The New Testament of our Lord and Saviour Jesus Christ

Matius 1

1 Eho Matiusat dat ahamda Boehàda Daud labe aho vou faat lehe mekehàda Yesus lam abo Alat Gagu Fihasi Vimteme Oluhu Dat Boehàda labe Am im lam toedaha bak. Nehaha bak. Ame Boehàda Daud lam iho ozom di am abo Abraham labe aho vou faat leheda meida modem bak. Lahana Yesus labe Am vou faat lehe debu iademe faasi vou nom gago ledam di Am tai ahobada Abraham nasi gagomda am bak. Ame lab vou faat lehe debu neha: 2 Abraham labe aho faahada Isak am. Labi Isak labe aho faahada Yakub am. Labi Yakub labe aho faaha adam dua belas ehe bak. Meida Yehuda am. 3 Labi Yehuda Tamar ve adam ahim faa. Meida Peres am. Labi meida Zerah am. Labihasu faada. Labi ame da Peres labe aho faahada Hezron am. Labi Hezron labe aho faahada Ram am. 4 Labi Ram labe aho faahada Aminadab am. Labi Aminadab labe aho faahada Nahason am. Labi Nahason labe aho faahada Salmon am. 5 Labi Salmon labe aho faahada Boas am. Ame da Boas labe am oi Rahab am. Labi Boas labe aho Rut ve Obed faa. Labi Obed labe aho faahada Isai am. 6 Labi Isai labe aho faahada Boehàda Daud am. Labihasu nom vou gago usdam bak am. Ame da Abraham labet faasi ame dam debu vou ded ladume Boehàda Daud vi tau gagom di ame dam debu ab empat belasleham. Labi Boehàda Daud labe aho Uria elohona labe am maboe Batsyeba ve Salomo faa. 7 Labi Salomo labe aho faahada Rehabeam am. Labi Rehabeam labe aho faahada Abia am. Labi Abia labe aho faahada Asa am. 8 Labi Asa labe aho faahada Yosafat am. Labi Yosafat labe aho faahada Yoram am. Labi Yoram labe aho faahada Uzia am. 9 Labi Uzia labe aho faahada Yotam am. Labi Yotam labe aho faahada Ahas am. Labi Ahas labe aho faahada Hizkia am. 10 Labi Hizkia labe aho faahada Manasye am. Labi Manasye labe aho faahada Amon am. Labi Amon labe aho faahada Yosia am. 11 Labi Yosia labe aho faadaha adam Yekon meida am. Labi Yosia labe am adam faadume modeha Babel damat Israel dam tet siàdume Babel laba vou ladume ukbome seti ab vou esdamam. Labihasu ame da Boehàda Daud labet faasi ame dam debu vou ded ladume ame Israel dam Babel damat tet siàdume Babel bak laba vou ladume ukbome seddaha debu laba vi tau gagom di ame dam debu ab empat belasleham. 12 Labi Babel laba tet vou esdamehamdi afoezobe fa isi olulo vabalehe di labe Yekon labe aho faahada Sealtiel am. Labi Sealtiel labe aho faahada Zerubabel am. 13 Labi Zerubabel labe aho faahada Abihud am. Labi Abihud labe aho faahada Elyakim am. Labi Elyakim labe aho faahada Azur am. 14 Labi Azur labe aho faahada Zadok am. Labi Zadok labe aho faahada Akim am. Labi Akim labe aho faahada Eliud am. 15 Labi Eliud labe aho faahada Eleazar am. Labi Eleazar labe aho faahada Matan am. Labi Matan labe aho faahada Yakub am. 16 Labi Yakub labe aho faahada Mariam dat Yusuf am. Labi Maria labe aho faaha adat Yesus am. Am abo Alat Gagu Fihasi Vimteme Oluhu Dat Boehàda am. 17 Labihasu ame Israel dam damat tet siàdume Babel laba vou le ukbome seddaha debu labet faasi ame dam debu vou ded ladume fa Yesus abo Alat Gagu Fihasi Vimteme Oluhu Dat Boehàda vi tau gagom di ame dam debu ab empat belasleham. 18 Yesus abo Alat Gagu Fihasi Vimteme Oluhu Dat Boehàda faaha di nehaha bak. Amu Am oi Maria Yusuf aho valo ozome gagu esu. Labi esu vou faodameilahit Maria dat vaha vab nam Alat Am Aha Nutabe Neàna labe fa Maria bake modi vizi ab zubuleham. Labi Yusuf aho Maria valo vou faodameam aahat Maria zubulehe bak ab aame ozobohudeham. 19 Labihàmu Yusuf am gi Alat gagu fi hasi esuhu im zi ahebu ulohodesu vamdesu meedam dàt modem labe aho valo modem nam zubulehe bak aahemu fa ame nam valo modem bak lam faatom bak ab vi ozodamam. Lahana aho Maria mom bak ahate gagosome ozoha, Mariat ladem bak labna zohàme ahate gagom mu gi fa aa vameame faatom bak ab vi ozoham. 20 Labi ozome neàdi bisu iddameam uleha Alat Am im gagu vou usemda labe Yusuf aba am obe laba duzu nehame vameadamna ab uledamam. “Yusuf, abo Boehàda Daud vou faat leheda oa, Maria oho vam bak a odohali momule. Ame Mariam zu ad laba modesu datalehena lam meit modem kaio. Abo Alat Am Aha Nutabe Neànat modi vizi zubulehenat moz. Om Maria a momule. 21 Maria am ba daboseà faa tame. Daboseà faasi oho ba ee talulo modemeam dam bake Soat Vausu Fa Vei Neàdemda ee, ‘Yesus,’ lahame talule. Ame Da lam Am Yahudi dam totbaho labe iho faina meedàmu Alat beom bake Aho ba soat vausu fa vei neàdelo modemu ee, ‘Yesus,’ lahame talule.” Lahame duzu vameadamna ab uleham. 22 Ne, ame im lam ahebu gi dat ahamda Alat vameadaha im aime fa dam bake ahate vameaidahada Yesaya labe aho fet toeme esuhu im lam fa imbodem bake ahit labihaha bak. 23 Aham di iube Alat Yesaya bake neha: “Nam soaona damat modehe vab nam zubuli daboseà faa tame. Faasi damat ihimo ba, ‘Imanuel,’ lahada tame.” Lahame ame lab fet toeme esuhu im lam fa ab imbodeham. “Alat iba taumda,” laham bak fa Ibrani dae gagom di gi, “Imanuel,” laham bak. 24 Labi Yusuf keesi ame Alat Am im gagu vou usemda labe aba neha, “Maria vale,” lahame gagoho baket ab modeham. Maria ve am numa ab vou laham. 25 Lahana ba modem vaba gi daboseà faasi neàdehezobe ba modelo gi vou faoda. Labi vou faodameilahit Maria daboseà ab faaham. Faasi ee, “Yesus,” lahame ab taluham.

Matius 2

1 Boehàda Herodes labe aho Yudea bak laba azihi dam vuusu im vahokedam di labe Yudea bak labe aba zoho modesuhu num debu Betlehem laba Mariat Yesus ab faaham. Labi Yesus faasi vou esdameilahit falo modem bak ozobohu dam totbaho labe ala debu zizem bak labet kota Yerusalem laba ab ledaham. 2 Labi kota Yerusalem bake ledume lefusi neha, “Data faahana um Yahudi dama vuusu boehàdatebolelo modem Data akete? Im ame boehàdatebo faaseo modem di labe duzum falo ala debu zizem bak laba duzuhuna iho bak ibida iubet aaho. Im ame Data lam, ‘Feàte,’ lahame ozome ahu adat iedi vou baedalo leho,” lahame vabi iuba le gagu ai. Iuba le gagu ai. Lahada. 3 Labihadameilahit Boehàda Herodes ame im lam aime modeha vi ozoda. “Oo, em boehàda am bak. Akati Data etei faahana boehàdatelelo mode?” lahame àvodi vi ozoda. Labi kota Yerusalem laba azihi dam totbaho ahebu gi laha àvodi vi ozoda. 4 Labihàmu Yahudi dam labe ibi iho Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu Herodes labe aho gagome ab valadaham. Labi valadume li dozeadume neàdi Herodesat vabi vi ailo ab gut gagoham. “Alat aham di iube meia fet vameadume esuhu im toedahana lam Aho Gagu Fihasi Vimteme Olulo Modem Dat Boehàda lam ake faalo modem im toeme esuhela?” 5 Lahahat ame dam zi labe fa gago, “Yudea bak labe aba zoho num debu Betlehem laba faalo modem bake. Dat ahamda Alat vameadaha im aime fa dam bake ahate vameaidahada labe aho im nehasu fet toeme esuhu labe iho aame ozobohudehe bak. 6 ‘Yehuda bak labe am num debu meida Betlehem laba azim dam oa, Yehuda bak laba modesuhu num debu meiti num debu meiti labihasu azihi dam lam bisi um voou meit ihimo feà damalem vabak. Um laha feà damalem bak. Neham bak. Ba ubu meida labe boehàdatebolem bak ehe bak. Ame Boehàdatebo lam Aho fa Israel ahamda labe aho ba vou faat ladaha dam laba vuusu im vahokeda tame.’ Lahame fet toeme esuhu im ahum lam iho aame ozobohudehe bak,” lahame Herodes bake ab vameadaham. 7 Labi vameadume neàdi dam lada debu behàsu lam fa lada. Labi fa ladume seti Herodes labe aho dam falo modem bak ozobohu dam lam fa neo aa gagome leda. Ledume dozeadume neàdi Herodesat ab gagoham. “Ame falo ahamte futoi duzuhu di um adi diat aahela?” 8 Lahame labi gagu aime ozobohudi neàdi Herodesat fa neo vi gago, “Uho nasi Betlehem laba le iademe nabidamehamdi ame Data lam vi aale. Vi aameam làhà eba taho fa li gagole. Em laha ame Data laba, ‘Feàte,’ laham bak ozome ahu adat iedi vou baedalo mozo,” lahame ahi vageme ame dam lam Betlehem bake ab gagu oluham. 9 Labi ame dam labe ame im lam aime neàdi neo ab ladamam. Ladameam aaha amu ala debu zizem laba aaha falo lam neo futoi duzu nasi ladam bak vi aahemu ab deeli vàhàdeham. Labihàmu damat gi fako zisu vou vi vulada. Labi ame falo labe dam lam vou ladume ame Data vou aidam numa fuhuzobe num ahoba laba ab duzuham. 11 Labihàmu damat ame num laba oli vi aaha Data lam am oi Mariati ab aaham. Labi aahemu ame Data lam, “Feàte,” laham bak ozome ahu adat iedi ogomasu biti ab vou baedamam. Labi soa maehena dumna ame dam labe vou lehena lam fi stoi nazoh vihiladume ab lodaham. Emasti labi na ahana neàna vuahubulemna kemenyanti labi na ahana neàna ut àkti ulohona soa noimna murti labihasu vihiladume ab lodaham. 12 Labi lodume neàdi fa ibi esum bake bolohet ab laham. Alat dam laba neha, “Herodes bake fa a lamule,” lahame gagohona ulehemu gi bolohet fa ibi esum bake ab iliham. 13 Labi ame dam falo modem bak ozobohu dam lam fa ladume seti Yusufat ba bisu iddameam uleha Alat Am im gagu vou usemda meida labe aba usi im vameadam bak ab uledamam. “Om nasi keele. Boehàda Herodes labe aho om Data otem bak nabidalo mozo. Om nam Mariati ahili Data ve taho Mesir bake vou itale. Laba le azi faobe eho ba neo nom ilu oba gagohozobe fa vou lem neàte,” lahame labi vameadume neàdi esmozi ab tom iluham. 14 Labi Yusuf keesi am nam Maria am Datati ukeme ame aibu labe Mesir bake ab vou itaham. 15 Labi Mesir bake lafusi aidam di lam gi Boehàda Herodes elohozobe fa lam bake vou faoda. Ame da Yusuf am nam am Datati Mesir bake vou itaha bak lam gi dat ahamda Alat vameadaha im aime fa dam bake ahate vameaidahada labe aho nasi nehi fet toeme esu. “Em Adat fa vi gagome Mesir bak labet fa Aba bake vou lelo mozo.” Lahame labi fet toeme esuhu im lam imbodelo modem labe Data lam ab vou iliham. 16 Labi Boehàda Herodes labe aho amu ame dam falo modem bak ozobohu dam laba neha, “Aba fa li gagole,” lahame gagu oluhu bak lam vou faodaha dam ame Data laba le aame fa aba li gagom vaba ahi vageme setehemu faki feà bak fusi am meo dam zi ab gagome ledume li dozeadaham. Labi dozeadume neàdi gut vameada. “Um nasi num debu Betlehem lamti labi num debu netàda zi lamti ahebu le nabidume daboseà tahun behàsdeheda lamti labi daboseà tahun behàsdehe vabda lamti labihasu ahebu oddale,” lahame vameadume ab oluham. Ame Boehàda Herodes labe nehi ozo. Ame dam falo modem bak ozobohu dam labe amu aba lehe diat nehi gago, “Ame di lam iho falo alimeat aaha di am tame,” laham bak ozobohudi am meo dam labihasu vameadume olu le ame baket ab modeham. Abo num debu iudu odda. Labi num debu iudu neo odda. Labihadume daboseà tahun behàsdeheda lamti labi daboseà tahun behàsdehe vabda lamti ahebu ab oddume foleham. Labihàmu Betlehem laba azihi Yahudi lahi lamti labi num debu netàda zi laba azihi Yahudi lahi lamti im data daboseà damat oddume foli seddàmu meb dae feàna faasi meedam bak lam damat ab aidamam. 17 Labihàmu dat ahamda Alat vameadaha im aime fa dam bake ahate vameaidahada Yeremia labe aho aham di iube nehi fet toeme esuhu im nim ab imbodeham. 18 “Damat aiha, num debu Rama abo kota Yerusalem netàdehe bak laba meit ahu faidi meb dae feàna meedam bak damat aidalo. Abo Israel nam Rahel labe am data ilahu vi ozome medaom bak damat aidalo. Am data elodume foli seddàmu meit vabededam diat ba ahu neàdi dae vabalem bieho.” Lahame labi fet toeme esuhu im lam ab modi imbodeham. 19 Labi Yusuf am nam Maria am Datati Mesir bake aidam lahasuhu di labe Boehàda Herodes bak abada laba ab eloham. Labi eloi neàdehezobe aibu meida labe Yusuf bisu iddameam uleha Alat Am im gagu vou usemda meida labe nom ilu am obe laba li duzu im nehame vameadamna ab uledamam. 20 “Yusuf, om nasi keesi usai om nam am Datati fa Israel bak laba vou lam neàdeho. Dat boehàda labe am meo dam gagome data ahebu oddam labe ozo, ‘Data oboda laha vi tau otese,’ lahame ozohoda lam eloho,” lahame labi gagu neàdi fa ab tom iluham. 21 Labi Yusuf kehàm vaba usai Maria am Datati gagome Mesir vou esmozi Israel bak laba fa ab vou laham. 22 Labi fa vou le azi modeha ame Herodes labe am adat Arkelaus fa neo boehàdateli ame Yudea dam neo vuusu im vahokedam bak aihemu fa Israel bak zoho labe Yudea bak laba lam iedi fa itam bak neo ab vi ozodamam. Labi fa neo itam bak ozome bisu iddameam uleha Alat Am im gagu vou usemda labe neo nom ilu aba li duzu im nehame vameadamna ab uledamam. “Oho etei li aidam bak niba a aidamule. Om gi Israel bak zoho labe Galilea bak laba lale,” lahame labi gagoho bak lam aihemu ame baket ab modeham. Yusuf am Data Am oiti vahi bak lam vou esmozi Galilea bak laba ab laham. 23 Galilea bak zoho labe am num debu Nazaret laba le im Data Yesus ab vou aziham. Ame bak lam modehemu dam ahamda Alat vameadaha im aime fa dam bake ahate vameaidaha dam zi labe ibi iho amu nasi nehame fet toeme esuhu im nidi nim ab modi imbodeham. “Ame Da lam ba, ‘Nazaretda,’ lahame gago tame,” lahame fet toeme esuhu im lam ab modi imbodeham.

Matius 3

1 Labi num debu Nazaret laba le im Data Yesus vou azibehamdi tahun ba di iube Yesus busaoli aidam di labe Yohanes Mei Vuu Valo Baptisleiamda labe aho Yudea bak bàhàgo bak laba abo bak aotba baa bohu dam vaba alim bak abo Yordan Soabo laba le Alat amu aba gagoho im aho fa ot vai dam bake ab vameadume fi dedamam. 2 “Alat Aba Aho amu di iube fet gagu esuhu digat ab vou fuham bak. Aho Gagu Fihasi Vimteme Oluhu Dat Boehàda lam etei bak niba lehemu Ahamo Boehàdateboli dam bake deeli vame Am damali vuusu im vahokedam bak lam etei ab faasi gàhàli meedamam bak. Labihàmu uho faina meedam bak lam nasi voedume fa ahu neà bak vàmadi meedale,” lahame dam bake ab gut vameadume fi dedamam. 3 Yohanesat aho etei ame alim bak laba le lab vameadaha bak lam dat ahamda Alat vameadaha im aime fa dam bake ahate vameaidahada Yesaya labe aho aham di iube nehame fet toeme esuhu im nim ab modi imbodeham. “Dat bak aotba baa bohu dam vaba alim bak laba azi dam aba valadamda zi laba dae buduana nehi vameada. ‘Alat Gagu Fihasi Vimteme Olulo Modem Dat Boehàda lem zie laba uho nasi duzu zie fet vueme neàdehena ahum Am ba lese. Aho lem zie a kibuna vuemule. Abo vamdesuhuna bàneàna vuele.’ ” Lahame Yesayat aho aham di iube lab fet toeme esuhu im lam imbodi Yohanesat ab faasi meedamam. 4 Ame da Yohanes lam ba ibi iho bak damat modi baleàhà bakti uloho vabak. Aho gi nehada. Abo sue keàbebuna unta tau neme etehàsoali fa sue baabuli sue sona bohu tademe dusu. Labi am kemohode laba laha sapi sokbat gimsu. Labi na àm di gi sàgàhàti labi bonahi ila labe am vaksati àda. Gi labihasu meedam dàt modem bak. 5 Lahamda labe ame dam vaba alim bak laba azi vameadume fi dedam di labe dam feà bak aba fet lei fet leida. Neha: Dam Yudea bak labe am num debu meida Yerusalem laba azim dam zi lamti ame Yudea bak labe am num debu mei num debu meime esdam dam totbaho lamti Yordan Soabo valau obe modesuhu num debu mei num debu mei lahadume azihi dam lamti labihasu, “Imo iuba le Yohanesat lab vameadam im lam aidase,” lahame Yohanes bake abo gi dihasi valada. Dihasi valada. 6 Labihadam damat iho Yohanesat lab vameadaha im lam aime iho faina meedaha bak ahate gagodume afoezobe Yohanesat ame dam lam vame Yordan Soabo laba vuu valo ab baptisleidamam. 7 Labihasu meedam di labe Farisi damti Saduki damti laham Yahudi dam zi labe ozo, “Yohanesat iba laha vuu valo baptisleidase,” lahame aba neo valada. Ame dam zi labe aba valadam bak aahemu im nehasu ab gut vameadamam. “Um gi meoli fai bak tadi meedam dam labe fa ozbat meoli meedam bakti ulohona meedam damat modem bak. Uho vedi nehi git ozo, ‘Meit im vuu valo baptislemeam làhà Alat dam ba beodam diat imti beom vabak am tiba.’ Làhà um git ozo. Uho faina meedam bak voedume fa ahu neà bak vàmadem vabameam Alat um laha beolo modem bak. 8 Alat uba ba beom vabake uho gi nehame meedale. Uho neha, ‘Ibi iho faina meedam bak lam voedaha bak,’ laham bak lam imbodemeam làhà fa im neà bakta vàmadi meedale. Uho labi modemeam làhà damat aame ozo, ‘Aa làhà! Dam nim iho faina meedam bak lam voedume fa ahu neà bak vàmadehe?’ laham bak lam damat aame ozobohudem bake uho gi nasi im neà bakta meedale. 9 Labi um ahu a nehi git tu vi ozodamule. ‘Im tai ahamda Abrahamat vou faat ledaha dam zoho im Yahudi dam am bak. Labiha labe Alat iba ba beom vabak. Im neà bak,’ laham bak lam um ahu a git tu vi ozodamule. Alat ozomta gi ame bak labet neàdem vabak. Abrahamat vou faat ledaha dam dualem vabameam làhà Alat gi ke zi nim modi fa Abraham mekehà damalem meo bak. 10 Alat gi dat ut siemda labe aho ut debu laba olo bà ahamaesu vou duzu neàdeheda lamti uloho bak. Labi aho ame ut oo valem bak aameam ut oo neàna valem bak aam vabda ahebu siedume fa visomoame vua sutem gikina elum bohu vuusumna laba voeda tame. Abo uho faina meedam bak fa voou ahu vei neàdi vàmadi im neàna meedam vabameam eho etei uba lab gagoho bak lamti uloholi Alat labiham bak. 11 Dam giida labe iho uba aame ozo, ‘Um faina meedam bak lam uho voedume fa ahu neà bak meedalo vàmadi fa Ala bake tu vuzehe?’ laham bak aame ozobohudem bake eho uba gi vaota baptisleidam bak. Lahana Dat ba em ohuse vi vulelo modemda lam bisi feàda am bak. Em gi feà vab dàt modem bak. Abo Am naba dusumna lo tadehena lam eho ziamoi vou lam uloho vabak. Lahamda labe Aho ba vuli uho Aba tu vuzehi meedàmu Aho Alam Aha Nutabe Neàna lamti vuati labihasu uba modi vizi teudeda tame. 12 Ame Da ba vulelo modemda labe Aho ba dam faheme afoezobe dam faina meedam dam lam vua sutem gikina elum bohu vuusumna laba voeda. Labi dam ahu debu vei neàdi im neà bakta meedam dam lamota fi me vada. Labihadamdaleàmu Am gi dat gandum oo fet lamti naube amomoiti veimodam datti uloho bak. Ame Da nibe gandum fi kbodume vaheme dehaleheda laba na nekehàsonabut dalu tom voou oo goaitoi nutabet fetti naubeti veimome fa nuta ateme vou le am na gihoemda vahedam num laba vahedam bak. Lahana fet lamti naube amomoiti Naedat fa feàktoi vou le vua vahudam bak,” lahame Yohanesat ab vameadaham. 13 Labihadam digat meida labe Yesus Galilea bak labe lehe labe Yordan Soabo laba li Yohanes bake ab gagoham. “Om laha Em vuu valo baptislele.” 14 Lahame labi gagoha Yohanesat odohali mu gago, “Ai, gi Oho bisi feàda labe em vuu valo baptislem bak. Lam bisi neà bak am. Lahana akati Oho eba, ‘Om vuu valo baptislele,’ lahame eba labi gagohela?” 15 Lahahat Yesus fa gago, “Neà bak. Oho gi ozahit Em vuu valo baptislem neà bak. Oho Eba labihasu meedam labe Alat Aba Aho amu lab ozome esuhu bak lam ahebu gi ab modi imbodemam bak.” Lahame labi gagohemu Yohanesat Yesus ab vuu valo baptisleham. 16 Labi valo baptisli neàdi Yesusat gi etei vao labet sikisi duzu aaha asum ab fatahivaham. Labi tom aaha asum fatahivai bumatalehe bak labet Alam Aha Nutabe Neàna labe fa bume doleti ulohonali nom oaedume Yesus bake nom vousi nusu vizi ab teudeham. 17 Labi modeha Alat Aba Aho azihi bak asum ahoba iubet ab nom gagoham. “Da nim Em Adat vàmtea Ebe Eho bisi deelemda Am am tame. Em abo Aba Aho meedam bak lam Em aam deeleho,” lahame ab nom gagoham.

Matius 4

1 Labi Yesus modi vizi teudehe labe Alam Aha Nutabe Neàna labe Aho ozo, “Iblisit Yesus bake modi ozose,” lahame Aho neo Yesus bake modi bak lam vou esmozi fa bak aotba baa bohu dam vaba alim bak laba ab vou laham. 2 Labi ame bak laba vou le vou godam di lam Yesus ahit na koena àm vaba idaia ibzidamehamdehe labe usi empat puluh foli modeha idoali ab beoham. 3 Labi idoali aidam di labe Mei Ahu Modi Ozolo Modemda abo Iblisit Aba li ab gagoham. “Om, ‘Alam Adat,’ lahamda Om idoalehe bake nasi ke nidi nim gagome rotibu lemeta.” 4 Lahame labi gagoha Yesusat fa gago, “Vabà! Alat Vameadaha Im Toedahana laba meit im nehasu toeme fi hasi esuhu bak. ‘Dam gi na àm bakta ahedem vabak. Abo Alat Aho gagoho im ahebu aime meedam bakti labihasu meedam labe im ahedem bak.’ Lahame toeme esuhu labe Em moho bak.” 5 Lahame labi gagu neàdi Iblisit ba neo Yesus kota Yerusalem abo Alat fi hasi gagu esuhu num debu bak laba vou le ame Fihasi Ala Bake Vou Baedam Num Vàmteabu labe am bisi ohut baa kila bak laba vou zisi duzu ab gagoham. 6 “Om, ‘Alam Adat,’ lahamda Oho num ohut baa nibe so ateme feà bak niba nom ilu aamale. Alat Om gem bak malem zoaha bak. Ne, Oho ba modem im nim Alat Vameadaha Im Toedahana laba meit im nehasu fet toehena taia? ‘Alat Am im gagu vou usem dam laba gagu oluhu labe im anekehàt Om si soat vausu vuusu vousem bak. Ba kebu bake nom ilu Om naba vatfom vabak.’ Lahame toehena taia?” 7 Lahame labi gagoha Yesusat fa gago, “Vabà! Em ba Ala bake labihasu modi ozolo modem moho bak. Nehaha bak. Alat Vameadaha Im Toedahana laba im meida nehasu toeme fi hasi esuhu bak. ‘Boehàda ubu uho vou baedam Ala laba uho a, “Iba taueo? Iba taum vabao?” laham bak lam a modi ozolo meedamule.’ Lahame labi toeme esuhu labe Em moho bak.” 8 Labi im lada lam modeme neàdi Iblisit Yesus neo vou le nohu sibu feàda laba ab vou laisi duzuham. Labi vou duzu neàdi dam mei debu labe im boehàda am dam zi lamti im nazoh feà lamti labi dam mei debu labe im boehàda am dam zi lamti im nazoh feà lamti ahebu alihi fi seo fi himu modi fa setida. 9 Fiseo fi himu setidume neàdi Iblisit Yesus bake ab gagoham. “Om nasi ahit ogomasu biti ahu adat iedi eba, ‘Feàte,’ lahame vou baedale. Oho labihamta na zi feà nim ahebu eho Oba lodume Oho fa vame Om damali Ohomo boehàdateli ame dam lam Oho vuusdam bak. Om nazoh ziali Om naedatelem bak.” 10 Lahame labi gagoha Yesusat fa gago, “Vabà! Iblis om Mei Ahu Modi Ozolo Modemda om nasi itale. Em ba ahit ogomasu biti oba vou baedam vabak. Nehaha bak. Alat Vameadaha Im Toedahana laba im meida nehasu toeme fi hasi esuhu bak ehe bak. ‘Um ahu a meia adat iedi vou baedamule. Gi Boehàda ubu uho vou baedam Ala lamota, “Feàte,” lahame vou baedale. Im Aho gagomda lamota uledi meedale.’ Lahame labi toeme fi hasi esuhu labe Em moho bak.” 11 Lahame labi gagu neàdi Iblisit Yesus bake modi ozolo meedaha Yesus ba bedem vabamu utasi Yesus vou esmozi ab laham. Labi modeha Alat Am im gagu vou usem dam labe nom ilu fa Yesus bake im vi vameadume na àmna ab lodaham. 12 Labi ba di iube Yesusat aiha, “Yohanesat Boehàda Herodes bake im vahokedume modehat Herodesat faki am meo dam gagome Yohanes si sel ousuho,” laham bak damat vameadam im ahum aihemu Yudea bak lam vou esmozi fa Galilea bak labe am num debu meida Nazaret laba fa ab laham. 13 Labi Am vou budualehe num debu Nazaret lam neo vou esmozi fa Itea Galilea obe modesuhu num debu Kapernaum laba le ab aziham. Abo dat ahamda Zebulon labe aba aho vou faat lehe dam debu lamti labi dat ahamda Naftali labe aba aho vou faat lehe dam debu lamti labihasu ibi iho azihi num debu modealaha bak laba netàdehe siit moz. Laham bak laba tau azi ame dam laba Alat vameadaha im vahokeda. 14 Aho lab tau azi Alam im vou vahoketedam bak labet modi dat ahamda Alat vameadaha im aime fa dam bake ahate vameaidahada Yesaya labe aho aham di iube nehame fet toeme esuhu im nim ab modi imbodeham. 15 “Um gi Israel dam behàsu Zebulonti Naftaliti dam ahim labe ibi iho vou faat lehe dam debu abo Galilea bak labe am itea valau obe abo Yordan Soabo dumam tot valau obe laba azihi dam laba neo vi tau vahi azihi dam abo Israel debut modem vab dam oa, 16 Um etei aibuna azihina ozomom dam lam uma fau feàna um ab aadamam tame. Abo um etei Ala bake vaitesu geàdam bohu vuusdamna ozomom dam lam etei nim uma usime ab fauha neàdeham bak. Dat uba Soat Vausu Fa Vei Neàdemda ab leham bak.” 17 Lahame Yesayat lab fet toeme esuhu im lam Yesusat Aho etei Kapernaum laba le tau azi Alat Aba vameadume oluhu im lam ame dam laba faasi vameadume fi dedam labe ame fet toeme esuhu im lam ab modi imbodeham. Aho im nehasu vameadume fi deda. “Alat Gagu Fihasi Vimteme Oluhu Dat Boehàda lam etei bak niba lehemu Alat Ahamo Boehàdateboli dam bake deeli vame Am damali vuusu im vahokedam bak lam etei ab faasi gàhàli meedamam bak. Labihàmu uho faina meedam bak lam nasi voedume fa ahu neà bak vàmadi meedale,” lahame ab vameadume fi dedamam. 18 Labi ba neo digat meida iube Yesusat Itea Galilea labe am valau obet ladam labe aaha Simon Yesusat ba ee, “Petrus,” lahame taluhuda lamti am vahada Andreasti im bohe dek vou bulo meedamna ab aaham. Ame dam ahim labe ibi modi baleàhà bak bohe vadam bak am. 19 Làhàmu Yesusat ab gagoham. “Um ahim Ebe Eho vahokedam im ozobohudelo vi tau meedam damalele. Um ba etei bohe vam damalem vabak. Eho uba vahokedume uho fa ot vai dam nabime vame neo vahokedume ame dam labe fa Eba tu vuzehem bak modelo mozo.” 20 Lahame gi etei labi gagoha ame dam ahim labe im bohe dek gi ihe laba vou esmozi Yesusat vahokedam im ozobohudelo ab vi tau laham. 21 Labi neo vahi ladameam Yesusat vi aaha Zebedeusam adam behàsu Yakobusti Yohanesti im aiti iheba nusu im bohe dek vabiedamna ab aaham. Labihàmu Yesus neo ame dam ahim laba neo ab gagoham. “Um ahim Ebe Eho vahokedam im ozobohudelo vi tau meedam damalele,” lahame gi etei labi gagoha im aiti im iheti bohe dek lamti gi laba voedume esmozi Yesus bake ab tau vulaham. 23 Labi ba di iube Yesusat Galilea bak labe am num debu mei num debu mei lahadaha bak laba abo Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num dozeadaha bak laba olidume Alat Vameadaha Im Toedahana lam aame gagodume vi vahokeda. Labi laha, “Alat dam bake deeli vame Am damali vuusu im vahokedam bak lam, ‘Akatihasu modemna modela?’ ” laham Im Neàna lam vou vameatedume fi deda. Labi dam nisilehe bak ahaladi ahaladiame faidehe dam lamti labi dam ahaladi ahaladiame gailehe dam lamti ahebu Aho modi fa neàdeda. Labihada. 24 Labi Yesusat Aho lab meedam bak lam kehàm vaba Galilea bak vafozi dam Siria bak abo num debu mei num debu mei lahadume azim dam labe laha ab aidume valadamam. Abo dam ahaladi ahaladiame gaileheda zi lam dam aheda zi labe iho Yesus bake ab fet vou leidamam. Dam nehasu Yesus bake fet vou leida. Dam gaili feà bak fusi geàdam dam totbaho ame. Labi dam setan oli veimahada zi totbaho ame. Labi dam ahelemohoda zi totbaho ame. Labi dam nao zoho nutabedeheda zi modeo, anekehà zoho nutabedeheda zi modeo, laham dam zi totbaho ame. Labihasu dam aheda labe iho Yesus bake ab fet vou leidamam. “Im dam nim Yesusat Aho ulasi fà neàdedase,” lahame Yesus bake ab fet vou leidamam. Fet vou leidàmu Yesusat ame dam zi ahebu modi fa ab neàdedaham. 25 Labihadàmu dam dua bak fa Yesus bake vuladume ab vi tau godamam. Ame dam zoho Galilea bak labet leda. Labi dam zoho Dekapolis abo Num Debu Bak Sepuluh labet leda. Labi dam zoho Yudea bak labe am num debu meida Yerusalem labet leda. Labi dam zoho ame Yudea bak labe am num debu mei num debu meime esdam bak labet leda. Labi dam zoho Yordan Soabo dumam tot iubet leda. Labihasu Yesus bake vuladume ab vi tau godamam.

Matius 5

1 Labi Yesusat dam dua bak labe Aba valadam bak aahemu Aho bak buzoho laba laisi dam bake vahokedam bak ozome ab nusuham. Labi nusuha Aba Aho vahokedam im ozobohudelo vi tau meedam dam zi neo Aba lehemu Aho ame dam laba gagodume ab nusualadaham. 2 Labi nusualadume neàdi ab faasi vahokedamam. 3 “Uho neha, ‘Iho gi nehasu aidameam im ba Alam damalem vabiem bak. Alat fà iba vou aasu vabiedase,’ lahame uho Ala vàmtea lamota tu ahumdi vou faodam dam oa, Alat uba deeli vame Am damali Aho uba ab vuusu im vahokedamam bak. Labihadamdaleàmu um etei bisi deelehe bohu vuusdam dam um am bak. 4 Labi um etei na im uba ahu faidemna modem di mebe izidam dam oa, Alat fa uba ba diamut vabededume um fa neàdeda tame. Labihadamdaleàmu um etei bisi deelehe bohu vuusdam dam um am bak. 5 Labi um etei ahu ladehebeat esdam dam oa, bak nim Alat ba diamut modi fa gàhàdi Aba Aho amu di iube fet vameadume vàmadi esuhuna ahebu uba lu uho gi neà bak azi tame. Labihadamdaleàmu um etei bisi deelehe bohu vuusdam dam um am bak. 6 Labi um etei na vabali idoali meedam bakti valo àhàkedam bakti ulohona uho neha, ‘Alat Aba Aho ozome esuhu bak lam im ahu vàmadi ame baket ulohodesu meedase,’ lahame uho modelo àhàki meedam dam oa, uho lab modelo àhàki meedam bak lam Alat fa uba ba diamut modi vizi imbodi um fa asimdi neàdeda tame. Labihadamdaleàmu um etei bisi deelehe bohu vuusdam dam um am bak. 7 Labi um etei meia aame faobekesi im neà bak tau meedam dam oa, Alat ba diamut uba laha aame faobekesi im neà bak tau meeda tame. Labihadamdaleàmu um etei bisi deelehe bohu vuusdam dam um am bak. 8 Labi um etei Alat vameadaha im aime ahu vàmadi meedam dam oa, um ba diamut Alati ot aaiame vahi azi tame. Labihadamdaleàmu um etei bisi deelehe bohu vuusdam dam um am bak. 9 Labi um etei dam fi baeme neàdelo meedam dam oa, Alat ba diamut uba neha, ‘Um Em adam imboda am tame,’ lahame uba ba labi gagodam bak. Labihadamdaleàmu um etei bisi deelehe bohu vuusdam dam um am bak. 10 Labi uho Alat Aba Aho ozome esuhu bak laba ozome im vamdesu meedàmu meit uba vabidume modi geàdam di um gi ozahigeàmu keàtet lahasu meedam dam oa, Alat uba deeli vame Am damali Aho uba ab vuusu im vahokedamam bak. Labihadamdaleàmu um etei bisi deelehe bohu vuusdam dam um am bak. 11 Labi etei nim uho Eba tu vi tau meedàmu damat uba faki tozome feàtàdam bak modeo, uba neha, ‘Um gi faina meedam damat modem bak,’ lahame giomim uba vàlu meedam bak modeo, uba labihasu vabidamnàme um gi ozahigeàmu keàtet lahasu meedam dam oa, uho bak niba meedaha bake gohali lodamna Alat asum ahoba iuba esu ahumdehena abo feàte. Labihadamdaleàmu um etei bisi deelehe bohu vuusdam dam um am bak. Nehaha bak. Aham di iube Alat vameadaha im aime fa dam bake ahate vameaidaha dam lam laha dam Ala bake fakemoholehe damat fa iba vabidam meot. Labihàmu etei nim dam giida labe ba uba ame baket meedameam làhà um a àvodemule. Gi ozahigeàmu mahate deelehe bohu vuusu meedale,” lahame Yesusat ab vahokedaham. 13 Labi im lada lam vahokedume neàdi Yesusat im meida nehame neo vi vahokeda. “Uho Ebe Eho vahokedam im ozobohudelo meedam dam nibe uho bak niba esdam di uho lab neà bak meedam bak lam uho fa meia vizem labe um gi garam na voou àm neà bak lamti ulohona ozomom damat modem bak. Garam abo na àmna nu laba voou vizehe labe ame na nu lam àm di abo àm neàt. Labiha labe garam lam abo neàt. Um laha gi ame bak lamti ulohona meedale. Lahana ame garam labe ahamo na nua vizemna lam fa vei seti faidemeam làhà ame na fauha keobe lam ba akati modi garamli na nu laba vizemnalela? Labiham biem bak. Ame na lam faidehemu gi damat lailaiam tomba laba voom bak. Labihàmu uho meia modi vizem bak lam mahate bohulali meedale. 14 Labi laha uho Ebe Eho vahokedam im ozobohudelo meedam dam nibe uho bak niba esdam di um gi vuagat fauhaedam bak lamti ulohona ozomom damat modem bak. Uho lab neàna meedam bak lam dam giida labe vi aame ozo, ‘Yesus bake tu vuzehem bak ame?’ làhàmu fa neo ame bak laba ab vi tau meedamam bak. Neham bak. Bak buzoho ahoba iuba num debu bak moadume dozeadameam làhà ba ame num debu bak ba vasti fi olem vabiem bak. Tom aam neà labe labiham bak. 15 Labi laha meit vuagat usim di ba boloseh visoi ahoba nom suusum vabak. Gi damat oli aam neà laham bak ozome tom fi haba laba esu fauhaedam bak. Labiham labe damat ame numa oli aidam di gi fauha neàdi modesdamna damat aam bak. 16 Labihàmu ubu uho Eba lab tu vuzehi neà bak bohu meedam bak lam a vastemule. Gi ahate meedale. Uho labihasu ahate meedam labe dam giida labe vi aame um Ai Ala asum ahoba iuba, ‘Am abo feàte,’ lahame labi tom vou baedam bak am tame,” lahame Yesusat ab vahokedaham. 17 Labi im lada lam vahokedume neàdi Yesusat Aho neo ame dam zi laba neo vi vahokeda. “Uho ozom, Eho bak niba lehe bak nim gi dat ahamda Musat toedume fi hasi esuhu Im Feàna zi lam Eho fa faamome voedalo lehe? Laham vabameam dam ahamda Alat vameadaha im aime fa dam bake ahate vameaidaha dam labe ibi iho toedume esuhu im zi lam Eho fa faamome voedalo lehe? Vabà! Em ba labihalo lehe vabak. Eho gi ame im zi lam modi fa imbodelo lehe bak. 18 Lo, lamota imbot. Lahana Eho etei uba neo gagolo modem im imboda nidi nim laha nasi aima. Asum ahoba iuba modealahana zi lamti bak niba modealahana zi nimti ehe lahasuhu di nim Alat Vameadaha Im Toedahana zi lam ba ame na toehena keobe beà vàmtea setem vabak. Abo ame im zi lam ahebu imbodi vou mode ledume ba novam digat fuhuzobe vaitom di am bak. 19 Labihàmu uho meit neha, ‘Ame im nidi nim feà vab imot modem bak,’ lahame ame Alat fi hasi esuhu im meida buà modehe vaba zidazi meeda. Labi ame da labe laha vedi fa neo meia nehi vahokeda. ‘Alat fi hasi esuhu im lam feà vab imot modem bak. Um laha voom neàte,’ lahame meia labihasu vahokeda. Alam damaleheda labihasu meedamda labe am ee ba vousai ee feàda talum vabak. Lahana uho meit ame Alat fi hasi esuhu im meida buà vekehe vaba ahebu ulohodesu vouhodume meeda. Labi laha meia neha, ‘Ame im lam meida a voomule. Ahebu meedam tadele,’ lahame meia labihasu vahokeda. Alam damaleheda labihasu meedamda labe am ee ba vousai ee feàda talumda am bak. 20 Neham bak. Ame Farisi dam lamti labi dat ahamda Musat toedume fi hasi esuhu Im Feàna zi ozobohudi fa dam bake vahokedam guru zi lamti labihasu ibi iho ame Fihasi Esuhu Im Feàna zi lam ulohodesu meedam di meedamta meeda. Lahana, ‘Damat iba fà aame deelese,’ lahame gi ahobat neàdi meeda. Ame dam labe ibi iho meedaha bak lam um a vi tau meedamule. Uho nehi ozohe? Uho ame dam zi labe ibi iho lab meedaha bak lam uho ulohodesu meedam bak labet modi Alat um vame Am damale? Vabà! Um git ozoho bak. Ba labiham vabak. Neham bak. Uho gi, ‘Alat fà iba deelese,’ lahame ahu adat iedi im Aba Aho ozohoda lam iademe vamdesu meedam bak labet modi Alat uba deeli vame Am damali vuusu im vahokedam bak am bak. Laham bak ozodale,” lahame Yesusat ab vahokedaham. 21 Labi im lada lam vahokedume neàdi Yesusat neo ame dam zi laba nehame vi vahokeda. “Um amu Musat aho gagu fi hasi esuhu im nidi nim damat aham di iube faasi nehame vou vamea usehena uba vi fusi um aihina taia? ‘Mei a otemule. Uho labihameam meit um si vou le dat boehàda labet aba aho modem bak laba vou duzu ame da labe fa uba uloome vi aime neàdi gagu beom bak ehete.’ Lahame fi hasi esuhu im lam damat uba vou vamea usehe labe um aime ozobohudehena taia? 22 Lahana Em etei im gàhàna nehasu uba fa vi vahokedalo modem bak. Uho meit dat meidate ahu adat fakemeam làhà Alat uba uloome aim bak ehete. Labi laha uho meit dat meidate gameam làhà ame da lam si Yahudit Ibi Iho Modem Im Gagu Vàmadi Esum Dam Debu labe avaesdam laba vou le duzu uloome vi gagu aime neàdi modem bak ehete. Labi laha uho meit dat meidate neha, ‘Ahusobut,’ lahame meia labi vàlu feàtàmeam làhà Alat ba diamut uba vi gagu aime modi vua eludamna sutem gikina bohu laba voou vi vataum bak ehete. 23 Labihàmu uho meit neha, ‘Em na nim Ala bake lolo mozo,’ lahame Fihasi Ala Bake Vou Baedam Num Vàmteabu labe am ad oli aam bak tomba laba modesuhu vua vahudamnabu laba vou le it ozo, ‘Oo làhà! Eho meia faina modi ame da labe eba fakemda ehe?’ lahame it ozobohudemeam làhà ame na lam nasi Ala bake a lomule. Gi ame nabu modesdam obe laba vou esmozi nasi dat oba faki aidamda laba fa le im vameadume vei neàdi fa li ame na Ala bake lole. 25 Labi umti vahi esumda meida labe fa oba faki neha, ‘Om eba git modehemu om si meia uloome vi aime neàdi gagu modidam dat boehàda labe aho meia uloome vi aim num laba vou lalo modem bak,’ lahame uba vàlu gagomeam làhà uho gi ozahigeàmu etei vou ladam di labe gi zie doni laba taho fa nasi im ot vameaidume fa neàdele. Oho labiham vabameam oba faki vàlu gagomda labe om vou le dat boehàda laba ub lom bak. Labi ame boehàda labet fa neo am meo dam gagome om neo si mei si ousu teudi simtedem num abo sel laba voom bak. 26 Lo, lamota imbot. Lahana Eho etei uba neo gagolo modem im imboda nidi nim laha nasi aima. Om sel laba voomeam làhà ba taho futom vabak. Abo ousdamehamdi boehàdat aba aho gagu esuhu doi oho gohali lodume uloholehezobe ba futom bak. Labiham bake gi zie doni laba nasi ot vameaidume neàdele. Lam bisi fa ot vahiam bak am bak,” lahame Yesusat ab vahokedaham. 27 Labi im lada lam vahokedume neàdi Yesusat neo nehame vi vahokeda. “Um amu Musat aho gagu fi hasi esuhu im nidi nim damat aham di iube faasi nehame vou vamea usehena uba vou fusi um laha aihina taia? ‘Nam dat eheda modeo, dat nam eheda modeo, a modemule.’ Lahame amu mali fi hasi esuhu im lam damat uba vou vamea usehe labe um aime ozobohudehena taia? 28 Lahana Em etei im gàhàna nehasu uba fa vi vahokedalo modem bak. Uho meit nam amomoi laba gi fakot aame ahulat vi ozo, ‘Nam lam eho vase,’ lahame gi ahulat vi ozome àhàkedameam làhà Alat ozomta uho gi ame nam lam ab ve faina modeham bak. 29 Labihàmu om ahu labe oba modi om fako om vou fohome faina modi ubahi ubahidume Em mu voolo modemeam làhà om fako nasi valoi voole. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi fako vàmtea vou godam bak lam bisi neà bak am taia? Ba akati modi fako ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela? 30 Labi laha om ahu labe oba modi om anekehàt om vou fohome faina modi ubahi ubahidume Em mu voolo modemeam làhà om anekehà nasi vaitoi voole. Omti Alati vahi vou ali ahu vàmadi amedamalem bake etei bak niba godam di gi anekehà vàmtea vou godam bak lam bisi neà bak am taia? Ba akati modi anekehà ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela?” lahame Yesusat ab vahokedaham. 31 Labi im lada lam vahokedume neàdi Yesusat neo nehame vi vahokeda. “Um amu Musat aho gagu fi hasi esuhu im nidi nim damat aham di iube nehame faasi vou vamea usehena uba vou fusi um laha aihina taia? ‘Uho meit am nam amu neàt vahana fa mu voolo modemeam làhà dat amu nasi, “Nam nim debu nehasu meedàmu eho mu vooho bak,” lahame sunit toeme ahate fi desi vameadume mu voomta neàte.’ Lahame fi hasi esuhu im lam damat uba vou vamea usehe labe um aime ozobohudehena taia? 32 Lahana Em etei im gàhàna nehasu uba fa vi vahokedalo modem bak. Meit am nam dat amomoit bako bake aa vaha vab nam aho naedat vedi ostame mu voohemu ame nam labe ozoha vabamu fa dat amomoi vameam làhà faina ab modeham bak. Lahana ame lab faina modehe bak lam debu am dàt modehe bak. Labi aho lab mu vooho nam lam labe aho vaha dat lam laha gi faina modehe bak,” lahame ab vahokedaham. 33 Labi im lada lam vahokedume neàdi Yesusat neo nehame vi vahokeda. “Um amu Musat aho gagu fi hasi esuhu im nidi nim damat aham di iube nehame faasi vou vamea usehena uba vou fusi um laha aihina taia? ‘Uho dat meidavat neha, “Ame bak lam eho mode tame,” lahame gagu vàmadi esumeam làhà a modehe vaba voomule. Abo uho Ala bake gagu vàmadi neha, “Ala amta nim. Ame bak lam eho mode tame,” lahame vi gagu esumeam làhà ame baket modem tadele.’ Lahame fi hasi esuhu im lam damat aham di iube faasi vou vamea usehe labe uba vou fusi um aime ozobohudehena taia? 34 Lahana Em etei im gàhàna nehasu uba fa vi vahokedalo modem bak. Uho im gagu vàmadi esulo modem di mei ee feàda a vi gagu esumule. Abo uho Alam ee gagom mu fi hasi ahit, ‘Asum ahoba ium ame nim. Eho mode tame,’ laham bak lam a vi gagu esumule. Asum ahoba iuba Alat azi dam bakdate vuusdam bak am bak. 35 Labi laha uho im gagu vàmadi esulo modem di Alam ee gagom mu fi hasi ahit, ‘Bak adba ame nim. Eho mode tame,’ laham bak lam a vi gagu esumule. Bak adba nim Alat laha naedateli vuusdam bak. Labi laha uho im gagu vàmadi esulo modem di kota Yerusalem laba a vi gagu esumule. Ame kota Yerusalem lam Alat bisi Boehàdateboleheda labe Aba Aho azi dam bake vuusu im vahokedam bak lam ehemu Aho neha, ‘Dam Aba, “Feàte,” lahame vou baedase,’ lahame gagu fi hasi esuhu num debu am bak. Laham bake na im gagu vàmadi esulo modem di na etei gagohoda lam a vi gagu vàmadi esumule. 36 Labi oho laha im gagu vàmadi esulo modem di om so laba odosu, ‘Em ame nim,’ lahame a vi gagu vàmadi esumule. Om so lam Ala naeda am bak. Om so lam om naedatelem vab labe om ohuta lam, ‘Fauhalele. Gihobulele,’ lahame labi gagu ame baket meedam biem bak. 37 Labihàmu fa gi nehale. Uho meit im gagu vàmadi esulo modem di, ‘Eho mode tame,’ lahame gi labihasu gagom neà. Laham vabameam, ‘Eho modem kaio,’ lahame gi labihasu gagom neà. Gi labihasu gagodale. Mei ee feàda a vi gagu esumule. Uho mei ee feàda vi gagu esumeam làhà um gi Iblis labe aba aho gagoho bak laba uho vi tau meedam bak am bak,” lahame Yesusat ab vahokedaham. 38 Labi im lada lam vahokedume neàdi Yesusat neo nehame vi vahokeda. “Um amu Musat aho gagu fi hasi esuhu im nidi nim damat aham di iube nehame faasi vou vamea usehena uba vou fusi um laha aihina taia? ‘Uho dam bohudemeam meit mei fako belu fako meida aibulemeam làhà dat fako aibuleheda fa neo dat aheda labe am fako laha belu fa vatau aibulem neàte. Labi laha meit mei adoha belu mo goaitomeam làhà dat mo belu goaitohoda labe fa neo dat aheda labe am adoha laha belu fa vatau am mo fa goaitom neàte.’ Lahame fi hasi esuhu im lam damat aham di iube faasi vou vamea usehena uba vou fusi um aime ozobohudehena taia? 39 Lahana Em etei im gàhàna nehasu uba fa vi vahokedalo modem bak. Oba fakemoholeheda labe oba fai bak modemeam làhà oho a modi fa vi vataumule. Meit oba faki eobu visoi om udehà ahi tot laba beomeam làhà oho gi teoli neo udehà soi totbaho ame da laba fi sule. 40 Meit oba nehi ozome tem vàlu gagomeam, ‘Om eba git modehe bake gohali om sue sona ad laba dusuhuda eho fa vase,’ lahame ame im lam fa meia uloome vi aime neàdi gagu beodam busaoda boehàda laba fi desi gagolo modemeam làhà oho gi ozahit sue obo oho ahoba dusuhuda sona bohu lamti vihitoi vi tau lole. 41 Labi laha Roma meo damat oba nehi gagomeam, ‘Em nazoh nim oho kilometer vàmtea lamota vou lale,’ lahame tet ooteme gagom di um gi ozahit kilometer behàsu lamota abo bak bohulana teo laha vou lale. 42 Meit oba neha, ‘Na lam eba lom neào?’ lahame ailo vi gagomeam làhà ame na lam a malemule. Gi lodale. Labi laha meit oba nehameam, ‘Om na lam eho teohe vou lam neào?’ laham di modeo, meit oba nehameam, ‘Om na lam eho vase. Labi eho ba vamda lam fa oba baleà vouhose,’ laham di modeo, lahame labi gagomeam làhà ame na a malemule. Gi lu olum neàte,” lahame Yesusat ab vahokedaham. 43 Labi im lada lam vahokedume neàdi Yesusat neo nehame vi vahokeda. “Um amu Musat aho gagu fi hasi esuhu im nidi nim damat aham di iube nehame faasi vou vamea usehena uba vou fusi um laha aihina taia? ‘Umti vahi ot vou aliam dam laba deelele. Lahana uba fakemoholehe dam laba uho fa faki ahu zoho beom neàte.’ Lahame fi hasi esuhu im lam damat aham di iube faasi vou vamea usehena uba vi fusi um aime ozobohudehena taia? 44 Lahana Em etei im gàhàna nehasu uba fa vi vahokedalo modem bak. Dam uba fakemoholehe dam laba uho gi ozahigeàmu fa vei deelele. Labi laha dam uba vabidume fai bak meedam dam laba uho gi ozahigeàmu fa Ala bake neha, ‘Ai oa, Oho ame dam laba im neà bak modi esule,’ lahame tom gagodale. 45 Uho labiham labe, ‘Um gi Alam damali abo um Aiat asum ahoba azimda labe Am itbaho fatoi meedam dam um am bak,’ laham bak uho vouhodam bak am bak. Eho gi neham bak ozome uba labi gagoho bak. Alat abo dam faasi gi dam totbaho lamota aame faobekesi vou aasdam vab Alat modem bak. Abo gi dam ahebu faobekesi vou aasdam Alat modem bak. Neham bak. Abo ala digadda fauhaedam di gi dam neà bak meedam dam lamota ozome fauhaedam vabak. Abo gi dam faina meedam dam lamti laha ozome fauhaedam bak. Labi abaedam di laha dam Alat Aba Aho gagoho im vuzehi vamdesu meedam dam lamota ozome abaedam vabak. Gi dam im vamdesu meedaha vab dam lamti laha ozome abaedam bak. 46 Uho gi dam uba deelem dam lamota fa ot deeliameam làhà ba akati Alat ame bak laba gohali ame baleà vouhoe? Labiham vabiem bak. Um ozom vaba? Meia teo vi gagome vaiam doi abo pajak atem dam lam gi ame baket modem meot. Ame dam labe gi dam iba deelem dam lamota abo uho neha, ‘Debu faina meedam dam,’ lahame feàtàhà dam totbaho laba ot deeliame meedam meo damat modem bak. Dam lamti ulohona a meedamule. 47 Labi laha uho meia ot tahiame im vameadam di uho, ‘Neàte. Alat oba neà bak modi esule,’ lahame gagom bak lam dam giidate gagodam vaba vedi gi um vou alem dam lamota gagomeam làhà uho ozom, Alat ba uba neha, ‘Um abo im neàna meedam damat modem bak,’ lahame uba deeli vou baedà? Vabà! Ba labiham vabak. Dam Ala bake tu vuzehi meedaha vab dam labihadam meot. Gi ibi iho vou alem dam lamota, ‘Neàte,’ lahame tahi gagodam damat modem bak. 48 Im Ai asum ahoba iuba azim Ala lam abo fai bak vaba abo dam ahebu deeli gi im neà bakta bohu meedam Alat modem labe um laha gi ame baket meedale,” lahame Yesusat ab vahokedaham.

Matius 6

1 Yesusat neo ame dam zi laba nehame vi vahokeda. “Uho Alat Aba Aho ozome esuhu im lam meedam di uho neha, ‘Iho im neà bak meedam labe damat fà iba aame vou baedase,’ laham bak a vi ozome meedamule. Uho labi modemeam làhà im Ai asum ahobada iube ba uba ame bak laba ozome neà bak baleà vouhodam vabak. 2 Labihàmu dam na vab dama na lolo modem di nasi a ahate nehi fet vameadume fi demule. ‘Eho etei modelo modem bak nim um nasi aadamale,’ lahame a fet vameadume fi demule. Gi ohomo ozome daleà lodale. Neham bak. Ahobat neàdi meedam dam labe iho Alat iba gagohona meedalo modem di ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di ba daleà meedam vabak. Vedi, ‘Dam dua bak iba fà aame vou baedase,’ lahame ame num laba oli meedam meot. Labi laha na ot loidam bak tomba laba lam di gi ame baket meedam damat modem bak. Ame dam ahobat neàdi meedam dam labe ibi iho meedam bakti ulohona a meedamule. Uho Eho etei uba gagolo modem im imboda nidi nim nasi aimale. Ame dam labe im dam totbahot iba fa vou baedaha bak labet modi im Ai Ala labe ba ame dam labe iho meedaha bak gohali ame baleà vouhodam vabak. Dam giida labe ame bak lam aame fa ame dam totbaho laba vou baedaha labe gi ame na baleà vouhom bak ab vaham bak. Ba iho vamna vabak. 3 Lahana uho dam na vab dama na lodam di gi daleà lodale. Dam totbaho aim bak laba ahate a vameadume lodamule. 4 Uho labi modem labe uho lab meedaha bak lam gi aa lohona ozomomnat modem bak. Lahamnàme im Ai asum ahoba iuba azim Ala labe dam bakda meedaha im ahebu aame ozobohudem tadem Alat modem labe uho lab daleà modehe bak lam laha vi aame ozobohudehe labe ba biem vabak. Fa uba ame bak gohali ame baleà vouhou uba neà bak mode tame,” lahame Yesusat ab vahokedaham. 5 Im lada lam vahokedume neàdi Yesusat neo nehame vi vahokeda. “Uho Ala bake tom gagolo modem di a, ‘Damat fà iba aame vou baedase,’ laham bak laba vi ozome damat aasdam bak laba duzu Ala bake tom gagodamule. Damat vedi nehada. ‘Damat fà iba aame vou baedase,’ lahame vi ozome Ala bake tom gagodalo modem di ame dam labe iho nehi deelehat meedam meote. Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di modeo, damat lailaiam bak laba duzum di modeo, abo dam dua bak odosdam bak laba le duzu Ala bake tom gagodam meo bak. Ame dam ahobat neàdi meedam dam labe ibi iho meedam bakti ulohona uho a meedamule. Uho Eho etei uba gagolo modem im imboda nidi nim nasi aima. Ame dam labe im dam totbahot iba fa vou baedam bak labet modi im Ai Ala labe ba ame dam labe iho lab tom gagoho bak lam ba ame baleà vi vouhom vabak. Lab modehe bak aahemu gi ab neàdeham bak. Ame dam labe damat iba vou baedaha im lam gi ab aime neàdeham bak. 6 Lahana uho Ala bake tom gagodalo modem di gi nehale. Num ubuda oli num bumat doo adda iuba neo oli doo it baguamdi im Ai iho aam biem Ala laba aa tom gagodale. Labiham labe im Ai iho aa meedaha bak ozobohu labe iba ba ame bak laba gohali ame baleà vouhodam bak. 7 Labi uho Ala bake tom gagodalo modem di a gi ame im vàmtea amu gago. Ba neo vi gago. A labihadamule. Dam Ala bake tu vuzehi meedaha vab dam labe iho labihadam meot. Abo ibi iho vuusdam ostam alalehena laba vou baedam di abo im bohulana vou baedam bak. Ame dam labe vedi nehi vi ozo, ‘Iho buuna tom gagodameam ibi iho vuusdam alalehena labe ba iba aim vabak. Abo bohulana tom gagodamehamdem labe iba aim bak am bak,’ lahame vi ozodam damat modem bak. 8 Uho dam labe meedam bak lam a vi tau meedamule. Gi modeme vanamai voom imot modem bak. Neham bak. Im im gagom bak ehena iho im Ai Ala bake tom gagoho vabna Ahamo nasi fet ozobohudi esum Alat modem bak. Labihaha bak. 9 Labihàmu uho Ala bake tom gagodalo modem di gi nehi tom gagodale. ‘Ai asum ahoba iuba azim Ala oa, Im dam bakda ahebu ee Oboda vousai, “Om abo feàte,” lahame tom vou baedase. 10 Om fa Boehàdateboli iba dam bakdate deeli vame fa Om damali Oho Iba vuusu im vahokedam bak lam nasi faasi meedale. Labiham labe im Obo Oho ozohoda lam ahebu iho uledi meedase. Abo asum ahoba iuba Oba tau azim dam zi labe iho Obo Oho ozoho bak meedam bak lamti ulohona iho laha bak adba niba neo ame baket meedase. 11 Labi im idoalem bake àmna iba dihasi lu àme neàde. Labi neo dihasi vi lu àme neàde. Labihadale. 12 Labi meit iba fai bak meedam bak lam iho gi ozahigeàmu fa vei neàdedam bak lamti ulohona Oho laha iba iho faina meedam bak lam gi ozahigeàmu fa vei neàdedale. 13 Labi naat iba, “Iho fai bak modem uledeo?” laham bak im ahu modi ozolo vabidam di iho bedi uledem vabak laba Oho modi esule. Labi laha abo Bisi Faina Meedamda labe aho iba, “Debu faina modem bak lam modele,” lahame ootedume iho bedem bak labna zohàme Oho iba soat vatohedale. [Neham bak. Om bisi feàda dam ahebu vuusdam Boehàdatebo Om naeda am bak. Iho ee Oboda gi labaha bohu vousai vou baedam bohu vuusdam bak. Neàde.]’ Uho labihasu tom gagodale,” lahame ab vahokedaham. 14 Labi im lada lam vahokedume neàdi Yesus Aho neo nehame vi vahokeda. “Meit uba fai bak meedam di uho gi ozahigeàmu fa vei neàdedale. Uho labihameam làhà im Ai Ala asum ahoba iube Aho laha ubu uho faina meedam bak lam gi ozahigeàmu fa vei neàdeda tame. 15 Lahana meit uba fai bak meedam di uho ame bak lam ozahigeàmu fa vei neàdedam vabameam làhà im Ai Ala labe Aho laha ubu uho faina meedam bak lam ba ozahigeàmu fa vei neàdedam vabak,” lahame ab vahokedaham. 16 Labi im lada lam vahokedume neàdi Yesusat neo nehame vi vahokeda. “Uho Ala bake ot netàdiame im ot vameaidalo ahit na àm mu tom gagolo modem di um dauha ladehebeat a meedamule. Labi um ohu fau visoi um ohu laba a nom gulamule. Labi sue kaobulehena a visoi dumule. Im lada lam dam ahobat neàdi meedam dam labe ibi iho meedam bak am bak. ‘Iho ahit na àm mu Ala bake tom gagodam bak nim damat fà iba aame vou baedase,’ lahame ahit labihasu gi ahobat neàdi meedam damat modem bak. Lahana ame dam labe ibi iho meedam bakti ulohona a meedamule. Uho Eho etei uba gagolo modem im imboda nidi nim nasi aima. Ame dam labe iho lab ahit na àm mu Ala bake tom gagodam bak lam im dam totbahot iba fa vou baedaha bak labet modi im Ai Ala labe ba ame dam labe iho lab meedaha bak laba gohali ba ame baleà vouhodam vabak. 17 Labihàmu uho Ala bake ot netàdiame im ot vameaidalo ahit na àm mu tom gagolo modem di gi ubu uho modi baleàhà im lamota modem neàte. Abo dihambe keesi anekehà valo kike. Labi dauha valo kike. Labihadamta neàte. 18 Uho lab Ala bake ot netàdiame im ot vameaidalo ahit na àm mu tom gagolo modem bak lam damat aame ozobohudem vabiem bak am tame. Gi uhumo aa daleà na àm bak mu tom gagodamta neàte. Neham bak. Im Ai iho aam biem Ala labe abo dam bakda iho aa daleà modehena lam ahebu ozobohudem Alat modem labe Aho uho lab daleà modehe bak gohali ame baleà vouhodam bak,” lahame Yesusat ab vahokedaham. 19 Labi im lada lam vahokedume neàdi Yesusat neo nehame vi vahokeda. “Um bak niba azim di bisi nazoh soa maehena duali bak niba vahedam bak lam a vi ozome meedamule. Neham bak. Bak nim nazoh àboziem meot. Boet aume fa hae vi vieme gihobuli vàhàdem meot. Meit um numa aa oli nazoh vam meot. Labihadàmu bak niba nazoh dualem bak bisi a azi vi ozodamule. 20 Meit aho soa maehe nazoh vahedaha bak laba am ahu laba it ozodam meo bak. Labiham bake gi im nehasu meedamta bisi neà bak am bak. Uho bak niba azim di gi im Alabadata meedale. Uho lab meedam bak labet modi Alat fa ame bak laba gohali ame baleà vouhou uba soa maehe nazoh asum ahoba iuba vaheme neàdi ahumdi esum bak am tame. Ame bak laba ba nazoh àboziem vabak. Boet aume fa hae vi vieme gihobuli vàhàdeme setem vabak. Meit aa oli vam vabak. Gi neàna modesdam bak,” lahame ab vahokedaham. 22 Labi im lada lam vahokedume neàdi Yesusat neo nehame vi vahokeda. “Meit am fako vuagat fauti uloho labe na alihi aadamna am bak. Labiham labe neham bak. Fako meibada neàdi im ozobohudi fi gatelo àhàkemeam làhà num vuagat fauhati uloholi na ahebu aadam bak. ‘Abo neà bak neame?’ laham bak ozobohudi meedam bak. 23 Lahana meit am fako faidemeam abo im ozobohudi fi gatem bak àhàkem vabameam làhà am gi aibu bakti uloholi na aam vabili modesdam bak. Ba, ‘Neà bak neame?’ laham bak vabili gi fai bak tadem bak. Labihàmu, ‘Neà bak neame?’ laham bak meit am ahu ozobohudi fi gatem vab labe am ahu ad laba aibuli modesdam bak lam gi feàna modesdam bak. 24 Labi im meida neham bak. Dat vàmtea labe meia na gagu meedamda behàsdemeam làhà ba na im ozome meedam vabiem bak. Neham labe labihaha bak. Meia na gagu meedamda behàsdemeam làhà dat meida laba faki ziesobuli aho gagoho bak lam gi tozome mu fa dat meida laba deeli aho gagoho im lamota aime uledi meedam bak. Labi laha um ahu Ala bake tu vuzehi vàmadi meedameam làhà ba ahu behàsdi fa nazoh zi lamti vahi tu vi ozodam biem bak. Labi laha um ahu bisi nazoh zi laba tu àvodi meedameam làhà ba ahu behàsdi fa Alati vahi tu vi ozodam biem bak,” lahame ab vahokedaham. 25 Labi im lada lam vahokedume neàdi Yesusat neo nehame vi vahokeda. “Um a bisi nehame vi ozodamule. ‘Im na àm bakti vao udem bakti vabalemeam làhà im ba akati modi ahedi na im meedàla? Im labihameam eloe taia?’ laham bak lam um bisi a àvodi vi ozodamule. Labi, ‘Im so bozbulehe bak nim im akati modi sueli dusuela?’ laham bak lam um bisi a àvodi vi ozodamule. Neham bak. Im ahedi na im meedam bak lamti na àm bak lamti na behàsu lam vi ozom di bisi tombuda im ahedi na im meedam bak am bak. Labi laha im so nimti sueti na behàsu lam vi ozom di bisi tombuda im so am bak. 26 Uho bumet meedam bak laba vi ozodale. Bume ba na debe soali modeme àm vabnat modem bak. Labi laha ba na modeme vahem num mome iho àmna laba vahedam vabak. Lahana im Ai Ala naedat Aho gi ozahit ame bume keobena laba vou faovoi dihasi na lu esu. Dihasi na lu esu. Labihadam bak. Labihàmu uho ozom, damti ame bume lamti na behàsu lam vi ozom di bisi tombuda akete? Gi im dam am bak. Labiham bake im Ai Ala naedat Aho laha iba dam bakdate vou faovoi aasdam Alat modem bak. 27 Uho ozom, um elom vaba gi ahe lahasu bohu vuusdam bak laba uho bisi lab it vou faovoi ozodam bak labet modi um elom vaba fa vi ahedidume bohu vuusdam meo. Vabà! Ba gi koena vi tau bohulalem vabak. 28 Uho koena vi tau bohulalem bak modem biem labe um akati neha, ‘Iho so bozbulehe bak nim akati modi sueli dusuela?’ lahame bisi dihasi vi ozoda. Dihasi vi ozoda. Labihadàla? Uho ut ava aam neàna ahamo usim di labe meedam bak laba vi ozodale. Ame ut ava lam damat dehe vabna gi ahamo usihinat modem bak. Labi laha ame ut ava labe anekehàli elu faitoi fi name beateli gimsum vabak. Lahana ame ut ava damat aam di abo aam neàna modem bak. 29 Lada lam labiha. Lahana dat ahamda Boehàdatebo Salomo labe aba aho vuusualaha nazoh feà lamota zi feàt. Lahana aba aho dusuhu sue neàna lamti ame ut ava lamti na behàsu lam vi ozodam di bisi aam neàda ut ava am bak. 30 Ame ut ava lam gi usdalo iahamu aladume seti fa damat vamateme fa vua vahudam bak lam Alat ozobohunàme gi ozahit aasu vabiedam labe damat aam neà bak modi esuidam bak. Alat labihasu modehelahit uho ozom, um so bozbulehe bak lam laha modi fa fi olem vaba? Vabà! Abo modem bak. Neham bak. Ame ut ava lam Alat modi aam neàdehe bak lamti um so bozbulehe bak lam Alat modi fa fi oli neàdem bak lamti na behàsu lam vi ozodam di uho ozom, bisi tombuda akete? Im dam am bak. Lahana um akati Eba mahate tu vuzehem vaba vedi gi im iudu ium ozo. Im iudu ium ozo. Lahadume vi ozodam bohu meedàla? 31 Neham bak. Ala bake tu vuzehe vab dam debu mei debu mei laham dam labe, ‘Im etei ana à? Vao ake le ude? Ana ve sueli dusuela?’ lahame àvodi vi ozodam bak abo feàte. Lahana ame dam labe ibi iho àvodi vi ozodam bak lam uho a vi tau meedamule. Dam bakda na àm vaba idoali elom bak lamti sue dusum bak vabalem bak lamti im Ai Ala Na Debu Modeheda labe Am ozobohu bak. Ba biem vabak. Labiham bake uho a bisi nehame àvodi vi ozodamule. ‘Im na àm bake im akati mode? Im vao udem bake im akati mode? Im sue vabalehe bake im akati mode?’ laham bak lam bisi a àvodi vi ozodamule. 33 Uho fa gi nehasu meedale. ‘Alat Ahamo Boehàdateboli iba deeli vame Am damali vuusu im vahokedàmu iho gi Aba Aho ozome esuhu bak lamota uledi im vamdesu meedase,’ laham bak laba nasi ahu vitasu vàmadele. Uho ame bak laba nasi vitasu vàmadi meedameam làhà Alat uho amu lab àvodi vi ozodamna lam ahebu uba ba vi loda tame. 34 Labihàmu uho etei nasi, ‘Em dihasi ana à? Em dihasi vao ake le ude? Em dihasi ana ve sueli dusuela?’ labihasu na im ba dihasi modiamda zi laba a nasi fet àvodi vi ozodamule. Uho gi na im uho etei di nibe àvodi meedume vou disimda lamota vi ozome meedale. Etei vi ozome meedamda nimti ba dihasi àvodi vi ozome meedamda lamti a vi tau valiheme dualemule. Ba dihasi modemda lam gi labihasu faode,” lahame Yesusat ab vahokedaham.

Matius 7

1 Labi im lada lam vahokedume neàdi Yesusat ame dam zi laba neo nehame vi vahokeda. “Uho meia a aame ozomsu gagodamule. Uho labiham labe Alat laha uba ba aame ozomsu gagodam vabak. 2 Lahana uho meia aame ozomsu gagodameam làhà Alat laha neha, ‘Uho faina meedàmu beose,’ lahame uba ozomsu gagodam bak. Aho gi ubu uho meia lab ozomsu gagodam bak labet fa zuhou ame baket neo uba ozomsu gagodam bak. 3 Um vahi azim dam meida labe am fako gi ut nu keobe bitehena uho bisi aame gagodamna akati modi fako ubuda ut gahebabu bitehena it aame gagom vaba mode? 4 Fako ubuda ut gahebabu bitehena uho it aame veiom vab dam akati um vahi azim dam meida labe am fako ut nu gi keobe bitehena aame nehame gagodàla? ‘Ba oa, om fako ut nu keobe bitehe bak eho aame veiose,’ lahame akati labi gagodàla? 5 Um abo gi ahit ahobat neàdi meedam damat modem bak. Um nasi fako ubuda lam ut gahebabu bitehena it veioi voole. Uho labi modemeam làhà fako ut nu keobe meibada bitehe bak fa aasu veiom neàte,” lahame Yesusat ab vahokedaham. 6 Labi im lada lam vahokedume neàdi Yesusat neo nehame vi vahokeda. “Uho Ala bake lolo fi hasi esuhuna lam ba veme a esumule. Vem lam gi vaktesi fa oba nohisi vee tame. Labi laha um soa modesu vou godamna lam abo doi feàna vamna lam ee gagom mutiara a doho fi ho esumule. Uho doho fi ho esumeam làhà dohot gi naot duzu duzuiame bake bauleme vàhàdeme setem bak. Neham bak. ‘Alat dam vuusu im vahokedam bak lam ab faasi meedamam bak,’ laham Im Neàna lam uho vameadume fi dedam di uba tozodume moudam dam laba a vi vameadamule. Fa dam iademe fi me uho lab vameadam im aim uledem dam laba vameadume fi dedam neàte,” lahame ab vahokedaham. 7 Labi im lada lam vahokedume neàdi Yesusat neo nehame vi vahokeda. “Meit Ala bake neha, ‘Im na nim vabalehe bak Oho iba na lodam neào?’ lahame Ala bake keàtet tom gagoidamda lam ame na vamda am bak. Labihàmu uho ozome valo modemna lam ehelemeam làhà, ‘Eba vàle,’ lahame Ala bake mahate tom gagoidale. Labiham labe ame na lam Alat uba lodam bak. Labi laha uho na meida, ‘Akatihasu modi vàla?’ laham bak Ala bake keàtet tom gagoidamda lam Alat ame da laba modi ame na vamda am bak. Labihàmu na meida, ‘Akatihasu modi vàla?’ laham bak lam uho Ala bake mahate tom gagoidale. Labiham labe ame na lam Aho uba modi uho ame na vam bak. Labi laha meit Ala bake neha, ‘Em na nim modem bak ozome Oba vi ailo leho. Om eba taum neào?’ lahame bisi tom gagoidamda lam Alat uledi taumda am bak. Labihàmu uho meit neha, ‘Em na nim modem bak ozome Oba vi ailo leho. Om eba taum neào?’ laham bak lam laha Ala bake mahate tom gagoidale. Labiham labe Alat uledi fa uba taum bak. 9 Um adam eheda um adat uba li nehame gagomeam, ‘Aia, eba roti vàle,’ lahame gagomeam uho fa ke ve lom meo? Vabà! Um ba labiham vabak. Gi ame roti lam visoi lom bak. 10 Laham vaba uba li nehame gagomeam, ‘Aia, eba bohe vàle,’ lahame gagomeam uho fa ostam mum ve lom meo? Vabà! Um ba labiham vabak. Gi ame bohe lam ve lom bak. 11 Um bisi fai bak meedamnàme na neàna vame um data bake lodam bak lam uhumo ozobohudi meedam meo damat modem bak. Im labihadam damat modem labe im Ai asum ahoba iuba azim Ala abo bisi neàboda labe iho meit Aba nehi gagomeam, ‘Ai oa, Om eba ame na lam lom neào?’ lahame gagu aimeam Ai labe uledi na neàna ame da laba lodam bak. 12 Uho ozom, ‘Da labe eba nehi meedase,’ lahame uho labi ozomeam làhà uho ozoho bak lam ame da laba nasi meedale. Neham bak. Iho dat ahamda Musat toedume fi hasi esuhu Im Feàna zi lamti dam ahamda Alat vameadaha im aime fa dam bake ahate vameaidaha dam labe ibi iho toedume esuhu im zi lamti labihasu vazisi ozodume meedam di eho etei ba lab gagoho bak lam bisi ame im zi labe im tombuda am bak,” lahame ab vahokedaham. 13 Labi Yesusat neo nehame vi vahokeda. “Uho meit neha, ‘Em gi Alati vahi ahe neàna bohu vuusdalo mozo,’ lahame ozome gagodam bak lam gi modesome modemeam modem biemnat modem bak. Neham bak. Alati vahi gi ahe neàna bohu vuusdam bak lam gi zie kekehena ladume fa doo kekehena laba lafum bakti uloho bak. Labiham labe gi dam koe zohota ame zie labe ladam bak. Lahana dam duada zoho labe fa zie olozehena baa abo lam neà labe laba ladam bak. Lahana ame zie labe ladume lafum di gi vua elum sutem gikina bohu vuusdam bak laba lafum bak. Labiham bake uho ame zie olozehena baa neàda voou fa zie kekeheda laba lam bake keàtet meedale,” lahame ab vahokedaham. 15 Labi im lada lam vahokedume neàdi Yesusat neo nehame vi vahokeda. “Dam uba li neha, ‘Alat iba vameadaha im iho aime fa uba li ahate vameaidalo modem bak,’ lahame giomim gagodam dam labe uba vizemo. Iademe it vou faovoi meedale. Ame dam uba lem di gi nut vemet fa domba sokbalehe bak. Ame bak lam neha: Uho ame dam labe iho vameadam im aim di dae meona vameadam vaba gi dae nemahuba neàt vameadam damat modemu vedi im Alam damalehe damti uloho tiba. Lahana ame dam lam gi nut vemti uloholi uba modi vàhàdedam bak. 16 Uho neha, ‘Ame giomim vou li vameadam dam lam iba fum di iho akatiham bak aame ozobohudela?’ laham bak lam gi ame dam labe ibi iho meedam bak laba aame im ozobohudem bak am bak. Neham bak. Bu modeo, oo modeo, aam labe ame utso vi ozobohudem bak. Uho ozom, dam gokio lo ali labe fa nigobuli sitom meo? Vabà! Ba labiham vabak. Gi ame nigo lo laba le sitom bak. Labi ile lo ali labe fa sei voeli faitom meo? Vabà! Labiham vabak. Gi le ame seiso laba am voe faitom bak. 17 Ut neàda oo neàna valem bak. Labi laha ut faida oo faina valem bak. 18 Ba ut neàda oo faina valem vabak. Labi laha ut faida ba oo neàna valem vabak. 19 Ut oo faina valemda ahebu damat sieme vua vahudam meo bak. Ame ut oo faina valemda lamti damat neha, ‘Im Alat vameadaha im aime fa dam bake ahate vameaidam dam im am bak,’ lahame giomim vameadam dam lamti ulohote. Alat laha ame dam lam vua elum sutem gikina laba voedam bak. 20 Neham bak. Ame dam lam, ‘Giomim meedalo,’ laham bak lam iho gi ame dam labe ibi iho faina meedam bak laba aame ozobohudi gagodam bak,” lahame ab vahokedaham. 21 Labi Yesusat im lada lam vahokedume neàdi fa neo nehame vi vahokeda. “Dam Eba neha, ‘Ai iba vuusdam Boehàda oa,’ lahame ostame ahobat neàdi gagodam dam lam ba Em Aiat deeli vame Am damali Aba Aho azim bak abo asum ahoba iuba le Aho vuusu im vahokedam vabak. Gi Em Aiat Aba Aho gagoho baket meedam dam lamota Am damali laba le Aho vuusu im vahokedam bak. 22 Neham bak. Alat ba diamut Dam Bake Uloodume Vi Aime Ozobohudi Neàdi Fime Fahedam Digat fum di dam dua bak Eba li im nehasu tauleme gagoida tame. ‘Ai iba vuusdam Boehàda oa, iho amu bak adba niba esdam diat meedaha im lam Om ozobohudehena taia? Iho amu dam bake neha, “Yesus labe Am im iba gagu iho ot vai fa uba ahate vameaidaha bak,” lahame amu ame im lam dam bake ahate vameaidaha bak. Labi laha mei ahu oli veimaha setan zi lam iho ee Oboda fa ve ame setan laba gagu futodume ilidaha bak. Labi laha iho ee Oboda fa ve damat ihimo modem biem im feàna lam meedaha bak,’ lahame Eba li labihasu tauleme gagoida tame. 23 Lahana Eho fa ame dam laba nehi ahate gagoda tame. ‘Vabà! Em um bieho. Um ana damat modela? Um bisi fai bak meedam dam em vou esmozi ilile,’ lahame Eho labi ba gagoda tame,” lahame ab vahokedaham. 24 Labi im lada lam vahokedume neàdi Yesusat im totobe meida nim neo nehame ab vi fi koadamam. “Meit Ebe Eho vameadam im lam aime meedamehamdemda lamti fa dat im ozobohuda nimti uloho bak. Da nibe num abada moho di abo bak sime neàdi bao nom ilu ke vame bakmat laba vou vahe làbome neàdi bak baule. Labi neo ame baket meedume bao ab vou zisit làbodume teudedume num ab moham. Labi abaa nom ilu vao duali feà bak fusi nutabe fai vi tau ame num laba beodamnàme ba nigome agutehe vaba gi teudi duzuhu bak. Ame num lam abo amu bao zi lam bak adba nom ilu ke vame ame bakmat laba vou vahe làbome bakti bauleme teudehe labe labihaha bak. 26 Lahana meit Ebe Eho vameadam im lam ailahigeàmomda lamti fa dat im biehebuda nimti uloho bak. Da nibe num abada moho di gi bao gi fota zisime afoezobe ahoba laba loat giame ame num ab moham. Labi abaa nom ilu vao duali feà bak fusi ame num laba zizeda. Labi neo nutabe fai labe lehe labe ame num laba beoda. Labihadume modeha ame num lam biti agube ab vàhàdeme seteham. Labihaha bak.” 28 Lahame Yesusat ame im zi lam labihasu vahokedam di labe damat aiha Yesusat ba dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe ibi iho ladehebeat vahokedam bakti ulohona vahokedam vaba Aho gi im dedateli vahokedàmu dam labet aime ab àvodeham.

Matius 8

1 Labi Yesusat bak buzoho labe lezehe di lam dam dua bak Aba tau lezeda. 2 Labi modeha dat sokba faidi vàhàdem bohu vuusdamda labe Aba ab gut tàham. Tàhi, “Yesus abo feàte,” lahame ozome Aho doudam obe laba ogomasu biti ab tauledamam. “Ai oa, Om eba faobekem vabao? Om uledemeam làhà em sokba faidi vàhàdem bohu vuusdam bak nimti damat eba fi hasi vaitesu esdam bak lamti Oho fa eba modi neàdem bak em ozobohu bak.” 3 Lahame labi tauledume gagohemu Yesusat gi ozahit Am anekehàt ame da laba nom ulasi gago, “Lo, Eho modi neàdem neà bak. Om sokba faidi vàhàdem bohu vuusdam bak lamti damat oba fi hasi vaitesu esdam bak lamti nasi setele,” lahame labi gagohoilahit ame da labe am sokba faidehe bak lam fa seti fa dam ahedati vahem bak ab neàdeham. 4 Labihahemu Yesusat ame da laba ab gagoham. “Om sokba faidi vàhàdem bohu vuusdàmu Eho modi fa neàdehe bak lam oho a dam bake vou vameatedume fi demule. Gi damat Ala bake lomna ve vua vahudam toheda laba le gagu ame da labe om sokba faidi vàhàdem bohu vuusdam bak lam, ‘Fa modi neàdeheo?’ laham bak aho gut nabidale. Labi nabidume neàdi fa dat ahamda Musat aham di iube Israel dam bake, ‘Nehame modidale,’ lahame vahokedaha bak lamti ulohona modele. Om fi ham bak neàdi fa vahem bake na fi ho oho etei si vou lalo modemna lam ame toheda laba vou le aho gut ve oteme vua vahusu om fa damti vahem bak modele. Labiham labe dam aheda aame ozo, ‘Da nim fa neàdi im fa vahem neàdehe?’ laham bak fet aame ozobohudi fa vahem bak am tame,” lahame Yesusat ab vi vameadume oluham. 5 Labi Yesus Aho num debu Kapernaum laba le modeha Roma meo dam seratus zi meida labe im boehàda labe aho Yesus bake gut tàhi, “Aba taule,” lahame ab vameadamam. Aho neha, “Ai Elaidamda oa, em na meedamda em num bake gaili feà bak fusi geàdam labe usam bili bisdalo,” lahame ab gut vameadamam. 7 Lahame labi gut vameadàmu Yesusat uledi fa ab gagoham. “Lo, Eho le om na meedamda laba ulasi fa neàde tame.” 8 Lahahat ame boehàda labe fa gago. “Ai, faode. Om bisi feàda nasi em num bake a lamule. Em feà vabda Oho em numa olemeam làhà em ladem bak. Gi Obo Oho lab duzuhu bak labet bak bohulana gagomeam em na meedamda nim modi fa ab neàdemam bak. 9 Em nehi ozo. Eba vuusdam boehàda labe eba na im gagom di em aime meedam bak. Labi em laha em meo dam niba eho na im gagom di ame dam labe laha aime meedam bak. Neham bak. Ebe eho vuusdam dam meida laba eho neha, ‘Iuba lale,’ lahame gagom di ame da labe lam meo bak. Labi eho laha dat meida amomoi laba neha, ‘Lele,’ lahame gagom di ame da labe lem meo bak. Labi em na meedam dam meida niba gago, ‘Na nim modele,’ lahame gagom di ame da labe modem meo bak. Em fota boehàdateli labihasu meedam bak. Lahana Oho meedam bak lam bisi feàda Om am bak. Labiham labe Oho gi laba duzu, ‘Em da nim fa neàdele,’ lahame Oho labi gagomeam làhà ame dat gaileheda nim modi fa ab neàdemam bak.” 10 Lahame labi vameadume modeha Yesusat ame im lam aime ab àvodeham. Àvodi Am fa vaktesi dam duada Aba vi tau godam dam laba ab gagoham. “Aa làhà! Da nim labi gagohe? Làhà um im imboda nidi nim nasi aima. Ame Romada abo Yahudi dàt modem vabda vàmtea nimota Eba bisi tuhudatebo am tame. Em Israel dam totbaho ahebu dat nidi vàmtea nibe aba aho lab bisi Eba tu vuzehehe bak lamti ulohoda Em ba aam kaio. 11 Neham bak. Ba diamut Alat Ahamo Boehàdateboli Am damalehe dam laba vuusu im vahokedam bak gàhà bak laba na feàna àlo meedam bak ehete. Ame na feàna àlo meedam di labe dam fa ame meo dam seratus labe im boehàda lamti uloholi Eba tu vuzehi meedam dam abo ala zizem tot iube le. Ala bozilem tot iube le. Labihadam Yahudi modem vab dam dua bak labe ame bak laba le Yahudi dam labe im tai ahobada Abrahamti Isakti Yakubti ame neà bak laba tau vahi deelehat meeda tame. 12 Aiee! Lahana um Yahudi dam totbaho abo Alat Aho neha, ‘Eho uba deeli vame Em damali Eho vuusu im vahokedase,’ lahame ahamte fi me vaha dam labe Eba tu vuzehehe vab labe ba ame baket tau meedam vabak. Alat ame dam lam gi bàhàgo bak iuba abo bisi aibu feà bak iuba voeda tame. Abo Alati fa vahem vaba gi ame bak laba voedàmu ahu faidi ahula it fu foelamdidume kikezi geàdam labe meb dae feàna faasi medda tame.” 13 Lahame labi gagu neàdi Yesusat fa vaktesi dat boehàda laba ab gagoham. “Nasi fa om num bake lale. Oho neha, ‘Eho gi niba duzu gagomeam om na meedamda lam fa neàde tame,’ lahame oho etei lab tu vuzehe bak lam Eho mode tame,” lahame gagu neàdi ame boehàda nibe kehàm vaba Yesus vou esmozi am num bake fa le aaha am na meedamda fa ahedi neàdi usahana ab aaham. Gi etei Yesusat lab gagoho di labe fa ahedi neàdi ab usaham. 14 Labi Yesus neo ladume Petrusam numa lafusi ab oleham. Oli aaha Petrusam boholeà so galihasi duana gaili bisdamna ab aaham. 15 Làhàmu Yesusat li nom bohusu ame nam labe Am anekehà laba nom odosu gago, “Om gailehe bak neàdele,” lahame labi mali gagoha ame gailehe bak fa ab seteham. Labi kehàm vaba fa usai duzu na ohume Yesus bake ab lu àham. 16 Labi dimatali aibulelo modem di labe dam aheda zi labe im setan oli veimaha dam zi lam Yesus bake vou ledume Aho ame setan zi laba gi Am ahat gagoha ab futodume ilime seddaham. Labi laha dam gi gaileheda zi lam Aho laha modi fa ab neàdedaham. 17 Labihasu meedaha im lam dat ahamda Alat vameadaha im aime fa dam bake ahate vameaidahada Yesaya labe aho aham di iube nehame fet toeme esuhu im nim ab modi imbodeham. “Iho faidehe bak lamti gailehe bak lamti abo iho kikezi geàdam bak lam ahebu ame Da labe Aho modi fa seddume neàdeda tame.” Lahame Yesayat aham di iube lab fet toeme esuhu im lam Yesusat ab modi imbodeham. 18 Labi Yesusat ame dam zi lam modi fa neàdedam labe aaha dam feà bak fusi Am so nutmadàmu Aba vi tau meedam dam laba ab gagoham. “Imo itea biou tot iuba lase.” 19 Lahame gi etei gagoha dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru meida labe Aba tàhi ab gagoham. “Guru oa, em, ‘Oho adi bake lào? Adi bake lào?’ laham di vi tau godalo mozo.” 20 Lahahat Yesusat ozo, “Da lam imboo?” laham bak vi ailo fa ab vi gagoham. “Nohubake azim vemta ibi iho im bak ehete. Labi bume laha ibi iho im ila ehete. Lahana Em Abo Asum Ahoba Iubet Bak Niba Li Dateleheda nim bitesu im bak kaio,” lahame ab gagoham. 21 Labi neo dat meida labe Aba Aho vahokedam im ozobohudelo vi tau meedamda meida labe neo ab vi gagoham. “Ai oa, faode. Em nasi em bake fa le em ai faina eloi baumsuhuzobe Oba ba vi tau meedase.” 22 Lahame labi gagoha Yesusat fa ab gagoham. “Vabo. Lada gi labihasu feidate. Damat Eba tu vuzehi meedaha vab damat abo Alati vaitesuhu damat fà baumsuse. Lahana om nasi etei Ebe Eho vahokedam im aime vi tau meedale,” lahame ab gagoham. 23 Labi Yesus neo Aba vi tau meedam damti iheba ziddume ab biodamam. 24 Biodam di labe Yesus lavoidume ab iddamam. Labi gi etei biodam labe nutabe fai iubet li itea laba modi fi tauledume bubaholedam labe ihe laba tom foadume vao ihe laba zizi noziali tezeo vabali dam folelo meedam di lam Yesus gi vabi iddam lahasu. 25 Làhàmu Aba vi tau meedam dam labe ihe zoho laba fi ai Yesus bake ukeme ab gagoham. “Ai Elaidamda, Om ade? Im ihe vao noziali im folelo mozo. Oho iba taule.” 26 Làhàmu Yesusat keesi ab gagoham. “Um ana modi iedi mode? Um Eba akati mahate tu vuzehem vaba mode?” lahame gagu neàdi usai nutabe fai lamti vao fi tauledume bubaholedamna lamti, “Setele,” lahame mali gagoha ab bagavai seteham. 27 Labi seti neàdi Aba vi tau meedam dam labe ame lab modehe bak lam aahemu ihimo vi ozome àvodi ab ot gagoidamam. “Aa làhà! Uho ozom, Da nim ana Dàt mode? Am gi nutabeti vao bubaholemna lamti, ‘Setele,’ lahame gagom di gi modi uledi setem meo Dàt modem bak,” lahame ab ot gagoidaham. 28 Labi neo biodume dumam tot Gadara bak laba fusi ab zituham. Labi zitu usdume ladume modeha setan zi oli veimaha dam ahim labe Yesus bake li ab gut tàham. Abo gi koei vahedam ke bumat zi laba azietem damat Aba ab li gut tàham. Ame dam ahim bisi meo feà labe dam giida labe iedi gi totobe iube labohoti laidam meo bak. 29 Labihadam dam ahim labe Yesus bake li gut tahi modeha ame setan zi labe iho ame dam ahim laba modi geàdam labe nehi ab gagodamam. “Yesus Alam Adat oa, akati modi Oho iba li ootedàla? Obo Oho ozome dam faheme beodam digat fuhu vabna akati Oho nasi iba li ootedume modi geàdalo modela?” lahame ab gagodamam. 30 Labi gagodam di labe doho fi ho zi gi netà bak nom otesuhu bak laba dozeadume bakbe àda. 31 Làhàmu ame setan zi nibe Yesus bake neo ab gagodamam. “Làhà Oho iba da nim mali gagu futodume ilidalo modem di im gi fa doho fi ho zi labe im ahu laba fa oedume veimadam neào?” 32 Lahame labi tauledume gagoha Yesusat uledi ame setan zi laba ab gagoham. “Nasi futodume ilidale.” Làhàmu ame setan zi nibe iho dam ahim nim futodume vou esmozi ilidume ame doho fi ho zi labe im ahu laba ab oedume veimadaham. Labi modeha ame doho zi lam bak nom otesuhu bak labet nom itaome valo nom ilu ab tezi elodaham. 33 Labi modeha dam doho fi ho vou aasdam dam labe aaha im doho valo tezi elodaha bak aahemu iedi ilime le im num debu bak laba ab vou fi det ladamam. Abo ame setan oli veimahada ahim lam Yesusat setan laba gagu futodume fa doho laba oedume itaome valo teddume elodaha bak lamti ame dam ahim fa neàdehe bak lamti labihasu dam bake ab vou fi det ladamam. 34 Lab vou fi det ladam labe dam laba azim dam labe im labihasu fi dehena lam aihemu fa Yesus bake aalo ab valadamam. Labi ledume Yesus bake li aame ozoha, na ibida neo vàhàdem bak labna zohàme ab gagoham. “Im bak nim Oho a tau azimule. Im maleho. Om taho itale.” Làhàmu Yesus Aba vi tau meedam damti fa biolo ihe ab ziddamam.

Matius 9

1 Labi iheba ziddume neàdi Yesusat Aba Aho amu li esdam bak laba abo num debu Kapernaum laba lam bak ozome fa ab bioham. Labi biou zitu aaha dam duada zi labe Aba li vou faodam bak ab aaham. 2 Ame di lam dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi laha laba tau dozeada. Labi Yesus zitu duzu modeha dam aheda labe dat nao zoho nutabedeheda ileba esu Yesus Aho avaesdam laba esum bak ozome ab vou li esuham. Dam labe ozo, “Im dat nao zoho nutabedeheda nim Yesusat modi fà neàdese,” lahame labi ozoho labe Yesus Aho avaesdam laba ab vou li nom esuham. Labi nom esuha Yesus ame dam labe iho ozom bak lam am ozobohudehemu dat nao zoho nutabedeheda niba ab gagoham. “Em adat ozomomda oa, om bisi a vi ozodamule. Obo oho faina meedàmu Alat beolo modem bak lam Eho gi vei mu fa faamome vei neàdeho.” Lahame labi gagoha netà niba dozeadaha guru zi labe ihimo ahulat aa nehi ozoda. “Oo, Da nim gi imti ulohoda baka ana modelo Aho ame da laba neha, ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahame labi gagodàla? Ame bak lam gi Alat Ahamo gagom bak akati Da nibe labi gagodàla? Da nibe gi Ala bake feàtàdam dàt mode taia?” lahame ab ozodamam. 4 Lahame aa ozodaha bak lam Yesusat Ahamo ozobohudi dam laba ab gagoham. “Um etei baka ana Eba faki, ‘Em git gagoho,’ lahame Eba ozomsu meedà? 5 Uho ozom, Eho ame nisileheda niba im gagom di im adida bisi damat aame ozobohudela? Eho nehameam, ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahame gagomeam damat aame ozobohudeo? Laham vabameam Eho gi neha, ‘Om nao zoho eloi nutabedehe bak lam Eho modi fa neàdeho. Nasi usai om ileba giame vuusu fa num bake lale,’ lahame gagomeam làhà damat aame ozobohudeo? Adida bisi damat aame ozobohudela? 6 Lahana Em Abo Asum Ahoba Iubet Bak Niba Li Dateleheda nim Ala naedat Eba gagu olu Eho fa im dedateli ot vai meit faina meedàmu Alat beolo modem bak lam Eho gi vei mu fa faamome vei neàdem meoda Em am bak. Lahana Eho labihasu meedam bak lam um biem bake Ebe Eho etei modelo modem bak nim um nasi aasu vou faomale. Labi dat nao zoho nutabedeheda nim Eho modi fa neàdi usam bak uho aameam làhà um laha neo, ‘Em meit faina meedàmu Alat beolo modem bak lam Eho gi vei mu fa faamome vei neàdem meoda Em am bak,’ laham bak etei um laha aame vi ozobohudem bak.” Lahame Yesus labi vameadume neàdi ame dat nao zoho nutabedeheda laba ab gagoham. “Om usai om ileba visoi vuusu fa om num bake vou lale.” 7 Lahame Yesusat gi etei labi gagoha ame da labe fa neàdi damat aasdahit amti usai am ileba visoi giame vuusu am num bake fa ab vou laham. 8 Labi ame bak lam ame dam duada zi labe aahemu àvodi anekehàso it gaadam labe ahu adat iedi Ala bake ab vou baedamam. “Im amu na im feàna lamohona ba aaha vabak. Gi etei alimeat Alat Am feàna dat bakdate vizi im dedateli fa dam bake im feàna meedam bak im ab aaham tame,” lahame àvodi Ala bake ab vou baedamam. 9 Labi Yesus ame bak lam vou esmozi ladam di labe aaha dat ee gagom Matius abo Yahudit modemda ab aaham. Im aho meedamda gi nehadam bak. Am Yahudi dam totbaho laba gagodume gi teo vi vaiam doi abo pajak lam aho vame fa Kaisarleheda laba loida. Ame doi lam atem dam meida Matius am bak. Am gi ame doi vadam num buà laba aidamna Yesusat am alihi aahemu ab gagoham, “Om Ebe Eho vahokedam im ozobohudelo vi tau meedam datelele,” lahame labi gagoha Matiusat usai Yesus bake ab vi tau meedam dateleham. 10 Labi ba neo Matiusat am na àdehena zi àlo Yesus Aba vi tau meedam dam lamti gagome am numa na àm bake ab leham. Di lam Matius bake tau meia gi teo vi vaiam doi vadam dam totbaho zi lamti labi damat neha, “Faina modeho,” lahame ozomsum dam totbaho lamti labihasu ba li tau vazisi ame na àdehena zi lam ab àdamam. 11 Laham bak lam Farisi dam labe aahemu Yesus bake vi tau meedam dam laba vi ailo ab gagoham. “Uba vuusdam guru labe akati modi meia gagu gi teo vi vaiam doi vadam dam zi lamti labi damat neha, ‘Faina modeho,’ lahame ozomsum dam lamti vazisi na zi vàmtea àdàla?” 12 Lahame vi ailo gagoha Yesusat fa dam laba im totobe nidi nim nehame ab fi koadamam. “Uho ozom, dam aheda dokter abo obat vuusumdate lam meo? Vabà! Gi dam gaileheda ihimo obat vuusumdate lam bak. 13 Ebe Eho bak niba li meedam bak um biem bake nasi meit Alat Vameadaha Im Toedahana laba im meida nim aame ozodale. Alat aham di iube Israel dam bake neha: ‘Uho bak niba esdam di bisi uho meedam im tombuda gi neham bak. Uho gi meia aame faobekesi im neà bak tau meedale. Uho labihasu meedam labe Em ahu bisi deelem bak am bak. Lahana ubu uho faina meedam bak fa faatom bak laba ozome na fi ho Eba lolo modemu oteme vua vahudam bak lam Em mahate deelem kaio.’ Lahame aham di iube toeme esuhu im lam uho mahate vi ozome ozobohudele. Neham bak. Eho bak niba lehe bak neham bak ozome lehe vabak. Damat neha, ‘Im abo Alat gagu fi hasi esuhu im zi ahebu ulohodesu vamdesu meedam dam im am bak,’ lahame ahobat neàdem dama Eho neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe vabak. Em gi damat neha, ‘Iho faina meedam damat modem bak,’ lahame it ozome gagodam dam laba neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe bak,” lahame Yesusat ab vameadaham. 14 Labi im lada lam vahokedume neàdi ba neo Yohanes Mei Vuu Valo Baptisleiamda labe aba aho vahokedam im ozobohudelo vi tau meedam dam labe ihimo Yesus bake li vabi vi ailo ab gagoham. “Im Yohanesat aba aho vahokedam im ozobohudelo vi tau meedam dam nimti Farisi dam lamti iho Ala bake tom gagodalo modemu ahit na àm mu izidam meo bak. Ne lahana akati modi dam Oba vi tau meedam dam lam labiham vaba modela?” 15 Lahame labi gagoha Yesusat gi damat Aba ba modem im laba ozome im totobe nidi nim nehame ab fi koadamam. “Dat soao labe nam soao valo na vahedam di labe ame da labe amti ot deeliam dam laba gagu vahi deelehat na àdam meo dam taia? Labi laha dat soao labe nam soao valo modemda ehe lahasuhu di lam am dam gi deeli na àm meo dam taia? Lahana ba diamut ame nam valo modemda lam modat li si utasi ve vou le setem di lam am dam totbaho labe im ahu faidi na àm mom di am taia?” lahame ab vi vameaham. 16 Labi im lada lam vameadume neàdi Aho neo Yahudi dam labe im tai ahamda zi labe ibi iho vou vahoke usehe im lamti fa Aba Aho etei li vou vahoketedam im gàhàna nimti ulohodesu fa vahem biem bak laba vi ozome neo im totobe nidi nim ab vi fi koadamam. “Meit am sue amu soa dusumda vàusi bumatalemeam làhà ba sue gàhàna baa amu valo kikeme modi koedehe vabna zoho vaitoi ame sue vàuhu bak laba taasu tadem vabak. Labihameam ame sue etei tadeheda lam fa valo kikeme àga bake esu dehalem di ame sue gàhàna zoho lam gi ahamo fa koedi etei tadehena etehàso lam ziambitoi vàusi bumat olozebalem bake ozome ahit moho bak. 17 Labi laha meit anggur oo gi etei unaha vaksa gàhàda fi kidi neàdehe vabda lam ba kambing fi ho sokba amu buhaleme bugeahana modi esu dehalehena laba fedem vabak. Meit labi modemeam ame na vaksa lam ba fi kidem labe ame na sokba amuda lam gi modi fi fasi ame na vaksa lam gi bake veàtom bak. Labi ame na sokba lab fedehena lamti gi amait vàhàdeme setem bak. Labiham bake meit ame na lam ba ozome modem vabak. Gi ame anggur vaksa gàhàda lam fa ame na sokba gàhàda buhaleme bugeahana modi laba fedem bak. Labi modem labe ame na sokba lamti ame na vaksa lamti gi amait iademe fi kidi neàna modesdam bak,” lahame Yesusat ame im totobe lam ab vameadaham. 18 Labi Yesus gi etei Yohanes Mei Vuu Valo Baptisleiamda laba vi tau meedam dam laba vameadam lahasuhu di labe dat meida abo Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba vou aasdamda meida labe Yesus bake lefusi ozo, “Yesus abo feàte,” lahame am ahu adat iedi Yesusam naba modesdam bak laba netàdi ogomasu ahit bake ab biteham. Ogomasu biti tauledume gago, “Om etei eba tau taho num ebedate lase. Em adnamat gi etei eloi bisdalo. Om eba tau le em adnamat koeiso laba Om anekehàt odosu gagomeam fat ahedi usam bak.” 19 Lahame labi gagoha Yesusat usai Aba vi tau meedam damti ame da laba tau vahi ab ladamam. Labi ladam di labe gi dam duali bak kekesi gi mei soat osiddam labe lada. 20 Labi ladam di labe zie doni laba nam abo bako itaha bak bohu vuusdume dua belas tahun fuhu nam nibe laha nem futoi tau Am ohuse duzu vi vueda. Vi vuedam labe ozo, “Em gi Yesusam sue ahoba dusuhuda sona bohu noma zoho aha obe laba ulameam làhà em bako itaha bak bohu vuusdam bak nim fa neàdem bak,” lahame ozome lehe labe Yesusam ohus tote aa vi vuli netàdi Am sue laba ab vi ulaham. 22 Labi vi ulaha Yesusat it vaktesi ame nam laba ab gagoham. “Oi, om a bisi vi ozodamule. Oho neha, ‘Yesusat eba modi fa neàdem bak,’ laham bak oho nasi tu vuzehehe labe om fa ab neàdeham bak,” lahame gi etei labi gagoha am bako itaha bak bohu vuusdam bak lam fa ab neàdeham. 23 Labi laha labe le ame da Yairus abo Yahudi damat ihimo fi hasi meedam num laba vou aasdamda labe am numa vou fusi oli aiha abo bisi dahobu bak ab aiham. Dam dua totbaho labe nimidam labe meb dae meeda. Labi dam totbaho labe im mabso fi stehena ee gagom suling lam laha vuusualame koei esulo modem di suling dae meeda. Labihadam dahobuna feà Yesusat ab aidamam. 24 Ame bak lam aihemu ab gagoham. “Um ahebu nasi futodale. Bisi a medaomule. Um adnamat eloho vabak. Gi iddalo,” lahame labi gagoha ame dam labe im koei nim eloho bak ozobohu labe fa Yesus bake vi igeame ab tozodamam. 25 Lahana ame dam futodume neàdi Yesusat gi ozahit ame num oula koei ousdamda laba vi oli koei laba netàdi am anekehà vuu visoi gago, “Ednamat oa, usale,” lahame labi gagoha adnamat nim it oazi lahana fa leheilahit ab ahedeham. 26 Labi etei Yesusat damat ihimo modem biem im feàna lam abo data elohona Aho lab modi fat ahedehe im lam kehàm vaba damat aime fa ame bak laba ab vou fi desi uloholeham. 27 Labi ame bak lam vou esmozi Yesus neo ladam di labe fako faidi na aam biem dam behàsu ame zie obe laba aidameam aiha Yesusat lebohotelo modem bak meit iba gagohemu fa nem futoi dam duada ohus laba vi duzu vulada. Vuladam labe Yesus bake vi budda. “Yesus abo Dat Ahamda Boehàda Daud Vou Faat Lehe Mekehàda oa, Om iba aame faobekesi im neà bak tau meedaleee. Alat Gagu Fihasi Vimteme Oluhu Dat Boehàda, ‘Om am tame,’ laham bak im ozobohuteee.” 28 Lahame labi vi bute ladameam Yesus le numa ab oleham. Làhàmu ame dam fako faida behàsu nibe neo vi vule ab oleham. Labi oli modeha Yesusat gut ailo gago, “Uho nehi ozome Eba lehe? ‘Um fako faidehe bak Eho modi fa neàdem bak,’ laham bak lam uho ozome Eba labi tuhu labe lehe?” Lahahat ame dam behàsu labe fa gago, “Lo, imbo bak. Ai Elaidamda, Oho labi modem bak lam im tuhu bak.” 29 Lahame labi gagohemu Yesus Am anekehà fa dam labe im fako laba odosu gago, “Uho Eba labihasu tu vuzehi meedàmu Eho ab modi neàdeham bak.” 30 Lahame gi etei labi gagoha ame dam ahim labe im fako faidehe bak lam modi fa na aam bak ab neàdeham. Labihazobe Yesusat fa dae meobeat mali ab vi gagoham. “Eho etei um fako faidehe bak modi fa neàdehe bak lam meia a le fi demule.” 31 Lahame mali gagoha ame dam ahim labe ame num labe futoi laha labe kehàm vaba dam bake ab vou fi det laham. Abo Yesusat iba im feàna modehe bak lam ame bak laba dam ahebu vou fi desi ab uloholeham. 32 Labi ame dam behàsu futoi neàdi dam aheda labe neo dat amu setan oli veimai dae vabaleheda labe am anekehà vuusu Yesus Aho avaesdam laba ab vou le vou duzuham. 33 Labi Yesusat ame da laba, “Setan taho futoi itale,” lahame labi gagoha ame setan lam futoi itame modeha ame da nibe fa dae faasi im ab vameadamam. Labi modeha dam duada zi labe ame bak lam aahemu àvodi ihimo im ab ot gagoi ot gagoidamam. “Aa làhà! Ibi iho Israel damat azihi bak niba im feàna lamohona im amu aaha vabak. Gi etei alimeat ab aaham bak.” 34 Lahana Farisi dam labe laha ame bak lam tau aahanàme ba labiham kai. Vedi neha, “Mei ahu oli veimam setan zi labe im boehàda Iblisit aho ame Da laba modi vizi teudehe labe Aho ame setan zi lam gagu futodume ilidam bak,” lahame ab ozomsu gagodamam. 35 Labi im lada lam modeme neàdi ba neo Yesus Aba vi tau meedam dam lamti iho vazisi ame bak lam vou esmozi num debu mei num debu meime godam di labe aho Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num dozeadaha bak laba olidume Alat Vameadaha Im Toedahana lam aame gagodume vi vahokeda. Labi laha, “Alat dam bake deeli vame Am damali vuusu im vahokedam bak lam, ‘Akatihasu modemna modela?’ ” laham Im Neàna lam vou vameatedume fi deda. Labi dam nisilehe bak ahaladi ahaladiame faidehe dam lamti labi dam ahaladi ahaladiame gailehe dam lamti ahebu Aho modi fa neàdeda. Labihada. 36 Labihadam labe aaha dam dua bak Aba valadam bak aam faimu ab faobekesi meedamam. Aho nehi ozo. Dam lam domba na vou aasdamda vabalehe bakti uloho bak. Ame dam lam iba vuusumda vabali naat iba vabidam labe, “Bisi im vamdesu meedam bak akete?” lahame gi ladehena dauhali meedam bak aahemu Yesusat ab aame faobekeham. 37 Faobekesi meedam labe Aba vi tau meedam dam laba ab gagoham. “Gandum dua bak amdi bozileho. Lahana ame gandum nim modeme vahedam dam koete. 38 Labihàmu uho utoho deda laba abo Em Ai Ala bake nasi nehi tom gagodale, ‘Ai oa, Oho fa dam na modeme vahem dam totbaho laha gagodume Om utoho laba oudume Om gandum fi kbodume vahedase. Abo dam Oba tuhuda amomoi laha gagome fa dam Oba tuhu vab dam labe iho azihi bak iuba oluidume Om Adat meedaha Im Neàna lam vou vameatedume uloholele,’ lahame mahate dihasi tom gagoda. Labi neo dihasi tom gagoda. Labihadale,” lahame ab vameadaham.

Matius 10

1 Labi ba digat meida iube Yesus Aba vi tau meedam dam dua belas gagome ledume ab li dozeadaham. Dozeadume neàdi Yesusat fa ame dam dua belas laba im nehasu modi vizi ab im dedamaleham. Mei ahu oli veimam setan mei setan mei laba gagu futodume ilidam bak ame. Labi meia vizi gailemna ahaladiahana ahebu laha modi fa neàdedam bak ame. Labi nisilehe bak ahaladiahana ahebu laha modi fa aodedam bak ame. Yesus Aho neha, “Uho labihasu modem neàte,” lahame Am dam dua belas laba ab gagu ab vizedaham. 2 Yesusat Aho gagu olu Am im vameadume esmozi laiam dam dua belas lam neha: Simon ee Yesusat ba taluhuda Petrus ame. Labi am vahada Andreas ame. Labi Zebedeusam adam behàsu Yakobusti am vahada Yohanesti labihasu ame. 3 Labi Filipus ame. Bartolomeus ame. Tomas ame. Matius ame. Ame da Matius lam gi meia teo vi gagome vaiam doi pajak atem dam meida am bak. Labi Alfeusam adat Yakobus ame. Tadeus ame. 4 Labi Simon Meohoda ame. Labi neo Yudas Iskariot ba Yesus otem bake vou foholo modemda ame. Labihasu Yesusat debe ab Aho gagu olu Am im vameadume esmozi laiam damaleham. 5 Labi Yesusat Aho gagu olu Am im vameadume esmozi laiam dam dua belas lam gagu olulo modem di labe im nehasu fet ab vi vameadamam. “Eho etei uba gagolo modem im nim uho le meedalo meedam di uho Yahudi damat modem vab dam labe im num debu mei num debu meime a ladamule. Labi laha Samaria bak labe am num debu mei num debu mei lahadume azihi dam laba a ladamule. 6 Gi im Yahudi dam abo dat ahamda Israel labe aba aho vou faat lehe dam totbaho abo domba vou aasdamda vabalehe bak lamti uloho dam laba ladale. 7 Uho ame dam laba ladume lafusi im vou vameatedam di labe im nehasu vameadale. ‘Alat Gagu Fihasi Vimteme Oluhu Dat Boehàda lam etei bak niba lehemu Alat Ahamo Boehàdateboli dam bake deeli vame Am damali vuusu im vahokedam bak lam etei ab faasi gàhàli meedamam bak,’ laham im lam uho ame Israel dam laba vou vameatedume fi dedale. 8 Labi laha dam gaileheda uho modi fa neàdeda. Labi dam gi etei elodahada zi uho modi fa ahedi usnada. Labi sokba faidi vàhàdem bohu vuusdam dam zi lam uho laha modi fa neàdedume fa dam aheda modi fa vahe vaheda. Labi mei ahu oli veimam setan uho fa gagu futodume ilidume fa vei neàdeda. Uho labihasu meedale. Labi uho lab meedaha bake gohali na a vi gagu vamule. Gi ule neàt meedam tadele. Neham bak. Amu Eho uba modi vizehe di lam uho Eba naat vaha vab labe abo Eho gi uba ule neàt modi vizehe bake ulohona labihadale. 9 Labi uho lam di gi saemea ladale. Damat emas modi doilehena lam modeo, perak modi doilehena lam modeo, tembaga modi doilehena lam modeo, labihasu a dume vou ladamule. 10 Labi laha nazoh dumna a vou ladamule. Labi laha sue sona ada dusumna modeo, sepatu modeo, gi ubu uho dusuhuda lamota vou ladam neàte. Labi laha um odoamso lam gi niba vou esmozi ladale. Neham bak. Uho ame dam laba le tau meedam bake ame dam labet uba gohali sue modeo, doi modeo, na àmna modeo, uba fà lodase. 11 Labi uho ame num debu bak modeo, sii bak modeo, iuba ladume lafusi, ‘Uho num amabadate tau azie?’ laham bak ozolo modem di nasi, ‘Amat am num uba uledi gagu azie?’ laham bak lam nasi nabidale. Nabidume aime neàdi ame num vàmtea lamota laba tau azile. A num iudu iuba le i. Num iudu iuba le i. A labihadamule. Gi num ubu uho azimda lamota azibe neo num debu amomoi bake neo le ame baket mode. Lahadale. 12 Labi uho ame num laba olelo modem di labe im nehasu num deda laba gagodale. ‘Neàte. Im Boehàda Alat Ahamo uba neà bak modi esuse,’ lahame gagu olele. 13 Labi uho ame num vàmtea laba azim di num dedamat uba iademe gut ve meedameam làhà uho amu lab oli gagoho im lam, ‘Im Boehàda Alat Ahamo uba neà bak modi esuse,’ lahame lab gagoho bak lam gi labihasule. Lahana uho ame num vàmtea laba azim di ame num dedamat uba iademe gut ve meedam vabameam làhà nasi uho amu lab gagoho bak lam fa vi faatoi vou esmozi neo ladale. 14 Labi uho mei num modeo, num debu bak modeo, uho ame bak laba lafusidam di aimeam num deda labe aho modeo, ame num debu laba azihi dam labe iho modeo, labihasu ubu uho vou lehe im lam aim moudume im bak malemeam làhà uho ame num debu bak lam vou esmozi fa neo ladale. Vou esmozi lalo modem di labe um naba bak itabe fau foamome vou esmozi fa neo iuba lale. Labi dam labe vi aame nehi ozom bak. ‘Aa làhà! Iho dam labe vou lehe im aihi vabake im bak itabe fau foamohe? Labihalahit Alat iba beoe taia?’ laham bak vi ozom bak am tame. 15 Em ba giomim gagoho vabak. Labi eho etei uba neo gagolo modem im imboda nidi nim laha iademe aime ozodale. Ba diamut Dam Bake Uloodume Vi Aime Ozobohudi Neàdi Fime Fahedam Digat fum di lam ubu uho vou lehe im lamti umti ule neàt vaha vab dam lam beodam di abo duana beoda tame. Lahana dam ahamda num debu Sodom laba azihi dam lamti labi num debu Gomora laba azihi dam lamti dam lada labe bisi faina meedaha bakta imbot. Lahana eho etei uba gagu olu ubu uho lab vou le meedaha bak lam aaha vab labe Alat ba beom di mahate duana beodam kaio. Gi fota beodalo modem bak,” lahame ab vameadaham. 16 Labi Yesusat neo vi susume nehame vameada. “Um nasi ozodale. Eho etei uba gagu olulo modem di nim um gi domba adatea nembedati ulohona fa dam abo serigala meo feà bakti ulohona laba olulo modem bak. Labihàmu uho mei bake lam di gi moket meedam bakti ulohona iademe ozome vatohedale. Labi uho dam laba le Eho uba lab gagu oluhu im lam meedam di gi bume dolet ilabdem bakti ulohona ahu nemahuba neàt meedale. 17 Labi laha Eho etei uba lab gagu oluhu bak lam uho mei bake le meedam di labe uho Eba tu vuzehi vi tau meedam damat modemu Yahudi dam labe ibi iho tu vuzehi meedam bak gagu faheme modiam dam labe fa uba faki vabidume fai baket meedam bak ehe labe iademe it vou faovoi meedale. Neham bak. Uba fakemoholehe dam labe um siàdume fa Yahudi dam labe ibi iho tu vuzehi meedam bak gagu faheme modiam dam labe ibi iho meit im modem diat ulooiame aim dam debu koeda laba ub loda tame. Labi ame dam labe uloodume aime neàdi fa uhumo fi hasi bakamta vahi Alat vameadaha im ahamda dogoit aidam bakti im meiti meedam num laba um vou oli na sokba nasbe ahit alibulehena labe uba foadume geàda tame. 18 Labi laha uho Eba tu vuzehi vi tau meedam damat modemu uba fakemoholehe dam labe ozo, ‘Im boehàda zi labe laha neo uba uloodume vi aime beodase,’ laham bak laba ozome um neo si bak ahaladiame vuusuidam boehàdatebo zi lamti dam eeda zi lamti laham dam laba vou le duzu uba uloodume aida tame. Lahana ame bak lam meedam di a iedemule. Neham bak. Uho ame dam laba neha, ‘Iho Yesus bake tu vuzeheho,’ laham bak ahate vameadam bake Alat ahit uba modi labihada tame. Abo Ebe Eho meedam im lam fi desi tombalehe labe fa ame Roma boehàda zi lamti Yahudi damat modem vab dam totbaho lamti iho fa aime ozobohudem bake labihadam bak. 19 Lahana ame Yahudi dam eeda labe um si vou ladume ame boehàda zi labe uba tet uloodam di labe uho fa dam laba fa gagom bak lam, ‘Iho im akatihasu fa vi gagoela?’ laham bak lam a bisi vi ozodamule. Neham bak. Em Ai Alat uba modi fi gatehe labe uho gi ame im lam fa ame dam laba fa gagoda tame. 20 Ame di lam ba uhumo gagodam vabak. Gi Em Ai labe Am Aha Nutabe Neàna Labe fa uba modi vizehe labe uho ot vai gagodam bak. 21 Labi ame di labe neham bak modem bak ehete. Um Eba vi tau meedam damat modemu dam duadat uba faki im nehasu meeda tame. Dat meida lam Eba tu vuzehe vabda labe am vahada Eba tu vuzeheda lam vou fohome meia ub lu otem bak ame. Labi dat meida lam Eba tu vuzehe vabda labe am dubu Eba tu vuzeheda lam fa vou fohome meia ub lu otem bak ame. Labi dat meida lam Eba tu vuzehe vabda labe am data Eba tu vuzeheda lam fa vou fohome meia ub lu otem bak ame. Labi mei data labe am ai modeo, am oi modeo, ibi iho gagoho im lam voou fa daet bohudi vou fohome meia ub lu otem bak ame. Labihada tame. Lahana Eba tu vuzehi meedam dam lam naat iba vabidam di iho gi ozahit keàtedi tu vuzehi meedam bohu vuusdume digat ba novai vaitomda laba fusi meedam lahasuhu dam lam Eho soat vausu fa vei neàdedam dam am bak. 23 Labihàmu uho bak mei bake lam di ame dam labe uba gut vabidume fai bak meedameam làhà dam lada lam vou esmozi fa bak mei bak iuba lale. Neham bak. Eho etei uba lab gagu uho meedalo meedam im lam uho Israel dam bake abo num debu mei num debu mei lahadaha dam laba uho le meedume gi neàdehe vabna Em Abo Asum Ahoba Iubet Bak Niba Li Dateleheda nim Em alihi damat ba fa aam bak. 24 Eho etei uba totobet fi koadalo modem im nim mahate vi aime ozobohudele. Neha: Meit vahokedam bak aidamda labe aho ba aba vahokedam guru laba fa vafozi feà datelem vabak. Labi laha mei na meedamda labe aho ba aba im gagu modiamda laba ba vafozi feà datelem vabak. Ame bak lam gi neham bak. Damat Eba fai bak meedameam làhà uho ozom, um Eho vahokedam dam niba ba damat fai bak laha meedam vaba? Vabà! Gi umti damat laha fai bak meedam bak. Neham bak. Em bak niba esdam di Em gi uba im gagomda Boehàda Em am bak. Labi uho Ebe Eho gagoho im aime vuzehi meedam dam um am bak. Labihàmu damat Eba neha, ‘Em gi setan zi ahebu vuusdam boehàda Beelzebul Em am bak,’ lahame Eba labihasu vàlu feàtàmeam làhà uho ozom, uba ba labiham vaba? Modem bak. Lahana uho Eba vi tau meedàmu uba fa duana feàtàdam bak,” lahame ab vameadaham. 26 Labi Yesusat neo nehame susume vi vameada. “Uho bak iuba le im Ebeda vou vameatedam di ame dam labe uba faki fai baket vabidume meedam di lam ame dam laba uho a iedi vi ozodamule. Neham bak. Alat Ahamo Boehàdateboli dam bakdate deeli vame Am damali vuusu im vahokedam bak lam, ‘Akatihasu modemna modela?’ laham bak lam amu fi zeam bitoi tombalehe vab im lam ba gi labihasu vastem bohu modesdam vabak. Abo ame im lam ahate vameame fi zeam bitoi tombali dam ozobohudem bak ehe bak. 27 Neham bak. Eho amu uba neha, ‘Alat Ahamo Boehàdateboli dam bake deeli vame Am damali vuusu im vahokedam bak lam ab faasi meedamam bak,’ laham im lam eho amu uba aa vameame fi gatehe im lam uho fa etei ot vai fa dam bake ahate fi desi vameadale. Abo Eho um dogoi bumat laba si aa vameadam im lam uho laha fa etei ot vai fa dam duadat odosdam bak laba le bisteat ahate vameadume fi dedale. 28 Labi uho dam bakda uba gi soabota oteme voom dam laba a àvodi vi ozome iedemule. Dam lam um otem di um so lam gi lab eloi vooho tadem bak. Ba neo um eloi it oazehena lam vi vabidam vabak. Labiham bake ame dam laba uho àvodi a iedemule. Fa gi nehale. Im so nim Alat modi elomnàme fa neo iho lab eloi it oazehena lam vi ve fa vua eludamna sutem gikina bohu laba voom bak ehete. Labiham bake ubu uho bisi àvodi vi ozome ahu adat iedelo modemeam làhà Na Debu Modehe Ala laba iedele. 29 Neham bak vi ozomale. Damat gena bume keobena nu vabna vam di, ‘Feà kaio,’ lahame ba doi oona tembagat modehena lam vam mom meote. Lahana ame bume keobena lam Alat faobekesi vou aasdam bak. Alat, ‘Ame bume lam biti elom neàte,’ laham bak uledem vabameam làhà ame bume lam meida buà ba bake biti elom vabak. 30 Lahana ame bume lamota vou aasdam vabak. Alat laha uba vou aasdam labe ba um meida buà vabiem vabak. Abo um ahebu vi ozobohu tadehe bak. Abo um ohuta tau keobebe lam Alat laha amu gi debe uloholi ozobohudi esuhu labe Alat um ba vàmtea vabiem vabak. 31 Labiham bake Alat ame gena bume keobe zi laba deeli vou aasdameam làhà im dam bakda laha tau vou aasdam bak. Lahana bisi aho deeli vou faovoemda im dam am bak. Labiha labe ame dam bakda amomoi labe uba otelo modem bak modeo, uba faina modelo modem bak modeo, uho a bisi vi ozodume iedemule. 32 Meit ladi iedehe vabna dam duada labe iho avaesdam laba le ahate duzu nehasu gagomeam, ‘Em Yesus bake tu vuzehi vi tau meedamda em meida am bak,’ lahame ahate labi gagomeam làhà Eho laha ba Em Ai asum ahoba iuba azim Ala labe Aho avaesdam laba Eho le duzu nehame gagom bak. ‘Da nim Eba tu vuzehi vi tau meedamda meida am am bak,’ lahame ba diamut Ala bake ahate labi gagoda tame. 33 Lahana meit ladi vei iedi dam duada labe iho avaesdam laba le duzu ahate nehameam, ‘Em Yesus bake tu vuzehi Aba vi tau meedamda modem kaio,’ lahame vei iedi Eba momeam làhà Eho ba Em Ai asum ahoba iuba azim Ala labe Aho avaesdam laba le duzu laha nehasu gagom bak. ‘Da lam Eba tu vuzehi vi tau meedamda modem kaio. Em bieho,’ lahame ba diamut ahate labi gagoda tame,” lahame Yesusat ab vameadaham. 34 Labi Yesusat neo nehame susume vi vameada. “Uho nehame ozohe? ‘Dam mei debuti dam mei debuti Eho fa vahe vahedalo bak niba leha,’ lahame uho labihasu ozohe? Làhà um git ozoho bak. Ba labiham vabak. Eho bak niba lehemu dam Eba tu vuzehe vab damat fa Eba tu vuzehe dam laba faki oddam bak. 35 Eho bak niba lehemu dam Eba tu vuzehe vab dam lamti fa Eba tu vuzehe dam lamti nehi ot fakiame ot beluidam bak. “Am adat fa am ai bake faki meeda. Labi am adnamat fa am oi bake faki meeda. Labi Am taai labe fa am tai bake faki meeda. 36 Labihadam labe iho nehi ozom bak. Uba fakemoho dam lam gi um dam debu am bak. Ba dam giida oba fakem vabak.” 37 Neham bak. Meit am ai modeo, am oi modeo, bisi duana deeli meeda. Labi Eba gi fota deeli meedamda lam ba neà vab labe Eho ba neha, ‘Ame da lam Eba tu vuzehi vi tau meedamda am am bak,’ lahame Eho ba labi gagom biem bak. Labi laha meit am adat modeo, am adnamat modeo, bisi duana deeli meeda. Labi Eba gi fota deeli meedamda lam ba neà vab labe Eho ba neha, ‘Eba tu vuzehi vi tau meedamda am am bak,’ lahame Eho ba labi gagom biem bak. 38 Labi laha meit neha, ‘Eho Yesus bake tu vuzehi im Abada meedàmu damat em si ut tetehesuhunaso lam ve lu vatu vou ladam di lam damat eba aasdamnàme gi ozahit vou le em paku dou elom neàte,’ lahame Eba labihasu tu vuzehi gagu vàmadem vaba vedi iedi momda abo Emti uloho vab labe Eho ame da laba, ‘Eba tu vuzehi vi tau meedamda am am bak,’ lahame Eho ba labi gagom biem bak. 39 Neham bak. Meit aba aho Eba lab tu vuzehehe bak lam ahate gagomeam damat am otem bak labna zohàme it vou faovoi vei iedi ahit biehenali, ‘Em Yesus bake tu vuzehi Am damalem kaio,’ lahame veibadamda lam ba Alati vahi gi ahe neàna bohu vuusdam vabak. Laham vaba meit bisi it vou faovoi elom bake vei iedem vaba ahatet neha, ‘Eho Yesus bake tu vuzehi Aba vi tau meedamda em am bak,’ lahame gagu afoezobe damat am otemeam làhà ame da lam ba Alati vahi gi ahe neàna bohu vuusdamda am am bak. 40 Uho bak mei bak iuba lameam meit uba ahu ule neàt gut vamda lam Alat ozom di ame da labe gi Eba laha ahu ule neàt ab vaham bak. Labi ame da labe Eba ahu ule neàt vameam làhà Eba Gagu Oluhuda lam abo Em Ai bake laha ahu ule neàt vaha bak. 41 Labi meit neha, ‘Da lam abo Alat gagu olu Am im ot vai fa iba ahate vameaidamda meida am bak,’ lahame am ahu ule neàt ame da labe etei iba leheda laba tu vuzehi gut vameam làhà Alat ba diamut ame da nibe aho lab tu vuzehehe bak lam gohali lomna lom di gi ame da nimti labi ame da nibe aho ule neàt gut vahada lamti amait ame na ulohona ba lodam bak. Labi meit neha, ‘Da lam abo Alat gagoho im vuzehi vamdesu meedamda meida am bak,’ lahame am ahu ule neàt ame da labe etei iba leheda laba tu vuzehi gut vameam làhà Alat ba diamut ame da nibe aho lab tu vuzehehe bak lam gohali lomna lom di gi ame da nimti labi ame da nibe aho ule neàt gut vahada lamti amait ame na ulohona ba lodam bak. 42 Ebe Eho vahokedam im ozobohudelo vi tau meedamda meida nim abo damat neha, ‘Feà vab dàt moz,’ lahamda nim meit ozo, ‘Da lam laha Yesus bake vi tau meedamda meida am bak,’ lahame ozome gi vaota noai lu udemeam làhà Alat ba diamut dam bake gohali lomna lodam di ame da laba laha tau lodam bak. Ba loho vaba alia modem vabak,” lahame Yesusat Aba vi tau meedam dam dua belas laba ame im zi lam ab vahokedaham.

Matius 11

1 Labi Yesus ame im zi lam Aba vi tau meedam dam dua belas laba vi vahokedume neàdi ab oudaham. Labi oudume neàdi Yesus ame bak lam vou esmozi Galilea bak labe am num debu iudu iumti num debu iudu iumti abo Yahudi dam lamota vou vahoketeda. “Alat Aho Ahamo Boehàdateli dam bake deeli vame Am damali vuusu im vahokedam bak lam etei Aho modi fa gàhàlehemu meit Aba Aho etei Gagu Fihasi Vimteme Oluhu Dat Boehàda laba tu vuzehi meedameam làhà ame da lam ab Alam damalemam bak,” laham Im Neàna lam vou vahoketedume vi vameadume fi deda. Labihada. 2 Labi ame di lam Yohanes Mei Vuu Valo Baptisleiamda labe gi damat amu si sel laba ousdam dàt meit li vameadahana ab aiham. “Obo oho neha, ‘Alat Gagu Fihasi Vimteme Oluhu Dat Boehàda am tame,’ lahame ozodamda labe Aho num debu iudu iumti num debu iudu iumti im vou vahoketedalo,” laham bak meit li vameadahana Yohanesat ab aiham. Labi ame im lam aihemu Yohanesat aba vi tau meedam dam gagome li duzu neàdi fa im nehasu vameame Yesus bake ab oluham. 3 “Uho Yesus bake le gagu aile. ‘Dam ahamda iube neha, “Alat ba diamut Aho Gagu Fihasi Vimteme Olulo Modem Dat Boehàda iba Israel dam bake olu tame,” lahame fet gagu vou vamea useheda Om ame Da ameo? Om ame Da modem vabameam làhà iho gi fa dat amomoi ba olum bake vou faodào?’ laham bak lam uho Yesus bake le gagu aile,” lahame labi vameadume neàdi Yesus bake ab oluham. 4 Labi ame dam labe Yesus bake le lafusi ame im lam gagoha Yesusat fa ab gagoham. “Uho etei li aaha bak nimti labi Eho vameadaha im uho aihi bak nimti labihasu fa le Yohanes bake vameadale. Eho nehasu meedam bak: 5 Dam fako faidi na aam biem dam labe im fako fa neàdedume na aada. Labi dam nao zoho nutabedehe dam lam laha fa neàdedume usnada. Labi dam sokba faidi vàhàdem bohu vuusdam dam lam laha modi fa neàdeda. Labi dam dogoi faidi ulaihàbulehe dam laha modi fa im aim neàdeda. Labi dam elodaha dam laha modi fat ahededume usnada. Labi laha Ebe Eho meedaha Im Neàna lam Eho li vameadam bak lam dam na vab dam labe iho aida. Eho labihasu meedam im zi lam uho fa Yohanes bake vou le vameadale. 6 Labi uho im nidi nim Yohanes bake vou le laha vameadale. Meit nehame ozo, ‘Alat Gagu Fihasi Vimteme Oluhu Dat Boehàda lem di im nehasu meedam bak,’ lahame aba aho ozoho bak lam Eho meedam vabnàme gi ozahit Eba tu vuzehemda lam Alat gi im neà bak modi esuiamda am bak,” lahame ame dam laba ab vameadume fa ab oluham. 7 Labi Yohanes bake fa ladam di labe Yesusat fa neo dam duada zi laba, “Yohanes ana dàt modela?” laham bak lam ab faasi vahokedamam. “Uho neha, ‘Imo le Yohanesam im aidase,’ lahame bak aotba baa bohu dam vaba alim bak laba lalo ladaha di lam um baka ana aalo ladahela? Uho gi ket et nutabet ulasi vou lai vou laidam bak aalo ladaheo? Vabà! Um ba labi ozome laha vabak. Yohanes abo meit vameadam im aim di ket et labe fi zuhusi bedem bakti uloho vabak. Am abo meit aba neha, ‘Im nehasu meedale,’ laham di am ba fa veimdem vab labe gi aba baket daetesu labaha bohu meedam dàt modem bak. Am abo teuda am bak. 8 Làhà um labiham vabameam baka ana aalo ladahela? Uho gi meit sue bisi neàna dusuhu bak aalo ladaheo? Vabà! Um ba labiham vabak. Dam nazoh duada labe iho sue bisi neàna dusuhu dam lam ba bak aotba baa bohu dam vaba alim bak azim vabak. Dam lamohoda gi boehàda labe im num bisi feàda lamota azim damat modem bak. Yohanes ba sue lamohoda dusu num feàda laba azim vabak. 9 Làhà labiham vabameam um baka ana aalo ladahela? Uho gi Alat vameadaha im aime fa dam bake ahate vameaidahadate aalo ladahe? Lo, imbote. Uho le aalo modemda abo ame da am bak. Lahana ame da Yohanes lam gi ame bak lamota modehe vabak. Abo ame bak labe vafozi bisi feàda am am bak. 10 Eho etei lab gagoho im lam Alat Vameadaha Im Toedahana laba im meida nim Yohanes bake nehasu vàlu gagoho bak ehe bak. Alat Am Adat Yesus bake neha: ‘Eho Em im le vameadamda nasi dam bake olu neàdi Om ba olu tame. Damat Om ule neàt gut vam bak laba ozome ame da labe nasi le duzu zie vueme neàdehena ahum Om ba vula tame.’ Lahame dat ahamda Alat vameadaha im aime fa dam bake ahate vameaidahada Maleaki labet aho fet toeme esuhu im lam ab imbodi Yohanesat ame baket ab meedaham bak. Labiha labe Eho uba neha, ‘Ame da lam ame bak labe vafozi bisi feàda am tame,’ lahame uba labi gagoho bak. 11 Lo, lamota imbot. Lahana Eho etei uba neo gagolo modem im imboda nidi nim laha nasi aima. Dam ahamda iumti dam bada nimti abo dam bakda ahebu fa vazisi Alat ozodam di bisi feàda dat vàmtea Yohanes Mei Vuu Valo Baptisleiamda am am bak. Lahana dam etei Eba tu vuzehi Alat deeli vame Am damali vuusu im vahokedam dam lam abo damat neha, ‘Feà kaio,’ lahame gagodam damat modemnàme Alat ozom di ame dam labe iho fa Yohanes vafozi feà damalem dam am bak. 12 Um im nidi nim laha aimale. ‘Damat iho faina meedam bak lam voedume fa ahu neà bak vàmadi meedam dam lam Alat fa deeli vame Am damali vuusu im vahokedam bak,’ laham im lam Yohanes Mei Vuu Valo Baptisleiamda labe aba aho amu dam bake lab vahokedam bak labet faasi vou mode ledume etei Eho neo fa ot vai vahokedam bak labet modi damat aime neha, ‘Im Alam damali Aho iba vuusu im vahokedase,’ lahame Alam damalehe dam laba dam amomoi labe meoli bohudi meedam labe geàda. Abo dam meoho damat fa ame Alat modi Am damali vuusu im vahokedam dam lam, ‘Fa iho vuusdase,’ lahame ot odosiame keàtedi meeda. 13 Eho etei Yohanes bake ozome lab vameadaha im lam abo imbote. Nehaha bak. Alat Vameadaha Im Toedahana ahebu lam dam ahamda labe neha, ‘Alat Ahamo Boehàdateboli dam bake deeli vame Am damali vuusu im vahokeda tame,’ lahame gagu vàmadi esuhu im lam gi amu aham di iube fet vameadume vou usehe bak. Labi neo Yohanes Mei Vuu Valo Baptisleiamda laba vou fusi aho fa neo ot vai ame im lam ahate vameadaha bak. 14 Labi Eho etei uba vameadalo modem im nim uho vuzeheo? Vuzehem vabao? Laham bak nasi aimale. Dat ahamda Alat vameadaha im aime fa dam bake ahate vameaidahada meida labe aho Alat gagoho im nehame fet toeme esuhu bak. ‘Alat Gagu Fihasi Vimteme Oluhu Dat Boehàda lam uho iademe gut vam bake Eho amu nasi Em im aime fa dam bake ahate vameaidamda Elia lam uba nasi olu uba le vabiedume ahumdi vou faodam bak mode tame.’ Lahame fet toeme esuhu im lam uho ule neàt vuzehemeam làhà, ‘Yohanes ame da am bak. Elia bake gi vàlu gagoho bak,’ laham bak lam um ozobohudem bak. 15 Um ahebu im ozobohuna taia? Um dogoi im aim bak ehena Eho etei lab vameadaha im lam mahate aime vi ozome ozobohudele. 16 Im meida neham bak. Dam etei bak niba esdamda ibi iho meedam bak lam Eho, ‘Akatiham bakti ulohote,’ lahame vouhome vameadàla? Làhà Eho gi neham bak vouhodase. Um dam bada nim gi data num bak tomba laba nusualadume dam busaot modem baket vouhom datati uloho bak. Ame data labe iho sikilo modem im lam fa data totbaho laba gagoha data lada labe mouda. Làhàmu ab faki tozodamam. 17 ‘Ea. Iho neha, “Imo bo foadume umti kuguidase,” lahame gagohat um akati mohela? Labi iho neo, “Umti vahi koei esum di medaom labe nimidase,” lahame gagoha um akati mohela?’ lahame ame data labe data totbaho laba faki tozome gagoda. 18 Um dam bada gi ame data labe modem bakti uloho bak. Nehaha bak. Amu Yohanes Mei Vuu Valo Baptisleiamda labe aho lehe di lam aho gi ahit na àm mu izidam bak. Labi laha ahit ba anggur oo vaksa meona uddam vabak. Labihamda modehe labe ame dam labe iho aame vi ozo, ‘Ibi iho na àme im gagu igeadam bak lam iho ame da laba gagoha akati aho modem vaba ahit na àm mu izidàla?’ lahame faki vedi mu nehi vi tozoda. ‘Ea, da lam gi setan oli veimai meedam dàt modem bak,’ lahame mu vi tozoda. 19 Labi laha Em Abo Asum Ahoba Iubet Bak Niba Li Dateleheda nibe Eho ba neo lehe di lam Em gi na àda. Labi laha anggur oo vaksa meona udda. Labi im gagu igeadam baket meeda. Eho labihamda modehe labe ame dam labe Eba aame vi ozo, ‘Ibi iho ahit na àm mu izidam bak lam iho ame da laba gagoha akati Aho modem vaba gi deeli igeadam labe na àdàla?’ lahame faki vedi Eba nehi vi tozoda. ‘Ea, Da lam abo gi dedehe geàmu na vi àdam bohu vuusdam Dàt moz. Labi laha anggur oo vaksa meona bisi duana uddume bak vabi bobidume iziam Dàt moz. Labi Da lam abo meia gagu gi teo vi vaiam doi pajak gut gagome vaiam damti labi damat neha, “Dam faina meedam damat moz,” lahame feàtàdaha dam totbaho lamti vazisi ot deeliame meedam Dàt moz,’ lahame Eba faki mu vi tozoda. Labihàmu Eho ozoha, um dam bada gi Yohanesti Emti li meedam im im gi mohet vanamai mom damat moz. Lahana Emti Yohanesti iho li Alat Aho ozobohudi meedam im lam iho fa dam bake lab vahokedaha di lam meit ame im lam aime tu vuzehi iademe ulohodesu meedameam làhà ame bak labet modi damat gi nehi ozome gagodam bak. ‘Làhà Alat Aba Aho ozobohudi meedaha bak labet modi Yohanesti Emti gagu oluhu bak lam gi ahole meedaha bak,’ lahame vi ozobohudi gagom bak am bak,” lahame Yesusat ame im lam ame dam zi laba ab vahokedaham. 20 Yesus Aho amu nehasu meeda. Num debu meida iuba le damat ihimo modem biem im feàna lam duana meeda. Labi neo num debu meida iuba le ame im feàna lam mahate duana modem kai. Gi labihada. Labihadamnàme Aho ame im feàna duana meedaha num debu laba azihi dam labe ame im lam aahanàme vedi ba ibi iho faina meedam bak lam voedume fa ahu neà bak vàmadi meedaha vaba gi Aba tum bakti mouda. Labihàmu Yesusat Aba Aho lab duzu vameadam lahasuhu di labe Aho ame num debu laba azim dam labe im alihi aasu gagodam vabna gi dae buduana faasi gagu butidam labe ab la vàlui le vàluidamam. 21 Aho nehame la vàlui le vàluidume buteme gagoda. “Aiee! Num debu Korazim lamti num debu Betsaida lamti laham bak behàsu laba azihi Yahudi dam oa, Alat uba ba diamut beodam bake nasi fet àvodi it ozodale. Nehaha bak. Eho etei ubu uho azihi num debu behàsu laba laha di lam na damat ihimo modem biem im feàna meedaha di lam uho aahanàme vedi Eba tuhu vaba aalahigeàmu mouda. Lahana uho nasi Em ehe vab di iube abo Yahudi damat modem vab dam num debu Tirus lamti num debu Sidon lamti azihi dam labe iho aham di iube meedaha im laba vi ozodale. Neha: Ame dam debu behàsu labe iho bisi faina meedàmu Alat gi amu aham di iube dam laba faki beodume ab vàhàdeme seddaham bak. Lahana Eho etei uba lab le meedaha im feàna lam fa ame dam ahamda debu behàsu laba amu le meedameam làhà ame dam labe gi amu di iube Eba tu vuzehi iho faina meedam bak lam voedume fa ahu neà bak vàmadi meedam bak. Labi neo ame bak lam dam giida labe fet aame ozo, ‘Làhà dam lam ibi iho faina meedam bak lam voedume fa ahu neà bak vàmadi meedà?’ laham bak aame ozobohudem bake ame dam labe laha gi amu di iube sue taubuna dusu. Fa ohu fau visoi im ohu laba nom gulada. Labihadam labe Alat ba beoho vaba gi labihasu vekehe bak. 22 Lahana Eho etei uba neo gagolo modem im imboda nidi nim laha nasi aima. Um num debu Korazim laba azihi dam lamti num debu Betsaida laba azihi dam lamti ubu uho faina meedam bak lam fa voou ahu vei neàdehe vab labe Alat ba diamut Dam Bake Uloodume Vi Aime Ozobohudi Neàdi Fime Fahedam Digat fum di labe uba beodam di bisi geàdam dam um am bak. Lahana num debu Tirus laba azihi dam lamti num debu Sidon laba azihi dam lamti ba Alat beodam di ame dam lam mahate geàdam vaba gi fota geàdam bak. Neham labe labihadam bak. Eho na damat ihimo modem biem im feàna lam dam labe aaha vab labe gi fota beodam bak. 23 Aiee! Um num debu Kapernaum laba azihi dam oa, uho vedi nehi vi ozodam damat modem bak. ‘Yesus bak ibida niba li na damat ihimo modem biem im feàna duana meedaha labe im abo bisi feàda im am bak. Damat iba aame im ee vousai vou baedam bak,’ lahame vi ozodam damat modem bak. Lahana um git ozoho bak. Ba labiham vabak. Eho amu bak ubuda laba le ame im feàna duana lab meedaha bak lam uho aahanàme ba Eba tu vuzehe vaba aalahigeàmu moudahemu ba diamut Alat um gi koei it oazehena le esdam bak laba vou nom ilu beodume sedda tame. Eho gi neham bak ozome uba labi gagoho bak. Amu aham di iube faina meedàmu Alat beodume vàhàdeme seddaha dam abo num debu Sodom laba azihi dam lam Eho uba le lab meedaha im feàna lam Eho amu ame dam laba le meedameam làhà ame dam labe gi amu di iube Eba tu vuzehi ibi iho faina meedam bak lam voedume fa ahu neà bak vàmadi meedam bak. Labiham labe im etei ba vou faat leheda zoho niba ame dam mekehà etei duzum lahasum bak. 24 Labihàmu um num debu Kapernaum laba azihi dam labe ubu uho faina meedam bak lam voedume fa ahu neà bak vàmadi meedam vab labe Alat ba diamut Dam Bake Uloodume Vi Aime Ozobohudi Neàdi Fime Fahedam Digat fum di bisi duana beodam dam um am bak. Lahana dam ahamda num debu Sodom laba azihi dam lam Alat ba beodam di ame dam lam mahate duana beodam kaio. Eho na damat ihimo modem biem im feàna lam dam labe aaha vab labe gi fota beodalo modem bak,” lahame Yesusat ab vameadaham. 25 Labi ame di labe Yesus fa Am Ai Ala bake ab tom vou baedamam. “Ai oa, Oho asum ahoba iumti fa bak nimti Om na debu modi vuusuhuda Boehàda Om am tame. Om abo neàte. Nehaha bak. Obo Oho dam bakdate deeli vame fa Om damali vuusu im vahokedam bak lam damat neha, ‘Im bisi sekolah vahokedam bak bohu vuusdam labe bisi ozobohu dam im am bak,’ lahame ihimo ozome it daetbadam dam laba Oho ahit modi vasteho. Lahana ame bak lam Oho fa dam sekolah vahokehe vaba im biehebu dam abo bisi feà vab dam laba Oho ahit ame dam laba modi im ozobohudi fi gatei meedam bak. 26 Ai oa, Oho lab meedaha bak lam Oho amu fet ozo, ‘Eho labi modelo àhàkehe bak,’ lahame labi fet ozoho labe Obo Oho modelo modemna lam Oho ab modi imbodeham bak. Labiha labe Eho, ‘Om abo neàte,’ lahame vou baedaho,” lahame ab tom vou baedaham. 27 Yesusat Aho labihasu Ala bake tom vou baedume neàdi fa ame dam giida zi laba neo vi vameada. “Em Ai aabot Aho modem im lam ahebu Aho Eba neha, ‘Oho fa im dedateli meedale,’ lahame Eba modi vizehe labe Eho fa im dedateli ab vuusdamam bak. Labiha labe Alam Adat nim, ‘Amat modela?’ laham bak lam dam giida ahebu biem bak. Gi Aiat Ahamo bisi ozobohudehe bak. Labi laha ame Adat labe am Ai lam, ‘Amat modela?’ laham bak lam dam giida ahebu biem bak. Gi Am Adat labe Ahamo bisi ozobohudehe bak. Labi laha ame Adat labe Aho fi me ve Am Aiat modem im modi fi gatehe dam lamota Am Ai laha ozobohu bak,” lahame ame dam zi laba ab vameadaham. 28 Labi Yesusat im lada lam vameadume neàdi Aho neo nehame vi vameada. “Uho meit im asimbuna meedam bak meedume bedali alihi nemahum dam lam um nasi Eba li Eho fa faamome modi dehabali neàdedase. 29 Em ahu neà labe meia im vahokedam di gi nemahuba neàt vameadam bak. Labi Ebe Eho uba vahokedam im lam ba meia modi asimbuli vanamam vabak. Em ba, ‘Uhumo meedale,’ lahame ba uba ahumdem vaba Eho vi tau meedam bak labet modi gi dehaba neàna vou ladam bak. Labihàmu Ebe Eho etei uba vahokedaha im lam uho ulohodesu meeda. Labi laha Ebe Eho bak niba esdam diat vou mode ledume baleàhà im nim uho laha vi vouhoda. Uho fa gi labihasu meedale. Uho labihasu meedam labe um ahu ba im iudu ium vi ozo. Im iudu ium vi ozo. Laham bak lam gi ab vabali vei seti aidamam bak,” lahame ab vameadaham.

Matius 12

1 Ame di labe ba hari Sabat abo Yahudi dam labe ibi iho gi azibe im digat meida labe Yesus Aba vi tau meedam damti iho bak mei bake lalo modemu gandum dee zie labe lada. Ladam di labe Aba vi tau meedam dam labe idoalehemu ame gandum oo amdeheda auet vi vuu footoi ab vou à ladamam. 2 Labi vou à ladam di labe Farisi dam totbaho labe ame bak lam aahemu Yesus bake ab gut gagoham. “Ne, etei nim gi hari Sabat abo im Yahudi dam labe ibi iho gi azibe im digat nim akati modi Oba vi tau meedam dam labe na oo auet vi vuu footoi vou à ledàla? Ne, im tai ahamda Musat aham di iube neha, ‘Hari Sabat fum di na a meedamule,’ lahame toeme fi hasi esuhuna akati modi Oba vi tau meedam dam labe ailahigeàmu na meedàla?” 3 Lahame labi gut vameadume modeha Yesusat fa ab gagoham. “Ne, im tai ahamda Boehàda Daud labe aho amu modehe im lam meit Alat Vameadaha Im Toedahana laba im meida nehi toehena nim um aame vi ozobohudehe vaba? Amu Daud Aba vi tau meedam damti idoalehemu dam ahamda labe iho Teohet Mome Fa Faatoiam Num Fihamna abo Alat Israel dam bake le tau im vameaidam num laba oli Ala bake lu fi haha beahuba laba esuhu roti lam aho visoi faheme am dam bake lodume iho vahi àdaha bak lam um vi ozobohudehe vaba? Ame roti lam dat ahamda Musat aho aham di iube neha, ‘Ame roti lam damat Ala bake lomna ve vua vahudam toheda zi labe ihimo àm rotit modem bak. Ba dam giida tau àm fi ham roti modem bak,’ lahame gagu fi hasi esuhu roti lam dam giida labe àhà bak. Lahana ame dam labe iho ba, ‘Faina modeho,’ lahaha vabak. 5 Labi um laha dat ahamda Musat aham di iube aho dam bake gagu fi hasi esuhu im zi toedahana laba im meida nehasu toehena lam um laha aame vi ozobohu vabali mode? Nehaha bak. Hari Sabat abo im Yahudi dam gi azibe im digat lam na modem fi ham digat labe ame damat Ala bake lomna ve vua vahudam toheda zi labe iho ame Fihasi Ala Bake Vou Baedam Num Vàmteabu laba oli na meedam meo bak. Lahana Alat ba neha, ‘Um faina modeho,’ lahame ba vàlu gagom vabak. Na Alat Aho gagu esuhuna meedam labe gi neà bak. 6 Lahana Eho etei nib doudamda nibe Eho ame Fihasi Ala Bake Vou Baedam Num Vàmteabu laba fa neo vafozi ab bisi feà Dateboleham bak. 7 Labihàmu Asum Ahoba Iubet Bak Niba Li Dateleheda nim Em ame Da amemu ame hari Sabat deda Em am bak. Labiham labe Ehemo neha, ‘Ame digat labe im nehasu modem neàte. Im nehasu a modemule,’ lahame ozome gagomda Em am bak. Labihàmu Eho nehi ozoho bak. Meit Alat Vameadaha Im Toedahana laba Alat Israel dam bake nehame vameadaha im meida nim uho laha vuzehi meedaha vab damat modem bak. ‘Uho bak niba esdam di bisi uho meedam im tombuda gi neham bak. Uho gi meia aame faobekesi im neà bak tau meedale. Uho labihasu meedam labe Em ahu bisi deelem bak am bak. Lahana ubu uho faina meedam bak fa faatom bak laba ozome na fi ho Eba lolo modemu oteme vua vahudam bak lam Em mahate deelem kaio.’ Lahame vameadaha im lam Eho ozoha, um Farisi dam labe vuzehi meedam vab damat modem bak. Uho vedi Eba vi tau meedam dam niba, ‘Git modeho,’ lahame ozomsuhu labe Eho labi vi ozome uba labi gagoho bak,” lahame Yesusat ab vameadaham. 9 Labi neo gi ame digat labe Yesus ame gandum dee zie labe labohoti vou esmozi neo ame num debu laba azim Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba neo ab oleham. 10 Ame di labe dat anekehà tot nutabedeheda laha ame num laba vi tau oli aida. Labihadam di labe Farisi dam laha laba tau oli nusualadaha labe ozo, “Imo Yesus bake vàlum im modi aase,” lahame labihasu ozoho labe Yesus bake ab vi ailo gagoham. “Guru oa, im tai ahamda Musat aho toedume fi hasi esuhu im lam akatihasu toedume esuhela? ‘Ame hari Sabat iho mei modi fa neàdem neàte,’ laham bak toeme esuheo? Laham vaba, ‘Hari Sabat iho mei modi fa neàdem fi ham bak,’ laham bak toeme esuheo? ‘Akatihasu modem neàte,’ lahame toedume esuhela?” 11 Lahame labi gagoha Yesusat fa ab vi gagoham. “Ne, um ame hari Sabat modemnàme nehi modem meo dam taia? Dat domba fi ho ousdamda labe am domba meida ame hari Sabat bak bumat laba subtem di uho naedamat abo gi àvodehat vi si fa vousai esum meo dam taia? Domba nom ilum di uho ozom, um gi labihasu aalahigeàmu voe? Vabà! Abo hari Sabat modemnàme uho naedamat gi ozahit fa vi si vihitoi fa bak ba neà bak laba olum bak. 12 Lahana Eho ozohat im damti dombati uloho vabak. Dam bisi aame àvodi tombulemda am bak. Labihàmu hari Sabat abo na modem fi ham digat nim mei modi fa neàdem neà bak.” 13 Lahame labi gagu neàdi fa dat nisileheda niba ab gagoham. “Om anekehà nasi vamdemale,” lahame gagoha da nibe am anekehà vamdeheilahit gi fa ab neàdeham. Abo gi anekehà neàda lamti ulohona fa ab modesuham. 14 Labi modeha ame Farisi dam labe iho ame bak lam aahemu ame num labe futodam labe neha, “Uho ozom, im akatihasu modi Yesus si otela?” lahame im aa ab odoadamam. 15 Ame Farisi dam labe Am otelo aa odoadaha im lam Yesus Ahamo naedat ozobohudi ame bak lam vou esmozi fa bak mei bake lam bak ozome ab ladamam. Ladam labe dam aheda ziti dam gaileheda ziti Aba vi tau vueda. Labihàmu Am aame faobekehemu dam gaileheda lam ahebu Aho modi fa ab neàdedaham. 16 Labihadam di labe Aho modi fa neàdedaha dam zi laba fa mali vi gagoda. “Eho uba modi fa neàdedaha bak nim uho meia neha, ‘Yesusat iba modi fa neàdedaho,’ lahame a ahate vou fi demule,” lahame mali vameadume neàdi ab oudaham. 17 Yesus Aho lab gagoho bak labet modi dat ahamda Alat vameadaha im aime fa dam bake ahate vameaidahada Yesaya labe aho aham di iube Yesusat Aho ba modelo modem im lam fet nehi toeme esuhu im nim ab modi imbodeham. 18 “Na Eho Gagohona Meedamda nim Ebe Eho fi hasi gagu olulo modemda Boehàda Am am bak. Ame Da lam Ebe Eho bisi deelemda am. Labi Aba Aho meedam im Eho aam di Em abo ahu deelem bak. Ame Da lam Eho Em Aha Nutabe Neàna labe Aba modi vizi teudehe labe Ebe Eho vamdesu meia uloome aim bak lam Aho fa dam debu meida iuba le ahate vameada. Dam debu meida iuba le ahate vameada. Labihada tame. 19 Labi Aho lab vou vameatedam bak lam Aho ba meia daetesu beàdam vabak. Labi laha Aho ba meia faki buteme vameadam dae vameadam vabak. Labi laha Aho ba zie tombuda laba le duzu dam bake bisteat buteme vameadam vabak. 20 Labi laha Am fasbaso fi zuhu bak aam di ba neha, ‘Faite,’ lahame ba voom vabak. Aho ba laha vuagat fauhalemna labe am sue zoho umahubuli sutelo vabalem di Am ba vi feume sutem vabak. Aho gi labihasu vou mode ledume damat Aba neha, ‘Ahole meedam Dàt modem bak,’ lahame deeli gagom bak laba vou fusi neàdi vaitom di am bak. 21 Labihadam labe dam debu mei dam debu mei lahadam dam ahebu Aba tu vuzeheda tame.” Lahame Alat gi Aba Aho Gagu Olulo Modemda Yesus labe Aho ba modelo modem im lam Yesayat aham di iube fet toeme esuhu im lam Yesus Aba Aho etei neha, “ ‘Eho Yesusat uba modi neàdedaho,’ laham bak lam meia a le fi demule,” lahame gagoho bak labet ame im lam ab modi imbodeham bak. 22 Labi ba digat meida iube dat amu setan oli veimai dae vabale. Labi laha am fako na aam vabile. Lahamda lam dam ahe damat anekehà vuusu Yesus bake ab vou le vou duzuham. Labihàmu Yesusat ame da laba neha, “Setan taho futoi itale,” lahame gagu ame setan lam futoi itame modeha ame da labe fa dae faasi im ab vameadamam. Labi am fako na aam biehe bak lam laha fa ab neàdeham. 23 Labi modeha dam duada zi labe ame bak lam aahemu àvodi ihimo im ab ot gagoi ot gagoidamam. “Aa làhà! Da nim abo mei modi neàdem feà Dàt modem bak. Làhà uho ozom, Da nim Dat Ahamda Boehàda Daud Vou Faat Lehe Mekehàda abo Alat amu neha, ‘Ebe Eho Gagu Fihasi Vimteme Olulo Modem Dat Boehàda abo Mesias uba ba olu tame,’ lahame amu fet vou vamea useheda ame Da am taia?” lahame àvodi ab ot gagoidamam. 24 Lahana ame Farisi dam labe laha ame bak lam aahana ba labiham vaba vedi nehi gagoda. “Yesus gi mei ahu oli veimam setan zi labe im boehàda Beelzebul labe fa Aba modi vizi teudehe labe Aho mei ahu oli veimaha setan mei setan mei laba gagu futodume ilidam bak,” lahame ab gagodaham. 25 Lahana ame Farisi dam labe im ahu ad labe ozodam bak lam Yesus Ahamo ozobohudi dam laba im ab faasi vahokedamam. “Eho etei uba vouhome vameadalo modem im nidi nim uhumo nasi aime neàdi ubu uho etei lab gagoho bak lam, ‘Imbo? Imbo vaba?’ laham bak nasi it ozodale. Bak amomoi vuusdam boehàda am damti ihimo fàsi ot beluidameam làhà ame dam lam gi ahebu foli seddam bak. Labi bak amomoi vuusdam boehàda am damti labihameam làhà gi neo ab vàhàdeme seddamam bak. Labi laha num debu vàmtea azihi dam labe ihimo fàsi iuba vahe iuba vahe labihadume ot beluidameam làhà gi dam ahebu foli ame num debu lam gi dam vabali alimdi seddam bak. Labi laha dat am lahi datati ihimo ot fakiame ot beluidameam làhà ame dam debu gi vabali setem bak. 26 Labihàmu uho Eba neha, ‘Beelzebulat Eba modi vizi Eho mei ahu oli veimaha setan mei setan mei laba gagu futodume ilidala,’ lahame Eba labi vàlu gagohemu Eho uba gi fa nehi gagom bak. Um git gagoho bak. Ame setan zi laba vuusdam boehàda Beelzebul labe aho Eba tau aba aho vuusdam setan zi lam Eho gagu futodume ilidameam làhà gi Beelzebul fa am damti ot beluiame foli seddamna ozomom bak. Labihameam ba ame debu lam ba akati teudi duzue? Gi vàhàdeme seddamna ozomom bak. 27 Labihàmu uho etei Eba lab gagoho bak lam, ‘Mei ahu oli veimaha setan mei setan mei lahamda zi lam Eho gagu futodume ilidam di Beelzebulat Eba tau modi ilidala,’ lahame uho Eba labihasu vàlu gagodam labe um gi uba it vàlu gagodam damat modem bak. Neham bak. Um Farisi dam totbaho laha mei ahu oli veimaha setan gagu futodume ilidam meo damat modem bak. Làhà uho Eba neha, ‘Beelzebulat Eba tau meedaha,’ lahame Eba vàlu gagomeam làhà um gi um Farisi dam zohoti vàlu gagoda taia? Labihàmu um dam zoho labe fa uba faki nehi gagom bak. ‘Uho Yesus bake git vàluho. Beelzebul iba tau setan gagu futodume ilidam vabna akati uho neha, “Beelzebul Yesus bake tau ame setan gagu futodume ilidala,” lahame labi gagodàla?’ lahame um Farisi dam zoho labe fa uba labi vàlu gagom bak. 28 Lahana Beelzebul ba Emti ahili meedam vabak. Gi Alat Am Aha Nutabe Neàna labe Eba modi vizi teudi Eho mei ahu oli veimaha setan mei setan mei laba gagu futodume ilidam bak. Ne, um gi neham bak ozome tu vuzehem vaba? Em abo Alat Gagu Fihasi Vimteme Oluhu Dat Boehàda Em am bak. Alat Eba gagu nom oluhemu Alat Ahamo Boehàdateboli dam bake deeli vame Am damali vuusu im vahokedam bak lam ab faasi meedamam bak. Laham bak um ozom vaba? 29 Mei ahu oli veimaha setan Eho gagu futodume ilidam meo bak lam Eho uba vouhodase. Neha: Dat teuda nibe am soa maehe nazoh vou faovoi num doo ozoho laba duzu ausdameam làhà ba meit am numa oli am nazoh vam vabak. Am nazoh gi ahe lahasum bak. Lahana dat bisi feàda labe fa da lada laba li nohisi beome si anekehà gia. Nao gia. Labihadume neàdi am num laba oli am nazoh gelevai voutam bak. 30 Meit Eba taum vabda lam Eba fakemda am bak. Labi laha Eho dam bake vahokedam labet modi meit Eba tu vuzehem bak lam meit Eba ame bak lam vi tau meedam vabda lam gi Ebe Eho lab meedam bak lam modi vàhàdeme dam fi goaitoi seddamda am bak.” 31 Labi Yesusat neo ame Farisi dam labe ibi iho amu gagoho bak lam, “Beelzebul Aba tau setan gagu futodume ilidam bak,” lahame gagoho bak lam vi ozome fa ame Farisi dam laba neo nehame vi vameada. “Eho teudi Beelzebul vafozi ame setan zi laba gagu futodume ilidam bakta imbot. Lahana uho im imboda nidi nim laha nasi aima. Meit faina meedam bak im meiti im meiti modeo, labi meit feàtàdam bak im meiti im meiti modeo, abo Asum Ahoba Iubet Bak Niba Li Dateleheda nim meit Eba feàtàdam bak modeo, meit labihasu faina meedam labe ahamo fa it ozobohudi Ala bake ahatet tom gagu neàdi voomeam làhà Alat gi ame da laba ozahigeàmu fa vei neàdedam meo bak. Lahana Alam Aha Nutabe Neàna Labe Eba lab tau modi vizi teudi Eho setan lab gagu futodume ilidam bak laba uho vedi neha, ‘Beelzebulat Eba tauha,’ lahame vàlu gagoho bak lam git gagom bak am bak. Um gi Alam Aha Nutabe Neàna laba feàtàdaha bak. Meit Alam Aha Nutabe Neàna laba feàtàmeam làhà ba Alat ozahigeàmu fa vei neàdedam vabak. Abo uho etei ahedi bak niba esdam di modeo, abo gi ba diamut bak gàhàdi modeo, ba Alat ozahigeàmu fa vei neàdedam vabak. Gi ab faidi vàhàdemam bak. 33 Uho im nidi nim laha vi ozomale. Iho utso, ‘Neào? Faio?’ lahame ozom di gi ame ut labe am oo modeo, am bu modeo, laba aame am so ozobohudem bak. Ut oo neàna valem bak aameam làhà am so laha neà bak. Lahana ut oo faina valem bak aameam làhà am so laha fai bak. 34 Um Farisi dam bisi meoli fai bak tadi meedam dam labe fa ozbat meoli meedam bakti ulohona meedam damat modem bak. Labiham labe ba akati aha ubuda labe im neàna futoe? Neham bak. Mei ahu laba vahedam im zi modi fa tombalemna im aha am bak. 35 Labiha labe da neàda am ahu gi im neà bakta vahedam labe aho im meedam di modeo, am aha labe im vameadam di modeo, gi im neà bakta meedam bak. Lahana dat bisi faina meedamda labe am ahu gi im fai bakta vahedam labe aho im meedam di modeo, am aha labe im vameadam di modeo, gi im fai bakta meedam bak. 36 Labihàmu um mahate um ahu it vou faovoi ozodale. Neham bak. Alat ba diamut Dam Bake Uloodume Vi Aime Ozobohudi Neàdi Fime Fahedam Digat fum di abo gi im aha labe ostame gagodam im keobe lam ahebu Alat iba fa gagu aidam bak. 37 Neham bak. Ame digat fum di lam Aho gi im dam ahat vameadam im laba ozome ame bak lam nehasu meedam bak. ‘Lada lam aha neàt. Làhà dat lada lam im vamdesu meedam dàt moz.’ Labi, ‘Lada lam aha fait. Làhà dat lada lam faina meedam dàt moz,’ lahame labi vi ozome ozobohudi gagodam bak,” lahame Yesusat ab vameadaham. 38 Labi ba neo digat meida labe Farisi dam lamti labi dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu Yesus bake li ab gagoham. “Guru oa, ‘Alat Gagu Fihasi Vimteme Oluhu Dat Boehàda Om ameo?’ laham bak lam im biem bake nasi na damat ihimo modem biem im feàna Oho fet modemale. Labi im aame ozobohudese,” lahame ab gagodamam. 39 Lahahat Yesusat fa gago, “Um etei dam bada nim gi bisi faina meedam bak tadem damat modem bak. Abo, ‘Em ba Alat gagu olum kaio,’ lahame Eba tu vuzehem mom damat modem bak. Um gi labihadam damat modem labe vedi Eba neha, ‘ “Om Alat Gagu Fihasi Vimteme Oluhu Dat Boehàda ameo?” laham bak lam im biem bake na damat ihimo modem biem im feàna Oho nasi fet modehemu im aame ozobohudese,’ lahame Eba gagodam damat modem bak. Lahana Em ba uledi ame bak lam uba etei di nibe fet modem moho bak. Ba nehi fet vouhodam bakti gagom kaio. Aham di iube Alat na damat ihimo modem biem im feàna abo Yunus bake modehe im lamti ulohona modemna uho ba aa tame. 40 Aham di iube Alat vameadaha im aime fa dam bake ahate vameaidahada Yunus lam Alat ahit modi bohe feàda labet Yunus visoi tolazi sete. Labi am gi bohe asum ad laba aidume usi làteladi modeha bohe labe ahamo zitu Yunus am asum laba bisdam bak fa it vooho bak. Ame bak lam Alat ba Eba modelo modem im nimti uloho bak. Em Abo Asum Ahoba Iubet Bak Niba Li Dateleheda nibe Em elohozobe damat Em koeiso ke bumat laba ub esu usi làteladi fat ahede tame. 41 Aham di iube Yunus Yahudi da labe aho Niniwe dam giida laba le Alat aba vameadaha im nehasu vou vameateda. ‘Alat uba beolo modem bake uho faina meedam bak lam nasi voedume fa ahu neà bak vàmadi meedale,’ lahame labi vou vameatedume fi dedaha di labe ame dam labe ame im lam aime uledi ame bak lam ab meedaham bak. Nehaha bak. Yunus aho amu vou vameatedaha bak lam feàta feàte. Lahana Yunus aho amu lab vou vameatedaha im lamti labi im Eho etei vou li vou vameatedahada nimti ozom di im bisi vafozi feàda im Ebeda nim am bak. Labihàmu Alat ba diamut damat iho bak niba meedaha im ahebu Aho Dam Bake Uloodume Vi Aime Ozobohudi Neàdi Fime Fahedam Digat fum di ame Niniwe dam ahamda amu elodaha dam labe iho fa ahedi usnadume Alat avaesdam laba le duzu uba dam badate vàlu nehi vameadam bak. ‘Um abo git modeho. Yunus iba li Alat vameadaha im vou vameatedaha di lam im gi kehàm vaba iho faina meedam bak lam voedume fa ahu neà bak vàmadi Ala bake tu vuzehedaha bak. Lahana um dam bada akati Yunus vafozi bisi feàda abo Alam Adat Yesusat uba li vou vameatedahana akati um aime tu vuzehem vaba modela?’ lahame uba ba diamut labi vàlu vameada tame. 42 Labi laha aham di iube Syeba bak laba azihi dam vuusdam boehà nam giida abo Yahudi modem vab nam labe aho ozo, ‘Yahudi dam vuusdam Boehàdatebo Salomo lam am abo bisi im ahebu ozobohudi meedam dàt modem bak. Salomot vameadam im aise,’ lahame aba aho azihi bak vou esmozi abo bak bohulana Salomot azihi bake ab laham. Labi doni bake vou id ladume Salomot azihi num feàda laba le lafusi Salomom im ab aidaham bak. Nehaha bak. Salomo bisi im ozobohudem bakta im ozobohudeheda am. Lahana etei nim bisi Salomo vafozeheda Em am bak. Labihàmu Alat ba diamut damat iho bak niba meedaha im ahebu Aho Dam Bake Uloodume Vi Aime Ozobohudi Neàdi Fime Fahedam Digat fum di ame Syeba bak laba azihi dam vuusdam boehà nam amu eloho nam labe fat ahedi usai Alat avaesdam laba le duzu uba dam badate vàlu nehi vameadam bak. ‘Um abo git modeho. Em abo Salomo bake le aho vameadaha im eho aihi bak. Lahana Salomo vafozi bisi feàda Yesusat uba li Am im vou vahoketedaha di lam akati um aime tu vuzehem vaba modela?’ lahame uba labi vàlu vameada tame,” lahame Yesusat ab vameadaham. 43 Labi im lada lam vameadume neàdi Yesusat im nehasu vi vameada. “Mei ahu oli veimaha setan labe futoi ame da lam vou esmozi itadam labe le meia oli odom bak ozome bak aotba baa bohu dam vaba alim bak le nabiteda. Labi nabitedume modeha meia oli odom bak aam biehemu ahamo aba it gago, ‘Làhà em gi ebe eho amu odoho bak laba fa li ame da labe am ahu laba olelo modem bak,’ lahame fa ab leham. Fa li ame da laba aaha am ahu ba Alam Aha Nutabe Neàna labet modi veimam vaba abo gi num naube feaktoi nazoh fa aba bake iademe vahehe labe boz neàdi gi num alim modesdam bakti ulohona ab li aaham. 45 Làhàmu fa neo le mei ahu oli veimam setan tujuh amomoi abo am fai bak vafozi bisi faida gagome fa vazisi vou ledume aba aho amu oli odoho bak laba ab vi oedume veimadaham. Labiha labe ame setan tujuh amomoi ame da labe am ahu laba ba vi oedaha labe aba amu fota neà bak vei seti fa abo bisi fai bak ab fuham. Um etei bisi faina meedam dam bada nim ubu uho faina meedam bak lam voedume fa ahu neà bak vàmadi meedam vabameam um laha gi ame baket modem bak,” lahame ab vahokedamam. 46 Labi Yesusat dam dua bake im vahokedam lahasuhu di labe Am oiti Am vahadam ziti labihasu, “Im vameadase,” lahame Yesus bake li netàdesome modeha dam Yesusat lab vameadam im lam ailo meedam labe dam bà tadi olem bili bak kekehemu num bako tot laba li dozeadume modesda. 47 Làhàmu dat meida labe bak lam aahemu le Yesus bake netàdi ab gagoham. “Om oiti Om vahadamti Oba im vameadalo bako iuba li dozeadume vou faodalo.” 48 Lahame labi gagoha Yesusat fa ab vi gagoham. “Ne, uho ozom, Em oiti Em vahadamti ame dam akete?” lahame gagu Am anekehà vousai Aba Aho vahokedam im ozobohudelo vi tau meedam dam zi laba vimtedam labe ab gagoham. “Ne, Em oiti Em vahadamti gi neam taia? 50 Meit Em Ai Alat Aba Aho ozoho bak vi ozome meedam dam lam Em vahada Em nà Em oi laham dam am bak,” lahame ab vameadaham.

Matius 13

1 Labi Yesus ame num lam vou esmozi itea valau obe laba lazi ab le nusuham. 2 Laba lazi nusu modeha dam zi feà neo Aba valadam labe gi soat osiddume Aba ab li vabousuham. Labihàmu dam bisi duali Aba soat nutmamna zohàme Aho fa ihe vihitoi koena vou bu duzu afoezobe ab zisi nusuham. Labi Aba valadam dam zi lam fa valau obe laba dozeada. 3 Labihazobe Yesusat im totobe tamehona ab faasi fi koadamam. “Nasi aimale. Dat utoho modemda nibe am na dem bak laba na oo neb ab le guladamam. 4 Labi na dem bak laba le guladam di labe ame na oo neb totbaho gi damat lailaidam zie tomba laba ab biddaham. Labi modeha bume faobuda labe li visoi àme ab seteham. Lada lam labiha. 5 Labi ame na oo neb totbaho lam ke baa bak laba ab biddaham. Labi modeha ke baa bak laba biddahada lam bak dua vab labe gi kehàm vaba ab loubedi usidaham. 6 Lahana ala faasi gaimeolehe di labe et loubedehena laba belu ab aladaham. Ke baa usihi labe am omnao bak vaksa bake nom lailaiam vab labe ab belu aladaham. Lada lam labiha. 7 Labi ame na oo neb totbaho lam aliho debu bak laba ab biddaham. Labi modeha na oo lamti alihosoti amediat usida. Amediat usihi labe na àm vabda labe nasi kilale. Labi kilalehe labe na àmda lam gi alihosot vi giame ab aladaham. Lada lam labiha. 8 Lahana ame na oo neb totbaho lam fa bak neà bake bidda. Bak neà bake biddaha labe abo neàna usidume kilali abo oo duana ab vaedaham. Labi oo vaedaha di labe na oo neb totbaho oo seratus vaeda. Labi na oo neb totbaho enam puluh vaeda. Labi na oo neb totbaho tiga puluh vaeda. Labihada. Ame na oo neb gi koena gulahanat oo tamehona ab vaedaham. Labihada.” 9 Lahame im totobe lada lam labihasu fi koadume neàdi Yesusat neo ab vi gagoham. “Um dogoi im aim bak ehena Eho etei lab vameadaha im lam mahate aime vi ozome ozobohudele,” lahame ab vi gagu esuham. 10 Lahame labi vi gagu neàdi Aba vi tau meedam dam labe dam dua bak vaitesu Yesus bake le netàdi duzu vi ailo ab gagoham. “Ai oa, Oho dam dua bake im vameadam di akati modi ame im tombu Oho vameadam vaba vedi bisi im totobet fi koadàla?” 11 Lahame vi ailo gagoha Yesusat fa neo ab vi vameadamam. “Alat Ahamo Boehàdateboli dam bake deeli vame Am damali vuusu im vahokedam bak lam etei modi fa gàhàlehe bak lam, ‘Akatihasu modemna modela?’ lahame dam amudate vastehe im lam Em Aiat Eba neha, ‘Eho ame im lam fa uba vameadume umota modi ozobohudi fi gatedase,’ lahame Eba labi gagohemu Eho im dedateli etei fa uba vameadume fi desi um ab ozobohudedamam bak. Lahana Eho dam giida abo Alam damalehe vab dam laba im vameadam di Eho gi ahit im totobet fi koadam bak. 12 Neham bak. Alat Ahamo Boehàdateboli dam bake deeli vame Am damali vuusu im vahokedam bak lam etei modi fa gàhàlem bak lam, ‘Akatihasu modemna modela?’ lahame Eho vahokedam im nim meit iademe ozome vi ozobohudi meedamda lam Alat fa ame da laba tau modi aho duana vi ozobohudedam bak. Lahana Eho etei ame im lam vahokedam bak lam meit ame im lam iademe ozome vi ozobohudi meedam vabda lam abo aho amu koena ozobohudehe bak lam Alat fa faatoi vei seti ba ame da labe vi ozome ozobohudedam vabak. 13 Neham labe Eho dam dua bake im vameadam di gi im totobet fi koadam bak. Ame dam labe iho aam bakta aa. Aim bakta ai. Lahana, ‘Iho etei aaha im nim akati modemna modela?’ Labi, ‘Iho etei aihi im nim akati modemna modela?’ laham bak lam ba fetehesu vi ozome ozobohudi meedam vab damat modem bak. Labihadam damat modem labe Eho ahit im totobet fi koadam bak. 14 Ame dam duada labe labihadàmu dat ahamda Alat vameadaha im aime fa dam bake ahate vameaidahada Yesaya labe aho aham di iube nehame fet toeme esuhu im nim ab modi imbodeham bak. ‘Alat Aho Israel dam bake neha, “Uho Ebe Eho meedam bak lam aam bakta aa. Lahana, ‘Uho etei aaha im nim akati modemna modela?’ laham bak lam ba vi ozome ozobohudedam vabak. Labi laha Em im uho aim bakta ai. Lahana, ‘Uho etei aihi im nim akati modemna modela?’ laham bak lam ba fetehesu vi ozome ozobohudedam vabak. 15 Um nehaha labe labihaha bak. Um ahu tamzohobuli im Ebeda ba ozobohudem biem damat modem bak. Labi um dogoi faidi ba im Ebeda aim biem bak. Labi laha um fako faidi ba Ebe Eho meedam bak lam ba aam biem bak. Labihadam labe ahusobulehe damat modem bak. Labiham vabameam làhà um fakot gi fa Ebe Eho meedam bak vi aada. Labi um dogoit ulaihàbulehe vaba gi im Ebeda vi aida. Labi um ahulat im Ebeda vi ozobohudeda. Labiham labe ubu uho faina meedam bak lam voedume fa ahu neà bak vàmadi Eba tu vuzehedàmu Eho beolo meedam bak lam fa mu soat vausu fa vei neàdedam bak.” Lahame Alat Aho Israel dam bake ab gagoham.’ Lahame Yesayat aham di iube fet toedume esuhu im lam dam duada nibe modi fa ab imbodeham bak,” lahame Yesusat ab vameadaham. 16 Labi im lada lam vameadume neàdi Yesus neo Aba vi tau meedam dam laba neo vi gago, “Lahana umota neàte. Um gi deelehe bohu vuusdam damat modem bak. Neham labe labiham bak. Fako ubuda im Ebe Eho meedam im nim um abo aada. Labi dogoi ubuda Ebe Eho vahokedam im nim um abo aida. Labihasu fetehesu vi ozome ozobohudi meedam labe um gi deelehe bohu vuusdam damat modem bak. 17 Lahana im imbona nidi nim nasi ozomale. Eho bak niba li im meedaha vab diat dam ahamda Alat vameadaha im aime fa dam bake ahate vameaidaha dam zi lamti dam ahamda totbaho labe iho Alat gagoho im aime vuzehi vamdesu meedam dam totbaho lamti labihasu ubu uho etei aadam bak nim ame dam zi labe iho aalo àhàki vou faodaha vabamu gi aham di iube eloi sedda. Labi ubu uho etei aidam im nim ame dam zi labe laha ailo àhàki vou faodaha vabamu gi aham di iube eloi sedda. Ame dam labe lab vou faodaha di lam Alat ame im lam taho modi fi gatehe vab labe gi aham di iube elodume seddaha bak,” lahame Yesusat ab vameadaham. 18 Labi Yesus Aba vi tau meedam dam laba aho neo vi vameada. “Um nasi aimale. Eho ame dat na oo neb gulaha bak laba vàlu totobet fi koadaha im labe am tombu uba fa ahate vameadalo mozo. 19 Neha: na oo neb zie tomba biti bumet visoi àhàda lamti dam Alam im nehi aime meedam dam nimti uloho bak. Alat Ahamo Boehàdateboli dam bake deeli vame Am damali vuusu im vahokedam bak lam etei modi fa gàhàlehe bak lam, ‘Akatihasu modemna modela?’ lahame meit vahokedaha Alam im lam ame dam labe iho aimta ai. Lahana ame im labe am tombu ba fetehesu vi ozome ozobohudi fi gatem vabak. Ame Bisi Faidatebo Iblis labe li ame dam labe ibi iho etei aihi im lam modi fa veioi setehe bak. Labiham bak. 20 Labi na oo neb ke baa bake biteheda lamti dam Alam im nehi aime meedam dam nimti uloho bak. Dam nibe iho Alam im lam aime deeli gi àvodehat tu vuzehe. Lahana abo mahate tu vuzehe vaba gi fota tu vuzehe. 21 Labi iho lab aihi im lam im ahu ad laba modesu teudi omnaoli abehamdehe vab labe naat iba vabidume geàdamna zi lam modeo, iho ame Alam im laba tu vuzehi meedàmu damat iba faki vabidamna modeo, labihasu iba meedam di labe iho Ala bake gi fota tuhu labe kehàm vaba ab mu voou seteham. Lada lam labiha. 22 Labi na oo neb aliho debu bak laba biteheda lamti dam Alam im nehi aime meedam dam nimti uloho bak. Dam nibe iho Alam im deelehat aime ve àdesda. Lahana ba bak niba esdam di gi, ‘Iba modi neàdemna modem vabna ozomo?’ lahame bisi àvodi azi ozoda. Labi laha im nazoh dualelo àhàki neo azi vi ozome meeda. Labihadam damat modem labe ibi iho amu Alam im aime vaha bak lam gi fa iho ozome meedam im lamti valiheme ab vàhàdeme seteham bak. Abo na oo neb usime bu vali amdehe vaba gi alihosot ot giaiame alai setem bak lamti uloho bak. Labiha labe Alam im lam ba ab vi ozome modem bieham bak. Lada lam labiha. 23 Labi na oo neb bak neà bake biti usihida lamti dam Alam im nehi aime meedam damti uloho bak. Dam nibe iho Alam im aim di abo gi ahu teudi ule neàt abo va. Abo vaha labe iho iademe ozome ozobohudi meeda. Labi damat ame Alam im lam lab aime ozobohudi meedam di labe gi veimdi veimdida. Neha: dam totbaho abo bisi duana ozobohudi meeda. Abo na oo neb bak neà bake biddahada labe usidume oo vaedaha di labe oo neb totbaho abo duana seratus vaedaha bak lamti uloho bak. Labi dam totbaho gi fota duana ozobohudi meeda. Abo na oo neb bak neà bake biddahada labe usidume oo vaedaha di labe oo neb totbaho fota duana enam puluh vaedaha bak lamti uloho bak. Labi dam totbaho gi koena ozobohudi meeda. Abo na oo neb bak neà bake biddahada labe usidume oo vaedaha di labe oo neb totbaho gi koena tiga puluh vaedaha bak lamti uloho bak,” lahame Yesusat Aba vi tau meedam dam laba ame im tombu lam ab vameadaham. 24 Labi Yesus ame iheba nusu dam bake vahokedam lahasuhu di labe aho ame valau obe laba dozeadaha dam zi laba im totobe nidi nim neo nehame vi fi koada. “Alat Ahamo Boehàdateboli Am damalehe dam laba vuusu im vahokedam di Aho ba diamut Dam Bake Uloodume Vi Aime Ozobohudi Neàdi Fime Fahedam Digat feàda labe meedam im lamti fa dat nidi nibe aho utoho abadate dat gagu olu gandum oo neàna guladaha bak lamti ulohote. 25 Neha: Ame da nibe aho utoho abada dam gagome le gandum oo neàna gulame esu fa aibuli num bake li ab beilame ab iddamam. Labi beilame iddam di labe dat utoho deda laba fakemoholeda labe aibut aa li iloho oo vou le dat naeda labe gandum oo gulaha bak laba aa vi tau gulame esmozi ab itaham. 26 Labi ba gandum loubedi usidume kilali oo vaedume modeha gi iloho lamti ab usdume kilaleham. 27 Labihàmu ame na meedam dam labe iho ame gandum dee laba le aaha bak lam fa iba na gagu meedamda laba fa ab li gagoham. ‘Aia, om gi gandum oo neàna iba lu iho gulahana taia? Ne, akati iho le aaha ilohoti usidume kilalehela?’ 28 Lahahat dat naeda labe gago, ‘Vabà! Gi eba fakemoholeheda labe aa li vi tau gulaha bak.’ Lahahat am na meedam dam labe fa gago, ‘Làhà oho iba gagome fa le ame iloho vaome voedào?’ 29 Lahahat dat gandum deda labet fa gago, ‘Vabà! Om iloho lam vaom di gi gandumti vaom bak. 30 Gi labihasu ame iloho lamti gandum lamti amait behàsu kilali fa amdi modeme vahem di eho ame gandum modeme vahedam dam laba eho nehi gagom bak. “Uho amu nasi iloho fi kbodume afoezobe vaheme dombuli vua vahudale. Labi ame gandum neo modeme am oota vame na gihoemda vahedam num laba vahedale,” ’ lahame eho labi gago tame,” lahame Yesusat im totobe lada lam ab fi koadaham. 31 Labi Alat Yesus bake gagu vimteme Aho Boehàdateboli dam bake deeli vame Am damali vuusu im vahokedam bak lam abo meit Aba tu vuzehi Am damalem bake vi taui vi tauidume dualem bak lam, “Akatihasu modem labe dam dualedàla?” laham bak lam damat ozobohudem bake Yesusat ame dam duada zi laba im totobe meida neo nehame ab vi fi koadamam. “Meit Ebe Eho vahokedam im tu vuzehi meedàmu Eho deeli vame Em damali vuusu im vahokedam bak lam gi dat nibe aho ut oo keobena rica oo vàmtea buà lam vou le am utoho laba dedesu esum bakti uloho bak. 32 Ame ut oo keobena vàmtea buà lam iho ozom di keobeta keobet. Lahana meit am utoho laba dedesu esu faobe le aam di na àmna totbaho gi bak adba laba buaedam meot. Lahana ame ut oo keobe lam kilali utsoti uloholi bume faobuda zi labe ut aaso laba li nusualadume ila moadam meo bak.” 33 Lahame ame im totobe lada lam fi koadume neàdi Yesusat gi meit Alat aba vuusu im vahokedam bak laba uledi meedamda laba meit vi aame fa vizedume dualedam bak lam vi ozome ame dam zi laba neo im totobe nidi nim vi vameada. Aho neha, “Alat Ahamo Boehàdateboli dam bake deeli vame Am damali vuusu im vahokedam bak lam gi nam nibe im nehasu meedam bakti ulohona modem bak. Nam nibe na ti fauti ulohona tepung ve afoezobe neo na ulasi fi kidemna keobena ragi lam laha laba vi tau esu valihedume seti vou faodameilahit deilemahi fi kidem bak lamti uloho bak. Dam Alat fa vahi vuusu im vahokedam dam amu debu koe bak lam fa dualem bak lamti ame na fi kidemna labe na ti fauti ulohoda laba modi vizi deilemahi fi kidi feà bak fum bak lamti uloho bak,” lahame ab vahokedaham. 34 Yesusat dam dua bak laba im vahokedam di lam aho ba im totobet fi koadaha vaba alia vahokedam vabak. Abo gi im totobet fi koadume vahokedam bak tadehe bak. 35 Yesus Aho ame dam dua bak laba labihasu vahokedam labet modi dat ahamda Alat vameadaha im aime fa dam bake ahate vameaidahada meida labe Alat aba vameadahana lam aho nehi fet toeme esuhu im nim Yesusat ab modi imbodeham bak. “Eho ame dam laba im vameadam di gi im totobet fi koada tame. Abo aham di iube Eho na ahebu modehe vab di iube Ehemo vastehena etei di nibe vou fuhuna Eho ame dam laba gi im totobet fi koada tame.” Lahame fet toeme esuhu im lam Yesusat Aba Aho etei lab meedaha bak labet modi ab imbodeham bak. 36 Labi ame im zi lam Yesusat fi koadume neàdi aho amu zihi ihe lam fa vou zitu usi ame dam duada zi lam vou esmozi aho amu futoi laha num laba fa li ab oleham. Labi Aba vi tau meedam dam lam laha vi tau vahi oeda. Oedume neàdi Yesus bake ab gagoham. “Ai oa, Oho amu gandumti ilohoti bak vàmtea laba usihi bak lam dam duada zi laba fi koadaha im lam iba ame im tombu ahate vameadale.” 37 Lahahat Yesusat fa ab vameadamam. “Lo, làhà nasi aimale. Ame gandum oo neàna gulahada lam Abo Asum Ahoba Iubet Bak Niba Li Dateleheda Em ame Da am bak. 38 Labi ame utoho lam gi dam bakda ahebu azihi bak am. Labi ame gandum oo neàna lam dam gi etei Eba tu vuzehi vahi im Ebeda meedume Alam damali Aho faasi vuusu im vahokedalo modem dam am bak. Lahana ame iloho lam gi Iblisim damali aho vuusu im abada gagome meedam dam am bak. 39 Labi dat utoho deda laba fakemoholeheda labe aibut aa li iloho oo neb vou le dat naeda labe amu gandum oo neb gulaha bak laba aa vi tau gulame esmozi itahada lam Iblis am. Labi ame gandum fa amdi modeme vahem di lam gi Alat ba diamut Dam Bake Uloodume Vi Aime Ozobohudi Neàdi Fime Fahedam Digat fusi meedam di am bak. Labi ame gandumti ilohoti fi kbodam dam lam gi Alat Am im gagu vou usem dam am bak. 40 Neham bak. Alat ba diamut Dam Bake Uloodume Vi Aime Ozobohudi Neàdi Fime Fahedam Digat fusi meedam di gi ame utoho deda labe aho iloho ateme vaheme vua vahudam bak lamti ulohona mode tame. 41 Neham bak. Em Abo Asum Ahoba Iubet Bak Niba Li Dateleheda niba Alat ba diamut Eba gagu Eho im dedateli fa ot vai Am damalehe dam laba vuusu im vahokedam di lam Eho Em im gagu vou usem dam bake gagome dam Eho vuusdam dam niba li ootedume modi fa faina meedam dam lamti labi dam bisi faina meedam meo dam debu lamti labihasu fi me vame vahe vahedalo modem bak. 42 Labi vahe vahedume neàdi ame dam zi lam fa vua elum sutem gikina laba voeda tame. Labi ame bak laba voedàmu ame dam labe kikezi geàdam labe ahu faidi meb dae feàna faasi meeda tame. 43 Lahana Alat Ahamo ozo, ‘Dam nim Ebe Eho gagoho im vuzehi vamdesu meedam dam am tame,’ lahame Aho vadaha dam lam ba diamut Aho vuusu im vahokedam bak gàhà bak laba Aho ame dam laba ala digadda labe fauhaedam bakti ulohona modi feà damali im ee vousai vou baeda tame. Labiham bake um dogoi im aim bak ehena mahate aime vi ozobohudele,” lahame ab vameadaham. 44 Labi Yesus ame dam duada zi laba neo im totobe meida nim neo nehame vi vameada. “Meit neha, ‘Alat eba deeli vame Am damali eba vuusu im vahokedam bak lam bisi eho modem im am bak. Ba akati eho im amomoi ozoe?’ lahame Alam damaleheda labe labihasu gagodamda lamti fa Eho etei neo vouholo modemda nimti uloho bak. Neha: Da meida nibe aho mei utoho laba le na meedameam aaha na soa maehena meit vastehena aho vi aame am ahu gelevai fa vasti esu fa am num bake li ab la ozoi le ozoidamam. ‘Eho akati modi na feàna nim taho và? Làhà em nazoh nim ahebu ozahit gelevai meia ot loidume fa doi vadume dualehezobe bak dedate le lu bak lam eho fa vase,’ lahame labi vi ozome deelehat vàhàdi ame baket ab meedaham. Na soa maehena vahemu am nazoh gelevai setehe bak laba ba vi ozoho vabak. Gi na feàna lam ab ve neàdeham bak.” 45 Lahame ame im totobe lada lam fi koadume neàdi Yesusat gi ame bak lam vi ozome neàdi ame dam zi laba im totobe nidi nim neo vi vameada. Aho neha, “Meit neha, ‘Alat eba deeli vame Am damali eba vuusu im vahokedam bak lam bisi eho modem im am bak. Ba akati eho im amomoi ozoe?’ lahame Alam damaleheda labe labihasu gagodamda lamti fa Eho etei neo vouholo modemda nimti uloho bak. Neha: Ke alihi voena abo na doi duana vamna ee gagom mutiara laham ke vadam bos labe aba aho modem bakti ulohote. Ame bos lam la nabizi le nabizi lahadam di lam abo mutiara doi feàna vamda laba nabida. Labi le nabidume modeha ame na ab aaham. Labi aame ahu gelevai fa am num bake ab leham. Num bake fa li ab la ozoi le ozoidamam. ‘Eho akati modi ame na lam taho và? Làhà em nazoh nim ahebu ozahit gelevai meia ot loidume fa doi vadume dualehezobe ame mutiara dedate le lu ame na lam eho fa vase,’ lahame labi vi ozome neàdi ame baket ab le meedaham. Mutiara doi feàna vamda vahemu am nazoh gelevai setehe bak laba ba vi ozom vabak. Gi na feàna lam ab ve neàdeham bak,” lahame im totobe lam ab fi koadaham. 47 Labi im totobe lada lam fi koadume neàdi Yesusat im totobe meida neo nehame vi vameada. “Ba diamut Alat Ahamo Boehàdateboli Am damalehe dam laba Aho vuusu im vahokedam di lam gi nehasu modem bakti ulohona meeda tame. Neha: Damat bohe dek itea vou bu ziamoi valo esu neàdi fa ab vou kea ledamam. Vou kea ledameam bohe ab vadamam. Labi bohe dek asimbuli fa nohula vou zitu aaha bohe mei bohe meime vaha bak ab aaham. Labihàmu ame dam labe ibi ihimo modi baleàhà bak lam ab faasi meedamam. Iho nusualadume bohe neàda vihilame boloseh vaheda. Labi bohe àm vabda fa veimome voeda. Labihada. 49 Alat ba diamut Dam Bake Uloodume Vi Aime Ozobohudi Neàdi Fime Fahedam Digat fum di Aho gi ame baket neo mode tame. Aho Am im vou usem dam gagome bak niba olu dam ab fahedamam bak. ‘Dam nim Ebe Eho gagoho im vuzehi vamdesu meedam dam am tame,’ lahame Aho ule neàt vadaha dam lam Aho fi me vahe. Labi dam bisi faina meedam dam lada lam fi hasi vua eludamna sutem gikina bohu laba le ab voedamam. Labi ame bak laba voedàmu ame dam labe kikezi geàdam labe ahu faidi meb dae feàna faasi meeda tame,” lahame im totobe lam ab fi koadaham. 51 Lahame im lada lam labi vameadume neàdi Yesusat Aba vi tau meedam dam laba vi ailo ab gagoham. “Eho etei lab vameadaha im totobe zi lam um ozome ozobohudeheo?” Lahame gagoha Aba vi tau meedam dam labe fa gago, “Lo, im vi ozome ozobohudehe bak.” 52 Làhàmu Aho fa neo gago, “Làhà Eho etei lab vameadaha im lam uho ame im labe am tombu lam um ozobohudehe bak lam abo neàte. Uho Alat Vameadaha Im Toedahana zi lam meit uba vahokedume um ozobohudehe bak. Labi laha Eho etei Alat Ahamo Boehàdateboli dam bake deeli vame Am damali vuusu im vahokedam bak lam, ‘Akatihasu modemna modela?’ laham bak lam um biem bake Eho uba vahokehena um laha ozobohudehe bak. Eho labihasu vahokedaha labe um im meida vàmtea ba vekehe vaba abo ozobohudehe labe fa dam im vekehe bak ehe dam laba uhumo fa vahokedam neà bak. Abo Alat Vameadaha Im Toedahana zi lamti Ebe Eho etei ba vahokeheda nimti fa vahi ame dam laba vahokedam neà bak. Abo dat na duada labe am soa maehe nazoh vahedam num oula labe vihilame vou futom di nazoh amu vahada lamti ba vahada lamti vame vou futodaha bak lamti ulohona meeda tame,” lahame ab vahokedume esuham. 53 Labi Yesusat ame im totobe zi lam fi koadume neàdi bak lam vou esmozi fa neo Am budualehe num debu Nazaret laba fa ab laham. Labi fa le aidam di labe Aho Am Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli ame dam laba Alat vameadaha im lam vahokeida. Labi ame im lam vahokeidume modeha damat ame im lam aidàmu ab àvodeham. Àvodi dam ihimo ot gagoidam labe ab tozodamam. “Aa làhà! Uho ozom, Da nim amat Aba modi Am ozobohudi fi gatei im dedateli iba li vahokedà? Aba amat am im vizi teudi na damat ihimo modem biem im feàna lam Aho meedà? 55 Ne, Da nim gi dat ut vame nazohaedamda labe am adat mode taia? Ne, labi laha Am oi gi Mariat mode taia? Labi Am vahadam zi abo Yakobus ame. Yusuf ame. Simon ame. Yudas ame. Labihasu ame dam zoho gi neam taia? 56 Ne, labi laha Am nà zi gi neam taia? Ba amat Aba vizi Am fa feà dateli fa na damat ihimo modem biem im feàna labihasu meedàla?” 57 Lahame Yesusat lab li vahokedaha im lam damat aim mu ab tozodamam. Labi mu tozodàmu Yesus fa ame dam laba ab gagoham. “Dat Alat vameadaha im aime fa dam bake ahate vameaidahada labe aho bak mei bake lam dita ame dam labe ahu adat iedi aho lab vou le vahokedaha im lam ule neàt gut ve aba vou baedam labe am im aime meedam meo bak. Lahana aho am vou budualehe bak modeo, am namti datati modeo, aho fa le vahokedam di am dam labe gi ailahigeàmodam meo bak. Ba ahu adat iedi aho lab li vahokedaha im lam aime aba vou baedam vabak,” lahame ab gagoham. 58 Yesus Am budualehe bak abo Nazaret laba azim dam labe Aba tu vuzehi meedaha vaba mu voohemu Aho ba ame bak laba na damat ihimo modem biem im feàna mahate duana meedaha vabak. Gi fota meeda.

Matius 14

1 Ame di labe Yesusat lab meedaha im lam meit li vameadaha im ahum lam Galilea bak vuusdam Boehàda Herodes Antipas laha ab vi aiham. 2 Labi ame im lam aihemu aho am na gagome meedam dam laba ab gagoham. “Eho ozoha, iho etei lab aidam im lam gi dat eho amu dam gagome bio vaitoi oteheda Yohanes Mei Vuu Valo Baptisleiamda labe aho fat ahedi usai ame im faasi meeda moio? Am fat ahedi usaha labe feà dateli ame na damat ihimo modem biem im feàna lam la modi le modida moio?” lahame ab gagoham. 3 Yohanes Mei Vuu Valo Baptisleiamda labe damat am otehe bak lam gi neha: Amu di iube Boehàda Herodesat aho aba meida Filipus labe am nam Herodias ab vaham. Labihàmu Yohanesat im lam ozobohudi Herodes bake neha, “Obo meida Filipusam nam oho vaha bak lam om git modeho. Ne, Musat aham di iube Alat aba vameadaha im nehasu toeme fi hasi esuhu bak. ‘Obo meida labe am nam a vamule,’ lahame toeme fi hasi esuhuna lam om akati vi modehe vaba voou fa obo meida labe am nam fa vahela?” lahame Herodes bake dihasi im vahokeda. Labi neo dihasi im vahokeda. Labihada. Labihadume modeha Herodesat faki am meo dam gagome Yohanes si anekehà ahim giame sel ab ousuham. 5 Ame di lam Herodes abo Yohanes bake otelo àhàki meeda. Lahana dam dua bak vedi neha, “Yohanes abo Alat vameadaha im aime fa dam bake ahate vameaidahada meida am bak,” lahame im abada aime tu vuzehi meeda. Labihàmu Herodesat Yohanes otem bak vei iedi gi si sel ousda. 6 Labi ba digat meida iube Herodes am faaha digat neo fuhemu dam gagome vahi na ab àdamam. Labi na vazisi àdam di labe Herodiasam adnamat ame dam labe iho avaesdam laba le duzu ab etoedamam. Etoedume modeha Herodes labe aho aaha am ahu gelevai ab deeli vàhàdeham. 7 Labihahemu aho voadam nam soao laba ab gagoham. “Oho etei lab etoedaha bak lam em aaha abo deeleho. Oho ozom, eho oba ana loela? Oho valo modemna lam gagomeam eho oba ame na lom bak. Em ba giomim gagom kaio,” lahame gagu vàmadi ohu ab vaham. 8 Lahame labi gagu vàmadi esu modeha nam soao nibe am oi Herodias bake le ab gagoham. “Oia, ai eho etoehemu deeli na lolo gagohona oho ozom, eho ai oho ba vahadate ana gagu vaela?” Lahahat am oiat aba aho ozoho bak lam nam soao laba ab vameame oluham. Labi nam soao labe fa am ai voamdate le ab gagoham. “Oho abo taho etei nibe om meo dam gagu Yohanes Mei Vuu Valo Baptisleiamda labe am bio vaitoi am ohubuta fi lihibabu esu eba fa vou lele. Labi, ‘Am oteho,’ laham bak em aase.” 9 Lahame labi gagu modeha Herodes am ahu ab faideham. “Em akati dam zi nim vou faodahit gagu vàmadi ohu vahela? Em gi feidam vabate. Eho nam soao niba lab gagoho bak lam ba voom vabiem bak,” lahame it ozodaha vabamu, “Ame baket modese,” lahame am meo dam gagome ab oluham. Labi ame meo dam labe sel laba le oli Yohanes si am bio ab vaitoham. 11 Labi vaitoi neàdi am ohubuta fi lihibabu esu fa vou li ame nam soao laba ab loham. Labi aho ve am oi bake vou le ab fi ham. 12 Labi ba meit dam Yohanes bake vi tau meedam dam laba le gagu dam labe fa sel laba le Yohanes koeiso lam ve vou futoi vou le koei esum ke bumat laba ab vou oli esuham. Labi esu neàdi Yesus bake le ab gagoham. “Yohanes damat oteho,” lahame ab le gagoham. 13 Labi Yesus Yohanes damat otehe bak aihemu, “Dam dua bak vou esmozi Ahamo dam vaba alim bak laba le aidam bak modese,” lahame ozome neàdi bak lam vou esmozi lazi iheba zisi ab laham. Labi gi etei ihe vihitoi ladam di lam damat aiha, “Yesus ihet laho,” laham bak aihemu dam num debu iudu iube le. Dam num debu iudu iube le. Labihadume vazisi neàdehezobe doait naot vi vule Yesusat zitum bak laba ozome le odosi ab vou faodamam. 14 Labi Yesus Aho le zitu usi aaha dam dua bak Aba doait li odosi faodamna ab aaham. Labihàmu dam laba aam faimu faobekesi dam gaileheda, “Fa iba modi neàdele,” lahame meedam dam laba modi fa ab neàdedamam. 15 Labihadume ab disilo meedamam. Làhàmu Aba vi tau meedam dam labe Aba li ab gagoham. “Disihi bak. Im bak nim dam vaba alim baket modem bak. Laham bake Ai Oho dam duada zi niba gagome fa dam sii modealaha bak iuba oudume dam nibe iho àmna fà le doit vame àdase. Lam bisi neà bak am tame.” 16 Lahahat Yesusat fa ab gagoham. “Vabà! Dam lam ba a gagome oudamule. Gi na àmna ubuda dam zi laba lodume àdameta.” 17 Lahame labi gagoha Am dam labe fa ab vi gagoham. “Aa! Im gi rotibu auohole. Labi bohe gi behàsu. Labihasu vasdam bak.” 18 Labi gagoha Yesusat fa gago, “Ame na àmna lam ve Eba fa vou lemale?” 19 Lahame labi gagu ame na lam vou lehezobe ame dam zi laba gagome sibe baa laba ab nusualadaham. Labi nusualadume neàdi Yesusat ame rotibu auohole lamti bohe behàsu lamti vame vuusualame neàdi ohu vousai tom avaesu Am ai aabo bake, “Neàte,” lahame tom gagu neàdi ame rotibu lamti bohe lamti visoi ab fahedume fa Aba vi tau meedam dam laba lodume iho fa ot vai vame dam duada zi laba lodume uloholi ab àdaham. 20 Labi ame dam zi fai labe ame na zi lam àdume modeha dam ahebu dedehemu zoho ab vahedaham. Labi Aba vi tau meedam dam labe damat lab àme dedehemu vahehena zoho lam fa vi ateti atetidume boloseh vahedume modeha boloseh dua belas ab bektoham. 21 Dam etei laba nusualadume na àhà dam lam gi dam aabota dem di abo lima ribu fuhu bak. Ba lahiti datati tau dem kaio. 22 Labi gi etei na àme neàdi Yesusat Aba vi tau meedam dam laba ab gagoham. “Um nasi fa iheba ziddume biole. Em ba vule tame,” lahame gagu ab oluham. Labi dam lada lam gagu olu neàdi neo dam duada zi lam neo gagome im num bake neo ab oudaham. 23 Labi oudume neàdi Yesus Ahamo Am Ai Ala bake tom gagom bak ozome bak buzoho laba ab laiteham. Labi laisi Ala bake tom gagodume modeha gi ab aibuleham. Ame di lam Yesus gi Ahamo tousda. 24 Labi ame aibu labe Aba vi tau meedam dam labe gi ihimo ihe vihitoi ladume itea tombu fusi modeha nutabe fai iubet li vao baho iho lam bak laba gut foadam labe ihe ab oke okedamam. 25 Labi ihe oke okedume dihalo vabalehe di labe abo jam tiga fusi jam enam fuhu vab di labe Yesusat gi ame aibu zoho labet vulezi gi itea ahoba laba duzui duzuidume dam ihe bake ab vi vuladamam. 26 Labi vi vuladume dam ihe bake fuseo vabali modeha damat it aame iedi ab geham. “Na aibu nim Nomaida Basit iba nohiseo mode taia?” lahame ab iedi geham. 27 Lahame labi geha Yesusat fa ab gagoham. “Um a iedi ahu faidi bisi vi ozodamule. Eho mozo.” 28 Lahahat Petrusat fa ab gagoham. “Boehàda oa, Om abo Yesusat modemeam làhà eba nasi gagome em usi Oba doait itea ahoba nibe Oba lese.” 29 Lahaha Yesusat fa ab gagoham, “Lahana nasi usi lele.” Làhàmu Petrusat ihe labet usi itea ahoba nom duzu Yesus bake doait ab ladamam. 30 Gi etei usi neàt ladam di labe aho vedi vaktesi nabime aaha nutabe fai labe vao beome bubaholedam bak aahemu iedi modeha ab vou teddamam. Labi vou teddàmu Yesus bake ab geham. “Boehàda oa, eba li em vi sile.” 31 Lahame labi geha Yesusat kehàm vaba Petrus ab vi si vousaham. Labi vi si vousai itea ahoba laba vou duzu neàdi gago, “Petrus, om akati Eba mahate tu vuzehi meedam vaba vedi, ‘Eho om soat vausueo? Vausum vabao?’ lahame ahu behàsdi bisi iedi meedàla?” 32 Lahame labi gagu neàdi ame dam behàsu lam fa iheba zisi modeha nutabe fai lamti vao bubaholedam bak lamti ab bagavai seteham. 33 Labi modeha dam ihe laba nusualadaha dam labe im ahu adat iedi iho Yesus bake ab vou baedamam. “Imbote. Om abo Alam Adat vàmtea Om am tame,” lahame ab vou baedaham. 34 Labi neo biodume num debu Genesaret laba lafusi ab zituham. 35 Labi zitu usdume modeha dam bak dedamat aaha, “Dat etei iba leheda nim Yesusat mode?” laham bak lam aame ozobohudi dam num debu bak netàda lam ahebu ab vou fi det ladume uloholeham. “Yesus iba leho,” lahame vou fi det ladume modeha dam ahe dam labe im dam gaileheda zi lam Yesus bake ab vou fet lei fet leidamam. 36 Labi fet lei fet leidume modeha dam duali feà bak fusi meedàmu ame dam labe fa Yesus bake ab tauledamam. “Om sue ahoba dusuhuda sona bohu nao bobusbe zoho labe am aha obe lam iho vi ulase?” lahame vi tauleda. Labi dam gaileheda ahebu ame sue gi koena vi ulaha modi fa ab neàdedaham.

Matius 15

1 Labi ba neo digat meida labe Farisi dam totbaho lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi totbaho lamti vazisi kota Yerusalem labe li Yesus bake ab vi ailo gagoham. 2 “Guru oa, dam ahamda ibi iho fi hasi vou mode usehe im lam Yahudi dam bake vuusu im vameame faheme modiam dam busaoda bada zi nibe iho fa vame ibi iho ozoho baket vi tauidume dualehe im lam akati modi Oba vi tau meedam dam labe tau modem vaba mode? Akati modi na àlo modem di ibi iho anekehà valo ekeme itatame neàdi na àiam baket modem vaba vedi anekehà gi labihasu na àdam damat modela?” 3 Lahame labi gagoha Yesusat fa ab vi gagoham. “Ne lahana um akati Alat Aba Aho gagu fi hasi esuhu im nim uho mu zidazi fa gi dam ahamda labe ibi iho fi hasi vou mode usehe im lam vame fa ubu uho ozoho bak vi tauidume tombuli meedàla? 4 Nehaha bak. Alat aham di iube nehi gagu fi hasi esuhu bak. ‘Um ai bake modeo, um oi bake modeo, ahu adat iedi uba gagoho im laba vuzehi meedale.’ Labi im meida neha: ‘Meit am ai modeo, am oi modeo, faki, “Seee. Taho elole,” lahame feàtàme vi uloome gagomeam làhà meit ame da laba fa neo oteme vataum bak.’ Lahame aham di iube Alat gagu fi hasi esuhu im lam uho akati meedam vaba vazidazehela? 5 Uho vedi fa nehi ozome vahokedam damat modem bak. Uho meit am ai bake modeo, am oi bake modeo, nehi gagomeam, ‘Ai oa, oi oa, em na nim oba lom neàte. Lahana eho amu Ala bake lolo gagu vàmadi fi hasi esuhu labe oba lom vabi mozo,’ lahame ame da labe labi gagomeam làhà uho vedi ame da labe aho lab gagoho bak laba, ‘Ahole modeho,’ lahame vi gagodam damat modem bak. 6 Uho labi vi gagodam labe ame da labe am ai bake modeo, am oi bake modeo, ahu adat iedi vou baedam vaba, ‘Gi voom neàte,’ lahame vi vahokedam damat modem bak. Um gi um tai ahamda labe ibi iho fi hasi vou mode usehe im lam um dam bada nibe fa vame meedume tombuli, ‘Iho ame im meedase,’ lahame meedam damat modem bak. Uho gi labihasu meedam labet um gi Alat Aba Aho amu lab gagu fi hasi esuhu im lam ab modi voou seteham bak. 7 Um gi ahobat neàdi meedam damat modem bak. Dat ahamda Alat vameadaha im aime fa dam bake ahate vameaidahada Yesaya labe aba aho aham di iube fet toeme esuhu Alam im meida nim gi um dam badate vàlu gagoho imot modem bak. 8 ‘Alat neha, “Ame Israel dam nim Em ee vousai Eba vou baedam di gi im ahat ahamo vou baeda. Ba ame dam labe im ahulat vi tau Eba deelem vabak. 9 Ame dam nibe iho, ‘Em abo feàte,’ lahame Eba vou baedam di gi modeme vanamai voom damat modem bak. Labi laha ibi iho lab vahokedam im lam ba Ebe Eho gagu fi hasi esuhu im vahokedam vaba vedi fa gi dam bakdat ihimo ahulat ozome gagu fi hasi vou vahoke usehe im vahokedam damat modem bak,” lahame Alat gagoho bak.’ Lahame Yesayat aho aham di iube lab fet gagu vàmadi esuhu bak labe imbodi uho ab meedamam bak,” lahame Yesusat ab vameadaham. 10 Labi im lada lam vameadume neàdi Yesusat neo dam dua bak laba, “Aba lele,” lahame gagodume li netàdi Aho ab vi vameadamam. “Um ahu iademe vi ozodume ozobohudem bake Eho etei uba vameadalo modem im nidi nim mahate iademe aidale. 11 Um Yahudi dam busaoda labe ubu uho nehi vahokedam im nim Alat ba uledem vabak. Uho vedi iho im ahat na ve àm bak labet modi it vàhàdeme faidi fi hasi modesda tiba. Lahana Alat ozomta ba im ahat na àm bak labet modi im it vàhàdeme faidi fi hasi modesdam vabak. Gi im ahat futom im labet iba modi im vàhàdeme faidedam bak.” 12 Lahame Yesus gi etei labi gagoha Aba vi tau meedam dam labe Aba li netàdi gago, “Aia, Oho etei lab vameadaha im lam Farisi damat vi aime Oba ahu adat fakehe bak Om ozodà?” 13 Làhàmu Yesusat fa ab gagoham. “Ne, um ozom vaba? Em Aiat Ahamo debe usihi vabna ahebu omnaoti vaome voedume dehalem meo bak. 14 Labihàmu ame Farisi dam laba gi ozahigeàmu mu vou esule. Dam lam guruta guru. Lahana ame dam lam gi fako faina modesdam bak. Neham bak. Dam fako faida behàsu labe dat meida anekehà vuusu vou lam biem bak. Labihameam dam ahim lam gi amait bak bumat laba nom ilum bak.” 15 Lahame labi gagoha Petrusat Yesus bake vi ailo ab gagoham. “Aia, Oho amu neha, ‘Alat ozomta ba im ahat na àm bak labet modi im it vàhàdeme faidi fi hasi modesdam vabak,’ lahame gagoho im lam am tombu iba fa ahate vameadale. Im ozom biem bak.” 16 Lahahat Yesusat fa ab gagoham. “Oo, um vi ozome ozobohudem vaba? Neha taia? 17 Na àmna gi ahat àme zulu esum bak. Labi vou faobe ba haeli vieme setem bak. 18 Lahana ibi iho im ahulat vi ozome neàdi futodam im lam iba modi it vàhàdeme faidedam im am bak. 19 Dam ahulat it ozome modi faidem im neha: Bisi fai bak meedam bak ozom bak ame. Mei otem bak ame. Nam dat eheda modeo, dat nam eheda modeo, aa modem bak ahebu ame. Ostame fi loholi ot vai ot vaidam bak ahebu ame. Mei na aa vam bak ame. Meia giomim vàlu gagodam bak ame. Meia feàtàdam bak ame. 20 Labihasu ame im zi lam iba modi it vàhàdeme faidemna am bak. Ba ame dam labe ibi iho ozoho baket anekehà valo ekeme itatam vaba na àm bak labet meia modi vàhàdeme faidem vabak,” lahame Yesusat ab vahokedaham. 21 Labi Yesusat ame bak lada vou esmozi neo ladume num debu Tirus lamti num debu Sidon lamti laha obe modesuhu bak laba ab laham. 22 Labi laba le lafusi modeha Kanaanda nam abo Yahudi namet modem vab nam busao labe aho azihi bak netàdehemu lehe labe Yesus bake li nehame tauleda. “Boehàda oa, Om abo Dat Ahamda Boehàda Daud Vou Faat Lehe Mekehàda am bak. Labihàmu Om eba aame faobekesi taule. Em adnamat mei ahu oli veimam setan am ahu laba veimai geàdam bohu modesdalo. Oho gagu futoi itale,” lahame ab tauledamam. 23 Lahame labi tauledume modeha Yesus ba dae bum kai. Gi daleà lada. Làhàmu Aba vi tau meedam dam labe fa Yesus bake vuli ab gagodamam. “Aia, Oho nam laba gagu fa lale. Nam lam bisi iba vi vaiti vaitidume imti vabidume im alihi nemahuseo mozo.” 24 Lahahat Yesusat fa gago, “Alat Eba gagu oluhu di lam gi Israel dam abo domba vou aasdam dam vabalehe bake Em gagome oluhu bak. Ba Yahudi damat modem vab dam laba gagu oluhu vabak.” 25 Lahame labi gagoha ame nam labe geàmu ozahit Yesus bake netàdi am ahu adat iedi, “Am abo feàte,” lahame vou baedalo Am naba modesdam bak laba ahit ogomasu ab biteham. Biti Yesus bake vou baedam labe neo tauleda. “Boehàda oa, eba taule,” lahame neo tauleda. 26 Lahahat Yesusat fa gago, “Data bake lu àlo modemna ba im veme esu àm vabak. Labiham fai bak.” 27 Lahahat ame nam labe fa neo gago, “Lo. Lamota imbot. Lahana Boehàda Om ozom vaba? Vem deda labe am na vaheme àm ut gaheba laba datalu na lu àm di na keobe goagoadamna lam am vem ad laba dozomna labe gi labaha àmna taia?” 28 Lahahat Yesusat fa ab gagoham. “Oia, oho etei Eba lab tu vuzehehe bak lam abo feàna modeho. Oho Eba lab gagoho bak lam Eho mode tame,” lahame uledi gagoha am adnamat lam gi omozit ame di labe fa ab neàdeham. 29 Labi Yesus neo ame bak lam vou esmozi fa neo ledume Itea Galilea valau obe lezi ab ladamam. Labi ladume bak buzoho laba laisi ab nusuham. 30 Labi nusu aaha dam aheda zi labe fa dam ahaladiame nisileheda zi vuusualame Aba vi valada. Neha: Abo nao zoho modeo, anekehà modeo, nutabedeheda zi ame. Labi fako faida zi ame. Labi dae vabda zi ame. Labi dam faida zi totbaho amomoi ame. Labihasu dam ahe damat Yesus bake vou ledume Am naba modesuhu bak laba oumahedume Yesusat ab uladdume modi fa ab neàdedaham. 31 Labi ame dam giida labe iho aaha, dam dae vabda fa modi im vameada. Labi dam nisileheda modi fa neàdeda. Labi nao nutabedeheda fa neàdedume usnadume lada. Labi dam fako faida modi fa na aam neàdeda. Labihasu ahebu meedume neàdedam bak aadahemu àvodi Israel dam vuusdam Ala bake, “Abo feàte,” lahame ab vou baedamam. 32 Labi ame di labe Yesusat Aho Aba vi tau meedam dam laba gagome li dozeadume neàdi ab gagoham. “Dam duada zi nim iba tau iddume usi làteladi im na àmna folehe labe idoali feà bak fuhu bak lam aam faimu Em faobekeho. Em ba dam nim na àhà vabna ideia olum kaio. Zie bohu nim fa ladameam gi doni bake ahadou faa susume lam bili la biti le bitiam zohàme ba labihasu olum maleho.” 33 Lahame labi gagoha Aba vi tau meedam dam labe fa ab vi gagoham. “Ne lahana dam vaba alim bak nim iho ake le na àmna aame vame fa vou li dam bake lodume uloholi àdàla?” 34 Lahahat Yesusat fa vi ailo gago, “Rotibu ubuda amamo vou lehela?” Lahahat Am dam labe fa ab vi gagoham. “Im rotibu tujuh ehete. Labi bohe koena ame. Gi labihasu vou lehe bak.” 35 Laham bak lam aime neàdi Yesusat fa ame dam duada zi laba gagome bak laba ab nusualadaham. 36 Labi nusualadume neàdi Aho ame rotibu tujuh lamti bohe koena lamti vame Ala bake, “Neàte,” lahame tom gagu neàdi fahedume Aba vi tau meedam dam laba lodume iho fa vame ame dam duada zi laba lodume uloholi ab àdaham. 37 Labi ame dam zi fai labe ame na zi lam àdume modeha dam ahebu dedehemu zoho ab vahedaham. Labi Aba vi tau meedam dam labe damat lab àme dedehemu vahehena zoho lam fa vi ateti atetidume boloseh vahedume modeha boloseh ab tujuhleham. Labi modeha ame boloseh lam ahebu ab bektoham. 38 Dam etei lab nusualadume na àhà dam lam gi dam aabota dem di abo empat ribu fuhu bak. Ba lahiti datati tau dem kaio. 39 Labi na lam àdume neàdi Yesus ame dam duada zi lam gagome fa ibi bake ab oudaham. Labi dam lada lam oudume neàdi Yesus Aba vi tau meedam dam lamti iheba ziddume Magadan bak laba ab bioham.

Matius 16

1 Labi Magadan bak laba biou zitu azibe modeha Farisi dam totbaho lamti labi Saduki dam totbaho lamti vazisi, “Iho im nehasu Yesus bake modi aase,” lahame fet ozome Yesus bake netàdi ootedam labe ab gagodamam. “ ‘Om abo Alat Gagu Fihasi Vimteme Oluhu Dat Boehàda am tame,’ lahamda nasi na damat ihimo modem biem im feàna fet modemale. Labi im aame ozobohudese,” lahame ab gagodamam. 2 Lahahat Yesusat fa gago. “Um dam abo dimataedam di asum iuba tom aame nehi gagodam meo dam taia? ‘Asum bozilehe bak. Etei dihameam di neà faam bak,’ lahame aame gagu diham di gi ame baket modem bak. 3 Laham vab di dihambe asum iuba aameam di ilemeam uho nehi aame gagom meo dam taia? ‘Asum di ilehe bak. Etei abaalem bak,’ lahame aame gagomeam gi ame baket modem bak. Um abo gi asum ahoba iuba modem bakta fet aame ozobohudi gagodam damat modem bak. Ne, um im labihamna meedam damat akati Eho etei li vahokedam im nimti labi Eho im feàna meedam bak lamti uho fet aadamna akati nehame vi ozodam vaba mode? ‘Elàhà! Alat iba vuusu im Am damali iba vahokedam bak ab faasi meedam ame?’ laham bak lam akati um ozobohudem vaba vabili ahusobuli modela? 4 Um etei dam bada nim gi bisi faina meedam bak tadem damat moz. Abo, ‘Em ba Alat gagu olum kaio,’ lahame Eba tu vuzehem mom damat modem bak. Um gi labihadam damat modem labe uho vedi Eba neha, ‘ “Om Alat Gagu Fihasi Vimteme Oluhu Dat Boehàda ameo?” laham bak lam im biem bake na damat ihimo modem biem im feàna Oho nasi fet modehemu im aame ozobohudese,’ lahame Eba gagodam damat modem bak. Lahana Em ba uledi ame bak lam uba etei di nibe fet modem moho bak. Ba fet vouhodam bak lamti gagom kaio. Neham bak. Aham di iube Alat na damat ihimo modem biem im feàna abo Yunus bake modehe im lam dam bake amu fet modehe bak lamti ulohona uho ba aa tame,” lahame labihasu vameadume neàdi dam lada lam vou esmozi Aba vi tau meedam damti iheba ziddume Itea Galilea labe ab biodamam. 5 Labi biou zituadume ladameam Aba vi tau meedam dam labe iho it ozoha, im roti vou lehe vab damat modem bak ab it ozobohudeham. 6 Labi ame di labe Yesusat Aba vi tau meedam dam laba ab gagoham. “Um iademe vou faovoehebeat meedale. Farisi dam lamti Saduki dam lamti ibi iho vou lehe na abo na vizi fi kidemna ragi lam ba a vamule.” 7 Lahame labi gagoha Aba vi tau meedam dam labe aime ihimo ab ot gagoidamam. “Uho ozom, iho roti vou lehe vabake Yesus iba labi gagohe?” 8 Lahame ame dam labe iho lab ot gagoidam im lam Yesusat ahamo ozobohudi ab vi gagoham. “Um akati Eho etei im totobet lab gagoho bak lam uho vabili vedi Eho uho roti vou lehe vabak laba ozome uba gagoho tiba vabi vi ozodàla? Làhà um mahate Eba tu vuzehi meedam vab damat mode? 9 Làhà um Eho amu meedaha bak lam uho fetehesu it ozodume vi ozobohudem vab damat mode? Um gi ozobohudehena ahit fa vabilehe damali mode? Eho amu dam lima ribu zi fai laba rotibu auohole faheme lodaha di lam damat àme neàdi vekehe roti zoho lam uho vi ateti atetidume boloseh amamo vahehela? 10 Labi laha Eho amu dam empat ribu zi fai laba laha rotibu tujuh faheme lodaha di lam damat àme neàdi vekehe roti zoho lam uho vi ateti atetidume boloseh amamo vahehela? 11 Lahana um akati Eho etei uba lab gagoho bak lam akati uho vedi Eho roti aabo gagoho tiba vi ozodàla? Eho gi nehasu ozome uba labi mali gagoho bak. ‘Farisi dam lamti Saduki dam lamti ibi iho vou lehe na vizi fi kidemna lam uba vizemo. Um iademe vou faovoele,’ lahaha bak ozome uba labi gagoho bak.” 12 Lahame labi gagoha Yesus Aba vi tau meedam dam labe fa ab vi ozobohudeham. “Elàhà! Yesusat gi ame Farisi dam lamti Saduki dam lamti ibi iho giomim vahokedam im lam, ‘A aime tu vuzehi meedamule,’ laham bak iba vahokelo Aho gi na vizi fi kidemna laba ahit vàlu im totobet fi koada taia?” lahame ab vi ozobohudeham. 13 Labi ba digat meida iube Yesus Aba vi tau meedam dam lamti ladume num debu Kaisarea Filipi laba netàdesome modeha gi aba zoho laba modealadaha num debu bak laba goda. Godam di labe Yesusat Aba vi tau meedam dam laba vi ailo ab gagoham. “Dam duada labe, ‘Asum Ahoba Iubet Bak Niba Li Dateleheda lam amat modela?’ lahame vameadaha bak uho akatihasu vi aidàla?” 14 Lahame labi vi gagu aiha Aba vi tau meedam dam labe fa ab gagoham. “Dam duada totbaho labe vedi neha, ‘Om gi Yohanes Mei Vuu Valo Baptisleiamda labe amu elohona fat ahedi mode moio?’ lahame vameada. Labi dam duada totbaho labe vedi neha, ‘Om gi aham di iube Alat vameadaha im aime fa dam bake ahate vameaidahada Elia amu ahena Alat vahada fa nom iluhe moio?’ lahame vameada. Labi neo dam dam duada totbaho labe vedi neha, ‘Om gi Yeremiat mode moio?’ lahame vameada. Labi neo dam zohot vedi neha, ‘Om gi dat ahamda Alat vameadaha im aime fa dam bake ahate vameaidahada meida eloho dàt fat ahedi lehe moio?’ lahame vameada. Dam zi labe Oba labihasu ozome otesi otesidam bak.” 15 Lahame labi vameadume modeha Yesusat fa neo vi ailo ab gagoham. “Ne lahana um akatiha? Um, ‘Em amat modela?’ laham bak um akatihasu ozome gagodàla?” 16 Lahahat Simon ee ba taluhuda Petrus labe fa ab gagoham. “Aia, Om abo Alat Gagu Fihasi Vimteme Oluhu Dat Boehàda am bak. Om abo elom giki Ala labe Am Adat am bak.” 17 Lahame labi gagoha Yesusat fa ab gagoham. “Yon labe am adat Simon oa, omota Alat abo neàna modehe bak. Oho etei lab gagu tombalehe bak lam damat oba vahokedume om ozobohudi fi gatei gagoho vabak. Gi Em Aiat asum ahoba iuba azim Ala labe Aho oba modi ozobohudi om fi gatehe labe oho gagu tombalehe bak. 18 Damat ke baana ahoba laba num mom bakti ulohona Eho oba modi teudi oho ba Ebe Eho meedaha Im Neàna vou vameateda tame. Oho labihadam labe dam dua bak labe obo oho etei lab ahate gagu tombalehe bak lamti ulohona Eba laha tu vuzehi teudi laodoamsu meeda tame. Ba elodam dam modemnàme meit ba Eba tu vuzehi vazisi meedume baleài meedam bak lam ba vàhàdeme setem vabak. Gi labahana bohu vuusdam bak. Labihàmu om abo ke teudati uloho bak laba ozome etei Eho om ee Petrus lahadalo modem bak. 19 Damat Eba tu vuzehi Em damalehe dam lam Alat Eba gagohemu Eho fa ot vai fa oba gagu oho fa im dedateli Em damalehe dam lam fa vuusu meedamda om am bak. Labiham labe oho bak adba niba na im ozome neàdi gagom di ame bak lam gi Alat amu asum ahoba iuba ozome neàdehena ahum om gi ba ozome gagodam bak. Neham bak. Oho nehi gagomeam, ‘Ba a modemule,’ lahame mali gagom di modeo, laham vaba, ‘Lo, modem neàte,’ lahame ozome uledi gagom di modeo, Alat gi amu ozome neàdi gagohona ahum om gi ba ozome gagodam bak.” 20 Lahame Yesusat Petrus bake labihasu vameadume neàdi Aho Aba vi tau meedam dam laba neo ab gagoham. “Petrusat etei Em ozobohudi neha, ‘Om abo Alat Gagu Fihasi Vimteme Oluhu Dat Boehàda am tame,’ lahame lab gagu tombalehe bak lam uho meia a le fi demule,” lahame Yesusat ab gagu mali esuham. 21 Ame digat labe Yesusat damat Aba ba modelo modem im lam Aba vi tau meedam dam laba alimeat fet ab vameadamam. Aho neha, “Em Ai Alat fet gagu esuhemu Em abo kota Yerusalem laba lalo modem bak. Labi laba le Yahudi damat ibi iho tu vuzehi meedam im vuusdam tohe dam zi labe vahi Em mu fa Eba fai bak bohu modi geàda tame. Labi laha meia gagu Em oteme eloi fa usi behàsdi Em eloho bak labet Alat modi fa ahedi usa tame,” laham im lam alimeat ab fet vameadume esuham. 22 Lahame labi vameadume modeha Petrusat Yesus vi vuu ubahi duzu gago, “Boehàda, ba a labi gagomule. Oho etei lab gagoho bak lam ba a damat oba vabidume geàdamule,” lahame Petrusat gi ostame ab vi vabededamam. 23 Lahame labi vabededume modeha Yesusat fa it vaktesi Petrus bake aasu gago, “Om gi Iblisit gagom im Eba gagohemu om fa Em ohuse duzule. Em Aiat Aba Ahamo ozome modelo modem bak ehena oho vedi Eba mali zie aum bakti ulohona meedam bak. Oho etei Eba lab gagoho bak lam gi dam bak damat ozom bak Eba gagoho bak. Ba Em Ai Alat Aba Aho fet ozoho bak gagoho vabak,” lahame Petrus bake ab vi gagoham. 24 Labi Petrus bake gagu neàdi Yesusat fa Aba vi tau meedam dam laba neo ab vi vameadamam. “Meit Ebe Eho vahokedam im ozobohudi vi tau meedalo àhàkedameam làhà ba im aba aho it ozome modelo àhàkemda lam ba it ozome meedam vabak. Ame da labe aho gi neham bak. ‘Eho Yesus bake tu vuzehi im Abada meedàmu damat em si ut tetehesuhunaso lam ve lu vatu vou ladam di lam damat eba aasdamnàme eho gi ozahit vou le em paku dou elom neà bak,’ lahame Eba labihasu tu vuzehi gagu vàmademda lam aho Eba tu vuzehi vi tau meedam neà bak. 25 Neham bak. Meit aba aho Eba lab tu vuzehehe bak lam ahate gagomeam damat am otem bak labna zohàme it vou faovoi vei iedi ahit biehenali, ‘Em Yesus bake tu vuzehi Am damalem kaio,’ lahame veibadamda lam ba Alati vahi ahe neàna bohu vuusdam vabak. Lahana meit neha, ‘Em Yesus bake tu vuzehi im Aba Aho ozohoda lamota meedam labe damat em otemeam làhà gi neà bak. Em ba àvodem vabak,’ lahame aba aho elom bak laba bisi it vou faovoi meedam vabda lam Alati vahi gi ahe neàna bohu vuusdamda am bak. 26 Iho bak niba esdam di meit nehi ozo, ‘Em gi nazoh zi nim vadume duali neàdese,’ lahame ozodamda labe aho vedi am ahu it vou faovoi Eba tu vuzehi Alati ahili ahena aabo laba vuusdam vabameam làhà aho amu modehe zoho ium gi meedume vanamai voom bak. Iho Alati ahili ahena aabo laba vuusdam bak lam iho ba anat vi lu và? Ba na ot loiam biem bak. 27 Neham labe Eho uba labi gagoho bak. Em Aiat Am na fauha meona fako iedemna ogatei modealaha bak lam fa Eba abo Asum Ahoba Iubet Bak Niba Li Dateleheda niba modi vizi feà Dateli Alat Am im gagu vou usem dam lamti ba nom ilu duzum bak. Labi ame di lam damat bak niba esdam di labe meedaha im lam Eho fa vi ozome ame baleà vouhou dam im neà bakta meedam dam laba eho fa im neà bak vatauda. Labi dam im fai bakta meedam dam laba Eho fa im fai bak vatauda. Labihasu faheme meeda tame. 28 Lo, lamota imbot. Lahana Eho etei uba neo gagolo modem im imboda nidi nim laha nasi aima. Um dam etei nib dozeadaha dam totbahota taho elom vaba ahe lahasdamna uho Em Abo Asum Ahoba Iubet Bak Niba Li Dateleheda nibe Boehàdateboli dam bake vuusu im vahokedalo li duzum bak um dam zohota ame bak aa tame,” lahame Yesusat ab vahokedaham.

Matius 17

1 Labi usi enamli neàdi Yesus Aho Aba vi tau meedam dam Petrusti Yakobusti Yakobusam vahada Yohanesti labihasu gi dam lada làtela lamota gagome sibu bake ab vou laiteham. 2 Labi vou laisi modeha Yesus Am alihi veimdehe bak lam Aba vi tau meedam dam làtela labe ab aaham. Abo gi ala digadda meo fau fako aam iedem bakti ulohona Yesus Am dauha laba ab modesuham. Labi Am sue laha ab fauha meoleham. 3 Labi ame dam làtela labe iho neo vi aaha Alat vameadaha im aime fa dam bake ahate vameaidaha dam abo aham di iube eloi seddaha dam behàsu Musati Eliati iho lehe bak aaha vabna nom ilu Yesus Am obe laba vi tau duzu im vameadamna ab aaham. 4 Labi ame bak lam aahemu Petrusat Yesus bake ab gagoham. “Dat Boehàda oa, iho etei niba li odosi umti vahehe bak abo neàte. Oho ozom, eho im nehasu modem neào? Teohet mom num làtela eho niba mome meida Oba mo. Labi meida Musa bake mo. Labi meida Elia bake mo. Eho gi labiham neào?” 5 Lahame Petrusat gi etei labi vameadam lahasuhu di labe ulo fauha meona nom ilu ame dam lam ab baguamdi seteham. Labi modeha Alat Am dae ulo labe futoi gago, “Da nim Em Adat vàmtea Ebe Eho bisi deelemda Am am tame. Em abo Aba Aho meedam bak lam Em aam deeleho. Uho Aho vameadam im mahate aime meedale,” lahame ab vameadaham. 6 Labi dam làtela labe iho ame dae lam aiha udovai ahu adat iedi ahit ogomasu bake ab biddaham. 7 Lahana Yesus ame dam niba le ulasi ab gagoham. “Bisi a iedemule. Fa usai duzule.” 8 Lahame labi gagohemu dam labe fa im ohu vousai aaha dam behàsu lam fa alimdi seti gi Yesusta Ahamo doudamna ab aaham. 9 Labi im lam meedume neàdi sibu labe fa lezedam di labe Yesusat Am dam làtela niba ab gagoham. “Uho etei le aadaha bak lam Em Abo Asum Ahoba Iubet Bak Niba Li Dateleheda nim eloi Em eloho bak labet Alat modi fa ahedi usaha vab di ba meia a le fi demule.” 10 Lahame labi gagoha ame dam làtela labe fa vi ailo gago, “Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe nehi vahokedamna iho aihi bak. ‘Amu dat ahamda Alat vameadaha im aime fa dam bake ahate vameaidahada Eliat nasi bak niba fa le. Labi Alat Gagu Fihasi Vimteme Olulo Modem Dat Boehàda ba vule tame,’ lahame vahokehena iho aihi bak. Ne, ‘Om ame Da am tame,’ lahana iho etei Eliam alihi aahana aho Om ba vulem bak zie vuehe vabna akati nasi fa lahela? Làhà, gurut iba lab vahokedam im lam giomimot mode?” 11 Lahame labi gagoha Yesusat fa vi gago, “Lo, lamota imbot. Eliat nasi bak niba li dam bake nehi fet vameada. ‘Alat Gagu Fihasi Vimteme Olulo Modem Dat Boehàda le tame,’ lahame vameadume damat aime neàdi im ahu vabiedume ahumdi vou faodam bak ehe bak. 12 Lahana um ozom vaba? Ame da Eliati ulohoda amu gi Eho ba vulem bake nasi li duzu neàdehe bak. Nasi li duzuhunàme aho lab vahokedaha im lam damat aime tuhu vabak. Vedi ame dam labe ibi iho modelo àhàkehe bak labet modi aba fa fai bak meedume vabidume geàdaha bak. Labi laha kehàm vaba ame dam labe Em Abo Asum Ahoba Iubet Bak Niba Li Dateleheda nim Eba laha gi ame baket neo meeda tame.” 13 Lahame labi gagoha ame dam làtela labe ab vi ozobohudeham. “Oo làhà! Am gi Yohanes Mei Vuu Valo Baptisleiamda laba ozome Elia bake vàlu vameadaha taia?” lahame ab vi ozobohudeham. 14 Labi Yesus Aba vi tau meedam dam làtela lam iho vahi lezi aaha dam duada labe Aba doait li faodamna lezi ab aaham. Labi modeha dat vàmtea labe Yesusam naba modesdam laba ogomasu ahit bake biti tauleme ab gagodamam. 15 “Dat Boehàda oa, em daboseà nim Oho li aame faobekesi modi fa neàdele. Mei ahu oli veimam setan labet aba modi aheli kehanabu vaome geàdamehamdi itaida. Labi laha ame setan labe aba modi am vua bak modeo, vao bak modeo, ostame bitidam meote. 16 Labi modidàmu eho Oba vi tau meedam dam totbaho niba tauledume gago, ‘Uho ame setan laba gagu futoi itale,’ lahame gagoha dam labe modesome modeha modem bi moho,” lahame Yesus bake ab vameadaham. 17 Labi vameame modeha Yesusat fa ame lab odosdam dam zi laba ab gagoham. “Em abo uba tau azibehamdehena um eteida nim akati Eba mahate tu vuzehem vaba modela? Akati Alat Aba Aho ozoho baket uho modehe vaba akati bisi odohabuli git meedam bak bohu vuusdàla? Eho uba vuusdam di adi bake fusi um mu voe? Uho Eba tu vuzehem bak Eho ba gi labihasu vou faodà?” lahame gagu neàdi fa ame da niba ab gagoham. “Om daboseà nasi ve vou lele.” 18 Lahame labi gagohemu ame da labe le am daboseà ve fa ab vou leham. Labi Yesusat ame setan laba neha, “Om nasi daboseà nim vou esmozi itale,” lahame mali gagoha ame setan labe daboseà nim vou esmozi ab itame seteham. Labi modeha daboseà lam modi fa ab neàdeham. 19 Labihadume dam duada zi fa le seti Yesus Ahamo tousdam di Aba vi tau meedam dam labe Aba ab gagoham. “Oho ozom, akati modi iho ame setan lam iho gagu futoi itasome modeha modem bi mohela?” 20 Lahahat Yesusat fa gago, “Neham labe uho modem biehe bak. Uho Eba mahate tu vuzehi meedam vab labe labihaha bak. Lo, lamota imbot. Lahana Eho etei uba neo gagolo modem im imboda nidi nim laha nasi aima. Uho meit Eba tu vuzehe bak abo gi ut ahakebu oo keobeti uloholi gi koena tu vuzehemta làhà uho gi sibu feàda laba, ‘Fa iuba le duzule,’ lahame gagom di ame sibu feàda lam oho gagoho bak lam aime vuzehi fa iuba le duzum bak. Abo gi na ahebu gagom di modem tadem bak. [ 21 Lahana mei ahu oli veimai ahelem setan lamohoda gagu futoi italo modem di gi modem vabak. Abo amu nasi na àm bak ahit mu Ala bake tom gagodume neàdi afoezobe ba ame setan lamohoda gagu futoi itam bak,]” lahame Yesusat ab vameadaham. 22 Labi Yesusat Aba vi tau meedam dam dua belas lam Aho neo vou ladume Galilea bak laba ab lafuham. Laba lafusi esdume modeha Yesusat Am dam dua belas laba ab gagoham. “Um aile. Em Abo Asum Ahoba Iubet Bak Niba Li Dateleheda nim kehàm vaba meit Em vou fohome dam bake ub lu ote tame. Labi oteme usi behàsdi Em eloho bak labet Alat modi fa ahedi usa tame,” lahame labi gagoha Aba vi tau meedam dam labe im ahu ab faideham. 24 Labi Yesusat Aba vi tau meedam dam lam Aho neo vou ladume num debu Kapernaum laba ab vou fuham. Labi vou fusi aidam di labe Fihasi Ala Bake Vou Baedam Num Vàmteabu faidehe bake vabielo modem doi pajak lam abo Yahudi damta gagome atem dam labe Petrus bake li vi ailo ab gagoham. “Guru ubuda lam ame Num Vàmteabu lam faidem bake vabiem doi pajak abo tahun ahebu gi lodam doi lam Aho lodào? Lodam vabao?” 25 Lahame labi gagoha Petrusat fa gago, “Lo, lodam bak.” Labi gagu neàdi Petrus giida labe ibi iho esdam num laba fa oli modeha Petrusat aho bako lab futoi doi vam bak vameaha im fa Yesus bake gagosome modeha Yesus gi Ahamo nasi ozobohudi ab gut vameadamam. “Simon, om akatihasu ozodà? Dam bakdate vuusu im vahokedam pemerintah boehàda zi labe ibi iho vam doi pajak lam dam bake gagome vam di oho ozom, ana dam bake gagome vadà? Gi im adam debuta ozome gagome ame doi pajak vadào? Gi dam ibi iho vuusdam dam lamota gagome ame doi pajak vadào? Oho ozom, akatihasu meedà?” 26 Lahame labi gagoha Petrusat fa gago, “Ame boehàda zi labe ibi iho vuusdam dam lamota gagome vadam bak.” Lahame labi gagoha Yesusat fa neo gago, “Làhà oho labihasu gagomeam làhà ba ame boehàda zi labe im adam debu laba gagome vadam vab taia? Neham bak. Em Alam Adat am bak. Labi um laha Alat Am damalehe dam um am bak. Labihàmu gi lodam doi pajak lam im ba tau lodam vab taia? 27 Lahamnàme damat iba ahu adat faki ozomsum bake gi ozahit ame pajak lodam neàte. Labihàmu oho nasi itea iuba lazi kas nom voou bohe ahamte vahada aha laba aameam emti omti ame doi pajak lodam bakti ulohona aa tame. Labi oho ame doi lam ve fa Fihasi Ala Bake Vou Baedam Num Vàmteabu laba ozome gi lodam doi pajak lam atem dam laba lodale,” lahame gagu neàdi ame baket ab modeham.

Matius 18

1 Labi ba digat meida iube Yesus Aba vi tau meedam dam labe Aba li vi ailo ab gagoham. “Aia, ba diamut Alat Oba modi Boehàdateboli dam bake deeli vame Om damali vuusu im vahokedam di lam im Om dam dua belas nim Oho da adidate gagu modi ee feàda talu Oba tau dam vuusu im vahokedàla?” 2 Lahame labi gagoha Yesusat fa data koena laba gagome li ame dam dua belas labe ibi iho avaelaha tot laba ab vou li duzuham. Labi vou li duzu neàdi ame dam laba ab faasi vameadamam. 3 “Nasi aima. Eho etei uba gagolo modem im imboda nidi nim mahate tu vi ozodam bohu meedale. Uho neha, ‘Bisi feàda im am bak,’ lahame ubu uho it daetbadam bak lam fa voedume fa data koena nidi nibe aba aho lab daleà azi meit aba vahokedam im aidam bak lamti ulohona meedam vabameam làhà Eho ba uba deeli vame Em damali Eho vuusu im vahokedam biem bak. 4 Labihàmu Eho gi uba nehi gagom bak. Um nasi ubu uho lab daetbadam bak lam voole. Labi fa ame data koena nimti uloholi ahu nemahuba neàt daleà azi meit vahokedam im lam vi aidam damalele. Uho labihamta Alat ba diamut Eba modi Ehemo Boehàdateboli Eho dam bake deeli vame Em damali vuusu im vahokedam di lam um laha feà damali ee taudume vousa tame. 5 Labihàmu meit Eba tu vuzehi meedàmu fa data koena nimti ulohoda lam meit ame da lam ule neàt vameam làhà gi Emti ule neàt ab vaham bak.” 6 “Lahana meit Eba tu vuzehi meedamda nim abo damat neha, ‘Gi data koena nimti ulohoda feà vab dàt moz,’ lahame ozomda lam meit am vou fohome faina modi ubahi ubahidume Em mu voohemu ame mei vou fohohoda lam ba diamut Alat bisi feàna beomda am bak. Dat labihalo modemda lam gi nasi nehasu meedam vaba? Dam gagome am si ke feàda bumatna visoi am bio laba vààsu asimbuli itea feàna tombu iuba vou le nobu feà bak iuba nasi nom voou tezi eloi setem vaba? Lam bisi neà bak am bak,” lahame ab vameadaham. 7 Labi im lada lam vameadume neàdi Aho neo nehame vi vahokeda. “Aiee! Bak niba azim dam Alat abo duana beoda tame. Neham bak. Bak adba niba esdam di naat li, ‘Meit fa faina modem neào?’ lahame modi ozolo modem di meia modi fa faina meedam bak ehete. Ame na meedam bak lam ba setem vabak. Lahana meit nehi ozo, ‘Eho da lada laba le modi, “Yesus fà mu voose,” ’ lahame modi ozolo modem di aho le modi da labe Em mu voomeam làhà da lada lam Alat bisi duana beomda am bak. 8 Labi laha om ahu labe oba modi om anekehà modeo, om nao modeo, om vou fohome faina modi ubahi ubahidume Em mu voolo modemeam làhà om anekehà modeo, om nao modeo, nasi vaitoi fa nisilele. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi anekehà vàmtea modeo, nao vàmtea modeo, vou goda. Labi ba diamut gi nisilehena Alat Aba Aho azim bak laba le tau vahi azim bak lam bisi neà bak am bak. Ba akati modi anekehà ahimti nao ahimti labihasu modesuhu bak lahasu faina meedam bohu vuusu vou mode ladume ba diamut om so ahebu vua elum sutem gikina bohu laba voela? 9 Labi laha om ahu labe oba modi om fakot om vou fohome faina modi ubahi ubahidume Em mu voolo modemeam làhà om fako nasi valoi voou fa nisilele. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi fako vàmtea vou goda. Labi ba diamut gi nisilehena Alat Aba Aho azim bak laba le tau vahi azim bak lam bisi neà bak am bak. Ba akati modi fako ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela?” lahame Yesusat ab vahokedaham. 10 Labi im lada lam vahokedume neàdi Aho neo Aba vi tau meedam dam laba neo im meida nehame vi vahokeda. “Iademe meedale. Damat um dam totbaho laba neha, ‘Gi data koena nimti ulohoda feà vab damat moz,’ lahame ozomom dam laba uho a vi feàtàme mu tozomule. Neham bak. Alat Am im gagu vou usem dam labe ame dam laba vou aasdam dam lam abo Em Aiat avaesdam laba gi labaha bohu vou faodam dam labe im dedamali Em Ai bake le fi dem bak ehete. Neham labe labiham bak. [ 11 Em Abo Asum Ahoba Iubet Bak Niba Li Dateleheda bak niba lehe bak nim gi damat faina meedàmu Alat beolo modesdam dam lam Eho nabime soat vausu fa vei neàdedalo lehe bak. Abo dat domba vou aasdamda labe am domba zie fàusi git ub oedahemu fa vi nabime vame fa iademe oumahedam datti uloholelo Em bak niba lehe bak.] 12 Uho akatihasu ozodà? Dat domba vou aasumda labe am domba seratus ehena meida vàmtea ahamo utasi bak vabili le setemeam làhà uho ozom, dat naeda akati mode? Gi neha taia? Gi domba sembilan puluh sembilan zi totbaho lam iademe bak buzoho sibe baa bak laba oumahedume neàdi vou esmozi fa seteheda lam vi nabida taia? 13 Labi nabidamehamdi ame domba vi aam di abo duana deelem bak. Imbo bak. Ame domba sembilan puluh sembilan seddaha vabda zi lam deelem bak lamti vàmtea seteheda fa vi aame deelem bakti uloho vabak. Vàmtea seteheda fa vi aaha bak lam bisi duana deelemda am bak. 14 Labi um Ai asum ahoba iuba azim Ala lam laha labihaha bak. Meit Eba tu vuzehi meedamda nim abo damat neha, ‘Gi data koena nimti ulohoda feà vab dàt moz,’ lahame ozomda lam meida fa zie fàusi git ub oli meedam bak labna zohàme Aiat vou faovoi meedam bak,” lahame Yesusat ab vahokedaham. 15 Labi im lada lam vahokedume neàdi Yesusat Aba vi tau meedam dam laba im meida neo nehame vi vahokeda. “Umti vahi Eba tu vuzehi meedamda meida labe fa um meidate git modemeam làhà uho fa gi nehale. Amu nasi dat oba git modeheda laba le fi desi gagole. ‘Om akati eba nehasu git modehela?’ lahame omti ame da lamti gi uhumo um ahim labe duzu im ot vameaidale. Labi ame da labe fa im obo oho nib vou le gagohoda lam ule neàt gut aimeam làhà um ahim labe amu ot vaitesuiame ot fakiaha bak lam fa vahem bak am tame. 16 Lahana ame da laba le fi desi gagomeam obo oho nib vou lehe im lam aim mu ot fakiaha bohu lahasdameam làhà fa neo le dat vàmtea modeo, dam behàsu modeo, oba tau daetesu vameadam dam ve vou le vameame modi neàdele. Eho gi dat ahamda Musat aho Alat aba vameadaha im nehasu toeme fi hasi esuhu bak ozome uba labi gagoho bak. ‘Meit meia vàlu neha, “Da nim faina modeho,” lahame meia vàlu gagomeam làhà nasi oba ahamte vou lehe im laba a aime tu vuzehemule. Abo dam behàsu modeo, dam làtela modeo, vi tau aame vameadamta aime tu vuzehem neàte.’ Lahame Musat aham di iube toeme fi hasi esuhu im ehe labe Eho uba labi gagoho bak. 17 Labi oho etei lab vou laha dam labe oba vi tau daetesu vameadume aameam neo uho lab daetesuhu bak aim mu bohulalemeam làhà oho umti vahi Eba tu vuzehi meedam dam totbaho laba le bakamta vazisi ame da labe aho git modehe im lam ahate fi desi vameadale. Labi ame dam zi labe fa ame da laba im vahokeme aameam am neo ame dam zi labe iho lab im vahokehe bak lam aim momeam làhà ame da lam nasi gagu utasi dam meilele. Abo um Yahudi dam labe ubu uho modi baleàhà bak lamti ulohona modi ame da lam, ‘Imti vahi Ala bake tu vuzehemda modem bak,’ laham bak a gagomule. Ame da lam nasi di nibet vaitesu voole. Abo um Yahudi dam labe ubu uho doi pajak atem dam lamti vahem vabak laba ozome ulohona modele,” lahame Yesusat ab vahokedaham. 18 Labi im lada lam vahokedume neàdi Yesusat neo Aba vi tau meedam dam laba neo im meida nehame vi vahokeda. “Nasi aima. Eho etei uba gagolo modem im imboda nidi nim mahate tu vi ozodam bohu meedale. Uho bak adba niba na im ozome neàdi gagom di ame bak lam gi Alat amu asum ahoba iuba ozome neàdehena ahum um gi ba ozome gagodam bak. Neham bak. Uho nehi gagomeam, ‘Ba a modemule,’ lahame mali gagom di modeo, laham vaba, ‘Lo, modem neàte,’ lahame ozome uledi gagom di modeo, Alat gi amu ozome neàdi gagohona ahum um gi ba ozome gagodam bak. 19 Em laha im nidi nim uba gagolo. Nasi aimale. Um meida behàsuvat bak niba esdam di Ala bake tom gagolo modem di dat meida labe meia neha, ‘Imo im nidi nim Ala bake tom gagodase,’ lahame gagu ame da meida labe fa tau uledi ahu vàmadi neàdi um behàsu labe Em Ai Ala bake labihasu tom gagodameam làhà Em Ai Ala asum ahoba iuba azimda labe Aho uho lab tom gagoho bak lam aime uledi meedam bak. 20 Neham labe labihaha bak. Damat Eba tu vuzehi meedamda behàsu modeo, làtela modeo, labihasu bak niba modeo, bak amomoi bak iuba modeo, vazisi tom gagolo meedam di uhumo meedam vabak. Em laha laba ehe bak,” lahame ab vahokedaham. 21 Labi Yesusat im lada lam vahokedume neàdi Petrusat Yesus bake li netàdi vi ailo ab gagoham. “Boehàda oa, emti vahi Oba tu vuzeheda meida nibe aho eba git meedamehamdi eho fa ozahigeàmu fa vei neàdedam bak lam eho debe adi bake fusi novà? Ame bak gi tujuh fusi novà? Laham vaba eho akatihasu mode?” 22 Làhàmu Yesusat fa gago, “Vabà! Ba oho gi tujuh laba novam vabak. Meit oba git meedamehamdemnàme ba obo oho ame da laba ozahigeàmu fa vei neàdedam bak lam ba debe novam bak vaba gi ozahigeàmu fa vei neàdedam bohu vuusu meedale. 23 Eho gi neham bak ozome oba labi gagoho bak. Ba diamut Alat Eba modi Ehemo Boehàdateboli dam bake vuusu im vahokedam di Em gi Eho etei neo vouholo modem boehàda nidi nimti ulohona meedam bak. Neha: Ame boehàda labe aho amu am na meedam dam labe doi abada vaha bake, ‘Ame baleà vouhom bak taho modese,’ lahame am doi vaha dam labe im ee toedaha buku laba nabidume aaha ame dam labe ame bak lam taho baleà vouhom vabamu am meo dam gagome ame dam laba le siàdume ab fet vou li fet vou lidamam. 24 Labi ame bak lam faasi meedam di ame meo dam labe le dat meida amu boehàda labe am doi abo juta bak fotehena abo doi dem biem zoho fuhuna ozomomda bonleheda meida ab ve vou leham. 25 Labi ame boehàda labe aho avaesdam laba ab vou li duzuham. Labi vou li duzu gagu aiha ame na meedamda labe fa gago, ‘Em doi koedi ba debe ame baleà vouhom bieho.’ Lahame labi gagoha ame boehàda labe faki am meo dam bake ab gagoham. ‘Da lamti am namti am datati labihasu ahebu siàdale. Fa meia lu doi vadase. Labi laha im numa vahehe soa maehe nazoh feà lamti ahebu gelevai fa meia lu doi vadase. Labi ame doi lam ahebu eba fa lodume ame baleà vouhom bak am tame.’ 26 Labi ame boehàda labe aho lab vameadaha im lam am na meedamda labe aihemu am ahu adat iedi ogomasu biti am boehàda laba ab tauledamam. Tauledam labe gago, ‘Laha faode. Em namti datati oho nasi a bisi faki meia lu doi feàna vadamule. Eho ba ame baleà vouhoda tame.’ 27 Labihàmu ame boehàda labe ab aime aame faobekeham. Faobekesi am meo dam laba ab gagoham. ‘Làhà nasi a simule,’ lahame gagu neàdi fa am na meedamda laba neo ab gagoham. ‘Oho amu doi ebeda vaha bak lam ame baleà vouhom bak lam feidate. Em gi ozahigeàmu fa ab vei neàdeham tame,’ lahame vameadume neàdi ab isi oluham. 28 Labi ame am na meedamda labe aho usai boehàda labe am num labe futoi le aaha amti vahi ame boehàda labe am na meedamda meida ab ot tàhiaham. Ame da labe amu doi abada gi koena bonleheda ab ot tàhiaham. Ot tàhiame ame da bio si biogadam labe im vameada. ‘Oho amu eba bonlehe bake taho etei alihi ot aaiaha di nibe ame baleà vouhou neàdele.’ 29 Lahame labi gagohemu ame da labe ahu adat iedi ogomasu bake biti fa ab tauledamam. ‘Laha faode. Eho ba ame baleà vouhoda tame.’ 30 Lahame labi gagohonàme ba faobekesi vou faodam bak lam uledem vabak. Gi mu vou esmozi meo dam laba le gagome li si ame sel laba ab vooham. Voou ousulo modem di gago, ‘Oho ame da laba ame baleà vouhou doi lodume uloholehezobe im om fa vou futo tame,’ lahame ab ousuham. 31 Labi ame boehàda labe am na meedam dam dua totbaho labe iho ame bak lam aihemu faki iba vuusdam boehàda laba ab le fi deham. ‘Imti vahi na oboda meedamda meida nibe gi im vahemda meida fa meo dam gagome si sel ousuho,’ lahame ab le fi deham. 32 Laham bak ame boehàda aihemu faki gago, ‘Ame da mei gagome sihida ve vou lele,’ lahame gagu olu le ame da si ab vou leham. Labi vou li duzu neàdi boehàda labe ab gut vahokedamam. ‘Om abo bisi faina meedamda om am bak. Oho amu eba neha, “Laha faode,” lahame eba tauledume gagoho di lam em oba faobekesi oho eba bonlehe bak lam abo feànàme em gi ozahigeàmu fa vei neàdi om isi oluhu bak. 33 Lahana akati oho fa meit oba bonlehe bak gi koena modehena akati ebe eho amu oba modehe bakti ulohona modi ame da laba faobekesi gi ozahigeàmu fa vei neàdem vaba mode?’ 34 Lahame faki am meo dam gagome ame da lam fa ab siham. Si gago, ‘Uho da nim ve sel ousule. Labi sel vou aasdam dam labe fa ame da niba dihasi fo. Dihasi fo. Labihadume ame da labe aho eba bonlehe bak fa ame baleà vouhou neàdehezobe fa isi olule,’ lahame ab gagu oluham,” lahame Yesusat ame im totobe lam ab vameadaham. 35 Labi im lada lam vameadume neàdi Yesusat neo vi vameada. “Meit uba git meedam di uho ame da laba gi ozahigeàmu um ahu ad lam fa vei neàdem vabameam làhà Em Ai asum ahoba iuba azimda labe fa uba laha gi ame baket modem bak. Uho Aba git meedaha bak lam Aho ba ozahigeàmu Am ahu fa vei neàdem vabak,” lahame ab vahokedaham.

Matius 19

1 Labi Yesusat im lada lam vahokedume neàdi Aba vi tau meedam dam lamti iho ame Galilea bak lam vou esmozi fa neo Yordan Soabo dumam tot Yudea bak labe am num debu meidati meidati laham bak lam ahebu goda. 2 Labi ame bak laba vou godam di labe dam duada zi Aba tau vi goda. Labi dam aheda zi labe iho dam nisileheda vou ledam di Yesusat gut ulasi modi fa neàdida. Labihada. 3 Labihadam di labe Farisi damat Yesusat git gagom bak aihizobe vàlulo ahit Aba netàdi duzu vi ailo ab gagoham. “Oho ozom, im Yahudi dam nibe ibi iho tu vuzehi meedam im labet vulam di meit aho amu vaha nam lam fa mu voom di gi ostame la vàlui le vàluidume mu voom neào? Akatihàla?” 4 Lahahat Yesusat fa gago, “Meit Alat Vameadaha Im Toedahana laba im nehi toehena nim um aame vi ozobohudehe vaba? ‘Ala Na Debu Modeheda labe ahamte alimeat na meedaha di iube dat mode. Nam mode. Lahaha bak.’ 5 Labi Aho modi neàdi Aho lab modehe bak lam vi ozome ab gagoham. ‘Làhà etei di nim dat nam vam di am aiti am oiti vou esmozi da nim gi am nam laba akili ihimo ahili so vàmadi ab le azimam bak. Labi lab le azihi bak lam vi ozom di gi nubu ab vàmadeham bak.’ Laham bak lam um aame ozobohudehena taia? 6 ‘Ba so behàsuo?’ laham bak lam ba vi ozom vabak. Labihàmu Alat modi vàmadehena uho dam bakda a modi fàsi behàsdemule.” 7 Lahame labi gagohemu Farisi dam labe fa neo Yesus bake vi ailo gago, “Ne lahana im tai ahobada Musat akati modi im nehasu toehela? Aho aham di iube neha, ‘Uho meit am nam amu neàt vahana fa mu voolo modemeam làhà dat amu nasi, “Nam nim debu nehasu meedàmu em mu vooho bak,” lahame sunit toeme ahate fi desi vameadume mu voou fa olumta neàte,’ lahame akati modi labi toehela?” 8 Lahame labi gagoha Yesusat fa gago, “Um ahebu ahu tamzohobulehe labe meit im vahokem bak aim biem damat modem labe Musat gi ozahit uledi im lam toehe bak. Lahana bisi alimeat Alat datti namti modehe di labe labi gagoho vabak. 9 Um ozobohudem bake nasi Ebe Eho etei gagolo modem im nim aimale. Neha: Meit am nam dat amomoit bako bake aa vaha vab nam aho naedat vedi ostame mu voou fa nam amomoi vameam làhà ame da lam faina modehe bak.” 10 Lahame labi gagoha Aba vi tau meedam dam labe ihimo Yesus bake ab gagoham. “Làhà dam lahi vam di labiham bake imo lahi vam bak gi mose. Gi soaona aidase.” 11 Lahame labi gagoha Yesusat fa gago, “Ne lahana uho etei lab gagoho bak lam dam dua zoho ba modem biem bak. Abo gi dam nam vadam bak. Lahana Alat Aba Aho gagu fi hasi esuhu dam labe ihimo nam mom bak modi vizi esuhu dam ehe bak. 12 Dam totbaho labe im nehasu meedam labe nam vam bak mouda. Im oiat faaha di mei modem biemna faadam labe lahi vam bak mouda. Labi dam totbaho labe im àko meit tet si vaomoho labe lahi vam bak mouda. Labi dam totbaho labe ihimo ozo, ‘Im ab Alam Damali Aho Iba vuusu im vahokedamam bak. Labihàmu imo gi Alat Aba Aho gagohona ahu vàmadi meedase,’ lahame lahi vam bak mouda. Um labihasu meedam uledemeam làhà gi ame baket modele,” lahame Yesusat ab vameadaham. 13 Ame di labe dam totbaho labe ozo, “Yesusat fà im data niba Am anekehà odosu neha, ‘Ai oa, Oho data niba neà bak modi esule,’ ” lahame tom gagom bake ozome im data Yesus bake ab vou ledamam. Vou ledume modeha Aba vi tau meedam dam labe iho ame bak lam aahemu ab gut mali meedamam. “Um data Yesus bake a vou li vabidamule.” 14 Lahame labi gut mali gagoha Yesusat daetesu gago, “Ame data lam Eba vou ledam neà bak. Uho a mali gagomule. Neham bak. Damat ibi iho vou mode ledume baleàhà bak lam fa veimdi fa data koena zi nibe ibi iho lab vou mode ledume baleàhà bak lam abo daleà azi meit iba vahokedam im aidam bak lamti ulohona meedam dam lam Alat deeli vame Am damali vuusu im vahokedam dam am bak.” 15 Lahame labi gagu neàdi ame data zi laba Am anekehàt nom odosu, “Ai oa, Oho data niba vou aasdale,” lahame tom gagoidume neàdi fa ab oudaham. Labi ame im lam meedume neàdi fa bak mei bake ab laham. 16 Labi ba digat meida iube dat bas nibe Yesus bake li netàdi gago, “Guru oa, Om abo neàte. Eho ana im meedam labet Alat eba ba modi Amti vahi gi ahe neàna bohu vuusdàla?” 17 Lahame labi vabi vi ailo gagoha Yesusat fa ab vi gagoham. “ ‘Na im neà bak meedam bak akete?’ laham bak lam ohomo ozobohudehena akati Eba labi gagoela? Lahana im dam bakda nim ba im neà bak meedamda vabak. Gi Alat Ahamo im neà bakta meedam bak. Labihàmu Alat oba ba modi Amti vahi gi ahe neàna bohu vuusdam bak lam, ‘Oba modi vizese,’ lahame oho modelo àhàkemeam làhà oho gi Aba Aho gagu fi hasi esuhu im zi lamota meedale. Oho labihamta ame bak lam oba modi vizem bak.” 18 Lahahat ame dat bas labe fa gago, “Alat gagu fi hasi esuhu im zi adida eho meedam labe ame bak lam eba modi vizela?” Lahahat Yesusat fa gago, “Ame im neha taia? ‘Mei a otemule. Labi nam dat eheda modeo, dat nam eheda modeo, a modemule. Labi mei na a aa vamule. Labi na aaha vabda labe, “Eho nehi aaho,” lahame a ostame giomim vàlu gagomule. 19 Labi um ai bake modeo, um oi bake modeo, ahu adat iedi uba gagoho im laba vuzehi meedale. Labi uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.’ Labihasu toedume fi hasi esuhu im lam om ozobohuna taia?” 20 Lahame labi gagoha dat bas nibe fa gago, “Oho etei lab gagoho im zi lam eho ahebu ulohodesu meedaha bak. Oho ozom, im meida ba eho neo modem bak eheo?” 21 Lahame labi gagoha Yesusat fa vi gago, “Lo, lahana om im meida vàmtea vekehe bak. Om abo neàbodelo àhàkemeam làhà om soa maehe nazoh zi lam ahebu gelevai doit ot loidume neàdi ame doi lam vadume fa faheme dam na vab dama iuba lo. Iuba lo. Lahadale. Oho labi modemeam làhà Alat Aba Aho azihi bak laba oba vahehe nazoh aabo ehete. Labihàmu oho ame doi lam dam na vab dama lodume neàdi fa li Eba tu tau godale.” 22 Lahame labi gagoha ame dat bas labe Yesusat lab gagoho im lam aiha am soa maehe nazoh zi abo feà dat modemu ahu faidi daleàdi ab laham. 23 Labi ame dat bas le seti Yesusat fa Aba vi tau meedam dam laba ab gagoham. “Lo, ame dat bas labiha. Lahana Eho etei uba gagolo modem im imboda nidi nim nasi aima. Meit am nazoh duada labe aho it ozo, ‘Eho Yesusam im aime vuzehi fa Alam dateli Aho eba vuusu im vahokedase,’ lahame it ozodamnàme am nazohti nehi ame bak lam uledi meedam biem meo bak. 24 Labi im nidi nim uba laha aimale. Im unta fi hobu labe aho sue tademna mo labe am bumat kekehena laba ba dalu lafutom biem bak. Labi dat na duada labe aho nehi ozo, ‘Alat laha eba deeli vame Am dateli eba vuusu im vahokedase,’ lahame gagu meedam bak lam laha modem biem bak. Lahana ba gagohoda lam bisi modem biemda am bak.” 25 Lahame labi gagu modeha Aba vi tau meedam dam labe ab aime àvodeham. Àvodi gago, “Aa làhà! Dam na duada labihalahit im dam totbaho ahebu Alat ba iba soat vausu im vei neàdi Amti vahi gi ahe neàna bohu vuusdam biehe taia!” 26 Lahame labi gagoha Yesusat Aba vi tau meedam dam laba aasdam labe ab gagoham. “Faode. Ame bak lam damat ihimo it modem biem bak. Lahana Ala bisi feàda abo na ahebu modem meo Ala labe ame bak lam modem meo bak.” 27 Lahame labi gagoha Petrusat fa ab vi gagoham. “Imota nehaha bak. Iho Oba vi tau meedam damalelo modemu nazoh ibida ahebu amu gi voedume vausi fa Oba tau vou godam bak. Lahana iho labihahemu ba diamut iho lab meedaha bak lam Alat ame baleà vouhom di im ana và?” 28 Lahame labi gagoha Yesusat fa ab gagoham. “Lo, oho lab gagoho bak lam imbota imbot. Lahana Eho etei uba gagolo modem im imboda nidi nim nasi aima. Ba diamut Em Ai Alat Aho bak nimti bak niba modealahana zi nimti ahebu Aho modi gàhàdehezobe Em Abo Asum Ahoba Iubet Bak Niba Li Dateleheda fa abobo Boehàdateboli boehàdat ahamo nusu meia im vahokedam di nusumna feàda laba nusu dam ahebu vuusu im vahokedam bak. Labi ame di lam uho Eba vi tau meedam dam dua belas nim um laha boehà damali fa ame nusumna feàda dua belas amomoi laba nusualadume dat ahamda Israel labe aho vou faat lehe dam debu dua belas laba faheme ahala vuusuiame im vahokeda tame. 29 Labi dam Eba vi tau meedam damalelo modemu im aiti im oiti im dubuti im vahadati im nàti im datati im dam zohoti im numti im utoho ziti im na fi ho ziti labihasu voedume esmomeam làhà ame dam labe im ahe lahasuhu di nibe Alat fa ame dam laba gi ame baleà vouhou na lodam di abo fetehesu duana vi loda tame. Labi laha ba diamut Alat ame dam laba modi Amti vahi gi ahe neàna bohu vuusda tame. 30 Alat ba diamut Aho Eba modi Eho Boehàdateboli dam vuusu im vahokedam di neham bak ehete. Damat etei bak niba esdam di vedi nehi it ozoda. ‘Ee feàda im am bak,’ lahame it daetbadam dam lam ba feà damalem vaba gi ee vousi ba duzum dam am bak. Laham vaba damat nehi it ozoda, ‘Ee feà vabda im ame?’ lahame it daetbadam vab dam lam ba feà damali fa ee vousai nasi duzum dam am bak,” lahame ab vahokedaham.

Matius 20

1 Labi Yesusat neo im meida nehame vi vahokeda. “Ba diamut Alat Eba modi Eho Boehàdateboli Em damalehe dam laba vuusu im vahokedam di Eho Em damalehe dam labe iho meedaha bak gohali lomna lodam di gi Eho etei neo vouholo modemda nibe Aba Aho meedaha bak lamti ulohona meeda tame. Neha: Bak deda nibe aho dihambe usai ozo, ‘Em anggur dee niba amat le na meedàla?’ laham bak ailo le dam bake nabida. 2 Labi le nabidume ame dam aame gago, ‘Uho anggur dee ebeda laba le na meedale. Labi eho uba doi perak oona vàmtea abo digat vàmtea na modehe bake vam doi uba lo tame,’ lahame gagu damat aime uledi ab ladaham. 3 Labi ba neo dihambe ala faasi jam sembilan fuhemu aho neo le damat na ot loidam bak laba le aaha dam na modem vaba gi esdamda aahemu gago, ‘Um laha anggur dee ebeda laba le na meedam neào? Uho le na modehezobe eho na meedume neàdehe bake ulohodesu lom doi uba loda tame.’ 5 Labi gagoha ame dam labe uledi le dam amu lahadati vazisi na ab meedamam. Labi ame utoho deda labe neo ala tomali jam dua belas neo le dam amomoi gagome am anggur dee laba neo ame baket neo gagu olu. Labi neo ala vakidehezobe jam tiga labe dam gagome gi ame baket neo gagu olu. 6 Labi ame utoho deda labe neo ala boz fi olelo modem di labe jam lima labe aho neo damat na ot loidam bak laba le aaha dam na modem vaba gi esdamda aahemu gago, ‘Um di bohu nim na modem vaba akati gi esdahit disihela?’ 7 Lahame labi gagoha ame dam labe fa gago, ‘Damat iba di bohu diat na modem bak gagoho vab labe im gi esdam bake.’ Lahahat ame utoho deda labe fa gago, ‘Làhà um laha anggur dee ebeda laba le na modem neàte,’ lahame gagohemu ame dam labe deeli neo le na ab meedamam. 8 Labi disi aibulelo modem di labe ame utoho deda labe am toheda laba ab gagoham. ‘Oho em na meedam dam laba le gagole. Aibuleho. Nasi ledale. Labi ame na meedam dam ledahazobe oho nasi ame dam labe iho lab le na meedaha bak gohali lom doi lam faheme lodale. Oho ame baket faasi lodam di amu nasi dam ba ala boz fi olelo vabali jam lima le na modem dam laba nasi doi lodale. Labihasu doi loidume dam dihambe nasi le na meedam dam laba lodume novale.’ 9 Lahame labi gagohemu ame baket faasi ab meedaham. Neha: Dam ba ala boz fi olelo vabali jam lima le na faasi meedam dam labe iho nasi li dozeadume ame toheda labe doi perak oona vàmtea ame dam laba ab lodume uloholeham. Labi dam jam tiga le na faasi meedam dam labe neo li dozeadume gi ame baket neo mode. Labi dam jam dua belas le na faasi meedam dam labe neo li dozeadume gi ame baket neo mode. 10 Gi labihadume neo dam na dihambe faasi meedam dam gagome ab li dozeadaham. Li dozeadam di labe ozo, ‘Im na dihambe faasi modeme vou disilahit im doi duana vam bak,’ lahame ozodume modeha ame toheda labe gi doi perak oona vàmtea loia. Abo dam ba li na meedaha dam labe iho vaha bakti ulohona loia. 11 Labi modeha ame dam labe iho ame doi perak oona vàmtea vaha bake faki ihimo vahi utoho deda laba le ab feàtàdamam. 12 ‘Oo, oho ozom, oho iba neàna modehe? Ne, dam jam lima faasi na modehe dam lam gi jam vàmtea na tau modehe bak. Lahana im abo dihambe faasi meedahit vou disihi dam abo ala gaimeot beoho dam nim oho akati gi doi ulohodesu lodahela?’ lahame ab beàdamam. 13 Lahahat utoho deda labe aime ame dam meida laba ab vi gagoham. ‘Emti vou alemda oa, em ba uba git modehe vabak. Eho amu uba ahamte dihambe gagu olulo modem di labe neha, “Digat vàmtea le modehe bak gohali lom doi abo perak oona vàmtea loda tame,” lahame ahate uba gagohemu uho aime uledi le em na meedaha dam taia? 14 Akati eba beàdàla? Om gi ozahit ame doi ve om num bake fa vou lale. Em ba ame doi lom di ba fetehesu vi lodam kaio. Em gi dam ba le na modeheda modeo, amu le na modeheda modeo, gi ulohodesu lolo àhàkehe bak. 15 Eho etei lodaha doi lam em doi deda modem vaba? Um git ozoho. Ehemo naedat it ozome meedam neà bak. Em gi doi deda modem labe ehemo ozome da iudu iuba nehasu lo. Da iudu iuba neo nehasu lo. Gi labihadam bak. Ebe eho ilabdi meedam bak lam um eba teidi fakehe?’ lahame ab gagu esuham.” Lahame im totobe lada lam labihasu ab fi koadaham. 16 Labi fi koadume neàdi Yesusat neo ab vi gagoham. “Alat ba diamut Aho Eba modi Eho Boehàdateboli dam vuusu im vahokedam di neham bak ehete. Damat etei bak niba esdam di vedi nehi ozoda. ‘Da lada lam ee feà vabda ame?’ lahame feàtàdam dam lam Alat ahole gohali na lodam dam am bak. Lahana damat neha, ‘Da lada lam ee feàda ame?’ lahame vou baedam dam lam Alat ba gohali na lodam vab dam am bak,” lahame ab vahokedaham. 17 Labi ba neo Yesusat Aho kota Yerusalem laba zooledam di lam dam duana aba vi tau lada. Ladam di labe zie doni bake Yesusat Aba vi tau meedam dam dua belas lamota gagu fàsi damat Aba kota Yerusalem laba ba modem im neo fet ab vameadamam. 18 “Um nasi iademe aimale. Im etei vahi kota Yerusalem laba zoolelo ladam bak. Labi laba lafusi Em Abo Asum Ahoba Iubet Bak Niba Li Dateleheda nim meit Em vou foho tame. Labi vou fohome damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti laham dam laba ub lu ame dam labe fa Eba uloodume vi aime ozobohudi neàdi, ‘Nasi otele,’ lahame ahu vàmadi gagu esu tame. 19 Labi Em otem bak gagu neàdi fa neo Yahudi damat modem vab dam abo Ala bake tu vuzehem vab dam laba neo ub lu ame dam labe Em gut ve fu tozoidume neo vou futoi na sokba nasbe ahit alibulehena labe Eba foadume geàda tame. Gi labihadume ut tetehesuhunaso laba esu paku dou ote tame. Lahana fa usi behàsdi Em eloho bak labet Alat modi fa ahedi usa tame,” lahame fet ab vameadaham. 20 Labi ba neo Zebedeusam nam labe aho Yesus bake im ailo modemu am adam Yakobusti Yohanesti abo Yesus bake vi tau meedam dam behàsu lam gagu vou le Yesusat avaesdam laba netàdi am oiat ahu adat iedi ogomasu ahit bake ab biteham. 21 Làhàmu Yesusat ab gut gagoham. “Eho oba ana im modem bake om Eba lehela?” Lahahat nam nibe fa gago, “Vabà! Eho gi neham bak Oba gagu vi ailo leha. Ba diamut Alat Oba modi Ohomo Boehàdateboli Oho dam bake deeli vame Om damali Oho vuusu im vahokedam bak faaseo modem di em adam ahim nim Oho gagome fa neo tau boehà damali meida Om ahi tot laba nusu dam bake tau vuusda. Labi meida Om soi tot laba nusu dam bake tau vuusda. Labihadam neào?” 22 Lahame labi gagoha Yesusat fa ame dam ahim labe am oiti ab gagoham. “Ne lahana uho etei lab gagoho im lam um it ozom vaba? Na feàna Eba modi geàdamna etei Eba modi ozolo modem im ehe bak. Ame bak lam uba laha modi ozolo vouhom neào? Um laha geàdam ule?” Lahahat ame dam ahim labe fa gago, “Modem neà bak. Im ahumdi neàdehe bak.” 23 Lahahat Yesusat fa neo vi gago, “Lo, imbo bak. Na im feàna Eba modi geàdamna lamti ulohona uba laha modi geàdam bak ehe bak. Lahana meia gagu fa Em ahi tot modeo, soi tot modeo, laba tau nusu vahi dam bake vuusu im vahokedam bak lam Ehemo gagu modem biem bak. Lam gi Em Aiat Ahamo fi hasi ahumdi ozome gagodam bak.” 24 Lahame lab ot vameaidam im lam Aba vi tau meedam dam totbaho sepuluh labe vi aime modeha ame dam behàsu laba ab fakeham. 25 Labihàmu Yesusat Aba vi tau meedam dam gagu fa vazisi neàdi im ab vahokedamam. “Um ozobohuna taia? Yahudi damat modem vab dam labe vedi, ‘Im abo feàte,’ lahame iho vuusdam dam laba tet ootedam labe im vahokedam di gi dae meobeat vahokedam meo bak. Labi im ee dam labe iho vuusdam dam laba teubeat vuusdam labe iho gagom im damat meeda. Labihadam meo bak. 26 Lahana um ba a labihadamule. Um fa gi nehasu meedale. Uho meidavat nehi it ozo, ‘Alat fa eba modi ee feà datelese,’ lahame it ozomda lam amu nasi gi amti vahi Eba vi tau meedam dam totbaho laba daleà na meedam labe dam labe im na meedam datelele. 27 Labi laha uho meidavat nehi it ozo, ‘Alat fà eba ee feàda modi talu vousai dam totbaho ee vousi fa eho vafozi bisi feà datelese,’ lahame it ozomda lam amu nasi gi amti vahi Eba vi tau meedam dam totbaho laba daleà ladehebeat im na teo meedam datelele. 28 Eho gi neham bak ozome uba labi gagoho bak. Em Abo Asum Ahoba Iubet Bak Niba Li Dateleheda nim Eho laha labihaha bak. Eho bak niba lehe di ba nehi it ozom vabak. ‘Em feàda am bak. Dam feà vab dam fa bake nusu Eho gagom im aime meedam damali Eba taum bohu meedale,’ lahame it ozome lehe vabak. Em gi feà vab Dateli dam bake taum bak ozome lehe bak. Abo gi dam bake tau bohu vuusdume damat Em si otem bak. Dam ahebu iho faina meedam bak lam Alat beom bake Ehemo ahit uledi damat Em oteme vasea gohali ot vai fa faamom bake ozome lehe bak. Labihàmu uho Ebe Eho ozome lehe bak lamti ulohona meedale,” lahame ab vahokedaham. 29 Labi Yesus Aba vi tau meedam damti iho num debu Yeriko vou esmozi ladam di labe dam duada zi Aba vi tau vulada. 30 Labi ladam di labe dam fako faidi na aam biemda behàsu gi zie obe laba aida. Labi ame dam behàsu labe dam duada zi lebohotedam bak dae aidàmu ab gut gagoham. “Bak nim amat ana im meedàla?” lahame vabi ostame gagoha meit neha, “Ne, Yesus gi ab lebohotelo modemam bak.” Làhàmu dam fako faida behàsu nibe ab vi buddamam. “Dat Ahamda Boehàda Daud Vou Faat Lehe Mekehàda oa, Om iba aame faobekesi im neà bak tau meedaleee. Alat Gagu Fihasi Vimteme Oluhu Dat Boehàda, ‘Om am tame,’ laham bak im ozobohuteee.” 31 Lahame buddume modeha ame dam nasi dozeadaha dam labe fa gago, “Mm, a gagomule,” lahame mali modeha ame dam behàsu nibe ailahigeàmu fa bisteat neo ab vi buddamam. “Dat Ahamda Boehàda Daud Labe Vou Faat Lehe Mekehàda oa, Om iba aame faobekesi im neà bak tau meedaleee.” 32 Lahame bisteat neo vi buddameilahit Yesus gi laba ab duzuham. Duzu gago, “Le gagome vou lele,” lahame gagome le ve vou li netàdi vou duzu modeha Yesus dam ahim laba ab gut gagoham. “Eho uba akati modemna uho Eba buddàla?” 33 Lahame gagoha ame dam ahim labe fa gago, “Kaio. Ai oa, im gi fako na aam biehemu àvodi na aalo àhàki Oho iba ulasi modi fa neàdem bak ozome Oba vi buddalo.” 34 Làhàmu Yesusat aam faimu faobekesi ame dam ahim labe im fako laba ulasi modeha im fako fa na aam bak ab neàdeham. Labihàmu ame dam ahim labe fa Yesus bake tu ab vi tau vuladamam.

Matius 21

1 Labi Yesus Aba vi tau meedam dam lamti iho neo tom ladume kota Yerusalem fuseo vabali Zaitun Dee Dozeadaha Bak Buzoho labe modesuhu num debu Betfage laba tom le odo. Le odosi Aba vi tau meedam dam meida behàsu gagu ab olulo meedamam. 2 Labi olulo modem di labe Aho nehame vi vameada. “Um ahim nim num debu iba netàdeheda laba lafusi aameam keledai fi ho ameaso lo vààsdamda labe am adat gàhàda lamti laba doudamna aa tame. Uho le lo vuhatoi vuusu amait vou lele. 3 Lo vuhatolo modem di meit uba nehi gagomeam, ‘Im keledai baka uho ana modelo lo vuhatolo modela?’ labihameam làhà uho fa nehi gagole. ‘Boehàda Aba Aho ozoho baket modelo modemu vou lalo mozo,’ lahame uho labihasu gagomeam ame da labe gi uledi uba lu olum bak,” lahame ab vameadume oluham. 4 Etei lab gagoho bak lam dat ahamda Alat vameadaha im aime fa dam bake ahate vameaidahada labe aho aham di iube im nehi fet toedume esuhu bak lam modi imbodelo labihaha bak. 5 “Dam num debu Sion laba azihi dam laba gagole, ‘Nasi aamale. Uba vuusdam Boehàda labe etei uba ab ledamam tame. Abo daleà ladehebeat ahu nemahubat li im vameadalo modemu Am gi keledai adat gàhàda labe am toha laba nusu vou ledam bak uho ab aadamam tame,’ laham im lam Sion dam laba vameadale.” Lahame aham di iube labihasu fet toeme esuhu im lam ab modi imbodeham. 6 Labi Aba vi tau meedam dam behàsu labe le aaha Yesusat lab gagu oluhu bak lam ab imbodeham. Ame keledai fi ho ameaso lo vààsdamda labe am adat gàhàda lamti laba doudamna ab aaham. Làhàmu Yesusat vi gagu oluhu baket ab modeham. Lo vuhatoi ame na fi ho ahim lam Yesus bake fa ab vou leham. Labi fa vou li ibi iho dusuhu sue sona ahobada vihilame ame keledai adat dooda labe am toha laba ab nom gutaudaham. Labi gutaudume neàdi Yesusat zisi nusu ab ladamam. 8 Labi lab ladam di labe dam dua totbaho labe im sue sona ahoba duhuda lam laha vihilame ame keledai Yesus vou lam zie laba vou olualada. Labi dam totbaho labe laha bom dee bake le bom alahaso fi kbodume ame zie laba vou olualada. Labihada. Damat ozo, “Yesus abo Boehàda feàda am tame,” lahame ahu adat iedi labihada. 9 Labihadume Yesus lab vou ladam di lam dam dua zoho nasi dozeadume lada. Labi dam zoho ba ohuse vi dozeame mitaeda. Labihadam dam labe im nehasu buteme vou bae lada: “Hosana! Ala abo feàteee. Boehàda Daud Labe Aho Vou Faat Leheda Meida nim abo feàteee! Dat abo Alat Aho Gagu Olu Ot Vai Im Dedateli iba etei ledamda nim abo feàteee!” Lahame vou bae lada. Labi meit neo nehame vou bae lada. “Hosana! Imo dam ahebu ee bisi vousai feà Datebolehe Ala laba, ‘Am abo feàte,’ lahame vou baedaseee!” Lahame meit buteme vou bae lada. Labi neo meit buteme vou bae lada. Labihada. 10 Gi labihasu vou bae ladume kota Yerusalem laba vou fusi modeha dam bak deda labe ame bak lam gut aihemu àvodi ihimo ab ot gagoidamam. “Uho ozom, dam zi feà nim ama bake deeli vou bae ledàla?” lahame meit gago meit gago labihadume vabi ab ot gagoidamam. 11 Lahame labi ot gagoidume modeha dam etei leheda zi labe fa ab gagoham. “Um ozobohudem vaba? Da nim abo Alat vameadaha im aime fa dam bake ahate vameaidahada Galilea bak zoho labe num debu Nazaret labe leheda Yesus am bak,” lahame ab vameadaham. 12 Labi Yesus kota Yerusalem laba lafusi Fihasi Ala Bake Vou Baedam Num Vàmteabu labe am ad oli aam bak tomba laba le duzu aaha damat Ala bake vou baedalo na Ala bake lomna ot loidam bak aahemu meoli dam na ot loidam dam zi lamti na vadam dam lamti meoleme ootedume futoda. Labi laha damat dam debu mei doi vame fa dam debu mei doi ot loiam doi vaheme ot loidam beahuba lam vuu vaktemoda. Labi laha damat meki fi ho ot loiam di nusumna lam laha vuu vaktemoda. Labihasu ab veimodamam. 13 Aho meoli gago, “Um ozom vaba? Meit Alat Vameadaha Im Toedahana laba im meida nehame toehe bak. ‘Alat neha, “Em num nim gi Eba tom gagodam numat modem bak.” ’ Lahame toehena um akati aalahigeàmu meit na aa ve voutame fi olehe bak ozome vou oli vasti esdam bakti ulohona modi Em num feàda niba oli im mei faasi meedàla?” lahame faki meoli meedam labe ame beahuba zi lam veimome afoezobe dam soa neo odosi veimome dam ab ilidamam. 14 Labi ame di labe dam aheda labe fa dam fako faida zi lamti dam nao zoho nutabedeheda zi lamti labihasu ame Fihasi Ala Bake Vou Baedam Num Vàmteabu labe am ad oli aam bak tomba laba Yesus bake vou ledahemu Aho ulasi fa neàdeda. 15 Labihadume modeha ame Num Vàmteabu labe am ad oli aam bak tomba laba dozeadaha data zi labe ab faasi buddamam. “Imo dam ahebu Alat Gagu Fihasi Vimteme Oluhu Dat Boehàda bisi feàda nim abo Boehàda Daud Labe Aho Vou Faat Lehe Mekehàda nim, ‘Abo feàte,’ lahame vou baedase,” lahame ab buddamam. Labihadume modeha damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu iho Yesusat damat ihimo modem biem im feàna meedaha bak lam aaha bak lamti ame data buddaha bak aihi bak lamti labihasu meedam bak aahemu faki feà bak ab fuham. 16 Labi faki, “Yesus ame Dàt modem kaio,” lahame ozoho labe Yesus bake ab gagoham. “Om data zi nibe oba vou baedam bak om aidà? Oho taho meoleme fa dae vabalele.” Lahame labi gagoha Yesusat fa gago, “Lo, Em aidam bake. Ne, meit Alat Vameadaha Im Toedahana laba im meida nim um aaha vaba? Ame im neha taia? ‘Ai Ala oa, Om amu gi data vohomdati tatvamdati nehi fet ozome esuhu bak. Ame data zi labe Oba, “ ‘Om abo feàte,’ lahame Oba vou baedase,” lahame fet ozome esuhu bak.’ Lahame labihasu toehe im lam um aaha vaba? Data gi ahole meedam bak.” 17 Lahame Yesus labi gagu neàdi Fihasi Ala Bake Vou Baedam Num Vàmteabu labe am ad oli aam bak tomba labe futoi neo Aba vi tau meedam damti iho kota Yerusalem vou esmozi fa neo num debu Betania laba ab le iham. 18 Labi Betania laba le izi dihambe neo Aba vi tau meedam damti vahi kota Yerusalem laba fa ab ladamam. Ladam di labe Yesus idoali meeda. 19 Làhàmu aaha ut ara zie obe laba doudam bak ab aaham. Aahemu oo sitoi àm bak ozome le netàdi nabitedaha oo aam kai. Gi et but neàdi modesda. Labihàmu ab uloodamam. “Seee. Ut nim ba oo a valemule. Gi mailele,” lahame uloohoilahit gi ame di labe am et lam ab bozileham. 20 Labi modeha Aba vi tau meedam dam labe ab aame àvodeham. Àvodi gago, “Aa làhà! Ut lam akati modi Da nibe gi etei aame ulooha ame di labe ut et lam bozili alahela?” 21 Lahame labi gagohemu Yesusat fa ab gagoham. “Lo, ame ut et bozili alahanata ala. Lahana Eho etei uba gagolo modem im imboda nim nasi aima. Um ahu behàsdi vi ozodam vaba abo uho Eba mahate tu vuzehi ahu vàmadi meedameam làhà uho fa Eho ame araso lam aame gagu alaha bak lamti ulohona neo modem bak. Lahana gi im feàna lada lamota modem vabak. Abo gi im feàna amomoi laha uho neo modem bak. Abo gi bak buzoho niba neha, ‘Nasi itezeavai itea feàna laba nom ilu fi oli setele,’ lahame gagom di ame baket modem bak. 22 Abo ubu uho valo Ala bake tom gagodamna lam uho nehi fet ozo, ‘Ame na lam Alat iba lom bak,’ lahame ahu vàmadi tu vuzehemeam làhà ame na lam uho vam bak,” lahame ab vahokedaham. 23 Labi Yesusat im lam vameadume neàdi neo ladume ame Fihasi Ala Bake Vou Baedam Num Vàmteabu labe am ad oli aam bak tomba laba le ame bak laba lab dozeadaha dam zi laba vahokeda. Vahokedume modeha damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti laham dam labe Yesus bake li netàdi daet beàdalo vabi vi ailo ab gagoham. “Ne, Oba amat modi vizi teudi im feàna lam Oho duzu meedàla? Oho nib li meedam im nim Oba amat gagu im dedateli Oho vuusu meedàla?” 24 Lahame labi gagu modeha Yesusat fa gago, “Im ubuda faode. Ebe Eho etei uba fi bovai vi ailo gagomda nim uba nasi vi gagu aise. Ne, Yohanes Mei Vuu Valo Baptisleiamda labe aba aho amu mei vuu valo baptisleiam bak lam amat Yohanes bake gagu aho ame bak lam meedahela? Alat aba gagu aho ame bak lam meedaheo? Laham vabameam damat aba gagu aho ame bak lam meedaheo? Akatihahela? Uho ame bak lam Eba fa gagomta uho etei Eba lab gagu vi ailo modem bak lam Eho fa uba vi gago tame.” Lahame labi gagu vou faoha ame Yahudi ee dam zi labe gi ihimo ot gagoida. “Uho ozom, iho akatihasu fa Yesus bake gagoe? Iho nehameam, ‘Alat Yohanes gagu olu meedaha bak,’ lahame labi gagomeam làhà Yesusat fa iba nehame vàlu gagom bak. ‘Ne, um lahana akati Yohanes am im aime tu vuzehem vaba moudume mohela?’ lahame iba labi fa gagom bak. 26 Laham vaba iho neo nehi gagomeam, ‘Damat gagu oluha,’ lahame labi gagomeam làhà dam etei iba tau dozeadaha dam totbaho zi nibe iba beom bak. Neham bak. Dam etei iba tau dozeadaha dam totbaho zi nim, ‘Yohanes ba damat gagu olu meedaha vabak. Am gi Alat vameadaha im aime fa dam bake ahate vameaidahada meida am am bak,’ laham bak lam ozobohu labe iho fa im mei gagomeam làhà dam iba faki beom bak.” 27 Lahame ame dam busaoda zi labe ihimo vou faovoi iedi fa vei biehenali Yesus bake fa ab vi gagoham. “Yohanes aho amu lab meedaha bak lam, ‘Amat aba gagu olu meedàla?’ laham bak lam im bieho.” Lahahat Yesusat fa dam laba ab gagoham. “Lo, làhà Eho li meedam im ahebu nim, ‘Amat Eba gagu olu Eho im dedateli meedàla?’ laham bak lam Em laha ba uba gagom vabak,” lahame ab vasteham. 28 Yesusat labi gagu neàdi fa ame Yahudi dam vuusdam eeda zi laba neo vi vahokeda. “Eho etei uba totobet fi koadalo modem im nidi nim uho mahate vi ozodale. Da nibe adam behàsu faasi vou buduali neàdi am aiat am adat datahida bake le gago, ‘Da adat busaoda oa, om etei em anggur dee laba le na modele.’ 29 Lahame labi gagoha am adat fa gago, ‘Vab. Em moho,’ lahame gagohoda labe fa ba uledi am aiam anggur dee laba le fa na meeda. 30 Labi neo ame da labe am adat basdate neo le gago, ‘Da adat basda oa, om etei em anggur dee laba le na modele,’ lahame labi gagoha ame da labe uledi gago, ‘Lo, ai eho mode tame,’ lahame gagohoda labe fa vei mu am aiat gagoho bak lam ba le modehe vaba ab moham.” 31 Lahame Yesusat im totobe lam fi koadume neàdi fa neo vi ailo ab gagoham. “Làhà um etei akati ozoe? Adat adida am aiat im gagoho bak aime uledi modehela?” Lahame labi gagoha ame Yahudi busaoda zi labe fa gago, “Dat datahida labe uledi modehe bak.” Lahame labi gagohemu Yesusat fa neo gago, “Lo, uho abo imbona gagoho bak. Lahana Eho etei uba neo gagolo modem im imboda nidi nim laha nasi aima. Um gi ame adat basda labe aho meedam bak lamti ulohona meedam damat modem bak. Neham bak. Kaisarleheda bake lodam doi pajak atem dam lam abo uho neha, ‘Faite,’ lahame tozome umti vahem mu fi hasi esuhu dam zi lamti labi lahi fi lohoda zi lamti labihasu umti vahem biem dam labe um fa vafozi amu nasi Alam damali Aho vuusu im vahokedam dam am bak. 32 Neham labe labihadam bak. Yohanes Mei Vuu Valo Baptisleiamda labe aho amu nasi duzu lehe di lam aho uba neha, ‘Alat Aba Aho ozome esuhu bak lam bisi im vamdesu meedam bak gi neham bak,’ laham bak uba vahokedasome modeha aba aho vou lehe im lam um gi tu vuzehem mu voedaha bak. Lahana pajak doi gi teo vi atem dam zi lamti lahi fi lohoda zi lamti labihasu nasi tu vuzehi ibi iho faina meedam bak lam voedume fa ahu neà bak vàmadi meedaha bak. Lahana uho ame bak lam aahanàme ba im abada tu vuzehi ubu uho faina meedam bak lam voedume fa ahu neà bak vàmadi meedaha vabak,” lahame ab vahokedaham. 33 Labi Yesus im lada lam vameadume neàdi Aho ame Yahudi dam busaoda laba im meida nim neo nehame vi vahokeda. “Eho etei uba totobet fi koadalo modem im nim uho mahate aime vi ozodale. Dat utoho deda nibe am tat vueheba laba am na meedam dam gagome anggur neb zi deddume neàdi esu. Labi neo am na meedam dam laba neha, ‘Um laha em anggur dee nim ke vou vahe lame fi bovai esule. Labi afoezobe ame anggur oo amdehezobe vaheme meit duzu uname vaksa futom bake ozome ke baana nabime ve fa ahit feme bumatali esule. Labi neo damat em anggur dee aa li vam bake azi nom vou aasdam num kilana laha mome duzule,’ lahame gagu olu ame baket ab modeham. Labi modeme neàdi anggur deda labe bak mei bake lalo modemu dam na debe soali modeme vahem dam zoho laba gago, ‘Uho em anggur dee nim teohet vou aasdume amdehezobe modeme vahedam di zoho uho va. Zoho eba naedate vahedume esu. Labihadale,’ lahame it gagu esmozi bak bohu bake ab laham. 34 Labi le aidamehamdi ozoha, am anggur oo vaedam bak fuhemu fa am na meedam dam làtela gagome ab oluham. ‘Em anggur dee teohet vou aasdam dam labe iho ot loiame vaha doi ebe eho vam zoho eba esuhuda le vame fa vou lele,’ lahame gagu ab oluham. 35 Labi le gagoha ame anggur dee teohet vou aasdam dam labe ame dam làtela lam lehemu ab gut siàdaham. Siàdume meida abo ote. Labi meida neo ket beodume ote. Labi meida gi fota beome isi olu. Labihada. 36 Labi anggur deda labe gut aaha dat vàmtea gi saemea fa lehemu neo am na meedam dam dua totbaho neo gagome fa duali ab oudaham. Labi oudume lafusi modeha ame anggur dee teohet vou aasdam dam labe neo gi ame baket meeda. 37 Labihàmu ame anggur deda labe neo gut aaha neo dam zoho gi saemea fa ledahemu vi ozo, ‘Ne, em akati mode? Làhà gi em adat nim neo gagu oluse. Eho labihameam dam labe fa em adat bake vei ladi ahu adat iedi fa eba doi lu olum zoaha bak,’ lahame vi ozome neàdi am adat ab gagu oluham. 38 Olu ladume lafuseo vabalehe di labe ame anggur dee teohet vou aasdam dam labe gi bak bohulana gut aaha anggur deda labe am adat ledam bak aahemu neha, ‘Da nim ba am aiam na misia vamda am taia? Imo da nim oteme afoezobe anggur dee nim fa im na misialese,’ lahame im aa ab odoadaham. 39 Labi im aa odoadume neàdi ame da fuhuzobe neo gut si vou kea lame anggur dee natàh ke labe vou futoi bako iuba ab oteme vooham.” 40 Lahame Yesus ame im totobe lam fi koadume neàdi neo ame Yahudi dam busaoda zi laba vi ailo ab gagoham. “Uho ozom, ame anggur deda labe fa li am anggur dee teohet vou aasdam dam laba le akati modela?” 41 Lahame labi gagoha ame Yahudi dam busaoda zi labe fa gago, “Ame faina meedam dam lam aho beodume ohabededume setem bak. Labi beodume am anggur dee lam fa dam amomoi gagome fa vou aasdam bak. Abo am anggur oo amdehezobe modeme vahedam di damat iademe ot loiame doi aba naedate lom zoho lam lom meoda ozome fi me vadume vou aasdam bak.” 42 Lahame labi vameadume neàdi Yesusat fa neo vi gago, “Lo, um gi imbona gagoho bak. Lahana meit Alat Vameadaha Im Toedahana laba im meida nim um vi aame ozobohudehe vaba? Ame im lam gi uho Eba tu vuzehem mom bake nehame fet toeme esuhuna taia? ‘Dam num moadam dam labe, “Faite,” lahame mu vooho ke lam fa feà Dateli bisi num mome teudem ke am bak. Ame bak lam Boehàda Alat Ahamo ozome modehe bak. Labi Aho lab modehe bak lam iho aam di damat ihimo modem biem im feàna modehena aaha bak.’ Lahame toeme esuhu im lam um aame ozobohudem vaba? Ame im lam etei ab imbodi uho Eba ab moudamam bak. 43 Labihàmu Eho uba nehi gagom bak. Em Alat Gagu Fihasi Vimteme Oluhu Dat Boehàda niba uho Eba tu vuzehi Alat uba deeli vame Am damali vuusu im vahokedam bak lam uho modem mohemu Alat fa dam amomoi bake abo Aba Aho gagohona uledi meedam dam laba fa Am damali vuusu im vahokedalo modem bak. [ 44 Eho gi neham bak ozome uba labi gagoho bak. Ame ke lam Alat Gagu Fihasi Vimteme Oluhu Dat Boehàda Em am bak. Meit Eba momda lam gi da nibe ke bake gitadi vàhàdemdati uloho bak. Laham vaba ame ke labe ame da laba fi tmai bake deebosi setemdati uloho bak.]” lahame Yesusat ab vameadaham. 45 Labi ame damat Ala bake lomna ve vua vahudam toheda zi laba vuusu im vameame faheme modiam dam lamti Farisi dam zi lamti iho Yesusat etei lab totobet fi koadaha im lam aihemu ab ozoham. “Oo, Yesusat etei lab vameadaha im lam gi iba vàlu vameada taia? Aho li vahokedaha im lam iho aim mu vooho bak laba ozome ame anggur dee teohet vou aasdam dam laba gi vàlu im totobet fi koadaha taia? 46 Imo Yesus sise,” lahame ahu gukeme modem faidi seti vi ozodaha dam duada totbaho labe vedi neha, “Ame Da Yesus abo Alat vameadaha im aime fa dam bake ahate vameaidahada meida am bak,” lahame tuhuda feà labe iedi sim bili gi vabedda.

Matius 22

1 Labi im totobe lada lam fi koadume neàdi Yesusat Aho ame Yahudi dam busaoda zi laba im totobe meida nim neo nehame ab fi koadamam. 2 “Alat neha, ‘Um Em damali Eho uba vuusu im vahokedam neàte,’ lahame fet gagu esuhu im lam damat aime uledi Alam damalem bak lam Eho uba vameadase. Ame bak lamti dat boehàda labe am adat nam vam bake vazisi na àm bake dam bake gagu oluhu im lam damat aime uledi lem bak lamti uloho bak. Neham bak. Dat boehàda labe am adat nam valo modemu fa vazisi na àm bak ab ozoham. 3 Làhàmu am na meedam dam laba gagodume aba aho ozoho dam iuba, ‘Lele,’ lahame fet gagu esu. Labi neo dam iudu iuba, ‘Lele,’ lahame fet gagu esu. Labihada. Labi ame na àdam digat fuhemu am na meedam dam laba neo gagome aho amu di iube, ‘Lele,’ lahame fet gagu esuhu dam laba ab gagu oluham. ‘Neàdeho. Nasi ledale,’ lahame gagu olu vou faoha dam lem mouda. 4 Làhàmu fa neo am na meedam dam totbaho neo gagome olu. ‘Uho dam eho amu fet gagoho dam laba le nehi gagole. “Nasi ledale. Na zi feà nim àdeho. Em abo sapi dooda zi nimti sapi adam eho amu na vaheme budualeheda zi nimti ahebu oddume ohume àdemahedume neàdeho. Nasi em adat nam vam bake ozome deeli vahi na àm bak niba nasi ledale.” Uho labihasu le gagodume vou ledale,’ lahame am na meedam dam neo gagome ab oluham. 5 Labi dat boehàdat aho amu fet gagu esuhu dam laba le gagoha dam ahebu gi ailahigeàmu fa im amomoi la modi le modida. Dat meida gi am utoho laba le na meeda. Labi dat meida labe aba aho doilem bak laba le na meeda. 6 Labi ame dam totbaho labe gi boehàda labe aho etei oluhu dam laba gut siàdume afoezobe beodume ab oddaham. Labihada. 7 Labihadàmu ame boehàda labe aho ame bak lam aihemu faki feà bak fusi am meo dam zi laba ab gagome oluham. ‘Dam lam le oddume fa vi vatause. Labi im num debu bak lam laha vuat beole,’ lahame gagu olu ame baket ab modeham. 8 Labi ame baket modi neàdi am na meedam dam totbaho neo gagome bakamta dozeadume neàdi neo ab gagu oluham. ‘Em adat nam vam bake damat deeli vazisi na àlo modemna zi nim àdeho. Lahana eho amu neha, “Lele,” lahame fet gagoha moudaha dam lam ahole lehe vaba vooho bak. 9 Labihàmu uho zie sedieba bak laba le dam gi laba goomda zi ahebu gagole. “Na àm bak niba li vazisi na àdase,” lahame gagu fa eba oluidale,’ lahame ab gagu oluham. 10 Labi am na meedam dam labe le ame baket ab meedamam. Abo zie sedieba bak laba le iho aaha dam ahebu gagodume na àm bake ab oudaham. Abo dam faina meedam dam modeo, dam im neà bak meedam dam modeo, gi ostame iuba le gagu olu. Iuba le gagu olu. Lahada. Labi oudume modeha ame num laba dam vazisi na àm bak kekesi guguai feà bak ab fuham. 11 Labi ame boehàda labe aho dam etei vazisi na àlo lehe damat esdam bak laba oli nabidume aaha meit nam vam di damat deeli vazisi na àm bak ozome dusum sue dusuhu vab dat labe am gi sue giida dusu li aidam bak ab aaham. 12 Ame bak lam aahemu ame da laba ab gagoham. ‘Om sue giida dusuhuda akati niba olehela?’ Lahame gagoha ame da labe ba dae bum kai. Gi daleà aida. 13 Làhàmu ame boehàda labe am im ot vai meedam dam laba ab gagoham. ‘Da nim nasi sile. Labi am anekehà ahim gia. Nao ahim gia. Labi vou futoi bàhàgo bak iuba bisi aibu feà bak laba voou ame da nibe fà kikezi geàdam labe ahu faidi meb dae feàna faasi meedase.’ ” 14 Lahame im totobe lam Yesusat ab fi koadaham. Fikoadume neàdi neo vi gago, “Um nasi ozomale. Alat neha, ‘Aho Am damali vuusu im vahokedase,’ lahame dam bake gagodam di gi dam dua bake gagodam bak. Lahamnàme ame dam zi lam bisi ahebu uledi Am damali ame bak lam meedam vabak. Gi dam zohota Am damali aho vuusu im vahokedam bak,” lahame ab vi vameadaham. 15 Labi ame Farisi dam totbaho labe iho Yesusat etei iba vàlu totobet fi koadaha im amudati badati aime faki ame Fihasi Ala Bake Vou Baedam Num Vàmteabu labe am ad oli aam bak tomba labe futoi ab ladamam. Ladam di labe ozo, “Im ba Yesus akatihasu modi vou fohome siela? Làhà imo gi nehase. Iho vou faobe Yesusam ahu ozolo ahit fi bovai vi aime Aho im git gagoho bak iho aihizobe vàlu sise,” lahame im aa ab odoadamam. 16 Labi im aa odoadume neàdi fa ame Farisi dam labe ibi iho vahokedam im ozobohudelo vi tau meedam dam zi ame. Labi Galilea bak laba azim dam laba vuusdam Boehàda Herodes Antipas bake taumda zi ame. Labihasu gagome Yesus bake ab oluham. “Yesusat git gagoho bak aime vàluse,” lahame im mei im meime vi ailo ahit Yesus bake ab oluham. Labi le Yesus bake ab gagoham. “Guru oa, Oho lab meedam bak lam im ahebu ozobohu bak. Om abo im vamdesu meedamda Om am bak. Labi Alat ozo, ‘Dam bakda nehasu meedase,’ lahame Aba Aho ozoho im lam Oho dam bake im vahokedam di Om laha gi im vamdesu imbona vahokedam bak. Om ba neham bak modem vabak. ‘Da lam ee feàda Eba im gagohe? Làhà aime tuse.’ Laham vab di, ‘Da lam ee vabda Eba im gagohe? Làhà Em aime tum bak mose,’ lahame ba dam fahedam vabak. Labiham labe damat Oba ozomsu gagom di Om ba ame im lam aime iedi vuzehem vabak. 17 Om labiham dàt modemu iho nehi Oba gagu vi ailo modem bak. Im Yahudi dam ihimo dat ahamda Musat toedume fi hasi esuhu Im Feàna zi lam iho tu vuzehi meedam labe Oho ozom, pemerintah iba vuusu meedam bak gohali lodam doi pajak lam iho ame doi lam fa Kaisarleheda laba lodam neào? Ame Im Feàna zi labet iba maleheo? Akatihà?” 18 Lahame labi gagoha Yesusat ame dam labe Aba vàlulo ahit keobaedume fi bovai vi ailo modem bak lam Ahamo ozobohudi fa ab gagoham. “Um gi ahobat neàdi Eba li vameadam damat modem bak. Uho akati, ‘Eho git gagose,’ lahame ahit Eba li gagu vi ailo meedà? 19 Uho ame gi vi tau lodam doi pajak oona perakat modehena lam Eba fi male.” Làhàmu ame dam labe le ame doi oona visoi fa vou li Yesus bake ab loham. 20 Labi Aho ve vousai dam bake fi si vimtedam labe ab vi gagoham. “Ame doi nim amam dauhati ulohona modesuhela? Labi amam ee laba toehela?” 21 Lahahat dam labe neha, “Dam ahebu vuusdam Kaisarleheda labe am dauhati am eeti modesuhu bak.” Lahame labi gagoha Yesusat fa neo vi gago, “Lo. Làhà uho dam ahebu vuusdam Kaisarleheda laba na abada lam fa naedate loda. Labi uho laha Alat Aba Aho gagohoda lam laha meeda. Labihadale.” 22 Lahame labi gagohemu ame dam labe Yesus git gagom bak aiesome ame im lam gagoha Yesusat git gagom vabamu àvodi gi daleàdi Yesus vou esmozi ab iliham. 23 Labi ame digat zoho labe Saduki dam labe laha neo Yesus bake gagu vi ailo ab li dozeadaham. Ame Saduki dam labe iho ozome tuhu im gi neha: “Mei elom di ba fat ahedi usam kaio,” lahame tu ozodam dam am bak. Laham dam labe Yesus bake li vi ailo ab gagoham. 24 “Guru oa, dat ahamda Musat aho toedume fi hasi iba esuhu Im Feàna zi lam im meida nehame toeme fi hasi esuhu bak. ‘Meit am itbaho fatoho vaba elomeam làhà fa ame nam maboe lam am dam zohot fa ve data faasi, “Ame koei labe am data am tame,” laham bak ozome debu bohulalelo ame maboe lam koei labe am vahadat modeo, am dubut modeo, fa vale,’ lahame Musat aham di iube labi toeme fi hasi iba esuhu bak. 25 Ne lahana iho etei vouholo modem im nim Oho nasi aimale. Amu di iube ame dam tujuh ehet. Datahida ame. Labi donida auoholehena ame. Labi domuàda ame. Labihasu ame dam tujuh labe dat datahida nam ab vaham. Labi ve modeha ame nam lam data faaha vabna dat ab eloham. Labi ame maboe lam ame koei laba vi tusuhu dàt fa neo ab vaham. 26 Labi ve modeha ame nam lam data faaha vabna dat neo ab eloham. Labi ame maboe lam dat doni dàt fa neo ab vaham. Labi ve modeha ame maboe lam data faaha vabna neo dat ab eloham. Gi labihasu vou mode ledume dat domuàdate ab vou fuham. Labi vou fusi modeha gi neo ame baket modi ame maboe lam data faaha vabna dat ab eloham. Labiha ladume ame dam tujuh ahebu ab foli seteham. 27 Labi ame maboe lam ba neo ab vi eloham.” 28 Lahame ame Saduki dam labe iho ame im lam vouhome neàdi, “Im elom di ba ahedi usào?” laham bak lam tozolo Yesus bake neo vi ailo ab gagoham. “Làhà Oho lab gagoho bak lam, ‘Mei elom di fat ahedi usam bak,’ lahame Oho lab tu ozome gagoho im lam imbodemeam làhà ba diamut dam ahebu elodaha dam fat ahededume usnadam di lam ame dam tujuh labe ototo vaidume ba vi eloho nam lam Oho ozom, amam namet mode?” 29 Lahahat Yesusat fa ab gagoham. “Vabà! Um git ozome gagoho bak. Alat Vameadaha Im Toedahana zi lam uho mahate aame vi ozome ozobohudehe vab damat modem bak. Labi Ala laha im feàna modem Alat modem labe dam elohonàme Aho modi fa neàdem meo bak um laha vabiem damat modem bak. 30 Ba diamut dam elodaha dam im elodaha bak labet Alat modi fa ahedi usnadam di lam dam ba lahi vam vabak. Labi laha lahi ba dam vam vabak. Gi Alat Am im gagu vou usem dam labe iho asum ahoba iuba azim di gi soaona esdam bakti uloho bak. 31 Ne, meit Alat Vameadaha Im Toedahana laba im meida nehi toehena nim, ‘Mei elom di fat ahedi usam bak,’ lahame toehe im lam Alat uba gagohona lam um aame ozobohudi neàdehe vaba Eba vabi vi ailo gagodà? 32 Alat aham di iube uba Yahudi dama nehasu vameadahana taia? ‘Em abo Abrahamti Isakti Yakubti labihasu Eho vuusuhu labe ame dam labe Eba vi ozome vou baedam Ala Em am bak.’ Lahame Alat aham di iube lab gagoho bak lam ame dam làtela lam gi elodahanàme fat ahedi Aba vou baedam lahasuhu bak lam Aho vameadaha bak. Labiham labe Eho vi ozom, dam elodahada zi labe ba Ala bake vou baedam vab taia? Gi dam ahe damat ihimo Ala bake vou baeda taia?” 33 Labi dam duada zi labe iho Yesusat Aho Saduki dam bake lab vi vahokedaha im lam aidume modeha ab àvodi meedamam. 34 Labi ame Saduki dam labe iho Yesusat etei lab vameadaha im lam aiha Yesus teudi gi im vamdesu vameadàmu ba dae bum kai. Labihàmu Farisi dam labe iho ame bak lam aihemu, “Iho akatihasu Yesus bake gagu aime Yesus git gagoho bak iho aihizobe iho siela?” laham bak neo vi ozome ihimo aa odoadalo fa bakamta ab vazisiham. 35 Labi vazisi im vameadume neàdi dat meidavat abo dat ahamda Musat toedume fi hasi esuhu Im Feàna zi lam bisi ozobohuda labe aho Yesus bake netàdi duzu Am ahu modi ozolo keobaeda. Aho neha, “Guru oa, Oho ozom, Musat aham di iube toedume fi hasi esuhu Im Feàna zi lam bisi im tombuda iho modemda akete? Oho nasi gagomale.” 37 Lahahat Yesusat fa gago, “Meit Alat Vameadaha Im Toedahana laba im meida nehaha bak. ‘Im dam ahebu meit am ahu vàmadi Ala bake deeli gi labaha bohu vuusda. Labi meit laha gi ame baket mode. Labihadale.’ 38 Im lada lam bisi iho nasi vi ozome modi tombulemda am bak. 39 Labi ame im bisi tombuda lamti ulohoda meida laha nehi toehe bak. ‘Uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.’ Lahame toehe bak. 40 Meit im tombuda behàsu lam meedam labet modi gi ame dat ahamda Musat toedume fi hasi esuhu Im Feàna zi lamti dam ahamda Alat vameadaha im aime fa dam bake ahate vameaidaha dam labe ibi iho lab toedume esuhu im lamti labihasu ame im zi feà lam gi ab vi tau meedamam bak,” lahame ab vameadaham. 41 Labi ame Farisi dam lam laba dozeadam lahasuhu di labe Yesusat vi ailo ab gagoham. 42 “Uho ozom, Alat Gagu Fihasi Vimteme Oluhu Dat Boehàda lam amam mekehàda modela?” Lahame labi gagoha ame dam labe fa gago, “Abo dat boehàda Israel dam bake vuusdam dat ahamda amu gi eloi seteheda abo Daud labe am mekehàda modem bak.” 43 Lahahat Yesusat fa vi gago, “Ne lahana aham di iube akati modi Daud vedi Alat Ba Gagu Fihasi Vimteme Olulo Modem Dat Boehàda laba, ‘Eba vuusdam Boehàda,’ lahame gagodàla? Nehaha bak. Amu Alam Aha Nutabe Neàna labe Daud bake modi vizi teudi aho nehasu toehe bak. 44 ‘Na Debu Modehe Ala labe Aho fa eba vuusdam Boehàda laba gago, “Om Em ahi totbaho niba nusu Eba tau feà Dateli dam vuusu im vahokedase. Labi Eho dam Oba fakemoholehe dam zi lam Eho ahit modi bedi fà Oba iedi uledi im Oboda fà aime meedase.” ’ Lahame Daud aham di iube labi toeme esuhu bak. 45 Daud ahamo Alat Ba Gagu Fihasi Vimteme Olulo Modemda Boehàda laba neha, ‘Eba vuusdam Boehàda,’ lahame labi gagodàmu ba akati meit Alat Gagu Fihasi Vimteme Oluhu Dat Boehàda laba neha, ‘Boehàda Daum mekehàda modem bak,’ lahame labi gagodàla? Labihameam làhà Alat Gagu Fihasi Vimteme Oluhu Dat Boehàda lam fa Boehàda Daud vafozi bisi feà Dateleheda Am taia?” 46 Lahame Yesusat labi im vamdesu vameadaha labe ame Farisi dam labe, “Iho akatihasu vi ozome fa vi gagoela?” lahame ba dae koena buhu vabak. Labihàmu ame Yahudi busaoda zi labe iba neo modi vi ladem bak labna zohàme ame digat labe faasi im dam meidavat ba Yesus bake im vi gagu aim bak ab moham.

Matius 23

1 Labi im lada lam vameadume neàdi Yesusat fa neo dam duada zi lamti Aba vi tau meedam dam lamti im meida bohu neo nehame faasi ab vahokedamam. 2 “Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labi ame Farisi dam lamti iho Alat amu Musa bake vameadume Musat fa ot vai vameadaha im lam iho neo ot vai im dedamali dam bake vahokedam bak. 3 Labihàmu ame dam labe iho lab vahokedam im lam uho mahate vuzehi meedale. Lahana ame dam labe ibi iho meedam bak uho a vi vouhodamule. Gi aalahigeàmole. Ame guru zi labe ibi iho meedam bak gi nehadam bak. Ame dam labe iho ame im lam vahokedamta vahokeda. Lahana naedamat gi ozahigeàmu fa im mei meedam bak ame. 4 Labi ame dam lam meia na asimbuna lu vohom di ba ot vam vaba gi meia ahumdem bak ame. Ame bak lam gi neham bak. Ame dam labe gi Musat aham di iube lab toedume fi hasi esuhu im lamota meia vahokedam kaio. Abo dam iho ahulat vi ozodam im zi lamti vi tau vahokedume meia modi vanamam damat modem bak. Lahana ame im zi lam, ‘Akatihasu modi neàdela?’ laham bak lam ba iho fet vouhodam vabak. Gi meia ahumdeda. 5 Labi ame dam labe ozo, ‘Dam amomoit fà iba aame vou baedase,’ lahame meedam labe iho Ala bake tom gagodam di vedi iho dauha gimsumna koena buà fi stoi Alat Vameadaha Im Toedahana nom dumna buà lam dam ihimo veimdi fa baa buduali gimsuidam bak ame. Labi laha, ‘Im bisi Musat toedume fi hasi esuhu im ulohodesu meedam dam im am bak,’ lahame im sue ahoba dusumda sona bohu lam dusum di vedi veimdi fa obuso bohulali vààudume duadam bak ame. 6 Labi laha ame dam labe vedi na zi vaheme àlo modem di vedi dam feàda nusu na àm bak laba bisi netàdi vi tau nusu na àdam meo bak ame. Labi laha iho Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di vedi dam feàda ihimo nusum bak laba deeli nusualadam meo meo bak ame. 7 Labi laha ame dam labe iho dam duana zi dokbuedam bak laba labohotelo modem di damat nom bohualame, ‘Ai Guru oa, om abo neàte,’ lahame iba labi gagom bak ozome deeli meedam bak ame. Labihasu meedam damat modem bak. 8 Lahana um Eba vi tau meedam dam nim damat im ahu adat iedi uba, ‘Ai guru,’ lahame gagom bak lam uho malele. Neham bak. Um guru ba tameho vabak. Um guru bisi imboda gi vàmtea bak. Labi um laha ubu mei dam zi laba gagom di gi um dubu ziti um vahada ziti lahadam bak. 9 Labi laha uho bak niba esdam lahasuhu di nim a dam amomoi laba ee vousai, ‘Aia,’ lahame a labi gagodamule. Um ai ba tameho vabak. Um Ai gi Vàmtea asum ahobada ium bak. 10 Labi laha damat uba, ‘Boehàda,’ laham bak lam uho laha malele. Um Boehàda ba tameho vabak. Gi vàmtea bak. Alat Gagu Fihasi Vimteme Oluhu Dat Boehàda vàmtea Em am bak. 11 Um meidavat neha, ‘Em fa feà datelese,’ lahame ozome modelo àhàkemeam làhà gi fa feà vab dateli mei na meedam datelele. 12 Eho gi neham bak ozome uba labi gagoho bak. Meit neha, ‘Em abo bisi feàda am tame,’ lahame it daetbadume am ee vousai gagomda laba Alat modi fa ee vou usi feà vab datelemda am bak. Lahana meit neha, ‘Em feà vabda am bak,’ lahame it ozome am ahu nemahuba neàt ee vousam vabda lam Alat ame da laba modi fa ee vousai feà datelemda am bak 13 Aiee! Um dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti um Farisi dam lamti labihasu ba vàhàdem bak vabili meedalo. Um gi ahobat neàdi meedam damat mozo. Meit neha, ‘Em abo Alam damali Aho eba vuusu im vahokedase,’ lahame ozodam dam lam uho vedi fa zie audam bakti ulohona modi ame dam labe iho Alam damalem bak uho maedam bak. Ebe eho lab vahokedam im gàhàna lam uho vuzehi Alam damali Aho uba vuusu im vahokedam mom damat modem labe uho vedi ubu uho ahulat vi ozodam im zi lam fa Musam im laba vi tau vahokedam labe meit, ‘Alam damalese,’ laham bak modelo meedam dam lam uho zie audam bak. [ 14 Aiee! Um guru zi lamti Farisi dam zi lamti um ba vàhàdem bak vabili meedalo. Um gi ahobat neàdi meedam damat modem bak. Uho gi maboe zi laba ahit neha, ‘Im om vou aasdalo mozo,’ laham dam labet vedi ahi vageme netàdi maboe nazoh fetehesu vi vadume dualem damat modem bak. Lahana uho Ala bake tom gagodam di uho lab faina modehe bak lam vedi ahit vasti uhumo neà damali gi Ala bake la gagoi le gagoidam labe bohulaleda. Aiee! Um labihasu meedam damat modem labe Alat ba diamut uba, ‘Fà duana modi geàdase,’ lahame na asimbuna feà meeda tame.] 15 Aiee! Um guru zi lamti um Farisi dam zi lamti um ba vàhàdem bak vabili meedalo. Um gi ahobat neàdi meedam damat modem bak. Uho vedi neha, ‘Imo meia le ibi iho Farisi damat meedam bak modi vizese,’ lahame ozome gi ozahit bak bohula bake le dat vàmtea buà laba modi vizem meo damat modem bak. Lahana ubu uho lab modem bak labet modi ame dat vàmtea labe aho vizi meedàmu gi vua eludamna sutem gikina bohu laba voomda am bak. Labi um laha laba voom bak. Lahana uho ba modi vizeheda lam bisi abobo ame vua eludamna sutem gikina bohu laba voomda am am bak. 16 Aiee! Uho vedi, ‘Im abo Alat vameadaha im vahokedam damat modem bak,’ lahamna um ba vàhàdem bak vabili meedalo. Um abo gi fako faidi na aam biem bakti uloholi meedam damat vedi fa dam fako faida laba neha, ‘Neà bak neam tame,’ lahame vahokedam damat modem bak. Uho vedi nehi dam bake git vahokeda. ‘Meit im fet gagu vàmadi esulo modem di labe im nehasu gagoda, “Fihasi Ala Bake Vou Baedam Num Vàmteabu ame nim. Eho ba mode tame,” lahame ame num buduabo laba vàlu ee gagu vàmadehena fa vazidazemeam làhà Alat ba ame da laba neha, “Om ohu vaha bak zidazeho,” lahame ba gagom vabak. “Gi voom neàte,” ’ lahame uho labi git vahokedam damat modem bak. Lahana uho vedi neo nehi vi vahokeda. ‘Meit im fet gagu vàmadi esulo modem di labe damat ame Num Vàmteabu laba vahedam emas laba aho vàlu gagomeam làhà ba ame bak lam veimdi voom vabiem bak. Gi abobo ab gagu vàhàdeham bak.’ 17 Uho labihasu vahokedam damat um akati fa vei ahusobuli meedà? Uho ozom, ame emas lam fa ame Num Vàmteabu labe fa vafozi feà nazohalehe? Vabo. Um git ozoho bak. Gi ame num buduabo labet modi ame emas lam modi fi hasi Alam nazohalehe bak. 18 Labi laha uho vedi nehi dam bake git vahokedam bak. ‘Meit im fet gagu vàmadi esulo modem di labe ame Num Vàmteabu labe am ad oli aam bak tomba laba modesu Ala bake lomna vua vahudamnabu laba vàlu ee gagu vàmadehena fa vazidazemeam làhà Alat ba ame da laba neha, “Om ohu vaha bak zidazeho,” lahame ba gagom vabak. “Gi voom neàte,” ’ lahame uho labi git vi vahokedam damat modem bak. Labi uho laha vedi neo nehi vi vahokeda. ‘Meit im fet gagu vàmadi esulo modem di ame vua vahudamnabu laba esuhu fi ho laba vàlu gagomeam làhà ba ame bak veimdi voom vabiem bak. Gi abobo ab gagu vàhàdeham bak,’ lahame git vahokedam damat modem bak. 19 Aiee! Um gi fako faidi na aam biem bakti uloholi meedam damat modem bak. Um ozom vaba? Na adida bisi feànalehela? Ame na fi hot feànalehe? Vabo. Um git ozoho bak. Gi ame vua vahudamnabu labet modi ame na fi ho modi fi hasi Alam nazohalehe bak. 20 Labihàmu um ozom vaba? Meit neha, ‘Eho ame bak mode tame,’ lahame fet gagu vàmadi esulo modem di ame na vahudamnabu laba vàlu gagomeam làhà aho gi ame na fi ho lamti vahi vàlu gagodam bak. Ba na vàmtea lamota vàlu gagom vabak. 21 Labi laha ame da labe aho lab fet gagu vàmadi esulo modem di lam aho ame Fihasi Ala Bake Vou Baedam Num Vàmteabu laba vàlu gagomeam làhà aho gi ame num lam Ala ehe bakti vahi vàlu gagoho bak. 22 Labi laha ame da labe aho lab fet gagu vàmadi esulo modem di lam aho asum ahoba iuba vàlu gagomeam làhà aho gi Alat nusu dam bake vuusu im vahokedam di nusumna feàda lamti Alati vahi vàlu gagoho bak. 23 Aiee! Um dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti um Farisi dam lamti um ba vàhàdem bak vabili meedalo. Um gi ahobat neàdi meedam damat modem bak. Uho vedi Ala bake vou baedam di Musat lab gagoho bak lamti ulohona meedam damat modem labe um utoho laba usihina keobe lam ahebu vame vou li debe vàmtea utasi Ala bake esu. Labi sembilan totbaho lam uho naedamat va. Labi neo ame na totbaho lam neo debe vàmtea utasi Ala bake neo esu. Labi sembilan totbaho lam uho naedamat va. Um gi im lada lamota meedam damat modem bak. Abo na et nakbe ahana neàna vizemna modeo, ut àhàkebu oo keobena modeo, nae modeo, labihasu debe ulohodesu fahedam damat modem bak. Lahana dat ahamda Musat aho toedume fi hasi esuhu Im Feàna zi labe im tombuda nim uho mu voedam damat modem bak. Abo dam bake iademe ahu vamdesu meedam bak ame. Labi meia aame faobekesi im neà bak tau meedam bak ame. Labi im gagom di ba vageme ame bak lam vàmtea buà voom vaba ahebu meedam tadem bak ame. Labihasu uho meedam vab damat modem bak. Uho im keobe lab meedaha bak lam meedamta neàt. Lahana ba gagoho zoho nimti vahi meedam bak lam bisi neà bak am tame. 24 Um abo gi fako faidi na aam biem bakti uloholi meedam damat vedi fako faida meida laba neha, ‘Neà bak neam tame,’ lahame vahokedam damat modem bak. Eho ahole uba vi tozohona ozohomu gagodam bak. Uho vedi uho udemna lam udelo modem di vo gatbe lam feàktoi na buduada untata vekesi udem dam taia? Uho vedi gi im totobe vi ozome meedam damat modem labe im tombuda uho gi fa ab voedaham bak. 25 Aiee! Um guru zi lamti um Farisi dam lamti um ba vàhàdem bak vabili meedalo. Um ahu abo meia ozom vaba gi, ‘Nazoh dualese,’ lahame meia mali soat ziemausi vadam damat modem bak. Um gi, ‘Meit fà aase,’ lahame ahobat neàdi meedam damat modem bak. Labiham labe um abo mokzohti fi lihibati kikem di am ad totbaho gi gihobu lahasuhu bak lam kikehe vaba gi toha totta kikem bakti uloho damat modem bak. 26 Um Farisi dam gi fako faidi na aam biem bakti uloholi meedam damat modem bak. Lahana um gi neham bak vi ozome meedam vaba? Amu nasi adahu tot kikeme boz neàdemeam làhà toha totbaho lam gi ahamo boz neàdem bak. Um abo ahu meia ozom vaba gi, ‘Nazoh dualese,’ lahame meia mali soat ziemausi vadam bak lam nasi voedale. Uho labihasu modemeam làhà ahobati vahi neàdem bak am bak. 27 Aiee! Um guru zi lamti um Farisi dam lamti um ba vàhàdem bak vabili meedalo. Um gi ahobat neàdi meedam damat modem bak. Um gi Yahudi damat koei ilehà ehe bak vabi gohatemeam faidi vàhàdeme fi ham bak labna zohàme koei ilehà ahoba laba na fauhana foom bakti ulohona meedam bak. Ame koei ilehà num lam damat aam dita fauha neà bakta aadam bak. Lahana bak ad ium dam faati meia modi vizi faidi vàhàdemna na meiti na meiti ehe bak. 28 Um laha gi ame bak lam modem bakti uloho bak. Neha: Ubu uho Yahudi damat meedume baleàhà im lam meedam bak lam damat aam dita uho gi im Alat Aba Aho gagoho im vuzehi vamdesu meedam bakta aada. Lahana um ahu ad labe meedam bak lam gi neha: uho bisi faina meedam bak ame. Labi meia ahi vageme ahobat neàdi meedam bak ame. Um gi fai bak ad laba vasti meedam damat modem bak. 29 Aiee! Um guru zi lamti um Farisi dam zi lamti um ba vàhàdem bak vabili meedalo. Um gi ahobat neàdi meedam damat modem labe uho vedi nehi ozo, ‘Imo dam ahamda Alat vameadaha im aime fa dam bake ahate vameaidaha dam aham di iube meit oddume elodaha dam zi laba vi ozome faobekese,’ lahame im koei baumahe bak laba ilehà moadume gàhàdi aam neàdedam damat modem bak. Labi laha, ‘Dam ahamda Alat Aba Aho gagoho im vuzehi vamdesu meedam dam amu elodaha bak laba vi ozome ozobuhudese,’ lahame dam zi labe im koei ilehà modesuhu bak laba laha vi vabiedume fa aam neàdedam damat modem bak. Um gi, ‘Damat fà iba aase,’ lahame labihadam damat meedam bak. 30 Uho vedi daetbadam labe nehi ot gagoida. ‘Mit ahea! Im ame di lam ehelemeam làhà im tai ahobada laba vi tau vazisi fa ame Alat vameadaha im aime fa dam bake ahate vameaidaha dam zi lam ba oddume im vasea bake veàmodam vabak,’ lahame vi ozome it daetbadam bak meedam damat modem bak. 31 Lahana um ozom vaba? Um laha Alat etei uba oudaha dam labe iho vou lehe im lam ailahigeàmu meedam damat modem labe vedi ahobat neàdi Alat amu oudaha dam ahamda labe im koei ilehà vabiedume fa neàdedam damat modem bak. Uho labihasu meedam bak labet modi um tai ahobada labe ame Alat amu oudaha dam ahamda zi laba oddaha bak lam ab modi tombaleham bak. 32 Làhà um tai ahobada zi labe ibi iho mei oddaha bak laba vi ozome uho laha nasi neo ame baket vi susume dam neo vi oddume neàdemeta. 33 Ea, um gi meoli fai bak tadi meedam dam labe fa ozbat meoli meedam bakti ulohona meedam damat modem bak. Um ahu vabali nehi ozohe? Alat uba ba uloodume vi aime ozobohudi neàdi gagu vua eludamna sutem gikina bohu laba um ba olum vaba moe? Ba oluhu vaba mom vabak. Abo olum bak. 34 Eho gi neham bak ozome uba labi gagoho bak. Um tai ahobada zi labe iho dam im fai bak meedaha vab dam abo Alat Aba Aho gagoho im vuzehi vamdesu meedam dam zi lam abo duana oddaha bak. Abo Alat na ahebu ahamte modehe di iube um tai ahobada zi labe iho dat im vamdesu meedamda ahamda Habel amu nasi alimeat oteheda am bak. Labi neo gi vou ote usdume Berekiam adat Zakaria ab oteham bak. Ame da Zakaria lam uho Fihasi Ala Bake Vou Baedam Num Vàmteabu labe am ad oli aam bak tomba laba abo ame num lamti labi na Ala bake lomna nom vaheme vua vahudamnabu lamti laha donibu laba otehe bak. Labihàmu um dam bada zoho nim Eho neo ahit damat Alat vameadaha im aime fa dam bake ahate vameaidaha dam amomoi ziti dam busaoda Alat vameadaha im ozobohu dam ziti Em im ozobohudi dam bake vahokedam guru ziti labihasu uba neo ouda tame. Oudahemu uho fa neo ame dam zoho lam odda. Labi ame dam zoho lam uho neo dam bake gagu ut tetehesuhunaso lam bake esu ame dam labe im anekehà vuu kidadesu paku dodume eloda. Labi ame dam zoho lam uho neo um Yahudi damat uhumo fi hasi bakamta vahi Alat vameadaha im ahamda dogoit aidam bakti im meiti meedam num laba na sokba nasbe ahit alibulehena labe ame dam laba foadume geàda. Labi ame dam zoho lam uho laha neo dam iho le esdam num debu bak laba vi nohisi dam lam neo ilime num debu meida laba neo le esu. Gi labihadam bohu meeda. Um labihasu lab meedam bak lamti um tai ahobada zi labe iho aham di iube dam im vamdesu meedam dam zi laba oddaha bak lamti labihasu Alat fa ame baleà vouhou um dam bada niba fa vi beoda tame. 36 Imbo bak. Em ba giomim gagom kaio. Um tai ahobada zi labe iho ame dam lab oddaha bak lam Alat vi ozome ame baleà vouhom di gi uho Eho li meedaha im nim aaha aiha laham dam lam vàlu beom dam um am tame.” 37 Lahame labi vi vahokedume neàdi Yesusat neo kota Yerusalem laba vahi azim Yahudi dam labe ibi iho aham di iube meedaha im lam vi ozome ahu faidi gi bak kiat ab vameadamam. “Aiee! Um kota Yerusalem laba azim dam Eho uba faobekesi meedalo. Nehaha bak. Dam ahamda Alat vameadaha im aime fa dam bake ahate vameaidaha dam zi lam um tai ahobada labe odda. Labi neo Aho gagu olu Am im vameadume esmozi laiam dam uba neo oudume modeha uho neo ame dam lam laha gi ket beodume oddume eloda. Um gi labihadam dam debut modem bak. Um Yahudi dam labihadàmu Alat uba ba beom bake Eho kuk ameaso labe am adambe meia vou faovoi am busehà labe delai dae kokoadam labe fa baguamdi vamatem bakti ulohona modi Eho uba soat vaususome iuba le modeme leidaha um gi Eba mohet vanamai moho bak. 38 Iumeee! Um Em moholahit um kota Yerusalem iumti ame uho Fihasi Em Ai Ala Bake Vou Baedam Num Vàmteabu lamti labihasu Alat vou esmozi ab alimdeham bak. 39 Em uho ba aam vaba vausi modesdamehamdi ba diamut uho Em alihi aahazobe fa um ahu uledi nehasu Eba gut gago, ‘Alat Aho Gagu Olu Ot Vai Im Dedateli iba etei ledamda nim abo feàteee!’ lahame uho ule neàt Eba gut valo modem di lam uho Em alihi ba aam di am tame,” lahame Yesusat fet ab vameadume esuham.

Matius 24

1 Labi Yesusat ame Fihasi Ala Bake Vou Baedam Num Vàmteabu labe am ad oli aam bak tomba lam vou esmozi futoi ladam labe Aba vi tau meedam dam labe iho it aame Yesus bake ab gagoham. “Guru oa, ame Num Vàmteabu nim susume moadahana feà nim Om aadào?” 2 Lahame labi gagoha Yesusat fa ab vi gagoham. “Uho etei lab aadamna zi lam bisi labaha bohu modesdam vabak. Eho etei uba gagolo modem im imboda nidi nim nasi aima. Ame ke mei ahoba vou vahe zihina zi lam ba fa faamome gi alimdi seddam bak,” lahame ab gagoham. 3 Labi neo ladume kota Yerusalem vou esmozi bàhàgo obe labet le Zaitun Dee Dozeadaha Bak Buzoho laba ab laiteham. Laisi laba odosi esdam di labe Aba vi tau meedam dam nibe ihimo Yesus bake li aa vi ailo ab gagoham. “Guru oa, Oho etei lab vi ozome gagoho im lam adi diat modemna gagohela? Labi laha Oho ba fa lem di bak niba modealahana meedume novai vaitolo modem digat lam Alat ana nasi iba fet vouhom bak iho aame ozo, ‘Ame bak lam ab modelo modem ame?’ lahame iho ana aame ozobohudela?” 4 Lahahat Yesusat fa ab gagoham. “Iho bak niba esu meedam im zi ahebu ba novai vaitolo modem digat fuseo modem di lam amu im nehamda nasi meeda tame. Amu dam duada totbaho labe uba nasi li neha, ‘Em abo Alat Gagu Fihasi Vimteme Oluhu Dat Boehàda am tame,’ lahame uba li ahit vageme keobaedam labe damat vabi imbo tibame dam dua zoho vi ozome tu vuzeheda tame. Labiham bake uho iademe vou faovoi esdam labe vou faodale. 6 Labi laha ame ba novai vaitolo modem digat fuseo modem di lam damat uba nasi li im nehasu vameada tame. ‘Dam bak kia bak ium ot fakiame ot belui ot beluidalo.’ Labi, ‘Dam bak netà bak niba ot fakiame ot belui ot beluidalo.’ Labihasu uba nasi li vameadam bak ehete. Lahana uho im labihasuhuna aim di um ahu a bisi iedi vi ozodamule. Ame ba novai vaitom digat lam di labe taho fum vabak. 7 Labi ame di labe im nehasu laha meeda tame. Dam debu fa vàmadiaha bak lamti dam debu fa vàmadiaha bak lamti ot fakiame ot belui ot beluidam bak ame. Labi bak amomoi vuusdam boehàda am damti bak amomoi vuusdam boehàda am damti labihasu ot fakiame ot belui ot beluidam bak ame. Labi bak iuba modeo, bak iuba modeo, di neà faasi bak aotbali na debe soali àm vabili idoali ibzidume dam elodam bak ame. Labi bak iuba modeo, bak iuba modeo, balim feàna nigome dam beodume foedam bak ame. 8 Labihasu ahamte faasi meedam im zi am bak. Abo lahit data faaseo modem di labe ahamte vi ozome vàzbudam bak lamti uloho bak. Lahana a bisi iedi vi ozodamule. Eho etei lab vameadaha im lam nasi meedamta meeda. Lahana dam bakda zi ahebu foli seddam digat lam di labe taho fum kaio. Ame bak lam vou meedamehamdi ba vou fuse tame. 9 Labi laha ame di labe uho Eba tu vuzehi vi tau meedam damat modemu dam mei debuti dam mei debuti ahebu uba faki meeda tame. Abo dam giida labe neha, ‘Imo dam nim siàdume meo damat esuhu bak iuba vou le ub lodume damat fai bak vabidam labe geàdam bohu meedume vi oddase,’ lahame vi ozome um siàdume vou lada tame. 10 Labi ame di labe laha dam amu Eba tu vuzeheda dua totbaho lam laha fa Em mu bak mei bake avaesu lada tame. Labi Eba mu itaha dam labe fa Eba tu vuzehi vi ozodam lahasuhu dam totbaho laba vei faki vou fohome meia ub lu odda tame. 11 Labi ame di labe laha damat neha, ‘Im nim Alat iba gagu iho ot vai fa uba vameaidalo mozo,’ lahame gi ahit giomim vameadam dam labe uba lailaidam labe dam dua zoho labe vedi imbo tiba vi tu vuzeheda tame. 12 Labihasu meedam labe dam bakda dua totbaho labe ibi iho lab bisi faina meedam bak lam vi taui vi tauidume dualedam labe ibi iho amu meia deeli meedam bak lam gi fa voou ab seddamam bak. 13 Lahana Eba tu vuzehi meedam dam lam naat iba vabidam di iho gi ozahit keàtedi tu vuzehi meedam bohu vuusdume digat ba novai vaitomda laba vou fusi meedam dam lam Eho soat vausu fa vei neàdedam dam am bak. 14 Labi laha, ‘Alat dam bake deeli vame Am damali vuusu im vahokeda tame,’ laham Im Neàna lam meit bak mei bak iuba le vou vameatedume fi deda. Meit bak mei bak iuba laha neo le vou vameatedume fi deda. Labihadume dam mei debuti dam mei debuti vou vameatedume uloholi neàdi ame ba novai vaitolo modem digat lam ab vou fumam tame,” lahame fet ab vameadaham. 15 Labi Yesusat neo susume vi vameada. “Ame ba novai vaitom digat fuseo modem di labe uho nehi fet aame ozobohudemna aa tame. Aham di iube dat ahamda Alat vameadaha im aime fa dam bake ahate vameaidahada Daniel labe aho aham di iube im tai ahobada zi laba nehi fet vameame vàmadi esuhu bak. ‘Ba diamut aam ahasbeamna abo Alat aam fakemda lam fa ame Fihasi Ala Bake Vou Baedam Num Vàmteabu laba oli duzu vàhàdehemu damat ame num lam gi mu vou esmo tame.’ Lahame Daniel lab fet vameame vàmadi esuhu im lam imbodi amena aam ahasbeamna labe ame Num Vàmteabu labe am Fota Fiham Zoho abo duzum maem zoho laba duzuhu bak uho aameam làhà ame digat ab fuseo meedamam bak. (Damat Daniel aho fet toeme esuhu im lam aame ozom di, ‘Akatihasu modem bake labi gagohela?’ lahame mahate fetehesu vi ozome ozobohudele). 16 Labihàmu uho Daniel lab gagohona lam uho ame num laba duzum bak aameam làhà Yudea bak laba azim dam labe uho laba a esdamule. Um foli seddam bak labna zohàme ahedem bak laba ozome gi taho sibu bak iuba iitaole. 17 Labi laha ame digat fuseo meedàmu um num ohut vabna baa ahoba laba zisi esdam dam lam a fa um numa oli na koena it ve voutamule. Gi labihasu vou esmozi iitaole. 18 Labi laha ame digat fuseo meedàmu dam utoho bake le godam dam labe a nehi ozo, ‘Em nutahalem bake num bake fa emoeme em sue sona ahoba dusumda it visoi vou itase,’ lahame a um num bake fa lamule. Gi vou esmozi taho iitaole. 19 Aiee! Lahana lahi zubuleheda zi lamti data tatvamda do àm lahasuhuda eheda zi lamti iitaom vanamam bak akati modelo. Làhà gi emoem vabilemnàme taho ozahit betea iitaole. 20 Labi laha uho lab iitaom digat vi ozom di uho mahate Ala bake nehame tom gagodale. ‘Ai Ala oa, ame digat fuseo meedam di Oho hari Sabat abo im Yahudi dam labe ibi iho gi azibe im digat abo lam bak bohula bake lam fi ham digat lam a modemule. Labi laha di faidi emoem biem digat lam a modemule. Gi fa digat amomoi ozome iba modi iitaole,’ lahame mahate Ala bake labihasu tom gagodale. 21 Eho gi neham bak vi ozome uba labi gagoho bak. Ame digat fuseo meedam di lam ba dam bakdate modi geàdamna lam ba koena modi geàdam kaio. Abo duana modi geàda tame. Amu Alat alimeat bak nim ahamte modehe di labe faasi vou mode ledume etei vou fusi meedam digat nim dam bakdate labihasu modi geàdamna lam ba na vabak. Gi ba novai vaitolo modem digat fum di ame im meedam di am bak. Labi laha ba diamut neo vi meedam bak na vabak. 22 Lahana Alat Aho fi hasi vame Am damalehe dam laba Aho bisi vi ozome deeli faobekesi meedàmu ame geàdam bak lam Aho ahit modi fa zohobuli vaito tame. Aho faobekesi ame bak lam zohobulem vabameam dat meida so lam vàmtea vekehe vaba gi dam ahebu modi vàhàdedume seddam bak. 23 Labi laha ame ba novai vaitolo modem digat fuseo meedam di meit uba nehi gagomeam, ‘Nime! Alat Gagu Fihasi Vimteme Oluhu Dat Boehàda neam tame,’ labi gagom bak modeo, ‘Iume! Ame Da lam am tame,’ lahame uba labi gagom bak lam modeo, um nasi a aime imbo tibame vuzehemule. Giomimot modem bak. 24 Eho gi neham bak ozome uba labi gagoho bak. Ame di labe damat lehe bak aaha vab dàt im nehasu vameadamna uho ai tame. ‘Em abo Alat Gagu Fihasi Vimteme Oluhu Dat Boehàda am tame,’ lahame giomim gagodamda modeo, ‘Alat Am im eba gagu eho ot vai dam bake ahate vameaidahada em ame Da am tame,’ lahame giomim gagodamda modeo, labihasu duzu vameadam dam uho aa tame. Ame dam labe nehi ozo, ‘Damat fà im ibida aime iba tuse,’ lahame ozome ahit na damat ihimo modem biem im feàna lamti abo damat fet aame àvodi meedamna lamti labihasu meedam labe dam duada zoho vedi imbo tibame ame im laba tu vuzeheda tame. Ame giomim vameadam dam labe iho lab vou li vameadam im lam Alat Aho fi hasi vame Am damalehe dam labe aime vuzehem bak mom bak lam ame dam labe iho ozobohuna ahit, ‘Modi aase,’ lahame vameada tame. Labihadamnàme Alat fi hasi vame Am damalehe dam labe ba ame bak lam modem vabak. 25 Labihàmu mahate it vou faovoele. Eho ame im zi lam vameadam bak lam uho vi ozome ozobohudem bake Eho ahit uba nasi fet labihasu vameadume esulo modem bak. 26 Labihadàmu meit uba li nehi gagomeam, ‘Iumeee! Alat Gagu Fihasi Vimteme Oluhu Dat Boehàda lam Aho bak aotba baa bohu dam vaba alim bak doudalo,’ lahame labi gagom bak modeo, ‘Nime! Ame da Aho gi aa niba li num bumat tuoho bake doudalo,’ lahame labi gagom bak modeo, um nasi a aime imbo tibame tu vuzehi laba ladamule. Giomimot modem bak. 27 Em Abo Asum Ahoba Iubet Bak Niba Li Dateleheda ba fa lem di gi neham bak. Asum boz vekesi fauhali asum ahebu veibai seti dam ahebu aam bakti ulohona modem labe dam ihimo ahebu aadam tadem bak. Ba akati meit li gagom im uho aie? 28 Neham bak. Na koei àm bume zi oaedam bak laba damat aam di nehame ozo, ‘Bume zi oaedam adba laba na koei ehe bak,’ lahame labi aame ozobohudem bak. Labi laha Em fa bak niba lem di Em ba aa lem vabak. Em fa lem di gi dam ahebu ozobohudem bak,” lahame Yesusat fet ab vameadume esuham. 29 Labi Yesusat neo vi susume vameada. “Ame ba novai vaitolo modem digat fuseo meedam di labe dam bakdate modi geàdamna zi lam foli neàdi kehàm vaba im nehasuhuda neo meeda tame. Ala digadda fa aibuli ba fauhaedam vaba modesda. Labi ala useheda lam ba fauhaedam vaba gi aibuli modesda. Labi falo zi lam fa bake nom fi goaitoi bidda. Labi asum ahoba iuba modealahana zi feà lam betea bakamta modealadam vaba gi ihevoulai ihevoulaida. Labihasu meeda tame. 30 Labi ame di labe, ‘Em Abo Asum Ahoba Iubet Bak Niba Li Dateleheda fa bak niba li dam bake vuusu im vahokedam bak ab fuhame?’ lahame damat fet aame ozobohudemna Eho ahit asum ahoba iuba modesu tame. Labi dam debu mei vàmadi vàmadiaha bak ahebu ame na lam aahemu im ahu faidi meb dae feàna faasi meeda tame. Neham bak aam labe labihaha bak. Damat ame na lam tom aam di Em Abo Asum Ahoba Iubet Bak Niba Li Dateleheda Em Aiat Am na fauha meona fako iedemna ogatei modealaha bak lam fa Eba modi vizi feà Dateli uloti nom iludam bak lam damat aame ozo, ‘Im ab folelo modem ame?’ lahame ahu faidi meb dae feàna faasi meeda tame. 31 Labi ame di labe na oma daeti ulohona trompet lahamna labe nom buddam labe Em im gagu vou usem dam zi laba gagu nom oudume Eho fi hasi vame Em damalehe dam lamota dam debu iudu iuba le vada. Dam debu iudu iuba neo le vada. Labihadume damat azihi bak ahebu ulohole tame,” lahame Yesusat fet ab vameadaham. 32 Labi Yesusat neo susume nehame vi vameada. “Eho etei ut ara laba vàlu totobet fi koadalo modem im nidi nim uho laha aime ozodume ozobohudele. Bak ibida niba ut ara labe am mekehà aaso faasi et nakbedem bak damat aam di nehi ozom bak. ‘Ab di neà faalo modem ame?’ laham bak iho aame ozobohudem bak am. 33 Labi laha Eho etei lab fet vameadaha im zi lam modesum bak uho aameam làhà uho nehi ozom bak am bak. ‘Eho amu lab fet vameadaha im lam ab imbodelo ahazobuleham bak,’ laham bak um ab ozobohudemam bak. 34 Nasi aima. Eho etei uba gagolo modem im imboda nidi nim mahate tu vi ozodam bohu meedale. Eho etei lab vameadaha im zi lam ahebu meedume neàdehe vabna um eteida nim ahe lahasuhuna ame im zi lam imbodehe bak aadume neàdi ba eloda tame. 35 Asumti asum ahoba iuba modealahana zi lamti labi bak nimti bak niba modealahana zi nimti labihasu ahebu ba beodume foedume sedda tame. Lahana Ebe Eho vameadam im zi lam ahebu ba setem vabak. Gi labaha bohu vuusdume imbodedam imot modem bak,” lahame fet ab vameadaham. 36 Labi im lada lam vameadume neàdi Yesusat neo vi susume vameada. “Eho etei uba lab vameadaha im zi lam ahebu vou fum di lam, ‘Adi diat modemna modela?’ laham bak lam ame digat labe am jam lamti im dam bakda zi nim ba vàmtea buà ozobohuda na vabak. Im ahebu gi vabiem tadehe bak. Labi Alat Am im gagu vou usem dam zi lam laha vabilem bak. Em gi Am Adàt modemnàme Em laha vabilem bak. Gi Em Ai Alat Ahamo ozobohudehe bak. 37 Uho Nuh ehe di labe meedaha im lam nasi vi ozomale. Aham di iube Nuhti vahi esdam dam lam vao zisi dam beoho vab di labe damat vedi na feàna iba ba beom bak vab tiba vabili esdam di labe gi ibi iho ozom bak lamota la modi le modidam bak. Na àda. Vao udda. Dam lahi vada. Lahi dama loda. Gi labihasu bohu modesdume Nuh am namti am adam lahiti ihe feàda numalehenabu laba ziddaha bak laba ab vou fuham. Labi ziddume modeha vao zisi bak ahebu fi oli dam ihe laba tau ziddaha vab dam lam ahebu ab belu elodume seddaham bak. Ame dam labe gi di labe it ozo, ‘Iho git la modi le modidaha bake im ab beodume elodalo modem ameo?’ lahame ozobohudi geàdaha bak. Labi laha Em abo Asum Ahoba Iubet Bak Niba Li Dateleheda nibe Eho ba fa bak niba lelo modem di damat gi ame dam ahamda labe iho ahumdehe vaba vabi gi esdaha bak lamti ulohona meedahit Em lem bak. 40 Em lem di gi neham bak. Dam behàsu na modelo utoho bake le meedam di labe meidata vuu visoi meida gi laba voou veke. 41 Labi laha lahi behàsu ti feàdam di lam meidata vuu visoi meida gi laba voou veke. Gi labihada tame. 42 Labihadam bak ehemu uho mahate it vou faovoi ozodam labe ahumdi vou faodale. Em um Boehàda ba fa lem digat labe am jamti um vabilem bake labihadale. 43 Uho im totobe nidi nim laha aime mahate vi ozome ozobohudele. Dat num deda labe am num laba meit am na aa li vam bak ozobohudemeam làhà ba ame aibu lam ba bisu im vabak. Abo vou faovoi aasdam labe ba meit am numa oli am nazoh aa li vam vabak. 44 Labihàmu um laha gi ame baket meedale. Em Abo Asum Ahoba Iubet Bak Niba Li Dateleheda nibe Eho ba lem digat lam um laha vabilem bake gi vou faovoi ahumdi ibzidale,” lahame fet ab vameadaham. 45 Labi im lada lam vameadume neàdi Aho neo ozo, “Dam Aba tu vuzehi im Abada meedam lahasuhuna ahum Aho fa li aase,” laham bak vahokedalo im totobe nidi nim neo nehame ab faasi fi koadamam. “Mei na meedamda nibe aho aba na gagu meedamda laba na gagom di aho gi ule neàt meedam tadem dàt moz. Aba na gagome meedam di ba gi modem vaba abo iademe ozobohu aabodi meedam bak. Labihadam dàt modem labe aba na gagu meedamda labe aho bak mei bake lalo meedàmu aho ame da laba fa neo ab gagoham. ‘Em na meedam dam totbaho zi nim oho fa ot vai vou aasdume na meedam bake ohomo vi ozobohudi vameadale. Labi ame dam labe na àdalo modem di oho na àmna faheme dihasi iuba loda. Dihasi iuba loda. Lahadale,’ lahame am na meedamda ahida laba ab gagu esmozi ab laham. 46 Labi le azibe fa li aaha aho am na meedamda ahida laba, ‘Nehame modele,’ lahame amu fet gagu esuhuna lam aho uledi meedamna li aahemu aho deeli am na meedamda laba gi neà bak bohu tadem bak. 47 Lahana ba gi lada lamota meedam vabak. Meia na gagu meedamda labe am na meedamda laba laha neha, ‘Em soa maehe nazoh ziti doi ziti oho fa ot vai iademe vou aasdale,’ lahame ab gagomam bak. 48 Lahana ame mei na meedamda labe ahida modehe vaba soida bisi faina meedamda modemeam làhà aba na gagu meedamda le setem di am ahulat gi nehi it ozo taia? ‘Aa! Ne, eba na gagome meedamda lam taho fa lem vaba? Akati kehàdà?’ lahame alamdi vedi aho vuusu na meedam damti na meedam lahiti ame dam laba faki beodume geàda. Labi laha vao meona uddume bak vabili bobidam meo dam laba tau vazisi na àda. Labi vao meona udda. Labihada. 50 Labi ame ot vai meedamda labe vedi aba na gagu meedamda lam ba fa lem digat labe am jam vabili esdameam làhà aho ozom vab digat labe dat naeda fa li ame da labe aho lab meedam bak lam aame faki feàna foadume dam ahobat neàdi meedam dam labe ibi iho esdam bak iuba voou kikezi geàdam labe ahu faidi meb dae feàna faasi medda tame,” lahame Yesusat im totobe lada lam ab vi vameadaham.

Matius 25

1 “Ba diamut Alat Ahamo Boehàdateli Dam vuusu im vahokedam di dam adidate Aho uledi Am Damali Aho vuusu im vahokedàla?” laham bak lam Yesusat vahokedalo im totobe nidi nim ab faasi fi koadamam. “Eho ba fa Boehàdateboli li Em damalehe dam laba vuusu im vahokedam di gi im totobe Eho etei fi koadalo modemda nimti uloho bak. Lahi soaona sepuluh zi labe ozo, ‘Dat nam etei valo modemda lam damat vou dozeadume dokbuedam labe vi vihitoadam dam zi lam imo doait le gut tau vou lase,’ lahame ozome im vua fauhaedamna zohobubeà ahala vuusu vuusuiame doait ab laham. 2 Ame lahi soaona sepuluh lam fàsi auohole totbaho ahusobu lahi soaot moz. Labi lahi soaona auohole totbaho lamota im ozobohu lahi soaot moz. 3 Laham lahi soao ahusobuda labe vedi vua fauhaedamna ibida abo zaitun oo modi minyaklehena folem di ba fedeme fauhaedam bake ozome fetehesu vame vou ladam kai. Vedi gi iho etei lab fedeme fauhaedamda lamota labihasu vou lada. 4 Lahana lahi soao im ozobohuda labe im vua fauhaedamna ibida amu fedeme fauhaedamda lamota ahumdi tu vou ladam vaba abo ba neo minyak folem di fedeme fauhalem bakti ozome fetehesu vame ab vou ladaham. 5 Labiham lahi soaona sepuluh labe le vou faodaha ame dat nam etei valo modemda lam taho vou fuhu vaba kehàdume modeha ame lahi soaona lam iho izeo àhàki lavoidume ab idaomam. 6 Labi idaomeam usi neisoat damat ab buteham. ‘Dat nam etei valo modemda ledalo. Imo nasi doait le gut tau vazisi vou ladase,’ lahame butedam bak aihemu keeddume im vua fauhaedamna lam vabiedume neàdi fa neo usidume ab fauhaedamam. 8 Lahana lahi ahusobuda labe vua ibida minyak vabali sutelo meedàmu fa lahi im ozobohuda laba ab gagoham. ‘Iba minyak zohovat vàle. Vua fau ibida suti seddalo mozo,’ lahame tauleda. 9 Lahahat lahi im ozobohuda nibe fa gago, ‘Vabo. Minyak ibida uba lomeam ibida ba uloholem vabak. Labiham bake ibida ba uba lom kaio. Uho nasi minyak ot loiam bak laba le doit vale.’ 10 Lahame labi gagohemu ame lahi ahusobuda auohole lam fa minyak valo ab ladaham. Gi etei iumà ium ladam di labe dat nam etei valo modemda ab lefuham. Labihàmu lahi soaona im ozobohuda labe im vua fauhaedamna lam fetehesu modi ahumdi vou faodam labe ame da lefuhemu vi tauidume ame na vahi àdalo modem num laba ab vi oedaham. Labi vi oedume neàdi num doo lam ab it baguamdi teudeham. 11 Labihadam di labe lahi soaona ahusobuda labe minyak vame neàdi fa vou li aaha dam num doo teude. Doo teudehemu bako laba dozeadume budda. ‘Ai oa, doo fi stole. Im vi tau oedase.’ 12 Lahame butidaha dat nam etei valo modemda labe fa ab gagoham. ‘Imbote. Em um biehemu ba doo fi stom vabak.’ ” 13 Lahame Yesusat ame im totobe lam fi koadume neàdi ab vi gagoham. “Ame bak lam labihahemu uho mahate it vou faovoi ozodam labe ahumdi vou faodam labe ibzidale. Eho ba fa lem digat labe am jamti um vabilem bake labihadale,” lahame Yesusat fet ab vameadume esuham. 14 Labi im lada lam vameadume neàdi Yesusat Aho ba Boehàdateboli bak niba fa li Am damalehe dam vuusu im vahokedalo modem di Aho li aameam, “Dam bakda Aho gagoho im uledi meedào? Meedam vabao?” lahame vi gagu aim bak ehedaleàmu im totobe nidi nim neo nehame ab vi vameadamam. “Eho ba fa lem di gi im totobe Eho etei uba fi koadalo modemda nimti uloho bak. Dat am soa maehe nazoh duada labe aho bak mei bake le ibzidalo modemu am na meedam dam gagome li dozeadume neàdi fet ab vameadamam. ‘Em soa maehe nazoh abo emas nim uho omozit iademe meedume emas fa duali vou faodale. Em bak iuba le koena azibehamdi fa le tame.’ 15 Lahame labi gagu neàdi ahamo ozo, ‘Da lada lam na meedam di keàteda ame. Da nidi nim na meedam di keàtet meedam vabda ame?’ laham bak laba ozome doi oona emas ab ahaladi ahaladiame lodume ab vou esmoham. Nehasu faheme loda: Am na meedamda meida laba doi oona emas dom abo auohole loda. Labi am na meedamda meida laba neo doi oona emas dom behàsu loda. Labi am na meedamda meida laba neo doi oona emas dom gi vàmtea lo. Labihasu am emas lam lodume esmozi ab laham. 16 Dat naeda labe gi etei le setehe omozit am na meedamda ame emas dom auohole vahada labe ozo, ‘Em akati modem labe em aiam emas dualela?’ lahame le nabime aaha emas modi dualem bak aahemu laba meedume doi oona emas dom auohole amomoi neo ve vi tau ab sepuluhleham. 17 Labi dat meida ame emas dom behàsu vahada labe aho neo abada vou le meedume doi oona emas dom behàsu neo ve vi tau ab ahialeham. 18 Lahana dat meida ame emas dom gi vàmtea vahada labe aho am aiam emas lam meedume dualem bake nabidam vaba vedi gi ve bak sime baumsu ab esuham. 19 Labi ibzidume aaha dat naeda fa ab leham. Fa li ozo, ‘Eho dam niba ahumdi esuhu bak lam em emas iademe na meedume dualeheo?’ laham bak gagu vi ailo am na meedam dam làtela niba ab gagu fet lei fet leidamam. 20 Leidam di labe dat ame emas dom amu auohole vahada lam aba aho ba meedume ve vi tauhuda auohole lamti vahi sepuluhlehena lam am ai bake ab vou li duzu gagoham. ‘Ai oa, oho nasi aamale. Oho amu eba lodume vou esmoho emas dom auohole lam eho ve fa omozit meedume emas dom auohole amomoi neo vi tau ab sepuluhleham tame.’ 21 Lahame labi gagoha dat naeda labe fa gago, ‘Lo, neàte. Eho oba lu vou esmohona lam oho abo iademe vuusu vou meedaha bak lam abo neàte. Eho oba gi koena lohona oho iademe vamdesu meedaha bake eho oba neo na buduada neo oba lu oho neo vou aasdalo mozo. Oho nasi ebe eho deelehat azim neà bak niba vi tau azile,’ lahame gut gagu ve aba ab tau aziham. 22 Labi vou faodameilahit dat meida emas dom amu behàsu vahada lam aba aho ba meedume ve vi tauhuda behàsu lamti vahi ahiali am ai bake ab vou li duzu gagoham. ‘Ai oa, oho nasi aamale. Oho amu eba lodume vou esmoho emas dom behàsu lam eho ve fa omozit meedume emas dom behàsu amomoi neo vi tau ab ahialeham tame.’ 23 Lahame labi gagoha dat naeda labe fa gago, ‘Lo, neàte. Eho oba lu vou esmohona lam oho abo iademe vuusu vou meedaha bak lam abo neàte. Eho oba gi koena lohona oho iademe vamdesu meedaha bake eho oba neo na buduada neo oba lu oho neo vou aasdalo mozo. Oho nasi ebe eho deelehat azim neà bak niba vi tau azile,’ lahame gut gagu ve aba ab tau aziham. 24 Labi neo vou faodameilahit dat meida emas dom amu vàmtea vahada lam neo ab li duzu gagoham. ‘Ai oa, oho iba meedam bak lam em ozobohu bak. Om abo dae teuna meedam dàt iba vuusu meeda. Om bisi meit debe soalehena gi ahum gagome vada. Meit ahamo meedume vanamai nuhatehena oho vedi gi ahum vada. 25 Labihàmu oho eba loho emas dom lam eho meedume ame emas lam dualehe vaba setemeam làhà oho eba faki beom bak labna zohàme em fa iedi oho eba loho emas dom vàmtea lam eho le bak sime fa baumsuhu bak. Ame emas dom neam tame. Oho naedat nasi fa vale.’ 26 Lahahat dat naeda labe ame lab gagoho bak lam aime faki ab gagoham. ‘Om abo eho na gagom di au vabali odohabulehe dàt modem labe bisi faina meedam dat om am bak. Oho eba neha, “Em bisi meit debe soalehena gi ahum gagome vada. Meit ahamo meedume vanamai nuhatehena eho vedi gi ahum vada.” 27 Laham bak lam om ozobohudehena akati eho oba loho emas lam oho neo ve damat mei emas modi duaedam num laba vou oli esu eho fa lehezobe ame emas fa dualehena oho eba gut lom vaba modela?’ 28 Lahame gagu neàdi am im ot vai meedamda meida laba ab gagoham. ‘Oho nasi da labe vuusuhu emas dom vàmtea lam si vietoi fa em na meedamda meida labe aho em emas modi sepuluhleheda laba taho fa lole. 29 Neham bak. Eho meia neha, “Em na nimota oho vou aasdale,” lahame gagu ame da labe aho iademe vuusu vou aasdameam làhà eho ame da laba neo neha, “Em na nidi nim oho laha vou aasdale,” lahame gagu ame na vi tau duali feà bak fusi vuusu vou aasdam bak. Laham vabameam eho meia neha, “Em na nimota oho vou aasdale,” lahame gagu ame da labe aho iademe vuusu vou aasdam vabameam làhà eho naedat ame da laba gagu meedam im lam gi fa faatoi vei setem bak. 30 Labihadàmu oho nasi em na meedamda nim abo na im vi ozome modem biemda nim nasi si vou futoi bàhàgo bak iuba bisi aibu feà bak laba voou ame da nibe fà kikezi geàdam labe ahu faidi meb dae feàna faasi meddase,’ ” lahame Yesusat im totobe lam ab fi koadaham. 31 Labi im totobe lada lam Yesusat fi koadume neàdi ame im zoho lam Aba vi tau meedam dam niba neo nehame vi vahokeda. “Em Abo Asum Ahoba Iubet Bak Niba Li Dateleheda nim Em Aiat Eba gagu Eho ot vai Boehàdateboli fa bak niba lem di Em Aiat Am na fauha meona fako iedemna ogatei modealaha bak lam Eba modi vizi feà Dateli le tame. Labi Em im gagu vou usem dam zi laha Eba vi tau le tame. Labi ame di labe Eho Boehàdat nusumna abo Em Aiat Am na fauha meona fako iedemna ogatei modealahana nusumna laba Eho nusu dam vahi vuusu im vahokeda tame. 32 Labi ame di labe Eho Em im gagu vou usem dam laba gagu le dam mei debuti dam mei debuti ahebu atetedume vou li Eho avaesdam laba dozeadume neàdehezobe Eho faheme dam debu behàsdelo mozo. Abo na fi ho vou aasdamda labe aho am domba zi fàsi bak mei bake vahe. Labi am kambing zi fàsi bak mei bake neo vahe. Labiham bakti ulohona mode tame. 33 Eho ame bak lam meedam di labe Eho dam Alat Aho ozome gagoho im lam uledi meedaha dam lam abo dombati uloho dam lam Eho ve fi hasi fa Em anekehà ahi totbaho niba oumaheda. Labi dam Am im mu voedaha dam lam abo kambingti ulohoda lam Eho neo ve fa Em anekehà soi totbaho laba oumaheda. Labihada tame. 34 Labi Eho Boehàdatebo nibe Eho dam Em anekehà ahi totbaho niba oumaheda zi niba nehi gagom bak. ‘Um abo neàte. Eho dam vuusu im vahokedam bak niba nasi oedale. Em Aiat Aho uba faobekesi neà bak ozome meedalo modemna zi uba etei ab modelo modemam bak. Abo Em Ai Alati ahili aham di iube na ahebu alimeat meedaha vab di iube iho im behàsut fet ozome ahumdi esuhuna ziat modem bak. Nasi oedume um naedamalele. 35 Nehaha bak. Eho amu idoalehe di labe uho Eba na àmna lodume Eho ve àda. Labi neo Eho valo àhàki modehe di labe uho laha Eba vao noai Eba lu eho ude. Labi Eho bak mei bak iube fa uba lehe di labe uho Eba ule neàt gut ve um num laba ousu idda. 36 Labi laha Em sue vabali so bozbulehemu uho Eba sue lome duada. Labi laha Eho gaili meedaha di labe uho Eba li faobekesi vabieda. Labi laha damat Em si sel ousuhemu uho Eba li Em ahu faidem bak labna zohàme uho Eba vabededa.’ 37 Lahame Eho labi gagodam di labe ame dam Alat Aba Aho gagoho im vuzehi vamdesu meedam dam Em anekehà ahi totbaho labe fa Eba nehi gagom bak. ‘Ai Boehàda oa, Om adi diat idoali iho aame Oba faobekesi na lome àdàla? Om adi diat valo àhàkehemu iho aame Oba faobekesi vao noai Oba lu uddàla? 38 Om adi diat bak mei bake iube iba li iho Om ule neàt gut ve num ibida vou oli iddàla? Om adi diat sue vabali so bozbulehemu iho aame Oba faobekesi sue lome duadàla? 39 Om adi diat gaili meedàmu iho aame Oba faobekesi li vabiedàla? Om adi diat damat Om si sel ousuhemu iho Oba li om ahu faidem bak labna zohàme iho Oba vabededahela?’ 40 Lahame ame dam labe labi gagodàmu Eho Boehàdatebo nibe fa nehi gagom bak. ‘Nasi ozomale. Bisi imbo bak gi neham bak. Dam Eba vi tau meedam dam nim abo Em dam nim abo gi ee feà vab dam meida buà niba uho ame bak laba vi ozome ame dam niba tauhu di labe uho gi ame bak lam Eba laha modehena ozomom bak.’ 41 Lahame labi gagu neàdi Eho dam Em anekehà soi totbaho niba oumaheda zi niba Eho nehi gagom bak. ‘Um Em Aiat amu gagu uloodume esuhu dam nim uho nasi bak nidi nim vou esmozi ilile. Abo gi vua eludamna sutem gikina bohu laba nasi le beodume geàdale. Ame bak lam Em Ai Alat Aho aham di iube nehi fet ozo, “Gi Iblisti Em im gagu vou usem dam totbaho aba tauhu dam lamti labihasu gi Eba vaitesu nasi vua eludamna sutem gikina bohu laba le beodume geàdase,” lahame ozome ahumdi esuhu bak laba le geàdale. 42 Nehaha bak. Eho amu idoalehe di labe uho ba Eba faobekesi na àmna lodaha vabak. Labi neo Eho valo àhàki modehe di labe uho laha Eba faobekesi vao noai Eba lu udehe vabak. 43 Labi laha Eho bak mei bak iube fa uba lehe di labe uho ba Eba ule neàt gut ve um numa vou oli ousu ihi vabak. Labi laha Em sue vabali so bozbulehemu uho ba Eba sue lome duadaha vabak. Labi laha Eho gaili meedaha di labe uho ba Eba li faobekesi vabiedaha vabak. Labi laha damat Em si sel ousuhu di labe uho ba Eba li Em ahu faidem bak labna zohàme Eba vabededaha vabak. Um gi labihadam dam tadehe bak.’ 44 Lahame Eho labi gagom di labe ame dam Em anekehà soi totbaho niba oumaheda zi nibe fa Eba nehi gagom bak. ‘Ai Boehàda oa, Om adi diat idoali iho aame faobekesi na lu àhà vaba mohela? Om adi diat valo àhàki meedàmu iho aame faobekesi vao noai lu udehe vaba mohela? Om adi diat bak mei bak iube iba lehemu iho ule neàt gut vaha vaba num ibida malehela? Om adi diat sue vabali so bozbulehemu iho aame faobekesi sue lome duhu vaba mohela? Om adi diat gaili meedàmu iho aame faobekesi li vabiedaha vaba mohela? Om adi diat damat si sel ousuhemu iho li vabededaha vaba mohela?’ 45 Lahame ame dam labe labi gagodàmu Eho Boehàdatebo nibe nehi fa gagom bak. ‘Nasi ozomale. Bisi imbo bak gi neham bak. Dam Eba vi tau meedam dam nim abo gi ee feà vab dam meida buà niba uho ame bak laba vi ozome ame dam niba tauhu vab labe uho gi ame bak lam Eba laha modehe vab damat ozomom bak.’ 46 Lahame Eho labi gagu neàdi ame dam lam gi Eba vaitesu vua eludamna sutem gikina bohu laba ab le geàdam bohu modesdamam bak. Lahana ame dam Alat Aba Aho gagoho im vuzehi vamdesu meedam dam laba Eho modi dam lam Emti vahi gi ahe neàna bohu vuusda tame,” lahame ab vahokedaham.

Matius 26

1 Labi ame im zi lam ahebu vahokedume neàdi Yesusat Aba vi tau meedam dam duabelas laba ab gagoham. 2 “Uho neham bak ozobohudehena taia? Im Yahudi dam bada nibe iho im tai ahobada zi labe Im Adam Datahida Alat Oddaha Vabat Labohotehe Bake Vi Ozome Roti Fikidehe Vabna Àme Iziam di ee gagom Paskah lam neo fa ab vou fuseo vabaleham bak. Abo etei usi behàsdi ab fumam bak. Labi ame di labe Em Abo Asum Ahoba Iubet Bak Niba Li Dateleheda nim damat si meia ub lu damat ut tetehesuhunaso laba esu paku dodume elo tame,” lahame fet ab vameadume esuham. 3 Labi ame di labe damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti labihasu vazisi neàdi damat Ala Bake Lomna Ve Vua Vahudam Tohe Dam Zi Labe Bisi Boehàdatebo Kayafas labe aho azihi num feàda laba ab laham. 4 Laba le vazisi im aa ab odoadamam. “Uho ozom, iho akatihasu modi zila audume Yesus si otela? 5 Lahana ibi iho dam vahi na àme iziam di nim imo nasi Yesus a simule. Aba tu vuzehehe dam duada kota Yerusalem niba esdamda ehete. Iho di nibe aba simeam làhà dam dae gai fai ziddume iba beomo. Gi ba digat meit sise,” lahame im aa ab odoadaham. 6 Amu Yesus num debu Betania laba le dat amu sokba faidi vàhàdem bohu vuusdamda modi fa neàdeheda Simon labe am num laba le aidam di labe nam meida vàmtea iba ab leham. Labi Yesus ame num laba vahi na àdam di labe ame nam labe aho doi duana vaha minyak ahana neàna amu ke fauhana ee gagom pualam meit modeme botolilehena laba fedehena aho vou le Yesusam ohu laba ab nom veàtoham. “Yesus abo feàte,” lahame ame bak laba vi ozome ab modeham. 8 Veàtoi modeha Yesus Aba vi tau meedam dam labe iho ame bak lam aahemu faki dam ihimo aa ab voe voedamam. “Oo, akati modi doi feàna vaha minyak labi gi vàhàdedàla? 9 Gi meia doi feàna ot loiame neàdi fa ame doi lam dam na vab dam laba fa lodam vaba mode?” 10 Lahana ame lab voe voedam bak lam Yesusat Ahamo ozobohudi fa dam laba ab gagoham. “Um ana modi nam niba faki vabidàla? Um ozom vaba? Aho Eba lab modehe bak lam gi neàna modehe bak. 11 Um dam na vab dam gi labaha bohu tau esdam labe vi taui vi tauidam labe esdam bohu meedam bak. Lahana Em etei nim ba uba tau azim bohu meedam vab Dàt modem bak. 12 Eho ozoha, Em ba elom di koei noimna noime afoezobe ke bumata vou oli esum bakti uloho bak laba ozome Em so niba na lam ahit nasi fet veosi ahumdi esulo modem bake ahole modehe bak. 13 Aho neàna modehe bakta imbote. Lahana Eho etei uba neo gagolo modem im imboda nidi nim laha nasi aima. Eho meedaha Im Neàna lam meit bak iudu iuba le vameadào? Bak iudu iuba le vameadào? Labihadam di ame nam nibe aba aho etei Eba lab modehe im lam damat laha aime ozobohudi fa ame im lamti vou vameatedam bak. Ba setem vaba gi labaha bohu vou aid ledam bak,” lahame Yesusat Aba vi tau meedam dam laba fet ab vameadaham. 14 Ame di labe Yesus Aba vi tau meedam dam duabelas labe dat meida Yudas Iskariot labe aho damat Ala bake lomna ve vua vahudam toheda zi laba vuusu im vameame faheme modiam dam laba le vi ailo ab gagoham. “Eho Yesus vou fohome uba ub lomeam uho eba ana loela?” Lahame labi gagoha ame dam labe uledi iho doi oona perak ibida debe tiga puluhli ab loham. 16 Labi Yudas ame doi lam ve neàdi aho ahit neà dateli le, “Yesus adi diat vou fohome dam bake ub loela?” lahame gi vou faoda. 17 Labihadam di labe vou faodameilahit Yahudi Dam Vahi Ame Roti Fikidehe Vabna Àme Iziam di ab vou fuham. Vou fuhemu digat ahamteda labe Yesus Aba vi tau meedam dam labe Aba li ab gagoham. “Boehàda oa, im Paskah fuhemu iho vahi na àm bake iho ake le na modeme vaheme ahumdi esuela?” 18 Lahahat Yesusat fa ab vi gagoham. “Uho kota Yerusalem laba le dat eho amu na àm bak gagu esuhuda laba nehi gagole. ‘Im gurut oba neha, “Am geàdume elom bak ab vou fuham bak. Labihàmu Aho Aba vi tau meedam damti vahi om num laba na àme iziam di Paskah fuhemu vahi na àlo modem bake na àmna modeme vahedume ahumdelo mozo,” lahaho,’ laham bake laba le gagole.” 19 Lahame labi gagohemu Aba vi tau meedam dam labe Yesusat etei iba lab gagoho bak lam le ame Paskah vi ozome àdamna lam modeme vaheme ahumdi neàdi ab esuham. 20 Labi disi aibulehemu Yesus Aba vi tau meedam dam dua belas lamti vahi ame num laba le na ab faasi àdamam. 21 Faasi na àdam di labe Yesusat ab gagoham. “Um nasi iademe aima. Um etei niba na vahi àdam dam nim meida vàmtea labe Em vou fohome meia ub lomda niba ehete.” 22 Lahame labi gagoha Aba vi tau meedam dam nibe im ahu faidi Yesus bake neha, “Ai oa, Oho ozom, eho modem im Oho gagohe?” lahame meit Yesus bake vi gagu ai. Meit neo vi gagu ai. Lahada. 23 Lahahat Yesusat fa gago, “Ne, ame Eba vou fohomda lam gi Eba neab tau na vaksa fi lihibabu niba roti zoho ekeme ab àdamam bak. 24 Lahana gi labihasule. Em Abo Asum Ahoba Iubet Bak Niba Li Dateleheda nim Eho ba modem im meit Alat Vameadaha Im Toedahana laba im meida nehasu toehe bak. ‘Elo tame,’ lahame fet toeme vàmadi esuhu labe ame bak ab imbodelo modemam bak. Aiee! Lahana ame da Em vou foholo modemda nim am oiat am faaha bak feidam vabate. Ame da nim Alat ba gi fai bak bohu tadelo modemda am bak.” 25 Lahame labi gagoha Yudasat abo Yesus etei vou foholo modemda labe ab gagoham. “Ai Guru oa, Oho etei lab gagoho im lam eho modemna Oho nasi fet gagohe?” Lahahat Yesusat fa neha, “Lo, ohomo ab ozobohudi gagoham taia?” lahame ab gagoham. 26 Labi ame lab vazisi na àdam di labe Yesusat neo roti ve Am Ai Ala bake, “Neàte,” lahame tom gagu neàdi ame rotibu lam agube faheme Am dam bake ab lodaham. Lodam labe nehame vi vameada. “Roti nim Em so am tame. Uho roti nim ve àm di Eba vi ozome àdale.” 27 Labi roti lam àdume neàdi Yesusat neo anggur oo vaksa mokzoho fedehena ve Am Ai Ala bake, “Neàte,” lahame tom gagu neàdi dat meidate lu vuusu vameada. “Uho ame anggur oo vaksa nim um ahebu uddam labe ototo vaidale. 28 Uho etei uddamna anggur oo vaksa nim nehi vi ozomna vaksa am tame. Amu Alat dam amudate gagu gohalemna lam fa vei seti etei nim Em vasea veàtolo modemna nim fa dam bakdate gohalemna Alat ab modi gàhàdeham bak. Dam bakda dua totbaho labe ibi iho faina meedam bak lam Alat ozahigeàmu im beodam vaba fa vei neàdedam bak vi ozome veàtolo modem vasea am bak. 29 Lahana im imboda nidi nim iademe aime tu ozodale. Iho etei vahi uddam anggur oo vaksa nim Em etei nib udehe tade tame. Lahana ba diamut Em Ai Alat Eba modi Boehàdateboli dam bake abobo vuusu im vahokedam di labe ba udem bakti gagom kaio.” 30 Lahame labi vameadume neàdi vou ladeedaha bak vàmadi ame num labe futoi kota Yerusalem vou esmozi Zaitun Dee Dozeadaha Bak Buzoho laba laitelo ab ladamam. 31 Labi ladam di labe Yesusat Aba vi tau meedam dam laba ab gagoham. “Etei aibu nim damat Em simeam làhà Eho geàdam bak lam uho aahemu um ahu gelevai ubu uho amu Eba lab vi tau meedam bak lam fa seti Em vou esmozi ili tame. Eho meit Alat Vameadaha Im Toedahana laba im meida nehi toehe labe uba labi gagoho bak. ‘Ame da domba fi ho vou aasdamda lam Eho dam bake modi damat ote tame. Labi am domba gi fi goaitoi sete tame.’ Lahame labihasu toehe bak ehemu uba labi gagoho bak. 32 Lahana Em eloho bak labet Alat modi fa ahedi usai Em Galilea bak laba nasi le uho ba vulem bake vou faoda tame.” 33 Lahame labi gagoha Petrusat fa ab vi gagoham. “Vabà! Dat Boehàda oa, dam totbaho nibe im ahu gelevai ibi iho Oba tu vuzehi meedam bak lam fa seti Om vou esmozi ili tame. Lahana em vàmtea nim ba Om vou esmozi itam bak em ba vi ozom vabak.” 34 Lahahat Yesusat fa gago, “Lo, oho lab gagoho bak ame. Lahana im imboda nidi nim nasi aima. Om ba labiham vabak. Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk ab aaumam tame,” lahame ab fet gagu esuham. 35 Lahahat Petrusat fa neo vi gago, “Dat Boehàda oa, Omti emti damat amediat otemta neàte. Em ba àvodem vabak. Lahamnàme em ahe lahasuhu di nim em ba meia neha, ‘Em Om bieho,’ lahame vageme Om mom vabak,” lahame labi gagoha Yesus bake vi tau meedam dam totbaho labe ame im lam aihemu gi Petrusat lab gagoho bak lamti ulohona Yesus bake neo ab vi gagodaham. 36 Labi Yesus Aho neo Aba vi tau meedam dam lam ve Getsemani laba ab vou laham. Laba lafusi gago, “Uho niba nusualadume faode. Em iumà iuba le Em Ai Ala bake tom gagodalo mozo.” 37 Lahame labi gagu neàdi Aho Petrusti Zebedeusam adam behàsu lamti labihasu dam làtela lamota, “Aba tau lele,” lahame gagu dam totbaho laba vou esmozi ab laham. Labi laba le lafusi modeha Yesusat Am ahu faidi feà bak fusi admahi ab meedamam. 38 Làhàmu Aho Am dam làtela niba ab gagoham. “Em ahu faidi feà bak fuho. Em gi ab elom ahulaleham tame. Um niba faode. Em Ehemo iumà iuba le tom gagodalo mozo. Labi um niba esdam di a imule. Gi vou faovoi aasdale.” 39 Lahame labi gagu neàdi Ahamo iumà iuba le ogomasu bake biti Am Ai Ala bake ab tom gagodamam. “Ai oa, em geàdalo modem bak nim Oho fa faatoi vei setem neào?” lahame gagu ozoha vabamu fa neo gago, “Vabo. Ebe Eho ozom bak fa feidate. Gi Obo Oho ozoho baket modem neàte,” lahame ab tom gagoham. 40 Lahame labi tom gagu neàdi usai fa Aba vi tau meedam dam làtela laba fa le aaha dam gi beilame idaomna le aa. Le aame Petrus bake ukeme ab gagoham. “Petrus, Em kehàm vabna gi jam vàmteadehena um akati vou faovoi aasdam vaba idaoe? 41 Iblisit uba li, ‘Um faina modem bak modeo,’ laham bak uba li um ahu ozolo modem di um ahu a bedemule. Gi mahate it vou faovoi Ala bake tom gagodale. Neham bak. Im ahu it ozomta gi neà bak modelo àhàki vi ozodam bak. Lahana im ahu nibet ihimo fatahivai bedem meo bak.” 42 Lahame labi im vahokeme neàdi Yesusat Am dam làtela lam fa neo vou esmozi iumà iuba le Am Ai Ala bake Aba Aho amu tom gagoho baket neo ab tom gagodamam. “Ai oa, Em geàdalo modem bak nim Oho fa faatoi vei setem bak momeam làhà gi labihasuse. Ebe Eho ozoho bak fa feidate. Em geàdam neàte. Obo Oho ozoho baket modem neàte.” 43 Lahame labihasu tom gagu neàdi usai fa Aba vi tau meedam dam làtela laba neo le aaha dam gi neo izeo àhàki feà bak fusi lavoidume fa idaomna le aa. 44 Làhàmu gi le aame vou esmozi fa le Am Ai Ala bake Aba Aho amu tom gagoho bak lamti ulohona fa neo ame baket tom gagu ab làteladeham. 45 Labi tom gagodume neàdi usai fa Aba vi tau meedam dam làtela laba fa neo le aaha dam gi beilame idaom lahasuhuna le aa. Làhàmu ukeme ab gagoham. “Ne, um akati bedali idaom lahasuhela? Nasi keesi usnadale. Asum Ahoba Iubet Bak Niba Li Dateleheda nim vou fohome dam faina meedam dam laba ub lomda iba ab fuseo vabaleham bak. 46 Nasi usnadume ladase. Em vou fohome meia ub lolo modemda etei iubet ab ledamam bak.” 47 Lahame Yesus gi etei vameadam lahasuhu di labe Aba vi tau meedam dam dua belas meida Yudas lam ab lefuham. Ahamo lem kai. Dam ae tot mo tot mo lahamna vuusualaha dam zi lamti labi eobu vuusualaha dam zi lamti labihasu aba tau mitaedume ab lefusi dozeadaham. Ame dam lam gi damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi totbaho lamti labihasu amu vameame ahumdi oudaha labe ame dam zi lam ab le omsuham. 48 Yudas amu aho gi iumà ium ledam labe ame dam zi laba nehame fet gagu esu, “Uho aameam im Yahudi damat meia tàm di oode totti totti tomoamdem bak lam eho ame Da laba modehe bak uho aameam làhà ame Da am tame. Uho ame Da lam nasi sile,” lahame amu fet gagu ahumdi esuhu bak ehete. 49 Labihàmu etei li dozeadaha di labe Yudasat gi taho Yesus bake ub fetu duzu ab gagoham. “Ai Guru oa, Om abo neàte,” lahame gagu Am oode totti totti ab tomoamdeham. 50 Labi modeha Yesusat fa ab gagoham. “Oo làhà! Om Emti vou alemda om labihalo ozome Eba ab lehame? Làhà ame bak lam taho modele.” Lahame labi gagoho di labe dam duada zi labe vi feddume Yesus ab siham. 51 Labi modeha Aba vi tau meedamda meida labe ae goha dusuhuna vuu vihitoi Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am na meedamda lam beoha biou gi dogoi baata fatoi bake ab biteham. 52 Labi modeha Yesusat fa ame da laba mali ab gagoham. “Aa! Ba meia a beomule. Neàdeho. Meit am ae tot mo tot mo lahamna labe meia belu elomeam làhà meit fa neo ame ae labe fa ame da laba belu eloi vi vataum meote. Gi feidate. 53 Um ozom vaba? Eho Em Ai bake nehi tauleme gagomeam, ‘Eba taule,’ lahame gagom di Aho gi uledi Eba Am im gagu vou usem dam meo dam zi feà abo tujuh puluh dua ribu oudume Eba taum bak. 54 Lahana Em Ai bake tom gem bak moho bak. Neham labe labihaha bak. Eho ame bak lam meedameam làhà meit Alat Vameadaha Im Toedahana laba im nehasu toehe im nim ba akati modi imbodela? ‘Alat Gagu Fihasi Vimteme Oluhu Dat Boehàda lam damat nehasu Aba mode tame,’ lahame lab toehe im lam ba akati modi imbode? Eho labiham bak vi ozome Em moho bak.” 55 Lahame Yesusat Aba vi tau meedamda meida laba im vahokedume neàdi fa neo dam Aba silo lehe dam zi laba im ab vi vahokedamam. “Um Em otelo vabeddamna akati Eho amu Fihasi Ala Bake Vou Baedam Num Vàmteabu labe am ad oli aam bak tomba laba Eho Alam im vahokeme leidamehamdehena abo umti vahi meedamna akati ame di labe Em taho si otem vaba mode? Uho ozomta vedi Em dat aa li ausume mei beome im nazoh gelevai esmozi laiam dàt mode tiba uho etei aeti eobuti ab vou lehame? 56 Lahana uho etei nib meedalo meedam im nim ahebu gi ahole meedalo modem bak. Neham bak. Dam ahamda Alat vameadaha im aime fa dam bake ahate vameaidaha dam zi labe iho amu fet toeme esuhu im lam imbodelo modem labe uho vabili etei ab meedamam bak.” Lahame labi vameadume neàdi modeha Aba vi tau meedam dam lam ahebu iedi Am vou esmozi fi goaitoi ab ilime seteham. 57 Labi Yesus sihi dam labe Am vou duzu vou ladume Damat Ala Bake Lomna Ve Vua Vahudam Tohe Dam Zi Labe Bisi Boehàdatebo Kayafas labe am num feàda laba ab vou laham. Amu dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti Yahudi dam bake vuusu im vameame faheme modiam dam busaoda zi lamti labihasu ame num bumat laba amu le ahumdi vou faoda. Labi dam lam gi laba esdamna ahum Yesus ab vou fuham. 58 Ame di labe Petrusat gi vaitesu ba aa vi duzu vulada. Labi ame num feàda labe am ad oli aam bak tomba laba vi fusi ame meo dam labe num feàda laba vou aasdam dam lamti gi aa valiheme laba vi tau nusda. “Damat Yesus bake akati modela?” laham bak aalo aa nusu vou faoteda. 59 Ame di labe damat Ala bake lomna ve vua vahudam toheda zi laba vuusu im vameame faheme modiam dam abo Yahudit Ibi Iho Modem Im Gagu Vàmadi Esum Dam Debu labe im dam zi lam vahe vahedume Kayafasam num laba im neham bak gagolo àhàki bakamta vahi vou faoda. Damat neha, “Yesus git modeho,” lahame gagu Yesus bake giomim vàlum damat li im gagom bake aihizobe Roma eeda laba ub lu, “Yesus fà beome elose,” laham bak gagolo àhàki vou faoda. 60 Labi vou faodaha giomim vàlum dam duanàme ame eeda zi labe ibi iho aime vàlum neàda aihizobe vàlusome vou faoha ba ame bak lam taho vi aim kai. Labi neo vou faodameilahit dam behàsu labe lehe labe ame dam eeda labe iho avaesdam laba li ab duzuham. 61 Li duzu gago, “Iho aiha ame Da nibe Aho nehi gagoha. ‘Ame Fihasi Ala Bake Vou Baedam Num Vàmteabu nim Aho beodume fa faamome seti usi behàsdi Aho fa mo tame,’ lahame gagoho bak lam iho aiho.” 62 Lahame labi vàlu gagohemu Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am ahu gukeme usai tomba duzu Yesus bake netàdi vi ailo ab gagoham. “Om dam nibe etei Oba vàlu gagoho im nim Om taho veibame fa gagom vaba?” 63 Lahame gagoha Yesus ba dae buhu vaba gi daleàdi vou faoda. Làhàmu ame Tohe Dam Zi Labe Bisi Boehàdatebot aho fa neo vi ailo gago, “Om, ‘Alat Gagu Fihasi Vimteme Oluhu Dat Boehàda abo Alam Adat am bak,’ laham bak lam imbodemeam làhà taho fa Ala elom giki Ala abo gi labaha bohu modesdam Ala labe Am ee gagu, ‘Om ame da am tame,’ laham bak taho gagu vàmadi esule.” 64 Lahame labi gagoha Yesusat fa ab vi gagoham. “Lo, oho etei Eba lab gagoho bak lam ohomo imbo bak ab gagoham bak. Alat Gagu Fihasi Vimteme Oluhu Dat Boehàda lam Em ame Da am bak. Lahana, ‘Em laha Alam Adàt modem bak,’ laham bak lam um biem bake Em ba diamut nehi meedam labe uho laha, ‘Imbote,’ lahame neo gago tame. Ba diamut uho Em Abo Asum Ahoba Iubet Bak Niba Li Dateleheda nim uho Eba aam di Em fa feà Dateli Ala Bisi Feàda labe Am ahi totbaho laba tau nusu na ahebu vuusdam bak lamti Em asum ahoba iube fa uloti bak niba lem bak lamti labihasu uho aa tame.” 65 Lahame labi gagohemu ame boehàdatebo labe aho aime faki am sue ahoba dusuhuda lam gi ahamo naedat auet it vome geleme ab faheham. Faki dam eeda totbaho niba ab gagoham. “Um aim vaba? Da nim gi Ala bake feàtàhà bak. Aho vedi, ‘Amti Alati ulohote,’ lahame gagoho bak lam uhumo ab vi aiham taia? Ba akati meit neo li vàlu gagom im lam iho aie? Ame da nibe Aho gi Ala bake lab feàtàhà bak lam uho ozom, Da nim akatihà?” Lahame labi gagoha ame dam eeda totbaho labe vazisi fa ab gagoham. “Lo, ibi iho fi hasi baleàhà bak lam Da nibe vazidazehemu gi gagu otem neàdehe bak,” lahame ab gagu vàmadeham. 67 Lahame labi gagu neàdi dam zi totbaho nibe Yesusam dauha laba keha beàdam labe aumbut vi foida. Labi dam totbaho nibe iho sue baa visoi Yesusat iba aam bak labna zohàme Am fakode laba baguamdi meit au baat Am oode laba vi fu tozome gago, “Hohoa. ‘Om Alat Gagu Fihasi Vimteme Oluhu Dat Boehàda am tame,’ lahamda Oho ozom, Oba amat beo. Taho iba fa gagoma,” lahame meit vi fu tozome gago. Meit vi fu tozome gago. Lahada. 69 Ame di labe Petrusat gi ame num labe am ad oli aam bak tomba laba nusda. Nusdume modeha mei na meedam nam labe aba li netàdi ab gagoham. “Om Yesus Galileada bake vi tau meedam dam meida om am taia?” 70 Lahame labi ahate gagoha Petrusat, “Damat fà aise,” lahame ab tem veibadamam. “Vabo. Oho etei lab gagoho im lam em ozom vabili mozo.” 71 Lahame gagu neàdi aho usai ame num feàda labe am ad oli aam bak tomba ub futom doo obe laba le duzu modeha na meedam nam meida labe neo aame dam dua bak laba ahate fi desi ab gagoham. “Imbot. Ame da nim gi Nazaretda Yesus abo damat etei sihida laba vi tau meedamda meida am bak.” 72 Lahame neo labi ahate gagoha Petrusat fa ohu vame tem ab veibadamam. “Ame Nazaretda lam em bieho. Eho giomim gagomeam làhà Alat fà eba beose.” 73 Labi gagu neàdi neo duzu vou faodameilahit dam am obe laba dozeadaha dam labe aba neo li netàdi ab gagoham. “Mm, abo imbote. Om abo damat etei sihida laba vi tau meedamda meida am bak. Iho gi oho im gagom bak vi aim di om gi Galilea damat im gagom bakti uloho bak.” 74 Lahame dam labe neo ahate gagoha Petrusat, “Damat fà aise,” lahame fa neo ohu vame ab tem veibadamam. “Uho etei gagohoda lam em bieho. Eho giomim gagomeam làhà Alat fà eba beose.” Lahame gi etei tem veibaha bak làteladeha kuk ab aauham. 75 Labi kuk aauha Petrusat Yesusat aba amu nehame fet gagoho bak lam fa ab vi ozobohudeham. “Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk ab aaumam tame,” lahaha bak lam ab vi ozobohudeham. Làhàmu dam dua bak vou esmozi futoi iumà iuba le ahu faidi nom bohusu bisteat meb dae ab faaham.

Matius 27

1 Labi dihambe damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti labihasu vazisi ozome ahu vàmadi ab gagoham. “Neàdehe bak. Yesus gagome otem neàte.” 2 Lahame labi gagu neàdi Yesusam anekehà ahim giame vou duzu vou futoi ozo, “Roma dàt gubernurli Yudea bak vuusdam boehàda laba vou le ub lu aho uloome aise,” laham bak ozome Gubernur Pilatus bake ab vou ladamam. 3 Ame di labe Yudas abo Yesus vou fohome meia ub lohoda labe aho vi aaha damat Yesus uloodume vi aime ozobohudi neàdi, “Yesus otese,” laham bak ab gagohamemu am ahu it ozo, “Eho git modehe,” lahame ahu faidi fa aho amu neàt vaha doi lam ve vuusu fa damat Ala bake lomna ve vua vahudam toheda zi laba im vameame faheme modiam dam lamti Yahudi dam bake vuusu im vameame faheme modiam dam busaoda zi lamti laham dam zi laba le, “Doi fa voedase,” lahame ab laham. 4 Le gago, “Eho faina modeho. Dat faina modehe vabda im neàna meedamda eho vabili meia ub lu vasea veàtolo mozo.” Lahame labi gagoha ame dam zi labe fa gago, “Akati ba fa iba li vameada. Ame bak lam ohomo amu modi vàhàdehe bak.” 5 Lahahat Yudasat aho vi ozoha, ba modem biehemu doi zi lam gi ame Fihasi Ala Bake Vou Baedam Num Vàmteabu laba gi ab voou fi goaitoi esmozi ab itaham. Labi itame le, “Ahamo modi elose,” lahame lo visoi ut aaso laba vààsu. Labi zoho am bio laba it vààsu labihadume nom ziagahuha loat kidademe biogai ab eloham. 6 Labi damat Ala bake lomna ve vua vahudam toheda zi laba vuusu im vameame faheme modiam dam labe iho Yudas le setehemu ame lab vou fi goaitoho doi lam fa vi ateme gago, “Doi nim mei oteme vasea veàtom bak ozome loho doi nim ba iho ve Fihasi Ala Bake Vou Baedam Num Vàmteabu laba vahedam doi laba vi tau esum biem bak. Dat ahamda Musat aho aham di iube iba labi mali toeme esuhu bak.” 7 Lahame ot vameaidume ahu vàmadi neàdi ab gagoham. “Imo doi nim ve fa gi nehase. Dam Yahudi damat modem vab dam elodam di baumahedam bak vabalehemu imo dat ohanu ve am anekehàt modeme nazohaedamda labe am utoho bae lam fa doi nibet fa vase,” lahame gagu neàdi ame baket ab modeham. 8 Amu ame bak lam labi modehemu ame bak gagom di, “Vasea bak,” lahame vou gago usdume dam bada niba ab vou fuham bak. 9 Labiha labe dat ahamda Alat vameadaha im aime fa dam bake ahate vameaidahada Yeremia labe aho aham di iube fet nehi toeme esuhu im nim ab modi imbodeham bak. “Ba diamut ame lab voedaha doi oona perakat modehena tiga puluh lam Israel damat neha, ‘Ame Da lam iba ub lomeam iho doi nehasu oba lo tame,’ lahame ahu vàmadi gagu loho doi lam vi ateme fa dat ohanu ve am anekehàt modeme nazohaedamda labe am bak ame doi labet vaha bak. Abo Boehàdat Alat eba labi fet gagu esuhu bakti ulohona modehe bak.” Lahame Yeremiat aham di iube fet toeme esuhu im lam ab modi imbodeham. 11 Labi dam eeda zi labe Yesus vou laha labe le Gubernur Pilatus aho avaesdam laba vou duzu neàdehezobe Pilatusat Yesus bake ab faasi uloodamam. “Imbo? Oho neha, ‘Em Yahudi dam debu vuusu im vahokedam boehàda am tame,’ lahame Oho labihasu gagodàmu damat Oba vàluhu bak lam imboo? Om ame da ameo?” Lahahat Yesusat fa gago, “Lo, oho etei lab gagoho bak lam imbote. Em ame da am bak.” 12 Lahahat ame damat Ala bake lomna ve vua vahudam toheda zi laba vuusu im vameame faheme modiam dam lamti ame Yahudi dam bake vuusu im vameame faheme modiam dam busaoda zi lamti iho vazisi im meiti im meiti Yesus bake la vàlui le vàluidume modeha Yesus ba dae bum kai. 13 Labihàmu Pilatus Yesus bake neo ab gagoham. “Dam etei Oba nib la vàlui le vàluidam bak nim Om aidamna akati taho fa veibam vaba mode?” Lahame labi gagoha damat Aba lab la vàlui le vàluidam bak lam Yesusat ba im vàmtea buà ot vai vi gagom kai. Gi ailahigeàmoda. Labi modeha Yesusat it veibam vabamu Pilatus ab aame àvodeham. 15 Ame Roma dam zoho vuusdam gubernur labe aba aho tahun ahebu modi baleàlehe bak gi nehadam bak. Yahudi dam ibi iho na àme iziam bak abo Paskah fum di Yahudi dam amu si sel oumahehe dam lam, “Dat adida isi oluela?” laham bak lam dam bake gagu aime gi damat iho ee gagohoda vàmtea lamota aho fa gagu vou futoi Yahudi dam bake olum meot. 16 Ame di labe amu ame sel oumahehe dam dat meida Barabas laba ehet. Ame da Barabas lam aba aho amu meedaha bak lam dam ahebu aime ozobohudehe labe elaidam dàt moz. Lahamda etei sel laba ousda. 17 Labihàmu ame gubernur labe aba aho amu modi baleàlehe bak fa neo vou fuhemu dam duada zi lam am num labe am ad oli aam bak tomba laba vazisi neàdehezobe Pilatusat vi ailo ab gagoham. “Em etei dat adida gagu vou futoi uba oluela? Barabas modeo? Yesus Aba damat neha, ‘Alat Gagu Fihasi Vimteme Oluhu Dat Boehàda am tame,’ lahamda modeo, dat adida eho gagu vou futoi uba oluela? Uho ame da gagole.” 18 Pilatus neham bak amu gi ozobohu labe vi ailo gagoho bak. Yesusat ba git modehe bak na vabak. Gi ame Yahudi dam busaoda eeda zi labe iho nehi ozo, “Akati modi dam dua totbaho labe fa Yesus bake tu vuzehi Am damali meedà?” lahame ahu adat faki teidi aba ub loho bak lam am ozobohu labe gagu vi aihi bak. 19 Labi Pilatus aba aho meia uloome vi aime neàdi fa dam bake gagolo modem diat ahamo nusumna gi etei laba nusu vi ozodam lahasuhu di labe am namet aba im gagu am im vou leheda labe ab li gagoham. “Om namet oba nehi vi gagu oluho. ‘Aho iddameam ame Da laba ulehe im modi ahu faidi azi vi ozodam bohu meedalo. Debu faina modehe vabda ba meia a gagu beomule,’ lahame oba vi gagoho.” 20 Lahana Pilatus gi etei am namet vi gagu oluhu im aidam di labe ame damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti labihasu vazisi iho ozahit dam duada zi laba neha, “Gubernur uba neha, ‘Am dat adida gagu vou futoi iba oluela?’ lahame gagom di uho gi gubernur laba fa nehi gagole, ‘Iba Barabas gagu vou futole. Labi oho om meo dam gagome fa Yesus otele,’ lahale,” lahame tet ootedam labe ame dam duada zi labe ab uledeham. 21 Uledi vou faodam labe Gubernur Pilatus neo ab gagoham. “Em etei dam behàsu nim dat adida eho gagu vou futoi uba oluela? Taho gagole.” Lahahat dam zi labe fa ab gagoham. “Iba gi Barabas gagu vou futoi iba olule.” 22 Lahame labi gagoha Pilatus neo vi ailo gago, “Làhà eho ame da Yesus nim damat neha, ‘Alat Gagu Fihasi Vimteme Oluhu Dat Boehàda am tame,’ lahamda nim eho akati modela?” Lahahat dam zi labe vi ozome dae vàmadi fa ab vi gagoham. “Làhà gi ut tetehesuhunaso laba esu paku dodume elole.” 23 Lahahat Pilatus fa neo gago, “Ne lahana eho Da nim uloodume aiha Aho faina modehe bak aihi vabna akati eho gagu ote?” Lahame labi gagoha ame dam duada zi labe Yesus gi ut tetehesuhunaso laba esu paku dolo àhàki meedàmu dae duali dae gai ab ziddamam. “Vabo. Gi om meo dam gagome ut tetehesuhunaso laba esu paku dodume elole,” lahame ab daetesu meedamam. 24 Labi Pilatus ozo, “Dam duada zi nibe daetesu meoli feà bak fusi gukedam bak tadi meedàmu eho ba akati modi dam laba male,” lahame vi ozodaha vabamu Pilatusat am na meedamda meida laba gagu fi lihiba vao noai vou li dam ahebu aasdahit am anekehà ahim valo ab kikeham. “Ame Da nim beome vasea veàtolo modem bak nim, ‘Em tau gagu modeho,’ laham bak lam ba eba a gagomule. Uhumo meedume Da nim ab otelo modemam bak.” 25 Lahame am anekehà valo kikedam di labe ame dam duada zi labe fa vazisi ab gagoham. “Lo, Om mom neà bak. Am vasea veàtolo modem bak lam gi imti iho ba vou faat ladam dam lamti labihasu meit fà iba vàlu gagom neà bak.” 26 Lahame labi gagohemu Pilatus am meo dam gagome Barabas sel ousuhuda laba gagu vou futoi ab oluham. Labi Yesus fa meo dam laba ub lu na sokba nasbe ahit alibulehena labe Aba foadume ab geàdamam. Labi foadume neàdi Pilatusat neo, “Yesus ut tetehesuhunaso laba esu paku dole,” lahame am meo dam lam gagu ab oluham. 27 Labi ame Gubernur Pilatusam meo dam labe iho Yesus si gubernur labe am im meedam num feàda labe am zoho laba abo meo damat vahi esdam bak laba neo vou le duzu neàdi im meo dam totbaho ahebu laba gagome ledume Yesusam obe laba ab ahilesu dozeadamam. 28 Dozeadume neàdi Yesusam sue vihilame fa sue sona boz gihona bohu abo boehàdat ahoba dusum sue lamohoda ve Yesus bake nom dusu. 29 Labi neo lo alibuna vabome vuihàli neàdi Yesusam ohu laba neo nom usulo vi gago, “Nim gi boehàdat am ohula nom usumnat modem bak,” lahame gagu ab nom usuham. Labi neo boehàda labe aho vuusum odoamso lamohoda Yesusam anekehà ahi tot laba neo tet lu ab vuusuham. Labihadume neàdi ame meo dam labe iho neo ahit neà damali ogomaladume Yesus bake ab gagu tozoidamam. “Looo. Yahudi dam debu vuusu im vahokedam boehàda abo neàteee,” lahame meit gagu tozo. Meit gagu tozo. Lahada. 30 Labi neo keha vi dou gagu tozoida. Labi neo ame odoamso fa vi vietoi Am ohu laba vi foada. 31 Labi fu tozoidume neàdi ame sue bohu lam fa vuu vihitoi sue Abada fa duadume neàdi damat Am esu paku dolo modem ut tetehesuhunaso lam visoi Aba nom vatu kota Yerusalem vou esmozi fa bàhàgo iuba Yesus ab vou ladamam. 32 Labi lab vou ladam di labe dat ee gagom Simon abo Kireneda labe aho kota Yerusalem bàhàgo bak laba godam dàt fa kota bake ledamda ab ot tahiaham. Ot tahiame modeha Yesusat Am vanamai alihi nemahuhemu ame meo dam labe Simon bake tet gut ooteme Yesusat Aho vatu vou ladam ut tetehesuhunaso lam fa visoi Simon bake tet ab nom vatuham. Labi Simon ame utso lam vatu ab vou ladamam. 33 Labi vou ladume Golgota laba ab vou fuham. “Golgota,” laham di gi, “Ohu Fetahabu,” laham bak. 34 Labi Golgota laba vou fusi dam nibe anggur oo vaksa na amomoi àhàkebuti valihehena lam vou li Yesus valo àhàkem bak laba ozome, “Lu udese,” lahame Yesus bake lu Aho koena udeme ozoha, “Na nim àhàkebunat moz,” làhàmu ab moham. 35 Labi ame meo dam labe neo Yesusam sue ahoba dusuhuda lam ab vome vihilaham. Labi vihilame neàdi neo ame ut tetehesuhunaso lam visoi bake esu afoezobe Yesus tom gaesu nom esu neàdi Am anekehà meida kidadesu paku do. Labi anekehà meida neo kidadesu paku do. Labi Am naba bakamta modesu paku do. Labihadume neàdi vi vuu vousai bak bumata ab zisuham. Labi zisu teudi neàdi ame meo dam labe iho Yesusam so laba amu lab vihilaha sue lam, “Amat vaela?” lahame ibi iho fi mam baket modeme neàdi ab vadaham. 36 Labi sue vadume neàdi ame meo dam zi labe ozo, “Meit bak iubet li Yesus fa vi vuhatoi ahede moio?” lahame Yesus bake nusu vou aasda. 37 Labi, “Da nim ana im modehe bake damat vàlu otehela?” lahame ut gaheba ve nehi toeme Yesusam ohu vazidazi toma zoho laba taasu paku dou esu. “DA NIM YESUS MOZO. ABO YAHUDI DAM VUUSU IM VAHOKEDAM BOEHÀDA AM TAME,” lahame toeme ab taasu esuham. 38 Labi Yesus ve paku doho di lam ame meo damat ut tetehesuhunaso meida ahim neo visoi dam mei nazoh vietomoadume vou itam dam ahim lam vame Yesusat modehe bakti ulohona modi paku dodume neàdi Yesusam anekehà ahi totti soi totti modesuhu tot laba bak bumata ab nom zisitdaham. 39 Labi Yesus taasu modesdam di labe dam duada zi labe labohotedam labe tom aame ohu bobodam labe 40 nehi tozome gagoida. “Làhà, ‘Ame Fihasi Ala Bake Vou Baedam Num Vàmteabu lam Om feàda modem labe Ohomo beodume fa faamome seti usi làteladi fa mo tame,’ lahame gagodamda am taia? Lahana Om Alam Adat laham bak imbodemeam làhà Ohomo naedat soat it vausu taho Ohomo paku it vi vuu veioi usemeta,” lahame tozome labohotida. 41 Labi laha ame di labe Yahudi damat ibi iho tu vuzehi meedam im vuusdam tohe dam zi labe iho laha Yesus bake tom aame tozome gagoida. “Ea, Da nim mei modi fa neàdemda ame? Akati Ahamo naedat taho it vabieme neàdem vaba mode? ‘Israel dam vuusu im vahokedamda boehàda Am am tame,’ lahamda Ahamo nasi paku it vi vuu veioi usi neàdemeta. Labihamta iho aame, ‘Imboo,’ laham bak ozome tu vuzehem bak. 43 Ame Da nibe Aho Ala bake tu vuzehemda Am am bak. Labi Aho amu neha, ‘Am abo Alam Adat Am am tame,’ lahame gagomda am bak. Làhà imo nasi aamase. Alat uledemta Aho modi Am fa faatoi usem bak,” lahame tozome gagoida. 44 Labi damat lab tozome gagodam di labe dam Yesusam obe laba tau paku doho dam behàsu labe vedi fa Yesus bake laha feàtàda. Labihada. 45 Gi labihadume ala tomaleha bak ahebu ala fauhaedam bak fa vei seti ab aibuleham. Labi aibulehemu vou faodameilahit ala vakidem bak fuha fa ab fauha neàdeham. 46 Labi jam tiga abo ala vakidehe di labe Yesusat bisteat Ibrani daet, “Eloi, Eloi, lama sabaktani,” lahame buteme ab geham. (Ame lab gagoho bak lam gi, “Eba vuusdam Ala oa, Om akati Em vou esmohela?” lahame gagoho imot moz.) 47 Lahana damat Yesus paku doho bak laba netàdi dozeadaha dam labet ame lab buteme gehe bak lam aihemu vedi neha, “Laha vi aima. Da lam gi dat ahamda Alat vameadaha im aime fa dam bake ahate vameaidahada Elia am ee gagoda taia?” 48 Lahame labi gagohemu meit emoeme le kohu lasobuti ulohona visoi anggur oo vaksa àhàkebuna laba nom ekeme neàdi ut aaso bohu laba taasu giame, “Yesusat fà udese,” lahame Yesusam aha laba ab tom fi sdamam. 49 Lahana dam totbaho labe mu fa mali gago, “Gi labihasu vou faodase. Da labe gagoho bak lam imbodi, ‘Eliat Aba tau soat vausu fa vei neàdeo?’ laham bak aasu vou faodase.” 50 Labihadameilahit Yesusat neo bisteat buteme ab geham. Labi etei lab buteme geheda labe Yesus ab fi sivai eloham. 51 Labi fi sivai eloho di labe ame Fihasi Ala Bake Vou Baedam Num Vàmteabu donibu laba tetehesdam sue tamzohobuna baa lam ahamo ahoba zoho iube fàsi nom vou li busbe nom zoho iuba ab fi tatoham. Labi ame di labe balim feàna neo nigo nigodume ke feàda fai ahamo fi fa fi fada. 52 Labi laha Alat Am damalehe dam aham di iube elodaha dam zi labe fat ahededume im baumahe ke bumat labe fa neo usnadume futodume fa neo goda. 53 Labi godam labe Yesus Am eloho bak labet Alat modi fa ahedi usahazobe ame dam zi labe iho kota Yerusalem abo Alat fi hasi esuhu bak laba le godam bak lam dam duada labe laha aadaha bak. 54 Lahana etei nim Yesus eloho di labe ame meo dam zi labe iba vuusdamda boehàda lamti iho vahi Yesus bake vou aasdam dam labe iho ame balim nigoho bak lamti labi na meida ziti labihasu ame bak lam aadahemu iedi modem faidi ab ot gagoidamam. “Làhà imbote. Da nim abo Alam Adàt modem bak,” lahame ab ot gagoidaham. 55 Labihadam di labe lahi dua totbaho labe vaitesu dozeadume damat Yesus paku dome meedam bak laba vou dozeadume aasda. Ame lahi lam amu Galilea bak labe faasi Yesus bake tau godam labe na meedam lahi zi am. 56 Ame lahi zi lam nam meida Maria abo num debu Magdala labet lehe nam am. Labi nam meida Yakobusti Yusufti faaha oi Maria am. Labi nam meida Zebedeusam adam labe im oi am. Labi lahi amomoi totbaho zi am. Labihasu gi vaitesu dozeadume vou aasda. 57 Labihadume disi aibulelo modem di labe dat Yusufti ee fatahivahada lam abo num debu Arimatea laba azihida labe aho Yesus koei visom bak ozome fa Pilatus bake ailo ab laham. Ame da Yusuf lam nazoh dua dàt moz. Ame da lam amu Yesusat Aba Aho vahokedaha im ozobohudelo vi tau meedamda meida am. Laham dàt Pilatus bake le gago, “ ‘Im etei Yesus koei ve vou le baumsum neào?’ laham bak oba gagu ailo leho,” lahame labi gagoha Pilatus uledi am meo dam laba fa gago, “Yusufat ame koeiso lam ve baumsum neàte,” lahame ab gagoham. 59 Làhàmu Yusuf am dam totbaho lamti laha labe le Yesus paku doho bak laba zisi ame koeiso vi vuu vuazi vou usi sue fauhana baa alimna visoi Yesus koei ab giaham. 60 Labi giame neàdi ke bumat alimda abo Yusuf aho ba elohozobe am koei vou oli esum bake ozome amu kebitem laba fet sime bumataeme esuhuna ahum laba Yesus koei lam ab vou oli esuham. Labi vou oli esu neàdi fa futoi ke baana am doo laba tusum ulohoda lam vou ogi ogialame tusu baguamdi esu neàdi ab vou esmozi ladaham. 61 Labi ame di labe Magdala labe lehe nam Mariati am ee fatahivaha nam Maria meidati labihasu aasdahit Yesus koei vou oli esu ke baana ab tusu baguamdeham. 62 Labi izi dihasi hari Sabat abo im Yahudi dam labe ibi iho gi azibe im digat vou fuhemu damat Ala bake lomna ve vua vahudam toheda zi laba vuusu im vameame faheme modiam dam lamti Farisi dam lamti labihasu vazisi Pilatus bake ab laham. 63 Le gago, “Ai gubernur oa, iho vi ozoha, ame Da Yesus lam abo meia vagemda labe Aba Aho amu ahe diat nehi gagodam bakvat ehete. ‘Am eloi usi behàsdi Am eloho bak labet Alat modi fa ahedi usa tame,’ lahame gagodam bak ehe bak. 64 Làhàmu oho nasi im ibida nim aime uledi modem neào? Oho om meo dam totbaho gagome Yesus koeiso esuhu ke bumat obe laba le mahate vou aasdume usi izi dihasidase. Iho neham bak ozome vou faovoi oba labi gagoho bak. Aba vi tau meedam damat aa li Am koei aa vihitoi vou le dam bake neha, ‘Am eloho bak labe fat ahedi usaho,’ lahame dam bake vageme dam duada labet vedi imbo tibame Aba tu vuzehem bak labna zohàme iho oba labi gagoho. Oho om meo dam gagu vou aasdam vabameam Aba vi tau meedam dam labe iho etei vagemda nibe modi bisi dam aime tu vuzehi fi di feà bak fusi duali meedam bak am bak. Amu di iube Aho neha, ‘Am Alat Gagu Fihasi Vimteme Oluhu Dat Boehàda Am am tame,’ lahame vageme gagoho di lam damat Aba tu vuzeheda gi koena tu vuzeheda. Lahana etei ba vagemda nim bisi dam duada vi tau tu vuzehedam bak lab tame.” 65 Lahame labi gagohemu Pilatus uledi fa ab gagoham. “Lo, làhà em meo dam totbaho nim uho nasi ve vou le, ‘Ame koei esuhu ke bumat neam tame,’ lahame gagu afoezobe em meo dam nibe mahate vou aasdale,” lahame gagu ab oluham. 66 Làhàmu le ame baket ab modeham. Ame Yahudi eeda labe ame koei esuhu ke bumat am ahazo baa laba le, “Ke baana nim ba a ogizi osoktomule,” lahame mali ibi iho utou bugeame esum bak lamti ulohona ab modi itoeme esuham. Labi ame bak lam modeme neàdi iho etei vou lehe meo dam zi lam gagome ab vou aasdamam.

Matius 28

1 Labi hari Sabat izi dihasi dihambe aibubet hari Minggu labe Magdala labe lehe nam Mariati labi am ee fatahivaha nam Maria meida lamti labihasu iho Yesus koei esuhu ke bumat laba ab laham. 2 Le lafusi modeha Alat Am im gagu vou usemda meida labe asum ahoba iube nom ilu modeha balim feàna belu bak ab nigo nigodamam. Labi modeha Alat Am im gagu vou usemda labe aho ame koei esuhu ke bumat laba le ke ahazo baana tusdamna lam osoktoi vou ogi ogialame neàdi ame ke ahazo baa ahoba laba ab nusdamam. 3 Ame Alat Am im gagu vou usemda lam am alihiti am sueti na fauha meona abo asum boz velem bakti ulohona damat fako aam iedemna modesu aida. 4 Labihadume modeha ame meo dam laba vou aasdam dam lam ame bak lam aahemu iedi modem faidi faa gukedume nigom bakti vei seti gi elom bakti uloholi modesda. 5 Labi ame Alat Am im gagu vou usemda labe aho lahi behàsu niba ab gagoham. “Um a iedemule. Em ozobohute. Um gi Yesus damat paku dome elohodate nabitaom bak em ozobohu bak. 6 Lahana Yesus nib kaio. Am eloho bak labet fa ahedi usaho. Abo gi Aho amu fet gagoho baket imbodi ab usaham tame,” lahame gagu usi ame ke bumat laba oli fa it vameada. “Um behàsu nasi Am koei amu esuhu bak niba vi oli aamale. Am nib kaio. 7 Uho vi oli aame neàdi taho futoi Aba vi tau meedam dam laba fa le nehasu gagole. ‘Am eloho bak labet fa ahedi usai Galilea bak laba nasi le dam labe ba vulem bake vou faodalo. Ame dam labe laba vule Am alihi neo aa tame,’ laham im lam le gagole. Neàde. Eho etei lab gagoho bak lam uho a vabili setemule. Abo mahate vi ozo ladale.” 8 Lahame labi gagohemu ame lahi behàsu labe ame koei esuhu ke bumat lam vou esmozi gi iedehena ozahit fa ahu deelehat vàhàdi, “Taho emoeme Yesus bake vi tau meedam dam laba ame im lam fi dese,” laham bak gagolo àhàki fa ab ladamam. 9 Gi etei emoedam di labe iho ladam zie donibu laba fuha Yesusat Aho lehe bak aaha vabna gi laba duzuhuna ab gut tàham. Ame lahi behàsu laba gut tàhi gago, “Neàte,” lahame labi gagoha ame lahi behàsu nibe Yesus bake fetu nusu ogomaladume biddume Yesusam naba laba vuusualame ab vou baedamam. 10 Labi modeha Yesusat neha, “Um a iedemule. Uho nasi Eba vi tau meedam dam laba le gagole. ‘Um nasi Galilea bak laba le aameam Em alihi uho aa tame,’ laham bak lam le gagole,” lahame ab gagu oluham. 11 Labi ame lahi behàsu etei ladam lahasuhu di labe ame meo dam Yesus koei esuhu ke bumat vou aasdam dam totbaho labe fa kota Yerusalem bake le ame damat Ala bake lomna ve vua vahudam toheda zi laba vuusu im vameame faheme modiam dam laba le ibi iho aaha im lam ahebu ab faasi vameadamam. 12 Labi ame im lam aime neàdi damat Ala bake lomna ve vua vahudam toheda zi laba vuusu im vameame faheme modiam dam labe iho fa im dam totbaho lam abo ame Yahudi dam bake vuusu im vameame faheme modiam dam busaoda zi laba neo gagu vazisi im aa odoada. “Iho etei aihi im lam iho akatihasu modela?” lahame im aa odoadume neàdi ozobohudi ab gagu vàmadeham. “Làhà imo gi nehase. Dam meo damat ame im lam fi dem bak labna zohàme imo dam laba doi duana lodume ame im lam fi dem bak fà setese.” 13 Lahame ozobohudi neàdi ame meo dam laba ab gagoham. “Uho etei aame iba li gagoho im lam meia a vameadamule. Gi nasi vastese. Vasti fa nehasu dam bake vameadase. ‘Ame koei lam gi dam Aba vi tau meedam dam labe usi neisoat aibut uho iddam di labet aa li koei lam vihitoi aa vou ilime seteho,’ lahame fa dam bake fi dese. 14 Lahana uho lab meedaha bak lam gubernur aime uba fakem bak labna zohàme a iedemule. Iho fa tohe duzu fi baedume neàdi ba uba beodam kaio.” 15 Lahame labi gagohemu ame meo dam labe uledi ame doi lam vame dam eeda labe iba etei lab gagoho baket ab faasi meedamam. Labi ame im giomimna lam vou fi det laha labe Yahudi dam dua bak ahebu aidume imbo tibame tu vuzehi baleài vou gago usdume Yahudi dam badate etei vou fusi ame im lam aidume vi tu vuzehedam lahasuhu bak. 16 Labi ame lahi behàsu labe Yesus bake vi tau meedam dam sebelas laba le Yesusat iba doni bake tàhi vameadaha im lam vou le vameadume neàdi ame dam sebelas labe usnadume Galilea bak laba ab laham. Abo Yesusat iba lab gagoho sibu lam Galilea bak laba modesuhemu laba ab ladaham. 17 Laba ladume lafusi aaha Yesusam alihi laba ab aaham. Aahemu im ahu adat iedi Aba vou baeda. Lahana im dam totbaho labe vedi neha, “Abo imboo? Yesus eloho Dàt fat ahedehe?” laham bak lam mahate tum kai. 18 Labihàmu Yesusat fa dam laba netàdi ab gagoham. “Asum ahoba iuba feà Dateli meedam im modeo, bak niba feà Dateli meedam im modeo, labihasu ahebu Em Aiat Eba gagu Eho im dedateli ame im zi lam ab meedaham bak. 19 Labihàmu uho fa neo ot vai ladume bak ahebu iuba, ‘Eba tu vuzehi meedale,’ lahame uho vou vahoketedume uloholedale. Labi laha dam Eba tuhuda labe iho fa Ai Alati Am Adatti Am Aha Nutabe Neàna lamti fa vazisi vou ali ahu vàmadehemu uho ve vuu valo baptisleidale. 20 Labi laha Ebe Eho uba gagodaha im lam ahebu uho laha ot vai, ‘Ame im lam tu vuzehi meedale,’ lahame ame dam laba laha vi vahoketedale. Labi laha im nidi nim mahate vi ozome ozobohudele. Em Ehemo vàmtea uba vou aasdume ba damat iho bak niba esu meedam im zi ahebu ba novai vaitolo modem digat laba vou fu tame,” lahame Yesusat it vameadume ab neàdi esuham.

Markus 1

1 Alam Adat Yesus abo Alat Gagu Fihasi Vimteme Oluhu Dat Boehàda labe Aho meedaha Im Neàna lam eho Markusat faasi toedaha bak debu nehaha bak: 2 Dat ahamda Alat vameadaha im aime fa dam bake ahate vameaidahada Yesaya labe aho Alat Am Adat Yesus bake vameadaha im aho nehame fet toeme esuhu bak. “Eho Em im le vameadamda nasi dam bake olu neàdi Om ba olu tame. Damat Om ule neàt gut vam bak laba ozome ame da labe nasi le duzu zie vueme neàdehena ahum Om ba vula tame. 3 Ame da labe aho bak aotba baa bohu dam vaba alim bak laba azi dam aba valadamda zi laba dae buduana nehi vameada. ‘Alat Gagu Fihasi Vimteme Olulo Modem Dat Boehàda lem zie laba uho nasi duzu zie fet vueme neàdehena ahum Am ba lese. Aho lem zie a kibuna vuemule. Abo vamdesuhuna bàneàna vuele.’ ” 4 Lahame Yesayat aho aham di iube lab fet toeme esuhu im lam imbodi Yohanesat ab faasi meedamam. Ame da Yohanes lam ba ibi iho bak damat modi baleàhà bakti uloho vabak. Aho gi nehada. Abo sue keàbebuna unta tau neme etehàsoali fa sue baabuli sue sona bohu tademe dusu. Labi am kemohode laba laha sapi sokbat gimsu. Labi na àm di gi sàgàhàti bonahi ila labe am vaksati àda. Gi labihasu meedam dàt modem bak. Lahamda labe aho dam vaba alim bak laba le azi Alat amu aba gagoho im aho fa ot vai dam bake ab vameadume fi dedamam. Labi laba azi vameadume fi dedam di labe dam feà bak aba fet lei fet leida. Neha: Dam Yudea bak labe am num debu meida Yerusalem laba azim dam zi lamti ame Yudea bak labe am num debu mei num debu meime esdam dam totbaho lamti labihasu, “Imo iuba le Yohanesat lab vameadam im lam aidase,” lahame Yohanes bake abo gi dihasi valaida. Labihàmu aho im nehasu ab gut vameadume fi dedamam. “Ubu uho faina meedam bak lam nasi voedume fa ahu neà bak meedale. Labi um ahu vàmadehezobe eho um vuu valo baptisleidase. Labi dam totbaho fà vi aame ozobohudese. Uho faina meedam bak lam Alat ozahigeàmu fa faamome uba beolo meedam bak lam fa vei mu neàdem bake labihadale,” lahame ab gut vameadume fi dedamam. Labi aho lab vameadaha im lam damat aime iho faina meedaha bak ahate gagodume afoezobe Yohanesat ame dam lam vame Yordan Soabo laba vuu valo ab baptisleidamam. 7 Labi aho neo dam bake im vameadam di gi im nehasu vou vameateda. “Dat ba em ohuse vi vulelo modemda lam bisi feàda am bak. Em gi feà vab dàt modem bak. Ba akati eho mei na teo meedamdati uloholi fa fota nusu Am naba dusumna lo tadehena lam eho ba ziamoe? Em ba labiham uloho vabak. 8 Dam giida labe iho uba aame ozo, ‘Uho faina meedam bak lam voedume fa ahu neà bak meedalo vàmadi fa Ala bake tu vuzehehe?’ laham bak aame ozobohudem bake eho uba gi vaota baptisleidam bak. Lahana Dat ba lemda labe li uho Aba tu vuzehi meedàmu Aho Alam Aha Nutabe Neàna lam uba modi vizi teudeda tame,” lahame vou vameateda. 9 Labihadam digat meida labe Yesus Galilea bak labe am num debu meida Nazaret labe lehe labe Yordan Soabo laba li Yohanesat Yesus ab vuu valo baptisleham. 10 Labi valo baptisli neàdi Yesus gi etei vao labet sikisi duzu aaha asum ab fatahivaham. Labi tom aaha asum fatahivai bumatalehe bak labet Alam Aha Nutabe Neàna labe fa bume doleti ulohonali nom vou oaedume Aba nom vousi nusu vizi ab teudeham. 11 Labi modeha Alat Aho asum ahoba iube Yesus bake ab nom gagoham. “Om Em Adat vàmtea Ebe Eho bisi deelemda Om am tame. Em abo Obo Oho meedam bak lam Em aam deeleho,” lahame ab nom gagoham. 12 Labi Yesus baptisli neàdi Alam Aha Nutabe Neàna labe Aho neo Yesus modi ame bak lam vou esmozi fa ame bak aotba baa bohu dam vaba alim bak labe aba zoho laba ab vou laham. 13 Labi vou le aidam di labe Iblisit Aba modi ozolo modidume usi ab empat puluhleham. Labi Aba modi ozolo modidam di labe Yesus gi nohubake esumna meona ziti aida. Labi Alat Am im gagu vou usem dam zi labe Aba laha li im vi vameadume na àmna loida. Labihada. 14 Labi ba di iube Yohanesat Boehàda Herodes bake im vahokedume modehat Herodesat faki am meo dam gagome Yohanes si sel ab ousuham. Damat Yohanes si sel ousu neàdehezobe Yesus Galilea bak laba fa ab laham. Le Aho Ala bake ot vaha Im Neàna lam ab faasi vameadume fi dedamam. 15 Aho im nehasu dam bake vameada. “Alat Aba Aho amu di iube fet gagu esuhu digat ab vou fuham bak. Aho Gagu Oluhu Dat Boehàda lam etei bak niba lehemu Ahamo Boehàdateboli dam bake deeli vame Am damali vuusu im vahokedam bak lam etei ab faasi gàhàli meedamam bak. Labihàmu uho faina meedam bak lam nasi voedume fa ahu neà bak vàmadi Alat gagu oluhu Im Neàna nim tu vuzehele,” lahame ab vameadume fi dedamam. 16 Labi ba neo digat meida iube Yesusat Itea Galilea labe am valau obet ladam labe aaha Simon am vahada Andreasti im bohe dek vou bulo meedamna ab aaham. Ame dam ahim labe ibi modi baleàhà bak bohe vadam bak am. 17 Làhàmu Yesusat ab gagoham. “Um ahim Ebe Eho vahokedam im ozobohudelo vi tau meedam damalele. Um etei ba bohe vam damalem bak modem vabak. Eho uba vahokedume uho fa ot vai dam nabime vame neo vahokedume ame dam labe fa Eba tu vuzehem bak modelo mozo.” 18 Lahame gi etei labi gagoha ame dam ahim labe im bohe dek gi ihe laba vou esmozi Yesusat vahokedam im ozobohudelo ab vi tau vulaham. 19 Labi neo vahi ladume koena ub le Yesusat vi aaha Zebedeusam adam behàsu Yakobusti Yohanesti ihe laba nusu im bohe dek vabiedamna ab aaham. 20 Gi etei lab aaha labe Yesusat ab gagoham. “Um ahim Ebe Eho vahokedam im ozobohudelo vi tau meedam damalele,” lahame labi gagoha dam ahim labe im ai Zebedeusti iba tau bohe meedam dam lamti ihe laba vou esmozi Yesus bake ab tau vulaham. 21 Labi Yesus Aba vi tau meedam dam lamti neo ladume num debu Kapernaum laba ab lafuham. Laba lafusi modeha hari Sabat abo Yahudi dam labe ibi iho gi azibe im digat fuhemu Yesusat Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli Alam im ab faasi vahokedamam. 22 Labi lab vahokedam di labe damat aiha Yesusat ba dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe ibi iho ladehebeat vahokedam bakti ulohona vahokedam vaba Aho gi im dedateli vahokedàmu dam labet aime ab àvodeham. 23 Labi Yesus ame num laba dam bake vahokedam lahasuhu diat setan oli veimahada amu ame num laba tau olehe dat labe dae meona Yesus bake gut alamdi ab gagu geham. 24 “Aa! Yesus Nazaretda oa, Om giida akati meit ihimo modem im tau meedalo modela? Oho iba li modi vàhàdeme seddalo lehe taia? Em abo Om ozobohu bak. Om abo Alat Gagu Fihasi Vimteme Oluhu Dat Boehàda bisi Neàboda Vàmtea Om am bak.” 25 Lahahat Yesusat dae meot fa ame setan laba ab gagoham. “Dae vabalele. Om taho futoi ame da nim vou esmozi itale.” 26 Lahame dae meot gagoha ame setan labe futolo da laba modi aheli faa gukedume dae feàna geàdume futoi ab itaham. 27 Labi modeha dam zi labe ame bak lam aahemu àvodi ab ot gagoi ot gagoidamam. “Aa làhà! Etei lab modehe bak lam im amu im lamohona aaha vab taia? Ame Da nibe Aho lab modehe bak lam gi im gàhàna modehe bak. Abo Aho im dedatelehe labe teudi ame setan zi laba, ‘Futodale,’ lahame gagom di ame setan zi lam aime uledi futodume ilidam meo bak,” lahame ab ot gagoidamam. 28 Labi kehàm vabna ame dam labe Yesusat etei modehe im lam aahemu fa Galilea bak laba modealadaha num debu bake le vou vameatedume ab uloholeham. 29 Labi Yesusat ame setan laba gagu futoi itame neàdi Aho Yakobusti Yohanesti Aba vi tau meedam dam totbaho lamti vazisi ame num labe futoi esmozi fa Simonti Andreasti dam ahim labe im num laba ab laham. 30 Labi le oli modeha Aba vi tau meedam dam labe Aba li ab gagoham. “Simonam boholeà so galihasi duana gaili bisdalo. Oba li aamale.” 31 Làhàmu Yesusat Simonam boholeà gaili bisdam num bumat laba oli ame nam laba neha, “Om gailehe bak neàdele,” lahame labi mali gagoha ame gailehe bak lam fa ab seteham. Labi kehàm vaba fa usai duzu na ohume Yesus Am damti ab lodume àdaham. 32 Labi dimatali aibulelo modem di labe dam aheda zi labe im dam gaileheda ziti dam setan oli veimahada ziti labihasu Yesus bake ab vou valadamam. 33 Labi valadume modeha ame num doo obe laba dam dua totbaho laba li ab dozeadamam. 34 Labi dozeadume modeha ame dam zi labe im gailehe bak ahaladi ahaladiaha bak lam Yesusat modi fa ab neàdedaham. Labi dam setan oli veimahada zi lam laha Aho neo ame setan zi laba gagu ab futodume ilidamam. Labi ame setan zi labe lab futodume ilidam di labe, “Am abo Alat Gagu Fihasi Vimteme Oluhu Dat Boehàda am tame,” laham bak gagomna zohàme Aho mali gi gagome ab oudaham. 35 Labi dihambe di fi zeadam diat Yesusat keesi usai ame num labe futoi num debu bak vou esmozi fa dam vaba alim bak laba le Ala bake ab tom gagodamam. 36 Labi tom gagodam lahasuhu di labe Simon am dam totbahoti Yesus bake ab le nabidamam. 37 Labi le nabidume Yesus aahemu ab gagoham. “Dam ahebu Oba vi nabidalo.” 38 Lahame gagoha Yesusat fa gago, “Lo, Em ozobohu bak. Lahana iba netàdehe num debu mei num debu mei lahadaha bake le dam laba Alat vameadaha im vameadume fi dedalo modem bak ehe bak. Alat amu Eba neha, ‘Labihadale,’ lahame Eba gagu oluhemu Eho ame bak lam ab meedalo modemam bak.” 39 Lahame labi gagu neàdi Yesusat ame num debu lam vou esmozi fa Galilea bak laba esdam dam totbaho labe im num debu mei num debu mei lahadaha bak laba le ame Yahudi damat ihimo ot vahiame im meedam num dozeadaha bak laba olidume Alat vameadaha im lam le vameadume fi deda. Labi ame di labe Aho laha mei ahu oli veimaha setan zi laba gagu futodume ilida. Labihada. 40 Labi ba neo digat meida iube Yesus num debu bak meidate le aidam di labe dat sokba faidi vàhàdem bohu vuusdamda labe ame bak laba godam labe Yesus bake li, “Yesus abo feàte,” lahame ozome Aho doudam obe laba ogomasu biti ab tauledamam. “Om eba faobekem vabao? Om uledemeam làhà em sokba faidi vàhàdem bohu vuusdam bak nimti damat eba fi hasi vaitesu esdam bak lamti Oho fa eba modi neàdem bak em ozobohu bak.” 41 Lahame labi tauledume gagohemu Yesusat Aho aahat aam faimu faobekesi gi ozahit Am anekehàt ame da laba nom ulasi gago, “Lo, Eho modi neàdem neà bak. Om sokba faidi vàhàdem bohu vuusdam bak lamti damat oba fi hasi vaitesu esdam bak lamti nasi setele.” 42 Lahame labi gagoha ame da labe am sokba faidehe bak lam fa seti fa dam ahedati vahem bak ab neàdeham. 43 Labi seti neàdehemu da labe dam bake fi dem bak labna zohàme Yesusat mali ab vi vameame olulo gagoham. 44 “Om sokba faidi vàhàdem bohu vuusdàmu Eho modi fa neàdehe bak lam oho a dam bake vou vameatedume fi demule. Gi damat Ala bake lomna ve vua vahudam toheda laba le gagu ame da labe om sokba faidi vàhàdem bohu vuusdam bak lam, ‘Fa modi neàdeheo?’ laham bak aho gut nabidale. Labi nabidume neàdi fa dat ahamda Musat aham di iube Israel dam bake, ‘Nehame modele,’ lahame vahokedaha bak lamti ulohona modele. Om fi ham bak neàdi fa vahem bake na fi ho oho etei si vou lalo modemna lam ame toheda laba vou le aho gut ve oteme vua vahusu om fa damti vahem bak modele. Labiham labe dam aheda aame ozo, ‘Da nim fa neàdi im fa vahem neàdehe?’ laham bak fet aame ozobohudi fa vahem bak am tame,” lahame Yesusat ab vi vameadume oluham. 45 Lahana ame da labe vedi am dam totbaho bake Yesusat aba neha, “Meia a le vou vameatedamule,” lahame gagoho bak lam geàmu dam bake, “Yesusat eba modi neàdeho,” lahame fa ab vou vameatedume fi dedamam. Làhàmu damat ozobohudi Aba valadam bak labna zohàme Yesusat ba num debu bak laba laha vaba gi bàhàgo bak dam vaba alim bak laba aida. Lahana dam vaba alim bak laba aidume modeha damat gi geàmu Aba valada. Dihasi bak iube Aba valada. Dihasi bak iube Aba valada. Labihada.

Markus 2

1 Labi ba neo digat meida iube Yesusat fa num debu Kapernaum laba ab laham. Le modeha kehàm vaba dam ahebu, “Yesus fa num debu bake leho,” lahaha bak lam ab aidaham. 2 Yesus lehe bak aihemu dam ahebu ame num laba valadume modeha num bumat keke. Labi num doozoh laha keke. Labihada. Labihadam di lam Yesus im nehasu dam bake vameada. “Alat Aba Aho Gagu Fihasi Vimteme Olulo Modem Dat Boehàda lam etei bak niba oluhemu Aho dam bakda modi Am damali vuusu im vahokedam bak lam etei ab faasi gàhàli meedalo modemam bak,” lahame dam bake ab faasi vameadamam. 3 Labi ame im lam vameadam di labe dam amomoi labe im dat nao zoho eloi nutabedeheda lam ileba esu dam ahim labe ahim labe zoho vuusui vuusuiame Yesus bake ab vou ledamam. 4 Labi vou ledume numa olesome modeha dam bà tadi num kekesi olem biehemu fa num ohut vabna baa ahoba laba vou zisi ame numa suusuhuna baa lam feàkmome bumatali afoezobe ame dat ileba lamti loa vààsu num ohut bumat labe fa damat nusualadaha tomba laba abo Yesusat avaesdam laba nom vousdume ab nom esuham. 5 Labi nom esuha Yesusat ozo, “Ame dam labe bisi Eba tu vuzehi meedà?” laham bak aame ozobohudehemu Aho fa dat nao zoho eloi nutabedeheda niba ab gagoham. “Em adat ozomomda oa, om ade? Obo oho faina meedaha bak lam Eho ozahigeàmu fa vei neàdeho,” lahame ab gagoham. 6 Lahame Aho etei lab gagoho di lam dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi laba laha tau nusualadaha dam ehet. Labi Yesus etei lab gagoho bak lam ame guru zi labe aime ihimo ahulat aa nehi ozoda. “Oo, da nim gi imti ulohona baka ana modi feà Dateli nehi gagodàla? ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahaha bak lam gi Alat Ahamo gagom bak akati Da nibe labi gagodàla? Da nim gi Ala bake feàtàdam dàt mode taia?” lahame ab ozodamam. 8 Lahame aa ozodaha bak lam Yesusat Ahamo ozobohudi ab gagoham. “Um ana modi um ahulat labi ozodàla? 9 Uho ozom, Eho ame nisileheda niba im gagom di im adida bisi damat aame ozobohudela? Eho nehameam, ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahame gagomeam damat aame ozobohudeo? Laham vabameam Eho gi neha, ‘Om nao zoho eloi nutabedehe bak lam Eho modi fa neàdeho. Nasi usai om ileba giame vuusu fa num bake lale,’ lahame gagomeam làhà damat aame ozobohudeo? Adida bisi damat aame ozobohudela? 10 Lahana Em Abo Asum Ahoba Iubet Bak Niba Li Dateleheda nim Ala naedat Eba gagu olu Eho fa im dedateli ot vai meit faina meedàmu Alat beolo modem bak lam Eho gi vei mu fa faamome vei neàdem meoda Em am bak. Lahana Eho labihasu meedam bak lam um biem bake Ebe Eho etei modelo modem bak nim uho nasi aasu vou faomale. Labi dat nao zoho nutabedeheda nim Eho modi fa neàdi usam bak uho aameam làhà um laha neo, ‘Em meit faina meedàmu Alat beolo modem bak lam Eho gi vei mu fa faamome vei neàdem meoda Em am bak,’ laham bak lam etei uho laha aame vi ozobohudem bak,” lahame Yesusat labihasu vameadume neàdi ame dat nao zoho nutabedeheda laba ab gagoham. 11 “Om usai om ileba visoi vuusu fa om num bake vou lale.” 12 Lahame Yesusat gi etei labi gagoha ame da labe fa neàdi damat aasdahit amti usai am ileba visoi giame vuusu ame num labe futoi fa am num bake ab laham. Labi modeha dam ahebu ame lab modehe bak lam aame àvodi anekehàso it gaadam labe ahu adat iedi Ala bake ab vou baedamam. “Aa làhà! Im amu im feàna lamohona ba aaha vabak. Gi etei alimeat ab aaham bak,” lahame àvodi Ala bake ab vou baedamam. 13 Labi Yesus ame num lam vou esmozi fa Itea Galilea valau obe laba neo lada. Labi ladam di labe dam duada labe aaha Yesus lehemu ab valadamam. Aba valadàmu Aho ame dam laba faasi ab vahokedamam. 14 Labi vahokedume neàdi neo ladameam aaha meia gagu gi teo vi vaiam doi pajak lam atemda abo Alfeusam adat Lewi labe aho gi am pajak vadam num buà laba aidamna ab aaham. Làhàmu ab gagoham. “Lewi oa, oho Ebe Eho vahokedam im vi tau meedam datelele,” lahame labi gagoha Lewit usai Yesus bake ab vi tau meedam dateleham. 15 Labi ba neo Yesus Aba vi tau meedam dam lamti Lewim num laba le na tau àda. Di lam Lewi bake tau meia gi teo vi vaiam doi vadam dam totbaho zi lamti labi damat neha, “Faina modeho,” lahame ozomsum dam lamti labihasu ba li ame dam laba vi tau vazisi na àda. Ame dam zi lam iho Yesusat Aba Aho vahokedam im ozobohudelo meedàmu laba tau vazisi na ab àdamam. 16 Laham bak lam Musat toedaha im ahamda vahokedam guru zi abo Farisi dam bake vi tau meedam dam labe iho ba li aaha ame bak lam aahemu Yesus bake vi tau meedam dam laba ab gagoham. “Yesus Dat neàda modem bak akati modi um fa meia gagu gi teo vi vaiam doi vadam dam ziti labi damat neha, ‘Faina modeho,’ lahame ozomsum dam lamti vazisi na zi vàmtea àdàla?” 17 Lahame vi ailo gagoha Yesusat fa dam laba im totobe nidi nim nehame ab vi fi koadamam. “Uho ozom, dam aheda dokter abo obat vuusumdate lam meo? Vabà! Gi dam gaileheda ihimo obat vuusumdate lam bak. Bak lam gi neham bak. Eho bak niba lehe bak neham bak ozome lehe vabak. Damat neha, ‘Im abo Alat gagu fi hasi esuhu im zi ahebu ulohodesu vamdesu meedam dam im am bak,’ lahame ahobat neàdem dama Eho neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe vabak. Em gi damat neha, ‘Iho faina meedam damat modem bak,’ lahame it ozome gagodam dam laba neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe bak,” lahame ab vameadaham. 18 Di labe Farisi dam zohoti dam Yohanes Mei Vuu Valo Baptisleiamda labe aba aho vahokedam im ozobohudelo vi tau meedam damti labihasu Ala bake tom gagodalo modemu ahit na àm mohonale. Lahana ame di labe Yesus Aba vi tau meedam dam labiham kai. Labi modeha dam amomoit Yesus bake li vabi vi ailo ab gagoham. “Yohanes bake vi tau meedam dam lamti Farisi dam bake vi tau meedam dam lamti labihasu Ala bake tom gagodalo modemu ahit na àm mu izidam meo bak. Lahana akati modi dam Oba vi tau meedam dam lam labiham vaba modela?” 19 Lahame labi gagoha Yesusat gi damat Aba ba modem im laba ozome im totobe nidi nim nehame ab fi koadamam. “Dat soao labe nam soao valo na vahedam di labe ame da labe amti ot deeliam dam laba gagu vahi deelehat na àdam meo dam taia? Labi laha dat soao labe nam soao valo modemda ehe lahasuhu di lam am dam gi deeli na àm meo dam taia? 20 Lahana ba diamut ame nam valo modemda lam naat aa si utasi vou le setem di lam am dam totbaho labe im ahu faidi na àm mom di am taia?” lahame ab vi vameaham. 21 Labi im lada lam vameadume neàdi Aho neo Yahudi dam labe im tai ahamda zi labe ibi iho vou vahoke usehe im lamti fa Aba Aho etei li vou vahoketedam im gàhàna nimti ulohodesu fa vahem biem bak laba vi ozome im totobe nidi nim ab vi fi koadamam. “Meit am sue amu soa dusumda vàusi bumatalemeam làhà ba sue gàhàna baa amu valo kikeme modi koedehe vabna zoho vaitoi ame sue vàuhu bak laba taasu tadem vabak. Labihameam ame sue etei tadeheda lam fa valo kikeme àga bake esu dehalem di ame sue gàhàna zoho lam gi ahamo fa koedi etei tadehena etehàso lam ziambitoi vàusi bumat olozebalem bake ozome ahit moho bak. 22 Labi laha meit anggur oo gi etei unaha vaksa gàhàda fi kidi neàdehe vabda lam ba kambing fi ho sokba amu buhaleme bugeahana modi esu dehalehena laba fedem vabak. Meit labi modemeam ame na vaksa lam ba fi kidehe labe ame na sokba amuda lam modi fi fasi ame na vaksa lam gi bake veàtom bak. Labi ame na sokba lab fedehena lamti gi amait vàhàdeme setem bak. Labiham bake meit ame na lam ba ozome modem vabak. Gi ame anggur vaksa gàhàda lam fa ame na sokba gàhàda buhaleme bugeame afoezobe laba fedem bak. Labi modem labe ame na sokba lamti ame na vaksa lamti gi amait iademe fi kidi neàna modesdam bak,” lahame Yesusat ame im totobe lam ab vameadaham. 23 Labi ba hari Sabat abo Yahudi dam labe ibi iho gi azibe im digat meida labe Yesus Aba vi tau meedam damti iho bak mei bake lalo modemu gandum dee zie labe lada. Ladam di labe Aba vi tau meedam dam labe idoalehemu ame gandum oo amdeheda lam auet vi vuu footoi ab vou à ladamam. 24 Labi vou ladam di labe Farisi dam totbaho labe ame bak lam aahemu Yesus bake ab gut gagoham. “Ne, etei nim gi hari Sabat abo im Yahudi dam labe ibi iho gi azibe im digat nim akati modi Oba vi tau meedam dam labe na oo auet vi vuu footoi vou à ledàla? Ne, im tai ahamda Musat aham di iube neha, ‘Hari Sabat fum di na a meedamule,’ lahame toeme fi hasi esuhuna Oba vi tau meedam dam labe akati ailahigeàmu na meedàla?” 25 Lahame labi gut vameadume modeha Yesusat fa ab gagoham. “Ne, im tai ahamda Boehàda Daud labe aho amu modehe im lam meit Alat Vameadaha Im Toedahana laba im meida nim um aame ozobohudehe vaba? Amu Daud aba vi tau meedam damti idoalehemu dam ahamda labe iho Teohet Mome Fa Faatoiam Num Fihamna abo Alat Israel dam bake le tau im vameaidam num laba oli Ala bake lu fi haha beahuba laba esuhu roti lam aho visoi faheme am dam bake lodume iho vahi àdaha bak lam um vi ozobohudehe vaba? Ame di lam Abiatar aho Damat Ala Bake Lomna Ve Vua Vahudam Tohe Dam Zi Labe Bisi Boehàdateboli meedam bak. Labihadam di labe ame roti lam dat ahamda Musat aho aham di iube neha, ‘Ame roti lam damat Ala bake lomna ve vua vahudam toheda zi labe ihimo àm rotit modem bak. Ba dam giida tau àm fi ham roti modem bak,’ lahame gagu fi hasi esuhu roti lam dam giida labe àhà bak. Lahana ame dam labe iho ba, ‘Faina modeho,’ lahaha vabak. 27 Eho gi neham bak ozome uba labi gagoho bak. Alat aham di iube na totbaho meedume neàdi dam alimeat ab modeham bak. Labi ba ame hari Sabat abo gi azibe im digat lam ba modehe bak. Labiha labe Eho ozoha, ame gi azibe im digat lam bisi feà vab labe ba dam fa vafozem vabak. 28 Labihàmu Alat Gagu Fihasi Vimteme Olu Asum Ahoba Iubet Bak Niba Li Dateleheda nim Em ame Da amemu ame hari Sabat deda Em am bak. Labiham labe Ehemo neha, ‘Ame digat labe im nehasu modem neàte. Im nehasu a modemule,’ lahame ozome gagomda Em am bak,” lahame ab gagoham.

Markus 3

1 Labi ba neo hari Sabat meida labe Yesusat ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba ab oleham. Ame di labe dat anekehà tot nutabedeheda laha ame num laba amu vi tau oli aida. 2 Labi ame di labe dam ame num laba olehe dam zi totbaho labe Yesusat ame hari Sabat abo ibi iho gi azibe im digat nibe mei modi fa neàdem bak labna zohàme vou faovoi Yesus bake fakot zisda. “Yesusat ame da niba modi fa neàdem bak aahazobe fa vàluse,” lahame fakot zisda. 3 Lahamnàme Yesus Aho dat anekehà tot nutabedeheda laba ab gagoham. “Om usai tomba niba li duzule,” lahame labi gagoha dat nisileheda labe usai damat nusualadaha doni tomba laba le ab duzuham. 4 Labihazobe Yesusat ahit gi dam labe iho modem bak ozobohuna fi bovai ame lab nusualadaha dam laba ab vameadamam. “Ne, uho ozom, hari Sabat abo gi azibe im digat nim im tai ahamda Musat, ‘Akatihasu modem neàte?’ lahame gagu fi hasi esuhela? ‘Im neàna modem bak modele,’ lahaheo? ‘Im fai bak modem bak modele,’ lahaheo? Im adida Musat gagu fi hasi esuhela? Laham vaba, ‘Mei elolo modem di iho modi fa neàdem neà bak,’ lahaheo? ‘Mei otem bak modem neà bak,’ lahaheo? Im adida Musat gagu fi hasi esuhela?” Lahame labi vi ailo gagoha dam ba Aba im vi gagomda vab. Làhàmu faki fakot Ahamo vi nabidume vi ozolaha vabamu ahu ab faideham. “Eho im meedam di dam nim akati modi Eba tu vuzehem vaba bisi odohali meedàla,” lahame ahu faidi vi ozolaha vabamu fa dat nisileheda niba ab gagoham. “Om anekehà nasi vamdemale,” lahame labi gagoha da nibe am anekehà vamdeheilahit gi fa ab neàdeham. 6 Labi modeha ame Farisi dam labe faki num lam vou esmozi fa dam Boehàda Herodes bake tauhu dam totbaho laba le neha, “Uho ozom, im akatihasu modi Yesus si otela?” lahame im aa ab odoadamam. 7 Labi Yesus Aba vi tau meedam dam lamti ihimo le esdalo modemu bak lada lam vou esmozi Itea Galilea valau obe laba le goda. Laba le godam di labe dam Galilea bak laba esdam dam dua totbaho labe aiha Yesus lehe bak aihemu ab valadamam. Aba valadam dam lam gi Galilea dam lamota ledaha vabak. Abo dam Yudea bak laba esdam dam lam laha tau leda. Labi Yudea bak labe am num debu meida Yerusalem labet laha tau leda. Labi laha dam Idumea bak laba esdam dam lamti Yordan Soabo biou ala zizem tot laba esdam dam lamti labi num debu Tirus labe am bak obe esdam dam lamti num debu Sidon labe am bak obe esdam dam lamti labihasu tau leda. Ame dam zi labe iho Yesusat meedaha im zi lam aihemu Aba valada. 9 Ame dam zi labe Aba valadàmu Aho ahamte dam ahaladi ahaladiame gaileheda lam ahebu modi fa neàdeda. Labihàmu dam totbaho labe aame ozo, “Iho laha Yesus bake netàdi Aho fà iba ulasi modi fa neàdedase,” lahame dam totbaho lebe vou ogia leda. Labi vou ogia ledam labe dam zi duali fai bak fuhemu Yesus Aba vi tau meedam dam laba fet ab gagoham, “Dam nim nehadume Em soat nutmalo mozo. Imo Eho gi iheba ziti nusu dam bake im vahokedam bak meedase. Um ihe vihitoi valau obe labe vou bu duzu vou faode,” lahame ab fet gagu esuham. 11 Labi Yesus ame dam zi laba uladdume fa neàdedam di lam mei ahu oli veimaha setan zi labe Yesus bake aam di Yesusat iba ooteme gagoho vabna, “Yesus abo feàte,” lahame nasi fet iedi dam laba ahit modi Yesusam naba modesdam laba ogomasu bake biti ab geàdamam. “Om abo Alam Adat Am tameee,” lahame meit bute meit bute lahada. 12 Lahana Yesus ame setan zi laba neha, “ ‘Em Amat modela?’ laham bak meia a le fi demule,” lahame mali dae meona gagu futodume ab ilidaham. 13 Labi ba digat meida iube Yesusat bak buzoho bake laisi afoezobe Aba Aho ozome fi me valo modem dam lamota neo gagome Aba ab vi laitedaham. 14 Labi laisi neàdi dam dua belas ab fi me vaham. Fime vame neàdi Aho neha, “Uho Eba tau vi gohatedam bak ame. Labi Eho uba gagu olu uho Ebe Eho meedaha Im Neàna lam dam bake vou vameatedam bak ame. Labi Eho uba gagu uho ot vai im dedamali fa mei ahu oli veimam setan laba fa gagu futodume ilidam bak ame. Uho labihasu meedam bake Eho etei ahit uba gagu um ab Em im vameadume esmozi laiam damaleham bak,” lahame ame dam dua belas lam ab vaham. 16 Ame Aho lab fi me vaha dam dua belas lam neha: Simon ee Yesusat ba taluhuda Petrus ame. 17 Labi Zebedeusam adam behàsu Yakobusti am vahada Yohanesti labihasu ame. (Yesusat Aho dam ahim labe iho bisi meo bak laba vi ozome asum meo fam bakti ulohona modem damat meedàmu ba ee, “Boanerges,” lahame taluhuda ahim am). 18 Labi Andreas ame. Filipus ame. Bartolomeus ame. Matius ame. Tomas ame. Labi Alfeusam adat Yakobus ame. Tadeus ame. Simon Meohoda ame. 19 Labi Yudas Iskariot ba Yesus otem bake vou foholo modemda ame. Labihasu Yesusat debe ab Aho gagu olu Am im vameadume esmozi laiam damaleham. 20 Labi Yesus amu dam dua belas fi me vame neàdi fa Aho amu azibe lehe num debu Kapernaum laba fa ab laham. Labi ame num laba oli modeha dam dua bak labe Yesus lehe bak aihemu neo ame num laba valadume modeha Yesus Am damti vanamai na ab àm bieham. 21 Labi ame di labe dam laba tau leheda totbaho labe ab gagoham. “Da nim ahusobuli mode taia?” laham bak lam meit aime fa Nazaret laba le Yesusam dam totbaho laba ab vameadamam. Vameadàmu Yesusam dam totbaho labe iho Yesus ve fa Nazaret vou lalo ab ozoham. 22 Ame di labe dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lam amu kota Yerusalem labet lazi num debu Kapernaum niba li ame num laba vahehe dam laba vedi nehi gagoda. “Yesus gi mei ahu oli veimam setan zi labe im boehàda Beelzebul labe fa Aba modi vizi teudehe labe Aho ame setan zi laba gagu futodume ilidam bak,” lahame dam bake ab gagodaham. 23 Labihasu vameadaha bak lam Yesusat aime fa ame dam lam gagome vazisi ab dozeadaham. Dozeadume neàdi Yesusat dam laba im totobe nidi nim ab vi fi koadamam. “Eho etei uba vouhome vameadalo modem im nidi nim uho nasi aime neàdi ubu uho etei lab gagoho bak lam, ‘Imbo? Imbo vabao?’ laham bak nasi it ozodale. Eho setan gagu futodume ilidam di uho vedi Eba neha, ‘Iblisit Eba tau modi ilidala,’ lahame gagodam bak lam Eho ba labi modem biem bak. Neham bak. Iblis labe am setan ziti gi debu vàmtea bak. Ba akati am dam totbaho fa gagu futodume ilidàla? 24 Ne, bak amomoi vuusdam boehàda am damti ihimo fàsi ot beluidameam làhà ame dam lam gi ahebu foli seddam bak. Labi bak amomoi vuusdam boehàda am damti labihameam làhà gi neo ab vàhàdeme setemam bak. 25 Labi laha dat am lahi datati ihimo ot fakiame ot beluidameam làhà ame dam gi vabali setem bak. 26 Labihàmu uho Eba neha, ‘Beelzebulat Eba modi vizi Eho mei ahu oli veimaha setan mei setan mei laba gagu futodume ilidala,’ lahame Eba labi vàlu gagohemu Eho uba gi fa nehi gagom bak. Um git gagoho bak. Ame setan zi laba vuusdam boehàda Beelzebul labe aho Eba tau aba aho vuusdam setan zi lam Eho gagu futodume ilidameam làhà gi Beelzebul fa am damti ot beluiame foli seddamna ozomom bak. Labihameam ba ame debu lam ba akati teudi duzue? Gi vàhàdeme seddamna ozomom bak. 27 Uho Eba gi ostame vàluho. Mei ahu oli veimaha setan Eho gagu futodume ilidam meo bak lam Eho uba vouhodase. Neha: Dat teuda nibe am soa maehe nazoh vou faovoi num doo ozoho laba duzu ausdameam làhà ba meit am numa oli am nazoh vam vabak. Am nazoh gi ahe lahasum bak. Lahana dat bisi feàda labe fa da lada laba li nohisi beome si anekehà gia. Nao gia. Labihadume neàdi am num laba oli am nazoh gelevai voutam bak.” 28 Labi Yesusat neo ame guru zi labe ibi iho amu gagoho bak lam, “Beelzebulat Aba tau setan gagu futodume ilidam bak,” lahame gagoho bak lam vi ozome fa ame guru zi laba nehame vi vameada. “Eho teudi Beelzebul vafozi ame setan zi laba gagu futodume ilidam bakta imbot. Lahana uho im imboda nidi nim laha nasi aima. Meit faina meedam bak im meiti im meiti modeo, labi meit feàtàdam bak im meiti im meiti modeo, iho labihasu faina meedam dam labe iho nasi it ozobohudi fa Ala bake ahatet tom gagu neàdi voomeam làhà Alat gi ame da laba ozahigeàmu fa vei neàdedam meo bak. 29 Lahana Alam Aha Nutabe Neàna Labe Eba lab tau modi vizi teudi Eho setan lab gagu futodume ilidam bak laba uho vedi neha, ‘Beelzebulat Eba tauha,’ lahame vàlu gagoho bak lam git gagom bak am bak. Um gi Alam Aha Nutabe Neàna laba feàtàdaha bak. Meit Alam Aha Nutabe Neàna laba feàtàmeam làhà ba Alat ozahigeàmu mu fa vei neàdedam vabak. Aba aho lab faina modehe bak lam faatoho vaba gi am ahu laba labaha bohu vizi modesdam bak.” 30 Yesusat neham bak vi ozome labi gagoho bak. Ame guru zi labe Aba neha, “Da lam ba Alam Aha Nutabe Neàna labe Aba modi vizi teudi setan gagu futodume ilidam vabak. Gi setan Aba oli veimaha labe ame baket meedam bak,” lahame labi gagohemu Aho gi labihasu ab vameadaham bak. 31 Labi gi etei vameadume neàdi modeha Yesusam oiti Am vahadam ziti labihasu ame num laba lafusi olesome modeha dam Yesusat lab vameadam im lam ailo meedam labe dam bà tadi olem bili bak kekehemu gi num bako tot laba li dozeadume vou faoda. Faodaha vabamu, “Yesus bake im vameadase,” lahame meia gagu ab oluham. Olu Yesus bake le ab gagoham. “Ai oa, Om oiti Om vahadam ziti Oba nabidam labe bako iuba li dozeame vou faodalo.” 33 Lahame labi gagoha Yesusat fa ab vi gagoham. “Ne, uho ozom, Em oiti Em vahadamti ame dam akete?” 34 Lahame labi gagu neàdi dam Aba netàdi nusualadaha dam zi laba aasu vi nabidam labe ab gagoham. “Ne, Em oiti Em vahadamti gi neam taia? 35 Meit Em Ai Alat Aba Aho ozoho bak vi ozome meedam dam lam Em vahada Em nà Em oi laham dam am bak,” lahame ab vameadaham.

Markus 4

1 Ba di iube Yesus neo Itea Galilea valau obe laba le im ab vahokedamam. Labi Aho lab vahokedam di labe dam zi feà neo Aba valadam labe gi soat osidda. Làhàmu Am dam gagome ihe laba zisi nusu valau obe laba vou bu ab duzuham. Labi Aba valadam dam zi lam gi valau obe laba dozeada. 2 Labihazobe Yesusat Aho im totobe tamehona ab faasi fi koadamam. Labi Aho dam bake neo nehame ab fi koadamam. 3 “Um nasi aimale. Dat utoho modemda nibe am na dem bak laba na oo neb ab le guladamam. 4 Labi na dem bak laba le guladam di labe ame na oo neb totbaho gi damat lailaidam zie tomba laba ab biddaham. Labi modeha bume faobuda labe li visoi àme ab seteham. Lada lam labiha. 5 Labi ame na oo neb totbaho lam ke baa bak laba ab biddaham. Labi modeha ke baa bak laba biddahada lam bak dua vab labe gi kehàm vaba ab loubedi usidaham. 6 Lahana ala faasi gaimeolehe di labe et loubedehena lam belu ab aladaham. Ke baa usihi labe am omnao bak vaksa bake nom lailaiaha vab labe ab belu aladaham. Lada lam labiha. 7 Labi ame na oo neb totbaho lam aliho debu bak laba ab biddaham. Labi modeha na oo neb lamti alihosoti amediat usida. Amediat usihi labe na àm vabda labe nasi kilale. Labi kilalehe labe na àmda lam gi alihosot vi giame ab aladaham. Lada lam labiha. 8 Lahana na oo neb totbaho lam fa bak neà bake bidda. Bak neà bake biddaha labe abo neàna usidume kilali oo duana ab vaedaham. Labi oo vaedaha di labe na oo neb totbaho oo tiga puluh vaeda. Labi na oo neb totbaho oo enam puluh vaeda. Labi na oo neb totbaho seratus vaeda. Labihada.” 9 Lahame im totobe lada lam labihasu fi koadume neàdi Yesusat neo ab vi gagoham. “Um dogoi im aim bak ehena Eho etei lab vameadaha im lam mahate aime vi ozome ozobohudele,” lahame ab vi gagu esuham. 10 Yesusat ba Ahamo aidam di labe Am dam dua belas lamti Aba tu vuzehe dam totbaho lamti ihimo Yesus bake le netàdi Aho amu dat na oo neb gulahada laba vàlu fi koadaha im labe am tombu vi ailo ab gagoham. “Ame im labe am tombu akete?” 11 Lahame vi ailo gagoha Yesusat fa neo ab vi vameadamam. “Alat Ahamo Boehàdateboli dam bake deeli vame Am damali vuusu im vahokedam bak lam etei modi fa gàhàlehe bak lam, ‘Akatihasu modemna modela?’ lahame dam amudate vastehe im lam Em Aiat Eba neha, ‘Eho ame im lam fa uba vameadume umota ozobohudi fi gatedase,’ lahame Eba labi gagohemu Eho im dedateli etei fa uba vameadume fi desi um ab ozobohudedamam bak. Lahana Eho dam giida abo Alam damalehe vab dam laba im vameadam di Eho ahit im totobet fi koadam bak. 12 Eho gi dat ahamda Alat vameadaha im aime fa dam bake ahate vameaidahada labe aba aho fet toeme esuhu im nim fa imbodem bake Eho ahit dam giidate im totobet fi koadam bak. Aham di iube Alat Yesaya bake neha: ‘Ame dam labe Ebe Eho meedam bak lam aam bakta aa. Lahana, “Iho etei aaha im nim akati modemna modela?” laham bak lam ba vi ozome ozobohudedam vabak. Labi laha Em im aim bakta ai. Lahana, “Iho etei aihi im nim akati modemna modela?” laham bak lam ba fetehesu vi ozome ozobohudedam vabak. Labiha labe ame dam labe ba ibi iho faina meedam bak lam voedume seti fa vei neàdedam vab labe Eho ba ame dam laba ba ozahigeàmu vei neàdedam vabak.’ Lahame Yesayat aho aham di iube lab fet toedume esuhu im lam imbodelo Eho dam giida abo Alam damalehe vab dam laba im vameadam di Eho ahit im totobet fi koadam bak,” lahame ab vameadaham. 13 Labi im lada lam vameadume neàdi Yesusat neo ab vi vameadamam. “Làhà uho etei neha, ‘Ame im labe am tombu akete?’ lahame Eba vi ailo gagoho bak Em àvodeha. Eho etei uba im totobe lab fi koadaha bak lam um ozobohudem vabali mode? Uho im lada lam ozobohudehe vab labe Eho ba neo uba im totobe amomoi fi koadam di um ba vi ozome ozobohudem vab taia? 14 Làhà Eho ame dat na oo neb gulaha bak laba vàlu totobet fi koadaha im labe am tombu uba fa ahate vameadase. Neham bak. Ame da na oo neb gulahada lam gi dat Alam im dam bake ahate vou vameatedamda am bak. 15 Labi na oo neb zie tomba biti bumet visoi àhàda lamti dam Alam im nehi aime meedam dam nimti uloho bak. Dam nibe iho Alam im lam aimta ai. Lahana kehàm vaba Iblisit li dam labe iho etei lab aime ahula esuhu im lam li modi ab seteham. Lada lam labiha. 16 Labi na oo neb ke baa bake biteheda lamti dam Alam im nehi aime meedam dam nimti uloho bak. Dam nibe iho Alam im lam aime gi àvodehat deeli tu vuzehe. Lahana abo mahate tu vuzehe vaba gi fota tu vuzehe. Labi iho lab aihi im lam im ahu ad laba modesu teudi omnaoli abehamdehe vab labe naat iba vabidume geàdamna zi lam modeo, iho ame Alam im laba tu vuzehi meedàmu damat iba faki vabidamna modeo, labihasu iba meedam labe iho Ala bake gi fota tuhu labe kehàm vaba ab mu voou seteham. Lada lam labiha. 18 Labi na oo neb aliho debu bak laba biteheda lamti Alam im nehi aime meedam dam nimti uloho bak. Dam nibe iho Alam im deelehat aime ve àdesda. Lahana ba bak niba esdam di, ‘Gi iba modi neàdemna modem vabna ozomo?’ lahame bisi àvodi azi ozoda. Gi ibi iho vi ozome meedamna meedume baleàhà im lamota bisi dihasi azi ozodume meeda. Labi laha im nazoh dualelo àhàki neo azi vi ozome meeda. Labihadam damat modem labe ibi iho amu Alam im aime vaha bak lam gi fa iho ozome meedam im lamti valiheme ab vàhàdeme seteham bak. Abo na oo neb usime bu vali amdehe vaba gi alihosot ot giaiame alai setem bakti uloho bak. Labiha labe Alam im lam ba ab vi ozome modem bieham bak. Lada lam labiha. 20 Labi na oo neb bak neà bake biti usihida lamti dam Alam im nehi aime meedam damti uloho bak. Dam nibe iho Alam im aim di abo gi ahu teudi ule neàt abo va. Abo vaha labe iho iademe ozome ozobohudi meeda. Labi damat ame Alam im lab aime ozobohudi meedam di labe gi nehame veimdi veimdida. Dam totbaho gi koena ozobohudi meeda. Abo na oo neb bak neà bake biddahada labe usidume oo vaedaha di labe oo neb totbaho gi koena tiga puluh vaedaha bak lamti uloho bak. Labi dam totbaho fota duana ozobuhudi meeda. Abo na oo neb bak neà bake biddaha labe usidume oo vaedaha di labe oo neb totbaho gi fota duana enam puluh vaedaha bak lamti uloho bak. Labi laha dam totbaho abo bisi duana ozobohudi meeda. Abo na oo neb bak neà bake biddahada labe usidume oo vaedaha di labe oo neb totbaho abo duana seratus vaedaha bak lamti uloho bak,” lahame Yesusat Aba vi tau meedam dam laba ame im tombu lam ab vameadaham. 21 Labi im lada lam vameadume neàdi Yesusat im totobe meida nidi nim neo faasi ab vi fi koadamam. “Meit vuagat usim di ba boloseh visoi ahoba nom suusum vab taia? Labi laha damat iho im beahuba ad laba vou oli esum vab taia? Gi damat oli aam neà laham bak ozome tom fi haba laba esu fauhaedam bak. 22 Neham bak. Alat Ahamo Boehàdateboli dam bake deeli vame Am damali vuusu im vahokedam bak lam, ‘Akatihasu modemna modela?’ laham bak lam amu fi zeam bitoi tombalehe vab im lam ba gi labihasu vastem bohu modesdam vabak. Abo ame im lam ahate vameadume fi zeam bitoi tombali dam ozobohudem bak ehe bak. 23 Um ahebu im ozobohuna taia? Um dogoi im aim bak ehena Eho etei lab vameadaha im lam mahate aime vi ozome ozobohudele. 24 Eho etei uba lab vahokedaha im lam uho mahate iademe aime vi ozodale. Neham bak. Ebe Eho lab vahokedaha im lam uho aime vi ozo ladam bak lam Alat laha gi ame baket uba ulohodesu neo modi um ozobohudi fi gatedam bak. Lahana gi ba im lada lamota modem vabak. Aho neo vi tau modi fi gateidam bak. 25 Neham bak. Alat Ahamo Boehàdateboli dam bake deeli vame Am damali vuusu im vahokedam bak lam etei modi fa gàhàlem bak lam, ‘Akatihasu modemna modela?’ lahame Eho vahokedam im nim meit iademe ozome vi ozobohudi meedamda lam Alat fa ame da laba vi tau modi aho im duana vi ozobohudedam bak. Lahana Eho etei ame im lam vahokedam bak lam meit ame im lam iademe ozome vi ozobohudi meedam vabda lam abo aho amu koena ozobohudehe bak lam Alat fa faatoi vei seti ba ame da labe vi ozome ozobohudedam vabak,” lahame ab vi vameadaham. 26 Labi im lada lam vameadume neàdi Yesusat im totobe nidi nim neo vi vameada. “Alat Ahamo Boehàdateboli dam bake deeli vame Am damali vuusu im vahokedam bak lam meit Am damali vi taui vi tauidume dualem bak lam, ‘Alat Ahamo meedam bak,’ laham bak lam uho ozobohudem bake Eho ahit im totobe nidi nim neo uba fi koadalo mozo. Da nibe am utoho laba le na oo neb ab gulaham. 27 Labi aibu di lam fa num bake li bitesu idda. Lahana na oo neb lam loubedi usidam di lam, ‘Akati modi usidàla?’ laham bak lam da na oo neb deheda lam ba ozobohu vabak. 28 Bak labet ahamo modi usim bak. Ba ame da labe vi tau modi usim vabak. Amu nasi loube futom bak. Labi ba neo avalem bak. Labi avali neàdi ba neo oo vali budualem bak. 29 Labi oo vali buduali neàdi amdehe bak aahazobe dat naeda labe ozo, ‘Modeme vahem bak fuho,’ lahame ozobohudi am na meedam dam gagome ab modeme vahedamam,” lahame ab vameadaham. 30 Labi im totobe lada lam vameadume neàdi Yesusat dam dua bak laba neo nehame vi vameada. “Alat Eba gagu vimteme Eho Boehàdateboli dam bake deeli vame Em damali vuusu im vahokedam bak lam abo meit Eba tu vuzehi Em damali vi taui vi tauidume dualem bak lam, ‘Akatihasu modem labe dam dualedàla?’ laham bak lam damat ozobohudem bake Eho neo ana im vàlu uba totobet vi fi koadàla? Làhà Eho im nidi nim vouhodase. 31 Bak damat ibi iho bak niba dem ut bisi oo koeda rica abo ut àhàkebu oo am bak. 32 Lahana ame ut oo neb lam iho bak damat im utoho laba tau dezi usim di bisi usime kilalemda ut àhàkebu am bak. Labi kilali aasoaledume neàdi bumet li am aaso bohu lam nutabedehe bak laba ila mome azim meo bak,” lahame im totobe lada lam ab vameadaham. 33 Alat Aho dam bakda modi Am damali vuusu im vahokedam bak lam, “Akatihasu modemna modela?” laham bak lam damat biem bake Yesusat gi im mei im meime totobet dam bake ab vameadaham. Gi damat ibi iho aime ozome ozobohudem neàdata ozome dam bake ab vameadaham. 34 Yesusat dam dua bak laba im vahokedam di lam aho ba im totobet fi koadaha vaba alia vahokedam vabak. Lahana Amti Aba vi tau meedam damti vazisi dam dua bak lam voedume dam ihimo tadem di ame im totobe labe am tombu lam Aho Am dam laba vameadume ab ozobohudi fi gatedamam. 35 Labi ame digat dimatahe zoho labe Yesusat Aba vi tau meedam dam laba ab gagoham. “Imo itea biou tot iuba lase.” 36 Làhàmu Aba vi tau meedam dam labe dam duada zi vou esmozi vi buadume Yesusat nusuhu ihe laba ab vi ziddume biodamam. Labi ame di lam dam duada zi totbaho labe laha neo ihe ibida ziddume vaitesu ba vi bioda. 37 Biodam di labe Yesus gi ihe tahabu zoho laba bitesu na ohu vi taasumna vi taasu idda. Bisu iddam di labe nutabe fai iubet li itea laba modi fi tauledume bubaholedam labe ihe laba tom foadume vao ihe laba zizi noziali tezeo vabali dam folem bak ab fuham. Làhàmu Aba vi tau meedam dam labe ihe zoho laba fi ai Yesus bake ukeme ab gagoham. “Guru oa, Om iba aame faobekem vaba? Im ihe vao noai im ab folelo modemam bak.” 39 Làhàmu Yesusat keesi usai nutabe fai lamti vao fi tauledume bubaholedamna lamti, “Setele,” lahame mali gagoha ab bagavai seteham. 40 Labi seti neàdi Yesusat Aba vi tau meedam dam laba ab gagoham. “Um akati bisi iedi modela? Um Eba akati mahate tu vuzehem vaba mode?” 41 Lahame labi gagoha ame dam labe Yesusat lab modehe bak lam aame iedi modem faidi ab ot gagoidamam. “Aa làhà! Uho ozom, Da nim ana Dàt mode? Am gi nutabeti vao fi tauledume bubaholedamna lamti, ‘Setele,’ lahame gagom di gi modi uledi setem meo Dàt modem bak,” lahame ab ot gagoidaham.

Markus 5

1 Labi Yesus Aba vi tau meedam dam lamti iho Itea Galilea laba neo biodume bak ee gagom Gerasa laba fusi ab zituham. 2 Labi zitu neàdi Yesus Aho usi aaha dat setan zi duana oedam ahe damat am si fa vou li bes botehà niz labe am anekehà ahim gia. Labi nao ahim gia. Lahamnàme ame setan zi labe veimai meolehe labe aho ame bes lam ahamo tet ukbodume koei vahedam ke bumat zi laba itaidume azietem meot. Ba dam ahe damat vi si ame bes botehà niz labe fa neo vi giam biehe bak. 5 Ame bak lam meedam di nehadam bak. Digad diat modeo, aibu diat modeo, gi ahusobuli bak vabili nohu sibu bake le biti geàda. Labi ke eimeoda visoi fa am soa it beome vasea bozieda. Labi ba neo koei vahedam ke bumat zi laba le gi ame baket meeda. Labihada. 6 Labihadam dàt aho Yesusam alihi gi bak bohulat aame Yesus bake emoeme netàdi Yesusat avaesdam bak laba ogomasu ahit bake ab biteham. Labi ogomasu biti modeha Yesus fa ame setan laba ab gagoham. “Om taho futoi da nim vou esmozi itale,” lahame labi gagoha ame da labe dae buduana Yesus bake ab geme vameadamam. “Yesus abo Ala Bisi Feàda labe Am Adat oa, meit ahamo modem im akati Oho li modi faatolo modela? Oho nasi Ala bake gagole. ‘Oho ba iba beodume modi vàhàdem kaio,’ laham bak lam ohu vam bakti ulohona gagu vàmadi esule.” 9 Lahame labi gagoha Yesusat fa gago, “Lahana om ee Eba gagomale.” Lahahat ame da labe fa gago, “Em ee gagom Legion. Im setan zi duana ame da nibe am ahu oedume veimaha bake labihasu taluhu bake,” lahame gagoda. 10 Ame setan zi labe ozoha, “Yesusat iba gagu futodume ibi bak nim vou esmozi ilidale,” lahame gagu oudam bak labna zohàme iedi, “Iba bak mei bake a oudamule,” lahame tauleda. 11 Labi ame di labe aaha doho fi ho zi gi netà bak nom otesuhu bak laba dozeadume bakbe àda. 12 Làhàmu ame setan zi nibe Yesus bake neo ab gagodamam. “Làhà Oho iba da nim mali gagu futodume ilidalo modem di im fa doho fi ho zi labe im ahu laba fa oedume veimadam neào?” 13 Lahame labi tauledume gagoha Yesusat uledi ame setan zi laba gagu futodume ilidume ame doho fi ho labe im ahu laba ab oedume veimadaham. Labi modeha ame doho zi lam bak nom otesuhu bak labet nom itaome valo nom ilu ab tezi elodaham. Abo ame doho dua ribu ehena ozomom bak. Lahana ab elodaham. 14 Labi modeha dam doho fi ho vou aasdam dam labe aaha im doho valo tezi elodaha bak aahemu iedi ab iliham. Ilime le im num debu ibidati bàhàgo bake numaedaha damti ab vou fi det ladamam. Lab vou fi det ladam labe dam laba azihi dam labe ame im lab modehe bak aalo ab valadamam. 15 Valadam labe Yesus bake li aaha dat setan zi amu oedume veimahada lam gi Yesusam naba modesdam laba sue fa dusu fa im ozobohudi aidamna aahemu àvodi ab iedeham. 16 Dam na aahada nibe Yesusat ame setan zi laba gagu futodume ilidaha bak lamti fa doho fi ho zi laba veimadume valo teddaha bak lamti labihasu fa dam iube lehe dam laba vou duzu gut vameada. 17 Labi vameadume modeha Gerasa bak laba azihi dam labe iho dae vazisi Yesus bake ab gagoham. “Om iba a tau azimule. Om taho fa lale.” 18 Lahame labi ootedàmu Yesusat fa biolo iheba ab ziham. Zisi fa lasome modeha ame setan zi futodume ilidahada labe Yesus bake neha, “Em Oba tause,” lahame vi tauleda. 19 Lahana Yesusat fa mali vi gago, “Obo oho azihi bak laba fa le ame dam laba Alat oba aam faimu im neà bak tauhu bak lam vameadale.” 20 Làhàmu ame da labe bak lada vou esmozi fa neo Dekapolis bak abo Num Debu Bak Sepuluh laba le Yesus Aba modehe im feàna lam ab vou vameatedume uloholeham. Labi modeha dam ahebu ab aime àvodeham. 21 Labi Yesus Gerasa bak vou esmozi fa Itea Galilea labe Aba Aho amu lehe tot iuba fa ab bioham. Labi fa biou zitu aaha dam zi labe Yesusat fa lem bake li dozeadume vou faodamna ab li zituham. 22 Labi Aho laba li zitu modeha dat meida ee, “Yairus,” lahamda labe ab lefuham. Ame da Yairus lam Yahudi dam labe ibi iho fi hasi bakamta vahi Alat vameadaha im ahamda dogoit aidam bakti im meiti meedam num laba vou aasdamda meida am. Lahamda labe ame bak laba li vi tau doudamna modehe labe Yesusam alihi aahemu, “Yesus abo feàte,” lahame ahu adat iedi Yesusam naba modesdam laba netàdi ogomasu ahit bake ab biteham. 23 Ogomasu biti bisteat tauledam labe gagoda. “Aia, em adnamat abo duana gaili elolo vabili bisdalo. Om eba tau em num bake le Om anekehàt ulasi fà aodese.” 24 Làhàmu Yesusat uledi Aba vi tau meedam damti vahi ab tau ladamam. Labi ladam di labe gi dam duali bak kekesi gi mei soat osiddam labe lada. 25 Labihadam di labe nam abo bako itaha bak bohu vuusdume dua belas tahun fuhu nam nibe laha ba duzu tau vueda. 26 Ame nam labe abo bako itaha bak bohu vuusdàmu dokter iudu iuba vou le doi lu vabiedaha neàdem bie. Labi neo dokter iudu iuba neo vou le doi lu vabiedaha neàdem bie. Gi labihadume am doiti ahebu ab teoledaham. Vedi gi fa vasea duali feà bak ab fuham. 27 Labihadam namet Yesusat amu mei modi fa neàdedam bak aime ozobohudehe labe vi ozo, “Eho gi Yesusam sue sona ahoba dusuhuda vi ulameam em fa neàdem bak,” lahame ozome lehe labe Yesusam ohus tote aa vi vuli Am sue laba ab vi ulaham. 29 Labi vi ulaha am bako itaha bak bohu vuusdam bak lam fa vaitoi ab neàdeham. Labi nam labe ahamo it ozo, “Em geàdam bak ab neàdehame?” lahame ab ozoham. 30 Labi ame nam nibe Yesusam sue ulaha di labe Yesusat ab it ozoham. “Eho meia modi vizi mei neàdemna futoho,” laham bak lam Ahamo naedat ozobohudi it vaktesi dam duadate ab gagoham. “Eba amat li Em sue ulahela?” 31 Lahahat Aba vi tau meedam dam labe fa gago, “Mm, dam dua labe Oba ulam bak tadehe taia? Oho akatiham bake iba vi ailo labi gagohela?” 32 Lahahat Yesusat geàmu, “Amat Eba ulahela?” lahame dam zi niba it nabida. 33 It nabidume modeha ame nam nibe Yesusat aba modi fa neàdehe bak lam aho naedat it ozome ozobohudehemu ahate fi ozi li Yesusat naba modesdam laba ogomasu biti faa dododam labe aba aho modehe bak lam fa ahate ab vameadamam. 34 Labi vameadume neàdi Yesusat nam niba ab gagoham. “Oi, oho nehame ozoho labe, ‘Yesusat eba modi fa neàdem bak,’ laham bak lam oho nasi tu vuzehehe labe om fa ab neàdeham bak. Ame bako itaha bak bohu vuusdam bak lam ba oba modi vabidume geàdam kaio. Om fa Alati vahehemu obo bake nasi lale,” lahame ab gagoham. 35 Labi Yesus im lada lam vameadam lahasuhu di labe ame da Yairus abo Yahudi damat ihimo fi hasi meedam num laba vou aasdamda labe am dam totbaho labe doait ab leham. Labi li Yairus bake ab gagoham. “Om adnamat eloho. Ba Guru bake a gagu vou lemule. Gi feidate.” 36 Lahana Yesusat ame dam labe iho lab gagoho bak lam gi ailahigeàmu ozahit fa Yairus bake ab gagoham. “A àvodi vi ozodamule. Om gi ahu teudi Eba tu vuzehi faode.” 37 Lahame gagu neàdi ozahit ladam labe dam duada zi lam Aba vi tauidume Yairusam numa lam bak mali gi Aba vi tau meedam dam làtela lamota ihimo tau ab laham. Petrus ame. Yakobus ame. Labi am vahada Yohanes ame. Labihasu Aba vi tau ladume Yairusam num bake ab vou le vou fuham. 38 Labi vou fusi bàhàgo laba duzu Yesusat vi aaha damat nimidume medaom labe dahobuedam bak ab aaham. 39 Làhàmu Yesusat ame num laba oli dam bake ab gagoham. “Um akati bisi nimidume medaom labe dahobuedàla? Um data nim elom kaio. Gi iddalo.” 40 Lahame labi gagoha ame dam labe im koei nim eloho bak ozobohu labe gi Yesus bake vi igeame ab tozodamam. Lahana Yesusat gi ozahigeàmu dam duada zi fa gagome futodume neàdi gi ame koei labe am oiti am aiti labi Aba vi tau meedam dam làtela lamti ihimo num oula koei ousdamda laba ab vou oleham. 41 Labi vou oli koei laba netàdi am anekehà vuu vousai dae Abada Aram daet, “Talita kum,” lahame ab gagoham. “Ednamat oa, usale,” lahame ab gagoham. 42 Lahame labi gagoha adnamat nim it oazi lahana fa leheilahit ahedi usai iehe lai iehe laidamam. Ame data dua belas tahun fuhuna elohona Yesusat etei modi fa ahedehemu dam ahebu aame àvodi feà bak ab fuham. 43 Làhàmu Yesus ame adnamat labe am aiti am oiti mali gago, “Etei modehe im nim, ‘Eho modeho,’ laham bak lam meia a le fi demule,” lahame mali ab vi gagu esuham. Labi fa am aiti am oiti gago, “Um adnamat niba na àmnavat lu àle,” lahame ab gagoham.

Markus 6

1 Labi Yesus Aba vi tau meedam dam lamti iho bak lada lam vou esmozi fa Am budualehe num debu Nazaret laba fa ab laham. 2 Laba fa le aidume hari Sabat abo Yahudi dam labe ibi iho gi azibe im digat neo fuhemu Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli Yesusat ab vahokedamam. Labi oli vahokedume modeha Aho lab vahokedam dam duada labe iho ame im lam aidume modeha ab àvodeham. “Aa làhà! Da labe Aho etei iba vahokedaha im lam Aba amat adi diat modi vizehela? Amat adi diat Aba modi vizi na damat ihimo modem biem im feàna Aho meedàla? 3 Ne, da lam gi im dam bakdati uloho taia? Am gi ut gaheba vame modeme nazohaedamda taia? Labi Am faaha oi Maria gi imti vahi azihi nam neam taia? Labi Am vahada zi gi ahebu neam tai. Abo Yakobusti Yosesti Yudasti Simonti ahebu neam tai. Labi laha Am nà zi gi neam tai,” lahame tozome vameadume Yesus bake tum bak ab moham. 4 Làhàmu Yesusat fa ab gagoham. “Dat Alat vameadaha im aime fa dam bake ahate vameaidahada labe aho bak mei bake lam dita ame dam labe ahu adat iedi aho lab vou le vahokedaha im lam ule neàt gut ve aba vou baedam labe am im aime meedam meo bak. Lahana aho am vou budualehe bak modeo, am dam zoho bake modeo, dat am namti datati modeo, aho fa le am dam laba im vahokedam di am dam labe gi ailahigeàmodam meo bak. Ba ahu adat iedi aho lab li vahokedaha im lam aime aba vou baedam vabak,” lahame ab gagoham. 5 Yesus Am budualehe bak abo Nazaret laba azim dam labe Aba tu vuzehi meedaha vaba mu voohemu Aho ba ame bak laba na damat ihimo modem biem im feàna mahate duana meedaha vabak. Am gi dam faidi nisileheda koe zoho laba ulasi neàdeda. Bisi dua bak modem kai. 6 Ame bak laba azim dam lam Aba tu vuzehem mohemu Am ab àvodeham. Labi bak Abada vou esmozi num debu amomoi bake ab laham. Num debu meida iuba le dam bake vahokeda. Labi num debu iudu iuba le dam bake neo vahokeda. Labihada. 7 Labi Aho ba neo Aba vi tau meedam dam dua belas lam gagome fa Aba li bakamta ab vaheham. Bakamta vahi neàdehezobe Yesusat Aho mei ahu oli veimam setan mei setan mei laba gagu futodume ilidam bak lam fa Am dam dua belas laba modi vizi ab im dedamaleham. Labi im dedamali neàdehezobe ame dam dua belas lam gagu faheme dam ab behàsdi behàsdiaham. 8 Labi behàsdi behàsdiame neàdi dam gagu faheme olulo modem di labe Yesusat im nehasu fet ab vi vameadamam. “Uho etei lalo modem di um nazoh ahebu niba vaheme gi saemea ladale. Gi um odoamsota vuusu laiale. Um na àmnati um nazoh vadum dekti doiti a vou lamule. 9 Gi um naba duhu sepatu lamti sue ubu uho sona soa ada duhuda lamti vou lam neàte. Lahana sue sona ada dusumna gi esuhuda a vou lamule. 10 Labi uho num debu mei iuba le lafusidam di labe aimeam dam labe uho vou laha im lam aime uledi num deda meida labe nehameam, ‘Uho num ebeda niba azim neàte,’ lahameam làhà gi num obo oho azimda lamota azile. A num iudu iuba le i. Num iudu iuba le i. A labihadamule. Gi num ubu uho azimda lamota azibe neo num debu amomoi bake le ame baket mode. Lahadale. 11 Laham vabameam uho num debu mei iuba le lafusidam di labe aimeam dam labe uho vou laha im lamti um soti moudume im bak malemeam làhà uho ame num debu bak lam vou esmozi lale. Vou esmozi lalo modem di labe um naba bak itabe fau foamome esmozi lale. Labi dam labe vi aame nehi ozom bak. ‘Aa làhà! Iho dam labe vou lehe im aihi vabake im bak itabe fau foamohe? Labihalahit Alat iba beoe taia?’ laham bak vi ozom bak am tame,” lahame vi vameadume faheme ab oudaham. 12 Labihàmu dam dua belas lam faheme behàsdi behàsdiame num debu iudu iuba olu. Labi num debu iudu iuba neo olu. Labihadume dam labe Yesusat gagu oluhu im lam ab vou vameatedamam. “Uho faina meedam bak lam nasi voedume fa ahu neà bak vàmadi meedale,” lahame dam bake vou vameateda. 13 Labi ame di labe laha setan mei setan mei laba gagu futodume ilida. Labi laha dam faidi nisileheda zi laba iho zaitun oo vaksa minyaklehena lam dam laba noime tom gagu modi fa neàdeda. Gi bak ahebu labihateda. 14 Labihadam di labe Yesus Aba vi tau meedam dam lamti iho im feàna lab meedaha im lam meit aime fa meia vamea. Meit aime fa meia vamea. Labihadume Yesus elaidam datelehemu Galilea bake vuusdam Boehàda Herodes Antipas laha ab vi aiham. Damat nehasu otesi otesidam bak ab vi aiham. Dam totbaho labe vedi vabili nehame vameada, “Yohanes Mei Vuu Valo Baptisleiamda labe fat ahedehe labe Alat aba modi vizi na damat ihimo modem biem im feàna lam meeda moio?” lahame vabi vameada. 15 Labi dam totbahot laha vedi vabili nehame vameada. “Dat ahamda Alat vameadaha im aime fa dam bake ahate vameaidahada Elia labe fa nom olu ame im lam meedam moio?” lahame vabi vameada. Labi dam totbahot laha vedi vabili nehame vameada. “Dat ahamda Alat vameadaha im aime fa dam bake ahate vameaidahada meida lamti uloholi ame im lam meedam moio?” lahame vabi vameada. 16 Labihasu otesi otesidam labe Herodes laha ab vi aime gagoham. “Vabo. Eho ozoha, iho etei lab aidam im lam gi dat eho amu dam gagome bio vaitoi oteheda Yohanes Mei Vuu Valo Baptisleiamda labe aho fat ahedi usai ame im lam meedam bak,” lahame ab gagoham. 17 Ame Boehàda Herodesat lab gagoho bak lam aho amu nehi modehe im nim ehe labe aho vi ozome labi gagoho bak. Amu di iube Boehàda Herodesat aho aba meida Filipus labe am nam Herodias ab vaham. Labihahemu Yohanesat im lam ozobohudi Herodes bake neha, “Obo meida Filipusam nam oho vaha bak lam om git modeho. Ne, Musat aham di iube Alat aba vameadaha im nehasu toeme fi hasi esuhu bak. ‘Obo meida labe am nam a vamule,’ lahame toeme fi hasi esuhuna lam om akati vi modehe vaba voou fa obo meida labe am nam fa vahela?” lahame Herodes bake dihasi im vahokeda. Labi neo dihasi im vahokeda. Lahada. Labihadume modeha Herodesat faki am meo dam gagome Yohanes si anekehà ahim giame sel ab ousuham. 19 Ame di labe Herodias laha Yohanes bake faki ahu zoho beoho labe, “Yohanes otese,” lahame modeha am dàt mali gi vou faoda. 20 Am dat Herodes nehi vi ozome mali, “Alat Yohanes bake, ‘Im Aba Aho gagohoda meedase,’ lahame fi hasi im vamdesu meedamda am bak,” laham bak ozobohu labe am ahu adat iedi, “Yohanes abo feàte,” lahame Yohanes bake vou baedam labe otem biehemu gi am meo dam gagome ame sel laba vou aasda. Labi Yohanesat aho Alat aba vameadume oluhu im lam Herodes bake vahokedam di lam aho ozobohudem biemnàme ozahit ame im lam neo vi ailo àhàki vou faodam meot. 21 Labi ba digat meida iube Herodes am faaha digat neo fuhemu, “Dam vahi na àdase,” lahame na àlo modem di labe aho dam eeda zi nehamda gagome leda. Galilea dam vuusdamda eeda zi ame. Labi am meo dam labe im boehàda zi ame. Labi am dam eeda totbaho zi ame. Labihasu vazisi na ab àdamam. 22 Labi na vazisi àdam di labe Herodiasam adnamat ame dam labe iho avaesdam laba le duzu ab etoedamam. Etoedume modeha Herodes labe aho gagome lehe dam ziti ame nam labe etoedam bak aahemu im ahu gelevai ab deeli vàhàdeham. Labihàmu Boehàda Herodes labe aho voadam nam soao laba ab gagoham. “Oho etei lab etoedaha bak lam em aaha abo deeleho. Oho ozom, eho oba ana loela? Oho valo modemna lam gagomeam eho oba ame na lom bak. 23 Abo em nazoh feà ahebu fàsi totbaho oba lo tame. Abo gi eho vuusdam dam lam ahebu fàsi totbaho oba lu om damale tame,” lahame gagu vàmadi ohu ab vaham. 24 Labi ame nam soao labe am aiat labi gagohemu oi Herodias bake le ab gagoham. “Oi, ai eho etoehe bake deeli na lolo gagohona oho ozom, eho ai oho ba vahadate ana gagu vaela?” Lahahat am oiat fa ab gagoham, “Oho gi ai bake le gagome aho fà am meo dam gagu Yohanes Mei Vuu Valo Baptisleiamda labe am bio vaitoi am ohubuta fi lihibabu esu eba vou li fi le. Labi eho aame ozo, ‘Ame da otehe?’ laham bak em aame ozobuhudese. Oho labihasu le gagole.” 25 Lahame labi gagohemu ame nam soao labe fa taho emoeme am ai voamdate li am oiat aba gagoho im lam ab gagoham. “Oho abo taho etei nibe om meo dam gagu Yohanes Mei Vuu Valo Baptisleiamda labe am bio vaitoi am ohubuta fi lihibabu esu eba fa vou lele. Labi, ‘Am oteho,’ laham bak em aase.” 26 Lahame labi gagu modeha Herodes am ahu faidi feà bak ab fuham. “Em akati dam zi nim vou faodahit gagu vàmadi ohu vahela? Em gi feidam vabate. Eho nam soao niba lab gagoho bak lam ba voom vabiem bak.” 27 Lahame ozoha vabamu aho mei otidamda laba gago, “Oho Yohanes ousdam sel laba le Yohanes am bio vaitoi am ohubuta fi lihiba esu fa vou lele,” lahame gagu ab oluham. Làhàmu meo damat le oli Yohanes si am bio ab vaitoham. Labi vaitoi am ohubuta fi lihibabu esu fa vou li ame nam soao laba ab loham. Labi aho ve am oi bake vou le ab fi ham. 29 Labi dam Yohanesat aba vi tau meedam dam labe aiha Yohanes otehe bak aihemu sel laba le Yohanes koeiso lam ve vou futoi vou le koei esum ke bumat laba ab vou oli esuham 30 Labi Yesusat Aho gagu olu Am im vameadume esmozi laiam dam dua belas labe iho iuba le mode iuba le mode labihadume neàdi fa li bakamta vahi iho iuba le meedaha im lamti iho iuba le dam bake vahokedaha im lamti ahebu Yesus bake li ab vameadaham. 31 Labi im lam vameadume neàdi modeha dam giida duali feà bak fusi meit Yesus bake li im abada modeme neàdi fa la. Meit li im abada modeme neàdi fa la. Labihadume modeha Yesus Aba vi tau meedam damti iho ba na koena zagum vabamu Yesus Am dam dua belas laba ab gagoham. “Um Eba tau ihimo dam vabak nutabe bak iuba le vaitesu esdase.” 32 Lahame labi gagohemu Yesus Am damti iheba ziddume dam vaba alim bak laba ab ladamam. 33 Lahana ame bak labe aba zoho num debu meiti num debu meiti laham dam dua bak labe vi aaha Yesus Am damti ihe vihitoi ladam bak vi aahemu vedi, “Dam ihimo nasi emoeme lafuse,” lahame naot ab vi vuladamam. Labi vi vuladume Yesus Am damti iho le zitum bak laba doait ab le vou faodamam. Labi Yesus laba zitu aaha dam dua bak vuli Aba vou foadam bak aahemu gi domba na vou aasdamda vabalehe bakti ulohona abo ame dam laba vuusdamda vabali naat vabidam labe, “Bisi im vamdesu meedam bak akete?” lahame gi ladehena dauhali meedam bak aahemu aam faimu faobekesi im mei im mei lahadume ab vahokedamam. 35 Labi vahokedume modeha ab disilo meedamam. Làhàmu Aba vi tau meedam dam labe Aba li ab gagoham. “Disihi bak. Im bak nim dam vaba alim baket modem bak. 36 Laham bake Ai Oho dam duada zi niba gagome fa dam sii modealaha bak iuba oudume dam iho àmna fà le doit vame àdase. Lam bisi neà bak am tame.” 37 Lahame labi gagoha Yesusat fa ab gagoham. “Gi na àmna ubuda dam zi laba lodume àdameta.” Lahahat Am dam labe fa ab vi gagoham. “Aa! Dam zi feà nimohona iho na ake vame ve lu àdàla? Dam bisi feà labe abo meit na modeme ala delapan foli vam doi lamohoda vou le na àmna vame vou li lodam labe uloholem bak. Abo gi ame doi oona perak dua ratus lamohoda mei bake vou le na àmna ot loiame ve fa vou li dam niba lome àm bake Oho labi ozome gagoheo?” 38 Lahame labi gagoha Yesusat fa ab vi ailo gagoham. “Uho etei vou lehe dek laba le nabime aama. Rotibu amamohela?” Làhàmu Am dam labe le aame neàdi fa li gago, “Nim gi rotibu auohole. Labi bohe gi behàsu. Labihasu vasdam bak.” 39 Lahahat Yesusat fa Aba vi tau meedam dam laba ab gagoham. “Uho dam zi nim gagome lima puluh iuba nusu lima puluh iuba nusu. Labi dam totbaho neo gagome seratus iuba nusu seratus iuba nusu. Labihadale,” lahame vameadume neàdi ame baket ab modeham. 41 Labi dam nusualadume neàdi Yesusat ame rotibu auohole lamti bohe behàsu lamti vame vuusualame neàdi ohu vousai tom avaesu Am ai aabo bake, “Neàte,” lahame tom gagu neàdi ame rotibu auohole lam fahedume fa Aba vi tau meedam dam laba lodume iho fa ot vai vame dam duada zi laba ab lodume uloheleham. Labi neo bohe lam laha gi ame baket meeda. Labihadume ab uloholeham. 42 Labi lodume uloholehezobe damat ab àdamam. Àdume modeha dam zi lam dedebuli na zoho gi vaheme esu. 43 Làhàmu Aba vi tau meedam dam labe damat lab àme dedehemu vahehena zoho lam fa vi ateti atetidume boloseh vahedume modeha boloseh dua belas ab bektoham. 44 Dam etei laba nusualadume na àhà dam lam dam aabota dem di abo lima ribu fuhu bak. 45 Labi gi etei na àme neàdi Yesusat Aba vi tau meedam dam laba ab gagoham. “Um nasi fa iheba ziddume dumam tot Betsaida laba biole. Em ba vule tame,” lahame gagu ab oluham. Labi dam lada lam gagu olu neàdi neo dam duada zi lam neo gagome im num bake neo ab oudaham. 46 Labi oudume neàdi Yesus Ahamo Am Ai Ala bake tom gagom bak ozome bak buzoho bake ab laiteham. 47 Laba laisi Ala bake tom gagodume modeha gi ab aibuleham. Ame aibu di lam Yesus gi Ahamo tousda. Labi Aho bak bohulat nom vi aaha Aba vi tau meedam dam labe gi amu ihe vihitoi ladume itea tombu fusi modeha nutabe fai iubet li vao baho iho lam bak labet gut foadam labe ihe ab oke okedamam. Labi damat, “Taho ibi tum bake fuse,” lahame tet vaedam bak ab vi aaham. Ame di lam dihalo vabali jam tiga fusi jam enam fuhu vab di labe meeda. Labihadam aibu zoho labet Yesusat vulezi itea ahoba laba duzu duzuidume dam ihe bake ab vi vuladamam. Labi vi vuladume dam ihe vafozesome modeha damat aame iedi ab geham. “Na aibu nim Nomaida Basit iba nohiseo mode taia?” Lahame labi geha Yesusat gi àvodehat fa ab gagoham. “Um a iedi ahu faidi bisi vi ozodamule. Eho mozo.” 51 Lahame labi gagu neàdi iheba fa vi zisi modeha nutabe fai lamti vao foadam bak lamti bagavai ab seteham. Labi modeha Aba vi tau meedam dam labe ab àvodi feà bak ab fuham. 52 Ame dam labe iho amu Yesusat rotibu auohole lam modi zi dualehe bak aame àvodehenàme, “Yesus amat modela?” laham bak lam biem lahasuhu bak. Dam labe mahate vi ozom vaba im ozom bak zohobuli meedam labe labihaha bak. 53 Labi neo biodume bak ee gagom Genesaret laba lafusi ab zituham. 54 Labi zitu usdume modeha dam bak dedamat aaha, “Dat etei iba leheda nim Yesusat mode?” laham bak lam aame ozobohudi dam num debu bak netàda lam ahebu ab vou fi det ladume uloholeham. Labi damat aimeam, “Yesus iuba laho,” laham bak aim di dam ahe damat dam gaileheda ileba vaheme ame bak laba vi vou vulada. “Yesus fa iuba laho,” laham di neo laba vi vou vulada. Lahada. 56 Labi Yesusat bak iuba lào? Bak iuba lào? Abo num debu bak modeo? Sii bak modeo? Gi bàhàgo bak modeo? Laham bak laba lam di dam ahe damat aime ozo, “Yesusat im dam gaileheda nim ulasi modi fa neàdedase,” laham bake vi ozome fa im dam gaileheda visomoame damat na ot loiam bak tomba laba oumaheda. Labi ame lab gailehe dam zi labe Yesusat lebohotelo modem di labe gi nehame gut tauleda, “Om sue sona ahoba dusuhuda labe am nao bobusbe zoho labe am aha obe lam iho vi ulase,” lahame Yesus bake vi tauleda. Labi dam gaileheda ahebu ame sue gi koena vi ulaha modi fa ab neàdedaham.

Markus 7

1 Labi ba neo digat meida labe Farisi dam totbaho lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi totbaho lamti vazisi kota Yerusalem labe lehe labe li aaha Yesus Aba vi tau meedam dam totbaho lamti iho na àdam di im Yahudi damat ibi iho fi hasi modem baket modehe vaba abo anekehà valo ekeme itatadume neàdi na àdam vaba gi labihasu na àdam bak ab aaham. 3 Ame Farisi dam lam abo Yahudi dam ahebu iho na àm di ba im anekehà valo ekeme itatam vaba alia na àdam vabak. Ame bak lam gi dam ahamda ihimo ostame vi tau fi hasi vou mode usehe im lam im Yahudi dam bake vuusu im vameame faheme modiam dam busaoda bada zi nibe iho fa vame meedume baleàhà im meida am bak. 4 Labi dam labe iho na ot loidam bak laba le fa lem di na àlo modem di vedi dam ahamda labe ibi iho modem im vi ozome anekehà vao nom ekeme itatame neàdi afoezobe ba na àdam bak. Abo gi dam ahamda ibi iho fi hasi vou mode usehe im lada lamota meedam vabak. Abo im asa na vahelo modem di modeo, mokzoho vao noai udelo modem di modeo, fi lihiba na vaheme àlo modem di modeo, abo ame nazoh lam ahebu valo ekeme itatame neàdi ame nazoh lam ve ame im modem bak. 5 Ame eeda zi labe labihasu meedam damat modem labe Yesus bake vi ailo ab gagoham. “Guru oa, dam ahamda ibi iho fi hasi vou mode usehe im lam im Yahudi dam bake vuusu im vameame faheme modiam dam busaoda bada zi nibe iho fa vame ibi iho ozoho bak vi tauidume dualehe im lam akati modi Oba vi tau meedam dam labe tau modem vaba mode? Akati modi na àlo modem di ibi iho anekehà valo ekeme itatame neàdi na àiam baket modem vaba vedi anekehà gi labihasu na àdam damat modela?” 6 Lahame labi gagoha Yesusat fa ab vi gagoham. “Um gi ahobat neàdi meedam damat modem bak. Dat ahamda Alat vameadaha im aime fa dam bake ahate vameaidahada Yesaya labe aba aho aham di iube fet toeme esuhu Alam im meida nim gi um dam badate vàlu gagoho imot modem bak. ‘Alat neha, “Ame Israel dam nim Em ee vousai Eba vou baedam di gi im ahat ahamo vou baeda. Ba ame dam labe im ahulat vi tau Eba deelem vabak. 7 Ame dam nibe iho, ‘Em abo feàte,’ lahame Eba vou baedam di gi modeme vanamai voom damat modem bak. Labi laha ibi iho lab vahokedam im lam ba Ebe Eho gagu fi hasi esuhu im vahokedam vaba vedi fa gi dam bakda labe ihimo ozome gagu fi hasi esuhu im vahokedam damat modem bak.” ’ Lahame Yesayat aho aham di iube lab fet gagu vàmadi esuhu bak labe imbodi uho ab meedamam bak. 8 Um gi Alat aba aho gagu fi hasi esuhu im lam uho modehe vaba vooho bak. Uho vedi fa gi bak damat ibi iho fi hasi vou mode usehe im lam fa vame meedume baleài tombuli meedam damat modem bak.” 9 Lahame labi gagu neàdi neo vi vameada. “Uho vedi neha, ‘Imo gi dam ahamda labe ibi iho fi hasi vou mode usehe im lam im dam busaoda eeda labe iho fa vame meedume baleàhà im lam iho fa vi meedase,’ lahame im lada lam modi fa tombuli keàtet meedam labe fa Alat Aba Aho amu lab gagu fi hasi esuhu im lam modi fa obedi voou setem damat modem bak. 10 Nehaha bak. Musat aham di iube Alat aba gagu fi hasi esuhu im nim ot vai fa dam bake nehasu vameadaha bak. ‘Um ai bake modeo, um oi bake modeo, ahu adat iedi uba gagoho im laba vuzehi meedale.’ Labi im meida neha: ‘Meit am ai modeo, am oi modeo, faki, “Seee. Taho elole,” lahame feàtàme vi uloome gagomeam làhà meit ame da laba fa neo oteme vataum bak.’ 11 Lahame aham di iube Alat Musat bake gagu fi hasi esuhu im lam uho akati meedam vaba vazidazehela? Uho vedi fa nehi ozome vahokedam damat modem bak. Uho meit am ai bake modeo, am oi bake modeo, nehi gagomeam, ‘Ai oa, oi oa, em na nim oba lom neàte. Lahana eho amu Ala bake lolo gagu vàmadi fi hasi esuhu labe oba lom vabi mozo,’ lahame ame da labe labi gagomeam làhà uho vedi ame da labe aho lab gagoho bak laba, ‘Ahole modeho,’ lahame vi gagodam damat modem bak. 12 Uho labi vi gagodam labe ame da labe am ai bake modeo, am oi bake modeo, ahu adat iedi vou baedam vaba, ‘Gi voom neàte,’ lahame vi vahokedam damat modem bak. 13 Um gi um tai ahamda labe ibi iho fi hasi vou mode usehe im lam um dam bada nibe fa vame meedume tombuli, ‘Iho ame im meedase,’ lahame meedam damat modem bak. Uho labihasu meedam labet um gi Alat Aba Aho amu lab gagu fi hasi esuhu im lam ab modi voou seteham bak. Uho gi im lada lamota meedaha vabak. Ubu uho git modi baleàhà im amomoi laha vi tau meedam damat modem bak,” lahame ab vameadaham. 14 Labi im lada lam vameadume neàdi Yesusat neo dam dua bak laba, “Aba lele,” lahame gagodume li netàdi ab vi vameadamam. “Um ahu iademe vi ozodume ozobohudem bake Eho etei uba vameadalo modem im nidi nim mahate iademe aidale. 15 Um Yahudi dam busaoda labe ubu uho nehi vahokedam im nim Alat ba uledem vabak. Uho vedi iho im ahat na ve àm bak labet modi it vàhàdeme faidi fi hasi modesda tiba. Lahana Alat ozomta ba im ahat na àm bak labet modi im it vàhàdeme faidi fi hasi modesdam vabak. Gi im ahat futom im labet modi im vàhàdeme faidedam bak. [ 16 Um dogoi ehena mahate aime vi ozobohudedume ozobohudele.”] 17 Lahame Yesusat ame im lam vameadume neàdi dam dua bak vou esmozi Aba vi tau meedam dam lamti ihimo numa ab le oedaham. Oedume neàdi Aba vi tau meedam dam labe Yesus bake vi ailo ab gagoham. “Oho etei na àm bake lab vàlu im totobet fi koadaha bak lam am tombu akete?” 18 Lahahat Yesusat fa ab gagoham. “Oo, um vi ozome ozobohudem vaba? Neha taia? Na àmna gi ahat àme gi zulu esum bak. Labi vou faobe ba haeli vieme setem bak. Bak labet modi meia it vàhàdeme faidi fi hasi modesdam vabak. (Yesus etei labi gagohemu iho ozom, ba na àmna ahebu fi hamda vabak. Gi ahebu àm neàna tadehe bak.) 20 Lahana ibi iho im ahulat vi ozome neàdi futodam im lam iba modi it vàhàdeme faidedam im am bak. 21 Dam ahulat it ozome modi faidem im neha: Bisi fai bak modem bak ozodam bak ame. Ostame fi loholi ot vai ot vaidam bak ahebu ame. Mei na aa vam bak ame. Mei otem bak ame. Nam dat eheda modeo, dat nam eheda modeo, aa modem bak ahebu ame. ‘Nazoh dualese,’ lahame meia mali soat ziemausi vadam bak ame. Meia faki bisi fai bak la modi le modidam bak ame. Meia giomim vameadam bak ame. Abo bisi fi loho feà bak fusi ladem bak ozom vaba fako bueme vou vabodam bak ame. Meit modehe im ahu adat faki teidi meedam bak ame. Meia feàtàdam bak ame. Aba it daetbadam bak ame. Meit im vameadam di vamdesum bili ahusobuli meedam bak ame. 23 Labihasu ame im zi lam iba modi it vàhàdeme faidemna am bak. Ba ame dam labe ibi iho ozoho baket anekehà valo ekeme itatam vaba na àm bak labet meia modi vàhàdeme faidem vabak,” lahame ab vahokedaham. 24 Labi Yesusat ame bak lada vou esmozi neo ladume num debu Tirus laba netàdehe bak laba ab laham. Le meit Aba aamna zohàme num meidate aa oli aidasome modeha vastem vabili kehàm vaba damat am alihi ab aame fi desi vàhàdeham. 25 Labihadam di labe Yahudi namet modem vab nam abo Siria bak zoho Fenisia laba faaha nam labe laha aiha Yesus lehe bak aihemu Yesus bake le netàdi am ahu adat iedi Yesusam naba modesdam laba ogomasu ahit bake ab biteham. Ame nam nibe am adnamat buà mei ahu oli veimam setan labe am ahu laba veimai geàdam bohu modesdam bak ehet. Làhàmu am oiat Yesus bake li neha, “Em adnamat mei ahu oli veimam setan labe am ahu laba veimai geàdam bohu modesdalo. Oho gagu futoi itale,” lahame ab tauledamam. 27 Lahame labi tauledume modeha Yesusat ame nam laba fa ab gagoham. “Na àmna data bake nasi lu àm bak. Data bake lu àlo modemna ba im veme esu àm vabak. Labiham fai bak.” 28 Lahahat ame nam labe Yesusat lab gagoho bak lam ailahigeàmu fa neo vi gago, “Lo. Lamota imbot. Lahana Boehàda Om ozom vaba? Num deda labe am na vaheme àm ut gaheba laba datalu na lu àm di na keobe goagoadamna lam vem ad laba dozomna labe gi labaha àmna taia?” 29 Lahahat Yesusat fa ab gagoham. “Oia, oho etei Eba fa lab gagoho im lam Eho aiha om abo Eba tu vuzehehemu om fa nasi num bake lam neàdeho. Ame setan lam futoi om adnamat lam vou esmozi itame setehe bak.” 30 Lahame labi gagohemu ame nam nibe Yesus fa vou esmozi am num bake ab laham. Le aaha am adnamat gi amu ame setan lam futoi itame seti fa neàdi nuzuba bisdamna ab le aaham. 31 Labi neo Yesus num debu Tirus lam vou esmozi neo ladume num debu Sidon labe labohoti Itea Galilea laba lazi Dekapolis bak abo Num Debu Bak Sepuluh vou id lada. 32 Ame Num Debu Bak Sepuluh vou id ladam di labe damat dat dae vabali ulaihàbuleheda lam ve Yesus bake ab vou leham. “Oho da nim Om anekehàt ulasi fa neàdele,” lahame ab tauledamam. 33 Labi modeha Yesusat ame da lam si Ahamo dam dua bak vaitesu vou duzu afoezobe Am anekehàso ahim ame da dogoi bumat ahim laba dusu afoezobe fa vi vihitoi neo Am anekehà laba keha dou fa ame da labe am iso laba ab ulaham. 34 Labi ulasi neàdi Am ohu vousai asum ahoba iuba tom aasu bisteat omeeme dae Abada Aram daet, “Efata,” lahame ab gagoham. (Aram dae, “Efata,” laham di gi, “Figatele,” lahame gagom bak am.) “Efata,” lahame labi gagoha ame da labe am dogoi ab fi gatei im ab aidamam. Labi am iso im gagom bak biehe bak lam laha fa ab neàdi im aim neàna ab vameadamam. 36 Labi modeha dam zi labe ame bak lam aahemu àvodi ab ot gagoidamam. “Aa làhà! Ame Da nim Aho modem im gi neà bak tadem Dàt moz. Abo dam im aim biemda modeo, dam im gagom biemda modeo, laham dam laba ulasi modi fa neàdemda Am am bak,” lahame ab vou baedamam. Labihadàmu Yesusat ame dam laba ab gagoham. “Eho etei lab modehe bak lam uho meia a le fi demule,” lahame mali ab vi gagu esuham. Lahana, “Meia a le gagu fi demule,” lahame vi mali gagomna damat geàmu fa vi fi de. Labi neo vi mali gagomna damat geàmu fa neo vi fi de. Labihada.

Markus 8

1 Labi ba di iube dam zi fai neo Yesus bake li vadokbueda. Ame dam zi fai labe na àmna vabalehemu Yesusat Aho Aba vi tau meedam dam laba gagome li dozeadume neàdi ab gagoham. “Dam duada zi nim iba tau iddume usi làteladi im na àmna folehe labe idoali feà bak fuhu bak lam aam faimu Em faobekeho. Em ba dam nim na àhà vabna ideia olum kaio. Dam zoho bak bohulana lehe bak. Laham bake zie bohu nim fa ladameam gi doni bake ahadou faa susume lam bili la biti le bitiam zohàme ba labihasu olum maleho.” 4 Lahame labi gagoha Aba vi tau meedam dam labe fa ab vi gagoham. “Ne lahana dam vaba alim bak nim iho ake le na àmna aame vame fa vou li dam bake lodume uloholi àdàla?” 5 Lahahat Yesusat fa vi ailo gago, “Rotibu ubuda amamo vou lehela?” Lahahat Am dam labe fa ab vi gagoham. “Im rotibu tujuh ehete. Labi bohe koena ame. Gi labihasu vou lehe bak.” 6 Laham bak lam aime neàdi Yesusat fa ame dam duada zi laba gagome bak laba ab nusualadaham. Labi nusualadume neàdi Aho ame rotibu tujuh lam vuusu Ala bake, “Neàte,” lahame tom gagu neàdi fahedume Aba vi tau meedam dam laba lodume iho fa vame ame dam duada zi laba lodume ulohole. 7 Labi neo Am dam labe iho vou lehe bohe koena lam laha Aho neo ve Ala bake, “Neàte,” lahame tom gagu neàdi neo ame baket ab modeham. 8 Labihadume uloholehezobe ame dam zi fai labe ame na zi lam àdume modeha dam ahebu dedehemu zoho ab vahedaham. Labi Aba vi tau meedam dam labe damat lab àme dedehemu vahehena zoho lam fa vi ateti atetidume boloseh vahedume modeha boloseh ab tujuhleham. Labi modeha ame boloseh lam ahebu ab bektoham. 9 Dam etei lab nusualadume na àhà dam lam gi dam aabota dem di abo empat ribu fuhu bak. Ba lahiti datati tau dem kaio. Labi na lam àdume neàdi Yesusat ame dam duada zi lam gagome fa ibi bake ab oudaham. 10 Labi dam lada lam oudume neàdi Yesus Aba vi tau meedam damti iheba ziddume bak ee gagom Dalmanuta laham bak laba ab ladamam. 11 Labi Dalmanuta bak laba lafusi zitu azibe modeha Farisi dam totbaho labe vazisi, “Iho im nehasu Yesus bake modi aase,” lahame fet ozome Yesus bake netàdi ootedam labe ab gagodamam. “ ‘Om abo Alat Gagu Fihasi Vimteme Oluhu Dat Boehàda am tame,’ lahamda nasi na damat ihimo modem biem im feàna fet modemale. Labi im aame ozobohudese,” lahame ab gagodamam. 12 Lahaha bak lam Yesusat vi aime ahu faidi bisteat ab omeham. Omeeme gago, “Um etei dam bada nim gi bisi faina meedam bak tadem damat moz. Um gi labihadam damat modem labe vedi Eba neha, ‘ “Om Alat Gagu Fihasi Vimteme Oluhu Dat Boehàda ameo?” laham bak lam im biem bake na damat ihimo modem biem im feàna Oho nasi fet modehemu im aame ozobohudese,’ lahame Eba gagodam damat modem bak. Lahana imbote. Em ba uledi ame bak lam uba etei di nibe fet modem moho bak.” 13 Lahame labi gagu neàdi ame Farisi dam lam vou esmozi Aba vi tau meedam damti ihe neo ziddume Itea Galilea labe ab biodamam. 14 Labi biou ladameam Aba vi tau meedam dam labe iho it ozoha, im roti vou lehe vab damat modem bak ab it ozobohudeham. 15 Labi vou biou ladam di labe Yesusat ozo, “Soo! Ame Farisi dam lamti Herodes Antipas lamti ibi iho ozom bak lam fa neo Eba vi tau meedam dam laba vizi vàhàdemna ozomo?” laham bak vi ozome vahokelo ahit Aba vi tau meedam dam laba im totobet ab fi koadamam. “Um iademe vou faovoehebeat meedale. Farisi dam lamti Boehàda Herodesti ibi iho vou lehe na abo na vizi fi kidemna ragi lam ba a vamule.” 16 Lahame labi gagoha Aba vi tau meedam dam labe aime ihimo ab ot gagoidamam. “Uho ozom, iho roti vou lehe vabake Yesus iba labi gagohe?” 17 Lahame ame dam labe ihimo lab ot gagoidam im lam Yesusat ahamo ozobohudi ab vi gagoham. “Um akati Eho etei im totobet lab fi koadaha bak lam uho vabili vedi Eho uho roti vou lehe vabak laba ozome uba gagoho tiba vabi vi ozodàla? Làhà um amu Ebe Eho meedam bak um vi ozome ozobohudehe vab labe fi gatehe vabali mode? Um akati bisi im ozom bak zohobuli mode? 18 Làhà damat ihimo modem biem im feàna lam Eho modemna um fako ehena na aam bi mode? Um dogoi ehena Eho gagoho im uho aim bi mode? Akati um ahu zohobuli mahate Eba tu vuzehi meedam vab damat mode? Um gi ozobohuna ahit fa vabilehe damali mode? 19 Eho amu dam lima ribu zi fai laba rotibu auohole faheme lodaha di lam damat àme neàdi vekehe roti zoho lam uho vi ateti atetidume boloseh amamo vahehela?” Lahahat Aba vi tau meedam dam labe fa gago, “Boloseh dua belas vahehe bak.” 20 Lahahat Yesusat neo vi gago, “Labi laha Eho amu dam empat ribu zi fai laba laha rotibu tujuh faheme lodaha di lam damat àme neàdi vekehe roti zoho lam uho vi ateti atetidume boloseh amamo vahehela?” Lahahat Am dam labe fa neha, “Boloseh tujuh vahehe bak.” 21 Lahame gagoha Yesusat neo vi gago, “Làhà Eho uba lab gagoho im lam um ozom biem lahasuhe?” lahame ab gagu esuham. 22 Labi neo ladam labe fa num debu Betsaida laba ab lafuham. Lafusi modeha dam aheda labe fa dat fako faida na aam biemda lam anekehà vuusu Yesus bake ab vou leham. “Yesusat fà ulasi neàdese,” lahame ab vou li tauledamam. 23 Labihàmu Yesusat ame dat fako faida lam neo anekehà vuusu num debu bak vou esmozi fa bàhàgo bak iuba ab vou laham. Labi vou le vou duzu neàdi Yesusat ame da labe am fakode laba keha ab doham. Keha dou neàdi Yesusat Am anekehà ahim ame da so laba odosu gago, “Om na aam neàdeheo?” 24 Lahahat ame da labe am ohu vousai nabime gago, “Lo, em dam alihi vi aadalo. Lahana gi utsoti ulohona goom bakta aadalo.” 25 Labi gagohemu Yesusat neo Am anekehà ahim fa ame da labe am fakode laba neo odosdume ab iteham. Labi modeha am fako keesi na aam bak ab neàdeham. Labi na ahebu ab aam tombali neàdeham. 26 Labi neàdehemu Yesusat ab vi gagoham. “Om num bake fa nasi lale. Lahana om ba num debu bake vi oli om neàdehe bak lam a vameadamule. Gi labohoti om num bake lale,” lahame ab gagu mali oluham. 27 Labi Yesus Aba vi tau meedam dam lamti iho Betsaida vou esmozi neo ladume num debu Kaisarea Filipi laba netàdesome modeha gi aba zoho laba modealaha num debu bak laba goda. Godam di labe Yesusat Aba vi tau meedam dam laba vi ailo ab gagoham. “Dam duada labe, ‘Em amat modela?’ lahame vameadaha bak uho akatihasu aidàla?” 28 Lahame labi gagu aiha Aba vi tau meedam dam labe fa ab vi gagoham. “Dam duada totbaho labe vedi neha, ‘Om gi Yohanes Mei Vuu Valo Baptisleiamda labe amu elohona fat ahedi mozo,’ lahame vameada. Labi dam duada totbaho labe vedi neha, ‘Om gi aham di iube Alat vameadaha im aime fa dam bake ahate vameaidahada Elia amu ahena Alat vahada fa nom iluhe moio?’ lahame vameada. Labi dam zohot neo vedi neha, ‘Om gi dat ahamda Alat vameadaha im aime fa dam bake ahate vameaidahada meida amu eloho dàt fat ahedi lehe moio?’ lahame vameada. Dam zi labe Oba labihasu ozome otesi otesidam bak.” 29 Lahame labi vameadume modeha Yesusat fa neo vi ailo ab gagoham. “Ne lahana um akatiha? Um, ‘Em amat modela?’ laham bak um akatihasu ozome gagodàla?” Lahahat Petrusat fa ab vi gagoham. “Aia, Om abo Alat Gagu Fihasi Vimteme Oluhu Dat Boehàda am bak.” 30 Lahame Petrusat labihasu gagohemu Yesusat Aho Aba vi tau meedam dam laba ab gagoham. “Petrusat etei lab gagu tombalehe bak lam, ‘Em abo Alat Gagu Fihasi Vimteme Oluhu Dat Boehàda am tame,’ lahaha bak lam uho meia a le fi demule,” lahame ab gagu mali esuham. 31 Ame digat labe Yesusat damat Aba ba modelo modem im lam Aba vi tau meedam dam laba alimeat fet ab vameadamam. Aho neha, “Em Ai Alat fet gagu esuhemu Yahudi damat ibi iho tu vuzehi meedam im vuusdam tohe dam zi labe vahi Em abo Asum Ahoba Iubet Bak Niba Li Dateleheda niba mu fa Eba fai bak bohu modi geàda tame. Labi laha meia gagu Em oteme eloi fa usi behàsdi Em eloho bak labet Alat modi fa ahedi usa tame.” 32 Lahame Yesusat gi damat Aba ba meedam im ahate fi desi vameadume ab tombaleham. Lahame labi vameadume modeha Petrusat Yesus vi vuu ubahi duzu gago, “Boehàda, ba a labi gagomule,” lahame gi ostame ab vi vabededamam. 33 Lahame labi vabededume modeha Yesusat fa it vaktesi Aba vi tau meedam dam laba aasu Petrus bake ab gagoham. “Om gi Iblisit gagom im Eba gagohemu om fa Em ohuse duzule. Oho etei Eba lab gagoho bak lam gi dam bak damat ozom bak Eba gagoho bak. Ba Em Ai Alat Aba Aho fet ozoho bak gagoho vabak,” lahame Petrus bake im ab vahokeham. 34 Labi Petrus bake gagu neàdi Yesusat fa Aba vi tau meedam dam lamti labi dam mei zi lamti gagome fa vazisi neo ab vi vameadamam. “Meit Ebe Eho vahokedam im ozobohudi vi tau meedalo àhàkedameam làhà ba im aba aho it ozome modelo àhàkemda lam ba it ozome meedam vabak. Ame da labe aho gi neham bak. ‘Eho Yesus bake tu vuzehi im Abada meedàmu damat em si ut tetehesuhunaso lam ve lu vatu vou ladam di lam damat eba aasdamnàme eho gi ozahit vou le em paku dou elom neà bak,’ lahame Eba labihasu tu vuzehi gagu vàmademda lam aho Eba tu vuzehi vi tau meedam neà bak. 35 Neham bak. Meit aba aho Eba lab tu vuzehehe bak lam ahate gagomeam damat am otem bak labna zohàme it vou faovoi vei iedi ahit biehenali, ‘Em Yesus bake tu vuzehi Am damalem kaio,’ lahame veibadamda lam ba Alati vahi ahe neàna bohu vuusdam vabak. Lahana meit neha, ‘Em Yesus bake tu vuzehi Aba Aho Meedaha Im Neàna lam eho dam bake vou vameatedam labe damat em otemeam làhà gi neà bak. Em ba àvodem vabak,’ lahame aba aho elom bak laba bisi it vou faovoi meedam vabda lam Alati vahi gi ahe neàna bohu vuusdamda am bak. 36 Iho bak niba esdam di meit nehi ozo, ‘Em gi nazoh zi nim vadume duali neàdese,’ lahame ozodamda labe aho vedi am ahu it vou faovoi Eba tu vuzehi Alati ahili ahena aabo laba vuusdam vabameam làhà aho amu modehe zoho ium gi meedume vanamai voom bak. 37 Iho Alati ahili ahena aabo laba vuusdam bak lam iho ba anat vi lu và? Ba na ot loiam biem bak. 38 Etei bak damat bisi faina meedume Eba mu tozodam di nibe meit neha, ‘Em abo Yesus bake tu vuzehi Aho vahokedaha im aime meedamda modem kaio,’ lahame ladi vei iedi Eba momeam làhà ba diamut Em Abo Asum Ahoba Iubet Bak Niba Li Dateleheda nibe Em Aiat Am na fauha meona fako iedemna ogatei modealaha bak lam fa Eba modi vizi feà Dateli Aho Am im gagu vou usem dam zi lamti ba neo amediat bak niba nom ilu meedam di lam Eho laha ame da laba neha, ‘Om Eba tu vuzehi Em damalehe vabda am tame,’ lahame mu voo tame,” lahame ab vameadaham.

Markus 9

1 Labi im lada lam vameadume neàdi Yesusat fa neo vi vameada. “Eho lab gagoho bak lam ba imbodemta imbode. Lahana Eho etei uba neo gagolo modem im imboda nidi nim laha nasi aima. Um dam etei nib dozeadaha dam totbahota taho elom vaba ahe lahasdamna uho ba Alat Boehàdateboli dam bake vuusu im vahokedalo li duzum bak um dam zohota ame bak aa tame,” lahame Yesusat ab fet gagu esuham. 2 Labi usi enamli neàdi Yesus Aho Aba vi tau meedam dam Petrusti Yakobusti Yohanesti labihasu gi dam lada làtela lamota gagome sibu bake ab vou laiteham. Labi vou laisi modeha Yesus Am alihi veimdehe bak lam Aba vi tau meedam dam làtela labe ab aaham. 3 Abo gi ala digadda meo fau fako aam iedem bakti ulohona Yesusam sue laba modesu ab fauha meoleham. Ba bak damat iho sue fauhana kikeme bisi fauha neàdem bakti uloho vabak. Abo bisi vafozi meona fau feà modesu ogatedam bak. 4 Labihàmu ame dam làtela labe iho vi aaha Alat vameadaha im aime fa dam bake ahate vameaidaha dam abo aham di iube eloi seddaha dam behàsu Musati Eliati iho lehe bak aaha vabna nom ilu Yesus Am obe laba vi tau duzu im vameadamna ab aaham. 5 Labi ame bak lam aahemu Petrusat Yesus bake ab gagoham. “Ai Guru oa, iho etei niba li odosi umti vahehe bak abo neàte. Imo teohet mom num làtela mose. Meida Oba mo. Labi meida Musa bake mo. Labi meida Elia bake mo. Labihadase.” 6 Petrusti aba mei dam behàsu lamti iho iedi modem faidi Petrusat gi ahulat ozom im ostame fa num mom bak lam ab gagoham. 7 Lahame Petrusat gi etei labi vameadam lahasuhu di labe ulo fauha meona nom ilu ame dam lam ab baguamdi seteham. Labi modeha Alat Am dae ulo labe futoi gago, “Da nim Em Adat vàmtea Ebe Eho bisi deelemda Am am tame. Uho Aho vameadam im mahate aime meedale.” 8 Lahame gi etei labihasu vameadameilahit ame dam làtela labe vi nabime aaha ulo fau lamti ame dam behàsu lamti fa seti gi Yesus Ahamo doudamna ab aaham. 9 Labi im lam meedume neàdi sibu labe fa lezedam di labe Yesusat Am dam làtela niba ab gagoham. “Uho etei le aadaha bak lam Em Abo Asum Ahoba Iubet Bak Niba Li Dateleheda nim eloi Em eloho bak labet Alat modi fa ahedi usaha vab di meia a le fi demule,” lahame ab gagu mali esuham. 10 Làhàmu ame dam làtela labe iho etei le aaha bak lam ba meia fi dehe vaba ab vasteham. Lahana Yesusat etei neha, “Em eloi fat ahedi usam bak,” lahaha bak lam, “Akati modemna gagohela?” laham bak ozom vabili ot vameaida. 11 Labi ot vameaidam labe fa neo Yesus bake vi ailo ab gagoham. “Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe nehi vahokedamna iho aihi bak. ‘Amu dat ahamda Alat vameadaha im aime fa dam bake ahate vameaidahada Eliat nasi bak niba fa le. Labi Alat Gagu Fihasi Vimteme Olulo Modem Dat Boehàda ba vule tame,’ lahame vahokehena iho aihi bak. Ne, ‘Om ame Da am tame,’ lahana iho etei Eliam alihi aahana aho Om ba vulem bak zie vuehe vabna akati nasi fa lahela? Làhà, gurut iba lab vahokedam im lam giomimot mode?” 12 Lahame labi gagoha Yesusat fa vi gago, “Lo, lamota imbot. Eliat nasi bak niba li dam bake nehi fet vameada. ‘Alat Gagu Fihasi Vimteme Olulo Modem Dat Boehàda le tame,’ lahame vameadume damat aime neàdi im ahu vabiedume ahumdi vou faodam bak ehe bak. Lahana um ozom vaba? Ame da Eliati ulohoda amu gi Eho ba vulem bake nasi li duzu neàdehe bak. Nasi li duzuhunàme aho lab vahokedaha im lam damat aime tuhu vabak. Vedi ame dam labe ibi iho modelo àhàkehe bak labet modi aba fa fai bak meedume vabidume geàdaha bak. Ame bak lam meit Alat Vameadaha Im Toedahana laba labihasu fet toeme esuhu im ehe labe labihaha bak. Lahana Em Abo Asum Ahoba Iubet Bak Niba Li Dateleheda nibe Ebe Eho ba modem im akatihà? Meit Alat Vameadaha Im Toedahana laba nehasu fet toeme esuhu bak. ‘Asum Ahoba Iubet Bak Niba Li Dateleheda lam damat Aba modi geàdume mu voo tame,’ lahame toehe bak lam akati modi um ozom vaba modela?” lahame ab vameadaham. 14 Labi Yesus Aba vi tau meedam dam làtela lam iho vahi lezi Aba vi tau meedam dam totbaho bake ab lefuham. Lefusi aaha dam duada zi totbaho lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu vahi fa Aba vi tau meedam dam totbaho laba vabousu daet beàdam bak ab li aaham. 15 Labi modeha dam duada zi labe iho it vaktesi aaha Yesusat ledam bak aahemu àvodi Yesus bake, “Neàte,” lahalo ab emoeham. 16 Labi emoeme Yesus bake lefuhemu Yesusat ab gut gagoham. “Um ana im beàdàla?” 17 Lahame gut gagohemu dat meida labe fa ab gagoham. “Vabà! Ai Guru oa, em daboseà nim mei ahu oli veimam setan labet modi dae vabaleho. 18 Ame setan labe aba modiam bak fum di aba modi bake biti geàda. Labi fa neo aba modi aheli kehanabu vaome geàda. Labi neo modi am mo uzimtedi so teilemahi modida. Labi modidàmu eho Oba vi tau meedam dam totbaho niba tauledume gago, ‘Uho ame setan laba gagu futoi itale,’ lahame gagoha dam labe modesome modeha modem bi moho,” lahame Yesus bake ab vameadaham. 19 Labi vameadume modeha Yesusat fa ame lab odosdam dam zi laba ab gagoham. “Em abo uba tau azibehamdehena um eteida nim akati Eba mahate tu vuzehem vaba modela? Alat Aba Aho ozoho baket uho modehe vaba akati bisi odohabuli git meedam bak bohu vuusdàla? Eho uba vuusdam di adi bake fusi um mu voe? Uho Eba tu vuzehem bak Eho ba gi labihasu vou faodà?” lahame gagu neàdi fa ame da niba ab gagoham. “Om daboseà nasi ve vou lele.” 20 Lahame labi gagohemu dam labe le ame daboseà ve fa ab vou leham. Labi Yesus bake vou le netàdeha ame setan labe Yesusam alihi aahemu ame daboseà niba modi ab tufa tufadamam. Labi bake biti vakte vaktedam labe kehanabu vaome ab geàdamam. 21 Labi geàdam di labe Yesusat ame daboseà labe am ai bake ab gagoham. “Om daboseà nim adi diat faasi ame im nim meedàla?” Lahahat ame da labe fa gago, “Amu gi koe diat faasi meedume etei ab vou fuham bak. 22 Ame setan labe, ‘Em adat nim otese,’ lahame aba modi vua bak modeo, vao bak modeo, ostame bitidam meote. Lahana Obo Oho modem im ehelemeam làhà iba faobekesi tau modele.” 23 Lahame labi gagoha Yesusat àvodi fa gago, “Lo, Eho modem im ehe bak. Ne, anat? Meit Eba tu vuzehi meedameam làhà na ahebu Eho modem neà tadehe bak.” 24 Lahame labi gagoha ame daboseà nibe am aiat ab gagoham. “Lo, em Oba tu vuzehemta tu vuzehehe bake. Lahana mahate tu vuzehem kaio. Oho eba laha vi modi Oba tu vuzehem bak mahate modi dualele.” 25 Lahame labi gagoha dam amomoi zi neo, “Imo vi tau aase,” lahame emoeme lefuseo meedam bak lam Yesusat aahemu ame setan laba ab mali ootedamam. “Meia modi dae vabalehe bakti ulaihàbulehe bakti labihasu modem setan oho taho daboseà nibe futoi vou esmozi itale. Ba a fa li oli veimamule.” 26 Lahame labi mali ooteha ame setan labe ame daboseà laba neo modi geàda. Gagada. Kehanabu vaoda. Labi modi tufa tufadume vou esmozi ab itaham. Lahana damat aaha ame daboseà lam koeisoti uloholi bisdam bak aahemu, “Eloho,” lahame àvodi ab gagodamam. 27 Lahana Yesusat geàmu ame daboseà lam neàdehe bak ozobohu labe am anekehà vi vuu vousai ab vou duzuham. 28 Labi ame daboseà lam modi fa neàdi Yesus Aba vi tau meedam dam lamti ihimo vahi dam dua bak vaitesu fa num ibi iho azimdate ab vou oedaham. Vou oedume neàdi Aba vi tau meedam dam labe Yesus bake ab gagoham. “Oho ozom, akati modi iho ame setan lam iho gagu futoi itasome modeha modem bi mohela?” 29 Lahahat Yesusat fa gago, “Mei ahu oli veimai ahelem setan lamohoda gagu futoi italo modem di gi modem vabak. Abo amu nasi Ala bake tom gagodume neàdi afoezobe ba ame setan lamohoda gagu futoi itam bak,” lahame ab vi gagu esuham. 30 Labi Yesusat Aba vi tau meedam dam lamti iho ame bak lam vou esmozi neo ladume Galilea bak laba modealaha num debu meida laba labe i. Num debu meida neo laba labe i. Labihada. Labi izi labohotidam di labe damat aime Aba valadam bak labna zohàme iho fusidam bak laba fum di ba fi dem vabak. Gi aa labohoti laida. Am abo Aba vi tau meedam dam laba im duana vi vahokedalo labihadam bak. Labi digat meida iube Aho neha, “Um aile. Em Abo Asum Ahoba Iubet Bak Niba Li Dateleheda nim kehàm vaba meit Em vou fohome dam bake ub lu ote tame. Labi oteme usi behàsdi Em eloho bak labet Alat modi fa ahedi usa tame.” 32 Lahame labi gagoha Aba vi tau meedam dam labe Yesusat etei lab gagoho im lam ozom bili vi ozodamnàme fa vi gagu aim iedi moh. 33 Labi neo ladume num debu Kapernaum ab vou fuham. Laba vou fusi num bake vou oedume neàdi Yesusat Aba vi tau meedam dam laba ab gagoham. “Iho etei zie doni laba lab leom di uho ana im vou otesi otesia ledàla?” 34 Lahame labi gagu aiha dam lam ba im vi gagom kai. Ame dam labe iho etei lab ledam di labe meit neha, “Alat iba ozom di eho feà datelem bak,” lahame vou otesi otesia lehemu Yesus bake vi gagu fi dem lade. 35 Làhàmu Yesusat fa nusu Aba vi tau meedam dam dua belas laba im ab vi vahokedamam. “Uho meidavat nehi it ozo, ‘Alat eba, “Em feà,” laham bak modese,’ lahame it ozome modelo àhàkemeam làhà ame da labe fa feà vab dateli meit gagohona uledi meedam tadele.” 36 Lahame labi gagu neàdi Aho fa data koena laba gagome li ame dam dua belas labe ibi iho avaelaha tot laba ab vou li duzuham. Labi vou li duzu neàdi ame data visoi sivai vou nusu Am dam laba nehame ab faasi vameadamam. 37 “Meit Eba tu vuzehi meedàmu fa damat neha, ‘Feà vab dàt moz,’ lahame gagomda lam abo data koena nimti ulohoda lam meit ame da lam ule neàt vamda lam Alat ozom di ame da lam gi Eba laha ahu ule neàt ab vaham bak. Labi Eba ahu ule neàt vamda lam gi Emota ule neàt vaha vabak. Abo Eba Gagu Oluhuda lam abo Em Ai bake laha ahu ule neàt vaha bak,” lahame ab vameadaham. 38 Lahame labi gagu modeha Yohanesat Yesus bake ab vi gagoham. “Ai Guru oa, iho amu iuba le aaha da meida labe Om ee gagodume mei ahu oli veimaha setan laba gagu futoi itaha bak im aaho. Lahana ame da lam imti vahi Oba vi tau meedam vab dàt labi modehemu iho malesome modeha vaba moho.” 39 Lahame labi gagoha Yesusat fa gago, “Mm, vabà! Meit labihameam uho a malemule. Modem neàte. Neham bak. Eho meia gagu im dedateli fa na damat ihimo modem biem im feàna modemeam làhà ame di labe ame da labe ba kehàm vaba Eba vi feàtàm biem bak. 40 Neham bak. Meit imti ot odosiam vabda lam iba taumda am bak. 41 Um mahate ozobohudele. Meit Eba tu vuzehi Em damaleheda meida iube uba nehi ozo, ‘Uho Eba Alat Gagu Fihasi Vimteme Oluhu Dat Boehàda niba tu vuzehi meedam dam um ame?’ lahame uba faobekesi gi vaota noai lu udemeam làhà Alat ba diamut um Eba tu vuzehi meedam dam niba gohali lomna lodam di ame da laba laha tau lodam bak. Ba loho vaba alia modem vabak,” lahame ab gagoham. 42 Im lada lam vameadume neàdi Yesusat im meida nim neo vi vameada. “Lahana meit Eba tu vuzehi meedamda nim abo damat neha, ‘Gi data koena nimti ulohoda feà vab dàt moz,’ lahame ozomda lam meit am vou fohome faina modi ubahi ubahidume Em mu voohemu ame mei vou fohohoda lam ba diamut Alat bisi feàna beomda am bak. Dat labihalo modemda lam gi nasi nehasu meedam vaba? Dam gagome am si ke feàda bumatna visoi am bio laba vààsu asimbuli itea feàna tombu iuba vou le nobu feà bak iuba nasi nom voou tezi eloi setem vaba? Lam bisi neà bak am bak. 43 Labi laha om ahu labe oba modi om anekehàt om vou fohome faina modi ubahi ubahidume Em mu voolo modemeam làhà om anekehà nasi vaitoi fa nisilele. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi anekehà vàmtea vou goda. Labi ba diamut gi nisilehena Alat Aba Aho azim bak laba le tau vahi azim bak lam bisi neà bak am bak. Ba akati modi anekehà ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela? [ 44 Ba akati modi om so ahebu koeili fomsoali geàdamna bohu abo vua elum sutem gikina bohu laba voela?] 45 Labi laha om ahu labe oba modi om naot om vou fohome faina modi ubahi ubahidume Em mu voolo modemeam làhà om nao nasi vaitoi fa nisilele. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi nao vàmtea vou goda. Labi ba diamut gi nisilehena Alat Aba Aho azim bak laba le tau vahi azim bak lam bisi neà bak am bak. Ba akati modi nao ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela? [ 46 Ba akati modi om so ahebu koeili fomsoali geàdamna bohu abo vua elum sutem gikina bohu laba voela?] 47 Labi laha om ahu labe oba modi om fakot om vou fohome faina modi ubahi ubahidume Em mu voolo modemeam làhà om fako nasi valoi voou fa nisilele. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi fako vàmtea vou goda. Labi ba diamut gi nisilehena Alat Aba Aho azim bak laba le tau vahi azim bak lam bisi neà bak am bak. Ba akati modi fako ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela? 48 Ba akati modi om so ahebu koeili fomsoali geàdamna bohu abo vua elum sutem gikina bohu laba voela?” lahame Yesusat ab vameadaham. 49 Im lada lam vameadume neàdi Yesusat neo vameada. “Eba tu vuzehi meedam dam lam ahebu, ‘Mahate tu vuzeheo?’ laham bak modi ozolo Alat ahit vuat modi geiam bakti ulohona modi geàdalo modem bak. Ibi iho lab tu vuzehe bak lam, ‘Fà vi teudese,’ lahame labihalo meedam bak. Neham bak. 50 Garam abo na àmna nu laba voou vizehe labe ame na nu lam àm di abo àm neàt. Labiha labe garam lam abo neàt. Lahana ame garam labe ahamo na nua vizemna lam fa vei seti faidemeam làhà ame na fauha keobe lam ba akati iho modi fa garamli na nu laba vizemnalela? Labiham biem bak. Uho Eba tu vuzehem dam laha garam na àmna modi vizem bakti ulohona meedale. Neham bak. Umti vahi esdam dam lamti ot fakiam vaba gi vahi esdam bak laba ozome iademe neà bak bohu meedale,” lahame ab vahokedaham.

Markus 10

1 Labi Yesusat im lada lam vahokedume neàdi Aba vi tau meedam dam lamti iho num debu Kapernaum vou esmozi fa neo, “Yudea bake lase,” lahame Yordan Soabo dumam tot laba biou num debu meidati num debu meidati modealadaha bak laba goda. Labi ame bak laba godam di labe dam duada zi labe neo Yesus bake valada. Abo dihasi valada. Dihasi valada. Labihada. Labihadàmu Yesusat laha Aba Aho amu modi baleàlehe baket neo ame dam zi laba im vi vahokeda. Labihada. 2 Labihadam di labe Farisi damat Yesusat git gagom bak aihizobe vàlulo ahit Aba netàdi duzu vi ailo ab gagoham. “Oho ozom, im Yahudi dam nibe ibi iho tu vuzehi meedam im labet vulam di meit aho amu vaha nam fa mu voom neào? Fa mu voom maleheo? Akatihasu vi vulaela?” 3 Lahahat Yesusat fa ab gagoham. “Dat ahamda Musat aho toedume fi hasi esuhu Im Feàna zi laba, ‘Akatihasu modem neàte,’ lahame toehela?” 4 Lahahat ame Farisi dam labe fa gago, “Im tai ahobada Musat aham di iube neha, ‘Uho meit am nam amu neàt vahana fa mu voolo modemeam làhà amu nasi, “Nam nim debu nehasu meedàmu em mu voolo modem bak,” lahame sunit toeme ahate fi desi vameadume mu voomta neàte.’ Lahame labi toehe bak.” 5 Lahame labi gagoha Yesusat fa ab gagoham. “Um ozom vaba? Um ahebu ahu tamzohobulehe labe meit im vahokem bak aim biem damat modem labe Musat gi ozahit uledi im lam toehe bak. Lahana bisi alimeat Alat datti namti modehe di labe labi gagoho vabak. Alat Vameadaha Im Toedahana laba uho im nidi nim aame ozobohudehe vaba? ‘Ala Na Debu Modeheda labe ahamte na modehe vab di iube dam bakda ahamte alimeat na meedaha di iube dat mode. Nam mode. Lahaha bak.’ 7 Labi Aho modi neàdi Aho lab modehe bak lam vi ozome ab gagoham. ‘Làhà etei di nim dat nam vam di am aiti am oiti vou esmozi da nim gi am nam laba akili ihimo ahili so vàmadi ab le azimam bak. Labi lab le azihi bak lam vi ozom di gi nubu ab vàmadeham bak.’ Lahaha bak lam um aame ozobohudehena taia? ‘Ba so behàsuo?’ laham bak lam ba vi ozom vabak. 9 Labihàmu Alat modi vàmadehena uho dam bakda a modi fàsi behàsdemule,” lahame ab mali vameadaham. 10 Labi im lam vameadume neàdi ibi iho esdam num laba fa oli modeha Aba vi tau meedam dam labe Aba neo dat nam mu voom im vi ailo ab gagoham. 11 Vi ailo gagu modeha Yesusat fa ab vi vameadamam. “Meit am nam aho neàt vahana fa mu voou fa nam amomoi vameam làhà ame da labe gi nam aba amu vahada laba faina modehe bak. ‘Nam ehena fa nam amomoi vaho,’ lahame Alat vàlu gagom bak. 12 Labi laha namet am dat aho neàt vahana fa mu voou fa dat amomoi vameam làhà ame nam lam faina modeho. ‘Dat ehena fa dat amomoi vaho,’ lahame Alat vàlu gagom bak,” lahame ab vahokedaham. 13 Ame di labe dam totbaho labe ozo, “Yesusat fà im data niba Am anekehà odosu neha, ‘Ai oa, Oho data niba neà bak modi esule,’ ” lahame tom gagom bake ozome im data Yesus bake ab vou ledamam. Vou ledume modeha Aba vi tau meedam dam labe iho ame bak lam aahemu ab gut mali meedamam. “Um data Yesus bake a vou li vabidamule.” 14 Lahame labi gut mali gagoha Yesusat aime faki daetesu gago, “Ame data lam Eba vou ledam neà bak. Uho a mali gagomule. Neham bak. Damat ibi iho vou mode leme baleàhà bak lam fa veimdi fa data koena zi nibe ibi iho lab vou mode leme baleàhà bak lam abo daleà azi meit iba vahokedam im aidam bak lamti ulohona meedam dam lam Alat deeli vame Am damali vuusu im vahokedam dam am bak. 15 Imbote. Labi Eho etei uba neo gagolo modem im imboda nidi nim laha nasi aima. Meit ibi iho vou mode ledume baleàhà bak lam fa veimdi fa data koena zi nibe ibi iho lab vou mode ledume baleàhà bak lam abo daleà azi meit iba vahokedam im aime meedam bak lamti ulohona meedam vabameam làhà ba Alat ame dam laba modi Am damali vuusu im vahokedume neà bak modi esuiam biem bak.” 16 Lahame labi gagu neàdi ame data zi lam vamateme sivai meida Am anekehàt nom odosu, “Ai oa, Oho data niba neà bak modi esule,” lahame ab tom gagoham. Labi data totbaho laha gi ame baket neo meeda. Labihada. 17 Labi Yesus Aba vi tau meedam damti iho ame num labe futoi ladasome modeha da meida labe, “Yesus bake im gagose,” lahame emoehe labe le Yesus bake gut tàhi, “Yesus Am abo feàte,” lahame ahu adat iedi Yesusam naba modesdam bak laba ogomasu ahit bake biti ab gagoham. “Guru bisi neàda oa, eho ana im meedam labet Alat eba modi Amti vahi gi ahe neàna bohu vuusdàla?” 18 Lahame labi vabi vi ailo gagoha Yesusat fa ab vi gagoham. “Om akati Eba, ‘Bisi neàda oa,’ lahame eba labi gagohela? Bak niba azim dam ahebu bisi neàda kaio. Gi Ala vàmteata bisi neàda am tame. 19 Alat dam bake neha, ‘Nehame meedale. Nehame meedale,’ laham im dat ahamda Musat toedume fi hasi iba esuhu Im Feàna zi lam om ozobohuna taia? Ame im neha: ‘Mei a otemule. Labi nam dat eheda modeo, dat nam eheda modeo, a modemule. Labi mei na a aa vamule. Labi na aaha vabda labe, “Eho nehi aaho,” lahame a ostame giomim vàlu gagodamule. Labi meit vahana, “Eho fa vase,” lahame a teidi vi modeme vamule. Labi um ai bake modeo, um oi bake modeo, ahu adat iedi uba gagoho im laba vuzehi meedale.’ Labihasu toedume fi hasi esuhu im lam om ozobohuna taia?” 20 Lahame labi gagoha da nibe fa gago, “Guru oa, em gi amu bos diat ame im lam faasi vou meedume etei busaolehe bak.” 21 Lahame labi gagoha Yesusat ame da laba aame faobekesi ab gagoham, “Lo. Lahana om im meida vàmtea vekehe bak. Om soa maehe nazoh zi lam ahebu gelevai doit ot loidume neàdi ame doi lam vadume fa faheme dam na vab dama iuba lo. Iuba lo. Lahadale. Oho labi modemeam làhà Alat Aba Aho azihi bak laba oba vahehe nazoh aabo ehete. Labihàmu oho ame doi lam dam na vabdate lodume neàdi fa li Eba tu tau godale.” 22 Lahame labi gagoha ame dat labe Yesusat lab gagoho im lam aiha am soa maehe nazoh zi abo feà dat modemu ahu faidi daleàdi ab laham. 23 Labi ame da lam le seti Yesusat fa Aba vi tau meedam dam laba aasumtedi ab gagoham. “Dam nazoh duada labe iho it ozo, ‘Iho Yesusam im aime vuzehi fa Alam damali Aho iba vuusu im vahokedase,’ lahame it ozodamnàme im nazohti nehi ame bak lam uledi meedam biem meo bak.” 24 Lahame labi gagoha Aba vi tau meedam dam labe ab aime àvodeham. Àvodi meedàmu Yesus im Abada neo vi vameada. “Em dam oa, dam nazoh duada labe iho nehi it ozo, ‘Imo Yesusam im aime vuzehi fa Alam damali Aho iba vuusu im vahokedase,’ lahame it ozodamnàme am nazohti nehi ame bak lam uledi meedam biem meo bak. 25 Im unta fi hobu labe aho sue tademna mo labe am bumat kekehena laba ba dalu lafutom biem bak. Labi dat na duada labe aho nehi ozo, ‘Alat laha eba modi Am Dateli Aho eba Vuusu Im Vahokedase,’ lahame gagu meedam bak lam laha modem biem bak. Lahana ba gagohoda lam bisi modem biemda am bak.” 26 Lahame labi gagu modeha Aba vi tau meedam dam labe aime àvodi modem faidi ab ot gagoi ot gagoidamam. “Aa làhà! Dam na duada labihalahit im dam totbaho ahebu Alat ba iba soat vausu im vei neàdi Amti vahi gi ahe neàna bohu vuusdam biehe taia!” 27 Lahame labi ot gagoidaha Yesusat Aba vi tau meedam dam laba aasdam labe ab gagoham. “Faode. Ame bak lam damat ihimo it modem biem bak. Lahana Ala bisi feàda abo na ahebu modem meo Ala labe ame bak lam modem meo bak.” 28 Lahame labi gagoha Petrusat fa ab vi gagoham. “Imota nehaha bak. Iho Oba vi tau meedam damalelo modemu nazoh ibida ahebu amu gi voedume vausi fa Oba tau vou godam bak.” 29 Lahame labi gagoha Yesusat fa ab vi gagoham. “Lo, oho lab gagoho bak lam imbota imbot. Lahana Eho etei uba neo gagolo modem im imboda nidi nim laha nasi aima. Uho meit neha, ‘Eho Yesus bake vi tau meedalo mozo.’ Labi neo, ‘Eho, “Alat meia soat vausu fa vei neàde tame,” laham Im Neàna lam eho tau vou vameatedalo mozo.’ Labihasu uledi modelo modemu am ai modeo, am oi modeo, am dubu modeo, am vahada modeo, am nà modeo, am lahiti datati modeo, am num modeo, am na utoho modeo, labihasu ahebu voedume esmomeam làhà ame da labe am ahe lahasuhu di nibe Alat fa ame da laba gi ame baleà vouhou na lodam di abo fetehesu duana vi loda tame. Lahana ba neà bakta gi labihasum vabak. Abo aho bak niba esdam diat damat aba vabidamna bohu modesdam bak laha ehe bak. Labi laha ba diamut ame da lam gi elomnàme Alat modi fa Amti vahi gi ahe neàna bohu vuusda tame. 31 Alat ba diamut Aho Eba modi Eho Boehàdateboli dam vuusu im vahokedam di neham bak ehete. Damat etei bak niba esdam di vedi nehi it ozoda. ‘Im ee feàda ame?’ lahame it daetbadam dam lam ba feà damalem vaba gi ee vousi ba duzum dam am bak. Lahana damat nehi it ozoda, ‘Im ee feà vabda ame?’ lahame it daetbadam vab dam lam ba feà damali fa ee vousai nasi duzum dam am bak,” lahame Yesusat ab vahokedaham. 32 Labi Yesusat Aba vi tau meedam damti dam gi vi tauhuda lamti iho kota Yerusalem zoolelo lada. Labi ladam di labe Yesus koena vaitesu nasi duzu lada. Labi dam duada ba vulada. Labihada. Labihadam di labe Aba vi tau meedam dam labe ozo, “Yesus akati modi nasi duzu ladà?” lahame ab àvodi vi ozo laomam. Labi dam giida totbaho labe neo vei iedi vi vulada. Làhàmu zie doni bake Yesusat Aba vi tau meedam dam dua belas lamota gagu fàsi damat Aba kota Yerusalem laba ba modem im neo fet ab vameadamam. 33 “Um nasi iademe aimale. Im etei vahi kota Yerusalem laba zoolelo ladam bak. Labi laba lafusi Em Abo Asum Ahoba Iubet Bak Niba Li Dateleheda nim meit Em vou foho tame. Labi vou fohome damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti laham dam laba ub lu ame dam labe fa Eba uloodume vi aime ozobohudi neàdi, ‘Nasi otele,’ lahame ahu vàmadi gagu esu tame. Labi Em otem bak gagu neàdi fa neo Yahudi damat modem vab dam abo Ala bake tu vuzehem vab dam laba neo ub lu dam labe Em gut ve fu tozoidam labe keha vi dome afoezobe fa vou futoi na sokba nasbe ahit alibulehena labe Eba foadume geàda tame. Gi labihadume ut tetehesuhunaso laba Em nom esu paku dou ote tame. Lahana fa usi behàsdi Em eloho bak labet Alat modi fa ahedi usa tame,” lahame fet ab vameadaham. 35 Labi ba neo Zebedeusam adam Yakobusti Yohanesti le Yesusat avaesdam laba netàdi duzu ab gagoham. “Guru oa, ‘Oho iba nehi modem neào?’ laham bak Oba gagu vi ailo mozo.” 36 Lahahat Yesusat fa ab gagoham. “Eho oba ana im modem bake um ahim Eba lehela?” 37 Lahahat dam ahim labe fa ab vi gagoham. “Vabà! Im gi neham bak Oba gagu vi ailo leha. Ba diamut Alat Oba modi Ohomo Boehàdateboli dam bake deeli vame Om damali vuusu im vahokedam bak faaseo modem di Oho iba gagome fa neo tau boehà damali meida Om ahi tot laba nusu dam bake tau vuusda. Labi meida Om soi tot laba nusu dam bake tau vuusda. Labihadam neào?” 38 Lahame labi gagoha Yesusat fa ame dam ahim laba ab gagoham. “Ne lahana uho etei lab gagoho im lam um it ozom vaba? Na im feàna Eba modi geàdamna etei Eba modi ozolo modem bak ehe bak. Ame bak lam uba laha modi ozolo vouhom neào? Um laha geàdume elom ule?” 39 Lahahat ame dam ahim labe fa gago, “Modem neà bak. Im ahumdi neàdehe bak.” Lahahat Yesusat fa neo vi gago, “Lo, imbo bak. Na feàna eba modi geàdume elom bakti ulohona uba laha modi geàdume elom bak ehe bak. 40 Lahana meia gagu fa Em ahi tot modeo, soi tot modeo, laba tau nusu vahi dam bake vuusu im vahokedam bak lam Ehemo gagu modem biem bak. Lam gi Em Aiat Ahamo fi hasi ahumdi ozome gagodam bak.” 41 Lahame lab ot vameaidam im lam Aba vi tau meedam dam totbaho sepuluh labe vi aime modeha Yakobusti Yohanesti ame dam behàsu laba ab fakeham. 42 Labihàmu Yesusat Aba vi tau meedam dam gagu fa vazisi neàdi im ab vahokedamam. “Um ozobohuna taia? Yahudi damat modem vab dam labe vedi, ‘Im abo feàte,’ lahame iho vuusdam dam laba tet ootedam labe im vahokedam di gi dae meobeat vahokedam meo bak. Labi im ee dam labe iho vuusdam dam laba teubeat vuusdam labe iho gagom im damat meeda. Labihadam meo bak. 43 Lahana um ba a labihadamule. Um fa gi nehame meedale. Uho meidavat nehi it ozo, ‘Alat fa eba modi ee feà datelese,’ lahame it ozome modelo àhàkemeam làhà amu nasi gi amti vahi esdam dam labe im na daleà meedam datelele. 44 Labi laha uho meidavat nehi it ozo, ‘Alat fà eba ee feàda modi talu vousai dam totbaho ee vousi fa eho vafozi bisi feà datelese,’ lahame it ozomda lam amu nasi gi amti vahi bak niba esdam dam zi labe im na daleà ladehebeat teo meedam datelele. 45 Eho gi neham bak ozome uba labi gagoho bak. Em Abo Asum Ahoba Iubet Bak Niba Li Dateleheda nim Eho laha labihaha bak. Eho bak niba lehe di ba nehi it ozom vabak. ‘Em feàda am bak. Dam feà vab dam fa bake nusu Eho gagom im aime meedam damali Eba taum bohu meedale,’ lahame it ozome lehe vabak. Em gi feà vab Dateli dam bake taum bak ozome lehe bak. Abo gi dam bake tau bohu vuusdume damat Em si otem bak. Dam ahebu iho faina meedam bak lam Alat beom bake Ehemo ahit uledi damat Em oteme vasea gohali ot vai fa faamom bake ozome lehe bak. Labihàmu uho Ebe Eho ozome lehe bak lamti ulohona meedale,” lahame Yesusat ab vameadaham. 46 Labi Yesus Aba vi tau meedam damti iho num debu Yeriko laba le ab lafuham. Labi lafusi bak lada lam vou esmozi ladam di labe dam duada zi iba vi tau vulada. Labi ladam di labe dat fako faida Bartimeus abo Timeusam adat lam gi zie obe laba aidam labe gut tauleda. 47 Labihamda labe dam duada zi lebohotedam bak dae aidàmu ab gut gagoham. “Bak nim amat ana im meedàla?” lahame vabi ostame gagoha meit neha, “Ne, Yesus Nazaretda gi ab lebohotelo modemam bak.” Làhàmu dat fako faida nibe ab vi buddamam. “Yesus abo Dat Ahamda Boehàda Daud Vou Faat Lehe Mekehàda oa, Om eba aame faobekesi im neà bak tau modeleee. Alat Gagu Fihasi Vimteme Oluhu Dat Boehàda, ‘Om am tame,’ laham bak em ozobohuteee.” 48 Lahame buddume modeha ame dam nasi dozeadaha dam labe fa gago, “Mm, a gagomule,” lahame mali modeha ame da nibe ailahigeàmu fa bisteat neo ab vi buddamam. “Dat Ahamda Boehàda Daud Vou Faat Lehe Mekehàda oa, Om eba aame faobekesi im neà bak tau modeleee.” 49 Lahame bisteat neo vi buddameilahit Yesus gi laba ab duzuham. Duzu gago, “Le gagome vou lele.” Lahame labi gagohemu dam labe fa le ame da laba gago, “A ahu faidemule. Nasi usai duzule. Yesus oba, ‘Lele,’ lahaho.” 50 Lahame labi gagohemu Bartimeus am sue sona ahoba dusuhuda vihitoi voou àvodehat usai Yesus bake ab vulaham. 51 Vule duzu modeha Yesus ab gut gagoham. “Eho oba akati modemna oho Eba buddàla?” Lahame gagoha ame da labe fa gago, “Kaio. Ai Guru oa, em gi fako na aam biehemu àvodi na aalo àhàki Oho eba ulasi modi fa neàdem bak ozome Oba vi buddalo.” 52 Làhàmu Yesusat fa ab vi gagoham. “Oho neha, ‘Yesusat eba modi fa neàdem bak,’ laham bak lam oho nasi fet Eba tu vuzehe labe om fako faidehe bak lam Eho modi fa na aam ab neàdeham bak. Om nasi fa lale,” lahame gi etei labi gagoha Bartimeusam fako fa na aam bak ab neàdeham. Labihàmu ame da labe fa zie doni laba Yesus bake gut tau ab vi vuladamam.

Markus 11

1 Labi Yesus Aba vi tau meedam dam lamti iho neo tom ladume kota Yerusalem laba fuseo vabali Zaitun Dee Dozeadaha Bak Buzoho labe modesuhu num debu behàsu Betfageti Betaniati lahaha doni laba tom le odo. Le odosi Aba vi tau meedam dam meida behàsu gagu ab olulo meedamam. 2 Labi gagu olulo modem di labe Aho nehame vi vameada. “Um ahim nim num debu iba netàdeheda laba lafusi aameam keledai fi ho adat gàhàda lo vààsdam bak aa tame. Ame keledai lam amu damat nusu gohatehe vaba alimda modem bak. Keledai lam lo vuhatoi vuusu vou lele. 3 Lo vuhatolo modem di meit uba nehi gagomeam, ‘Im keledai uho ana modelo lo vuhatolo modela?’ labihameam làhà uho fa nehi gagole. ‘Boehàda Aba Aho ozoho baket modelo modemu gi teohet vou le fa vou lelo mozo,’ lahame uho da laba labi gagole,” lahame ab vameadume oluham. 4 Labi le aahat Yesusat lab gagu oluhu bak lam ab imbodeham. Ame keledai fi ho adat gàhàda lam gi num doo futom zie obe lo vààsdam bak ab aaham. Aahemu Yesusat vi gagu oluhu baket ab le lo vuhatosome modeha damat ab gagoham. “Aa! Im keledai uho ana modelo lo vuhatolo modela?” 6 Lahame labi gagoha dam behàsu nibe fa ab gagoham. “Mm, vabà! Boehàda Aba Aho ozoho baket modelo modemu gi teohet vou le fa vou lelo mozo,” lahame labihasu gagohemu ame dam labe uledi ab lu oluham. 7 Labi fa Yesus bake vou li ibi iho sue sona ahoba dusuhuda vihilame ame keledai adat gàhàda labe am toha laba ab nom gutaudaham. Labi gutaudume neàdi Yesusat zisi nusu ab ladamam. 8 Labi ame dam dua totbaho labe im sue sona ahoba dusuhuda lam laha vihilame ame keledai Yesus vou lam zie laba vou olualada. Labi dam totbaho labe laha bom dee bake le bom alahaso fi kbodume ame zie laba vou olualada. Labihada. Damat ozo, “Yesus abo boehàda feàda am tame,” lahame ahu adat iedi labihada. 9 Labihadume Yesus lab vou ladam di lam dam dua zoho nasi dozeadume lada. Labi dam zoho ba ohuse vi dozeame mitaeda. Labihadam dam labe iho im nehasu buteme vou bae lada: “Hosana! Ala abo feàteee. Dat abo Alat Aho Gagu Olu Ot Vai Im Dedateli iba etei ledamda nim abo feàteee!” 10 “Im tai ahobada Boehàda Daud labe aho amu meedaha bak lamti ulohona aho vou faat lehe mekehàda nibe neo etei iba vuusu im vahokedalo modemda nim abo feàteee! Hosana! Imo dam ahebu ee bisi vousai feà datebolehe Ala laba, ‘Am abo feàte,’ lahame vou baedaseee!” Lahame meit buteme vou bae lada. Labi neo meit buteme vou bae lada. Labihada. 11 Gi labihasu vou bae ladume kota Yerusalem laba ab vou fuham. Labi laba lafusi ame Fihasi Ala Bake Vou Baedam Num Vàmteabu labe am ad oli aam bak tomba le duzu nabidam labe aaha disi aibulelo modemu Am dua belasti fa futoi Betania laba ab laham. 12 Labi Betania laba le izi dihambe neo Aba vi tau meedam damti vahi Betania vou esmozi fa kota Yerusalem laba ab ladamam. Ladam di labe Yesusat idoali meeda. 13 Làhàmu Yesusat gi bak bohulat aaha ut ara abo mekehà faasi etali neàdehena zie obe laba doudam bak ab aaham. Aahemu oo sitoi àm bak ozome le netàdi nabitedaha oo aam kai. Gi et but neàdi modesda. Oo valem di fuhu vabak. 14 Làhàmu ab uloodamam. “Seee. Ut nim ba oo a valemule. Gi maileleee,” lahame ab uloome esuham. Labi Aho lab uloome esuhu bak lam Aba vi tau meedam dam labe ab vi aime esuham. 15 Labi neo ladume Yesus kota Yerusalem laba lafusi Fihasi Ala Bake Vou Baedam Num Vàmteabu labe am ad oli aam bak tomba laba le duzu aaha damat Ala bake vou baedalo na Ala bake lomna ot loidam bak aahemu meoli dam na ot loidam dam zi lamti na vadam dam lamti meoleme ootedume futoda. Labi doi meit iube vou leheda abo na vam biem doi vame fa ame Num Vàmteabu laba na ba vam neà doi lam ot loiam dam iho doi vahedam beahuba lam vuu vaktemoda. Labi laha damat meki fi ho ot loiam di nusumna lam laha vuu vaktemoda. Labihasu ab veimodamam. 16 Gi im lada lamota meedam vabak. Fa neo ame na lam vame fa ame Fihasi Ala Bake Vou Baedam Num Vàmteabu labe am ad oli aam bak tomba olem doo laba vou olem bak laha ab maleham bak. 17 Labi Yesusat dam duada laba vahokedam labe meoli neha, “Meit Alat Vameadaha Im Toedahana laba im meida nim um aam vaba? ‘Alat neha, “Em num nim gi dam debu mei dam debu mei labihasu ahebu Eba tom gagodam numat modem bak.” ’ Lahame toehena um akati aalahigeàmu meit na aa ve voutame fi olehe bak ozome vou oli vasti esdam bakti ulohona modi Em num feàda niba oli im mei faasi meedàla?” lahame faki meoli meedam labe ame beahuba zi lam veimome afoezobe dam soa neo odosu veimome dam ab ilidamam. 18 Labi ame di labe damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti iho Yesusat etei lab gagoho bak lam aihemu faki, “Imo Yesus otese,” lahame ozom bak faasi im aa ab odoadamam. Dam dua bak fa Yesusat vahokedaha im laba àvodi fa ibi iho vahokedaha im mu voou fa Yesus bake tum bak labna zohàme iedi vou faovoi, “Yesus otese,” lahame vi ozoda. 19 Yesus Aba vi tau meedam damti disi aibulehemu aibut am damti kota Yerusalem vou esmozi ibi iho esum bak laba fa ab laham. 20 Labi izi dihasi dihambe Yesus Aba vi tau meedam dam lamti iho usai neo kota Yerusalem laba fa ladameam labe aaha ut ara Yesusat màt ulooho ut lam alai bozili seti modesdam bak ab aaham. 21 Làhàmu Petrusat vi ozobohudi Yesus bake ab gagoham. “Ai Guru oa, nasi aama. Oho màt ulooho ut araso lam gi ab alai bozili doudamam bak.” 22 Lahame labi gagoha Yesusat fa ab gagoham. “Nasi Ala bake tu vuzehele. Uho Ala bake gagom im lam Alat uledi modem bak. 23 Imbote. Ala bake mahate tu vuzehele. Labi Eho etei uba neo gagolo modem im imboda nidi nim laha nasi aima. Um ahu behàsdi vi ozodam vaba abo ahu vàmadi nehi gagomeam, ‘Bak buzoho nim itezeavai itea feàna laba nom ilu fi oli setele,’ lahame ahu vàmadi tu vuzehi gagom di uho lab gagoho bak lam ame baket modem bak. 24 Labihàmu Eho uba nehi gagolo modem bak. Ubu uho valo Ala bake tom gagodamna lam uho nehi fet ozo, ‘Ame na lam Alat iba lom bak,’ lahame ahu vàmadi tu vuzehemeam làhà ame na lam uho vam bak. 25 Labi uho laha duzu Ala bake tom gagolo modem di meit uba git modehemu uho fakemda ehelemeam làhà nasi ame da laba ozahigeàmu vei neàdi ba tom gagodale. Ubu uho faina meedam bak lam um Ai Ala asum ahoba iube Aho gi vei mu fa faamome vei neàdem bake labihadale. [ 26 Lahana meit uba fai bak modeheda lam uho fa ozahigeàmu fa vei neàdem vabameam làhà um Ai Ala asum ahoba iube ba ubu uho faina meedam bak lam laha ba gi vei mu fa faamome vei neàdem vabak,”] lahame Yesusat ab vahokedaham. 27 Labi vahokedume neàdi Yesus Aba vi tau meedam damti iho neo ladume kota Yerusalem laba lafusi Yesus ame Fihasi Ala Bake Vou Baedam Num Vàmteabu labe am ad oli aam bak tomba laba le godam di labe Yahudi damat ibi iho tu vuzehi meedam im vuusdam tohe dam zi labe Yesus bake li netàdi daet beàdalo vabi vi ailo ab gagoham. 28 “Ne, Oba amat modi vizi teudi im feàna lam Oho duzu meedàla? Oho nib li meedam im nim Oba amat gagu im dedateli Oho vuusu meedàla?” 29 Lahame labi gagu modeha Yesusat fa gago, “Im ubuda faode. Ebe Eho etei uba fi bovai vi ailo gagomda nim uba nasi vi gagu aise. Ne, Yohanes Mei Vuu Valo Baptisleiamda labe aba aho amu mei vuu valo baptisleiam bak lam amat Yohanes bake gagu aho ame bak lam meedahela? Alat aba gagu aho ame bak lam meedaheo? Laham vabameam damat aba gagu aho ame bak lam meedaheo? Akatihahela? Uho ame bak lam Eba fa gagomta uho etei Eba lab gagu vi ailo modem bak lam Eho fa uba vi gago tame.” 31 Lahame labi gagu vou faoha ame Yahudi ee dam zi labe gi ihimo ot gagoida. “Uho ozom, iho akatihasu fa Yesus bake gagoe? Iho nehameam, ‘Alat Yohanes gagu olu meedaha bak,’ lahame labi gagomeam làhà Yesusat fa iba nehame vàlu gagom bak. ‘Ne, um lahana akati Yohanes am im aime tu vuzehem vaba moudume mohela?’ lahame iba labi fa gagom bak. 32 Laham vaba iho neo nehi gagomeam, ‘Damat gagu oluha,’ lahame labi gagomeam dam etei iba tau dozeadaha dam totbaho zi nibe iba beom bak. Neham bak. Dam etei iba tau dozeadaha dam totbaho zi nim, ‘Yohanes ba damat gagu olu meedaha vabak. Am gi Alat vameadaha im aime fa dam bake ahate vameaidahada meida am am bak,’ laham bak ozobohu labe iho fa im mei gagomeam làhà dam iba faki beom bak.” 33 Lahame ame dam busaoda zi labe ihimo vou faovoi iedi fa vei biehenali Yesus bake fa ab vi gagoham. “Yohanes aho amu lab meedaha bak lam, ‘Amat aba gagu olu meedàla?’ laham bak lam im bieho.” Lahahat Yesusat fa dam laba ab gagoham. “Lo, làhà Eho li meedam im zi nim, ‘Amat Eba gagu olu Eho im dedateli meedàla?’ laham bak lam Em laha ba uba gagom vabak,” lahame ab vasteham.

Markus 12

1 Labi Yesus im lada lam gagu neàdi Aho ame Yahudi dam eeda zi laba im meida nim neo nehame vi vahokeda. “Eho etei uba totobet fi koadalo modem im nim uho mahate aime vi ozodale. Dat utoho deda nibe am tat vueheba laba am na meedam dam gagome anggur neb zi deddume neàdi esu. Labi neo am na meedam dam laba neha, ‘Um laha em anggur dee nim ke vou vahe lame fi bovai esule. Labi afoezobe ame anggur oo amdehezobe vaheme meit duzu uname vaksa futom bake ozome ke baana nabime ve fa ahit feme bumatali esule. Labi neo damat em anggur dee aa li modem bake azi nom vou aasdam num kilana laha mome duzule,’ lahame gagu olu ame baket ab modeham. Labi modeme neàdi anggur deda labe bak mei bake lalo modemu dam na debe soali modeme vahem dam zoho laba gago, ‘Uho em anggur dee nim teohet vou aasdume amdehezobe modeme vahedam di zoho uho va. Zoho eba naedate vahedume esu. Labihadale,’ lahame it gagu esmozi bak bohu bake ab laham. 2 Labi le aidamehamdi ozoha, am anggur oo vaedume amdem bak fuhemu fa am na meedamda meida laba gagu ab oluham. ‘Em anggur dee teohet vou aasdam dam labe iho ot loiame vaha doi ebe eho vam zoho eba esuhuda lam le vame fa vou lele,’ lahame gagu ab oluham. 3 Labi le gagoha ame anggur dee teohet vou aasdam dam labe ame da lam lehemu gut si foadume saemea fa ab oluham. 4 Labi anggur deda labe gut aaha dat gi saemea fa lehemu am na meedamda meida laba neo gagu fa ab oluham. Labi olu lafusi modeha ame anggur dee teohet vou aasdam dam labe neo gi ohula gut fu game ladi ab oluham. 5 Labihàmu ame anggur deda labe neo gut aaha neo dat gi saemea fa lehemu dat meida laba neo ab gagu oluham. Olu fusi modehat ab gut oteham. Gi ame baket neo modidam labe ame anggur dee vou aasdam dam labe neo dam zoho gut odda. Labi dam zoho gi foadume fa saemea ouda. Gi labihada. 6 Gi labihadume modeha am adat abo aho bisi deeleheda lamota ab vekeham. Làhàmu ab ozoham. ‘Ne, em akati mode? Làhà gi em adat nim neo gagu oluse. Eho labihameam dam labe fa em adat bake vei ladi ahu adat iedi fa eba doi lu olum zoaha bak,’ lahame vi ozome neàdi am adat ab gagu oluham. 7 Olu ladume lafuseo vabalehe di labe ame anggur dee teohet vou aasdam dam labe gi bak bohulana gut aaha anggur deda labe am adat ledam bak aahemu neha, ‘Da nim ba am aiam na misia vamda am taia? Imo da nim oteme afoezobe anggur dee nim fa im na misialese,’ lahame im aa ab odoadaham. 8 Labi im aa odoadume neàdi ame da fuhuzobe neo gut si oteme am koeiso vou kea lame anggur dee natàh ke labe vou futoi bako iuba ab vooham.” 9 Lahame Yesus ame im totobe lam fi koadume neàdi neo ame Yahudi dam busaoda zi laba vi ailo ab gagoham. “Uho ozom, ame anggur deda labe fa li am anggur dee teohet vou aasdam dam laba li akati modela? Gi neha taia? Dat naeda fa li ame anggur dee teohet vou aasdam dam laba oddam bak. Labi oddume am anggur dee lam fa dam amomoi gagome fa vou aasdam bak. 10 Imbo bak. Eho etei uba lab gagoho bak lam abo imbote. Lahana meit Alat Vameadaha Im Toedahana laba im meida nehi toehena nim um aame vi ozobohudehe vaba? ‘Dam num moadam dam labe, “Faite,” lahame mu vooho ke lam fa feà Dateli bisi num mome teudem ke am bak. 11 Ame bak lam Boehàda Alat Ahamo ozome modehe bak. Labi Aho lab modehe bak lam iho aam di damat ihimo modem biem im feàna modehena aaha bak.’ Lahame toeme esuhu im lam um vi aame ozobohudehe vaba? Ame im lam etei ab imbodi uho Eba ab moudamam bak.” 12 Lahame labi vameadume modeha ame Yahudi dam eeda zi labe iho Yesusat etei lab totobet fi koadaha im lam aihemu ab ozoham. “Oo, Yesusat etei lab vameadaha im lam gi iba vàlu vameada taia? Aho li vahokedaha im lam iho aim mu vooho bak laba ozome ame anggur dee teohet vou aasdam dam laba gi vàlu im totobet fi koadaha taia? Imo Yesus sise,” lahame ahu gukeme modem faidi seti vi ozodaha, dam duada totbaho Yesus bake tuhuda feà labe iedi Am sim bili Yesus vou esmozi fa ab laham. 13 Labi ame Yahudi dam eeda zi labe fa le vou faobe neo im aa odoadume neàdi dam iba taumda ab gagu ledaham. Neha: Farisi dam totbaho ame. Labi Galilea bak laba azim dam laba vuusdam Boehàda Herodes Antipas bake taumda zi ame. Labihasu gagome ledahazobe im nehasu vameame Yesus bake ab oluham. “Uho Yesus bake ahit fi bovai im mei im meime gagu vi aimeam Yesusat git gagoho bak aihizobe sile,” lahame vameadume neàdi Yesus bake ab oluham. 14 Labi le Yesus bake ab gagoham. “Guru oa, Oho lab meedam bak lam im ahebu ozobohu bak. Om abo im vamdesu meedamda Om am bak. Labi Alat ozo, ‘Dam bakda nehasu meedase,’ lahame Aba Aho ozoho im lam Oho dam bake im vahokedam di Om laha gi im vamdesu imbona vahokedam bak. Om ba neham bak modem vabak. ‘Da lam ee feàda Eba im gagohe? Làhà Em aime tuse.’ Laham vab di, ‘Da lam ee vabda Eba im gagohe? Làhà Em aime tum bak mose,’ lahame ba dam fahedam vabak. Labiham labe damat Oba ozomsu gagom di Om ba ame im lam aime iedi vuzehem vabak. Om labiham dàt modemu iho nehi Oba gagu vi ailo modem bak. Im Yahudi dam ihimo dat ahamda Musat toedume fi hasi esuhu Im Feàna zi lam iho tu vuzehi meedam labe Oho ozom, pemerintah iba vuusu meedam bak gohali lodam doi pajak lam iho ame doi lam fa Kaisarleheda laba lodam neào? Ame Im Feàna zi labet iba maleheo? Akatihà?” Lahame labi gagoha Yesusat ame dam labe Aba vàlulo ahit keobaedume fi bovai vi ailo modem bak lam Ahamo ozobohudi fa ab gagoham. “Um gi ahobat neàdi Eba li vameadam damat modem bak. Uho akati, ‘Eho git gagose,’ lahame ahit Eba li gagu vi ailo meedà? Uho ame pajak abo gi vi tau lodam doi oona perakat modehena lam Eba fi male.” 16 Làhàmu ame dam labe le ame doi oona visoi fa vou li Yesus bake ab loham. Labi Aho ve vousai dam bake fi si vimtedam labe ab vi gagoham. “Ame doi nim amam dauhati ulohona modesuhela? Labi amam ee laba toehela?” Lahahat dam labe neha, “Dam ahebu vuusdam Kaisarleheda labe am dauhati am eeti modesuhu bak.” 17 Lahame labi gagoha Yesusat fa neo vi gago, “Làhà uho dam ahebu vuusdam Kaisarleheda laba na abada lam fa naedate loda. Labi uho laha Alat Aba Aho gagohoda lam laha meeda. Labihadale.” Lahame labi gagohemu ame dam labe Yesus git gagom bak aiesome ame im lam gagoha Yesusat git gagom vabamu ab àvodeham. 18 Labi ame digat zoho labe Saduki dam labe laha neo Yesus bake gagu vi ailo ab li dozeadaham. Ame Saduki dam labe iho ozome tuhu im gi neha, “Mei elom di ba fat ahedi usam kaio,” lahame tu ozodam dam am bak. Laham dam labe Yesus bake li vi ailo ab gagoham. 19 “Guru oa, dat ahamda Musat aho toedume fi hasi iba esuhu Im Feàna zi lam im meida nehi toeme fi hasi esuhu bak. ‘Meit am itbaho fatoho vaba elomeam làhà fa ame nam maboe lam am dam zohot fa ve data faasi, “Ame koei labe am data am tame,” laham bak ozome debu bohulalelo ame maboe lam koei labe am vahadat modeo, am dubut modeo, fa vale,’ lahame Musat aham di iube labi toeme fi hasi iba esuhu bak. 20 Ne lahana iho etei vouholo modem im nim Oho nasi aimale. Amu di iube ame dam abo tujuh ehet. Datahida ame. Labi donida lima ame. Labi domuàda ame. Labihasu ame dam tujuh labe dat datahida nam ab vaham. Labi ve modeha ame nam lam data faaha vabna dat ab eloham. 21 Labi ame maboe lam ame koei laba vi tusuhu dàt fa neo ab vaham. Labi ve modeha ame maboe lam data faaha vabna dat neo ab eloham. Labi ame maboe lam dat doni dàt fa neo ab vaham. Labi ve modeha ame maboe lam data faaha vabna neo dat ab eloham. 22 Gi labihasu vou mode ledume dat domuàdate ab vou fuham. Labi vou fusi modeha gi neo ame baket modi ame maboe lam data faaha vabna dat ab eloham. Labiha ladume ame dam tujuh ahebu ab foli seteham. Labi ame maboe lam ba neo ab vi eloham.” 23 Lahame ame Saduki dam labe iho ame im lam vouhome neàdi, “Im elom di ba ahedi usào?” laham bak lam tozolo Yesus bake neo vi ailo ab gagoham. “Làhà Oho lab gagoho bak lam, ‘Mei elom di fat ahedi usam bak,’ lahame Oho lab tu ozome gagoho im lam imbodemeam làhà ba diamut dam ahebu elodaha dam fat ahededume usnadam di lam ame dam tujuh labe ototo vaidume ba vi eloho nam lam Oho ozom, amam namet mode?” 24 Lahahat Yesusat fa ab gagoham. “Vabà! Um git ozome gagoho bak. Alat Vameadaha Im Toedahana lam uho mahate aame vi ozome ozobohudehe vab damat modem bak. Labi Ala laha im feàna modem Alat modem labe dam elohonàme Aho modi fa neàdem meo bak um laha vabiem damat modem bak. 25 Ba diamut dam elodaha bak labet Alat modi fa ahededume usnadam di lam dam ba lahi vam vabak. Labi laha lahi ba dam vam vabak. Gi Alat Am im gagu vou usem dam labe iho asum ahoba iuba azim di gi soaona esdam bakti uloho bak. 26 Ne lahana uho neha, ‘Dam elodaha dam labe im elodaha bak labet Alat modi fa ahededume usnadam vabak,’ lahame uho lab gagoho bak lam git ozome gagoho bak. Eho ozoha, uho Musat aham di iube toedume esuhu im lam vi aame ozodam vab damat modem bak. Aham di iube ut aabadehena buà lam vuat eludam bak Musat vi aadàmu aasuhat vua elum bak lam taho faali setem vabamu Musat le netàdi ab aasdamam. Labi aasdume modeha Alat am dae vua labe futoi Musa bake nehame vameadaha bak. ‘Em abo Abrahamti Isakti Yakubti labihasu Eho vuusuhu labe ame dam labe Eba vi ozome vou baedam Ala Em am bak.’ Lahame vameadahana toeme esuhu im lam uho mahate vi ozodam vab damat modem bak. Alat aham di iube lab gagoho bak lam ame dam làtela lam gi elodahanàme fat ahedi Aba vou baedam lahasuhu bak lam Aho vameadaha bak. 27 Labiham labe Eho vi ozom, dam elodahada zi labe ba Ala bake vou baedam vab taia? Gi dam ahe damat ihimo Ala bake vou baeda taia? Um abo git ozoho damat modem bak,” lahame ab vameadaham. 28 Labi Yesusti ame Saduki dam lamti daet ot beidam di lam dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru meida vàmtea labe aho ba vuli tau duzu aiha Yesusat gi im neàt fa vameadàmu aho neo aba aho ozohoda lam fa Yesus bake vi ailo ab gagoham. “Guru oa, Oho ozom, Alat neha, ‘Meedale,’ lahame gagu esuhu im zi lam bisi im tombuda iho modemda akete? Oho nasi gagomale.” 29 Lahahat Yesusat fa gago, “Eho ozoha, Alat Vameadaha Im Toedahana zi labe im bisi tombuda gi nehaha bak. ‘Israel dam oa, Boehàda iba vuusdamda iho vou baedam Ala lam gi vàmtea bak. Ba amomoi kaio. 30 Labihàmu im dam ahebu meit am ahu vàmadi Ala bake deeli gi labaha bohu vuusda. Labi meit laha gi ame baket mode. Labihadale.’ Lahame Musat laba toehe im lada lam bisi tombuda am bak. 31 Labi im meida nehi toehe bak. ‘Uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.’ Ba ame Musat aho toedume fi hasi esuhu Im Feàna zi abo damat vou vamea usehena lam iho vi ozom di ba modi tombulemda amomoi vabak. Gi ame im behàsu am bak.” 32 Lahame labi gagoha ame guru labe fa neo vi gago, “Lo, Om abo neà gagoho. Oho neha, ‘Iba vuusdamda iho vou baedam Ala lam gi vàmtea bak. Ba amomoi kaio,’ lahame Oho etei lab gagoho bak lam imbote. 33 Labi Oho neha, ‘Im dam ahebu gi ahu vàmadi Ala bake deeli gi labaha bohu vuusdale,’ lahaha bak lamti labi, ‘Iho naedamat it deeli vou faovoi vabiedam bak lamti ulohona vi ozome fa dam amomoi bake laha ame baket meedale,’ lahaha bak lamti bisi iho vi ozome vuusu tombulemda am bak. Lahana, ‘Iho Ala bake vi ozome na fi ho vua vahudamda modeo, na amomoi Ala bake vi ozome lomda modeo, labihasu meedale,’ lahame vamea usehe im lada lam bisi tombuda modem vabak.” 34 Lahame labi gagoha Yesusat aime vi ozo, “Làhà da lam abo im ozobohudi gagohe?” lahame vi ozobohudi ame da laba fa ab vi gagoham. “Alat dam bake deeli vame Am damali vuusu im vahokedam bak lam abo gàhà bak lam om ozobohudi ab fi gatelo vabaleham bak. Eho ozoha, om kehàm vaba Eba tu vuzehi ab Alam damalelo modemam bak.” Yesusat gi neà bak labihasu gagodàmu Yahudi dam eeda zi labe iho git neo vi gagomeam iba neo modi ladem bak labna zohàme ame digat labe faasi im dam meidavat ba Yesus bake im vi gagu aim bak ab moham. 35 Labi ame Fihasi Ala Bake Vou Baedam Num Vàmteabu labe am ad oli aam bak tomba laba Yesusat dam bake vahokedam lahasuhu di labe Am gi ozobohunàme neo ahit dam bake vi ailo ab gagoham. “Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe iho akati modi ame Alat Gagu Fihasi Vimteme Oluhu Dat Boehàda laba im nehasu gagodàla? ‘Am abo boehàda Israel dam bake vuusdam dat ahamda amu gi eloi seteheda abo Daud labe am mekehàdat modem bak,’ lahame labi gagodàla? 36 Ne, aham di iube Alam Aha Nutabe Neàna labe Aho Daud bake modi vizi teudi Daud ahamo nehi gagohona taia? Aho neha: ‘Na Debu Modehe Ala labe Aho fa eba vuusdam Boehàda laba gago, “Om Em ahi totbaho niba nusu Eba tau im dedateli dam vuusu im vahokedase. Labi Eho dam Oba fakemoholehe dam zi lam Eho ahit modi bedi fà Oba iedi uledi im Oboda fà aime meedase.” ’ Lahame Daud aham di iube labi toeme esuhu bak. 37 Daud ahamo Alat Ba Gagu Fihasi Vimteme Olulo Modemda Boehàda laba neha, ‘Eba vuusdam Boehàda,’ lahame labi gagodàmu ba akati meit Alat Gagu Fihasi Vimteme Oluhu Dat Boehàda laba neha, ‘Boehàda Daum mekehàda modem bak,’ lahame labi gagodàla? Labihameam làhà Alat Gagu Fihasi Vimteme Oluhu Dat Boehàda lam fa Boehàda Daud vafozi bisi feà Dateleheda Am taia?” Lahame Yesusat labihasu vameadàmu ame dam duada zi labe iho gi deelehat ab vi aidamam. 38 Yesusat dam duada zi laba neo nehame vi vameada. “Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe ibi iho meedam bak uba vizemo. Labiham bake um abo iademe it vou faovoi meedale. Ame guru zi labe ibi iho meedam bak gi nehadam bak. ‘Dam totbaho iba fà gut baedase,’ laham bak ozome sue sona ahoba dusumda bohuna duadume damat im vameadam bak tomba laba le it aai it aaidam labe deeli goom bak ame. Labi iho neo dam duana zi dokbuedam bak laba le damat fà, ‘Neàte,’ lahame iba gut gagom bake deeli meedam bak ame. 39 Labi neo im Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di vedi dam feàda ihimo nusum bak laba deeli nusualadam meo bak ame. Labi laha na zi vaheme àlo modem di vedi dam feàda ihimo nusu na àm bak laba bisi netàdi vi tau nusu na àdam meo bak ame. 40 Labi maboe zi laba ahit neha, ‘Im om vou aasdalo mozo,’ laham dam labet vedi ahi vageme netàdi maboe nazoh fetehesu vi vadume dualem bak ame. Labi laha Ala bake tom gagodam di iho lab faina modehe bak lam vedi ahit vasti ihimo neà damali gi Ala bake la gagoi le gagoidam labe bohulaledam bak ame. Aiee! Ame dam labe labihasu meedam damat modem labe Alat ba diamut, ‘Fa duana modi geàdase,’ lahame na asimbuna feà ame dam laba meeda tame,” lahame Yesusat ab vameadaham. 41 Labi Yesusat im lada lam vameadume neàdi Aho ame Fihasi Ala Bake Vou Baedam Num Vàmteabu labe am ad oli aam bak tomba abo damat Ala bake lodamna vahedamnabu modesuhu bak laba netàdi nusu dam duada labe iho Ala bake doi duadam bak laba vi aasda. Vi aasdameam aaha dam na duada labe iho doi duana duadam bak ab aaham. 42 Labi neo gut aaha na vab nam maboe labe neo li aba aho Ala bake lolo modemna abo doi oona koena behàsu tembagat modehena ab vou li tau dusuham. Ame doi lam ozom di na vam biemna ozomomnat modem bak. 43 Yesusat ame bak lam aahemu Aba vi tau meedam dam laba, “Aba netàdi li dozeadale,” lahame gagu ab li dozeadaham. Li dozeadume neàdi ab gagoham. “Eho etei uba gagolo modem im imboda nidi nim nasi aima. Na vab nam maboe labe aba aho etei Ala bake loho doi lamti dam duada labe ibi iho Ala bake lodaha doi lamti labihasu ozom di bisi na duana Ala bake lohona ozomomda gi maboe abada am bak. Neham bak. 44 Ame nazoh dua dam labe vedi doi dua totbaho iho naedamat vada. Labi gi totbaho Ala bake loda. Lahana ame nam maboena nim labiham kai. Ame maboe lam na vab nam modemnàme abada gi ahebu loho bak. Aba aho modi ahedelo modem bak gi ab lu seteham bak,” lahame ab vameadaham.

Markus 13

1 Labi Yesusat ame Fihasi Ala Bake Vou Baedam Num Vàmteabu labe am ad oli aam bak tomba lam vou esmozi futoi lalo modem di labe Aba vi tau meedam dam meida vàmtea labe aho it aame Yesus bake ab gagoham. “Guru oa, ame Num Vàmteabu nim kebu feàna susume moadaha na feà nim Om aadào?” 2 Lahame labi gagoha Yesusat fa ab vi gagoham. “Uho etei lab aadamna zi lam bisi labaha bohu modesdam vabak. Ame ke mei ahoba vou vahe zihina zi lam ba fa faamome gi alimdi seddam bak,” lahame ab gagoham. 3 Labi neo ladume kota Yerusalem lam vou esmozi bàhàgo obe labet le Zaitun Dee Dozeadaha Bak Buzoho laba ab laiteham. Ame bak lam ame Fihasi Ala Bake Vou Baedam Num Vàmteabu labe doudam bak dum aam neà bak laba laisi odosi esdam di lam Petrusti Yakobusti Yohanesti Andreasti labihasu ihimo Yesus bake li aa vi ailo ab gagoham. “Guru oa, Oho etei lab vi ozome gagoho im lam adi diat modemna gagohela? Labi ame bak lam modelo modem diat amu ana nasi iba fet vouhoho bak iho aame ozo, ‘Ame bak lam ab modelo modem ame?’ lahame iho ana aame ozobohudela?” 5 Lahahat Yesusat fa ab gagoham. “Iho bak niba esu meedam im zi ahebu ba novai vaitolo modem digat fuseo modem di lam amu im nehamda nasi meeda tame. Amu dam duada totbaho labe uba nasi li neha, ‘Em abo Alat Gagu Fihasi Vimteme Oluhu Dat Boehàda am tame,’ lahame uba li ahit vageme keobaedam labe damat vabi imbo tibame dam dua zoho vi ozome tu vuzeheda tame. Labiham bake uho iademe vou faovoi esdam labe vou faodale. 7 Labi laha ame ba novai vaitolo modem digat fuseo modem di lam damat uba nasi li im nehasu vameada tame. ‘Dam bak kia bak ium ot fakiame ot belui ot beluidalo.’ Labi, ‘Dam bak netà bak niba ot fakiame ot belui ot beluidalo.’ Labihasu uba nasi li vameadam bak ehete. Lahana uho labihasuhuna aim di um ahu a bisi iedi vi ozodamule. Ame ba novai vaitom digat lam di labe taho fum vabak. 8 Labi ame di labe im nehasu laha meeda tame. Dam debu fa vàmadiaha bak lamti dam debu fa vàmadiaha bak lamti ot fakiame ot belui ot beluidam bak ame. Labi bak amomoi vuusdam boehàda am damti bak amomoi vuusdam boehàda am damti labihasu ot fakiame ot belui ot beluidam bak ame. Labi bak iuba modeo, bak iuba modeo, di neà faasi bak aotbali na debe soali àm vabili idoali ibzidume dam elodam bak ame. Labi bak iuba modeo, bak iuba modeo, balim feàna nigome dam beodume foedam bak ame. Labihasu ahamte faasi meedam im zi am bak. Abo lahit data faaseo modem di labe ahamte vi ozome vàzbudam bak lamti uloho bak. Lahana a bisi iedi vi ozodamule. Eho etei lab vameadaha im lam nasi meedamta meeda. Lahana dam bakda zi ahebu foli seddam digat lam di labe taho fum kaio. Ame bak lam vou meedamehamdi ba vou fuse tame. 9 Labi laha uho mei bake le meedam di labe uho Eba tu vuzehi vi tau meedam damat modemu uba nehada tame. Uba fakemoholehe dam labe um siàdume fa Yahudi dam labe ibi iho tu vuzehi meedam bak gagu faheme modiam dam labe ibi iho meit im modem diat uloodume aim dam debu koeda laba ub lodam bak ame. Labi laha uloodume aime neàdi fa uhumo fi hasi bakamta vahi Alat vameadaha im ahamda dogoit aidam bakti im meiti meedam num laba um vou oli na sokba nasbe ahit alibulehena labe uba foadume geàdam bak ame. Labi laha uho Eba tu vuzehi vi tau meedam damat modemu uba fakemoholehe dam labe ozo, ‘Im boehàda zi labe laha dam nim uloodume vi aime beodase,’ laham bak laba ozome um siàdume bak ahaladiame vuusuidam boehàdatebo zi lamti dam eeda zi lamti laham dam laba vou le duzu uba uloodume aidam bak ame. Lahana ame bak lam meedam di a iedemule. Neham bak. Uho ame dam laba neha, ‘Iho Yesus bake tu vuzeheho,’ laham bak ahate vameadam bake Alat ahit uba modi labihada tame. Labihasu meedam im zi lam uba meedam bak ehe bake iademe it vou faovoi meedale. 10 Eho meedaha Im Neàna lam meit bak mei bak iuba le vou vameatedume fi deda. Meit bak mei bak iuba le vou vameatedume fi deda. Labihadume dam mei debuti dam mei debuti vou vameatedume uloholi neàdi ame ba novai vaitolo modem digat lam ab vou fumam tame. 11 Lahana uba fakemoholehe dam labe uho Eba tu vuzehe bake faki um si damat bakamta vahi uloodume aidam debu laba vou le ub lodume ame damat fa uba uloodam di lam uho neha, ‘Iho im akatihasu fa vi gagoela?’ laham bak a bisi àvodi vi ozodamule. Gi ahu keahumtedesu vou faodale. Damat uba uloodume gagu vi ailo modem di lam uho fa vi gagolo modem di gi Alat Aho uba modi vizi fi gatehe im lamota uho iedem vabna fa vi gagodale. Ame di lam ba uhumo gagodam vabak. Gi Em Ai labe Am Aha Nutabe Neàna Labe fa uba modi vizehe labe uho ot vai gagodam bak. 12 Labi laha ame di labe uho Eba tu vuzehi vi tau meedam damat modemu dam duadat uba faki im nehasu meeda tame. Dat meida lam Eba tu vuzehe vabda labe am vahada Eba tu vuzeheda lam fa vou fohome meia ub lu otem bak ame. Labi dat meida lam Eba tu vuzehe vabda labe am dubu Eba tu vuzeheda lam fa vou fohome meia ub lu otem bak ame. Labi dat meida lam Eba tu vuzehe vabda labe am data Eba tu vuzeheda lam fa vou fohome meia ub lu otem bak ame. Labi mei data labe fa am ai modeo, am oi modeo, ibi iho gagoho im voou fa daet bohudi fa vou fohome meia ub lu otem bak ame. Labihada tame. Lahana Eba tu vuzehi meedam dam lam naat iba vabidam di iho gi ozahit keàtedi tu vuzehi meedam bohu vuusdume digat ba novai vaitomda laba vou fusi meedam dam lam Eho soat vausu fa vei neàdedam dam am bak,” lahame Yesusat fet ab vameadaham. 14 Labi Yesusat neo nehame susume vi vameada. “Ba novai vaitom digat fuseo modem di labe uho nehi fet aame ozobohudemna Eho uba ab fet gagolo modemam bak. ‘Ba diamut aam ahasbeamna abo Alat aam fakemda lam fa ame Fihasi Ala Bake Vou Baedam Num Vàmteabu laba oli duzu vàhàdehemu damat ame num lam gi mu vou esmo tame.’ Lahame Daniel lab fet vameame vàmadi esuhu im lam imbodi amena aam ahasbeamna labe ame Num Vàmteabu labe am Fota Fiham Zoho abo duzum maem zoho laba duzuhu bak uho aameam làhà ame digat ab fuseo meedamam bak. (Damat Daniel aho fet toeme esuhu im lam meit aame ozom di, ‘Akatihasu modem bake gagohela?’ lahame mahate fetehesu vi ozome ozobohudele). Labihàmu amena aam ahasbeamna lam uho ame num laba duzuhu bak aameam làhà um Yudea bak laba azim dam labe uho laba a esdamule. Um foli seddam bak labna zohàme ahedem bak laba ozome gi taho sibu bak iuba iitaole. 15 Labi laha ame digat lam fuseo meedàmu ubu uho num ohut vabna baa ahoba laba zisi esdam dam lam a fa um numa oli na koena it ve voutamule. Gi ahebu vou esmozi iitaole. 16 Labi laha ame digat fuseo meedàmu dam utoho bake le godam dam labe a nehi ozo, ‘Em nutahalem bake num bake fa emoeme em sue sona ahoba dusumda it visoi vou itase,’ lahame fa um num bake a lamule. Gi labihasu vou esmozi taho iitaole. 17 Aiee! Lahana lahi zubuleheda zi lamti data tatvamda do àm lahasuhuda eheda zi lamti iitaom vanamam bak akati modelo? Làhà gi emoem vabilemnàme taho ozahit betea iitaole. 18 Labi laha uho lab iitaom digat vi ozom di uho mahate Ala bake nehame tom gagodale. ‘Ai Ala oa, ame digat fuseo meedam di a di faidi emoem biem digat lam a modemule. Gi fa digat amomoi ozome iba modi iitaole,’ lahame mahate Ala bake labihasu tom gagodale. 19 Eho gi neham bak vi ozome uba labi gagoho bak. Ame digat fuseo meedam di lam ba dam bakdate modi geàdamna lam ba koena modi geàdam kaio. Abo duana modi geàda tame. Amu Alat alimeat bak nim ahamte modehe di labe faasi vou mode ledume etei vou fusi meedam digat nim dam bakdate labihasu modi geàdamna lam ba na vabak. Gi ba novai vaitolo modem digat fum di ame im meedam di am bak. Labi laha ba diamut neo vi meedam bak na vabak. 20 Lahana Alat Aho fi hasi vame Am damalehe dam laba Aho bisi vi ozome deeli faobekesi meedàmu ame geàdam bak lam Aho ahit modi fa zohobuli vaito tame. Aho faobekesi ame bak lam zohobulem vabameam dat meida so lam vàmtea vekehe vaba gi dam ahebu modi vàhàdedume seddam bak. 21 Labi laha ame ba novai vaitolo modem digat fuseo meedam di lam meit uba nehi gagomeam, ‘Nime! Alat Gagu Fihasi Vimteme Oluhu Dat Boehàda neam tame,’ lahame labi gagom bak modeo, ‘Iume! Ame Da lam tame,’ lahame uba labi gagom bak lam modeo, um nasi a aime imbo tibame tu vuzehemule. Giomimot modem bak. 22 Eho gi neham bak ozome uba labi gagoho bak. Ame di labe damat lehe bak aaha vab dàt im nehasu vameadamna uho ai tame. ‘Em abo Alat Gagu Fihasi Vimteme Oluhu Dat Boehàda am tame,’ lahame giomim gagodamda modeo, ‘Alat Am im eba gagu eho ot vai dam bake ahate vameaidahada em ame Da am tame,’ lahame giomim gagodamda modeo, labihasu duzu vameadam dam uho aa tame. Ame dam labe nehi ozo, ‘Damat fà ibi iho vameadaha im aime iba tuse,’ lahame ozome ahit na damat ihimo modem biem im feàna lamti abo damat fet aame ozome àvodi meedamna lamti labihasu meedam labe dam duada zoho vedi imbo tibame ame im laba tu vuzehe tame. Ame giomim vameadam dam labe iho lab vou li vameadam im lam Alat fi hasi vame Am damalehe dam labe aime vuzehem bak mom bak lam ame dam labe iho ozobohuna ahit, ‘Modi aase,’ lahame vameada tame. Labihadamnàme Alat fi hasi vame Am damalehe dam labe ba ame bak lam tu vuzehem vabak. 23 Labihàmu mahate it vou faovoele. Eho ame im zi lam vameadam bak lam uho vi ozome ozobohudem bake Eho ahit uba nasi fet labihasu vameadume esulo modem bak,” lahame Yesusat fet ab vameadaham. 24 Labi Yesusat neo susume vi vameada. “Ame ba novai vaitolo modem digat fuseo meedam di labe dam bakdate modi geàdamna zi lam foli neàdi kehàm vaba im nehasuhuda neo meedam bak aada tame. Ala digadda fa aibuli ba fauhaedam vaba modesda. Labi ala useheda lam ba fauhaedam vaba gi aibuli modesda. 25 Labi falo zi lam fa bake nom fi goaitoi bidda. Labi asum ahoba iuba modealahana zi feà lam betea bakamta modealadam vaba gi ihevoulai ihevoulaida. Labihasu meeda tame. 26 Labi ame di labe damat tom aam di Em Abo Asum Ahoba Iubet Bak Niba Li Dateleheda Em Aiat Am na fauha meona fako iedemna ogatei modealaha bak lam fa Eba modi vizi feà Dateli uloti nom vousdam bak lam damat aada tame. 27 Labi ame di labe Eho laha Em im gagu vou usem dam zi laba gagome nom oudume Eho fi hasi vame Em damalehe dam lamota dam debu iudu iuba le vada. Dam debu iudu iuba le vada. Labihadume damat azihi bak ahebu ulohole tame,” lahame Yesusat fet ab vameadaham. 28 Labi Yesusat neo susume nehame vi vameada. “Eho etei ut ara laba vàlu totobet fi koadalo modem im nidi nim uho laha aime ozodume ozobohudele. Bak ibida niba ut ara labe am mekehà aaso faasi et nakbedem bak damat aam di nehi ozom bak. ‘Ab di neà faalo modem ame?’ laham bak iho aame ozobohudem bak am. 29 Labi laha Eho etei lab fet vameadaha im zi lam modesum bak uho aameam làhà uho nehi ozom bak am bak. ‘Eho amu lab fet vameadaha im lam ab imbodelo ahazobuleham bak,’ laham bak um ab ozobohudemam bak. 30 Nasi aima. Eho etei uba gagolo modem im imboda nidi nim mahate tu vi ozodam bohu meedale. Eho etei lab vameadaha im zi lam ahebu meedume neàdehe vabna um eteida nim ahe lahasuhuna ame im zi lam imbodehe bak aadume neàdi ba eloda tame. 31 Asumti asum ahoba iuba modealahana zi lamti labi bak nimti bak niba modealahana zi nimti labihasu ahebu ba beodume foedume sedda tame. Lahana Ebe Eho vameadam im zi lam ahebu ba setem vabak. Gi labaha bohu vuusdume imbodedam imot modem bak,” lahame fet ab vameadaham. 32 Labi im lada lam vameadume neàdi Yesusat neo vi susume vameada. “Eho etei uba lab vameadaha im zi lam ahebu vou fum di lam, ‘Adi diat modemna modela?’ laham bak lam ame digat labe am jam lamti im dam bakda zi nim ba vàmtea buà ozobohuda na vabak. Im ahebu gi vabiem tadehe bak. Labi Alat Am im gagu vou usem dam zi lam laha vabilem bak. Em gi Am Adàt modemnàme Em laha vabilem bak. Gi Em Ai Alat Ahamo ozobohudehe bak. 33 Eho etei uba lab vameadaha im zi lam ahebu vou fum di lam, ‘Adi diat modemna modela?’ laham bak lam ame digat labe am jam lamti um vabilem bake mahate it vou faovoi ozodam labe ahumdi vou faodale. 34 Eho ba fa lem di neham bakti uloho bak vi ozome uba im totobe nidi nim neo vi vameadase. Dat num deda labe aho bak mei bake lalo modemu am na meedam dama it gagu esmo. ‘Uho em num vou aasu vabiedale,’ lahame am dam laba im mei im meime ab lodume esmoham. Labi neo num doo vou aasdamda laba neha, ‘Em num oho iademe vou aasdale,’ lahame neo gagu esmo. Labihasu gagu esmozi ab laham. 35 Labi le setehe di labe ame dam labe ba gi aidam vabak. Iba im gagu modiamda labe aho fa lem di abo etei disim diat modeo, usi neisoat modeo, diham ozoho modeo, dihambe modeo, aho fa lem di lam ame dam labe iho biem bake abo vou faovoi aasdam bak. ‘Ame da labe fa lem diat im gi aho gagu vou esmoho bak modehe vaba gi idaom bak li aamna zohàme imo vou faovoi aasdase,’ laham bak ozome meedam bak. Um laha Eho fa lem digat biem bake vou faovoi aasdale. 37 Eho etei uba neha, ‘Mahate vou faovoi aasdale,’ lahaha bak lam gi umota gagoho vabak. Abo dam ahebu gagoho bak,” lahame fet ab vameadaham.

Markus 14

1 Labi neo usi behàsdi Yahudi dam bada nibe im tai ahobada zi labe Im Adam Datahida Alat Oddaha Vabat Labohotehe Bake Vi Ozome Roti Fikidehe Vabna Àme Iziam di ee gagom Paskah laham di fuseo meedàmu damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti vazisi im aa odoada. “Uho ozom, iho akatihasu modi zila audume Yesus si otela? 2 Lahana ibi iho dam vahi na àme iziam di nim imo nasi Yesus a simule. Aba tu vuzehehe dam duada kota Yerusalem niba esdamda ehete. Iho di nibe Aba simeam làhà dam dae gai fai ziddume iba beomo. Gi ba digat meit sise,” lahame aa ab odoadaham. 3 Amu Yesus num debu Betania laba le dat amu sokba faidi vàhàdem bohu vuusdamda modi fa neàdeheda ee gagom Simon labe am num laba le aidam di labe nam meida vàmtea iba ab leham. Labi Yesus ame num laba vahi na àdam di labe ame nam labe aho narwastu omnao aaboda labe modehe minyak abo doi duana vahana ahana neàna amu ke fauhana ee gagom pualam meit modeme botolilehena laba fedehena aho vou le ame botoli omtobe feolehe bak labe aguti Yesusam ohu laba ab nom veàtoham. “Yesus abo feàte,” lahame ame bak laba vi ozome ab modeham. 4 Labi dam ame bak laba esdamda totbaho labe ame bak lam aahemu faki dam ihimo ab ot gagoidamam. “Oo, akati modi doi feàna vaha minyak lam gi vàhàdedàla? 5 Gi fa meia ot loiame doi feàna abo dat vàmtea na meedume tahun vàmtea foli gohali vam doiti ulohona fa vame ame doi lam dam na vab dam laba fa lodam vaba modela?” lahame ame nam laba faki im ab vahokedamam. 6 Lahana Yesusat fa dam laba ab gagoham. “Gi labihasule. Um ana modi nam niba faki im vahokedàla? Um ozom vaba? Aho Eba vou baedalo gi im neà bak modehe bak. 7 Um dam na vab dam gi labaha bohu tau esdam labe vi taui vi tauidam labe esdam bohu meedam bak. Lahana Em etei nim ba uba tau azim bohu meedam vab Dàt modem bak. 8 Nam nibe aba aho ozome modelo modem bak ahamo ab modeham bak. Eho ozoha, Em ba elom di koei noimna noime afoezobe ke bumata vou oli esum bakti uloho bak laba ozome Em so niba na lam ahit nasi fet veosi ahumdi esulo modem bake ahole modehe bak. 9 Aho neàna modehe bakta imbote. Lahana Eho etei uba neo gagolo modem im imboda nidi nim laha nasi aima. Eho meedaha Im Neàna lam meit bak iudu iuba le vameadào? Bak iudu iuba le vameadào? Labihadam di ame nam nibe aba aho etei Eba lab modehe im lam damat laha aime ozobohudi fa ame im lamti vou vameatedam bak. Ba setem vaba gi labaha bohu vou ai ledam bak,” lahame fet ab vameadaham. 10 Ame di labe Yesus Aba vi tau meedam dam dua belas labe dat meida Yudas Iskariot labe aho damat Ala bake lomna ve vua vahudam toheda zi laba vuusu im vameame faheme modiam dam laba aho Yesus vou fohome ame dam laba ub lom bake aa ab le odoadaham. 11 Labihàmu ame dam labe Yudasat etei li gagoho im lam aiha uledi, “Iho doi oba lo tame,” lahame fet gagu ab esuham. Làhàmu Yudas aho ahit neà dateli le, “Yesus adi diat vou fohome dam bake ub loela?” lahame gi vou faoda. 12 Labihadam di labe vou faodameilahit Yahudi Dam Vahi Ame Roti Fikidehe Vabna Àme Iziam di ab vou fuham. Vou fuhemu digat ahamteda labe abo damat ame Paskah vi ozome àlo modem domba otem digat fuhemu Yesus Aba vi tau meedam dam labe Aba li ab gagoham. “Boehàda oa, im Paskah fuhemu iho vahi na àm bake iho ake le na modeme vaheme ahumdi esuela?” 13 Làhàmu Yesusat am dam behàsu laba fa ab vi gagoham. “Uho kota Yerusalem laba lefusi duzu aameam dat vao noai vou lemda omti ot gausiamda labe lam bak laba uho am ohuse vi duzu vulale. 14 Uho laba vi duzu vulame aameam num da labe aho olemda laba um laba vi olele. Labi vi oli num deda laba nehi gagole. ‘Im gurut oba neha, “Aho amu oba Paskah fum diat Am damti vahi na àdam bak gagu esuhu bak akete?” lahaho.’ 15 Uho labi gagomeam làhà dat num deda labe um vou le ame num zuhuba baa duana lam gi vabieme neàdi esdamna le aam bak. Uho gi ame tom fi hababu laba ibi iho ame bak vi ozome vahi àmna lam laba modeme vahedale,” lahame ab gagu oluham. 16 Làhàmu Aba vi tau meedam dam behàsu labe kota Yerusalem laba le aaha Yesusat lab gagoho bak lam abo imbona le aa. Làhàmu ame Paskah vi ozome àdamna lam modeme vahedume ahumdi neàdi esu fa Yesus bake ab laham. 17 Labi fa le disi aibulehemu Yesus Aba vi tau meedam dam dua belas lamti vahi ame num laba le na ab faasi àdamam. 18 Faasi na àdam di labe Yesusat ab gagoham. “Um nasi iademe aima. Um etei niba na vahi àdam dam nim meida vàmtea labe Em vou fohome meia ub lomda niba ehete.” 19 Lahame labi gagoha Aba vi tau meedam dam nibe im ahu faidi Yesus bake neha, “Ai oa, Oho ozom, eho modem im Oho gagohe?” lahame meit Yesus bake vi gagu ai. Meit neo vi gagu ai. Lahada. 20 Lahahat Yesusat fa gago, “Ne, um ame dam dua belas nibe meida vàmtea gi Eba neab tau na vaksa fi lihibabu niba roti zoho ekeme ab àdamam bak. 21 Lahana gi labihasule. Em Abo Asum Ahoba Iubet Bak Niba Li Dateleheda nim Eho ba modem im meit Alat Vameadaha Im Toedahana laba im meida nehasu toehe bak. ‘Elo tame,’ lahame fet toeme vàmadi esuhu labe ame bak ab imbodelo modemam bak. Aiee! Lahana ame da Em vou foholo modemda nim am oiat am faaha bak feidam vabate. Ame da nim Alat ba gi fai bak bohu tadelo modemda am bak,” lahame ab gagoham. 22 Labi lab vazisi na àdam di labe Yesusat neo roti ve Am Ai Ala bake, “Neàte,” lahame tom gagu neàdi ame rotibu lam agube faheme Am dam bake ab lodaham. Lodam labe nehame vameada. “Roti nim Em so am tame. Uho roti nim ve àm di Eba vi ozome àdale.” 23 Labi roti lam àdume neàdi Yesusat neo anggur oo vaksa mokzoho fedehena ve Am Ai Ala bake, “Neàte,” lahame tom gagu neàdi dat meidate lu vuusu vameada. “Uho ame anggur oo vaksa nim um ahebu uddam labe ototo vaidale,” lahame gagu neàdi dam ahebu ab otot udidamam. 24 Labihadam di labe Yesusat neo vi vameada. “Iho etei uddam anggur oo vaksa nim nehi vi ozomna vaksa am tame. Amu Alat dam amudate gagu gohalemna lam fa vei seti etei nim Em vasea veàtolo modemna nim fa dam bakdate gohalemna Alat ab modi gàhàdeham bak. Dam bakda dua totbaho labe ibi iho faina meedam bak lam Alat ozahigeàmu im beodaha vaba fa vei neàdedume iba modi Am damaedume Aho iba vuusdam bak vi ozome veàtolo modem vasea am bak. 25 Lahana im imboda nidi nim iademe aime tu vi ozodale. Iho etei vahi uddam anggur oo vaksa nim Em etei nib udehe tade tame. Lahana ba diamut Em Ai Alat Eba modi Boehàdateboli dam bake abobo vuusu im vahokedam di labe ba udem bakti gagom kaio.” 26 Lahame labi vameadume neàdi vou ladeedaha bak vàmadi ame num labe futoi kota Yerusalem vou esmozi Zaitun Dee Dozeadaha Bak Buzoho laba laitelo ab ladamam. 27 Labi ladam di labe Yesusat Aba vi tau meedam dam laba ab gagoham. “Etei aibu nim damat Em simeam làhà Eho geàdam bak lam uho aahemu um ahu gelevai ubu uho amu Eba lab vi tau meedam bak lam fa seti Em vou esmozi ili tame. Meit Alat Vameadaha Im Toedahana laba im meida nehi toehe labe Eho uba labi gagoho bak. Alat amu neha: ‘Ame da domba fi ho vou aasdamda lam Eho dam bake modi damat ote tame. Labi am domba gi fi goaitoi sete tame.’ Lahame labihasu toehe bak ehemu Eho uba labi gagoho bak. 28 Lahana Em eloho bak labet Alat modi fa ahedi usai nasi Galilea bak laba le uho ba vulem bake gut vou faoda tame.” 29 Lahame labi gagoha Petrusat fa ab vi gagoham. “Vabà! Dat Boehàda oa, dam totbaho nibe im ahu gelevai ibi iho Oba tu vuzehi meedam bak lam fa seti Om vou esmozi ili tame. Lahana em vàmtea nim ba Om vou esmozi itam bak em ba vi ozom vabak.” 30 Lahahat Yesusat fa gago, “Lo, oho lab gagoho bak ame. Lahana im imboda nidi nim nasi aima. Om ba labiham vabak. Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk aaum bak ab behàsdemam bak,” lahame ab fet gagu esuham. 31 Lahahat Petrusat fa neo vi gago, “Dat Boehàda oa, Omti emti damat amediat otemta neàte. Em ba àvodem vabak. Lahamnàme em ahe lahasuhu di nim em ba meia neha, ‘Em Om bieho,’ lahame vageme Om mom vabak.” Lahame labi gagoha Yesus bake vi tau meedam dam totbaho labe ame im lam aihemu gi Petrusat lab gagoho bak lamti ulohona Yesus bake neo ab vi gagodaham. 32 Labi Yesus Aho neo Aba vi tau meedam dam lam vame bak ee gagom Getsemani laba ab vou laham. Laba lafusi gago, “Uho niba nusualadume faode. Em iumà iuba le Em Ai Ala bake tom gagodalo mozo.” 33 Lahame labi gagu neàdi Aho Petrusti Yakobusti Yohanesti labihasu dam làtela lamota, “Aba tau lele,” lahame gagu dam totbaho laba vou esmozi ab laham. Labi laba le lafusi modeha Yesusat Am ahu faidi feà bak fusi admahi ab meedamam. 34 Làhàmu Aho Am dam làtela niba ab gagoham. “Em ahu faidi feà bak fuho. Em gi ab elom ahulaleham tame. Um niba faode. Em ehemo iumà iuba le tom gagodalo mozo. Labi um niba esdam di a imule. Gi vou faovoi aasdale.” 35 Lahame labi gagu neàdi Ahamo iumà iuba le ogomasu bake biti Am Ai Ala bake ab tom gagodamam. “Ai Em Ai oa, na im ahebu Ohomo modem neà bak tadeho. Labihàmu Em geàdalo modem bak nim Oho fa faatoi vei setem neào?” lahame gagu ozoha vabamu fa neo gago, “Vabo. Ebe Eho ozom bak fa feidate. Gi Obo Oho ozoho baket modem neàte,” lahame ab tom gagoham. 37 Lahame labi tom gagu neàdi usai fa Aba vi tau meedam dam làtela laba fa le aaha dam gi beilame idaomna le aa. Le aame Petrus bake ukeme ab gagoham. “Simon, Em kehàm vabna gi jam vàmtea folehena um akati vou faovoi aasdam vaba idaoe? 38 Iblisit uba li, ‘Um faina modem bak modeo,’ laham bak uba li um ahu modi ozolo modem di um ahu a bedemule. Gi mahate it vou faovoi Ala bake tom gagodale. Neham bak. Im ahu it ozomta gi neà bak modelo àhàki vi ozodam bak. Lahana im ahu nibet ihimo fatahivai bedem meo bak.” 39 Lahame labi im vahokeme neàdi Yesusat Am dam làtela lam fa neo vou esmozi iumà iuba le Am Ai Ala bake Aba Aho amu tom gagoho baket neo tom gagu ab behàsdeham. 40 Labi tom gagu neàdi usai fa Aba vi tau meedam dam làtela laba fa neo le aaha dam gi neo izeo àhàki feà bak fusi lavoidume fa idaomna le aa. Làhàmu le ukeme keesi modeha dam làtela labe ladi fa im vi gagom vabi gi daleàde. 41 Làhàmu ame dam lam fa neo vou esmozi iumà iuba le Am Ai Ala bake Aba Aho amu tom gagoho baket neo tom gagu ab làteladeham. Labi tom gagodume neàdi usai fa Aba vi tau meedam dam làtela laba fa neo le aaha dam gi beilame idaomna le aa. Làhàmu ukeme ab gagoham. “Ne, um akati bedali idaom lahasuhela? Neàde! Nasi keesi usnadale. Asum Ahoba Iubet Bak Niba Li Dateleheda nim vou fohome dam faina meedam dam laba ub lomda iba ab fuseo vabaleham bak. 42 Nasi usnadume ladase. Em vou fohome meia ub lolo modemda etei iubet ab ledamam bak.” 43 Lahame Yesus gi etei vameadam lahasuhu di labe Aba vi tau meedam dam dua belas meida Yudas lam ab lefuham. Ahamo lem kai. Dam ae tot mo tot mo lahamna vuusualaha dam zi lamti labi eobu vuusualaha dam zi lamti labihasu aba tau mitaedume ab lefusi dozeadaham. Ame dam lam gi Yahudi damat ibi iho tu vuzehi meedam im vuusdam tohe dam zi labe amu vameame ahumdi oudaha labe ame dam zi lam ab le omsuham. 44 Yudas amu aho gi iumà ium ledam labe ame dam zi laba nehame fet gagu esu, “Uho aameam im Yahudi damat meia tàm di oode totti totti tomoamdem bak lam eho ame Da laba modehe bak uho aameam làhà ame Da am tame. Uho nasi ame Da lam si vuusu uho vuusualahana lamti vuusualame vausu mei ousum bak iuba vou lale,” lahame amu fet gagu ahumdi esu. 45 Labihàmu etei li dozeaha di labe Yudasat gi taho Yesus bake ub fetu duzu ab gagoham. “Ai Guru,” lahame gagu Am oode totti totti ab tomoamdeham. 46 Labi modeha Yudas bake tau lehe dam zi labe ame bak lam aahemu vi feddume Yesus ab siham. 47 Labi modeha Aba vi tau meedamda meida labe am ae goha dusuhuna vuu vihitoi Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am na meedamda lam beoha biou gi dogoi baata fatoi bake ab biteham. 48 Labi modeha Yesusat fa neo dam duada labe Aba silo lehe dam zi laba im ab vi vahokedamam. “Um Em otelo vabeddamna akati Eho amu Fihasi Ala Bake Vou Baedam Num Vàmteabu labe am ad oli aam bak tomba laba Eho Alam im vahokeme leidamehamdehena abo umti vahi meedamna akati ame di labe Em taho si otem vaba mode? Uho ozomta vedi Em dat aa li ausume mei beome im nazoh gelevai esmozi laiam dàt mode tiba uho etei aeti eobuti ab vou lehame? Lahana uho etei nib meedalo meedam im nim ahebu gi ahole meedalo modem bak. Nehaha bak. Dam ahamda Alat vameadaha im aime fa dam bake ahate vameaidaha dam zi labe iho amu Alat Vameadaha Im Toedahana laba fet toeme esuhu im lam imbodelo modem labe uho vabili etei ab meedamam bak.” 50 Lahame labi vameadume neàdi modeha Aba vi tau meedam dam lam ahebu iedi Am vou esmozi fi goaitoi ab ilime seteham. 51 Labi laha ame di lam dat bas meida labe gi sue baana gimsudamna Yesus bake tau vulada. Vuladameam damat aba neo siha gi sue laba vi sihi labe aho fi tuha ame sue lam fodzi ab so bozbuli itaham. 53 Labi Yesus sihi dam labe Am vou duzu vou ladume Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am num feàda laba ab vou laham. Ame di labe ame Yahudi damat ibi iho tu vuzehi meedam im vuusdam tohe dam zi labe iho Yesus bake uloome aim bake ozome ame num bumat laba laha tau leida. 54 Ame di labe Petrusat gi vaitesu ba aa vi duzu vulada. Labi ame num feàda labe am ad oli aam bak tomba laba vi fusi ame meo dam labe num feàda laba vou aasdam dam lamti gi aa valiheme laba vi tau nusu vuaga fi dda. 55 Ame di labe damat Ala bake lomna ve vua vahudam toheda zi laba vuusu im vameame faheme modiam dam abo Yahudit Ibi Iho Modem Im Gagu Vàmadi Esum Dam Debu labe im dam zi lam vahe vahedume Kayafasam num laba bakamta vahi vou faoda. Damat neha, “Yesus git modeho,” lahame gagu Yesus bake giomim vàlum damat li im gagom bake aihizobe Roma eeda laba ub lu, “Yesus fà beome elose,” laham bak gagolo àhàki vou faoda. Lahana ba ame im aim kai. 56 Di lam dam giida labe giomim vàlum dam duata duat. Lahana meit vàluhu bak lamti meit vàluhu bak lamti ba vàmadem vab labe gi ot odosia. 57 Gi labihasu meedameilahit dam totbaho labe lehe labe ame dam eeda labe iho avaesdam laba li duzu ab gagoham. “Iho aiha ame Da nibe nehi gagoha. ‘Ame Fihasi Ala Bake Vou Baedam Num Vàmteabu nim damat anekehàt mohona nim Aho beodume fa faamome seti usi behàsdi Aho fa dam bakda labe im anekehàt moho vab num lam Aho mo tame,’ lahame gagoho bak lam iho aiho.” Lahame labihasu giomim vàluhunàme etei lab vàlu gagoho bak lamti meit neo vi vàlu gagoidaha bak lamti ba uloho vab im vàlu vameada. 60 Gi labihadume modeha ame Tohe Dam Zi Labe Bisi Boehàdatebo labe ahu gukeme usai tomba duzu Yesus bake netàdi vi ailo ab gagoham. “Om dam nibe etei Oba vàlu vameadam im nim Om taho veibame fa gagom vaba?” 61 Lahame gagoha Yesus ba dae buhu vaba gi daleàdi vou faoda. Làhàmu ame Tohe Dam Zi Labe Bisi Boehàdatebot aho fa neo vi ailo gago, “Om, ‘Alat Gagu Fihasi Vimteme Oluhu Dat Boehàda abo ibi iho bisi tom vou baedam Ala labe Am Adàt am bak,’ laham bak lam imbodemeam làhà taho gagu vàmadi esule.” 62 Lahame labi gagoha Yesusat fa ab vi gagoham. “Lo, Alat Gagu Fihasi Vimteme Oluhu Dat Boehàda lam Em ame Da am bak. Ba diamut Em Abo Asum Ahoba Iubet Bak Niba Li Dateleheda nim uho Eba aam di Em gi feà Dateli Ala Bisi Feàda labe Am ahi totbaho laba tau nusu na ahebu vuusdam bak lamti Em asum ahoba iube fa uloti bak niba lem bak lamti labihasu uho ba aa tame.” 63 Lahame labi gagohemu ame boehàdatebo labe aho aime faki am sue ahoba dusuhuda lam gi ahamo naedat auet it vome geleme ab faheham. Faki dam eeda totbaho niba ab gagoham. “Um aim vaba? Da nim gi Ala bake feàtàhà bak. Aho vedi, ‘Amti Alati ulohote,’ lahame gagoho bak lam ihimo ab vi aiham taia? Ba akati meit neo li vàlu gagom im lam iho aie? Dat naeda labe Ahamo ab it gagu vàmadeham bak. Uho ozom, Da nim akatihà?” Lahame labi gagoha ame dam eeda totbaho labe vazisi fa ab gagoham. “Lo, ibi iho fi hasi baleàhà bak lam Da nibe vazidazehemu gi gagu otem neàdehe bak,” lahame ab gagu vàmadeham. 65 Lahame labi gagu neàdi dam eeda zi totbaho nibe Yesusam dauha laba keha beàda. Labi neo sue baa visoi Yesusat iba aam bak labna zohàme Am fakode laba baguamdi meit am aumbut Aba vi fu tozome gago. “Hohoa. ‘Om Alat vameadaha im aime fa dam bake ahate vameaidahada am tame,’ lahamda Oho ozom, Oba amat beo. Taho iba fa gagoma,” lahame meit vi fu tozome gago. Meit fu vi tozome gago. Lahada. Gi labihadume neàdi fa neo dam Yesus si vou goomda zi laba ub lu ame dam labe fa ve vou lalo modem di labe neo ab foadamam. 66 Ame di labe Petrusat gi ame num labe am ad oli aam bak tomba laba nusda. Nusdume modeha ame boehàda labe am na modem nam meida vàmtea labe Petrus bake labohotesome aaha Petrusat vuaga fi ddam bak aahemu Petrus bake aasu ozodume ab gagoham. “Om Yesus Nazaretda laba vi tau meedam dam meida om am taia?” 68 Lahame labi gagoha Petrusat tem veibadam labe ab gagoham. “Vabo. Em ame da lam em bieho. Oho etei lab gagoho im lam em ozom vabili mozo,” lahame gagu neàdi ame num feàda labe am ad oli aam bak tomba labe am doo futom obe laba ab le duzuham. [Laba le duzuha kuk ab aauham.] 69 Lahame vou faodameilahit ame nam labe neo Petrusat doo futom obe laba doudam bak aahemu dam totbaho aba netàda laba fi desi ab gagoham. “Em ozobohu bak. Ame da nim gi damat etei sihida laba vi tau meedamda meida am bak.” 70 Lahahat Petrusat neo tem ab veibadamam. “Em ame da meida modem kaio,” lahame labi tem veibadaha bak ab behàsdeham. Labi neo vou faodameilahit neo dam laba dozeadaha dam labe ab aame gagoham. “Mm, abo imbote. Om abo damat etei sihida laba vi tau meedamda meida am bak. Iho gi oho im gagom bak vi aim di om gi Galilea damat im gagom bakti uloho bak.” 71 Lahame dam labe neo ahate gagoha Petrusat, “Damat fà aise,” lahame fa neo ohu vame ab tem veibadamam. “Uho etei gagohoda lam em bieho. Eho giomim gagomeam làhà Alat fà eba beose.” 72 Lahame gi etei tem veibaha bak làteladeha kuk neo vi aaume ab behàsdeham. Labi kuk aauha Petrusat Yesusat aba amu nehame fet gagoho bak lam ab vi ozobohudeham. “Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk aaum bak ab behàsdemam bak,” lahaha bak lam fa ab vi ozobohudeham. Làhàmu am ahu faidi nom bohusu bisteat meb dae ab faaham.

Markus 15

1 Labi dihambe Yahudit Ibi Iho Modem Im Gagu Vàmadi Esum Dam Debu abo damat Ala bake lomna ve vua vahudam toheda zi laba vuusu im vameame faheme modiam dam ame. Labi Yahudi dam bake vuusu im vameame faheme modiam dam busaoda zi ame. Labi Musam Im Feàna zi ozobohudi fa meia vahokedam guru zi ame. Labihasu vahe vahedume im vameadume neàdi ahu vàmadi ab gagoham. “Neàdehe bak. Yesus gagome otem neàte. Imo Yesus neo Roma dàt Yudea bak vuusdam gubernurleheda laba vou le ub lu aho fà uloome aise.” Lahame labi gagu neàdi Yesusam anekehà ahim giame vou duzu vou futoi Gubernur Pilatus bake ab vou ladamam. Labi vou ladume gubernur labe am im meedam num feàda Pilatusat aidam bak laba lafusi aho avaesdam laba vou duzu neàdehezobe, “Pilatusat fà aise,” lahame im meiti im meiti Yesus bake la vàlui le vàluidume ab vameadamam. “Gubernur oa, iho aiha Yesusat neha, ‘Am abo dam bake vuusu im vahokedam boehàdatebo Am am bak,’ lahadam bak im aiho.” 2 Làhàmu Pilatusat Yesus bake ab vi ailo gagoham. “Imbo? Oho neha, ‘Em Yahudi dam debu vuusu im vahokedam boehàda am tame,’ lahame Oho labihasu gagodàmu damat Oba vàluhu bak lam imboo? Om ame da ameo?” Lahaha Yesusat fa gago, “Lo, oho etei lab gagoho bak lam imbote. Em ame Da am bak.” 3 Lahame labi gagoha ame toheda zi laba vuusu im vameame faheme modiam dam labe fa neo im mei tem vàlu beàda. Labi neo im mei tem vàlu beàda. Lahada. Gi labihadamnàme Yesus ba dae bum kai. 4 Làhàmu Pilatusat Yesus bake neo vi ailo ab gagoham. “Dam etei Oba nib la vàlui le vàluidam bak nim Om aidamna akati taho fa veibam vaba mode?” 5 Lahame labi gagoha Yesus ba neo dae bum kai. Labihàmu Pilatus ab àvodeham. 6 Ame Roma dam zoho vuusdam gubernur labe aba aho tahun ahebu modi baleàlehe bak gi nehadam bak. Yahudi dam ibi iho na àme iziam bak abo Paskah fum di Yahudi dam amu si sel oumahehe dam lam, “Dat adida isi oluela?” laham bak lam dam bake gagu aime gi damat iho ee gagohoda vàmtea lamota aho fa gagu vou futoi Yahudi dam bake olum meot. 7 Ame di labe amu sel oumahehe dam dat meida Barabas laba ehet. Ame da Barabas lam amu im nehasu meedaha dàt moz. Amti am Yahudi dam totbaho lamti iho vazisi kota Yerusalem niba li dam totbaho gagome fàsi fa Kaisarleheda labe am Roma damti, “Beose,” lahame modi dae gai duzu mei otehemu ame Roma meo dam labe si sel oumaheda meida am bak. 8 Labihàmu ame gubernur labe aba aho amu modi baleàlehe bak fa neo vou fuhemu dam duada zi labe ame num feàda labe am ad oli aam bak tomba laba vazisi neàdehezobe ab vi tauledamam. “Obo oho amu modehe baket neo modele.” Lahame labi gagoha Pilatusat vi ailo ab gagoham. “Eho etei dat adida gagu vou futoi uba oluela? Yesus abo damat neha, ‘Um Yahudi dam vuusdam boehàda am tame,’ lahamda nim eho uba isi olue?” 10 Pilatus neham bak amu gi ozobohudi labi gagu vi ailo gagoho bak. Yesus ba git modehe bak na vabak. Gi ame toheda zi laba vuusu im vameame faheme modiam dam labe iho nehi ozo, “Akati modi dam dua totbaho labe fa Yesus bake tu vuzehi Am damali meedà?” lahame ahu adat faki teidi aba ub loho bak lam am ozobohu labe ahit vi ailo ab gagoham. 11 Lahana ame toheda zi laba vuusu im vameame faheme modiam dam labe iho amu dam duada zi laba nehi fet gagu esu, “Gubernur uba neha, ‘Am dat adida gagu vou futoi iba oluela?’ lahame gagom di uho gi gubernur laba fa nehi gagole, ‘Iba Barabas gagu vou futole. Labi oho om meo dam gagome fa Yesus otele,’ lahale,” lahame tet ootedam labe ame dam duada zi labe ab uledeham. 12 “Barabas isi oluse,” lahame gagodam labe Gubernur Pilatusat neo vi ailo ab gagoham. “Eho Barabas isi olumeam làhà eho ame da Yesus damat neha, ‘Um Yahudi dam bake vuusu im vahokedam boehàda am tame,’ lahamda nim eho akati modela?” 13 Lahahat dam zi labe vi ozome dae vàmadi fa ab gagoham. “Làhà ut tetehesuhunaso laba esu paku dodume elole.” 14 Lahahat Pilatus fa neo gago, “Ne lahana eho Da nim uloodume aiha Aho faina modehe bak aihi vabna akati eho gagu ote?” Lahame labi gagoha ame dam duada zi labe Yesus gi ut tetehesuhunaso laba esu paku dolo àhàki meedàmu dae duali dae gai ab ziddamam. “Vabo. Gi om meo dam gagome ut tetehesuhunaso laba esu paku dodume elole,” lahame ab daetesu meedamam. 15 Labi Pilatusat ozoha, dam duada zi labe labihasu daetesu vàhàdehemu, “Eho ba akati modi dam laba male,” lahame vi ozodaha vabamu dam zi labe im ahu deelem bake Pilatusat am meo dam gagome Barabas sel ousuhuda laba gagu vou futoi ame dam zi laba fa ab oluham. Labi Yesus fa meo dama ub lu na sokba nasbe ahit alibulehena labe Aba foadume ab geàdamam. Labi foadume neàdi Pilatusat neo, “Yesus ut tetehesuhunaso laba esu paku dole,” lahame am meo dam lam gagu ab oluham. 16 Labi ame meo dam labe iho Yesus si gubernur labe am im meedam num feàda labe am zoho laba abo meo damat vahi esdam bak laba neo vou le duzu neàdi im meo dam totbaho ahebu gagome ledume Yesusam obe laba ab ahilesu dozeadamam. 17 Dozeadume neàdi Yesusam sue vome vihilame fa sue sona boz gihona bohu abo boehàdat ahoba dusum sue lamohoda ve Yesus bake nom dusu. Labi neo lo alibuna vabome vuihàli neàdi Yesusam ohu laba neo nom usulo vi gago, “Nim gi boehàdat am sueti am ohu laba usumnati lahamnat modem bak,” lahame tozome afoezobe ab nom usuham. 18 Labihadume neàdi ame meo dam labe iho neo ahit neà damali Yesus bake ab gagu tozoidamam. “Looo. Yahudi dam debu vuusu im vahokedam boehàda abo neàteee,” lahame meit gagu tozo. Meit gagu tozo. Labihada. 19 Labi loso visoi Yesusam ohu laba meit fu tozo. Meit fu tozo. Labihada. Labi neo keha vi dou gagu tozoida. Labi neo ahit neà damali ogomaladume, “Yesus abo feàteee,” lahame vou baedam labe tozoida. 20 Labihadume neàdi ame sue bohu lam fa vuu vihitoi sue Abada fa duadume neàdi damat Am esu paku dolo modem ut tetehesuhunaso lam visoi Aba nom vatu kota Yerusalem vou esmozi fa bàhàgo iuba Yesus ab vou ladamam. 21 Labi lab vou ladam di labe dat ee gagom Simon abo Aleksanderti Rufusti labe im ai Kireneda labe aho kota Yerusalem bàhàgo bak laba godam dàt fa kota bake ledamda ab ot tahiaham. Ot tahiame modeha Yesusat Am vanamai alihi nemahuhemu ame meo dam labe Simon bake tet gut ooteme Yesusat Aho vatu vou ladam ut tetehesuhunaso lam fa visoi Simon bake tet ab nom vatuham. Labi Simon ame utso lam vatu ab vou ladamam. 22 Labi vou ladume Golgota laba ab vou fuham. Aram dae Golgota laham di gi, “Ohu Fetahabu,” laham bak. 23 Labi Golgota laba vou fusi ame meo dam nibe anggur oo vaksa laba na amomoi àhàkebuna ee gagom mur lamti vi tau valihehena lam, “Yesusat valo àhàkem bak laba ozome lu udese,” lahame lu modeha Yesus ab moham. 24 Labi ame meo dam labe neo Yesusam sue ahoba dusuhuda lam ab vome vihilaham. Labi vihilame neàdi neo ame ut tetehesuhunaso lam visoi bake esu afoezobe Yesus tom gaesu nom esu neàdi Am anekehà meida kidadesu paku do. Labi Am anekehà meida neo kidadesu paku do. Labi Am naba bakamta modesu paku do. Labihadume neàdi vi vuu vousai bak bumata ab nom zisuham. Labi zisu teudi neàdi ame meo dam labe iho Yesusam so laba amu lab vihilaha sue lam, “Amat vaela?” lahame ibi iho fi mam baket modeme neàdi ab vadaham. 25 Damat Yesus ve ut tetehesuhunaso laba paku doho di lam gi dihambe jam sembilan doho bak. 26 Labi meit aame ozo, “Da nim ana im modehe bake damat vàlu otehela?” lahame damat ut gaheba ve meo dam gagome toeme neàdi Yesusam ohu vazidazi toma zoho laba taasu paku vi dou esu. Ame ut gaheba lam im nehasu toe. DA NIM ABO YAHUDI DAM VUUSU IM VAHOKEDAM BOEHÀDA AM TAME, lahame toeme ab taasu esuham bak. 27 Labi Yesus ve paku doho di lam ame meo damat ut tetehesuhunaso meida ahim neo visoi dam mei nazoh vietomoadume vou itam dam ahim lam vame Yesusat modehe bakti ulohona modi paku dodume neàdi Yesusam anekehà ahi totti soi totti modesuhu laba bak bumata ab nom zisitdaham. [ 28 Labihadaha bak lam vi ozom di gi meit Alat Vameadaha Im Toedahana laba im meida nim abo meit Alat Gagu Fihasi Vimteme Oluhu Dat Boehàda labe Aho ba modem im nasi ozobohudi nehi fet toeme esuhu im nim ab modi imbodeham bak. “Ame da lam ozom di faina meedamda ozomomda am bak.” Lahame fet toeme vàmadi esuhu labe ame bak lam ab modi imbodeham bak.] 29 Labi Yesus taasu modesdam di labe dam duada zi labe labohotedam labe tom aame ohu bobodam labe nehi tozome gagoida. “Làhà, ‘Ame Fihasi Ala Bake Vou Baedam Num Vàmteabu lam Om feàda modem labe Ohomo beodume fa faamome seti usi làteladi fa mo tame,’ lahame gagodamda am taia? Làhà Ohomo naedat soat it vausu taho Ohomo paku laba it vi vuu veioi usemeta,” lahame tozome labohotida. 31 Labi laha ame di labe damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu laha Yesus bake feàtàom labe ihimo ot gagoi ot gagoida. “Ea, Da nim mei modi fa neàdemda ame. Akati Ahamo naedat taho it vabieme neàdem vaba mode? 32 ‘Alat Gagu Fihasi Vimteme Oluhu Dat Boehàda Am am tame,’ lahamda Ahamo nasi paku laba it vi vuu veioi usi neàdemeta. Labihamta iho aame, ‘Imboo?’ laham bak ozome tu vuzehem bak,” lahame tozome ot gagoida. Labi laha ame di labe dam mei nazoh vadam dam abo Yesusam obe laba tau paku doho dam behàsu labe vedi fa Yesus bake laha feàtàda. Labihada. 33 Gi labihadume ala tomaleha bak ahebu ala fauhaedam bak seti ab aibuleham. Labi aibulehemu vou faodameilahit ala vakidem bak fuha fa ab fauha neàdeham. 34 Labi jam tiga abo ala vakidehe di labe Yesusat bisteat Ibrani dae, “Eloi, Eloi, lama sabaktani,” lahame buteme ab geham. (Ame lab gagoho bak lam gi, “Eba vuusdam Ala oa, Om akati Em vou esmohela?” lahame gagoho imot moz.) 35 Lahame dam Yesus paku doho bak laba netàdi dozeadaha dam labet ame lab buteme gehe bak lam aihemu vedi neha, “Laha vi aima. Da lam gi dat ahamda Alat vameadaha im aime fa dam bake ahate vameaidahada Elia am ee gagoda taia?” 36 Lahame labi gagohemu meit emoeme le kohu lasobuti ulohona visoi anggur oo vaksa àhàkebuna laba nom ekeme neàdi ut aaso bohu laba taasu giame, “Yesusat fà udese,” lahame Yesusam aha laba tom fi sulo gago, “Imo vao nim lu udeme aamase. Da labe gagoho bak lam imbodi, ‘Eliat aba vi tau fa veioi vou useo?’ laham bak aasu vou faose.” 37 Labihadameilahit Yesusat neo bisteat buteme ab geham. Labi etei lab buteme geheda labe Yesus ab fi sivai eloham. 38 Labi fi sivai eloho di labe ame Fihasi Ala Bake Vou Baedam Num Vàmteabu donibu laba tetehesdam sue tamzohobuna baa lam ahamo ahoba zoho iube fàsi nom vou li busbe nom zoho iuba ab fi tatoham. 39 Labi modeha ame meo dam zi labe iba vuusdam boehàda lam abo Yesusat avaesdam totbaho laba duzuhuda labe aho Yesusat geme fi sivai eloho bak aahemu ab gagoham. “Làhà imbote. Da nim abo Alam Adàt modem bak,” lahame ab gagoham. 40 Labihadam di labe lahi dua totbaho labe vaitesu dozeadume damat Yesus paku dome meedam bak laba vou aasda. Ame lahi zi lam amu Galilea bak labe faasi Yesus bake tau godam labe na vou modetedume fa kota Yerusalem niba vou fuhu lahi zi am. Ame lahi zi lam nam meida Maria abo num debu Magdala labet lehe nam am. Labi nam meida abo Yosesti dat baseà Yakobusti im faaha oi Maria am. Labi nam meida Salome am. Labi lahi amomoi totbaho zi am. Labihasu gi vaitesu dozeadume vou aasda. 42 Damat Yesus ve ut tetehesuhunaso laba esu paku dome eloho digat lam gi Yahudi dam labe ibi iho dihasi gi azibe im digat hari Sabat fulo modemu iho na modeme ahumdem digat eloho bak. Làhàmu disi aibulelo vabalehe di labe dat Yusufti ee fatahivahada abo num debu Arimatea laba azihida labe aho Yesus koei visom bak ozome fa Pilatus bake gagu ailo ab laham. Ame da Yusuf lam ame Yahudit ibi iho modem im gagu vàmadi esum dam debu laba taumda bisi dam totbaho labe ibi iho vou baedamda meida am. Aho laha Alat Gagu Fihasi Vimteme Oluhu Dat Boehàda lam ba li dam bake vuusu im vahokedam bak lam, “Adi diat modela?” laham bak vou faodamda am. Lahamda labe iedehe vab dàt Pilatus bake le Yesus koei baumsum bake le ab tauledamam. “Im etei Yesus koei ve vou le baumsulo oba gagu ailo leho.” 44 Lahame labi gagoha Pilatusat aiha, “Yesus akati kehàm vaba elohela?” lahame ab aime àvodeham. Làhàmu, “Imboo?” laham bak vi ailo am meo dam vuusdam boehàda abo damat Yesus ve ut tetehesuhunaso laba esu paku doho bak vou aasdamda laba ab gagome leham. 45 Lehemu gagu aiha imbodehemu Yusuf bake ab gagoham. “Lo, le visoi vou le baumsum neàte.” 46 Làhàmu Yusuf le sue fabebu vabna ee gagom linen lahamda lam doit ve am dam totbaho lamti laha labe le Yesus paku doho bak laba zisi ame koeiso vi vuu vuazi vou usi aho vou lehe sue baana lam visoi Yesus koei ab giaham. Labi giame neàdi ke bumat alimda amu kebitem laba meit fet sime bumataeme esuhuna ahum laba Yesus koei lam ab vou oli esuham. Labi vou oli esu neàdi fa futoi ke baana am doo laba tusum ulohoda lam vou ogi ogialame tusu baguamdi esu neàdi ab vou esmozi ladaham. 47 Labi ame di labe Magdala labe lehe nam Mariati am ee fatahivaha nam Maria meida abo Yoses labe am oi lamti labihasu Yesus koei vou oli esu ke baana vi baguamdehe bak lam ame lahi behàsu lam gi laba tau aasda.

Markus 16

1 Labi hari Sabat abo Yahudi dam labe ibi iho gi azibe im digat foli dihasi dihambe aibubet hari Minggu labe Magdala labe lehe nam Maria lamti am ee fatahivaha lahi abo Yakobusam oi Maria meida lamti nam meida Salome lamti labihasu iho minyak ahana neàna doit ve ibi iho Yahudi damat modi baleàhà bak ozome Yesus koei noilo ame koei esuhu ke bumat laba ab laham. 3 Ladam di labe im ot gagoia lada. “Uho ozom, iho laba fum di amat ke baana lam ogizi osoktoi im oedà?” lahame ot gagoia lada. 4 Labi ladume lafusi tom aaha ame ke baana lam gi ogizi osoktoi modesdamna ab aaham. 5 Làhàmu ame ke bumata vi oli aaha dat bas sue sona ahoba dusumna bohu fauha meona fako iedemna dusu ahi tot laba aidamna ab aame udovai àvodeham. 6 Labi modeha ame dat bas labe lahi laba ab gagoham. “Um a iedemule. Em ozobohute. Um gi Yesus Nazaretda damat ve ut tetehesuhunaso laba esu paku dome elohoda niba nabitaom bak em ozobohu bak. Lahana ame Da nib kaio. Am eloho bak labet Alat modi fa ahedi usaho. Nasi li aama. Damat ame Da koei vou oli esuhu bak neam bak. 7 Uho aame neàdi fa futoi Petrusti Yesus bake vi tau meedam dam totbaho lamti le gagole. ‘Am eloho bak labet Alat modi fa ahedi usai Galilea bak laba nasi le dam labe ba vulem bake vou faodalo. Ame dam labe laba vule Am alihi neo aa tame. Abo Aho amu ahe diat ame dam laba fet gagu esuhu bak ab imbodelo modemam bak,’ laham im lam nasi le gagole.” 8 Lahame labi gagohemu ame lahi labe, “Akatihasu modem im labihahela?” lahame vabi gi iedi faa gukeom labe ame ke bumat labe futoi vou esmozi fa ab emoedamam. Emoedam labe le lafusi iedem lahasuhu labe iho etei aihi im lam taho dam bake fi dem kai. [ 9 Labi hari Minggu dihambe labe Yesus Am eloho bak labet Alat modi fa ahedi usaha di labe Aho ahamte tàhàda Magdala labe lehe nam Maria am. Gi Am koei esuhu ke bumat labe am doo obe laba Aho Maria bake ab tàham. Ame Maria lam amu setan tujuh am ahu oedume veimadahemu Yesusat fa gagu futodume ilidaha nam am. 10 Lahaha nam labe Yesusam alihi aame neàdi fa laha labe le aaha Yesus bake tu vuzehehe dam totbaho labe Yesus eloho bake medaomna ab le aaham. Labihàmu aho le aaha bak lam ame dam laba vameadaha dam gi tozome mouda. 12 Ame digat zoho labe neo Aba tu vuzehi meedam dam meida behàsu labe iho kota Yerusalem vou esmozi bàhàgo goomna neo tàh. Lahana ame bak laba tàhà di am dauha aba amu modesuhu bak fa veimdi fa amomoi modesuhuna tàhà labe dam lam, “Yesusat mode?” laham bak vabile. 13 Lahana gi ba ozobohudi neàdi im dam totbaho bake le, “Iho Yesus neo vi aaho,” lahame vameadume modeha im dam zoho laha neo gi tozome mouda. 14 Labi ba neo Aba vi tau meedam dam sebelas labe iho na vahi àlo meedam di labe Yesusat neo lehe bak aaha vabna ab li duzuham. Labi li duzu dae meobeat im ab vahokedamam. “Um akati Eba mahate tu vuzehem vaba mode? Um akati Eho eloho bak labet Alat modi fa ahedi usai Em alihi meia fi hemu ame dam labe fa uba li vameadahana um akati ohu aotebuli gi tozome mohela?” lahame im vahokeda. 15 Labi im vahokedume neàdi im meida neo vi vameada. “Uho nasi Eho meedaha Im Neàna lam dam bakda ahebu vou vameatedale. 16 Uho le ame Im Neàna lam vou vameatedameam meit Eba tu vuzehi valo baptislemeam làhà ame da labe aba aho faina meedàmu Alat aba beom bake Eho soat vausu fa vei neàde tame. Lahana meit ame im lam aihina vedi fa Eba tu vuzehem momda lam Alat ame da labe aba aho faina meedam bak lam faatom vaba beoda tame. 17 Labi laha dam Eba tu vuzehi meedam dam lam, ‘Alat iba modi im dedamali ame bak meedà?’ laham bak lam damat fet aame ozobohudem bake im nehasu la modi le modida tame. Eho gagu im dedamali mei ahu oli veimam setan mei setan mei laba gagu futodume ilidam bak ame. Labi Alam Aha Nutabe Neàna labet modi vizi naedat it aim biem dae abo dae mei dae meime vameadam bak ame. 18 Labi ame dam totbaho labe laha iho ozba vabi vom di ba veeme elodam vabak ame. Labi laha vao obat mei elomna ehena vabi udem di ba elom vabak ame. Labi ame dam labe laha dam gaileheda laba, ‘Alat modi fa neàdese,’ lahame im anekehà odosu tom gagomeam fa neàdem bak ame. Labihasu ame baket vi meeda tame,” lahame ab it vameadaham. 19 Lahame im Boehàda Yesusat Aba vi tau meedam dam laba im labihasu it vameadume neàdi Alat Am vousai asum ahoba iuba vou tom ilu Alam ahi totbaho laba nusu Am Ai bake tau na ahebu ab vuusdamam. 20 Labi tom ilu setehemu Aba vi tau meedam dam labe ame Im Neàna lam bak iudu iuba le vou vameateda. Bak iudu iuba neo le vou vameateda. Labihada. Labihadam di labe Boehàda Yesusat ame dam laba modi teudehe labe ame im lam ab vou vameatedamam. Dam giida labe aame ozo, “Làhà ame dam labe etei iba vou li vameadaha im lam Alat gagu oluhu im ame?” lahame ozobohudem bake ame dam labe iho Im Neàna vou vameatedam di lam Alat ahit dam laba modi im dedamali na damat ihimo modem biem im feàna lamti ab la modi le modidamam.]

Lukas 1

1 Teofi lusoa, Yesusat Aho iba bak niba meedume esuhu im lam dam dua totbaho labe ame im ahum lam sunit toedume esuhu bak. 2 Ame dam labe sunit iho toedahada lam ba im meidem kaio. Abo Yesusat ahamte faasi vou mode ladaha im lam dam na aame vou vameatedaha damat fa iba dam badate vou vamea usehe im lam iho aihi bak lamti gi uloho imot modem bak. 3 Labihadamdaleàmu eho dam iudu iuba le Yesusat ahamte meedaha im lam aiti aitida. Labi ame im toedume esuhu sunit lam laha aame ozoida. Lahadume ame im lam ahebu ehemo iademe vi ozodume ozobohudehedaleàmu, “Eho laha im ebe eho ozobohudehe bak neo toedume esum neà bak,” lahame ozome ame im bohu nim toedume oba ab lu esulo modemam bak. 4 Dam amomoit oba amu gi ahat vahokedaha bak lam, “Imbote,” lahaha bak lam eho iademe im ahebu neà vamdesu vameadam bohu toedume neàdi oba lu esulo modem bak. Neàde. Labi ame Yesus labe Aba Aho meedaha im lam gi nehi meedaha bak. 5 Herodes Yudea bak laba boehàdateli dam vuusu im vameadam di labe Zakaria laha damat Ala bake lomna ve vua vahudam toheda meida am. Ame da Zakaria lam Abiat vou faat leheda meida am. Abia laha amu damat Ala bake lomna ve vua vahudam toheda am. Labiha labe aba aho vou faat lehe dam gi ame baket meeda. Labi Zakaria am nam Elisabet aba debu zoho vou faat leheda ahamda Harun am. Harun laha amu damat Ala bake lomna ve vua vahudam toheda am. 6 Labi Zakaria am namti im meedam di Alat aaha gi im Aba Aho gagohona fi hasi vamdesu meedamda am namti am. Labi laha Alat, “Nehame meedale,” lahame gagu esuhu im lam ahebu iademe ulohodesu meedamda am namti am bak. Ba meit neha, “Im lada lam vooho,” laham bak ba gagom vabda am namti am bak. 7 Ne lahana Zakaria am nam Elisabetti gi aona behàsu aida. Labi laha Elisabet gi maina data vabna azietedam bak. 8 Labihadam di lam Abiat vou faat leheda meida Zakaria labe am dam totbahoti fa damat Ala bake lomna ve vua vahudam tohe damalelo ototo vaiam bak fuhudaleàmu Zakariat ame bak lam modelo am dam totbahoti Fihasi Ala Bake Vou Baedam Num Vàmteabu laba ab ladaham. Labi le odosi ame bak lam meedume modeha, “Amat oli na ahana neàna vuat usime vuahubulela?” laham bak modelo ame dam labe im tai ahobada vou mode usehe baket modeha Zakaria ab modeham. 10 Labihàmu Zakaria ame na vuat usime vuahubulelo ame Ala bake baedam numa ab oleham. Labi oli ame na lam usime vuahubuledam di labe dam bako laba bakamta dozeadaha dam giida zi labe laha tom gagoda. 11 Labi meedameilahit Alat Am im gagu vou usemda meida labe na ahana neàna ohusuhu bak ahi totbaho laba ab duzuham. 12 Labi laba duzu modeha Zakaria aame ab àvodeham. 13 Làhàmu Alat Am im gagu vou usemda labe Zakaria bake ab vameadaham. “Zakaria, om bisi a àvodemule. Oho tom gagoho bak lam Alat ab aiham bak. Labi laha om nam Elisabet maina aolehena Alat uba tau daboseà fa tame. Labi ame daboseà lam faasi ee talulo modemeam, ‘Yohanes,’ lahale. 14 Labi ame data lam faasi ba buduali Alat ozomta, ‘Feàda am bak,’ lahame ozoho labe om abo deeleha vàhàde tame. Labi ame data lam etei faahemu dam amomoi zi laha vi aame oba tau deeleha vàhàde tame. Ame data lam om nam nibeso laba ahamte adatelem di labe faasi Alat Am Aha Nutabe Neàna labet ame adatelehena laba modi vizi vuusdam labe gi teudi Alat Aba Aho ozohona bohu vuusu meeda tame. Labi am ba anggur loba oo vaksa dam bobim vao lamti na vaksa dam bobim vao amomoi lamti ba udem vabak. 16 Labi ame data lam ba buduali dat ahamda Israel labe aho vou faat lehe dam debu abo Yahudi dam laba aho im vou vahokedam bak labet modi ame dam dua totbaho labe fa Boehàda im tai ahobada tu vuzehi meedam Ala laba fa neo tu vuzehe tame. 17 Labi laha Alat aham di iube Am Aha Nutabe Neàna labe fa dat ahamda Alat vameadaha im aime fa dam bake ahate vameaidahada meida Elia bake modi vizi teudehe bakti ulohona Aho ame data laba fa ame baket neo modi vizi teudi nasi olulo modem bak. Labi Boehàda ba neo vuelo modem bak. Ame data budualehezobe im nehasu modem bake Alat nasi olulo modem bak. Dam amomoi bake le im vahokedam bak labet modi ame dam busao ziti ame data ziti im ahu ot fakiam bak fa vei neàdi vahelo modem bak ame. Labi laha dam Alat Aba Aho gagu esuhu im lam aime uledi vamdesu meedam vab dam laba aho modi fa damat ame im lam aime uledi vamdesu meedam dam laba fa vahi ame im lam uledi vamdesu meedam bak ame. Labi ame da lam ame baket meedàmu Boehàda ba gi ame dam zi lam vabiedume neàdehena ahum le aam bak. Ame dam zi lam gi Am lem bake faodamna le aam bak,” lahame ame im lam Alat Am im gagu vou usemda labe Zakaria bake fet ab vameadaham. 18 Labi fet vameadume modeha Zakariat fa gago, “Ne, em abo aole. Labi em nam laha aole. Lahana oho gagoho bak lam, ‘Imboo?’ laham bak em akati ozoela? Eba ame bak fet vouhole.” 19 Làhàmu ame Alat Am im gagu vou usemda labe fa gago, “Mm, em abo Gabriel am bak. Em abo Alat vameadaha im aime vou uselo Alat aidam obe laba duzu vou faodamda am bak. Labiha labe Alat eba neha, ‘Ame Im Neàna nim vameadale,’ lahame eba gagu ab oluham bak. 20 Eho oba fet vameaha im nim ba imbodelo modem bak fum diat abo imbodem bak. Ne lahana om em im nim aime vuzehem vab labe om ba im gagom vabi fa ulaihàbulem bak. Om ulaihàbuli modesdamehamdi eho oba fet vameaha im nim imbodehezobe om ba fa dae lem bak,” lahame Zakaria bake ab vameadaham. 21 Labihadam di labe dam bako dozeadaha dam zi labe, “Zakaria akati taho futom vaba ame Fihasi Ala Bake Vou Baedam Num Vàmteabu laba bisi kehàdàla?” lahame vabi vou faoda. 22 Labi vabi vou faodameilahit Zakaria ab futoham. Futoi modeha am im gagom vabili gi daleà doudam labe gi anekehàt dam bake im ab vameadamam. Labiha labe dam bakoda zi labe ozo, “Làhà ame Fihasi Ala Bake Vou Baedam Num Vàmteabu laba Alat ahit ame da laba modi edehesi na aho aamna aame dae vabalehe taia?” lahame ab ozoham. 23 Labi Zakaria gi dae vabna labihasu ame num laba ame na meedume meit ot vam bak neo fuhuzobe fa am numa ab laham. 24 Labi am numa fa le aidam di labe am nam Elisabet modeme ab zubuleham. Zubulehezobe Elisabet ahamo aba it ozoda. 25 “Em nib zubulehe bak nim Alat ab modehame? Etei nim Am eba ab aame faobekehame? Labi em mailehe bak damat eba feàtàm bak fa ab faatohame?” lahame it ozodume betea aidume ala ab auoholeham. Am zu koe lahasuhuna futoi gohatemeam damat aba feàtàm bak labna zohàme abo am zu dualehezobe ba futoi gohatelo gi betea aida. 26 Labi ala enamli esdameilahit Alat Am im gagu vou usemda Gabriel laba neo gagu Galilea bak labe aba zoho num debu meida Nazaret laba damat na vahedam nam soaona abo damat modehe vab nam laba ab oluham. Ame nam soao labe am ee gagom Maria. Labi ame nam soao lam am valo na vaheme esdamda ee gagom Yusuf. Dat ahamda Boehàda Daud labe aho vou faat lehe dam meida am. 28 Labi Gabriel labe aho nam laba nom ilu meia ahamte tahi gagom im ab gagoham. “Om abo neàte. Om abo Alat bisi deeli im neà bak modi esuhu nam om am bak. Labi Alat vou aasdam nam om am bak.” 29 Lahame labi gagoha Mariat aba, “Neàte,” lahame gagoho im lam àvodi, “Eba akati modemna labi gagohela?” lahame vabi vi ozoda. 30 Vabi vi ozodàmu ame Alat Am im gagu vou usemda labe gago, “Maria, om bisi a àvodemule. Alat bisi deelehe nam om am bak. 31 Om abo ba zubuli daboseà faa tame. Faasi ee talulo modemeam, ‘Yesus,’ lahale. 32 Am abo feàda modelo modem bak. Labi Alat Asum Ahoba Tom Novaha Bak Laba Azihida Feà Datebo labe ame Data laba gagom di, ‘Am Adat,’ lahalo modem bak. Labi ame Data labe Am tai Daud aham di iube boehàdatelehe bak lam Boehàda abo ubu uho vou baedam Alat fa neo ame Data laba modi Boehàdatelelo modem bak. 33 Labi Boehàdateboli um tai ahamda Yakub labe aba aho ba vou faat ledaha dam zi nim Aho vuusu im vahokedam bak gi labaha bohu vuusda tame. Ba setem kaio,” lahame fet ab vameadaham. 34 Lahame labi vameadume modeha Mariat fa vi ailo ab gagoham. “Ne, em dat vab nam gi soaona aidam nam oho gagoho bak akati em modi zubulela?” 35 Lahame labi gagoha ame Alat Am im gagu vou usemda nibe fa gago, “Om zubulem bak gi neham bak. Alat Am Aha Nutabe Neàna labet oba vou nom ilu tame. Labi Ala Bisi Feà Datebo labe Am teuna oba modi vizehe labe om zubulem bak. Labiham labe data oho ba faamda lam gi fai bak vabda Neàboda abo, ‘Alam Adat,’ laham bak. 36 Ne, um ame lahi meida Elisabet gi aolehena zubuli data faalo modem bak. Abo damat amu neha, ‘Mailehe,’ lahame feàtàdam nam zubuli ala enamlehe bak. 37 Na damat modem biemna Alata modem meo bak.” 38 Lahame labi vameadume neàdi Mariat fa ab gagoham. “Lo, em Alat na gagom ule nam am bak. Eba ame bak lam modem neàte,” lahame labi gagu modeha ame Alam im vou useheda labe Maria ab vou esmoham. 39 Labi Maria gi kehàm vababoà usai am nazoh dek ateme Yudea sibu num debu meida laba ab emoe laiteham. 40 Labi laisi le lafusi Zakariam num laba oli Elisabet bake si, “Neàte,” lahame im ab vameadamam. 41 Labi Elisabet Mariat, “Neàte,” lahame gagoho bak lam aime modeha Elisabet data asum ad nibeso labe ab nigoham. Labi Alat Am Aha Nutabe Neànat Elisabet bake modi vizi teudehe labe aba ab vuusdamam. 42 Labiha labe Elisabet dae duana faasi Maria bake im ab vameadamam, “Ee làhà! Alat lahi totbaho laba deeli tauhu vabna om vàmteata Alat neà bak ab modehame? Labi oho ba faam data lam Alat laha deeli im neà bak ab modelo modem ame? 43 Labi oho ahamte eba, ‘Neàte,’ lahame gagoho di labe em nibeso ad niba datat aime deeli nigoho. Labiha labe eho vi ozoha, om abo Alat iba Gagu Oluhu Dat im Boehàda ba faaseo modem namet modem labe datat em zu ad niba deeli nigoho. Lahana om labiham namet eba feà vab namelehe bak em abo àvodeha. 45 Alat Am im gagu vou usemda labe oba fet vameaha im lam oho nehame vi ozo, ‘Ame im lam imbodem bak,’ lahame labi vi ozome vuzehe labe Alat oba deeli im neà bak ab modi esuham bak,” lahame ab vameadaham. 46 Lahame labi vameadume neàdi Maria Ala bake vou baedam labe Elisabet bake nehi vameada. “Em abo ahu vàmadi Ala bake vou baedam bak. 47 Alat eba Soat Vausu Fa Vei Neàdehe bake em abo deeleho. 48 Em gi boehà vab nam Alat Am na gagom ule namet modemnàme Aho ba eba aalahigeàmoho vabak. Abo eba aame faobekehe bak. Labiha labe em abo Ala bake deelehe bak. Etei di nibe faasi dam eteida debuti dam bada debuti ahebu vazisi eba vi ozome nehame Ala bake vou baedam bak. ‘Em vàmteata Alat bisi deeli im neà bak modi esuhu nam am tame,’ lahame Ala bake vou baedam bak. Alat Na Debu Modeheda feàda eba na iho damat modem biemna eba modehe labe dam eteida debuti dam bada debuti ame dam duada zi labe labi vi ozome Ala bake vou baedam bak. Ala bisi neàbodeheda vàmtea am tame. 50 Meit Ala bake, ‘Om abo feàte,’ lahame ozodume ahu adat iedi modemda laba Alat aame faobekesi vabiedam meo bak. Aho meia aame faobekesi im neà bak meedam bak abo feàte. Amu aham di iube ame bak lam faasi vou mode usdume etei niba ab vou fuham bak. 51 Alat na feàna modehe bak lam ba vasti modesdam vabak. Abo gi ahate tombali modesdam bak. Dam zi labe ihimo iba it daetbadume, ‘Nehame modese,’ lahame vabademsu meedam bak lam Alat ahit modi fa fi goaitoho bak. Labi dam labe ibi iho ozome modelo modem bak lam ba modi fi tatom vabak. 52 Labi laha dam bisi feàda boehàda zi lam Alat modi fa bisi feà vab damale. Labi bisi feà vab dam lam Alat modi fa bisi feà damale. Labihadam bak. 53 Labi dam na vab dam labe Ala bake neha, ‘Iba taule,’ laham dam laba Alat na neàna lodam meo bak. Ne lahana dam na duada laba Alat ba taum vabak. Gi saemea fa olum bak. 54 Alat abo aham di iube im tai ahamda zi laba nehame nasi fet vameadume esu. ‘Eho Abraham labe aho ba vou faat ladam damti aame faobekem bohu vuusda tame. Abo ba setem kaio,’ lahame labi fet vameadume esuhu im lam Alat ba fa vabiem kaio. Abo gi ozobohu lahasdam labe Aho iba Abraham mekehà abo Israel labe aho vou faat lehe dam abo iho Alat na gagom ule dam zi niba Aho iba tau aame faobekem bohu ab modesdamam bak.” Lahame Mariat labihasu vou baedume ab neàdeham. 56 Labi Maria Elisabet bake tau azibe ala làteladi fa aba bake ab laham. 57 Labi Elisabet am data faam bak fuhemu am daboseà ab faaham. 58 Labi ame data faasi modeha Elisabet ab deeli vàhàdeham. Labi dam totbaho abo am num abada obe laba tau vahi esdam dam zi lamti aba mei dam zi lamti labihasu Alat Elisabet bake lab aame faobekesi im neà bak tauhu bak lam aihemu laha Elisabet bake tau ab deeli vàhàdeham. 59 Labi ame daboseà faasi vou id lame usi delapanli Yahudi dam labe ibi iho daboseà faasi modem di laso aubehà sokba ukbom baket modi ame daboseà laba am aiam ee, “Zakaria lahame taluse,” lahame meeda. 60 Lahana am oi Elisabet mali gago, “Vabo. A labi talumule. Gi Yohanes lahame talule.” 61 Lahame gagoha ame dam labe gago, “Mm, ne um amu dam ubuda ee amu labi taluhuda vabak.” 62 Làhàmu dam labe ame daboseà labe am ai bake le anekehàt im ab vameadamam. “Om daboseà iho ee akatihasu taluela?” lahame anekehàt im ab vameadaham. 63 Làhàmu Zakariat, “Aba na toemnavat vou lele,” lahame anekehàt im ab vameaham. Labi Zakariat ame na ve ab toeham. “Em daboseà nim am ee gi, ‘Yohanes,’ laham bak,” lahame ab toeham. Labi modeha dam labe ab aame àvodi meedamam. 64 Labi modehat Zakaria fa ab daeleham. Labihàmu aho fa Ala bake ab vou baedamam. 65 Labi Zakaria am obe laba tau vahi esdam dam labe aho lab baedam bak laba aime àvodi anekehàso ab gaadamam. Labi ame im lam damat gi kehàm vababoà modi vou fi det lame Yudea sibu num debu bak ahebu ab uloholeham. 66 Labi ame im aidaha dam zi labe nehame azi vi ozoda. “Ame daboseà lam Alat tau vuusdam bak. Lahana am ba buduali akatihalo modem dàt mode?” lahame dam num debu meida iube azi vi ozoda. Dam num debu meida iube azi vi ozoda. Labihada. 67 Labi Alat Am Aha Nutabe Neàna ame daboseà labe am ai Zakaria bake ab modi vizeham. Labi modi vizi teudehe labe Alat Am Adat Yesus ba faam bak Zakaria bake amu fet gagu am ozobohudehe labe im lam ab vameadamam. Aho nehame vameada. 68 “Imo Boehàda abo im Israel damat iho vou baedam Ala abo Na Debu Modeheda laba vou baedase. Neham bak. Dat ahamda Israel labe aho vou faat lehe dam nim dam mei zi iba fakem dam labe iba simtedi iba isi olum malehemu Alat etei Am na gagom di uledi meedamda meida abo Boehàda Daud labe aba aho vou faat leheda meida lam iba soat vausumda feàda iba olu im fa ab isi oluham bak. 70 Nehaha bak. ‘Alat Aho ba ame bak mode tame,’ lahame nasi fet gagu vàmadem im lam aham di iube Aho vameadaha im aime fa dam bake ahate vameaidaha dam laba Aho ahit modi ozobohudi ame im lam aime fa ahate ab vameadaham bak. 71 Ame im lam Alat aham di iube nehame fet vameadaha bak. ‘Aho dam mei zi iba ahate fakehe dam iba beolo modem bake Aho iba soat vausu tame. Labi iba adat fakehe dam labe iba fai bak modelo modem bake Aho iba soat vausu tame,’ lahame aham di iube ame dam laba fet vameadume ame dam labe fa ahate vou vameatedaha bak. 72 Alat Aho aham di iube im tai ahamda debu zi laba neha, ‘Eho um ba vou faat ladam dam ziti uba aame faobekesi im neà bak tau meedam bohu vuusda tame,’ lahame fet vameadume vàmadi esuhu bak lam Aho fa vabiem vaba abo it ozome imbodelo modemu Aho gi iba dam bada niba ab aame faobekesi meedamam bak. 73 Alat Ahamo aham di iube im tai ahobada Abraham bake nehame fet vameadume vàmadi vaitoho bak. ‘Iba ahate fakem dam mei zi iba beolo meedam bake Aho iba soat vausu fa vei neàdeda. Labi Aho iba soat vausum bak labet modi Aho iba gagohona iho meedam di im ba meia iedem vaba gi ule neàt ame bak bohu meeda. Iho ame bak lam meedam di im gi Alat Aba Aho gagoho bak laba ulohodesu ahu vàmadi abo Alat deelem bak laba ozome iademe ahu vamdesu meeda. Im gi labihadume elodume sedda tame,’ lahame Abraham bake fet vameadume vàmadi vaitoho bak.” Laham im lam Zakariat ab vameadaham. 76 Lahame labihasu vameadume neàdi Zakaria labe am daboseà buduali ba meedalo modem im lam Alat ahit Zakaria bake modi ozobohudi am daboseà laba aasu im faasi ab vameadamam. “Daboseà oa, Alat Na Debu Modeheda Bisi Feàda labe ba oba gi nehi gagom bak. ‘Em im aime fa dam bake fa ahate vameaidamda om am tame,’ lahame gagom bak. Oho im nehasu meedam labe labihalo modem bak. Alat amu nasi om olu dam bake le neha, ‘Nehame meedale,’ lahame vabiedume neàdehena ahum Boehàda ba vi vulelo modem bak. 77 Alat om olu oho gi dam bake le im nehasu vameadalo modem bak. ‘Alat Am ahu nemahuba neà labe iba bisi aame faobekesi im neà bak tau meedàmu Aho Gagu Olulo Modemda ab nom ilulo modemam bak. Abo gi dihahana ozomomna modelo modem bak. Aho gi imbo bak iba vameadam labe imti Alati vaitesu bohu vuusdam bak lam abo iho aibuna azihina ozomom bak niba Aho modi fa fauhaeda. Labi laha, “Akati modi im Alati fa vahela?” laham bake iba neo vahoke. Labihadalo ame Da iba ab nom olulo modemam bak. Labihàmu im Yahudi dam nibe iho faina meedàmu Alat iba beolo modem bak lam Aho gi vei mu fa faamome vei neàdedàmu Aho iba beom vaba soat vausu fa vei neàdedam bak ehete,’ laham bak lam im Yahudi damat biem bake oho nasi li iba modi fi gatelo modem bak.” Lahame Alat Zakaria bake ahit modi Am Aha Nutabe Neàna labe vizi neàdehe labe Zakariat im labihasu fet vameadume ab esuham. 80 Labi Zakaria am adat Yohanes nim laba vou azim zidume buduali im ab ozobohudedamam. Labi im ozobohudi bak aotba baa bohu dam vaba alim bak laba le azi faobe aho dat ahamda Israel labe aho vou faat lehe dam totbaho laba Alat vameadaha im vou vahokedam bak fuhuzobe bak lam vou esmozi lalo faoda.

Lukas 2

1 Labi Yohanes faasi fota àdesdume Kaisar Agustus labe aho Roma dam vuusu im vahokedam lahasuhu di labe aho nehi am dam laba vameada. “Um ahebu dat mei ee toedamda iuba la. Iuba la. Lahadume ee gagodume toedale. Eho vuusdam dam ahebu delo mozo,” lahame ab vameadume oluham. 2 Ame lab vameadume oluhu im lam Siria bak laba azim dam vuusdam Gubernur Kirenius labe aho dam vuusdam di labe alimeat modehe imot modem bak. 3 Labi vameadume oluhemu Kaisarleheda labe aba aho vuusdam dam abo bak iudu iumti bak iudu iumti ahebu im ee toem bake im tai ahamdat azihi num debu bake ab ladamam. 4 Labihàmu Yusuf laha Galilea bak labe num debu Nazaret vou esmozi fa Yudea bak labe num debu Betlehem laba ab laham. Abo am tai ahamda Boehàda Daud labe am faaha num debu bak laba Yusufat ozoha, am Daud vou faat lehe mekehàda amemu Betlehem laba ab laham. 5 Aho na vahedam nam soao zubulehe nam Mariati Betlehem laba ee toedam bake ab laham. 6 Labi le azi modeha am data faam bak ab fuham. 7 Am data faam bak fuhemu daboseà datahida ab faaham. Labi faasi sue nasbe bohu giame teohet lemda im num kekehemu Maria am daboseà ousum biehemu gi fi ho na vahem beahuba laba am data ab ousuham. 8 Labiham di labe domba vou aasum dam Betlehem bàhàgo sibe baa laba domba zi aibut vou azi aasda. 9 Labihadam di labe Alat Am im gagu vou usemda meida labe damat aidam bak laba ab nom ilu duzuham. Duzuha Alat Am na fauhalemna feà labe damat aidam bak laba fauhali ogatehe labe dam fako ab iedeham. Labi dam labe ab udovai ab iedi modem faideham. 10 Labihàmu ame Alat Am im gagu vou usemda labe dam laba ab vameadamam. “Um a iedemule. Em im neàna uba vou leho. Eho vameadam im nim uho aime fa dam bake fi demeam um dam ahebu aime deeli vàhàde tame. 11 Etei di nim tai ahamda Boehàda Daud faaha num debu bak laba uba Soat Vausu Fa Vei Neàdemda etei faaho. Ame Da lam abo Alat Gagu Fihasi Vimteme Oluhu Dat Boehàda am tame. Abo uba vuusdam Boehàdatebot modem bak. 12 Um biem bake le nabime aameam sue nasbe bohu giame fi ho na vahem beahuba laba ousdam Data aameam làhà ame Data am tame. Labi eho etei uba gagoho bak nim, ‘Imboo?’ laham bak um aame ozobohude tame,” lahame ab vameadaham. 13 Labi vameadume neàdi modeha Alam im vou usi vameadam dam duada zi neo vi tau nom ilu dozeada. Dozeadume ame Data faaha bake ozome Ala bake ab vou baedamam. 14 “Imo Ala abo asum ahoba iuba azihida, ‘Abo bisi feàte,’ lahame vou baedase. Labi dam bake esuhu dam niba Aho ozome deeli fi me vaha dam lam Alati ot deeliame fa vahe vahedase. Labi laha im dam bakda nim Aho iba modi ot deeliame fa vahe vahedase.” Lahame Ala bake ab vou baedaham. 15 Vou baedume neàdi ame domba zi vou aasdam dam labe im domba ziti vou esmozi fa asum ahoba ab tom iluham. Labi modeha dam labe, “Imo Alat Am im gagu olum dam labe iba vou li vameaha im lam Betlehem bake le aamase,” lahame ot gagoiame neàdi ab usname emoeham. 16 Usname emoeme num debu Betlehem bak laba le nabime aaha ab imbodeham. Yusufti Mariati fi ho na vahem beahuba laba ousdam datati ab le aaham. 17 Aame neàdi ame dam labe fa dam duada laba ame Alat Am im gagu vou usem dam labe iba vameadaha im lam ab vou vameatedaham. Abo ame Data nim, “Ana Data modela?” laham bak vou vameateda. 18 Vou vameatedume modeha dam ame im aihida lam ab aime àvodeham. 19 Lahana Maria ame im lam ahebu im amu modemdati ba modemdati azi ahulat vi ozoda. 20 Labi ame domba zi vou aasdam dam labe aame neàdi fa ibi bake ab ladaham. Fa ladam di labe dam labe iho aihi bak lamti iho aaha bak lamti ozome Ala bake, “Am abo feàte,” lahame vou bae lada. Alam im vou usi vameadam dam labe iba vameadaha im lam imbodehemu Ala bake vou bae lada. 21 Labi ame Data faasi ba usi delapanli Yahudi dam labe ibi iho daboseà faasi modem diat laso aubehà sokba ukbom bak modem digat fuhemu ame bak modi ee, “Yesus,” ab taluham. Ame ee lam Alat Am im gagu vou usemda labe amu Maria zubulehe vab di iube taluhu ee am. Làhàmu ee, “Yesus,” lahame ab taluham. 22 Labi vou faome Yusufti Mariati fi ham bak neàdi fa vahem digat ab fuham. Labi ame digat fuhemu Alat amu dat ahamda Musa bake neha, “Yahudi dam daboseà alimeat faahada fi hasi Eba naedate lodale.” Lahame toeme esuhu im lada lamti labi, “Yahudi lahi daboseà faasi fi ham bak neàdi fa vahelo modem bake meki fi ho behàsu modeo, gi meki adatea behàsu modeo, vou le damat Ala bake lomna ve vua vahudam toheda laba lu ame da labe ve oteme Ala bake lole.” Lahame toeme esuhu im lada lamti labihasu Yusufti Mariati ame bak lam meedalo ame na behàsu lamti ame Daboseà Yesus lamti vame kota Yerusalem laba ab vou lalo meedamam. Ame Daboseà lam Alam im meedam datelem bake ozome gagu esulo ve ab vou laham. 25 Labihadam di lam dat ee, “Simeon,” lahame taluhuda kota Yerusalem laba aida. Ame da Simeon labe aho Ala bake ahu adat iedi Alat Aba Aho, “Nehame meedale,” lahame gagu esuhu im zi lam ahebu iademe vamdesu meedamda am bak. Alat Gagu Fihasi Vimteme Olulo Modem Dat Boehàda li Yahudi dam labe ibi iho faina meedam bak lam soat vausu fa vei neàdem bak lam, “Taho modese,” lahame vou faodamda am. Labi Alam Aha Nutabe Neàna labe aba modi vizi vuusu meedamda am. 26 Labihamda laba Alam Aha Nutabe Neàna labe amu nehame fet gagu esu. “Alat Gagu Fihasi Vimteme Oluhu Dat Boehàda lam om aame ba elo tame,” lahame fet gagu esuhu bak ehe bak. 27 Labihadamda laba Alam Aha Nutabe Neàna labe ahit modi Fihasi Ala Bake Vou Baedam Num Vàmteabu labe am ad oli aam bak tomba laba ab oleham. Labi oli aidameam aaha Yusufti Mariati am Data Yesus lam ba ab vou li vi oleham. Amu im tai ahamda Musat, “Nehame modele,” lahame toeme esuhu bak lam modelo ab vou oleham. 28 Labi vou oli modeha Simeon ame Data lam aame gut si sivai Ala bake ab vou baedamam. 29 “Ai Ala oa, Oho amu eba gagoho bak ab imbodeham tame. Dam bake Soat Vausu Fa Vei Neàdemda Oho bak niba oluhuda em fako nim ab aame neàdi asimdeham bak. Em Om im meedamda nim elom neàdehe bak. 31 Ame Dam Bakdate Soat Vausumda nim Oho gi Yahudi dam nimota modi olum kaio. Abo dam ahebu modi oluho. 32 Ame dam bake Soat Vausu Fa Vei Neàdemda nim abo uma usime fauhalem bakti ulohoda Am am bak. Labiha labe ame Da nibe Yahudi damat modem vab dam abo dam giida modi Obo Oho meedam bak ozobohudemda Am am bak. Labi laha ame Da im Yahudi damat faahemu dam giida zi labe fa iba abo dat ahamda Israel labe aho vou faat lehe dam nim Om dam niba, ‘Feàte,’ lahame vou baedam bak am bak.” Lahame Ala bake ab vou baedaham. 33 Labi vou baedume neàdi modeha Simeon ame Data niba labi gagohemu ame Data labe Am aiti oiti vi ozoha vabamu fa vei àvode. 34 Labi Simeonat neo Ala bake, “Ala Oho dam nim im neà bak modi esule,” lahame Ala bake tom gagoda. Tom gagodume neàdi Simeon Data nibe Am oi Maria bake neha, “Alat ahit modi dat ahamda Israel labe aho vou faat lehe dam abo Yahudi dam lam fàsi totbaho ame Data nibe Am im aim momda lam beo. Labi totbaho ame Data nibe Am im aime vuzehemda lam soat vausu. Labihasu modelo ahit gagu oluhu bak. Labi laha damat Ala biem bake, ‘Data nibe modi fi gatedase,’ lahame Alat ahit ame Data nim gagu oluhu bak. Labi ame Data nibe ame bak lam fet vouhome damat aameam dam dua totbaho labe aame ozo, ‘Ostam im,’ lahame aalahigeàmu feàtàme tozo tame. 35 Labiham labe ame Data nim damat ahu adat ozome vastem im lam Aho modi fa ahate tombalem bak. Labi ame im lam ahebu labi modem labe om ba aame ahu faidi admahem bak,” lahame Maria bake ab vameadaham. 36 Labi ame di labe Alat vameadaha im aime fa dam bake ahate vameaidaha nam ee, “Hana,” lahame taluhu nam laha ame num zoho labe lehe labe ame Data niba ab li aaham. Ame nam lam Fanuel labe am adnamat abo Asyer debu labe vou faat lehe namet modem bak. Labi aho amu dat ve vou aidume tujuh tahun foli modeha am dat eloho namet modem bak. 37 Labi am dat eloi maboeli azibehamdi abo delapan puluh empat tahun foli aolehe namet modem bak. Labi ame nam labe laha gi Fihasi Ala Bake Vou Baedam Num Vàmteabu labe am ad oli aam bak tomba laba Ala bake vou baedam di gi labaha digat ahebu dihasi modi dihasi modidahit vou disidam namet modem bak. Labi aho ame bak lam meedam di labe gi ozahit na àm bak mu Ala bake tom gagodam namet modem bak. 38 Labihadam namet ame Data aahemu nehame vameada. “Data nim faaha bak abo neàte,” lahame Ala bake vou baeda. Labi laha Yahudi damat neha, “Dam giidat iba simtedi beodam bake Alat iba Soat Vausu Fa Vei Neàdemda adi diat iba oluela?” laham bak vou faodam dam laba Hanat ame Data lam, “Akatihasu modem datat modela?” laham im lam ame dam laba vou vameateda. 39 Labi Yusufti Mariati ame Alat aham di iube Yahudi dam bake neha, “Nehame meedale,” laham im lam amu dat ahamda Musat toeme esuhu Im Feàna zi lam abo Yahudi dam labe ibi iho daboseà faam diat meedam im lam kota Yerusalem laba ab modeme neàdeham. Labi modeme neàdi ame Data lamti fa Galilea bak labe aba zoho num debu meida Nazaret laba fa ab vou laham. Abo num debu bak ibidate fa ab laham. 40 Labi fa le vou azibe ame Data buduali teudi im ab ozobohudedamam. Labi Alat Aba deeli tau vuusdam labe gi Aba im neà bak ab modi esuidamam. 41 Yahudi dam bada nibe iho im tai ahobada zi labe Im Adam Datahida Alat Oddaha Vabat Labohotehe Bake Vi Ozome Roti Fikidehe Vabna Àme Iziam di ee gagom Paskah laham di fuhudaleàmu Yusufti Mariati kota Yerusalem laba ladume ame bak lam modi fa leda. Labi ba neo ame bak fuhudaleàmu neo kota Yerusalem laba ladume ame bak lam modi fa leda. Labihada. 42 Labihadume Yesus bos di abo dua belas tahun lehe di labe Yusufti Mariati ibi iho ame na àm bak neo modelo kota Yerusalem bake ab ladaham. 43 Labi ladume ame na modeme àme izidume neàdi fa aba bake ab ledamam. Lahana Yesusat vedi gi kota Yerusalem laba aida. Yesusat gi kota Yerusalem laba aidamna Am aiti oiti vabi ab vou esmoham. 44 Vedi imti vahi ledam dam nim ame Data lamti vahi leda tiba vabi ledume le ab disiham. Labi, “Yesus akete?” lahame imti vahi ledam dam ibi mei dam ziti dam giidati dam laba gagu aiha, “Ame Daboseà nib kaio,” làhàmu nabidume modeha vi aaha aam vabamu laba izi dihasi Yesus setehe bake nabilo fa kota Yerusalem laba le nabime ab iham. 46 Labi izi dihasi neo nabime aaha Yesusat gi ame Fihasi Ala Bake Vou Baedam Num Vàmteabu labe am ad oli aam bak tomba laba Alat aham di iube Yahudi dam bake, “Nehame meedale,” laham im lam ozobohudi meia vahokem dam ziti vahi im ot vameaidamna ab aaham. Yesusat ame dam zi labe iho vameadam im aida. Labi Aho fa ame dam zi laba im amomoi neo vabi vi gagu aida. Labi ame dam zi labe fa Yesus bake im amomoi vabi vi gagu aida. Lahadamna ab aaham. 47 Labi dam totbaho labe Yesusat fa ame dam zi laba gagoho im aiha, “Aa làhà! Daboseà nim abo im ozobohu Dàt mode?” lahame ab àvodeham. 48 Labihadam di labe Yesus Am aiti oiti neo vi aame modeha laha ab àvodeham. Àvodi Am oiat Aba neha, “Dat adat oa, Om akati iho laha bake vulehe vaba modela? Em Om aiti abo Om setehe bake àvodi nabiti nabitime abo ahu faidi seteha.” 49 Lahame gagoha Yesusat fa ab gagoham. “Ne, um akati Eba nabidàla? Em abo Em Ai aabom numa aidalo ahit uba vulehe vabake. Om bak lam biehe labe Eba nabidà?” 50 Lahame labi gagoha Am oiti aiti Aho gagoho bak lam aimta ai. Lahana, “Em Ai aabom numa aidalo,” laham bak vabi vi ozoda. 51 Labi vi ozodume Yesusat Am aiti oiti fa vahi Nazaret fa ab laham. Labi fa le aidam di lam Yesusat gi Am aiti oiti gagom im aime uledi vou meeda. Labi Am oiat im amu modeheda iumti etei modeheda nimti azi ahulat vi ozoda. 52 Labi Yesus buduali neo im vi ozobohudi ozobohudidume ab dualeham. Labihadam labe Alati damti ame Da laba ab deeleham.

Lukas 3

1 Kaisarleheda Tiberiusat Roma dam ahebu vuusu im vahokedume ala oli buzidamehamdehe di labe Alat Zakariam adat Yohanes aho bak aotba baa bohu dam vaba alim bak aidamda laba neha, “Em im vou vameatedale,” lahame ab gagu oluham. Ame di labe ee dam labe nehame faheme meeda. Pontius Pilatusat aho gubernurli Yudea bak laba azim dam lam vuusu im meeda. Labi laha Herodesat neo Galilea bak azim dam lam vuusu im meeda. Labi laha Herodes labe am dubu Filipusat neo Iturea bak laba azim dam lamti Trakonitis bak laba azim dam lamti vuusu im meeda. Labi laha Lisaniasat neo Abilene bak laba azim dam lam vuusu im meeda. Labi laha ame di labe Hanasti Kayafasti ame dam ahim labe iho fa Damat Ala Bake Lomna Ve Vua Vahudam Tohe Dam Zi Labe Bisi Boehàdateboli meeda. Dam labe labihasu meedam di labe Alat Yohanes bake ab gagu oluham. 3 Labi gagu oluhemu Yohanes labe Yahudi dam Yordan Soabo esuhu damti obe esuhu damti Alat aba vameadaha im nim ab vou vameatedamam. “Ubu uho faina meedam bak lam nasi voedume fa ahu neà bak vàmadehezobe eho um vuu valo baptisleidase. Labi dam totbaho fà vi aame ozobohudese. Uho faina meedam bak lam Alat ozahigeàmu fa faamome uba beolo meedam bak lam fa vei mu neàdem bake labihadale,” lahame Yohanesat ab vameadume fi dedamam. 4 Yohanesat aho etei ame dam vaba alim bak laba le lab vameadaha bak labet modi dat ahamda Alat vameadaha im aime fa dam bake ahate vameaidahada Yesaya labe aho aham di iube fet nehi toeme esuhu im ab imbodeham. “Dat bak aotba baa bohu dam vaba alim bak laba azi dam aba valadamda zi laba dae buduana nehi vameada. ‘Alat Gagu Fihasi Vimteme Olulo Modem Dat Boehàda lem zie laba uho nasi duzu zie fet vueme neàdehena ahum Am ba lese. Aho lem zie a kibuna vuemule. Abo vamdesuhuna bàneàna vuele. 5 Labiham labe abo bak nohina modealaha bak fa bak vaheme bàneàdem bak. Labi sibu bak lam laha fa sime bàneàdem bak. Labi zie kibo kibomda lam laha vabieme vamdesu esum bak. Labi zie zisi usiamda lam laha bàneàdem bak. 6 Labiham labe Alat dam bake soat vausu fa vei neàdem bak lam, “Akatihasu modemna modela?” laham bak lam Alat Aho modi fa ahate fi zeam bitom labe dam ahebu aame ozobohudem bak,’ lahame ame da labe labihasu vameadam bak damat aida.” Lahame amu aham di iube Yesayat labi fet toeme esuhu bak lam imbodi Yohanesat ab meedamam. 7 Yohanesat ame baket meedam di labe dam zi labe ozo, “Yohanesat iba laha vuu valo baptisleidase,” lahame Yohanes bake valada. Labi neo dihasi valada. Labihada. Labihadàmu Yohanesat aba valadaha dam laba im nehasu ab gut vameadamam. “Um gi ahobat vagedam damat moz. Uho vedi nehi git ozo, ‘Iho valo baptislemeam làhà Alat dam ba beodam diat ba imti beom vabak am tiba.’ Làhà um git ozo. Uho faina meedam bak voedume fa ahu neà bak vàmadem vabameam Alat um laha beolo modem bak. 8 Alat uba ba beom vabake uho gi nehame meedale. Ubu uho faina meedam bak lam voedaha bak lam imbodemeam làhà fa im neà bakta vàmadi meedale. Uho labi modemeam làhà damat aame ozo, ‘Aa làhà! Dam nim iho faina meedam bak lam voedume fa ahu neà bak ab vàmadehame?’ laham bak lam damat aame ozobohudem bake uho gi nasi im neà bakta meedale. Labi um ahu a nehi git tu vi ozodamule. ‘Im tai ahamda Abrahamat vou faat ledaha dam zoho im Yahudi dam am bak. Labiha labe Alat iba ba beom vabak. Im neà bak,’ laham bak lam um ahu a git tu vi ozodamule. Alat ozomta gi ame bak labet neàdem vabak. Abrahamat vou faat ledaha dam dualem vabameam làhà Alat gi ke zi nim modi fa Abraham mekehà damalem meo bak. 9 Neham bak. Alat gi dat ut siemda labe aho ut debu laba olo bà ahamaesu vou duzu neàdeheda lamti uloho bak. Labi aho ame ut oo valem bak aameam ut oo neàna valem bak aam vabda ahebu siedume fa visomoame vua sutem gikina elum bohu vuusumna laba voeda tame. Abo uho faina meedam bak fa voou ahu vei neàdi vàmadi im neàna meedam vabameam eho etei uba lab gagoho bak lamti uloholi Alat labiham bak.” Lahame Yohanesat dam aba valadaha dam laba ab gut vahokedaham. 10 Labi gut vahokedume modeha dam zi labe ab gagoham. “Làhà Alat iba labi modem bak im akatihasu modem labe Alat iba labi modem moela?” 11 Làhàmu Yohanesat fa ab gagoham. “Dat sue sona behàsda labe sue meida visoi dat sue vabda laba lu esuiale. Labi dat na eheda labe dat na vabda laba na lu àme izidale.” 12 Lahame labi vameadam di labe dam bake teo vi vaiam doi pajak atem dam zi labe neo, “Yohanesat fà im vuu valo baptisleidase,” lahame tau li dozeaha dam labe ab vi ailo gagoham. “Guru oa, ne im laha Alat iba beom bake iho akatihasu modem labe Alat iba labi modem vaba moela?” 13 Làhàmu Yohanesat fa ab gagoham. “Làhà um zie gohali vam doi meia gut gagome doi vaiam diat a fetehesu vaiamule. Gi boehàdat oba gagomda lamota vaiale.” 14 Labi meo dam totbaho labe Yohanes bake neo vi ailo ab gagoham. “Ne, im laha Alat iba beom bake iho akatihasu modem labe Alat iba beom vaba moela?” Lahahat Yohanesat fa ab gagoham. “Làhà um mei doi a tet vietomoame vou itamule. Um a, ‘Meit fà iedi am doi iba lose,’ laham bak a labi modemule. Labi meida um na modem doi vam di gi deelehat uba lohoda lamota vale,” lahame ab gagoham. 15 Labi Yohanesat ame im lam vahokedàmu ame dam zi labe Alat Gagu Fihasi Vimteme Oluhu Dat Boehàda lem bake vou faodam dam zi labe vedi Yohanes ame da am tibame ahulat vabi vi ozodume dozeadume aasu vou faoda. 16 Labi ame dam zi labe labi vabi ozodàmu Yohanesat ahamo ozobohudi ab vi gagoham. “Um eba a git ozomule. Em gi feà vab dàt modem bak. Lahana Dat ba em ohuse vi vulelo modemda lam bisi feàda am bak. Am naba dusumna lo tadehena lam ba akati eho ziamoe? Em ba labiham uloho vabak. Dam giida labe iho uba aame ozo, ‘Um faina meedam bak lam uho voedume fa ahu neà bak meedalo vàmadi fa Ala bake tu vuzehe?’ laham bak aame ozobohudem bake eho uba gi vaota baptisleidam bak. Lahana Dat ba lemda labe li uho Aba tu vuzehi meedàmu Aho Alam Aha Nutabe Neàna lamti vuati labihasu uba modi vizi teudeda tame. 17 Ame Da ba vulelo modemda labe Aho ba dam faheme afoezobe dam faina meedam dam lam vua sutem gikina elum bohu vuusumna laba voeda. Labi dam ahu vei neàdi im neà bakta meedam dam lamota fi me vada. Labiham bak modelo modemu Am gi dat gandum oo fet lamti naube amomoiti veimodam datti uloho bak. Ame Da nibe gandum fi kbodume vaheme dehaleheda laba na nekehàsonabut dalu tom voou oo goaitoi nutabet fetti naubeti veimome fa nuta ateme vou le am na gihoemda vahedam num laba vahedalo modem bak. Lahana fet lamti naube totbaho lamti Naedat fa feàktoi vou le vua vahudalo modem bak,” lahame Yohanesat ab vameadaham. 18 Etei lab vameadam im lamti im amomoi zi lamti Yohanesat dam zi laba vou vahoketeda. Labi vou vahoketedam labe aho laha, “Alat Gagu Fihasi Vimteme Oluhu Dat Boehàdat lem bak ab fuham tame,” laham Im Neàna laha vou vameateda. Labihada. 19 Labi Yohanesat iuba le Alam Im Neàna vou vahoketedam di labe aiha Galilea dam vuusdam Boehàda Herodes Antipasat aho aba meida Filipus am nam Herodias vaha bak lamti labi aho faina meedaha im amomoi zi lamti labihasu Yohanesat ozobohudi ab gagoham. “Herodes om gi faina meedam dàt modem bak,” lahame im vahokedume modeha Herodesat neha, “Aho faina meedaha bak akati Yohanesat aba im vahokedàla?” lahame am meo dam gagome Yohanes si mei sime oumahedam num laba vou oli ousu doo ab teudeham. Labi Herodes ame bak lam modehe labe am bisi fai bak meedam bak lam duali feà bak ab fuham. 21 Amu Yohanes damat si sel ousuhu vab di iube nehame meeda. Dam aba valadam dam zi lam aho vuu valo baptisleida. Labihadam digat meida labe Yesus laha neo li valo ab baptisleham. Labi valo baptisli neàdehezobe Yesusat Am Ai Ala bake tom gagodameilahit asum ab fatahivaham. 22 Asum fatahivai bumatalehe bak labet Alam Aha Nutabe Neàna fa bume doleti ulohonali nom vou oaedume Yesus bake nom vou usi nusu vizi ab teudeham. Labihazobe Alat Aba Aho azihi bak asum ahoba iube Yesus bake ab nom gagoham. “Om Em Adat vàmtea Ebe Eho bisi deelemda Om am tame. Em abo Obo Oho meedam bak lam Em aam deeleho,” lahame ab nom gagoham . 23 Labi Yesus Alat Aba gagu oluhu im faasi meedam di abo am tiga puluh tahun foli busaoli neàdehe labe faasi ab meedamam. Dam zi labe ozomta vedi, “Yesus Yusuf am adat am tiba,” lahame ozo. Labi Yusuf Elit faa. 24 Labi Eli Matatat faa. Labi Matat Lewit faa. Labi Lewi Malkit faa. Labi Malki Yanait faa. Labi Yanai Yusufat faa. 25 Labi Yusuf Matisat faa. Labi Matisa Amosat faa. Labi Amos Nahumat faa. Labi Nahum Heslit faa. Labi Hesli Nagait faa. 26 Labi Nagai Maatat faa. Labi Maat Matisat faa. Labi Matisa Simeit faa. Labi Simei Yosekat faa. Labi Yosek Yodat faa. 27 Labi Yoda Yohananat faa. Labi Yohanan Resat faa. Labi Resa Zerubabelet faa. Labi Zerubabel Sealtielet faa. Labi Sealtiel Nerit faa. 28 Labi Neri Malkit faa. Labi Malki Adit faa. Labi Adi Kosamat faa. Labi Kosam Elmadamat faa. Labi Elmadam Eret faa. 29 Labi Er Yesuat faa. Labi Yesua Eliezeret faa. Labi Eliezer Yorimit faa. Labi Yorim Matatat faa. Labi Matat Lewit faa. 30 Labi Lewi Simeonat faa. Labi Simeon Yehudat faa. Labi Yehuda Yusufat faa. Labi Yusuf Yonamat faa. Labi Yonam Elyakimit faa. 31 Labi Elyakim Meleat faa. Labi Melea Minat faa. Labi Mina Matatat faa. Labi Matata Natanat faa. Labi Natan Daud faa. 32 Labi Daud Isait faa. Labi Isai Obedat faa. Labi Obed Boasit faa. Labi Boas Salmonat faa. Labi Salmon Nahasonat faa. 33 Labi Nahason Aminadabat faa. Labi Aminadab Adminat faa. Labi Admin Arnit faa. Labi Arni Hezronat faa. Labi Hezron Peresat faa. Labi Peres Yehudat faa. 34 Labi Yehuda Yakubat faa. Labi Yakub Isakat faa. Labi Isak Abrahamat faa. Labi Abraham Terat faa. Labi Tera Nahorat faa. 35 Labi Nahor Serugat faa. Labi Serug Rehut faa. Labi Rehu Pelegat faa. Labi Peleg Eberat faa. Labi Eber Salmonat faa. 36 Labi Salmon Kenanat faa. Labi Kenan Arpaksadat faa. Labi Arpaksad Semat faa. Labi Sem Nuhat faa. Labi Nuh Lamekat faa. 37 Labi Lamek Metusalahat faa. Labi Metusalah Henokat faa. Labi Henok Yaredat faa. Labi Yared Mahalaleelat faa. Labi Mahalaleel Kenanat faa. 38 Labi Kenan Enosat faa. Labi Enos Set faa. Labi Set Adamat faa. Labi Adam Alat ahamte modeheda am. Labihada.

Lukas 4

1 Labi Yesus valo baptisli neàdi Alam Aha Nutabe Neàna labe Aba modi vizi teudehe labe Aho Yordan Soabo lam ab vou esmozi bak aotba baa bohu dam vaba alim bak laba ab vou laham. 2 Labi ame bak laba vou le aidam di labe Iblisit li Yesus bake modi ozolo modidume usi empat puluh ab foleham. Labihadam di labe Yesusat ahit na koena àm vaba idaia ibzidamehamdehe labe usi empat puluh foli modeha idoali ab beoham. 3 Labi idoali aidam di labe Iblisit li Yesus bake ab gagoham. “Om, ‘Alam Adat,’ lahamda Om idoalehe bake nasi ke nidi nim gagome rotibu lemeta.” 4 Lahame labi gagoha Yesusat fa gago, “Vabà! Alat Vameadaha Im Toedahana laba im meida nehasu toeme fi hasi esuhu bak. ‘Dam gi na àm bakta ahedem vabak.’ Lahame toeme esuhu labe Em moho bak.” 5 Labi im lada lam modeme neàdi Iblisit Yesus neo vou le nohu sibu feàda laba ab vou laisi duzuham. Labi vou duzu neàdi dam mei debu labe im boehàda am dam zi lamti im nazoh feà lamti labi dam mei debu labe im boehàda am dam zi lamti im nazoh feà lamti ahebu alihi fi seo fi himu modi fa setida. 6 Fiseo fi himu setidume neàdi Iblisit Yesus bake ab gagoham. “Om nasi ahit ogomasu biti ahu adat iedi eba, ‘Feàte,’ lahame vou baedale. Oho labihamta na zi feà nim ahebu eho Oba lodume Oho vame Om nazoh ziali Ohomo boehàdateli ame Oho etei aadaha dam lam vuusdam bak. Ne, ame na zi modem bak lam amu Alat eba modi vizi naedatelehe labe eho ozome fa meia modi vizi am naedatelem neà bak.” 8 Lahame labi gagoha Yesusat fa gago, “Vabà! Em ba ahit ogomasu biti oba vou baedam vabak. Nehaha bak. Alat Vameadaha Im Toedahana laba meit im nehasu toeme fi hasi esuhu bak ehe bak. ‘Um ahu a meia adat iedi vou baedamule. Gi Boehàda ubu uho vou baedam Ala lamota, “Feàte,” lahame vou baedale. Im Aho gagomda lamota uledi meedale.’ Lahame labi toeme fi hasi esuhu labe Em moho bak.” 9 Lahame labi gagu neàdi Iblisit ba neo Yesus kota Yerusalem bake vou le ame Fihasi Ala Bake Vou Baedam Num Vàmteabu labe am bisi ohut baa kila bak laba vou zisi duzu ab gagoham. “Om, ‘Alam Adat,’ lahamda Oho num ohut baa nibe so ateme feà bak niba nom ilu aamale. Alat Om gem bak malem zoaha bak. 10 Ne, Oho ba modem im nim Alat Vameadaha Im Toedahana laba meit im nehasu fet toehena taia? ‘Alat Am im gagu vou usem dam laba gagu oluhu labe im anekehàt Om si soat vausu vuusu vou usem bak. Ba kebu bake nom ilu Om naba vatfom vabak.’ Lahame toehena taia?” 12 Lahame labi gagoha Yesusat fa gago, “Vabà! Em ba Ala bake labihasu modi ozolo modem moho bak. Nehaha bak. Alat Vameadaha Im Toedahana laba meit im nehasu toeme fi hasi esuhu bak. ‘Boehàda ubu uho vou baedam Ala laba uho, “Iba taueo? Iba taum vabao?” laham bak lam a modi ozolo meedamule.’ Lahame labi toeme esuhu labe Em moho bak.” 13 Lahame labi gagu neàdi Iblisit Yesus bake modi ozolo im mei im meime meedaha Yesus ba bedem vabamu utasi Yesus vou esmozi ab laham. Iblisit aho ladam di labe nehi vi ozo lada. “Eho Yesus bake ba adi diat neo modi ozoela?” lahame vi ozo lada. 14 Labi Yesus gi amu Alat Am Aha Nutabe Neàna labe Aba modi vizi teudehe labe ame dam vaba alim bak labet fa Galilea bak laba ab laham. Labi fa le modeha Yesusat li meedaha im lam damat aime fa Galilea bak obe bak ium ahebu vou susualame ab uloholeham. 15 Labi ame di labe Yesusat Galilea bak labe aba zoho num debu meida laba le ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli ame dam laba vahokeda. Labi num debu meida laba neo le gi ame baket meeda. Labihadam di labe dam ahebu Aba ab vou baetedamam. 16 Labi Yesusat ame bak labet vou mode ledume neo Am budualehe num debu Nazaret laba fa ab leham. Labi fa li aidume hari Sabat abo Yahudi dam labe ibi iho gi azibe im digat labe neo ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba ab oleham. Aba Aho meedume baleàhà bak am. Labiha labe ame num laba ab le oleham. Labi oli Alat Vameadaha Im Toedahana lam aame gagolo modemu ame num tombu laba ab le duzuham. 17 Labi duzu neàdi ame im vameadam num vou aasdamda labe aho dat ahamda Yesaya abo Alat vameadaha im aime fa dam bake ahate vameaidahada labe aho aham di iube fet toedume esuhuna bolohona lam visoi Yesus bake ab loham. Labi lu Yesusat ve ziambitoi Aba Aho aasume gagolo modem im lam nabime aahemu ame na toehe bak lam aasu fa dam num laba nusualadaha dam laba nehame ab vameadamam. 18 “Alat Eba neha, ‘Im nehasu meedale,’ laham bak ozome Am Aha Nutabe Neànat Eba modi vizi teudehe bak. Dam na vab dam laba Eho Am Im Neàna fa ahate vou vameateda. Labi dam meida debut fa dam mei debu siàdume vou li abehamdehe dam debu laba Eho le, ‘Um fa isi olum neàdehe bak,’ laham Im Neàna lam Eho vou vameateda. Labi laha dam fako aubesuhuda debu laba, ‘Eho le um fako modi fa neàdi na aam bak,’ laham im lam eho laha vou vameateda. Labi laha meia fai bak bohu tadi meedam dam laba, ‘Eho le ame bak lam faatoi modi fa ahe neà duzum bak,’ laham im lam Eho laha vou vameateda. 19 Labi laha Eho dam bake neha, ‘ “Alat Aho dam bake soat vausu fa vei neàdeda tame,” lahame amu fet gagu esuhu im lam etei di nim ab imbodelo modemam bak,’ laham bak lam Eho laha vou vameateda. ‘Labihasu dam bake vou vameatedale,’ lahame Eba gagu oluhu bak.” Lahame Yesayat aham di iube aho fet toeme esuhuna bolohona lam Yesusat ab aame gagoidaham. 20 Labi ame na toehena lam Yesusat aame gagoidume neàdi fa giame am naedate lu dam bake im vahokelo ab nusuham. Labihadam di labe dam ame num laba nusualadaha dam labe gi Yesus bake fako zisu aasda. 21 Fako zisu aasdam labe Yesusat dam laba ab gagoham. “Dat ahamda Yesayat aho Alat Vameadaha Im Toedahana laba toehe bak meida nim Eho etei uba vameadume um dogoit aidam di nibe ame im lam ab imbodi Eho fa ab meedamam bak,” lahame ab gagoham. 22 Lahame labi gagu modeha ame dam labe ame im lam vi aime àvodi ab ozoham. “Aa làhà! Ame im lab vameahana lam abo im neàna vamdesuhunat moz,” lahame àvodi vi ozodaha vabamu dam ihimo fa neo nehame ot gagoida. “Da nim gi Yusufat faaha adat akati bisi labi gagodà?” 23 Lahame labi ot gagoidàmu ame dam labe iho ozoho bak lam Yesusat Ahamo ozobohudi fa dam laba im ab vameadamam. “Uho gi im tai ahamda labe ibi iho gagom baket ozome Eba nehame gagolo mode taia? ‘Mei fa vabieme neàdemda oa, Om Ohomo nasi fa it vabieme neàdemeta,’ lahame gagodam baket neo Eba labi gagolo mode taia? Lahana um gi nehi ailo modem dam taia? ‘Iho aiha Oho num debu Kapernaum laba na damat ihimo modem biem im feàna modehe bakvat ehete. Ame bak lam imbodemeam làhà Oho fa Obo bak Nazaret niba laha modehezobe im aase,’ lahame uho Eba vi ailo modem dam taia?” 24 Lahame labi gagu neàdi Yesusat neo vi gago, “Uho Eba labihamta labiha. Lahana Eho etei uba neo gagolo modem im imboda nidi nim laha nasi aima. Dat Alat vameadaha im aime fa dam bake ahate vameaidahada labe aho bak mei bake lam dita ame dam labe ahu adat iedi aho lab vou le vahokedaha im lam ule neàt gut ve aba vou baedam labe am im aime meedam meo bak. Lahana aho am budualehe bak laba fa le am dam laba im vahokedam di am dam labe gi ailahigeàmodam meo bak. Ba ahu adat iedi aho lab li vahokedaha im lam aime aba vou baedam vabak. 25 Uho dat ahamda Alat vameadaha im aime fa dam bake ahate vameaidahada meida Elia labe aba aho aham di iube nehi meedaha bak lam vi ozodale. Ame di lam Israel dam labe iho Alat Am dae ailahigeàmu moudahemu Alat ahit asum ulo laba modi seti ab di neà faaham. Labi di neà faasi abaa vabali bak aotbali na aladume seti dam ame bak laba azim dam lam ahebu gi idoali vàhàdeme beo. Labi ame di neà faaha di lam abo tiga tahun ala enam foli fa abaale. Lahana ame di neà faasi meedam di labe im Israel lahi maboena zi gi idoali meeda. Ne lahana Alat Elia gagome im Israel lahi maboena zi laba, ‘Taule,’ lahame gagu oluhu vabak. Alat vedi num debu Sidon labe aba zoho modesuhu num debu Sarfat laba abo Israel damat modem vab dam labe im bak laba azihi nam maboena vàmtea laba, ‘Taule,’ lahame gagu oluhu bak. 27 Labi um laha dat ahamda Alat vameadaha im aime fa dam bake ahate vameaidahada meida Elisa lam Alat aham di iube gagu olu nehi modehe bak laba laha vi ozodale. Ame di lam im Israel dam totbaho sokba faidi vàhàdem bohu vuusum dam zi Israel bak laba esdam dam ehe bak. Ne lahana Alat Elisa bake neha, ‘Oho ame dam sokba faidi vàhàdem bohu vuusdam dam lada laba le modi fa neàdi vahedale,’ lahame gagu oluhu vabak. Alat vedi Elisa bake gagu fa dat giida Siria azim dat abo sokba faidi vàhàdem bohu vuusdamda Naaman laba, ‘Le modi neàdi fa vahele,’ lahame gagu oluhu bak.” Lahame Yesusat dam laba ab vameadaham. 28 Lahame labi vameadume modeha dam ame num laba nusualadaha dam labe ame im lam aime vi ozoha, Yesusat gi Yahudi dam ahamda laba ozome vàlu ahit iba vameadàmu ab faki ziesobuleham. 29 Faki ziesobuli usnadume Yesus bake tet si odosi veioi odosi veioidume vou futoi fa num debu bak gatohoba labe vou tom vi odosi vi odosia ladume sibu gat bak laba nom voolo ab vou laiteham. 30 Vou laisi gat bak obe laba duzu modehat Yesus gi dam bà tadehe bak labe aa vou kibo kibodume Aba Aho lam bake ab lazeham. 31 Labi ba digat meida iube Yesus Galilea bak labe am zoho num debu meida Kapernaum laba ab lazeham. Labi le aidume hari Sabat abo Yahudi dam labe ibi iho gi azibe im digat meida labe Yesusat ame Yahudi damat ihimo ot vahiame im meedam num laba oli Aho dam laba Alam im ab faasi vahokedamam. 32 Labi lab vahokedam di labe damat aihat Yesusat ba ladehebeat vameadam vaba Aho gi im dedateli vahokedàmu dam labet aime ab àvodeham. 33 Labi Yesus ame num laba dam bake vahokedam lahasuhu diat dat setan oli veimahada amu ame num laba tau olehe dat labe dae meona Yesus bake gut alamdi ab gagu geham. 34 “Aa! Yesus Nazaretda oa, Om giida akati meit ihimo modem im tau meedalo modela? Oho iba li modi vàhàdeme seddalo lehe taia? Em abo Om ozobohu bak. Om abo Alat Gagu Fihasi Vimteme Oluhu Dat Boehàda bisi Neàboda Vàmtea Om am bak.” 35 Lahahat Yesusat dae meot fa ame setan laba ab gagoham. “Dae vabalele. Om taho futoi ame da nim vou esmozi itale,” lahame dae meot gagoha ame setan labe da lam belu damat nusualadaha doni laba modi biti afoezobe da lam gi ahena vou esmozi futoi ab itaham. 36 Labi modeha dam zi labe ame bak lam aahemu àvodi ab ot gagoi ot gagoidamam. “Aa làhà! Etei lab modehe bak lam im amu im lamohona aaha vab taia? Ame Da nibe Aho lab modehe bak lam gi im gàhàna modehe bak. Abo Aho im dedatelehe labe teudi ame setan zi laba, ‘Futodale,’ lahame gagom di ame setan zi lam aime uledi futodume ilidam meo bak,” lahame ab ot gagoidamam. 37 Labi kehàm vabna ame dam labe Yesusat etei modehe im lam aahemu fa Kapernaum num totobe esuhu dam laba le vou vameatedume ab uloholeham. 38 Labi Yesusat ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num labe futoi laha labe le Simonam numa ab oleham. Oli modeha Simonam boholeà so galihasi duana gaili bisdàmu dam labe Yesus bake gut gago, “Simonam boholeà so galihasi duana gaili bisdalo. Oba li aamale.” 39 Làhàmu Yesusat li nom bohusu aasume mali ooteme gago, “Om gailehe bak neàdele,” lahame mali gagoha ame gailehe bak fa ab seteham. Labi kehàm vaba fa usai duzu na ohume Yesus Am damti ab lodume àdaham. 40 Labi ala bozilelo modem di labe dam aheda labe im dam ahaladiame gailehe dam zi lam Yesus bake vou valada. Labi valadàmu Yesusat gut uladdume fa neàdeda. 41 Labi ame di labe dam setan oli veimahada zi lam Yesusat laha gagu ame setan zi lam ab gagu futodume ilidamam. Labi lab iitaom labe fa Yesus bake it bute lada. “Om abo Alam Adat am tameee. Im abo Om ozobohuteee,” lahame labi it bute ladàmu Yesusat setan zi laba mali vi gagoda. “Mm vabo. Um Em, ‘Amat modela?’ laham bak a gagomule.” Ame setan zi labe, “Am Alat Gagu Fihasi Vimteme Oluhu Dat Boehàda am tame,” laham bak ozobuhudi damat aim zohàme Yesusat mali gi gagome ab oudaham. 42 Labihadume dihambe di fi zeadam diat Yesusat num debu bak vou esmozi fa dam vaba alim bak laba ab laham. Labi le modeha dam duada zi labe ba Yesus bake vi nabidamehamdi aaha Yesus ab vi aaham. Vi aame Yesus bake tet vi mali gago, “Ai a lamule. Om gi niba azim neàte,” lahame vi mali gagoda. 43 Lahana Yesusat mu gago, “Ne lahana Alat dam bake deeli vame Am damali vuusu im vahokedam bak lam, ‘Akatihasu modemna modela?’ laham Im Neàna lam Eho num debu mei num debu mei lahadaha bak laba le vameatedume fi dedalo modem bak ehe bak. Alat amu Eba neha, ‘Labihadale,’ lahame Eba gagu oluhemu Eho ame bak lam ab meedalo modemam bak,” lahame ab gagoham. 44 Lahame labi gagu neàdi Yesusat neo Yahudi dam labe ibi iho azihi bak ahebu num debu mei num debu mei lahadaha bak laba ab ladamam. Labi ladam di labe ame Yahudi damat ihimo ot vahiame im meedam num dozeadaha bak laba olidume ame Im Neàna lam ab vou vameatedume fi dedamam.

Lukas 5

1 Labi Yesusat ba neo digat meida iube Itea Genesaret am nohu auobe laba lazi duzu Alat Aba vameadaha im lam dam bake vahokedam di labe damat, “Ame im lam aise,” lahame Yesus bake valadam labe gi mei soat osidda. 2 Soat osiddàmu Yesusat Am duzum bak biehemu aaha ihe alimna behàsu ab aaham. Ihe dedam labe im ihe tu bohe dek kikeda. 3 Làhàmu Yesusat ihe Simonbada laba zisi ab gagoham. “Om ihe nim vihitoi vao auobe iuba vou bu duzule.” Làhàmu Simon ihe vihitoi vou bu duzu Yesusat gi ame ihe laba nusum labe dam duada nohu auobe laba dozeadaha dam laba ab vahokedaham. 4 Labi vahokedume neàdi Yesusat Simon bake gago, “Ihe laha no tombu iuba vou bu afoezobe um bohe dek nasi nom voole. Um bohe zi feà beom bak.” 5 Lahame labi gagoha Simon fa vi gago, “Ai Guru oa, im abo bohe dek nim iho usehet vou keaiaha ba bohe vam kaio. Abo aibu bohu iho vou keaiaha im vanamai vou dihaha bak. Lahana Oho gagohemu im gi ozahit modi ozolo mozo.” 6 Làhàmu ihe no tombu iuba vou bu bohe dek laba nom esu vou keaha bohe zi fai ab beoham. Labi dam labe vuu visolo voohat bohe zi fai labe dek vàuseo modemu am dam totbaho ihe dedam meida laba anekehà veguamdi gagu ihe meida vou emoeme ab lefuham. Labi lefusi dam lam fa vahi bohe dek lam visoi bohe zi lam vihilame ihe behàsu laba vahedume modeha ihe asimbuli ab tezeo vabaleham. 8 Làhàmu Simon am dam ihe abadate tau zihi damti ame bohe zi fai lam vaha bak aahemu ab aame àvodeham. Labi laha Simonam dam totbaho ihe meidate zihi dam Zebedeusam adam behàsu Yakobusti Yohanesti laha aame àvode. Simon abo ee Yesusat ba tahuda Petrus labe aho ame bak lam aame àvodehemu ahu adat iedi, “Yesus abo feàte,” lahame ozohemu Yesusam naba modesdam laba ahit ogomasu biti ab gagoham. “Boehàda oa, Om eba netàdem em ladem bak. Om itale. Em abo faina meedam dàt moz.” Labi Simonat labihasu gagohemu Yesusat fa vi gago, “Neà bak. A iedemule. Om ba bohe vam damalem bak modem vabak. Om abo etei nibe faasi Eho oba vahokedume oho fa ot vai dam nabime vame neo vahokedume ame dam labe fa Eba tu vuzehem bak modelo mozo,” lahame ab gagoham. 11 Làhàmu ame dam labe im ihe fa vou zituadume im nazoh lam ahebu laba voedume esmozi Yesusat vahokedam im ozobohudelo ab vi tau vulaham. 12 Labi ba neo digat meida iube Yesusat num debu bak meida laba aidam di labe dat sokba ahebu faidi vàhàdem bohu vuusdamda labe ame bak laba godam labe le aaha Yesusam alihi ab aaham. Aahemu ahu adat iedi, “Yesus abo feàte,” lahame ozohemu Yesusat doudam obe laba ahit ogomasu biti ab tauledamam. “Ai oa, Om eba faobekem vabao? Om uledemeam làhà em sokba faidi vàhàdem bohu vuusdam bak nimti damat eba fi hasi vaitesu esdam bak lamti Oho fa eba modi neàdem bak em ozobohu bak.” 13 Lahame labi tauledume gagohemu Yesusat gi ozahit Am anekehàt ame da niba nom ulasi gago, “Lo, Eho modi neàdem neà bak. Om sokba faidi vàhàdem bohu vuusdam bak lamti damat oba fi hasi vaitesu esdam bak lamti nasi setele,” lahame labi gagoha ame da labe am sokba faidehe bak lam fa seti ab neàdeham. 14 Labi seti neàdehemu Yesusat ame da laba ootedam labe ab gagoham. “Om sokba faidi vàhàdem bohu vuusdàmu Eho modi fa neàdehe bak lam oho a dam bake vou vameatedume fi demule. Gi damat Ala bake lomna ve vua vahudam toheda laba le gagu ame da labe om sokba faidi vàhàdem bohu vuusdam bak lam, ‘Modi fa neàdeheo?’ laham bak aho gut nabidale. Labi nabidume neàdi fa dat ahamda Musat aham di iube Israel dam bake, ‘Nehame modele,’ lahame vahokedaha bak lamti ulohona modele. Om fi ham bak neàdi fa vahem bake na fi ho oho etei si vou lalo modemna lam ame toheda laba vou le aho gut ve oteme vua vahusu om fa damti vahem bak modele. Labiham labe dam aheda aame ozo, ‘Da nim fa neàdi im fa vahem neàdehe?’ laham bak fet aame ozobohudi fa vahem bak am tame,” lahame Yesusat ab vi vameadume oluham. 15 “Meia a le gagomule,” lahana ame da labe vedi, “Ame Da Yesus lam akatihasu meedam Dàt modela?” laham im lam ab vou fi det laham. Vou fi det laha labe dam duada labe aime Yesus bake valada. Dam labe ozo, “Iho Yesusat lab vahokedam bak aise,” laham bak lamti labi dam im gailehe bak lam, “Yesusat modi fà neàdedase,” laham bak lamti labihasu ozome valada. 16 Lahana Yesusat dam duada bako vou esmozi fa dam vabake le tom gagodam meot. 17 Labi ba neo digat meida iube Yesusat num meida laba oli dam bake vahokeda. Ame di lam Farisi dam lamti labi dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti laba tau nusualada. Ame dam labe Galilea bak ahebu num debu bak meida iube le. Num debu bak meida iube le. Labihada. Labi ame dam totbaho Yudea bak ahebu num debu bak meida iube le. Num debu bak meida iube le. Labihada. Labi ame dam totbaho kota Yerusalem bak iube le. Labihadume ab tau nusualadaham. Labihadam di lam dam gaileheda modi fa neàdemna lam Alat Yesus bake modi vizi modesda. 18 Laham Dàt dam bake vahokedameilahit dam amomoi labe dat nao zoho eloi nutabedeheda lam ileba esu Yesusat avaesdam laba esum bak ozome vou leda. 19 Labi vou ledume numa olesome modeha dam bà tadi num kekesi olem biehemu fa num ohut vabna baa ahoba laba vou zisi ame numa suusuhuna baa lam feàkmome bumatali afoezobe ame dat ileba lamti loa vààsu num ohut bumat labe fa damat nusualadaha tomba laba abo Yesusat avaesdam laba nom vousdume ab nom esuham. 20 Labi nom esuha Yesusat ozo, “Ame dam labe bisi Eba tu vuzehi meedà?” laham bak aame ozobohudehemu Aho fa dat nao zoho eloi nutabedeheda niba ab gagoham. “Ba oa, om ade? Obo oho faina meedaha bak lam Eho ozahigeàmu fa vei neàdeho.” 21 Lahame labi gagoha ame Farisi damti ame guru zi lamti ame dam labe Yesusat lab gagoho bak lam aime ihimo ahulat aa nehi ozoda. “Oo, Da nim gi imti ulohona baka ana modi feà Dateli labi gagodà? ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahaha bak lam gi Alat Ahamo gagom bak akati Da nibe labi gagodàla? Da nim gi Ala bake feàtàdam dàt mode taia?” lahame ab ozodamam. 22 Lahame aa ozodaha bak lam Yesusat Ahamo ozobohudi dam laba ab gagoham. “Um ana modi um ahulat labi vi ozodàla? 23 Uho ozom, Eho ame nisileheda niba im gagom di im adida bisi damat aame ozobohudela? Eho nehameam, ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahame gagomeam damat aame ozobohudeo? Laham vabameam Eho gi neha, ‘Om nao zoho eloi nutabedehe bak lam Eho modi fa neàdeho. Nasi usai om ileba giame vuusu fa num bake lale,’ lahame gagomeam làhà damat aame ozobohudeo? Adida bisi damat aame ozobohudela? 24 Lahana Em Abo Asum Ahoba Iubet Bak Niba Li Dateleheda nim Ala naedat Eba gagu Eho fa im dedateli ot vai meit faina meedàmu Alat beolo modem bak lam Eho gi vei mu fa faamome vei neàdem meoda Em am bak. Lahana Eho labihasu meedam bak lam um biem bake Ebe Eho etei modelo modem bak nim um nasi aasu vou faomale. Labi dat nao zoho nutabedeheda nim Eho modi fa neàdi usam bak uho aameam làhà um laha neo, ‘Em meit faina meedàmu Alat beolo modem bak lam Eho gi vei mu fa faamome vei neàdem meoda Em am bak,’ laham bak etei um laha aame vi ozobohudem bak.” Lahame Yesusat labi vameadume neàdi ame dat nao zoho nutabedeheda laba ab gagoham. “Om usai om ileba visoi vuusu fa om num bake vou lale.” 25 Lahame Yesusat gi etei labi gagoha ame da labe fa neàdi damat aasdahit amti usai aho bisum ileba lam visoi giame vuusu am num bake fa ab vou laham. Am numa fa ladam di labe, “Ala abo neàte,” lahame vou bae lada. 26 Labi ame dam duada labe Yesusat etei da lam modi fa neàdehe bak laba aame àvodi anekehàso it gaadam labe Ala bake ab vou baedamam. “Aa làhà! Im amu na im feàna lamohona ba aaha vabak. Gi etei alimeat ab aaham tame,” lahame àvodi Ala bake ab vou baedaham. 27 Labi Yesusat ame bak lam modeme neàdi vou esmozi ladam di labe aaha meia gagu gi teo vi vaiam doi pajak atem dam meida Lewi labe am gi ame doi pajak vadam num buà laba aidamna Yesusat ab aaham. Labi aame gago, “Lewi oa, oho Ebe Eho vahokedam im ozobohudelo vi tau meedam datelele.” 28 Lahame labi gagoha Lewit usai aho lab meedam bak lam ahebu vou esmozi Yesus bake ab vi tau meedam dateleham. 29 Labi ba neo Lewit am na àdehena zi àlo Yesus Aba vi tau meedam dam lamti gagome am numa na àm bake ab leham. Di lam Lewi bake tau meia gi teo vi vaiam doi vadam dam totbaho zi lamti dam amomoi zi totbaho lamti labihasu ba li tau vazisi ame na àdehena zi lam ab àdamam. 30 Labi na àdam di labe Musat toedaha im ahamda vahokedam guru zi abo Farisi dam bake vi tau meedam dam lamti labi ame Farisi dam totbaho lamti iho ba li aaha ame bak lam aahemu Yesus bake vi tau meedam dam laba ab gagoham. “Um akati modi meia gagu gi teo vi vaiam doi vadam dam zi lamti damat neha, ‘Faina meedaho,’ lahame ozomsum dam lamti vazisi na àdàla?” 31 Lahame faki vi ailo gagoha Yesusat fa dam laba im totobe nidi nim nehame ab fi koadamam. “Uho ozom, dam aheda dokter abo obat vuusumdate lam meo? Vabà! Gi dam gaileheda ihimo obat vuusumdate lam bak. 32 Bak lam gi neham bak. Eho bak niba lehe bak neham bak ozome lehe vabak. Damat neha, ‘Im abo Alat gagu fi hasi esuhu im zi ahebu ulohodesu vamdesu meedam dam im am bak,’ lahame ahobat neàdem dama Eho neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe vabak. Em gi damat neha, ‘Iho faina meedam damat modem bak,’ lahame it ozome gagodam dam laba neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe bak,” lahame ab gagoham. 33 Lahame Yesusat labi gagu neàdi modeha ame dam labe Yesus bake neo ab gagoham. “Im Farisi dam nibe ibi iho vahokedam im ozobohudelo vi tau meedam damti Yohanes Mei Vuu Valo Baptisleiamda labe aba aho vahokedam im ozobohudelo vi tau meedam damti laham dam labe Ala bake tom gagodalo modemu ahit na àm mu izidam meo bak. Ne lahana Oba vi tau meedam dam akati ame baket meedam vaba vedi gi ozahigeàmu na àda. Labi anggur oo vaksa udda. Labihadàla?” 34 Lahame labi gagoha Yesusat gi damat Aba ba modem im laba ozome im totobe nidi nim nehame ab fi koadamam. “Dat soao labe nam soao valo na vahedam di labe ame da labe amti ot deeliam dam laba gagu vahi deelehat na àdam meo dam taia? Labi laha dat soao labe nam soao valo modemda ehe lahasuhu di lam am dam gi deeli na àm meo dam taia? 35 Lahana ba diamut ame nam valo modemda lam naat aa si utasi vou le setem di lam am dam totbaho labe im ahu faidi na àm mom di am taia?” lahame ab vi vameadaham. 36 Labi im lada lam vameadume neàdi Aho neo Yahudi dam labe im tai ahamda zi labe ibi iho vou vahoke usehe im lamti fa Aba Aho etei li vou vahoketedam im gàhàna nimti ulohodesu fa vahem biem bak laba vi ozome neo im totobe nidi nim ab vi fi koadamam. “Meit am sue amu soa dusumda vàusi bumatalemeam làhà ba sue soa dusumda gàhàda amu valo kikeme modi koedehe vabna am zoho fa vi vaitoi ame sue vàuhu bak laba taasu tadem vabak. Meit labi modemeam ame sue gàhàda lam gi vàhàdem bak. Labi laha sue gàhàda zoho vi vaitohona lam ba sue amudate taasu aam di am alihi ba uloho vabak. 37 Labi laha meit anggur oo gi etei unaha vaksa gàhàda fi kidi neàdehe vabda lam ba kambing fi ho sokba amu buhaleme bugeahana modi dehalehena laba fedem vabak. Meit labi modemeam ame na vaksa lam ba fi kidehe labe ame na sokba amuda lam gi modi fi fasi ame na vaksa lam gi bake veàtom bak. Labi ame na sokba lab fedehena lamti gi amait vàhàdeme setem bak. 38 Labiham bake meit ame na lam ba ozome modem vabak. Gi ame anggur oo vaksa gàhàda lam fa ame na sokba gàhàda buhaleme bugeahana modi laba fedem bak. 39 Labi im meida neha: Meit anggur loba oo vaksa amu fedeheda lam uddamehamdehe labe ba ame na vaksa gàhàda lam udem mom meot. ‘Amuda lam bisi udem neàda am bak,’ lahame meit labi gagom meot,” lahame Yesusat ame im totobe lam ab fi koadume neàdeham.

Lukas 6

1 Labi ba hari Sabat abo Yahudi dam labe ibi iho gi azibe im digat meida labe Yesus Aba vi tau meedam damti iho bak mei bake lalo modemu gandum dee zie labe lada. Ladam di labe Yesus Aba vi tau meedam dam labe ame gandum oo amdeheda lam auet vi vuu footoi anekehà esu gigime fet veimome ab vou à ladamam. 2 Labi vou à ladam di labe Farisi dam totbaho labe ame bak lam aahemu Yesus bake ab gut gagoham. “Ne, etei nim gi hari Sabat abo im Yahudi dam labe ibi iho gi azibe im digat nim akati modi Oba vi tau meedam dam labe na oo auet vi vuu footoi vou à ledàla? Ne, im tai ahamda Musat aham di iube neha, ‘Hari Sabat fum di na a meedamule,’ lahame toeme fi hasi esuhuna akati modi Oba vi tau meedam dam labe ailahigeàmu na meedàla?” 3 Lahame labi gut vameadume modeha Yesusat fa ab gagoham. “Ne, im tai ahamda Boehàda Daud labe aho amu modehe im lam meit Alat Vameadaha Im Toedahana laba im meida nim um aame vi ozobohudehe vaba? Amu Daud aba vi tau meedam damti idoalehemu dam ahamda labe iho Teohet Mome Fa Faatoiam Num Fihamna abo Alat Israel dam bake le tau im vameaidam num laba oli Ala bake lu fi haha beahuba laba esuhu roti lam aho visoi faheme am dam bake lodume iho vahi àdaha bak lam um vi ozobohudehe vaba? Dat ahamda Musat aho aham di iube neha, ‘Ame roti lam damat Ala bake lomna ve vua vahudam toheda zi labe ihimo àm rotit modem bak. Ba dam giida tau àm fi ham roti modem bak,’ lahame gagu fi hasi esuhu roti lam ame dam giida labe àhà bak. Lahana ame dam labe iho ba, ‘Faina modeho,’ lahaha vabak.” 5 Lahame vameadume neàdi Yesusat neo ab vi gagoham. “Alat Gagu Fihasi Vimteme Oluhu Dat Boehàda Asum Ahoba Iubet Bak Niba Li Dateleheda nim Em ame Da amemu ame hari Sabat deda Em am bak. Labiham labe Ehemo neha, ‘Ame digat labe im nehasu modem neàte. Im nehasu a modemule,’ lahame ozome gagomda Em am bak,” lahame ab gagoham. 6 Labi ba hari Sabat meida labe Yesusat neo ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli dam bake vahokeda. Dam bake vahokedam di labe dat anekehà ahi totbaho nutabedeheda laha ame num laba amu vi tau oli aida. 7 Labi ame di labe Farisi damti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu laba tau nusualadaha labe Yesusat ame hari Sabat mei modi fa neàdem bak labna zohàme vou faovoi Yesus bake fakot zisda. “Yesusat ame da niba modi fa neàdem bak aahazobe fa vàluse,” lahame fakot zisda. 8 Lahana Yesusat Aho ame dam labet ibi iho ozoho bak lam ozobohunàme ozahit dat anekehà nutabedeheda laba ab gagoham. “Om usai tomba niba li duzule,” lahame labi gagoha dat nisileheda labe usai damat nusualadaha doni tomba laba le ab duzuham. 9 Labihazobe Yesusat ahit gi dam labe modem bak ozobohuna fi bovai ame lab nusualadaha dam laba ab vameadamam. “Ne, uho ozom, hari Sabat abo gi azibe im digat nim im tai ahamda Musat, ‘Akatihasu modem neàte?’ lahame gagu fi hasi esuhela? ‘Im neàna modem bak modele,’ lahaheo? ‘Im fai bak modem bak modele,’ lahaheo? Im adida Musat gagu fi hasi esuhela? Laham vaba, ‘Mei elolo modem di iho modi fa neàdem neà bak,’ lahaheo? ‘Mei otem bak modem neà bak,’ lahaheo? Im adida Musat gagu fi hasi esuhela?” 10 Lahame labi vi ailo gagoha dam ba Aba im vi gagomda kai. Làhàmu fakot ahamo vi nabidume vi ozolaha vabamu Yesusat fa dat nisileheda niba ab gagoham. “Om anekehà nasi vamdemale,” lahame gagoha da nibe am anekehà vamdeheilahit fa ab neàdeham. 11 Labi modeha Farisi dam lamti Yahudi dam ibi iho tu vuzehem im vuusum guru zi lamti Yesus bake faki neha, “Uho ozom, im Yesus bake akati modela?” lahame im aa ab odoadamam. 12 Labi ba digat meida iube Yesusat Ahamo tom gagom bak ozome bak buzoho laisi le aibut Ala bake tom gagodahit vou diha. 13 Labi dihasi dihambet Yesusat Aba Aho vahokedam im ozobohudelo vi tau meedam dam zi lam neo gagome Aba ab vi laitedaham. Labi dozeadume neàdi gagu gi dam dua belas lamota fàsi ve, “Aho gagu olu Am im vameadume esmozi laiam dam,” lahame ee ab taluham. 14 Aba Aho fi me vaha dam dua belas lam neha: Simon ee Yesusat ba taluhuda Petrus ame. Labi Simonam vahada Andreas ame. Labi Yakobus ame. Yohanes ame. Filipus ame. Bartolomeus ame. 15 Matius ame. Tomas ame. Labi Alfeus am adat Yakobus ame. Labi Simon Meohoda ame. 16 Labi Yakobus am adat Yudas ame. Labi Yudas Iskariot ba Yesus otem bake vou foholo modemda ame. Labihasu Yesusat debe fàsi vaha dam dua belas am. 17 Labi Yesusat Aho fi me vaha dam dua belas lamti ame bak buzoho labet fa buoba bake lezi odosi aaha Aba Aho vahokedam im ozobohudelo vi tau meedam dam totbaho zi ame. Labi dam dua totbaho amomoi zi ame. Labihasu li dozeadaha bak ab aaham. Ame dam dua totbaho zi lam zoho Yudea bak labe am num debu meida Yerusalem labet le. Labi dam zoho ame Yudea bak laba modealaha num debu mei num debu meime lahadaha bak labet le. Labi dam zoho fa itea feàna obe modealaha num debu Tirus lamti num debu Sidon lamti laham bak labet le. Labihasu li dozeadaha bak ab aaham. 18 Damat im nehasu ozome li dozeada. Yesusat Aho lab vahokedam bak aim bak ame. Labi im dam totbaho ahaladiame gailedaha bak lam, “Yesusat fà modi neàdese,” laham bak ame. Labihasu ozome li dozeada. Labi ame di lam dam setan oli veimahada zi lam laha tau ledahemu Yesusat ame setan laba gagu futodume ilida. 19 Labi, “Alat Yesus bake modi teudehe labe Aho fa ame dam zi lam modi fa neàdedà?” laham bak lam dam dua zoho labe neo vi aame, “Yesusam alihi vi ulase,” lahame àhàki ab meedamam. 20 Ame dam zi labe, “Yesusam alihi vi ulase,” lahame àhàki meedume modeha Yesusat ozo, “Aho vahokedam im nim dam duada zi labe fà aise,” làhàmu Aba Aho vahokedam im ozobohudelo vi tau meedam dam zi laba ahit aasu im faasi ab vahokedamam. “Um na vab dam oa, um na vab damat meedamnàme Alat uba deeli vame Am damali Aho uba ab vuusu im vahokedamam bak. Labihadamdaleàmu etei bisi deelehe bohu vuusdam dam um am bak. 21 Labi etei na vabali idoali meedam bakti ulohona Alat Aba Aho lolo modemna valo àhàki ozodam dam oa, Alat uba modi asimdi neàdeda tame. Labihadamdaleàmu etei bisi deelehe bohu vuusdam dam um am bak. Labi etei faina meedàmu it ozome ahu faidi mebe izidam dam oa, Alat ba diamut uba modi um ahu fa deeleda tame. Labihadamdaleàmu etei bisi deelehe bohu vuusdam dam um am bak. 22 Labi Em Abo Asum Ahoba Iubet Bak Niba Li Dateleheda modemu uho Eba tu vi tau meedàmu damat uba aame neha, ‘Dam mei,’ lahame uba faki feàtàdume um ee gagomti momnàme um gi ozahigeàmu keàtet lahasu meedam dam oa, uho bak niba meedaha bake gohali lodamna Alat asum ahoba iuba esu ahumdehena abo feàte. Labihadamdaleàmu etei bisi deelehe bohu vuusdam dam um am bak. Meit uba labihasu vabidamnàme um gi ozahit vei deeli etoedam labe kuguidale. Nehaha bak. Aham di iube ame dam labe im tai ahamda zi labe fa Alat vameadaha im aime fa dam bake ahate vameaidaha dam ahamda zi laba ame baket laha meedaha bak. Labihàmu ame dam labe uba etei ame baket neo meedameam làhà gi ozahit vei deeli etoedam labe kuguidale. 24 Aiee! Lahana Eho ozoha, um etei nazoh dualehe dam lam ba gi fai bak bohu tadem bak. Ame na uho amu gi ab vame asimdeham bak. Um ba diamut abo gi ahu faidi dehabalem labe gi fai bak bohu tadem bak. 25 Aiee! Um etei na aha odosdam damat mode? Làhà um ba gi diamut abo gi aha alia iddam labe gi fai bak bohu tadem bak. Aiee! Um etei ahu deeleha azim dam lam um ba diamut abo gi ahu faidi meddam labe gi fai bak bohu tadem bak. 26 Aiee! Dam dua bak labe um neà bak meeda tibame uba vou baedam labe um ba gi fai bak bohu tadem bak. Nehaha bak. Ame uba etei vou baedam dam labe im tai ahobada zi labe aham di iube laha meit neha, ‘Alat vameadaha im aime fa dam bake ahate vameaidaha dam im ame dam am tame,’ lahame vageme fa dam bake giomim vou vameatem dam ahamda laba amu laha vou baedaha bak. Um etei bada gi ame amu giomim vou vameatedam damti uloholelo modem labe ame dam totbaho labe fa uba vou baedam bak. Aiee! Um ba diamut Alat laha um beodam labe gi fai bak bohu tadem bak.” Lahame ab vahokedaham. 27 Labi im lada lam vahokedume neàdi Yesusat neo nehame Aba vi tau meedam dam dua zoho laba ab vi vahokedamam. “Um etei Em im aidam dam ade? Em im meida nim neo uba vahokedalo mozo. Uba fakemoholehe dam laba uho gi ozahigeàmu fa vei deelele. Labi laha uba adat faki ziesobulem dam laba uho gi laha ozahigeàmu fa vei neàdi ame dam laba neà bak tadi meedale. 28 Meit uba uloome neha, ‘Seee. Naat beole,’ lahame uloome gagomda laba uho gi ozahigeàmu vei neàdi fa Ala bake neha, ‘Ai oa, Oho da lam fa im neà bak modi esule,’ lahame tom gagodale. Labi laha dam uba fai bak meedam dam laba uho a fa ame baket vi modi vataumule. Gi ozahigeàmu fa vei neàdi Ala bake, ‘Ai oa, Oho da lam fa im neà bak modi esule,’ lahame tom gagodale. 29 Labi laha meit oba faki eobu visoi om udehà totbaho laba beomeam làhà oho gi teoli neo udehà totbaho ame da laba fi sule. Labi laha meit om sue sona ahoba dusuhuda tet vietomeam làhà om sue sona ada dusuhuda a malemule. Gi ozahit sue lada lam laha vihitoi vi lole. 30 Meit oba neha, ‘Na lam eba lom neào?’ lahame vi ailo gagomeam làhà ame na lam a malemule. Gi lodale. Labi om na tet si vietohoda laba a, ‘Em na fa veiale,’ laham bak lam ba a vi gagomule. Gi labihasule. 31 Uho nehi ozo, ‘Da labe eba nehi meedase,’ lahame uho labi ozomeam làhà uho ozoho bak lam ame da laba nasi meedale.” 32 “Um Eba vi tau meedam dam uho gi dam uba deelem dam lamota fa ot deeliameam làhà Alat ba uba deeli vou baedam vabak. Ne, dam faina meedam dam labe gi dam iba deelem dam lamota ot deeliam meo damat modem bak. Lahana Alat ame dam laba ba deeli vou baedam vabak. Labiham labe um laha ame baket modemeam làhà Alat laha ba uba deeli vou baedam vabak. 33 Labi um laha uho gi dam uba neà bak tadem dam lamota fa neo neà bakta ot modidameam làhà Alat ba uba deeli vou baedam vabak. Dam faina meedam dam labe ame bak lam modem meot. Ame dam labe gi dam iba neà bak tadem dam lamota fa neo neà bakta ot modidam meo damat modem bak. Lahana Alat ame dam laba ba deeli vou baedam vabak. Labiham labe um laha ame baket meedameam làhà Alat laha ba uba deeli vou baedam vabak. 34 Labi um laha uho na lodam di gi uba fa ame baleà vouhodam dam lamota na lodameam làhà Alat ba uba deeli vou baedam vabak. Dam faina meedam dam labe ame bak lam laha meedam meot. Ame dam labe na ibida lodam di vedi neha, ‘Ame da labe fa eba ame baleà vouhou fa vi vam bak ehete,’ lahame vi ozome uledi na lodam meo damat modem bak. Lahana Alat ame dam laba ba deeli vou baedam vabak. Labiham labe um laha ame baket meedameam làhà Alat laha ba uba deeli vou baedam vabak. 35 Um Eba vi tau meedam dam a labihasu meedamule. Um gi neham bakta meedale. Dam uba fakemoholehe dam laba uho gi ozahit fa vei neàdi ame dam laba deeli gi im neà bakta meedale. Labi laha meit oba nehameam, ‘Om na lam eho teohe vou lam neào?’ laham di modeo, meit oba nehameam, ‘Om na lam eho vase. Labi eho ba vamda lam fa oba baleà vouhose,’ laham di modeo, lahame labi gagomeam làhà ame na lolo modem di a nehi fet ozome lodamule. ‘Eba fa ame baleà vouhoe?’ laham bak a ozome lodamule. Gi lu olum neàte. Uho gi labihasu meedameam làhà Alat uba ame bak gohali lolo modemna lam abo feàna lolo modem bak. Labi laha Alat Bisi Feàda asum ahoba iuba azimda labe Aho uba neha, ‘Um Em data am tame,’ lahame gagom bak. Am abo im nehasu meedam Alat modem labe Aho labihalo modem bak. Meit na lom di, ‘Neàte,’ laham bak ozome fa gagom mom dam lamti dam labe bisi fai bak meedam dam lamti labihasu meedam dam laba Aho gi ozahigeàmu fa vei neàdi neà bakta meedam meo Alat modem bak. Labihàmu uho gi ulohona meedale. 36 Im Ai Alat meia aame faobekesi ozahit meedam bak lamti ulohona um laha meia aame faobekesi ozahit meedale,” lahame Yesusat ame dam laba ab vahokedaham. 37 Labi im lada lam vahokedume neàdi Yesusat im meida neo nehame vi vahokeda. “Uho meia a aame ozomsu gagodamule. Uho labiham labe Alat laha uba ba aame ozomsu gagodam vabak. Labi laha uho meia a, ‘Om gi faina meedam dàt moz. Alat fà om beom neàte,’ lahame a labihasu ozomsu gagodamule. Uho labi modem vabameam làhà Alat laha uba ba labihasu ozomsu gagodam vabak. Labi laha meit uba fai bak meedamda laba uho gi ozahigeàmu fa vei neàdedale. Uho labiham labe ubu uho faina lab meedam bak lam Alat laha ozahigeàmu fa vei neàdedam bak. 38 Uho laha meia na ilabdi lodam labe bohu vuusdale. Uho labi modemeam làhà Alat uba lolo modemna laha gi abo na ilabdi lodam labe bohu vuusdam bak. Ame na lodam di gi nehasu meedam bak. Gi mei ahoba vi vaheme bekesi totbaho goaitolo modemu auet vi neioeme neo vi vaheme zibulem bak. Nasi vi ozodale. Ubu uho meia meedam bak lam Alat gi ame baket ulohodesu fa uba meedam bak,” lahame Yesusat im lada lam neo ab vahokeham. 39 Labi im lada lam vahokedume neàdi Yesusat Aba vi tau meedam dam labe im Abada mahate ozobohudehe vaba fa Farisi dam labe ibi iho vahokedam im laba aidume tu vuzehem bak labna zohàme Yesusat neo ame dam zi laba dam fako aubesuhuna laba vàlu im totobe nidi nim nehame ab faasi vi fi koadamam. “Dam fako faida behàsu labe dat meida anekehà vuusu vou lam biem bak. Labihameam dam ahim lam gi amait bak bumat laba nom ilum bak. 40 Labi laha meit vahokedam bak aidamda labe aho ba aba vahokedam guru laba fa vafozi feà datelem vabak. Gi meit vahokedam bak aidamda labe fa aba vahokedam guru labe im ahebu vahokedam bak lam aidume vi ozome ozobohudi fa am guru lamti uloholem bak,” lahame Yesusat im lada lam ab vahokedaham. 41 Labi im lada lam vahokeme neàdi Yesusat im meida neo nehame ab vi vahokedamam. “Um vahi azim dam meida labe am fako gi ut nu keobe bitehena uho bisi aame gagodamna akati modi fako ubuda ut gahebabu bitehena it aame gagom vaba mode? 42 Fako ubuda ut gahebabu bitehena uho it aame veiom vab dam akati um vahi azim dam meida labe am fako ut nu gi keobe bitehena aame nehame gagodàla? ‘Ba oa, om fako ut nu keobe bitehe bak eho aame veiose,’ lahame akati labi gagodàla? Um abo gi ahit ahobat neàdi meedam damat modem bak. Um nasi fako ubuda lam ut gaheba bitehena it veioi voole. Uho labi modemeam làhà fako ut nu keobe meibada bitehe bak fa aasu veiom neàte,” lahame ab vahokedaham. 43 Labi im lada lam vahokedume neàdi fa, “Damat ibi iho modem bak lam, ‘Neào? Faio?’ laham bak ozobohudelo modem di gi aba aho modem bak laba iho aame ozobohudem bak,” laham bak vahokelo Yesusat im totobe meida nim neo nehame ab vi fi koadamam. “Ut neàda oo modeo, bu modeo, ba faina valem vabak. Labi laha ut faida oo modeo, bu modeo, ba neàna valem vabak. 44 Meit ame utso lam, ‘Neào? Faio?’ lahame ozom di gi ame ut labe am oo modeo, am bu modeo, laba aame am so ozobohudem bak. Neham bak. Dam gokio lo ali labe nigobuli sitom vabak. Labi laha ile lo ali labe sei voeli faitom vabak. 45 Dam ahu ahebu laha labiham bak. Mei ahu laba vahedam im zi modi fa tombalemna im aha am bak. Labiha labe da neàda am ahu gi im neà bakta vahedam labe aho im meedam di modeo, am aha labe im vameadam di modeo, gi im neà bakta meedam bak. Lahana dat bisi faina meedamda labe am ahu gi im fai bakta vahedam labe aho im meedam di modeo, am aha labe im vameadam di modeo, gi im fai bakta meedam bak,” lahame Yesusat im totobe lada lam ab fi koadaham. 46 Labi im lada lam vahokedume neàdi Yesusat ame dam zi laba im totobe meida nim neo nehame ab vi fi koadamam. “Ne, um Eho na im gagom di gi ailahigeàmodamehamdem dam akati Eba neha, ‘Ai iba vuusdam Boehàda oa,’ lahame labi gagodàla? 47 ‘Meit Ebe Eho vameadam im aime meedamehamdemda lamti akatihamdati ulohote,’ làhàla? 48 Gi neham bak. Da nibe num abada moho di abo bak simaheme neàdi bao nom zisiddume ke vame bakmat laba vou vaheteme neàdi bak bauletedume teudehedati uloho bak. Labi ba vao belu num laba zizehe di bao lam teudehe labe ba nigome agutehe vabak. Abo aho amu num moho di gi iademe moho labe labihaha bak. 49 Lahana, ‘Meit Ebe Eho vameadam im ailahigeàmomda lamti akatihamdati ulohote,’ làhàla? Gi neham bak. Da nibe num moho di gi bao zisum vabna loat giame ame num ab moham. Labi ba vao belu ame num laba zizeha num lam gi vaot beome biti agube ab vàhàdeme seteham. Dat num labi momda lamti Ebe Eho vameadam im ailahigeàmomda lamti uloho bak,” lahame Yesusat dam zi laba im labihasu ab vahokedaham.

Lukas 7

1 Labi Yesusat Aho Am im lam ahebu ame dam zi laba vahokedume neàdi fa num debu Kapernaum laba ab laham. 2 Ame di labe Roma meo dam seratus zi meida labe im boehàda labe am na meedamda aba bisi deeleheda ame num debu Kapernaum laba gaili abo elolo vabali bisda. 3 Labi Yesusat meedaha im lam ame boehàda labe amu aime ozobohudehe labe Yesusat Kapernaum niba lehe bak aihemu aho Yahudi dam bake vuusu im vameame faheme modiam dam busaoda totbaho laba gagu Yesus bake ab oluham, “Uho Yesus bake le aile. ‘Em na meedamda nim Oho li modi fa neàdem neào?’ laham bak uho Yesus bake le gagu aile,” lahame ab gagu oluham. 4 Labi ame boehàda labe labi gagohemu aho gagu oluhu dam labe Yesus bake le ab faasi vameadamam. “Im boehàda labe am na meedamda gaili abo elolo vabali bisdalo. Oho iba tau le aame modi fa neàdem neào? Ame boehàda lam abo iba Yahudi dama deeli vuusdam meoda am bak. Am abo im Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num lam am dam gagome mome iba loho bak. Am abo neàda am tame. Labiham bake aho gagoho im lam Oho aime modem neào?” lahame ame im lam Yesus bake vameadume neàdi Yesusat uledi ame dam laba ab tau ladamam. Labi ladameam num bake fuseo vabali aaha ame boehàda labe amti ot deeliame vuusdam dam totbaho neo gagome doait ab oluham. “Uho Yesus bake doait le gagole. ‘Boehàda oa, Om bisi feàda em numa olem di em ladem bak. 7 Labi em laha Oba ahate fum ladem bake feidate. Om bisi feàda labe gi Obo Oho lab duzuhu bak labet bak bohulana gagomeam em na meedamda nim gi modi fa ab neàdemam bak. 8 Em nehi ozo. Eba vuusdam boehàda labe eba na im gagom di em aime meedam bak. Labi em laha em meo dam niba eho na im gagom di ame dam labe laha aime meedam bak. Neham bak. Ebe eho vuusdam dam niba eho da meida laba neha, “Iuba lale,” lahame gagom di ame da labe lam meo bak. Labi eho laha dat meida amomoi laba neha, “Lele,” lahame gagom di ame da labe lem meo bak. Labi em na meedam dam meida niba gago, “Na nim modele,” lahame gagom di ame da labe modem meo bak. Em fota boehàdateli labihasu meedam bak. Lahana Oho meedam bak lam bisi feàda Om am bak. Labiham labe Oho gi laba duzu, “Em da nim fa neàdele,” lahame Oho labi gagomeam làhà em da nim gailehe bak modi fa ab neàdemam bak,’ laham bak lam uho doait le Yesus bake gagole,” lahame ame dam laba labi vameadume neàdi Yesus bake doait ab oluham. 9 Labi le Yesus bake doni laba ot tahiame ame im lam vameadume modeha Yesusat ame im lam aime ab àvodeham. Àvodi Am fa vaktesi dam duada Aba vi tau godam dam laba ab gagoham. “Aa làhà! Ame da labe etei lab gagoho bak lam abo imbota imbot. Lahana Eho etei uba gagolo modem im nim laha imbo imot modem bak. Nasi aimale. Ame Romada abo Yahudi dàt modem vabda vàmtea nimota Eba bisi tuhudatebo am tame. Em Israel dam totbaho ahebu ba dat lada vàmtea labe aba aho lab bisi Eba tu vuzehehe bak lamti ulohoda Em ba aam kaio,” lahame ab gagoham. 10 Labi gagu neàdi dam doait gagome oluhu dam nibe fa im boehàda am num bake ab laham. Le ame dat gaili bisdamda nim fa neàdehe bak ab le aaham. 11 Labi Yesusat num debu Kapernaum laba azibe ba neo num debu Nain laba ab laham. Labi Aba Aho vahokedam im ozobohudelo vi tau meedam dam ziti dam amomoi zi lamti tau vulada. 12 Ladaha labe num debu Nain bàhàgo obe laba fuseo vabali aaha dam koei ileba esu vou ledam bak ab aaham. Koei labe am oi lam dat amu eloi setehena maboet moz. Lahana am adat gi vàmtea faahana neo eloi medda. Làhàmu Nain dam amomoi zi labe nam laba vi tau vule koei baumsulo vulada. Labihadamna modehe labe Yesusat ab aaham. 13 Labi Yesusat Aho ame nam labe lab meddam bak lam aahemu faobekesi ab gut gagoham. “Oi, a mebule,” lahame ab gagoham. 14 Labi gagu afoezobe Yesusat lab lehe labe koei ileba laba netàdi ulasi modeha dam ab odoham. Dam laba odosi Yesusat koei niba ab gagoham. “Baseà om fat ahedi usale.” 15 Lahame gagoha koei lam fat ahedi usai ileba nusu im ab faasi vameadaham. Labi Yesusat fa ame da labe am oi bake gago, “Om adat nasi fa om num bake vou lale,” lahame ab gagu oluham. 16 Labi modeha dam laba dozeadaha dam zi labe ab aame àvodi anekehàso ab gaadamam. Abo àvodi fa Ala bake vou baeda. “Alat vameadaha im aime fa dam bake ahate vameaidahada abo feàda etei iba ab lehame? Alat iba Am Yahudi dama taulo etei iba ab nom oluhame?” lahame Ala bake ab vou baedaham. 17 Labi ame im lam Nain bak labe ab vou fi det ladaham. Vou fi det laha labe Yudea bake azim damti Yudea totobe esuhu damti ahebu ab vou fi det lame uloholeham. 18 Labi Yohanesat aba aho vahokedam im ozobohudelo vi tau meedam dam labe laha ame Yesusat meedaha im lam ahebu aime fa Yohanes sel ousdam num laba vou le Yohanes bake ab vameadaham. 19 Labi Yohanes ame im lam aihemu ozoho vabamu aho aba vi tau meedam dam meida behàsuta gagome ab leham. Li duzu neàdi Yohanesat ame dam behàsu laba nehame vameame Yesus bake ab oluham. “Uho Yesus bake le gagu aile. ‘Dam ahamda iube neha, “Alat ba diamut Aho Gagu Fihasi Vimteme Olulo Modem Dat Boehàda olu tame,” lahame fet gagu vou vamea useheda Om ame Da ameo? Om ame Da modem vabameam làhà iho gi fa dat amomoi ba olum bake vou faodào?’ laham bak lam uho Yesus bake le gagu aile,” lahame vameadume neàdi Yesus bake ab oluham. 20 Labi ame dam behàsu labe Yesus bake le lafusi aaha Yesusat gi im nehasu meedam bak ab aaham. Dam fota gailehe dam lamti dam elolo vabalehe dam lamti Aho modi fa neàdeda. Labi dam setan oli veimahada zi lam Aho laha setan laba gagu futodume ilida. Labi fako faidi na aam biem dam lam Aho laha modi fako fa na aam neàdeda. Yesusat labihasu meedam bak lam dam behàsu labe ab le aaham. Bak lam aadahemu Yesus bake ab gagoham. “Yohanes Mei Vuu Valo Baptisleiamda labe iba neha, ‘Oba li gagu aile. “Dam ahamda iube neha, ‘Alat ba diamut Aho Gagu Fihasi Vimteme Olulo Modem Dat Boehàda ba gagu olu tame,’ lahame fet gagu vou vamea useheda Om ame Da ameo? Om ame Da modem vabameam làhà iho gi fa dat amomoi ba olum bake vou faodào?” laham bak Oba li gagu aile,’ lahame iba gagu im oluho,” lahame ame im lam Yesus bake ab vameadaham. 22 Labi vameadume neàdi Yesusat fa ame dam behàsu laba ab gagoham. “Uho etei li aaha bak nimti labi Eho vameadaha im uho aihi bak nimti labihasu fa le Yohanes bake vameadale. Eho nehasu meedam bak: Dam fako faidi na aam biem dam labe im fako fa neàdedume na aada. Labi dam nao zoho nutabedehe dam lam laha fa neàdedume usnada. Labi dam sokba faidi vàhàdem bohu vuusdam dam lam laha modi fa neàdeda. Labi dam dogoi faidi ulaihàbulehe dam laha modi fa im aim neàdeda. Labi dam elodaha dam laha modi fa ahededume usnada. Labi laha Ebe Eho meedaha Im Neàna lam Eho li vameadam bak lam dam na vab dam labe iho aida. Eho labihasu meedam im zi lam uho fa Yohanes bake vou le laha vameadale. 23 Labi uho im nidi nim neo Yohanes bake vou le vameadale. Meit nehame ozo, ‘Alat Gagu Fihasi Vimteme Oluhu Dat Boehàda lem di im nehasu meedam bak,’ lahame aba aho ozoho bak lam Eho meedam vabnàme gi ozahit Eba tu vuzehemda lam Alat gi im neà bak modi esuiamda am bak.” 24 Lahame labihasu vameadume neàdi ame dam behàsu lam fa Yohanes bake ab oluham. Labi olu neàdi Yesusat fa neo dam duada zi laba, “Yohanes ana dàt modela?” laham bak lam ab faasi vahokedamam. “Uho neha, ‘Imo le Yohanesam im aidase,’ lahame bak aotba baa bohu dam vaba alim bak laba lalo ladaha di lam um baka ana aalo ladahela? Uho gi ket et nutabet ulasi vou lai vou laidam bak aalo ladaheo? Vabà! Um ba labi ozome laha vabak. Yohanes abo meit vameadam im aim di ket et labe fi zuhusi bedem bakti uloho vabak. Am abo meit aba neha, ‘Im nehasu meedale,’ laham di am ba fa veimdem vab labe gi aba baket daetesu labaha bohu meedam dàt modem bak. Am abo teuda am bak. 25 Làhà um labiham vabameam baka ana aalo ladahela? Uho gi meit sue bisi neàna dusuhu bak aalo ladaheo? Vabà! Um ba labihaha vabak. Dam nazoh duada labe iho sue bisi neàna dusuhu dam lam ba bak aotba baa bohu dam vaba alim bak laba azim vabak. Dam lamohoda gi boehàda labe im num neàna bisi feàda lamota azim damat modem bak. Yohanes ba sue lamohoda dusu num feàda laba azim vabak. 26 Làhà labiham vabameam um baka ana aalo ladahela? Uho gi Alat vameadaha im aime fa dam bake ahate vameaidahadate aalo ladahe? Lo, imbote. Uho le aalo modemda abo ame da am bak. Lahana ame da Yohanes lam gi ame bak lamota modehe vabak. Abo ame bak labe vafozi bisi feàda am am bak. 27 Eho etei lab gagohoda lam Alat Vameadaha Im Toedahana meida nim Yohanes bake nehasu vàlu gagoho bak ehe bak. Alat Am Adat Yesus bake neha: ‘Eho Em im le vameadamda nasi dam bake olu neàdi Om ba olu tame. Damat Om ule neàt gut vam bak laba ozome ame da labe nasi le duzu zie vueme neàdehena ahum Om ba vula tame.’ Lahame dat ahamda Alat vameadaha im aime fa dam bake ahate vameaidahada Maleaki labe aho fet toeme esuhu im lam ab imbodi Yohanes ame baket ab faasi meedaham bak. Labiha labe Eho uba neha, ‘Ame da lam ame bak labe vafozi bisi feàda am tame,’ lahame uba labi gagoho bak. 28 Lo, lamota imbot. Lahana Eho etei uba neo gagolo modem im imboda nidi nim laha nasi aima. Dam ahamda iumti dam bada nimti abo dam bakda ahebu fa vazisi Alat ozodam di bisi feàda vàmtea Yohanes Mei Vuu Valo Baptisleiamda am bak. Lahana dam etei Eba tu vuzehi Alat deeli vame Am damali vuusu im vahokedam dam lam abo damat neha, ‘Feà kaio,’ lahame gagodam damat modemnàme Alat ozom di ame dam labe iho fa Yohanes vafozi feà damalem dam am bak,” lahame ab vahokedaham. 29 Lahame labihasu vahokedume modeha dam duada totbaho labe Yesusat lab vahokedaha im lam aime uledi Ala bake ab vou baetedamam. “Lo, imbote. Alat Aba Aho meedam bak ahebu gi ahole meedam Alat modem bak,” lahame Ala bake ab vou baetedaham. Ame dam labe ihimo ame bak lam modehe vabak. Dam abo meia gagu gi vi vaiam doi zoho pajak lam atem dam totbaho lam laha ame baket tau meedaha bak. Ame dam zi labe amu Yohanesat, “Nehame modele,” lahame vahokedaha im lam aime uledi Yohanesat im vuu valo baptisleidahemu Ala bake ab vou baetedaham. 30 Lahana Farisi damti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti laham dam zi labe amu Yohanesat, “Nehame meedale,” lahame vahokehe im lam ailahigeàmu moho labe ba neham bak gagom kai. “Im oho valo baptislele,” laham bak lam gagodam moho labe etei fa Yesusat vahokehe im lam, “Alat uba soat vausu tame,” lahame Yesusat lab vahokehe im lam neo laha aim mouda. 31 Labi Yesusat im meida neo ab vi vahokedamam. “Dam etei bak niba esdamda ibi iho meedam bak lam Eho, ‘Akatiham bakti ulohote,’ lahame vouhome vameadàla? 32 Làhà Eho gi neham bak vouhodase. Um dam bada nim gi data num bak tomba laba nusualadume dam busaot modem baket vouhom datati uloho bak. Ame data labe iho sikilo modem im lam fa data totbaho laba gagoha data lada labe mouda. Làhàmu ab faki tozodamam. ‘Ea. Iho neha, “Imo bo foadume umti kuguidase,” lahame gagohat um akati mohela? Labi iho neo, “Umti vahi koei esum di medaom labe nimidase,” lahame gagoha um akati mohela?’ lahame ame data labe data totbaho laba faki tozome gagoda. 33 Um dam bada gi ame data labe modem bakti uloho bak. Nehaha bak. Amu Yohanes Mei Vuu Valo Baptisleiamda labe aho lehe di lam aho gi ahit na àm mu izidam bak. Labi laha anggur oo vaksa meona lam ba uddam vabak. Labiham damat modehe labe uho aame vi ozo, ‘Ibi iho na àme im gagu igeadam bak lam iho ame da laba gagoha akati aho modem vaba ahit na àm mu izidàla?’ lahame faki vedi mu nehi vi tozoda. ‘Ea, da lam gi mei ahu oli veimam setan labe am ahu oli veimai meedam dàt modem bak,’ lahame tozoda. 34 Labi laha Em Abo Asum Ahoba Iubet Bak Niba Li Dateleheda nibe Eho ba lehe di lam Em gi na àda. Labi laha anggur oo vaksa meona udda. Labi im gagu igeadam baket meeda. Eho labihamda modehe labe uho Eba aame vi ozo, ‘Ibi iho ahit na àm mu izidam bak lam iho ame da laba gagoha akati Aho modem vaba gi deeli igeadam labe na àdàla?’ lahame faki vedi Eba nehi vi tozoda. ‘Ea, Da lam abo gi dedehe geàmu na vi àdam bohu vuusdam Dàt moz. Labi laha anggur oo vaksa meona bisi duana uddume bak vabi bobidume iziam Dàt moz. Labi Da lam abo meia gagu gi teo vi vaiam doi pajak gut gagome vaiam damti labi damat neha, “Dam faina meedam damat modem bak,” lahame feàtàdaha dam totbaho lamti vazisi ot deeliame meedam Dàt modem bak,’ lahame Eba faki mu vi tozoda. Labihàmu Eho ozoha, um dam bada gi Yohanesti Emti li meedam im im gi mohet vanamai mom damat moz. 35 Lahana Emti Yohanesti iho li Alat Aho ozobohudi meedam im lam iho fa dam bake lab vahokedaha di meit ame im lam aime vuzehi iademe ulohodesu meedameam làhà ame bak labet modi damat gi nehi ozome gagodam bak. ‘Làhà Alat Aba Aho ozobohudi meedaha bak labet modi Yohanesti Emti gagu oluhu bak lam gi ahole meedaha bak,’ lahame vi ozobohudi gagom bak am bak,” lahame Yesusat ame im lam ame dam zi laba ab vahokedaham. 36 Labi ba digat meida iube Farisi dam meida Simonat am na àm bake Yesusat ab gagu leham. Labi Yesusat Farisida labe am numa li na ab tau àdamam. 37 Labiham di labe ame num debu laba faina meedam nam laba ehet. Laham nam labe Yesusat Farisida labe am num laba li na tau àm bak ozobohu labe aho doi duana vaha minyak ahana neàna amu ke fauhana ee gagom pualam meit modeme botolilehena laba fedehena lam visoi Yesus na àm bak laba ab vou leham. 38 Labi vou li Yesusat aidam obe laba li duzu Yesus Am naba modesdam bak laba ahit ogomasu nom bohusu ab vou meddamam. Vou meddam labe nam labe am fa vaksa lam fa Yesusam naba toha laba babadume eksobuleda. Labihàmu am ohuta bohulana lam it visoi Am naba eksobu bak lam fa footoda. Labi nam nibe am ladehe labe ozo, “Em abo faina meedam namet mode? Labi Yesus abo neàda im ozobohuda ame?” laham bak ozohemu Am naba laba tomoamdi ame minyak ahana neàna lam ve ab noidamam. 39 Labi Farisida num deda labe aho nam labe modehe bak lam vi aahemu am ahulat ahamo vi ozo, “Ne, damat neha, ‘Da nim Alat vameadaha im aime fa dam bake ahate vameaidam Dàt modem bak,’ lahamda akati nam faina meedam namet Aba uladdam bak taho malem vaba vabi modela?” lahame ab vi ozoham. 40 Labi ame Farisida labe aho ozoho bak lam Yesusat gi Ahamo ozobohudi ab vi gagoham, “Simon, Em im oba vamease,” lahame gagoha Simon fa gago, “Lo, nasi vameamale.” 41 Labihàmu Yesusat Simon bake im totobe nidi nim ab faasi fi koadamam. “Dat am doi meia lu afoezobe ba ame baleà vouhoiamda meida labe dat meida doi oona perak lima ratus lo. Labi dat meidate lima puluh lo. 42 Labi faobe ame dam behàsu fa doi dedate ame baleà vouhom bie. Labihàmu doi deda labe ab gagoham. ‘Làhà fa eba ame baleà vouhom bak feidate,’ lahame ab gagu moham.” Lahame im totobe lada lam fi koadume neàdi Yesusat fa Simon bake neo ab vi ailo gagoham. “Oho ozom, dam behàsu lam dat adidat ame dat doi deda laba bisi deelehela?” 43 Lahahat Simonat fa ab vi gagoham. “Eho ozoha, dat doi duana vahada labe aba neha, ‘Feidate,’ lahame gagoho bak aihemu bisi deeleheda am bak.” Lahahat Yesusat fa vi gago, “Lo, oho vi ozome ozobohudi neàdi gagoho bak lam ahole gagoho bak.” 44 Labi Yesusat fa vaktesi nam laba avaesu gi Simon bake neo ohuset ab it vameadamam. “Nam nibe Eba etei li modehe bak Eho oba gagolo mozo. Eho om numa ahamte olehe di lam meit mei numa olem di naba kikem vao noai esum baket oho ba Eba ame baket modehe vabak. Lahana nam nimota am fa vaksat Em naba toha babame eksobueme fa am ohutat footoho bak. 45 Labi laha Eho om numa ahamte olehe di lam mei numa alimeat li olem di meia si oode tomoamdem baket oho ba Eba ame baket modehe vabak. Lahana nam nimota ba li vi olehe labe Em naba si tomo tomodam lahasuhu bak. 46 Labi oho ba Em ohu niba zaitun oo minyaklehena lam Eba noihi vabak. Lahana nam nimota abo minyak ahana neàna ve Em naba toha niba noihi bak. 47 Labihadàmu Eho oba nehi gagom bak. Am faina duana meedaha bak lam Eho ozahigeàmu fa ab vei neàdeham bak. Labiha labe aho Eba duana deelem bak. Lahana meit faina meedam bak gi koena modehena Eho ozahigeàmu fa vei neàdemeam làhà ame da labe Eba gi koena deelem bak,” lahame ab vameadaham. 48 Labi Yesusat fa neo ame nam niba ab gagoham. “Oho faina meedaha bak lam Eho fa ozahigeàmu mu fa vei neàdehe bak,” lahame ab gagoham. 49 Yesusat nam niba labi gagohemu dam Simon bake na tau àdam dam totbaho labe aime ihimo aa ab ot gagoiaham. “Da nim baka ana modelo modem Dàt labi gagoe? Meit faina meedàmu Alat beolo modem bak lam Alat Ahamo gi vei mu fa faamome vei neàdedam Alat modem labe akati da nibe, ‘Aho modeho,’ lahame faasi mode?” lahame ab ot gagoiaham. 50 Lahana Yesusat gi ailahigeàmu nam niba neo ab gagoham. “Om Eba tu vuzehe labe Alat oba beom bake Eho soat vausuhu bak. Om fa Alati vahehemu obo bake nasi lale,” lahame ab gagoham.

Lukas 8

1 Labi ba di iube Yesusat neo Alat Boehàdateboli dam bake vuusu im vahokedam bak lam, “Akatihasu modemna modela?” laham Im Neàna lam dam num debu dua bake esuhu damti dam sii bake esuhu damti laham dam laba Yesusat ame Im Neàna lam vou le iuba vamea. Iuba vamea. Labihada. Labihadam di lam Aho Am im gagu oluiam dam dua belas lam laha vi tau goda. 2 Labi lahi totbaho zi amu setan oli veimaha bak ame. Labi so faidehe bak ame. Labihasu meedaha bak amu Yesusat modi fa neàdedaha lahi lam laha Yesus bake tau goda. Ame lahi zi lam meida Maria abo Magdala bake azim nam am. Lahana am ahu amu setan tujuh oedume veimadahemu Yesusat fa gagu futodume ilidaha nam am. 3 Labi nam meida Yohana abo Kuzam nam am. Ame Kuza lam Herodes Antipas boehàda labe am nazoh vou aasumda am. Labi nam meida Susana am. Labiham lahi lamti lahi giida totbaho ziti Yesus bake vi tau goda. Yesusat Aho Am im gagu oluiam damti iho iuba le ame Im Neàna vamea. Iuba le ame Im Neàna vamea. Lahadam di labe im na àm bakti im bakti vabalehemu ame lahi labe im doi num dedate lu na ve Yesusat Aho Am im gagu oluiam dam dua belasti àme i. Labi num iudu iuba laha le ame lahi labe im doi neo num dedate lu neo na ve àme i. Labihada. 4 Yesusat labihasu bak mei bake le Im Neàna lam vameadam di digat meida labe dam num debu bake esuhu dam zi labe Yesus bake iubet le iubet le lahadume bakamta ab li dozeadaham. Labihàmu Yesusat im totobe meida nidi nim nehame dam zi laba ab faasi fi koadamam. 5 “Dat utoho modemda nibe am na dem bak laba na oo neb ab le guladamam. Labi na dem bak laba le guladam di labe ame na oo neb totbaho gi damat lailaidam zie tomba laba ab biddaham. Labi modeha ame na oo neb totbaho damat lailaidam labe gi naot duzui duzuidume vàhàde. Labi oo neb totbaho gi bume faobuda labe visoi àme ab seteham. Lada lam labiha. 6 Labi ame na oo neb totbaho lam ke baa bak laba ab biddaham. Labi modeha ke baa bak laba biddahada lam bak vao vaksa vab labe ame na oo neb lam usihita usi. Lahana gi usilo iahamu fa ab aladaham. Lada lam labiha. 7 Labi ame na oo neb totbaho lam aliho debu bak laba ab biddaham. Labi modeha na oo neb lamti alihosoti amediat usida. Amediat usihi labe na àm vabda labe nasi kilale. Labi kilalehe labe na àmda lam gi alihosot vi giame ab aladaham. Lada lam labiha. 8 Lahana na oo neb totbaho lam fa bak neà bake bidda. Bak neà bake biddaha labe abo neàna usidume kilali abo oo duana ab vaedaham. Labi oo vaedaha di labe abo oo seratus ab vaedaham.” Lahame im totobe lada lam labihasu fi koadume neàdi Yesusat neo ab vi gagoham. “Um dogoi im aim bak ehena Eho etei lab vameadaha im lam mahate aime vi ozome ozobohudele,” lahame ab vi gagu esuham. 9 Labi Yesusat vameadume neàdi dam dua bak fa le seti Aba vi tau meedam dam dua belas nibe ihimo Yesus bake li ab gagoham. “Ame Oho totobet lab fi koadaha im lam am tombu akete?” 10 Lahame vi ailo gagoha Yesusat fa neo ab vi vameadamam. “Alat Ahamo Boehàdateboli dam bake deeli vame Am damali vuusu im vahokedam bak lam etei modi fa gàhàlehe bak lam, ‘Akatihasu modemna modela?’ lahame dam amudate vastehe im lam Em Aiat Eba neha, ‘Eho ame im lam fa uba vameadume umota ozobohudi fi gatedase,’ lahame Eba labi gagohemu Eho im dedateli etei fa uba vameadume fi desi um ab ozobohudedamam bak. Lahana Eho dam giida abo Alam damalehe vab dam laba im vameadam di lam ‘Ame dam labe Ebe Eho meedam bak lam aam bakta aa. Lahana, “Iho etei aaha im nim akati modemna modela?” laham bak lam ba vi ozome ozobohudedam vabak. Labi laha Em im aim bakta ai. Lahana, “Iho etei aihi im nim akati modemna modela?” laham bak lam ba fetehesu vi ozome ozobohudedam vabak.’ Labiham labe Eho gi ahit im totobet fi koadam bak,” lahame ab vameadaham. 11 Lahame labi vameadume neàdi Yesusat neo ab vi vameadamam, “Ame lab totobet fi koadaha im labe am tombu gi neham bak. Ame na oo neb gulahana lam Alam im am bak. 12 Labi na oo neb zie tomba biti bumet visoi àhàda lamti dam Alam im nehi aime meedam damti uloho bak. Neha: Dam nibe iho Alam im lam aimta ai. Lahana Iblis labe ozo, dam nim Alat vameadaha im aime Ala bake tu vuzehi Alat soat vausum bak labna zohàme Iblisit li im ahu ad laba modesuhu im lam ab modi seteham. Lada lam labiha. 13 Labi neo na oo neb ke baa bake biteheda lamti dam Alam im nehi aime meedam dam nimti uloho bak. Dam nibe iho Alam im lam aime gi àvodehat deeli tu vuzehe. Lahana abo mahate tu vuzehe vaba gi fota tu vuzehe. Labi iho lab aihi im lam im ahu ad laba modesu teudi omnaoli abehamdehe vab labe naat iba modi ozolo meedam di labe ame dam lam gi Ala bake fota tuhu bak labet modi gi kehàm vaba ab mu voou seteham. Lada lam labiha. 14 Labi na oo neb aliho debu bak laba biteheda lamti Alam im nehi aime meedam dam nimti uloho bak. Dam nibe iho Alam im deelehat aime ve àdesda. Lahana bak niba esdam di gi iba modi neàdemna, ‘Modem vabna ozomo?’ lahame bisi àvodi azi ozoda. Labi laha im nazoh dualelo àhàki neo azi vi ozome meeda. Labi laha ibi iho modelo àhàki ahu gukemna neo azi vi ozome meeda. Labihadam damat modem labe ibi iho amu Alam im aime vaha bak lam gi fa iho ozome meedam im lamti valiheme ab vàhàdeme seteham bak. Abo na oo neb usime bu vali amdehe vaba gi alihosot ot giaiame setem bakti uloho bak. Labiha labe Alam im lam ba ab vi ozome meedam bieham bak. Lada lam labiha. 15 Labi na oo neb bak neà bake biti usihida lamti dam Alam im nehi aime meedam damti uloho bak. Dam nibe Alam im aim di abo gi ahu teudi ule neàt abo va. Abo vaha labe iho na im meedam di gi ahate neà baket meeda. Ame Alam im lam ba mu voom vaba abo teudi tu vuzehehe bak bohu vuusdam labe abo na oo neb labe bak neà bak laba biddahada labe oo duana vaedaha bak lamti uloho bak,” lahame Yesusat Aba vi tau meedam dam laba ame im tombu lam ab vameadaham. 16 Labi ame im tombu lam vameadume neàdi Yesusat im totobe meida neo nehame faasi ab vi fi koadamam. “Meit vuagat usim di ba boloseh visoi ahoba nom suusum vabak. Labi laha damat iho im beahuba ad laba vou oli esum vabak. Gi damat oli aam neà laham bak ozome tom fi haba laba esu fauhaedam bak. Labiham labe damat ame numa olem di gi fauha neàdi modesdamna aam bak. 17 Alat Ahamo Boehàdateboli dam bakdate deeli vame Am damali vuusu im vahokedam bak lam, ‘Akatihasu modemna modela?’ laham im lam amu fi zeam bitoi tombalehe vab im lam ba gi labihasu vastem bohu modesdam vabak. Abo ame im lam ahate vameadume fi zeam bitoi tombali dam ozobohudem bak ehe bak. 18 Labiham bake Eho uba vahokedam im zi lam iademe aime ozodale. Meit ame im lam iademe aime vuzehemeam làhà Alat fa ame da laba vi tau modi aho im duana vi ozobohudedam bak. Lahana meit ame im lam iademe aime vuzehem vabameam làhà Alat Aho ame da labe koena ozobohudehena lam gi fa faatoi vei setem bak. Labiham bake Eho uba nib vahokedam im nim um dogoi balesu mahate iademe aile,” lahame Yesusat ab vameadamam. 19 Labi ame im lam vameadam di labe Yesus Am oiti Am vahadam ziti Yesus bake li netàdesome modeha dam bà tadi olem bili meeda. 20 Làhàmu dat meida labe bak lam aahemu le Yesus bake netàdi ab gagoham. “Ai oa, Om oiti Om vahadamti Oba li tàhi aalo àhàki bako iuba li dozeadume vou faodalo.” 21 Lahame gagoha Yesusat fa dam zi laba ab vi gagoham. “Ne, uho ozom, Em oiti Em vahadamti ame dam akete? Ame dam gi um neam taia? Meit Em Aiat gagoho im aime vuzehi meedam dam ahebu lam Em oi Em vahada laham dam am bak,” lahame Yesusat ab vameadaham. 22 Labi ba digat meida iube Yesusat ab gagoham. “Imo itea biou tot iuba lase,” làhàmu Aba vi tau meedam damti iho iheba ziddume ab biodamam. 23 Biodam di labe Yesusat lavoidume ab iddamam. Labi iddam di labe nutabe fai iubet li itea laba modi fi tauledume bubaholedam labe ihe laba tom foadume vao ihe laba zizi noziali tezeo vabali dam folem bak ab fuham. 24 Làhàmu Aba vi tau meedam dam labe ihe zoho laba fi ai Yesus bake ukeme ab gagoham. “Ai Guru, Om ade? Im ihe vao zizi noziali im folelo mozo.” Làhàmu Yesusat keesi usai nutabe fai lamti vao fi tauledume bubaholedamna lamti mali, “Setele,” lahame gagoha ab bagavai seteham. 25 Labi seti neàdi Yesusat Aba vi tau meedam dam laba ab gagoham. “Um Eba akati mahate tu vuzehem vaba mode?” lahame gagoha ame dam labe ame lab modehe bak lam ihimo vi ozome ahu adat iedi ab ot gagoidamam. “Aa làhà! Uho ozom, Da nim ana Dàt mode? Am gi nutabeti vao fi tauledume bubaholedamna lamti, ‘Setele,’ lahame gagom di gi uledi setem meo Dàt modem bak,” lahame ab ot gagoidaham. 26 Labi ot gagoiame neàdi neo bioda. Biodume bak ee gagom Gerasa laba fusi ab zituham. 27 Labi zitu neàdi Yesus Aho usi aaha dat setan zi duana oedume veimahada labe Yesus bake li gut tàh. Ame da lam ame num debu laba azihi dàt moz. Lahana etei gi so bozbuna num aabo bake azim vaba gi koei vahedam ke bumat zi bake azietem dàt Yesus bake li gut tàh. 28 Ame da lam amu dam ahe damat am si fa vou li bes botehà niz labe am anekehà ahim gia. Labi nao ahim gia. Labi vou azi aasdam meot. Lahamnàme ame setan zi labe veimai meolehe labe aho ame bes lam ahamo tet ukbodume dam vaba alim bake vou itaidam meot. Labihamda labe Yesus bake li gut tahi modeha Yesusat fa ame setan laba ab gagoham. “Om taho futoi da nim vou esmozi itale,” lahame mali ooteha ame da labe geàdume Yesusam naba modesdam laba ahit ogomasu ab biteham. Biti bisteat ab gagoham. “Yesus abo Ala Bisi Feàda labe Am Adat oa, meit ahamo modem im akati Oho li modi faatolo modela? Eba a modi gemule.” 30 Lahame labi gagoha Yesusat da niba neo gago, “Om ee Eba gagomale.” Lahame gagoha da nibe fa gago, “Em ee gagom Legion.” Aho ozo, setan zi duana labe am ahu oedume veimahemu ee labi taluhu bak. 31 Labi ame setan zi labe Yesus bake nehame tauleme gagoda. “Iba a bak bumat zoho novaha bak ozom vabna laba a nom olu geàdam bak tademule,” lahame labi tauleda. 32 Labi ame di labe aaha doho fi ho zi gi netà bak nom otesuhu bak laba dozeadume bakbe àda. Làhàmu ame setan zi nibe Yesus bake neo ab gagodamam. “Làhà Oho iba da nim mali gagu futodume ilidalo modem di im fa doho fi ho zi labe im ahu laba fa oedume veimadam neào?” lahame labi tauledume gagoha Yesusat uledi 33 ame setan zi laba gagu futodume ilidume ame doho fi ho labe im ahu laba ab oedume veimadaham. Labi modeha ame doho zi lam bak nom otesuhu bak labet nom itaome valo nom ilu ab tezi elodaham. 34 Labi modeha dam doho fi ho vou aasdam dam labe aaha im doho valo tezi elodaha bak aahemu iedi ab iliham. Ilime le im num debu ibidati bàhàgo bake numaedaha damti ab vou fi det ladaham. 35 Lab vou fi det ladam labe dam laba esum dam labe ame im lab modehe bak lam aalo ab valadamam. Valadam labe Yesus bake li aaha dat setan zi amu oedume veimahada lam gi Yesusam naba modesdam laba sue fa dusu im ozobohudi aidamna aahemu ab àvodi iedeham. 36 Dam na aahada nibe Yesusat ame setan zi laba gagu futodume ilidaha bak lam fa dam iube lehe dam laba vou duzu gut vameada. 37 Labi vameadume modeha Gerasa bak laba esuhu dam labe iedi modem faidehemu iho dae vazisi Yesus bake ab gagoham. “Om iba a tau azimule. Om taho fa lale.” Lahame labi ootedàmu Yesusat fa biolo iheba ab ziham. 38 Zisi fa lasome modeha amu setan zi gagu futodume ilidahada labe Yesus bake neha, “Em Oba tause.” Lahame vi tauledume modeha Yesusat mali 39 vi gago, “Obo oho azihi bak laba fa le ame dam laba Alat oba abo neàna modehe bak lam vameadale.” Lahame labi gagohemu da nibe fa num debu bake le Yesusat aba im neàna modehe bak lam ab vou vameatedaham. 40 Labi Yesus Gerasa bak vou esmozi fa Itea Galilea labe Aba Aho amu lehe tot iuba fa ab bioham. Labi fa biou zitu aaha dam zi labe Yesusat fa lem bake li dozeadume vou faodamna ab li zituham. Labi ame dam zi labe Yesus fa iba lehemu gut deeli, “Neàte,” lahame ab gagodamam. 41 Labi Aho laba li zitu modeha dat meida ee, “Yairus,” lahamda labe ab lefuham. Ame da Yairus lam Yahudi dam labe ibi iho fi hasi bakamta vahi Alat vameadaha im ahamda dogoit aidam bakti im meiti meedam num laba vou aasdamda meida am. Lahamda labe am adnamat gi vàmtea faahana abo dua belas tahun fuhuna abo duana gaili elolo vabali meeda. Labihàmu li Yesusam alihi aahemu, “Yesus abo feàte,” lahame ahu adat iedi Yesusam naba modesdam laba netàdi ogomasu ahit bake ab biteham. Ogomasu biti tauledume gago, “Om Em numa tau lele,” lahame ab gagodamam. Labi gagodàmu Yesusat ab tau ladamam. Labi ladam di labe gi dam duali bak kekesi gi mei soat osiddam labe lada. 43 Labi ladam di labe nam abo bako itaha bak bohu vuusdume dua belas tahun fuhu nam nibe abo dam amomoit aba modi fa neàdem biehe namet laha ba tau duzu vueda. 44 Laham nam labe dam duada soat vatoheme Yesusam ohus tot nibe aa vi vuli Am sue sona ahoba dusuhuda ohus tot bobusbe niba ab vi ulaham. Labi vi ulahemu am bako itaha bak bohu vuusdam bak lam fa vaitoi ab neàdeham. 45 Labi nam nibe Yesusam sue ulaha di labe Yesusat ozobohudi ab gagoham. “Eba amat ulahela?” Lahahat dam ahebu veibam tade. Làhàmu Petrusat Yesus bake ab gagoham. “Mm, Guru Om ozom vaba? Dam dua labe bak kekesi Oba ulam tadi modem bak.” 46 Lahahat Yesusat fa ab gagoham. “Mm vabà! Meit ahit Eba ulaha bak. Eho meia modi neàdemna meia modi neàdehe bak Em naeda it ozoho bak.” 47 Lahame labi gagoha nam nibe aho Yesus bake aa ulaha bak lam Yesusat Ahamo ozobohudi ahate gagohemu iedi faa ab dododamam. Am faa dododume lehe labe, “Yesus abo feàte,” lahame ahu adat iedi Yesusam naba modesdam laba ahit ogomasu ab biteham. Biti gi dam labe fà aisome ahate ab fi deham. Aho Yesus bake ulaha bak, “Ana modi ulahela?” laham bak lamti aho Yesus bake ulasi taho neàdehe bak lamti fa ahate ab vameadaham. 48 Labi vameadume neàdi Yesusat nam niba ab gagoham. “Oi oho neha, ‘Yesusat eba modi fa neàdem bak,’ laham bak oho nasi tu vuzehehe labe om fa ab neàdeham bak. Làhà om fa Alati vahehemu obo bake nasi lale,” lahame ab gagoham. 49 Labi Yesus im lada lam vameadam lahasuhu di labe ame da Yairus abo Yahudi damat ihimo fi hasi meedam num laba vou aasdamda labe am dam totbaho labe doait ab leham. Labi li Yairus bake ab gagoham. “Om adnamat eloho. Ba Guru bake a gagu vou lemule. Gi feidate.” 50 Lahana Yesusat ame lab gagoho bak lam aime fa Yairus bake ab gagoham. “A àvodi vi ozodamule. Om gi ahu teudi Eba tu vuzehi faode. Om adnamat fa neàdem bak.” 51 Lahame labi gagu neàdi ozahit fa vahi ab laham. Labi le Yairus am numa fusi Yesus dam bisi dua bak numa vi tau olem bak mali gi Petrusti Yohanesti Yakobusti labi ame adnamat labe am aiti oiti labihasu ihimo ab oedaham. 52 Labi num zoho laba oli aaha dam laba esdam dam labe adnamat elohemu nimidam labe vou medao. Làhàmu Yesusat dam laba ab gagoham. “Bisi a medaomule. Um data nim elom kaio. Gi iddalo.” 53 Lahame labi gagoha ame dam labe im koei nim eloho bak ozobohu labe gi Yesus bake vi igeame ab tozodamam. 54 Lahana Yesus gi ozahit num zoho laba le koei niba anekehà vuu visoi gago, “Ednamat oa, usale.” 55 Lahame labi gagoha adnamat nim it oazi lahana fa leheilahit ab ahedi usai duzuham. Usai duzuhuzobe Yesusat dam laba ab gagoham. “Um adnamat niba na àmnavat lu àle.” 56 Lahame labi gagoha adnamat nibe am aiti oiti gi àvodi aasda. Lahana Yesusat adnamat labe am aiti oiti mali gago, “Etei modehe im nim meia a le fi demule,” lahame ab mali vi gagu esuham.

Lukas 9

1 Labi ba neo Yesusat Aho gagu olu Am im vameadume esmozi laiam dam dua belas lam gagome fa bakamta ab vaheham. Labi vahi neàdi Aho neha, “Uho im nehasu im dedamali meedam neàte. Mei ahu oli veimam setan mei setan mei laba gagu futodume ilidam bak ame. Labi meia vizi gailemna ahaladiahana ahebu laha modi fa neàdedam bak ame. Um labihasu im dedamali meedam neàte,” lahame ame dam dua belas laba modi vizi teudedume ab modi im dedamaleham. 2 Labi im dedamali neàdi Yesusat am dam dua belas laba neha, “Nasi ladale. Labi uho bak iuba la. Bak iuba la. Lahadam diat ame dam laba, ‘Uho Alat Gagu Fihasi Vimteme Oluhu Dat Boehàda laba tu vuzehem labe Alat uba deeli vame Am damali uba vuusu im vahokedam bak laba uledi meedale,’ lahame dam bake vou vameatedume fi deda. Labi dam nisileheda modi fa neàdeda. Labihasu vou modetedale,” lahame gagu ab oudaham. 3 Ahamte gagu oudalo modem di labe Yesusat im meida nim nehame ab vi vameadamam. “Uho bak iuba la bak iuba la lahadam diat um odoamsoti um nazoh dekti um na àmnati um doiti sue sona ada dusumna gi esuhuda lamti ahebu niba vaheme esmozi gi saemea ladale. 4 Labi uho num debu mei iuba le lafusidam di labe aimeam dam labe uho vou laha im lam aime uledi num deda meida labe uba nehameam, ‘Uho num ebeda niba azim neàte,’ lahameam làhà gi num obo oho azimda lamota azile. A num iudu iuba le i. Num iudu iuba le i. Labihadamule. Gi num ubu uho azimda lamota azibe neo num debu amomoi bake neo le ame baket mode. Lahadale. 5 Laham vabameam uho num debu mei iuba le lafusidam di labe aimeam dam labe uho vou laha im lamti um soti moudume im bak malemeam làhà uho ame num debu bak lam vou esmozi lale. Vou esmozi lalo modem di labe um naba bak itabe fau foamome esmozi lale. Labi dam labe vi aame nehi ozom bak. ‘Aa làhà! Iho dam labe vou lehe im aihi vabake im bak itabe fau foamohe? Labihalahit Alat iba beoe taia?’ laham bak vi ozom bak am tame,” lahame vi vameadume ab oudaham. 6 Làhàmu ame dam dua belas labe ladume le Alat Boehàdateboli dam bake vuusu im vahokedam bak lam, “Akatihasu modemna modela?” laham Im Neàna lam num debu bak iudu iuba le vou vameateda. Num debu bak iudu iuba le vou vameateda. Lahada. Labi dam gaileheda bak iuba le modi fa neàdeda. Iuba le modi fa neàdeda. Labihada. 7 Labihadam di lam ame dam dua belas labe iho meedaha im lam meit aime fa meia vamea. Meit aime fa meia vamea. Lahadume Galilea bak vuusdam Boehàda Herodes Antipas laha ab vi aiham. Aime vabi vi ozoda. Neham labe vabi ozoda. Dam totbaho labe vedi vabili nehame vameada. “Yohanes Mei Vuu Valo Baptisleiamda labe fat ahedi mode moio?” lahame vabi vameada. 8 Labi dam totbahot laha vedi vabili nehame vameada. “Dat ahamda Alat vameadaha im aime fa dam bake ahate vameaidahada Elia labe fa nom olu ame im lam meedam moio?” lahame vabi vameada. Labi dam totbahot laha vedi vabili nehame vameada. “Gi dat ahamda Alat vameadaha im aime fa dam bake ahate vameaidahada meida eloho dàt fat ahedi lehe moio?” lahame vabi vameada. Labihadam labe Herodesat laha gi ame bak labet modi ozom vabi ab azi ozodamam. 9 Labi Herodesat vabi azi ozodaha vabamu ahamo aba ab it gagoham. “Ne, Yohanes eho amu em dam gagome bio vaitoi eloho bak. Ne lahana eho aidam im lam ana Dàt meedam imot modela? Ba Yohanesat modem vabak,” lahame ahamo aba ab it gagoham. Labihàmu, “Am abo ame Da Yesus lam Am alihi aase,” lahame àhàki ab ozome izidamam. 10 Labi Yesusat Aho gagu olu Am im vameadume esmozi laiam dam dua belas labe iho iuba le mode iuba le mode labihadume neàdi fa li bakamta vahi iho bak mei bake le meedaha im lam ahebu Yesus bake ab li vameadaham. Labi im lam vameadume neàdi Yesusat ame dam lam gagome dam duada vaitoi vou esmozi ihimo num debu Betsaida laba ab vou ladamam. 11 Labiham di labe Yesus Am dam dua belasti ladume setehe bak laba dam dua totbaho labe ozobohudi ba vi vula. Ba vulaha labe vule vi aaha Yesus Am dua belasti doni bake odosdamna ab vi fuham. Làhàmu Yesusat gut aaha dam duada zi ba vulehemu, “Neàte,” lahame ab gut gagoham. Gut gagu ozoha vabamu fa neo im vameada. “Meit am faina meedam bak lam voedume fa ahu neà bak vàmadi Ala bake tu vuzehi meedameam làhà Alat ame da laba deeli vame Am damali vuusu im vahokeda tame,” laham im lam faasi vahokeda. Labi neo dam nisileheda labe, “Iba modi neàdele,” lahame gagodam dam lam Aho modi fa neàdeda. Labihasu ab meedaham. 12 Labihadume modeha ala vakidi ab disilo modemam. Làhàmu Yesus Am dua belas labe Yesus bake li ab gagoham. “Ai oa, im bak nim dam vaba alim bak modem labe ba na àmna kaio. Laham bake Ai Oho dam duada zi niba gagome fa dam si modealaha bak iuba gagome oudume iho àmna lamti iho im bak lamti fà le nabidume laba ahala izidase.” 13 Lahame labi gagoha Yesusat fa ab gagoham. “Gi na àmna ubuda dam zi laba lodume àdameta.” Lahame labi gagoha Am dam labe fa ab vi gagoham. “Aa! Im gi rotibu auohole. Labi bohe behàsu. Lamota ehete. Dam feà nim ba akati ulohole. Gi doi bak mei bake vou le na àmna ot loiame ve fa vou li dam niba lome àm bake Oho labi ozome gagoheo?” lahame vi ailo ab gagoham. 14 Ame dam zi feà lam gi dam aabota dem di abo lima ribu fuhu bak. Lahana Yesusat fa Aba vi tau meedam dam laba ab gagoham. “Uho dam zi nim gagome lima puluh iuba nusu lima puluh iuba nusu lahadale,” lahame ab gagoham. 15 Labi gagohemu Am dam nibe le gagome dam fàsi lima puluh iuba nusu lima puluh iuba nusu. Lahadume dam ahebu ab nusualadaham. 16 Labihazobe Yesusat ame rotibu auohole lamti bohe behàsu lamti vame vuusualame neàdi ohu vousai tom avaesu Am ai aabo bake, “Neàte,” lahame tom gagu neàdi ame rotibu lamti bohe lamti visoi ab fahedaham. Fahedume fa Aba vi tau meedam dam laba lodume iho fa ot vai vame dam duada zi laba lodume uloholi ab àdaham. 17 Labi ame dam zi fai labe ame na zi lam àdume modeha dam ahebu dedehemu zoho ab vahedaham. Labi Aba vi tau meedam dam labe damat lab àme dedehemu vahehena zoho lam fa vi ateti atetidume boloseh vahedume modeha boloseh dua belas ab bektoham. 18 Labi ba digat meida iube Yesus dam duada zi vaitoi vou esmozi Aba vi tau meedam damta ihimo vazisi ab laham. Labi le Yesusat neo Ahamo fota vaitesu Am Ai Ala bake tom gagoda. Labi tom gagodume neàdi fa li Aba vi tau meedam dam laba ab gagoham. “Dam duada labe, ‘Em amat modela?’ lahame vameadaha bak uho akatihasu aihela?” 19 Lahame labi gagu aiha Aba vi tau meedam dam labe fa ab vi gagoham. “Dam duada totbaho labe vedi neha, ‘Om gi Yohanes Mei Vuu Valo Baptisleiamda labe amu elohona fat ahedi mozo,’ lahame vameada. Labi dam duada totbaho labe vedi neha, ‘Om gi aham di iube Alat vameadaha im aime fa dam bake ahate vameaidahada Elia amu ahena Alat vahada fa nom iluhe moio?’ lahame vameada. Labi dam duada totbaho labe vedi neha, ‘Om gi dat ahamda Alat vameadaha im aime fa dam bake ahate vameaidahada meida amu eloho dàt fat ahedi lehe moio?’ lahame dam zi labe Oba labihasu ozome otesi otesidam bak.” 20 Lahame labi vameadume modeha Yesusat fa neo vi ailo ab gagoham. “Ne lahana um akatiha? Um, ‘Em amat modela?’ laham bak um akatihasu ozome gagodàla.” Lahahat Petrusat fa ab vi gagoham. “Aia, Om abo Alat Gagu Fihasi Vimteme Oluhu Dat Boehàda am bak.” 21 Lahame Petrusat labi gagohemu Yesusat Aba vi tau meedam dam laba ab gagoham. “Petrusat etei lab gagu tombalehe bak lam, ‘Em abo Alat Gagu Fihasi Vimteme Oluhu Dat Boehàda am tame,’ lahaha bak lam uho meia a le fi demule,” lahame ab mali gagu esuham. 22 Labi im lada lam gagu neàdi Yesusat neo ab vi gagoham. “Em Ai Alat fet gagu esuhemu Yahudi damat ibi iho tu vuzehi meedam im vuusdam tohe dam zi labe vahi Em abo Asum Ahoba Iubet Bak Niba Li Dateleheda niba mu fa Eba fai bak bohu modi geàda tame. Labi laha meia gagu Em oteme eloi fa usi behàsdi Em eloho bak labet Alat modi fa ahedi usa tame,” lahame fet ab vameadume esuham. 23 Labi ame im lam Aba vi tau meedam dam laba vameadume neàdi aaha dam duada zi lam neo lehemu Yesusat ame dam laba im ab faasi vameadamam. “Meit Ebe Eho vahokedam im ozobohudi vi tau meedalo àhàkedameam làhà ba im aba aho it ozome modelo àhàkemda lam it ozome meedam vabak. Ame da labe aho gi neham bak. ‘Eho Yesus bake tu vuzehi im Abada meedàmu damat em si ut tetehesuhunaso lam ve lu vatu vou ladam di lam damat eba aasdamnàme eho gi ozahit vou le em paku dou elom neà bak,’ lahame Eba labihasu tu vuzehi gagu vàmademda lam aho Eba tu vuzehi vi tau meedam neà bak. 24 Neham labe labiham bak. Meit aba aho Eba lab tu vuzehehe bak lam ahate gagomeam damat am otem bak labna zohàme it vou faovoi vei iedi ahit biehenali, ‘Em Yesus bake tu vuzehi Am damalem kaio,’ lahame veibadamda lam ba Alati vahi ahe neàna bohu vuusdam vabak. Lahana meit neha, ‘Em Yesus bake tu vuzehi im Aba Aho ozohoda lamota meedam labe damat em otemeam làhà gi neà bak. Em ba àvodem vabak,’ lahame aba aho elom bak laba bisi it vou faovoi meedam vabda lam Alati vahi gi ahe neàna bohu vuusdamda am am bak. 25 Iho bak niba esdam di meit nehi ozo, ‘Em gi nazoh zi nim vadume duali neàdese,’ lahame ozodamda labe aho vedi am ahu it vou faovoi Eba tu vuzehi Alati ahili ahena aabo laba vuusdam vabameam làhà aho amu modehe zoho ium gi meedume vanamai voom bak. 26 Labi meit etei nibe neha, ‘Em abo Yesus bake tu vuzehi Aho vahokedaha im aime meedamda modem kaio,’ lahame ladi vei iedi Eba momeam làhà ba diamut Em Abo Asum Ahoba Iubet Bak Niba Li Dateleheda nibe Em Aiat Am na fauha meona fako iedemna ogatei modealaha bak lam fa Eba modi vizi feà Dateli Aho Am im gagu vou usem dam zi lamti ba neo amediat bak niba nom ilu meedam di lam Em laha ame da laba neha, ‘Om Eba tu vuzehi Em damalehe vabda am tame,’ lahame mu voo tame. 27 Lo, lamota imbot. Lahana Eho etei uba neo gagolo modem im imboda nidi nim laha nasi aima. Um dam etei nib dozeadaha dam totbahota taho elom vaba ahe lahasdamna uho ba Alat Boehàdateboli dam bake vuusu im vahokedalo li duzum bak um dam zohota ame bak aa tame,” lahame ab vahokedaham. 28 Labi Yesusat Aho ame im lam dam bake vahokedume neàdi usi delapan folehena ozohomu dihasi Aho tom gagodam bak ozome Aba vi tau meedam dam Petrusti Yohanesti Yakobusti labihasu gi dam lada làtela lamota gagome sibu bake ab vou laiteham. 29 Labi vou laisi le Yesusat ab tom gagodamam. Tom gagodam di labe Am dauhati Am sueti alihi veimdi ab fauha meoleham. Abo asum boz velem bakti ulohona Am sue laba ab modesuham. 30 Labi modeha Alat vameadaha im aime fa dam bake ahate vameaidaha dam behàsu aham di iube eloi seddaha dam Musati Eliati Alat Am na fauha meona fako iedemna ogatedamna im so laba modesu iho lehe bak aaha vabna nom ilu Yesus Am obe laba vi tau duzu im vameadamna ab aaham. “Yesus Am ba kota Yerusalem laba le elo tame,” lahame Alat amu vameame esuhu im ab imbodelo modem amemu im lam ab vameadamam. 32 Labihadam di lam Petrus am dam meida behàsuti idao. Labi idaome fa keesi aaha Yesus labe Am dauha laba Alat Am na fauha meona fako iedemna modesu ogatedam bak lamti ame dam behàsu labe Yesusam obe laba tau doudam bak lamti ab aaham. 33 Labi aadameilahit ame dam behàsu lam Yesus vou esmozi lalo modemu Petrusat Yesus bake ab gagoham. “Ai Guru oa, iho etei niba li odosi umti vahehe bak abo neàte. Imo teohet mom num làtela mose. Meida Oba mo. Meida Musa bake mo. Meida Elia bake mo. Labihadase,” lahame gi ahulat ozom im ostame ab vi gagoham. 34 Lahame Petrusat gi etei labi vameadam lahasuhu di labe ulo fauha meona nom ilu dam lam ab baguamdi seteham. Labi baguamdi fi oli setehemu dam ab iedeham. 35 Labi modeha Alat Am dae ulo labe futoi gago, “Da nim Em Adat Eho amu fi hasi gagu oluhuda Am am tame. Uho Aho vameadam im mahate aime meedale,” lahame ulo labe ame dae lam ab gagoham. 36 Labi gagu neàdi ame dam làtela labe neo vi aaha uloti dam behàsu lamti seti gi Yesusat Ahamo duzuhu bak ab aaham. Lahana ame dam làtela labe iho etei aaha bak lam iho Yesus bake vi tau meedam lahasuhu di labe ame im lam ba meia gagom kai. Gi dam ihimo aame vaste. 37 Labi izi dihasi dihambe Yesus Aba vi tau meedam dam làtela lamti vahi sibu labe fa ab lezeham. Lezi aaha dam duada zi labe doait li odosdam bak ab aaham. 38 Labi dat vàmtea labe Yesus bake bisteat gut gago, “Guru oa, em daboseà nim Oho li aame modi fa neàdele. Em gi data vàmtea faaha dàt moz. 39 Lahana em data nim mei ahu oli veimam setan labe aba li si modi aheleidume dam aim biem dae geme vou esmozi laida. Labi laha aba modi tufa tufame kehanabu vaoda. Lahana ame setan lam em data nim gi odohalehebeat isi esmozi lalo modem labe gi beome nisili vou esmozi laida. 40 Labi modidàmu eho Oba vi tau meedam dam totbaho niba tauledume gago, ‘Uho ame setan laba gagu futoi itale,’ lahame gagoha dam labe modesome modeha modem bi moho,” lahame Yesus bake ab gut vameadaham. 41 Gut vameadume modeha Yesusat fa ame lab odosdam dam zi laba ab gagoham. “Em abo uba tau azibehamdehena um eteida nim akati Eba mahate tu vuzehem vaba modela? Akati Alat Aba Aho ozoho baket uho modehe vaba akati bisi odohabuli git meedam bak bohu vuusdàla? Eho uba vuusdam di adi bake fusi um mu voe? Uho Eba tu vuzehem bak Eho ba gi labihasu vou faodà?” lahame gagu neàdi fa ame da niba ab gagoham. “Om daboseà nasi ve vou lele.” 42 Lahame labi gagohemu da nibe le ame daboseà ve vou ledameam ame setan labe daboseà lam belu bake biti modi tufa tufada. Lahana Yesusat ame setan laba, “Futoi daboseà nim vou esmozi itale,” lahame mali gagoha ame setan labe futoi daboseà lam vou esmozi ab itaham. Labi modeha daboseà lam fa ab neàdeham. Labi fa neàdi am ai bake ab loham. 43 Labi modeha dam duada zi lab dozeadume aasdamna modehe labe Alat im feàna modehe bak lam ab aame àvodeham. Labi dam duada zi labe Yesusat etei lab meedaha im lamti amu meedahada iumti ahebu labihasu àvodi meedam di labe Aho fa Aba vi tau meedam dam bake aa ab vameadamam. 44 “Eho etei uba gagolo modem im nidi nim um mahate dogoi balesu aile. Em Abo Asum Ahoba Iubet Bak Niba Li Dateleheda nim meit Em vou fohome meia ub lu ote tame.” 45 Lahame labi vameadume modeha Aba vi tau meedam dam nibe ozo, “Yesusat akati modemna gagohela?” laham bak ozom bi vi ozoda. Lab ozom biehe bak lam Alat ahit vaste. Labiha labe dam labe Yesus bake, “Akatihasu modemna gagohela?” laham bak fa vi gagu aim iedi moh. 46 Labi ba digat meida iube Yesus Aba vi tau meedam dam labe ihimo otesi otesida. “Uho ozom, ba diamut im dua belas nim Yesusat da adidate gagu modi ee feàda talu Aba tau dam vuusu im vahokedàla?” lahame ab otesi otesidamam. 47 Lahana dam labe im ahulat ozodam bak lam Yesusat Ahamo ozobohudi data koena laba gagome li Aho Am anekehàt vuu Aba Aho balesdam tot niba ab vou li duzuham. 48 Labi vou li duzu neàdi ame dam laba ab faasi vameadamam. “Uho meidavat nehi ozo, ‘Em bisi feàda modem kaio,’ lahame ozome fa meit aba im gagomda laba uledi meedameam làhà ame da lam bisi feàda am bak. Labiham labe meit Eba tu vuzehi meedàmu fa damat neha, ‘Feà vab dàt moz,’ lahame gagomda lam abo data koena nimti ulohoda lam meit ame da lam ule neàt gut vamda lam Alat ozom di ame da lam gi Eba laha ahu ule neàt ab vaham bak. Labi Eba ahu ule neàt vamda lam gi Emota ule neàt vaha vabak. Abo Eba Gagu Oluhuda lam abo Em Ai bake laha ahu ule neàt vaha bak,” lahame Yesusat ab vameadaham. 49 Lahame labi vameadume modeha Yohanesat Yesus bake ab vi gagoham. “Ai oa, iho amu iuba le aaha da meida labe Om ee gagodume mei ahu oli veimaha setan laba gagu futoi itaha bak im aaho. Lahana ame da lam imti vahi Oba vi tau meedam vab dàt labi modehemu iho malesome modeha vaba moho.” 50 Lahame gagoha Yesusat fa gago, “Mm, vabà! Meit labihameam uho a malemule. Meit imti ot odosiam vabda lam iba taumda am bak,” lahame ab gagoham. 51 Labi Yesus Alat vuu vousai asum ahoba iuba tom ilum digat fuseo vabalehemu kota Yerusalem lalo ahu ab vàmadi vitasuham. 52 Labi lalo modem di labe Yesusat dam totbaho gagome nasi olu. “Bak iuba le na teohe labe àme imna modeme vahele,” lahame gagu nasi ab oluham. Labi dam labe le Samaria dam num debu laba fusi ame na modesome modeha Samaria dam Yesus lem bak male. Yesus Yahudi dàt modem labe kota Yerusalem laba lalo ahu vitasuhu labe Samaria dam bak ibida Yesusat lem bak male. 54 Labihàmu dam lam Yesus bake fa li Samaria dam labe ibi bak malehe im lam ab vameadaham. Vameadume modeha Aba vi tau meedam dam meida behàsu Yakobusti Yohanesti meoli Yesus bake ab gagoham. “Dat Boehàda oa, Om iho neham neào? Iho asum ahoba iuba ootedume vua modi nom ilu dam lam beom neào?” 55 Lahame gagoha Yesusat fa vaktesi dam behàsu niba mali gago, “A labihamule,” lahame mali ab gagoham. 56 Labi gagu neàdi Yesus Aba vi tau meedam damti fa vahi dam num debu meidate ab laham. 57 Yesus Aba vi tau meedam damti kota Yerusalem bake ladam digat meida labe ladameam dat vàmtea doni labe Aba tàhi ab gagoham. “Em, ‘Oho adi bake lào? Adi bake lào?’ laham di vi tau godalo mozo.” 58 Lahahat Yesusat ozo, “Da lam imboo?” laham bak ailo fa ab vi gagoham. “Nohubake azim vemta ibi iho im bak ehete. Labi bume laha ibi iho im ila ehete. Lahana Em Abo Asum Ahoba Iubet Bak Niba Li Dateleheda nim bitesu im bak kaio,” lahame ab gagoham. 59 Labi dat meida labe Aba neo gut tàhi ab gagoham. “Om Eba vi tau godamda modele,” lahame gagoha da labet fa Yesus bake vi gago, “Ai oa, faode. Em nasi em bake fa le em ai faina eloi baumsuhuzobe Oba ba vi tau meedase.” 60 Lahahat Yesusat fa ab gagoham. “Vabo. Lada gi labihasu feidate. Dam Eba tu vuzehi meedaha vab damat abo Alati vaitesuhu damat fà baumsuse. Oho gi, ‘Em abo Alat Gagu Fihasi Vimteme Oluhu Dat Boehàda niba damat tu vuzehem labe Alat ame dam laba deeli vame Am damali vuusu im vahokedam bak am tame,’ laham im lam bak mei bak iumti bak mei bak iumti le vou vameatedume fi dedale,” lahame ab gagoham. 61 Labi neo ladameam dat amomoi labe Yesus bake neo tàhi ab gut gagoham. “Ai oa, em Oba tau Obo Oho vahokedam im ozobohudelo meedam datelelo mozo. Lahana em ebe mei dam bake nasi le, ‘Em Yesus bake tau lalo mozo,’ laham bak lam le gagu neàdi Oba ba taulo modem bak.” 62 Lahame labi gagoha Yesusat fa da laba ab vi gagoham. “Meit Ebe Eho vameadam im laba tu vuzehehena vedi fa aba aho vou esmoho dam nazohti it ozodameam làhà ba Alat dam bake deeli vame Am damali vuusu im vahokedam bak lam, ‘Akatihasu modemna modela?’ laham Im Neàna lam ba bak mei bak iumti bak mei bak iumti le vou vameatedume fi dedam di ba uloho vabak,” lahame ab gagoham.

Lukas 10

1 Labi Yesus labe Aho ba neo Aba vi tau meedam dam dua totbaho voou gi dam tujuh puluh lamota gagome ab li dozeadaham. Labi dozeadume neàdi Aho ba vulalo modem bak ahebu ozome ame dam tujuh puluh lam faheme dam meida behàsu gagu num debu meida iuba nasi olu. Labi neo dam meida behàsu gagu neo num debu meida iuba neo olu. Labihada. 2 Labi ame dam lam lalo modem di labe Aho im nehasu ab vi vameadamam. “Gandum dua bak amdi bozileho. Lahana ame gandum nim modeme vahedam dam koete. Labihàmu uho Utoho deda laba abo Em Ai Ala bake nasi nehi tom gagodale, ‘Ai oa, Oho fa dam na modeme vahem dam totbaho laha gagodume Om utoho laba oudume Om gandum fi kbodume vahedase. Abo dam Oba tuhuda amomoi laha gagome fa dam Oba tuhu vab dam labe iho bak amomoi azihi bak iuba gagu oluidume Om Adat meedaha Im Neàna lam vou vameatedume uloholele,’ lahame mahate dihasi tom gagoda. Labi neo dihasi tom gagoda. Labihadale. 3 Um nasi lam neàde. Lahana uho mahate ozodale. Eho etei uba gagu olulo modem di nim um gi domba adatea nembedati ulohona fa dam abo serigala meo feà bakti ulohona laba olulo modem bak. 4 Uho lalo modem di um doi dek lamti na dek lamti um sepatu naba dusumna meida behàsu lamti labihasu niba vou esmozi lale. Labi uho Em im vou lam dam labe doni bak laba labe dam alihi aameam làhà ame bak laba bisi a labe duzu im vameadume kehàmule. Gi taho Em im vou vameatedale. 5 Labi uho damat esuhu bak fusi dam num bake olelo modem di labe im nehasu num deda laba gagodale. ‘Neàte. Im Boehàda Alat Ahamo uba neà bak modi esuse,’ lahame gagu olele. 6 Labi gagu aameam ame num deda labe neha, ‘Lo, neàte,’ lahame ame lab gagoho bak lam uledi gagomeam làhà ame lab gagoho bak lam imbodi Alat ame dam laba gi neà bak modi esuiam bak. Lahana labiham vabameam ame num deda labe im num mali ame lab gagoho bak lam momeam làhà Alat ame dam laba neà bak modi esuiam vabak. Gi fa oba na gagohodate modi esum bak. 7 Labi laha meit uba nehameam, ‘Num ebeda nim uho azim neàte,’ lahame labi gagomda lamota laba azibe neàdi fa neo num debu amomoi neo la. Lahadale. Bisi a num iudu iuba le azibe i. Num iudu iuba le azibe i. Lahadamule. Labi laha ame num deda labe uba na àmnati vaoti lodam di ame na lam uho gi vadale. Meit mei na meedamda laba ame na modem bak gohali na lodam neà bak. Ame na uba lodamna lam uho le meedam im labet gohali lomna am bak. 8 Labihahemu uho num debu bak iuba le lafusi ame num debu laba azim dam labe uba nehameam, ‘Lo, ibi bak niba uho azim neàte,’ lahame uledi gagomeam làhà ame dam labe na iho àmna uba lodam di um ame na vam di a odohalehebeat vamule. Gi labihasu ule neàt vame àdale. 9 Labi laha ame num debu laba esuhu dam gailemeam làhà uho ame dam laba modi fa neàdedale. Labi laha uho ame dam laba le nehame vameadume fi dedale. ‘Alat Aba Aho Gagu Fihasi Vimteme Oluhu Dat Boehàda lam etei bak niba lehemu Aho dam bake deeli vame Am damali Ahamo Boehàdateli dam bake vuusu im vahokedam bak lam etei ab faasi gàhàli meedamam bak. Uho nasi ame Da laba tu vuzehi Alam damalele,’ lahame vameadume fi dedale. Ame num debu laba vahi azim dam labe uba uledemeam làhà labihasu uho ame num debu laba meedale. 10 Laham vabameam uho num debu bak iuba le lafusi aimeam ame num debu laba azim dam labe uba nehameam, ‘Bak ibida nim uho azim maleho,’ lahame labi mali uho vou laha im lamti aim moudume im bak malemeam làhà uho ame num debu lam vou esmozi lale. Vou esmozi lalo modem di labe ame num debu labe am bak tomba laba dam ahebu aam neà bak laba le ame dam laba nehame fet vouhodume gagodale. ‘Làhà um labi modehemu um bak itabe fau nim im naba zitbotoho bak nim iho abobo foamodaha bak. Uho nehame vi aame ozom bake labihaha bak. “Ee làhà! Iho dam labe ibi iho vahokedaha im lam iho ailahigeàmohemu, ‘Alat iba fà beose,’ laham bake im bak itabe fau foamohe?” lahame ozobohudem bake iho ahit um bak itabe fau foamodaha bak,’ lahame gagole. Labi laha uho ame dam laba neo nehame it vameame esmole. ‘Lahana uho im lada lamota a vi ozodamule. Im nidi nim laha vi ozobohudele. Alat Aba Aho Gagu Fihasi Vimteme Oluhu Dat Boehàda lam etei bak niba lehemu Aho dam bake deeli vame Am damali Ahamo Boehàdateboli dam bake vuusu im vahokedam bak lam etei ab faasi gàhàli meedamam bak,’ laham im lam uho laha ame num debu bak lam vou esmozi lalo modem di labe ame dam laba labihasu it vameadume esmozi lale. 12 Im Ebeda nim uho laha mahate vi aimale. Alat ba diamut Aho Dam Bake Uloodume Vi Aime Ozobohudi Neàdi Fime Fahedam Digat fum di lam ubu uho vou lehe im lamti umti ule neàt vaha vab dam lam beodam di abo duana beoda tame. Lahana dam ahamda num debu Sodom laba azihi dam lada labe bisi faina meedaha bakta imbot. Lahana eho etei uba gagu olu ubu uho lab vou le meedaha bak lam aaha vab labe Alat ba beom di mahate duana beodam kaio. Gi fota beodalo modem bak,” lahame ab vameadaham. 13 Labi im lada lam vameadume modeha Yesusat Am im moho dam debu laba Alat ba fai bak tadem bak laba vi ozome ahu faidi neo vi vameada. “Aiee! Num debu Korazim lamti num debu Betsaida lamti laham bak behàsu laba esuhu Yahudi dam oa, Alat uba ba diamut beodam bake nasi fet àvodi it ozodale. Nehaha bak. Eho etei ubu uho azihi num debu behàsu laba laha di lam na damat ihimo modem biem im feàna meedaha di lam uho aahanàme vedi Eba tuhu vaba aalahigeàmu mouda. Lahana uho nasi Em ehe vab di iube abo Yahudi damat modem vab dam Tirus num debu lamti num debu Sidon lamti azihi dam labe iho aham di iube nehi meedaha im laba vi ozodale. Ame dam debu behàsu labe iho bisi faina meedàmu Alat gi amu aham di iube dam laba faki beodume ab vàhàdeme seddaham bak. Lahana Eho etei uba lab le meedaha im feàna lam fa ame dam ahamda debu behàsu laba amu le meedameam làhà ame dam labe gi amu di iube Eba tu vuzehi iho faina meedam bak lam voedume fa ahu neà bak vàmadi meedam bak. Labi neo ame bak lam dam giida labe fet aame ozo, ‘Làhà dam lam ibi iho faina meedam bak lam voedume fa ahu neà bak vàmadi meedà?’ laham bak aame ozobohudem bake ame dam labe laha gi amu di iube sue taubuna dusu. Fa ohu fau visoi im ohu laba nom gulada. Labihadam labe Alat ba beoho vaba gi labihasu vekem bak. 14 Lahana um num debu Korazim laba esuhu dam lamti num debu Betsaida laba esuhu dam lamti ubu uho faina meedam bak lam fa voou ahu vei neàdehe vab labe Alat ba diamut Dam Bake Uloodume Aime Ozobohudi Neàdi Fime Fahedam Digat fum di labe uba beodam di bisi geàdam dam um am bak. Lahana num debu Tirus laba esuhu dam lamti num debu Sidon laba esuhu dam lamti ba Alat beodam di ame dam lam mahate geàdam vaba gi fota geàdam bak. Neham labe labihadam bak. Eho na damat ihimo modem biem im feàna lam dam labe aaha vab labe gi fota beodam bak. 15 Aiee! Um num debu Kapernaum azihi dam oa, uho vedi nehi vi ozodam damat modem bak. ‘Yesus bak ibida niba li na damat ihimo modem biem im feàna duana meedaha labe im abo bisi feàda im am bak. Damat iba aame im ee vousai vou baedam bak,’ lahame vi ozodam damat modem bak. Lahana um git ozoho bak. Ba labiham vabak. Eho amu bak ubuda laba le ame im feàna duana lab meedaha bak lam uho aahana ba Eba tu vuzehe vaba aalahigeàmu moudahemu ba diamut Alat um gi koei it oazehena le esdam bak laba vou nom ilu beodume sedda tame,” lahame Yesusat ab vameadaham. 16 Labi ame im lam vi vameadume neàdi Aba vi tau meedam dam laba neo vi vameada, “Meit uho vou le vameadam im lam aime uledi meedamda lam Alat ozom di ame da lam gi Ebe Eho vameadam im lamti aime uledi meedam bak. Laham vaba meit uho vou le vameadam im lam aime uledi meedaha vaba momda lam Alat ozom di ame da lam gi Emti Ebe Eho vameadam im lamti aime uledi meedam vaba moudam bak. Labi ame da labe Emti Ebe Eho vameadam im lamti aime uledi meedaha vaba momda lam Alat ozom di ame da lam gi Eba gagu bak niba oluhuda abo Em Ai Ala labe Aho vameadam im lamti laha aime meedam vaba momda am bak,” lahame vi vameadume neàdi ame dam tujuh puluh lam ab oudaham. 17 Labi ame dam tujuh puluh lam faheme Yesusat Aho vameadume oluhu im lam bak mei bake le meedume neàdi Yesus bake fa deelehat ab fet lei fet leidamam. Labi fet lei fet leidume Yesus bake lefusi àvodehat vameada. “Boehàda oa, Oho iba vameadume oluhu im lam iho le meedaha bak. Labi ame di labe iho laha gi Om ee gagodume mei ahu oli veimaha setan lam, ‘Taho futoi itale,’ lahame gagodam di ame setan labe aime udovai futodume ilidam meo bak.” 18 Lahame labi gagoha Yesusat fa ab vi gagoham. “Lo, uho ame setan zi laba gagu futodume ilidaha di labe Em ahulat ahamo vi ozoha, ame setan zi labe im boehàda Iblis lam aho asum ahoba iube bake bitehe bak Eho aaho. Gi asum boz velem bakti ulohona taho bitehena Em aaha bak. 19 Uho ame lab meedaha bak lam Eho naedat uba modi vizi teudehe labe uho ame bak lam ab meedaham bak. Labi laha uho ba ozbaso modeo, ut sokba bake azim moliba modeo, uho vabi naot duzum di ba uba veem vabak. Labi ame bak lam Eho uba modi vizi teudehe labe ba Iblisit aho, ‘Um bedese,’ lahame umti ot odosiam bohu modesdam lahasuhu bak lam um teudehe labe ba bedem vabak. Uho teudi Iblis fa bedem bak. Labiham bake ame na ahebu uba vabidam di gi nembena tadem bak. 20 Ne lahana um bisi ame setan labe uho lab gagodam bak laba aime udovai futodume ilidam bak laba bisi a deelemule. Uho gi nehame deelele. Ala bake tu vuzehe labe amedamali fa Alat Am bak neàna asum ahoba iuba tau azim bak laba vi ozodume deelele,” lahame ab vameadaham. 21 Labi Yesusat ame dam tujuh puluh laba im lab vameadaha di labe Alam Aha Nutabe Neànat Yesus bake modi vizi teudehe labe Yesusat ab deeli vàhàdeham. Deeli vàhàdi meedam di labe Aho Am Ai Ala bake ab tom vou baedamam. “Ai oa, Om abo neàte. Asum ahoba iumti fa bak nimti Om na debu modi vuusuhuda Boehàda Om am tame. Nehaha bak. Obo Oho dam bakdate deeli vame fa Om damali vuusu im vahokedam bak lam damat neha, ‘Im bisi sekolah vahokedam bak bohu vuusdam labe bisi ozobohu dam im am bak,’ lahame ihimo ozome it daetbadam dam laba Oho ahit modi vasteho. Lahana ame bak lam Oho fa dam sekolah vahokehe vaba im biehebu dam abo bisi feà vab dam laba Oho ahit ame dam laba modi im ozobohudi fi gatei meedam bak. Ai oa, Oho lab meedaha bak lam Oho amu fet ozo, ‘Eho labi modelo àhàkehe bak,’ lahame labi fet ozoho labe Obo Oho modelo modemna lam Oho ab modi imbodeham bak. Labiha labe Eho, ‘Om abo neàte,’ lahame vou baedaho,” lahame ab tom vou baedaham. 22 Yesusat Aho labihasu Ala bake tom vou baedume neàdi fa ame dam giida zi laba neo vi vameada. “Em Ai aabot Aho modem im lam ahebu Aho Eba neha, ‘Oho fa im dedateli meedale,’ lahame Eba modi vizehe labe Eho fa im dedateli ab vuusdamam bak. Labiha labe Alam Adat nim, ‘Amat modela?’ laham bak lam dam giida ahebu biem bak. Gi Aiat Ahamo bisi ozobohudehe bak. Labi laha ame Adat labe am Ai lam, ‘Amat modela?’ laham bak lam dam giida ahebu biem bak. Gi Am Adat labe Ahamo bisi ozobohudehe bak. Labi laha ame Adat labe Aho fi me ve Am Aiat modem im modi fi gatehe dam lamota Am Ai laha ozobohu bak,” lahame ame dam zi laba ab vameadaham. 23 Labi ame dam duada zi laba im lam vameadume neàdi Yesusat fa neo Aba vi tau meedam dam lamota avaesu aa vameada. “Eho meedam im nim um abo ahate aadahemu umota gi deelehe bohu vuusdam damat modem bak. 24 Lahana im imbona nidi nim nasi ozomale. Eho bak niba li im meedaha vab diat dam ahamda Alat vameadaha im aime fa dam bake ahate vameaidaha dam zi lamti boehàda ahamda zi lamti labihasu ubu uho etei um fakot aadam bak nim ame dam zi labe iho aalo àhàki vou faodaha vabamu gi aham di iube elodume seddaha bak. Labi ubu uho etei dogoit aidam im nim ame dam zi labe laha ailo àhàki vou faodaha vabamu gi aham di iube elodume seddaha bak. Ame dam labe lab vou faodaha di lam Alat ame im lam taho modi fi gatehe vab labe gi aham di iube elodume seddaha bak,” lahame Yesusat ab vameadaham. 25 Labi digat meida iube dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru meida labe aho ozo, “Yesus bake modi ozose,” lahame aho ozobohuna ahit vabilehenali fi bovai Yesus bake vi ailo ab gagoham. “Guru oa, eho ana im meedam labet Alat eba modi Amti vahi gi ahe neàna bohu vuusdàla?” 26 Lahahat Yesusat fa gago, “Alat aham di iube Yahudi dam bake, ‘Nehame meedale. Nehame a meedamule,’ laham Im Feàna zi lam im tai ahamda Musat akatihasu toedume fi hasi esuhela? Labi ame toedume fi hasi esuhu im zi lam oho aam di om akatihasu ozohela?” 27 Lahame labi gagoha ame da labe fa ab vi gagoham. “Dat ahamda Musat aho nehi toedume fi hasi esuhu bak ‘Im dam ahebu meit am ahu vàmadi Ala bake deeli gi labaha bohu vuusda. Labi meit laha gi ame baket mode. Labihadale.’ Labi im meida neha, ‘Uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.’ Lahame toedume fi hasi esuhu bak.” 28 Lahame labi gagohemu Yesusat fa neo ab gagoham. “Lo, oho lab gagoho bak lam imbo bak. Oho ame baket modele. Oho ame baket modemeam làhà om ba gi Alati vahi ahe neàna bohu vuusdam bak.” 29 Ne lahana ame da lam gi dam abada lamota deelem bak laba vi ozome aho vedi Yesusat aba taumda am tibame ahit biehenali fa Yesus bake neo gago, “Ne, dam amomoi eho deelemda ana dama eho vi ozome deelela?” 30 Lahame labi gagohemu Yesusat, “Meit ana dama deelela?” laham bak ame da laba vahokelo im totobe nidi nim nehame ab faasi fi koadamam. “Yahudit modemda meida nibe kota Yerusalem labe Yeriko bake lazeda. Lazedameam dam aa li ausume laiam dam labe zila audume da niba ahile dou ab nohisi beoham. Ototo beluidume biti afoezobe am nazoh vi gelevai italo aahat dat gi tohasidamna it aame esmozi ab itaham. 31 Labiham di labe damat Ala bake lomna ve vua vahudam toheda abo Yahudit modemda meida labe ba ame da labe lehe zie labe ba neo gi ostame vuledam dàt bak bohulat vi aaha dat gi laba bisda. Làhàmu gi aalahigeàmu fa zie biou zie totbaho iubet ab labohoti laham. 32 Labi ba neo Fihasi Ala Bake Vou Baedam Num Vàmteabu laba vou aasumda labe Yahudi da abo Lewit vou faat leheda meida labe laha neo gi ostame vuledam dàt li netàdi aaha dàt bisdam bak aahemu gi labe aalahigeàmu fa zie biou zie totbaho iubet labohoti aba aho lalo ladam bak laba ab laham. 33 Labi ba neo Samaria bak azimda Yahudi damti ot fakiamda meida labe bak mei bake lalo ladam dàt neo ledameam aaha dàt bisdam bak aahemu ab aame faobekeham. 34 Faobekesi am anggur oo vaksa falailemna lam visoi damat beome foozehe bak laba veosi kikeda. Labi neo na ut oo nubehelemna nutabena lam neo visoi veosi noida. Labihada. Labihadume neàdi sue zohot ab giaham. Giame neàdi afoezobe si visoi vou le am keledai aho nusu vou godamna fi ho laba ousu ab vou laham. Vou laha labe le teohet tau im num laba oli ousu neo vabieda. 35 Labi izi dihasi am doi oona perak behàsu vatoi da num dedate lu gago, ‘Da nim oho vou azi iademe vabiedale. Em da nim oba ousu esmom bake em doi etei oba lohona nim oho na vame lome àme folemeam làhà doi oboda laha tau na vam neàte. Labi em bak iuba le azibe fa lehezobe doi oho esuhuda lam eho fa ame baleà vouho tame.’ ” 36 Lahame Yesusat ame im totobe lada lam fi koadume neàdi ame dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru niba fa vi ailo ab gagoham. “Naat aa li ausume beome biti vou esmohoda lam oho ozom, Eho etei lab vouhome vameadaha dam làtela lam dat adidat am datelehela?” 37 Lahame labi gagoha ame da labe fa ab vi gagoham. “Dat na aame faobekesi ve vabieheda lam am dateleheda am taia?” Lahahat Yesusat fa ab vi gagoham. “Lo, imbot. Làhà oho nasi fa le dat meia faobekesi vabieheda lamti uloholi ame baket meedale,” lahame Yesusat ab vi gagu oluham. 38 Labi Yesus Aba vi tau meedam damti, “Iho kota Yerusalem lase,” lahame ladume num debu amomoi bake lafu. Laba le lafuha laba azim nam Martat abo num deda labe aho Yesus bake ab gut gagoham. “Em num niba oho im neàte,” lahame ab gut gagoham. 39 Martam vahada ee gagom Maria am. Yesusat ame lahi behàsu labe im num laba oli aidam di labe Maria gi Yesusam obe netàdi nusu Aho vahokedam im dogoit vi aida. 40 Lahana Marta gi Yesusti vahi àmna ohudalo modem namet abo na iudu ium mode. Na iudu ium mode. Labihadam namet moz. Labihadam namet Yesus bake li gago, “Boehàda oa, em na ehemo meedam vanamam bak akati em vahada Oho gagome eba tau na meedam vaba mode? Oho gagome eba tau na meedale.” 41 Lahame gagoha Boehàda Yesusat fa Marta bake ab gagoham. “Marta om ade? Om abo na duana meedam bakta vi ozodam namet moz. 42 Oho labi ozome meedam bak lam feidate. Lahana im bisi imboda neam bak. Mariata abo neà bak ozome meedam bak. Aho ozome meedam bak lam ba meit gagome faatom vabak,” lahame ab gagoham.

Lukas 11

1 Labi ba digat meida iube Yesusat bak mei bake neo le Ala bake tom gagoda. Tom gagodume neàdi modeha Aba vi tau meedam dam meida labe Yesus bake ab li gagoham. “Dat Boehàda oa, iho tom gagom di, ‘Akatihasu tom gagoela?’ laham bak lam Oho iba vahokedale. Amu Yohanesat aba vi tau meedam dam laba tom gagom di, ‘Akatihasu tom gagoela?’ laham bak Yohanesat vahokehemu Oho laha iba vahokedale,” lahame ab gagoham. 2 Lahame labi gagohemu Yesusat fa gago, “Làhà uho Ala bake tom gagodalo modem di gi nehi tom gagodale. ‘Ai oa, Im dam bakda ahebu ee Oboda vousai, “Om abo feàte,” lahame tom vou baedase. Om fa Boehàdateboli iba dam bakdate deeli vame fa Om damali Oho Iba vuusu im vahokedam bak lam nasi faasi meedale. 3 Labi im idoalem bake àmna iba dihasi lu àme neàde. Labi neo dihasi vi lu àme neàde. Labihadale. 4 Labi meit iba fai bak meedam bak lam iho gi ozahigeàmu fa vei neàdedam bak lamti ulohona Oho laha iba iho faina meedam bak lam gi ozahigeàmu fa vei neàdedale. Labi naat iba, “Iho fai bak modem uledeo?” laham bak im ahu modi ozolo vabidam di iho bedi uledem vabak laba Oho modi esule.’ Uho tom gagom di labihasu tom gagodale,” lahame Yesusat ab vahokeham. 5 Labi im lada lam vahokedume neàdi Yesusat neo Aba vi tau meedam dam laba im totobe nidi nim neo nehame vi fi koada. “Uho meidavat usi neisoali oho omti vou alemda labe am num laba le nehi gagomeam, ‘Ba oa, em dat meida nim bak mei bake lalo modem dàt idoalehena etei em numa li fuho. Lahana em na àmna foli oba na gagu valo leho,’ lahameam omti vou alemda labe oba neha, ‘Eba a vabimule. Em num doo baguamdi teudi em datati vahi beilame idaom bak. Em usai oba na lom bieho,’ lahame oba fa labi gagom meo? Vabà! Omti vou alemda labe ba oba labi gagom vabak. 8 Eho ozoha, omti vou alemda labe aho uledi usai na ve oba lom bak lam gi neham bak. Ba gi vou alehe bak labet uledi usai oba na ve lom vabak. Damat aba, ‘Na faobu dàt moz,’ lahame aba feàtàme aho lademna zohàme aho uledi usai obo oho gagohona ahebu ve lodam bak. 9 Labihàmu Em oba gi nehi gagolo modem bak. Meit Ala bake neha, ‘Im na nim vabalehe bak Oho iba na lodam neào?’ lahame Ala bake keàtet tom gagoidamda lam ame na vamda am bak. Labihàmu uho ozome valo modemna lam ehelemeam làhà, ‘Eba vàle,’ lahame Ala bake mahate tom gagoidale. Labiham labe ame na lam Alat uba lodam bak. Labi laha uho na meida, ‘Akatihasu modi vàla?’ laham bak Ala bake keàtet tom gagoidamda lam Alat ame da laba modi ame na vamda am bak. Labihàmu na meida, ‘Akatihasu modi vàla?’ laham bak lam uho Ala bake mahate tom gagoidale. Labiham labe ame na lam Aho uba modi uho ame na vam bak. Labi laha meit Ala bake neha, ‘Em na nim modem bak ozome Oba ailo leho. Om eba taum neào?’ lahame bisi tom gagoidamda lam Alat uledi taumda am bak. Labihàmu uho meit neha, ‘Em na nim modem bak ozome Oba ailo leho. Om eba taum neào?’ laham bak lam laha Ala bake mahate tom gagoidale. Labiham labe Alat uledi fa uba taum bak. 11 Um adam eheda um adat uba li nehame gagomeam, ‘Aia, eba bohe vàle,’ lahame gagomeam uho fa ostam mum ve lom meo? Vabà! Um ba labiham vabak. Gi ame bohe lam ve lom bak. 12 Laham vaba uba li nehame gagomeam, ‘Aia, eba oo vàle,’ lahame gagomeam uho fa ut sokba bake azim moliba lam ve lom meo? Vabà! Um ba labiham vabak. Gi ame oo lam ve lom bak. 13 Um bisi fai bak meedamnàme na neàna vame um data bake lodam bak lam uhumo ozobohudi meedam meo damat modem bak. Im labihadam damat modem labe im Ai asum ahoba iuba azimda abo bisi neàboda labe iho meit Aba nehi gagomeam, ‘Ai oa, Om eba ame na lam lom neào?’ lahame gagu aimeam Ai labe uledi na neàna ame da laba lodam bak. Abo meit Aba nehi gagomeam, ‘Ai Ala oa, Om Aha Nutabe Neàna eba modi vizi teudele,’ lahame gagom di Ai labe Am Aha Nutabe Neàna lam ame da laba modi vizi teudem meo bak,” lahame ab vahokedaham. 14 Labi ba di iube mei ahu oli veimai dae vabalem setan labe dat niba oli veimahemu Yesusat gagu futolo ooteda. Labi ootedume modeha ame setan labe futoi da nim vou esmozi ab itaham. Futoi itame modeha da nibe fa dae ab faaham. Dae faasi im vameadume modeha dam duada zi labe vi aame ab àvodeham. 15 Lahana dam na aahada totbaho labe vedi nehi gagoda. “Yesus gi mei ahu oli veimam setan zi labe im boehàda Beelzebul labe fa Aba modi vizi teudehe labe Aho mei ahu oli veimaha setan mei setan mei laba gagu futodume ilidam bak,” lahame ihimo ab ot gagoidamam. 16 Lab ot gagoidam labe vedi Yesus bake modi ozolo neha, “Imo Da laba, ‘ “Om Alat Gagu Fihasi Vimteme Oluhu Dat Boehàda ameo?” laham bak lam im biem bake na damat ihimo modem biem im feàna Oho nasi fet vouhodamale. Labi im aame ozobohudese,’ laham bak gagu aise,” lahame ihimo ab ot gagoidamam. 17 Lahana ame dam labe im ahu ad labe ozodam bak lam Yesus Ahamo ozobohudi dam laba im ab faasi vahokedamam. “Eho etei uba vouhome vameadalo modem im nidi nim uho nasi aime neàdi ubu uho etei lab gagoho bak lam, ‘Imbo? Imbo vabao?’ laham bak nasi it ozodale. Bak amomoi vuusdam boehàda am damti ihimo fàsi ot beluidameam làhà ame dam lam gi ahebu foli seddam bak. Labi bak amomoi vuusdam boehàda am damti neo labihameam làhà gi ab vàhàdeme setemam bak. Labi laha dat am lahi datati ihimo ot fakiame ot beluidameam làhà ame dam gi vabali setem bak. 18 Labihàmu uho Eba neha, ‘Beelzebulat Eba modi vizi Eho mei ahu oli veimaha setan mei setan mei laba gagu futodume ilidala,’ lahame Eba labi vàlu gagohemu Eho uba gi fa nehi gagom bak. Um git gagoho bak. Ame setan zi laba vuusdam boehàda Beelzebul labe aho Eba tau aba aho vuusdam setan zi lam gagu futodume ilidameam làhà gi Beelzebul fa am damti ot beluiame foli seddamna ozomom bak. Labihameam ame debu lam ba akati teudi duzue? Gi vàhàdeme seddamna ozomom bak. 19 Labihàmu uho etei Eba lab gagoho bak lam, ‘Mei ahu oli veimaha setan mei setan mei zi lam Eho gagu futodume ilidam di Beelzebulat Eba tau modi ilidala,’ lahame uho Eba labihasu vàlu gagom labe um gi uba it vàlu gagodam damat modem bak. Neham bak. Um Farisi dam totbaho laha mei ahu oli veimaha setan gagu futodume ilidam meo damat modem bak. Làhà uho Eba neha, ‘Beelzebulat Eba tau meedaha,’ lahame Eba vàlu gagomeam làhà um gi um Farisi dam zohoti vàlu gagoda taia? Labihàmu um dam zoho labe fa uba faki nehi gagom bak. ‘Uho Yesus bake git vàluho. Beelzebul iba tau setan gagu futodume ilidam vabna akati uho neha, “Beelzebul Yesus bake tau ame setan gagu futodume ilidala,” lahame labi gagodàla,’ lahame um Farisi dam zoho labe fa uba labi vàlu gagom bak. 20 Lahana Beelzebul ba Emti ahili meedam vabak. Gi Alat Am feà bak labet Eba modi vizi teudi Eho ame setan gagu futodume ilidam bak. Ne, um gi neham bak ozome tu vuzehem vaba? Em abo Alat Aho Gagu Fihasi Vimteme Oluhu Dat Boehàda Em am bak. Alat Eba gagu nom oluhemu Alat Ahamo Boehàdateboli dam bake deeli vame Am damali vuusu im vahokedam bak lam ab faasi meedamam bak. Laham bak um ozom vaba? 21 Uho Eba gi ostame vàluho. Mei ahu oli veimaha setan Eho gagu futodume ilidam meo bak lam Eho uba vouhodase. Neha: Dat teuda nibe am soa maehe nazoh vou faovoi num doo ozoho laba nazoh meona vuusualame duzu ausdameam làhà ba meit am numa oli am nazoh vam vabak. Am nazoh gi ahe lahasum bak. 22 Lahana dat bisi feàda labe fa da lada laba li nohisi beome aho vuusdam nazoh meona veimome afoezobe am nazoh gelevai voutame dam bake faheme ab lodamam bak,” lahame im totobe lada lam ab fi koadaham. 23 Labi im totobe lada lam fi koadume neàdi Yesusat neo vi gago, “Meit Eba taum vabda lam Eba fakemda am bak. Labi laha Eho dam bake vahokedam labet modi meit Eba tu vuzehem bak lam meit Eba ame bak lam vi tau meedam vabda lam gi Ebe Eho lab meedam bak lam modi vàhàdeme dam fi goaitoi seddamda am bak,” lahame Yesusat ab vameadaham. 24 Labi im lada lam vameadume neàdi Yesus im nehasu vi vameada, “Mei ahu oli veimaha setan labe futoi ame da lam vou esmozi itadam labe le meia oli odom bak ozome bak aotba baa bohu dam vaba alim bak le nabiteda. Labi nabitedume modeha meia oli odom bak aam biehemu ahamo aba it gago, ‘Làhà em gi ebe eho amu odoho bak laba fa li ame da labe am ahu laba olelo modem bak,’ lahame fa ab leham. 25 Fa li ame da laba aaha am ahu ba Alam Aha Nutabe Neàna labet modi veimam vaba abo gi num naube feaktoi nazoh fa aba bake iademe vahehe labe boz neàdi gi num alim modesdam bakti ulohona ab li aaham. 26 Làhàmu fa neo le mei ahu oli veimam setan tujuh amomoi abo am fai bak vafozi bisi faida gagome fa vazisi vou ledume aba aho amu oli odoho bak laba ab vi oedume veimadaham. Labiha labe ame setan tujuh amomoi ame da labe am ahu laba ba vi oedaha labe aba amu fota neà bak vei seti fa abo bisi fai bak ab fuham,” lahame ab vahokedaham. 27 Labi Yesusat ame im lada lam vahokedam di labe ame dam duada zi dozeadaha bak labe nam vàmtea labe ame im lam aihi labe àvodeha Yesus bake ab buteham. “Om faasi doa oluhu oi lam Alat bisi im neà bak modi esuhu namet modem bakeee.” 28 Lahame buteme modeha Yesusat fa gago, “Lo, lamota am tame. Lahana meit Em Ai Alat gagoho im lam aime uledi meedamda lam Alat bisi im neà bak modi esuiam da am bak,” lahame ab gagoham. 29 Lahame labi gagodam di labe dam amomoi zi labe neo ledume fa dam amu dozeadaha dam zi lamti fa vahi dozeada. Labihadam di labe Yesusat ame dam zi fai laba neo ab vameadamam. “Um etei dam bada nim gi bisi faina meedam bak tadem damat modem bak. Um gi labihadam damat modem labe uho vedi Eba neha, ‘ “Om Alat Gagu Fihasi Vimteme Oluhu Dat Boehàda ameo?” laham bak lam im biem bake na damat ihimo modem biem im feàna Oho nasi fet modehemu im aame ozobohudese,’ lahame gagodam damat modem bak. Lahana Em ba uledi ame bak lam uba etei di nibe fet modem moho bak. Ba nehi fet vouhodam bakti gagom kaio. Aham di iube Alat na damat ihimo modem biem im feàna abo Yunus bake modehe im lamti ulohona modemna uho ba aa tame. 30 Aham di iube Alat vameadaha im aime fa dam bake ahate vameaidahada Yunus lam Alat ahit modi bohe feàda labet Yunus visoi tolazehe di lam am eloho vaba fa ahedi kota Niniwe laba le Alat aba gagoho im lam fa dam bake vou vameatedaha bak labet modi ame Niniwe dam labe ozo, ‘Imbote. Ame da Yunus lam abo Alat gagu iba oluhuda am bak,’ laham bak ab ozobohudeham bak. Bak lamti ulohona Em Asum Ahoba Iubet Bak Niba Li Dateleheda nibe Eho modehemu um etei dam bada nibe laha aame, ‘Imbote. Alat Gagu Fihasi Vimteme Oluhu Dat Boehàda Em am tame,’ lahame ba ozobohude tame. 31 Aham di iube Yunus Yahudi da labe aho Niniwe dam giida laba le Alat aba vameadaha im nehasu vou vameateda. ‘Alat uba beolo modem bake uho faina meedam bak lam nasi voedume fa ahu neà bak vàmadi meedale,’ lahame labi vou vameatedume fi dedaha di labe ame dam labe ame im lam aime uledi ame bak lam ab meedaham bak. Nehaha bak. Yunus aho amu vou vameatedaha bak lam feàta feàt. Lahana Yunus aho amu lab vou vameatedaha bak lamti labi im Eho etei vou li vou vameatedahada nimti ozom di bisi vafozi feàda im Ebeda nim am bak. Labihàmu Alat ba diamut damat iho bak niba meedaha im ahebu Aho Dam Bake Uloodume Vi Aime Ozobohudi Neàdi Fime Fahedam Digat fum di ame Niniwe dam ahamda amu elodaha dam labe iho fa ahedi usnadume Alat avaesdam laba le duzu uba dam badate vàlu nehi vameadam bak. ‘Um abo git modeho. Yunus iba li Alat aba vameadaha im aho vou vameatedaha di lam im gi kehàm vaba iho faina meedam bak lam voedume fa ahu neà bak vàmadi Ala bake tu vuzehedaha bak. Lahana um dam bada akati Yunus vafozi bisi feàda abo Alam Adat Yesusat uba li vou vameatedahana akati um aime tu vuzehem vaba mohela?’ lahame uba ba diamut labi vàlu vameada tame. Labi laha aham di iube Syeba bak laba azihi dam vuusdam boehà nam giida abo Yahudi modem vab nam labe aho ozo, ‘Yahudi dam vuusdam Boehàdatebo Salomo lam am abo bisi im ahebu ozobohudi meedam dàt modem bak. Salomot vameadam im aise,’ lahame aba aho azihi bak vou esmozi abo bak bohulana Salomot azihi bake ab laham. Labi doni bake vou id ladume Salomot azihi num feàda laba le lafusi Salomom im ab aidaham bak. Nehaha bak. Salomo bisi im ozobohudem bakta im ozobohudeheda am. Lahana etei nim bisi Salomo vafozeheda Em am bak. Labihàmu Alat ba diamut damat iho bak niba meedaha im ahebu Aho Dam Bake Uloodume Vi Aime Ozobohudi Neàdi Fime Fahedam Digat fum di ame Syeba bak laba azihi dam bake vuusdam boehà nam amu eloho nam labe fat ahedi usai Alat avaesdam laba le duzu uba dam badate vàlu nehi vameadam bak. ‘Um abo git modeho. Eho abo Boehàda Salomo bake le aho vameadaha im lam aihi bak. Lahana Salomo vafozi bisi feàda Yesusat uba li Am im vou vahoketedaha di lam akati um aime tu vuzehem vaba modela?’ lahame uba labi vàlu vameada tame,” lahame Yesusat ab vameadaham. 33 Labi Yesusat im lada lam labihasu vameadume neàdi Aho neo dam duada zi laba im meida nidi nim ab faasi vi vahokedamam. “Meit vuagat usime fauhalem di labe ba tuoho bake esum vabak. Labi laha ba boloseh visoi ahoba nom suusum vabak. Gi damat oli aam neà laham bak ozome tom fi haba laba esu fauhaedam bak. Labiham labe damat ame numa olem di gi fauha neàdi modesdamna aam bak. 34 Um fako lam vuagat fauhati uloho labe uho na alihi aadamna am bak. Labiham labe neham bak. Fako ubuda neàdemeam abo Ebe Eho vahokedam im aime vuzehi ahu vàmadi meedameam làhà, ‘Imbo bak neame?’ laham bak uho ozobohudi meedam bak am bak. Lahana meit am fako faidemeam abo Eho vahokedam im aime vuzehi meedam vaba momeam làhà ba, ‘Imbo bak neame?’ laham bak vi ozome ozobohudi fi gatem vabak. Gi vabili im ozom bak bili modesdam bak. 35 Labiham bake um iademe meedale. Neham bak. Uho vedi nehi ozo, ‘Im fauha neàdi im imbo bak vuzehi meedam damat modem bak,’ lahame uho lab ozome meedam bak lam gi im giomimna meedam bak. Labiham bake um vabiemna zohàme mahate vou faovoedale. 36 Labi laha uho meit, ‘Ala akatihasu meedam Alat modela?’ laham im imbona lam uho ba koena mom vaba abo um ahu vàmadi ozobohudelo àhàkemeam làhà Alat ame bak lam uba modi fi zeam bitom bak. Abo vuagat usime iademe esu fauhalem bakti uloholi na ahebu ahate aadam bak,” lahame ab vahokedaham. 37 Labi Yesusat ame im lam vahokedume neàdi modeha Farisida meida nibe Yesus bake gago, “Omti emti vahi na àdase,” lahame labi gagohemu Yesusat uledi ame da labe am numa le oli vahi na ab tau àdamam. 38 Labi na àdam di labe ame Farisida labe aaha im Yahudi damat ibi iho fi hasi modem baket modehe vaba abo anekehà valo ekeme itatame neàdi na àdam baket Yesusat modehe vabamu ab aame àvodeham. 39 Labi ame da labe aame àvodi modeha Yesusat ame da laba fa ab vameadamam. “Um Farisi dam labe um ahu ad laba vou faovoi meedam vaba vedi gi ahoba totta vou faovoi meeda. Abo um ahu meia ozom vaba gi, ‘Nazoh dualese,’ lahame meia mali soat ziemausi vadam damat modem bak. Uho vedi neha, ‘Alat iba deelese,’ lahame um anekehà valo ekeme itatame neàdi na àdam bak lam gi mokzohti fi lihibati kikem di am ad totbaho gihobu lahasuhu bak lam kikehe vaba vedi gi toha totta kikem bakti uloholehe damat modem bak. 40 Um labiham damat modehe labe um gi ahusobu damat modem bak. Ne, um ozom vaba? Alat Na Debu Modeheda labe Aho im dam bake gi ahoba totta modi vou faovoi meedam vabak. Abo im ahu ad lamti modi vou faovoi meedam Alat modem bak. 41 Labiham bake uho neha, ‘Alat iba aame deelese,’ laham bak laba ozome dam ahamda labe ibi iho fi hasi vou mode usehe im lam uho bisi tau meedam bak lam nasi voou gi um ahu ad lam vabieme neàdem bak ozome fa na vab dam laba faobekesi um nazoh vame fa dam iuba lo. Iuba lo. Lahadale. Uho labi modemeam làhà um ahoba tot lamti um ahu ad lamti fa vahi gi ab boz neàdemam bak,” lahame ab vahokeham. 42 Lahame labi vahokeme neàdi Yesusat neo im nehasu ab vi vahokedamam. “Aiee! Um Farisi dam um ba vàhàdem bak vabili meedalo. Uho vedi Ala bake vou baedam di Musat lab gagoho bak lamti ulohona meedam damat modem labe um utoho laba usihina keobe lam ahebu vame vou li debe vàmtea utasi Ala bake esu. Labi sembilan totbaho lam uho naedamat va. Labi neo ame na totbaho lam neo debe vàmtea utasi Ala bake neo esu. Labi sembilan totbaho lam uho naedamat va. Um gi im lada lamota meedam damat modem bak. Abo na et nakbe ahana neàna vizemna modeo, labi nae modeo, labi na mei na meime ahanalemna totbaho modeo, labihasu debe ulohodesu fahedam damat modem bak. Lahana dat ahamda Musat aho toedume fi hasi esuhu Im Feàna zi labe im tombuda nim uho mu voedam damat modem bak. Abo dam bake iademe ahu vamdesu meedam bak ame. Labi Ala bake deeli meedam bak ame. Labihasu uho meedam vab damat modem bak. Uho im keobe lab meedaha bak lam meedamta neàt. Lahana ba gagoho zoho nimti vahi meedam bak lam bisi neà bak am tame. 43 Aiee! Um Farisi dam um ba vàhàdem bak vabili meedalo. Uho vedi im Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di vedi dam feàda ihimo nusum bak laba deeli nusualadam bak ame. Labi neo dam duana zi dokbuedam bak laba le damat fà, ‘Neàte,’ lahame uba gut gagom bake deeli meedam bak ame. Um gi labihasu meedam damat modem bak. 44 Aiee! Um Farisi dam um ba vàhàdem bak vabili meedalo. Um abo koei ilehà tatbuli, ‘Koei eheo?’ laham bak ozom biem bakti uloho bak. Ame bak ad ium dam faati meia modi vizi faidi vàhàdemna na meiti na meiti ehe bak vabi gohatemeam faidi vàhàdem meot. Ame bak lam gi neham bak. Um ahit neà damalehe labet modi dam amomoit fa im ubuda tum neà tiba tu vuzeheha fa ubu uho ad ium faidehe bak vabili ab vizemam bak. Um gi labihasu meedam damat modem bak.” 45 Lahame labi vameadume modeha ame dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru meida labe Yesus bake ab vi gagoham. “Guru oa, Oho lab vameaha im lam Farisi damat fà aisome vameaha vabak. Gi imti feàtàhà bak.” 46 Lahame labi gagoha Yesusat fa vi gago, “Lo, um dat ahamda Musat toedume fi hasi esuhu Im Feàna zi lam uho ozobohudi fa dam bake vahokedam di um ba vàhàdem bak vabili meedam gurut modem bak. Um abo meia na asimbuna ahumdem damti uloho bak. Ame bak lam neham bak. Um gi ame dat ahamda Musat toedume fi hasi esuhu Im Feàna zi lam meia ootedam di im ubu uho ozohodati tau vahi duali ootedaha labe mei mu odohalemnàme uho gi tet vi ootedume uledem damat modem bak. Lahana um akati ame im lam uho meia ootedam di akati um laha tau modem vaba modela? 47 Aiee! Um guru zi um ba vàhàdem bak vabili meedalo. Uho vedi nehi ozo, ‘Imo dam ahamda Alat vameadaha im aime fa dam bake ahate vameaidaha dam aham di iube meit oddume elodaha dam zi laba vi ozome faobekese,’ lahame im koei baumahe bak laba ilehà moadume gàhàdi aam neàdedam damat modem bak. Lahana um ozom vaba? Um tai ahobada labe ame dam lam oddaha bak. Lahana Alat lab oudaha dam labe ibi iho lab li vameadume vou esmoho im lam uho laha aidam moudaha damat vedi ahi vageme ahobat neàdi ame dam lam baumahe bak laba vi vabiedume gàhàdem meo damat modem bak. Labiha labet uho neha, ‘Neàte. Ahole oddaha bak,’ lahame uho gi daeta vi tau oddaha dam um am bak. 49 Uho labihasu meedàmu Alat Bisi Im Ozobohudatebo labe Aho aham di iube amu gi fet ozobohudi neàdehe labe nehame fet gagu esuhu bak. ‘Eho vameadaha im aime fa dam bake ahate vameaidaha dam lamti Eho gagu olu Em im vameadume esmozi laiam damti labihasu Eho um Yahudi dam bake neo vi ouda tame. Labi ame dam labe le meedameam dam iho vou le vameadaha im lam aim mom dam labe faki ame dam zoho gi odda. Labi dam zoho gi fai baket vabidume voeda. Labihada tame.’ 50 Labihàmu um tai ahobada zi labe aham di iube Alat lab oudaha dam vou ote ledume vasea veàmodaha bak lam fa Alat uba dam badate vàlu nehi gago tame. ‘Ame dam vou ote ledume vasea veàmodaha bake gohali Eho gi um dam bada niba beome vasea gohalem bak,’ lahame Alat fet labihasu gagu esuhu bak. Nehaha bak. Abo Alat na ahebu ahamte modehe di iube um tai ahobada zi labe iho dat ahamda Habel amu nasi alimeat oteheda am bak. Labi uho neo gi vou ote ledume Zakaria ba ab oteham bak. Ame da Zakaria lam uho Fihasi Ala Bake Vou Baedam Num Vàmteabu labe am ad oli aam bak tomba laba abo ame num lamti labi na Ala bake lomna nom vaheme vua vahudamnabu lamti laha donibu laba otehe bak. Labihàmu ame lab vou ote ledaha bak laba Alat vi ozome um dam badate fa vàlu neha, ‘Ame dam vou ote ledume vasea veàmodaha bake gohali modeme neàdemna um am tame,’ lahame uba labi fet ab gagu esuham bak. 52 Aiee! Um dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi um ba vàhàdem bak vabili meedalo. Um gi meit lam di zie aum bakti ulohona meedam damat modem bak. Ame bak lam neham bak. Meit neha, ‘Em akatiham labe Alam damali Aho eba vuusu im vahokedà?’ laham bak lam um guru ozobohuna vedi fa meit, ‘Ame bak lam modese,’ lahame modelo àhàkemda lam fa vausu meedam labe ame da labe fa ame bak lam modem biehe bak. Uho neham labe labihaha bak. Ebe eho lab vahokedam im gàhàna lam uho vuzehi Alam damali Aho uba vuusu im vahokedam mom damat modem labe uho vedi ubu uho ahulat vi ozodam im zi lam fa Musam im laba vi tau vahokedam labe ame da labe ame bak lam modem biehe bak. Labiha labe um ba vàhàdem bak vabili meedam damat modem bak,” lahame Yesusat ame Farisi dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti laham dam laba vàlu im ab vahokedaham. 53 Labi vahokedume neàdi Yesusat ame Farisida labe am num labe futoi esmozi le aidam di labe ame Farisi dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti laham dam labe Yesus bake ahit meoli vabilo ab la gagoi le gagoidamam. Yesusat meia git vahokem bak labna zohàme vàlulo Yesus bake dihasi vi ooteme ailo vameada. Dihasi vi ooteme ailo vameada. Lahadam bak ab faasi meedamam.

Lukas 12

1 Labi ame di labe dam zi fai Yesusat doudam bak laba valadume vahi bakamta dozeadume modeha gi dam bà tadi mei soat osidda. Labihadam di labe Yesusat amu nasi Aba Aho vahokedam im ozobohudelo vi tau meedam dam zi laba ab faasi vahokedamam. “Um iademe vou faovoehebeat meedale. Uba Farisi dam labe iho faina meedam bak uba ahit neà damali vageme uho vedi vabi dam lam imbona mode tiba uba vizemo. Labiham bake um iademe modele. 2 Damat ozo, ‘Iho modehe bak nim damat aaha vabak,’ lahame iho aa modi vastehe im lam ahebu Alat ba diamut ahate modi fi zeam bitoi dam ahebu ba aame ozobohudem bak. 3 Neham bak. Damat aibut aa fi olehe bake le aa vameaha im lam, ‘Ba meit aim vabak,’ lahame ozoho im lam ba diamut modi ala faasi fauhaedam di labe damat aime ozobohudem bak. Labi laha damat num ad oula tuoho bake le meia im adnahet aa vasti vameaha im lam, ‘Ba meit aim vabak,’ lahame ozoho im lam ba diamut modi ahate tombalem labe dam ahebu aime ozobohudem bak,” lahame ab vahokedaham. 4 Labi im lada lam vahokedume neàdi Yesusat neo im meida vi vahokeda. “Emti vou alehe dam oa, Eho etei uba vamealo modem im nim laha mahate iademe aile. Uho dam bakda uba gi soabota oteme voom dam laba a àvodi vi ozome iedemule. Dam lam um otem di um so lam gi lab eloi vooho tadem bak. Ba neo um eloi it oazehena lam vi vabidam vabak. Labiham bake ame dam laba uho a àvodi iedemule. 5 Fa gi nehale. Uho gi Ala Na Debu Modeheda laba, ‘Feàte,’ lahame ahu adat iedi ozodale. Neham bak. Um dam bakda Ala naedat modehe labe um oteme elomta elo. Lahana uho lab eloi it oazehena lam Aho ba vi ve fa vua eludamna sutem gikina bohu laba voom bak ehete. Labiham bake ubu uho bisi àvodi vi ozome ahu adat iedelo modemeam làhà Na Debu Modehe Ala laba iedele. 6 Neham bak. Damat gena bume keobena nu vabna vam di, ‘Feà kaio,’ lahame doi oona tembagat modehena lam vam mom meote. Lahana ame bume keobena lam Alat faobekesi vou aasdam labe ba vàmtea vabiem vabak. Ahebu vi ozobohu tadehe bak. 7 Lahana gi ame bume lamota vou aasdam vabak. Alat laha uba vou aasdam labe ba um meida buà vabiem vabak. Abo um ahebu vi ozobohu tadehe bak. Abo um ohuta tau keobebe lam Alat laha amu gi debe uloholi ozobohudi esuhu labe Alat um ba vàmtea vabiem vabak. Labiham bake Alat ame gena bume keobe zi laba deeli vou aasdameam làhà im dam bakda laha tau vou aasdam bak. Lahana bisi aho deeli vou faovoemda im dam am bak. Labiha labe ame dam bakda amomoi labe uba otelo modem bak modeo, uba faina modelo modem bak modeo, uho a bisi vi ozodume iedemule,” lahame ab vahokedaham. 8 Lahame labi vahokedume neàdi Yesusat neo im meida nehame vi vahokeda. “Um Em im nim mahate aimale. Meit ladi iedehe vabna dam duada labe iho avaesdam laba le ahate duzu nehasu gagomeam, ‘Em Yesus bake tu vuzehi vi tau meedamda em meida am bak,’ lahame ahate labi gagomeam làhà Em Abo Asum Ahoba Iubet Bak Niba Li Dateleheda nibe Eho laha ba Alat Am im gagu vou usem dam zi labe avaesdam laba le duzu nehame gagom bak, ‘Da nim Eba tu vuzehi vi tau meedamda meida am am bak,’ lahame ba diamut ahate labi gagoda tame. 9 Lahana meit ladi vei iedi dam duada labe iho avaesdam laba le duzu ahate nehameam, ‘Em ba Yesus bake tu vuzehi Aba vi tau meedamda modem kaio,’ lahame vei iedi Eba momeam làhà Eho ba Alat Am im gagu vou usem dam zi labe iho avaesdam laba le duzu laha nehasu gagom bak, ‘Da lam Eba tu vuzehi vi tau meedamda modem kaio. Em bieho,’ lahame ba diamut ahate labi gagoda tame. 10 Labi Dat Asum Ahoba Iubet Bak Niba Li Dateleheda nim meit Em mu feàtàme ba ozobohudi fa Ala bake ahatet tom gagomeam làhà Alat gi ame da laba ozahigeàmu fa vei neàdem meo bak. Lahana Alam Aha Nutabe Neàna Labe Eba lab tau modi vizi teudi Eho setan gagu futodume ilidam bak laba meit neha, ‘Iblisit Eba tauha,’ lahame vàlu gagoho bak lam git gagom bak am bak. Ame da labe gi Alam Aha Nutabe Neàna laba feàtàhà bak. Meit Alam Aha Nutabe Neàna laba feàtàmeam làhà ba Alat ozahigeàmu mu fa vei neàdem vabak. 11 Ba diamut uho Eba tu vuzehi vi tau meedam damat modemu uba fakemoholehe dam labe um si fa Yahudi dam labe ihimo fi hasi meedam num laba vou le ame Yahudi im ozobohudatebo zi labe uba uloodam di modeo, pemerintah eeda zi labe iho avaesdam laba vou le uba uloodam di modeo, lahadam di labe uho ame dam laba fa veibadam bak lam, ‘Iho im akatihasu vi gagoela?’ laham bak lam um ahu a bisi nasi fet vi ozodamule. 12 Ame di lam ba uhumo gagodam vabak. Gi Em Ai labe Am Aha Nutabe Neàna Labe fa um ahu ad laba vahokedam bak labet modi vizehe labe uho ot vai gagodam bak,” lahame ab vahokedaham. 13 Labi Yesus im lada lam vahokedume neàdi modeha dam zi labe dat meida labe Yesus bake ab vi gagoham. “Guru oa, Oho em dubu bake gagome aiat misiali vou esmoho nazoh gagome fàsi eba lole.” 14 Lahame gagoha Yesusat fa gago, “Uhumo modem im akati Em giida taue? Amat Eba neha, ‘Oho dam behàsu nibe modem im ozome ozobohudi gagu fi baele,’ lahaela? Lahame Eba ba labi gagomda vabak.” 15 Lahame gagu neàdi Yesusat dam laba dozeadaha dam zi laba neo vi vameada. “Uho etei bak niba esdam di um soa maehe nazoh duana vadume vahedam bak labet modi um ba ahe neàdedam vabak. Labiham bake um ahu mahate iademe it ozodume vou faovoele. A bisi, ‘Nazoh dualese,’ lahame meia mali soat ziemausi vadamule.” 16 Lahame labi vameadume neàdi Yesusat ame dam duada zi laba neo im totobe nidi nim nehame ab vi fi koadamam. “Da na duada nibe am utoho abo na duana debe soale. 17 Na duana debe soalehe labe am it ozo, ‘Na vahem num kekehe bak em na modeme ake vahela?’ 18 Lahame it ozodume ozobohudi fa aba it gago, ‘Làhà em gi nehi modese. Em na vahem num zi faamome fa num buduana zi moadase. Labi em na àmna ziti na àm vabda ziti ame num laba vahedase. 19 Labi vahedume neàdi em fa eba nehi it gagom bak, “Em abo na neàna ala oli buzidamehamdi folemna modeme num tamehodi vahedaho. Em ba na modem bak ozom vabak. Em gi ame na ahum lamota azi àda. Udda. Lahadume izidalo modem bak. Labi na eho deelemna ozome meedalo modem bak,” ’ lahame aba ab it gagoham. 20 Labi it gagodume modeha Alat Am dae gagu neisoat ab vàuham. ‘Om disi elom bak vabi meedamda ahusobu dàt moz. Labi om elom di om na zi oho om soa it ozome vahehena lam oho naedat ba vame vou lam vabak. Om na zi fai oho voedume vou esmohona lam meit gelevai setem bak,’ lahame Alat ame da laba ab gagoham,” lahame Yesusat ahit im totobe lada lam ab fi koadaham. 21 Labi fi koadume neàdi Yesusat neo vi gago, “Meit neha, ‘Em akati modi em nazoh dualela?’ lahame ahamo am ahulat labi it ozodume am soa maehe nazoh vahedume zi dualem bakta ozodume meeda. Lahana im Alat, ‘Nehame meedale,’ lahame gagomda lam aho ba ozodume meedam vabak. Ame da labe aho gi da amu gagohoda lamti uloho bak. Alat laha ame da laba, ‘Ahusobu dàt moz,’ lahame gagom bak,” lahame Yesusat ab vameadaham. 22 Labi ame im lam dam duada zi laba vameadume neàdi Yesusat Aba Aho vahokedam im ozobohudelo vi tau meedam dam laba neo nehame vi vahokeda. “Eho amu neha, ‘Meit am nazoh duana vadume vahedaha bak labet modi am ahe neàna tadem vabak,’ lahame gagohemu uho etei bak niba esdam di uba modi ahe neàdemna, ‘Modem vabna ozomo?’ lahame a bisi vi ozodamule. ‘Im na àmna vabalemeam làhà im ba akati modi ahedi na im meedàla? Im labihameam eloe taia?’ laham bak modeo, labi, ‘Im so bozbulehe bak nim im akati modi sueli dusuela?’ laham bak modeo, um bisi a labi vi ozodamule. 23 Neham bak. Im ahedi na im meedam bak lamti na àm bak lamti na behàsu lam vi ozom di bisi tombuda im ahedi na im meedam bak am bak. Labi laha im so lamti sueti na behàsu lam vi ozom di bisi tombuda im so am bak. 24 Uho bumet meedam bak laba vi ozodale. Bume ba na debe soali modeme àm vab bumet modem bak. Labi laha ba na modeme vahem num mome iho àmna laba vahedam vabak. Lahana Ala naedat Aho gi ozahit ame bume keobena laba vou faovoi dihasi na lu esu. Dihasi na lu esu. Labihadam bak. Labihàmu uho ozom, damti ame bume lamti na behàsu lam vi ozom di bisi tombuda akete? Gi im dam am bak. Labiham bake Ala naedat Aho laha dam bake vou faovoi aasdam bak. 25 Uho ozom, um elom vaba ahe lahasu bohu vuusdam bak laba uho bisi lab it vou faovoi ozodam bak labet modi um elom vaba fa vi ahedidume bohu vuusdam meo? Vabà! Ba gi koena vi tau bohulalem vabak. 26 Uho koena vi tau bohulalem bak modem biem labe um a bisi nehame vabi vi ozodamule. ‘Im dihasi ana à?’ Labi, ‘Im so bozbulehe bak akati modi sueli dusuela?’ laham bak lam bisi a labi vi ozodamule. 27 Uho ut ava aam neàna ahamo usim di meedam bak laba vi ozodale. Ame ut ava lam damat dehe vabna gi ahamo usihinat modem bak. Labi laha ame ut ava labe ba anekehàli elu faitoi fi name beateli gimsum vabak. Lahana ame ut ava damat aam di abo aam neàna modem bak. Labihamta labiha. Lahana ahamda Boehàdatebo Salomo labe aba aho vuusualaha nazoh feà lamota zi feàt. Lahana aba aho dusuhu sue neàda lamti ame ut ava lamti na behàsu lam vi ozodam di bisi aam neàda ut ava am bak. 28 Ame ut ava lam gi usdalo iahamu aladume seti fa damat vamateme fa vua vahudam bak lam Alat ozobohunàme gi ozahit aasu vabiedam labe damat aam neà bak modi esuidam bak. Alat labihasu modehelahit uho ozom, um so bozbulehe bak lam laha modi fa fi olem vaba? Vabà! Abo modem bak. Neham bak. Ame ut ava lam Alat modi aam neàdehe bak lamti um so bozbulehe bak lam Alat modi fa fi oli neàdem bak lamti na behàsu lam vi ozodam di uho ozom, bisi tombuda akete? Im dam am bak. Lahana um akati Eba mahate tu vuzehem vaba vedi gi im iudu ium ozo. Im iudu ium ozo. Lahadume vi ozodam bohu meedàla? 29 Neham bak. Ala bake tu vuzehe vab dam debu mei debu mei laham dam labe, ‘Im etei ana à? Vao ake le ude?’ lahame àvodi vi ozodam bak abo feàte. Lahana ame dam labe ibi iho àvodi vi ozodam bak lam uho a vi tau meedamule. Dam bakda na àm vaba valo àhàki idoali elom bak lam im Ai Ala Na Debu Modeheda lam ozobohu bak. Am ba biem vabak. Labiham bake uho a nehame àvodi vi ozodamule. ‘Im na àm bake im akati mode? Im vao udem bake im akati mode?’ laham bak bisi a àvodi vi ozodamule. 31 Uho fa gi nehasu meedale. Alat Boehàdateboli uba deeli vame Am damali vuusu im vahokedam bak laba nasi ahu vitasu vàmadele. Uho ame bak laba nasi ahu vitasu vàmadi meedameam làhà Alat uho amu lab àvodi vi ozodamna lam ahebu uba ba vi loda tame,” lahame ab vahokedaham. 32 Lahame labi vahokedume neàdi Yesusat neo nehame vi vahokeda. “Um Ai Alat neha, ‘Aho ba diamut uba deeli vame Am damali asum ahoba iuba Aba vi tau vahi boehà damali dam bake vuusu im vahokedase,’ lahame àhàkedam bak. Labiham bake um Eba vi tau meedam dam debu koe damat modemnàme bisi a àvodi nehi vi ozodamule. ‘Im dihasi ana à? Im so bozbulehe bak akati modi sueli dusuela?’ laham bak bisi a labi àvodi vi ozodamule. Gi Ala bake mahate tu vuzehele. 33 Meit aho soa maehe nazoh vahedaha bak laba am ahu laba it ozodam meo bak. Labiham bake gi im nehasu meedamta bisi neà bak am bak. Um soa maehe nazoh fa meia doit ot loiame neàdi fa ame doi vame fa dam na vab dama iuba lo. Iuba lo. Labihadam bak meedale. Uho labi modem labe Alat asum ahoba iuba uba vahedam nazoh vadumna neàna laba soa maehe nazoh vaddume vahedam bak. Ame nazoh lam ubu uho bak niba vaheheda lamti uloho vabak. Nazoh asum ahobada lam ba vàhàdeme setem vabak. Mei na aa vamda ba iuba le na lam aa vame voutame seti koedem vabak. Labi ba naat aum vabak. Abo gi neàna modesdam bak,” lahame ab vahokedaham. 35 Lahame labi vahokedume neàdi Yesusat neo, “Am fa lem bake ahumdi neàdi vou faodale,” laham bak vahokelo im totobe nidi nim faasi ab fi koadamam. “Uho gi mei na meedam dam nibe iho nehasu meedam bakti ulohona laha meedale. Mei na meedam dam labe iba na gagu meedamda labe aho dat amomoi nam vam bake vazisi na àm bake tau àdalo modem bake am na meedam dam laba gagu esmozi ab laham. Labi gagu esmohemu ame na meedam dam labe omozit amu gi modi ahumdi sue dusu minyak vua fauhali gi labihasu modesu dat naeda fa lem bake vou faoda. Dat naeda ba fa li gagohemu num doo taho fi stom bake ame dam labe gi labihasu ahumdi vou faodam bak. 37 Labi dat naeda aibut leo? Usi neisoat leo? Labi li aameam am na meedam dam amu gi modi ahumdi neàdi aba vou faodam bak lam li aameam ab deelemam bak. Lahana gi im lada lamota modem vaba fa im nidi nim laha modem bak. Am na meedam dam labe vou faodamna li aahemu aho ame dam laba abo im neà bak modi esuiam bak. Dat naeda labe ahamo ame dam laba nehame gagom bak. ‘Um betea nusu faode. Eho na ohume fa uba lu àm bak,’ lahame deeli aho am dam laba labi gagu meedam bak. 39 Em im totobe nidi nim uho laha aime vi ozome ozobohudele. Neha: Dat num deda labe am num laba meit am na aa li vam bak ozobohudemeam làhà ba ame aibu lam ba bisu im vabak. Abo vou faovoi aasdam labe ba meit am numa oli am nazoh aa li vam vabak. 40 Labihàmu um laha gi ame baket meedale. Em Abo Asum Ahoba Iubet Bak Niba Li Dateleheda nibe Eho ba lem digat um vabilem bake um gi vou faovoi ahumdi ibzidale.” 41 Lahame labi gagu modeha Petrusat Yesus bake vi ailo ab gagoham. “Boehàda oa, Oho etei lab totobet fi koadaha im lam iho Oba vi tau meedam dam nimota im vahokelo totobet fi koadào? Gi im ahebu im vahokelo totobet fi koadào?” 42 Lahame labi gagoha Yesusat ozo, “Dam Aba tu vuzehi im Abada meedam lahasuhuna ahum Aho gi li aase,” laham bak vahokelo im totobe nidi nim fa ab faasi fi koadamam. “Mei na meedamda nibe aho aba na gagu meedamda labe na gagom di aho gi ule neàt meedam tadem dàt moz. Aba na gagome meedam di ba gi modem vaba abo iademe ozobohu aabodi meedam bak. Labihadam dàt modem labe aba na gagu meedamda labe aho bak mei bake lalo meedàmu aho ame da laba fa neo ab gagoham. ‘Em na meedam dam totbaho zi nim oho fa ot vai vou aasdume na meedam bake ohomo vi ozobohudi vameadale. Labi ame dam labe na àdalo modem di oho na àmna faheme dihasi iuba loda. Dihasi iuba loda. Lahadale,’ lahame am na meedamda ahida laba ab gagu esmozi ab laham. 43 Labi le azibe fa li aaha aho am na meedamda ahida laba, ‘Nehame modele,’ lahame amu fet gagu esuhuna lam aho uledi meedamna li aahemu aho deeli am na meedamda laba gi im neà bak meedam tadem bak. 44 Lahana ba gi im lamota meedam vabak. Ame na gagu meedamda labe am na meedamda laba neha, ‘Em soa maehe nazoh ziti doi ziti oho fa ot vai iademe vou aasdale,’ lahame ab gagomam bak. 45 Lahana ame mei na meedamda labe ahida modehe vaba soida modemeam làhà aba na gagu meedamda labe le setem di am ahulat gi nehi it ozo taia? ‘Aa! Ne, eba na gagu meedamda lam taho fa lem vaba? Akati kehàdà?’ lahame alamdi vedi aho vuusu na meedam damti na meedam lahiti ame dam laba faki beodume geàda. Labi ozom vabamu fa gi na duana àda. Anggur vaksa vao meona lam uddume bak vabili ohu bobida. Labihada. 46 Labihadam di labe ame ot vai meedamda labe vedi aba na gagu meedamda lam ba fa lem digat labe am jamti vabili esdameam làhà aho ozom vab digat labe dat naeda fa li ame da labe aho lab meedam bak lam aameam fa nehi gagom bak. ‘Om gi dat mei,’ lahame gagu feàna beome mu fa bàhàgo iuba abo Alat gagohona tu vuzehi meedam vab dam labe ibi iho esdam bak laba voom bak. 47 Neham bak. Meia na gagu meedamda labe am na meedamda laba neha, ‘Oho na nim modele,’ lahame gagohona ame na meedamda labe ahamte gagoho dita aime ozobohude. Lahana ailahigeàmu ame na modi ahumdi neàdi vou faodam vabak. Labi modemeam làhà dat naeda fa li ame da lam abo duana foadam bak. 48 Lahana dat naedat am na meedamda laba, ‘Nehame modele,’ laham bak gagom vabameam ame na meedamda labe, ‘Ana modemna gagohela?’ laham bak biehe labe ba ahamo git modemeam dat naeda faki foadamta foada. Lahana mahate foadam vabak. Gi fota foadam bak,” lahame gagu neàdi Yesusat neo ab vi gagoham. “Labiham bake Alat meia neha, ‘Oho gi na nidi nimota meedale,’ lahame amu gagu esuhuna Aho ba vi ailo gagu modem di ame da laba gi koena gagu esuhu labe gi koena vi gagu vi aim bak. Lahana Alat meia neha, ‘Oho na nidi nim meeda. Na nidi nim laha meeda. Lahadale,’ lahame amu gagu esuhuna ba Aho ame da laba vi ailo gagu modem di ame da laba bisi duana gagu esuhu labe abo duana vi gagu vi aidam bak,” lahame ab vahokedaham. 49 Lahame labi vahokedume neàdi Yesusat neo im amomoi neo vi vameada. “Dam bakda nibe faina meedàmu Alat dam bake modi geàdalo modemu Alat ahit Em gagu dam bake ab nom oluham bak. Alat Aho ame bak lam modelo modem bak akati taho modem vaba? 50 Lahana Em nasi geàdamehamdem bakti nehi Alat Aba Aho modelo modem bak lam taho modem vabamu vou faodam bak. Lahana Em geàdam bak lam akati taho modi fi gatem vaba mode? Em bak lam bisi vi ozodam bohu meedam bak. 51 Uho nehame ozohe? ‘Em bak niba lehemu dam mei debuti dam mei debuti fa ab vahe vahedam ame?’ lahame uho labihasu ozohe? Làhà um git ozoho bak. Ba labiham vabak. Eho bak niba lehemu dam totbaho labe Eba tu vuzehem mouda. Labi dam totbaho labe Eba tu vuzehem bak ulededa. Labihadume fahedaha labe dam mei debuti dam mei debuti fa ot faki ot fakiame ab ot belui ot beluidamam bak. 52 Etei di nibe faasi num vàmtea laba azihi dam auoholehena lam ihimo faheme totbaho Eba tu vuzehe. Dam totbaho Eba tu vuzehem mouda. Lahada tame. Dam Eba tu vuzehe dam làtela labe fa Eba tu vuzehe vab dam behàsu laba faki ot odosia. Laham vaba dam Eba tu vuzehe dam behàsu labe fa Eba tu vuzehe vab dam làtela laba faki ot odosia. Labihada tame. 53 Abo faheme ame ai labe fa am adatti ot fakiame ot odosia. Labi ame oi labe fa am adnamati ot fakiame ot odosia. Labi ame taai labe fa am taiti ot fakiame ot odosia. Etei di nibe faasi labihadamna bohu tade tame,” lahame ab vahokedaham. 54 Lahame ame im lam Aba vi tau meedam dam laba vahokedume neàdi Yesusat fa neo dam duada zi laba im meida neo ab vi vahokedamam. “Uho ulo giho asum ala bozilem zoho laba aameam nehi aame gagom meo dam taia? ‘Asum di ilehe bak. Etei abaalem bak,’ lahame aame gagomeam gi ame baket modem bak. 55 Labi laha uho aameam nutabe fa ba tot iube lem bak aam di uho neha, ‘Im etei di neà faasi galiha tame,’ lahame labi aame gagom di gi ame baket modem bak. 56 Um gi asumti bakti modem bakta fet aame ozobohudi gagodam damat modem bak. Ne, um im labihamna meedam damat akati Eho etei li vahokedam im nimti labi Eho im feàna meedam bak lamti uho fet aadamna akati nehame vi ozodam vaba mode? ‘Elàhà! Alat iba vuusu im Am damali iba vahokedam bak ab faasi meedam ame?’ laham bak lam akati um ozobohudem vaba vabili ahusobuli modela?” 57 Lahame labi vahokedume neàdi Yesusat neo ab vi vahokedamam. “Em Ai Alat neha, ‘Im vamdesu meedam bak neam tame,’ lahaha bak lam akati uhumo vi ozome ozobohudi neàdi Ebe Eho vahokedam im laba tu vuzehi Alati vahem vaba modela? Etei di nim ame bak lam meedam neàdi am bak. 58 Uho taho ame bak lam meedam vabameam Alat um beom bak. Abo Eho etei vouholo modem im nimti uloho bak. Umti vahi azim dat meida labe fa oba faki neha, ‘Om eba git modehemu em om si meia uloome vi aime neàdi gagu modidam dat boehàda labe aho meia uloome vi aim num laba vou lalo modem bak,’ lahame oba vàlu gagomeam làhà oho gi ozahigeàmu etei vou ladam di labe gi zie doni laba taho fa nasi im ot vameaidume fa neàdele. Oho labiham vabameam oba faki vàlu gagomda labe om vou kea lame dat boehàda laba ub lom bak. Labi ame boehàda labet fa neo am meo dam gagome om neo si mei si ousu teudi simtedem num abo sel laba voom bak. 59 Labiham bake om nasi aima. Om sel laba voomeam làhà ba taho futom vabak. Abo ousdamehamdi boehàdat aba aho gagu esuhu doi oho gohali lodume uloholehezobe ba futom bak. Labiham bake gi zie doni laba nasi ot vameaidume neàdele. Lam bisi fa ot vahiam bak am bak,” lahame ab vahokedaham.

Lukas 13

1 Yesusat dam duada zi laba labihasu vahokedam di labe dam amomoi zi labe Aba li lefusi Gubernur Pilatus labe amu Galilea dam oddaha im lam nehasu Yesus bake vameada. Amu Galilea dam totbaho labe iho faina meedàmu ibi iho Ala bake lodamna lam ame Fihasi Ala Bake Vou Baedam Num Vàmteabu labe am ad oli aam bak tomba laba ame na fi ho vou ledume ame na lam oddume vahedam di labe Pilatus labe am meo dam gagome ame dam lam ab oddaham. Lahaha im lam Yesus bake li vameada. 2 Vameadume modeha Yesusat dam laba fa ab gagoham. “Uho nehi ozohe? Ame Galilea dam lab oddaha dam lamti Galilea dam dua totbaho oddaha vab dam lamti ozom di lab oddaha dam lam bisi faina modehe bake oddahe? Uho labi vi ozodà? 3 Vabà! Uho git ozo. Uho ozoho bak labe imbodi oddaha vabak. Uho faina meedam bak lam voedume fa ahu neà bak vàmadi meedam vabameam um laha elom bak. 4 Neham bak laha ozomale. Um kota Yerusalem labe am bàhàgo Siloam bak num naoha bohuna labe aguti nom ilu dam adbada delapan belas beome eloho bak lam um akati vi ozoe? Uho nehi vi ozohe? Ame num aguti beoho dam delapan belas lamti labi kota Yerusalem laba azihi dam dua totbaho beoho vab dam lamti ozom di lab elodaha dam lam bisi faina modehe bake beodume elodahe? Uho labi vi ozodà? 5 Vabà! Lada lam uho laha git ozo. Uho ozoho bak labe imbodi beoho vabak. Uho faina meedam bak lam voedume fa ahu neà bak vàmadi meedam vabameam um laha elom bak,” lahame ab vameadaham. 6 Labi vameadume neàdi, “Damat faina meedam bak lam voedume fa ahu neà bak vàmadi meedam vabameam Alat vou faom vabamu beom bak,” laham im vahokelo Yesusat neo im totobe amomoi vi ozome dam duada laba neo ab fi koadamam. “Da nibe am utoho laba ut oo àmda so douda. Labi, ‘Am ut oo valehe?’ laham bak le aaha oo valem kai. 7 Labihàmu da nibe am na vabieme vahemda laba ab gagoham. ‘Ut oo àmda so lam eho le aame leidaha vabamu ala oli buzidamehamdehena akati taho ooalem bi mode? Taho ome bitele. Bak neà bak akati ut nibe veimai mode?’ 8 Lahame labi gagohemu am na vabieme vahemda nibe fa gago, ‘Aia, faode. Im ut nasi a omule. Gi labihasu ala totbaho laha faobe ozomase. Eho na debu obe niba vou sie làbome bak valiheme afoezobe fa oube vame fa vahem bak. 9 Labi modi ba neo aameam oo valemeam làhà, “Neàte,” laham bak. Lahana oo valem vabameam làhà eba nehi gagole. “Ome bitele,” lahame eba labi gagomeam làhà eho le ome bitem bak,’ ” lahame Yesusat im totobe lada lam ab fi koadaham. 10 Labi ba hari Sabat meida labe Yesusat ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli dam bake ab vahokedamam. 11 Labi vahokedam di labe aaha nam setan modi nisilehe nam ame num laba tau ame lab vahokedam im aidamna aa. Ame nam labe am toha abo ozuhuna vamdem bi meedamehamdi abo tahun delapan belas folehe namet moz. 12 Labiham nam lam Yesusat aahemu gagome li Aho avaesdam laba duzu neàdi ab gagoham. “Om ade? Om nisilehe bak Eho oba modi om fa ab neàdeham bak.” 13 Lahame Yesusat labi gagu neàdi Am anekehàt nam laba ulasi nam lam am toha fa ab vamdeham. Am toha vamdehemu Ala bake ab vou baedamam. 14 Vou baedume modeha ame num deda labe Yesusat hari Sabat mei fa neàdehemu faki ame num laba nusualadaha dam laba ab gagoham. “Digat enam lam ahebu na modem neàte. Digat lamota niba li mei fa neàdedam neàte. Lahana hari Sabat abo gi azibe im digat fum di niba li a meia modi fa neàdedamule,” lahame ab vameadaham. 15 Labi vameadume modeha Yesusat fa gago, “Um abo gi ahobat neàdi vagem damat moz. Ne, ame hari Sabat lam um lembu sapiti ulohona fi ho modeo, keledai fi ho modeo, valo àhàkem di uho naedamat lo vuhatomome vou olame le vao udeme fa vou li lo vààsu esum meo dam taia? 16 Labihàmu Yahudi nam nim Iblisit veimai faidi modesdume delapan belas tahunlehemu ame hari Sabat nibe am nisilehe bak nim Eho modi fa Iblisit fa am mu isi esmozi itaha bak lam ahole modehe bak,” lahame ab gagoham. 17 Labi Yesusat labi gagohemu dam Aba tauhu vab dam lam ahebu gi ladi daleàdi nom bohusu. Lahana dam duada totbaho labe Aho lab feà bak meedaha bak ahebu aame deeli ab vou baedamam. 18 Labi ame dam duada totbaho labe Yesus bake vou baedume modeha Aho fa neo dam laba im meida totobet nehame vi vahokeda. “Alat Eba gagu vimteme Eho Boehàdateboli dam bake deeli vame Em damali vuusu im vahokedam bak lam meit Eba tu vuzehi Em damali vi taui vi tauidume dualem bak lam, ‘Akatihasu modem labe dam dualedàla?’ laham bak lam damat ozobohudem bake Eho neo, ‘Akatiham bakti ulohote?’ lahame ana im vàlu uba totobet vi fi koadàla? Làhà Eho im nidi nim vouhodase. 19 Dat nibe aho ut oo keobena rica oo vàmtea buà lam vou le am utoho laba dedesu esu. Labi usime loubedi kilali utsoti uloholi bume faobuda zi labe ut aaso laba li nusualadam bak lamti uloho bak.” 20 Lahame labi gagu neàdi Yesusat neo ab vi gagoham. “Meit Alat aba vuusu im vahokedam bak laba uledi meedamda laba meit vi aame fa vizedume dualedam bak lam Eho neo, ‘Akatiham bakti ulohote?’ lahame ana im neo vàlu uba totobet vi fi koadàla? 21 Làhà Eho im nidi nim neo vouhodase. Neha: Nam nibe na ti fauti ulohona tepung ve afoezobe neo na ulasi fi kidemna keobena ragi lam laha laba vi tau esu valihedume seti vou faodameilahit deilemahi fi kidem bak lamti uloho bak. Dam Alat fa vahi vuusu im vahokedam dam amu debu koe bak lam fa dualem bak lamti ame na fi kidemna labe na ti fauti ulohoda laba modi vizi deilemahi fi kidi feà bak fum bak lamti uloho bak,” lahame ab vahokedaham. 22 Labi im lada lam vahokedume neàdi Yesusat kota Yerusalem bake lalo ahu vàmadi ab vitasuham. Labi Aho kota Yerusalem bake lalo ladam di labe gi nehada. Num debu duada laba labe vahokedume labohoti neo la. Labi neo ladume num debu koeda laba neo labe vahokedume labohoti neo la. Gi labiha lada. 23 Labi lab mode ladam digat meida labe dat meida labe Yesus bake vi ailo ab gagoham. “Dat boehàda oa, dam Alat soat vausu beom malemda duao? Koeo? Akatihasuhela?” Lahame labi gagu modeha Yesusat fa dam duada zi laba ab vi vameadamam. “Ba dam dua kaio. Alati vahi azilo lam zie lam gi doo kekehenati ulohona modem bak. 24 Labihàmu ame doo kekehena laba olem bake uho gi etei nibe kekehena geàmu tet olelo meedale. A vanamamule. Neham bak. Dam duada totbaho labe vedi nehame ozoda. ‘Imo zie nidi nim le aamase,’ lahame nabidamnàme ba vi aam vabili meedam bak. 25 Neham bak. Ala dat num deda lamti uloho bak. Dat num deda labe usai ame doo lam baguamdemeam làhà ba meit olem biem bak. Labi modemeam um bako tot laba dozeadaha dam labe nehame tauledam bak. ‘Ai, doo fi stole. Im vi tau oedase.’ Lahame labi tauledameam làhà ame num deda labe fa nehame uba gagom bak. ‘Em um bieho. Um ana damat modela?’ 26 Lahame labi gagomeam uho fa neo nehame vi gagom bak, ‘Vabà! Aia, im amu di iube omti vahi na àdam bak. Labi laha amu di iube oho bak ibida labe im num debu meida laba li Alat Na Debu Modeheda labe Am im iba vahokeda. Labi num debu meida laba neo vahokeda. Labihadam bak lam om vi ozodam vabao?’ 27 Lahana uho labi gagomeam ame num deda labe fa neo uba nehame gagom bak. ‘Vabà! Em um bieho. Um ana damat modela? Um bisi fai bak meedam dam em vou esmozi ilile,’ lahame uba labi gagu um ilidam bak. 28 Labi uho lab iitaom labe gi bak bohulana fa it aameam neham bak it aada tame. Alat Ahamo Boehàdateboli Am damalehe dam laba vuusu im vahokedam bak gàhà bak laba damat na feàna àlo meedam bak ame. Labi Yahudi damat modem vab dam abo dam giida zi labe ala zizem tot iube le. Ala bozilem tot iube le. Ba totbaho totti totti iube le. Labihadume fa Yahudi dam labe im tai ahamda Abrahamti am adat Isakti am mekehà Yakubti labi dam ahamda Alat vameadaha im aime fa dam bake ahate vameaidaha dam zi lamti laham dam zi lam Alat modi fa vazisi vuusu im vahokedam bak laba vahi gi deelehat esdam bak ame. Labihasu uho it aada tame. Lahana ame dam lamti umti Alat fa vazisi vuusu im vahokedam vabak lam uho aame ahu faidi ahula it fu foelamdidume kikezi geàdam labe meb dae feàna faasi buteo tame. 30 Alat ba diamut Aho Eba modi Eho Boehàdateboli dam bake vuusu im vahokedam di neham bak ehete. Damat etei bak niba esdam di vedi nehi ozoda. ‘Da lada lam ee feà vabda ame?’ lahame feàtàdam dam lam ba feà damali fa ee vousai nasi duzum dam am bak. Lahana damat neha, ‘Da lada lam ee feàda ame?’ lahame vou baedam dam lam ba feà damalem vaba gi ee vou usi ba duzum dam am bak,” lahame Yesusat labi ab vahokedaham. 31 Labi Yesusat ame im lam vahokedam di labe Farisi dam totbaho labe li Yesus bake ab gagoham. “Om bak ibi bak nim feidasi Obo Oho lalo modem bak laba taho lale. Galileada boehàda labe Herodes Antipasat am dam gagome Om otelo mozo.” 32 Lahame labi gagu fi desi modeha Yesusat fa gago, “Mm, uho dat bisi meohoda Herodes laba Em im nim fa vou le gagole. ‘Em etei digat nim mei ahu oli veimaha setan Eho fa gagu futodume ilidam bak lamti mei so faidehe bak Eho modi fa neàdedam bak lamti labihasu meedahit vou dihalo modem bak. Labi laha dihasi ame baket neo meedahit vou dihalo modem bak. Em gi im Ebe Eho vou modetem bak meedume Alat Aba Aho ozoho digat lam vou fusi novalo modem bak,’ laham bak lam uho le gagole.” 33 Lahame labi gagu neàdi Yesusat neo ame Farisi dam laba neo vi vameada. “Ne, Alat vameadaha im aime fa dam bake ahate vameaidaha dam damat oddam di ba bak mei bake bisi duana oddume voedam vabak. Abo kota Yerusalem laba bisi duana oddume voedam bak am bak. Labiha labe dam Em otelo modem di Em kota Yerusalem fuhu vab di bak mei bake otem vabak. Abo kota Yerusalem fum di lam damat Em otem di am bak. Labiham bake Em abo etei digat nimti digat ba dihamda lamti ba dihamda meida iumti labihasu ahebu gi Ebe Eho vou modetem bak lamota vou mode ladume kota Yerusalem laba vou fuseo modem bak. Em ba im meit gagomda ba aim vabak.” 34 Lahame labi vi vahokedume neàdi Yesusat neo kota Yerusalem laba vahi azim Yahudi dam ibi iho aham di iube meedaha im lam vi ozome ahu faidi gi bak kiat ab vameadamam. “Aiee! Im kota Yerusalem laba azim dam Eho uba faobekesi meedalo. Dam ahamda Alat vameadaha im aime fa dam bake ahate vameaidaha dam zi lam um tai ahobada labe odda. Labi neo Aho gagu olu Am im vameadume esmozi laiam dam uba neo oudume modeha uho neo ame dam lam laha gi ket beodume oddume eloda. Um gi labihadam dam debut modem bak. Um Yahudi dam labihadàmu Alat uba ba beom bake Eho kuk ameaso labe am adambe meia vou faovoi am busehà labe delai dae kokoadam labe fa baguamdi vamatem bakti ulohona modi Eho uba soat vaususome iuba le modem leidaha um gi Eba mohet vanamai moho bak. 35 Iumeee! Um Em moholahit um kota Yerusalem iumti ame uho Fihasi Em Ai Ala Bake Vou Baedam Num Vàmteabu lamti labihasu Alat vou esmozi ab alimdeham bak. Em uho ba aam vaba vausi modesdamehamdi ba diamut uho Em alihi aahazobe fa um ahu uledi nehasu Eba gut gago, ‘Alat Aho Gagu Olu Ot Vai Im Dedateli iba etei ledamda nim abo feàteee!’ lahame uho ule neàt Eba gut valo modem di lam uho Em alihi ba aam di am tame,” lahame Yesusat fet ab vameadume esuham.

Lukas 14

1 Labi ba hari Sabat meida labe Farisi da elaidamda labe Yesus bake, “Lele,” làhàmu Yesusat uledi ame da labe am num bake ab laham. Le na tau àdam di labe Farisi dam abo Yahudi dam labe ibi iho fi hasi esuhu im aame ozobohudedam dam totbaho labe iho, “Yesusat git modehe bak aame vàluse,” lahame vou aasda. 2 Labihadam di labe dat so ahebu fi kideheda Yesusat avaesdam bak laba li douda. 3 Labihàmu Yesusat ahit ozobohuna fi bovai Farisi damti ame dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti ame dam laba ab gagoham. “Im tai ahamda Musat aho toedume fi hasi esuhu im lam akatihasu toedume esuhela? Ame hari Sabat abo gi azibe im digat nim iho meia modi fa neàdedam fi hào? Fiham vabao? ‘Akatihale?’ lahame toedume esuhela?” 4 Lahame labi gagoha ame dam labe gi ahu adat ot odosiame gi ladi daleàde. Làhàmu Yesusat gi ozahit Am anekehàt ame da nim vi vuu vou li Aba netàdi duzu aho modi fa neàdeheilahit am so fi kidehe bak ab vihitoham. Labi neàdehemu Yesusat ame da lam fa gagome am num bake ab oluham. 5 Labi ame da lam gagu olu neàdi Aho ame dam eeda zi laba neo vi vameada. “Ne, um ame hari Sabat modemnàme nehi modem meo dam taia? Um data modeo, um lembu sapiti ulohona fi ho modeo, damat ahit sime bumatalehe vao laba subtem di uho naedamat abo gi àvodeha vi si fa vousai esum meo dam taia?” 6 Yesusat etei labi gagoha ame dam lam fa vi ozome gagom bili gi daleàde. 7 Ame num deda labe am na àm bake aho gagohoda lamota ahebu ledume ab nusualadaham. Labi Yesusat Aho gut aaha dam etei lab gagome li nusualadaha dam labe iho dam feàda ihimo nusualadam bak laba fi me veimai nusualadam bak ab aaham. Labi ame bak lam aahemu ame dam laba im totobe nidi nim ab vi fi koadamam. 8 Aho neha, “Dam lahi valo modemu na zi àdalo modem diat meit uba nehameam, ‘Em numa li em na zi tau àdale,’ lahame uba labi gagu li ame da na zi deda labe am numa olem di labe a dam feàda ihimo nusualadamna laba a nusualadamule. Dat feàda umti vafozeheda aho amu gagu esuhuda labe abo ba li nusum bak labna zohàme uho laba a li nusumule. 9 Uho meit labi modemeam làhà ame na zi deda labe oho git nusuhu bak aame oho nusuhu bak laba li oba nehi gagom bak. ‘Ba oa, oho fa iuba le nusule. Dat feàda niba nusum bak.’ Lahame oba labi li gagomeam om gi ladi usai fa dat feà vab dat nusumna laba nusum bak. 10 Labiham bake um gi nehale. Meit uba nehameam, ‘Em numa li em na zi tau àdale,’ lahame uba labi gagu li ame da na zi deda labe am numa olelo modem di labe uho gi feà vab dam labe iho nusumna laba nusualadale. Uho meit labi modemeam làhà ame na zi deda labe oho nusuhu bak laba li oba nehame gagom bak. ‘Ba oa, oho fa dat feàda nusumna iuba le nusule,’ lahame oba labi gagomeam làhà omti vahi na tau àdam dam ahebu labe ame bak lam vi aame oba, ‘Feàte,’ lahame vou baedam bak,” lahame Yesusat im totobe lada lam ab fi koadume neàdeham. 11 Lahame labi vameadume neàdi Yesusat neo ame im labe am tombu ab vi vameadamam. “Ame bak lam gi neham bak. Meit neha, ‘Em abo bisi feàda am tame,’ lahame it daetbadume am ee vousai gagomda laba Alat modi fa ee vou usi feà vab datelemda am bak. Lahana meit neha, ‘Em feà vabda am bak,’ lahame it ozome am ahu nemahuba neàt ee vousam vabda lam Alat ame da laba modi fa ee vousai feà datelemda am bak.” 12 Lahame tombat labi vi vameadume neàdi afoezobe Yesusat dat Aba, “Na tau àdale,” lahame gagohoda laba neo vi vahokeda. “Oho om na zi àdalo modem di labe ala tomali modeo, disi modeo, a om vahi ot vou aliam dam lam modeo, obo mei dam zi modeo, om obe laba tau vahi esdam dam nazoh duada modeo, labihasu dam neàda zi lamota a gagodume ledume om na zi lam tau àdamule. Oho labi modemeam làhà ame dam au eheda neàda zi labe fa neo ba oba gagu na zi ibida lam oho tau àdam bak. Labi modemeam na oho amu modeheda lamti fa ame baleà ab vouhoham bak. 13 Labiham bak lam a modemule. Oho gi nehame modele. Oho om na zi àdalo modem di labe dam na vab dam lamti dam nisilehedati dam nao zoho eloi nutabedehedati dam fako aubesuhudati labihasu dam faida zi na modeme àm biemda zi laba gagodume ledume om na zi lam tau àdale. 14 Oho labi modemeam làhà Alat oba deeli im neà bak modi esu tame. Ame dam nisda zi lam fa oba neo gagu na zi ibida àdam biem bak. Fa oba ame baleà vouhom biem bak. Lahana ba diamut dam Alat Aba Aho gagoho im vuzehi vamdesu meedam dam amu elodahada zi lam Alat ame dam laba modi fa ahededam di iube Aho fa oba ame baleà vouhom di am bak,” lahame ab vahokedaham. 15 Labi Yesusat Aho ame na zi deda laba im lam vahokedume modeha dat ame na zi tau àdamda meida labe Yesusat lab vahokehe im lam aihemu Yesus bake ab gagoham. “Ba diamut Alat Gagu Fihasi Vimteme Oluhu Dat Boehàda labe Aho faasi dam bake vuusu im vahokedam di labe Am na zi lam, ‘Um Eba fa tau vahi àdam neàte,’ lahame Aho fi hasi esuhu dam lam bisi vi modi asimdem dam am tame.” 16 Lahame labi gagoha Yesusat im totobe amomoi vi ozome fa ab fi koadamam. “Da nibe am na zi ba àdalo modemu dam iudu ium, ‘Lele,’ dam iudu ium, ‘Lele,’ lahame dam zi laba ab gagu esuham. 17 Labi gagu esu vou faodameilahit na àdam bak ab vou fuham. Na àdam bak fusi ame na àdalo modem di labe am na meedamda niba ab gagu oluham. ‘Oho le dam eho amu fet gagu esuhu dam laba le gagole. “Im na àdeho. Nasi lele,” ’ lahame ab gagu oluham. 18 Labi dam duada laba le gagoha dam ahebu gi im amomoi la vàlui le vàluidume mouda. Amu le labe gagohoda labe neha, ‘Em bak ebe amu doi loho bake le aam bakti nehi mozo. Labiham bake eho om na zi le tau àhà vabake eba a fakemule. Em feidam neàte. Laham bak oho na zi dedate fa le labi gagole,’ lahame ab gagu moham. 19 Labi ba neo le gagohoda meida labe neha, ‘Em sapi fi ho sepuluh etei doit vahana, “Neàna vaheo?” laham bak le aalo mozo. Labiham bake eho om na zi le tau àhà vabake eba a fakemule. Em feidam neàte. Laham bak oho na zi dedate fa le labi gagole,’ lahame ab gagu moham. 20 Labi ba neo le gagohoda meida labe neha, ‘Em nam etei na vaheme vahadaleàmu oba vule na tau àm bieho. Laham bak oho na zi dedate fa le labi gagole,’ lahame ab gagu moham. 21 Dam num iudu iuba le gago. Dam num iudu iuba le gago. Lahadume modeha gi ahebu im amomoi la vàlui le vàluidume ab moudaham. Labihàmu ame na meedamda labe fa li ame dam labe la vàlui le vàluidume moudaha im lam da naedate ab vameadaham. Labi vameadume modeha dat naeda labe ab fakeham. Faki am na meedamda niba neo ab gagu oluham. ‘Taho le dam num debu zie tomba esuhudati zie aaso laba esuhudati ame dam laba le dam na vab dam lamti dam nisilehe dam lamti dam fako faidehe dam lamti dam nao zoho eloi nutabedehe dam lamti dam lada lamota labihasu gagome vou lele,’ lahame gagu oluhemu am na meedamda labe le gagu atetedume fa ab vou ledaham. 22 Fa vou ledume da naedate gago, ‘Ai, oho eba lab gagu oluhu bak lam eho le ame dam zi lam atetedume fa vou ledume neàdeho. Lahana om na zi vahehe bak nim dam koedi oloze lahasuho.’ 23 Lahame labi gagu modeha dat naeda labe fa am na meedamda niba neo gago, ‘Làhà oho fa zie soaboti num debu bàhàgo bake modealaha zie koedati le dam alihi aameam làhà ame dam lam gi tet ootedume taho vou ledale. Em na nib modeme vahehena zi nim abo dam duali bak guguai àdalo mozo. 24 Neham bak. Dam eho amu em na àlo gagoha moho dam lam ba em na zi nim vi tau àm vabak. Abo gi ba koena lu zagum vabak,’ lahame gagu ab oluham,” lahame Yesusat gi Aho ba Boehàdateboli na feàna àlo modem di Yahudi dam Aho amu gagoha moho dam dua bak lam ba na tau àm vabak laba ozome im totobe lam ab fi koadaham. 25 Yesusat ame lab ladam digat meida labe dam duada zi Aba vi tau vulada. Vuladume modeha Aho fa it vaktesi Aba vuedam dam laba im ab vahokedamam. 26 “Meit nehame meedamda labe Ebe Eho vahokedam im ozobohudelo vi tau meedam biem bak. Ame da labe Eba bisi deelehe vaba vedi am ai lamti am oi lamti am nam lamti am data zi lamti aba meidam zi lamti abo amti labihasu bisi deeli meedameam làhà ba Ebe Eho vahokedam im ozobohudelo vi tau meedam biem bak. 27 Labi laha meit neha, ‘Eho Yesus bake tu vuzehi im Abada meedàmu damat em si ut tetehesuhunaso lam ve vatu vou ladam di lam damat eba aasdamnàme gi ozahit vou le em paku dou elom neàte,’ lahame Eba labihasu tu vuzehi gagu vàmadem vaba vedi iedi momda abo uloho vab labe Eho ame da laba, ‘Eba tu vuzehi vi tau meedamda am am bak,’ lahame Eho ba labi gagom biem bak.” 28 Lahame labi vahokedume neàdi Yesusat neo, “Meit Eba tu vuzehi vi tau meedalo modemeam làhà amu nasi ozo, ‘Eho modem uloho?’ lahame mahate ozodume neàdi ba Eba tu vuzehele,” laham bak vahokelo dat num kilana molo modemdati boehàda bohudelo modemdati lahamda behàsu laba vàlu im totobe nidi nim neo ab vi fi koadamam. “Uho im nehasu meedam dam taia? Uho meit nehame ozo, ‘Em meit aa li modem im azi nom aasdam neà bak ozome num kilana molo mozo,’ lahame ozome num molo modem di labe abo doi modeo, num mom ut modeo, abo nasi debe uloholi neàdi ba num mom dam taia? Laham vabameam ame doi modeo, ame num mom ut modeo, debe uloholem vabameam làhà ame num lam ba faasi mom vab dam taia? 29 Ame num mom doi amu nasi debe uloholehe vabna vedi faasi mome aameam doi koedi num lam neàdehe vabna gi aauleme voomeam làhà damat neha, ‘Elo! Om doi debe uloholi neàdehezobe num bao zisim vabna ana modi num labi aauleme voe?’ lahame labi gagom bak labna zohàme ame da labe amu nasi ozodume neàdi ba num faasi mom bak. Um laha Eba tu vuzehi meedalo modemeam làhà amu nasi ahumtedi neàdi Eba tu vuzehele. 31 Labi meida neham bak. Boehàda labe ibi modi baleàhà bak gi nehame modem dam taia? Dam mei debu koedati dam mei debu duadati ot belui ot beluidalo modem di labe dam mei debu koeda labe im boehàda labe nasi nehame ozo, ‘Dam mei debu iba beolo modemda zi lam im meo dam dua puluh ribu ehete. Lahana dam meo dam ibida gi sepuluh ribu ehena fa ame dam laba iho ot beluiao? Gi labihasu feidam neào?’ lahame labi nasi ozome neàdi ot beluiam bak lam ba faasi meedam dam taia? 32 Labi ame boehàda labe ozo, ‘Im dam koedi ot beluiam bieho,’ lahame ozobohudi neàdi am dam totbaho laba nasi neha, ‘Uho doait iuba le dam laba gagole. “Imo gi vasea gohali na ot loidume fa neàdese,” lahame doait gut vameadale,’ lahame ame dam iba fakemda duada labe ledam bak laba doait olu gagom dam taia? Ame boehàda lam dam mei debuti ot belui ot beluidalo modem di labe amu nasi ozome neàdi ba ame bak lam faasi meedam dam taia?” 33 Lahame im totobe lada lam fi koadume neàdi tombu neo ab vi vahokedamam. Neha: “Uho meit Ebe Eho vahokedam im ozobohudelo vi tau meedalo modemda lam laha gi ame baket meedale. Abo aba aho vuusu meedam im ahebu bisi it ozodam lahasumda lam ba Ebe Eho vahokedam im ozobohudelo vi tau meedam biem bak,” lahame Yesusat ab vahokeham. 34 Labi im lada lam vahokedume neàdi Yesusat im meida nidi nim neo nehame vi vahokeda. “Garam abo na àmna nu laba voou vizehe labe ame na nu lam àm di abo àm neàt. Labiha labe garam lam abo neàt. Lahana ame garam labe ahamo na nua vizemna lam fa vei seti faidemeam làhà ame na fauha keobe lam ba akati modi garamli na nu laba vizemnalela? Labiham biem bak. 35 Ame na abo gi faidi voom bak. Ba meit ame na vi visoi na debu bake na usim neà bake ozome ame bak laba vahem vabak. Abo gi voom bak. Um etei Eho nib vahokedaha im nim ahebu um aimeam làhà um ame im lam mahate vi ozodume vi ozobohudi fi gatele,” lahame Yesusat ame im lam ab vahokedaham.

Lukas 15

1 Labi Yesusat dam bake vahokedam di labe ame meia gagu gi teo vi vaiam doi pajak gut gagome vaiam dam zi lamti dam faina meedam dam totbaho zi lamti ame dam labe Yesusat Aba Aho vahokedam im ailo Aba valada. 2 Labi valadume modeha Farisi damti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu aaha ame dam labe Yesus bake valadam bak ab aaham. Aahemu ab voe voedamam. “Da lam abo dam faina meedam dama deeli tau na àm meo Dàt moz,” lahame labi voe voeda. 3 Labihàmu Yesusat Aho ozo, “Na setehena iho fa vi aame vahana lam bisi deelemda am bak,” lahame im totobe nidi nim ab vi fi koadamam. 4 “Uho meit domba seratus ehena meida vàmtea ahamo utasi bak vabili le setemeam làhà uho ozom, dat naeda akati mode? Gi neha taia? Domba sembilan puluh sembilan zi totbaho lam iademe sibe baa alim bak laba oumahedume neàdi vou esmozi fa seteheda lam vi nabida taia? 5 Labi nabidamehamdi ame domba vi aahazobe deelehat vi si bio nom gutaasu fa vou li fa am sibe baa laba fa ousu esmozi fa numa li am vahi ot vou aliam dam lamti am obe laba tau vahi esdam lamti labihasu nehi li vameadam bak. ‘Imo vahi eho domba seteheda fa vi aame deelehe im vameadase,’ lahame deeli dam vahi im vameadam meo bak. 7 Labi Alati Aba asum ahoba iuba tau azim damti laha neham bak. Dat faina meedamda vàmtea nibe aho faina meedam bak lam voedume fa ahu neà bak vàmadi meedàmu Alati Aba tau azim damti ame da laba laha deeli ihimo im ot vameaidam meo bak. Lahana dam duada nibe neha, ‘Im gi Alat Aba Aho gagoho im vuzehi vamdesu meedam dam im am bak. Ba akati iho faina meedam bak lam voedume fa ahu neà bak vàmadi meedà?’ lahame ahobat neàdehe dam laba Alati Aba tau azim damti ame dam laba bisi deeli ihimo im ot vameaidam vabak,” lahame ab vameadaham. 8 Im lada lam vameadume neàdi Yesusat im totobe meida nim neo faasi ab vi fi koadamam. “Nam nibe doi oona perak sepuluh esuhuna meida setemeam làhà am akati modela? Aho gi umaso usime num ad bak ium ahebu nabiti nabitime modeha vabamu fa naube vààteme vi oskeame nabidamehamdi ame doi fa vi aam meo bak. 9 Vi aahemu ve am vahi ot vou aliam dam lamti am obe laba tau vahi esdam lamti labihasu nehi li vameadam bak. ‘Imo eho doi seteheda vi aame deelehe im vameadase,’ lahame ame im lam deelehat vameadam bak. 10 Labi Alati Aba tau azim damti laha neham bak. Dat faina modemda vàmtea labe aho faina meedam bak lam voedume fa ahu neà bak vàmadi meedàmu Alati Aba vi tau azim damti ame da laba laha deeli ihimo im ot vameaidam meo bak,” lahame ab vameadaham. 11 Labi im lada lam vameadume neàdi Yesusat neo im totobe meida nim faasi ab vi fi koadamam. “Da nibe am adam behàsu. Datahidati domuàdati. 12 Labi domuàdata am ai bake le gago, ‘Aia, na misia eba lomda di nibe fet lole,’ lahame labi gagohemu am aiat am nazoh faheme totbaho domuàdate fet loda. Labi datahida vahada gi laba vahe. 13 Labi dat domuàda na abada lam vadume fa meia lodume fa doi vada. Labi doi vadume iddume am doi vame bak mei bake ab vou laham. Labi bak mei bake vou le aho am doi lam ostame git meedume vàhàdeme foli sete. Seti gi sota ab duzuham. 14 Labihadume modeha ame bak lam gi di neà faasi bohulali dam gi idoali fole. Labihàmu domuàda laha na àhàki beo. 15 Làhàmu ame bak labe num meida iuba le num dedate gago, ‘Em om na modem neào?’ lahame gagoha num deda labe neha, ‘Lo, em doho na vahem bak oho modem neàte,’ lahame ab gagoham. Làhàmu domuàda nibe doho na vahem bak ab meedamam. Labi meedameam ahadou beoho labe doho vahehena sokba vi tau àm bak ab ozoham. 16 Lahadamnàme dam amomoi aba ba na lu àm kai. 17 Labi daleà azi ozodume ozobohudi fa aba it ge, ‘Aiee! Em aiam na meedam dam lamota na àmna totbaho laba vahehena em akati idoali ohabali elolo mode? 18 Làhà em ai bake fa le nehi gagom bak. “Ai oa, em abo oba Alati faina modeho. 19 Labiham labe em ladeho. Om ba eba a om adat lahamule. Om eba gi fa om na meedamda fa modele,” ’ lahame ab it geham. 20 Labi it geme ozoha vabamu am usai am aiam num bake fa ab laham. Labi laha labe le numa fusesome modeha am aiat gi bak bohulat gut aame aam faimu faobekesi emoehe labe le si dogoiba vuusu ab vou meddamam. 21 Labi domuàda am ai bake ab gagoham. ‘Aia, em abo oba Alati faina modeho. Labiham labe em ladeho. Om ba eba a, “Om adat,” lahamule.’ 22 Lahame labi gagoha am aiat ozahigeàmu am na meedam dam niba gago, ‘Uho le sue sona bohu dusumda bisi boz neàda lam taho visoi vou li em adat niba gutaasule. Labi em anekehàso esum cincin lam laha visoi vou li am anekehàso dusule. Labi em naba dusumna sepatu laha visoi vou li am naba dusule. 23 Labi sapi adat teiemo amu na vaheme nehuleheda lam laha ve vou li otele. 24 Em adat amu eloi setehena ozohomu fa alihi aahadaleàmu im vahi sapiti na amomoiti giame àdume deelehat kuguidalo modem bake,’ lahame am na meedam dam niba ab gagu oluham. Labi le ame na vame fa vou li ame baket ab modeham. Labi dam nim ab deelehat kuguidalo meedamam. 25 Labi deelehat kuguidam di labe datahida utoho bak laba na meeda. Na meedam dàt lehe labe num zoho obe fusesome aiha dam kuguidam dae aida. 26 Labihàmu dat datahida labe im na meedamda meida laba anekehà vegu vegume li gago, ‘Dam baka ana modehe bake ozome kuguidàla?’ 27 Labi na meedamda labe fa gago, ‘Obo meida ahena fa lehe bake om aiat sapi adat teiemo amu na vaheme nehuleheda otehe bak.’ 28 Labihàmu datahidat faki numa olem bak ab moham. Olem mohemu am aiat futoi ab gagoham. ‘Olem neàte,’ lahame gagodume modeha 29 datahida fa meoli gago, ‘Aia, em abo oho na im gagom di ba ailahigeàmom vabak. Em abo uledi ala oli buzidamehamdehe bak. Lahana om amu eba gi om kambing adat teiemo meida taho oteme lu em damti kuiguidam vaba? 30 Lahana om adat meida lam amu oba na misia fet vame vou le lahi fi lohoda laba modeme vàhàdeme teoli seti fa lehena om sapi adat teiemo amu na vaheme nehuleheda oteme lohona taia?’ 31 Lahame gagoha am aiat fa gago, ‘Adat om abo ebe vou azihida am bak. Ne, na nim ahebu om na tadehena tai. 32 Lahana obo meida bak mei bake le eloi setehena ozohomu fa alihi aaha bake iho deelehat kuguidam neà bak,’ lahame ab gagoham.” Lahame im lam Yesusat ame dam zi laba ab vameadaham.

Lukas 16

1 Labi im lada lam vameadume neàdi Yesusat neo Aba Aho vahokedam im ozobohudelo vi tau meedam dam laba im totobe meida nim neo nehame ab vi fi koadamam. “Dat na duada labe am toheda laba gagu am nazoh zi vou aasda. Labi vou aasdume modeha dam amomoi zi labe ame da laba vàlulo aa li nazoh dedate gago, ‘Om toheda om nazoh vou aasdamda lam git meedam labe om nazoh dua bak lam gi vàhàdeme seti koedeho,’ lahame ame da laba vàlulo nazoh dedate aa li ab vameadaham. 2 Lahame labi vameadume modeha ame nazoh deda labe am toheda laba gagome li duzu vameada. ‘Dam zi labe eba li vameadaha im lam imboo? Làhà, “Nazoh akatihasuhela?” laham bak toedume esum buku laba obo oho ame nazoh modehe bak lam oho fa toedume neàdi eba ba vou lele. Oho em nazoh zi vou aasdam bak eho fa ab faatolo meedamam bak.’ 3 Lahame labi gagu modeha am toheda labe nehame ab it ozodamam. ‘Aa làhà! Ne, em akati mode? Ebe eho mei nazoh zi vou aasdam bak dat naeda labe aho ab faatolo modem ame? Ne, em akati mode. Neà bak akete? Ne, em beeda bak sim biemda. Em meia na taulem lademda. Ne, em akati mode? 4 Làhà em gi nehalo. Damat eba ba diamut uledi deelem bake em gi ame dam laba neà bak amu nasi fet ozome dam laba modem labe emti ot deeliam damalelo modem bak. Labi ba diamut dat nazoh deda labe ebe eho am nazoh zi vou aasdam bak faatom diat em gi amu modi ahumdi neàdehena modehe labe gi emti ot deeliam dam laba lam di dam labe eba deeli fa taum bak,’ lahame it ozome ab neàdeham. 5 Lahame labi it ozome neàdi amu ame nazoh dedate vahana fa ame baleà vouhom vaba modesdam lahasuhu dam laba, ‘Fa amti ot deeliase,’ lahame ozome ame dam lam gagome fet li nehame modeme fa laida. Ahamte gagome li duzuhuda laba ahit ozobohuna vi ailo ab gagoham. ‘Oho dat nazoh dedate ame baleà vouhom vabat teoli esdam bak akatihasuhela?’ 6 Lahame labi vi gagu aiha ame da labe fa gago, ‘Em abo zaitun oo vaobe nubehelemna delapan ratus liter lam eho vaha bake na lom kaio. Gi teoli esdalo,’ lahame labi gagu modeha ame toheda labe fa gago, ‘Làhà oho amu neha, “Ame baleà vouhoda tame,” lahame amu toeme esuhu sunit oboda nim oho naedat nasi ve nusu faatoi voou fa ahit, “Empat ratus liter vaha,” lahame fa toeme gàhàdele. Labi empat ratus liter totbaho lam gi labihasu teo lele,’ lahame ab gagoham. 7 Labi gagu neàdi da lada lam fa la. Labi ba neo dat meida neo gagome li duzu ahit ozobohuna neo vi ailo ab gagoham. ‘Oho dat nazoh dedate ame baleà vouhom vabat teo li esdam bak akatihasuhela?’ lahame labi vi gagu aiha ame da meida labe fa gago, ‘Em gandum oo keobe kaobu zi seribu lam eho vaha bake na lom kaio. Gi teoli esdalo,’ lahame labi gagu modeha ame toheda labe fa gago, ‘Làhà oho amu neha, “Ame baleà vouhoda tame,” lahame amu toeme esuhu sunit oboda nim oho naedat nasi ve nusu faatoi voou fa ahit, “Kaobu totbaho delapan ratus vaha,” lahame fa toeme gàhàdele. Labi kaobu totbaho dua ratus lam gi labihasu teo lele,’ lahame gagu neàdi neo ame naedate fa ame baleà vouhom vaba modesdam lahasuhu dam totbaho laba gi ame baket labihasu neo meeda. Amu duana loho bak lam fa gagome koededa. Ame dam zi labe ba diamut aba uledi deelem bake aho ame dam zi laba gi ame neà bak modehe bak lam nasi fet ozome meeda. 8 Labi ame nazoh dedat am toheda labe lab meedaha bak lam aime ozobohudi ab it ozoham. ‘Em toheda nim gi em nazoh fetehesu totbaho meia aa lu vasti modidam dàt moz. Lahadamnàme aho im ba modemda amu nasi fet ozobohudi nasi modi esuhu bak lam abo neà bak,’ lahame dat naeda labe am toheda laba ab vou baedaham,” lahame Yesusat ame im totobe lada lam fi koadume ab neàdeham. Labi im totobe lada lam fi koadume neàdi Yesusat neo vi vahokeda. “Dam Ala bake tu vuzehi meedaha vab dam bakda nibe ibi iho ba na ot modiam neà bak laba amu nasi fet vi ozome meedume esum meo damat moz. Lahana Ala bake tu vuzehi meedam dam nibe ibi iho ba asum ahoba iuba neà bak tadem bake mahate amu nasi fet ozobohudi meedume esum vab damat moz. 9 Labiham bake uho nehame meedale. Um ba diamut eloi um nazoh zi lam bak niba voedume vou esmoho di labe Alat asum ahoba laba nehame uba gago, ‘Um Em bak neà bak niba li abehamde tame,’ lahame uba labi gut gagom bake um bak niba vahedam nazoh zi lam nasi fa doit ot loidume fa ame doi lam vame fa dam na vabda zi laba iuba lo. Iuba lo. Lahadale. 10 Meit meia neha, ‘Oho im nidi nimota vuusu meedale,’ lahame ame da laba tu gagu esu aameam ame da labe ame na iademe vuusu meedam bak aaha labe fa neo, ‘Im meida vuusu meedale,’ lahame ame da laba na duana ahumdi vi gagodume esum neà bak. Lahana meit meia neha, ‘Oho na nidi nimota vuusu meedale,’ lahame ame da laba tu gagu esu aameam ame da labe ame im meedam vabameam làhà ba ame da laba neo, ‘Im meida nim laha vuusu meedale,’ lahame ame da laba na duana ba ahumdi vi gagodume esum vabak. 11 Labiham bake bak dam labe ibi iho bak niba meedume vahedaha nazoh modeo, doi modeo, meit uba neha, ‘Uho im nidi nimota vuusu meedale,’ lahame uba gagohona uho iademe vuusu meedam vabameam làhà Alat Aba Aho azihi bak neà bak iuba vahedaha nazoh aabo lam uba ba gagu uho vuusu meedam vab taia? 12 Labi laha uho bak niba esdam di Alat uba neha, ‘Uho im nidi nimota vuusu meedale,’ lahame uba tu gagu esu vou aasdam nazoh nim uho iademe vuusu vou aasdam vabameam làhà ba diamut asum ahoba iuba uba vahedaha nazoh aabo lam, ‘Uba vahedaha nazoh am tame. Nasi vale,’ laham bak lam Alat ba uba labi gagu lodam vab taia? 13 Labi im meida neham bak. Dat vàmtea labe meia na gagu meedamda behàsdemeam làhà ba na im ozome meedam vabiem bak. Neham bak. Meia na gagu meedamda behàsdemeam làhà dat meida laba faki ziesobuli aho gagoho bak lam gi tozome mu fa dat meida laba deeli aho gagoho im lamota aime uledi meedam bak. Labi laha um ahu Ala bake tu vuzehi vàmadi meedameam làhà ba ahu behàsdi fa nazoh zi lamti vahi tu vi ozodam biem bak. Labi laha um ahu bisi nazoh zi laba tu àvodi meedameam làhà ba ahu behàsdi fa Alati vahi tu vi ozodam biem bak,” lahame ab vahokedaham. 14 Lahame labi vahokedume modeha Farisi dam totbaho labe bisi doi tu deelehe labe Yesusat Aba Aho vahokedam im ozobohudelo vi tau meedam dam laba lab vahokedaha im lam aidam di labe fa omto kibou Yesus bake ab tozodamam. 15 Labi lab tozodam di labe Yesusat fa ame Farisi dam laba im ab vahokedamam. “Uho vedi neha, ‘Damat iba fà aame deelese,’ lahame ahobat neà damali meedam damat modem bak. Lahana um ahu ad labe meedam bak lam Alata ozobohu bak. Uho neham bak ozom vaba? Iho bakda nibe ozo, ‘Na lada lam bisi feàda ame?’ lahame ozome deelemna lam Alat ozom di, ‘Ame na lam feà vabak,’ lahame faki gi aame ozahigeàmom bak,” lahame Farisi dam laba ame im lam ab vi vahokeham. 16 Labi ame im lam vahokedume neàdi Yesusat neo ame Farisi dam laba im meida neo nehame vi vahokeda. “Alat aham di iube iba Yahudi dam bake, ‘Nehame meedale,’ laham im lam dat ahamda Musat toedume fi hasi esuhu Im Feàna zi lamti dam ahamda Alat vameadaha im aime fa dam bake ahate vameaidaha dam labe iho dam bake, ‘Alat uba nehaho,’ lahame toedume esuhu im lamti labihasu ame im lam im Yahudi dam amudati im dam badati ahebu aime vuzehi vou mode ledume fa etei Yohanes Mei Vuu Valo Baptisleiamda labe aba aho faasi vou vameatedaha bak laba vou fusi ab meedam lahasuham bak. Labi etei di nibe, ‘Alat Ahamo Boehàdateboli dam bake deeli vame Am damali vuusu im vahokedam bak lam, “Akatihasu modemna modela?” ’ laham im gàhàna lam Yohanesat aba aho nasi faasi vameadume fi dedaha bak laba Eho neo etei vi tau vameadam bak labet modi damat Ala bake neha, ‘Iba laha modi Om damali Oho iba vuusu im vahokedale,’ lahame deelehat modelo àhàki vi taui vi tauidume ab dualedamam bak. 17 Lahana neham bak. Asum ahoba iuba modealahana zi lamti bak niba modealahana zi nimti ehe lahasuhu di nim Alat Vameadaha Im Toedahana zi lam abo ame na toehena keobe beà vàmtea ba setem vabak. Gi labaha bohu modesdam bak.” 18 Lahame labi vahokedume neàdi Yesusat neo vi vameada. “Meit am nam aho neàt vahana fa mu voou fa nam amomoi vameam làhà ame da lam faina modeho. Labi dàt lab mu vooho nam lam meit fa vameam làhà ame da lam laha faina modeho,” lahame ab vahokedaham. 19 Labi ame im lam vahokedume neàdi Yesusat im totobe meida nim neo nehame ab vi fi koadamam. “Dam behàsu. Dat meida abo na duada modem labe aho sue dusum di gi sue beeda ada dusu afoezobe sue teuda neo ahoba vi dusu. Labiham dàt moz. Labi ame da lam laha gi na neàna àme dedehe bohu vuusum dàt moz. 20 Labi dat meida na vabda Lazarus gi so bak ahebu but fi kebe galihasi bisdam dàt moz. Ame da lam dam ahe damat vou li dat na duada am num bako natàh doo futom obe laba ousu bisda. 21 Bisdume ozoha, da na duada labe àme voedaha àhàzo nami àme dedem bak ab ozodamam. Am gi idoalem bakta modem kai. Vemet ledume am but bak demum bak lamti vanamai meeda. 22 Labihadume modeha dat na vabda Lazarus nim ab eloham. Elohemu Alat Am im gagu vou usem dam labe usi am ve Yahudi tai ahamda Abraham aham di iube elohoda labe am ousdam ba tot laba vou le ab vi ousuham. Labi dat na duada laha ba eloi bake ab baumsuham. 23 Labi ame dat na duada labe gi koei it oazehena le esdam bak laba le idiamdi geidam labe fako vousai tom aaha Abraham gi bak bohulana tom aa. Labi Abraham ba tot laba vi aaha Lazarusam alihi laha ab aaham. 24 Labihàmu da na duada labe bisteat ab buteham. ‘Ai Abraham oa, om eba aame àvodi faobekele. Em vuat beome idiamdi ge. Idiamdi ge. Labiham bake eba Lazarus gagome olu vao anekehàsoat ulasi em bio kealehe bak iso niba li ulasi fa nutabedele.’ 25 Lahame gagoha Abrahamat fa ab gagoham. ‘Adat, om ahe di iube modem bak it ozome fa ozobohudele. Om gi abo neà bak tadehe dàt moz. Lahana Lazarus nim na aho modem gi fai bak tadehe dàt moz. Labihàmu am etei nim gi fa neà bak tadehe bak. Labi om gi fa idiamdi gem bak tadehe bak. 26 Labi laha im ame bak nim Alat ahit itmat feàna doni modehe labe im uba lalo modemeam uba laba lam biem bak. Labi laha um iba lelo modemeam iba niba laha lem biem bak.’ 27 Lahame vameame modeha dat na duada labe neo gagoda. ‘Ai, làhà oho Lazarus gagome fa em aiam num bake olule. Em vahadam auohole laba ehete. Em vahadam auohole lam ba idiamdi gem bak niba neo vulem bak labna zohàme oho Lazarus gagome olu le fi dele.’ 29 Lahahat Abrahamat fa ab gagoham. ‘Vabà! Um vahadam lam dat ahamda Musat toedume fi hasi esuhu Im Feàna zi lamti labi dam ahamda Alat vameadaha im aime fa dam bake ahate vameaidaha dam totbaho labe iho toedume esuhu im lamti laba aime ozobohudemna laba ehete. Um vahadam ame im laba aime vuzehi meedam neàte.’ 30 Lahame labi gagoha dat na duada labe fa gago, ‘Em vahadam gi ame lab toedume esuhu im lam aim mom meote. Lahana abo meit eloi fat ahedi usaha dàt fa ahate le gagom labe em vahadam labe aime ibi iho faina meedam bak lam voedume fa ahu neà bak vàmadi meedam labe ba niba vulem vabak am tame.’ 31 Lahahat Abrahamat fa ab gagoham. ‘Amu um vahadam labe ame dat ahamda Musat toedume fi hasi esuhu Im Feàna zi lamti dam ahamda Alat vameadaha im aime fa dam bake ahate vameaidaha dam totbaho labe iho toedume esuhu im lamti amu aihi vabak. Ba làhàme meit eloi fat ahedi usaha dàt fa ahate le vameadameam ba ame dam labe laha vuzehem vabak,’ lahame ab gagoham,” lahame Yesusat im totobe lada lam ab fi koadume neàdeham.

Lukas 17

1 Labi Yesusat im totobe lada lam fi koadume neàdi fa Aba Aho vahokedam im ozobohudelo vi tau meedam dam zi laba neo im amomoi neo vi vahokeda. “Aiee! Bak niba azim dam Alat abo duana beoda tame. Neham bak. Bak adba niba esdam di naat li, ‘Meit faina modem neào?’ lahame modi ozolo modem di meia modi fa faina meedam bak ehete. Ame na meedam bak lam ba setem vabak. Lahana meit nehi ozo, ‘Eho da lada laba le modi, “Yesus fà mu voose,” ’ lahame modi ozolo modem di aho le modi da labe Em mu voomeam làhà da lada lam Alat bisi duana beomda am bak. 2 Gi neham vaba? Meit Eba tu vuzehi meedamda nim abo damat neha, ‘Gi data koena nimti ulohoda feà vab dàt moz,’ lahame ozomda lam meit am vou fohome faina modi ubahi ubahidume Em mu voohemu ame mei vou fohohoda lam ba diamut Alat bisi feàna beomda am bak. Dat labihalo modemda lam gi nasi nehasu meedam vaba? Dam gagome am si ke feàda bumatna visoi am bio laba lo vààsu asimbuli itea feàna tombu iuba vou le nobu feà bak iuba nasi nom voou tezi eloi setem vaba? Lam bisi neà bak am. 3 Labiham bake um iademe it vou faovoi meedale. Uho meia ootedam labe ame da labe fa faina modem bak labna zohàme iademe it vou faovoi meedale. Uho meidavat oba faina modemeam làhà oho fa ame da laba im vahokedale. Labi im vahokedume neàdi ame da lam fa aho faina meedam bak lam voedume fa ahu neà bak vàmadi meedameam làhà oho ame da labe oba faina modehe bak lam oho gi laha ozahigeàmu fa vei neàdele. 4 Labi ame digat vàmtea labe ame da labe neo oba faina vi modi fa aho faina meedam bak lam voedume fa ahu neà bak vàmadi oba li nehame gagomeam, ‘Eho oba faina modehe bak lam oho gi ozahigeàmu fa vei neàdele,’ lahame oba laba li vi gagomeam làhà oho ame da labe oba faina modehe bak lam gi fa neo vi ozahigeàmu fa vei neàdele. Ame digat vàmtea labe ame da labe gi ame baket labihasu meedume modehe bak tujuhlemeam làhà oho laha gi ozahigeàmu vei neàdehe bak laha tujuhlele.” 5 Lahame labi vahokedume neàdi Yesusat Aho gagu olu Am im vameadume esmozi laiam dam labe ihimo Yesus bake ab vi gagoham. “Boehàda oa, im Oba mahate tu vuzehem vabamu Oho iba modi teudi im Oba mahate tu vuzehese.” 6 Lahame labi gagoha Yesusat fa dam laba ab vi gagoham. “Uho meit Eba tu vuzehehe bak abo gi ut ahakebu oo keobeti uloholi gi koena tu vuzehemta làhà uho gi ut kia laba, ‘Ohomo it valoi fa itea tom laba zisule,’ lahame gagomeam làhà ame ut kilabo lam im obo oho gagoda laba vuzehi modem bak,” lahame ab vameadaham. 7 Labi im lada lam vameadume neàdi Yesusat im totobe amomoi neo vi fi koada. “Eho uho modem bak vi ozome gi vouholo modem bak. Uho nehame modem dam taia? Uho um meida labe am na meedamda laba neha, ‘Em utoho na dem bake vabiedale,’ lahame gagu olum bak modeo, ‘Em domba vou aasdale,’ lahame gagu olum bak modeo, ame na lam le modeme fa lem di labe dat naeda labe am na meedamda laba nehame gut baedam vab taia? ‘Làhà om nasi li nusu na oboda nasi àdale. Labi na ebe eho àmda ba àlo mozo.’ 8 Laham bak gut baedam vaba gi nehame mode taia? Ame na meedamda labe ame na le modeme fa lem di labe dat naeda labe aho am na meedamda laba gi nehame gut gagom bak. ‘Valo ehume sue neàna dusu em na ohume eba lu àdale. Labi eho nasi àdume neàdi na obo oho àmda ba àdale,’ lahame labi gago taia? 9 Ame bak lam uho ozom di um akati ozoe? Ame na meedamda labe gi dat naeda labe aba aho gagohoda lamota meedaha labe uho ozom, dat naeda labe fa am na meedamda laba vou baedào? Vabà! Labiham vabak. Dat naeda labe am na meedamdate amu gagu modehe labe vou baedam moho bak. 10 Labi um laha Alat uba, ‘Nehame meedale,’ lahame uba gagu uho ame bak lamota vuzehi meedume neàdemeam làhà uho gi nehame vi ozome gagodale. ‘Im gi Alat na teo gagu meedume baleàhà labe iho gi Aho lab gagoho bak lamota meedam bak. Akati Aho ba iba vou baedà?’ lahame vi ozodume gagodale,” lahame Yesusat ab vameadaham. 11 Labi Yesusat kota Yerusalem laba ladam digat meida labe Galilea bakti Samaria bakti laha zie doni bak laba lada. 12 Ladameam num debu bak meida laba lafuseo vabali modeha dam sokba faidi vàhàdem bohu vuusdam dam sepuluh Yesus bake ab gut tàham. Tàhi vaitesu duzu Yesus bake bisteat ab buteham. 13 “Yesus Dat Boehàda oa, iba aame faobekele.” 14 Lahame gagoha Yesusat ame dam sepuluh lam ab aaham. Aame gago, “Uho damat Ala bake lomna ve vua vahudam toheda zi laba le, ‘Um sokba faidi vàhàdehe bak lam fa neàdi vahem neào?’ laham bak le aimale,” lahame labi gagoha ame dam labe uledi ab ladamam. Iumà iuba le modeha im sokba faidi vàhàdehe bak lam modi fa ab neàdedaham. 15 Labi dat meida labe am sokba faidehe bak laba it nabime aaha fa neàdehemu fa Yesus bake ab emoeham. Fa emoedam di labe nehame bisteat vou bae leda. “Ala abo feàte. Ala abo feàte,” lahame Ala bake bisteat vou bae ledume Yesus bake ab lefuham. 16 Fusi am ozo, “Yesus abo feàte,” laham bak ozome ahu adat iedi Yesusam naba modesdam laba ahit ogomasu biti nom bohusu gago, “Om abo neàte. Om abo neàte,” lahame Yesus bake vou baeda. Dat Yesus bake fa leheda Samaria dàt moz. 17 Gi Samariada vàmtea nibe ahamo fa lehemu Yesusat Ahamo it vameada. “Dam sepuluh ahebu modi fa neàdedaha taia? Ne, dam sembilan totbaho dua bak akati fa Eba lehe vaba modela? 18 Dat vàmtea nim Yahudi dàt modem vabda abo dat giida nibe aho Ala bake, ‘Om abo feàte,’ lahame vou baedalo fa ab leham bak. Lahana Yahudi dam sembilan dua bak lam akati fa lem vaba seti modela?” lahame labi it vameadume neàdi Yesusat fa neo da niba ab gagoham. “Om Ebe Eho vameadam im aime tu vuzehe labe om faidehe bak fa ab neàdeham bak. Om nasi fa usai lale,” lahame ab gagu oluham. 20 Labi Yesusat lab vou mode ladam digat meida labe Farisi dam totbaho labe Yesus bake vabi vi ailo ab gagoham. “Alat im dam bakda modi Am damali vuusu im vahokedam di ba adi diat ahate imbodi meedàla?” Lahame labi gagu modeha Yesusat fa ame dam laba ab vi gagoham. “Vab. Um git ozoha. Alat dam bakda modi Am damali vuusu im vahokedam bak lam faaseo meedam di meit fakot fet aam vabna gi mei ahu ad labe ahamo meedam bak. Labiha labe ba meit neha, ‘Neam tame! Ame Da Boehàda neab li meedamam tame! Iuam tame! Ame Da Boehàda iuba ab li meedamam tame!’ lahame ba gagom vabak.” 22 Lahame Yesusat ame Farisi dam laba labi vameadume neàdi fa neo Aba Aho vahokedam im ozobohudelo vi tau meedam dam laba neo ab vi vahokedamam. “Em Abo Asum Ahoba Iubet Bak Niba Li Dateleheda nibe Eho ba fa lelo modem di labe um dam bakda nibe nasi nehame aalo àhàkem bak. ‘Ame Asum Ahoba Iubet Bak Niba Li Dateleheda labe Aho iba vuusu im vahokedam bak taho fum vabao?’ laham bak um nasi aalo àhàki meedam bak. Lahamnàme ame bak lam ahate fi zeam bitom vab labe um ba aam vabak. 23 Labiham bake meit uba nehameam, ‘Iuam tame! Iuba ab le meedamam tame. Neam tame! Niba ab li meedamam tame,’ lahame labi uba gagomeam a àvodi iuba emoeme le aa. Fa iuba emoeme le aa. A labihadume fet uledi emoetedamule. 24 Neham bak. Em Abo Asum Ahoba Iubet Bak Niba Li Dateleheda nibe Eho ba fa lem di gi neham bak. Asum boz vekesi fauhali asum ahebu veibai seti dam ahebu aam bakti ulohona modem labe dam ihimo ahebu aadam tadem bak. Ba akati meit li gagom im uho aie? 25 Eho ba fa lemta abo fa lem bak. Lahana dam eteida nibe Eba nasi modi Em geàdam bakti nehi modem bak. Labi laha, ‘Em Alam adat modem kaio,’ lahame damat Eba feàtàme moudam bakti nehi modem bak. 26 Em Abo Asum Ahoba Iubet Bak Niba Li Dateleheda nibe Eho ba fa bak niba lelo modem di damat gi dam aham di iube Nuh amti vahi azihi dam labe iho ahumdehe vaba vabi gi esdaha bak lamti ulohona meedahit Em lem bak. 27 Nehaha bak. Aham di iube Nuhti vahi esdam dam labe damat gi ibi iho ozom bak lamota la modi le modidam bak. Na àda. Vao udda. Dam lahi vada. Lahi dama loda. Gi labihasu bohu modesdume Nuh am namti am adam lahiti ihe feàda numalehenabu laba ziddaha di laba ab vou fuham. Labi Nuh am namti am adam lahiti iheba ziddume modeha vao zisi bak ahebu fi oli dam ihe laba tau ziddaha vab dam lam ahebu ab belu elodume seddaham bak. 28 Labi laha aham di iube Lot amti vahi num debu Sodom bak laba azihi dam labe iho gi ibi iho ozom bak lamota la modi le modidam bak. Na àda. Vao udda. Na doit vada. Nazoh ot loida. Na debe ut sieda. Num moada. 29 Gi labihasu bohu modesdume Lot am namti am adnamat ahimti iho num debu Sodom bak vou esmozi itame modeha Alat asum labe vua feàna modi nom ilu ame Sodom dam ilihi vab dam ahebu im numti data nazohti ahebu ab belu elodume seddaham bak. 30 Em Abo Asum Ahoba Iubet Bak Niba Li Dateleheda nibe Eho fa lelo modem di lam damat gi dam aham di iube Lot amti vahi azihi dam labe iho ahumdehe vaba vabi gi esdaha bak lamti ulohona meedahit Em le tame. 31 Ame Eho ba fa lem digat labe ubu uho num ohut vabna baa ahoba laba zisi esdam dam lam a fa um numa oli na koena it ve voutamule. Gi ahebu vou esmozi iitaole. Labi laha meit utoho bake na meedamda labe fa a num bake lamule. 32 Uho Lot am nam labe modehe bak vi ozodale. Aham di iube Alat Lot vazisi azihi dam laba vuat beolo modem di labe Lot am namti im num vou esmozi itadam di labe Lot am nam labe am nazoh voedume vou esmoho bake it aaha labe Alat belu am fa ab garam kebuli duzuham bak. Labiham bake ame digat lam a um nazoh visom bake a ozome lamule. 33 Meit neha, ‘Em gi em nazohti labihasu ahena aidalo modem bak,’ lahame aba aho elom bak laba bisi it vou faovoi ozodamda lam ba Alati vahi ahe neàna bohu vuusdam vabak. Laham vaba meit bisi it vou faovoi elom bake vei iedem vaba ahatet neha, ‘Eho Yesus bake tu vuzehi Aba vi tau meedamda em am bak,’ lahame gagu afoezobe damat am otemeam làhà ame da lam ba Alati vahi gi ahe neàna bohu vuusdamda am bak. 34 Labi ame Eho ba fa lem di labe gi ame aibu labe lemeam làhà dam behàsu bakamta bisu iddamna gi meidata vuu visoi meida gi laba voou veke. 35 Labi laha lahi behàsu ti feàdam di lam meidata vuu visoi meida gi laba voou veke. Gi labihada tame. [ 36 Labi laha utoho bake le na meedam dam behàsu lam meidata vuu visoi meida gi laba voou veke. Gi labihada tame.”] 37 Lahame labi vameadume modeha Aba vi tau meedam dam labe fa ab vi gagoham. “Aa làhà! Dat Boehàda oa, Om im lam adi bake modem im vameadàla?” Lahame labi gagoha Yesusat im totobe nidi nim fa ab vi gagoham. “Na koei àm bume zi oaedam bak laba damat aam di nehame ozo, ‘Bume zi oaedam adba laba na koei ehe bak,’ lahame labi aame ozobohudem bak. Labi laha Em fa bak niba lem di Em ba aa lem vabak. Em fa lem di gi dam ahebu ozobohudem bak,” lahame ab vameadaham.

Lukas 18

1 Labi im lada lam vameadume neàdi Yesusat neo ozo, “Aba Aho vahokedam im ozobohudelo vi tau meedam dam labe Ala bake dihasi tom gago. Dihasi tom gago. Lahadam bak lam a vanamai momule. Gi labihasu vou meedamehamdi Am ba fa li aase,” lahame labi ozome Aba vi tau meedam dam niba im totobe neo ab fi koadamam. 2 “Num debu meida laba meia uloome vi aime neàdi gagu modiamda laba azi. Ame da labe aho Ala bake, ‘Abo feàte,’ lahame ahu adat iedi gagoho vabda am. Labi laha meit modem im aame faobekem vaba gi aalahigeàmomda am. Labiham dàt moz. 3 Labi nam maboena ame num debu laba laha vahi azi. Laham nam labe ame meia uloome aime neàdi gagomda laba le gago, ‘Eba fakemda laba oho eba tau im neà bak vameame vamdesu esule,’ lahame dihasi le gago. Dihasi le gago. Labihada. 4 Labihadam di labe ame da labe mu ailahigeàmu izidaha vabamu ahamo aba ab it ozoham. ‘Em abo Ala bake, “Am abo feàte,” lahame ahu adat iedi gagom vabda ame? Labi laha em meit modem im ba aame faobekem vaba gi aalahigeàmomda ame? 5 Em labihadamnàme ame maboe nibe bisi eba dihasi li gagu fa laidam labe em vanamai feà bak fum bak labna zohàme eho aba fakemda laba le fa im neà bak vameame vamdesu esulo modem bak ab uledeham bak,’ lahame labi ab it ozoham.” 6 Lahame Yesusat im totobe lada lam ab fi koadume neàdeham. Labi fi koadume neàdi Aho neo vi vameada. “Ame meia git uloome vi aime neàdi gagu modidamda labe aho etei odohalehebeat modehe im lam mahate vi ozome ozobohudele. 7 Neham bak. Ame da labe ame nam maboe labe bisi dihasi li gagu fa laidam nam maboe laba tauhu labe uho ozom, Alat Aba Aho fi me vaha dam labe Aba bisi digad di tom gagoda. Fa usehe di tom gagoda. Labihadam dam laba uho ozom, Alat ba taum vaba moe? Vabà! Tau im neà bak modi vamdesu esuiam bak. Dam Ala bake, ‘Iba taule,’ lahame labi tom gagodam di lam Alat mu dam bake, ‘Laha faode,’ lahame gagom vab taia? Am gi kehàm vaba taho aime tau im neà bak modi vamdesu esuiam bak. Labiham bakta labiha. Lahana Em Abo Asum Ahoba Iubet Bak Niba Li Dateleheda nibe Eho ba diamut bak niba fa lem di damat Eba tu vuzehi tom gagodam lahasuhuna Eho fa li aae?” lahame ab vahokedume esuham. 9 Labi im lada lam vahokedume neàdi Yesusat neo aaha dam giida labe ihimo it daetbadume neha, “Im abo neàte. Iho Alat Aba Aho gagoho im lam vuzehi vamdesu meedam dam im am bak,” lahame labi it daetbadume fa meia feàtàdam dam zi lam aahemu ame dam laba im totobe nidi nim ab fi koadamam. 10 Aho neha, “Dam behàsuva ame Fihasi Ala Bake Vou Baedam Num Vàmteabu labe am ad oli aam bak tomba laba tom gagom bak ozome ab tom laham. Dat meida Farisi dàt moz. Labi dat meida meia gagu gi teo vi vaiam doi pajak atem dàt moz. Labiham dam behàsu ab tom laham. 11 Labi ame num laba tom le Farisida nibe gi laba duzu ahamo aba it daetbadam labe Ala bake tom gagoda. ‘Ala oa, emti dam amomoi totbahoti uloho kaio. Dam totbaho labe iho mei na vam di ahi vageme na meida neo vi tau vaiam bak ame. Labi meia bisi fai bak meedam bak ahebu ame. Labi mei lahi dat ehena aa meedam bak ame. Labihasu meedam dam lamti emti uloho kaio. Labi dat meia gagu gi teo vi vaiam doi pajak atemda nimti ba emti uloho kaio. Labiham bake Om abo neàte. 12 Em hari Minggu nusu vou id ladume em ahit na àm bak mu na àhà vabna usi behàsdi fa Minggu nusuidam meo bak. Ebe eho modi baleàhà bak am bak. Labi em laha na eho le modeme vou liamna lam ahebu faheme vahedume na zi vahehe bak sepululehezobe meida zi visoi Oba lolo vou li niba esuiam meo bak. Em abo bisi neàda em am bak,’ lahame ab tom gagodaham. 13 Lahana dat meia gagu gi teo vi vaiam doi pajak atemda labe gi bak vaitesu douda. Lahana am ladehe labet asum ahoba iuba ba tom aame Ala bake tom gagodam vabak. Gi ladi douda. Ahu faidi foelamdi tom gago, ‘Ai oa, em abo faina modemda em am tame. Om eba nom aame faobekesi im neà bak tau meedale,’ lahame ab tom gagoham.” 14 Lahame Yesusat ame im totobe lada lam fi koadume neàdi ame dam laba ab vi gagoham. “Em abo imbo bak uba vameadalo modem bak. Nasi aima. Dat bada nimota am faina meedaha bak lam Alat ozahigeàmu fa gagu faatoi neàdi Alat Am damali fa num bake lahada am bak. Lahana dat amuda lam Alat gagu faatoi neàdi vaha vaba fa num bake laha bak. Labihaha bak. Eho gi neham bak ozome uba labi gagoho bak. Meit neha, ‘Em abo bisi feàda am tame,’ lahame it daetbadume am ee vousai gagomda laba Alat modi fa ee vou usi feà vab datelemda am bak. Lahana meit neha, ‘Em feà vabda am bak,’ lahame it ozome am ahu nemahuba neàt ee vousam vabda lam Alat ame da laba modi fa ee vousai feà datelemda am bak,” lahame ab vahokedaham. 15 Ame di labe dam totbaho labe ozo, “Yesusat fà im data bozna niba Am anekehà odosu neha, ‘Ai oa, Oho data niba neà bak modi esule,’ ” lahame tom gagom bake ozome im data tatvamda zi lam Yesus bake ab vou ledamam. Vou ledume modeha Aba vi tau meedam dam labe iho ame bak lam aahemu ab gut mali meedamam. “Um data Yesus bake a vou li vabidamule.” 16 Lahame labi gut mali gagoha Yesusat ozahigeàmu ame data vou ledam dam zi laba neha, “Lele,” lahame gagu neàdi Aba vi tau meedam dam laba fa neo im ab vahokedamam. “Ame data lam Eba vou ledam neà bak. Uho a mali gagomule. Neham bak. Damat ibi iho vou mode ledume baleàhà bak lam fa veimdi fa data koena zi nibe ibi iho lab vou mode ledume baleàhà bak lam abo daleà azi meit iba vahokedam im aidam bak lamti ulohona meedam dam lam Alat deeli vame Am damali vuusu im vahokedam dam am bak. 17 Imbote. Labi Eho etei uba neo gagolo modem im imboda nidi nim laha nasi aima. Meit ibi iho vou mode ledume baleàhà bak lam fa veimdi fa data koena zi nibe ibi iho lab vou mode ledume baleàhà bak lam abo daleà azi meit iba vahokedam im aime meedam bak lamti ulohona meedam vabameam làhà ba Alat ame dam laba modi Am damali Aho vuusu im vahokedume neà bak modi esuiam biem bak,” lahame ab vahokedaham. 18 Labi vahokedume neàdi modeha ame dam zi labe Yahudi elaidamda meida labe Yesus bake netàdi vi ailo ab gagoham. “Guru bisi neàda oa, eho ana im meedam labet Alat eba modi Amti vahi gi ahe neàna bohu vuusdàla?” 19 Lahame labi vi ailo gagoha Yesusat fa ab vi gagoham. “Om akati eba, ‘Bisi neàda oa,’ lahame labi Eba gagoela? Dam bak niba esuhu dam ahebu bisi neàda kaio. Gi Ala vàmteata bisi neàda am tame. 20 Alat dam bake neha, ‘Nehame meedale. Nehame meedale,’ laham im dat ahamda Musat toedume fi hasi iba esuhu Im Feàna zi lam om ozobohuna taia? Ame im neha taia? ‘Nam dat eheda modeo, dat nam eheda modeo, a modemule. Labi mei a otemule. Labi mei na a aa vamule. Labi na aaha vabda labe, “Eho nehi aaho,” lahame a ostame giomim vàlu gagomule. Labi um ai bake modeo, um oi bake modeo, ahu adat iedi uba gagoho im laba vuzehi meedale.’ Labihasu toedume fi hasi esuhu im lam om ozobohuna taia?” 21 Lahame labi gagoha da nibe fa gago, “Em gi amu bos diat ame im lam faasi vou meedume etei busaolehe bak.” 22 Lahame labi gagoha Yesusat ame da labe lab gagoho im aime fa gago, “Lo. Lahana om im meida vàmtea vekehe bak. Om soa maehe nazoh zi lam ahebu gelevai doit ot loidume neàdi ame doi lam vadume fa faheme dam na vab dama iuba lo. Iuba lo. Lahadale. Oho labi modemeam làhà Alat Aba Aho azihi bak laba oba vahehe nazoh aabo ehete. Labihàmu oho ame doi lam dam na vab dama lodume neàdi fa li Eba tu tau godale.” 23 Lahame ame da labe Yesusat lab gagoho im lam aiha am soa maehe nazoh zi abo feà dàt modemu ahu faidi gi daleàde. 24 Làhàmu Yesusat gi ame da laba aasdam labe fa laba dozeadaha dam zi laba ab gagoham. “Dam nazoh duada labe iho it ozo, ‘Iho Yesusam im aime vuzehi fa Alam damali Aho iba vuusu im vahokedase,’ lahame it ozodamnàme im nazohti nehi ame bak lam uledi meedam biem meo bak. 25 Neham bakti uloho taia? Im unta fi hobu labe aho sue tademna mo labe am bumat kekehena laba ba dalu lafutom biem bak. Labi dat na duada labe aho nehi ozo, ‘Alat laha eba modi Am Dateli eba Vuusu Im Vahokedase,’ lahame gagu meedam bak lam laha modem biem bak. Lahana ba gagohoda lam bisi modem biemda am bak.” 26 Lahame labi gagu modeha ame dam labe Yesusat lab gagoho im lam aime Yesus bake ab vi gagoham. “Aa làhà! Dam na duada labihalahit im dam totbaho ahebu Alat ba iba soat vausu im vei neàdi Amti vahi ahe neàna bohu vuusdam biehe taia!” 27 Lahame labi gagoha Yesusat fa ab gagoham. “Faode. Ame bak lam damat ihimo it modem biem bak. Lahana Ala bisi feàda abo na ahebu modem meo Ala labe ame bak lam modem meo bak.” 28 Lahame labi gagoha Petrusat fa ab vi gagoham. “Imota nehaha bak. Iho Oba vi tau meedam damalelo modemu nazoh ibida ahebu amu gi voedume vausi fa Oba tau vou godam bak.” 29 Lahame labi gagoha Yesusat fa ab vi gagoham. “Lo, oho lab gagoho bak lam imbota imbot. Lahana Eho etei uba neo gagolo modem im imboda nidi nim laha nasi aima. Uho meit neha, ‘Alat dam bake deeli vame Am damali vuusu im vahokedam bak lam eho tau vou vameatedalo mozo,’ laham bak ozome uledi modelo modemu fa am num nazohti modeo, am lahiti am datati modeo, am aiti oiti modeo, am dubu am vahadamti modeo, am nàti modeo, labihasu voedume esmomeam làhà ame da labe aho ahe lahasuhu di nibe Alat fa ame da laba gi ame baleà vouhou na lodam di abo fetehesu duana vi loda tame. Labi laha ba diamut ame da lam gi elomnàme Alat modi fa Amti vahi gi ahe neàna bohu vuusda tame,” lahame Yesusat ab vahokedaham. 31 Lahame labi vahokedume neàdi afoezobe Yesusat Aho gagu olu Am im vameadume esmozi laiam dam dua belas lam vou li vaitesu duzu im nehasu ab vameadamam. “Um nasi iademe aimale. Im etei vahi kota Yerusalem laba zoolelo mozo. Labi laba lafusi dam ahamda Alat vameadaha im aime fa dam bake ahate vameaidaha dam labe iho amu nasi fet toedume esuhu im lam abo damat Eba Asum Ahoba Iubet Bak Niba Li Dateleheda niba ba modem im nim ahebu ab modi imbodelo modemam bak. 32 Damat Em si Yahudi damat modem vab dam abo Ala bake tu vuzehem vab dam laba neo ub lu ame dam labe Eba tozoda. Labi Eba feàtàom labe keha Em soa beàda. Labi Eba na sokba nasbe ahit alibulehena labe foadume geàdume Em ab otemam bak. Labi Em eloi usi behàsdi Em eloho bak labet Alat modi fa ahedi usa tame. Labihalo modem bak.” 34 Lahame labi gagu modeha Aba vi tau meedam dam dua belas labe Yesusat lab gagoho im lam aiha, “Akati modem im labi gagohela?” lahame im ahulat ihimo vi ozome modeha ozobohudem vabili gi labihasu esu. Ame Yesusat lab gagoho im lam, “Akatihasu modemna modela?” laham bak lam ame di labe ahate fi zeam bitoho vab labe dam lam ba fi gatehe vabak. 35 Labi Yesus Aba vi tau meedam damti kota Yerusalem lalo ladam lahasuhu di labe num debu Yeriko laba fuseo vabali modeha dat fako faida na aam biemda labe zie obe laba aida. Ame da lam gi meia na vi taulelo aida. 36 Labihamda labe dam duada zi lebohotedam bak dae aidàmu ab gut gagodamam. “Bak nim amat ana im meedàla?” 37 Lahame ostame gut gagodume modeha dam nasi dozeadaha dam labe gago, “Ne, Yesus Nazaretda gi ab lebohoti Yeriko bake lalo modemam bak.” 38 Làhàmu dat fako aubesuhuna nibe ab buteham. “Yesus abo Dat Ahamda Boehàda Daud Vou Faat Lehe Mekehàda oa, Om eba aame faobekesi im neà bak tau meedaleee. Alat Gagu Fihasi Vimteme Oluhu Dat Boehàda, ‘Om am tame,’ laham bak em ozobohuteee.” 39 Lahame buddume modeha ame dam nasi dozeadaha dam labe fa gago, “Mm, a gagomule,” lahame mali modeha ame da nibe ailahigeàmu fa bisteat neo vi budda. “Dat Ahamda Boehàda Daud Vou Faat Lehe Mekehàda oa, Om eba aame faobekesi im neà bak tau meedaleee.” 40 Lahame bisteat vi buddameilahit Yesus gi laba ab duzuham. Duzu gago, “Le gagome vou lele,” lahame gagohemu dam ahe damat le ve ab vou leham. Vou li modeha Yesusat ame da laba ab gut gagoham. 41 “Eho oba akati modemna oho Eba buddàla?” Lahame gagoha ame da labe fa Yesus bake ab vi gagoham. “Kaio. Ai oa, em gi fako na aam biehemu àvodi na aalo àhàki Oba vi buddalo.” 42 Làhàmu Yesusat fa ab vi gagoham. “Lo, oho nehame ozoho labe, ‘Yesusat eba modi fa neàdem bak,’ laham bak lam oho nasi tu vuzehehe labe om fako faidehe bak lam Eho modi fa na aam ab neàdeham bak.” 43 Lahame Yesusat gi etei labi gagoha ame da labe am fako fa na aam bak ab neàdeham. Labihàmu ame da labe fa zie doni laba Yesus bake gut vi tau ab vi vuladamam. Vuladam labe, “Ala abo feàte,” lahame vou bae lada. Labi dam duada labe da nim fa neàdehe bak lam aahemu laha vi tau Ala bake ab vou baedaham.

Lukas 19

1 Labi vou bae ladume modeha Yesusat ame num debu Yeriko laba lafusi labohotelo meeda. Labiham di lam Yeriko laba Zakeus laha laba ehet. Meia gagu gi teo vi vaiam doi pajak gut gagome vam dam labe im boehàda meida Zakeus am. Am abo na duada am. 3 Zakeus am Yesusat ledam bak aihemu am abo Yesus bake aalo àhàke. Lahana dam duada labe Yesus bake valadam labe dam duali Yesus aam biehemu Yesusat lam bak laba ahamo nasi vazidazi emoeme le uto zisi ausi gut aasda. Am gi buuna buà modehe labe labihaha bak. 5 Labi aasdameam Yesusat lehe labe Zakeus aidam adba laba li duzu tom aaha Zakeus ut aasoa aidam bak aame tom gago, “Zakeus om taho usele. Em etei nim om numa izi neo lam bak modelo modem bak.” 6 Lahame labi gagoha Zakeus gi àvodehat usi deelehat Yesusti ahili am numa ab laham. 7 Labi am numa le vou olesome modeha dam duada labe num zoho obe laba dozeadaha dam labe Zakeus labe aho Yesus am numa vou olelo modem bak aahemu ab tozoham. “Ea, ne Yesus gi dat faina modemda laba ana modi deeli vou izeo mode?” lahame ab tozome gagoham. 8 Lahana Zakeus aho gagom im gi dam labe fà aisome Yesus bake ab gagoham. “Dat Boehàda oa, em etei nim em nazoh duana ahebu faheme totbaho dam na vab dam laba lodam bak. Labi eho mei doi ahi vageme vaiamdaleàmu na ebe eho esuhuda totbaho lam laha faheme dam laba fa duana lodam bak. Eho amu meia vageme doi vaha di gi koena vaha bake etei abo fa duana lodam bak.” 9 Lahame labi gagoha Yesusat neha, “Oho etei lab gagoho bak lam Em ab aime ozobohudeham bak. Om lahi datati ubu uho faina meedàmu Alat uba beolo modem bake om abo om tai Abraham labe aba aho amu Ala bake lab tu vuzehehe bak lamti ulohona oho laha modehemu etei nim Alat ozahigeàmu fa uba soat vausu ab vei neàdeham bak. 10 Em Abo Asum Ahoba Iubet Bak Niba Li Dateleheda bak niba lehe bak nim gi damat faina meedàmu Alat beolo modesdam dam lam abo Zakeusti ulohoda lam Eho nabime soat vausu fa vei neàdedalo lehe bak. Abo dat domba vou aasdamda labe am domba zie fàusi git ub oedahemu fa vi nabime vame fa iademe oumahedam datti uloholelo Em bak niba lehe bak,” lahame ab vameadaham. 11 Labi Aho lab vameadaha im lam dam zi labe ame im lam aidam lahasuhu di labe vedi nehi ozo, “Yesusat Am kota Yerusalem ab fuseo vabaleham bak. Aho kota Yerusalem laba le lafusi im Israel dam vahi vuusu im vahokedam bak abobo modem bak etei ab faasi meedalo modemam bak,” lahame labi ahu ab git ozoham. Làhàmu Yesusat, “Aho Boehàdateboli dam bake vuusu im vahokedam bak fum kaio,” lahame vameame tombalelo ame dam laba im totobe nidi nim neo nehame ab faasi vi fi koadamam. 12 “Dat elaidamda meida nibe aho ozo, ‘ “Em boehàdateli neàdi eho fa em dam vuusu im vahokedase,” lahame fa boehàdatebo laba le fa gagu boehàdateli neàdi em fa li em dam vahi vuusu im vahokedalo modem bak,’ lahame ozome neàdi bak bohula bak laba lalo ab usaham. 13 Usai lalo modem di labe am na meedam dam sepuluh gagome li dozeadume neàdi doi oona emas lam abo nazoh feàna vamna sepuluh lam faheme am dam laba vàmtea lodume uloholi it vameada. ‘Em doi uba gi koena lohona nim uho vame vou le fa na vame ot loidam bohu vuusdume fa doi dualehena em fa li aase,’ lahame labi gagu neàdi usai bak bohula bak laba ab laham. 14 Labi ladam di labe ame da labe aho vuusulo modem dam zi aba vi feàtàdume fa dam totbaho fàsi dam laba nehame gagu ab vi oluham. ‘Uho boehàdatebo laba le gagole. “Im da labe boehàdateli iba vuusum bak im moho,” lahale,’ lahame labi gagu ab oluham. Làhàmu dam ba vulahada labe labi le boehàdatebo laba gagoha 15 boehàdatebo gi ailahigeàmu ame da laba ab modi boehàdateleham. Boehàdateli fa am bake ab oluham. Labi boehàdateli fa am bake ledume am numa ab lefuham. Am numa lefusi aho amu am doi lodaha dam abo am na meedam dam sepuluh laba, ‘Am doi dualeheo?’ laham bak aalo ame dam laba, ‘Lele,’ 16 lahame gagu modeha ame da ahamte li duzuhuda labe li duzuhemu dat naeda labe ab ailo gagoham. ‘Eho oba loho doi lam akatihahela?’ Lahame labi gagu vi aaha ame na meedamda labe neha, ‘Ai, doi oona emas vàmtea oho eba lohoda lam eho modi fa duali ab sepuluhleham tame.’ 17 Lahame labi gagoha dat naeda labe fa gago, ‘Lo, làhà oho modehe bak abo neàte. Om abo na meedamda bisi neàda am bak. Eho oba doi koena lohona oho abo iademe vou aasdume fa dualehemu eho fa oba modi boehàdateli oho num debu sepuluh labe im dam zi lam vuusu im vahokedam bak ab modelo modemam bak,’ lahame ab gagoham. Lada labiha. 18 Labi na meedam dam meida labe ba neo li duzuhemu dat naeda labe ab ailo gagoham. ‘Eho oba loho doi lam akatihahela?’ lahame labi gagoha dat ba leheda nibe gago, ‘Ai, doi oona emas vàmtea oho eba lohoda lam eho modi fa duali ab auoholeham tame.’ 19 Lahame labi gagoha dat naeda labe fa gago, ‘Lo, làhà oho modehe bak abo neàte. Labiham bake eho oba modi boehàdateli oho num debu auoholehena labe im dam zi lam vuusu im vahokedam bak ab modelo modemam bak,’ lahame ab gagoham. Lada labiha. 20 Labi na meedamda meida labe ba neo li duzuhemu dat naeda labe neo ab ailo gagoham. ‘Eho oba loho doi lam akatihahela?’ lahame labi gagoha dat ba neo leheda nibe gago, ‘Ai, oho eba doi oona emas vàmtea lohona neam bak. Om abo dae teuna meedam dàt iba vuusu meeda. Om bisi meit debe soalehena gi ahum gagome vada. Meit ahamo meedume vanamai nuhatehena oho vedi gi ahum vada. Om labiham dàt modehe labe oho eba loho doi oona emas vàmtea lam eho meedume ame emas lam dualehe vaba setemeam làhà oho eba li faki beom bak labna zohàme em fa oba vei iedi meedam labe eho doi lam gi oho loho di labe ve sue zohot giame gi esdam bohu meedume fa om ab leham bak.’ 22 Lahahat dat naeda labe ame lab gagoho bak lam aime faki ab gagoham. ‘Làhà, om em na meedamda abo bisi fai bak modem dàt modem bak. Oho lab gagoho bak lam eho ab aiham bak. Labihàmu eho gi ame bak labet fa zuhou na asimbuna feà oba ab modelo modemam bak. Oho neha, “Em abo dae teuna meedam dàt uba vuusu meedala. Em bisi meit debe soalehena gi ahum gagome vadala. Meit ahamo meedume vanamai nuhatehena eho vedi gi ahum vadala,” lahame om labi ozobohudi gagomda labe akati eho oba loho doi lam oho neo ve damat mei emas modi duaedam num laba vou oli esu eho fa lehezobe ame emas fa dualehena oho eba gut lom vaba modela?’ 24 Lahame labi gagu neàdi dat naeda labe dam aba obe laba netàdi dozeadaha dam laba gago, ‘Da nibe vuusuhu doi oona emas vàmtea lam si vietoi fa em na meedamda meida labe aho em doi modi sepuluhleheda laba taho fa lole.’ 25 Lahame labi gagoha ame dam labe àvodi gago, ‘Aa! Ai om akati labi gagodà? Ame da lam oho amu doi sepuluh lohona ba akati doi nidi nim neo vi loe?’ 26 Lahame labi gagoha dat naeda labe fa gago, ‘Neha taia? Eho meia neha, “Em na nimota oho vou aasdale,” lahame gagu ame da labe iademe vuusu vou aasdameam làhà eho ame da laba neo neha, “Em na nidi nim oho laha vou aasdale,” lahame gagu ame na vi tau duali feà bak fusi vuusu vou aasdam bak. Laham vabameam eho meia neha, “Em na nimota oho vou aasdale,” lahame gagu ame da labe iademe vuusu vou aasdam vabameam làhà eho naedat ame da laba gagu meedam im lam gi fa faatoi vei setem bak. 27 Labihàmu uho nasi le dam amu neha, “Im da labe boehàdateli iba vuusum bak im moho,” lahame eba faki labi gagoho dam laba le gagome eba fa vou ledale. Labi eba vou li vou dozeadume em aasdahit ame dam lam oddume voedale,’ lahame ab gagoham.” Lahame Yesusat im totobe lada lam ab fi koadaham. 28 Labi im lada lam fi koadume neàdi Yesus Aba vi tau meedam damti vahi kota Yerusalem ab tom lalo ladamam. Tom ladam di labe Yesus nasi lada. 29 Labi ladume Zaitun Dee Dozeadaha Bak Buzoho bak laba tom ladume bak labe modesuhu num debu behàsu Betfageti Betaniati lahaha doni laba fuseo vabalehe di labe Aba vi tau meedam dam meida behàsu nasi gagu olulo meeda. 30 Gagu olulo modem di labe Aho nehi vi vameada. “Um ahim nim num debu iba netàdeheda laba lefusi aameam keledai fi ho adat gàhàda lo vààsdam bak aa tame. Ame keledai lam amu damat nusu gohatehe vaba alimda modem bak. Keledai lam lo vuhatoi vuusu vou lele. 31 Lo vuhatolo modem di meit uba nehi gagomeam, ‘Im keledai uho ana modelo lo vuhatolo modela?’ labihameam làhà uho fa nehi gagole. ‘Boehàda Aba Aho ozoho baket modelo modemu vou lalo mozo,’ lahame uho da laba labi gagole,” lahame ab vameadume oluham. 32 Labi le aahat Yesusat lab gagu oluhu bak lam ab imbodeham. Ame keledai fi ho adat gàhàda num zohobe laba lo vààsdam bak ab aaham. 33 Labi le lo vuhatosome modeha keledai dedam labe gago, “Aa! Im keledai uho ana modelo lo vuhatolo modela?” 34 Lahame labi gagoha dam behàsu nibe fa ab gagoham. “Mm vabà! Boehàda Aba Aho ozoho baket modelo modemu vou lalo mozo,” lahame ab gagoham. 35 Labi gagu neàdi lo vuhatoi loa vuusu fa Yesus bake vou li ibi iho sue sona ahoba dusuhuda vihilame ame keledai adat gàhàda labe am toha laba ab nom gutaudaham. Labi gutaudume neàdi Yesusam naba tom odosi zisi nusu ab ladamam. 36 Labi zisi nusu zie ladam di lam dam dua totbaho labe im sue sona ahoba dusuhuda lam laha vihilame ame keledai Yesus vou lam zie laba vou olualada. 37 Labiha ladume Yesusat Zaitun Dee Dozeadaha Bak Buzoho laba zizi kota Yerusalem lazesome modeha Aba Aho vahokedam im ozobohudelo vi tau meedam dam zi labe Yesusat na damat ihimo modem biem im feàna Aho amu meedaha im vi ozome deelehat ab faasi Ala bake bisteat ab vou baedamam. 38 Nehame vou baeda. “Alat Aho Gagu Olu Ot Vai Im Dedateli iba etei lehe Dat Boehàda nim abo feàteee! Ala asum ahoba iumti im bak niba esdam damti fà modi vahe vahedase. Labihalo modemu imo Ala bake vou baedase.” Lahame meit buteme vou bae lada. Meit buteme vou bae lada. Labihada. 39 Labi vou bae ladume modeha Farisi dam totbaho lab vi tau dozeadaha dam labe Yesus bake gago, “Guru Oba vi tau meedam dam zi nibe Oba vou baedam bak Oho gagu fa malele.” 40 Lahame labi gagoha Yesusat fa gago, “Labiham vabiem bak. Ne, dam nim gagu dae vabameam làhà ke nibe fa ahali Ala bake vou baedam bak. Labiham bake etei di nibe vou baedam bak ba vabalem vabak,” lahame ab gagoham. 41 Labi neo ladume Zaitun Dee Dozeadaha Bak Buzoho bak labe nom ladume kota Yerusalem fuseo vabali nom aaha dam num nom aadàmu Yesusat meb dae ab faaham. 42 Ame dam lam dam amomoit faki beolo modemu Yesusat vi ozome faobekesi Ahamo im mebet ab vameadamam. “Um kota Yerusalem dam akati etei nibe ahu vàmadi fa vahem bak vabili mode? Ame bak lam um etei ozobohudemeam làhà um ba gi neà bak tadem bak. Lahana um ba lahame ame bak lam ba ozom vabak. Ab vaitoham tame. 43 Um ba diamut dam uba fakehe damat li ahiledou vabousu beom bak. Um ba meida futoi itam vabak. 44 Gi um data nazohti ahebu beome setem bak. Labi um num zi lam laha ahebu faatoi setem bak. Alat uba faobekesi vuusulo oluhuda um ailahigeàmohemu labiham bak,” lahame mebet ab vameadaham. 45 Labi im lam vameadume neàdi Yesusat neo le kota Yerusalem laba lafusi Fihasi Ala Bake Vou Baedam Num Vàmteabu labe am ad oli aam bak tomba laba le duzu aaha damat Ala bake vou baedalo na Ala bake lomna ot loidam bak aahemu meoli dam na ot loidam dam zi lamti na vadam dam lamti meoleme ootedume ab futodamam. 46 Aho meoli gago, “Um ozom vaba? Meit Alat Vameadaha Im Toedahana laba im meida nehi toehe bak. ‘Alat neha, “Em num nim gi Eba tom gagodam numat modem bak.” ’ Lahame toehena um akati aalahigeàmu meit na aa ve voutame fi olehe bak ozome vou oli vasti esdam bakti ulohona modi Em num feàda niba oli im mei faasi meedàla?” lahame faki meoli meedam labe dam soa odosi veimome dam ab ilidamam. 47 Labi Yesusat kota Yerusalem laba aidam di lam gi Fihasi Ala Bake Vou Baedam Num Vàmteabu labe am ad oli aam bak tomba laba le dam bake vahokeda. Labi dihasi neo gi ame baket meeda. Labihadam di labe Yahudi damat ibi iho tu vuzehi meedam im vuusdam tohe dam zi labet vedi vahi Yesus otesome meedaha dam duada zi labe bisi Yesusat lab vahokedam im tu leidàmu otem vabi gi vabeddam bak meeda.

Lukas 20

1 Labi ba neo digat meida iube Yesusat ame Fihasi Ala Bake Vou Baedam Num Vàmteabu labe am ad oli aam bak tomba laba neo le ame bak laba dozeadaha dam zi laba vahokeda. Labi laha, “Alat Dam Bake vuusu im vahokedam bak lam, ‘Akatihasu modemna modela?’ ” laham Im Neàna lam ame dam zi laba laha vameadume fi deda. Labihadam di labe ame Yahudi damat ibi iho tu vuzehi meedam im vuusdam tohe dam zi laha vahi tau dozeadaha dam labe Yesus bake li netàdi vabi vi ailo ab gagoham. 2 “Ne, Oba amat modi vizi teudi im feàna lam Oho duzu meedàla? Oho nib li meedam im nim Oba amat gagu im dedateli Oho vuusu meedàla?” 3 Lahame labi gagu modeha Yesusat fa gago, “Im ubuda faode. Ebe Eho etei uba vi ailo gagomda nim uba nasi vi gagu aise. 4 Ne, Yohanes Mei Vuu Valo Baptisleiamda labe aba aho amu mei vuu valo baptisleiam bak lam amat Yohanes bake gagu aho ame bak lam meedahela? Alat aba gagu aho ame bak lam meedaheo? Laham vabameam damat aba gagu aho ame bak lam meedaheo? Akatihahela? Uho ame bak lam Eba fa gagomta uho etei Eba lab gagu vi ailo modem bak lam Eho fa uba vi gago tame.” 5 Lahame labi gagu vou faoha ame Yahudi ee dam zi labe gi ihimo ot gagoida. “Uho ozom, iho akatihasu fa Yesus bake gagoe? Iho nehameam, ‘Alat Yohanes gagu olu meedaha bak,’ lahame labi gagomeam làhà Yesusat fa iba nehame vàlu gagom bak. ‘Ne, um lahana akati Yohanes am im aime tu vuzehem vaba moudume mohela?’ lahame iba labi fa gagom bak. 6 Lahana iho nehame gagomeam, ‘Damat gagu oluha,’ lahameam làhà dam etei iba tau dozeadaha dam totbaho zi nibe fa iba faki ke visomoame iba beodume elodà moio? Neham bak. Dam etei iba tau dozeadaha dam totbaho zi nim, ‘Yohanes ba damat gagu olu meedaha vabak. Am gi Alat vameadaha im aime fa dam bake ahate vameaidahada meida am am bak,’ lahame labi ozodam labe iho fa im mei gagomeam làhà dam iba faki beom bak.” 7 Lahame ame dam busaoda zi labe ihimo vou faovoi iedi fa vei biehenali Yesus bake fa ab gagoham. “Yohanes aho amu lab meedaha bak lam, ‘Amat gagu olu meedàla?’ laham bak lam im bieho.” 8 Lahahat Yesusat fa dam laba ab gagoham. “Lo, làhà Eho li meedam im zi nim, ‘Amat Eba gagu olu Eho im dedateli meedàla?’ laham bak lam Em laha ba uba gagom vabak,” lahame ab vasteham. 9 Lahame labi gagu neàdi Yesusat lab dozeadaha dam zi laba im totobe nidi nim neo nehame ab faasi fi koadamam. “Dat utoho deda nibe am tat vueheba laba am na meedam dam gagome anggur neb zi deddume neàdi esu. Labi bak mei bake le azibehamdi fa lelo modemu dam na debe soali modeme vahem dam zoho laba gago, ‘Uho em anggur dee nim teohet vou aasdume amdehezobe modeme vahedam di zoho uho va. Zoho eba naedate vahedume esu. Labihadale,’ lahame it gagu esmozi bak bohu bake ab laham. 10 Labi le aidamehamdi ozoha, am anggur oo vaedume amdem bak fuhemu fa am na meedamda meida laba gagu ab oluham. ‘Em anggur dee teohet vou aasdam dam labe iho ot loiame vaha doi ebe eho vam zoho eba esuhuda lam le vame fa vou lele,’ lahame gagu ab oluham. Labi le gagoha ame anggur dee teohet vou aasdam dam labe ame da lam lehemu gut si foadume saemea fa ab oluham. 11 Labi anggur deda labe gut aaha dat gi saemea fa lehemu am na meedamda meida laba neo gagu fa ab oluham. Labi olu lafusi modeha ame anggur dee teohet vou aasdam dam labe neo gi gut foadume game ladi fa saemea ab oluham. 12 Labihàmu ame anggur deda labe neo gut aaha neo dat gi saemea fa lehemu dat meida laba neo gagu oluhu bak ab làteladeham. Labi olu fusi modehat ame dam labe neo ame da nim gut beome nisili visoi anggur dee natàh zidazi ab vooham. 13 Labihàmu ame anggur deda labe vi ozo, ‘Ne, em akati mode? Làhà gi em adat vàmtea ebe eho deeleheda nim gagu oluse. Eho labihameam dam labe fa em adat bake vei ladi ahu adat iedi fa eba doi lu olum zoaha bak,’ lahame vi ozome neàdi am adat ab gagu oluham. 14 Olu ladume lafuseo vabalehe di labe ame anggur dee teohet vou aasdam dam labe gi bak bohulana gut aaha anggur deda labe am adat ledam bak aahemu neha, ‘Da nim ba am aiam na misia vamda am taia? Imo da nim oteme afoezobe anggur dee nim fa im na misialese,’ lahame im aa ab odoadaham. 15 Labi im aa odoadume neàdi ame da fuhuzobe neo gut si vou kea lame anggur dee natàh ke labe vou futoi bako iuba ab oteme vooham.” Lahame Yesus ame im totobe lam fi koadume neàdi neo ame Yahudi dam busaoda zi laba vi ailo ab gagoham. “Uho ozom, ame anggur deda labe fa li am anggur dee teohet vou aasdam dam laba li akati modela? 16 Gi neha taia? Dat naeda fa li ame anggur dee teohet vou aasdam dam laba oddam bak. Labi oddume am anggur dee lam fa dam amomoi gagome fa vou aasdam bak,” lahame im totobe lada lam fi koadume neàdi modeha lab dozeadaha dam zi labe Yesusat lab gagoho bak lam aime ozo, “Alat iba Yahudi dama labihalo modemna ozomo?” lahame tombu ozobohudi fa Yesus bake ab gagoham. “Vabà! A labihamule.” 17 Lahame labi gagohemu Yesusat ame dam totbaho labe Aba moho bake vi ozome Aba vi gagoho dam laba vi aasu gago, “Imbo bak. Eho etei uba lab gagoho bak lam abo imbote. Lahana meit Alat Vameadaha Im Toedahana laba im meida nehi toehena nim um aame vi ozobohudehe vaba? ‘Dam num moadam dam labe, “Faite,” lahame mu vooho ke lam fa feà Dateli bisi num mome teudem ke am bak.’ Lahame toeme esuhu im lam uho ozom, akatiham bake labi gagohela? Ame im lam gi neham bak. 18 Ame ke lam Alat Gagu Fihasi Vimteme Oluhu Dat Boehàda Em am bak. Meit Ebe Eho vahokedam im tu vuzehi meedam vabda lam gi da nibe ke bake gitadi vàhàdemdati uloho bak. Laham vaba ame ke labe ame da laba fi tmai bake deebosi setemdati uloho bak,” lahame Yesusat ab vameaham. 19 Labi dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti damat Ala bake lomna ve vua vahudam toheda zi laba vuusu im vameame faheme modiam dam lamti ame dam labe ozo, “Oo, Yesusat etei lab vameadaha im lam gi iba vàlu vameada taia? Aho li vahokedaha im lam iho aim mu vooho bak laba ozome ame anggur dee teohet vou aasdam dam laba gi vàlu im totobet fi koada taia?” laham bak ozobohudehe labe abo Yesus silo àhàki nabidaha dam duada totbaho labe Yesus bake tuhuda feà labe iedi sim bili gi vabedda. 20 Labi iho Yesus sim biehemu fa ba sim neàdi vou fuhuzobe, “Sise,” lahame gi vou faoda. Vou faodam labe ozo, “Yesus git gagohozobe si fa gubernur iba vuusdamdate vou le ub lu aho im dedateli fà uloose,” lahame fa dam amomoi bake ab gagoham. “Uho ahit Yesus bake le neà damali vahi keobaedale,” lahame gagu Yesus bake ab oluham. 21 Labi Yesus bake le dam duada zi totbaho labe vou faodahit ahit fi bovai im ab vameadamam. “Guru oa, Oho lab meedam bak lam im ahebu ozobohu bak. Om abo im vameadam di im vamdesu vameadam bak. Labi im vahokem di laha im vamdesu vahokedam bak. Labi Alat ozo, ‘Dam bakda nehasu meedase,’ lahame Aba Aho ozoho im lam Oho dam bake im vahokedam di Om laha gi im vamdesu imbona vahokedam bak. Om ba neham bak modem vabak. ‘Da lam ee feàda Eba im gagohe? Làhà aime tuse.’ Laham vab di, ‘Da lam ee vabda Eba im gagohe? Làhà Em aime tum bak mose,’ lahame ba dam fahem vabak. Om gi ozahit vahi vahokedam bak. 22 Om labiham dàt modemu iho nehi Oba gagu vi ailo modem bak. Im Yahudi dam ihimo dat ahamda Musat toedume fi hasi esuhu Im Feàna zi lam iho tu vuzehi meedam labe Oho ozom, pemerintah iba vuusu meedam bak gohali lodam doi pajak lam iho fa Kaisarleheda laba lodam neào? Ame Im Feàna zi labet iba maleheo? Akatihàla?” 23 Lahame labi gagoha Yesusat dam labe Aba keobaedam bak Ahamo ozobohudi ab gagoham. 24 “Uho ame pajak abo gi vi tau lodam doi oona perakat modehena lam Eba fi male.” Làhàmu ame dam labe le ame doi oona visoi fa vou li Yesus bake ab loham. Labi Aho ve vousai dam bake fi si vimtedam labe ab vi gagoham. “Ame doi nim amam dauha ame doi laba modesuhela? Labi amam ee toehela?” 25 Lahahat dam labe neha, “Dam ahebu vuusdam Kaisarleheda labe am dauhati am eeti modesuhu bak.” Lahame labi gagoha Yesusat fa neo vi gago, “Lo. Làhà uho dam ahebu vuusdam Kaisarleheda laba na abada lam fa naedate loda. Labi uho laha Alat Aba Aho gagohoda lam laha meeda. Labihadale.” 26 Lahame labi gagohemu dam Yesus bake keobaedam dam labe, “Dam duada zi labe Yesusat git gagom bak fà aise,” lahame ame im lam gagoha Yesusat git gagom vabamu àvodi ab daleàdeham. 27 Labi ame digat zoho labe Saduki dam labe laha neo Yesus bake gagu vi ailo ab li dozeadaham. Ame Saduki dam labe iho ozome tuhu im gi neha, “Mei elom di ba fat ahedi usam kaio,” lahame tu ozodam dam am bak. Laham dam labe Yesus bake li vi ailo ab gagoham. 28 “Guru oa, dat ahamda Musat aho toedume fi hasi iba esuhu Im Feàna zi lam im meida nehi toeme fi hasi esuhu bak. ‘Meit am itbaho fatoho vaba elomeam làhà fa ame nam maboe lam am dam zohot fa ve data faasi, “Ame koei labe am data am tame,” laham bak ozome debu bohulalelo ame maboe lam koei labe am vahadat modeo, am dubut modeo, fa vale,’ lahame Musat aham di iube labi toeme fi hasi iba esuhu bak. 29 Ne lahana iho etei vouholo modem im nim Oho nasi aimale. Amu di iube ame dam abo tujuh ehet. Datahida ame. Labi donida auoholehena ame. Labi domuàda ame. Labihasu ame dam tujuh labe dat datahida nam ab vaham. Labi ve modeha ame nam lam data faaha vabna dat ab eloham. 30 Labi ame maboe lam ame koei laba vi tusuhu dàt neo fa ab vaham. Labi ve modeha ame maboe lam data faaha vabna dat neo ab eloham. Labi ame maboe lam dat doni dàt neo fa ab vaham. Labi ve modeha ame maboe lam data faaha vabna dat neo ab eloham. Gi labihasu vou mode ledume dat domuàdate ab vou fuham. Labi vou fusi modeha gi neo ame baket modi ame maboe lam data faaha vabna dat neo ab eloham. Labiha ladume ame dam tujuh lam ahebu ab foli seteham. 32 Labi ame maboe lam ba neo ab vi eloham.” 33 Lahame ame Saduki dam labe iho ame im lam vouhome neàdi, “Im elom di ba fat ahedi usào?” laham bak lam tozolo Yesus bake neo vi ailo ab gagoham. “Làhà Oho lab gagoho bak lam, ‘Mei elom di fat ahedi usam bak,’ lahame Oho lab tu ozome gagoho im lam imbodemeam làhà ba diamut dam ahebu elodaha dam fat ahededume usnadam di lam ame dam tujuh labe ototo vaidume ba vi eloho nam lam Oho ozom, amam namet mode?” 34 Lahahat Yesusat fa ab gagoham. “Vabà! Um git ozo. Dam bakda ahebu bak niba azim di lahi vada. Labi lahit ihimo dat aho vamda gagu vada. Lahadam bak. 35 Lahana ba diamut Alat ozo, ‘Da lada lam am eloho bak labet Eho modi fa ahedi usam neàte,’ lahame Aho labi ozoho dam modeo, lahi modeo, lada zi lamota modi fat ahededume usnadume Alat azihi bak neà bak laba azim di ba meit neha, ‘Em nam valo mozo.’ Labi meit neha, ‘Em dat valo mozo,’ laham bak lam ba labi gagom vabak. 36 Labi laha ame bak laba azim di fa Alat Am im gagu vou usem dam lamti uloholehe labe ba neo elodam vabak. Labi laha Alat ame dam elodahada zi laba Aho modi fat ahededume usnadaha labe ab modi Am damalemam bak. 37 Uho vedi neha, ‘Dam elodaha dam labe im elodaha bak labe ba fat ahededume usnadam vabak,’ lahame git ozodam damat modem bak. Eho ozoha, uho Musat aham di iube toedume esuhu im lam vi aame ozodam vab damat modem bak. Aham di iube ut aabadehena buà lam vuat eludam bak Musat vi aadàmu aasuhat vua elum bak lam taho faali setem vabamu Musat le netàdi ab aasdamam. Labi aasdume modeha Alat am dae vua labe futoi Musa bake nehame vameadaha bak. ‘Em abo Abrahamti Isakti Yakubti labihasu Eho vuusuhu labe ame dam labe Eba vi ozome vou baedam Ala Em am bak.’ Lahame vameadahana toeme esuhu im lam uho mahate vi ozodam vab damat modem bak. Alat aham di iube lab gagoho bak lam ame dam làtela lam gi elodahanàme fat ahedi Aba vou baedam lahasuhu bak lam Aho vameadaha bak. 38 Labiham labe Eho vi ozom dam elodahada zi labe ba Ala bake vou baedam vab taia? Gi dam ahe damat ihimo Ala bake vou baeda taia? Alat ozomta ame dam elodahada zi lam gi ahe lahasuhu damat modem bak,” lahame Yesusat ab vameadaham. 39 Lahame labi vameadume modeha ame dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru totbaho labe iho Yesusat ame Saduki dam bake lab vameadaha im lam aime, “Ahole vahokeha,” lahame ozome Yesus bake gago, “Oho ame lab vameadaha im lam abo imbona vameadaho,” lahame ab gagoham. 40 Labi gagu modeha ame dam labe ladi ba Yesus bake fa li im vi aim bak ab moham. 41 Labi Yesusat neo ame dam zi laba neo vi vameada. “Damat akati modi ame Alat Gagu Fihasi Vimteme Oluhu Dat Boehàda laba im nehasu gagodàla? ‘Am abo boehàda Israel dam bake vuusdam dat ahamda amu gi eloi seteheda abo Daud labe am mekehàdat modem bak,’ lahame labi gagodàla? 42 Nehaha bak. Boehàda Daud aham di iube aho Ala Bake Vou Baedam Labe Ladeem Im Toedahana laba im meida nehi toehena ehe bak. ‘Na Debu Modehe Ala labe Aho fa eba vuusdam Boehàda laba gago, “Om Em ahi totbaho niba nusu Eba tau im dedateli dam vuusu im vahokedase. Labi Eho dam Oba fakemoholehe dam zi lam Eho ahit modi bedi fà Oba iedi uledi im Oboda fà aime meedase.” ’ Lahame Daud aham di iube labi toeme esuhu bak. 44 Daud ahamo Alat Ba Gagu Fihasi Vimteme Olulo Modemda Boehàda laba neha, ‘Eba vuusdam Boehàda,’ lahame labi gagodàmu ba akati meit Alat Gagu Fihasi Vimteme Oluhu Dat Boehàda laba neha, ‘Boehàda Daum mekehàda modem bak,’ lahame labi gagodàla? Labihameam làhà Alat Gagu Fihasi Vimteme Oluhu Dat Boehàda lam fa Boehàda Daud vafozi bisi feà Dateleheda Am taia?” lahame ab gagoham. 45 Lahame labi gagoha ame dam duada zi labe Yesusat lab vahokehe im aidam di labe Yesusat fa Aba vi tau meedam dam zi laba neo im vahokeda. 46 “Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru labe ibi iho meedam bak uba fa vizemo. Labiham bake um abo iademe it vou faovoi meedale. Ame guru zi labe ibi iho meedam bak gi nehadam bak. ‘Dam totbaho iba fà gut baedase,’ laham bak ozome sue sona ahoba dusumda bohuna duadume damat im vameadam bak tomba laba le it aai it aaidam labe deeli goom bak ame. Labi iho neo dam duana zi dokbuedam bak laba le damat fà, ‘Neàte,’ lahame iba gut gagom bake deeli meedam bak ame. Labi neo im Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di vedi dam feàda ihimo nusum bak laba deeli nusualadam meo bak ame. Labi laha na zi vaheme àlo modem di vedi dam feàda ihimo nusu na àm bak laba bisi netàdi vi tau nusu na àdam meo bak ame. 47 Labi laha maboe zi laba ahit neha, ‘Im om vou aasdalo mozo,’ laham dam labet vedi ahi vageme netàdi maboe nazoh fetehesu vi vadume dualem bak ame. Labi laha Ala bake tom gagodam di iho lab faina modehe bak lam vedi ahit vasti ihimo neà damali gi Ala bake la gagoi le gagoidam labe bohulaledam bak ame. Labihasu meedam damat modem labe Alat ba diamut ame dam laba, ‘Fà duana modi geàdase,’ lahame na asimbuna feà meeda tame,” lahame ab vahokedaham.

Lukas 21

1 Labi Yesusat ame im lada lam vahokedume neàdi Aho Fihasi Ala Bake Vou Baedam Num Vàmteabu labe am ad oli aam bak tomba abo damat Ala bake lodamna vahedamnabu modesuhu bak laba netàdi nusu aidam di labe gut aaha dam na duada labe doi ibida Ala bake lolo modem doi vou li duadam bak laba vi aasda. 2 Labi neo gut aaha na vab maboe labe neo li aba aho Ala bake lolo modemna abo doi oona koena behàsu tembagat modehena ab vou li tau dusuham. Ame doi lam ozom di na vam biemna ozomomnat modem bak. 3 Yesusat ame bak lam aahemu Aba vi tau meedam dam laba ab vameadamam. “Eho etei uba gagolo modem im imboda nidi nim nasi aima. Na vab maboe labe aba aho etei Ala bake loho doi lamti dam duada labe ibi iho Ala bake lodaha doi lamti labihasu ozom di bisi na duana Ala bake lohona ozomomda gi maboe abada am bak. Neham bak. 4 Ame nazoh dua dam labe vedi doi dua totbaho iho naedamat vada. Labi gi totbaho Ala bake loda. Lahadam bak. Lahana nam maboena lam labiham kai. Ame maboe lam am na vab nam modemnàme abada gi ahebu loho bak. Aba aho modi ahedelo modem bak gi ab lu seteham bak,” lahame Yesusat ab vameadaham. 5 Labi ame di labe Yesus bake vi tau meedam dam labe ame Fihasi Ala Bake Vou Baedam Num Vàmteabu laba tom nabidume Yesus bake ab gagoham. “Guru oa, ame Num Vàmteabu nim Om aadào? Abo ke neànat modehe numat moz. Ame Num Vàmteabu niba damat Ala bake vahedaha nazoh nim abo na neàna taumahe làbohonat moz. Abo neàte,” lahame labi vou baedume modeha Yesusat fa ab vi gagoham. 6 “Uho etei lab aadamna lam bisi labaha bohu modesdam vabak. Ame ke mei ahoba vou vahe zihina zi lam ba fa faamome gi alimdi seddam bak,” lahame ab gagoham. 7 Lahame labi gagoha ame dam labe Yesus bake neo vi gago, “Guru oa, Oho etei lab vi ozome gagoho im lam adi diat modemna gagohela? Labi ame bak lam modelo modem diat amu ana nasi iba fet vouhoho bak iho aame ozo, ‘Ame bak lam ab modelo modem ame?’ lahame iho ana aame ozobohudela?” 8 Lahame labi gagoha Yesusat fa ab gagoham. “Iho bak niba esu meedam im zi ahebu ba novai vaitolo modem digat fuseo modem di lam amu im nehamda nasi meeda tame. Amu dam duada totbaho labe uba nasi li neha, ‘Em abo Alat Gagu Fihasi Vimteme Oluhu Dat Boehàda am tame.’ Labi, ‘Etei di nim Alat abo Boehàdateboli Aho dam bake deeli vame vuusu im vahokedalo modem di ab vou fuham tame,’ lahame uba li ahit vageme keobaedam bak ehete. Lahana ame dam labe uba li keobaedam im lam a aime tu vuzehemule. 9 Labi laha ame ba novai vaitolo modem digat fuseo modem di lam damat uba nasi li neha, ‘Dam bak kia bak ium ot fakiame ot belui ot beluidalo.’ Labi, ‘Dam bak ium dae gai feà zidam labe nohisi mei nazoh beluidalo.’ Labihasu meit uba nasi li vameadam bak ehete. Lahana uho im labihasuhuna aim di um ahu a bisi iedi vi ozodamule. Ame ba novai vaitom digat lam di labe taho fum vabak.” 10 Lahame labi vameadume afoezobe Yesusat neo vi susume vameada. “Ame ba novai vaitolo modem digat fuseo modem di labe im nehasu laha meeda tame. Dam debu fa vàmadiaha bak lamti dam debu fa vàmadiaha bak lamti ot fakiame ot belui ot beluidam bak ame. Labi bak amomoi vuusdam boehàda am damti bak amomoi vuusdam boehàda am damti labihasu ot fakiame ot belui ot beluidam bak ame. 11 Labi bak iuba modeo, bak iuba modeo, balim feàna nigome dam beodume foedam bak ame. Labi bak iuba modeo, bak iuba modeo, di neà faasi bak aotbali na debe soali àm vabili idoali ibzidume dam elodam bak ame. Labi bak iuba modeo, bak iuba modeo, gailem bak vou vizealamna modi ket vua dou fi hiludam bakti ulohona vou vizialadam bak ame. Labi laha asum laba damat fet aame iedemna im amu aam vabna feà damat aadam bak ame. Labihasu ahamte faasi meedam im zi am bak. 12 Ame im zi lam ahebu meedalo modem di labe uho Eba tu vuzehi vi tau meedam damat modemu uba nehada tame. Yahudi dam labe ibi iho tu vuzehi meedam bak gagu faheme modiam dam labe fa uba faki vabidume fai baket meedam bak ame. Labi laha uba fakemoholehe dam labe um siàdume fa uhumo fi hasi bakamta vahi Alat vameadaha im ahamda dogoit aidam bakti im meiti meedam num laba vou le ame num vuusdam dam labe uba uloodume ame im aihizobe dam amomoi gagu um si mei ousu teudem num laba um oumahedam bak ame. Labi laha uho Eba tu vuzehi vi tau meedam damat modemu uba fakemoholehe dam labe ozo, ‘Im boehàda zi labe laha dam nim uloodume vi aime beodase,’ laham bak laba ozome um siàdume bak ahaladiame vuusuidam boehàdatebo zi lamti dam eeda zi lamti laham dam laba vou le duzu uba uloodume aidam bak ame. 13 Lahana ame bak lam meedam di a iedemule. Neham bak. Damat uba lab meedam bak labet modi Ebe Eho meedam im lam uho fi desi tombalem di am bak. Uho modi tombalehe labe fa ame Roma boehàda zi lamti Yahudi damat modem vab dam totbaho lamti iho fa aime ozobohudem bak am bak. 14 Ame dam labe uba tet uloodalo modem di labe uho dam laba fa veibadam bak lam, ‘Iho im akatihasu fa vi gagoela?’ laham bak a bisi àvodi vi ozodamule. Gi ahu keahumtedesu vou faodale. 15 Damat uba uloodam di labe uho fa gagom dae lam Ehemo uba modi ozobohudi fi gatehe labe uho ame bak lam gagodam bak. Uho lab gagodam dae lam uba fakemoholehe dam labe ba uba ot vai dae meoli vi daetesu gagom vabak. 16 Labi laha ame di labe uho Eba tu vuzehi vi tau meedam damat modemu dam duadat uba faki im nehasu meeda tame. Um aiti oiti modeo, ubu meidam modeo, um ame dam modeo, um ot vou aliam dam modeo, laham dam Eba tu vuzehi meedaha vab dam labe laha um fa vou fohome meia gagu si ame eeda zi laba vou ladume ub loda tame. Labi um dam totbaho lam ame eeda zi labe im meo dam laba gagu um odda tame. 18 Lahana um eloi it oazehena lam ba Alati vaitesum vaba gi Amti vahi ahe neàna bohu vuusdam bak. 19 Ame na uba lab vabidamna zi lam uba modi bedi Eba tu vuzehem bak voomna zohàme abo mahate keàtedi Eba tu vuzehi meedale. Uho labi meedameam làhà um abo gi Alati vahi ahe neàna bohu vuusda tame,” lahame Yesusat ab vameadaham. 20 Lahame labi vameadume neàdi Yesusat neo vi susume vameada. “Um nasi aimale. Dam ahamda Alat vameadaha im aime fa dam bake ahate vameaidaha dam labe aham di iube neha, ‘Kota Yerusalem laba vahi azim dam labe iho faina meedàmu Alat faki ame dam lam beoda tame,’ lahame amu nasi fet toeme esuhu bak lam abo modi imbodem di fuhuzobe abo neham bak. Yahudi dam bake fakem dam labe im meo damat kota Yerusalem dam labe im numti ahiledou vabousuhu bak lam uho aa tame. Uho aameam làhà nehame vi ozoda tame. ‘Kota Yerusalem dam lam im num lamti ahebu beodume foli seddam bak ab fuhame?’ laham bak um ab ozobohudemam bak. Labiham bake um Yudea bak laba azim dam labe uho laba a esdamule. Um foli seddam bak labna zohàme ahedem bak laba ozome gi taho sibu bak laba iitaole. Labi ame Yudea bak labe aba zoho kota Yerusalem laba vahi azim dam labe laha num debu ibida vou esmozi iitaole. Labi laha kota Yerusalem bàhàgo bak laba na meedam dam labe a, ‘Imo fa li ahedese,’ laham bak lam a ozome fa lemule. Gi bak iuba iitaole. 23 Ame di labe Yahudi dam labe iho faina meedàmu Alat faki ame Yahudi damat azihi bak lam ahebu gi fai bak tadehemu beodam bak lam akati modelo. Aiee! Lahana lahi zubuleheda zi lamti data tatvamda do àm lahasuhuda eheda zi lamti iitaom vanamam bak akati modelo. Làhà gi emoem vabilemnàme taho ozahit betea iitaole. 24 Ame Yahudi dam bake fakemoholehe dam labe lab meedam di labe Yahudi dam totbaho gi ae tot mo tot mo lahamna labe oddume voeda. Labi dam totbaho gi tet siàdume fa bak mei bake vou ladume sedda. Labihada tame. Labi ame lab meedam di labe dam debu mei vàmadi vàmadiaha bak abo Ala biem dam labe iho Yahudi dam labe ibi iho azihi kota Yerusalem laba veimai naedamali fa Yahudi dam laba vou vabeotedamehamdi fai baket vou meedume Alat amu neha, ‘Vaitom di am tame,’ lahame fet gagu esuhu bak fum di labe ab vaitomam tame,” lahame Yesusat fet ab vameadume esuham. 25 Labi Yesusat neo susume vi vameada. “Labihadam di labe neo nehadam bak aada tame. Asum ahoba iuba tom aam di ala digaddati ala usehedati falo ziti asum bak ium ahebu damat amu fet aame ozobohudemna ba modesu tame. Labi laha nehada tame. Damat bak iuba aimeam itea feàna labe am dae feàna muudam bak aida. Labi laha ame itea labe vao bahot fi tauledam labe foadam bak laha aida. Labihada. Labihadam labe dam bake azim dam ahebu ahu gukedume faa dododume, ‘Im akati modela?’ lahame vabi vi ozoda tame. 26 Ala digaddati ala usehedati falo ziti asum bak ium ahebu ibi amu neàt modesuhu bak lam fa vei seti ihevoulai ihevoulaidam bak lam damat fet aadume vi ozo, ‘Im bak niba baka ana im modelo labihahela?’ lahame ahu faidi feà bak fuhu labe im ozom bakti bili ahu faidi setehe labe ahu nasi fet boloda tame. 27 Labi ame di labe damat tom aam di Em Abo Asum Ahoba Iubet Bak Niba Li Dateleheda Em Aiat Am na fauha meona fako iedemna ogatei modealaha bak lam fa Eba modi vizi feà Dateli uloti nom vousdam bak lam damat aada tame. 28 Eho etei lab vameadaha im zi lam faasi modelo meedam di lam dam bake esuhu dam nibe bisi fai bak tadi vabidam bak lam Alat ab vausdalo modemam tame. Labiham bake um a bisi ladi ohu nom bohusdamule. Um fa ohu vousai ahulat deeli vou faodale,” lahame Yesusat fet ab vameadaham. 29 Labi Yesusat neo susume nehame vi fi koada. “Uho ut araso lamti ut oo valemda so amomoi lamti ut labe modem bak laba vi ozodale. 30 Ame ut labe bak ibi bak niba et nakbedem bak damat aadam di nehi ozom bak. ‘Ab di neà faalo modem ame?’ laham bak iho aame ozobohudem bak am. 31 Labi laha Eho etei lab fet vameadaha im zi lam modesum bak uho aameam làhà uho nehi ozom bak am bak. ‘Alat Eba modi Boehàdateboli Eho fa li Am damalehe dam zi lam vazisi vuusu im vahokedam bak lam ab fuseo vabalehame?’ laham bak uho vi ozobohudem bak am bak. 32 Nasi aima. Eho etei uba gagolo modem im imboda nidi nim mahate tu vi ozodam bohu meedale. Eho etei lab vameadaha im zi lam ahebu meedume neàdehe vabna um eteida nim ahe lahasuhuna ame im zi lam imbodehe bak aadume neàdi ba eloda tame. 33 Asumti asum ahoba iuba modealahana zi lamti labi bak nimti bak niba modealahana zi nimti labihasu ahebu ba beodume foedume sedda tame. Lahana Ebe Eho vameadam im zi lam ahebu ba setem vabak. Gi labaha bohu vuusdume imbodedam imot modem bak,” lahame Yesusat fet ab vameadaham. 34 Lahame labi vahokedume neàdi Yesusat neo im meida vi vahokeda. “Eho ba fa lem diat gi neham bak. Damat felik vààsu dohot vabi duzu sim bakti ulohona modehe labe dam bakda ahebu gi vabiem di labe Em taho fa lem bak. Labiham bake um iademe it vou faovoi ozodale. A bisi dihasi vao meona uddume bak bi bobidam labe ostame la gagoi le gagoidume ahusobuli igeao. Labi dihasi neo ame baket neo vi meeda. Uho etei bak niba esdam di uba modi neàdemna, ‘Modem vabna ozomo?’ lahame a bisi dihasi vi ozo. Labi dihasi neo vi ozo. A bisi labihadamule. Uho labihasu ahu fi goaitoi meedam di labe Em ba taho lem bake uho vabilemna zohàme Eho uba neha, ‘Iademe mahate it vou faovoi ozodale,’ lahame gagodam bak. 36 Labi it vou faovoi ozodam labe mahate Ala bake tom gagodale. Neham bak. Ubu uho amu neà bak esdam bak lam fa veimdi vàhàdeme meedam di labe um ahu iedehe vaba gi ahe neàt lahasu vou meedume vaitom bake mahate tom gagodale. Labi laha Em Abo Asum Ahoba Iubet Bak Niba Li Dateleheda nim Em ba Boehàdateboli fa li dam vuusu im vahokedalo modem diat Eho uba gagu aidalo modem di labe uho gi ladem vaba teut Eba li duzum bake laha mahate tom gagodale,” lahame ab vahokedaham. 37 Labi Yesusat kota Yerusalem laba le aidam di lam Am gi nehada. Amu digad di lam ame Fihasi Ala Bake Vou Baedam Num Vàmteabu labe am ad oli aam bak tomba laba le dam bake vahokeda. Labi disidam di labe fa Zaitun Dee Dozeadaha Bak Buzoho laba laisi izi fa lezida. Labihada. 38 Labihadam di labe dam totbaho dua bak di fi zeadam diat Yesusat im vahokem bak vi ailo ame Num laba valada. Labi dihasi dihambe neo ame im lam vi ailo neo ame Num laba valada. Labihada.

Lukas 22

1 Labihadam di labe Yahudi dam bada nibe im tai ahobada zi labe Im Adam Datahida Alat Oddaha Vabat Labohotehe Bake Vi Ozome Roti Fikidehe Vabna Àme Iziam di ee gagom Paskah lam neo fa ab vou fuseo vabaleham. 2 Labi fuseo modem di labe damat Ala bake lomna ve vua vahudam toheda zi laba vuusu im vameame faheme modiam dam lamti Musat toedaha Im Feàna lam ozobohudi fa meia vahokedam guru zi lamti laham dam labe vahi, “Im Yesus akati modi otela?” lahame dam dua totbahot aam zohàme iedi gi aa odoada. 3 Labihadam di lam Yudas abo am ee meida Iskariot lahamda lam abo Yesusat Aho Am im gagu oluiam dam dua belas labe dat meida lam Iblisit am ahu laba ab veimaham. 4 Lahamda labe am ahu Iblisit veimaha labe aho ame toheda zi laba vuusu im vameame faheme modiam dam lamti Fihasi Ala Bake Vou Baedam Num Vàmteabu laba vou aasdam damti laham dam laba le, “Aho akatihasu modi Yesus vou fohome ame dam laba ub loela?” laham bake aa ab le odoadaham. 5 Labi aa le odoadahemu ame dam labe Yudasat Yesus vou fohom bake deeli doi lolo ab gagu esuham. 6 Làhàmu Yudasat uledi ahu ab vàmadeham. Labi ahu vàmadi ahit neà dateli le, “Yesus adi diat vou fohome dam bake ub loela?” lahame gi vou faoda. Yesusat Ahamo fi ozem bak aahazobe vou fohome ame dam duada laba ub lom bak ozome vou faoda. 7 Labiham di labe vou faodameilahit Yahudi dam vahi ame Roti Fikidehe Vabna Àme Iziam di ab vou fuham. Labi ame di lam izidume modeha damat ame Paskah vi ozome àlo modem domba otem digat ab vou fuham. 8 Labihàmu Yesusat Petrusti Yohanesti ab gagu oluham. “Um nasi le ibi iho Paskah àmna lam le modeme vaheme esule.” 9 Lahame gagoha dam labe fa gago, “Ne, iho ake le modeme vaheme ahumdi esuela?” 10 Lahahat Yesusat fa ab vi gagoham. “Uho kota Yerusalem laba lefusi duzu aameam dat vao noai vou lemda omti ot gausiamda labe lam bak laba uho am ohuse vi duzu vulale. Uho laba vi duzu vulame aameam num da labe aho olemda laba um laba vi olele. 11 Labi vi oli num deda laba nehi gagole. ‘Im gurut oba neha, “Aho amu oba Paskah fum diat Am damti vahi na àdam bak gagu esuhu bak akete?” lahaho.’ 12 Uho labi gagomeam làhà dat num deda labe um vou le am num zuhuba baa duana lam gi vabieme neàdi esdamna le aam bak. Uho gi ame tom fi hababu laba ibi iho ame bak vi ozome vahi àmna lam laba modeme vahedale,” lahame ab gagu oluham. 13 Làhàmu ame dam behàsu labe kota Yerusalem laba le aaha Yesusat lab gagoho bak lam abo imbona le aa. Làhàmu ame Paskah vi ozome àdamna lam modeme vahedume ahumdi ab esuham. 14 Labi ame na lam àm bak fuhemu Yesusat Aho gagu olu Am im vameadume esmozi laiam dam dua belas lamti vahi na modeme vahehe bak laba ab laham. Labi le vahi ame na lam ab faasi àdamam. 15 Labi na àlo modem di labe Yesusat Aba vi tau meedam dam laba vameada. “Em geàdam bakti lahadaleàmu ibi iho Paskah vi ozome àmna etei nib àlo modemda nimota uba tau àdalo àhàkeha. Labi Em ba geàda tame. 16 Labi em etei na nib tau àhà tadi ba diamut Alat Eba modi Boehàdateboli Am damalehe dam zi laba abobo vuusu im vahokedam di labe ba àm bakti gagom kaio. Di lam Alat dam bake abobo soat vausu fa vei neàdem di am tame,” lahame ab vameadaham. 17 Labi vameadume neàdi Yesusat neo anggur oo vaksa mokzoho fedehena ve Am Ai Ala bake, “Neàte,” lahame tom gagu neàdi dat meidate lu vuusu vameada. “Uho ame anggur oo vaksa nim um ahebu uddam labe ototo vaidale,” lahame gagu neàdi dam ahebu ab otot udidamam. 18 Labihadam di labe Yesusat neo vi vameada. “Iho etei vahi uddam anggur oo vaksa nim Em etei nib udehe tade tame. Lahana ba diamut Alat Eba modi Boehàdateboli dam bake abobo vuusu im vahokedam di labe ba udem bakti gagom kaio.” 19 Labi gagu neàdi Yesusat neo roti ve Am Ai Ala bake, “Neàte,” lahame tom gagu neàdi ame rotibu lam agube faheme Am dam bake ab lodaham. Lodam labe vameada. “Roti nim Em so am tame. Em so nim Eho ahit uledi damat oteme um gohalemna am tame. Uho roti nim àm di Eba vi ozome àdale,” lahame agube ab àdaham. 20 Labi ame anggur vaksa lam ude. Labi roti lam à. Labihadume neàdi Yesusat anggur vaksa mokzoho fedehena meida neo ve Ala bake, “Neàte,” lahame tom gagu neàdi dam bake lu uddam di labe vameada. “Iho etei uddam anggur oo vaksa nim nehi vi ozomna vaksa am tame. Amu Alat dam amudate gagu gohalemna lam fa vei seti etei nim Em vasea veàtolo modemna nim um gohalemna Alat ab modi gàhàdeham bak. Laham bake vi ozomna vaksa am tame. 21 Lahana dat Em vou foholo modemda etei Eba niba na tau àdam bak. 22 Lahana gi labihasule. Em Abo Asum Ahoba Iubet Bak Niba Li Dateleheda nim Alat amu Eba neha, ‘Elo tame,’ lahame gagu oluhu labe ame bak ab modelo modemam bak. Aiee! Lahana ame da Em vou foholo modem bak feidam vabate. Ame da nim Alat ba gi fai bak bohu tadelo modemda am bak.” 23 Lahame labi gagoha Aba vi tau meedam dam nibe aime ihimo aa ab ot gagoiadamam. “Uho ozom, Yesusat etei lab gagoho bak lam amat modelo modem im ozome gagohela?” lahame ab ot gagoiaham. 24 Labi ot gagoiame neàdi ame dam labe ihimo fa neo im amomoi faasi daet beàdam labe nehame otesi otesida. “Im meidavat amat bisi feà dateli damat iba vou baedàla?” lahame otesi otesida. 25 Lahame ame dam labe labi otesi otesidàmu Yesusat Aba vi tau meedam dam laba im ab vahokedamam. “Um ozobohuna taia? Yahudi damat modem vab dam labe vedi, ‘Im abo feàte,’ lahame iho vuusdam dam laba tet ootedam labe im vahokedam di gi dae meobeat vahokedam meo bak. Labi im ee dam labe iho vuusdam dam laba teubeat vuusdam labe iho neha, ‘Im meia faobekesi vausu vou aasdam dam im am bak,’ lahame it daetbadam meo damat modem bak. 26 Lahana um ba a labihadamule. Uho meidavat ee feàda taluhuda gi nehame it ozome meedale. ‘Em bisi feà dàt modem vabak,’ laham bak lam uho labi it ozodume fa feà vab damalele. Labi laha uho meidavat boehàdateli meia im vahokedamda gi nehame it ozome meedale. ‘Em gi na meedam dateli meit na abada gagom di eho fa modese,’ laham bak lam uho labi it ozodume fa na meedam damalele. 27 Neham bak vi ozodale. Uho ozom, dam nehame meedam dam dat adida, ‘Bisi feàda am tame,’ lahame ozoela? Dam nusu meit lohona ahum ve àmda lam bisi feàda modemda ameo? Laham vabameam dam na lodamda lam bisi feàda modemda ameo? Um dam adida, ‘Bisi feàda am tame,’ lahame labi vi ozoela? Uho bak damat ozomta, ‘Dam nusu meit lohona ahum ve àmda lam bisi feàda am bak,’ lahame labi ozom dam taia? Lahana Em ba labiham vabak. Em umti vahi godam di gi nehame meedam bak. Em gi meia na lodam damat meedam bakti ulohona meedam bak,” lahame ab gagoham. 28 Labi gagu neàdi Yesusat im meida neo vi vameada. “Meit Eba fai bak meedaha di lam uho gi Eba amu tu vuzehehe bak lahasu bohu vuusdam bak. Uho Em mu vooho vabak. 29 Uho labihasu meedaha bake gohali Eho uba nehame meedalo mozo. Ba diamut Em Aiat Eba modi Boehàdateboli Am damalehe dam zi laba vuusu im vahokedam di labe umti Emti vahi nusu na àdalo modem bak ame. Labi um laha boehà damali fa boehàdat ahamo nusu meia im vahokedalo nusumna feàda dua belas amomoi laba nusualadume dat ahamda Israel labe aho vou faat lehe dam debu dua belas laba faheme ahala vuusuiame im vahokedam bak ame. Labihasu modelo modem bake Eho uba modi um naedamalelo modem bak. Abo Em Ai Aba Aho amu Eba nehame fet gagu esu, ‘Oho ba diamut dam vuusu im vahokedale,’ lahame amu Eba labi fet gagu oluhu labe Eho fa naedateli fa neo uba ahit modi um naedamalelo modem bak,” lahame Yesusat fet vameadume ab esuham. 31 Lahame labi fet vameadume esu neàdi Yesusat Petrus bake gago, “Simon oa, Eho etei oba vameadalo modem im nim mahate aile. Iblisit um ahu ozolo Ala bake le, ‘Dam labe im ahu eho modi ozom neào?’ lahame gagu aiha Alat uledehe bak. 32 Lahana om Eba tu vuzehehe bak voou setem bak labna zohàme Eho Em Ai bake neha, ‘Petrus Eba tu vuzehehe bak lam a voou seti abehamdemule,’ lahame Em Ai bake tom gagoho bak. Labi om Eba tu vuzehehe bak voou seti ba fa vi ozome fa vei neàdi teudi fa Eba tu vuzehem di labe om dam totbaho niba laha, ‘Um mahate teudi Eba tu vuzehele,’ lahame labi vahokedale.” 33 Lahame labi gagoha Petrusat fa gago, “Vabà! Dat Boehàda oa, em ba Oba tuhu bak voou setem vabak. Meit Om si fa meit faina modehemu si ousu simtedem num laba ousumeam làhà em tau si ousum neà bak. Labi meit Om otemeam làhà em laha tau otem neà bak.” 34 Lahahat Yesusat fa ab gagoham. “Vabà! Petrus om ba labiham vabak. Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk ab aaumam tame,” lahame ab fet gagu esuham. 35 Lahame labi gagu neàdi Yesusat dam laba neo vi ailo gago, “Eho amu uba neha, ‘Em Im Neàna nim meia vou vameatedale,’ lahame uba amu gagu oluhu di lam, ‘Um doi dekti um na àmna dekti um sepatu meidati uho a vou lamule,’ lahame Eho amu uba lab mali gagu oluhu bak laba uho vi ozodale. Uho bak iuba le meedaha di lam nazoh vabna vou meedume izidào? Na àme im vabna vou meedume izidào?” Lahame dam laba labi vi ailo gagu modeha ame dam labe fa gago, “Vab. Im di lam na vabalehe vabak. Abo na ehe bak.” 36 Lahame labi gagu modeha Aho ame dam laba neo vi gago, “Lo, di lamota neà bak. Lahana damat etei di nibe faasi Eba vi ozodam bak fa veimdi Eba vabidaha labe damat laha ame baket neo uba vabidam bak. Nehaha bak. Alat Gagu Fihasi Vimteme Oluhu Dat Boehàda nibe Eho meedam im lam dat ahamda Yesaya labe aho nasi ozobohudi Alat aba vameadaha im nehi fet toeme esuhu bak. ‘Ame Da lam ozom di faina meedamda meida ozomomda Am am bak.’ Lahame Alat Vameadaha Im Toedahana laba labihasu fet toeme vàmadi esuhu labe etei nibe ame bak ab imbodelo modemam bak. Damat Eba modelo modem im nim Yesayat lab fet toeme esuhu im lam abo modem bak. Ba modehe vaba mom vabak. Labiham bake um doi dek modeo, um na àmna dek modeo, uho lam bak laba vou gohatedale. Labi um ae tot mo tot mo lahamna vabda abo ame ae valo modem doi laha vabalemeam làhà sue sona ahoba dusumda ubuda meia lu doit ve fa ame ae lam vadale,” lahame ahit Am dam laba damat ba fai baket vou vabidume im ahu bedem bak labna zohàme ahit nazoh laba gi vàlu gagoho bak. 38 Lahame labi gagu modeha Aba vi tau meedam dam labe vedi Yesusat iba gi ahu teudem bake gagoho bak lam vabili vedi abo ae laba gagoho tiba ab vi gagoham. “Boehàda oa, ne ame ae behàsu neam taia?” Lahame labi gagohemu Yesusat ozo, “Dam labe git ozoho bak,” làhàmu ab vi gagoham. “Neàde. Ba a gagom. Gi labihasule,” lahame ab gagoham. 39 Labi gagu neàdi fa futoi kota Yerusalem vou esmozi neo Zaitun Dee Dozeadaha Bak Buzoho laba Aba Aho le izi fa leiam bake neo tom la. Aba vi tau meedam dam laha tau vula. 40 Labi le Yesusat Aba Aho amu odosidam bake fusi dam niba ab gagoham. “Iblisit uba li, ‘Um faina modem bak modeo,’ laham bak um ahu ozolo modem di, ‘Um ahu a bedemule,’ laham bak mahate Ala bake tom gagodale.” 41 Lahame gagu neàdi Yesusat dam lam vou esmozi Ahamo iumà iuba le abo ke dom di ket le biti novam iuba vaitesu ogomasu ab tom gagodamam. 42 “Ai oa, em geàdalo modem bak nim Oho fa faatoi vei setem neào?” lahame gagu ozoha vabamu fa neo gago, “Vabo. Ebe Eho ozom bak fa feidate. Gi Obo Oho ozoho baket modem neàte,” lahame ab tom gagoham. [ 43 Labi tom gagodume modeha Alat Am im gagu vou usemda asum ahoba iube usi Yesus Am obe laba duzu Yesus bake vabededume modi teudeda. 44 Labi modeha Am ahu faidi feà bak fusi admahi setehe labe neo bisteat ab tom gagodamam. Labi tom gagodume modeha ab nuhateham. Labi nuhateme vao fefeaha labe gi vasea babam bakti ulohona bake babada.] 45 Labi tom gagodume neàdi usai Aba vi tau meedam dam laba fa li aaha dam ahu faidi feà bak fuhu labe gi idao. 46 Làhàmu Yesusat ukeme neha, “Um baka ana idaoela? Taho usnadale. Iblisit uba li, ‘Um faina modem bak modeo,’ laham bak um ahu modi ozolo modem di um ahu a bedemule. Abo mahate it vou faovoi Ala bake tom gagodale.” 47 Lahame Yesusat gi etei vameadam lahasuhu di labe Aba vi tau meedam dam dua belas meida Yudas lam aho dam zi vihitoi Yesus bake ab le omsuham. Labi Yudasat im Yahudi damat meia tàm di oode totti totti tomoamdem bak lam aho Yesus bake modi, “Am abo neàte,” laham bak ozome gagolo netàdi modeha Yesusat Ahamo ozobohudi ab gut gagoham. “Ne, Em Abo Asum Ahoba Iubet Bak Niba Li Dateleheda modem bak. Lahana Yudas oho akati ahit neà dateli Eba, ‘Neàte,’ lahame Em oode tomoamdehezobe dam duada zi labe vi aame ozobohudi, ‘Fà Em sise,’ lahame meedà?” 49 Lahame labi gagoha Aba vi tau meedam dam labe aaha ame dam duada labe Yesus silo modemu gago, “Dat boehàda oa, im dam lam ae tot mo tot mo lahamna nibe beom neào?” 50 Lahame labi gagohoilahit Aba vi tau meedamda meida nibe am ae goha dusuhuna vuu vihitoi Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am na meedamda meida lam beoha biou gi dogoi baa ahi totbahoda lam aet fu fatoi bake ab biteham. 51 Labihàmu Yesusat fa ab gagoham. “Aa! Ab neàdeham tame.” Lahame vi gagu mali Yesusat fa da labe am dogoi debu laba ulasi fa ab dogoileham. 52 Labi Yesusat neo dam Aba silo lehe dam zi laba abo damat Ala bake lomna ve vua vahudam toheda zi laba vuusu im vameame faheme modiam dam lamti Fihasi Ala Bake Vou Baedam Num Vàmteabu vou faovoi aasdam dam zi lamti Yahudi dam bake vuusu im vameame faheme modiam dam busaoda zi lamti labihasu ame dam zi laba im ab vahokedamam. “Um Em otelo vabeddamna akati Eho amu Fihasi Ala Bake Vou Baedam Num Vàmteabu labe am ad oli aam bak tomba laba le Eho Alam im vahokeme leidamehamdehena abo umti vahi meedamna akati ame di labe Em taho si otem vaba mode? Uho ozomta vedi Em dat aa li ausume mei beome im nazoh gelevai esmozi laiam dàt mode tiba uho etei aeti eobuti ab vou lehame? Lahana etei di nim meit Em sim bak nim Alat amu fet gagoho labe uho Em ab silo modemam bak. Labi ame di nim laha aibu bak vuusdamda Iblisit aho gagohona uba modi um uledehe di am bak,” lahame ab gagoham. 54 Labi gagu neàdi ame dam labe Yesus ab siham. Labi ame dam labe Yesus si vou duzu vou ladume Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am num feàda laba ab vou laham. Vou duzu vou ladam di labe Petrusat gi vaitesu ba aa vi duzu vulada. 55 Vuladume ame num feàda labe am ad oli aam bak tomba laba vi fusi aaha dam amu nasi Yesus vou laha dam labe ame num bak tomba laba bakamta nusualadume vuaga fi dda. Labihàmu am ba vule vi tau nusu. 56 Labi na modem nam soao nibe vua faut aaha Petrusat nusuhu bak aahemu li netàdi Petrus bake aasu ozodume ab gagoham. “Da nim ame Da laba vi tau meedamda am taia?” 57 Lahame gagoha Petrus fa vei iedi vasti veiba, “Vabo. Da lam em bielo.” 58 Labi gagu koena vou faodameilahit meit neo am alihi aame gago, “Om abo damat etei sihida laba vi tau meedamda meida am taia?” Lahame gagoha Petrus neha, “Vabo. Em ame da meida modem kaio.” 59 Labi gagu vou faodameilahit meit neo ozobohudi neàdi gago, “Mm, abo imbote. Da nim abo damat etei sihida laba vi tau meedamda meida am bak. Iho gi aho im gagom bak vi aim di am gi Galilea damat im gagom bakti uloho bak.” 60 Lahame labi gagoha am neo veiba, “Vabo. Oho etei gagoho bak lam em ozom bieho. Om abo gi ostam im gagoho,” lahame labi gagoha kuk ab aauham. 61 Labi Yesusat vaktesi Petrus bake abo bisteat ab aasuham. Aasuhemu Petrusat Yesusat aba amu fet gagoho bak lam ab vi ozobohudeham. “Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk ab aaumam tame,” lahame Yesusat aba amu fet gagoho bak lam ab vi ozobohudeham. 62 Làhàmu dam dua bak vou esmozi futoi iumà iuba le ahu faidi nom bohusu bisteat meb dae ab faaham. 63 Labi Yesus bake vou aasdam dam labe Yesus bake foadam labe ab tozodamam. 64 Labi tozodam di labe dam labe sue baa visoi Yesusat iba aam bak labna zohàme Am fako laba ab baguamdeham. Baguamdi neàdi meit fu tozome gago, “Hohoa. ‘Om Alat vameadaha im aime fa dam bake ahate vameaidahada am tame,’ lahamda Oho ozom, Oba amat beo. Taho iba fa gagole,” lahame meit vi fu tozome gago. Meit fu vi tozome gago. Lahada. 65 Labi ame dam labe laha Yesus bake ab vi feàtàomam. 66 Labi lab modehe bak lam usehet modeme ab vou dihaham. Labi dihasi Yahudit Ibi Iho Modem Im Gagu Vàmadi Esum Dam Debu lam abo damat Ala bake lomna ve vua vahudam toheda zi laba vuusu im vameame faheme modiam dam ame. Labi Musam Im Feàna zi ozobohudi fa meia vahokedam guru zi ame. Labihasu vahe vahedume im vameadam bak tomba laba ab nusualadaham. Labi nusualadume neàdi Yesus si vou dozom dam labe neo Yesus vuusu vou ubahi ame dam eeda labe avaelaha tomba laba ab vou duzuham. 67 Labi vou duzu neàdi ame dam zi labe Yesus bake gago, “Om, ‘Alat Gagu Fihasi Vimteme Oluhu Dat Boehàda am tame,’ laham bak lam imbodemeam làhà taho gagu vàmadi esule.” Lahame labi gagoha Yesusat fa gago, “Eho ame bak uba gagomeam um gi ailahigeàmom bak. Um ame bak lam ba vuzehem vabak. 68 Labi Eho fa uba gagu vi ailo modemeam um ba làhàme Eba im vi gagom vabak. 69 Lahana Em gi fa im nidi nim nehi gagolo. Ba diamut Em Abo Asum Ahoba Iubet Bak Niba Li Dateleheda nim uho Eba aam di Em gi feà Dateli Ala Bisi Feàda labe Am ahi totbaho laba tau nusu na ahebu vuusdam bak lam uho ba aa tame.” 70 Lahame labi gagoha ame dam labe fa vi ailo gago, “Làhà Om abo Alam Adat mode?” Lahame labi gagoha Yesusat fa gago, “Lo. Uho gagoho bak lam imbo bak. Em ame Da am bak.” 71 Lahame labi gagoha ame dam labe ihimo fa ab ot gagoidamam. “Um aim vaba? Da nim gi Ala bake feàtàhà bak. Aho vedi, ‘Amti Alati ulohote,’ lahame gagoho bak lam uhumo ab vi aiham taia? Ba akati meit neo li vàlu gagom im lam iho aie? Dat naeda labe Ahamo ab it gagu vàmadeham bak,” lahame ab ot gagoiaham.

Lukas 23

1 Labi ot gagoiame neàdi ame Yahudit Ibi Iho Modem Im Gagu Vàmadi Esum Dam Debu lam usnadume Yesus vou duzu Gubernur Pilatus bake ab vou laham. 2 Labi Pilatus bake vou le vou dozom labe iho Yesus bake vàluhu im fa Pilatus bake vameada. “Iho Da nibe Aho vahokedam im aiha abo im Yahudi dam niba Aho git vahokedam bak. Aho vedi neha, ‘Meit teo vi vaiam doi pajak lam Kaisarleheda laba a lodamule,’ lahame iba Yahudi dama gagome lom malemda am tame. Am laha neha, ‘Em abo Alat Gagu Fihasi Vimteme Oluhu Dat Boehàda am bak,’ lahame vameadamda am tame. Lahame git vahokedam bak iho aihi bak,” lahame Yesus bake vàluhu im lam Pilatus bake ab vameadaham. 3 Labi vameadume modeha Pilatus labe fa Yesus bake vi ailo gago, “Imbo? Oho neha, ‘Em Yahudi dam debu vuusu im vahokedam boehàda am tame,’ lahame Oho labihasu gagodàmu damat Oba vàluhu bak lam imboo? Om ame da ameo?” Lahame labi gagoha Yesusat fa vi gago, “Lo, oho etei lab gagoho bak lam imbote. Em ame Da am bak.” 4 Yesusat labi gagohemu Pilatus fa ame damat Ala bake lomna ve vua vahudam toheda zi laba vuusu im vameame faheme modiam dam lamti dam duada totbaho zi lamti laham dam laba gago, “Eho Da nim uloome aiha, ‘Iba pemerintah bake git modehe bak vàmtea ehete,’ laham bak lam aihi vab labe ba eho gagu otem bieho.” 5 Lahame labi gagoha ame dam zi labe vahi meoli Yesus beolo àhàki bobodam labe neha. “Vabo. Imbona biehena. Ame Da nim Aho Yudea bak ahebu azihi dam laba Aba Aho lab vahokedam bak labet modi dam dua bak fa ahu ulededume dae gai ab dualeham bak. Abo Aho Galilea bak labe faasi vou vahoke ledume etei kota Yerusalem niba ab vou fuham bak,” lahame daetesu ab bobodamam. 6 Lahame labi daetesu bobodàmu Pilatus ame lab gagoho bak lam mu dam zi laba gago, “Da nim Galilea da modeo?” lahame gagoha dam zi labe gago, “Lo, Galilea dàt modem bak.” 7 Làhàmu Pilatusat ozo, “Yesus abo Galilea bak azim dam labe im Boehàda Herodes Antipas labe aho vuusu im vahokemda meida am bak,” laham bak lam Pilatus ab aime ozobohudeham. Labi ozobohudehe labe Pilatus dam zi niba ab gagoham. “Uho Yesus vuusu Boehàda Herodes bake vou lale,” lahame ab gagu oluham. Ame di lam Herodes laha kota Yerusalem niba teohet li aidamna modehe labe Herodes bake ab vou laham. 8 Labi vou le Yesusat amu meedaha im Herodes aihi labe aalo àhàki vou faodamna modehe labe Yesusam alihi etei gut aahemu ab deeleham. “Na damat ihimo modem biem im feàna meida Yesusat modem bak aho aase,” laham bak gi amu di iube aalo àhàki vou faoda. 9 Laham Dat ab vou fuhamemu Herodesat Yesus bake im mei im meime gut uloodaha Yesus ba dae bum kai. 10 Labi ame toheda zi laba vuusu im vameame faheme modiam dam lamti ame Im Feàna zi lam ozobohudi fa meia vahokedam guru zi lamti laham dam laba dozeadaha dam labe laha Yesus bake vàlu vei meoli feà bak fusi ab meedamam. 11 Labi Herodes am meo damti neo Yesus bake tozome feàtàida. Tozome feàtàidam labe Herodes am dam gagome boehàdat dusum sue sona bohu bisi feàda visoi Yesus Am soa gutaasu vi tozo, “Looo. Dam bake vuusu im vahokedam boehàda abo neàteee,” lahame vi tozome feàtàidume neàdi fa Pilatus bake ab oluham. 12 Labi ame digat lam Herodesti Pilatusti amu ot fakiam dam fa ab vaheham. 13 Labi Yesus fa Pilatus bake vou le Pilatus ame toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti dam duada totbaho lamti laham dam zi lam gagome li bakamta ab dozeadaham. 14 Dozeadume neàdi Pilatusat ab gagoham. “Uho neha, ‘Da nim Aho Yahudi dam niba git vahokedam bak,’ lahame si eba vou leheda nim ame uho lab vàluhu bak lam eho um vou faodahit uloodume aiha ba labiham Dàt modem kaio. 15 Labi Herodesat laha neo uloome aiha, ‘Ba labiham dàt modem kaio,’ lahame fa eba oluhu bak. Ne, Da nim im modehena vabda ba akati eho gagome ote? 16 Làhàmu eho gi nehalo. Eho em dam gagome gi na sokba nasbe ahit alibulehena labe beome im vahokeme afoezobe fa isi olulo mozo,” lahame ab gagoham. [ 17 Ame Roma dam zoho vuusdam gubernur labe aba aho tahun ahebu modi baleàlehe bak gi nehadam bak. Yahudi dam ibi iho na àme iziam bak abo Paskah fum di meit faina modehemu si ousu simtedem num laba oumahehe Yahudi dam meidavat isi olum meot. Ame gubernur aba aho modem bak am. Labiham labe Pilatus ame bak lam neo modelo Yesus isi olum bak ab gagoham.] 18 Ame di labe amu sel oumahehe dam dat meida Barabas laba ehet. Ame da Barabas lam aba aho amu im nehasu meedaha dàt moz. Amti am Yahudi dam totbaho lamti iho vazisi kota Yerusalem niba li dam totbaho gagome fàsi fa Kaisarleheda labe am Roma damti, “Beose,” lahame modi dae gai duzu mei otehemu ame Roma meo dam labe si sel oumaheda meida am bak. Labihàmu ame gubernur labe aba aho amu modi baleàlehe bak fa neo vou fuhemu dam duada zi labe ame num feàda labe am ad oli aam bak tomba laba vazisi neàdehezobe ab vi tauledamam. “Obo oho amu modehe baket neo modele.” Lahame labi gagoha Pilatusat fa vi ailo ab gagoham. “Em etei dat adida gagu vou futoi uba oluela? Barabas modeo? Yesus modeo? Dat adida eho gagu vou futoi uba oluela? Uho ame da gagole.” Lahahat ame dam zi labe neha, “Vabo. Yesus gi otele. Iba fa Barabas isi olule,” lahame ab gagodamam. 20 Ame dam zi labe, “Yesus fa otele,” lahame gagoha Pilatusat Yesus isi olulo àhàkehemu dam dua bak laba neo vatoheda. “Uho Da niba vàluhu bak lam imbo kaio.” 21 Lahame vatohedume modeha dam duada zi labe vedi fa daet meoleteme gago, “Yesus taho ut tetehesuhunaso laba esu paku dodume elole,” lahame ab meoledume gagoidamam. 22 Labi modeha Pilatusat neo gago, “Aa! Ne, akati labi mode? Da nim Am git modehe bak akete? Eho uloodume aiha Da nim faina modehe bak aihi vabna akati gagu ote? Eho gi, ‘Im vahokeme neàdese,’ laham bak ozome em meo dam gagome na sokba nasbe ahit alibulehena labe foadume geàdume neàdi isi olulo modem bak.” 23 Lahame labi gagoha ame dam duada zi labe Yesus gi ut tetehesuhunaso laba esu paku dolo àhàki meedàmu dae duali dae gai ab ziddamam. “Vabo. Gi om meo dam gagome ut tetehesuhunaso laba esu paku dodume elole,” lahame daetesu bobome ibi baket ab vaham. 24 Labi Pilatusat ozoha, dam duada zi labe daetesu dae gai ziddàmu fa dam lada labet ibi iho modelo àhàkehe baket ab modeham. 25 Damat neha, “Iba isi olule,” lahame gagohoda Barabas lam abo Roma pemerintah bake odosi mei otehemu sel ousuhuda lam ab isi oluham. Labi ame Yahudi dam duada zi labe ibi iho gagoho baket modelo Pilatusat Yesus am meo dam laba ub lu ame meo dam labe Yesus bake tet ooteme Am esu dolo modem ut tetehesuhunaso lam gagu Ahamo naedat vatu ab vou kea ladamam. 26 Labi ame meo dam labe Yesus lab vou ladam di labe dat ee gagom Simon abo Kireneda labe aho kota Yerusalem bàhàgo bak laba godam dàt fa kota bake ledamda ab ot tàhiaham. Ot tàhiame modeha Yesusat Am vanamai alihi nemahuhemu ame meo dam labe Simon bake gut ooteme Yesusat Aho vatu vou ladam ut tetehesuhunaso lam fa visoi fa Simon bake tet ab nom vatuham. Labi Simon ame utso lam vatu Yesusam ohuse vi duzu ab vou ladamam. 27 Labi vou ladam di labe dam duada zi totbaho laba vi dozeadume vulada. Labi laha laba vi tau laom lahi zi labe meb daeti mebe gagoidam labe vulada. Labihada. 28 Labihadume modeha Yesusat fa it vaktesi lahi zi laba ab it vameadamam. “Aiee! Um kota Yerusalem niba azim dam ba diamut dam amomoi labe uba beoda tame. Labi ame lab meedam di labe damat uba aame nehi gagoda tame. ‘Lahi maili zubulem vabiem lahi modeo, adam nibeso data faaha vaba soaoda modeo, data do fi suhu vab lahi modeo, laham lahi labe bisi deeli asimdem lahi am bak. Lahana lahi databeda zi im ahu faidi dehabalem lahi am bak,’ lahame gagoda tame. Labiham bake um kota Yerusalem laba vahi azim lahi zi Eba bisi a vou medaomule. Uho gi feidasi ame umti um datati ba meit uba modi fai bak tadem bake vi ozome medaole. 30 Uho gi neham bak ozodale. Ut duzuhuna nim damat ome dehalehe vabna vuat usimeam làhà uho ozom, ut amu ome dehaleheda akatihà. Gi neham bak. Abo vuat vizi eludume faalem bak. Ame bak lam gi neham bak. Damat Eba Da neàda niba nehi fai baket modehelahit uho ozom, um kota Yerusalem dam faina meedam dam laba ba diamut akatihà? Ba diamut fai bak feàna tadeda tame. Labiham bake ame di labe ame dam labet nehi gagodam bak. ‘Im ahe di nibe nasi fet modi elodase. Iba bak buzoho modeo, bitaha sibu feàda modeo, taho ilihi feàna gutidume nom ilu nasi im beodume baguamdedume seddase,’ lahame labi gagodam bak,” lahame Yesusat ab it vaktesi vameadaham. 32 Labi Yesus vou ladam di lam bisi faina meedam dam behàsu laha meo damat Yesusti amediat otelo vou duzu vou lada. 33 Labi vou ladume damat neha, “Ohu Fetahabu,” lahame taluhu bak laba vou fusi odosi ame meo damat Yesusam sue ahoba dusuhuda lam ab vome vihilaham. Labi vihilame neàdi ame ut tetehesuhunaso lam visoi bake esu afoezobe Yesus tom gaesu nom esu neàdi Am anekehà meida kidadesu paku do. Labi Am anekehà meida neo kidadesu paku do. Labi Am naba bakamta modesu paku do. Labihadume neàdi vi vuu vousai bak bumata ab nom zisuham. Labi zisu teudi neàdi ut tetehesuhunaso meida ahim neo visoi dam faina meedam dam ahim lam vame Yesusat modehe bakti ulohona modi paku dodume neàdi Yesusam anekehà ahi totti soi totti modesuhu obe laba bak bumata ab nom zisitdaham. [ 34 Labihadume neàdi Yesusat Ala bake ab tom gagoham. “Ai oa, dam nim Em otelo meedam bak nim abo vabili Em otelo meedalo. Làhàmu Oho gi ozahigeàmu fa vei neàdele,” lahame ab tom gagoham.] Labi ame meo dam labe iho Yesusam so laba amu lab vihilaha sue lam, “Amat vaela?” lahame ibi iho fi mam baket modeme neàdi ab vadaham. 35 Labi damat Yesus bake paku lab dodam di labe dam duada zi totbaho gi obe laba dozeadume aasda. Lahana Yahudi dam bake vuusu im vameame faheme modiam dam busaoda zi labe vedi Yesus bake tozome feàtàida. “Ea, Da nim mei modi fa neàdemda ame? Akati Ahamo naedat taho it vabieme neàdem vaba mode? Da nim, ‘Am abo Alat Gagu Fihasi Vimteme Oluhu Dat Boehàda abo Alat fi me vahada am tame,’ lahamda nasi fa Ahamo usi neàdemeta,” lahame ab gagu feàtàidamam. 36 Labi ame meo dam labe laha anggur oo vaksa na meiti valiheme àhàkebulehena ve vou le Yesus bake tom fi si tom tozoda. “ ‘Om Yahudi dam vuusdam boehàda am tame,’ lahamda Ohomo usi neàdemeta,” lahame ab tozodaham. 38 Neham bak aahemu tozoda. Meit aame ozo, “Da nim ana im modehe bake damat vàlu otehela?” lahame damat ut gaheba ve nehi toeme Yesusam ohu vazidazi toma zoho laba taasu paku vi dou esuhu bak ehet. DA NIM ABO YAHUDI DAM VUUSU IM VAHOKEDAM BOEHÀDA AM TAME, lahame toeme ab taasu esuham bak. Labiha labe damat Yesus bake aame ab tozodamam. 39 Labi faina meedam dam behàsu laba vi tau taasdamda meida labe Yesus bake tozome gago, “Om, ‘Alat Gagu Fihasi Vimteme Oluhu Dat Boehàda am tame,’ laham bak imbomeam làhà Omti imti modi fa veimome neàdemeta. Labi im usdase.” 40 Lahame labi tozome gagoha dat meida labe mali gago, “Aa! Om akati Ala bake, ‘Am abo feàte,’ lahame ahu adat iedi gagom vaba vedi labi gagodà? Im ahim nim Amti vahi damat neha, ‘Fà beose,’ lahame gagu otelo modem bak om ozom vaba? 41 Im ahim nimota faina modehe labe damat gagu ab otelo meedamam bak. Lahana Da nidi nim faina modehe vabda damat gagu otelo modem bak om ozom vaba?” 42 Lahame dat meida laba im vi vahokeme neàdi fa neo Yesus bake ab gagoham. “Yesus oa, Oho eba aame faobekele. Oho ba Boehàdateboli dam bake vuusu im vahokedam bak fum di Om em a fa vabiemule. Oho eba it ozome neà bak modi esule.” 43 Lahame gagoha Yesusat fa gago, “Eho etei oba gagolo modem im nim nasi aime vuzehele. Etei Emti omti Firdaus abo bak neà bak laba fa vei ahilem bak,” lahame ab gagoham. 44 Gi labihadume ala tomaleha bak ahebu ala fauhaedam bak fa vei seti ab aibuleham. Ame lab aibulehe di labe Fihasi Ala Bake Vou Baedam Num Vàmteabu labe am donibu laba tetehesdam sue tamzohobuna baa lam laha ab fatahivaham. Labi aibulehemu vou faodameilahit ala vakidem bak fuha fa ab fauha neàdeham. 46 Labi fauha neàdi modeha Yesusat bisteat buteme ab geham. “Ai oa, Em eloi it oazehena nim Oho vale,” lahame bisteat geha Am ohem bak ab seteham. Labi ab fi sivai eloham. 47 Labi modeha ame meo dam zi labe iba vuusdamda boehàda lam abo Yesusat avaesdam totbaho laba duzuhuda labe aho Yesusat geme fi sivai eloho bak aahemu Ala bake ab vou baedamam. “Làhà imbote. Da nim git modehe vab dàt modem bak,” lahame Ala bake ab vou baedaham. 48 Labi dam dua zoho zi labe damat etei lab meedam bak lam aalo vahi bakamta dozeadaha dam labe ame bak lam aadahemu ahu faidi ahula it foidam labe foelamdidume fa im num bake ab ladaham. 49 Labi dam Yesus bake deeli vuusum dam zi lamti amu Galilea bak labe faasi Yesus bake tau godam labe na vou modetedume fa kota Yerusalem niba vou fuhu lahi zi lamti labihasu damat lab meedam bak laba vaitesu dozeadume ab aasdamam. 50 Labi ame di lam dat Yusufti ee fatahivahada labe Yesus koei visom bak ozome fa Pilatus bake gagu ailo ab laham. Ame da Yusuf lam aho Yahudi dam azihi bak labe abo Yudea bak labe am num debu meida Arimatea laba azihida am. Am abo neàda Alat Aba Aho gagoho im lam vuzehi vamdesu meedamda am. Am abo Alat Gagu Fihasi Vimteme Oluhu Dat Boehàda lam ba li dam bake vuusu im vahokedam bak lam, “Adi diat modela?” laham bak vou faodamda am. Labi ame da lam abo Yahudit Ibi Iho Modem Im Gagu Vàmadi Esum Dam Debu laba taumda meida am. Lahana ame Yahudi busaoda zi labe vazisi neha, “Yesus otem neàte,” lahame gagu otehe di lam daeta tauhu vabda vàmtea am. 52 Lahamda labe Yesus koei vam bak ozome Pilatus bake ab le gagoham. Le gagu aime Pilatus ab uledeham. 53 Làhàmu Yusuf sue fabebu vabna nasbelehena ee gagom linen ve am dam totbaho lamti fa lehe labe li Yesus paku doho bak laba zisi ame koeiso vi vuu vuazi vou usi aho vou lehe sue baana lam visoi Yesus koei ab giaham. Labi giame neàdi ke bumat alimda amu kebitem laba meit fet sime bumataeme esuhuna ahum laba Yesus koei lam ab vou oli esuham. Labi vou oli esu neàdi fa futoi ke baana am doo laba tusum ulohoda lam vou ogi ogialame tusu baguamdi esu neàdi ab vou esmozi ladaham. 54 Yusufat Yesus koei vou le esulo modem di labe amu Galilea labe Yesus bake tau lehe lahi labe iho vule vaitesu duzu vi aasda. Aasdam labe koei esum ke bumat aa. Labi Yusufat, “Koei akatihasu esuhela?” laham bak lam neo vi aa. Labihada. Ame koei esuhu di gi hari Jumat dimatali ala bozilehe di labe esu baguamde. Ame digat lam Yahudi dam labe ibi iho gi azibe im digat hari Sabat na modem vab digat zoho fuseo modemu dam na meedume ab vahedamam. 56 Labihàmu ame lahi lam ame bak lam aame neàdi fa im num bake ab leham. Fa li Yesus koeiso noilo ozohemu koei esum di noimna ahana neàna behàsu modeme ab vaheham. Labi vaheme neàdi vou izi dihasi hari Sabat modemu gi vaheme esu. Amu di iube Alat dat ahamda Musa bake neha, “Gi azibe im digat na a meedamule,” lahame gagu fi hasi esuhu labe ame bak lam voom mohemu gi vaheme ab esuham.

Lukas 24

1 Labi usi behàsdi dihambe aibubet hari Minggu labe ame lahi koei noimna ahana neàna iho modeme vahehena ahum behàsu visoi Yesus koei esuhu ke bumat laba ab vou laham. 2 Vou le aaha ke baana baguamdehena lam aba amu modesuhu bak fa ogizi osoktoi modesda. 3 Làhàmu vi oli nabime aaha im Boehàda Yesus koei ba aam kai. 4 Labihàmu, “Koei akati modi setehela?” lahame dozeadume vi ozotedameam aaha Alat Am im gagu vou usem dam behàsu sue fako iedemna modesu ogatedam labe lahit dozeadaha obe laba duzuhuna ame lahi labe ab aaham. 5 Labi aame modeha lahi labe udovai iedi ogomaladume bake ab biddaham. Biddahemu ame dam behàsu labe ab gagoham. “Um mei ahedehena akati vabili koei bake nabitaoela? 6 Am nib kaio. Am eloho bak labet fa ahedi usaha bak. Amu umti Galilea bak laba tau godam di labe vameaha im laba uho vi ozodale. Nehi vameadahana taia? 7 ‘Asum Ahoba Iubet Bak Niba Li Dateleheda nim meit vou fohome dam faina meedam dam laba ub lu ve ut tetehesuhunaso laba esu paku dome eloi usi behàsdi eloho bak labet fa ahedi usa tame,’ lahame uba amu vameadahana taia?” 8 Lahame ab vameadaham. Labi etei lab usi vameadaha im lam ame lahi labe vi aime modeha Yesusat iba amu vameadaha bak lam fa ab it ozobohudeham. 9 Labi it ozobohudi futoi fa im num bake fa ab leham. Fa li Yesusat Aho Am im gagu oluiam dam sebelas lamti dam Yesus bake vi tau meedam dam amomoi zi lamti laham dam laba iho fakot aaha bak lamti iho aihi im lamti dam laba ab li vameadaham. 10 Ame im lam li vameadaha lahi neha: nam meida kota Magdala labe lehe Maria am. Labi nam meida Yohana am. Labi nam meida Yakobus faaha oi Maria am. Labi iba tau gohatem lahi totbaho am. Laham lahi labe dam laba ame im lam ab li vameadaham. 11 Labi im lam li vameadume neàdi modeha damat ozo, “Lahi lam ostam im vou leha,” lahame gi tozome moh. 12 Lahana Petrusat ozahit koei esuhu ke bumat aalo ab usai emoeham. Emoehe labe le ke bumat ozoho laba nom bohusu ub aasuha koei aam kai. Gi damat amu koeiso laba giame esuhu sue nasbe bohuta laba bisdamna ab aaham. Làhàmu fa ledam labe ozo, “Akati modehe im labihahela?” lahame vi ozo leda. 13 Labi ame digat labe Yesus bake vi tau meedam dam meida behàsu labe num debu Emaus laba lada. Kota Yerusalem labe Emaus bake lam di mahate kila vabak. Laham bak laba ab ladamam. Labi ladam di labe damat Yesus bake meedaha im lam ahebu vou vamea lada. 15 Labi vou vamea ladaha vabamu fa neo ot gagoi ot gagoia lada. Ot gagoi ot gagoia ladam di labe Yesusat ba nem futoi tau lada. 16 Lahana ame dam behàsu lam Da lam gi alihita aa. Lahana, “Yesusat modeo?” laham bak mahate ozom kai. Gi vabi vou vamea lada. 17 Labi Yesusat dam niba gago, “Um baka ana im ot gagoi ot gagoia ladàla?” Lahame vi gagoha dam behàsu nibe Yesus eloho bake vi ozome ahu faidi nom bohusu ab duzuham. 18 Duzuhu di labe dat meida Kleopasat ame Da laba ab gagoham. “Ne, Om damat kota Yerusalem laba etei meedaha im dam kota Yerusalem teohet li azibe laiam dam totbaho ahebu ozobohudehena Om vàmtea akati vabi modela?” 19 Lahame labi gagoha Yesusat fa gago, “Kota Yerusalem laba baka ana im meedaha bake labi gagoela?” Lahame labi gagoha da nibe fa gago, “Mm. Damat Yesus Nazaretdate meedaha im gagom bak. Da lam abo Alat vameadaha im aime fa dam bake ahate vameaidahada feàda am bak. Labi Alati dam duada zi lamti ame Da laba vi ozom di Am abo na damat ihimo modem biem im feàna modem meoda Am am bak. Labi Aho im vameadam di damat aime modem tademda am bak. Lahana damat Ala bake lomna ve vua vahudam toheda zi laba vuusu im vameame faheme modiam dam lamti Yahudi busaoda im ozobohuda zi lamti laham dam zi labe neha, ‘Yesus fà belu elose,’ lahame na asimbuna feà modelo Pilatus bake ub lu Pilatusat am meo dam laba gagu Yesus ut tetehesuhunaso laba esu paku dome ab eloham bak. 21 Ne, iho vedi dam mei debut im Yahudi dam siàdume vou esdam bak isi olumda Alat iba ahit oluhuda Am am tiba modeha ame dam labe ab oteham bak. Etei ame im lam modeme usi ab ahileham bak. Labi im lada lamota modehe vabak. 22 Imti vahi gohatehe lahi totbaho labe dihambe koei esuhu ke bumat laba le aaha koei aam kai. Làhàmu fa iba li vameada. ‘ “Yesus eloho bak labet Alat modi fa ahedi usaha,” laham im lam Alat Am im gagu vou usem dam behàsu labe usi duzu vameadamna im aaho,’ lahame labi vameadaha im lam im abo àvodehe bak. 24 Labihàmu im dam totbahot neo usai koei esuhu ke bumat laba emoeme le aaha lahit iba vameaha bak lam imbo laham bak ab aaham. Lahana ba Yesus koei aaha vabak,” lahame ame im lam ame Da laba ab vameadaham. 25 Labi vameadume neàdi modeha Yesusat dam behàsu niba gago, “Um akati ahusobuli mode? Um akati dam ahamda Alat vameadaha im aime fa dam bake ahate vameaidaha damat fet toedume esuhu im lam akati um ahu taho vi ozome ozobohudi vuzehem vaba mode? 26 Alat amu ozome esuhemu ame Alat Gagu Fihasi Vimteme Oluhu Dat Boehàda labe Aho amu nasi geàdume ba elom bak. Labi elohozobe ba neo Am eloho bak labet Alat modi fa ahedi usai asum ahoba iuba tom iluhuzobe Alat Aba, ‘Feàte,’ lahame vou baedam bak,” lahame ab gagoham. 27 Labi gagu neàdi dam ahamda zi labe iho Yesusat ba meedam im lam amu nasi fet ozobohudi Alat Vameadaha Im Toedahana laba toedume esuhu im zi lam ahebu ame dam behàsu biem bake Yesusat ab vou vahoke ladamam. Amu dat ahamda Musat toedume fi hasi esuhu Im Feàna zi lam nasi faasi vou vahoke ledume fa neo dam ahamda Alat vameadaha im aime fa dam bake ahate vameaidaha dam totbaho labe ibi iho toedume esuhu im lam faasi vou vahoke lada. 28 Labi vou vahoke ladume num debu Emaus laba fuseo modem di labe Yesusat Ahamo utasi Aba bake lasome modeha dam behàsu labe ame Da lam Ahamo lam bake mali gago, “Disilo mozo. Om iba tau li izi dihasi lam neàte.” Labihàmu Yesusat ab vi tau vulaham. 30 Labi Yesusat tau vule na àdam di labe Yesusat roti ve Ala bake tom gago, “Oho na nim modehe bak abo neàte,” lahame tom gagu neàdi agube dam behàsu laba ab lodaham. 31 Labi lu modeha dam labe Yesus vabi modem bak lam fa ab ozobohudeham. Labi ozobohudi modeha Yesus gi neàt na lodam dàt gi ab alimdi seteham. 32 Labihahemu ame dam behàsu àvodi ab ot gagoidamam. “Alat Vameadaha Im Toedahana lam iho biem bake Aho iba zie doni iuba vou vahoke ledam di lam im ahu gelevai tu vou ozo leda taia?” lahame ab ot gagoidaham. 33 Labi ot gagoiame neàdi usai kota Yerusalem fa ab leham. Fa li aaha Yesusat Aho gagu olu Am im vameadume esmozi laiam dam sebelas lamti Aba Aho vahokedam im ozobohudelo vi tau meedam dam totbaho lamti laba vahi esdam bak ab aaham. 34 Labihàmu ame dam duada nibe gut gago, “Imbote. Boehàda eloho bak labet fa ahedi usaha bak. Am alihi Simonat aaho.” 35 Lahame gut gagu neàdi dam behàsu labe iho Emaus lalo modehe di labe modehe im lamti labi Yesus vabi modemu Yesusat roti agube lodaha di labe fa ozobohudehe bak lamti dam duada niba ab vameadaham. 36 Labi ame im lam vameadameilahit Yesusat neo lehe bak aaha vabna Aho damat im vameadam bak laba ab li duzuham. Labi duzu gago, “Neàte. Um a iedemule. Um ahu teudi vou faodale.” 37 Lahame labi gagoha ame dam duada labe aaha na it oazehenat li duzuhuna zohàme udovai ab iedeham. 38 Iedi modemu Yesusat ab gagoham. “Um akati ozom vaba iedi modela? Um akati Em ahedehe bak ozom vaba vabi, ‘Em Amat mode?’ lahame bisi vi ozodàla? 39 Em anekehàti nabati uho nasi aadamale. Eho mozo. Na it oazehenat modemeam làhà ba faati nuti ehelem vabak. Lahana Em abo faati nuti ehe bak. Em faati nuti, ‘Eheo?’ laham bak uho voatateme ozomale.” 40 Labi gagu neàdi Yesusat Aho gagoho bak lam dam nibe, “Aho vageha,” lahamna zohàme dam bake Am anekehàti Am nabati paku doho bak lam dam bake ab fi ham. 41 Labi dam labe gi lab aaha bak laba ab deeli vàhàdeham. Lahana, “Ame Da nim Yesusat modeo,” laham bak mahate ozoho vab labe vabi vi ozodam lahasu. Labihàmu Yesusat dam niba fa ab gagoham. “Um niba na àmnavat eheo?” 42 Labihàmu dam nibe bohe dehame esuhuna visoi Yesus bake ab loham. 43 Labi Yesusat bohe lam ve, “Damat fà aase,” lahame tomba laba duzu ab àham. 44 Labi àme neàdi ame dam laba im neo ab vi vameadamam. “Eho amu uba tau godam lahasuhu di labe uba nehi vameadume esuhuna taia? ‘Eho vou mode ladam im lam ahebu ba modi imbodem tadeda tame. Abo dat ahamda Musat toehe im modeo, dam ahamda Alat vameadaha im aime fa dam bake ahate vameaidaha damat toehe im modeo, dam ahamda Ala bake vou baedam ladeem dae toehe im modeo, labihasu ame dam labe iho amu nasi fet toedume esuhu im lam ahebu modi imbodem tadeda tame,’ lahame Eho amu uba vameadume esuhu bak lam um fa vabili mode?” lahame ab vameadaham. 45 Labi vameadume neàdi Alat Vameadaha Im Toedahana lam, “Akatihasu modemna modela?” laham bak lam Am damat biem bake, “Fà ozobohudese,” lahame Yesusat ame dam labe im ahu laba ab modi fi gateham. 46 Labi dam ahu modi fi gatehezobe Aho neo vi vameada. “Ebe Eho meedaha im lam dam ahamda labe iho amu Alat Vameadaha Im Toedahana laba nehi fet toeme esuhu bak. ‘Alat Gagu Fihasi Vimteme Oluhu Dat Boehàda lam damat oteme usi behàsdi Am eloho bak labet Alat modi fa ahedi usa tame. 47 Labi fa ahedi usai neàdi Aho Am dam bake neha, “Modem neàte,” lahame Aho gagu im dedamalehe dam labe fa ot vai dam bake nehi vameada, “Uho faina meedam bak lam voedume fa ahu neà bak vàmadi meedameam làhà Alat laha uho lab faina meedàmu Aho uba beolo modem bak lam Aho gi vei mu fa faamome vei neàdedam bak,” lahame vou vameatedume bak ahebu uloholeda tame. Abo kota Yerusalem nibe faasi dam debu fa vàmadehe bak iuba le vou vameateda. Dam debu fa vàmadehe bak iuba le vou vameateda. Abo labihadume bak ahebu uloholeda tame,’ lahame fet toeme esuhu bak. 48 Labihàmu Eho eloi fat ahedi usaha bak lam uho aame ozobohudehe labe uho na aaha dam nibe fa dam amomoi bake le ame im lam ahebu fa vou vameatedam bak. 49 Lahana um a nasi lamule. Em Aiat amu neha, ‘Am Aha Nutabe Neàna uba lo tame,’ lahame fet gagu esuhuna lam Eho uba nom olu tame. Laham bake um gi kota Yerusalem niba vou faodale. Niba vou faodume Alat asum ahoba iube ame na uba nom olu modi teudi neàdehezobe ba lale,” lahame ab vameadaham. 50 Labi vameadume neàdi Yesus ba neo Aba vi tau meedam dam nim vame kota Yerusalem vou esmozi laha labe num debu Betania labe am bàhàgo bak obe laba vou le dam niba im it vameadume esmolo vaktesi Am anekehà behàsu vousai vamdesu Ala bake ab tom gagodamam. “Ai oa, Oho dam niba im neà bak modi esuiale,” lahame labi tom gagodameilahit Yesusat Am dam vou esmozi Alat Am vousai Aho azihi bak asum ahoba iuba ab tom iluham. 52 Labi dam nibe ahu adat iedi, “Yesus abo feàte,” lahame vou baedam labe deeleha vàhàdi fa kota Yerusalem niba ab ledaham. 53 Labi fa ledume gi ame Fihasi Ala Bake Vou Baedam Num Vàmteabu labe am ad oli aam bak tomba laba Ala bake vou baeda. Abo gi dihasi vou baeda. Dihasi vou baeda. Labihada. Àhàm.

Yohanes 1

1 Bak nim na ahebu meedaha vab diat dat ee, “Alat Vameadaha Im,” lahamda Yesus lam ehe bak. Labi ame di labe, “Alat Vameadaha Im,” lahamda lam Alati ahili modesda. Labi, “Alat Vameadaha Im,” lahamda lam gi Ala am bak. 2 Abo aham di iube ame Da lam gi Alati ahili esdam bak. 3 Asum ahoba modealahana zi lamti labi bak adba niba modealahana zi nimti ahebu meedaha di lam Alat ame Da lamti ahili meedaha bak. Ba na vàmtea buà nim ame Da vab diat modeheda vabak. 4 Im dam bakda ahedem bake debu ame Da am. Labi im aibu bake aidam dam nim iba modi Fauhaedamda ame Da am. 5 Labi iba modi Fauhaedamda labe Aho dam aibu bak laba aidamna ozomom dam laba fi ddam labe modi fa fauhaedam bohu modesdam bak. Ba ame aibu bak lam bisi feà labe ame fi ddam bak lam ba mali sutem vabak. Gi bohu modesdam bak. 6 Neha taia? Dat, “Yohanes,” lahamda laba, “Nehame modele,” lahame Alat ab gagu oluham. 7 Ame Fauhaedamda lam damat biem bake, “Dam ahebu Yohanesat li vameadam im lam fà aime ame Fauhaedamdate tu vuzehese,” lahame ab gagu oluham bak. 8 Ame da Yohanes lam ba ame Fauhaedamda modem vabak. Gi ame Fauhaedamda labet Aho meedaha im lam, “Yohanesat fa im dedateli vou vameatedale,” lahame Alat gagu oluhuda am am bak. 9 Ame Da Fauhaedamda bisi imboda vàmtea labe, “ ‘Ala akatihasu meedam Alat modela?’ laham im imbona lam dam bakda ahebu fà ozobohudi fi gatedase,” lahame Aho dam bakdate ab li tàham. 10 Alat ame Da modi Amti ahili asum ahoba modealahana zi lamti bak niba modealahana zi nimti alimeat modehenàme Aho dat aliholi bak niba li modeha dam bak damat, “Am amat modela?” laham bak damat ba vi ozobohudem bie. 11 Abo gi Am Yahudi damat esdam bake li modeha Am damat Am mu vooho bak. 12 Lahana meit Aba uledi tu vuzehi meedam dam lamota Aho naedat gagu ame dam laba modi fat ab Alam damalemam bak. 13 Etei lab vameadaha im lam Alam damalehe bak lam ba ibi iho bak damat nam ve ozo, “Data faase,” lahame im nam modeme data faam bake gagoho vabak. Gi Alat Ahamo ozome ame dam laba meedume Am damalehe bak. 14 Ame Da, “Alat Vameadaha Im,” lahamda lam fa dat aliholi iba dam bakdate tau vazisi aidaha bak. Abo Am Ai Alat Aho modehe Adat vàmtea lam oluhu labe imota Am feà bak aaha bak. Abo Aho iba ozahit deeli im neà bak meedam bak lam iho laha aaha bak. Labi, “Ala akatihasu meedam Alat modela?” laham im imbona ahebu lam im biem bake iba modi fi gateheda Am am bak. Ba im meida vastehe vabak. 15 Ame Da lam damat biem bake Yohanes Mei Vuu Valo Baptisleiamda laba Alat modi ozobohudehe labe aho dam bake vameadaha bak. Aho dam bake vameadam di gi dae buduana nehi vameada. “Eho amu uba neha, ‘Dat em ohuse ba vulemda lam amu di ium gi Alati ahili aida. Em baat. Labihàmu emti ame Da lamti ozom di bisi feàda Am am bak,’ lahame eho uba lab vameadahada lam, ‘Alat Vameadaha Im,’ lahamda Am am bak.” 16 Aho bisi iba ozahit deeli im neà bak meedam labe neà bak duana iba neo vi modidam bak. 17 Nehaha bak. Alat aham di iube im Israel dam bake neha, “Nehame modem neàte. A nehame meedamule,” lahame gagu fi hasi esuhu Im Feàna zi lam gi Musa bake gagu aho fa vou vamea usdume iba vou fuhu im am bak. Lahana, “Ala akatihasu meedam Alat modela?” laham im imbona lamti Aho iba ozahit deeli im neà bak meedam bak lamti labihasu Yesus abo Alat Gagu Fihasi Vimteme Oluhu Dat Boehàda labe iba modi fi gatehe im am bak. 18 Alam alihi ba meit aaha vabak. Gi Aho modehe Adat vàmteata abo Aba ahida Aho bisi deeleheda labe Ahamo, “Am Ai Ala akatihasu meedam Alat modela?” laham bak im biem bake iba modi im fi gateheda Am am bak. 19 “Alat Gagu Fihasi Vimteme Oluhu Dat Boehàda lam amat mode?” laham bak lam Yohanes Mei Vuu Valo Baptisleiamda labe aho ozobohudi vameadaha bak gi neha: Yohanesat bak aotba baa bohu dam vaba alim bak laba dam bake im vahokedume dam vuu valo baptisleidam digat meida labe kota Yerusalem laba azihi Yahudi dam busaoda labe iho damat Ala bake lomna ve vua vahudam toheda zi totbaho lamti ame dam laba vi tau meedam dam abo Lewi dam totbaho lamti labihasu gagome Yohanes bake ab oluham. “Om ana dàt mode?” laham bak vi ailo ame dam laba gagu ab oluham. 20 Labi ame dam labe Yohanes bake lafusi neha, “Alat Gagu Fihasi Vimteme Oluhu Dat Boehàda lam om ame Da modeo,” laham bak vi ailo gagoho di lam aho ba vastehe vaba abo ahate fa im nehasu vameadaha bak. “Alat Gagu Fihasi Vimteme Oluhu Dat Boehàda lam em ame Da modem kaio,” lahame ahate fa gagoho bak. 21 Lahame labi gagoha ame dam labe neo vi ailo gago, “Làhà om ame Da modem vabameam làhà om ana dàt mode? Làhà om gi Alat Vameadaha Im Aime Fa Dam Bake Ahate Vameaidahada abo Alat aham di iube ahena asum ahoba vou tom iluhuda Eliat fa bak niba nom ilu mode moio?” Lahahat Yohanesat fa gago, “Vabà! Em ba ame da Eliat modem vabak.” Lahahat ame dam labe neo vi ailo gago, “Làhà om gi dat Alat vameadaha im aime fa dam bake ahate vameaidahada meida abo Alat neha, ‘Ba olu tame,’ lahame fet gagu esuhu Dàt mode moio?” Lahahat Yohanesat fa gago, “Vabà! Em ame Da modem kaio.” 22 Gi labihadume ot gagoi ot gagoidaha vabamu ame dam etei leheda zi labe fa ab gagoham. “Làhà im bie. Om ana dàt mode? Oho iba fa gagom im ohomo ozome im imbo bak lam iba taho gagu iho ame im aime neàdi fa dam iba gagu oluhu dam laba fa le vameadase.” 23 Lahame labi gagohemu Yohanesat gi dat ahamda Alat vameadaha im aime fa dam bake ahate vameaidahada Yesaya labe aho fet toeme esuhu im vi ozome fa ame dam laba ab gagoham. “Uho nasi Yesayat fet toeme esuhu im nim ozomale. ‘Dat bak aotba baa bohu dam vaba alim bak laba azi dam aba valadamda zi laba dae buduana nehi vameada. “Alat Gagu Fihasi Vimteme Olulo Modem Dat Boehàda lem zie laba uho nasi duzu zie fet vueme neàdehena ahum Am ba lese.” ’ Lahame Yesayat lab fet toeme esuhu im lam imbodi eho ame da nibe ab meedamam bak.” 24 Lahame labi vameadume modeha Farisi dam labe ibi iho gagu Yohanes bake oudaha dam totbaho labe neo Yohanes bake vi ailo ab gagoham. “Oho amu neha, ‘Om ba Alat Gagu Fihasi Vimteme Oluhu Dat Boehàda modem kaio.’ Labi neo, ‘Eliat modem kaio.’ Labi neo, ‘Alat Vameadaha Im Aime Fa Dam Bake Ahate Vameaidahada Alat ba Olulo Modemda modem kaio,’ lahadam dàt ba oba amat gagu om im dedateli im Yahudi dam oho vuu valo baptisleidàla?” 26 Lahahat Yohanesat fa gago, “Dam giida labe iho meia aame ozo, ‘Da lam am ahu faina meedam bak lam aho voedume fa ahu neà bak meedalo vàmadi fa Ala bake tu vuzehe?’ laham bak aame ozobohudem bake eho dam bake gi vaota baptisleidam bak. Lahana em ohuse ba vi vulelo modemda lam gi etei uba tau vahi esdamda ame Da ehe bak um biem bak. Ame Da feàda labe Am naba dusumna lo tadehena lam eho feà vab dàt lo ziamom di em ba uloho vabak,” lahame ab gagoham. 28 Etei lab vameadaha im lam gi Yordan Soabo ala zizem totbaho Betania abo Yohanes Mei Vuu Valo Baptisleiamda labe aho dam vuu valo baptisleidam bak laba meedaha imot modem bak. 29 Labihadume izi dihasi Yohanesat gut aaha Yesus aba ledam bak alimeat ab gut aame dam duada zi laba ab gagoham. “Iumeee! Uho nasi aamale. Alat modi ahumdi esuhu Domba Adatea iubet ab ledamam tame. Abo iho dam bakda ahebu iho faina meedàmu Alat iba beolo modem bak lam, ‘Fà faamome vei neàdedase,’ laham bak vi ozome ba ot vai eloi iba soat vausu fa vei neàdedalo modemda etei iubet ab ledamam tame. 30 Eho amu uba neha, ‘Amu di ium Dat em ohuse ba vulemda nimti Alati ahili aida. Em baat. Labihàmu emti ame Da lamti ozom di bisi feàda Am am bak,’ lahame eho amu uba lab vameadaha Da lam iubet ab ledamam tame. 31 Israel dam Soat Vausu Fa Vei Neàdemda lam, ‘Yesus ame Da modeo,’ laham bak lam ememe laha amu di iube ame bak lam biem bak. Lahana eho niba lehe bak debu gi nehaha bak. Alat Israel dam soat vausu fa vei neàdedam bak laba vi ozome Aho Gagu Fihasi Vimteme Olulo Modemda Boehàda lam Israel damat biem bake, ‘Eho ame dam laba modi fi gatedase,’ lahame eho ahit li dam bake vuu valo baptisleidam bak,” lahame aho dam bake labihasu ab vameadaham. 32 Labi vameadume neàdi Yohanesat neo aho aaha im neo nehi vi vameada. “Israel dam Soat Vausu Fa Vei Neàdemda lam, ‘Yesus ame Da modeo,’ laham bak lam eho amu di ium bie. Lahana Alat amu eba neha, ‘Damat iho faina meedaha bak voou fa vei neàdedaha dam lam oho vuu valo baptisleidale. Labi oho ame bak lam vuusu meedam labe aameam Em Aha Nutabe Neàna labe fa bume doleti ulohonali nom oaedume Dat meida laba nom vou usi vizi abehamdemeam làhà ame Da am tame. Ame Da labe Aho ba damat Aba tu vuzehi meedam dam lam Em Aha Nutabe Neàna lam Aho ame dam laba modi vizi teudedamda Am am bak,’ lahame eba labi gagohemu eho ame bak lam ab aaham. Eho Yesus vuu valo baptislehe di labe tom aaha asum ahoba iube Alam Aha Nutabe Neàna labe fa bume doleti ulohonali nom vou oaedume Yesus bake nom vou usi vizi teudi abehamdehe bak lam em alimeat ab aame ozoham bak. ‘Aa làhà! Israel dam Soat Vausu Fa Vei Neàdemda ame?’ laham bak em ab aame ozobohudeham bak. 34 Làhàmu eho aame ozobohudehe im lam dam bake gi nehi vameadam bak. ‘Ame Da Yesus lam Alam Adat am bak,’ lahame ozobohudi gagodam bak,” lahame Yohanesat ab vameadaham. 35 Labihadume izi dihasi Yohanesat neo aba aho meia vuu valo baptisleidam bak laba esda. Aba Aho vahokedam im ozobohudelo vi tau meedam dam behàsu laha ame bak laba tau aida. 36 Labi aidume modeha Yesus lebohotelo modemu Yohanesat ab gagoham. “Um nasi aama. Alat modi ahumdi esuhu Domba Adatea iube iba ab lebohotelo modemam tame.” 37 Lahaha bak lam ame da Yohanes bake vi tau meedam dam behàsu labe aime fa Yesus bake vule ab tau ladamam. 38 Labi modeha Yesusat fa it vaktesi aaha ame dam behàsu Aba vuedàmu vi ailo ab gagoham. “Um Eba ana vi vuedà?” Lahahat ame dam behàsu labe fa gago, “Ai Rabi oa, Oho aidam bak akete?” (Ibrani dae Rabi gagom di gi, “Guru,” lahame gagom bak.) 39 Lahahat Yesusat fa gago, “Uhumo Eba vuli aameam Ebe Eho aidam bak um ab aamam bak.” Làhàmu Yesus bake vuli Aho aidam bak aame neàdi modeha dimatali jam empat fuhemu gi ame digat zoho lam Yesus bake tau aidume vou disi aibule. 40 Ame da Yohanes bake vi tau meedam dam behàsu labe iho fa Yesus bake vi tau meedaha debu gi neha: Yohanes Mei Vuu Valo Baptisleiamda labe aho amu Yesusat modelo modem im lam fet vameadamna im ahim nibe aime Yesus bake ab vi tau meedamam bak. Im ahim Aba vi tau meedamda meida ee gagom Andreas laham bak. Im ahim nibe iho Yesus bake vi tau meedam di labe Andreasta kehàm vaba am dubu Simon Petrus bake fa le ab nabidamam. Le nabidume aame neàdi ab gagoham. “Simon oa, Mesias abo iho amu di iube vou faodamda imota ame Da tàho. Eba nasi tau le aale.” (Ibrani dae, “Mesias,” laham di gi Yunani dae, “Kristus,” laham bak. Abo, “Alat Gagu Fihasi Vimteme Oluhu Dat Boehàda,” laham bak.) 42 Lahame labi gagu neàdi Andreasat Simon neo ve Yesus bake ab vou laham. “Simon ana dàt mode?” laham bak Yesus bake gagu ozobohudelo ahit Yesus bake ab vou laham. Vou le lafusi modeha Yesusat Simon bake gut aasumtedi ab gagoham. “Om Yonam adat ee gagom Simon laham bak. Lahana etei di nibe faasi om ee meida, ‘Kefas,’ lahame ee gàhàda neo vi talulo modem bak,” lahame Yesusat ab gagoham. (Etei ee, “Kefas,” lahame taluhu bak lam fa Yunani dae gagom di gi, “Petrus,” laham bak.) 43 Labi izi dihasi Yesusat Aho ozo, “Em Galilea bak laba lase,” lahame fet vi ozome esuhemu ladam labe Filipus bake tàhi gago, “Om Ebe Eho vahokedam im ozobohudelo vi tau meedam datelele,” lahame labi gagohemu ame baket ab modeham. 44 Ame da Filipus lam gi Andreasti Petrusti ibi iho azihi bak num debu Betsaida laba vahi azihi dàt moz. 45 Laham dàt aho fa neo amti vou alemda ee gagom Natanael lahamdate tàhi im vameadalo ab laham. Le tàhi ab gagoham. “Alat Gagu Fihasi Vimteme Oluhu Dat Boehàda lam imota aaho. Abo dat ahamda Musat aho dam bake gagu fi hasi esuhu Im Feàna Toedahana zi lamti labi dam aham di iube Alat vameadaha im aime fa dam bake ahate vameaidaha dam labe ibi iho fet toedume esuhu im lamti nehasu toe, ‘Alat Gagu Fihasi Vimteme Olulo Modem Dat Boehàda olu tame,’ lahame amu fet gagoho Da lam imota aaho. Ame Da lam Am ee, ‘Yesus,’ lahamda num debu Nazaret laba vou budualehe dàt moz. Abo Yusufam adat moz.” 46 Lahame labi gagu modeha Natanael gi tozome fa vi ailo gago, “Nazaret! Elaidam vab baket modem bak. Ba bak labet im feàna meedamda lehe bakvat im aihe?” Lahahat Filipus fa ab gagoham. “Lahamnàme gi ozahit ohomo eba tau vule aamale,” lahame gagohemu aho usai Filipus bake ab tau vulaham. 47 Vuladam labe lafusi Yesusat Aho gut aaha Natanael Aba ledam bak aahemu, “Natanael akatihasu meedam dàt modela?” laham bak vi ozome ab gut vameadamam. “Etei ledamda nim ba meia vagem vab dàt modem bak. Labihàmu am abo Yahudi dàt am tai ahobada Israel labe vou faat leheda meida abo Israel da aabo am bak.” 48 Lahaha bak lam Natanael aho aime vi ailo ab gagoham. “Ne, Om adi bake em aame ozobohudi labi gagodà?” Lahahat Yesusat fa gago, “Natanael oa, Filipus amu oba le gagoho vab di iube om ut araso adba nutabe bak laba nusdam bak lam Em ozobohudehe bak.” 49 Lahahat Natanael àvodi ab gagoham. “Làhà, Ai Guru oa, Om abo Alam Adat am tame. Abo im Israel dam vuusu im vahokedam Boehàda iho vou faodamda Om am bak.” 50 Lahame labi gagoha Yesusat fa gago, “Oo làhà! Om gi Eho om ut araso adba nutabe bak laba nusdam bak lam Ehemo ozobohudi oba gagoho bak om aihi labe oho Eba tu vuzehi labi gagoho taia? Lahana om ba aam di im bisi feàda abo oho etei aaha im nidi nim vafozi bisi feàda om ba aa tame. 51 Lo, lamota imbot. Lahana Eho etei uba neo gagolo modem im imboda nim laha aimale. Ame im feàna lam uho ba aamna gi neha: ‘Em abo Alat Gagu Fihasi Vimteme Oluhu Dat Boehàda am tame,’ laham bak um biem bake um ba asum ahoba iube fatahivai bumatalehena ozomomna labet Alat Am im gagu vou usem dam labe Eba abo Asum Ahoba Iubet Bak Niba Li Dateleheda niba nom ilu fat tom iluiam bak uho aa tame,” lahame Yesusat labi fet ab gagu esuham.

Yohanes 2

1 Labi usi behàsdi Galilea bak zoho labe am num debu Kana laba azim dat labe nam valo modemu dam na giaha bak ehet. Làhàmu Yesusam oi laba tau vula. 2 Labi Yesusti Aba Aho vahokedam im ozobohudelo vi tau meedam damti iba gagohemu im laha laba tau ab vulaham. 3 Labi na gihi lam àdume modeha dam zi labe iho uddam anggur oo vaksa ab foleham. Làhàmu Yesusam oi labe Aba li gago, “Dam nim im anggur oo vaksa folehe bak.” 4 Lahahat Yesusat fa gago, “Oi, om akati Eba li ame im lam labi gagodà? ‘Em amat modela?’ laham bak tombalem bak lam Alat Aho ozoho di fuhu vabak.” 5 Lahame Am oi bake labi gagohemu Am oiat Yesus Aho uledi modem bak ozobohudi fa na modem dam laba ab gagoham. “Em adat labe Aho uba gagu modiamna lam gi aime meedale.” 6 Di lam im netà obe laba vao fedemna ket modehena alimnabu enam ehete. Ame nabu lam Yahudi damat ibi iho fi ham bake kikem vao nom noadam nabu am. Ame nabu vàmtea lam vao laba fedem di abo vao seratus liter fedem bak ozomomna am bak. 7 Làhàmu Yesusat dam na modem dam laba ab gagoham. “Ame vao foli alimdehe nabu zi laba vao feddale.” Làhàmu vao feddume ab bekeddaham. 8 Bekeddahemu Yesusat neo ab gagoham. “Um nasi vao fedeme bekeddahanabu laba vao koena nom noai fa im duzu vameame dam faheme na lodamda laba vou lale.” Làhàmu ame baket ab modeham. 9 Ame vao koena fa ame da laba vou li ab loham. Lu ame da labe gut ve ab udeham. Ame vao lam Yesusat modi anggur oo vaksalehe vaot moz. Lahana ame im duzu vameame dam faheme na lodamda labe aho damat uddam anggur oo vaksa gi amu folehe bak am ozobohudi, “Anggur oo vaksa nidi nim ana bake vahela?” laham bak bie. Lahana na modem dam labe iho vao noai aba vou lehe dam lamota ozobohut. Lahana im biemda labe aho dat etei nam valo modemda laba deeli vou baedalo aa gagome ab leham. 10 Li duzu neàdi ab gagoham. “Eho etei uddam vao nim udeme ozoha, anggur oo vaksa ba udeheda nim bisi neàda am tame. Ibi iho modi baleàhà bak lam amu anggur oo vaksa bisi neàda amu nasi dam bake lodume uddam bak. Labi uddume ohu bobidume bak vabi meedam di gi anggur oo vaksa mahate udem neà vabda ba lodume uddume novam bak. Lahana oho etei labihaha vabak. Oho vedi udem neàda ahit mali esu faobe ba lodam bak. Abo neàte,” lahame ab vameadaham. 11 Etei na damat ihimo modem biem im feàna damat fet aame ozobohudemna lam Yesusat etei alimeat ab modeham. Abo Galilea bak zoho labe num debu Kana laba alimeat ab modeham. Aho labi modehe labe, “Am feà bak,” ab modi tombaleham. Labi tombalehemu Aba vi tau meedam dam labe iho neha, “Yesus abo Alam Adat am tame,” lahame ibi iho tu vuzehehe bak lam ab vi teudedamam. 12 Labi ame im lada lam modeme neàdi Yesusti Am oiti Am vahada ziti labi Aba vi tau meedam dam lamti iho vazisi ame bak lam vou esmozi num debu Kapernaum laba ab lazeham. Laba lazi teohe azi izida. 13 Yahudi dam bada nibe iho im tai ahobada zi labe Im Adam Datahida Alat Oddaha Vabat Labohotehe Bake Vi Ozome Roti Fikidehe Vabna Àme Iziam di ee gagom Paskah vou fuseo vabalehe di labe Yesus Aba Aho vahokedam im ozobohudelo vi tau meedam damti vahi kota Yerusalem laba id ladume ab zooleham. 14 Labi kota Yerusalem laba zooli fusi ame Fihasi Ala Bake Vou Baedam Num Vàmteabu laba ab laham. Labi ame Num Vàmteabu labe am ad oli aam bak tomba laba le duzu aaha damat Ala bake vou baedalo na Ala bake lomna abo sapiti dombati bume doleti labihasu ot loidam bak ab aaham. Labi doi meit iube vou leheda abo na vam biem doi vame fa ame Num Vàmteabu laba na ba vam neà doi lam ot loiam dam iho doi vahedam beahuba nusdam bak laha aa. 15 Ame bak lam aahemu faki, “Meia beodamna modese,” lahame ihi sokba bobaehenati ulohona zi ateme dombuli neàdi ame dam zi lam beodume ame Num Vàmteabu labe am ad oli aam bak tomba lam dam ab futodume seddamam. Abo domba zi lamti sapi zi lamti laha meoli iteda. Labi ame doi ot loiadam dam labe im doi laha feàkmome voeda. Labi im doi vahedam beahuba zi lam laha vuu vaktemoda. Gi labihada. 16 Labi bume dole meia ot loiam dam laba Aho neha, “Um na zi nim nasi vou futodume bàhàgo iuba lale. Um akati Em Aiam Num niba na zi nim ot loidàla? Taho ilile.” 17 Lahame Yesusat gi etei labi gagoha Aba vi tau meedam dam labe iho ab vi ozoham. “Meit Alat Vameadaha Im Toedahana laba im nidi nim Yesusat modi ab imbodeham bak,” lahame ab vi ozoham. Ame toehe im neha: “Boehàda oa, Eho Om num bisi vou faovoemda modemu Em ahu galihasi seteho.” Lahame toehe bak lam ab vi ozoham. 18 Labi modeha Yahudi dam vuusdam busaoda zi labe iho Yesus etei lab meedaha bak lam aahemu beàdalo ab gagoham. “Baka Oba amat modi im dedateli im lam meedàla? Alat Oba gagu im dedateli Oho ame im lam meedameam làhà Oho laha na damat ihimo modem biem im feàna iba modi iho fet aame, ‘Imbote,’ laham bak ozobohudemna nasi modele.” 19 Lahahat Yesusat fa gago, “Làhà ame Fihasi Ala Bake Vou Baedam Num Vàmteabu nim uho fa faamome seddamale. Labihazobe Eho gi usi behàsdi fa momet neàdem bak.” 20 Lahahat ame Yahudi dam labe alamdi fa ab gagoham. “Aa! Fihasi Ala Bake Vou Baedam Num Vàmteabu nim abo empat puluh enam tahun moho bak. Ba akati Oho usi behàsdi mome neàde?” 21 Lahana ame Yahudi dam vuusdam busaoda zi labe iho Yesusat lab gagoho bak lam vabile. Yesusat etei ame Fihasi Ala Bake Vou Baedam Num Vàmteabu laba im lam gagoho di lam Am gi vàlu gagoho bak. Gi Am so laba modem im fi bovai gagoho bak. 22 Ba di iube Am eloho bak labe fat ahedi usam bak imbodehezobe Aba Aho vahokedam im ozobohudelo vi tau meedam dam labe Yesusat etei lab gagoho bak lam ba it ozome ozobohudehe bak ehe bak. It ozobohudehemu Alat Vameadaha Im Toedahana zi lamti labi Yesusat ahe di labe Aho lab fet vameadaha im lamti ahebu labihasu vazisi damat ba ozobohudi tu vuzehe bak ehe bak. 23 Dam etei kota Yerusalem laba ame Paskah vi ozome àme iziam di lam Yesus laha tau meeda. Ame bak lam tau meedam di labe Yesusat na damat ihimo modem biem im feàna damat fet aame àvodemna lam duana meeda. Ame lab meedam bak lam dam dua bak aahemu Aba fota tu vuzeheda. 24 Lahana Yesus ba dam laba tum vabak. Dam bakda labe im ahu ad laba modem bak lam ahebu ozobohu labe ba dam laba tuhu vabak. 25 Am ba dat meida nibe fa dat meida, “Neào? Faio?” laham bak ba vi gagu aim vabak. Dam bakda labe im ahu ahebu Am ozobohu labe labihaha bak.

Yohanes 3

1 Labi aibu meida labe dat ee gagom Nikodemus lahamda labe Yesus bake li tàh. Ame da Nikodemus lam Yahudit Ibi Iho Modem Im Gagu Vàmadi Esum Dam Debu labe ahala vou baeaiam im vuusualam debu Farisi laba tau meedamda meida am. Lahamda labe Yesus bake aibut tàhi ab gagoham. “Ai Guru oa, im dam totbahota Alat Oba neha, ‘Dam bake le im nehasu vahokedale,’ lahame gagu oluhu bak lam imota ozobohu bak. Ba na damat ihimo modem biem im feàna damat fet aame ozobohudemna lam Oho etei lab meedahana lam ba Alat Ahamo Oba modi vizi teudehe vab alia meedam vabak.” 3 Lahahat Yesusat fa gago, “Nasi aime ozomale. Meit am fa faasi veimdi gàhàdem vabameam ba Alam damali Aho vuusu im vahokedam vabiem bak.” 4 Lahahat Nikodemus fa gago, “Ne lahana meit am busaoli setehena akati ba fa faaela? Ba am oiam nibeso laba oli am fa faam neà? Ba modem biem bak.” 5 Lahahat Yesusat fa neo gago, “Lo, lamota imbot. Lahana Eho etei oba gagolo modem im imboda nidi nim laha aima. Meit neha, ‘Em Alam damalese,’ lahamda lam ba vao labet faasi gàhàdem vabak. Labi laha Alam Aha Nutabe Neàna labe ame da laba modi am ahu ad laba vizi teudem vabak. Labihameam làhà ba Alam damali Aho vuusu im vahokedam vabiem bak. 6 Neham bak. Dam bakda im lahiti data faam di gi ekda faadam bak. Lahana im modi fa veimdi gàhàli Alati vou alem bak lam gi Alam Aha Nutabe Neàna labet iba modi vizehe labe labihadam bak. 7 Labihàmu Eho etei lab gagoho bak lam, ‘Meit am fa faasi gàhàdese,’ lahaha bak lam a àvodemule. 8 Neham bak. Nutabe lam gi iuba foada. Iuba foada. Lahana ame nutabe, ‘Adi baket ledà? Adi bake lada?’ laham bak lam im biem bak. Im gi na nigo nigodamna foadam bakta dogoit aida. Labi laha Alam Aha Nutabe Neàna labet meia modi vizi fa veimdi gàhàlem bak lam im laha aame ozobohudem biem bak. Lahana modi fa veimdi gàhàlemda labe aba aho meedam bak lam iho aame ozobohudem bak am.” 9 Lahame labi gagoha Nikodemusat fa Yesus bake ab vi ailo gagoham. “Alam Aha Nutabe Neàna labe Aba Aho meia modi vizi fa veimdi gàhàlem bak lam akatihasu modemna modela?” 10 Lahahat Yesusat fa neo gago, “Oo, Alat Vameadaha Im Toedahana lam oho ozobohudi Israel dam vuusu im vahokedamda meida om am taia? Ba akati Eho lab gagoho im lam om ozom bi mode? 11 Làhà Eho etei oba gagolo modem im imboda nidi nim nasi iademe aima. Ibi iho ozobohudehena lam iho uba Yahudi eeda busaodate ahate gagomda am. Labi laha iho fakot aahada lam iho uba ahate vameadamda am. Lahana um akati ibi iho vameadaha bak lam uho fa vuzehem vaba modela? 12 Ne, Eho etei, ‘Ala akatihasu meedam Alat modela?’ laham bak lam uba vahokedaha di lam gi bak niba meedaha im vouhoha um ba Eba tu vuzehehe vabak. Eho ba neo ame bak lam uba vahokelo meedam di Eho asum ahoba iuba meedam im vouhomeam uho ba akati Eba tu vuzehe? 13 Ba bak niba esdamda meida vàmtea buàva nibet fa asum ahoba iuba laisi, ‘Imvat eheo?’ laham bak aame fa im dedateli lezemda vabak. Lahana asum ahoba iuba, ‘Imvat eheo?’ laham bak Emota ozobohu bak. Em abo Asum Ahoba Iubet Bak Niba Li Dateleheda modemu Em gi aham di iube asum ahoba iuba aidume fa ame im lam uba vameadalo Eho bak niba lehe bak. 14 Aham di iube im Yahudi dam tai ahobada zi labe iho bak aotba baa bohu dam vaba alim bak laba vabi godam di lam Musat vameadaha im moho dam lam ozbat veedaha bak. Làhàmu Alat Musa bake neha, ‘Tembaga ve vabiedume ozbasoti ulohona modi fa ut aaso bohulana laba modesu vousale. Labi ozbat veedaha dam labe fa ame ozba itti ulohona laba tom aameam Eho modi fa neàde tame,’ làhàmu Musat ame baket ab modeham. Im lada lam amu mode. Labi ba neo Em abo Asum Ahoba Iubet Bak Niba Li Dateleheda nim laha damat abo ut tetehesuhunaso laba esu vousalo modem bak. 15 Labiham labe meit Eba tu vuzehi meedameam làhà ame da laba modi Alati vahi gi ahe neàna bohu vuusdam bak,” lahame Yesusat ab vameadume esuham. 16 Nasi ozomale. Alat dam bakda ahebu bisi deelehemu Aho dam bakda iho faina meedam bak laba gohali fa ot vai eloi vasea veàtom bak vi ozohemu gi Aho modehe Adat vàmtea lam bak niba ab oluham bak. Labiham labe Aho Oluhu Adat lam meit Aba neha, “Am abo Alat Gagu Fihasi Vimteme Oluhu Dat Boehàda am tame,” laham bak laba tu vuzehi meedamda lam ba Alat vaitesu voom vaba abo Amti vahi gi ahe neàna bohu vuusdam bak. 17 Nehaha bak. Alat amu Am Adat bak niba oluhu di lam dam bakdate neha, “Uho faina meedam damat modem labe fà beose,” lahame na asimbuna feà modelo gagu oluhu vabak. Gi dam bakda labe iho faina meedàmu Aho beom bak lam Am Adat fa iba soat vausu fa vei neàdem bak laba ozome gagu oluhu bak. 18 Meit Alam Adat laba tu vuzehemda laba Alat ba, “Oho faina meedam dàt modem labe fà beose,” lahame na asimbuna feà modelo ba gagom vabak. Lahana meit Aba tu vuzehem vabda laba Aho gi amu di iube, “Beo tame,” lahame na asimbuna feà modelo Alat fet gagu esuhu bak lam lahasdam bak. Abo ame da labe Alat modehe Adat vàmtea laba tu vuzehem mom labe labihaha bak. 19 Alat dam bakda, “Beose,” lahame na asimbuna feà modelo gagu esuhu bak lam gi neham labe labihadam bak. Alam Adat abo Fauhaedamda labet bak niba ab leham bak. Lahana dam bakda labe iho faina meedam labe ame Fauhaedamda laba faki gi aibu bak laba deeli esdam bohu meedam damat modem bak. Labiha labe Alat, “Beose,” lahame ab gagu esuham bak. 20 Neham bak. Dam faina meedam dam ba fauha bak laba deelem vabak. Gi faki mom bak. Ibi iho lab faina meedam bak lam fi dem bak labna zohàme ba ame fauha bak laba le netàdem vabak. Gi mom bak. 21 Lahana meit im imbona lam tu vuzehi vamdesu meedamda lam ame fauha bak laba lam meot. Abo, “Ibi iho lab im vamdesu meedam bak lam gi Alat Aho iba vuusdam labe iho ame baket meedam damat modem bak,” laham bak tombalelo ahit ame fauha bak laba lam bak. 22 Labi ba digat meida iube Yesus Aba vi tau meedam damti vahi kota Yerusalem vou esmozi Yudea bak obe laba le dam etei Aba tu vuzehi meedam dam lam Aho gagu valo baptisleida. 23 Labi ame di labe Yohanes Mei Vuu Valo Baptisleiamda lam damat si sel ousuhu vab di iube aho laha Ainon sii abo num debu Salim netàdehe bak laba abo vao dua bak ehe bak laba dam vuu valo baptisleida. Damat, “Valo baptislese,” lahame dihasi valada. Dihasi valada. Labihadaha labe labihada. 25 Labi digat meida labe Yohanes aba aho vahokedam im ozobohudelo vi tau meedam dam labe iho fa im Yahudi da meidati daet otesi otesida. “Im Yahudi dam vaot itatame neàdemna neàda akete? Yohanesat im dedateli modemda nibao? Yesusat im dedateli modemda labao?” laham bak lam ozom bi daet otesi otesida. 26 Làhàmu Yohanesam dam labe aba li ab gagoham. “Ai Guru oa, digat amuda iube imti omti Yordan Soabo dumam totbaho laba vahi esdam di oho iba neha, ‘Iumeee, iba soat vausu fa vei neàdedalo modemda iubet ab ledamam tame,’ lahame vimteme iba ahate vameahada lam om vi ozodam lahasuheo? Ame Da lam laha bak iuba le dam vuu valo ab baptisleidamam bak. Om ozom vaba? Dam dua bak Oba lem vaba fa Ame Da laba dihasi valada. Dihasi valada. Labihadam bak.” 27 Lahahat Yohanesat fa gago, “Neà bak. Im dam bakda ahebu ibi iho na meedam bak lam gi Alat gagu esuhu labe ame baket ahaladiame meedam bak. 28 Eho amu uba neha, ‘Em ba Alat Gagu Fihasi Vimteme Oluhu Dat Boehàda modem vabak. Alat gi eba neha, “Em nasi le zie vueme ame Da ba vuese,” lahame gagu oluhuda em am bak,’ laham bak lam eho amu gagohona um aime ozobohudehena taia? 29 Eho dat nam valo modem bak vouhodase. Ame nam soao lam gi aba valo modemda labe aho aidam bak laba lam bak tade. Labi ame nam valo modemda labe amti vou alemda labe gi am obe duzu, ‘Aba im gagom bak eheo?’ lahame vou faoda. Vou faodam labe ame nam valo modemda labe am namti im ot vameaidam bak aidàmu am ahu abo deele. Eho etei vouhodam nam valo modemda lam gi Yesus am bak. Labi Amti vou alemda em am bak. Labi eho aiha dam bisi dua bak aba dihasi valada. Dihasi valada. Laham bak lam eho etei aihemu em ba fakem vaba abo gi deeli vàhàdehe bak. 30 Neham bak. ‘Ame Da labe Am feà bak lam vi taui vi tauidume budualedase. Labi em fa feà vab dateli vousdase,’ laham bak lam Alat modelo àhàkem bak am bak. 31 Uho neham bak ozomale. Asum ahoba iube fa bak niba leheda lamti dam bakdati ozom di bisi feàda asum ahoba iubet leheda Am am. Bak niba esdamda ahebu gi dam bakda labe ibi iho modi baleàhà bak vouhodam damat modem bak. Abo im vameadam di gi bak niba modehe im vameadam bak. Lahana asum ahoba iubet leheda im bakda vafozi bisi feàda Am am bak. 32 Ame Da labe Aho dam bake im vameadam di Aho gi Alat Aba modi fi gatei Aho aaha im lamti Aho aihi im lamti lamota dam bake ahate vameadam bak. Lahana ba dam Aba Aho vameahana tu vuzeheda vabak. 33 Lahana meit Aba Aho vameadam im lam tu vuzehemeam làhà ame da lam laha im nidi nim laha neo vi tau ozobohudi gagodam bak. ‘Alat vameadaha im lam laha imbo im vameadam bak,’ lahame neo vi tau ozobohudi gagodam bak. 34 Neham labe labihaha bak. Ame Da lam gi Alat neha, ‘Im Ebeda dam bake vameadase,’ lahame gagu oluhuda Am am bak. Alat Am Aha Nutabe Neàna labe ame Da laba modi vizehe di gi na im ahebu modi vizehe bak. Ba koena modi vizehe vabak. Labiha labe Aho gi Alat gagoho im lamota vameadam bak. 35 Im Ai Alat Am Adate deelehe labe na ahebu Aba gagu im dedatelehe bak. 36 Labi meit Alam Adat laba uledi tu vuzehemeam làhà Alat ame da laba modi Amti vahi gi ahe neàna bohu vuusdam bak. Lahana meit Am Adat laba uledi tu vuzehem vabameam ba Alati vahi ahe neàna bohu vuusdam vabak. Gi ame da laba Alat fakem bohu vuusdam bak. Ba vaitom kaio,” lahame Yohanesat ab vameadaham.

Yohanes 4

1 Ame di lam Farisi damat aiha dam dua bak, “Iba meit vuu valo baptislese,” lahame Yesus bake dihasi valada. Dihasi neo valada. Lahada. Labihadume Yesus bake tu vuzehi meit vuu valo baptisli neàdi ame dam Yesus bake vi tau meedam dam totbaho laba vi taui vi tauidume duaeda. Abo Yohanes Mei Vuu Valo Baptisleiamda labe aba aho vuu valo baptisli fa aba vi tau meedam dam lam fa vafozi Yesusbada duaeda. Laham bak lam meit li gagoho bak ame Farisi damat ab aiham. ( 2 Lahana Boehàda Yesus mei vuu valo baptislem vab dàt modem bak. Gi Aba vi tau meedam dam labe ihimo mei vuu valo baptisleidam bak.) 3 Lahana ba digat meida iube meit neo Yesus bake le ab gagu fi deham. “Damat Oba vi tau meedam damalehemu meit im vuu valo baptislehe dam duale. Labi Yohanes abada fa koede. Lahaha bak lam meit gagohona Farisi damat aiho,” lahame meit Aba li gagu fi dehena Yesusat aime ozobohudi Aba vi tau meedam dam lamti iho Yudea bak vou esmozi fa Galilea bak laba ab ladamam. 4 Yudea bak vou esmozi ladam di labe Samaria bak labet ab ladamam. Di lam Yahudi damti Samaria damti ba ot vahiame meedam vab damat modem bak. Lahana Yesus ozahit, “Taho lase,” lahame iho Aba vi tau meedam dam nimti vahi gi zie buuda Samaria bak labet ab ladamam. 5 Labi ame Samaria bak labet ladume ala tomali abo jam dua belas fuseo vabaehe diat num debu Sikar labe am bàhàgo laba ab lafuham. Ame Sikar lam gi dat ahamda Yakub labe aho aham di iube am adat Yusuf bake loho bak zoho laba netàdi modesuhu num debut moz. Labi laha ame num debu bak labe am bàhàgo laba Yakubat aham di iube sihi vao nobu laha ehet. Labi Yesus ladaha vanamahemu ame vao nobu obe laba ab le nusuham. Labi ame di labe Aba vi tau meedam dam nibe iho na àm bak ozome na àmna doit valo Sikar laba ab ladaham. Labi omozit Yesus lab aidam di labe Samariada lahi vao noalo ab leham. Li modeha Yesusat ab gut gagoham. “Oi, oho Eba vao noai lom vabao?” 9 Lahahat nam labe ozo, “Ne, Yahudi dam ba im Samaria dam labe vao udemna zoho ibida ba vao udem vabak. Mom bak,” lahame àvodi fa ab gagoham. “O Dat busao, Om Yahudi dam modemna akati eba Samariada lahi niba vao tauledàla?” 10 Lahahat Yesusat fa gago, “Ne, Alat oba lolo modemna lam om ozobohude. Labi Eho etei oba vao tauleheda nim, ‘Em amat modela?’ laham bak lam om laha neo vi ozobohude. Labihameam oho Eba neo vao tauledàmu Eho uledi oba ahedem vao lu udem bak.” 11 Lahahat ame nam labe fa gago, “Dat busao, ne Om vao noamna vabna vao nobu feà adba iuba modesdamna akati noaela? Oho ahedem vao lam adi bake vàla? 12 Làhà im tai ahobada Yakub labe iba modi vou esmoho vao misia nim fai? Labi Om bisi feàda ame? Ne, ame vao nim Yakub am naeda laha tau vao noai udehe bak. Labi am adamti aba aho ba vou faat lehe mekehà dam zi lamti labi na fi ho zi lamti labihasu uddaha vao nim fai? Labi Obo Oho lolo modemda lam fa bisi neà? Lahame ozome labi gagohe?” 13 Lahahat Yesusat neo fa vi vameada, “Meit vao nidi nim udemeam ame da lam fa neo vao àhàkedam bak. 14 Lahana meit vao Eho lolo modemda nim udemeam ame da labe ba valo àhàkedam vabak. Neham labe labihaha bak. Vao Eho lolo modemda nim meit udemeam làhà aho udehe bak labet modi am ahu ad laba vao aanati ulohona labaha bohu futodam bakti ulohona modi am gi ahe neàna bohu vuusdam bak.” 15 Lahahat nam labe vabi abo gi vao abo gagoho tiba fa neo ab gagoham. “Dat busao, làhà Oho eba ame vao lam lu udele. Labiham labe em ba valo àhàkem vab labe em ba niba li vao noaiam vabak am tame.” 16 Lahahat Yesusat fa neo gago, “Làhà, om nasi fa le om dat gagome fa niba vou lele.” 17 Lahahat nam labe fa gago, “Mm, em dat vabak.” Lahame labi gagohemu Yesusat fa ab gagoham. “Lo, oho etei, ‘Em dat kaio,’ lahaha bak lam imbo taia? Lahana oho amu dat vaha bak auoholehe bak. Labi oho etei bako vou godam dat lam oho iademe vaha vab namet modem bak.” 19 Lahame labi gagoha nam nibe vatohedam labe fa neo ab gagoham. “Làhà Dat busao, em etei ab ozoham bak. Om Alat Am im fi desi fa meia ahate vameaidaha dàt mode moio? 20 Làhà Oho ozom, meit Ala bake, ‘Am abo feàte,’ lahame ahu adat iedi vou baedam di adi bake vou baedam labe neàde? Ne, im Samaria dam nibe gi sibu nidi niba Ala bake vou baedam bak. Abo im tai ahobada zi labe ibi iho aham di iube iho Ala bake vou baedam di gi sibu nidi nimota laisi ame baket meedam bak. Lahana um Yahudi damat neha, ‘Im Samaria dam git meedala. Gi Fihasi Ala Bake Vou Baedam Num Vàmteabu kota Yerusalem laba duzuhuna lamota Ala bake vou baedam bak am tame,’ lahame labi gagodam bak. Làhàmu Oho ozom, um Yahudi damat imbodeheo? Iho Samaria damat ibi iho meedam bak labet imbodeheo? Adida imbodehela?” 21 Lahame labi gagohemu Yesusat neo ab vi vameadamam. “Oi, Eho etei oba gagolo modem im nidi nim mahate aime tu vuzehele. Faobe ba damat im Ai Ala bake vou baedalo modem di ba gi sibu niba modeo, gi kota Yerusalem laba modeo, ba gi bak lamota vou baedam vabak. 22 Um Samaria dam labe uho Ala bake vou baedam di, ‘Akatihasu meedam Alat modela?’ laham bak lam um mahate ozobohudi neàdem vab damat Ala bake vou baedam bak. Lahana im Yahudi dam nibe iho Ala bake vou baedam di im abo ozobohu aabodi Ala bake vou baedam bak. Neham labe labihaha bak. Im Boehàda Alat amu di iube neha, ‘Aho ba dam soat vausu fa vei neàdedam bak lam Aho fa dam bake modi fi zeam bitom di Aho gi Yahudi dam labet modi ame bak lam fi zeam bito tame,’ lahame iba fet gagu esuhu bak. 23 Neham bak. Ala Am alihi im gi fota aam vabnat modem bak. Labihàmu iho dam bakda Aba vou baedam di gi im ahu ad nibet vi ozome vou baedam bak. Lahana gi modem vaba abo imbolabe ahu adat vi ozome ahu vàmadi Aba vou baedam bak. Damat ba im Ai Ala bake abo imbona vou baedalo modem di gi labiham bak ba mode tame. Gi im ahu ad nibet vi ozome abo imbolabe ahu vàmadi im Ai Ala bake vou baedam bak. Ai Ala labe gi, ‘Dam gi labihasu meedam damta Aba vou baedase,’ lahame ozome àhàki vou faodam bak. Lahana ame bak lam gi etei di nibet ab faasi meedamam bak.” 25 Lahame labi vameadume modeha nam labe fa neo gago, “Em nehi ozo. Alat Aho Gagu Olulo Modemda Boehàda ba iba le tame. Labi Aho lehezobe iho ba meedam biem im lam ahebu Aho ba iba gagu im ozobohudi fi gate tame.” (Ibrani dae, “Mesias,” laham di modeo, Yunani dae, “Kristus,” laham di modeo, gi, “Alat Gagu Fihasi Vimteme Oluhu Dat Boehàda,” lahame gagom bak am.) 26 Lahame labi gagoha Yesus labe fa ab gagoham. “Ne, Em ame Da am bak. Em ame Da etei im oba ab vameadamam bak.” 27 Lahame gi etei lab vameadam lahasuhu di labe iho Yesus bake vi tau meedam dam nibe iho num debu iuba le fa li aaha Yesus lahi bake im vameadam bak aame ab àvodeham. “Guruleheda ba lahi bake im ot vameaidam vabak. Fiham bak,” lahame ozome ab àvodeham. Lahana ba ame nam laba, “Om ana lehela?” lahame ba labi vi ailo gagom bak modem kai. Labi laha Yesus bake, “Guru, um ana im vameadàla?” laham bak lam laha ba vi ailo gagom iedi gi vei daleàde. 28 Labi ame nam labe am vao noamna lam gi laba vou esmozi ame num debu bake esdam dam laba fa ab emoeham. Labi le dam bake ab vameadamam. 29 “Etei niba li eba im vameadamda eho bàhàgo laba vou esmohoda lam um nasi eba tau fa le aamale. Da lam im ebe eho amu modeheda ahebu Ahamo ozobohudi eba gut vameadaha bak. Uho ozom, Da lam Alat amu Gagu Fihasi Vimeteme Iba Olulo Modem Boehàda iho vou faodamda ameo? Imo taho fa le aase,” lahame labi gagohemu dam lam ahebu num debu labe usname fa Yesus bake ab ladamam. 31 Labihadam di omozit iho Yesus bake vi tau meedam dam nibe Aba nehi gagoda. “Ai Guru oa, Om idoalehe bak na nasi li àle.” 32 Lahame labi gagoha Yesusat fa vi gago, “Em na àmna ehe bak um biem bak.” 33 Lahahat Am dam labe ihimo fa ab ot vameaidamam. “Uho ozom, Da nim amat na vou li lu àhela?” 34 Lahahat Yesusat Aho etei, “Na àmna ehe bak,” lahame lab gagoho bak lam fa neo vi vameada. “Eho na àme modi neàdemna ehe bak. Eba Gagu Oluhuda lam abo Em Ai Ala labe Aba Aho ozome Eba gagoho im lam ahebu meedume neàdem bak lam bisi Eba modi neàdemna am bak. 35 Nasi ozomale. Uho gi nehasu ozome gagodam damat mode taia? ‘Na debe uloholi neàdi ala ahiali ame na ba modeme vahedam bak,’ lahame labi gagodume baleàhà damat mode taia? Lahana Eho uba gi im nehasu gagom bak. ‘Um na utoho zi laba aale. Na ambedi neàdeho. Modeme vahedam bak ab vou fuham bak. Abo Samaria dam labe meit iba li vameadam labe aime Eba tu vuzehem bake ahumdi vou faodam bak ehe bak,’ lahame uba labi gagom bak. 36 Neham bak. Dam amuda iube bak vabieme neàdi na oo gulaha dam lam amu gi meedume neàdehe bak. Lahana dam ba etei nibe na modeme vahedam dam lam ibi iho na meedam bak gohali vamna lam etei ab vadamam tame. Labiham labe dat amu bak vabieme neàdi na oo gulahada lamti labi dat na ba modeme vahedamda lamti gi ame na ab modeme vahehamemu fa vahi deelem bak. Ame dam labe ibi iho modeme vahedamna lam gi dam Eba tu vuzehi im Ebeda meedamda zi am bak. ‘Ame dam laba im vameadume modi fa Eba tu vuzehi fa Alati vahi gi ahe neàna bohu vuusdase,’ laham bak laba ozome modeme vahedam bak. 37 Labihàmu damat gagodume baleàhà im nim imbote. Neha: ‘Dat meida na de. Labi ame na ambedehezobe dat meida fa modeme vaheda. Labihadam bak,’ lahame labi gagodume baleàhà im lam imbote. 38 Neham bak. Ba utoho Ebeda lam uho dehe vabna Eho ozahit uba neha, ‘Laba le na modeme vahedale,’ lahame Eho uba gagu oudaha bak. Ame utoho lam Alat dam amomoi gagu oudaha dam labe iho tat vueme na debe vanamahana uho gi mei na ahum fa modeme vahedaha bak,” lahame Yesusat im labihasu ab vameadume esuham. 39 Ame Samariada lahi labe neha, “Da lam im ebe eho amu modeheda ahebu Ahamo ozobohudi eba gut vameadaha bak,” lahame aho aime àvodi fa dam bake ahate vameaha labe ame Samaria dam lam num debu Sikar laba esuhu dam dua totbaho labe neha, “Ame Da Yesus lam Alat Gagu Fihasi Vimteme Oluhu Dat Boehàda Am am bak,” lahame ab tu vuzeheham. 40 Labi ame Samaria dam labe Yesus bake le tàhi im vameadaha di labe Yesus bake deeli nehi gagoda. “Om nasi a lamule. Iba tau iddume lale,” lahame labi gagodàmu Yesus uledi ame dam labe im num debu bak laba le tau aidume usi ab behàsdeham. 41 Ame dam laba Yesusat Ahamo Am im vahokedume usi behàsdi modeha dam dua bak neo vi tauidume Yesus bake ab tu vuzehedamam. 42 Labi tu vuzehedam labe fa ahamte Yesus bake tàhi im vameadaha nam laba nehame ab vameadamam. “Iho etei Yesus bake lab tu vuzehehe bak lam oho aame iba li vameadaha bak lamota ozome tuhu vabak. Im gi ihimo Yesus bake le tàhi im Abada aidume ab tu vuzeheham bak. Abo imbote. Ame Da Yesus lam abo dam bakda ahebu Soat Vausu Fa Vei Neàdemda Am am bak,” laham im lam ab vameadaham. 43 Labi Yesus Aba vi tau meedam dam lamti iho num debu Sikar lam vou esmozi ibi iho Galilea bak laba lam bak ozome neo ab ladamam. 44 Di amuda iube Yesusat Ahamo nehi ahate gagoho bak ehet. Aho neha, “Dat Alat vameadaha im aime fa dam bake ahate vameaidahada labe aho bak mei bake lam dita ame dam labe ahu adat iedi aho lab vou le vahokedaha im lam ule neàt gut ve aba vou baedam labe am im aime meedam meo bak. Lahana aho am budualehe bak laba fa le am dam laba im vahokedam di am dam labe gi ailahigeàmodam meo bak. Ba ahu adat iedi aho lab li vahokedaha im lam aime aba vou baedam vabak,” lahame ahate gagoho bak ehet. 45 Lahana Galilea bak zoho laba lafusi modeha ame Galilea bak laba azihi dam totbaho labe gi Aba deelehat gut vada. Ame dam labe amu Yahudi damat kota Yerusalem laba vahe vaheme ame na àme iziam bak abo Paskah lam laba tau vahi meedam di lam Yesusat na damat ihimo modem biem im feàna zi meedaha bak fako ibidat aadahemu labihada. 46 Labi neo Galilea bak laba ladam labe ame bak labe am num debu meida Kana laba fa ab laham. Abo Aho amu laba le vao aabo modi fa anggur oo vaksalehe bak laba fa ab laham. Ame di labe Roma Boehàda meida labe am na vi tau meedamda meida labe am adat fa ibi iho azim num debu Kapernaum laba gaili bisda. 47 Làhàmu aho aiha Yesusat Yudea bak labet fa Galilea bak niba lehe bak aihemu Kana laba le Yesus bake tàhi ab tauledamam. “Em adat Kapernaum laba gaili bisdamda elolo vabaleha. Oho eba nasi tau le modi fa neàdem neào?” 48 Lahame labi taulehemu Yesusat ab gagoham. “Na damat ihimo modem biem im feàna damat amu aaha vabna fet aame àvodemna Eho modem bak lam um dam bakda labe aam vabameam um ba, ‘Em abo Alat Gagu Fihasi Vimteme Oluhu Dat Boehàda am tame,’ laham bak ba Eba tu vuzehem vabak.” 49 Lahame labi gagoha ame eeda labe fa gago, “Dat busao, bisi a kehàmule. Em adat elolo vabaleho. Fa taho lase.” 50 Lahahat Yesusat fa gago, “Om nasi om num bake lale. Om adat gi fa neàdehena fa le aa tame.” Labi ame eeda labe Yesusat etei lab gagoho bak laba aime tu fa am num bake Kapernaum laba ab ladamam. 51 Labi ladume izi dihasi neo ladameam aaha am na modem dam doait ledam bak ab tàham. Tàhi gago, “Aia, om adat gailehe bak fa aodeha.” 52 Lahaha bak aihemu gago, “Ne ana jam fat aodehela?” Lahahat ame dam labe fa gago, “Màt jam satu am so galihaha bak fa neàdi setehena ozomoho bak.” 53 Lahaha bak lam aihemu ame eeda labe it ozo. “Oo làhà! Jam lam gi Yesusat eba neha, ‘Om adat fat ahede tame,’ lahame gagoho jam ame?” lahame it ozobohudi aho am dam laba fi desi aho am damti neha, “Ame Da Yesus lam Alat Gagu Fihasi Vimteme Oluhu Dat Boehàda am tame,” lahame Yesus bake ab tu vuzeheham. 54 Yesusat ahamte Yudea bak labet fa Galilea bak niba li na damat ihimo modem biem im feàna damat fet aame ozobohudemna ahamte modeheda lamti etei modehedati vahi gagom di ab behàsdeham bak.

Yohanes 5

1 Labi ba di meida iube Yahudi dam neo vahe vaheme na àme iziam di neo meida meedàmu Yesusat, “Vi tause,” lahame kota Yerusalem fa neo ab laham. 2 Ame kota Yerusalem bàhàgo obe ke vou vahe zime vabousuhu bak labe am doo meida ad laba, “Domba Ot Loiam Bak Laba Netàdi Modesuhu Doo,” laham doo labe am obe damat sihi vao nobu ehet. Ame vao nobu ee Aram dae gagom di, “Betesda,” laham bak. Labi ame vao nobu labe am valau obe laba vabousuhu ohut baana zisuhuna abo natàh vabna damat nutabe bake nusum bak auohole laba ehet. 3 Ame bak laba dam fako faida na aam biemda ziti nao zoho nutabedeheda zi lamti nisileheda totbaho ziti labihasu ame bak laba beiladam meot. [Neham bak. Ame vao nobu laba Alat Am im gagu vou usemda labe nom ilu ame vao laba modi bobodam meot. Labi ame vao gi etei faasi bobodam di labe dat nisileheda nasi fusi ehumda lam am faidehe bak modi fa neàdemda am. Labihàmu vao bobodam bak aalo ame dam nisileheda zi laba beilame vou faoda.] 5 Ame di lam dat nisili abo tiga puluh delapan tahun fuhuda ame bak laba ehet. 6 Lahamda labe bisdam bak Yesusat aame ozo, “Da nim am nisilehe bak abo tahun duana gailehe?” laham bak Ahamo ozobohudehemu ab gagoham. “Om fa neàdem bak uledem vabao?” 7 Lahahat dat nisileheda labe fa gago, “Lo, Dat busao, em ule bak. Lahana ame vao modi bobodam di lam dam aheda em visoi nom voomda vabak. Labiham labe ehemo etei usai lasome modiameam kehàm vaba meit vao bobodam bak laba nasi ehu fa neàdedume em vooidam bak tadehe bak.” 8 Lahahat Yesusat ame da laba ab gagoham. “Làhà, usai duzu oho ousu imna lam ve bolome fa om num bake lale.” 9 Lahame gi etei labi gagohoilahit ame da lam fa ab neàdeham. Làhàmu usai aho ousu imna lam ve bolome fa ab ladamam. Yesusat ame da laba modi fa neàdehe di lam gi hari Sabat abo Yahudi dam labe ibi iho gi azibe im digat modi fa neàdehe bak. 10 Labi dat etei Yesusat modi fa neàdeheda labe aho ousu imna lam ve vou ladam bak lam Yahudi dam busaoda im vameadam dam labe iho ame da labe aho meedam bak lam vi aame ame da laba im ab vahokedamam. “Etei hari Sabat abo gi azibe im digat modemu akati oho ousu imna lam ve vou ladàla? Dat ahamda Musat aho neha, ‘Hari Sabat na a meedamule,’ lahame toeme fi hasi esuhu labe im Yahudi damat na modem fi ham digat om akati git meedà?” 11 Lahahat ame da labe fa gago, “Vabà! Dat eba modi fa neàdeheda labe Aho neha, ‘Oho ousu imna lam ve bolome vou lale,’ lahame gagohemu eho gi ame baket modehe bak.” 12 Lahahat ame dam labe fa neo gago, “Ne, amat oba neha, ‘Oho ousu imna lam ve vou lale,’ lahame labi oba gagohela?” 13 Lahame labi gagoha ame da labe aba modi neàdeheda lam, “Amat modela?” laham bak am fa vei vabile. Yesus ba laba doudam vaba gi im vameadam labe dam duada zi laba valiheme setehe labe am gi ab vei vabileham. 14 Labihadume kehàm vaba Yesusat ame da laba ba neo ame Fihasi Ala Bake Vou Baedam Num Vàmteabu labe am ad oli aam bak tomba laba ab vi tàham. Vi tàhemu gago, “Nasi aima. Om fa neàdehena, faina meedam bak bohu vuusdam bak nasi vaitole. Oba neo im mei im meime feà bak fumo. Amu gi koena modehe bak fa dualemo.” 15 Lahaha bak lam ameda nibe, “Eba modi fa neàdeheda Yesus ame?” laham bak di labe ozobohudi fa ame Yahudi dam busaoda zi laba fa le ab fi deham. “Eba modi fa neàdeheda Yesus am tame,” lahame ab le fi deham. 16 Ame bak lam le fi dehemu Yahudi dam busaoda im vameadam dam labe iho ozoha, Yesusat gi ame hari Sabat meia modi fa neàdehemu Yesus bake feàtàdume vabidam bak bohu ab faaham. 17 Lahana ame dam labe Aba Aho meedam bak biehemu tombalelo Yesusat ame dam laba im ab vameadamam. “Ne, Em Ai Alat gi amu di iube faasi digat ahebu dam bakdate faobekesi ozahit dam bake im neà bak meedume etei vou fuhu bak. Ba digat meida labe gi azibe im vabak. Ba akati Eho laha modem vaba moela? Em gi Em Aiat modehe baket vi vouhodam bak.” 18 Lahame Yesus Aho etei labi gagoho bak labet modi ame Yahudi dam busaoda zi labe, “Imo Yesus otese,” lahame faki feà bak fusi neo im aa ab vi odoadamam. Gi labihadam bohu ab faasi meedamam. Ame dam labe neha, “Gi im hari Sabat na modem fi ham digat labe Yesusat mei modi fa neàdehe bak. Labi Aho laha Ala bake, ‘Am Ai,’ lahame lab gagoho bak labet modi Am fa Alati uloholehe bak,” lahame ame Yahudi dam busaoda zi labe Yesus bake ab fakeham. 19 Làhàmu Yesusat fa ame Yahudi dam busaoda zi laba ab gagoham. “Ebe Eho etei uba gagolo modem im imboda nidi nim um nasi iademe aima. Em Alam Adat modem labe Em ba Ebe Eho ozoho baket meedam vabak. Gi Em Ai Alat Aba Aho ozoho bak laba aame ozobohudi vi meedam bak. Am Adat na meedam bak lam gi Am Aiat na meedam bakti ulohona meedam bak. 20 Neham labe labihadam bak. Em Aiat Eba deeli meedam bak. Labi Aba Aho ozome meedam im ahebu lam Aho Eba modi fi gatehe bak. Labihàmu digat meida ium ame da nisileheda lam Eho modi fa neàdehe bak. Lahana Em Aiat Eba ba neo modi Eho ba modem im lada lam vafozi gi feàna modem bak. Labiham labe um ba àvodem bak. 21 Neham bak. Em Aiat mei eloho bak labet modi fa ahedem bak lamti ulohona Eho Am Adat modem labet Eho laha Ebe Eho ozome deelemda laba Eho laha modi fa ahe neàna bohu vuusdam meo bak. 22 Labi laha dam bakdat ibi iho na im meedam bak lam Em Aiat Aho ba uloome vi aime ozobohudi neàdi neha, ‘Da lada lam im vamdesu meedam vabda am. Beose. Da nidi nim im vamdesu meedamda am. Neà bak fà modese,’ lahame ba vi ozome ozobohudi neàdi gagodam vabak. Ame bak lam Aho gi Eba Am Adat niba fa gagu Eho fa ot vai im dedateli Eho ame baket meedam bak. 23 Em Aiat neham bak ozome Eba labihaha bak. Damat Eba ahu adat iedi vou baedam bak lamti ulohona fa Em Adat bake, ‘Ame baket modese,’ lahame labihaha bak. Meit Am Adate ahu adat iedi vou baedam vabameam làhà ba Am Ai Aba Gagu Oluhudate laha ahu adat iedi vou baedam vabak. 24 Im lada lam imbomu im imboda nidi nim laha nasi iademe aima. Meit Eho vameadaha im zi lam tu vuzehi meeda. Labi fa neo Eba gagu oluhuda Em Ai Ala bake laha tu vuzehe. Labihameam làhà Alat ba ame da laba, ‘Om faina meedam bake beose,’ lahame ba na asimbuna feà modelo gagom vaba gi modi fa Alati vahi gi ahe neàna bohu vuusdam bak. Alati vaitesum bohu modem zie lam vou esmozi fa Alati vahi gi ahe neàna bohu vuusdam zie laba lam bak. 25 Labi im nidi nim laha iademe aima. Dam Alati ot vaitesuhu dam lam ba Alam Adat nibe abo Ebe Eho vameadam im aidam bak ehete. Lahana ame di ab vou fuham bak. Labihàmu Ebe Eho lab vameadam im lam meit tu vuzehi meedaha dam lamota Alat modi Amti vahi gi ahe neàna bohu vuusda tame. Em ame Da ab li dam bake vuusu im vahokedam amemu labihaha bak. 26 Neham labe labihaha bak. Meia modi ahe neàna bohu vuusdam Alat modem labe Aho laha gi amu di iube Emti ahili asum ahoba vahi esdam di labe Aho Eba Am Adat niba vizi Eho fa im dedateli meia modi fa ahe neàna bohu vuusdam Dàt modem bak. 27 Labi Em Abo Asum Ahoba Iubet Bak Niba Li Dateleheda modem labe Em Ai Alat Eba Am Adat niba laha neo modi Eho fa ot vai im dedateli dam bakda ibi iho na im meedam bak laba Eho uloome vi aime ozobohudi neàdi gagodam bak. 28 Eho etei lab gagoho bak lam bisi a àvodemule. Neham bak. Dam elodahada zi labe ba diamut fa Eho, ‘Lele,’ lahame butem dae lam aime fa im baumahe bak labet usnadam digat ba fu tame. Dam ahe diat im neà bakta meedaha dam lam usnadume fa Alati vahi gi ahe neàna bohu vuusda tame. Lahana dam ahe diat faina meedaha dam lam usnadume Eho neha, ‘Beodume Alati vaitesuse,’ lahame na asimbuna feà modelo gagoda tame. 30 Lahana ame bak lam meedam di ba gi Ebe Eho ozoho baket meedam vabak. Eho meia uloome vi aime ozobohudi neàdi, ‘Beoeo? Beom vabao?’ lahame gagodam bak lam Eho gi Em Ai Alat Aba Aho gagoho bak lam aime neàdi ame baket meedam bak. Labiha labe Eho meia lab uloome vi aime neàdi gagom bak lam ahebu gi ahole vamdesu gagodam bak tadehe bak. Neham labe labihaha bak. Em ba, ‘Ebe Eho ozoho baket meedume Aho fà deelese,’ lahame ba meedam vabak. Em gi Eba gagu oluhuda Em Aiat Aba Aho, ‘Nehame modese,’ lahame ozoho baket meedume, ‘Aho fà deelese,’ lahame meedam bak. Labihaha bak,” lahame Yesusat ame Yahudi dam busaoda zi laba ab vameadaham. 31 Yesusat ame Yahudi dam busaoda zi laba neo nehame vi vameada. “ ‘Alat Gagu Fihasi Vimteme Oluhu Dat Boehàda Em ame Da am tame,’ lahaha bak lam gi Ehemo naedat gagomeam dam amomoi aame ozobohudi tau gagomda vabalemeam làhà Eho lab gagoho bak lam, ‘Imbo gagoheo? Giomim gagoheo?’ laham bak lam um ba tu vuzehem biem bak. 32 Lahana Eba tau gagomda ehe bak. Em Ai Ala labe Aho Eba tau gagom bak lam ba giomim gagom vabak. Abo imbo bak gagodam bak. Tu vuzehem neà bak. 33 Labi um laha Yohanes Mei Vuu Valo Baptisleiamda laba, ‘Om ame Da modeo?’ laham bak vi ailo dam amomoi aba olu gagu aiha aho neha, ‘Em ame Da modem kaio,’ lahame veibame Eba laha ahate tau gagoho bak. Aho lab gagoho bak lam imbote. Ba giomim veibam kaio. 34 Lahana Yohanesat lab gagoho bak lam, ‘Em ame Da modem kaio,’ lahaha bak lam am gi bak dàt Eba tau labi gagoho bak. Em ba ame bak laba tum vabak. Em gi uho Yohanesat lab gagoho bak lam fa vabilemna zohàme Eho gi ahit, ‘Uho Yohanesat lab gagoho bak lam aime fa Eba tu vuzehi Alat uba beom vaba soat vausu fa vei neàdedase,’ lahame Eho ahit uba vi vameadam bak. 35 Ame da Yohanes aho lab Eba tau gagoho bak lam gi vuagat fauhaedam bakti ulohona fauhaedam labe uba laha modi fauhaedam bak. Labi Yohanesat lab vameadaha im lam um gi ule neàt deeli dogoit aidam bak. Lahana uho lab ule neàt dogoit aidam bak lam ba bohu vuusdam vabak. Gi kehàm vaba fa setem bak. 36 Lahana Eho ozoha, meit neha, ‘Alat Gagu Fihasi Vimteme Oluhu Dat Boehàda Em ame Da am tame,’ lahame Eba tau ahate gagom bak lam Yohanesbada vafozi bisi feàda ehete. Neham bak. Em Aiat neha, ‘Im nidi nim nehasu modele. Im nidi nim nehasu modele. Labihadume neàdi folele,’ lahame Eba gagoho im zi lam ahebu Ebe Eho etei ozome meedam im am bak. Abo Ebe Eho vahokedam im modeo, na damat ihimo modem biem im feàna Eho meedam bak modeo, lahamna zi lam meit aame ozo, ‘Imbot. Em Aiat Eba gagu Eho bak niba lehe bak,’ laham bak ozobohudi tau gagodam bak. 37 Gi im lada lamota Eba tau gagodam vabak. Em Aiat abo Eba gagu bak niba oluhuda Ahamo laha tau, ‘Em ame Da am tame,’ lahame Eba tau gagodam bak. Lahana um ba Am dae koena aim bak vab. Ba Am alihi aam bak laha vab. 38 Labi laha Aho gagu uba oluhuda nim uho im Ebeda tu vuzehem vab labe ba im Abada laha um ahu tu vuzehem vaba mu voedaha bak. 39 Uho vedi neha, ‘Alat Vameadaha Im Toedahana zi lam iho ulohodesu meedameam làhà iba modi fa Alati vahi gi ahe neàna bohu vuusdam bak,’ lahame dihasi ame im laba aame ozoda. Dihasi ame im laba neo aame ozoda. Gi labihadam bohu vuusdam damat modem bak. Lahana um ozom vaba? Alat Gagu Fihasi Vimteme Oluhu Dat Boehàda lam, ‘Em ame Da am tame,’ lahame fet vameame esuhu bak ehe bak. 40 Lahamnàme um ba, ‘Im Alati vahi gi ahe neàna bohu vuusdase,’ laham bake ba Eba tu vuzehem moudam damat modem bak. 41 Lahana Eho etei uba im lab vahokedaha bak lam um a git ozodamule. Em ba, ‘Dam bak damat Eba ahu adat iedi, “Em abo feàte,” lahame vou baedase,’ laham bak ozome ba uba im vahokedam vabak. 42 Lahana uho um ahulat meedam bak lam Em ozobohu bak. Um ba Ala bake ahulat deelem vab damat modem bak. 43 Eho bak niba lehe diat Em Aiat Eba gagu oluhu di labe Aho Eba modi Am im ot vai im dedatelehemu lehe bak. Lahana um ba Eba gut deeli vaha vabak. Lahana meit ahamo ozome ostame li vameadam di uho gi gut aime deeli vuzehem meo damat modem bak. 44 Um gi, ‘Dam totbaho labe fà iba, “Im abo feàte,” lahame iba deeli vou baedase,’ lahame ot modidam damat modem bak. Lahana uho ba Ala bisi imboda vàmtea labe, ‘Aho fà iba vou baedase,’ lahame ba Aho uba deelemna lam uho ba meedam vab damat modem bak. Um labihadam damat modem labe ba akati uho Eba tu vuzehi meedà?” 45 “Uho Eba lab moho bak lam uho ozom, Eho ba diamut Em Aiat avaesdam laba duzu uba vàlu gagoe? Vabà! Eho ba uba vàlu gagom vabak. Uba vàlu gagomda Musa am bak. Uho vedi nehame tu vi ozodam damat modem bak. Dat ahamda Musat toedume fi hasi esuhu Im Feàna zi lam uho vuzehi ulohodesu meedam labe Alat uba soat vausu fa vei neàdedam bak am tiba. Lahana ba labiham vabak. 46 Lahana ame da Musat gi aham di iube Ebe Eho ba modem im fet toeme esuhu bak. Labihàmu uho Musa bake imbona tu vuzehi meedam labe uho akati Eba laha tu vuzehem vaba mode? 47 Lahana uho Musat toedume fi hasi esuhu Im Feàna zi lam uho abobo tu vuzehi meedam vab labe ba akati Eho vou li vameadam im nim uho tu vuzehi meedà?” lahame Yesusat ab vi vameadaham.

Yohanes 6

1 Labi ba Yesus Aba vi tau meedam damti iho kota Yerusalem vou esmozi fa Galilea bak laba li digat meida labe iheba ziddume Itea Galilea dumam tot iuba ab bioham. Ame itea lam ee behàsute. Ee meida Tiberias am. 2 Di lam dam dua bak Aba vi tau goda. Yesusat dam gaileheda zi modi fa neàdedaha bak abo na damat ihimo modem biem im feàna damat fet aame ozobohudemna zi Aho amu meedaha bak aahemu vi tau goda. 3 Labihadume modeha Yesus Aba vi tau meedam dam lamti iho bak otesuhu bak labet fa tom ladume ab zizi nusualadaham. 4 Ame di lam Yahudi dam labet ibi iho modi baleàhà bak na àme iziam bak abo Paskah lam neo fuseo vabaehe di am. 5 Labi nusualadume neàdi Yesusat lab aidam labet nom aaha dam dua bak zi fai, “Aba netàdese,” lahame tom ledam bak ab nom aaham. Làhàmu Filipus bake gago, “Dam zi fai nim iho ake le roti doit vame lodume àdàla?” 6 Lahame Yesusat etei lab gagoho bak lam Aho ba modelo modem im Ahamo naedat ozobohuna ahit biehenali Filipusam ahu modi ozolo ahit fi bovai ab gagoham. 7 Lahahat Filipusat fa ab vi gagoham. “Aa! Dam zi feà nimohona iho na ake vame lu àdàla? Dam bisi feà labe ba meit na modeme ala delapan foli vam doi lamohoda vou le na àmna vameam ba uloholem vabak. Iho na àmna le ve fa dam bake vou li gi koena zagum bak laba ozome lodume uloholesome meedameam dam bisi feà labe na koedi dam zoho fotem bak.” 8 Lahame labi gagoha Aba vi tau meedamda meida abo Simon Petrusam dubu Andreas labe aho neo vi gago, “Guru oa, daboseà nib doudamda nim am rotibu gi auoholehenati bohe behàsu buàti ehete. Lahana oho akatiham bake ozome labi gagohela? Dam duana na nim àm koena ba akati modi faheme lodume uloholela?” 10 Lahahat Yesusat fa gago, “Uho dam gagome sibe baa niba nusualadale.” Làhàmu gagu ab nusualadamam. Ame bak lam sibe baa duamu laba gagu ab nusualadaham. Ame dam zi lam dam aabota dem di abo lima ribu fuhu bak. 11 Labi nusualadume neàdi Yesusat ame rotibu auohole lam ve Ala bake, “Neàte,” lahame tom gagu neàdi ame rotibu auohole lam fahedume fa Aba vi tau meedam dam laba lodume iho fa ot vai vame dam duada zi laba ab lodaham. Labi neo bohe lam gi ame baket meeda. Abo dam labe àme dedem bake uloholi ab lodaham. Labihadume dam lam ame na lam àdume modeha dedebuli na àmna zoho gi vaheme esu. 12 Làhàmu Yesusat Aba vi tau meedam dam laba ab gagoham. “Uho nasi na damat àme dedehemu esuhuna zoho lam ahebu vamatele. Na meida vàmtea a voomule.” 13 Làhàmu rotibu auohole modi dualehena lam damat àme neàdi vahehena zoho lam vi ateti atetidume boloseh vahedume modeha boloseh dua belas ab bektoham. 14 Na damat ihimo modem biem im feàna damat fet aame ozobohudemna Yesusat etei lab modehena lam damat vi aahemu im nehasu ab faasi vameadamam. “Làhà, Ame Da Yesus nim abo Alat Vameadaha Im Aime Fa Dam Bake Ahate Vameaidahada abo Alat amu neha, ‘Aho bak niba olu tame,’ lahame fet gagu esuhuda lam iho vou faodam Dat am taia?” lahame ab faasi vameadamam. 15 Làhàmu damat neha, “Imo Yesus tet si modi iba vuusdam boehàdatelese,” lahame fet ozome esuhu bak lam Yesus ahamo nasi ozobohudi ozo, “Em Aiat Aba Aho ozome esuhu bak fuhu vabak,” laham bak ozobohudi bak lam vou esmozi Ahamo fa neo ab tom ladamam. 16 Labi disi aibulehemu Yesusat Aba vi tau meedam dam labe ihimo ab lazeham. 17 Labi lazi iheba ziddume itea tot iuba num debu Kapernaum laba aibut ab biodamam. Aibulehenàme Yesus ba iba tau biodam kai. 18 Labi biodume itea tombu fusi modeha nutabe fai iubet li vao baho foadam labe im ihe ab oke okedamam. 19 Gi oke okedamna geàmu vou vaelame enam kilometer lamoho ozomomna fusi it aaha Yesusat gi vao tom ahoba laba duzui duzuidume iba ledam bak ab aaham. Lahamnàme, “Yesusat mode?” laham bak im ozobohu vab labe ab iedi modem faideham. 20 Làhàmu Yesusat vi vuli netàdi ab gagoham. “A iedemule. Eho ledalo.” 21 Lahaha bak aihemu iho gi deelehat gut gagu Yesusat fa ab ziham. Labi zihat gi kehàm vabna ibi iho ladam auobe ab zituham. 22 Labi izi dihasi Yesus Aho ahamte li meedaha tot iuba vou esmoho dam labe Yesus setehe bake nabida. “Uho ozom, Yesus ake lahela? Ne, im ba bak niba ihe behàsu aaha vabak. Gi ihe vàmteana Aba vi tau meedam dam labe ihimo ziddume ab bioham bak,” lahame ot vameaida. 23 Labi vameadameam aaha num debu Tiberias laba azihi dam ihe ibida ziddume li zituadaha bak ab aaham. Abo màt im Boehàda Yesus Aho rotibu ve Ala bake vou baedume modi dualehe roti àdaha bak netàdi zituadaha bak ab aaham. 24 Labi zituadume nabidume aaha Yesus Aba vi tau meedam damti im alihi aam vabamu fa im iheba ziddume Kapernaum dumam tot iuba Yesus bake vi nabidalo ab biodaham. 25 Labi biodume dumam tot iuba ab zituadaham. Zitu nabidume Yesus bake ab tàham. Tàhi gago, “Ai Guru oa, Om adi diat niba fuhela? Akati modi biohela?” 26 Lahana Yesusat fa gago, “Lo, uho lab gagoho bak lam Em aiha. Lahana Eho etei uba gagolo modem im imboda nidi nim laha nasi iademe aima. Ubu uho ozome Eba nabidam bak lam Em ozobohu bak. Na damat ihimo modem biem im feàna lam abo damat fet aame ozobohudemna Eho lab meedahana labe am im tombu um ozobohudi Eba nabidam vab damat modem bak. Um gi ame roti lam àdume dedehe labet, ‘Fà neo àse,’ lahame Eba vi nabidam damat mode taia? 27 Na iho àlo àhàki dihasi meeda. Dihasi meeda. Laham im lam bisi a tombuli meedamule. Lada lam gi kehàm vaba koeili sete. Labi gi àme foli sete. Labihadamna bohu meedam bak. Fa gi nehale. ‘Im akatihasu meedam labe iho Alati vahi ahe neàna bohu vuusdàla?’ laham bake gi na àmna koeilem gikina abo uho tu vuzehem bak laba modi teudemna laba vi ozome keàtedi ame im lam dihasi mode. Dihasi mode. Labihadale. Ame bak uba modelo modemda lam gi Asum Ahoba Iubet Bak Niba Li Dateleheda nibe Eho uba ame bak lam modem bak. ‘Ame baket modele,’ lahame Em Ai Alat Eba deeli gagohemu Eho ot vai im dedateli ab meedamam bak.” 28 Lahame labi gagohemu ame dam zi labe fa vi ailo ab gagoham. “Iho ana im meedam labet Alat fa Aba Aho ozoho bak ulohodesu meedàla?” 29 Lahahat Yesusat fa gago, “ ‘Im nehasu meedale,’ lahame Alat uba gagohona gi neham bak. Alat Aba Aho Gagu Fihasi Vimteme Uba Oluhu Dat Boehàda Em ame Da niba uho tu vuzehele.” 30 Lahahat ame dam labe neo vi gago, “Làhà, Oho na damat ihimo modem biem im feàna abo damat fet aame ozobohudemna modem labe iho aame ozo, ‘Imbote. Alat Gagu Fihasi Vimteme Oluhu Dat Boehàda Om am bak,’ lahame iho aame Oba tu vuzehem bak. Làhà Oho ame im feàna adida modi iho aaela? 31 Ne, im tai ahobada zi labe iho aham di iube bak aotba baa bohu dam vaba alim bak Alat ahit zie vou kibo kibodam di labe na àmna ee gagom manna lahamna vou à ladaha bak. Ame im lam meit Alat Vameadaha Im Toedahana laba nehame toehe bak ehe bak. ‘Asum ahoba iube bak niba goagoadamna lam Musat dam laba lu àdaha bak.’ Lahame toehe im ehe bak. Làhà Oho laha ame da Musati ulohona laha modeme iho aame ozobohudi Oba tuse.” 32 Lahahat Yesusat fa gago, “Lahana bisi imbo bak gi nehaha bak. Ame na um tai ahobada zi labe iho àhana lam ba Musat lodaha vabak. Gi Em Ai Alat ame dam laba lodaha bak. Labi etei nim neo Em Aiat roti abo imbona asum ahoba iube bak niba oluhuna uba lolo modem bak ab faasi meedamam bak. 33 Ame roti imbona lam abo Alat uba lolo modemna lam gi neha: Gi Dat asum ahoba iube fa bak niba li dam bakdate modi fa ahe neàna bohu vuusdamda Am am bak.” 34 Lahahat ame dam zi labe fa neo gago, “Làhà! Dat Busao, Oho etei di nibe faasi ame roti lam iba dihasi lo dihasi lo labihadale.” 35 Lahahat Yesusat neo ab vi gagoham. “Na Àmna Meia Modi Alati Vahi Gi Ahe Neàna Bohu Vuusdam Roti lam Em ame Da am bak. Meit Eba tu vuzehemeam làhà ba idoali valo àhàkedam vabak. Eho ame da laba modi asimdi bohu vuusdam bak. 36 Lahana Eho amu uba gagoho bak lam abo uho Eho meedaha im feàna lamti Emti aadahanàme, ‘Alat Gagu Fihasi Vimteme Oluhu Dat Boehàda Em am tame,’ laham bak Eba ba tu vuzehem vabak lam uho meedam lahasuhu damat modem bak. 37 Em Aiat neha, ‘Dam nim Om dam am tame,’ lahame fet gagu esuhu dam lam Eba ba tu vuzehi im Ebeda meeda tame. Labi Eba ba tu vuzehem dam lam ba meida vàmtea Em mu voom vabak. Abo vam bak. 38 Neham labe labihaha bak. Em asum ahoba iube bak niba lehe bak nim Em ba Ebe Eho ozoho baket modelo lehe vabak. Gi Eba gagu oluhuda Em Aiat Aba Aho ozoho baket meedalo lehe bak. 39 Eba gagu oluhuda Em Aiat Aba Aho ozoho bak gi neham bak. ‘Damat Eba ozom di, “Em abo Alam Adat am tame,” lahame ozobohudi Eba tu vuzehem dam laba Eho modi fa Em Aiti vahi gi ahe neàna bohu vuusdam bak ame. Labi Aiat neha, “Dam nim Om dam am tame,” lahame fet gagu esuhu dam lam Eho meida vàmtea voom vaba gi ahe neàt vuusu vou aasdam bak ame. Gi labihasu vou aasdume Dam Bake Uloodume Vi Aime Ozobohudi Neàdi Fime Fahedam Digat vou fusi ame dam lam elodahanàme Eho modi fat ahedi usnadam bak ame. Labihadase,’ laham bak lam Em Aiat Aba Aho ozoho bak am bak.” 41 Lahame labihasu vameadume modeha ame Yahudi dam fa Yesus bake ab voe voedamam. Yesusat amu neha, “Ame roti asum ahoba iube fa bak niba oluhuna lam Em ame Da am tame,” lahame lab gagoho bak lam aihemu faki fa Yesus bake ab voe voedamam. 42 Voe voedam labe ot vameaida. “Aa! Da nim gi Yusufam adat Yesusat mode taia? Ne, Am oiti Am aiti im ozobohu bak. Baka akati Aho neha, ‘Em asum ahoba iube fa bak niba lehe bak,’ lahame labi gagodàla?” 43 Lahahat Yesusat fa ab gagoham. “Uho lab faki Eba voe voedam labe ot vameaidam bak lam nasi vaitole. 44 Meit Eba tu vuzehelo modemeam làhà ahamo ozome Eba tu vuzehem vabak. Amu Eba gagu oluhuda Em Aiat nasi meit Eba tu vuzehem bak lam ame da laba modi vizem labe ba Eba tu vuzehem bak. Labihamda lam Eho ba diamut Dam Bake Uloodume Aime Ozobohudi Neàdi Fime Fahedam Digat fum di lam am eloho bak labe Eho modi fat ahedi usa tame. 45 Dam ahamda Alat vameadaha im aime fa dam bake ahate vameaidaha dam labe damat Eba ba tu vuzehem bak laba ozome ibi iho aham di iube nehi fet toehena nidi nim ehe bak. ‘Alat fa dam ahebu im vahokeda tame.’ Alat Vameadaha Im Toedahana labihameam làhà Em Ai Alat Aho vahokedam dam lam im Abada aime ozobohudi tu vuzehi meedameam làhà Eba laha tu vuzehi im Ebeda meedam bak. 46 Lahana Eho etei lab gagoho bak lam uho a nehi git ozodamule. ‘Meit Em Aiam alihi aaho,’ laham bak a ozomule. Ba meit Am alihi aahada vabak. Gi Aba Aho gagu oluhuda Emota Am alihi aame ozobohudehe bak. 47 Im lada lam imbomu im imboda nidi nim laha nasi iademe aima. Meit Eba tu vuzehemda lam Alati vahi gi ahe neàna bohu vuusdamda am bak. 48 Em abo Roti Meia Modi Alati Vahi Gi Ahe Neàna Bohu Vuusdam Roti Em am bak. 49 Um nasi ozomale. Aham di iube um tai ahobada zi labe iho bak aotba baa bohu dam vaba alim bak laba Alat ahit zie vou kibo kibodam di labe iho vou à laha manna zi lam ba iba modi Alati vahi ahe neàna bohu vuusdaha vabak. Ame na àdamnàme gi bak laba elodume seddaha bak. 50 Lahana asum ahoba iube bak niba nom oluhu roti nim abo Em nib doudamda nim ba labiham vabak. Meit ame roti nim àmeam làhà gi Alati vahi ahe neàna bohu vuusdam bak. 51 Imbote. Asum ahoba iube bak niba nom oluhu roti abo meia modi Alati vahi gi ahe neàna bohu vuusdam roti lam Em am bak. Meit ame roti nim àmeam làhà Alati vahi gi ahe neàna bohu vuusdam bak. Ame roti lam gi Em nu am. Dam bakda ahebu iho Alati vahi gi ahe neàna bohu vuusdam bake Eho ahit Em nu nim uledi dam bakdate lolo modem bak.” 52 Yesusat etei lab gagoho bak lam gi amti vou alem bake vi ozome am nu niba gi it vàlu gagoho im laba Yahudi damat vabi otesidam labe gago, “Oo, da lam akati Am nu iba lu iho àela? Ba labiham biem bak.” 53 Làhàmu Yesusat ozo, “Damat Eba tu vuzehi ibi iho faina meedaha bak lam Aho ba Am vasea veàtoi fa faamom bak uledese,” lahame neo im nehasu vi vameada. “Eho etei uba gagolo modem im imboda nidi nim iademe aime ozomale. Asum Ahoba Iubet Bak Niba Li Dateleheda nibe Em so ad nu nim meit àm vaba mu meeda. Labi Em vasea nim laha udem vaba mu meeda. Labihameam làhà ame da lam ba Alati vahi ahe neàna bohu vuusdam vabak. Gi vaitesu meedam dàt modem bak. 54 Lahana Em abo Alat Gagu Fihasi Vimteme Oluhu Dat Boehàda modem labe meit Em so ad nu nim à. Labi Em vasea nim laha ude. Labihasu meedameam làhà ame da lam Alati vahi gi ahe neàna bohu vuusdam bak. Labi Dam Bake Uloodume Aime Ozobohudi Neàdi Fime Fahedam Digat lam vou fusi Eho fa li ame dam lam elodahanàme Eho modi fat ahedi usnada tame. 55 Neham bak. Em so ad nu nim àmna imbona am. Labi Em vasea nim udemna imbona am. Labihaha bak. 56 Meit Em so ad nu nim à. Labi Em vasea laha ude. Labihasu meedameam làhà ame da lamti Emti ot vou aliame ahu vàmadi meedam bak. 57 Im bakda ahebu ahe di godam bak lam Em Aiat debu modehe bak. Em Aiat labiham Alat modem labe Aho neo Eba gagu Eho bak niba li Dateli ahe di godam bak. Labiha labe meit Em so ad nu nim àmeam làhà Eho ame da laba modi Alati vahi gi ahe neàna bohu vuusdam bak. 58 Eho amu uba lab gagoho bak lam neo vi gagolo. Roti asum ahoba iube bak niba nom oluhu roti lam Em am bak. Lahana im tai ahobada zi labe iho àhà manna lamti uloho vabak. Ame dam labe iho ame manna àdamnàme gi elodume seddaha damat modem bak. Lahana meit Eho etei lab gagoho roti lam àmeam gi Alati vahi ahe neàna bohu vuusdam bak.” 59 Lahame lab vameadaha im bohu lam Yesusat Aho num debu Kapernaum laba abo Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli ab vahokedaham. 60 Yesusat im labihasu vameadume modeha Aba Aho vahokedam im ozobohudelo vi tau meedam dam dua totbaho labe iho aime ozome voe voedam labe ot gago ot gagoida. “Aa! Ame Da labe etei iba nib vahokedaha im nim iho vi ozom biem im iba vahokedaha bak. Ba amat uledi vuzehi meedà?” 61 Lahana ame dam labe Aho lab gagoho bak laba faki voe voedaha bak lam Yesusat Ahamo ozobohudi ame dam laba ab gagoham. “Eho lab vahokedaha im vàmtea buà lam uho aime faki Em vou esmolo modeo? 62 Làhà Eho Asum Ahoba Iubet Bak Niba Li Dateleheda fa Ebe amu azihi bake ba tom ilum bak uho aameam um di lam akatihà? Làhà uho di lam bisi faki feà bak fum di ame? 63 Alam Aha Nutabe Neàna labe Aho meia modi vizi Alati vahi fa ahe neàna bohu vuusdamda Am am bak. Dam bakda iho keàtedi meedam im lam ba na vamna vabak. Ebe Eho uba vameadaha im lam gi Alam Aha Nutabe Neàna labe Aho Eba modi vizi teudehe labe Eho uba vameadaha im lam fa uba modi Alati vahi gi ahe neàna bohu vuusdam imot modem bak. 64 Laham imot modemnàme um dam totbaho labe Eba tu vuzehem mom lahasuhu dam ehe bak.” (Yesusat etei lab gagoho bak lam gi neham bak nasi fet ozobohudehe labe labi gagoho bak. Dam adida Aba tu vuzehem moe? Labi dat adida Am vou fohome meia ub lu ote? Laham bak lam gi amu di iube dam bake ahamte lab faasi vahokedam di iube nasi fet ozobohudehe bak.) 65 Lahame labi gagu neàdi Yesusat neo vi gago, “ ‘Ana modi dam Eba tu vuzehem mohela?’ laham bak lam Eho amu uba gagohona fa neo vi gagolo. Meit Eba tu vuzehelo modemeam làhà ba ame da lam Alat neha, ‘Modem neàte,’ lahame nasi ame da laba modi teudehe vaba alia modem vabak.” 66 Lahame Yesusat ame bak lam etei lab gagoho di labe faasi Aba Aho vahokedam im ozobohudelo vi tau meedam dam dua totbaho labe fa Yesus mu vou esmozi fa ibi amu modem bake fa meeda. 67 Làhàmu Yesusat Aba bisi vi tau meedam dam dua belas laba ab gagoham. “Um akatihà? Um laha Em mu vou esmozi lào?” 68 Lahahat Simon Petrusat fa gago, “Ai Boehàda oa, iho fa Om mu vou esmozi im ama bake là? ‘Meia modi Alati vahi fa ahe neàna vuusdam bak lam akatihasu modemna modela?’ laham im lam bisi ozobohudi meia fi gatemda Om vàmtea am bak. 69 Om abo Alat Ahamo gagu fi hasi asum ahoba iube bak niba nom oluhu Dat bisi Neàboda Vàmtea Om am bak. Laham bak lam im ozobohudi tu vuzehi ab neàbodedaham bak.” 70 Lahahat Yesusat fa gago, “Em um fi me vaha di dam dua belas vaha taia? Lahana um meidavat setan zi vuusdam boehàda Iblis labe aho veimai fa im abada modelo modem bak,” lahame ab vi gagoham. 71 (Etei Yesusat lab vàlu gagoho bak lam gi Simon Iskariotam adat Yudas labe aho ba modem im nasi fet ozobohudi vàlu vameadaha bak. Ame da Yudas gi dua belas meida modemnàme ba Yesus vou fohome meia ub lu otelo modemda am bak.)

Yohanes 7

1 Labi ba di meida iube Yesus Aba vi tau meedam dam lamti gi Galilea bak laba esdam di labe Aho gi num debu meida iuba le vahokeda. Num debu meida iuba le vahokeda. Gi labihada. Ba Yudea bak laba ahit lam mom dàt moz. Yudea bak laba azim Yahudi busaoda, “Am otese,” lahame aa odoadam labe laba lam mu meeda. 2 Ame di labe Yahudi damat na àme iziam bak meida fuseo vabalehe bak. Neha: Aham di iube Yahudi damat im tai ahobada bak aotba baa bohu dam vaba alim bak laba abo Alat ahit vou kibo kibodam zie laba ladam di labe iho teohet mome vou idetehe num moadume vou idetedam bak. Labi dam badat ame bak laba vi ozome vouhodalo ut et num moadume iddam meot. Ame bak lam fa neo vi ozome na àme iziam di fuhemu damat Yudea bak labe am num debu meida Yerusalem laba vahe vaheda. Labihadam di labe Yesusam vahadam zi labe Aba im vahokeda. “Om akati fa gi Galilea niba bisi aidàla? Fa Yudea bak laba le na damat ihimo modem biem im feàna modem labe dam Obo Oho vahokedam im ozobohudelo vi tau meedam dam labe fà aase. 4 Oho gi Galilea niba aa aidameam ba ee Oboda akati damat aime vou baedà? Om ba elaidam datelem vabak. ‘Na damat ihimo modem biem im feàna lam Oho modem meote,’ laham bak lam imbodemeam làhà bak iuba le mode. Bak iuba le mode. Gi labihadume bak ahebu esdam damat fà aadase.” 5 Lahame Yesusam vahadam zi labe laha Aba tu vuzehem moudam labe Yesus bake tozome im ab vahokedamam. 6 Lahahat Yesusat fa gago, “ ‘Em amat modela?’ lahame modi fi gatem di fum kaio. Umota kota Yerusalem laba etei lào? Ba di iube lào? Gi ostame lam neà bak. 7 Ba dam uba fakemda na vabak. Lahana Eho dam bakda abo Alat modem im biem dam laba, ‘Um faina meedam damat modem bak,’ lahame ahate vameadam bak laba damat Eho lab gagoho im aime Eba faki meedam damat modem bak. 8 Ame Na Àme Izidam bak kota Yerusalem laba uhumo lale. ‘Em amat modela?’ lahame modi fi gatem bak lam fuhu vab di Em ba taum kaio.” 9 Lahame gagu neàdi Am tauhu vaba gi Galilea laba aida. 10 Labi Am vahadam zi labe ame Na Àme Iziam bak laba le setehezobe Yesus laha ba neo ame bak laba aa vi vula. Labi aa vi vule damat Aba aame ozobohudem bak labna zohàme gi aa goda. 11 Labi ame Na Àme Iziam bak laba Yahudi dam busaoda eeda zi laba laha ehet. Yesus lem bak labna zohàme nabidam labe dam bake vou gagoteda, “Um ame Da Yesus alihi aaheo?” lahame iuba le gago. Iuba le gago. Labihada. 12 Ame Na Àme Iziam bak laba godam dam zi labe, “Yesus ana dàt modela?” lahame voe voedam labe ot gagoi ot gagoida. Dam totbaho labe neha, “Da lam abo gi im neà bakta meedam Dàt modem bak,” lahame gagoda. Lahana dam totbaho labe vedi nehi gago, “Vab. Da lam gi meia ahi vagem Dàt modem bak,” lahame tozome gagoda. Labihada. 13 Lahana dam totbaho labe Yahudi dam busaoda eeda zi labe iba fakemna zohàme iedi ibi iho ozoho bak lam ba ahatet vameadam kai. 14 Labi ame Na Àme Iziam di folelo vabalehe digat meida labe Yesusat ame Fihasi Ala Bake Vou Baedam Num Vàmteabu labe am ad oli aam bak tomba laba le dam bake ahate le duzu im ab faasi vahokedamam. 15 Aho etei li lab vahokedam im lam ame Yahudi dam zi labe aime àvodi ab ot gagoi ot gagoidamam. “Aa làhà! Uho ozom, ame Da nibe Aho Alat Vameadaha Im Toedahana lam akati modi Aho bisi ozobohudi vahoketedàla? Im Yahudi dam sekolah ibida tau vahokehe vab Dàt im lam akati ozobohudi vahoketedàla?” lahame ab ot vameaidamam. 16 Lahame lab vameadaha bak lam Yesusat fa vi aime ame dam laba ab gagoham. “Eho etei lab vahokedaha im lam ba Ebe Eho ozoho baket uba vahokedam vabak. Gi Eba gagu oluhu Ala labe Aba Aho ozoho baket uba vahokedam bak. 17 Meit neha, ‘Em gi Alat Aba Aho ozoho baket meedase,’ lahame ozome gagomda lam fa gi neham bak vi tau ozobohudem bak am bak. ‘Eho lab vahokedaha im lam, “Adi baket lehela?” “Em gi ee Ebeda vousase,” lahame vahokedào? “Gi Alat Aba Aho ozoho baket Eho vahokedào?” ’ Laham bak vi tau ozobohudem bak am bak. 18 Neham bak. Meit ahamo im dedateli gi im abadata vou li vameadamna lam, ‘Gi ee abada vousai damat aba vou baedase,’ lahame meedam dàt modem bak. Lahana meit neha, ‘Eba gagu oluhuda labe ee Abada vousai vou baedase,’ lahame im Aba Aho meedamda lam gi im vamdesu meedam bak. Ba meia vagemda modem vabak. Abo im imbona meedam dàt modem bak. 19 Ne, Alat Israel dam bake neha, ‘Nehame modem neàte. Im lada lam a modemule,’ lahame gagu fi hasi esuhu Im Feàna zi lam Musat ot vai um tai ahobada zi laba vameame neàdi fa um tai ahobada zi labe neo ot vai fa neo uba vou vamea usehena taia? Lahana um meida vàmtea buà ba ame Im Feàna zi lam ulohodesu meedamda vabak. Uho ulohodesu meedameam làhà um ba Em otelo aa odoadam vabak.” 20 Lahahat ame dam duada labet neha, “Ba Oba amat otelo meedà? Gi mei ahu oli veimam setan om ahu veimai om gi ahusobuli meedamna taia?” 21 Lahahat Yesusat fa gago, “Im Yahudi damat na modem vaba gi azibe im digat hari Sabat labe Eho meia modi fa neàdehemu um aame Eba fakehe dam taia? 22 Lahana um laha hari Sabat na meedam dam taia? Amu aham di iube Musat uba neha, ‘Um daboseà faam di usi tujuh foli neàdehezobe am laso aubehà sokba ukbole,’ lahame uba vou gago usehe im lam uho vi tau meedam labe uho um daboseà faasi usi tujuh folehemu gi hari Sabat modemnàme um gi ozahit ame digat labe um daboseà laso aubehà sokba ukbom meo dam taia? (Lahana eho ozoha, ame laso aubehà sokba ukbom bak lam bisi Musat ahamo vou gago usehe vabak. Gi tai ahobada iube faasi nasi vou gago usehe bak.) 23 Làhà uho dat ahamda Musat aho toedume fi hasi esuhu Im Feàna zi lam voom vaba abo ulohodesu meedalo um gi data laso aubehà sokba hari Sabat ukbom damat ba akati modi gi ame hari Sabat Eho dat so ahebu nisileheda laba modi fa neàdem bak lam uho Eba aame fakehela? 24 Uho Eho meedam im laba gi fakot aame vi ozome ozobohudi neàdi gagodam bak lam nasi voole. Eho lab meedam bak laba uho aame vi ozome ozobohudi neàdi gagolo modem di gi Em Ai Alat Aba Aho neha, ‘Bak lam neà bak ame? Fai bak ame?’ lahame Ahamo ozoho bak laba vi ozome gagomta neàte. Uho labihameam làhà, ‘Em abo Alat Gagu Fihasi Vimteme Oluhu Dat Boehàda am tame,’ laham bak um ozobohudi ahole vamdesu gagodam bak am bak,” lahame Yesusat ab vameadaham. 25 Dam kota Yerusalem laba azihi dam totbaho labe iho Yesusat etei lab vameadaha im lam aiha ozom vabili ab ot gagoi ot gagoidamam. “Ne, ame Da nim im Yahudi busaoda labe iho nabime otelo modemda am taia? 26 Lahana akati iho aaha ame Da labe iedem vaba ahate dam bake vahokedà? Dam busaoda ba Aba mali gagom bak vaba? Làhà, ‘Am abo Alat Gagu Fihasi Vimteme Olulo Modem Dat Boehàda am tame,’ laham bak lam dam busaoda labe fa etei ozobohudi neàdehe labe ba mali gagom bak mohe? 27 Lahana Da lam akati, ‘Alat Gagu Fihasi Vimteme Olulo Modem Dat Boehàda Am am tame,’ lahadà? Ame Da nim, ‘Adi baket lehela?’ laham bak lam im ozobohu bak. Am gi Nazaret labe lehe bak. Lahana Alat aham di iube neha, ‘Eho Gagu Fihasi Vimteme Olulo Modem Dat Boehàda uba olu tame,’ lahame fet gagu esuhuda lam ba lem di, ‘Adi baket lehela?’ laham bak lam ba dam bakda meida vàmtea ba ozobohudem vabak,” lahame ot gagoida. 28 Lahaha bak lam Yesusat aihemu Aho gi ame Fihasi Ala Bake Vou Baedam Num Vàmteabu labe am ad oli aam bak tomba laba vahokedam lahasuhu di labe dae buduana ab gagoham. “Imboo? ‘Em amat mode?’ laham bak lamti labi, ‘Em adi baket lehela?’ laham bak lamti um abo ozobohu aabodeheo? Em bak niba lehe bak nim Ebe Eho ozoho bak labet lehe vabak. Gi Eba gagu oluhu Ala labe Aba Aho ozoho bak labet modi Em bak niba lehe bak. Eba gagu oluhuda lam bisi imboda Am am bak. Gi Aba tu vuzehem neàda uho ozobohudehe vaba moho bak. 29 Lahana Emota Am ozobohu aabodehe bak. Eba gagu oluhu Ala Am am bak. Labi Aho Em gagu oluhu vab di iube Em gi amu Amti vahi aidam bak. Labihaha bak.” 30 Lahame Yesusat lab gagoho bak lam dam totbaho labe aime faki, “Imo Yesus sise,” lahame meeda. Lahana Yesus sim bak Alat fet ozome esuhu digat fuhu vab labe ame dam labe meida vàmtea ba Yesus bake netàdi alihi ulam kai. 31 Dam totbaho labe Aba silo àhàki modemnàme dam totbaho labe fa Aba tu vuzehi nehi ot gagoi ot gagoida. “Ame Da Yesus lam Alat Gagu Fihasi Vimteme Oluhu Dat Boehàda iho vou faodam Dat am taia? ‘Alat Gagu Fihasi Vimteme Oluhu Dat Boehàda labe Aho ba na damat ihimo modem biem im feàna damat fet aame ozobohudemna nehasu meeda tame,’ lahame fet gagu esuhuna lam ahebu Ame Da nibe ab li meedam am taia? Ba damvat im nimohona vafozi feàda meedamna im ba aahada vabak,” lahame tu vuzehi ab gagodamam. 32 Lahame lab ot gagoiaha bak lam Farisi dam totbaho labe aihemu faki fa damat Ala bake lomna ve vua vahudam toheda zi laba vuusu im vameame faheme modiam dam lamti fa vahi fa ame Num Vàmteabu laba vou aasdam dam totbaho laba ab le gagoham. “Uho Yesus le sile,” lahame ab gagu oluham. 33 Labi ame di labe Yesusat dam bake gi im nehasu vameada. “Em umti niba aidam bak ba bohu kaio. Gi kehàm vaba Eba gagu oluhuda laba Eho fa la tame. 34 Labi di lam uho fa Eba vi nabidameam um ba Em alihi vi aam vabak. Labi laha Ebe Eho le azilo modem bak laba um laha tau vulam biem bak.” 35 Lahahat ame Yahudi dam busaoda eeda zi labe ozom vabili ab ot gagoi ot gagoidamam. “Aa! Ame Da nim Aho adi bake le iho nabidume im Am alihi vi aam biela? Làhà Aho gi im Yahudi dam totbaho fa Yunani bak laba fi goaitoi esuhu dam laba le dam lamti fa Yunani damti vahokelo gagoho labe im ba vulam biem bake gagoheo? 36 Aho neha, ‘Uho fa Eba vi nabidameam um ba Em alihi vi aam vabak,’ lahaha bak lamti labi Aho neha, ‘Ebe Eho le azilo modem bak lam um laha tau vulam biem bak,’ lahaha bak lamti, ‘Akati modemna modela?’ lahame labi gagohela,” lahame ab ot gagoidamam. 37 Labihadume ame Na Àme Iziam di labe ba novalo modem digat abo bisi feàda labe Yesusat ame Fihasi Ala Bake Vou Baedam Num Vàmteabu labe am ad oli aam bak tomba laba neo le duzu dae buduana ab faasi vameadamam. “Meit valo àhàkemeam làhà Eba li udele. Meit Eba tu vuzehemeam làhà gi meit Alat Vameadaha Im Toedahana laba nehasu toehe bakti ulohona mode tame. ‘Ame da labe aho udehe bak labet modi am ahu ad laba meia modi fa ahe neàna bohu vuusdam vao fa vao aanati ulohona labaha bohu futodume tàda tame,’ lahame toehe bak ehete,” lahame Yesusat ab vameaham. 39 (Yesusat etei meia modi fa ahe neàna bohu vuusdam vao laba vàlu gagoho bak lam gi meit Aba tu vuzehemda laba Alam Aha Nutabe Neàna Aho ilabdi ame da laba ba modi vizi teudem bak laba ozome vameadam bak. Lahana Yesusat fa Am Ai bake fa le ee Abada Alat vousai Aba modi feà datelehe vab labe Aho Alam Aha Nutabe Neàna lam it olu dam bake nom ilu vizedaha vabak.) 40 Labi Yesusat etei lab gagoho bak lam dam dua totbaho labe aihemu fa ab ot gagoi ot gagoidamam. “Oo, ame Da nim gi Musat aham di iube neha, ‘Ba diamut Alat Vameadaha Im Aime Fa Dam Bake Ahate Vameaidahada emti ulohoda olu tame,’ lahame fet vameame esuhu Dat am taia?” lahame ot gagoida. 41 Labi dam dua totbaho labe nehame gagoda. “Ne, ame Da nim gi Alat Gagu Fihasi Vimteme Oluhu Dat Boehàda iho vou faodamda am taia?” lahame ot gagoida. Lahana dam dua totbaho labe vedi Yesus Galilea laba faaha tibame nehi git gagoda. “Vabà! Ame Da ba akati labihà? Alat Gagu Fihasi Vimteme Olulo Modem Dat Boehàda lam Galilea labe ba le? Ba labiham vabak. 42 Ne, meit Alat Vameadaha Im Toedahana laba im nehasu fet toeme esuhuna taia? ‘Alat Gagu Fihasi Vimteme Olulo Modem Dat Boehàda lam gi im tai ahobada Boehàda Daud vou faat lehe mekehàda modem bak. Abo Daud aham di iube faaha kota Betlehem laba vi faa tame,’ lahame toehe bak. Labiha labe ba akati labihà? Ame Da nim iho vou faodam Dàt modem vabak,” lahame ot gagoida. 43 Labihadam labe, “Yesus ana dàt modela?” lahame damat ab faheme la ozoi le ozoidamam. 44 Labi ame di lam Aba silo àhàki meedam dam bak laba ehet. Lahana ame dam labe meida vàmtea ba Yesus bake netàdi alihi ulam kai. 45 Amu Farisi dam lamti labi damat Ala bake lomna ve vua vahudam toheda zi laba vuusu im vameame faheme modiam dam lamti vazisi fa ame Fihasi Ala Bake Vou Baedam Num Vàmteabu laba vou aasdam dam laba neha, “Yesus le sile,” lahame gagu olu ame dam labe le vabeddaha Yesus sim vabili saemea fa ab leham. Labi fa li modeha ame dam eeda zi totbaho labe ab gut meoleham. “Um akati Da lam si fa niba vou lehe vaba modela?” 46 Lahahat ame Num Vàmteabu laba vou aasdam dam labe fa gago, “Ne, im Da labet Aho etei vou li vameadam im lam im amu aihi vabak. Abo im dedat ozobohudi vameadam imot modem bak.” 47 Lahahat ame Farisi dam labe tozome gago, “Ea, um laha fa Da labe lab vagehe bak laba tau vuzehe dam ame? 48 Ne, uho ozom, im Farisi dam modeo, dam eeda zi totbaho modeo, im meida vàmtea Da laba tu vuzehehe datva ehe? Vabà! Im labihadamda vabak. Akati uho labi modelo mode? 49 Gi dam ee vabda zi nim abo dat ahamda Musat aho aham di iube toedume fi hasi esuhu Im Feàna zi lam biem damat ihimo Ame Da laba tu vuzehe bak. Dam lam gi Alat aham di iube, ‘Beome vàhàdese,’ lahame amu gi uloome esuhu dam am bak.” 50 Lahame labi gagu modeha Farisida meida abo amu Yesus bake le tàhi im vameadamda Nikodemus labe neo am Farisi dam totbaho laba ab gagoham. 51 “Um nasi ozomale. Dat ahamda Musat aho toedume fi hasi esuhu Im Feàna zi lam abo ihimo Yahudi damat tuhu im lam gi neha taia? Amu nasi, ‘Da lam git modehe bak akete?’ lahame uloodume, ‘Ame da labe aho veibadào? Veibadam vabao?’ laham bak aime neàdi ba, ‘Beose,’ lahame na asimbuna feà gagu beom bak. Ba aihi vabna ostame na asimbuna feà gagu beom vabiem bak.” 52 Lahame labi gagoha ame ee dam totbaho labe faki fa Nikodemus bake gago, “Oo làhà! Om laha Galilea labet lehe? Om nasi Alat Vameadaha Im Toedahana zi laba mahate nabidume aale. Ba nehi toehe bak vabak. ‘Alat vameadaha im aime fa dam bake ahate vameaidamda lam ba Galilea bak labe Israel bake olu tame,’ lahame fet toeme esuhu im ba na vabak.” [ 53 Lahame vameadume neàdi dam lam fi goaitoi im num bake ahala ab laiame seteham.]

Yohanes 8

1 Labihàmu Yesus fa Zaitun Dee Dozeadaha Bak Buzoho laba ab laiteham. 2 Labi izi dihasi dihambe Yesus ame Fihasi Ala Bake Vou Baedam Num Vàmteabu labe am ad oli aam bak tomba laba neo fa ab laham. Labi laba lafusi modeha dam dua bak Aba valadàmu Aho im vahokelo ab nusu faasi vahokedamam. 3 Labi vahokedume modeha dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti Farisi dam totbaho lamti laham dam lam vazisi iho nam dat ehena fa dat amomoi aa modehe bak aahemu si vou li netàdi ub odosi damat avaesdam tomba laba ab vou duzuham. 4 Ame dam labe ozo, “Dat ahamda Musat aho toedume fi hasi esuhu Im Feàna zi lam, ‘Yesusat fa ame baket meedào? Meedam vabao?’ laham bak aihizobe fa Yesus bake vàluse,” lahame ame nam lam ahit ab vou li vou duzuham. Vou duzu neàdi Yesus bake ab gagoham. “Guru oa, nam nim dat ehena fa dat amomoi aa vaha bake iho si vou leho. Iho ozoha, Musat aho aham di iube toedume fi hasi esuhu Im Feàna zi lam im nehasu toehe bak ehete. ‘Nam dat ehena fa dat amomoi ve modemeam làhà ket beodume elole,’ lahame toeme esuhu bak ehe bak. Lahana Oho ozom, akatihàla? Gi ame bak lam modeo? Feidào?” Lahahat Yesusat dae buhu vaba gi fota nusu am anekehàsoat bak laba ab toedamam. 7 Labi ame dam labe gi Yesus bake vi ooteom labe neo ab vi gagoham. “Oho ozom, akatiha?” lahame meit vi gago. Meit vi gago. Lahada. Labihadàmu Yesusat fa usai duzu ab gagoham. “Làhà um etei faina modehe vabda ehelemeam làhà ame da labe nasi ke visoi nam laba beole,” lahame gagu neàdi fa neo fota nusu anekehàsoat bak laba neo nom toeda. 9 Làhàmu ame Yahudi dam busaoda eeda zi labe Yesusat etei lab gagoho bak lam aihemu dam aoleheda nasi ladi aa ahala laida. Labi neo dam gàhàda laha ladi aa ahala laida. Labihadume ame dam lam ahebu le seddume gi Yesusti dam dua bak labe iho avaesdam tombu laba duzuhu nam lamti ihimo veke. 10 Làhàmu fa usai duzu nam laba ab gagoham. “Dam oba, ‘Beose,’ lahame na asimbuna feà oba modelo gagoho dam zi lam ake ladahela? Oba vàlumda niba vekesi doudam vabao?” 11 Lahahat nam labe fa gago, “Dat Busao, ba na kaio.” Lahahat Yesusat fa gago, “Làhà Em laha obo oho modehe im laba ozome, ‘Beose,’ lahame na asimbuna feà oba modelo gagom bak kaio. Nasi lale. Obo oho faina meedam bak lam ba a vi meedamule,” lahame im vi vahokeme ab oluham.] 12 Labi Yesusat neo im nehasu ame Yahudi dam dua bak laba vi vahokeda. “Dam bakda ahebu im ahu ad laba modi Fauhaedamda Em am bak. Meit Eba tu vuzehi im Ebeda meedameam làhà ba aibu bak laba gohatem vabak. Gi Eho modi fauhaedam bak labet modi ame da labe fa Alati vahi gi ahe neàna bohu vuusdam bak.” 13 Lahaha bak lam ame Farisi damat aime mu otesidam labe ab gagoham. “Om git gagoda. Oho etei, ‘Dam bakda ahebu im ahu ad laba modi Fauhaedamda Em am bak,’ lahame lab gagoho bak lam gi Obo Ohomo ozoho im gagodam labe im ba vuzehem biem bak. Ame bak lam Oba vi tau gagomda akete?” 14 Lahahat Yesusat fa gago, “Vabà! Eho etei lab gagoho bak lam dam amomoit laha vi tau gagom vabameam làhà Eho lab gagoho bak lam ba giomimot modem vabak. Abo imbo bak. Neham labe labihaha bak. ‘Em adi baket lehela?’ laham bak lamti labi, ‘Em ake fa làla?’ laham bak lamti Ehemo naedat ozobohudi gagoho bak. Lahana um biem bak. 15 Ebe Eho meedam im lam uho ozome ozobohudi neàdi gagodam bak lam um gi uho bak damat ubu uho ozoho baket ozomsu gagodam bak. Lahana Ehemo ba meia ozome ozobohudi neàdi gagom di ba umti uloholi meia ozomsu gagodam vabak. 16 Lahana Eho meia ozome ozobohudi neàdi gagomeam làhà Ebe Eho ozome ozobohudi neàdi gagodam bak lam gi ahole imbona vamdesu gagodam bak. Neham labe labihadam bak. Ehemo meia ozome ozobohudi neàdi gagodam vabak. Em gagu oluhuda Em Aiti ahili ame baket meedam bak. 17 Lahana Eho gi im lamota ozome uba gagodam vabak. Ubu uho dat ahamda Musat aho toedume fi hasi esuhu Im Feàna zi laba tu meedam im lam im nehasu toehe bak ehe taia? Neha: ‘Meit veibam di na aahada behàsu lam ehe labe ame da laba tau ulohodesu gagomeam làhà ame da labe aho lab gagoho bak lam imbo bak. Meit aba aho gagoho bak laba tu vuzehem neàte,’ lahame toehe bak ehe taia? 18 Làhà Eba vi tau gagomda laha behàsu bak. Ehemo naedat it ozome gagomda ame. Labi Eba gagu oluhuda Em Ai labe vi tau gagomda ame. Em Em Aiti ahili uloholi gagodam labe uho tu vuzehem neà bak.” 19 Lahahat ame Farisi dam labe Yesus bake neo vi ailo gago, “Oho etei lab gagoho bak lam Om Ai akete?” Lahahat Yesusat fa gago, “ ‘Em ana dàt modela?’ laham bak lamti labi Em Ai, ‘Amat modela?’ laham bak lamti um biem bak. Uho, ‘Em ana dàt modela?’ laham bak lam um ozobohudemeam làhà um Em Ai, ‘Amat mode?’ laham bak lamti laha vi ozobohudem bak.” 20 Lahame Yesusat etei lab vameadaha im lam aho gi ame Fihasi Ala Bake Vou Baedam Num Vàmteabu labe am ad oli aam bak tomba laba abo Ala bake lodam doi vahedamnabu zi modealadaha bak laba netàdi vahokedam diat vameadaha imot modem bak. Lahana damat Yesus sim bak lam Alat fet ozome esuhu digat fuhu vab labe ba dam meida vàmtea Yesus bake netàdi sim kai. 21 Yesusat neo ame Yahudi dam busaoda eeda zi laba neo vi vameada. “Kehàm vaba Em fa le sete tame. Em le setehemu uho gi neo, ‘Alat Gagu Fihasi Vimteme Oluhu Dat Boehàda lam akete?’ lahame uho gi dat amomoi bake nabidam lahasumeam ba ame da vi aaha vab labe uho faina meedam bak lam Alat fa ozahigeàmu fa vei neàdem vaba um elodume Ebe Eho le azilo modem bak laba um tau vulam biem bak.” 22 Lahame labi gagu modeha ame Yahudi dam busaoda eeda zi labe Yesusat lab gagoho bak laba tozolo ihimo aa ot gagoi ot gagoida. “Oo, Da lam etei neha, ‘Ebe Eho le azilo modem bak laba um tau vulam biem bak,’ lahame lab gagoho im uho ozom, akatihasu ozome labi gagohela? Làhà Ahamo Aba it otem labe Aho elom di gi ààmo ziet lalo modem labe iho ame bak laba ba vulam biem bake gagohe?” 23 Lahana Yesusat gi ozahigeàmu neo vi vameada. “Um gi bak damat modem bak. Labiha labe uho na im ozom di gi bak damat ibi iho modi baleàhà bak ozodam damat modem bak. Lahana Em asum ahoba iubet lehe bak. Labiha labe Ebe Eho ozoho bak amomoi bak. Lahana uho ozom, Em umti uloholi bak dàt mode tiba. Lahana ba labihaha vabak. 24 Labiha labe Eho amu uba gagoho bak am bak. Um gi faina meedam bak Alat fa ozahigeàmu fa vei neàdem vabna um eloda tame. Eho neha, ‘Em ame Da am tame,’ lahame lab gagoho bak lam uho tu vuzehem vabameam imbote. Um gi uho bak niba faina meedam bak lam Alat fa ozahigeàmu fa vei neàdem vabna um eloda tame.” 25 Lahame Aho neo labi gagu modeha ame Yahudi busaoda eeda zi labe Yesus bake fa vi ailo ab gagoham. “Làhà Om abo amat modela?” Lahahat Yesusat fa gago, “Baka akati Eho fa uba neo vi vameà? Ebe Eho amu uba lab gagodam bak lam lahasuhu bak. Em ame Da am bak. Ba Ebe Eho gagodam bak ba veimdem vabak. 26 Eho uba neha, ‘Um faina modeho,’ lahame uba ozome vàlu vi gagodam bak feà bak ehe bak. Lahana ba Ehemo gagodam vabak. Eba gagu oluhuda lam Am abo imbona meedamda modem labe Eho gi Aba Aho Eba gagohona lam Eho aihina lam fa dam bakda ahebu vameadam bak.” 27 Yesusat etei lab vameadaha im lam gi Am Ai Alat meedaha im ozome vameadaha bak. Lahana damat ba ozobohudem vabile. 28 Ozobohudem biehemu Yesusat neo ab vi gagoham. “Etei nim, ‘Em ana Dàt modela?’ laham bak lam um bie. Lahana ba Asum Ahoba Iubet Bak Niba Li Dateleheda nim damat Em ve vousai tom modesum di lam, ‘Em ame Da am tame,’ laham bak Eho amu uba gagohona lam, ‘Imbote,’ laham bak lam um ba ozobohude tame. Labi laha ame di lam, ‘Eho na im meedam di Ebe Eho ozoho baket meedam vabak. Gi Em Aiat Aba Aho Eba vahokehe baket fa dam bake vameadam bak,’ laham bak lam um laha ba neo vi ozobohude tame. 29 Labi Eba Gagu Oluhuda lam gi Emti bakamta aidam tadem bak. Am ba Em vou esmozi Ehemo aidam vabak. Eho gi Aho deelem bak laba ozome meedam tadehemu labihaha bak.” 30 Lahame Yesusat lab vameadam di lam dam zoho dua bak aidume fa Yesus bake, “Am abo Alat Gagu Fihasi Vimteme Oluhu Dat Boehàda am tame,” lahame ab tu vuzeheham. 31 Labihadume neo Yesusat fa Yahudi dam Aba tu vuzehehe dam laba nehi vameada. “Ebe Eho uba lab vahokedaha im lam uho tu vuzehi meedam bohu vuusdameam làhà imbot. Um abo Ebe Eho vahokedam im ozobohudelo bisi vi tau meedam dam um am bak. 32 Labiham labe, ‘Ala akatihasu meedam Alat mode?’ laham im imbona lam Eho uba vameadume um ozobohudehe bak labet modi na im uba neha, ‘Nehasu modele. Nehasu modele,’ lahame ootedam im lam uba vabidam bak lam fa ab modi setemam bak.” 33 Lahahat ame Yahudi dam busaoda eeda zi labe faki fa gago, “Oo làhà! Om git gagoho taia? Na im iba ootedume modi asimbulem im vabna baka akati Oho neha, ‘Na im iba ootedume vabidam bak lam modi fa sete tame,’ lahame iba labi gagohela? Ne, im Abrahamat vou faat lehe mekehà dam im am bak. Labiham labe meit iba ootedume modi asimbulemna vabak.” 34 Lahahat Yesusat fa gago, “Lo, Abrahamat vou faat lehe mekehà dam um am bak. Im lada lam imbomu im imboda nidi nim laha nasi iademe aima. Meit faina meedam bak bohu vuusdam labe ame bak lam ame da laba vizehe labe ba modi veiom biem bak. Gi labaha bohu modesdam bak. Abo mei na teo meedamda labe aba im gagu ootedamda labe am na teo meedam bak lamti ulohote. 35 Ame mei na teo meedamda lam aba im gagu ootedamda labe am damali labaha bohu vuusdam vabak. Gi teohe am damali meedam bak. Lahana, ‘Adat,’ lahamda lam am amedamali labaha bohu vuusdamda am bak. 36 Labihàmu Em Alam Adat modem labe faina meedamna lam uba veimai uho voom vabilehe bak lam Eho modi setemeam làhà abobo seti um Alam damali gi labaha bohu vuusdam bak. 37 Um Abrahamat vou faat lehe mekehà dam Em ozobohu bak. Lahamnàme Abrahamat Ala bake tu vuzehehe bak lamti uloho vabna Eho vahokedam im lam um ahu ad labe tu vuzehi meedam vab labe uho Eba otelo àhàki vabeddam damat modem bak. 38 Em Aiti ahili azihi di labe Aho Eba modi Em ozobohudi fi gatehe im lam Eho fa uba vameadam im am bak. Lahana um gi um aiat uba vahokehe im lamota meedam damat modem bak.” 39 Lahahat ame Yahudi dam busaoda eeda zi labe fa ab vi gagoham. “Ne lahana im tai ahobada Abraham labe aho iba vahokedahana lam iho aime meedamna am bak.” Lahahat Yesus fa gago, “Vabà! Um, ‘Abrahamat vou faat lehe mekehà dam im am bak,’ lahaha bak lam imbodemeam làhà um gi Abrahamat aba aho im vamdesu meedam bak lamti ulohona vi meedam lahasdam bak. 40 Lahana uho ba labihaha vabak. Em gi Em Aiat Aho Eba im imbona gagohona lam Eho ot vai uba vahokeha uho vedi Em otelo vabeddam damat modem bak. Lahana Abrahamat Em Aiam im imbona meit vameahana aihi di ba moho vabak. Abo tu vuzehi meedaha bak. 41 Lo, Eho ahole gagoho bak. Um gi um ai aabo aho meedaha bak labet vi meedam damat modem bak.” Lahahat ame dam labe fa neha, “Im gi Abrahamam nam labe vou faat lehe bak. Ba meit vou faat lehe vabak. Im Ai aabo gi vàmtea Ala am bak.” 42 Lahahat Yesusat fa gago, “Um Ai aabot Alat modemeam làhà um gi Eba deelem bak. Nehaha bak. Alat Eba gagu oluhu labe Em niba lehe bak. Em ba Ehemo ozome niba lehe vabak. Gi Alat Ahamo ozome Eba gagu oluhu bak. 43 Eho lab vahokedaha im lam uho aimta ai. Lahana uho modehe vaba moudaha labe im Ebeda, ‘Akati modemna modela?’ laham bak lam um aime ozobohudem bi meedam bak. 44 Um gi um ai Iblis labe am damali aba aho ozoho bak laba modelo àhàki meedam damat meedam bak. Iblis lam gi Alat ahamte alimeat bakti na ahebu modi esuhu di labe faasi dam bakdate modi faidehe labe elodam bak lam modi vizeheda Iblis am bak. Labi laha aba aho meedam bak lam ba im imbo bak vab labe ba im imbona vameadam vabak. Gi vagedam tadem dàt modem bak. Labi aho meia im giomim vagedam bak lam ba it àvodem vab dàt modem bak. Aba aho amu di iube faasi modi baleàhà bak am bak. Labi laha damat im abada vuzehi meedameam làhà gi im aiti uloholi neo meia vagedam damat modem bak. 45 Labihàmu Eho im imbona uba vameadam di lam um am damat modem labe gi aba aho modeme baleàhà baket vi vouhodam labe Emti Ebe Eho vameadam imti uho tu vuzehem mu meedam damat modem bak. 46 Um meida vàmtea labe ba Eba neha, ‘Eho faina modehe bak neam tame,’ laham bak vimteme vàlu gagom bak vab taia? Làhà Eho im imbona uba vameadam labe akati modi uho Emti Ebe Eho vameadam imti tu vuzehem vaba modela? 47 Meit Alam damaleheda lam im Abada deelehat aime tu vuzehi meedam meot. Lahana um Alam damalehe vab labe um ba im Ebeda aim moho bak.” 48 Lahame labi vameadaha ame Yahudi dam busaoda labe Yesus bake feàtàlo ab gagoham. “Ibi iho amu ozoho bak lam gi ahole ozoho bak. Om gi Samariada git modem dàt modem bak. Mei ahu oli veimam setan Oba veimai vuusdam dàt modem bak.” 49 Lahahat Yesusat fa neo gago, “Vabà! Mei ahu oli veimam setan ba Eba veimai vuusdam vabak. Em gi Em Ai Ala bake ahu adat iedi vou baedam bak. Lahana um ba Eba ahu adat iedi vou baedam vabak. Uho vedi Eba feàtàdam bak. 50 ‘Damat Eba vou baedase,’ lahame Em ba labihasu ozome na im meedam vabak. Lahana Em Aiat ahamo, ‘Damat Em Adat labe Am ee vousai, “Feàte,” lahame ahu adat iedi vou baedase,’ lahame Aba Aho ozome meedam bak lamti gagom kaio. Labi, ‘Eho im ahole meedào? Ahole meedam vabao?’ lahame vi ozome ozobohudi neàdi gagomda Am am bak. 51 Im lada lam imbomu im imboda nidi nim laha nasi iademe aima. Meit Ebe Eho vameadam im lam aime tu vuzehi meedameam làhà ame da lam Alati gi ahe neàna bohu vuusda tame.” 52 Lahame labi gagoha ame Yahudi dam busaoda labe fa ab gagoham. “Ea, iho amu gagoho bak ab imbodeham bak. Mei ahu oli veimam setan Oba veimai vuusdam labe Om ahusobuli vameadam bak. Ne, Abraham gi amu di iube eloho bak. Labi Alat vameadaha im aime fa dam bake ahate vameaidaha dam totbaho lamti laha gi amu di iube elodaha bak. Lahana akati Oho neha, ‘Meit Ebe Eho vameadaha im nim aime tu vuzehi meedameam làhà ame da lam ba elom vaba gi ahe neàna bohu vuusda tame,’ lahame Oho labi gagohela? 53 Làhà im tai ahobada Abraham lam gi amu di iube eloi seteheda lam feà vab dàt mode? Labi Alat vameadaha im aime fa dam bake ahate vameaidaha dam totbaho lam gi amu di iube elodume seddaha dam lamti laha feà vab damat mode? Labi Om bisi feàda ame? Oho ozom, Om ana dàt modela?” 54 Lahahat Yesusat fa gago, “Uho vedi Eho gi ee Ebeda vou daetbada tiba. Lahana Em ba labihadam vabak. Ebe Eho etei lab gagoho bak lam uba vouhodase. Neha: Ee Ebeda Ehemo vousai it daetbadameam làhà gi teo modeme vanamai voom bak. Labihàmu Em ba labiham vabak. Em gi Em Ai uho neha, ‘Im ahu adat iedi vou baedam Ala am bak,’ laham Ala labet Em ee vousai, ‘Em abo feàte,’ lahame Eba vou baedam bak. 55 Lahana Em Ai um biem bak. Lahamnàme Emota ozobohu bak. Lahana Eho nehameam, ‘Em Ala biem bak,’ lahame labi gagomeam làhà Em gi ubu uho neha, ‘Im Ala ozobohu bak,’ lahame lab vagehe bak lamti ulohona gagodam bak. Lahana Em abo Ala ozobohudi im Abada aime vuzehi meedam bak. 56 ‘Eho bak niba lem digat aa tame,’ lahaha bak lam um tai ahobada Abrahamat amu di iube nasi tu ozome esuhu bak lam am gi deelehat vou faodam bak. Labi vou faodume modeha Eho ba lehe bak nim aho ab aame deeli vàhàdeham bak.” 57 Lahame labi gagu modeha ame Yahudi dam busaoda labe Yesus bake neo tozodam labe ab gagodamam. “Oo làhà! Om lima puluh tahun fuhu vab Dàt ba akati Om Abrahamam alihi aahela? Hohoa. Om gi giomim vameadam dàt moz.” 58 Lahahat Yesusat gago, “Imbote. Eho lab gagoho bak lam ba giomim gagom kaio. Lahana Eho etei uba gagolo modem im imboda nidi nim laha iademe ozomale. Abraham faaha vab di Em ehe bak.” 59 Lahahat Aho, “Am gi Alati ulohote,” lahame Aho etei lab gagoho bak lam ame Yahudi dam busaoda eeda zi labe faki feà bak fusi, “Yesus otese,” lahame ke visomoame, “Beose,” lahame viisiha Yesus gi ab itame seteham. Abo gi dam so neumat labe vatoheme ame Fihasi Ala Bake Vou Baedam Num Vàmteabu labe am ad oli aam bak tomba lam vou esmozi ab itame seteham.

Yohanes 9

1 Labi ba digat meida labe Yesus Aba vi tau meedam damti iho godam labe dat na aam biemda ab aaham. Gi am oiat faaha di labet fako na aam biemna faaha dat ab aaham. 2 Lahamda aahemu Aba vi tau meedam dam labe ab gagoham. “Ai Guru oa, dat etei faaha di labet fako na am biemda lam akati modi labihahela? Aho faina modem bak labet labihahe? Gi am aiti oiti faina modem bak labet labihahe? Akatihahela?” 3 Lahahat Yesusat fa gago, “Vabà! Ba ame da nibe faina modehe labe labihaha vabak. Labi laha am aiti oiti laha faina modehe labe labihaha vabak. Ala bisi im feàna meedam Alat modem labe Aho ame da niba modi fa neàdem bak lam, ‘Damat fà aame ozobohudese,’ lahame ame baket modehe bak. 4 Um nasi ozomale. Aibu bak ab fuseo vabaleham bak. Aibu bak fumeam ba iho na meedam biem bak. Labihàmu di fauha neà lahasdam di nim Eba gagu oluhu Ala labe Aho Eba gagoho im lam iho meedam neà di am bak. 5 Em bak niba ehe lahasuhu di dam bakda labe im ahu ad laba modi Fauhaedamda Em am bak.” 6 Lahame labi gagu neàdi Yesusat Am keha bak laba ab nom doham. Labi vi uhulame bak vaobedi neàdi Am anekehàt visoi dat na aam biemda labe am fakode laba ab noiham. 7 Noime gago, “Om nasi le Vao Nobu Siloam laba le dauha kikele.” (“Siloam,” lahaha bak lam Ibrani dae ozom di gi, “Gagu olum bak,” laham bak.) Lahame labi gagohemu dam aheda labe ame da lam ve Vao Nobu Siloam laba vou le naedat am dauha it kikeme modeha ab neàdeham. Gi na aam bak neàdi am num bake fa ab laham. 8 Labi modeha am num obe esuhu dam lamti labi am ozobohu dam totbaho lamti dam labihasu amu ame da labe aho nusu iba na tauledam bak ozobohu dam labe iho gut aaha àvodi ot gagoida. “Uho ozom, da lam ana dàt mode? Ne, da lam gi fako na aam bili niba nusu iba na tauledamda am taia?” 9 Lahahat dam totbaho labe vedi neha, “Vabo, ame da labe modem kaio. Gi am alihiti ulohonali modem bak.” Lahahat ame da labe ahamo vi aime fa ab gagoham. “Lo, em ame da am bak.” 10 Lahahat dam labe fa neha, “Làhà om fako akati modi fa neàdehela?” 11 Lahahat ame da labe fa neha, “Dat ee gagom Yesus lahamda labe Aho bak vaobena modi Am anekehàt visoi em fakode niba noime gago, ‘Om nasi le Vao Nobu Siloam laba le dauha kikele,’ lahame eba labi gagohemu eho ame bak laba le dauha kikeme modeha em fako na aam bak ab neàdeham bak.” 12 Lahahat ame dam labe fa neha, “Oba modi fa neàdeheda akete?” Lahahat ame da labe fa neha, “Em bie. Le seteho.” 13 Yesusat Am kehati bakti valiheme bak vaobena visoi dat fako na aam biemda labe am fakode laba noime modi fa neàdehe bak lam gi hari Sabat modehemu ame dam labe dat fako faidehena fa na aam neàdeheda ve Farisi dam bake ab vou laham. 15 Vou le modeha ame Farisi dam labe iho neo vi ailo ame da laba ab gut vameadamam. “Om fako faidehe bak akati modi om etei fa na aam neàdehela?” Lahame labi gut gagoha ame da labe fa gago, “Ame Da labe bak vaobena modi Am anekehàt visoi em fakode niba noihemu eho em dauha le valo kikeme modeha em etei fa na aam bak ab neàdeham bak.” 16 Lahame etei labi gagoha ame Farisi dam totbaho labe aime ab gagoham. “Ame Da Yesus lam ba Alat gagu oluhu vab Dàt modem bak. Im Yahudi damat hari Sabat na modem fi ham digat lam Aho ozahigeàmu fa na meedam bak.” Lahana ame Farisi dam totbaho labe vedi neha, “Mm, ne da nim faina modemeam làhà na damat ihimo modem biem im feàna damat fet aame ozobohudemna nim ba amat Aba vizi Aho teudi im lamohoda meedàla?” lahame labi gagoha ame Farisi dam labe ihimo ab otesi otesidamam. 17 Labi ihimo otesi otesidaha vabamu fa neo ame dat fako faidehena fa na aam neàdeheda laba neo ab gagoham. “Ne, om akatiha? Fako faidehena fa na aam neàdeheda om am taia? Om ame Da laba gagom im ehe?” Lahahat ame da labe fa gago, “Eho ozoha, Am abo Alat vameadaha im aime fa dam bake ahate vameaidahada Am am bak.” 18 Lahame labi gagu modeha ame Yahudi dam busaoda eeda zi labe ihimo ot gagoida. “Iho ozoha, ame da lam amu fako na aam bili meedam bak lam meit aba modi fa neàdehe bak lam gi giomim. Gi am oiat fako aam neàna faaha bak lahasdam bak,” lahame labi ozohemu da labe aho vameadaha im laba ba tuhu vabak. Làhàmu dam gagome ame dat fako faidehena modi fa neàdeheda labe am aiti oiti, “Ve vou lele,” lahame ab gagu oluham. 19 Le ve fa vou li ab gut gagoham. “Ne, da nim uho neha, ‘Uho etei faaha di labe fako na aam biemna faaho,’ lahamda nim um adat mode? Làhà akati modi etei fa na aam neàdehela?” 20 Lahahat am aiti oiti fa gago, “Lo, im adat am bak. Labi laha iho am faaha di gi fako na aam biemna faaha bak. 21 Lahana, ‘Am akati etei fa na aam neàde? Amat fa aba modi neàde?’ laham bak lam im bie. Uho gi da laba gagu aima. Da lam gi busaolehena ahamo fa uba gagometa.” 22 Ame da lam am namti nehame iedi labi gagoho bak. Amu ame Yahudi dam busaoda eeda zi labe im nehasu gagu vàmadi esuhu bak ehet. “Meit neha, ‘Ame Da Yesus lam Alat Gagu Fihasi Vimteme Oluhu Dat Boehàda am tame,’ lahame labi gagomeam làhà ame da lam ba im Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba ba tau vahem vabak,” lahame gagu vàmadi esuhu labe ame etei iba gut uloodam dam laba ab gagoham. “Da lam gi busaolehena ahamo fa uba gagometa,” lahame lab gagoho im lam ab gagoham. 24 Lahame labi gagu neàdi ame Yahudi dam busaoda zi labe fa dat fako faidehena modi fa neàdeheda laba neo gagome lehe bak ab behàsdeham. Li duzu neàdi ab gut gagoham. “Alat oba nom aasdalo. Oho nasi ohu vame, ‘Yesus akatihasu meedam dàt modela?’ laham bak imbo bak gagole. Iho ozoha, ame Da Yesus lam gi faina meedam dàt modem bak.” 25 Lahahat ame da labe fa gago, “Ne, ame Da labe, ‘Debu faina modem Dàt modeo, faina modem vab Dàt modeo,’ laham bak lam em biem bak. Em gi im nimota ozobohu bak. Em amu fako na aam biemna ame Da labet fa eba modi em etei fa na aam neàdehe bak.” 26 Lahahat ame dam labe fa neo gago, “Ame Da labe oba ana mode? Oba akati modi om fa na aam neàdehela?” 27 Lahahat ame da labe fa gago, “Ne, eho amu uba gagohona taia? Um aim vaba? Um ana modi fa bak lam neo bisi vi ailo gagodàla? Làhà uho laha ame Da labe Aba Aho vahokedam im ozobohudelo vi tau meedam damalelo mode?” 28 Lahahat ame dam labe dae meot feàtàme vameada. “Vabo. Im ame Da laba vi tau meedam damat modem vabak. Ame Da laba bisi vi tau meedamda om am bak. Im gi im tai ahamda Musa bake vi tau im abada meedam damat modem bak. 29 Alat aham di iube im abada Musa bake tàhi vameame fi gatei aho fa ot vai im dedateli iba fa vou vamea usehe bak lam im ozobohu bak. Lahana Ame Da Yesus nim, ‘Amat Aba modi im dedateli lehela?’ laham bak lam im biem bak.” 30 Lahahat ame da labe fa ame dam busaoda laba im vahokeda. “Ne, ame Da Yesus labe Aho em fako faidehena Aho modi fa neàdehenàme akati modi uho neha, ‘Amat Aba modi im dedateli lehela,’ lahame labi gagodàla? Aiee! Em uho etei lab gagodam bak lam em aiha àvodeha. 31 Bak nim im ahebu ozobohuna taia? Dam faina meedam dam labe iho Ala bake, ‘Iba taule,’ lahame gagom di Ala ba ame dam laba taum vabak. Gi dam Aba deeli vou baedam dam abo Aba Aho ozoho baket uledi meedam dam lamota ibi iho gagom im aime taum meo bak. Bak lam im ahebu ozobohuna taia? 32 Labi laha dat etei faaha di labe fako na aam biemda modi fa neàdehe bak lam im amu aaha vabak. Abo Alat ahamte alimeat na ahebu meedaha di labe faasi etei vou fuhu di nim im ame bak lam aaha vabak. Gi etei alimeat ab aaham bak. 33 Ame Da Yesus lam Alat gagu im dedatelem vabameam ba im feàna nimohona ba modem vabak.” 34 Lahahat ame dam labe fa gago, “Vabo. Om oiat om faaha di labe faasi om gi faina meedume etei vou fuhu bak. Baka akati modi oho iba im vahokedà?” lahame ame da laba dae meona bebet fa im num mali ab gagu futoi itaham. 35 Labi ba neo Yesusat aiha Farisi dam labe dat fako faidehena Aho modi fa neàdeheda lam im Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num lam mali bebet futoi itaha bak aihemu le nabidume ab vi aaham. Vi aahemu gago, “Dat Asum Ahoba Iubet Bak Niba Li Dateleheda abo Alat Gagu Fihasi Vimteme Oluhu Dat Boehàda laba om tu vuzehi meedào?” 36 Lahahat ame da labe fa gago, “Dat Busao, ame Da lam akete? Oho etei eba fa gagole. Labi em ame Da laba eho tu vuzehese.” 37 Lahahat Yesusat fa gago, “Ne, Em ame Da oho ab aaham bak. Oba etei im ab vameadamam bak.” 38 Lahahat ame da labe fa gago, “Ai Boehàda, em etei Oba ab tu vuzeheham bak,” lahame ahit ogomasu biti ab vou baedamam. 39 Labi Yesusat neo vi vameada, “Eho bak niba lehe bake gi neham bak ozome lehe bak. Dam bakda labe iho na im meedaha bak laba ozome Eho dam totbaho laba, ‘Git modeho,’ labi dam totbaho laba, ‘Im vamdesu meedaho,’ laham bak laba ozome ozobohudi neàdi gagodalo bak niba lehe bak. Em gi damat neha, ‘Im fako na aam bieho,’ laham dam lam Eho modi fa na aam neàdeda. Labi laha damat neha, ‘Fako ibida na aam neà bak,’ lahame ahobat gagodam dam laba Eho modi fako ibida fa na aam bieda. Eho gi labihasu modelo bak niba lehe bak.” 40 Yesusat etei lab gagoho bak lam Farisi dam laba tau doudam dam totbaho labe ame bak aihemu fa Yesus bake ab gagoham. “Làhà, im laha fako na aam biem dam im ame?” 41 Lahahat Yesusat fa gago, “Uho neha, ‘Bisi im vamdesu meedam bak akete?’ laham bak um biem bak lam imbodemeam làhà ba Alat uba neha, ‘Um git modeho,’ lahame ba vàlu gagom vabak. Lahana uho etei neha, ‘Fako ibida neàte,’ lahamnàme Fauhaedamda imboda nim uho moudaha bak. Labiha labe Alat ubu uho faina meedam bak lam ba ozahigeàmu um fa vei neàdedam vabak,” lahame ab gagu esuham.

Yohanes 10

1 Yesusat neo susume vi vameada. “Eho etei neha, ‘Alat ubu uho faina meedam bak lam Aho ozahigeàmu fa vei neàdedam vabak,’ lahame Eho lab gagoho bak lam abo imbote. Labi Eho etei neo uba vouhome vameadalo modem im imboda nidi nim laha iademe aima. Dat domba ut tàme ousdam bak laba olem di doo labet iademe olem vaba fa bàhàgo tot iube zidazi olemda lam mei na aa vamda am bak. Mei na tet si vietoi voutamda am bak. 2 Lahana doo labet iademe olemda lam am domba vou aasdamda naeda am am bak. 3 Labi ame domba ut tàme ousdam bak laba ame doo laba vou aasdamda labe gut aameam domba deda lehemu doo fi stoi olem bak. Labi domba deda labe oli am domba zi ee gagodam labe domba labe im aiam dae aime ledahemu am aiat ab vou futodamam bak. 4 Labi vou futodume neàdi domba deda nasi duzu ladam labe domba zi labe im aiam dae aime ozobohu labe am ohuse ba vi dozeadume vuladam bak. 5 Ba dat giida labe am ohuse vi dozeadume vuladam biem bak. Dat giida iba vou aasdam vab dàt modemu iba butemeam ba ame domba zi labe ame da labe am dae aim vabak. Gi ilime seddam bak. Ame da labe am dae im aime ozobohudehe vab labe gi ilime seddam bak,” lahame Yesusat ab vameaham. 6 Yesusat gi, “Amti fa meia vagedam dam lamti uloho kaio,” laham bak vahokelo Aho ahi gi domba ut tàme ousdam bak laba vàlu im totobe labihasu fi koadume modeha ame Farisi dam labe, “Akatihasu modemna gagoela?” laham bak lam ba vi ozome ozobohudehe vabak. 7 Làhàmu Yesusat fa neo vi vameada. “Eho amu dombat aime modem bak vameadaha bak lam imbota imbot. Lahana Eho etei uba gagolo modem im imboda nidi nim laha nasi aima. Ame domba ut tàme ousdam bak laba modesuhu Doo abo dombat oli futoiam Doo lam Em am bak. Abo olem bak gagu oluiamda naeda Em am bak. 8 Meit ame domba ut tàme ousdam bak laba modesuhu doo labet iademe olem bakti ulohona Eba tu vuzehi meedamda lam Alat soat vausu fa vei neàdemda am tame. Labi ame dombadeda labe am domba ame ut tàhà laba vou oli fa vou futoi sibe baa vou le sibe àdam bakti ulohona Eho ame dam laba vou aasdume modi fa ahe neàna bohu vuusda tame. Em lehe vab diat nasi lehe dam giida zi labe vedi neha, ‘Alat iba gagu uba oluha,’ lahame vagedume, ‘Meit aba aho Eba tu vuzehe bak lam fa vabalese,’ lahame meedaha dam ehe bak. Abo mei na aa vadam dam lamti mei nazoh tet si vietoi voutam dam lamti ulohona meedaha damat modem bak. Lahana domba Ebeda ame dam labe iho vameadaha dae lam ba aihi vabak. 10 Ame da mei na aa vamda labe ame domba ut tàme ousdam bak laba lem di gi neham bak ozome lehe bak. Gi mei domba aa ve voutame oteme àme setelo lehe bak. Lahana Ebe Eho lehe bak nim ba labihaha vabak. Em gi domba Ebeda fa Emti vahi gi ahe neàna bohu vuusdam bake abo ba na iho ozome vamna vabake ozome lehe bak. 11 Em abo Domba Vou Aasdamda Neàda Em am bak. Vem nohuda li, ‘Domba beose,’ laham di Em domba ahedem bake Ehemo uledi soat vausu ot vai elom neà bak. 12 Mei domba teohet vou aasdam bake doi vamda lam bisi domba iademe vou aasdam vabak. Neham labe labihaha bak. Domba lam am dombat modem vabak. Mei domba aho gi vou aasda. Labihàmu ame da labe aho aameam nohubake azihi vem meona ame domba beolo modemu aho gi iedi domba vou esmozi itam bak. Labi ame domba zi lam ame vem meona labe nohisi domba meida veeme àme domba totbaho ab fi goaitoi ilime seddamam bak. 13 Ame da lam gi aho doi vam bak laba deeli vou aasda. Ba domba laba faobekem vabak. Labihàmu ame vem meona lem di am ba domba faobekem vaba gi aalahigeàmu iedi itame setem dàt modem bak. 14 Lahana Em ba labiham vabak. Em abo Domba Vou Aasdamda Neàda Em am bak. Em Aiti ot ozobohudiaha bak lamti ulohona Emti domba Ebedati laha ot ozobohudiaha bak. Labi laha domba Ebeda ahedem bake Ehemo uledi soat vausu ot vai elom bak. 16 Em domba ut tàhà niba ba vi tau oumahedalo modemna zi amomoi ehete. Lada lam Eho laha le ateme fa vou li ut tàhà niba vahi oumaheda tame. Ame domba lam laha dae Ebeda aime ozobohudi fa amuda zi nimti vahi gi Ehemo zi vàmadi vou aasdalo modem bak. 17 Em ba fat ahedi usam bak laba ozome domba Ebeda ahedem bake Ehemo uledi soat vausu ot vai elom bak. Eho ahit lab uledi ot vai elolo modem bak lam Em Aiat Eba deelem bak. 18 Em Ehemo it ozome neàdi uledi gagom vabameam làhà ba meit Eba otem vabak. Gi Ehemo naedat it ozome uledi neàdi im dedateli gagom labe meit Em otem bak. Em Aiat Eba gagoho labe Eho im dedateli Ehemo uledi ot vai elom neàte. Labi laha im dedateli fat ahedi usam neàte. Labihadam bak.” 19 Lahame Yesusat lab vameadaha im bohu lam ame Yahudi damat aiha vabamu ihimo otesi otesidam labe ab fahedamam. 20 Dam dua totbaho labe nehame gagoda. “Mei ahu oli veimam setan lam ame Da labe Am ahu laba veimai ahusobuli ostam im debu vabna vameadam Dàt mode taia? Baka akati iho ame Da labe Am im iho neo vi aie?” lahame gagu mouda. 21 Lahana dam totbaho labe nehame gagoda. “Ame Da labe etei vameadume iho aihi im nim mei ahu oli veimam setan veimaha labe labihasu im vameadam biem bak. Ba akati setan oli veimahada labe dat fako na aam biemda modi fa neàdela? Labiham biem bak,” lahame ab gagodamam. 22 Labi ba digat meida labe neo Yahudi dam labe ibi iho ozome na àme iziam bak meida ab vou fuham. Ame na àme iziam di lam gi ame Fihasi Ala Bake Vou Baedam Num Vàmteabu Lam amu di iube meit modi vàhàdehemu Yahudi dam amuda labe iho ame num fa itatame gàhàdehe bak laba vi ozome na àme iziam di modem bak neo ab fuham. Labihàmu Yahudi dam bada labe kota Yerusalem laba na àme iziam bak lam neo ab meedamam. Di lam di nutabedehe di am. 23 Ame na àme iziam di labe am digat meida labe Yesusat ame Num Vàmteabu labe am bak tomba labe am baa tot Salomonam Num Tom Fihaba Alim Baa laba goda. 24 Laba godume modeha Yahudi damat Am alihi aahemu fa Aba netàdi dozeadume vi ailo ab gagodamam. “ ‘Om ana dàt modela?’ laham bak lam akati iba taho ahate gagom vaba im vabili ahu vi ozodam bohu meedàla? ‘Om Alat Gagu Fihasi Vimteme Oluhu Dat Boehàda ameo?’ laham bak imbomeam làhà taho ahate iba gagole.” 25 Lahahat Yesusat fa gago, “Ne, Eho amu uba gagohona um Em im tu vuzehem moudam damat mode taia? Lahana um ozom vaba? Em Aiat Eba gagu Eho fa im dedateli ame na damat ihimo modem biem im feàna zi nim Eho lab meedaha bak labet uba modi, ‘Em ana Dàt modela?’ laham bak ozobohudi fi gatemna am bak. 26 Lahana ame bak aahanàme um ba domba zi Ebeda modem vab labe uho ba neha, ‘Em abo Alat Gagu Fihasi Vimteme Oluhu Dat Boehàda Em am bak,’ lahame ba Eba tu vuzehem vabak. 27 Domba Ebeda dae Ebeda aim di ozobohu labe aime uledi ledam bak. Labi laha, ‘Domba adida Ebeda mode?’ laham bak lam Em naeda ozobohu bak. Labiham labe domba Ebeda Eho vameadam im aime vuzehi meedam bak. 28 Labi domba Ebeda Eho modi Em Aiti vahi gi ahe neàna bohu vuusdam bak. Labiha labe ba Alati vaitesu geàdam bohu vuusdam vabak. Ba domba Ebeda meit Em anekehà niba si vietom vabak. 29 Na ahebu vafozi bisi feàda Em Ai am bak. Labi laha domba Eba lohoda Am am bak. Ba domba Ebeda meit Em Aiam anekehà laba si vietom vabak. 30 Emti Em Aiti ozom di im gi vàmtea bak.” 31 Lahame Yesusat etei lab gagoho bak lam ame Yahudi dam labe aime faki neo, “Yesus otese,” lahame ke visomoame, “Beose,” lahame viisiha Yesusat neo vi gagoda, “Ne, Eho dam bake tau meedam im neàna lam Em Aiat Eba neha, ‘Meedale,’ lahame gagu Em im dedateli Eho na damat ihimo modem biem im feàna meedaha im zi lam um aahana taia? Eho lab meedaha im zi lam adida Eho modehe labe um faki Em otelo modela?” 33 Lahahat ame Yahudi dam labe fa gago, “Oho lab neà bak meedamna zi lam iho aame faki ke visomoame Om otelo modem vabak. Iho Om otelo modem bak gi neha: Om gi bakda labe vedi neha, ‘Emti Em Aiti ozom di im gi vàmtea bak,’ lahame gagoho bak lam Oho gi Ala bake feàtàhà bak. Om gi bakda akati, ‘Om Ala am tame,’ lahame gagodàla? Im Oho lab gagoho bak laba faki ke visomoame Om otelo modem bak.” 34 Lahahat Yesusat fa gago, “Alat Vameadaha Im Toedahana zi lam abo ubu uho vuusdam Alam im lam um laba aame vi ozodam vaba? Aham di iube Israel dam vuusdam dam ahamda busaoda zi lam abo Alat Am im gagu oluhu dam zi lam Aho im nehasu dam laba gagohona meit nehame toehe bak ehena taia? ‘Alat neha, “Um abo meit vuusualame vou baedam ala zi um am bak,” ’ laham im uho ab vuusdamam taia? 35 Alat Vameadaha Im Toedahana lam ba fa faamome veimdi fa im meidem biem bak lam im ahebu ozobohu bak. Gi labaha bohu vuusdamnat modem bak. ‘Um abo meit vuusualame vou baedam ala zi um am bak,’ lahame lab toehe bak lam imbodemeam làhà uho ozom, Em akatiha? ‘Em Alat mode,’ laham bak lam Em gagom biehe? Vabà! Gagom neà bak. Aiat neha, ‘Em Adat,’ lahame gagu fi hasi bak niba gagu oluhuda Em ame Da am bak. Labiha labe Eho amu neha, ‘Em Alam Adat am bak,’ lahame gagoho di lam akati modi uho vedi neha, ‘Eho Ala bake feàtàho,’ lahame vàlu gagohela? 37 Eho etei vameaha bak lam fa uba vouhodase. Neha: Eho Em Aiat meedam im lam Eho vi meedam vabameam làhà Eba a tu vuzehemule. 38 Lahana Eho ame im lam meedameam làhà gi Ebe Eho lab meedam bak labet uho aadaha labe, ‘Em Alam Adat am tame,’ lahame Eba tu vuzehele. Ebe Eho lab vameadaha im labet uho Eba tu vuzehem momeam làhà gi Ebe Eho lab meedam bak lam aame ozo, ‘Alat Eba gagu oluhu labe Eho ame baket meedaho,’ laham bak laba tu vuzehele. Uho labi modem labe Em Em Aiti ot vou ali ot vou aliame ahu vàmadi ulohodesu meedam bak lam um ab ozobohu aabodemam bak.” 39 Yesusat etei lab gagoho bak lam ame Yahudi damat aihemu neo faki, “Sise,” lahame vabeddume modeha Yesus neo itame sete. Ba sim vabak. 40 Labi itaha labe le Yordan Soabo dumam tot iuba fa ab bioham. Abo Yohanes Mei Vuu Valo Baptisleiamda labe aho amu dam valo baptisleidaha bak laba fa ab bioham. Biou laba teohe azi. 41 Laba le azi modeha dam dua bak Aba dihasi valada. Dihasi valada. Lahada. Damat nehi ot gagoidam labe valada. “Yohanes Mei Vuu Valo Baptisleiamda labe ba na damat ihimo modem biem im feàna damat fet aame ozobohudemna modehe vabak. Lahana Ame Da Yesus, ‘Akatihasu meedam dàt modela?’ laham im lam Yohanesat vameame esuhuna lam ahebu gi imbodem tadehe bak,” lahame ot gagoidam labe valada. 42 Labihadume modeha ame bak laba dam dua zoho labe, “Yesusat ame Alat Gagu Fihasi Vimteme Oluhu Dat Boehàda am tame,” lahame ab tu vuzehedaham.

Yohanes 11

1 Ame di lam dat ee gagom Lazarus lahamda labe aho num debu Betania laba gaili bisda. Labi am nà behàsu Martati Mariati laha ame bak laba vahi azi. Ame nam Maria lam ba im Boehàda Yesusam naba minyak ahana neàna noime afoezobe am ohuta bohu labe vi footolo modem nam am. Laham nam labe am dubu Martati im vahada Lazarus gaili bisdàmu vou aasda. 3 Làhàmu am nà behàsu labe iho da meida laba gagu Yesus bake ab oluham. “Ai Boehàda oa, Omti vou alemda Oho deelemda gaili bisdalo. Lele,” lahame ab gagu oluham. 4 Lahaha im lam Yesusat aihemu gago, “Lazarus lab gaili bisdam bak lam gi labihasu fà bisdase. Ba elom kaio. Am gaili bisdam bak lam Alat nehame ozome gaili bisdam bak. Alat Aho Lazarus bake ba modem im ehe labe ame bak labet modi Amti Em Am Adatti, ‘ “Bisi feàte,” laham bak lam damat fà ozobohudese,’ lahame ahit labihaha bak.” 5 Yesusat aho Martati Mariati Lazarusti deeli meedamnàme vedi, “Lazarus gaili bisdalo,” laham bak aihina taho laha vaba vedi Aba Aho azihi bak laba neo usi behàsde. 7 Labi usi behàsdi neàdehezobe Aho iba Aba vi tau meedam dam niba ab gagoham. “Imo Yudea bake laba fa lase.” 8 Lahame labi gagoha iho fa gago, “Ai Guru oa, Om ozom vaba? Om etei laba laha di ame Yahudi damat gi ke visomoame Om otelo modem bake akati kehàm vaba fa laba lalo modela?” 9 Lahahat Yesusat fa gago, “Digat vàmtea labe fauhaedam di dua belas jam ehete. Di lam ala fauhaedam labe damat godameam ba naba gitadi bitem vabak. 10 Lahana damat aibut godameam naba gitadi bitem di am. Fauhaedam bak vab labe labihaha bak.” 11 Lahame labi gagu neàdi neo vi gago, “Imti vou alemda Lazarus bitesu iddalo. Imo le Eho ukese.” 12 Lahahat Aba vi tau meedam dam nibe iho fa vi gago, “Ai Boehàda oa, am iddameam làhà gi fa neàdelo iddam bak. Gi labihasule.” 13 (Yesusat etei lab gagoho bak lam gi Lazarus eloho bak gagolo Aho ahit im totobet gagoho bak. Lahana Aba vi tau meedam dam labe vedi abo iddam bak gagoho tibame vabili labi vi gagoho bak.) 14 Ame dam labe vabilehemu Yesusat fa ahate ab gagoham. “Lazarus eloho. 15 Lahana Eho ame da laba ba modem im ehe labe uba modi uho Eba vi tu vuzehi dualem bake am elolo vabalehe di lam ame bak laba Em tau modehe vab labe Em gi deelehe bak. Neàde. Imo nasi Lazarus eloho bak laba ladase.” 16 Lahahat Tomas damat neha, “Tasbana,” lahame ee meida taluhuda labe aho fa im amti vahi Yesus bake vi tau meedam dam totbaho niba ab gagoham. “Lo, im Da laba tau vuladume le Amti vahi elodam neàte,” lahame gagu neàdi dam vahi Yudea bake ab laham. 17 Ame Betania gi kota Yerusalem laba netàdehe num debut moz. Gi kilometer làtela lamo. Kia vabak. Labihadam di lam Yahudi dam kota Yerusalem laba azihi dam dua totbaho labe li Martati Mariati im vahada Lazarus elohemu im ahu faidehe bak vabededa. Labihadume modeha Yesus Aba vi tau meedam damti lehe labe li num debu Betania netàdehe bak niba ab fuham. Fusi aiha, Lazarus gi digat meida iube eloi ke bumata esu abo usi ahialehena li ai. 20 Labi Yesus ledam bak lam Martat aihemu, “Yesus bake tàse,” lahame doait ab laham. Lahana Maria gi ahu faidi numa aida. 21 Labi Marta doait le tàhi ab gut gagoham. “Ai Boehàda oa, Om màt di iube iba taho lemta im vahada ba elom kaio. Oho modi fa neàdem bak lam em ozobohu bak. Oho etei nim Ala bake neha, ‘Eba na nim veiale. Eba na nim veiale,’ lahame gagomeam làhà Oho lab gagohona lam Alat ahebu aime uledi modem tadem bak.” 23 Lahahat Yesusat fa gago, “Um vahada fat ahedi usa tame.” 24 Lahahat Martat fa gago, “Lo, em ozobohu bak. Etei bak niba vou mode ladume ba Dam Bake Uloodume Vi Aime Ozobohudi Neàdi Fime Fahedam Digat labe dam ahebu elodaha bak labet Alat modi fa ahededume usnadam di lam em vahadati laha am eloho bak labet ba Alat modi fa ahedi usam bak lam em ozobohu bak.” 25 Lahahat Yesusat neo vi gago, “Dam Elodahada Lam Fa Modi Ahededume Usnadamda Em am bak. Meit Eba tu vuzehemeam làhà gi elohonàme Eho modi fa usai Alati vahi gi ahe neàna bohu vuusdam bak. Ba neo vi elodam vabak. Gi ahe neàna labaha bohu vuusdam bak. Marta, Eho etei lab gagoho bak lam om tu vuzeheo?” 27 Lahahat Martat fa gago, “Lo. Ai Boehàda, Oho lab gagoho bak lam em tu vuzeheho. Labi laha Alat aham di iube neha, ‘Eho Gagu Fihasi Vimteme Olulo Modem Dat Boehàda bak niba olu tame,’ lahame fet gagu vàmadi esuhuda Om ame Da am bak. Labi Om laha abo Alam Adat am bak.” 28 Lahame Marta labi gagu neàdi fa num bake le Maria bake aa gagu dam dua bak vaitesu vou li gago, “Im Guru bàhàgo bak laba doudalo. Oba, ‘Lele,’ lahaho.” 29 Lahame labi gagu modeha Mariat aihemu gi àvodehat usai Yesus bake ab laham. 30 Di lam Yesus gi num debu Betania bàhàgo bak laba abo Marta Aba doait tàhà bak laba vou faodam lahasu. Ba num debu bake fum kai. 31 Labihadam di labe Yahudi damat neha, “Maria bake vabededase,” lahame am num laba teohe li esdam dam labe vi aaha Mariat àvodehat usai num labe futoi ladam bak aahemu ab ozoham. “Am vahada koei ke bumata esuhu bak laba le mezeo mode taia?” lahame gagu usnadume ab vuladamam. 32 Labi Maria le Yesusat odosdam bak laba lafusi Yesus aahemu ahit Yesusat avaesdam laba ogomasu biti ab gagoham. “Ai Boehàda oa, Om màt di iube iba taho lemta im vahada Oho modi fa neàdem bak. Ba elom kaio,” lahame ab vameadaham. 33 Labi Mariat lab mebe vameadam bak lamti labi Yahudi dam aba tau vuladaha dam labe medaom bak lamti Yesusat aahemu ahu faidi feà bak fusi, “Dam nim akati modi, ‘Dam elohoda ba fat ahedi usam kaio,’ lahame tum vaba modela?” lahame vi ozodaha vabamu ab gagoham. 34 “Koei esuhu ke bumat akete?” Lahahat dam labe fa neha, “Ai, nasi iba tau le aale.” 35 Làhàmu ladam labe Yesus fa vi tau fa vaksa vevea lada. 36 Labi modeha ame Yahudi damat vi aame ab gagoham. “Nasi aama. Am abo Lazarus bake deelehe bak ba koena modem kaio.” 37 Lahana dam totbaho labe vedi neha, “Dat fako na aam biemda modi fa neàdehena ba akati koei nim amu gailehe di taho modi fa neàdehe vaba modela?” lahame ab gagoham. 38 Labi Yesus neo gi ahu faidi feà bak fuhuna ozahit ladume ame ke bumat laba lafu. Ame ke bumat lam damat koei esu neàdi am ahazo ke baana ve tusu baguamdi modesda. 39 Làhàmu Yesusat ab gagoham. “Ke bumat labe am ahazo baana osoktole.” Lahahat koei labe am nà Martat mali gago, “Ai Boehàda oa, Om ozom vaba? Im vahada koei amu gi esuhuna usi ahialehena koei ahana fem bak. A osoktomule.” 40 Lahahat Yesusat fa gago, “Eho amu oba gagohona taia? Meit Eba tu vuzehemeam làhà Eho ame da laba modi ozobohudi, ‘Ala abo feàte,’ laham bak fi gate tame.” 41 Lahame labi gagoha damat ame bak lam aihemu ame ke ahazo baana lam ab osoktoham. Labi osoktoi neàdi Yesusat Am ohu vousai asum ahoba iuba tom aasdume gago, “Ai oa, Eho Oba lab gagoho im lam Oho aihi bak lam abo neàte. 42 Eho Oba im gagom di Om gi aim tadem bak lam Em ozobohu bak. Lahana dam niba Eba tau dozeadaha dam zi nim, ‘Fà aime ozo, “Eba gagu oluhuda Om am tame,” laham bak ozobohudese,’ lahame Eho ahit labi ahate gagodam bak.” 43 Lahame labi tom gagu neàdi Yesusat dae buduana ab buteham. “Lazarus nasi futoi lele.” 44 Lahahat koei lam damat amu am anekehà ahimti am nao ahimti sue nasbe gia. Labi sue baana am dauha neo suusu baguamde. Lahadume amu lab giaha bak lahasuhuna fa usai futoi ab li duzuham. Làhàmu Yesusat ab gagoham. “Uho Lazarus fà lam neà bak ozome um nasi Lazarusam so laba giaha sue lam ahebu ziamome voedale.” Làhàmu ame baket ab modeham. 45 Labihadam labe Yahudi dam Maria bake li vabededam dam labe aaha Yesusat lab modehe bak aahemu dam dua bak totbaho labe Yesus bake ab tu vuzeheham. 46 Lahana ame Yahudi dam totbaho labe vedi Farisi dam bake le, “Yesus nehaho,” lahame ab fi deham. 47 Làhàmu ame Farisi dam labe ame bak lam aihemu fa Yahudi dam labe ibi iho Ala bake lomna ve vua vahudam toheda zi laba vuusu im vameame faheme modiam dam lamti vahi ozo, “Imo fa Yahudit Ibi Iho Modem Im Gagu Vàmadi Esum Dam Debu laba gagu fa vahe vahedume ame im lam vameadase,” lahame Yahudi dam eeda zi labe bakamta nusualadume meia uloome aime vameadam dam debu laba ab laham. Le lafusi vameada. “Ame Da lam na damat ihimo modem biem im feàna damat fet aame ozobohudemna zi duana meedam bak lam akati iho ame Da laba gagu malem vaba modela? 48 Iho gi labihasu aalahigeàmu nehasu modesdameam dam ahebu Aba aame ozo, ‘Ame Da lam Alat Gagu Fihasi Vimteme Oluhu Dat Boehàda am tame,’ lahame tu vuzehi meedam bak. Labihameam dam mei debu iba vuusdam boehàdatebo labe ozo, ‘Làhà, dam lam ibi iho vuusu meedam bak mu fa Da lada laba tu vuzehemo,’ lahame ozomsu im meo dam fa iba olu ame Fihasi Ala Bake Vou Baedam Num Vàmteabu ibi iho vuusdamna lamti im damti ame meo dam labet beodume vàhàdedume sedda moio?” 49 Lahame labi vameadam labe im dat meida abo Damat Ala Bake Lomna Ve Vua Vahudam Tohe Dam Zi Labe Bisi Boehàdatebo abo tahun etei gàhàda nibe damat gagu fa boehàdateboleheda Kayafas labe aho ab gagoham. “Um ahusobu damat mode? Uho lab gagoho bak lam um it ozodam vaba? 50 Im Yahudi dam ahebu bisi ahe neàdem bak gi neha taia? Im dam dua bak beoho vaba gi dat vàmtea ot vai eloi setem bak lam bisi neà bak lam um ozodam vaba?” 51 Kayafas lab gagoho bak lam ahamo ozobohudi gagoho vabak. Aho lab gagoho im lam ba ab imbodeham bak. Ame da labe ame tahun labe Damat Ala Bake Lomna Ve Vua Vahudam Tohe Dam Zi Labe Bisi Boehàdatebolehemu Alat ahit ame da labe am ahu laba, “Yahudi dam ahebu soat vausu fa vei neàdem bake Yesus ot vai elo tame,” laham im lam vizi ozobohudi aho vabi fet gagu esuhu bak. 52 Gi Yahudi dam lamota soat vausu fa vei neàdem bak lamota ozome gagoho vabak. Yahudi damat modem vab dam abo bak iuba azihi dam ahebu soat vausu fa vei neàdem bakti labihasu ozome gagoho bak. “Abo dam mei debuti dam mei debuti bak iuba fi goaitoho dam abo Aba tu vuzehemda ahebu Alat vamateme am dam debu vàmadese,” lahame labihalo modem bak. 53 Labihàmu ame digat labe faasi Yahudi dam busaoda eeda zi labe, “Yesus si otese,” lahame im aa odoadume ahu ab vàmadeham. 54 Làhàmu Yesusat Aba Aho meedam im lam damat Aba aam vabake Aho ahit Yahudi damat esuhu bak ahebu ahate gohatem bak ab mu vaitoham. Labi vaitoi kota Yerusalem vou esmozi bak aotba baa bohu dam vaba alim bak netàdehe num debu Efraim laba ab laham. Abo Aba vi tau meedam damti vahi laba ab le tau esdamam. 55 Ame di labe Yahudi dam labet ibi iho modi baleàhà bak abo na àme iziam bak abo Paskah neo ab vou fuseo vabaleham. Ame digat fuseo vabalehemu kota Yerusalem netàdehe num debu mei num debu meime azihi dam labe iho faidehe bak fa neàdelo ibi iho amu nasi valo it kikeme itatam bake kota Yerusalem laba valada. Ame na àme iziam bak abo Paskah lam vahi àm bake ozome valada. 56 Labi ame dam etei kota Yerusalem laba vahe vahedam dam labe, “Yesus akete?” lahame nabiha vabamo. Iho ame Fihasi Ala Bake Vou Baedam Num Vàmteabu labe am ad oli aam bak tomba laba dozeadaha di labe nehi ot gagoida. “Um akatihasu ozohela? Iho vahi na àme iziam bak nim Am ba lem vabao?” lahame ot gagoida. 57 Ame damat Ala bake lomna ve vua vahudam toheda zi laba vuusu im vameame faheme modiam dam lamti Farisi dam lamti amu dam bake nehi fet gagu esu. “Meit Yesusam alihi aameam làhà iba li gagole. Iho Da lam taho sim bak am tame,” lahame fet gagu esuhu bak ehet.

Yohanes 12

1 Labi ame na àme iziam bak abo Paskah lam vou fuhu vabna gi ba usi enamlem bak ehe lahasuhuna Yesusat nasi fa Betania laba la. Abo Lazarus am eloho bak labet Aho amu modi fa ahedi usahada labe aho azihi bak laba ab laham. 2 Labi le lafusi ame Betania esuhu dam labe Yesus ibi bake fa lehemu deeli na àmna ab modeme vahedamam. Martat na ohuda. Labi Lazarus fa Yesusti dam bak iube lehe damti vahi na àda. 3 Labi na àdam di labe Mariat aho narwastu omnao aaboda labe modehe minyak abo doi duana vahana ahana neàna vou li Yesusam naba laba veosi afoezobe am ohuta bohu labe fa footoda. Labi modeha ame minyak ahana labe feà bak fusi num lam ahana ab feedamam. 4 Labi modeha Aba vi tau meedamda meida Yudas Iskariot abo Yesus ba vou fohome dam bake ub lolo modemda labe ame bak aame faki ab gagoham. 5 “Oo, akati modi doi feàna vaha minyak ahana neàna lam gi vàhàdedàla? Gi fa meia ot loiame doi feàna abo dat vàmtea na meedume tahun vàmtea foli gohali vam doiti ulohona ve fa faheme dam na vab dam laba lodam vaba modela?” 6 (Lahana ame da Yudasat lab gagoho bak lam ba dam na vabdate faobekesi doi lolo gagoho vabak. Am gi mei nazoh aa vam dàt moz. Im Yesus bake vi tau meedam dam nibe iho na im meedam doi vuusdamda am. Labi ame da Yudas gi im doi na aho ozomna aa vame setemda modem bak.) 7 Lahame Yudas labi gagohemu Yesusat fa ab vi gagoham. “Gi labihasule. Maria bake a vabimule. Eho ozoha, Em ba elom diat koei noimna noime afoezobe ke bumata vou oli esum bakti uloho bak laba ozome Em naba niba ahit nasi fet veosi ahumdi esulo modem bak. 8 Um dam na vab dam gi labaha bohu tau esdam labe vi taui vi tauidam labe esdam bohu meedam bak ehe bak. Lahana Em etei nim ba uba tau azim bohu meedam vab Dàt modem bak. Mariat ahole modehe bak,” lahame ab gagoham. 9 Labihadam di labe Yahudi damat aiha, “Yesus Betania laba le aidalo,” lahaha bak aihemu, “Yesus aase,” lahame dam feàda zi labe Betania laba ab valadamam. Gi Yesusta aam bakta ozome valadam vabak. Lazarus am eloho bak labet Yesusat amu modi fa ahedi usahada lamti aalo ab valadamam. 10 Làhàmu ame damat Ala bake lomna ve vua vahudam toheda zi laba vuusu im vameame faheme modiam dam labe iho dam dua bak Lazarus bake valadam bak aahemu faki, “Lazarus laha otese,” lahame ab ozome esuham. 11 Neham labe labihaha bak. Yahudi dam dua totbaho labe Lazarus eloho bak labet Yesusat modi fa ahedi usaha bak aame ozobohudi fa ame toheda zi labe im boehàda zi laba tum mu vou esmozi fa Yesus bake tu vuzehi meedàmu, “Lazarus laha otese,” lahame ozome esuhu bak. 12 Labi izi dihasi dam dua bak amu ame na àme iziam bak abo Paskah lam tau àlo nasi kota Yerusalem niba vahi esdam dam labe aiha Yesus lelo meedam bak aihemu bom alahaso ab le fi kbodaham. Fikbodume neàdi, “Yesus abo feàte,” laham bak ozome vou baedalo kota vou esmozi bàhàgo obe iuba Yesus bake doait tàlo ab laham. Ladam labe ame bom alahaso lam vuusualame vou eeadam labe meit neha, “Hosana! Ala abo feàteee!” Lahame vou bae lada. Labi meit neha: “Dat abo Alat Aho Gagu Olu Ot Vai Im Dedateli iba etei ledamda nim abo feàteee!” Lahame vou bae lada. Labi meit neha: “Iba Israel dam vuusu im vahokedalo modem Boehàda abo feàteee!” Lahame neo gagu vou bae lada. Lahada. 14 Amu iub ledam di iube Yesus gi mei keledai fi ho adat gàhàda ve zisi nusu leda. Ame Yesusat etei lab meedam im lam Alat Vameadaha Im Toedahana laba meit fet toeme esuhu im nidi nim ab modi imbodeham. 15 “Dam num debu Sion laba azihi dam oa, nasi aamale! Uba vuusdam Boehàda labe etei uba ab ledamam tame. Lahana a iedemule. Gi umti vahem bak laba ozome deeli daleà ladehebeat keledai fi ho adat gàhàda laba nusu ledalo.” Lahame fet gagu esuhu bak lam ab modi imbodi meedamam. 16 Ame etei lab meedaha im lam Aba vi tau meedam dam nibe amu lab fet toeme esuhu im lam modi imbodehe bak lam vabile. Lahana ba Yesus damat oteme Am eloho bak labet Alat modi fa ahedi usai fa Am Ai bake asum ahoba iuba tom ilu Alat Am ee vousai feà Dateli neàdehezobe ba ab vi ozobohudeham. “Oo làhà! Alat Vameadaha Im Toedahana lam gi damat ba Yesus bake meedalo modem im ab modi imbodehame?” laham bak ba vi ozome ozobohudehe bak. 17 Dam dua bak etei Yesus bake doait tàlo modem bak lam debu gi nehaha bak. Lazarus eloi ke bumata esuhu di lam Yesusat buteme fa ahedi futoho bak lam Yahudi damat aame ozobohudehe labe fa iho aaha bak lam meia le fi de. Meia le fi de. Labihadam labe kota Yerusalem esdam dam dua bak na damat ihimo modem biem im feàna damat fet aame ozobohudemna modeheda Yesus ame Da amemu Aba doait tàlo ab ladaham bak. 19 Labihadume modeha Farisi dam labe dam etei Yesus bake buteme vou bae ladam bak lam aahemu ihimo ab ot gagoidamam. “Aiee! ‘Im dam Yesus bake tum bak malese,’ lahame modeha im gi nembedi ab mohameo? Um nasi ozodale. Bak niba esdam dam ahebu Aba tulo lab valadamam tame,” lahame àvodi ab ot gagoidamam. 20 Ame na àme iziam bak abo Paskah lam meedam di Yahudi dam dua bak labe neha, “Ala abo feàte,” lahame ahu adat iedi Ala bake vou baedalo modemu kota Yerusalem laba laha bak. Labi ame di labe Yunani dam totbaho laha tau laba laha bak. 21 Ame Yunani dam labe iho Yesus bake vi tau meedamda meida Filipus abo Galilea bak labe am num debu Betsaida labe leheda laba le ab gagoham. “Dat busao oa, im abo Yesus bake tàhi im vamealo àhàkeho.” 22 Lahame labi gagohemu Filipus neo Andreas bake le ame Yunani dam labe iho etei gagoho im lam fa vou le gago. Labi gagu neàdi ame dam ahim lam fa neo Yesus bake le ab gagoham. “Yunani dam Oba aalo nabidalo.” 23 Lahame labi gagoha Yesusat ame dam laba im ab faasi vameadamam. “Em kehàm vaba elo tame. Lahana Em Abo Asum Ahoba Iubet Bak Niba Li Dateleheda modem labe Em eloho bak labet Alat modi fa ahedi usai Em Ai bake asum ahoba iuba tom iluhemu Em feà datelehe bak lam Alat fa dam bakda modi ozobohudi fi gatelo modem bak ab vou fuham bak. 24 Im lada lam imbomu im imboda nidi nim laha nasi iademe aima. Ebe Eho ahe neàt aidam di gi gandum oo buàti uloho bak. Neha: Gandum oo buà bake dezi fa bak baulem vabameam gi aba esdam bak lahasuhu bak. Ba loube futoi oo valem vabak. Lahana bake dezi fa bak baulemta laha usime oo duana vaedam bak. Labi laha Eho elom vabameam làhà uba soat vausu um fa vei neàdemna ba na vabak. 25 Meit neha, ‘Em bak niba gi nehasu ahena bohu aidalo modem bak,’ lahame labihasu it ozome deeli meedamda lam ba diamut ahe neàna bohu vuusdam vabak. Gi lab eloho tadi setem bak. Lahana bak niba esdam di meit neha, ‘Em Yesus bake tu vuzehi im Abada meedam labe meit em otem neà bak,’ lahame labihasu ozodamda lam Alati vahi gi ahe neàna bohu vuusdamda am bak. 26 Meit neha, ‘Em abo Yesus bake tu vuzehi Aba vi tau meedam dateli im Abada modelo mozo,’ lahamda lam Eba nasi tu vuzehi im Ebe Eho gagomna lam meedale. Labiham labe Ebe Eho le azim bak laba ame da lamti ahili le azim bak. Labi im Ebeda meedamda lam laha Em Aiat am ee vousai vou baedam bak. 27 Lahana Em etei vi ozodaha vanamai Em ahu faidi admahi seteho. Em Ai bake akatihasu gagoela? ‘Eba ba modi geàdalo modemna lam fa faatoi vei setem neào?’ lahame gagoe? Vab. Em labiham bie. Ame bak lam gi Ebe Eho bak niba lehe bak am bak.” Lahame Aho labihasu gagu ozoha vabamu fa ab gagoham. 28 “Làhà Eho gi Ai bake nehalo. ‘Ai oa, Oho bisi feà bak lam damat biem bake Oho dam bake modi ozobohudi fi gatele.’ ” Lahame gi etei labi gagoha asum ahoba iube Alat Am im Yesus bake ab vameadaham. “Obo Oho bak niba na im meedam bak labet modi damat, ‘Em abo feàte,’ laham bak ab modi ozobohudi ab fi gateham bak. Labi laha Eho ba modem im modem labet modi dam bake neo ame baket modi ozobohudi fi gate tame,” lahame ab nom vameadaham. 29 Labi ame asum ahoba iube lab nom vameadaha im lam dam duada zi labe aime vedi neha, “Asumat giliha.” Lahana dam totbaho labe vedi neha, “Alat Am im gagu vou usemda labe Yesus bake im vameadàla?” lahame meit ibi iho ozoho bak gago. Meit ibi iho ozoho bak gago. Lahada. 30 Labi modeha Yesusat fa ame dam laba ab gagoham. “Uho etei lab aihi im lam bisi Eba ozome, ‘Em aise,’ lahame vameadaha vabak. Gi, ‘Alat Gagu Fihasi Vimteme Oluhu Dat Boehàda Em ame Da am tame,’ laham bak um ozobohudem bake ahit uba nom vameadaha bak. 31 Etei di nim Alat dam bakda labe ibi iho bak niba meedaha im, ‘Git modeheo? Neà bak modeheo?’ laham bak ozome ozobohudi neàdi gagolo modem di ab vou fuham bak. Labi laha dam bakda vuusdam boehàda Iblis lam gagu itame setem di ab vou fuham bak. 32 Lahana damat Eba modi bak nibet vousai tom modesu neàdehezobe Eho modi zie tombali dam debu ahebu Eba valadume tu vuzehi meeda tame,” lahame Yesusat ab vameadaham. 33 (Yesusat etei lab gagoho bak lam, “Damat Eba modi bak nibet vousai tom modesu neàdehezobe,” lahame lab gagoho bak lam Am gi, “Damat Am akatihasu otela?” laham bak laba ozome im totobet fi koadaha bak.) 34 Yesusat etei lab gagoho bak lam ame dam duada zi labe vi aime fa ab gagoham. “Oho etei lab vameadaha bak lam im ozom vabileho. Alat Vameadaha Im Toedahana zi lam meit aame iba gagodam di iho gi neham bak dogoit aidam bak. ‘Alat Gagu Fihasi Vimteme Olulo Modem Dat Boehàda lam gi labaha ahe neà bohu vuusdam Dàt modem bak,’ lahame labi vameadamna akati Oho neha, ‘Ame Asum Ahoba Iubet Bak Niba Li Dateleheda lam damat modi bak nibet vousai tom modesu elo tame,’ lahame labi gagodàla? Làhà im git ozohe? Iho vou faodamda Om ame Da modem vaba? Làhà Oho nasi Oho lab gagoho bak lam, ‘Asum Ahoba Iubet Bak Niba Li Dateleheda elo tame,’ lahaha bak lam, ‘Ame Da lam ana dàt mode?’ laham bak lam im biem bake Oho iba modi ozobohudi tombalele.” 35 Lahahat Yesusat gi Aba Aho ba meedalo modem im vi ozome im totobe nidi nim fa ab fi koadamam. “Uba Fauhaedamda nibe umti vahi niba esdam bak gi kehàm vaba setem bak. Labihàmu uba modi aibulem bak labna zohàme fauhaedam lahasuhu di nibe fauhaedam bak laba ladale. Meit aibu bake ladameam, ‘Am adi bake ladà?’ laham bak lam ba ozobohudem vabak. 36 Labihàmu uba modi Fauhaedamda nim umti vahi esdam lahasuhu di nibe nasi Aba tu vuzehele. Labiham labe Am itbaho fatoi Am damali Am im imbona lam fa ot vai meeda tame.” Lahame labihasu vameadume neàdi Yesusat ame dam lam vou esmozi gi ab itame seteham. Ba dam bake ahate gohatem vabak. 37 Yesusat aho na damat ihimo modem biem im feàna damat fet aame ozobohudemna zi duana lam Yahudi damat aasdahit meedahanàme ame dam lam ba Aba tu vuzehem vaba gi mu bohu vuusdam bak lahasda. 38 Ame dam labe iho lab mu bohu vuusdam bak lam gi dat ahamda Alat vameadaha im aime fa dam bake ahate vameaidahada Yesaya aho aham di iube nehame fet toeme esuhu im lam ab modi imbodeham. “Boehàda Ala oa, iho vou vameatedaha im lam iho ozoha, dam aime tu vuzeheheda mahate dua vabna ozomom bak. Om feà bak lam Oho dam bake modi ozobohudi fi gatehenàme iho vou li vameadaha im lam tu vuzehem mom bak lahasuho.” Lahame Yesayat lab fet toeme esuhu im lam ab modi imbodeham. 39 Ame Yahudi damat Yesus bake tu vuzehem vaba moudahemu fa ba ab tum bieham bak. Abo Yesayat aham di iube Alat gagoho im meida aho nehasu fet toeme esuhu bakti ulohote. 40 “Boehàda Alat nehaho. ‘Eho dam labe na aam bak labna zohàme Eho ahit modi ame dam labe na aam bileho. Labi dam labe im ahulat vi ozome ozobohudem bak labna zohàme Eho ahit modi im ahu tamzohobuleho. Labiham labe ame dam labe ba ibi iho faina meedam bak lam voedume seti fa vei neàdedam vab labe Eho ba ame dam laba soat vausu fa vei neàdedam kaio.’ ” Lahame Yesayat aham di iube labihasu fet toeme esuhu labe ame Yahudi damat fa Yesus bake ba tu vuzehem biehe bak am bak. 41 Ame da Yesaya lam Alat ahit modi Aho Gagu Fihasi Vimteme Olulo Modemda Boehàda labe ba feà Dateli meedam im lam nasi ozobohudi gi aham di iube ame im lam nasi fet toeme esuhu bak. 42 Ame Yahudi dam dua bak Yesus bake tu vuzehem vabnàme ame Yahudi dam busaoda eeda zi totbahota Aba tu vuzeheda ehe bak. Lahana ame dam labe ibi iho Yesus bake tu vuzehe bak lam Farisi dam labe aime ibi iho fi hasi bakamta vahi Alat vameadaha im ahamda dogoit aidam bakti im meiti meedam num lam mali gagu itam bak labna zohàme gi aa tu vuzehi meeda. 43 Neham labe labihaha bak. Ame dam labe iho aa tu vuzehi meedam di Alat iba deeli vou baedam bak ba ozome meedam vaba vedi, “Gi bak damat fà iba vou baedase,” lahame ibi iho Yesus bake lab tu vuzehe bak lam imbo vabna gi meeda. 44 Labi Yesus dam bake dae buduana ab buteme im ab vameadamam. “Meit Eba tu vuzehemeam làhà ba gi Emota tu vuzehem vabak. Abo Eba Gagu Oluhuda lamti tu vuzehem bak. 45 Labi laha ame da labe aho Eba fakot aam di gi Eba Gagu Oluhuda laba aadamna ààmom dàt modem bak. 46 Eho bak niba lehe bak nim gi dam bakda aibu bak laba azim dam laba, ‘Fà modi fauhaedase,’ laham bak ozome lehe bak. Meit Eba tu vuzehemda lam aibu bak laba azim lahasum vabake Eho ahit labihaha bak. 47 Meit Eho vameadam im aime tu vuzehi meedam vaba gi aalahigeàmomda laba Eho, ‘Beose,’ lahame ba na asimbuna feà aba modelo gagodam vabak. Neham bak. Eho dam bakda laba, ‘Beose,’ lahame na asimbuna feà dam laba modelo gagom bak laba ozome bak niba lehe vabak. Eho gi dam bakda ibi iho faina meedàmu Alat beom bak fa faamome soat vausu fa vei neàdedam bak laba ozome bak niba lehe bak. 48 Lahana damat Eho vameadaha im lam Emti mu aalahigeàmom dam lam ba beom bak ehe bak. Abo Alat ba diamut Dam Bake Uloodume Vi Aime Ozobohudi Neàdi Fime Fahedam Digat fum di beom di am bak. Ame dam labe Eho vameadaha im laba tu vuzehem vaba moudahemu Alat gi ame bak labet dam laba vàlu, ‘Beole,’ lahame vi ozome ozobohudi neàdi gagoda tame. 49 Neham labe labihaha bak. Eho bak niba li meedam di nim ba Ebe Eho ozoho bak labet ozome Ehemo im dedateli dam bake im vameadam vabak. Gi Eba gagu oluhuda Em Aiat Aho neha, ‘Dam bake im nehasu vameadale,’ lahame gagohemu Eho gi Aba Aho gagohoda lamota dam bake li vameadam bak. 50 Labi Em Aiat Eba neha, ‘Im nehasu dam bake vameadale,’ lahame Eba gagodaha im lam meit tu vuzehem labe Aho modi fa Amti vahi gi ahe neàna bohu vuusdam im am bak. Laham bak lam Em ozobohu bak. Labihàmu Eho dam bake im vameadam di Eho gi iademe Em Aiat amu Eba fet gagu esuhu im ahum lamota dam bake vameadam bak,” lahame Yesusat ab vameadaham.

Yohanes 13

1 Yahudi dam labet ibi iho modi baleàhà bak lam abo na àme iziam bak abo Paskah lam novalo modem di labe digat bisi tombuda dihasi àm bak ab fuseo meedamam. Labi ame aibu labe Yesusat Am bak nim vou esmozi fa Am Ai bake lam bak fuhu bak lam Am naedata ozobohu bak. Aho bak niba li tau aidam di Aba vi tau meedam dam ahebu Aho gi amu di iube faasi deelehe bohu vuusdam bak. Aho gi labihasu vou mode ledume Am bak nim fa vou esmom bak ab vou fuhamdaleàmu, “Aba Aho Am damalehe dam laba bisi lab deelehe bohu vuusdam bak lam Am dam labe fà ozobohudese,” lahame Aho ab vouhodalo modemam. 2 Aho Aba vi tau meedam dam dua belasti iho ame Paskah vi ozome àmna tombuda àlo modemu vahe vahedam di labe Iblisit gi amu di iube Simon Iskariotam adat Yudas bake am ahu laba neha, “Oho Yesus vou fohome meia ub lu otele,” lahame gagu esuhu bak. 3 Lahamnàme Yesusat Am Aiat Aba na im ahebu lu Aba modi im dedateli vuusu meedam bak lam Am naedata ozobohu bak. Labi Am Aiat Aba gagu asum ahoba iube bak niba oluhu bak lamti labi Am Ai bake fa lam bakti Am laha ozobohu bak. 4 Làhàmu, “Aba Aho Am damalehe dam laba bisi lab deelehe bohu vuusdam bak lam ame dam labe fà ozobohudese,” lahame Aho na àdam bak labe usai Am sue ahobada vihitoi esu afoezobe handuk visoi Am kemohode laba gimsu neàdi vao fedehena visoi fi lihiba laba veàtoi fa Aba vi tau meedam dam labe im naba laba vaot ab faasi kikedume afoezobe Aba it gimsuhu handuk labe eksobu bak ab footoidamam. Aho nehasu meeda. 6 Dat meida am naba kikeme neàdi fa handuk vi footoi esu. Dat meida am naba kikeme neàdi fa handuk vi footoi esu. Lahadume Simon Petrus bake vou fusi am naba kikesome modeha Petrusat ozo, “Em feà vab dàt akati Yesusat em naba kikelo mode?” lahame ozohemu Yesus bake ab gut gagoham. “Ai Boehàda oa, em naba Oho kikelo mode?” 7 Lahahat Yesusat fa gago, “Eho etei nib meedam bak nim om biem bak. Lahana faobe om ba ozobohude tame.” 8 Lahahat Petrusat fa ab gagoham. “Vabà! Om ba em naba a kikemule.” Lahahat Yesusat fa gago, “Eho oba vaot kikem vabameam Emti omti ahu vàmadi vou alem vabak.” 9 Lahame labi gagoha Simon Petrusat fa gago, “Labihameam làhà gi em nabata a kikemule. Em anekehàti em ohuti ahebu laha kikedale.” 10 Lahahat Yesusat ozo, “Am dam amu faina meedaha bak lam Eho modi fa faamome vei neàdedahamnàme fa neo ba faina vi modi vi modidàmu Eho neo vi faamome vei neàdedam bak laba ozome Eho gi nabata vaot kikedume vouhodase,” lahame ozome fa Petrus bake ab gagoham. “Meit gi etei sabunat ehume neàdeheda lam ba so gihobulem vabak. Ab boz neàdeham bak. Gi naba vekeheda lamota kikedam bak. Um dam totbaho ahebu Eho kikeme boz neàdehe bak. Lahana gi dat vàmtea vooho bak,” lahame ab gagoham. 11 Yesusat etei lab gagoho bak lam Aho gi Am vou fohome dam bake ub lu otelo modemda lam Am gi amu di iube fet ozobohudehe labe Aho neha, “Um dam totbaho ahebu Eho kikeme boz neàdehena gi dat vàmtea vooho bak,” lahame labi gagoho bak. 12 Labi Aho Aba vi tau meedam dam labe im naba vou kike ladume neàdi fa usai sue ahobada amu vihitohoda lam fa ab dusuham. Dusu neàdi Aba Aho na àdam bak laba fa ab le nusuham. Labi nusu gago, “Eho etei lab meedaha bak lam uho vi ozo, ‘Akatihasu modelo labihahela?’ laham bak lam um ozobohudeheo? 13 Neham bak. Uho Eba im gagom di, ‘Guru oa, Ai Boehàda oa,’ lahadam bak lam gi ahole gagodam bak. Em ame Da am bak. 14 Uba vuusdam boehàdati uba vahokedam guruti Em ame Da modehemu Eho ahit mei na teo meedamdati ulohonali um naba kikedaha bak. Labihàmu uho gi ame baket meedale. Um naba ot kikei ot kikeidale. 15 Eho etei uba lab meedaha bak lam, ‘Uho laha ame baket meedale,’ lahame uba ab vouhodaham bak. 16 Eho vouhohemu uho gi ame baket vi meedale. Labi laha Eho etei uba gagolo modem im imboda nidi nim laha nasi iademe aima. Mei na meedamda labe aho ba aba im gagu modiamda laba ba vafozi feà datelem vabak. Labi laha im ahum ve fa meia vameadamda lam ba im deda laba vafozi feà datelem vabak. 17 Eho etei uba lab vahokedaha bak lam um aime ozobohudehe labe uho vi meedameam làhà Alat fa uba im neà bak modi esuiam bak. 18 Eho amu neha, ‘Gi dat vàmtea vooho bak,’ lahame lab gagoho bak lam um ahebu vi ozome gagoho vabak. ‘Uho Eba tu vuzehi vi tau meedam damalele,’ lahame um fi me vaha di lam, ‘Um akatihasu meedam damat modela?’ laham bak lam Em gi amu nasi fet ozobohudehena um fi me vaha bak. Ebe Eho ba modem im lam meit Alat Vameadaha Im Toedahana laba nehasu toehena, ‘Imbodese,’ lahame Eho ahit um labihasu fi me vaha bak. Ame im neha: ‘Meit ahobat neàdi Eba tau roti àdamda lam Eba fa fakemoholemda am bak.’ Laham im lam imbodelo Eho ahit um fi me vaha bak. 19 Eho etei lab gagoho bak lam ame im meedaha vab di nibe uba nasi fet vameadam bak. Ame im lam ba modi imbodehezobe uho it ozo, ‘Em ame Da ame?’ laham bak laba tu vuzehem bake Eho ahit uba nasi fet vameadam bak. 20 Eho etei lab gagoho bak lam imbote. Em ame Da am bak. Lahana Eho etei uba gagolo modem im imboda nidi nim laha nasi iademe aimale. Ebe Eho im Ebeda gagu oluhuda lam meit ule neàt gut vameam làhà gi Eba laha ahu ule neàt ab vaham bak. Labi Eba ahu ule neàt vamda lam gi Emota ule neàt vaha vabak. Abo Eba Gagu Oluhuda lam abo Em Ai bake laha ahu ule neàt vaha bak,” 21 Lahame labi vameadume neàdi Yesusat ahu faidi feà bak fusi vi ozodaha vabamu ahate ab vi gagoham. “Im imboda nidi nim nasi iademe aima. Uho meidavat Em vou fohome meia ub lu ote tame.” 22 Yesusat etei lab gagoho bak lam Aba vi tau meedam dam labe iho aime àvodi, “Amat modem im gagohela,” lahame ihimo fako meot ot aai ot aaida. 23 Di lam Eho Yohanesat Aba vi tau meedamda meida abo Yesusat deeleheda nibe Am obe laba vi tau aida. 24 Làhàmu Simon Petrus labe eba neha, “ ‘Amat modela?’ laham bak lam oho Guru bake gagu aile,” lahame gi fakot im vameada. 25 Làhàmu eho Yesusam so laba nem ulasi netàdi aa gago, “Ai Boehàda, amat modela?” 26 Lahahat Yesusat fa eba neha, “Eho etei roti na vaksa niba nom ekeme lu àlo modemda nim ame da am tame,” lahame gagu roti aguti ame na vaksa laba nom ekeme afoezobe fa Simon Iskariotam adat Yudas bake ab loham. 27 Lu modeha Iblisit Yudasam ahu laba ab oli veimadamam. Labi modeha Yesusat Yudas bake ab gagoham. “Oho lab ozome modelo modem im taho modele.” 28 Lahame Aba Aho lab gagoho bak lam iho Aba tau na àdam dam totbaho nibe, “Yesus akatihasu ozome Yudas bake labi gagohela?” laham bak vabili vi ozoda. 29 Im doi Yudasat vuusdam dàt modem labe dam totbaho labe vedi nehi ozo, “Làhà im Paskah labe na àm tombuda àm bake na le doit vam bak gagodà tiba. Laham vabameam ame doi vou le na vame fa dam na vab dam laba lodalo gagodà tiba,” lahame vabili vi ozoda. 30 Labi Yudasat ame roti ve àme neàdi modeha ab futoi laham. Gi aibut ab futoi laham. 31 Labi Yudas futoi le seti neàdi Yesusat Am ba eloho bak labet Alat modi fa ahedi usahazobe Aba neo modi tom vousai fa feà datelelo modem bak laba ozome Aba vi tau meedam dam niba im neo vi susulo vameada. “Etei nibe Em Abo Asum Ahoba Iubet Bak Niba Li Dateleheda nim damat Eba, ‘Em abo feàte,’ lahame vou baedam bak lam Alat modi ab faaseo meedamam bak. Labi laha Eba modelo modem im nibet modi damat Em Ai Ala bake laha neo, ‘Am abo feàte,’ lahame vou baedam bak laha ab faaseo meedamam bak. 32 Labi Eho vou mode lehe im nibet modi damat Em Ai bake, ‘Am abo feàte,’ lahame vou baedameam làhà Em Aiat Eba Am Adate etei modelo modem im labet neo modi damat neha, ‘Em abo feàte,’ lahame Eba fa neo vou baeda tame. Ame bak lam ba kehàlo modem vabak. Abo taho modelo modem bak. 33 Em damalehe dam oa, Em umti vahi esdam bak nim ba bohulalem kaio. Em gi ab setelo modemam bak. Labi uho gi fa Eba vi nabidam bak. Lahana Eho amu Yahudi dam busaoda eeda zi laba neha, ‘Ebe Eho le azilo modem bak laba um tau vulam biem bak,’ lahame lab gagoho bak lam Eho neo gi ame baket uba neo vi gagu esulo modem bak. Um laha etei Eba tau vulam vabiem bak. 34 Labihàmu Eho im gàhàda, ‘Nehame modele,’ lahame uba ab vameame esulo modemam bak. Neha: Uhumo nasi meia ot deeli ot deelidale. Abo Ebe Eho uba deelehe bak lamti ulohona uho neo uhumo ot deeli ot deelidale. 35 Uhumo ot deeli ot deeliame meedameam làhà dam bakda ahebu aame ozo, ‘Dam lam abo Yesus bake bisi vi tau meedam dam ame?’ laham bak aame ozobohudem bak am tame,” lahame Yesusat ab vameadaham. 36 Ame di labe Yesusat neha, “Em umti vahi esdam bak nim ba bohulalem kaio. Em gi ab setelo modemam bak,” lahame lab gagoho bak lam Simon Petrusat aiha vabamu fa ab vi gagoham. “Ai Boehàda oa, Om ake lalo mode?” Lahahat Yesusat fa gago, “Ebe Eho etei lalo modem bak nim om Eba etei vi tau vulam vabiem bak. Lahana ba diamut Eba vi vulem bakti gagom kaio.” 37 Lahame labi gagoha Petrusat neo ab vi gagoham. “Ai Boehàda oa, akati modi eho etei nim Oba vi tau vulam biehela? Em Oba tu vuzehi vi tau meedàmu damat em otem ule bak.” 38 Lahahat Yesusat fa neo gago, “Oo làhà! Om Eba tu vuzehi vi tau meedàmu damat om otem om ule? Om abo imbona gagohe? Eho ozoha, ame bak lam om ozome neàdem kaio. Om ba labiham vabak. Nasi aima. Em abo imbo bak oba gagolo mozo. Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi veibam bak làtelademeam kuk ab aaumam tame,” lahame ab fet gagu esuham.

Yohanes 14

1 Labi Yesus neo Aba vi tau meedam dam laba neo nehame vi vameada. “Um bisi a ahu faidi vi ozodamule. Uho Ala bake tu vuzehem labe laha Eba laha tu vuzehele. 2 Em Aiam num lam abo damat azim nuzuba duate. Em etei Em Aiam num laba nasi le nuzuba ubu uho ba azilo modemda lam Eho le modeme ahumdi vahedalo mozo. Ame bak lam imbodem vabameam Em ba uba ame bak lam gagom vabak. Abo imbodelo modem labe uba vameadam bak. 3 Labi Eho laba le uho azilo modem bak lam Eho modeme ahumdi neàdi Em fa li um ateme fa vou le laba oumahedalo modem bak. Em umti vahi azim bake labihalo modem bak. 4 Ebe Eho azilo modem bak lamti labi, ‘Akatihasu modem labet laba là?’ laham bak lamti um ozobohu bak.” 5 Lahame labi gagoha Tomasat fa ab vi gagoham. “Ai Boehàda oa, Oho etei lalo modem bak lam im biem bak. Oho lalo modem bak lam, ‘Akatihasu làla?’ laham bak lam im ba akati ozobohude?” 6 Lahahat Yesusat fa gago, “Iho bakdati Alati ahu vàmadi vou alem bak lam, ‘Akatihasu modem labe ame baket mode?’ laham bak lam meia modi ozobohudi fi gatemda Em ame Da am bak. Labi, ‘Ala akatihasu meedam Alat modela?’ laham im imbona lam im dedateli meia modi ozobohudi fi gatemda Em laha ame Da am bak. Labi meia modi Alati vahi gi ahe neàna bohu vuusdamda Em laha ame Da am bak. Meit Em Ai Alati vahi ahu vàmadi vou alem bak lam gi Eba tu vuzehem labe labiham bak. Ba meit Eba tu vuzehem vaba alia modem vabak. 7 Um Em ozobohu aabodemeam làhà um laha Em Ai Ala laha ozobohu aabodem bak. Lahana Eho ozoha, um Em alihi aahemu etei aibu nibe faasi Eba modelo modem im meedam labe um Em Ai Alam alihi aame ozobohudehena ozomom bak.” 8 Lahahat Filipusat vabili neo vi gago, “Ai Boehàda oa, Om Ai, ‘Neam tame,’ laham bak lam iba gagu im aame ahu asimdi neàdese.” 9 Lahahat Yesusat fa gago, “Filipus, Eho umti vahi vou godamehamdehena, ‘Em ana dàt mode?’ laham bak lam om akati Em vabiem lahasu mode? Meit Em alihi aadameam làhà gi Em Ai Alati aadahana ozomom bak. Labiha labe ba akati oho neha, ‘Im Om Ai alihi aase,’ lahame labi gagohela? 10 Em Em Aiti ot vou ali ot vou aliame ahu vàmadi meedam bak nim om tu vuzehehe vaba? Ebe Eho uba vameadam im nim ba Ehemo ozome im dedateli uba vameadam vabak. Gi Em Aiat Eba gagu Eho im dedateli fa uba vameadam bak. Labi laha Eho na damat ihimo modem biem im feàna zi lam meedam bak lam ba Ehemo im dedateli meedam vabak. Gi Em Aiat Eba vou ali ahu vàmadi meedam labe Aho eba modi vizehemu Eho ot vai im Abada ulohodesu meedam bak. 11 Eho neha, ‘Em Em Aiti ot vou ali ot vou aliame ahu vàmadi meedam bak,’ lahame Ebe Eho lab gagoho bak lam uho tu vuzehele. Laham vabameam Ebe Eho lab vameadaha im labet uho Eba tu vuzehem momeam làhà gi na damat ihimo modem biem im feàna Eho lab meedaha bak lam uho aadaha labe ozo, ‘Alat Eba gagu oluhu labe Eho ame baket meedà?’ laham bak laba tu vuzehele. 12 Eho etei lab gagoho bak lam imbote. Gi ame bak lam aadam labe Eba tu vuzehele. Labi im imboda nidi nim laha iademe aima. Meit Eba tu vuzehemeam làhà ame da labe aho gi Ebe Eho lab meedam bak lamti ulohona ab meedamam tame. Lahana gi im lamota meedam vabak. Eho Em Ai bake fa le Aiam Aha Nutabe Neàna ame da laba it olu vizi teudelo modemu ame da labe gi Ebe Eho meedaha bak lam vafozi aba aho meedam bak lam fa fetehesu im feàna vi meeda tame. 13 Labi uho Eba na im uho ozohona gagom di uho Eba tu vuzehi vou ali ahu vàmadi meedàmu Eho ame bak mode tame. ‘Em Ai abo feàte,’ laham bak lam damat biem bake modi fa tombali damat ozobohudem bake Eho Am Adat nibet labihada tame. 14 Abo uho Eba na im uho ozohona ahebu gagom di uho Eba tu vuzehi vou ali ahu vàmadi meedàmu Eho ame bak mode tame,” lahame ab vameadaham. 15 Labi im lada lam vameadume neàdi Yesusat Aba vi tau meedam dam laba neo nehame vi vameada. “Meit Eba deeli meedameam làhà ame da labe gi Ebe Eho aba neha, ‘Im nehasu meedale,’ lahame Eho gagu esuhu im zi ahebu lam ame da labe laha meedam tadem bak. 16 Labiham labe Eho Em Ai bake gagu Aho fa Eba ot vai Uba Taumda amomoi abo uba tau abehamdemda uba nom olu tame. 17 Eho etei neha, ‘Uba Taumda ehete,’ lahame gagoho bak lam gi Alam Aha Nutabe Neànat uba tau abehamdem bak uba gagoho bak. Ame Da lam, ‘Ala akatihasu meedam Alat modela?’ laham im imbona lam meia modi ozobohudi fi gatemda Am am bak. Damat Eba tu vuzehehe vab dam labe ba Uba Taumda laba deeli tu vuzehem vabiem bak. Neham labe labihaha bak. Ame dam labe, ‘Ame Da lam akatihasu meedam Dàt modela?’ laham bak lam vi ozome ozobohudehe vab labe ba Aba deeli tu vuzehem vabiem bak. Lahana ame Da labe Aho uba vou ali ahu vàmadi meedam labe umota Am ozobohu bak. Labi laha Aho ba uba modi um ahu ad laba vizi gi labaha bohu vou modesdalo modem bak. Ba um vou esmom vabak. 18 Em ba um dumdamali vou esmolo modem vabak. Em fa neo uba lem bak. 19 Kehàm vaba dam bakda Eba tu vuzehem vab dam labe Em alihi ba aam kaio. Lahana umota Em alihi ba vi aam bak. Labi Em eloho bak labet Alat modi fa ahedi usahemu um laha gi ba ame baket ulohona neo meedam bak. 20 Uho Em alihi vi aame novalo modem digat labe uho im nehasu ozobohudi fi gatem digat am bak. Eho Em Ai bake vou ali ahu vàmadi meedam bak ame. Labi uho Emti ot vou ali ot vou aliame ahu vàmadi meedam bak ame. Lahame uho labihasu um ba fi gatei ozobohude tame. 21 Ebe Eho, ‘Im nehasu meedale,’ lahame gagu esuhu im zi lam meit aime ule neàt vuzehi meedam dam lam Eba deelem dam am bak. Labi Eba deelem dam lam Em Em Aiti fa neo ame dam laba deelem bak. Labi, ‘Em ana Dàt modela?’ laham bak lam Eho ame dam lam laha modi ozobohudi dam lam fi gate tame.” 22 Lahame labi gagoha Yudasam ee fatahivahada Yudas meida labe aho Yesus bake neo ab vi ailo gagoham. “Ai Boehàda oa, ‘Om Alat Gagu Fihasi Vimteme Oluhu Dat Boehàda Om am tame,’ laham bak lam Om akatihasu dam bakda totbaho bake modi ozobohudi fi gatelo modem vaba gi imota modi ozobohudi fi gatelo mode?” 23 Lahame labi gagoha Yesusat fa gago, “Meit Eba deeli meedameam làhà ame da labe ba Ebe Eho vahokedam im lam voom vaba abo aime tu vuzehi meedam bak. Labihadam dam lam Em Aiat deelem dam am bak. Dam labihasu meedam dam lam Em Em Aiti fa ame dam laba vahi vou ali ahu vàmadi abehamde tame. 24 Meit Eba deeli meedam vabameam làhà ame da labe ba Ebe Eho vahokedam im lam ba tu vuzehi meedam vabak. Gi voedam bak tadem bak. Uho mahate vi ozodale. Eho uba vahokedam im nim ba gi Ehemo ozome uba vahokedam imot modem vabak. Abo gi Em Aiat Eba gagu oluhuda labe Aho Am im Eba gagu Eho ot vai uba fa vahokedam bak. 25 Eho etei uba lab vameadaha im zi lam Em uba tau azihi lahasuhu di nibe Eho ahit uba vameadam bak. 26 Lahana ba Em Aiat Eba ot vai Uba Taumda abo Am Aha Nutabe Neàna lam uba olu tame. Uba Taumda labe lehezobe Ebe Eho amu uba lab vameadaha im lam ahebu Aho fa uba modi uho fa vi ozobohudeda tame. Labi laha, ‘Ala akatihasu meedam Alat modela?’ laham im imbona lam Eho uba lab vahokedahana uho ozobohudem biem zoho ahebu lam Aho uba