The New Testament of our Lord and Saviour Jesus Christ
1:1 On ma surat partuturan ni Jesus Kristus, anak ni si Daud, anak ni si Abraham. 1:2 Anak ni si Abraham si Isak; anak ni si Isak si Jakkob; anak ni si Jakkob si Juda dohot angka hahaanggina. 1:3 Anak ni si Juda si Peres dohot si Jara, sian si Tamar; anak ni si Peres si Hesron; anak ni si Hesron si Ram. 1:4 Anak ni si Ram si Aminadab; anak ni si Aminadab si Nahason; anak ni si Nahason si Salmon. 1:5 Anak ni si Salmon si Boas sian si Rahab; anak ni si Boas si Obed sian si Rut; anak ni si Obed si Isai. 1:6 Anak ni si Isai raja Daud; anak ni si Daud si Salomo, sian jolma ni si Uria. 1:7 Anak ni si Salomo si Rehabeam; anak ni si Rehabeam si Abia; anak ni si Abia si Asa. 1:8 Anak ni si Asa si Josapat; anak ni si Josapat si Joram; anak ni si Joram si Usia. 1:9 Anak ni si Usia si Jotam; anak ni si Jotam si Ahas; anak ni si Ahas si Hiskia. 1:10 Anak ni si Hiskia si Manasse; anak ni si Manasse si Amon; anak ni si Amon si Josia. 1:11 Anak ni si Josia si Jekonya dohot angka hahaanggina; i ma di tingki habubuangnasida na tu huta Babel. 1:12 Jadi dung tarbuang nasida, tubu ma si Sealtiel, anak ni si Jekonya, dung i si Serubabel, anak ni si Sealtiel. 1:13 Anak ni si Serubabel si Abihud; anak ni si Abihud si Eliakim; anak ni si Eliakim si Asor. 1:14 Anak ni si Asor si Sadok; anak ni si Sadok si Akim; anak ni si Akim si Eliud. 1:15 Anak ni si Eliud si Eleasar; anak ni si Eleasar si Mattan; anak ni si Mattan si Jakkob. 1:16 Anak ni si Jakkob si Josep, dongan saripe ni si Maria, na tumubuhon Jesus, na margoar Kristus. 1:17 Sampulu opat do torop ni sundut ni si Abraham ro di si Daud; laos sampulu opat sundut do olat ni si Daud ro di habubuangnasida tu huta Babel, jala sampulu opat sundut do muse olat ni habubuangnasida sahat ro di Kristus i. 1:18 Ianggo hatutubu ni Jesus Kristus songon on do: Uju oroan ni si Josep i dope inana, si Maria i, gabegabean do ibana sian Tondi Parbadia, andorang so masipadonohan dope nasida. 1:19 Ala parroha na bonar si Josep, na mangoro si Maria, ndang adong rohana paurakkon nasida, gabe ditahi rohana nama, naeng sirangkononna songon i. 1:20 Alai di na songon i dope tahi ni rohana, diida ma di nipina surusuruan ni Tuhan i, na mandok tu ibana: O Josep, anak ni si Daud, unang alang roham mangalap si Maria, gabe donganmu saripe muse, ai na sian Tondi Parbadia do na naeng tubu di ibana. 1:21 Tumubuhon Anak ma ibana; Jesus do Goarna, bahenonmu, ai paluaonna do bangsona sian angka dosanasida be. 1:22 Masa pe sudena i, asa jumpang na hinatahon ni Tuhan i marhite sian panurirangna na mandok: 1:23 "Ida hamu ma, gabegabean do na marbaju i, tubuan Anak ma ibana; jala bahenon do Goarna Immanuel, lapatanna: Donganta ma Debata!" 1:24 Jadi dung tarsunggul si Josep, dioloi ma hata ni surusuruan ni Tuhan i: Saut ma dialap na niolina i. 1:25 Alai laos so ditanda, paima tubu buhabajuna i; jadi digoar ma Ibana Jesus.
2:1 Asa dung tubu Jesus di huta Betlehem, di luat Judea, uju hinarajahon ni si Herodes, ro ma angka parhapistaran sian purba tu huta Jerusalem, 2:2 angka ninna ma: Didia do Raja na imbaru tubu i? Naung huida hami do bintangna di tano habinsaran; ala ni i ro do hami sumomba Ibana! 2:3 Alai disi dibege raja Herodes hata i, tarsonggot ma ibana ro di sude pangisi ni huta Jerusalem. 2:4 Jadi dipapungu ma angka sintua ni malim ro di sibotosurat ni bangso i, dipamanat ma tu nasida huta hatubuan ni Kristus i. 2:5 Jadi didok nasida ma tu ibana: Huta Betlehem na di luat Judea do, ai songon on do pandok ni panurirang i: 2:6 "Ia ho, huta Betlehem, apala tung na ummetmet ho di tongatonga ni angka huta na di luat Judea, ai ho do huta haroroan ni Raja i, na marmahan Israel, bangsongki!" 2:7 Dung i marhusip ma si Herodes manjou angka parhapistaran i tu jolona disihirsihiri ma tu nasida lelengna, dung tarida bintang i. 2:8 Dung i disuru ma nasida tu huta Betlehem, ninna ma: Laho ma hamu, tangkas ma diori hamu Dakdanak i! Ia dung jumpang, paboa hamu ma tu ahu, asa dohot ahu ro marsomba tu Ibana. 2:9 Asa dung dibege nasida hata ni raja i, laho ma nasida. Anggo bintang i, naung niidanasida hian di tano habinsaran i, sai di ginjangnasida do muse, rasirasa sahat tingkos di ginjang ni inganan ni Dakdanak i. 2:10 Marnida bintang i, mansai las situtu ma rohanasida. 2:11 Laos dibongoti ma bagas i, gabe diida ma Dakdanak i dohot si Maria, inana i. Dung i manungkap ma nasida marsomba tu Dakdanak i, dirungkari ma artanasida: Sere, haminjon dohot angka na angur, parsombanasida tu Ibana. 2:12 Dung i ro ma tona ni Debata marhite sian nipinasida, unang pola mulak be tumopot si Herodes; jadi sian dalan na asing nama nasida mulak tu luatnasida. 2:13 Asa dung laho nasida, ro ma surusuruan ni Tuhan i, diida si Josep di nipina, na mandok tu ibana: Hehe ma ho, boan ma Dakdanak i rap dohot inana i, maporus ma hamu tu tano Misir; disi ma hamu jolo, paima ro muse hatangku, ai na naeng luluan ni si Herodes do Dakdanak i, asa bunuonna. 2:14 Jadi hehe ma ibana, diboan ma Dakdanak i rap dohot inana borngin i, maporus tu tano Misir. 2:15 Laos disi ma nasida, paima mate si Herodes, asa jumpang na nidok ni Tuhan i marhite sian panurirangna na mandok: "Sian Misir do hujou Anakki!" 2:16 Asa dung mamoto si Herodes, naung dipaotooto angka parhapistaran i ibana, tarrimas situtu ma ibana, disuru ma tu Betlehem dohot tu sandok luat na humaliang i angka na mamunui nasa dakdanak baoa, na marumur dua taon, ro di angka na ummetmet sian i, hombar tu tingki naung nirisihanna sian angka parhapistaran i. 2:17 Disi ma jumpang hata ni panurirang Jeremia na mandok: 2:18 "Tarbege do di huta Rama soara partangison dohot angguk badar: Diangguhi si Rahel do ianakhonna i: Ndang olo be apulon, ai nunga sun siap nasida." 2:19 Alai dung mate si Herodes, diida si Josep ma di nipina surusuruan ni Tuhan i di tano Misir, na mandok tu ibana: 2:20 Hehe ma ho, boan ma Dakdanak i rap dohot inana mulak tu tano Israel, ai nunga mate angka na sumangkapi hosa ni dakdanak i. 2:21 Jadi hehe ma ibana, diboan ma Dakdanak i rap dohot inana mulak tu tano Israel. 2:22 Alai dung dibege ibana, si Arkilaus do hape raja di luat Judea manggonti amana si Herodes, biar do rohana, anggo tung laho tusi. Jala dung ro poda sian Debata tu ibana di nipina, gabe dompak luat Galilea nama ditondong. 2:23 Jadi ojak ma ibana maringanan di sada huta na margoar Nasaret, gabe jumpang ma hata ni panurirang na mandok: Goaron do Ibana si Nasarani!
3:1 Dung i di laonlaon ni ari hehe ma si Johannes pandidi marjamita di halongonan Judea, 3:2 ninna ma: Pauba hamu ma rohamuna, ai nunga songgop harajaon banua ginjang i! 3:3 Ibana do na pinaboa ni panurirang Jesaya, uju na nidokna: "Soara ni na manjoujou di halongonan: Pature hamu ma dalan di Tuhan i; pahornop hamu ma sidalananna i!" 3:4 Imbulu ni unto do ulos ni si Johannes, hulingkuling do hohosna: Angka sihapor dohot situak ni loba do sipanganonna. 3:5 Dung i laho ma pangisi ni Jerusalem manopot ibana, songon i dohot sude halak Judea ro di saluhut angka na maringanan di lambung ni Jordan i. 3:6 Jadi dipandidihon si Johannes ma nasida di aek Jordan i, dung ditopoti be dosanasida. 3:7 Alai di na niidana torop Parise dohot Saduse manopot pandidionna i, ninna ma mandok nasida: Hamu anak ni ulok! Ise do na mangajari hamu, pasidingkon rimas na ro sogot? 3:8 Parbuehon hamu ma na tama, paboa naung muba rohamuna! 3:9 Jala so tung didok hamu di bagasan rohamuna: Si Abraham do amanami! Ai hudok ma tu hamu: Tarjadihon Debata do anak di si Abraham sian angka batu on! 3:10 Ai nunga pola ampe tangke tu daling ni angka hau! Onpe, sitabaon ma nasa hau na so marparbuehon na denggan jala sidabuhononhon tu api! 3:11 Ia ahu, aek do hudidihon tu hamu mandokkon paubahon roha; alai andul gumogo do na ro sian pudingku, gari mamboan sipatuna hurang tama dope ahu. Didihonon ni I do tu hamu Tondi Parbadia dohot api! 3:12 Di tanganna do purpuran; paiasonna ma pardegeanna; papunguonna do emena tu sopona; alai tutungonna do anggo hurangkam i tu api na so ra mintop. 3:13 Uju i ma ro Jesus sian Galilea tu batang aek Jordan, laho padidihon Ibana tu si Johannes. 3:14 Alai manjua do si Johannes, didok ma: Ahu do nian patut didionmu, hape Ho ro mandapothon ahu! 3:15 Alai didok Jesus ma mandok ibana: Songon i ma jolo! Ai tama do tapajongjong nasa hatigoran! Dung i dioloi ma Ibana. 3:16 Asa dung tardidi Jesus, pintor hehe ma Ibana sian aek i, jala mungkap ma langit, jadi tarida ma mijur Tondi ni Debata songon darapati sumonggopi Ibana. 3:17 Laos mangkuling ma soara sian ginjang, didok ma: On do Anakku, Haholongan i; halomoan ni rohangku do Ibana!
4:1 Dung i ditogihon Tondi i ma Jesus tu halongonan, asa diunjuni sibolis i Ibana. 4:2 Jadi dung opatpulu ari, opatpulu borngin lelengna so mangan Ibana, male ma dihilala. 4:3 Dung i didapothon sipangunjuni i ma Ibana, ninna ma: Molo na tutu Ho Anak ni Debata, dokkon ma batu on gabe sipanganon! 4:4 Alai ninna ma mangalusi: Na didok Surat i do: "Apala holan sipanganon hangoluan ni jolma; tung nasa hata ni Debata do, na ro sian Ibana!" 4:5 Dung i ditogihon sibolis i ma Ibana tu huta na badia i, dipajongjong ma Ibana tu atas bagas joro i, dung i ninna ma mandok Ibana: 4:6 Molo Anak ni Debata Ho, timbungkon ma Dirim tu toru, ai didok Surat i do: "Dohononna do angka surusuruanna manangannangan Ho, asa unang tartuktuk patmu tu batu!" 4:7 Dung i ninna Jesus ma mandok ibana: Dohot do on didok Surat i: "Ndang jadi unjunanmu Tuhan Debatam!" 4:8 Dung i diulahi sibolis i ma manogihon Ibana tu punsu ni dolok na timbo situtu, dipatuduhon ma tu Ibana nasa harajaon na di portibi on ro di hasangaponna, dung i ninna ma mandok Ibana: 4:9 Saluhutna i lehononku do tu Ho, molo olo Ho marsomba tu ahu. 4:10 Dung i didok Jesus ma mandok ibana: Laho ma ne ho, bolis; ai didok Surat i do: "Tuhan Debatam do sisombaonmu, Sasadasa do sioloanmu!" 4:11 Dung i ditadingkon sibolis i ma Ibana; jadi ro ma angka pardisurgo marhobasi di Ibana. 4:12 Dung dibege Jesus, naung tarhurung si Johannes, laho ma Ibana tu Galilea. 4:13 Laos ditadingkon ma huta Nasaret, laho maringanan tu huta Kapernaum na di topi ni tao i, di luat Zebulon dohot Naptali. 4:14 Asa jumpang na nidok ni panurirang Jesaya na mandok: 4:15 "Luat Zebulon dohot Naptali na di topi ni tao i, di ipar ni aek Jordan, luat Galilea, inganan ni angka sipelebegu: 4:16 Jolma angka na maringanan di na holom marnida Panondang na bolon; nunga binsar Panondang i di angka na manginganhon tano na nilinggoman ni hamatean". 4:17 Jadi olat ni i mamungka ma Jesus marjamita; ia jamitana on do: Pauba hamu ma rohamuna, ai nunga songgop harajaon banua ginjang i! 4:18 Dung i di na mardalani Jesus di topi ni tao Galilea, diida ma disi dua halak na saama na sumampakkon jalanasida tu tao i, ai pardengke do nasida; i ma si Simon na margoar si Petrus dohot donganna saama si Andreas. 4:19 Dung i ninna ma mandok nasida: Ihuthon hamu ma Ahu; bahenonku do hamu gabe sijala jolma! 4:20 Dung i pintor ditadingkon nasida ma jalanasida i, laho mangihuthon Ibana. 4:21 Dung laho Ibana sian i, diida ma muse dua halak na asing na saama, i ma si Jakobus dohot anggina, si Johannes, anak ni si Sebedeus, angka na pauliuli jalanasida hundul di bagasan paraunasida rap dohot si Sebedeus, amanasida i. Jadi dijou ma nang nasida. 4:22 Dung i pintor ditadingkon nasida ma parau i dohot amanasida, laho mangihuthon Ibana. 4:23 Dung i didalani Ibana ma sandok luat Galilea laho mangajari di angka parguruan, mamaritahon Harajaon i huhut pamalum nasa sahit dohot na niae ni halak na disini. 4:24 Jadi tarbarita ma Ibana ro di liat tano Siria, pola dipamboan halak tu Jolona nasa na hansitan, angka parsahit na ragam dohot angka hasonggopan ni angka sibolis dohot angka na solpot bulan on ro di angka na sarion, gabe dipamalum ma nasida saluhutna. 4:25 Jadi mansai torop ma halak mangihuthon Ibana, angka na sian luat Galilea, sian Dekapolis (Sampulu huta), sian Jerusalem, sian Judea dohot sian luat na di bariba ni aek Jordan.
5:1 Asa dung diida Jesus halak na sai torop i, nangkok ma Ibana tu sada tor jadi hundul ma disi; dung i didapothon angka siseanna ma Ibana. 5:2 Dung i marsoara ma Ibana mangajari nasida, ninna ma: 5:3 Martua ma na pogos tondi, ai di nasida do harajaon banua ginjang i! 5:4 Martua ma na marsak roha, ai siapulon do nasida! 5:5 Martua ma na lambok roha, ai teanonnasida do tano on! 5:6 Martua ma na mauas male mida hatigoran, ai sipabosuron do nasida! 5:7 Martua ma na asi roha, ai siasian do nasida! 5:8 Martua ma parroha na ias, ai idaonasida do Debata! 5:9 Martua ma sibahen dame, ai goaron do nasida anak ni Debata! 5:10 Martua ma na pinaburuburu ni halak ala ni hatigoran, ai di nasida do harajaon banua ginjang i! 5:11 Martua ma hamu, molo diinsahi halak hamu manang dipaburuburu manang dipatubutubu ragam ni hata na roa, na so tutu, dompak hamu ala ni Ahu! 5:12 Las ma rohamuna jala marolopolop, ai godang do umpamuna di banua ginjang i, ai songon i do dipaburuburu angka panurirang na jumolo sian hamu. 5:13 Hamu do sira ni tano on! Alai molo tung gabe hambar sira i, aha ma bahenon paansimhon? Nda tung na hasea be i; sibolongkononhon nama tu balian, asa didegei halak. 5:14 Hamu do panondang ni portibi on! Ndang tarbahen so sai patar huta na di atas dolok. 5:15 Ndang dihungkuphon halak ampang tu palito na ginalahanna; tu ginjang ni parpalitoan do dibahen, asa disondangi saluhut na di jabu i. 5:16 Naeng songon i ma marsinondang palitomuna di jolo ni halak, asa diida angka pambahenanmuna na denggan i, asa dipuji nasida Amamuna na di banua ginjang i. 5:17 Unang ma dirimpu rohamuna: Ahu ro mangarumpakkon patik i, manang hata ni angka panurirang i pe. Ndang ro Ahu mangarumpakkon; na pajongjongkon do Ahu! 5:18 Ai hata na sintong do na hudok on tu hamu: Rasirasa sega langit dohot tano on, na so tupa sega sian patik i nanggo sada sisiasia manang sanggurit pe, paima saut saluhutna i. 5:19 Asa manang ise na mangarumpakkon sada sian angka patik na ummetmet i jala dipodahon i tu jolma, i ma goaron na ummetmet di harajaon banua ginjang i; alai na mangulahon jala mangajarhonsa, i do goaron na balga di harajaon banua ginjang i. 5:20 Ai hudok ma tu hamu: Molo so andul dumenggan hatigoranmuna sian hatigoran ni angka sibotosurat dohot Parise, ndang habongotan hamu harajaon banua ginjang i. 5:21 Dibege hamu do hata na tu angka ompu na robi: "Unang ho mambunu!" Ia pamunu siuhumon do. 5:22 Alai Ahu do mandok tu hamu: Tu jolo ni paruhuman ma ganup na tarrimas tu donganna; jala tama hona uhum ni rapot godang do ganup na mandok tu donganna: Hurang ajar! Alai na pola mandok tu donganna: Pe ho sisoada!, tama dapot api na roko do i. 5:23 Asa molo diboan ho sipelehononmu tu langgatan, dung i tarsingot roham disi di sogo ni roha ni donganmu dompak ho, 5:24 tadingkon ma sipelehononmi di jolo ni langgatan i; laho ma ho jolo mardenggan dohot donganmi; dung pe i, asa ro ho pasahathon sipelehononmi! 5:25 Tung denggan ma roham maradophon alomi; alai tibu, binsan rap dope hamu di tongandalan! So tung sanga dipasahat alomi ho tu panguhum, gabe dipasahat panguhum i ho tu opasna, gabe dihurungkon ho maon. 5:26 Situtu do na hudok on tu ho: Na so tupa ho ruar sian i, anggo so sahat gararmi sude ro di na saduit! 5:27 Dibege hamu do hata na tu angka ompu na robi: "Unang ho mangalangkup!" 5:28 Alai Ahu mandok tu hamu: Manang ise na mamereng boruboru huhut marsangkap na roa, nunga saut dilangkup i di bagasan rohana. 5:29 Molo digasipi mata siamunmi ho, pulsikkon ma i jala bolongkon! Ai dengganan do mago dagingmu deba nuaeng, unang bolong dagingmi hibul sogot tu api na roko! 5:30 Jala molo digasipi tangan siamunmi ho, gotap ma i jala bolongkon! Ai dengganan mago ruas ni dagingmu sada nuaeng, unang bolong dagingmu hibul sogot tu api na roko! 5:31 Angkup ni i didok do: "Manang ise na palahohon jolmana, ingkon dilehon do surat sirang tu ibana." 5:32 Alai Ahu mandok tu hamu: Ganup na palahohon na niolina, ia so ala ni na marmainan, na palangkuphonsa do! Pangalangkup do nang na mambuat na sirang i! 5:33 Angkup ni i, dibege hamu do hata na tu angka ompu na robi: "Ndang jadi tolononmu na tutu! Naung saut diuarihon ho tu Debata, ingkon gararonmu do!" 5:34 Alai Ahu mandok tu hamu: Sandok na so tupa hamu manolon nang maruari pe: Manang tu langit i, ai habangsa ni Debata do i; 5:35 manang tu tano on, ai sidegean ni patna do i; manang tu huta Jerusalem pe, ai huta ni Raja na bolon i do i. 5:36 Angkup ni i, ndang jadi ho manolon tu ulum; ai ndang marhuaso ho mambahen bontar manang birong obukmu nanggo sada. 5:37 Songon on ma hatamuna: Olo, anggo olo; ndang, ia ndang! Nasa na ganda sian i, sian na jahat do i! 5:38 Dibege hamu do hata na mandok: "Mata do abul ni mata; ipon do abul ni ipon!" 5:39 Alai Ahu mandok tu hamu: Unang alo hamu na jahat! Molo adong na mamastap hurum siamunmi, tarehon ma nang hurummu sihambirang! 5:40 Molo adong na naeng mambahen sindir tu ho, laho mambuat ulosmu, atena ma dohot bajubajum di ibana! 5:41 Molo adong manang ise na manggogoi ho mandongani ibana sapaal, oloi ma ibana dua! 5:42 Lehon na mangido tu ho! Unang tundali na naeng marsali tu ho! 5:43 Dibege hamu do hata na mandok: "Holong ma roham di donganmi; hosom ma ia di musum!" 5:44 Alai Ahu do mandok tu hamu: Holong ma rohamu di musumuna; tangiangkon hamu ma angka na paburuburu hamu. 5:45 Asa tung gabe anak ni Amamuna na di banua ginjang i hamu: Ai dipabinsar do mata ni arina tu angka parroha na jahat nang tu na bonar, diparo do udan tu parroha na tigor nang tu na geduk. 5:46 Ai molo holong rohamuna holan di angka na mangkaholongi hamu, dia ma upamuna? Gari angka sijalobeo, nda songon i do dibahen? 5:47 Dia do hasurunganmuna, molo denggan hatamuna holan tu angka donganmuna? Gari angka sipelebegu, nda songon i do dibahen? 5:48 Ipe, ingkon sun denggan do rohamuna songon Amamuna di banua ginjang na sun denggan roha i!
6:1 Jaga ma hamu, asa unang diulahon hamu hatigoranmuna di jolo ni halak, sitotondurannasida! Ai molo songon i, ndang marupa be hamu sian Amamuna na di banua ginjang i. 6:2 Antong, molo diulahon ho parasinirohaon, unang ma dokkon paluon tingting songon binahen ni halak pangansi di angka parguruan dohot alaman, asa dipuji halak nasida. Na tutu do na hudok on tu hamu: Nunga sahat dijalo nasida upanasida. 6:3 Asa jumpa dilehon ho asiasi, unang ma pola diboto tanganmu sihambirang na nilehon ni tanganmu siamun, 6:4 asa buni angka asi ni roham; jadi baloson ni Amangmu, na marnida di na buni, ma i tu ho! 6:5 Dung i, jumpa martangiang hamu, unang songon halak pangansi hamu, angka na mangkalomohon jongjong martangiang di angka parguruan dohot di dalan balobung, asa diida jolma i nasida. Na tutu do na hudok on tu hamuna: Nunga sahat dijalo nasida upanasida! 6:6 Alai ia martangiang ho, tu bilut ma ho laho; sordak ma pintu i! Dung i martangiang ma ho tu Amangmu na di na buni, gabe baloson ni Amangmu, na marnida di na buni, ma i tu ho! 6:7 Asa uju martangiang hamu, unang marnoninoni bahen hamu songon binahen ni sipelebegu; i dirimpu, tangihonon ni Debata nasida ala ni deak ni hatahatanasida. 6:8 Ipe, unang ma doshon nasida hamu! Ai diboto Amamuna do na ringkot di hamuna, andorang so mangido dope hamu. 6:9 Songon on ma tangiangmuna: Ale Amanami na di banua ginjang! Sai pinarbadia ma Goarmu! 6:10 Sai ro ma harajaonmu! Sai saut ma lomo ni roham di banua tonga on songon na di banua ginjang! 6:11 Lehon ma di hami sadari on hangoluan siap ari! 6:12 Sesa ma dosanami songon panesanami di dosa ni angka na mardosa tu hami! 6:13 Unang hami togihon tu pangunjunan! Palua ma hami sian na jahat! Ai Ho do nampuna harajaon dohot hagogoon dohot hasangapon ro di saleleng ni lelengna. Amen! 6:14 Ai ia disesa hamu sala ni halak na dompak hamu, sesaon ni Amamuna na di banua ginjang i do dohot dosamuna. 6:15 Alai anggo so disesa hamu sala ni halak na dompak hamu, ndang tagamon sesaon ni Amamuna nang dosamuna. 6:16 Uju marpuasa hamu, unang ma pola surbot panailimuna idaon songon di halak pangansi, ai dipasingki do bohinasida, asa haru tanda parpuasaonnasida diida halak Na tutu do na hudok on tu hamu: Nunga sahat dijalo nasida upanasida! 6:17 Alai jumpa marpuasa ho, pangir ma ulum, suapi bohim, 6:18 asa unang tanda parpuasaonmi di jolo ni halak, alai tanda di jolo ni Amangmu na di na buni, gabe baloson ni Amangmu, na marnida di na buni, ma i tu ho! 6:19 Unang papungupungu hamu arta di hamu di tano on, di na targagat tasik dohot ngitngit, di na tarhali jala tartangko panangko i! 6:20 Alai papungupungu hamu ma arta di hamu di banua ginjang, di na so targagat tasik manang ngitngit; di na so tarhali jala so tartangko panangko i! 6:21 Ai ia disi artam, disi do roham! 6:22 Palito ni daging do mata. Molo hisar matami, tiur ma sude dagingmu! 6:23 Alai molo roa matami, holom ma sude dagingmu. Holomna i antong, anggo mangkolom panondang na di bagasan ho! 6:24 Ndang haoloan sada halak dua induk! Sai hosomanna do na sada, haholonganna do na sada nari; hombaranna do na sada, toisanna do na sada nari. Ndang haoloan hamu Debata rap dohot Mammon! 6:25 Ala ni i do umbahen na hudok tu hamuna: Unang holsohon hamu hosamuna sumarihon sipanganon, manang dagingmuna pasarisari parabiton! Nda ummarga hosa sian sipanganon? Nda ummangat daging sian parabiton? 6:26 Bereng hamu ma pidong angka na martongatonga langit, angka na so manabur, na so manggotil, na so papunguhon tu sopo; tong do diparmudumudu Amamuna na di banua ginjang i nasida! Nda godang dope hasurunganmuna sian i! 6:27 Ise hamu marhuaso pagandahon ariarina nanggo saasta ganjangna, anggo tung sian pangkolsohon ni rohana? 6:28 Boasa antong holsohononmuna parabiton! Patangkas hamu ma partubu ni bungabunga na di ladang i, angka na so mangula jala na so mangganti! 6:29 Ahu mandok tu hamuna: Gari si Salomo, uju di bungaran ni hasangaponna i ibana, gari so mamangke songon bungabunga sada. 6:30 Asa molo songon i diparulosi Debata duhutduhut na di ladang i, na jongjong songon sadari on, na tupa dipuruni marsogotna i, lam hamu ma, lam so parulosanna! Oe hamu siotik haporseaon! 6:31 Antong unang ma holsoan rohamuna, mandok: Aha ma panganonnami? Aha ma inumonnami? Aha ma parabitonnami? 6:32 Angka sipelebegu do mangkaringkothon saluhutna sisongon i. Diboto Amamuna na di banua ginjang i do, naung ringkot angka i di hamu. 6:33 Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna! 6:34 Antong, unang ma holsohon hamu ari marsogot, ai sarihonon ni ari marsogot do na ringkot disi. Sae do, molo masiporsan hasusaanna be angka ari.
7:1 Unang hamu manguhumuhumi, asa unang hona uhum hamu, 7:2 ai panguhumonmuna i do siuhumhononhon tu hamu, parsuhatonmuna i do sisuhathononhon tu hamu. 7:3 Aha ma pola paberengberengonmu silbaksilbak na di mata ni donganmu; ia na satiang na di matami ndang diantoi ho! 7:4 Tung patut ma dohononmu tu donganmi: Ua, huumpat ma jolo silbaksilbak i sian matami! Hape na satiang do di matami! 7:5 E ho pangansi, jumolo ma umpat tiang i sian matami; dung pe i, asa pingkiranmu, manang beha pangumpatmu di silbaksilbak na di mata ni donganmi. 7:6 Unang lehon hamu arta na badia i tu angka jurangga, jala unang ma danggurhon hamu mutihamuna tu jolo ni angka babi, so tung dilotloti i dohot patna, laos humusor manaroso hamu! 7:7 Pangido hamu ma, sai na lehononna do tu hamu; lului hamu ma, sai na jumpangan do hamu; tuktuhi hamu ma, sai na ungkaponna do di hamu! 7:8 Ai sai na manjalo do nasa na mangido, sai na jumpangan do na mangalului; sai na ungkapon do di na manuktuhi! 7:9 Ai ise sian hamu jolma, na mangalehon batu tu anakna, molo indahan dipangido? 7:10 Manang na olo mangalehon ulok, molo dengke dipangido? 7:11 Gari hamu angka parjahat umboto mangalehon basabasa na denggan tu anakkonmuna, lam Amamuna na di banua ginjang i ma so lehononna arta na denggan di na mangido tu Ibana? 7:12 Saluhut na pinangido ni rohamu, sibahenon ni halak tu hamu, i ma bahen hamu tu nasida, ai i do pamusatan ni patik ro di hata ni angka panurirang. 7:13 Bongoti hamu ma harbangan na gogot i; ai ruak do harbangan jala lambas do dalan na tu hamagoan, jala torop do angka na bongot sian i. 7:14 Alai na hopit do ia harbangan jala gogot do dohot dalan na tu hangoluan, jala otik do halak na jumpangan i. 7:15 Jaga hamu ma angka panurirang pargapgap, ai na ro do nasida mandapothon hamu marrupahon birubiru, alai anggo rohana di bagasan, tung babiat panoro do! 7:16 Sian parbuena do tandaonmuna nasida. Tung dapot ma putikkononhon parbue ni hau anggur sian bulu duri, manang antajau sian rimbang? 7:17 Ai marparbuehon na denggan do nasa hau na denggan; alai matua roa do parbue ni hau na so hasea. 7:18 Ai anggo hau na denggan ndang tarparbuehonsa na roa, jala hau na roa ndada tarparbuehonsa na denggan. 7:19 Nasa hau na so marparbuehon na denggan, sitabaon do, gabe bolong nama tu api. 7:20 Asa sian angka parbuena do tandaonmuna nasida! 7:21 Ndada saluhut halak, na mandok Ahu Tuhanna, bongot sogot tu harajaon banua ginjang i, holan angka na mangulahon lomo ni roha ni Damang na di banua ginjang i do! 7:22 Ai torop do sogot di ari parpudi na mandok tu Ahu: Ale Tuhan! Ale Tuhan! Nda manurirangi hami nahinan mangasahon Goarmu? Nda hupabali hami najolo angka sibolis mangasahon Goarmu? Nda lan angka ulaon na balga huula hami mangasahon Goarmu? 7:23 Dung i dohononku ma tu nasida: Ndang dung hutanda hamu; laho ma hamu sian lambungkon, hamu angka na mambahen na so jadi! 7:24 Asa na umbege hatangki jala diulahon, sipatudoson ma i tu halak na marroha, na paulihon bagasna diatas batu mamak. 7:25 Ia ro pe udan potir, mangalantap pe tangkuju jala pur pe habahaba manondong bagas i, ndang na marumpak, ai batu mamak do haojahanna. 7:26 Alai na umbege hatangki, hape ndang diulahon, i ma sipatudoson tu halak na oto, na paulihon bagasna di atas rihit. 7:27 Dung i ro ma udan potir, mangalantap ma tangkuju, pur ma dohot habahaba manondong bagas i, gabe marumpak ma, pola tung marongso. 7:28 Jadi dung sidung dihatahon Jesus angka hata ondeng, tarhatotong ma natorop i umbege podana i. 7:29 Ai na marsahala do pangajarionna di nasida, ndada songon pamodaion ni angka sibotosurat.
8:1 Jadi mijur ma Jesus sian dolok i, dung i mansai torop ma halak mangihuthon Ibana. 8:2 Dung i ro ma sada halak na huliton sumomba Ibana, huhut ma didok: Ale Tuhan, molo na olo Ho, tarpaias Ho do ahu! 8:3 Jadi disurdukkon Jesus ma tanganna, laos dijama ma, huhut ma didok: Na olo do Ahu; ias ma ho! Jadi pintor malum ma hulitna i. 8:4 Dung i didok Jesus ma mandok ibana: Manat ma ho; unang paboaboa manang tu ise; alai laho ma ho, patuduhon ma dirim tu malim; dung i pelehon ma na nidokkon ni si Musa sipelehononmu, gabe panindangion tu nasida. 8:5 Dung i bongot ma Jesus tu huta Kapernaum, jadi ro ma tu jolona sada induk ni soldadu mangelehelek Ibana, ninna ma: 8:6 Ale Tuhan, sai peak do naposongku di jabungku; na sarion do ibana, mansai bernit diahap. 8:7 Dung i ninna Jesus ma mandok ibana: Ro pe Ahu pamalum sahitna. 8:8 Dung i didok induk ni soldadu i ma mangalusi: Ale Tuhan, na hurang tama do ahu, tung degeonmu jabungku; dok ma hata sisandok, asa hipas naposongki! 8:9 Ai gari ahu, jolma na nirajaan, na mangarajai soldadu; molo hudok tu na sada: Tu sadu i ma ho!, laho do ibana; ia tu na sada: Tu on ma ho!, ba, ro do ibana; jala ia hudok tu naposongku: On ma bahen!, jadi i do dibahen. 8:10 Jadi longang ma roha ni Jesus umbegesa, gabe didok ma mandok angka na mangihuthon Ibana: Na tutu do na hudok on tu hamu: Gari di halak Israel, ndang jumpang Ahu haporseaon na songon i! 8:11 Alai hudok ma tu hamu: Torop do na ro sogot sian purba dohot sian pastima, gabe dongan sapanganan ni si Abraham dohot si Isak dohot si Jakkob di harajaon banua ginjang i. 8:12 Alai anggo angka anak ni Harajaon i hian, sipabalion do i sogot tu na holom marimpotimpot; disi ma masa angguhangguk dohot na patungoripon. 8:13 Laos didok Jesus ma mandok induk ni soldadu i: Laho ma ho, jumpang ho ma hombar tu haporseaonmi! Jadi hipas ma naposona i di na sangombas i. 8:14 Dung i ro ma Jesus tu bagas ni si Petrus, jadi peak ma diida simatua boru ni si Petrus i panepaneon. 8:15 Jadi dijama ma tanganna, dung i ditadingkon panepane i ma ibana; laos hehe do marhobasi di Ibana. 8:16 Alai dung bot arina i, dipamboan halak ma tu lambungna torop na sinonggopan ni angka sibolis. Hatana do dibahen pabalihon sibolis i jala dipamalum do saluhutna angka na marniae, 8:17 asa jumpang na nidok ni panurirang Jesaya: "Ibana do mangusung pardangolanta jala angka sahitta diporsan." 8:18 Asa dung diida Jesus torop ni halak na mangkaliangi Ibana, didokkon ma taripar tu bariba an. 8:19 Jadi ro ma sada sibotosurat mandok tu Ibana: Ale Guru, sai naeng ihuthononku do Ho, manang tudia pe Ho laho! 8:20 Dung i didok Jesus ma mandok ibana: Na marliang do angka antuasu, na marasar do pidong angka na martongatonga langit; alai anggo di Anak ni jolma i ndang adong hapeahan ni uluna! 8:21 Jadi adong ma sahalak sian angka siseanna na mandok tu Ibana: Ale Tuhan; ua, loas ahu jolo mananom damang! 8:22 Alai ninna Jesus ma mandok Ibana: Ahu ma ihuthon! Angka na mate i ma pasombu mananom na matena! 8:23 Dung i bongot ma Ibana tu parau, jadi diihuthon angka siseanna ma Ibana. 8:24 Dung i ro ma habahaba siampalautus di tao i, pola dilungkupi angka galumbang i parau i; alai na tarpodom do anggo Ibana. 8:25 Jadi didapothon angka sisean i ma Ibana, disungguli ma, didok ma: Ale Tuhan, urupi ma; na mago ma hami! 8:26 Dung i ninna ma mandok nasida: Na mabiar do hamu hape, hamu parhaporseaon na metmet? Laos hehe ma Ibana, hona hata ma alogo dohot tao i dibahen, gabe menak situtu ma. 8:27 Alai tarhalomong ma roha ni jolma i, angka ninna ma: Halak dia do On? Guru dokna do hape alogo nang tao i! 8:28 Asa dung sahat Ibana ro di bariba i, tu luat ni halak Gadara, ro ma sian parbandaan dua halak na sinonggopan ni sibolis manjumpangkon Ibana. Mansai jorbut do nasida, pola so tarbolus manang ise dalan i. 8:29 Dung i joujou ma nasida, ninna ma: Oe, marhua Ho tu hami; Ho, Anak ni Debata! Na ro do Ho hape mangarsahi hami, di na so tingkina dope? 8:30 Alai tongon ma manjampali babi sapunguan bolon, ndang pola dao sian nasida. 8:31 Dung i dipangido angka sibolis i ma tu Ibana, ninna ma: Molo ingkon pabalionmu hami, suru ma hami mambongoti babi na sapunguan an! 8:32 Dung i didok ma mandok nasida: Antong, laho ma ne hamu! Dung i haruar ma nasida, laho songgop tu angka babi i. Dung i marbubur ma babi na sapunguan i sian tolping i tu tao, laos mate mogap di aek i. 8:33 Dung i maporus ma angka parmahan i, laho tu huta i, dipaboa ma saluhutna, nang taringot tu jolma na sinonggopan ni sibolis i hian. 8:34 Dung i ruar ma saluhut pangisi ni huta i mandapothon Jesus; jadi dung diida, dipangido ma tu Ibana, anggiat ditadingkon luatnasida.
9:1 Dung i bongot ma Ibana tu parau, ditaripari ma tao i, jadi sahat ma Ibana tu hutana. 9:2 Dung i diboan na mamboan ma tu jolona sada halak na sarion, na peak di podomanna. Jadi disi diida Jesus haporseaonnasida, ninna ma mandok na sarion i: Pos ma roham, ale anaha; nunga sesa dosam! 9:3 Alai didok deba sian angka sibotosurat ma di bagasan rohanasida: Na mangaleai Debata do Halak on! 9:4 Diboto Jesus ma pingkiran ni rohanasida, jadi didok ma mandok nasida: Boasa tung dipingkiri hamu na jahat di bagasan rohamuna? 9:5 Dia do ummomo? Dohonon: Nunga sesa dosam, manang dohonon: Hehe ma ho mardalani? 9:6 Alai asa diboto hamu, marhuaso do Anak ni jolma i di tano on manesa dosa didompakkon ma na sarion i mandok: Hehe ma ho, boan ma podomanmi, laho ma muli! 9:7 Jadi hehe ma ibana tutu laho muli. 9:8 Marnida i natorop i, mabiar ma nasida jala dipuji ma Debata, na olo mangalehon huaso sisongon i tu angka jolma. 9:9 Dung i laho ma Jesus sian i, jadi diida ma sada halak na margoar si Mateus, hundul di parbeoan, gabe didok ma mandok ibana: Ihuthon ma Ahu! Jadi hehe do ibana mangihuthon Jesus. 9:10 Dung i uju hundul Ibana mangan di bagasna i, ro ma torop sijalobeo dohot pardosa mangangkupi Jesus dohot angka siseanna. 9:11 Marnida i angka Parise, ninna nasida ma mandok angka siseanna: Boasa tung mangan gurumuna rap dohot angka sijalobeo dohot pardosa? 9:12 Alai dibege Jesus do i, jadi ninna ma: Apala ringkot di angka na hisar pandaoni, di angka na marsahit do! 9:13 Alai laho ma hamu mangguruhon na nidok ni hata on: "Asi ni roha do huhalomohon, ndada pelean!" Ai ndada ro Ahu laho manjou angka partigor, asa dipauba rohana, angka pardosa do! 9:14 Dung salpu i, didapothon angka sisean ni si Johannes ma Ibana, didok nasida do: Boasa marpuasai hami dohot angka Parise; ia angka siseanmi ndang marpuasa? 9:15 Jadi didok Jesus ma mandok nasida: Tung tarbahen ma marsak roha ni pandongani ni pangoli, saleleng rap dope dohot nasida pangoli i? Alai na ro ma arina, buatonna ma disi Pangoli i sian lambungnasida; disi ma nasida marpuasa. 9:16 Angkup ni i: Ndang adong na mandungkaphon abit na imbaru tu abit naung mumut, ai ribakkonon ni na nidungkaphon i do dirina sian pandungkapanna i, jadi lam tu ruakna ma na maribak i. 9:17 Ndang dipainding jolma tuak anggur siraruan tu poting naung buruk, aik mapultak poting i gabe bolong tuak i, laos sega dohot ingananna; tu poting na imbaru do bahenon tuak siraruan i, jadi simpan be ma! 9:18 Uju dihatahon dope hata ondeng tu nasida, nunga ro sada halak na sangap marsomba tu Ibana, huhut ma didok: Ipe mate borungku; alai ro ma Ho mangampehon tanganmu tu ibana, asa sumuang mangolu! 9:19 Jadi hehe ma Jesus rap dohot siseanna, laho mangihuthon ibana. 9:20 Dung i tongon ma adong sada boruboru na tamaningon bulan on, leleng ni sampuludua taon, na ro sian pudina manjama rambu ni ulosna; 9:21 ai ninna rohana di bagasan: Nanggo pala ulosna hujama, mangolu ma ahu! 9:22 Dung i humusor ma Jesus, dibereng ma ibana, laos ninna ma: Pos ma roham, ale inang, haporseaonmi do na pangoluhon ho! Dung i hipas ma boruboru i olat ni na sangombas i. 9:23 Asa dung sahat Jesus ro di bagas ni na sangap i, diida ma angka pangondasi dohot natorop oruk. 9:24 Jadi didok ma: Laho ma hamu, ai ndada na mate si betet on; na modom do! Jadi diparengkeli nasida do Ibana. 9:25 Asa dung dipalaho natorop i, bongot ma Ibana, ditangkup ma tanganna, jadi mulak mangolu ma dakdanak i. 9:26 Dung i sar ma barita i tu na saluat i. 9:27 Dung i laho ma Jesus sian i, jadi adong ma dua halak na mapitung mangihutihut Ibana, huhut gogo manjoujou: Ale Anak ni si Daud! Asi ma roham di hami! 9:28 Jadi laho bongot tu jabu i Jesus, didapothon angka na mapitung ondeng ma Ibana, gabe didok ma mandok nasida: Ai dihaporseai hamu do Ahu margogo patupahon i? Jadi didok nasida ma mandok Ibana: I do, Tuhan! 9:29 Gabe dijama ma matanasida huhut ma didok: Marguru tu haporseaonmuna ma jumpang hamu! 9:30 Jadi saut ma buha matanasida. Dung i gogo ma dipopai Jesus nasida, didok ma: Jaga ma hamu! So tung adong manang ise na umbotosa! 9:31 Alai laho do nasida, dipanghatahatahon ma Ibana tu sude nasida na saluat i. 9:32 Laho tu balian dope nasida ondeng, nunga adong na mamboan tu jolona sada halak na ngungu, hasiaran ni sibolis. 9:33 Jadi dung bali sibolis i, mangkatai ma na ngungu i. Longang ma antong natorop i, angka ninna ma: Ndang dung tarida dope sisongon i di bangso Israel on! 9:34 Alai didok angka Parise ma: Dipabali Halak on do angka sibolis mangasahon sintua ni sibolis i! 9:35 Jadi sai mardalani do Jesus mangaliati angka huta ro di angka sosor, mangajari di angka parguruannasida, manurasihon barita na uli taringot tu Harajaon i; dipamalum do nasa sahit dohot tihasnasida. 9:36 Jadi mamereng natorop i, asi ma rohana, ai maheu jala marhinamago do nasida diida songon birubiru na so marparmahan. 9:37 Laos ninna ma mandok siseanna: Bidang do nian sisabion, alai otik do anggo angka pangula. 9:38 Onpe, elehelek hamu ma Nampuna sisabion i, anggiat dipaborhat angka pangula tu sisabionna i!
10:1 Jadi dijou Jesus ma siseanna na sampuludua i tu jolona, dilehon ma tu nasida sahala mangalo dompak angka tondi na hodar, laho pabalihonsa jala laho pamalum nasa sahit dohot tihas. 10:2 Ianggo goar ni apostel na sampuludua i, angka on do: Na parjolo si Simon, na ginoar huhut si Petrus, dohot donganna saama si Andreas; dung i si Jakobus dohot donganna saama si Johannes, i ma angka anak ni si Sebedeus; 10:3 dung i si Pilippus dohot si Bartolomeus; si Tomas dohot si Mateus, sijalobeo i; dung i si Jakobus, anak ni si Alpeus, dohot si Tadeus; 10:4 dung i si Simon, halak Kana, dohot si Jude Iskariot, parjehe i. 10:5 Na sampuludua ondeng ma disuru Jesus, dipatihi ma nasida, ninna ma: Unang tondong hamu dalan na tu halak sipelebegu, jala unang topot hamu tu huta ni halak Samaria! 10:6 Tu angka birubiru na mago na sian pinompar ni halak Israel sambing ma hamu laho! 10:7 Alai borhat ma hamu mamaritahon hata on: Nunga songgop harajaon banua ginjang i! 10:8 Pamalum hamu ma sahit ni na marsahit, pangolu hamu ma angka na mate, ias ma bahen hamu angka na huliton, pabali hamu ma angka sibolis! Sibasabasa do i tu hamu; antong, basabasahon hamu ma i! 10:9 Unang ma sarihon hamu hian sere, manang perak, manang hepeng tu hohosmuna, 10:10 manang singkop siboanon tu pardalanan, manang ulos dua, songon i nang sipatu manang tungkot pe; ai tama do dapotan bohalna pangula. 10:11 Alai laho mambongoti huta manang sosor pe, diori hamu ma disi halak na tama soranganmuna, jadi disi ma hamu manongtong, paima borhat muse. 10:12 Jala laho mambongoti jabu i, tabii hamu ma nasida! 10:13 Laos songgop ma damemuna tu isi ni jabu i, anggo na tama nasida manjalosa; alai molo so i, mulak ma tu hamuna damemuna i. 10:14 Jadi anggo so dijangkon nasida hamu manang so olo tumangihon hatamuna, tadingkon hamu ma bagas dohot hutanasida, laos pirpirhon hamu ma dompak nasida nang orbuk na lohot di patmuna! 10:15 Situtu do na hudok on tu hamu: Numeang do sitaonon ni luat Sodom dohot Gumora di ari uhum sogot, unang huta ondeng. 10:16 Husuru do hamu songon birubiru tu tongatonga ni angka babiat; dibahen i pantas ma hamu marroha songon ulok, huhut lidang ma rohamuna songon darapati! 10:17 Jaga ma hamu di angka jolma, ai pasahatonna do hamu tu angka paruhuman, jala linsinganna do hamu di angka parguruannasida. 10:18 Toguonnasida do hamu tu jolo ni angka panggomgomi dohot tu jolo ni angka raja ala ni Ahu, bahen panindangion tu nasida dohot tu angka sipelebegu. 10:19 Alai jumpa dipajongjong nasida hamu, unang ma holsoan rohamu di sidohononmuna i, ai di na sangombas i do lehononna tu hamu hata sidohononmuna i. 10:20 Ai apala hamu na mandok hata disi; Tondi ni Amamuna do marturasi di bagasan hamu. 10:21 Pasahaton ni hahana do anggina tu hamatean, jala pasahaton ni amaama do anakna; jala na hehe do angka anakkon dompak natorasna, laho pabunuhonsa. 10:22 Hosoman ni saluhut jolma do hamu ala ni Goarhu; alai nasa na manahan ro di ujungna, i do paluaonna! 10:23 Ia dilele nasida hamu sian huta na sada, maporus ma hamu tu huta na asing, ai na tutu do na hudok on tu hamu: Ndang sanga topotonmuna sude huta na di tano Israel, nunga ro Anak ni jolma i. 10:24 Apala sumurung anak sisean sian guruna, manang naposo sian indukna. 10:25 Nunga antong jadi di anak sisean i, molo songon na di guruna di ibana; nang di naposo, molo songon na di indukna di ibana. Molo digoar halak nampuna bagas si Belsebul, lam tu donganna sajabu ma, lam so dohononna sisongon i! 10:26 Unang ma habiari hamu nasida, ai ndang adong na holip, na so sipapataron sogot; jala ndang adong na buni, na so dapot botoon sogot. 10:27 Na hupaboa tu hamu di na holom, hatahon hamu ma i di na tiur; na huhusiphon tu pinggolmuna, baritahon hamu ma i di angka partungkoan! 10:28 Unang pola mabiar hamu mida angka na mambunu daging, angka na so tuk mambunu tondi; alai na marhuaso mangagohon daging dohot tondi tu na roko, i do sihabiaranmuna. 10:29 Nda digadis halak dua amporik arga sauang? Alai ndang madabu nanggo sada sisongon i tu tano, anggo so binoto ni Amamuna. 10:30 Ianggo di hamu, gari obuk saluhutna na di ulumuna i nunga dibilang. 10:31 Dibahen i unang ma hamu mabiar, ai ummangat dope hamu sian torop amporik! 10:32 Ai ganup na mangkatindangkon Ahu di jolo ni jolma, i do hatindangkononku di jolo ni Damang na di banua ginjang i; 10:33 alai ganup na mansoadahon Ahu di jolo ni jolma, laos soadahononku do i di jolo ni Damang na di banua ginjang i! 10:34 Unang ma dirimpu rohamuna, na mamboan dame Ahu, umbahen na ro tu tano on; ndada na ro Ahu mamboan dame, tung podang do! 10:35 Ai na ro do Ahu pabadahon anak tu amana, boru tu inana, parumaen tu simatuana boru; 10:36 jala tung donganna sajabu gabe musu ni jolma i. 10:37 Na humolong roha di amana manang di inana asa di Ahu, ndang tama i siseanku; jala na humolong roha di anakna dohot di boruna asa di Ahu, ndang tama i siseanku. 10:38 Jala na so mamorsan silang na tu ibana i, laho mangihuthon Ahu, ndang na tama i siseanku. 10:39 Ai na marhamaolhon ngoluna, ngolu ni i do na mago sogot; alai na sumeahon ngoluna ala ni Ahu, i do jumpangan ngolu sogot. 10:40 Na manjangkon hamu, Ahu do jinangkonna: Jala na manjangkon Ahu, Na marsuru Ahu do jinangkonna disi. 10:41 Na manjangkon panurirang, ala targoar panurirang, dapotan upa ni panurirang; na manjangkon partigor, ala targoar partigor, dapotan upa ni partigor. 10:42 Na painumhon aek tabar santahu tu sahalak sian angka na metmet on, ala targoar siseanku ibana: Na tutu situtu do na hudok on tu hamu, ndang na mago upana!
11:1 Jadi dung sun dipatihi Jesus siseanna na sampuludua i, hehe ma Ibana sian i, laho mangajari dohot marjamita di angka hutanasida. 11:2 Alai dibege si Johannes na tarhurung i do barita ni angka na binahen ni Kristus i, jadi disuru ma siseanna manungkun Ibana: 11:3 Ho do na naeng ro i, manang na asing dope sipaimaonnami? 11:4 Dung i didok Jesus ma mangalusi nasida: Mulak ma hamu, baritahon hamu ma tu si Johannes i angka na binege dohot na niidamuna on: 11:5 Na gabe marnida do angka na mapitung, na mardalani do angka na lumpuon, na gabe ias do angka na huliton, na marbinege do angka na nengel na mulak mangolu do angka na mate; tu angka na pogos do binoan barita na uli. 11:6 Jala martua do na so targasip di Ahu! 11:7 Jadi dung laho nasida, ditaringoti Jesus ma si Johannes tu natorop i: Aha do na naeng idaonmuna, umbahen na laho hamu tu halongonan? Arung na meoleol na niullus ni alogo do? 11:8 Manang na naeng idaonmuna do sahalak parabit na lamot? Di jabu ni angka na raja do anggo parabit na lamot. 11:9 Manang na naeng idaonmuna do tahe panurirang? Olo, hudok ma tu hamu: Sumurung do ibana sian panurirang. 11:10 Ibana do na nidok ni hata on: "Ahu ma marsuru suruanki patujolom, sipature dalanmu di jolomi." 11:11 Na tutu do na hudok on tu hamu: Ndang adong na hehe sian jolma, na tinubuhon ni parompuan, na umbalga sian si Johannes pandidi; alai halak na ummetmet pe, naung di bagasan harajaon banua ginjang i, umbalga do i sian ibana. 11:12 Alai olat ni angka ari ni si Johannes pandidi tu jolo on sigogoan do harajaon banua ginjang i, jala angka sibahen gogo do mangaithonsa. 11:13 Ai intap si Johannes nama panurirangon ni sude angka panurirang dohot patik i. 11:14 Jadi molo tartangkup rohamuna i: Ibana do si Elia, na naeng ro i! 11:15 Hamu angka na marpinggol, pinggol hamu ma i! 11:16 Alai tu ise ma tahe patudosonku bangso on? Tudos ma nasida tu dakdanak na hundul di paronanan, angka na manjoujou di angka donganna dakdanak, mandok: 11:17 Hupalui hami suling di jolomu, so haru manortor hamu; andung hupatubegehon hami tu hamu, so saut hamu tangis! 11:18 Ai na ro do si Johannes, ndang parpapangan, ndang parminum, gabe dipandok: Sibolis do di ibana. 11:19 Ia ro Anak ni jolma i, na olo mangan jala minum, gabe didok: Ndi, Halak on, sipapangan mago jala sisobur tuak anggur, aleale ni sijalobeo dohot, pardosa! Gabe pintor do Hapistaran i dipintori angka pambahenanna i. 11:20 Dung i ditorui Jesus ma huta, angka naung gumodang marnida hagogoonna i, ala so muba rohanasida, ninna do: 11:21 Marjea ma ho, Korasin! Marjea ma ho, Betsaida! Ai aut di huta Tirus dohot Sidon dipamasa hagogoon angka na masa di hamu, ndang tarbahen so paubaonna rohana uju i, marabithon goni, hundul di orbuk! 11:22 Angkup ni i, hudok ma di hamu: Neang do sitaonon ni pangisi ni huta Tirus dohot Sidon di ari uhum i, martimbangkon sitaononmuna. 11:23 Ia ho Kapernaum! Nda na pinatimbo ho ro di langit an? Sidabuhononhon do ho sahat tu api na roko! Ai aut di huta Sodom dipamasa hagogoon angka na masa di bagasan ho, ndang tarbahen so hot dope huta i rasirasa sadari on! 11:24 Angkup ni i, hudok ma di hamu: Neang do sitaonon ni pangisi ni huta Sodom di ari uhum i, martimbangkon sitaononmuna! 11:25 Uju i ma didok Jesus hatana songon on: Hupuji Ho, Amang, Tuhan na manggomgomi banua ginjang dohot tano on, ala ditamondingkon Ho hata i sian jolo ni angka na pistar dohot na marroha, gabe dipapatar Ho i tu angka siondihononhon. 11:26 Olo, Amang, ai i do dihalomohon roham hian. 11:27 Saluhutna i, nunga dipasahat Damang tu Ahu; asa ndang adong na tumanda Anak i dungkon ni Ama i; Ama i pe, ndang adong na tumanda i, ia so holan Anak i, angkup ni na pinodaan ni Anak i, mangihuthon lomo ni rohana. 11:28 Ro ma hamu tu Ahu, hamu angka na loja jala na sorat, asa hupasonang hamu! 11:29 Jangkon hamu ma augangku, marguru ma hamu tu Ahu, ai na lambok do Ahu jala na serep marroha, asa dapotan hasonangan tondimuna. 11:30 Ai lambok do augangku jala neang do dohot na hupaporsanhon.
12:1 Dung i mamolus ma Jesus sian tonga ni hauma, tongon di ari Sabbat i, jala digotili angka siseanna ma eme i, ala naung male dihilala, laos digugut. 12:2 Marnida i angka Parise, ninna nasida ma mandok Ibana: Bereng! Indi, siseanmi! Diulahon nasida do na so jadi di ari Sabbat! 12:3 Dung i ninna ma mandok nasida: Ndang dung dijaha hamu huroha na binahen ni si Daud, uju male ibana rap dohot angka donganna sauduran? 12:4 Ai dibongoti do joro ni Debata, gabe dipangan nasida do roti na marhadohoan, na so jadi panganonna manang panganon ni angka donganna pe, nda holan angka malim i do nian. 12:5 Manang na so dung ulaning dijaha hamu di buku patik i, na so sala hape angka malim jumpa ari Sabbat di bagasan joro i, nang pe dilaosi patik ari Sabbat i? 12:6 Alai hudok ma tu hamu: Na sumurung sian bagas joro i do On! 12:7 Alai ndang tagamon uhumonmuna nasida na so marsala i, aut na diboto hamu na nidok ni hata on: "Asi ni roha do huhalomohon, ndada anggo pelean." 12:8 Ai guru di Anak ni jolma i do nang ari Sabbat i! 12:9 Jadi hehe ma Ibana sian i, dibongoti ma parguruannasida. 12:10 Jala adong ma disi sada halak naung mate tanganna sambariba, jala disungkun nasida ma Ibana: Ai na jadi do pamalumon sahit di ari Sabbat? Alai na naeng aluhononnasida do Ibana nian. 12:11 Alai ninna ma mandok nasida: Ise sian hamu na marbirubiru sada, na so laho manahopi i jala manaiti tu ginjang, ia tung targodung i di ari Sabbat? 12:12 Nda andul sumurung ma antong jolma sian birubiru! Asa na jadi do mambahen na denggan di ari Sabbat. 12:13 Dung i ninna ma mandok jolma i: Patoltol ma tanganmi! Jadi dipatoltol ma, gabe sumuang ma hisar songon tanganna na sada nari. 12:14 Jadi ruar ma angka Parise i martuptup i, manang beha bahenonnasida mambunu Ibana. 12:15 Dung diboto Jesus tahinasida, sumurut ma Ibana sian i. Anggo natorop i, diihuthon do Ibana, jadi dipamalum ma sahitnasida saluhutna. 12:16 Jala gomos ma nasida dipopai, asa unang dipaboaboa nasida Ibana. 12:17 Asa jumpang na nidok ni panurirang Jesaya: 12:18 "Ida ma naposongku na hupillit i, haholonganku jala hasoloan ni rohangku do Ibana; ampehononku do Tondingku tu Ibana, jala lumbahononna ma uhum tu angka bangso. 12:19 Ndang olo Ibana mangkuling tomputompu, jala ndang dipagogo soarana; ndang tarbege Ibana di adaran na bidang. 12:20 Ndang ponggolhononna arung naung marosak, jala ndang na intopanna sumbu na marnehetnehet; ingkon sahat do pamonangonna uhum i. 12:21 Gabe tu Goarna ma marhaposan angka bangso!" 12:22 Dung i tarboan ma tu jolona sada halak partondi na hodar, na mapitung jala na ngungu; jadi malum do ibana dibahen, gabe mangkatai ma ibana huhut marnida. 12:23 Jadi tarhalomong ma halak natorop i saluhutna, didok nasida ma: Nda tung On Anak ni si Daud ulaning? 12:24 Umbege i angka Parise, ninna nasida ma: Si Beelsebul, induk ni angka sibolis, do dipangasahon Ibana, laho pabalihon angka tondi na hodar. 12:25 Alai diboto Jesus do pingkiran ni rohanasida, jadi ninna ma mandok nasida: Pesan do ganup harajaon na marsalisi sama dirina, jala ndang na hot be manang huta manang bagas na marsalisi dohot dirina. 12:26 Asa molo dipabali sibolis i donganna sibolis, marsalisi nasida sama nasida. 12:27 Jala molo tung Ahu pabalihon angka sibolis mangasahon si Beelsebul, na mangasahon ise do huroha angka anakmuna laho pabalihonsa? Onpe, nasida do manguhumi hamu disi. 12:28 Alai anggo Ahu pabalihon angka sibolis i mangasahon Tondi ni Debata, naung songgop ma tahe harajaon ni Debata tu hamu! 12:29 Tung habongotan halak ma jabu ni ulubalang jala mangarampas ugasanna, anggo so jumolo diihoti ulubalang i? Nda dung pe i, asa tarbuatsa ugasanna? 12:30 Na so mandongani Ahu, alongku do i; jala na so donganku papunguhon, na paserakkon do i. 12:31 Dibahen i hudok ma tu hamu: Tarsesa do sogot nasa dosa ni halak ro di panginsahion, alai ndang sesaon anggo panginsahion dompak Tondi i. 12:32 Asa molo adong na mandok hatana mangalo Anak ni jolma i, hasesaan do i; alai molo adong na mandok hatana mangalo Tondi Parbadia i, ndang na sesa anggo i, manang di hasiangan on, nang di na ro sogot. 12:33 Molo hau na denggan sinuan, na denggan ma antong parbuena; molo hau na roa sinuan, gabe roa do parbuena, ai matua sian parbuena do tandaon hau. 12:34 E hamu anak ni ulok, tung tarbahen hamu angka na jahat i ma mangkatahon hata na denggan? Ai ia i na manggohi roha, matua i do hatahonon ni pamangan. 12:35 Dirungkari halak na denggan roha do angka hadengganon sian arta na denggan na pineopna i; jala anggo halak na jahat roha, angka hajahaton do rungkaranna sian na jat na pineopna hian. 12:36 Alai hudok ma tu hamuna: Ingkon maralus do jolma sogot di ari uhum i taringot tu nasa hata na so gabeak na hinatahonna i. 12:37 Ai marguru tu angka hatami do ho pintoranna manang uhumonna sogot. 12:38 Dung i ninna na deba sian angka Parise dohot sibotosurat ma mangalusi: Ale Guru, naeng idaonnami do sada tanda sipatupaonmu! 12:39 Alai ninna ma mangalusi nasida: Na mangido tanda do bangso na jahat jala na mangalangkup on; alai ndang lehonon tanda tu nasida, ia so holan tanda na masa tu panurirang si Jonas: 12:40 Ai songon si Jonas i tolu ari tolu borngin di bagasan butuha ni dengke na bolon, songon i ma muse Anak ni jolma i di bagasan tano, tolu ari tolu borngin lelengna. 12:41 Na hehe do sogot halak Ninive di paruhuman i dompak bangso na sansundut on, mangkonahon uhum tusi, ai dipauba do rohanasida, umbege jamita ni si Jonas. Jala ida ma, On do na sumurung sian si Jonas i! 12:42 Na hehe do sogot di paruhuman i raja boruboru na sian dangsina i dompak halak na sansundut on, mangkonahon uhum tusi, ai na ro do nasida sian luat na sai dao mananginangi hamaloon ni si Salamo. Ida ma, On do na sumurung sian si Salomo! 12:43 Alai dung bali tondi na hodar sian jolma, didalani ma angka inganan na hasang, mangalului paradianan, jala ndang jumpangsa. 12:44 Gabe didok ma: Mulak nama ahu tu ingananku na hutadingkon i! Jadi di na ro ibana, rumar ma i didapot, nunga disapu jala dipalehet. 12:45 Dung i borhat ma ibana mangarahon pitutondi na asing, angka na jumahat sian ibana, laos dibongoti ma laho maringanan tusi; jadi jumahat ma pangalaho ni jolma i di ujungna sian di mulana i. Songon i nama songgop tu bangso na jahat on! 12:46 Jadi di na mangkatai dope Ibana dohot natorop i, nunga jongjong di duru inana rap dohot angka anggina, naeng mangkatai dohot Ibana. 12:47 Dung i adong ma na paboahon: Di balian an do inangmu dohot angka anggim, naeng mangkatai dohot Ho! 12:48 Alai ninna ma mangalusi na paboahon i: Ise do goaron dainang, jala ise do dohonon anggingku? 12:49 Jadi dipaherbang ma tanganna tu ginjang ni angka siseanna, huhut ma didok: Angka on do dainang dohot anggingku! 12:50 Ai na mangulahon lomo ni roha ni Damang na di banua ginjang, i do anggingku, i do ibotongku, i do dainang!
13:1 Di na sadari ruar ma Jesus sian bagas i, laho hundul tu pasir ni tao. 13:2 Jadi marpungu ma torop halak tu jolona, gabe dipanaek Ibana ma sada parau laho hundul tusi, jala sude natorop i jongjong do di pasir i. 13:3 Dung i godang ma dihatahon tu nasida, huhut pangke umpama, ninna ma: Na laho tu balian do sahalak panabur laho manabur. 13:4 Jadi di na manabur i ibana, adong ma boni i deba na mamiltik tu dalan, dung i ro ma angka pidong mamarguti. 13:5 Alai anggo na deba, tu tano na batu on do madabu, di na so sadia hapal tano, jadi tibu ma tubu, dibahen na so bagas tano disi. 13:6 Alai di na lam timbo mata ni ari, rahar ma; gabe mate, ala so marurat. 13:7 Anggo na deba, tu parsihupian do madabu, laos tubu do angka sihupi i, gabe dipisati ma eme i. 13:8 Alai na deba nari, tu tano na denggan i do madabu, gabe saut ma marparbue, saratus lompit do na deba, onompulu lompit do na deba, jala tolupulu lompit do na deba. 13:9 Hamu angka na marpinggol, pinggol hamu ma i! 13:10 Dung i didapothon angka siseanna ma Ibana mandok: Boasa marumpama Ho marjamita tu nasida? 13:11 Alai ninna ma mangalusi nasida. Ala ni on do: Sibasabasa do i tu hamu, umbahen na ditanda hamu angka hasimoon ni harajaon banua ginjang i; alai ndang dibasabasahon i anggo tu nasida. 13:12 Ai tu ganup paradongan lehonon do jala pasuksuhon. Alai buaton ma sian na so paradongan na adong di ibana hian. 13:13 I do alana, umbahen na marumpama Ahu manjamitai nasida, ai marnida nasida, so haru diida, jala marbinege nasida, so haru dibege, jala ndang diantusi. 13:14 Asa naung jumpang ma di nasida na sinurirangkon ni si Jesaya na mandok: "Begeon ni sipareonmuna do i nian, matua so antusanmuna; simalolongmuna do marnidasa nian, matua so tandaonmuna. 13:15 Naung tangkang do roha ni bangso on jala maingol do pinggolna, dipapitpit do matana, asa unang marnida simalolongna, unang marbinege sipareonna, jala unang mangantusi rohana, asa unang mulak jala unang malum nasida bahenonku." 13:16 Alai martua do simalolongmuna ala marnida, dohot sipareonmuna ala marbinege! 13:17 Ai na tutu do na hudok on tu hamu: Torop do angka panurirang dohot angka partigor, angka na masihol naeng idaonna nian naung niidamuna, hape ndang diida, jala naeng begeonna nian naung binegemuna, hape ndang dibege. 13:18 Onpe, tangihon hamu ma umpama taringot tu panabur i! 13:19 Tu ganup na umbege hata Harajaon i, anggo so diantusi, ro do parjahat i, mangarampasi na sinaburhon tu rohana i. I ma na sinaburhon tu dalan i. 13:20 Alai na sinaburhon tu na batu on, i ma na umbege hata i, gabe manigor las ma rohana manjangkon. 13:21 Alai ndang marurat di bagasan rohana; parsatongkinan do ibana, ai pintor targasip do rohana, di na songgop haporsuhon manang pangaleleon siala Hata i. 13:22 Alai anggo na sinaburhon tu parsihupian i, i ma na umbege hata i, gabe pangkolsohonna di angka na di hasiangan on dohot hamoraon sipangansi i do mamisati hata i, jadi ndang saut marparbue. 13:23 Alai anggo na sinaburhon tu tano na denggan, i do na umbege hata i jala diantusi, laos i do na saut marparbue. Ia parbuena: Saratus lompit do na deba, onompulu lompit do na deba, tolupulu lompit anggo na deba. 13:24 Dung i umpama na asing ma dipatubegehon tu nasida, ninna ma: Tudos do harajaon banua ginjang i tu sada halak na manaburhon boni na denggan tu haumana. 13:25 Alai di na modom halak, ro ma musuna, manaburhon simaremeeme, tu holangholang ni eme i, laos laho sian i. 13:26 Alai dung marbuhu tano jala martahi boltokon eme i, tanda ma dohot simaremeeme i. 13:27 Jala ditopot angka naposo ma parhauma i, ninna ma: Rajanami, nda boni na denggan do na disaburhon ho tu haumami? Sian dia do simaremeeme i? 13:28 Alai didok ma tu nasida: Musu i do mambahen i. Dung i didok angka naposo i ma tu ibana: Denggan do di roham, hami laho palunggukkon? 13:29 Dung i ninna ma: Ndangana, so tung dohot eme i dibutbuti hamu, laho palunggukkon simaremeeme i. 13:30 Pasombu hamu ma i rap magodang paima gotilon; dung i dohononku ma di masa ni gotilon i tu angka panabi: Jumolo ma palunggukkon hamu simaremeeme i, dung i rahuti hamu ma sasambobok asa tinutung; alai anggo eme i, papungu hamu ma tu sopongku! 13:31 Dung i didok ma umpama na asing tu nasida: Tudos do harajaon banua ginjang i tu batu ni siarum, na binuat ni sada halak laho manaburhon tu porlakna. 13:32 I do sada na ummetmet sian nasa ragam ni boni; alai dung tubu, gabe umbalga do i sian nasa ingkau rata, pola hira hau do, jala ro do angka pidong na martongatonga langit marasar tu rantingna. 13:33 Dung i umpama na asing muse dihatahon tu natorop: Tudos do harajaon banua ginjang i tu itak naung niasoman, na binuat ni sahalak inaina, laho pasaorhon tu itak tolu ampang, paima asom saluhutna. 13:34 Saluhutna i dihatahon Jesus marhite sian umpama tu natorop; ndang na mangkatai Ibana tu nasida, anggo so marhite sian umpama, 13:35 asa jumpang hinatahon ni panurirang i na mandok: "Huungkap pe pamanganku mangkatahon umpama, hurungkari pe na buni sian mula ni portibi on." 13:36 Dung i dipamuli ma natorop i. Jala dung sahat Ibana tu jabu, didapothon angka siseanna ma Ibana mandok: Patorang ma tu hami umpama taringot tu simaremeeme na di hauma i! 13:37 Dung i ninna ma mangalusi nasida: Anak ni jolma i do manaburhon boni na denggan i. 13:38 Portibi on do ia panaburan i; ianggo boni na denggan, i do angka anak harajaon i; alai anggo simaremeeme, angka anak ni parjahat do i. 13:39 Sibolis i do musu i na manaburhonsa. Ajal ni hasiangan on do ia ari gotilon; angka surusuruan ni Debata do panggotil i. 13:40 Asa songon na pinalunggukna i simaremeeme i jala ditutung tu api, songon i do masa sogot di ajal ni hasiangan on: 13:41 Ai suruon ni Anak ni jolma i do angka surusuruanna papungupunguhon saluhut sipanggasipi dohot siulahon na so uhum sian harajaonna i. 13:42 Dung i dabuonnasida ma angka i tu liang pamurunan i; disi ma masa angguhangguk dohot na patungoripon. 13:43 Di ari i ma marsinondang angka partigor songon mata ni ari di harajaon ni Amanasida. Hamu angka na marpinggol, pinggol hamu ma i! 13:44 Tudos do harajaon banua ginjang i tu arta na buni di sada ladang, gabe adong ma sahalak na jumpangan i jala dibunihon ma. Dung i laho ma ibana di las ni rohana i manggadisi nasa na di ibana, laos dituhor ma ladang i. 13:45 Tudos do muse harajaon banua ginjang i tu sahalak partigatiga, na mangalului mutiha na arga. 13:46 Jadi dung jumpangsa sada mutiha na arga situtu, laho ma ibana manggadisi nasa na di ibana, laos dituhor ma i. 13:47 Tudos do muse harajaon banua ginjang i tu jala na sinampakkon tu laut, gabe marragamragam dapotsa. 13:48 Jadi dung gok, ditait ma tu darat, dung i hundul ma nasida mamilliti na denggan, mandabuhonsa tu ingananna; alai dipambolongkon do anggo na so hasea. 13:49 Songon i do masa sogot di ajal ni hasiangan on: Borhat do angka surusuruan i manirangkon angka parjahat sian tongatonga ni angka partigor. 13:50 Dung i dabuonna ma nasida tu liang pamurunan i; disi ma masa angguhangguk dohot na patungoripon. 13:51 Nunga diantusi hamu saluhutna i? Jadi didok nasida ma tu Ibana: Nunga. 13:52 Gabe didok ma tu nasida: Onpe, ganup sibotosurat, naung mangguruhon ruhut ni harajaon banua ginjang i, tudos ma i tu sada na mora, na mangarungkari arta na imbaru dohot naung leleng sian na pineopna i. 13:53 Jadi dung dipaujung Jesus angka umpama ondeng, laho ma Ibana sian i. 13:54 Jadi sahat ma Ibana tu huta hagodanganna, jala diajari ma nasida di parguruannasida, pola tarhalomong nasida, angka ninna ma: Sian dia ma dapot Halak on hapistaran dohot ulaon hagogoon sisongon i? 13:55 Nda Ibana anak ni tukang i? Nda si Maria do goar ni inana i, jala angka anggina do si Jakobus, Josep, Simon dohot Judas? 13:56 Nda di hita on sude angka ibotona i? Sian dia do dapot Ibana sudena i? 13:57 Jadi targasip ma nasida mida Ibana. Alai ninna Jesus ma mandok nasida: Tung na so adong do hasangapon ni panurirang anggo di huta hagodanganna dohot di jabuna. 13:58 Gabe ndang haru piga ulaon hagogoon diula disi, ala na so porsea i nasida.
14:1 Sar ma uju i dibege si Herodes, raja na opat i, barita ni Jesus. 14:2 Gabe didok ma tu angka naposona: Ibana do si Johannes pandidi; naung hehe do i sian angka na mate, umbahen na tarpatupasa angka ulaon hagogoon. 14:3 Ai naung ditangkup si Herodes do si Johannes, diihoti jala dihurungkon siala si Herodias, dongan saripe ni anggina si Pilippus. 14:4 Ai didok si Johannes do tu ibana: Ndang tama di ho nasida! 14:5 Na naeng bunuonna do ibana nian, alai dihabiari do natorop, ai panurirang do ibana dirajumi rohanasida. 14:6 Alai di ari hatutubu ni si Herodes manortor ma boru ni si Herodias i di jolonasida, jadi solo ma roha ni si Herodes marnida, 14:7 pola maruari ibana, marbagabagahon mangalehon manang dia pe sipangidoonna. 14:8 Jadi ninna anak boru naung niajaran ni inana i ma: Lehon tu ahu dison di atas pinggan ulu ni si Johannes pandidi! 14:9 Gondok do nian roha ni raja i; alai ala ni uarina i dohot ala ni angka tamuena i, gabe didokkon ma na mangalehonsa. 14:10 Asa disuru nama na mamisikkon ulu ni si Johannes di hurungan i. 14:11 Saut ma diboan uluna di atas pinggan, dilehon ma tu anak boru i, gabe diboan tu inana i. 14:12 Dung i ro ma angka siseanna i, dialap ma bangkena, laos ditanom, dung i didapothon ma Jesus, laho paboahonsa. 14:13 Alai umbege i, borhat ma Jesus sian i marparau tu luat na lungun, punjung sasadasa. Jadi umbege i natorop, mardalan tur ma nasida sian angka huta i mandapothon Ibana. 14:14 Dung ro Jesus sian i, diida ma halak mansai torop, jadi asi ma rohana mida nasida, dipamalum ma angka na marsahit na di nasida. 14:15 Alai mareak bot ari didapothon siseanna ma Ibana, angka ninna ma: Halongonan do dison jala na bot ne ma ari; pamuli ma natorop i, asa laho nasida tu angka huta manuhor sipanganon! 14:16 Alai didok Jesus ma tu nasida: Ndang pola laho nasida, lehon hamu ma nasida mangan! 14:17 Dung i ro ma hatanasida: Holan lima roti dohot dua dengke sambing do hupeop hami dison. 14:18 Alai ninna ma: Boan hamu ma i tu Ahu! 14:19 Dung i didokkon ma natorop i hundul di duhutduhut, ditiop ma roti na lima dohot dengke na dua i, manaili ma Ibana tu ginjang laho mamasumasu, dibagi ma roti i, diparlehon ma tu angka siseanna, asa nasida mangalehon tu natorop i. 14:20 Jadi mangan ma saluhutna jadi bosur be ma; dung i dipapungu ma angka ebaeba na lobi i, gok sampuludua ampang. 14:21 Alai anggo torop ni baoa na mangan i arga limaribu do, so padohot angka parompuan dohot dakdanak. 14:22 Dung i didasdas Jesus ma angka siseanna marparau pajolohon tu bariba an, asa dipamuli jolo natorop i. 14:23 Jadi dung saut dipamuli, nangkok ma sasadasa tu dolok martangiang. Asa dung bot ari, holan sahalakna ma disi. 14:24 Alai anggo parau i nunga tarholang sian pasir, jala disosak galumbang i do nasida, ai alo do alogo i tu nasida. 14:25 Jadi martahi tahuak manuk, ro ma Jesus mandapothon nasida di sisik ni tao. 14:26 Jadi dung diida sisean i Ibana mardalan di sisik ni tao i, marlangan ma nasida, dirimpu tondi; pola mangangguhi be nasida sian biar ni rohanasida. 14:27 Alai pintor dipanghulingi Jesus ma nasida, ninna ma: Pos ma rohamuna, Ahu do! Unang hamu mabiar! 14:28 Dung i ninna si Petrus ma mangalusi Ibana: Ale Tuhan, anggo Ho do hape, dokkon ahu ro mandapothon Ho, mardalan sian aek i! 14:29 Gabe didok ma: Ro ma antong! Jadi mijur ma si Petrus sian parau i, mardalan sian aek i mandapothon Jesus. 14:30 Alai mamereng alogo na gogo i, mabiar ma ibana, jadi naeng lonong ma, gabe dijouhon: Tuhan, palua ahu! 14:31 Jadi pintor disurdukkon Jesus ma tanganna manangkup ibana, jala didok ma tu ibana: E ho, siotik haporseaon; aha ma pola ganggu roham? 14:32 Laos bongot ma nasida tu parau i, jadi so ma alogo i. 14:33 Jadi disomba halak na di parau i ma Ibana, angka ninna ma: Tutu do Ho Anak ni Debata! 14:34 Dung i laos marparau ma nasida sahat tu luat Genesaret. 14:35 Jadi dung ditanda halak isi ni luat i Ibana, disuru nasida ma paboahon tu sandok luat na humaliang i, dung i dipamboan ma tu Ibana nasa na hansitan. 14:36 Jadi dielehelek nasida ma Ibana, asa diloas jamaonnasida nanggo rambu ni ulosna; jadi malum do saluhut na manjamasa.
15:1 Dung i ro ma angka sibotosurat dohot angka Parise sian huta Jerusalem mandapothon Jesus, ninna ma: 15:2 Boasa dilaosi angka siseanmi adat na sian angka natuatua? Ai ndang marburi nasida laho mangan. 15:3 Alai ninna ma mangalusi nasida: Ia hamu, boasa laosanmuna patik ni Debata, paingotingot adatmuna i? 15:4 Ai Debata do mamatikkon: "Pasangap ma amangmu dohot inangmu! Ia na mamburai amana dohot inana, sipusaon do!" 15:5 Alai hamu mamodahon: Ia adong na mandok tu amana tu inana: Pinelehon ma tagonan na patut hian pangurupingku di ho, ndang pola be halak i pasangaphon amana manang inana disi! 15:6 Gabe disegai hamu do patik ni Debata dibahen adatmuna i. 15:7 E hamu pangansi! Na sintong do dapot di hamu hata na sinurirangkon ni si Jesaya, di na nidokna i: 15:8 "Dipasangap pamangan ni bangso on do Ahu; alai anggo rohanasida dao do sian Ahu. 15:9 Jala magopo do pambahennasida pasangaphon Ahu, ai poda ni jolma do dipodahon nasida." 15:10 Laos dijou ma natorop i tu jolona, didok ma tu nasida: Tangi jala parateatehon hamu ma! 15:11 Nda tung gabe ramun jolma hinorhon ni na bongot sian pamanganna; na ruar sian pamanganna, i do mangaramuni jolma. 15:12 Dung i didapothon angka siseanna ma Ibana, ninna ma: Diboto Ho do tahe, naung targasip angka Parise umbege hata ondeng? 15:13 Alai ninna ma mangalusi: Sibutbuton do nasa suansuanan na so sinuan ni Damang na di banua ginjang i. 15:14 Pasombu hamu ma nasida! Angka partogi na mapitung do nasida manogu na mapitung; alai molo na lonap manogu na mapitung, targodung do nasida duansa. 15:15 Dung i ninna si Petrus ma mandok Ibana: Patorang ma tu hami umpama ondeng! 15:16 Jadi didok Jesus ma: Tong dope so marroha nang hamu? 15:17 Ndang diantusi hamu: Na laho tu butuha do na bongot sian pamangan, dung i bolong tu hundulan na soding? 15:18 Alai angka na ruar sian pamangan, sian roha do i hehe, laos i do mangaramuni jolma i. 15:19 Ai sian roha do hehe angka pingkiran na jahat, pamunuon, pangalangkupon, harorangon, panangkoon, hata gapgap dohot panginsahion. 15:20 Angka i do na mangaramuni jolma; alai ndada ramun jolma, anggo mangan so marburi. 15:21 Dung i sumurut ma Jesus sian i tu luat Tirus dohot Sidon. 15:22 Jadi ro ma sada boru Kanaan sian luat i manjoujou: Asi ma roham mida ahu, Tuhan, Anak ni si Daud! Posi do diae borungku dipaporsukporsuk sibolis! 15:23 Alai ndang dialusi Jesus nasida. Jadi ro ma angka siseanna mangelehelek Ibana, ninna ma: Pamuli ma nasida, ai sai diihuthon do hita manjoujou. 15:24 Alai ninna Jesus ma mangalusi: Holan tu angka birubiru na mago na sian pinompar ni halak Israel do Ahu disuru. 15:25 Alai ro ma boruboru i, disomba ma Ibana huhut ma didok: Tuhan, tolong ahu! 15:26 Alai ninna ma mangalusi: Ndang tama buaton sipanganon ni angka dakdanak laho mandabuhon tu angka biang. 15:27 Alai didok boruboru i ma: I do nian, Tuhan; alai diallang biang i do angka na pisik na mardekdehan sian panganan ni ompuna. 15:28 Dung i ninna Jesus ma mangalusi nasida: Balga do haporseaonmi, inang! Saut ma na pinangidomi! Jadi hisar ma boruna i olat ni na sangombas i. 15:29 Dung i borhat ma Jesus sian i, jadi sahat ma tu tao Galilea. Jala nangkok ma Ibana tu dolok, laos hundul disi. 15:30 Dung i ro ma mansai torop halak, dipamboan do angka na sarion, na mapitung, na ngungu, na gurdung dohot lan dope na asing; dipampeakkon do angka i tu jolona, gabe saut ma nasida dipamalum. 15:31 Pola longang do natorop i, ala diida mangkuling na ngungu, malum na gurdung, mardalan na sarion jala marnida na mapitung; laos dipuji nasida ma Debata ni halak Israel. 15:32 Alai dijou Jesus ma angka siseanna tu jolona, didok ma: Malengleng ateatengku mida natorop on, ai nunga pola tolu ari diingani Ahu jala ndang adong balanjonasida. Ndang hum rohangku pamulihon nasida, so jolo nilehon mangan, so tung handorusan nasida maon di dalan i. 15:33 Dung i ninna angka siseanna i ma mandok Ibana: Sian dia ma dapot hita di halongonan roti na tuk pabosur halak na sai torop on? 15:34 Dung i didok Jesus ma tu nasida: Piga do roti dipeop hamu? Jadi didok nasida ma: Pitu do, angkup ni dengke otik. 15:35 Dung i didokkon ma natorop i hundul di tano i. 15:36 Jadi ditiop ma roti na pitu i nang angka dengke i, didok ma mauliate, diponggoli ma, diparlehon ma tu angka siseanna, jala siseanna ma mangalehon tu natorop. 15:37 Dung i mangan ma nasida saluhutna, pola bosur be; laos dipapungu nasida ma angka ponggolponggol na lobi i, gok pitu singkop. 15:38 Anggo torop ni na mangan i, opatribu baoa do, so padohot angka parompuan nang dakdanak. 15:39 Jadi dipamuli Jesus ma natorop i, dung i marparau ma Ibana sahat tu luat Magadan.
16:1 Dung i ro ma angka Parise dohot Saduse mangunjuni Ibana, mangido tanda sian banua ginjang sipatuduhononna tu nasida. 16:2 Alai ninna ma mangalusi nasida: Jumpa botari somal didok hamu: Logo ma ari, ai manariur do langit. 16:3 Ia manogotnogot: Na ro ma ari sadari on, ai habut do langit jala halindo. Malo do hamu nian manjujur rupa ni langit; ia manjujur na tinudu ni na masa nuaeng, ndang diboto hamu? 16:4 Bangso parjahat jala pangalangkup mangido tanda; alai holan tanda ni si Jonas do sipamasaon tu nasida. Dung i laho ma Ibana, ditadingkon ma nasida. 16:5 Jadi dung sahat siseanna tu bariba, lupa do nasida hape mamboan roti. 16:6 Gabe didok Jesus ma tu nasida: Manat jala jaga ma hamu pasiding na niasoman na di angka Parise dohot Saduse! 16:7 Dung i masipandohan ma nasida: Dibahen na so mamboan roti do hita hape! 16:8 Jadi dung diboto Jesus i, didok ma: Boasa dipanghatahatahon hamu, na so mamboan roti hamu? Oe parhaporseaon na otik! 16:9 Ndang dope mangantusi rohamuna? Ndang diingot hamu na lima roti i, uju di na limaribu i, dohot godang ni ebaeba pinapungumuna i? 16:10 Manang na pitu roti i di na opatribu i ro di ebaeba pinapungumuna disi? 16:11 Beha, ndang diantusi hamu, na so taringot tu roti hatangki: Jaga ma hamu pasiding na niasoman na di angka Parise dohot Saduse? 16:12 Disi pe asa dapot rohanasida: Ndada na niudi na niasoman ni halak Parise dohot Saduse hape na nidokna i sijagaon, tung podanasida do. 16:13 Jadi sahat ma Jesus tu luat Kaesarea Pilippi, gabe disungkun ma angka siseanna: Ise do Anak ni jolma i, didok halak? 16:14 Jadi didok nasida ma: Na deba mandok: Si Johannes pandidi, anggo na deba: Si Elia, na asing muse: Si Jeremia manang sahalak sian angka panurirang i. 16:15 Dung i didok ma tu nasida: Ia hamu, ise do Ahu, didok hamu? 16:16 Jadi ninna si Simon Petrus ma: Kristus (Messias), Raja na pinarbagabaga i do Ho, Anak ni Debata na mangolu! 16:17 Dung i ninna Jesus ma mangalusi ibana: Martua do ho, Simon, anak ni si Jona, ai ndada daging dohot mudar papatarhon i tu ho, Damang na di banua ginjang i do. 16:18 Ahu pe, hudok ma tu ho: Si Petrus (Batu mamak) do ho, jala di atas batu mamak ondeng do paojahonku huriangku, jala na so tupa talu i bahenon ni angka harbangan ni banua toru. 16:19 Hulehon pe tu ho anak hinsu ni harajaon banua ginjang i: Nasa na niihotanmi di tano on, na tarihot ma i nang di banua ginjang; jala nasa na pinaluam i di tano on, malua ma i nang di banua ginjang. 16:20 Dung i diorai ma angka siseanna, unang dipaboa nasida tu halak, Ibana do Kristus i. 16:21 Olat ni i ma dipatorang Jesus tu angka siseanna, na ingkon laho do Ibana tu Jerusalem manaon na porsuk sian angka sintua ni natorop, sian sintua ni malim nang sian sibotosurat pe, pola ingkon mate Ibana bunuon, jala pangoluon di ari patoluhon. 16:22 Dung i diarahon si Petrus ma Ibana, disaritai ma, ninna do: Asi ma roha ni Debata di Ho, Tuhan! Unang ma songgop i tu Ho! 16:23 Alai humusor ma anggo Ibana mandok tu si Petrus: Laho ma ne ho, bolis! Gasip do ho di Ahu, ai ndang diparrohahon ho angka na di Debata, angka na di jolma do. 16:24 Dung i didok Jesus ma tu angka siseanna: Nasa na giot mangihuthon Ahu, disoadahon ma dirina, diporsan ma silang na tu ibana; diihuthon ma Ahu! 16:25 Ai na naeng paluahon hosana, mangagohonsa do; alai na agoan hosa ala ni Ahu, i do na jumpangan. 16:26 Ai aha ma antong gunana di jolma, nang liat portibi on diomo, anggo mago do tondina? Aha ma tarlehon jolma bahen tobus ni tondina? 16:27 Ai na ro ma sogot Anak ni jolma i di bagasan hasangapon ni Amana rap dohot angka surusuruanna; dung i balosonna ma tu ganup, hombar tu na niulana. 16:28 Na tutu do na hudok on tu hamu: Ndang na mangae hamatean anggo deba sian angka na jongjong dison, so jolo diida ro Anak ni jolma i di bagasan harajaonna.
17:1 Dung i salpu onom ari, diarahon Jesus ma si Petrus, si Jakobus dohot anggina si Johannes, ditogihon ma nasida tu sada dolok na timbo, tu na suhi. 17:2 Dung i muba ma rupana diida nasida, gabe marsinondang ma bohina songon mata ni ari i, mamontar ma ulosna songon na tiur. 17:3 Jadi tarida ma di nasida si Musa dohot si Elia, na mangkatai dohot Ibana. 17:4 Jadi dipanghulingi si Petrus ma Jesus: Tuhan, sonangna i dison! Molo na une di roham, hupauli ma dison tolu inganan, sada di Ho, sada di si Musa, sada di si Elia. 17:5 Mandok i dope ibana, ro ma sada ombun na tiur mangalinggomi nasida jadi mangkuling ma soara sian bagasan ombun i: On do Anak haholonganku, lomo do rohangku mida Ibana; tangihon hamu ma Ibana! 17:6 Umbege i angka sisean i, manungkap ma nasida jala mabiar situtu. 17:7 Gabe didapothon Jesus ma nasida laos dijamai, huhut ma didok: Hehe ma hamu; unang ma mabiar! 17:8 Alai laho manaili tu ginjang, sasada Jesus nama dapot matanasida disi. 17:9 Jadi laho tuat sian dolok i, dipatihi Jesus ma nasida, na so jadi paboaon tu manang ise pe na niidanasida, saleleng so hehe dope Anak ni jolma i sian na mate. 17:10 Dung i disungkun angka siseanna ma Ibana: Beha do pandok ni angka sibotosurat: Ingkon jumolo ro si Elia? 17:11 Gabe dialusi Jesus ma nasida: Ro ma tutu si Elia pajongjongkon saluhutna. 17:12 Alai hudok ma tu hamu: Nunga sahat ro si Elia, alai ndang ditanda nasida ibana; roharohanasida do dibahen tu ibana. Laos songon i ma mangae Anak ni jolma i bahenonnasida. 17:13 Dung pe i asa diboto siseanna i, si Johannes pandidi na nidokna i disi. 17:14 Dung sahat nasida tu natorop i, ro ma sada halak sumomba Ibana huhut mandok: 17:15 Tuhan, sai asi ma roham di anakki; na solpoton do ibana, mansai bernit diae; jotjot ibana somsam tu api, jotjot tu aek. 17:16 Huboan do ibana nian tu angka siseanmi alai ndang tarpamalum nasida ibana. 17:17 Dung i ninna Jesus ma mangalusi: E bangso na so porsea jala na sumalin on! Sadia leleng on angkupanku hamu? Sadia leleng nari anjuonku hamu? Boan hamu ma ibana tuson! 17:18 Dung i disonggahi Jesus ma ibana, gabe ruar ma sibolis i sian ibana, jadi hisar ma dakdanak i olat ni na sangombas i. 17:19 Dung i pulik ma ditopot angka sisean i Jesus mandok: Boasa so tarpabali hami ibana? 17:20 Jadi didok Jesus ma tu nasida: Ala ni otik ni haporseaonmuna do! Ai situtu do na hudok on tu hamu: Nanggo na sabatu ni sabi haporseaonmuna, dohononmuna ma tu dolok on: Munsat ma ho sian on tusan!, saut do i munsat; gabe ndang adong na so tarpatupa hamu. 17:21 Alai anggo na samansam on, ndang olo bali, ia so marhite sian tangiang dohot parpuasaon. 17:22 Alai di na pungu i nasida di Galilea, didok Jesus ma tu nasida: Sipasahaton ma Anak ni jolma i tu tangan ni halak. 17:23 Pola do mate Ibana bunuonna, dung i pangoluon do Ibana di ari patoluhon. Jadi bobonosan situtu ma rohanasida. 17:24 Jadi dung sahat nasida tu huta Kapernaum, ro ma angka sijalo guguan tu si Petrus mandok: Beha, ndang digarar Gurumuna guguan i? 17:25 Digarar do, ninna. Jadi laho bongot tu jabu, manjoloani ma Jesus mandok: Beha di roham, Simon, sian ise do dijalo angka raja di tano on guguan manang beo? Sian anakna manang sian na leban? 17:26 Jadi didok si Petrus ma tu Ibana: Sian na leban i do! Gabe ninna Jesus ma: Antong, lias do ia angka anak! 17:27 Alai asa unang targasip nasida tabahen, laho ma ho tu tao, dabu ma hail i, dung i sintak ma dengke na parjolo manoro, bungka holaholana, jadi jumpang ho ma disi sada rupia; i ma buat, lehon ma i tu nasida bahen guguanta i.
18:1 Uju i didapothon angka sisean i ma Jesus mandok: Ise ulaning na umbalga di harajaon banua ginjang? 18:2 Jadi dijou Jesus ma sada dakdanak, dipajongjong ma i tu tongatonganasida, dung i ninna ma: 18:3 Situtu do na hudok on tu hamu: Molo so mulak rohamu, gabe songon dakdanak, tung na so bongot hamu tu harajaon banua ginjang i. 18:4 Asa na paoru dirina songon dakdanak on, i do na umbalga di harajaon banua ginjang i. 18:5 Jala na manjangkon dakdanak na songon on marhitehite Goarhu, Ahu do na jinangkonna disi. 18:6 Alai na manggasipi sada sian na metmet on, angka na porsea di Ahu, dengganan ma ginantungkon losung batu tu rungkungna, laho mangalonongkon ibana tu laut na umbagas i. 18:7 Oe, jea ni portibi on, nialap ni gasip! Ndang tarbahen so ro nian gasip; alai marjea ma jolma na parohonsa! 18:8 Alai molo tung digasipi tanganmu manang patmu ho, gotap jala bolongkon, ai dumenggan mate bariba manang lumpuon ho bongot tu hangoluan, sian na mardua tangan dohot mardua pat, bolong tu api sisalelenglelengna. 18:9 Molo tung digasipi matami ho, pulsikkon jala bolongkon, ai dumenggan marmata sada ho, bongot tu hangoluan, sian na marmata dua, bolong tu api na roko. 18:10 Jaga ma hamu, so tung marhu ni roha hamu mida sada sian na metmet on, ai hudok ma tu hamu: Diida angka surusuruannasida na di banua ginjang i do tongtong bohi ni Damang na di banua ginjang i. 18:11 (Ai naung ro do Anak ni jolma i, paluahon na mago.) 18:12 Beha do rohamuna: Adong ma di sahalak saratus birubiru, gabe mago sada sian i; nda tadingkononna ma na siapulu sia i di tor, laho mangalului na mago i? 18:13 Na sintong ma na hudok tu hamu: Anggo dung jumpangsa, lasan ma rohana mida i, asa mida na siapulu sia na so mago i. 18:14 Suang songon i do roha ni Amamuna na di banua ginjang i, ai dipangido do, naeng unang mago agia sada sian na metmet on. 18:15 Alai molo mardosa donganmi, topot jala ajari ibana, holan hamu padua. Molo ditangihon ho, dapot ho do ibana gabe donganmu muse. 18:16 Alai anggo so ditangihon ho, arahon ma donganmu sada manang dua, asa hinatindangkon ni dua manang tolu halak nasa hata. 18:17 Alai molo so ditangihon nang nasida, paboa ma tu na sahuria i. Molo so ditangihon nang huria i, etong ma ibana songon parbegu jala sijalobeo. 18:18 Situtu do na hudok on tu hamu: Nasa na niihotanmuna di tano on, hot ma i tarihot nang di banua ginjang, jala nasa na pinaluanmuna di tano on, saut ma i malua nang di banua ginjang. 18:19 Angkup ni i hudok ma di hamu: Molo mardos ni roha manang dua sian hamu di tano on tumangiangkon manang hata dia pe, jaloonmuna do i sian Damang na di banua ginjang i. 18:20 Ai anggo pungu dua manang tolu pe marhitehite Goarhu, sai dongananku do nasida. 18:21 Dung i didok si Petrus ma mandok Ibana: Tuhan, sintap piga hali do sesaonku sala ni donganku na dompak ahu? Pola do pitu hali? 18:22 Gabe didok Jesus ma tu ibana: Ndada pitu hali dohononku tu ho, tung sintap pitupulu hali pitu do! 18:23 Onpe, tudos ma harajaon banua ginjang i tu sada raja, na laho mardabudabu dohot angka naposona. 18:24 Jadi di na manungka mangetong ibana, tarboan ma tu jolona sada halak, na marutang tu ibana saloksa talenta. 18:25 Jadi dibahen na so adong gararna, didokkon raja i ma gadison ibana dohot jolmana ro di anakkonna ro di saluhut na di ibana, asa adong gararna. 18:26 Jadi marsomba ujung ma naposo i tu adopanna, ninna ma: Palambas ma roham, hugarar pe tu ho saluhutna i! 18:27 Jadi asi do roha ni raja i di naposona, dipalua ma ibana, ba disesa ma utangna i. 18:28 Alai laho tu balian naposo ondeng, tongon ma dapotsa donganna naposo sahalak, na marutang tu ibana saratus hupang, gabe ditangkup ma i jala dipongkihi, ninna ma: Garar ma utangmi! 18:29 Dung i marsomba ujung ma i, sumomba donganna naposo mandok: Palambas ma roham mida ahu, hugarar pe tu ho saluhutna i! 18:30 Alai ndang olo, laho do ibana mangkurungkon donganna, paima digarar utangna i. 18:31 Jadi dung diida angka donganna naposo na masa i, marsak situtu ma rohanasida, jadi laho ma nasida tu raja i paboahon sude na masa i. 18:32 Gabe dijou raja i ma ibana, didok ma: Ho naposo na jahat, sude utangmi husalesehon, ala dielehelek ho ahu. 18:33 Nda ingkon songon i ma ho nian marasi ni roha di donganmu naposo, songon ahu na marasi ni roha di ho! 18:34 Jadi tarrimas ma raja i, dipasahat ma ibana tu pamongkihi, paima digarar sude utangna i. 18:35 Songon i do bahenon ni Damang na di banua ginjang i tu hamu, anggo so disesa hamu be sian rohamuna sala ni donganmuna!
19:1 Asa dung dipaujung Jesus pamodaionna ondeng, borhat ma Ibana sian Galilea, gabe sahat ma tu luat Judea na di ipar ni aek Jordan. 19:2 Jadi mansai torop halak mangihuthon Ibana, laos dipamalum ma nasida disi. 19:3 Dung i ro ma angka Parise mangunjuni Ibana, ninna do: Beha, na jadi do sirangkonon ni baoa jolmana, asal adong alana? 19:4 Alai ninna ma mangalusi nasida: Ndang dung dijaha hamu huroha: Sian mulana i do ditompa Panompa i nasida baoa dohot boruboru? 19:5 Ai didok do: "Dibahen i tadingkonon ni baoa do amana dohot inana, laho patophon dirina tu dongan saripena, gabe sada daging do nasida na dua i." 19:6 Asa ndada dua be nasida, tung sada daging do. Onpe, naung pinadomu ni Debata, ndang jadi sirangon ni jolma. 19:7 Dung i didok nasida ma tu Ibana: Molo boti, boasa patikkonon ni si Musa, lehonon surat sirang laho paulakkon? 19:8 Gabe didok ma tu nasida: Ala ni tangkang ni rohamuna do, umbahen na diloas si Musa hamu paulakkon jolmamuna; alai nda tung i songon i sian mulana. 19:9 Alai hudok ma tu hamu: Pangalangkup do nasa na paulakkon jolmana, dung i dioli na asing, anggo so ala hata parmainanon. 19:10 Dung i ninna angka sisean i ma mandok Ibana: Molo songon i do hape ruhut pardongansaripeon, tagonan unang marnioli. 19:11 Alai didok ma tu nasida: Nda tung saluhut halak tarbahen manjalo hata on, holan angka hasahatanna hian do! 19:12 Ai adong do jolma na ias: Na deba na songon i hian sian hatutubuna; na deba nari na pinaias ni jolma; jala na deba muse na paias dirina ala ni harajaon banua ginjang i. Manang ise na tarbahen manjalo hata i, dijalo ma! 19:13 Dung i diboan na mamboan ma angka dakdanak tu Ibana, asa diampehon tanganna tu nasida laho tumangiangkonsa. Alai dirimasi angka sisean i ma nasida. 19:14 Alai ninna Jesus ma: Loas hamu ma ro angka dakdanak i, unang ambat hamu nasida ro tu Ahu; ai di angka sisongon i do harajaon banua ginjang i! 19:15 Jadi diampehon ma tanganna tu nasida, laos laho ma sian i. 19:16 Dung i didapothon sada halak ma ibana, didok ma: Gurunami, na denggan dia do patupaonku, asa dapot ahu hangoluan saleleng ni lelengna? 19:17 Alai didok ma tu ibana: Boasa Ahu sungkunonmu taringot tu na denggan? Holan Sada do parroha na denggan! Alai molo naeng ho bongot tu hangoluan, angka patik i ma radoti! 19:18 Jadi didok ma: Angka dia? Gabe didok Jesus ma: On do: "Unang ho mambunu! Unang ho mangalangkup! Unang ho manangko! Unang ho mangkatindangkon gapgap!" 19:19 "Pasangap amangmu dohot inangmu! Jala: Haholongi ma donganmu songon dirim!" 19:20 Dung i ninna dolidoli i ma mandok Ibana: Nunga huradoti sasudena i sian sietehetehonki. Aha dope hahuranganku? 19:21 Jadi ninna Jesus ma mandok ibana: Molo naeng sun denggan ho, laho ma ho manggadis artami, parlehon tu angka na pogos, asa mararta ho di banua ginjang; dung i ro ma ho mangihuthon Ahu! 19:22 Umbege i, mulak ma dolidoli i saor habot ni rohana, ai paradongan situtu do ibana. 19:23 Alai didok Jesus ma tu angka siseanna: Situtu do na hudok on tu hamu: Tung maol do habongotan halak na mora harajaon banua ginjang i. 19:24 Lam dohononku do tu hamuna: Gumabur do bongotan ni gaja pinggol ni jarum, unang halak na mora masuk tu harajaon banua ginjang i. 19:25 Umbege i angka sisean i, tarsonggot situtu ma nasida, angka ninna ma: Ise nama malua, molo boti? 19:26 Alai diberengi Jesus ma nasida, huhut ma didok: Sandok ndang tarpatupa jolma i, alai anggo Debata, saluhut do tarpatupasa. 19:27 Dung i ninna si Petrus ma mangalusi Ibana: Ia hami, saluhut do hutadingkon hami mangihuthon Ho. Aha ma balos ni i tu hami? 19:28 Jadi didok Jesus ma tu nasida: Na tutu do na hudok on tu hamuna: Di ari sogot, di haimbaruon i, di na hundul Anak ni jolma i di habangsa hasangaponna i, dohot ma hamu juguk disi di sampuludua habangsa, manguhumi halak Israel na sampuludua marga i. 19:29 Jala ganup na manadingkon hahaanggina, ibotona, amana, inana, anakkonna, haumana manang jabuna pe ala ni Goarhu, manjalo ma i marlompitlompit, angkup ni i teanonna hangoluan na saleleng ni lelengna i. 19:30 Alai lan do angka naung parjolo hian gabe parpudi, jala parpudi hian gabe parjolo.
20:1 Ai tudos do harajaon banua ginjang i tu sada na mora, na laho sogot di torang ni ari mangarahon pangula tu porlak anggurna. 20:2 Jadi dung mardos ni roha ibana dohot angka pangulana taringot tu upanasida, i ma sahupang sadari, disuru ma nasida tu porlakna. 20:3 Dung i, laho tu balian di pungkul sia, diida ma halak na asing na ngongong di onan i. 20:4 Gabe didok ma tu nasida: Ua, dohot ma hamu tu porlakki! Hulehon pe tu hamu na tama. Jadi laho ma nasida. 20:5 Dung i laho muse ma ibana di pungkul sampuludua dohot di pungkul tolu, laos songon i do dibahen. 20:6 Dung i laho muse ma ibana di pungkul lima, jadi jumpangsa ma halak na asing jongjong boti disi, jadi didok ma tu nasida: Boasa ngongong sambing hamu manipat sadari on? 20:7 Jadi didok nasida ma tu ibana: Ndang adong na mangarahon hami. Dung i didok ma tu nasida: Dohot ma hamu laho tu porlakki! 20:8 Asa dung bot ari, didok parporlak anggur i ma mandok juaratulisna: Jou ma angka pangula i, parlehon ma upanasida, jojor sian na parpudi sahat ro di na parjolo i! 20:9 Jadi ro ma angka na masuk di pungkul lima, dijalo be ma sahupang. 20:10 Alai di na ro angka na parjolo i, hirim ma rohanasida, gumodang jaloonna; hape nang nasida, sahupang be do dijalo. 20:11 Alai manjalo i, marmungutmungut ma nasida dompak na mora i, 20:12 ninna ma: Ia halak an na parpudi masuk, holan sajom do i mulaulaon, gabe dos do dibahen ho nasida tu hami, angka na tumaon renge ni ulaon ro di mohop ni ari! 20:13 Dung i ninna ma mangalusi sada sian nasida: Ndang adong hubahen tu ho na so tigor, amang! Nda mardos ni roha hita di na sahupang i? 20:14 Jalo ma na tu ho i; dung i laho ma! Alai naeng do ahu mangalehon tu na parpudi on songon na tu ho. 20:15 Ai nda tama guru di ahu ugasanki? Somor do matam, ala basa ahu? 20:16 Songon i ma gabe parjolo angka na parpudi hian, jala angka na parjolo hian gabe parpudi. (Ai lan do na jinou; alai otik do na tarpillit.) 20:17 Dung i laho nangkok tu huta Jerusalem, pulik ma diarahon Jesus na sampuludua i, dipanghulingi ma nasida di tongandalan i: 20:18 Na nangkok ma hita tu Jerusalem, pasahatonna ma disi Anak ni jolma i tu angka sintua ni malim dohot tu sibotosurat, gabe uhumonnasida ma Ibana, ingkon marutang hosa. 20:19 Dung i pasahatonnasida ma Ibana tu parbegu, asa diinsahi, dilinsingi jala diparsilangkon. Dung i mulak mangolu ma Ibana di ari patoluhon. 20:20 Dung i didapothon ina ni anak ni si Sebedeus rap dohot angka anakna i ma Ibana, disomba ma, laho pasahathon pangidoanna. 20:21 Jadi ninna Jesus ma mandok ibana: Aha dipangido rohamu? Dung i didok ma tu Ibana: Loas ma hundul sogot anakku na dua on, na sada di siamunmu, na sada nari di hambirangmu, di harajaonmi! 20:22 Alai ninna Jesus ma mangalusi: Ndang diboto hamu na pinangidomuna. Tung tarinum hamu ma siinumon na naeng inumonku (jala tarparidi hamu ma paridion siparidionku)? Jadi didok nasida ma: Tarbahen hami do! 20:23 Dung i didok ma tu nasida: Tutu nian, inumonmuna do siinumonki; jala paridihononmuna do pandidion siparidihononki; alai ndang guru di Ahu na mambahen hundul di siamunhu dohot di hambirangku. Damang i do padirihon i tu angka panahatanna i. 20:24 Umbege i na sampulu i, sogo ma rohanasida mida donganna na dua i. 20:25 Alai dipapungu Jesus ma nasida, ninna ma: Dirajai angka sigomgomi bangso do anak buana, jala dipatunduk angka na sangapna do nasida; diboto hamu do i. 20:26 Unang ma songon i anggo di hamu! Manang ise hamu na naeng sangap, i ma gabe pangoloi di donganna. 20:27 Jadi manang ise hamu, na naeng parjolo, i ma gabe naposo ni donganna. 20:28 Songon Anak ni jolma i pe, ndada asa dioloi halak Ibana, umbahen na ro; Ibana balik pangoloi jala mangalehon hosana bahen tobus ni torop jolma. 20:29 Jadi laho ruar sian Jeriko, torop ma halak mangihuthon Ibana. 20:30 Jala hundulhundul ma dua halak na mapitung di pinggol ni dalan i; jadi dung dibege mamolus Jesus, joujou ma nasida, ninna ma: Asi ma roham di hami, Anak ni si Daud! 20:31 Alai dipinsang angka natorop i ma nasida, asa sip nian: Alai lam gogo ma nasida manjoujou: Asi ma roham di hami, Tuhan, Anak ni si Daud! 20:32 Jadi mangulon ma Jesus, dipanghulingi ma nasida: Aha dipangido rohamuna sibahenonku tu hamu? 20:33 Dung i didok nasida ma: Naeng ma mungkap matanami, Tuhan! 20:34 Gabe asi ma roha ni Jesus, dijama ma matanasida jadi pintor marnida ma. Jadi diihuthon nasida ma Ibana.
21:1 Dung i laho mandapothon huta Jerusalem, sahat ma nasida tu sosor Betpage, mardonokkon dolok Jetun. Sian i ma disuru Jesus siseanna dua halak. 21:2 Ninna ma: Laho ma hamu tu sosor na di jolomuna an, mamintor jumpang hamu ma disi tambat halode sada rap dohot anakna; harhari jala togu hamu ma i tu Ahu! 21:3 Jadi molo tung adong na mandok hatana tu hamu, alusi hamu ma: Na ringkot do i di Tuhan i! Dung i pintor loasonna ma. 21:4 Alai masa pe sisongon i, asa jumpang na hinatahon ni panurirang i: 21:5 "Paboa hamu ma tu boru Sion: Ida ma, na ro ma Rajami manopot ho, na lambok do rohana; halode do hundulanna dohot anak ni halode boban." 21:6 Dung i laho ma angka sisean i patupahon na nidokkon ni Jesus tu nasida. 21:7 Diboan nasida ma halode i dohot anakna, diampehon ma ulosnasida tu ginjangna, laos dipahundul ma Jesus tu atasna i. 21:8 Deba sian natorop i pahembangkon ulosnasida tu dalan i, na deba nari manalliki angka ranting ni hau jadi dipanserakkon tusi. 21:9 Alai sude natorop i, angka na di jolona nang na mangihut sian pudi pe, mangolopolophon: Hosianna di Anak ni raja Daud! Pinasupasu ma na ro marhitehite Goar ni Tuhan i! Hosianna ma di ginjang! 21:10 Jadi di na bongot i Ibana tu huta Jerusalem, gaor ma na sahuta i, angka ninna ma: Ise do halak i? 21:11 Jadi dipandok natorop i ma: Jesus, Panurirang i do i, na sian huta Nasaret, na di luat Galilea! 21:12 Dung i dibongoti Jesus ma bagas joro ni Debata, dipabali ma sian i saluhut angka na manggadisi dohot na manuhori disi, ditunggalingkon do meja ni angka situngkari hepeng ro di bangku ni angka sigadis darapati. 21:13 Laos didok ma tu nasida: "Bagas partangiangan do goar ni bagashu" ninna Surat i; alai gabe liang ni pandobo do i dibahen hamu! 21:14 Dung i didapothon angka na mapitung dohot na lumpuon ma Ibana tu bagas joro i, jadi dipamalum ma nasida. 21:15 Alai sogo situtu ma angka sintua ni malim dohot sibotosurat marnida halongangan na pinambahenna i, nang umbege dakdanak angka na manjoujou di bagas joro: Hosianna di Anak ni raja Daud! 21:16 Laos didok ma tu Ibana: Dibege Ho do hatanasida on? Jadi didok Jesus ma tu nasida: Hubege do! Ndang dung dijaha hamu huroha: "Soara ni angka dakdanak dohot posoposo dipature Ho gabe pujipujian"? 21:17 Dung i ditadingkon ma nasida, ruar ma Ibana sian huta i dompak Betania, laos disi ma marborngin. 21:18 Alai torang ni arina i, laho mulak tu huta i, male ma dihilala. 21:19 Dung i diida ma di dalan i hau ara sangkambona jadi didapothon ma, hape holan bulung sambing do jumpangsa disi, gabe didok ma tu hau i: Na so jadi be ho marparbue olat ni on! Jadi pintor rahar ma hau ara i. 21:20 Marnida i angka sisean i, tarhalomong ma rohanasida, angka ninna ma: Ndi, tompuna i rahar hau ara i! 21:21 Jadi dialusi Jesus ma nasida: Na tutu do na hudok on tu hamu: Aut na porsea hamu, so ganggu rohamu, ndada holan songon na tu hau ara ondeng patupaonmuna. Sandok gari tu dolok an dohononmuna: Munsat ma ho jala madabu tu laut, gari saut do! 21:22 Ai jaloonmuna do saluhut nasa na pinangidomuna di tangiangmuna, anggo na porsea hamu! 21:23 Jadi dung bongot Ibana tu bagas joro i, laho mangajari disi, didapothon angka sintua ni malim dohot sintua ni bangso i ma Ibana, angka ninna ma: Huaso dia dipangasahon Ho? 21:24 Dung i ninna Jesus ma mangalusi nasida: Ahu ma jolo manungkun hamu; dung pe dialusi hamu Ahu, asa paboaonku tu hamu, manang huaso dia hupangasahon di pambahenanki: 21:25 Ia pandidion ni si Johannes, sian dia do i? Sian banua ginjang do manang sian jolma manisia? Dung i marpingkir ma nasida sama nasida, songon on: 21:26 Ia ninta: Sian banua ginjang, dohononna ma: Boasa so dihaporseai hamu ibana? Anggo tadok annon: Sian jolma, sihabiaranta ma natorop i, ai panurirang do si Johannes di roha ni jolma saluhutna. 21:27 Gabe ninna nasida ma mangalusi Jesus: Ndang huboto hami i. Laos ro ma hatana tu nasida: Antong, Ahu pe, ndang paboaonku tu hamu, manang huaso dia hupangasahon patupahon ulaonki. 21:28 Alai beha do di rohamuna? Adong ma dua anak di na sahalak; jadi ditopot ma sihahaan, didok ma tu ibana: Laho ma ho, anaha, sadari on mangula tu porlakta! 21:29 Alai ro ma alusna: Ndang olo ahu! Hape disolsoli do rohana muse, gabe saut ma ibana laho. 21:30 Ia amaama i ditopot ma sianggian i, laos songon i do hatana, gabe didok i ma mangalusi: Olo, tuan! Hape, ndang saut laho. 21:31 Ise sian nasida na dua i mangulahon pinangido ni amanasida? Jadi didok nasida ma tu Ibana: Sihahaan i do! Dung i didok Jesus ma tu nasida: Situtu do na hudok on tu hamu: Tagonan do halak sijalobeo dohot boru na jahat bongot tu harajaon ni Debata, unang hamu! 21:32 Ai na ro do si Johannes tu hamu di dalan hatigoran, ndang dihaporseai hamu ibana; alai anggo angka sijalobeo dohot angka boru na jahat porsea do. Diida hamu do i nian; laos tong so disolsoli hamu rohamuna, laho mangkaporseai ibana. 21:33 Bege hamu ma sada umpana na asing: Adong ma sahalak na mora, na mamungka porlak anggurna, dihandangi, dihali ma pangilangan di bagasan, dipauli ma gudangna, dipasahat ma tu angka pangula, dung i marhutasada ma ibana. 21:34 Dung jumpang tingkina mambuat parbuena, disuru ma angka naposona manopot pangula i manjalo parbuena. 21:35 Jadi ditangkup angka pangula i ma naposona, na sada dilombuti, na sada dibunu, na sada didangguri dohot batu. 21:36 Dung i diulahi na mora i ma marsuru naposona angka na asing, tumorop sian na parjolo i; laos songon i do dipambahen pangula i tu nasida. 21:37 Parpudi ma disuru tu nasida anakna, ai ninna rohana: Ra biar ma rohanasida mida anakki! 21:38 Alai marnida anak i, didok angka pangula i ma sama nasida: On do sitean porlak i! Beta ma, tapusa ibana, asa di hita siteanonna i! 21:39 Jadi ditangkup nasida ma ibana, dionjar ma sian porlak i, laos dipusa. 21:40 Molo ro sogot parporlak i, aha ma bahenonna tu angka pangula i? 21:41 Gabe ninna nasida ma mandok Ibana: Tung jorbut do pamununa di angka parjahat i, jadi pasahatonna ma porlak anggurna tu pangula na asing, angka na mangalehon parbuena di tingkina i. 21:42 Dung i didok Jesus ma tu nasida: Beha, ndang dung dijaha hamu di Surat i: "Ia batu na binolongkon ni angka pande bagas i, apala i do gabe batu parsuhisuhi (partunggul). Pinamasa ni Tuhan do i, jala halongangan do i diida matanta"? 21:43 Dibahen i ma umbahen na hudok tu hamu: Buaton do harajaon ni Debata sian hamu jala lehonon ma tu bangso na olo mamboan parbuena. 21:44 Marosak ma ganup na tinggang tu batu on, jala magopu ma ganup na tiningganganna. 21:45 Jadi dung dibege angka sintua ni malim dohot Parise umpamana i, dianto ma, nasida do hinatahonna disi. 21:46 Jadi dilului nasida ma dalan manangkup Ibana; alai mabiar do nasida mida natorop i, ai panurirang do Ibana di rohanasida.
22:1 Dung i diulahi Jesus ma marumpama tu nasida songon on: 22:2 Tarpatudos do harajaon banua ginjang i tu sada raja na mamestahon anakna na mangoli. 22:3 Jadi disuru ma angka naposona, manjou angka na ginokkonna hian tu pestana i, hape ndang olo nasida ro. 22:4 Dung i diulahi ma, disuru ma naposo na asing, ninna ma: Paboa hamu ma tu angka naung ginokkon: Nunga huparade panganon pesta i, nunga hupotong angka horbo dohot lombu; nunga rade saluhutna. Ipe, ro ma hamu tu pesta i! 22:5 Alai na laho be do nasida di tois ni rohanasida: Na sada tu haumana, na sada tu partigatigaonna. 22:6 Alai ditangkup na deba angka naposona, dipasipalsipal jala dipusa. 22:7 Jadi tarrimas ma raja i, disuru ma soldaduna mangalengsehon angka pamunu i jala manurbu hutanasida. 22:8 Dung i ninna ma mandok angka naposona: Nunga rade nian na hasea tu pesta i, alai ndang tau angka na pinio i. 22:9 Onpe, laho ma hamu tu angka dalan balobung, arahon hamu ma tu haroan on nasa na dapot hamu! 22:10 Jadi saut ma laho angka naposo i tu angka dalan, ditogihon ma saluhut na jumpang nasida, angka na jahat dohot na denggan, gabe gok tamue ma parpestaan i. 22:11 Alai laho bongot raja i mamereng angka tamuena, dapot matana ma disi sada halak na so marpangkean pesta. 22:12 Jadi didok ma tu ibana: Na beha do parmasukmu tuson, amang, ai ndang marpangkean pesta ho? Gabe mangkohom ma ibana. 22:13 Dung i didok raja i ma tu angka naposona: Tali hamu ma patna dohot tanganna, laos pabali hamu ma ibana tu na holom marimpotimpot; disi ma masa angguhangguk dohot na patungoripon. 22:14 Ai lan do na jinou; alai otik do na tarpillit. 22:15 Dung i laho ma angka Parise martuptup sama nasida, manang na beha bahenonnasida padapothon Ibana di hatana. 22:16 Jadi disuru nasida ma angka siseannasida rap dohot angka naposo ni si Herodes tu Ibana, angka ninna ma: Gurunami, huboto hami, na tigor Ho; ai sintongsintong dipodahon Ho dalan ni Debata jala ndang dihabiari Ho manang ise, ai so siida bohi ni jolma Ho! 22:17 Ipe, paboa ma tu hami: Beha didok roham: Na jadi do lehonon guguan (belasting) tu Kesar i, manang na so jadi tahe? 22:18 Alai diboto Jesus do jahat ni rohanasida, jadi didok ma: E hamu pangansi! Boasa unjunanmuna Ahu? 22:19 Patuduhon hamu ma hepeng guguan i tu Ahu! Gabe diboan nasida ma sada hupang tu Ibana. 22:20 Dung i didok Jesus ma tu nasida: Gombaran dohot surat ni ise do dison? 22:21 Jadi dialusi nasida ma: Gombaran ni Kesar i do. Jadi didok ma tu nasida: Antong, lehon hamu tu Kesar, na sian Kesar i; jala lehon hamu ma tu Debata, na sian Debata! 22:22 Gabe longang ma rohanasida umbegesa; laos laho ma nasida, ditadingkon ma Ibana. 22:23 Di na sadari i ro ma angka Saduse, na so marhatutuhon adong haheheon sian na mate, jadi disungkun nasida ma Ibana: 22:24 Gurunami, didok si Musa: Molo adong na mate, so martinading, pareahon ni anggina ma jolmana i, pajongjongkon pomparan di hahana. 22:25 Jadi adong ma di hami pitu halak na marhahamaranggi; mangoli ma sihahaan, dung i mate ma ibana so martinading, ditinggalhon ma jolmana i di tinodohonna. 22:26 Songon i do paidua dohot paitolu ro di paipitu. 22:27 Umpudi sian nasida sasudena i mate dohot boruboru i. 22:28 Antong di ari haheheon i, ise do sian nasida na pitu i nampuna parompuan i, ai sude do nasida marniolihonsa? 22:29 Alai ninna Jesus ma mangalusi nasida: Nalilu do hamu, siala ndang diboto hamu Surat i nang hagogoon ni Debata! 22:30 Ai anggo ruhut ni angka naung mulak mangolu: Ndang mangoli, ndang muli; songon surusuruan ni Debata do nasida di banua ginjang i. 22:31 Alai anggo taringot tu haheheon ni angka naung mate, ndang dung dijaha hamu ulaning na nidok ni Debata tu hamu di hatana on: 22:32 "Ahu do Debata ni si Abraham, Debata ni si Isak jala Debata ni si Jakkob!" Apala Debata ni angka na mate Ibana, Debata ni angka na mangolu do! 22:33 Jadi tarhalomong ma halak natorop i umbege pamodaionna i. 22:34 Alai marpungu ma angka Parise i, dung dibege, naung dipajut Jesus angka Saduse i. 22:35 Dung i diunjuni sahalak sibotopatik sian nasida ma Ibana, disungkun ma: 22:36 Gurunami, dia do patik raja sian angka patik i? 22:37 Jadi didok Jesus ma: Sihaholonganmu do Tuhan Debatam sian nasa ateatem, sian nasa hosam dohot sian nasa roham! 22:38 I do patik raja jala parjolo. 22:39 Alai dos do arga ni na paduahon on: Sihaholonganmu do donganmi doshon dirim! 22:40 Patik na dua on do mangkangkam nasa patik dohot hata ni panurirang. 22:41 Alai di na pungu i angka Parise, disungkun Jesus ma nasida, ninna ma: 22:42 Na beha do rohamu taringot tu Kristus i? Anak ni ise do Ibana? Jadi dialusi nasida ma Ibana: Anak ni si Daud do! 22:43 Alai didok ma tu nasida: Alai digoar si Daud do Ibana "Tuhan", diajari Tondi i, ai didok do: 22:44 "Ninna Tuhan i do mandok Tuhanku: Hundul ma Ho tu Siamunhon, paima hupeakhon angka musum bahen sidegedegean ni patmu!" 22:45 Antong, anggo digoar si Daud do Ibana "Tuhan", beha ma Ibana Anakna? 22:46 Jadi ndang adong manang ise na tarbahen mangalusi Ibana; jala olat ni na sadari i ndang adong na hum roha manungkun Ibana.
23:1 Dung i dipanghulingi Jesus ma halak natorop dohot angka siseanna, 23:2 ninna ma: Dihunduli angka sibotosurat dohot angka Parise do habangsa ni si Musa. 23:3 Onpe, ula jala radoti hamu ma sasude na pinodahonnasida tu hamu; alai unang ma tiru hamu ia pambahenannasida! Ai na ripe mamodai do nasida, so adong diulahon. 23:4 Boban angka na dokdok do dirahuti nasida jala diampehon tu abara ni jolma i, alai ndang olo nasida manjamasa, nanggo dohot sada jarijarina. 23:5 Nasa pambahenannasida, asa dipaberengbereng halak, umbahen na diula, ai dipabidang do tali partangiangannasida, laos dipaganjang do rambuna. 23:6 Sai hundulan na sumangap do ditodo, uju di parpestaan, songon i bangku jolojolo di angka parguruan. 23:7 Dipangido, naeng tabion nasida di onan jala naeng goaron ni jolma i nasida guru. 23:8 Alai anggo hamu, unang ma margoar guru, ai Sada do Gurumuna; saluhutna hamu marhahamaranggi. 23:9 Ndang jadi goaronmuna manang ise sian hamu "Ama" di tano on, ai Sada do Amamuna, i ma na di banua ginjang i! 23:10 Jala ndang jadi goaron hamu Partogi, ai Sada do Partogimuna, i ma Kristus i! 23:11 Alai na sumangap sian hamu, i ma gabe songon naposomuna! 23:12 Ai sipaoruon do ganup na patimbo dirina; alai sipatimboon do na paoru dirina. 23:13 Marjea ma hamu sibotosurat dohot Parise, hamu pangansi! Ai disordak hamu do harajaon banua ginjang i di jolo ni jolma i. Ndang masuk hamu; angka na giot bongot pe, ndang diloas hamu masuk. 23:14 Marjea ma hamu sibotosurat dohot Parise, hamu pangansi! Ai dipolgak hamu do jabu ni boruboru na mabalu jala tangiang na ganjang dibahen hamu mangkuphupisa. Uhum na lobi dokdok do jaloonmuna ala ni i. 23:15 Marjea ma hamu sibotosurat dohot Parise, hamu pangansi! Ai diliati hamu do laut dohot tano manaiti tu agamamuna nanggo sada halak. Jadi dung saut ibana masuk, gabe anak ni roko ibana dibahen hamu, silompit sian hamu! 23:16 Marjea ma hamu partogi na mapitung, angka na mandok: Na manolon tu bagas joro, ndang marguna; alai na manolon tu sere na di bagas joro, i do na marguna. 23:17 E hamu na oto jala na mapitung! Ai dia do na ummangat, sere i manang bagas joro i, na pabadiahon sere i? 23:18 Angkup ni i didok hamu: Na manolon tu langgatan, ndang marguna; alai na manolon tu pelean na di atas langgatan i, i do na marguna. 23:19 E hamu na mapitung! Ai dia do na ummangat, pelean i manang langgatan i, na pabadiahon pelean i? 23:20 Nda songon on: Na manolon tu langgatan i, manolon tusi do, padohot tu saluhut na diatasna. 23:21 Jala na manolon tu bagas joro, manolon tusi do, nang tu Ibana na manginganhonsa. 23:22 Na manolon tu banua ginjang, manolon tu habangsa ni Debata do, nang tu Ibana na mangkundulisa. 23:23 Marjea ma hamu sibotosurat dohot Parise, hamu pangansi! Ai diparsampulu hamu do angka suansuanan na metmet, alai tading do angka patik na ummaol dibahen hamu, songon hatigoran, parasinirohaon dohot haburjuon. Siulaon do na sada on, alai unang ma tading na sada an! 23:24 Hamu partogi na mapitung! Dipasisi hamu do rongit; alai ia gaja dibondut hamu do! 23:25 Marjea ma hamu sibotosurat dohot Parise, hamu pangansi! Ai dipaias hamu do panginuman dohot mangkuk sian duru, hape marisi pandoboon do dohot pargadombuson. 23:26 E ho, Parise na mapitung! Parbagasan ni panginuman i ma jolo paias, asa gabe ias nang duruna! 23:27 Marjea ma hamu sibotosurat dohot Parise, hamu pangansi! Ai suman do hamu tu tanoman na hinapur, angka na denggan berengon sian duru, hape marisi holiholi ni na mate do dohot nasa na rotak! 23:28 Tongon songon i hamu: Tigor hamu nian idaon ni halak sian duru, alai anggo di bagasan, gok pangansion do hamu dohot na so uhum. 23:29 Marjea ma hamu sibotosurat dohot Parise, hamu pangansi! Ai dipauli hamu do tanoman ni angka panurirang, jala dipalehet hamu tambak ni angka partigor. 23:30 Pola didok hamu: Aut hami uju di ngolu ni angka ompu, ndang tagamon dohot hami parsala di mudar ni angka panurirang i! 23:31 Asa dihatindangkon hamu do hape, anak ni sibunu panurirang i do hamu! 23:32 Onpe, haru gohi hamu ma suhatsuhat ni ompumuna! 23:33 Hamu angka ulok jala anak ni ulok dari, tung beha ma bahenonmuna maporus pasidingkon uhuman na roko? 23:34 Dibahen i, ida ma, Ahu marsuru tu hamu angka panurirang dohot parroha dohot sibotosurat: Bunuonmuna jala parsilangkononmuna ma deba sian nasida, na deba linsinganmuna do di parguruanmuna jala leleanmuna sian huta tu huta. 23:35 Asa mandatang tu hamu mudar ni saluhut angka partigor na so marpipot, na use di tano on olat ni mudar ni si Abel na tigor i ro di mudar ni si Sakarias, anak ni si Berekia, na pinusamuna di holangholang ni bagas joro dohot langgatan i. 23:36 Situtu do na hudok on tu hamu: Sasudena i mandatang sogot tu bangso on! 23:37 Jerusalem! Jerusalem! Dibunu ho do angka panurirang jala didangguri ho do angka na sinuru manopot ho. Nunga piga hali naeng papunguonku do nian angka anakmi, sobokkon pidong na papunguhon anakna tu toru ni habonghabongna; alai ndang dung olo hamu! 23:38 Ida ma, ingkon tarulang do sogot bagasmuna! 23:39 Ai hudok ma tu hamu: Na so idaonmuna be Ahu olat ni on, paima dohononmuna: Pinasupasu ma na ro marhitehite Goar ni Tuhan i!
24:1 Dung i borhat ma Jesus, laho ruar sian bagas joro i. Jadi didapothon angka siseanna i ma Ibana, dipatuduhon ma tu Ibana angka bagas ni joro i. 24:2 Alai didok Jesus ma tu nasida: Diida hamu sasudena i? Situtu do na hudok on tu hamu: Ndang pasombuonna sogot disi dua batu martinditindi na so gargaronna. 24:3 Dung i uju hundul Ibana di dolok Jetun i, pulik ma didapothon angka siseanna Ibana, mandok: Paboa ma tu hami: Andigan masa i, jala dia ma tanda ni harorom dohot ajal ni hasiangan on? 24:4 Gabe dialusi Jesus ma nasida: Jaga ma hamu, so tung dililuhon halak hamu! 24:5 Ai lan do na ro sogot manoluk Goarhu, angka na mandok: Ahu do Kristus i, gabe torop ma lilu bahenonnasida. 24:6 Alai begeonmuna ma barita ni angka hamusuon dohot soara ni na marmusu. Manat ma hamu, unang hamu tarsonggot; ndang tarbahen so masa angka i, alai ndang i dope ujungna. 24:7 Ai na hehe do sogot bangso maralohon bangso, harajaon maralohon harajaon; masa ma nang haleon dohot lalo marluatluat. 24:8 Sasudena i, parmulaan ni pambebeonna i dope. 24:9 Dung i pasahatonna ma hamu tu haporsuhon, pola pusaonna do hamu, gabe hosoman ni bangso saluhutna hamu ala Goarhu. 24:10 Jadi torop ma targasip di tingki i, gabe masijehean jala masihosoman ma! 24:11 Dung i hehe ma lan panurirang pargapgap, mangaliluhon torop jolma. 24:12 Jadi ala na lam rarat na so uhum, lam tu ngalina ma haholongon ni roha di jolma godangan. 24:13 Alai na manahan ro di ujung, i do paluaonna. 24:14 Laos baritahononhon do barita na uli on na taringot tu Harajaon i di liat portibi on, laho mangkatindangkonsa tu saluhutna bangso; dung pe i, asa ro ujungna. 24:15 Antong, molo diida hamu di inganan na badia i hagagaor na so uhum i, na nilumbahon ni panurirang Daniel (diparateatehon na manjaha on ma i!): 24:16 Disi ma maporus hamu na di Judea tu dolok! 24:17 Na di bilut parginjang ni jabuna, unang ma dialap angka ugasan na di jabu i, di na mijur. 24:18 Na di ladang, unang ma pola humusor mambuat ulosna! 24:19 Alai marjea ma angka na gabegabean dohot angka panarusan di angka ari i! 24:20 Alai martangiang ma hamu, asa unang pola maporus hamu di partaonan ngali manang jumpa ari Sabbat. 24:21 Ai mansai balga do haporsuhon i; sian mula ni hasiangan on rasirasa nuaeng ndang adong dope masa na songon i, tu jolo on pe ndang masa be. 24:22 Jala aut unang diorui angka ari i, ndang tagamon malua agia sada jolma; alai ala ni angka na pinillit i do umbahen na diorui. 24:23 Molo dipandok disi tu hamu: Ida ma, disi, disan do Kristus i, unang porsea hamu! 24:24 Ai na hehe do sogot angka Kristus pargapgap dohot angka panurirang pargapgap, patupahon tanda na balga dohot halongangan, laho mangaliluhon nang angka na pinillit, ia na tarbahen. 24:25 Jaga ma hamu! Nunga hupalumba hamu hian. 24:26 Antong, anggo didok nasida tu hamu: Di halongonan an do Ibana, unang hamu laho tusi; ia didok: Di bilut do Ibana, unang haporseai! 24:27 Ai songon hilap na mullop di habinsaran marnalanala ro di hasundutan, songon i do sogot haroro ni Anak ni jolma i. 24:28 Ai ia disi bangke, tusi do marumbal angka lali. 24:29 Alai dung salpu haporsuhon ondeng, pintor mangkolom ma mata ni ari i, ndang marsinondang be bulan i, mardabuan ma angka bintang sian langit, jadi humuntal ma angka hagogoon ni parlangitan. 24:30 Di tingki i ma binsar di langit i tanda ni Anak ni jolma i, gabe mangangguhi ma sude bangso na di tano on, ai idaonnasida ma Anak ni jolma i ro di atas ombun ni langit, mantat hagogoon dohot hasangapon godang. 24:31 Jadi suruonna ma angka surusuruan na marsarune mansai gogo, jadi sian desa na ualu i ma papunguonnasida angka na pinillitna, sian suhi ni langit na sada ro di na sada nari i. 24:32 Alai sian hau ara i ma guruhon hamu tudosanna: Molo martunasi punsuna jala rungkar angka bulungna, botoonmuna ma, naung jonok partaonan las. 24:33 Suang le songon i, jumpa diida hamu masa angka ondeng, botoonmuna ma, naung jonok hasosonggopna. 24:34 Situtu do na hudok on tu hamu: Na so tupa salpu bangso on, so jolo songgop sasudena i. 24:35 Ai laho salpu pe sogot langit dohot tano on, anggo angka hatangki ndang na olo salpu! 24:36 Alai anggo arina dohot sadiharina, ndang adong na umbotosa, nang surusuruan na di banua ginjang, nang Anak i; nda holan Ama i! 24:37 Alai songon uju di ngolu ni si Noak i, songon i do sogot haroro ni Anak ni jolma i! 24:38 Ai tagan so ro aek na sumar i, marmangani nasida jala minumminum, mangoli dohot pabolihonsa, paima dapot ari habobongot ni si Noak tubagasan parau i. 24:39 Laos so mamoto nasida, paima ro aek na sumar i mangaupi nasida saluhutna. Suman tusi do sogot haroro ni Anak ni jolma i! 24:40 Rap ma disi dua halak di ladang; na sada do dijangkon, na sada dibolongkon. 24:41 Rap ma disi dua panduda; na sada do dijangkon, na sada dibolongkon. 24:42 Onpe, dungo ma hamu; ai ndang diboto hamu ari haroro ni Tuhanmuna! 24:43 Alai ingot hamu ma on: Aut na diboto na mora i tingki haroro ni panangko, ndang tagamon so dungo ibana, asa unang disursari ugasanna na di bagasna i. 24:44 Dibahen i sai tagam ma hamu, ai na ro ma Anak ni jolma i di na so pangkirimon ni rohamu! 24:45 Asa didia do naposo haposan jala na marroha, na pinabangkit ni indukna mangalehon angka naposona mangan di tingkina? 24:46 Martua do naposo i, na mangulahon songon i didapot indukna di harorona i! 24:47 Situtu do na hudok on tu hamu: Pabangkitonna do ibana mangaramoti saluhutna na di ibana. 24:48 Alai ia na jahat naposo i, dohononna ma di bagasan rohana: Leleng dope asa ro indukhi! 24:49 Gabe tole ma ibana mangalinsingi angka donganna naposo; mangan minum do anggo ibana, mangangkupi angka siparmabuk. 24:50 Dung i ro ma induk ni naposo ondeng di ari na so panagamanna jala di sadihari na so pamotoanna. 24:51 Jadi agoonna ma ibana, laos lehononna ma tu ibana tohap ni angka pangansi. Disi ma masa angguhangguk dohot na patungoripon!
25:1 Disi ma tarpatudos harajaon banua ginjang i tu sampulu anak boru, angka na borhat manomunomu pangoli i, masiboan parpalitoanna be. 25:2 Alai na oto do na lima sian nasida, na pantas marroha do na lima. 25:3 Ianggo angka na oto i, diboan do nian parpalitoanna, alai ndang mantat miak nasida. 25:4 Alai anggo na pantas marroha i, diboan do miak di ingananna i rap dohot parpalitoannasida. 25:5 Alai di na leleng so ro pangoli i, mondokondok ma nasida sasude, laos tarpodom ma. 25:6 Alai tonga borngin i, adong ma na joujou: Na ro ma pangoli i; hehe ma hamu manomunomu! 25:7 Jadi hehe ma angka anak boru i saluhutna, dipature be ma parpalitoanna. 25:8 Dung i didok angka na oto i ma tu angka na pantas marroha: Lehon hamu ma tu hami deba sian miakmuna, ai na mintop ma palitonami. 25:9 Alai dialusi angka na pantas marroha i ma: Ndang sae maon di hami dohot di hamu; tu angka panggadis ma hamu laho tagonan, manuhor di hamu! 25:10 Alai di tongandalan i dope nasida laho manuhor, nunga ro pangoli i; jadi bongot ma angka naung hobas hian rap dohot ibana tu hasampuran rea i, dung i tarsordak ma pintu i. 25:11 Alai ro ma sian pudi anak boru na lima nari, angka ninna ma: Tuannami, ungkap ma di hami! 25:12 Alai ninna ma mangalusi: Situtu do na hudok on tu hamu: Ndang na hutanda hamu! 25:13 Antong, jaga ma hamu, ai ndang diboto hamu arina manang sadiharina! 25:14 Umpamana: Adong ma sada halak na naeng marhutasada, jadi dijou ma angka naposona, laho palumehon artana tu nasida. 25:15 Jadi dilehon ma tu na sada lima bagian, tu na asing dua, tu na asing muse sada dilehon, ganup marguru tu gogona; dung i borhat ma ibana. 25:16 Mamintor ma laho na manjalo na lima bagian i, ditigatigahon ma i, jadi diomo ma lima bagian nari. 25:17 Na manjalo na dua bagian i pe, tong songon i do; dohot do ibana mangomo dua nari. 25:18 Alai anggo na manjalo na sada i, dihali ma tano mambunihon hepeng ni indukna i tusi. 25:19 Alai dung leleng, mulak ma induk ni angka naposo ondeng, jadi mardabudabu ma ibana dohot nasida. 25:20 Jadi ro ma na manjalo na lima bagian i, diboan ma na lima bagian nari, ninna ma: Tuannami, lima bagian pinasahatmi tu ahu; ida ndi on, lima bagian nari huomo. 25:21 Dung i didok indukna i ma tu ibana: Taho ma i, ale naposo na denggan roha jala haposan! Haposan do ho di na otik, pasahatonku ma tu ho godang. Bongot ma ho tu halasan ni roha ni tuanmu! 25:22 Dung i ro ma na manjalo na dua bagian i, didok ma: Tuannami, dua bagian pinasahatmi tu ahu; ida ndi on, dua bagian nari huomo. 25:23 Dung i didok indukna i ma tu ibana: Taho ma i, ale naposo na denggan roha jala haposan; haposan do ho di na otik, pasahatonku ma tu ho godang. Bongot ma ho tu halasan ni roha ni tuanmu! 25:24 Jadi ro ma nang na manjalo na sada bagian i, ninna ma: Tuannami, nunga huboto hian, ho parroha na pir, na manggotil di na so panuananmu, jala na papunguhon di na so panaburanmu. 25:25 Jadi ala na mabiar ahu, laho do ahu mambunihon bagianki tubagasan tano; na, ndi on, ugasanmon! 25:26 Alai ninna indukna i ma mangalusi ibana: Oe, ho naposo na jahat roha jala na losok! Diboto ho do hape, ahu manggotil di na so panuananku jala papunguhon di na so panaburanku! 25:27 Antong, nda tama ma nian boanonmu hepengki tu sianahi hepeng, gabe jaloonku ma di ahu rap dohot bungana di harorongkon? 25:28 Onpe, buat hamu ma bagianna i; lehon hamu ma i tu na mameop na sampulu bagian i! 25:29 Ai di ganup paradongan lehonon do, asa marlobilobi ibana. Alai sibuaton do sian na so paradongan nang na di ibana hian. 25:30 Laos pabali hamu ma naposo na so hasea i tu na holom marimpotimpot! Disi ma masa angguhangguk dohot na patungoripon. 25:31 Alai dung ro sogot Anak ni jolma i marhasangapon rap dohot saluhut surusuruanna, hundulanna ma disi habangsa hasangaponna i. 25:32 Dung i marluhut ma tu jolona nasa bangso, jadi sirangonna ma nasida songon binahen ni parmahan na manirang birubiru boruboru sian birubiru tunggal. 25:33 Jadi pajongjongonna ma boruboru i tu siamunna, alai anggo tunggal i tu hambirangna. 25:34 Dung i dohonon ni Raja i ma tu angka na di siamunna i: Ro ma hamu, angka na pinasupasu ni Damang, tean hamu ma harajaon i, na pinature di hamu sian haoojak ni tano on! 25:35 Ai na male do Ahu, dilehon hamu do Ahu mangan; na mauas do Ahu, dilehon hamu do Ahu minum; na buro do Ahu, gabe dijangkon hamu do Ahu. 25:36 Na marsangkotbulung do Ahu, jadi diparulosi hamu do ahu; na hansitan do Ahu, jala ditingkir hamu do Ahu; na tarhurung do Ahu jadi ro hamu mandulo Ahu. 25:37 Dung i dohonon ni angka partigor i ma mangalusi: Tuhan, nandigan huida hami Ho male, gabe hulehon hami Ho mangan; manang mauas, gabe hulehon hami Ho minum? 25:38 Nandigan huida hami Ho na buro, gabe hujangkon hami Ho; manang marsangkotbulung, gabe huparulosi hami Ho? 25:39 Nandigan huida hami Ho marsahit manang tarhurung, gabe hudulo hami Ho? 25:40 Dung i alusan ni Raja i ma nasida: Situtu do na hudok on tu hamu; Nasa na binahenmuna tu sada sian anggingku angka na metmet on, na tu Ahu do i dibahen hamu! 25:41 Dung i dohononna ma tu angka na di hambirangna: Laho ma hamu sian jolongkon, hamu angka na binuraan tu api sisalelenglelengna, na pinature di sibolis i dohot di angka surusuruanna! 25:42 Ai na male do Ahu, ndang dilehon hamu Ahu mangan; na mauas do Ahu, ndang dilehon hamu Ahu minum. 25:43 Na buro do Ahu, ndang dijangkon hamu Ahu; na marsangkotbulung do Ahu, ndang diparulosi hamu Ahu; na marsahit do Ahu, na tarhurung do Ahu, ndang didulo hamu Ahu. 25:44 Dung i dohononnasida ma mangalusi Ibana: Tuhan, nandigan huida hami Ho male, manang mauas, manang na buro, manang marsangkotbulung, manang marsahit, manang tarhurung, so hupatureture hami Ho? 25:45 Dung i dohononna ma mangalusi nasida: Situtu do na hudok on tu hamu: Di na so niantoanmuna sahalak sian angka na metmet on, sandok Ahu do na so niantoanmuna disi. 25:46 Dung i laho ma nasida tu na bernit salelenglelengna; alai anggo partigor i tu hangoluan sisalelenglelengna do.
26:1 Asa dung sahat dihatahon Jesus sude angka jamita ondeng, ninna ma mandok angka siseanna: 26:2 Diboto hamu do, haduan ma dapot pesta Paska; disi ma pasahatonna Anak ni jolma i, asa diparsilangkon. 26:3 Marpungu ma uju i angka sintua ni malim dohot angka sintua ni bangso i tu godung ni sintua ni malim na margoar si Kayapas, 26:4 laho martuptup, manang bisuk dia bahenonna manangkup Jesus dohot mamusa Ibana. 26:5 Alai didok nasida ma: Unang ma di pesta i, so tung guntur natorop i. 26:6 Alai uju di Betania Jesus di bagas ni si Simon na huliton i, 26:7 didapothon sada parompuan ma Ibana, mantat guriguri na marisi miak na arga situtu, i ma diusehon tu Uluna, tagan mangan nasida. 26:8 Marnida i angka siseanna, sogo ma rohanasida, angka ninna ma: Magoponai, antong! 26:9 Aut ginadis i nian arga jala nilehon tu na pogos! 26:10 Umboto i Jesus, ninna ma mandok nasida: Boasa arsahanmuna parompuan i? Ai na uli do na binahenna i tu Ahu. 26:11 Ai tongtong do adong na pogos di tongatongamuna, alai anggo Ahu ndang manongtong di hamuna. 26:12 Ai diusehon pe miak i tu Dagingki, hira na mambahen adat pananomon do nasida disi tu Ahu. 26:13 Situtu do na hudok on tu hamu: Manang didia di liat portibi on dijamitahon sogot barita na uli on, hatahononna do nang na binahenna ondeng gabe baritana. 26:14 Dung i laho ma sada sian na sampuludua i, na margoar Jude Iskariot, manopot angka sintua ni malim, 26:15 mandok: Sadia ma lehononmuna tu ahu, asa hupasahat Ibana tu hamu? Gabe tolupulu rupia ma dibilang nasida tu jolona. 26:16 Olat ni i ma dilului rohana tingki halehetanna laho pasahathon. 26:17 Alai di ari parhobasan parjolo ni pesta Paska i didapothon siseanna ma Jesus, angka ninna ma: Tudia ma patureonnami di Ho panganon Paska i, dipangido roham? 26:18 Gabe didok ma: Laho ma hamu tu huta i, manopot si anu, dok hamu ma tu ibana: Tona ni Guru i: Na dapot ne ma tingkingku, di ho ma Ahu sorang, laho mangan Paska i rap dohot siseanku. 26:19 Dung i dibahen angka sisean i ma songon na nidokkon ni Jesus tu nasida, jadi dihobasi ma panganon Paska i. 26:20 Adong dung bot ari, mangan ma Ibana rap dohot siseanna na sampuludua i. 26:21 Jadi di na mangan i nasida, ninna ma: Situtu do na hudok on di hamu: Sada sian hamu naeng pasahathon Ahu! 26:22 Dung i marsak situtu ma rohanasida, gabe dipandok be ma tu Ibana: Nda tung ahu i, Tuhan? 26:23 Alai ninna ma mangalusi: Ia i na rap dohot Ahu manurdukkon tanganna tu paringkauan, i do na pasahathon Ahu! 26:24 Tong do nian ujung ni Anak ni jolma i, songon na tarsurat hian; alai marjea do halak na pasahathon Anak ni jolma i? Tagonan unang ma sanga tubu ibana tu hasiangan on! 26:25 Dung i ro ma si Judas, parjehe i, didok ma: Nda tung ahu i, Guru? Jadi didok Jesus ma tu ibana: Ho do tutu! 26:26 Jadi di na mangan i nasida, dihindat Jesus ma roti, dipasupasu ma, diponggoli jala diparlehon ma tu angka siseanna, huhut ma didok: Jalo hamu ma, pangan hamu; Dagingku do on! 26:27 Dung i dihindat ma panginuman, didok ma mauliate, dilehon ma tu nasida, huhut ma didok: Sude ma hamu manginum sian i! 26:28 Ai Mudarhu do on, mudar parpadanan i, na niusehon humongkop torop, bahen hasesaan ni dosa. 26:29 Alai hudok ma tu hamu: Na so tupa be inumonku olat ni on sian parbue ni hau anggur i sahat ro di ari sogot; disi ma inumonku na imbaru rap dohot hamu di harajaon ni Damang. 26:30 Jadi dung diendehon nasida ende pujipujian i, ruar ma nasida laho tu dolok Jetun. 26:31 Disi ma didok Jesus tu nasida: Saluhut do hamu naeng targasip mida Ahu di na saborngin on, ai na tarsurat do: "Lombutanku ma parmahan i, gabe marserak ma birubiru na sapunguan i." 26:32 Alai dung hehe Ahu sian na mate, joloananku ma hamu tu Galilea. 26:33 Alai ninna si Petrus ma mangalusi Ibana: Agia sude nasida targasip mida Ho, anggo ahu, na so tupa targasip. 26:34 Dung i didok Jesus ma mandok ibana: Situtu do na hudok on tu ho: Tolu hali do soadahononmu Ahu di na saborngin on, tagan so martahuak dope manuk. 26:35 Dung i didok si Petrus ma tu Ibana: Nang mate pe ahu rap dohot Ho, ndang soadahononku Ho. Laos songon i do hata ni saluhut sisean i. 26:36 Dung i sahat ma Jesus rap dohot nasida tu porlak sada na margoar Getsemane. Jadi didok ma tu angka sisean i: Hundul ma hamu jolo dison, saleleng disan Ahu martangiang. 26:37 Dung i ditogihon ma si Petrus dohot anak ni si Sebedeus na dua i, dung i gabe marsak situtu ma Ibana jala bobonosan. 26:38 Jala didok ma tu nasida: Mansai marsak situtu do rohangku, hira na mate do. Dison ma hamu, dungo rap dohot Ahu! 26:39 Dung i laho ma Ibana saotik tujolo, dipatungkap ma bohina tu tano martangiang, ninna ma: Ale Amang, namun na tarbahen, salpuhon ma siinumon on sian Ahu! Alai tahe, unang marguru tu rohangku; roham do! 26:40 Dung i mulak ma Ibana tu angka siseanna, jala tarpodom do nasida didapot, jadi didok ma tu si Petrus: Ndang margogo hamu hape dungo rap dohot Ahu nanggo sangombas? 26:41 Dungo ma hamu jala martangiang, asa unang hamu bongot tu pangunjunan, ai na girgir do nian tondi i, alai gale do ia daging! 26:42 Dung i laho ma Ibana paduahalihon martangiang, ninna ma: Ale Amang, molo so tarbahen salpu on, nda ingkon huinum, sai saut ma lomo ni Roham! 26:43 Dung i di na ro i Ibana, tarpodom muse ma nasida didapot, ai mansai dokdok do salibonnasida. 26:44 Jadi ditadingkon ma nasida, diulakkon ma laho martangiang patoluhalihon, mandok hata ondeng. 26:45 Dung i didapothon ma muse angka siseanna jadi didok ma tu nasida: Datdatanmuna dope modom dohot maradian? Nunga dapot tingkina nuaeng, sahat ma Anak ni jolma i tu tangan ni pardosa. 26:46 Hehe ma hamu, laho ma hita! Ndi, nunga, ro na pasahathon Ahu! 26:47 Mangkatahon i dope Ibana, nunga ro si Judas, sada sian na sampuludua i, rap dohot torop halak, angka na marpodang jala marlombutlombut, sinuru ni angka sintua ni malim dohot sintua ni bangso i. 26:48 Alai nunga dipabotohon parjehe i hian partinandaan tu nasida, ai didok do: Ia i na huumma, Ibana ma i; i ma tangkup hamu! 26:49 Asa pintor didapothon ma Jesus, didok ma: Tabi di Ho, Guru! Laos diumma. 26:50 Alai ninna Jesus ma mandok ibana: Marhua ho tuson, anggia? Dung i ro ma nasida, dilaluhon ma tangannasida tu Jesus manangkup Ibana. 26:51 Dung i adong ma sada sian angka dongan ni Jesus mangalaluhon tanganna, disintak ma podangna, ditampulhon ma tu naposo ni sintua ni malim sahalak, dipisikkon ma pinggolna. 26:52 Jadi didok Jesus ma tu ibana: Pasarung podangmi, ai na manintak podang, mago ma bahenon ni podang! 26:53 Ai na so tarbahen Ahu do di roham mangido sian Damang, asa dipadiri di Ahu saonari lobi sian sampuludua loksa surusuruan? 26:54 Alai songon dia ma disi saut hata ni Surat i na mandok: Ingkon masa do na songon i? 26:55 Uju i ma didok Jesus tu angka natorop i: Hira na dompak panamun do hamu hehe, marpodang jala marlombutlombut manangkup Ahu. Ariari do Ahu nian hundul mangajari di bagas joro, so adong ditangkup hamu Ahu. 26:56 Alai na masa do sudena on, asa jumpang hata ni angka panurirang i. Dung i ditadingkon saluhut sisean i ma Ibana laho maporus. 26:57 Asa dung ditangkup nasida Jesus, ditogihon ma Ibana tujolo ni sintua ni malim si Kayapas, ai nunga pungu disi angka sibotosurat ro di pangituai. 26:58 Alai sai mangihut do si Petrus mandaodao sahat ro di alaman ni sintua ni malim i. Laos bongot ma ibana tubagasan, laho hundul tusi rap dohot angka naposo marnida ujungna. 26:59 Alai anggo angka sintua ni malim ro di sandok rapot godang mangalului panindangion gapgap dompak Jesus, na tuk mambahen Ibana marutang hosa. 26:60 Alai nang pe hehe torop sitindangi gapgap, ndang adong jumpangsa. 26:61 Alai parpudi ro ma dua halak, ninna ma: Didok Halak on: Tarbahen Ahu do mangalohai joro ni Debata jala pajongjong i sumuang di bagasan tolu ari. 26:62 Dung i hehe ma sintua ni malim i, mandok tu Ibana: Ndang alusanmu na hinatindangkonnasida dompak Ho? 26:63 Alai sai hohom do anggo Jesus. Dung i dipanghulingi sintua ni malim i ma Ibana: Hupatolon ma Ho tu Debata Siparngolu i, asa dipaboa Ho tu hami, manang na tutu Ho Kristus, Anak ni Debata! 26:64 Dung i didok Jesus ma tu ibana: Songon na nidokmi ma tutu! Alai hudok ma tu hamu: Olat ni on ma idaonmuna Anak ni jolma i, hundul di siamun ni Hagogoon jala ro di atas ombun ni langit. 26:65 Gabe diribakkon sintua ni malim ma pangkeanna mandok: Na mangaleai Debata do Ibana! Pola luluan dope sitindangi? Nunga dibege hamu pangaleaina i! 26:66 Beha do di rohamu? Dung i ninna nasida ma mangalusi: Marutang hosa ma Ibana! 26:67 Jadi ditijuri nasida ma bohina, na deba manompuk, na deba mangalinsingi, 26:68 huhut mandok: Surirangi hami, Kristus, ise do na mambunu Ho? 26:69 Alai na hundul do anggo si Petrus di alaman i, jadi didapothon sada parompuan ma ibana mandok: Dohot do ho dongan ni Jesus, na sian Galilea i! 26:70 Jadi disoadahon ma di jolonasida saluhutna, ninna ma: Ndang huboto na nidokmi! 26:71 Dung i di na naeng haruar ibana, diida parompuan na asing ma ibana, didok ma tu angka na disini: On do sada dongan ni Jesus na sian Nasaret! 26:72 Jadi diulahi ma mansoadahon, pola manolon: Tung na so hutanda do Halak i! 26:73 Alai dung satongkin nari, didapothon angka na jongjong disi ma si Petrus mandok: Sintong tahe, dohot do ho sada sian nasida, ai pangkulingmi do patandahon ho! 26:74 Dung i dipambuburahon ma dirina huhut manolonnolon: Tung na so hutanda do Halak i, ninna. Jadi pintor martahuak ma manuk. 26:75 Jadi diingot si Petrus ma na hinatahon ni Jesus tu ibana: Tolu hali soadahononmu Ahu, tagan so martahuak dope manuk. Dung i laho ma si Petrus tu balian tumatangis situtu.
27:1 Torang ni arina i martuptup ma sude angka sintua ni malim dohot sintua ni bangso i dompak Jesus, laho mamusa Ibana. 27:2 Ditali jala ditogu nasida ma Ibana laho pasahathon tu panguhum si Latus. 27:3 Jadi dung diida si Judas, parjehe i, na naeng hona uhum nama Ibana, disolsoli ma rohana, dipaulak ma na tolupulu rupia i tu angka sintua ni malim dohot tu sintua ni bangso i; 27:4 ninna ma: Sala do ahu! Hujehehon do hape na so marpipot! Alai didok nasida ma: Ndang ro di hami i! Ho do na sari disi! 27:5 Jadi ditimpalhon ma perak i tu bagasan joro i, laos sumurut sian i laho maningkot. 27:6 Alai dibuat angka sintua ni malim ma hepeng i, ninna ma: Ndang jadi padomuon i tu arta ni joro, ai tuhor ni mudar do i! 27:7 Jala mardos ni roha nasida manuhorhonsa tu ladang ni pande hudon, bahen parbandaan ni halak dagang. 27:8 Ala ni i do umbahen na margoar i ladang mudar ro di sadari on. 27:9 Disi ma jumpang hata ni panurirang Jeremia na mandok: "Dibuat nasida do na tolupulu rupia i, asam ni na niasam, diasam deba anak Israel. 27:10 Dung i dilehon ma i manuhor ladang ni pande hudon, songon na nidokkon ni Tuhan i tu ahu." 27:11 Asa dipajongjong do Jesus tujolo ni panguhum i. Jadi disungkun panguhum i ma Ibana, ninna ma: Atehe, Ho do raja ni halak Jahudi? Alus ni Jesus: Songon na nidokmi ma tutu! 27:12 Dung i dialuhon angka sintua ni malim dohot sintua ni bangso i ma Ibana; alai ndang dialusi manang aha. 27:13 Jadi didok si Latus ma tu Ibana: Ndang dibege Ho godang ni na hinatindangkonnasida dompak Ho? 27:14 Alai ndang dialusi Ibana nanggo sada hata, pola longang situtu roha ni panguhum i. 27:15 Alai peam do dipalua panguhum i di pesta i sada halak na tarhurung, marguru tu na tinodo ni natorop. 27:16 Alai adong ma tarhurung uju i sada parjahat na sumalin, na margoar si Barabas. 27:17 Jadi di na pungu i nasida, didok si Latus ma tu nasida: Ise do dipangido hamu paluaonku, si Barabas manang Jesus na targoar Kristus? 27:18 Ai diboto do, late ni rohanasida do umbahen na dipasahat nasida Ibana. 27:19 Alai di na hundul i ibana di habangsa paruhuman i, ditonahon jolmana ma tu ibana: So tung dihahua ho halak na tigor i, ai susa situtu do ahu naborngin di nipingku ala Ibana. 27:20 Alai sai disosoi angka sintua ni malim rap dohot sintua ni bangso i natorop, asa dipangido nasida, malua si Barabas, alai pusaon do anggo Jesus. 27:21 Dung i ninna panguhum i ma mandok nasida: Ise sian na dua i dipangido hamu paluaonku? Jadi didok nasida ma: Si Barabas! 27:22 Dung i didok si Latus ma tu nasida: Antong, aha ma bahenonku tu Jesus, na targoar Kristus? Gabe saluhut nasida, mandok: Parsilangkon ma! 27:23 Alai ninna panguhum i ma: Ai aha na jahat dibahen? Jadi lam gogo ma dipanjoujouhon: Parsilangkon ma! 27:24 Asa dung diida si Latus, na so marguna hatana, lam ganda tabe gaorna, dibuat ma aek mamburi tanganna di jolo ni natorop i, huhut mandok: Lias do ahu sian mudar ni On! Hamu do na sari disi! 27:25 Dung i ninna sude natorop i ma: Marsapata tu hami dohot tu ianakhonnami ma mudarna i! 27:26 Dung i saut ma dipalua si Barabas; alai anggo Jesus dilinsingi, dung i dipasahat ma, asa diparsilangkon. 27:27 Jadi diboan angka soldadu ni panguhum i ma Jesus tu bagas paruhuman, diarahon ma sude dongannasida manahopi Ibana. 27:28 Ditanggal ma abitna, disolukkon ma tu Ibana baju dapdap. 27:29 Didandani nasida ma sungsang duri bahen tumpalna, diampehon ma i tu uluna; dilehon ma tolong tu tanganna siamun, dung i marsomba ma nasida tu jolona mangaleai Ibana, angka ninna ma: Tabi ma di Ho, ale Raja ni Jahudi! 27:30 Huhut ditijuri nasida Ibana, dibuat ma tolong i sian tanganna, dilotakkon tu uluna. 27:31 Jadi dung sun dileai nasida Ibana, ditanggal ma sian Ibana baju dapdap i, disolukkon ma muse tu dagingna abitna hian, dung i ditogihon ma Ibana, asa diparsilangkon. 27:32 Alai laho tu balian jumpang nasida ma sahalak Kirene na margoar si Simon; i nama digogoi nasida mamorsan hau na pinarsilang i. 27:33 Jadi sahat ma nasida tu inganan na margoar Golgata (lapatanna: Partangkurahan). 27:34 Disi ma dipainum nasida tu Ibana tuak anggur na marsaor pogu; jadi dung didai, ndang olo Ibana manginum. 27:35 Alai dung diparsilangkon nasida Ibana, martondung ma nasida taringot tu angka abitna. 27:36 Jadi hundul ma nasida disi jumaga Ibana. 27:37 Jadi dilohothon nasida ma tu ginjang ni uluna surat paboa salana, hatana: Jesus do On, Raja ni Jahudi! 27:38 Rap dohot Ibana diparsilangkon nasida dua halak panamun; sada di siamunna, sada di hambirangna. 27:39 Alai dilealeai angka na mamolus i Ibana, angka dipaelengeleng uluna mandok: 27:40 E Ho, na mangalohai joro i jala na pajongjongkonsa di bagasan tolu ari! Palua dirim, molo na tutu Ho Anak ni Debata; mijur ma Ho sian hau pinarsilang i! 27:41 Suman tusi do pangaleai ni angka sintua ni malim sibotosurat dohot sintua ni bangso i, ai didok be: 27:42 Ia na asing dipalua, dirina so tarpaluasa. Raja ni Israel do Ibana! Antong, mijur ma Ibana sian hau pinarsilang i, asa porsea hami di Ibana! 27:43 Naung dihaposi Debata; antong, I ma paluahon Ibana nuaeng, molo na lomo rohana, ai ninna do: Anak ni Debata do Ahu! 27:44 Laos songon i do pangaleai ni panamun i, na rap diparsilangkon dohot Ibana. 27:45 Alai olat ni hos ni ari ro di pungkul tolu holom ma sandok tano i. 27:46 Alai tar di pungkul tolu dipangiar Jesus ma soarana, dianggukhon ma: Ale Debatangku, Debatangku, boasa tung tadingkononmu Ahu (Eli, Eli, lama sabachtani)? 27:47 Alai umbege i, ninna na deba sian angka na jongjong disi: Na manjou si Elia do 27:48 Dung i pintor marlojong ma sada sian nasida mangalap limut, dibutongi ma i tu na asom, dipalohot ma tu tolong painumhon Ibana. 27:49 Alai na deba nari mandok: Pasombu jolo: Taida ma, manang na olo ro si Elia paluahon Ibana! 27:50 Alai diulahi Jesus ma marsoara na gogo; dung i tos ma hosana. 27:51 Laos di na satongkin i maribak ma hirehire na di bagasjoro sian ginjang ro di toru. Dung i humuntal ma tano i, marigat ma dohot angka batu mamak. 27:52 Mungkap ma angka tanoman, dung i hehe ma daging ni torop na badia angka na modom disi, 27:53 gabe ruar ma nasida sian angka tanoman i; jadi dung hehe Jesus, ro do nasida tu huta na badia i, pataridahon nasida tu torop halak. 27:54 Alai dung diida induk ni soldadu i rap dohot angka donganna, na jumaga Jesus, lalo i ro di angka na masa i, mabiar situtu ma nasida, ninna ma: Tutu do On Anak ni Debata! 27:55 Alai adong ma disi torop boruboru, na manatapnatap mandaodao, i ma angka naung mangihuthon Jesus sian Galilea, patureturehon Ibana. 27:56 Si Maria Magdalena ma sada sian nasida dohot si Maria, ina ni Jakobus dohot Josep, dohot ina ni angka anak ni si Sebedeus. 27:57 Alai dung bot ari, ro ma sada halak na mora, na margoar si Josep, na sian huta Arimatea, naung gabe sisean ni Jesus. 27:58 Ibana ma laho tu si Latus mangido bangke ni Jesus. Jadi didokkon si Latus ma na pasahathonsa tu ibana. 27:59 Dung i dijalo si Josep ma bangke i, dibaluti ma tu dagangan na ias. 27:60 Dung i dipeakkon ma tu bagasan tanomanna na imbaru dope, na tinuhil tu bagasan batu, digulang ma batu na bolon tu baba ni tanoman i; dung i laho ma ibana. 27:61 Alai hundulhundul do disi tondongkon tanoman i si Maria Magdalena dohot si Maria na sada. 27:62 Alai torang ni arina i, na mangihut tu ari parhobasan i, marluhut ma angka sintua ni malim ro di Parise. 27:63 Huingot hami, Tuannami, naung didok Pangansi i, di na mangolu dope Ibana: "Na hehe ma Ahu di ari patoluhon!" 27:64 Antong, dokkon ma na manjaga tanoman i sahat ro di ari patoluhon, asa unang ro angka siseanna manangko Ibana, jadi dohononnasida ma tu natorop: Naung hehe Ibana sian na mate; gabe rumoa maon sipaotooto parpudi sian na parjolo i. 27:65 Jadi didok si Latus ma tu nasida: Togihon hamu ma parjaga i! Laho ma hamu mangaramotisa sian nasa rohamuna! 27:66 Dung i laho ma nasida mangaramoti tanoman i, dipajagahon, huhut ma disahapi batu i.
28:1 Alai di buhabuha ijuk, di ari parjolo dung salpu Sabbat i, ro ma si Maria Magdalena dohot si Maria na sada maningkir tanoman i. 28:2 Alai nunga masa lalo na gogo. Ai tuat do surusuruan ni Tuhan sian banua ginjang; jala dung sahat, digulang ma batu i, laos hundul diatasna. 28:3 Alai songon hilap do rupana idaon, saksak do ulosna songon hapur. 28:4 Jadi angka dotdot ma parjaga i dibahen biar ni rohanasida, hira na mate do. 28:5 Alai ninna surusuruan i ma mandok parompuan i: Unang hamu mabiar, ai huboto, dilului hamu do Jesus, naung diparsilangkon. 28:6 Ndang dison Ibana. Ai nunga hehe Ibana, songon na nidokna hian. Pajonok hamu ma; ida hamu ma inganan hapeahanna i! 28:7 Hatop ma hamu laho tu angka siseanna i paboahon, naung hehe Ibana sian na mate, jadi joloananna do hamu tu Galilea, disi ma idaonmuna Ibana; nunga hupaboa i tu hamu. 28:8 Dung i hatop ma nasida laho sian tanoman i, mabiar huhut las situtu rohanasida; marlojong do nasida laho mamaritahonsa tu angka siseanna. 28:9 Disi ma ro Jesus mandapothon nasida, ninna ma: Dame ma di hamu! Dung i dipajonok nasida ma, dihaol ma patna, huhut manungkap tu jolona. 28:10 Jadi didok Jesus ma tu nasida: Unang hamu mabiar, laho ma hamu mandokkon angka anggingku tu Galilea, disi ma idaonnasida Ahu! 28:11 Alai di na laho i nasida, nunga sahat deba sian angka parjaga i tu huta, dibaritahon ma saluhut na masa i tu angka sintua ni malim. 28:12 Jadi marluhut ma nasida rap dohot angka sintua ni bangso i martahi, dilehon ma hepeng na nia tu soldadu i; 28:13 laos ninna ma: Dok hamu ma: Tagan tarpodom hami, ro do angka siseanna bornginna i, manangko Ibana. 28:14 Jadi molo tung tarbege i tu panguhum, hami pe mandamedamei ibana huhut sumarihon, unang susa hamu. 28:15 Dung i dijalo nasida ma hepeng i, dibahen ma songon na pinodahonna tu nasida, gabe mehet ma hata ondeng di halak Jahudi ro di sadari on. 28:16 Alai na laho do anggo siseanna na sampulusada i tu sada dolok na di luat Galilea, songon naung tinonahon ni Jesus tu nasida. 28:17 Jadi dung diida nasida Ibana, disomba ma Ibana; alai na ganggu do roha ni na deba. 28:18 Dung i didapothon Jesus ma nasida, didok ma: Nunga sahat tu Ahu nasa huaso na di banua ginjang dohot na di tano on. 28:19 Laho ma hamu, podai hamu ma saluhut bangso, didi hamu ma nasida tubagasan Goar ni Ama. Anak dohot Tondi Parbadia! 28:20 Laos ajari hamu ma nasida mangaradoti nasa hata naung hupatikkon tu hamu. Ai ida ma, sai na dongananku do hamu ganup ari, rasirasa ro ajal ni hasiangan on!
1:1 On ma mula ni barita na uli ni Jesus Kristus. 1:2 Hombar tu na tarsurat di panurirang Jesaya: "Husuru ma suruanki, patujolo ni bohim, sipature sidalananmi!" 1:3 "Soara ni na manjoujou di halongonan: Pature hamu ma dalan di Tuhan i; pahornop hamu ma sidalananna i!" 1:4 Di halongonan do si Johannes mandidihon jala manjamitahon pandidion hamubaon ni roha, laho pasesahon dosa. 1:5 Jadi ruar ma sude pangisi ni tano Judea ro di sude halak Jerusalem manopot ibana jala dipandidihon do nasida di batang aek Jordan, dung ditopoti be dosana. 1:6 Ianggo si Johannes i, imbulu ni unto do ulosna jala hulingkuling do hohosna, angka sihapor dohot situak ni loba do sipanganonna. 1:7 On do jamitana; Na ro ma sian pudingku na gumogo sian ahu; na hurang tama do ahu paunduk ahu mangkarhari tali ni sipatuna. 1:8 Aek do hudidihon tu hamu; alai Tondi Parbadia do didihononna tu hamu. 1:9 Uju i ma ro Jesus sian Nasaret, na di luat Galilea, jadi tardidi ma Ibana di aek Jordan, dididi si Johannes. 1:10 Di na hehe Ibana sian aek i, pintor diida si Johannes ma mungkap langit, jadi songgop ma Tondi i songon darapati tu Ibana. 1:11 Jala masa ma soara sian ginjang i, na mandok: Ho do Anak haholongan ni rohangku; lomo do rohangku di Ho! 1:12 Dung i mamintor ditogihon Tondi i ma Ibana tu halongonan. 1:13 Asa di halongonan ma Ibana leleng ni opatpulu ari diunjuni sibolis i; rap dohot angka binatang do Ibana disi, dung i ro ma angka surusuruan marhobasi di Ibana. 1:14 Alai dung dihurungkon si Johannes, ro ma Jesus tu luat Galilea manjamitahon barita na uli ni Debata. 1:15 Ninna do: Nunga dapot tingkina; nunga songgop harajaon ni Debata. Pauba hamu ma rohamuna, jala haporseai hamu ma barita na uli i! 1:16 Dung i di na mardalani Ibana di topi ni tao Galilea, diida ma si Simon dohot si Andreas, dongan saama ni si Simon, na sumampakkon jalana tu tao i, ai panjala do nasida. 1:17 Jadi didok Jesus ma tu nasida: Ihuthon hamu Ahu; bahenonku do hamu sijala jolma! 1:18 Pintor ditadingkon nasida ma jala i, laos mangihuthon Ibana. 1:19 Jadi dung dumao otik didalani sian i, diida ma si Jakobus, anak ni si Sebedeus, dohot si Johannes, donganna saama i, di bagasan parau do nang nasida patureturehon jalanasida. 1:20 Dung i manigor dijou ma nasida, gabe ditadingkon nasida ma amanasida, si Sebedeus na di parau i rap dohot angka anak gajianna, laos ro do nasida mangihuthon Ibana. 1:21 Dung i dibongoti nasida ma huta Kapernaum, jadi manigor tu parguruan ma Ibana di ari Sabbat, laho mangajari. 1:22 Gabe longang do rohanasida umbege podana, ai na marsahala do pangajarionna di nasida, ndada songon angka sibotosurat. 1:23 Jala tongon ma adong di parguruannasida sada halak partondi na hodar na mangangguhi. 1:24 Ninna do: O Jesus, na sian Nasaret; marhua Ho tu hami! Na ro do Ho hape mangago hami! Hutanda do Ho; na badia ni Debata do Ho! 1:25 Alai disonggahi Jesus do ibana, didok ma: Sip ho! Ruar ma ho sian ibana! 1:26 Gabe disarat tondi na hodar i ma ibana, pola gogo soarana manjoujou, laho ruar sian ibana. 1:27 Jadi longang ma rohanasida saluhutna, pola masisungkunan nasida, angka didok ma: Na beha do on? Poda na imbaru do on! Ai gari angka tondi na hodar dipaksa mardongan sahala, gabe dioloi do Ibana. 1:28 Dung i pintor sar ma baritana tu sandok luat Galilea i. 1:29 Dung ruar sian parguruan i, manigor dibongoti nasida ma jabu ni si Simon dohot si Andreas raphon si Jakobus dohot si Johannes. 1:30 Alai na peak do simatua boru ni si Simon i panepaneon, jadi manigor ditaringothon ma i tu Ibana. 1:31 Jadi didapothon ma ibana, dijama ma tanganna pahehehon; dung i ditadingkon panepane i ma ibana, jadi dihobasi ma di nasida. 1:32 Alai dung bot, dung sundut mata ni ari, masiboan na marsahitna be ma halak tu jolona, ro di na sinonggopan ni angka sibolis. 1:33 Gabe sude nasida na sahuta i marpungu di jolo ruma i. 1:34 Jadi torop do angka na hansitan na marragamragam sahitna dipamalum jala torop sibolis dipabali; alai ndang diloas angka sibolis i paboahon, naung ditanda nasida Ibana. 1:35 Dung i manogotna i, borngin situtu dope, hehe ma Ibana tu balian, laho martangiang tu na lungun. 1:36 Jadi diihuthon si Simon dohot angka donganna ma Ibana tusi. 1:37 Jadi dung jumpangsa, didok nasida ma mandok Ibana: Sude halak mangalului Ho! 1:38 Alai didok Ibana ma tu nasida: Beta ma hita tu na asing, tu angka lumban na humaliang an, asa dohot disi Ahu marjamita. Ai ala ni i do umbahen na ro ahu! 1:39 Laos laho ma Ibana marjamita tu parguruannasida na di liat Galilea jala dipabali angka sibolis. 1:40 Jadi ro ma sada halak na huliton tu jolona, dielehelek jala disomba ma Ibana huhut mandok: Molo na olo Ho, tarpamalum Ho do ahu! 1:41 Jadi asi ma rohana, disurdukkon ma tanganna, dijama ma ibana, laos didok ma: Na olo do Ahu; ias ma ho! 1:42 Jadi pintor longkang ma hulit i sian ibana, gabe ias ma dagingna. 1:43 Dung i gogo ma ibana dipopai jala manigor dipalaho ma. 1:44 Ninna ma mandok ibana: Jaga ho; so tung dipaboa ho i tu manang ise! Alai laho ma ho, patuduhon ma dirim tu malim, dung i pelehon ma na pinatikkon ni si Musa, ala naung malum ho, bahen panindangion tu nasida! 1:45 Alai dung laho ibana, dipungka ma pararathonsa, dipasar ma hata i, pola so tarbahen Ibana be bongot tu huta i di na patar; jadi di ruar, di inganan na sumoding nama Ibana. Laos ro do halak sian desa na ualu i manopot Ibana.
2:1 Asa dung na nia lelengna, diulakkon Jesus ma laho tu huta Kapernaum, jala tarbege ma, naung di jabu Ibana. 2:2 Jadi torop ma marpungu tusi, pola so hasiatan be ro di alamanna, gabe dipaboa ma tu nasida hata i. 2:3 Dung i ro ma na mamboan sada halak na sarion tu Ibana; opat do na mangusungsa. 2:4 Alai ndang hajonohan nasida Ibana, ala ni natorop i, gabe diloha nama tarup ni ingananna i; jala dung diungkap i, ditantan ma sian i podoman hapeahan ni na sarion i. 2:5 Marnida haporseaonnasida i Jesus, ninna ma mandok na sarion i: O anaha, nunga sesa angka dosami! 2:6 Alai adong do hundul disi deba sibotosurat, angka na mandok di bagasan rohanasida: 2:7 Na boha do hata ni On! Na mangaleai Debata do Ibana. Sasada Debata do na tuk manesa dosa! 2:8 Alai manigor diboto Jesus ma di bagasan rohana parhusarion ni rohanasida, jadi didok ma tu nasida: Boasa songon i pingkiran ni rohamuna? 2:9 Dia do ummomo? Dohonon tu na sarion i: Nunga sesa angka dosami! Manang dohonon: Hehe ma ho, boan ma podomanmi; mardalan ma ho? 2:10 Alai asa diboto hamu, marhuaso do Anak ni jolma i di tano on manesa angka dosa (didok ma tu na sarion i:) 2:11 Ahu mandok tu ho: Hehe ma ho, boan ma podomanmi; laho ma muli! 2:12 Jadi hehe do ibana, pintor dibuat ma podomanna i laho tu balian, dipanotnoti nasida sude; pola tarhalomong rohanasida saluhutna, gabe dipuji ma Debata, angka ninna ma: Ndang dung dope huida hami na songon i! 2:13 Dung i diulakkon ma laho tu tao i, jadi didapothon saluhut natorop i ma Ibana, gabe diajari ma nasida. 2:14 Dung i di na mamolus Ibana, diida ma si Lepi, anak ni si Alpeus, hundul di parbeoan, jadi didok ma tu ibana: Ihuthon Ahu! Jadi hehe do i tutu mangihuthon Ibana. 2:15 Dung i mangan ma Ibana di bagasna i, jadi torop sijalobeo dohot pardosa mangangkupi Jesus dohot angka siseanna mangan; tung torop do angka na mangihuthon Ibana. 2:16 Alai diida angka sibotosurat na sian Parise i do Ibana mangan raphon angka pardosa dohot sijalobeo, gabe didok nasida ma tu angka sisean i: Mangan minum do Ibana hape raphon angka sijalobeo dohot pardosa! 2:17 Alai umbege i Jesus, ninna ma mandok nasida: Apala na ringkot di angka na hisar pandaoni i, di angka na hansitan do! Ndang na ro Ahu manjou angka partigor, angka pardosa do! 2:18 Alai somal do angka sisean ni si Johannes marpuasa, songon i angka Parise; jadi ro ma nasida mandok tu Ibana: Boasa marpuasai angka sisean ni si Johannes nang sisean ni angka Parise; ia angka siseanmi, ndang marpuasa? 2:19 Gabe didok Jesus ma tu nasida: Tung tarbahen ma pandongani ni pangoli i marpuasa, saleleng rap dope dohot nasida pangoli i? Sapanjang di lambungnasida dope pangoli i, ndang tarbahen nasida marpuasa. 2:20 Alai na ro ma arina, alaponna ma disi Pangoli i sian tongatonganasida i; disi ma nasida marpuasa. 2:21 Ndang adong na mandungkaphon abit na imbaru tu abit naung mumut; ai ribak do muse sian i na nidungkaphon na songon i, na imbaru sian na buruk i, jadi lam ganda ma na maribak i. 2:22 Jala ndang dipainding jolma tuak anggur siraruan tu inganan naung buruk, ai puntason ni tuak anggur i do ingananna i, gabe mago ma tuak anggur i nang ingananna i. 2:23 Dung i mamolus ma Ibana sian tonga ni hauma, tongon di ari Sabbat, jadi dipungka angka siseanna ma manggotili angka biur, di na mardalan i. 2:24 Dung i didok angka Parise ma tu Ibana: Bereng ma na binahennasida, na so jadi di ari Sabbat! 2:25 Gabe ninna ma mandok nasida: Ndang dung dope dijaha hamu huroha na binahen ni si Daud, uju tarsosak ibana, di na male ibana dohot angka donganna sauduran? 2:26 Ai dibongoti do joro ni Debata, uju si Abiatar sintua ni malim, jala dipangan do roti na marhadohoan, na so jadi panganon ni manang ise nian, ia so holan angka malim i, laos diparlehon do sian i tu angka donganna. 2:27 Dung i didok ma tu nasida: Ala ni jolma i do, umbahen na diaturhon ari Sabbat; ndang ala ni ari Sabbat, umbahen na ditompa jolma i. 2:28 Asa guru di Anak ni jolma i do nang ari Sabbat!
3:1 Dung i dibongoti muse ma parguruan i. Jadi adong ma disi sada halak naung mate tanganna sambariba. 3:2 Jadi mangonggop ma rohanasida di Ibana, manang na olo Ibana pamalumhonsa di ari Sabbat, asa anggiat taraluhon nasida Ibana. 3:3 Alai didok ma mandok halak partangan na mate i: Hehe ma ho tu tongatonga on! 3:4 Laos didok ma tu nasida: Dia do na patut ulaon di ari Sabbat, mambahen na denggan manang mambahen na jahat, pangoluhon hosa manang mambunusa? Alai mangkohom do anggo nasida. 3:5 Jadi rimas ma rohana manganolnol nasida huhut marsak ala ni tangkang ni rohanasida. Jala didok ma tu jolma i: Patoltol ma tanganmi! Jadi dipatoltol ma tutu, gabe sumuang hisar ma tanganna i. 3:6 Alai laho tu balian angka Parise i, pintor martuptup ma nasida rap dohot angka na mangihuthon si Herodes dompak Ibana, manang beha bahenonnasida mamusa Ibana. 3:7 Dung i sumurut ma Jesus rap dohot angka siseanna tungkan tao i, jadi mansai torop halak sian luat Galilea dohot Judea mangihuthon Ibana. 3:8 Songon i sian Jerusalem, nang sian luat Idumea dohot sian ipar ni Jordan ro di angka na humaliang Tirus dohot Sidon; mansai torop angka naung umbege godang ni na binahenna i, ro mandapothon Ibana. 3:9 Jadi didokkon ma angka siseanna, asa diparade parau sada di Ibana ala ni natorop i, asa unang disosak nasida Ibana. 3:10 Ai mansai torop do nasida dipamalum, gabe ro sude na porsuk parniahapanna tahop manjama Ibana. 3:11 Jadi marsomba be do tu Ibana angka tondi na hodar, disi diida nasida Ibana, huhut manjoujou: Anak ni Debata do Ho! 3:12 Alai gogo do nasida dipopai, asa unang dipapatar Ibana. 3:13 Dung i nangkok ma Ibana tu sada dolok, jadi dijou ma tu jolona angka silomo ni rohana, gabe ro be ma nasida. 3:14 Jadi dipillit ma nasida sampuludua, na naeng gabe donganna, jala na naeng suruonna marjamita, 3:15 huhut marhuaso pabalihon angka sibolis. 3:16 Asa dipilliti ma na sampuludua i: Ia si Simon digoari do huhut si Petrus. 3:17 Dungkon ni i si Jakobus, anak ni si Sebedeus i, dohot si Johannes, dongan saama ni si Jakobus i; laos digoar do nasida Boanerges, na mandok: Anak ni ronggur. 3:18 Tole muse si Andreas, Pilippus, Bartolomeus, Mateus, Tomas, Jakobus, anak ni si Alpeus, si Tadeus, si Simon, na sian huta Kana, 3:19 dohot si Jude Iskariot, parjehe i. 3:20 Dung i muli ma Ibana, gabe rongom muse ro natorop i, pola sundat nasida mangan. 3:21 Jadi umbege i angka sisolhotna, ro ma nasida mangalap Ibana, ai ninna nasida do: Na rintik do Ibana. 3:22 Ia angka sibotosurat, naung tuat sian huta Jerusalem, didok do: Na sibolison do Ibana, jala induk ni angka sibolis i do dipangasahon, laho pabalihon angka sibolis. 3:23 Jadi dijou ma nasida tu jolona, marumpama ma Ibana mandok tu nasida: Tagamon ma pabalion ni sibolis i donganna sibolis? 3:24 Ai molo marsalisi sada harajaon sama dirina, ndang na hot harajaon i. 3:25 Jala molo marsalisi dongan sabagas sama nasida, ndang na hot na sabagas i. 3:26 Asa molo hehe sibolis i mangalo dirina jala marsalisi sama ibana, ndang tarbahen hot be ibana, na laho suda nama. 3:27 Ndang habongotan halak jabu ni ulubalang, laho mangarampas ugasanna, anggo so jumolo diihoti ulubalang i; dung pe i, asa tarbuatsa ugasanna. 3:28 Situtu do hatangkon: Tarsesa pe nasa dosa ni angka jolma ro di nasa ragam ni panginsahionnasida na dompak Debata; 3:29 anggo na mangaleai Tondi Parbadia i, ndang dapotsa hasesaan ni i nang di tingki sogot; parutang dosa sisalelenglelengna nama ibana. 3:30 Ala didok nasida: Partondi na hodar do Ibana. 3:31 Dung i ro ma inana dohot angka anggina, jadi di ruar nama nasida jongjong, gabe disuru ma na manjou Ibana. 3:32 Na hundul do natorop i humaliang Ibana, gabe didok ma: Di alaman an do inangmu dohot angka anggim ro di angka ibotom; diusoi do Ho! 3:33 Alai ninna ma mangalusi nasida: Ise do goaron dainang, jala ise do dohonon angka anggingku? 3:34 Jala dibereng ma angka na hundul humaliang Ibana, ninna ma: Angka on do dainang dohot angka anggingku! 3:35 Ai na mangulahon lomo ni roha ni Debata, i do anggingku, i do ibotongku, i do dainang!
4:1 Jadi diulahi ma mangajari di topitao i, gabe marpungu ma mansai torop halak tu jolona, pola dibongoti parau sada na di tao i bahen juguhanna; di topi tao i do anggo natorop i sudena. 4:2 Jala godang ma dipodahon tu nasida marhite sian umpama, didok ma di pamodaionna i: 4:3 Tangihon hamu ma! Na laho ma sahalak panabur manaburhon bonina. 4:4 Jadi di na manabur i ibana, adong ma deba na mamiltik tu dalan, gabe ro ma angka pidong mamargutisa. 4:5 Anggo na deba tu tano na batu on do madabu, di na so sadia hapal tano, jadi pintor tubu ma, dibahen na so bagas tano disi. 4:6 Alai di na lam timbo mata ni ari, rahar ma, gabe mate, ala so marurat. 4:7 Anggo na deba tu parsihupian do madabu, laos tubu do angka sihupi i jala dipisat do eme i, gabe ndang marparbue. 4:8 Alai na deba nari tu tano na denggan i do madabu, gabe saut ma diparbuehon parbue na mangolu jala na olo ganda, ro di tolupulu lompit, onompulu lompit dohot saratus lompit. 4:9 Laos didok ma: Hamu angka parpinggol na marbinege, pinggol hamu ma i! 4:10 Dung i dung laho natorop i, disungkun angka donganna rap dohot na sampuludua i ma Ibana siala angka umpama i. 4:11 Gabe didok ma tu nasida: Bulus do dilehon anggo tu hamu hahomion ni harajaon ni Debata; alai marhite sian umpama do sahat ni i sude tu angka na di balian, 4:12 asa unang saut diida nasida, nang pe tangkas dibereng; asa unang diantusi, nang pe torang dibege; asa unang mulak rohanasida, unang sesa dosanasida. 4:13 Laos didok ma tu nasida: Ndang diantusi hamu hape umpama ondeng! Beha ma antusanmuna umpama i sudena? 4:14 Hata i do disaburhon panabur i. 4:15 Jala angka on do na sinaburhon tu dalan i: Ia disi disaburhon hata i, dung dibege nasida, pintor ro ma sibolis i, dirampas do hata na sinaburhon tu rohanasida. 4:16 Suang songon i, angka on ma na sinaburhon tu tano na batu on: Ia disi dibege hata i, manigor las ma rohana manjalosa; 4:17 alai ndang marurat di bagasan rohanasida, parsatongkinan do nasida, jadi molo masa haporsuhon manang pangaleleon siala hata i, pintor targasip do rohanasida. 4:18 Asing muse angka na sinaburhon tu parsihupian, i ma angka naung umbege hata i. 4:19 Alai masuk huhut tu rohanasida pangkolsohon di angka na di hasiangan on dohot hamoraon sipangansi i ro di hisaphisap na asing i, jala angka i do mamisati hata i, laos so marparbue. 4:20 Dung i angka on do na sinaburhon tu tano na denggan: Angka na umbege jala na manjangkon hata i, gabe marparbue, tolupulu lompit na deba, onompulu lompit na deba saratus lompit na deba. 4:21 Dung i didok ma tu nasida: Ai dipasang do ulaning palito laho pajongjongkonsa tu toru ni ampang manang tu toru ni parate; nda bahenonna i nian tu atas parpalitoan? 4:22 Ai ndang adong na holip na so sipapataron sogot; jala ndang adong na masa di sihabunian, na so ro tu hatorangon muse. 4:23 Hamu angka parpinggol na marbinege, pinggol hamu ma i! 4:24 Laos didok ma tu nasida: Manat ma hamu di na binegemuna; ai parsuhatonmuna do sisuhathononhon tu hamu, tambaonna dope tahe tu hamu! 4:25 Ai tu ganup paradongan lehonon do. Alai sibuaton do sian na so paradongan nang na di ibana hian. 4:26 Dung i didok ma: On ma pangalaho ni harajaon ni Debata: Songon pambahen ni halak na manaburhon boni tu haumana. 4:27 Na modom do ibana bornginna jala dungo ia arianna; na martumbur do anggo boni i laos marbuhutano, so pamotoan ni parhauma i. 4:28 Ai sian gogona sandiri dipatubu tano i jumolo hauna, dung i biurna, dung i eme na porngis i di bagasan biurna i. 4:29 Alai disi dilehon parbuena, mamintor disuru ma panabi, ai nunga ro gotilon. 4:30 Dung i didok ma: Tu aha ma pasumanonta harajaon ni Debata; tu dia ma umpamahononta? 4:31 Suman tu batu ni siarum ma! Ai bonina na sinaburhon tu tano, i do na ummetmet sian nasa batu ni suansuanan. 4:32 Alai dung sinaburhon, simbur ma i tubu, gabe tumimbo sian nasa ingkau rata jala balga ma dangkana, pola tarbahen do pidong na martongatonga langit marasar di linggomna i. 4:33 Jadi marhitehite lan umpama sisongon on dihatahon nasida hata i, marguru tu na tarjangkon nasida. 4:34 Alai ndang adong dihatahon tu nasida so marhitehite umpama; alai pulik do dipatorang saluhutna tu siseanna. 4:35 Jadi laos di na sadari i, dung bot ari, didok ma tu nasida: Beta marparau ma hita tu bariba an! 4:36 Jadi dipalaho nasida ma natorop i, dijangkon ma Ibana songon i tu bagasan parau i; jala adong dope angka parau na asing udur dohot nasida. 4:37 Dung i masa ma habahaba na gogo situtu, jadi disampakkon ma angka galumbang i tu bagasan parau i, maradu digohi parau i. 4:38 Na modom do anggo Ibana di atas halangulu sada, tartungkan pudipudi ni parau i; gabe disungguli nasida nama Ibana, didok ma tu Ibana: Ale Guru! Ndang disarihon roham hita mago? 4:39 Jadi hehe ma Ibana, hona hata ma alogo i dibahen, didok ma tu tao i: Sip ma! So! Jadi so ma alogo i jala menak situtu ma. 4:40 Laos didok ma tu nasida: Boasa songon i biar rohamuna? Dia do umbahen soada haporseaon di hamu? 4:41 Jadi hatahutan situtu ma nasida jala masipandohan ma: Halak dia do On? Guru dokna do hape alogo ro di tao i!
5:1 Dung i sahat ma nasida tu bariba ni tao i, tu luat ni halak Gadara. 5:2 Jadi di na ruar Ibana sian parau i, pintor ro ma mandapothon Ibana sahalak na ro sian parbandaan, na manjujung tondi na hodar. 5:3 Di parbandaan do ibana maringanan, jala ndang adong na tuk tumali ibana, nang pe dirantei. 5:4 Ai nunga jotjot dirantei tanganna dohot patna, alai ditostosi do angka rante na di tanganna dohot na di patna i; ndang tarpatunduk jolma ibana. 5:5 Jala manongtong arian dohot borngin di parbandaan nama ibana manang di angka dolokdolok mangangguhangguk huhut mambalbalhon batu tu dagingna. 5:6 Di na tinatapna i Jesus sian na dao, ro ma ibana marlojong jala marsinggang tu jolona. 5:7 Laos marsoara na gogo ma ibana manjoujou, ninna ma: Marhua Ho tu ahu, Jesus, Anak ni Debata na tumimbul! Huelehelek Ho marhitehite Debata: Unang ahu arsahi! 5:8 Ai nunga didok tu ibana: Ruar ma ho, tondi na hodar, sian halak on! 5:9 Dung i disungkun ma ibana: Ai ise goarmu? Gabe didok ma mangalusi: Loksa do goarhu, ai torop do hami. 5:10 Jala mansai dielehelek ma Ibana, anggiat unang nasida dipabali sian na saluat i. 5:11 Alai adong ma disi, di robean i babi sapunguan na balga, na manjampali. 5:12 Jadi dielehelek nasida ma Ibana, ninna ma: Suru ma hami tu bagasan babi an, asa i hubongoti hami! 5:13 Dioloi ma nasida, gabe ruar ma angka tondi na hodar i, dibongoti ma angka babi i, jadi mardobur ma na sapunguan i sian tolping i tu tao i; hirahira duaribu do toropna, gabe mate mogap ma di tao i. 5:14 Alai na maporus do angka parmahan i, dibaritahon ma i tu angka na di huta dohot na di angka ladang. Jadi ro ma angka i manangkasi na masa i. 5:15 Jala ro ma nasida tu Jesus, jadi mabiar ma nasida marnida na sinonggopan ni sibolis nasailaonna i, hasandaran ni na saloksa i, ai nunga hundul ibana marulos jala marroha. 5:16 Jala dipajojor angka na marnidasa ma tu na ro i, naung masa tu hasonggopan ni sibolis i dohot na taringot tu babi i, 5:17 gabe pintor dielehelek ma Ibana, asa sumurut sian luatnasida. 5:18 Jadi laho mambongoti parau i Jesus, diparhurajai hasandaran ni angka sibolis i ma Ibana, asa dongananna Ibana nian. 5:19 Alai ndang diloas, didok ma tu ibana: Muli ma ho tu angka sisolhotmu, pajojor ma tu nasida godang ni na binahen ni Tuhan i tu ho dohot pangasina di ho! 5:20 Dung i laho ma ibana dipaboaboa ma di Sisampuluhuta i godang ni sude na binahen ni Jesus tu ibana, gabe longang ma saluhutna. 5:21 Jadi dung marparau Jesus muse tu bariba i, dirongomi natorop i Ibana na di topi tao i dope. 5:22 Jala ro ma sintua ni parguruan i sahalak, na margoar si Jairus; jadi disi diida Jesus, marsinggang ma ibana tu lambung patna. 5:23 Diparhurajai ma Ibana, ninna huhut: Na matemate ne do nuaeng borungku; sai ro ma Ho jolo mangampehon tanganmu tu ibana, asa malua jala mangolu! 5:24 Jadi hehe ma Ibana, didongani ma, jala torop ma halak mangihuthon, pola disosak nasida Ibana. 5:25 Dung i adong ma disi parompuan sada na marsahithon bulan, leleng ni sampuludua taon. 5:26 Nunga tung godang ditaon binahen ni torop pandaoni jala sude artana dipasuda tusi; laos so marniula, lam tu pasangna tahe sahitna i. 5:27 Jadi dung dibege barita ni Jesus, ro ma ibana rap dohot natorop i sian pudi, dijama ma ulosna. 5:28 Ai ninna rohana do: Asal hujama nanggo ulosna i, malum do hilalaonku. 5:29 Jadi pintor montok ma mudar i; laos dihilala do di dagingna, naung malua ibana sian na niaena i. 5:30 Ia Jesus mamintor diboto do, naung adong hagogoon ruar sian Ibana, jadi dipahusor ma dirina di tongatonga ni natorop i, ninna ma: Ise i na manjama uloshi? 5:31 Gabe didok angka siseanna ma mandok Ibana: Diida Ho do panosak ni natorop on di Ho, gabe didok Ho dope: Ise manjama Ahu? 5:32 Alai dibereng ma humaliang mananda na mambahensa. 5:33 Gabe ro ma parompuan i, angka dotdot ma ibana dibahen biar ni rohana, marningot naung masa tu ibana i; laos marsinggang ma ibana tu jolona, sintong ma dipaboa saluhutna i. 5:34 Alai didok ma tu ibana: Dipalua haporseaonmi do ho, inang! Mardame ma ho laho! Sai malua ma ho sian parniaeanmi! 5:35 Mangkatahon i dope Ibana, nunga ro angka na sian bagas ni sintua i mandok: Nunga mate borumi; aha be lojaanmu Guru i! 5:36 Alai diparhamuda Jesus do hata ni na ro i, didok ma tu sintua i: Unang ho mabiar, asal ma porsea! 5:37 Jadi ndang diloas manang ise mangihuthon Ibana, dungkon ni si Petrus, Jakobus dohot Johannes, dongan saama ni si Jakobus i. 5:38 Sahat ma nasida tu bagas ni sintua i, jala diberengi Ibana ma na gaor i, i ma angka na tumatangis jala gogo mangandungi. 5:39 Dibongoti ma, didok ma tu nasida: Boasa songon i gaor hamu jala tumatangis? Ndang na mate si betet i: na tarpodom do i! 5:40 Jadi diparengkeli nasida ma Ibana. Alai diparuar ma nasida saluhutna, diarahon ma ama dohot ina ni dakdanak i dohot donganna hian, dibongoti ma bilut hapeahan ni dakdanak i. 5:41 Dung i ditangkup ma tangan ni dakdanak i, didok ma tu ibana: Talita kumi! Astuanna: O Butet! Ahu mandokkon ho hehe! 5:42 Dung i mamintor hehe ma boruboru i laos mardalandalan. Marumur sampuludua taon do ibana, gabe tarhalomong situtu ma nasida. 5:43 Alai gomos ma nasida dipopai, unang diboto manang ise i; laos didokkon ma lehononna mangan.
6:1 Jadi hehe ma Ibana sian i, laho tu huta hagodanganna jala diihuthon angka siseanna ma Ibana. 6:2 Jadi jumpa ari Sabbat dipungka ma mangajari di parguruan, jadi longang ma roha ni natorop na umbegesa, angka ninna ma: Sian dia do i tu Ibana? Jala hapistaran dia do i na nilehon tu Ibana? Ai ulaon hagogoon do hope pinatupa ni tanganna! 6:3 Nda Ibana tukang i, tubu ni si Maria i, haha ni si Jakobus, Josep, Jude dohot Simon? Nda di lambungta angka ibotona? Jadi targasip ma nasida mida Ibana. 6:4 Alai ninna Jesus ma mandok nasida: Tung na so marsangap do panurirang ianggo di luat hagodanganna, di angka donganna sabutuha dohot di bagasna. 6:5 Jadi ndang tarpatupasa disi ulaon hagogoon, dungkon ni na niampehonna tanganna tu otik halak na hansitan, laho pamalum nasida. 6:6 Gabe longang ma rohana, ala so porsea nasida. Laos diliati ma angka huta di na saluat i mangajari. 6:7 Dung i dijou ma na sampuludua i jumonok, dipungka ma marsuru nasida marduadua, dilehon ma tu nasida huaso mamaksa angka tondi na hodar. 6:8 Jala diorai ma boanonnasida manang aha tu tongandalan, manang roti manang hajut, manang hepeng di hohos pe, nda holan tungkot. 6:9 Alai denggan do marsipatu hamu jala ndang jadi pangkeonmuna bajubaju dua, ninna. 6:10 Laos didok do tu nasida: Ia dung dibongoti hamu jabu, disi ma hamu mian, paima borhat muse. 6:11 Molo adong isi ni huta na so olo manjangkon hamu jala ndang ditangihon hatamu, tadingkon hamu ma i, laos pirpirhon hamu ma nang orbuk na lohot di totmuna, bahen panindangion tu nasida! 6:12 Jadi borhat ma nasida marjamita mandokkon paubahon roha. 6:13 Jala torop do sibolis dipabali nasida; lan na hansitan dimiahi gabe malum dibahen. 6:14 Jadi tarbege ma i tu raja Herodes, ai nunga tarbarita goar ni Jesus, pola didok: Nunga hehe si Johannes pandidi sian angka na mate; i do alana, umbahen parhagogoon sisongon i Ibana. 6:15 Adong ma na mandok si Elia do Ibana! Na asing muse mandok: Panurirang do Ibana suman tu angka panurirang najolo. 6:16 Alai anggo si Herodes, dung dibege i, sai ninna do: Si Johannes, naung hugotap i uluna, i do dipahehe. 6:17 Ai disuru si Herodes i do najolo na manangkup si Johannes dohot mangkurungkon siala si Herodias, pardihuta ni anggina si Pilippus, naung nilangkupna. 6:18 Ai didok si Johannes do tu si Herodes: Ndang jadi di ho anggi borumi! 6:19 Jala hosom ma roha ni si Herodias i di ibana; sai naeng bunuonna do ibana, alai ndang tarpatupasa. 6:20 Ai na mabiar do si Herodes mida si Johannes, ala na ditanda do ibana halak na tigor roha jala na bontor, jadi diondingi do ibana, jala bohabohaon do rohana umbege jamitana, huhut dihalomohon hatana. 6:21 Dung i jumpang ma ari na une, i ma ari hatutubu ni si Herodes, di na mambahen panganon ujuan ibana di angka na sangap dohot di angka induk ni soldadu ro di angka na raja sian halak Galilea. 6:22 Jadi bongot ma boru ni si Herodias tu bagasan manortor; jadi solo ma mata ni si Herodes dohot angka donganna disi, gabe didok raja i ma tu boru i: Pangido sian ahu manang dia lomo ni roham; lehononku do i tu ho! 6:23 Laos diuarihon do tu boruboru i: Manang dia pe sipangidoonmi, ro di na satonga ni harajaonki, sai na lehononku do! 6:24 Jadi ruar ma boruboru i mandok tu inangna: Aha ma pangidoonku? Jadi didok ibana ma: Ulu ni si Johannes pandidi ma! 6:25 Jadi humalaput ma ibana bongot tu adopan ni raja i, dipangido ma: Saonari ma lehon tu ahu di atas pinggan ulu ni si Johannes pandidi! 6:26 Marsak situtu ma roha ni raja i, alai ala ni angka uarina dohot ala ni angka na ginokkonna i, ndang olo ibana paujathon boruboru i. 6:27 Jala mamintor disuru raja i ma hupasna sada, didokkon ma ibana mangalap ulu ni si Johannes i. Gabe laho ma hupas i manggotap uluna di bagasan hurungan i. 6:28 Jala diboan ma uluna i di atas pinggan, dipasahat ma tu anak boru i, jala boruboru i ma mangalehonsa tu inangna. 6:29 Asa dung dibege angka sisean ni si Johannes na masa i, ro ma nasida, dibuat ma bangkena jala ditanom. 6:30 Dung i marpungu ma angka apostel i tu jolo ni Jesus, dipaboa ma tu Ibana sasude na niula jala na niajarhonnasida. 6:31 Gabe didok Ibana ma tu nasida: Sumurut ma hamu, tungkan na suhi an, pahosahon saotik! Ai torop do halak marlaho ro tu nasida; gari mangan, gari so sadihari. 6:32 Dung i borhat ma nasida marparau sumurut tu inganan na suhi. 6:33 Jadi torop do marnida jala mananda nasida na borhat i, gabe sian darat ma marlojong nasida sian saluhut angka huta i pajolohon tusi. 6:34 Asa di na tardarat Jesus, diida ma punguan na bolon i, gabe asi ma rohana mida nasida, ai songon birubiru nasida na so marparmahan, gabe godang ma dipodahon tu nasida. 6:35 Jadi di na mareak bot ari, didapothon angka siseanna ma Ibana mandok: Na lungun do inganan on jala guling bot do nuaeng. 6:36 Pamuli ma nasida, asa sanga nasida tu angka lumban humaliang dohot tu angka huta manuhori sipanganonnasida. 6:37 Gabe didok Ibana ma mangalusi nasida: Lehon hamu ma nasida mangan! Jadi ro ma nasida: Asa hami nama laho manuhori roti arga duaratus uang silehononnami panganonnasida? 6:38 Alai didok ma tu nasida: Piga do roti na di hamu? Laho ma hamu manangkasi! Jadi dung diboto, didok ma: Lima do, angkup ni dua dengke! 6:39 Dung i didokkon ma nasida sudena hundul di duhutduhut na rata i, marsasapanganan. 6:40 Jadi marpanggungpanggung ma nasida hundul marsasaratus dohot marlimalimapulu. 6:41 Jala ditiop Ibana ma roti na lima i dohot dengke na dua i, ditailihon ma tu ginjang laho mamasumasu, dung i dibagi ma angka roti i, diparlehon ma tu angka siseanna, asa disagihon tu angka nasida; nang dengke na dua i pe dibagi do di nasida saluhutna. 6:42 Gabe mangan be ma sasudena i, jala bosur be do. 6:43 Jadi dipapungu nasida ma angka ebaeba, gok sampuludua ampang; songon i do taringot tu dengke i. 6:44 Ia torop ni na manganhon roti i, limaribu baoa do. 6:45 Dung i tagan paulakkon natorop i dope Ibana, mamintor didasdas ma angka siseanna mambongoti parauna, pajolohon tu bariba, tu Betsaida. 6:46 Jadi dung dipamuli nasida, laho ma Ibana tu dolok martangiang. 6:47 Jadi dung bot ari, di tonga tao do parau i; sasada Ibana nama di darat. 6:48 Jala diida ma tarsosak nasida na marluga i dibahen alogo na alo tu nasida, jadi didapothon ma nasida, di na martahuak manuk parjolo sahali; mardalan di sisik ni tao do Ibana, jala songon na naeng salpuanna nasida. 6:49 Alai marnida Ibana na mardalan di sisik ni tao i, dirimpu nasida tondi, pola mangangguhi. 6:50 Ai sude do nasida marnida Ibana jadi hatahutan be ma. Alai pintor dipanghulingi Ibana ma nasida, didok ma: Pos ma rohamuna! Ahu do on; unang ma hamu mabiar! 6:51 Laos manaek ma Ibana tu nasida tu bagasan parau i, dung i menak ma alogo i; gabe mansai tarhalomong situtu ma nasida. 6:52 Ai ndang mangarti dope nasida marningot roti i; pir do rohanasida. 6:53 Jadi taripar ma nasida tondongkon ni luat Genesaret jala dipadarat ma. 6:54 Jala dung ruar nasida sian paraunasida, manigor ditanda halak do Ibana. 6:55 Gabe humalaput ma nasida sian sandok luat na humaliang i, diusung ma angka na hansitan di podomanna be tu manang dia Ibana dibege nasida. 6:56 Asa laho mambongoti lumban manang huta manang sosor Ibana, disi ma dipeakkon di alamanna angka na hansitan i, jadi dielehelek do Ibana, asa diloas jamaonnasida nanggo rambu ni ulosna, jadi sude na manjamasa dipamalum.
7:1 Dung i rap marpungu ma tu jolona angka Parise dohot deba sian angka sibotosurat, naung ro sian huta Jerusalem. 7:2 Jadi diida nasida ma deba sian angka siseanna, na jorjor mangan roti, so jolo marburi. 7:3 Ai anggo halak Parise nang nasa Jahudi, ndang olo mangan, ia so jumolo tangkas diusa tanganna mangihuthon adat ni angka situatua. 7:4 Na sian onan pe, ndang dipangan, so jolo diuras, jala godang dope na asing ditiop siradotan, songon pamurion di angka panginuman, gendi dohot hudon. 7:5 Jadi disungkun angka Parise dohot angka sibotosurat ma Ibana: Boasa so diihuthon angka siseanmi adat ni angka situatua, ai ramun do tanganna mangan roti? 7:6 Alai ninna Ibana ma mandok nasida: Sintong do dapot di hamu pangansi na sinurirangkon ni si Jesaya, songon na tarsurat i: "Dipapujipuji pamangan ni bangso on do Ahu; alai ia rohanasida dao do sian Ahu!" 7:7 "Jala magopo do pambahennasida pasangaphon Ahu, ai patikpatik ni jolma do dipodahon nasida." 7:8 Ai tading do patik ni Debata dibahen hamu, laho mangaradoti adat na sian jolma. 7:9 Laos didok ma tu nasida: Leak ma antong ditompas hamu patik ni Debata, laho mangaradoti adatmuna. 7:10 Ai didok si Musa do nian: "Pasangap ma amangmu dohot inangmu!" Angkup ni i: "Ia na mamburai amana manang inana, sipusaon do!" 7:11 Alai hamu mamodahon: Dohonon ni halak ma tu amana manang tu inana: Korban! Lapatanna: Pinelehon ma tagonan na patut hian pangurupingku di ho. 7:12 Asa ndang diloas hamu be ibana paturehon agia aha di amana manang di inana pe; 7:13 gabe disegai hamu do hata ni Debata dibahen adat na pinadalanmuna. Jala godang na suman tusi diula hamu. 7:14 Jala dijou muse ma natorop i, ninna ma mandok nasida: Tangihon hamu saluhut ma Ahu, jala parateatehon hamu ma: 7:15 Nda tung gabe ramun jolma binahen ni na ro sian ruar tu bagasan ibana; alai na ruar sian jolma i, i do mangaramuni ibana. 7:16 Hamu, angka parpinggol na marbinege, pinggol hamu ma i! 7:17 Jadi dung muli Ibana jala holang sian natorop i, disungkun angka siseanna ma Ibana siala umpama ondeng. 7:18 Gabe didok ma tu nasida: Asa dohot do hamu hape so mangarti! Ndang dapot rohamu, na so tarbahen ramun jolma bahenon ni nasa na ro sian ruar tubagasan ibana. 7:19 Ai so manang bongot i tu bagasan rohana; tu butuha do i laho, dung i bolong do i muse di inganan na soding, asa gabe ias do saluhutna sipanganon i. 7:20 Alai on do: Na ruar sian jolma i, i do mangaramuni ibana. 7:21 Ai sian bagasan, sian roha ni jolma i do ro pingkiran na jahat, parmainanon, panangkoon, pamunuon, 7:22 pangalangkupon, pangahution, hajahaton, pangansion, pargadombuson, panorgangon, panginsahion, ginjang dohot neang ni roha. 7:23 Na ro sian bagasan do saluhut angka hajahaton ondeng, jala angka i do na mangaramuni jolma. 7:24 Dung i borhat ma Ibana sian i laho tu luat Tirus, jadi dibongoti ma sada jabu; naeng ma unang tarboto i di rohana, alai ndang tarbahensa buni. 7:25 Ai ndang piga dan dibege sada inaina baritana; partondi na hodar do boruna, gabe ro ma ibana marsinggang tu jolona. 7:26 Parbegu do ina i, sian bangso Siroponisia, jadi dipangido ma tu Ibana, asa dipabali sibolis i sian boruna. 7:27 Alai ninna do mangalusi: Loas jolo bosur angka dakdanak; ai ndang tama buaton sipanganon ni angka dakdanak, laho mandabuhonsa tu jolo ni angka biang! 7:28 Alai ninna inaina i do mangalusi: I do nian, Tuhan; alai dohot do angka biang, na di toru ni meja i, mangallang na pinarpisikpisikkon ni angka dakdanak! 7:29 Gabe didok ma tu ina i: Ala ni hatami, laho ma ho; nunga ruar sibolis i sian borumi! 7:30 Laho ma tutu nasida muli, gabe jumpangsa ma boruna i modom di podomanna: Nunga ruar sibolis i. 7:31 Dung i borhat ma Jesus muse sian luat Tirus, laho sian Sidon sahat tu tao Galilea, mamolus sian tongatonga ni luat Sisampuluhuta. 7:32 Jala diboan ma tu jolona sahalak na nengel huhut mangungu; dielehelek ma Ibana, asa diampehon tanganna tusi. 7:33 Jala diboan ma ibana tu na suhi, holang sian natorop i, dijullukhon ma jarijarina tu pinggol ni halak i, dung i marsitijur ma Ibana laho manjama dilana. 7:34 Laos manaili ma Ibana dompak ginjang, marhosa godang ma, dung i didok ma tu ibana: Hepata! Na mandok: Mungkap ma! 7:35 Jadi mungkap ma tutu parbinegeanna, harhar ma nang ihot ni dilana, gabe tingkos ma pangkulingna. 7:36 Jala dipopai ma nasida, unang dipaboaboa tu halak; alai lam diorai, lam gogo ma nasida mamaritahonsa. 7:37 Jadi longang situtu ma nasida, ninna ma: Nunga denggan saluhutna dibahen Ibana, gabe marbinege do angka na nengel, jala na mangungu gabe mangkatai dibahen.
8:1 Marpungu ma uju i muse torop halak jala ndang adong panganonnasida gabe dijou Jesus ma angka siseanna, didok ma tu nasida: 8:2 Maras do rohangku mida na torop on, ai nunga tolu ari diingani nasida Ahu, jala ndang adong balanjonasida. 8:3 Anggo hupamuli nasida, so jolo mangan, handorusan nasida maon di tongandalan i; ai parhuta na dao do nasida deba! 8:4 Jadi dialusi angka siseanna ma Ibana: Sian dia ma tarpatupa di halongonan on roti, sae pabosur nasida? 8:5 Gabe disungkun ma nasida: Piga do roti di hamu? Jadi didok nasida ma: Pitu do! 8:6 Dung i didokkon ma natorop i hundul tu tano. Ditiop Ibana ma roti na pitu i, didok ma mauliate, diponggoli ma, laos dipasahat ma tu angka siseanna, gabe diparlehon nasida ma tu natorop i. 8:7 Laos adong do di nasida dengke otik, dipasupasu ma nang i, disuru ma nasida manaruhonsa. 8:8 Gabe mangan ma nasida jadi bosur be do, laos dipapungu ma angka ponggolponggol ebaebanasida: Gok pitu ampang. 8:9 Arga opat ribu do nasida; dung i dipamuli ma. 8:10 Jadi manigor masuk tu parau ma Ibana raphon angka siseanna jala sahat ma Ibana tu luat Dalmanuta. 8:11 Jadi ro ma angka Parise, dipungka ma marsual dohot ibana; tanda sian ginjang do dipangido nasida, laho mangunjuni Ibana. 8:12 Alai marhoi ma Ibana di bagasan tondina mandok: Boasa ma tanda pangidoon ni bangso on. Situtu do hatangkon tu hamu: Na so tupa lehonon tanda tu bangso on! 8:13 Laos ditadingkon ma nasida, mangulahi ma Ibana bongot tu parau, laho taripar. 8:14 Naung lupa do nasida mamboan balanjo; sada sambing nama roti di nasida na di parau i. 8:15 Jala dipalumba ma nasida, ninna ma: Manat ma hamu jala jaga, pasiding na niasoman ni angka Parise, nang na di si Herodes pe. 8:16 Gabe masipandohan ma nasida: Dibahen na so adong roti di hita hape! 8:17 Jadi dung diboto Ibana i, ninna ma mandok nasida: Boasa dipanghatahatahon hamu, na soada roti di hamu? Laos so marbinoto dope hamu; laos so mangantusi hamu; laos pir do rohamu? 8:18 Marmata do hamu so marnida; marpinggol do hamu, so marbinege, jala ndang marningot hamu? 8:19 Di na husagihon na lima roti i tu na lima ribu i, gok piga ampang ebaeba dibuat hamu disi? Gabe didok nasida ma tu Ibana: Sampuludua! 8:20 Beha, uju na pitu i tu na opat ribu i, piga ampang ebaeba dibuat hamu ia disi? Jadi ninna nasida ma: Pitu! 8:21 Jala didok ma tu nasida: Laos so mangarti dope hamu? 8:22 Dung i ro ma nasida tu Betsaida. Jadi diboan na mamboan ma sada halak na mapitung tu Ibana, dielehelek ma Ibana, asa dijama. 8:23 Gabe ditiop ma tangan ni na mapitung i, ditogihon ma tu balian ni huta i, ditijuri ma matana, diampehon ma tanganna tu ibana, disungkun ma: Nunga adong diida ho? 8:24 Jadi mamereng ma ibana, didok ma: Tarsongon bona ni hau do huida jolma na mardalan i. 8:25 Dung i diulakkon ma mangampehon tanganna tu matana jala tiur ma pamerengna, gabe malum ma: Torang do saluhutna diida. 8:26 Laos disuru ma ibana muli tu jabuna, didok ma: Unang bongoti huta i! 8:27 Dung i borhat ma Jesus rap dohot siseanna i tu angka huta mardonokkon Kaesarea Pilippi; jala di tongandalan i disungkun ma angka siseanna i, ninna ma: Ise do Ahu, didok halak? 8:28 Jadi dialusi nasida ma Ibana: Si Johannes pandidi do didok halak; na deba mandok: Si Elia; na asing muse: Sahalak sian angka panurirang i do! 8:29 Dung i disungkun Ibana ma nasida: Ia hamu, ise ma Ahu didok hamu? Jadi dialusi si Petrus ma Ibana: Kristus i do Ho! 8:30 Gabe dipopai ma nasida, unang dipaboaboa Ibana tu halak. 8:31 Jadi dipungka ma mangajari nasida: Ia anak ni jolma i ingkon godang do sitaononna, ingkon bolongkonon ni angka sintua dohot malim dohot sibotosurat do ibana, laos pusaonna do; dung i mulak mangolu do di ari patoluhon. 8:32 Patar do dipaboa hata i. Alai diarahon si Petrus ma Ibana, disolsoli ma Ibana. 8:33 Alai humusor ma anggo Ibana, dipanotnoti ma angka siseanna i, dipinsang ma si Petrus, ninna ma: Laho ma ne ho, bolis, sian lambungkon; ai ndang na diparrohahon ho na di Debata, angka na di jolma do. 8:34 Laos dijou ma natorop i rap dohot siseanna, didok ma tu nasida: Nasa na giot mangihuthon Ahu, disoadahon ma dirina, dituhuk ma silang na tu ibana i, diihuthon ma Ahu. 8:35 Ai na naeng paluahon hosana, mangagohonsa do; alai na agoan hosa ala ni Ahu dohot ala ni barita na uli i, i do paluahonsa. 8:36 Ai aha ma antong gunana di jolma, nang liat portibi on diomo, anggo mago do hosana? 8:37 Ai aha do na tarlehon jolma bahen tobus ni hosana? 8:38 Asa molo adong na maila ala ni Ahu manang ala ni hatangki pe maradophon bangso pangalangkup jala pardosa on, laos maila do Anak ni jolma i sogot mangkatindangkon i, di na ro Ibana di bagasan hasangapon ni Amana rap dohot surusuruan angka na badia i.
9:1 Laos didok ma tu nasida: Na tutu do hatangkon tu hamu: Adong do deba sian angka na jongjong dison, na so tupa mangae hamatean, so jolo diida ro harajaon ni Debata marhagogoon! 9:2 Dung i salpu onom ari diarahon Jesus ma si Petrus, Jakobus dohot Johannes, ditogihon ma nasida nangkok tu sada dolok na timbo, tu na suhi, holan nasida; gabe muba ma rupana diida nasida. 9:3 Gabe marsillam ma angka ulosna, bontar sahali; na so dapot botoon ni panunsi di tano on mambahen bontar songon i. 9:4 Dung i diida nasida ma si Elia rap dohot si Musa; na mangkatai do nasida dohot Jesus. 9:5 Jadi didok si Petrus na mangkuling i Jesus: Guru, dengganna i dison! Hupauli hami ma dison soposopo tolu: Sada di Ho, sada di si Musa, sada di si Elia! 9:6 Ai ndang diboto na nidokna i, ai tung hatahutan situtu do nasida. 9:7 Jala ro ma ombun sada mangalinggomi nasida, laos mangkuling ma soara sian bagasan ombun i, didok ma: On do Anak haholonganku, tangihon hamu ma Ibana! 9:8 Alai di na manaili nasida, ndang agia ise be diida; sasada Jesus do angkupnasida. 9:9 Jadi laho tuat sian dolok i, dipopai ma nasida, unang dipajojor na niidanasida i tu halak, ia so jolo hehe Anak ni jolma i sian na mate. 9:10 Digolom nasida do hata i, gabe masisungkunan ma nasida: Na mandok beha do on: Hehe sian na mate? 9:11 Jadi disungkun nasida ma Ibana: Didok angka sibotosurat do, ingkon jumolo ro si Elia? 9:12 Gabe didok ma tu nasida: Ro do tutu si Elia jumolo pajongjongkon saluhutna; alai beha do na tarsurat taringot tu Anak ni jolma i, paboa ingkon lan do sitaononna jala doshon na soada rajuman Ibana? 9:13 Alai hudok ma tu hamu: Naung ro do si Elia, jadi roharohanasida do dibahen tu ibana, songon naung tarsurat hian taringot tu ibana. 9:14 Laho mandapothon angka sisean i, diida nasida ma torop halak humaliang nasida dohot angka sibotosurat na masisungkunan dohot nasida. 9:15 Jadi pintor longang situtu ma sude natorop i marnida Ibana, marlojong be do nasida mandapothon Ibana laho mangkormat. 9:16 Dung i disungkun ma nasida: Aha do sinungkunhonmuna tu nasida on? 9:17 Gabe ro ma sahalak sian natorop i mangalusi: O Guru, tu Ho hian do huboan anakkon; partondi na ngungu do ibana. 9:18 Jadi disi ditangkup ibana, dipasaratsarat do, gabe margumogumo jala patungoripon, laos gonggong. Nunga hudokkon angka siseanmi pabalihon ibana; alai ndang margogo nasida. 9:19 Alai ninna ma mangalusi nasida: E hamu, bangso na so porsea! Sadia leleng nari Ahu rap dohot hamu? Sadia leleng nari paanjuanjuonku hamu? Tu Ahu ma boan hamu ibana! 9:20 Jadi diboan nasida ma ibana. Disi diida tondi i Jesus, mamintor dipapuhung ma anak i, laos tinggang, margallogallo jala margumogumo. 9:21 Disungkun Jesus ma amana i: Nunga sadia leleng songgop on tu ibana? Jadi didok ma: Sian sietehetehonna dope! 9:22 Jala jotjot do ibana ditinggangkon tu api dohot tu aek, mamusa ibana nian. Alai ia adong gogom, urupi hami; asi ma roham di hami! 9:23 Jadi dialusi Jesus ma ibana: Ia taringot tu gogo: Na marhagogoon do na porsea i patupahon saluhutna! 9:24 Dung i pintor dipagogo ama ni anak i ma soarana, dijouhon ma: Na porsea do ahu! Urupi ahu na hurang porsea on! 9:25 Alai naung lam rongom natorop i diida Jesus, disonggahi ma tondi na hodar i, didok ma tu ibana: Ho, tondi na ngungu jala na pojam! Ahu mandokkon ho ruar sian jolma on, jala ndang jadi bongotanmu be ibana! 9:26 Gabe mangangguhi ma i, huhut gogo ma ibana disaratsarat, laos ruar ma, jala songon na mate do anak i, pola lan do mandok: Nunga tos hosana. 9:27 Alai ditangkup Jesus ma tanganna, laho pahehehonsa, gabe jongjong ma. 9:28 Jadi dung muli Jesus, disungkun angka siseanna ma Ibana pulik: Boasa so tarpabali hami ibana? 9:29 Jadi didok ma tu nasida: Holan marhite sian tangiang dohot parpuasaon do tarpabali tondi na saragam on! 9:30 Dung i borhat ma nasida sian i, didalani nasida ma tano Galilea; alai ndang jadi botoon ni halak Ibana di rohana. 9:31 Ai dipodai do angka siseanna, didok ma tu nasida: Sipasahaton ma Anak ni jolma i tu tangan ni halak, jala pusaonna ma Ibana; alai dung dipamate, hehe do Ibana di ari patoluhon! 9:32 Alai ndang na diantusi nasida hata i jala tanggak do rohanasida manungkun Ibana. 9:33 Dung i sahat ma nasida tu huta Kapernaum; jadi dung ro di tongajabu Ibana, disungkun ma nasida: Aha do na hinataanmuna di tongandalan i? 9:34 Alai mangkohom do nasida; ai dihatai do di dalan i, manang ise nasida na sumurung. 9:35 Laos hundul ma Ibana, dijou ma na sampuludua i, didok ma tu nasida: Ia i na naeng gabe parjolo di rohana, dibahen ma ibana parpudi jala naposo ni saluhut donganna. 9:36 Dung i dibuat ma dakdanak sada, dipajongjong ma tu tongatonganasida, dihaol ma jala didok ma tu nasida: 9:37 Na manjangkon dakdanak sada sisongon on marhitehite Goarhu, Ahu do na jinangkonna disi! Jala na manjangkon Ahu, ndada Ahu na jinangkonna i, na marsuru Ahu do. 9:38 Jadi dipanghulingi si Johannes ma Ibana: Guru, huida hami do sahalak na pabalihon angka sibolis marhitehite Goarmu; ndang olo ibana mangihuthon hita jadi hurarang hami do ibana, ala so hita diihuthon. 9:39 Alai didok Jesus ma: Ndang oraanmuna Ibana nian! Ai ndang tagamon insahan ni halak Ahu, dung jolo diulahon hagogoon marhitehite Goarhu. 9:40 Ai pandongani do di hita, na so mangalo hita. 9:41 Ai na sintong do hatangkon tu hamu: Na painumhon aek santahu tu hamu di bagasan Goarhu, ala Kristus nampuna hamu; ndang na mago upa ni i! 9:42 Alai na manggasipi sada sian na metmet on, angka na porsea di Ahu, dengganan ma ginantungkon losung batu tu rungkungna, laho mangalonongkon ibana tu laut. 9:43 Jala molo digasipi tanganmi ho, gotap! Ai dengganan, telpang ho bongot tu hangoluan, unang mardua tangan ho marobur tu na roko, tu api na so ra mintop, 9:44 di na so ra mate gulokna, di na so mintop apina. 9:45 Asa molo digasipi patmi ho, gotap! Ai dengganan, telpang ho bongot tu hangoluan, unang mardua pat ho didanggurhon tu na roko, 9:46 di na so ra mate gulokna, di na so mintop apina. 9:47 Jala molo digasipi matami ho, pulsikkon! Ai dengganan, marmata sambariba ho bongot tu harajaon ni Debata, unang mardua mata ho dibolongkon tu na roko, 9:48 di na so ra mate gulokna, di na so mintop apina. 9:49 Ai ingkon siraan do ganup di bagasan api. 9:50 Na marguna do sira i. Alai molo tung hambar sira i, aha ma bahenon paansimhonsa? Sai marsira ma hamu huhut mardame sama hamu!
10:1 Dung i borhat ma Jesus sian i jala sahat ma tu luat Judea na di ipar ni batang aek Jordan. Jadi dirongomi natorop i muse Ibana, gabe diulahi ma mangajari nasida songon na somal. 10:2 Laos ro ma angka Parise mangunjuni Ibana; on do sungkunsungkunnasida: Beha, na jadi do sirangkonon ni baoa dongan saripena? 10:3 Alai dialusi Ibana ma nasida: Ai aha dipatikkon si Musa tu hamu? 10:4 Gabe didok nasida ma: Dioloi si Musa do mambahen surat sirang laho paulakkon. 10:5 Alai dialusi Jesus ma nasida: Ala ni tangkang ni rohamuna do, umbahen na disurathon tu hamu aturan na songon i. 10:6 Alai sian mulana i dope, di hatotompana i, baoa dohot boruboru nasida dibahen. 10:7 Ala ni i tadingkonon ni baoa do amana dohot inana, patophon dirina tu niolina. 10:8 Na gabe sada daging do nasida na dua i; asa ndada dua be nasida, tung sada daging do. 10:9 Onpe, naung pinadomu ni Debata, ndang jadi sirangon ni jolma! 10:10 Asa dung muli nasida, diulahi siseanna ma manungkun Ibana taringot tusi. 10:11 Gabe ninna ma mandok nasida: Na paulakkon dongan saripena, dung i dioli na asing, pangalangkup do ibana disi. 10:12 Boruboru i pe, molo disirang dirina sian sinondukna jala dibuat na asing, pangalangkup do. 10:13 Dung i adong ma na mamboan angka anakkonna tu Ibana, asa dijama; alai dipinsang angka siseanna do nasida. 10:14 Marnida i Jesus, sogo ma rohana, didok ma tu nasida: Loas hamu ma ro angka dakdanak i sahat tu Ahu; unang orai hamu nasida, ai di angka sisongon i do harajaon ni Debata! 10:15 Situtu do hatangkon tu hamu: Na so manjalo harajaon ni Debata songon dakdanak, ndang saut bongot tusi. 10:16 Dung i dihaol ma nasida, diampehon ma tanganna tu nasida laho mamasumasu. 10:17 Dung i, laho ruar Ibana tu dalan i, ro ma sahalak marlojong, laos marsinggang ma manungkun Ibana: O Guru, na denggan roha! Dia do sipatupaonku, asa hutean hangoluan na salelenglelengna? 10:18 Alai didok Jesus ma tu ibana: Boasa didok ho Ahu na denggan roha? Ndang adong na denggan roha, dungkon ni sasada Debata! 10:19 Diboto ho do angka patik i: "Unang ho mangalangkup! Unang ho mambunu! Unang ho manangko! Unang ho olo mangkatindangkon na so tutu! Unang ho mandaho! Ingkon pasangaponmu amangmu dohot inangmu!" 10:20 Alai ninna ma mandok Ibana: O Guru! Sasudena i huradoti do, sian sieteketehonku dope! 10:21 Jadi mamereng ibana, holong ma roha ni Jesus di ibana, huhut ma didok: Sada do na hurang di ho: Laho ma ho jolo manggadis nasa na di ho, parlehon ma tu angka na pogos, asa mararta ho di banua ginjang. Dung i ro ma ho, (porsan silang i), ihuthon Ahu! 10:22 Alai habot do roha ni i umbege hata ondeng; marsak ma rohana sumurut, ai parsinamot godang do ibana. 10:23 Dung i dibereng Jesus ma angka siseanna na humaliang, didok ma tu nasida: Maolna i bongot angka paradongan tu bagasan harajaon ni Debata! 10:24 Ia angka sisean i, tarsonggot do di na nidokna i. Alai ninna Jesus ma muse mangalusi nasida: O angka anaha! Maolna i (angka na pos roha di panamotan) bongot tu harajaon ni Debata! 10:25 Gumabur do boluson ni gaja pinggol ni jarum, unang halak na mora bongot tu bagasan harajaon ni Debata! 10:26 Jadi lam tarhalomong ma nasida, gabe masipandohan ma: Molo boti, ise ma tarbahen malua? 10:27 Dibereng Jesus ma nasida huhut ma didok: Anggo di jolma ndang tarbahen; alai ndang songon i di Debata! Ai saluhutna do tarbahen anggo di Debata! 10:28 Dung i dipanghulingi si Petrus ma Ibana: Ia hami, saluhutna do hutadingkon hami mangihuthon Ho! 10:29 Gabe didok Jesus ma: Na tutu do hatangkon na tu hamu: Nasa na tumadingkon jabuna, manang hahaanggina, manang ibotona, manang inana, manang amana, manang ianakhonna, manang haumana pe, ala ni Ahu dohot ala ni barita na uli, 10:30 ingkon silompit saratus jaloonna nuaeng di hasiangan on angka bagas, angka hahaanggi, iboto, ina, ianakhon ro di angka hauma mardongan buruburu, angkup ni i: Di hasiangan sogot hangoluan na salelenglelengna. 10:31 Alai lan do angka naung parjolo hian gabe parpudi, jala parpudi hian gabe parjolo. 10:32 Alai di tongandalan laho nangkok tu huta Jerusalem, di jolonasida do Jesus, gabe tarsonggot do nasida, laos mabiar do nasida mangihuthon. Jadi diarahon muse ma na sampuludua i, dipungka ma muse paboahon tu nasida na naeng masa tu Ibana: 10:33 Na nangkok do hita tu huta Jerusalem, jadi pasahatonna ma Anak ni jolma i tu angka sintua ni malim dohot tu angka sibotosurat, jadi marutang hosa ma ibana uhumonna, jala pasahatonna ma Ibana tu angka parbegu; 10:34 insahanna, tijuranna jala linsinganna ma Ibana, laos pusaonna do; alai mulak mangolu do ibana di ari patoluhon. 10:35 Dung i ro ma mandapothon Ibana si Jakobus dohot si Johannes, angka anak ni si Sebedeus; ai hatanasida: Gurunami, adong do pinangido ni rohanami, silehononmu tu hami nian. 10:36 Gabe ninna ma mandok nasida: Ai aha do pinangido ni rohamu sibahenonku tu hamu? 10:37 Dung i didok nasida ma tu Ibana: Naeng bahenonmu hami hundul di hasangaponmi, na sada tu siamunmu, na sada nari tu hambirangmu. 10:38 Alai ninna Jesus ma mandok nasida: Ndang diboto hamu na pinangidomuna i. Tung tarinum hamu ma siinumonki? Tung tarparidi hamu ma paridion siparidionki? 10:39 Gabe didok nasida ma tu Ibana: Tarbahen hami do! Dung i ninna Jesus ma mandok nasida: Tutu do nian, inumonmuna do siinumonki, jala paridionmuna do paridion siparidionki. 10:40 Alai na mambahen hundul tu siamunhu dohot tu hambirangku, ndang guru di Ahu i; di angka naung dirade hian do i. 10:41 Alai dung tarbege i tu na sampulu i, gabe sogo ma rohanasida di si Jakobus dohot Johannes. 10:42 Jadi dipapungu Jesus ma nasida, ninna ma mandok nasida: Diboto hamu do, dirajai angka sigomgomi bangso do parripenasida jala dipaksa angka na sangapna do nasida. 10:43 Alai unang ma songon i, anggo di hamu! Manang ise hamu na giot sangap, i ma gabe pangoloi di donganna! 10:44 Jala manang ise hamu, na naeng parjolo, i ma gabe naposo ni donganna saluhutna. 10:45 Ai nang Anak ni jolma i pe, ndada asa dioloi halak Ibana, umbahen na ro; Ibana do balik pangoloi jala mangalehon hosana bahen tobus ni torop jolma. 10:46 Dung i dibongoti nasida ma huta Jeriko. Jadi di na ruar Ibana sian Jeriko raphon siseanna dohot halak natorop, adong ma hundul disi di pinggol ni dalan i sahalak sipanehenehe na mapitung, si Bartimeus, anak ni si Timeus. 10:47 Jadi dung dibege ibana, Jesus na sian Nasaret do i hape, dipungka ma manjoujouhon: O Jesus, Anak ni si Daud, asi ma roham mida ahu! 10:48 Lan do maminsang ibana, asa sip nian; alai lam digogo do manjouhon: Ale Anak ni si Daud, asi ma roham di ahu! 10:49 Jadi sulon ma Jesus, didok ma: Jou hamu ma ibana! Gabe dijou ma na mapitung i, didok ma mandok ibana: Pos ma roham! Hehe ma ho! Dijou do ho! 10:50 Jadi hatop ma ibana hehe, laho mandapothon Jesus; laos tading do anggo ulosna. 10:51 Dipanghulingi Jesus ma ibana: Aha dipangido roham sibahenonku tu ho? Jala didok na mapitung i ma tu ibana: Gurunami, naeng marnida ma nian matangku! 10:52 Dung i didok Jesus ma tu ibana: Laho ma ho! Dipangolu haporseaonmi do ho. Jala mamintor marnida ma matana, laos diihuthon ma Jesus di sidalananna i.
11:1 Dung i di na lam jonok nasida tu huta Jerusalem, tu Betpage dohot Betania, na di lambung ni dolok Jetun, disuru Jesus ma siseanna dua halak. 11:2 Didok ma tu nasida: Laho ma hamu tu sosor na di jolomuna an; jadi disi bongot hamu tusi, dapot hamu ma tambat disi sada anak ni halode, na so dung dope hinundulan; harhari jala togu hamu ma i tuson! 11:3 Jadi molo tung adong na mandok tu hamu: Na marhua do hamu?, dok hamu ma: Na ringkot do i di Tuhan i; jala tibu do pasuangonna i tuson. 11:4 Borhat do nasida jala dapotsa do anak ni halode i, tambat dingkan harbangan di alaman i, jadi ditanggali nasida ma. 11:5 Dung i adong ma halak na jongjong disi na mandok tu nasida: Na marhua do hamu na mananggali anak ni halode i? 11:6 Jadi didok ma songon na tinonahon ni Jesus tu nasida, gabe dipasombu ma. 11:7 Ditogu nasida ma anak ni halode i tu Jesus, diampehon ma ulosnasida tu atasna jadi marsihundul ma Jesus disi. 11:8 Jala torop do halak angka na pahembangkon ulosnasida tu dalan i; na deba manalliki angka bulung rata sian ladang i, laho mangamparhon tu dalan i. 11:9 Ia angka na di jolo nang angka na mangihut sian pudi, sai manjoujouhon do: Hosianna! Pinuji ma na ro marhitehite Goar ni Tuhan i! 11:10 Pinuji ma harajaon ni amanta Daud na naeng ro! Hosianna ma di ginjang ni ginjangan! 11:11 Jadi bongot ma Jesus tu huta Jerusalem sahat tu bagas joro i. Jala dung tangkas dibereng sude, ruar ma Ibana muse, laho tu huta Betania rap dohot na sampuludua i, ala naung bot ari situtu. 11:12 Dung i torang ni arina i, dung hehe nasida sian Betania, male ma dihilala. 11:13 Jadi ditatap ma hau ara sada naung marbulung jadi didapothon ma, atik beha dapotan Ibana disi. Hape dung sahat, holan bulung sambing do jumpangsa; ai ndang dope tingkina marparbue. 11:14 Jadi dipanghulingi ma hau i: Matua tano on, ndang jadi be agia ise manganhon parbue sian ho! Dibege angka siseanna do nidokna i. 11:15 Dung i sahat ma nasida tu huta Jerusalem. Jadi dibongoti ma bagas joro i, manigor dipabali ma angka na manggadisi dohot na manuhori di joro i, ditunggalingkon ma meja ni angka panungkari ro di bangku ni angka sigadis darapati. 11:16 Ndang diloas boluson ni na marsiboanon bagas joro i. 11:17 Laos ninna do mangajari nasida: Nda tarsurat: "Bagas partangiangan ni saluhut bangso do goaron bagashu?" Hape gabe liang ni pandobo do i dibahen hamu. 11:18 Jadi dibege angka sintua ni malim dohot angka sibotosurat ma i, gabe dilului ma dalan mamusa Ibana; ai nunga biar rohanasida mida Ibana, ala tarhalomong sude natorop i umbege podana i. 11:19 Alai ganup bot ari, sai ruar do nasida tumadingkon huta i. 11:20 Di na mamolus nasida manogotna i, diida ma naung rahar hau ara i ro di uratna. 11:21 Marningot hata i si Petrus, didok ma tu Ibana: Guru, bereng ma! Nunga rahar hau ara na binuraanmi! 11:22 Gabe didok Jesus ma mangalusi nasida: Porsea ma hamu di Debata! 11:23 Na tutu do hatangkon tu hamu: Molo adong na mandok tu dolok on: Hindat dirim, dabuhon ho tu laut!, sai na saut do i idaonna, anggo so ganggu ibana di bagasan rohana jala porsea, ingkon tulus na nidokna i. 11:24 Dibahen i hudok ma tu hamu: Saluhutna, manang dia pe dipangido hamu di tangiangmuna, sai na sahat do i tu hamu, asal porsea hamu, ingkon jaloonmuna. 11:25 Alai molo jongjong hamu martangiang, sai sesa hamu ma, molo adong pangkurangi ni rohamu di halak, anggiat disesa nang Amamuna na di banua ginjang i salamuna. 11:26 Alai anggo so disesa hamu, ndang sesaon ni Amamuna na di banua ginjang i salamuna. 11:27 Jala dibongoti muse ma huta Jerusalem. Jadi mardalandalan ma Ibana di joro i, gabe ro ma mandapothon Ibana angka sintua ni malim, angka sibotosurat ro di angka panungganei. 11:28 Didok nasida ma tu Ibana: Huaso dia dipangasahon Ho mambahen sisongon i? Ise do na mangalehon huaso i tu Ho, laho patupahon angka i? 11:29 Gabe didok Jesus ma tu nasida: Adong na husungkun tu hamu, alusi hamu ma Ahu, asa hupaboa tu hamu, manang huaso dia hupangasahon di pambahenanki: 11:30 Ia pandidion ni si Johannes, sian ginjang do i, manang sian jolma? Alusi hamu ma Ahu! 11:31 Gabe marhusari ma nasida songon on: Ia ninta: Sian ginjang!, ndang tagamon so dohononna: Antong, boasa so dihaporseai hamu ibana? 11:32 Alai beha, ia tadok: Sian jolma? Ai dihabiari do natorop, ala panurirang do si Johannes di roha ni jolma saluhutna. 11:33 Gabe ninna nasida ma mangalusi Jesus: Ndang huboto hami i! Jala ro ma hata ni Jesus tu nasida: Ahu pe, ndang paboaonku tu hamu, manang huaso dia hupangasahon patupahon ulaonki.
12:1 Dung i dijamitai Jesus ma nasida marhite sian umpama, ninna ma: Adong ma sada halak na pauli porlak anggurna, dihandangi ma humaliang, dihali ma pangilangan, dipauli ma gudangna, dipasahat ma tu angka pangula, dung i marhutasada ma ibana. 12:2 Jadi di tingkina i disuru ma naposona manopot angka pangula i, asa dijalo sian nasida parbuena i deba. 12:3 Hape ditangkup nasida do ibana, dipukpuhi, laos muli boti do ibana dipaulak. 12:4 Dung i diulakkon ma marsuru naposona na asing tu nasida, alai dilombut do nang i jala dileai. 12:5 Jadi disuru muse sahalak na asing, alai dipusa do anggo i; dung i lan dope angka na asing disuru, na deba dilasahi, na deba dipusa nasida. 12:6 Adong dope anakna sada, hinaholongan ni rohana, i ma disuru parpudi tu nasida, ai ninna rohana do: Ra biar ma rohanasida mida anakki! 12:7 Alai masipandohan do angka pangula i: On do panean! Beta ma, tapusa ma ibana, asa di hita siteanonna i! 12:8 Gabe ditangkup nasida ma ibana, dipusa ma, jala tu balian ni porlak anggur i nama didanggurhon. 12:9 Dia ma tagamon bahenon ni tuan parporlak anggur i? Ro ma ibana mangalengsehon angka pangula i, dung i pasahatonna ma porlak i tu halak na asing. 12:10 Ndang dung dope dijaha hamu hata ni surat on: "Ia batu na binolongkon ni angka pande bagas i, nunga i gabe batu parsuhisuhi. 12:11 Pinamasa ni Tuhan do i; halongangan do i diida matanta"? 12:12 Gabe dilului nasida ma dalan manangkup Ibana; alai mabiar do nasida mida natorop i. Ai diboto, nasida do tinuju ni umpama ondeng, laos laho do nasida manadingkon Ibana. 12:13 Jadi dipaborhat nasida ma deba sian angka Parise dohot sian angka naposo ni si Herodes, asa dipadapot nasida Ibana di hatana. 12:14 Jadi ro ma nasida mandok tu Ibana: Gurunami, huboto hami na tigor Ho jala ndang dihabiari Ho agia ise, ai so siida bohi ni jolma Ho; sintongsintong dipodahon Ho dalan ni Debata. Na jadi do lehonon guguan tu Kesar i, manang na so jadi? Lehononta do, manang ndang? 12:15 Alai diboto Jesus do, ansiansinasida i, jadi didok ma tu nasida: Boasa unjunanmuna Ahu? Boan hamu ma tu Ahu rupia sada asa huida! 12:16 Jadi diboan nasida ma i. Dung i didok Ibana ma tu nasida: Gombaran dohot surat ni ise do dison? Jadi didok nasida ma tu Ibana: Gombaran ni Kesar i do! 12:17 Laos didok Jesus ma tu nasida: Lehon hamu ma tu Kesar na sian Kesar i, jala tu Debata na sian Debata! Jadi longang ma rohanasida mida Ibana. 12:18 Dung i ro ma tu jolona angka Saduse, na so marhatutuhon, adong haheheon sian na mate, jadi disungkun nasida ma Ibana: 12:19 Gurunami, disurathon si Musa do tu hita: Molo mate halak, ditinggalhon pardihutana, so marianakkon, ingkon dihabia anggina do boruboru i, pajongjongkon pomparan di hahana i. 12:20 Asa adong ma pitu halak na marhahamaranggi; mambuat boru ma sihahaan i, jadi mate ma ibana, so martinading. 12:21 Dung i dibuat paidua i ma boruboru i, laos mate do ibana, so martinading; paitolu i pe songon i do. 12:22 Songon i sude nasida na pitu i so martinading. Umpudi sian nasida sasudena i mate ma nang parompuan i. 12:23 Ise do sian nasida nampuna parompuan i, ia di haheheon i? Ai nasida na pitu di do marniolihonsa. 12:24 Alai ninna Jesus ma tu nasida: Nda i ma haliluonmuna, na so binotomuna Surat i nang hagogoon ni Debata? 12:25 Ai di na hehe nasida sian na mate, ndang mangoli, ndang marhamulian; songon angka surusuruan na di banua ginjang i do nasida! 12:26 Alai anggo taringot tu haheheon ni angka na mate, ndang dung dijaha hamu ulaning di surat ni si Musa (binduna: Ramba na sampulguk) na nidok ni Debata tu ibana: "Ahu do Debata ni si Abraham, Debata ni si Isak jala Debata ni si Jakkob"? 12:27 Apala Debata ni angka na mate Ibana; Debata ni angka na mangolu do! Tung na lilu situtu do hamu! 12:28 Na dibege sibotosurat sahalak do nasida na masialusan i, gabe ro ma ibana jumonok; dung ditanda denggan ni alus ni Jesus, disungkun ma Ibana: Dia do patik na ummangat sian patik i sudena? 12:29 Dialusi Jesus ma ibana, didok ma: On do patik na ummangat: "Tangihon ma, ale Israel, Tuhan sasadasa do Tuhan Debatanta i. 12:30 Jala haholonganmu do Tuhan Debatam sian nasa ateatem, sian nasa hosam, sian nasa roham dohot sian nasa gogom!" 12:31 Ia patik paiduana, on do: Haholonganmu do donganmi songon dirim! Patik na ummangat sian na dua i ndang adong. 12:32 Jadi didok sibotosurat i ma tu Ibana: Tingkos didok ho, Guru, hombar tu hasintongan: Sada do Debata jala ndang adong na asing dungkon ni Ibana. 12:33 Jala mangkaholongi Ibana sian nasa ateate, sian nasa roha dohot sian nasa gogo huhut mangkaholongi dongan songon diriniba, ummangat do i sian saluhut angka pelean situtungon nang pelean na asing pe. 12:34 Dung dibege Jesus pantasna maralus, ninna ma mandok ibana: Ndang sadia dao ho sian harajaon ni Debata! Olat ni i ndang adong be na hum roha pasungkunsungkun Ibana. 12:35 Uju mangajari Jesus di bagasan joro i, ninna ma mandok nasida: Marhua didok angka sibotosurat Kristus i Anak ni si Daud? 12:36 Ai si Daud sandiri do mandok marhitehite Tondi Parbadia i: "Ninna Tuhan i do mandok Tuhanku: Hundul ma Ho tu Siamunhon, paima hupeakhon angka musum, bahen sidegean ni patmu!" 12:37 Apala si Daud do manggoar Ibana Tuhan, beha ma Ibana Anakna? Lomo do roha ni natorop i tumangihon hatana. 12:38 Laos didok Jesus ma di sipodaonna i: Jaga ma hamu mida angka sibotosurat, angka na lomo roha madangadang marbaju na ganjang, asa ditabi halak nasida di angka onan. 12:39 Na ringkot do rohanasida di bangku jolojolo di angka parguruan ro di hundulan na sumangap di parpestaan. 12:40 Dipolgak nasida do bagas ni na mabalu, gabe tangiang na ganjang do dibahen nasida mangkuphupisa. Uhum na dumokdok do jaloonnasida. 12:41 Na hundul do Ibana tondongkon poti parasian, gabe dibereng ma pambahen ni halak mandabuhon hepengna tu poti i. Jadi torop do na mora na mandabuhon na godang. 12:42 Laos ro ma boruboru na mabalu sada, na pogos; didabuhon ma tusi dua rimis, i ma sasen. 12:43 Gabe dijou Jesus ma siseanna i, ninna ma mandok nasida: Situtu do hatangkon tu hamu: Gumodang do na nidabuhon ni na mabalu, na pogos an tubagasan poti parasian i, asa saluhut angka na mandabuhon i. 12:44 Ai sian lobilobi nasida do didabuhon be; alai ia parompuan an, sian pogosna do didabuhon saluhutna na di ibana, tung sandok hangoluanna i.
13:1 Laho tumadingkon bagas joro i, ninna sahalak siseanna ma mandok Ibana: Bereng ma, Gurunami, uli ni angka batu on dohot tongam ni angka jabu on! 13:2 Alai ninna Jesus ma mandok Ibana: Diida ho do jabu angka na bolon on? Ndang pasumbuon nanggo dua batu martinditindi na so gargaronna. 13:3 Dung i uju hundul Ibana di dolok Jetun, tondongkon joro i, pulik ma disungkun si Petrus, Jakobus, Johannes dohot Andreas Ibana: 13:4 Paboa ma tu hami, andigan masa i; jala dia ma tandana, paboa na songgop ma saluhutna i? 13:5 Jala dihatahon Jesus ma tu nasida songon on: Jaga ma hamu, so tung dililuhon halak hamu! 13:6 Ai lan do na ro sogot manoluk Goarhu, angka na mandok: Ahu do i!, gabe torop ma lilu bahenonnasida. 13:7 Asa molo dibege hamu barita ni angka hamusuon ro di gaor ni na marmusu, unang hamu tarsonggot! Ndang tarbahen so masa angka i, alai ndang i dope ujungna. 13:8 Ai na hehe do sogot bangso maralohon bangso, harajaon maralohon harajaon; masa ma nang laho marluatluat, masa ma nang haleon. Parmulaan ni pambebeonna do i. 13:9 Alai jaga hamu ma dirimuna, ai pasahatonna do hamu tu angka loloan na godang dohot tu jolo ni rapot huria, linsinganna ma hamu jala pajongjongonna ma hamu tu jolo ni angka panguhum dohot angka raja ala ni Ahu, bahen panindangion tu nasida. 13:10 Alai ingkon jumolo do baritahononhon barita na uli i tu ganup bangso. 13:11 Asa jumpa ditogu nasida hamu laho pasahathon, unang holsoan rohamuna di sidohononmuna i! Sandok ia i dilehon tu hamu, di na sangombas i, i ma hatahon hamu; ai apala hamu i na mandok hata disi, Tondi Parbadia i do. 13:12 Alai pasahaton ni sihahaan do anggina, asa tu hamatean, songon i amaama di anakkonna, jala na hehe do angka ianakhon dompak natorasna laho pabunuhonsa. 13:13 Hosoman ni halak saluhutna do hamu ala ni Goarhu. Alai na manahan ro di ujungna, i do paluaonna. 13:14 Alai molo idaonmuna hagagaor ni na so uhum jongjong di na so jadi (diparateatehon na manjaha on ma i), disi ma maporus angka na di luat Judea i tu dolok! 13:15 Na di bilut parginjang ni jabuna, unang ma dialap angka ugasan na di jabu i, di na mijur i ibana! 13:16 Na di hauma, unang ma pola humusor mambuat ulosna! 13:17 Alai marjea ma angka na gabegabean dohot angka panarusan di angka ari i! 13:18 Alai martangiang ma hamu, asa unang songgop i di partaonan ngali! 13:19 Ai masa do di angka ari i haporsuhon, na so dung adong dope olat ni panompaon ni Debata di na tinompana i rasirasa nuaeng, tu jolo on pe ndang masa be. 13:20 Jadi aut unang diorui Tuhan i angka ari i, ndang tagamon malua nanggo sada jolma; alai ala ni angka na pinillitna i do umbahen na diorui. 13:21 Molo dipandok disi tu hamu: Ida: Disi, disan do Kristus i, unang porsea hamu! 13:22 Ai na hehe ma angka Kristus pargapgap nang angka panurirang pargapgap, patupahon tanda dohot halongangan, laho mangaliluhon nang angka na tarpillit, aut tarbahensa. 13:23 Jaga ma hamu! Naung hulumbahon do sudena i tu hamu! 13:24 Alai di angka ari i, dung salpu haporsuhon ondeng, mangkolom ma mata ni ari jala ndang marsinondang be bulan i. 13:25 Mardabuan ma angka bintang sian langit i jala humuntal ma angka hagogoon ni parlangitan. 13:26 Jadi idaonnasida ma Anak ni jolma i ro marhitehon ombun, mantat hagogoon dohot hasangapon godang. 13:27 Laos disi ma suruonna angka pardisurgo papunguhon angka na pinillitna i sian desa na ualu i, sian suhi ni tano sahat ro di suhi ni langit. 13:28 Alai sian hau ara i ma guruhon hamu tudosanna. Ia dung martunasi punsuna jala rungkar bulungna, botoonmuna ma, naung jonok partaonan las. 13:29 Suang le songon i, jumpa diida hamu masa angka ondeng, botoonmuna ma, naung jonok hasosonggopna. 13:30 Situtu do hatangkon tu hamu: Na so tupa salpu bangso on, so jolo songgop sasudena i. 13:31 Salpu pe sogot langit dohot tano on; anggo angka hatangki, ndang na olo salpu! 13:32 Alai anggo arina dohot sadiharina, ndang adong na umbotosa, nang surusuruan na di banua ginjang, nang Anak i pe; nda holan Ama i! 13:33 Tagam ma hamu; dungo ma hamu, ai ndang diboto hamu, manang sadihari tingkina i! 13:34 Umpamana: Songon halak na marhutasada na manadingkon jabuna, disagihon do huaso tu angka naposona, tu ganup siulaonna be, jala sijaga pintu i didokkon marjaga. 13:35 Antong, dungo ma hamu, ai ndang diboto hamu, manang sadihari ro tuan nampuna bagas i, manang di bot ni ari, manang di na tonga borngin, manang di na martahuak manuk, manang di torang ni ari i. 13:36 So tung jumpangsa hamu modom, di na ro Ibana tompu! 13:37 Ai tu saluhutna hamu do hatangkon: Dungo ma hamu!
14:1 Alai dua ari nari nama uju i, asa dapot Pesta Paska, hamamasa ni roti na so pinolongan. Jadi dilului angka sintua ni malim dohot angka sibotosurat angkal manangkup jala mamusa Jesus. 14:2 Alai didok nasida ma: Unang ma di pesta i, so tung guntur natorop i! 14:3 Jadi uju di Betania Ibana, di bagas ni si Simon na huliton najolo, di na hundul Ibana laho mangan, ro ma sada parompuan mamboan galas na marisi miak arum na arga, na so marsampur, dibolai ma galas i jala diusehon ma miak i tu ulu ni Jesus. 14:4 Alai adong ma na marmungutmungut sama nasida: Magoponai miak i dibahen! 14:5 Aut ginadis nian miak i lobi tolu ratus rupia mangasii na pogos! Jadi dimuruhi ma ibana. 14:6 Alai ninna Jesus do: Pasombu hamu ma ibana! Boasa arsahanmuna ibana? Na uli do na binahenna i tu Ahu! 14:7 Ai tongtong do adong na pogos di tongatongamuna; jala asal ma olo hamu, tarpatongon hamu do na denggan tu nasida; alai anggo Ahu ndang manongtong di hamuna. 14:8 Intap na tarbahensa do na niulana i; na manjoloani do ibana mamiahi pamatangku songon di na mananom. 14:9 Situtu do hatangkon tu hamu: Manang didia di liat portibi on dijamitahon muse barita na uli on, hatahononna do nang binahenna i gabe baritana. 14:10 Dung i laho ma sada sian na sampuludua i, si Jude Iskariot, manopot angka sintua ni malim, asa dijehehon Ibana tu nasida. 14:11 Umbege i, tarhilas ma rohanasida, jadi diparbagabaga ma lehononnasida hepeng tu ibana. Gabe dilului rohana ma tingki halehetanna; laho pasahathon Ibana. 14:12 Jadi di ari parjolo ni pesta Paska, di na somal dipotong birubiru Paska i, ro ma hata ni angka sisean i tu Ibana: Tudia ma hami laho paturehon panganon Paska i, dipangido roham? 14:13 Jadi disuru Ibana ma siseanna dua halak, didok ma tu nasida: Laho ma hamu tu huta i, pajumpang ma hamu disi dohot sada halak na mangusung aek sahudon; ibana ma ihuthon hamu! 14:14 Jadi dok hamu ma tu nampuna jabu na binongotanna i: Tona ni Guru i tu ho: Didia do bilut inganan, asa disi hupangan hami Paska i rap dohot siseanki? 14:15 Jadi patuduhononna ma tu hamu bilut parginjang sada, na lambas, na tipak hinembangan, disi ma pature hamu di hita! 14:16 Borhat ma siseanna i, dibongoti ma huta i, jadi jumpang nasida ma tutu songon na nidokna i, gabe dipature ma Paska i. 14:17 Asa dung bot ari, ro ma Ibana rap dohot na sampuludua i. 14:18 Dung i hundul ma nasida mangan, gabe didok Jesus ma: Na tutu do hatangkon tu hamu: Sada sian hamu on, na rap mangan dohot Ahu, pasahathon Ahu! 14:19 Gabe marsak ma rohanasida jala sadasada ma nasida mandok tu Ibana: Nda tung ahu i? 14:20 Alai ninna Ibana do mangalusi nasida: Sada sian hamu na sampuludua on, na rap dohot Ahu manornophon tu bagasan paringkauan! 14:21 Tong do nian ujung ni Anak ni jolma i, songon na tarsurat hian; alai marjea do halak na gabe parhitean pasahathon Anak ni jolma i! Tagonan unang tubu Ibana! 14:22 Jadi di na mangan i nasida, dihindat Jesus ma roti, dipasupasu ma, diponggoli jala diparlehon ma tu nasida, huhut ma didok: Jalo hamu ma; Dagingku do on! 14:23 Dung i dihandit ma panginuman, didok ma mauliate, dilehon ma tu nasida, gabe saluhut do nasida manginum sian i. 14:24 Laos didok ma tu nasida: Mudarhu do on, mudar parpadanan i, na niusehon humongkop torop halak. 14:25 Na tutu do hatangkon tu hamu: Na so tupa be inumonku olat ni on sian parbue ni hau anggur i sahat ro di ari sogot: Disi ma inumonku na imbaru di harajaon ni Debata. 14:26 Jadi dung diendehon nasida ende pujipujian i, borhat ma nasida tu dolok Jetun. 14:27 Jadi didok Jesus ma tu nasida: Na targasip ma hamu saluhutna, ai na tarsurat do: "Lombutanku ma parmahan i, gabe marserak ma angka birubiru i!" 14:28 Alai dung hehe Ahu sian na mate, joloananku ma hamu tu Galilea. 14:29 Gabe didok si Petrus ma tu Ibana: Agia sude nasida targasip, ndang anggo ahu! 14:30 Jadi didok Jesus ma tu ibana: Situtu do hatangkon tu ho: Apala saborngin on ma soadahononmu Ahu tolu hali, tagan so martahuak dope manuk paduahalihon! 14:31 Alai lam digogohon ma hatana, didok ma: Nang pe ingkon mate ahu rap dohot Ho, ndang tagamon soadahononku Ho! Laos songon i do hatanasida sudena. 14:32 Dung i sahat ma nasida tu sada ladang na margoar Getsemane, jadi didok ma tu angka siseanna: Hundul ma hamu dison, tagan martangiang Ahu. 14:33 Jala ditogihon ma si Petrus, Jakobus dohot Johannes. Dung i biahaton ma Ibana jala bobonosan. 14:34 Jadi didok ma tu nasida: Mansai marsak do rohangku, hira na mate do. Dison ma hamu mian jala dungo! 14:35 Dung i laho ma Ibana tu jolo saotik, dipatungkap ma dirina tu tano martangiang, anggiat disalpuhon tingki i sian Ibana, anggo na tarbahen. 14:36 On do hatana: Ale Amang, saluhutna do tarpatupa Ho! Salpuhon ma siinumon on sian Ahu! Alai ndada guru lomo ni rohangku, roham do! 14:37 Dung i ro ma Ibana, jadi modom do nasida didapot, gabe didok ma tu si Petrus: O Simon, na modom do ho hape! Ndang margogo ho dungo, nanggo sangombas! 14:38 Dungo ma hamu jala martangiang, asa unang bongot hamu tu bagasan pangunjunan; ai na girgir do nian tondi i, alai gale do ia daging. 14:39 Dung i diulakkon ma martangiang; laos hata ondeng do didok. 14:40 Dung i di na ro Ibana muse, tong do modom nasida didapot, ai na dokdok do salibon ni matanasida, jala ndang diboto mangalusi Ibana. 14:41 Jadi di na ro Ibana patoluhalihon, didok ma tu nasida: Datdatanmuna dope modom dohot maradian! Sae ma i! Nunga dapot tingkina! Ida hamu, pasahatonna ma Anak ni jolma i tu tangan ni angka pardosa! 14:42 Hehe ma hamu; laho ma hita! Ndi, nunga ro na pasahathon Ahu! 14:43 Mangkatahon i dope Ibana, mamintor disi ma si Judas, sahalak sian na sampuludua i, jala rap dohot ibana torop halak na marpodang jala marlombutlombut, sinuru ni angka sintua ni malim, angka sibotosurat dohot angka panungganei. 14:44 Alai dipabotohon parjehe i hian partinandaan tu nasida, ai ninna do: Ia i na huumma, Ibana ma i, tangkup hamu ma i jala jamot ma boan hamu Ibana! 14:45 Mamintor didapothon ma Jesus, mandok: Guru! Laos diumma ma Ibana. 14:46 Gabe dilaluhon nasida ma tangannasida tu Ibana laho manangkup. 14:47 Alai adong ma sahalak sian angka na jongjong disi, disintak ma podangna, ditampul ma naposo ni sintua ni malim, dipisikkon ma pinggolna. 14:48 Jadi didok Jesus ma mandok nasida: Hira na dompak panamun do hamu hehe, marpodang jala marlombutlombut manangkup Ahu. 14:49 Ariari do Ahu nian rap dohot hamu di bagas joro mangajari, so adong ditangkup hamu Ahu! Alai naeng ma jumpang na nidok ni Surat i! 14:50 Dung i ditadingkon nasida sude ma Ibana laho maporus. 14:51 Adong ma disi dolidoli sahalak na mangihutihut Ibana, holan dagangan do dialithon tu dagingna, gabe ditangkup nasida ma ibana. 14:52 Alai ditinggalhon do dagangan i, marsaemara do ibana maporus. 14:53 Ditogihon nasida ma Jesus tu jolo ni sintua ni malim, jala marluhut ma disi sude angka sintua ni malim, angka sintua ro di angka sibotosurat. 14:54 Mandaodao do anggo si Petrus mangihut sian pudi ro di alaman parbagasan ni jabu ni sintua ni malim i, jadi disi ma ibana juguk rap dohot angka naposo mansusudu. 14:55 Alai anggo sintua ni malim i ro di sandok rapot godang mangalului panindangion dompak Jesus mambahen marutang hosa Ibana; alai ndang adong jumpangsa. 14:56 Ai lan do nian na mangkatindangkon gapgap dompak Ibana: Alai ndang mardomu na hinatindangkonnasida i. 14:57 Laos hehe ma deba sitindangi gapgap dompak Ibana, angka ninna do: 14:58 Hubege hami do Ibana mandok: Lohaanku ma joro on na pinauli ni tangan, jala di bagasan tolu ari pajongjongonku na asing, na so pinauli ni tangan. 14:59 Alai nang pe songon i, ndang mardomu na hinatindangkonnasida i. 14:60 Dung i hehe ma sintua ni malim i tu tongatonga, disungkun ma Jesus, ninna ma: Tung so alusanmu do na hinatindangkonnasida dompak Ho? 14:61 Alai mauhom do anggo Jesus, ndang agia aha dialusi. Gabe disungkun sintua ni malim i Ibana muse, didok ma: Beha, Kristus do Ho, Anak ni Sipujion i? 14:62 Jadi didok Jesus ma: Ahu do i! Jala idaonmuna do Anak ni jolma i hundul di siamun ni Hagogoon, jala ro marhitehitehon ombun na di langit. 14:63 Gabe diribakkon sintua ni malim i ma pangkeanna, huhut ma didok: Pola luluan dope sitindangi? 14:64 Nunga dibege hamu pangaleaina i di Debata! Beha do di rohamu? Gabe sude ma nasida manguhum Ibana marutang hosa. 14:65 Dung i dipungka na deba sian nasida manijuri Ibana, dibulang ma matana, dipastapi ma bohina huhut mandok tu Ibana: Manurirangi ma Ho! Nang angka naposo manahopi Ibana, laho mangalombuti. 14:66 Di toru do anggo si Petrus, di alaman parbagasan, jadi ro ma naposo boruboru ni sintua ni malim i sahalak. 14:67 Diida ma si Petrus na mansusudu i, gabe dibereng ma ibana, laos didok ma: Dohot do ho da, dongan ni Jesus na sian Nasaret! 14:68 Alai diporso si Petrus do, didok ma: Ndang adong huboto, jala ndang huantusi na nidokmi! Laos ruar ma ibana tu alaman jolojolo, jala martahuak ma manuk. 14:69 Alai marnida ibana, diulahi naposo boruboru i ma mandok tu angka na jongjong disi: On do sada sian nasida! 14:70 Alai mamorso muse anggo ibana. Jadi dung satongkin nari, didok angka na jongjong disi ma muse mandok si Petrus: A, tongon do; dongannasida do ho, ai halak Galilea do ho! 14:71 Gabe dipungka si Petrus ma mambuburahon dirina huhut manolonnolon: Ndang hutanda jolma na nidokmuna i! 14:72 Dung i mamintor martahuak ma manuk i paduahalihon. Jadi diingot si Petrus ma na nidok ni Jesus tu ibana: Tolu hali do soadahononmu Ahu, andorang so martahuak manuk paduahalihon. Jala marningot i, tumatangis ma ibana.
15:1 Manigor dung torang ari, martuptup ma angka sintua ni malim raphon angka panungganei, angka sibotosurat dohot sandok rapot godang i, jadi ditali nasida ma Jesus, mamboan jala pasahathon Ibana tu si Latus. 15:2 Disungkun si Latus ma Ibana: Atehe, raja ni halak Jahudi do Ho? Jala ninna Jesus ma mangalusi ibana: Songon nidokmi do tutu! 15:3 Alai godang do dipartuhashon angka sintua ni malim dompak Ibana. 15:4 Jadi diulahi si Latus ma manungkun Ibana: Ndang alusanmu i? Godangna i dituhashon nasida dompak Ho! 15:5 Alai ndang dialusi Jesus agia aha, pola longang roha ni si Latus. 15:6 Alai jumpa ari pesta, somal dipalua tu nasida sada halak na tarhurung, hombar tu na pinangido ni rohanasida. 15:7 Jadi adong ma sada halak na margoar si Barabas, rap tarhurung dohot angka panggunturi, naung mambunu jolma di na guntur i. 15:8 Jala nangkok ma na torop i laho mangido, asa dibahen tu nasida songon na somal. 15:9 Gabe ro ma si Latus mangalusi nasida: Atehe, denggan do rohamuna hupalua tu hamu raja ni halak Jahudi i? 15:10 Ai diboto, na sian late ni roha do dipasahat angka sintua ni malim Ibana. 15:11 Alai digintali angka sintua ni malim do natorop i, asa tagonan si Barabas dipalua tu nasida. 15:12 Jala ninna si Latus ma muse mangalusi nasida: Antong, dia do dipangido rohamu bahenonku tu na ginoarmuna: Raja ni Jahudi? 15:13 Alai dijouhon nasida ma: Parsilangkon Ibana! 15:14 Gabe didok si Latus ma mandok nasida: Ai aha do na jat dibahen? Alai lam digogo ma manjouhon: Parsilangkon ma Ibana! 15:15 Alai naeng mambuat roha ni natorop i do si Latus, jadi dipalua ma si Barabas; alai dipasahat ma anggo Jesus, asa diparsilangkon, dung jolo dilasahi. 15:16 Dung i ditogihon angka soldadu i ma Ibana tu emper paruhuman i (i ma Pretorion), jadi tusi ma dijou sude na sahorong i. 15:17 Baju dapdap ma disolukkon nasida tu dagingna, didandani ma sungsang duri bahen tumpalna. 15:18 Dung i tole ma nasida mangkormat Ibana, dipandok ma: Tabi ma di Ho, raja ni Jahudi! 15:19 Laos dipasakkon nasida tolong tu uluna, ditijuri do Ibana jala dilompit ma totnasida, laho sumomba Ibana. 15:20 Asa dung dileai nasida Ibana, ditanggal ma muse baju dapdap i sian dagingna, disolukkon ma tu Ibana angka abitna hian. Dung i ditogu ma Ibana tu balian, laho mamajalhon. 15:21 Mamolus do sian i sahalak na ro sian ladangna, si Simon na sian luat Kirene, ama ni si Aleksander dohot si Rupus; i ma digogoi nasida, asa diporsan hau na pinarsilang siporsanon ni Jesus hian. 15:22 Jadi diboan nasida ma Ibana tu Golgata (lapatanna: Partangkurahan). 15:23 Dilehon nasida ma tu Ibana anggur na marsaor mir, alai ndang dijalo. 15:24 Diparsilangkon nasida do Ibana, jadi dibagi ma angka abitna; tondung do dibahen laho pasagihonsa. 15:25 Di pungkul sia do diparsilangkon nasida Ibana. 15:26 Jala disurathon nasida do tu ginjangna surat parsalaanna: Raja ni Jahudi! 15:27 Rap dohot Ibana diparsilangkon nasida dua panamun, sada di siamunna, sada di hambirangna. 15:28 Gabe jumpang ma na nidok ni Surat i: "Tarrajum do Ibana tu halak parjahat." 15:29 Jadi diinsahi angka pamolus i ma Ibana, diupirhon be ma ulunasida huhut dipandok: Pe Ho, na mangalohai bagas joro i jala na pajongjongkonsa di bagasan tolu ari! 15:30 Palua dirim jala mijur ma Ho sian hau na pinarsilang i! 15:31 Suman tusi do panginsahion ni angka sintua ni malim rap dohot angka sibotosurat, angka na masipandohan: Na leban dipalua, ia dirina so tarpaluasa. 15:32 Ho, Kristus, raja ni Israel! Mijur ma Ho antong sian hau na pinarsilang i, asa huida hami i jala porsea! Manginsahi do nang donganna tarsilang. 15:33 Alai di hos ni ari songgop ma na holom tu liat tano i, sahat ro di pungkul tolu. 15:34 Jadi di pungkul tolu i, marsoara na balga ma Jesus manjouhon: Ale Debatangku, Debatangku, boasa tadingkononmu Ahu (Eloi Eloi, lama sabakhtani)! 15:35 Jadi adong ma deba na jongjong disi na umbegesa, gabe didok ma: Si Elia do jinouna i! 15:36 Alai marlojong ma sahalak manornophon limut tu asom, dilohothon ma i tu tolong laho painum Ibana, huhut ma didok: Antong, taida ma, manang na ro si Elia paijurhon Ibana! 15:37 Dung i marsoara na gogo ma Jesus, laos tos ma hosana. 15:38 Jadi maribak bola dua ma hirehire na di bagas joro i, sian ginjang tu toru. 15:39 Dung diida letnan na mangadopi Ibana, songon i hape parmatena, gabe didok ma: Na tutu do Anak ni Debata Halak on! 15:40 Manatapnatap do sian na dao deba inaina, songon si Maria Magdalena, si Maria ni si Jakobus na umposo, angkup ni i ina ni si Josep dohot si Salome. 15:41 Diihuthon nasida do Ibana laho mangkobasi, uju di Galilea dope Ibana; dungkon ni i lan dope angka na asing, na rap nangkok dohot Ibana tu Jerusalem. 15:42 Jadi dung bot ari, di ari parhobasan i, i ma patujolo ni ari Sabbat, 15:43 ro ma si Josep sian Arimatea, na masuk rapot godang, halak na sangap na maimaima di harajaon ni Debata; dipatomos ma rohana laho bongot tu jolo ni si Latus, mangido bangke ni Jesus. 15:44 Jadi longang ma roha ni si Latus, ala naung mate; gabe dijou ma letnan i, disungkun ma ibana, manang naung leleng mate. 15:45 Asa dung ditangkasi i sian letnan i, dipasahat ma bangke i tu si Josep. 15:46 Dituhor si Josep ma dagangan, dipaijur ma Ibana, dibaluti ma tu dagangan i, dipeakkon ma bangke i tu tanoman sada na niliang tu bagasan batu; dung i digulang ma sada batu tu baba pintu ni tanoman i. 15:47 Dipanotnoti si Maria Magdalena dohot si Maria ni si Josep ma, manang na tu dia Ibana dipeakkon.
16:1 Asa dung salpu ari Sabbat i, dituhor si Maria Magdalena dohot si Maria ni si Jakobus rap dohot si Salome ma ragamragam ni na hushus, laho mamiahi bangkena. 16:2 Jadi mansai sogot di ari parjolo dung Sabbat i, laho ma nasida tu tanoman i, di na binsar mata ni ari. 16:3 Masipandohan do nasida: Ise ma manggulang batu i di hita sian baba pintu ni tanoman i? 16:4 Mamereng dompak i nasida, diida ma naung digulang batu i, ai na balga situtu do i. 16:5 Dibongoti nasida ma tanoman i, gabe diida ma dolidoli sahalak, parulos na marlinanglinang, hundul tungkan siamun, jadi mabiar situtu ma nasida. 16:6 Alai ninna do mandok nasida: Unang ma hamu mabiar! Dilului hamu do Jesus na sian Nasaret, naung diparsilangkon. Nunga hehe Ibana; ndang dison Ibana! Ida hamu ma inganan hapeahanna on! 16:7 Laho ma hamuna, paboa hamu ma tu angka siseanna dohot tu si Petrus: Joloananna do hamu tu Galilea, disi ma idaonmuna Ibana, songon naung didok hian tu hamu! 16:8 Dung i ruar ma nasida maporus sian tanoman i, laos angka dotdot do nasida jala tarmali. Jadi ndang adong dipaboaboa nasida agia tu ise, ai na tahuton do rohanasida. 16:9 Alai anggo Jesus, naung mulak mangolu, sogot di ari parjolo dung ari Sabbat i, dipataridahon do dirina jumolo tu si Maria Magdalena (sian i do dipabali najolo pitu sibolis). 16:10 Jadi laho ma i paboahonsa tu angka na mandongani Ibana najolo, angka na marsak jala tumatangis. 16:11 Alai ndang porsea nasida, naung mangolu jala naung diida si Maria Ibana. 16:12 Dung i dipataridahon Ibana muse dirina tu dua halak sian nasida, marrupahon rupa na asing, di na laho marhutasada nasida. 16:13 Jadi dohot ma nasida ro mamaritahonsa tu angka donganna i; alai nang nasida, ndang dihaporseai. 16:14 Dung i muse uju hundul nasida mangan, dipataridahon ma dirina tu na sampulusada i, dipinsang ma ganggu dohot jogal ni rohanasida, ala so porsea nasida di angka naung marnida Ibana, naung hehe sian na mate. 16:15 Jadi ninna ma mandok nasida: Laho ma hamu tu liat portibi on; jamitahon hamu ma barita na uli i tu nasa na tinompa. 16:16 Na porsea jala tardidi, dapotan haluaon; alai na so porsea i, hona uhum do! 16:17 Jala on ma tanda angka na mangihut tu na porsea: Pabalionnasida do angka sibolis marhitehite Goarhu dohot mangkatahon hata na imbaru. 16:18 Jomputonnasida do angka, ulok, jala nang diinum rasun hamatean, ndang pola mahua nasida; ampehononnasida ma tanganna tu angka na marsahit, gabe malum ma hilalaonna. 16:19 Asa anggo Tuhan i, dung mangkatai Ibana dohot nasida, tarhinsat ma tu banua ginjang, laho hundul tu siamun ni Debata. 16:20 Alai laho do anggo nasida manjamitahon barita na uli tu ganup luat; jala diurupi Tuhan i ma nasida, dipahot ma jamitanasida marhitehite tanda angka na mangihut i.
1:1 Nunga na nia nian manguji manurathon jojor barita ni naung tangkas masa di tongatonganami, 1:2 mangihuthon pamaritahon ni angka sitindangi sian mulana i tu hami, i ma angka naung gabe parhalado di hata i. 1:3 Jadi dohot ma ahu pasadahon rohangku manurathonsa jojorjojor di ho, ale Teopilus na pinarsangapan, dung jolo hupamanat sude sian mulana i, 1:4 asa ditanda ho hasintongan ni hata, naung dipodahon tu ho. 1:5 Uju Herodes raja di tano Judea, adong ma sada malim na margoar Sakarias na sian horong ni si Abia; boru Aron do dongan saripena, si Elisabet do goarna. 1:6 Bonar do nasida duansa maradophon Debata, diparangehon do nasa patik dohot aturan ni Tuhan i, so hasurahan. 1:7 Ndang adong anakkonnasida, ai na hol do si Elisabet; jala nunga ganjang umurnasida be. 1:8 Jala jumpang ma di anggap ni horongna i mangulahon hamalimon ibana di adopan ni Debata. 1:9 Mangihuthon na hinasomalhon ni malim marsijomput na sinurat nasida, gabe ibana ma mambongoti joro ni Tuhan i manutung daupa. 1:10 Di ruar do anggo halak natorop sudena martangiang di tingki manutung daupa i. 1:11 Gabe diida ibana ma surusuruan ni Tuhan i, jongjong di siamun ni langgatan pardaupaan i. 1:12 Tarsonggot ma si Sakarias marnidasa jala laos hatahutan ma. 1:13 Didok surusuruan i ma tu ibana: Unang ho mabiar, Sakarias; ai nunga ditangihon pangidoanmi: Tubuhonon di donganmu saripe ma anak di ho; si Johannes ma bahenonmu goarna. 1:14 Marlas ni roha jala mariaia ma ho, jala torop do mangkalashon hatotopakna i. 1:15 Ai balga ma ibana di adopan ni Tuhan i; na so tupa inumonna tuak anggur ro di nasa siinumon na pang, jala gok Tondi Parbadia ma ibana sian bortian dope. 1:16 Torop ma anak Israel pasuangonna tu Tuhan Debatanasida. 1:17 Patujolona ma ibana di bagasan tondi dohot hagogoon ni si Elia, pasuangonna ma roha ni angka ama tu anakkonna jala angka na tois marroha gabe parroha na bonar, laho padirihon di Tuhan i bangso naung ture. 1:18 Gabe didok si Sakarias ma tu surusuruan i: Sian dia ma tandaonku i? Ai ahu nunga matua, dongan saripengku pe nunga ganjang umurna. 1:19 Dialusi surusuruan i ma ibana: Gabariel do ahu, na jongjong di jolo ni Debata; disuru do ahu mangkatai dohot ho, mamboan barita las ni roha on tu ho. 1:20 Alai gabe ngungu ma ho, ndang botoonmu mangkuling sahat ro di ari hamamasana, ala so dihaporseai ho hatangki, na naeng tulus di tingkina i. 1:21 Ia natorop i, sai maimaima do di si Sakarias; longang do rohanasida, ala songon i gele ibana di joro i. 1:22 Jadi laho ruar, ndang diboto mamangkulingi nasida, gabe manganto ma nasida, naung adong niidana di joro i. Mangkilapi nama ibana tu nasida, laos tong ngungu. 1:23 Asa dung sae tingkina marhalado, mulak ma ibana tu jabuna. 1:24 Ndang piga ari nari gabegabean ma si Elisabet, dongan saripena i, jadi martabunitabuni ma ibana lima bulan lelengna. 1:25 Ninna ma: Pambahen ni Tuhan i do i di ahu di tingki on, ai lomo do rohana mambuat haurahonki di jolo ni halak. 1:26 Salpu onom bulan disuru Debata ma pardisurgo Gabariel tu Nasaret, i ma sada huta di luat Galilea, 1:27 manopot sada anak boru, oroan ni sada baoa na margoar Josep, na sian pomparan ni si Daud; si Maria do goarna. 1:28 Laho mamasuhi jabuna i, ninna ma: Tabi di ho, na niasian! Didongani Tuhan i ma ho! 1:29 Alai tarsongot do nasida umbege hata i, ninna rohana do, parsantabian dia do i ulaning? 1:30 Jala didok surusuruan i ma tu nasida: Unang ho mabiar, ale Maria; ai dapotan asi ni roha do ho di Debata! 1:31 Gabegabean ma ho, tubuan anak ma ho; Jesus ma bahenonmu Goarna! 1:32 Balga ma Ibana muse, goaron do Ibana Anak ni Natumimbul i; lehonon ni Tuhan Debata do tu Ibana habangsa ni si Daud, amana i. 1:33 Rajaanna do pomparan ni si Jakkob salelenglelengna, jala ndang marhaujungan harajaonna i. 1:34 Didok si Maria ma mandok surusuruan i: Songon dia ma pangalaho ni i, ai so adong hutanda baoa. 1:35 Jadi dialusi surusuruan i ma nasida: Songgopan ni Tondi Parbadia ma ho jala linggoman ni hagogoon ni Natumimbul i do ho; ala ni i na badia do dohonon na tubu i, Anak ni Debata. 1:36 Ia si Elisabet, sisolhotmi na sai tua i, naung digoar na hol, marhangoluan anak do; paonombulanhon ma nuaeng. 1:37 Ai ndang adong na so tarpatupa Debata. 1:38 Gabe didok si Maria ma: Naposo ni Tuhan i do ahu. Sai saut ma tu ahu songon na nidokmi! Dung i ditadingkon surusuruan i ma nasida. 1:39 Di tingki i ma borhat si Maria dipahatop ma laho tu dolok, tu huta Juda. 1:40 Bagas ni si Sakarias do dibongoti, ditabi ma si Elisabet. 1:41 Umbege tabi ni si Maria i si Elisabet manggunjal ma posoposo di bagasan bortianna, jadi gok Tondi Parbadia ma si Elisabet. 1:42 Laos marsoara na gogo ma ibana, dijouhon ma: Dapotan pasupasu do ho di tongatonga ni angka ina; dapotan pasupasu do na pinarorotmi! 1:43 Marhua ma pola ro ina ni Tuhanki manopot ahu on! 1:44 Ai disi dapot pinggolhu soara ni tabimi, manggunjal do posoposo i di siubeonku, sian las ni rohana. 1:45 Martua ma ho, ala dihaporseai ho, ingkon tulus na tinonahon ni Tuhan i tu ho! 1:46 Gabe didok si Maria ma: Dipatimbul rohangku do Tuhan i. 1:47 Mariaia do tondingku mida Debata, Sipalua ahu. 1:48 Ai ditatap do haetehon ni naposona on. Parhatuaon ma ahu olat ni on marsundutsundut. 1:49 Ai habalgaon do dibahen Pargogo i tu ahu. Na badia do Goarna i. 1:50 Ai marsundutsundut do asi ni rohana mida angka na mangkabiari Ibana. 1:51 Hagogoon do diula tanganna i, dipanserakkon do angka na ginjang marroha. 1:52 Angka na gogo i dipaijur do sian habangsanasida, dipabangkit do angka na metmet. 1:53 Na denggan dipasuksuk Ibana tu angka na male, jala angka na lobian hian rumar do dipalaho. 1:54 Dipainuinu do Israel naposona i, marningot asi ni rohana i, 1:55 mangihuthon bagabagana na tu angka ompunta, tu si Abraham dohot tu pomparanna salelenglelengna. 1:56 Laos mian ma si Maria i disi arga tolu bulan jala mulak muse tu jabuna i. 1:57 Jadi gok ma tingki ni hangoluan ni si Elisabet; anak ma ditubuhon. 1:58 Marlas ni roha ma rap dohot ibana angka hombar bagasna dohot sisolhotna, umbege naung marasi ni roha godang Tuhan i di ibana. 1:59 Di ari paualuhon i ro ma nasida, laho manunat posoposo i; jala dibahen ma goarna Sakarias, mangihuthon goar ni amana. 1:60 Alai mangkuling ma inana i, didok ma: Nda tung; si Johannes do goarna bahenon! 1:61 Gabe didok nasida ma mangalusi ibana: So adong agia ise di angka sisolhotmi na margoar songon i! 1:62 Dihilapi nasida ma amana, manang ise goarna bahenon dipangido rohana. 1:63 Gabe dipangido ibana ma panuratan, disurathon ma: Si Johannes do goarna! Jadi tarhalomong ma nasida sude. 1:64 Alai di na satongkin i mungkap ma pamanganna, sumuang ma pangkataionna, marsoara ma ibana mamudii Debata. 1:65 Gabe hatahutan ma sude hombar hundulnasida, jala di sandok dolok Judea dipanghatahatahon do sasude na masa i. 1:66 Jala saluhut na umbegesa, diparateatehon be do barita i, ninna ma: Na gabe aha ma ulaning dakdanak on? Ai tung didongani tangan ni Tuhan i do ibana. 1:67 Gok Tondi Parbadia ma si Sakarias, amana i, gabe manurirangi ma: 1:68 Pinuji ma Tuhan i, Debata ni Israel, ala ditopot bangsona jala dipatupa haluaonna. 1:69 Dipatindang do di hita tanduk haluaon, di bagas ni si Daud naposona i, 1:70 hombar tu na hinatahonna marhite sian soara ni angka panurirangna na badia i sian na robi: 1:71 Haluaon sian angka musunta dohot sian tangan ni angka na mangkosomi hita, 1:72 laho mangasii angka amanta marningot padanna na badia i, 1:73 i ma uarina na niuarihonna di si Abraham amanta i, 1:74 paboa lehononna tu hita, asa hita marhalado di adopanna i, so pola marhabiaran be, dung malua hita sian tangan ni angka musu, 1:75 marhabadiaon jala marhatigoran di adopanna i, saleleng hita mangolu. 1:76 Ia ho, anaha, targoar ma panurirang ni Natumimbul, ai patujolo ni Bohi ni Tuhan i do ho, paturehon angka dalanna, 1:77 laho patandahon tu bangsona haluaon marhite sian hasesaan ni dosanasida, 1:78 hinorhon ni pangasii ni Debatanta; ai binahen ni i do ro na binsar sian ginjang i manopot hita, 1:79 laho sumondangi angka na hundul di bagasan haholomon, angka na nilinggoman ni hamatean, patongonhon langkanta tu dalan hadameon. 1:80 Ianggo dakdanak i, lam magodang do, lam togu marroha jala di halongonan do mian, paima papataronna dirina tu bangso Israel.
2:1 Dung i ro ma uju i parenta sian Kesar Augustus, ingkon suratan nasa jolma di gomgomanna. 2:2 Pamilangon parjolo ma i, uju digomgomi si Kirenius tano Siria. 2:3 Jadi borhat ma sasude, asa disurati, ganup tu bona ni pinasana. 2:4 Borhat ma nang si Josep, na sian Galilea, sian Nasaret, nangkok tu luat Judea, tu huta ni si Daud, na margoar Betlehem, ala sian pomparan jala marga ni si Daud ibana, 2:5 pasurathon dirina rap dohot si Maria, oroanna i, naung gabegabean. 2:6 Jadi di na disini nasida, gok ma ari ni hangoluanna. 2:7 Ditubuhon ma anak buhabajuna, diborhos ma, dipeakkon ma tu bagasan panggagatan, ala so adong inganan na asing di parmianannasida. 2:8 Jadi adong ma marborngin di ladang na disini angka parmahan, mangingani pinahannasida. 2:9 Jadi didapothon sada surusuruan ma nasida, jala marsinondang ma sangap ni Tuhan i humaliang nasida, gabe mabiar situtu ma. 2:10 Alai didok surusuruan i ma tu nasida: Unang mabiar hamu; ai barita halalas ni roha godang do huboan tu hamuna, parsaulian ni sandok bangso i. 2:11 Ai naung tubu do di hamu saborngin on, di huta ni si Daud, Sipalua i, i ma Kristus, Tuhan i! 2:12 On ma partinandaan di hamu: Posoposo do dapotonmuna, na binorhos peak di panggagatan. 2:13 Jala tompu ma adong dongan ni surusuruan i torop angka parangan parbanua ginjang, dipuji nasida do Debata, mandok: 2:14 Hasangapon ma di Debata di ginjang, dame ma di tano on, di angka jolma halomoan i. 2:15 Jala di na laho i angka surusuruan i sian nasida dompak ginjang, masipandohan ma angka parmahan i: Beta ma hita tu Betlehem, taida ma na masa on, na pinabotohon ni Tuhan i tu hita! 2:16 Jadi hatop ma nasida laho tusi, gabe jumpangsa si Maria dohot si Josep dohot Posoposo i, na peak di panggagatan i. 2:17 Asa dung diida, dibaritahon nasida ma boaboa, naung dihatahon tu nasida taringot tu Dakdanak i. 2:18 Jadi sude na umbegesa, longang be do siala na hinatahon ni angka parmahan i tu nasida. 2:19 Ia si Maria, dipeop do hata i sudena jala dipahusorhusor di bagasan rohana. 2:20 Mulak do angka parmahan i, dipasangap jala dipapujipuji do Debata ala ni sasude na binege jala na niidanasida, songon naung dihatahon i tu nasida. 2:21 Jadi dung dapot ari paualuhon i, asa tarsunat Ibana, gabe dibahen ma Goarna Jesus, naung digoar pardisurgo i hian, andorang so di bortian dope. 2:22 Asa dung gok angka ari pangiasannasida mangihuthon patik ni si Musa, diboan nasida ma Ibana tu huta Jerusalem, pasahathon Ibana tu Tuhan i, 2:23 songon na tarsurat di bagasan patik ni Tuhan i: "Nasa baoa, buhabaju ni inana, hadohoan ni Tuhan i do goaron!" 2:24 Huhut mamelehon pelean, songon na niaturhon di bagasan patik ni Tuhan i: Dua anduhur tabu manang dua anak ni darapati. 2:25 Jala adong ma sada halak di Jerusalem, na margoar si Simeon, halak na bonar jala daulat, na maimaima di pangapul na tu Israel; na niinganan ni Tondi Parbadia do ibana. 2:26 Jala nunga dipabotohon Tondi Parbadia i tu ibana, na so idaonna hamatean, ia so jolo diida Kristus ni Tuhan i. 2:27 Gabe ro ibana tu joro i didasdas Tondi i; tongon ma diboan natorasna Jesus, Posoposo i, tu bagasan, laho mambahen tu Ibana mangihuthon adat na niaturhon ni patik i. 2:28 Jadi diabing si Simeon ma Posoposo i, dipuji ma Debata, ninna ma: 2:29 Paluaonmu ma nuaeng, ale Raja, naposomon di bagasan dame, songon na nidokmi; 2:30 ai nunga diida matangku haluaon na sian Ho i, 2:31 na pinaradem di jolo ni bangso sudena, 2:32 bahen panondang sumondangi angka parbegu, bahen hasangapon ni Israel, bangsomi! 2:33 Jadi longang ma roha ni amana dohot inana umbege hatana i, na taringot tu Posoposo i. 2:34 Jala dipasupasu si Simeon ma nasida, laos ninna ma mandok si Maria, inana i: Na pinajongjong do on, bahen partinggangan dohot parhehean di torop sian Israel jala bahen tanda na hona gaga, 2:35 (ho pe, podang do manorushon roham muse), asa gabe patar pingkiran ni roha ni torop halak. 2:36 Jala adong do boruboru panurirang sada na margoar si Hanna, boru ni si Panuel, sian marga Aser. Nunga na tuatua nasida, na marsinonduk mangan najolo pitu taon lelengna, dung marhamulian. 2:37 Na mabalu do nasida, marumur ualupulu opat taon. Ndang meret nasida sian joro i, sai marpuasa jala martangiang mangoloi Debata, arian dohot borngin. 2:38 Dohot do nasida ro di na sangombas i mamuji Debata jala dibaritahon do Ibana tu saluhut na mangkasiholi haluaon ni Jerusalem. 2:39 Asa, dung dipasidung nasida saluhutna i hombar tu na pinatikkon ni Tuhan i, mulak ma nasida tu Galilea, tu Nasaret, hutanasida i. 2:40 Ia Dakdanak i, lam magodang do, lam margogo huhut marroha situtu, laos didongani asi ni roha ni Debata Ibana. 2:41 Jala ganup taon laho do natorasna tu Jerusalem marariraya Paska. 2:42 Jadi dung marumur Ibana sampuludua taon, rap nangkok do nasida, songon na somal di pesta i. 2:43 Asa dung diradoti nasida angka ari raya i, di na laho mulak i nasida, tinggal ma Jesus, Dakdanak i, di Jerusalem, so pamotoan ni natorasna. 2:44 Dirimpu nasida, naung rap dohot dongan sauduran Ibana, jadi didalani nasida ma parsadarian mangalului Ibana di tongatonga ni angka tondong dohot dongan. 2:45 Dung so jumpang nasida Ibana, mulak ma nasida tu Jerusalem, laho mangalului Ibana. 2:46 Salpu tolu ari, dapot nasida ma Ibana di joro i hundulhundul di tongatonga ni angka guru tumangihon hatanasida huhut manungkunnungkun. 2:47 Tarhalomong be do nasida umbege hatana, dibahen torus ni rohana dohot angka alusna. 2:48 Marnida Ibana, songgot do rohanasida jala dipanghulingi inana i ma Ibana: Boasa dibahen Ho songon i tu hami, anaha? Bernit do huahap hami dohot amangmu mangalului Ho. 2:49 Gabe didok ma tu nasida: Boasa pola luluanmuna Ahu? Ndang diboto hamu, na patut Ahu di bagasan bagas ni Damang? 2:50 Alai ndang diantusi nasida hata na nidokna i tu nasida. 2:51 Laos tuat do Ibana rap dohot nasida sahat tu Nasaret, jala pangoloi do Ibana di nasida. Alai dipeop inana i do sude na masa i di bagasan rohana. 2:52 Jadi lam ganda ma torus ni roha ni Jesus nang dagingna, lam dihalomohon Debata nang jolma Ibana.
3:1 Pasampululimataonhon hinarajahon ni Kesar Tiberius, uju Pontius Latus manggomgomi luat Judea, di tingki ni angka raja na opat on: Si Herodes di luat Galilea, si Pilippus, donganna saama, di luat Iturea dohot Trakonitis, si Lisanias di luat Abilene, 3:2 uju si Hannas dohot Kayapas sintua ni malim, ro ma hata ni Debata tu si Johannes, anak ni si Sakarias, di halongonan. 3:3 Gabe ditopot ibana ma sandok luat humaliang batang aek Jordan, dijamitahon ma pandidion hamubaon ni roha, laho pasesahon dosa. 3:4 Hombar tu na tarsurat di buku parjamitaon ni panurirang Jesaya: "Soara ni na manjoujou di halongonan! Pature hamu ma dalan di Tuhan i, pahornop hamu ma sidalananna!" 3:5 "Ingkon gohan do nasa rura jala siparejeton do nasa dolok dohot buntulbuntul, sipatigoron do na bengkuk jala sipadosdoson na marbungkibungki." 3:6 "Jala idaon ni nasa daging do haluaon na sian Debata!" 3:7 Asa didok ma tu natorop na ro padidihon dirina tu ibana: Hamu, anak ni ulok! Ise do na mangajari hamu pasidingkon rimas na ro sogot? 3:8 Parbuehon hamu ma na tama, paboa naung muba rohamuna! Jala so tung didok hamu di bagasan rohamuna: Si Abraham do amanami! Ai hudok ma tu hamu: Tarjadihon Debata do anak di si Abraham sian angka batu on. 3:9 Ai nunga pola ampe tangke tu daling ni angka hau. Onpe, sitabaon do nasa hau na so marparbuehon na denggan jala sidabuhononhon do tu api! 3:10 Gabe disungkun natorop i ma ibana: Dia nama bahenonnami? 3:11 Jadi dialusi ma nasida: Na marduabaju dilehon ma tu na so adong bajuna, jala na umpeop sipanganon, songon i ma dibahen! 3:12 Ro do nang angka sijalo beo padidihon dirina, angka didok ma: Guru, dia sibahenonnami? 3:13 Gabe didok ma tu nasida: Unang ma buat hamu lobi sian na niaturhon tu hamu! 3:14 Dohot ma angka soldadu manungkun ibana: Ia hami, dia ma sibahenonnami? Jadi dialusi ma: Unang ma susai, unang ma dobo hamu halak! Hasabamhon hamu ma gajimuna! 3:15 Managamnagam do bangso i, dirimpu be di bagasan rohana taringot tu si Johannes, atik beha Kristus i ibana. 3:16 Gabe dialusi si Johannes ma nasida saluhutna: Ahu do tutu mandidihon hamu dohot aek; alai na ro ma na gumogo sian ahu; na hurang tama do ahu mangkarhari tali ni sipatuna. Didihonon ni I do tu hamu Tondi Parbadia dohot api. 3:17 Di tanganna do purpuran, paiasonna ma pardegeanna: Papunguonna do emena tu sopona, alai tutungonna do hurangkam i tu api na so ra mintop. 3:18 Lan dope na asing dipasingothon tu bangso i, laho mamaritahon barita na uli tu nasida. 3:19 Alai hona hata do si Herodes, raja na opat i, dibahen si Johannes, siala si Herodias, pardihuta ni anggina, dohot siala sude ulaon na jahat ni si Herodes i. 3:20 Alai tamba ni sasudena i: Didabu ma si Johannes tu hurungan. 3:21 Alai uju tardidi natorop i saluhutna, gabe dohot ma Jesus tardidi; jala di na martangiang Ibana, mungkap ma langit. 3:22 Jala mijur ma Tondi Parbadia tu atasna marrupa songon darapati, jala masa ma soara sian ginjang, songon on: Ho do Anakku, haholongan i; lomo do rohangku di Ho! 3:23 Anggo Jesus hirahira tolupulu taon do umurna di parhehena i; jala di roha ni halak, Ibana anak ni si Josep, i ma anak ni si Eli; 3:24 i ma anak ni si Mattat, anak ni si Lepi, anak ni si Malki, anak ni si Jannai anak ni si Josep; 3:25 anak ni si Mattatis, anak ni si Amos, anak ni si Nahum, anak ni si Esli, anak ni si Naggai; 3:26 anak ni si Maat, anak ni si Mattatis, anak ni si Semein, anak ni si Josek, anak ni si Joda; 3:27 anak ni si Joanan, anak ni si Resa, anak ni si Serubabel, anak ni si Sealtiel, anak ni si Neri; 3:28 anak ni si Malki, anak ni si Addi, anak ni si Kosam, anak ni si Elmadam, anak ni si Er; 3:29 anak ni si Josua, anak ni si Elieser, anak ni si Jorim, anak ni si Mattat, anak ni si Lepi; 3:30 anak ni si Simeon, anak ni si Juda, anak ni si Josep, anak ni si Jonam, anak ni si Eliakim; 3:31 anak ni si Melea, anak ni si Mina, anak ni si Mattata, anak ni si Natan, anak ni si Daud; 3:32 anak ni si Isai, anak ni si Obed, anak ni si Boas, anak ni si Salmon, anak ni si Nahason; 3:33 anak ni si Amminadab, anak ni si Admin, anak ni si Arni, anak ni si Hesron, anak ni si Peres, anak ni si Juda; 3:34 anak ni si Jakkob, anak ni si Isak, anak ni si Abraham, anak ni si Tera, anak ni si Nahor; 3:35 anak ni si Serug, anak ni si Reu, anak ni si Peleg, anak ni si Heber, anak ni si Sela; 3:36 anak ni si Kenan, anak ni si Arpaksad, anak ni si Sem, anak ni si Noak, anak ni si Lamek; 3:37 anak ni si Metusalah, anak ni si Henok, anak ni si Jared, anak ni si Mahalaleel, anak ni si Kenan; 3:38 anak ni si Enos, anak ni si Set, anak ni si Adam; na sian Debata do anggo i.
4:1 Gok Tondi Parbadia ma Jesus mulak sian aek Jordan, gabe diliathon Tondi i Ibana di halongonan. 4:2 Opatpulu ari lelengna diunjuni sibolis i Ibana. Sandok ndang mangan Ibana manipat angka ari i; jadi dung marujung i, male ma dihilala. 4:3 Gabe didok sibolis i ma tu Ibana: Anggo na tutu Ho Anak ni Debata, dokkon ma batu on gabe roti. 4:4 Dialusi Jesus ma ibana: Tarsurat do: "Apala holan sipanganon hangoluan ni jolma; nasa hata ni Debata do." 4:5 Dung i ditogihon ma Ibana tu na huminsat, dipatuduhon ma tu Ibana sude harajaon na di tano on di bagasan sanghidop mata. 4:6 Laos didok sibolis ma tu Ibana: Tu Ho ma lehononku sasudena on gomgomanmu ro di hasangaponna i, ai tu ahu dipasahat i, jala hulehon i tu silomo ni rohangku. 4:7 Di Ho ma i saluhut, anggo olo Ho marsomba tu ahu. 4:8 Jadi dialusi Jesus ma ibana: Tarsurat do: "Tuhan Debatam do sombaonmu, sasada Ibana do sioloanmu!" 4:9 Gabe ditogihon do Ibana tu Jerusalem, dipajongjong ma Ibana tu palaspalas ni bagas joro, laos didok ma tu Ibana: Anggo Anak ni Debata Ho, dabuhon ma dirim sian on tu toru. 4:10 Ai na tarsurat do: "Dohononna do angka surusuruanna taringot tu ho, asa diramoti ho," 4:11 "jadi tangantanganonnasida do ho, asa unang tartuktuk patmu tu batu." 4:12 Alai dialusi Jesus ibana muse: Didok do: "Ndang jadi unjunanmu Tuhan Debatam!" 4:13 Jadi dung dipaujung sibolis i sude pangunjunan i, ditadingkon ma Ibana, paima ro tingkina muse. 4:14 Margogohon Tondi i ro Jesus muse tu Galilea, jadi sar ma baritana tu sude luat humaliang i. 4:15 Mangajari do Ibana di angka parguruannasida, jala saluhut do mamuji Ibana. 4:16 Jadi ro ma Ibana tu Nasaret, tu huta hagodanganna. Mangihuthon hasomalanna laho do Ibana tu parguruan i jumpa ari Sabbat; jadi jongjong ma Ibana, naeng manjaha. 4:17 Gabe dilehon ma tu Ibana pustaha ni panurirang si Jesaya, diungkap ma i jadi dapot matana ma na tarsurat songon on: 4:18 "Songgop do tu ahu Tondi ni Tuhan i, ai dimiahi do ahu, mamboan barita na uli tu angka na pogos. 4:19 Disuru do ahu, mamaritahon tu angka na tarhurung asa malua, tu angka na mapitung asa marnida, paluahon angka na ginosagosa, mamaritahon taon parasinirohaon ni Tuhan i." 4:20 Ditutup ma pustaha i, dipaulak ma tu parhobas; laos hundul ma, gabe nolnol ma dompak Ibana mata ni sude na di parguruan i. 4:21 Jala dihatahon ma tu nasida: Sadari on do jumpang na tarsurat ondeng, di na binegemuna i. 4:22 Sasude do manohoi Ibana jala longang be do, umbege hata na tabo na hinatahonna, gabe ninna ma: Nda anak ni si Josep Ibana? 4:23 Jala didok Ibana ma tu nasida: Dohononmuna do nian tu Ahu hata ni umpama on: Pamalum ma dirim, ale datu! Angka na hubege hami na binahenmi di Kapernaum, laos bahen ma i dison, di huta hagodanganmon! 4:24 Jadi didok ma: Situtu do hatangkon tu hamu: Tung na so marsangap do panurirang anggo di luat hagodanganna. 4:25 Sintong do na hudok on tu hamu: Lan do nian boruboru na mabalu di bangso Israel di tingki ni si Elia di na manintak langit tolu taon onom bulan lelengna, uju masa haleon potir di sandok tano on. 4:26 Alai ndang tu manang ise nasida disuru si Elia, tung tu Sarpat do, na di luat Sidon, tu sada boruboru na mabalu. 4:27 Lan do nian na huliton di bangso Israel, di tingki ni panurirang si Elisa; alai ndang adong agia ise nasida dipamalum, holan si Naaman halak Siria i do. 4:28 Jadi gok rimas ma nasida sude na di parguruan i umbegesa. 4:29 Hehe do nasida, dipabali Ibana sian huta i, ditogu ma Ibana tu tolping ni dolok, ojahan ni hutanasida i, laho manggulangkon Ibana sian i. 4:30 Alai mamolus do Ibana sian tongatonganasida, laos laho sian i. 4:31 Jadi tuat ma Ibana tu huta Kapernaum, na di Galilea; diajari ma nasida jumpa ari Sabbat. 4:32 Gabe longang do rohanasida umbege podana, ai marsahala do jamitana i. 4:33 Jala adong ma di parguruan i sada halak partondi na hodar; marsoara na gogo ma dianggukhon: 4:34 Oe Jesus na sian Nasaret, marhua Ho tu hami! Na ro do Ho hape mangago hami! Hutanda do Ho; na badia ni Debata do Ho! 4:35 Alai disonggahi Jesus do ibana, didok ma: Sip ho! Ruar ma ho sian ibana! Jala tu tongatonga i ma disampathon tondi na hodar i ibana, laho ruar; ndang mahua ibana dibahen. 4:36 Jadi longang ma rohanasida saluhutna, gabe masipandohan ma nasida: Na boha do on? Mardongan huaso dohot gogo dipaksa angka tondi na hodar, gabe ruar do. 4:37 Jala sar ma baritana tu nasa inganan humaliang. 4:38 Borhat ma Ibana sian parguruan i, gabe masuk ma tu jabu ni si Simon. Ia simatua boru ni si Simon, posa do panepanena, jala ditaringothon ma nasida tu Ibana. 4:39 Jadi dijonohi ma nasida, disonggahi ma panepane i, gabe laho ma i. Jala manigor hehe ma inaina i marhobasi di nasida. 4:40 Dung sundut mata ni ari, dipamboan be ma tu Ibana na marsahitna, na marragamragam niaena. Jala tu nasida sadasada diampehon Ibana tanganna, laho pamalum nasida! 4:41 Sian torop nasida marruaran angka sibolis na manampiar, mandok: Anak ni Debata do Ho; gabe disonggahi do nasida, ndang diloas nasida paboahon, naung diboto, Kristus i Ibana. 4:42 Alai di torang ni arina i borhat Ibana laho tu halongonan. Ia natorop i dilului jala didapothon ma Ibana, laho mangambat Ibana nian, unang laho sian nasida. 4:43 Alai didok ma tu nasida: Ingkon dohot do tu angka huta na asing hubaritahon harajaon ni Debata, ai ala ni i do Ahu disuru. 4:44 Jala marjamitai do Ibana di angka parguruan na di luat Galilea.
5:1 Jongjong di topi tao Genesaret do Ibana sahali, di na nirongoman ni natorop Ibana, laho umbege hata ni Debata. 5:2 Jadi tongon ma diida dua parau di topi pasir; ia pardengke i nunga ruar mamburi jalanasida. 5:3 Gabe dibongoti Ibana ma parau na sada na di si Simon i, jala dipangido tu ibana, asa dipaholang parau i saotik sian pasir i. Hundul do anggo Ibana mamodai natorop i sian parau i. 5:4 Asa dung mansohot Ibana marjamita, ninna ma mandok si Simon: Lugai ma tu na umbagas jala sampakkon hamu ma jalamuna, asa dapotan. 5:5 Gabe ninna si Simon ma mangalusi: Guru! Manipat saborngin on do huhalojahon hami, so adong dapot; alai mangasahon hatami olo do ahu sumampakkon. 5:6 Dipasaut nasida ma i, gabe dapot nasida ma dengke mansai godang, pola maribak jala i. 5:7 Jala dihilap nasida ma dongannasida na di parau na sada, asa ro mandongani nasida mambuatsa. Ro do nasida, gabe digohi ma parau i duansa maradu lonong. 5:8 Marnida i si Simon Petrus, marsomba ma ibana tu jolo ni Jesus, huhut ma didok: Laho ma Ho sian ahu, Tuhan, ai halak pardosa do ahu! 5:9 Ai tarhalomong do ibana ro di sude donganna siala dengke na binuatnasida i. 5:10 Songon i do nang angka dongan ni si Simon i, si Jakobus dohot si Johannes, angka anak ni si Sebedeus. Jala ninna Jesus ma mandok si Simon: Unang ho mabiar: Olat ni on ma ho gabe sijala jolma! 5:11 Dipadarat nasida ma angka parau i, ditadingkon ma saluhutna i mangihuthon Ibana. 5:12 Jala tagan di sada huta Ibana, adong ma sada halak na huliton. Marnida Jesus i, manungkap ma ibana mandok: O Tuhan, molo na olo Ho, tarpaias Ho do ahu! 5:13 Jadi disurdukkon Jesus ma tanganna, laos dijama ma ibana, huhut ma didok: Na olo do Ahu, ias ma ho! Jadi pintor longkang ma hulit i sian ibana. 5:14 Jala diorai Ibana ma, asa unang dipaboa i tu halak; alai laho ma ho, ninna, patuduhon ma dirim tu malim; dung i pelehon ma na pinatikkon ni si Musa, ala naung ias ho, bahen panindangion tu nasida. 5:15 Alai lam sar do baritana jadi torop halak marpungu, laho tumangihon hatana jala pamalumhon sahitnasida. 5:16 Alai manginsurut tu halongonan do anggo Ibana, laho martangiang. 5:17 Dung i di na sadari mangajari Ibana, jadi hundul ma disi angka Parise ro di guru, angka na ro sian nasa huta na di Galilea dohot Judea, nang sian Jerusalem. Mangimpas do gogo ni Tuhan i di Ibana, pamalum angka sahit. 5:18 Jala diboan na mamboan ma sada halak na sarion, na peak di podomanna, dilului do dalan pabongothon ibana, laho mameakkonsa tujolo ni Jesus. 5:19 Alai ndang tarpabongot nasida ibana dibahen ponjotna i, gabe dipanaek nasida ma tarup i; diungkapi ma butar i, ditantan ma ibana di atas podomanna tongon tu jolo ni Jesus. 5:20 Marnida haporseaonnasida i Jesus, ninna ma: Nunga sesa angka dosami, anaha! 5:21 Gabe marhusari ma angka sibotosurat ro di Parise i; Ise do On, na mangaleai Debata? Holan sasada Debata do na tuk manesa dosa! 5:22 Alai ditanda Jesus do parhusarion ni rohanasida, jadi dialusi ma nasida: Aha dipingkiri hamu di bagasan rohamuna? 5:23 Dia do ummomo? Dohonon; nunga sesa angka dosami! Manang dohonon: Hehe ma ho mardalani? 5:24 Alai asa diboto hamu, marhuaso do Anak ni jolma i di tano on manesa angka dosa (didok ma tu na sarion i), Ahu mandok tu ho: Hehe ma ho, boan ma podomanmi; laho ma ho muli! 5:25 Manigor hehe ma ibana dipanotnoti nasida, dihindat ma podoman hapeahanna i laho muli, huhut dipuji Debata. 5:26 Tarhalomong nasida sude, dipuji ma Debata, laos gok biar nasida mandok: Na so dung masa do huida hami sadari on! 5:27 Dung salpu i, mardalani ma Ibana, gabe diida ma sada halak sijalo beo, na margoar si Lepi, hundul di parbeoan, jadi didok ma tu ibana: Ihuthon Ahu! 5:28 Jadi hehe ma i, ditadingkon saluhutna mangihuthon Ibana. 5:29 Dihobasi si Lepi ma di Ibana sipanganon ujuan di jabuna i. Jala torop angka sijalo beo dohot jolma na asing rap hundul marsipanganon. 5:30 Marmungutmungut ma angka Parise dohot sibotosuratnasida dompak angka siseanna i, mandok: Boasa mangan minum hamu rap dohot angka sijalo beo dohot sipardosa? 5:31 Gabe dialusi Jesus ma nasida: Apala ringkot pandaoni di angka na hisar, di angka na marsahit do! 5:32 Ndang na ro Ahu manjou angka partigor, asa dipauba rohana, angka pardosa, i do! 5:33 Alai didok nasida ma tu Ibana: Marpuasai jala martangiangi do angka sisean ni si Johannes, songon i angka sisean ni Parise i; alai mangan minum do anggo siseanmi. 5:34 Gabe ninna Jesus ma mandok nasida: Ai tarsuru hamu do pandongani ni pangoli marpuasa, saleleng rap dohot nasida pangoli i? 5:35 Alai na ro ma arina, buatonna ma disi Pangoli i sian nasida; disi ma nasida marpuasa. 5:36 Dihatahon ma huhut umpama on tu nasida: Ndang adong na olo mangaribahi abit na imbaru laho mandungkaphonsa tu abit naung buruk; ai molo boti, sega ma abit na imbaru i, laos so tangkup pandungkap na imbaru tu na buruk i. 5:37 Ndang dipainding jolma tuak anggur siraruan tu inganan na basebasean; ai molo boti, puntason ni tuak anggur siraruan i do ingananna i, gabe ambolong tuak anggur i, ingananna pe sega do. 5:38 Tu poting na imbaru do paindingon tuak anggur siraruan i! 5:39 Jala naung somal manginum tuak anggur naung leleng, ndang dipangido na imbaru, ai ninna do: Lambok do naung leleng i.
6:1 Jadi jumpa ari Sabbat mamolus ma Ibana sian tonga ni hauma jala digotili siseanna i ma angka biur, laos diguguti, dung dirurusi dohot tangannasida. 6:2 Gabe ninna deba sian angka Parise ma: Boasa ulaonmuna na so jadi jumpa ari Sabbat? 6:3 Jadi dialusi Jesus ma nasida: Asa ndang dijaha hamu huroha pambahenan ni si Daud, uju na male ibana rap dohot donganna sauduran? 6:4 Ai dibongoti do bagas ni Debata jala dibuat roti na marhadohoan, gabe dipangan ma sian i, dilehon deba tu donganna; na so jadi panganon ni manang ise i nian, dungkon ni angka malim. 6:5 Laos didok ma tu nasida: Guru di Anak ni jolma i do nang ari Sabbat! 6:6 Jumpa ari Sabbat na asing dibongoti Ibana ma parguruan i laho mangajari, jadi adong ma disi sahalak naung mate tanganna siamun. 6:7 Mangonggop do angka sibotosurat ro di angka Parise, manang na olo Ibana pamalum sahit di ari Sabbat, asa taraluhon nasida Ibana. 6:8 Alai diboto Ibana do pingkirannasida, jadi ninna ma mandok partangan na mate i: Hehe ma ho tu tongatonga on! Jala hehe ma i jongjong tusi. 6:9 Dung i ninna Jesus ma mandok nasida: Husungkun ma hamu: Dia do na patut ulaon di ari Sabbat: Mambahen na denggan manang na jahat, pangoluhon hosa manang mangagohonsa? 6:10 Jala dibereng ma nasida tuk humaliang, laos ninna ma tu halak i: Patoltol tanganmi! Diula ma i, gabe malum tanganna i. 6:11 Songon na ritoritoon do anggo nasida, laos martuptup ma di sibahenonnasida tu Jesus. 6:12 Di angka ari i ma nangkok Ibana tu dolok martangiang, jala manipat na saborngin i ma didatdati martangiang tu Debata. 6:13 Jadi dung torang ari, dijou ma tu jolona angka siseanna, sampuludua do dipillit sian nasida; digoar do nasida apostel. 6:14 Si Simon, na ginoaranna Petrus, dohot si Andreas, donganna saama; si Jakobus dohot Johannes; si Pilippus dohot Bartolomeus; 6:15 si Mateus dohot si Tomas; si Jakobus ni si Alpeus dohot si Simon, na margoar si Silotes; 6:16 si Jude ni si Jakobus dohot si Jude Iskariot, na gabe siparjehe muse. 6:17 Tuat ma Ibana rap dohot nasida tu sada inganan na hornop; adong ma disi torop angka siseanna dohot mansai godang halak natorop sian sandok Judea dohot Jerusalem, nang sian topi laut ni Tirus dohot Sidon. Na ro do nasida, umbege hatana huhut pamalumhon sahitnasida tu Ibana. 6:18 Nang angka na sinahitan ni tondi na hodar gabe malum. 6:19 Jadi sude natorop i mangiraira manjama Ibana, ai ruar do gogo sian Ibana, dipamalum do saluhutna. 6:20 Dung i dibereng ma angka siseanna, huhut ma didok: Martua ma hamu angka na pogos, ai di hamu do harajaon ni Debata! 6:21 Martua ma hamu angka na male nuaeng, ai sipabosuron do hamu! Martua ma hamu angka na tangis nuaeng, ai mengkel ma hamu muse. 6:22 Martua ma hamu, anggo dihosomi jala dipilpilhon halak hamu, anggo diinsahi jala dibolongkon goarmuna songon parjahat ala ni Anak ni jolma i. 6:23 Las ma rohamuna jala mariaia di hamamasana i, ai balga do upamuna di banua ginjang i, ai songon i do dibahen angka amanasida tu angka panurirang i. 6:24 Alai marjea ma hamu na mora, ai nunga sahat dijalo hamu apulapul na tu hamu. 6:25 Marjea ma hamu na bosuran nuaeng, ai rapar hamu muse! Marjea ma hamu, na mengkel nuaeng, ai na mangandung jala tumatangis hamu muse! 6:26 Marjea ma hamu, anggo saluhut jolma mamujimuji hamu; ai songon i do dibahen amanasida tu angka panurirang pargapgap i. 6:27 Alai hudok ma tu hamuna na manangi: Haholongi hamu ma musumuna; na denggan ma bahen hamu tu na mangkosomi hamu. 6:28 Pasupasu hamu ma angka na mamburai hamu, tangiangkon hamu ma angka na mangasupi hamu. 6:29 Anggo dipastap hurummi, tarehon nang na sambariba i; jala anggo dibuat ulosmu, unang jua nang bajubajum. 6:30 Nasa na mangido tu ho, lehon; jala unang tunggu halak, naung mambuat ugasanmi. 6:31 Ia i na pinangidomuna, naeng bahenon ni halak tu hamu, i ma bahen hamu tu nasida! 6:32 Ai molo dihaholongi hamu na marholong ni roha di hamu, parulian dia ma i di hamu? Ai nang angka parjahat dihaholongi do na marholong ni roha di nasida. 6:33 Jala anggo dibahen hamu na denggan tu angka sibahen na denggan tu hamu, parulian dia ma i di hamu? Nang angka parjahat i, songon i do pambahenna. 6:34 Jala molo mangkirim hamu mambuatsa muse, laho pasali dongan, parulian dia ma i di hamu? Ai dipasali parjahat do donganna parjahat, asa dijalo muse hepengna. 6:35 On ma tahe: Haholongi hamu ma musumuna bahen hamu ma na denggan jala pasali hamu ma, di na so hirim rohamuna di balosna; balga ma upamuna, gabe angka anak ni Natumimbul i ma hamu, ai basa do Ibana di na tois marroha jala di na jahat. 6:36 Gabe parasiroha ma hamu, songon Amamuna, Parasiroha i! 6:37 Unang ma hamu manguhumuhumi, gabe ndang uhumanna hamu! Unang hamu manorui, gabe ndang toruanna hamu! Palua hamu, gabe paluaonna hamu! 6:38 Lehon hamu ma, gabe lehononna ma di hamu! Parsuhatan na denggan, na nionjat, na hinuturhutur jala na pinasuksuk lehononna tu ampuanmuna, ai parsuhatan na sinuhathonmuna do suhathononna tu hamu. 6:39 Jala dihatahon do nang umpama on tu nasida: Tung tartogu na mapitung ma donganna na mapitung di dalan? Nda rap targodung ma nasida duansa? 6:40 Ndada sumurung sisean sian guruna. Naung sun denggan do ganup, molo doshon guruna. 6:41 Aha ma pola paberengberengonmu silbaksilbak na di mata ni donganmu; ia na satiang na di matami ndang diantoi ho! 6:42 Tung dohononmu ma tu donganmi: Ua, huumpat ma jolo silbaksilbak na di matami, anggia; hape na satiang na di matami ndang diida ho! E ho pangansi, jumolo ma umpat tiang i sian matami: Dung pe i, asa pingkironmu, manang beha pangumpatmu di silbaksilbak na di mata ni donganmu. 6:43 Ai ndang adong hau na denggan, na marparbuehon na roa, manang hau na roa na marparbuehon na denggan. 6:44 Ai sian parbuena i do tartanda nasa hau. Ai ndang tarputikkon antajau sian tadatada, jala ndang tarbuat parbue ni hau anggur sian rimbang. 6:45 Angka hadengganon do dirungkari halak na denggan roha sian pangkal na denggan na di bagasan rohana, jala na jahat do dirungkari halak na jahat roha sian na jat na pineopna hian. Ai ia i na manggohi roha, matua i do dihatahon pamangan. 6:46 Boasa antong goaronmuna Ahu: Tuhan, Tuhan!, hape ndang diula hamu na hudok. 6:47 Nasa na ro tu Ahu, anggo dibege angka hatangku jala diulahon, tudos ma i tu na hupatuduhon on: 6:48 Songon halak na pajongjong jabu, na mangkali bagas laho paojakkonsa tu batu mamak. Asa di na magodang aek, ditondong batang aek ma bagas i; alai ndang na tarhutiksa, ala togap dipauli. 6:49 Anggo na umbegesa, alai ndang diulahon, tudos ma i tu halak sipajongjong jabu di tano, so marhaojahan tu batu; ditondong batang aek ma i, jadi manigor marumpak ma, pola tung marongso.
7:1 Asa dung sun dihatahon Ibana sasude hatana ondeng tu pinggol ni natorop, dibongoti ma huta Kapernaum. 7:2 Jadi hansitan ma naposo ni sada letnan, na pinarhamaol ni tuanna, pola matemate ne. 7:3 Dung dibege ibana barita ni Jesus, disuru ma angka sintua ni halak Jahudi manopot Ibana mangelehelek, asa ro pamalum naposona i. 7:4 Sahat ma nasida tu Jesus jala gomos ma Ibana diapoi, ninna ma: Patut do oloanmu ibana. 7:5 Ai holong do rohana di bangsonta; tung ibana do pajongjong parguruanta. 7:6 Jadi rap laho ma Jesus dohot nasida. Alai ndang apala dao be Ibana sian jabu i, nunga disuru letnan i angka donganna mandok tu Ibana: Tuhan, unang loja Ho! Ai na hurang tama do ahu, tung bongotanmu jabungku. 7:7 Laos ala ni i do ndang tau huetong diringku manopot Ho. Alai dok ma hata sisandok, asa malum naposongki. 7:8 Ai halak, na ginomgoman ni na marhuaso do ahu, na mangarajai soldadu; molo hudok tu na sada: Tusadui ma ho?, laho do ibana; ia tu na sada: Tu on ma ho! -- Ro do ibana; jala ia tu naposongku: On ma bahen!, jadi i do dibahen. 7:9 Umbege i, longang ma Jesus, laos humusor ma Ibana mandok tu natorop na mangihuthon Ibana: Hudok ma tu hamu: Gari di halak Israel, gari ndang jumpang Ahu haporseaon na songon i! 7:10 Jadi muli ma angka na sinuru i tu jabu, laos malum do didapot nasida anak somang i. 7:11 Marsogotna i laho ma Ibana tu sada huta na margoar Nain; siseanna i do donganna sauduran, songon i do natorop godang. 7:12 Mandapothon bahal ni huta i nasida, tongon ma diusung tu balian sahalak naung mate, anak sasada ni inana naung mabalu; jala torop do pangisi ni huta i mangundurhon. 7:13 Marnida na mabalu i Tuhan i, maras do rohana, jadi didok ma tu ibana: Unang ho tangis! 7:14 Laos didapothon ma batang i, dijama ma, jadi sulon ma na mangusungsa, gabe didok ma: O dolidoli, hudok ma tu ho: Hehe ma ho! 7:15 Jadi hundul ma halak naung mate i, dipungka ma mangkatai jala dilehon ma ibana tu inana i. 7:16 Hatahutan do nasida sasude jala dipuji ma Debata, didok ma: Panurirang bolon do dipahehe di tongatonganta jala ditatap Debata do bangsona. 7:17 Sar ma baritana i tu sandok luat Judea ro di sude luat na humaliang i. 7:18 Jadi dibaritahon angka sisean ni si Johannes ma sasudena i tu ibana, gabe dijou ma dua siseanna tu jolona. 7:19 Disuru ma nasida manopot Tuhan i mandok: Ai Ho do na naeng ro i, manang na asing dope paimaonnami? 7:20 Asa dung sahat halak i tu jolona, didok nasida ma: Disuru si Johannes pandidi i do hami manopot Ho, mandok: Ai Ho do na naeng ro i, manang na asing dope sipaimaonnami? 7:21 Tongon uju i torop ma halak dipalua Ibana sian sahit dohot haporsuhon nang sian angka tondi na jahat, jala torop na mapitung marnida dibahen. 7:22 Laos dialusi ma nasida songon on: Laho ma hamu mamaritahon tu si Johannes na niida jala na binegemuna on: Na gabe marnida do angka na mapitung, na mardalani do angka na pangpang, na gabe ias do angka na huliton, na marbinege angka na nengel, na mulak mangolu do angka na mate; tu angka na pogos do binoan barita na uli; 7:23 jala martua do na so targasip di Ahu! 7:24 Alai dung laho angka suruan ni si Johannes, ditaringoti ma si Johannes tu natorop i: Aha do na naeng idaonmuna, umbahen na laho hamu ruar tu halongonan? Arung na meoleol na niullus ni alogo do? 7:25 Na marnida aha do umbahen na borhat hamu? Halak parabit na lamot do? Di jabu ni na raja do angka na marabit na sangap jala angka na gaduk. 7:26 Na marnida aha do tahe, umbahen na borhat hamu? Panurirang do? I do tutu! Hudok ma di hamu: Sumurung do ibana sian panurirang! 7:27 Ibana do na nidok ni Surat i: "Suruonku ma suruanki, patujolom, sipature dalanmu di jolomi!" 7:28 Hudok ma tu hamu: Ndang adong na tubu sian parompuan na umbalga asa si Johannes; alai halak na ummetmet, naung di bagasan harajaon ni Debata, umbalga ma i sian ibana. 7:29 Ai natorop i saluhutna na umbege hatana ro di angka sijalo beo, dipintori do Debata, ai dijalo do pandidion i sian si Johannes. 7:30 Alai anggo halak Parise dohot sipeop patik i, disundati do tahi ni Debata na taringot tu nasida, ai ndang dipadidihon dirina tu ibana. 7:31 Asa tu ise ma patudosonku halak na sansundut on; tudos tu ise nasida tahe? 7:32 Tudos ma nasida tu angka dakdanak na hundul di onan, na masijouan mandok: Hupalui hami suling di jolomu, so haru manortor hamu; andung hupatubegehon hami, so saut hamu tangis. 7:33 Ai na ro do si Johannes pandidi i, ndang mangan roti, ndang minum anggur ibana, gabe didok hamu: Na sibolison do ibana! 7:34 Ro Anak ni jolma i, mangan minum do anggo Ibana, gabe didok hamu; Ndi Halak on! Sipapangan mago, sisobur tuak, aleale ni sijalo beo dohot sipardosa! 7:35 Gabe pintor Hapistaran i dipintori angka anakna saluhutna. 7:36 Dung i diarahon sahalak sian angka Parise ma Ibana mangan; jadi dibongoti ma jabu ni Parise i, laos hundul disi: 7:37 Dung i ro ma boruboru pardosa sahalak, isi ni huta i, ala diboto, naung hundul Ibana di bagas ni Parise i; diboan ma sada galas alabaster, isian ni miak na hushus. 7:38 Mariluilu do ibana laho mandapothon tu pat ni Jesus; iluiluna do manonui patna i, obukna do dibahen mangapusi, diumma ma patna i jala dimiahi dohot miak na hushus i. 7:39 Marnida i halak Parise na mangarahon Ibana, marhusari ma ibana songon on: Aut na panurirang halak on, tandaonna do boruboru on na manjama Ibana jala botoonna do pangalahona, ai sipardosa do i. 7:40 Gabe dialusi Jesus ma ibana: Simon, adong na hudok tu ho! Ia hata ni i: Hatahon ma, Guru! ninna. 7:41 Dua do parsingiran ni sada halak sipaanakkon hepeng. Utang ni na sada limaratus rupia, limapulu do di na sada nari. 7:42 Ala soada gararnasida, dibasabasahon ma i tu nasida duansa. Asa ise nasida tagamon na humolong roha di ibana? 7:43 Dialusi si Simon ma: Parsibasabasaan na gumodang i do, anggo di rohangku. Jadi dialusi ma ibana: Tingkos do panimbangmi! 7:44 Dung i didompakkon ma parompuan i, laos ninna ma mandok si Simon: Atehe diida ho do parompuan on? Ro do Ahu tu jabum on, ndang dilehon ho aek pamuri ni pathu; alai anggo ibana, iluilu ni matana do dibahen manonui pathu jala diapusi dohot obukna. 7:45 Ndang diumma ho Ahu; alai anggo ibana, olat ni dung bongot tuson, ndang dipasohot mangumma pathu. 7:46 Ndang dimiahi ho ulungku; alai anggo ibana, dimiahi do pathu dohot miak na hushus. 7:47 Dibahen i hudok ma tu ho: Nunga sesa dosana na godang i, umbahen godang holong ni rohana. Alai anggo otik do disesa, otik ma holong ni rohana. 7:48 Laos didok ma tu parompuan i: Nunga sesa angka dosami! 7:49 Gabe didok angka donganna sapanganan ma sama nasida: Ise do On? Ai dohot do angka dosa disesa? 7:50 Laos didok muse tu parompuan i: Haporseaonmi do paluahon ho. Mardame ma ho muli!
8:1 Salpu i dibolus Ibana ma angka huta dohot lumban marjamita, laho mamaritahon harajaon ni Debata; na sampuludua i do donganna, 8:2 nang deba parompuan naung pinamalumna sian angka tondi na jahat dohot sian parsahiton, i ma si Maria, na margoar Magdalena, na tinadingkon ni pitu tondi na hodar, 8:3 dohot si Johanna, dongan saripe ni si Kusa, juara bagas ni si Herodes, dohot si Susana, ro di torop na asing, na manatap Ibana sian sinadongannasida. 8:4 Asa dung pungu torop jolma jala marroan tu jolona sian angka huta i sude, marumpama ma Ibana: 8:5 Na laho ma sahalak panabur manaburhon boni. Jadi di na manabur i ibana, adong ma deba na mamiltik tu dalan, gabe tardege ma i jala diparguti pidong na martongatonga langit. 8:6 Na deba madabu tu batu; jala dung tubu, rahar ma, ala so maraek. 8:7 Na deba madabu tu tongatonga ni parsihupian, jala rap tubu ma sihupi i, dipisat ma i. 8:8 Ia na asing i madabu tu tano na denggan i; jala dung tubu, diparbuehon ma saratus lompit. Dung didok songon i, dijouhon ma: Hamu, angka parpinggol na marbinege, pinggol umpama i. 8:9 Disungkun angka siseanna ma Ibana taringot tu umpama i. 8:10 Gabe didok ma: Dilehon do tu hamu pamotoan di hahomion ni harajaon ni Debata; alai marhitehite umpama do tu angka na asing, asa unang diida, nang pe dibereng, jala unang diantusi, nang pe dibege. 8:11 Alai on ma umpama i: Ia boni i, hata ni Debata do. 8:12 Anggo na di dalan i, i ma angka na umbegesa, dung i ro ma sibolis i, dibuat ma hata i sian rohanasida, asa unang porsea nasida, unang dapotan haluaon. 8:13 Anggo na di batu i, i ma angka na las roha manjangkon hata i, dung dibege; alai ndang marurat nasida, sangombas do nasida porsea, jala di masa ni pangunjunan marbalik nasida. 8:14 Anggo na madabu tu parsihupian i, i ma angka na umbegesa, gabe laho ma nasida, hapusohan binahen ni pangkolsohon, hamoraon dohot hahisapon ni ngolu on, jala ndang matoras parbuena. 8:15 Alai anggo na tu tano na denggan, i ma angka na mameop hata binegena i di bagasan roha na bonar jala na denggan, gabe saut marparbue di bagasan habengeton. 8:16 Alai ndang adong na pagalakkon palito, gabe dihungkuphon ampang tusi, manang dibahen tu toru ni parate; tu parpalitoan do dibahen, asa diida angka na ro i palito i. 8:17 Ai ndang adong na buni, na so patar muse; jala ndang adong na simo, na so tangkas tandaon muse jala mullop. 8:18 Dibahen i pamanat hamu ma, manang songon dia parbinegemuna; ai tu paradongan lehonon do, alai buaton ma sian na so paradongan na adong di ibana di rohana. 8:19 Dung i ro ma inana dohot angka anggina manopot Ibana, gabe ndang tarbahensa tolhas tu jolona, dibahen torop ni halak. 8:20 Jala adong ma na paboahon tu Ibana: Inangmu dohot anggimu jongjong dibalian; naeng idaonnasida do Ho! 8:21 Alai ninna Jesus ma mandok nasida: Angka on na umbege jala mamarangehon hata ni Debata, i do dainang, i do angka anggingku! 8:22 Jala di na sadari bongot ma Ibana tu parau rap dohot angka siseanna, laos didok ma tu nasida: Tataripari ma tao i; dung i borhat ma nasida. 8:23 Di na marparau i nasida, nok ma matana. Jadi turun ma habahaba siappalautus tu tao i, gabe disangkopi galumbang i ma nasida, pola tarmara. 8:24 Jadi didapothon nasida ma Ibana, disungguli ma: Ia hatanasida: Guru! Guru! Na mago ma hami! Dung i hehe ma Ibana; hona hata ma alogo i dohot galumbang ni aek i dibahen, gabe so ma jala menak. 8:25 Alai ninna ma mandok nasida: Didia do haporseaonmuna? Alai mabiar do nasida huhut longang, jala masipandohan: Halak dia ma On ulaning? Gari angka alogo i dohot aek i dipaksa, jala dioloi do Ibana. 8:26 Marlayar nasida tu luat Gadara, tondongkon ni luat Galilea. 8:27 Asa dung tardarat Ibana, dapotsa ma sada halak, isi ni huta i, partondi na hodar; nunga na nia lelengna ndang olo be marabit jala ndang olo mian di jabu, di angka parbandaan do ibana. 8:28 Alai disi diida Jesus, mangangguhi ibana manungkap di jolona, jala gogo ma soarana mandok: Marhua Ho tu ahu, Jesus, Anak ni Debata Na tumimbul? Huelehelek Ho, unang ahu arsahi! 8:29 Ai didokkon Jesus do tondi na hodar i ruar sian jolma i. Nunga jotjot disoroi ibana, gabe dirantei jala dibeangkon halak ibana laho mangaramoti; alai dirapui tondi i do angka ihot i jala dihidahida ibana tu halongonan. 8:30 Disungkun Jesus ma ibana: Ai ise goarmu? Gabe didok ma: Loksa do goarhu. Ai torop do tondi na jahat sorang tu ibana. 8:31 Laos dielehelek nasida Ibana, unang dipaksa nasida turun tu banua toru. 8:32 Alai adong ma disi, di robean i, babi sapunguan na balga na manjampali, gabe dipangido, asa diloas nasida mambongoti angka i; jadi dioloi ma. 8:33 Gabe ruar ma tondi na jahat i sian jolma i, dibongoti ma angka babi i, jadi marbubur ma na sapunguan babi i sian rura tu tao, laos mate mogap. 8:34 Alai dung diida angka parmahan i na masa i, maporus ma nasida, dibaritahon ma i di huta dohot di angka ladang. 8:35 Gabe ruar ma nasida marnida naung masa i; didapothon ma Jesus, jadi jumpang nasida ma halak, na jahat i, marabit jala marroha, hundul di lambung pat ni Jesus, jadi hatahutan ma nasida. 8:36 Alai angka na marnidasa, i do paboahon tu nasida pangalaho ni hamamalum ni na sinorangan ni angka tondi na hodar i. 8:37 Jadi dielehelek saluhut pangisi ni luat humaliang Gadara ma Ibana, asa sumurut sian nasida, ai biahaton situtu do nasida. Laos bongot tu parau ma Ibana laho mulak. 8:38 Dielehelek halak na tinadingkon ni tondi na jahat i do Ibana naeng dongananna Ibana nian; alai dipalaho do ibana, ninna ma: 8:39 Muli ma ho tu jabum, pajojor ma saluhut na binahen ni Debata tu ho! Jadi laho do ibana, dibaritahon ma di sandok huta i nasa na binahen ni Jesus tu ibana. 8:40 Asa dung mulak Jesus, dijangkon natorop i do Ibana, ai nunga dipaimaima hian Ibana. 8:41 Jadi ro ma sahalak, na margoar si Jairus, sintua ni parguruan i do ibana; dipatungkap ma dirina tu jolo ni Jesus mangelehelek Ibana, asa ro tu jabuna. 8:42 Ai matemate ne do boruna sisadasada, na marumur sampuludua taon. Jadi laho mandapothon tusi, hona sosak ma Ibana dibahen natorop i. 8:43 Dung i adong ma parompuan sahalak, naung sampuludua taon lelengna marsahithon bulan; nunga dipasuda sude artana tu angka pandaoni, so tarpamalumsa. 8:44 I do na ro mandapothon Jesus, sian pudi ma dijama rambu ni ulosna, jadi manigor montok ma mudar i. 8:45 Gabe didok Jesus ma: Ise do i na manjama Ahu? Dung sude mansoadahon, ninna si Petrus rap dohot angka donganna ma: Guru, natorop i do manosak jala mamonjoti Ho! 8:46 Alai ninna Jesus do: Adong do na manjama Ahu! Ai huhilala, ruar do gogo sian Ahu. 8:47 Diantusi parompuan i ma, na so buni hape pambahenna i, jadi angka hitir ma ro, disomba ma Ibana, dipajojor ma di jolo ni saluhut natorop i alana, umbahen na dijama, ro di hamamalumna di na santongkin i. 8:48 Gabe ninna ma mandok ibana: Haporseaonmi do na paluahon ho, inang; mardame ma ho muli! 8:49 Mangkatahon i dope Ibana, adong ma na ro sian jabu ni sintua ni parguruan i mandok: Nunga mate borumi; unang be lojai Guru i! 8:50 Umbege i Jesus, dialusi ma ibana: Unang ho mabiar, asal porsea ho; sai mangolu do ibana! 8:51 Dung sahat tu jabu, ndang diloas bongot halak, dungkon ni si Petrus, si Johannes dohot si Jakobus, angkup ni ama dohot ina ni dakdanak i. 8:52 Tangis do sasude mangandungi na mate i. Alai ninna ma: Unang hamu tangis! Ai ndang na mate ibana, na modom do! 8:53 Gabe diparengkeli nasida Ibana, ala diboto naung mate. 8:54 Alai ditangkup Ibana ma tanganna, dijouhon ma: Hehe ma ho, butet! 8:55 Gabe mulak ma hosana, jadi manigor hehe ma; didokkon Jesus ma lehonon dakdanak i mangan. 8:56 Tarmali ma natorasna i; alai dipopai ma nasida, unang dihatahon na masa i.
9:1 Dung i dipapungu ma na sampuludua i; dilehon ma tu nasida gogo dohot huaso, mangalo nasa tondi na hodar nang pamalum angka sahit. 9:2 Disuru ma nasida mamaritahon harajaon ni Debata jala pahisarhon halak. 9:3 Jala ninna ma mandok nasida: Unang boan hamu agia aha tu tongandalan, manang tungkot, manang singkop, manang roti, manang hepeng, manang dua baju pe. 9:4 Jadi molo dung dibongoti hamu jabu, disi ma hamu mian; laos sian i ma hamu borhat muse. 9:5 Anggo so dijangkon hamu, ruar ma hamu sian huta sisongon i; pirpirhon hamu ma orbuk i sian totmuna, bahen panindangion tu nasida. 9:6 Jadi borhat ma nasida; diliati ma angka huta marbarita na uli huhut pamalum sahit di sasude. 9:7 Dibege si Herodes, raja na opat i, ma sude na masa i, gabe bohabohaon ma ibana, ala adong na mandok: Nunga dipahehe si Johannes sian na mate. 9:8 Na deba mandok: Nunga ro si Elia; na asing muse: Nunga mulak mangolu sahalak sian angka panurirang na robi. 9:9 Alai didok si Herodes ma: Ianggo si Johannes, nunga hugotap uluna; alai ise ma On, naung songon i hubege baritana? Jala dipangido rohana, naeng idaonna Ibana. 9:10 Asa dung mulak angka apostel i, dipajojor nasida ma tu Ibana nasa na niulanasida, gabe ditogihon ma nasida manginsurut tu sada huta na margoar Betsaida. 9:11 Umboto i natorop i, diihuthon ma Ibana, jadi dijangkon Jesus ma nasida, dibaritahon ma tu nasida harajaon ni Debata jala dipamalum angka na hurang hipas i. 9:12 Alai di na mareak guling bot, ro ma na sampuludua i mandok tu Ibana: Pamuli ma natorop i, asa laho nasida sorang tu angka huta dohot tu angka parladang humaliang, anggiat dapotsa sipanganon, ai halongonan do ingananta on. 9:13 Alai ninna ma mandok nasida: Lehon hamu ma nasida mangan! Gabe ninna nasida ma: Holan lima roti dohot dua dengke do di hita, anggo so hami laho manuhori sipanganon di natorop on saluhutna. 9:14 Ai arga limaribu halak do toropnasida. Laos ninna ma mandok siseanna: Dokkon hamu ma nasida juguk marsasapunguan, marlimalimapulu. 9:15 Dipatupa nasida ma i, dipahundul ma nasida saluhutna. 9:16 Dibuat Ibana ma na lima roti dohot na dua dengke i, ditailihon ma tu ginjang, laho mamasumasu; diponggoli ma, dilehon ma tu siseanna, asa nasida sumagihonsa tu natorop i. 9:17 Mangan ma nasida saluhutna jala bosur be do; laos dibuat do angka ponggolponggol ebaebanasida, gok sampuludua ampang. 9:18 Jadi uju martangiang Ibana sasadasa, didapothon angka sisean i ma Ibana, gabe disungkun ma nasida: Ise do Ahu didok natorop? 9:19 Didok nasida ma mangalusi: Si Johannes pandidi do; na deba: Si Elia; na deba: Sahalak sian angka panurirang na robi, naung mulak mangolu. 9:20 Gabe didok Ibana ma tu nasida: Anggo hamu, ise do Ahu didok hamu? Jadi ninna si Petrus ma mangalusi: Kristus ni Debata do Ho! 9:21 Alai gogo ma nasida diorai, unang dipaboaboa i tu halak. 9:22 Laos didok ma: Ia Anak ni jolma i, ingkon godang do taononna, bolongkonon ni angka panungganei, sintua ni malim dohot sibotosurat do Ibana, dung i pusaon do, jala mulak mangolu do di ari patoluhon. 9:23 Tu saluhutna ma didok: Ia adong na naeng mangihuthon Ahu, disoadahon ma dirina, dituhuk ma ariari hau pinarsilang na tu ibana, laho mangihuthon Ahu. 9:24 Ai agoan hosa ma na naeng paluahon hosana; alai na agoan hosa ala ni Ahu, i do na pangoluhonsa. 9:25 Ai aha ma gunana di jolma, nang nasa portibi on diomo, anggo diago dirina, laos mago disi. 9:26 Asa na olo maila ala ni Ahu dohot ala ni angka hatangki, pailaon ni Anak ni jolma i do ibana, di na ro Ibana di bagasan hasangapon na di Ibana dohot na di Ama i raphon angka surusuruan na badia i. 9:27 Alai tutu do hatangkon tu hamu: Adong do deba na jongjong dison, na so tupa mangae hamatean, so jolo diida ro harajaon ni Debata. 9:28 Arga ualu ari dung salpu hata ondeng, ditogihon ma si Petrus, si Johannes dohot si Jakobus nangkok tu dolok martangiang. 9:29 Jadi uju na martangiang Ibana, mimbar ma rupa ni bohina, jala marlinanglinang ma parabitonna. 9:30 Mangkatai ma dua halak dohot Ibana; i ma si Musa dohot si Elia. 9:31 Marhasangapon do nasida idaon, angka na humatahon ujung ni langkana, sipasidungonna di Jerusalem. 9:32 Tarpodom do anggo si Petrus dohot angka donganna. Alai dung dungo nasida, gabe diida ma hasangaponna i, nang halak na dua i jongjong di lambungna. 9:33 Jala martahi sirang nasida sian Ibana, ninna si Petrus ma mandok Jesus: O Guru, dengganna i dison! Hupauli hami ma soposopo tolu: Sada di Ho, sada di si Musa, sada di si Elia; so adong diboto na nidokna i. 9:34 Mandok songon i dope ibana, ro ma ombun sada mangalinggomi nasida, gabe hatahutan ma nasida, laho bongot tubagasan ombun i. 9:35 Jadi mangkuling ma sada soara sian ombun i mandok: On do Anakku na tarpili i; tangihon hamu ma Ibana! 9:36 Jadi dung mangkuling soara i, sasada Jesus nama dapot nasida disi. Laos mauhom do nasida; ndang dipabotohon na niidanasida i tu agia ise anggo di angka ari i. 9:37 Torang ni arina i tuat ma nasida sian dolok i, jala ro ma torop halak manjumpangkon Ibana. 9:38 Jadi adong ma di tongatonga ni natorop i sahalak na manjouhon: Guru, sombangku di Ho, tatap ma anakki; sasada i do tubungku. 9:39 Disi disoro tondi i ibana, manigor mangguhangguk ma, dipapuhung do ibana, pola margumogumo pamanganna; maol sumurut sian ibana, sai digosagosa do. 9:40 Nunga huelehelek angka siseanmi, asa dipabali nian; alai ndang tarpatupasa i! 9:41 Gabe dialusi Jesus ma mandok: E bangso na so porsea jala na sumalin on! Sadia leleng on angkupanku jala paanjuanjuonku hamu? Boan anakmi tuson! 9:42 Mandapothon Jesus i dope nasida, nunga disoro tondi na jahat i ibana jala dipapuhung. Alai disonggahi Jesus ma tondi na hodar i jala dipamalum ma dakdanak i; dipasahat ma ibana tu amana. 9:43 Tarhalomong do nasida saluhutna dibahen hasahalaon ni Debata. Jadi di na longang nasida mida sude pambahenanna i, ninna Ibana ma mandok siseanna: 9:44 Tangihon hamu ma hatangkon: Magira ma pasahaton Anak ni jolma i tu tangan ni halak! 9:45 Alai ndang diantusi nasida pandokna i; buni do i sian rohanasida, so diarti, jala tanggak do rohanasida, manungkun Ibana siala hata i. 9:46 Alai tubu ma pingkirannasida sama nasida: Manang ise nasida masuk na sumurung. 9:47 Alai diboto Jesus do pingkiran ni rohanasida, gabe dialap ma sada dakdanak, dipajongjong ma tu lambungna. 9:48 Laos didok ma tu nasida: Na olo manjangkon dakdanak on ala Goarhu, Ahu do na jinangkonna disi; jala na manjangkon Ahu, manjangkon na marsuru Ahu do. Ai na ummetmet sian hamu sude, i do na balga dohonon. 9:49 Jadi mangkuling ma si Johannes, ninna ma: Guru, huida hami do sada halak, sipabali angka tondi na jahat mangasahon Goarmu; jala nioraan ibana, ala so didongani hami mangihuthon Ho. 9:50 Didok Jesus ma tu ibana: Unang orai hamu ibana! Ai na so mangalo hamu, donganmuna do i. 9:51 Alai di na lam donok ari hababangkitna, dipatohom ma bohina mardalan tu huta Jerusalem. 9:52 Laos disuru ma angka suruanna patujolona. Jadi laho ma nasida, dibongoti ma sada huta ni halak Samaria, paturehon parbornginanna. 9:53 Gabe ndang dijangkon nasida Ibana, ala dipatohom bohina laho tu Jerusalem. 9:54 Marnida i siseanna si Jakobus dohot si Johannes, didok ma: Tuhan, anggo olo Ho, hudokkon hami ma turun api sian ginjang mangalengsehon nasida, (songon binahen ni si Elia). 9:55 Alai humusor ma Ibana, hona hata ma nasida dibahen, (ninna ma: Ndang diboto hamu hape, manang Tondi dia di hamu? 9:56 Ai laho paluahon, ndada mangagohon tondi ni jolma Anak ni jolma i, umbahen na ro). Jala tu huta na asing nama ditopot nasida. 9:57 Uju di tongandalan nasida, ninna sahalak ma mandok Ibana: Sai ihuthononku do Ho, manang tudia pe Ho laho. 9:58 Didok Jesus ma tu ibana: Na marliang do angka antuasu, na marasar do pidong na martongatonga langit; alai anggo di Anak ni jolma i ndang adong hapeahan ni uluna. 9:59 Ia tu sahalak na asing didok: Ihuthon Ahu! Alai didok i ma: Loas ahu jolo laho mananom damang! 9:60 Alai ninna ma mandok ibana: Pasombu ma angka na mate mananom na matena; alai anggo ho, borhat ma mamaritahon harajaon ni Debata! 9:61 Sahalak na asing muse mandok: Huihuthon pe Ho, Tuhan; alai loas ahu jolo martinading hata tu angka donganku sabagas! 9:62 Alai ninna Jesus ma mandok ibana: Na manjama ninggala, huhut mamereng tu pudi, tung na so tau ma i tu harajaon ni Debata.
10:1 Dung i dipillit Jesus dope pitupulu halak nari, jala duadua do nasida disuru patujolona tu sude huta dohot inganan, sitopotonna i muse. 10:2 Ninna ma mandok nasida: Bidang do nian sisabion, alai otik do anggo pangula. Onpe, elehelek hamu ma Nampuna sisabion i, anggiat dipaborhat angka pangula tu sisabionna i. 10:3 Laho ma hamu! Hira birubiru do hamu husuru tu tongatonga ni angka babiat. 10:4 Unang boan hamu handehande manang hajut, manang sipatu pe; unang tabi hamu halak di tongandalan! 10:5 Laho mambongoti jabu, jumolo ma dok hamu: Dame ma di hamu na sabagas on! 10:6 Jala molo adong disi anak hadameon, songgop ma damemuna tu ibana; alai molo soada, mulak ma i tu hamu. 10:7 Di jabu i ma hamu mian; mangan jala inum hamu ma sian na adong di nasida, ai tama do marupa pangula; unang laholaho hamu sian jabu na sada tu na sada. 10:8 Anggo dibongoti hamu huta jala dijangkon do hamu, pangan hamu ma na nilehonnasida tu hamu. 10:9 Pamalum hamu ma angka na hansitan na disini; dok hamu ma tu nasida: Nunga sahat harajaon ni Debata tu hamu! 10:10 Alai anggo dibongoti hamu huta, gabe ndang dijangkon nasida hamu, ruar ma hamu tu partungkoan; dok hamu ma tu nasida: 10:11 Nang orbuk sian hutamuna on, na lohot di totnami, huapusi hami mulak tu hamu; asal diboto hamu, naung ro harajaon ni Debata. 10:12 Hudok ma di hamu: Neang do sitaonon ni pangisi ni huta Sodom di ari sogot, martimbangkon sitaonon ni huta sisongon i. 10:13 Marjea ma ho, Korasin! Marjea ma ho, Betsaida! Ai aut di huta Tirus dohot di Sidon dipamasa hagogoon angka naung masa di hamu, tibu ma paubaonnasida rohanasida, marabithon goni, hundul di orbuk. 10:14 Asa neang do sitaonon ni pangisi ni huta Tirus dohot Sidon di ari uhum i, martimbangkon sitaononmuna. 10:15 Jala ho Kapernaum, nda na pinatimbo ho ro di langit an? Sidabuhononhon do ho sahat tu banua toru! 10:16 Na tumangihon hamu, Ahu do tinangihonna, jala na manulak hamu, Ahu do tinulakna; alai na manulak Ahu, na marsuru Ahu do tinulakna disi. 10:17 Mardongan las ni roha do mulak na pitupulu i mandok: Tuhan, guru doknami do nang tondi na jahat i, marhitehite Goarmu! 10:18 Alai ninna ma mandok nasida: Huida do sibolis i madabu sian ginjang songon porhas. 10:19 Nunga hupasahat tu hamu huaso mandegei angka ulok dohot hala dohot mangalo nasa hagogoon ni musu i; na so tupa hahuaonna hamu. 10:20 Alai ndang pola las rohamuna, ala naung guru dokmu angka tondi i. On ma tahe halashon hamu: Naung tarsurat goarmuna di banua ginjang i! 10:21 Laos di tingki i ma marolopolop Ibana di bagasan Tondi Parbadia, mandok: Hupuji Ho, Amang, Tuhan Sigomgom banua ginjang dohot tano on, ala ditamondingkon Ho i sian jolo ni angka na pistar dohot na marroha, gabe dipapatar Ho i tu angka siondihononhon. Olo, Amang, i do dihalomohon roham hian! 10:22 Saluhutna i, nunga dipasahat Damang tu Ahu; jala ndang adong na tumanda Anak i, dungkon ni Ama i; Ama i pe, ndang adong na tumanda i, ia so holan Anak i, angkup ni na pinodaan ni Anak i mangihuthon lomo ni rohana. 10:23 Dung i didompakkon ma pulik angka siseanna, mandok: Martua ma angka mata na marnida na niidamuna; 10:24 Ai hudok ma di hamu: Torop do angka panurirang dohot raja masihol: Naeng idaonna nian naung niidamuna, hape ndang diida; jala naeng begeonna, naung binegemuna, hape ndang dibege. 10:25 Dung i hehe ma sada sibotopatik mangunjuni Ibana, ninna ma: Guru, dia do sibahenonku, asa hutean muse hangoluan na salelenglelengna? 10:26 Gabe ninna Jesus ma mandok ibana: Aha do tarsurat di patik i? Beha do dijaha ho? 10:27 Jadi dialusi ma songon on: Ingkon dihaholongi ho do Tuhan Debatami sian nasa ateatem, sian nasa tondim, sian nasa gogom dohot sian nasa roham, jala donganmi songon dirim! 10:28 Dung i ninna ma mandok ibana: Tingkos do alusmi; ulahon ma i, gabe mangolu ma ho! 10:29 Alai naeng ma pintoranna dirina gabe ninna ma mandok Jesus: Ai ise do donganku goaron? 10:30 Jadi mangalusi ma Jesus, ninna ma: Adong ma sada halak, na tuat sian huta Jerusalem laho tu huta Jeriko, gabe disamun panamun; dipupusi ibana, dipukpuhi, dung i laho; matemate ne do ibana ditadingkon. 10:31 Tongon ma mamolus malim sada sian dalan i; diida do ibana, alai dilaosi. 10:32 Songon i do sahat sahalak Lepi tu inganan i; diida do ibana, alai dlaosi. 10:33 Alai mamolus ma sian i sahalak Samaria; jala asi do rohana marnidasa. 10:34 Didapothon ma, dipauli ma bugangna, didaishon ma miak dohot anggur tusi; dipahundul ma ibana tu hodana, diboan ma ibana tu parbornginan, laos dipasarisari ma ibana. 10:35 Torang ni arina i dirungkari ma rupia dua, dilehon ma i tu nampuna bagas i, ninna ma: Pauliuli ma ibana; jala molo tung lobi harugianmu, husingkat pe, laho mulak sian on. 10:36 Ise sian na tolu i di roham, gabe dongan ni na tardobo i? 10:37 Jadi didok ma: Na marasi ni roha di ibana. Gabe ninna Jesus ma mandok ibana: Laho ma ho, bahen ma songon i! 10:38 Jala di na mardalani nasida, dibongoti ma sada huta. Adong ma disi parompuan sahalak, na margoar si Marta, na manjangkon Ibana tu jabuna. 10:39 Ianggo anggina na margoar si Maria, hundulhundul do di jolo ni Tuhan i tumangihon hatana. 10:40 Diharonsothon si Marta do ragam ni parhobason. Laos dipajonok ma mandok: Tuhan, ndang diantoi roham, na pinasombu ni anggingki ahu marhobasi sahalakku? Dokkon ibana antong mandongani ahu! 10:41 Gabe ninna Tuhan i mangalusi ibana: O Marta, Marta! Lan do disarihon jala dihasusahon ho! 10:42 Sada do na ringkot! Dipillit si Maria do tohap na uli i; ndang sibuaton i sian ibana.
11:1 Uju martangiang Ibana di sada inganan, jala dung mansohot, ninna sahalak siseanna ma mandok Ibana: Tuhan, ajari hami martangiang, songon na binahen ni si Johannes tu angka siseanna. 11:2 Gabe didok ma tu nasida: Songon on ma dok hamu laho martangiang: Ale Amanami, sai pinarbadia ma Goarmu! Sai ro ma harajaonmu! Sai saut ma lomo ni roham di banua tonga on, songon na di banua ginjang! 11:3 Lehon ma tu hami sadari on hangoluan siap ari! 11:4 Sesa ma dosanami, songon panesanami di dosa ni nasa na mardosa tu hami; jala unang hami togihon tu pangunjunan! Palua ma hami sian pangago! 11:5 Laos ninna ma mandok nasida: Ise hamu na maraleale, gabe ditopot ma i mareak tongaborngin, mandok tu ibana: Ua, pasali ahu tolu roti! 11:6 Ai ro do alealengku sian pardalananna, jala ndang adong sipanganon lehononku tu ibana. 11:7 Gabe dialusi halak i ma sian bagasan, mandok: Unang ahu susai! Nunga sordak pintu, jala nunga modom angka anakkonku rap dohot ahu; ndang tarbahen ahu hehe mangalehon di ho. 11:8 Hudok ma di hamu: Nang so hehe halak i mangalehon, ala naung maraleale nasida, ndang tarbahensa so hehe mangalehon nasa na ringkot di ibana ala ni jugulna i mangido. 11:9 Ahu pe, hudok ma tu hamu: Pangido hamu ma, sai na lehonon do tu hamu; lului hamu ma, sai na jumpangan do hamu; tuktuhi hamu ma, sai na ungkapon do di hamu! 11:10 Ai sai na manjalo do nasa na mangido; sai na jumpangan do na mangalului jala sai na ungkapon do di na manuktuhi. 11:11 Ise sian hamu angka amaama, anggo dipangido anakna roti tu ibana, gabe dilehon batu tusi, manang dengke dipangido, gabe ulok dilehon? 11:12 Manang dipangido tinaru ni manuk, gabe dilehon hala tusi? 11:13 Gari hamu, angka na jahat i, umboto mangalehon na denggan tu angka anakkonmuna, lam so lehonon ni Ama i sian banua ginjang Tondi Parbadia tu angka na mangido I sian Ibana? 11:14 Dung i dipabali ma sada tondi na mambahen ngungu; alai dung bali tondi i, mangkuling ma na ngungu i, gabe longang ma natorop i. 11:15 Alai deba sian nasida mandok: Marhitehite Beelsebul, induk ni angka tondi i, dipabali Ibana angka tondi na jahat i. 11:16 Alai anggo na asing mangunjuni Ibana, mangido tanda sian ginjang. 11:17 Alai ala ditanda Ibana angka pingkirannasida, gabe didok ma tu nasida: Pesan do nasa harajaon na marsalisi sama dirina jala masitinggangan ma angka jabuna. 11:18 Jala molo marsalisi sibolis i sama dirina, tung tarbahen ma hot harajaonna i? Ala didok hamu, na hupabali angka tondi i marhitehite Beelsebul. 11:19 Alai molo tung Ahu pabalihon angka sibolis mangasahon Beelsebul, ise ma dipangasahon angka anakmuna, laho pabalihonsa? Onpe, nasida do manguhumi hamu disi! 11:20 Alai molo hupabali angka tondi na hodar marhitehite tangan ni Debata, naung songgop ma harajaon ni Debata tu hamu. 11:21 Anggo dijagai ulubalang na gopas marsinjata jabuna, sinok ma ugasanna. 11:22 Alai molo ditahopi na gumogo i ibana jala ditaluhon, buaton ni i ma sandok sinjatana na pinangasahonna i, jala sagihononna ma tabantabanna i. 11:23 Na so mandongani Ahu, alongku ma i; na so donganku papunguhon, na paserakkon do i! 11:24 Ia dung ruar tondi na hodar i sian jolma, didalani ma angka inganan na hasang, mangalului paradianan; jala anggo so jumpangsa i, ninna ma: Mulak nama ahu tu ingananku naung hutadingkon i! 11:25 Jadi di na ro ibana, naung sinapu jala pinalehet didapot. 11:26 Jadi laho ma ibana, ditogihon ma pitu tondi angka na jumahat sian ibana, dibongoti ma laho maringanan tusi, gabe jumahat ma pangalaho ni jolma i di ujungna sian na di mulana i. 11:27 Di na mangkatahon hata i Ibana, dipagogo sada parompuan sian tongatonga ni natorop i ma soarana, ninna ma mandok Ibana: Martua ma na tumubuhon jala na pabagot Ho! 11:28 Alai ninna Ibana ma: Martua ma angka na umbege hata ni Debata jala na umpeopsa! 11:29 Jadi lam marpungu ma angka natorop i, gabe marjamita ma Ibana: Na jahat do na sansundut on; tanda do dipangido, jala ndang lehonon tanda tu nasida, dungkon ni tanda ni si Jonas. 11:30 Ai songon si Jonas gabe tanda di pangisi ni huta Ninive, songon i ma Anak ni jolma i di na sansundut on. 11:31 Na hehe ma sogot di paruhuman i raja boruboru na sian dangsina i dompak halak na sansundut on, mangkonahon uhum tusi; ai sian suhi ni tano ibana ro, umbege habisuhon ni si Salomo. Ida ma, On do na sumurung sian si Salomo! 11:32 Na hehe ma sogot di paruhuman i halak Ninive dompak na sansundut on, mangkonahon uhum tusi, ai dipauba nasida do rohanasida umbege jamita ni si Jonas i. Ida ma, On do na sumurung sian si Jonas! 11:33 Ndang adong na mambahen palito na pinasangna i tu inganan, na buni, manang tu toru ni ampang; tu parpalitoan i do dibahen, asa diida na ro i sondangna i. 11:34 Palito ni daging do mata i. Molo hisar matam, tiur ma sandok dagingmu; alai molo roa, mangkolom ma nang dagingmi. 11:35 Ipe, jaga ma ho, so tung mangkolom sondang na di bagasan ho! 11:36 Asa molo tiur sandok dagingmi, soada na holom disi, tiur ma sasude, songon naung pinatiur sondang ni sillam ma ho! 11:37 Andorang dihatahon dope i, diarahon sada halak Parise ma Ibana mangan; jala bongot ma Ibana, laos hundul ma. 11:38 Alai longang ma Parise i, ala diida, na so jolo marburi Ibana laho marsipanganon. 11:39 Jadi didok Tuhan i ma tu ibana: Anggo hamu Parise, duru ni panginuman dohot mangkuk dipaias hamu; alai ia parbagasanmuna gok pandoboon dohot hajahaton do. 11:40 E hamu na hurang roha! Sitompa duruna, nda laos i do na manompa bagasanna? 11:41 Asal ma dibasabasahon hamu na di bagasanna bahen asiasi, sandok ias ma na di hamu! 11:42 Marjea ma hamu Parise, ai diparsampulu hamu do angka suansuanan na ummetmet, ro di ragamragaman ni simarata; alai dilaosi hamu do uhum dohot holong ni roha ni Debata. Siulaon do na sada on; alai unang ma tading na sada an! 11:43 Marjea ma hamu Parise, ai ringkot do rohamuna mangkunduli bangku jolojolo di angka parguruan, jala asa ditabi jolma i hamu di tonga onan. 11:44 Marjea ma hamu, ai suman do hamu tu tanoman na so tanda, gabe didege halak tusi, so sian pamotoanna. 11:45 Jadi ro ma alus ni sahalak sibotopatik, didok ma tu Ibana: Dohot do hami direhei Ho di hatam ondeng. 11:46 Gabe didok Ibana ma: Marjea nang hamu sibotopatik, ai diampehon hamu do tu angka jolma i boban na so tarboan; alai ndang olo anggo hamu manjama porsanon i, nanggo dohot sada jarijarimuna! 11:47 Marjea ma hamu, ai dipauli hamu do tanoman ni angka panurirang, hape amamuna do, pamatehon nasida. 11:48 Asa sitindangi jala panolopi do hamu di pambahenan ni amamuna, ai nasida do mambunusa, gabe hamu do paulihon. 11:49 Ala ni i didok Hapistaran ni Debata: Suruonku ma tu nasida angka panurirang dohot apostel; bunuon jala leleannasida do deba sian i. 11:50 Asa luluhononhon ma tu na sansundut on mudar ni sude panurirang, naung durus i olat ni parmulaan ni tano on, 11:51 mamungka sian mudar ni si Abel ro di mudar ni si Sakarias, na tarbunu di holangholang ni langgatan dohot joro i. Olo tutu, hudok ma tu hamu, luluhononhon ma i tu na sansundut on! 11:52 Marjea ma hamu sibotopatik, ai dirampas hamu do anak hinsu parbinotoan; hamu sandiri ndang bongot, jala angka na naeng bongot, diambati hamu. 11:53 Asa di na ruar Ibana sian i, dionggopi angka sibotosurat dohot Parise ma Ibana, jala ragam do disungkunhon tu Ibana. 11:54 Dihaliangi nasida Ibana, anggiat tardapot Ibana binahen ni sada hatana.
12:1 Marrongoman ma ro natorop i marriburibu, pola masidegean nasida, gabe didok Ibana ma parjolo, tu siseanna: Jaga ma hamu pasiding na niasoman na di angka Parise, i ma pangansion i. 12:2 Ndang adong na hungkup, na so ungkap muse, manang na buni, na so dapot botoon muse. 12:3 Dibahen i nasa na hinatahonmuna di na holom, begeon do i muse di na tiur; na hinusiphonmuna tu pinggol di bilut, baritahononhon do muse di angka partungkoan. 12:4 Alai hudok ma tu hamu angka alealengku: Unang ma habiari hamu angka na mambunu daging jala dungkon ni i so adong be sihahuaonna. 12:5 Alai hupatuduhon ma tu hamu na patut habiaranmuna: Habiari hamu ma ibana, na marhuaso mambunu huhut mandabuhon tu api na roko. Olo, hudok ma tu hamu: Ibana ma habiari hamu! 12:6 Nda digadis lima amporik arga dua benggol; agia sada sisongon i, ndang na lupa sian adopan ni Debata. 12:7 Gari obuk na di ulumuna, sude do dibilangi. Unang hamu tahutan! Ummangat do hamu sian amporik torop. 12:8 Hudok ma di hamu: Ganup na mangkatindangkon Ahu di jolo ni jolma, hatindangkonon ni Anak ni jolma i do sogot di adopan ni angka surusuruan ni Debata. 12:9 Alai na mansoadahon Ahu di jolo ni jolma, soadahononhon do sogot di adopan ni angka surusuruan ni Debata. 12:10 Jala ganup na mandok hatana mangalo Anak ni jolma i, tarsesa do i; alai na mangaleai Tondi Parbadia, ndang dapotan hasesaan. 12:11 Alai molo togihononnasida hamu tu angka parguruan, tu jolo ni angka induk dohot panggomgomi, unang ma holsoan hamu, manang beha pangalusionmuna ro di sidohononmuna. 12:12 Ai ajarhonon ni Tondi Parbadia i do tu hamu di na sangombas i na patut dohononmuna. 12:13 Jadi adong ma sahalak sian natorop i na mandok tu Ibana: Guru, dokkon ma amparangku marbagi teanteanannami rap dohot ahu! 12:14 Alai didok ma tu ibana: Baoa! Ise do pabangkit Ahu gabe panguhum manang sibagi teanteanan di hamu? 12:15 Laos didok ma tu nasida: Jaga ma hamu, pasiding hamu ma nasa haholiton! Ai nang pe marlobilobi halak, ndada sian artana i ngoluna. 12:16 Gabe dihatahon ma sada umpama tu nasida, ninna ma: Suha do gogo ni hauma ni sada halak na mora. 12:17 Jadi marhusari ma ibana di bagasan rohana songon on: Aha nama bahenonku? Ai ndang adong hasiatan ni gogo ni tanongki. 12:18 Gabe ninna ma: On ma bahenonku: Hulohai nama angka sopongki, hupauli ma angka na umbalga, asa tusi papunguonku sude na tubu i ro di artangku. 12:19 Jala dohononku ma tu tondingku: Ale tondingku, nunga rade godang artam, sae manang piga taon on. Ipe, marhasonangan ma ho, mangan minum ma ho, las ma roham! 12:20 Alai ninna Debata ma mandok ibana: E ho na loahon! Saborngin on ma tungguon hosam sian ho. Ia na pinaradem, tu ise ma i? 12:21 Songon i ma masa di halak an, na papunguhon arta di dirina, anggo so mamora ibana di Debata. 12:22 Jadi ninna ma mandok siseanna: Ala ni i hudok ma tu hamu: Unang holsohon hamu hosamuna pasarisari sipanganon, manang dagingmuna sumarihon parabiton. 12:23 Ai ummangat do hosa sian sipanganon jala sumurung do daging sian parabiton. 12:24 Bereng hamu ma pidong sigak, angka na so manabur manang manggotil, na so margudang manang marsopo. Tong do Debata marmudumuduhon angka i. Godang ni hasurunganmuna antong sian angka pidong! 12:25 Ise hamu na tarpaganda ariarina, nanggo saasta ganjangna, marhite sian pangkolsohon ni rohana? 12:26 Asa molo so tarpatupa hamu na ummotik i, boasa pola holsohononmuna na di atas ni i? 12:27 Patangkas hamu ma partubu ni bungabunga na di ladang i, angka na so mangganti manang martonun pe! Alai hudok ma tu hamu: Gari si Salomo uju di bungaran ni hasangaponna i, gari so mamangke songon bungabunga sada. 12:28 Asa molo songon i diparulosi Debata duhutduhut na di ladang i na jongjong songon sadari on, na tupa dipuruni marsogotna i, lam hamu ma, lam so parulosanna? E hamu siotik haporseaon! 12:29 Asa unang ma lulululu rohamuna di sipanganon manang di siinumonmuna; unang bohabohaon rohamuna disi! 12:30 Angka sipelebegu na di portibi on do mangalului angka sisongon i; alai diboto Amamuna do, na hasea angka i di hamu. 12:31 Asal ma dilului hamu harajaonna i; dung i tambahononna do angka i tu hamu. 12:32 Unang ho mabiar, ale punguan na metmet! Ai naung dihalomohon Amamuna do, mangalehon harajaonna i tu hamu. 12:33 Gadis hamu ma na pineopmuna, jala lehon hamu ma asiasi. Pauli hamu ma di hamu angka puro na so ra buruk; masiarta parbanua ginjang na so ra suda ma hamu, na so hadonohan panangko jala na so targagat ngitngit. 12:34 Ai ia disi artamuna, disi do nang rohamuna. 12:35 Sai hohos ma gontingmuna, jala galak ma palitomuna! 12:36 Jala suman ma hamu tu jolma na paipaimahon indukna, di na ro muli ibana sian parunjuhan, asa mamintor diungkap di ibana, di harorona manuktuhi. 12:37 Martua ma angka anak somang i, na dungo dapoton ni indukna di harorona i! Na sintong do hatangkon tu hamu: Hohoshononna ma ulosna, pajuguhonna ma nasida; ibana ma jongjong marhobasi di nasida. 12:38 Martua ma nasida, anggo songon i nasida didapot, manang na ro ibana di paduanghaebornginhon manang di patolunghaebornginhon. 12:39 Alai tanda hamu ma on: Aut diboto nampuna jabu, manang di pungkul piga tagamon ro panangko, dungo ma ibana, ndang loasonna ibana manursari ugasanna. 12:40 Hamu pe, gabe hobas ma, ai na ro do Anak ni jolma i di tingki na so panagamanmuna! 12:41 Jadi didok si Petrus ma: Tuhan, tu hami do didok Ho umpama ondeng, manang dohot do tu saluhutna? 12:42 Gabe didok Tuhan i ma: Ise ma antong juara bagas na tau haposan, na marroha, sipabangkiton ni indukna manggomgom angka naposona, laho mangalehon bohalnasida di tingkina? 12:43 Martua ma anak somang i, na mangulahon songon i dapoton ni indukna di harorona i! 12:44 Sintong do na hudok on tu hamu: Pabangkitonna do ibana mangaramoti nasa ugasanna. 12:45 Alai molo didok anak somang i di bagasan rohana: Laon dope, asa ro indukhu, jadi dipungkuli ma angka naposo baoa dohot boruboru, mangan minum ibana maradu mabuk, 12:46 gabe ro ma induk ni naposo i di ari na so panagamanna jala di ngombas na so pamotoanna, jala parduaonna ma ibana, laho mangalehon tohapna rap dohot na so haposan. 12:47 Ia anak somang, na umboto na hinalomohon ni indukna, gabe so marhobas ibana jala ndang diulahon lomo ni rohana, godang ma linsinglinsing taononna. 12:48 Alai na so umbotosa, gabe diulahon na tama pinsangon, otik ma taononna. Ai godang ma siluluan tu pangalehonan na godang, jala godang ma tungguon tu panahatan ni na godang. 12:49 Na ro do Ahu mandanggurhon api tu tano on. Dihasiholi nasa rohangku do, anggiat haru galak nian! 12:50 Alai didihononhon do tu Ahu paridion; jala mansai bobos do rohangku, saleleng so tulus dope i. 12:51 Na dirimpu rohamuna do, na laho mangalehon dame Ahu tu atas tano on, umbahen na ro? Nda tung, hudok ma di hamu: Panirangon do tahe. 12:52 Ai olat ni on ma maralo lima halak na di sada jabu: Na tolu maralohon na dua, jala na dua maralohon na tolu. 12:53 Maralo ma ama tu anakna, anak i tu amana; ina tu boruna, boru i tu inana; simatua boru tu parumaenna, parumaen i tu namboruna. 12:54 Dung i ninna ma mandok natorop i: Jumpa diida hamu nangkok ombun sian hasundutan, pintor didok hamu do: Na ro ma udan; jadi saut do songon i. 12:55 Jala jumpa mangullus alogo sian dangsina, didok hamu: Na logo ma ari: Jadi jumpang do songon i. 12:56 E hamu pangansi, malo do hamu hape manimbangi rupa ni tano on dohot langit i; so malo ma hamu manjujuri tingki on? 12:57 Boasa so sian rohamuna hamu manimbangi na patut? 12:58 Binsan raphon alom dope ho manopot panguhum, haringkothon ma di tongandalan i, asa malua ho sian ibana; so tung disarat ibana ho tu jolo ni panguhum, gabe panguhum pasahathon ho tu upasna jala hurungkonon ni upas i ho maon. 12:59 Hudok ma tu ho: Na so tupa ho haruar sian i, paima digarar ho sude ro di na saduit!
13:1 Adong ma na ro uju i paboahon tu Ibana taringot tu angka halak Galilea, na didurushon si Latus do mudarnasida, gabe saor tu na pinelehonnasida. 13:2 Jadi ninna Jesus ma mangalusi nasida: Na diagam rohamuna do pardosaan halak Galilea i martimbangkon saluhut halak Galilea, ala songon i diahap nasida? 13:3 Hudok ma di hamu: Ndang; anggo so muba rohamuna, laos songon i do hamu mago muse! 13:4 Manang na dirimpu hamu, anggo na sampuluualu halak, na mate ditinggang palaspalas na di Siloam, parsalaan sian sude pangisi ni huta Jerusalem? 13:5 Hudok ma di hamu: Nda tung; anggo so muba rohamuna, laos songon i do hamu mago muse! 13:6 Dung i dihatahon ma umpama on: Adong ma di sada halak hau ara na sinuanna tu porlak anggurna; jadi ro ma ibana mangalului parbuena, hape ndang adong jumpangsa. 13:7 Gabe ninna ma mandok siula porlak anggurna: Nunga pola patolutaonhon ahu ro mangalului parbue di hau ara on, laos so jumpang. Taba ma i; aha pola magopo tano i bahenonna! 13:8 Alai didok i ma mangalusi: Tuannami, loas ma i disi sataon on, asa sanga hupangkur humaliang bonana, mambahen napa tusi, 13:9 anggiat olo marparbue tu jolo on; alai anggo soada, tabaon ma! 13:10 Dung i mangajari ma Ibana di sada parguruan jumpa ari Sabbat. 13:11 Jadi adong ma disi sada parompuan, naung martondi sibahen marsahit leleng ni sampulu ualu taon; suhung do dagingna jala ndang tarbahensa dirgak. 13:12 Dijou Jesus ma ibana jumonok, dung diida; jala ninna ma mandok ibana: Malua ma ho, inang, sian parsahitonmi! 13:13 Laos diampehon ma tanganna tu ibana, jadi pintor dipadirgak parompuan i ma dirina jala dipuji ma Debata. 13:14 Alai ia sintua ni parguruan i, sogo ma rohana, ala na pamalum sahit Jesus jumpa ari Sabbat, jala ro ma hatana tu natorop i: Onom do ari di na patut mulaulaon hita; disi ma hamu ro, asa dipamalum sahitmuna, unang ma di ari Sabbat! 13:15 Alai ninna Tuhan i ma mangalusi ibana: E ho pangansi! Nda ganup hamu mangkarhari horbona manang halodena sian panggagatan di ari Sabbat manogihonsa marsobur? 13:16 Ia on, sada boru ni si Abraham, naung nirahutan ni sibolis sampulu ualu taon lelengna, ndang patut harharan ihotihotna di ari Sabbat? 13:17 Dung didok Ibana i, muruk ma sude alona i. Jala marlas ni roha ma sude natorop i siala saluhut pambahenna na marmulia i. 13:18 Alai didok ma: Tudos tu aha ma harajaon ni Debata, tu aha ma pasumanonku? 13:19 Tudos ma i tu batu ni siarum, na jinomput ni sada halak, laho manaburhonsa tu porlakna; jadi tubu ma gabe hau, jala ro do angka pidong na martongatonga langit marasar tu rantingna. 13:20 Diulahi mandok: Tu aha ma patudosonku harajaon ni Debata? 13:21 Tudos ma i tu itak naung niasoman, na binuat ni sada parompuan pasaorhonsa tu itak tolu ampang, paima asom saluhutna. 13:22 Jadi dibolus Ibana ma angka huta dohot sosor laho mangajari, uju di pardalanan mandapothon huta Jerusalem. 13:23 Jala adong ma na mandok tu Ibana: Tuhan, otik do ulaning na saut malua? 13:24 Alai ninna Ibana ma mandok nasida: Marungkil ma hamu, asa masuk sian pintu na gogot i; ai hudok ma tu hamu: Torop do na marsangkap naeng masuk nian, alai ndang tarbahensa. 13:25 Alai dung hehe nampuna jabu i jala disordak pintu i, disi ma jongjong hamu di balian manuktuhi pintu i, mandok: Tuhan, ungkap di hami! Jala dohononna ma: Ndang huboto hamu, manang sian dia! 13:26 Dohononmuna ma disi: Na rap mangan jala minum do hami dohot Ho, jala diajari Ho do hami di angka alamannami. 13:27 Dung i dohononna ma: Hudok ma di hamu: Ndang huboto hamu, manang sian dia. Sumurut ma hamu sian Ahu, hamu sudena, siula hageduhon! 13:28 Disi ma masa angguhangguk dohot na patungoripon, di na idaonmuna di bagasan harajaon ni Debata si Abraham, si Isak dohot si Jakkob ro di panurirang saluhutna; alai pinabali tu balian do anggo hamu! 13:29 Disi ma ro angka na sian purba dohot sian pastima, sian utara dohot sian dangsina, gabe hundul ma marsipanganon di harajaon ni Debata. 13:30 Angka naung parpudi hian tupa gabe parjolo; jala angka naung parjolo hian, tupa gabe parpudi. 13:31 Uju i didapothon deba Parise ma Ibana mandok: Hehe ma ho, borhat ma sian on, ai na naeng bunuon ni si Herodes do Ho! 13:32 Gabe ninna ma mandok nasida: Laho ma hamu, dok hamu ma tu antuasu i: Hupabali angka tondi na hodar jala hupamalum angka sahit sadari on dohot marsogot, jala marujung ma langkangku patoluna. 13:33 Alai ingkon mardalan Ahu sadari on, nang marsogot ro di ari na mangihut tusi; ai na so bolas mate panurirang, anggo di balian ni huta Jerusalem. 13:34 Jerusalem, Jerusalem! Dibunu ho do angka panurirang i jala didangguri ho do angka na sinuru manopot ho! Jotjotna i naeng papunguonku do nian ianakhonmu, sobokkon pidong na papunguhon anakna tu toru ni habonghabongna; alai ndang dung olo hamu! 13:35 Tarulang ma sogot bagasmuna. Alai hudok ma tu hamu: Na so tupa idaonmuna be Ahu, paima dohononmuna: Pinasupasu ma na ro marhitehite Goar ni Tuhan!
14:1 Jadi jumpa dibongoti Ibana jabu ni sada sintua ni halak Parise di sada ari Sabbat laho marsipanganon, nunga disi nasida mangonggopi Ibana. 14:2 Jadi adong ma disi di jolona sada halak na sigurbahon. 14:3 Jadi ninna Jesus ma mandok angka sibotopatik dohot Parise i: Ai na jadi do pamalumon sahit di ari Sabbat, manang na so jadi? Alai hohom do anggo nasida. 14:4 Gabe dijama Ibana ma halak i; dipamalum ma, laos dipamuli. 14:5 Jadi didok ma tu nasida: Anggo na targodung horbo manang halode ni manang ise hamu, nda manigor ditait tu ginjang, nang di ari Sabbat? 14:6 Gabe ndang haalusan nasida hatana i. 14:7 Alai diida ma, angka hundulan na sumangap dipilliti angka na pinio i, gabe marumpama ma Ibana, ninna ma mandok nasida: 14:8 Anggo tarpio ho tu parunjuhan, unang ho juguk tu hundulan na ummangat, atik beha adong piniona sahalak na sumangap sian ho; 14:9 gabe ro suhut i, na rap mamio hamu, mandok tu ho: Di ibana ma juguhanmi! Jadi ila ma roham juguk tu hundulan partoru. 14:10 Alai anggo dipio na mamio ho, laho ma ho juguk tu hundulan pudipudi; asa anggo dung ro na mamio ho, dohononna ma tu ho: Tungkan julu on ma ho juguk, ale! Jadi sangap ma ho idaon ni sude donganmu na tarpio i. 14:11 Ai nasa na patimbohon dirina, sipaoruon do; jala na paoru dirina, i do sipatimboon! 14:12 Didok ma huhut tu na mamio Ibana: Jumpa dibahen ho pesta manang haroan, unang ma pio tusi angka alealem, manang hahaanggim, manang hulahulam, manang hombar bagasmu pe, angka na gabe, asa unang nasida muse mamio ho, gabe dibalos i tu ho. 14:13 Alai jumpa mambuat sipanganon ho, pio ma angka na pogos, angka na martihas, na pangpang dohot na mapitung. 14:14 Jadi martua ma ho disi, ai ndang tarbalos nasida i tu ho; alai marbalos do i tu ho sogot di haheheon ni angka partigor. 14:15 Umbege i sahalak donganna marsipanganon i, ninna ma mandok Ibana: Martua ma na mangan di harajaon ni Debata! 14:16 Gabe ninna Jesus ma mangalusi: Adong ma sahalak na marulaon godang: Torop do halak gokkon tusi. 14:17 Jadi di mata ni pesta i disuru ma anak somangna mandok tu angka naung ginokkonna i: Ro ma hamu, ai nunga rade saluhutna! 14:18 Hape rap do nasida sude marsidalian. Didok na parjolo i ma tu ibana: Hutuhor do hauma, ndang tarbahen so laho ahu maningkir. Raja ho, ondihon ahu! 14:19 Ia na asing mandok: Naung hutuhor do horbo lima auga; na laho ma ahu manangkasi. Raja ho, ondihon ahu! 14:20 Na asing muse mandok: Nambura mambuat boru ahu; ala ni i ndang tarbahen ahu ro. 14:21 Muli ma anak somang i, dibaritahon ma i tu indukna. Jadi tarrimas ma suhut i, didok ma tu anak somangna: Silu, laho ma ne tu angka alaman dohot jambur ni huta i, togihon ma angka na pogos, angka na martihas, na mapitung dohot na pangpang! 14:22 Jadi ro ma hata ni anak somang i: Nunga saut na nidokkonmi, tuan; alai lumbang dope! 14:23 Gabe didok induk i ma tu naposona: Laho ma tu balian, tu angka dalan na metmet, tu angka lapelape; sosoi ma nasida bongot, asa haru gok jabungku! 14:24 Ai hudok ma di hamu: Na so tupa daion ni nanggo sada sian angka na ginokkon hian sipanganon na hupauli i. 14:25 Alai torop do halak na mandongani Ibana. Jadi humusor ma Ibana, ninna ma mandok nasida: 14:26 Ganup halak na ro tu Ahu, ndang tarbahen gabe siseanku, ia so dihasogohon ibana amana, inana, na niolina, anakkonna, hahaanggina dohot angka ibotona, ro di hosana sandiri. 14:27 Ndang tarbahen gabe siseanku halak, na so manuhuk silang na tu ibana, laho mangihuthon Ahu! 14:28 Ai ise hamu na giot pajongjong palaspalas, na so jumolo hundul mangetongi sipalahoonna tusi, manang na tuk laho patulushon? 14:29 Unang dipauli jolo ojahanna, hape ndang tuk gogona pasahathonsa, gabe surahan ni sude halak na marnidasa ibana. 14:30 Dohononnasida ma: Dipungka halak on do pajongjongkon, hape ndang adong bahenonna pasunhon. 14:31 Ise raja na borhat marmusu mangalo donganna raja, na so jumolo hundul mamingkiri, manang na tardompakkonsa mardongan saloksa soldadu alona i, na ro manahopi ibana mardongan dua loksa. 14:32 Alai anggo so tarbahen i, suruonna ma pangulu, binsan holang dope musu i, mangido pardamean. 14:33 Hamu pe, ndang tarbahen agia ise hamu gabe siseanku, anggo so tartadingkonsa nasa na di ibana. 14:34 Hasea do sira i; alai anggo gabe hambar sira i, aha ma paansimhon i? 14:35 So manang marguna i tu hauma, manang tu tangkal pe; bolongkononhon nama i! Hamu parpinggol na marbinege, pinggol hamu ma i!
15:1 Dung i dipasolhot torop angka sijalo beo dohot sipardosa dirina tu Ibana, laho tumangihon hatana. 15:2 Jadi marmungutmungut ma angka Parise dohot sibotosurat; ia hatanasida: Dijangkon On do angka pardosa, pola sapanganan Ibana dohot nasida. 15:3 Gabe dihatahon Ibana ma umpama on tu nasida: 15:4 Ise hamu sahalak parbirubiru saratus, anggo tardempar sada sian i, na so tuminggalhon na siapulu sia i di ladang, laho mangalului na so tarida i, paima jumpangsa? 15:5 Ia dung dapotsa, diampehon ma tu abarana sian las ni rohana. 15:6 Jadi dung sahat ibana tu jabuna, dipapungu ma alealena dohot hombar hundulna, didok ma tu nasida: Marlas ni roha ma hamu rap dohot ahu, ala jumpang ahu birubirungku naung mago i! 15:7 Hudok ma tu hamu: Suman tusi do gumodang las ni roha di banua ginjang mida sipardosa sahalak, na olo paubahon rohana, asa mida siapulu sia partigor, na so pola paubahon rohanasida. 15:8 Adong ma ulaning parompuan na marhepeng sampulu hupang; anggo mago sada sian i, na so pagalakkon palito jala manapui bagasna, mangalului tangkas hupang na mago i, paima jumpangsa? 15:9 Ia dung jumpangsa, dipapungu ma angka alealena dohot hombar hundulna mandok: Marlas ni roha ma hamu rap dohot ahu, ala naung jumpang ahu hupangku na mago i. 15:10 Hudok ma tu hamu: Suman tusi do masa las ni roha di jolo ni angka surusuruan ni Debata mida sahalak sipardosa na paubahon rohana. 15:11 Jala ninna ma muse: Adong ma dua anak ni na sahalak. 15:12 Gabe didok sianggian i ma mandok amana: Amang, lehon tu ahu sinamot, manang sadia tohaphi! Jala disagihon ma tu nasida panamotan i. 15:13 Ndang pola piga dan nari, dipapungu sianggian i ma saluhutna, dung i laho ma tu luat na dao; disi ma dipansuasaehon sinamotna paolooloi hisapna. 15:14 Dung dipasuda saluhutna i, masa ma haleon potir di na saluat i, jadi dohot ma ibana mamungka rapar. 15:15 Jadi laho ma ibana mahiandu tu sada halak pangisi ni luat i, gabe disuru ma ibana tu ladangna, marmahan angka babina. 15:16 Disangkapi rohana do manggohi butuhana langkat i, indahan ni babi i; alai ndang adong na mangalehonsa tu ibana. 15:17 Dung i dipasuang ma rohana tu bagasan, ninna ma: Torop ni halak digaji damang, angka na lobian di indahan; anggo ahu mate ma anturaparon dison! 15:18 Hehe nama ahu laho mandapothon damang; dohononku ma tu ibana: Ale amang, na mardosa do ahu tu banua ginjang nang dompak ho! 15:19 Ndang tama be ahu goaron anakmu; bahen ma ahu songon anak gajianmu sada! 15:20 Jadi hehe ma ibana manopot amana. Alai dao dope ibana, nunga ditatap amana ibana; jadi asi ma roha ni i marnida ibana, hatop ma ditomu, dihaol jala diumma. 15:21 Gabe ninna anak i ma mandok ibana: Amang, na mardosa do ahu tu banua ginjang nang dompak ho; ndang tama be ahu goaron anakmu! 15:22 Alai ninna ama i ma mandok naposona: Haru, boan hamu ma ulos na dumenggan, salini hamu ma ibana; tintin ma lehon hamu tu tanganna dohot sipatu tu patna! 15:23 Jala boan hamu ma anak ni lombu na pinamokmok i; potong hamu ma i, naeng mangan hita marlas ni roha. 15:24 Ai naung mate do anakkon gabe mangolu; naung mago ibana, gabe jumpang muse. Jadi mamungka marlas ni roha ma nasida. 15:25 Alai di ladang do anggo anakna sihahaan i. Jadi di na ro ibana dumonok tu bagas i, dibege ma endeende dohot parhinaloan. 15:26 Gabe dijou ma sahalak naposo, dipamanat ma, manang dia na masa i. 15:27 Jala ninna i ma mandok ibana: Nunga ro anggim; jadi dipotong amangmu do anak ni lombu na pinamokmok i, ala hipas ibana mulak. 15:28 Alai pangarimason ma ibana, ndang olo bongot tu jabu; gabe ruar ma amana, mangapoi ibana. 15:29 Alai ninna ma mangalusi amana i: Na sai leleng hupaolooloi ho, ndang dung hulaosi patikmu. Ndang hea dilehon ho hambing sada tu ahu, asa marlas ni roha ahu dohot angka donganki. 15:30 Hape disi ro anakmi, na mamondut sinamotmi rap dohot boruboru na jahat, gabe diseat ho do di ibana anak ni lombu na pinamokmok i! 15:31 Alai didok ma tu ibana: Anaha, tongtong do ho rap dohot ahu jala di ho do sasude na di ahu i. 15:32 Alai patut do pamasaon las ni roha dohot pariaiaon! Ai naung mate do anggimon, gabe mangolu; jala naung mago do ibana, gabe jumpang!
16:1 Laos didok Ibana ma tu siseanna i: Adong ma sada halak na mora na marjuara bagas. Jadi tarbortik ma tu ibana, dipansuasaehon juara bagas i artana. 16:2 Gabe dijou ma ibana, ninna ma mandok ibana: Dia do i na hubege taringot tu ho? Patuduhon ma paretongan ni hajuaraonmi; ai ndang tarbahen ho be leat ni juara bagas! 16:3 Jadi marhusari ma juara bagas i: Dia nama bahenonku, ai buaton ni tuanki nama sian ahu hajuaraonki. Mamangkur, ndang adong gogongku; manehenehe, maila ahu. 16:4 On ma tahe sibahenonku di rohangku, asa dijangkon nasida ahu tu jabunasida, ia dung dipaijur ahu sian hajuaraonki: 16:5 Jadi sadasada ma dijou nasa parsingiran ni indukna i tu jolona, didok ma tu na parjolo ro i: Sadia sigararonmi tu tuanta? 16:6 Alusna: Saratus gunsi miak. Gabe ninna ma mandok ibana: Alap ma suratmi, dung i hundul ma ho manurathon hatop limapulu! 16:7 Tu na asing muse didok: Ia ho, sadia do sigararonmi? Saratus tuhukan eme! Gabe didok tu ibana: Alap ma suratmi, dung i surathon ma: Ualupulu! 16:8 Jadi dipuji na mora i ma juara bagas na geduk i, ala bisuk pambahenna i. Ai umbisuk do anak portibi on asa anak hatiuron i mangangkupi donganna saroha. 16:9 Ahu pe, hudok ma di hamu: Lului hamu ma di hamu aleale marhitehite Mammon na geduk i; asa ia dung suda i, gabe dijangkon ma hamu tu bagasan angka parmianan sogot. 16:10 Ia haposan halak di na ummotik, haposan ma ibana nang di na godang: Ianggo geduk ibana di na ummotik, geduk ma nang di na godang. 16:11 Asa molo so haposan hamu mangaradoti Mammon na geduk i, ise ma antong pasahathon tu hamu arta na tutu i? 16:12 Jala molo so haposan taringot tu ugasan ni na leban, ise ma olo mangalehon tu hamu na tu hamu hian! 16:13 Ndang haoloan sada anak somang dua induk: Sai hosomanna do na sada, haholonganna do na sada nari; hombaranna do na sada, toisanna do na sada nari. Ndang haoloan hamu Debata rap dohot Mammon i! 16:14 Alai sude hata ondeng dibege halak Parise, angka na impolan di perak; jala manungarnungar ma nasida dompak Ibana. 16:15 Gabe ninna Ibana ma mandok nasida: Ianggo hamu tutu, dipintori hamu do dirimuna di jolo ni halak; alai ditanda Debata do rohamuna. Ai na timbul di roha ni jolma, i do dihagigihon Debata. 16:16 Intap si Johannes do patik i dohot angka panurirang i. Olat ni i ma dibaritahon harajaon ni Debata, jala saluhutna do mambahen gogo tusi. 16:17 Alai ummomo do salpu langit dohot tano, sian na gabe bolong sada gurit ni patik i. 16:18 Pangalangkup do ganup na paluahon niolina, gabe dioli na asing; pangalangkup do nang na mambuat na pinalua ni baoana i. 16:19 Asa adong ma sada halak na mora, na marabithon surta na rara dohot haen bontar na lamot; ariari do ibana marlas ni roha godang. 16:20 Alai adong ma sahalak na pogos, na margoar si Lasarus, peakpeak di jolo pintu ni na mora i; gok baro do dagingna. 16:21 Dipangido rohana do manganhon ebaeba na sian panganan ni na mora i; alai ro ma biang mandilati barona i. 16:22 Dung i mate ma na pogos i, gabe diboan angka surusuruan ma ibana tu ampuan ni si Abraham. Laos mate do nang na mora i, dung i ditanom. 16:23 Jadi sian banua toru i ma ibana manaili tu ginjang, uju di na bernit i ibana, jala ditatap ma si Abraham sian na dao jala si Lasarus di ampuanna i. 16:24 Dung i joujou ma ibana, ninna ma: Ompung Abraham! Asi roham mida ahu: Suru ma si Lasarus manornophon ujung ni jarijarina tu aek, palamohon dilangku, ai bernit do huahap di api on. 16:25 Alus ni si Abraham: Ingot, anaha, naung dijalo ho na denggan, uju di ngolum; ia si Lasarus na porsuk do. Anggo nuaeng, apulon do ibana dison; alai mangae na porsuk nama ia ho. 16:26 Jala angkup ni i muse, dijadihon do lung na bagas holangholangta; asa ndang bolas taripar angka na giot manorusi sian on tu hamu, jala ndang tarbahen na disini manopot hami tuson. 16:27 Ro muse hatana: Molo boti, mangido ma ahu tu ho, ompung, suruonmu ibana tu bagas ni damang. 16:28 Ai lima nari do hahaanggingku; naeng dihatindangkon tu nasida, unang gabe dohot nasida ro tu parhansitan on. 16:29 Alai ninna si Abraham ma: Adong do di nasida surat ni si Musa dohot angka panurirang; angka i ma ditangihon! 16:30 Gabe ninna ma: Ndang i, ompung Abraham; alai aut ni adong sahalak sian angka naung mate ro mandapothon nasida, paubaonnasida ma rohanasida. 16:31 Alai dialusi ma: Anggo so ditangihon nasida si Musa dohot angka panurirang, ndang tagamon mangoloi nasida, nang adong na hehe sian angka na mate.
17:1 Alai didok Ibana ma tu siseanna i: Ndang tarbahen so ro angka gasip; alai marjea ma na parohonsa! 17:2 Dengganan do di ibana ginantungkon losung batu tu rungkungna jala nilonongkon ibana tu laut, unang digasipi sahalak sian angka na metmet on! 17:3 Jamoti hamu ma dirimuna! Anggo dung mardosa donganmu, podai ibana; jadi molo dipauba rohana, sesa ma dosana i! 17:4 Jala molo tung pitu hali di na sada ari mardosa ibana dompak ho, jala pitu hali ibana mulahulak tu jolom mandok: Jora ma ahu, sesaonmu do! 17:5 Dung i ninna angka apostel i ma mandok Tuhan i: Tambai ma haporseaonnami! 17:6 Alai ninna Tuhan i ma: Molo adong di hamu haporseaon na sabatu ni siarum, tardok hamu do tu hau galagala an: Maborgat ma ho suanhon ma ho tu laut!, gabe oloanna do hamu! 17:7 Alai ise sian hamu paranak somang na maninggala manang marmahan, tagamon ma dohononmuna tu ibana, jumpa muli sian hauma: Haru tu on ma ho hundul mangan? 17:8 Nda dohononmuna ma mandok ibana: Pature ma sipanganonki, marhohop ma ho, mangkobasi di ahu, asa mangan minum ahu; dung pe i, asa mangan dohot minum ho! 17:9 Tung dohononmu ma mauliate tu anak somangmu, ala dipasaut na niaturhonmu? 17:10 Songon i do nang hamu; molo dung diula hamu saluhut na nidokkonna i tu hamu, dok hamu ma: Naposo na so hasea do hami; intap ulaon na patut do huula hami. 17:11 Uju mardalan Ibana dompak Jerusalem, dibolus ma sian tongatonga ni luat Samaria dohot Galilea. 17:12 Laho bongot tu sada huta, pajumpang ma Ibana dohot sampulu halak na huliton, na jongjong mandaodao. 17:13 Dipagogo nasida ma soaranasida, angka ninna ma: Jesus, Guru! Asi ma roham di hami. 17:14 Jadi ninna Ibana ma marnidasa: Laho ma hamu patuduhon dirimuna tu angka malim! Jala di na laho i nasida, gabe ias ma nasida. 17:15 Alai mulak do sahalak sian nasida, dung diida, naung gabe malum ibana; dipagogo ma soarana mamuji Debata. 17:16 Dipatungkap do dirina tu jolo ni Jesus mandok mauliate. Jala halak Samaria do i. 17:17 Alai ninna Jesus ma mangalusi: Nda sampulu nasida naung gabe ias? Didia do na sia nari? 17:18 Ndang adong jumpang hape, na olo mulak pasangaphon Debata, dungkon ni halak dagang on? 17:19 Laos ninna ma mandok ibana: Hehe ma ho, laho ma! Haporseaonmi do paluahon ho! 17:20 Alai disungkun angka Parise do Ibana: Andigan ma songgop harajaon ni Debata? Gabe dialusi ma nasida, ninna ma: Apala gumortap idaon harajaon ni Debata di harorona i. 17:21 Jala ndang tardok: Ndi on do! Manang: Ndi an! Ai tung di tongatongamuna do harajaon ni Debata. 17:22 Dung i ninna ma mandok siseanna: Na ro ma angka ari, malungun ma rohamuna disi, naeng idaonmuna sada ari ni Anak ni jolma i; alai ndang idaonmuna i. 17:23 Jala dohononna ma tu hamu: Dison! Disan do i! Unang topot hamu tusi, unang ihuthon hamu! 17:24 Ai songon hilap na sumiksak, laho manorangi sian desa na sada ro di tondongkonna i, suman tusi do pangalho ni Anak ni jolma i di arina i. 17:25 Alai ingkon jumolo lan taononna; bolongkonon ni na sansundut on do Ibana. 17:26 Songon na masa uju di tingki ni si Noak i, suman tusi do sogot di angka ari ni Anak ni jolma i: 17:27 Na mangan minum do nasida, mangoli jala pabolihonsa sahat ro di ari habobongot ni si Noak i tubagasan parau i; jadi ro ma aek na sumar i mangagohon nasida saluhutna. 17:28 Songon na masa di angka ari ni si Lot: Mangan minum nasida, manuhor manggadis, manuan jala pauli bagas. 17:29 Alai di ari halalaho ni si Lot sian huta Sodom turun ma udan api dohot barerang sian ginjang, mangagohon nasida saluhutna. 17:30 Songon i ma masa di na sadari i, di na gabe patar Anak ni jolma i. 17:31 Ia halak na di bilut parginjang ni jabuna di na sadari i, jala di jabu i ugasanna, unang ma dialap i, di na mijur ibana; jala halak na di ladang, laos songon i: Unang pola muli ibana! 17:32 Ingot hamu ma nioli ni si Lot i! 17:33 Agoan hosa ma na naeng paluahon hosana; alai na agoan hosa, i do na pangoluhonsa. 17:34 Hudok ma di hamu: Di na saborngin i dua halak ma sapodoman; na sada do jangkononna, na sada nari tulahonna. 17:35 Rap manduda ma dua parompuan; na sada do jangkononna, na sada nari tulahonna. 17:36 Rap mangula hauma ma dua halak; na sada do jangkononna, na sada nari tulahonna. 17:37 Jadi ninna nasida ma mangalusi Ibana: Didia ma i, Tuhan? Gabe didok ma tu nasida: Ia disi bangke, laos tusi do marumbal angka lali!
18:1 Dung i dihatahon ma tu nasida umpama sada, paboa ingkon tongtong nasida martangiang, na so tupa lemba. 18:2 On do hatana: Adong ma di na sahuta panguhum sada; ndang dihabiari Debata jala ndang dipardulihon jolma. 18:3 Alai adong ma di huta i parompuan na mabalu, na ro manopot ibana mandok: Pintori ahu maralohon alongki! 18:4 Jadi leleng ndang ringkot rohana. Alai ninna ma muse di bagasan rohana: Tutu do, ndang huhabiari Debata jala ndang parduli ahu di jolma. 18:5 Alai hupintori nama na mabalu on, ala dinengnengi ahu, atik beha ro ibana maon muse manggariangi ahu. 18:6 Dung i didok Tuhan i ma: Tangihon hamu ma pandok ni panguhum na geduk i! 18:7 Ia Debata, tung so pintoranna ma angka na pinillitna, angka na manjou Ibana arian dohot borngin? Tung pangerngeronna ma di nasida? 18:8 Hudok ma di hamu: Magira ma pintoranna nasida! Alai tagamon jumpang Anak ni jolma i ma haporseaon di tano on di harorona i? 18:9 Alai dihatahon ma umpama sada taringot tu halak na mangkaposi dirina, mandok na tigor nasida, angka na marhu, ni roha di dongan, ninna ma: 18:10 Adong ma dua halak na nangkok tu joro i martangiang; halak Parise do na sada, sijalo beo na sada nari. 18:11 Jadi dirgak ma Parise i jongjong; songon on ma tangiangna di bagasan rohana: Mauliate ma ahu tu Ho, ale Debata, ala so dos ahu dohot halak na leban, angka panamun, pargeduk, pangalangkup manang songon sijalo beo an. 18:12 Dua hali saminggu ahu marpuasa jala huparsampulu do saluhutna na huomo. 18:13 Ianggo halak sijalo beo i, mandaodao do ibana jongjong; gari manaili dompak ginjang, ndang barani. Alai ditompuk ma andorana huhut mandok: Asi roham, ale Debata, di ahu pardosa on! 18:14 Hudok ma tu hamu: Umpintor do on laho muli asa na sada an: Ai sipaoruon do ganup na patimbo dirina; alai na paoru dirina, i do sipatimboon! 18:15 Jadi dohot do dakdanak diboan tu jolona, asa jamaonna nasida; alai marnida i angka sisean i, dipinsang ma nasida. 18:16 Alai dijou Jesus ma nasida, laos ninna ma: Loas hamu ma ro angka dakdanak i sahat tu Ahu; unang orai hamu nasida, ai di angka sisongon i do harajaon ni Debata! 18:17 Situtu do hatangkon tu hamu: Na so manjalo harajaon ni Debata songon dakdanak, ndang saut bongot tusi. 18:18 Dung i disungkun sahalak sintua ma Ibana, ninna ma: O Guru, na denggan roha! Dia do sipatupaonku, asa hutean hangoluan na salelenglelengna? 18:19 Gabe ninna Jesus ma mandok ibana: Boasa digoar ho Ahu na denggan roha? Ndang adong na denggan roha, dungkon ni sasada Debata! 18:20 Angka patik i diboto ho do: "Unang ho mangalangkup! Unang ho mambunu! Unang ho manangko! Unang ho olo mangkatindangkon na so tutu! Ingkon pasangaponmu amangmu dohot inangmu!" 18:21 Alai ninna halak i ma: Sasudena i huradoti do sian sietehetehonku dope. 18:22 Umbege i Jesus, ninna ma mandok ibana: Sada nama na hurang di ho: Gadis ma nasa na di ho, parlehon ma i tu angka na pogos, gabe mararta ma ho di banua ginjang. Dung i ro ma ho mangihuthon Ahu! 18:23 Alai habot do rohana umbegesa ai na mora jong do ibana. 18:24 Alai dibereng Jesus ma ibana, laos didok: Maolna i bongot angka na mora tu bagasan harajaon ni Debata! 18:25 Gumabur do boluson ni gaja pinggol ni jarum, unang halak na mora bongot tu bagasan harajaon ni Debata! 18:26 Gabe didok angka na umbegesa: Molo boti, ise ma tarbahen malua? 18:27 Alai ninna Ibana ma: Na so tarpatupa jolma, tarpatupa Debata do! 18:28 Dung i ninna si Petrus ma: Hutinggalhon hami do na di hami, mangihuthon Ho. 18:29 Gabe didok Ibana ma tu nasida: Na tutu do hatangkon na tu hamu: Nasa na tumadingkon jabuna, manang na niolina, manang hahaanggina, manang natorasna, manang anakkonna pe ala ni harajaon ni Debata, 18:30 ingkon silompit do jaloonna i di hasiangan on, angkup ni i hangoluan salelenglelengna di hasiangan sogot. 18:31 Alai diarahon ma na sampuludua i, ninna ma mandok nasida: Na nangkok ma hita tu Jerusalem jala tulus ma tu Anak ni jolma i sasudena, na tarsurat di angka panurirang i. 18:32 Ai pasahaton ma Ibana tu angka parbegu, gabe insahanna, leaanna jala tijuranna ma Ibana. 18:33 Linsinganna jala pusaonna do Ibana; dung i mulak mangolu ma Ibana di ari patoluhon. 18:34 Ndang diantusi nasida agia otik sian i; na buni do hata i sian rohanasida, ndang diboto nasida na hinatahonna i. 18:35 Dung i mandapothon huta Jeriko, adong ma sada halak na mapitung na hundulhundul di dalan i mangidoido. 18:36 Umbege natorop na mamolus i, dipatangkas halak i ma, manang dia na masa i. 18:37 Gabe dibaritahon halak ma tu ibana, Jesus sian Nasaret i mamolus. 18:38 Jadi joujou ma ibana mandok: O Jesus, Anak ni si Daud, asi roham di ahu! 18:39 Hona hata ma ibana dibahen angka na parjolo i, asa sip ibana nian. Alai lam digogo ma manjoujouhon: O Anak ni si Daud, asi roham di ahu! 18:40 Dung i sulon ma Jesus, didokkon ma togihononhon ibana tu jolona. Jadi dung donok, disungkun ma ibana: 18:41 Aha dipangido roham, bahenonku tu ho? Jadi didok ma: Marnida ma nian matangku, ale Tuhan! 18:42 Gabe didok Jesus ma tu ibana: Marnida ma ho! Haporseaonmi do pamalum ho! 18:43 Jadi pintor marnida ma matana, laos diihuthon Jesus, huhut mamujimuji Debata. Jala sude natorop na marnidasa mamuji Debata.
19:1 Dung i dibongoti, laos dibolus Ibana ma huta Jeriko. 19:2 Jadi adong ma disi sahalak, induk ni angka sijalo beo, na margoar Sakeus; na mora do ibana. 19:3 Dipangido rohana, naeng idaonna rupa ni Jesus; alai ndang tarbahensa siala natorop i, ai pardaging na metmet ibana. 19:4 Gabe marlojong ibana tu jolo, dipanaek ma hau galagala sada, anggiat diida Ibana, ai i do dalan sibolusonna. 19:5 Dung sahat tusi, mamereng ma Jesus tu ginjang, laos ninna ma mandok ibana: O Sakeus, hatop ma ho mijur, ai ingkon sorang Ahu tu jabumi sadari on! 19:6 Jadi hatop ma ibana mijur; las rohana manjangkon Jesus. 19:7 Marnida i marungutungut ma nasida sude, mandok: Na sorang do Ibana hape tu halak sipardosa! 19:8 Gabe ro ma si Sakeus, didok ma tu Tuhan i: Olo, Tuhan, satonga ni angka artangki ma hulehon tu angka na pogos; jala ia adong na huangati, siopat lompit ma hupaulak. 19:9 Jadi didok Jesus ma tu ibana: Dapotan tua do pangisi ni jabu on sadari on, ai pinompar ni si Abraham do nang ibana. 19:10 Ai na ro do Anak ni jolma i mangalului jala paluahon na mago. 19:11 Jadi dibege nasida ma i, gabe didatdati Ibana marumpama, ala naung donok tu huta Jerusalem; jala dirimpu nasida, manigor sipapataron ma harajaon ni Debata. 19:12 Asa didok ma: Naeng borhat ma sahalak na raja tu luat na dao, manjalo harajaon; dung pe i, asa mulak muse. 19:13 Jadi dijou ma naposona sampulu halak, dilehon ma tu nasida sampulu bagian, laos ninna ma mandok nasida: Tigatigahon hamu ma i, paima ro ahu muse! 19:14 Alai hosom do roha ni angka na nirajaanna mida ibana, disuru nasida ma suruannasida sian pudina, paboahon: Ndang olo hami rajaan ni i! 19:15 Asa dung dijalo harajaon i, ro ma ibana mulak, jala disuru ma na manjou angka naposona, naung manjalo hepeng i, asa diboto na niomohonna be. 19:16 Jadi ro ma na parjolo i, ninna ma: Tuan, sampulu bagian do diomo bagian na sian ho i. 19:17 Gabe ninna ma mandok ibana: Taho ma i, ale naposo na denggan roha! Ala haposan ho di na otik situtu sampulu huta ma gomgomanmu! 19:18 Dung i ro ma na paduahon i, ninna ma: Ia bagian na sian ho, tuan, lima bagian do diomo. 19:19 Jala ninna ma nang tu ibana: Ia ho, lima huta ma gomgomanmu! 19:20 Jala ro ma na asing mandok: Na, bagianmon, tuan; hutungkus do i di saputanganku. 19:21 Ai biar do rohangku mida Ho, ala na horas ho; dibuat ho do na so pineakkonmu, jala digotil ho do na so sinuanmu. 19:22 Gabe didok ma tu ibana: Mangihuthon pandokmi do uhumonku ho, naposo na jahat roha! Diboto ho do hape, ahu halak na horas, sibuat na so hupeakhon, sigotil na so husuan! 19:23 Boasa so dilehon ho antong hepengki tu sianahi hepeng, asa hutunggui rap dohot bungana di harorongkon? 19:24 Laos didok ma tu angka donganna: Buat hamu ma sian ibana bagianna i; lehon hamu ma i tu parbagian na sampulu i! 19:25 Jadi ninna nasida ma mandok ibana: Alai nunga sampulu bagian di ibana, tuan! 19:26 Hudok ma di hamu: Di ganup paradongan lehonon do; alai sibuaton do sian na so paradongan na di ibana hian. 19:27 Alai ia musungki, na so olo rajaanku, boan hamu ma tuson; seseati hamu ma nasida di jolongkon! 19:28 Jadi dung didok songon i, hehe ma Ibana laho nangkok tu Jerusalem. 19:29 Dung i mandapothon huta Betpage dohot Betania, mardonokkon dolok i, na margoar dolok Jetun, disuru ma siseanna dua halak. 19:30 Ninna ma: Laho ma hamu tu huta na di jolomuna an; dung bongot hamu, jumpang hamu ma tambat disi anak ni halode, na so dung dihunduli halak; harhari jala boan hamu ma i tuson! 19:31 Jala molo adong na manungkun hamu: Boasa harharanmuna i?, dok hamu ma songon on: Ringkot do i di Tuhan i! 19:32 Dung i laho ma angka na sinuru i, jala jumpang nasida do songon na nidokna i tu nasida. 19:33 Alai laho mangkarhari anak ni halode i nasida, didok angka nampunasa ma tu nasida: Boasa harharanmuna anak ni halode i? 19:34 Jadi didok nasida ma: Na ringkot do i di Tuhan i! 19:35 Gabe diboan nasida ma i tu Jesus; dipeakkon ma ulosnasida tu anak ni halode i jadi dipahundul ma Jesus tu ginjangna. 19:36 Jala di na borhat i Ibana, dipahembang nasida ma ulosnasida tu dalan i. 19:37 Alai mandapothon tuatan na di dolok Jetun i, hinsa ma roha ni sandok punguan ni sisean i, mamuji Debata, marsoara na gogo, siala sude hagogoon naung niidanasida i. 19:38 Ia endenasida: Pinasupasu ma Raja i, na ro marhitehite Goar ni Tuhan! Dame do di surgo; hasangapon di ginjang! 19:39 Jala halak Parise i deba, na sian natorop i, mandok tu ibana: Orai ma antong angka siseanmi, Guru! 19:40 Jala ninna ma mangalusi: Hudok ma di hamu: Aut mauhom nasida, joujou ma angka batu! 19:41 Jala laho mandapothon huta i, tangis ma Ibana marnidasa. 19:42 Ninna ma: Aut di arim on ma nian ditanda ho na tau padamehon ho! Alai naung gabe buni do i nuaeng sian matami. 19:43 Ai na ro ma muse angka ari manahopi ho; hubu on ni musum ma ho disi, halianganna jala sosahonna ma ho humaliang. 19:44 Jala panepneponna ma ho rap dohot anakkonmu di tongatongami, jala ndang pasombuonna nanggo dua batu martinditindi, ala na so ditanda ho tingki panopoton na tu ho. 19:45 Dung i dibongoti Jesus ma joro i, dipabali ma sian i angka sipanggadis. 19:46 Ninna ma mandok nasida: Na tarsurat do, bagas partangiangan do bagashu; hape gabe liang pandoboan do i dibahen hamu. 19:47 Jala ariari do Ibana mangajari di joro i. Alai anggo angka sintua ni malim i dohot sibotosurat ro di angka panungganei ni bangso i mangalului dalan mamusa Ibana. 19:48 Alai ndang jumpang nasida dalan patupahonsa; ai sai marsilohot do roha ni natorop i saluhutna tu Ibana, tumangihon hatana.
20:1 Jala di na sadari uju i mangajari natorop i Ibana di joro i, mamaritahon barita na uli, gabe ro ma mandapothon Ibana angka malim dohot sibotosurat rap dohot angka panungganei. 20:2 Ninna nasida ma mandok Ibana: Paboa ma tu hami: Huaso dia do dipangasahon Ho mangula Ulaonmi? Ise do na mangalehon huaso i tu Ho? 20:3 Gabo dialusi ma nasida, ninna ma: Ahu pe, adong do na husungkun tu hamu; paboa hamu ma tu Ahu: 20:4 Ia pandidion ni si Johannes, sian ginjang do i manang sian jolma? 20:5 Alai marhusari ma nasida sama nasida, songon on: Ia ninta annon: Sian ginjang, dohononna ma; boasa so dihaporseai hamu ibana? 20:6 Alai ia ninta: Sian jolma, dangguran ni sandok natorop i hita, ai gomos dihaporseai, panurirang do si Johannes i. 20:7 Jadi dialusi nasida ma: Ndang huboto hami, manang sian dia i. 20:8 Gabe didok Jesus tu nasida: Ahu pe, ndang paboaonku tu hamu, manang huaso dia hupangasahon di ulaonki. 20:9 Jala dihatahon ma umpama on tu natorop i: Adong ma sada halak na pauli porlak anggurna, jadi dipasahat ma i tu angka pangula; dung i laho ma ibana marhutasada lelengleleng. 20:10 Di tingkina i disuru ma naposona tu angka siula porlak anggur i, asa dilehon tu ibana gogo ni porlak anggur i deba. Alai dilombuti angka pangula i ibana, laos muli boti do ibana dipaulak. 20:11 Jadi disuru muse naposona na asing; alai nang i dilasahi jala dileai nasida do, laos songon i ibana disuru muli. 20:12 Disuru muse dope na patoluhon; alai nang i dibugangi do jala dipabali. 20:13 Dung i ninna nampuna porlak anggur i ma: Aha nama bahenonku? Anakku haholongan i ma suruonku; ra biar ma rohanasida mida ibana. 20:14 Alai marnida ibana angka pangula i, masipandohan ma nasida, ninna ma: On do panean i! Tapusa ma ibana, asa di hita siteanonna i! 20:15 Jala dipabali nasida ma ibana tu balian ni porlak anggur i, laos dipusa ma. Aha nama bahenon ni nampuna porlak anggur i tu nasida? 20:16 Na ro ma ibana mambunu angka siula porlak anggur i, dung i pasahatonna ma porlak anggur i tu halak na asing. Alai umbege i, ninna nasida ma: Palias ma i! 20:17 Alai dinolnol Ibana ma nasida, huhut ma didok: Ai dia do lapatan ni na tarsurat songon on: "Ia batu na binolongkon ni angka pande bagas i, apala i do gabe batu parsuhisuhi?" 20:18 Marosak ma ganup na tinggang tu batu on, jala magopu ma ganup na tiningganganna. 20:19 Di na sangombas i dilului angka sibotosurat ro di sintua ni malim dalan manangkup Ibana; alai mabiar do nasida mida natorop i, ai diantusi be do, tu nasida do tinuju ni umpama ondeng. 20:20 Jala dionggopi nasida do Ibana, disuru ma angka pangkahap, sipaulaula songon parroha na tigor, anggiat tarpadapot nasida Ibana di hatana, asa tarpasahatsa Ibana tu panggomgomi, tu huaso ni panguhum i. 20:21 Jadi disungkun nasida ma Ibana, ninna ma: O Guru, huboto hami, na tigor do pangkataionmu nang pamodaionmu, jala na so siida bohi Ho; sintong do tahe dipodahon Ho dalan ni Debata. 20:22 Na jadi do lehononta guguan tu Kesar i, manang na so jadi? 20:23 Alai torang diboto Ibana ansiansinasida i, gabe ninna ma mandok nasida: 20:24 Patuduhon hamu ma tu Ahu rupia sada! Gombaran dohot surat ni ise do ndi on? Didok nasida ma: Gombaran ni Kesar i do. 20:25 Jadi ninna ma mandok nasida: Molo boti, lehon hamu ma tu Kesar na sian Kesar i, jala tu Debata na sian Debata! 20:26 Asa ndang tuk nasida padapot Ibana di hatana i di jolo ni natorop i, jala longang do rohanasida dibahen alusna; laos hohom nama nasida. 20:27 Gabe ro ma deba sian Saduse na so marhatutuhon, adong haheheon ni na mate, manungkun Ibana. 20:28 Ninna nasida ma: Gurunami, disurathon si Musa di hita: Molo mate sihahaan, tuminggalhon parompuan so martinading, ingkon dihabia anggina do dongan saripe ni hahana i, pajongjongkon pomparan di ibana. 20:29 Asa adong ma pitu halak na marhahamaranggi. Mangoli ma sihahaan, dung i mate ma ibana so martinading. 20:30 Dihabia paidua ma boruboru i. 20:31 Dung i paitolu i muse; gabe songon i do torus na pitu i, ndang martinading di hamamatenasida be. 20:32 Umpudi sian nasida mate nang parompuan i. 20:33 Onpe, di haheheon i, ise sian nasida nampuna nioli disi? Ai nasida na pitu i do marniolihonsa. 20:34 Gabe didok Jesus ma tu nasida: Anak ni hasiangan on do mangoli jala pabolihonsa. 20:35 Alai angka naung gabe tau tu hasiangan sogot dohot tu haheheon na sian angka na mate, ndang mangoli manang pabolihonsa pe. 20:36 Ai ndang tarbahensa be mate, ai suman tu surusuruan i jala anak ni Debata do nasida, ia dung gabe partohap di haheheon i. 20:37 Alai paboa, sipaheheon sogot angka naung mate, nang si Musa ditaringoti do i, uju di ramba na sampulguk i, ai digoar do disi Tuhan i "Debata ni si Abraham, Debata ni si Isak jala Debata ni si Jakkob." 20:38 Nda tung Debata ni angka na mate Ibana, Debata ni angka na mangolu do; ai saluhut do nasida mangolu di Ibana. 20:39 Dung i ninna deba sian angka sibotosurat ma mangalusi: Denggan do na nidokmi, Guru! 20:40 Ai ndang barani be nasida manungkun manang dia pe tu Ibana. 20:41 Gabe ninna Jesus ma mandok nasida: Marhua ma didok, Anak ni si Daud do Kristus i? 20:42 Ai didok si Daud sandiri di buku Psalmen: "Ninna Tuhan i do mandok Tuhanku: Hundul ma Ho tu Siamunhon, 20:43 paima hupeakhon angka musum bahen sidegedegean ni patmu!" 20:44 Asa digoar si Daud do Ibana Tuhan, beha ma Ibana Anakna? 20:45 Alai uju na manangi natorop i saluhutna, ninna Ibana ma mandok siseanna: 20:46 Jaga ma hamu mida angka sibotosurat, ai las do rohanasida madangadang, marbaju na ganjang, asa ditabi halak nasida di angka onan; jala ringkot do rohanasida juguk tu bangku jolojolo di angka parguruan dohot tu hundulan na sumangap di parpestaan. 20:47 Dipolgak nasida do bagas ni na mabalu; mangansi do nasida martangiang lelengleleng. Uhum na dumokdok do jaloonnasida muse.
21:1 Dung i mamereng ma Ibana, gabe diida ma angka na mora na mandabuhon silehonlehonna tu bagasan poti parasian. 21:2 Alai diida ma boruboru na mabalu sada, na pogos, na mandabuhon dua rimis. 21:3 Gabe didok Ibana ma: Situtu do hatangkon tu hamu: Gumodang do na nidabuhon ni na mabalu na pogos an sian saluhutna i. 21:4 Ai sasude nasida sian lobilobinasida be do didabuhon; alai ia parompuan an, sian pogosna i do didabuhon sasude na pineopna i. 21:5 Dung i ditaringoti na deba ma joro i, naung dipajagar dohot batu angka na uli dohot silua ni halak, jala ninna Ibana ma: 21:6 Diida hamu pe i sude, na ro ma angka arina, ndang tinggal disi dua batu martinditindi na so gargaronna. 21:7 Jadi disungkun nasida ma Ibana, ninna ma: Andigan ma masa i, Guru; jala dia ma tandana, paboa laho songgop ma i? 21:8 Alai ninna Ibana ma: Jaga ma hamu, so tung lilu hamu! Ai lan do na ro sogot manoluk Goarhu, angka na mandok: Ahu do! Nunga dapot tingkina i! Unang ma ihuthon hamu nasida! 21:9 Alai molo dibege hamu barita ni angka hamusuon dohot hagunturon, unang ma hamu tarsonggot; ai ndang tarbahen so songgop i jumolo. Alai ndang dope manigor dapot ajalna i. 21:10 Laos didok ma tu nasida: Na hehe do sogot bangso maralohon bangso, harajaon maralohon harajaon. 21:11 Masa ma lalo angka na bolon, angka sahit bala marluatluat nang haleon, tarida ma angka panonggoti ro di tanda na balga sian langit. 21:12 Alai tagan so masa dope angka i, tangkupon jala leleannasida do hamu; pasahatonna do hamu tu angka parguruan dohot hurungan, gabe togihononna hamu tu jolo ni raja dohot panguhum humongkop Goarhu. 21:13 Laos i ma gabe dalanmuna, mangkatindangkon Ahu. 21:14 On ma parateatehon hamu: Na so pola sarihononmuna hian sitariashononmuna disi. 21:15 Ai Ahu mangalehon tu hamu soara dohot habisuhon, na so bolas aloon nang alusan ni angka musumuna. 21:16 Alai nang natorasmuna, hahaanggi, sisolhot ro di alealemuna do pasahathon hamu; jala pamateonna deba sian hamu. 21:17 Hosoman ni saluhut jolma do hamu ala Goarhu. 21:18 Jala na so tupa mago sada obuk sian ulumuna. 21:19 Marhitehite benget ni roha do malua hosamuna. 21:20 Alai molo diida hamu huta Jerusalem i hinaliangan ni angka parangan, boto hamu ma, naung donok nama hasesegana. 21:21 Maporus tu dolok i ma di tingki i angka na di Judea i; angka na di bagasan huta i haruar ma sian i, jala angka na di ladang i, unang ma bongot tu huta i. 21:22 Ai angka ari pamaloson ma i, asa songgop sasude na tarsurat i. 21:23 Marjea ma angka na gabegabean dohot angka panarusan di angka ari i; ai songgop ma hagogotan bolon tu tano on jala harimason tu bangso on. 21:24 Rage ma nasida bahenon ni mata ni podang jala diihoti ma nasida mamboan tu saluhut angka bangso, gabe lotlotan ni halak parbegu ma huta Jerusalem, paima gok angka tingki ni parbegu. 21:25 Dung i masa ma angka tanda di mata ni ari, di bulan dohot di angka bintang pe; jala hapusohan ma angka bangso di tano on jala bobonosan, bahenon ni gasak ni laut i dohot galumbangna. 21:26 Tarhatos ma jolma i dibahen hatahutonna dohot panagamon ni rohana di na naeng masa tu liat portibi on; ai humuntal ma angka hagogoon ni parlangitan. 21:27 Dung i idaonnasida ma Anak ni jolma i ro marhitehon ombun mantat huaso dohot hasangapon godang. 21:28 Alai molo mamungka masa angka i, dirgak ma hamu; pasindak hamu ma ulumuna, ai nunga jonok haluaonmuna. 21:29 Jala dihatahon ma tu nasida umpama sada: Bereng hamu ma hau ara i dohot angka hau na asing! 21:30 Ia dung martunasi diida hamu, tandaonmuna do sian i, naung jonok partaonan las. 21:31 Suang songon i, ia dung masa angka i diida hamu, boto hamu ma, naung donok harajaon ni Debata. 21:32 Situtu do hatangkon tu hamu: Na so tupa salpu na sabangso on, so jolo songgop saluhutna i! 21:33 Salpu pe sogot langit dohot tano on, anggo hatangki na so tupa salpu! 21:34 Alai jaga hamu ma dirimuna, unang sorat rohamuna binahen ni parminumon dohot parmabuhon dohot panarihon di hangoluan on, gabe tompu ditahopi ari i hamu songon tali rambang. 21:35 Ai hatop ma i songgop tu atas ni sude na maringanan di atas tano on. 21:36 Alai dungo ma hamu tongtong mardongan tangiang, asa margogo hamu, pasiding saluhut na naeng masa i, laho jongjong di jolo ni Anak ni jolma i. 21:37 Di joro i do Ibana mangajari arianna i; alai bodarina i ruar Ibana, laho marborngin di dolok na margoar Jetun. 21:38 Jala sogot ma didapothon saluhut natorop i Ibana, tumangihon hatana di joro i.
22:1 Alai na jonok nama ari raya mangan roti na so niasoman, na margoar Paska. 22:2 Jala sai dipingkiri angka sintua ni malim dohot angka sibotosurat dalan mamusa Ibana, ai dihabiari nasida do natorop i. 22:3 Alai dibongoti sibolis i do si Jude na margoar Iskariot, sahalak sian na sampuludua i. 22:4 Gabe laho ibana martuptup dohot angka sintua ni malim raphon angka panungganei, manang dia dalanna pasahathon Ibana tu nasida. 22:5 Jadi sian las ni rohanasida marpadan ma nasida, mangalehon hepeng tu ibana. 22:6 Dioloi si Jude ma i, jadi dilului ma tingki na une pasahathon Ibana, so sian pamotoan ni natorop i. 22:7 Dung i jumpang ma arina mangan roti na so niasoman, laos disi do somal dipotong birubiru Paska. 22:8 Jadi disuru Jesus ma si Petrus dohot si Johannes, ninna ma: Laho ma hamu paturehon birubiru Paska sipanganonta i. 22:9 Gabe ninna nasida ma mandok Ibana: Tu dia ma dohononmu hami paturehonsa? 22:10 Dung i ninna Ibana ma mandok nasida: Disi bongot hamu tu huta i, pajumpang ma hamu dohot sada halak siboan partuaehan; ihuthon hamu ma ibana tu bagasan jabu na binongotanna. 22:11 Dok hamu ma tu nampuna bagas i: Tona ni Guru i tu ho: Didia do inganannami, asa mangan Paska i Ahu rap dohot angka siseanku? 22:12 Dung i patuduhononna ma tu hamu bilut parginjang sada na lumbang, naung hinembangan; disi ma pature hamu! 22:13 Jadi laho ma nasida; jumpang nasida ma songon na pinaboana i tu nasida, jala dipature ma Paska i. 22:14 Asa dung dapot tingkina, hundul ma Ibana rap dohot angka apostel. 22:15 Dung i ninna ma mandok nasida: Mansai masihol rohangku, naeng mangan birubiru Paska on Ahu rap dohot hamu, tagan so songgop dope sitaononki. 22:16 Ai hudok ma di hamu: Na so tupa panganonku be i, ia so dapot hagogokna i di harajaon ni Debata! 22:17 Jala dibuat Ibana ma panginuman, dipasupasu ma, laos ninna ma: Buat hamu ma on, sagihon hamu ma i sama hamu! 22:18 Ai hudok ma di hamu: Na so tupa be inumonku parbue ni hau anggur, paima songgop harajaon ni Debata! 22:19 Jala dihindat ma roti, dipasupasu ma, diponggoli jala diparlehon ma tu nasida, huhut ma didok: Dagingku do on, na nilehon humongkop hamu; ula hamu ma i, bahen parningotan di Ahu! 22:20 Songon i do dihindat nang panginuman, dung sun nasida na mangan i, didok ma: Ia panginuman on, padan na imbaru do i, marhitehite mudarhu, na durus humongkop hamu! 22:21 Tangan ni na manjehehon Ahu do hape rap dohot Ahu di atas meja on! 22:22 Tong do nian langka ni Anak ni jolma i, songon naung diaturhon tu Ibana; alai marjea do halak na manjehehon Ibana! 22:23 Gabe dipungka nasida ma masitangkasan, manang ise nasida ulaning na olo mangulahon i. 22:24 Jala tubu ma parbadaon di nasida, manang ise nasida rajumon na sumangap. 22:25 Gabe ninna Jesus ma mandok nasida: Angka raja ni angka sipelebegu do manggomgom, jala na ulibasa do digoar angka na sangapnasida. 22:26 Alai unang ma songon i anggo di hamu! Na sumangap na di hamu, gabe songon naposo, jala na manguluhon suman ma tu pangoloi! 22:27 Ai ise do na sumangap, na hundul marsipanganon manang na marhobas i? Nda na hundul i? Alai di tongatongamuna do anggo Ahu songon parhobas. 22:28 Alai hamu do na manahan di lambungku, di na tarunjun i Ahu. 22:29 Anggo Ahu, huturpukhon pe tu hamu Harajaon i, songon naung diturpukkon Damang i tu Ahu. 22:30 Asa mangan jala minum hamu di mejangki di harajaonki, mangkunduli habangsa laho manguhumi halak Israel na sampuludua marga i. 22:31 O Simon, Simon nunga dipangido sibolis i, naeng segeonna hamu songon dahanon. 22:32 Alai Ahu do manangiangkon ho, unang mintop haporsaonmi. Jala dung mulak sogot roham, pargogoi ma roha ni angka hahaanggim! 22:33 Alai ninna si Petrus ma mandok Ibana: Tuhan, na hobas do ahu mandongani Ho tu hurungan, nang tu hamatean pe! 22:34 Alai ninna Ibana ma: Hudok ma tu ho, Petrus: Ndang martatahuak manuk saborngin on, so jolo tolu hali soadahononmu, na so tinandam Ahu. 22:35 Laos ninna ma mandok nasida: Uju husuru hamu, so marhajut, so marhandehande, so marsipatu pe, dung do hamu hurangan? Jadi didok nasida ma: Ndang dung! 22:36 Gabe ninna ma mandok nasida: Alai anggo nuaeng, na marhajut, diboan ma i, songon i nang handehande. Jala na so umpeop i, digadis ma mandarna, manuhor podang! 22:37 Ai hudok ma di hamu: Ingkon saut na tarsurat taringot tu Ahu na mandok: "Tarrajum do Ibana tu angka parjahat!" Ai nasa na taringot tu Ahu, jumpang ma nuaeng. 22:38 Gabe didok nasida ma: Tuhan, adong do dua podang dison. Jadi didok ma tu nasida: Sae ma i! 22:39 Dung i laho ma Ibana tu balian, tu dolok Jetun, songon na somal; jala diihuthon angka siseanna Ibana. 22:40 Asa dung sahat Ibana tusi, ninna ma mandok nasida: Martangiang ma hamu, asa unang bongot hamu tu bagasan pangunjunan! 22:41 Anggo Ibana dipapulik ma dirina sian nasida, arga tuk dangguron batu, marsinggang ma Ibana martangiang songon on: 22:42 Amang, aut olo ma Ho nian pasalpuhon siinumon on sian Ahu! Alai unang ma rohangku saut, roham ma! 22:43 Alai diida Ibana ma surusuruan sian banua ginjang i, na margogoihon Ibana. 22:44 Jala di parungkilonna i, lam digogo ma martangiang; jadi songon mudar na himpal do madekdek hodokna i tu tano. 22:45 Jala hehe ma Ibana sian na martangiang i, mandapothon siseanna; jadi tarpodom ma nasida didapot, dibahen arsak ni rohanasida. 22:46 Gabe ninna ma mandok nasida: Boasa ma tung modom hamu? Hehe ma hamu martangiang, asa unang hamu bongot tu pangunjunan! 22:47 Mandok i dope Ibana, nunga ro torop halak, niuluhon ni sada sian na sampuludua i, ia goarna si Judas, na manjonohi Jesus mangumma Ibana. 22:48 Alai ninna Jesus ma mandok ibana: O Judas, pangummaon do hape dibahen ho, pasahathon Anak ni jolma i? 22:49 Alai diida angka dongan ni Jesus ma na naeng masa i, gabe didok ma: Tuhan, tampulhononnami ma podang i? 22:50 Jala sahalak sian nasida manampul naposo ni sintua ni malim, gabe digotap pinggolna siamun. 22:51 Alai ro ma alus ni Jesus: Sae ma i! Dijama ma pinggol i, dipamalum ma halak i. 22:52 Gabe ninna Jesus ma mandok angka sintua ni malim, angka sigomgom joro i dohot angka panungganei, naung manahopi Ibana: Hira dompak halak panamun hamu ro, mantat podang dohot lombutlombut. 22:53 Ariari do Ahu rap dohot hamu di joro i; ndang dung dilaluhon hamu tanganmuna dompak Ahu. Alai on do tingkimuna dohot huaso ni haholomon i. 22:54 Dung ditangkup, diboan nasida ma Ibana manogihon tu bagasan jabu ni sintua ni malim i. Alai mandaodao ma si Petrus mangihuthon. 22:55 Dipagalak nasida ma api di pogu ni alaman i jala rap hundul ma disi, gabe ro ma si Petrus juguk tu tongatonganasida. 22:56 Dung i diida naposo boruboru sahalak ma ibana juguk mardonokkon api i, dinolnol ma ibana, ninna ma: Dongan ni Halak an do on, tahe! 22:57 Alai disoadahon do Jesus, didok ma: Ndang hutanda Ibana, inang! 22:58 Dung i satongkin nari, diida sahalak na asing ma ibana jala ninna ma: Sada sian nasida i do ho! Alai didok si Petrus ma: Ndang na tutu i, amang! 22:59 Dung salpu hirahira sajom, diondolhon sahalak na asing muse, mandok: Tongon do, dohot do halak on donganna najolo, jala halak Galilea do i. 22:60 Alai didok si Petrus ma: Ndang huboto na nidokmi, amang! Mandok i dope ibana, mamintor martatahuak ma manuk. 22:61 Jadi humusor ma Tuhan i, dibereng ma si Petrus, gabe diingot si Petrus ma hata ni Tuhan i, i ma na nidokna i tu ibana: Andorang so martatahuak manuk i annon, nunga tolu hali Ahu soadahononmu! 22:62 Jala ruar ma ibana, tumatangis gogogogo. 22:63 Alai anggo angka baoa na maniop Jesus, dipauruuru jala dilasahi do Ibana. 22:64 Dibulang nasida do Ibana gabe disungkun: Manurirangi ma Ho: Ise i na mamastap Ho? 22:65 Jala lan dope na asing dihatahon nasida tu Ibana laho mangaleai. 22:66 Jadi disi torang ari, marpungu ma rapot ni sintua ni bangso i, i ma angka sintua ni malim rap dohot sibotosurat; ditogu nasida ma Ibana tu harungguannasida. Ninna nasida ma: Anggo Kristus i do Ho, paboa ma i di hami! 22:67 Gabe ninna Ibana ma mandok nasida: Nang hupaboa i tu hamu, tong do so porsea hamu! 22:68 Alai molo manungkun Ahu, ndang tagamon alusanmuna Ahu. 22:69 Alai olat ni on ma hundul Anak ni jolma i tu siamun ni Hagogoon ni Debata. 22:70 Gabe saluhut nasida mandok: Asa Anak ni Debata do Ho? Jadi didok Ibana ma tu nasida: Songon na nidokmuna: Ahu ma i tutu! 22:71 Dung i ninna nasida ma: Pola luluanta dope sitindangi? Ai nunga apala hita umbegesa dihatahon Ibana.
23:1 Dung i hehe ma saluhut nasida na pungu i, mamboan Ibana tu jolo ni si Latus. 23:2 Dialuhon nasida ma Ibana, ninna ma: Na dapot hami do on pabalikbalikkon bangsonami jala mangorai mangalehon guguan tu Kesar i; dipandok, Raja Kristus do Ibana. 23:3 Gabe disungkun si Latus ma Ibana: Ho do Raja ni Jahudi i? Jadi dialusi ma ibana, ninna ma: Songon na nidokmi ma tutu! 23:4 Dung i ninna si Latus ma mandok angka sintua ni malim dohot natorop i: Ndang adong dapot ahu sala ni Halak on! 23:5 Alai lam digogohon nasida do mandok: Digunturi Ibana do bangso i, ai sai mangajari Ibana di sandok tano Judea, mamungka sian Galilea sahat ro tuson. 23:6 Alai umbege i si Latus, manungkun ma ibana, manang halak Galilea Ibana? 23:7 Jala dung diboto, na sian gomgoman ni si Herodes Ibana, disuru ma Ibana tujolo ni si Herodes, ai tongon do ibana di huta Jerusalem uju i. 23:8 Marnida Jesus si Herodes i, las situtu ma rohana; ai nunga na nia lelengna, sai naeng idaonna Ibana, ala naung dibege baritana, jala diarop rohana, idaonna tanda sada sipatupaonna. 23:9 Jadi godanggodang ma disungkunhon tu Ibana; alai ndang adong dialusi Jesus ibana. 23:10 Disi do angka sintua ni malim ro di sibotosurat, jala gogogogo do Ibana dialuhon. 23:11 Ia si Herodes rap dohot angka donganna, direhei jala dilealeai do Ibana, disolukkon ma pangkean na arga tu Ibana, laos songon i ma disuru Ibana mulak tu si Latus. 23:12 Jadi di na sadari i ma maraleale si Herodes dohot si Latus, ai na masihosoman do nasida anggo nasailaon. 23:13 Alai didokkon si Latus ma angka sintua ni malim, angka panungganei ro di natorop i marpungu, ninna ma mandok nasida: 23:14 Diboan hamu do Halak on tu jolongku, sipabalik bangso didok hamu; jala di jolomuna hutangkasi i, gabe ndang adong jumpang ahu di Halak on sala, angka na tinuhashonmuna tu Ibana. 23:15 Si Herodes pe songon i do, disuru do Ibana mulak tu jolonami; asa ndang adong parulaonna, na tama mambahen Ibana marutang hosa. 23:16 Dibahen i lasahanku ma Ibana, asa pinalua. 23:17 Naung i aturan, paluaonna sahalak tu nasida di pesta i. 23:18 Alai sude nasida sasoara manjoujouhon: Pusa ma on! Si Barabas ma palua di hami! 23:19 Alai ala ni guntur naung tubu di huta i jala ala ni partodosonna, umbahen na tarhurung ibana. 23:20 Gabe diulahi dipanghulingi si Latus ma nasida, ai naeng paluaonna Jesus. 23:21 Alai dipanjoujouhon nasida: Parsilangkon, parsilangkon Ibana! 23:22 Jala patoluhalihon ma didok tu nasida: Ai aha do na jat dibahen Halak on? Ndang jumpang ahu agia aha di Ibana na tau gabe marutang hosa. Dibahen i lasahanku, dung i paluaonku ma Ibana. 23:23 Alai dipangiar be do soarana manosahi ibana, mangido parsilanghononhon Ibana; jala siat ma joujounasida. 23:24 Jadi dipaputus si Latus ma, pasauton nama pinangido ni rohanasida i. 23:25 Dipalua ma halak na pinangidonasida i, na tarhurung ala ni na guntur dohot ala ni todostodos; ia Jesus dipasahat ma guru roharohanasida. 23:26 Laho manogihon Ibana, disoro nasida ma sahalak, si Simon sian Kinene do goarna, na ro sian ladangna; tu ibana ma dipaporsanhon hau pinarsilang i, paihutihut Jesus. 23:27 Mangihuthon Ibana torop halak nang angka boruboru na mananangisi jala mangandungi Ibana. 23:28 Jadi didompakkon Jesus ma nasida, ninna ma: Hamu, angka boru Jerusalem, unang ma Ahu tatangisi hamu, dirimuna dohot anakkonmuna ma! 23:29 Ai na ro ma angka ari sogot, dohononna ma disi: Martua ma angka na hol, angka ina na so dung tubuan jala na so dung panarusan! 23:30 Disi ma pungkaon ni halak mandok tu angka dolok: Tinggang i ma hami! Dohot tu angka tor: Hungkupi hami! 23:31 Ai molo songon on pambahennasida tu hau na rata, aha ma tagamon masa tu hau naung masak? 23:32 Alai ditogihon dope dua halak nari, parjahat, sipamateon rap dohot Ibana. 23:33 Asa dung sahat nasida tu dolokdolok na margoar partangkurahan, diparsilangkon ma Ibana disi rap dohot angka parjahat i, na sada tu siamunna, na sada nari tu sihambirangna. 23:34 Jadi didok Jesus ma: Ale Amang! Marpamuati ma roham mida nasida, ai ndang diboto nasida na binahennasida i. Laho marbagi ulosna, manjomput na sinurat ma nasida. 23:35 Jongjong ma disi natorop i mainondur. Alai dohot do angka panungganei manginsahi Ibana, angka ninna ma: Ia na leban dipalua; ua, dirina ma dipalua, anggo na tutu Kristus ni Debata, na pinili i Ibana! 23:36 Alai dohot do angka soldadu i pauruuru Ibana. Dipajonok mamboan na asom tu Ibana. 23:37 Laos didok ma: Anggo raja ni Jahudi do Ho, palua dirim antong! 23:38 Alai adong ma tarsurat di atasna: Raja ni Jahudi do On! 23:39 Alai na sada sian angka parjahat, na targantung i, mangaleai Ibana: Ai ndada Kristus i Ho? Palua ma dirim, nang hami antong! 23:40 Alai dialusi donganna ibana, dipinsang ma, ninna ma: Ndang dihabiari ho hape Debata, atik pe rap hona uhum hita? 23:41 Uhum na tigor do na tu hita, ai tajalo do upa ni pambahenanta; alai anggo Ibana, ndang adong diula na so ture. 23:42 Laos ninna ma: O Jesus, ingot ahu, ia dung sahat Ho tu harajaonmi! 23:43 Gabe ninna Jesus ma mandok ibana: Situtu do hatangkon tu ho: Sadari on do ho rap dohot Ahu di Paradeiso! 23:44 Jala mareak pungkul sampuludua, songgop ma na holom tu sandok tano i sahat ro di pungkul tolu. 23:45 Ai mangkolom ma mata ni ari i. Jadi maribak ma hirehire na di bagas joro i, bola dua. 23:46 Dung i marsoara na gogo ma Jesus, ninna ma: Amang! Tu bagasan tanganmu ma hupasahat tondingku! Jadi dung didok i, tos ma hosana. 23:47 Marnida na masa i letnan i, dipuji ma Debata, ninna ma: Tutu do, halak na tigor roha do On! 23:48 Jadi sude natorop i, na marluhut mainondur, masitompuk andorana, marnida na masa i, laos mulak ma. 23:49 Alai mandaodao do jongjong saluhut angka na tumanda Ibana marnidasa, songon i angka parompuan na mangihuthon Ibana sian tano Galilea. 23:50 Jadi adong ma sada halak, na margoar Josep, masuk rapot godang, parroha na burju jala na tigor. 23:51 Ndang panolopi ibana di tahi dohot pambahenannasida; pangisi ni huta Arimatea na di Judea do, jala dohot do ibana maimaima di harajaon ni Debata. 23:52 Didapothon ibana do si Latus mangido bangke ni Jesus. 23:53 Dipaijur ma bangke i, dibaluti ma tu dagangan na halus, dipeakkon ma tu bagasan tanoman na niliang tu batu; na so dung adong dope peak manang ise disi. 23:54 Ari parhobasan do uju i jala jonok ma Sabbat i. 23:55 Alai mangihut do angka parompuan, naung mandongani Ibana ro sian luat Galilea; dibereng nasida do tanoman i ro di parpeak ni bangke i. 23:56 Dung i muli ma nasida paturehon angka na hushus ro di miak mir. Jala manipat ari Sabbat i, so nasida mangihuthon patik i.
24:1 Alai di ari parjolo dung ari Sabbat, ro ma nasida mansai sogot tu tanoman i, mantat na hushus na pinaturenasida. 24:2 Alai nunga digulang batu i sian tanoman i didapot nasida. 24:3 Jala dung bongot, ndang jumpang nasida bangke ni Tuhan Jesus. 24:4 Jadi di na jut rohanasida marnidasa, gabe jongjong ma di lambungnasida dua halak parabit na marlinanglinang. 24:5 Alai mabiar ma rohanasida jala unduk nasida manaili, gabe ninna halak ondeng ma tu nasida: Boasa luluanmuna na mangolu di inganan ni angka na mate? 24:6 Ndang dison Ibana: Nunga dipahehe Ibana. Ingot hamu ma na hinatahonna i tu hamu, uju di Galilea i dope Ibana! 24:7 Ai didok do, ingkon pasahaton Anak ni jolma i tu tangan ni halak pardosa jadi parsilangkononhon, jala mulak mangolu ma Ibana di ari patoluhon. 24:8 Jala diingot nasida ma hatana i. 24:9 Gabe mulak ma nasida sian tanoman i, dibaritahon ma sasudena i tu na sampulusada i dohot tu donganna saluhutna. 24:10 Si Maria Magdalena ma i, dungkon ni i si Johannes dohot si Maria ni si Jakobus. Nang angka na asing na mandongani nasida paboahonsa tu angka apostel. 24:11 Hira turiturian do angka hata i di rohanasida jala ndang dihaporseai. 24:12 Alai hehe ma si Petrus marlojong tu tanoman i. Dipaunduk ma dirina, pulik ma diida peak angka saputsaputna i. Dung i muli ma ibana, huhut longang do rohana marningot na masa disi. 24:13 Dung i adong ma dua halak sian nasida mardalani di na sadari i tu sada huta na margoar Emmaus, arga ualu paal daona sian Jerusalem. 24:14 Jala mangkatai ma nasida taringot tu saluhut naung masa i. 24:15 Jadi di na mangkatai nasida songon i jala masipapuasan, ro ma Jesus sandiri mandapothon jala mardalan rap dohot nasida. 24:16 Alai pangalelaon do matanasida, unang ditanda nasida Ibana. 24:17 Jadi ninna ma mandok nasida: Hata dia do na hinatahonmuna sama hamu di tongandalan on? Gabe sulon ma nasida huhut tungki. 24:18 Dung i mangalusi ma na sahalak na margoar Kleopas, ninna ma mandok Ibana: Sasada Ho do huroha na mian di Jerusalem, na so umboto na masa disi di angka ari on? 24:19 Jadi ninna ma mandok nasida: Ai aha do? Gabe ninna nasida ma mandok Ibana: Angka na taringot tu Jesus, halak Nasaret i, panurirang na gogo di ulaon nang di hata, di jolo ni Debata dohot sandok bangso i. 24:20 I do dipasahat angka sintua ni malim rap dohot sintuanta, asa marutang hosa jala diparsilangkon. 24:21 Alai anggo hami sai mangkirim do, naeng Ibana paluahon Israel! Jala nunga pola patoluarihon sadari on, dung masa angka i. 24:22 Tarsonggot muse rohanami dibahen angka parompuan deba na sian hami; sogot do nasida nasogotan sian tanoman i. 24:23 Ndang jumpang nasida bangkena, gabe ro do nasida mandok, naung diida nasida surusuruan angka na paboahon, na mangolu do Ibana. 24:24 Jala adong ma sian hami na laho tu tanoman i, jumpang nasida do tutu songon na hinatahon ni angka parompuan i; alai anggo Ibana ndang adong diida. 24:25 Jadi ninna Ibana ma mandok nasida: Oe hamu, na hurang roha jala na losok mangkaporseai saluhut na hinatahon ni angka panurirang i! 24:26 Nda ingkon songon i marsitaonon Kristus i, laho masuk tu hasangaponna i? 24:27 Jadi jojor ma sian si Musa dohot sian saluhut panurirang i dipatorang tu nasida nasa na tarsurat taringot tu Ibana. 24:28 Dung i jonok ma nasida tu huta sitopotonnasida i; anggo Ibana dibahen ma songon na naeng datdatanna dope sidalananna i. 24:29 Gabe disosoi nasida ma Ibana, ninna ma: Ua, mian ma Ho di hami, ai na bot ne ma jala manihir ari! Jadi bongot ma Ibana mandongani nasida. 24:30 Jala di na hundul Ibana rap dohot nasida mandok mangan, dihindat Ibana ma roti i, dipasupasu ma, dung i diponggoli mangalehonsa tu nasida. 24:31 Disi ma buha matanasida gabe ditanda ma Ibana. Dung i marhalindo ma Ibana di jolonasida. 24:32 Gabe masipandohan ma nasida: Nda gara rohanta di bagasan, uju dipanghulingi hita di tongandalan i, laho patorangkon tu hita na tarsurat i? 24:33 Jadi borhat ma nasida di na sangombas i, laho mulak tu Jerusalem, gabe pungu ma didapot na sampulusada i rap dohot angka dongannasida. 24:34 Angka ninna nasida do mandok: Naung tutu do dipahehe Tuhan i, jala diida si Simon do Ibana! 24:35 Jadi dibaritahon nasida na ro i ma na masa di tongandalan i ro di panandanasida di Ibana, di na mamonggoli roti i Ibana. 24:36 Mangkatahon i dope nasida, jongjong ma Jesus di tongatonganasida mandok: Dame ma di hamu! 24:37 Gabe tarhalomong jala hatahutan ma nasida, ai dirimpu, tondi do na niidanasida. 24:38 Jadi ninna Ibana ma mandok nasida: Boasa tarhalomong rohamu jala boasa songon na ganggu rohamuna? 24:39 Bereng hamu ma tanganku dohot pathu, paboa Ahu sandiri do! Jama hamu ma Ahu jala tilik hamu ma; ai anggo tondi ndang marsibuk manang marholiholi, songon na niidamuna di Ahu. 24:40 Uju mandok songon i, dipatuduhon ma tanganna dohot patna tu nasida. 24:41 Alai laos so porsea dope nasida siala las dohot longang ni rohanasida, gabe didok na tu nasida: Adong dipeop hamu dison manang dia sipanganon? 24:42 Jala dilehon nasida ma tu Ibana dengke na pinanggang samponggol. 24:43 I ma dijalo Ibana, laos dipangan ma i dipanotnoti nasida. 24:44 Jadi ninna Ibana ma mandok nasida: On ma angka hatangku na huhatahon tu hamu, uju rap dope Ahu dohot hamu: Ingkon jumpang do saluhutna na tarsurat taringot tu Ahu di patik ni si Musa, di angka panurirang i nang di buku Psalmen. 24:45 Jadi dibungkai ma rohanasida, asa diantusi na tarsurat i. 24:46 Dung i ninna ma mandok nasida: Songon i do tarsurat hian, manaon na porsuk Kristus i jala hehe sian na mate di ari patoluhon. 24:47 Jala baritahononhon ma marhitehite Goarna hamubaon ni roha mangalap hasesaan ni dosa, tu sude angka bangso, mamungka sian huta Jerusalem. 24:48 Hamu do mangkatindangkonsa. 24:49 Jala suruonku ma songgop tu hamu na pinarbagabaga ni Damang. Alai mian ma hamu di huta on, paima disolukkon hamu hagogoon na sian ginjang! 24:50 Jadi ditogihon Ibana ma nasida ruar tungkan Betania, dung i dipaherbang ma tanganna mamasumasu nasida. 24:51 Jadi di na mamasumasu nasida Ibana, sirang ma Ibana sian nasida jala tarhindat tu ginjang. 24:52 Dung i disomba nasida ma Ibana jala mulak tu huta Jerusalem, marlas ni roha situtu. 24:53 Jadi tongtong ma nasida di joro i mamujimuji Debata.
1:1 Di mulana i nunga adong Hata i, jala saor tu Debata do Hata i, jala Debata do Hata i. 1:2 I ma na saor tu Debata di mulana i. 1:3 Saluhutna i marhite sian Hata i do, umbahen na manjadi; jala ndang adong nanggo sada sian naung jadi i, na so marhite sian 1:4 Di bagasan Hata i do hangoluan; laos hangoluan i do Panondang ni hajolmaon. 1:5 Na marsinondang do Panondang i di bagasan na holom, alai ndang dijangkon na holom i. 1:6 Hehe do sada halak sinuru ni Debata, si Johannes do goarna. 1:7 Sitindangi do ibana, umbahen na ro, asa dihatindangkon Panondang i, anggiat gabe porsea saluhutna marhite sian Ibana. 1:8 Ndang apala ibana Panondang i; na mangkatindangkon Panondang i do tahe. 1:9 Alai nunga mandok ro uju i tu portibi on Panondang na sintong i, na manondangi nasa jolma. 1:10 Di portibi on hian do Ibana, jala marhite sian Ibana do manjadi portibi on; hape ndang ditanda portibi on Ibana. 1:11 Na ro do Ibana manopot na di Ibana hian, gabe ndang dijangkon angka na di ibana i Ibana. 1:12 Alai manang piga na manjangkon Ibana, tusi do dilehon huaso, asa gabe anak ni Debata nasida, angka na porsea di Goarna. 1:13 I ma angka na so tubu sian mudar, manang sian sangkap ni daging, manang sian sangkap ni baoa, tung sian Debata do. 1:14 Gabe daging ma Hata i jala maringan di tongatonga ni hita on, jadi huida hami ma hasangaponna, i ma hasangapon ni Anak sasada na sian Ama i, gok asi ni roha dohot hasintongan. 1:15 Dihatindangkon si Johannes do Ibana, ai ninna ma: On do Ibana na hudok i, na ro sian pudingku; jumolo do Ibana adong asa ahu, ai parjolo hian do Ibana. 1:16 Ai sian hamoraonna do saluhut hita manjalo, i ma asi ni roha na so marnamontok. 1:17 Ai marhite sian si Musa do dilehon anggo patik i; alai hinorhon ni Jesus Kristus do manjadi asi ni roha dohot hasintongan. 1:18 Ndang dung adong na marnida Debata; Anak na sasada i, na di ampuan ni Ama i, Ibana do mamaritahonsa. 1:19 Disuru angka Jahudi sian huta Jerusalem ma angka malim dohot halak Lepi manungkun si Johannes: Ai ise do ho?, gabe on ma dihatindangkon: 1:20 Ai diparhatopot do, ndang diporso, didok do: Ndang ahu Kristus i. 1:21 Gabe disungkun nasida ma ibana: Antong ise do ho? Si Elia do ulaning? Jadi didok ma: Ndang i ahu! Panurirang i do ho? Dung i dialusi ma: Ndang! 1:22 Dung i ninna nasida ma mandok ibana: Antong, ise do ho?, asa haalusan hami angka na marsuru hami. Aha do dohononmu taringot tu ho? 1:23 Dung i ninna ma: Soara ni na manjoujou di halongonan do ahu: Patigor hamu ma dalan ni Tuhan! songon naung nidok ni panurirang Jesaya. 1:24 Sian Parise do angka na sinuru i. 1:25 Jadi didok nasida ma manungkun ibana: Boasa mandidihon ho, so manang Kristus ho, manang si Elia, manang panurirang i? 1:26 Gabe didok si Johannes ma mangalusi nasida: Ia ahu aek do hudidihon; alai nunga jongjong di tongatongamuna Ibana, na so tinandamuna i. 1:27 Ibana do i na ro sian pudingku; na hurang tama do ahu mangkarhari tali ni sipatuna. 1:28 Di Betania do i masa, di ipar ni aek Jordan, ai disi do mandidihon si Johannes. 1:29 Torang ni arina i diida si Johannes ma Jesus ro tusi, jadi didok ma: On do Birubiru ni Debata, na mamorsan dosa ni portibi on! 1:30 Ibana do na hudok i: Sian pudingku ro sada halak, naung jumolo adong asa ahu; ai parjolo hian do Ibana. 1:31 Ahu pe, ndang hutanda Ibana; alai asa tandap Ibana di halak Israel, umbahen na ro ahu mandidihon aek. 1:32 Dung i dihatindangkon si Johannes ma, ninna ma: Huida do Tondi i tuat songon darapati sian banua ginjang i jala mian di Ibana! 1:33 Ahu pe, ndang hutanda Ibana jolo. Alai Ibana na marsuru ahu mandidihon aek, I do mandok tu ahu: Ia tusi diida ho tuat Tondi i jala mian di Ibana, Ibana do sididihon Tondi Parbadia. 1:34 Asa nunga huida jala huhajongjongkon: Ibana do Anak ni Debata. 1:35 Marsogotna i jongjong muse si Johannes disi dohot siseanna dua halak. 1:36 Jadi di na niidana i Jesus mamolus, ninna ma: On do Birubiru ni Debata! 1:37 Jadi dibege siseanna na dua i ma hatana, gabe diihuthon ma Jesus. 1:38 Dung i humusor ma Jesus, diida ma nasida na mangihuthon Ibana, jadi ninna ma mandok nasida: Aha do na niluluanmuna? Jadi didok nasida ma mandok Ibana: Rabbi (na mandok: Guru) didia do Ho sorang? 1:39 Jadi didok ma mandok nasida: Ro ma hamu, asa diida hamu! Dung i ro ma nasida, diida ma parmiananna; laos rap ma nasida dohot Ibana sadarina i. Tar di pungkul opat ma i. 1:40 Si Andreas, dongan saama ni si Simon Petrus, do na sada sian na dua i, na umbege hata ni si Johannes dohot mangihuthon Ibana. 1:41 Dung i pajumpang ma ibana jumolo dohot si Simon, donganna saama, jadi didok ma mandok ibana: Nunga jumpang hami Messias i (astuanna: Kristus)! 1:42 Laos ditogihon ma ibana tu Jesus. Alai dibereng Jesus ma ibana huhut ma didok: Si Simon, anak ni si Jonas do ho; si Kepas ma ho goaron (astuanna: Batu mamak, Petrus)! 1:43 Torang ni arina i, di na naeng laho Ibana tu Galilea, jumpangsa ma si Pilippus, dung i didok Jesus ma mandok ibana: Ihuthon ma Ahu! 1:44 Alai sian Betsaida do si Pilippus, i ma huta ni si Andreas dohot si Petrus. 1:45 Dapot si Pilippus ma si Natanael, jadi didok ma mandok ibana: Nunga jumpang hami Ibana, na nidok ni si Musa di surat patik i jala na pinaboa ni angka panurirang; i ma Jesus, anak ni si Josep, na sian huta Nasaret. 1:46 Dung i didok si Natanael ma mandok ibana: Tung tarbahen ma ro na denggan sian huta Nasaret? Jadi didok si Pilippus ma: Ro ma ho marnida! 1:47 Diida Jesus ma si Natanael ro manopot Ibana, jadi didok ma taringot tu ibana: On ma sada halak Israel na tutu, na so marpangansi di bagasan! 1:48 Ninna si Natanael ma mandok Ibana: Sian dia ditanda Ho ahu? Dung i dialusi Jesus ma ibana: Huida do ho, uju ditoru ni hau ara i ho, andorang so dijou si Pilippus i dope ho. 1:49 Dung i ninna si Natanael ma mangalusi Ibana: Gurunami, Ho do Anak ni Debata! Ho do raja ni halak Israel! 1:50 Dung i ninna Jesus ma mangalusi ibana: Ala hudok tu ho: Huida ho di toru ni hau ara i, umbahen na porsea ho? Idaonmu dope na sumurung sian i! 1:51 Laos ninna ma: Na tutu situtu do na hudok on tu hamu: Idaonmuna do mungkap banua ginjang jala manaek mijur angka surusuruan ni Debata tumopot Anak ni jolma i.
2:1 Dung i patoluarihon adong ma na marbagas di huta Kana na di luat Galilea, jala disi ma ina ni Jesus. 2:2 Alai dohot ma Jesus raphon angka siseanna dipio tu pesta i. 2:3 Jadi dung hurangan anggur nasida, ninna ina ni Jesus ma mandok Ibana: Ndang adong anggur di nasida! 2:4 Alai ninna Jesus ma mandok ibana: Marhua ho tu Ahu, inang? Ndang dope ro tingkingku. 2:5 Dung i ninna inana i ma mandok angka parhobas: Manang dia dohononna tu hamu, bahen hamu ma! 2:6 Alai mangihuthon adat parburion ni halak Jahudi, adong ma diri disi onom gunsi (hudon batu), siatsiat dua ro di tolu poting. 2:7 Dung i ninna Jesus ma mandok nasida: Gohi hamu ma angka gunsi on aek! Jadi gok situtu ma dibahen. 2:8 Laos didok muse tu nasida: Tahui hamu ma sian i, dung i boan hamu ma tu indukmuna! Jadi diboan nasida ma. 2:9 Alai didai induk ni angka parhobas i ma aek i naung gabe anggur, jala ndang diboto haroroanna, ai holan angka parhobas na manahui aek i do umbotosa, gabe dijou ma pangoli i. 2:10 Jadi ninna ma mandok ibana: Saluhut jolma mangalehon parjolo anggur na dumenggan; dung pe butong halak, asa dilehon na humurang. Ia ho, dipeop ho do anggur na dumenggan ro di nuaeng! 2:11 Asa i ma tanda na parjolo, na binahen ni Jesus di huta Kana na di Galilea, papatarhon hasangaponna i, gabe porsea ma angka siseanna di Ibana. 2:12 Dung salpu i, tuat ma Ibana tu Kapernaum rap dohot inana, angka anggina dohot siseanna, laos mian manang piga ari disi. 2:13 Jadi jonok ma Paska ni Jahudi, gabe nangkok ma Jesus tu huta Jerusalem. 2:14 Dung i hundul ma di joro i didapot angka partigatiga lombu, birubiru dohot darapati ro di angka panungkari. 2:15 Jadi dipauli Jesus ma tali bahen linsinglinsing, dipabali ma nasida saluhutna sian joro i, rap dohot angka birubiru dohot lombu, disarahon ma hepeng ni panungkari i, diunggilhon ma mejana. 2:16 Dung i ninna ma mandok angka partigatiga darapati: Boan hamu ma i sian on! Unang bahen hamu bagas ni Damang gabe partigatigaan! 2:17 Jadi diingot angka siseanna i ma hata na tarsurat i: "Hamuruhon humongkop bagasmi do mangallang ahu!" 2:18 Dung i ninna angka halak Jahudi ma mangalusi Ibana: Aha ma tanda patuduhononmu tu hami, umbahen songon i dibahen Ho? 2:19 Gabe ninna Jesus ma mangalusi nasida: Lohai hamu ma joro on; dung i pajongjongonku ma i di bagasan tolu ari! 2:20 Jadi didok angka Jahudi i ma: Opatpulu onom taon do lelengna dipauli bagas joro on; ia Ho, pajongjongonmu ma i di bagasan tolu ari? 2:21 Alai dagingna i do joro na nidokna disi. 2:22 Asa dung hehe Ibana sian na mate, diingot angka siseanna ma hata ondeng, gabe porsea ma nasida di hata ni surat i nang di hata na nidok ni Jesus. 2:23 Alai uju di huta Jerusalem Ibana, di pesta Paska i, lan ma porsea di Goarna, dung diida nasida tanda angka na binahenna i. 2:24 Alai ndang dihaporseai Jesus i nasida, ala saluhut nasida ditanda. 2:25 Ai ndang pola manjalo panindangion Ibana taringot tu jolma i, ai diboto Ibana hian do na di bagasan roha ni halak.
3:1 Asa adong ma sahalak sian angka Parise, sintua ni Jahudi na margoar Nikodemus. 3:2 Na ro bornginborngin manopot Ibana, jadi didok ma mandok Ibana: Gurunami, huboto hami do Ho guru na ro sian Debata, ai ndang tarpatupa agia ise tanda songon na binahenmi, ia so Debata donganna. 3:3 Dung i ninna Jesus ma mangalusi ibana: Na tutu situtu do na hudok on tu ho: Ia so tubu jolma sian ginjang, ndang tarbahensa marnida harajaon ni Debata! 3:4 Dung i ninna si Nikodemus ma mandok Ibana: Songon dia ma tarbahen tubu muse halak, ia naung matua? Tung haulahansa ma mamasuhi siubeon ni inana, asa tubu? 3:5 Jadi dialusi Jesus ma: Na tutu situtu do na hudok on di ho: Anggo so tubu jolma sian aek dohot sian Tondi, ndang habongotansa harajaon ni Debata! 3:6 Daging do na tubu sian daging, tondi do na tubu sian Tondi. 3:7 Unang ma longang roham, ala hudok tu ho: Ingkon tubu hamu sian ginjang! 3:8 Na mangullus do alogo dompak lomo ni rohana; dibege ho do parngongosna, alai ndang diboto ho haborhatanna manang hasahatanna. Laos songon i do ganup naung tubu sian Tondi. 3:9 Dung i ninna si Nikodemus ma mangalusi Ibana: Songon dia ma tarpajadi i? 3:10 Jadi ninna Jesus ma mangalusi ibana: Ho, guru ni bangso Israel, ndang diboto ho i? 3:11 Na tutu situtu do na hudok on di ho: Huhatahon hami do na huboto hami jala huhatindangkon hami do naung huida hami, gabe ndang dijangkon hamu na huhatindangkon hami. 3:12 Gari angka na di tano on huhatahon tu hamu, ndang porsea hamu; tung porsea ma hamu, molo huhatahon tu hamu angka na di banua ginjang i? 3:13 Ndang adong na manaek tu banua ginjang, ia so naung tuat i sian banua ginjang; i ma Anak ni jolma i, na di banua ginjang i hian. 3:14 Jadi songon naung pinatimbo ni si Musa ulok i di halongonan, songon i naeng patimboon Anak ni jolma i, 3:15 asa dapotan hangoluan na salelenglelengna ganup na porsea di Ibana. 3:16 Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana. 3:17 Ai ndang na disuru Debata Anakna i tu portibi on, asa uhumanna; naeng paluaonna portibi on tahe, umbahen na disuru. 3:18 Ndang siuhuman na porsea di Ibana; alai anggo na so porsea i, nunga hona uhum, ala so porsea ibana di Goar ni Anak sasada ni Debata. 3:19 Alai on ma uhum i: Nunga ro na tiur i tu portibi on, jadi holongan do roha ni angka jolma di na holom i asa di na tiur i, ai na jahat do parulaonnasida. 3:20 Ai ganup na mangulahon na roa, hosom do rohana di na tiur i, jala ndang didapothon na tiur i, asa unang gabe patar angka ulaonna i. 3:21 Alai na mangula hasintongan i, didapothon do na tiur i, asa patar parulaonna i; ai di bagasan Debata do diula. 3:22 Dung i ro ma Jesus dohot angka siseanna i tu luat Judea, jadi mian disi ma jolo Ibana rap dohot nasida jala mandidihon. 3:23 Alai dohot do si Johannes mandidihon di Enon, mardonokkon huta Salem, ai na nia aek disi. Jadi tusi ma ro halak gabe tardidi. 3:24 Ai ndang dope dihurungkon si Johannes uju i. 3:25 Marsual ma disi angka sisean ni si Johannes dohot sahalak Jahudi siala parburion i. 3:26 Jadi didapothon nasida ma si Johannes, didok ma tu ibana: Gurunami, Halak i na ro tu jolom, di ipar ni aek Jordan, na hinatindangkonmi, I do mandidihon nuaeng, gabe saluhut halak ro mandapothon Ibana. 3:27 Dung i ninna si Johannes ma mangalusi: 'Ndang tarbuat jolma manang aha, anggo so dilehon tu ibana sian banua ginjang. 3:28 Hamu sandiri do sitindangingku di na hudok: Ndada ahu Kristus i; na sinuru do ahu patujolona. 3:29 Nampuna oroan, i do pangoli i. Alai na jongjong do aleale ni pangoli i patangitangi ibana; jadi marlas ni roha situtu dibahen soara ni pangoli i. Asa halahas ni roha sisongon i ma jumpang di ahu. 3:30 Ianggo Ibana, patut lam ganda; lam moru ma anggo ahu! 3:31 Na ro sian ginjang, I do mangatasi saluhutna. Na ro sian tano on, i ma sian tano on, jala angka na sian tano on do dihatahon. 3:32 Dihatindangkon na ro sian banua ginjang i do na niidana dohot na binegena, gabe ndang adong na manjangkon na hinatindangkonna i. 3:33 Halak na manjangkon na hinatindangkonna i, i do sumahaphon, paboa parsintong Debata. 3:34 Ai na sinuru ni Debata. I do mangkatahon angka hata ni Debata; ai ndang marpanuhatan Ibana mangalehon Tondi i. 3:35 Na holong do roha ni Ama i di Anak i; naung dilehon do saluhutna tu tanganna. 3:36 Naung dapotan hangoluan na salelenglelengna do na mangkaporseai Anak i; alai na so mangoloi Anak i, ndang idaon ni i hangoluan; sai na mian do tahe rimas ni Debata di ibana.
4:1 Dung i diboto Tuhan i ma, naung dibege angka Parise, tumorop do dibahen Jesus siseanna dohot mandidihon sian si Johannes; 4:2 atik pe so Jesus sandiri mandidihon, angka siseanna do. 4:3 Jadi ditadingkon ma luat Judea laho mangulahi tu luat Galilea. 4:4 Alai ingkon bolusonna do luat Samaria. 4:5 Gabe ro ma ibana tu sada huta na di Samaria, na margoar Sikar, mardonokkon ladang na nilehon ni si Jakkob tu si Josep, anakna i. 4:6 Alai adong ma disi sumur ni si Jakkob; jadi dibahen naung loja Jesus sian pardalanan, hundul ma Ibana di lambung ni sumur i; tar di hos ni ari ma i. 4:7 Dung i ro ma sada boru Samaria, manahui aek. Jadi didok Jesus ma mandok ibana: Lehon Ahu minum! 4:8 Ai nunga laho angka siseanna i tu huta, manuhor bohal. 4:9 Jadi didok boru Samaria i ma mandok Ibana. Boasa mangido tapian Ho halak Jahudi, sian ahu boru Samaria? Ai ndang marparsaoran halak Jahudi dohot halak Samaria. 4:10 Dung i ninna Jesus ma mangalusi ibana: Aut diboto ho basabasa ni Debata, jala aut ditanda ho na mangido aek inumon sian ho, ra olo ho mangido tu Ibana; dung i lehononna ma tu ho aek na mangolu. 4:11 Jadi didok boruboru i ma tu Ibana: Tuan, tahutahu gari soada di Ho, tole bagas do sumur on; tung sian dia ma tu Ho aek na mangolu? 4:12 Tung umbalga ma Ho asa ompunta si Jakkob, na mangalehon sumur on di hami? Ibana do manginum sian i dohot ianakhonna ro di pinahanna! 4:13 Dung i ninna Jesus ma mangalusi ibana: Sai mangulahi mauas do nasa na minum sian aek on. 4:14 Alai na manginum aek silehononki, na so tupa mauas be i ro di salelenglelengna. Ai anggo aek silehononki, gabe mual do i di bagasan ibana, na mabaor sahat ro di hangoluan sisalelenglelengna. 4:15 Dung i ninna boruboru i ma mandok Ibana: Tapian sisongon i ma lehon di ahu, Tuan, asa unang be mauas ahu jala unang be sai ro tuson manahui. 4:16 Dung i, ninna Jesus ma mandok ibana: Laho ma ho jolo, jou ma dongan saripem, dung i mulak tuson! 4:17 Gabe ninna boruboru i ma mangalusi; Ndang mardongan saripe ahu! Dung i ninna Jesus ma tu ibana: Toho do pandokmi, na so adong sinondukmu. 4:18 Ai nunga lima hali ho mardongan saripe; ia baoa na di ho i nuaeng, ndang donganmu saripe i dohonon; asa na tutu do na nidokmi! 4:19 Dung i ninna boruboru i ma mandok Ibana: Ale tuan, panurirang do Ho huida! 4:20 Di dolok an do martangiang ia ompunami, gabe didok hamu, ingkon Jerusalem do partangiangan. 4:21 Dung i ninna Jesus ma mandok ibana: Porsea ma ho di Ahu, inang! Na ro ma tingkina, gabe ndang pola be dolok an manang Jerusalem partangiangan tu Ama i. 4:22 Disomba hamu do na so binotomuna; huboto hami do na husomba hami, ai bangso Jahudi do haroroan ni haluaon. 4:23 Alai na ro ma tingkina jala nunga ro i nuaeng, gabe di bagasan Tondi dohot hasintongan martangiang angka partangiang na tutu tu Ama i; ai angka partangiang na songon i dipangido Ama i. 4:24 Tondi do anggo Debata; asa angka na martangiang tu Ibana, patut martangiang di bagasan Tondi dohot hasintongan. 4:25 Dung i didok boruboru i ma mandok Ibana: Huboto do, na naeng ro Messias na margoar Kristus; ia dung ro Ibana, baritahononna do saluhutna i tu hami. 4:26 Dung i ninna Jesus ma mandok ibana: Ahu do i, na mangkatai dohot ho! 4:27 Dung songon i, ro ma angka siseanna jala longang ma rohanasida, ala mangkatai Ibana dohot boruboru i; alai ndang adong na olo mandok: Aha dipausoi Ho? manang: Aha hinatam dohot ibana? 4:28 Asa ditadingkon boruboru i ma panguhatanna, laho tu huta, gabe didok ma tu angka jolma i: 4:29 Beta hamu! Ida hamu ma sada halak na paboahon tu ahu sude parulaonki! Atik tung Kristus i Ibana? 4:30 Gabe ruar ma nasida sian huta i, laho manopot Ibana. 4:31 Andorang i, disosoi angka siseanna ma Ibana, ninna ma: Mangan ma Guru i! 4:32 Alai ninna ma mandok angka siseanna: Adong do di Ahu sipanganon na so binotomuna. 4:33 Gabe ninna siseanna ma sama nasida: Ai adong do ulaning na mamboan sipanganon tu Ibana? 4:34 Dung i ninna Jesus ma mandok nasida: Sipanganon do i di Ahu, na mangulahon lomo ni roha ni na marsuru Ahu dohot paujungkon ulaonna. 4:35 Nda didok hamu: Opat bulan nari, ro ma gotilon? Alai hudok ma di hamu: Pabidok hamu ma matamuna, bereng hamu ma hauma i; ai nunga marlangat, na tau gotilon ma! 4:36 Nunga manjalo upa panggotil i, papunguhon parbue tu hangoluan na salelenglelengna, asa rap marlas ni roha panabur dohot panggotil. 4:37 Ai dison ma tutu hata na mandok: Na sada on manabur; na sada an manggotil. 4:38 Ahu do marsuru hamu manggotil na so hinalojahonmuna; angka na asing do mangkalojahonsa, gabe disoluk hamu na niulanasida. 4:39 Jadi torop do halak Samaria sian na sahuta i gabe porsea di Ibana, ala dihatindangkon boruboru i: Tung saluhut parulaonki dipaboa Ibana do tu ahu! 4:40 Asa dung sahat angka halak Samaria ro tu Jesus, dielehelek ma Ibana, asa mian di nasida; jadi laos disi ma Ibana dua ari. 4:41 Dung i toropan do nasida na gabe porsea ala ni hata ni Jesus. 4:42 Gabe didok nasida ma tu boruboru i: Ndang be ala ni pandokmi, umbahen na porsea hami; ai nunga hubege jala hutanda hami sandiri, Ibana do tutu Sipalua portibi on. 4:43 Jadi dung salpu na dua ari i, borhat ma Ibana sian i laho tu Galilea. 4:44 Ai Jesus sandiri do mangkatindangkon, na so marsangap panurirang di tano hagodanganna. 4:45 Jadi di na ro Ibana tu Galilea, gabe dijangkon halak Galilea ma Ibana, dibahen naung diida nasida saluhutna na binahenna i di Jerusalem, di ari raya i; ai dohot do nasida marariraya disi. 4:46 Asa ro muse ma Jesus tu huta Kana na di luat Galilea, pambahenanna aek gabe anggur uju i. Alai adong ma parpangkat sahalak di huta Kapernaum, hansitan di anakna. 4:47 Jadi dung dibege i, naung ro Jesus sian luat Judea tu luat Galilea, didapothon ma Ibana; dielehelek ma, asa tuat Ibana pamalum anakna i, ai matemate ne do ibana. 4:48 Jadi didok Jesus ma tu ibana: Molo so diida hamu tanda dohot halongangan, ndang na porsea hamu. 4:49 Dung i didok parpangkat i ma: Sai tuat ma Ho jolo, Tuhan, andorang so mate dope anakki! 4:50 Jadi didok Jesus ma tu ibana: Laho ma ho; na mangolu do anakmi! Gabe dihaporseai halak i ma hata na nidok ni Jesus tu ibana, laos laho ma. 4:51 Alai laho tuat dope, nunga ditomutomu angka naposona ibana paboahon, na mangolu anakna i. 4:52 Dung i dipamanat ma tu nasida tingkina, manang na sadihari lumambok dihilala; jadi didok nasida ma: Nantoari, tar di pungkul sada do sumurut panepane i sian ibana. 4:53 Jadi diboto amana i ma: Apala i ma tingkina, uju didok Jesus: Na mangolu do anakmi! gabe porsea ma ibana dohot sude pangisi ni bagasna. 4:54 Asa i ma tanda paduahon, na pinatupa ni Jesus muse, di na ro Ibana sian luat Judea laho tu luat Galilea
5:1 Salpu ni i adong ma pesta ni halak Jahudi, jadi nangkok ma Jesus tu Jerusalem. 5:2 Jadi adong ma di Jerusalem di lambung ni harbangan birubiru paridian sada na margoar Betesda anggo di hata Heber; lima do soposopo disi. 5:3 Marpeahan do disi torop halak na hansitan, na mapitung, na sarion, na tiarapon, angka na paimaimahon hagugunsang ni aek i. 5:4 Ai surusuruan ni Debata do tuat marombasombas tubagasan paridian i manggunsang aek i. Asa na parjolo bongot di hagugunsang ni aek i, gabe malum do, manang dia pe sahit na lohot tu ibana. 5:5 Alai adong ma disi sahalak naung tolupulu ualu taon lelengna marsahit. 5:6 Diida Jesus ibana peak disi, jala diboto ma, naung pola leleng ibana disi, gabe ninna ma mandok ibana: Naeng malum ho? 5:7 Jadi didok na marsahit i ma mangalusi Ibana: Iale tuan! Ndang adong parhuaonku, na manogu ahu tu paridian i di hagugunsang ni aek i; ai mandok ro dope ahu, nunga dijoloani na asing ahu mijur. 5:8 Dung i ninna Jesus ma mandok ibana: Hehe ma ho; hindat ma lagem, mardalan ma ho! 5:9 Jadi pintor hisar ma jolma i, dihindat ma lagena, laos mardalan ma. Alai ari Sabbat do toho na sadari i. 5:10 Dung i ninna angka Jahudi i ma mandok na pinamalum i: Ari Sabbat do nuaeng; ndang jadi boanonmu lagem! 5:11 Jadi didok ma mangalusi nasida: Halak i na pamalum ahu, i do mandok tu ahu; Hindat ma lagem, mardalan ma ho! 5:12 Dung i disungkun nasida ma ibana: Ai ise na mandokkon ho mangkindatsa jala mardalan? 5:13 Alai ndang ditanda na hansitan i Ibana; ai nunga sumurut Jesus, ala torop halak disi. 5:14 Ndang piga dan jumpang Jesus ma ibana di bagas joro, jadi didok ma tu ibana: Atehe, nunga hisar be ho? Unang datdati mangula dosa, asa unang songgop tu ho na umposi! 5:15 Gabe laho ma halak ondeng paboahon tu angka Jahudi, Jesus do na pahisar ibana. 5:16 Jadi diburui angka Jahudi ma Jesus, ala dibahen songon i di ari Sabbat. 5:17 Alai dialusi Jesus ma nasida, ninna ma: Na mangula do Damang rasirasa nuaeng; Ahu pe mangula do. 5:18 Ala ni i lam disangkapi angka Jahudi mamusa Ibana, ai disegai do ari Sabbat i, tole digoar do Debata Amana jala dipasobok do dirina dohot Debata. 5:19 Gabe dialusi Jesus ma nasida, didok ma: Na tutu situtu do na hudok on tu hamu: Ndang tarpatupa Anak i manang aha sian roharohana, anggo so diida Ibana Ama i mangulahonsa; ai ia i dibahen Ama i, laos i do diula Anak i. 5:20 Ai holong do roha ni Ama i di Anak i, dipatuduhon do tu Ibana nasa ulaon ni Ama i; laos patuduhononna ma tu Ibana ulaon na umbalga sian on, asa longang rohamu. 5:21 Ai songon panungguli ni Ama i di angka na mate, laho pangoluhon nasida, songon i do Anak i: dipangolu do angka na naeng pangoluonna. 5:22 Ai ndang adong diuhumi Ama i manang ise; nunga dipasahat sandok paruhumon i tu Anak i, 5:23 asa diparsangapi saluhut halak Anak i, songon parsangapinasida di Ama i. Ia i na so pasangaphon Anak i, i ma na so pasangaphon Ama i, na marsuru Ibana. 5:24 Na tutu situtu do na hudok on tu hamu: Manang ise na tumangihon hatangki jala porsea di na marsuru Ahu, nunga sahat tu ibana hangoluan na salelenglelengna; ndang pola be ibana tu paruhuman, nunga taripar ibana sian hamatean tu hangoluan. 5:25 Na tutu situtu do na hudok on tu hamu: Na ro ma tingkina jala nunga masa nuaeng, begeon ni angka na mate i ma disi soara ni Anak ni Debata; gabe mangolu ma angka na umbegesa. 5:26 Ai songon Ama i Parngolu hian di bagasan dirina, laos songon i do dilehon tu Anak i, asa Parngolu Ibana di bagasan dirina. 5:27 Jala dilehon do tu Ibana huaso manguhumi, ala Anak ni jolma i Ibana. 5:28 Unang longang rohamu ala ni i, ai di na ro tingkina, begeon ni saluhut halak na di angka tanoman i ma soarana. 5:29 Dung i ruar be ma: Angka sibahen na denggan hehe tu hangoluan; alai angka siula na jahat hehe tu uhum. 5:30 Ndang tarula Ahu agia aha, anggo tung sian diringku; hombar tu na hubege do panguhumhu, jadi tigor do uhumhi, ala so hulului na pinangido ni rohangku, na pinangido ni roha ni na marsuru Ahu, i do. 5:31 Anggo Ahu mangkatindangkon diringku, ndang na sintong panindangionki. 5:32 Adong do na asing na mangkatindangkon Ahu jala huboto, na sintong do panindangionna na taringot tu Ahu. 5:33 Naung disuru hamu do na manopot si Johannes, gabe na sintong i dihatindangkon ibana. 5:34 Alai anggo Ahu, ndang hujalo panindangion sian jolma; ia hutaringoti pe i, ala ni hamu do, anggiat malua hamu. 5:35 Palito na galak jala na marsinondang do ibana; alai na naeng marlas ni roha do hamu sangombas di bagasan sondangna i. 5:36 Alai na sumurung do panindangion na di Ahu asa na sian si Johannes; ai angka ulaon na nilehon ni Ama i tu Ahu, sipaujungonku, i ma angka ulaon na huula, i do mangkatindangkon Ahu, paboa na disuru Ama i Ahu. 5:37 Nang Ama i na marsuru Ahu, dihatindangkon do Ahu. Ndang dung dibege hamu soarana, rupana pe ndang dung diida hamu. 5:38 Hatana pe ndang ditiop hamu mian di bagasan rohamuna, ai ndang porsea hamu di na sinuruna. 5:39 Didiori hamu do angka surat i, ai diparbaga rohamu, dapot hamu do disi hangoluan na salelenglelengna; jala Surat i do tutu mangkatindangkon Ahu. 5:40 Alai ndang olo hamu ro manopot Ahu, asa dapotan hangoluan hamu nian. 5:41 Ndang adong hujalo hasangapon sian jolma. 5:42 Alai nunga hutanda hamu, na so ditiop hamu di bagasan hamu holong ni roha ni Debata. 5:43 Ro do Ahu marhitehite Goar ni Damang, gabe ndang dijangkon hamu Ahu. Alai molo ro na asing marhitehite goarna sandiri, jangkononmuna do anggo i. 5:44 Songon dia ma antong tarbahen hamu gabe porsea, ai na masijaloan sangap do hamu sama hamu; alai anggo sangap na sian Debata na sasada i, ndang dilului hamu. 5:45 Unang dirimpu rohamuna, Ahu mangaluhon hamu tu Ama i. Adong do na mangaluhon hamu; i ma si Musa, haposan ni rohamuna i. 5:46 Ai aut na porsea hamu di si Musa, porsea ma hamu nang di Ahu; ai taringot tu Ahu do disurathon. 5:47 Alai molo so porsea hamu di suratna i, tung porsea ma hamu di hatangki?
6:1 Asa dung salpu i, ditaripari Jesus ma tao Galilea, Tiberias. 6:2 Alai torop ma halak mangihuthon Ibana, ala diida nasida tanda angka na binahenna tu na hansitan. 6:3 Dung i nangkok ma Jesus tu dolok, laho hundul tusi rap dohot angka siseanna. 6:4 Alai jonok nama Paska, ari raya ni Jahudi. 6:5 Dung i manatap ma Jesus, diida ma torop halak ro mandapothon Ibana, jadi didok ma mandok si Pilippus: Sian dia ma tuhoronta roti, asa mangan angka on? 6:6 Alai didok pe songon i, na laho mangunjuni ibana do; ai diboto hian do sibahenonna. 6:7 Jadi dialusi si Pilippus ma Ibana: Ndang sae roti arga duaratus hupang, asa dijalo ganup nasida sasaotik. 6:8 Dung i didok sahalak sian angka siseanna, i ma si Andreas, anggi ni si Simon Petrus, ma mandok Ibana: 6:9 Adong do dison sada dakdanak na umpeop lima roti dohot dua dengke; alai sadia ma i tu na sai torop? 6:10 Alai didok Jesus ma: Dokkon hamu ma hundul angka jolma i; alai bidang do jampalan disi. Dung i hundul ma disi torop ni baoa, arga limaribu. 6:11 Asa dibuat Jesus ma angka roti i, didok ma mauliate, diparlehon ma i tu angka na hundul i; sian dengke i pe songon i, saguru lomo ni rohanasida. 6:12 Alai dung bosur nasida, ninna ma mandok angka siseanna: Papungu hamu ma angka ebaeba i, asa unang magopo! 6:13 Gabe dipapungu nasida, jadi gok ma sampuludua ampang ebaeba sian na lima roti i, na so suda angka na mangan i. 6:14 Asa dung diida halak i tanda naung binahen ni Jesus i, ninna nasida ma: On ma tutu panurirang i, na naeng ro tu portibi on. 6:15 Mamoto ma Jesus, naeng ro nasida manoro Ibana, laho pabangkithon gabe raja, jadi maporus ma Sasadasa tu dolok. 6:16 Alai dung bot ari, tuat ma angka siseanna i tu topitao. 6:17 Dibongoti nasida ma parau i, ditaripari ma tao i dompak Kapernaum. Nunga pola mangkolom; laos so ro dope Jesus mandapothon nasida. 6:18 Alai gaor do tao i dibahen pangullus ni habahaba na gogo. 6:19 Asa dung marluga nasida arga dua manang tolu paal daona, diida nasida ma Jesus na mardalan diatas tao i manjonohi parau i, gabe mabiar ma nasida. 6:20 Alai didok ma mandok nasida: Ahu do on; unang hamu mabiar! 6:21 Jadi naeng ma pabongotonnasida Ibana tubagasan parau i; dung i pintor sahat ma parau i tu luat sitondongonnasida. 6:22 Torang ni arina i, diboto natorop na tinggal di ipar ni tao i, na so adong disi parauna asing dungkon ni na sasada i, jala na so dohot Jesus bongot tu parau i, holan angka siseanna do na borhat. 6:23 Alai na ro do angka parau sian Tiberias jonok tu inganan parmanganan roti na tinangiangkon ni Tuhan i. 6:24 Asa dung diida natorop i, na so disi Jesus, nang angka siseanna pe, dibongoti ma muse angka parau jadi ro tu huta Kapernaum mangalului Jesus. 6:25 Jadi dung jumpang nasida Ibana di bariba ni tao i, ninna nasida ma mandok Ibana: Guru, sadihari do ho ro tuson? 6:26 Dung i ninna Jesus ma mangalusi nasida: Na tutu situtu do na hudok on tu hamu: Dilului hamu pe Ahu, ndada ala naung dapot rohamuna tanda i, tung ala ni na bosur i do hamu, na mangan roti i. 6:27 Unang ma sipanganon na olo salpu ula hamu; alai sipanganon na mian ro di hangoluan na salelenglelengna, na naeng lehonon ni Anak ni jolma i tu hamu. Ai Ibana do dihatindangkon Ama i, Debata. 6:28 Dung i ninna nasida ma mandok Ibana: Dia ma bahenonnami, asa huula hami angka ulaon lomo ni roha ni Debata? 6:29 Dung i ninna Jesus ama mangalusi nasida: Haporseai hamu ma Nasinuru ni Debata; i ma ulaon lomo ni rohana. 6:30 Dung i ninna nasida ma: Asa dia ma tanda bahenonmu siidaonnami, asa tung porsea hami di Ho? Aha diula Ho? 6:31 Ia ompunami, mangan Manna do di parhorsihan, songon na tarsurat: "Dilehon do roti sian banua ginjang panganonnasida." 6:32 Dung i ninna Jesus ma mandok nasida: Na tutu do hatangkon tu hamu: Apala si Musa mangalehon tu hamu roti na sian banua ginjang; Damang i do mangalehon di hamu roti na tutu, na sian banua ginjang. 6:33 Ai na tuat sian banua ginjang do silehon hangoluan tu portibi on; i do roti na sian Debata. 6:34 Gabe didok nasida ma: Sai tong ma lehon tu hami, ale Tuhan, roti sisongon i! 6:35 Dung i ninna Jesus ma mandok nasida: Ahu do roti hangoluan i: sandok na so male be manang ise, naung ro tu Ahu; jala na so tupa be mauas manang ise, na porsea di Ahu. 6:36 Alai nunga hupaboa tu hamu: Diida matamuna do Ahu nian; alai ndang porsea hamu. 6:37 Saluhutna na nilehon ni Ama i tu Ahu, i do na ro tu Ahu; jala na so tupa pabalionku na ro tu Ahu. 6:38 Ai ndada tuat Ahu sian banua ginjang mambahen roharohangku; na pinangido ni roha ni na marsuru Ahu, i do. 6:39 Alai on do dipangido roha ni na marsuru Ahu: Unang ma mago hubahen agia sada sian saluhutna na nilehonna tu Ahu, asa hupangolu i tahe di ari parpudi. 6:40 Ai on do dipangido roha ni Damang: Naeng ma dapotan hangoluan salelenglelengna ganup na marnida Anak i jala porsea di Ibana; jala paheheonku do ibana di ari parpudi. 6:41 Gabe marmungutmungut ma angka Jahudi dompak Ibana siala pandokna i: "Ahu do roti na tuat sian banua ginjang." 6:42 Jadi didok nasida ma: Nda Ibana do Jesus, anak ni si Josep i; nda tatanda amana dohot inana? Beha ma dohononna antong: Na tuat sian banua ginjang do ahu? 6:43 Jadi dialusi Jesus ma nasida: Unang hamu marmungutmungut! 6:44 Ndang adong na tarbahen ro tu Ahu, ia so na tinogu ni Ama i na marsuru Ahu; jala Ahu pahehehon ibana di ari parpudi. 6:45 Na tarsurat do di angka panurirang: "Na pinodaan ni Debata ma nasida saluhutna." Ganup na manangihon Ama i jala na marguru tu Ibana, i do na ro tu Ahu. 6:46 Ndang dung adong nian na marnida Ama i; holan Ibana na ro sian Debata, I do na marnida Ama i. 6:47 Na tutu situtu do na hudok on tu hamu: Na porsea, i do naung gabe nampuna hangoluan na salelenglelengna. 6:48 Ahu do roti hangoluan i! 6:49 Na mangan Manna i do angka ompumuna di parhorsihan, jadi mate do! 6:50 On do roti na tuat sian banua ginjang, asa unang mate na manganhonsa. 6:51 Ahu do roti na mangolu, na tuat sian banua ginjang i. Manang ise na manganhon roti on, i do mangolu salelenglelengna. Ia roti silehononki, bahen hangoluan ni portibi on, i ma dagingku. 6:52 Dung i marsual ma angka Jahudi sama nasida, ninna ma: Beha ma bahenon ni Halak on mangalehon dagingna i panganonta? 6:53 Jadi didok Jesus ma tu nasida: Na tutu situtu do hatangkon na tu hamu: Tung na so dapot hamu hangoluan i, molo so dipangan hamu daging ni Anak ni jolma i, jala so diinum hamu mudarna! 6:54 Dapotan hangoluan salelenglelengna do ganup na manganhon dagingku jala manginum mudarhu; jala paheheonku do ibana di ari parpudi. 6:55 Ai sipanganon na tutu do dagingku, jala siinumon na tutu do mudarhu. 6:56 Manang ise na manganhon dagingku jala manginum mudarhu, i do na mian di bagasan Ahu jala Ahu di bagasan ibana. 6:57 Songon parsuru ni Ama Siparngolu i di Ahu, gabe mangolu Ahu marhitehite Ama i, songon i ma mangolu marhitehite Ahu na manganhon Ahu. 6:58 On do roti na tuat sian banua ginjang; alai nda tung songon na di angka ompu i, ai mangan do nasida, tong do mate. Mangolu salelenglelengna do na manganhon roti on. 6:59 I ma hata ni Jesus, laho mangajari di bagasan parguruan na di huta Kapernaum. 6:60 Asa torop ma sian angka siseanna na umbegesa mandok: Hata na kasar do i; ise pabegebege i? 6:61 Alai diboto Jesus ma di bagasan rohana, naung marmungutmungut angka siseanna siala hata i, jadi didok ma tu nasida: Tung ala ni i do hamu targasip? 6:62 Beha nama, anggo idaonmuna Anak ni jolma i manaek tu ingananna hian? 6:63 Tondi i do na pangoluhon; ndang marguna anggo daging i. Angka hata naung huhatahon tu hamu, Tondi do i dohot hangoluan. 6:64 Alai adong do deba sian hamuna na so porsea; ai diboto Jesus do sian mulana nasida na so olo porsea, ro di na naeng manjehehon Ibana. 6:65 Jadi ninna ma: Dibahen i ma umbahen na hudok tu hamu, na so tarbahen manang ise manopot Ahu, ia so Damang i mangalehonsa tu ibana. 6:66 Lan ma angka siseanna i manundalhon Ibana olat ni i; ndang be didongani nasida Ibana. 6:67 Dung i didok Jesus ma mandok na sampuludua i: Nda tung dohot hamu naeng laho? 6:68 Gabe dialusi si Simon Petrus ma Ibana: Tung tu ise ma hami laho, ale Tuhan? Di Ho do hata hangoluan sisalelenglelengna! 6:69 Jala nunga huhaporseai jala hutanda hami: Ho do na badia ni Debata! 6:70 Dung i dialusi Jesus ma nasida, ninna ma: Nda sampuludua do hamu naung hupillit i? Hape sada sian hamu gabe sibolis! 6:71 Si Judas, anak ni si Simon, halak Iskariot i, do na nidokna disi, ai i do na manjehehon Ibana muse; sada sian na sampuludua i do ibana.
7:1 Dung salpu i, diadangi Jesus ma luat Galilea, ai ndang olo Ibana mardalani di Judea, ala naeng bunuon ni halak Jahudi Ibana. 7:2 Alai jonok do pesta parlapelapean ni Jahudi. 7:3 Jadi didok angka anggina i ma mandok Ibana: Borhat ma Ho sian on laho tu Judea, asa dohot siseanmi marnida angka ulaon na pinatupami! 7:4 Ai ndada di na holip diula halak sibahenonna, anggo naeng tu hapataran ibana. Anggo sapala diula Ho angka na songon i, papatar antong dirim tu portibi on! 7:5 Ai nang angka anggina, ndang porsea di Ibana. 7:6 Dung i ninna Jesus ma mandok nasida: Ianggo tingkingki ndang dope jumpang; alai anggo tingkimuna tongtong do dapot anggo i. 7:7 Didia ma hosoman ni portibi on hamu; anggo Ahu dihosomi do, ala Ahu mangkatindangkon, paboa na jahat angka pambahenanna. 7:8 Hamu ma nangkok marpesta; ianggo Ahu, ndang nangkok tu pesta on, ai ndang dope jumpang tingkingki. 7:9 Dung songon i hatana, tading ma Ibana di Galilea. 7:10 Alai dung nangkok angka anggina i marpesta, nangkok muse ma nang Ibana; ndang apala patar, tar songon na buni do. 7:11 Asa dilului angka Jahudi ma Ibana di pesta i, angka ninna do: Ai didia do Ibana? 7:12 Jadi sai dihatahatai natorop ma Ibana; adong do na mandok: Parroha na denggan do Ibana; alai na asing muse mandok: Nda tung, na mangaliluhon natorop do Ibana. 7:13 Alai ndang adong na hum papatarhon hatana taringot tu Ibana, dibahen biarnasida mida Jahudi i. 7:14 Nunga pola salpu satonga ni angka ari ni pesta i, asa laho Jesus tu bagas joro mangajari. 7:15 Gabe longang ma angka Jahudi, didok ma: Sian dia ma diboto On hata ni Debata, so manang diguruhon? 7:16 Jadi didok Jesus ma tu nasida: Anggo podangku, ndada sian Ahu sandiri, sian na marsuru Ahu do. 7:17 Ganup na olo mangulahon pinangido ni roha ni I, botoonna ma, manang na sian Debata podangki, manang na huhatahon i sian diringku sambing. 7:18 Ganup na mangkatahon sian dirina, sangapna do niluluanna; alai na mangalului sangap ni na marsuru ibana, i do parsintong, ndang adong na geduk di bagasan ibana. 7:19 Nda dilehon si Musa patik i tu hamu? Hape ndang adong nanggo sada sian hamu na mangaradoti patik i. Boasa ditahi rohamuna mamusa Ahu? 7:20 Dung i ninna natorop i ma: Na sibolison do Ho! Tung ise ma tumahi mamusa Ho? 7:21 Dung i ninna Jesus ma mangalusi nasida: Hupatupa sada ulaon, gabe longang hamu saluhutna. 7:22 Onpe, dilehon si Musa tu hamu ruhut parsunaton (ndang nian sian si Musa parmulaanna, na sian angka ompu i do), gabe, disunat hamu halak nang di ari Sabbat. 7:23 Asa tarsunat do hape jolma jumpa ari Sabbat, unang dilaosi patik ni si Musa; tung Ahu ma muruhanmuna, ala hibul jolma i hupamalum jumpa ari Sabbat? 7:24 Unang ma marguru tu na niida sambing uhummuna, tigor ma panguhummuna! 7:25 Dung i ninna deba sian isi ni Jerusalem ma: Nda Ibana i, na naeng bunuonnasida? 7:26 Ndi, tullom ni hatana i! So manang aha didok nasida tu Ibana. Atik naung torang ulaning diboto angka sintuanta, Ibana tutu Kristus? 7:27 Alai tahe, taboto do haroroan ni Halak on. Alai molo ro Kristus i, ndang dapot botoon, manang sian dia haroroanna. 7:28 Dung i dipagogo Jesus ma soarana mangajari di bagas joro i, ninna ma: Olo tutu, ditanda hamu do Ahu jala diboto hamu do haroroanki. Ndang na ro Ahu sian diringku, alai adong do Parsintong i, na marsuru Ahu, na so tinandamuna. 7:29 Alai anggo Ahu hutanda do Ibana, ai sian Ibana do Ahu; Ibana do marsuru Ahu. 7:30 Dung i dilului nasida ma dalan manangkup Ibana; alai ndang adong na mangalaluhon tanganna tu Ibana, ai ndang dope jumpang tingkina. 7:31 Alai lan do sian natorop gabe porsea di Ibana, angka ninna do: Molo ro Kristus, tagamon gumodang tanda patupaonna sian na binahen ni On? 7:32 Dibege Parise i ma angka hata ni natorop i na taringot tu Ibana, jadi disuru angka sintua ni malim dohot Parise i ma angka opas manangkup Ibana. 7:33 Jadi ninna Jesus ma: Sangombasnari nama Ahu rap dohot hamu; dung i laho ma Ahu manopot na marsuru Ahu. 7:34 Luluanmuna ma Ahu; alai ndang dapot, ai ndang tarbahen hamu ro tu sitopotonki. 7:35 Jadi ninna angka Jahudi ma sama nasida: Tudia ma naeng laho Ibana, umbahen so jumpang hita Ibana? Naeng laho Ibana ulaning tu dongan na mangaranto di Junani dohot mangajari halak Junani i? 7:36 Hata dia do i na nidokna: Luluanmuna ma Ahu, alai ndang dapot; jadi: ndang tartopot hamu tu sitopotonki? 7:37 Dung i di ari pesta na parpudi na sumangap i, jongjong ma Jesus disi, dipagogo ma soarana mandok: Molo adong na mauas, tu Ahu ma ibana ro minum! 7:38 Songon na nidok ni Surat i: Angka batang aek na mangolu do mabaor sian na porsea di Ahu. 7:39 Alai taringot tu Tondi i do didok hata ondeng, i ma sijaloon ni angka na gabe porsea di Ibana; ai ndang dope ro Tondi Parbadia, ala so dipasangap dope Jesus. 7:40 Jadi deba sian natorop na umbege hata i mandok: On do tutu Panurirang i! 7:41 Deba nari mandok: Kristus do Ibana! Alai adong na asing na mandok: Tung luat Galilea ma haroroan ni Kristus? 7:42 Nda didok Surat i: Sian pomparan ni si Daud, jala sian huta Betlehem, na niinganan ni si Daud nahinan, ro Kristus i? 7:43 Jadi marsalisi ma natorop ala Ibana. 7:44 Deba sian nasida naeng manangkup Ibana; alai ndang adong na mangalaluhon tangan tu Ibana. 7:45 Dung i mulak ma angka opas tu angka sintua dohot tu Parise i, gabe didok nasida ma: Boasa so diboan hamu Ibana? 7:46 Jadi mangalusi ma angka opas i: Ndang dung dope adong halak na marjamita songon Ibana. 7:47 Dung i dialusi angka Parise i ma nasida: Tung dohot ma hamu dipaotooto? 7:48 Ai adong do porsea di Ibana sada sian angka sintua manang Parise? 7:49 Holan natorop do, na so umboto patik i; naung hona toru do nasida. 7:50 Dung i ninna si Nikodemus, dongannasida sahalak, i do na ro uju i manopot Jesus, didok ma tu nasida: 7:51 Ai diuhumi patikta i do halak, ia so jolo tinangihon hatana, gabe binoto na niulana? 7:52 Dung i ninna nasida ma mangalusi ibana: Naung dohot do ho huroha halak Galilea? Pamanat ma antong jala ida, na so adong hehe panurirang sian luat Galilea! 7:53 Laos masitopot jabuna be ma nasida.
8:1 Dung i laho ma Jesus tu balian, tu dolok Jetun. 8:2 Alai torang ni arina i, diulahi laho tu bagas joro i, jadi ro ma nasa natorop i manopot Ibana; laos hundul Ibana mangajari nasida. 8:3 Dung i ditogihon angka sibotosurat dohot Parise ma sada boruboru na targombang tu jolona, dipajongjong ma ibana tusi. 8:4 Dung i ninna nasida ma mandok Ibana: Guru, na marlangka pilit do boruboru on, gabe tardapot. 8:5 Didok patik ni si Musa, pantinggangkononhon batu tu angka sisongon i. Ia Ho, dia ma pandokmu? 8:6 Alai didok nasida pe songon i, na laho mangunjuni Ibana do, asa adong dalan mangaluhon Ibana. Alai dipaunduk Jesus ma Ibana manurati dohot jarijarina tu tano i. 8:7 Alai dung sai didatdati nasida manungkun, dipadirgak ma Ibana huhut ma didok tu nasida: Manang ise sian hamu na so mardosa, i ma jumolo maninggangkon batu tu ibana. 8:8 Dung i dipaunduk muse ma Ibana manurati tu tano i. 8:9 Alai umbege i, laho be ma nasida sadasada, pininsang ni panggora ni rohana be, jumolo ma angka sintua i, gabe tinggal ma holan Jesus angkup ni boruboru i, na jongjong disi. 8:10 Dipadirgak Jesus ma dirina, jadi ninna ma mandok ibana: Didia do nasida, inang? Ndang adong na mandok uhumna tu ho? 8:11 Jadi ninna ma: Ndang adong, Tuhan! Dung i didok Jesus ma tu ibana: Ahu pe, ndang uhumonku ho. Laho ma ho; unang be ho mardosa tu joloan on! 8:12 Dung i diulahi Jesus muse manjamitai nasida, ninna ma: Ahu do Panondang ni portibi on. Na so tupa mardalan di na holom na mangihuthon Ahu; di ibana do tahe Panondang hangoluan. 8:13 Dung i didok angka Parise ma tu Ibana: Dirim do dihatindangkon Ho; ndang na sintong panindangionmi! 8:14 Dung i ninna Jesus ma mangalusi nasida: Sintong do panindangionku, nang diringku pe huhatindangkon; ai huboto do haroroanku dohot sitopotonku. Ndang diboto hamu haroroanku manang sitopotonku pe. 8:15 Mangihuthon pardagingon do panguhummuna; anggo Ahu, ndang huuhumi agia ise. 8:16 Jala ia manguhum pe Ahu, sintong do uhumhu. Ai ndada na mamunjung Ahu; na marsuru Ahu, i do donganku disi. 8:17 Nang di patik ni uhummuna tarsurat do: Na sintong do na hinatindangkon ni dua halak. 8:18 Ahu do manindangi taringot tu diringku; angkup ni i, Ama i na marsuru Ahu, I do mangkatindangkon Ahu. 8:19 Dung i didok nasida ma tu Ibana: Didia do Amangmu? Jadi dialusi Jesus, ninna ma: Ndang ditanda hamu manang Ahu, manang Damang pe. Aut na ditanda hamu Ahu, tandaonmuna do nang Damang i. 8:20 I ma dihatahon di bilut inganan ni arta, uju mangajari Ibana di bagas joro i. Ndang adong na manangkup Ibana, ai ndang dapot dope tingkina. 8:21 Dung i didok Jesus ma muse tu nasida: Na laho ma Ahu, gabe jalahanmuna ma Ahu; alai mate ma hamu di bagasan dosamuna. Ndang tardapothon hamu sitopotonki. 8:22 Dung i ninna angka Jahudi i ma: Na naeng maningkot Ibana ulaning, umbahen na didok: Ndang tardapothon hamu sitopotonki? 8:23 Dung i didok Jesus ma tu nasida: Anggo hamu, sian toru on do hamuna, na sian ginjang do anggo Ahu; na sian portibi on do hamuna, ndang sian portibi on anggo Ahu. 8:24 Nunga hudok antong tu hamu: Na mate ma hamu di bagasan dosamuna. Ai molo so porsea hamu, Ahu do Ibana, mate nama hamu di bagasan dosamuna. 8:25 Dung i ninna nasida ma mandok Ibana: Ai ise do Ho? Jadi didok Jesus ma tu nasida: Sandok, naung huhatahon tu hamu, i do Ahu! 8:26 Godang do sihataonku dohot sipinsangonku taringot tu hamu. Alai Parsintong i do marsuru Ahu; jala angka na hubege sian Ibana, i do huhatahon tu portibi on. 8:27 Ndang mananda nasida, Ama i do na nidokna disi. 8:28 Dung i didok Jesus ma tu nasida: Dung pe dipatimbo hamu Anak ni jolma i, asa botoonmuna, Ahu do i, jala na so mambahen agia aha Ahu anggo sian roharohangku sandiri; alai songon pinodahon ni Damang tu Ahu, songon i do huhatahon. 8:29 Jala na marsuru Ahu, i do mandongani Ahu. Ndang dung ditadingkon Ibana sasada Ahu, ai tongtong do hubahen lomo ni rohana. 8:30 Asa di na mangkatahon i Ibana, torop ma gabe porsea di Ibana. 8:31 Dung i didok Jesus ma tu angka Jahudi, naung gabe porsea di Ibana: Molo mian hamu di bagasan hatangku, sintong ma hamu siseanku. 8:32 Dung i tandaonmuna ma na sintong i, jala paluaon ni na sintong i ma hamu. 8:33 Jadi dialusi nasida ma Ibana, ninna ma: Pinompar ni si Abraham do hami; ndang dung hami mangadop di halak. Boasa dohononmu: Paluaon ma hamu? 8:34 Dung i didok Jesus ma mangalusi: Na tutu situtu do na hudok on tu hamu: Hatoban ni dosa do ganup na mangula dosa. 8:35 Ndada tongtong hot di bagas anggo hatoban, Anak i do disi tongtong. 8:36 Molo dipalua Anak i hamu, na malua situtu ma hamu. 8:37 Huboto do hamu pinompar ni si Abraham; alai dilului hamu do dalan mambunu Ahu, ai ndang siat hatangku tu hamu. 8:38 Na huida di Damang, i do huhatahon; hamu pe antong, na binegemuna di amamuna, i do diula hamu. 8:39 Dung i ninna nasida ma mangalusi: Si Abraham do amanami! Dung i didok Jesus ma: Anggo angka anak ni si Abraham do hamu, ulaonmuna ma angka pambahenan ni si Abraham. 8:40 Alai dilului hamu do dalan mambunu Ahu on, na paboahon tu hamu hasintongan na hubege sian Debata. Ndang songon i pambahen ni si Abraham. 8:41 Diula hamu do angka na niula ni amamuna. Dung i didok nasida ma tu Ibana: Apala na tubu sinalong hami: Sada do amanami, i ma Debata. 8:42 Dung i didok Jesus ma tu nasida: Aut ni Debata amamuna, holong ma rohamuna di Ahu. Ai sian Debata do Ahu borhat ro tu on; ai ndang ro Ahu sian roharohangku, Ibana do marsuru Ahu. 8:43 Boasa so diantusi hamu pangkataionku? Ala so tartangihon hamu hatangku. 8:44 Na marama tu sibolis do hamu, jala sinangkap ni roha ni amamuna do naeng patupaonmuna. Sibunu jolma do ibana sian mulana i, ndang tindang ibana di hasintongan, ai ndang adong hasintongan di bagasan rohana. Jumpa dihatahon gabus, na di dirina hian ma dihatahon disi, ai pargapgap do ibana jala ama ni gapgap. 8:45 Alai molo Ahu mangkatahon hasintongan, gabe ndang porsea hamu di Ahu. 8:46 Ise sian hamu na padapot Ahu di dosangku? Alai anggo huhatahon na tutu, boasa so porsea hamu di Ahu? 8:47 Ganup na sian Debata, tangihonon ni i do hata ni Debata. Ala so sian Debata hamu, umbahen na so ditangihon hamu Ahu. 8:48 Dung i didok angka Jahudi ma mangalusi Ibana: Nda tigor na hudok hami: Halak Samaria do Ho; na sibolison do Ho? 8:49 Jadi dialusi Jesus ma: Ndang na sibolison Ahu; alai hupasangap do Damang, jadi hamu do mangaleai Ahu. 8:50 Ianggo Ahu ndang hulului sangaphu; adong do na mangaluluisa jala na manguhumi. 8:51 Na tutu situtu do na hudok on tu hamu: Molo adong na mangaradoti hatangki, ndang idaon ni i hamatean salelenglelengna. 8:52 Gabe didok angka Jahudi ma tu Ibana: Apala nuaeng ma huboto hami, naung sibolison Ho; na mate do si Abraham ro di angka panurirang i, gabe didok Ho: Molo adong na mangaradoti hatangku, na so tupa aeon ni i hamatean salelenglelengna, nimmu. 8:53 Ai umbalga do Ho sian si Abraham, amanami, na mate i? Angka panurirang pe mate do. Ai ise do Ho di roham? 8:54 Dung i dialusi Jesus ma: Molo Ahu pasangap diringku, na soada ma sangaphu. Damang i, na nidokmuna Debatamuna, i do na pasangap Ahu. 8:55 Ndang ditanda hamu Ibana; alai anggo Ahu hutanda do Ibana. Aut hudok: Ndang hutanda Ibana, pargapgap ma Ahu doshon hamu; alai hutanda do Ibana jala huradoti do hatana. 8:56 Marolopolop do si Abraham, amamuna i, ala naeng idaonna aringki; jadi saut ma diida, gabe las ma rohana. 8:57 Dung i didok angka Jahudi i ma mandok Ibana: Ndang tuk dope Ho limapulu taon; tung diida Ho ma si Abraham? 8:58 Dung i ninna Jesus ma mandok nasida: Na tutu situtu do na hudok on tu hamu: Jumolo hian do Ahu asa tubu si Abraham. 8:59 Dung i dihindat nasida ma batu laho maninggangkon tu Ibana, alai buni ma Jesus laho sian bagas joro i.
9:1 Dung i di na mamolus i Ibana, diida ma sada halak na mapitung tubu. 9:2 Gabe ninna angka siseanna ma manungkun Ibana: Ale Guru, ise do na mardosa, halak on do manang natorasna, umbahen na mapitung ibana tubu? 9:3 Jadi dialusi Jesus ma: Ndada ala ni dosana manang ala ni dosa ni natorasna; alai naeng gabe patar angka ulaon ni Debata di ibana. 9:4 Ingkon ulaonku do ulaon ni na marsuru Ahu, saleleng arian; ai dung ro borngin, ndang tarbahen mangula disi manang ise. 9:5 Panondang ni portibi on do Ahu, tagan di portibi on Ahu. 9:6 Jadi dung didok songon i, ditijuri ma tano i mambahen gambo marhite sian ijurna i, didalohon ma gambo i tu matana. 9:7 Dung i didok ma tu ibana: Laho ma ho marsuap tu dano Siloam (na mandok: Na sinuru)! Jadi laho ma ibana marsuap, gabe marnida ma ibana mulak. 9:8 Dung i didok hombar bagasna ma ro di angka na marnida ibana najolo mangidoido: Nda on do na somal hundul mangidoido? 9:9 Jadi adong ma deba na mandok: Ibana do i! Alai na deba mandok: Ndangana, suman do ibana tusi. Didok ibana do: Ahu do i! 9:10 Dung i ninna nasida ma: Beha do hamumungkap ni matami? 9:11 Jadi didok ma mangalusi: Halak i na margoar Jesus, i do pauli gambo, didalohon ma i tu matangku, jadi disuru ahu marsuap tu dano Siloam; dung i laho ahu tusi marsuap, jadi marnida ma. 9:12 Dung i ninna nasida ma tu ibana: Didia do Ibana? Jadi didok ma: Ndang huboto! 9:13 Gabe ditogihon nasida ma halak na mapitung hian tu angka Parise. 9:14 Alai ari Sabbat do tongon, uju dipauli Jesus gambo i dohot mangungkap matana i. 9:15 Laos disungkun angka Parise i ma tu ibana pangalahona, umbahen marnida ibana. Jadi didok ma tu nasida: Gambo do didalohon tu matangki, dung i marsuap ahu jadi marnida ma! 9:16 Dung i didok na deba sian angka Parise i ma: Ndang na sian Debata Halak i, ai ndang dijujur Ibana ari Sabbat i. Angka na asing mandok: Tung tarpatupa halak sipardosa ma tanda sisongon i? Jadi marsalisi ma nasida sama nasida. 9:17 Dung i didok nasida ma muse tu na mapitung hian: Ia ho, dia ma pandokmu taringot tu Ibana, ala diungkap matami? Jadi didok ma: Panurirang do Ibana! 9:18 Jadi ndang diparhatutu angka Jahudi i, ibana do na mapitung i najolo, gabe marnida muse, pola do dijou nasida natoras ni naung marnida i. 9:19 Jadi disungkun ma nasida: Anakmuna do on tahe, na nidokmuna na mapitung tubu i? Na boha do gabe marnida ibana nuaeng? 9:20 Dung i ninna natorasna i ma mangalusi nasida: Na huboto hami do on anaknami jala na mapitung do ibana tubu. 9:21 Alai ndang huboto hami, manang beha pangalahona gabe marnida; ba, ndang hutanda hami na mangungkap matana. Ibana ma sungkun hamu; nunga tang dagingna, botoonna do mandok sidohononna. 9:22 Ai mabiar mida Jahudi i do natorasna, umbahen na didok songon i. Ai nunga mardos ni roha angka Jahudi, ingkon sipabalion do sian huria ganup na marhatopothon, Kristus Ibana. 9:23 Dibahen i do umbahen na didok natorasna i: Nunga tang dagingna; ibana ma sungkun hamu! 9:24 Dung i dijou nasida ma paduahalihon halak na mapitung hian, didok ma tu ibana: Pasangap ma Debata! Huboto hami do, pardosa Halak i. 9:25 Dung i ninna ibana ma mangalusi: Manang na pardosa Ibana, ndang huboto. Holan on do na huboto: Na mapitung do ahu najolo, alai na marnida do anggo nuaeng. 9:26 Gabe ninna nasida ma mandok ibana: Ai aha do dibahen tu ho; beha do dibahen mangungkap matami? 9:27 Jadi dialusi ma nasida: Nunga hupaboa i tu hamu; na so dibege hamu do i? Naeng begeonmuna i muse? Naeng gabe siseanna nang hamu? 9:28 Dung i disurahi nasida ma ibana, ninna ma: Ho do siseanna; anggo hami sisean ni si Musa do. 9:29 Huboto hami do, si Musa diangkupi Debata mangkatai; alai anggo Halak on, ndang binoto, manang sian dia Ibana. 9:30 Gabe dialusi ibana ma nasida: Longang do rohangku disi, na so binotomuna, manang na sian dia Ibana, hape diungkap do matangku! 9:31 Taboto do, na so ditangihon Debata angka pardosa, alai halak na mangkabiari Debata jala mangulahon pinangido ni rohana, i do ditangihon. 9:32 Sian mula ni tano on ndang dung binege, adong na mangungkap mata ni halak na mapitung tubu. 9:33 Aut so sian Debata Ibana, ndang tarpatupasa agia aha. 9:34 Dung i ninna nasida ma mangalusi ibana: Hibul do ho tubu di bagasan dosa, hape naeng ajaranmu hami! Jadi dipabali nasida ma ibana. 9:35 Dibege Jesus ma, naung dipabali nasida ibana, jadi ninna ma mandok ibana, dung jumpangsa: Na porsea do ho di Anak ni jolma i? 9:36 Dung i ninna halak i ma mangalusi: Ai ise do i, Tuhan, asa huhaporseai Ibana? 9:37 Jadi didok Jesus ma tu ibana: Na niidam, na mangkatai dohot ho, I ma Ibana. 9:38 Gabe didok ma: Na porsea do ahu, ale Tuhan! Laos disomba ma Ibana. 9:39 Dung i didok Jesus ma: Mamboan uhum do, umbahen na ro Ahu tu portibi on, asa marnida angka na so marnida hian, jala asa gabe mapitung angka na marnida. 9:40 Jadi dibege na deba sian angka Parise na rap dohot Ibana ma i, jadi didok ma tu Ibana: Nda tung dohot hami mapitung? 9:41 Jadi didok Jesus ma tu nasida: Aut na mapitung hamu, gabe so mardosa hamu. Alai didok hamu do: Na marnida do hami, gabe hot ma dosamuna.
10:1 Na tutu situtu do na hudok on tu hamu: Manang ise na so bongot sian pintu, laho tu bara ni birubiru, na manjangkit sian dalan na asing laho bongot, panangko do i jala pamangus. 10:2 Alai na bongot sian pintu i, i do siparmahan birubiru i. 10:3 Ungkapon ni sijaga pintu i ma di ibana jala dibege angka birubiru i do soarana; jala dijou do angka birubiruna di goarna be, laho manogihonsa tu balian. 10:4 Ia dung diparuar sude na di ibana, sai di jolonasida ma ibana mardalan, gabe diihuthon angka birubiru ma ibana, ai ditanda do soarana. 10:5 Alai ndang olo nasida mangihuthon tu na asing; na maporus do nasida mida i, ai ndang ditanda nasida soara ni na asing i. 10:6 Asa dihatahon Jesus pe hata umpama ondeng tu nasida, ndang diboto nasida lapatan ni na nidokna i tu nasida. 10:7 Dung i didok Jesus ma muse tu nasida: Na tutu situtu na hudok on tu hamuna: Ahu do pintu na tu birubiru i. 10:8 Saluhut angka naung manjoloani Ahu, panangko do i jala pamangus; alai ndang ditangihon angka birubiru i nasida. 10:9 Ahu do pintu i. Paluaon do ganup na bongot sian Ahu; na laho bongot jala laho ruar ma ibana, dapotan jampalan. 10:10 Anggo panangko, holan manangkoi, maneati jala mangago do, umbahen na ro Alai anggo Ahu, asa adong hangoluan di nasida, pola marlobilobi di nasida, umbahen na ro. 10:11 Parmahan na denggan do anggo Ahu. Diseahon parmahan na denggan i do hosana humongkop angka birubiruna. 10:12 Alai anggo na niupaan, na so parmahan situtu, na so nampuna birubiru i; diida pe ro babiat, ditadingkon do birubiru i laho maporus, gabe disoro babiat i ma birubiru i jala dipanserakkon. 10:13 Ai sipangan gaji do ibana, na so sumarihon angka birubiru i. 10:14 Ahu do Parmahan na denggan. Hutanda do angka na di Ahu, jala ditanda nasida do Ahu. 10:15 Songon Ama i na tumanda Ahu jala Ahu tumanda Ama i, jala huseahon do hosangku humongkop birubiru i. 10:16 Adong dope angka birubirungku na asing, na so sian bara on. Ingkon dohot do angka i togihononku; tangihononnasida do soarangku, dung i gabe sada punguan ma i jala sada ma parmahan. 10:17 Ala ni on do umbahen dihaholongi Ama i Ahu, ala hulehon hosangku, asa jaloonku i muse. 10:18 Ndang adong na mambuat i sian Ahu, sian lomongku do i hulehon. Na marhuaso do Ahu mangalehon, na marhuaso do Ahu manjalo muse. I ma patik na hujalo sian Damang. 10:19 Dung i marsalisi muse ma angka Jahudi i ala ni angka hata ondeng. 10:20 Torop do sian nasida mandok: Na sibolison jala na rintik do Ibana; aha patangitangionmuna I? 10:21 Angka na asing mandok: Nda tung hata ni na sibolison i; tung tarungkap sibolis i; tung tarungkap sibolis ma mata ni na mapitung? 10:22 Dung i jumpang ma ari parningotan di haompoan ni bagas joro i di Jerusalem; partaonan ngali do uju i. 10:23 Jadi mardalandalan ma Jesus di emper ni si Salomo na di bagas joro i. 10:24 Gabe dihaliangi angka Jahudi ma Ibana, didok ma tu Ibana: Sadia leleng on ma bohabohaon rohanami bahenonmu? Molo na tutu Ho Kristus, tullom ma paboa tu hami! 10:25 Dung i ninna Jesus ma mangalusi: Nunga hupaboa tu hamu; hape ndang porsea hamu. Angka ulaon na huula marhitehite Goar ni Damang, angka i do mangkatindangkon Ahu. 10:26 Alai ndang porsea hamu, ai ndang masuk birubirungku hamu. 10:27 Ditangihon angka birubirungku do soarangku jala hutanda do nasida, diihuthon nasida do Ahu. 10:28 Gabe hulehon tu nasida hangoluan salelenglelengna; ndang be mago nasida salelenglelengna jala ndang tarrampas manang ise nasida sian tanganku. 10:29 Umbalga sian saluhutna do Damang na mangalehon nasida tu Ahu, umbahen na so tarrampas manang ise nasida sian tangan ni Damang. 10:30 Sada do Ahu dohot Ama i. 10:31 Dung i dialap angka Jahudi ma muse batu, laho maninggangkonsa tu Ibana. 10:32 Dung i didok Jesus ma: Lan do ulaonku na denggan sian Damang, angka na hupatuduhon tu hamu; ala ni ulaon dia do naeng dangguranmuna Ahu? 10:33 Dung i ninna angka Jahudi ma mangalusi Ibana: Apala ala ni ulaon na denggan, umbahen na naeng danggurannami Ho; ala ni pangaleaimi di Debata do: Dipasobok Ho do dirim tu Debata, atik pe dongan jolma Ho. 10:34 Dung i dialusi Jesus ma nasida: Ai nda tarsurat di patikmuna: "Nunga hudok: Angka debata do hamuna"? 10:35 Gari nasida na gabe hasahatan ni hata ni Debata, digoar do "debata", jala ndang tarsengsang Surat i. 10:36 Tung dohononmuna ma tu na pinarbadiaan ni Ama i, naung sinuruna tu portibi on: Sileai Debata do Ho, ala hudok: Anak ni Debata do Ahu? 10:37 Molo so huula angka ulaon ni Damang, unang porsea hamu di Ahu. 10:38 Alai ia huula angka i, porsea ma hamu di angka ulaon i, anggo so Ahu dihaporseai hamu, asa diboto jala ditanda hamu, di bagasan Ahu do Ama i, jala Ahu di bagasan Ama i. 10:39 Dung i naeng ma tangkuponnasida Ibana; alai laho do Ibana sian tongatonganasida. 10:40 Dung i laho ma Ibana muse tu ipar ni aek Jordan, tu pandidian ni si Johannes najolo, laos mian disi. 10:41 Dung i torop ma halak ro manopot Ibana, angka ninna ma: Ndang dipatupa si Johannes nian tanda, alai nasa na nidok ni si Johannes taringot tu Halak on, sintong do i. 10:42 Jadi torop do halak disi gabe porsea di Ibana.
11:1 Marsahit ma halak si Lasarus na sian Betania, i ma huta na niinganan ni si Maria dohot si Marta, hahana i. 11:2 I ma si Maria na mamiahi Tuhan i jala mangapusi patna dohot obuknasida; iboto ni i do si Lasarus na marsahit i. 11:3 Jadi disuru angka ibotona i ma na mandok tu Ibana: O Tuhan, na marsahit do hinaholongan ni roham! 11:4 Umbege i Jesus, ninna ma: Nda tung hamatean ujung ni sahit i, alai bahen hasangapon ni Debata do i, asa marsangap Anak ni Debata marhite sian i. 11:5 Alai holong do roha ni Jesus di si Marta dohot di anggina i, nang di si Lasarus i. 11:6 Asa dung dibege naung marsahit ibana, mangulon dope Ibana dua ari nari di ingananna i. 11:7 Dung salpu i, ninna ma mandok angka siseanna: Beta ma hita mulak tu Judea! 11:8 Dung i ninna angka siseanna ma mandok Ibana: Gurunami, apala nambura dope ditahi angka Jahudi mandangguri Ho, ulahanmu muse tusi? 11:9 Jadi dialusi Jesus ma: Nda sampuludua jom na sadari? Ndang na olo tartuktuk na mardalan arian, ai diida do panondang ni portibi on. 11:10 Alai na mardalan borngin i, tartuktuk ma anggo i, ai ndang di bagasan ibana panondang i. 11:11 I ma didok. Dung i ninna ma tu nasida: Nunga modom si Lasarus, alealenta i; alai na laho ma Ahu tusi manungguli ibana. 11:12 Dung i didok angka siseanna ma tu Ibana: Ale Tuhan, molo na modom ibana, na laho mangolu ma. 11:13 Hamamatena do nian na nidok ni Jesus disi; alai dirimpu nasida, parmodomon hian do na nidokna i. 11:14 Disi pe asa tullom didok tu nasida: Nunga mate si Lasarus! 11:15 Ala ni hamu do umbahen na las rohangku, so disi Ahu, asa porsea hamu; alai borhat ma hita manopot ibana! 11:16 Dung i didok si Tomas, na margoar si Linduat, ma mandok angka donganna sisean: Antong, borhat ma hita, asa rap mate hita dohot Ibana! 11:17 Jadi dung sahat Jesus ro disi nunga pola opat ari di bagasan tanoman ibana didapot. 11:18 Alai anggo huta Betania, na jonok do i tu Jerusalem, tar dua batu daona. 11:19 Torop do Jahudi naung ro manopot si Marta dohot si Maria, mangapul nasida siala ibotonasida i. 11:20 Jadi dung dibege si Marta, naung ro Jesus, laho ma ibana manomunomu; na tinggal di bagas do anggo si Maria. 11:21 Dung i ninna si Marta ma mandok Jesus: Aut na dison Ho, ale Tuhan, ndang tagamon mate ibotongki! 11:22 Alai nuaeng pe, tong do huboto, lehonon ni Debata do tu Ho nasa sipangidoonmu tu Ibana. 11:23 Gabe didok Jesus ma tu ibana: Na hehe ma ibotom! 11:24 Jadi didok si Marta ma tu Jesus: Olo, huboto do, na hehe do ibana di haheheon i, na di ari parpudi. 11:25 Dung i ninna Jesus ma mandok ibana: Ahu do haheheon dohot hangoluan; na mangolu do na porsea di Ahu, nang pe mate ibana! 11:26 Jala ganup na mangolu jala na porsea di Ahu, na so tupa mate ibana salelenglelengna! Porsea do ho disi? 11:27 Dung i didok ma tu Ibana: Olo, Tuhan, na porsea do ahu: Ho do Kristus, Anak ni Debata, na naeng ro tu portibi on. 11:28 Jadi dung didok songon i, laho ma ibana manjou si Maria anggina i, dihusiphon ma, mandok: Nunga ro Guru i, dijou do ho! 11:29 Umbege i si Maria, hapogan ma ibana hehe mandapothon Ibana. 11:30 Ai ndang dope sahat ro di huta i Jesus, mangulon di inganan hajumpanganna dohot si Marta i dope Ibana. 11:31 Ia angka Jahudi i, donganna di jabu i, angka naung ro mangapul nasida, dung diida hapogan si Maria hehe laho tu balian, diihuthon ma ibana; ai dirimpu, laho tu tanoman do ibana tumatangis. 11:32 Asa sahat ma si Maria tu pangulonan ni Jesus; jala disi diida Ibana, dipatungkap ma ibana tu jolona, huhut mandok: Aut na dison Ho, ale Tuhan, ndang tagamon mate ibotongki! 11:33 Jadi dung diida Jesus tumatangis si Maria ro di Jahudi na ro i, angka na tumatangis i, tarrimas ma rohana huhut bonsa. 11:34 Dung i ninna ma: Tudia do dipeakkon hamu ibana? Jadi didok nasida ma: Ro ma Ho marnida, Tuhan! 11:35 Dung i tariluilu ma mata ni Jesus. 11:36 Dung didok angka Jahudi i ma: Ndi! Holong ni rohana i di ibana! 11:37 Alai deba sian nasida mandok: Mata ni na mapitung diungkap Ibana do; ndang hasundatan Ibana huroha halak on, unang mate? 11:38 Gabe tarrimas muse ma roha ni Jesus, di na sahat Ibana tu tanoman i. Liang batu do i, laos batu do langkopna. 11:39 Dung i ninna Jesus ma: Hindati hamu ma batu i! Gabe ninna si Marta, iboto ni naung monding i, ma: Nunga sanga bau, Tuhan, ai nunga pola opat ari. 11:40 Dung i ninna Jesus ma mandok ibana: Nda hudok tu ho: Idaonmu do hasangapon ni Debata, molo na porsea ho? 11:41 Jadi dihindat nasida ma batu i; dung i manaili ma Jesus dompak ginjang, didok ma: Ale Amang, mauliate ma hudok tu Ho, ala ditangihon Ho Ahu. 11:42 Huboto do nian, na tongtong do ditangihon Ho Ahu; alai ala ni natorop on, na jongjong humaliang, umbahen hudok songon i, asa porsea nasida, naung sinurumi do Ahu. 11:43 Jadi dung didok songon i, dipagogo ma soarana manjouhon: O Lasarus, ruar ma ho! 11:44 Dung i ruar ma tutu na mate i; lilit dope saput i tu patna dohot tu tanganna, jala alit sekka i tu bohina. Jadi didok Jesus ma: Harhari hamu i, asa mardalan ibana. 11:45 Jadi torop ma sian angka Jahudi, naung ro tu si Maria, gabe porsea di Ibana, dung diida nasida na pinatupana i. 11:46 Alai deba sian nasida laho manopot angka Parise, mamaritahon na binahen ni Jesus. 11:47 Dung i dipansang angka sintua ni malim i dohot angka Parise ma rapot godang, didok nasida ma: Aha ma bahenonta? Ai lan do tanda dibahen Halak i! 11:48 Molo itapasombu Ibana, porsea ma halak saluhutna di Ibana, gabe ro ma halak Rom maon mangarampas tanonta dohot bangsonta. 11:49 Alai hehe ma sada sian nasida, i ma si Kayapas, sintua ni malim di na sataon i, didok ma tu nasida: Na hurang roha do hamu! 11:50 Ndang dipingkiri rohamuna, dengganan do mate sada halak humongkop natorop i, unang laho mago sandok bangso i. 11:51 Alai ndang sian rohana sandiri dihatahon i; ala sintua ni malim ibana di na sataon i, umbahen na disurirangkon, na naeng mate ma Jesus humongkop bangso i. 11:52 Alai tahe, ndada holan laho mangkongkop bangso i; alai naeng papunguonna angka anak ni Debata, angka na marserak dope, laho pasadahonsa. 11:53 Asa olat ni na sadari i martuptup i ma nasida laho mamusa Ibana. 11:54 Jadi ndang be mardalani Jesus di na patar di tongatonga ni halak Jahudi; na sumurut do Ibana sian i tu sada luat mardonokkon halongonan, tu huta na margoar Epraim. Jadi disi ma Ibana mian rap dohot angka siseanna. 11:55 Alai jonok nama Paska ni Jahudi, jadi torop ma halak laho sian luat i nangkok tu Jerusalem, manguras dirina, patujolo ni Paska i. 11:56 Jadi dilului nasida ma Jesus, angka jongjong ma nasida di bagas joro i masipandohan: Beha di rohamuna, na so ro do Ibana ulaning tu pesta i? 11:57 Alai nunga dipatikkon angka sintua ni malim dohot angka Parise: Manang ise na umboto inganan ni Jesus, ingkon dipabotohon, asa dapot tangkuponnasida Ibana.
12:1 Dung i onom ari nari asa dapot pesta Paska i, sahat ma Jesus tu huta Betania, na niinganan ni si Lasarus, na sinunggul ni Jesus sian na mate. 12:2 Jadi dipauli nasida ma disi panganon ujuan di Ibana; si Marta do marhobasi, si Lasarus ma sada donganna mangan disi. 12:3 Gabe dibuat si Maria ma sahat i miak Nardus na arga na so marsaor, dimiahi ma pat ni Jesus, obukna ma dibahen mangalapu. Jadi digohi uap ni miak i ma bagas i. 12:4 Jadi sada sian angka siseanna, si Jude Iskariot na naeng manjehehon Ibana, mandok: 12:5 Boasa so ginadis miak i arga tolu ratus hupang, bahen silehonlehon nian di angka na pogos? 12:6 Alai ndada na pogos sinarihonna, umbahen na didok songon i; panangko do ibana tahe, diusung do asiasi ni halak, ai tu ibana dipasahat puro i. 12:7 Dung i ninna Jesus ma: Pasombu ma ibana, ai diparade do i hira tu ari hatatanomhi. 12:8 Ai tongtong do adong na pogos di tongatongamuna, alai anggo Ahu ndang tongtong di lambungmuna. 12:9 Dung i diboto torop sian halak Jahudi ma, naung disi Ibana, jadi ro ma tusi, ndada ala ni Jesus sambing; naeng idaonnasida do huhut si Lasarus, naung pinahehena i sian na mate. 12:10 Alai nunga ditahi angka sintua ni malim i, naeng bunuonnasida nang si Lasarus. 12:11 Ai ala ibana do umbahen torop Jahudi laho tusi jala porsea di Jesus. 12:12 Dung i torang ni arina i dibege halak natorop na ro tu pesta i, na naeng ro ma Jesus tu Jerusalem. 12:13 Jadi dibuat nasida ma angka maremare, laho manomunomu Ibana huhut dijoujouhon: Hosianna! Pinanasupasu ma na ro marhite Goar ni Tuhan i, Raja ni Israel! 12:14 Dung i dapot Jesus ma halode sada, i ma dihunduli, hombar tu na tarsurat: 12:15 "Unang ho mabiar, boru Sion; ida ma, Rajam do na ro, marsihundul di anak ni halode!" 12:16 Alai ndang diantusi angka siseanna i hian; dung pe marsangap Jesus, asa diingot nasida, naung marhahonaan tu Ibana do hape na tarsurat i ro di pambahenannasida tu Ibana. 12:17 Laos dihatindangkon natorop, angka na mandongani Ibana do, paboa naung jinouna i si Lasarus sian tanoman, laho manungguli ibana sian na mate. 12:18 Jadi ala naung dibege natorop i barita ni tanda na binahenna i, umbahen na ditomu nasida Ibana. 12:19 Jadi didok angka Parise ma sama nasida: Diida hamu do, na so marniula na binahenmu, ai liat portibi on do paihutihut Ibana. 12:20 Alai adong ma deba halak Junani, dongan ni angka na nangkok i, laho martangiang di ari raya i. 12:21 Jadi didapothon nasida ma si Pilippus na sian Betsaida na di Galilea, mangelehelek ibana, ninna ma: Tuannami, naeng do idaonnami Jesus! 12:22 Dung i ro ma si Pilippus, dipaboa ma i tu si Andreas; dung i ro ma si Andreas rap dohot si Pilippus paboahonsa tu Jesus. 12:23 Gabe didok Jesus ma mangalusi nasida: Naung dapot ma tingkina, asa marsangap Anak ni jolma i! 12:24 Na tutu situtu do na hudok on tu hamu: Ndang na ganda eme i, molo so madabu tu tano jala mate; dung pe mate, asa godang parbuena. 12:25 Agoan hosa ma na marhamaolhon hosana; alai na mangkasogohon hosana di portibi on, i do na mangaramotisa sahat tu hangoluan salelenglelengna. 12:26 Ahu ma diihuthon ganup na olo mangoloi Ahu; jala ia disi Ahu, disi ma dohot anak somangku. Pasangapon ni Ama i do ganup na mangoloi Ahu. 12:27 Na bonsa do rohangku nuaeng; aha ma dohononku? Palua ma Ahu, Amang, sian tingki on? Alai tahe, ala ni i do umbahen na sahat tingki on tu Ahu. 12:28 Pasangap ma Goarmi, Amang! Dung i ro ma soara sian banua ginjang, mandok: Nunga hupasangap, laos pasangaponku do muse! 12:29 Jadi dung dibege, natorop i na jongjong disi, ninna nasida ma: Ronggur do i. Angka na asing mandok: Adong do surusuruan ni Debata na mangkatai dohot Ibana. 12:30 Dung i ninna Jesus ma mangalusi nasida: Ndada ala ni Ahu, umbahen na ro soara ondeng; ala ni hamu do! 12:31 Nuaeng ma jumpang tingkina, asa diuhum portibi on; sipabalion ma nuaeng raja ni portibi on. 12:32 Anggo Ahu, dung dipatimbo Ahu sian tano on, taitonku do saluhut nasida tu Ahu! 12:33 Pangalaho ni parmatena do dipatuduhon marhitehite hatana ondeng. 12:34 Asa dialusi natorop i ma Ibana: Hubege hami di surat ni patik i, na mian do Kristus i ro di salelenglelengna; boasa dohononmu: Ingkon sipatimboon do Anak ni jolma i? Ise do Anak ni jolma i, na nidokmi? 12:35 Dung i didok Jesus ma tu nasida: Satongkin nari nama Panondang i di hamu. Mardalan ma hamu, binsan di hamu dope Panondang i, asa unang ditahopi na holom i hamu. Ianggo na mardalan di na holom, ndang diboto i, manang dompak dia ibana laho. 12:36 Binsan di hamu dope Panondang i, porsea ma hamu disi, asa gabe anak ni Panondang i hamu! I ma dihatahon Jesus; dung i ditadingkon ma nasida laho martabuni. 12:37 Alai atik pe dipatupa Ibana angka tanda na sai godang i di jolonasida, ndang porsea nasida di Ibana. 12:38 Asa sintong jumpang hata ni panurirang Jesaya na nidokna i: "Iale Tuhan, tung ise ma na porsea di jamitanami; jala tangan ni Tuhan i, di ise ma i torang tarida?" 12:39 Dibahen i ndang tarbahen nasida porsea; ai on do didok Jesaya muse: 12:40 "Nunga dipapitung Ibana matanasida, jala nunga dipatangkang rohanasida, asa unang marnida simalolongnasida jala unang mangantusi rohanasida, unang mulak nasida, unang malum nasida hubahen!" 12:41 Songon i ma didok Jesaya, ala diida hasangaponna i jala dihatahon taringot tu Ibana. 12:42 Nang sian angka partogi pe, adong do nian na nia na gabe porsea di Ibana; alai ndang diparhatopot nasida i ala ni angka Parise, asa unang bali nasida sian huria. 12:43 Ai holongan do rohanasida di hasangapon ni jolma, asa di hasangapon ni Debata. 12:44 Dung i joujou ma Jesus, ninna ma: Na porsea di Ahu, ndada Ahu na hinaporseaanna; na marsuru Ahu do dihaporseai disi. 12:45 Na marnida Ahu, marnida na marsuru Ahu do. 12:46 Ahu do Panondang na ro tu portibi on, asa unang mian di na holom nasa na porsea di Ahu. 12:47 Asa molo adong na umbege hatangku, gabe ndang diradoti, ndada Ahu manguhum ibana; ai ndada laho manguhum portibi on, na laho paluahon portibi on do, umbahen na ro Ahu. 12:48 Na mambolongkon Ahu jala na so manjalo hatangku, nunga adong na manguhum i; hata na huhatahon, i do manguhum ibana di ari parpudi. 12:49 Ai ndang sian roharohangku Ahu marjamita; diaturhon Ama i na marsuru Ahu do sidohononku dohot sihatahononku. 12:50 Jala huboto, hangoluan na salelenglelengna do podana i. Asa di sude hatangki, ia i pandok ni Ama i tu Ahu, i do huhatahon.
13:1 Mandapothon pesta Paska i, nunga diboto Jesus, naung ro tingkina manadingkon portibi on, laho mandapothon Ama i; gabe songon pangkaholongina di angka na di Ibana na di portibi on, laos songon i do dihaholongi nasida ro di ujungna. 13:2 Di na mangan i nasida, nunga disuanhon sibolis i parjeheon tubagasan roha ni si Jude Iskariot, anak ni si Simon. 13:3 Jala diboto Jesus do, naung dipasahat Ama i saluhutna tu tanganna jala Ibana na ro sian Debata laho mulak ma tu Debata. 13:4 Gabe hehe ma Ibana sian na mangan i, ditanggal ma ulosna, dibuat ma basahan, ditapolhon tu Ibana. 13:5 Diusehon ma aek tu sambong, dung i diburi ma pat ni angka siseanna, diapusi ma dohot basahan na tinapolhonna i. 13:6 Dung i sahat ma Ibana tu si Simon Petrus, jadi didok i ma mandok Ibana: Tung Ho ma, ale Tuhan, mamburi pathu? 13:7 Dung i ninna Jesus ma mangalusi ibana: Ndang diantusi ho pambahenankon na tu ho anggo nuaeng; muse pe botoonmu i. 13:8 Dung i didok si Petrus ma tu Ibana: Matua tano on ndang burionmu pathu! Dung i ninna Jesus ma mangalusi ibana: Molo so burionku ho, ndang partohap ho di Ahu! 13:9 Dung i ninna si Simon Petrus ma: Ale Tuhan, unang ma holan pathu, dohot ma tangan dohot ulungku! 13:10 Gabe didok Jesus ma tu ibana: Halak naung maridi i, ndengkon be burion, ai nunga sude ibana ias. Naung ias do anggo hamu, alai ndang luhut hamu. 13:11 Ai ditanda do sipasahat Ibana, umbahen na didok: Ndang saluhut hamu ias! 13:12 Asa dung diburi Jesus patnasida dipangke ma muse ulosna, hundul ma Ibana, didok ma tu nasida: Ai diantusi hamu do pambahenanki tu hamu? 13:13 Digoar hamu do Ahu Guru jala Tuhan, jadi ture do pandokmuna disi; ai i do Ahu tutu. 13:14 Asa molo Ahu, Tuhan jala Gurumuna, mamburi patmuna, tama ma nang hamu masiburian pat! 13:15 Ai sitiruon do hulehon tu hamu, asa dibahen hamu songon naung hubahen i tu hamu! 13:16 Na tutu situtu do na hudok on tu hamu: Ndang umbalga anak somang sian indukna, ndang sumurung suruan sian na marsuru ibana. 13:17 Molo diboto hamu i, martua ma hamu mangulahonsa! 13:18 Ndada tu saluhut hamu hatangki; na hutanda do angka na hutodo i. Alai naeng ma jumpang na nidok ni Surat i: "Donganku sapanganan, i do manjungkangkon patna dompak Ahu!" 13:19 Hupaboa i hian tu hamu, andorang so songgop dope; asa ia dung saut, gabe porsea hamu: Ahu do na nidok ni hata i. 13:20 Na tutu situtu do na hudok on tu hamu: Na manjangkon na husuru, Ahu do jinangkonna disi; alai nasa na manjangkon Ahu, manjangkon na marsuru Ahu do! 13:21 Asa dung didok Jesus hata ondeng, bonsa ma rohana, dung i dihatindangkon ma, ninna ma: Na tutu situtu do na hudok on tu hamu: Sahalak sian hamu na pasahathon Ahu! 13:22 Dung i masiberengan ma angka sisean i, jut ma rohanasida, manang ise na nidokna disi. 13:23 Alai adong ma sada sian angka siseanna i, na hundul jumonok tu Ibana, haholongan ni Jesus i. 13:24 I ma dihilap si Petrus jadi ninna ma mandok ibana: Sungkun ma, ise i na nidokna i! 13:25 Jadi dipadonok ma tu lambung ni Jesus mandok tu Ibana: Tuhan, ise i? 13:26 Gabe dialusi Jesus ma: Ia tusi hulehon na santapik na husornophon on, i ma ibana! Jadi disornophon ma santapik, dilehon ma tu si Jude Iskariot anak ni si Simon. 13:27 Jadi dung dibondut i, dibongoti sibolis i ma ibana. Dung i didok Jesus ma tu ibana: Humatop ma ula siulaonmi! 13:28 Alai ndang adong manang ise sian nasida na mangan i, na umboto astuan ni na nidokna i. 13:29 Ai ala di ibana puro i, gabe dirimpu na deba, didokkon Jesus ibana manuhor na hasea tu pesta i, manang marsilua tu na pogos. 13:30 Asa dung dijalo si Jude na santapik i, pintor laho do ibana tu balian; alai borngin ma uju i! 13:31 Jadi dung laho ruar ibana, didok Jesus ma: Na marsangap ma nuaeng Anak ni jolma i, jala marsangap Debata di bagasan Ibana. 13:32 Molo marsangap Debata di bagasan Ibana, pasangapon ni Debata ma Ibana di bagasan dirina, jala tibu ma pasangaponna Ibana. 13:33 Hamu angka anaha, sangombas nari nama Ahu rap dohot hamu; luluanmuna ma Ahu; alai songon naung hudok tu angka Jahudi: Ndang tarbahen hamu ro tu sitopotonki, laos i do hudok nuaeng tu hamu. 13:34 Patik na imbaru ma hulehon tu hamu: Naeng ma masihaholongan hamu; songon holong ni rohangku di hamu, naeng ma songon i dohot hamu masihaholongan. 13:35 Apala sian on ma tandaon ni halak saluhutna, hamu siseanku: Molo masihaholongan hamu. 13:36 Dung i ninna si Simon Petrus ma mandok Ibana: Tuhan, tudia ma Ho laho? Jadi ninna Jesus ma mangalusi: Ndang tarihuthon ho dope Ahu tu sitopotonki, anggo nuaeng; muse pe asa ihuthononmu Ahu! 13:37 Gabe ninna si Petrus ma mandok Ibana: Tuhan, boasa so tarihuthon ahu Ho nuaeng? Hosangku do lehononku humongkop Ho! 13:38 Dung i ninna Jesus ma mangalusi ibana: Hosam lehononmu humongkop Ahu? Na tutu situtu do na hudok on tu ho: Ndang dope martahuak manuk, nunga sanga tolu hali disoadahon ho Ahu!
14:1 Unang ma bonsa rohamuna! Porsea ma hamu di Debata, jala porsea ma hamu di Ahu! 14:2 Torop do inganan di bagas ni Damang. Aut so i, dohononku ma tu hamu: Na laho do Ahu mangarade inganan di hamu? 14:3 Jala laho pe Ahu mangarade inganan di hamu, sai mulak do Ahu mangalap hamu, asa rap hamu dohot Ahu! 14:4 Jala diboto hamu do dalan tu inganan sitopotonki. 14:5 Dung i ninna si Tomas ma mandok Ibana: Ndang huboto hami, manang tudia Ho laho, Tuhan: Jala sian dia ma botoonnami dalan i? 14:6 Gabe didok Jesus ma tu ibana: Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu. 14:7 Anggo ditanda hamu Ahu, tandaonmuna do nang Damang i. Olat ni on ma ditanda hamu Ibana jala diida hamu Ibana. 14:8 Gabe didok si Pilippus ma tu Ibana: Patuduhon tu hami Ama i, ale Tuhan, asa sombu rohanami! 14:9 Jadi didok Jesus ma: Nunga pola na sai leleng Ahu rap dohot hamu, laos so ditanda ho dope Ahu, ale Pilippus. Na marnida Ahu, marnida Ama i do; boasa ma dohononmu: Patuduhon tu hami Ama i? 14:10 Ndang porsea ho, Ahu di bagasan Ama i jala Ama i di bagasan Ahu? Apala sian roharohangku huhatahon hata angka na hudok tu hamu. Ama i na maringanan di bagasan Ahu, i do patulus angka ulaonna i. 14:11 Porsea ma hamu di Ahu: Di bagasan Ama i do Ahu jala di bagasan Ahu do Ama i; molo so i, ala ni angka ulaon i ma hamu porsea! 14:12 Na tutu situtu do na hudok on tu hamu; Patupaon ni na porsea di Ahu do songon angka ulaon na huula i; na sumurung sian i dope patupaonna tahe, ai na laho ma Ahu tu Damang. 14:13 Asa manang aha pangidoanmuna marhitehite Goarhu, patupaonku do, asa marsangap Ama i di bagasan Anak i! 14:14 Molo dipangido hamu manang aha sian Ahu marhitehite Goarhu, patupaonku ma i! 14:15 Molo na holong rohamuna di Ahu, radotanmuna do angka patikku. 14:16 Jala pangidoonku ma tu Ama i, asa dilehon tu hamu sada Pangondian na asing, asa I mandongani hamu salelengna i. 14:17 I ma Tondi hasintongan i, na so tarjalo portibi on, ai ndang diida jala ndang ditanda; alai ditanda hamu do Ibana, ai na rap ma Ibana dohot hamu jala di bagasan hamu ma Ibana. 14:18 Ndang tadingkononku hamu so marama; na ro ma Ahu mandapothon hamu. 14:19 Saotik nari nama, jadi ndang be idaon ni portibi on Ahu, alai idaonmuna do Ahu; ai na mangolu do Ahu, hamu pe mangolu do! 14:20 Di na sadari i ma botoonmuna, Ahu di bagasan Damang jala hamu di bagasan Ahu jala Ahu di bagasan hamu. 14:21 Manang ise na maniop angka patikki jala diradoti, i do na holong roha di Ahu. Alai dihaholongi Damang i do na holong roha di Ahu; Ahu pe, holong do rohangku di ibana jala papataronku ma Ahu tu ibana. 14:22 Jadi didok si Jude ma (ndada si Iskariot i): Dia do alana, Tuhan, umbahen na holan tu hami papataronmu dirim, ndada tu portibi on? 14:23 Dung i ninna Jesus ma mangalusi ibana: Ganup na holong roha di Ahu, radotan ni i do hatangki, jala haholongan ni Damang ma ibana, gabe ro ma Hami manopot ibana, maringanan tubagasan ibana. 14:24 Na so holong roha di Ahu, ndang radotan ni i hatangku. Ndang Ahu nampuna hata na binegemuna i, Ama i na marsuru Ahu do! 14:25 I ma huhatahon tu hamu, tagan rap dope Ahu dohot hamu. 14:26 Alai anggo Pangondian i, i ma Tondi Parbadia, sisuruon ni Ama i marhitehite Goarhu, ajarhonon jala paingothonon ni I do tu hamu nasa na huhatahon i tu hamu! 14:27 Dame do hutinggalhon di hamu; dame na di Ahu, i do hulehon di hamu. Ndang songon pangalehon ni portibi on pangalehonku. Unang ma bonsa jala unang ma mabiar rohamuna! 14:28 Nunga dibege hamu hatangku: Na laho ma Ahu, jala na ro do Ahu muse manopot hamu. Aut na holong rohamuna mida Ahu, las ma rohamuna, ala laho Ahu manopot Ama i; ai umbalga do Damang asa Ahu. 14:29 Asa nunga hupaboa i hian tu hamu, andorang so jumpang dope, asa porsea hamu, dung songgop. 14:30 Ndang haru godang be hatahononku tu hamu, ai na ro ma raja ni portibi on; ndang adong dihana i nian di Ahu. 14:31 Alai naeng ma botoon ni portibi on, na holong do rohangku di Ama i jala sipasaut pandok ni Ama i do Ahu. Onpe, hehe ma hamu, laho ma hita sian on!
15:1 Ahu do hau anggur na tutu; Damang do tukang porlak i. 15:2 Digotap do nasa rantingku na so marparbue, jala dipaias do nasa na marparbue, asa ganda parbuena i. 15:3 Nunga ias hamu binahen ni hata i na huhatahon tu hamu. 15:4 Sai mian di bagasan Ahu ma hamu, songon Ahu di bagasan hamu! Songon ranting i, na so tarbahen marparbue anggo sian dirina, anggo so mian di hau anggur i; laos songon i hamu, anggo so mian di bagasan Ahu hamu. 15:5 Ahu do hau anggur i, hamu do ranting i. Na mian di bagasan Ahu jala Ahu di bagasan ibana, i ma na marparbuehon godang; ai ndang tarula hamu agia aha, anggo so mardongan Ahu. 15:6 Nasa na so mian di bagasan Ahu, dibolongkon do i songon ranting, na gabe masak; dung i dipalungguk, didanggurhon ma i tu api, jadi gor ma. 15:7 Molo mian hamu di bagasan Ahu, jala molo mian hatangki di bagasan hamu, jumpang hamu do manang dia pe dipangido rohamuna. 15:8 Marsangap ma Damang, molo marparbuehon na godang hamu jala gabe angka siseanku hamu. 15:9 Songon holong ni roha ni Damang di Ahu, songon i do holong ni rohangku di hamu. Mian ma hamu di bagasan holong ni rohangki! 15:10 Radoti hamu ma angka patikku; i ma dalanna, asa mian hamu di bagasan holong ni rohangku: Songon Ahu pe na mangaradoti angka patik ni Damang, gabe mian di bagasan holong ni rohana. 15:11 Umbahen na huhatahon i tu hamu, asa di bagasan hamu halalas ni rohangki, jala asa gok halalas ni rohamuna. 15:12 On ma patikku: Naeng ma masihaholongan hamu, songon Ahu na mangkaholongi hamu. 15:13 Na sumeahon hosana humongkop angka alealena, i do parholong ni roha na so halompoan. 15:14 Alealengku ma hamuna, molo diula hamu na hupatikkon i tu hamu. 15:15 Ndang hugoar be hamu anak somang, ai ndang diboto anak somang na niula ni indukna; aleale do hamu hudok, ai nunga hupabotohon tu hamu saluhutna na hubege sian Damang. 15:16 Ndada hamu mamillit Ahu; Ahu do mamillit hamu jala hupadiri hamu, asa laho hamu marparbue, jala asa mian parbuemuna i; asa dilehon tu hamu nasa sipangidoonmuna sian Ama i marhitehite Goarhu. 15:17 On ma hupatikkon tu hamu. Masihaholongan ma hamu! 15:18 Molo dihosomi portibi on on hamu, boto hamu ma, naung jumolo Ahu dihosomi. 15:19 Aut na sian portibi on hamu, haholongan ni portibi on do donganna. Alai ndang sian portibi on hamu. Ahu do tahe mamillit hamu sian portibi on; ala ni i do, umbahen na dihosomi portibi on hamu. 15:20 Ingot hamu ma hata naung hudok tu hamu: Ndang na umbalga anak somang sian indukna. Molo diburui nasida Ahu, buruanna do nang hamu; molo diradoti nasida hatangku, radotanna ma nang hatamu. 15:21 Alai songon i bahenonnasida tu hamu, ala ni Goarhu; ai ndang ditanda nasida na marsuru Ahu. 15:22 Aut so ro Ahu paboahonsa tu nasida, ndang mardosa nasida disi; alai nuaeng ndang adong be sidohononnasida mangkungkupi dosanasida. 15:23 Ganup na hosom roha di Ahu, hosom do roha ni i nang di Damang. 15:24 Aut unang huula angka ulaon di tongatonganasida, na so dung niula ni jolma, ndang mardosa nasida disi; alai nunga diida nasida i, gabe dihosomi nasida nang Ahu, nang Damang. 15:25 Alai naeng ma jumpang hata na tarsurat di patik ni uhumnasida: "Dihosomi nasida do Ahu, so adong alana!" 15:26 Asa ro ma Pangondian i sisuruonku sian Ama i tu hamu, i ma Tondi hasintongan i, na borhat sian Damang; I do na mangkatindangkon taringot tu Ahu. 15:27 Alai dohot ma hamu mangkatindangkon, ai donganku do hamu sian mulana i.
16:1 Asa unang targasip hamu, umbahen na huhatahon angka hata ondeng tu hamu. 16:2 Pabalionnasida do hamu sian huria. Na ro ma tingkina, gabe songon na mamele Debata do na mamusa hamu, anggo di rohana. 16:3 Songon i do bahenonnasida, ala so ditanda nasida nang Ama i, nang Ahu. 16:4 Alai hupaboa i hian tu hamu, asa diingot hamu di hasosonggopna i, naung huhatahon i tu hamu. Ai ndada sian mulana hupaboa i tu hamu, ala na rap dope hita. 16:5 Alai na laho ma Ahu nuaeng manopot na marsuru Ahu, jala ndang adong manang ise hamu manungkun Ahu: Na laho tudia do Ho? 16:6 Lam dokdok tahe rohamuna, ala hudok songon i tu hamu. 16:7 Alai na mandok na tutu do Ahu tu hamu: Ulimuna do i, ia laho Ahu. Ai aut so laho Ahu, ndang na ro Pangondian i manopot hamu. Alai anggo laho Ahu, suruonku do Ibana tu hamu. 16:8 Anggo dung ro Ibana, ajaranna do portibi on taringot tu dosa dohot taringot tu hapintoron dohot taringot tu uhum. 16:9 Anggo taringot tu dosa, i ma na so porsea nasida di Ahu. 16:10 Anggo taringot tu hapintoron, i ma na laho Ahu manopot Damang, jadi ndang be idaonmuna Ahu. 16:11 Anggo taringot tu uhum, i ma naung hona uhum induk ni portibi on. 16:12 Godang dope nian sidohononku tu hamu; alai ndang tarboan hamu dope i nuaeng. 16:13 Alai dung ro Tondi hasintongan na nidok ondeng, togihonon ni I do hamu tubagasan nasa hasintongan: Ai ndang adong sihatahononna sian sandirianna; na binegena, i do hatahononna baritahononna do tu hamu, na naeng masa dope. 16:14 Pasangaponna do Ahu, ai jaloonna do na di Ahu, laho mamaritahonsa tu hamu. 16:15 Saluhut na di Ama i, di Ahu do i, umbahen na hudok: Jaloonna do na di Ahu, laho mamaritahonsa tu hamu. 16:16 Satongkin nari nama, ndang idaonmuna be Ahu, dung i satongkin nari muse, idaonmuna ma Ahu. 16:17 Gabe masipandohan ma angka siseanna i: Dia do astuan ni na nidokna i tu hita satongkin nari nama, ndang idaonmuna be Ahu; dung i: Satongkin nari muse idaonmuna ma Ahu? 16:18 Jadi didok nasida ma: Dia do astuan ni hata: "Satongkin nari"? Ndang taboto lapatanna. 16:19 Mamoto ma Jesus, na naeng ro nasida manungkun Ibana, gabe didok ma tu nasida: Na masisungkunan do hamu taringot tu na hudok: Satongkin nari nama, ndang idaonmu be Ahu, dung i: Satongkin nari muse, idaonmuna ma Ahu? 16:20 Na tutu situtu do na hudok on tu hamu: Na tumatangis ma hamu jala mangandungi, alai las ma roha ni portibi on; marsak do anggo rohamuna, alai muba ma arsak ni rohamuna gabe las ni roha. 16:21 Dokdok do roha ni boruboru laho manubuhon posoposona, ai naung songgop hasasangana. Alai dung tubu posoposo i, ndang be diingot na porsuk i, dibahen halalas ni rohana, ala naung tubu jolma i tu hasiangan on. 16:22 Di hamu pe nuaeng dok ni roha; alai idaonku do hamu muse, gabe las ma rohamuna disi, jala ndang buaton sian hamu halalas ni rohamuna i. 16:23 Ndang sungkunonmuna be Ahu di na sadari i. Na tutu situtu do na hudok on tu hamu: Nasa sipangidoonmuna tu Ama i, sai na lehononna do marhitehite Goarhu. 16:24 Rasirasa nuaeng ndang dope mangido hamu marhitehite Goarhu. Pangido hamu ma, asa manjalo hamu, asa gok halalas ni rohamuna! 16:25 Na marumpama do Ahu nasailaon mangkatai dohot hamu; alai ndang marumpama be Ahu di tingki na ro i, ai disi ma patar baritahononku tu hamu taringot tu Ama i. 16:26 Di na sadari i ma hamu mangido marhitehite Goarhu, jala ndang pola Ahu mangondihon hamu tu Ama i. 16:27 Ai Ama i sandiri mangkaholongi hamu, ala naung holong rohamuna di Ahu, jala ala naung porsea hamu, Ahu borhat sian Debata. 16:28 Na borhat sian Ama i do Ahu ro tu portibi on; na manadingkon nama Ahu muse di portibi on, laho manopot Ama i. 16:29 Gabe didok angka siseanna i ma: Nuaeng pe, asa patar hatam; ndang songon umpama be na nidokmi. 16:30 Huboto hami do nuaeng, saluhutna do diboto Ho, ndengkon adong na manungkun Ho. Dibahen i ma umbahen na porsea hami, naung borhat sian Debata do Ho. 16:31 Jala dialusi Jesus ma nasida: Porsea ma hamu nuaeng? 16:32 Na ro ma tingkina, jala nunga ro i nuaeng, jadi marserak ma hamu, ganup masitondong dalanna, tadingkononmuna ma Ahu punjung; alai ndang punjung Ahu tahe, ai Ama i do donganku. 16:33 Asa mardame hamu di bagasan Ahu, umbahen na huhatahon angka i tu hamu. Haporsuhon do jambarmuna di portibi on; alai pos ma rohamuna: Nunga talu hubahen portibi on.
17:1 I ma didok Jesus; dung i manaili ma Ibana dompak ginjang mandok: Ale Amang, nunga dapot tingkina: Parsangapi ma Anakmu, asa dipasangap Anakmi Ho! 17:2 Songon naung nilehonmi tu Ibana huaso mangarajai nasa daging, asa dilehon hangoluan na salelenglelengna tu saluhut jolma na nilehonmi tu Ibana. 17:3 Alai na mananda Ho, Debata na sasada i, na sintong i, dohot Jesus Kristus na sinurum, i do hangoluan na salelenglelengna. 17:4 Nunga hupasangap Ho di tano on, ai nunga hupasidung ulaon na nilehonmi siulaonku. 17:5 Nuaeng pe, parsangapi ma Ahu tu lambungmi, Amang, songon sangaphu tagan di lambungmi Ahu, andorang so adong dope hasiangan on. 17:6 Nunga hupapatar Goarmi tu jolma angka na nilehonmi tu Ahu sian portibi on. Ho hian do nampuna nasida, jala dilehon Ho do nasida tu Ahu; diradoti nasida do hatami. 17:7 Nunga diboto nasida, na sian Ho do saluhutna na nilehonmi tu Ahu. 17:8 Ai nunga hupasahat tu nasida angka hata na nilehonmi tu Ahu jadi dijangkon nasida do, gabe diboto nasida situtu, Ahu borhat sian Ho, jala nunga porsea nasida, Ho do marsuru Ahu. 17:9 Ndang apala portibi on hutangiangkon, nasida on do, angka na nilehonmi tu Ahu, ai Ho do nampuna nasida. 17:10 Jala nasa na di Ahu, na di Ho do i; jala na di Ho, na di Ahu do i, jala nunga marsangap Ahu di bagasan nasida. 17:11 Ndang di portibi on be Ahu tu joloan on, di portibi on do anggo nasida; na ro do Ahu manopot Ho. Ale Amang na badia, ramoti ma nasida di bagasan Goarmu, angka na nilehonmi tu Ahu, asa sada nasida songon Hita! 17:12 Saleleng rap Ahu dohot nasida, Ahu do mangaramoti nasida di bagasan Goarmu na nilehonmi tu Ahu jala hujagai; gabe ndang adong na mago sian nasida, ia so holan anak jea i, asa jumpang hata ni Surat i. 17:13 Alai na ro ma Ahu nuaeng manopot Ho; di portibi on dope Ahu, di na hudok songon i, asa di bagasan nasida rimpas halalas ni roha na di Ahu i. 17:14 Nunga hulehon hatami tu nasida; dihosomi portibi on do nasida, ai ndang sian portibi on nasida, songon Ahu na so sian portibi on. 17:15 Ndang apala hupangido, taitonmu nasida sian portibi on; alai naeng ma ramotanmu nasida maralohon na jahat i. 17:16 Ndang na sian portibi on nasida, songon Ahu na so sian portibi on. 17:17 Parbadiai ma nasida di bagasan hasintongan; hatami do hasintongan i. 17:18 Songon parsurum di Ahu tu portibi on, songon i do husuru nasida tu portibi on. 17:19 Huparbadiai do diringku humongkop nasida, asa gabe badia nang nasida binahen ni hasintongan i. 17:20 Alai ndang holan nasida hutangiangkon, dohot do angka na naeng porsea dope di Ahu, tinogu ni hatanasida: 17:21 Asa sada nasida saluhutna; songon Ho, ale Amang, di bagasan Ahu jala Ahu di bagasan Ho, songon i ma nang nasida di bagasan Hita, asa porsea portibi on, Ho marsuru Ahu. 17:22 Nunga hulehon tu nasida hasangapon na nilehonmi tu Ahu, asa sada nasida songon Hita na sada roha i. 17:23 Ahu ma di bagasan nasida jala Ho di bagasan Ahu, asa sun denggan hasadaonnasida, gabe diboto portibi on, Ho marsuru Ahu jala holong roham di nasida songon holong ni roham di Ahu. 17:24 Ale Amang, naeng ma di rohangku, ia disi Ahu, disi ma dohot angka na nilehonmi tu Ahu, asa diida nasida hasangapon na di Ahu, na nilehonmi tu Ahu; ai holong do roham di Ahu, jumolo asa ojak portibi on. 17:25 Ale Amang na bonar: So ditanda portibi on pe Ho, anggo Ahu, hutanda do Ho, jala diboto angka on, Ho do marsuru Ahu. 17:26 Nunga hupabotohon tu nasida Goarmi, jala pabotohononku dope, asa di bagasan nasida holong ni rohami na di Ahu, jala asa Ahu di bagasan nasida.
18:1 Jadi dung didok Jesus songon i, ruar ma Ibana rap dohot angka siseanna tu ipar ni aek Kidron. Adong ma disi sada porlak, tusi ma laho Ibana dohot angka siseanna i. 18:2 Alai diboto si Jude siparjehe i do inganan i, ai jotjot do marpungu tusi Jesus dohot angka siseanna. 18:3 Ia si Jude i, diarahon ma angka soldadu dohot angka naposo ni sintua ni malim, didapothon ma tusi, mantat sulusulu, palito dohot sinjata. 18:4 Diboto Jesus do saluhut na naeng songgop tu Ibana, jadi ruar ma Ibana, didok ma tu nasida: Ise do na jinalahanmuna i? 18:5 Gabe ninna nasida ma mangalusi Ibana: Jesus, halak Nasaret i do! Dung i ninna Jesus ma mandok nasida: Ahu do i! Alai dohot do si Jude siparjehe i jongjong di lambungnasida. 18:6 Asa dung didok tu nasida: Ahu do i, sumurut ma nasida, angka martinggangan ma tu tano. 18:7 Dung i diulahi ma manungkun nasida: Ise do na niluluanmuna? Jadi didok nasida ma: Jesus, halak Nasaret i do. 18:8 Dung i ninna Jesus ma mangalusi: Nunga hupaboa tu hamu: Ahu do i. Asa molo Ahu dilului hamu, loas hamu ma laho angka on! 18:9 Ai naeng do jumpang hata na nidokna i: Ndang adong na mago hubahen agia sada sian angka na nilehonmi tu Ahu. 18:10 Ia si Simon Petrus marpodang do, i ma disintak jadi ditampulhon ma tu naposo ni sintua ni malim i, jadi dipisikkon ma pinggolna siamun; si Malkus do goar ni naposo i. 18:11 Dung i ninna Jesus ma mandok si Petrus: Pasarung podangmi! Nda inumonku siinumon na nilehon ni Ama i tu Ahu? 18:12 Dung i ditangkup angka soldadu dohot induknasida ro di angka naposo ni Jahudi ma Jesus, jala diihoti. 18:13 Jadi ditogihon ma Ibana jumolo tu si Hannas, i ma simatua ni si Kayapas, sintua ni malim di na sataon i. 18:14 I ma si Kayapas, naung mandok tu angka Jahudi: Dengganan do mate sada halak humongkop, bangso i. 18:15 Alai diihuthon si Simon Petrus dohot sisean na sada nari ma Jesus. Na masitandaan sisean na sada i dohot sintua ni malim i, jadi bongot ma ibana rap dohot Jesus tu alaman ni malim i. 18:16 Alai jongjong do si Petrus tartungkan balian di lambung pintu i. Jadi ruar ma sisean na sada i, na masitandaan dohot sintua ni malim i, mangkatai dohot boruboru sijaga pintu, gabe ditogihon ma si Petrus tubagasan. 18:17 Dung i ninna boruboru sijaga pintu i ma mandok si Petrus: Nda ho sada sian angka sisean ni Halak an? Jadi didok ma: Ndang i ahu! 18:18 Alai na jongjong do disi angka naposo dohot angka opas mansusudu di pansusuduan na niopannasida dibahen ngalina i. Jadi rap dohot nasida ma jongjong si Petrus disi mansusudu. 18:19 Alai disungkun sintua ni malim i ma Jesus taringot tu angka siseanna dohot taringot tu podana i. 18:20 Jadi dialusi Jesus ma ibana, ninna ma: Patar do hatangki di hatoropan. Na tongtong do Ahu mangajari nasailaon di bagasan parguruan nang di bagas joro pe, parpunguan ni saluhut Jahudi; ndang adong manang aha huhatahon marsibuni. 18:21 Boasa Ahu disungkun ho? Nasida naung umbege hatangki, i ma sungkun! Ai diboto nasida do na huhatahon i. 18:22 Dung didok Jesus songon i, dipastap sada opas na jongjong disi ma Ibana, huhut ma didok: Songon i do pangalusim di sintua ni malim i? 18:23 Dung i ninna Jesus ma mangalusi ibana: Ia na hurang na hudok, hajongjongkon hurangna; alai anggo na hona do, boasa pastaponmu Ahu? 18:24 Asa disuru si Hannas ma Ibana naung tinali i tu sintua ni malim si Kayapas. 18:25 Laos na jongjong dope disi si Simon Petrus mansusudu, gabe didok nasida ma mandok ibana: Nda dohot do ho sada sian siseanna? Jadi mamorso ma ibana, ninna ma: Nda tung i ahu! 18:26 Dung i didok sahalak naposo ni malim, sisolhot ni nampuna pinggol na pinisikkon ni si Petrus i ma: Nda huida ho rap dohot Ibana di porlak i? 18:27 Jadi diporso si Petrus ma muse, dung i pintor martahuak ma manuk. 18:28 Asa ditogihon nasida ma Jesus sian jolo ni si Kayapas tu kantor. Alai sogot ma i manogot i. Ndang na bongot anggo nasida tu kantor, asa unang tarsubang nasida laho manganhon Paska i. 18:29 Gabe ruar ma si Latus mandapothon nasida, didok ma: Pangaluan dia do diboan hamu dompak Halak an? 18:30 Dung i ninna nasida ma mangalusi: Aut unang sibahen na jahat Halak on, ndang tagamon pasahatonnami Ibana tu ho. 18:31 Gabe ninna si Latus ma mandok nasida: Boan hamu ma Ibana, uhumi hamu ma Ibana marguru tu adatmuna. Alai ninna angka Jahudi ma mandok ibana: Ndang jadi pusaonnami manang ise. 18:32 Jumpang ma disi na nidok ni Jesus, uju pinaboana i hian pangalaho ni parmatena. 18:33 Jadi dibongoti si Latus muse kantorna, dijou ma Jesus, didok ma tu Ibana: Atehe, Ho do raja ni Jahudi? 18:34 Ro ma alus ni Jesus: Na sian roham do na nidokmi, manang na nidok ni halak do i tu ho taringot tu Ahu? 18:35 Gabe dialusi si Latus ma: Ai halak Jahudi do ahu? Bangsomi dohot angka sintua ni malim i do pasahathon Ho tu ahu. Aha do na binahenmu? 18:36 Jadi dialusi Jesus ma: Ndang sian portibi on harajaonku. Aut sian portibi on harajaonku, ndang tarbahen so mangalo angka naposongki, asa unang sahat Ahu tu angka Jahudi, alai ndang sisongon i harajaonki. 18:37 Dung i ninna si Latus ma mandok Ibana: Asa raja do Ho? Jadi ninna Jesus ma mangalusi: Songon na nidokmi ma tutu. Raja do Ahu! Umbahen na tubu Ahu jala umbahen na ro Ahu tu portibi on, asa huhatindangkon hasintongan i. Ganup na sian hasintongan i tangihonon ni i do soarangku. 18:38 Jadi ninna si Latus ma mandok Ibana: Aha ma i, hasintongan i? Jadi dung didok sisongon i, ruar ma ibana muse manopot angka Jahudi mandok tu nasida: Ndang jumpang ahu manang dia salana. 18:39 Alai tahe, somal hupalua sada halak tu hamu jumpa Paska i. Anggo na lehet di rohamu, hupalua ma raja ni Jahudi i tu hamu? 18:40 Gabe dijouhon nasida ma muse: Unang Ibana; si Barabas ma! Alai partodos do anggo si Barabas.
19:1 Dung i ditogu si Latus ma Jesus, didokkon ma linsingan. 19:2 Jadi didandani angka soldadu ma sungsang duri bahen tumpal, diampehon ma i tu uluna; baju dapdap ma dialithon tu dagingna. 19:3 Dung i ro ma nasida tu jolona mandok: Tabi di Ho, ale raja ni Jahudi! Laos dipastapi ma Ibana. 19:4 Dung i ruar ma muse si Latus, didok ma tu angka Jahudi: Ida hamu ma, hutogihon do Ibana tu jolomuna, asa diboto hamu, na so adong jumpang ahu salana. 19:5 Laos ruar ma Jesus manjujung sungsang duri jala marbaju dapdap. Jadi didok si Latus ma tu nasida: Ida hamu ma Jolma i! 19:6 Asa dung diida angka sintua ni malim dohot angka naposo Ibana, dijouhon nasida ma: Parsilangkon, parsilangkon ma Ibana! Dung i didok si Latus ma tu nasida: Boan hamu ma Ibana, parsilangkon hamu ma; ai ndang jumpang ahu salana. 19:7 Gabe dialusi angka Jahudi ma Ibana, ninna ma: Marguru tu patiknami ingkon marutang hosa Ibana, ai dibahen do dirina Anak ni Debata. 19:8 Umbege i si Latus lam ganda ma biarna. 19:9 Dung i diulahi muse tu kantorna, didok ma tu Jesus: Sian dia do Ho? Alai ndang dialusi Jesus ibana. 19:10 Dung i didok si Latus ma tu Ibana: Ndang angkupanmu ahu mangkatai? Ndang diboto Ho, marhuaso ahu paluahon Ho, jala marhuaso pasilangkon Ho? 19:11 Jadi dialusi Jesus ma: Ndang adong huasom mangago Ahu, aut unang nilehon i tu ho sian ginjang. Dibahen i gumodang do dosa ni na pasahathon Ahu tu ho. 19:12 Jadi olat ni i ma dilului si Latus dalan paluahon Ibana. Alai manjoujou ma angka Jahudi, ninna do: Molo dipalua ho On, ndang aleale ni Kesar ho! Ai na mangalo Kesar i do ganup na mambahen dirina raja. 19:13 Asa dung dibege si Latus hata i, ditogihon ma Jesus haruar, laos hundul ma ibana di habangsa paruhuman na di inganan na margoar: Pantar batu, alai anggo di hata Heber: Gabbata. 19:14 I ma na masa di ari parhobasan Paska, mareak hos ni ari. Dung i didok ma tu angka Jahudi: Ida hamu ma rajamuna! 19:15 Alai digogo nasida ma manjouhon: Padao, padao ma I: Parsilangkon ma Ibana! Dung i didok si Latus ma tu nasida: Parsilangkononku ma rajamuna? Jadi dialusi angka sintua ni malim ma: Ndang adong rajanami dungkon ni Kesar i! 19:16 Dung i dipasahat ma Ibana tu nasida, asa di parsilangkon; jadi dijalo nasida ma Jesus. 19:17 Laos Ibana do mamorsan hau pinarsilang i, laho tu inganan na margoar partangkurahan; Golgata do goarna anggo di hata Heber. 19:18 Disi ma diparsilangkon nasida Ibana rap dohot dua halak na asing di lambungna, angkup be; di tongatonga ma ia Jesus. 19:19 Alai disurat si Latus ma sada boaboa, dipalohot ma i tu hau i. On do hatana: Jesus, halak Nasaret, raja ni Jahudi! 19:20 Jadi torop ma Jahudi na manjaha boaboa i, ai jonok tu huta i do hapajalan ni Jesus, jala tarsurat do i di hata Heber, di hata Rom dohot di hata Junani. 19:21 Dung i didok sintua ni angka Jahudi ma tu si Latus: Unang surat i: Raja ni Jahudi; alai na nidokna i ma nian: Ahu do raja ni Jahudi! 19:22 Dung i dialusi si Latus ma: Na husurat i, naung sinurat do i! 19:23 Asa dung diparsilangkon angka soldadu i Ibana, dibuat nasida ma angka abitna, diparopat ma i, di ganup soldadu sabagian be, dungkon ni sampesampena. Anggo sampesampe i ndang marpanjaruman, na ditonun sambing do i. 19:24 Gabe masipandohan ma nasida: Unang ma taribahi on, martondung ma hita taringot tusi, manang di ise i. Jadi jumpang ma Surat i, na mandok: "Dibagi nasida do abithu; tondung do didabu taringot tu sampesampengku." Asa songon i do pambahen ni angka soldadu. 19:25 Dung i jongjong ma di lambung ni Jesus na di hau pinarsilang i inana dohot paribanna dohot si Maria ni si Kleopas dohot si Maria Magdalena. 19:26 Anggo Jesus, dung diida, disi inana i dohot sisean haholongan ni rohana di lambungna, didok ma tu inana i: Ndi ma, inang, anakmi! 19:27 Dung i didok ma tu sisean i: Ndi ma, inangmi! Jadi olat ni i ma dijangkon sisean i ibana tu jabuna. 19:28 Jadi dung diboto Jesus, naung marujung saluhutna, asa jumpang na tarsurat i, ninna ma: Mauas Ahu! 19:29 Jadi adong ma disi isian ni tuak na asom, jadi dibutongi nasida ma limut tubagasan tuak na asom i, dipalohot ma i tu sada tolong, laho manurdukkon tu pamanganna. 19:30 Jadi dung dijalo Jesus na asom i, ninna ma: Nunga marujung! Dung i dipaunduk ma uluna, pasahathon tondina. 19:31 Ala tongon ari parhobasan ni pesta na balga, naeng ma unang di hau pinarsilang angka bangke di ari Sabbat i; ala ni i dipangido angka Jahudi ma tu si Latus, asa disuru na mangarosak haehaenasida jala dipaijur. 19:32 Gabe ro ma angka soldadu i, dirosak ma haehae ni na parjolo i, songon i do donganna na rap tarsilang dohot Jesus. 19:33 Alai dung sahat nasida tu Jesus, diida ma naung sanga mate Ibana, gabe ndang dirosak be haehaena. 19:34 Alai ditullangkon sada sian angka soldadu i ma mundimundina tu andora ni Jesus; jadi manigor puas ma sian i mudar mardongan aek. 19:35 Na marnidasa i do na mangkatindangkon i, jala sintong do na hinatindangkonna i. Ibana do umboto sintong ni na nidokna i, asa anggiat dohot hamu porsea. 19:36 Ai na masa do i, asa jumpang na tarsurat i, na mandok: "Ndang jadi ponggolon holiholina!" 19:37 Jala surat na asing muse mandok: "Berengonnasida do na tinullangnasida i!" 19:38 Dung salpu i dipangido si Josep na sian Arimatea ma tu si Latus, paijuronna bangke ni Jesus. Sisean ni Jesus do ibana, alai marsibuni do ala ni biarna mida angka Jahudi. Jadi dioloi si Latus ma i. Dung i ro ma ibana, dipaijur ma bangkena. 19:39 Alai ro ma nang si Nikodemus, i ma naung ro manopot Jesus bornginborngin najolo, diboan ma mir na marsaor aloe arga saratus hati. 19:40 Dung i dibuat nasida ma bangke ni Jesus, dibaluti ma tu dagangan rap dohot na hushus i mangihuthon adat pananomon ni Jahudi. 19:41 Alai adong ma mardonokkon hapajalanna i sada porlak, jala di bagasan porlak i adong sada tanoman na imbaru, na so dung hapeahan ni manang ise dope. 19:42 Asa tusi nama dipeakkon nasida Jesus, siala ari parhobasan ni Jahudi; ai jonok do tanoman i.
20:1 Dung i di ari parjolo dung salpu ari Sabbat, laho ma si Maria Magdalena sogot di na holom i dope tu tanoman i, jadi diida ma, naung dihindat batu i sian tanoman i. 20:2 Gabe marlojong ma ibana manopot si Simon Petrus dohot sisean na sada nari, haholongan ni roha ni Jesus, paboahon tu nasida: Nunga dibuat na mambuat Tuhan i sian tanomanna; ndang binoto, manang tudia ditaruhon. 20:3 Jadi borhat ma si Petrus dohot sisean na sada nari, jadi sahat ma nasida tu tanoman i. 20:4 Na rap marlojong do na dua i, gabe marhajoloan do sisean na sada, na humatop sian si Petrus, gabe parjolo ma ibana sahat tu tanoman i. 20:5 Jadi dipaunduk ma dirina, diida ma peak angka pangalilit; alai ndang bongot ibana. 20:6 Ro ma nang si Petrus sian pudina; dibongoti ma tanoman i jadi diida ma peak angka pangalilit i. 20:7 Anggo sekka panaputi ni uluna ndang rap dohot angka pangalilit i, pulik do dibalun tu ingananna. 20:8 Disi pe asa bongot nang sisean na sada, naung parjolo sahat tu tanoman i; dipanotnoti, gabe porsea ma ibana. 20:9 Ai ndang dope diantusi nasida hata ni Surat i na mandok: Ingkon hehe Ibana sian na mate. 20:10 Asa muli ma sisean na dua i. 20:11 Laos jongjong do si Maria dibalian ni tanoman i tumatangis, jadi di partangisna i dipaunduk ma ibana dompak tanoman i. 20:12 Gabe diida ma hundul disi surusuruan dua, parabit na marlinanglinang; na sada tartungkan julu on, na sada nari tartungkan inganan ni pat ni hapeahan ni bangke ni Jesus. 20:13 Didok nasida ma tu ibana: Boasa tangis ho, inang? Jadi dialusi ma nasida: Dibuat na mambuat do Tuhanki; ndang huboto, manang na tudia ditaruhon. 20:14 Mandok songon i, humusor ma ibana dompak pudi, gabe diida ma Jesus jongjong disi; alai ndang ditanda. 20:15 Dung i didok Jesus ma tu ibana: Boasa tangis ho, inang? Ise dilului ho? Jadi dirimpu rohana ma, tukang porlak i Ibana, gabe didok ma tu Ibana: Anggo hamu do mambuat Ibana, paboa hamu ma tu ahu, manang na tudia ditaruhon hamu asa hualap Ibana! 20:16 Dung i didok Jesus ma tu ibana: Maria! Jadi didompakkon si Maria ma Ibana huhut mandok: Ale Guru! (Rabbuni, anggo di hata Heber). 20:17 Jala didok Jesus ma tu ibana: Unang Ahu jama; ai ndang dope nangkok Ahu tu Ama i. Alai laho ma ho tu angka anggingki, dok ma tu nasida: Na laho nangkok ma Ahu tu Damang jala Amamuna, tu Debatangku jala Debatamuna. 20:18 Dung i laho ma si Maria Magdalena, dibaritahon ma tu angka sisean i: Nunga huida Tuhan i, jala angka on do hatana tu ahu. 20:19 Jadi dung bot ari, di ari parjolo dung salpu ari Sabbat, di naung sordak angka pintu ni inganan ni angka sisean i, ala ni biar ni rohanasida mida angka Jahudi, ro ma Jesus jongjong tu tongatonganasida, jadi didok ma tu nasida: Dame ma di hamu! 20:20 Jadi dung didok songon i, dipatuduhon ma tanganna dohot andorana tu nasida, gabe las ma roha ni angka sisean i, ala naung diida nasida Tuhan i. 20:21 Dung i diulahi Jesus ma mandok tu nasida: Dame ma di hamu! Songon sinuru ni Ama i Ahu, suruonku hamu. 20:22 Jadi dung didok songon i, mangombus ma Ibana dompak nasida, huhut ma didok: Jalo hamu ma Tondi Parbadia! 20:23 Molo disesa hamu dosa ni manang ise, naung sesa ma i; molo dipahot hamu dosa ni manang ise, hot do i. 20:24 Alai anggo si Tomas, sada sian na sampuludua i, na margoar Linduat, ndang rap dohot nasida, di na ro i Jesus. 20:25 Gabe didok angka donganna sisean ma tu ibana: Nunga huida hami Tuhan i! Alai dialusi ma nasida: Na so tupa porsea ahu, molo so huida di tanganna i bogas ni labang i, laos dijama jarijaringku bogas ni labang i, jala ia so dijama tanganku andorana i. 20:26 Dung salpu ualu borngin, pungu ma muse angka sisean i di bagasan, rap dohot si Tomas. Dung i ro ma Jesus, di na sordak i angka pintu, jongjong tu tongatonganasida, didok ma: Dame ma di hamu! 20:27 Dung i didok ma tu si Tomas: Boan tu on jarijarimi jala ida ma tanganku! Surdukkon ma tanganmi manjama andorangku! Unang ganggu roham; sai porsea ma ho! 20:28 Gabe ninna si Tomas ma mangalusi Ibana: Tuhanku jala Debatangku! 20:29 Jadi didok Jesus ma tu ibana: Ala diida ho Ahu, umbahen na gabe porsea ho. Martua ma angka na porsea, atik pe so diida! 20:30 Godang dope tanda angka na asing na pinatupa ni Jesus di jolo ni angka siseanna, angka na so sinurat di buku on. 20:31 Alai umbahen na sinurat angka on, asa porsea hamu, Jesus do Kristus, Anak ni Debata; jala asa hamu angka na porsea i dapotan hangoluan marhitehite Goarna.
21:1 Dung i dipatuduhon Jesus ma Ibana muse tu angka siseanna di topitao Tiberias. Jala songon on do pangalahona: 21:2 Pungu ma si Simon Petrus dohot si Tomas na margoar Linduat, angkup ni i si Natanael sian Kana na di Galilea dohot angka anak ni si Sebedeus, rap dohot dua nari sian angka siseanna i. 21:3 Gabe ro ma hata ni si Simon Petrus tu nasida: Laho ma ahu mardengke. Jadi didok nasida ma tu ibana: Dohot ma hami! Laos borhat ma nasida, bongot ma tu parau; alai ndang dapot nasida agia aha di na saborngin i. 21:4 Alai di na torang ari, jongjong ma Jesus di pasir; alai ndang ditanda angka sisean i Ibana. 21:5 Jadi didok Jesus ma tu nasida: Ndang adong dengkemuna, ale angka anaha, nanggo saotik? Jadi ro ma alusnasida: Ndang adong! 21:6 Dung i didok ma tu nasida: Sampakkon hamu ma jalamuna tu siamun ni parau i, asa dapotan hamu! Jala disampakkon nasida ma, gabe ndang tartait nasida be jala i dibahen godang ni dengke i. 21:7 Dung i didok sisean haholongan ni roha ni Jesus i ma tu si Petrus: Tuhan i do i! Jadi dung dibege si Simon Petrus, Tuhan i do i hape, dialithon ma abitna, ai ndang marabit hian ibana; dung i ditimbung ma tu tao i. 21:8 Alai marparau do angka donganna sisean i sahat, huhut sumarat jala na marisi dengke i; ai ndang sadia dao nasida sian darat i, arga duaratus elak nama. 21:9 Jadi dung sahat nasida ro di darat, diida ma gara disi dohot dengke peak di ginjangna, angkup ni roti. 21:10 Dung i didok Jesus ma tu nasida: Boan hamu ma tu on deba dengke sian angka na dapot hamu nangkin! 21:11 Gabe manaek ma si Petrus tu parau, disarat ma jala i tu darat, gok dengke na balga, saratus limapulu tolu toropna; atik pe na sa i toropna, ndang na maribak jala i. 21:12 Jadi didok Jesus ma tu nasida: Ro ma hamu mangan! Alai ndang adong manang ise sian angka sisean i, na hum roha manise Ibana: Ise do Ho? Ai diboto be, Tuhan i do Ibana. 21:13 Asa ro ma Jesus, dibuat ma roti i, diparlehon ma tu nasida, angka dengke i pe songon i do. 21:14 I ma patoluhalihon dipatuduhon Jesus Ibana tu angka siseanna, dung hehe Ibana sian angka na mate. 21:15 Asa dung mangan nasida, didok Jesus ma tu si Simon Petrus: Ale Simon, anak ni si Jonas, humolong do roham di Ahu sian angka on? Jadi didok ma tu Ibana: Olo, Tuhan; diboto Ho do holong ni rohangku di Ho! Jadi didok Jesus ma tu ibana: Parmahan i ma anak ni birubirungku! 21:16 Dung i ninna muse ma paduahalihon: Simon, anak ni si Jonas, holong do roham di Ahu? Jadi didok ma tu Ibana: Olo, Tuhan; diboto Ho do holong ni rohangku di Ho! Dung i didok ma tu ibana: Parmahan i ma angka birubirungku! 21:17 Dung i didok ma patoluhalihon tu ibana: Simon, anak ni si Jonas, holong do roham di Ahu? Jadi marsak ma roha ni si Petrus, ala patoluhalihon didok tu ibana: Holong do roham di Ahu? Jadi didok ma tu Ibana: Saluhutna, ale Tuhan, diboto Ho; Ditanda Ho do holong ni rohangku di Ho! Dung i didok Jesus ma tu ibana: Parmahan i ma angka birubirungku! 21:18 Na tutu situtu do na hudok on tu ho: Andorang umposo dope ho, ho do mangkohosi dirim, laho manopot lomo ni roham; alai dung matua ho, surdukkononmu ma tanganmu, jadi hohosan ni na leban ma ho jala togihononna ma ho tu na so hinalomohon ni roham. 21:19 Alai marhite sian hatana ondeng dipalumba do ibana, manang songon dia parmatena laho pasangaphon Debata. Jadi dung didok songon i, ninna ma mandok ibana: Ihuthon ma Ahu! 21:20 Dung i humusor ma si Petrus jadi diida ma mangihut sisean haholongan ni roha ni Jesus, i ma na hundul jumonok tu Jesus di na marsipanganon i; laos ibana do na manungkun uju i: Ise do i, Tuhan, na manjehehon Ho? 21:21 Asa dung diida si Petrus ibana, ninna ma mandok Jesus: Beha ma halak on, Tuhan? 21:22 Gabe didok Jesus ma tu ibana: Molo na lomo rohangku, naeng mian ibana, paima ro Ahu, ndang na ro di ho i; asal diihuthon ho Ahu! 21:23 Asa sar ma tu angka dongan hata on: Ndang mate sisean on! Alai ndang didok Jesus: Ndang mate ibana. On do tahe didok: Molo na lomo rohangku, naeng mian ibana, paima ro Ahu, ndang na ro di ho i! 21:24 I ma sisean i na mangkatindangkon angka on jala manurathon, jadi huboto hami, na tutu do na hinatindangkonna i. 21:25 Alai lan dope na asing na binahen ni Jesus; aut sinurathon i sadasada, ra ndang siat di portibi on di rohangku angka buku na sinuratan i.
1:1 Nunga sidung nian hubahen, ale Teopilus, barita na parjolo i, taringot tu saluhut ulaon dohot poda na pinungka ni Jesus, 1:2 sahat ro di ari hahihinsatna, dung jolo dipatihi Ibana marhitehite Tondi Parbadia angka apostel na pinillitna i. 1:3 Dung salpu haporsuhon na tinaonna i, dipatandaphon do dirina mangolu tu nasida marhitehite lan tanda, i ma na pinataridahonna dirina tu nasida leleng ni opatpulu ari, dohot mangkatahon taringot tu harajaon ni Debata. 1:4 Jadi di na domu Ibana dohot nasida, dipatihi ma, na so jadi meret nasida sian Jerusalem, so jolo dipaima bagabaga ni Ama i, na binegemuna i sian Ahu, ninna. 1:5 Ai aek do dididihon si Johannes i; alai Tondi Parbadia do didihononhon tu hamu, ndang pola piga ari nari! 1:6 Laos disungkun angka na pungu i ma Ibana, angka ninna ma: Pajongjongonmu ma saonari, ale Tuhan, Harajaon i di Israel? 1:7 Alai ninna ma mandok nasida: Ndang ro di hamu i, umboto taonna manang ombasna; na binuhul ni Ama i guru di huasona sambing. 1:8 Alai jaloonmuna do hagogoon ni Tondi Parbadia na songgop tu hamu, gabe sitindangingku ma hamu di Jerusalem dohot di sandok Judea dohot di Samaria, sahat ro di ujung ni tano on. 1:9 Jadi dung didok songon i, tarhinsat ma Ibana dipanotnoti nasida: Dung i diholipi ombun i ma Ibana sian jolo ni matanasida. 1:10 Di na tinuluthon nasida dope Ibana na laho i tu ginjang, nunga jongjong di lambungnasida dua halak parulos na marlinanglinang. 1:11 Angka na mandok: O hamu halak Galilea, aha ma sai jongjong hamu mamerengi dompak ginjang? Anggo Jesus i, na tarhinsat sian lambungmuna tu banua ginjang i, na ro do Ibana sogot, songon na niidamuna Ibana laho dompak banua ginjang i. 1:12 Dung i mulak ma nasida tu huta Jerusalem sian dolok na margoar dolok Jetun, na jonok tu Jerusalem; na hadalanan di ari Sabbat do daona. 1:13 Jadi dung sahat, nangkok ma nasida tu bilut parginjang, parmianannasida, i ma si Petrus, si Johannes, si Jakobus dohot si Andreas, si Pilippus dohot si Tomas, si Bartolomeus dohot si Mateus, si Jakobus, anak ni si Alpeus, dohot si Simon Silotes, dohot si Judas, anak ni si Jakobus. 1:14 Angka i do saluhutna mandatdati martangiang sian sada ni rohanasida, rap dohot angka parompuan dohot si Maria, ina ni Jesus, ro di angka anggina i. 1:15 Uju i hehe ma si Petrus di tongatonga ni angka donganna (ia torop ni nasida na pungu i, arga saratus duapulu halak do), ninna ma: 1:16 Hamu angka dongan hahaanggi, ingkon saut do na nidok ni surat na nilumbahon ni Tondi Parbadia marhitehite soara ni si Daud taringot tu si Judas, naung gabe partogi ni angka na manangkup Jesus. 1:17 Ai tarrajum do nian ibana tu hami, jala parjambar do ibana di tohonan i. 1:18 Onpe, ladang do dituhor sian upa ni hageduhon i; jadi di na tungkap ibana madabu, mapultak ma dagingna, gabe sabur ma nasa raoanna. 1:19 Saluhut pangisi ni huta Jerusalem do umbotosa, umbahen na digoari ladang i di hatanasida Akeldamak, astuanna: Tano mudar. 1:20 Ai tarsurat do di buku ni angka Psalmen: "Sai tarulang ma parmiananna i, unang ma adong na manginganisa!" angkup ni i: "Jaloon ni na asing ma tohonanna!" 1:21 Antong, ingkon gabe dongannami sihatindangkon haheheon ni Tuhan Jesus ma sada sian angka na mandongani hami, saleleng Ibana marmeangmuli di hita on. 1:22 Olat ni pandidion ni si Johannes ro di ari hahihinsatna i sian hita. 1:23 Dung i dipajongjong nasida dua halak, si Josep na margoar si Barsabas, na marimbang goar Titius Justus, dohot si Matias. 1:24 Jadi martangiang ma nasida: Ale Tuhan, sidodo roha ni saluhutna, patandahon ma, manang ise sian na dua on dipillit Ho, 1:25 gabe sijalo tohap di ulaon on dohot tohonan apostel, na tinadingkon ni si Judas, naung laho manopot sitopotonna i! 1:26 Laos marsijomput na sinurat ma nasida, jadi dapot ma si Matias, gabe tarrajum ma ibana dongan ni apostel na sampulusada i.
2:1 Jadi dung jumpang ari palimapuluhon i (Pentakoste), pungu ma nasida saluhutna di sada inganan. 2:2 Jadi masa ma tompu soara sian ginjang songon parngongos ni alogo na gogo mamolus, gabe digohi ma sandok bagas hundulannasida i. 2:3 Jadi tarida ma di nasida suman tu dila ni api na marjillamjillam, disonggopi ma ganup nasida. 2:4 Gabe gok Tondi Parbadia ma nasida saluhutna, jadi mamungka marpangkuling na asing ma nasida, marguru tu pangalehon ni Tondi i tu nasida mangkatahonsa. 2:5 Alai adong ma angka Jahudi na maringan di Jerusalem, halak na daulat sian saluhutna bangso na ditoru ni langit. 2:6 Alai di na masa soara i, marpungu ma natorop i; jadi tarhalomong ma nasida, ai ganup umbege nasida mangkatahon di hatana be. 2:7 Jadi tarmali ma nasida saluhutna jala longang, angka ninna ma: Nda halak Galilea saluhut nasida na mangkatai i? 2:8 Boasa ganup hita umbege di hata hasomalanta be? 2:9 Halak Partia dohot Media dohot Elamit dohot angka na maringanan di Mesopotamia, di Judea dohot di Kappadosia, di Pontus dohot di Asia. 2:10 Di Prigia dohot di Pampilia, di tano Misir dohot di angka luat Libia na tungkan Kirene dohot halak Rom na maringanan dison, angka halak Jahudi ro di angka parguru, 2:11 angka halak Kreta dohot halak Arab; di hatanta be do itabege dihatahon nasida angka ulaon habalgaon ni Debata! 2:12 Jadi tarhalomong ma nasida saluhutna, jut be ma rohana, angka ninna ma sama nasida: Na marhua do i ulaning? 2:13 Alai manginsahi do na deba, angka ninna ma: Gok anggur na tonggi do nasida. 2:14 Jadi hehe ma si Petrus rap dohot na sampulusada i, dipagogo ma soarana, dipanghulingi ma nasida: Hamu halak Jahudi jala sude hamu na maringanan di Jerusalem, boto hamu ma on, jala pasiat hamu ma hatangkon tu pinggolmuna! 2:15 Ai apala na mabuk hami on, songon na tinuhashonmuna, ai pungkul sia dope nuaeng. 2:16 Na hinatahon ni panurirang Joel do tahe na masa on; ai ninna do: 2:17 "Di angka ari parpudi, ninna Debata, usehononku ma sian Tondingku, tu nasa na mardaging, gabe manurirangi ma angka anak dohot borumuna, maralatan ma angka dolidolimuna, jala marnipi ma angka natuatuamuna." 2:18 "Tu angka naposongku baoa dohot boruboru pe usehononku ma sian Tondingku di angka ari i, asa manurirangi nasida." 2:19 "Dung i patupaonku ma angka halongangan di ginjang di langit, angka tanda di toru, di tano i, i ma mudar dohot api dohot timus na marhalimontang." 2:20 "Muba ma mata ni ari gabe mangkolom, dohot bulan i gabe songon mudar, patujolo ni haroro ni ari ni Tuhan i, na balga i." 2:21 "Jadi disi ma malua ganup na manjou Goar ni Tuhan i." 2:22 Hamu angka halak Israel, tangihon hamu ma hata on: Dipatandaphon Debata do tu hamu Jesus na sian Nasaret i, hinorhon ni hagogoon, halongangan dohot tanda, angka na pinatupa ni Debata di tongatongamuna, songon naung binotomuna i. 2:23 Marhite sian tangan ni na so marpatik i digantungkon jala dipusa hamu Ibana, dung dipasahat Debata sian tahina na hot i dohot sian pamotoanna hian. 2:24 Ibana do dipahehe Debata, dung diharhari bernit ni hamatean, ai ndada na hatiopan hamatean i Ibana. 2:25 Ai marhahonaan tu Ibana do pandok ni si Daud: "Tongtong do huida Tuhanki di jolongku, ai di siamunhu do Ibana, asa unang 2:26 "Ala ni i las do rohangku jala marolopolop soarangku; dagingku pe maradian do huhut mangkirim." 2:27 "Ai ndang pasombuonmu diringku di banua toru jala ndang loasonmu na badiami marnida habusukon." 2:28 "Nunga dipabotohon Ho tu ahu angka dalan hangoluan, gohanmu do ahu halalas ni roha di adopanmi!" 2:29 Hamu angka dongan, na jadi ma ahu marhiras ni roha mandok tu hamu: Ia ompunta si Daud, na mate do ibana jala tartanom; di hita on do tanomanna rasirasa sadari on. 2:30 Antong, panurirang do ibana jala diboto do, naung diuarihon Debata tu ibana, pabangkitonna do pomparanna tu atas habangsana i. 2:31 Asa sian pamotoanna hian dilumbahon ibana disi haheheon ni Kristus i, paboa na so pasombuon Ibana di banua toru jala na so idaon ni dagingna i habusukon. 2:32 I ma Jesus, naung pinahehe ni Debata; saluhut do hami mangkatindangkonsa. 2:33 Asa dung dipatimbul Debata Ibana tu siamunna, dijalo ma sian Ama i Tondi Parbadia na pinarbagabaga i, gabe diusehon ma i, songon naung niida jala binegemuna i. 2:34 Ai ndada si Daud i nangkok tu banua ginjang, alai didok ibana: "Ninna Tuhan i do mandok Tuhanku: Hundul ma Ho tu siamunhon," 2:35 "paima hupatunduk angka musum, bahen sidegedegean ni patmu!" 2:36 Antong, tangkas situtu ma diboto sandok bangso Israel: Jesus na pinarsilangkonmuna, i ma bangkit Tuhan jala Kristus dibahen Debata! 2:37 Jadi umbege i, ditorushon ma rohanasida, dung i didok nasida ma tu si Petrus dohot tu angka donganna apostel: Aha nama sibahenonnami, ale angka dongan? 2:38 Alai didok si Petrus ma tu nasida: Pauba hamu ma rohamuna, dung i padidihon hamu ma ganup hamu tubagasan Goar ni Jesus Kristus, bahen hasesaan ni dosamuna, asa dijalo hamu silehonlehon i, i ma Tondi Parbadia i. 2:39 Ai di hamu do bagabaga i dohot di angka anakkonmuna ro di saluhut angka na dao, manang piga na naeng jouon ni Tuhan Debatanta dope. 2:40 Lan dope hata na asing dihatindangkon ibana, laho mangapoi nasida, ninna do: Sai olo ma hamu malua sian bangso na geduk on! 2:41 Asa tardidi ma angka na manjangkon hatana i, gabe arga toluribu ma torop ni halak na manamba di na sadari i. 2:42 Alai marsihohot do nasida di poda ni angka apostel marparsaoran, marulaon na badia jala martangiang. 2:43 Alai songgop ma biar tu roha ni saluhutna; masa ma lan halongangan dohot tanda di Jerusalem, dipatupa angka apostel i. 2:44 Alai sai domu do saluhut angka na porsea i, jala songon hatopan dirajumi nasida saluhut artanasida. 2:45 Tupa digadisi nasida arta dohot ugasannasida, disagihon ma tu saluhutna marguru tu haseana di ganup. 2:46 Ganup ari do nasida tongtong saroha di bagas joro i, jala jojor jabu do nasida marulaon na badia, marlas jala marbulus ni roha nasida marsipanganon. 2:47 Huhut mamuji Debata jala lomo do roha ni nasa natorop mida nasida. Alai ganup ari do ditambai Debata tu na sahuria i angka na dapotan haluaon.
3:1 Dung i rap nangkok ma si Petrus dohot si Johannes tu bagas joro, di pungkul tolu di tingki partangiangan. 3:2 Jadi diusung na mangusung ma sahalak na pangpang sian hatutubuna; ganup ari do ditaruhon nasida ibana tu lambung pintu ni bagas joro na margoar na uli, asa dipangido asiasi sian angka na bongot tu bagas joro i. 3:3 Jadi di na niidana si Petrus dohot si Johannes, naeng bongot tu bagas joro i, dipangido ma asiasi. 3:4 Alai dipanotnoti si Petrus dohot si Johannes ma ibana, ninna ma: Bereng dompak hami! 3:5 Dung i dibereng ma nasida, dihirim rohana jaloonna manang aha sian nasida. 3:6 Alai ninna si Petrus ma: Anggo perak dohot sere ndang adong di ahu; alai na adong di ahu, hulehon ma tu ho: Marhitehite Goar ni Jesus Kristus na sian Nasaret i, mardalani ma ho! 3:7 Laos ditangkup ma tanganna siamun pahehe ibana, jadi pintor hot ma haehaena dohot totna. 3:8 Dung i manigor hehe ma ibana, jongjong ma huhut mardalan, dung i bongot ma ibana rap dohot nasida tu bagas joro i mardalan jala mirjahirjak huhut mamuji Debata. 3:9 Jadi diida natorop saluhutna do ibana mardalani dohot mamuji Debata. 3:10 Alai diboto nasida, ibana do i, na hundul nasailaon mangidoido di lambung pintu na uli na di bagas joro i; jadi mansai longang ma rohanasida jala tarhalomong mida na masa tu ibana i. 3:11 Alai dung sai udur ibana dohot si Petrus dohot si Johannes, marrongoman ma saluhut halak tu nasida, tu inganan na margoar emper ni si Salomo, dibahen songgot ni rohanasida. 3:12 Alai marnida i si Petrus, ninna ma mandok natorop i: Hamu, halak Israel, boasa longang rohamu mida on, boasa hami diberengi hamu, songon na hira gogonami sandiri manang hadaulatonnami mambahen mardalan halak on? 3:13 Na dipasangap Debata ni si Abraham, si Isak dohot si Jakkob, Debata ni angka amanta i do Jesus naposona i, na pinasahat jala na sinoadahonmuna di jolo ni si Latus na mandok uhumna, paluaon Ibana nian. 3:14 Alai disoadahon hamu do na badia jala partigor i; dipangido hamu do, lehonon tu hamu pamunu i. 3:15 Alai dipusa hamu do partogi tu hangoluan. I ma dipahehe Debata sian na mate; hami do angka sitindangi ni i! 3:16 Asa ala ni haporseaon di Goarna do dipargogoi Goarna halak on na niida jala na tinandamuna, gabe dilehon haporseaon na sian Tuhan i do hahisaron tu ibana di jolomuna saluhutna. 3:17 Onpe, hamu ale angka dongan, huhilala, na hurang boto do hamu, umbahen na diulahon hamu i, songon i do nang angka sintuamuna. 3:18 Alai dipasaut Debata do disi na pinaboana hian marhitehite hata ni saluhutna panurirang, mandok: Sitaon na bernit do anggo Kristusna. 3:19 Antong, pauba jala paulak hamu ma rohamuna, asa tarsesa dosamuna, 3:20 asa anggiat ro angka ari hahilasan sian adopan ni Tuhan i jala asa disuru tu hamu Jesus Kristus, songon naung tinahina i hian. 3:21 Dijangkon banua ginjang do Ibana jolo, paima ro tingki hasosonggop ni nasa na hinatahon ni Debata di na robi marhite sian hata ni angka panurirangna na badia i. 3:22 Ai didok si Musa do: "Paheheon ni Tuhan Debatanta do panurirang sada sian angka hahaanggimuna i songon ahu on; Ibana do sitangihononmuna di saluhut sidohononna tu hamu. 3:23 Alai sirotongkononhon ma disi sian bangso i nasa na so tumangihon panurirang i!" 3:24 Alai nasa panurirang angka na manurirangi, mamungka sian si Samuel ro di angka na sian pudina i, angka ari on do dibaritahon nasida. 3:25 Hamu do anak ni angka panurirang i jala partohap di padan na binahen ni Debata tu angka amanta i, uju na nidokna i tu si Abraham: "Dapotan pasupasu ma saluhut bangso ni tano on marhite sian Pomparanmi!" 3:26 Jumolo do di hamu dipahehe Debata Naposona i, disuru do Ibana mamasumasu hamu, angka na mulak sian hajahatonmuna be.
4:1 Alai di na manjamitai natorop i nasida, ditahopi angka malim i dohot sintua ni bagas joro i rap dohot angka Saduse ma nasida. 4:2 Muruk ma i, ala diajari nasida natorop i jala dibaritahon haheheon sian na mate marhite sian Jesus. 4:3 Jadi ditangkup ma nasida, didabu ma nasida saborngin i tu hurungan, ai nunga bot ari. 4:4 Alai gabe porsea do torop sian angka naung umbege jamita i, pola gok limaribu torop ni angka baoa. 4:5 Alai di torang ni arina i marpungu ma di Jerusalem angka pangituai nang angka sintua ro di angka sibotosurat, 4:6 rap dohot si Hannas, sintua ni malim i, dohot si Kayapas, si Johannes dohot si Aleksander ro di sude sisolhot ni sintua ni malim i. 4:7 Jadi dipajongjong ma nasida tu tongatonga, dipamanat ma: Gogo ni ise manang goar ni ise dipangasahon hamu patupahon i? 4:8 Dung i gok Tondi Parbadia ma si Petrus, didok ma tu nasida: Hamu angka na sangap ni bangso on jala pangituai! 4:9 Molo pola tangkasan hami sadari on ala ni denggan basa i na tu sada halak na hansitan, manang marhite sian ise ibana malum, 4:10 boto hamu ma saluhutna ro di sude bangso Israel: Jongjong pe halak on hisar di jolomuna, sandok marhitehite Goar ni Jesus Kristus na sian Nasaret i do, na pinarsilangkonmuna, na pinangolu ni Debata sian na mate! 4:11 Ibana do "batu na binolongkon ni hamu angka pande bagas i, naung gabe batu parsuhisuhi." 4:12 Asa ndang adong haluaon di bagasan manang ise na asing; ai ndang adong goar na asing ditoru ni langit dilehon tu jolma, parhiteanta tu haluaon. 4:13 Ia nasida, longang do marnida hiras ni roha ni si Petrus dohot si Johannes i, ai torang do diboto, na so sijama surat jala na so marsiajar nasida; ditanda do, nasida dongan ni Jesus najolo. 4:14 Alai diida do jongjong disi rap dohot nasida halak naung malum i, jadi ndang dapotsa be manang aha sidohononna. 4:15 Gabe disuru nama nasida tu balian ni parrapotan i, dung i masitungkaran pingkiran ma nasida, angka ninna ma: 4:16 Dia ma bahenonta tu angka halak on? Ai tandap do tanda na pinamasanasida on; saluhut pangisi ni huta Jerusalem do umbotosa jala ndang tarsoadahon hita. 4:17 Alai asa unang lam rarat tu natorop i, gogo ma nasida taasupi, asa sandok unang be marjamita nasida tu halak mangasahon Goar i. 4:18 Dung i dijou ma nasida, dirarang ma, sandok na so tupa be nasida marjamita manang mangajari mangasahon Goar ni Jesus. 4:19 Alai ninna si Petrus dohot si Johannes ma mangalusi: Hamu ma manimbang, manang na tigor i di roha ni Debata, molo tangian hami di hamu asa di Debata. 4:20 Ai ndang tarbahen hami so mangkatahon naung huida jala hubege hami. 4:21 Alai lam diasupi ma nasida, dung i dipalua ma, ala so jumpang nasida dalan manguhumi nasida dibahen natorop i, ai saluhut do mamuji Debata marningot na masa i. 4:22 Ai lobi opatpulu taon do umur ni jolma na pinamalum i. 4:23 Alai dung malua nasida, didapothon ma angka dongannasida, jadi dibaritahon ma sude na nidok ni angka sintua ni malim dohot angka pangituai tu nasida. 4:24 Jadi dung dibege nasida i, sasoara ma nasida mandok tu Debata: O ale Tuhan, Ho do manjadihon langit dohot tano dohot laut ro di nasa isina i! 4:25 Hinorhon ni Tondi Parbadia dihatahon Ho do marhite sian soara ni amanami, si Daud naposomu, songon on: "Boasa ogaoga halak parbegu jala na so marniula dipingkiri angka bangso?" 4:26 "Na hehe do angka raja ni tano on jala marpungu do angka panggomgomi laho mangalo Tuhan Kristusna i." 4:27 Ai tutu ma naung marpungu di huta on si Herodes dohot Pontius Latus rap dohot halak parbegu dohot bangso Israel maralohon Jesus, naposom na badia i, na miniahanmi, 4:28 laho pasauthon hasosonggop ni na tiningki ni tanganmu dohot roham hian. 4:29 Onpe, ale Tuhan, bereng ma asupasupnasida, jala lehon tu angka naposomon hiras ni roha situtu, laho mangkatahon hatam! 4:30 Huhut surdukkon ma tanganmu, laho patupahon hahisaron ro di angka tanda dohot halongangan marhitehite Goar ni Jesus, naposom na badia i! 4:31 Jadi dung martangiang nasida, humuntal ma inganan parpunguannasida jala gok Tondi Parbadia ma nasida saluhutna, gabe marhiras ni roha ma nasida mangkatahon hata ni Debata. 4:32 Alai saroha saoloan do angka na porsea na sapunguan i; jala ndang adong nanggo sada sian angka paradongan na mandok: Hapunjunganna artana i, hatopan do i saluhutna dietong. 4:33 Jadi marhagogoon situtu ma angka apostel i, mangkatindangkon haheheon ni Tuhan Jesus i, jala tung lomo situtu do roha ni halak mida sude nasida. 4:34 Ai ndang adong manang ise nasida hurangan; ai ia adong pe sian nasida parhauma manang parjabu, digadisi do i, dung i diboan ma tuhor ni na ginadisna i. 4:35 Dipeakkon ma i tujolo ni angka apostel, dung i disagihon nasida ma i tu angka na hurangan. 4:36 Jadi adong ma sahalak Lepi sian pulo Siprus, i ma si Josep, na ginoar ni angka apostel si Barnabas (mandok: Anak ni pangapulon). 4:37 Digadis ma hauma golatna, diboan ma hepeng i, laos dipeakkon ma tujolo ni angka apostel i.
5:1 Adong ma uju i sahalak na margoar si Ananias rap dohot dongan saripena si Sapira, na manggadis tanona. 5:2 Mardos ni roha ibana dohot dongan saripena, manamondingkon tuhorna i deba; diboan ma na deba nari, dipeakkon ma tujolo ni angka apostel. 5:3 Alai ninna si Petrus ma: Oe Ananias, naung digohi sibolis i do hape roham, laho manggabusi Tondi Parbadia i dohot mamorso deba tuhor ni tano i. 5:4 Ia ditiop ho i, nda gong di ho; digadis ho pe i, nda laos tong guru di ho? Dia do umbahen na tubu roham, mambahen songon i! Ndada jolma na ginabusanmi disi, Debata do! 5:5 Alai disi dibege si Ananias hata ondeng, runggang ma ibana, laos tos hosana. Jadi biahaton situtu ma sude na umbegesa. 5:6 Jadi hehe ma angka na umposo, disaputi ma bangkena, diusung ma tu balian laho mananom. 5:7 Alai salpu arga tolu jom ro ma dongan saripena i, ndang dope diboto na masa i. 5:8 Jala dipanghulingi si Petrus ma ibana: Paboa ma tu ahu: Na sa on do digadis hamu tano i? Olo, na sa i do, ninna. 5:9 Alai ninna si Petrus ma mandok ibana: Boasa tung saroha hamu mangunjuni Tondi ni Tuhan i? Tagam ma, na mandok masuk ma angka naung mananom dongan saripem; usungonnasida ma nang ho tu balian! 5:10 Dung i pintor runggang ma ibana tu jolona, laos tos hosana. Jadi di na bongot i angka na umposo i, nunga mate ibana didapot jala diusung ma bangkena tu balian, ditanom ma tulambung ni dongan saripena i. 5:11 Jadi hatahutan situtu ma sude na sahuria i ro di nasa na umbegesa. 5:12 Alai masa do godang angka tanda dohot halongangan marhite sian tangan ni angka apostel i tu natorop; saroha do nasida saluhutna, marpungu do nasida tu emper ni si Salomo. 5:13 Alai sian na leban i ndang adong na hum rohana pasaorhon dirina tu nasida; diparsangapi natorop i do nasida tahe. 5:14 Alai lam tamba ma angka na porsea di Tuhan i, torop baoa nang boruboru. 5:15 Pola dipamboan halak do angka na hansitan tu alaman, dipeakkon ma tu podoman dohot tu amak, asa anggiat hona halinu ni si Petrus i deba sian nasida, jumpa ro ibana. 5:16 Alai dohot do torop halak sian angka huta humaliang ro tu Jerusalem, mamboan angka na marsahit dohot angka na niarsahan ni tondi na hodar, gabe malum ma nasida saluhutna. 5:17 Alai hehe ma sintua ni malim i dohot saluhut angka donganna, i ma horong ni halak Saduse, gok rimas rohanasida. 5:18 Jadi dilaluhon ma tangannasida tu angka apostel i, didabu ma nasida tu hurungan hatopan. 5:19 Alai bornginna i diungkap surusuruan ni Tuhan i ma angka pintu ni hurungan i, ditogihon ma nasida tu balian, didok ma: 5:20 Laho ma hamu; di bagas joro ma hamu jongjong, mangkatahon tu natorop i saluhut hata hangoluan i! 5:21 Jadi dung dibege nasida i, sogot ma nasida laho tu bagas joro laho mangajari. Alai ro ma sintua ni malim i dohot angka donganna, dipapungu ma rapot godang dohot saluhut sintua ni angka anak Israel; dung i disuru ma tu hurungan mangalap nasida. 5:22 Alai dung sahat ro disi angka naposo i, ndang jumpangsa nasida di hurungan i, jadi mulak ma nasida paboahonsa, ninna ma: 5:23 Momos do nian hurungan i hudapot hami, angka parjaga pe jongjong di jolo ni angka pintu i; alai dung huungkap hami, ndang jumpang hami manang ise di bagasan. 5:24 Asa dung dibege sintua ni bagas joro i dohot angka sintua ni malim boaboa i, jut ma rohanasida mamingkiri, manang dia astuan ni i. 5:25 Alai ro ma na mamaritahon tu nasida: Dibagas joro do hape jongjong nasida na hinurungkonmuna i, mamodai natorop i. 5:26 Dung i laho ma sintua i rap dohot angka naposo mangalap nasida; alai ndada gogo dibahen, ai mabiar do nasida mida natorop, aik boha didangguri nasida maon. 5:27 Asa dung diboan, dipajongjong ma nasida tujolo ni rapot godang, dung i dipamanat sintua ni malim i ma nasida, ninna ma: 5:28 Gomos situtu do nian hatanami mangorai hamu, na so jadi be hamu mangajari mangasahon Goar i, hape lam digohi hamu do huta Jerusalem podamuna i; na naeng parsapatahononmuna mudar ni Halak i tu hami? 5:29 Dung i ninna si Petrus dohot angka apostel i ma mangalusi: Ingkon oloan do iba di Debata asa di jolma! 5:30 Dipahehe Debata ni angka amanta do Jesus, na pinusamuna, uju digantung hamu Ibana tu hau. 5:31 Tu siamunna do dipabangkit Debata Ibana gabe Partogi jala Sipalua, laho mangalehon tu halak Israel hamubaon ni roha dohot hasesaan ni dosa. 5:32 Hami do panindangi di hata on dohot Tondi Parbadia, na nilehon ni Debata tu angka na mangoloi Ibana. 5:33 Alai umbege i nasida, digotapi ma rohanasida jadi diputushon ma, sipusaon do nasida. 5:34 Alai hehe ma di rapot i sahalak Parise, na margoar Gamaliel, sibotopatik, na sangap do ibana di roha ni natorop i, didokkon ma paruaron nasida satongkin. 5:35 Dung i didok ma tu nasida: Hamu halak Israel, manat ma hamu di sibahenonmuna tu angka jolma on! 5:36 Hehe do najolo si Teudas, dipabalga dirina, pola arga opatratus halak mangihuthon ibana, gabe tarbunu do ibana, marserak do saluhutna na mangihuthon ibana, gabe soada be. 5:37 Di pudina hehe muse si Judas, halak Galilea i, di na tarsurat i saluhut halak, jadi torop do dibolabola ditogihon; alai dohot do ibana lengse, gabe marserak sudena na mangihuthon ibana. 5:38 Asa on ma hatangku: Unang hahua hamu be angka halak i, pasombu hamu ma nasida; ai molo sian jolma tahi dohot ulaon on, na laho sega ma i. 5:39 Alai molo sian Debata, ndang taragohon hamu nasida; so tung gabe tardapot hamu maon angka sialo Debata! 5:40 Dioloi nasida ma ibana, dijou ma angka apostel i, dilinsingi ma nasida jadi diorai ma mangkatahon mangasahon Goar ni Jesus, dung i dipalua ma. 5:41 Alai las do rohanasida, laho ruar sian jolo ni rapot i, ala tau nasida dirajumi Debata manaon lealea humongkop Goar i. 5:42 Jadi ndang mansohot nasida ariari di bagas joro nang jojor jabu pe, mangajarhon dohot mamaritahon Kristus Jesus i.
6:1 Alai di angka ari i lam manamba ma torop ni sisean i, jadi marmungutmungut ma halak Junani dompak halak Heber, ala tartading angka parompuan na mabalu sian nasida di pangurupion ariari. 6:2 Jadi diparia na sampuludua i ma sandok huria i, didok ma: Ndang denggan hupapudi hami hata ni Debata, laho paturehon angka asiasi. 6:3 Onpe, ale angka dongan, diori hamu ma sian tongatongamuna pitu halak na denggan baritana, angka na gok Tondi jala na pantas marroha, sipabangkitonta tu ulaon i. 6:4 Alai anggo hami, tangiang dohot ulaon jamita i ma tong huhapadothon hami. 6:5 Jadi lomo ma roha ni na sahuria i di hata i; dipillit ma si Stepanus, sada halak na gok haporseaon dohot Tondi Parbadia, dung i si Pilippus, si Prokorus, si Nikanor, si Timon dohot si Parmenas, angkup ni i si Nikolaus, sada parguru sian Antiokia. 6:6 Angka i ma dipajongjong tujolo ni angka apostel i, jala martangiang ma huhut mangampehon tangan tu nasida. 6:7 Jadi lam rarat ma hata ni Debata, ganda situtu ma torop ni angka sisean di Jerusalem; angka malim pe, torop do mangoloi porsea. 6:8 Alai na gok asi ni roha dohot hagogoon si Stepanus, dipatupa do halongangan dohot tanda angka na balga di adopan ni natorop i. 6:9 Gabe hehe ma deba angka na sian parguruan na margoar Libertini dohot sian Kirene dohot sian Aleksanderia dohot angka na sian Kilikia dohot sian Asia marsual dohot si Stepanus. 6:10 Alai ndang taralo nasida hapistaranna dohot Tondi i na mangajari ibana. 6:11 Gabe dipajuju nasida ma deba halak na mandok: Hubege hami do ibana mandok hata barangsi mangapasi si Musa dohot Debata. 6:12 Jadi digintali nasida ma natorop i ro di angka sintua dohot angka sibotosurat, laos hehe ma nasida, ditangkup ma ibana, diboan ma tujolo ni rapot godang. 6:13 Dung i dipajongjong nasida ma angka sitindangi gapgap na mandok: Ndang na mansadi halak on mangkata inganan na badia i nang patik i. 6:14 Ai hubege hami do ibana mandok: Lohaan ni Jesus sian Nasaret i ma joro i, paubaonna ma adat na tajalo sian si Musa. 6:15 Jadi dipanotnoti saluhut parrapot i ma ibana, jala songon bohi ni surusuruan ni Debata do bohina diida nasida.
7:1 Dung i didok sintua ni malim i ma: Atehe, na tutu do i? 7:2 Jadi dialusi ma: Hamu angka hahaanggi dohot angka damang, tangihon hamu jolo! Dipataridahon Debata na marsangap i do Ibana tu amanta si Abraham, uju di Mesopotamia ibana, andorang so maringan di huta Haran dope. 7:3 Ninna ma mandok ibana: Bungkas ma ho sian tanomi dohot sian donganmu sabutuha; topot ma tano sipatuduhononku tu ho! 7:4 Jadi laho ma ibana sian tano Kasdim maringan tu huta Haran; dung i sian i muse, dung mate amana i, dipaunsat do ibana tu tano niingananmuna on nuaeng. 7:5 Ndang dope dilehon anggo golat tu ibana disi, nanggo na santopap, jadi diparbagabaga do, lehononna tu ibana tano i, asa ibana nampunasa ro di pomparanna, andorang so adong dope anakna. 7:6 Alai songon on do didok Debata: "Gabe na hinomit ma pomparanmu di tano na leban; parhatobanon jala paporsukporsukkon ni halak do nasida leleng ni opatratus taon". 7:7 "Dung i uhumonku ma bangso na nioloannasida i, ninna Debata; i pe asa bungkas nasida sian i, dung i sombaonnasida ma Ahu di inganan on." 7:8 Laos dilehon ma tu ibana padan parsunaton. Dung songon i, ditubuhon ma si Isak, disunat ma ibana di ari paualuhon; jadi disunat si Isak ma muse si Jakkob; laos songon i dibahen si Jakkob tu ompunta na sampuludua i. 7:9 Dung i dilatei angka ompunta i ma si Josep, digadis ma ibana tu tano Misir; alai didongani Debata do ibana. 7:10 Jala dipalua do ibana sian saluhutna haporsuhonna, gabe dilehon tu ibana asi ni roha dohot hapistaran di jolo ni Firaun, raja ni Misir i, na mamampe ibana gabe pangarajai di tano Misir ro di saluhut na di bagasna i. 7:11 Dung i songgop ma haleon tu liat tano Misir dohot tu tano Kanaan, gabe porsuk ma diae, jadi ndang jumpangan sipanganon be angka amanta i. 7:12 Alai dibege si Jakkob ma, adong sipanganon di tano Misir, jadi dipaborhat ma angka amanta i tusi parjolo sahali. 7:13 Dung i di na paduahalihon i dipatandahon si Josep ma ibana tu hahaanggina, laos torang ma di raja Firaun i partubu ni si Josep. 7:14 Alai disuru si Josep ma na manjou amana i, si Jakkob, rap dohot saluhutna donganna sabutuha; pitupulu lima do toropnasida. 7:15 Asa tuat ma si Jakkob tu tano Misir, dung i mate ma ibana nang angka amanta i. 7:16 Dung i ditaruhon ma nasida tu Sikem, dipeakkon ma tu tanoman, na tinuhor ni si Abraham sian angka anak ni si Hemor disi. 7:17 Alai dung lam jonok tingki na pinarbagabaga ni Debata, na niuarihonna tu si Abraham i, lam sopar ma bangso i jadi matorop mabue ma nasida di tano Misir i. 7:18 Paima pampe raja na asing, na so umboto si Josep i. 7:19 Jadi bisuk ma dibahen mangago bangsonta, dijahati do angka amanta, gabe dibolongkon posoposonasida, asa unang mangolu. 7:20 Jadi di tingki i ma tubu si Musa, jala lomo do roha ni Debata mida ibana. Leleng ni tolu bulan do ibana diparmudumudu di bagas ni amana i. 7:21 Dung i ditaruhon nama tu balian, alai dijangkon boru ni raja Firaun ma ibana, dipagodanggodang ma jala diain. 7:22 Dipodahon ma tu ibana nasa hapistaran ni halak Misir, gabe malo ma ibana di hata nang di ulaon pe. 7:23 Alai dung dapot umurna opatpulu taon, tubu ma rohana mandulo angka donganna sabutuha, i ma halak Israel i. 7:24 Jala marnida sahalak na nirupa, mangalo ma ibana; diluluhon ma na nirupa i, dipusa ma halak Misir i. 7:25 Na dihirim rohana do, antoan ni angka donganna ma, na naeng patupaon ni Debata haluaon di nasida marhite sian tanganna; hape ndang dianto nasida. 7:26 Dung i marsogotna i ro muse ma ibana, tongon di na marbadai nasida, gabe disosoi ma nasida mardame, ninna ma: Na marhahamaranggi do hamu, ale angka amang; boasa masialoan hamu? 7:27 Alai ditulak parsala i ma ibana, didok ma: Ai ise mamampe ho gabe pangarajai dohot panguhum di hami? 7:28 Nda tung naeng pusaonmu ahu songon naung pinusam nantoari halak Misir i? 7:29 Dung i maporus ma si Musa, umbege hata i; laos mahiandu ma ibana di tano Midian, ditubuhon ma disi dua anak. 7:30 Jadi dung gok opatpulu taon, diida ibana ma surusuruan ni Debata di halongonan, di dolok Sinai, di bagasan api na marsigorgor di ramba sampulguk. 7:31 Longang ma roha ni si Musa, dung diida na niidana i, jadi didapothon ma manangkasi; alai tarbege ma soara ni Tuhan: 7:32 "Ahu do Debata ni angka amangmu, Debata ni si Abraham, si Isak dohot si Jakkob." Jadi angka dotdot ma si Musa, ndang hum be rohana manangkasi. 7:33 Alai ninna Tuhan i ma mandok ibana: "Tanggali sipatu sian patmu, ai tano na badia do inganan hajongjonganmi! 7:34 Nunga tangkas huida haporsuhon tinaon ni bangsongki di tano Misir, jala nunga hubege hoihoinasida, asa nunga tuat Ahu paluahon nasida; onpe, ro ma ho, asa husuru ho tu tano Misir!" 7:35 I ma si Musa i na jinuanasida, pola didok nasida: Ise na mamampe ho gabe pangarajai dohot panguhum? Apala ibana ma disuru Debata gabe pangarajai dohot sipalua marhite sian tangan ni surusuruan na niidana di ramba na sampulguk i. 7:36 Ibana do manogihon nasida bungkas, dipatupa do angka halongangan dohot tanda di tano Misir i, di laut rara dohot di parhorsihan, leleng ni opatpulu taon. 7:37 I ma si Musa, na mandok tu angka halak Israel: "Paheheon ni Debata do panurirang sada di hamu sian angka hahaanggimuna songon ahu on!" 7:38 Ibana ma i na di huria na di halongonan i rap dohot surusuruan, na mangkatai di dolok Sinai dohot ibana dohot angka amanta i; dijalo do hata na mangolu, silehononna tu hita. 7:39 Na so tinangihon ni angka amanta i, ai ditulak nasida do ibana, jadi mulak ma rohanasida marningot tano Misir. 7:40 Ai didok nasida tu si Aron: Pauli di hita angka debata, na mardalan di jolonta; ai ndang taboto, manang aha masa di si Musa, naung manogihon hita ruar sian tano Misir. 7:41 Jadi digana nasida ma lombu uju i, laos dipele ma ganaganaan i, gabe dihalashon nasida hapandean ni tangannasida. 7:42 Alai ditundali Debata ma nasida, dipasahat ma mangoloi angka na pinardebatanasida na di langit i, songon na tarsurat di pustaha ni angka panurirang i: "Ai adong disombahon hamu, bangso Israel, tu Ahu angka pelean dohot silehonlehon, uju na di halongonan i hamu leleng ni opatpulu taon? 7:43 Dihunti hamu do balebale ni Molok dohot bintang ni debata Repan ro di angka gombaran na pinaulimuna bahen sisombaonmuna. Tu balik ni Babel dope buangkononku hamu!" 7:44 Di angka amanta di halongonan i do undungundung panindangion i, na suman tu na niaturhon ni Debata na mangkatai dohot si Musa i, asa bahenonna tudos tu tiruan na niidana i. 7:45 I ma dijalo angka amanta i, laos diboan rap dohot si Josua, laho mamuhar angka bangso na pinabali ni Debata sian jolo ni angka amanta i ro di angka ari ni si Daud. 7:46 Ibana ma na niasian ni Debata, gabe dipangido ma, naeng adong inganan ni Debata ni si Jakkob. 7:47 Alai si Salomo ma paulihon inganan di Ibana. 7:48 Alai ndang mian Natumimbul i di bagasan inganan na pinandean ni tangan, songon na nidok ni panurirang i: 7:49 "Langit i do habangsangku, jala ondolan ni pathu do tano i; bagas dia ma i na naeng paulionmuna di Ahu, ninna Tuhan i; tung dia ma inganan pangulonanki? 7:50 Nda tanganku do paulihon saluhutna i?" 7:51 O hamu na jogal rungkung, angka na so tarsunat rohamu nang pinggolmu, tongtong do dialo hamu Tondi Parbadia i; songon angka amamuna, suang songon i do nang hamu! 7:52 Ise ma sian angka panurirang i, na so pinaburuburu ni angka amamuna? Pola dipusa nasida do angka na sumurirangkon haroro ni Partigor i; Ibana pe dipasahat jala dipusa hamu do! 7:53 Dijalo hamu do patik i, na pinatolhas ni angka surusuruan i; hape ndang diradoti hamu i. 7:54 Umbege i, digotap ma rohanasida jala patungosngoson ma iponnasida dompak ibana. 7:55 Alai gok Tondi Parbadia ma si Stepanus mamereng tu ginjang, jadi diida ma hasangapon ni Debata dohot Jesus jongjong di siamunna. 7:56 Jadi didok ma: Ida ma, mungkap do langit i huida, jala Anak ni jolma i jongjong tungkan siamun ni Debata! 7:57 Alai marsoara na gogo ma nasida marsurahi huhut disongsongi pinggolnasida be, jadi rap ma nasida manahopi ibana. 7:58 Disarat nasida ma ibana tu balian ni huta i, dung i dipantinggangkon ma batu tu ibana. Ia angka sitindangi i, dipampeakkon do ulosnasida tujolo ni dolidoli na margoar Saulus. 7:59 Asa dipantinggangkon nasida ma batu tu si Stepanus; gabe manjoujou do ibana mandok: Ale Tuhan Jesus, jalo ma tondingku! 7:60 Alai na marsinggang ma ibana, huhut dipagogo ma soarana mandok: Ale Tuhan, unang jujur dosanasida i! Jadi dung didok songon i, monding ma ibana.
8:1 Alai dihalomohon si Saulus do pamununasida di si Stepanus. Jala masa ma olat ni na sadari i pangaleleon bolon dompak huria na di huta Jerusalem, gabe marserak ma nasida saluhutna, so padohot angka apostel, tu luat Judea dohot Samaria. 8:2 Alai ditanom angka halak na daulat roha ma si Stepanus, jala na nia lelengna ditatangisi nasida ibana. 8:3 Alai dipaporsukporsuk si Saulus do nasida na sahuria i: Dibongoti angka jabu, disarat sian i baoa nang boruboru, laho pasahathon tu hurungan. 8:4 Madangadang do angka na marserak i huhut mamaritahon hata i. 8:5 Laos tuat ma anggo si Pilippus tu huta Samaria, dijamitahon ma tu nasida Kristus i. 8:6 Jadi dung dibege natorop i jamita ni si Pilippus jala diida angka tanda na pinatupana, saroha ma nasida marateatehonsa. 8:7 Ai ruar do angka tondi na hodar, marsoara na balga sian torop halak na sinonggopanna i; godang do nang na sarion dohot na lumpuon dipamalum. 8:8 Jadi mansai las ma roha ni nasida na sahuta i. 8:9 Alai adong do di huta i hian sada halak na margoar si Simon, parsibalik mata na mangaliluhon roha ni halak Samaria i, ai na sumurung do ibana didok. 8:10 Jadi saluhut halak, angka na metmet dohot na magodang, mangihuthon ibana, angka didok ma: On ma hagogoon ni Debata apala na balga! 8:11 Alai umbahen na dipaihutihut nasida ibana na sai leleng, ala lilu nasida dibahen hapandeanna i. 8:12 Alai gabe tardidi ma angka baoa nang boruboru, dung porsea nasida di na binaritahon ni si Pilippus na taringot tu harajaon ni Debata dohot Goar ni Jesus Kristus. 8:13 Dung i gabe porsea ma nang si Simon ondeng jala tardidi ma, laos dipaihutihut ma si Pilippus; jadi mansai longang ma rohana marnida tanda dohot hagogoon na balga, angka na masa i. 8:14 Alai dung dibege angka apostel na di Jerusalem, naung dijalo halak Samaria i hata ni Debata, disuru nasida ma si Petrus dohot si Johannes manopot nasida. 8:15 Tuat ma nasida, ditangiangkon ma angka dongan i, asa dijalo Tondi Parbadia. 8:16 Ai ndang dope songgop Tondi i manang tu ise nasida, asal tardidi do nasida tubagasan Goar ni Tuhan Jesus. 8:17 Jadi mangampehon tangan ma apostel i tu nasida, gabe dijalo ma Tondi Parbadia. 8:18 Alai dung diida si Simon angka apostel i mangalehon Tondi Parbadia marhite sian na mangampehon tangan, ro ma ibana mamboan hepeng tu nasida. 8:19 Didok ma: Lehon hamu ma huaso sisongon i nang tu ahu, asa manjalo Tondi Parbadia halak, ia huampehon tanganku tu ibana. 8:20 Alai didok si Petrus ma mandok ibana: Mago ma ho rap dohot perakmi; ai dirimpu ho, tartuhor silehonlehon ni Debata marhitehite hepeng! 8:21 Ndang parjambar manang partohap ho di hata on, ai ndang na bonar roham maradophon Debata. 8:22 Ipe pauba ma roham sian hajahatonmi; dung i pangido ma tu Tuhan i, anggiat tarsesa tahitahi ni roham! 8:23 Ai huida do roham di bagasan pogu na paet, niihotan ni hageduhon. 8:24 Alai ninna si Simon i ma mangalusi: Tangiangkon hamu ma ahu tu Tuhan i, asa unang songgop tu ahu na nidokmuna i. 8:25 Asa dung dihatindangkon jala dihatahon hata ni Tuhan i, mulak ma anggo nasida tu Jerusalem; laos dibaritahon dope barita na uli i di torop huta na di luat Samaria. 8:26 Alai dipanghulingi surusuruan ni Tuhan i ma si Pilippus: Hehe ma ho, laho ma dompak dangsina tu dalan na langlang i, na tuat sian Jerusalem tu huta Gasa! 8:27 Jadi hehe ma ibana laho tusi. Jala adong ma disi sada halak Etiopia, parpangkat na balga, siramoti saluhutna arta ni si Kandake, raja ni halak Etiopia; i ma naung ro sian Jerusalem, dung martangiang disi. 8:28 Jadi hundul ma ibana di huretana laho mulak, huhut manjahai surat ni panurirang Jesaya. 8:29 Alai ninna Tondi i ma mandok si Pilippus: Laho ma ho tusi, hombari ma hureta i! 8:30 Jadi marlojong ma si Pilippus tusi, gabe dibege ma ibana manjaha surat ni panurirang Jesaya; dung i ninna ma: Atehe, diantusi ho do na jinahami? 8:31 Alai ninna ma: Songon dia ma haantusan ahu i, anggo so adong na mamodai ahu? Laos disosoi ma si Pilippus manaek, asa hundul tu lambungna. 8:32 Alai anggo hata ni surat na jinahana i on do: "Ditogu do Ibana songon birubiru tu pamotongan jala songon birubiru na hohom di jolo ni panggustingi; songon i do nang Ibana, ndang tarbege soarana." 8:33 "Di hametmetonna i marujung uhum na tu Ibana. Ise ma manjujur sundutna i, ai tarhinsat do hosana sian tano on?" 8:34 Dung i ninna parpangkat i ma mangkuling i si Pilippus: Raja ho, ise do na nidok ni panurirang disi? Ibana sandiri do manang halak na leban? 8:35 Dung i mangkuling ma si Pilippus, dibaritahon ma Jesus tu Ibana, marbingkas sian hata ni surat ondeng. 8:36 Alai laho manulus dalan i, jumpang nasida ma aek, jadi ro ma parpangkat i: Ndi on ma aek! Adong dope ambatna, unang ahu tardidi? 8:37 Dung i didok si Pilippus ma: Anggo na porsea ho dohot nasa roham, jadi do i! Gabe ninna ma mangalusi: Ahu porsea. Anak ni Debata do Jesus Kristus! 8:38 Laos didokkon ma maradian hureta i; dung i mijur ma nasida, si Pilippus dohot parpangkat i tu aek i, dipandidihon ma ibana. 8:39 Alai di na nangkok i nasida sian aek i, diluahon Tondi ni Tuhan i ma si Pilippus, jadi ndang be diida parpangkat i ibana; marlas ni roha ma didatdati sidalananna i. 8:40 Alai anggo si Pilippus, di Asdod do ibana jumpang; dibolus ma angka huta i sude sahat ro di Kaesarea, huhut mamaritahon barita na uli i.
9:1 Alai sai tong dope diondamhon si Saulus asupasup dohot pamunuon dompak sisean ni Tuhan i. 9:2 Ditopot ma sintua ni malim i mangido surat mandapothon angka parguruan na di huta Damaskus, asa ihotanna jala boanonna tu Jerusalem baoa nang boruboru pe, nasa na jumpangsa angka na mangihuthon agama i. 9:3 Alai uju di tongandalan ibana, mardonokkon huta Damaskus, tompu ma sumillam sondang sian ginjang humaliang ibana. 9:4 Jadi tinggang ma ibana tu tano, dung i dibege ma soara na mandok tu ibana: Saulus, Saulus! Boasa leleanmu Ahu? 9:5 Alai didok ma: Ise do Ho, Tuhan? Jadi didok Ibana: Jesus do Ahu, na nileleanmi! (Susa ma ho manandahi turatura!) 9:6 Angka hitir jala tarhalomong ibana mandok: Dia ma bahenonku, Tuhan, dipangido roham? Hata ni Tuhan i tu ibana: Hehe ma ho, bongoti ma huta i; disi ma paboaon tu ho sibahenonmu. 9:7 Alai tarhatotong do anggo angka donganna sauduran i, ai dibege nasida do soara i, alai ndang diida manang ise. 9:8 Jadi hehe ma si Saulus sian tano i; alai dung diungkap matana, sandok ndang marnida be; laos ditiop nasida nama tanganna, manogu ibana tu huta Damaskus. 9:9 Asa tolu ari lelengna ndang marnida matana jala ndang mangan manang minum ibana. 9:10 Jadi adong ma di huta Damaskus i sada sisean na margoar Ananias; dipataridahon Tuhan i ma dirina tu ibana, didok ma: Ale Ananias! Dung i dialusi ma: Dison do ahu, Tuhan! 9:11 Jadi didok Tuhan i ma mandok ibana: Hehe ma ho, laho ma tu alaman na margoar sitigor; tu bagas ni si Juda i ma pausoi halak Tarsus na margoar Saulus, ai na martangiang do ibana. 9:12 Gabe diida ibana, bongot sada halak na margoar Ananias mangampehon tangan tu ibana, asa sumuang marnida. 9:13 Alai ninna si Ananias ma mangalusi: Ale Tuhan, nunga sian lan halak hubege taringot tu godang ni na jahat na binahen ni halak i di huta Jerusalem tu angka na badiami. 9:14 Dison pe marhuaso do ibana sian angka sintua ni malim i, mangihoti saluhutna na manjou Goarmu. 9:15 Alai didok Tuhan i ma tu ibana: Laho ma ho, ai hupillit do ibana ulaulangku, asa diboan Goarhu tujolo ni angka bangso, nang tujolo ni angka raja dohot tujolo ni angka anak Israel. 9:16 Ai patuduhononku pe tu ibana godang ni sitaononna ala ni Goarhu. 9:17 Jadi hehe ma si Ananias, dibongoti ma bagas i, diampehon ma tanganna tu ibana, huhut didok: O Saulus, anggia, disuru Tuhan i do ahu, i ma Jesus na niidami di pardalananmu ro tuson, asa sumuang marnida huhut gok Tondi Parbadia ho. 9:18 Dung i pintor peut ma hapitungon i sian matana gabe sumuang marnida: Dung i hehe ma ibana gabe tardidi. 9:19 Laos di jolo ma sipanganon jadi suang ma gogona. Dung i na nia do lelengna diangkupi ibana angka sisean na di huta Damaskus i. 9:20 Manigor marjamita ma ibana di bagasan angka parguruan i, dihatindangkon ma Jesus, paboa Anak ni Debata Ibana. 9:21 Gabe muningan ma roha ni saluhutna na umbegesa, angka ninna ma: Nda ibana i, na mangalele di Jerusalem saluhutna angka na manjou Goar i; nang langkana tuson, nda laho mangihoti jala manogu nasida nian tujolo ni angka sintua ni malim? 9:22 Alai lam marsigomos ma si Saulus, pola jut do roha ni angka Jahudi na maringanan di huta Damaskus i dibahen, ai dipatorang do, Jesus i do Kristus. 9:23 Asa dung na nia lelengna, martahi ma angka Jahudi mamusa ibana. 9:24 Alai tarbortik ma tuptupnasida tu pinggol ni si Saulus. Pola do angka harbangan diingani nasida arian nang borngin, asa dapot ibana bunuonnasida. 9:25 Alai diboan angka sisean i ma ibana borngin i; sian parik ma ditantan nasida ibana di bagasan hirang. 9:26 Asa dung sahat ibana tu Jerusalem, naeng ma pasaoronna dirina tu angka sisean i; alai saluhut nasida mabiar mida ibana, ai ndang porsea nasida, naung gabe sisean ibana. 9:27 Si Barnabas do manjangkon ibana, ditogihon ma tu angka apostel i, laos dipajojor ma tu nasida, naung diida si Saulus Tuhan i di pardalananna dohot pangkataionnasida ro di pangkatindangkonna di Goar ni Jesus, uju na di huta Damaskus. 9:28 Dung i sai rap ma ibana dohot nasida mardalani di Jerusalem; marhiras ni roha do ibana mangkatahon Goar ni Tuhan i. 9:29 Pola dipanghulingi jala disuali angka Hellenist; alai dipatahitahi nasida do mambunu ibana. 9:30 Alai diboto angka dongan ma i, dipataru ma ibana tuat tu Kaesarea, laos disuru ma ibana tu huta Tarsus. 9:31 Asa mardamedame ma huria i di liat luat Judea dohot Galilea ro di Samaria, jala lam tu toguna ma huhut mamarangehon hatahuton mida Tuhan i, jala lam tu toropna nasida hinorhon ni pangapoion ni Tondi Parbadia. 9:32 Alai diebati si Petrus ma nasida saluhutna, jala tuat ma ibana manopot angka na badia na maringanan di Lidda. 9:33 Jadi jumpangsa ma disi sada halak na margoar Eneas, na sarion, naung peak di podomanna, leleng ni ualu taon. 9:34 Jadi didok si Petrus ma mandok ibana: Eneas, dipamalum Jesus Kristus do ho; hehe ma ho, duduk ma podomanmi! Jadi manigor hehe ma ibana. 9:35 Jadi diida sude pangisi ni huta Lidda dohot Saron ibana, gabe didompakkon ma Tuhan i. 9:36 Dung i adong ma di Joppe parompuan sada na porsea, na margoar Tabita, astuanna hije (Dorkas), na sumurung mangulahon na denggan dohot mambahen asi ni roha. 9:37 Tongon ma di angka ari i marsahit ibana laos mate, jadi diburi ma ibana, dipeakkon ma tu bilut parginjang. 9:38 Alai jonok do huta Lidda tu huta Joppe; jadi tarbege ma tu angka dongan, si Petrus disi, gabe disuru ma dua halak manopot ibana mangapoi, asa humatop ibana ro tumopot nasida. 9:39 Jadi hehe ma si Petrus mandongani nasida. Asa dung sahat, ditogihon ma ibana tu bilut parginjang; jadi ro ma mandapothon ibana saluhut boruboru na mabalu angka na tumatangis, dipatuduhon tu ibana ulos dohot abit angka na pinauli ni si Tabita, andorang rap dope dohot nasida. 9:40 Alai dipalaho si Petrus ma nasida saluhutna, dung i marsinggang ma ibana martangiang, didompakkon ma bangke i, didok ma: O Tabita, hehe ma ho! Jadi dipabidok ma matana; dung i di na niidana si Petrus i, hundul ma ibana. 9:41 Jadi disurdukkon ma tanganna, pahehehon ibana; dung i dijou ma angka na badia i ro di angka boruboru na mabalu, dipajongjong ma ibana mangolu di jolonasida. 9:42 Dung i sar ma i diboto saluhut pangisi ni huta Joppe, jadi torop do gabe porsea di Tuhan i. 9:43 Alai na nia do lelengna ibana mian di huta Joppe, sorang di sada halak na margoar Simon, sipauli hulingkuling.
9:1 Alai sai tong dope diondamhon si Saulus asupasup dohot pamunuon dompak sisean ni Tuhan i. 9:2 Ditopot ma sintua ni malim i mangido surat mandapothon angka parguruan na di huta Damaskus, asa ihotanna jala boanonna tu Jerusalem baoa nang boruboru pe, nasa na jumpangsa angka na mangihuthon agama i. 9:3 Alai uju di tongandalan ibana, mardonokkon huta Damaskus, tompu ma sumillam sondang sian ginjang humaliang ibana. 9:4 Jadi tinggang ma ibana tu tano, dung i dibege ma soara na mandok tu ibana: Saulus, Saulus! Boasa leleanmu Ahu? 9:5 Alai didok ma: Ise do Ho, Tuhan? Jadi didok Ibana: Jesus do Ahu, na nileleanmi! (Susa ma ho manandahi turatura!) 9:6 Angka hitir jala tarhalomong ibana mandok: Dia ma bahenonku, Tuhan, dipangido roham? Hata ni Tuhan i tu ibana: Hehe ma ho, bongoti ma huta i; disi ma paboaon tu ho sibahenonmu. 9:7 Alai tarhatotong do anggo angka donganna sauduran i, ai dibege nasida do soara i, alai ndang diida manang ise. 9:8 Jadi hehe ma si Saulus sian tano i; alai dung diungkap matana, sandok ndang marnida be; laos ditiop nasida nama tanganna, manogu ibana tu huta Damaskus. 9:9 Asa tolu ari lelengna ndang marnida matana jala ndang mangan manang minum ibana. 9:10 Jadi adong ma di huta Damaskus i sada sisean na margoar Ananias; dipataridahon Tuhan i ma dirina tu ibana, didok ma: Ale Ananias! Dung i dialusi ma: Dison do ahu, Tuhan! 9:11 Jadi didok Tuhan i ma mandok ibana: Hehe ma ho, laho ma tu alaman na margoar sitigor; tu bagas ni si Juda i ma pausoi halak Tarsus na margoar Saulus, ai na martangiang do ibana. 9:12 Gabe diida ibana, bongot sada halak na margoar Ananias mangampehon tangan tu ibana, asa sumuang marnida. 9:13 Alai ninna si Ananias ma mangalusi: Ale Tuhan, nunga sian lan halak hubege taringot tu godang ni na jahat na binahen ni halak i di huta Jerusalem tu angka na badiami. 9:14 Dison pe marhuaso do ibana sian angka sintua ni malim i, mangihoti saluhutna na manjou Goarmu. 9:15 Alai didok Tuhan i ma tu ibana: Laho ma ho, ai hupillit do ibana ulaulangku, asa diboan Goarhu tujolo ni angka bangso, nang tujolo ni angka raja dohot tujolo ni angka anak Israel. 9:16 Ai patuduhononku pe tu ibana godang ni sitaononna ala ni Goarhu. 9:17 Jadi hehe ma si Ananias, dibongoti ma bagas i, diampehon ma tanganna tu ibana, huhut didok: O Saulus, anggia, disuru Tuhan i do ahu, i ma Jesus na niidami di pardalananmu ro tuson, asa sumuang marnida huhut gok Tondi Parbadia ho. 9:18 Dung i pintor peut ma hapitungon i sian matana gabe sumuang marnida: Dung i hehe ma ibana gabe tardidi. 9:19 Laos di jolo ma sipanganon jadi suang ma gogona. Dung i na nia do lelengna diangkupi ibana angka sisean na di huta Damaskus i. 9:20 Manigor marjamita ma ibana di bagasan angka parguruan i, dihatindangkon ma Jesus, paboa Anak ni Debata Ibana. 9:21 Gabe muningan ma roha ni saluhutna na umbegesa, angka ninna ma: Nda ibana i, na mangalele di Jerusalem saluhutna angka na manjou Goar i; nang langkana tuson, nda laho mangihoti jala manogu nasida nian tujolo ni angka sintua ni malim? 9:22 Alai lam marsigomos ma si Saulus, pola jut do roha ni angka Jahudi na maringanan di huta Damaskus i dibahen, ai dipatorang do, Jesus i do Kristus. 9:23 Asa dung na nia lelengna, martahi ma angka Jahudi mamusa ibana. 9:24 Alai tarbortik ma tuptupnasida tu pinggol ni si Saulus. Pola do angka harbangan diingani nasida arian nang borngin, asa dapot ibana bunuonnasida. 9:25 Alai diboan angka sisean i ma ibana borngin i; sian parik ma ditantan nasida ibana di bagasan hirang. 9:26 Asa dung sahat ibana tu Jerusalem, naeng ma pasaoronna dirina tu angka sisean i; alai saluhut nasida mabiar mida ibana, ai ndang porsea nasida, naung gabe sisean ibana. 9:27 Si Barnabas do manjangkon ibana, ditogihon ma tu angka apostel i, laos dipajojor ma tu nasida, naung diida si Saulus Tuhan i di pardalananna dohot pangkataionnasida ro di pangkatindangkonna di Goar ni Jesus, uju na di huta Damaskus. 9:28 Dung i sai rap ma ibana dohot nasida mardalani di Jerusalem; marhiras ni roha do ibana mangkatahon Goar ni Tuhan i. 9:29 Pola dipanghulingi jala disuali angka Hellenist; alai dipatahitahi nasida do mambunu ibana. 9:30 Alai diboto angka dongan ma i, dipataru ma ibana tuat tu Kaesarea, laos disuru ma ibana tu huta Tarsus. 9:31 Asa mardamedame ma huria i di liat luat Judea dohot Galilea ro di Samaria, jala lam tu toguna ma huhut mamarangehon hatahuton mida Tuhan i, jala lam tu toropna nasida hinorhon ni pangapoion ni Tondi Parbadia. 9:32 Alai diebati si Petrus ma nasida saluhutna, jala tuat ma ibana manopot angka na badia na maringanan di Lidda. 9:33 Jadi jumpangsa ma disi sada halak na margoar Eneas, na sarion, naung peak di podomanna, leleng ni ualu taon. 9:34 Jadi didok si Petrus ma mandok ibana: Eneas, dipamalum Jesus Kristus do ho; hehe ma ho, duduk ma podomanmi! Jadi manigor hehe ma ibana. 9:35 Jadi diida sude pangisi ni huta Lidda dohot Saron ibana, gabe didompakkon ma Tuhan i. 9:36 Dung i adong ma di Joppe parompuan sada na porsea, na margoar Tabita, astuanna hije (Dorkas), na sumurung mangulahon na denggan dohot mambahen asi ni roha. 9:37 Tongon ma di angka ari i marsahit ibana laos mate, jadi diburi ma ibana, dipeakkon ma tu bilut parginjang. 9:38 Alai jonok do huta Lidda tu huta Joppe; jadi tarbege ma tu angka dongan, si Petrus disi, gabe disuru ma dua halak manopot ibana mangapoi, asa humatop ibana ro tumopot nasida. 9:39 Jadi hehe ma si Petrus mandongani nasida. Asa dung sahat, ditogihon ma ibana tu bilut parginjang; jadi ro ma mandapothon ibana saluhut boruboru na mabalu angka na tumatangis, dipatuduhon tu ibana ulos dohot abit angka na pinauli ni si Tabita, andorang rap dope dohot nasida. 9:40 Alai dipalaho si Petrus ma nasida saluhutna, dung i marsinggang ma ibana martangiang, didompakkon ma bangke i, didok ma: O Tabita, hehe ma ho! Jadi dipabidok ma matana; dung i di na niidana si Petrus i, hundul ma ibana. 9:41 Jadi disurdukkon ma tanganna, pahehehon ibana; dung i dijou ma angka na badia i ro di angka boruboru na mabalu, dipajongjong ma ibana mangolu di jolonasida. 9:42 Dung i sar ma i diboto saluhut pangisi ni huta Joppe, jadi torop do gabe porsea di Tuhan i. 9:43 Alai na nia do lelengna ibana mian di huta Joppe, sorang di sada halak na margoar Simon, sipauli hulingkuling.
11:1 Alai dibege angka apostel dohot angka dongan na di Judea i ma, naung dohot do hape halak sipelebegu manjangkon hata ni Debata. 11:2 Gabe dibadai angka na porsea sian Jahudi i ma si Petrus, dung nangkok ibana tu Jerusalem, angka ninna ma: 11:3 Bongot do ho hape tu angka halak na so tarsunat, jala rap mangan do ho dohot nasida! 11:4 Alai jojor sian mulana ma dipatorang si Petrus na masa i, ninna ma: 11:5 Uju na martangiang ahu di huta Joppe, huida ma di bagasan tondingku, mijur sada inganan na bidang na maropatsuhi, tartantan sian ginjang ro di jolongku. 11:6 Dung i di na hupanotnoti i, huida ma disi angka siopatpat na di tano, angka binatang dohot angka na manjirir ro di angka pidong na martongatonga langit. 11:7 Jadi hubege ma soara na mandok tu ahu: Hehe ma ho, Petrus; seseati ma, pangan ma! 11:8 Alai ningku ma: Tongka, Tuhan! Ai ndang dung hudai na ramun manang na so ias. 11:9 Alai mangalusi ma soara i paduahalihon sian ginjang: Unang ramun dok naung niiasan ni Debata! 11:10 Ro di tolu hali do masa songon i dung i ditait ma saluhutna i muse tu ginjang. 11:11 Dung i tongon di na satongkin i jongjong ma tolu halak di jolo ni jabu inganannami, angka na disuru sian Kaesarea mandapothon ahu. 11:12 Alai didok Tondi i ma tu ahu, na so jadi ganggu rohangku mandongani nasida. Alai angkuphu do dongan na onom on, jadi hubongoti hami ma jabu ni halak i. 11:13 Dibaritahon ma tu hami, naung niidana surusuruan i jongjong di bagasan jabuna, na mandok tu ibana: Suru ma tu huta Joppe, manjou si Simon na margoar Petrus! 11:14 Hatahonon ni i do tu ho hata na tau paluahon ho ro di sandok isi ni jabum! 11:15 Alai mamungka dope ahu marjamita disi, gabe songgop ma Tondi Parbadia tu nasida, songon na tu hita di mulana i. 11:16 Disi ma huingot hata ni Tuhan i na nidokna i: "Aek do dididihon si Johannes, alai Tondi Parbadia do didihononhon tu hamu!" 11:17 Antong, tung margogo ma ahu mangambat Debata, anggo dos do hape silua na binasabasahon ni Debata tu nasida, songon na tu hita, angka naung gabe porsea di Tuhan Jesus Kristus? 11:18 Dung dibege nasida hata i, hohom be ma, gabe dipuji ma Debata, angka ninna ma: Asa dohot do hape tu halak sipelebegu dilehon Debata hamubaon ni roha asa mangolu! 11:19 Alai anggo angka na marserak i hinorhon ni pangaleleon siala si Stepanus, torus ma didalani luat Penisia sahat ro di pulo Siprus dohot Antiokia; alai holan tu Jahudi sambing dope dibaritahon nasida hata i. 11:20 Alai adong do tahe deba sian nasida, halak Siprus dohot Kirene, na sahat ro tu Antiokia, gabe dibaritahon Tuhan Jesus disi nang tu halak Junani. 11:21 Jadi didongani tangan ni Tuhan i nasida: Jala na nia toropnasida gabe porsea, angka na mandompakkon Tuhan i. 11:22 Pola tarbege baritanasida tu huria na di Jerusalem i, gabe disuru nasida ma si Barnabas tu Antiokia. 11:23 Tolhas ma ibana tusi, jadi diida ma asi ni roha ni Debata, gabe las ma rohana; laos diapoi ma sasude, asa marsihohot rohanasida mian di Tuhan i. 11:24 Ai tung halak na denggan roha do ibana, gok Tondi Parbadia dohot haporseaon, gabe ganda ma torop halak tartogu tu Tuhan i. 11:25 Dung i borhat ma ibana laho tu huta Tarsus mangalului si Saulus; jadi dung jumpangsa, ditogihon ma tu Antiokia. 11:26 Gabe rap ma nasida mian di huria i sataon lelengna, torop ma halak diajari disi; laos di Antiokia parjolo targoar angka sisean i halak Kristen. 11:27 Alai tuat ma uju i angka panurirang sian Jerusalem tu huta Antiokia. 11:28 Jadi hehe ma sada sian nasida na margoar Agabus, disurirangkon ma marhitehite Tondi i masa ni haleon potir tu liat portibi on; i ma na songgop uju hinarajahon ni si Klaudius. 11:29 Dung i dituptup angka sisean i ma manongos tumpak, marguru tu na tarpatupasa be, tu angka dongan na maringanan di Judea. 11:30 Saut ma i dibahen, ditongos ma i tu angka sintua i marhitehite tangan ni si Barnabas dohot si Saulus.
12:1 Tar di tingki i ma dilaluhon raja Herodes tanganna tu deba na sahuria i paporsukporsukkon nasida. 12:2 Podang do dibahen mambunu si Jakobus, dongan saama ni si Johannes i. 12:3 Jadi dung diida, lomo roha ni Jahudi disi, didatdati ma, ditangkup ma dohot si Petrus, tongon di angka ari ni pesta Paska i. 12:4 Jadi dung ditangkup, didabu ma ibana tu hurungan, dipasahat ma ibana tu opat hali opat soldadu panjaga; ditahi rohana, naeng togihononna ibana tujolo ni natorop, dung salpu pesta Paska i. 12:5 Asa dijaga nasida do si Petrus di hurungan i; alai sai didatdati huria i do tumangiangkon ibana tu Debata. 12:6 Dung i di na naeng togihonon ni Herodes si Petrus, modom do ibana borngin i di holangholang ni dua soldadu, tarihot dohot rante dua; di jolo pintu ni hurungan i pe adong do na manjaga. 12:7 Dung i tompu ma ro surusuruan ni Tuhan i jadi marsinondang ma sada panondang di bilut i, dituktuk ma lambung ni si Petrus manungguli ibana, huhut didok: Hatop ma ho hehe! Jadi marpeutan ma angka rante i sian tanganna. 12:8 Dung i didok surusuruan i ma tu ibana: Hohosi ma dagingmi, pasang ma sipatumi! Jadi dibahen ma songon i. Dung i didok ma tu ibana: Uloshon ulosmi; ihuthon ma ahu! 12:9 Dung i diihuthon ma ibana laho tu balian, jadi ndang diboto, manang na tutu do songon i masa tu ibana marhite sian surusuruan i; dirimpu do, di bagasan tondina diida i. 12:10 Alai dung dibolus nasida panjaga na parjolo dohot na paduahon i, sahat ma nasida tu harbangan bosi, dalan tu huta. Jadi mungkap boti ma i di jolonasida, gabe ruar ma nasida tu dalan di huta i, dung i pintor sirang ma surusuruan i sian ibana. 12:11 Jadi dung tarjolma si Petrus, ninna ma: I pe asa huboto situtu, naung disuru Tuhan i do surusuruanna mangaroro ahu sian tangan ni si Herodes dohot sian nasa na niarop ni bangso Jahudi. 12:12 Jadi dung tangkas i di ibana, laho ma ibana tu bagas ni si Maria, ina ni si Johannes na margoar huhut Markus; torop do disi marpungu martangiang. 12:13 Alai dung dituktuhi ibana pintu parduru, ro ma naposo boruboru na margoar Rode mananginangi. 12:14 Ditanda ma soara ni si Petrus alai ndang manigor diungkap pintu i dibahen las ni rohana; tu bagasan do ibana marlojong paboahon, naung jongjong do hape si Petrus di jolo pintu i. 12:15 Gabe didok nasida ma tu ibana: Na rintik do ho; alai sai diondolhon do hatana i, jadi didok nasida nama: Surusuruanna do i. 12:16 Alai sai didatdati si Petrus do manuktuhi; jala di na mangungkap i nasida, diida ma ibana, gabe tarhalomong ma rohanasida. 12:17 Alai dihiraphon ma tanganna tu nasida, asa sip; dung i dipajojor ma tu nasida pambahen ni Tuhan i, manogihon ibana ruar sian hurungan i, laos didok ma: Baritahon hamu ma i tu si Jakobus dohot tu angka dongan. Dung i laho ma ibana tumopot inganan na asing. 12:18 Alai dung torang ari, gaor situtu ma roha ni angka soldadu i taringot tu na masa di si Petrus i. 12:19 Alai dung so jumpang si Herodes ibana, atik pe dilului, diuhumi ma angka panjaga i, didokkon ma togihononhon nasida tu hamatean; laos bungkas ma anggo ibana sian Judea tu Kaesarea, jadi disi nama ibana na maringan. 12:20 Dung i marmusumusu ma ibana dompak isi ni Tirus dohot Sidon; alai saroha ma nasida manopot ibana, diellemellem ma si Blastus, naposo haposan ni raja i. Mangido mardame nasida, ala sian tano ni raja i bohal ni luatnasida. 12:21 Dung i di ari na tiniti dipangke Herodes ma ulos harajaonna jadi hundul ma di habangsana manariashon hatana tu nasida. 12:22 Gabe dijouhon natorop i ma: Soara ni Debata do i, ndada soara ni jolma! 12:23 Alai pintor dipastap surusuruan ni Debata ma ibana, ala so dilehon hasangapon tu Debata; jadi dipangan gulok ma ibana, laos mate. 12:24 Alai lam rarat ma anggo hata ni Debata. 12:25 Jadi mulak ma si Barnabas dohot si Saulus sian Jerusalem i, dung dipasahat, nasida asiasi i! Diboan ma si Johannes na margoar si Markus.
13:1 Alai adong ma di huria Antiokia i angka panurirang dohot angka guru, i ma si Barnabas dohot si Simeon na margoar Niger dohot si Lucius na sian Kirene dohot si Menahem, na rap magodang dohot raja Herodes, dohot si Saulus. 13:2 Jadi di na marulaon nasida tu Tuhan i huhut marpuasa, ninna Tondi Parbadia ma: Papulik hamu ma di Ahu si Barnabas dohot si Saulus tu ulaon, na hupatongon tu nasida. 13:3 Jadi marpuasa ma huria i jala martangiang, diampehon ma tanganna tu nasida, laho paborhathon. 13:4 Tuat ma nasida na sinuru ni Tondi Parbadia i tu huta Seloikia; sian i ma marparau nasida tu pulo Siprus. 13:5 Jadi dung sahat nasida tu huta Salamis, dibaritahon ma hata ni Debata di angka parguruan ni Jahudi; alai si Johannes do suruannasida. 13:6 Ditorusi nasida ma liat pulo i sahat ro di huta Papos, jadi jumpang nasida ma sada halak Jahudi, parsibalik mata jala panurirang pargapgap, na margoar Bar Jesus. 13:7 Na mian do ibana di panggomgomi Sergius Paulus halak na pantas marroha: I do manjou si Barnabas dohot si Saulus, naeng begeonna hata ni Debata. 13:8 Alai dialo parsibalik mata i, si Elimas, do nasida (ai i do astuan ni goarna i), naeng ambatonna panggomgomi i, unang porsea. 13:9 Alai anggo si Saulus, na margoar huhut Paulus, na gok Tondi Parbadia, dijonggor ma ibana. 13:10 Mandok: E ho, na gok saluhut ansiansi dohot ragam ni hajahaton, anak ni sibolis, alo ni nasa hatigoran, ndang pasohotonmu papeolhon dalan ni Tuhan angka na tigor i? 13:11 Tongkin on ma ho hona tangan ni Tuhan; mapitung ma ho, ndang idaonmu jolo mata ni ari i! Jadi pintor rambon, dung i holom ma diida; dadapdadap nama ibana mangalului partogina. 13:12 Jadi porsea ma panggomgomi i, marnida na masa i, jala longang rohana di poda ni Tuhan i. 13:13 Dung i marparau ma anggo si Paulus rap dohot angka donganna sian huta Papos i, gabe sahat ma nasida tu huta Perge na di Pampilia; alai ditadingkon si Johannes do nasida, mulak tu Jerusalem. 13:14 Alai didatdati nasida do mardalan sian Perge ro di huta Antiokia na di Pisidia, jadi jumpa ari Sabbat i laho ma nasida hundul tubagasan parguruan. 13:15 Alai dung sidung dijaha disi patik i ro di surat ni angka panurirang i, disuru angka sintua ni parguruan i ma na mandok tu nasida: Ale angka dongan, molo adong di hamu hata sipaingot tu natorop on, dok hamu ma! 13:16 Dung i hehe ma si Paulus, dihiraphon ma tanganna, ninna ma: Hamu, angka halak Israel, dohot hamu angka na mangkabiari Debata, tangihon hamu ma! 13:17 Dipillit Debata ni hita bangso Israel do angka ompunta i, dipatimbul do bangso i, uju panginsua nasida di tano Misir, jala dipatoltol do tanganna manogihon nasida ruar sian i. 13:18 Leleng ni opatpulu taon dipaanjuanju do nasida, uju di parhorsihan. 13:19 Pitu bangso diparendep di tano Kanaan; tanona i dilehon teanonnasida. 13:20 Tar opatratus limapulu taon ma leleng ni i. Dung i dilehon ma tu nasida angka panguhum ro di panurirang Samuel. 13:21 Dung i dipangido nasida ma raja, jadi dilehon Debata ma tu nasida si Saulus, anak ni si Kis, marga Benjamin, leleng ni opatpulu taon. 13:22 Jadi dung dipaijur i, dipabangkit ma di nasida si Daud bahen rajanasida, na hinatindangkonna i di na nidokna: "Nunga jumpang Ahu si Daud, anak ni si Isai, halomoanki, sipasaut nasa na pinangido ni rohangku!" 13:23 Sian pinompar ni i ma diparo Debata di halak Israel Jesus, i ma Sipalua na pinarbagabagana i. 13:24 Patujolo ni harorona dibaritahon si Johannes tu sandok bangso Israel pandidion mandokkon paubahon roha. 13:25 Mareak ujung ni langkana didok si Johannes i: Ndada ahu na niarop ni rohamuna; di pudingku do Ibana ro. Na hurang tama do ahu mananggali sipatuna. 13:26 Hamu ale angka dongan, na sian pomparan ni si Abraham, dohot hamu na mangkabiari Debata! Tu hita do ditongos hata haluaon on. 13:27 Ai ndang na ditanda angka pangisi ni Jerusalem dohot angka sintuanasida Ibana; alai diuhumi nasida do Ibana, pasauthon pandok ni angka panurirang i, na jinaha ganup ari Sabbat. 13:28 Dipangido nasida do tu si Latus, bunuon Ibana, atik pe so adong jumpang nasida alana mambahen marutang hosa. 13:29 Asa dung dipatulus nasida saluhut na tarsurat hian taringot tu Ibana, dipaijur ma Ibana sian hau i, dipeakkon ma tu tanoman. 13:30 Alai disungguli Debata do Ibana sian na mate. 13:31 Na nia do lelengna dipataridahon dirina tu angka na rap nangkok dohot Ibana sian Galilea tu Jerusalem; angka i do nuaeng sitindangi on tu bangso i. 13:32 Jadi barita las ni roha on huboan hami tu jolomuna: Bagabaga na tu angka ompunta i, nunga dipasaut Debata i tu angka anakta, di na pinahehena i Jesus. 13:33 Songon na tarsurat huhut di ende Psalmen dua: "Anakku do Ho; sadari on do Ho hutubuhon!" 13:34 Dilumbahon hian, paheheonna Ibana sian na mate, jala na so tupa be Ibana mandapothon habusukon, ai didok do: "Lehononku ma tu hamu angka asiasi na sintong na di si Daud!" 13:35 Laos didok do di ende na asing: "Ndang na loasonmu idaon ni na badiami habusukon!" 13:36 Ai anggo si Daud, dung dipatulus lomo ni Debata saleleng di ngoluna, monding do, laos tartanom tu lambung ni angka amana, gabe diida do habusukon. 13:37 Alai anggo na pinangolu ni Debata, ndang adong diida I habusukon. 13:38 Asa boto hamu ma, ale angka dongan: Binaritahon do tu hamu hasesaan ni dosa marhitehite Ibana. 13:39 Pintoranna do ganup na porsea, dung so tarbahen pintor hamu sian saluhut dosa i, pintoran ni patik ni si Musa. 13:40 Antong, jaga ma hamu, unang manginona tu hamu na hinatahon ni angka panurirang i: 13:41 "Pamanat hamu ma, hamu angka parhu ni roha; marseto ma rohamuna, laos marjea, ai Ahu patupahon sada ulaon di arimuna. Ndang tagamon parhatutuonmuna i, nang adong na pajojorhon i tu hamu!" 13:42 Asa di na laho ruar i nasida, dipangido ma, naeng ma hatahononhon tu nasida angka hata i basa Sabbat i. 13:43 Alai dung muli sian parguruan i, torop ma sian angka Jahudi dohot sian angka parguru na daulat roha mangihuthon si Paulus dohot si Barnabas, gabe dijamitai jala diapoi ma nasida, asa mian di bagasan asi ni roha ni Debata. 13:44 Alai di ari Sabbat na ro i sude ne pangisi ni huta i marpungu, naeng begeonna hata ni Tuhan i. 13:45 Alai dung diida angka Jahudi torop ni jolma i, gok pangiburuon ma rohanasida, gabe dialo jala diinsahi ma jamita ni si Paulus i. 13:46 Dung i marhiras ni roha ma si Paulus dohot si Barnabas mandok: Tama nian tu hamu parjolo jamitahononhon hata ni Debata; alai ditulakkon hamu do i, jala ndang tau hamu parjambar di hangoluan sisalelenglelengna ditimbang hamu: Antong, sipelebegu i ma hudompakkon hami. 13:47 Ai songon on do ditonahon Tuhan i tu hami: "Na hupadiri do ho bahen panondang di angka sipelebegu, bahen haluaon ro di ujung ni tano on!" 13:48 Umbege i angka sipelebegu i, las ma rohanasida, dipuji ma hata ni Tuhan i, jadi gabe porsea ma nasa naung pinarade tu hangoluan sisalelenglelengna. 13:49 Jadi dipararat ma hata ni Tuhan i tu sandok luat i. 13:50 Alai digintali angka Jahudi ma angka parompuan na sangap, na daulat roha dohot angka pangituai ni huta i, jadi dipatubu ma pangaleleon dompak si Paulus dohot si Barnabas, laos dipabali ma nasida sian luat i. 13:51 Alai dipaspas apostel i do orbuk na lohot di patna dompak nasida, dung i ro ma nasida tu Ikonium. 13:52 Alai gok halalas ni roha dohot Tondi Parbadia ma roha ni angka sisean i.
14:1 Ia di Ikonium suang ditopot nasida parguruan ni Jahudi, jadi hinorhon ni jamitanasida gabe porsea ma mansai torop Jahudi dohot halak Junani. 14:2 Alai dijujui jala dipamohop angka Jahudi na so porsea i ma roha ni angka sipelebegu dompak angka sisean. 14:3 Alai na nia do laonna nasida mian disi; hiras do rohanasida marjamita huhut mangasahon Tuhan i. Angka tanda dohot halongangan dilehon Tuhan i patupaonnasida, laho mangondolhon hata asi ni rohana i. 14:4 Alai mardua ma roha ni pangisi ni huta i: Na deba mandongani halak Jahudi, na deba mandongani angka apostel. 14:5 Alai naeng hehe ma halak sipelebegu dohot Jahudi rap dohot angka induknasida manggosa dohot mandangguri nasida. 14:6 Dung tarbortik i, maporus ma nasida tu angka huta na di luat Likaonia, i ma huta Listra dohot Derbe ro di huta angka na humaliang i. 14:7 Jadi dibaritahon nasida ma barita na uli disi. 14:8 Jadi adong ma di huta Listra sada halak na hundulhundul, ndang margogo patna, na pangpang sian hatutubuna; ndang dung mardalan. 14:9 Gabe dibege ibana ma si Paulus marjamita. Jadi dibereng si Paulus ma ibana jala diida ma, na porsea do ibana, tarbahen malum sahitna. 14:10 Jadi dipagogo ma soarana mandok: Tingkos ma ojakkon patmi! Manigor hehe ma ibana huhut mardalani. 14:11 Alai dung diida natorop i na binahen ni si Paulus i, marsuraksurak ma nasida, angka ninna ma di hata Likaonia: Nunga marrupahon rupa ni jolma do angka debata, gabe tuat tu hita on! 14:12 Jadi digoar ma si Barnabas: Zeus, si Paulus: Hermes, ala ibana pangkatai. 14:13 Laos diboan malim ni debata Zeus, na dibalian ni huta i, ma angka horbo tunggal dohot ramerame tu bahal i, naeng mamele rap dohot natorop i. 14:14 Umbege i angka apostel, si Barnabas dohot si Paulus, diribakkon ma ulosnasida, laos maringkat ma mandapothon natorop i. 14:15 Joujou ma nasida mandok: O hamu, ale angka dongan, aha do na binahenmu? Jolma do nang hami na marparniahapan songon hamu; barita na uli do huboan hami tu hamu, asa mulak hamu sian angka debatamuna na soada i tu Debata na mangolu, ai Ibana do manompa langit dohot tano dohot laut ro di nasa isina. 14:16 Na dipasombu do di angka sundut na salpu i saluhut bangso tumopot dalanna be. 14:17 Alai songon i pe i, ndatung na so dihatindangkon dirina marhitehite ulaon dengganbasa, ai dilehon do tu hamu udan sian ginjang dohot partaonan hadumaon; angkup ni i dipasabam do rohamuna marhitehite sipanganon dohot las ni roha. 14:18 Nang songon i hatana, tung na maol do diambat nasida natorop i, unang saut nasida dipele. 14:19 Alai ro ma angka Jahudi sian Antiokia dohot na sian Ikonium tusi, dihatai ma natorop i, gabe didangguri ma si Paulus, disarat ma ibana tu balian ni huta i, pola dirimpu naung mate ibana. 14:20 Alai dung dihaliangi angka sisean i ibana, hehe ma ibana mulak tu huta i. Dung i torang ni arina i borhat ma ibana rap dohot si Barnabas tu huta Derbe. 14:21 Dibaritahon nasida ma barita na uli i di huta i jala na nia diajari nasida gabe sisean. Jadi mulak ma nasida sian Listra ondeng dohot Ikonium tu Antiokia. 14:22 Dipatogu nasida ma roha ni angka sisean i, diapoi ma nasida, asa marsihohot marhaporseaon, ninna ma: Ingkon bolusonta do lan haporsuhon, laho bongot tu harajaon ni Debata. 14:23 Alai dipillit ma angka sintua di nasida di ganup huria; mardongan tangiang dohot na marpuasa dipasahat ma nasida tu Tuhan naung hinaporseaannasida. 14:24 Dung i dibolus nasida ma luat Pisidia, gabe sahat ma tu luat Pampilia. 14:25 Dihatahon ma hata i di huta Perge, dung i tuat ma nasida tu huta Atalia. 14:26 Sian i ma marparau nasida tu Antiokia, ai disi do dipasahat nasida najolo tu asi ni roha ni Debata, laho mangula ulaon naung pinasidungnasida i. 14:27 Jadi dung sahat nasida, dipapungu ma huria i, dibaritahon ma nasa na pinatupa ni Debata marhitehite nasida, pola diungkap pintu ni haporseaon i nang di halak sipelebegu. 14:28 Dung i na nia do lelengna nasida disi mandongani angka sisean i.
15:1 Jadi adong ma na tuat sian luat Judea; songon on do dipodahon tu angka dongan i: Molo so tarsunat hamu mangihuthon agama ni si Musa, ndang tarbahen hamu gabe malua. 15:2 Jadi guntur ma huria i, pola gogo do nasida dialo si Paulus dohot si Barnabas. Dung i disuru ma si Paulus dohot si Barnabas rap dohot dongan deba nari sian nasida nangkok tu Jerusalem manopot angka apostel dohot angka pangituai, patorangkon salisi i. 15:3 Dibolus nasida na pinaborhat ni huria i ma tano Penisia dohot Samaria, dipajojor ma disi hamumuba ni roha ni angka sipelebegu, gabe las situtu ma roha ni sude angka dongan i dibahen. 15:4 Jadi dung sahat nasida tu Jerusalem, dijangkon na sahuria i dohot angka apostel ro di angka pangituai ma nasida, jadi dibaritahon nasida na ro i ma godang ni na niula ni Debata marhite sian nasida. 15:5 Dung i hehe ma na deba sian rongkanan ni halak Parise, angka naung gabe porsea, mandok: Ingkon sunaton do nasida jala apoan, mangaradoti patik ni si Musa. 15:6 Dung i marpungu ma angka apostel i ro di angka pangituai, sumulu hata i. 15:7 Alai dung leleng marsual, hehe ma si Petrus, ninna ma mandok nasida: Hamu angka hahaanggi! Diboto hamu do, naung tibu dipillit Debata ahu di tongatongamuna, laho patubegehon tu halak sipelebegu barita na uli i, asa porsea nasida. 15:8 Debata sitanda roha i sandiri do sitindangi di nasida, marhite sian na nilehonna i Tondi Parbadia i tu nasida songon na tu hita. 15:9 Ndang dia imbarna hita dohot nasida dibahen Debata, dung dipaias rohanasida hinorhon ni haporseaon i. 15:10 Antong, boasa ma unjunanmuna Debata nuaeng, laho mangampehon auga tu rungkung ni angka sisean, na so tarusung angka amanta i nang hita pe. 15:11 Marhite sian asi ni roha ni Tuhan Jesus do tahe, umbahen na malua hita dihaporseai rohanta; nasida pe songon i do. 15:12 Dung i hohom ma sude natorop i tumangihon hata ni si Barnabas dohot si Paulus, na pajojorhon godang ni tanda dohot halongangan angka na niula ni Debata di tongatonga ni angka sipelebegu marhite sian nasida. 15:13 Asa dung marujung hatanasida, mangalusi ma si Jakobus, ninna ma: Hamu angka hahaanggi, tangihon hamu ma hatangkon! 15:14 Nunga dipajojor si Simon taringot tu panatap ni Debata apala parjolo sahali, manjangkon tu Goarna bangsona sian angka sipelebegu. 15:15 Jala mardomu do i tu hata ni angka panurirang i, songon na tarsurat: 15:16 "Dung salpu i, mulak ma Ahu, laho paulihon muse undungundung ni si Daud naung marumpak i; ulahanku ma paulihon naung maloha i, laho pajongjongkon. 15:17 Asa dilului angka halak na tading i ma Tuhan i, ro di saluhut sipelebegu, angka na manjujung Goarhu," 15:18 ninna Tuhan i, na pabotohon angka i hian sian na robi. 15:19 Dibahen i hutimbang, ndang sisusaan be nasida, angka na ro sian sipelebegu mandompakkon Debata. 15:20 Alai nirodi ma nasida, sumubangkon pardebataon na leban, parmainanon, na mate so sineat ro di mudar i, angka na mangaramuni. 15:21 Ai sian na robi adong do di ganup huta angka na manjamitahon si Musa; ai dijaha do suratna ganup ari Sabbat di angka parguruan. 15:22 Denggan ma didok roha ni angka apostel dohot angka pangituai ro di sandok huria i: Pinillit ma sian nasida dongan sisuruon tu Antiokia mandongani si Paulus dohot si Barnabas, i ma si Jude na margoar si Barnabas dohot si Silas, angka sintua di tongatonga ni donganna. 15:23 Ia surat siboanonnasida on do: Hami angka donganmuna, angka apostel dohot angka sintua, manongos tabi di angka dongan na sian sipelebegu na di huta Antiokia, di luat Siria dohot Kilikia. 15:24 Hubege hami, naung ro deba sian hami an, na manggaori hamu marhitehite hatanasida mangaliluhon rohamuna; tung na so hudokkon hami do nasida. 15:25 Sada do rohanami, mamillit sisuruon on tu hamuna rap dohot si Barnabas dohot si Paulus, angka haholongan ni rohanami. 15:26 Naung diseahon nasida do hosanasida ala ni Goar ni Tuhanta Jesus Kristus. 15:27 Asa husuru hami do si Jude dohot si Silas, asa dohot nasida paboahon hata i tu hamu. 15:28 Ai denggan do di roha ni Tondi Parbadia nang di rohanami: Unang be niampehon tu hamu na dokdok, dungkon ni na ringkot on: 15:29 Parsubangkon hamu ma pelean na tu begu dohot mudar dohot na mate so sineat, angkup ni i parmainanon i; denggan ma dipasiding hamu angka i. Hipas ma hamu! 15:30 Jadi dung dipaborhat, tuat ma nasida tu Antiokia; jadi dipapungu ma natorop i, laho pasahathon surat i. 15:31 Alai dung dijaha nasida surat i, las ma rohanasida jala tarapul. 15:32 Alai si Jude dohot si Silas, panurirang do nasida huhut, jala godang do jamitanasida mangapoi angka dongan i dohot patoguhon rohanasida. 15:33 Alai dung na nia lelengna nasida disi, dipaborhat angka dongan i ma nasida di bagasan dame, mulak tu na marsuru nasida. 15:34 Anggo si Silas, lomo do rohana tading disi. 15:35 Alai mian di Antiokia jolo si Paulus dohot si Barnabas dohot torop angka na asing, mangajarhon dohot mamaritahon hata ni Tuhan i. 15:36 Alai di laonlaon ni ari ninna si Paulus ma mandok si Barnabas: Beta ma hita mangulahi marnida angka donganta i tu ganup huta, naung tajamitai najolo, manang beha pangalahonasida! 15:37 Alai ditahi roha ni si Barnabas do, naeng ma togihononhon dohot si Johannes na margoar si Markus. 15:38 Alai anggo di roha ni si Paulus, ndang tama togihononhon ibana, ala naung ditadingkon nasida di Pampilia jala ndang didongani nasida tu ulaon i. 15:39 Jadi marbada ma nasida, pola sirang; gabe ditogihon si Barnabas ma si Markus marparau tu pulo Siprus. 15:40 Alai dipillit si Paulus ma si Silas bahen donganna; jadi borhat ma ibana, dung dipasahat angka dongan i ibana tu asi ni roha ni Tuhan i. 15:41 Jadi diliati ma tano Siria dohot Kilikia, patoguhon angka huria i.
16:1 Tolhas ma ibana sahat ro di huta Derbe dohot Listra; jadi adong ma disi sada sisean na margoar si Timoteus, anak ni boru Jahudi na porsea, alai halak Junani do anggo amana. 16:2 Denggan do baritana, dihatindangkon angka dongan na di Listra dohot Ikonium. 16:3 Jadi dipangido roha ni si Paulus ma ibana donganna borhat, jala ditogihon ma; disunat ma ibana ala ni halak Jahudi na di luat i, ai diboto be, halak Junani do amana. 16:4 Alai di na mangaliati angka huta i nasida, dipasahat ma patik na pinaputus ni angka apostel dohot sintua na di Jerusalem, siradotannasida. 16:5 Gabe lam togu ma haporseaon ni angka huria i, jala lam ganda toropnasida ganup ari. 16:6 Alai dibolus nasida do luat Prigia dohot Galatia, ala diambat Tondi Parbadia nasida mangkatahon hata i di Asia. 16:7 Jadi sahat ma nasida tungkan luat Misia, dung i diuji nasida ma mardalan tu Bitinia; alai ndang diloas Tondi ni Jesus nasida. 16:8 Asa diarbis nasida ma luat Misia i, jadi tuat ma tu huta Troas. 16:9 Dung i diida si Paulus ma borngin i di bagasan tondina: Jongjong sada halak Makedonia mangelehelek ibana, ia hatana: Taripar ma ho tu Makedonia, mangurupi hami! 16:10 Alai dung diida na niidana i, pintor disangkap rohanami ma borhat tu luat Makedonia; ai ditimbang rohanami do, naung didokkon Debata hami tusi, mamaritahon barita na uli tu nasida. 16:11 Dung i marparau ma hami sian Troas, mamintor tu Samotrake, dung i sadarina i tu Neapolis. 16:12 Sian i tu Pilippi, i ma huta sabungan ni Makedonia jala ojahan ni panggomgomi Rom. Disi ma hami manang piga ari. 16:13 Jadi di ari Sabbat ruar ma hami tu balian ni huta i, tu topi ni batang aek, tu partangiangan na niarop ni rohanami; disi ma hami hundulhundul mangkatai dohot angka parompuan naung pungu disi. 16:14 Jadi adong ma sada parompuan na mananginangi, na margoar si Lidia, sian huta Tiatira, partigatiga abit hasumba, na daulat roha tu Debata; jadi dibungka i Tuhan i ma rohana, gabe diparateatehon ma angka na hinatahon ni si Paulus i. 16:15 Asa dung tardidi ibana dohot donganna sajabu, diapoi ma hami, ninna ma: Molo na tutu ahu porsea di Tuhan i di rohamuna, sorang ma hamu tu jabungku; pola disosoi hami. 16:16 Jadi laho tu partangiangan i, pajumpang ma hami dohot sada naposo boruboru pangarunding; godang do laba ni induk somangna sian pangarundingonna i. 16:17 Dipaihutihut ibana ma si Paulus dohot hami, huhut manjoujou: Angka naposo ni Debata na tumimbul i do halak on, na paboahon dalan tu haluaon di hamuna! 16:18 Jadi songon i ma dibahen ibana ariari. Alai sogo do roha ni si Paulus disi, jadi humusor ma ibana, mandok tu tondi i: Marhitehite Goar ni Jesus Kristus do hudokkon ho ruar sian ibana. Jadi ruar ma ibana di na satongkin i. 16:19 Alai dung diida induk somangna i, na so adong be pangomoan sihirimon sian parompuan i, ditangkup nasida ma si Paulus dohot si Silas, disarat ma tu onan, tujolo ni angka pangarajai. 16:20 Jadi ditogihon ma nasida tujolo ni angka panguhum i, ninna ma: Na manggunturi hutanta on do angka halak on; Jahudi do nasida! 16:21 Dibaritahon do adat na so jadi jaloon manang ihuthononnami, ai halak Rom do hami. 16:22 Jadi hehe ma natorop i dompak nasida, dung i didokkon angka panguhum i ma sintahon ulosnasida, asa dilinsingi. 16:23 Jadi dung leleng dilinsingi, didabu ma nasida tu hurungan, didokkon ma sijaga hurungan i mangaramoti nasida situtu. 16:24 Mangihuthon parenta na jinalona i, didabu ma nasida tu hurungan parbagasan, momos ma patnasida dibeangkon. 16:25 Alai mareak tonga borngin i martangiang ma si Paulus dohot si Silas mamuji Debata, dipatangitangi angka na tarhurung i. 16:26 Alai tompu ma masa lalo bolon, pola lalolalo ojahan ni hurungan i; pintor mungkap do saluhut pintu, tanggal ma nang rantenasida saluhutna. 16:27 Gabe tarsunggul ma sijaga hurungan i; jala dung diida, talak do hape angka pintu ni hurungan i, disintak ma podangna, naeng maningkot; ai dirimpu, naung maporus angka na tarhurung i. 16:28 Alai dipagogo Paulus ma soarana, ninna ma: Unang bahen jea tu ho, ai dison do hami saluhutna! 16:29 Jadi dipangido ma palito, dung i marlojong ma ibana tubagasan, manungkap tujolo ni si Paulus dohot si Silas, huhut angka dotdot. 16:30 Ditogihon ma nasida haruar, ninna ma: Hamu angka tuan, aha ma bahenonku, asa malua ahu? 16:31 Jadi didok nasida ma: Haporseai ma Tuhan Jesus, asa malua ho dohot isi ni bagasmi! 16:32 Laos dipaboa nasida ma hata ni Tuhan i tu ibana dohot tu saluhut donganna sabagas. 16:33 Jadi manigor dialap ma nasida borngin i, diburii ma bogas ni linsinglinsing i, dung i pintor tardidi ma ibana ro di sude nasida na saripe. 16:34 Ditogihon ma nasida tu bagasna, dihobas ma sipanganon; dung i las ma rohana dohot sude isi ni bagasna, ala naung porsea ibana di Debata. 16:35 Jadi dung torang ari, disuru angka panguhum i ma angka opas mandokkon: Palua ma angka halak i! 16:36 Jadi dibaritahon sijaga hurungan i ma hata i tu si Paulus: Nunga disuru angka panguhum i, asa malua hamu. Antong, ruar ma hamu; mardame ma hamu laho! 16:37 Alai didok si Paulus ma tu nasida: Halak Rom do hami, gabe di hapataran do dilinsingi nasida hami, so jolo dipamanat; didabu do hami tu hurungan. Tung marsibuni ma nasida nuaeng paluahon hami? Ndang songon i; ingkon nasida do ro manogihon hami ruar sian on! 16:38 Dung i dipaboa angka opas i ma hata i tu angka panguhum; jadi mabiar ma nasida, dung dibege, halak Rom do hape nasida. 16:39 Jadi ro ma nasida, diapoapoi ma apostel i; jadi dung ditogihon tu balian, dielehelek ma, asa ditadingkon huta i. 16:40 Alai dung ruar nasida sian hurungan i, laho ma nasida manopot si Lidia. Jadi dung diida angka dongan i, jala dung diapuli, borhat ma nasida.
17:1 Alai dung dibolus nasida huta Ampipolis dohot Apolonia, sahat ma nasida tu huta Tessalonik, jala adong ma disi sada parguruan ni Jahudi. 17:2 Mangihuthon somalna ditopot si Paulus ma nasida tusi; tolu ari Sabbat padodot ma dipajojor tu nasida hata ni Surat i. 17:3 Dibuhai ma i laho patorangkon, ingkon marsitaonon Kristus i jala hehe muse sian na mate; jala Jesus i naung hubaritahon tu hamu, i do Kristus i, ninna. 17:4 Deba sian nasida mangoloi, gabe domu tu si Paulus dohot si Silas, songon i torop situtu halak Junani angka na daulat tu Debata, nang parompuan na sangap pe na nia do. 17:5 Alai mangiburui ma angka Jahudi, diarahon ma deba na jahat roha sian halak gambalgambal, digintali jala digunturi ma na sahuta i, jadi ditahopi ma bagas ni si Jason, dipangido ma, naeng boanon nasida tujolo ni natorop. 17:6 Alai dung so jumpangsa nasida, disarat ma si Jason dohot angka dongan i deba tujolo ni na manggomgom huta i, huhut manjoujou: Nunga ro nang tu hita on angka sigunturi liat portibi on! 17:7 Si Jason do manjangkon nasida. Sude nasida mangalo patik ni Kesar i; ai didok do, adong raja na asing, i ma Jesus i. 17:8 Gabe digaori nasida ma roha ni natorop i dohot roha ni na manggomgom huta i, angka na umbegesa. 17:9 Dung pe dijalo nasida tahan sian si Jason dohot angka dongan i, asa dipalua. 17:10 Alai mamintor dipaborhat angka dongan i ma si Paulus dohot si Silas borngin i tu Berea: Jadi dung sahat ro disi, laho ma nasida tu parguruan ni Jahudi. 17:11 Umburju hian do nasida asa pangisi ni huta Tessalonik, ai girgir situtu do rohanasida manjangkon hata i, jala ganup ari ditangkasi Surat i, manang na domu tusi. 17:12 Asa tung torop sian nasida gabe porsea, na nia do nang halak Junani, angka parompuan na sangap nang baoa pe. 17:13 Alai dung diboto angka Jahudi na di Tessalonik i, naung dibaritahon si Paulus hata ni Debata di Berea, ro ma nasida tusi, manggintali dohot manggunturi natorop i. 17:14 Alai pintor dipaborhat angka dongan i ma si Paulus laho dompak laut: Tading ma anggo si Silas dohot si Timoteus disi. 17:15 Alai dipataru nasida ma si Paulus sahat ro di huta Aten, jadi mulak ma nasida, dung dijalo tonana tu si Silas dohot si Timoteus, mandokkon nasida humatop ro tusi. 17:16 Andorang dipaimaima si Paulus nasida di huta Aten, targitik do rohana di bagasan marnida godang ni ganaganaan na di huta i. 17:17 Jadi sai dipanghulingi ma di parguruan angka Jahudi ro di angka na mangkabiari Debata, songon i di onan ariari angka na ro tusi. 17:18 Alai marsual ma deba sian parpoda Epikurus nang Stoa dohot ibana, jadi adong ma na mandok: Aha ma naeng dohonon ni sijubajabi on? Alai na deba mandok: Rupa dihatahon do angka debata na leban; ai dibaritahon do Jesus dohot haheheon sian na mate. 17:19 Jadi dialap nasida ma ibana, ditogihon ma tu Areopagus, angka ninna ma: Ai jadi do botoonnami, manang poda na imbaru dia do na hinatahonmi? 17:20 Ai songon na muba do hata na binoanmi tu hami, gabe naeng ma botoonnami pangalaho ni i. 17:21 Alai saluhut pangisi ni huta Aten ro di angka na leban pe, na mebat tusi, giot mangkatahon dohot mamaritahon barita na imbaru, apala i do na rumingkot di rohanasida. 17:22 Asa jongjong ma si Paulus di parsitongaan ni Areopagus i, ninna ma: Hamu angka halak Aten, sandok huida, mabiar situtu hamu mida angka na pinardebatamuna i. 17:23 Ai di na mardalani ahu, mamerengi angka sisombaonmuna, gabe jumpang ahu ma langgatan sada na sinuratan: Tu Debata na so tinanda! Antong, na sinombamuna na so tinandamuna, i do na hubaritahon tu hamu. 17:24 Ia Debata na tumompa hasiangan on ro di saluhut isina, i ma Tuhan ni langit dohot tano, ndang maringanan Ibana di angka joro na pinauli ni tangan. 17:25 Ndang hurangan Ibana, umbahen pola sihobasan ni tangan ni jolma di Ibana, ai tung Ibana do mangalehon di sudena hangoluan dohot hosa ro di saluhutna i. 17:26 Sian sada jolma do dipatupa Ibana saluhut bangso ni manisia, asa diingani liat sisik ni tano on, dibuhul hian do tingki ni angka bangso i ro di parbalohan ni siinganannasida, 17:27 asa luluannasida Debata, anggiat tung hadadapan nasida Ibana jala jumpang, ai ndang na dao Ibana sian ganup hita on. 17:28 Ai di bagasan Ibana do hita mangolu, manggulmit jala humosa, songon na nidok ni deba parendemuna: "Sabangso do hita dohot Ibana!" 17:29 Antong, anggo sabangso hita dohot Debata, unang ma dirimpu rohanta, suman tu sere Debata, manang tu perak, manang tu batu na pinandean jala piningkiran ni roha ni jolma. 17:30 Naung dibolushon pamereng ni Debata do angka taon haotoon; alai anggo nuaeng dibaritahon do tu hajolmaon: Ingkon sandok sude paubahon rohana. 17:31 Ai nunga di tingki Ibana sada ari paruhuman tu portibi on di bagasan hatigoran, marhite sian sada halak na pinillitna i; ai diungkap do dalan tu haporseaon di saluhut jolma, dung dipahehe Ibana sian na mate. 17:32 Alai umbege hatana na taringot tu haheheon sian na mate, manurahi ma na deba; alai na deba mandok: Naeng begeonnami dope hatam sahali nari taringot tusi. 17:33 Dung songon i, laho ma si Paulus sian tongatonganasida. 17:34 Alai adong do deba na mangihuthon ibana, gabe porsea, songon si Dionisius na sian Areopagus i, nang parompuan sada na margoar Damaris dohot deba nari donganna.
18:1 Dung i borhat ma si Paulus sian huta Aten, laho tu huta Korint. 18:2 Jadi jumpangsa ma disi sada halak Jahudi na margoar Akuila, na tubu di luat Pontus, dohot donganna saripe si Priskilla, angka nambura ro sian Italia, ala diparentahon raja Klaudius, ingkon saluhut halak Jahudi di bungkas sian huta Rom. 18:3 Nasida ma ditopot, laos mian disi jala rap mulaulaon do, ala sahapandean nasida, i ma partonunon. 18:4 Alai marjamita do ibana ganup ari Sabbat di parguruan; ditupuk do roha ni halak Jahudi nang Junani. 18:5 Asa dung ro si Silas dohot si Timoteus sian Makedonia, digogo si Paulus do marjamita, laho mangkatindangkon tu angka Jahudi, Jesus i do Kristus. 18:6 Alai dibahen na mangalo nasida jala manginsahi, dipaspas si Paulus ma ulosna, didok ma tu nasida: Marsapata tu hamu ma mudarmuna, lias do anggo ahu; olat ni on ma ahu laho tu halak sipelebegu! 18:7 Laos meret ibana sian i tu bagas ni sada halak na margoar Titius Justus na mangkabiari Debata; hombarhon bagas parguruan i do jabuna. 18:8 Alai na gabe porsea di Tuhan i do si Krispus, sintua ni parguruan i, ro di saluhutna isi ni jabuna; jala torop sian halak Korint, dung dibege i, gabe porsea jala tardidi. 18:9 Alai borngin i diida si Paulus di bagasan tondina ma Tuhan i na mandok tu Ibana: Unang ma ho mabiar; hatahon ma, unang ma ho mauhom! 18:10 Ai hudongani pe ho, ndang tarhahua manang ise ho, laho mangago; ai torop do halak di Ahu di huta on! 18:11 Asa mian ma ibana disi sataon onom bulan lelengna, mangajarhon hata ni Debata tu nasida. 18:12 Alai uju si Gallio panggomgomi di Akaya rap hehe ma halak Jahudi dompak si Paulus, ditogihon ma ibana tu paruhuman. 18:13 Angka ninna ma: Dihatahatai on do angka jolma i mangoloi Debata maralohon patik i. 18:14 Jadi di na naeng mangkuling si Paulus, ninna si Gallio ma mandok angka Jahudi: O hamu halak Jahudi! Aut ala ni pambahenan hageduhon manang hajahaton, patut antong antoanku hamu. 18:15 Alai anggo parsalisian siala podapoda dohot goargoar dohot patikmuna, rohamuna ma disi; ai ndang olo ahu manguhumi sisongon i. 18:16 Jadi dipalaho ma nasida sian paruhuman i. 18:17 Gabe ditangkup nasida saluhutna ma si Sostenes, sintua ni parguruan, dibalbali ma ibana di jolo ni paruhuman i; ndang diantoi si Gallio. 18:18 Jadi na nia dope lelengna si Paulus disi, asa martinading hata tu angka dongan i. Dung i marparau ma ibana tu Siria rap dohot si Priskilla dohot si Akuila. Di huta Kenkrea digusting obukna, ai adong do bagabagana. 18:19 Dung i rap sahat ma tu huta Epesus jadi ditadingkon ma nasida disi; laho do anggo ibana tu parguruan mangkatai dohot halak Jahudi. 18:20 Alai ndang dioloi pangidoannasida, naeng mian ibana lumeleng disi. 18:21 Martinading hata nama ibana, ninna ma: Huulaki pe manopot hamu, molo diloas Debata. Dung i marparau ma ibana, borhat sian Epesus. 18:22 Sahat ma ibana tu huta Kaesarea, dung i nangkok ma, ditabi huria i. Dung i tuat ma ibana tu huta Antiokia. 18:23 Asa dung na nia lelengna ibana disi, borhat ma ibana; jojor ma dibolus luat Galatia dohot Prigia, patoguhon roha ni saluhut sisean i. 18:24 Alai ro ma tu huta Epesus sada halak Jahudi na margoar Apollos, na tubu di Aleksanderia; halak na pistar do ibana, na torang umboto Surat i. 18:25 Nunga diajarhon tu ibana dalan ni Tuhan i jala na hiras do rohana, mangkatahon, torang do pamodaionna taringot tu Jesus; alai holan pandidion ni si Johannes do diboto. 18:26 Dipungka ibana ma marjamita di parguruan i sian roha na hiras; dibege si Akuila dohot si Priskilla jamitana, gabe ditogihon ma, dipajojor ma dalan ni Debata tumangkas tu ibana. 18:27 Alai di na naeng laho ibana tu Akaya, manolopi do angka dongan i, disurathon ma tu angka sisean i, asa dijangkon ibana. Jadi dung sahat ibana ro disi, godang ma panumpakna di angka na porsea i, dibahen asi ni roha ni Debata. 18:28 Ai mansai torang do jamitana; ditaluhon do angka Jahudi di na patar, ai dipatorang sian angka surat i, Jesus i do Kristus.
19:1 Alai uju di huta Korint si Apollos, didalani si Paulus ma angka luat na tungkan dolok sahat ro di huta Epesus, jadi jumpangsa ma disi deba sisean. 19:2 Dung i ninna ma mandok nasida: Naung dijalo hamu do Tondi Parbadia, di na gabe porsea hamu? Alai ninna nasida ma mandok ibana: So hea hubege hami, adong Tondi Parbadia! 19:3 Dung i ninna ma: Ai pandidion dia do dijalo hamu? Jadi didok nasida ma: Pandidion ni si Johannes do. 19:4 Dung i didok si Paulus ma: Ia pandidion ni si Johannes, na mandokkon paubahon roha do; ai diapoi do natorop i mangkaporseai na naeng ro sian pudina, i ma Jesus. 19:5 Umbege i nasida, dipadidihon be ma dirina tubagasan Goar ni Tuhan Jesus. 19:6 Jadi di na mangampehon tanganna si Paulus tu nasida, songgop ma Tondi Parbadia tu nasida, jadi mangkatahon di hata na asing ma nasida dohot manurirangi. 19:7 Alai intap sampuludua halak do nasida pungu. 19:8 Dung i laho ma ibana tubagasan parguruan, hiras ma rohana marjamita disi leleng ni tolu bulan; dipatorang jala dipasingothon pangalaho ni harajaon ni Debata. 19:9 Alai dipajogal na deba do rohana jala ndang mangoloi huhut dope manginsahi agama i di jolo ni natorop i, jala ditadingkon ibana ma nasida; dipapulik ma angka sisean i, jadi di sikola ni si Tiranus ma ibana marjamita ganup ari. 19:10 Leleng ni dua taon ma sai songon i gabe sange ma dibege saluhut pangisi ni luat Asia hata ni Tuhan i, nang Jahudi nang Junani pe. 19:11 Jala angka hagogoon na sumurung do diula Debata marhite sian tangan ni si Paulus. 19:12 Pola do dipamboan halak angka sekka dohot sampesampe na sian dagingna tu angka na hansitan i, gabe munsat do angka sahit sian nasida, ruar do nang angka tondi na hodar. 19:13 Jadi adong ma deba Jahudi na maotaot, angka sipabali begu, na manguji mangkatahon Goar ni Tuhan Jesus tu angka partondi na hodar i, angka ninna ma: Mangasahon Jesus, na binaritahon ni si Paulus i, hupabali ma hamu! 19:14 Angka anak ni si Sikewa, sada malim ni Jahudi, pitu halak do na mambahensa. 19:15 Alai ninna tondi na hodar i ma mangalusi nasida: Na hutanda do anggo Jesus i, si Paulus pe huboto do; alai anggo hamu, ise do hamu? 19:16 Laos ditahopi jolma partondi na hodar i ma nasida, dipatunduk ma nasida duansa, digosagosa, pola marsaemara jala mabugang nasida maporus sian jabu i. 19:17 Jadi diboto saluhut halak Jahudi ma i ro di halak Junani na maringanan di huta Epesus, gabe songgop ma biar tu rohanasida saluhut, jadi tongam ma Goar ni Tuhan Jesus. 19:18 Jadi torop sian angka naung gabe porsea ro manopoti jala paboahon bahenbahenannasida. 19:19 Jala lan do sian angka mangulahon hadatuon najolo palunggukkon angka pustaha i, disoksohi ma i di jolo ni saluhutna; dung i diasam ma argana, jadi dapot ma limapulu ribu rupia. 19:20 Songon i ma lam rarat jala lam hot hata i hombar tu hagogoon ni Tuhan i. 19:21 Salpu i, ditahi roha ni si Paulus ma, naeng mardalan tu huta Jerusalem, mamolus sian luat Makedonia dohot Akaya; ai ninna ma: Ia dung sian i ahu, ingkon dohot ma huta Rom idaonku. 19:22 Jadi disuru ma dua halak parhobasna, i ma si Timoteus dohot si Erastus, tu luat Makedonia; alai anggo ibana mangulon dope jolo di Asia. 19:23 Alai tubu ma uju i guntur bolon siala agama i. 19:24 Ai adong ma sahalak tungkang perak na margoar Demetrius, sipauli angka bagas joro perak ni debata Artemis; na nia do pangomoan dipatongon tu angka pande i. 19:25 Dipapungu ibana ma angka pande i ro di angka pangulanasida, didok ma: Diboto hamu do, ale, sian ulaon on do sinadonganta. 19:26 Diida jala dibege hamu do, ndada holan di Epesus on, tung hira di sandok luat Asia dihatahatai jala dipabalik si Paulus on do torop halak, didok do: Ndang na tutu Debata, ia angka na pinauli ni tangan. 19:27 Jala ndada holan pandaramanta on tarmara laho mago; dohot do tahe debata Artemis na balga i, na sinomba ni liat Asia i dohot isi ni portibi on, gabe lea jorona jala ambolong hamuliaonna. 19:28 Alai umbege hata i, gok rimas ma rohanasida, jala gogo ma dijoujouhon: Na balga do Artemis ni halak Epesus! 19:29 Jadi guntur situtu ma nasida na sahuta i: Ria ma nasida manahopi bagas painonduran, laos disarat ma tusi si Gayus dohot si Aristarkus, halak Makedonia, dongan ni si Paulus i. 19:30 Jadi naeng ma laho si Paulus tu tongatonga ni halak i; alai ndang diloas angka sisean i. 19:31 Pola dohot do deba sian angka pangituai sian luat Asia, alealena i, marsuru mangelehelek ibana, unang laho tu painonduran i. 19:32 Alai asingasing be do dipanjoujouhon nasida; ai tung na gaor do na pungu i, jala godangan do na so umboto, manang ala ni aha umbahen na marpungu. 19:33 Alai sian tongatonga ni natorop i dipajolo angka Jahudi ma si Aleksander, dung jolo diajari. Jadi dihiraphon ma tanganna, laho manariashon hatana tu natorop i. 19:34 Alai dung diboto nasida, halak Jahudi ibana, sada nama soara ni saluhutna, hira dua jom do lelengna dipanjoujouhon: Balga do Artemis ni halak Epesus! 19:35 Alai dipasonang juaratulis i ma natorop i, ninna ma: Hamu halak Epesus! Halak dia ma na so umboto, huta Epesus do parhalado di Artemis na balga i, nang di gombaranna na madabu sian ginjang! 19:36 Ndang na targaga i antong; dibahen i tama sonang hamu, unang pola tarsomong mambahen manang aha. 19:37 Ditogihon hamu do angka halak on tuson, so manang sisoro ugasan ni bagas joro manang panginsahi di debatanta i nasida. 19:38 Alai molo tung adong alualu ni si Demetrius dohot angka donganna pande dompak manang ise, adong do angka panguhuman dohot angka panggomgomi; disi ma nasida masialusan. 19:39 Alai molo na asing dilului hamu, di parluhutan i ma pinaputus i! 19:40 Atik beha dialuhon hita maon, ala ni guntur sisadari on; so haru adong paralaan na mambahen lias hita taringot tu na guntur on. 19:41 Songon i ma hatana, pamulihon na pungu i.
20:1 Asa dung montok na gaor i, dijou si Paulus ma angka sisean i tu jolona, laho martinading hata tu nasida, dung i borhat ma ibana tu Makedonia. 20:2 Didalani ma angka luat i, buas jamitana mangapoi nasida; laos tolhas ma tu tano Junani. 20:3 Tolu bulan lelengna mangulon ibana disi, jala laho marparau hian tu tano Siria, gabe dionggopi angka Jahudi ma ibana; jadi dipaputus ma rohana, mulak sian Makedonia. 20:4 Alai donganna do si Sopater, anak ni si Pirus na sian Berea, si Aristarkus dohot si Sekundus, halak Tessalonik, si Gayus sian huta Derbe dohot si Timoteus, si Tikikus, dohot si Tropimus na sian Asia. 20:5 Jumolo do anggo nasida, gabe dipaima do hami di Troas. 20:6 Salpu pesta Paska i marparau ma hami borhat sian Pilippi, jadi palimaarihon pajumpang ma hami dohot nasida di Troas; disi ma hami mangulon pitu ari lelengna. 20:7 Alai marsogot ni ari Sabbat i, uju marpungu hami laho marulaon na badia, marjamita ma si Paulus tu nasida jala dipaganjang ma jamitana pola ro di tonga borngin, ala na naeng borhat ibana manogotna i. 20:8 Alai torop do palito di bilut parginjang, di parpunguannami i. 20:9 Jadi adong ma dolidoli sahalak, na margoar Eutikus, na hundulhundul di jandela; tarlalap ma ibana di na mandatdati si Paulus mangkatai; jadi nok ma matana, gabe madabu ma ibana sian tindi patoluhon tu toru, jadi nunga mate dihindat. 20:10 Gabe mijur ma si Paulus, ditahopi ma ibana jala dihaol, ninna ma: Unang hamu gaor, di bagasan ibana do tondina! 20:11 Dung i mulak ma ibana tu ginjang, diponggoli ma roti i, laos mangan ma; dung i na nia dope dihatahon sahat ro di na mareak torang ari, jadi songon i ma ibana borhat. 20:12 Alai mangolu do dolidoli i ditogihon nasida; jadi tarapul situtu ma rohanasida. 20:13 Dung i jumolo ma hami bongot tu parau i marlayar tu Asos, asa disi jaloonnami si Paulus hombar tu na niaturhonna, ai na naeng mandarat do ibana. 20:14 Jumpangsa ma hami di Asos jala jinangkon ma ibana, dung i sahat ma hami tu Metilene. 20:15 Jadi dung marlayar hami sian i, sahat ma hami torang ni arina i tungkan tondong ni Kios jala marsogotna i mandapothon pulo Samos ma hami, dung i marsogotna i muse sahat ma hami tu Miletus. 20:16 Ai naeng laosan do huta Epesus di roha ni si Paulus, asa unang ginetean tingkina mangulon di Asia; ai mangkudus do ibana, anggiat sanga marari Pentakoste tu huta Jerusalem. 20:17 Alai disuru do sian Miletus tu Epesus manjou angka sintua ni huria i. 20:18 Jadi di na ro i nasida mandapothon ibana, ninna ma mandok nasida: Diboto hamu do pangalahongku, saleleng ahu rap dohot hamu olat ni ari parjolo, dung hudege Asia. 20:19 Ai huoloi do Tuhan i sian nasa serep ni roha huhut mariluilu manaon pangunjunan, angka na tahop tu ahu dibahen tahi ni halak Jahudi. 20:20 Ndang na hutabunihon manang aha na marguna, na so haru jinamitahon manang pinodahon tu hamu di hatoropan, nang marsasajabu pe. 20:21 Tongtong do huhatindangkon tu halak Jahudi nang tu halak Junani hamumuba ni roha tu Debata dohot haporseaon di Tuhanta Jesus Kristus. 20:22 Anggo saonari, songon na diihoti Tondi i do ahu, laho tu Jerusalem; so adong huboto, manang dia na naeng masa tu ahu disi. 20:23 Holan on: Hira di ganup huta dilumbahon Tondi Parbadia, tali dohot na porsuk do sitagamonku disi. 20:24 Alai ndang pola arga hurajumi hosangku, asal ma hupaujung langkangki dohot ulaon naung hujalo sian Tuhan Jesus, i ma na mangkatindangkon barita na uli taringot tu asi ni roha ni Debata. 20:25 Nuaeng pe, huboto do, ndang be idaonmuna bohingku, saluhut hamu na hutopot i paboahon Harajaon i. 20:26 Dibahen i huhatindangkon tu hamu sadari on: Naung lias do ahu sian sapata ni mudar ni saluhut hamu. 20:27 Ai ndang adong hubuati agia aha; tung sahat do hupabotohon tu hamu nasa tahi ni Debata. 20:28 Antong, ramoti hamu ma dirimu ro di sandok panggungan i, ai dipatindang Tondi Parbadia i do hamu gabe simatamatai, asa diparmahani hamu huria ni Tuhan i, na tinobusna marhite sian mudarna sandiri. 20:29 Ai huboto do: Ia dung laho ahu, bongot ma tu hamu, babiat panoro, angka na so mangolani na pinarmahan i. 20:30 Gari sian tongatongamuna sandiri hehe ma halak angka na mamodahon na lipe, mangelaela angka sisean i mangihuthon nasida. 20:31 Dibahen i, dungo ma hamu; ingot hamu ma, na so marpansadian ahu arian dohot borngin tolu taon lelengna paingothon ganup hamu mardongan iluilu. 20:32 Onpe, hupasahat ma hamu nuaeng tu Debata dohot tu hata asi ni rohana. Ibana do na margogo patoguhon roha jala mangalehon siteanon i tu saluhut na badia i. 20:33 Ndang dung ditodo rohangku sian manang ise perak, manang sere, manang ulos. 20:34 Diboto hamu do, tangankon do pangalugai di na hasea di ahu nang di angka na mandongani ahu. 20:35 Sandok hupatuduhon tu hamu, ingkon songon i do iba mulaulaon laho mangurupi angka na so margellok, marningot hata ni Tuhan Jesus, ai Ibana do mandok: "Martuaan do na mangalehon sian na manjalo!" 20:36 Jadi dung didok songon i, marsinggang ma ibana jala rap martangiang nasida saluhutna. 20:37 Alai tangis situtu ma nasida saluhutna jala dihaol nasida si Paulus huhut diumma. 20:38 Apala hatana ondeng ma gumodang diarsakkon nasida, na so idaonnasida be bohina. Laos dipataru nasida ma ibana tu parau i.
21:1 Asa dung sirang hami sian nasida, marlayar ma hami manumpol tu pulo Kos, jala torang ni arina i tu Rodos, sian i tu Patara. 21:2 Jadi jumpang hami ma sada parau, naeng taripar tu Penisia, i ma hubongoti hami laos marlayar. 21:3 Dung hutatap hami pulo Siprus, hulaosi hami ma i tungkan sihambirang laho manuju dompak Siria, jadi tardarat ma hami di Tirus, ai tusi do hasahatan ni muatan ni parau i. 21:4 Hutopot hami ma angka sisean i jala mangulon disi pitu ari lelengna. Hinorhon ni Tondi i dipalumba nasida do si Paulus, unang nangkok tu Jerusalem. 21:5 Alai dung salpu ariarinami disi, hehe ma hami laho borhat muse, jadi dipataru nasida saluhutna padohot angka ina ro di angka dakdanak ma hami tu balian ni huta i, jadi marsinggang ma hami martangiang di topilaut. 21:6 Dung masijalangan bongot ma hami tu parau; mulak do anggo nasida tu ingananna be. 21:7 Marujung ma parparauonnami, ai sian Tirus sahat ma hami tu Ptolemais; jadi hujalang hami ma angka dongan, laos mangulon do di nasida sadari. 21:8 Alai marsogotna i borhat ma hami, gabe sahat ma tu Kaesarea, jadi laho ma hami tu bagas ni si Pilippus parjamita i, sada sian na pitu i, jadi sorang di ibana ma hami. 21:9 Alai adong ma opat boruna na marbaju, angka na manurirangi. 21:10 Jadi andorang lumeleng mangulon hami disi, tuat ma sian Judea sada panurirang na margoar Agabus. 21:11 Didapothon ma hami, dibuat ma hohos ni si Paulus, dirahuthon ma tu tanganna dohot tu patna, huhut ma didok: On do hata ni Tondi Parbadia: Songon on ma ihoton ni angka Jahudi di Jerusalem nampuna hohos on, pasahatonnasida do ibana tu tangan ni sipelebegu. 21:12 Umbege hata i, huelehelek hami rap dohot ma maringanan disi ma ibana, unang nangkok tu Jerusalem. 21:13 Alai ninna si Paulus ma mangalusi: Dia do na binahenmuna, na tumatangis i dohot na mangalalai rohangku? Hobas do ahu, ihoton nang bunuon pe di Jerusalem ala ni Goar ni Tuhan Jesus! 21:14 Dung so olo ibana apoan, hohom sambing hami, gabe hudok hami ma: Sai saut ma lomo ni roha ni Tuhan i! 21:15 Asa dung salpu angka ari i, marhobas ma hami, laho nangkok tu Jerusalem. 21:16 Alai dohot sisean deba na sian Kaesarea mandongani hami, ditogihon ma hami sorang tu si Manason sian Siprus, naung leleng sisean. 21:17 Di na sahat hami tu Jerusalem, las do roha ni angka dongan i manjangkon hami. 21:18 Jala torang ni arina i laho ma si Paulus rap dohot hami manopot si Jakobus, gabe ro ma tusi angka sintua saluhutna. 21:19 Jadi dung dijalang ibana nasida, jojor ma dihatahon tu nasida na binahen ni Debata tu halak sipelebegu marhitehite ulaonna i. 21:20 Umbege hatana i, dipuji nasida ma Debata; dung i didok nasida ma tu ibana: Diida ho do, anggia, marriburibu do halak Jahudi angka naung gabe porsea, jala saluhut do nasida mangkapadothon patik i. 21:21 Dibege nasida, dipodai ho do halak Jahudi saluhutna, na di tongatonga ni halak sipelebegu, asa sirang sian si Musa, jala didok ho do, na so jadi sunatonnasida angka anakkonna, jala ndang pola radotannasida adat i, ninna. 21:22 Antong, beha nama? Ai begeonnasida do, naung ro ho. 21:23 Onpe, bahen ma na hudok hami on di ho! Adong do di hami opat halak, na marutang bagabaga. 21:24 Togihon ma nasida, urasi ma dirim rap dohot nasida, harugihon ma tu nasida, asa dipagustingkon obukna, gabe botoon ni saluhutna, na so tutu do hape barita i, na taringot tu ho, naung dohot do ho tahe pangaradoti di patik. 21:25 Alai taringot tu angka sipelebegu, naung gabe porsea, nunga pinatikkon hian tu nasida, ingkon dijaga dirina be maralohon pelean na tu begu, dohot mudar, songon i na mate so sineat, ro di parmainanon. 21:26 Jadi marsogotna i diarahon si Paulus ma angka baoa i, diurasi ma dirina rap dohot nasida, laho tu bagas joro, paboahon na naeng gohanna angka ari pangurasan i, paima sahat pelean sian ganup nasida. 21:27 Alai di na mandok marujung na pitu ari i, diida angka Jahudi na sian Asia ma ibana di bagas joro, gabe digunturi ma saluhut natorop i, ditangkup ma ibana. 21:28 Huhut ma dijouhon: O hamu halak Israel, urupi hami! On do jolma i, na sai mangajari saluhut halak maralohon bangsonta dohot patik i ro di inganan on. Dohot do halak Junani hape ditogihon tu bagas joro on; diramuni do inganan na badia on! 21:29 Ai naung diida nasida do si Tropimus na sian huta Epesus rap dohot ibana di huta i, gabe dirimpu, naung ditogihon si Paulus ibana tu bagas joro i. 21:30 Jadi guntur ma sandok huta i, marpungu ma sude natorop, disoro ma si Paulus, disarat ma tu balian ni joro i; dung i pintor ditutup ma angka pintu. 21:31 Alai di na naeng pusaonnasida ibana, sahat ma tu kapiten barita i, naung guntur do sandok Jerusalem. 21:32 Jadi pintor ditogihon ibana ma angka soldadu ro di angka letnan manahopi nasida; asa disi diida nasida kapiten i dohot angka soldaduna, dipasohot ma na mambalbali si Paulus. 21:33 Gabe ro ma kapiten i, ditangkup ma si Paulus, didokkon ma ihoton ibana dohot dua rante, dung i dipatangkas ma, manang halak dia ibana ro di na binahenna. 21:34 Alai sai masipansorohon hatana do natorop i; asa dung so jumpangsa hata na sintong dibahen na guntur i, didokkon ma togihononhon ibana tu tangsi. 21:35 Alai di na sahat i ibana tu tangga, diusung angka soldadu nama ibana dibahen panahopi ni natorop i. 21:36 Ai na mangihut do natorop i huhut manjoujou: Pinusa ma ibana! 21:37 Jadi di na naeng togihononnasida si Paulus tubagasan tangsi i, didok ma tu kapiten i: Jadi do dohononku hata tu ho? Gabe didok ma: Diboto ho do hape hata Junani? 21:38 Asa ndada ho halak Misir i, na manggunturi naengan on dohot manogihon na opatribu panamun tu parhorsihan? 21:39 Dung i didok si Paulus ma: Jahudi do ahu, raja huta do ahu di Tarsus, huta na tarbarita di luat Kilikia. Raja ho, loas ahu jolo mangkatai tu natorop i! 21:40 Jadi dung diloas, jongjong ma si Paulus di tangga i, dihiraphon ma tanganna tu natorop i. Jadi dung hohom be, marhata Heber ma ibana, ninna ma:
22:1 Hamu angka hahaanggi dohot ama, tangihon hamu ma pangalusionkon na tu hamu! 22:2 Asa dung dibege nasida, marhata Heber ibana tu nasida, lam hohom be ma, gabe ninna ma: 22:3 Halak Jahudi do ahu, na tubu di Tarsus na di luat Kilikia, alai magodang do di huta on; di parsikolaan ni si Gamaliel do ahu diajari mangihuthon patik ni angka amanta i timpas, gabe hupapusuhon mangoloi Debata, songon sude hamu sadari on. 22:4 Hupaburuburu do parugama on maradu mate nasida, ai huihoti do angka baoa dohot boruboru laho pasahathon tu hurungan. 22:5 Sintua ni malim i ro di angka sintua do panindangi di ahu, ai sian nasida do hujalo surat tu angka dongan i, di na laho i ahu tu huta Damaskus, manogihon dohot tarihot nang angka na disini tu Jerusalem, asa hona uhum nasida. 22:6 Alai masa ma, di na di tongandalan i ahu mardonokkon huta Damaskus, tar di hos ni ari, tompu ma sumillam sian ginjang humaliang ahu sondang na tiur situtu. 22:7 Pola tinggang do ahu tu tano, dung i hubege ma sada soara na mandok tu ahu: Saulus!, Saulus! Boasa leleanmu Ahu? 22:8 Jadi ningku ma mangalusi: Ise do Ho, Tuhan? Jadi ninna ma mandok ahu: Jesus do Ahu, na sian Nasaret, na nileleanmi! 22:9 Diida angka donganku do nian sondang i, alai ndang dibege nasida soara ni na mangkatai dohot ahu. 22:10 Gabe ningku ma: Dia ma sibahenonku, Tuhan? Jadi didok Tuhan i ma tu ahu: Hehe ma ho, laho ma tu Damaskus: Disi do paboaon tu ho saluhut na patut ulaonmu. 22:11 Alai ndang marnida be ahu dibahen sillam ni sondang i, gabe ditogu angka donganki nama tanganku sahat tu Damaskus. 22:12 Dung i adong ma disi sahalak na margoar Ananias, halak na daulat roha marningot patik i; na denggan do baritana di saluhut Jahudi na maringan disi. 22:13 I do na ro manopot ahu, ninna ma: Ale Saulus, anggia; marnida ma ho! Jadi manigor saut ma huida ibana. 22:14 Dung i ninna ma: Nunga dipillit Debata ni angka amanta hian do ho, asa tandaonmu lomo ni rohana, jala idaonmu Partigor i jala begeonmu soarana sandiri, 22:15 asa gabe sitindangina ho tu sude jolma taringot tu na niida dohot na binegem i. 22:16 Onpe, boasa sulonsulonon roham? Hehe ma ho, padidihon ma ho jala paburihon ma dosam, dung dijou ho Goarna i! 22:17 Alai jumpang ma di ahu, dung mulak ahu tu Jerusalem, marhatiuron ma tondingku, di na martangiang i ahu di bagas joro. 22:18 Ai huida do Ibana; didok do tu ahu: Humatop ma ho laho sian Jerusalem on, ai ndang jaloonnasida pangkatindangkonmi na taringot tu Ahu. 22:19 Dung i ningku ma: Diboto nasida do, ale Tuhan, ahu do na mangkurungkon dohot mangalinsingi di angka parguruan angka na porsea di Ho. 22:20 Jala di na durus mudar ni si Stepanus sitindangimi, disi do ahu jala hinalomohon do i, jala ahu do mangaramoti ulos ni angka na mamusa ibana. 22:21 Jadi didok ma mandok ahu: Laho ma ne ho; ai tu halak sipelebegu, tu na dao naeng suruonku ho! 22:22 Jadi sintap ni hata ondeng nama dipatangitangi nasida ibana, gabe dipangiar be ma soarana, mandok: Padao ma halak on sian tano on, ai ndang tama mangolu ibana! 22:23 Alai sai tole do nasida manjoujou, ditimpalhon do ulosnasida, jala disangkophon orbuk i dompak ginjang. 22:24 Jadi didokkon kapiten i ma togihononhon ibana tubagasan tangsi; disuru ma na mangalinsingi ibana laho manangkasi, asa binoto alana, umbahen na songon i panjouonnasida dompak ibana. 22:25 Alai di na naeng tambatonnasida ibana dohot tali pasa, ninna si Paulus ma mandok letnan na jongjong disi: Na jadi do linsinganmuna halak Rom, nang so jolo niuhuman? 22:26 Umbege hata ondeng letnan i, ditopot ma kapiten paboahonsa, ninna ma: Aha naeng bahenonmu? Halak Rom do halak i! 22:27 Jadi ditopot kapiten ma ibana, ninna ma: Paboa tu ahu, halak Rom do ho? Jadi didok ma: I do! 22:28 Dung i mangalusi ma kapiten i: Ia ahu, godang do huharugihon manuhor uhum Rom. Jadi didok si Paulus ma: Alai anggo ahu, na sian partubungku do songon i. 22:29 Jadi pintor sumurut ma angka na naeng manangkasi ibana; ai mabiar do kapiten i, dung diboto halak Rom do hape si Paulus, naung didokkon talion. 22:30 Torang ni arina i naeng ma tangkas botoonna alana, umbahen na dialuhon angka Jahudi i ibana, jala dipalua ma ibana, didokkon ma marpungu angka sintua ni malim dohot rapot godang i, ditogu ma si Paulus tu tongatonganasida.
23:1 Alai dibereng si Paulus ma rapot i, ninna ma: Hamu, angka hahaanggi, na marparange do ahu sian nasa burju ni rohangku mangoloi Debata ro di sadari on. 23:2 Alai didokkon sintua ni malim Ananias ma angka na jongjong disi mamastap ibana. 23:3 Dung i didok si Paulus ma mandok ibana: Pastapon ni Debata ma ho, dorpi na hinapur! Na hundul do ho manguhumi ahu marguru tu patik, hape didokkon ho pastapon ahu maralohon patik i! 23:4 Dung i didok na jongjong disi: Ai insahanmu sintua ni malim ni Debata? 23:5 Gabe didok si Paulus ma: Ndang na huboto, ale dongan, ibana sintua ni malim i; ai tarsurat do: "Ndang jadi insahanmu sintua ni bangsom!" 23:6 Alai diboto si Paulus ma, deba sian nasida Saduse, na deba halak Parise, gabe dijouhon ma di rapot i: Hamu angka hahaanggi! Halak Parise do ahu jala anak ni Parise. Ala ni pangkirimon ni roha dohot ala ni haheheon sian na mate, umbahen na tu paruhuman on ahu. 23:7 Alai dung didok songon i, marsalisi ma angka Parise dohot Saduse, gabe mardua roha ma na pungu i. 23:8 Ai disoadahon angka Saduse do haheheon nang surusuruan nang tondi; alai anggo Parise, diparhatutu do duansa. 23:9 Jala mansai guntur ma; alai hehe ma deba sibotosurat sian horong ni angka Parise mangalo, ninna ma: Ndang adong na jahat jumpang hami di halak on. Atik naung tutu dipanghulingi Tondi manang surusuruan ni Debata ibana. 23:10 Alai lam balga ma bada i, jala mabiar ma kapiten i, aik boha diparsisiga nasida si Paulus, gabe didokkon ma tuat soldadu i mangaroro ibana sian tongatonganasida, manogihon tu tangsi. 23:11 Alai bornginna i jongjong ma Tuhan i di lambungna, didok ma: Pos ma roham! Songon naung hinatindangkonmi Ahu di Jerusalem on, ingkon songon i do ho mangkatindangkon nang di huta Rom! 23:12 Alai dung torang ari, marbulan ma deba sian angka Jahudi, dipambuburahon ma dirina, mandok na so tupa mangan manang minum nasida, saleleng so dipusa si Paulus. 23:13 Lobi opatpulu do torop ni na marbulan songon i. 23:14 Jadi ro ma nasida, manopot angka sintua ni malim ro di angka pangituai, didok ma: Nunga hupambuburahon hami dirinami, na so jadi daionnami agia aha, saleleng so hupusa hami si Paulus. 23:15 Antong, rap ma hamu dohot rapot i mangidohon tu kapiten i, asa ditogihon ibana tu jolomuna, songon na laho patangkashon tumorang hata i; alai hobas do hami mamusa ibana, tagan di tongandalan dope. 23:16 Alai tarbege do tahi i tu ibebere ni si Paulus, jadi laho ma ibana tu tangsi i paboahonsa tu si Paulus. 23:17 Jadi dijou si Paulus ma sada letnan tu lambungna, didok ma: Togihon dolidoli on tu kapiten i, ai adong do sipaboaonna tu ibana. 23:18 Jadi diarahon ma ibana, ditogihon ma tu kapiten, ninna ma: Na dijou si Paulus na tarhurung i do ahu; dipangido tu ahu, togihononhon dolidoli on tu jolom, ala adong sidohononna tu ho. 23:19 Ditiop kapiten ma tanganna manogihon ibana tu na soding, disise ma: Ai aha do sipaboaonmu tu ahu? 23:20 Jadi didok ma: Na martuptup do angka Jahudi mangidohon sian ho, naeng togihononmu marsogot si Paulus tujolo ni rapot, songon na naeng dope patangkasonnasida hata i. 23:21 Onpe, unang oloi nasida, ai lobi opatpulu halak sian nasida mangonggopi ibana, angka naung mambuburahon dirina, na so tupa mangan manang minum, saleleng so dipusa ibana; nunga hobas nasida nuaeng, holan hata sian ho nama dipaima. 23:22 Dung i dipamuli kapiten ma dolidoli i, dipopai ma, na so jadi paboaonna naung pinatolhasna i tu ibana. 23:23 Gabe dijou ma dua letnan tu jolona, didok ma: Padiri hamu ma duaratus soldadu laho tu Kaesarea, rap dohot pitupulu halak parsihundul, angkup ni i dua ratus pandongani, pungkul sia borngin. 23:24 Pinadiri huhut hoda hundulan ni si Paulus, mangaluahon ibana tu panggomgomi Feliks. 23:25 Laos dibahen ma surat songon on: 23:26 Na manongos tabi do si Klaudius Lisias tu na pinarsangapan Panggomgomi Feliks. 23:27 Na ditangkup angka Jahudi do halak on; jadi di na naeng pusaonnasida ibana, ro do ahu dohot angka soldadu mangarampas ibana, dung huboto, halak Rom do ibana. 23:28 Alai di na naeng botoonku alana, umbahen na disalahon nasida ibana, hutogihon ma ibana tujolo ni rapotnasida. 23:29 Gabe dapot ahu ma: Siala parsalisian taringot tu patiknasida do dialuhon nasida ibana; ndang adong hata dompak ibana, umbahen na patut marutang hosa manang tu hurungan ibana. 23:30 Alai adong ma na paboahon tu ahu tahinasida dompak halak on, jadi manigor ma husuru ibana tu ho, jadi hudok tu angka pangalu, asa tu ho diandehon sidohononna i. 23:31 Asa diboan angka soldadu i ma si Paulus mangihuthon parenta i, ditogihon ma di na saborngin i tu Antipatris. 23:32 Alai marsogotna i disuru nasida ma angka parsihundul i mamboan ibana; na mulak tu tangsi i do anggo nasida. 23:33 Jadi tolhas ma nasida tu Kaesarea, dipasahat ma surat i tu panggomgomi, ditogihon ma si Paulus tu jolona. 23:34 Jadi dung dijaha surat i, disungkun ma, manang sian luat dia ibana. Jadi dung diboto, na sian Kilikia ibana, ninna ma: 23:35 Hutangkasi pe hatami, dung ro angka na mangaluhon ho. Dung i didokkon ma na mangkurungkon ibana tu bagas paruhuman na di raja Herodes.
24:1 Asa dung salpu lima ari, tuat ma si Ananias, sintua ni malim i, rap dohot deba sintua dohot sada halak parhata, si Tertullus, mangadap tujolo ni panggomgomi, mangaluhon si Paulus. 24:2 Alai dung taralap ibana, dibungka si Tertullus ma pangaluanna i, ninna ma: 24:3 Na taruli dame godang do hami binahenmi, jala marhite sian panarihon ni roham ganda do pangabahan ni bangso on; sandok mardongan hamauliateon ni roha godang huhalashon hami saluhutna i, ale Feliks na pinarsangapan! 24:4 Alai asa unang malelengku hutogang ho, hupangido ma tu ho: Tangihon hami jolo satongkin hombar tu basam! 24:5 Dapot hami do halak on pangago jala panggunturi di saluhut halak Jahudi di liat portibi on, partogi ni halak Nasarani. 24:6 Diuji do pasamakkon bagas joro i, gabe hutangkup hami ma ibana. 24:7 Saluhutna i, umbahen na hualuhon hami ibana, dapot botoonmu sian ibana, molo ditangkasi ho. 24:8 Jadi dohot ma angka Jahudi manolopi, mandok: Tutu do songon i! 24:9 Alai dihilap panggomgomi i ma si Paulus mandokkon mangkuling, jadi ninna ma mangalusi: 24:10 Dibahen na huboto, naung leleng ho panguhum di bangso on, hiras do rohangku manariashon hatangkon. 24:11 Ai hatangkasan ho do: Sampuludua ari dope salpu, dung nangkok ahu tu Jerusalem martangiang. 24:12 Ndang jumpang nasida ahu mangkatai di bagasan joro i dohot halak, manang mambahen guntur natorop, nang di parguruan manang di huta pe. 24:13 Jala ndang na tarhajongjongkon nasida nanggo sada na pinartuhashonnasida nuaeng dompak ahu. 24:14 Na mangoloi Debata ni angka daompung do ahu, mangihuthon agama na songon haliluon di rohanasida, laho mangkaporseai saluhut na tarsurat di buku patik dohot di angka panurirang; i do sitopotanku tu ho! 24:15 Na mangkirim do rohangku tu Debata, mulak mangolu sogot angka na tigor dohot angka na geduk, songon na hinirim ni rohanasida pe. 24:16 Ala ni i do umbahen na huhaburjuhon, asa marroha na ias ahu tongtong maradophon Debata nang maradophon jolma. 24:17 Alai dung salpu manang piga taon, ro ma ahu mamboan asiasi tu bangsongku dohot pelean. 24:18 Disi jumpang nasida ahu mangurasi diringku di bagas joro, alai ndada mardongan natorop manang di bagasan na guntur. 24:19 Alai naeng ma dison nian di jolomon, Jahudi deba na sian Asia mangalualu, molo tung adong diboto manang dia hasalaanku. 24:20 Nang nasida on pe dihatahon ma, manang dia gedukku dapot nasida, di na jongjong i ahu di adopan ni rapot i. 24:21 Holan hata on na hujouhon i huhut jongjong di tongatonganasida: Ala ni haheheon ni angka na mate on, umbahen na diuhumi hamu ahu sadari on! 24:22 Alai dipalalaplalap si Feliks ma nasida, ala mansai tangkas diboto agama i, ninna ma: Dung pe tuat kapiten Lisias, patangkasonku ma angka hata na sian hamu i. 24:23 Didokkon ma letnan i mangaramoti si Paulus, alai lumumbang; na so jadi ambaton manang ise donganna, na giot marhobasi di ibana. 24:24 Alai dung salpu deba ari, ro ma si Feliks dohot dongan saripena, si Drusila, boru Jahudi, disuru ma na mangalap si Paulus, naeng begeonna hatana taringot tu haporseaon di Kristus Jesus. 24:25 Alai di na hinatahonna taringot tu hatigoran dohot hatomanon dohot uhum sogot tarsonggot ma si Feliks, ninna ma mangalusi: Antong, songon i ma jolo! Molo sadihari ahu suruonku do na manjou ho. 24:26 Alai huhut do dihirim rohana, lehonon ni si Paulus hepeng tu ibana; dibahen i jotjot do disurui mangalap si Paulus, mangkatahatai dohot ibana. 24:27 Alai dung gok dua taon, ro ma si Perkius Festus mangganti si Feliks; jadi naeng do si Feliks pajongjongkon basana tu halak Jahudi, ditadingkon ma si Paulus tarhurung.
25:1 Asa dung tolu ari dijujung si Festus tohonanna i, nangkok ma ibana sian huta Kaesarea tu Jerusalem. 25:2 Gabe ro ma tu jolona angka sintua ni malim dohot angka panungganei ni Jahudi mangaluhon si Paulus, diparhurajai ma ibana: 25:3 Mangido asi ni roha, asa disuru si Paulus tu Jerusalem, asa bahenonnasida pangonggopon mamusa ibana di tongandalan. 25:4 Alai ninna si Festus ma mangalusi: Naung niramotan do si Paulus di Kaesarea; alai anggo ahu tibu nama mulak tusi, ninna. 25:5 Antong, rap tuat ma angka na sangapmuna jala dialuhon ma baoa i, anggo adong diula na jahat. 25:6 Asa dung mian di nasida ualu ro di sampulu borngin, tuat ma ibana tu Kaesarea; dung i marsogotna i dihunduli ma habangsa paruhuman i, didokkon ma togihononhon si Paulus tu jolona. 25:7 Asa dung ro, dihaliangi angka Jahudi naung tuat sian Jerusalem ma ibana, dipanghatahatahon ma godang pangaluan angka na dokdok, na so tarhajongjongkon nasida. 25:8 Ai ditariashon si Paulus ma: Ndang na mardosa ahu manang dompak patik ni Jahudi, nang dompak bagas joro i, nang dompak raja Kesar pe. 25:9 Alai laho mambuat roha ni angka Jahudi i, ninna si Festus ma mangalusi si Paulus: Na olo do ho nangkok tu Jerusalem, asa huuhumi ho disi taringot tu angka ondeng? 25:10 Jadi didok si Paulus ma: Na jongjong do ahu di jolo ni paruhuman ni raja Kesar; disi do ahu patut uhumon. Ndang adong hajahaton huula dompak Jahudi; tangkas situtu do diboto ho i. 25:11 Nuaeng pe, ia adong huulahon na jahat, na tama mambahen ahu marutang hosa, ndang manjua ahu mate; alai anggo so tutu na tinuhashonnasida tu ahu, ndang tarpasahat manang ise ahu tu nasida. Raja Kesar i do pangondianku! 25:12 Jala martuptup ma si Festus dohot angka donganna paruhum, gabe ninna ma mangalusi: Raja Kesar do digoar ho pangondianmu; tu raja Kesar ma ho borhat! 25:13 Alai dung salpu deba ari, ro ma raja Agrippa dohot Bernike tu Kaesarea mangkormat si Festus. 25:14 Jala di na mangulon nasida disi deba ari, dipajojor si Festus ma tu raja i angka na taringot tu si Paulus, ninna ma: Adong do dison sada halak tarhurung, ditinggalhon si Feliks. 25:15 Uju di Jerusalem ahu, mangadap do angka sintua ni malim ro di sintua ni halak Jahudi tu jolongku, mangido naeng hona uhum ibana. 25:16 Jadi ningku ma mangalusi nasida: Ndang adat i di halak Rom, pasahaton sada halak, ia so jolo pinatumpol na tartuhas dohot angka pangalu, asa haalusansa pangaluan i. 25:17 Jadi dung pungu nasida dison, ndang hupalalaplalap be; marsogotna i ma huhunduli paruhuman i, hudokkon ma togihononhon baoa i. 25:18 Hehe pe angka na mangaluhon i, ndang adong nanggo sada salana tarhajongjongkon nasida, songon na niagam ni rohangku. 25:19 Alai adong do angka parsalisiannasida taringot tu pardebataon na di nasida dohot taringot tu sada halak Jesus, naung mate gabe mangolu, ninna si Paulus. 25:20 Alai di na tarsosak i ahu siala parhataan i, husungkun ma ibana, manang na olo laho tu Jerusalem, asa disi ibana diuhumi taringot tusi. 25:21 Alai dipangido si Paulus do, naeng ramotan ibana, asa tu paruhuman ni na marmulia i; jadi hudokkon ma ramotan ibana, paima husuru tu raja Kesar. 25:22 Alai ninna si Agrippa ma mandok si Festus: Naeng ma di rohangku begeonku pandok ni baoa i. Jadi didok ma: Antong, marsogot ma begeonmu! 25:23 Dung i marsogotna i ro ma Agrippa dohot Bernike marhasangapon godang, jadi bongot ma tubagasan bilut paruhuman rap dohot angka kapiten ro di angka na mora ni huta i; dung i didokkon si Festus ma togihononhon si Paulus. 25:24 Gabe didok si Festus ma: Ale raja Agrippa, dohot hamu saluhut dongan na ro rap dohot hami! Ida hamu ma halak on! Ala ni ibana do dipatopottopot saluhut halak Jahudi ahu tu Jerusalem nang dison, dipanjoujouhon, na so patut be mangolu ibana. 25:25 Alai tangkas do huboto, na so adong diula na tama mambahen ibana marutang hosa; alai ala digoar ibana na marmulia i pangondianna, huuhumi nama, suruon ibana tusi. 25:26 Ndang adong manang aha na tangkas surathononku tu tuan i taringot tu ibana; ala ni i do umbahen na hutogihon ibana tu jolomuna, alai jumolo do tahe tu ho, raja Agrippa, asa adong sisurathononku, dung tinangkasan. 25:27 Ai haduk do di rohangku, suruon halak na tarhurung, so pinaboa hasalaanna.
26:1 Dung i didok si Agrippa ma tu si Paulus: Na jadi ma tariashononmu hatam! Gabe dihatahon si Paulus ma, huhut mangkiraphon tanganna: 26:2 Na martua do ahu, dirajumi rohangku, raja Agrippa, ala na jadi alusanku ho sadari on taringot tu saluhut na tinuhashon ni angka Jahudi tu ahu. 26:3 Ala sumurung panandaonmu di sude adat ro di parsalisian ni halak Jahudi, umbahen na mangido ahu tu ho: Pabenget ma roham tumangihon hatangkon! 26:4 Diboto saluhut halak Jahudi do parangengku na sian sietehetehonku, sian mulana di tongatonga ni bangsongki di Jerusalem. 26:5 Ai ditanda do ahu sian najolo, namun olo nasida mangkatindangkon, paboa na huihuthon rongkanan Parise i ma na rumisik di agamanta i. 26:6 Na jongjong do ahu nuaeng di paruhuman siala pangkirimon ni roha di angka bagabaga na nilehon ni Debata tu angka amanta i. 26:7 Naeng sahat tusi do dihirim roha ni na sampuludua marganta, umbahen na dioloi nasida Debata borngin dohot arian sian nasa gogonasida. Ala ni pangkirimon ni roha i do, rajanami, umbahen na dialuhon halak Jahudi ahu. 26:8 Atehe, tung so tarparhatutu rohamuna do, Debata pangoluhon angka na mate? 26:9 Alai nang ahu pe antong, hurimpu do jolo, ingkon godang do patupaonku mangalo Goar ni Jesus na sian Nasaret. 26:10 Tulus ma antong hubahen songon i di Jerusalem: Torop sian angka na badia i hupasahat tu hurungan, dung hujalo huaso sian angka sintua ni malim i, jadi martolop do ahu, di na tarbunu i nasida. 26:11 Jala jotjot do hupaporsukporsuk nasida di saluhut parguruan manosoi nasida manginsahi; tung na tarlobi do lalaen ni rohangku, mangalele nasida sahat ro di angka huta na dumao. 26:12 Laos songon i do tu Damaskus ahu borhat marhuaso, pinaborhat ni angka sintua ni malim. 26:13 Jala di tongandalan i, rajanami, di hos ni ari huida ma sondang na tumiur sian mata ni ari ro sian ginjang, sumondangi ahu ro di angka donganku sauduran. 26:14 Gabe martinggangan hami saluhutna tu tano jala hubege ma sada soara na mandok tu ahu di hata Heber: Saulus, Saulus! Boasa leleanmu Ahu? Susa ma ho manandahi turatura! 26:15 Alai ningku ma: Ai ise do Ho, Tuhan? Jadi didok Tuhan i ma: Jesus do Ahu na nileleanmi! 26:16 Alai hehe ma ho, jongjong ma! Ai hupataridahon pe Ahu tu ho, na laho mamillit ho, gabe suruan dohot sitindangi ni na niidam dohot di na naeng pataridahononku dope tu ho. 26:17 Hupapulik ma ho sian bangso i dohot sian halak sipelebegu, ai tusi do naeng suruonku ho, 26:18 laho mamuhai matanasida, asa mulak nasida sian na holom i tu na tiur, sian gomgoman ni sibolis i tu Debata, asa dijalo nasida hasesaan ni dosa dohot tohapna rap dohot angka naung gabe badia hinorhon ni haporseaon di Ahu. 26:19 Dibahen i, ale raja Agrippa, mangoloi do ahu di na huida sian banua ginjang i. 26:20 Ai hujamitai do jumolo angka na di Damaskus, dung i angka na di Jerusalem, songon i saluhut na di luat Judea ro di halak sipelebegu, asa dipauba rohanasida jala mulak tu Debata mamarangehon na tama di roha naung muba. 26:21 Ala ni i do ditangkup angka Jahudi ahu di bagas joro, naeng pusaonna ahu. 26:22 Alai diurupi Debata do ahu ro di sadari on, umbahen na jongjong dope ahu manjamitai angka na metmet dohot na magodang, jala ndang adong huhatahon na so domu tu na sinurirangkon ni angka panurirang i dohot si Musa. 26:23 Na mandok, sitaon na bernit do Kristus, jala Ibana do parjolo hehe sian angka na mate, mamaritahon hatiuron tu bangso i nang tu halak sipelebegu. 26:24 Alai dung songon i panariashonna i, dipagogo si Festus ma soarana, didok ma: Na lalaen do ho, Paulus! Parbinotoanmu na godang i do mambahen ho lalaen! 26:25 Alai ro ma si Paulus: Ndang na lalaen ahu, ale Festus na pinarsangapan; hata na tutu jala na torang hutariashon! 26:26 Na marbinoto do raja i disi, umbahen na hiras rohangku mangkuling i ibana; ai didok rohangku, ndang adong agia sada sian angka i na holip sian jolona, ai ndada na masa i di na suhi. 26:27 Porsea do ho, raja Agrippa, di angka panurirang? Huboto, na porsea do ho! 26:28 Alai ninna Agrippa ma mandok si Paulus: Otik nari nama so dihatai ho ahu, asa gabe Kristen ahu! 26:29 Jadi ninna si Paulus ma: Dipangido rohangku tu Debata, manang na hurang otik nari manang godang naeng ma nang ho, nang saluhut nasida na umbege ahu sadari on, gabe doshon ahu on, so padohot rante on. 26:30 Jadi hehe ma raja i dohot panggomgomi i dohot Bernike ro di angka donganna. 26:31 Dipaholang dirina otik jala masipandohan ma songon on: Ndang diula halak on na tau mambahen ibana marutang hosa manang tu hurungan pe. 26:32 Laos ninna Agrippa ma mandok si Festus: Na tarpalua do nian halak i, aut unang Kesar i digoar pangondianna.
27:1 Alai dung diuhum, ingkon marparau nama hami tu Italia, dipasahat ma si Paulus rap dohot deba donganna na tarhurung tu sada letnan na margoar Julius, na sian parangan ni Kesar Augustus. 27:2 Hubongoti hami sada parau Adramitium, na marlayar tu angka luat na di Asia; dung i borhat ma hami si Aristarkus, halak Makedonia sian Tessalonik, do dongannami. 27:3 Marsogotna i tardarat ma hami di Sidon; na basar do pangalaho ni si Julius maradophon si Paulus, diloas do ibana laho manopot angka dongan, asa ditamuei nasida ibana. 27:4 Sian i ma marlayar hami manopinopi pulo Siprus, ala mangalo alogo i. 27:5 Jadi dung binolus laut na di lambung Kilikia dohot Pampilia, sahat ma hami tu Mirra na di Likia. 27:6 Disi ma jumpang letnan i sada parau Aleksanderia, na naeng marlayar tu Italia; jadi dipabongot ma hami tusi. 27:7 Na nia lelengna ngernger do parparauonnami jala maol nama hami sahat tu Knidus; alai ndang diloas alogo i hami manulus jadi manopinopi pulo Kreta nama hami marlayar manondong Salmone. 27:8 Jadi loja do hami manalpui i, gabe sahat ma hami tu sada inganan, na margoar Muara na uli, mardonokkon huta Lasea. 27:9 Nunga na nia salpu tingkina gabe mamungka marmara ma parparauon, ai nunga salpu tingki puasa; ala ni i dipaingot si Paulus ma nasida, ninna ma: 27:10 Hamu angka dongan, ia parparauonta on mantat hasusaan dohot harugian godang huida, ndada holan tu muatan ro di parau i, dohot do hosanta tarmara. 27:11 Alai porseaan do letnan i di juaramudi dohot di induk ni parau i, asa di hata ni si Paulus. 27:12 Alai dibahen na hurang denggan muara i pasalpuhon taon ngali disi, naeng ma marlayar sian i di roha ni na tumorop, anggiat tarbahen sahat tu Penike martaon ngali, i ma sada muara na di Kreta, na tartungkan nariti dohot manabia. 27:13 Jadi ala ngernger alogo i sian dangsina, dirimpu nasida ma, tarpasautsa tinahi ni rohana, jadi ditait ma sao i mangkorisi pulo Kreta. 27:14 Alai ndang pola sadia leleng ro ma sian pulo i habahaba siappalautus, na margoar habahaba siirisanna. 27:15 Diluahon ma parau i, ndang tardompakkonsa alogo i; jadi hupasombu hami nama, diboan ma hami maupaup. 27:16 Jadi di na maupaup hami sian topi ni sada pulo na margoar Klauda, maol nama hupegang hami parau na metmet i. 27:17 I ma dihindat, dipangke nasida ma nasa na tau pangurupi mangaliliti parau i; alai dibahen na mabiar nasida taronjar tu Sirtis, dipaijur ma layar i, jadi maupaup nama hami songon i. 27:18 Alai di na tarsosak situtu hami dibahen ari i, dibolongkon nasida ma marsogotna i muatan ni parau i. 27:19 Dung i di ari patoluhon dibolongkon tangannami ma nang parhohas ni parau i. 27:20 Alai dibahen nunga na nia lelengna so tarida manang mata ni ari manang bintang pe, jala gogo do panosak ni ari i di hami, gabe saep ma hirim ni rohanami di hosanami. 27:21 Jadi dung leleng so mangan nasida, hehe ma si Paulus di tongatonganasida, ninna ma: Ale angka dongan, aut ditangihon hamu nian iba, unang munsat sian Kreta, pasiding hasusaan dohot harugian on! 27:22 Ipe, huapoi ma hamu marhiras ni roha, ai ndang adong na agoan hosa sian hamu; holan parau i do na laho mago! 27:23 Ai na jongjong do di lambungku na borngin surusuruan ni Debatangku na huoloi, 27:24 ninna ma: Unang ho mabiar, ale Paulus; ingkon tujolo ni raja Kesar ho jongjong, jala nunga dibasabasahon Debata tu ho saluhut donganmu na saparau. 27:25 Dibahen i, hiras ma rohamuna, ale angka dongan; ai na porsea do ahu di Debata, ingkon jumpang do songon na nidokna i tu ahu. 27:26 Alai ingkon tarsanggal do hita tu sada pulo. 27:27 Pasampuluopatbornginhon hami na maupaup di laut Adria, di na tonga borngin i, dianto roha ni angka parparau i, na jonok nama darat. 27:28 Gabe didabu ma tali donda, jadi dapot nasida ma duapulu dopa; jala saotik nari dumao sian i diulakkon didodo, jadi dapot ma sampululima dopa. 27:29 Biar ma rohanasida, atik beha tombom hami tu batu; jadi opat sao ma didabu sian pudi ni parau i, paimahon torang ni ari. 27:30 Dung i naeng lintun ma sian parau angka anak parau i; ditantan ma solu i tu laut, diparsidalianhon naeng dabuonnasida tali sao sian ulu ni parau i. 27:31 Jadi didok si Paulus ma tu letnan i dohot tu angka soldadu: Molo so tinggal nasida di parau on, ndang tarbahen hamu malua. 27:32 Dung i digotap angka soldadu i ma angka tali ni solu i, dipasombu ma madabu. 27:33 Alai paima mamungka torang ari, disosoi si Paulus ma nasida saluhutna marsipanganon, ninna ma: Pasampuluopatarihon ma sadari on hamu na bebenesan, laos so mangan; ndang agia aha dipangan hamu. 27:34 Dibahen i huapoi ma hamu mambuat sipanganon, tau panumpak do i, asa malua hamu; ai na so tupa marurus nanggo obuk sada sian ulumuna. 27:35 Jadi dung didok songon i, dibuat ma roti i, didok ma mauliate tu Debata di jolonasida saluhutna, diponggoli ma, dipungka ma manganhon. 27:36 Jadi hiras ma rohanasida saluhutna, laos dibuat ma sipanganon i. 27:37 Alai toropnami na di parau i: Duaratus pitupulu onom halak do. 27:38 Dung bosur nasida, didabu ma bohal i tu laut, laho paneangkon parau i. 27:39 Dung torang ari, ndang ditanda nasida darat i; alai ditatap nasida ma sada solok na marpasir, naeng tusi ma patongononnasida parau i, namun tarbahen. 27:40 Jadi digotap nasida ma angka tali sao i, pasombuhonsa di laut, huhut diharhari ma angka ihot ni amudi i dipatongon ma layar i tu alogo mareakkon pasir i. 27:41 Alai ambal ma nasida tu sada tuktuk, jadi diloas ma parau i tombom tusi, gabe tarsanggal ma ulu ni parau i, laos hot ma disi: Alai maloha ma pudipudi ni parau i dibahen gogo ni umbak. 27:42 Dung i ditahi angka soldadu ma mambunu angka sitarapan i, asa unang marlange nasida laho malua. 27:43 Alai naeng do pangoluon ni letnan i si Paulus jadi disundati ma tahi ni rohanasida, didokkon ma angka na malo marlange jumolo manimbung laho tu darat i. 27:44 Na deba marlampuhon papan-papan, na deba marlampuhon angka ponggolponggol ni parau i, gabe songon i ma saluhut nasida malua tu darat.
28:1 Dung tardarat hami, binege ma goar ni pulo i Malta. 28:2 Alai na basar situtu do pangisi ni pulo i maradophon hami, dipagalak do api, ditogihon ma hami saluhutna tusi, ala ni por ni udan dohot ngali ni ari. 28:3 Jadi di na pagugunhon rambaramba si Paulus, laho mambahen tu api, ruar ma sian i ulok dari dibahen mohopna, dipargut ma tanganna. 28:4 Jadi dung diida jolma i ulok i gaunggaung di tanganna, masipandohan ma nasida: Sandok pamunu do halak on; ndang diloas uhum i ibana mangolu, atik pe malua sian laut. 28:5 Alai dipirpirhon ma ulok i tubagasan api, ndang pola mahua ibana. 28:6 Alai ditagam nasida, naeng magurbak ma, manang runggang mate satongkin ibana; alai dung leleng dipaimaima nasida, so manang mahua ibana diida, martungkar ma rohanasida; didok ma, debata ibana. 28:7 Alai adong ma mardonokkon tusi ladang ni sada halak na sumangap di pulo i, na margoar Publius; dijangkon do hami, denggan do hami ditamuei tolu ari lelengna. 28:8 Alai peak ma uju i ama ni si Publius i panepaneon huhut barobunion, gabe masuk ma si Paulus manopot ibana; jadi dung martangiang, diampehon ma tanganna tu ibana, gabe malum ma. 28:9 Dung songon i, ro ma angka na asing na marsahit di pulo i, jadi malum be ma. 28:10 Gabe sangap situtu do hami dibahen nasida; jala di na borhat i hami marlayar, dipadiri nasida do na hasea di hami. 28:11 Alai dung salpu tolu bulan, borhat ma hami marlayar di sada parau Aleksanderia, na marpartanda linduat, naung pasalpuhon taon ngali di pulo i. 28:12 Jadi dung tardarat hami di Sirakus, mangulon ma hami disi tolu ari. 28:13 Sian i ma hami mangaliat, jala sahat ma hami tu Regium; jadi marsogotna i ro ma alogo sian dangsina, jadi sahat ma hami tu Potioli di ari paduahon i. 28:14 Disi pajumpang hami dohot angka dongan na mangapoi hami, mangulon di nasida pitu ari, dung i borhat ma hami tu huta Rom. 28:15 Sian i ma ro angka dongan, dung dibege baritanami, ditomutomu ma hami sahat ro di Appiporum dohot Tres Taberne. Marnida nasida, mandok mauliate ma si Paulus tu Debata; lam pos ma antong rohana. 28:16 Alai dung tolhas hami tu huta Rom, diloas do anggo si Paulus maringan di lomo ni rohana rap dohot soldadu sada na manjagai ibana. 28:17 Jadi dung salpu tolu ari, dijou si Paulus ma angka panungganei ni halak Jahudi. Dung pungu nasida, ninna ma mandok nasida: Hamu angka dongan! Ia ahu, ndang adong hubahen manang aha dompak bangsonta manang dompak adat na sian angka ompu, gabe diihoti ahu di Jerusalem jala dipasahat ahu tu tangan ni halak Rom. 28:18 Jadi naeng paluaonna do ahu, dung ditangkasi ahu, ala so dapot salangku na tama mambahen ahu marutang hosa. 28:19 Alai dibahen sai mangalo angka Jahudi i, ndang tarjua ahu so hugoar raja Kesar pangondianku; ndang adong sialuhononku sala ni bangsongku. 28:20 I do antong alana, umbahen na hujou hamu, asa huida jala hupangkulingi hamu, ai ala ni pangkirimon ni halak Israel do umbahen na dirantei ahu. 28:21 Dung i ninna nasida ma mandok ibana: Ndang adong hujalo hami surat sian Judea taringot tu ho, jala ndang adong manang ise sian angka dongan i, naung ro tuson paboahon barita na jahat taringot tu ho. 28:22 Alai tama do di rohanami begeon sian ho parrohaonmi; ai taringot tu agama on huboto hami do, na nialo ni halak do i di liat portibi on. 28:23 Asa dung digondit nasida ari di ibana, ro ma nasida torop manopot ibana tu parmiananna, jadi marjamita ma ibana mangkatindangkon harajaon ni Debata: Dipajojor ma tu nasida barita ni Jesus sian patik ni si Musa dohot sian angka panurirang i, olat ni manogotna ro di bot ni ari. 28:24 Jadi deba ma marhatutuhon na hinatahonna i; alai deba ndang porsea. 28:25 Gabe marsalisi ma nasida sama nasida jadi laho be ma, dung jolo didok si Paulus hata on tu nasida: Sintong ma na nidok ni Tondi Parbadia marhitehite panurirang Jesaya tu angka amamuna najolo. 28:26 Ai ninna do: "Laho ma ho paboahon tu bangso on: Marhite sian parbinegeanmuna do begeonmuna i, gabe ndang dapot rohamuna; jala di na marnida i hamu, idaonmuna i, gabe ndang mananda. 28:27 Ai nunga pir roha ni bangso on, nunga maol marbinege pinggolnasida; nunga ditutup matanasida, asa unang marnida matanasida, unang marbinege pinggolnasida, unang marbinoto rohanasida, unang muba rohanasida, unang tarpamalum Ahu nasida!" 28:28 Antong, boto hamu ma, nunga ditongos Debata haluaon on tu halak sipelebegu; tangihononnasida do i. 28:29 Asa dung dihatahon ibana i, laho ma angka Jahudi sian i; godang do parsualonnasida sama nasida. 28:30 Alai dua taon ma si Paulus maringan di bagas na sineoana i; dijangkon do nasa na ro manopot ibana. 28:31 Marhiras ni roha situtu do ibana mamaritahon harajaon ni Debata jala mangajarhon barita ni Tuhan Jesus; ndang adong na mangambat.
1:1 Ahu surat tinongos ni si Paulus, naposo ni Jesus Kristus, na tarjou gabe apostel jala pinapulik tu ulaon mamaritahon barita na uli na sian Debata. 1:2 I ma diparbagabaga hian di angka surat na badia marhitehite angka panurirangna. 1:3 Taringot tu Anakna Jesus Kristus, Tuhanta i, na tubu sian pomparan ni si Daud, ia dagingna. 1:4 Naung gabe tandap Anak ni Debata na marhagogoon mangkihuthon Tondi na badia, dung hehe Ibana sian hamatean. 1:5 Sian Ibana hujalo hami asi ni roha dohot tohonan apostel mangalopokkon pangoloion di haporseaon tu roha ni saluhut bangso, ala ni Goarna i. 1:6 Sian nasida do nang hamu na jinou ni Jesus Kristus. 1:7 Mandapothon angka na hinaholongan ni Debata jala angka na badia, na jinouna i, na di huta Rom: Asi ni roha ma di hamu dohot dame sian Debata Amanta nang sian Tuhan Jesus Kristus! 1:8 Mandok mauliate ahu jumolo tu Debatangku marhitehite Jesus Kristus siala sude hamu, ala tu liat portibi on do tarbarita haporseaonmuna. 1:9 Ndang mansadi ahu marningot hamu. Ia sitindangingku Debata do, na huoloi di bagasan tondingku, di na hubaritahon Anakna i. 1:10 Tongtong do hupangido di angka tangiangku, anggiat tung manang andigan pe lomo ni roha ni Debata patiurhon dalanku manopot hamu. 1:11 Ai masihol do ahu marnida hamu, anggiat tung tarlehon ahu tu hamu deba silehonlehon partondion, patoguhon rohamuna. 1:12 On do tahe: Naeng dapotan hiras ni roha nang ahu sian hamu hinorhon ni haporseaonta b'e. 1:13 Alai naeng ma botoonmuna, angka dongan, naung jotjot ditahi rohangku manopot hamu, asa marparbue ahu nang di hamu songon na di angka bangso na leban i; alai tarsabat do ahu rasirasa nuaeng. 1:14 Na marutang do ahu di halak Junani nang di bangso na leban, di angka parhapistaran nang di angka na hurang roha. 1:15 Dibahen i husangkap sian nasa rohangku manjamitahon barita na uli i nang di hamu di huta Rom. 1:16 Ai ndang na huhailahon barita na uli i, ai hagogoon ni Debata do i paluahon nasa na porsea, halak Jahudi jumolo, dung i dohot do halak Junani. 1:17 Ai dipapatar do disi hatigoran ni Debata, na sian haporseaon tu haporseaon, hombar tu na tarsurat hian: "Na mangolu do partigor i hinorhon ni haporseaonna!" 1:18 Ai dipapatar do sian ginjang rimas ni Debata dompak nasa jolma, na so daulat jala na geduk roha, na mangambat hasintongan i marhitehite hageduhon. 1:19 Tandap do nian di nasida pamotoan taringot tu Debata dipatandap Debata. 1:20 Ai dapot tarida do pangalaho ni Debata na buni hian, timbangon ni roha, sian angka pambahenan ni Debata di na tinompana i hasiangan on, i ma hagogoonna dohot hadebataonna na manongtong i, asa unang adong sidaliannasida. 1:21 Ai atik pe diboto nasida Debata, ndang dipasangap Ibana songon na tama di Debata, jala ndang dipuji, gabe dipaotooto angka pingkiranna do nasida, jala mangkolom ma rohanasida na so mangarti i. 1:22 Dirimpu, na bisuk nasida, hape na loahon do! 1:23 Dipasambar do hasangapon ni Debata na manongtong i tu gombaran na suman tu jolma na mangilas i, songon i tu pidong dohot tu binatang ro di na manjirir i. 1:24 Dibahen i dipasahat Debata do nasida di bagasan hisaphisap ni rohanasida tu hahodaron i, pola diparonsam nasida dagingna sama nasida. 1:25 Ai dipasambar do hasintongan ni Debata gabe gabus, jadi disomba jala dioloi na tinompa singkat ni Panompa i, na tarpuji ro di salelenglelengna. Amen. 1:26 Ala ni i dipasahat Debata nasida tu hahisapon hailaon, ai dipaimbar angka boruborunasida do bangko hian tu na so bangko. 1:27 Suang songon i nang angka baoa, ditinggalhon do ruhut hian, siingoton maradophon boruboru, gabe garang ma nasida di bagasan hahisapon, pola baoa sama baoa mangulahon hailaon jadi patut do dijalo di dirina be upa ni haliluonnasida. 1:28 Ala so diparhamaol nasida na mananda Debata, gabe dipasahat Debata nasida tu parrohaon na so gabeak, asa diulahon na so uhum. 1:29 Tung gok do nasida nasa hageduhon hajahaton, haroaon, pangahution, latelate, bunubunu, badabada, ansiansi dohot angkal bisuk. 1:30 Angka parmihimmihim, parhata tundal, sihosomi Debata, angka na jungkat, siginjang roha, sideak hata, parpingkiran na roa, na manoisi natorasna; 1:31 na so marroha, siose padan, na so umboto holong dohot asi ni roha. 1:32 Diboto nasida do nian uhum na pinatikkon ni Debata, mandok na tama marutang hosa angka na mangulahon sisongon i, hape tong do diula; lumobi tahe, lomo do rohanasida mida angka na mangulahonsa.
2:1 Dibahen i ndang dapot ondingan ho, ale jolma, sidabu uhum. Ai dirim do diuhumi ho, di na niuhumanmu donganmi. Ai suman tu na binahenna i do pambahenmi, ho na manguhumi i! 2:2 Ai taboto do: Hombar tu hasintongan do uhum ni Debata mangonai tu angka na mangulahon sisongon i. 2:3 Ai dirimpu ho, ale, tarpasiding ho uhum ni Debata, anggo diuhumuhumi ho na mangula sisongon i, hape dohot do ho mambahensa? 2:4 Tung na hu do roham di denggan ni basana na godang i, di panganjuonna nang di lambas ni rohana? Ndang diboto ho, habasaon ni Debata naeng manogihon ho tu hamubaon ni roha? 2:5 Alai dibahen jogal ni roham na so olo muba i, dipagukguk ho do tu dirim rimas di ari hasosonggop ni rimas i, di na gabe patar uhum na tigor i dibahen Debata. 2:6 Ai baloshononna do tu ganup marguru tu na niulana b'e! 2:7 Hangoluan na salelenglelengna do di angka na marbenget ni roha mangula na denggan, laho mangalului hasangapon, hamuliaon dohot hatongtongon. 2:8 Alai rimas dohot muruk ma di angka na tongkar, ala pangoloi nasida di hageduhon, ndada di hasintongan. 2:9 Na bernit dohot hatahuton ma tu roha ni nasa jolma na mangulahon hajahaton, tu halak Jahudi jumolo, dung i dohot do tu halak Junani. 2:10 Alai hasangapon, hamuliaon dohot dame tu ganup na mangulahon na denggan, tu halak Jahudi jumolo, dung i dohot do tu halak Junani. 2:11 Ai ndang siida rupa anggo Debata! 2:12 Ai angka na mardosa, so marpatik, mago do, nang so marpatik; jala angka na mardosa, ginomgoman ni patik, uhuman ni patik i do. 2:13 Ai ndada na umbege patik i, pintor di roha ni Debata; angka na mangulahon patik i, i do pintoranna. 2:14 Ai diulahon angka sipelebegu sian dirina do na pinangido ni patik i, atik pe so adong patik di nasida, asa gabe nasida sandiri ma songon patik di nasida, angka na so marpatik hian. 2:15 Sian i ma tarida, paboa naung tarsurat ulaon patik i di bagasan rohanasida, laos mangkatindangkon do panggora ni rohanasida, angkup ni pingkiran ni rohanasida, angka na masisolsolan nang masiondian pe. 2:16 I ma di ari sogot, di na ro Debata manguhumi nasa na buni na di jolma marhite Kristus Jesus, hombar tu na hubaritahon i. 2:17 Na margoar Jahudi do anggo ho, patik i dipartanggulhon do jala Debata ditengahon ho. 2:18 Diboto ho do pinangidona i, jala tartimbang ho do na jadi dohot na so jadi, ala naung dipodai patik i ho. 2:19 Tau do ho, didok roham, gabe partogi di na mapitung, panondang di angka na di bagasan na holom; 2:20 sipodai angka na hurang roha, pangajari di angka na metmet, ai di ho do rumang ni parbinotoan dohot hasintongan di bagasan patik i. 2:21 Antong, ia na asing dipodai ho do, alai dirim ndang dipodai ho. Ditingtingkon ho do, na so jadi manangko, hape manangko do anggo ho! 2:22 Didok ho do: Unang mangalangkup; hape pangalangkup do ho! Na magigi do ho mida angka ajiajian, hape pandobo do ho di bagas joro! 2:23 Dipangasahon ho do patik i, tong do dipalealea ho Debata marhite sian pangalaosim di patik i. 2:24 Songon naung tarsurat i: "Ala ni hamu do umbahen na marlea Goar ni Debata diida angka sipelebegu". 2:25 Hasea do nang parsunaton i, anggo diparangehon ho patik i; alai molo pangalaosi ho di patik i, gabe songon na so parsunaton ma i di ho. 2:26 Asa molo diradoti na so tarsunat i pangidoan ni patik i, nda rajumon ma dagingna na so tarsunat i doshon naung disunat? 2:27 Jadi ho naung nampuna hata i dohot parsunaton i, anggo dilaosi ho patik i, uhumon ni na so tarsurat ma ho, anggo diradoti patik i. 2:28 Ai ndada i tutu Jahudi na marrupahon hajahudion, jala ndada i tutu parsunaton na di daging. 2:29 Alai naeng ma Jahudi ibana di bagasan rohana; parsunaton i pe, naeng ma di bagasan roha hinorhon ni Tondi, unang hata ni patik; angka sisongon i ma dapotan pujipujian sian Debata, nda tung sian jolma.
3:1 Asa dia nama hasurungan ni Jahudi? Tu aha ma hasea parsunaton i? 3:2 Sandok godang do i. Parjolo: Hasahatan ni angka pandok ni Debata do nasida. 3:3 Ai beha nama, ia so porsea na deba? Tung tarbahen nasida na so porsea i ma manegai haburjuon ni Debata Sihaposan i? 3:4 Dao ma i! On do tahe: Parsintong do ia Debata, alai pargabus do nasa jolma, songon na tarsurat i: "Asa pintor ho di angka pandohanmu jala monang di panguhumonmi!" 3:5 Alai beha ma dohononta? Ia dipajongjong hageduhonta hatigoran ni Debata, nda na geduk ma Debata, molo dipalalu rimasna? Santabi di Debata! 3:6 Dao ma i! Ai aut i, songon dia ma taruhum Debata portibi on? 3:7 Alai molo lam timbul hasintongan ni Debata binahen ni gabushu paganda hasangaponna boasa uhumon dope ahu songon pardosa? 3:8 Nda tagonan ma taula na roa, asa ro na denggan, songon pandok ni na deba magarehei hita; songon i do hatanta, ninna. Patut ma antong hona uhum angka sisongon i! 3:9 Asa boha ma? Marhasurungan do hami? Ndangana, ai nunga hupatorang: Rap ginomgoman ni dosa do saluhutna, halak Jahudi nang halak Junani. 3:10 Hombar tu na tarsurat i: "Ndang adong na tigor nanggo sada!" 3:11 "Ndang adong na marroha, na usouso di Debata." 3:12 "Saluhut nasida nunga manimbil, tung sange do nasida marroha mago; ndang adong sibahen na denggan nanggo sada." 3:13 "Tanoman na ngangang do aruarunasida, na paotootohon do dilanasida; bisa ni ulok dari do ditoru ni bibirnasida." 3:14 "Gok burabura dohot hata podu pamangannasida." 3:15 "Hirtap do patnasida mandurushon mudar." 3:16 "Hamagoan dohot haporsuhon do di dalannasida." 3:17 "Ia dalan hadameon i ndang diboto." 3:18 "Ndang marhabiaran di Debata rohanasida." 3:19 Alai taboto do: Tu na ginomgoman ni patik i do nasa hata ni patik i, asa mangkohom nasa jolma jala marutang tu Debata sandok manisia. 3:20 Ai ndang dapotan hatigoran jolma nanggo sada di adopan ni Debata, anggo sian na mangulahon patik i. Ai dihorhon patik i do panandaon di dosa. 3:21 Alai nunga gabe patar nuaeng hatigoran ni Debata, so sian patik i, songon naung dihatindangkon patik i nang angka panurirang pe. 3:22 I ma hatigoran ni Debata na marhitehite haporseaon di Jesus Kristus sahat tu saluhut angka na porsea. 3:23 Ai ndang adong imbar ni i: Tung saluhut do nasida mardosa jala ndang dapot pujion ni Debata nasida. 3:24 Gabe dipintori do nasida dalan basabasa binahen ni asi ni rohana hinorhon ni panobusion na di bagasan Kristus Jesus. 3:25 Ibana do dipadiri Debata bahen habangsa parasian marhite sian haporseaon di mudarna i, asa dipapatar Debata disi hatigoranna, ala naung dibolus matana angka dosa najolo marhite lambas ni rohana. 3:26 Ai naeng papataron ni Debata hatigoranna apala nuaeng, asa pintor Ibana jala dipintori na marhaporseaon di Jesus. 3:27 Asa adong dope sipangasahononhon? Nunga gotap anggo i! Binahen ni patik dia do? Binahen ni angka parulaon i do? Nda tung, binahen ni patik haporseaon i do. 3:28 Asa on do dijujur rohanta: Haporseaon i do mamintori jolma, ndada na mangulahon patik. 3:29 Ai holan Jahudi do nampuna Debata? Nda dohot sipelebegu i? I do antong; dohot do sipelebegu i! 3:30 Ai sada do Debata na mamintori na tarsunat sian haporseaonnasida, songon i nang na so tarsunat i, ala ni haporseaonnasida. 3:31 Asa na mangarumpakkon patik do hita binahen ni haporseaon i? Dao ma i! Na pajongjongkon patik i do hita.
4:1 Beha ma di rohanta? Aha ma jumpang si Abraham, amanta i, taringot tu daging. 4:2 Ai ia pintor si Abraham sian na niulana, adong ma sipangasahononna; alai nda tung maradophon Debata. 4:3 Ai nda on do didok Surat i: "Na porsea do si Abraham di Debata, gabe i ma dirajumi bahen hatigoranna!" 4:4 Utang na so tarjua do upa sijaloon ni na mulaulaon, nda tung asi ni roha. 4:5 Alai haporseaon do rajumon gabe hatigoran anggo di jolma na so mangaradoti ulaon, asal porsea ibana di Sipintori na jahat. 4:6 Songon pandok ni si Daud, ai diparhatua do halak na gabe pintor dirajumi Debata, so sian parulaonna: 4:7 "Martua ma jolma, naung sinesaan pangalaosionna, naung hinungkupan dosana! 4:8 Martua ma halak, anggo so dijujur Tuhan i dosana tu ibana!" 4:9 Ise antong diparhatua disi? Angka na marsunat do, manang dohot do angka na so marsunat? Ai nunga tadok: "Dietong do haporseaon ni si Abraham gabe hatigoranna!" 4:10 Ai beha do antong dirajumi? Dung marsunat ibana, manang andorang so marsunat i? Andorang so marsunat dope! 4:11 Anggo parsunaton i, partinandaan do i, sumahaphon tu ibana hatigoranna ala ni haporseaonna andorang so marsunat dope, asa gabe ama ibana di saluhut angka na porsea na so marsunat i, asa nang tu nasida dirajumi hatigoran. 4:12 Huhut do ibana ama ni angka na marsunat; alai ndada asal tarsunat nasida, naeng ma ditiru haporseaon ni si Abraham, amanta i, andorang so marsunat dope. 4:13 Ai ndada marhite sian patik i ro bagabaga tu si Abraham nang tu pomparanna, na mandok: Ibana tumean portibi on; marhite sian hatigoran na sian haporseaon i do. 4:14 Ai aut angka siradoti patik i gabe panean, ndang marguna haporseaon i, jadi pesan ma bagabaga i. 4:15 Ai dihorhon patik i do rimas; alai anggo soada patik, laos so adong do pangalaosion. 4:16 Dibahen i sian haporseaon i do bagabaga i, asa sian asi ni roha do, ai naeng hot bagabaga i di sandok pomparanna i; ndada holan di dongan sapatik ni si Abraham, dohot do di donganna sahaporseaon, ai ama ni hita saluhutna do ibana. 4:17 Hombar tu na tarsurat i: "Hupabangkit do ho gabe ama ni torop bangso!" Di adopan ni Debata ma i, na hinaporseaanna Sipangolu angka na mate jala Sijou na so adong hian gabe adong. 4:18 Maralohon nasa pangkirimon do haporseaonna na mangkirim i, asa gabe ama ni torop bangso ibana, hombar tu hata i: "Songon i ma sogot pomparanmu!" 4:19 Ndang na olo gale haporseaonna i paidaida pamatangna na hira so marngolu be, ai nunga saratus taon ne' umurna, nang paidaida si Sara, naung saep ladang i. 4:20 Ndang olo ganggu rohana tumadingkon haporseaon di bagabaga ni Debata; na lam tu toguna do tahe haporseaonna jala diparsangapi do Debata. 4:21 Ai pos situtu do rohana: Tuk do gogo ni Debata patupahon na pinarbagabagana i. 4:22 Ala ni i do umbahen na dirajumi i gabe hatigoranna. 4:23 Ndada ala ni ibana sambing, umbahen na tarsurat, naung dirajumi tu ibana. 4:24 Hita pe, ditatap do disi, ai sirajumon do nang tu hita haporseaon di Ibana, na pahehehon Jesus Tuhanta i sian na mate. 4:25 Ai dipasahat do Ibana ala ni pangalaosionta i, jala dipangolu siala hatigoranta.
5:1 Asa dung dipintori hita dalan haporseaon, mardame ma hita dohot Debata marhitehite Tuhanta Jesus Kristus. 5:2 Laos marhitehite Ibana do saut masuk hita tu asi ni roha, hajongjonganta nuaeng dalan haporseaon, jala taparhatua do dirinta marningot hasangapon ni Debata na itahirim i i. 5:3 Alai lumobi sian i dope, ai itahalashon do nang angka haporsuhon, ala taboto, dihorhon haporsuhon i do habengeton ni roha. 5:4 Jala dihorhon habengeton ni roha i do hatauon, jala hatauon i do mangkorhon pangkirimon. 5:5 Alai ndang na murak hita bahenon ni pangkirimon i, ala nunga diusehon tubagasan rohanta holong ni roha ni Debata marhitehite Tondi Parbadia, naung nilehonna i tu hita. 5:6 Ai uju na parir dope hita, disi ma tongon mate Kristus humongkop angka parjahat. 5:7 Ai maol mate halak humongkop partigor; adong do deba na barani mate humongkop na ulibasa. 5:8 Alai ia Debata, dipapatar do holong ni rohana i di hita, uju pardosa dope hita, ai disi do mate Kristus humongkop hita. 5:9 Asa lam malua ma hita sian rimas i nuaeng marhite sian Ibana, dung jolo dipintori hita di bagasan mudarna i. 5:10 Ai molo dipadenggan Ibana hita tu Debata hinorhon ni parmate ni Anakna i, uju musuna dope hita, nda lam paluaonna ma hita, angka naung pinadengganna i, dung mangolu Ibana? 5:11 Lumobi dope, tung itahalashon do Debata mangasahon Tuhanta Jesus Kristus, ai di bagasan Ibana do tajalo pardengganan i. 5:12 Dibahen i, songon na bongot dosa i tu portibi on marhite sian sada halak jala marhitehite dosa i ro hamatean, songon i sahat hamatean i tu saluhut jolma, ala sude nasida mardosa. 5:13 Ai nunga di portibi on hian do dosa, nang andorang so ro dope patik i; alai ndang dijujur dosa, ia so adong patik. 5:14 Alai nunga manggomgomi hamatean i olat ni si Adam sahat ro di si Musa, nang so dos pardosaonnasida tu pangalaosion ni si Adam, sumansuman ni na naeng ro i. 5:15 Alai ndada sapangalaho pangalaosion i dohot basabasa i. Ai binahen ni pangalaosion ni na sada, marmatean na torop i; alai andul sumurung tu na torop i ma asi ni roha ni Debata dohot basabasa, na hinorhon ni parasirohaon ni na sada jolma Jesus Kristus. 5:16 Ia silehonlehon i asing do sian na binahen ni na sahalak na mardosa i, ai dihorhon uhum na sian na sahalak i do uhum hamagoan; alai hinorhon ni basabasa i do dipintori torop pangalaosi. 5:17 Ai molo hamatean manggomgomi, binahen ni na sada ala ni pangalaosionna i, nda lam manggomgomi huhut mangolu marhitehite Jesus Kristus na sada i ma antong nasida, angka naung manjalo asi ni roha na tarlobi angkup ni basabasa, i ma hatigoran i? 5:18 Asa songon marhite sian pangalaosion ni na sahalak lalu uhum hamagoan tu saluhut jolma, songon i do marhite sian na Sada na mamintori sahat hatigoran hangoluan tu saluhut jolma. 5:19 Ai songon marhite sian hatoison ni sada jolma gabe torop tardapot mardosa, songon i ma marhite sian pangoloion ni na Sada i gabe torop dipintori. 5:20 Alai soluk ma bongot patik i pagandahon pangalaosion. Alai ganda pe dosa i, lam sumurung ma asi ni roha i. 5:21 Asa songon na manggomgomi jolo dosa i mantat hamatean, songon i do nang asi ni roha i manggomgomi marhitehite hatigoran mangkorhon hangoluan na salelenglelengna marhite sian Jesus Kristus Tuhanta i.
6:1 Antong, dia ma dohononta? Datdatanta ma mardosa, asa tung timbul asi ni roha? 6:2 Dao ma i! Hita angka naung mate di dosa i, tung tarbahen hita dope mangolu di bagasan i? 6:3 Na so diboto hamu do on: Sude hita, nasa naung tardidi tubagasan Kristus Jesus, tubagasan hamateanna do hita tardidi? 6:4 Antong, naung tartanom do hita rap dohot Ibana marhitehite pandidion i tubagasan hamatean, asa marparange hita di bagasan ngolu na imbaru, songon Kristus naung hehe sian angka naung mate hinorhon ni hasangapon ni Amana. 6:5 Ai anggo nunga sanghambona hita dohot Ibana, di na rap mate hita dohot Ibana i, suang songon i ma hita nang taringot tu haheheon. 6:6 Ai taboto do: Nunga tarsilang hadirionta na buruk raphon Ibana, asa pinasohot daging pardosaon, asa unang be hita mangadop di dosa. 6:7 Ai dung mate jolma, lias do ibana sian dosa. 6:8 Alai molo naung mate hita rap dohot Kristus, dihaporseai rohanta, rap mangolu ma hita dohot Ibana. 6:9 Ai taboto do, na so mate be Kristus, dung mulak mangolu sian na mate; ndang dirajai hamatean i be Ibana. 6:10 Ai mate pe Ibana, sahali do i, ala ni dosa; ia mangolu nuaeng, di Debata do i. 6:11 Suman tusi ma rajumi hamu dirimuna songon naung mate di dosa i, alai mangolu di Debata di bagasan Kristus Jesus. 6:12 Antong, unang ma dosa i mangarajai di bagasan dagingmuna na olo mate i, mangoloi hisapna! 6:13 Jala unang ma pasahat hamu angka ruasmuna tu dosa i, bahen sinjata ni hajahaton; tu Debata ma tahe pasahat hamu dirimuna songon angka naung pinangolu sian na mate; songon i nang ruasmuna, tu Debata ma i, bahen sinjata ni hatigoran! 6:14 Ai ndang rajaan ni dosa i be hamu, ai ndang digomgomi patik i hamu, tung asi ni roha i do. 6:15 Antong, beha nama? Mardosa ma hita, ala ginomgoman ni asi ni roha i, ndada ginomgoman ni patik i hita? Dao ma anggo i! 6:16 Ndang diboto hamu on: Ia tusi dipasahat hamu dirimu gabe hatoban pangoloi, hatoban ni i do hamu angka na mangoloi: Manang hatoban ni dosa tu hamatean, manang pangoloi tu hatigoran. 6:17 Alai mauliate ma di Debata, ala salpu tingki pangadopanmuna di dosa i; gabe pangoloi hamu nuaeng sian nasa rohamuna di ruhut ni poda, naung sahat tu hamu. 6:18 Ai dung malua hamu sian dosa i, gabe tunduk do hamu mangoloi hatigoran i. 6:19 Ruhut ni jolma ma huumpamahon ala ni hagaleon ni dagingmuna: Ai songon naung pinasahatmuna angka ruasmuna gabe pangoloi di hahodaron dohot di na so uhum, mangulahon na so uhum i; songon i ma pasahat hamu nuaeng angka ruasmuna tu hatigoran, laho pabadiahonsa. 6:20 Tutu nian, uju hatoban ni dosa hamu, malua do hamu sian hatigoran. 6:21 Antong, dia do parbuemuna disi? Angka na hinailahonmuna anggo nuaeng, ai hamatean do hapateanna. 6:22 Alai nuaeng, dung malua hamu sian dosa i, dung gabe pangoloi di Debata hamu, adong do parbuemuna tu habadiaon; jala hangoluan na salelenglelengna do hapateanna. 6:23 Ai upa tinuhor ni dosa do hamatean; alai basabasa ni Debata do hangoluan salelenglelengna marhitehite Kristus Jesus Tuhanta i.
7:1 Digomgomi patik i do jolma, saleleng ibana mangolu; diboto hamu do i, ale angka dongan, ai tu angka na umboto patik i do hatangkon. 7:2 Ai hira naung niihot ni patik i do boruboru tu harajaanna, saleleng mangolu baoa i; alai anggo dung mate baoa i, malua ma boruboru i sian patik pardongansaripeon. 7:3 Asa pangalangkup do ibana goaron, ia tu baoa na asing ibana, tagan mangolu dope hamulianna. Alai anggo dung mate baoa i, malua do pardihutana sian patik i; ndang pangalangkup be ibana goaron, molo muli tu baoa na asing. 7:4 Songon i ma antong hamu, ale angka dongan: Nunga mate hamu di patik i marhitehite daging ni Kristus; asa na asing manggomgomi hamu, i ma Ibana naung hehe sian na mate, asa di Debata hita marparbue. 7:5 Ai andorang di bagasan daging i hita, margogo do angka hisap hadosaon i di bagasan angka ruasta dihorhon patik i, asa itaparbuehon hamatean. 7:6 Alai nunga disirang hita sian patik i, jala naung mate do hita di na maniop hita nasailaon, asa pangoloi hita marpangalaho na imbaru di bagasan Tondi, unang be marpangalaho na buruk di bagasan hata ni patik i. 7:7 Antong, beha ma dohononta? Dosa do patik i? Dao ma i! Alai ndang na hutanda dosa i, anggo so marhite sian patik i, ai ndang na botoonku hahisapon i, aut unang didok patik i: "Unang ho marhahisapon!" 7:8 Marbingkas sian patik i disungguli dosa i di bagasan ahu ragam ni hahisapon; ai songon na mate dope dosa, anggo so adong patik. 7:9 Mangolu do anggo ahu najolo so marpatik dope. Alai ro ma patik i, gabe mangolu ma dosa i. 7:10 Alai anggo ahu mate do, jadi gabe hamatean do hape di ahu patik i, sihorhon hangoluan nian. 7:11 Ai marbingkas sian i, dipaotooto jala dipamate dosa i do ahu marhitehite patik i. 7:12 Asa na badia do patik i, badia do na tinonahon ni Debata, tigor jala denggan. 7:13 Na beha do? Manjadi hamateanku do na denggan i? Dao ma i! Dosa i do tahe mangkorhon hamatean di ahu marhitehite na denggan, asa tandap dosa i jala patar jahatna na tarlobi i, marhite sian patik i. 7:14 Ai taboto do, partondion do patik i; alai pardaging do anggo ahu jala targadis tu gomgoman ni dosa. 7:15 Ai ndang hutolopi na hubahen i; ai na huhagigihon, i do huula, ndada na huhalomohon i. 7:16 Alai ia huula na so hinalomohon ni rohangku, na manolopi ma ahu di hinadenggan ni patik i. 7:17 Asa ndada ahu na mangulahonsa, tung dosa i do na mangingani ahu. 7:18 Ai huboto do, ndang adong na denggan maringanan di bagasan ahu, mandok di bagasan dagingku. Ia hagioton dapot do nian di ahu; alai ndang dapot anggo na patupahon na denggan. 7:19 Ai ndada huula na denggan, na pinarhagiot ni rohangku; na roa i, na so huhalomohon, i do huula. 7:20 Alai molo huula na so hinalomohon ni rohangku, ndang apala ahu mangulasa dosa i do tahe, na maringanan di bagasan ahu. 7:21 Asa jumpang ahu songon aturan: Na roa do dapot di ahu, nang pe dipangido rohangku mangulahon na denggan. 7:22 Ai dihalashon jolma parbagasan na di ahu do nian patik ni Debata. 7:23 Alai huida do patik na asing di bagasan angka ruas ni dagingku, na marmusu dompak patik na di bagasan rohangku; gabe dipatunduk do ahu tu gomgoman ni patik ni dosa, na di bagasan ruas ni dagingku. 7:24 O'e, ahu jolma na dangol on! Ise ma paluahon ahu sian pamatang hamatean on? 7:25 Mauliate ma hudok tu Debata marhitehite Jesus Kristus Tuhanta i. Dibahen i, ahu sandiri mangoloi patik ni Debata di bagasan rohangku; alai mangihuthon daging i, patik ni dosa i do huoloi.
8:1 Onpe, ndang na mangonai be uhum tu angka na di bagasan Kristus Jesus, angka na so marpangalaho marguru tu daging, na marguru tu tondi do. 8:2 Ai nunga dipalua patik ni tondi hangoluan na di bagasan Kristus Jesus do ahu sian patik ni dosa dohot hamatean. 8:3 Ai dung so margogo patik i, na pinagale ni daging i, disuru Debata do Anakna sandiri ala dosa i, marrupahon daging pardosaon i; gabe songon i ma dihonahon uhum tu dosa i, di bagasan daging i. 8:4 Asa jumpang ma hatigoran na pinangido ni patik di hita, angka na mangihuthon Tondi i, ndang be anggo daging. 8:5 Ai pardagingon do diparrohahon angka na mangihuthon daging i; alai Tondi do diparrohahon angka na mangihuthon Tondi i. 8:6 Ai hamatean do harohaon ni daging, alai hangoluan jala hadameon do anggo harohaon ni Tondi. 8:7 Hamusuon dompak Debata do harohaon ni daging; ndang olo unduk i di patik ni Debata, ai ndang tarbahensa. 8:8 Alai ndang tarhalomohon Debata angka parroha daging. 8:9 Alai anggo hamu, ndang be di bagasan daging i, di bagasan Tondi do, molo tung tutu Tondi ni Debata maringanan di bagasan hamu. Alai molo so Tondi ni Kristus di jolma, ndang Kristus nampuna ibana. 8:10 Alai molo Kristus di bagasan hamu, mangolu do tondi ala ni hatigoran, nang pe mate pamatang ala ni dosa i. 8:11 Alai molo maringanan di bagasan hamu Tondi ni na manungguli Jesus sian na mate, sandok pangoluon ni Ibana, naung manungguli Kristus Jesus i, ma nang pamatangmuna na mate i, hinorhon ni Tondina na mangingani hamu. 8:12 Onpe, ale angka dongan, unang be hita mangadop di daging, marparange marguru tu daging! 8:13 Ai molo marguru tu daging hamu marparange, mate ma hamu; alai molo dipamate hamu parulaon ni pamatang marhitehite Tondi i, mangolu ma hamu. 8:14 Ai nasa na tinogihon ni Tondi ni Debata, angka i do anak ni Debata. 8:15 Ai ndang na dijalo hamu tondi hatoban, asa mangulahi mabiar, Tondi haanakon do dijalo hamu; mangasahon I do panjouonta: Abba, mandok: Ale Amang! 8:16 Laos Tondi i do mangkatindangkon di tondinta, paboa na tutu hita anak ni Debata. 8:17 Alai molo anak hita, dohot ma panean; panean di Debata, dongan panean ni Kristus; molo tung donganna hita di sitaonon, gabe donganna hita sogot nang di hasangapon. 8:18 Ai hurajumi angka sitaonon di hasiangan on, hira na so adong do martimbangkon hasangapon sipapataron tu hita sogot. 8:19 Ai malungun do nasa na tinompa i paimaimahon tingkina, asa dipapatar angka anak ni Debata. 8:20 Ai tu habusukon do dipatunduk na tinompa i; ndada sian lomona, tung binahen ni na patundukkonsa do. 8:21 Huhut mangkirim: Paluaonna ma nang na tinompa i sian pangadopan hamagoan, sahat tu haluaon hasangapon na di angka anak ni Debata. 8:22 Ai taboto do, sai tong dope rap marhoi jala mambebe nasa na tinompa i. 8:23 Angkup ni i, nang hita angka naung manjalo patumonaan ni Tondi i, marhoihoi di bagasan rohanta, paimaimahon haanakon, asa disi marhaluaon pamatangta. 8:24 Ai tong dope mangkirim hita, angka naung malua. Alai molo niida na hinirim i, ndang pangkirimon be i dohonon; ai marhua hirimon, anggo dung diida mata! 8:25 Alai molo mangkirim hita di na so taida dope, marbenget ni roha ma hita paipaimahonsa. 8:26 Alai nang Tondi i, diurupi do hita di hagaleonta i; ai ndang taboto, manang aha na tama sipangidoonta, gabe diondihon Tondi i do hita marhitehite hata na hinoihon na so tangkas hinatahon. 8:27 Alai diboto Sitanda roha i do na pinarrohahon ni Tondi i, ai marguru tu lomo ni roha ni Debata do pangondihonna di angka na badia i. 8:28 Alai taboto do, saluhutna do manumpak tu na denggan di angka na marholong ni roha di Debata, angka na jinouna sian tahina hian. 8:29 Ai angka na tinandana hian, i do ditodo, asa gabe tudos nasida tu pangalaho ni Anakna i, asa Ibana na parjolo tubu sian torop anggina. 8:30 Jala angka naung tinodona, i do dijou; jala na jinouna, i do dipintori; jala angka naung pinintoranna, i do dipasangap. 8:31 Onpe, aha ma dohononta disi? Molo Debata donganta, ise ma alonta? 8:32 Ndang diolani Ibana Anakna sandiri, tung dipasahat do humongkop hita saluhutna tagamon ma so basabasahononna raphon Ibana saluhutna i tu hita? 8:33 Ise mangaluhon angka na pinillit ni Debata? Ai Debata do na mamintori. 8:34 Ise do na mandabu uhum hamagoan? Nunga mate Kristus Jesus i, lobi tahe, naung mulak mangolu do; di siamun ni Debata do Ibana mangondihon hita. 8:35 Dia manirang hita sian holong ni roha ni Kristus i? Haporsuhon do manang hagogotan, manang pangaleleon manang haraparon, manang parsaemaraon, manang mora, manang podang pe? 8:36 Hombar tu na tarsurat i: "Humongkop Ho do dibunui hami manipat ari; songon birubiru sipotongon do hami dirajumi." 8:37 Alai andul do hamonanganta di saluhutna i, hinorhon ni na mangkaholongi hita. 8:38 Ai gomos do ditiop rohangku: Ndang tarbahen sirang hita sian holong ni roha ni Debata, na di bagasan Kristus Jesus Tuhanta i: Manang bahenon ni hamatean manang hangoluan, nang bahenon ni angka surusuruan nang angka harajaon, nang na masa nuaeng, nang na masa sogot, nang angka hagogoon pe, 8:39 manang bahenon ni na di ginjang nang na di toru, ro di nasa na tinompa pe.
9:1 Na sintong do hatangkon marhitehite Kristus, ndada gabus i, dihatindangkon rohangku huhut marhitehite Tondi Parbadia: 9:2 Marsak situtu do rohangku jala tongtong do margudompong. 9:3 Ai dipangido rohangku, naeng bali ahu sian adopan ni Kristus humongkop hahaanggingki, donganku sabangso mangihuthon partubu ni daging. 9:4 Bangso Israel do nasida. Di nasida do ruhut paramaon dohot hasangapon, nang parpadanan dohot parpatihon, nang pargamaon ro di angka bagabaga. 9:5 Di nasida do angka ompu i, sian nasida do haroroan ni Kristus mangihuthon pardagingonna; Ibana ma di ginjang ni saluhutna, Debata, na pinarsangapan salelenglelengna. Amen. 9:6 Alai ndatung pesan hata ni Debata; ai ndada saluhut, na tubu sian Israel, goaron Israel. 9:7 Jala ndada saluhut nasida anak dohonon, ala pomparan ni si Abraham. On do tahe: "Sian si Isak do goaron pomparanmu!" 9:8 Lapatanna: Ndada anak ni daging dohonon anak ni Debata; angka anak na pinarbagabaga, i do dirajumi. 9:9 Ai bagabaga do hata on: "Suang songon on tingkina Ahu ro muse, jadi adong ma disi sada anak di si Sara!" 9:10 Angkup ni i, si Rebekka pe, di na gabegabean ibana sian halak si Isak, ompunta i: 9:11 Ai andorang so tubu dope nasida, so diulahon dope na denggan manang na roa, naeng ma hot na tinahi ni Debata sian pamillitna sambing, 9:12 ndada mangihuthon parulaonnasida; sian panjouonna sambing ma. Ai didok tu ibana: "Sioloan ni na umbalga i do na ummetmet i!" 9:13 Hombar tu na tarsurat: "Huhaholongi do si Jakkob, alai huhasogohon do si Esau!" 9:14 Onpe, dia ma dohononta? Nda songon na geduk ma Debata? Dao ma i. 9:15 Ai didok do tu si Musa: "Martalup ni roha do Ahu di sitalupan ni rohangku, jala asi do rohangku di siasianku." 9:16 Asa guru di pangasii ni Debata do, ndada guru di na manuntun manang mamuspus. 9:17 Ai songon on do didok surat i tu si Firaun: "Apala tusi do ho husungguli, asa hupataridahon gogongku marhitehite ho, asa tarbarita Goarhu tu liat tano on." 9:18 Asa diasii Ibana do na naeng asianna, jala dipajogal do roha ni na, naeng pajogalonna. 9:19 Ra ro ma alusmu: Boasa manorui dope Ibana! Ai ise mangalo tahina? 9:20 Iale, jolma manisia; tung ise ma ho, na naeng manggaga Debata? Tung dohonon ni na ginana i ma mandok na manggana: Boasa songon i ahu bahenonmu? 9:21 Ai nda marhuaso sitopahudon laho patupahon sian na samansam tano liat deba ulaula tu na tama, na deba tu na lea? 9:22 Ai di na naeng pabotohonon ni Debata rimasna huhut patuduhon gogona, gabe marlambas ni roha godang Ibana manganju angka ulaula sirimasan i, angka naung pinadiri tu hamagoan. 9:23 Songon i do dipapatar surung ni hasangaponna i maradophon angka ulaula siasian, angka na pinaturena i hian tu hasangapon. 9:24 Ai dijou do hita, nang sian bangso Jahudi, nang sian angka sipelebegu. 9:25 Songon na nidokna i di surat ni si Hosea: "Bangsongku ma goaronku na so bangsongku hian, jala haholonganku do na so hinaholongan hian!" 9:26 "Jala dung nidok jolo tu nasida: Ndada hamu bangsongku, apala disi ma nasida goaron angka anak ni Debata Parngolu!" 9:27 Ai dijouhon si Jesaya do taringot tu bangso Israel: "Nang pe na sarihit na di topilaut torop ni anak Israel, holan pasipasina i do malua. 9:28 Ai dipatulus jala dipaputus Tuhan i do hatana di tano on." 9:29 Songon naung sinurirangkon ni si Jesaya: "Aut unang ditinggalhon Tuhan Sebaot boni di hita, suman tu Sodom dohot Gumora do hita!" 9:30 Asa dia ma dohononta? On do: Angka parbegu na so mangeahi hatigoran, dapotsa do, i ma hatigoran na sian haporseaon. 9:31 Alai anggo Israel na mangeahi patik hatigoran i, ndang sahat tusi. 9:32 Ala ni aha? Ala sian na mangulahon do (dilului), ndada sian haporseaon, gabe tartuktuk ma nasida di batu partuktuhan i, 9:33 hombar tu na tarsurat i: "Hupeakhon do di Sion batu partuktuhan jala batu pargasipan; jala ndang sipailaon na porsea di Ibana."
10:1 Ale angka dongan, dipangido rohangku, huhut hutangiangkon nasida tu Debata, anggiat malua. 10:2 Ai huhatindangkon do nasida, paboa na diharingkothon pargamaonna; alai ndang marroha. 10:3 Ai disoadahon nasida do hatigoran ni Debata, dilului tahe pajongjongkon hatigorannasida sandiri, jala ndang diundukkon hatigoran ni Debata. 10:4 Ai Kristus do ujung ni patik i, laho mamintori nasa na porsea. 10:5 Ai disurathon si Musa do nian: "Jolma na mangulahon hatigoran na marhite sian patik, i do na mangolu disi." 10:6 Alai ia hatigoran na sian haporseaon i mandok songon on: "Unang tung dok di bagasan roham: Ise ma manaek tu banua ginjang?" (Astuanna: Mangalap Kristus sian i.) 10:7 Manang: "Ise tuat tu banua toru?" (Astuanna: Manogihon Kristus sian angka na mate.) 10:8 On do tahe didok: "Talpe do di ho hata i, di bagasan pamanganmu dohot di bagasan roham do!" I do hata haporseaon i na hubaritahon hami. 10:9 Ai malua ma ho, molo diparhatopot pamanganmi Tuhan Jesus i, huhut dihaporseai roham, naung dipahehe Debata Ibana sian angka na mate. 10:10 Ai roha i do porsea, asa tu hatigoran; pamangan i do mangkatindangkon, asa tu haluaon. 10:11 Ai didok surat i do: "Ndang sipailaon nasa na porsea di Ibana!" 10:12 Ai ndang adong imbar ni Jahudi manang Junani; ai Sada do Tuhan ni saluhutna, naung marbasabasahon sian hamoraonna tu saluhut angka na manjou Ibana. 10:13 Ai "malua do ganup na manjou Goar ni Tuhan i!" 10:14 Antong, beha ma jouonnasida Ibana na so hinaporseaannasida? Beha ma porsea nasida, ia so jolo dibege baritana. Alai beha ma begeonnasida, ia so adong parjamita? 10:15 Alai beha ma marjamita nasida, ia so adong na marsuru, songon na tarsurat i: "Lehetna i langka ni angka sibaritahon na denggan!" 10:16 Alai ndang sude mangoloi barita na uli i, ai ninna si Jesaya do: "Ale Tuhan, tung ise ma mangkaporseai jamitanami?" 10:17 Asa sian na tumangihon do ro haporseaon; ia panangihon i, sian hata ni Kristus do. 10:18 Alai on ma dohononku: Ndang dibege i huroha? Nunga nian! "Naung tolhas do soarana tu liat portibi on, jala ro di suhi ni tano on do baritana." 10:19 Alai hudok muse: Ndang manganto Israel disi? Parjolo si Musa mandok: "Pinggilonku ma hamu mangiburu mida na so bangso hian, paheheonku rimasmuna mida bangso na oto." 10:20 Hum do si Jesaya mandok: "Angka na so mangalului Ahu, i do na dapotan; naung gabe patar do Ahu di angka na so mangusoi Ahu." 10:21 Alai tu bangso Israel do didok: "Manipat ari hupaherbang tanganku tu bangso na so mangoloi jala na manggaga."
11:1 Asa hudok ma: Tung dibolongkon Debata do bangsona? Dao ma i! Ai halak Israel do nang ahu, pinompar ni si Abraham, marga Benjamin. 11:2 Nda tung dibolongkon Debata bangsona, naung tinandana hian. Na so diboto hamu do na nidokna di surat na taringot tu si Elia, uju dialuhon ibana Israel tu Debata, ai ninna ma: 11:3 "Ale Tuhan, dipusa nasida angka panurirangmi, dilohai do angka langgatanmi; sasada ahu nama na tading, jala dohot do hosangku disangkapi nasida." 11:4 Dia ma didok soara na ro tu ibana? "Huhirahon do di Ahu pituribu halak, angka na so sumomba debata Baal i!" 11:5 Nuaeng pe, adong do pasipasi, mangihuthon pamilliton ni asi ni roha i. 11:6 Alai molo binahen ni asi ni roha, ndang be sian parulaon; aut unang i, ndang be goaran i asi ni roha! 11:7 Asa dia nama? Ndang jumpang bangso Israel na niluluan ni rohana, holan angka na pinillit do na dapotan; dipajogal do roha ni na asing. 11:8 Hombar tu na tarsurat i: "Ro di sadari on do dilehon Debata tu nasida tondi na derem dohot mata na so jadi marnida ro di pinggol na so jadi marbinege." 11:9 Jala didok si Daud do: "Sai gabe jorgong jala jaring ma mejanasida bahen pargasipan jala bahen pamaloson di nasida!" 11:10 "Dipaholom ma matanasida, asa unang marnida, jala dipabungkuk ma tanggurungnasida tongtong!" 11:11 On do hudok: Na naeng tinggang do nasida, umbahen na tartuktuk? Dao ma i! Pangalaosionnasida do gabe haluaan di halak parbegu, anggiat tung mangiburu nasida disi. 11:12 Alai molo pangalaosionnasida manjadihon parsaulian ni portibi on, jala hahurangannasida manjadihon hamoraon ni parbegu, lam beha ma habobongot ni nasida sudena! 11:13 Tu hamu angka sipelebegu do hatangkon: Ala apostel tu sipelebegu ahu, sangap do huetong tohonanki. 11:14 Anggiat tung mangiburu hubahen donganku sasibuk, laho paluahon nanggo deba sian nasida. 11:15 Ai molo saut pardengganan ni portibi on, di na bolong i nasida, nda gabe songon hangoluan sian na mate ma i, ia dung saut nasida dijangkon. 11:16 Alai molo badia patumonaan i, badia ma nang na niudi; jala molo badia uratna, badia ma nang angka dangkana. 11:17 Tutu, deba rantingna dirampingkon, asa ho tarsumbat tusi; atik pe hau jarak harangan hian ho, gabe partohap do ho di urat dohot di miak ni hau jarak huta i. 11:18 Unang ma antong ginjang roham maradophon angka ranting i; alai ia ginjang roham, ingot ma: Ndada ho mangusung urat i, niusung ni i do ho! 11:19 Dohononmu ma: Dirampingkon do ranting i, asa ahu disumbathon tusi! 11:20 Tutu do i! Ala so porsea nasida, umbahen na dirampingkon; alai sian haporseaon i do, umbahen na jongjong ho. Unang ma ginjang roham, mabiar ma tahe! 11:21 Ai molo so diolani Debata angka ranting hian, ndang olananna nang ho. 11:22 Onpe, bereng ma basa ni Debata dohot horasna: Horas do Ibana maralohon angka naung tinggang i; basa do maradophon ho, anggo mian ho di bagasan habasaonna; ia so i, tabaonna do nang ho! 11:23 Nasida pe, molo masuk porsea, sumbathononna do; margogo do Debata manumbathon nasida muse. 11:24 Ai sian hau jarak harangan hian ho dirampingkon, gabe disumbathon ho maralohon bangkona tu hau jarak huta; nda lam tarsumbathonsa ma nasida, laho pasuangkon tu hau jarak hian. 11:25 Asa unang hapistaranmuna pangasahononmuna, ale angka dongan; naeng ma di rohangku botoonmuna hasimoon on: Naung songgop do jolo hatangkangon tu bangso Israel, paima tumpu masuk halak sipelebegu i. 11:26 Jala i do gabe dalan, asa malua sandok bangso Israel, hombar tu na tarsurat: "Na ro ma sian Sion Sipalua; tamparonna ma hajahaton sian Jakkob!" 11:27 "Jala on ma padanhu dohot nasida, molo dung hubuat angka dosanasida." 11:28 Asa marningot barita na uli i, musu do nasida ala hamu; alai mangihuthon pamilliton i, angka haholongan do nasida ala angka ompu i. 11:29 Ai ndang dipatait Debata angka silehonlehonna nang panjouonna i. 11:30 Ai najolo ndang sioloi Debata hamu (sipelebegu), gabe dapotan asi ni roha hamu anggo nuaeng, hinorhon ni na so mangoloi i nasida (Israel). 11:31 Songon i ma nasida: Ndang pangoloi nasida saonari; anggiat siasian nang nasida musengani, hinorhon ni asi ni roha na tu hamu i. 11:32 Ai naung dipasahat Debata do saluhutna tu roha na so mangoloi, asa asianna muse saluhutna. 11:33 Bagasna i, antong, hamoraon, hapistaran dohot parbinotoan ni Debata! Na so hasigatan do angka uhumna jala na so habogasan do angka dalanna! 11:34 Ai ise dung umboto roha ni Tuhan i? Ise manuturi Ibana? 11:35 Ise mangalehon parjolo tu Ibana, asa dibalos tusi? 11:36 Ai sian Ibana do saluhutna ro, marhitehite Ibana jala marhapatean tu Ibana do sasudena i! Di Ibana ma hasangapon salelenglelengna! Amen.
12:1 Na huapoi ma hamu, ale angka dongan, marhitehite asi ni roha ni Debata: Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha. 12:2 Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonna dohot na sun denggan. 12:3 Ai marhite sian asi ni roha na nilehonna tu ahu, hupaingot ma ganup hamu: Unang ma torbang rajumi hamu dirimu, lobi sian na patut; alai intap ni na tama ma parrohaonmuna: Ganup marguru tu godang ni haporseaon na tinurpukkon ni Debata tu ibana. 12:4 Umpamana: Torop do ruas di dagingta, alai ndada saulaon ruas i sude: 12:5 Songon i do hita: Torop sadaging di bagasan Kristus, alai ruas be' do hita sama hita. 12:6 Ganup manjalo silehonlehon marguru tu ragam ni asi ni roha na tinurpukkonna tu hita: Ia panurirangon, naeng ma mardomu tu haporseaon. 12:7 Ia ulaon marhobas, ba ulaon marhobas ma; ia haguruon, i ma! 12:8 Ia pangapoion, i ma; ia na mangasii, sian bulus ni roha ma; ia na manguluhon, marringgas ni roha ma; ia na marbasabasa, sian las ni rohana ma! 12:9 Unang ma marpangansi holong ni roha i! Hagigihon hamu ma na jat; pareak hamu ma na denggan! 12:10 Ingot hamu ma holong ni roha sama dongan Kristen! Masijolojoloanan ma hamu masipasangapan! 12:11 Unang sumurut ringgas ni rohamuna! Partondi na girgir ma hamu! Oloi hamu ma Tuhan i! 12:12 Marlas ni roha ma hamu mangkirim! Marbenget ni roha ma di haporsuhon! Jugulhon hamu ma tangiang! 12:13 Antoi hamu ma na hasea di angka na badia! Haringkothon hamu ma partamueon! 12:14 Pasupasu hamu ma angka na paburuburu hamu; pasupasu ma antong, unang bura i! 12:15 Marlas ni roha ma hamu rap dohot angka na marlas ni roha, jala tangis ma hamu rap dohot angka na tangis! 12:16 Sada ma rohamu sama hamu: Unang hatimboon pingkiri hamu, alai patutoru hamu ma rohamu tu haserepon; unang parbisuk hamu di rohamu! 12:17 Unang baloshon hamu na jat alo ni na jat; ringkoti hamu ma na denggan di jolo ni halak saluhutna! 12:18 Molo tarbahen, intap na tarpatupa hamu, tiop hamu ma dame maradophon halak saluhutna! 12:19 Hamu, angka na hinaholongan, unang hamu marlulu; pasahat hamu ma rimas i (tu Debata), ai tarsurat do: "Di Ahu do pamaloson, Ahu pe mamaloshon, ninna Tuhan i." 12:20 Onpe, jumpa male musum, lehon ibana mangan; jumpa mauas ibana, painum! Ai songon na pagukgukkon gara do ho tu atas uluna, anggo dibahen ho songon i. 12:21 Unang ma talu ho dibahen hajahaton; alai taluhon ma hajahaton i marhitehite na denggan!
13:1 Unduk ma ganup di panggomgomi na marsahala; ai ndang adong sahalana, ia so sian Debata, Debata do mangaturhon nasida. 13:2 Asa na mangalo aturan ni Debata do na mangalo panggomgomi i. Alai na mangaithon uhum tu dirina do na mangalo i. 13:3 Ai angka siula hajahaton do patut mangkabiari panggomgomi, ndada angka siulahon na denggan. Na denggan ma ulahon, asa unang pola habiaranmu panggomgomi i, asa dapot pujipujian ho tahe sian nasida. 13:4 Suruan ni Debata do nasida, laho manumpak ho. Alai molo diula ho na jat, patut ho tahutan, ai ndada gaitgait podang na niusungna i. Suruan ni Debata do nasida, mangkonahon uhum tu siulahon hajahaton. 13:5 Dibahen i patut marunduk ni roha hita; ndada nionjar ni biar mida rimasna, tung sinuru ni roha i do. 13:6 Ala ni i garar hamu ma nang beo i, ai parhobas ni Debata do nasida; tusi do nasida disuru. 13:7 Tu ganup ma lehon hamu na tama tungguonna: Beo tu na patut manjalosa, sohe tu na ture hasahatanna, biar tu na tama habiaran, hormat tu na talup hormatan. 13:8 Unang marutang hamu manang tu ise, dungkon ni ruhut masihaholongan; ai na mangkaholongi dongan, i do manggohi patik i. 13:9 Ai na nidok ni patik i: "Unang ho mangalangkup! Unang ho mambunu! Unang ho manangko! Unang marpangkaliangi roham!" Ro di nasa patik na asing, on do pamusatanna: "Haholongi donganmi songon dirim!" 13:10 Ia parholong ni roha, ndang diulahon na jahat tu angka dongan; asa haholongon ni roha i do tutu hagogok ni patik i. 13:11 I ma ringkoti hamu, ala diboto hamu tingkina: Ai naung dapot do ombasna, laho hehe sian na modom; ai nunga jumonok haluaonta nuaeng, sian uju gabe porsea hita. 13:12 Na salpu ne ma borngin, na jonok nama arian. Antong, tatanggali ma angka ulaon haholomon; tasolukkon ma angka sinjata hatiuron! 13:13 Badia ma hita marpangalaho songon na patut arian, unang masalpuhu parmanganon dohot parminumon, unang marharorangon dohot margadombus, unang marbada dohot mangiburu! 13:14 Alai solukkon hamu ma Tuhan Jesus Kristus; jala unang ma sarihon hamu dagingmuna laho manungguli hisaphisapna.
14:1 Anju hamu ma na gale marhaporseaon, unang uhumuhumi hamu pingkirannasida! 14:2 Pos do roha ni na sada on, laho manganhon nasa ragam ni sipanganon; ai na gumale i, ingkau rata sambing do dipangan. 14:3 Unang ma hu roha ni na manganhonsa mida na so manganhonsa; jala na mangorom, unang ma diuhumuhumi donganna na manganhonsa, ai naung dijangkon Debata do ibana. 14:4 Ai ise do ho, umbahen na diuhumuhumi ho anak somang ni na leban? Mandapot di tuanna do ibana, manang na hot, manang na tinggang. Alai hot do ibana, ai tarpahot Tuhan i do ibana. 14:5 Ia di roha ni na deba, marhasurungan do ari on sian ari an; ia di roha ni na asing, dos be do angka ari i. Asal ma gomos pingkiranna be! 14:6 Na pabadiahon ari i, di Tuhan i ma diparbadiai; na manganhon i, Tuhan i ma diingot disi, ai dipuji disi Debata; songon i do na mangorom, Tuhan i do diingot disi, laos dipuji do Debata. 14:7 Ai ganup hita ndang mangolu di dirinta, jala laos ganup hita ndang mate di dirinta. 14:8 Ai ia mangolu pe hita, mangolu di Tuhan i do; jala mate hita, mate di Tuhan i do! Asa mangolu manang mate pe hita, tong do di Tuhan i hita. 14:9 Ai i do umbahen na mate Kristus jala mulak mangolu, asa Ibana Tuhan ni angka na mate, nang angka na mangolu. 14:10 Ia ho, boasa uhumuhumanmu donganmu; boasa hu roham mida donganmu? Ai hita sasude pajongjongonna sogot tu adopan ni habangsa ni Debata. 14:11 Ai na tarsurat do: "Na mangolu do Ahu, ninna Tuhan i. Marsinggang tu jolongku sogot nasa na mangolu, jala nasa parsoara marhatopothon Debata!" 14:12 Asa ganup hita on, alusanta do Debata taringot tu dirinta be. 14:13 Onpe, unang be hita masiuhumuhuman! On ma tahe timbangi hamu: Unang ma binahen partuktuhan manang pargasipan tu dongan! 14:14 Tangkas situtu do huboto marhitehite Tuhan Jesus: Na so adong na ramun hian; alai na gabe ramun do i di na manjujursa ramun. 14:15 Ai molo diarsahi ho donganmi ala sipanganon, ndang diparangehon ho be holong ni roha i. Unang ma mago donganmu binahen ni sipanganonmu, ai naung mate do Kristus humongkop ibana. 14:16 Onpe, unang ma hona insak artamuna! 14:17 Ai ndada sipanganon manang siinumon harajaon ni Debata; hatigoran do dohot hadameon dohot las ni roha di bagasan Tondi Parbadia. 14:18 Ai molo dioloi ho Kristus disi, dihalomohon Debata do ho jala arga ho di jolma. 14:19 Dibahen i taeahi ma na tau padamehon jala pauliulihon hita sama hita! 14:20 Unang segai na niula ni Debata, binahen ni sipanganon. Saluhutna i ias do nian, alai gabe dae do i di halak, molo targasip ibana laho manganhonsa. 14:21 Tagonan, unang mangan juhut, unang minum anggur hita, unang ma taula manang dia pe, ia targasip donganmu disi. 14:22 Ia adong pe haporseaonmu, di ho ma i di jolo ni Debata. Martua do na so ganggu be di na tinolopan ni rohana! 14:23 Alai molo ganggu roha ni halak laho manganhon, hona uhum do, ala so sian haporseaon. Ai nasa na so tubu sian haporseaon, i do dosa.
15:1 Alai patut do hita na margogo i manganju hagaleon ni angka na hurang gogo, jala unang ma tahasiani dirinta. 15:2 Ganup ma hita mambahen halomoan ni roha ni dongan, laho padengganhon jala pauliulihon. 15:3 Ai nang Kristus pe, ndang dihasiani dirina; songon na nidok ni Surat i tahe: "Toho do tu ahu reherehe ni angka na mangarehei Ho!" 15:4 Ai nasa na tarsurat hian, bahen poda di hita do, umbahen na tarsurat; asa marpangkirimon hita binahen ni habengeton dohot pangapulon na di bagasan Surat i. 15:5 Alai dilehon Debata, nampuna habengeton dohot pangapulon i, ma tu hamu hasadaon ni roha sama hamu mangihuthon Kristus Jesus, 15:6 asa sahata sasoara hamu mamuji Debata jala Ama ni Tuhanta Jesus Kristus! 15:7 Dibahen i masijangkonan ma hamu, songon panjangkon ni Kristus di hita, bahen hasangapon ni Debata. 15:8 Ai on do hudok: Naung gabe pangoloi di angka na tarsunat do Kristus ala ni hasintongan ni Debata, laho pahothon bagabaga na tu angka ompu najolo. 15:9 Alai dipasangap angka sipelebegu i do Debata ala ni asi ni rohana, songon naung tarsurat: "Ala ni i do pujionku Ho di tongatonga ni angka sipelebegu jala endehononku ma Goarmu!" 15:10 Jala didok di na asing muse: "Marolopolop ma hamu angka sipelebegu rap dohot bangsona!" 15:11 Jala di na asing muse: "Puji hamu ma Tuhan i, sude hamu angka sipelebegu, jala pujion ni saluhut angka bangso ma Ibana!" 15:12 Jala didok si Jesaya do muse: "Adong ma sogot urat ni si Isai, jala hehe ma na manggomgomi angka parbegu; tu Ibana ma mangkirim angka bangso!" 15:13 Alai gok ma dibasabasahon Debata, nampuna pangkirimon i, tu hamu ragam ni halalas ni roha dohot dame di bagasan haporseaon, asa lam sumurung hamu marpangkirimon, pinargogoan ni Tondi Parbadia! 15:14 Ahu pe tangkas do huboto, naung gok habasaron jala saluhut hapistaran hamu, angka dongan; na tarbahen hamu do masipasingotan. 15:15 Alai barani do ahu mambahen saotik surat tu hamu, songon na pasingothon hamu ala ni asi ni roha na binasabasahon ni Debata tu ahu. 15:16 Ai naung gabe parhalado ni Kristus Jesus do ahu tu halak sipelebegu, asa huulahon barita na uli ni Debata, anggiat angka sipelebegu i gabe pelean na tau jaloon, na pinarbadiaan di bagasan Tondi Parbadia. 15:17 Asa na tarpuji ahu do diringku di bagasan Kristus Jesus, marningot ulaon na hujalo sian Debata. 15:18 Ai ndang hum rohangku mangkatahon na so dihorhon Kristus di bagasan ahu, manogunogu angka sipelebegu tu pangoloion, di hata dohot di ulaon, 15:19 mardongan hagogoon ni tanda dohot halongongan, di bagasan hagogoon ni Tondi Parbadia. Songon i do sahat hupatubegehon barita na uli na sian Kristus, mamungka sian Jerusalem dohot luat na humaliang sahat ro di Ilirikum. 15:20 Alai hasurunganku do huetong: Mamaritahon barita na uli i sandok di na so tarbarita dope Goar ni Kristus, asa unang ahu songon na pauli jabu diatas ojahan ni na leban. 15:21 Alai mangihuthon hata ni Surat i: "Marnida ma angka na so dapotan barita i, jala mangantusi ma angka na so dung umbegesa." 15:22 Laos i do mangambat ahu gumodang, umbahen na so ro ahu, manopot hamu. 15:23 Alai anggo nuaeng: Ndang adong be siulaonku di angka luat i; jala nunga manang piga taon hian dihasiholi rohangku manopot hamu, laho borhat tu Hispania. 15:24 Ai hirim do rohangku, idaonku hamu di na mamolus ahu, jala pataruonmuna ahu tusi, dung jolo sombu rohangku otik marnida hamu. 15:25 Alai tu Jerusalem dope langkangku anggo saonari, sumarihon angka na badia i. 15:26 Ai dipaputus huria Makedonia dohot Akaya do, mambahen pangurupion tu angka dongan na hurangan di Jerusalem. 15:27 I ma tahinasida; ai tutu utangnasida do i: Ai molo angka sipelebegu gabe partohap di arta partondion na di nasida, tama do antong ditolongi angka sipelebegu nasida taringot tu angka na ringkot di daging. 15:28 Ia dung hupaujung i jala tangkas hupatolhas parsaulian on, borhat ma ahu sian hamu tu Hispania. 15:29 Alai huboto do, molo ro ahu tu hamu, mantat hagogok ni pasupasu ni Kristus do ahu ro. 15:30 Alai huapoi ma hamu ale angka dongan, marhitehite Tuhanta Jesus Kristus dohot marhitehite holong ni roha ni Tondi i: Dongani hamu ma ahu marungkil marhite sian na tumangiangkon ahu tu Debata, 15:31 anggiat dipalua ahu sian angka na tois na di Judea jala anggiat dihalomohon angka na badia i ulaonki na tu Jerusalem, 15:32 anggiat marlas ni roha ahu sahat tu hamu hombar tu roha ni Debata, gabe rap tarapul rohanta. 15:33 Didongani Debata Pardame i ma hamu saluhutna! Amen.
16:1 Hupasahat ma tu hamu ibotonta si Poibe, pangurupi di huria Kenkrea. 16:2 Jangkon hamu ma nasida marhitehite Tuhan i, songon na tama di angka na badia, jala urupi hamu ma nasida di nasa ulaon, jumpa ringkot urupan. Ai naung gabe pangurupi nasida di torop halak, nang di ahu pe. 16:3 Tabingku di si Priska dohot Akuila, angka donganku pangula di bagasan Kristus Jesus. 16:4 Diseahon nasida do hosanasida humongkop ahu; gabe ndada holan ahu mandok mauliate tu nasida, tung saluhut huria na sian sipelebegu do. 16:5 Tabingku nang di punguan na di bagasnasida, Tabingku di si Epenetus, haholonganki, patumonaan ni huria ni Kristus di Asia. 16:6 Tabingku di si Maria na mangkalojahon hamu. 16:7 Tabingku di si Andronikus dohot di si Junias, angka donganku samarga, donganku tarhurung; denggan do baritanasida di angka apostel jala na jumolo nasida di Kristus asa ahu. 16:8 Tabingku di si Ampliatus, na huhaholongi di bagasan Tuhan i. 16:9 Tabingku di si Urbanus, donganta di bagasan Kristus, songon i di si Stakis, haholonganki. 16:10 Tabingku di si Apelles, naung tau nidapot di Kristus. Tabingku ma di angka dongan sabagas ni si Aristobulus. 16:11 Tabingku di si Herodion, donganku samarga, Tabingku di dongan sajabu ni si Narkissus, angka na di bagasan Tuhan i. 16:12 Tabingku di si Tripena dohot Triposa, angka na olo loja humongkop Tuhan i. Tabingku di si Persis, haholongan i, naung olo loja situtu humongkop Tuhan i. 16:13 Tabingku di si Rupus, na pinillit ni Tuhan i, songon i di inangna, na songon ina di ahu. 16:14 Tabingku di si Asinkritus, Plegon, Hermes, Patrobas, Hermes, nang di angka dongan na rap dohot nasida. 16:15 Tabingku di si Polologus, si Julia, Nerius ro di ibotona i, di si Olimpas dohot di sude dongannasida na badia i. 16:16 Masitabian ma hamu huhut masiummaan di bagasan habadiaon! Sahat ma tabi ni sude angka huria ni Kristus tu hamuna! 16:17 Huapoi ma hamu angka dongan: Jagahon hamu ma angka na mambingkasi parsalisian dohot pargasipan mangalo poda naung ginuruhonmuna, jala pasiding hamu ma nasida. 16:18 Ai ndada Tuhanta Kristus dioloi nasida, butuhanasida do; jala dipaotooto nasida do angka na so umboto hajahaton, marhitehite hatanasida na uli jala na tabo di pinggol. 16:19 Ai nunga tarbarita pangoloionmuna tu saluhutna, i do halalas ni rohangku di hamuna; alai naeng ma di rohangku marbisuk tu na denggan hamu, polin pasidingkon na roa. 16:20 Alai tibu ma rosahan ni Debata Pardame i sibolis i tutoru ni patmuna. Didongani asi ni roha ni Tuhanta Jesus ma hamuna! 16:21 Manongos tabi tu hamu si Timoteus, donganku pangula, songon i si Lucius, Jason, Sosipater, angka donganku samarga. 16:22 Mandok tabi di hamu di bagasan Tuhan i, ahu si Tertius na manurathon surat on. 16:23 Mandok tabi di hamu si Gayus na manamuei ahu ro di sandok huria i, songon i si Erastus hasahatan ni hepeng ni huta i, dohot si Kuartus dongan i. 16:24 (Didongani asi ni roha ni Tuhanta Jesus Kristus ma hamusudena! Amen.) 16:25 Alai hasangapon ma di Debata na tuk margogoihon hamu, hombar tu barita na uli na hubaritahon dohot jamita ni Jesus Kristus. I ma hasimoon naung dipaullop, dung jolo ditabunihon sian na robi. 16:26 I ma dipapatar nuaeng marhite sian surat ni angka panurirang mangihuthon tona ni Debata na manongtong i, jala dipabotohon tu saluhut bangso, asa dioloi be porsea. 16:27 Di Ibana, Parbisuk mamunjung i, ma hasangapon marhitehite Kristus ro di salelenglelengna! Amen.
1:1 Ahu surat sian si Paulus, naung tarjou gabe apostel ni Jesus Kristus, mangihuthon lomo ni roha ni Debata, rap dohot si Sostenes dongan i, 1:2 mandapothon huria ni Debata na di Korint, angka naung gabe badia di bagasan Kristus Jesus, angka na badia, naung tarjou rap dohot saluhut na manjou Goar ni Tuhanta Jesus kristus di ganup inganan, di nasida nang di hami: 1:3 Asi ni roha ma di hamu dohot dame sian Debata Amanta dohot sian Tuhan Jesus Kristus i! 1:4 Mandok mauliate do ahu tongtong di Debatangku siala hamu, marningot asi ni roha ni Debata, naung nilehonna tu hamu di bagasan Kristus Jesus. 1:5 Ai naung gabe mamora do hamu di bagasan Ibana di saluhutna i, di sandok hata i, nang di sude pangantusion. 1:6 Ai naung dipahot do di hamu panindangion na taringot tu Kristus i. 1:7 Asa ndada na hurangan hamu di nasa ragam ni basabasa ni Debata; na maimaima nama hamu di hapapatar ni Tuhanta Jesus Kristus. 1:8 Pahoton ni I do hamu ro di ujung, gabe so hasurahan di ari ni Tuhanta Jesus Kristus i. 1:9 Haposan do Debata, naung manjou hamu tu parsaoran dohot Anakna Jesus Kristus, Tuhanta i. 1:10 Alai huapoi ma hamu, ale angka dongan, mangasahon Goar ni Tuhanta Jesus Kristus, asa sahata hamu saluhutna, unang ma adong parbolatan di hamu; hot ma hamu binahen ni sada ni roha dohot sada ni pingkiran! 1:11 Ai tarbortik do tu ahu marhite sian pangisi ni bagas ni si Kloe taringot tu hamu angka dongan, paboa na masa di hamu parsalisian. 1:12 Alai on do hudok: Adong do di hamu na mandok: Sisean ni si Paulus do ahu; na deba: Sisean ni si Apollos do ahu; na deba: Sisean ni si Kepas do ahu; na deba: Sisean ni Kristus do anggo ahu. 1:13 Na binagi do Kristus i? Naung tarsilang do si Paulus ulaning humongkop hamu? Naung tubagasan goar ni si Paulus do hamu tardidi? 1:14 Mauliate hudok, ala so adong hupandidihon di hamu, dungkon ni si Krispus dohot si Gayus. 1:15 Unang adong na mandok, tubagasan goarhu sandiri hamu tardidi! 1:16 Alai dohot do tahe pangisi ni bagas ni si Stepanus hupandidihon; dungkon ni i, ndang adong hupandidihon, intap ni na huboto. 1:17 Ai ndang disuru Kristus i ahu mandidihon, mamaritahon barita na uli do; jala i pe, ndada marhata habisuhon, unang diorui silang ni Kristus i. 1:18 Ai haotoon do hata na taringot tu silang i di roha ni angka na laho mago; alai hagogoon ni Debata do i di hita na dapotan haluaon. 1:19 Ai na tarsurat do: "Huagohon habisuhon ni na bisuk jala hubolongkon roha ni parroha." 1:20 Didia ma na bisuk? Didia ma sibotosurat? Didia ma parsinabul di tano on? Nda gabe haotoon habisuhon ni portibi on dibahen Debata? 1:21 Ai mangihuthon habisuhon ni Debata, ndang ditanda portibi on Debata marhite dalan habisuhon; gabe dihalomohon Debata ma paluahon angka na porsea i marhitehite jamita haotoon. 1:22 Ai na mangido tanda do anggo halak Jahudi, jala mangalului habisuhon do ia halak Junani. 1:23 Alai Kristus na tarsilang i do hujamitahon hami; pargasipan do i di halak Jahudi, haotoon di sipelebegu. 1:24 Alai di angka na tarjou i, nang Jahudi, nang Junani, gabe hagogoon ni Debata dohot habisuhon ni Debata do Kristus i. 1:25 Ai umbisuk do haotoon ni Debata asa angka jolma i, jala gumogo do hagaleon ni Debata asa angka jolma i. 1:26 Bereng hamu ma, angka dongan, panjouonna di hamu: Ndang piga hamu na bisuk mangihuthon sibuk, ndang piga na gogo, ndang piga na sangap hian. 1:27 Alai na oto di roha ni portibi on dipillit Debata, laho pailahon angka na bisuk; jala na gale di portibi on dipillit Debata, laho pailahon na gogo. 1:28 Angka na teuk di portibi on jala na marlea dipillit Debata: Tung sisoada i do, asa soadahononna naung jongjong hian, 1:29 asa unang manenganenga agia ise jolma maradophon Debata. 1:30 Alai sian Ibana do umbahen na di bagasan Kristus Jesus hamu, ai Ibana do gabe habisuhon di hita sian Debata dohot hatigoran dohot habadiaon dohot haluaon. 1:31 Asa saut na tarsurat i: "Na naeng mamuji dirina, mangasahon Tuhan i ma ibana mamuji!"
2:1 Ahu pe, di na ro i ahu tu hamu angka dongan, ndada marhata hamaloon manang marhabisuhon ahu ro mamaritahon tu hamu panindangion taringot tu Debata. 2:2 Ai hupasada do rohangku, na so tupa botoonku di tongatongamuna agia aha, dungkon ni Jesus Kristus, mandok: Barita ni silangna. 2:3 Marhagaleon jala marhatahuton do ahu di tongatongamuna jala bobonosan situtu. 2:4 Hatangku nang parjamitaonku pe, ndada marhata habisuhon na malo mangaithon; tondi dohot hagogoon di dipapatar disi, 2:5 asa marojahan haporseaonmuna di hagogoon ni Debata, unang di habisuhon ni Jolma. 2:6 Alai habisuhon do huhatahon hami di angka naung rimpas; alai nda tung habisuhon na di portibi on, manang habisuhon ni partogi ni portibi on, angka na laho salpu. 2:7 Habisuhon ni Debata do tahe na simo jala na buni, naung dipaojak Debata hian sian mula ni mulana bahen hasangaponta. 2:8 I ma na so ditanda agia ise sian angka partogi ni portibi on; ai aut ditanda, ndang tagamon parsilangkononna Tuhan na marsangap i. 2:9 Saut do na tarsurat i: "Na so dung niida ni mata, na so dung binege ni pinggol, na so dung hehe di bagasan roha ni jolma, i do diparade Debata di angka na mangkaholongi Ibana." 2:10 Alai dipapatar Debata do i tu hami marhite sian Tondi i. Ai sude do didodo Tondi i, ro di angka hasimoon ni Debata. 2:11 Ai ise jolma umboto na di jolma i, ia so tondi ni jolma na di bagasan ibana? Suang songon i: Ndang adong na tumanda na di Debata, ia so Tondi ni Debata. 2:12 Alai ndang hujalo hami tondi portibi on; Tondi na sian Debata do, asa dapot botoonnami na binasabasahon ni Debata tu hami. 2:13 Jala i do huhatahon hami, ndada di bagasan hata habisuhon ni jolma na targuruhon, tung na pinodahon ni Tondi do, laho manimbangi angka partondion mangihuthon ruhut ni tondi. 2:14 Ndang tarjalo jolma hian na sian Tondi ni Debata, ai haotoon do i di rohana; ndang tartandasa i, ai partondion do mandodo i. 2:15 Alai saluhutna i didodo partondi; alai ndang tardodo manang ise anggo ibana. 2:16 Ai ise ma naung tumanda roha ni Debata, asa ajaranna Ibana? Alai roha ni Kristus i do anggo di hami.
3:1 Ahu pe, ale angka dongan, ndang tarbahen ahu mangkatai tu hamu uju i songon na tu angka partondi, sandok songon na tu angka pardaging do jala posoposo di bagasan Kristus. 3:2 Susu do hupainumhon tu hamu, ndada sipanganon hian, ai ndang tarjalo hamu i uju i; gari nuaeng, gari so tarjalo hamu dope! 3:3 Ai tong dope hamu pardaging. Ai anggo masa di hamu pangiburuon dohot parsalisian, nda pardaging hamu jala mamarangehon ruhut hajolmaon? 3:4 Ai nda parroha hajolmaon hamu, molo adong na mandok: Sisean ni Paulus do ahu, jala na sada an: Sisean ni Apollos do anggo ahu? 3:5 Ai ise Apollos; ise Paulus? Parhalado do nasida, parhiteanmuna gabe porsea, jala ganup hombar tu pangalehon ni Tuhan i di ibana. 3:6 Ahu do manuan, Apollos do pabornokkon; alai Debata do patubuhon. 3:7 Asa ndada rajuman na manuan manang na pabornokkon; Debata na patubuhon, i do! 3:8 Dos do na manuan dohot na pabornokkonsa; alai ganup do manjalo upana, hombar tu pangulaonna be. 3:9 Ai dongan pangula ni Debata do hami; hauma ni Debata, bagas ni Debata do anggo hamu. 3:10 Hombar tu asi ni roha ni Debata na nilehonna i tu ahu, hupauli ojahan i, songon binahen ni pande bagas na bisuk; na asing do muse pajongjong bagas i. Alai ganup ma mamatahon, manang beha pangulaonna disi. 3:11 Ai ndang tarpauli ojahan na asing, dungkon ni naung ojak i, i ma Jesus Kristus i. 3:12 Asa molo dipauli diatas ojahan i manang sere, perak, batu na arga, hau, lamlam manang durame: 3:13 Gabe patar do na niula ni ganup. Ari sogot i do paullophonsa, ai papataron ni api ma i; asa api i do mangunjuni, manang beha ulaon ni ganup. 3:14 Molo hot ulaon na pinaulina i, jaloonna do upa. 3:15 Molo soksohanna niulana i, luangan ma ibana; malua do nian anggo ibana, alai songon na nienet sian api nama. 3:16 Ndang diboto hamu: Joro ni Debata hamu, jala Tondi ni Debata maringanan di bagasan hamu? 3:17 Agohonon ni Debata do na mangagohon joro ni Debata, ai na badia do joro ni Debata; i ma hamu. 3:18 Unang adong na paotootohon dirina. Molo adong dietong na bisuk di tongatongamuna di portibi on, gabe na oto ma ibana jolo, anggiat gabe na bisuk muse. 3:19 Ai anggo di jolo ni Debata haotoon do habisuhon ni portibi on, ai tarsurat do: "Ditangkup do angka na bisuk di bagasan angkalnasida." 3:20 Jala muse: "Diboto Tuhan i do, na so marniula pingkiran ni angka na bisuk!" 3:21 Asa unang ma adong na manenganengahon jolma, ai sasudena i di hamu do. 3:22 Manang Paulus, Apollos, Kepas, hasiangan on, hangoluan, hamatean, na masa nuaeng dohot na songgop sogot pe, saluhutna do di hamu. 3:23 Alai di Kristus do hamu, jala di Debata do anggo Kristus.
4:1 Dirajumi jolma i ma hami: Parhalado ni Kristus jala juarabagas ni angka hahomion ni Debata. 4:2 Jumolo dipangido di angka juarabagas; naeng haposan nasida jumpang. 4:3 Otik do i huetong, anggo hamu manang rapot paruhuman ni jolma manguhumi ahu; ahu pe, ndang huuhumi diringku. 4:4 Ai ndang adong salangku, anggo na huboto; alai ndada gabe pintor ahu hinorhon ni i. Tuhan i do manguhumi ahu. 4:5 Dibahen i, unang hamu manguhumi di na so tingkina tagan so ro Tuhan i; patiuronna do na buni di na holom, jala papataronna do tahitahi ni roha. Disi ma dapotan pujipujian ganup sian Debata. 4:6 Alai tu ahu dohot tu si Apollos huaithon hata ondeng, ala ni hamu angka dongan, asa marhite sian hami guruhononmuna: Unang nilobian na tarsurat i; unang dipaburnang na deba dirina mandongani na sada, maralohon na sadanari. 4:7 Ai ise mangaliga ho; jala aha do adong di ho na so jinalom? Alai molo na ripe manjalo ho, aha ma manenganenga ho, songon na so manjalo! 4:8 Nunga mahap hamu, nunga mamora. Nunga raja hamu, so pola marhitehite hami. Aut ma nian gabe raja hamu, asa dohot hami raja raphon hamu! 4:9 Ai didok rohangku do, dipatindang Debata hami apostel gabe parpudi, songon naung pinasahat tu hamatean, pola gabe sitotonduran do hami di portibi on dohot di angka pardisurgo, nang di jolma pe. 4:10 Na oto do hami ala ni Kristus; anggo hamu, angka na marroha do di bagasan Kristus. Angka na gale hami; hamu angka na gogo. Angka na pinarsangapan hamu; hami angka na lea. 4:11 Ro di na sangombas on, rapar hami jala mauas, marsaemara jala digosagosa do hami, so maringanan na hot. 4:12 Huhalojahon hami mangulahon tangannami sandiri. Diinsahi hami, mamasumasu hami; dilelei hami, manaonnaon do hami; 4:13 diparoaroa hami, mangelehelek do hami. Hira gabe rapanrapan ni portibi on do hami, apusapus ni saluhutna do ro di nuaeng. 4:14 Ndada laho pailahon hamu, umbahen na husurathon angka ondeng, na laho paingot hamu do, songon anakkonku na hinaholongan. 4:15 Ai nang pe adong saloksa pangajari di hamu marhitehite Kristus, ndang haru piga ama; ai ahu do manubuhon hamu di bagasan Kristus Jesus, marhite sian barita na uli. 4:16 Dibahen i huapoi hamu: Gabe sitiru ahu ma hamu! 4:17 Ala ni i do husuru tu hamu Timoteus, anakkonku, haholongan jala haposan ni rohangku marhitehite Tuhan i, asa ibana paingot hamu di angka dalanku na marhitehite Kristus Jesus, hombar tu na huajarhon di nasa huria. 4:18 Alai dipaburnang deba do dirina, songon na so saut be ahu ro mandapothon hamu. 4:19 Alai gira do ahu ro tahe manopot hamu, anggo lomo roha ni Tuhan i; jala tandaonku ma disi gogo ni angka na paburnang dirina, ndada hatanasida. 4:20 Ai ndada di bagasan hata harajaon ni Debata, di bagasan hagogoon do! 4:21 Dia do dipangido rohamuna: Marlinsinglinsing ahu ro manopot hamu manang marholong ni roha jala martondi na lambok?
5:1 Tarbege do, masa parmainanon di hamu; jala gari di sipelebegu, gari so masa sisongon i, pola diparjolma nioli ni amana. 5:2 Tong dipatimbo hamu do dirimu; nda balik marsak ma nian hamu, asa pinabali sian tongatongamuna na mangulahon na songon i! 5:3 Ai anggo ahu, nang holang pamatangku, di tongatongamuna do ahu mangihuthon partondion: Nunga songon na di tongatongamuna ahu, manguhum na mangulahon sisongon i: 5:4 Marhitehite Goar ni Tuhan Jesus, di na pungu hamu dohot tondingku, mardongan hagogoon ni Tuhanta Jesus. 5:5 Pasahaton ibana tu sibolis, laho mangago dagingna, anggiat malua tondina di ari ni Tuhan Jesus. 5:6 Ndang denggan baritamuna. Ndang diboto hamu: Otik pe na asom i, diasomi do sude na niudi i? 5:7 Ias ma pabali hamu asom naung leleng i, asa na niudi na imbaru hamu, ai ndang na niasoman hamu. Ai nunga pola dibunu Birubiru paska humongkop hita, i ma Kristus. 5:8 Onpe, marpesta ma hita di bagasan hapolinon dohot hasintongan, unang ma marhitehite pangasomi hajahaton jala haroaon naung bari. 5:9 Nunga husurathon tu hamu: Na so jadi saor hamu dohot angka parmainan. 5:10 Ndang hudok sude parmainan na di portibi on ro di angka parangat dohot pandobo dohot sioloi ajiajian; aut i, ingkon ruar nama hamu sian portibi on. 5:11 On do tahe hudok di surat i: Na so jadi saor hamu dohot halak na targoar dongan, hape parmainan do ibana, manang parangat, manang sioloi ajiajian, manang panginsahi, manang siparmabuk, manang pandobo pe; gari mangan rap dohot sisongon i, gari so jadi. 5:12 Ai marhua ma ahu manguhum angka na di ruar (ni huria; nda angka na di bagasan siuhumonmuna!) 5:13 Uhumon ni Debata do angka na di ruar. Pabali hamu ma siparjahat i sian tongatongamuna!
6:1 Adong do hape di tongatongamuna na marparkaro dompak donganna, gabe hum ibana maruhum tu angka sipargeduk, ndada tu angka na badia! 6:2 Ndang diboto hamu: Uhumon ni angka na badia do sogot portibi on? Jala molo uhumonmuna portibi on, ndang tuk hamu manguhum siotihotik i? 6:3 Ndang diboto hamu: Hita manguhum sogot angka surusuruan; lam hata ugasan tano on ma! 6:4 Hape jumpa adong di hamu parkaro taringot tu ugasan tano on, dipauhumhon hamu i tu angka na marlea di huria! 6:5 Na pailahon hamu do hatangkon: Na so adong huroha di hamu na marroha, nanggo sahalak, na tarbahen manguhum dongan sama dongan? 6:6 Na marparkaro do hape dongan sama dongan, jala di jolo ni angka na so porsea i! 6:7 Sandok hataluanmuna hian do i, anggo marparkaro hamu sama hamu. Boasa so tagonan ditaon hamu na so uhum? Boasa so tagonan dioloi hamu angatan? 6:8 Hape hamu sandiri do mangarupa jala mangangati, pola tu angka dongan! 6:9 Na so diboto hamu do: Ndang sitean harajaon ni Debata anggo angka sipargeduk? Unang hamu lilu: Ndang sitean harajaon ni Debata angka parmainan, angka sioloi ajiajian, angka pangalangkup, angka pangalukluhi, nang angka na marjolmahon baoa. 6:10 Songon i nang angka panangko, angka parangat, angka siparmabuk, angka panginsahi, nang angka pandobo. 6:11 Jala angka sisongon i do hamu deba najolo; alai nunga hamu diburi, nunga hamu diparbadiai jala dipintori marhitehite Goar ni Tuhan Jesus Kristus dohot marhitehite Tondi ni Debatanta. 6:12 Saluhutna do jadi di ahu, alai ndang saluhut marguna; saluhutna do jadi di ahu, alai ndang jadi patunduhon ni manang aha ahu. 6:13 Tu butuha i do angka sipanganon, jala butuha i do tu angka sipanganon; alai rap pasohoton ni Debata do angka i. Alai anggo daging i, unang ma tu parmainanon; tu Tuhan i ma, jala tu daging i do Tuhan i! 6:14 Alai dipahehe Debata do Tuhan i, laos paheheonna ma nang hita di hagogoonna i. 6:15 Ndang diboto hamu, ruas ni Kristus do pamatangmuna? Tung pangkeonku ma angka ruas ni Kristus i bahen ruas ni siula parmainanon? Dao ma i! 6:16 Ndang diboto hamu, naung gabe sada daging dohot boruboru na jahat, anggo sampur tusi; ai ninna do: "Na gabe sada daging do nasida na dua i." 6:17 Alai na padomu dirina dohot Tuhan i, gabe sada tondi do i dohot Ibana. 6:18 Maporus ma hamu pasiding parmainanon i! Nasa dosa na niula ni jolma, dibalian ni dagingna do; alai na marmainan, mardosa di dagingna sandiri do. 6:19 Ndang diboto hamu: Dagingmuna do joro ni Tondi Parbadia, na di bagasan hamu, naung jinalomuna sian Debata; ndada hamu nampuna dirimuna. 6:20 Ai arga do hamu ditobus: Dibahen i pasangap hamu ma Debata marhitehite dagingmuna dohot marhitehite tondimuna; ai Debata do nampuna i.
7:1 Alai taringot tu na sinurathonmuna, on ma alushu: Denggan do di baoa, unang manjama boruboru. 7:2 Alai laho pasidingkon parmainanon i, denggan ma ganup baoa mardongan saripe jala ganup boruboru marhamulian. 7:3 Diulahon baoa i ma na tama tu pardihutana, laos songon i parompuan i tu hamulianna. 7:4 Ndang guru di parompuan i pamatangna, guru di baoa i do; suang le: Ndang guru di baoa i dagingna, guru di na niolina do. 7:5 Holan sian dos ni rohamuna be jala martingki hamu masipadaoan, asa sadihari hamu martangiang; dung i masitopotan ma muse, asa unang diunjuni sibolis i hamu, binahen ni ramun ni rohamuna. 7:6 Alai hudok pe songon i, na mangkaehe do ahu, ndada na mandokkon. 7:7 Alai naeng ma nian, anggo di rohangku, saluhut halak songon ahu on; alai tahe, ganup ma hombar tu na niasinirohahon ni Debata tu ibana: On tu na sada, an tu na sada. 7:8 Alai on ma hatangku tu angka na so marnioli dohot tu angka boruboru naung mabalu: Denggan do nasida manongtong songon ahu on. 7:9 Alai molo so harajaan nasida dirina, mardongan saripe ma; ai dengganan do mardongan saripe sian na garang. 7:10 Alai anggo naung hot ripe, Tuhan i do mamaksa, ndada holan ahu: Na so tupa sirang boruboru i sian hamulianna. 7:11 Alai molo tung sirang, unang marhamulian be, tagonan ma domu muse dohot hamulianna hian; songon i baoa i, unang ma dipaulak dongan saripena. 7:12 Ahu, ndang apala Tuhan i, mandok tu angka na asing i: Molo so porsea (so Kristen) pardihuta ni sada dongan, unang ma dipaulak, anggo na lomo roha ni parompuan manginganhon ibana. 7:13 Jala molo so porsea (so Kristen) hamulian ni sada boruboru, unang ma ditadingkon, anggo na lomo roha ni baoa i manginganhon ibana. 7:14 Ai na gabe badia do baoa na so porsea i marhitehite pardihutana, jala gabe badia do boruboru na so porsea i marhitehite dongan i. Aut unang i, ramun ma anakkonmuna; alai badia do nasida. 7:15 Alai molo disirang na so porsea i dirina, sirang ma ibana tusi. Ndang apala marnihot baoa manang boruboru naung Kristen tu sisongon i; alai di bagasan dame dijou Debata hamu. 7:16 Ai aha ma diboto ho hian, ale inang, manang na tarpangolu ho baoa i; ho pe, amang aha ma diboto ho, manang na tarpangolu ho boruboru i? 7:17 Antong, ganup ma marpangalaho songon na sinagihon ni Tuhan i tu ibana, songon uju na dijou Debata ibana. Laos i do huaturhon di saluhut huria i. 7:18 Anggo naung tarsunat, di na tarjou ibana, unang ma dipauba; na so tarsunat di na tarjou i ibana, unang ma dipasunathon. 7:19 Ndang arga parsunaton, nang bangko hian; na mangaradoti patik ni Debata, i do! 7:20 Ia songon i ganup, di na tarjou i ibana, laos songon i ma ibana tongtong. 7:21 Anggo hatoban ho, di na tarjou i ho, unang holsohon i; tagonan ho mian disi, nang pe tarbahen ho malua. 7:22 Ai hatoban na tarjou marhitehite Tuhan i, anakmata di Tuhan i do i; songon i anakmata na tarjou i, hatoban ni Kristus do i. 7:23 Arga do hamu ditobus; unang ma olo hamu parhatobanon ni jolma! 7:24 Ia i ganup, di na tarjou i ibana, ale angka dongan, laos i ma ibana tongtong maradophon Debata. 7:25 Alai anggo taringot tu angka na marbaju, ndang adong nian hujalo patik ni Tuhan i; alai pingkiranku ma hulehon, songon halak na tau haposan, ala na niasian ni Tuhan i ahu. 7:26 On do pingkiranku: Ala tingki hasusaan nuaeng, denggan ma songon i halak. 7:27 Anggo naung tarihot ho tu boruboru, unang lului haluaon; anggo malua ho sian parjolmaon, unang lului boruboru. 7:28 Alai laho mangoli ho, ndang mardosa ho disi; jala molo marhamulian na marbaju i, ndang mardosa ibana disi; alai marniae di daging do nasida. Alai naeng huolani do hamu nian. 7:29 Alai on ma hudok, ale angka dongan: Gogot nama tingkina. Songon on ma tu joloan on: Songon na so marjolma ma angka naung marjolma i. 7:30 Jala songon na so tangis ma angka na tumatangis i. Jala songon na so marlas ni roha ma angka na marlas ni roha i: Jala angka na manuhor, songon na so umpeopsa. 7:31 Jala angka na marhaseangkon portibi on, songon na so marhaseangkonsa situtu, ai na mamolus do rumang ni portibi on. 7:32 Alai naeng ma di rohangku, unang marholso ni roha hamu. Disarihon na so marripe i do na ringkot di Tuhan i, asa dihalomohon Tuhan i ibana. 7:33 Na marripe i sumarihon angka na di tano on, naeng halomoan ni boruboru i, jala mardua roha do ibana. 7:34 Nang boruboru na so marhamulian, nang na marbaju, na ringkot di Tuhan i do disarihon, asa badia dagingna nang tondina; alai naung marbagas i sumarihon angka na di tano on, naeng halomoan ni hamulianna. 7:35 Alai hudok pe songon i, laho mambahen na hasea di hamu do, ndada manjailhon tali rambang tu hamu; alai asa marruhut na ture hamu jala manongtong di Tuhan i, so hariboriboan. 7:36 Alai molo na hurang tama di rohana, pasombuonna songon i boruna na marbaju, anggo naung tangastangasan, ingkon tulus nama marhamulian, dipasaut ma lomo ni rohana, ndang mardosa ibana disi: Marbagas ma nasida. 7:37 Alai anggo naung gomos rohana jala ndang tarsosak, jadi guru dokna rohana, gabe dipaputus di bagasan rohana, mandok ramotanna nama boruna na marbaju i; denggan do na binahenna i. 7:38 Asa denggan do pambahen ni na pamuli boruna na marbaju; alai dengganan do pambahen ni na so pamulihonsa. 7:39 Na tarihot do boruboru na marripe, saleleng mangolu hamulianna; alai ia dung monding baoa i, marhaluaon ma nasida muli tu halomoan ni rohana; asal ma marhitehite Tuhan i! 7:40 Alai sonangan do nasida, anggo di rohangku, molo songon i nama nasida; jala didok rohangku, adong do nang di ahu Tondi ni Debata.
8:1 Alai anggo taringot tu juhut naung pinelehon taboto be; naung adong do parbinotoan di hita saluhutna. Na paburnangkon do parbinotoan; alai na pauliulihon do ia holong ni roha. 8:2 Na mangarimpu, naung adong binotona, ndang diboto dope pangalaho ni parbinotoan na tama. 8:3 Alai anggo adong na mangkaholongi Debata, i do na tinanda ni Debata. 8:4 Onpe, taringot tu na manganhon juhut naung pinelehon taboto do: Ndang tutu adong begu di portibi on, jala ndang adong Debata dungkon ni Nasasada i. 8:5 Ai adong do tutu digoar debata di ginjang nang di tano on pe, ai lan do dipardebata jala lan do dipartuhan. 8:6 Alai anggo di hita holan sada do Debata, Ama i, parmulaan ni saluhut, jala hita do tu Ibana; jala sada do Tuhan, i ma Jesus Kristus, parhitean ni saluhutna, jala hita marhitehite Ibana. 8:7 Alai ndang apala saluhutna nampuna parbinotoan i. Adong dope na manganhonsa songon pelean situtu, ala somal diparhatutu begu, gabe ramun rohanasida, na hurang togu i. 8:8 Alai ndang dipajonok sipanganon hita tu Debata: Ndang na surut hita, anggo so tapangan, jala ndang ummangat hita, nang tapangan. 8:9 Alai jaga ma hamu, so tung gabe partuktuhan di angka na gale i huasomuna. 8:10 Ai adong ma na marnida ho, nampuna parbinotoan ondeng, hundul marsipanganon di parsombaonan ni begu: Nda niapoan ma disi rohana na hurang togu i, manganhon juhut na pinelehon? 8:11 Gabe mago maon binahen ni parbinotoanmi dongan, na gale i dope na hinophop ni hamamate ni Kristus! 8:12 Alai molo songon i hamu mardosa dompak angka dongan jala digugai hamu rohanasida na hurang togu i, na dompak Kristus do hamu mardosa disi. 8:13 Dibahen i, antong, anggo targasip donganki siala sipanganon, na so tupa be panganonku juhut salelengna i, asa unang targasip donganki hubahen.
9:1 Nda anak mata do ahu? Nda apostel ahu? Nda nunga huida Jesus, Tuhanta i? Nda hamu ulaonku di bagasan Tuhan i? 9:2 Molo so apostel ahu di na leban, sandok apostel do ahu anggo di hamu; ai hamu do sahap ni haapostelonki di bagasan Tuhan i! 9:3 On do paralusonku tu angka na ro manangkasi ahu: 9:4 Na so marhuaso do hami mangan dohot minum? 9:5 Nda marhuaso hami mardongan saripe jala mamboan nasida, songon binahen ni angka apostel na asing dohot angka anggi ni Tuhan i, nang si Kepas pe? 9:6 Ai holan ahu dohot si Barnabas do, na so jadi malua sian na mulaulaon i? 9:7 Tung ise ma dung disuru soldadu, so margaji? Tung ise ma pauli porlak anggur, so dipangan sian parbuena? Ise ma marmahan dorbia, so manganhon susu ni pinarmahanna? 9:8 Ai hasomalan ni jolma do na hutaringoti disi; nda laos i didok patik i? 9:9 Ai na tarsurat do di patik ni si Musa: "Ndang patut huntamonmu baba ni horbo, uju mardege!" Horbo do pinasarisari ni Debata? 9:10 Nda sandok tu hita hatana? Ai sumarihon hita do tarsurat: Patut mangkirim paninggala di na maninggala i, jala mangkirim pardege di jambarna. 9:11 Molo husuan hami tu hamu angka partondion, tung godang ma i goaron, molo hugotil hami sian hamu na hasea tu daging? 9:12 Gari na leban, gari martohap di gogomuna, nda lam hami ma nian! Alai ndang na hupangasahon hami huaso i, sandok hupatalu hami do rohanami, asa tung unang huambat hami barita na uli na sian Kristus. 9:13 Nda diboto hamu, angka na mangula di bagas joro mangan sian joro i, jala angka na marhalado di langgatan i, marsaulihon sian i? 9:14 Laos songon i do diaturhon Tuhan i tu angka parbarita na uli: Naeng sian barita i hangoluannasida. 9:15 Alai ndang dung hupangke sada sian angka i; jala ndada husurathon on, asa masa songon i tu ahu, ai tagonan do ahu mate, asal unang disegai hasurunganki. 9:16 Ai molo huhatahon barita na uli i, ndang hasurunganku i; utangku hian do i. Marjea do ahu, aut so hubaritahon i! 9:17 Ai molo huula i sian lomo ni rohangku, marupa ma ahu; alai nang sian na so tarjua, tong do diampehon tu ahu tohonan i. 9:18 Asa aha do upangku? On do: Di na mamaritahon barita na uli i ahu, so hurugii hamu, asa unang hupangasahon huasongku di barita na uli i. 9:19 Ai atik pe malua ahu sian saluhutna i, hupatutoru do diringku tutoru ni saluhutna, asa tumorop nasida hutogihon. 9:20 Na gabe songon Jahudi do ahu di angka Jahudi, anggiat hutogihon angka Jahudi. Di angka na ginomgoman ni patik i gabe songon na ginomgoman ni patik i ahu: Nang so tutu ginomgoman ni patik i ahu, anggiat hutogihon angka na ginomgoman ni patik i. 9:21 Asa hutogihon angka na so marpatik, gabe songon na so marpatik ahu di angka na so marpatik i; alai ndada so marpatik ahu di jolo ni Debata, tung ginomgoman ni patik ni Kristus i do ahu. 9:22 Di angka na gale gabe songon na gale do ahu, asa hutogihon angka na gale i. Hupahombar do diringku tu sasude, anggiat hupalua nanggo deba. 9:23 Alai saluhutna i huula ala barita na uli, anggiat dohot ahu partohap disi. 9:24 Nda diboto hamu: Ia angka na maradu, saluhutna i do nian marlojong; alai sada do manjalo uli. Burju ma hamu marlojong, asa dapotan hamu! 9:25 Alai nasa na maradu, diorom do saluhutna i; angka ondeng tutu, asa dijalo tumpal na laho salpu, alai di hita na so olo salpu. 9:26 Ia ahu, antong, ndada songon na so martujuan parlojongonku, nda tung songon na manampul alogo paraloonku. 9:27 Hupukpuhi do dagingku jala hupatunduk, asa unang angka na asing hujamitai, hape ahu gabe bolong.
10:1 Ai naeng ma tangkas botoonmuna di rohangku, ale angka dongan: Ia angka amanta najolo, saluhut do nian nilinggoman ni ombun i, jala saluhut do nasida mamostang laut i. 10:2 Jadi saluhut do nasida tardidi tubagasan si Musa, di bagasan ombun i dohot di laut i. 10:3 Jala sada do sipanganon partondion dipangan nasida saluhutna. 10:4 Laos sada do siinumon partondion diinum nasida saluhutna, ai diinum nasida do sian dolok batu partondion na mangihut i (Kristus do dolok batu i). 10:5 Alai toropan do nasida ndang dihalomohon Debata: Ai rage do nasida di halongonan i. 10:6 Alai gabe tudosan panjoraan ma i tu hita, asa unang tahahisaphon na roa, songon nasida na marhisap i. 10:7 Jala unang ma sioloi debata na leban hamu, songon na deba sian nasida, suman tu na tarsurat i: "Hundul do bangso i mangan dohot minum, dung i hehe ma nasida manortor." 10:8 Unang ma hita marmainan, songon na deba sian nasida na marmainan i, gabe mate satongkin duapulutolu ribu di na sadari i. 10:9 Unang taunjuni Tuhan i, songon deba sian nasida na mangunjuni i, gabe angka ulok i mangagohon nasida. 10:10 Unang ma hamu marungutungut, songon deba nasida na marungutungut i, gabe diago pangago i nasida. 10:11 Tudutudu do i na mangonai tu nasida; lumbalumba tu hita do i, umbahen na tarsurat, ai tu hita do jumonok ajal ni angka ari. 10:12 Onpe, ganup na jongjong di rohana, dimatahon ma, unang tinggang! 10:13 Holan pangunjunan na patut di jolma do naung mangonai tu hamu. Haposan do Debata, ndang loasonna hamu unjunan lobi sian gogomuna; Ibana na parohon pangunjunan i, laos Ibana do mambahen hapateanna, asa tartaon hamu. 10:14 Dibahen i, ale angka haholongan, maporus ma hamu pasiding parsombaon tu angka begu! 10:15 Tu angka parroha do hatangku. Hamu ma manimbangi na hudok. 10:16 Siinumon pasupasu i, na tahamauliatehon, nda parsaoran ni mudar ni Kristus do i? Roti na taponggoli i, nda parsaoran ni daging ni Kristus do i? 10:17 Ala sada do roti i, gabe sadaging do hita torop, ai saluhut do hita partohap di roti na sasada i. 10:18 Bereng hamu ma Israel hian: Nda partohap di langgatan i do angka na manganhon pelean i? 10:19 Naung arga do juhut na pinelehon manang margogo do begu; i do na hudok disi? 10:20 Nda on do tahe: Na pinelehonnasida, ndada tu Debata dipelehon, tu begu i do. Alai ndang lomo rohangku, hamu saor tu angka begu! 10:21 Ndang tarinum hamu sian panginuman ni Tuhan i huhut sian panginuman ni angka begu! Ndang tarbahen hamu partohap di langgatan ni Tuhan i huhut di langgatan ni angka begu! 10:22 Toisanta ma Tuhan i? Tung gumogo ma hita sian Ibana? 10:23 Saluhutna jadi do, alai ndang saluhut marguna; saluhutna jadi do, alai ndang saluhut patoguhon. 10:24 Unang ma masiringkoti na di ibana, na di dongan i ma! 10:25 Pangan hamu ma sian saluhut na ginadis di parjagalan i, unang nirisihan, ala ni panggora ni roha i! 10:26 Ai: "Gok di Tuhan i do tano on ro di isina!" 10:27 Anggo dipio na so porsea (na so Kristen) hamu jala dioloi hamu laho, pangan hamu ma sian saluhut na pinatedekna tu jolomuna; unang nirisihan, ala ni panggora ni roha i! 10:28 Alai molo tung adong na mandok tu hamu: Juhut na pinelehon do on; unang pangan hamu sian i, ala ni halak i na paboahonsa dohot ala ni panggora ni roha i! 10:29 Alai ndada panggora ni roha na di ho na hudok disi, na di dongan i do; ai tung hahuaon ni panggora ni roha ni halak ma ahu, naung marhaluaon i! 10:30 Ai molo mauliate rohangku manjangkonsa, aha ma pola insahan ahu, ala ni naung huhamauliatehon i! 10:31 Onpe, na mangan manang na minum hamu, manang dia pe diula hamu: Bahen hamu ma saluhutna i, pasangaphon Debata! 10:32 Unang bahen hamu partuktuhan di Jahudi, manang di halak Junani, manang di huria ni Debata pe! 10:33 Songon ahu on: Hubuat do roha ni saluhut di na sasude, ai ndang hulului na marguna di ahu, na marguna di na torop i do, anggiat malua nasida.
11:1 Tiru hamu ma ahu, songon ahu na maniru Kristus! 11:2 Alai hupuji do hamu, ala sandok diingot hamu ahu jala hot ditiop hamu aturan, songon na hupasahat i tu hamu. 11:3 Alai naeng ma botoonmuna di rohangku: Kristus i do ulu ni ganup baoa, baoa i do ulu ni boruboru; alai Debata do ulu ni Kristus i. 11:4 Nasa baoa, na martahuluk laho martangiang manang manurirangi, mangaleai uluna. 11:5 Alai ganup boruboru, na martangiang manang manurirangi, so dihungkupi uluna, dileai do uluna, ai tudoshon na jinambak do nasida. 11:6 Ai molo so dihungkupi boruboru i uluna, atena ma digustingi! Alai molo na hansas di boruboru ginustingan manang jinambak, dihungkupi ma antong! 11:7 Anggo baoa, ndang pola dihungkupi uluna, ai sumansuman dohot hasangapon ni Debata do ibana. Alai boruboru i, hasangapon ni baoana do. 11:8 Ndada sian boruboru baoa i; sian baoa do boruboru i. 11:9 Jala ndada ala boruboru i tartompa baoa i, boruboru i do ala ni baoa. 11:10 Ala ni i, patut marsahala do boruboru i diatas uluna, ala ni angka surusuruan i. 11:11 Asal ma di bagasan Tuhan i nasida, ndada boruboru i sopadohot baoa i, songon i nang baoa i sopadohot boruboru i. 11:12 Ai marharoroan boruboru i sian baoa, laos songon i do baoa sian boruboru i; alai sian Debata do saluhutna i. 11:13 Timbang hamu ma di hamu, manang na tama boruboru martangiang tu Debata, so dihungkupi uluna. 11:14 Nda nang bangko hian mamodahon tu hamu, hurang tama di baoa marobuk ganjang? 11:15 Nda hasangapon i di boruboru, marobuk na ganjang; ai obuk na ganjang i do dilehon tu nasida bahen pangkuphupi. 11:16 Alai molo adong na giot marbada di rohana, ndang i adat di hami, nang di angka huria ni Debata pe. 11:17 Alai laho mangudut na mangatur, adong do na so huhalashon: Ndang mangkorhon tu na denggan parpunguanmuna; tu na roa do! 11:18 Parjolo hubege, jala huparhatutu i deba: Marbolatbolat hamu jumpa marpungu. 11:19 Ndang tarbahen so adong di tongatongamuna parbolatan, asa tandap parroha na tau na di hamu. 11:20 Jala molo marpungu hamu, ndada na tutu songon na manganhon parpadanan ni Tuhan i hamu. 11:21 Ai di na mangan hamu, marsisoro sipanganonna be, gabe male na sada, mabuhan na sada. 11:22 Na so adong do jabumuna, asa disi hamu mangan jala minum? Na hu do rohamuna di huria ni Debata, jadi dipaila hamu angka parhahurangan? Aha ma dohononku? Pujionku do hamu? Ndang hupuji hamu disi. 11:23 Ai sian Tuhan i do hujalo jala hupasahat tu hamu: Ia Tuhan Jesus i, di borngin i, uju tarjehe Ibana, dibuat do roti. 11:24 Didok ma mauliate, diponggoli ma, laos didok ma: Dagingku do on, na humongkop hamu. Ula hamu ma i, bahen parningotan di Ahu! 11:25 Laos songon i ma nang panginuman i, dung salpu na mangan i; ia hatana: Padan na imbaru i ma on di bagasan mudarhu. Ula hamu ma songon i, bahen parningotan di Ahu, ganup diinum hamu i! 11:26 Ai ganup dipangan hamu roti na songon on jala diinum hamu sian panginuman on, hamamate ni Tuhan i do binaritahonmuna disi, rasirasa ro Ibana. 11:27 Asa molo adong na manganhon roti i jala minum sian panginuman ni Tuhan i sian na so tau, parsala do i di daging dohot di mudar ni Tuhan i. 11:28 Alai ditangkasi jolma i ma dirina; dung pe i, asa dipangan sian roti i jala diinum sian panginuman i. 11:29 Ai molo so dipandang daging i, tong do dipangan jala diinum, i do mangalap uhum tu dirina marhite sian na mangan dohot na minum i. 11:30 Ala ni i do umbahen torop na gale jala na marsahit di hamu, jala na nia naung modom. 11:31 Alai molo tauhumi dirinta, ndang siuhumon hita. 11:32 Alai hona ajar do hita angka na niuhuman ni Tuhan i, asa unang hona uhum hamagoan hita rap dohot portibi on. 11:33 Dibahen i, ale angka donganku: Masipaimaan ma hamu, anggo marpungu hamu, laho mangan! 11:34 Molo adong na male, di jabuna ma ibana mangan, unang gabe uhum parpunguanmuna. Dung pe ro ahu, asa huatur angka na asing i.
12:1 Alai dipangido rohangku, ale angka dongan, naeng ma torang botoonmuna taringot tu angka partondion. 12:2 Ai diboto hamu do, naung hira ditogu jala disarat do hamu tu angka ganaganaan na mangungu, uju sipelebegu hamu. 12:3 Dibahen i hupabotohon ma tu hamu: Ndang tarbahen halak, na mangkatai marhitehite Tondi ni Debata, mamburai Jesus; jala holan marhitehite Tondi Parbadia do targoar Jesus, Tuhan. 12:4 Ragam do parasirohaon i; alai sada do Tondi. 12:5 Ragam do ulaon (di huria); alai sada do Tuhan. 12:6 Ragam do hagogoon; alai sada do Debata na mangkorhonsa di bagasan sasudena i. 12:7 Alai laho manumpak do dibasabasahon jala dipataridahon Tondi i tu ganup. 12:8 Ai tu na sada on dilehon do marhitehite Tondi i hata habisuhon; alai tu na sada an hata parbinotoan marhitehite Tondi na sasada i. 12:9 Tu na asing muse haporseaon di bagasan Tondi na sasada i, tu na asing huaso pamalumhon di bagasan Tondi na sasada i. 12:10 Tu na asing gogo patupahon halongangan, tu na asing panurirangon, tu na asing na mananda ragam ni tondi, tu na asing muse mangkatahon di hata na leban, tu na asing pajojorhon parhataan i. 12:11 Alai saluhutna i dipatupa Tondi na sasada i, ai asingasing be disagihon i tu ganup, guru lomo ni rohana. 12:12 Umpamana: Hibul do daging i, alai torop do anggo ruasna, jala ruas na torop i manjadihon daging na sasada i; songon i do Kristus. 12:13 Ai Tondi na sasada i do dipandidihon tu hita saluhutna, gabe sada daging, nang Jahudi, nang Junani, nang hatoban, nang anak mata; jala tu saluhut hita dipainumhon Tondi na sasada i. 12:14 Ai daging i pe, ndang na sada ruasna, tung torop do. 12:15 Tung sura ninna pat: Dibahen na so tangan ahu, ndang masuk daging ahu; tung na so masuk daging ma i ala ni i! 12:16 Jala aut sura ninna pinggol i: Ala so mata ahu, ndang masuk daging ahu; tung na so masuk daging ma i ala ni i! 12:17 Aut mata sandok daging i, didia ma parbinegean? Aut pinggol sandok daging i, didia ma parnianggoan? 12:18 Alai diaturhon Debata do inganan ni ganup ruas di daging i, marguru tu lomo ni rohana. 12:19 Alai aut sura saruas i sude, beha ma daging i? 12:20 Alai nang pe torop angka ruas i, sada do daging i. 12:21 Alai ndang tardok mata tu tangan: Ndang tu dihangku ho! Nang ulu mandok pat: Ndang tu dihangku hamu! 12:22 Muba do tahe ringkot ni ruas ni daging i, angka na songon na humurang idaon. 12:23 Jala balik sumangap tabahen ruas ni dagingta, angka na lumea di rohanta, jala tumangkas tasarihon angka na haduk hian. 12:24 Ndang pola ringkot i tu angka ruas na sangap hian. Alai dipatomu Debata do pamatang i, jala sumangap, dibahen ruas na lea hian, 12:25 asa unang marsalisi daging i, sama dirina, asa denggan masipasarisarian ruas sama ruas. 12:26 Ia mangae sada ruas, rap mangae ma saluhut ruas i; jala ia sangap dibahen sada ruas, rap marlas ni roha ma saluhut ruas i. 12:27 Alai daging ni Kristus do hamu, jala ruas hamu sama hamu. 12:28 Jala dipabangkit Debata di bagasan, huria i parjolo angka apostel, paduahon angka panurirang, patoluhon angka pangajari, dung i dibasabasahon angka hagogoon, angka silehonlehon pamalumhon, ro di pangurupion, panggomgomion dohot parhataan na leban. 12:29 Tung apostel ma nasida saluhutna, manang panurirang nasida saluhutna, manang pangajari saluhutna? Tung saluhut ma nasida parhagogoon? 12:30 Tung saluhut ma nasida margogo pamalumhon? Tung saluhut ma nasida mangkatahon di hata na asing? Tung saluhut ma nasida malo pajojorhon? 12:31 Lului hamu ma angka silehonlehon na ummangat! Jala dungkon ni i, patuduhononku dope tu hamu dalan na sumurung situtu.
13:1 Tung sura huhatahon angka parhataan ni jolma nang surusuruan pe, anggo so parholong ni roha ahu, naung songon hangsa do ahu na mangkulingkuling jala songon ogung na maruolol. 13:2 Jala tung sura panurirangon di ahu, gabe huboto hasimoon sasudena ro di sandok parbinotoan, jala tung sura parhaporseaon situtu ahu, pola tarpaunsat ahu dolok, doshon na soada ma ahu, anggo so parholong ni roha ahu. 13:3 Jala tung sura hubasabasahon saluhut artangku jala hupasahat dagingku, asa ditutung, tung na so marguna i di ahu, anggo so parholong ni roha ahu. 13:4 Na lambas do haholongon i jala na sorta, ndang na mangiburu haholongon i, ndang tenga jala ndang dipaburnangburnang dirina. 13:5 Maradat situtu do haholongon i, ndang na ahut, ndang olo pangarimason, ndang dipajujurjujur na jahat. 13:6 Ndang las rohana mida hageduhon; alai tongtong do dihalashon hasintongan i. 13:7 Saluhut do ditanom rohana, saluhut do dihaporseai, dihirimi jala ditaon. 13:8 Ndang na olo salpu haholongon i. Ia panurirangon pasohotonna do, mansadi do nang angka parhataan, parbinotoan pe mansohot do. 13:9 Mardebadeba do parbinotoanta, jala mardebadeba do panurirangonta. 13:10 Dung pe ro na sun denggan i, asa pasohotonna na mardebadeba i. 13:11 Saleleng dakdanak ahu, danak pangkataionku, danak parrohaonku danak pingkiranku; alai disi tang ahu, hubolongkon pangalaho na danak. 13:12 Anggo nuaeng, semo do parnidaanta songon sian sorminan; alai sogot adop bohi be ma. Mardebadeba do parbinotoanku anggo nuaeng dope; alai anggo disi, torus ma panandaonku, songon naung tinandana ahu. 13:13 Asa tolu do na hot: I ma haporseaon, pangkirimon dohot haholongon; alai haholongon do na umbalga i.
14:1 Eahi hamu ma haholongon i! Ringkoti hamu ma angka partondion; alai na rumingkot, i ma na manurirangi! 14:2 Ai na marhata na leban ndada dongan jolma dipanghulingi, Debata do; ai ndang dapot antusan i, hahomion do dihatahon di bagasan tondina i. 14:3 Alai na manurirangi i, jolma do dipanghulingi, laho pauliulihon, mangapoi jala mangapuli. 14:4 Na pauliulihon dirina do na marhata na leban, alai huria i do dipauliuli na manurirangi. 14:5 Las do rohangku nian, anggo saluhut hamu marhata na leban; alai ummarga, do na manurirangi, ai sumurung do na manurirangi asa na marhata na leban, anggo so laos dipajojor, laho pauliulihon huria i. 14:6 Asa, ale angka dongan, molo tung ro ahu manopot hamu jala holan marhata na leban ahu, aha ma guna ni i di hamu, anggo so huhut huhatahon tu hamu pangungkapon manang parbinotoan manang panurirangon dohot poda. 14:7 Umpamana: Uninguningan, angka na marsoara, nang so mangolu, songon tulila manang hasapi; anggo samak soarana, songon dia ma dapot botoon, na tinulilahon manang na hinasapihon? 14:8 Songon sarune rupani; anggo so tangkas soarana, tung adong ma na marhobas tu tongtangan? 14:9 Songon i ma hamu di parhataan i: Anggo so tangkas parhataanmuna, songon dia ma dapot antusan na hinatahon? Nda songon alogo mamolus nama i! 14:10 Torop do antong ragam ni parhataan di portibi on, angka na masiboan laguna be. 14:11 Anggo so huboto astuan ni hata i, hira so dongan jolma ma ahu di roha ni na mangkatai i; ibana pe, songon na so dongan jolma ma di rohangku. 14:12 Songon i ma di hamu: Sapala diringkoti hamu partondion, lului hamu ma na tau pauliulihon huria i, asa adong hasurunganmuna. 14:13 Dibahen i, martangiang ma parhata na leban i, anggiat tarpajojorsa. 14:14 Ai jumpa martangiang ahu di hata na leban, tondingku do tutu martangiang; alai so do anggo rohangku. 14:15 Beha nama? Martangiang ma ahu di bagasan tondingku; alai naeng martangiang do ahu huhut di bagasan rohangku. Marende ma ahu di bagasan tondingku; alai naeng marende do ahu huhut di bagasan rohangku. 14:16 Ai molo dipuji ho Debata di bagasan tondim, tung tarbahen ma dongan, na hundul di inganan ni natorop i, mandok "amen" di hata hamauliateonmi, anggo so diantusi na hinatahonmu! 14:17 Ture do nian hamauliateonmi; alai ndang na pauliulihon i di angka dongan. 14:18 Mauliate do rohangku tu Debata, ala na ummalo ahu marhata na leban sian hamu sudena. 14:19 Alai anggo di huria i ahu, lasan do rohangku mangkatahon lima hata na marastuan, unang saloksa hata na leban, asa hupodai nang angka na asing. 14:20 Unang ma dakdanak hamu, ale angka dongan, anggo di parrohaon; dakdanak ma hamu taringot tu na roa, alai matoras ma hamu marparrohaon! 14:21 Tarsurat do di patik i: "Mangkatai ma ahu tu bangso on marhitehite parhata na leban jala marhite sian parsoara na asing; jala songon i pe i, tong so tangihononnasida Ahu, ninna Tuhan i!" 14:22 Asa tanda do angka parhataan na leban: Ndada di angka na porsea, di angka na so porsea i do; alai anggo panurirangon i, ndada di angka na so porsea, di angka naung porsea i do. 14:23 Asa molo pungu sandok huria i jala sude marhata na leban, gabe bongot ma angka na so mangantusisa manang na so porsea, nda dohononnasida ma: Angka na ngongar hamu? 14:24 Alai tung sura sude manurirangi, gabe ro na so porsea manang na so mangarti, nda dapotan poda ma ibana sian sasude, nda ajaran ni saluhutna i ma ibana? 14:25 Gabe patar ma sihabunian ni rohana, jadi manungkap ma ibana marsomba tu Debata, jala marhatutuhon, naung tutu do Debata di tongatongamuna. 14:26 Asa beha do, ale angka dongan? Jumpa marpungu hamu, adong do di na sada endeende, di na sada poda, di na sada pangungkapon, di na sada parhataan na leban, di na sada hatoranganna; sasudena i, laho pauliulihon huria i ma nian! 14:27 Laho mangkatahon di hata na leban, sae ma dua manang intap tolu, jala sadasada ma; jadi sahalak ma pajojorhonsa! 14:28 Alai molo so adong na pajojorhon, mangkohom ma ibana anggo di jolo ni huria i; tu dirina dohot tu Debata ma i dihatahon! 14:29 Anggo panurirang, lehet ma dua manang tolu marsoara, angka dongan i ma manimbangi. 14:30 Alai molo dapotan pangungkapon sahalak na hundul disi, so ma anggo na parjolo i! 14:31 Ai na jadi do hamu saluhutna manurirangi sadasada, asa saluhut dapotan poda dohot sipaingot. 14:32 Ai pangoloi do angka tondi ni panurirang di angka panurirang i. 14:33 Ai ndang dihalomohon Debata na gaor, dame i do! Songon na di saluhut huria ni angka na badia i, 14:34 hohom ma angka parompuan di parpunguanmuna, ai ndang patut mandok hata nasida; pangoloi ma antong, songon nidok ni patik i! 14:35 Alai molo adong sitangkasannasida, sinondukna be ma disungkun di jabu; ai subang do di boruboru, anggo tung mandok hata di jolo ni huria i. 14:36 Ai mamungka sian hamu do rarat hata ni Debata, manang holan tu hamu do i sahat? 14:37 Ganup na mandok, panurirang manang partondi ibana, diboto ma antong: Tona ni Tuhan i do naung husurathon on. 14:38 Alai molo so mananda ibana, rohana ma disi! 14:39 Onpe, ale angka donganku, ringkoti hamu ma na manurirangi, jala unang orai hamu na mangkatahon di hata na leban! 14:40 Asal sasudena i marruhut na denggan jala maratur!
15:1 Alai naeng ma pabotohononku tu hamu, angka dongan, barita na uli, na hubaritahon tu hamu, na jinalomuna naung gabe hajongjongan muna. 15:2 Laos i do parhiteanmuna gabe malua, namun ditiop hamu hata na binaritahon tu hamu; ia na so sandok magopo hamu porsea. 15:3 Ai sian mulana hupasahat tu hamu na hujalo; on do: Naung mate do Kristus ala ni dosanta, hombar tu na tarsurat i. 15:4 Naung tartanom do Ibana, gabe dipahehe di ari patoluhon, hombar tu na tarsurat i. 15:5 Jadi dipataridahon do dirina tu si Kepas, dung i tu na sampuludua i. 15:6 Dung i dipataridahon dirina sahali tu lobi lima ratus dongan; na tumorop sian angka i mangolu dope, deba do naung monding. 15:7 Dung i dipataridahon dirina tu si Jakobus, dung i tu angka apostel i sudena. 15:8 Alai dipudi ni saluhutna i, dipataridahon do Ibana nang tu ahu, na tardok tubu di na so tingkina. 15:9 Ai ahu do na ummetmet sian angka apostel; na so tama do ahu nian goaron apostel, ala naung hulele huria ni Debata. 15:10 Alai na di ahu nuaeng, sian asi ni roha ni Debata do, umbahen na dapot; jala ndang na magopo asi ni rohana na tu ahu i, ai gumodang do na huulahon sian nasida saluhutna; alai ndada ahu tahe, asi ni roha ni Debata na tu ahu, i do! 15:11 Antong, manang ahu pe manang nasida, songon i do parjamitaonnami, jala songon i do gabe porsea hamu. 15:12 Marhua ma dohonon ni na deba sian tongatongamuna, na so adong haheheon ni angka naung mate, dung sanga binaritahon taringot tu Kristus, paboa naung dipahehe Ibana sian na mate! 15:13 Alai anggo so adong haheheon ni angka na mate, ndang na hehe nang Kristus. 15:14 Ai anggo so hehe Kristus sian angka na mate, rumar ma jamitanami, laos rumar ma nang haporseaonmuna. 15:15 Tardapot ma nang hami ala pargapgap di Debata, ala maralohon Debata huhatindangkon hami, naung dipahehe Kristus i, hape ndang dipahehe, anggo sandok so mulak mangolu angka na mate. 15:16 Ai anggo so dipahehe angka na mate, ndang tutu hehe nang Kristus i. 15:17 Alai anggo so dipahehe Kristus i, magopo ma haporseaonmuna, jala tong dope hamu di bagasan dosamuna, 15:18 gabe mago ma nang angka naung monding marhitehite Kristus. 15:19 Anggo holan di tano on hita mangkirim di Kristus i, jolma na dumangol do hita sian saluhutna. 15:20 Alai nunga hehe Kristus i sian na mate, Ibana do parjolo ni angka na monding i. 15:21 Ai songon marhite sian sada jolma songgop hamatean, songon i do marhite sian sada Jolma haheheon ni angka naung mate. 15:22 Ai songon na di bagasan Adam saluhut mate, songon i di bagasan Kristus sude dipangolu. 15:23 Alai ganup ma mangihuthon parjojorna: Parjolo i Kristus, dung i angka na di Kristus i, di harorona i. 15:24 Dung i ujungna; disi ma pasahatonna harajaon i tu Debata Ama, dung jolo dipasohot nasa panggomgomion, hahuasoon dohot hagogoon. 15:25 Ai ingkon mangarajai Ibana, rasirasa dipatunduk saluhut musu i tutoru ni patna. 15:26 Hamatean i do musu na parpudi sipasohotonna i. 15:27 Ai saluhutna do dipatunduk tutoru ni patna. Alai molo saluhut dipatunduk didok, tandap ma disi, na so dohot na patundukkon saluhutna tu Ibana. 15:28 Alai dung tunduk saluhutna i tu Ibana, disi ma dohot Anak i sandiri unduk tu na patundukkon saluhut tu Ibana, asa Debata gabe saluhut di bagasan saluhut. 15:29 Angkup ni i: Aha do na niula ni angka na padidihon dirina humongkop angka na mate? Ai molo sandok so hehe angka na mate, aha padidihononna dirina humongkop angka i! 15:30 Hami pe, aha pola taononnami mora ganup tongkin? 15:31 Songon na mate do ahu ganup ari, songon sintongna hamu, angka dongan, gabe barita sipujion di ahu di bagasan Kristus Jesus, Tuhanta i. 15:32 Ai anggo holan ala ni jolma hurangguthon di huta Epesus angka binatang, aha ma guna ni i di ahu? Anggo so hehe angka na mate: Ba mangan minum ma hita, ai mate do hita marsogot. 15:33 Unang hamu lilu! Mago do adat na denggan anggo hinombar na roa! 15:34 Patut ma hamu tarjolma unang mardosa; ai adong do deba, na so tumanda Debata. Laho pailahon hamu do hudok i. 15:35 Alai dohonon ni na deba ma: Songon dia ma hehe angka naung mate i? Dia ma daging ni nasida na ro i? 15:36 E, ho na loahon! Apala na olo mangolu na sinaburhonmi, anggo so na mate! 15:37 Jala jumpa manabur ho, ndada badan ni na naeng ro i disaburhon ho; batuna sambing do, manang na asing pe. 15:38 Alai Debata do mangalehon badan, guru lomo ni rohana; jala asing be do badan tu ganup boni. 15:39 Ndada sarupa nasa ragam ni sibuk i; ai asing do na di jolma, asing sibuk ni pinahan, asing sibuk ni pidong, asing na di dengke. 15:40 Adong do badan parbanua ginjang, jala adong do badan parbanua tonga on; alai asing do sangap ni na di ginjang, asing do na sian tano on. 15:41 Asing do sondang ni mata ni ari, jala asing do sondang ni bulan i; asing muse sondang ni angka bintang, ai marsisurungi do angka bintang marsinondang. 15:42 Songon i do nang di haheheon ni angka naung mate: Tarsabur do di habusukon; alai dipahehe do di hatongtongon. 15:43 Tarsabur do di haleaon; alai dipahehe do di hasangapon. Tarsabur do di hagaleon; alai dipahehe do di hagogoon. 15:44 Na tarsabur do badan parhosa; alai dipahehe do badan partondi. Anggo adong do badan parhosa, adong ma nang badan partondi. 15:45 Hombar tu na tarsurat i: "Gabe hosa na mangolu do jolma na parjolo, si Adam i"; alai Tondi na pangoluhon do anggo Adam na parpudi i! 15:46 Alai ndada badan partondi i na parjolo, parhosa i do; dung i pe, asa partondi i! 15:47 Na sian tano do jolma na parjolo i jala marpangalaho tano on; sian banua ginjang do Jolma na paduahon i. 15:48 Mangihuthon pangalaho ni na sian tano on do angka na di tano on; jala mangihuthon pangalaho ni na sian ginjang i do angka na di ginjang i. 15:49 Jala songon naung tauloshon rumang ni na sian tano on, songon i do uloshononta sogot rumang ni na sian ginjang i. 15:50 On do na hudok disi, ale angka dongan: Ndang tarbahen sibuk dohot mudar manean harajaon ni Debata, jala ndang tartean na olo busuk i hatongtongon i. 15:51 Hahomion do na hudok on tu hamu: Ndang na saluhut hita monding; alai saluhut do hita paubaonna. 15:52 Tompu, di bagasan sanghidopmata, di pangkuling ni sarune na parpudi i; ai mangkuling ma sarune, gabe hehe ma angka naung mate i tu hatongtongon, laos paubaonna ma anggo hita. 15:53 Ai ingkon hatongtongon do manoluk na olo busuk on, jala hangongolu na manongtong do manoluk na olo mate on. 15:54 Alai dung disoluk hatongtongon i na olo busuk on, jala disoluk hangongolu na manongtong i na olo mate on, disi ma jumpang hata na tarsurat i: "Nunga tarbondut hamatean; nunga soluk hamonangan!" 15:55 "Jo hamatean, didia hamonanganmi? Jo hamatean, didia soropmi?" 15:56 Alai dosa do sorop ni hamatean, jala patik i do gogo ni dosa i. 15:57 Alai mauliate ma di Debata, na pamonang hita marhitehite Tuhanta Jesus Kristus! 15:58 Onpe, hamu angka donganku na hinaholongan, marsihohot jala so mubauba ma hamu, jala lam sumurung ma tongtong di bagasan ulaon ni Tuhan i, ai diboto hamu do: Ndang magopo halojaonmuna di bagasan Tuhan i.
16:1 Alai taringot tu guguan na tu angka na badia i, ulahon hamu ma, songon naung huaturhon tu angka huria na di Galatia. 16:2 Ganup ari Minggu ma dipapungu ganup, marguru tu na tarbahensa; unang pola pamasaon guguan, di na ro i ahu. 16:3 Alai disi sahat ahu tu hamu, suruonku ma dongan na leak tau di rohamuna mardongan surat, mamboan asiasimuna i tu Jerusalem. 16:4 Alai molo tung umpola, gabe dohot ahu borhat, denggan ma rap hami laho. 16:5 Alai ro do ahu manopot hamu, dung huebati luat Makedonia. Ai mamolus do ahu di luat Makedonia. 16:6 Alai ra mian do ahu di hamu, jala pasalpuonku partaonan ngali, asa pataruonmuna ahu, manang tudia pe ahu borhat. 16:7 Ai ndang naeng bolus hamu idaonku sahali on; arop do tahe rohangku mian di hamu lumeleng, molo diloas Tuhan i. 16:8 Alai di Epesus do ahu mian, sahat tu pesta Pentakoste. 16:9 Ai mungkap do di ahu pintu na balga, na marpangkorhon godang; jala torop do na mangalo. 16:10 Alai molo tung ro si Timoteus, sarihon hamu ma, unang mabiar ibana di tongatongamuna; ai ulaon ni Tuhan i do diula songon ahu on. 16:11 Unang ma adong na marhu ni roha mida ibana! Alai pataru hamu ma ibana di bagasan dame, asa ro ibana mandapothon ahu, ai hupaimaima do ibana raphon angka dongan i. 16:12 Alai anggo donganta, si Apollos i, nunga gogo nian huapoi, asa ditopot hamu rap dohot angka dongan on; alai sandok na so ra ibana ro anggo nuaeng, alai ro do ibana muse di tangkas ni langkana. 16:13 Dungo ma hamu, marsihohot marhaporseaon, tang ma hamu jala margogo! 16:14 Di bagasan haholongon ma tulus sasudena di hamu! 16:15 Diboto hamu do, angka dongan, pangisi ni bagas ni si Stepanus do patumonaan ni luat Akaya, jala dipasahat nasida do dirina gabe parhobas di angka na badia; dibahen i huapoi ma hamu: 16:16 Dohot ma hamu marunduk ni roha maradophon dongan angka sisongon i, nang maradophon ganup donganta pangula na mangkalojahon! 16:17 Alai las do rohangku, ala na ro do si Stepanus dohot si Portunatus dohot si Akaikus; ai nasida do manggohi na so tarpatupa hamu. 16:18 Ai dipahosa nasida do tondingku nang tondimuna. Onpe, parhamaol hamu ma angka dongan sisongon i! 16:19 Manongos tabi tu hamu angka huria na di Asia. Manongos tabi godang situtu tu hamu marhitehite Tuhan i: Si Akuila dohot si Priska rap dohot na marpungu di jabunasida. 16:20 Sahat ma tabi ni saluhut angka dongan i tu hamu. Masitabian ma hamu mardongan pangummaon na badia. 16:21 On ma tabingku sian ahu, Paulus, sinurat ni tanganku. 16:22 Hona bura ma na so mangkaholongi Tuhan i! Maranata (Na ro ma Tuhanta)! 16:23 Didongani asi ni roha ni Tuhan Jesus i ma hamu! 16:24 Didongani holong ni rohangku ma hamu saluhutna di bagasan Kristus Jesus i!
1:1 Ahu surat sian si Paulus, apostel ni Kristus Jesus, sian lomo ni roha ni Debata, rap dohot dongan si Timoteus, mandapothon huria ni Debata, na di huta Korint, nang saluhut angka na badia, na di sandok Akaya: 1:2 Asi ni roha ma di hamu dohot dame sian Debata Amanta i dohot sian Tuhan Jesus Kristus! 1:3 Pinuji ma Debata, Ama ni Tuhanta Jesus Kristus, Ama Parasiroha situtu jala Debata, Sipangapul na sumurung! 1:4 Ai diapul do hami di bagasan saluhut haporsuhonnami, asa tarapul hami angka dongan na di bagasan ragam ni haporsuhon, hinorhon ni apulapul na binasabasahon ni Debata tu hami. 1:5 Ai muba do godang ni haporsuhon ala ni Kristus songgop tu hami; laos hombar tusi do sumurung pangapulon tu hami hinorhon ni Kristus. 1:6 Alai porsuk pe huahap hami, bahen pangapulon dohot haluaon di hamu do; ba tarapul hami, bahen pangapulon di hamu do, ai dibahen do hamu marhabengeton di sitaonon, angka na sapangalaho dohot na huta on hami. 1:7 Jala hot do pangkirimonnami taringot tu hamu, ai on do huboto hami: Songon naung gabe partohap hamu di angka sitaonon, laos songon i do nang di apulapul. 1:8 Ai naeng do tangkas botoonmuna, ale angka dongan, haporsuhon na mangonai tu hami di luat Asia: Tung na sorat situtu do hami, lobi sian na tartaon, pola saep do rohanami di ngolunami. 1:9 Nunga putus hosanami, ditimbang rohanami; asa unang dirinami huhaposi hami, tung Debata do, na manungguli angka naung mate. 1:10 Saut do hami dipalua, laos paluaonna do sian hamatean na sai jorbut i. Tu Ibana do mangkirim rohanami, paluaonna do nang tu joloan on. 1:11 Dohot ma hamu mangurupi tumangiangkon hami, anggiat torop dongan mangkamauliatehon asiasi na tu hami, ala torop naung mangkongkop hami. 1:12 On do pujipujian na di hami: Dihatindangkon panggora ni rohanami do, naung huparangehon hami, di adopan ni portibi on, lumobi situtu ma di adopanmuna, habadiaon dohot hapolinon na sian Debata ndada habisuhon hian, tung asi ni roha ni Debata do. 1:13 Ai ndang asing lapatan ni na husurat hami tu hamu sian na jinaha jala niantusanmuna; jala hirim do rohangku, laos torus antusanmuna, 1:14 songon naung mamungka diantusi hamu hatanami, paboa hami gabe pujipujian di hamu, jala laos songon i hamu di hami di ari ni Tuhanta Jesus. 1:15 Mangasahon i, tibu hian do hutahi ro manopot hamu, asa dua hali hamu marlas ni roha. 1:16 Naeng mamolus do ahu sian hamu laho tu Makedonia; jala dung sian Makedonia, mulak tu hamu, asa hamu pataruhon ahu tu Judea. 1:17 Marneang ni roha do ahu tumahi i? Manang marguru tu sibuk do tahingki, gabe rap dapot di ahu hata olo dohot hata ndang? 1:18 Alai haposan do Debata, ai ndang jumpang di hami hata olo huhut hata ndang. 1:19 Ai Jesus Kristus, Anak ni Debata, na hubaritahon hami tu hamu, rap dohot si Silwanus dohot si Timoteus, ndada gabe olo Ibana dohot ndang, tung hot do hata olo marhitehite Ibana. 1:20 Ai manang piga bagabaga ni Debata, gabe olo do di bagasan Ibana jala marhitehite Ibana do amen, bahen hasangapon ni Debata marhitehite hami. 1:21 Alai Debata do pahothon hami rap dohot hamu tubagasan Kristus i, jala dimiahi hami. 1:22 Laos Ibana do sumahap hami, jala dilehon do tubagasan rohanami patujolo i, i ma Tondi i. 1:23 Alai Debata do hujou saksi ni tondingku, paboa hamu do huolani, umbahen so ro dope ahu tu Korint. 1:24 Ai ndada naeng mangarajai haporseaonmuna hami; angka pangurupi muna do hami di halalas ni rohamuna, ai naung ojak do hamu di bagasan haporseaon.
2:1 Hupaputus do di bagasan rohangku, na so ulahanku be ro manopot hamu di bagasan arsak ni roha. 2:2 Ai molo huarsahi hamu, ise ma palas rohangku muse? Nda ibana na huarsahi i? 2:3 Jala ala ni i do, umbahen manurat ahu tu hamu, asa unang arsak ni roha tu ahu di harorongku, sian angka na patut palas rohangku; ai pos do rohangku di hamu sudena, naung halalas ni rohamuna saluhutna do halalas ni rohangki. 2:4 Sian haporsuhon godang dohot sian ponjot ni roha do ahu manurat tu hamu mardongan iluilu godang, ndada asa marsak hamu, sandok asa ditanda hamu holong ni rohangku na sumurung mida hamu. 2:5 Alai na mangarsahi i, ndada ahu niarsahanna, hamu saluhutna do, manang deba tahe, unang masalpuhu hatangku. 2:6 Sae do tu na songon i pinsangpinsang sian na torop. 2:7 Onpe, balik ma tagonan hamu manesa dosana jala mangapul ibana, unang dibondut arsak ni roha na torbang i ibana. 2:8 Dibahen i huapoi hamu, patuduhon holong ni roha tu ibana. 2:9 Laos i do tinembak ni surathu tu hamu, naeng tandaonku, manang na tau hamu, manang pangoloi hamu di na saluhutna. 2:10 Alai molo disesa hamu dosana, dohot ma ahu. Ai manang dia na husesa, ala ni hamu do husesa i, di adopan ni Kristus. 2:11 Unang diangati sibolis i hita, ai ndada na so taboto tinahina i. 2:12 Alai di na sahat ahu tu huta Troas, manjamitahon barita na uli na taringot tu Kristus, mungkap do nian pintu di ahu di bagasan Tuhan i. 2:13 Alai ndang marhasonangan tondingku, ala so dapot ahu donganku, si Titus i, jala martinading hata nama ahu tu nasida, laho borhat tu Makedonia. 2:14 Alai mauliate ma di Debata, na tongtong pamonang hami di bagasan Kristus, jala dipapatar do, di saluhut inganan marhite sian hami, parbinotoan taringot tu Ibana, na songon uap na hushus. 2:15 Ai uap na hushus sian Kristus i do hami di adopan ni Debata, di angka na malua, nang di angka na laho mago. 2:16 Uap hamatean tu hamatean di na deba; uap hangoluan tu hangoluan di na deba. Jala ise do na tau tusi? 2:17 Ai ndada suman hami tu na deak i, na mangalansumhon hata ni Debata; alai sian lidang ni rohanami, sinuru ni Debata do huhatahon hami i di adopan ni Debata, di bagasan Kristus.
3:1 Na mangulahi do hami mamujimuji dirinami? Manang na ringkot marsurat panindangion hami mandapothon hamu manang manjalo sian hamu, songon binahen ni na deba? 3:2 Hamu do suratnami, naung sinurathon tubagasan rohanami, na tinanda jala jinaha ni saluhut jolma. 3:3 Ai tanda do hamu surat ni Kristus na hupature hami, sinurat so dohot tinta, marhite sian Tondi ni Debata na mangolu, i do; ndada tu panuratan batu, alai di panuratan daging, i ma ateate. 3:4 Pos do rohanami taringot tusi tu Debata, marhitehite Kristus. 3:5 Ndada tau hami sian dirinami, anggo tung mamingkiri agia aha sian dirinami; sandok sian Debata do hatauonnami. 3:6 Ibana do patauhon hami, gabe parhalado di padan na imbaru, na marhite sian Tondi i; ndada marhite sian surat, ai na mambunu do surat, Tondi i do pangoluhon. 3:7 Alai gari parhaladoon hamatean, na marsurat, na niuhir tubagasan batu, gari marhasangapon do, pola so tarbahen anak Israel mamereng bohi ni si Musa, dibahen sangap na olo salpu i, na di bohina i: 3:8 Lam beha ma sangap ni parhaladoon ni Tondi i! 3:9 Ai marhasangapon do parhaladoon na tu uhum; nda lam sumurung ma hasangapon ni parhaladoon na tu hatigoran! 3:10 Ai hira so marhasangapon be dohonon na marsangap disi, dibahen hasusurung ni hasangapon on. 3:11 Ai molo sangap na olo salpu i, nda dao lumobi hasangapon ni na manongtong on! 3:12 Marhiras ni roha situtu do hami, antong, mangasahon pangkirimon na sai balga. 3:13 Ndang hutiru hami be si Musa, na mangkungkupi bohina, asa unang dibereng halak Israel ujung ni na olo salpu i. 3:14 Alai gabe tangkang do rohanasida, ai ro di sadari on tong do tartutup parjanjian lama, jumpa dijaha i; laos so diungkap dope, ala holan di bagasan Kristus dipasohot i. 3:15 Olo tahe, ro di sadari on peak do pangkuphupi i diatas rohanasida, uju dijaha surat ni si Musa. 3:16 Alai disi mulak rohanasida mandapothon Tuhan i, buatonna ma pangkuphupi i. 3:17 Tuhan i do Tondi i; jala ia disi Tondi ni Tuhan i, disi do haluaon. 3:18 Alai anggo hita saluhutna, angka na sinondangan ni hasangapon ni Tuhan i, so hungkup bohinta, paubaonna ma hita, gabe tudos tu rupana, mandapothon ragam ni hasangapon, marguru tu Tuhan ni Tondi i.
4:1 Onpe, ala naung hujalo hami tohonan on, sian pangasina di hami, ndang marnaloja hami. 4:2 Sandok hutulakkon hami do angka na buni, angka sihailahononhon; ai ndang marangkal hami, jala ndang marlaok hubahen hami hata ni Debata; hasintongan i do hupapatar hami, gabe jongjong hami, tandaon ni roha ni saluhutna jolma di adopan ni Debata. 4:3 Jala molo tung tartutup barita na uli, na hujamitahon hami, di angka na laho mago do i tartutup. 4:4 Ai dipapitung debata ni portibi on do pingkiran ni angka na so porsea, asa unang nasida dipatiur sondang ni barita na uli, na taringot tu hasangapon ni Kristus, na tardok suman ni Debata. 4:5 Ai ndada dirinami hujamitahon hami, Kristus Jesus i do, paboa Ibana Tuhan; alai naposomuna do hami ala ni Jesus. 4:6 Ai Debata, na mandokkon marsinondang hatiuron i sian haholomon i, Ibana do patiurhon rohanami, pabinsar parbinotoan di sangap ni Debata, na di bagasan bohi ni Kristus i. 4:7 Alai di bagasan inganan na mura matapor do artanami on, asa Debata nampuna hagogoon na sumurung i, unang hami. 4:8 Di na saluhut do hami marhaporsuhon, alai ndang hapusohan; tarsosak, alai ndada tarhapit. 4:9 Na tarlele do hami, alai nda tung pinasombu; pinantinggangkon, alai nda tung anggo bolong. 4:10 Tongtong do hupausungusung hami di dagingnami hamamate ni Jesus, asa patar di dagingnami nang hangongolu ni Jesus. 4:11 Ai tongtong do hami, angka na mangolu dope, dipasahat tu hamatean, ala ni Jesus i, asa gabe patar nang hangongolu ni Jesus di dagingnami na olo mate i. 4:12 Asa na mangkorhon do hamatean di bagasan hami, alai hangoluan do anggo di bagasan hamu. 4:13 Alai tong do Tondi haporseaon i di bagasan hami, hombar tu na tarsurat i: "Na porsea do ahu, umbahen na huhatahon"; hami pe, na porsea do, umbahen na dohot hami mangkatahon, 4:14 ala huboto hami: Naung pahehehon Tuhan Jesus i, pahehehon ni I do nang hami raphon Jesus i, jala pajongjongonna do hami raphon hamu. 4:15 Alai saluhutna i, ala ni hamu do, asa asi ni roha i, na lam tu gandana, dibahen na torop, mangkorhon hamauliateon na sumurung, bahen hasangapon ni Debata. 4:16 Dibahen i, ndang marnaloja hami; ai lam tu burukna pe hajolmaonnami parduru i, anggo parbagasan i, ariari do dipaimbaru. 4:17 Ai haporsuhonnami na martingki jala na neang porsanon, i do patupahon di hami hasangapon na sumurung, na lumobi hamuliaonna na salelenglelengna, 4:18 ala hutailihon hami na so tarida i, nda tung na tarida i; ai parsatongkinan do na tarida i, alai manongtong do ro di salelenglelengna na so tarida i.
5:1 Ai on do huboto hami: Di na tanggal bagas parlapelapeannami na sian tano on, adong ma di hami inganan na sian Debata, bagas na so pinauli ni tangan, na mian salelenglelengna di banua ginjang i. 5:2 Ai saleleng dison, marhoi do hami huhut masihol, naeng haru solukkononhon inganannami na sian banua ginjang i. 5:3 Ai nda tung songon na marsaemara hami tardapot disi, tung marabit do. 5:4 Ai tagan di parlapelapean on hami, marhoi do hami jala sorat, ala dipangido rohanami: Naeng unang ma ditanggali sian hami, dilampishon ma nian, asa dibondut hangoluan i hamatean. 5:5 Alai na patauhon hami tusi, Debata do i, dung jolo dilehon tu hami Tondi i, patujolona i. 5:6 Asa na pos do rohanami tongtong, atik pe huboto hami, dao hami sian Tuhan i, saleleng maringanan di bagasan daging on hami. 5:7 Ai di bagasan haporseaon do hami, ndada dope di bagasan na marnida, 5:8 Alai lam pos do rohanami, jala lasan do bungkas sian daging on, laho maringanan di Tuhan i. 5:9 Ala ni i huhut huringkoti hami, naeng halomoan ni rohana hami, manang naung sahat tu sambulo, manang di pardalanan dope. 5:10 Ai ingkon gabe patar be do hita saluhutna sogot di jolo ni habangsa paruhuman ni Kristus, asa dijalo be hombar tu na niulana, tagan di pardagingon, manang na denggan, manang na roa. 5:11 Onpe, ala na binoto, habiaran do Tuhan i, huapoi hami do angka jolma i; alai patar do hami di Debata, jala hirim rohanami, patar do hami nang di bagasan rohamuna. 5:12 Ndada mangulahi hami mamujimuji dirinami di jolomuna, alai mangalehon dalan tu hamu, asa adong pamujionmuna di hami maralohon dongan, angka na mangasahon rupa, alai ndada roha. 5:13 Alai molo tung songon na so marroha hami, di Debata ma i; jala molo tung marroha hami, tu hamu do. 5:14 Ai ditiop holong ni roha ni Kristus do hami. 5:15 Jala songon on do hujujur hami: Anggo naung mate Nasada i humongkop sude, naung mate do nasida saluhutna. Jala humongkop saluhut do Ibana mate, asa unang be mangolu di dirina angka na mangolu i, asa mangolu nasida di Ibana, naung mate jala mulak mangolu humongkop nasida. 5:16 Ala ni i, ndang hutanda hami be manang ise mangihuthon pardagingon; jala nang pe hutanda hami najolo Kristus mangihuthon pardagingonna, ndang be hutanda hami anggo nuaeng. 5:17 Asa molo di bagasan Kristus halak, na tinompa na imbaru ma i. Nunga salpu pangalaho na robi, gabe na imbaru. 5:18 Sudena i sian Debata do; ai Ibana do padengganhon hita tu dirina marhite Kristus, jala dilehon do tu hami tohonan pardengganan i. 5:19 Ai di bagasan Kristus do Debata, gabe dipadenggan do portibi on tu dirina, ai ndang dijujur tu nasida dosanasida, jala dipajongjong do di tongatonganami hata pardengganan i. 5:20 Onpe, partonaan ni Kristus do hami, ai na mangapoi do Debata marhite sian hami. Singkat ni Kristus do hami mangelehelek: Sai olo ma hamu padengganon tu Debata! 5:21 Ai on do dipatupa Debata: Humongkop hita gabe dosa Ibana, na so tumanda dosa, asa gabe hatigoran ni Debata hita di bagasan Ibana.
6:1 Na mangapoi do hami, angka dongan pangula, asa unang magopo panjaloonmuna di asi ni roha ni Debata. 6:2 Ai didok do: "Di tingki parasian do ho hutangihon, jala di ari haluaon do ho huurupi. Nuaeng ma tongon tingki parasian; nuaeng ma ari haluaon i!" 6:3 Ndang mangalehon partuktuhan hami di agia aha pe, asa unang hasurahan tohonannami. 6:4 Di na saluhut hupatuduhon hami dirinami songon angka naposo ni Debata: Di bagasan habengeton godang, di bagasan angka haporsuhon, hasusaan dohot hagogotan; 6:5 di na hona pungkul, di na tarhurung, di bagasan hagunturon, di halojaon, di mangkar ni mata, di parpuasaon; 6:6 di bagasan hatomanon, di bagasan parbinotoan, lambas ni roha dohot habasaron, di bagasan Tondi Parbadia, di bagasan holong ni roha na so marpangansi; 6:7 di bagasan hata hasintongan, di bagasan hagogoon ni Debata, marhitehite sinjata hatigoran di siamun dohot hambirang; 6:8 mamolus sian hasangapon dohot haleaon, sian barita na roa dohot barita na denggan; songon angka na mangaliluhon, hape parsintong do; 6:9 songon angka na so tinanda, hape na tinanda do; songon na naeng mate, hape na mangolu; songon angka na binunu, alai ndada na mate; 6:10 songon angka na marsak, alai tongtong do parroha na las; songon angka na pogos, alai torop do dipamora; songon na so paradongan, hape saluhut do digomgom. 6:11 Buas do pandoknami tu hamu, halak Korint; ungkap do rohanami. 6:12 Ndang mangingking rohanami maradophon hamu; rohamuna do na mangingking i. 6:13 Songon na tu anakkonku ma hatangkon: Palambas hamu ma nang rohamuna, balos ni i! 6:14 Unang saauga hamu dohot angka na so porsea! Ai aha ma pardomuan ni hatigoran dohot na so uhum; jala aha do hasaoran ni hatiuron dohot haholomon? 6:15 Beha ma domu Kristus dohot Belial; aha ma hatopan ni na porsea dohot na so porsea? 6:16 Tung olo ma mardomu joro ni Debata dohot angka ajiajian? Ai joro ni Debata na mangolu i do hita, songon na nidok ni Debata: "Naeng di tongatonganasida do Ahu maringanan jala mardalani, gabe Debatanasida do Ahu, jala nasida gabe bangsongku." 6:17 "Dibahen i, ruar ma hamu sian tongatonganasida jala paholang hamu ma dirimuna, ninna Tuhan i; unang ma jama hamu na ramun, asa hujangkon hamu!" 6:18 "Jala gabe Ama ma Ahu di hamu, jala hamu gabe anak dohot boru di Ahu, ninna Tuhan, Sigomgom parluhutan."
7:1 Onpe, hamu angka haholongan, ala naung tu hita angka bagabaga ondeng, tapaias ma dirinta sian nasa na tau pahodarhon daging dohot tondi, laho patulushon habadiaon mardongan biar mida Debata! 7:2 Jangkon hamu ma hami; ndang adong hujahati hami agia ise sian hamu, manang niago, manang niangatan pe. 7:3 Ndang hudok i, laho mandabu uhum tu hamu; ai nunga hudok nangkin, naung di bagasan rohanami hamu, asa rap mate jala rap mangolu. 7:4 Godang do hiras ni rohangku mida hamu, godang do nang pamujingku di hamu; naung tarapul situtu do rohangku, marlas ni roha na sumurung do ahu di bagasan saluhut haporsuhonnami. 7:5 Ai nang di haroronami tu Makedonia, ndang marhasonangan dagingnami, sandok porsuk do huhilala hami: Paraloon sian duru, hatahuton sian bagasan. 7:6 Alai Debata, na mangapul na toruk marroha. I ma mangapul nang hami, dibahen haroro ni si Titus. 7:7 Ndada holan marhitehite harorona, dohot do marhitehite pangapulon, naung jinalona sian hamu, ai dibaritahon do tu hami sihol ni rohamuna, partangismuna dohot ringgasmuna humongkop ahu, gabe lam las do rohangku. 7:8 Ai nang pe marsak hamu hubahen marhitehite surat i, ndang husolsoli rohangku disi. Tutu, husolsoli do najolo nian, ai huida marsak rohamuna satongkin, dibahen surat i. 7:9 Anggo nuaeng, las do rohangku: Ndada ala naung marsak i rohamuna, ala ni hamubaon ni roha, na hinorhon ni arsak ni rohamuna, i do; ai sian Debata do arsak ni rohamuna, asa sandok unang luangan hamu hubahen hami. 7:10 Ai dihorhon arsak ni roha na sian Debata do hamubaon ni roha tu haluaon, na so sisolsolan; alai dihorhon arsak ni roha ni portibi on do hamatean. 7:11 Tanda hamu ma arsak ni roha on, na sian Debata; ai dihorhon do di hamu ringgas ni roha na sai godang i, tole paraluson, sogo ni roha, hatahuton, sihol ni roha, pangkamuruhon, paminsangon pe. Di saluhutna i dipatuduhon hamu, paboa na lias hamu, di hata i. 7:12 Asa hutongos pe surat i tu hamu, ndada ala ni parjahat i, manang ala ni na jinahatanna; ala ni on do tahe: Asa patar sama hamu, di adopan ni Debata ringgas ni rohamuna na humongkop hami. 7:13 Ala ni i gabe tarapul hami. Alai dung tarapul hami, lam sumurung muse huhalashon hami las ni roha ni si Titus, ala dipahosa hamu saluhutna tondina i. 7:14 Ai ndang tarila ahu, di na hupuji hamu maradophon ibana; sandok songon naung huhatahon hami saluhutna i tu hamu, mangihuthon hasintongan i, songon i do gabe marhasintongan pamujinami maradophon si Titus. 7:15 Jala lam tu balgana do holong ni rohana di hamu, paingotingot pangoloionmuna saluhutna, ai dijangkon hamu do ibana mardongan biar dohot lomos ni roha. 7:16 Na las do rohangku, ala haposan hamu hudapot di na saluhutna.
8:1 Alai hupabotohon hami ma tu hamu, angka dongan, asi ni roha ni Debata, na nilehonna i tu angka huria na di Makedonia: 8:2 Ai atik pe di bagasan pangunjunan dohot haporsuhon godang nasida, dihorhon halalas ni rohanasida na sumurung angkup ni sungkot ni hinapogosnasida do habasaon na lumobi. 8:3 Huhatindangkon do, naung dilehon nasida nasa na tarpatupasa, lobi tahe sian gogona; jala sian lomona do! 8:4 Gogo do diapoi nasida hami jala dipangido asi ni roha, i ma na naeng gabe parsidohot mangurupi angka na badia i. 8:5 Jala gumodang sian na huhirim hami: Tung dirina do dilehon nasida parjolo tu Tuhan i, dung i tu hami, mangihuthon lomo ni roha ni Debata. 8:6 Gabe huapoi hami si Titus, asa laos dipaujung di tongatongamuna ulaon asi ni roha on, songon naung pinungkana i. 8:7 Alai songon hasurunganmuna di na saluhut, di haporseaon, di hata, di parbinotoan, di nasa haringgason, di pangkaholongimuna di hami, naeng songon i ma hasurunganmuna nang di ulaon asi ni roha on. 8:8 Ndada songon paksa hatangki; naeng ujionku do tahe sintong ni holong ni rohamuna, tumimbangkon pangkaburjuhon ni angka dongan. 8:9 Ai diboto hamu do asi ni roha ni Tuhanta Jesus Kristus, na mamora hian, gabe pogos ala ni hamu, asa gabe mamora hamu hinorhon ni pogosna i. 8:10 On do turgas sian ahu: Na patut do i di hamu; ai hamu jumolo hian sian na taon i umpungka nang na patupahon, nang na tumahi. 8:11 Asa patulus hamu ma nuaeng nang na patupahon, asa songon ringkot ni roha laho tumahi, songon i ma na patupahon, hombar tu na dapot. 8:12 Ai molo adong ringkot ni roha, halashononhon do na dapot, nda tung salpu sian na dapot. 8:13 Ai ndada naeng haporsuhon di hamu, hasonangan ia di dongan; naeng masipadosan ma nian. 8:14 Anggo saonari ditomutomu na lobi na di hamu ma na hurang di nasida, asa ditomutomu nang na lobi na di nasida na hurang di hamu, asa gabe dos! 8:15 Hombar tu na tarsurat: "Sipeop na godang, ndang marlobilobi; jala sipeop na otik, ndang hurangan." 8:16 Alai mauliate ma di Debata, na mangalehon ringgas ni roha na songon i humongkop hamu tubagasan roha ni si Titus. 8:17 Na olo do ibana apoan; lam ringgas rohana, borhat mandapothon hamu, sian lomona sandiri. 8:18 Alai rap dohot ibana husuru hami do dongan i, na tarpuji di saluhut huria i, siala barita na uli i. 8:19 Angkup ni i, disuru angka huria do ibana, mandongani hami di ulaon asi ni roha on, na huhobashon hami, bahen hasangapon di Tuhan, huhut pahinsa rohanami. 8:20 Unang ditihai hami di tumpak na balga, na huhapadothon hami; i do na hutamparhon hami. 8:21 Ai hupingkiri hami na patut ingoton di jolo ni Tuhan i, nang di jolo ni jolma. 8:22 Jala rap dohot nasida husuru hami dongannami, dung ragam jala jotjot huuji hami ringgas ni rohana i; alai lam ganda do ringgas ni rohana nuaeng, dibahen godang ni pos ni rohana di hamu. 8:23 Asa anggo si Titus, donganku do ibana jala angkuphu mangkongkop hamu; ia angka dongannami, sinuru ni angka huria do jala sipasangap Kristus. 8:24 Onpe, tu nasida ma pataridahon hamu sintong ni holong ni rohamuna, nang sintong ni pamujinami di hamu, di adopan ni angka huria i!
9:1 Anggo taringot tu pangurupion na tu angka na badia, ndang pola be surathononku tu hamu. 9:2 Ai huboto do ringgas ni rohamuna, naung pola hupuji di jolo ni halak Makedonia, mandok: Naung marhobas Akaya sian na taon i dope, jala ringgas ni rohamuna do pajujuhon dongan torop. 9:3 Alai husuru do angka dongan i, asa unang so marimpola pamujingku di hamu taringot tusi, asa tutu hobas hamu, songon naung hudok hian; 9:4 asa unang rap ro hami dohot dongan sian Makedonia, gabe ndang hobas hamu hudapot hami, jala murak hami, hamu do tahe, di nalom ni rohanami i. 9:5 Dibahen i huringkoti hami mangapoi angka dongan, asa dipajolo nasida mandapothon hamu, laho paradehon pasupasu naung pinarbagabagamuna, asa rade i, songon na hinabuashon, unang hinolithon. 9:6 Ingot ma: Na manaburhon otik, otik do gotilonna; jala na manaburhon managam pasupasu, mangalap pasupasu di na manggotil. 9:7 Ganup ma nionjar ni rohana, unang ma sian muruk manang sian na so tarjua; ai dihaholongi Debata do na las roha mangalehon! 9:8 Alai marhuaso do Debata, mangusehon saluhut asiasi tu hamu, asa sandok tuk situtu di hamu jala marlobilobi hamu, laho patupahon saluhut ulaon na denggan; 9:9 hombar tu na tarsurat: "Na manaburi ibana, mangalehon tu angka na pogos; hot do hatigoranna i ro di salelenglelengna." 9:10 Alai na padirihon boni tu panabur dohot indahan tu na manganhon, padirion jala pagandaon ni I do di hamu sisaburhononhon, jala patubuonna parbue ni hatigoranmuna, 9:11 asa di na saluhut hamu mamora tu nasa habasaon, na mangkorhon hamauliateon tu Debata, marhite sian hami. 9:12 Ai ndada, asal dipatuk ulaon guguan on hahurangan ni angka na badia i; na sumurung do i huhut, ala ni hamauliateon ni na torop tu Debata. 9:13 Gabe dipasangap hamu Debata, ia dung tau hamu jumpang di ulaon parhobason on, ala ni pangoloion ni rohamuna, laho mangkatindangkon barita na uli na sian Kristus, dohot ala na buas pangantoionmuna di nasida dohot di dongan saluhutna. 9:14 Nasida pe, ditangiangkon do hamu, jala masihol do nasida di hamu, marningot asi ni roha na sumurung na sian Debata tu hamu. 9:15 Alai mauliate ma tu Debata ala ni silehonlehonna, na so tarhatahon i!
10:1 Alai ia ahu, si Paulus, huapoi ma hamu marhitehite lambok ni roha dohot habasaron ni Kristus. Na toruk roha do ahu maradophon hamu, anggo adop bohi be; alai na barani maralohon hamu, jumpa holang. 10:2 Alai dipangido rohangku do: Naeng unang ma nian pola barani ahu, jumpa dompak, sian pos ni rohangku sipangasahononku di rohangku maradophon na deba, na mangarajumi hami songon parroha daging. 10:3 Tutu do, di bagasan daging dope hami; alai ndada marguru tu daging parungkilonnami. 10:4 Ai ndada mangihuthon daging sinjatanami marungkil, tung margogo do di Debata, laho mangarumpakkon angka tano bato. 10:5 Ai hurumpakkon hami do angka pingkiran habisuhon ro di nasa roha na timbo, na hehe mangalo parbinotoan na sian Debata, jala huihoti hami do nasa roha, asa gabe pangoloi di Kristus i. 10:6 Jala hobas do hami, maminsang nasa na so mangoloi, ia dung timpas pangoloionmuna. 10:7 Bereng hamu ma na tandap di jolomuna: Molo adong na pos roha, mandok, Kristus nampuna ibana, diingot ma: Songon Kristus nampuna ibana, laos songon i do Kristus nampuna hami. 10:8 Ai ndang tagamon tarila ahu, nang pe tamba dope pamujingku di huaso na nilehon ni Tuhan i di hami, laho pauliulihon hamu, ndada manegai. 10:9 Unang ma songon na hupambibiari hamu marhite sian angka surat i. 10:10 Ai angka surat i tutu, ninna, dokdok jala gogo; alai gale do, jumpa ro ibana, jala lea do hatana. 10:11 On ma dipingkiri halak i: Ia songon i hatanami na marhite sian surat, jumpa dao, songon i do ulaonnami, di na dompak hami. 10:12 Tutu, ndang barani hami, pasaorhon manang patudoshon dirinami tu angka na manjuljulhon dirina. Angka parroha mago do nasida, ai na manuhati jala pasumansumanhon do nasida sama dirina. 10:13 Alai ndang olo hami mamujimuji dirinami, ro di na so tingkina; sandok intap aturan, na pinatikkon ni Debata tu hami. Laos i do, umbahen na sahat hami ro di hamu. 10:14 Ai ndada na pabalgabalgahon diri hami, so pola jolo ro hami mandapothon hamu; ai hami sahat, antong, nang tu hamu, mamaritahon barita na uli ni Kristus. 10:15 Ndada lompo sian uhum pamujinami di hami, anggo di bagasan ulaon ni na leban; alai lam ganda situtu ma ulaonnami, dihirim rohanami, molo dung ganda haporseaonmuna sama hamu, marguru tu parturena, 10:16 laho manjamitahon barita na uli, sahat ro di angka na di balik ni parbalohanmuna, unang pola huhasangaphon hami ulaon, naung tinurpukkon tu na asing siradotanna. 10:17 Alai na mamuji dirina, marhitehite Tuhan i ma ibana mamuji! 10:18 Ai ndada na tau na pajolohon dirina; na niuji ni Tuhan i, i do!
11:1 Aut ma nian dipataontaon hamu bodokku saotik! Olo tahe, pataontaon hamu ma ahu! 11:2 Muruk ni Debata do na di ahu humongkop hamu; ai nunga hupaorohon hamu tu sada Baoa, padirihon tu Kristus, songon na marbaju na bontor. 11:3 Alai biar do rohangku, so tung diago maon pingkiranmuna, manadingkon bulus ni roha maradophon Kristus, suman tu na pinaotooto ni ulok i si Haoa marhitehite angkalna i. 11:4 Ra tung denggan do rohamuna manaon, molo ro deba mamaritahon Jesus na mimbar sian na hubaritahon hami, manang molo dijalo tondi na leban, na so jinalomuna hian, manang barita na uli na asing, na so jinangkonmuna hian. 11:5 Alai anggo di rohangku, ndang na humurang ahu sian angka apostel na bolonan i. 11:6 Alai nang pe hurang malo ahu di hata, nda tung anggo di parbinotoan; tongtong tahe hupatandahon hami i tu hamu sasudena. 11:7 Na mardosa do ahu, di na hupatutoru diringku, laho patimbo hamu, ala songon silehonlehon huboan barita na uli ni Debata, na hubaritahon tu hamu? 11:8 Na mangarampas do ahu sian huria na asing bahen balanjongku, laho marulaon di hamu. 11:9 Jala ia hurangan pe ahu di tongatongamuna, ndang hususai agia ise, ai angka dongan, na ro sian Makedonia, i do patukkon na hurang di ahu. Tongtong hupatihi diringku, unang hususai hamu, jala laos i do bahenonku tu joloan on. 11:10 Namun hasintongan ni Kristus di bagasan ahu, ndang jadi montok pujipujian on di ahu di angka luat Akaya. 11:11 Ala ni aha? Ala na so holong do rohangku di hamu? Debata do umbotosa! 11:12 Alai huula pe i nuaeng nang tu joloan on, ala ni angka na mangalului parbonsiran do, laho manggotaphon i, asa anggiat dos hami dohot nasida di pamujion i. 11:13 Ai anggo nasida, angka apostel pargapgap do, angka pangula pangansi, disumansuman do angka apostel ni Kristus. 11:14 Ndang pola longang roha disi, ai nang sibolis i, dipasumansuman do ibana songon suruan hatiuron. 11:15 Lam beha naposona manumannuman rupa ni naposo ni hatigoran! Hombar tu angka parulaonna do ujungna be! 11:16 Huulaki ma mandok: Unang ma dirimpu na deba, na loahon ahu. Alai molo tung i, jangkon hamu ma ahu hira na loahon, asa tarpapujipuji ahu diringku saotik. 11:17 Ndada marguru tu Tuhan i hatangki; hira di bagasan na loahon ahu, mangihuthon pambahen ni na mamujimuji diri. 11:18 Anggo torop mamujimuji diri mangasahon pardagingon, dohot ma ahu mamuji diringku. 11:19 Lomo do hamu na bisuk mangkaehe na loahon. 11:20 Na mangkaehe do hamu, molo diparhatoban deba hamu, molo pinapangani hamu, molo ditangkup hamu, molo adong na patimbo dirina, molo dipastap hamu. 11:21 Hailaon do na hudok, ra na gale do hami disi. Alai na pinangasahonnasida, dohot ma ahu mangasahonsa (haotoon do hatangki, santabi). 11:22 Halak Heber do nasida? Dohot do ahu! Halak Israel do nasida? Dohot do ahu! Pinompar ni Abraham do nasida? Dohot do ahu! 11:23 Parhalado ni Kristus do nasida? Haotoon do hatangkon: Lumobi do anggo ahu! Sumurung manaon renge ni ulaon, nang hurungan; lumobi tu ahu linsinglinsing; jotjot do di bagasan parmaraan hamatean. 11:24 Lima hali ma ahu dilinsingi halak Jahudi, opatopatpulu hurang sada. 11:25 Tolu hali do ahu dilasahi, sahali ahu didangguri dohot batu, tolu hali harom, saborngin sadari ahu mumbangumbang di laut ni lautan. 11:26 Jotjot do ahu di pardalanan, marmara di batang aek, marmara dibahen panamun, marmara sian angka dongan sabutuha, marmara sian angka parbegu, marmara di huta, marmara di halongonan, marmara di laut, marmara di tongatonga ni dongan na so haru dongan. 11:27 Di bagasan ulaon dohot hasusaan, jotjot do mangkar matangku, jotjot do mauasmale dohot marpuasa, di ngali ni ari dohot di na hurangan ulos. 11:28 Dungkon ni i angka na tahop tu ahu ariari, laho mangkolsohon saluhut huria i. 11:29 Ise na gale, so dohot ahu gale? Ise do na targasip, so dohot mohop ateatengku? 11:30 Molo ingkon mamujimuji ahu, angka hagaleonki ma hupapujipuji. 11:31 Ia Debata, Ama ni Tuhan Jesus, na tarpuji ro di salelenglelengna, diboto do, na so margabus ahu: 11:32 Di Damaskus i dijagai komandan ni raja Aretas do huta ni halak Damaskus, naeng manangkup ahu. 11:33 Jadi di bagasan haranjang ma ahu ditantan sian jandela tu balian ni parik, gabe malua sian tanganna.
12:1 Ingkon mamujimuji diri, nang so marguna; asa taringotanku ma na huida, ro di angka pangungkapon na sian Tuhan i. 12:2 Di bagasan Kristus hutanda sada jolma: Nunga sampuluopat taon salpuna, tarhinsat halak i ro di lampis patoluhon ni banua ginjang i. Manang na di bagasan dagingna ibana uju i, manang dibalian ni dagingna, ndang huboto; Debata do umbotosa. 12:3 Asa na hutanda do jolma i. Alai manang na di bagasan dagingna ibana uju i, manang sirang sian dagingna, ndang huboto; Debata do umbotosa. 12:4 Na tarhinsat do ibana ro di Paradeiso, jala dibege do hata na so tarhatahon, na so jadi dohonon ni jolma manisia. 12:5 I ma papujipujionku; alai anggo taringot tu diringku, holan ala ni hagaleonku papujipujionku ahu. 12:6 Jala nang pe hupapujipuji diringku, ndang na so marroha ahu disi, ai sintong do hatangki. Alai huorom nama i, unang sumurung ahu di rajumi halak sian na niidana dohot binegena di ahu. 12:7 Jala asa unang huhaginjangkon angka pangungkapon na sumurung na tu ahu: Hona basirbasir do ahu di sibukku, i ma suruan ni sibolis na mamukpuhi ahu, asa unang hupatimbo diringku. 12:8 Tolu hali do hupangido sian Tuhan i, asa sumurut i sian ahu. 12:9 Gabe didok Ibana tu ahu: Tuk ma asi ni rohangku di ho; ai di hagaleon do sun timbul hagogoon. Asa tagonan ma hupapujipuji diringku di bagasan angka hagaleonku, asa songgop tu ahu hagogoon ni Kristus. 12:10 Dibahen i, sonang do huhilala di bagasan angka hagaleon, pangaleaion, hasosahan, pangaleleon dohot hagogotan ala ni Kristus; ai jumpa gale ahu, disi do ahu margogo. 12:11 Naung gabe maoto do ahu hape; hamu do manosaknosak ahu. Hamu do nian tama pajolohon ahu; ai na so adong hahuranganku sian angka apostel na bolonan i, nang pe sisoada ahu. 12:12 Pinamasa do nian angka tanda ni apostel di tongatongamuna marhitehite nasa habengeton, angkup ni angka tanda halongangan dohot ulaon hagogoon. 12:13 Ai dia ma hataluanmuna martimbangkon huria angka na asing i? Na so hususai hamu; holan i do. Sesa hamu ma gedukki! 12:14 Nunga pola patoluhalihon hobas ahu manopot hamu, jala ndada susaanku hamu, ai ndada artamuna hulului, hamu sandiri do; ai ndang tama angka ianakhon papungupunguhon arta di natuatuana, angka natuatua i di angka anakkonna, i do. 12:15 Alai las do rohangku mangururi, laos seahononku do diringku humongkop tondimuna. Di na songon i tarlobi pangkaholongingku di hamu, tung ummotik ma ahu haholongan! 12:16 Songon i pe i, ndang hususai hamu; alai ala parangkal ahu, gabe marbisuk ahu mambuat rohamuna. 12:17 Naung huangati hamu manang marhitehite sada halak, na husuru manopot hamu? 12:18 Huapoi do tutu si Titus, jala husuru dongan i rap dohot ibana. Adong do diangati si Titus hamu? Nda sisada tondi hami di parangenami, nda sisada bogas? 12:19 Nunga hian huroha dirimpu hamu, mamintori diri hami tu hamu? Di adopan ni Debata, di bagasan Kristus do hatanami: Sasudena i, laho pauliulihon hamu, angka haholongan! 12:20 Ai biar do rohangku, atik so dapot ahu hamu di harorongku, hombar tu na pinangido ni rohangku, jala ahu pe asing sian na pinangido ni rohamuna dapotonmuna. Atik beha jumpang parbadabadaon, pangiburuon, rimasrimas, gulutgulut, parhataan tundal, bitibiti, roha na burnang dohot hagaoron. 12:21 So tung dipatutoru Debatangku ahu di tongatongamuna di harorongki, pola tatangisanku torop angka naung mardosa hian, na so manolsoli rohana siala hahodaron, parmainanon dohot pargadombuson na niula nasida i.
13:1 Patoluhalihon ma ahu ro nuaeng manopot hamu. Sipaputuson do nasa hata, mangasahon dua manang tolu sitindangi. 13:2 Di harorongku paduahalihon uju i, songon i nang nuaeng, di na dao i dope ahu, nunga hudok hian jala dohononku tu angka naung mardosa, nang tu dongan sasudena: Ndang maralangalang ahu di harorongkon. 13:3 Ai dipangido hamu do partinandaan, paboa na tutu Kristus mangkatai marhite sian ahu; ndang gale Ibana maradophon hamu, marhagogoon do tahe di tongatongamuna. 13:4 Ai tarsilang pe Ibana di bagasan hagaleon, na mangolu do Ibana sian hagogoon ni Debata. Nang hami gale di bagasan Ibana, alai na mangolu do hami rap dohot Ibana sian hagogoon ni Debata di bagasan hamu. 13:5 Unjuni hamu ma dirimuna, manang na di bagasan haporseaon hamu; sulingkit hamu ma dirimuna! Na so ditanda hamu do dirimuna, paboa naung Jesus Kristus di bagasan hamu? Ai ia so i, sandok na so tau do hamu! 13:6 Alai dihirim rohangku, tandaonmuna do, ndang na so tau hami. 13:7 Alai martangiang do hami tu Debata, asa unang diula hamu agia aha na roa; ndada asa hami idaon na tau, naeng hamu mangulahon na denggan, dipangido rohanami, nang pe songon na so tau hami idaon. 13:8 Ai ndang adong gogonami mangalo hasintongan i, sandok mangkongkop hasintongan, i do. 13:9 Ai las do rohanami, hamu margogo, nang pe gale hami. Laos on do tangiangnami: Naeng gabe togu rohamuna! 13:10 Dibahen i husurat songon i, di na holang dope ahu, asa unang posi pambahenku, dung ro ahu, marguru tu huaso, na nilehon ni Tuhan i tu ahu, laho pauliulihon, ndada manegai. 13:11 Onpe, ale angka dongan, sai las ma rohamuna, sai olo ma hamu patoguon jala apoan, sada ma pingkiranmuna; radoti hamu ma dame i, asa didongani Debata, Parholongroha jala Pardame i, hamu! 13:12 Masitabian ma hamu marhitehite umma na badia. Na manongos tabi tu hamu saluhut angka na badia i. 13:13 Sai didongani asi ni roha ni Tuhan Jesus Kristus dohot holong ni roha ni Debata dohot parsaoran ni Tondi Parbadia ma hamu saluhutna!
1:1 Ahu surat ni si Paulus, apostel, ndada sian jolma, ndada marhite sian sada jolma, alai marhite sian Jesus Kristus jala marhite sian Debata Ama, naung pahehehon Ibana sian na mate; 1:2 raphon dongan saluhut na mandongani ahu, mandapothon angka huria na di luat Galatia: 1:3 Asi ni roha ma di hamu dohot dame sian Debata Ama dohot sian Tuhanta Jesus Kristus, 1:4 naung mangalehon dirina ala ni dosanta, asa diroro hita sian hasiangan na jahat on, mangihuthon roha ni Debata Amanta. 1:5 Di Ibana ma hasangapon ro di salelenglelengna i! Amen. 1:6 Longang do rohangku, ala songon i tibu hamu marbalik sian Ibana, naung manjou hamu marhitehite asi ni roha ni Kristus, mangoloi barita na uli na asing. 1:7 So manang adong na asing. On do tahe: Adong do halak na manggaori rohamuna, jala na pasambarhon barita na uli ni Kristus i. 1:8 Alai aut sura hami, nang surusuruan sian banua ginjang pe, mamaritahon barita na uli, asing sian naung binaritahon tu hamu, hona toru ma ibana! 1:9 Songon hatangku tu hamu najolo, tong songon i do nang nuaeng: Molo tung dibaritahon halak barita na uli tu hamu, asing sian naung jinalomuna i, hona toru ma ibana! 1:10 Lomolomo ni jolma do hulului disi, manang lomo ni roha ni Debata? Na tabo di pinggol ni jolma do hulului? Aut i, ndang sintong ahu anak somang ni Kristus. 1:11 Alai hupabotohon ma tu hamu, angka dongan: Ndada mangihuthon hajolmaon barita na uli i na hubaritahon i. 1:12 Ai ndada hujalo manang huguruhon i sian jolma, tung marhite sian pangungkapon ni Jesus Kristus, i do. 1:13 Ai nunga dibege hamu pangalahongku, uju di bagasan hajahudion dope ahu: I ma na gasagasaon i ahu, mangalelei jala mangarotongkon huria ni Debata. 1:14 Sumurung do ahu sian torop dongan torbangku di bangsongku mangulahon hajahudion, ai na tarlobi do pangkamuruhonku, mangaradoti tona na sian angka ompunami. 1:15 Alai dipapulik Debata do ahu, andorang so topak dope ahu, jala dijou do ahu sian asi ni rohana. 1:16 Gabe lomo rohana papatarhon Anakna i tu ahu, laho mamaritahon Ibana tu angka sipelebegu; ndang jolo huparguru disi sibuk dohot mudar. 1:17 Jala ndada nangkok ahu tu Jerusalem, manopot angka apostel, naung jumolo sian ahu; alai tu tano Arab do ahu laho. Dung sian i, mulak ahu muse tu Damaskus. 1:18 Jadi dung salpu tolu taon, nangkok ma ahu tu Jerusalem, laho mananda si Kepas, jala sampululima borngin ma ahu sorang di ibana. 1:19 Alai ndang adong huida apostel na asing, dungkon ni si Jakobus, anggi ni Tuhan i. 1:20 Alai anggo taringot tu na husurat on tu hamu, tung di jolo ni Debata do i: Ndang margabus ahu! 1:21 Dung i laho do ahu tu angka luat na di Siria dohot Kilikia. 1:22 Alai ndang ditanda huria ni Kristus, angka na di luat Judea i, anggo bohingku. 1:23 Holan na tarbege do tu nasida; na mangalele nasida najolo, i do mamaritahon nuaeng haporseaon, na nirotongkonna i najolo. 1:24 Jala dipuji nasida ma Debata ala ni ahu.
2:1 Dung pe salpu sampuluopat taon, mangulahi ma ahu nangkok tu Jerusalem, rap dohot si Barnabas; huboan ma nang si Titus. 2:2 Alai mangihuthon pangungkapon do ahu nangkok, jala pamaritahonku di barita na uli tu angka sipelebegu hupatedek tu jolonasida, gumodang tu na marsangap i, atik beha magopo parlojongonku tu pudi on, nang sian nasailaonna i. 2:3 Gari si Titus, donganki, halak Junani i, ndang apala disosak, asa tarsunat. 2:4 Alai adong do deba dongan na so haru dongan, na pasamaksamakkon dirina tu hami, angka na ro manisipi mangonggopi hami, angka naung pinalua ni Kristus Jesus, laho patundukkon hami nian. 2:5 Ndang mangunduk hami mangoloi nasida nanggo satongkin, asa hot hasintongan ni barita na uli di hamu. 2:6 Alai ndang adong ditambai angka na marsangap i agia aha tu na di ahu hian; manang ise nasida najolo, ndang mahua i di ahu, ndada siida bohi ni jolma anggo Debata. 2:7 Diida nasida do tahe, naung dipasahat do tu ahu barita na uli na tu angka parbegu, songon na tu si Petrus tu angka Jahudi. 2:8 Ai na mangulahon di si Petrus haapostelon tu angka Jahudi, laos Ibana do mangulahonsa di bagasan ahu tu angka parbegu. 2:9 Ditanda nasida ma asi ni roha i, naung dilehon tu ahu, i ma si Jakobus, Kepas dohot Johannes, angka na songon tiang partunggul dirajumi dongan, gabe dijalang nasida ma ahu dohot si Barnabas, tanda ni parsaoran, paboa hami tu angka parbegu, nasida tu angka Jahudi. 2:10 Asal huingot hami angka na pogos; jala saut do huringkoti patupahon i. 2:11 Alai jumpa ro si Kepas tu Antiokia, tullom do hualo, ala sihataon ibana. 2:12 Ai saleleng so ro dope angka na sinuru ni si Jakobus, rap mangan do ibana dohot angka parbegu; alai dung ro nasida, dipasurut do dirina jala dipaholang, sian biarna mida angka dongan na sian Jahudi. 2:13 Marmismisi do angka Jahudi na asing raphon ibana, pola do tartogu nang si Barnabas binahen ni parmismisonnasida i. 2:14 Alai dung huida, na so tigor langkanasida marguru tu hasintongan ni barita na uli i, ningku ma mandok si Kepas di jolo ni nasida saluhutna: Halak Jahudi hian do ho, alai diihuthon ho do adat ni parbegu, ndada adat Jahudi; marhua ma sosakhononmu halak parbegu maradat Jahudi! 2:15 Halak Jahudi hian do hami, ndada pardosa sian angka parbegu. 2:16 Alai on do huboto hami: Sian haporseaon di Jesus Kristus sambing do dapotan hapintoron jolma, ndada sian ulaon patik. Dibahen i, nang hami gabe porsea di Kristus Jesus i, asa dipintori hami, sian haporseaon di Kristus i, ndada sian ulaon patik: Ai ndang dapotan hapintoron nasa na mardaging, anggo sian ulaon patik. 2:17 Alai molo pardosa tardapot nang hami, na naeng pintor marhitehite Kristus, nda gabe sitambai dosa do Kristus disi? Dao ma anggo i! 2:18 Ai hupajongjong do diringku pangalaosi, molo hupauli muse naung hulohai: 2:19 Ai nunga mate ahu di patik i hinorhon ni patik i, asa mangolu ahu di Debata. Raphon Kristus i do ahu tarsilang. 2:20 Ndada ahu be na mangolu i nuaeng; Kristus do mangolu di bagasan ahu. Ia mangolu pe ahu nuaeng di bagasan daging, mangolu marhitehite, haporseaon di Anak ni Debata, na mangkaholongi ahu jala na mangalehon dirina humongkop ahu. 2:21 Ndang hubolongkon asi ni roha ni Debata; ai aut adong hatigoran marhite sian patik i, magopo ma hamamate ni Kristus i.
3:1 Oe hamu, halak Galatia, na so marroha i! Ise do mandormai hamu? Ai nunga pola songon na ginombar diida matamuna Jesus Kristus na tarsilang i. 3:2 Sasada on ma naeng botoonku sian hamu: Sian ulaon patik do dijalo hamu Tondi i, manang sian jamita haporseaon i? 3:3 Songon i hape hami maoto! Di bagasan Tondi do pamungkaanna, gabe di bagasan daging ma pangujungina? 3:4 Tung magopo ma panaononmuna na sai godang i (molo tung magopo)! 3:5 Onpe, na patongon Tondi i tu hamu jala mangulahon angka hagogoon di bagasan hamu, na sian ulaon patik do diula i, manang sian jamita haporseaon i? 3:6 Songon di si Abraham: "Dihaporseai do Debata, jadi i do dijujur tu ibana gabe hatigoranna!" 3:7 Asa boto hamu ma: Angka na sian haporseaon, i do anak ni si Abraham. 3:8 Alai diboto Surat i hian, na sian haporseaon i do pintoran ni Debata angka sipelebegu, gabe dibaritahon tu si Abraham: "Marhite sian ho pasupasuon saluhut bangso!" 3:9 Onpe, angka na sian haporseaon i do dipasupasu rap dohot si Abraham na porsea i. 3:10 Ai hona toru do saluhut na naeng marulaon patik, ai na tarsurat do: "Hona bura do ganup, na so mian di bagasan sasude na tarsurat di buku patik i, asa diulahon!" 3:11 Alai tandap do, na so adong dapotan hatigoran di jolo ni Debata, bahenon ni patik i; ai "na mangolu ma partigor i sian haporseaon!" 3:12 Alai ndang sian haporseaon i anggo patik i; ai na mangulahonsa, i do na mangolu bahenon ni i! 3:13 Ditobus Kristus i do hita sian bura ni patik i, di na hona bura Ibana humongkop hita, ai na tarsurat do: "Hona bura do ganup na targantung di hau!" 3:14 Ai di bagasan Kristus Jesus naeng songgop tu halak sipelebegu pasupasu na tu si Abraham, asa marhitehite haporseaon tajalo Tondi na pinarbagabaga i. 3:15 Ale angka dongan, adat ni hita jolma ma ginisanna: Padan testament ni jolma, dung gabe hot, ndang diose, ndang ditambai. 3:16 Anggo angka bagabaga i dihatahon do tu si Abraham dohot tu pinomparna; ndada didok: Dohot tu angka pinomparna, songon tu na deak; tung tu na sada do: "Dohot tu pinomparmi", ninna, i do Kristus. 3:17 Lapatanna: Ia padan testament, naung pinahot ni Debata, ndang tarpasohot patik i, laho manundati bagabaga i; ai opat ratus tolupulu taon do i umpudi ro. 3:18 Ai molo sian patik i uhum paneanon, ndang be sian bagabaga. Alai dibasabasahon Debata do i tu si Abraham dalan bagabaga. 3:19 Tudia ma antong patik i? Ditambahon do i ala ni angka pangalaosion, paima ro Pomparan, Nampuna bagabaga i, jala marhitehite angka surusuruan i dipatongon tu tangan ni Pangulu. 3:20 Alai ndada na patureturehon sambariba ia pangulu; alai sada do anggo Debata. 3:21 Asa mangalo angka bagabaga ni Debata do patik i? Dao ma anggo i! Ai aut dilehon patik na tuk pangoluhon, sian patik i ma tongon hatigoran i. 3:22 Alai dihinsu Surat i do saluhutna tubagasan dosa, asa dilehon bagabaga, na marhitehite haporseaon di Jesus Kristus, tu angka na porsea i. 3:23 Alai tagan so ro haporseaon, tarhurung do hita di bagasan patik jala dihinsu, managam haporseaon, na naeng patandahonon dope. 3:24 Asa gabe songon siparorot do patik i, mamboan hita tu Kristus, asa sian haporseaon hita dipintori. 3:25 Alai dung ro haporseaon i, ndang be ginomgoman ni siparorot i hita. 3:26 Ai saluhut do hamu anak ni Debata marhitehite haporseaon di Kristus Jesus. 3:27 Ai Kristus i do diparuloshon hamu, sude hamu, naung tardidi tubagasan Kristus. 3:28 Ndang mardiaimbar disi Jahudi manang Junani, hatoban manang anak mata, baoa manang parompuan, ai sada do hamu saluhutna di bagasan Kristus Jesus. 3:29 Alai anggo Kristus nampuna hamu, pinompar ni Abraham do hamu, antong, jala panean mangihuthon bagabaga i.
4:1 Alai on do hudok: Saleleng dakdanak dope panean i, ndang dia imbarna dohot anak somang, atik pe ibana nampuna sasudena i. 4:2 Di gomgoman ni angka pangaramoti dohot juara bagas do ibana, ro di tingki naung hian binuhul ni amana i. 4:3 Songon i nang di hita: Di hadakdanakonna i diparhatoban sisiasia ni hasiangan on do hita. 4:4 Alai dung dapot gok ni tingkina, disuru Debata ma Anakna, tubu sian boruboru, ginomgoman ni patik i; 4:5 asa ditobus angka na ginomgoman ni patik i, asa tajalo ruhut paramaon. 4:6 Alai ala anak hamu, disuru Debata do tubagasan rohanta Tondi ni Anakna i, na manjoujou: Abba (ale Amang)! 4:7 Dibahen i, ndang be hatoban ho; tung anak do! Alai molo anak, laos panean do ho marhite sian Debata! 4:8 Alai di na so tinandamuna Debata, dipaolooloi hamu do angka na so Debata hian. 4:9 Alai anggo nuaeng, ditanda hamu do Debata; nunga ditanda Debata hamu tahe. Marhua ma hamu marbalik muse, mulak tu sisiasia angka na so margellok jala na lea, asa oloanmuna angka i muse? 4:10 Gabe siradoti ari, bulan, tingki dohot taon do hamuna. 4:11 Huholsohon do hamu, atik na so marniula halojaonki mangkongkop hamuna. 4:12 Songon ahu ma hamu; ai ahu pe, songon hamu do, angka dongan! Elehelekhu di hamu; ndang adong dihahua hamu ahu. 4:13 Alai diboto hamu do, di bagasan hagaleon ni daging huboan barita na uli tu hamu di mulana. 4:14 Jala di na tarunjun i hamu dibahen pardagingonku, ndang na lea manang hu rohamuna disi; tung songon surusuruan ni Debata do dijangkon hamu ahu, songon Kristus Jesus, i do. 4:15 Onpe, dia ma nuaeng na pinarhatuahonmuna i? Ai huhatindangkon do tu hamu, horukonmuna do uju i matamuna, mangalahonsa tu ahu, aut na tarbahen. 4:16 Asa na gabe musumuna do ahu, ala huhatahon tu hamu hasintongan i? 4:17 Ndada na polin ringgasnasida mangkongkop hamu. Alai naeng paduruonnasida hamu, anggiat ringgas rohamuna mangkongkop nasida. 4:18 Denggan do sandok ringgas ni roha na polin, jala unang ma holan, jumpa di tongatongamuna ahu. 4:19 Hamu angka anakkonku, angka na huae musengani, paima manjadi rupa ni Kristus di bagasan hamu: 4:20 Dipangido rohangku do, aut ma nian di tongatongamuna ahu tongon, jala tarpauneune ahu soarangki, ai na jut do rohangku pasarisari hamu. 4:21 Hamu na giot gomgoman ni patik i, paboa hamu ma tu ahu: Ndang dibege hamu patik i? 4:22 Tarsurat do disi: Dua do anak ni si Abraham, na sada sian hatobanna, na sada nari sian boru mata i. 4:23 Alai mangihuthon sibuk do partubu ni na sian boru hatoban i, alai sian bagabaga i do na sian boru mata i. 4:24 Na marastuan do i: Ai padan na dua i do nasida: Na sada na sian dolok Sinai, na manjadihon parhatobanon, i ma si Hagar. 4:25 Ai di luat Arab do dolok Sinai, jala suman ma i tu Jerusalem nuaeng, ai na mangadop do i rap dohot anakkonna. 4:26 Alai Jerusalem na di ginjang i: I do boru mata i, jala i do ina di hita saluhutna! 4:27 Ai tarsurat do: "Marlas ni roha ma ho na hol, na so mangintubu, mariaia ma ho, marsoara na gogo, na so mangae anak; ai torop do anakkon ni na punjung i, tumorop asa na di na marhamulian." 4:28 Alai anak bagabaga do anggo hamu, angka dongan, mangihuthon si Isak. 4:29 Alai tong do nuaeng songon na hian: Dilele na tubu marguru tu daging do na tubu marguru tu Tondi i. 4:30 Alai aha do didok Surat i? "Pabali ma boru hatoban i rap dohot anakna, ai na so tupa manean anak ni boru hatoban i rap dohot anak ni boru mata i!" 4:31 Onpe, ale angka dongan, ndada anak ni boru hatoban hita, angka anak ni boru mata, i do!
5:1 Asa saut malua hita, umbahen na dipalua Kristus i hita. Hot ma hamu jongjong, antong, jala unang be olo hamu patunduhon ni auga parhatobanon i! 5:2 Sandok ahu, Paulus, mandok tu hamu: Molo pasunathonsa hamu, ndang marguna be Kristus di hamu! 5:3 Huulaki ma mangkatindangkon tu ganup jolma: Na pasunathon, ingkon diulahon sandok patik i! 5:4 Naung sirang do hamu sian Kristus, anggo naeng pintor hamu, bahenon ni ulaon patik; naung peut do hamu sian parasirohaon! 5:5 Ai marhitehite haporseaon di bagasan tondi hita managam hatigoran sihirimon i. 5:6 Ai ndada margogo di Kristus Jesus i, nang hajahudion, nang na so hajahudion; sandok haporseaon siula haholongon i do! 5:7 Na denggan do parlojongmuna najolo; ise mangambat hamu, so mangoloi hasintongan i be? 5:8 Ndada sian na manjou hamu ro pangelaelaon sisongon i. 5:9 Diasomi saotik na asom i do sandok itak na niudi. 5:10 Pos do rohangku di hamu marhitehite Tuhan: Ndada na mimbar rohamuna. Alai manang ise pe na manggaori hamu, porsanon ni i do uhuman na tu ibana! 5:11 Alai aut hujamitahon hajahudion, ale angka dongan, marhua ma ahu lelean? Ai naung mansohot ma antong gasip ni silang i. 5:12 Aut gotap ma nian angka na manggunturi hamu! 5:13 Tu haluaon i hamu dijou, angka dongan; asal unang haluaon i gabe parbonsiran di sibuk; sandok marhitehite haholongon i ma hamu masioloan! 5:14 Ai hagogok ni saluhut patik do hata na sandok on: Haholongi donganmi songon dirim! 5:15 Alai molo masiharatan jala masiallangan hamu, jaga ma hamu, so tung suda hamu na masilengsean! 5:16 Alai on do hudok: Marguru tu Tondi i ma hamu marparange; unang pasaut hamu hisaphisap ni daging! 5:17 Ai na maralohon tondi do sangkapsangkap ni daging, jala maralohon daging i do sinangkap ni tondi: Na masialoan do i, asa unang dipasaut hamu pinangido ni rohamuna. 5:18 Alai molo ditogihon Tondi i hamu, ndang ginomgoman ni patik hamu. 5:19 Alai tandap do parulaon ni daging, i ma parmainanon, hahodaron, pargadombuson, 5:20 hasipelebeguon, hadatuon, parmusumusuon, parbadabadaon, pangiburuon, rimasrimas, pargutugutuon, parsalisian, partahitahion, 5:21 bunubunu, parmabuhon, haormuson jala angka na suman tusi. Naung hupaboa najolo tu hamu, songon i do nang nuaeng: Ndang teanon ni angka na mangulahon sisongon i harajaon ni Debata. 5:22 Alai angka on do parbue ni Tondi: Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon. 5:23 Ndang maralo patik dompak angka sisongon i. 5:24 Alai angka na ginomgoman ni Kristus Jesus, diparsilangkon do dagingna rap dohot angka hisaphisap dohot sangkapsangkap. 5:25 Ia dung dipangolu Tondi i hita, taparangehon ma Tondi i! 5:26 Unang ma taeahi hasangapon na rumar; unang masiasapan manang masilatean!
6:1 Ale angka dongan, molo tung tarsomong jolma mardosa, hamu angka naung taruli di Tondi ma patureturehon ibana marhitehite tondi na lambok; alai matahon dirim, so tung dohot ho tarunjun! 6:2 Masiurupan ma hamu mamorsan angka na dokdok i; i ma dalan mangaradoti patik ni Kristus. 6:3 Ai molo dipaburnang halak dirina, hape so adong di ibana, sipaotooto diri do i. 6:4 Alai ganup ma manangkasi ulaonna be; dung i tu ibana sandiri ma pujipujian, ndada maradophon na asing. 6:5 Alai adong di ganup siporsanonna be! 6:6 Alai na mamodahon hata ni Debata, tama do taruli di nasa parsaulian ni na pinodaanna i. 6:7 Unang hamu lilu; ndang olo Debata leaan! Ai ia i disabur halak, i do gotilonna! 6:8 Ai na manabur tu dagingna, manggotil do sian dagingna hamagoan; alai na manabur tu tondi, manggotil do sian tondi i hangoluan salelenglelengna! 6:9 Alai unang marnaloja hita mambahen na denggan, ai na manggotil do hita muse di tingkina i, anggo so pargale hita nuaeng. 6:10 Antong, binsan sadihari dope, taulahon ma na denggan di saluhut halak, alai gumodang ma tu donganta sahaporseaon! 6:11 Tanda hamu ma balga ni surat ni tanganku! 6:12 Sude na ringkot roha di hasangapon ni pardagingon, manosaknosak hamu pasunathon; asal unang taononna pangaleleon siala silang ni Kristus. 6:13 Ai gari nasida, Jahudi hian, ndang diradoti patik i; alai naeng do hamu tarsunat di rohanasida, asa di puji nasida dirina marhite sian dagingmuna. 6:14 Alai dao ma sian ahu na mamuji diri, anggo so siala silang ni Tuhanta Jesus Kristus! Marhitehite Ibana do tarsilang portibi on di ahu, jala ahu pe, tarsilang do maradophon portibi on. 6:15 Ai manang sian hajahudion dongan manang sian hasipelebeguon, ndang mahua i; ingkon na tinompa na imbaru do! 6:16 Jala dame ma dohot asi ni roha tu saluhut na mamarangehon ruhut sisongon i, nang tu Israel ni Debata! 6:17 Dungkon ni i, unang ma pola disusai agia ise ahu, ai hupaboanboan do angka tanda ni bugang ni Jesus di dagingku. 6:18 Didongani asi ni roha ni Tuhanta Jesus Kristus ma tondimuna, ale angka dongan! Amen.
1:1 Ahu surat tinongos ni Paulus, apostel ni Kristus Jesus, sian lomo ni roha ni Debata, mandapothon angka na badia na di Epesus, angka na porsea di Kristus Jesus: 1:2 Asi ni roha ma di hamu dohot dame sian Debata Amanta, nang sian Tuhan Jesus Kristus i! 1:3 Pinuji ma Debata, Ama ni Tuhanta Jesus Kristus, naung umpasupasuhon tu hita ragam ni pasupasu partondion sian banua ginjang, di bagasan Kristus. 1:4 Ai dipillit do hita di bagasan Ibana, andorang so ojak dope tano on, asa badia hita jala so hasurahan di adopanna i, di bagasan holong ni roha. 1:5 Ditodo hian do hita bahen anakna, marhitehite Jesus Kristus, asa tu Ibana, mangihuthon halomoan ni rohana, 1:6 asa tarpuji asi ni rohana na marmulia i, na niasihonna tu hita di bagasan na Hinaholonganna i. 1:7 Di bagasan Ibana dapot hita haluaon i, binahen ni mudarna i, i ma hasesaan ni angka pangalaosion, mangihuthon asi ni rohana na tarlobi i, 1:8 naung buas niusehonna i tu hita mardongan hapistaran dohot habisuhon godang. 1:9 Ai dipabotohon Ibana do tu hita tahi ni rohana, na buni hian mangihuthon halolomona, naung pinahotna i di bagasan dirina, 1:10 laho pasauthonsa di hagogok ni tingkina, mandok: Pasadahon di bagasan Kristus i sasudena, na di banua ginjang dohot na diatas tano on. 1:11 Ai di bagasan Ibana do dapotan partalian hita, angka naung tinodona hian, marguru tu tahi ni na patulushon sasude, mangihuthon pandok ni rohana, 1:12 asa tarpuji hasangaponna marhitehite hita, angka naung mangkirim hian di Kristus i. 1:13 Di bagasan Ibana dohot hamu umbege hata hasintongan i, i ma barita na uli na taringot tu haluaonmuna, jala di bagasan Ibana gabe porsea hamu, laos disahaphon do tu hamu Tondi Parbadia na pinarbagabaga i. 1:14 Ibana do patujolo ni arta siteanonta, bahen haluaon ni na hinophopna i, asa tarpuji hasangaponna i. 1:15 Asa ahu pe, dung hubege, naung porsea hamu di Tuhan Jesus jala holong rohamuna di saluhut angka na badia, 1:16 ndang mansadi ahu mandok mauliate siala hamu, marningot hamu, di na martangiang ahu: 1:17 Anggiat dilehon Debata ni Tuhanta Jesus Kristus, Ama ni hasangapon i, tu hamu Tondi hapistaran dohot pangungkapon mananda Ibana. 1:18 Dipatiur ma mata ni rohamuna, asa diboto hamu rumang ni arta sihirimon sian panjouonna i ro di surung ni hasangapon, siteanon ni angka na badia i. 1:19 Asa ditanda hamu nang hagogok ni gogona na sumurung i na tu hita, angka na porsea sian pangkorhon ni hagogoonna na marmulia i. 1:20 Ai di Kristus do i diulahon Debata, di na pinahehena i Ibana sian na mate jala pinahundulna i tu siamunna di bagasan banua ginjang i, 1:21 tu ginjang ni nasa harajaon dohot huaso, nang hagogoon dohot hamuliaon, nang tu ginjang ni nasa goar na tarhatahon, ndada holan di hasiangan on, dohot do di na ro sogot. 1:22 Saluhutna do dipatunduk tutoru ni patna, jala dipabangkit do Ibana, na mangatasi sasude, gabe ulu ni huria i. 1:23 I do pamatangna na manggohi Ibana, asa gohanna sasude di bagasan saluhutna.
2:1 Hamu pe, nunga mate hamu najolo hinorhon ni angka pangalaosion dohot dosamuna, 2:2 angka na niulahonmuna marguru tu tingki ni hasiangan on, mangihuthon lomolomo ni na marhuaso di aoangaoang, i ma tondi na mangula nuaeng di bagasan angka anak na so siat hata. 2:3 Raphon nasida do nang hita sasudena najolo mangulahon angka hisaphisap ni dagingta, di na taturut lomolomo ni daging i ro di sangkapsangkapna, jadi anak sirimasan do hita sian bangko hian, doshon angka na asing. 2:4 Alai anggo Debata parasiroha bolon do jala parholongroha na balga maradophon hita. 2:5 Jala raphon Kristus do dipangolu Ibana hita, angka naung mate di bagasan angka pangalaosion; na sian asi ni roha do, umbahen na malua hamu! 2:6 Gabe rap dipangolu jala rap dipabangkit hita tu gomgoman banua ginjang, di bagasan Kristus Jesus. 2:7 Laos patuduhononna do di angka tingki na naeng ro dope surung ni hamoraon ni asi ni rohana, di habasaonna i maradophon hita, di bagasan Kristus Jesus. 2:8 Ai sian asi ni roha do, umbahen na malua hamu, dalan haporseaon; jala ndada binahenmuna, silehonlehon ni Debata do. 2:9 Nda tung sian parulaon i, asa unang adong na mamuji diri. 2:10 Ai jadijadianna do hita, angka na tinompa di bagasan Kristus Jesus, asa marulaon na denggan hita; ai angka i do dipature Debata hian, asa taparangehon i. 2:11 Dibahen i, hamu sipelebegu hian, na targoar na so parsunaton, digoar angka na somal didok parsunaton na pinatupa ni tangan di sibuk i; ingot hamu ma; 2:12 Ndang parjambar di Kristus hamu uju i; dibalian ni harajaon Israel do hamu, jala ndang taruli di angka parpadanan bagabaga; soada sihirimon jala soada Debata di hamu di tano on. 2:13 Alai anggo nuaeng, di bagasan Kristus Jesus do hamu; jala dao pe hamu najolo, gabe dipajonok mudar ni Kristus i do hamu nuaeng. 2:14 Ai Ibana do pardameanta, dung dipasada na dua i jala ditangtangi dorpi parholangan i, i ma hamusuon i. 2:15 Ai di bagasan dagingna do diloha Ibana patik i, i ma angka tona dohot aturan, asa ditompa di bagasan dirina na dua i, gabe sada jolma na imbaru, pajongjong dame. 2:16 Jala dipadenggan do na dua i di bagasan daging na sasada i tu Debata, binahen ni silang i; ai disi do dipusa Ibana hamusuon i. 2:17 Dung i ro ma Ibana, mamaritahon dame di hamu angka na dao, dame nang di angka na donok. 2:18 Ai marhite Ibana adong do dalan manopot Ama i di hita na dua ragam i, di bagasan sada Tondi. 2:19 Asa ndada be angka paisolat manang panginsua hamu; angka dongan saharajaon raphon angka na badia do, jala dongan sabagas ni Debata. 2:20 Ai dipauliuli do hamu diatas ojahan ni angka apostel dohot panurirang; Kristus Jesus sandiri do batu parsuhisuhi disi. 2:21 Di bagasan Ibana do martomu sandok bagas i jala lam ganda, gabe joro na badia di bagasan Tuhan i. 2:22 Di bagasan Ibana do nang hamu rap dipauliuli, gabe parmianan ni Debata di bagasan Tondi i.
3:1 Ala ni i do ahu, Paulus, niihot ni Kristus, ala hamu angka sipelebegu. 3:2 Molo tung dibege hamu tohonan mangaradoti asi ni roha ni Debata, na pinasahatna i tu ahu, patureturehon hamu. 3:3 Ai sian pangungkapon do dipabotohon tu ahu hahomion, na hutaringoti nangkiningan. 3:4 Laho manjaha i, dapot timbangonmuna pangantusingku di hahomion ni Kristus i. 3:5 Ndang dipabotohon dope i tu angka anak ni jolma di angka sundut najolo, alai nunga dipapatar i nuaeng tu angka apostelna na badia i dohot tu angka panurirangna, di bagasan Tondi i: 3:6 Paboa, dohot do halak parbegu gabe dongan panean jala dongan sadaging dohot dongan satohap di bagabaga, na di bagasan Kristus Jesus, marhite sian barita na uli i. 3:7 Naung gabe parhalado ni i do ahu, sian pangalehon ni Debata di asi ni rohana, na tu ahu sian pangkorhon ni hagogoonna i. 3:8 Tu ahu, na ummetmet sian saluhut angka na badia i, dilehon asi ni roha on: Mamaritahon tu angka sipelebegu hamoraon ni Kristus na so hadodoan i; 3:9 jala patorangkon pangalaho ni tohonan di hahomion i, na buni sian mula ni mulana di bagasan Debata, Sitompa saluhut. 3:10 Naeng ma marhite sian huria i dipatandahon godang ni ragam ni hapistaran ni Debata tu angka na marmulia jala marhuaso di banua ginjang i. 3:11 I do ditahi sian mula ni mulana, gabe dipasaut di bagasan Kristus Jesus, Tuhanta i. 3:12 Marhitehite Ibana dapot hita hiras ni roha dohot dalan masuk, di bagasan roha na pos, na mangkaporseai Ibana. 3:13 Dibahen i mangido ahu, asa unang mandele hamu mida haporsuhonku, angka na humongkop hamu, ai hasangaponmuna do i. 3:14 Ala ni i, hulompit do tothu maradophon Ama i. 3:15 Ibana do haroroan ni nasa bangso, na targoar di banua ginjang nang di tano on. 3:16 Anggiat, hombar tu godang ni hasangaponna i, dilehon tu hamu jolma parbagasan, sipargogoan jala sipatoguon marhitehite Tondina, 3:17 asa maringanan Kristus i marhitehite haporseaon di bagasan rohamuna, gabe hot hamu marurat jala marojahan di bagasan roha na holong. 3:18 Naeng ma malo hamu mangantusi, rap dohot saluhut angka na badia i, ganjangna dohot bidangna, bagasna dohot timbona, 3:19 laho tumanda holong ni roha ni Kristus, na mangatasi nasa pangantusion, asa sahat tu hamu sandok hagogok ni Debata! 3:20 Alai tarpatupa Ibana do andul lumobi sian na tapangido manang tapingkiri, hombar tu hagogoon na mangkorhon di bagasan hita. 3:21 Di Ibana ma hasangapon di tongatonga ni huria i jala di bagasan Kristus Jesus ro di saluhut sundut salelenglelengna! Amen.
4:1 Asa ahu na tarihot di bagasan Tuhan i, huapoi ma hamu: Parangehon hamu ma na tama, hombar tu panjouon naung songgop tu hamu! 4:2 Martoruk ni roha situtu, marlambok jala marlambas ni roha, masihaehean di bagasan roha na holong! 4:3 Haringgashon hamu ma mangaradoti hasadaon ni Tondi, pinadomu ni dame! 4:4 Ai sada do daging i, jala sada do Tondi; ai songon i do hamu tarjou di bagasan sada pangkirimon di panjouon i. 4:5 Sada do Tuhan, sada do haporseaon, sada do nang pandidion. 4:6 Sada do Debata, Ama ni sasude, sigomgomi saluhut, sitorusi saluhut jala siingani saluhut. 4:7 Alai tu ganup hita be do dibasabasahon asiasi i, marguru tu panagihon ni pangalehon ni Kristus. 4:8 Dibahen i ninna do: "Nunga manaek Ibana tu ginjang, ditaban do na tarhurung; dilehon do silehonlehon tu angka jolma!" 4:9 Alai nangkok pe Ibana, naung tuat do Ibana jumolo tu inganan na ditoru ni tano. 4:10 Ibana, naung tuat i, laos I do na manaek tu ginjang ni saluhut banua ginjang, asa digohi sasude. 4:11 Laos Ibana do mangalehon deba gabe apostel, deba panurirang, deba evangelist, deba muse parmahan jala pangajari, 4:12 patureturehon angka na badia i, laho mangulahon tohonan i, pauliulihon daging ni Kristus: 4:13 Paima sahat hita saluhut tu hasadaon ni haporseaon nang parbinotoan di Anak ni Debata, gabe jolma na tang jala matoras situtu, mangihuthon hagogok ni rimpas ni Kristus. 4:14 Asa unang be hita dakdanak, angka na pinalindaklindak jala na pinamboanboan ni pangombus ni ragam ni poda, binahen ni pangaliluhon ni jolma dohot angkal na paotootohon. 4:15 Gabe parhasintongan hita tahe di bagasan haholongon i, jala lam magodang ma hita di na saluhut, mangeahi Ibana, Ulu i, i ma Kristus. 4:16 Sian Ibana do sandok daging i dipadomu jala martomu, tiniop ni sude uraturat pangurupi, gabe lam magodang daging i mangihuthon pangulaon ni ganup ruas di bagianna be, pinauliuli di bagasan haholongon i. 4:17 Asa on do na hudok jala huhatindangkon marhitehite Tuhan: Na so tupa be hamu marpangalaho songon halak sipelebegu, na marrohahon na so marguna. 4:18 Angka parroha haholomon do nasida, angka na holang sian ngolu ni Debata, binahen ni haotoon ni rohanasida, ala naung gabe pir rohanasida. 4:19 Ndang marnangon nasida, gabe dipasahat dirina tu pargadombuson, jala diulahon nasa harorangon mardongan pangahution. 4:20 Alai anggo hamu, ndang songon i diguruhon hamu Kristus i, 4:21 namun dibege hamu baritana jala dapotan poda sian Ibana, i ma hasintongan di bagasan Jesus: 4:22 Tanggali hamu ma jolma na buruk i, isara di pangalaho najolo, ai laho mago do i hinorhon ni angka hisaphisap sipaotooto. 4:23 Alai paimbaru hamu ma dirimuna di bagasan tondi ni rohamuna! 4:24 Jala solukkon hamu ma jolma na imbaru, na tinompa suman tu Debata, di bagasan hatigoran dohot hapolinon na marhasintongan! 4:25 Dibahen i, bolongkon hamu gabus i; hatahon hamu ma na sintong, ganup tu donganna, ai ruas do hita sama hita. 4:26 Ia tarrimas hamu, unang ma mardosa! Unang ma sanga mate mata ni ari, so mintop rimasmuna. 4:27 Unang pasiat hamu sibolis i! 4:28 Naung manangko i, unang be manangko; mulaulaon ma ibana, tanganna i ma sumarihon ngoluna, asa adong lehononna tu na hurangan. 4:29 Unang ma ruar hata na busuk sian pamanganmuna; naeng ma na denggan na tau padengganhon na humurang, asa dapotan uli na umbegesa. 4:30 Jala unang ma arsahi hamu Tondi Parbadia ni Debata, naung disahaphon tu hamu tu ari haluaon i. 4:31 Dao ma sian hamu nasa riting ni roha dohot muruk dohot rimas, nang hata songgaksonggak dohot insahinsak, songon i nasa hajahaton! 4:32 Alai gabe na basar ma hamu sama hamu, angka parasiroha; masisesaan dosa ma hamu, songon panesa ni Debata di dosamuna di bagasan Kristus.
5:1 Onpe, sitiru Debata ma hamu, songon angka anak na hinaholongan! 5:2 Jala parangehon hamu ma haholongon i songon Kristus i, na mangkaholongi hamu jala dilehon do dirina humongkop hita, gabe silua jala pelean bahen uap na hushus tu Debata. 5:3 Alai parmainanon dohot ragam ni harorangon ro di pangahution, unang ma targoar di hamu; ai songon i do tama di angka na badia. 5:4 Songon i nasa sihailahononhon, hata barangsi dohot pargaitgaiton na so patut; alai mauliate ma nian dohonon. 5:5 Ai boto jala ingot hamu ma: Anggo di harajaon ni Kristus dohot Debata, ndang adong siteanon ni parmainan manang parhodar, manang parroha na ahut; ai sioloi na so Debata do i. 5:6 Unang olo hamu paotootoon ni hatahata na rumar; ai ala ni angka i do mangonai rimas ni Debata tu angka anak na so mangoloi. 5:7 Dibahen i, unang ma hamu gabe dongan satohapnasida! 5:8 Ai na holom do hamu najolo; alai tiur do anggo nuaeng di bagasan Tuhan i: Marparange ma hamu, songon angka anak hatiuron! 5:9 Ai nasa habasaon dohot hatigoran dohot hasintongan, i do parbue ni na tiur i. 5:10 Tangkasi hamu ma, manang dia lomo ni roha ni Tuhan i! 5:11 Unang ma saor hamu tu angka ulaon haholomon na soada parbuena; pinsangi hamu angka i tagonan! 5:12 Ai gari manaringoti na niulanasida di na buni, gari hailaon do. 5:13 Alai gabe patar do i saluhutna, tinoruan ni na tiur i; ai nasa naung dipapatar, tiur ma i! 5:14 Dibahen i, ninna do: "Tarsunggul ma ho na tarpodom, jala hehe ma sian angka na mate; gabe sondangan ni Kristus ma ho!" 5:15 Antong, manat ma hamu mamereng manangkasi parulaonmuna; songon angka na marroha, unang ma songon angka na hurang roha! 5:16 Parhaseang hamu ma tingki, ai ari hasusaan do nuaeng. 5:17 Dibahen i, unang ma gabe maoto hamu; alai antusi hamu ma, manang dia lomo ni roha ni Tuhan i. 5:18 Unang ma mabuk hamu bahenon ni anggur, ai hamagoan do di bagasan i; alai gok Tondi ma hamu! 5:19 Hatahon hamu ma sama hamu angka ende psalmen, angka ende pujipujian dohot ende partondion; endehon jala puji hamu ma Tuhan i di bagasan rohamuna! 5:20 Manongtong ma hamu mandok mauliate siala saluhutna tu Debata Ama, di bagasan Goar ni Tuhanta Jesus Kristus! 5:21 Masioloan ma hamu sian biar ni rohamuna mida Kristus! 5:22 Dioloi angka parompuan ma baoana be, songon pangoloi di Tuhan! 5:23 Ai baoa i do ulu ni pardihutana, songon Kristus ulu ni huria i; laos Sipangolu daging i do Ibana. 5:24 Alai songon pangoloion ni huria di Kristus i, songon i ma angka parompuan maradophon baoana be di na saluhutna. 5:25 Hamu angka baoa, haholongi hamu ma pardihutamuna be songon Kristus, na mangkaholongi huria i jala dilehon do dirina humongkopsa; 5:26 asa diparbadiai, dung diiasi marhitehite na mandidihon aek di bagasan Hata i. 5:27 Jala sangap do dipadiri di Ibana huria i, so marlindang, so marhalingking, manang marhahurangan dia pe, asa badia tahe jala so hasurahan. 5:28 Songon i do patut haholongan ni angka baoa pardihutana be, songon dagingna sandiri. Na mangkaholongi pardihutana, dirina do hinaholonganna disi. 5:29 Ndang dung dihosomi jolma dagingna, diparmudumudu do jala dipainuinu, songon pambahen ni Kristus tu huria i. 5:30 Ai ruas ni dagingna do hita. 5:31 "Ala ni i, tadingkonon ni halak do amana dohot inana, mangangkupi dongan saripena; jala gabe sada daging do nasida na dua i!" 5:32 Tung na balga do hahomion on; alai tu Kristus dohot tu huria i huhonahon. 5:33 Alai sandok ganup hamu, masihaholongi pardihutana be songon dirina; alai dihabiari parompuan i ma baoana!
6:1 Hamu angka anak, oloi hamu ma angka natuatuamuna di bagasan Tuhan i; ai i do na tigor. 6:2 "Parsangapi amangmu dohot inangmu!" I do patik na parjolo mardongan bagabaga: 6:3 "Asa martua ho jala leleng mangolu di tano on!" 6:4 Hamu angka ama, unang gintali hamu angka anakkonmuna; pagodanggodang hamu ma nasida di bagasan ajar dohot poda ni Tuhan i! 6:5 Hamu angka anak somang, oloi hamu ma angka indukmuna di hasiangan on mardongan biar dohot lomos ni roha; marroha na bulus songon na maradophon Kristus! 6:6 Unang hamu pangoloi di mata, songon na mambuat roha ni jolma; songon naposo ni Kristus ma ulahon hamu roha ni Debata, sian nasa rohamuna. 6:7 Sian burjumuna ma hamu mangoloi: Songon di Tuhan i, unang di jolma i! 6:8 Ai diboto hamu do: Sumuang jaloon ni ganup sian Tuhan i na denggan na niulana, manang hatoban ibana manang anak mata. 6:9 Hamu angka induk pe, laos songon i ma bahen hamu tu nasida; antahi hamu ma na mangasupi i, ai diboto hamu do, di banua ginjang do nang Tuhanmuna, jala ndada siida bohi Ibana. 6:10 Dungkon ni i, gabe togu ma rohamuna di bagasan Tuhan i dohot di bagasan hagogoonna na togu i! 6:11 Solukkon hamu ma pangkean sinjata na sian Debata, asa taralo hamu utiutian ni sibolis i. 6:12 Ai ndada marungkil hita mangalo mudar dohot sibuk, angka harajaon do, angka parhuaso, angka sigomgomi hasiangan haholomon on, angka tondi hajahaton na di ginjang i. 6:13 Dibahen i, jalo hamu ma pangkean sinjata na sian Debata, asa tarbahen hamu mangalo di ari na jahat i, jala hot jongjong, dung dipatunduk hamu sasude. 6:14 Antong, jongjong ma hamu, marhohoshon hasintongan di gontingmuna, angka naung manolukkon bajubaju partahanan, i ma hatigoran i. 6:15 Marsipatu ma patmuna, laho mangkaringgashon barita na uli, pardamean i. 6:16 Angkup ni sudena i, jalo hamu ma lombulombu haporseaon i; haintopan hamu do marhite sian i sude sumbia api ni parjahat i. 6:17 Jangkon hamu ma nang tahuluk haluaon dohot podang ni tondi, i ma hata ni Debata. 6:18 Martangiang ma hamu, mardongan sandok pangidoan dohot elehelek di bagasan Tondi, manang sadihari pe, huhut dungo jala jugul tongtong, tumangiangkon saluhut angka na badia, 6:19 nang ahu pe, asa dibungka pamanganku, mandok sidohononku, laho pabotohon hahomion ni barita na uli, mardongan hiras ni roha. 6:20 Ai tusi do disuru ahu na tarrante on, asa marhiras ni roha ahu disi, mangkatahonsa songon na tama. 6:21 Alai paboaon ni si Tikikus do tu hamu saluhutna i, asa diboto hamu na masa di ahu, ro di ulaonku; ai ibana do dongan na hinaholongan jala parhobas haposan di bagasan Tuhan i. 6:22 Ala ni i do husuru ibana mandapothon hamu, asa dapot botoonmuna na masa di hami, jala asa diapuli rohamuna. 6:23 Dame ma di angka dongan, dohot holong ni roha raphon haporseaon sian Debata Ama i, nang sian Tuhan Jesus Kristus i! 6:24 Asi ni roha i ma mandongani saluhut, angka na marsihohot mangkaholongi Tuhanta Jesus Kristus!
1:1 Ahu surat, tinongos ni si Paulus dohot si Timoteus, angka naposo ni Kristus Jesus, mandapothon saluhut angka na badia di bagasan Kristus Jesus, angka na di Pilippi, raphon angka sintua dohot pangurupi: 1:2 Asi ni roha ma di hamu dohot dame sian Debata Amanta dohot sian Tuhan Jesus Kristus! 1:3 Mauliate hudok tu Debatangku, ganup huingot hamu. 1:4 Tongtong manang sadihari pe hutangiangkon hamu sudena; sian las ni rohangku do huula tangiangki. 1:5 Ai huingot saormuna tu barita na uli sian mulana i sahat ro di nuaeng. 1:6 Apala on ma pos ni rohangku: Naung umpungka ulaon na denggan di bagasan hamu, patuluson ni I do i, sahat ro di ari ni Kristus Jesus. 1:7 Tama do songon i rohangku mida hamuna sude, ala na di bagasan rohangku hamuna. Ai rap partohap di asi ni roha na tu ahu i do hamu saluhutna, di na tarhurung i ahu, nang di na hutariashon jala huondolhon barita na uli i. 1:8 Ai Debata do saksingku di balga ni siholhu mida hamu sude, mangihuthon pangasii ni Kristus Jesus. 1:9 Jala on do hupangido, naeng ma lam sumurung holong ni rohamuna, marurat di parbinotoan dohot di nasa panimbangon partondion, 1:10 laho manangkasi na rumingkot i, asa polin hamu, so partuktuhan, sahat ro di ari ni Kristus, 1:11 asa ramos hamu marparbue hatigoran marhitehite Jesus Kristus, bahen hasangapon jala pujipujian di Debata. 1:12 Alai dipangido rohangku, ale angka dongan, naeng ma botoonmuna: Lam manumpak tu barita na uli do na masa di ahu: 1:13 Pola naung gabe barita ni Kristus do angka rantengku tu sandok pangisi ni tangsi i, nang humaliang. 1:14 Gabe dapotan pos ni roha do tumorop dongan na di bagasan Tuhan i binahen ni rantengki, gabe lam barani ma mangkatahon hata ni Debata, so pola mabiar. 1:15 Deba tutu mangkatindangkon Kristus marroha latelate dohot badabada, alai deba sian denggan ni roha. 1:16 Nionjar ni holong ni roha ma angka i, ala diboto, manariashon barita na uli do, umbahen na tarhurung i ahu. 1:17 Alai na asing i manjamitahon Kristus sian roha na marbada, ndada mamolin; dihirim, tambaannasida do haporsuhon tu ahu na tarrante. 1:18 Asa beha do? Asal ma dijamitahon Kristus, manang beha pe pangalahona; manang marroha di bagasan, manang marroha na sintong. Las do rohangku disi, nang nuaeng, nang tu jolo on. 1:19 Ai huboto, manumpak do i tu ahu gabe hatuaonku, horhonon ni tangiangmuna dohot pangurupion ni Tondi ni Jesus Kristus. 1:20 Ai i do na huhalungunhon jala huhirim, sandok na so tarila ahu: Tung mardongan nasa hiras ni roha, songon nasailaon, songon i nang nuaeng, marsangap Kristus marhite sian dagingku, mangolu manang mate pe ahu. 1:21 Ai Kristus do hangoluan di ahu, jala laba nang hamatean. 1:22 Alai anggo marparbue ulaonki hinorhon ni ngolu ni daging on, gabe ndang huboto, manang dia pillitonku. 1:23 Duansa do manosak ahu: Malungun do ahu borhat, asa rap dohot Kristus; ai dumenggan situtu do i. 1:24 Alai rumingkot do mian di bagasan daging ala ni hamu! 1:25 Jala mangkaposi i, huboto ma: Mian do ahu jala tinggal rap dohot hamu sude, laho patimbul jala pahinsa haporseaonmuna, 1:26 asa lam sumurung pamujimuna di Kristus Jesus marhite sian ahu, di na ro ahu muse tu hamu. 1:27 Asal tu barita na uli ni Kristus ma pahombar hamu parsaoranmuna, asa huida di hamu, di na ro i ahu, manang hubege taringot tu hamu, tagan padaodao dope, paboa na hot hamu jongjong di bagasan hasadaon ni tondi jala rap marungkil, marsada ni roha mangkaporseai barita na uli. 1:28 Tung unang ma olo hamu pambibiaran ni angka alo di agia aha pe; tanda ni hamagoanna ma i di nasida, alai di hamu tanda ni haluaon do, jala sian Debata do i. 1:29 Ai pola diasinirohahon tu hamu, marsitaonon humongkop Kristus, ndada holan na mangkaporseai Ibana. 1:30 Jala di hamu do nuaeng parungkilon, naung niidamuna di ahu najolo, jala na binegemuna nuaeng taringot tu ahu.
2:1 Molo tung adong apoapo marhitehite Kristus, dohot sosososo holong ni roha dohot parsaoran ni tondi, nang talup dohot asi ni roha, 2:2 gohi hamu ma halalas ni rohangkon: Sada ma parrohahon hamu; sada ma haholonganmuna; saroha, sapingkiran ma hamu! 2:3 Unang ma mardingkandingkan manang marhasangapon na rumar; alai sian toruk ni rohamuna be ma rajumi hamu donganmuna sumurung sian dirimuna! 2:4 Unang ma na ringkot di hamu be matahon hamu, dohot ma na di dongan! 2:5 Songon parrohaon ni Kristus Jesus ma parrohaonmuna! 2:6 Atik pe rupa ni Debata di Ibana, ndada songon na nidobo dirajumi rohana tudosna i tu Debata. 2:7 Dirumari do dirina jala disolukkon rupa ni hatoban, gabe suman tu jolma do Ibana jala rumang jolma dapot di Ibana. 2:8 Dipatutoru do dirina; na gabe pangoloi do Ibana paima mate, pola tung mate tarsilang! 2:9 Ala ni i do dipatimbo Debata Ibana jala dibasabasahon tu Ibana Goar na sumurung asa nasa goar, 2:10 asa somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano, 2:11 jala asa nasa na marsoara marhatopothon: Jesus Kristus do Tuhan, bahen hasangapon ni Debata Ama! 2:12 Onpe, hamu, na hinaholongan, songon tongtong ni pangoloionmuna nasailaon, unang holan jumpa di hamuna ahu, lam songon i ma, di na padaodao ahu: Mardongan biar dohot lomos ni roha ulahon hamu ma haluaonmuna! 2:13 Ai diula Debata do di bagasan hamu giot ni roha nang ulaon saut, mangihuthon lomo ni rohana. 2:14 Di nasa pambahenanmuna: Unang ma hamu marungutungut, unang ma marroha ganggu! 2:15 Naeng ma so hasurahan jala so marlaok hamu, angka anak ni Debata, angka na so marlindang di tongatonga ni sundut na geduk jala na marbalik; disi ma hamu marsinondang songon sisondangi portibi on! 2:16 Marsitiopan ma hamu tu hata hangoluan i, bahen pujipujian di ahu di ari ni Kristus, paboa na so magopo parlojongonku, jala ndada na so marguna halojaonku. 2:17 Ai nang pe didurushon mudarhu songon pelean mangkongkop haporseaonmuna, marlas ni roha do ahu rap dohot hamu saluhutna. 2:18 Laos i ma halashon hamu, jala marlas ni roha ma hamu rap dohot ahu! 2:19 Alai hirim do rohangku marhitehite Tuhan Jesus, tibu ma suruonku si Timoteus manopot hamu, anggiat marhiras ni roha nang ahu, anggo dung huboto na masa di hamu. 2:20 Ai ndang adong be donganku sisaroha, na olo sumarihon hamu sian roha na burju. 2:21 Ai na ringkot tu dirina be do dijalahi ndada na tu Kristus Jesus i. 2:22 Alai diboto hamu do hatauonna i, ai songon anak tu amana pangkobasionna di ahu, humongkop barita na uli i. 2:23 Hirim do rohangku, tarsuru ahu do ibana, disi huboto, manang beha langkangku. 2:24 Alai pos do rohangku di bagasan Tuhan i, tibu ma nang ahu ro. 2:25 Alai ninna rohangku do, patut suruonku manopot hamu dongan i, si Epaproditus, donganku mangula jala marungkil, na sinurumuna mamboan na ringkot di ahu. 2:26 Ai masihol do ibana mida hamu saluhutna, jala humasusa rohana, ala tarbortik tu hamu sahitna i. 2:27 Jala tutu do ibana marsahit, pola mate ne: Alai asi do roha ni Debata mida ibana, ndada holan di ibana tahe, tung na dohot do di ahu, unang mardapotdapot arsak ni rohangku. 2:28 Muba ma antong ringkot ni rohangku marsuru ibana, asa marlas ni roha hamu marnida ibana, palumbang nang rohangku huhut. 2:29 Onpe, marlas ni roha situtu ma jangkon hamu ibana di bagasan Tuhan i, jala parhamaol hamu ma angka na songon i! 2:30 Ai humongkop ulaon ni Kristus i sor mate ibana, jala diseahon do hosana, laho manggohi na hurang dope sian hamu, mangkobasi di ahu.
3:1 Angkup ni i, ale angka donganku, las ma rohamuna di bagasan Tuhan i! Ndang dokdok rohangku, manurathon jumotjot i tu hamu; jala patoguhon rohamuna do i. 3:2 Bereng hamu angka biang; bereng hamu angka pangula na jahat; bereng hamu parsunaton na torbang! 3:3 Ai hita do targoar parsunaton, angka parsomba di bagasan Tondi ni Debata, angka siasahon Kristus Jesus, angka na so marpos ni roha di daging i. 3:4 Adong do nian nang di ahu sipangasahononhon di daging. Ai molo dirimpu deba, adong sipangasahononna di pardagingon, nda lam ahu ma nian! 3:5 Tarsunat di ari paualuhon do ahu, na sian bangso Israel marga Benjamin, halak Heber, tubu ni halak Heber, halak Parise mangihuthon patik i. 3:6 Garang do rohangku mangalele huria i, so hasurahan di hatigoran na sian patik. 3:7 Alai naung paruntungan hian di ahu, harugian do i hujujur ala ni Kristus i. 3:8 Saluhutna do tahe huetong harugian tumimbangkon hamuliaon ni panandaon di Kristus Jesus, Tuhanki. Ala Ibana huseangkon saluhutna i, jala orbuhorbuk do i huetong, asa huomo Kristus, 3:9 asa di bagasan Ibana ahu didapot, unang ma marhatigoran sian patik, tung sian haporseaon di Kristus do, i ma hatigoran na sian Debata, na marojahan di haporseaon, 3:10 asa hutanda Ibana dohot hagogoon ni haheheonna i, ro di hasasaor tu angka haporsuhonna, di na gabe sapangalaho ahu dohot Ibana di hamamatena i; 3:11 anggiat sahat ahu tu haheheon na sian angka na mate! 3:12 Apala naung sanga hutangkup i manang naung gabe sun denggan; alai sai hueaki do, anggiat tartangkup ahu i, songon naung tinangkup ni Kristus Jesus i ahu. 3:13 Ale angka dongan, ndang hurajumi diringku, naung sun hutangkup i. 3:14 On do tahe: Huhalupahon na di pudingku, hueaki angka na di jolo. Dompak pandang i do hupuspus, dompak upa hamonangan na sian panjouon ni Debata sian ginjang, di bagasan Kristus Jesus i. 3:15 Manang piga hita naung rimpas, i ma taparrohahon! Jala molo asing pingkiranmuna taringot tu manang aha, nang i pe, papataron ni Debata do tu hamu. 3:16 Asal ma tatiop, intap naung sahat tu hita! 3:17 Rap sitiru ahu ma hamu, ale angka dongan; jala pamanat hamu ma angka na marparange songon hami, sitiruonmuna! 3:18 Ai songon naung jotjot hudok tu hamu, jala anggo nuaeng mardongan ilu do hudok: Torop do marpangalaho, gabe musu ni silang ni Kristus. 3:19 Hamagoan do ujungnasida, butuhanasida do dipardebata, sihailahononna dihasangaphon, angka na di tano on diparrohahon. 3:20 Ai di banua ginjang do sambulonta; sian i do tapaimaima Sipangolu hita, Tuhan Jesus Kristus i. 3:21 Paubaonna do dagingta na lea on, gabe doshon dagingna na sangap i, hombar tu hagogoonna i, ai tarpatunduksa do saluhutna tu Ibana.
4:1 Onpe, hamu angka donganku na hinaholongan jala na hinasiholan, halasan ni rohangku jala tumpalhu; songon i ma marsihohot hamu di bagasan Tuhan i; hamu angka haholongan! 4:2 Hamu, Euodia dohot Sintike, huapoi ma hamu, asa marsada ni roha di bagasan Tuhan i. 4:3 Huelehelek ma dohot ho, ale Sunsugos na bontor, urupi ma nasida, angka naung mandongani ahu marungkil humongkop barita na uli, raphon si Klemen dohot donganki saulaon na deba nari; di buku hangoluan i do goarnasida. 4:4 Marlas ni roha ma hamu tongtong di bagasan Tuhan i! Huulaki ma mandok: Marlas ni roha ma hamu! 4:5 Pabotohon hamu ma habasaronmuna tu saluhut halak! Donok do Tuhan i! 4:6 Unang holsohon hamu agia aha; alai sandok pabotohon hamu ma tu Debata pangidoanmuna marhitehite tangiang dohot elehelek mardongan mauliate! 4:7 Jala dame ni Debata na sumurung sian saluhut roha, i ma mangaramoti angka ateate dohot pingkiranmuna di bagasan Kristus Jesus! 4:8 Angkup ni i, ale angka dongan, pingkiri hamu ma nasa parange na sintong, na daulat, na tigor, na bontor, na uli, na denggan begeon ro di sude na targoar haburjuon, na tau pujipujian! 4:9 Ulahon hamu ma na ginuruhonmuna, na jinalo, na binege jala na niidamuna di ahu; dung i donganan ni Debata Sipardame i ma hamuna. 4:10 Alai tarhilas situtu do rohangku di bagasan Tuhan i, ala mangulahi tarida rohamuna sumarihon na ringkot di ahu. Tongtong do i nian rohamuna, alai holan tingkina do na so une. 4:11 Ndada ala na hurangan ahu, umbahen na hudok i; ai nunga huguruhon, mangkasonangkon na adong. 4:12 Huboto do marpangontik, huboto do marlobilobian; tongtong do somal ahu di saluhutna, nang bosur, nang rapar, nang marlobilobi, nang marnahurang. 4:13 Saluhutna do tarpatupa ahu marhitehite Ibana, na margogoihon ahu! 4:14 Alai tahe, denggan do pambahenmuna i; ai ditiroi hamu do haporsuhonku. 4:15 Alai diboto hamu halak Pilippi do, na so adong, dungkon ni hamu, huria na hubahen donganku mangetong hepeng na ro dohot na laho, olat ni mula ni pamaritahonki, di na borhat i ahu sian Makedonia. 4:16 Ai di Tessalonik dope ahu, nunga ditongos hamu na ringkot di ahu, sahali ro di dua hali. 4:17 Ndada silehonlehon i hulului parbue i do na hujalahi; na gabe singirmuna do i. 4:18 Alai sandok tuk do di ahu, marlobilobi gari adong; suksuk do di ahu, dung hujalo na tinongosmuna marhite sian si Epaproditus: Uap na hushus ma i, pelean halaean, halomoan ni roha ni Debata. 4:19 Alai gohan ni Debatangku do nasa na ringkot di hamu, hombar tu hamoraonna i di hasangapon i, di bagasan Kristus Jesus! 4:20 Alai hasangapon ma di Debata, Amanta i, ro di salelenglelengna! Amen. 4:21 Pasahat hamu ma tabingku tu nasa na badia di bagasan Kristus Jesus! Na manongos tabi do angka dongan na rap dohot ahu. 4:22 Saluhut na badia manongos tabi di hamu, alai gumodang ma angka na sian bagas ni Kesar i! 4:23 Didongani asi ni roha ni Tuhan Jesus Kristus ma tondimuna!
1:1 Ahu surat ni si Paulus, apostel ni Kristus Jesus, sian lomo ni roha ni Debata, dohot Timoteus, dongan i, 1:2 mandapothon angka na badia na di Kolosse, angka dongan na porsea, na di bagasan Kristus: Asi ni roha ma di hamu dohot dame sian Debata, Amanta i! 1:3 Mandok mauliate do hami, laho tumangiangkon hamu tongtong tu Debata, Ama ni Tuhanta Jesus Kristus. 1:4 Ai hubege hami do barita ni haporseaonmuna di Kristus Jesus, nang holong ni rohamuna mida saluhut na badia, 1:5 ala ni sihirimon i, naung diparade di hamu di banua ginjang i; nunga dibege hamu hian i marhitehite hata hasintongan i, i ma barita na uli i. 1:6 I ma naung sahat, nang tu hamu, nang tu liat portibi on; na marparbue do i jala lam ganda, suang songon na di hamu, olat ni dung dibege jala ditanda hamu asi ni roha ni Debata di bagasan hasintongan. 1:7 Songon i do diguruhon hamu sian si Epapras, dongan saulaon i, na hinaholongan; ai parhalado ni Kristus na haposan do ibana humongkop hamu. 1:8 Laos ibana do pajojorhon tu hami holong ni rohamuna di bagasan tondi. 1:9 Dibahen i, dung hubege hami i, ndang mansohot nang hami tumangiangkon hamu, jala mangido, asa digohi di hamu pantas ni roha, mananda lomo ni rohana, marhitehite nasa hapistaran dohot habisuhon partondion, 1:10 asa marparange na tama di Tuhan i hamu, gabe halomoan situtu jala marparbuehon nasa ulaon na denggan; 1:11 laos ganda di hamu panandaon di Debata, gabe margogo situtu hamu hombar tu gogo ni hasangaponna i, mangkorhon nasa habengeton dohot lambas ni roha, mardongan las ni roha. 1:12 Mandok mauliate ma hamu di Ama i, naung patauhon hamu, manjalo tohap na di bagasan hatiuron i, siteanon ni angka na badia i! 1:13 Ai nunga diroro hita sian gomgoman haholomon i, jala dipaunsat hita tubagasan harajaon ni Anak, haholongan ni rohana. 1:14 Di bagasan Ibana do adong di hita haluaon i, i ma hasesaan ni angka dosa. 1:15 Ibana do suman ni Debata na so tarida i; na parjolo tubu sian nasa na tinompa. 1:16 Ai marhite sian Ibana do ditompa saluhutna, na di banua ginjang dohot na di tano on, na tarida dohot na so tarida i, angka habangsa, angka harajaon, angka gomgoman, angka parhuasoon; saluhutna i do ditompa marhitehite Ibana, jala marhapatean tu Ibana. 1:17 Jala di jolo ni saluhutna do Ibana, jala saluhutna i do hot di bagasan Ibana. 1:18 Ibana do ulu ni daging i, i ma huria i. Ibana do parmulaan, naung parjolo tubu sian angka na mate, asa Ibana parjolo di na saluhutna. 1:19 Ai ditontuhon Debata do, naeng ma maringanan di bagasan Ibana sandok hagogokna i! 1:20 Laos marhite sian Ibana do padengganonna tu dirina saluhutna i, nang angka na di tano, nang angka na di banua ginjang, dung dipatupa dame marhitehite mudar na sian silangna i, marhitehite Ibana. 1:21 Dohot do hamu, angka na holang najolo jala parroha musu marhitehite angka ulaon hajahaton, 1:22 dipadenggan Ibana nuaeng marhitehite daging hajolmaonna i, di na mate i Ibana, laho pajongjongkon hamu badia jala so hasurahan jala so sipinsangon, maradophon Ibana. 1:23 Asal ma mian hamu ojak jala hot di bagasan haporseaon, jala so olo meret sian pangkirimon, na binegemuna di barita na uli, na binaritahon tu saluhut na tinompa, na ditoru ni langit Ahu, Paulus, gabe parhalado ni i. 1:24 Las do rohangku nuaeng di angka haporsuhonku na humongkop hamu, jala marhite sian dagingku hugoki na hurang dope di angka na tinaon ni Kristus, humongkop dagingna, i ma huria i. 1:25 Naung gabe parhalado ni i do ahu, hombar tu pangaradotion ni Debata, na pinasahatna tu ahu, i ma na manggohi hata ni Debata nang di hamu. 1:26 I ma hahomion, na buni najolo sian mula ni mulana, marsundutsundut; alai nuaeng dipapatar do tu angka na badiana. 1:27 Ai tu nasida do naeng pabotohonon ni Debata surung ni hamuliaon ni hahomion on, di tongatonga ni angka parbegu; i ma: Kristus di bagasan hamu, sihorhon pangkirimon di hasangapon. 1:28 Ibana do hubaritahon hami; hupaingot jala huajari hami nasa jolma di nasa habisuhon, laho pajongjong ganup jolma rimpas di bagasan Kristus. 1:29 I do huhalojahon mardongan parungkilon, marguru tu hagogoonna, na gogo situtu mangkorhon di bagasan ahu.
2:1 Alai dipangido rohangku, naeng ma botoonmuna balga ni parungkilonku humongkop hamu, nang humongkop dongan na di Laodikea, ro di sasude, na so sanga marnida bohingku sandiri. 2:2 Ai naeng ma tarapul rohanasida, pinadomu ni holong ni roha, asa sandok mamora nasida di pangantusion na gomos, gabe ditanda hahomion ni Debata, i ma Kristus i. 2:3 Di bagasan Ibana do buni saluhut habisuhon dohot parbinotoan na arta. 2:4 Umbahen hudok songon i, asa unang dihatahatai deba hamu marhitehite malomalo ni pangkuling. 2:5 Ai padaodao pe isara di pardagingon, naung rap dohot hamu do ahu di partondion, marlas ni roha mamereng turena na di hamu, ro di hot ni haporseaonmuna di Kristus. 2:6 Onpe, songon panjangkonmuna di Kristus Jesus, Tuhan i, songon i ma hamu marparange di bagasan Ibana! 2:7 Gabe marurat jala pinauliuli ma hamu di bagasan Ibana, togu marhaporseaon, hombar tu na niajarhon tu hamuna; lumobi ma hamu marroha mauliate! 2:8 Jaga ma hamu, so tung diago deba hamu marhitehite hata bisukbisuk dohot hata lensem na so marimpola, hombar tu tonatona ni jolma, mangihuthon sisiasia ni hasiangan on, ndada mangihuthon Kristus. 2:9 Ai di bagasan Ibana do maringanan sandok gok ni hadebataon marrupahon daging. 2:10 Di bagasan Ibana sahat nang tu hamu hagogokna i; Ibana do ulu ni nasa hamuliaon dohot panggomgomion. 2:11 Laos di bagasan Ibana do hamu tarsunat, ndada binahen ni tangan, laho mananggal pamatang na mardaging on, binahen ni parsunaton na sian Kristus, i do. 2:12 Ai rap tartanom do hamu dohot Ibana, di na tardidi i hamu; laos di bagasan Ibana do rap hamu dipahehe, di na gabe porsea hamu di hagogoon ni Debata, na pahehehon Ibana sian angka na mate. 2:13 Asa hamu, naung mate di bagasan angka pangalaosion dohot di bagasan sibuk na so tarsunat i, raphon Ibana do hamu dipahehe, di na sinesana i nasa pangalaosionta. 2:14 Disesa do surat tangan i na dompak hita, i ma angka patik na maralohon hita; dipadao do i, dilohothon tu silang i. 2:15 Dipupusi do angka hamuliaon dohot panggomgomion, patar do dipatotondurhon nasida, dipaebangkon do nasida na talu i. 2:16 Onpe, unang ma diuhumi halak hamu siala sipanganon manang siinumon, manang siala pesta, manang poltak ni bulan, manang ala ni ari Sabbat pe. 2:17 Halinu ni angka na naeng ro do i; alai Kristus i do nampuna badan. 2:18 Tung unang ma hamu dilesanlesani halak, na giot paulaula na serep jala sumomba angka surusuruan, ditengatengahon do na niidana di bagasan tondina, pinaburnang ni roharoha ni dagingna. 2:19 Alai ndang diparsigantungi Ulu i, ai sian I lam magodang, marguru tu Debata, sandok pamatang i, na niurupan jala pinadomudomu ni angka urat dohot ihotihot. 2:20 Anggo naung rap dohot Kristus i hamu mate taringot tu sisiasia ni hasiangan on; boasa ma olo hamu paksaon songon halak na mangolu di hasiangan on: 2:21 Unang jama on! Unang pangan on! Unang tiop on! 2:22 Sipangkeon jala sipasudaon do i sasudena. Angka patik dohot podapoda ni jolma sambing do angka i. 2:23 Na songon habistohon do i idaon, na paburjuburjuhon jala na paserepserephon diri, na mangaluntei daging; alai ndang marguna mangalo roha na pasombuhon sibuk.
3:1 Asa molo naung rap hamu dipahehe dohot Kristus, jalahi hamu ma angka na di ginjang; ai disi do Kristus, hundul di siamun ni Debata. 3:2 Angka na di ginjang i ma parrohahon hamu, unang ma angka na di tano on! 3:3 Ai nunga mate hamu, jala buni do ngolumuna raphon Kristus di bagasan Debata. 3:4 Alai ia dung gabe patar sogot Kristus, hangoluanta i, disi ma gabe patar nang hamu raphon Ibana di bagasan hasangapon. 3:5 Antong, bunu hamu ma ruasmuna, angka na di tano on: parmainanon, hahodaron, riting ni roha, hisaphisap na roa, ro di pangahution, i ma pardebataon na leban. 3:6 Ala ni angka i do lalu rimas ni Debata. 3:7 Diulahon hamu do angka i najolo, tagan di bagasan i ngolumuna. 3:8 Alai anggo nuaeng, bolongkon hamu ma saluhutna i: Rimas, muruk, hajahaton, panginsahion hata barangsi sian pamanganmuna! 3:9 Unang ma masigabusan hamu, ai nunga ditanggal hamu jolma na buruk i rap dohot angka parulaonna, 3:10 jala nunga disolukkon hamu na imbaru i, na pinaimbaru, asa tandaonna rupa ni na tumompa ibana. 3:11 Ndang mardiaimbar disi Junani manang Jahudi, na marsunat manang na so marsunat, bangso na leban manang bangso na so maju dope, hatoban manang anak mata; Kristus i do tahe saluhutna jala di bagasan saluhutna. 3:12 Onpe, hamu angka naung pinillit ni Debata, angka na badia jala hinaholongan, solukkon hamu ma parasirohaon situtu, habasaron, haserepon, lambok dohot lambas ni roha! 3:13 Masipauneunean jala masisesaan dosa ma hamu, jumpa marpangkurangi na sada dompak donganna; songon panesa ni Kristus di hamu, songon i ma nang hamu! 3:14 Alai diginjang ni saluhutna i: I ma haholongon ni roha i; ai i do rahutrahut ni nasa harimpason. 3:15 Jala dame ni Kristus i ma mangarajai di bagasan rohamuna, ai tusi do hamu dijou di bagasan sada daging. Gabe parroha mauliate ma hamu! 3:16 Gugun ma hata ni Kristus maringanan di tongatongamuna; mardongan sandok hapistaran ma hamu masiajaran jala masipaingotan marhitehite angka ende psalmen, endeende pujipujian dohot ende partondion; endehon hamu ma Debata di bagasan rohamuna marroha hamauliateon! 3:17 Jala na siulaon, manang di hata, manang di pambahenan, saluhutna i ma marhitehite Goar ni Tuhan Jesus, huhut mandok mauliate tu Debata Ama marhitehite Ibana. 3:18 Hamu angka parompuan, oloi hamu ma hata ni hamulianmuna be, songon na tama di roha ni Tuhan i. 3:19 Hamu angka baoa, haholongi hamu ma pardihutamuna be, jala unang ma jungking hamu maradophon nasida! 3:20 Hamu angka dakdanak, sandok pangoloi ma hamu di natorasmuna, ai i do dihalomohon Tuhan i! 3:21 Hamu angka amaama, unang gintali hamu angka anakkonmuna, asa unang mandele! 3:22 Hamu angka anak somang, oloi hamu ma angka indukmuna na di tano on di na saluhutna; unang ma pangoloi di mata hamu, songon na mambuat roha ni jolma, marbulus ni roha ma, sian biar ni roha mida Tuhan i! 3:23 Sian rohamuna ma ula hamu nasa sibahenonmuna; songon na tu Tuhan i, ndada tu jolma! 3:24 Ingot hamu ma: Sian Tuhan i do jaloonmuna siteanon i, balos ni i Tuhan Kristus i ma oloi hamu! 3:25 Ai na mangulahon hageduhon, porsanonna do na niulana i, so adong masa parnidanidaon di bohi.
4:1 Hamu angka induk, lehon hamu ma na tigor jala na tama tu angka anak somang; ingot hamu: Adong do Tuhan nang di hamu di banua ginjang i! 4:2 Manongtong ma hamu martangiang; dungo ma hamu disi, huhut mandok mauliate! 4:3 Tangiangkon hamu nang hami, asa dilehon Debata di hami pintu na ungkap di hata i, mangkatahon hahomion ni Kristus; ala ni i do, umbahen na tarihot ahu, 4:4 asa hupapatar i songon na tama pangkatahonku. 4:5 Marpantas ni roha ma hamu marparange maradophon angka na di balian; parhaseang hamu ma tingki! 4:6 Sai tong ma lambok hatamuna, songon na siniraan, asa botoonmuna alus na patut tu ganup jolma. 4:7 Pabotohonon ni Tikikus do tu hamu nasa na masa di ahu; ibana do dongan na hinaholongan jala parhalado haposan jala dongan pangula di bagasan Tuhan i. 4:8 Alas ni on do, umbahen na husuru ibana tu hamu, asa diboto hamu na masa di hami, jala asa diapul rohamuna, 4:9 rap dohot si Onesimus, dongan haposan, haholongan i, na sian hamu on; pabotohononnasida do tu hamu nasa na masa di hami. 4:10 Manongos tabi tu hamu: Aristarkus donganku tarhurung, dohot Markus, ibebere ni Barnabas; nunga dijalo hamu hata taringot tu ibana; anggo ro ibana tu hamu on, jangkon hamu on, jangkon hamu ma ibana! 4:11 Songon i Jesus, na margoar Titius Justus; holan nasida do Jahudi hian, donganku pangula di harajaon ni Debata, angka na gabe apulapul di ahu. 4:12 Manongos tabi tu hamu Epapras na sian hamu on, naposo ni Kristus Jesus; na tongtong do ibana marungkil tumangiangkon hamu, asa jongjong hamu rimpas jala margomos ni roha situtu di nasa na hinalomohon ni Debata. 4:13 Ahu do saksina di godang ni na hinalojahonna i humongkop hamu dohot humongkop angka dongan na di Laodikea, nang na di Hierapolis. 4:14 Manongos tabi tu hamu pandaoni Lukas, haholongan i, dohot si Demas. 4:15 Dok hamu ma tabi tu angka dongan na di Laodikea, songon i tu Nimpa, ro di huria na marpungu di jabuna. 4:16 Jala ia dung dijaha surat on di hamu, sarihon hamu ma, asa dijaha i nang di huria Laodikea; jala naeng ma jahaonmuna nang surat na tu Laodikea i! 4:17 Dok ma tu si Arhippus: Jaga ho di tohonan, na jinalom di bagasan Tuhan i, laho mangaradotisa! 4:18 On ma tabingku sian ahu, Paulus, na sinurat ni tanganku. Ingot hamu ahu na tarrante i! Didongani asi ni roha i ma hamu!
1:1 Ahu surat tinongos ni si Paulus, si Silwanus dohot Timoteus mandapothon huria Tessalonik na di bagasan Debata Ama dohot Tuhan Jesus Kristus: Asi ni roha ma di hamu dohot dame! 1:2 Na mandok mauliate do hami tongtong tu Debata siala hamu saluhutna; ai hutaringoti hami do hamu di tangiangnami. 1:3 Ai ndang mansadi hami marningot ulaonmuna na sian haporseaon dohot halojaonmuna na sian holong ni roha i ro di habengetonmuna na sian roha na mangkirim di Tuhanta Jesus kristus, i ma maradophon Debata Amanta. 1:4 Ai huboto hami do, ale angka dongan na hinaholongan ni Debata: Angka naung tarpillit do hamu. 1:5 Ai ndada marhitehite hata sambing ro barita na uli, na hupaboa hami tu hamu, tung mardongan hagogoon do dohot Tondi Parbadia, angkup ni hiras ni roha godang; ai diboto hamu do antong pangalaho ni hami na ro i tu hamu humongkop hamu. 1:6 Jadi nunga gabe paniru hamu di hami dohot di Tuhan i, ai marlas ni roha na sian Tondi Parbadia do hamu manjalo hata i di bagasan haporsuhon godang. 1:7 Pola gabe sitiruon hamu di saluhut dongan na porsea, angka na di luat Makedonia dohot Akaya. 1:8 Ai sian hamu do marlupuk hata ni Tuhan i, ndada holan tu luat Makedonia dohot Akaya; tung tu saluhut luat do tarbarita haporseaonmuna di Debata, asa ndang pola be taringotannami anggo i. 1:9 Ai dibaritahon nasida do nang dalannami masuk tu hamu, nang dalanmuna mulak tu Debata, tumadingkon angka ajiajian laho mangoloi Debata na mangolu jala na sintong i. 1:10 Na maimaima nama hamu di haroro ni Anakna sian banua ginjang i, dung dipahehe sian angka na mate, i ma Jesus, na paluahon hita sian rimas na naeng ro i.
2:1 Ai nang hamu, ale angka dongan, marbinoto do: Ndada na magopo haroronami tu hamu. 2:2 Ai dung jolo huta on hami na marporsuk dohot na marsipal di huta Pilippi (songon na binotomuna), dapotan hiras ni roha do hami mangasahon Debatanami laho mangkatahon tu hamu barita na uli na sian Debata, nang pe godang paraloon. 2:3 Ai ndada na lilu manang mangansi manang marangkal hami laho mamodai hamu. 2:4 Alai songon halak angka naung tau di roha ni Debata do hami, gabe hasahatan ni barita na uli i, songon i do huhatahon hami; ndada songon angka na mambuat roha ni jolma, naeng hami tahe halomoan ni roha ni Debata na manigati rohanami. 2:5 Ai diboto hamu do: Ndang dung hami marhata lemeslemes, ndang dung hami marbisukbisuk mambuat arta; Debata do sitindangi disi. 2:6 Ndang manjalahi sangap hami sian jolma, manang sian hamu, manang sian angka na asing pe, atik pe tarbahen hami do nian marhatongamon, ala apostel ni Kristus hami. 2:7 Alai basar do hami di tongatongamuna songon inaina na pauliuli gellengna. 2:8 Songon i do sian sihol ni rohanami di hamu huhalashon hami do mangalehon tu hamu barita na uli na sian Debata; lobi tahe, dohot ma antong dirinami, ala naung huhaholongi hami hamu. 2:9 Ai diingot hamu do, ale angka dongan, halojaon dohot hasusaannami, ai arian dohot borngin hami mulaulaon, unang marhaboratan hamu; songon i do hubaritahon hami tu hamu barita na uli na sian Debata. 2:10 Hamu do sitindangi angkup ni Debata, paboa na daulat, na tigor jala na so hasurahan hami maradophon hamu angka na porsea. 2:11 Suang songon i diboto hamu: Huapoi hami do hamu sadasada, songon pangapoi ni amaama di anakkonna, jala huapuli hami; 2:12 jala hubulani hami do hamu, asa marparange hamu songon na tama maradophon Debata, na manjou hamu tu harajaonna dohot tu hasangaponna i. 2:13 Dibahen i tongtong do hami mandok mauliate tu Debata, ai dijangkon hamu do hata ni Debata na binegemuna sian hami; ndada songon hata ni jolma dijangkon, hamu i, tung songon hata ni Debata do, ai i do i tutu, gabe marpangkorhon ma hata i di bagasan hamu, angka na porsea. 2:14 Ai nunga gabe paniru hamu, ale angka dongan, di angka huria ni Debata na di luat Judea, angka na di bagasan Kristus Jesus; ai ditaon hamu do na bernit dibahen angka donganmuna sabangso, songon nasida na pinaporsukporsuk ni halak Jahudi. 2:15 Ai dibunu nasida do Tuhan Jesus ro di angka panurirang i, nang hamu dilelei do; angka na hinasogohon ni Debata do nasida jala alo ni saluhut jolma. 2:16 Diorai do hami manjamitai halak parbegu laho paluahon nasida; asa tongtong do nasida pagukgukkon pardosaonnasida, lalu ma antong tu nasida sungkot ni haririmas i. 2:17 Alai anggo hami, ale angka dongan, hira na tilahaon do hami mandaodao sian hamu sangombas, mandok bohinami do na dao i, ndada anggo rohanami; alai lam huharingkothon hami do marnida bohimuna mardongan sihol ni roha godang. 2:18 Dibahen i naeng ro do hami tu hamu, ahu si Paulus, sahali, dua hali tahe; alai diambat sibolis i do langkanami. 2:19 Ai ise do targoar pangkirimon ni rohanami dohot halalas ni rohanami jala tumpal pamujion di hami, ia so hamu di adopan ni Tuhanta Jesus Kristus, jumpa di harorona i? 2:20 Olo, hamu do hasangapon di hami dohot halalas ni roha.
3:1 Ala na so tartaon hami be siholnami, denggan do di rohanami, holan hami ma jolo tading di huta Aten. 3:2 Gabe husuru hami ma si Timoteus, angginami jala naposo ni Debata, mangkobasihon barita na uli na sian Kristus, asa dipatogu rohamuna jala dipodai hamu marhaporseaon; 3:3 asa unang diunggilhon angka haporsuhon i na deba sian hamu; ai diboto hamu do, tusi do hita dipadiri. 3:4 Ai di tongatongamuna dope hami, nunga hulumbahon hami hian tu hamu, na naeng masa angka haporsuhon tu hita, songon naung masa tutu patar di jolomuna. 3:5 Dibahen i ndang tartaon ahu be, gabe husuru na manangkasi haporseaonmuna, atik beha naung diunjuni sipangunjuni i hamu, gabe magopo maon na huhalojahon hami. 3:6 Alai dung mulak si Timoteus tu hami sian hamu, denggan do dibaritahon tu hami haporseaonmuna dohot holong ni rohamuna angkup ni i dibaritahon do burjumuna marningot hami dohot sihol ni rohamuna, naeng idaonmuna hami, songon hami na masihol di hamu. 3:7 Disi ma tarapul hami marningot hamu, ale angka dongan, dibahen haporseaonmuna, nang pe didondoni ragam ni hagogotan dohot haporsuhon hami. 3:8 Ai na mangolu ma hami nuaeng, anggo hot hamu jongjong marojahan di Tuhan i. 3:9 Ai hamauliateon dia ma tarlehon hami tu Debata, balos ni saluhut halalas ni roha na huhilala hami di jolo ni Debatanami marningot hamu? 3:10 Borngin dohot arian lobi sumurung do tangiangnami, asa anggiat idaonnami bohimuna laos patingkosonnami, ia adong dope hahurangan ni haporseaonmuna. 3:11 Alai Debata Amanta sandiri dohot Tuhanta Jesus ma pabulushon langkanami tu hamu! 3:12 Alai digohi jala lam ditambai Tuhan i ma haholongon ni rohamuna sama hamu, nang tu saluhut, songon holong ni rohanami di hamu! 3:13 Laho patoguhon rohamuna, gabe so hasurahan marhabadiaon di jolo ni Debata Amanta, di na ro i Tuhanta Jesus rap dohot saluhut angka na badiana.
4:1 Angkup ni i, ale angka dongan, huelehelek jala huapoi hami ma hamu marhitehite Tuhan Jesus: Lam tang ma hamu marguru tu poda na jinalomuna sian hami taringot tu parange na tama, laho pasauthon lomo ni roha ni Debata, songon naung binahenmuna. 4:2 Ai diboto hamu do patik angka na hulehon hami tu hamu marhitehite Tuhan Jesus. 4:3 On do pinangido ni roha ni Debata: Naeng badia hamu; harorangon i naeng pasidingonmuna. 4:4 Naeng ma ganup hamu umboto mardongan saripe di bagasan habadiaon na tama. 4:5 Unang ma mangihuthon hisaphisap na garang i, songon halak sipelebegu na so tumanda Debata. 4:6 Ndang jadi jahatan manang angatan dongan di pandaraman; ai parlulu do Tuhan i di sasudena i, songon naung hulumbahon jala huhatindangkon hami tu hamu. 4:7 Ai tu habadiaon do dijou Debata hita, ndada tu hahodaron. 4:8 Dibahen i, molo hu roha ni halak disi, ndada jolma nileaanna, sandok Debata do, naung mangalehon Tondina na badia i tubagasan hamu. 4:9 Alai anggo haholongon ni roha di dongan, ndang haru ringkot pasingothononku tu hamu, ai nunga diajari Debata hamu masihaholongan. 4:10 Laos songon i do diula hamu tu saluhut dongan na di liat Makedonia. Alai huapoi hami do hamu, ale angka dongan, naeng ma lam sumurung hamu! 4:11 Jala haringkothon hamu ma, asa parhohom hamu masiradoti tohapna, angkup ni i marulaon ma dohot tanganmuna, songon naung hurodihon hami. 4:12 Anggiat maradat hamu idaon ni angka na di balian, unang pola marbagahon sian halak. 4:13 Alai naeng ma tangkas botoonmuna, ale angka dongan, taringot tu angka naung monding i, asa unang marsak hamu, songon angka na leban, na so marpangkirimon. 4:14 Ai molo porsea hita, naung mate Jesus dohot hehe, sandok togihonon ni Debata do rap dohot Jesus nang angka naung monding marhitehite Ibana. 4:15 Ai hata ni Tuhan i do na hupasahat hami nuaeng tu hamu: Ia mangolu pe hita, angka na mian ro di haroro ni Tuhan i, nda tung sumurung hita sian nasida naung monding i. 4:16 Ai na tuat ma Tuhan i sian banua ginjang mardongan suraksurak, marsoara ma raja ni surusuruan, tarbege ma sarune ni Debata. Dung i hehe ma jumolo angka na mate di bagasan Kristus. 4:17 Dung songon i, hita na mangolu dope, angka na mian i, taitonna ma hita raphon nasida di bagasan angka ombun, laho manomunomu Tuhan i tu langit an; jadi olat ni i sai tongtong ma hita rap dohot Tuhan i. 4:18 Antong, masiapulan ma hamu marhitehite angka hata i!
5:1 Alai ndang pola suraton tu hamu, ale angka dongan, taringot tu tingkina dohot sadiharina. 5:2 Ai diboto hamu do tangkas, na songon panangko borngin do haroro ni ari ni Tuhan i. 5:3 Ai molo didok halak, dame do jala mora so adong, disi ma tompu tahop tu nasida hamagoan i, songon pambebeon tu na gabegabean, jala ndang adong haporusannasida. 5:4 Alai hamu, ale angka dongan, ndang di bagasan na holom hamu: So tung hatiuran ari hamu songon panangko! 5:5 Ai saluhutna do hamu anak hatiuron jala anak arian; ndang sian borngin hita manang sian haholomon. 5:6 Antong, sai unang ma tarpodom hita, songon angka na leban; sai dungo ma hita jala marroha na torang! 5:7 Ai borngin i do tarpodom angka na modom i, jala borngin i do mabuk angka na mabuk i. 5:8 Alai anggo hita na sian arian, marroha na torang ma hita, tasolukkon ma haporseaon dohot haholongon songon baju partahanan jala tajujung ma pangkirimon ni roha di haluaon! 5:9 Ai ndang dipadiri Debata hita bahen sirimasan; alai naeng ma dapotan haluahon hita marhite sian Tuhanta Jesus Kristus, 5:10 naung mate humongkop hita, asa sandok mangolu hita rap dohot Ibana, manang na dungo (mangolu) dope hita, manang naung modom pe. 5:11 Dibahen i, sai masipaingotan ma hamu jala masipauliulian, songon naung binahenmuna. 5:12 Huelehelek hami ma hamu, ale angka dongan, tanda hamu ma angka na mangkalojahon hamu, angka na manguluhon hamu marhitehite Tuhan i, ro di angka na paingothon hamu! 5:13 Sangap situtu ma rajumi hamu nasida mardongan holong ni roha ala ni ulaonnasida! Sai mardame ma hamu sama hamu! 5:14 Alai huapoi hami ma hamu, ale angka dongan, sai paingot hamu ma angka na so maradat, apuli hamu ma angka siotik roha, anju hamu ma angka na gale, lambas ma rohamuna dompak saluhutna! 5:15 Matamatahon hamu ma, asa unang dibaloshon manang ise na roa balos ni na roa; na denggan ma pareahi hamu tongtong, nang sama hamu, nang tu saluhut halak. 5:16 Tongtong ma hamu marlas ni roha! 5:17 Unang mansadi hamu martangiang! 5:18 Mandok mauliate ma hamu siala saluhutna! Ai i do dipangido Debata sian hamu marhitehite Kristus Jesus. 5:19 Unang intopi hamu tondi i! 5:20 Unang lea rohamuna di panurirangon! 5:21 Tangkasi hamu ma saluhutna; na denggan i ma tiop hamu! 5:22 Pasiding hamu ma nasa rumang ni na roa! 5:23 Diparbadiai Debata pardame i ma hamu gabe sun denggan, jala diramoti ma tondimuna, nang roha, nang daging, asa ias, so hasurahan di haroro ni Tuhanta Jesus Kristus! 5:24 Haposan do Ibana na manjou hamu; sai pasautonna do i. 5:25 Ale angka dongan, tangiangkon hamu ma hami! 5:26 Mandok tabi ma hamu tu saluhut dongan mardongan umma na badia i! 5:27 Huelehelek ma hamu di jolo ni Tuhan i, asa dipajahahon hamu surat on tu saluhut dongan. 5:28 Didongani asi ni roha ni Tuhanta Jesus Kristus ma hamuna!
1:1 Ahu surat tinongos ni si Paulus, si Silwanus dohot Timoteus mandapothon huria Tessalonik, na di bagasan Debata Amanta Dohot Tuhan Jesus Kristus. 1:2 Asi ni roha dohot dame ma di hamu sian Debata Amanta dohot Tuhan Jesus Kristus! 1:3 Tama situtu do hami mandok mauliate tongtong tu Debata siala hamu ale angka dongan, songon na patut, ai na ganda situtu do haporseaonmuna, laos tamba holong ni roha ni ganup hamu sama hamu. 1:4 Pola hubaritahon hami hamu di angka huria ni Debata, mamuji habengeton dohot haporseaonmuna, di na masa tu hamu ragam ni pangaleleon dohot haporsuhon, angka na pinataontaonmuna. 1:5 I ma tandana, paboa na ro ma paruhumon ni Debata na tigor i; asa disi ma patar hatauonmuna tu harajaon ni Debata, dung jolo manaon na porsuk i hamu humongkopsa. 1:6 Molo tung i tingkos di roha ni Debata, mamaloshon haporsuhon tu angka na paporsukporsukkon hamu; 1:7 alai hasonangan tu hamu, angka na pinaporsukporsuk i rap dohot hami, di na tarida Tuhan Jesus tuat sian banua ginjang rap dohot angka surusuruan ni hagogoonna. 1:8 Di bagasan api na marnalanala ro ma Ibana mandabu uhum tu angka na so mananda Debata dohot tu angka na so mangoloi barita na uli ni Tuhanta Jesus. 1:9 Jaloonnasida ma uhum, i ma hamagoan sisalelenglelengna sian adopan ni Tuhan i dohot sian hagogoonna na tongam i. 1:10 Ai di na ro Ibana, marsangap ma Ibana dibahen angka na badiana, jala tarpuji ma Ibana dibahen saluhut naung mangkaporseai Ibana di ari i, ai saut do gabe porsea hamu di na huhatindangkon hami tu hamu. 1:11 Apala i ma tangiangnami tongtong, anggiat tung dipatau Debatanta hamu hombar tu panjouonna i, jala asa ditambai di hamu las ni roha di na denggan dohot ulaon haporseaon marhitehite hagogoon. 1:12 Asa marsangap Goar ni Tuhanta Jesus di bagasan hamu; hamu pe naeng marsangap di bagasan Ibana, marguru tu asi ni roha ni Debatanta dohot Tuhan Jesus Kristus.
2:1 Alai anggo taringot tu haroro ni Tuhanta Jesus Kristus dohot hasasahatta tu Ibana, mangido ma hami tu hamu, ale angka dongan: 2:2 Unang jalojalo mimbar hamu gabe so marroha, jala unang lilu hamu bahenon ni tondi ni partondi, manang hata ni parhata, manang bahenon ni surat pe, songon na sian hami didok, angka na paboahon: Nunga dapot ari ni Tuhan i! 2:3 Sandok unang dipaotooto manang ise hamu! Ai ingkon jumolo marbalik torop, laos tarida ma jolma sipardosa na sumalin, i ma anak parhamagoan i. 2:4 I ma sipangalo na pabangkithon dirina tu atas ni saluhut na targoar Debata dohot na patut sombaon, pola do dipahundul dirina, tubagasan joro ni Debata; paboa ibana sandiri Debata. 2:5 Ndang diingot hamu, naung hupaboa hian i tu hamu, andorang di tongatongamuna dope ahu? 2:6 Angkup ni i, diboto hamu do: Adong dope na mangambat ibana nuaeng, paima ro tingkina pataridahon dirina. 2:7 Ai nunga marpangkorhon nuaeng hajahaton i, dalan hahomion, patagamtagam tingkina, asa dipadao na mangambat i dope saonari. 2:8 Dung i pe asa sipapataron siparjahat i; alai ripashonon ni Tuhan Jesus ma ibana bahenon ni hosa ni pamanganna; siaphononna ma ibana di hapapatar ni harorona i. 2:9 Na sian huaso ni sibolis i do haroro ni siparjahat i, mantat ragam ni hagogoon dohot tanda dohot halongangan gapgap, 2:10 angkup ni i hajahaton sipaotooto di angka na laho mago i, ala na so olo nasida mangkaholongi hasintongan i, asa malua nian. 2:11 Ala ni i do suruon ni Debata tu nasida sipaotooto na margogo, asa porsea nasida di gapgap, 2:12 asa hona uhum saluhut na so olo porsea di hasintongan i, angka na mangkalomohon hageduhon. 2:13 Alai na tama do hami tongtong mandok mauliate tu Debata marningot hamu, ale angka dongan, na hinaholongan ni Tuhan i, ala dipillit Debata hamu sian mulana, asa saut hamu malua, i ma marhite sian Tondi na pabadiahon dohot haporseaon di hasintongan. 2:14 Ai tusi do hamu dijou marhitehite barita na uli, na hubaritahon hami, asa partohap hamu di hasangapon ni Tuhanta Jesus Kristus. 2:15 Antong, ale angka dongan, hot ma hamu jongjong jala marsitiopan ma hamu tu angka poda na huajarhon hami tu hamu marhite sian hata nang surat pe. 2:16 Apala Tuhanta Jesus Kristus dohot Debata Amanta, na mangkaholongi hita jala mangalehon apulapul, na mian tongtong, dohot pangkirimon na denggan sian asi ni roha i: 2:17 Ibana ma mangapuli jala pahothon rohamuna di bagasan nasa ulaon nang hata na denggan!
3:1 Angkup ni i, tangiangkon hamu ma hami, ale angka dongan, asa marlojong hata ni Tuhan i jala marsangap songon na di hamu, 3:2 anggiat malua hami sian halak na jengkel jala na jahat i; ai ndang saluhutna olo porsea. 3:3 Alai haposan do Tuhan i: Patoguonna do rohamu jala ramotanna do hamu maralohon na jahat i. 3:4 Na pos do rohanami mida hamu di bagasan Tuhan i, sai patupaonmuna do na hupodahon hami tu hamu, nang nuaeng, nang tu joloan on. 3:5 Sai ditogutogu Tuhan i ma rohamuna tu holong ni roha ni Debata dohot tu habengeton ni kristus i! 3:6 Alai mangasahon Goar ni Tuhanta Jesus kristus: Hupaingot hami ma hamu, ale angka dongan: Sumurut ma hamu sian ganup dongan, na so maradat di parange, na so mangihuthon poda na jinalona sian hami! 3:7 Ai diboto hamu do, manang songon dia patut tiruonmuna hami, ai ndada songon na so maradat hami di tongatongamuna; 3:8 ai ndada songon tamue sorang hami di manang ise hamu; loja do hami tahe jala ngalutan mulaulaon borngin dohot arian, unang sorat hamu hubahen. 3:9 Ndada na so marsahala hami nian, alai naeng pajongjongonnami dirinami tiruan di hamu, asa diihuthon hamu hami. 3:10 Ai nang andorang di tongatongamuna hami, nunga hurodihon hami tu hamu: Na so ra mangula, unang ma ibana mangan! 3:11 Ai tarbege do tu hami, adong do deba sian hamuna na so maradat parangena, angka na so mulaulaon, na so siulaon do tahe dijama. 3:12 Tu angka sisongon i hupatikkon jala hurodihon hami mangasahon Tuhan Jesus Kristus: Bulus ma nasida mulaulaon, asa na niomona be dihangoluhon. 3:13 Alai anggo hamu, ale angka dongan, unang ma marnaloja hamu mambahen na denggan! 3:14 Alai ia so olo deba tumangihon hatanami na tarsurat on, patanda hamu ma i; unang ma marparsaoran hamu dohot ibana, asa tarila ibana. 3:15 Jala unang ma nian rajumi hamu ibana songon musu, pasingot hamu ma ibana tahe songon dongan! 3:16 Alai manongtong jala mangimpas ma damena dilehon Tuhan Sipardame i tu hamuna! Didongani Tuhan i ma hamu sudena! 3:17 On ma tabingku sian ahu, si Paulus, na sinurat ni tanganku. Songon i do somal tandatanganku di nasa surathu. 3:18 Didongani asi ni roha ni Tuhanta Jesus Kristus ma hamu sudena!
1:1 Ahu surat tinongos ni Paulus, apostel ni Kristus Jesus sian pandokkon ni Debata, Sipalua hita, dohot sian Kristus Jesus, pangkirimonta i, 1:2 mandapothon si Timoteus, anakkonku na tutu di bagasan haporseaon: Asi ni roha, talup ni roha dohot dame sian Debata Ama dohot sian Kristus Jesus, Tuhanta i! 1:3 Huapoi do ho, tinggal di Epesus, uju borhat ahu tu Makedonia, asa dirodihon ho tu na deba, unang dipodahon na lipe. 1:4 Unang dijujur turiturian ro di surat sundutsundut na so marujung, angka na mantat parsalisian, gumodang asa parsombaon tu Debata marhitehite haporseaon. 1:5 Alai na tinembak ni patik i do haholongon sian roha na ias, sian panolopi ni panggora ni roha, nang sian haporseaon na so marlaok. 1:6 I do ditadingkon na deba, gabe marbalik tu hatahata na so gabeak. 1:7 Naeng sipodahon patik i nasida: So adong diboto na hinatahon dohot na hinajongjongkonnasida. 1:8 Alai taboto do, na denggan do patik i, molo hombar tusi pamangkena, 1:9 ala diboto, na so dipajongjong patik di parroha na tigor, tung di angka na so maruhum do, di na so tumangihon hata, di na so mangkabiari Debata, di angka pardosa, i ma angka na ramun na so marpaho, angka sibalbal ama dohot ina, angka sipusa jolma, 1:10 angka parmainan, sibahen rongkos tu na poso, angka pamangus, angka pargapgap, angka siallang gana dohot nasa na alo dompak poda na tiar i, 1:11 hombar tu barita na uli, naung dipasahat tu ahu, na taringot tu hasangapon ni na Martua Debata. 1:12 Mauliate hudok di na margogoihon ahu, i ma Kristus Jesus, Tuhanta i; ai dietong do ahu haposan, umbahen na dipabangkit ahu gabe parhalado. 1:13 Panginsahi do ahu najolo jala pangalele jala siulahon gogo; alai dapotan asi ni roha do ahu, ai ndang huboto na huula i, tagan so porsea i dope ahu. 1:14 Alai gabe lam sumurung do asi ni roha ni Tuhanta i, mantat haporseaon dohot holong ni roha, di bagasan Kristus Jesus. 1:15 Haposan jala sandok tau jaloon do hata on: Nunga ro Kristus Jesus tu portibi on, paluahon angka pardosa; sian angka i do ahu na parjolo. 1:16 Alai ala ni on do, umbahen na diasii ahu: Naeng jumolo marhite sian ahu patuduhonon ni Kristus Jesus sandok lambas ni rohana i, bahen tiruan di angka na naeng porsea di Ibana tu hangoluan salelenglelengna. 1:17 Alai hamuliaon dohot hasangapon sisalelenglelengna ma di Raja na so marmula i; i ma Debata na manongtong, na so dapot idaon, na mamunjung i! Amen. 1:18 I ma podahon, songon na huampehon tu ho, anakkonku, Timoteus, hombar tu hata panurirangon najolo, angka na taringot tu ho, asa marhitehite i ho manahan di paraloan na denggan i. 1:19 Tiop ma haporseaon i, marroha na ias, na binolongkon ni na deba, gabe tarharom taringot tu haporseaon. 1:20 Songon Himeneus dohot Aleksander, naung hupasahat tu sibolis i, asa taruli ajar nasida, unang be manginsahi.
2:1 Onpe, on do sipaingothu, naeng ma ulahononhon parjolo situtu pangidoan, partangiangon, parpangondianon dohot hamauliateon humongkop saluhut halak, 2:2 humongkop angka raja dohot saluhut parhuaso, asa marsonangsonang jala so hariboriboan hita marpangalaho, di bagasan sandok hadaulaton dohot hahormaton. 2:3 Na denggan do i, jala halomoan ni roha ni Debata, Sipalua hita. 2:4 Ai dipangido rohana do, naeng saluhut jolma malua jala sahat mananda hasintongan i. 2:5 Ai sada do Debata, jala sada do nang Pangulu ni Debata dohot jolma, i ma jolma Kristus Jesus i. 2:6 Dilehon do dirina, bahen tobus humongkop saluhut, i ma sihatindangkononhon di tingki hadenggananna. 2:7 Tusi do ahu dipabangkit, gabe parjamita jala apostel, gabe pangajari di halak sipelebegu, di bagasan haporseaon dohot hasintongan; tutu do hatangki, ndang margabus ahu. 2:8 Asa dipangido rohangku: Naeng ma martangiang angka baoa di nasa inganan, sumombahon tangan na bontor, so marrimas, so marroha ganggu. 2:9 Angka parompuan pe, songon i do: Pantun marabit, marpangkean hahormaton dohot toruk ni roha; unang ma marhitehite obuk na mardandan dohot sanggul mas dohot mutiha manang abit na arga. 2:10 Alai naeng ma songon na tama di parompuan, angka na marhatopothon hadaulaton marhitehite angka ulaon na denggan. 2:11 Hohom ma parompuan marguru, marunduk ni roha situtu. 2:12 Alai ndada huloas parompuan mangajari manang mangarajai hamulianna; mauhom ma nasida! 2:13 Ai jumolo do si Adam ditompa; dung i pe, asa si Haoa. 2:14 Jala ndada si Adam dipaotooto; parompuan i do dipaotooto, gabe pangalaosi. 2:15 Alai dapotan haluaon do ibana marhitehite na mangintubu, molo mian nasida di bagasan haporseaon dohot haholongon ni roha, nang habadiaon mardongan hatomanon.
3:1 Hata haposan do on: Ulaon na denggan do pinangido ni na mangalului hasintuaon. 3:2 Dibahen i, unang ma adong dapot sisurahan di sintua: Harajaan ni sada boruboru ma ibana, marpangontik, marroha, marhapantunon, na las roha martamue, na malo mangajari. 3:3 Unang ma sisobur tuak, unang pangalinsingi; alai na lambok, pardame jala si impolan di perak. 3:4 Na malo mangarajai donganna sabagas, paranakkon sioloi ajar mardongan sandok hahormaton. 3:5 Ai molo so diboto mangarajai isi ni bagasna, tung songon dia ma paturetureonna huria ni Debata? 3:6 Unang ma halak na imbaru masuk, unang gabe ginjang rohana; jala madabu maon tubagasan uhum ni sibolis i. 3:7 Ingkon denggan do baritana di halak na di balian, asa unang ibana madabu tubagasan panginsahion dohot sambil ni sibolis i. 3:8 Songon i do nang angka parhobas: Ingkon na toman do, unang mardua hata, unang sisobur tuak, unang parpangomo sian dalan na so tama; 3:9 angka na umpeop hahomion ni haporseaon i di bagasan roha na ias. 3:10 Alai siunjunan jumolo nang nasida; dung pe i, asa jaloonnasida ulaon i, anggo so hasurahan. 3:11 Songon i ma angka parompuan: Toman, unang sihatahatai donganna; parpangontik, haposan di saluhut. 3:12 Ia parhobas i, ingkon harajaan ni sada boruboru, angka na umboto manguluhon anakkonna dohot bagasna be. 3:13 Ai ia dung ture parhobasonnasida, naek situtu ma nasida, jala marhiras ni roha godang marhaporseaon di Kristus Jesus. 3:14 Husurathon angka i tu ho, huhut mangkirim, tibu ahu ro manopot ho. 3:15 Alai molo tung gumele ahu, naeng botoonmu, na patut parangehononmu di bagas ni Debata, i ma huria ni Debata na mangolu i! 3:16 Tiang jala tungkol ni hasintongan i jala tandap balga ni hahomion ni hadaulaton i: Nunga gabe patar Ibana mardaging, dipintori di bagasan Tondi, tarida di angka surusuruan, binaritahon tu angka parbegu, hinaporseaan di portibi on jala tarhinsat di bagasan hasangapon!
4:1 Alai tangkas do didok Tondi i: Adong ma di angka ari sogot deba na marbalik sian haporseaon i; oloan ni i ma angka tondi sipaotooto dohot podapoda ni angka sibolis, 4:2 bahenon ni ansiansi ni angka sihatahon gabus, angka na tinoruan ni panggora ni rohanasida. 4:3 Diorai nasida do mardongan saripe; dipatik do jolma mangorom sipanganon, na jinadihon ni Debata, asa mardongan mauliate i dijalo angka na porsea, angka naung tumanda hasintongan i. 4:4 Ai na denggan do nasa na tinompa ni Debata jala ndang sisubanghononhon nasa na jinalo mardongan roha mauliate. 4:5 Ai na gabe badia do i, binahen ni hata ni Debata dohot tangiang. 4:6 Anggo i diapohon ho tu angka dongan, gabe tutu ma ho parhalado ni Kristus Jesus, mangkangoluhon hata haporseaon i dohot poda na uli na niihuthonmi. 4:7 Pasiding ma angka turiturian na so gabeak, na so marnosan i. Pasomalsomal ma dirim mangulahon hadaulaton! 4:8 Ai otik do guna ni na pabosihon daging; alai tu saluhutna do hasea hadaulaton i, ai hangoluan nuaeng nang sogot dibagabagahon. 4:9 Haposan do hata i jala tau situtu jaloon. 4:10 Ai ala ni i do, umbahen loja hita jala marungkil: Ala mangkirim hita di Debata na mangolu, Sipalua halak saluhutna, alai sumurung angka na porsea. 4:11 I ma patikkon jala podahon! 4:12 Unang ma hu roha ni halak mida ho siala haposoonmi; alai gabe tiruan ni angka na porsea ma ho di pangkataion, di parange, di holong ni roha, di haporseaon, nang di hatomanon. 4:13 Sai datdati ma na manjahai, na mangapoi, nang na mangajari, paima ro ahu! 4:14 Unang neang roham di silehonlehon na di ho i, na pinasahat tu ho marhitehite panurirangon dohot pangampehon tangan sian angka sintua. 4:15 I ma pasarisari, i ma parangehon, asa patar diida sude hanaehanmi! 4:16 Matahon dirim, ro di pamodaion i; mian ma ho disi! Ai molo i diula ho, paluaonmu ma dirim ro di angka na tumangihon ho.
5:1 Unang songgahi na tuatua; alai apoi ma ibana songon ama, angka na poso i songon anggi; 5:2 angka parompuan na tuatua songon ina, angka na umposo songon iboto; alai marhatomanon situtu. 5:3 Parompuan na mabalu parsangapi, anggo na mabalu na tutu. 5:4 Alai anggo maranakkon manang marpahompu ina na mabalu i, nasida ma jumolo sumarihon donganna sabagas i di bagasan hadaulaton, mambahen pamaloson tu natuatuana, ai i do dihalomohon Debata. 5:5 Alai anggo na mabalu na tutu, na so mardihadiha, mangkirim ma tu Debata, jala manongtong mangido dohot martangiang arian dohot borngin. 5:6 Alai anggo diulahon hisaphisap, naung mate do i, nang mangolu dope. 5:7 I ma patikkon, asa so hasurahan nasida. 5:8 Alai na so sumarihon donganna, haputusan donganna sabagas, naung mansoadahon haporseaon do i; jumahat do i sian halak na so porsea. 5:9 Ndang sipilliton ina na mabalu, ia so gok onompulu taon umurna, naung sahali marhamulian. 5:10 Ingkon denggan do ulaonna dihatindangkon halak: Anggo dipagodanggodang anakkonna, las rohana martamue, diburi pat ni angka na badia, diurupi angka na di bagasan haporsuhon, dieahi nasa ulaon na denggan. 5:11 Alai pasiding ma angka boruboru na mabalu na poso; ai ia dung garang rohanasida maralohon Kristus, naeng ma marhamulian nasida. 5:12 Sisaritaon do nasida, ala nunga ditadingkon haburjuonnasida di mulana. 5:13 Angkup ni i, marlanggelangge do nasida; diringkoti na merbaserbas tu bagas ni halak; alai tamba ni parlanggelanggeon i: Na gabe sihapodea do nasida, angka na juit, sihatahon na so marguna. 5:14 Onpe, dipangido rohangku: Marhamulian ma angka na sopot mabalu, asa tubutubuan, patureturehon bagasna, unang dilehon tu alo i parbonsiran, laho manginsahi. 5:15 Ai nunga sanga marbalik deba mangihuthon sibolis i. 5:16 Alai molo adong na mabalu, na marsolhothon na porsea, i ma patureturehon nasida, asa tarpatureture huria i na mabalu na tutu. 5:17 Silompit do jujuron hasangapon ni sintua, na burju mangula hasintuaon, gumodang ma tu angka na mangulahon hata dohot poda. 5:18 Ai didok Surat i: "Ndang jadi huntamonmu baba ni horbo na mardege!" dohot: "Na tama do di pangula upana!" 5:19 Unang jalo pangaluan dompak sintua, ia so di jolo ni dua manang tolu sitindangi. 5:20 Angka na mardosa i pinsang di jolo ni saluhutna, asa mabiar nang angka dongan. 5:21 Humangmangi ho di jolo ni Debata dohot Kristus Jesus, nang di jolo ni surusuruan ni Debata, angka na tarpillit: Unang maralangalang roham mangaradoti angka ondeng, unang ma mardingkandingkan! 5:22 Unang hapogani mangampehon tanganmu tu halak; unang saor ho tu dosa ni na leban. Ramoti dirim, asa ias ho! 5:23 Unang sai minum aek ho; pangke ma anggur sasaotik, daon ni butuha, ai jotjot do ho gale. 5:24 Di na deba halak patar hian do dosana, tagan so songgop dope uhum; ia di na deba mangihut sian pudi nama. 5:25 Suang songon i: Patar do angka ulaon na denggan; jala nang pe asing, tong ndang tarbahensa buni!
6:1 Nasa anak somang, ditoru ni auga, dirajumi ma indukna tama pasangapon di na saluhutna, asa unang hona insak Goar ni Debata, nang agama i. 6:2 Alai molo porsea angka induk, unang ma moru parsangapina di nasida, ala dongan nasida; lam dioloi ma, ala porsea nasida jala na hinaholongan, angka naung taruli di basabasa i. I ma ajarhon jala paingothon! 6:3 Na mangajarhon asing, na so marsitiopan tu hata na tingkos, na sian Tuhanta Jesus Kristus, dohot tu poda na mangihuthon hadaulaton i, 6:4 i do na burnang, ndang diboto agia aha, parsualon dohot parpollungon dihasahithon, i ma haroroan ni latelate, badabada, panginsahion dohot panihanihaion na roa, 6:5 parsalisian na manongtong di jolma naung sega rohana, naung agoan hasintongan i, ai dirimpu, pangomoan do hadaulaton i. 6:6 Pangomoan godang do tutu hadaulaton, anggo mardongan sabam ni roha. 6:7 Ai ndang adong taboan tu hasiangan on, jala ndang tarboan hita agia aha laho ruar. 6:8 Alai molo adong di hita sipanganon dohot parabiton, tahasabamhon ma i! 6:9 Ia angka na naeng gabe mamora, madabu do tubagasan pangunjunan dohot sambil dohot tu lan hahisapon haotoon, angka na mangago, na mangalonongkon jolma i tubagasan jea dohot hamagoan. 6:10 Ai urat ni nasa hajahaton do roha na holongan di hepeng; i do disangkapi na deba, umbahen na lilu sian haporseaon i, gabe diaithon do godang na bernit tu dirina. 6:11 Alai anggo ho halak ni Debata, maporus ma sian i; pareahi ma hatigoran, hadaulaton, haporseaon, holong ni roha, habengeton dohot lambok ni roha! 6:12 Haburjuhon ma paraloan haporseaon na denggan i; tangkup ma hangoluan salelenglelengna, ai tusi do ho dijou, jala diparhatopot ho do panindangion na denggan di jolo ni torop sitindangi. 6:13 Hupatik ma ho di jolo ni Debata, na pangoluhon saluhut, dohot di jolo ni Kristus Jesus, na mangkatindangkon na denggan di jolo ni Pontius Latus: 6:14 Radoti ma patik i, so marlindang, so hasurahan, paima tarida Tuhanta Jesus Kristus i. 6:15 Ai di hajujumpang ni tingkina patar ma Ibana, bahenon ni na Martua i, Pargogo sasadasa, Raja ni angka raja, Tuhan ni angka tuan. 6:16 Sasadasa do na so olo mate, Siingani hatiuron na so tartopot, na so dung diida jolma Ibana, jala ndang tarbereng Hasangapon dohot hagogoon ma di Ibana ro di salelenglelengna! Amen. 6:17 Rodihon ma angka na mora di hasiangan on, unang ginjang rohanasida, unang dihaposi hamoraon na so mian i; alai dihaposi ma Debata, na buas mangalehon tu hita saluhut sihalashononta. 6:18 Naeng ma mangulahon na denggan nasida, mamora di angka ulaon na denggan, marroha na buas, na girgir marsibasabasa, 6:19 papunguhon di nasida pangkal na denggan tu tingki sogot, asa ditangkup nasida ngolu na tutu. 6:20 Ale Timoteus, ramoti naung jinalomi, pasiding ma pangkataion na so marimpola, na so gabeak i, dohot sualsual na pilit targoar parbinotoan! 6:21 I do dibaritahon deba, gabe manimbil sian haporseaon. Didongani asi ni roha i ma hamu!
1:1 Ahu surat tinongos ni si Paulus, apostel ni Kristus Jesus, marhite sian tahi ni Debata, marguru tu bagabaga hangoluan, na di bagasan Kristus Jesus, 1:2 mandapothon si Timoteus, anakkonku na hinaholongan: Asi ni roha, talup ni roha, dame sian Debata Ama dohot sian Kristus Jesus, Tuhanta i! 1:3 Mauliate rohangku di Debata, na huoloi di bagasan roha na ias, sian angka daompung dope; ai so marpansohotan hupaingotingot ho di angka tangiangku, borngin nang arian. 1:4 Ai masihol do ahu marnida ho, marningot iluilumi, anggiat gok halalas ni rohangku. 1:5 Ai huingot do haporseaonmu na so marlaok i, na maringanan hian di bagasan ompungmu boru, si Lois, nang di bagasan inangmu, si Eunike; alai dohot do di bagasan ho, dihaporseai rohangku. 1:6 Ala ni i hupaingot ho, asa diparatarata ho silehonlehon ni Debata, na tu ho i, di na huampehon tanganki tu ho. 1:7 Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton. 1:8 Onpe, unang ho maila, mangkatindangkon Tuhanta i, jala unang hailahon ahu, na tarhurung humongkop Ibana; dohot ma ho tahe mangkongkop barita na uli, sian hagogoon ni Debata! 1:9 Ai dipalua jala dijou do hita marhitehite panjouon na badia; ndada marguru tu ulaonta, tung sian tahina dohot sian asi ni roha, na binasabasahon tu hita di bagasan Kristus Jesus, na sian mula ni mulana. 1:10 Alai nuaeng dipapatar do, di na tarida Sipalua hita, Kristus Jesus i. Ibana do pasohothon hamatean, di paullop hangoluan dohot hatongtongon marhitehite barita na uli i. 1:11 Tusi do ahu dipabangkit, gabe parjamita dohot apostel dohot pangajari. 1:12 Ala ni i do, umbahen na marsitaonon ahu, alai ndang maila ahu disi; ai hutanda do Ibana na huhaporseai, jala pos do rohangku, margogo Ibana mangaramoti na pinalumehonna i tu ahu, ro di ari sogot i. 1:13 Ihuthon ma angka poda na tingkos i tiruanmu, songon naung binegem sian ahu, di bagasan haporseaon dohot holong ni roha na di Kristus Jesus i. 1:14 Na pinalumehon na denggan i ma ramoti marhitehite Tondi Parbadia, na maringanan di bagasan hita. 1:15 Diboto ho do, naung ditundali saluhut na di Asia i ahu, songon Pigelus dohot Hermogenes. 1:16 Sai dilehon Tuhan i ma asi ni roha tu bagas ni si Onesiporus; ai jotjot do sonang pangkilalaanku dibahen, jala ndang dihailahon ibana rantengki. 1:17 Ai disi ro ibana tu huta Rom, dihaburjuhon do mangalului ahu, paima jumpangsa. 1:18 Sai dilehon Tuhan i ma, asa jumpangan asi ni roha ibana sian Tuhan i di ari sogot i! Torang do diboto ho nasa panolongina di ahu di huta Epesus.
2:1 Onpe, ale anaha, margogo ma ho marhitehite asi ni roha ni Kristus Jesus! 2:2 Jadi ma binegem sian ahu di adopan ni torop sitindangi, i ma pasahat tu halak haposan, angka na tau mangajari na asing. 2:3 Gabe dongan manaon haporsuhon ma ho, songon parangan na denggan di Kristus Jesus! 2:4 Ndang olo alit parporang tu angka ulaon pandaraman, asa halomoan ibana di na marsuru ibana. 2:5 Nang na marsiadu pe, ndang dipartumpali, ia so tigor paraloonna i. 2:6 Ingkon siula hauma i jumolo taruli di parbuena! 2:7 Antusi na hudok i; ai lehonon ni Tuhan i do tu ho roha mangarti saluhutna i. 2:8 Paingotingot ma Jesus Kristus, naung dipangolu sian angka na mate, na sian pinompar ni si Daud, hombar tu na hubaritahon i. 2:9 Ala ni i do ahu manaon na porsuk, pola tarrante songon siula hajahaton; alai ndang tarrante anggo hata ni Debata 2:10 Dibahen i, benget do rohangku, manaon saluhutna i, ala ni angka na tarpillit, asa dohot nasida taruli di haluaon, na di bagasan Kristus Jesus, dohot di hasangapon salelenglelengna i. 2:11 Haposan do hata on: Anggo donganna do hita tu hamatean, donganna ma nang tu hangoluan. 2:12 Anggo benget hita manaon, rap mangarajai ma hita sogot. Molo mansoadahon hita, dohot ma Ibana mansoadahon hita. 2:13 So haposan pe hita, tong do haposan anggo Ibana; ai ndang tarsoadahonsa dirina. 2:14 I ma pasingothon jala hatindangkon di jolo ni Debata; unang ma nasida masisualan, ai tung na so hasea do i, na mangago do i di angka na umbegesa. 2:15 Haringgashon patuduhon haburjuonmi di Debata, songon pangula na so tarila, na padalanhon hata hasintongan i tigortigor. 2:16 Alai pasiding ma pangkataion na so marimpola, na so gabeak i, ai lam tu gandana do hajahatonnasida hinorhon ni i. 2:17 Songon baro sirarat lam ragat hatanasida; songon na di si Himeneus dohot Piletus. 2:18 Na lilu do nasida sian hasintongan i, ai didok: Nunga sanga masa haheheon i, gabe marbalik deba sian haporseaon i. 2:19 Alai na hot do haojahan na sian Debata. Hata on ma sahapna: "Ditanda Tuhan i do angka na di Ibana!" Dohot: "Sirang ma sian hageduhon nasa na mandok Goar ni Tuhan i!" 2:20 Ala ndada holan ulaula sere dohot perak dapot di bagasan bagas na bolon, dohot ma ulaula hau dohot tano; na deba tu ulaon hasangapon, na deba tu haleaon. 2:21 Asa halak na paias dirina sian angka ondeng, i ma gabe ulaula na badia, na tu ulaon hasangapon, na hasea di nampuna bagas i, rade tu nasa ulaon na denggan. 2:22 Maporus ma ho pasiding sangkapsangkap haposoon; alai pareak ma hatigoran, haporseaon, holong ni roha dohot dame, rap dohot angka na manjou Tuhan i sian roha na ias. 2:23 Alai pasiding ma angka sungkunsungkun haotoon na ngongar, ai diboto ho, na mangkorhon parbadaan do i. 2:24 Na so patut parbadabada anggo naposo ni Tuhan i, alai tama basar maradophon saluhut, malo mangajari, benget manaon na jat; 2:25 marlambok ni roha ma maminsang angka na mangalo, anggiat dilehon Debata tu nasida hamubaon ni roha, laho mananda hasintongan, 2:26 asa tarjolma nasida, dung malua sian jorgong ni sibolis i, na nialithonna tu nasida, pasauthon roharohana.
3:1 Alai patut ma botoonmu on: Na ro ma angka ari hasusaan, di angka tingki parpudi. 3:2 Ai mangkaholongi dirina ma jolma disi, impolan di perak, parhata manggang, parroha haginjangon, angka panginsahi, na so mangoloi natorasna, na so marningot lagu, angka na tois; 3:3 angka na so marroha holong, pangoseose, panihasnihasi, na so umboto mangorom, parmurukmuruk, na so marholong ni roha di na denggan; 3:4 angka parjehe, parroha na neang, sipaburnang diri, holongan di hisap ni daging asa di Debata. 3:5 Parrumang hadaulaton do nasida; alai hagogoonna i ndang dapot di nasida. Pasiding ma angka sisongon i! 3:6 Angka sisongon i do na olo manisipi tu jabu ni halak, mandormai roha ni angka boruboru, naung sorat binahen ni dosa, angka na nielaela ni ragam ni hahisapon, 3:7 angka na tongtong marguru, alai matua so sahat nasida mananda hasintongan i: 3:8 Tudoshon si Jannes dohot si Jambres, angka na mangalo si Musa, laho mangalo hasintongan. Nasida do jolma naung sega rohana; ndang manahan haporseaonnasida. 3:9 Alai ndang tagamon patulusonnasida i, ai patar do diida sude haotoonnasida, suang songon di na dua ondeng. 3:10 Alai diihuthon ho do ahu di poda, di parange, di tahi, di haporseaon, di lambas, holong dohot benget ni roha, 3:11 di bagasan angka pangaleleon, haporsuhon, angka na masa tu ahu di Antiokia, di Ikonium, di Listra: Pangaleleon na sai godang do huta on, jala dipalua Tuhan i do ahu sian saluhutna i. 3:12 Alai ndang tarbahen so hona lele nasa, na naeng marparange na daulat marhitehite Kristus Jesus. 3:13 Alai na mangkapogani hamagoanna do angka parjahat dohot siulas utiutian; na paotootohon do nasida huhut dipaotooto. 3:14 Alai anggo ho, sai mian ma di bagasan angka na ginuruhon jala naung hinaporseaanmi, ai diboto ho do na mangajarhonsa tu ho. 3:15 Huhut ala diboto ho, sian sietehetehonmi dope, surat na badia i, na margogo pabisukkon ho, asa taruli di haluaon marhitehite haporseaon di Kristus Jesus. 3:16 Ai nasa Surat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran, 3:17 asa rimpas halak ni Debata, hobas tu nasa ulaon na denggan.
4:1 Di jolo ni Debata dohot Kristus Jesus, na ro manguhumi angka na mangolu dohot na mate, huhatindangkon nang hapataronna, nang harajaonna. 4:2 Jamitahon hata i, hajongjongkon di tingki na une nang so une; pinsang, paingot, apoi marhitehite nasa lambas ni roha dohot pamodaion. 4:3 Ai na ro ma tingkina, ndang tartahan halak disi poda na tingkos i; alai mangihuthon hisaphisap sandiri ma alaponnasida pangajari na pageokgeokkon pinggolnasida. 4:4 Taitonnasida ma pinggolnasida sian hasintongan i, laho paelengkonsa tu angka turiturian. 4:5 Alai anggo ho, sandok unang ma mabuk roham, taon ma na jat i; radoti na tama ulaon ni parbarita na uli; sahat ula tohonanmi! 4:6 Ai pasahaton nama anggo ahu songon pelean; na dapot ne ma tingki haluluangki! 4:7 Nunga hupasidung paraloan na denggan i, nunga hupaujung parlojongonki; ramot hubahen haporseaon i. 4:8 Diri nama di jolongku tumpal hatigoran, silehonon ni Tuhan, Paruhum na tigor i, di ari sogot i tu ahu; alai ndada holan tu ahu, tu saluhutna do tahe, angka na mangkaholongi hapataronna i. 4:9 Pahatop manopot ahu tibu! 4:10 Ai ditadingkon si Demas i do ahu, ala naung holong rohana di portibi on, laos laho tu Tessalonik; songon i si Kreskes tu Galatia si Titus tu Dalmatia. 4:11 Sasada si Lukas i nama donganku. Arahon si Markus i, jala boan ibana donganmu, ai hasea situtu do ibana tu parhobason. 4:12 Ia si Tikikus i, nunga husuru tu Epesus. 4:13 Molo ro ho, boan ma baju panas na hutinggalhon di si Karpus, di huta Troas; songon i angka buku, na rumingkot, i ma angka pustaha i! 4:14 Godang hajahaton diula si Aleksander, pande bosi i, dompak ahu; baloshonon ni Tuhan i do tu ibana, hombar tu pambahenanna i. 4:15 Ho pe, jaga ibana; ai dialo situtu do hatanami. 4:16 Di paralusanku parjolo sahali, ndang adong donganku; tung saluhutna do manadingkon ahu. Unang ma tarrajum i tu nasida! 4:17 Alai Tuhan i do mandongani jala margogoihon ahu, asa tulus parjamitaon i marhite sian ahu, gabe saluhut sipelebegu umbegesa; laos malua do ahu sian baba ni babiat i. 4:18 Roroon ni Tuhan i do ahu sian nasa ulaon hajahaton, jala paluaonna do ahu tubagasan harajaonna na di banua ginjang i. Di Ibana ma hasangapon ro di salelenglelengna! Amen. 4:19 Tabingku ma di si Priska dohot si Akila, songon i di pangisi ni bagas ni si Onesiporus. 4:20 Tinggal do si Erastus di Korint; alai marsahit do hutadingkon si Tropimus di Miletus. 4:21 Gumira ma ho ro, andorang so taon ngali! Manongos tabi tu ho si Eubulus, si Pudes, si Linus, dohot si Klaudia ro di dongan sasude. 4:22 Didongani Tuhan i ma tondimuna! Asi ni roha ma di hamu!
1:1 Ahu surat ni si Paulus, naposo ni Debata, apostel ni Jesus Kristus, hombar tu haporseaon ni angka na pinillit ni Debata, jala hombar tu panandaon di hasintongan, na domu tu hadaulaton, 1:2 mangasahon pangkirimon di hangoluan na so ra suda, naung sian mula ni mulana i diparbagabaga Debata, na so margabus i, 1:3 gabe dipapatar do hinatahonna i di tingkina i, marhite sian parjamitaon, na pinasahatna tu ahu, mangihuthon pandokkon ni Debata, Sipangolu hita, 1:4 mandapothon si Titus, anak na tutu, taringot tu haporseaon hatopan i: Asi ni roha dohot dame sian Debata Ama dohot sian Kristus Jesus, Sipalua hita! 1:5 Umbahen na hutadingkon ho di Kreta, asa dipature, ho ulaon angka na tading i dope, dohot pabangkithon sintua di ganup huta, songon naung huaturhon tu ho. 1:6 Naeng ma nasida so hasurahan, dongan saripe ni sada parompuan, paranakkon na porsea, angka na so tarhata sineang roha manang na jungking pe. 1:7 Ai anggo sintua, sandok na so jadi hasurahan, naeng ma songon juara bagas ni Debata, unang siula roharoha, unang parpiripiri, unang sisobur tuak, unang parbada, unang parpangomo sian na so ture! 1:8 Alai na basa martamue, na las roha di na denggan, na toman, na bonar, na badia, sirajai dirina. 1:9 Na marsitiopan tu hata sihaposan i mangihuthon poda i, asa margogo ibana, mangapoi marhitehite poda na tingkos i, nang maminsang angka na manggaga. 1:10 Alai lan do angka na jengkel, angka parhata na so gabeak, na giot mangaliluhon; toropan nasida Jahudi. 1:11 Ingkon huntamon do pamangannasida, ai digaori nasida do pangisi ni angka bagas, diajarhon do na so jadi, mambuat pangomoan hailaon. 1:12 Didok sahalak panurirang sian tongatonganasida: Sai tong pargapgap do halak Kreta, angka binatang pamusa, parroha butuha, angka na losok. 1:13 Sintong do panindangion i. Dibahen i, gomos ma paminsangmu di nasida, asa gabe hisar nasida marhaporseaon. 1:14 Unang diantoi turiturian ni Jahudi ro di patikpatik ni jolma, angka naung manundalhon hasintongan i. 1:15 Ias do saluhut di angka na ias; alai ndang adong na ias di parroha na ronsam, na so porsea, ai naung ronsam do rohanasida ro di panggora ni roha i. 1:16 Dihatahon nasida do, naung ditanda Debata, alai disoadahon do Ibana di na niulanasida; ai hagigian do nasida jala na tois, na so tau tu manang dia ulaon na denggan.
2:1 Alai anggo ho, hatahon ma na domu tu poda na tingkos i: 2:2 Naeng ma marroha na torang angka na tuatua, daulat, toman, hisar marhaporseaon, marholong jala marbenget ni roha. 2:3 Songon i angka parompuan natuatua: Marparange na tama di na badia i, unang panihasnihasi, unang hatagian di anggur; angka sipodahon na denggan. 2:4 Naeng ma apoapoannasida angka parompuan na poso, mangkaholongi sinondukna dohot anakkonna, 2:5 mamarangehon hatomanon, hapormanon, mangaringkoti ulaonna di bagas, marbasabasa, marunduk ni roha maradophon hamulianna be, unang hona insak hata ni Debata. 2:6 Laos songon i ma apoi baoa angka na umposo, asa marhatomanon. 2:7 Sandok pajongjong dirim tiruan di angka ulaon na denggan, polin di pangajarion, marhatomanon. 2:8 Naeng tingkos poda i, so tarsual, asa maila na mangalo i, ala so dapot na roa sidohononna maralohon hita. 2:9 Dioloi angka anak somang ma indukna be, patupahon lomo ni rohana di na saluhutna; unang ma manggagai! 2:10 Unang ma mangahuti; dipatuduhon ma nasida haposan di sasude asa sandok marsangap poda ni Debata, Sipalua hita, dibahen. 2:11 Ai nunga tarida asi ni roha ni Debata, sibahen haluaon ni saluhut jolma. 2:12 Diajari do hita, asa tasoadahon roha na so daulat ro di angka hisaphisap tano on, asa taparangehon hatomanon, hatigoran dohot hadaulaton, tagan di hasiangan on. 2:13 Laos diajari do hita, paipaimahon hatuaon na tahirim i dohot hapapatar ni hasangapon ni Debata na balga i dohot Kristus Jesus, Sipalua i. 2:14 Ai dilehon do dirina humongkop hita, asa ditobus hita sian nasa hajahaton, asa urasonna di dirina bangso, naung Ibana nampunasa, na olo mangkapadothon angka ulaon na denggan. 2:15 I ma hatahon, paingothon jala ajarhon sian nasa gomos ni roham! Unang ma adong na marhu ni roha mida ho!
3:1 Paingot ma nasida, asa marroha na unduk mangoloi panggomgomi na mangarajai, huhut ringgas tu nasa ulaon na denggan. 3:2 Unang ma siinsahi dongan, manang na tongkar; naeng ma parroha na lambok, parroha panganju di saluhut halak. 3:3 Ai dohot do hita najolo angka na oto, na tois, na lilu, pinarhatoban ni ragam ni hisaphisap dohot sangkapsangkap, taulahon do hajahaton dohot latelate; angka hagigian do hita jala masihosoman. 3:4 Alai disi ma tarida habasaon dohot habasaron ni Debata, Sipalua hita: 3:5 Ndada ala ni ulaonta hatigoran, umbahen na dipalua Ibana hita; tung sian asi ni rohana do, marhitehite pandidion pangulahion tubu dohot marhitehite Tondi Parbadia na paimbaruhon i, 3:6 naung niusehonna i tu hita buas marhitehite Jesus Kristus, Sipalua hita, 3:7 asa gabe tigor hita, binahen ni asi ni rohana, jala sitean hangoluan salelenglelengna, mangihuthon pangkirimon i. 3:8 Haposan do hata i, jala naeng ma gomos hatindangkononmu i dipangido rohangku, asa nasida, naung gabe porsea di Debata, mangkapadothon angka ulaon na denggan. I ma na uli jala hasea di jolma. 3:9 Alai pasiding ma angka sualsual haotoon i dohot hata sundutsundut ro di parsalisian dohot parbadaon siala Patik i, ai ndang marniula i jala magopo. 3:10 Pasiding ma halak parpoda haliluon, dung jolo dipaingot ho ibana sahali manang dua hali; 3:11 ai diboto ho do, naung marbalik situtu sisongon i jala diulahon dosa, atik pe naung ditorui rohana ibana. 3:12 Ia dung husuru si Artemas dohot Tikikus tu ho, pahatop ma ro mandapothon ahu tu Nikopolis, ai disi do ahu naeng mian di taon ngali. 3:13 Haringkothon ma paborhathon si Jenas, siboto patik i, dohot Apollos; unang hurangan nasida di agia aha! 3:14 Naeng ma diguruhon angka donganta, mangkapadothon angka ulaon na denggan, sumarihon na ringkot pangkeon; unang so marparbue nasida! 3:15 Na manongos tabi tu ho saluhut donganku. Pasahat ma tabinami tu angka na marholong ni roha di hami, di bagasan haporseaon. Didongani asi ni roha i ma hamu saluhutna!
1:1 Ahu surat ni si Paulus, na tarihot ala ni Kristus Jesus, nang Timoteus, dongan i, mandapothon si Pilemon na hinaholongan, dongannami saulaon, 1:2 laos mandapothon si Appia, ibotonami, dohot si Arkippus, dongannami marungkil, ro di huria na marluhut di bagasmu: 1:3 Asi ni roha ma di hamu dohot dame sian Debata Amanta dohot sian Tuhan Jesus Kristus! 1:4 Na mandok mauliate do ahu tu Debatangku tongtong, marningot ho di angka tangiangku. 1:5 Ai hubege do holong ni roham dohot haporseaonmu di Tuhan Jesus dohot maradophon saluhut angka na badia. 1:6 Anggiat ma marpangkorhon hasaoron ni haporseaonmi, laho mananda nasa na denggan na di bagasan hamu, maradophon Kristus i. 1:7 Ai godang do di ahu halalas ni roha nang apulapul, dibahen holong ni roham, ai dipasabam ho do ateate ni angka na badia i, ale anggia. 1:8 Onpe, godang do nian hiras ni rohangku di bagasan Kristus, mangarodihon na tama tu ho. 1:9 Alai ala ni holong ni roha i, tagonan ma ahu mangelehelek. Nunga songon i ahu, Paulus, naung matua, jala tarihot nuaeng ala ni Kristus Jesus. 1:10 Asa huelehelek ma ho; ala ni anakkonku, si Onesimus, na hutubuhon, di na tarihot on ahu. 1:11 Na so marguna do ibana najolo di ho; alai nuaeng marguna situtu do di ho, nang di ahu. 1:12 Na husuru do ibana mulak tu ho; doshon rohangku do ibana huetong. 1:13 Naeng do nian tioponku ibana, asa singkatmu ibana patureturehon ahu, di na tarrante on ahu ala ni barita na uli i. 1:14 Alai ndang olo ahu mambahen agia aha, anggo so sian pamotoanmu, asa unang songon na so tarjua denggan basamu, naeng ma sian lomo ni roham. 1:15 Atik i alana, umbahen na sirang ibana sangombas sian ho, asa gabe salelengna ibana di ho! 1:16 Ndada be naposom ibana, tung lobi sian naposo, songon dongan na hinaholongan; lumobi di ahu, lam beha ma di ho: Mangihuthon ruhut tano on, tole di bagasan Tuhan i. 1:17 Asa molo dietong ho ahu donganmu, jangkon ma ibana songon ahu! 1:18 Alai molo tung adong salana manang utangna di ho, tu ahu ma i rajumi! 1:19 Ahu, Paulus, manurathonsa dohot tanganku, paboa ahu sigarar i; unang jolo hudok tu ho, na marutang diri do ho tu ahu. 1:20 Olo tutu, anggia, naeng maruntung ahu sian ho di bagasan Tuhan i; pasabam ma ateatengku di bagasan Kristus i! 1:21 Ala pos rohangku, oloanmu ahu, umbahen na manurat ahu tu ho; ai huboto, patupaonmu do lumobi sian na hudok i. 1:22 Pature huhut inganan di ahu, ai dihirim rohangku, lehononna do ahu mulak tu hamu, dibahen angka tangiangmuna. 1:23 Manongos tabi tu ho: Si Epapras, donganku tarhurung di bagasan Kristus Jesus. 1:24 Songon i: Si Markus, Aristarkus, Demas, Lukas, angka donganku saulaon. 1:25 Didongani asi ni roha ni Tuhan Jesus Kristus ma tondimuna!
1:1 Jotjot jala ragam najolo pambahen ni Debata mangkuling i angka ama i marhitehite angka panurirang i. 1:2 Alai di angka ari na parpudi on dipanghulingi do hita marhite sian Anak i. Ibana do dipabangkit gabe sitean parluhutan i, jala marhitehite Ibana do ditompa angka hasiangan i. 1:3 Sillam ni hasangaponna dohot suman ni hadirionna do Ibana, jala diusung do parluhutan i marhitehite hatana na marhagogoon i. Jala dung dipatupa Ibana haiason sian angka dosa, hundul do Ibana tu siamun ni Hatongamon na di ginjang i. 1:4 Songon surung ni Goarna na tineanna i, na mangatasi angka surusuruan, songon i do surung ni hasangaponna martimbangkon nasida. 1:5 Ai tu surusuruan dia ma hea didok: "Anakku do Ho; sadari on do Ho hutubuhon"? Manang: "Ahu do gabe Amana, jala Ibana gabe Anakku"? 1:6 Alai di na naeng togihononna muse tu portibi on Ibana na parjolo tubu i, disi ma didok: "Ingkon marsinggang tu jolona sude angka surusuruan ni Debata!" 1:7 Didok do nian taringot tu angka surusuruan i: "Ibana mambahen alogo surusuruanna, api na marjimburjimbur do parhaladona." 1:8 Alai taringot tu Anak i didok: "Ro di salelenglelengna do habangsami, ale Debata; tungkot hatigoran do tungkot harajaonmi!" 1:9 "Dihaholongi Ho do hatigoran jala dihagigihon Ho do hajahaton; ala ni i do dimiakkon Debatami miak halalas ni roha tu Ho, ale Debata, sumurung asa tu angka donganmi!" 1:10 Dung i: "Ho, ale Tuhan, paojakkon tano on di mulana i, jala jadijadian ni tanganmu do parlangitan i." 1:11 "Mago do angka i muse, alai tongtong do mian anggo Ho; laho buruk do i saluhutna songon ulos." 1:12 "Songon sampesampe balunonmu i sude, gabe muba ma; alai anggo Ho, laos tong do Ho, ndang mansohot angka taonmi!" 1:13 Alai tu surusuruan dia ma hea didok: "Hundul ma Ho tu Siamunhon, paima hubahen angka musum sidegedegean ni patmu"? 1:14 Nda saluhut nasida tondi parhobas, angka na sinuru, mangurupi angka sitean haluaon i?
2:1 Dibahen i, naeng ma muba gomosta, maniop hata naung tabege i, unang tung dibaorhon hita. 2:2 Ai gari hata na hinatahon ni angka surusuruan i, gari hot do, jala nasa pangalaosion dohot hatoison mangalap pamaloson na hombar. 2:3 Tagamon ma adong dapot haporusanta, molo tatoishon haluaon na sai godang i? Pola do Tuhan i mangkatahonsa di mulana i, jala momos dipasahat angka na umbegesa tu hita! 2:4 Ai dohot do Debata mangkatindangkon marhitehite angka tanda dohot halongangan dohot ragam ni pambahenan hagogoon, nang marhitehite Tondi Parbadia, na sinagihonna guru lomo ni rohana. 2:5 Ai ndada tu angka surusuruan i dipagomgomhon Ibana hasiangan sogot, na tahatahon on. 2:6 Alai adong do na mangkatindangkon di Surat i: "Aha do jolma i, umbahen na diingot Ho Ibana; manang anak ni jolma i, umbahen na ditatap Ho ibana?" 2:7 "Otik dipaoru Ho Ibana tu toru ni angka surusuruan. Hasangapon dohot hamuliaon ditumpalhon Ho tu Ibana." 2:8 "Saluhutna do dipatunduk Ho tutoru ni patna." Ai di na pinatundukna i saluhutna i tu Ibana, ndang adong tading, na so unduk tu Ibana; alai anggo nuaeng, ndang taida dope, naung tunduk tu Ibana saluhutna i. 2:9 Alai na pinaoruna i otik tutoru ni angka surusuruan i, i ma Jesus taida, na martumpalhon hasangapon dohot hamuliaon, ala nunga ditaonhon hamatean i, asa sian asi ni roha ni Debata Ibana mangahap hamatean i humongkop saluhut. 2:10 Ai Ibana, hapatean jala parmulaan ni nasa na adong, dung jolo ditogihon Ibana torop anak tu hasangapon, tama Ibana, parmulaan ni haluaonnasida i, dipajongjong sun denggan marhitehite sitaonon. 2:11 Ai marharoroan sian na Sada do saluhutna, na pabadiahon dohot na pinabadiana i; ala ni i ndang dihailahon Ibana, manggoar nasida angka anggina. 2:12 Ai ninna do: "Baritahononku do Goarmu tu angka anggingku; di tongatonga ni huria i do endehononku Ho!" 2:13 Dung i muse: "Ibana do bahenonku haposanku!" Jala muse: "Dison do Ahu dohot dakdanak i, angka na nilehon ni Debata tu Ahu!" 2:14 Asa songon dakdanak partohap di mudar dohot di sibuk, gabe suman do dohot Ibana partohap disi, asa marhitehite hamatean i dipasohot Ibana sibolis i, na marhuaso mambahen mate, 2:15 asa dipalua sasude na pinarhatoban ni biar ni roha managam hamatean, saleleng mangolu. 2:16 Ai apala angka surusuruan disarihon, pomparan ni Abraham i do! 2:17 Ala ni i, ingkon gabe dos situtu Ibana tu angka anggina asa gabe parasiroha Ibana jala sintua ni malim haposan maradophon Debata, laho pasaehon angka dosa ni bangso i. 2:18 Ai intap naung marsitaonon Ibana di na tarunjun i, haurupan Ibana do angka na tarunjun i.
3:1 Onpe, ale angka dongan na badia, partohap di panjouon na sian banua ginjang i, bereng hamu ma Jesus i, i ma apostel jala sintua ni malim na taparhatopot i! 3:2 Haposan do Ibana maradophon na pabangkithon Ibana, songon si Musa di sandok bagasna i. 3:3 Alai gumodang do hasangapon dietong tu Ibana, asa tu si Musa, mangihuthon surung ni hamuliaon na tu sipauli bagas asa tu bagas i. 3:4 Ai ganup bagas, adong do na paulihonsa; alai sipauli saluhutna, Debata do. 3:5 Anggo si Musa nian, haposan do di sandok bagasna i, songon parhobas, laho mangkatindangkon na naeng baritahononhon dope. 3:6 Alai anggo Kristus i, songon Anak sigomgom bagasna; hita do bagasna, anggo gomos tatiop ro di ujungna hiras ni roha, na mangasahon ni hinirim i. 3:7 Dibahen i, songon na nidok ni Tondi Parbadia i: "Sadari on, di na binegemuna soarana," 3:8 "unang ma papir hamu rohamuna, songon nasida na tangkang i di ari pangunjunan di halongonan i!" 3:9 "Ai disi diunjuni angka amamuna Ahu, jala dipaujiuji, atik pe diida nasida angka ulaonki opatpulu taon lelengna." 3:10 "Dibahen i muruk do Ahu mida na sansundut i jala hudok: Tongtong do lilu rohanasida. Alai ndang ditanda nasida angka dalanku," 3:11 "pola maruari Ahu di rimashi: Na so tupa bongotannasida paradiananki!" 3:12 Matahon hamu ma, ale angka dongan, so tung tardapot di manang ise pe sian hamu roha na jahat, na so porsea, na manundali Debata na mangolu i! 3:13 Alai masiapoan ma hamu ganup ari, saleleng tardok dope sadari on, unang tung gabe pir roha ni manang ise sian hamu, hinorhon ni dosa na paotootohon! 3:14 Ai nunga gabe partohap di Kristus hita, anggo gomos tatiop ro di ujungna pos ni roha, na di hita di mulana i. 3:15 Uju i ma didok: "Sadari on, di na binegemuna soarana, unang ma papir hamu rohamuna, songon nasida na tangkang roha uju i!" 3:16 Ise do na patangkang rohana, atik pe dibege i? Nda saluhut nasida na tumadingkon tano Misir, tinogihon ni si Musa? 3:17 Angka ise do dimuruhi Ibana opatpulu taon lelengna? Nda nasida, na mardosa i! Gabe marragean do dagingnasida di halongonan i. 3:18 Dompak ise do Ibana maruari, na so tupa nasida masuk tu paradiananna i? Nda dompak angka na so mangoloi! 3:19 Asa on do taida: Ala na so porsea i nasida, umbahen na so tarbahensa bongot.
4:1 Dibahen i, biar ma rohanta, unang songon na tading manang ise sian hamu, binsan hot dope bagabaga, laho masuk tu paradiananna i. 4:2 Ai dohot do tu hita dibaritahon i, songon na tu nasida; alai ndang marguna di nasida hata na binegenasida, ala so saor haporseaon i di bagasan nasida na umbegesa. 4:3 Ai na bongot tu paradianan i do hita, anggo dung gabe porsea, songon na nidokna i: "Pola maruari Ahu di rimashi, na so tupa bongotannasida paradiananki," atik pe naung sidung angka ulaon i olat ni haoojak ni portibi on. 4:4 Ai didok do sahali songon on taringot tu ari papituhon i: "Dung i maradian ma Debata di ari papituhon i sian saluhut ulaonna i." 4:5 Dung i muse: "Na so tupa bongotannasida paradiananki!" 4:6 Asa adong dope deba na tarbahen bongot tusi; alai na jumolo jinamitaan i ndang masuk, ala na so mangoloi. 4:7 Ala ni i, dibuhul muse sada ari, sadari on, ninna, ai didok do marhite sian si Daud, dung salpu na sai leleng i, suman tu naung nidokna i hian: "Sadari on, di na binegemuna soarana, unang ma papir hamu rohamuna!" 4:8 Ai aut si Josua pabongothon nasida, ndang hatahononna be di pudi ni i taringot tu ari na asing. 4:9 Dibahen i, adong dope hirimon paradianan Sabbat di bangso ni Debata. 4:10 Ai ibana naung bongot tu paradianan i, maradian do sian na niulana songon Debata, na maradian sian na niulana i. 4:11 Antong, taharingkothon ma mambongoti paradianan i; unang ma adong na somsam, mangihuthon na so mangoloi i. 4:12 Ai na marngolu do hata ni Debata jala marpangkorhon, jala tumajom sian nasa podang siduababa, jala torus do disirang hosa dohot tondi, ringring dohot utohutokna, laos diuhumi do na sinangkap dohot na piningkir ni roha. 4:13 Jala ndang adong na tinompa na onding sian jolona, tung saluhut do tedek, so adong na hungkup diida matana. Tu Ibana do hita mardabudabu! 4:14 Onpe, dibahen naung adong di hita sintua ni malim na bolon, naung manorusi angka banua ginjang i, i ma Jesus, Anak ni Debata, gomos ma tatiop naung taparhatopot i! 4:15 Ai naung adong do di hita sintua ni malim na tarbahen dongan mangkilala di angka hagaleonta; tung na tarunjun do Ibana di na saluhut songon hita, alai ndang mardosa. 4:16 Antong, marhiras ni roha ma hita mandapothon habangsa parasiasian, asa tajalo talup ni roha, jala asa dapot asi ni roha hita bahen pangurupion, di tingki halehetanna.
5:1 Ai ganup sintua ni malim, na binuat sian jolma, dipabangkit do ala ni jolma, mangaradoti angka ulaon na tu Debata, asa dipelehon silehonlehon nang pelean, ala ni angka dosa. 5:2 Na tarbahen do i rap mangkilala dohot angka na hurang boto nang na lilu, ai dohot do ibana partohap di hagaleon. 5:3 Alai ni i, ingkon mamboan pelean pardosaon ibana; ia songon i humongkop natorop, laos songon i humongkop dirina. 5:4 Jala ndang adong na mangaithon hamuliaon sisongon i tu dirina; Debata do manjou ibana tusi, songon si Aron i. 5:5 Laos songon i do nang Kristus: Ndang Ibana mangaithon sahala sintua ni malim tu dirina; Debata do, na mandok tu Ibana: "Anakku do Ho; sadari on do Ho hutubuhon!" 5:6 Songon nidokna i di na asing: "Malim do Ho ro di salelenglelengna, mangihuthon horong ni si Melkisedek!" 5:7 Tagan jolma Ibana, dipelehon do angka pangidoanna dohot elehelekna, mardongan angguk bolon dohot iluilu tu na tuk paluahon Ibana sian hamatean; jadi ditangihon do Ibana, gabe malua sian hatahuton i. 5:8 Ai atik pe Anak i Ibana, diguruhon do pangoloion marhite sian na tinaonanna i! 5:9 Jala dung rimpas gabe sihorhon haluaon salelenglelengna do Ibana di sude na mangoloi Ibana. 5:10 Digoar Debata do Ibana sintua ni malim, mangihuthon horong ni si Melkisedek. 5:11 Godang do nian sidohononnami taringot tusi, jala angka na maol pajojoron, ala nunga penge pinggolmuna. 5:12 Ai tumimbangkon lelengna i, nunga patut guru hamu nian, hape angka sisiasia ni hata ni Debata dope siajarhononhon tu hamu; gabe susu nama ringkot di hamu, ndada sipanganon hian. 5:13 Ai ganup partohap di susu ndang marbinoto di hata hatigoran i, ai posoposo do i. 5:14 Alai sipanganon hian do di angka na rimpas, naung pasomalsomal rohana, gabe malo mambolati na denggan sian na roa.
6:1 Onpe, unang ma jolo tataringoti be poda mulamula na taringot tu Kristus; tadapothon ma na rimpas i! Unang pola taulahi pauli ojahan taringot tu na paubahon roha, manundalhon ulaon hamatean, mangkaporseai Debata, 6:2 manang poda taringot tu pandidion dohot na mangampehon tangan, taringot tu haheheon ni angka naung mate dohot uhum sogot. 6:3 I ma bahenonta, molo tung diloas Debata. 6:4 Ai nasida, angka naung sanga dipatiur, angka naung mandai silehonlehon parbanua ginjang, angka naung gabe partohap di Tondi Parbadia, 6:5 angka naung mandai hata na uli na sian Debata ro di angka hagogoon ni hasiangan sogot: 6:6 Molo tung marbalik nasida, tung na so tarpaimbaru do nasida, asa muba muse, ai naung mangulahi pasilangkon Anak ni Debata do nasida di dirina, jala dipaurak. 6:7 Ai tano na mangonsop udan, na sai ro tusi, gabe ditubuhon suansuanan na hasea di angka na mangulasa, i do taruli di pasupasu sian Debata. 6:8 Alai na tumubuhon sihupi dohot bajora, ndang na hasea i; bura do sitagamon ni i, jala mosokkononna nama i di ujungna. 6:9 Alai hudok hami pe songon i, ale angka haholongan, na dumenggan i do huhirim i hami di hamu, i ma na martohap di haluaon. 6:10 Ai ndang na geduk Debata: Tung halupahononna ma na niulamuna dohot holong ni roha na pinatuduhonmuna tu Goarna, di pangkobasionmuna di angka na badia i najolo ro di nuaeng? 6:11 Alai dipangido rohanami do, naeng patuduhonon ni ganup hamu ringkot ni roha na songon i, patasakkon pangkirimon i sahat ro di ujungna. 6:12 Unang ma gabe angka na losok hamu; tiru hamu ma angka sitean bagabaga i, marhitehite haporseaon dohot lambas ni roha! 6:13 Ai laho mangalehon bagabagana tu si Abraham, di dirina do maruari Debata, ala so adong na umbalga paruarianna. 6:14 On do hatana: "Pasupasuonku situtu do ho jala patoroponku do ho, asa tung torop!" 6:15 Jadi dipalambas do rohana; i do dalanna, gabe dapotsa na pinarbagabaga i. 6:16 Ai anggo jolma, na umbalga sian nasida do dibahen paruarianna; jala pamomoshon do uari i, papatehon nasa parsalisian. 6:17 Ia Debata, uari do dipangke, laho patuduhon tu angka sitean bagabaga i tahina, na so olo muba i, 6:18 asa dapotan apoapo na margogo hita, horhonon ni na dua partinandaan, na so olo muba, ai na so tarbahen Debata margabus; tusi do hita marhaporusan, laho marsitiopan tu pangkirimon na di jolonta i. 6:19 Na songon sao di tondinta do i, na hot jala na togu, na manorusi sahat tu bagasan ni rimberimbe i. 6:20 Tusi do bongot Patujolonta, i ma Jesus, naung gabe sintua ni malim salelenglelengna, mangihuthon horong ni si Melkisedek.
7:1 Anggo Melkisedek i, raja di huta Salem, malim ni Debata na tumimbo do ibana, ditomutomu jala dipasupasu do si Abraham na mulak, dung dipapatu ibana angka raja. 7:2 Tu ibana do diturpukkon si Abraham saparsampulu sian sasudena i. Raja hatigoran do parjolo lapatan ni goarna i, angkup ni i: Raja ni Salem, na mandok: Raja sipardame. 7:3 So marama, so marina, so marpartuturan, na so marmula arina, na so marujung ngoluna; na dipatudos do ibana tu Anak ni Debata, malim do tongtong ro di salelenglelengna. 7:4 Alai bereng hamu ma sangapna i: Salang si Abraham, ompunta parsadaan, mangalehon tu ibana saparsampulu ni angka arta. 7:5 Nang angka sijujung hamalimon sian angka anak ni i Lepi disuru do, asa hombar tu patik i diparsampulu bangso i, ima angka hahaangginasida, na rap pomparan ni si Abraham. 7:6 Alai ibana, na so marpartuturan tu nasida, diparsampulu do si Abraham, jala dipasupasu do hasahatan ni bagabaga i. 7:7 Jadi sandok ndang targaga on: Na sumangap i do mamasumasu na ummetmet. 7:8 Jala jolma na olo mate do nasida, na manjalo na saparsampulu i; alai anggo ibana, mangolu do dihatindangkon. 7:9 Jala tardok ma: Marhitehite si Abraham diparsampulu do nang si Lepi, sijalo na saparsampulu i nian. 7:10 Ai di bagasan amana na sumundut i dope ibana, di na ro Melkisedek manomunomu. 7:11 Onpe, ia dipatihi pe bangso i, marpandapotan di hamalimon ni si Lepi, nda tung marhite sian i songgop harimpason i; ai aut i, boasa pola pajongjongon malim na asing, na mangihuthon horong ni si Melkisedek, na so goaron mangihuthon horong ni si Aron? 7:12 Ai molo mimbar hamalimon, ndang tarbahen so mimbar nang patik. 7:13 Jala ibana, na nidok ni hata on, masuk marga na asing do; ndang dung adong sian i na marhalado di langgatan i. 7:14 Ai torang do antong: Sian Juda do martumbur Tuhanta; ndang ditaringoti si Musa hamalimon ni na samarga i. 7:15 Jala ganda dope torangna, molo dipajongjong malim na asing, na suman tu si Melkisedek, 7:16 na gabe malim sian pangkorhon ni ngolu na so haharharan, unang ma sian patik ni aturan sibuk. 7:17 Ai dihatindangkon do ibana paboa: "Malim do Ho ro di salelenglelengna, mangihuthon horong ni si Melkisedek!" 7:18 Disi ma dipasohot patik na jumolo i, ala so margogo jala so marguna. 7:19 Ai ndang tarpasun patik i agia aha; alai dipabongot do pangkirimon na dumenggan, i ma parhiteanta manjonohi Debata. 7:20 Ndang masa i, ia so marhitehite uari; anggo nasida tutu, gabe malim do, so pola marhitehite uari. 7:21 Alai ia On, marhitehite uari do, na niuarihon ni na mandok tu Ibana: "Naung maruari do Tuhan i, jala ndang solsolanna dirina: Malim do Ho ro di salelenglelengna!" 7:22 Hombar tusi do sumurung padan, na hinangkungan ni Jesus. 7:23 Jala torop do anggo nasida na gabe malim, ala na so diloas hamatean i nasida mian. 7:24 Alai anggo Ibana, ala mian ro di salelenglelengna, ndang taripar hamalimonna tu na asing. 7:25 Dibahen i, tarbahen Ibana do paluahon sandok angka na manjonohi Debata marhitehite Ibana; ai na mangolu do Ibana tongtong, laho mangondihon nasida. 7:26 Ai sintua ni malim na songon i do tama di hita, na badia, na so marlaok, na so marlindang, na marbolat sian angka pardosa, naung gabe tumimbo sian angka banua ginjang i, 7:27 na so pola ganup ari pasahathon jumolo pelean ala ni dosana sandiri, dung i ala ni dosa ni bangso i, songon angka sintua ni malim i; ai sahali do i diulahon, di na pinelehonna i dirina. 7:28 Ai dipabangkit patik i do jolma sipargale gabe sintua ni malim; alai dipabangkit hata uari, na umpudi sian patik i, do Anak i, naung gabe rimpas ro di salelenglelengna.
8:1 Asa on do na rumingkot di hata on: Adong do di hita sintua ni malim, na hundul di siamun ni habangsa Hatongamon na di banua ginjang i, 8:2 siradoti angka ulaon na badia ro di joro na tutu i, naung dipauli Tuhan i, ndada jolma. 8:3 Ai ganup sintua ni malim dipabangkit do, asa dipelehon silehonlehon dohot pelean; asa ingkon adong nang di Ibana sipelehononna. 8:4 Aut sura di tano on Ibana, ndang suraon malim Ibana, ala adong do na mamelehon angka silehonlehon mangihuthon patik i. 8:5 Diradoti nasida do tiruan dohot halinu ni na di banua ginjang i, songon na dapotan poda si Musa sian ginjang, uju naeng paulionna joro i: "Bereng ma, ninna, 'asa paulionmu saluhutna i tudos tu tiruan, naung di patuduhon tu ho di dolok i!' " 8:6 Alai dapot Ibana do tohonan na sumurung nuaeng, ai Pangulu do Ibana di parpadanan na sumurung, na niaturhonna marojahan di bagabaga na dumenggan. 8:7 Ai aut so hasurahan na parjolo i, ndang tagamon luluanna hasiatan ni na paduahon on. 8:8 Ai dihata do nasida, di na nidokna i: "Na ro ma angka ari, ninna Tuhan i, pajongjongonku ma disi padan na imbaru tu pinompar ni Israel dohot Juda!" 8:9 "Ndada suman tu padan na hupajongjong di angka amanasida, manogihon nasida ruar sian tano Misir; ai so mian nasida di bagasan parpadananki; nang Ahu pe, ndang hupasarisari nasida, ninna Tuhan i." 8:10 "Ai on do padan na naeng pajongjongonku tu pinompar ni Israel, dung salpu angka ari i, ninna Tuhan i: Lehononku do angka patikku tu bagasan rohanasida jala tu ateatenasida surathononku i; dung i gabe Debatanasida ma Ahu, jala nasida gabe bangsongku." 8:11 "Jala ndang pola be diajari halak donganna sabangso manang hahaanggina pe, mandok: Tanda ma Tuhan i! Ai tandaonnasida luhutna do Ahu, angka na metmet nang angka na magodang pe." 8:12 "Ai marpamuati do rohangku mida hageduhonnasida, jala na so tupa be ingotonku angka dosanasida." 8:13 Di na tinaringotanna na imbaru i, dipaburukburuk ma na jumolo i. Alai na laho salpu ma nasa naung gabe buruk jala matua.
9:1 Asa adong do nian nang di na parjolo i angka uhum ni parhaladoon, ro di joro na marrumang tano on. 9:2 Ai dipauli do inganan jolojolo i; di bagasan i do: Parpalitoan i ro di meja dohot roti na marhadohoan; i do na margoar: Na badia. 9:3 Alai di pudi ni rimberimbe paduahon i do inganan na margoar: Na badia situtu. 9:4 Disi do langgatan pardaupaan sere dohot poti parpadanan, na nilampisan saluhut dohot sere, dibagasanna do guriguri sere na marisi manna i dohot tungkot ni si Aron na martumbur i, ro di batu panuratan padan i; 9:5 jala di atasna Kerubim di hasangapon, na mangalinggomi langkop pardengganan i. Ndang tarhatahon i saonari sadasada. 9:6 Dung songon i dipauli, gabe manongtong ma bongot angka malim tu bagasan inganan jolojolo i, mangulahon parhaladoon i. 9:7 Alai tubagasan na paduahon i, holan sintua ni malim i do, sahali sataon, jala ndang tarbahen so mantat mudar, sipelehononna ala ni dirina dohot ala ni dosa haotoon ni bangso i. 9:8 Marhitehite i do dipatuduhon Tondi Parbadia i, paboa na so dipapatar dope dalan tu na badia i, saleleng hot dope joro na parjolo i: 9:9 Tudutudu tu tingki on nuaeng; ai dipelehon do disi silehonlehon dohot pelean, angka na so tuk pasonangkon situtu panggora ni roha ni na marhalado i. 9:10 Angka sipanganon dohot siinumon ro di ragam ni pandidion sambing do i, hatigoran ni sibuk, angka na pinatikkonna, paima ro arina patingkoshon. 9:11 Alai ro do Kristus; Ibana do sintua ni malim ni angka parulian na naeng ro i. Jala na sahali i do dibongoti na sun badia i, marhite sian joro na umbalga jala na mauliutus na so pinauli ni tangan, na so sian panompaon on; 9:12 ndada marhitehite mudar ni angka hambing randuk manang anak ni lombu, tung marhitehite mudarna sandiri, gabe dipatupa haluaon salelenglelengna. 9:13 Ai gari mudar ni hambing randuk dohot jonggi dohot lombu, naung diparsiragongi, dipistikkon tu angka na ramun, mangkorhon haiason ni sibuk: 9:14 Nda lam tumangkas ma mudar ni Kristus i paiashon rohamuna sian angka ulaon hamatean, laho mangoloi Debata Siparngolu i; ai dipelehon do dirina so marlindang tu Debata, marhitehite Tondi na manongtong i! 9:15 Jadi ala ni on, umbahen na gabe pangulu di padan (testament) na imbaru Ibana: Asa dijalo angka na tarjou i bagabaga i, i ma siteanon na so olo muba i; dung jolo adong na mate, laho pasaehon angka pangalaosion, uju di padan na parjolo i. 9:16 Ai anggo adong padan testament, ingkon tandap mate sibahen testament i. 9:17 Ai dung pe mate halak i, asa hot testament i; ai nda tung margogo i, saleleng mangolu dope na mambahensa. 9:18 Ai nang padan na parjolo i, marhitehite mudar do i dipasahat. 9:19 Ai dung dihatahon si Musa tu sandok natorop i nasa tona mangihuthon patik i, dibuat ma mudar ni anak ni lombu dohot hambing randuk mardongan aek, hapas na rara dohot limut isop, dipispisi ma pustaha i sandiri ro di sandok natorop i. 9:20 Huhut ma didok: "On ma mudar ni padan na niaturhon ni Debata di hamu!" 9:21 Laos songon i ma dipispishon mudar i tu joro i dohot tu saluhut ulaula na badia i. 9:22 Jala hira saluhutna do diurasi marhitehite mudar mangihuthon patik i; jala holan marhitehite na mandurushon mudar tulus hasesaan. 9:23 Asa ingkon songon i do diurasi na tiniru sian na di banua ginjang i; alai na di banua ginjang i hian, marhite sian pelean na ummangat do! 9:24 Ai ndada bongot Kristus tubagasan na badia na pinauli ni tangan, gombaran ni na sintong i; tung tu bagasan banua ginjang sandiri do, laho patuduhon dirina nuaeng di adopan ni Debata, humongkop hita. 9:25 Ndada laho mamelehon dirina jotjot, songon sintua ni malim i, na mambongoti na badia i jojor taon marhitehite mudar ni na leban. 9:26 Aut i, ingkon jotjot ma Ibana marsitaonon, olat ni haoojak ni hasiangan on. Alai sahali do gabe patar Ibana di ujung ni angka ari on, laho pasohothon dosa i, binahen ni na pinelehonna i dirina. 9:27 Songon na ampe tu jolma: Mate sahali, dung i uhum i; 9:28 songon i do nang Kristus, naung sahali dipasahat, laho mamorsan dosa ni natorop i; alai paduahalihon ndada ala ni dosa, tarida ma Ibana disi, mantat haluaon di angka na paipaimahon Ibana.
10:1 Ai holan halinu ni angka parulian sogot do na di patik i, ndada anggo badanna. Ala ni i, sandok ndang tarbahen patik i mambahen sun denggan angka na sai ro tusi, mamboan pelean ganup taon. 10:2 Ai aut i, pasadionnasida ma na mamele i, ala so adong be dosa siingoton ni nasida na marhalado i, anggo dung ias nasida sahali. 10:3 Alai binahen ni angka pelean, mulak rata do ganup taon parningotan di dosa. 10:4 Ai ndang tarbahen mudar ni angka jonggi manang hambing randuk pasaehon angka dosa. 10:5 Ala ni i, ninna do di habobongotna i tu portibi on: "Ndang diparhagiot roham pelean manang silehonlehon; daging i do dipauli Ho di Ahu!" 10:6 "Ndang lomo roham di pelean situtungon manang di pelean pardosaon." 10:7 "Jadi ningku ma: Na ro ma Ahu mangulahon lomo ni roham, ale Debata; di pustaha i do tarsurat taringot tu Ahu." 10:8 Didok jolo: "Ndang diparhagiot Ho pelean dohot silehonlehon, nang pelean situtungon manang pelean pardosaon, jala ndang lomo roham di na pinelehon mangihuthon patik." 10:9 Dung i didok ma: "Na ro ma Ahu, mangulahon lomo ni roham!" Disi ma dipasohot na parjolo i, asa dipajongjong na paduahon. 10:10 Di bagasan lomo ni rohana i gabe angka na badia hita, binahen ni daging ni Jesus Kristus, naung pinelehonna, na sahali i. 10:11 Jala ganup malim jongjong do ariari marhalado dohot manjotjoti mamboan pelean, na sandok so tarbahen pasaehon dosa. 10:12 Alai anggo Ibana, sada pelean sambing do diboan, pasaehon ro di salelenglelengna angka dosa; dung i hundul do Ibana di siamun ni Debata. 10:13 Na maimaima nama Ibana, rasirasa dipampeakkon angka musuna bahen sidegedegean ni patna. 10:14 Ai hinorhon ni pelean na sasada i, sun denggan do dipajongjong Ibana, ro di salelenglelengna, angka na olo pabadiaonna. 10:15 Alai dohot do Tondi Parbadia i mangkatindangkonsa tu hita, ai didok do: 10:16 "On ma padan sipajongjongonku tu nasida, dung salpu angka ari i, ninna Tuhan i: Lehononku ma angka patikku tubagasan ateatenasida jala surathononku ma i tu rohanasida," 10:17 "jala na so tupa be ingotonku dosanasida ro di hajahatonnasida!" 10:18 Anggo dung sesa angka i, ndang be masa pelean pardosaon. 10:19 Antong, ale angka dongan, adong do di hita hiras ni roha, laho bongot tu bagasan na badia i, di bagasan mudar ni Jesus; 10:20 ai dibungka do di hita dalan na imbaru jala na mangolu, sian rimberimbe i, i ma dagingna i; 10:21 jala adong do di hita malim na bolon, sigomgom bagas ni Debata. 10:22 Dibahen i, tadapothon ma, marroha na sintong, di bagasan hagogok ni haporseaon, dung diurasi rohanta, unang be disolsoli panggora ni roha i hita, jala dung diburi dagingta dohot aek na ias! 10:23 Momos ma tatiop pangkirimon na taparhatopot i, ai haposan do na marbagabagahonsa! 10:24 Masiantoan ma hita, masipajujuan tu haholongon dohot tu angka ulaon na denggan! 10:25 Unang tatadingkon parpunguanta hian, songon na hinasomalhon ni na deba; tung masipaingotan ma hita, jala lam i ma nian, ala lam jonok diida hamu ari i! 10:26 Ai anggo tatuntun mardosa, dung jolo tajalo parbinotoan di hasintongan i, ndang adong be dapot pelean pasaehon dosa. 10:27 Uhum na jorbut nama sipaimaon dohot api ni haririmas, siallang angka na mangalo. 10:28 Sitompas patik ni si Musa ingkon mate do, anggo adong dua manang tolu sitindangi, so siat asi ni roha. 10:29 Timbang hamu ma: Sadia dumokdok ma uhum mangonai tu jolma, na mandegedegei Anak ni Debata jala na mansoadahon mudar parpadanan, parhitean ni habadiaonna nian, jala na manoisi Tondi Parasiroha i! 10:30 Ai tatanda do Ibana, naung mandok: "Ahu do nampuna, partubolon; Ahu do mamaloshon!" Dung i muse: "Uhumon ni Tuhan i do bangsona!" 10:31 Jorbutna i, madabu tu tangan ni Debata na mangolu i! 10:32 Alai ingot hamu ma angka ari najolo; ai dung dipatiur hamu, ditaon hamu do godang parungkilon, i ma haporsuhon. 10:33 Na deba sian hamu gabe sitotonduran dibahen insahinsak dohot haporsuhon; na deba gabe saor tu angka na manaon songon i. 10:34 Ai rap manaon do hamu dohot angka na tarhurung; jala nang dirampas artamu, marlas ni roha do hamu manaon i, ala diboto hamu, adong do di hamu arta na ummangat jala na mian. 10:35 Onpe, unang ma bolongkon hamu hiras ni rohamuna, ai balga do upa ni i! 10:36 Ai habengeton do na ronsot di hamu, asa tarula hamu lomo ni roha ni Debata, jala dapot bagabaga i. 10:37 Ai "saotik nari sambing nama, ro ma na giot ro, jala ndang marnalemba!" 10:38 Alai sian haporseaon ma mangolu partigor i; jala ndang lomo rohangku di halak na sumurut. 10:39 Alai ndang sumurut anggo hita, asa tu hamagoan; na marhaporseaon do, laho mangomohon tondi.
11:1 Alai anggo haporseaon i, pos ni roha do i di angka sihirimon, jala pamotoan na tontu taringot tu na so niida. 11:2 Di bagasan i do dapotan panindangion angka na tuatua na robi. 11:3 Hinorhon ni haporseaon do taantusi, naung marhitehite pandok ni Debata dipaojak angka hasiangan, asa sian na so tarida manjadi na tarida i. 11:4 Hinorhon ni haporseaon do dipelehon si Abel tu Debata pelean na dumenggan sian na binoan ni si Kain; marhite sian i do dihatindangkon ibana partigor, ai dihatindangkon Debata do angka pelean na binoanna, jala marhite sian i marsoara dope ibana, atik pe naung mate. 11:5 Hinorhon ni haporseaon i do tarhinsat si Henok, gabe ndang diida hamatean, jadi ndang jumpang be ibana, ala naung dihinsat Debata; ai andorang so tarhinsat, dihatindangkon do ibana, halomoan ni Debata. 11:6 Alai anggo so marhaporseaon, ndang tarbahen halomoan; ai halak na mandapothon Debata, ingkon dihaporseai: Adong Debata; laos Ibana do silehon upa tu angka na manjalahi Ibana. 11:7 Hinorhon ni haporseaon do dijalo si Noak poda taringot tu na so dapot idaon dope, gabe mabiar ibana, jala dipauli parau i, bahen haluaan ni nasida na sajabu; marhitehite i diuhumi ibana portibi on, jala gabe sitean hatigoran, na marguru tu haporseaon. 11:8 Hinorhon ni haporseaon do mangoloi si Abraham, dung dijou bungkas tu tano sijaloonna bahen teanteanan; saut do ibana bungkas, so adong diboto sitopotonna. 11:9 Hinorhon ni haporseaon do ibana hinomit di tano, naung diparbagabaga tu ibana, songon di tano ni na leban; undungundung do diingani raphon si Isak dohot si Jakkob, donganna panean di bagabaga na sasada i. 11:10 Ai dipaimaima do huta na marojahan na hot, na pinandean jala na pinauli ni Debata. 11:11 Laos hinorhon ni haporseaon do dijangkon si Sara gogo manubuhon pomparan maralohon timbo ni umurna, ala haposan di rohana na marbagabagahonsa. 11:12 Dibahen i tubu do sian na sasada i, naung mate dohonon, na satorop ni bintang di langit, na sagodang ni rihit di topilaut, na so dapot bilangan. 11:13 Di bagasan haporseaon do mate nasida sude. Ndang sanga dijalo nasida bagabaga i; sian na dao nama ditatap jala dihalashon; na diparhatutu, panginsua jala paisolat nasida di tano on. 11:14 Marhitehite pandoknasida sisongon i ditariashon, panjalahi do nasida di parsambuloan. 11:15 Aut diingot rohanasida tano naung tinadingkonnasida i, sanga do nasida mulak tusi. 11:16 Alai na dumenggan do dihalungunhon nasida, i ma na di banua ginjang i. Dibahen i, ndang dihailahon Debata nasida; na olo do Ibana goaron Debatanasida, ai nunga dipauli di nasida sada huta. 11:17 Hinorhon ni haporseaon do dipelehon si Abraham si Isak i, di na tarunjun i ibana. Dipasahat sijalo bagabaga i do anakna na sasada i. 11:18 Ai taringot tu ibana do didok: "Di bagasan si Isak do targoar di ho pomparan!" 11:19 Dirajumi rohana do, marhuaso Debata, manungguli nang sian na mate, jala mulak sian i do ibana dijalo, hira tudosan. 11:20 Hinorhon ni haporseaon do dipasupasuhon si Isak tu si Jakkob dohot tu si Esau angka na naeng masa dope. 11:21 Hinorhon ni haporseaon do dipasupasu si Jakkob, na laho mate i, angka anak ni si Josep sadasada, jala dipaunduk dirina dompak ulu ni tungkotna. 11:22 Hinorhon ni haporseaon do ditaringoti si Josep di ajalna i hamumulak ni angka anak Israel jala ditonai do nasida taringot tu holiholina. 11:23 Hinorhon ni haporseaon do ditabunihon natoras ni si Musa ibana tolu bulan lelengna, dungkonsa tubu, ala anak na uli ibana diida; jala ndang dihabiari paksa ni raja i. 11:24 Hinorhon ni haporseaon do manjua si Musa, dung magodang, goaron ibana anak ni boru ni Firaun. 11:25 Tagonan do dipilit rohana: Rap tumaon na porsuk ibana dohot bangso ni Debata, sian na maruntung satongkin, bahenon ni dosa. 11:26 Haleaon ni Kristus i do dijujur ibana hamoraon na ummangat asa angka arta na di tano Misir; ai pamaloson i do dibereng. 11:27 Hinorhon ni haporseaon do ditadingkon ibana tano Misir, ndang dihabiari ibana rimas ni raja i, ai dapotan gogo do ibana, ala diida rohana Ibana, na so tarida hian. 11:28 Hinorhon ni haporseaon do diulahon Paska i dohot na mangusehon mudar, asa unang dihahua pangago i buhabajunasida. 11:29 Hinorhon ni haporseaon do dibolus nasida laut na rara i songon tano na mahiang; diuji halak Misir ma i, gabe mate mogap. 11:30 Hinorhon ni haporseaon do magargar parik ni huta Jeriko, dung pitu ari lelengna dihaliangi. 11:31 Hinorhon ni haporseaon do, umbahen so mago si Rahab, boruboru na jahat i, raphon angka na so mangoloi; ai di bagasan dame do dijangkon angka pangkahap i. 11:32 Dia dope dohononku! Na so sanga pajojoronku barita ni si Gidion, Barak, Simson, Jepta, Daud, Samuel ro di angka panurirang. 11:33 Ai hinorhon ni haporseaon do dipatunduk nasida angka harajaon, dipatulus hatigoran, taruli di angka bagabaga, dihuntam baba ni angka babiat; 11:34 diintopi gogo ni api, malua sian baba ni podang, sumuang margogo sian hagaleon, marantu di hamusuon, ditaluhon angka parangan ni na leban. 11:35 Dijalo angka ina na matena sumuang sian haheheon. Alai na deba diparsilangkon do, so saut malua, asa anggiat taruli di haheheon na dumenggan. 11:36 Na deba muse manaonhon reherehe dohot linsinglinsing, tole ihotihot dohot hurungan: 11:37 Didangguri, dipaporsukporsuk, digargaji, mate dibuat podang na tajom, munsatunsat do nasida marabithon bobak ni birubiru dohot hambing, anturaparon, sinosahan, jinahatan. 11:38 Hurang tama do nian portibi on mandongani nasida, gabe ditondong nasida angka halongonan, angka tor, angka liang dohot lombanglombang na di tano on. 11:39 Saluhut nasida ndang dijalo na pinarbagabaga i, atik pe dihatindangkon, na porsea nasida. 11:40 Ai na dumenggan do ditahi Debata, lehononna tu hita, asa unang sahat tu harimpason nasida, so rap dohot hita.
12:1 Dibahen i nang hita pe, ala na sai torop ni sitindangi humaliang hita, tapeakkon ma nasa na pasorathon ro di dosa na girgir mangkaliangi, jala marbenget ni roha ma hita marlojong tu bagasan paraloan, na sonson di jolonta! 12:2 Tabereng ma induk ni haporseaon i jala na paujungkonsa, i ma Jesus, na manaonhon parsilangon i, singkat ni las ni roha, tohapna i hian, so dietong i hailaon, gabe hundul di siamun ni habangsa ni Debata! 12:3 Paingotingot hamu ma Ibana, na pataontaonhon paraloan sisongon i dompak Ibana sian angka sipardosa asa unang marnaloja hamu, unang mandate tondimuna! 12:4 Ndang adong dope pola tiris mudarmuna, laho mangalo di parungkilon maralohon dosa i. 12:5 Nunga lupa hamu di pangapulon na hinatahonna tu hamu, ala anak hamu, ai ninna do: "Ale anaha, unang tois roham di pangajarion ni Tuhan i, jala unang ho mandele, jumpa dipinsang ho!" 12:6 Ai diajar Tuhan i do na hinaholongan ni rohana, jala dilinsingi do ganup anak na jinangkonna. 12:7 Benget ma hamu, jumpa diajar hamu! Anakna do hamu disi, dijujur Debata. Ai didia ma adong anak, na so niajar ni amana! 12:8 Ai na so anak situtu ma hamu, anggo malua hamu sian na hona ajar, naung songgop tu sasudena i. 12:9 Onpe, angka amanta isara di daging do pangajar di hita, jala tahabiari do nasida; nda lam marunduk ni roha ma hita tu Ama ni angka tondi, asa mangolu hita. 12:10 Ia nasida, diajar do hita, so piga ari, marguru tu panimbangan ni rohanasida; alai anggo On, tu na marguna do: Asa partohap hita di habadiaonna i. 12:11 Nasa paminsangon tutu, anggo di hamamasana, ndada las ni roha i hilalaon, tung arsak do; alai dung salpu i, diparbuehon do hatigoran na mardame di angka naung gabe somal marhite sian i. 12:12 Dibahen i, patogar hamu ma tangan na so marnangon dohot ulu ni tot na telluktelluk! 12:13 Patigor hamu ma sidalanan ni patmuna, asa unang lam sitik na pangpang; asa sumuang malum ma nian! 12:14 Ringkoti hamu ma, asa mardame hamu tu saluhut halak, huhut asa badia hamu; anggo so i, ndang adong idaonta Tuhan i. 12:15 Matahon hamu ma, asa unang adong na paholang dirina sian asi ni roha ni Debata, unang i gabe urat na paet na martumbur, sihorhon hasusaan, gabe hodar maon torop bahenon ni i. 12:16 Tung unang ma adong parmainan manang na ramun songon si Esau, na sumeahon sahala sihahaan ala ni sipanganon sada. 12:17 Ai diboto hamu do: Na tartulak do ibana, di na naeng manean pasupasu i ibana muse; ndang jumpangsa hasiatan ni muba ni roha i, atik pe mariluilu ibana mangaluluisa. 12:18 Ai ndang didapothon hamu na tarjama, na marsigorgor di bagasan api, manang hagolapon, haholomon ro di habahaba, 12:19 manang pangkuling ni sarune dohot saringar ni hata, pola mangelehelek angka na umbegesa, unang tu nasida dipatongon hata i. 12:20 Ai ndang tartaon nasida Paksa i na mandok: Molo dais dorbia tu dolok, ingkon mate i dangguran. 12:21 Pola didok si Musa, dibahen songkal ni na tarida i: Hatahutan do ahu jala angka dotdot! 12:22 Alai dolok Sion i do didapothon hamu dohot huta ni Debata na mangolu i, i ma Jerusalem na di banua ginjang i, dohot surusuruan na marloksaloksa, i ma loloan pesta bolon i, 12:23 dohot huria ni na parjolo tubu, angka na tarsurat di banua ginjang i, dohot Debata, Siuhumi saluhut, dohot tondi ni angka partigor naung rimpas, 12:24 dohot Jesus, pangulu ni parpadanan na imbaru i, dohot mudar na mangurasi i, parsoara na dumenggan unang mudar ni si Abel. 12:25 Jaga ma hamu, so tung dijua hamu Ibana na mangkuling i! Ai molo gari so malua nasida na manjua Ibana na mamaksa di tano on, lam hita ma, anggo tatundalhon Ibana na sian banua ginjang i! 12:26 Tano on do dihutur soarana uju i; alai anggo nuaeng marbagabaga do Ibana songon on: "Sahali nari do Ahu mangkuturi, ndada holan tano on, dohot ma banua ginjang i!" 12:27 Alai hata na mandok sahali nari patuduhon: Na naeng muba ma na tarhutur, i ma na tinompa on, asa hot na so tarhutur i! 12:28 Dibahen i, mauliate ma rohanta, ala tajalo harajaon na so tarhutur; marhitehite i do gabe hita parhalado halomoan ni Debata mardongan biar dohot hadaulaton. 12:29 Ai api na mangallang do Debatanta i!
13:1 Manongtong ma holong ni roha di dongan! 13:2 Unang halanggushon hamu partamueon; ai marhite sian i hea do ditamuei halak angka surusuruan, so pamotoanna. 13:3 Ingot hamu ma angka na tarhurung, songon na rap tarhurung; songon i angka na tumaon na porsuk, ai dohot do hamu di bagasan daging. 13:4 Sangap ma pardongansaripeon di na saluhut, jala unang ramun parsaoran pardongansaripeon; ai uhumon ni Debata do angka parmainan dohot pangalangkup. 13:5 Unang ma marholong ni roha di hepeng pangalahomuna; hasabamhon hamu ma na adong! Ibana sandiri do mandok: "Sandok na so tadingkononku do ho; sandok na so pasombuonku do ho!" 13:6 Asa tung pos rohanta mandok: Tuhan i do pangurupi di ahu, ndang mabiar ahu; aha ma bahenon ni jolma tu ahu? 13:7 Ingot hamu ma angka na manguluhon hamu, na paboahon hata ni Debata tu hamu; ujung ni pardalanannasida ma bereng hamu, jala tiru hamu ma haporseaonnasida! 13:8 Ia Jesus Kristus, songon i nantoari, songon i sadari on, laos i do ro di salelenglelengna! 13:9 Unang ma olo hamu elaelaon ni poda na ragam jala na lain! Ai patut do marhitehite asi ni roha gabe togu roha, ndada marhitehite parpanganon, na so marguna di angka na mangaradotisa. 13:10 Adong do di hita langgatan; ndang marhuaso manganhon sian i angka na marhalado di undungundung i. 13:11 Ai dibalian ni parsaroan i do ditutung sibuk ni angka dorbia, dung diboan sintua ni malim mudar i tu bagasan bilut na badia, ala ni dosa. 13:12 Songon i do nang Jesus: Dibalian ni harbangan i do Ibana marsitaonon, asa diparbadiai bangso i marhitehite mudarna sandiri. 13:13 Dibahen i, tadapothon ma Ibana tu balian ni parsaroan i, mamorsan haleaonna i! 13:14 Ai ndang adong di hita dison huta na hot; alai dilului rohanta do na ro sogot. 13:15 Marhitehite Ibana ma tapelehon tongtong tu Debata pelean pujipujian, i ma parbue ni bibir, angka na marhatopothon Goarna. 13:16 Alai unang ma lupa hamu, mambahen na denggan dohot mangulahon asi ni roha; ai dihalomohon Debata do angka pelean na songon i. 13:17 Tangihon hamu ma angka na manguluhon hamu jala oloi hamu ma nasida! Ai nasida do manjagai tondimuna, laos nasida do maralus sogot; naeng ma marlas ni roha nasida disi, unang mardongan hoihoi, ai ndang ulimuna i. 13:18 Tangiangkon hamu ma hami! Ai pos do rohanami, na so pola solsolan ni panggora ni roha i hami, ala huringkoti hami marparange na denggan di na saluhut. 13:19 Alai lam huapoi ma hamu mangulahon i, asa anggiat tumibu ahu dipatongon muse tu hamu. 13:20 Alai Debata Sipardame i, na manogihon sian angka na mate Siparmahan bolon ni angka birubiru i, marhitehite mudar ni padan sisalelenglelengna i, i ma Tuhanta Jesus; 13:21 Ibana ma patauhon hamu di nasa ulaon na denggan, mangulahon lomo ni rohana, ai dipatupa do di bagasan hamu na tau lomo ni rohana marhitehite Jesus Kristus! Di Ibana ma hasangapon i ro di salelenglelengna! Amen. 13:22 Alai huapoi ma hamu, angka dongan, jangkon hamu ma si paingot i; ai jempek do husurathon tu hamu. 13:23 Boto hamu ma, naung malua donganta, si Timoteus. Anggo tibu ibana ro, naeng rap hami marnida hamu. 13:24 Dok hamu ma tabi tu saluhut gurumuna, nang tu angka na badia saluhutna! Manongos tabi do tu hamu angka dongan na sian Italia. 13:25 Didongani asi ni roha i ma hamu saluhutna!
1:1 Ahu surat ni si Jakobus, naposo ni Debata dohot Tuhan Jesus Kristus, mandapothon na sampuludua marga, na di parserahan: Tabi ma di hamu! 1:2 Ale angka donganku, las ni roha sambing ma rajumi hamu i, anggo madabu hamu tu bagasan ragam ni pangunjunan. 1:3 Boto hamu ma: Na mangkorhon habengeton do pangunjunan na tu haporseaonmuna. 1:4 Alai ingkon dihorhon habengeton i do ulaon na sun denggan, asa gabe rimpas hamu, angka na so marlindang, na so marnahurang. 1:5 Ai molo adong di tongatongamuna na hurangan bisuk, dipangido ma tu Debata, na bulus mangalehon di saluhut jala ndang marpangea, dung i lehononna ma tu ibana. 1:6 Alai di bagasan haporseaon ma ibana mangido, unang marganggu ni roha; ai na ganggu roha i, tudos do tu galumbang ni laut, na pinahuturhutur jala na pinalindaklindak ni alogo. 1:7 Unang ma diparbaga roha ni halak i, jaloonna agia aha sian Tuhan i! 1:8 Ai halak na mardua roha, na gaor do i di saluhut angka dalanna. 1:9 Alai dipuji dongan na toruk i ma dirina siala timbona i! 1:10 Songon i na mora i, siala hatoruhonna; ai na laho salpu ma ibana songon bungabunga na di ladang i. 1:11 Ai binsar ma mata ni ari dohot mohopna, jadi rahar ma duhut i, marurus ma bungana, mago ma rupana na jengkar i. Songon i ma laho malos na mora i di bagasan angka dalanna. 1:12 Martua do halak na manaon di pangunjunan i: Ai dung tau ibana, jaloonna ma tumpal hangoluan, naung diparbagabaga tu angka na holong roha di Ibana. 1:13 Unang ma didok manang ise, jumpa tarunjun ibana: Na tarunjun do ahu sian Debata! Ai ndang masa di Debata pangunjunan tu hajahaton; ndang diunjuni Ibana manang ise. 1:14 Alai ditaiti jala dipaelaela sangkapsangkap ni rohana sandiri do ganup, umbahen na tarunjun. 1:15 Jadi dung manjangkon sangkapsangkap ni roha i, ditubuhon ma dosa; alai dung gok dosa i, ditubuhon ma hamatean. 1:16 Unang ma hamu lilu, angka donganku na hinaholongan! 1:17 Saluhutna silehonlehon na denggan, nasa ulibasa na mauliutus, i ma na ro sian ginjang, sian Ama ni na tiur, na so olo muba, na so umboto agia halinu ni hamimimbar. 1:18 Sian tahi ni rohana do ditubuhon Ibana hita marhitehite hata hasintongan i, asa hita hira patumonaan sian angka na tinompana i. 1:19 Ingot hamu ma, angka donganku na hinaholongan: Ganup jolma, girgir ma ibana mananginangi, bangkol ma ibana mangkatai, bangkol ma tarrimas! 1:20 Ai ndang diulahon rimas ni jolma hatigoran ni Debata. 1:21 Dibahen i, bolongkon hamu ma nasa na roa ro di hajahaton na lohot i; marlambok ni roha ma hamu manjalo hata na sinuan tu bagasan rohamuna, na tarbahen paluahon tondimuna. 1:22 Alai gabe siulahon Hata i ma hamu, unang holan pananginangi, angka na paotootohon dirina! 1:23 Ai pananginangi di hata i, anggo so diulahon, tudos ma i tu halak na paberengbereng rupa ni bohina di sorminan. 1:24 Ai dibereng do dirina, dung i laho ma ibana, gabe ndang diboto be rupana. 1:25 Alai na mamereng torus tu bagasan uhum haluaon na sun denggan i jala mian disi, i ma na martua marhite sian pangulaonna i, anggo so pananginangi na mangkalupahon, siula ulaon i tahe ibana. 1:26 Molo adong na mandok di bagasan rohana, na daulat ibana, hape ndang dirantei dilana, diansi do tahe rohana: Na magopo ma hadaulatonna i. 1:27 On do hadaulaton na ias jala na so marlindang, di roha ni Debata Ama: Mandulo angka na so marama, so marina dohot angka na mabalu di haporsuhonnasida, huhut mangaramoti diriniba maralohon portibi on, unang marlindang.
2:1 Ale angka donganku, unang ma siidaida bohi hamu, angka na porsea di Tuhanta Jesus Kristus na marsangap i! 2:2 Ai adong ma ro tu bagasan parguruanmuna sahalak partintin sere jala parulos na arga, ro ma huhut sahalak na pogos, marabit na humurang. 2:3 Jadi dibereng hamu ma na marabit na denggan, didok hamu ma: Denggan ma ho juguk dison; alai tu na pogos i didok hamu: Disan ma ho jongjong, manang hundul ma ho tu na hudege on! 2:4 Nda nunga marbagi dua rohamu disi; nda nunga manguhumi hamu mangihuthon pingkiran na jahat? 2:5 Tangihon hamu ma, ale angka donganku na hinaholongan: Nda dipillit Debata angka na pogos di portibi on, asa mamora nasida marhitehite haporseaon jala panean di harajaon, na pinarbagabagana tu angka na holong roha di Ibana? 2:6 Alai dileai hamu do na pogos i. Nda angka na mora i na paporsukporsukkon hamu jala manaratnarat hamu tu paruhuman? 2:7 Nda nasida do na manginsahi Goar na denggan i, naung digoarhon tu hamu? 2:8 Sibahen na denggan do hamu, antong, molo marguru tu Surat i diulahon hamu patik raja on: "Haholongi donganmi songon dirim!" 2:9 Alai molo siida bohi hamu, na mangulahon dosa do hamu disi, gabe diuhumi patik i hamu songon pangalaosi. 2:10 Ai aut sura diradoti jolma saluhut patik i, alai tinggang di na sada, nunga gabe parsala ibana di saluhutna. 2:11 Ai Ibana na mandok: "Unang ma ho mangalangkup!," laos Ibana do mandok: "Unang ho mambunu!" Asa molo so mangalangkup ho, alai mambunu do, tong do ho pangalaosi di patik! 2:12 Di nasa hata dohot ulaonmuna ingot hamu ma: Siuhumon do hamu, bahenon ni patik haluaon i! 2:13 Ai uhum na so marasi ni roha ma tu na so mangulahon asi ni roha; na monang do asi ni roha maralohon uhum. 2:14 Aha ma gunana, ale angka donganku, molo didok halak, di ibana do haporseaon; alai ndang adong di ibana pangulaon. Tarbahen do haporseaon i paluahon ibana? 2:15 Molo adong dongan baoa manang boruboru, na marsaemara jala hurangan di sipanganon siap ari, 2:16 gabe adong na mandok sian tongatongamuna: Laho ma hamu mardamedame, las ma hamu, bosur ma hamu; alai ndang dilehon hamu tu nasida na ringkot di daging, aha ma gunana? 2:17 Haporseaon i pe songon i do: Anggo so adong pangulaonna, naung mate do hadirionna. 2:18 Alai adong ma na mandok: Di ho do haporseaon; di ahu do pangulaon! Patuduhon ma di ahu haporseaonmu so padohot angka pangulaon, asa ahu patuduhon tu ho haporseaon sian angka pangulaonku. 2:19 Na porsea do ho, adong Debata sisadasada. Taho ma i; dohot do angka sibolis porsea disi, jala angka dotdot! 2:20 Alai ho, ale jolma na rumar, naeng botoonmu, na so marguna haporseaon, anggo so marulaon? 2:21 Nda gabe tigor si Abraham, amanta i, marhite sian ulaon, di na binoanna i si Isak, anakna i, tu pamelean? 2:22 Diida ho disi, manumpak do haporseaon i tu angka ulaonna, jala sian angka ulaon i gabe rimpas haporseaon i. 2:23 Jadi jumpang ma na nidok ni Surat i: "Dihaporseai si Abraham do Debata, jala i do dirajumi tu ibana gabe hatigoranna" jala targoar do ibana "aleale ni Debata." 2:24 Asa diida hamu do: Sian angka pangulaon i do gabe tigor jolma, ndada holan sian haporseaon. 2:25 Songon i do nang si Rahab boruboru na jahat i; nda sian angka pangulaon do ibana gabe tigor, di na jinangkonna i angka suruan jala dipalua do nasida sian dalan na asing? 2:26 Ai songon daging i na mate, anggo so martondi; songon i do mate haporseaon na so marulaon.
3:1 Ale angka donganku, unang deak hamu gabe guru; ai taboto do, dumokdok do uhum sijaloonta. 3:2 Ai saluhut hita jotjot marsala; molo adong na so sala di hata, i ma halak na rimpas, na tarbahen mangarantei saluhut dagingna i. 3:3 Molo tabahen rante tu baba ni angka hoda, asa dioloi hita, tatogutogu do sandok dagingna i. 3:4 Angka hopal i pe, atik pe na sai balga jala nionjar ni angka alogo na gogo, dipatongontongon do marhitehite amudi na metmet tungkan lomo ni roha ni juaramudi i. 3:5 Songon i do nang dila i: Ruas na metmet do i, alai godang do hatahatana; metmet pe api i, digalahi do tombak na sai balga! 3:6 Api do nang dila i, portibi hageduhon; songon i do pangalaho ni dila di tongatonga ni angka ruas ni dagingta, dipahodar do sandok daging i jala dipagalak do panggulmiton ni ngolunta i, dung galak dibahen na roko. 3:7 Ai nasa ragam ni binatang, angka pidong, ulok ro di dengke tarpatunduk do, gabe tunduk dibahen hajolmaon. 3:8 Alai ndang tarpatunduk jolma anggo dila i; panjahati na so marpansadian do i, gok bisa hamatean. 3:9 I do ulaulanta mamuji Tuhan i, Amanta; laos i do tapangke mambuburahon jolma, na tinompa marguru tu rupa ni Debata. 3:10 Sian sada pamangan do ruar pamujion dohot pamuraion. Ale angka donganku, ndang tama masa songon i! 3:11 Tung adong ma baba ni mual sada, na marbullakkon na tonggi dohot na paet? 3:12 Ale angka donganku, tung tarparbuehon antajau ma unte, manang tubu antajau sian hau anggur? Ndang tarpapuas mual na ansim tapian na uli. 3:13 Ise hamu na bisuk jala na pantas marroha? Sian denggan ni parangena ma dipataridahon ibana angka ulaonna marhitehite halambohon ni habisuhon! 3:14 Alai molo ditiop hamu pangiburuon na paet dohot hatongkaron di bagasan rohamuna, unang ma puji hamu dirimuna maralohon hasintongan, huhut margabus! 3:15 Ndada i habisuhon na ro sian ginjang; na sian tano do i, sian roha ni jolma, sian sibolis. 3:16 Ai ia disi pangiburuon dohot hatongkaron, disi ma hagaoron dohot sandok ulaon hajahaton. 3:17 Alai anggo habisuhon na sian ginjang i, sandok na bontor do i, olo mardame, lambok, pangoloi, gok asi ni roha dohot parbue hadengganon, dao sian hagangguon nang pangansion. 3:18 Alai di bagasan dame do disaburhon parbue hatigoran di angka na mangulahon dame i.
4:1 Sian dia do angka parbadaon dohot parmusuon na di hamu? Nda sian hisaphisap, angka na maralo di bagasan angka ruasmuna! 4:2 Na marsangkapi do rohamuna, alai ndang dapotan; na mambunu do hamu jala mangiburu, laos so taruli hamu. Na masialoan do hamu jala marmusu, so adong di hamu, ala so martangiang hamu. 4:3 Na martangiang do hamu nian; alai ndang manjalo, ala sala tangiangmuna, ai naeng pansuasaehononmuna do i di bagasan hahisaponmuna. 4:4 Hamu angka pangalangkup, ndang diboto hamu, hamusuon dompak Debata do paralealeon dohot portibi on? Asa, na naeng aleale ni portibi on, dipajongjong do dirina, gabe alo ni Debata. 4:5 Manang ninna rohamuna, gait do na nidok ni Surat i? Pangiburu do Tondi i, naung dipadiri di bagasan hamu. 4:6 Alai lam gumodang do asi ni roha dilehon; ala ni i do didok: "Dialo Debata do angka na ginjang roha, alai dilehon do asi ni roha tu angka na serep marroha!" 4:7 Antong, oloi hamu ma Debata; alo hamu ma sibolis i, dung i maporus ma ibana sian hamu. 4:8 Pajonok hamu ma tu Debata, dung i pajonohonna ma tu hamu! Paias ma tanganmuna, hamu angka pardosa, jala pabontor ma rohamuna hamu angka na mardua roha! 4:9 Arsakkon hamu ma jeamuna; mangangguhi jala tumatangis ma hamu; muba ma parengkelonmuna gabe partangison, nang halalas ni roha gabe arsak ni roha! 4:10 Paserep hamu ma rohamuna maradophon Tuhan i, dung i patimboonna ma hamu. 4:11 Unang ma hamu masipahatahataan, ale angka dongan; na mangkatahata jala manguhumuhumi donganna, mangkatahata jala manguhumuhumi patik do i. Alai molo diuhumi ho patik i, panguhum do ho, ndada siula na nidok ni patik i. 4:12 Sada do Sipajongjong patik jala Panguhum; i do na tarbahen paluahon dohot mangagohon. Alai ho, ise do ho, umbahen na diuhumi ho donganmu? 4:13 E hamu, didok hamu do: Sadari on manang marsogot laho ma hami tu huta adui, asa disi hami sataon martigatiga jala mangomoomo. 4:14 So adong diboto hamu na masa marsogot; ai aha do hosamuna! Suman ma hamu tu timus, na tarida satongkin, dung i gabe so haidaan be. 4:15 Singkat ni i ma nian dohononmuna: Molo na lomo roha ni Tuhan i, mangolu ma hami, jala bahenonnami ma on dohot an. 4:16 Hape ditengatengahon hamu do hata manggang muna; na jahat do nasa panenganengahon sisongon i. 4:17 Antong, na umboto mambahen na denggan, gabe ndang diulahon, na mardosa ma ibana disi.
5:1 E hamu angka na mora, tumatangis ma hamu jala mangangguhi managam haporsuhon, na naeng songgop tu hamu. 5:2 Nunga busuk hamoraonmuna, nunga ngitngiton ulosmuna. 5:3 Naung tasihon do sere dohot perakmuna, jala sitindangi dompak hamu do tasik i, na manggagat tu sibukmuna songon api. Dipapungu hamu do arta di angka ari na parpudi. 5:4 Na maungaung do na nidobomuna, i ma upa ni angka pangula na manggotil angka haumamuna, jala panjouon ni angka panabi, nunga sahat tu pinggol ni Tuhan Sebaot! 5:5 Tarlobi do pargadombusonmuna di tano on, dipamokmok hamu do dirimuna di ari pamotongan. 5:6 Diuhumi dibunu hamu do Partigor i; ndang dialo Ibana hamu! 5:7 Antong, pabenget hamu ma rohamuna, ale angka dongan, sahat ro di haroro ni Tuhan i! Ai parhauma i pe, dipaimaima do parbue na arga, na sian tano i, jala dihabengethon do, paima dijalo udan manogot nang bodari. 5:8 Hamu pe, marbenget ni roha ma, patogu hamu ma rohamuna, ai donok do haroro ni Tuhan i. 5:9 Unang marhoi hamu maralohon hamu, ale angka dongan, asa unang hona uhum hamu. Nunga jongjong di pintu i Panguhum i! 5:10 Ale angka dongan; angka panurirang, na marjamita marhitehite Goar ni Tuhan i, ma tiru hamu di haporsuhon dohot di habengeton. 5:11 Taparhatua do angka naung marhabengeton. Dibege hamu do habengeton ni si Job, jala diida hamu do ujung na binahen ni Tuhan i; ai parasiroha bolon do Tuhan i jala partalup ni roha. 5:12 Alai parjolo ni saluhutna, ale angka donganku, unang hamu manolonnolon manang tu parlangitan, manang tu tano on, manang tu panolonan na asing pe; alai hatamuna: Olo, hot ma i olo, ia hata: Ndang hot ma ndang, asa unang madabu hamu tu bagasan uhum. 5:13 Molo adong di tongatongamuna na tumaon na porsuk, martangiang ma ibana; molo adong na marlas ni roha, marende ma ibana. 5:14 Molo adong na marsahit di hamu, dijou ma angka sintua ni huria i; asa ditangiangkon ibana; didampol ma ibana dohot miak marhitehite Goar ni Tuhan i. 5:15 Dung i pangoluon ni tangiang haporseaon i ma na marsahit i, jala paheheon ni Tuhan i ma ibana; sesa ma nang dosana, molo tung adong diulahon. 5:16 Antong, masitopotan dosa ma hamu dohot masitangiangan, asa malum hamu. Na margogo situtu do tangiang ni partigor, molo dihaburjuhon. 5:17 Jolma do si Elia, sabangko dohot hita; gogo do ibana martangiang, unang jolo ro udan; jala ndang ro udan di tano i, tolu taon onom bulan lelengna. 5:18 Dung i diulahi ma martangiang, jala dilehon langit i ma udan; dung i dipantubuhon tano i ma parbuena. 5:19 Ale angka donganku, molo adong di hamu naung lilu sian hasintongan, gabe adong na manogihon ibana mulak, 5:20 diboto ma: Na paluahon tondina sian hamatean jala mangkungkupi godang dosa do halak, na manogihon pardosa mulak sian haliluonna i.
1:1 Ahu surat ni si Petrus, apostel ni Jesus Kristus, mandapothon angka paisolat, naung tarpillit, na marserak di Pontus, Galatia, Kappadosia, Asia dohot Bitinia, 1:2 marguru tu panandaon ni Debata Ama hian, di bagasan Tondi na pabadiahon, tu pangoloion dohot pangurasion ni mudar ni Jesus Kristus: Singkop ma di hamu asi ni roha dohot dame! 1:3 Pinuji ma Debata, Ama ni Tuhanta Jesus Kristus, naung manubuhon hita paduahalihon, sian godang ni asi ni rohana, marhitehite haheheon ni Jesus Kristus sian angka na mate, asa marpangkirimon na mangolu hita. 1:4 Di siteanon na manongtong, na so marlindang, na so ra malos, na sinimpan di banua ginjang di hamu. 1:5 Ai diramoti do hamu hinorhon ni gogo ni Debata marhitehite haporseaon, asa sahat tu haluaon, naung rade sipapataron di tingki na parpudi i. 1:6 I do dihalashon hamu, nang pe marsak hamu satongkin nuaeng, di bagasan ragam ni pangunjunan, molo tung ingkon i. 1:7 Ai naeng jumpang do hatauon ni haporseaonmuna, na andul ummarga sian sere na so manahan, nang pe diuji api i, bahen pujipujian dohot hamuliaon dohot hasangapon, di hapapatar ni Jesus Kristus i. 1:8 Atik pe so dung diida hamu Ibana, dihaholongi hamu do Ibana, na hinaporseaanmuna, nang so diida hamu Ibana nuaeng, gabe mariaia do hamu, di bagasan halalas ni roha na so tarhatahon jala na tongam, 1:9 gabe jaloonmuna do ujung ni haporseaonmuna, i ma haluaon ni tondimuna. 1:10 I ma haluaon, na niluluan jala pinamanatmanat ni angka panurirang, naung manurirangkon asi ni roha na tu hamu i. 1:11 On do dipamanatmanat nasida: Manang andigan jala manang sadihari tingkina dituduhon Tondi ni Kristus i, na di bagasan nasida, na mangkatindangkon hian angka haporsuhon, na naeng songgop tu Kristus i, ro di angka hasangapon na dipudi ni i. 1:12 Dipapatar pe i tu nasida, ndada di nasida sandiri, di hamu do na niradotannasida i. Laos i do na pinaboa ni angka parbarita na uli nuaeng tu hamu marhitehite Tondi Parbadia, naung sinuruna sian banua ginjang. Masihol do angka pardisurgo mamereng tu bagasanna. 1:13 Dibahen i, hohosi hamu ma rohamuna; torang ma rohamuna; sandok mangkirim ma hamu di asi ni roha na tarboan tu hamu, di hapataron ni Jesus Kristus. 1:14 Songon dakdanak sipangoloi ma hamu; unang ma paihutihut hamu be sangkapsangkap ni roha, uju di haotoonmuna najolo. 1:15 Alai mangihuthon Nabadia i, na manjou hamu, dohot ma hamu gabe badia di nasa parangemuna! 1:16 Ai na tarsurat do: "Badia ma hamu, ai na badia do Ahu!" 1:17 Molo Ama digoar hamu Ibana, na so marnida rupa, laho manguhumi nasa jolma marguru tu pambahenanna, marhatahuton ma hamu marparange di tingki paisolatanmuna! 1:18 Ai diboto hamu do: Ndada binahen ni sere manang perak, angka na olo buruk, umbahen na malua hamu sian adatmuna na so marniula i, na tineanmuna sian angka amamuna; 1:19 alai binahen ni mudar ni Kristus na arga i do, na songon mudar ni birubiru na so hasurahan, na so marlindang. 1:20 Naung ditodo do Ibana hian, tagan so ojak dope portibi on; alai dipapatar do di ujung ni angka tingki, ala ni hamu. 1:21 Marhitehite Ibana do dihaporseai hamu Debata, na pahehehon Ibana sian angka naung mate, jala na mangalehon hasangapon tu Ibana, asa tu Debata haporseaon nang pangkirimonmuna. 1:22 Paias hamu ma rohamuna, marpangoloion di hasintongan, mangeahi haholongon na so marlaok di dongan, asa masihaholongan situtu hamu sian nasa roha. 1:23 Ai nunga mangulahi tubu hamu, ndada sian boni na olo basebasean, sian na manongtong do: Binahen ni hata na mangolu jala na mian i, na sian Debata. 1:24 Ai "songon duhutduhut do nasa daging, songon bungabunga ni duhutduhut i do saluhut hasangaponna. Nunga malos duhutduhut i jala marurus bungabungana". 1:25 "Alai na mian do ro di salelenglelengna ia hata ni Tuhan i!" I do hata na binaritahon tu hamu.
2:1 Antong, bolongkon hamu ma nasa hajahaton dohot nasa angkal dohot pangiburuon nang panihaion! 2:2 Songon posoposo na imbaru tubu, uasan ma hamu di susu na tama, na so marlaok, asa lam magodang hamu, horhonon ni i, bahen haluaon, 2:3 molo tung naung didai hamu habasaron ni Tuhan i. 2:4 Ai nunga didapothon hamu Ibana, na songon batu na mangolu, na binolongkon ni jolma; alai na pinillit jala na arga, ia di Debata. 2:5 Sai olo ma nang hamu paulion, songon angka batu na mangolu, gabe bagas partondion jala hamalimon na badia, laho mamboan angka pelean partondion, halomoan ni roha ni Debata, marhitehite Jesus Kristus. 2:6 Ai na tarsurat do di Surat i: "Hupeakhon do di bagasan Sion sada batu parsuhi, na marpili jala na arga; ndang na tarila na porsea di Ibana!" 2:7 Arga do Ibana di hamu, angka na porsea; alai di angka na so porsea i: Batu na binolongkon ni angka pande bagas i, i ma gabe batu parsuhi, 2:8 jala gabe batu partuktuhan jala batu pargasipan. Ai na tartuktuk do nasida disi, ala so dihaporseai nasida hata i; ai tusi do nasida dipadiri. 2:9 Alai marga na pinillit do hamu, hamalimon na raja, bangso na badia, houm na ginomgomanna, asa tung dibaritahon hamu denggan ni harohaon ni Ibana, naung manjou hamu sian na holom tu hatiuronna halongangan i. 2:10 Hamu, angka na so bangso najolo, gabe bangso ni Debata nuaeng; angka na so niasian hamu najolo, gabe niasian do nuaeng. 2:11 Ale angka haholongan, huapoi ma hamu songon angka paisolat jala halak dagang: Orom hamu ma angka hisaphisap ni roha sibuk, na maralo dompak partondion! 2:12 Marparange na denggan ma hamu di tongatonga ni angka parbegu, asa, ia adong na pahatahatahon hamu songon angka parjahat, gabe dipasangap nasida Debata di ari panuluhan i, dung diida denggan ni ulaonmuna. 2:13 Unduk ma hamu maradophon nasa uhum, na sinuan di hajolmaon, ala ni Tuhan i, nang maradophon raja parhuaso parginjang, 2:14 nang maradophon panguhum, angka na sinuruna, maminsang angka sibahen na jahat, alai mamuji ia siula na denggan. 2:15 Ai on do lomo ni roha ni Debata: Naeng ma marhite sian ulaon na denggan pompomanmuna haotoon ni halak na hurang roha. 2:16 Ai angka naung malua do hamu; alai unang ma pinangke haluaon i mangondingi hajahaton; songon angka naposo ni Debata ma tahe! 2:17 Marhapantunon ma hamu tu sasude; haholongi ma angka dongan; habiari ma Debata; pasangap ma raja! 2:18 Unduk ma angka anak somang maradophon angka indukna, huhut ma sandok dihabiari; unang holan maradophon parroha na denggan jala na basar, ingkon dohot do maradophon parroha na jungking. 2:19 Ai i do asi ni roha, molo ditaon halak arsak ni roha dohot pambahenan na so uhum, ala ingot ibana di Debata. 2:20 Ai barita dia ma i, ia benget hamu manaon pangalinsingon, anggo tung ala ni dosamuna? Alai molo benget hamu manaon na porsuk, balos ni ulaonmuna na denggan, i do asiasi di roha ni Debata. 2:21 Ai tusi do hamu tarjou, ai dohot do Kristus manaon na porsuk humongkop hamu, tumadingkon tiruan di hamu, asa diihuthon hamu bogas ni patna: 2:22 "Ndang adong dosa diula Ibana; ndang jumpang angkal di bagasan pamanganna." 2:23 Ndang manginsahi Ibana, di na hona insak, ndang mangasupi, di na manaon na porsuk; alai dipasahat do tu Panguhum sitigor roha i. 2:24 Diporsan Ibana do dosanta di bagasan dagingna tu hau i, asa malua hita sian dosa, gabe mangolu di hatigoran i: "Hinorhon ni bugangna i do gabe malum hamu." 2:25 Ai songon birubiru na lilu do hamu najolo; alai nunga didompakkon hamu nuaeng Parmahan i, na manganahon tondimuna.
3:1 Songon i ma angka parompuan: Unduk ma nasida maradophon angka harajaanna be; asa molo so porsea deba di Hata i, gabe meol rohanasida, binahen ni parange ni parompuan i, so pola mardongan hata, 3:2 molo dibereng nasida parangemuna na bontor, na marhatahuton. 3:3 Unang ma dipajagarjagar rupana sian duru, marhitehite na mandandani obuk manang marpangkean sere manang na mamangkemangke. 3:4 Alai jolma parbagasan na buni, na tongtong martondi na lambok jala na dame, i do na arga dietong Debata. 3:5 I do najolo pangkean ni angka parompuan na badia i, angka na mangkirim tu Debata; unduk do rohanasida maradophon harajaanna. 3:6 Songon si Sara, dioloi do si Abraham, digoar do ibana tuan. Na gabe angka boruna do hamu, molo diula hamu na denggan, so mabiar mida songgotsonggot. 3:7 Angka baoa pe songon i ma; marroha ma hamu mangangkupi nasida, ala pardaging na gumale do ina i. Sangap ma bahen hamu nasida, ala dohot do nasida dongan panean di asiasi hangoluan, asa unang tarambat tangiangmuna. 3:8 Angkup ni i, saroha ma hamu saluhutna, sapangkilaan, angka na marholong ni roha di dongan, na marasi ni roha, na serep! 3:9 Unang ma baloshon hamu na jat alo ni na jat, panginsahion alo ni panginsahion; lam mamasumasu ma hamu, ai naeng teanonmuna do pasupasu, umbahen na tarjou hamu. 3:10 Ai "na holong roha di hosana jala na giot marnida ari na sonang, dipasohot ma dilana sian na roa, nang bibirna, asa unang dihatahon ansiansi." 3:11 "Dipasiding ma hajahaton diulahon ma na denggan; dilului ma dame, i ma dieahi!" 3:12 "Ai tu angka parroha na tigor do mata ni Tuhan; jala tu angka pangidoannasida do pinggolna; alai bohi ni Tuhan i do alo ni angka sibahen na jat!" 3:13 Jala ise do na manjahati hamu, molo diringkoti hamu na denggan! 3:14 Alai molo tung tumaon na porsuk hamu, ala ni hatigoran, na martua do hamu disi. Unang ma gaor rohamuna, bahenon ni biar ni roha mida nasida! 3:15 Alai parbadiai hamu ma Kristus, Tuhan i, di bagasan rohamuna; tongtong ma hobas, mangalusi ganup na manungkun hamu taringot tu na hinirim ni rohamuna; alai mardongan lambok ni roha ma dohot biar! 3:16 Unang ma pola marlobok taroktokmuna, asa tarila nasida na manuhasnuhasi hamu, angka na manginsahi parangemuna na denggan, na di bagasan Kristus i. 3:17 Ai tagonan do, hamu manaon haporsuhon ala ni ulaon na denggan, molo tung i lomo ni roha ni Debata; unang ma ala ni ulaon na roa! 3:18 Ai dohot do Kristus mate sahali ala ni angka dosa, na tigor i humongkop angka pargeduk, asa ditogihon hita tu Debata; na tarbunu do ia dagingna, alai dipangolu do anggo tondina. 3:19 Di bagasan tondi i do Ibana laho marjamita tu angka tondi na di bagasan hurungan i, 3:20 angka na so mangoloi najolo, di na maimaima lambas ni roha ni Debata, uju di angka ari ni si Noak, di na pinaulina parau na gabe haluaan ni na otik i, i ma na ualu halak, marhitehite aek i. 3:21 I do tudosan ni pandidion i, na paluahon hamu nuaeng; ndada songon na mambolongkon na rotak sian pamatang, alai na tapangido do disi tu Debata panggora ni roha, na so olo manolsoli be, hinorhon ni haheheon ni Jesus Kristus. 3:22 Di siamun ni Debata do Ibana, dung laho tu banua ginjang, gabe marunduk do tu Ibana angka surusuruan, angka gomgoman dohot angka hagogoon.
4:1 Antong, ala naung marsitaonon Kristus di dagingna, roha sisongon i ma gabe sinjata nang di hamu, ai na mansohot mardosa do halak, na mangahap di dagingna; 4:2 asa manang piga ari nari ariarina di ngolu on, tu lomo ni roha ni Debata ma i; unang ma tu hisaphisap ni roha hajolmaon! 4:3 Ai sae ma, antong angka ari naung salpu i, di na niulahonmuna roha hasipelebeguon, ai diulahon hamu do disi harorangon, hahisapon, parmabuhon, parmanganon, parminumon dohot pangoloion di ajiajian na so uhum i. 4:4 Na jaluk do i di rohanasida, na so dohot i be hamu marlojong tu pusat hamagoan i, gabe manginsahi nasida. 4:5 Alusannasida do sogot Ibana, na hobas manguhumi angka na mangolu nang angka naung mate. 4:6 Ai umbahen na dipaboa barita na uli nang tu angka naung mate, anggiat mangolu nasida di tondina, marguru tu Debata, nang pe hona uhum di dagingna, marguru tu hajolmaonna. 4:7 Alai nunga jonok ujung ni saluhutna! Antong, marroha ma hamu, jala manangkas ma rohamuna tu tangiang! 4:8 Alai di jolo ni saluhutna, masihaholongan situtu ma hamu, ai dihungkupi haholongon ni roha i do godang dosa. 4:9 Ringkot ma rohamuna masitamuean; unang marungutungut! 4:10 Masipatureturean ma hamu, ganup marguru tu asiasi na jinalona, songon angka juara bagas na burju di ragamragaman ni asiasi ni Debata. 4:11 Ia adong na marjamita, naeng ma songon angka pandohan ni Debata; ia adong na marhobas, naeng ma sian hagogoon na nilehon ni Debata, asa di saluhutna i marsangap Debata, marhitehite Jesus Kristus. Di Ibana ma hasangapon ro di salelenglelengna i! Amen. 4:12 Ale angka haholongan, unang ma jaluk di rohamuna hamohopon i, na ro manguji hamu; unang ma songon na sambar i di rohamuna! 4:13 Marlas ni roha ma hamu, marguru tu saormuna di angka haporsuhon na tinaon ni Kristus i, asa dohot hamu marlas ni roha jala mariaia, di na gabe patar hasangaponna i. 4:14 Martua do hamu, molo hona insak hamu ala ni Goar ni Kristus, ala songgop tu hamu Tondi hasangapon na sian Debata. 4:15 Unang ma adong sian hamu manaon na porsuk, ala mambunu, manang manangko manang marjahat ibana, manang ala diantoi na so ulaonna! 4:16 Alai molo adong na manaon na porsuk, ala halak Kristen ibana, unang ma hansit rohana; alai dipasangap ma Debata, manjujung Goar i. 4:17 Ai nunga jumpang tingki ni uhum madabu, mamungka sian bagas ni Debata. Alai molo jumolo tu hita, dia ma ujung ni angka na so mangoloi barita na uli na sian Debata? 4:18 Jala molo sihol so malua partigor i, tudia ma tagamon halak na so daulat jala sipardosa i? 4:19 Dibahen i, angka na marhaporsuhon mangihuthon roha ni Debata, dipasahat ma tondina tu Panompa haposan i, marhitehite na mangulahon na denggan.
5:1 Hupaingot ma angka sintua na di tongatongamuna, ahu dongan sintua jala sitindangi di angka haporsuhon na tinaon ni Kristus, huhut partohap di hasangapon sipapataron sogot: 5:2 Parmahan i hamu ma punguan ni Debata na di hamu, unang songon na pinaksa, sian las ni roha ma mangihuthon Debata; unang ala ni pangomoan hailaon, sian ringkot ni roha ma! 5:3 Unang ma songon angka na mamaksa natorop; alai gabe tiruan ma hamu di angka na pinarmahan! 5:4 Molo i, jaloonmuna ma tumpal hasangapon na so ra malos i, ia dung gabe patar Parmahan na bolon i. 5:5 Laos songon i ma hamu, angka na umposo, unduk ma hamu di angka na tumunggane! Alai saluhutna ma hamu manolukkon haserepon sama hamu, ai dialo Debata do angka na ginjang roha, alai dilehon do asiasi tu angka na serep marroha. 5:6 Antong, patutoru hamu ma dirimuna tutoru ni tangan ni Debata na gogo i, asa dipatimbo hamu di tingkina i! 5:7 Tinggangkon hamu ma nasa na hinolsohon ni rohamuna tu Ibana, ai disarihon do hamu! 5:8 Torang ma rohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna. 5:9 Gomos ma hamu mangalo ibana marhitehite haporseaon; ingot hamu ma: Ndang tarbahen so songgop angka haporsuhon sisongon i, nang tu angka hahaanggimuna na di portibi on. 5:10 Alai anggo Debata, nampuna saluhut asi ni roha, naung manjou hamu tu hasangaponna na manongtong i di bagasan Kristus, pauliulionna, pahotonna jala patoguonna do hamu, dung jolo ditaon hamu satongkin haporsuhon i. 5:11 Di Ibana ma hagogoon ro di salelenglelengna! Amen. 5:12 Marhite sian si Silwanus, dongan haposan i, di rohangku, hubahen surat na saotik on tu hamu, mangapoi jala mangkatindangkon, i do sintong asi ni roha ni Debata, hajongjonganmuna. 5:13 Na mandok tabi tu hamu huria na di Babel, na tarpillit rap dohot hita, angkup ni si Markus, anakki. 5:14 Masitabian ma hamu huhut masiummaan di bagasan holong ni roha. Dame ma di saluhut hamu, angka na di bagasan Kristus!
1:1 Ahu surat ni si Simon Petrus, naposo jala apostel ni Jesus Kristus, mandapothon angka naung manjalo haporseaon na arga, rap dohot hami, marhitehite hatigoran ni Debatanta dohot Jesus Kristus, Sipalua i: 1:2 Singkop ma di hamu asi ni roha dohot dame, marhitehite panandaonmuna di Debata dohot di Jesus, Tuhanta i! 1:3 Dilehon hagogoon ni hadebataonna i do tu hita nasa na tau hangoluan dohot hadaulaton marhite sian naung tatanda Ibana, na manjou hita, hinorhon ni hasangaponna dohot hadengganonna sandiri. 1:4 Marhite sian i do dilehon tu hita bagabagana angka na arga jala na balga situtu, asa hinorhon ni i gabe partohap hamu di hadebataon, dung sanga maporus hamu sian hamagoan, na di bagasan hahisapon na di portibi on. 1:5 Dibahen i, haringgashon hamu ma sian nasa gogo, manurdukkon denggan ni parange di bagasan haporseaon i, dung i habisuhon ma di bagasan parange na denggan i; 1:6 dung i pangarajaion diri ma di bagasan habisuhon i, dung i habengeton ma di bagasan pangarajaion diri i, dung i hadaulaton ma di bagasan habengeton i: 1:7 Dung i holong ni roha di dongan ma di bagasan hadaulaton i, dung i holong ni roha di na saluhutna ma di bagasan holong ni roha di dongan i! 1:8 Ai molo jumpang angka i di hamu jala ganda, ndada loasonna hamu losok jala so marparbue, laho mananda Jesus Kristus, Tuhanta i. 1:9 Alai molo so dapot i di na deba, halak na mapitung ma i, parmata na jonok, naung lupa di haiason sian dosa, na di ibana najolo. 1:10 Dibahen i, ale angka dongan, lam ringgas ma hamu pahothon panjouonna dohot pamillitonna di hamu; ai molo diulahon hamu i, ndang olo be hamu tinggang. 1:11 Songon i ma buas lehononna tu hamu hamasuhon tu bagasan, harajaon salelenglelengna, na di Tuhanta Jesus Kristus, Sipalua i. 1:12 Dibahen i, tongtong do hupaingothon angka i tu hamu, atik pe naung diboto hamu i jala naung togu rohamuna di bagasan hasintongan, na di hamu nuaeng. 1:13 Alai tama do, didok rohangku, ahu manungguli hamu marhitehite hata sipaingot, saleleng di bagasan balebale on dope ahu. 1:14 Ai huboto, tibu nama tadingkononku balebalengkon, songon naung pinabotohon ni Tuhanta Jesus Kristus tu ahu. 1:15 Alai huharingkothon do, asa tongtong tarbahen hamu marningot i, dung borhat ahu. 1:16 Ai ndada huihuthon hami angka turiturian na piningkir ni na bisuk, di na hupabotohon hami tu hamu hagogoon dohot haroro ni Tuhanta Jesus Kristus; tung diida matanami do hatongamonna i. 1:17 Ai dijalo do hamuliaon dohot hasangapon sian Debata Ama, di na masa tu Ibana sian hasangapon na tongam i soara on: "On do Anakku, haholongan ni rohangku; na lomo do rohangku di Ibana!" 1:18 I ma soara, na hubege hami ro sian banua ginjang i, uju rap hami dohot Ibana di dolok na badia i. 1:19 Jadi lam hot ma, antong, hata panurirangon i di hami; jala tama marsitiopan tusi ma hamu, songon na tu palito na marsinondang di inganan na holom, paima tarida siulubalang ari i, jala binsar siboan hatiuron di bagasan rohamuna. 1:20 On ma parjolo boto hamu: Ndang dapot hatorangan ni nasa panurirangon na tarsurat, anggo sian roha ni jolma. 1:21 Ai ndang dung sian tahi ni jolma haroroan ni panurirangon; alai tinogihon ni Tondi Parbadia do, umbahen na marsoara angka jolma, disuru Debata.
2:1 Alai hehe do nang najolo angka panurirang pargapgap di tongatonga ni natorop; songon i nang nuaeng ro tu tongatongamuna angka guru pargapgap, siboan parsirangan hamagoan, pola do soadahononna Tuhan na manobus nasida, gabe lingkup do tu dirinasida hamagoan, diaithon nasida. 2:2 Torop na mangihuthon pansuasaehonnasida; ala ni nasida gabe hona insak do agama hasintongan i. 2:3 Sian roha na marpambuat parlabahononna do hamu marhitehite hata sipaotooto. Sian nahinan dope ndang sulon uhum na tu nasida, jala ndang tarlalap hamagoan di nasida. 2:4 Ai gari angka surusuruan na mardosa, ndang diolani Debata: Na didabu do nasida tu banua toru, tu lung haholomon, paramothon nasida tu uhum. 2:5 Nang hasiangan na robi i, ndang diolani Ibana; alai diramoti do paualu si Noak, parjamita hatigoran i, di na tinongosna aek na sumar i mangkungkupi portibi na jahat i. 2:6 Nang huta Sodom dohot Gumora, diparsiragongi do, laho manguhumi, pajongjong lumbalumba taringot tu na masa sogot tu angka na tois. 2:7 Alai dipalua do si Lot na tigor i, na niarsahan ni angka na so maruhum i marhitehite harorangon na niulanasida. 2:8 Ai marhite sian na niidana dohot na binegena ariari diarsakkon tondi ni partigor i do pambahenannasida na so maruhum i, di na maringanan ibana di tongatonganasida. 2:9 Diboto Tuhan i do, paluahon angka na daulat sian pangunjunan dohot pajagahon angka pargeduk, asa hona pinsang nasida di ari uhum i. 2:10 Gumodang ma angka sipaolooloi sibuk, siulahon hahisapon na pahodarhon, angka parhu ni roha di panggomgomion; angka na garang do nasida jala na tois, na so mabiar manginsahi angka parhasangapon. 2:11 Gari angka surusuruan, atik pe sumurung hagogoon dohot huasonasida, gari so mandabuhon uhum paminsangon dompak nasida di jolo ni Tuhan i. 2:12 Alai songon binatang na so marroha do nasida, angka sitangkupon jala sibunuon hian, umbahen na tubu; na manginsahi do nasida di na so binotonasida, gabe mago ma di hamagoannasida. 2:13 Upa hageduhon i do diluahon nasida; halalas ni roha do dijujur nasida pargadombuson ariari; sap angka hahodaron dohot hagigian do nasida, na ripe mansuasaehon di bagasan hahisaponnasida, di na rap mangan nasida dohot hamu. 2:14 Gok pangalangkupon do matanasida; na so mansadi nasida mardosa, diellemellem do roha ni angka na hurang togu, dipasomalsomal do rohana tu pangahution: Angka anak jea do nasida. 2:15 Ditadingkon do dalan na tigor i, gabe lilu, mangihuthon dalan ni si Bileam, anak ni si Beor, na holong roha di upa hageduhon i. 2:16 Alai hona ajar do ibana di pangalaosionna i, ai dorbia na tarrante, na so parsoara hian, i do gabe mangkuling marsoara jolma, mangalo lalaen ni panurirang i. 2:17 Angka mual na so maraek do nasida, angka ombun na niullus ni halisungsung; holom ni na holom do dipadiri di nasida. 2:18 Ai dihatahon nasida do haotoon na tarlobi burnang, laho mangeleala, marhitehite hisaphisap ni sibuk dohot pargadombuson, dongan na imbaru maporus dope, tumadingkon angka pardalan na di bagasan haliluon. 2:19 Dibagabagahon nasida do haluaon, atik pe hatoban ni hamagoan i nasida; ai ia i na patunduk halak, hatoban ni i do ibana. 2:20 Ai angka naung maporus pasidingkon hahodaron ni portibi on, di na tinandanasida Tuhan Jesus Kristus, Sipalua i: Anggo mangulahi taralit jala talu, gabe jumorbut ma ujungna sian bonana. 2:21 Ai dumenggan do di nasida, aut unang ditanda nasida dalan hatigoran i, sian na tumundalhon uhum na badia, naung sahat tu nasida, naung tinandanasida i. 2:22 Jumpang do di nasida hata ni umpama na sintong on: Na mulak do biang tu utautana, jala na margulu do babi di na rotakna, dung mangarembe.
3:1 On ma surat na paduahon, na husurat tu hamu, angka haholongan, manungguli bontor ni roha di hamu, marhitehite hata sipaingot, 3:2 asa diingot hamu hata angka naung hinatahon ni angka panurirang na badia i, nang patik ni Tuhan jala Sipalua i, na binaritahon ni angka apostelmuna. 3:3 On ma na rumingkot botoonmuna: Na ro ma di angka ari parpudi angka pangalensem, parhata insahinsak, na mangoloi angka hisapna sandiri; 3:4 angka na mandok: Didia do harorona, na pinarbagabaga i? Ai dung monding angka amanta, hot do saluhutna songon i, sian mula ni hasiangan on! 3:5 Laho mandok songon i, ndang manganto rohanasida, naung sian aek do langit nang tano, jala marhitehite aek do hajajadina hinorhon ni hata ni Debata. 3:6 Laos marhitehite aek i do mago uju i tano on, dilantaphon aek i. 3:7 Jala marhite sian hata i do diramoti Ibana langit dohot tano nuaeng; dipeop do, asa tu api di ari paruhuman jala hamagaon ni jolma angka na jahat. 3:8 Alai tangkas ma ingot hamu, angka haholongan: Sada ari do di Tuhan i songon saribu taon, jala saribu taon songon sada ari! 3:9 Ndang dipagele Tuhan i bagabaga i, songon na nidok ni roha ni na deba; alai lambas do rohana mida hamu, ai dipangido rohana, naeng unang ma nian mago agia ise, naeng ma tahe saluhutna sahat tu hamubaon ni roha. 3:10 Alai na ro ma ari ni Tuhan i, songon panangko; mardorop ma disi langit i, laho sega; masarsar ma sisiasia ni tano on bahenon ni api; songon i nang tano i, ro di sude ulaon na di atasna, masoksok ma. 3:11 Antong, anggo masarsar do hape saluhutna on, nda lam sumurung ma parange na badia dohot hadaulaton 3:12 ni angka na paimaimahon jala mangkasiholi haroro ni ari ni Debata, di na masarsar langit i disoksohi, jala malala tartutung do angka sisiasiana! 3:13 Alai na maimaima do hita di langit na imbaru dohot di tano na imbaru, inganan ni hatigoran i, hombar tu bagabagana. 3:14 Dibahen i, hamu angka haholongan, anggo i dipaimaima hamu, ringkoti hamu ma, asa didapot Ibana hamu so martihas, so hasurahan, di bagasan dame! 3:15 Rajumi hamu ma lambas ni roha ni Tuhanta haluaonmuna, songon naung manurat tu hamu dongan haholonganta, si Paulus i, marguru tu parbinotoan, naung dilehon tu ibana. 3:16 Songon i di saluhut angka suratna, i dipatorang; adong do deba disi na maol antusan, i ma dipalipe angka na so marroha jala na so togu rohana, nang di surat na asing pe, bahen hamagoannasida sandiri. 3:17 Antong, hamu angka haholongan, ala naung diboto hamu i hian, jaga ma, unang tarela hamu, dibahen haliluon ni angka na so maruhum i, gabe madabu hamu maon sian haojahanmuna. 3:18 Alai lam ganda ma di hamu asi ni roha dohot panandaon di Tuhanta Jesus Kristus, Sipalua i! Di Ibana ma hasangapon, nang nuaeng, nang ro di salelenglelengna!
1:1 Na adong sian mulana, na hubege hami, na niida ni matanami, na hupanotnoti hami, jala na jinama ni tangannami, taringot tu hata hangoluan i. 1:2 Naung gabe patar do hangoluan i, nunga huida hami, gabe huhatindangkon jala hubaritahon hami tu hamu hangoluan na salelenglelengna i, naung adong hian di adopan ni Ama i, gabe dipapatar tu hami. 1:3 Na huida jala hubege hami, i do binaritahon nang tu hamu, asa marparsaoran nang hamu rap dohot hami. Tu Ama i dohot tu Anakna Jesus Kristus do parsaoranta i. 1:4 Umbahen na husurathon hami hata on tu hamu, asa gok halalas ni rohamuna. 1:5 On do barita, na hubege hami sian Ibana gabe binaritahon tu hamu: Panondang do Debata; ndang adong di bagasan Ibana manang aha na holom. 1:6 Molo tadok, naung saor hita tu Ibana, huhut taulahon na holom, pargabus do hita, ndang siula hasintongan hita. 1:7 Alai molo taparangehon hatiuron, songon Ibana na di bagasan na tiur, saor do hita sama hita, jala dipaias mudar ni Jesus, Anakna i, do hita sian nasa dosa. 1:8 Molo tadok, na so adong dosanta, tapaotooto do dirinta, jala ndang di bagasan hita hasintongan i. 1:9 Molo tatopoti angka dosanta, haposan do Ibana jala bonar, manesa dosanta jala paiashon hita sian nasa hageduhon. 1:10 Molo tadok, na so mardosa hita, pargabus do Ibana tabahen, jala ndang di bagasan hita anggo hatana.
2:1 Ale angka anaha, umbahen husurat on tu hamu, asa unang mardosa hamu. Molo tung adong na mardosa, adong do pangondianta tu Ama i, i ma Jesus Kristus, partigor i. 2:2 Ibana do pardengganan pasaehon angka dosanta; alai ndada holan dosanta, tung dohot do dosa ni sandok portibi on. 2:3 Sian on do taboto, naung tatanda Ibana: Molo taradoti angka patikna. 2:4 Na mandok: Hutanda do Ibana; alai ndang diradoti patikna, pargabus do i, ndang adong hasintongan di bagasan ibana. 2:5 Alai na mangaradoti hatana, naung tutu ma gok haholongon ni roha ni Debata di bagasan ibana. Sian i ma taboto, hita di bagasan ibana. 2:6 Na mandok, mian di bagasan Ibana, ingkon diparangehon ma songon Ibana. 2:7 Ale dongan, na hinaholongan, ndada patik na imbaru na husurat tu hamu, patik naung leleng do, na di hamu sian mulana. Patik naung leleng, i do hata na binegemuna i. 2:8 Tong do na imbaru patik na husurat tu hamu, sintong do i di bagasan Ibana dohot di bagasan hamu, ai na salpu ma na holom; nunga marsinondang nuaeng Panondang na sintong i. 2:9 Halak na mandok di bagasan na tiur i ibana, huhut dihosomi donganna: Na tongtong dope mian i di bagasan na holom. 2:10 Na holong roha di donganna, i do na mian di bagasan na tiur; ndang pargasipan ibana. 2:11 Alai na manghosomi donganna, di bagasan na holom do i; di bagasan na holom do dalanna. Ndang diboto, manang tudia ibana laho, ai dipapitung na holom i do matana. 2:12 Hubahen surat tu hamu, angka anak, dibahen naung sesa dosamuna, ala ni Goarna i. 2:13 Hubahen surat tu hamu, angka ama, ala ditanda hamu Ibana, na sian mulana i; hubahen surat tu hamu, angka dolidoli, ala naung ditaluhon hamu parjahat i; hubahen surat tu hamu, angka anak, ala ditanda hamu Ama i. 2:14 Nunga hubahen surat tu hamu, angka ama, ala naung ditanda hamu Ibana, na sian mulana i; nunga hubahen surat tu hamu, angka dolidoli, ala margogo hamu, jala ala mian hata ni Debata di bagasan hamu, jala ala naung ditaluhon hamu parjahat i. 2:15 Unang ma haholongi hamu portibi on, nang angka na dibagasanna! Anggo dihaholongi halak portibi on, ndang di bagasan ibana holong ni roha ni Ama i. 2:16 Ai nasa na di portibi on, i ma lomolomo ni roha ni daging, giotgiot ni roha ni mata dohot na manenganengahon sinadongan, ndada sian Ama i anggo i, tung sian portibi on do. 2:17 Jala na laho salpu do portibi on rap dohot na pinarhagiotna; alai na mian ro di salelenglelengna do na mangulahon lomo ni roha ni Debata. 2:18 Hamu angka anaha, tingki parpudi do nuaeng; jala songon naung binegemuna, na naeng ro Antikristus i; nunga lan gabe Antikristus; sian i do taboto, nuaeng ma tingki parpudi. 2:19 Sian tongatonganta do nian haroroannasida, alai ndang donganta nasida; ai aut donganta nasida, udur ma nasida dohot hita; alai naeng patar ma nasida, na so donganta saluhutna i. 2:20 Naung miniahan ni Na-badia i do hamu, jala saluhut hamu umbotosa. 2:21 Hubahen pe surat tu hamu, ndada ala so diboto hamu hasintongan i, ala naung diboto hamu i tahe, jala ndang sian hasintongan nasa gabus. 2:22 Ise do sipargabus i, ia so na mansoadahon, na mandok: Ndang Kristus i Jesus? I ma Antikristus, na mansoadahon Ama i dohot Anak i. 2:23 Ganup na mansoadahon Anak i, ndang di ibana nang Ama i. Halak na marhatopothon Anak i, di ibana do nang Ama i. 2:24 Mian ma di bagasan hamu na binegemuna sian mulana i! Molo mian di bagasan hamu na binegemuna sian mulana i, mian ma nang hamu di bagasan Anak i dohot di bagasan Ama i. 2:25 Jala anggo bagabaga na pinarbagabaga na i tu hita, i ma ngolu na salelenglelengna i. 2:26 Angka i do husurat tu hamu taringot tu angka na mangaliluhon hamu. 2:27 Na mian do di bagasan hamu pamiahion, naung jinalomuna sian Ibana; ndang pola hamu ajaran ni halak. Sintong do na niajarhon ni pamiahion i saluhutna tu hamu, ndang adong gabus disi. Mian ma hamu di bagasan Ibana, songon naung niajarhon tu hamu! 2:28 Nuaeng pe, angka anaha, mian ma hamu di bagasan Ibana, asa marhiras ni roha hita, di na gabe patar Ibana, unang tarila hita maradophon Ibana di harorona i! 2:29 Molo diboto hamu, tigor Ibana, boto hamu ma: Naung tubu sian Ibana do nasa na mangulahon hatigoran i.
3:1 Ida hamu ma godang ni haholongon na binasabasahon ni Ama i tu hita, ai targoar do hita angka anak ni Debata, jala angka i do hita tutu. Dibahen i, ndang ditanda portibi on hita, ai ndang ditanda anggo Ibana. 3:2 Hamu angka haholongan! Anak ni Debata do hita nuaeng, jala ndang dope dipapatar, manang na gabe aha hita sogot; alai taboto do: Anggo dung patar Ibana, gabe suman ma hita tu Ibana, ai idaonta do rupana sandiri. 3:3 Ganup na mangkirim songon i di Ibana, diparbadiai ma dirina, songon Ibana na badia i! 3:4 Pangalaosi do ganup na mardosa, ai pangalaosion do dosa i. 3:5 Diboto hamu do, na mambuat angka dosanta do Ibana, umbahen na ro; ndang adong dosa anggo di bagasan Ibana. 3:6 Nasa na mian di bagasan Ibana, ndang mardosa; ganup sipardosa, ndang dung diida jala ndang ditanda i Ibana. 3:7 Hamu angka anaha, unang dipaotooto halak hamu! Siulahon hatigoran, i do na tigor, songon Ibana na tigor i. 3:8 Sian sibolis do halak na mangulahon dosa, ai sian mulana do mardosa sibolis i. Laho manegai angka ulaon ni sibolis do, umbahen na ro Anak ni Debata. 3:9 Ganup naung tubu sian Debata, ndang mardosa; ai na mian do di bagasan ibana boni i. Ndang tarbahensa mardosa, ai nunga tubu sian Debata ibana. 3:10 Disi do tanda anak ni Debata dohot anak ni sibolis: Ndang sian Debata ganup halak na so mangulahon hatigoran, jala na so marholong ni roha di donganna. 3:11 Ai on do barita na binegemuna sian mulana: Ingkon masihaholongan hita. 3:12 Unang ma songon si Kain, ai sian hajahaton do ibana, gabe dibunu do anggina. Dia do alana, umbahen na dibunu? Ala na jahat ulaonna; alai tigor do ulaon ni anggina. 3:13 Unang ma longang rohamuna, angka dongan, molo dihosomi portibi on hamu. 3:14 Taboto do, naung taripar hita sian hamatean tu hangoluan, ala tahaholongi angka dongan. Na so parholong ni roha, mian do di bagasan hamatean. 3:15 Sibunu jolma do ganup na hosom roha di donganna; jala diboto hamu do, na so mian hangoluan salelenglelengna di nasa dibunu jolma. 3:16 Sian on do tatanda haholongon ni roha: Sian ibana na mangalehon hosana humongkop hita. Hita pe, tama do talehon hosanta humongkop donganta. 3:17 Molo adong paradongan di tano on, ia diida hurangan donganna, gabe dihinsu ateatena maradophon halak i, tung songon dia ma mian holong ni roha ni Debata di bagasan ibana? 3:18 Hamu angka anaha, unang ma hatanta dohot dilanta mangkaholongi; naeng ma marhitehite pambahenan dohot hasintongan. 3:19 Disi ma botoonta, paboa sian hasintongan hita jala tapapos rohanta di Jolona. 3:20 Molo disolsoli rohanta hita, umbalga do Debata sian rohanta jala diboto saluhutna. 3:21 Hamu angka haholongan, molo so disolsoli rohanta hita, marhiras ni roha do hita maradophon Debata. 3:22 Jadi manang aha pe tapangido, jaloonta do sian Ibana, ala taradoti patikna jadi taula lomo ni rohana. 3:23 On do patikna: Naeng porsea hita di Goar ni Anakna Jesus Kristus, huhut masihaholongan, songon naung tinonahonna i tu hita. 3:24 Siradoti patikna, i do na mian di bagasan Ibana jala Debata di bagasan ibana. Jala sian on do taboto, naung mian Ibana di bagasan hita: Sian Tondi i, na nilehonna i tu hita.
4:1 Hamu angka haholongan, unang ma ganup tondi haporseai hamu; unjuni hamu ma, manang na sian Debata angka tondi; ai nunga borhat torop panurirang pargapgap tu portibi on. 4:2 Sian on ma tanda hamu Tondi ni Debata: Ganup tondi ma marhatopothon Jesus Kristus, naung ro di bagasan daging, i ma sian Debata. 4:3 Ganup tondi na so marhatopothon Jesus i, i ma na so sian Debata. I ma pangalaho ni Antikristus, na naeng ro i, songon naung binegemuna; jala nunga di portibi on ibana nuaeng. 4:4 Sian Debata do anggo hamu, angka anaha; jala nunga ditaluhon hamu nasida, ai umbalga do Ibana na di bagasan hamu, asa na di bagasan portibi on. 4:5 Sian portibi on do anggo nasida; dibahen i; sian portibi on do hatanasida, jala ditangihon portibi on do nasida. 4:6 Sian Debata do ia hita. Halak na tumanda Debata, i ma na tumangihon hita; halak na so sian Debata, i ma na so tumangihon hita. Sian i do tatanda Tondi hasintongan dohot tondi sipaotooto. 4:7 Hamu angka haholongan, masihaholongan ma hita, ai sian Debata do haholongon i, jala ganup na marholong ni roha, i ma naung tubu sian Debata jala ditanda do Debata. 4:8 Halak na so marholong ni roha, i do na so tumanda Debata, ai haholongon do Debata. 4:9 Sian on do gabe patar holong ni roha ni Debata na tu hita; sian naung sinuruna i Anakna na sasada i tu portibi on, asa mangolu hita marhitehite Ibana. 4:10 Di bagasan on do holong ni roha i: Ndada hita mangkaholongi Debata; Ibana do mangkaholongi hita, jala disuru do Anakna, bahen pardengganan pasaehon dosanta. 4:11 Hamu angka haholongan, anggo songon i holong ni roha ni Debata di hita, tama ma nang hita masihaholongan! 4:12 Ndang dung adong halak na marnida Debata. Molo masihaholongan hita, mian ma Debata di bagasan hita, jala tipak ma holong ni rohana i di bagasan hita. 4:13 Sian on do taboto, hita mian di bagasan Ibana jala Ibana di bagasan hita: Ala naung nilehonna i tu hita sian Tondina i. 4:14 Huida jala huhatindangkon hami, naung disuru Ama i do Anak i, bahen Sipalua portibi on. 4:15 Ia i na marhatopothon, Jesus do Anak ni Debata, di bagasan ibana do mian Debata jala ibana di bagasan Debata. 4:16 Nunga tatanda jala tahaporseai holong ni roha ni Debata di hita. Debata do haholongon i; jala halak na mian di bagasan haholongon, i do na mian di bagasan Debata jala Debata di bagasan ibana. 4:17 Disi ma gabe tipak holong ni roha i di bagasan hita, pola marhiras ni roha hita di ari paruhuman i; ai songon Ibana, songon i do nang hita di portibi on. 4:18 Ndang adong biar di bagasan holong ni roha i; alai dipabali holong ni roha naung rimpas i do biar i. Ai na bernit do anggo biar; jala ndang rimpas holong ni roha ni halak na mabiar. 4:19 Marroha holong ma hita, ala Ibana jumolo mangkaholongi hita! 4:20 Pargabus do halak na mandok: Holong rohana di Debata; hape dihosomi do donganna. Ai na so mangkaholongi donganna na niidana, tung songon dia ma haholonganna Debata na so niidana? 4:21 On do patik na tajalo sian Ibana: Na mangkaholongi Debata, i ma na mangkaholongi nang donganna.
5:1 Ganup na porsea, Jesus do Kristus, i do naung tubu sian Debata, jala ganup na mangkaholongi Ibana na manubuhon, haholongan ni i do nang na tubu sian Ibana. 5:2 Sian on do taboto, naung holong rohanta di angka anak ni Debata: Molo tahaholongi Debata jala taradoti patikna. 5:3 Ai on do holong ni roha di Debata; molo taradoti patikna. Ndada na dokdok patikna i. 5:4 Ai nasa na tubu sian Debata do manaluhon portibi on. Haporseaonta i do naung monang manaluhon portibi on. 5:5 Ise do na manaluhon portibi on, ia so na porsea di Jesus Kristus, Anak ni Debata? 5:6 Ibana do i, naung ro marhitehite aek dohot mudar, Jesus Kristus; ndada holan di bagasan aek i, di bagasan aek dohot mudar, i do! Jala Tondi i do na mangkatindangkon, ai hasintongan do Tondi i. 5:7 Ai tolu do na mangkatindangkon. 5:8 I ma Tondi i, aek i dohot mudar i; jala sada do na tolu i. 5:9 Ia panindangion sian jolma tajalo do; alai sumurung do panindangion na sian Debata, ai panindangion na sian Debata do on, na hinatindangkonna taringot tu Anakna i. 5:10 Na porsea di Anak ni Debata, ditiop do panindangion i. Na so porsea di Debata, i ma mambahen Ibana pargabus, ala so porsea ibana di na hinatindangkon ni Debata taringot tu Anakna i. 5:11 Jala on do panindangion i: Naung dibasabasahon Debata do tu hita hangoluan salelenglelengna, jala di bagasan Anakna do hangoluan i. 5:12 Ia di ibana Anak i, di ibana do hangoluan i; ia so di ibana Anak ni Debata, ndang di ibana hangoluan i. 5:13 Umbahen na husurat angka i tu hamu, angka na porsea di Goar ni Anak ni Debata: Naeng botoonmuna, naung di hamu do hangoluan na salelenglelengna! 5:14 On do hiras ni rohanta maradophon Ibana: Molo tapangido manang aha marguru tu lomo ni rohana, tangihononna do hita. 5:15 Jala molo taboto, tangihononna do hita di nasa na tapangido, gabe taboto, saut ma di hita angka na tapangido i sian Ibana. 5:16 Ia diida halak donganna, mangulahon dosa na so marhapatean tu hamatean, martangiang ma ibana, dung i basabasahononna ma tu ibana hangoluan; i ma di angka na mardosa na so marhapatean tu hamatean. Adong do dosa na marhapatean tu hamatean; ndang hudok, tangiangkononhon anggo i. 5:17 Dosa do nasa hageduhon, jala adong do dosa na so marhapatean tu hamatean. 5:18 Taboto do, na so mardosa nasa naung tubu sian Debata; alai na marsihohot tu Debata do halak, naung tubu sian Ibana, jala ndang tarhahua parjahat i ibana. 5:19 Taboto, na sian Debata do hita, jala di bagasan hajahaton do nasa portibi on. 5:20 Alai taboto do, naung ro Anak ni Debata jala dilehon roha tu hita, asa tatanda Parsintong i. Di bagasan Parsintong i do hita, di bagasan Anakna Jesus Kristus. Ibana do Debata na sintong dohot hangoluan salelenglelengna. 5:21 Hamu angka anaha, jaga hamu ma dirimuna maralohon debata sileban!
1:1 Ahu surat ni sintua i mandapothon ina soripada, naung pinillit, nang mandapothon angka anakkonna, angka na huhaholongi situtu; jala ndada holan ahu, dohot do saluhut naung tumanda hasintongan i, 1:2 ala ni hasintongan, na mian di bagasan hita, jala na mandongani hita ro di salelenglelengna: 1:3 Didongani asi ni roha, talup ni roha dohot dame ma hita, sian Debata Ama dohot sian Jesus Kristus, Anak ni Ama i, marhitehite hasintongan dohot haholongon! 1:4 Mansai tarhilas do rohangku, ala jumpang ahu anakkonmu deba, angka na mamarangehon hasintongan, marguru tu patik naung tajalo sian Ama i. 1:5 Na mangido ma ahu nuaeng tu ho, ale inang soripada, ndada songon patik na imbaru na sinurathon tu ho, na di hita sian mulana, i do: Naeng masihaholongan hita. 1:6 Jala on do holong ni roha i; naeng parangehononta patikna. I do patik siparangehononmuna, songon naung binegemuna sian mulana i. 1:7 Ai nunga borhat torop siulahon sipaotooto tu portibi on, angka na so marhatopothon Jesus Kristus ro di bagasan daging. I ma na paotootohon, jala i do Antikristus i. 1:8 Matahon hamu ma dirimuna, asa unang mago sian hamu naung niulamuna; naeng ma upa na gok jaloonmuna! 1:9 Ganup na mangalaosi na so mian di bagasan poda ni Kristus, ndang partohap i di Debata. Na mian di bagasan poda, i do partohap di Ama i dohot di Anak i! 1:10 Molo ro halak tu hamu, na so mamboan poda on, unang ma jangkon hamu ibana tu jabu, unang ma tabi hamu! 1:11 Gari na mangalehon tabi tu ibana, saor do tu angka ulaonna na jahat i. 1:12 Godang do nian sisurathononku tu hamu; alai ndang une roha, anggo marhitehite harotas dohot tinta; alai dihirim rohangku, ahu ro mandapothon hamu, asa mangkatai hita adop bohi be, asa gok halalas ni rohanta. 1:13 Na manongos tabi tu ho angka anakkon ni anggim, na tarpillit i.
1:1 Ahu surat ni sintua i mandapothon si Gayus, haholongan i, na huhaholongi situtu. 1:2 Ale anggia, sandok dipangido rohangku, naeng horas ho jala hipas, hombar tu horas ni tondim! 1:3 Tarhilas situtu do rohangku, di na ro angka dongan i mangkatindangkon hasintongan na di ho ro di parangem, na di bagasan hasintongan. 1:4 On do las ni rohangku na umbolon: Molo hubege, diparangehon angka anakkonku hasintongan i. 1:5 Na denggan do pambahenmi, anggia, na tu angka dongan, nang tu angka tamue. 1:6 Dihatindangkon nasida do holong ni roham, di jolo ni huria i. Denggan ma paborhatonmu nasida, marguru tu na tama di Debata. 1:7 Ai ala ni Goar i do nasida borhat; ndang adong dijalo nasida agia aha sian angka parbegu. 1:8 Dibahen i, tama ma hita manjangkon angka na songon i, asa gabe dongan pangula hita, pajongjong hasintongan i. 1:9 Hubahen do surat tu huria i; alai ndang dijangkon si Diotrepes hami, ai naeng ibana do na guminjang. 1:10 Dibahen i, anggo dung ro ahu, taringotanku ma pambahenna i, na niulana manihasnihasi hami marhitehite angka hata na roa. Jala ndang sombu dope rohana disi; ai laos so dijangkon do angka dongan i, diambat do angka na ringkot roha jala dipabali do sian huria. 1:11 Unang ihuthon na roa, anggia; na denggan i ma! Sian Debata do halak na mangulahon na denggan; ia siula na roa, ndang dung diida i Debata. 1:12 Dapotan panindangion do si Demetrius sian saluhutna, nang sian hasintongan sandiri; songon i do nang sian hami, jala diboto ho do, na sintong do anggo panindangion na sian hami. 1:13 Godang do nian sisurathononku tu ho; alai ndang une rohangku, manurat tu ho marhitehite tinta dohot panurat. 1:14 Alai dihirim rohangku, naeng tibu ho idaonku, dung i mangkatai ma hita adop bohi be. 1:15 Dame ma di ho! Na manongos tabi do tu ho angka dongan. Pasahat ma tabingku tu angka dongan sadasada!
1:1 Ahu surat ni si Judas, naposo ni Jesus Kristus, anggi ni si Jakobus, mandapothon angka na marpili, angka haholongan di bagasan Debata Ama, jala niramotan di Jesus Kristus: 1:2 Singkop ma di hamu asi ni roha dohot dame dohot haholongon ni roha! 1:3 Hamu angka haholongan, ringkot situtu do rohangku, mambahen surat tu hamu taringot tu haluaon hatopan i; ndang tarjua ahu so suratonku tu hamu hata mangapoi hamu, marungkil humongkop haporseaon, naung tolhas dipasahat tu angka na badia. 1:4 Ai adong do deba halak, naung manisipi bongot, mangonai do tu nasida uhum on, naung tarsurat hian: Angka na so daulat, angka na pabalikkon asi ni roha ni Debata tu pargadombuson, gabe disoadahon nasida do Raja i dohot Tuhanta na sasada i, Jesus Kristus i. 1:5 Alai na naeng paingotonku do hamu, angka na tangkas umboto saluhutna: Dipalua Tuhan i do nian bangsona sian tano Misir; alai dilengsehon do musengani angka na so porsea. 1:6 Angka surusuruan pe, na so mangaramoti panggomgomionna, angka na manadingkon inganannasida hian, diparamothon do tubagasan haholomon marhitehite rante na manongtong, sahat ro di ari uhum na balga i. 1:7 Songon Sodom dohot Gumora ro di angka huta na humaliang i, angka na marharorangon suman tu nasida, paihutihut daging na leban, gabe tudosan na solpa, taringot tu api paruhuman na salelenglelengna. 1:8 Suang songon i ma antong nang nasida na tarpedem on, diramuni do sibukna, hu rohanasida di panggomgomion, diinsahi do angka parhasangapon. 1:9 Alai di na marbada Mikhael, sintua ni surusuruan i, dohot sibolis i siala bangke ni si Musa, ndang hum rohana mandabu uhum paminsangon dompak sibolis i; alai didok: Dipinsang Tuhan ma ho! 1:10 Alai anggo nasida, diinsahi do nasa na so binotona; alai na binotonasida sian bangkona hian songon di binatang na so marroha i, i do na mangago nasida. 1:11 Marjea ma nasida, ai didalani do dalan ni si Kain, gabe tarboan do nasida binahen ni upa sipaotooto ni si Bileam, jala mago dibahen paraloon ni si Kora. 1:12 Angka tihas do nasida, di na marsipanganon na badia hamu, angka na so mabiar gabe donganmuna sapanganan, angka na pamokmokkon dirina, angka ombun na so maraek, na niullus ni alogo, angka hau na rahar, na so marparbue, naung dua hali mate, angka naung maborgat; 1:13 angka galumbang laut na riar, na margumogumohon hailaonna sandiri, angka bintang na lilu; holom ni na holom do dipadiri di nasida ro di salelenglelengna. 1:14 Nunga manurirangi taringot tu nasida Henok, papitusunduthon sian si Adam, ninna do: Nunga ro Tuhan i mardongan angka na badiana, na marloksaloksa, 1:15 manguhumi saluhutna dohot maminsang saluhut parjahat, ala ni nasa ulaonnasida na jahat na binahennasida dohot ala ni saluhut hatanasida na tois, na hinatahon ni angka parjahat dompak Ibana. 1:16 I ma angka parmungutmungut, angka siburai soro ni arina, alai huhut diulahon hahisaponnasida, dihatahon pamangannasida do hata manggang, jumpa mangellemellem marhata dompak, mambuat laba sian i. 1:17 Alai hamu angka haholongan, ingot hamu ma hata angka naung nilumbahon ni angka apostel ni Tuhanta Jesus Kristus! 1:18 Ai didok nasida do tu hamu: Di angka ari parpudi ro ma angka sipanginsahi, angka na mangulahon hahisapon, hajahaton ni rohanasida be. 1:19 I ma angka pamolamola; mangolu do nian, alai ndang martondi. 1:20 Alai hamu, angka haholongan, pauliuli hamu ma dirimuna di atas haporseaonmuna na badia situtu, jala martangiang di bagasan Tondi Parbadia! 1:21 Ramoti hamu ma dirimuna di bagasan holong ni roha ni Debata! Maimaima ma hamu di asi ni roha ni Tuhanta Jesus Kristus, asa sahat hamu tu hangoluan salelenglelengna. 1:22 Ajari hamu ma angka na ganggu roha i! 1:23 Palua hamu ma nasida, rampas hamu ma nasida sian api; marasi ni roha ma hamu di na deba, huhut mabiar, hagigihon hamu ma nang abitna, naung niramunan ni sibukna. 1:24 Alai hasangapon ma di Ibana na margogo mangaramoti hamu, unang tinggang, jala pajongjongkon hamu marolopolop, so martihas, tu adopan ni hasangaponna! 1:25 Di Debata na sasada i, na paluahon hita marhitehite Jesus Kristus, Tuhanta i, di Ibana ma hasangapon, hamuliaon, hagogoon dohot parhuasoon sian mula ni mulana, nang nuaeng, nang ro di salelenglelengna! Amen.
1:1 On ma pangungkapon ni Jesus Kristus, na nilehon ni Debata tu Ibana, asa tu angka naposona patuduhononna na naeng masa tibu, gabe saut dipatuduhon, ai ditongos do marhite sian surusuruanna tu naposona, Johannes. 1:2 Dihatindangkon ibana do hata ni Debata dohot panindangion taringot tu Jesus Kristus: Nasa na niidana. 1:3 Martua ma na manjaha ro di angka na umbege hata panurirangon on, angka siradoti na tarsurat dison; ai jonok do ari i! 1:4 Ahu surat ni si Johannes mandapothon na pitu huria na di Asia: Asi ni roha ma di hamu dohot dame sian Ibana na mangolu i, naung mangolu hian jala na naeng ro, nang sian na pitu Tondi na di adopan ni habangsana, 1:5 nang sian Jesus Kristus, Sitindangi haposan i, na parjolo tubu sian angka naung mate, Sigomgom angka raja ni tano on! Ibana do mangkaholongi hita jala dipalua hita sian dosanta marhitehite mudarna. 1:6 Dijadihon do hita gabe harajaon hamalimon di Debata, Amana i: Di Ibana ma hasangapon dohot hagogoon ro di salelenglelengna! Amen. 1:7 Ida ma, na ro ma Ibana di bagasan ombun! Idaon ni nasa mata do Ibana, nang angka naung manullang Ibana, gabe mangangguhi be ma saluhut bangso ni tano on mida Ibana. I ma tutu. Amen. 1:8 Ahu do Bonana jala Ujungna, ninna Tuhan Debata, Debata nuaeng, Debata naung adong hian, na naeng ro i, Sigomgom saluhutna! 1:9 Ahu Johannes, donganmuna jala rap dohot hamu partohap di haporsuhon dohot di harajaon nang di habengeton na di bagasan Jesus; di pulo na margoar Patmos do ahu uju i, ala ni hata ni Debata dohot ala ni pangkatindangkon di Jesus. 1:10 Naung di bagasan ari ni Tuhan i do ahu di bagasan tondi, gabe hubege di pudingku soara na gogo, suman tu soara ni sarune. 1:11 On do didok: Surathon ma na niidam tu sada buku jala tongos ma i tu na pitu huria, i ma Epesus, Smirna, Pergamos, Tiatira, Sardes, Piladelpia dohot Laodikea! 1:12 Gabe humusor ma ahu marnida Parsoara, naung mangkatai i dohot ahu. Jadi dung humusor ahu, huida ma pitu parpalitoan sere. 1:13 Jadi di tongatonga ni angka parpalitoan i huida ma na suman tu Anak ni jolma, na marsampesampe jala marhohos sere di pamatangna. 1:14 Mamontar do simanjujungna ro di obukna, bontar songon hapas, saksak songon hapur; jala songon nala ni api do ia matana. 1:15 Ianggo patna songon haksa na nilala di bagasan pamurunan, ia soarana songon parhasak ni aek godang. 1:16 Ditiop do pitu bintang di tanganna siamun, jadi ruar do sian pamanganna podang siduababa na tajom; songon mata ni ari na maringaringar do ia sondang ni bohina. 1:17 Disi huida Ibana, tinggang do ahu tujolo ni totna, songon naung mate; gabe diampehon Ibana ma tanganna siamun tu ahu, huhut ma didok: Unang ho mabiar, ai Ahu do Parjolo jala Parpudi! 1:18 Ahu do Siparngolu; naung mate do Ahu najolo, gabe mangolu antong ro di salelenglelengna; di Ahu do anak hinsu ni hamatean dohot banua toru! 1:19 Onpe, surathon ma na niida ni matami, i ma na masa nuaeng ro di na naeng masa, dung salpu on: 1:20 Hahomion ni bintang na pitu, angka na niidam di siamunhu, dohot parpalitoan sere na pitu i: Ia bintang na pitu i, angka suruan ni na pitu huria do i, ia parpalitoan na pitu i, i ma na pitu huria i.
2:1 Surathon ma tu suruan ni huria Epesus: On do hata ni na maniop bintang na pitu i di siamunna, na mardalan di holangholang ni parpalitoan na pitu i: 2:2 Huboto do angka ulaonmu dohot parungkilonmu ro di habengetonmu; na so tarpataontaon ho angka parjahat. Diunjuni ho do angka na mandok, apostel nasida, hape ndang na tutu; pargapgap do nasida jumpang ho. 2:3 Na marbenget ni roha do ho, na marsitaonon do ho ala ni Goarhu; ndang marnaloja ho. 2:4 Alai adong do pangkurangi ni rohangku di ho, i ma naung tinadingkonmu holong ni roham na di mulana i! 2:5 Onpe, parateatehon ma hatinggalanmi; pauba ma roham, ulahon ma angka ulaonmu na parjolo i! Ia so i, ro ma Ahu mandapothon ho, manunggalingkon parpalitoanmi sian ingananna, anggo so dipauba ho roham. 2:6 Alai on do tutu hasurunganmu: Dihasogohon ho do ulaon ni halak Nikolaus; Ahu pe, huhasogohon do i. 2:7 Ditangihon na marpinggol ma na nidok ni Tondi i tu angka huria: Na monang i ma bahenonku manganhon parbue ni hau hangoluan, na di Paradaiso ni Debata! 2:8 Surathon ma tu suruan ni huria Smirna: On do hata ni Parjolo huhut Parpudi, naung mate najolo gabe mangolu: 2:9 Huboto do haporsuhonmu dohot hapogosonmu, alai na mora do ho; huboto nang panginsahion ni angka na mandok: Jahudi nasida; hape ndang na tutu, punguan ni sibolis do nasida. 2:10 Unang habiarhon angka haporsuhon na naeng ro! Dabuon ni sibolis ma deba sian hamu tubagasan hurungan, asa tarunjun hamu, gabe tarsosak ma hamu sampulu ari lelengna. Sai burju ma ho rasirasa mate; dung i lehononku ma tu ho tumpal hangoluan i! 2:11 Ditangihon na marpinggol ma na nidok ni Tondi i tu angka huria: Ndang mahua na monang i bahenon ni hamatean na paduahon i! 2:12 Surathon ma tu suruan ni huria Pergamos: On do hata ni na maniop podang siduababa na tajom i: 2:13 Huboto do ingananmu mardonokkon habangsa ni sibolis i, jadi na marsihohot do ho di Goarhu, ndang disoadahon ho haporseaon di Ahu, nang uju di angka ari ni Antipas, sitindangingku haposan i, gabe dipusa do ibana di tongatongamuna, di inganan ni sibolis i. 2:14 Alai adong do saotik pangkurangi ni rohangku di ho: Na adong do di tongatongamuna angka na mangoloi poda ni Bileam, na mangajari si Balas mambahen gasip di jolo ni halak Israel, i ma na manganhon na pinelehon tu begu dohot na marmainan. 2:15 Suang songon i adong di tongatongamu angka na marsitiopan tu poda ni halak Nikolaus. 2:16 Pauba ma roham! Ia so i, magira ma Ahu ro marmusu dompak nasida marhitehite podang ni pamanganku. 2:17 Ditangihon na marpinggol ma na nidok ni Tondi i tu angka huria: Tu na monang i ma lehononku sipanganon manna na buni i, jala lehononku tu ibana batu na saksak dohot goar na imbaru na sinurat tu atas batu i, na so binoto ni manang ise, ia so holan na manjalosa. 2:18 Surathon ma tu suruan ni huria Tiatira: On do hata ni Anak ni Debata, na marmata songon nala ni api, jala patna tudos tu haksa: 2:19 Huboto do angka ulaonmu dohot holong ni roham dohot haporseaonmu ro di pangkobasionmu, nang benget ni roham; huboto, gumodang do ulaonku parpudi sian angka na parjolo i. 2:20 Alai on do pangkurangi ni rohangku di ho: Dipasombu ho do boru Izebel, na mandok, panurirang ibana, gabe diajari jala dililuhon do angka naposongku, asa marmainan nasida jala manganhon na pinelehon tu begu. 2:21 Nunga hupaganjang nian arina, asa paubaonna rohana; alai ndang olo ibana paubahon rohana tumadingkon parmainanonna i. 2:22 Dabuonku ma ibana tubagasan parsahiton, songon i angka donganna pangalangkup tubagasan haporsuhon godang, ia so dipauba rohana tumadingkon niulana i. 2:23 Laos ragehononku ma angka anakkonna asa mate, asa diboto saluhut huria; Ahu do sidodo ateate dohot roha; jala lehononku tu ganup hamu hombar tu na niulana be. 2:24 Alai tu hamu, angka na tading di Tiatira, tu nasa na so umpeop poda ondeng, angka na so umboto hahomion ni sibolis i, songon na nidoknasida, tu hamu do hudok: Ndang be ampehononku pandokdohi na asing tu hamu: 2:25 Asal ma ditiop hamu na di hamu i, paima ro Ahu! 2:26 Di na monang i, anggo diradoti ulaonku sahat ro di ujung, lehononku ma huaso manggomgomi angka parbegu: 2:27 Parmahanonna ma nasida marhitehite tungkot bosi, mangarosak nasida hira hudon tano, songon naung hujalo sian Damang. 2:28 Lehononku ma tu ibana bintang sipaias. 2:29 Ditangihon na marpinggol ma na nidok ni Tondi i tu angka huria!
3:1 Surathon ma tu suruan ni huria Sardes: On do hata ni Partondi na pitu na sian Debata jala Parbintang na pitu: Huboto do angka ulaonmu; na targoar do ho mangolu, hape na mate do! 3:2 Tarsunggul ma ho jala patogu ma donganmu na tading i, angka na naeng mate. Ai ndang jumpang Ahu di angka ulaonmu, naung gok di jolo ni Debatangku. 3:3 Antong, ingot ma, manang songon dia na jinalom dohot na binegem; i ma radoti jala pauba roham! Dibahen i, molo so tarsunggul ho, ro ma Ahu songon panangko; na so jadi botoonmu sadiharina Ahu ro manopot ho. 3:4 Alai adong do di Sardes otik goar ni halak, angka na so mangaramuni abitna; nasida ma mardalan sogot rap dohot Ahu marabit na saksak, ai na tau do nasida. 3:5 Songon i ma uloshononhon abit na saksak tu na monang i; na so tupa be sesaonku goarna sian buku hangoluan i, hatindangkononku ma goarna di jolo ni Damang nang angka surusuruanna. 3:6 Ditangihon na marpinggol ma na nidok ni Tondi i tu angka huria! 3:7 Surathon ma tu suruan ni huria Piladelpia: On do hata ni Nabadia jala Nasintong, na umpeop anak hinsu ni Daud, na mangungkap so adong na mangkinsu, jala na mangkinsu so adong na mangungkap: 3:8 Huboto do angka ulaonmu. Antong, nunga hupadiri di jolom pintu naung mungkap, na so bolas hinsuon ni manang ise. Ai otik pe gogom, diradoti ho do hatangku; ndang disoadahon ho Goarhu. 3:9 Huboan ma halak sian punguan ni sibolis, angka na mandok, Jahudi nasida, hape ndang na tutu, pargabus do nasida: Bahenonku ma nasida ro marsomba tujolo ni patmu, botoonnasida do, naung huhaholongi ho! 3:10 Ai diradoti ho do hata habengeton na sian Ahu; Ahu pe, ramotanku ma ho di ari pangunjunan na naeng ro tu liat portibi on, mangunjuni angka na mangingani tano on. 3:11 Magira ma Ahu ro. Tiop ma na di ho, unang adong na mambuat tumpalmi! 3:12 Bahenonku ma na monang i gabe tiang di joro ni Debatangku; na so tupa be ibana ruar sian i, jala surathononku ma tu ibana Goar ni Debatangku dohot goar ni huta ni Debatangku, i ma Jerusalem na imbaru i, na tuat sian banua ginjang sian Debatangku, nang Goarhu na imbaru i. 3:13 Ditangihon na marpinggol ma na nidok ni Tondi i tu angka huria! 3:14 Surathon ma tu suruan ni huria Laodikea: On do hata ni si Amen, Sitindangi haposan jala na sintong, mula ni na tinompa ni Debata: 3:15 Huboto do angka ulaonmu: Na so haru ngali, na so haru las ho; aut ni haru ngali ma ho manang las nian! 3:16 Alai dibahen na danggoldanggol sisilon ho, so haru ngali, so haru las, utahononku ma ho sian pamanganku. 3:17 Ai didok ho: Na mora do ahu jala paradongan, ndang hurangan ahu. Ndang diboto ho, na parir do ho hape jala na dangol, na pogos, na mapitung jala na marsaemara. 3:18 Huapoi ma ho, manuhor sian Ahu sere naung pinapita ni api, anggiat tutu mamora ho, nang abit na saksak siuloshononmu, unang patar hailaonmu di parsaemaraonmi, nang miak mamiahi matami, asa marnida ho! 3:19 Ai nasa na huhaholongi, angka i do hupinsang jala huajar. Antong, haringkothon ma na paubahon roha! 3:20 Ida ma, na jongjong do Ahu di jolo pintu i manuktuhi; ia adong na tumangihon soarangku dohot mangungkap pintu i, bongot ma Ahu tu ibana, mangan ma Ahu rap dohot ibana, jala ibana rap dohot Ahu. 3:21 Padirionku ma tu na monang i hundulan di habangsangku rap dohot Ahu; songon Ahu, dung monang, hundul rap dohot Damang di habangsana i. 3:22 Ditangihon na marpinggol ma na nidok ni Tondi i tu angka huria!
4:1 Dung salpu i, hubereng ma, jadi ida ma, ungkap do sada pintu di banua ginjang, jadi mangkuling ma soara, naung hubege mangkatai dohot ahu di mulana i, songon soara ni sarune, didok ma: Nangkok ma ho tuson, asa hupatuduhon tu ho na naeng masa, dung salpu angka ari on. 4:2 Jadi mamintor di bagasan tondi ma ahu: Adong ma habangsa sada di banua ginjang, jadi adong do na mangkunduli habangsa i. 4:3 Ia na hundul i, songon mata intan Jaspis dohot Sardion do idaon rupana; dihaliangi halibutongan do habangsa i, na songon mata intan Samara rupana. 4:4 Humaliang habangsa i adong ma duapulu opat habangsa, juguhan ni duapulu opat sintua, angka parabit na saksak jala martumpal sere di ulunasida. 4:5 Na ruar do sian habangsa i angka hilap dohot soara na mardoromdorom dohot ronggur; galak do pitu parpalitoan api di jolo ni habangsa i, i ma na pitu Tondi ni Debata. 4:6 Di jolo ni habangsa i adong ma songon laut sorminan, suman tu kristal (galas), jala di parsitongaan ni habangsa i dohot humaliang habangsa i adong ma opat parngolu, angka na marmata torop, di jolo nang di pudi. 4:7 Ia parngolu parjolo suman do tu singa, ia parngolu paduahon suman tu jonggi, ia na patoluhon marbohi songon jolma, ia na paopathon suman tu pidong raja ualu na habang. 4:8 Adong di ganup parngolu na opat i onom habonghabongna be, na marmata do nasida humaliang dohot di bagasan; ndang maradian nasida arian dohot borngin, mandok: Na badia, na badia, na badia do Tuhan Debata, Sigomgom saluhutna, naung adong hian, Siparngolu i, na naeng ro! 4:9 Disi dilehon angka parngolu i hasangapon dohot hamuliaon dohot hamauliateon tu Ibana, na hundul di habangsa i, na mangolu ro di salelenglelengna, 4:10 jalo ma manungkap sintua na duapulu opat i di jolo ni na hundul di habangsa i, disomba ma Parngolu sisalelenglelengna i, dipeakkon ma tumpalnasida tujolo ni habangsa i, huhut ma didok: 4:11 Ale Tuhan Debatanami, na tama do Ho manjalo hasangapon dohot hamuliaon dohot hagogoon, ai ditompa Ho do saluhutna; hinorhon ni lomo ni roham do, umbahen manjadi angka i jala tartompa!
5:1 Dung i huida ma di tangan siamun ni na hundul di habangsa i sada buku, naung sinuratan sian bagasan nang sian duru, naung sinahap dohot pitu sahap. 5:2 Jadi huida ma sada surusuruan na marsahala, na marsoara na gogo mamaritahon: Ise do na tau mangungkap buku i jala mangkarhari angka sahapna i? 5:3 Alai ndang adong manang ise di banua ginjang nang di tano nang di toru ni tano, na tarbahen mangungkap buku i manang marnida tubagasan. 5:4 Gabe tangis situtu do ahu, ala so adong jumpang agia ise, na tau mangungkap buku i nang marnida tubagasan. 5:5 Dung i didok sada sian angka sintua i ma mandok ahu: Unang ho tangis; nunga monang Singa i, na sian marga Juda, urat ni si Daud, laho mangungkap buku i dohot sahapna na pitu i. 5:6 Jadi di parsitongaan ni habangsa i, di tongatonga ni na opat parngolu dohot angka sintua i, huida jongjong sada Birubiru, songon naung tarbunu, pitu do tandukna jala pitu matana, i ma na pitu Tondi ni Debata, na sinuruna tu liat tano on. 5:7 Dung i ro ma Ibana, dijalo ma buku i sian tangan siamun ni na hundul di habangsa i. 5:8 Asa dung dijalo buku i, manungkap ma na opat parngolu i dohot na duapulu opat sintua i di jolo ni Birubiru i; ganup nasida maniop sada hasapi dohot sada saoan sere gok angka na hushus, i ma tangiang ni angka na badia. 5:9 Diendehon nasida ende na imbaru, ninna ma: Na tama do Ho manjalo buku i jala mangungkap angka sahapna, ai naung tarbunu do Ho jala marhitehite mudarmu ditobus Ho do tu Debata jolma sian saluhut marga, hata, houm dohot bangso. 5:10 Jala dijadihon Ho do nasida gabe harajaon hamalimon di Debatanta, asa manggomgomi nasida di atas tano i! 5:11 Dung i mamereng ma ma ahu, gabe hubege ma songon soara ni torop surusuruan humaliang habangsa i, nang soara ni angka parngolu i dohot angka sintua i; ia toropnasida marloksaloksa jala marriburibu. 5:12 Marsoara na gogo nasida mandok: Na tama do Birubiru naung tarbunu i manjalo hagogoon dohot hamoraon dohot hapistaran dohot sahala dohot hamuliaon dohot hasangapon dohot pujipujian! 5:13 Gabe hubege ma soara ni nasa na tinompa, angka na di banua ginjang, di tano, ditoru ni tano ro di na di laut, tung saluhutna na di bagasan angka i mandok: Pujipujian dohot hamuliaon dohot hasangapon dohot hagogoon ro di salelenglelengna ma di Ibana, na hundul di habangsa i dohot di Birubiru i! 5:14 Jadi didok na opat parngolu i ma: Amen! Laos manungkap ma angka sintua i huhut marsomba.
6:1 Dung i huida ma, diungkap Birubiru i ma sada sahap sian na pitu i, jadi hubege ma sada sian parngolu na opat i marsoara songon ronggur mandok: Ro ma ho! 6:2 Dung i hubereng, jadi adong ma hoda sihapaspili; na marsior do na mangkunduli hoda i, dilehon do tu ibana tumpal, laos borhat do ibana marhamonangan, asa monang. 6:3 Jadi dung diungkap sahap paduahon, hubege ma parngolu paduahon mandok: Ro ma ho! 6:4 Dung i ruar ma hoda na asing, na rara songon api; dilehon ma tu na mangkunduli hoda i huaso mambuat dame sian tano on, asa masiseatan, laos dilehon ma podang na balga tu ibana. 6:5 Jadi dung diungkap sahap patoluhon, hubege ma soara ni parngolu patoluhon mandok: Ro ma ho! Jadi huida, adong ma hoda sada na birong; ditiop na mangkunduli hoda i do sada dasing di tanganna. 6:6 Jadi hubege do songon soara di tongatonga ni na opat parngolu i mandok: Sasolup eme sahupang, jala tolu solup eme na rara sahupang; ia miak dohot anggur, unang hahua! 6:7 Jadi dung diungkap sahap paopathon, hubege ma soara ni parngolupaopathon mandok: Ro ma ho! 6:8 Jadi hubereng, gabe adong ma hoda sada silansat; ia goar ni na mangkunduli hoda i, hamatean do, jala mangihut do tu ibana banua toru; jadi dilehon do di nasida huaso tu saparopat ni pangisi ni tano on, mamusa nasida marhitehite podang dohot haleon dohot hamatean hian nang marhitehite binatang angka na di tano on. 6:9 Jadi dung diungkap sahap palimahon, huida ma ditoru ni langgatan i tondi ni angka naung sineat, ala ni hata ni Debata dohot ala ni pangkatindangkonnasida. 6:10 Na marsoara na gogo do nasida manjoujou, angka ninna ma: Sadia leleng nari, ale Tuhan na badia jala na sintong, asa manguhumi Ho jala mangaluluhon mudarnami tu angka na mangingani tano i? 6:11 Gabe dilehon ma tu ganup nasida abit na saksak, jadi didokkon ma nasida maimaima sangombas nari, paima tumpu nang angka dongannasida naposo, angka hahaangginasida, angka sipusaon dope songon nasida. 6:12 Jadi huida, dung diungkap sahap paonomhon: Masa ma lalo bolon, gabe mamirong ma mata ni ari songon harung hori, jadi sandok bulan i songon mudar. 6:13 Jala mardekdehan ma bintang angka na di langit i tu tano, songon di hau antajau, na mameuthon parbuena, ia jumpa hinutur ni alogo na gogo. 6:14 Jadi dibalun ma langit i songon surat na binalun, meret ma nasa dolok dohot pulo sian inganannasida. 6:15 Gabe martabuni ma angka raja ni tano on dohot angka na sangap, angka induk ni soldadu, angka na mora dohot angka na gogo, angka anak somang nang angka anak mata: Martabuni be ma tu angka liang dohot batu na di dolok. 6:16 Gabe didok nasida ma tu angka dolok dohot batu: Tinggang i jala hungkupi hamu ma hami maradophon bohi ni na hundul di habangsa i dohot maradophon rimas ni Birubiru i! 6:17 Ai nunga ro ari ni rimasnasida na balga i; tung ise tartahan i?
7:1 Dung salpu i, huida ma opat surusuruan jongjong di na opat desa ni tano i, angka na maniop na opat alogo ni tano i, asa unang mangombus alogo di tano, nang di laut nang tu sada hau pe. 7:2 Dung i huida ma surusuruan na asing hehe sian habinsaran ni mata ni ari, na maniop sahap ni Debata na mangolu, jadi balga ma soarana manjouhon dompak surusuruan na opat i, angka naung manjalo sahala mangago tano dohot laut. 7:3 Ninna ma: Unang ma ago hamu tano nang laut nang angka hau, paima husahapi hami angka naposo ni Debatanta di bohinasida be! 7:4 Laos hubege do bilangan ni angka na tarsahap i: Saratus opatpulu opat ribu sian saluhut marga ni halak Israel: 7:5 Sian marga Juda sampuludua ribu angka na tarsahap, sian marga Ruben sampuludua ribu, sian marga Gad sampuludua ribu, 7:6 sian marga Aser sampuludua ribu, sian marga Naptali sampuludua ribu, sian marga Manasse sampuludua ribu, 7:7 sian marga Simeon sampuludua ribu, sian marga Lepi sampuludua ribu, sian marga Isasar sampuludua ribu, 7:8 sian marga Zebulon sampuludua ribu, sian marga Josep sampuludua ribu, sian marga Benjamin sampuludua ribu angka na tarsahap. 7:9 Dung salpu i, adong ma hubereng mansai torop, na so dapot bilangan ni jolma, sian nasa bangso, marga dohot houm dohot hata, angka na jongjong diadopan ni habangsa i dohot di adopan ni Birubiru i, angka na maruloshon abit na saksak jala na maniop maremare di tangannasida. 7:10 Gogo ma soaranasida manjoujou, angka ninna ma: Tua ma di Debatanta, na mangkunduli habangsa i, dohot di Birubiru i! 7:11 Jadi jongjong ma saluhut surusuruan i humaliang habangsa i dohot humaliang angka sintua i dohot parngolu na opat i, dung i manungkap ma nasida di jolo ni habangsa i huhut marsomba tu Debata. 7:12 Ninna nasida ma: Amen! Pujipujian dohot hasangapon dohot hapistaran dohot hamauliateon dohot hagogoon dohot hatoguon ma di Debatanta ro di salelenglelengna! Amen. 7:13 Dung i mangalusi ma sada sian angka sintua, didok ma mandok ahu: Ise do angka i; jala sian dia do ro angka na maruloshon abit na saksak i? 7:14 Jadi hudok ma mandok ibana: Ale tuanku, ho do umbotosa. Gabe didok ma tu ahu: I ma angka naung ro sian haporsuhon godang; nunga diburi nasida abitnasida jala dipasaksak di bagasan mudar ni Birubiru i. 7:15 Ala ni i sai di jolo ni habangsa ni Debata do nasida, mangoloi Ibana arian dohot borngin di bagasan jorona i, jala Ibana, na mangkunduli habangsa i, ma paulihon inganan di atasnasida. 7:16 Ndang be male nasida, ndang be mauas, ndang be ditinggang las ni ari nasida, manang dia na mohop pe. 7:17 Ai parmahanon ni Birubiru na di parsitongaan ni habangsa i do nasida jadi togihononna ma nasida tu angka mual aek hangoluan, jadi apusan ni Debata nasa iluilu sian matanasida.
8:1 Jadi dung diungkap sahap na papituhon i, hohom ma angka na di banua ginjang i, arga satonga jom lelengna. 8:2 Dung i huida ma na pitu surusuruan, na jongjong di adopan ni Debata, jadi dilehon ma tu nasida pitu sarune. 8:3 Dung i ro ma surusuruan na asing, jongjong tondongkon langgatan pamelean i, ditiop ma pardaupaan sere, gabe dilehon ma tu ibana godang daupa, asa lehononna i tu atas langgatan sere na di jolo ni habangsa i, manambai tangiang ni saluhut angka na badia. 8:4 Gabe manaek ma timus ni daupa i, tamba ni tangiang ni angka na badia i, sian tangan ni surusuruan i tujolo ni Debata. 8:5 Dung i dibuat surusuruan i ma pardaupaan i, digohi ma i dohot api na sian langgatan i, didabu ma i tu tano i, gabe masa ma angka ronggur dohot soara na mardoromdorom, angka hilap dohot lalo. 8:6 Jadi marhobas ma na pitu surusuruan, na maniop sarune na pitu i, asa dipalu sarunena be. 8:7 Gabe dipalu na parjolo i ma sarunena, jadi masa ma ambolas dohot api saor mudar didabu tu tano i, gabe mosok ma sapartolu ni tano i, mosok ma dohot sapartolu ni angka hau, mosok ma nang saluhut duhutduhut na rata i. 8:8 Dung i dipalu surusuruan na paduahon ma sarunena, gabe didabu ma api tu laut songon dolok na balga na marsigorgor, gabe mudar ma sapartolu ni laut i. 8:9 Laos mate ma sapartolu ni angka na tinompa na mangolu di laut, rendep ma sapartolu ni angka parau. 8:10 Dung i dipalu surusuruan na patoluhon ma sarunena, gabe madabu ma sian langit sada bintang na balga, na marsigorgor songon palito, laos ditinggang ma sapartolu ni angka batang aek dohot mual. 8:11 Apsintos (hapaeton) do goar ni bintang i; jadi gabe paet do sapartolu ni aek i, laos mate do torop halak dibahen aek i, naung gabe paet. 8:12 Dung i dipalu surusuruan na paopathon ma sarunena, gabe hona pungkul ma sapartolu ni mata ni ari dohot sapartolu ni bulan dohot sapartolu ni angka bintang, gabe mangkolom ma na sapartolu i, laos so marsinondang be na sapartolu i arianna, borngin i pe songon i do. 8:13 Dung i hubereng, jadi hubege ma sada pidong raja ualu habang martongatonga langit; marsoara na gogo do ibana mandok: Marjea, marjea, marjea ma angka na mangingani tano i, horhonon ni soara na tading i dope, i ma sarune ni surusuruan na tolu nari, angka na naeng marsarune dope!
9:1 Dung i dipalu surusuruan na palimahon ma sarunena. Gabe huida ma bintang sada madabu sian langit tu tano i, jadi dilehon ma tu ibana anak hinsu ni ruang parbanua toru. 9:2 Gabe diungkap ma ruang parbanua toru i, jadi manaek ma timus sian ruang i songon timus ni pamurunan na balga, gabe mangkolom ma mata ni ari ro di parlangitan, dibahen timus na sian ruang i. 9:3 Jadi marruaran ma angka sihapor sian timus i tu tano i, dung i dilehon ma tu nasida huaso songon huaso ni hala di tano on. 9:4 Jadi dipaksa ma nasida, unang disegai duhutduhut ni tano i, manang angka na rata, manang agia sada hau, ia so holan jolma, angka na so marsahap di pardompahanna sian Debata. 9:5 Dipaksa do nasida, unang mamusa; sipaporsukporsuhonna do jolma i lima bulan lelengna. Ia porsukna suman tu pangonai ni hala, jumpa didoit jolma. 9:6 Luluan ni jolma ma hamatean di angka ari i, alai ndang jumpangsa; mangido do rohanasida, naeng mate nian, alai maporus do hamatean i sian nasida. 9:7 Ia rupa ni angka sihapor i suman do tu hoda, naung hobas tu parmusuon; ia di ulunasida dijujung do tumpal songon sere. Ia bohinasida songon bohi ni jolma do idaon; 9:8 ia obuknasida songon obuk ni boruboru, jala iponnasida songon ipon ni singa. 9:9 Marbajubaju do nasida suman tu bajubaju bosi; ia pangkuling ni habonghabongnasida songon soara ni torop hureta na tinait ni hoda, na marlojong tu tongtangan. 9:10 Marihur nasida songon ihur ni hala na marsorop; laos di bagasan ihurnasida do huasonasida, i ma na mangago angka jolma, leleng ni lima bulan. 9:11 Ia raja na manggomgom nasida, surusuruan sada sian banua toru, na margoar Abdon di hata Heber; ia di hata Junani Apollion do goarna. 9:12 Nunga salpu jea na parjolo; ida ma, na ro ma jea dua nari, dung salpu on! 9:13 Dung i dipalu surusuruan na paonomhon na sarunena. Jadi hubege ma sada soara sian na opat suhi ni langgatan sere na di jolo ni Debata. 9:14 On do hatana tu surusuruan paonomhon na marsarune i: Harhari ma surusuruan na opat na tambat di topi ni batang aek Euprat na balga i! 9:15 Jadi malua ma surusuruan na opat i, angka naung pinarade, asa hobas di ombasna, di arina, di bulanna, di taonna, laho mambunu sapartolu ni hajolmaon. 9:16 Ia torop ni angka parporang na mangkunduli hoda, dua loksa hali loksa do; hubege do bilangannasida. 9:17 Songon on do huida di bagasan tondingku angka hoda nang angka na mangkundulisa: Dialithon do angka bajubaju partahanan na songon api deba, na deba angka na rara, na deba angka na gorsing songon barerang. Ia ulu ni angka hodanasida songon ulu ni singa; na puas do sian babanasida api mardongan timus dohot barerang. 9:18 Hinorhon ni haporsuhon na tolu i tarbunu do sapartolu ni hajolmaon, i ma hinorhon ni api dohot timus dohot barerang, angka na puas sian babanasida. 9:19 Ai di bagasan angka babanasida dohot ihurnasida do gogo ni angka hoda i, ai suman tu ulok do angka ihurnasida, angka na marulu; marhitehite i do nasida mangago. 9:20 Anggo angka jolma na tading, na so binunu ni angka haporsuhon i, laos so dipauba do rohanasida, tumadingkon niula ni tangannasida, asa unang be nian marsomba nasida tu sibolis manang tu ajiajian, angka na sian sere, sian perak, tombaga, hau dohot batu, angka na so tarbahen marnida manang marbinege manang mardalan pe. 9:21 Ndang dipauba nasida rohanasida tumadingkon pamunuon nang na pauli rasun nang parmainanon ro di panangkoon.
10:1 Dung i huida ma surusuruan na asing na gogo, tuat sian banua ginjang; na maruloshon ombun, halibutongan do di atas uluna, songon mata ni ari do bohina, ia patna songon tiang api do. 10:2 Ditiop do di tanganna buku sada na metmet, naung binungka; diojakkon do patna siamun tu laut, ia patna hambirang tu tano. 10:3 Gogo ma soarana manjoujou songon singa na maungaung; jadi di na manjoujou i ibana, mangkuling ma pitu ronggur. 10:4 Jadi dung mangkuling ronggur na pitu i, naeng manurat ahu; jadi hubege ma soara sian banua ginjang na mandok: Sahapi ma na hinatahon ni ronggur na pitu i; unang ma surathon! 10:5 Dung i dipatoltol surusuruan, na huida jongjong di atas laut dohot tano, ma tanganna siamun dompak ginjang. 10:6 Jadi manolon ma ibana tu Debata na mangolu ro di salelenglelengna, naung tumompa langit dohot isina, tano padohot isina, nang laut ro di na dibagasanna, paboa na so masa be na paginjangkon tingki: 10:7 Tung di ari ni soara ni surusuruan na papituhon, di na naeng paluonna sarune i, disi ma patuluson hahomion ni Debata, songon naung binaritahonna i tu angka naposona, i ma angka panurirang i. 10:8 Ia soara, naung hubege hian sian banua ginjang, mangulahi mangkulingi ahu, ninna ma: Laho ma, jalo ma buku naung binungka i, na di tangan ni surusuruan, na jongjong di atas laut dohot tano! 10:9 Dung i hutopot ma surusuruan i, hudokkon ma ibana, mangalehon buku i tu ahu. Jadi didok ma: Na, pangan ma; gabe paet ma i di butuham, alai tonggi songon situak ni loba anggo di pamanganmu. 10:10 Jadi hujalo ma buku i sian tangan ni surusuruan i jala hupangan, gabe tonggi ma i di bagasan pamanganku songon situak ni Loba; jadi dung hubondut, gabe paet do i dihilala butuhangku. 10:11 Jala angka didok ma tu ahu: Ingkon ulahanmu dope manurirangi dompak angka marga dohot bangso dohot hata, nang dompak torop raja.
11:1 Dung i dilehon ma tu ahu arung sada songon tungkot, huhut ma didok: Hehe ma ho, suhati ma joro ni Debata ro di langgatan i, nang angka na marsomba disi. 11:2 Laosi ma ia alaman parduru ni joro i, unang suhati anggo i; ai nunga dipasahat i tu angka parbegu: Padegedegeonnasida do huta na badia i, leleng ni opatpulu dua bulan. 11:3 Dung i lehononku ma tu na dua sitindangingku, asa manurirangi nasida, maruloshon hori, leleng ni saribu duaratus onompulu ari. 11:4 Nasida ma na dua hau jetun jala na dua parpalitoan, angka na jongjong di adopan ni Tuhan ni tano i. 11:5 Ia adong na naeng manjahati nasida, rungkar ma api sian pamangannasida, mangallang musunasida; ia adong na naeng manjahati nasida, ingkon songon i do ibana mate. 11:6 Na marhuaso do nasida mangkinsu langit, asa unang ro udan di angka ari panurirangonnasida; jadi na marhuaso do nasida, paimbarhon angka aek gabe mudar, jala mangkonahon nasa haporsuhon tu tano i, manang beha pe jotjotna di rohanasida. 11:7 Anggo dung dipatulus nasida panindangionnasida, nangkok ma binatang i sian banua toru marmusu dompak nasida; taluhononna ma nasida jala pusaonna. 11:8 Peak ma bangkenasida di alaman ni huta na balga i; ia goarna partondion Sodom dohot Misir, ai disi do naung tarpajal nang Tuhannasida i. 11:9 Dung i paberengberengon ni halak sian angka bangso dohot marga dohot hata dohot houm ma bangkenasida tonga opat ari lelengna: Ndang diloas tartanom bangkenasida. 11:10 Marlas ni roha ma angka pangisi ni tano i mida nasida jala mariaia, pola masitongosan silua sama nasida, ala naung dipaporsukporsuk panurirang na dua i angka pangisi ni tano i. 11:11 Jadi dung salpu tonga opat ari, songgop ma tu nasida tondi hangoluan na sian Debata, gabe diojakkon ma patnasida, jadi lalu ma hatahuton godang tu angka na marnida nasida. 11:12 Jala dibege nasida ma soara na gogo sian banua ginjang, na mandok tu nasida: Manaek ma hamu tuson! Dung i manaek ma nasida di bagasan ombun tu banua ginjang, dipanotnoti angka musunasida. 11:13 Jadi di na sangombas i masa ma lalo bolon, marumpak ma saparsampulu ni huta i, mate ma di lalo i pitu ribu jolma, gabe mabiar ma angka na tading i, dipasangap ma Debata na di banua ginjang i. 11:14 Nunga salpu jea na paduahon; tibu ma ro jea na patoluhon! 11:15 Dung i dipalu surusuruan na papituhon ma sarunena; jadi masa ma soara na gogo di banua ginjang, angka dipandok: Nunga sahat tu Tuhanta i dohot tu Kristusna i harajaon ni hasiangan on; bangkit Raja ma Ibana ro di salelenglelengna! 11:16 Ia sintua na duapulu opat na di adopan ni Debata, angka na masihunduli habangsana be, dipatungkap ma bohinasida huhut disomba ma Debata. 11:17 Ninna nasida ma: Na mandok mauliate do hami tu Ho, ale Tuhan Debata, Sigomgom saluhutna, na mangolu nuaeng nang najolo, ala naung dialithon Ho hagogoonmu na balga i, jala ala naung bangkit Raja Ho! 11:18 Nunga tarrimas angka bangso, gabe ro ma rimasmu, dapot ma tingki ni angka naung mate asa niuhuman, huhut mangalehon upa tu angka naposom, i ma angka panurirang i dohot angka na badia, angka na mangkabiari Goarmu, angka na metmet ro di angka na balga, huhut mangago angka na mangago tano i. 11:19 Dung i tarungkap ma joro ni Debata na di banua ginjang i, gabe tarida ma poti parpadananna di jorona i, jadi masa ma angka hilap dohot soara, ronggur dohot lalo, nang ambolas na balga.
12:1 Dung i tarida ma partinandaan na balga di langit: I ma sada boruboru, na maruloshon mata ni ari, bulan i do ditoru ni patna, sampuludua bintang do tumpal ni uluna. 12:2 Na gabegabean do ibana, jala mangangguhi, ai pambebeonna do tongon jala mangae laho mangintubu. 12:3 Dung i tarida ma partinandaan na asing di langit, i ma sada naga na bolon songon api; pitu do uluna, sampulu tandukna, pitu tumpal harajaon di angka uluna i. 12:4 Jadi disarat ihurna i sapartolu ni angka bintang na di langit i, gabe didabu tu tano i. Jadi jongjong ma naga i di jolo ni boruboru, na naeng mangintubu, asa bondutonna posoposona, dung tubu. 12:5 Dung i ditubuhon ma posoposo baoa, na naeng marmahanhon sogot nasa bangso marhitehite tungkot bosi. Jadi tarhinsat ma anakna i tu adopan ni Debata dohot tu habangsana. 12:6 Na maporus do boruboru i tu halongonan, tu ingananna na pinarade ni Debata, asa disi dipatureture leleng ni saribu duaratus onompulu ari. 12:7 Dung i masa ma hamusuon di banua ginjang, martongtang ma Mikhael rap dohot angka surusuruanna dompak naga i. Marmusu ma nang naga i rap dohot angka surusuruanna. 12:8 Alai ndang manahan nasida; ndang be dapot inganannasida di banua ginjang. 12:9 Jadi dipabali ma naga na balga i, ulok na robi i, na margoar sibolis dohot setan, na paotootohon liat portibi on, dipabali ma ibana tu tano i, dipabali ma nang angka surusuruanna raphon ibana. 12:10 Dung i hubege ma soara na gogo di banua ginjang, na mandok: Nunga sahat nuaeng haluaon dohot hagogoon dohot harajaon ni Debatanta dohot hamuliaon ni Kristusna; ai nunga dipabali pangasung i, na mangasungi angka hahaangginta arian dohot borngin di jolo ni Debata. 12:11 Nunga ditaluhon nasida ibana hinorhon ni mudar ni Birubiru i dohot hinorhon ni hata na hinatindangkonnasida; ndang diparhamaol nasida hosanasida rasirasa mate. 12:12 Dibahen i marlas ni roha ma hamu, angka banua ginjang dohot pangisina! Marjea ma tano i dohot laut, ai nunga tuat sibolis i tu hamu, marrimas situtu; ai diboto, otik nama tingkina! 12:13 Alai dung diida naga i, naung bali ibana tu tano, dilele ma boruboru na tumubuhon anak i. 12:14 Gabe dilehon ma tu boruboru i dua habonghabong ni pidong raja ualu na balga i, asa habang tu ingananna di halongonan, asa disi dipatureture sangombas dohot dua ngombas dohot satonga ombas, holang sian adopan ni ulok i. 12:15 Ia ulok i, dibursikkon do sian babana aek na sabatang aek sian pudi ni boruboru i, anggiat diauphon batang aek i ibana. 12:16 Alai diurupi tano i ma boruboru i, ai dipangangang tano i do babana, dibondut do batang aek, na binursikkon ni naga i sian babana. 12:17 Jadi tarrimas ma naga i mida boruboru i, gabe laho ma ibana marmusu dompak angka pomparanna na tading i, angka na mangaradoti patik ni Debata jala marsihohot di panindangion ni Jesus. Jala didapothon ma tu pasir ni laut.
13:1 Dung i huida ma ruar sian laut i sada binatang: Sampulu do tandukna, pitu uluna; diatas ni angka tandukna adong ma sampulu tumpal, jadi angka goar panginsahion do di angka uluna i. 13:2 Suman tu babiat do binatang i huida, patna songon pat ni gompul, babana songon baba ni singa; jadi dilehon naga i ma tu ibana gogona nang habangsana dohot sahala godang. 13:3 Dung i huida ma sian angka uluna sada naung hona tagil, sihamatehononna hian; hape gabe malum do bugangna hamatean i. Jadi longang ma liat portibi on paidaida binatang i. 13:4 Gabe disomba nasida ma naga i, ala ibana mangalehon sahala tu binatang i; laos disomba ma binatang i, angka ninna ma: Ise ma tudos tu binatang i; ise tarbahen marmusu dompak ibana? 13:5 Dung i dilehon ma tu ibana soara mangkatahon hata na balga dohot panginsahion, jala dilehon tu ibana huaso mangulahonsa leleng ni opatpulu dua bulan. 13:6 Gabe dibungka ma pamanganna manginsahi Debata, manginsahi Goarna dohot jorona, ro di angka na maringanan di banua ginjang. 13:7 Jadi dilehon ma tu ibana huaso, marmusu dompak angka na badia ro di na manaluhon nasida; laos dilehon tu ibana sahala manggomgomi saluhut marga dohot houm dohot hata dohot bangso. 13:8 Sombaon ni saluhut pangisi ni tano on ma ibana, nasa na so tarsurat goarna olat ni haoojak ni hasiangan on di buku hangoluan ni Birubiru naung tarbunu i. 13:9 Ganup na marpinggol, ditangihon ma! 13:10 Nasa na martaban, ingkon tartaban do; nasa na mambunu dohot podang, ingkon mate bunuon ni podang! Disi ma jumpang habengeton dohot haporseaon ni angka na badia! 13:11 Dung i huida ma binatang na asing ruar sian tano i: Dua do tandukna, songon tanduk ni birubiru; songon hata ni naga i do ia hatana. 13:12 Diulahon do nasa huaso ni binatang na parjolo i di jolona. Disuru do tano i dohot pangisina sumomba binatang na parjolo i, nampuna bugang hamatean naung gabe malum i. 13:13 Diula do tanda angka na balga, pola dipatuat do api sian langit tu tano di jolo ni jolma. 13:14 Dililuhon do angka na maringanan di tano i hinorhon ni angka tanda, naung dilehon tu ibana, sipatupaonna di jolo ni binatang i, ai didokkon do angka na maringanan di tano i paulihon gombaran di binatang, naung mabugang najolo binahen ni podang, gabe mangolu. 13:15 Laos dilehon do huaso tu ibana, mangalehon hosa tu gombaran ni binatang i, gabe marsoara do gombaran ni binatang i, jala mambahen mate nasa na so sumomba gombaran ni binatang i. 13:16 Jadi disuru ma saluhutna, na metmet nang na magodang, na mora nang na pogos, anak mata nang hatoban, mambahen partinandaan tu tangannasida siamun manang tu pardompahannasida. 13:17 Asa unang tarbahen halak manuhor manang manggadis, anggo so di ibana partinandaan i, i ma goar ni binatang i manang bilangan ni goarna. 13:18 Dison do habisuhon! Dirajumi na marroha ma bilangan ni binatang i, ai bilangan ni jolma do i. Onomratus onompulu onom do bilangan i.
14:1 Dung i hubereng: Jongjong ma Birubiru i di dolok Sion, adong ma donganna saratus opatpulu opat ribu, angka naung tarsurat Goarna dohot Goar ni Amana di pardompahannasida. 14:2 Jadi hubege ma soara sian banua ginjang songon parhasak ni aek godang jala songon parlatas ni ronggur na gogo; ia soara na hubege i, suman nang tu parhasapion ni angka parhasapi, angka na mamalu hasapina. 14:3 Diendehon nasida do ende na imbaru di jolo ni habangsa i dohot di jolo ni parngolu na opat i nang angka sintua i. Ndang targuruhon manang ise ende i, nda holan na saratus opatpulu opat ribu, angka naung ditobus sian tano i. 14:4 I ma angka na so pasaorhon dirina tu boruboru, angka na marbaju do nasida; diihuthon nasida do Birubiru i, manang tudia pe i laho. Nasida do angka na tartobus sian hajolmaon, patumonaan di Debata dohot di Birubiru i. 14:5 Ndang adong jumpang gabus di pamangannasida; ndang adong agia aha lindangnasida. 14:6 Dung i huida ma surusuruan na asing habang martongatonga langit, na umpeop barita na uli sisalelenglelengna, sibaritahononna tu angka pangisi ni tano i, tu saluhut bangso dohot marga dohot hata dohot houm. 14:7 Gogo ma soarana mandok: Habiari hamu ma Debata jala pasangap Ibana, ai nunga dapot tingki ni panguhumonna! Somba hamu ma Ibana, Sitompa langit dohot tano dohot laut ro di angka mual aek! 14:8 Dung i mangihut ma surusuruan na asing, na mandok: Nunga pesan, nunga pesan Babel na balga, na painumhon anggur harimason ni parmainanonna tu saluhut bangso. 14:9 Mangihut ma tu nasida surusuruan na patoluhon, na marsoara na gogo mandok: Molo adong halak na sumomba binatang i dohot gombaranna jala na manjalo partinandaan i tu bohina manang tu tanganna: 14:10 Ingkon minum do ibana sian anggur harimason ni Debata, naung polin dipadiri tu panginuman ni rimasna, jala sipaporsukporsuhon do ibana di bagasan api dohot barerang diadopan ni angka surusuruan na badia i dohot di adopan ni Birubiru i. 14:11 Manaek ma timus ni haporsuhonnasida ro di salelenglelengna; ndang dapot paradianan arian nang borngin angka na marsomba tu binatang i dohot tu gombaranna, ro di angka naung manjalo partinandaan ni goarna. 14:12 Disi ma jumpang habengeton ni angka na badia, angka na mangaradoti patik ni Debata dohot haporseaon di Jesus. 14:13 Jadi hubege ma soara sian banua ginjang na mandok: Surathon ma: Martua ma angka na mate di bagasan Tuhan i, olat ni on! Tutu, didok Tondi i, mansohot ma nasida sian parungkilonnasida, ai na mangihut ma tu nasida niulanasida i! 14:14 Dung i hubereng ma: Adong ma ombun sada na bontar, jadi hundul ma di atas ombun i sahalak na suman tu anak ni jolma, na martumpal sere di uluna, jadi sasabi na tajom di tanganna. 14:15 Jadi ruar ma surusuruan na asing sian joro i, na marsoara na gogo manjouhon tu na hundul di atas ombun i: Suruhon ma sasabim jala sabihon, ai nunga dapot tingki gotilon, ai nunga masak situtu sigotilon na di tano i. 14:16 Gabe didabu na hundul di atas ombun i ma sasabina tu tano i, jadi disabi ma tano i. 14:17 Laos ruar ma surusuruan na asing sian joro na di banua ginjang i; dohot do ibana maniop sasabi na tajom. 14:18 Gabe ruar ma sian langgatan i surusuruan na asing, na marhuaso taringot tu api, jadi marsoara na gogo ma ibana manjoujou dompak sitiop sasabi na tajom i, didok ma: Suruhon ma sasabim na tajom i, gotili ma angka parbue ni hau anggur na di tano i, ai nunga malamun parbuena! 14:19 Jadi didabu surusuruan i ma sasabina tu tano i, digotili ma hau anggur ni tano i, didabu ma tubagasan pangilangan harimason na bolon na di Debata. 14:20 Dibalian ni huta i ma didegei pangilangan i, gabe puas ma mudar sian pangilangan i sahat ro di kongkang ni angka hoda, duaratus paal daona.
15:1 Dung i huida ma di banua ginjang tanda na asing na balga jala halongangan: Adong ma pitu surusuruan, na umpeop pitu haporsuhon na parpudi; ai di bagasan i do marujung rimas ni Debata. 15:2 Jadi huida ma laut sada songon sorminan, na marsaor api; na jongjong do di topi laut sorminan i angka naung monang maralohon binatang i nang taringot tu gombaranna dohot bilangan ni goarna, ditiop do angka hasapi ni Debata. 15:3 Jadi diendehon nasida ma ende ni Musa, naposo ni Debata, dohot ende ni Birubiru i, angka ninna ma: Na balga jala halongangan do angka ulaonmu, ale Tuhan Debata. Sigomgom saluhutna; na tigor jala na sintong do angka dalanmu, ale Raja ni angka bangso! 15:4 Tung ise ma na so mangkabiari Ho, ale Tuhan, dohot pasangaphon Goarmu? Ai sasada Ho do na badia; ai na ro ma saluhut bangso marsomba tu jolom, ai nunga gabe patar angka panguhummu na tigor i! 15:5 Dung i huida ma, mungkap ma joro ni undungundung panindangion na di banua ginjang i. 15:6 Jadi ruar ma sian joro i na pitu surusuruan na umpeop haporsuhon na pitu i; haen na ias na marlinanglinang do diuloshon nasida, jala marhohos sere di pamatangna. 15:7 Gabe dilehon sada sian na opat parngolu i ma tu na pitu surusuruan i pitu saoan sere, angka na gok rimas ni Debata, na mangolu ro di salelenglelengna. 15:8 Jadi gok timus ma joro i, dibahen hasangapon ni Debata dohot hagogoonna; ndang tarbahen manang ise mambongoti joro i, paima marujung na pitu haporsuhon, sipatupaon ni surusuruan na pitu i.
16:1 Dung i hubege ma soara na gogo sian joro i, na mandok tu surusuruan na pitu i: Borhat ma hamu, usehon hamu ma saoan na pitu i, inganan ni rimas ni Debata, tu tano i! 16:2 Gabe borhat ma na parjolo, diusehon ma saoanna tu tano i. Jadi masa ma baro na roa jala na jahat di jolma, angka naung manjalo partinandaan ni binatang i, jala naung marsomba tu gombaranna. 16:3 Dung i diusehon na paduahon ma saoanna tu laut, jadi gabe mudar ma i songon mudar ni na mate; laos mate ma nasa na marhosa di laut. 16:4 Dung i diusehon na patoluhon ma saoanna tu angka batang aek dohot tu angka mual aek; laos gabe mudar ma angka i. 16:5 Jadi hubege ma soara ni surusuruan, sigomgom angka aek, mandok: Na tigor do Ho, na mangolu i nuaeng nang najolo, na badia do Ho, ala songon i panguhumonmu! 16:6 Ai didurushon nasida do mudar ni angka na badia dohot angka panurirang, gabe mudar do dipainumhon Ho tu nasida; patut ma i di nasida! 16:7 Jadi hubege ma langgatan i mandok: Olo, ale Tuhan Debata, Sigomgom saluhutna; na sintong jala na tigor do angka uhummu! 16:8 Dung i diusehon na paopathon ma saoanna tu mata ni ari, jadi dilehon ma tu mata ni ari huaso mamosohi angka jolma marhitehite api. 16:9 Gabe mosok situtu ma angka jolma, jala diinsahi nasida do Debata na marhuaso manongos angka haporsuhon i, laos so dipauba nasida rohanasida pasangaphon Debata. 16:10 Dung i diusehon na palimahon ma saoanna tu habangsa ni binatang i, gabe mangkolom ma harajaonna. Jadi dihaharati nasida do angka dilanasida dibahen hansitna i. 16:11 Gabe diinsahi nasida ma Debata Parbanua ginjang i, dibahen hansit ni baro na niaenasida; laos so dipauba rohanasida, manadingkon angka ulaonnasida nian. 16:12 Dung i diusehon na paonomhon ma saoanna tu batang aek Euprat na balga i. Jadi marsik ma aekna, asa pinarade dalan ni angka raja na sian habinsaran ni mata ni ari. 16:13 Dung i huida ma tolu tondi na hodar songon tohuk, ruar sian baba ni naga i dohot sian baba ni binatang i, songon i sian baba ni panurirang pargapgap i. 16:14 Ai tondi ni angka sibolis do i, na mambahen angka tanda i; angka na borhat tumopot angka raja ni liat portibi on, laho papunguhon nasida tu hamusuon na di ari na bolon i, ari ni Debata, Sigomgom saluhutna. 16:15 Ida ma, na ro ma Ahu songon panangko! Martua ma na dungo jala na mangaramoti abitna, asa hobas, asa unang marsaemara ibana mardalan, gabe tarida hailaonna! 16:16 Jadi dipaluhut ma nasida tu sada inganan, na margoar Armagedon, ia di hata Heber. 16:17 Dung i diusehon na papituhon ma saoanna tu aoangaoang. Jadi ro ma soara na gogo sian joro i, sian habangsa i, na mandok: Nunga saut! 16:18 Dung i masa ma angka hilap dohot soara dohot ronggur, masa ma dohot lalo bolon, songon na so dung masa, olat ni dung adong jolma di tano i, lalo na sai bolon i. 16:19 Jadi mabola ma huta na bolon i, gabe tolu ponggol; marrumpahan ma ia huta ni angka bangso. Jadi diingot Debata ma Babel na balga i, mangalehon tu ibana panginuman na gok anggur pangarimasan dohot hamuruhonna. 16:20 Gabe maporus ma saluhut angka pulo, jadi angka dolok ndang adong jumpang be. 16:21 Jala madabu ma ambolas na balga, na sahat i dokdokna, sian langit tu angka jolma; gabe diinsahi angka jolma i do Debata dibahen porsuk ni ambolas i, ai balga situtu do bernit ni haporsuhon i.
17:1 Dung i ro ma sada sian na pitu surusuruan, na umpeop saoan na pitu i, mangkatai dohot ahu, didok ma: Ro ma, hupatuduhon ma tu ho uhum na tu boruboru na jahat, na balga, na hundul di topi ni angka aek godang! 17:2 Donganna marmainan do angka raja na di tano i, jala naung gabe mabuk do pangisi ni tano i dibahen anggur parmainanonna i. 17:3 Jadi diluahon ma ahu di bagasan tondi tu halongonan. Jadi huida ma sada boruboru hundul di atas binatang na rara, na gok goar panginsahion, pitu do uluna, sampulu tandukna. 17:4 Haen na rara dohot haen hasumba do abit ni boruboru i, na nilampisan dohot sere nang mata intan dohot mutiha; ditiop do di tanganna panginuman sere na gok hagigian dohot hahodaron sian parmainanonna i. 17:5 Na tarsurat do di pardompahanna goar hahomion: Babel na balga, ina ni angka parmainan dohot angka hagigian na di tano on. 17:6 Jadi huida boruboru i mabuk, dibahen mudar ni angka na badia dohot mudar ni angka sitindangi ni Jesus, gabe longang situtu ma rohangku marnidasa. 17:7 Gabe didok surusuruan i ma mandok ahu: Boasa longang roham? Hupaboa ma tu ho hahomion ni boruboru on dohot binatang na mangusung ibana, na marulu pitu jala martanduk sampulu. 17:8 Ia binatang na niidami, na mangolu do i najolo, ndang mangolu be nuaeng, na nangkok ma i muse sian banua toru, asa laho tumopot hamagoan. Gabe longang ma roha ni pangisi ni tano on, nasa na so tarsurat goarna di buku hangoluan na sian mula ni hasiangan on, di na idaonnasida binatang i, naung mangolu najolo jala ndang mangolu be nuaeng, gabe ro muse. 17:9 On do lapatanna na marhabisuhon: Na pitu ulu, i ma pitu dolok, na hinundulan ni boruboru i, jala pitu raja do i. 17:10 Nunga pesan na lima, disi dope na sada, ndang dope ro na sada nari; jala dung ro, satongkin sambing ibana mian. 17:11 Ia binatang na mangolu najolo, gabe ndang mangolu be, i do na paualuhon; laos sian na pitu ondeng do ibana, jadi na laho tumopot hamagoan. 17:12 Ia na sampulu tanduk na niidami, sampulu raja do i, na so manjalo dope harajaon, alai jaloonnasida do huaso mangarajai sangombas, rap dohot binatang i. 17:13 Saroha ma nasida, lehononnasida do gogo dohot huasonasida tu binatang i. 17:14 Na marmusu ma nasida dompak Birubiru i, gabe taluhonon ni Birubiru i ma nasida, ala Ibana Tuhan ni angka tuan jala Raja ni angka raja; ia angka donganna, i ma angka na tarjou, angka na tarpillit jala haposan. 17:15 Dung i didok ma tu ahu: Ia angka aek na niidami, inganan ni boruboru na jahat i, i ma angka bangso, angka punguan bolon, angka marga dohot hata. 17:16 Ia tanduk na sampulu, na niidami, dohot binatang i, hosomannasida ma boruboru na jahat i, lungunan ma bahenonnasida ibana jala marsaemara, allangonnasida ma sibukna, jala tutungonnasida ma ibana tu api. 17:17 Ai dipahehe Debata do rohanasida pasauthon tahina hian, mangulahon hasadaon ni roha, mangalehon harajaonnasida tu binatang i, paima saut angka hata ni Debata. 17:18 Ia boruboru na niidami, i ma huta na balga, na mangarajai angka raja na di tano on.
18:1 Dung salpu i, huida ma surusuruan na asing tuat sian banua ginjang, na marhuaso godang, gabe tiur ma tano i dibahen hasangaponna. 18:2 Gogo ma soarana manjoujouhon: Nunga pesan, nunga pesan Babel na balga i, gabe inganan ni angka sibolis jala hurungan ni nasa tondi na hodar jala huruhuruan ni nasa pidong na ronsam, angka hagigian. 18:3 Ai naung minum do saluhut bangso sian anggur pangarimasan na sian parmainanonna, jala donganna, marmainan do angka raja na di tano on; naung gabe mamora do angka partigatiga ni tano on binahen ni hagogoon ni hageduhonna. 18:4 Dung i hubege ma soara na asing sian banua ginjang, na mandok: Laho ma hamu, ale bangsongku, ruar sian i, asa unang partohap hamu di angka dosana, unang dohot hamu manjalo di haporsuhonna i! 18:5 Ai nunga sahat ro di banua ginjang angka dosana; nunga marningot Debata di angka hajahatonna. 18:6 Baloshon hamu tu ibana songon naung binahenna i, silompit ma bahen hamu marguru tu angka ulaonna; silompit dua ma tahuhon hamu di ibana tu panginuman na sinaorhonna i! 18:7 Manang sadia hasangapon dohot pargadombuson na niaithonna tu dirina, na sai godang haporsuhon dohot arsak ni roha ma lehon hamu tu ibana? Ai didok ibana di bagasan rohana: Na hundul do ahu mangarajai, ndang na mabalu ahu, na so tupa idaonku arsak ni roha. 18:8 Dibahen i, di bagasan na sadari ma songgop tu ibana angka haporsuhon: Hamatean dohot andung dohot haraparon; dung i tutungon ma ibana tu api. Ai na gogo do Tuhan Debata, na manguhum ibana. 18:9 Angka raja na di tano on, angka donganna marmainan jala margadombus, i ma mananangisi jala mangandungi ibana, di na idaonnasida timus ni panutunganna i. 18:10 Na mandaodao nama nasida jongjong dibahen biarnasida mida parniahapanna i; ia hatanasida: Na marjea, na marjea do ho, huta na balga, huta Babel na togu i, ai di bagasan na sajom do lalu uhum na tu ho! 18:11 Tangis ma angka partigatiga ni tano on, angka naung marsak mida ibana, ala so adong be na manuhor boniaganasida. 18:12 I ma angka boniaga sere dohot perak, mata intan, mutiha, haen na bontar, hasumba, surta, abit na rara dohot nasa na hushus ro di ragam ni ulaula na sian gading, sian hau na arga, sian haksa, bosi dohot batu marmar, 18:13 angkup ni i ulu mamis dohot miak na hushus, pamurpuri dohot mir dohot haminjon, anggur, miak, itak, eme, horbo, birubiru, hoda, hureta, hatoban ro di hosa ni jolma. 18:14 Nunga munsat sian ho parbue ni hau na hinasolohon ni roham; nunga mago sian ho nasa na uli jala na tiur berengon, na so tupa be jumpang angka i! 18:15 Angka na martigatigahon sisongon i, angka naung gabe mamora binahenna i, jongjong mandaodao dibahen biarnasida mida parniahapanna, tumatangis jala mangangguhi. 18:16 Ninna nasida ma: Na marjea, na marjea do ho, huta na balga, na marabithon abit na bontar dohot na rara dohot hasumba, na nilampisan dohot sere nang mata intan ro di mutiha, ai di bagasan sajom do gabe suda hamoraon na songon i! 18:17 Na jongjong mandaodao ma saluhut juaramudi dohot angka na marparau mangkoris topilaut dohot anak parau ro di saluhut na marulaon di laut. 18:18 Jadi manjoujou ma nasida marnida timus ni pamurunanna, ninna ma: Dia na tudos tu huta na balga i? 18:19 Gabe dipirpirhon nasida ma orbuk tu ulunasida, jala manjoujou ma nasida huhut tumatangis jala mangangguhi, angka ninna ma: Na marjea, na marjea do ho, huta na balga i; binahenna i do gabe mamora saluhut na marparau dilaut marhite sian hamoraonna, ai di bagasan sajom do dipanepnep! 18:20 Halashon ma i, ale banua ginjang, dohot hamu, angka na badia ro di angka apostel nang panurirang; ai nunga diluluhon Debata hamu tu ibana! 18:21 Jadi dihindat sada surusuruan na gogo ma sada batu na salosung na bolon, didabu ma i tu laut, huhut ma didok: Songon i sahali mandanggurhon, bolongkononhon ma huta Babel na balga i, gabe ndang jumpang be! 18:22 Na so tupa be tarbege di bagasan ho soara ni angka parhasapi dohot siparende dohot partulila dohot parsarune; ndang jumpang be di bagasan ho nanggo sada ragam ni siula hapandean; jala ndang be tarbege di bagasan ho pangkuling ni panduda. 18:23 Na so tupa be marsinondang di bagasan ho nanggo palito sada, ndang tagamon tarbege be di bagasan ho soara ni pangoli dohot oroan, ai naung dirajai angka partigatigamu do tano on, jala marhitehite hadatuonmu do gabe lilu angka bangso. 18:24 Na jumpang do di bagasan huta i mudar ni angka panurirang dohot angka na badia, ro di mudar ni saluhut naung tarseat di tano on.
19:1 Dung salpu i, hubege ma di banua ginjang soara na gogo songon sian torop halak, na mandok: Halleluya! Rimpun di Debatanta do haluaon dohot hasangapon dohot hagogoon! 19:2 Ai na sintong jala na tigor do angka uhumna, ai nunga diuhumi Ibana boruboru na jahat, na balga i, naung mangago tano on binahen ni parmainanonna, jala diluluhon Ibana do mudar ni naposona sian tanganna. 19:3 Dung i didok nasida ma paduahalihon: Halleluya! Na manaek do timusna ro di salelenglelengna! 19:4 Jala manungkap ma sintua na duapulu opat i ro di parngolu na opat i laho sumomba Debata, na hundul di habangsa i, angka ninna ma: Amen! Halleluya! 19:5 Jadi ruar ma sada soara sian habangsa i na mandok: Puji hamu ma Debatanta, hamu saluhut naposona, na mangkabiari Ibana, angka na metmet nang angka na balga! 19:6 Dung i hubege ma songon soara ni natorop situtu, songon soara ni aek godang, songon soara ni angka ronggur na gogo, na mandok: Halleluya! Ai nunga mangarajai Tuhan Debatanta, Sigomgom saluhutna! 19:7 Marlas ni roha ma hita jala mariaia, jala talehon ma tu Ibana hasangapon, ai nunga jumpang hasampuran raya ni Birubiru i; nunga hobas soripadana. 19:8 Nunga dilehon tu ibana abit na saksak jala na ias sialithononna. Ia abit na saksak i, i ma hapintoron ni angka na badia. 19:9 Laos didok ma tu ahu: Surathon ma: Martua do angka na jinou tu panganon ujuan ni Birubiru i! Jala didok do tu ahu: On do angka hata na sintong na sian Debata! 19:10 Jadi manungkap ma ahu tujolo ni patna, sumomba ibana, gabe didok ma tu ahu: Unang ma songon i! Donganmu naposo do ahu jala dongan ni angka hahaanggim, angka naung manjalo panindangion sian Jesus. Debata do sisombaonmu! Ai panindangion taringot tu Jesus i do tondi panurirangon. 19:11 Dung i huida ma mungkap banua ginjang, tarida ma disi sada hoda sihapaspili; ia na hundul di ginjangna margoar Haposan jala Parsintong. Marhatigoran do Ibana manguhum jala marporang. 19:12 Alai songon nala ni api do anggo matana, torop do tumpal harajaon di uluna; adong do Goarna tarsurat, na so binoto ni manang ise, ia so holan Ibana. 19:13 Diuloshon do abit na tinubar tu mudar, didok do Goarna: Hata ni Debata. 19:14 Mangihut do tu Ibana angka parangan na di banua ginjang, angka na mangkunduli hoda sihapaspili; haen na saksak jala na ias do abitnasida. 19:15 Na ruar do podang na tajom sian pamanganna, asa i tampulhononna tu angka bangso. Parmahanonna ma nasida dohot tungkot bosi, jala Ibana do mandege pangilangan ni anggur pangarimasan ni muruk ni Debata, Sigomgom saluhutna. 19:16 Na tarsurat do Goarna di ulosna nang di gontingna: Raja ni angka raja jala Tuhan ni angka tuan. 19:17 Dung i huida ma sada surusuruan jongjong di bagasan mata ni ari, na manjoujou marsoara na gogo, didok ma tu saluhut pidong angka na habang martongatonga langit: Ro ma hamu, marpungu ma hamu tu panganon na balga, na pinarade ni Debata! 19:18 Naeng ma allangonmu sibuk ni angka raja dohot sibuk ni angka induk dohot sibuk ni angka pargogo dohot sibuk ni angka hoda ro di na hundul di ginjangna, sibuk ni angka anak mata dohot hatoban, nang na metmet nang na balga! 19:19 Jadi huida ma binatang i dohot angka raja ni tano on ro di angka parangannasida, nunga marluhut laho marmusu dompak na hundul di atas hoda i nang dompak angka paranganna. 19:20 Gabe tartangkup ma binatang i rap dohot panurirang pargapgap i, naung mambahen angka tanda di jolona, parhiteanna paotootohon angka na manjalo partinandaan ni binatang i ro di angka na sumomba gombaranna. Mangolu do na dua i didabu tu laut api na marsigorgor mardongan barerang. 19:21 Ia angka na tading i dipusa do dohot podang na ruar sian pamangan ni na mangkunduli hoda i, gabe butong ma saluhut pidong dibahen sibuknasida.
20:1 Dung i huida ma sada surusuruan tuat sian banua ginjang, na maniop anak hinsu ni banua toru, jala rante na balga do di tanganna. 20:2 Jadi ditangkup ma naga i, ulok na robi i, i ma sibolis jala setan, gabe dirante ma ibana leleng ni saribu taon. 20:3 Laos didabu ma ibana tu banua toru, jala dihinsu jadi disahap tu atasna, unang be dililuhon angka bangso, paima salpu na saribu taon i. Dung salpu i, ingkon paluaon ibana sangombas na jempek. 20:4 Dung i huida ma angka habangsa, angka dihunduli ma, dilehon ma tu nasida panguhumon; angkup ni i huida ma tondi ni angka na binunu ala ni panindangion di Jesus dohot ala ni hata ni Debata, i ma angka na so marsomba tu binatang i nang tu gombaranna, jala angka na so manjalo partinandaan i tu pardompahannasida pe. Na mangolu do nasida jala mangarajai rap dohot Kristus leleng ni saribu taon. 20:5 Ia na mate, angka na asing, ndang mulak mangolu, paima salpu na saribu taon i. I ma haheheon parjolo! 20:6 Na martua jala na badia do halak na martohap di haheheon na parjolo i; ndang marhuaso hamatean paduahon mangago nasida; na gabe malim ni Debata dohot Kristus do nasida, jala mangarajai rap dohot Ibana leleng ni na saribu taon i. 20:7 Dung salpu na saribu taon i, malua ma sibolis i sian hurunganna. 20:8 Jadi ruar ma ibana mangaliluhon angka bangso di na ualu desa ni tano on, i ma Gog dohot Magog, papunguhon nasida tu parmusuon; na sarihit na di laut do bilangannasida. 20:9 Jala nangkok ma nasida tu adaran ni tano i, dihaliangi ma parsaroan ni angka na badia dohot huta na hinaholongan i, gabe madabu ma api sian banua ginjang; i do mangallang nasida. 20:10 Jadi didabu ma sibolis i, na mangaliluhon nasida, tu laut api dohot barerang, tu inganan ni binatang dohot panurirang pargapgap i, asa dipaporsukporsuk arian dohot borngin, ro di salelenglelengna. 20:11 Dung i huida ma sada habangsa na balga, na bontar dohot na hundul di atasna: Na maporus do tano dohot langit maradophon bohina, so adong be jumpang inganannasida. 20:12 Dung i huida ma angka naung mate i, angka na metmet nang angka na balga, jongjong di jolo ni habangsa i; jadi diungkap ma angka buku. Dung i diungkap ma sada buku na asing, i ma buku hangoluan, gabe diuhumi ma angka na mate i marguru tu na tarsurat di bagasan angka buku i, hombar tu na niulanasida be. 20:13 Dung i dilehon laut i ma angka na mate na disini, dilehon nang hamatean dohot banua toru i ma angka na mate na tiniopna, gabe diuhumi ma ganup, marguru tu na niulana be. 20:14 Dung i didabu ma hamatean dohot banua toru tubagasan laut api i. I ma hamatean na paduahon; laut api i do i. 20:15 Manang ise na so jumpang tarsurat di buku hangoluan i, i ma didabu tubagasan laut api i.
21:1 Dung i huida ma banua ginjang na imbaru dohot tano na imbaru, ai nunga salpu banua ginjang na parjolo dohot tano na parjolo i; laut i pe ndang adong be. 21:2 Jala huida ma huta na badia i tuat sian banua ginjang sian Debata, i ma Jerusalem na imbaru, na pinature songon oroan na sinanggulan mandapothon harajaanna. 21:3 Jadi hubege ma soara na gogo sian habangsa i, na mandok: On do joro ni Debata di tongatonga ni angka jolma; na maringanan ma Ibana di tongatonganasida, jala nasida ma bangsona, jala Debata sandiri saor tu nasida! 21:4 Jadi apusan ni Debata ma nasa iluilunasida sian matanasida: Ndang adong be hamatean nang arsak ni roha; nang angguhangguk, nang na hansit, ndang disi be; ai nunga salpu na parjolo i! 21:5 Dung i didok na hundul di habangsa i ma: Ida ma, saluhutna do hupaimbaru! Jadi didok ma: Surathon ma i, ai haposan do angka hata on jala na sintong! 21:6 Laos didok ma tu ahu: Nunga saut! Ahu do Parjolo jala Parpudi, Bonana jala Ujungna. Lehononku ma tu na mauas sian mual aek hangoluan i, so pola tuhoron! 21:7 Teanon ni na monang i ma saluhutna; jala Ahu gabe Debatana, ibana gabe anakku! 21:8 Alai angka na mandele jala na so porsea jala angka na ramun ro di angka pamunu dohot parmainan dohot angka na sumomba ajiajian ro di saluhut pargabus manjalo tohapna di laut na gor api dohot barerang, i ma hamatean na paduahon i! 21:9 Dung i ro ma sada sian na pitu surusuruan i, naung maniop saoan na pitu, angka na marisi haporsuhon parpudi na pitu i, didok ma mandok ahu: Ro ma tuson; hupatuduhon ma tu ho oroan i, soripada ni Birubiru i! 21:10 Jadi diboan ma ahu di bagasan tondi tu dolok na balga jala na timbo, dipatuduhon ma tu ahu huta na badia, i ma Jerusalem, tuat sian banua ginjang, sian Debata. 21:11 Hasangapon sian Debata do di huta i. Ia sondangna tudos do tu mata intan na ummarga, songon batu Jaspis na marhillong. 21:12 Balga jala timbo do parik ni huta i, sampuludua do harbanganna; sampuludua surusuruan do di atas harbanganna; ia goar angka na sinuratan disi, i ma goar ni marga Israel na sampuludua i. 21:13 Tolu harbangan sian habinsaran, tolu sian utara, tolu sian dangsina, tolu sian hasundutan. 21:14 Sampuludua do batu ojahan ni parik ni huta i; disi do na sampuludua goar ni na sampuludua apostel ni Birubiru i. 21:15 Ditiop na mangkatai dohot ahu do sada tungkot sere, asa suhatonna huta i dohot angka harbanganna ro di parikna. 21:16 Na maropatsuhi do hapeahan ni huta i, dos do bohangna dohot unjurna. Jadi disuhat ma huta i marhitehite tungkot i; dapot ma saribu limaratus paal: Dos do unjurna dohot bohangna dohot timbona. 21:17 Laos disuhat ma parikna, saratus opatpulu opat asta; suhatsuhat ni jolma do na di surusuruan i. 21:18 Sian batu Jaspis do parik i dipauli, jala sere na pinapita do huta i songon sorminan na tio. 21:19 Dipajeges do angka ojahan ni parik ni huta i marhitehite ragam ni batu na arga: Ia ojahan na parjolo batu Jaspis do, ia na paduahon Sapir, na patoluhon Kalkedon, na paopathon batu Samarados. 21:20 Ia na palimahon batu Sardonik, na paonomhon Sardion, na papituhon Krisopras, na paualuhon Berillos, na pasiahon Topasion, na pasampuluhan Krisopras, na pasampulusadahon Hiakintos, na pasampuluduahon batu Ametistos. 21:21 Ia na sampuludua harbangan i sampuludua mutiha do; ganup harbangan sian sada mutiha. Ia alaman ni huta i sere na ias do, songon sorminan na tio. 21:22 Ndang adong huida joro di bagasan huta i, ai Tuhan Debata, Sigomgom saluhutna, do jorona rap dohot Birubiru i. 21:23 Ndang ringkot di huta i mata ni ari manang bulan, asa sondanganna; ai hasangapon ni Debata do patiurhonsa, Birubiru i do panondangna. 21:24 Na mardalani ma angka bangso di bagasan sondangna; boanon ni angka raja ni tano on ma hasangaponnasida tusi. 21:25 Ndang na hinsu harbanganna manipat ari, ai ndang masa disi borngin. 21:26 Jadi boanonnasida ma hasangapon dohot hamuliaon ni angka bangso tubagasan huta i. 21:27 Na so tupa masuk tu huta i nasa na ramun, nang siula hagigian dohot gabus, nda holan angka naung tarsurat di buku hangoluan na di Birubiru i.
22:1 Dung i dipatuduhon ma tu ahu batang aek hangoluan na tio songon sorminan, na ruar sian habangsa ni Debata dohot Birubiru i. 22:2 Di tongatonga ni alamanna dohot di batang aek i angkupangkup adong hau hangoluan, na marparbue sampuludua hali, na mangalehon parbuena ganup bulan; ia bulung ni hau i gabe hahisaron ni angka bangso. 22:3 Ndang adong be na hona bura. Disi do habangsa ni Debata dohot Birubiru i; angka naposona i ma marhalado di Jolona. 22:4 Idaonnasida do Bohina; di pardompahannasida do Goarna. 22:5 Ndang masa be disi borngin, ndang ringkot be di nasida palito manang sondang ni mata ni ari, ai sondangan ni Tuhan Debata do nasida, jala na mangarajai do nasida salelenglelengna. 22:6 Dung i didok ma mandok ahu: Haposan do angka hata on jala na sintong; disuru Tuhan Debata, nampuna tondi ni angka panurirang, do surusuruanna, patuduhon tu angka naposona angka na naeng masa tibu. 22:7 Ida ma, gira do Ahu ro! Martua ma na mangaradoti angka hata panurirangon na di bagasan buku on! 22:8 Ahu, Johannes, do marnida jala umbege angka on. Jadi dung hubege jala huida, manungkap ma ahu marsomba tujolo ni pat ni surusuruan, na patuduhon angka i tu ahu. 22:9 Jadi didok ma mandok ahu: Unang ma songon i! Donganmu naposo do ahu jala dongan ni angka hahaanggim, dongan ni angka panurirang dohot angka na mangaradoti hata ni buku on. Debata ma somba! 22:10 Dung i didok ma mandok ahu: Unang sahapi angka hata panurirangon ni buku on, ai jonok ma tingkina! 22:11 Tong ma didatdati siula hajahaton mangulahon hajahaton; tong ma diramuni na ramun i dirina; tong ma diulahon na tigor i hatigoran; tong ma diparbadiai na badia i dirina! 22:12 Ida ma, gira ma Ahu ro! Boanonku ma upa silehonon tu ganup, hombar tu na niulana! 22:13 Ahu do Mulana jala Punsuna, Parjolo jala Parpudi, Bonana jala Ujungna! 22:14 Martua ma angka na mamburi abitnasida, asa marhuaso nasida marjambar di hau hangoluan i jala masuk sian angka harbangan tubagasan huta i. 22:15 Dibalian ma angka biang dohot angka siulahon rasun dohot angka parmainan dohot pamunu dohot sioloi na so Debata, ro di nasa na mangkaholongi jala na mangulahon gabus. 22:16 Ahu, Jesus, marsuru surusuruanku, mangkatindangkon tu hamu angka on, mandapothon angka huria i. Ahu do urat dohot marga ni Daud, bintang sipaias na marsinondang i! 22:17 Jadi didok Tondi dohot oroan i: Ro ma Ho! Laos dohonon ni na umbegesa: Ro ma Ho! Sai ro ma na mauas; dijalo na giot roha i ma aek hangoluan i, dalan basabasa! 22:18 Ahu mangkatindangkon di ganup, na umbege angka hata panurirangon ni surat on: Ia adong na manambai tusi, tambaan ni Debata ma tu ibana angka haporsuhon, na tarsurat di bagasan buku on. 22:19 Jadi molo adong na mamuati angka hata ni buku panurirangon on, buatan ni Debata ma tohapna na di hau hangoluan dohot di huta na badia i, angka na tarsurat di bagasan buku on. 22:20 Didok Ibana na mangkatindangkon on; Olo, na ro ma Ahu tibu! Amen; ro ma Ho, ale Tuhan Jesus! 22:21 Didongani asi ni roha ni Tuhan Jesus ma angka na badia!