1:1 Aipu sarambakaina, sawatipu kandazi dunia, Nggahi Ra Eli wa'ura wara. Nggahi Ra Eli wara malavo Ruma Hatalla ro Nggahi Ra Eli sama lavo Ruma Hatalla 2 Ra'aipu saramba wa'una Sia wara sama-sama lavo Ruma Hatalla. 3 Sara'ana rakandazi kai ncai Sia, ro razi sara'ana ma wara, wati kone savua rau rakandazi watisi vara Sia. 4 Nggahi Ra Eli ede fu'u mori, ro mori mambei taroa zi ru'u va manusia. 5 Taroa ede nakataroaku zi rindikaina, ro rindi ede wati wa'una hade taroa ede. 6 Maira dou ranggadu va Ruma Hatalla, la Yahya ngarana. 7 Sia mai ngoa ra kahabana mavoha taroa ede, loakuzu imbi va sara'ana dou. 8 Ndai sia laina taroa ede, sia zi makaronggampa. 9 Taroa masapodakaina ma kataroa samenana manusia, maina zi dunia. 10 Nggahi Ra Eli Ruma wara zi dunia, dunia rakandazi kai ncai Sia, pala dunia wati patana Sia. 11 Sia maina zi dana ra rasa ndai-Na pala bangsa-Na wati tarimana Sia. 12 Pala wara rau dou ma tarima Sia ro imbi zi Sia; siazoho mbei-Na hak mandazi ana Ruma Hatalla, 13 ranggana laina razi manusia, vara mori mavou ede ramaina razi Ruma Hatalla. 14 Nggahi Ra Eli wa'ura ndazi manusia, Sia ngge'ena zi woha ndaita, ro ndai wa'ura edata zese ra ntasa-Na. Zese ra ntasa ede weha ao va Sia kai Ana makese weki va Ama. Kai ncai Sia ndaita loa eda Ruma Hatalla ro meci ra ca'u-Na zi ndai. 15 La Yahya mai zimandazi sakasi-Na, sia ngoa ra kahabana: "Akeku Sia ranggahi va nahu: Sia zimamai kento ntewi kaisi nahu, pala nancewi na'e ntewi kaisi nahu, vara sawatipu wara nahu, Sia wa'ura wara." 16 Sia vini va meci ra ca'u; wati zimacumpu, Sia mambei bareka ndaita. 17 Hukum Ruma tarima va ndai kai ncai la Musa. Pala anugera ro lampa rawi mapoda rakatada kai ncai Ruma Isa Al Masih. 18 Wati wara ma parana eda Ruma Hatalla, selasi Ana makese weki va Ama, ma sama lavo Ama ro rapu poda lavo Sia. Sia edeku ma katadana Ama zi ndaita. 19 Dou-dou mana'ekai Yahudi zi Yerusalem kauna imam-imam ro dou-dou Lewi lao aka la Yahya ro sozi zi sia, "Nggomi ake cou?" 20 La Yahya nggahi ntirina, "Nahu laina Sangaji Mambei salama." 21 "Nggara ndedesi, nggomi ake couku?" sozi va siazoho. "Savua nggomi ake la Elia?" "Laina," cambe va la Yahya. "Savua nggomi ake Nabi rasake ede?" sozi va siazoho wali. "Laina," cambena. 22 "Nggara ndedesi, ngoapu zi nami cou nggomi ake," nggahi siazoho, "loakuzu cambe va nami zi dou-dou ma rakau nami. Auku nggahi va nggomi mavoha weki ndaimu?" 23 Cambe va la Yahya, "Nahura sia ranggahi va Nabi Yesaya: 'Dou ma nggahi nggao zi so sarae: Kapiripu ncai zi ru'u va Ruma.' " 24 Dou-dou rakakai va dou Farisi 25 masozi, "Nggara laina nggomi Sangaji Mambei salama, laina la Elia, lai rauna Nabi rasake ede, vavau nggomi kandeu karasokaimu dou?" 26 Cambe va la Yahya, "Nahu makandeu karaso dou kai oi. Pala zi woha nggomizoho wara dou ma wati pata va nggomizoho. 27 Sia mai kento ntewi kaisi nahu, pala kone zimasalo'a ai sapatu-Na nahu wati patuna." 28 Sara'ana ede ndazikaina zi Betania, tawela ele va Sori Yordan hizi la Yahya kandeu karasokaina dou. 29 Vala aisanai, la Yahya edana Ruma Isa mai rakana sia. Edempara nggahi la Yahya, "Tatiopu, Akaku Ana Jimba Ruma Hatalla ma kamborana dosa dunia. 30 Sia edeku ranggahi va nahu zimamai kento ntewi kaisi lavo nahu, pala nancewi na'e ntewi kaisi lavo nahu, vara sawatipu wara nahu, Sia wa'ura wara. 31 Sawatipu ede, nahu wati vadeku cou Sia ede. Sapodakaina nahu mai kandeu karasoku dou kai oi loakuzu bangsa Israel patana Sia." 32 La Yahya nuntu ra nggahi rauna ake, "Nahu edaku Roh Allah londona vune nasi dara ma ramai razi langi edempara midina ese wawo Sia. 33 Wakatu ede nahu watipu vadeku cou Sia. Pala Ruma Hatalla ma kauna nahu kandeu karaso kai oi wa'ura nggahina zi nahu, 'Ma'edasi va nggomi Roh Allah malondo, edempara midina ese wawo savua dou, Sia edeku ma zimakandeu karaso kai Roh Allah.' 34 Nahu wa'ura eda madaku Sia," nggahi la Yahya, "ro nahu manuntu ra nggahi va one Siara Ana Ruma Hatalla." 35 Vala aisanai la Yahya wara zi hizi ede wali lavo zua dou anamorina. 36 Wakatu eda va sia Ruma Isa lampa saina ta ede, nggahi sia, "Tatiopu! Akaku Ana Jimba Ruma Hatalla." 37 Zua dou anamori la Yahya maringa nggahi ra eli ede, edempara lao vatuna Ruma Isa. 38 Ruma Isa tambari-Na, ro edana siazoho mawunga lampa vatu Sia. Sozi va Sia, "Au ngupamu nggomizoho?" Cambe va siazoho, "Rabi, taveku Rabi ngge'ekaita?" ('Rabi' aona Guru.) 39 "Mai tiopu va ndaimu," nggahi Ruma Isa. Siazoho lao samana lavo Sia ro edana tavera ngge'ekai Sia. Wakatu ede voe upa aimambia. Ainaina ede siazoho ngge'e lavo Sia. 40 Savua dou zi ade zua dou ede ma wa'ura ringa au ranggahi va la Yahya ro sawa'u va ede lao vatuna Ruma Isa, edezu la Andreas, ari la Simon Petrus. 41 Lao roci la Andreas ngupana la Simon, arina ede, ro nggahina zi sia, "Nami wa'ura eda angimu lavo Mesias!" (Mesias sama lavo Al Masih, edezu: Sangaji Mambei salama.) 42 La Andreas lao otona la Simon zi Ruma Isa. Ruma Isa tio kavaena la Simon, edempara nggahina, "Nggomi Simon, ana la Yona. Nggomi zi pehekai la Kefas." (Kefas sama lavo Petrus, aona: doro wadu.) 43 Vala aisanaina Ruma Isa nane'e lao aka Galilea. Sia eda angi lavona la Filipus, ro nggahi-Na zi sia, "Mai vatupu Nahu!" 44 La Filipus ma ramai razi Betsaida, edezu hizi ngge'ekai la Andreas ro la Petrus. 45 Filipus eda angi lavo la Natanael ro nggahina zi sia, "Nami wa'ura rakamu eda dou rapehe va la Musa zi ade Buku Hukum Allah, ro rangoa ra kahaba va nabi-nabi. Sia edezu Ruma Isa razi Nazaret, ana la Yusuf." 46 Pala cambe va la Natanael, "Savua nawara ma taho ma ramai razi Nazaret?" "Mai tiopu va ndaimu," cambe va la Filipus. 47 Ruma Isa edana Natanael mamai, edempara nggahina mavoha sia, "Tiopu, akaku dou Israel masapodakaina. Wati wara mapalasu zi sia." 48 "Buneku loa pata va Ita mada?" sozi va la Natanael zi Ruma Isa. Cambe va Ruma Isa, "Sawatipu ou va la Filipus nggomi, Nahu wa'ura edaku nggomi awa wombo fu'u ara aka." 49 "Pa Guru," nggahi la Natanael, "Ita edezu Ana Ruma Hatalla! Itaku Sangaji bangsa Israel!" 50 Nggahi Ruma Isa, "Nggomi imbimu, va nggahi Nahu zi nggomi vara Nahu wa'ura edaku nggomi ziwombo fu'u haju ara? Lampa rawi-lampa rawi ma ipi ncewi na'e ntewi kaisi lavo ede zi eda va nggomi!" 51 Nggahi wali Ruma Isa, "Poda, imbipu, nggomi zima'eda langi mahengga weki, ro mala'eka-mala'eka Ruma Hatalla mane'e londo zi Ana Manusia."

2:1 Zua nai sawa'u va ede wara ndiha nika aka kota Kana zi Galilea, ro ina Ruma Isa wara ta aka. 2 Ruma Isa lavo anamorizoho-Na ra'unda rau zi ndihakai ede. 3 Wakatu cumpura oi anggo, nggahi ina-Na zi Ruma Isa, "Siazoho wa'ura cumpu anggona." 4 Cambe va Ruma Isa, "Ina, ai to'ina kaumu Mada. Watipu raka wakatuna Mada katada-Ku weki." 5 Pala ina Ruma Isa manggahi zi dou-dou mataki kavua ngaha ra nono, "Karawipu au ranggahi-Na zi nggomizoho." 6 Ta ede wara ini mbua muja rasadia zi ru'u karasokai sarumbu vatu ranginakai Yahudi. Sanikina muja ede isina kira-kira saratu lite. 7 Nggahi Ruma Isa zi dou-dou mataki kavua ngaha ra nono ede, "Isipu muja-muja ede kai oi." Siazoho isi kavinina oi zi muja-muja ede. 8 Edempara nggahi Ruma Isa zi siazoho, "Ake wehapu sato'i ade oi ede ro lao wa'apu zi dou mana'ekai ndiha." Siazoho wa'ana oi ede zi dou mana'ekaina ndiha, 9 ro sia tavaina oi ma wa'ura rungka ndazi anggo. (Sia wati vadena ratavena anggo ede, selasi dou-dou mataki kavua ngaha ra nono ma lua oi edempa ma vade.) Ndazi dou mana'ekai ndiha ede lao zenina zi vunti mone, 10 edempara nggahina zi sia, "Ranginakai va dou nasadia uluku anggo ma ipi caru ro dou ra'unda namanta adena nono, ampo kalosa anggo ma biasa. Pala nggomi mawi'iku anggo ma ipi caru sa'ake!" 11 Edeku rawi mavisa ra guna ma saramba-rambakaina rakarawi va Ruma Isa. Sia karawina ede aka Kana zi Galilea. Kai tanda ede Sia natei katadaku zese ra ntasa-Na. Ndazi anamorizoho-Na imbi zi Sia. 12 Sawa'u va ede Ruma Isa laona aka Kapernaum sama-sama lavo ina-Na, arizoho-Na ro anamorizoho-Na. Siazoho ngge'e ta aka sampe pila-pila nai ntoina. 13 Wakatu Aruraja Paskah Yahudi wa'ura zeni, Ruma Isa lao aka Yerusalem. 14 Zi Bait Allah zi Yerusalem Sia rakana eda dou-dou malanda capi, jimba, ro nasi dara; ro dou-dou macepe piti madoho ta ede. 15 Ruma Isa ndawina cambo kai ai edempara vaka kalosa sara'ana binata ede, nataho jimba ro capi razi ade Bait Allah. Meja-meja dou macepe piti ponga va Sia ndazina piti siazoho mbari mbura rero. 16 Edempara nggahi Sia zi dou malanda nasi dara, "Hanta peso sara'apu. Aina kandazimu Uma Ama Nahu hizi landa ra lajokai!" 17 Ndazi kawara va anamorizoho-Na zi ade ayat Alkitab ake, "Meci ra ca'u va Mada zi Uma-Mu, Ruma Hatalla, maka'a ade-Ku." 18 Dou-dou mana'ekai Yahudi madaca'u Ruma Isa, nggahi siazoho zi Sia, "Coba ndawipu karawi mavisa ra guna zi katandakai ru'u nami va one Nggomi mantau hak karawi vune ake." 19 Cambe va Ruma Isa, "Zumbapu Uma ake, ro ade wakatu tolu nai Nahu zimatu'u mbalina." 20 Edempara nggahi siazoho, "Upampuru ini mba'a ntoina zi katu'u kai Bait Allah ake. Ro Nggomi mane'e tu'u mbalina ade wakatu tolu nai?" 21 Pala Bait Allah ma aona nggahi va Ruma Isa edezu sarumbu ndai-Na. 22 Ndazi sawa'u va ede, sawa'u va Ruma Isa zi kamori mbali razi made, kawara va anamorizoho-Na va one lampa rawi ede parana ranggahi va Sia. Edempara imbi kai va siazoho zi au ratunti zi ade Alkitab ro zi au ranggahi va Ruma Isa. 23 Wunga mbuipu Ruma Isa wara zi Yerusalem wakatu Aruraja Paskah, mboto dou ma'imbi zi Sia vara karawi-Na mavisa ra guna. 24 Pala ndai Ruma Isa wati imbina siazoho, vara Sia napataku samenana dou. 25 Wati paralu ngoa va dou zi Sia mavoha cou-cou rau, vara ndai Sia navadeku au ma wara zei ade manusia.

3:1 Wara savua dou mana'ekai agama zi ade kalompo dou Farisi ngarana la Nikodemus. 2 Zisavua aimangazi sia mai rakana Ruma Isa ro nggahina, "Pa Guru, madazoho vade Ita ranggadu va Ruma Hatalla. Vara wati wara savua dou rau maloa karawi mavisa ra guna vune rakarawi va Ita, nggara watisi sia razende ra wa'a va Ruma Hatalla." 3 Cambe va Ruma Isa, "Imbipu, wati kone savua dou rau maloa ndazi anggota ela Karaja'an Allah, nggara sia watisi zi nggana mbali." 4 "Vuneku loana dou mana'e zi nggana mbali?" nggahi Nikodemus zi Ruma Isa. "Savua loaku sia lu'u mbali ade loko inana wa'u va ede zi nggana mbali?" 5 Cambe va Ruma Isa, "Nancihi poda nggahi Nahu ake: nggara watisi dou zi nggana razi oi ro razi Roh Allah, dou ede wati loana ndazi anggota ela Karaja'an Allah. 6 Manusia sacara sarumbu kasana ranggana va dou matuana, pala sacara ade rohani ranggana va Roh Allah. 7 Aina mbora akamu nggara nggahisi va Nahu: Nggomizoho sara'ana pavuaku zi nggana mbali. 8 Angi nangemo tavera ne'ena; ndai maringa elina, pala wati vadeta ratavena maikaina ro taveku laokaina. Ndede rauja lavo dou ranggana va Roh Allah." 9 "Vuneku loana ndazi lampa rawi ede?" sozi va Nikodemus. 10 Cambe va Ruma Isa, "Nggomi guru zi Israel; savua poda nggomi wati vademu? 11 Imbipu: nami nuntu ra nggahimu au ravade va namimpa, ro nami mbeimu nuntu ra nggahi au rawa'u va nami mpa; pala nggomizoho wati ngawamu tarima au rangoa va nami. 12 Nggomizoho wati imbimu nggara caritasi va Nahu mavoha lampa rawi razi dunia ake; vuneku loamu imbi va nggomizoho, nggara ngoasi va Nahu zi nggomizoho lampa rawi mavoha saroga? 13 Wati kone savua dou maparana ne'e ese saroga, selasi Sia ma londo zi dunia, edezu Ana Manusia. 14 Sama vune la Musa makane'e sawa romba zi salona haju zi so sarae, ndede rauja Ana Manusia pavuaku zi kane'e, 15 loakuzu samenana nggomizoho ma imbi zi Sia maraka mori masapodakaina ro ma'ederahizi." 16 Vara Ruma Hatalla ndede meci ra ca'una manusia zi dunia ake, ndazina Sia mbeina Ana-Na ma kese weki, loakuzu sanikina dou ma imbi zi Sia wati iha lelina, malaisi zimaraka mori masapodakaina ro ma'ederahizi. 17 Vara Ruma Hatalla nggaduna Ana-Na laina zimaparesa ncihi ra ncara dunia ake, pala zimakasalamana. 18 Dou ma imbi zi Sia wati zi hukum. Pala dou ma wati imbi wa'ura hukum va Ruma Hatalla, vara sia wati imbina zi Ana Ruma Hatalla ma kese weki. 19 Sia rada'awa kai dasa ake: Taroa ede wa'ura maina zi dunia, pala manusia nancewi ca'uku zimarindi ntewi kaisi lavo taroa, vara ruku ra rawi siazoho madavae. 20 Sanikina dou ma karawi madavae, nadaca'u zi taroa; sia wati ngawana mai zi taroa, loakuzu ruku ra rawina ma davae wati tadana. 21 Pala dou ma karawi rakane'ekai va Ruma Hatalla, maina zi taroa loakuzu ndazi tadana va one au rakarawina ede edezu rakane'e Ruma Hatalla. 22 Sawa'u va ede Ruma Isa ro anamorizoho-Na lao aka Yudea. Sia ngge'ena ta aka pila-pila wakatu ntoina lavo siazoho ro kandeu karasona dou. 23-24 Wakatu ede la Yahya watipu lu'una zi ade uma bui. Sia kandeu karasona dou zi Ainon, wati zo'ona lavo Salim, vara ta aka wara mboto oi. Dou-dou mamai zi sia, ro sia kandeu karasona siazoho. 25 Pila-pila dou anamori la Yahya tampu'u cence ncihi lavo dou Yahudi mavoha atora karaso sarumbu. 26 Siazoho laona zi la Yahya, ro nggahina, "Pa Guru, savua mbuipu kawara va Ita dou ma sama lavo Ita zi ipa vae va Sori Yordan ede, raturu tei va Ita zi madazoho ntoina? Sia ake nakandeu karaso rauku, ro sara'ana dou nalao rakaku Sia!" 27 Cambe va la Yahya, "Manusia wati loana ntau au-au nggara watisi rambei va Ruma Hatalla zi sia. 28 Ndai nggomizoho wa'ura ringamu nggahi nahu, 'Nahu laina Sangaji Mambei salama. Nahu ranggadu ulu ntewi kaisi lavo Sia.' 29 Vunti siwe edezu ntau vunti mone. Soba vunti mone ede nakizi dampimpa ro nakade'eku, ro naneo adena nggara naringasi eli vunti mone. Ndede rauja lavo nahu. Ake nahu neo poda adeku. 30 Siaku ma pavua naha penti, ro nahu nanaha kura penti." 31 Ma ramai ese mai nancewi eseku zi sara'ana. Ma ramai zi dunia lu'u golonga dou dunia, ro nuntu ra nggahi mavoha lampa rawi dunia. Sia ma ramai ese mai nancewi na'e zi sara'ana. 32 Sia nuntu ra nggahina mavoha au rawa'u ra'eda ro ringa-Na, pala wati kone savua dou ma'imbi zi nggahi ra eli-Na. 33 Dou ma imbi zi nuntu ra nggahi-Na ede, namangakuku va one Ruma Hatalla mancihi. 34 Vara dou ranggadu va Ruma Hatalla nakaronggaku nggahi ra eli Ruma Hatalla, vara Ruma Hatalla wa'ura mbei kancihina Roh-Na zi sia. 35 Ama nameci ra ca'uku Ana-Na, ro wa'ura zonggo ra mbeina sara'a kuasa zi Sia. 36 Dou ma imbi zi Ana ede zimaraka mori masapodakaina ro ma'ederahizi. Pala dou ma wati to'a zi Ana ede wati zimaraka mori. Sia zi hukum va Ruma Hatalla santoi-ntoina.

4:1 Dou-dou Farisi ringana va one Ruma Isa rakana ro kandeu karasona dou mancewi mboto mavatu Sia ntewi kaisi lavo la Yahya. 2 (Sapodakaina ndai Ruma Isa wati kandeu karasona malaisi anamorizoho-Na mpa.) 3 Wakatu vade va Ruma Isa va one dou-dou Farisi wa'ura ringana lampa rawi ede, Sia tu'u wi'ina Yudea lao mbali aka Galilea. 4 Zi ade lampa ra laokaina ede Sia pavuaku lampa saina Samaria. 5 Ndazi ronggara Ruma Isa zi savua kota zi Samaria ma ngara Sikhar, wati zo'ona lavo dana rambei va la Yakub ntoina zi la Yusuf anana. 6 Ta ede wara temba la Yakub. Ruma Isa na'ipiku makina vara lampana, vara ndedena Sia doho zi kengge temba. Wakatu ede kira-kira voe sampuru zua aimarai, 7-8 ro anamori Ruma Isa wa'ura lao aka kota zi welikaina ngaha ra nono. Edempara savua dou siwe Samaria mai timba oi. Nggahi Ruma Isa zi sia, "Ama ncawa, loa Nahu raho oi nono?" 9 Cambe va dou siwe Samaria ede, "Ita dou Yahudi, mada dou Samaria; vavauku Ita rahokaimu oi nono zi mada?" (Vara dou Yahudi wati wara zapo angina lavo dou Samaria.) 10 Cambe va Ruma Isa, "Pai mavade va nggomi rambei va Ruma Hatalla ro cou maraho nono zi nggomi, pasti ndai nggomi zimaraho nono zi Sia, ro Sia zimambei zi nggomi oi mamori." 11 Nggahi dou siwe ede, "Ita wati ntauta voru, ro temba ake na'ipiku zeina. Ratave Ita rakakaimu oi mambei mori? 12 Yakub, ama wa'i ra waro madazoho, mambeina madazoho temba ake. Ndai sia rau weha oi zi nonona ta ake; ndede rauja anazohona ro binata ntadina. Savua kacai va Ita, Ita mancewi na'e ntewi kaisi lavo Yakub?" 13 "Dou ma nono oi ake zimamango wo'o wali," nggahi Ruma Isa, 14 "pala dou ma nono oi zi mbei va Nahu, wati zimamango wo'o wali santoi-ntoina. Vara oi zimbei va Nahu ede zimandazi mada oi zi ade sarumbuna ma sambura losa ro mambei zi sia mori masapodakaina ro ma'ederahizi." 15 Nggahi dou siwe ede, "Ruma, tambei to'ipu mada oi ede, loakuzu mada wati zimamango wo'o wali; ro wati paralu walina mai ta ake zi wehakaiku oi." 16 "Laora, oupu rahimu, edempara dula mbalipu ta ake," nggahi Ruma Isa. 17 "Mada wati ntauku rahi,' 'cambe va dou siwe ede. Ncihi romo nggahimu," nggahi Ruma Isa. 18 "Vara nggomi wa'ura nikamu lima kali, ro dou mone ma mori sama lavomu ake laina rahimu." 19 "Ake mada wa'ura vadeku Ita savua dou nabi," nggahi dou siwe ede. 20 Wa'i ra waro madazoho manemba Ruma Hatalla zi doro to'i ake, pala bangsa Ita manggahi va one zi Yerusalem mpa hizina dou manemba Ruma Hatalla." 21 "Imbipu," nggahi Ruma Isa zi sia, "zi savua wakatu dou zimanemba Ama, lai walina zi doro to'i ake, ro lai rauna zi Yerusalem. 22 Nggomizoho dou Samaria nembamu ma wati pata va nggomizoho, pala nami dou Yahudi manembaku Sia rapata va nami, vara salamakai ramaina razi dou Yahudi. 23 Pala wakatuna zimamai, mala wa'ura mai, va one kai kuasa Roh Allah dou-dou zimanemba Ama kai Ruma Hatalla ma poda vune rakane'e va Ama. 24 Vara Ruma Hatalla ede Roh, ro kai kuasa Roh Allah mpoampa dou-dou laona nemba Ama vune rakane'ekai-Na." 25 Nggahi dou siwe ede zi Ruma Isa, "Mada vade Sangaji Mambei salama (zipehekai Al Masih) zimamai. Nggara namaisi Sia, Sia nangoa sara'aku zi ndaita." 26 "Nahuku Sia," nggahi Ruma Isa, "Nahu ma wunga nuntu ra nggahi lavo nggomi ake." 27 Wakatu ede wontu anamori Ruma Isa. Siazoho mbora akana edana Ruma Isa manuntu ra nggahi lavo dou siwe. Pala wati kone savua dou zi ade weki siazoho masozi zi dou siwe ede, "Ina au paraluta?" atao masozi zi Ruma Isa, "Vavau Ita nuntu ra nggahimu lavo dou siwe ede?" 28 Edempara dou siwe ede tu'u wi'ina roana ta ede edempara laona aka kota ro nggahina zi dou-dou ta aka, 29 "Mai tiopu dou ma rangoa zi nahu sara'ana rakarawi va nahu. Savua napodaku Sia ede Sangaji Mambei salama?" 30 Ndazi dou-dou ede tu'u wi'ina kota edempara laona zi Ruma Isa. 31 Wunga wakatu ede anamori Ruma Isa recena ngaha Ruma Isa. "Pa Guru," nggahi siazoho, "santaveta takatenggora weki." 32 Pala cambe va Ruma Isa, "Wara ngaha ra nono zi Nahu, ma wati vade va nggomizoho." 33 Ndazi anamorizoho-Na tampu'u sozi-sozi zi angi ndaizohona, "Savua wara dou mawa'a ngaha ra nono zi ru'u va Sia?" 34 Edempara nggahi Ruma Isa, "Ngaha ra nono Nahu edezu vatu rakane'e va Sia ma ranggadu Nahu, ro makanggori karawi razonggo-Na zi Nahu. 35 Nggomizoho nggahimu, 'Upa wura walipu oru pako.' Pala Nahu manggahi zi nggomizoho: Tio kavaepu oma-oma ma wa'ura monca, sadia zipako! 36 Dou ma pako wa'ura tampu'u tarima ao ufana ro kavorona hasi zi mori masapodakaina ro ma'ederahizi. Ndazi dou ma pari zei ro dou ma pako loa kazihi ade sama-sama. 37 Ncihi nggahi peribahasa ake, 'Ma savua mangguza, ma kalaina mapako.' 38 Nahu makau nggomizoho lao pako zi oma ma watira karawi va nggomizoho; dou makalai wa'ura karawi ta aka, ro nggomizoho matarima laba razi karawikai siazoho." 39 Mboto dou Samaria ela ra dou kota ede ma'imbi zi Ruma Isa, vara nggahi dou siwe ede, "Sia manggahina zi nahu sara'a rakarawi va nahu." 40 Ndazi wakatu dou-dou Samaria ede eda angina lavo Ruma Isa, siazoho raho kapodana loakuzu Sia ngge'e lavo siazoho. Ndazi Ruma Isa nge'e ta ede zua nai ntoina. 41 Edempara ncewi mboto wali dou ma'imbi zi Ruma Isa vara au rangoa ra tei va ndai Sia zi siazoho. 42 Siazoho nggahina zi dou siwe ede, "Nami ma'imbira ake, laina vara ngoa au rangoa va nggomi zi nami, pala vara ndai nami wa'ura ringamu zi Sia, ro vademu va one poda Sia Mambei salama dunia." 43 Sawa'u va zua nai ngge'ena zi Sikhar, Ruma Isa lao aka Galilea. 44 Ndai Ruma Isa nawa'ura nggahi, "Savua dou nabi wati horoma va dou zi dana ra rasa ndaina." 45 Pala wakatu Sia rongga zi Galilea, dou-dou ta aka weha aona Sia kai sana ade, vara siazoho wara zi Yerusalem wakatu Ainaina Aruraja Paskah, ro wa'ura eda sara'ana rakarawi va Ruma Isa. 46 Edempara Ruma Isa dula mbali aka Kana zi Galilea, tavera Sia parana rungkana oi ndazi anggo. Zi kota ede wara savua dou mavora pamarenta, anana mawunga supu zi Kapernaum. 47 Wakatu ringa va sia va one Ruma Isa wa'ura mai zi Galilea ra'aka Yudea, sia lao rakana Ruma Isa ro rahona zi Ruma Isa mai zi Kapernaum zimakataho wea anana ma ne'era made. 48 Nggahi Ruma Isa zi dou mavora pamarenta ede, "Nggara watisi eda va nggomizoho rawi mavisa ra guna, nggomizoho wati imbimu." 49 "Ruma," cambe va dou mavora pamarenta ede, "ta mai roci to'ipu sawatipu ana mada madena." 50 Nggahi Ruma Isa zi sia, "Laora anamu wa'ura taho." Dou ede na'imbiku zi nggahi ra eli Ruma Isa, edempara sia laona. 51 Ziwoha ncai, adazohona mai zi sia ro ngoa ra kahabana, "Ana Ita wa'ura taho." 52 Edempara sozi va sia zi siazoho voe pila ana dou ede tampu'u tahona. Cambe va siazoho, "Awina kira-kira voe savua aimarai mbora henggena." 53 Edempara ama ana dou ede kawarana va one wakatu ede Ruma Isa manggahi zi sia, "Anamu wa'ura taho." Ndazi sia ro samenana iwa ra wekina imbi zi Ruma Isa. 54 Edeku rawi mavisa ra guna makazuakalikaina rakarawi va Ruma Isa zi Galilea sawa'u va Sia maina razi Yudea.

5:1 Sawa'u va ede wara ndiha Yahudi, edempara Ruma Isa lao aka Yerusalem. 2 Zi Yerusalem zeni lavo "Taza Jimba" wara savua kolam, ade bahasa Ibrani tangarakai Betesda. Ta ede wara lima mbua rasatampa. 3 Zihizi rasatampa-satampa ede wara mboto dou masupu mamaru ndore; wara ma mbuda, wara ma mpako ra mpedu, wara ma made vinci. Siazoho sara'ana nangenaku kanggavo oi zi kolam ede. 4 Vara wara sakali-sakali mala'eka Ruma londo zi kolam ede ro kavona oi. Ro dou masupu ma sarambakaina lu'u zi ade kolam ede wakatu kanggavo oi zimataho sara'a au rasupuna. 5 Zihizi ede wara savua dou mone ma wa'ura supu tolumpuru waru mba'a ntoina . 6 Eda va Ruma Isa sia maru ndorena ta aka, ro navadeku va one sia wa'ura ntoi poda supuna; ndazi sozi va Ruma Isa zi sia, "Savua mane'e taho nggomi?" 7 Cambe va dou masupu ede, "Pa, wati wara dou ta ake zimakalu'u mada ade kolam wunga kanggavo oina. Ro wunga mada lao aka kolam, dou makalai wa'ura lu'u ulu." 8 Edempara nggahi Ruma Isa zi sia, "Tu'ura, hantapu dipimu ro lampara." 9 Wunga ede wa'u dou ede tahona. Sia hantana dipi ro lampana. Lampa rawi ede ndazina zi ainaina Sabat. 10 Vara ndedena dou-dou mana'ekai Yahudi manggahi zi dou ma voupura taho ede, "Ainaina ake ainaina Sabat. Nggomi wati loamu hanta dipimu." 11 Pala cambe va dou ede, "Dou ma rakataho mada akana makau mada hanta dipi mada ro lampa." 12 "Cousi Sia ma kau nggomi hanta dipi ro lampa?" sozi va siazoho. 13 Pala dou ma wa'ura taho ede wati vadena douna, vara Ruma Isa wa'ura mbora zi woha dou mamboto ede. 14 Edempara Ruma Isa eda angina lavo dou ede ade Bait Allah, ro nggahina zi sia, "Ake nggomi wa'ura taho. Aina karawimu dosa wali, vavaina iumu lampa rawi ma ipi iha wali." 15 Ndazi dou ede laona edempara ngoana zi dou-dou mana'ekai Yahudi va one Ruma Isa ma kataho wea supuna. 16 Ro vara ndedena siazoho tampu'u kasusana Ruma Isa, vara Sia katahona dou masupu zi ainaina Sabat. 17 Pala nggahi Ruma Isa zi siazoho, "Ama-Ku nakarawi ncau sampe ake, ro Nahu karawi rau." 18 Nggahi ra eli ede nakandaziku dou-dou mana'ekai Yahudi naha ne'e hade Sia. Siazoho karawina ede, laina vara sapa-Na atora agama mpoa mavoha ainaina Sabat, pala vara nggahi rau Sia va one Ruma Hatalla ede Ama-Na; aona Sia kasamana weki-Na lavo Ruma Hatalla. 19 Cambe ndake va Ruma Isa zi dou-dou ede, "Imbipu, Ana wati loana karawi au-au kai kuasa ndai-Na. Sia karawina au ra'eda va Sia karawi va Ama-Na. Vara au rakarawi va Ama, ede rauku zikarawi va Ana. 20 Vara Ama nameci ra ca'uku Ana ro katadana zi Sia sara'a rakarawi va ndai-Na. Mala Ama zimakatada rau-Na ruku ra rawi ma ipi na'e wali, ndazina mbora kai aka nggomizoho. 21 Ama ede nakamori mbaliku dou mamade, ro mbeina zi siazoho mori masapodakaina ro ma'ederahizi; ndede rauja Ana mambei mori ma'ederahizi zi dou zine'ekai va Sia mbei mori. 22 Ndai Ama wati kancarana cou-cou rau. Sara'ana kuasa zi paresa kai ncihi ra ncara wa'ura zonggona zi Ana-Na. 23 Karawikai va Ama ede loakuzu samenana dou lia ra horomana Ana vune siazoho malia ra horomana zi Ama. Dou ma wati lia ra horoma Ana wati lia ra horoma rauna Ama ma ranggadu Ana. 24 Ncihi poda nggahi Nahu ake: Dou ma kade'e kavae nggahi ra eli Nahu, ro na'imbiku zi Sia ma ranggadu Nahu, nantau mori masapodakaina ro ma'ederahizi. Sia wati zi hukum; sia wa'ura hori razi madekaina ro narakaku mori ra woko. 25 Imbipu: zimamai wakatuna -- mala wa'ura raka wakatuna -- dou mamade zimaringa eli Ana Ruma Hatalla. Ro dou ma ringana zimamori. 26 Vune ndai Ama fu'u mori, Sia kandazina Ana-Na fu'u mori rau. 27 Sia wa'ura mbeina zi Ana-Na hak zi paresa ncihi ra ncara, vara Sia Ana Manusia. 28 Aina mbora akamu nggomizoho ringamu lampa rawi ake, va wakatuna zimamai vara sara'ana dou ma wa'ura made naringaku eli-Na, 29 edempara losana razi ade rade. Dou ma wa'ura karawi mataho zimamori mbali ru'u mori. Pala dou ma wa'ura karawi madavae zimamori mbali zi hukum." 30 "Nahu wati loaku karawi au-au kai va kane'e ndai-Ku. Nahu zimaparesa ncihi ra ncarampa vune rakaukai va Ruma Hatalla. Ro au ranggahi va Nahu adi, vara Nahu wati vatu-Ku rakane'e va ndai Nahu, malaisi rakane'e va Ama ma ranggadu Nahu. 31 Misampara Nahu manuntu ra nggahi mavoha weki ndai-Ku, nuntu ra nggahi ede wati loa zi imbi. 32 Pala wara dou makalai ma mbei sakasi mavoha Nahu, ro Nahu vade va one nuntu ra nggahina ede ncihi. 33 Nggomizoho wa'ura nggadumu dou zi la Yahya, ro sia wa'ura mbeina sakasi ma poda mavoha Nahu. 34 Lampa rawi ede Nahu manggahi, laina vara Nahu maparalu zi nuntu ra nggahi manusia, pala loakuzu nggomizoho zikasalama. 35 La Yahya ede vune ilo ma kalea ro makalosa taroana. Zisamporo wakatu nggomizoho neo ademu tarima taroana ede. 36 Pala nuntu ra nggahi Nahu nancewi na'e ntewi kaisi zi nuntu ra nggahi la Yahya. Au rakarawi va Nahu ake, edezu karawi rakaukai va Ama zi Nahu, zi bukutikai va one Ama mawa'ura nggadu Nahu. 37 Ro Ama ma ranggadu Nahu mambei sakasi rau mavoha Nahu. Nggomizoho watipu ringamu eli-Na atao edamu pahu-Na. 38 Nggahi ra eli-Na wati rawi'imu zei ademu vara nggomizoho wati imbimu zi Nahu ranggadu-Na. 39 Nggomizoho tana'omu Alkitab va kacaimu vara kai caramu ede nggomizoho mantau mori masapodakaina ro ma'ederahizi. Ro Alkitab ede mambei sakasi mavoha Nahu. 40 Pala nggomizoho wati ngawamu mai zi Nahu zirakakaimu mori ma'ederahizi. 41 Nahu wati ngupaku roi va manusia. 42 Nahu kapataku Nggomizoho. Nahu vade nggomizoho wati meci ra ca'umu Ruma Hatalla zei ademu. 43 Nahu maiku kai kuasa Ama-Ku, pala nggomizoho wati tarima aomu Nahu. Pala maisi dou makalai mai kai kuasa ndaina, nggomizoho mangawaku tarima ao sia. 44 Vuneku loa imbi va nggomizoho, nggara nggomizoho ngupamu roi va sasamamu manusia, ro wati usahamu ngupa roi razi Ruma Hatalla ma Kese Weki? 45 Aina kacaimu Nahu zimakancara nggomizoho zi tando Ama. Justru zimakancarana nggomizoho edezu la Musa, sia ede rane'ekai va nggomizoho. 46 Misakai nggomizoho imbimu zi la Musa, nggomizoho zima'imbi zi Nahu, vara mavoha Nahu sia tuntina. 47 Pala nggarasi nggomizoho wati imbimu zi au ratunti va la Musa, vuneku loamu imbi va nggomizoho zi au ranggahi va Nahu?"

6:1 Pila-pila wakatu ntoina sawa'u va ede Ruma Isa lao aka ipa va vae Ndano Galilea, zitangara kai rau Ndano Tiberias. 2 Sawa'u va ronggana ta aka, mboto dou vatu Sia vara siazoho wa'ura edana karawi-Na mavisa ra guna kai katahona dou-dou masupu. 3 Ruma Isa tekana doro to'i, edempara dohona ta ede lavo anamorizoho-Na. 4 Wakatu ede wa'ura zenira Ainaina Aruraja Paskah Yahudi. 5 Wakatu eda va Ruma Isa zi kompe ra pei-Na, Sia edana dou ma'ipi poda mboto mamai raka Sia. Edempara nggahi Sia zi la Filipus, "Taveku ndai loakai weli zi ngaha ra nono, loakuzu sara'ana dou ake loa ngaha?" 6 (Ruma Isa wa'ura vade auku zikarawi-Na, pala nggahi ndedekai va Sia vara Sia nane'eku uji la Filipus.) 7 Cambe va la Filipus, "Roti maco'i zua ratu piti salaka wati zimancihi zi ru'u va douzoho ake, kone sanikina dou raka sato'impa." 8 Savua dou anamori Ruma Isa ma kalaina, edezu la Andreas ari la Simon Petrus, manggahi, 9 "Ta ake wara ana dou mone mawa'a lima mbua roti ro zua tembe uta. Pala auku aona ede zi ru'u va dou mamboto ake?" 10 "Kaupu dou-dou ede doho," nggahi Ruma Isa. Zi hizi ede wara mboto mpori, ndazi dou-dou ede doho zi mpori -- sara'ana wara kira-kira lima riwu dou mone. 11 Edempara Ruma Isa wehana roti ede, edempara rentana do'a syuku zi Ruma Hatalla. Sawa'u va ede Sia cengga-cenggana roti ede zi dou mamboto. Edempara Sia cengga-cenggana uta ede, ro siazoho ngaha ra nonona sampe mbocu podakaina. 12 Sawa'u va siazoho ngaha sampe mbocuna, nggahi Ruma Isa zi anamorizoho-Na, "Kavoropu mancewi ngaha ra nono ede ai to'ina wara rapaki." 13 Edempara siazoho kavorona sampuru zua wonca vini mancewi ngaha ra nono razi lima mbua roti rangaha va dou mamboto ede. 14 Wakatu eda va dou mamboto rawi mavisa ra guna rakarawi va Ruma Isa, nggahi siazoho, "Poda, akeku Nabi rasake ede rapamao mai zi dunia!" 15 Ruma Isa navadeku siazoho ngawakaina mai zi pakasakaina Ruma Isa zimandazi sangaji siazoho. Vara ndedena Sia lao pesona weki lao aka dana ra rasa doro to'i. 16 Wunga ne'empara rindi ai, anamori Ruma Isa londo awa ndano. 17 Edempara siazoho nentena sampa lao ipa vae va ndano ede nalao aka Kapernaum. Wa'ura rindi ai pala Ruma Isa watipu mai rakana siazoho. 18 Ziwakatu ede ndano natampu'ura na'e galo vara angi na'e. 19 Sawa'u va loja kira-kira lima atao ini kilo mete, siazoho edana Ruma Isa mai rakana sampa kai lampana ese wawo oi. Siazoho na'ipiku dahuna. 20 Pala nggahi Ruma Isa zi siazoho, "Aina dahu, ake Nahu!" 21 Edempara kai sana adena siazoho tarima aona Sia lu'u ade sampa, ro wakatu ede wa'u sampa siazoho rongga aka hizi laokaina. 22 Vala aisanai dou mamboto ma mbuipu ngge'e zi ipa vae ndano, kawarana weki va one akana cuma wara savua sampampa ta aka. Siazoho vade va one anamori Ruma Isa wa'ura lao kai sampa ede, Ruma Isa wati vatuna. 23 Edempara pila-pila mbua sampa razi kota Tiberias mai ro lavuna zeni lavo hizi dou mamboto ede mangaha roti sawa'u va rentana do'a syuku va Ruma. 24 Wakatu eda va dou mamboto ede va one nataho Ruma Isa ro anamorizoho-Na watizu warana ta ede, siazoho rau ne'ena sampa-sampa ede ro laona aka Kapernaum ngupa Ruma Isa. 25 Wakatu dou-dou mamboto ede eda angi lavo Ruma Isa zi ipa vae va ndano, sozi va siazoho zi Sia, "Pa Guru, vune ai Ita rongga ta ake?" 26 Cambe va Ruma Isa, "Poda, nggomizoho ngupakaimu Nahu laina vara nggomizoho loamu ka'ao rawi mavisa ra guna rakarawi va Nahu, pala vara nggomizoho wa'ura ngaha sampe mbocumu. 27 Aina karawi zirakakaimu ngaha ra nono ma loa mpoi ro mbai. Karawipu zirakakaimu ngaha ra nono ma wati loa mbai ro ma loa mbei mori masapodakaina ro ma'ederahizi. Ngaha ra nono ede zi mbei va Ana Manusia zi nggomizoho, vara Sia wa'ura hanta va Ruma Hatalla, Ama-Na." 28 Edempara sozi va siazoho zi Sia, "Auku zi pavua karawi va madazoho loakuzu madazoho karawi rakane'e va Ruma Hatalla?" 29 Cambe va Ruma Isa, "Akeku zi ne'e va Ruma Hatalla zi nggomizoho: imbipu zi Sia ranggadu va Ruma Hatalla." 30 "Nggara ndedesi," nggahi siazoho, "auku bukutina zi mbei va Ita loakuzu madazoho eda ro imbi zi Ita? Auku zi karawi va Ita? 31 Wa'i ra waro madazoho ngahana manna zi so sarae, vune ratunti zi ade Alkitab, 'Sia mbeina siazoho ngaha roti razi saroga.' " 32 Edempara nggahi Ruma Isa zi siazoho, "Imbipu: Laina la Musa malaisi Ama-Ku ma mbeina zi nggomizoho roti masapodakaina razi saroga. 33 Vara roti rambei va Ruma Hatalla edezu Sia ma ralondo ese saroga ro mambei mori zi ru'u va manusia zi dunia." 34 "Ama," nggahi siazoho, "mbei ntuwupu zi madazoho roti ede." 35 "Nahura roti ma mbei mori," nggahi Ruma Isa zi siazoho. "Dou ma mai zi Nahu wati zimahizo wali santoi-ntoina. Ro dou ma imbi zi Nahu wati zimamango wo'o wali santoi-ntoina. 36 Pala vune ranggahi Nahu zi nggomizoho, konena nggomizoho wa'ura edamu Nahu, nggomizoho wati imbimu. 37 Samenana dou rambei va Ama zi Nahu zimamai zi Nahu. Nahu wati tula aoku cou-cou ma mai zi Nahu. 38 Vara Nahu londoku razi saroga, laina zimakarawi vera ne'e ndai-Ku, malaisi rakane'e va Sia ma ranggadu Nahu. 39 Ro akeku rakane'e va Sia ma ranggadu Nahu: loakuzu razi sara'ana dou razonggo zi Nahu, wati kone savua dou rau mamoda; pala loakuzu Nahu makamori mbali siazoho zi Ainaina Kiama. 40 Poda akeku rakane'e va Ama Nahu: Loakuzu sara'a ma ra'eda Ana ro imbina zi Sia ma ntau mori masapodakaina ro ma'ederahizi, ro Nahu zimakamori mbali wakatu Ainaina Kiama." 41 Dou-dou Yahudi tampu'u bada reze zi Ruma Isa, vara nggahi Sia: "Nahuku roti ma ralondo ese saroga." 42 Nggahi siazoho, "Savua laina ake Isa, ana la Yusuf? Nami mapataku ina ro ama-Na! Vuneku loana Sia nggahi va one Sia ralondona ese saroga?" 43 Edempara nggahi Ruma Isa zi siazoho, "Aina bada reze. 44 Wati kone savua dou maloa mai zi Nahu, nggarasi Ama ma ranggadu Nahu, wati wa'ana sia zi Nahu; ro cou ma mai, zikamori mbali va Nahu zi Ainaina Kiama. 45 Zi ade Buku Nabi-nabi ratunti ndake: 'Sara'ana dou zi ngoa ra tei va Ruma Hatalla.' Ndazi sara'ana dou ma ringa Ama ro tana'ona zi Sia, maina zi Nahu. 46 Ede laina aona va one wara dou ma wa'ura eda Ama. Cuma Sia ma ramai ta Ruma Hatalla, mawa'ura eda Ama. 47 Zivademu: dou ma imbi, nantau mori masapodakaina ro ma'ederahizi. 48 Nahura roti ma mbei mori. 49 Wa'i ra waromu ngahana manna zi so sarae ro siazoho made rau. 50 Pala wati ndedena lavo roti ma londo razi saroga; dou ma ngaha roti ede wati zimamade. 51 Nahura roti ma londo razi saroga -- roti ma mbei mori. Dou ma ngaha roti ake zimamori santoi-ntoina. Roti zi mbei va Nahu zi mori ra wokokai manusia zi dunia edezu hi'i Nahu." 52 Ringana ede, dou-dou Yahudi cence ncihi angi ndaina. "Vuneku loana dou ake mbei hi'i-Na zi ngaha ndaita?" nggahi siazoho. 53 Edempara nggahi Ruma Isa zi siazoho, "Imbipu: Nggarasi nggomizoho wati ngahamu hi'i Ana Manusia ro nonomu ra'a-Na, nggomizoho wati poda-poda zimamori. 54 Dou ma ngaha hi'i Nahu ro nono ra'a Nahu nantau mori masapodakaina ro ma'ederahizi ro Nahu zimakamori mbali siazoho zi Ainaina Kiama. 55 Vara hi'i Nahu poda-poda ngaha ra nono, ro ra'a Nahu poda-poda oi nono. 56 Dou ma ngaha hi'i Nahu ro manono ra'a Nahu, nangge'empa savuana lavo Nahu, ro Nahu savua lavo sia. 57 Ama ma mori ede, ma ranggadu Nahu ro Nahu rau mori razi Ama. Ndede rau ro dou ma ngaha hi'i Nahu zimamori razi Nahu. 58 Akeku roti ma londo razi saroga: laina roti vune ra ngaha va wa'i ra waromu. Vara sawa'u va ngahana roti ede, siazoho namade rau. Pala dou ma ngaha roti ake zimamori santoi-ntoina." 59 Sara'ana ede nggahi va Ruma Isa wakatu Sia ngoa ra tei-Na zi uma sambeakai zi Kapernaum. 60 Sawa'u va ringana nggahi ra eli Ruma Isa ede, mboto zi ade weki anamorizoho-Na manggahi, "Tana'o ake na'ipiku tanina. Couku ma wa'una tarima!" 61 Ndai Ruma Isa navadeku va one anamorizoho-Na mabada reze mavoha lampa rawi ede. Ndazi nggahi Sia, "Savua nggomizoho ma'iha ade vara nuntu ra nggahi ede? 62 Vuneku ndazina peasi nggara edasi va nggomizoho Ana Manusia ne'e mbalina zi hizi-Na masarambakaina? 63 Ma kandazina manusia mori edezu Roh Allah. Tenggo ra wale manusia wati wara onena. Nggahi ra eli ranggahi va Nahu zi nggomizoho ake edezu nggahi ra eli Roh Allah ro nggahi ra eli ma mbei mori. 64 Pala wara rau zi ade weki nggomizoho ma wati imbi." (Ruma Isa wa'ura vadena zi ai saramba wa'una cou-cou ma wati ne'e imbi, ro couku zimazonggo Sia zi dou-dou ma musu-Na.) 65 Edempara nggahi wali Ruma Isa, "vara ndedena Nahu mangoana zi nggomizoho va one wati kone savua dou maloa mai zi Nahu, nggara watisi rakane'e va Ama." 66 Tampu'u wakatu ede mboto dou mavatuna matu'u wi'i Sia, ro wati ngawa walina vatu Sia. 67 Edempara sozi va Ruma Isa zi sampuru zua anamorizoho-Na, "Savua nggomizoho rau mane'e wi'i paki Nahu?" 68 "Ruma," nggahi la Simon Petrus zi Sia, "zi couku madazoho laokaimu? Nggahi ra eli Ruma mambei mori masapodakaina ro ma'ederahizi. 69 Madazoho wa'ura imbi poda-poda va one Ruma dou maraso ranggadu va Ruma Hatalla." 70 Cambe va Ruma Isa, "Savua laina Nahu ma rakazale nggomizoho sampuru zua dou ake? Pala savua dou zi ade weki nggomizoho edezu seta!" 71 Aona nggahi Ruma Isa edezu la Yudas ana la Simon Iskariot. Va konena la Yudas savua dou zi ade weki sampuru zua dou anamori Ruma Isa, sia zimazonggo Ruma Isa zi dou-dou ma musu-Na.

7:1 Sawa'u va ede Ruma Isa lao lampa rero-Na zi Galilea. Sia wati ngawana lao aka dana ra rasa Yudea vara dou-dou mana'ekai Yahudi ta aka mane'e hade Sia. 2 Wakatu ede wa'ura zeni Aruraja Pondok Daun. 3 Ndazi nggahi arizoho-Na zi Ruma Isa, "Tu'u wi'ipu hizi ake ro laopu aka Yudea, loakuzu anamori-Mu na'eda rauku karawi-Mu. 4 Wati wara dou zimacilina au rakarawina, nane'esi mbou ngarana. Nggara makarawisi va Ita karawi vune ede, sara'a dunia pavuaku vadena!" 5 (Vara ari-ari ndai-Na wati imbi rauna zi Sia.) 6 "Watipu wakatuna zi ru'u va Nahu," nggahi Ruma Isa zi siazoho, "pala zi ru'u va nggomizoho, sanikina wakatu loa. 7 Dunia ake wati lu'u va aka da ca'una nggomizoho. Pala Nahu wati ca'u romo va dunia, vara Nahu maca'u nggahi zi dunia va one ruku ra rawina madavae. 8 Laopu ndai nggomizoho aka ndihakai ede. Nahu wati laoku vara watipu wakatuna zi ru'u va Nahu." 9 Ndede nggahi Ruma Isa zi arizoho-Na, ro Sia ngge'e zi Galilea. 10 Sawa'u va lao arizoho-Na aka ndihakai ede, kai midi-midi Ruma Isa lao kesena wati wara dou mavadena. 11 Santoi ndiha ede, dou-dou mana'ekai Yahudi mangupa Sia ro sozi rerona, "Taveku Sia?" 12 Mboto dou manuntu nari mavoha Sia. Wara ma nggahi: "Sia dou nawancuku tahona." Wara rauja ma nggahi: "Wati! Sia nakasantuda mboto dou." 13 Pala wati kone savua dou madisa nggahi kana'e mavoha Sia vara siazoho dahu zi dou-dou mana'ekai Yahudi. 14 Wunga sama na'ekai ndiha, Ruma Isa lu'u ade Bait Allah, edempara tampu'una ngoa ra tei. 15 Dou-dou mana'ekai Yahudi mbora poda akana ro nggahina, "Vuneku loana dou ake vade mandede mboto, sapodakaina Sia wati paranana sakola?" 16 Cambe va Ruma Isa, "Rangoa ra tei va Nahu ake laina ngoa ra tei va Nahu, pala ngoa ra tei va Sia ma ranggadu Nahu. 17 Dou ma ngawa vatu rakane'e Ruma Hatalla, zimavade savua ngoa ra tei va Nahu ramaina razi Ruma Hatalla atao ramaina razi ndai Nahu. 18 Dou ma mbei ngoa ra tei ndaina nangupaku zi lia ra horomakai weki ndaina. Pala dou ma ngupa lia ra horoma zi ru'u va Sia ma ranggaduna, dou ede rombo, wati wara kukukeko zi sia. 19 Savua laina la Musa mawa'ura mbeina parenta-parenta Ruma Hatalla zi nggomizoho? Pala zi ade weki nggomizoho wati wara ma vatuna parenta-parenta ede. Vavauku nggomizoho ne'ekaimu hade Nahu?" 20 Cambe va dou mamboto ede, "Nggomi ringu! Cou mane'e hade Nggomi?" 21 Cambe va Ruma Isa, "Savuampa rawi rakarawi va Nahu zi ainain Sabat, ro nggomizoho mbora mena akamu. 22 Mbei va la Musa zi nggomizoho atora suna -- konena suna ede sapodakaina wati ramaina razi la Musa, pala ramaina zi wa'i ra waro sawatipu la Musa. Vara ndedena, zi ainaina Sabat rau nggomizoho mane'eku suna dou. 23 Makarawisi ede va nggomizoho vavaina sapamu atora la Musa mavoha suna, vavau nggomizoho mbanimu zi Nahu vara kataho va Nahu weki dou sara'ana zi ainaina Sabat? 24 Aina kancaramu dou vara dasa ma tada, pala vara kai dasa ma'adi." 25 Edempara wara pila-pila dou Yerusalem manggahi, "Savua laina dou akesi rangupa rero zi ne'e hade? 26 Tio Sia nuntu ra nggahina zi tando dou mamboto kai wati wara dou mahakona, ro wati wara dou ma nggahi au-au zi Sia! Savua dou-dou mana'ekai ndaita wa'ura kawarana weki va one Sia ake Sangaji Mambei salama? 27 Pala namaisi Sangaji Mambei salama ede, wati kone savua dou mavade ratave maikai-Na! Sapodakaina ndai wa'ura vadeta razi vena dou ake." 28 Edempara, Ruma Isa wunga ngoa ra teina zei ade Bait Allah, Sia nggahi kana'ena, "Ndazi nggomizoho mavadeku cou Nahu ake, ro ratavena maikai-Ku? Nahu wati maiku kai kane'e ndai-Ku. Nahu ranggadu va Sia ma ntau hak manggadu Nahu, ro Sia loa zi imbi. Pala nggomizoho wati patamu Sia. 29 Nahu pata Sia, vara Nahu ramaiku razi Sia, ro Sia edezu ma ranggadu Nahu." 30 Ziwakatu ede siazoho nane'eku wa'u Ruma Isa, pala wati wara ma disa nenti Sia, vara watipu raka wakatuna. 31 Mboto dou zi ade weki dou-dou ede tampu'u imbi zi Sia, ro nggahina, "Nggara namaisi Sangaji Mambei salama ede, savuana loaku Sia karawi mancewi mboto rawi mavisa ra guna ntewi kaisi lavo dou ake?" 32 Dou-dou Farisi maringa vuneku dou mamboto ede manuntu kanari mavoha Ruma Isa. Vara ndedena, sama-sama lavo dou-dou mana'ekai imam, siazoho kauna pila-pila dou majaga Bait Allah lao wa'u Ruma Isa. 33 Nggahi Ruma Isa zi dou mamboto zi ade Bait Allah, "Zisamporo walimpa Nahu wara sama lavoku nggomizoho. Sawa'u va ede Nahu zimalao dula mbali aka ma ranggadu Nahu. 34 Nggomizoho zimangupa Nahu, pala wati rakamu eda Nahu; vara nggomizoho wati loamu mai zi hizi tavera warakai Nahu." 35 Edempara dou-dou mana'ekai Yahudi cua nggahi zi angi ndaizohona, "Dou ake nane'e lao taveku ndazina zi daloakai raka eda va ndai Sia? Savua Sia nane'eku lao aka dou-dou Yahudi ma ngge'e zi dana ra rasa dou zi ade woha dou Yunani, ro nangoa ra teiku dou Yunani? 36 Auku aona Sia nggahina va one ndai zimangupa Sia pala wati zimaraka eda Sia ro va one ndai wati loa mai aka hizi tavera wara kai Sia?" 37 Wakatu ainaina macumpukaina razi ndiha kai ede, edezu ainaina ma ipi penti poda, Ruma Isa kizina zi ade Bait Allah edempara nggahi-Na, "Dou ma mango wo'o pavuaku mai nonona zi Nahu. 38 Mavoha dou ma imbi zi Nahu, ratunti zi ade Alkitab: 'Ratazei adena wara lampa oi ma mbei mori.' " 39 (Ruma Isa nuntu ra nggahina mavoha Roh Allah, ma zi tarima va dou-dou ma imbi zi Sia. Vara wakatu ede Roh Allah watipu rambei; vara Ruma Isa watipu kazese ro kantasa kai made-Na.) 40 Mboto dou maringa ra kade'e au ranggahi va Ruma Isa, ro zi ade weki siazoho wara ma nggahi, "Dou ake pasti Nabi ra ngena va ndai ede!" 41 Ma kalaina manggahi, "Akeku Sangajai Mambei salama!" Pala wara rau dou ma nggahi, "Ah, vuneku loana Sangaji Mambei salama ramaina razi Galilea? 42 Zi ade Alkitab ratunti va one Sangaji Mambei salama edezu londo ra mai la Daud ro zimamai razi Betlehem, edezu kampo ra mporo la Daud." 43 Cumpukaina dou-dou tampu'ura cence ncihi mavoha Ruma Isa. 44 Wara ma ne'e wa'u Sia, pala wati kone savua dou rau manenti-Na. 45 Wakatu dou-dou majaga Bait Allah rakau lao wa'u Ruma Isa mai mbalina, dou-dou mana'ekai imam ro dou-dou Farisi ede sozina zi siazoho, "Vavauku nggomizoho wati wa'a ca'arakaimu Sia?" 46 Cambe va dou-dou majaga ede, "Watipu parana wara dou manuntu ra nggahi vune Sia!" 47 "Savua nggomizoho wa'ura kasantuda va Sia rau? Nggahi va dou-dou Farisi ede. 48 "Savua wara razi dou-dou mana'ekai ndai atao dou Farisi ma'imbi zi Sia? 49 Pala dou mamboto ake, siazoho wati vadena hukum Musa, ro siazoho wa'ura hina va'a va Ruma Hatalla." 50 Savua dou zi ade weki dou-dou Farisi ede edezu la Nikodemus ma wa'ura iu mai zi Ruma Isa. Nggahi la Nikodemus zi dou-dou Farisi ma kalaina, 51 "Nggahi va Hukum, savua-vua dou wati loa zi hukum sawatipu parakarana zi ringa ra kade'e ro rakarawina ziparesa." 52 "Savua nggomi rau razi Galilea?" cambe va siazoho. "Paresa lalompa zi ade Alkitab! Nggomizoho ma'edaku va one wati wara nabi ma razi Galilea!" 53 Sawa'u va ede, sara'ana dou dula zi umana.

8:1 Pala Ruma Isa laona aka Doro to'i Zaitun. 2 Vala aisanai sizi-sizi poda Sia lao walina aka Bait Allah, ro mboto dou mamai raka Sia. Doho Ruma Isa, edempara tampu'u ngoa ra teina siazoho. 3 Wunga wakatu ede, guru-guru agama ro dou-dou Farisi mai wa'ana zi Sia savua dou siwe raraka eda karawina jina. Siazoho kauna dou siwe ede kizi zei wohana, 4 edempara nggahina zi Ruma Isa, "Pa Guru, dou siwe ake raraka eda wunga karawina jina. 5 Zi ade Hukum Musa wara atora va one dou siwe vune ake pavuaku tova kai wadu sampe madena. Ake vune kananu va Ita?" 6 Sozi ndedekai va siazoho va ne'ena kamavu Sia, loakaina zi kancara va siazoho Sia. Pala Ruma Isa na'okompa, ro tuntina kai kangge-Na zi dana. 7 Wakatu sozi pakasa ncau va siazoho, Sia hantana tuta-Na ro nggahina zi siazoho, "Dou ma wati wara dosa zi ade weki nggomizoho, co'opu sia zimatova ulu kai wadu zi dou siwe ede." 8 Sawa'u va ede Ruma Isa oko mbalina ro tunti walina zi dana. 9 Sawa'u va ringana nggahi ndede Ruma Isa, siazoho lao tu'u wi'ina hizi ede, savua-savua tampu'u ma tua. Cumpukaina Ruma Isa kesena mawara ta ede lavo dou siwe ma mbuipu kizi zi hizina. 10 Edempara Ruma Isa hantana tuta-Na ro nggahina zi dou siwe ede, "Taveku siazoho sara'ana? Savua wati wara ma hukum nggomi?" 11 "Io wati, Pa," cambena. "Taho," nggahi Ruma Isa, "Nahu rau wati hukum-Ku nggomi. Ake laora, aina karawi walimu dosa." 12 Ruma Isa nuntu ra nggahi walina zi dou mamboto, nggahi-Na, "Nahura taroa dunia. Dou ma vatu Nahu wati zimalampa zi ade rindikaina, pala nantau taroa mori ra wokona." 13 "Ake Ita manuntu ra nggahi mavoha weki ndai-Mu," nggahi dou-dou Farisi ede zi Sia, "nuntu ra nggahi-Mu wati podana." 14 Cambe va Ruma Isa, "Konena Nahu nuntu ra nggahi-Ku mavoha weki ndai-Ku, nuntu ra nggahi-Ku ede napodaku; vara Nahu kavade ratavena maikai Nahu ro tave zi laokai Nahu. Nggomizoho wati vademu ratavena ramaikai Nahu ro taveku zi laokai Nahu. 15 Nggomizoho paresa ncihi ra ncara dou kai cara manusia; Nahu wati paresaku ncihi ra ncara kone savua dou. 16 Pala paresasi va Nahu ncihi ra ncara dou, raparesa-Ku ede na'adi, vara Nahu wati kese-Ku; Ama ma ranggadu Nahu wara sama-sama lavo Nahu. 17 Zi ade Hukum Musa ratunti ndake: Nuntu ra nggahi ma poda edezu nuntu ra nggahi razi zua dou. 18 Ma nuntu ra nggahi mavoha Nahu wara zuana -- Nahu ro Ama ma ranggadu Nahu." 19 "Teveku Ama-Mu ede?" nggahi siazoho. Cambe va Ruma Isa, "Nggomizoho wati patamu Nahu ro Ama-Ku, mapatasi va nggomizoho Nahu, pasti nggomizoho mapata rauku Ama Nahu." 20 Sara'ana ede ranggahi va Ruma Isa wakatu Sia wunga tei-Na zi Bait Allah zeni lavo peti-peti hizi zonggo ra mbeikai piti. Pala wati kone savua dou rau ma wa'u Sia, vara watipu raka wakatuna. 21 Nggahi wali Ruma Isa zi siazoho, "Nahu zimalao, ro nggomizoho zimangupa Nahu, pala nggomizoho zimamade ade dosamu. Aka hizi laokai Nahu, nggomizoho wati loamu laokai." 22 Ndazi nggahi dou-dou mana'ekai Yahudi, "Kombisi Sia nane'eku hade weki ndai-Na, vara nggahi Sia, 'Aka hizi laokai Nahu, nggomizoho wati loamu maikai.' " 23 Edempara nggahi Ruma Isa zi siazoho, "Nggomizoho ramaimu ta awa; pala Nahu ramai-Ku ta ese. Nggomizoho razi duniana; Nahu laina razi dunia. 24 Vara ndedena Nahu nggahiku zi nggomizoho, va one nggomizoho zimamade zi ade dosa-dosamu. Ro podana nggomizoho zimamade zi ade dosa-dosamu, nggara watisi imbimu va one 'Nahura Sia zi pehekai NAHU WARA'." 25 "Nggomi cou sapodakaina?" sozi va siazoho. Cambe va Ruma Isa, "Zi au waliku nuntu ra nggahi lavo nggomizoho! 26 Mboto walipu lampa rawi mavoha nggomizoho zi ne'eku nggahi ra paresa ncihi ra ncaramu va Nahu. Pala Sia ma ranggadu Nahu loa zi imbi. Ro Nahu mangoana zi dunia au raringa va Nahu razi Sia." 27 Siazoho wati loana ka'ao va one Sia wunga nuntu ra nggahina zi siazoho mavoha Ama. 28 Vara ndedena nggahi Ruma Isa zi siazoho, "Peasi nggara nggomizoho wa'ura kazese ra kantasamu Ana Manusia, nggomizoho zimavade va one 'Nahura Sia ma zipehekai NAHU WARA', ro nggomizoho zimavade va one wati wara kone savua rakarawi va Nahu razi ndai Nahu. Nahu nggahimpa au rangoa ra tei va Ama zi Nahu. 29 Ro Sia ma ranggadu Nahu wara sama lavo Nahu. Sia wati paranana co'o wi'i Nahu kese, vara Nahu makarawi ncau au makasana wea ade-Na." 30 Sawa'u va nggahi sara'ana va Ruma Isa ede, mboto dou ma'imbi zi Sia. 31 Edempara nggahi Ruma Isa zi dou-dou Yahudi ma wa'ura imbi zi Sia, "Nggara mavatusi va nggomizoho mori vune rangoa ra tei va Nahu nggomizoho poda-poda vatumu Nahu, 32 ndazi nggomizoho zimapata lampa rawi mapoda, ro lampa rawi mapoda ede zimahori kalosana nggomizoho." 33 "Madazoho ake londo ra mai Ibrahim," nggahi siazoho, "Madazoho watipu iumu ndazi ada cou-cou rau! Auku aona nggahi Ita, 'Nggomizoho zihori kalosa'?" 34 "Nancihi poda nggahi Nahu ake," nggahi Ruma Isa zi siazoho, "Dou ma karawi dosa, edezu ada dosa. 35 Ro savua ada wati ntauna hizi zi ngge'e impikaina zi ade iwa ra weki, pala ana zi ru'u santoi-ntoina nantau hizi ade iwa ra wekina. 36 Vara ndedena, nggara Ana mahori kalosa nggomizoho, nggomizoho poda-poda hori weki. 37 Nahu vade nggomizoho ake poda londo ra mai la Ibrahim. Pala nggomizoho mane'e hade Nahu, vara nggomizoho wati ngawamu tarima rangoa ra tei va Nahu. 38 Au ra'eda va Nahu zi Ama-Ku, edeku zi nuntu ra nggahi va Nahu. Pala nggomizoho makarawiku au rangoa ra tei va ama ndaimu." 39 Cambe va siazoho, "Ama madazoho edezu Ibrahim." "Pai poda-podasi nggomizoho ana-ana la Ibrahim," nggahi Ruma Isa, "pasti nggomizoho makarawiku au rakarawi va la Ibrahim. 40 Nahu karonggaku zi nggomizoho ruku ra rawi mataho raringa va Nahu zi Ruma Hatalla, pala nggomizoho mane'eku hade Nahu. Ibrahim wati karawina vune ede! 41 Nggomizoho karawimu au rakarawi va ama ndaimu." Cambe va siazoho, "Madazoho laina ana-ana haram. Ama madazoho savuampa, edezu ndai Ruma Hatalla." 42 Edempara nggahi Ruma Isa zi siazoho, "Nggara podasi Ruma Hatalla ede Amamu, nggomizoho zimameci ra ca'u Nahu, vara Nahu ramaiku razi Ruma Hatalla. Nahu maiku laina rakane'e ndai-Ku, pala Sia ma ranggaduna Nahu. 43 Vavauku nggomizoho wati loamu ka'ao au ranuntu ra nggahi Nahu? Vara nggomizoho wati wa'umu taha kade'e rangoa ra tei va Nahu. 44 Ibilis amamu, ro nggomizoho mangawa vatu rakane'e amamu. Ra'aipu saramba wa'una Ibilis ede mahade dou. Sia watipu paranana lu'u tamapoda ra mancihi, vara wati wara ruku ra rawi mataho zi sia. Sia nanuntu cowasi ede nancihi ncao mpa, vara wa'ura ndede tabe'ana. Sia macowa, ro ramai kai sara'ana macowa. 45 Pala Nahu manggahi mapoda ra mancihi, ro vara ndedena nggomizoho wati imbimu zi Nahu. 46 Couku zi ade weki nggomizoho maloa mbei bukuti va one wara dosa zi Nahu? Nggara nggahisi va Nahu lampa rawi mapoda, vavauku nggomizoho wati imbikaimu zi Nahu? 47 Dou ma mai razi Ruma Hatalla, naringa ra kade'eku nggahi ra eli Ruma Hatalla. Pala nggomizoho laina razi Ruma Hatalla, vara ndedena, nggomizoho wati ngawakaimu kade'e." 48 Cambe va dou-dou Yahudi zi Ruma Isa, "Savuana ncarasi nggahi va nami va one Nggomi dou Samaria ralu'ukai va seta?" 49 Cambe va Ruma Isa, "Nahu wati lu'ukai va seta. Nahu malia ra horoma Ama-Ku, pala nggomizoho makavawa ra katuna Nahu. 50 Nahu wati ngupaku lia ra horoma zi ru'u weki ndai-Ku. Wara savua ma usaha wea lia ra horoma zi ru'u va Nahu, ro Sia ma paresa ncihi ra ncara. 51 Ncihi poda nggahi-Ku ake, dou ma vatu nggahi ra eli Nahu, santoi-ntoina wati zimamade." 52 Edempara nggahi dou-dou Yahudi ede zi Ruma Isa, "Ake nami poda-poda vademu va one Nggomi wa'ura lu'u kai va seta! Ndai la Ibrahim wa'ura made, ndede rauja sara'ana nabi. Pala nggahi va Nggomi, 'Dou ma vatu nggahi ra eli Nahu, santoi-ntoina wati zimamade.' 53 Nggara ndai la Ibrahim wa'ura made, ro nabi-nabi sara'ana wa'ura made rau, Nggomi ake couku? Savua na'epu Nggomi ntewi kaisi lavo ama nami Ibrahim?" 54 Cambe va Ruma Isa, "Pai ngupasi va Nahu zese ra ntasa zi ru'u va ndai Nahu, zese ra ntasa ede wara aona. Ruma Hatalla Ama-Ku makazese ra ntasana Nahu. Mavoha Sia nggomizoho manggahi Sia edezu Ruma Hatalla nami. 55 Sapodakaina nggomizoho wati patamu Sia. Pala Nahu kapataku Sia. Pai nggahisi va Nahu va one Nahu wati pataku Sia, ndazi Nahu dou macowa, sama vune nggomizoho. Nahu kapataku Sia, ro mato'a zi ngoa ra tei-Na. 56 Amamu la Ibrahim naneo poda adena va one sia zima'eda ainaina Nahu. Sia wa'ura edana ro Sia neo poda adena!" 57 Edempara nggahi dou-dou Yahudi zi Ruma Isa, "Umu Nggomi watipu wa'una lima mpuru mba'a, ro Nggomi wa'ura eda-Mu la Ibrahim?" 58 Cambe va Ruma Isa, "Poda Nahu manggahi zi nggomizoho: sawatipu wara la Ibrahim, Nahu wa'ura wara." 59 Edempara dou-dou Yahudi ede wehana wadu zi tovakaina Sia; pala Ruma Isa cilina weki, edempara lao tu'u wi'ina Bait Allah.

9:1 Wunga lampa Ruma Isa, Sia edana dou ma mbuda ra'aipu wara wa'una. 2 Anamori Ruma Isa sozina zi Ruma Isa, "Pa Guru, vavauku dou ake ranggana kambuda? Savua va dosa ndaina atao vara dosa ama ra inana?" 3 Cambe va Ruma Isa, "Sia mbudana laina vara dosa ndaina atao dosa dou matuana, pala loakuzu eda va dou kuasa Ruma Hatalla makarawi zi ade weki dou ede. 4 Salama mbuipu taroa ai, ndai pavuaku karawi lampa rawi razi Sia ma ranggadu Nahu. Aimangazi zimawontu, ro kone savua dou wati zimaloa karawi. 5 Salama Nahu zi dunia ake, Nahura taroa dunia." 6 Sawa'u va nggahi ndedena Ruma Isa katufena zi dana, ro kacampona oi fela-Na ede lavo dana. Edempara kandaikai va Sia zi mada dou ede, 7 edempara nggahi Sia zi dou ede, "Lao wacapu pahumu zi Kolam Siloam." (Siloam aona 'Zinggadu'.) Ndazi dou ede lao wacana pahuna. Wakatu dula mbalina, sia wa'ura loana eda. 8 Dou-dou kompe ra peina ro dou-dou ma sawatipu va ede ma'edana sia ma raho sadeka, nggahi menana, "Savua laina sia akesi ma taki doho raho sadeka?" 9 Wara ma nggahi, "Sia romo." Pala wara rauja ma nggahi, "Laina, sia sarai vune pahu dou ede." Pala nggahi va ndai dou ede, "Madara sia." 10 "Vuneku ndazina sampe nggomi loakaimu eda?" nggahi siazoho zi sia. 11 Cambe va sia, "Dou ma ngara Isa ede mandawi sato'i dana makarezo, edempara kandaina zi madaku ro nggahi-Na, 'Lao wacapu pahumu zi Kolam Siloam.' Edempara mada laoku. Ro wakatu mada wacaku pahu, mada loaku eda." 12 "Taveku dou ede?" sozi va siazoho. Cambe va sia, "Io wati vadeku." 13-14 Ainaina ede edezu ainaina Sabat wakatu Ruma Isa kacampona dana lavo oi fela-Na zi loakaina kandazi dou mambuda ede loa eda. Ndazi dou ma akana ede mbuda ede lao wa'a aka dou-dou Farisi. 15 Siazoho sozi rauna zi sia ravunena sia loakaina eda. Cambe va sia, "Sia makandaina dana rezo zi madaku, edempara mada wacaku ro mada loaku eda." 16 Pila-pila dou ade weki dou Farisi ede manggahi, "Wati lu'u va aka dou ma karawina ake ramaina ta Ruma Hatalla, vara Sia wati kandazi auna ainaina Sabat." Pala nggahi va dou makalaina, "Wati lu'u va aka dou ma dosa makarawi visa ra guna vune ake?" Edempara wontu lalompa cence ncihi zi ade weki siazoho. 17 Edempara sozi wali va dou-dou Farisi zi dou ede, "Au kananu nggomi mavoha Sia ma kandazina nggomi loa eda?" "Sia nabi," cambe va dou ede. 18 Pala dou-dou mana'ekai Yahudi ede wati ne'ena imbi va one dou ede poda mbudana sawatipu va ede ro ake wa'ura loa eda. Vara ndede siazoho ouna dou matuana, 19 ro sozina, "Savua poda ake anamu ranggahimu mbuda ra'aipu ranggana wa'u? Vuneku loakaina eda ake?" 20 Ina ra ama ana dou ede macambe, "Poda ake ana madazoho; ro podana sia mbudana ra'aipu ranggana wa'u. 21 Pala ravunena sia loakaina eda ake, madazoho wati vadeta. Ro cou ma rakandazina sia loa eda, ede rau madazoho wati vademu. Tasozi lalompa zi ndaina, sia wa'ura na'e; sia naloa cambe va ndaina." 22 Ina ra ama ana dou ede nggahi ndedekaina vara siazoho nadahuku zi dou-dou mana'ekai Yahudi; vara siazoho ede wa'ura kasavuana nggahi, va one dou mangaku Isa Sangaji Mambei salama, wati loa walina lu'u zi ade uma sambeakai. 23 Vara ndedena ina ra ama ana dou ede nggahina, "Sia wa'ura na'e; tasozi lalompa zi ndaina." 24 Edempara siazoho ou walina dou ma rambuda akana ede, ro nggahina zi sia, "Sumpapu va one nggomi zimanggahi ma poda. Nami mavade va one dou ede dou madosa." 25 "Savua Sia nadosa atao wati," cambe va dou ede, "mada wati vadeku. Pala savua lampa rawi mada vadeku; ntoina mada mbudaku, ake mada wa'ura loa eda." 26 Edempara siazoho nggahi walina zi sia, "Sia au rakarawina zi nggomi? Vuneku Sia ndawina nggomi loa eda?" 27 Cambe va dou ede, "Wa'ura ngoa va mada zi itazoho, pala wati ngawata kade'e va itazoho. Vavauku itazoho mane'e kade'e wali? Kombisi itazoho mane'e ndazi anamori Sia rau?" 28 Edempara siazoho i'a ra va'ana sia ro nggahina, "Nggomiku anamori-Na; laina nami! Nami mavatuku la Musa. 29 Nami mavadeku va one Ruma Hatalla wa'ura nuntuna zi la Musa. Pala mavoha dou ede, nami wati vademu ratave ramaikai-Na." 30 Cambe va dou ede, "Wati lu'u va aka va one itazoho wati vadeta ratave ramaikai-Na, pala Sia wa'ura kandazina mada loa eda. 31 Ndai wa'ura vade va one Ruma Hatalla wati ringa rakade'ena dou madosa, malaisi dou ma lia ra horoma Ruma Hatalla, ro makarawina rakane'e-Na. 32 Ra'aipu tampu'u ndazi dunia watipu wara ringa wara dou maloa kandazi dou ranggana mbuda loa eda. 33 Nggarasi dou ede laina razi Ruma Hatalla, Sia wati loana ndawi au-au." 34 Cambe va siazoho, "Au? Nggomi ma vini va dosa ra'aipu ranggana wa'u, nggomi mane'e ngoa ra tei nami?" Ndazi tampu'u ede sia kanta lu'u zi ade uma sambeakai. 35 Ringa va Ruma Isa va one siazoho wa'ura kantana dou ede lu'u zi ade uma sambeakai. Sia ngupana dou ede edempara nggahina zi sia, "Savua nggomi ma'imbiku zi Ana Manusia?" 36 Cambe va dou ede, "Cou Sia, Ruma? Tangoa to'ipu zi mada loakuzu mada imbi zi Sia." 37 "Nggomi wa'ura edamu Sia," cambe va Ruma Isa. "Sia ma wunga nuntu lavo nggomi ake." 38 "Mada imbi, Ruma," nggahi dou ede, edempara sujuna zi tando Ruma Isa. 39 Nggahi Ruma Isa, "Nahu maiku zi dunia ake zimaparesa; loakuzu dou ma mbuda naloa eda, ro dou ma loa eda, zimandazi mbuda." 40 Pila-pila dou Farisi ma wara ta ede maringa nggahi ndede Ruma Isa, edempara sozi va siazoho zi Sia, "Aona nggahi va Nggomi ede nami ake rau mbuda?" 41 Cambe va Ruma Isa, "Pai mbudasi nggomizoho, nggomizoho wati dosamu. Pala va nggahi nggomizoho, 'Nami ma'edamu,' ede aona nggomizoho mbuipu dosamu."

10:1 "Nancihi podaku nggahi Nahu ake: Dou ma lu'u ade uma jimba kai nggoncuna kuta, ro wati lu'una kai taza, pala nalu'uku zi ncai makalai, dou ede dou mampanga ro dou maparampo. 2 Pala dou ma lu'u kai taza, sia edeku ompu jimbana. 3 Dou majaga uma jimba nahengga weaku taza ncai zi ru'una, ro jimba-jimbana naringa ra kade'eku elina wakatu sia ouna siazoho kai ngara cua ndaina ro mazende siazoho lao losa. 4 Sawa'u va jimba-jimba ede wa'a kalosa, ma'ompukaina nalampa ulu, ro jimba-jimba nalampa vatuku sia vara siazoho napataku elina. 5 Siazoho wati zimangawa lampa vatu dou makalai, mala narai razi dou ede vara wati patana elina." 6 Ruma Isa caritana conto ra ibara ede, pala siazoho wati loana ka'ao auku ne'e va Sia. 7 Ndazi nggahi Ruma Isa sakali wali, "Ncihi poda nggahi Nahu ake: Nahura taza ncai zi ru'u va jimba. 8 Samenana ma mai sawatipu Nahu edezu dou mampanga ro dou marampo, pala jimba-jimba wati kade'ena eli siazoho. 9 Nahura taza. Cou-cou malu'u kai ncai Nahu zimasalama; sia lu'u losana ro narakaku zi ngaha ra nonona. 10 Dou mampanga mai va ne'ena mpangampa, zimahade dou, ro zimane'e ka'iha mawara. Pala Nahu maiku loakuzu manusia raka mori maremba poda. 11 Nahuku ompu jimba ma taho. Ompu jimba ma taho nambeiku nawana zi ru'u va jimba-jimbana. 12 Dou ra'ufa ma laina ompu jimba ro lai rauna dou mantau jimba-jimba ede, zimarai tu'u wi'i jimba-jimba, nggara na'edasi va sia lako doro mamai. Edempara jimba-jimba ede nakumpa ro nakambari mburaku va lako doro. 13 Dou ra'ufa ede raina, vara sia karawina vara ufa. Sia wati tio katahona jimba-jimba ede. 14-15 Nahura ompu jimba ma taho. Sama vune Ama mapata Nahu ro Nahu mapata Ama, ndede rauja Nahu mapata jimba-jimba-Ku ro siazoho rau napataku Nahu. Nahu kazonggo nawa-Ku ziru'u va siazoho. 16 Mbuipu warana jimba-jimba makalaina ma ntau Nahu rau, pala wati lu'u va kalompo jimba ake. Siazoho rau pavuaku wa'a rau va Nahu ro siazoho rau zimakade'e eli Nahu. Siazoho sara'ana zimandazi savua kalompo lavo savua ompu jimba. 17 Ama mameci ra ca'u Nahu vara Nahu mazonggo nawa-Ku, zimatarima mbali. 18 Wati kone savua dou maloana weha razi Nahu. Nahu mazonggo kai rakane'e ndai-Ku. Nahu mantau kuasa zimazonggona, ro mantau kuasa zimaweha mbali. Edeku taki ra puta ratarima va Nahu razi Ama-Ku." 19 Vara nggahi ndedekai Ruma Isa, dou-dou Yahudi tampu'ura cence ncihina. 20 Mboto ma nggahi, "Sia lu'ukai va seta! Sia naringu! Zi aukaimu ringa ra kade'e zi Sia?" 21 Pala wara rauja ma nggahi, "Dou-dou ralu'ukai va seta wati nuntu ra nggahi ndedena! Savua naloa seta makandazi dou mambuda ndazi loa eda?" 22 Zi Yerusalem dou-dou mawunga kandihana Ainaina Kasahakai Bait Allah. Wakatu ede oru vusi. 23 Ruma Isa wunga lampana zi katere Salomo zi ade Bait Allah, 24 wakatu mai dou-dou Yahudi kavoro weki zi kompe Ruma Isa. Nggahi siazoho, "Sampe vune aiku Nggomi co'omu nami mbali mbua ade? Tangoa ntiri to'ipu, Nggara Nggomi poda-podasi Sangaji Mambei salama." 25 Cambe va Ruma Isa, "Wa'ura nggahi va Nahu zi nggomizoho, pala nggomizoho wati imbimu. Karawi rakawi va Nahu kai ngara Ama-Ku, mabukutina mavoha Nahu. 26 Nggomizoho wati imbimu vara nggomizoho wati lu'una zi golonga jimba-jimba Nahu. 27 Jimba-jimba-Ku nakade'eku eli Nahu. Nahu kapata-Ku siazoho, ro siazoho navatuku Nahu. 28 Nahu mambei siazoho mori masapodakaina ro ma'ederahizi, ro zi ru'u santoi-ntoina siazoho wati zimaleli. Wati wara kone savua dou maloana weha rampa zi rima Nahu. 29 Ama-Ku, ma wa'ura mbeina siazoho zi Nahu, mancewi ese razi samenana. Ro wati wara kone savua dou maloana weha rampa siazoho zi ade rima Ama. 30 Nahu ro Ama edezu savua." 31 Edempara dou-dou Yahudi weha walina wadu zi tovakaina Ruma Isa. 32 Pala nggahi Ruma Isa zi siazoho, "Nggomizoho wa'ura edamu Nahu makarawi mboto lampa rawi mataho, rakau kai va Ama zi Nahu. Razi samenana lampa rawi ede, ma veku ma kamaikaina nggomizoho mane'e tova Nahu kai wadu?" 33 Cambe va dou-dou Yahudi ede, "Laina vara karawi-Mu ma taho ede zi ne'e tovakai va nami Nggomi kai wadu, pala vara Nggomi i'a ra va'amu Ruma Hatalla. Nggomi savua dou manusia, mane'e kandazi weki ndai-Mu Ruma Hatalla." 34 Edempara cambe va Ruma Isa, "Savua laina zi ade Buku Hukum nggomizoho ratunti: Nggahi Ruma Hatalla, 'Nggomizoho edezu berhala'? 35 Ndai wa'ura vade va one au ratunti zi ade Alkitab zimangge'e santoi-ntoina. Ndazi, nggara Ruma Hatalla matangara kai 'berhala' zi dou-dou ma tarima nggahi ra eli-Na, 36 vavauku nggomizoho nggahikaimu Nahu ma'i'a ra va'a Ruma Hatalla vara Nahu nggahiku Nahu Ana Ruma Hatalla? Nahu poda rakazale va Ama ro nggaduna zi dunia. 37 Nggara watisi karawi va Nahu rakaukai va Ama, aina imbimu zi Nahu. 38 Pala vara Nahu makarawina, imbipu zi au rakarawi va Nahu ede, konena nggomizoho wati ne'emu imbi zi Nahu. Kai ndedena nggomizoho vade ro loa ka'ao va one Ama ngge'empa savuana lavo Nahu, ro Nahu ngge'empa savua lavo Ama." 39 Siazoho mane'e usaha wali wa'u Ruma Isa, pala Sia hori weki zi siazoho. 40 Ruma Isa dula mbali lao aka ipa vae va Sori Yordan, zi hizi la Yahya ntoina kandeu karasona dou, edempara ngge'ena ta aka. 41 Mboto dou mamai zi Sia. Nggahi siazoho, "Yahya wati karawina lampa rawi mavisa ra guna, pala sara'a ranggahina mavoha dou ake napodaku." 42 Edempara mboto dou ta aka ma'imbi zi Ruma Isa.

11:1 Savua dou ma ngara la Lazarus nge'e zi Betania sama-sama lavo amancawana la Maria ro la Marta. 2 Maria edezu dou siwe ma lua mina mengi zi ezi Ruma, ro ma'osa kamango kai honggona. Zisavua wakatu la Lazarus hengge. 3 La Maria ro la Marta kahabana zi Ruma Isa, "Ruma, amania madazoho rameci ra ca'u va Ita ede wunga henggena." 4 Wakatu ringa va Ruma Isa haba ede, nggahi Sia, "Supu ake wati zi madekai. Ake ndazikaina loakuzu zi kadese ra kantasakai Ruma Hatalla, ro vara ndedena Ana Ruma Hatalla zi kazese ra kantasa rau." 5 Ruma Isa nameci ra ca'uku la Marta, Maria ro la Lazarus. 6 Pala wakatu Ruma Isa ringa haba va one la Lazarus wunga henggena, Sia sangaja ngge'e zi hizi-Na zua nai wali. 7 Sawa'u va ede Sia ampona nggahi zi anamorizoho-Na, "Maira ndai talaoku dula mbali aka Yudea." 8 Cambe va siazoho, "Pa Guru, vou podapu dou-dou Yahudi mane'e tova Ita kai wadu ro ake Ita mane'eku dula mbali ta aka?" 9 "Savua lainsi aimarai ntoina sampuru zua jam?" nggahi Ruma Isa. "Dou ma lampa zi wakatu aimarai, wati satununa vara sia na'edaku taroa dunia ake. 10 Pala dou ma lampa zi wakatu aimangazi, nasatunuku, vara wati wara taroa zindaina." 11 Ndedeku nggahi va Ruma Isa. Edempara nggahi wali va Sia, "Soba ndai la Lazarus wa'ura maru, pala Nahu zimalao katu'una sia." 12 Nggahi anamori Ruma Isa, "Ruma, nggarasi la Lazarus maru, peasi sia zimataho." 13 Aona nggahi Ruma Isa edezu va one la Lazarus wa'ura made. Pala kacai va siazoho aona nggahi Ruma Isa edezu va one la Lazarus maru biasa. 14 Vara ndedena nggahi Ruma Isa zi siazoho kai ngoa ntirina, "Lazarus wa'ura made. 15 Pala Nahu neo ade rauku Nahu wati wara ta aka, vara nancewi tahopu zi ru'u va nggomizoho, loakuzu nggomizoho imbi. Mai ndai talaora ake zi la Lazarus." 16 Tomas zipehekai "La Ndua" manggahi zi lengazohona masama-sama anamori Ruma Isa, "Mai ndaita lao vatu, co'opu ndai made sama lavo Sia!" 17 Wakatu Ruma Isa rongga zi hizi ede, la Lazarus wa'ura upa nai ntoina ra'umbu. 18 Betania zeni lavo Yerusalem, kira-kira tolu kilo mete zo'ona. 19 Mboto dou Yahudi mawa'ura mai tio la Marta ro la Maria zimarere siazoho vara made amaniana. 20 Wakatu ringa va la Marta va one Ruma Isa mamai, sia losa weha aona Ruma Isa, pala la Maria ngge'e zi uma. 21 Nggahi la Marta zi Ruma Isa, "Ruma, paina wara Ruma ta ake wakatu ede, pasti amania mada wati zimamade. 22 Konena ndede vade va mada va one wakatu ake wa'u Ruma Hatalla zimambei au-au raziraho va Ita zi Sia." 23 "Amaniamu zimamori mbali," nggahi Ruma Isa zi Marta. 24 Cambe va la Marta, "Mada kavade la Lazarus zimamori mbali wakatu kamori mbali dou mamade peasi zi Ainaina Kiama." 25 "Nahuku ma mbei mori ro makamori mbali dou mamade," nggahi Ruma Isa zi Marta. "Dou ma imbi zi Nahu zimamori mbali, konena sia wa'ura made. 26 Ro dou mamori ma imbi zi Nahu, santoi-ntoina wati zimamade. Savua ma'imbiku nggomi zi lampa rawi ede?" 27 "Ruma," cambe va la Marta, "mada ka'imbiku Ita Ana Ruma Hatalla, Sangaji Mambei salama zimamai zi dunia ake." 28 Sawa'u va nggahi ndede la Marta, sia lao ouna la Maria, sa'ena ro ngoa kanarina zi sia, "Pa Guru wara ta ake; Sia sozina nggomi." 29 Ringana ede la Maria tu'u rocina, edempara lao rakana Ruma Isa. 30 Wakatu ede, Ruma Isa watipu lu'una zi desa. Sia mbuipu zi hizi raweha aokai va la Marta. 31 Dou-dou Yahudi ma wunga rere la Maria zi uma, edana la Maria tu'u ro lao losa rocina; ndazi siazoho lao vatuna sia, vara kacai va siazoho sia nalao nangiku aka rade. 32 Wakatu Maria rongga zi hizi Ruma Isa ro edana Sia, suju nemba va la Maria zi tando Sia ro nggahina, "Ruma, paisi wara Ita ta ake wakatu ede, pasti amania mada wati madena." 33 Wakatu eda va Ruma Isa nangi la Maria, ro dou-dou Yahudi ma mai sama lavo la Maria manangi rau, nata ade-Na, ro Sia zi edamu na'ipiku ncoki ade-Na. 34 Ndazi sozi va Sia zi siazoho, "Taveku nggomizoho umbukaimu sia?" "Mai tatiopu, Ruma," cambe va siazoho. 35 Edempara nangi Ruma Isa. 36 Ndazi nggahi va dou-dou Yahudi ede, "Tiopu, nawancuku meci ra ca'una zi la Lazarus!" 37 Pala wara zi ade weki siazoho ma nggahi, "Sia nandawiku dou mambuda ndazi loa eda, vavauku Sia wati loana tapa loakuzu la Lazarus aina madena?" 38 Ruma Isa na'ipiku ncoki ade wali-Na, edempara laona aka rade. Rade ede edezu savua karombo ravonto kai wadu na'e. 39 "Kiri pesopu wadu ede," nggahi Ruma Isa. Cambe va la Marta, amancawa dou ma made ede, "Pala, Ruma, sia wa'ura upa nai ra'umbu. Tantu wa'ura wou mbai!" 40 Nggahi Ruma Isa zi la Marta, "Wa'ura nggahi va Nahu zi nggomi: Nggara ma'imbisi va nggomi, nggomi zima'eda, poda na'ipiku na'ena kuasa Ruma Hatalla!" 41 Edempara siazoho pesona wadu ede. Edempara Ruma Isa zongana langi ro nggahi-Na, "Tarima kasi, Ama, vara Ita wa'ura ringata Mada. 42 Mada kavade va one Ita maringa ncauku Mada, pala Mada manggahi ake, zi ru'u va dou-dou ma wara ta ake; loakuzu siazoho imbina va one Ita ma ranggadu Mada." 43 Sawa'u va nggahi ndedena, Ruma Isa nggahi kana'ena, "Lazarus losara!" 44 Edempara losa dou ma wa'ura made ede. Rima ra ezina mbuipu ra ponte kai salolo, ro pahuna ravonto kai satove salolo pontekai pahu. "Salo'apu salolona loakuzu sia loa lampa," nggahi Ruma Isa zi dou-dou ta ede. 45 Mboto dou-dou zi ade weki dou-dou Yahudi ma mai tio la Maria, imbi zi Ruma Isa wakatu siazoho edana lampa rawi mandazi ede. 46 Pala pila-pila dou zi ade weki siazoho malao aka dou Farisi ro ngoana au wa'u rakarawi va Ruma Isa. 47 Vara ndedena dou-dou Farisi ro dou-dou mana'ekai imam mbolona lavo Mahkama Agama. Nggahi siazoho, "Auku zi karawi va ndai? Dou ake ndawina mboto rawi mavisa ra guna! 48 Nggara co'o ntuwusi va ndai Sia vune ake samenana dou zima'imbi zi Sia. Cumpukaina dou mana'ekai Roma zimamai ro kalelina Bait Allah ro sara'a bangsa ndaita!" 49 Savua dou zi ade weki siazoho ma ngara Kayafas, dou mana'ekai imam-imam wakatu mba'ana ede, manggahi, "Nggomizoho wati vademu au-au. 50 Savua nggomizoho wati kawaramu weki va one zi ru'u ela ra dou, natahopu savua dou mamade ntewi kaisi sara'ana bangsa maleli?" 51 Sapodakaina Kayafas nggahi ndedena, laina razi kananu ndaina. Pala kai dou mana'ekai imam-imam wakatu mba'ana ede sia makaronggana ranggahi Ruma va one Ruma Isa zimamade zi ru'u va bangsa Yahudi. 52 Ro laina zi ru'u va bangsa Yahudi mpoa, pala zimakavoro ro zimasavuana ana-ana Ruma Hatalla ma ncengga rero. 53 Tampu'u ainaina ede dou-dou mana'ekai Yahudi mafakana ne'e hade Ruma Isa. 54 Vara ndedena Ruma Isa wati walira kizi zi tando dou mamboto zi woha dou Yahudi, Sia tu'u wi'ina Yudea, edempara laona aka kota mangara Efraim zeni lavo so sarae. Ta ede Sia ngge'e samana lavo anamorizoho-Na. 55 Wakatu ede wa'ura zeni Ainaina Aruraja Paskah Yahudi. Mbotora dou-dou razi desa-desa wa'ura lao aka Yerusalem zi kalampakaina upacara karaso sarumbu sawatipu ndihakai ede. 56 Siazoho ngupana Ruma Isa, ro wakatu kavoro weki zi Bait Allah, nggahi siazoho zi savua lavo masavuana, "Auku kananu nggomi? Kombi Sia wati maina zi ndihakai ake," 57 Siazoho nggahi ndedekaina vara dou-dou mana'ekai imam ro dou-dou Farisi wa'ura kalosana parenta va one dou ma vade tave warakai Ruma Isa, pavuaku lapona loakuzu Sia zi wa'u.

12:1 Ini nai sawatipu Ainaina Aruraja Paskah, Ruma Isa lao aka Betania. Zi hizi ede ngge'ekai la Lazarus rawa'u kamori mbali va Sia razi madena. 2 Ta aka Ruma Isa mbei ao va siazoho ngaha ra nono, ro la Marta masadia weana. Lazarus ro dou-dou mamai doho ngaha sama lavo Ruma Isa. 3 Edempara mai la Maria kai kira-kira sadompo lite mina mengi narwastu ma nggali poda co'ina. Sia luana mina ede zi ezi Ruma Isa, edempara osana kai honggona. Sara'a uma ede ndazi wou mengi va mina mengi ede. 4 Pala la Yudas Iskariot, savua dou ade weki anamori Ruma Isa -- ma sawa'u va ede zimazonggo Sia zi dou-dou ma musu-Na -- manggahi, 5 "Vavauku mina mengi ede zidalanda kai co'i tolu ratu piti salaka, ro pitina zi mbei zi dou mancoki mori?" 6 Nggahi ndedekai la Yudas laina vara sia matio ra ntanda dou mancoki mori, pala vara sia dou mampanga. Sia ntuwura wehana piti zi kas rakasamakai rawi'i zi sia. 7 Pala nggahi Ruma Isa, "Co'opu dou siwe ede! Sia karawina ake zi ru'u va ainaina umbukai Nahu. 8 Dou mancoki mori wara ncau zi ade woha nggomizoho, pala Nahu wati." 9 Mboto dou Yahudi maringana va one Ruma Isa wara zi Betania, ndazi siazoho laona ta aka. Siazoho lao laina vara Ruma Isa mpoa, pala vara siazoho mane'e eda rau la Lazarus ma wa'ura kamori mbali razi madena va Ruma Isa. 10 Vara edana dou-dou mana'ekai imam nane'eku hade la Lazarus rau; 11 vara sia makandazina mboto dou Yahudi tu'u wi'ina siazoho ro imbi zi Ruma Isa. 12 Vala ai sanai dou mamboto ma wa'ura mai zi kandihakaina Paskah maringana va one Ruma Isa wunga ade lampakaina lao aka Yerusalem. 13 Ndazi siazoho wehana ro'o haju palem edempara lao weha aona Sia, ro nggahina salahona, "Zese ra ntasa zi ru'u Ruma Hatalla! Taho ra ntai Sia ma mai kai ngara Ruma. Taho ra ntai Sangaji Israel!" 14 Ruma Isa rakana savua keledai ndara, ro nentena. Edempara ndazira ratunti zi ade Alkitab: 15 "Aina dahu, ana dou siwe Sion! Tiopu Sangajimu mamai, manente savua keledai ndara!" 16 Ziwakatu ede anamori Ruma Isa watipu loana ka'ao sara'ana ede. Pala sawa'u va Ruma Isa zi kazese ra kantasa kai made-Na, siazoho ampona kawaraku va one rakarawi va dou-dou zi Sia wa'ura tunti ade Alkitab mavoha Sia. 17 Dou-dou ma wara wakatu Ruma Isa ma'ou la Lazarus losa zi ade rade ro kamorina razi madena, manuntu ra nggahi ncau mavoha lampa rawi ede. 18 Vara ndedena dou mamboto ede lao aka Ruma Isa vara siazoho maringana va one Siaku ma wa'ura karawi mavisa ra guna ede. 19 Ndazi dou-dou Farisi nggahina zi savua dou lavo masavuana, "Ndai wati loata karawi au-au! Tiopu, samenana dunia lao vatu Sia!" 20 Zi ade woha dou-dou ma lao aka Yerusalem mane'e lao sambea wakatu ndihakai ede wara rauja pila-pila dou Yunani. 21 Siazoho mai rakana la Filipus ro nggahina, "Cina, nggara loasi, nami mane'e eda angi lavo Isa." (Filipus razi Betsaida zi Galilea.) 22 Edempara la Filipus lao ngoana ede zi la Andreas, ro sawa'u va ede siazoho zuana karonggana zi Ruma Isa. 23 Nggahi Ruma Isa zi siazoho, "Wa'ura raka wakatuna Ana Manusia zi kazese ra kantasa. 24 Nancihi podaku nggahi va Nahu ake: Nggara sanggini gando watisi ngguza zi dana ro madena, gando ede nangge'empa sanggini. Pala madesi isi gando ede, ampona wara hasina mamboto gando. 25 Dou ma meci ra ca'u morina zimambora morina. Pala dou madaca'u morina zi dunia ake, zimasandaka mori masapodakaina ro ma'ederahizi. 26 Dou ma ne'e karawi wea Nahu pavuaku vatuna Nahu; loakuzu ada Nahu loa sama lavo Nahu tavera warakai Nahu. Dou ma karawi wea Nahu zi horoma va Ama Nahu." 27 "Darura ade-Ku; auku zi nggahi va Nahu ake? Savua pavuaku nggahi va Nahu, 'Ama, horipu Mada razi wakatu ake'? Pala justru zima'iu wakatu susa ra ncoki akeku maikai Mada. 28 Ama, zese ra ntasa ngara Ita!" Edempara wara ringa eli razi langi manggahi, "Nahu wa'ura kazese ra kantasaku Sia, ro Nahu zimakazese ra kantasa walina Sia." 29 Dou mamboto ma wara ta ede maringana eli ede. Nggahi siazoho, "Aka karece ai!" Pala wara rauja ma nggahi, "Laina! Mala'eka manuntu lavo Sia!" 30 Edempara nggahi Ruma Isa zi siazoho, "Ringakaimu eli ede, laina zi ru'u pentikai va Nahu, pala zi ru'u pentikai nggomizoho. 31 Ake wa'ura wakatuna dunia zi paresa; ake makuasa zi dunia ake zikakoa. 32 Pala Nahu ake, nggara wa'usi Nahu zikazese ra kantasa ese wawo dunia, Nahu zimahinti sara'a dou zi Nahu." 33 Nggahi ndedekai Sia zi katadakaina vuneku carana made-Na. 34 Nggahi dou mamboto ede zi Sia, "Nggahi Buku Hukum madazoho, Sangaji Mambei salama zimamori santoi-ntoina. Vuneku loata Ita nggahi va one Ana Manusia pavuaku zi kazese ra kantasa ese wawo dunia? Couku Ana Manusia ede?" 35 Cambe va Ruma Isa, "Cuma ru'u samporompa taroa ede wara zi ade woha nggomizoho. Ndazi, lampapu ntawi taroa ede mbuipu warana, loakuzu nggomizoho aina voha va marindikaina. Dou ma lampa zi ade rindikaina wati vadena tave laokaina. 36 Imbipu zi taroa ede, ntawi taroa ede mbuipu warana zi nggomizoho, loakuzu nggomizoho ndazimu ana-ana taroa." Sawa'u va nggahi ndede Ruma Isa, Sia lao tu'u wi'ina hizi ede, ro wati ngawana katada weki zi siazoho. 37 Konena wa'ura mboto rakarawina mavisa ra guna rakarawi va Ruma Isa zi tando siazoho, siazoho wati imbina zi Sia. 38 Edempara ndazira au ranggahi va Nabi Yesaya, "Ruma, couku ma imbi zi haba madazoho? Zi couku kuasa Ruma zi katadakai?" 39 Vara ndedena siazoho wati ngawana imbi, vara la Yesaya wa'ura nggahi rauna, "Nggahi Ruma Hatalla, 40 'Nahu makambudana mada siazoho, zimakaterana ade siazoho; loakuzu mada siazoho wati loana eda, fiki ra kananu siazoho wati loana ka'ao. Loakuzu siazoho aina mbali zi Nahu, edempara Nahu katahoku supu siazoho.' " 41 Nggahi ndedekai la Yesaya vara sia wa'ura edana na'e kuasa Ruma Isa, ro manuntu ra nggahina mavoha Sia. 42 Kone ndedena, mboto dou, kone zi ade weki dou mana'ekai Yahudi imbi zi Ruma Isa. Pala siazoho wati disana mangaku ede kai ngoa ntiri, vara siazoho nadahuku zi dou-dou Farisi kombisi nakantaku lu'u zi ade uma sambeakai. 43 Siazoho na'ipipu ca'una raka roi va manusia ntewi kaisi rakaco'i va Ruma Hatalla. 44 Edempara nggahi Ruma Isa, "Dou ma imbi zi Nahu, laina zi Nahu imbikaina, pala zi Sia ma ranggadu Nahu. 45 Ro dou ma eda Nahu, na'edaku Sia ma ranggadu Nahu. 46 Nahu maiku zi dunia kai taroa, loakuzu sara'ana dou ma imbi zi Nahu vavaina ngge'ena zi ade rindikaina. 47 Dou ma ringa ra kade'ena ngoa ra tei va Nahu, pala wati vatuna -- laina Nahu mahukum sia. Vara maikai Nahu laina zimahukumna dunia ake, pala zimakasalamana. 48 Dou ma daca'u Nahu ro wati kade'ena nggahi ra eli Nahu, wa'ura wara ma zimaparesana. Nggahi ra eli rakarongga va nahu, edeku zimaparesana zi Ainaina Kiama. 49 Vara Nahu wati nuntu ra nggahiku zi rakane'e ndai-Ku; Ama ma ranggadu Nahu, Siaku ma rakauna zi Nahu auku pavua zi karawi va Nahu ro zi karongga va Nahu. 50 Ro Nahu kavade va one parenta-Na ede mambei mori masapodakaina ro ma'ederahizi. Ndazi Nahu makaronggana vune rangoa ra tei va Ama zi Nahu."

13:1 Sanai sawatipu Ainaina Aruraja Paskah, Ruma Isa navadeku va one wa'ura wakatauna Sia tu'u wi'ina dunia ake zilao mbalikaina aka Ama-Na. Sia nameci ra ca'uku dou-dou ma ndazi ntau-Na zi dunia, ro Sia nangge'empa meci ra ca'una siazoho sampe cumpukaina. 2 Ruma Isa ro anamorizoho-Na wunga ngaha sambiana. Ibilis wa'ura kalu'una niana ede zi ade la Yudas ana la Simon Iskariot zizonggokaina Ruma Isa zi dou-dou ma musu-Na. 3 Ruma Isa navadeku va one Ama-Na wa'ura zonggo mbeina sara'ana kuasa zi Sia. Sia navade rauku va one Sia ramaina ta Ruma Hatalla ro zimadula mbali zi Ruma Hatalla. 4 Vara ndedena Sia kizi, runcu jumba-Na, ro zikina kai here loko zi loko-Na. 5 Sawa'u va ede Sia luana oi zi ade savua basi, edempara tampu'una waca wea ezi anamorizoho-Na ro kamangona kai here loko raziki zi loko-Na. 6 Rakara Sia zi la Simon Petrus, ma nggahi, "Ruma, wati lu'ukai va aka Ruma ma waca wea ezi mada?" 7 Cambe va Ruma Isa, "Ake nggomi wati loamu ka'ao au rakarawi va Nahu ake, pala peasi nggomi zimaloa ka'ao." 8 "Aina, Ruma," nggahi la Petrus zi Ruma Isa, "Ai to'ina Ruma mawaca wea ezi mada!" Pala cambe va Ruma Isa, "Nggara watisi waca va Nahu nggomi, nggomi wati wara campo au-aumu lavo Nahu." 9 Nggahi la Simon Petrus, "Nggara ndedesi, Ruma, aina ezi mada mpoa, pala rima ro tuta mada rau!" 10 "Dou ma wa'ura ndeu, nawa'ura raso sara'ana," nggahi Ruma Isa zi la Petrus. "Sia wati paraluna zi karaso wali; selasi ezina. Nggomizoho ake wa'ura raso, pala wati sara'ana." 11 (Ruma Isa wa'ura vade couku zimazonggo Sia zi dou-dou ma musu-Na. Vara ndedena nggahi Sia, "Nggomizoho ake wa'ura raso, pala wati sara'ana.") 12 Sawa'u va Ruma Isa waca weana ezi siazoho, Sia kani mbalina jumba-Na ro doho mbalina. Edempara nggahi Sia zi siazoho, "Savua maloa ka'ao va nggomizoho au rakarawi va Nahu zi nggomizoho voupu ake? 13 Nggomizoho oumu Nahu Guru ro Ruma. Ro poda nandedeku. 14 Nggara Nahu ake Ruma ro Guru nggomizoho mawaca wea ezimu, nggomizoho pavua raupu waca kali cempe ezi angimu. 15 Nahu mambei conto mataho ake zi nggomizoho, loakuzu nggomizoho karawi raumu au rakarawi va Nahu zi nggomizoho. 16 Nancihi poda nggahi-Ku ake: Savua dou ada wati ncewi na'ena zi rumana, ro savua dou ranggadu wati ncewi na'ena zi dou ma ranggaduna. 17 Nggara wa'usi vade va nggomizoho sara'ana ake, taho ra ntika nggomizoho makarawisi. 18 Au ranggahi Nahu ake laina mavoha nggomizoho sara'ana. Nahu vade cou-cou ma wa'ura kazale va Nahu. Pala au ratunti ade Alkitab, pavuaku ndazina, edezu 'Dou ma ngaha sama lavo Nahu, zimazonggo Nahu zi dou-dou ma musu Nahu.' 19 Lampa rawi ede karongga va Nahu zi nggomizoho ake, sawatipu ndazina, loakuzu ndazina lampa rawi ede peasi, nggomizoho zima'imbi va one Nahuku Sia ma zi pehe kai NAHU WARA. 20 Nancihi podaku nggahi Nahu ake: Cou matarima ao dou ranggadu va Nahu, natarimaku Nahu. Ro cou matarima Nahu, natarimaku Sia ma ranggadu Nahu." 21 Sawa'u va nggahi ndedena Ruma Isa, Sia na'ipiku lalai ade-Na. Edempara Sia nggahina, "Ncihi poda nggahi-Ku ake: Savua dou zi ade weki nggomizoho zimazonggo Nahu zi dou-dou ma musu Nahu." 22 Anamori-Na ntanda angi menana kai mbora mena akana vara wati vadena couku makasu ede. 23 Anamori ma ipi meci ra ca'u va Ruma Isa doho zi kompe Ruma Isa. 24 La Simon Petrus mambei isara zi sia, loakuzu sia masozi zi Ruma Isa couku makasu-Na. 25 Ndazi anamori ede doho peduna zi Ruma Isa, ro sozina, "Couku sia, Ruma?" 26 Cambe va Ruma Isa, "Dou zi mbei va Nahu roti razeta va Nahu ade mangko, siaku douna." Edempara Ruma Isa wehana sadompo roti, zetana zi ade mangko; edempara mbeina zi la Yudas ana la Simon Iskariot. 27 Sawa'u va la Yudas tarimana roti ede, Ibilis lu'una zi adena. Edempara nggahi va Ruma Isa zi sia, "Karawi rocipu au zi ne'e karawi va nggomi." 28 Wati kone savua dou zi ade weki siazoho ma doho ngaha ra nono ta ede maloa ka'ao vavauku Ruma Isa nggahi ndedekaina zi la Yudas. 29 Wara ma kacai Ruma Isa makau la Yudas weli au-au zi paralu zi ngaha ndihakai ede, atao mbei piti zi ru'u va dou mancoki mori -- vara la Yudas edezu dou manenti piti kas siazoho. 30 Sawa'u va la Yudas tarimana roti ede, sia losa lalona. Ai wa'ura rindi. 31 Sawa'u va lao la Yudas, nggahi Ruma Isa, "Ake Ana Manusia zi kadese ra kantasa, ro Ruma Hatalla zi kazese ra kantasa kai ncai Sia. 32 Nggara Ruma Hatalla zi kazese ra kantasa kai ncai Sia, Sia rau zi kazese ra kantasa va Ruma Hatalla kai weki ndai-Na. Mala Ruma Hatalla zimakazese ra kantasa rocina Sia. 33 Ana-ana-Ku, Nahu wati zimangge'e ntoi wali lavo nggomizoho. Nggomizoho zimangupa Nahu, pala vune rawa'u nggahi va Nahu zi dou-dou mana'ekai Yahudi, ndede rau zi nggahi va Nahu zi nggomizoho; aka hizi zi laokai va Nahu, nggomizoho wati loamu maikai. 34 Lampa rawi vou zi mbei va Nahu nggomizoho: Meci ra ca'upu zi savua lavo masavuana. Sama vune Nahu mameci ra ca'u nggomizoho, ndede rauja nggomizoho pavuaku meci ra ca'u kali cempe angimu. 35 Nggara nggomizoho macua meci ra ca'usi angimu, samenana dou zimavade va one nggomizoho anamori Nahu." 36 "Ruma, Ruma mane'e lao taveku?" sozi va la Simon Petrus zi Ruma Isa. Cambe va Ruma Isa, "Tavera laokai Nahu, nggomi wati loamu lao vatu ake. Nggomi zimavatu kento Nahu." 37 "Ruma, vavauku mada wati loaku vatu Ita ake?" sozi va la Petrus wali. "Mada karela made zi ru'u va Ruma!" 38 Cambe va Ruma Isa, "Savua poda nggomi marela made zi ru'u va Nahu? Zivademu, sawatipu koko janga peasi, nggomi wa'ura tolu kali nggahimu va one nggomi wati patamu Nahu!"

14:1 "Aina darura mena ademu," nggahi Ruma Isa zi siazoho. "Imbipu zi Ruma Hatalla, ro imbi raupu zi Nahu. 2 Zi uma Ama-Ku mboto hizi ngge'ekai. Nahu laoku ta aka zimasadia weamu hizi zi ru'u va nggomizoho. Nahu wati zimanggahi ndede zi nggomizoho, nggara watisi ndazi ndedena. 3 Sawa'u va lao sadia wea va Nahu hizi zi ru'u va nggomizoho, Nahu zimamai mbali ro weha aoku nggomizoho, loakuzu tavera warakai Nahu, ta ede rau warakai nggomizoho. 4 Aka hizi laokai Nahu nggomizoho mavadeku ncaina." 5 Edempara nggahi la Tomas zi Ruma Isa, "Ruma, madazoho wati vadeta taveku zi laokai Ruma, vuneku zi vadekai va madazoho ncaina?" 6 Cambe va Ruma Isa, "Nahuku ncai zipatakai Ruma Hatalla ro zirakakai mori. Wati kone savua dou rau maloa mai zi Ama, nggara watisi kai ncai Nahu. 7 Nggomizoho mapatasi Nahu, pasti nggomizoho mapata rauku Ama Nahu. Ake nggomizoho wa'ura patamu Sia, ro wa'ura edamu Sia." 8 Edempara nggahi la Filipus zi Ruma Isa, "Ruma, taturu tei to'ipu zi madazoho Ama, loakuzu ncihi ade madazoho." 9 Pala cambe va Ruma Isa, "Wa'ura ntoi poda Nahu wara sama-sama lavo nggomizoho, ro wati ngge'epu patamu Nahu, Filipus? Dou ma wa'ura eda Nahu, wa'ura edana Ama. Vuneku loamu nggahi, 'Turu teipu Ama zi madazoho'? 10 Filipus! Savua wati imbi va nggomi, va one Nahu masavua lavo Ama, ro Ama masavua lavo Nahu? Au ranggahi va Nahu zi nggomi, wati nggahi va Nahura zi ade weki ndai-Ku. Ama mangge'empa savua lavo Nahu, Siaku ma karawi sara'ana ede. 11 Imbipu zi Nahu, vara Nahu masavua lavo Ama ro Ama masavua lavo Nahu. Atao sakura-kurana, imbipu va one au rawa'u karawi va Nahu. 12 Ncihi poda nggahi va Nahu ake: Dou ma imbi zi Nahu, zimakarawi au rawa'u karawi va Nahu, -- mala sia zimanaha karawi ma ncewi na'e wali -- vara Nahu malao aka Ama. 13 Ro au-au raraho va nggomizoho kai ngara Nahu, ede zi karawi va Nahu zi ru'u va nggomizoho, loakuzu Ama zi kazese ra kantasa kai ncai Ana. 14 Au-aura raho va nggomizoho kai ngara Nahu, Nahu zimakarawina." 15 "Nggara nggomizoho mameci ra ca'u Nahu, nggomizoho makarawiku raparentakai va Nahu. 16 Nahu zimaraho zi Ama, ro Sia zimambeina zi nggomizoho Mabantu makalaina, zimangge'e sama lavo nggomizoho santoi-ntoina. 17 Sia edezu Roh Allah zimakatadana mapoda mavoha Ruma Hatalla. Dunia wati loana tarima Sia, vara wati eda atao pata-Na. Pala nggomizoho mapataku Sia, vara Sia mangge'e sama lavo nggomizoho ro zimandazi savua lavo nggomizoho. 18 Nggomizoho wati ziwi'i paki kese va Nahu kai dou makasi pahu. Nahu zimamai mbali zi nggomizoho. 19 Zisamporo walimpa dunia wati zima'eda Nahu wali. Pala nggomizoho zima'eda Nahu. Ro vara Nahu mori, nggomizoho rau zimamori. 20 Naraka ainaina ede, nggomizoho zimavade va one Nahu savua lavo Ama, nggomizoho savua lavo Nahu, ro Nahu savua lavo nggomizoho. 21 Dou ma tarima rakaukai va Nahu ro makarawina, siaku ma meci ra ca'u Nahu. Ama-Ku zimameci ra ca'una dou ma meci ra ca'u Nahu. Nahu rau zimameci ra ca'u dou ede ro makatada weki Nahu zi sia." 22 Yudas (laina la Yudas Iskariot) masozi zi Ruma Isa, "Ruma, vavauku Ruma ngawakaita katada weki zi madazoho ro laina zi dunia?" 23 Cambe va Ruma Isa, "Dou ma meci ra ca'u Nahu, zimavatu ngoa ra tei va Nahu. Ama-Ku zimameci ra ca'una sia. Ama ro Nahu zimamai zi sia ro ngge'e sama lavo sia. 24 Dou ma wati meci ra ca'u Nahu, wati vatuna ngoa ra tei va Nahu. Ngoa ra tei raringa va nggomizoho ede, laina razi Nahu, malaisi razi Ama ma ranggadu Nahu. 25 Sara'ana ede nggahi va Nahu zi nggomizoho salama Nahu mbuipu lavo nggomizoho. 26 Pala Roh Allah, Mabantu zi nggadu va Ama kai ngara Nahu, Siaku zimangoa ra tei nggomizoho sara'ana ro zimakawarana nggomizoho zi sara'ana ma wa'ura ngoa va Nahu zi nggomizoho. 27 Taho ra ntai zi wi'i va Nahu zi nggomizoho. Taho ra ntai ndai Nahu zi mbei va Nahu zi nggomizoho. Rambei va Nahu ede laina vune rambei va dunia zi nggomizoho. Aina darura ademu, aina dahu. 28 Nggomizoho wa'ura ringamu nggahi Nahu, 'Nahu zimalao, pala Nahu zimamai mbali zi nggomizoho'. Nggara nggomizoho mameci ra ca'usi Nahu, nggomizoho zimasana Nahu malao aka Ama, vara Ama mancewi na'e ntewi kaisi Nahu. 29 Nahu mangoana ede zi nggomizoho ake, sawatipu ndazi sara'ana, loakuzu nandazisi pea, nggomizoho zima'imbi. 30 Nahu wati zimanuntu ra nggahi mancewi mboto wali lavo nggomizoho, vara wa'ura wakatuna dou makuasakai dunia ake maina. Pala sia wati ntauna kuasa zi weki Nahu. 31 Pala sara'ana ede pavuaku ndazina loakuzu dunia kawarana weki va one Nahu mameci ra ca'u Ama ro makarawi sara'ana rakaukai va Ama zi Nahu. Maira ndai talao pesoku weki ta ake."

15:1 Nggahi wali Ruma Isa, "Nahuku fu'u anggo ma sapodakaina, ro Ama-Ku edezu makarawi nggarona. 2 Sanikina sanga Nahu ma wati mbua, nadompoku va Sia, ro sanikina sanga ma mbua, ro'ona zikalao sarundena va Sia loakuzu nanaha ipi wali mboto wuana. 3 Nggomizoho wa'ura raso vara ngoa ra tei rambei va Nahu zi nggomizoho. 4 Ngge'epu savua lavo Nahu ro Nahu rau mangge'empa savua lavo nggomizoho. Sangana wati loana mbua ndaina, selasi nggara nambuipusi zi fu'una. Ndede walija nggomizoho maloa mbua, nggara ngge'empa savuamu lavo Nahu. 5 Nahuku fu'u anggo, ro nggomizoho sanga-sangana. Dou ma ngge'empa savuana lavo Nahu ro Nahu lavo sia, zimambua mboto; vara watisi va Nahu, nggomizoho wati loamu karawi au-au. 6 Dou ma wati mbuipu savuana lavo Nahu, zipaki vune sanga haju, edempara ndazi mango. Sanga-sanga vune ede zikavoro ro zipaki zi ade afi, edempara zi ka'a. 7 Nggomizoho mambuipusi savuamu lavo Nahu ro rangoa ra tei va Nahu ngge'e zi ademu, rahopu zi Ama au-au zi ne'e va nggomizoho; rarahomu ede zi mbei wea. 8 Nggara mbotosi karawi mataho va nggomizoho, Ama-Ku zi kazese ra kantasa; ro kai ndedena nggomizoho poda-poda ndazi anamori Nahu. 9 Vune Ama mameci ra ca'u Nahu, ndedeku Nahu mameci ra ca'u nggomizoho. Pavuapu nggomizoho ngge'empa mori vune dou zi meci ra ca'u va Nahu. 10 Nggara kalampasi va nggomizoho rakaukai va Nahu, nggomizoho ngge'empa to'amu zi meci ra ca'u va Nahu, sama vune Nahu mangge'empa to'a zi meci ra ca'u Ama vara kalampaku rakaukai-Na. 11 Sara'ana ake ngoa va Nahu zi nggomizoho, loakuzu sana ade Nahu wara zi ademu, ro sana ade nggomizoho mandazi mpuruna. 12 Akeku zi kaukai va Nahu: Meci ra ca'upu zi savua lavo masavuana, sama vune Nahu mameci ra ca'u nggomizoho. 13 Dou ma ipi poda meci ra ca'u sobazohona edezu dou ma mbei mori razi ru'u va siazoho. 14 Nggomizoho edezu soba-soba Nahu, nggara karawisi va nggomizoho au rakaukai va Nahu zi nggomizoho. 15 Nggomizoho wati walira oukai va Nahu ada, vara ada wati vadena au wunga karawi va rumana. Nggomizoho zi oukai va Nahu soba, vara sara'ana raringa va Nahu zi Ama, wa'ura ngoa va Nahu zi nggomizoho. 16 Laina nggomizoho ma kazale Nahu. Nahuku ma kazalena nggomizoho, ro makau lao nggomizoho zimambua mamboto -- wua-wua ma daloa leli. Ndazi Ama zimambeina zi nggomizoho au-au raraho va nggomizoho zi Sia kai ngara Nahu. 17 Akeku zi kaukai va Nahu zi karawi va nggomizoho: Meci ra ca'upu zi savua lavo savuana." 18 "Nggomizoho wati ca'usi va dunia, kawarapu va one Nahu wa'ura ulu daca'u va dunia. 19 Pai nggomizoho ntau dunia, nggomizoho zi meci ra ca'u va dunia kai ntauna. Pala Nahu wa'ura kazaleku nggomizoho zi dunia ake, ndazi nggomizoho lai walina ntau dunia. Vara ndedena dunia wati ca'ukaina zi nggomizoho. 20 Kawarapu au ranggahi va Nahu zi nggomizoho, 'Ada wati ncewi na'ena ntewi kaisi lavo rumana.' Nggarasi siazoho wa'ura kancokina Nahu, siazoho zimakancoki nggomizoho rau. Siazoho nggara navatusi ngoa ra tei va Nahu, siazoho navatu rauku ngoa ra tei va nggomizoho. 21 Sara'ana ede zi karawi va siazoho zi nggomizoho, vara nggomizoho anamori Nahu, vara siazoho wati patana Sia ma ranggaduna Nahu. 22 Pai watisi mai Nahu ro wati ngoa sara'ana ede zi siazoho, siazoho wati dosana. Pala ake siazoho wati ntauna alasa wali zi dosa siazoho. 23 Dou ma daca'u Nahu, nadaca'u Ama-Ku. 24 Pai zi woha siazoho Nahu wati karawiku lampa rawi ma watipu karawi va dou makalai, siazoho wati dosana. Pala ake siazoho wa'ura eda au rakarawi va Nahu, ro siazoho wati ca'una Nahu ro Ama-Ku. 25 Pala pavuaku ndedena, loakuzu ndazina au ratunti zi ade Buku Hukum siazoho, edezu: Siazoho wati ca'una Nahu kai wati ntauna alasa.' 26 Nahu zimanggaduna zi nggomizoho Mabantumu ma razi Ama. Siaku Roh zimakatadana lampa rawi mapoda mavoha Ruma Hatalla. Namaisi Sia, Sia zimanuntu ra nggahi mavoha Nahu. 27 Ro nggomizoho rau pavuapu mbeimu nuntu ra nggahi mavoha Nahu, vara nggomizoho wa'ura sama-samamu lavo Nahu ra'aipu saramba wa'una.

16:1 Samenana ede zi ngoa va Nahu zi nggomizoho vavaina nggomizoho murtamu. 2 Nggomizoho zi kalosa zi ade uma-uma sambeakai. Ro zimamai wakatuna va one dou ma hade nggomizoho zimakacaina siazoho patu ro to'a zi Ruma Hatalla. 3 Siazoho karawina ede zi nggomizoho vara siazoho watipu patana Ama ro Nahu. 4 Pala ake Nahu zimanggahina ede zi nggomizoho, loakuzu nandazisi ede peasi, nggomizoho kawarapu va one Nahu wa'ura ngoaku zi nggomizoho." "Lampa rawi ake wati ngoa va Nahu zi nggomizoho aipu saramba wa'una, vara nahu mbuipu sama-samaku lavo nggomizoho. 5 Pala ake Nahu zimalao zi Sia ma ranggadu Nahu; ro wati kone savua dou zi ade weki nggomizoho masozi taveku laokai Nahu. 6 Ake mala nggomizoho madarura ade, vara nggahi ndede Nahu zi nggomizoho. 7 Pala Nahu manggahi ma podana zi nggomizoho: Nancewi tahopu ziru'u va nggomizoho, nggara laosi Nahu; vara nggara Nahu watisi laoku, Mabantumu ede wati zimamai zi nggomizoho. Pala laosi Nahu, Nahu zimanggadu Sia zi nggomizoho. 8 Nggara namaisi Sia, Sia zimakatadana zi dunia aona ma poda mavoha dosa, zi au ramapoda, ro razi hukuma Allah. 9 Sia zimanggahina va one watisi imbi zi Nahu edezu dosa; 10 va one Nahu poda, vara Nahu lao zi Ama ro nggomizoho wati zima'eda Nahu wali; 11 ro va one Ruma Hatalla wa'ura tampu'una hukumna, vara makuasakai dunia ake wa'ura zihukum. 12 Mboto walipu zi ne'e nggahi va Nahu zi nggomizoho, pala wakatu ake nggomizoho watipu sanggo tarima. 13 Pala nggara Roh ede namaisi, edezu Sia ma katadana lampa rawi ma poda mavoha Ruma Hatalla, nggomizoho zizende va Sia zi patakaimu sara'a lampa rawi ma poda. Sia wati zimanuntu ra nggahi razi weki ndai-Na, pala zimanuntu ra nggahi au raringa-Na, ro Sia zimangoana zi nggomizoho auku zimandazi zi ainaina makento. 14 Sia zimakazese ra kantasana Nahu, vara au rakarongga-Na zi nggomizoho, ratarima-Na razi Nahu. 15 Sara'ana ma wara zi Ama edezu ntau Nahu. Vara ndedena Nahu nggahi-Ku va one au rakarongga va Roh zi nggomizoho, ratarima-Na razi Nahu." 16 "Zisamporo walimpa nggomizoho wati zima'eda Nahu wali, ro zi samporo walimpa nggomizoho zima'eda Nahu." 17 Pila-pila anamori Ruma Isa tampu'ura sozi savua lavo savuana, "Auku aona Sia nggahi ndedekaina zi ndaita: 'Zisamporo walimpa nggomizoho wati zima'eda Nahu wali, ro wali rau zi samporo walimpa nggomizoho zima'eda Nahu'? Au rauku aona lavo: 'Nahu malao zi Ama'?" 18 Siazoho sozi ntuwuna, "Auku aona, 'samporo'? ndai wati loata ka'ao Sia nuntu ra nggahi-Na mavoha auku!" 19 Ruma Isa navadeku siazoho mane'e sozi zi Sia. Ndazi nggahi Sia, "Wa'ura nggahi va Nahu akana, 'Zisamporo walimpa, nggomizoho wati edamu nahu wali, ro zi samporo wali nggomizoho zima'eda Nahu wali.' Savua edero zi ngangokai va nggomizoho? 20 Imbipu, nggomizoho zimanangi ro zimazuru zala, pala dunia zimaneo ade. Nggomizoho zimasusa ade, pala susamu ede zimarungka ndazi neo ade. 21 Nggarasi savua dou siwe mane'empara nggana, sia nasusaku, vara wa'ura raka wakatuna sia susa ra ncokina. Pala wa'usi losa anana, dou siwe ede nanefaku susa ra ncokina vara neo adena va savua ana keana wa'ura wara zi dunia. 22 Ndede rauja lavo nggomizoho: Ake nggomizoho masusa ade, pala Nahu zima'eda angi lavo nggomizoho wali, ndazi ademu zimasana; ro wati kone savua dou maloana weha neo ade ede zi ade nggomizoho. 23 Zi'ainaina ede, nggomizoho wati zimasozi au-au wali zi Nahu. Imbipu: Au-au raraho va nggomizoho zi Ama kai ngara Nahu, ede zi mbei va Ama zi nggomizoho. 24 Sampe wakatu ake nggomizoho watipu rahomu au-au kai ngara Nahu. Rahopu, ndazi nggomizoho zimatarimana, loakuzu mpuruna neo ademu." 25 "Sara'ana ake nggahi va Nahu zi nggomizoho kai conto ra ibara. Pala zimamai wakatuna, Nahu wati zimakani conto ra ibara wali, pala kai ngoa ntiri zi nggomizoho mavoha Ama. 26 Wakatu ede nggomizoho zimaraho zi Ama kai ngara Nahu; zi vademu, Nahu wati zimaraho zi Ama zi ru'u va nggomizoho, 27 vara ndai Ama mameci ra ca'u nggomizoho. Sia mameci ra ca'u nggomizoho vara nggomizoho mameci ra ca'uku Nahu, ro imbimu va one Nahu ma ramai ta Ruma Hatalla. 28 Poda Nahu ma mai razi Ama, ro wa'ura maiku zi ade dunia. Pala ake Nahu tu'u wi'iku dunia zi lao mbaliku aka Ama." 29 Edempara anamori Ruma Isa manggahi zi Sia, "Ake Ruma kai ngoa ntiri ro watira kani kai conto ra ibara, 30 ro madazoho vadeta va one Ruma mavade sara'ana. Wati paraluna kone savua dou masozi au-au zi Ruma. Vara ndedena madazoho imbi Ruma ma ramai ta Ruma Hatalla." 31 Cambe va Ruma Isa zi siazoho, "Ndazi savua ma'imbiku nggomizoho ake? 32 Kawarapu! Wakatuna zimamai, mala wa'ura mai, nggomizoho zi kambari mbura rero. Nggomizoho zimadula aka uma cua ndaimu ro zimatu'u wi'i Nahu kese. Pala Nahu wati keseku vara Ama mawara sama lavo-Ku. 33 Sara'ana ake nggahi va Nahu loakuzu nggomizoho rakamu taho ra ntai vara savuamu lavo Nahu. Zi dunia nggomizoho zimasusa ra ncoki. Pala kalembopu ademu! Nahu mawa'ura kakoana dunia!"

17:1 Sawa'u va nggahi ndedena, Ruma Isa zongana ese langi ro nggahina, "Ama, ake wa'ura raka wakatuna. Kazese ra kantasapu Ana-Mu, loakuzu Ana-Mu makazese ra kantasa rauna Ama. 2 Ama wa'ura mbeita kuasa zi samenana ela manusia zi Ana, loakuzu Sia mbeina mori masapodakaina ro ma'ederahizi zi samenana dou rambei va Ama zi Sia. 3 Akeku mori masapodakaina ro ma'ederahizi; loakuzu dou mapata Ama, savuampa Ruma Hatalla ma poda, ro mapata Ruma Isa Al Masih ranggadu va Ama. 4 Mada wa'ura kazese ra kantasaku Ama ese wawo dunia ake kai kanggoriku karawi rakau kai va Ama zi Mada. 5 Ama! Kazese ra kantasa to'ipu Mada ake zi Ama, kai kazese ra kantasa rakantau va Mada sama lavo Ama sawatipu kandazi dunia ake. 6 Mada wa'ura kapata weaku Ama zi dou-dou razi dunia ake rawa'u mbei va Ama zi Mada. Siazoho edezu ntau Ama, ro Ama wa'ura mbeita siazoho zi Mada. Siazoho wa'ura vatuna nggahi ra eli Ama. 7 Ake siazoho wa'ura vade va one sara'a rambei va Ama zi Mada ramaina ta Ama. 8 Wa'ura karongga va Mada zi siazoho nggahi ra eli Ama rambei va Ama zi Mada; ro siazoho wa'ura tarimana. Siazoho navadeku va one Mada poda-poda ramaiku ta Ama ro siazoho imbi va one Ama ma ranggadu Mada. 9 Mada do'aku zi ru'u va siazoho. Mada wati do'aku zi ru'u va dunia malaisi zi ru'u va dou-dou ma wa'ura mbei va Ama zi Mada, vara siazoho edezu ntau Ama. 10 Samenana ntau Mada edezu ntau Ama rau; ro samenana ntau Ama edezu ntau Mada rau. Mada zi kazese ra kantasa zi woha siazoho. 11 Ake Mada mai zi Ama. Mada wati ngge'e waliku zi dunia; pala siazoho wara zi dunia. Ama ma raso! Jagapu siazoho kai kuasa ngara Ama, edezu ngara ma rawa'u mbei va Ama zi Mada -- loakuzu siazoho ndazi savua, sama vune Ama lavo Mada rau savua. 12 Wakatu mbuipu Mada sama lavo siazoho, Mada wa'ura jagaku siazoho kai kuasa ngara Ama -- ngara rambei va Ama zi Mada. Mada wa'ura jagaku siazoho lavo wati kone savua dou rau zi ade weki siazoho mamoda, selasi sia pavua zimamoda romo; loakuzu ndazira au ratunti ade Alkitab. 13 Ake Mada maiku zi Ama. Sara'ana ake nggahi va Mada wakatu Mada mbuipu zi dunia; loakuzu siazoho iu podana neo ade Mada. 14 Mada wa'ura karonggaku zi siazoho nggahi ra eli Ama, ro dunia madaca'u siazoho, vara siazoho laina ntau dunia, sama vune Mada laina ntau dunia. 15 Mada wati rahoku loakuzu Ama maweha siazoho zi ade dunia ake, pala raho va Mada loakuzu Ama majagana siazoho razi La Madavae. 16 Sama vune Mada laina ntau dunia, siazoho rau laina ntau dunia. 17 Kandazi to'ipu siazoho ntau rakalai va Ama kai ncai lampa rawi mapoda; nggahi ra eli Ama edeku lampa rawi mapoda. 18 Vune Ama mawa'ura nggadu Mada zi dunia, ndede rauja Mada manggadu siazoho zi dunia. 19 Ziru'u pentikai va siazoho, Mada mazonggo weki kai ntau rakalai Ama, loakuzu siazoho rau mandazi ntau rakalai Ama kai ncai lampa rawi mapoda. 20 Laina zi ru'u va siazoho mpoa Mada do'aku. Mada do'a ziru'u va dou-dou ma imbi zi Mada va nuntu ra nggahi va siazoho ake. 21 Mada maraho nemba Ama, loakuzu siazoho sara'ana mandazi savua, vune Ama masavua lavo Mada, ro Mada lavo Ama. Raho-raho to'impa siazoho ndazi savuana lavo Ndaita loakuzu dunia imbina va one Ama ma ranggadu Mada. 22 Mada wa'ura mbeiku siazoho zese ra ntasa rambei va Ama zi Mada, loakuzu siazoho ndazi savuana, sama vune Ndaita masavua rau; 23 Mada lavo siazoho, ro Ama lavo Mada; loakuzu siazoho poda-poda savuana. Ndazi dunia zimavade va one Ama ma ranggadu Mada, ro va one Ama mameci ra ca'u siazoho vune Ama mameci ra ca'u Mada. 24 Ama, Mada ne'eku loakuzu siazoho, rambei va Ama zi Mada, wara sama lavona Mada zi hizi warakai Mada, loakuzu siazoho edana zese ra ntasa Mada; edezu zese ra ntasa rambei va Ama zi Mada, vara Ama mameci ra ca'u Mada sawatipu kandazi dunia ake. 25 Ama ma adi! Dunia wati patana Ama, pala Mada kapata Ama; ro dou-dou ake navadeku va one Ama ma ranggadu Mada. 26 Mada wa'ura katadaku ngara Ama zi siazoho; ro Mada kakarawi ncau vune ede, loakuzu meci ra ca'u Ama zi Mada nangge'empa zi ade siazoho lavo Mada masavua lavo siazoho."

18:1 Sawa'u va Ruma Isa do'a ndedena, Sia lavo anamorizoho-Na lao ipa vae va Sori Kidron. Ta ede wara savua nggaro, Ruma Isa lavo anamorizoho-Na lu'u ade nggaro ede. 2 La Yudas mazonggo Ruma Isa zi dou-dou ma musu-Na ede, navade hizi ede; vara Ruma Isa wa'ura ntuwu poda kavoro weki zi hizi ede lavo anamorizoho-Na. 3 Edempara la Yudas lao aka hizi ede lavo wa'ana mboto tentara Romawi ro pila-pila dou majaga Bait Allah rakakai va dou-dou mana'ekai imam ro dou-dou Farisi. Siazoho wa'ana zaha, ilo ro obo. 4 Ruma Isa navadeku sara'ana ma zimandazi zi weki ndai-Na. Ndazi Sia mai rakana dou-dou ede ro sozina, "Cou ngupa nggomizoho?" 5 "Isa, dou Nazaret," cambe va siazoho. "Nahuku Sia," nggahi Ruma Isa. La Yudas mazonggo Ruma Isa zi dou-dou ma musu-Na kizi ta ede lavo siazoho. 6 Wakatu nggahi Ruma Isa zi siazoho, "Nahura Sia," siazoho suru menana edempara mbo'ona awa dana. 7 Sozi va Ruma Isa sakali wali zi siazoho, "Nggomizoho cou ngupamu?" "Isa dou Nazaret," cambe va siazoho. 8 "Wa'ura nggahi va Nahu, Nahuku Sia," nggahi va Ruma Isa. "Ro nggara napodasi Nahu zi ngupa va nggomizoho, co'opu siazoho ma kalaina ake lao." 9 (Kai nggahi ndedena, ndazira au ranggahi va Ruma Isa sawatipu va ede: "Ama, razi dou-dou rambei va Ama zi Mada, wati kone savua dou ma moda.") 10 La Simon Petrus ma wa'a savua peda, olona edempara fati kakorina fiko wana ada dou mana'ekai imam-imam. Ngara ada ede la Malkus. 11 Edempara nggahi Ruma Isa zi la Petrus, "Kalu'u mbalipu pedamu ede zi lapina! Savua kananu va nggomi Nahu wati zimanono mo susa ra ncoki rambei va Ama zi Nahu?" 12 Edempara tentara-tentara Romawi lavo mana'ekaina ro tentara-tentara Yahudi mawa'u ra leto Ruma Isa. 13 Sarambakaina siazoho lao wa'ana Ruma Isa lao satando zi Hanas, riana mone la Kayafas. Kayafas edezu dou mana'ekai imam-imam zi mba'ana ede. 14 Ro siaku mangoa ra tei kataho zi dou-dou mana'ekai Yahudi va one natahopu savua dou mamade zi ru'u va samenana bangsa. 15 Simon Petrus ro savua dou anamori makalai mavatu slando Ruma Isa. Anamori ma kalai ake napataku va dou mana'ekai imam-imam; ndazi sia lu'u vatu sama rauna lavo Ruma Isa zi sarei dou mana'ekai imam-imam, 16 Petrus ngena ta ari lua, zi taza. Edempara anamori ma kalai ede lao losa ro nuntuna lavo dou siwe ma jaga taza, edempara wa'ana la Petrus lu'u ta zei. 17 Dou siwe majaga taza nggahina zi la Petrus, "Oe, savua laina nggomi rausi savua dou ade weki anamori dou aka?" "Laina," cambe va la Petrus. 18 Wakatu ede vusi ai, ndazi ada-ada ro tentara-tentara wa'ura kaleana afi daru ro siazoho niruna afi ta ede. La Petrus laona ta aka ro kizi niruna afi lavo siazoho. 19 Sozi va dou mana'ekai imam-imam zi Ruma Isa mavoha anamorizoho-Na ro mavoha ngoa ra tei-Na. 20 Cambe va Ruma Isa, "Nahu kaca'u nuntu ra nggahi ntiri zi tando dou mamboto. Nahu kaca'u ngoa ra tei ncau zi uma-uma sambeakai ro zi Bait Allah, hizi dou Yahudi ranginakaina kavoro weki. Nahu watipu parana nggahiku au-au kai macili ro rahasia. 21 Ndazi vavauku nggomi sozikaimu Nahu? Sozipu zi siazoho ma wa'ura ringa ngoa ra tei va Nahu. Pasti siazoho navadeku au ranggahi va Nahu." 22 Wakatu nggahi ndede Ruma Isa, savua dou tentara ta ede matopa-Na ro nggahina, "Disa poda Nggomi nuntu vune ede zi dou mana'ekai imam-imam!" 23 Cambe va Ruma Isa, "Nggara nggahisi va Nahu au-au ma ncara, nggahi wa'upu ta ake auku mancarana! Pala nggara nggahisi va Nahu ede napodasi, vavau nggomi topakaimu Nahu?" 24 Edempara Hanas makau wa'a Ruma Isa randante zi Dou Mana'ekai Imam-Imam ngarana Kayafas. 25 La Simon Petrus mbui ngge'epu kizi niruna afi ta ede. Nggahi dou-dou zi sia, "Savua laina nggomi rausi anamori dou aka?" Pala la Petrus wati mangaku, nggahina, "Laina!" 26 Savua dou ada dou mana'ekai imam-imam, edezu iwa ra weki dou ma rafati kakori va la Petrus fikona, manggahi, "Savua laina eda va nahu nggomi zi nggaro ede masama-sama lavo Sia?" 27 Edempara la Petrus wati mangaku walina, "Wati," -- ro ncihi ncao wakatu ede koko janga. 28 Aimasizi-sizi poda siazoho lao wa'ana Ruma Isa razi uma Kayafas lao aka asi gubernu. Ndai dou-dou Yahudi wati lu'una zi ade asi, loakuzu siazoho wati ndazina naji kai cara agama, vara siazoho nane'e vatu ngaha ngaha ra nono Paskah. 29 Vara ndedena Pilatus losa rakana siazoho ro sozina, "Auku vavu ra lo'o va nggomizoho zi dou ake?" 30 Cambe va siazoho, "Pai Sia watisi wara ncarana, madazoho wati zimawa'a Sia zi Ita Gubernu." 31 Nggahi Pilatus zi siazoho, "Wehapu Sia ro paresapu ncihi ra ncara Sia va nggomizoho kai vatu hukum ndaimu!" Pala dou-dou Yahudi ede macambena, "Madazoho wati loa hukum made dou." 32 (Ake ndazikaina loakuzu ndazira au ranggahi va Ruma Isa mavoha cara Sia zimamade.) 33 Pilatus lu'u mbali zi asi ro ouna Ruma Isa, edempara sozina, "Savua poda Nggomi Sangaji dou Yahudi?" 34 Cambe va Ruma Isa, "Savua sozimu ake ramaina tandai nggomi atao wara dou makalai ma wa'ura ngoamu mavoha Nahu?" 35 Cambe va Pilatus, "Savua nahu ake dou Yahudi? Ma zonggo Nggomi zi nahu edezu bangsa ndai-Mu ro dou-dou mana'ekai imam. Au rawa'u karawi va Nggomi?" 36 Nggahi Ruma Isa, "Karaja'ana Nahu, laina razi dunia ake. Pai Karaja'ana Nahu razi dunia ake, dou-dou-Ku zima'usaha kapodana loakuzu Nahu vavaina zizonggo zi dou-dou mana'ekai Yahudi. Pala ncihi romo Karaja'an-Ku laina razi dunia ake!" 37 Edempara sozi va Pilatus zi Sia, "Nggara ndedesi, Nggomi sangaji?" Cambe va Ruma Isa, "Nggomi manggahi va one Nahu ake sangaji. Nahu ranggana ro maiku zi dunia ake zi ru'u savuampa zi ne'e, edezu mambei nuntu ra nggahi mavoha lampa rawi mapoda. Dou ma razi lampa rawi mataho ede naringaku Nahu." 38 Sozi va Pilatus zi Sia, "Auku aona lampa rawi mapoda?" Edempara Pilatus losa walina razi asi ro nggahina zi dou-dou Yahudi, "Nahu wati rakaku rawina mancara kone savua rau zi Sia. 39 Pala ranginakai va nggomizoho, nahu maca'u hori savua dou rabui zi Ainaina Aruraja Paskah. Savua mangawa nggomizoho loakuzu nahu mahori sangaji dou Yahudi zi ru'u va nggomizoho?" 40 Cambe va siazoho kai kanggica kana'ena, "Wati, aina Sia, pala la Barabas!" (Barabas edezu savua dou parampo.)

19:1 Edempara Pilatus lu'una ro kauna dou cambo Ruma Isa. 2 Tentara-tentara ndawina savua songko sangaji kai sanga haju rui, edempara kakanina zi tuta Ruma Isa. Sawa'u va ede siazoho kakanina zi Sia jumba keta, 3 edempara pila-pila kali maina zi Sia ro nggahina, "Io sangaji dou Yahudi!" Edempara siazoho topana Sia. 4 Sawa'u va ede Pilatus losana sakali wali ro nggahina zi dou mamboto ede, "Tiopu! Nahu mawa'a kalosa Sia zi nggomizoho, loakuzu vade va nggomizoho va one nahu wati rakaku rawina mancara kone savua rau zi Sia." 5 Edempara losa Ruma Isa kai kanina songko sangaji randawi kai rui ro jumba keta. Nggahi Pilatus zi siazoho, "Tiopu dou ede." 6 Wakatu eda va dou-dou mana'ekai imam ro tentara-tentara ede Ruma Isa, siazoho kanggicana, "Salibpu Sia! Salibpu Sia!" Nggahi Pilatus zi siazoho, "Wehapu Sia, ro salibpu va ndaizohomu, nahu wati rakaku eda rawi-Na mancara konena savua rau zi Sia." 7 Cambe va dou-dou Yahudi ede, "Nggahi va hukum madazoho, Sia pavuaku zivavu kai hukuma made, vara Sia mangaku weki-Na Ana Ruma Hatalla." 8 Wakatu ringa va Pilatus nggahi ndede siazoho, sia nanaha ipi dahu wali. 9 Ndazi sia lu'u mbalina zi ade asi ro sawa'u va Ruma Isa wa'a kalu'u, sozi va Pilatus zi Sia, "Nggomi ratave maikai-Mu?" Pala wati cambe va Ruma Isa. 10 Ndazi nggahi wali Pilatus, "Nggomi wati ne'emu nuntu lavo nahu? Zivade-Mu, nahu mantau kuasa zimahori Nggomi ro kuasa zimasalib Nggomi!" 11 Cambe va Ruma Isa, "Nggara watisi mbei va Ruma Hatalla kuasa ede zi nggomi, nggomi wati ntaumu kuasa sama sekali zi Nahu. Vara ndedena dou ma zonggo mbei Nahu zi nggomi, nana'epu dosa sia ntewi kaisi nggomi." 12 Wakatu ringa va Pilatus ede, sia na'usahaku zi horikaina Ruma Isa. Pala dou-dou Yahudi makanggica ntuwu, "Nggara horisi va Ita Sia, Ita laina soba Kaisar! Dou ma kanahu weki ndaina sangaji, edezu musu Kaisar!" 13 Wakatu ringa va Pilatus nggahi ra eli ede, sia wa'a kalosana Ruma Isa edempara dohona zi kadera pengadila zi hizi ma ngara Dasa Wadu. (Zi ade bahasa Ibrani ngarana Gabata.) 14 Wakatu ede ne'empara voe sampuru zua aimarai, ainaina sawatipu Ainaina Aruraja Paskah. Nggahi Pilatus zi dou-dou ede, "Ake sangaji nggomizoho!" 15 Siazoho kanggica walina, "Hadepu Sia! Hadepu Sia! Salibpu Sia!" Sozi va Pilatus, "Savua pavuaku salib va nahu sangaji nggomizoho?" Cambe va dou-dou mana'ekai imam, "Kaisar ede mpoampa menana sangaji madazoho!" 16 Edempara Pilatus zonggo mbeina Ruma Isa zi siazoho zisalib. Siazoho weha aona Ruma Isa, edempara lao wa'ana Sia. 17 Losa Ruma Isa kai tundu va ndai-Na haju salib lao aka hizi ma ngara "Hizi Rangka". (Zi ade bahasa Ibrani pehe kai Golgota.) 18 Ta aka Sia zisalib. Sama-sama lavo Sia wara rauja zua dou makalaina rasalib; savua dou zi savae ku'i, savua dou zi savae wana ro Ruma Isa zi ade wohana. 19 zi haju salib Ruma Isa, kau va Pilatus wi'i ratunti ake: Isa Dou Nazaret, Sangaji Dou Yahudi". 20 Mboto dou Yahudi mabaca ratunti ede, vara hizi rasalibkai Ruma Isa ede wati zo'ona lavo kota. Ratunti ede ade nggahi Ibrani, Latin ro Yunani. 21 Nggahi dou-dou mana'ekai imam zi Pilatus, "Aina tunti 'Sangaji dou Yahudi', malaisi tatuntipu, 'Dou ake manggahi, Nahu Sangaji Dou Yahudi.' " 22 Pala cambe va Pilatus, "Ma wa'ura ratunti va nahu, wati loa zirungka." 23 Sawa'u va tentara-tentara ede nggori salibna Ruma Isa, siazoho wehana kani ra lombo-Na. Kani ra lombo ede cengga upana: cua-cua raka mena ru'u ndaina. Siazoho weha rauna jumba-Na. Jumba ede watira nda'una -- ramuna tampu'u ta esena sampe ta awana. 24 Nggahi mena tentara ede zi savua dou lavo masavuana, "Aina dompo-dompo va ndai jumba ake. Mai ndai ta'undiku loakuzu vade couku zimaloana raka." Lampa rawi ede ndazina loakuzu ndazira vune ratunti ade Alkitab, edezu: "Siazoho macengga-cenggana kani ra lombo-Ku, ro ma'undi zi ru'u jumba-Ku." Ro poda romo tentara-tentara ede karawina vune ede. 25 Zeni lavo salib Ruma Isa kizi ina Ruma Isa, ina nto'i-Na, la Maria wei la Klopas, ro la Maria Magdalena. 26 Wakatu eda va Ruma Isa ina-Na ro savua anamori rameci ra ca'u va Sia makizi ta ede, nggahi Sia zi ina-Na, "Ina ake ana Ita." 27 Edempara nggahi Ruma Isa zi anamori-Na ede, "Ede Inamu." Tampu'u wakatu ede anamori ede matarima ina Ruma Isa zi ngge'e lavona zi umana. 28 Ruma Isa navadeku va one ake wa'ura nggori sara'ana, ro loakuzu au ratunti zi ade Alkitab loa ndazina, nggahi Sia, "Nahu mango wo'oku." 29 Ta ede wara savua mangko vini va oi anggo ma ngonco. Edempara savua wunta taka razeta kai oi anggo ngonco ede, ro raziki kai salona haju naru, edempara zetana zi wiwi Ruma Isa. 30 Edempara nela va Ruma Isa oi anggo ede edempara nggahina, "Wa'ura nggori!" Edempara Sia okona tuta-Na ro madena. 31 Dou-dou mana'ekai Yahudi wati ne'ena timba dou-dou rasalib ede ngge'e tero weki zi haju salib zi ainaina Sabat, au walipu sakali ake Sabat ede Ainaina Aruraja mapenti poda. Vara ainaina rasalibkai Ruma Isa hinana sawatipu ainaina Sabat ede, dou-dou Yahudi rahona iji zi Pilatus zi fokakai ezi-ezi dou-dou ma wa'ura salib ro kalondo timba-timba ede razi haju salib. 32 Edempara tentara-tentara ede lao foka uluna ezi zua dou ra salib sama lavo Ruma Isa. 33 Wakatu siazoho rakara zi Ruma Isa, siazoho edana Sia wa'ura made. Ndazi siazoho wati fokana edi-Na. 34 Pala loko Ruma Isa runcakaina vuja va savua dou tentara ade weki tentara-tentara ede; ro losa lalompa ra'a ro oi. 35 Dou ma eda madana mandazi ede, siaku ma ngoa ra kahabana lampa rawi ede, loakuzu nggomizoho imbi raumu. Ro nuntu ra nggahi ede napodaku, ro sia navadeku va one ede napodaku. 36 Lampa rawi ede ndazina loakuzu ndazira au ratunti ade Alkitab, edezu, "Wati kone savua peke-Na zifoka". 37 Zi ade Alkitab rau ratunti: "Siazoho zimantandana Sia rawa'u runca va siazoho". 38 Sawa'u va ede la Yusuf dou Arimatea rahona iji zi Pilatus zi loakaina weha timba Ruma Isa. (Yusuf edezu anamori Ruma Isa kai wati tadana, vara sia nadahuku zi dou mana'ekai Yahudi.) Pilatus mbeina iji zi sia, ndazi sia lao wehana timba Ruma Isa. 39 Nikodemus, ma ntoina parana maina zi Ruma Isa wakatu aimangazi, lao sama rauna lavo la Yusuf. Nikodemus mawa'a marakani lo'i zupa ro haju gaharu -- sara'ana wara kira-kira tolu mpuru kilogram mbotona. 40 Zua dou ede mawehana timba Ruma Isa edempara pontekaina salolo sama-sama lavo marakani lo'i mamengi ede kai vatu ranginakai umbu dou Yahudi. 41 Zi hizi Ruma Isa rasalib wara savua nggaro. Zi ade nggaro ede wara savua rade vou, ma watipu rakani umbu kai dou. 42 Vara rade ede zeni, ro ainaina Sabat ne'empara tampu'u, siazoho umbuna Ruma Isa ta aka.

20:1 Zi ainaina Minggu aimasizi, mbuipu rindi ai, la Maria Magdalena lao aka rade. Sia edana wadu ravontokai wa'ura kiri weki zi hizi vontokai rade ede. 2 Edempara sia rai lao ngupana la Simon Petrus ro savua dou anamori rameci ra ca'u va Ruma Isa, ro nggahina zi siazoho, "Ruma wa'ura weha va dou zi ade radena, ro nahu wati vadeku tave rawi'ikai Sia." 3 Edempara la Petrus ro anamori makalaina ede lao aka rade. 4 Zuana ede rai, pala anamori makalai ede ma'ipi roci ntewi kaisi la Petrus, ro sia rongga ulu zi rade. 5 Sia tio cazeina zi ade rade ro edana salolo mawara ta ede, pala sia wati lu'una. 6 La Simon Petrus mavatu kento, edempara lu'u lalona zi ade rade ede. Sia edana salolo mawara ta ede, 7 pala tove salolo raziki kai tuta Ruma Isa wati warana zeni ede malaisi wara raluru zi hizi makalai. 8 Edempara anamori ma rongga ulu zi rade, lu'u rauna. Sia eda ro imbina. 9 (Sampe wakatu ede siazoho watipu loana ka'ao au ratunti ade Alkitab va one Sia pavuaku mori mbalina razi madena.) 10 Sawa'u va ede anamori Ruma Isa dulana. 11 La Maria Magdalena makizi tatando rade ro nangina. Wunga mbuipu sia nangi, sia tio cazeina zei rade, 12 edempara edana zua mala'eka makani ra lombo malanta. Siazoho dohona zi hizi ratohokai timba Ruma Isa, ma savua zi ao tuta, ro ma kalaina zi ao ezi. 13 Sozi va mala'eka-mala'eka ede, "Ina, vavau nangikaita?" Cambe va Maria, "Ruma mada wa'ura weha va dou, ro mada wati vadeku Sia rawi'i tave." 14 Sawa'u va nggahi ndedena, sia tambarina ro edana Ruma Isa makizi ta ede. Pala sia wati vadena va one ede Ruma Isa. 15 Sozi va Ruma Isa zi sia, "Ina, vavau nangikaita? Cou ngupa ita?" Kacai va la Maria dou ede mataki tonggu nggaro, ndazi nggahi sia, "Pa, nggara Itasi ma rapesona Sia ta ake, tangoa to'ipu mada tave Ita wi'ikaita Sia, loakuzu mada maweha-Na." 16 Nggahi Ruma Isa zi sia, "Maria!" Tambari la Maria zi Ruma Isa edempara nggahina kai nggahi Ibrani, "Rabuni!" (Aona "Guru".) 17 "Aina nentimu Nahu," nggahi Ruma Isa zi sia, "vara Nahu watipu ne'eku ese Ama. Pala laopu zi cina ra angi Nahu, ro ngoapu zi siazoho va one Nahu ake mane'e ese Ama-Ku ro Ama-mu, Ruma Hatalla Ruma-Ku ro Ruma Hatalla Rumamu." 18 Edempara la Maria lao ngoana zi anamori Ruma Isa va one sia wa'ura edana Ruma ro va one Ruma mawa'ura ngoana zi sia sara'ana. 19 Zi ainaina Minggu ede lalo, wakatu wa'ura aimangazi, anamori Ruma Isa kavoro weki zi savua uma kai taza-taza rakunci, vara siazoho nadahuku zi dou-dou mana'ekai Yahudi. Wezi lalompa mai Ruma Isa ro kizina zi woha siazoho ro nggahina, "Salam taho ra ntai zi ru'u va nggomizoho." 20 Sawa'u va nggahi ndedena , Sia teina zi siazoho rima ro loko-Na. Wakatu edana Ruma, siazoho neo poda adena. 21 Edempara nggahi Ruma Isa zi siazoho sakali wali, "Salam taho ra ntai zi ru'u va nggomizoho. Vune Ama ma ranggadu Nahu, ndede rau Nahu manggaduna nggomizoho." 22 Edempara Sia ufina nawa-Na zi siazoho ro nggahina, "Tarima aopu Roh Allah. 23 Nggara nggomizoho kangampu weamu dosa savua-vua dou, Ruma Hatalla rau makangampu weana. Nggomizoho nggara watisi kangampu weamu dosa savua-vua dou, Ruma Hatalla rau wati zimakangampu weana sia. 24 Tomas (zipehekai la "Ndua"), savua dou zi ade weki sampuru zua anamori Ruma Isa, wati warana ta ede sama-sama lavo ma kalaina wakatu mai Ruma Isa. 25 Ndazi anamori Ruma Isa ma kalaina manggahi zi la Tomas, "Nami wa'ura edamu Ruma!" Pala cambe va la Tomas, "Nggara watipusi eda va nahu ra'a paku zi rima-Na, watipusi tau va nahu kanggeku zi rara'a suwu ede ro watipu tauku rima zi loko-Na, wati pehe nahu zima'imbi." 26 Saminggu sawa'u va ede anamori Ruma Isa wara wali zi hizi ede, ro la Tomas wara rau ta ede. Sara'a taza rakunci. Pala Ruma Isa mai ro kizina zi woha siazoho, edempara nggahina, "Salam taho ra ntai zi ru'u va nggomizoho." 27 Edempara nggahi Ruma Isa zi la Tomas, "Tiopu rima Nahu, ro taupu kanggemu ta ake. Zalapu rimamu ro taupu zi loko Nahu. Aina mbali mbua wali ademu, pala imbipura!" 28 Nggahi la Tomas zi Ruma Isa, "Io Ruma Hatalla, Rumaku!" 29 Ndazi nggahi Ruma Isa zi sia, "Nggomi imbimu vara wa'ura edamu Nahu Taho ra ntika dou ma imbi konena da'eda Nahu!" 30 Mbuipu mboto walina lampa rawi mavisa ra guna makalaina rakarawi va Ruma Isa zi tando anamorizoho-Na, pala wati ratunti zi ade buku ake. 31 Pala sara'ana ake ratunti, loakuzu nggomizoho imbimu va one Ruma Isa edezu Sangaji Mambei salama, Ana Ruma Hatalla, ro vara imbi zi Sia, nggomizoho rakakaimu mori.

21:1 Sawa'u va ede Ruma Isa katadana weki-Na sakali wali zi Ndano Tiberias zi anamorizoho-Na. Ndakeku ndazina: 2 Zisavua ainaina la Simon Petrus, la Tomas zipehekai la Ndua, la Natanael dou Kana zi Galilea, ana-ana la Zebedus, ro zua dou anamori Ruma Isa ma kalaina, wunga kavoro weki. 3 Nggahi la Simon Petrus zimakalaina, "Nahu kane'e lao wa'u uta." "Nami vatuja," nggahi siazoho zi sia. Edempara siazoho lao nentena sampa. Pala savala ai ede siazoho wati rakana au-au. 4 Wakatu wontu liro, Ruma Isa kizi zi kengge ndano, pala siazoho wati vadena va one ede Ruma Isa. 5 Nggahi Ruma Isa zi siazoho, "Anazoho, savua nggomizoho wara ntaumu uta?" "Io watita," cambe va siazoho. 6 Nggahi Ruma Isa zi siazoho, "Wurapu alamu zi savae wana sampa, peasi nggomizoho zimaraka uta." Edempara wura va siazoho ala ede, pala wati wa'una hinti mbali vara mboto poda uta tazeina. 7 Nggahi va anamori rameci ra ca'u va Ruma Isa zi la Petrus, "Aka Ruma!" Wakatu ringa va la Simon Petrus va one ede Ruma, sia kanina vajuna (vara sia wati kanina vaju) edempara nggoncuna ade oi. 8 Anamori ma kalaina lampa vatuna lao aka kengge ndano kai sampa, ro hinti salahona ala mavini va uta. Siazoho wati ipi zo'ona lavo kengge ndano, kira-kira saratu metempa. 9 Wakatu siazoho londona zi sampa, siazoho wara edana kama'a afi ro uta ta esena ro roti. 10 Nggahi Ruma Isa zi siazoho, "Mai wa'ajapu ta ake pila-pila tembe uta ravoupura wa'u va nggomizoho." 11 La Simon Petrus ne'ena ese sampa, edempara hinti wa'ana ala zikenggena. Ala ede vini va uta ma na'e-na'e; sara'ana wara saratu lima mpuru tolu tembe. Ro konena mboto ede, alana wati ncipana. 12 Nggahi Ruma Isa zi siazoho, "Mai ngahara." Wati kone savua dou zi ade anamori-Na madisa sozi, "Ita cou?" Vara siazoho navadeku va one Sia ede Ruma. 13 Edempara Ruma Isa mai zenina zi siazoho, wehana roti ede, ro mbeina zi siazoho. Sia karawina vune ede rau kai uta ede. 14 Akeku katolu kalikaina Ruma Isa katadana weki-Na zi anamorizoho-Na sawa'u va Sia mori mbali razi made-Na. 15 Sawa'u va nggori ngaha siazoho, nggahi Ruma Isa zi la Simon Petrus, "Simon, ana la Yona, savua nggomi ma'ipi meci ra ca'u Nahu ntewi kaisi zi siazoho ake mameci ra ca'una Nahu?" "Poda, Ruma," cambe va la Petrus, "Ruma mavade va one mada mameci ra ca'u Ruma." Nggahi Ruma Isa zi sia, "Ntadi katahopu ana-ana jimba-Ku." 16 Kazua kalikaina sozi va Ruma Isa zi sia, "Simon ana la Yona, savuana poda nggomi mameci ra ca'u Nahu?" "Poda, Ruma," cambe va la Petrus, "Ruma mavade mada mameci ra ca'u Ruma." Nggahi Ruma Isa zi sia, "Ntadi jaga katahopu jimba-jimba-Ku." 17 Katolu kalikaina nggahi Ruma Isa zi sia, "Simon ana la Yona, savua napoda nggomi mameci ra ca'u Nahu?" La Petrus ndazi lalai adena vara Ruma Isa sozina zi sia sampe tolu kali. Ndazi cambe wali va la Petrus, "Ruma, Ruma mavade sara'ana. Ruma mavade mada mameci ra ca'u Ruma!" Edempara nggahi Ruma Isa zi sia, "Ntadi jaga katahopu jimba-jimba-Ku. 18 Ncihi poda nggahi Nahu ake: Wakatu nggomi mbuipu tenggomu, ndai nggomi mahereku rokamu, ro lao vera ne'e ndaimu. Pala nggara nggomi mawa'usi tua pea, nggomi zima'ala rimamu, ro dou makalai ma ziki nggomi ro mawa'a nggomi tavera dane'e kai va nggomi." 19 (Kai nggahi ra eli ndedena Ruma Isa katadana vuneku la Petrus madena peasi zimakazese ra kantasana Ruma Hatalla.) Sawa'u va ede nggahi Ruma Isa zi la Petrus, "Vatupu Nahu!" 20 Wakatu tambari la Petrus, sia edana zi kontuna anamori rameci ra ca'u va Ruma Isa. (Sia edeku ma doho zeni lavo Ruma Isa aipu wakatu ngaha ro masozi zi Sia, "Ruma, couku zimazonggo Ruma zi dou-dou mamusu Ruma?") 21 Edana sia, sozi va Petrus zi Ruma Isa, "Ruma, vuneku sia ake?" 22 Cambe va Ruma Isa, "Misampara ne'esi va Nahu sia ngge'empa morina sampe mai wali kai Nahu, ede laina urusa nggomi. Pala nggomi vatupu Nahu!" 23 Ndazi mboura haba zi ade woha anamori Ruma Isa va one anamori masavua ede wati zimamade. Sapodakaina Ruma Isa wati nggahina va one anamori masavua ede wati zimamade, malaisi: "Misampara ne'e va Nahu sia mori sampe mai wali kai Nahu, ede laina urusa nggomi." 24 Anamori ma'edeku ma mbei nuntu ra nggahi mavoha mandazi ake. Sia rauku ma wa'ura tuntina. Ro ndai vadeta va one aura nggahina ede napodaku. 25 Mbuipu mbotona lampa rawi makalaina rakarawi va Ruma Isa. Misampara sara'ana ede ratunti savua-vua, iu va nahu wati wara hizina zi sara'a dunia zi wi'i kai sara'a buku ma zitunti ede.