1:2.) 4:14 Martuah do nasiam, anggo hona risa nasiam halani goran ni Kristus, ai sogop do bani nasiam Tonduy hasangapon, Tonduy ni Naibata. (bd. 2:20; 3:14; Mat. 5:10.) 4:15 Ulang ma adong hun tongah-tongahnasiam na manaron halani mamunuh, barang manangko, barang marjahat, barang halani mangurus na so siurusonni. 4:16 Barang ise na marsitaronon halani halak Kristen ia, ulang ma maila ia, tapi ipasangap ma Naibata marhitei goran in. (Pil. 1:20.) 4:17 Ai jumpah ma panorangni madabuh uhum, mamungkah humbani rumah ni Naibata. Ai anggo parlobei humbanta, sonaha ma ujung ni na so mambalosi ambilan na madear, na humbani Naibata? (Jer. 25:29; Hes. 9:6.) 4:18 Ai anggo narus lang maluah halak parpintor, huja ma gakni halak na so daulat anjaha sipardousa ai? (Pod. 11:31; Luk. 23:31.) 4:19 Halani ai, na marsitaronon halani rosuh ni Naibata, iondoskon ma tonduyni hubani Sipanompa hatengeran in, marhitei na manghorjahon na madear. (Ps. 31:6.)

1 Petrus 5

5:1 Ase, hupaingat ma sintua-sintua na itongah-tongah-nasiam, songon hasoman sintua anjaha saksi pasal sitoronon ni Kristus, homa siparrupei bani hasangapon na sihol sipatalaron ope: (Rom 8:17; 2 Joh. 1.) 5:2 Parmahani nasiam ma hulanan ni Naibata na bani nasiam, ulang songon paksaan, tapi humbani malas ni uhur ma, domu hubani rosuh ni Naibata; ulang ma halani uhur haut, tapi humbani porlu ni uhur ma. (Joh. 21:16; Lah. 20:28; 1 Tim. 3:2-7.) 5:3 Ulang ma songon na mamaksa dompak hasoman, na niondoskon bani nasiam, tapi gabe siusihan ma bani na pinarmahan in. (2 Kor. 1:24; Tit. 2:7.) 5:4 Jadi, jaloonnasiam ma sortali hasangapon na so ra melus ai, talarhonsi Parmahan bolon in. (bd. 2:25; 1 Kor. 9:25; 1 Tim. 4:8; Heb. 13:20.) 5:5 Lanjar sonai ma homa nasiam na maposo, unduk ma nasiam bani partua-partua. Haganup ma nasiam margondithon toruh ni uhur samah nasiam, ai iimbang Naibata do sigijang uhur, tapi ibere do idop ni uhur bani na toruh maruhur. (Pod. 3:34; Mat. 23:12; Ep. 5:21; Jak. 4:6.) 5:6 Halani ai patoruh nasiam ma dirinasiam hutoruh ni tangan ni Naibata na gogoh in, ase ipagijang nasiam bani panorangni. (Job 22:29; Jak. 4:10.) 5:7 Ompashon nasiam ma haganup na hinolsohkon nasiam hu-Bani, ai isarihon do nasiam.(Ps. 55:23; Mat. 6:25; Pil. 4:6.) 5:8 Torang ma uhurnasiam anjaha puho ma nasiam, ai mawat-awat do imbangnasiam, sibolis in, songon singa na maraum, mangindahi sibondutonni. (1 Tes. 5:6.) 5:9 Imbang nasiam ma ia marhitei haporsayaon na toguh, ai ibotoh nasiam do, age haganup saninanasiam na i sab dunia on ihonai sitaronon na sonai do. (Ep. 6:11-13; Jak. 4:7.) 5:10 Tapi Naibata, paridop ni uhur in, na mandilo nasiam ibagas Kristus Jesus hu hasangaponni na manongtong in, pauli-ulionni, patotaponni, pargogohanni anjaha pajonamonni do nasiam, dob manaron nasiam tongkin.(bd. 1:6; Heb. 13:21.) 5:11 Bani ma hagogohon ronsi sadokah ni dokahni. Amen. (bd. 4:11.) 5:12 Marhitei humbani si Siluannus, na huhira hasoman hatengeran ni uhur, hubahen do surat na pondok on bani nasiam, laho pagolpahon anjaha manaksihon, in do tongon idop ni uhur ni Naibata na sintong in, hajongjongannasiam in. (Heb. 13:22.) 5:13 Manongos tabi do bani nasiam kuria na i Babel, na tarpilih songon nasiam; sonai homa anakku si Markus. 5:14 Marsitabian ma nasiam marhitei summah holong ni uhur. Damei ma bani nasiam haganup na ibagas Kristus. (Rom 16:16; 1 Kor. 16:20; 2 Kor. 13:12.)

2 Petrus 1

1:1 Humbani si Simon Petrus, juak-juak anjaha apostel ni Jesus Kristus, hubani sagala na dob manjalo haporsayaon, na dos hargani songon na jinalonami, marhitei hapintoran ni Naibatanta ampa Jesus Kristus, Sipaluah in. (Lah. 15:14.) 1:2 Sai lambin martambah ma bani nasiam idop ni uhur ampa damei, marhitei panandaionnasiam bani Naibata ampa Jesus, Tuhanta in. (1 Ptr. 1:2.) 1:3 Ibere hagogohon ni ha-Naibataonni ai do banta sagala na porlu bahen hagoluhon pakon hadaulaton marhitei na itandai hita Ia, na mandilo hita marhitei hasangaponni ampa hadearonni sandiri. (1 Ptr. 2:9.) 1:4 Marhitei ai ibere do banta bagah-bagahni na maharga ampa na banggal tumang, ase marhitei ai boi nasiam maporus humbani hamagouan na i dunia on, pinaroh ni hisap-hisap, anjaha gabe parrupei nasiam bani ha-Naibataonni. 1:5 Halani ai, haringgashon nasiam ma humbani sagala gogoh pataridahkon dear ni parlahou ibagas haporsayaon nasiam, dob ai hapentaron ma ibagas parlahou na madear ai; (Gal. 5:6, 22.) 1:6 dob ai panrajaion diri ma ibagas hapentaron ai, dob ai hasabaron ma ibagas panrajaion diri ai, dob ai hadaulaton ma ibagas hasabaron ai; 1:7 dob ai holong ni uhur bani hasoman ma ibagas hadaulaton ai, dob ai holong bani haganup ma ibagas holong ni uhur bani hasoman ai. (Gal. 6:10.) 1:8 Ai anggo jumpah in bani nasiam anjaha martambah-tambah, seng paturutonni nasiam rayohan anjaha seng marbuah, laho mananda Jesus Kristus, Tuhanta in. 1:9 Tapi, bani ise seng jumpah ai, halak na mapitung ma ai, anjaha parpangidah na sompit, na dob lupa bani haborsihon humbani dousa-dousani hinan. (1 Joh. 2:9, 11.) 1:10 Halani ai, nasiam sanina, lambin ringgasni ma nasiam patotapkon pandiloonni ampa pamilihonni bani nasiam; ai anggo ihorjahon nasiam in, seng ra be nasiam tompas. 1:11 Jadi sonin ma unjah bereonni bani nasiam hamasukan hubagas harajaon ni Tuhanta, Jesus Kristus Sipaluah in, na totap sadokah ni dokahni. 1:12 Halani ai, tongtong do husurahon pasingathon ganupan in bani nasiam, age pe domma ibotoh nasiam in, anjaha maronjolan nasiam totap ibagas hasintongan, na dob adong bani nasiam. (Jud. 5.) 1:13 Ai patut do, nini uhurhu, sadokah ibagas lampo-lampo on ope ahu, pagolpaonku nasiam marhitei singat-singat, (bd. 3:1; 2 Kor. 5:1.) 1:14 ai hubotoh, podas ma tadinghononku lampo-lampo on, songon na dob pinabotohkon ni Tuhanta Jesus Kristus bangku. (Joh. 21:18, 19.) 1:15 Halani ai huporluhon do, ase tongtong tarbahen nasiam mardingat in, dob misir ahu. 1:16 Ai seng turi-turian, na piningkiran ni halak na pentar iirikkon hanami, sanggah ipabotohkon hanami bani nasiam hagogohon ampa parroh ni Tuhan Jesus Kristus; tapi iidah matanami sandiri do hasangaponni. 1:17 Ai ijalo do hamuliaon ampa hasangapon humbani Naibata Bapa, sanggah na roh Bani humbani hasangapon na majombut ai sora on: On do Anakku, haholongan ni uhurhu; marosuh do uhurhu Bani. (Mat. 17:5; Mrk. 9:7; Luk. 9:35.) 1:18 In ma sora, na ibogei hanami roh hun nagori atas, sanggah rap hanami pakonsi i dolog na mapansing ai. (Mat. 17:1.) 1:19 Jadi lambin totap ma hata panjahaion in bannami; anjaha dear ma marsijoloman nasiam hujin songon bani sada lampu na marsinalsal ibagas ianan na golap, paima siang ari, anjaha poltak bintang buha siang in ibagas uhurnasiam. 1:20 On ma parlobei botoh nasiam: Seng jumpah hatorangan ni sagala panjahaion na tarsurat, anggo humbani uhur ni jolma sandiri. 1:21 Ai seng ongga humbani rosuh ni jolma harohan ni panjahaion; tapi binobahon ni Tonduy Na pansing do, ase marsora jolma in, isuruh Naibata. (2 Tim. 3:16, 17.)

2 Petrus 2

2:1 Tapi adong do hinan nabi sipahulah-kulah itongah-tongah ni bangsa Israel; sonai homa itongah-tongahnasiam adong do guru sipahulah-kulah, na mamboan marponop-ponop podah na parsedahon, pala do parnalangon ni sidea Tuhan na manobus sidea. Marhitei ai iparoh sidea do hamagouan na podas bani sidea sandiri. (Mat. 24:11; 1 Tim. 4:1; Jud. 4.) 2:2 Anjaha buei do na mangihuthon hasumsamon ni sidea, anjaha halani sidea hona risa do pangajara