/1 Na adong sian mulana, na hubege hami, na niida ni matanami, ma ni tangannami, taringot tu hota hangoluan i. Naung gabe patar do hangoluan i, nunga huida hami, gabe huhatindangkon djala hubaritahon hami tu i, naung adong hian di adopan ni Ama i, gabe dipapatar tu hami. Na huida djala hubege hami, i do binaritahon nang tu hamu, asa marparsaoran nang hamu rap dohot hami; Tu Ama i dohot tu Anakna Jesus Kristus do parsaoranta i. Umbahen na husurathon hami hata on tu hamu, asa gok halalas ni rohamuna. On do barita, na hubege hami sian Ibana, gabe binaritahon tu hamu: Panondang do Debata; ndang adong dibagasan Ibana manang aha na holom. Molo tadok, naung saor hita tu Ibana, huhut taulahon na holom, pargabus do hita, ndang siula hasintongan hita. Alai molo taparangehon hatiuron, songon Ibana na dibagasan na tiur, saor do hita sama hita, djala dipaias mudar ni Jesus, Anakna i, do hita sian nasa dosa. Molo tadok, na so ada dosanta, tapaotooto do dirinta, djala ndang dibagasan hita hasintongan i. Molo tatopoti angka dosanta, haposan do Ibana djala bonar, manesa dosanta djala paiashon hita sian nasa hageduhon. Molo tadok, na so mardosa hita, pargabus do Ibana tabahen, djala ndang dibagasan hita anggo hatana.

/2 Ale angka anaha, umbahen husurat on tu hamu, asa unang mardosa hamu; Molo tung adong na mardosa, adong do pangondianta tu Ama i, i ma Jesus Kristus, partigor i.