1

1 Di muna, di landè fa mgimò balù i tan, tagnè nun Tnalù. Mnè kenen di saféd Dwata, na kenen sa Dwata. 2 Di katbù i kdee, tagnè kenen déén di Dwata. 3 I kdee mgimò Dwata nimoan fagu di Tnalù, na landè mgimò ku là fagu di kenen. 4 Na i Tnalù ani, kenen i gumdà nawa balù i tan, na i gumdà nawa ani, kenen i salò lamwa fandam i dad to. 5 Na i salò ani tmuyal di gukmifun na i kakifu là gamfisan i knengan. 6 Na nun satu to dek Dwata, dnagit ku Dyan. 7 Én duen Dwata mdek ku Dyan du fye tmulen di dad to gablà di salò ani, du fye i kdee dad to faglut di kenen. 8 Na Dyan, ise kenen i salò, bay kenen i tmulen gablà di salò. 9 Hae, du én i bang kakel i too glut salò tmuyal di kdee dad to dini di tah tanà. 10 Mnê kenen dini di tah tanà mgimò fagu di kenen, bay knean, là dilè i dad to ku simto kenen. 11 Na salu kenen di kenen banwe, bay i dad ton là dmawat kenen. 12 Kabay i dad to dmawat na faglut di kenen, banlén kaglut du fye mbaling ale dad ngà Dwata. 13 Là ale mbaling dad ngà Dwata fagu di kngà i to di tah tanà, ku demen fagu di knayè i to, ku demen fagu di nimòla, bay Dwata i mimò dale i dad ngaan. 14 I dnagit Tnalù tambaling to, na mnè kenen di safédito na tatoon fite i kafyen di gito, na too glut i kdee manan. Tateenito i bong kdatahan, i kdatah i sen Tingà Maan Dwata. 15 Tulen Dyan gablà di kenen, na falbongan i taluan, manan, "Nun to tmadol deg too mdatah fa di deg, du di là agu fa sut tagnè nun kenen." 16 Na mdà di bong kafyen, kdeeito banlé kafye, na galan tananù i kafye blén. 17 Hae, du fagu di ku Mosis blé Dwata di gito i dad flaloan, bay blén i kafye na kaglut di gito fagu di ku Dyisas Krayst. 18 Landè to lmen mite Dwata, bay i sen Tingaan, du lê kenen Dwata na i too kanbong nawa i Maan, na fgadean di gito i kagkah i maan. 19 Na ani tulen Dyan di bang nun dad ganlal dad Dyu déén di Dyérusalém mdek dademe dad bà di Dwata na dad bel Libay salu di ku Dyan, du smalek ku simto kenen. 20 Là buni Dyan i kaglutan, bay toon tulen, manan, "Ise agu i Mgalék Dwata." 21 Na snalekla kenen, manla, "Kabay, simto ge? Ge kè Ilaydya?" Manan, "Ise." Na snalekla, manla, "Ge kè i Tugad Dwata fatanmi?" Tmimel kenen, manan, "Ise." 22 Taman manla, "Na, tulenam gami ku simto ge, du fye nun timelmi di dad to mdek gami. Tan i manam gablà di ktom?" 23 Na tmimel Dyan fagu di dad talù i tugad Dwata Isaya, manan, "Deg sa i to tamlo di banwe landè to mnè déén, manan, 'Tanluyu i dalan gumagu i Amu.' " 24 Na i dad to smalek ku Dyan ani dunan dad to dek dad Farisi. 25 Na snalekla kenen, "Ku ise ge i Mgalék Dwata ku demen Ilaydya, ku demen i Tugad Dwata fatanmi, na kan ku gal ge munyag?" 26 Na man Dyan, "Hae, du munyag agu alò fagu di yéél, bay tanun mdatah fa di deg di blengyu làyu fa dilè. 27 Dunan i mangu tmadol deg na du too mdatah kenen là agu gablà balù mbel i ikat talumfaan." 28 Na kdee ani tamgimò di banwe Bétani di faltù i yéél Dyordan déén di gal gumunyag Dyan. 29 Di tmadol duh, teen Dyan Dyisas fdadong di kenen, na manan di dad to, "Neyeyu tadini i tingà bilibili Dwata, i dsù mwè i dad salà i dad to di klamang banwe. 30 Ani i tatulengu gamu di kmangu, 'Nun to tmadol deg, too mdatah fa di deg, du di là agu fa sut tagnè nun kenen.' 31 Na balù deg di muna làgu fa dilè i to tmadol deg, bay munyag agu di yéél du fye fdilègu kenen di dad bel Israél di kakelan." 32 Na ani man Dyan gablà di kenen, manan, "Teengu i Tulus Dwata fdanà mdà di langit gambet i abun, na mnè di kenen. 33 Di muna làgu kenen dilè, bay Dwata, i mdek deg munyag fagu di yéél, manan di deg, 'Ku nè to teenam gumdaf na gumnè Tulus Dwata, dunan i to munyag fagu di Mtiu Tulus.' 34 Taman du tateengu i gman Dwata di deg tulengu gamu, to ani Tingà Dwata." 35 Di tmadol duh, lêman tadag déén Dyan na lwe gal mlalò kenen, 36 na teenan Dyisas mlius di dale, na manan, "Neyeyu tadéén i Tingà Bilibili Dwata!" 37 Di kaklinge i lwe gal mlalò ku Dyan i manan, mlalò ale ku Dyisas. 38 Na falê Dyisas na teenan ale mlalò kenen, taman manan, "Tan i fanngabalyu?" Na manla, "Tanè gumneam, Rabay." (I gumtatek talù Rabay ani, dunan To Tamdò.) 39 Na man Dyisas di dale, "Magin gamu deg du fye teenyu." Na magin ale kenen, na teenla i gumnean. Tatngà masol i duh. Na mnè ale flo di safédan di duh én. 40 Na satu di lwe mlinge i man Dyan, na mlalò ku Dyisas gine, dunan Andru, i flanek Simon Fiter. 41 Na i tnanin nimò Andru, gasilan fanngabal flanekan Simon, na manan di kenen, "Tateenmi i Mésaya." (I gumtatek talù Mésaya, dunan Krayst, i Mgalék Dwata). 42 Na faginan Simon salu di ku Dyisas. Na meye Dyisas di ku Simon, na manan, "Ge sa Simon tingà Dyan, bay mdà ani Sifas i dagitam." (Salngad gumtatek i dad dagit Sifas na Fiter, dunan batu.) 43 Di tmadol duh, fandam Dyisas salu kenen di banwe Galili, taman di kiten ku Filif, manan, "Magin ge deg!" 44 I gumdà Filif ani di banwe Bétsayda, i lunsud gumnè Andru na Fiter. 45 Na fanngabal Filif satu to dnagit ku Natanyél, na manan, "Tateenmi i to man Mosis di libru gusmulatan i dad flalò Dwata, na gman i dademe tugad Dwata, dunan Dyisas mdà di banwe Nasarét, i tingà Dyosif." 46 Na smalek Natanyél, "Nun kè fye to mdà di banwe Nasarét?" Na tmimel Filif, manan, "Ditù ite, fye teenam." 47 Na di kafdadongla, teen Dyisas Natanyél, na manan, "I to ani too glut bel Israél du too matlu, landè kaflingu." 48 Na smalek Natanyél, manan, "Nè gumdaam gmadè deg?" Na man Dyisas, "Di là ge fa tlo Filif, tateenta ge di dungan i kayu fig." 49 Na man Natanyél di kenen, "Rabay, ge sa i Tingà Dwata. Ge i Harì dad bel Israél." 50 Na man Dyisas, "Faglut ge kè du mangu di ge tateenta ge di dungan i kayu fig. Nun teenam kadang mdatah fa di mgimògu ani." 51 Na manan fa di kenen, "Tulengu gamu i kaglutan, teenyu kadang kgukà i langit na i dad kasaligan Dwata myak na mnaul di deg, i dnagit Tingà To."

2

1 Kafnge lwe butang nun kasdeme di banwe Kana déén di Galili. Na ditù i yê Dyisas. 2 Na Dyisas na dad mlalò kenen lê nlak di kasdeme. 3 Di takti binu, man yê Dyisas di kenen, "Talandè binula." 4 Na man Dyisas di yéan, "Libun, fbayaam deg ku tan i nimògu. Ise fa banggu fite i gnagangu di dad to." 5 Na man i yéan di dad salig déén, "Nimòyu ku tan i manan di gamu." 6 Na nun nam namu batu gkah déén gumkah yéél du di fnaglut i dad Dyu too mabtas i kalobla. Na kat satu namu ani mdadong lime lata i laman. 7 Na man Dyisas di dad salig déén, "Fananòyu yéél dad namu ani." Na nlamla i dad namu kel di fnò. 8 Kafnge én, manan di dale, "Samyul gamu, na nebeyu di to magot i fista." Na nebela di kenen. 9 Na di kagneman i yéél tambaling binu, tikeng kenen du laan gadè gufdu i fye binu. Kabay gmadè i dad salig samyul dun. Kabay du laan gadè, taman tlon i lagi sandeme, 10 na manan di kenen, "I gal nimò ku nun fista, funala falwà i too fye nem binu, na ku tatoo gamginum i dad to, falwàla i binu là fye. Kabay ge, silangam falwà i too fye nem binu, ani nan." 11 I nimò Dyisas ani di banwe Kana déén di Galili i tnanin tnikeng mgimoan. Na ani kfagun fite i bong kdatahan, na i dad mlalò kenen faglut ale di kenen. 12 Kafnge ani, mdà ale Dyisas, yéan, dad flanekan lagi, na dad gal mlalò kenen masol salu di Kafernaum, na mnè ale déén di là file duh. 13 Na tamdadong i fista kafaldam i dad Dyu i Duh Kaglius, taman salu Dyisas di Dyérusalém. 14 Na teenan déén dad to fabli i dad baka, dad bilibili, na dad abun di lam i Bong Gumnè Dwata. Na nun dad to déén sudeng di lamisala samfalit filak. 15 Di kiten én, mimò kenen skél tali, na ndalan kdeela lamwà, balù i dad baka na bilibili. Na sanbalétan i filak i dad to samfalit filak na lugadan dad lamisala. 16 Na nngakan dad to fabli dad abun, manan, "Nebeyu lamwà i dad fabliyu ani. Nangyu nimò fadyan i gumnè Màgu." 17 Di kaklinge i dad mlalò ku Dyisas i manan, gafaldamla i sulat di Tnalù Dwata, manan, "I kalbong nawagu i gumneam Dwata i too finit nawagu." 18 Na di kite i dad ganlal i dad Dyu i nimò Dyisas, snalekla kenen, manla, "Nun kè tnikeng gaganam nimò du gudmilèmi nun kaglutam mimò én gine?" 19 Na tmimel Dyisas, manan, "Lanbàyu i gumnè Dwata ani, na ftadaggu lêman di tlu duh." 20 Na man i dad Dyu, "Fat falò nam fali klo mimò i Bong Gumnè Dwata ani, na gaganam kè mimò dun di alò tlu duh?" 21 Kabay i gumnè man Dyisas ani dunan i lawehan. 22 Na taman di kték Dyisas mdà di fati gafaldam i dad gal mlalò kenen i gmanan ani, na fnaglutla i gsulat di Tnalù Dwata gablà di ktékan, na i gman Dyisas ani. 23 Di klo Dyisas di Dyérusalém di Fista Duh Kaglius, nun dee dad to faglut di kenen di kitela i dad tnikeng mgimoan. 24 Kabay là salig Dyisas i kton di dad to ani du gadean i mnè di nawa i kdee dad to. 25 Du balù landè to tmulen kenen i mnè di nawa i dad to, tasanan gadè nawa i kdee dad to.

3

1 Nun satu lagi dnagit ku Nikodimus mdà di fnaglut dad Dyu dnagit Farisi. Na kenen satu ganlal i dad Dyu. 2 Di satu butang, salu Nikodimus di ku Dyisas, na manan di kenen, "Rabay, gadèmi ge i satu to tamdò dek Dwata, du landè to gmagan mimò i tnikeng nimoam ku là déén di kenen Dwata." 3 Na tmimel Dyisas, manan, "Tulengu ge i kaglutan, silang gakuf i to di kagot Dwata ku sut kenen lêman." 4 Na man Nikodimus, "Kabay tan kibò i satu to lêman sut ku tatua? Fakay kenen kè samfulê di tien yéan na lêman sut?" 5 Na tmimel Dyisas, manan, "Tulengu ge i kaglutan, landè to gfusuk di kagot Dwata ku laan funa sut fagu di yéél na lêman fagu di Tulus Dwata. 6 Ku alò to gusutan, alò to sa kenen, ku Tulus Dwata i gusutan, tingà Dwata kenen. 7 Taman nang ge tikeng du tagmangu di ge, 'Là fakay ku là ge lêman sut.' 8 Ku fkahta di nus tatian salu tanè kayean gusalu. Lingem i lukan, bay laam gadè i gufdun na i gusalun. Salngad én i kaglabatito i ksut dad to fagu di Tulus Dwata." 9 Na smalek Nikodimus, manan, "Tan i kibò kgimò ani?" 10 Na tmimel Dyisas, manan, "Ge i satu tamdò i dademem bel Israél, na kan ku laam glabat ani? 11 Tulengu ge i kaglutan, én manmi i toomi gadè na i tulenmi i tatoomi sa teen, bay knean làyu sa fnaglut dun. 12 Ku là gamu faglut i mangu gablà di mgimò dini di tah tanà, tan sa kibòyu faglut ku tulengu gamu gablà di dad mgimò di langit. 13 Landè to lmen salu di langit galwà di deg, i dnagit Tingà To, du én gumdàgu. 14 "Di muna fa, nimò Mosis i ulad tabaga na tlawéngan di kayu, na nketan fdatah déén di banwe landè to mnè déén fye mgulê i dad to meye dun. Na là fakay ku là salngad én mgimò kadang di deg, i dnagit Tingà To, du fatlawéngla agu di kayu, na nketla fdatah, 15 du fye kdee dad to faglut di deg nun nawala landè sen. 16 "Du Dwata toon kanbong nawa kdee dad to di tah tanà, taman blén i sen Tingaan du fye balù simto faglut di kenen là malmo di salà, bay nun nawan landè sen. 17 Du ise én duen Dwata mdek i Tingaan dini di tah tanà du mlayam i dad to, bay dekan dini du fye falwaan dad to di dad salàla. 18 "Na balù simto to faglut di Tingà Dwata là fanlayam, bay ku simto là faglut tagnè nukum di kaflayam, du laan faglut di sen Tingà Dwata. 19 I duen Dwata mlayam i dad to ani, du tasalu agu, i salò, dini di tah tanà, bay én balingla too knayè i kifu, na knangla i kalwa, du sasè i nimòla. 20 Du i kdee dad to mimò sasè knangla i kalwa, na là ale mayè fdadong di salò ken gadè i dad sasè nimòla. 21 Kabay balù simto to matlu i nimoan fdadong kenen di salò du fye too teen i kdee nimoan mdà di Dwata." 22 Kafnge kdee ani salu Dyisas na dad mlalò kenen di dad banwe glam di Dyudiya. Mnè ale ditù na munyag ale i dad to. 23 Na Dyan gal munyag di satu banwe dnagit Anon mdadong di Salim du nun bong yéél ditù. Na salu dad to di kenen du fbunyag ale, 24 du di bang én, là fa bnilanggù Dyan. 25 Na nun dad mlalò ku Dyan, sdal ale satu Dyu gablà di kafbunyag. 26 Taman salu ale di ku Dyan, na manla di kenen, "Rabay, gafaldamam i demem sgalak di faltù i yéél Dyordan, i to tulenam di gami. Gal kenen munyag, na tadee dad to salu baling di kenen." 27 Na tmimel Dyan, manan, "Landè gnagan i to ku là gablé Dwata dun di kenen. 28 Gamu sa i mlinge i gmangu ise agu Krayst, i Mgalék Dwata. Kabay alò agu i to dek Dwata muna du fatlagad i kakelan. 29 Ku fkahta di kasdeme, gablà ku i lagi sandeme i gufikit i libun nfunan, na i to fatlagad i kasdeme fatanan i kakel i lagi sandeme na di kaklingen i taluan too kenen lehew. Salngad én deg, na too sikof nan i klehewgu du takel nan. 30 Na là fakay ku là kenen mbaling mdatah na agu mbaling mdanà. 31 "I to mdà di langit mdatah kenen di balù simto, bay i to mdà di tanà alò kenen to di tanà, na i manan alò mdà di tah tanà. I to mdà di langit, kenen i too mdatah di kdee. 32 I tulenan, dunan i teenan na talingen di langit, bay knean landè alì to faglut di manan. 33 Kabay ku simto dmawat i manan, fiten fagu di kdawatan kdee man Dwata too glut. 34 Du Dyisas i to dek Dwata, na i gumdà dad taluan di Dwata du sdulê blé Dwata i Tulusan di kenen. 35 Too bong nawa Maan i Tingaan, taman fagotan di kenen i kdee. 36 Na balù simto faglut di Tingà Dwata gamdawat nawan landè sen, bay ku simto là mimen i Tingà Dwata là gamdawat nawan landè sen, bay mnè kenen di kalbut Dwata kel di landè gusenan."

4

1 Na linge dad Farisi, too dee fa i dad to mlalò ku Dyisas na dee fa dad to bnunyagan di ku Dyan. 2 Kabay i kaglutan, ise ku Dyisas i munyag, bay én sa munyag i dad mlalò kenen. 3 Na di kgadè Dyisas i gman dad to di dad Farisi, tnagakan i banwe Dyudiya, na samfulê kenen di Galili. 4 Na nun duenan magu di banwe Samériya. 5 Na kel kenen di satu tukay banwe glam di Samériya dnagit Sikar mdadong di tanà blé Dyékob di tingaan Dyosif. 6 Na nun sol yéél déén tanakol Dyékob di muna. Na di kaltu i duh du mlungay Dyisas magu, sudeng kenen mdadong di sol yéél én. 7 Là déén dad mlalò kenen du fles ale salu di tukay banwe du mayad knaanla. Na nun kel déén satu libun mdà di Samériya du smulu. Na man Dyisas di kenen, "Begam agu banlé yéél du minum agu." 9 Na man i libun, "Ge satu to Dyu, na agu satu to mdà di banwe Samériya. Kan kè ku mni ge di deg yéél?" Ani manan, du i dad to Dyu là ale sgalak i dad to mdà di Samériya. 10 Na tmimel Dyisas, manan, "Ku aloam gadè ku i tan kayè Dwata blé di ge, na ku simto mni di ge yéél ani, tamni ge moon di deg yéél, na tablégu di ge yéél i mlé falami nawa." 11 Na man i libun, "Kabay landè syulam, na i sol yéél ani too mngalam. Nè gumweam i yéél mlé falami nawa? 12 Én gutambulmi Dyékob i makol i sol yéél ani. Na kenen, na dad ngaan, na dad lmanafan, kdeela minum yéél ani. Kayeam man kè mdatah ge fa di ku Dyékob?" 13 Na man Dyisas di kenen, "I kdee dad to minum i yéél di sol yéél ani, lêman ale malinum. 14 Kabay i dad to minum i yéél blégu dale là ale lêman malinum, du i yéél blégu di dale mgimò sfuten di lam nawala, na mlé nawa landè sen." 15 Na man i libun di kenen, "Banlém agu i yéél manam én, du fye là agu lêman malinum, na fye là agu lêman samfulê dini du smulu." 16 Na man Dyisas di kenen, "Mdà ge. Nngém yaanam, na samfulê gamu dini." 17 Na tmimel i libun, manan, "Landè yaangu." Na man Dyisas, "Glut i manam, landè yaanam ani, 18 du talime sa nan i kdee yaanam, bay i demem mnè ani ise yaanam. Too glut sa i manam." 19 Na man i libun, "Nilègu nan ge satu tugad Dwata, taman tan i manam gablà ani? 20 Én gumangamfù dad gutambulmi di Dwata di bulul ani, bay gamu dad Dyu, manyu i syudad Dyérusalém gumangamfù dad to di Dwata." 21 Na man Dyisas di kenen, "Libun, fye ku faglut ge i mangu ani, tamdadong i bang ise alò bulul ani ku demen Dyérusalém gumangamfùyu di Maito Dwata. 22 Na gamu dad to di Samériya là gamu gmadè i fnangamfùyu, bay gami dad Dyu gadèmi du i gumdà i kagalwà dad to, dunan di dad Dyu. 23 Kabay fan kel i duh, na takel nan ani, i too glut mangamfù di Mà dunan i dad to mangamfù di kenen mdà di nawala na mdà di kaglabatla i kaglut. Én i dad mangamfù knayè Dwata. 24 Na Dwata, tulus kenen, taman i untù kfangamfù di kenen mdà di nawa na mdà di kaglabat i kaglut." 25 Na man i libun di kenen, "Gadègu kel kadang di fulé duh i to Mgalék Dwata, i dnagitla Krayst. Na di kakelan tulenan gito kdee." 26 Na man Dyisas di kenen, "Agu sa i dunan, i stulen di ge ani." 27 Na di sleng Dyisas talù takel dad mlalò kenen, na too ale tikeng, du i libun i demen stulen, bay landè balù satu di dale smalek ku tan kayean di libun én, na ku tan i duenan stulen di kenen. 28 Na tnagak i libun i namun na samfulê kenen di lunsud, du tnulenan i dad to, manan, 29 "Sagwê gamu! Neyeyu i to tmulen di deg i kdee nimògu. Ken kenen Krayst, i Mgalék Dwata." 30 Taman tamdà ale lamwà di lunsud du salu di ku Dyisas. 31 Klo i là fa kel i dad to én di ku Dyisas, fakdo i dad mlalò kenen, manla, "To Tamdò, beg ge kmaan." 32 Kabay man Dyisas di dale, "Nun deg knaan i làyu gadè." 33 Na sasalek ale, manla, "Nun to dé tmunda kenen knaan?" 34 Na man Dyisas di dale, "Én deg knaan dunan i kimengu i knayè Mà, i mdek deg, na i kafngegu i fimoan deg. 35 "Ise én galyu man, 'Fat bulen gdè klo kel i bang kamtu?' Kabay mangu di gamu, takel i bang kamtu. Neyeyu i dee dad to salu dini, gambet ale i fule tagablà kantu. 36 Na i dad to kamtu dale, nun taden blé Dwata dale, du mdà di kaktula nun nawa i dad to landè sen. Taman i dad to mla na i dad kamtu sdulê ale flehew di ulê i nimòla. 37 Too glut i gal man, 'Satu i mla na satu i kamtu.' 38 Tadekta gamu kamtu di tanà gumla i dademe to, na mdà di dad nimòla, gamu gamwè i uléan." 39 Na too dee dad to mdà di lunsud én di Samériya faglut di ku Dyisas, du mdà di man i libun gine di kagmanan, "Tatulenan deg i kdee dad nimògu." 40 Taman di kakel i dad to mdà di Samériya di ku Dyisas beg ale fakdo kenen du fye mnè di safédla, taman mnè kenen déén lwe butang. 41 Na nun fa dee dademe to faglut di ku Dyisas du mdà di katdoan dale. 42 Na manla di libun én gine, "I kafaglutmi taise alò mdà di kagmanam gami, bay mdà di kaklingemi katdoan, na gadèmi too glut kenen i To Falwà i dad to di tah tanà." 43 Na kafnge i lwe butang, mdà ale Dyisas salu di banwe Galili. 44 Tanun man Dyisas, "I tugad Dwata là nafè i dad to di kenen too banwe." 45 Kabay di kakelan di Galili, too kenen dnawat i dad to déén, du dee di dale tasalu di Fista Duh Kaglius ditù di Dyérusalém na tateenla i kdee mgimoan ditù. 46 Na samfulê Dyisas di tukay banwe Kana déén di Galili, i banwe gufbalingan binu i yéél. Na nun satu ganlal déén mdà di Kafernaum i nun tingaan lagi nun tduk. 47 Di kaklinge i ganlal takel Dyisas di Galili mdà di Dyudiya, salu kenen di ku Dyisas, na fakdo du fye salu Dyisas di Kafernaum du fye began fangulê i tingaan du tafan mati. 48 Kabay man Dyisas di kenen, "Landè di gamu faglut di deg, silang ku mite gamu i dad tnikeng nimògu na i ilè kdatahgu." 49 Kabay man i ganlal di ku Dyisas, "E Amu, beg ge magin deg ditù, di là fa mati tingàgu." 50 Na tmimel Dyisas, manan, "Mulê ge du tamgulê i tingaam." Faglut i ganlal i man Dyisas di kenen, na mdà mulê. 51 Di dalanan mulê, snitong kenen dademe lifanan, na manla di kenen, "Tamgulê i tingaam." 52 Taman snalekan ale ku kilen i kgulê tingaan. Na manla, "Kwas i initan taklé i duh malfabi." 53 Na gafaldam i ganlal, i kman Dyisas di kenen, "Tamgulê i tingaam," dunan di taklé i duh, taman faglut kenen di ku Dyisas, na balù i kdee mnè di gumnean. 54 Na ani i galwe tnikeng mgimò Dyisas kafngen tmagak i banwe Dyudiya salu di Galili.

5

1 Kafnge én, nun fista i dad Dyu, taman salu Dyisas lêman di Dyérusalém. 2 Na déén di Dyérusalém nun kligu dnagit Bétsata di talù Hibru, mdadong di satu gal gufusuk i galla dnagit Gufusuk i Dad Bilibili. Na déén di kilil i kligu, nun gafdak lime gufsilung dad to. 3 Na nun dee dad to milè déén sahal dad tdukla, dad butè, dad kimay, na dad là galyak i lawehla. Fatanla i ksambug i yéél, 4 du gmanla nun gal bang ktufa satu kasaligan i Amuito Dwata salu di kligu, na snambugan i yéél, na ku simto i guna tufa di kligu balù tan i bung tdukan mgulê. 5 Na nun lagi déén nun tduk tlu falò walu fali klon. 6 Di kite Dyisas i to én, tagadean tatoo mlo kenen milè déén, taman snalekan kenen, manan, "Mayè ge kè ku mgulê?" 7 Na tmimel i to nun tduk, manan, "Hae, bay landè demegu mebe deg di yéél di bangan msambug, na di fan agu salu ditù tagal nun to guna di deg." 8 Na man Dyisas di kenen, "Tadag ge, nweam i gumileam, na magu ge." 9 Na di kman Dyisas ani mgulê kenen, na nwean i gumilean, na magu. Mgimò ani di Duh Kaftud i dad Dyu. 10 Na di kite i dad ganlal dad Dyu i nimò i to mgulê ani, manla, "Duh Kaftud ani! Nlafaam i flalò gablà di Duh Kaftud di kebem gumileam." 11 Kabay tmimel kenen, manan, "I to fgulê deg i mdek deg mwè i gumilègu na magu." 12 Na snalekla kenen, manla, "Simto kè i mdek ge mwè i gumileam na magu?" 13 Kabay là sa gadè i to mgulê ku simto fgulê kenen, du too dee dad to stifun déén, na fasbool Dyisas di dale, na mdà. 14 Kafnge én, teen Dyisas i to én déén di Bong Gumnè Dwata, na manan di kenen, "Neyem, tamgulê ge! Na nang ge lêman mimò sasè ken matnù i ksasè mkel di ge." 15 Na mdà i to mgulê gine, na tnulenan i dad ganlal dad Dyu na Dyisas kadì gafgulê kenen. 16 Du gambet ani i nimò Dyisas di Duh Kaftud, én i gumdà i dad ganlal dad Dyu mlayam kenen. 17 Na tmimel Dyisas dale, manan, "Là ftud i Màgu Dwata mimò kel ani, na salngad deg, mimò agu." 18 Na di kman Dyisas ani matnù baling kayè i dad ganlal dad Dyu mati kenen, là alò du nlafaan i Duh Kaftud, bay du manan Dwata i Maan, na di kmanan én, fasngadan i kton di Dwata. 19 Na tmimel Dyisas, manan, "Tulengu gamu i kaglutan, landè gimò i Tingà ku ise knayè i Mà. Én alògu nimò, i teengu di ku Mà, du i nimò Màgu, én i nimògu. 20 Du i Mà too kamdo deg i Tingaan, na fiten deg i kdee nimoan. Na fanan fite deg i too mdatah fa gamtikeng nimò, du fye too gamu tikeng. 21 Hae, du nték Mà i dad mati, na banlén ale nawa, na salngad én i Tingaan, du banlégu nawa i dad to knayègu. 22 Na ise ku Mà mukum i dad to, du agu i gumlén glal mukum dale, 23 du fye i kdee dad to mafè deg salngad i kafèla i Màgu. Na ku simto là mafè deg, na laan nafè Màgu i mdek deg. 24 "Tulengu gamu i kaglutan, ku simto to mimen i tnalùgu, na faglut di mdek deg, nun nawan landè sen, na talà kenen fanlayam di fulé duh, du balù kenen to mati di muna, bay di takafaglutan tanun falami nawan. 25 "Tulengu gamu i kaglutan, tamdadong nan i duh, na tadini sa nan, linge i dad to mati di salàla i tnalùgu, agu i Tingà Dwata, na i dad to mlinge na mimen i tnalùgu banlé falami nawa. 26 Du i Màgu gumdà i nawa, na salngad agu i Tingaan lê gumdà i nawa. 27 Na tagablén di deg glal mukum i dad to, du deg sa i dnagit Tingà To. 28 "Na nang gamu tikeng di mangu ani, du mdadong nan i duh i kdee dad to mati mlinge i tnalùgu déén di lbangla, 29 na lamwà ale. Na di kték i dad to gamgimò fye nun nawala landè sen, bay di kték i dad to gamgimò sasè, nukum ale di kaflayam landè sen." 30 Fadlug Dyisas talù, manan, "Landè gagangu nimò fagu alò di deg knayè. I kukum lalògu dunan i man Dwata di deg. Na too tlu kukumgu du ise deg knayè nimengu bay i knayè Dwata i mdek deg. 31 "Na ku alò agu i tmulen gablà di ktogu là fakay snalig. 32 Kabay nun fa satu tmulen gablà di deg, na i man Màgu too glut. 33 "Na nun dekyu di ku Dyan Gal Munyag, na i tulen Dyan gablà di deg too glut. 34 Ise ku én gusmaliggu i man dad to, bay faglabatgu gamu gablà di tulen Dyan du fye galwà gamu. 35 Na Dyan gambet kenen i salò too mneng du kenen sa faglabat i kaglut di dad to, na nun ayèyu flinge i manan, bay là mlo. 36 "Kabay nun fa fgadè gablà di deg mdatah fa di ktulen Dyan, dunan i dad nimò tafimò Mà deg. Hae, i kdee dad mgimògu én i tmulen na i Mà i mdek deg. 37 Na Mà, i mdek deg dini, kenen i satu tmulen gablà di deg, bay làyu lmen linge i taluan, na làyu lmen teen i bawehan, 38 na là mnè tnaluan di nawayu, du là gamu faglut di to dekan. 39 Tooyu gal ganbet i Tnalù Dwata du man nawayu mdà déén nun nawayu landè sen. Na blaam i Tnalù Dwata i tmulen gablà di deg. 40 Kabay knean là gamu mayè faglut di deg du fye moon gfunyu nawa landè sen. 41 "Ise én fanngabalgu kdayen i dad to, 42 bay gadègu kagkah i nawayu, landè kakdoyu Dwata. 43 I kaglutgu salu dini di gamu du dek i Màgu Dwata, bay làyu agu dnawat. Kabay ku nun dademe to salu dini di gamu du mdà alò di dale knayè, baling én dnawatyu. 44 Tan i kibòyu faglut du én tooyu knayè i kdayen mdà di demeyu to, ise i kdayen mdà di too glut Dwata. 45 "Nangyu fandam ku agu i mlé gamu salà di Màgu. I mlé gamu salà dunan Mosis i tooyu snalig, 46 du ku faglut gamu i man Mosis lê gamu faglut di deg du agu sa i gman Mosis di dad sulatan. 47 Kabay ku là gamu faglut i dad sulat Mosis, na tan i kibòyu faglut i tnalùgu."

6

1 Kafnge én, mdà Dyisas salu ditù di faltù i lanaw Galili, i lanaw dnagitla Tibiryas. 2 Na too dee dad to mlalò kenen du tateenla dad tnikeng mgimoan di kafguléan dad to nun tduk. 3 Kabay mnagad ale Dyisas di satu bulul, na sudeng ditù magin i dad gal mlalò kenen. 4 Na mdadong nan bang i fista dad Dyu dnagit Duh Kaglius. 5 Di keye Dyisas di glibutan teenan i dee dad to salu di kenen, taman manan di ku Filif, "Nè gumayadito gablà knaan fkaan i kdee dad to ani?" 6 Manan ani du tnilewan Filif ku nun ksaligan di kenen, bay tasanan gadè ku tan i fanan nimò. 7 Na tmimel Filif, manan, "I dee dad to ani, kulang i taden di walu bulen bayadito i fan fkaan dale, balù alò tukay blé di kat to." 8 Na talù i satu mlalò ku Dyisas dnagit ku Andru, dunan i flanek Simon Fiter, manan, 9 "Nun tingà lagi dini nun bnatun lime batù fan barli na lwe nalaf, bay tan gukmamu ani di kdee dad to ani." 10 Na man Dyisas, "Fsudengyu i dad to." Na nun too fye bnas tmabò déén, taman sudeng i dad to, na mdadong lime libu kdee dad lagi. 11 Na kafnge én, nwè Dyisas dad fan, na dmasal mlé fye di Dwata, na falelan di dad to sudeng déén. Na salngad i kiboan dad nalaf. Na kmaan kdeela kel di kabsolla. 12 Na di kabsolla, man Dyisas di dad mlalò kenen, manan, "Santifunyu i lukasan, fye landè malmo." 13 Na santifunla, na nun sfalò lwe been fnò lukas i dad lime batù fan barli fkaan Dyisas i dad to. 14 Di kite i dad to i tnikeng nimò Dyisas ani, manla, "Ani sa tugad Dwata sanfatanito dekan di tah tanà." 15 Na gadè Dyisas fan ale salu di kenen du fye nwèla du gnagala nimò harìla, taman mdà kenen salu di bulul aloan satu. 16 Na di kasdaf i duh, salu i dad mlalò ku Dyisas ditù di lanaw, 17 na myak ale di tah awengla du mifal ale i lanaw salu di Kafernaum. Takifu nan, bay là fa kel Dyisas déén di dale. 18 Na di bang én, too malbang i lwek du mgal i nus. 19 Na i kawagla kamwa nun kè lime ku demen nam kilumitru, na teenla Dyisas magu di tah lanaw salu di dale, na too ale likò. 20 Kabay manan di dale, "Agu sa ani. Nang gamu likò!" 21 Na lehew ale fsakay ku Dyisas di awengla, na di kyakan, tadéén ale di banwe gusalula. 22 Di kakwalan, ditù fa i dad to di faltù i lanaw, na gadèla malfabi nun alò satu aweng déén, dunan i snakay dad mlalò ku Dyisas. Na gadèla alò dad gal mlalò ku Dyisas mdà na là kenen magin. 23 Kabay nun dademe aweng mdà di banwe Tibiryas dmuung mdadong di gukmaanla fan, di tafnge i Amu mlé fye di Dwata. 24 Taman di kite i dad to talà déén Dyisas na dad mlalò kenen, gasil ale mdà maweng salu di Kafernaum du fanngaballa Dyisas. 25 Di kite i dad to ku Dyisas di faltù i lanaw, manla di kenen, "To Tamdò, kilen kakelam dini?" 26 Na tmimel Dyisas, manan, "Tulengu gamu i kaglutan, i duenyu mngabal deg ise ku gamlabat gamu i dad tnikeng tateenyu, bay du bsol gamu mdà di fan i gkaanyu. 27 Nang gamu faflayam mngabal i knaan di tah tanà lumak malmo, bay én gufaflayamyu mngabal i knaan gumdà nawa landè sen. Na agu, i dnagit Tingà To, i mlé dun di gamu, du tanun ilè di deg na agu i mgalék Dwata Mà mimò dun." 28 Na snalekla kenen, manla, "Tan i nimòmi du fye mgimòmi i knayè Dwata?" 29 Na tmimel Dyisas, manan, "Ani i knayè Dwata, dunan faglut gamu di to dekan dini." 30 Na smalek ale, manla, "Tan i tnikeng fitem du fye faglut gami di ge? Tan i gaganam nimò? 31 Du di kalngab dad gutambulito di banwe landè to mnè déén, kmaan ale mana mdà di langit salngad di gman di Tnalù Dwata, manan, 'Mlé kenen knaan mdà di langit du fye gamkaan ale.' " 32 Na man Dyisas di dale, "Tulengu gamu i kaglutan, ise sa ku Mosis mlé i knaan mdà di langit, bay Màgu mlé gamu i glut knaan mdà di langit. 33 I knaan blé Dwata dunan i tufa mdà di langit mlé falami nawa di dad to di tah tanà." 34 Na manla di kenen, "Amu, galam gami banlé i knaan én, kel di landè sen." 35 Na man Dyisas di dale, "Agu sa i knaan mlé nawa, na ku simto salu di deg laan lêman bitil, na ku simto faglut di deg laan lêman malinum. 36 "Gambet i tagmangu di gamu, balù tateenyu i dad nimògu, bay knean là gamu fa faglut. 37 I kdee dad to blé Màgu di deg salu ale di deg. Na balù simto i salu di deg làgu kenen fnang. 38 Du ise én duengu tufa mdà di langit du nimògu i deg knayè, bay salu agu dini du nimògu i knayè i mdek deg dini di tah tanà. 39 Na i knayè i mdek deg ku landè lana balù satu di kdee dad to blén deg, na ku sdulêgu ale nték mdà di fati kadang di fulé duh. 40 Du ani too knayè Màgu, ku balù simto to mite deg i Tingaan, na faglut di deg, gfunan nawa landè sen, na ntékgu kenen mdà di fati kadang di fulé duh." 41 Kaklinge i dad Dyu i gman Dyisas, "Agu i glut knaan mdà di langit," too ale mugak. 42 Manla, "Ise ani kè Dyisas tingà Dyosif? Gadeito sa i tuan! Kan ku manan tufa kenen mdà di langit?" 43 Na tmimel Dyisas dale, manan, "Nang gamu mugak déén. 44 Landè to fakay fdadong di deg ku là nebe Mà, i mdek deg, na ntékgu kenen mdà di fati kadang di fulé duh. 45 Balù i dad tugad Dwata di muna fa, smulat ale, manla, 'I kdee dad to tdò Dwata.' Na i kdee dad to flinge na gamwè i tdò Màgu, salu ale di deg. 46 Ise ku én kayègu man ku nun to lmen mite i Màgu Dwata du alò agu, i mdà di Dwata, mite kenen. 47 Tulengu gamu i kaglutan, i kdee dad to faglut di deg gfunla nawa landè sen. 48 Agu i knaan mlé nawa. 49 Too glut kmaan i dad gutambulito mana, i knaan mdà di langit, di kalngabla di banwe landè to, bay knean mati ale. 50 Kabay i knaan mangu ani mdà di langit, ku nun to kmaan dun là mati. 51 Na agu sa i knaan mdà di langit mlé nawa, na balù simto to kmaan i knaan ani nun falami nawan landè sen. Na i knaan mangu ani dunan i lawehgu blégu kadang du fye nun falami nawa i dad to di klamang banwe." 52 Kaklinge i dad ganlal dad Dyu i manan, tambù ale sdal, manla, "Tan kibò to ani mlé lawehan du fye knaanito?" 53 Na man Dyisas, "Tulengu gamu i kaglutan, ku làyu knaan i laweh i dnagit Tingà To, na làyu ninum i litean, landè falami nawayu. 54 Kabay balù simto kmaan i lawehgu na minum i litègu nun nawala landè sen, na ntékgu ale mdà di fati kadang di fulé duh, 55 du i lawehgu too glut knaan na i litègu too glut ninum. 56 Na ku simto kmaan i lawehgu na minum i litègu, mnè kenen di deg, na mnè agu di kenen. 57 I Màgu i mdek deg, dunan i gumdà nawa, na i deg nawa mdà di kenen, salngad én, i dad to kmaan i lawehgu, nun falami nawala mdà di deg. 58 Ani i knaan mdà di langit, na là salngad di knaan mana knaan i dad gutambulito, du knean mati ale, bay balù simto i kmaan i knaan mangu ani nun nawala landè sen." 59 Ani man Dyisas di katdoan di gusatdò i dad Dyu di banwe Kafernaum. 60 Di kaklinge i dad mlalò ku Dyisas i tdoan ani, man dee di dale, "Too malima i tdoan ani. Simto kè gamdawat dun?" 61 Balù landè tmulen, gadè Dyisas too nugak i dad mlalò kenen i tdoan gine, taman manan di dale, "Ani kè gumdàyu tmagak i klalòyu deg? 62 Ku én fandamyu, tan i fandamyu ku teenyu agu, i dnagit Tingà To, magket samfulê di gumdàgu di langit? 63 Alò i Tulus Dwata gmagan mlé nawa, là sa gwè dun fagu di kgagan i to. I tdògu gamu ani mdà di Tulus Dwata, na gamlé falami nawa. 64 Kabay nun dademe di gamu là faglut di deg." Man Dyisas ani du mdà di kagatbuan tagnean gadè ku simto dad là faglut di kenen, na ku simto i fan mangkal kenen di fati. 65 Na manan, "Én i duengu man di gamu gine, silang gmagan satu to salu di deg ku tnabeng i Màgu." 66 Na mdà di man Dyisas ani, dee dad mlalò kenen tmagak kenen, na là ale nan magin kenen. 67 Taman snalek Dyisas i sfalò lwe gal mlalò kenen, manan, "Man, lê gamu mayè tmagak deg?" 68 Na tmimel Simon Fiter, manan, "Amu, landè dademe to gusalumi, du alò ge i gumdà dad tnalù mlé nawa landè sen. 69 Tafaglut gami di ge, du gadèmi ge sa i To Landè Salà dek Dwata sanfatanmi." 70 Tmimel Dyisas, manan, "Agu malék gamu dad sfalò lwe, bay knean nun satu di gamu salig Satanas." 71 Dyudas, tingà Simon Iskariyot, i gmanan du Dyudas kadang i mangkal kenen di fati balù kenen satu di sfalò lwe gal mlalò ku Dyisas.

7

1 Kafnge én, lamngab Dyisas di banwe Galili. Laan mayè lamngab di banwe Dyudiya du i dad ganlal dad Dyu déén mayè mati kenen. 2 Na tamdadong nan i fista dad Dyu dnagit Dad Flo Gumnè. 3 Taman man dad flanekan lagi di kenen, "Fye ku mdà ge malò i fista ditù di Dyudiya, du fye mite i dad mlalò ge i dad tnikeng galam nimò, 4 du ku nun to mayè too mdengeg, laan buni i dad nimoan. Du ku gmagan ge mimò tnikeng, fitem di kdee dad to." 5 Én manla du balù ale i dad flanekan, là ale faglut di kenen. 6 Na man Dyisas di dale, "Là fa kel i bang kfite i kdatahgu, bay gamu balù kilen, fakayyu nimò i knayèyu. 7 Là gamu knang nawa i dad to mlalò knayè i banwe, bay knangla agu nawa du fgadègu i ksasè i dad nimòla. 8 Muna gamu di fista, làgu fa salu ditù, du là fa too kel i banggu." 9 Kafngen man ani, fanak kenen di banwe Galili là mlo. 10 Kabay di kakubu dad flanekan salu di fista, malò Dyisas, bay landè gmadè ku salu kenen ditù. 11 Kabay fanngabal kenen i dad ganlal i dad Dyu déén di fista, na sasalek ale, manla, "Tanè Dyisas?" 12 Na nun dee dad to stifun déén sungag gablà di kenen. Man i dademe, "Fye to kenen," bay man i dademe, "Là sa, du fangawan i dad to." 13 Kabay landè dad to stulen gablà di kenen di gudee i dad to du likò ale i dad ganlal i dad Dyu. 14 Na mdadong i kagatngà i fista, salu Dyisas di Bong Gumnè Dwata, na tamdò. 15 Na i dad ganlal i dad Dyu too ale tikeng di kaklingela i tdoan, na manla, "Nè gumdà i gnadè i to ani, du laan kè skwila?" 16 Taman tmimel Dyisas dale, manan, "Ise ku di deg gumdà i tdògu, bay mdà di Dwata i mdek deg. 17 Nè i to mayè mlalò i knayè Dwata gmadè sa ku i tdògu mdà di Dwata ku demen mdà alò di deg fandam, 18 du nè i to tamdò mdà di kenen fandam, kayean alò fdatah i kenen kto, bay ku tamdò satu to du fye fdatahan i to mdek kenen, én i gugmadèyu matlu to kenen na laan tmulen kéng. 19 Blé gutambulito Mosis di gamu i dad flalò Dwata, bay landè satu di gamu gamlalò dun du ku lalòyu kan ku mayè gamu mati deg?" 20 Na tmimel i dad to, manla, "Tabnusaw ge! Simto mayè mati ge?" 21 Na tmimel Dyisas, manan, "Alògu nimò satu tnikeng di Duh Kaftud, na tikeng gamu. 22 Dek gamu Mosis tmulì i dad lagi, bay ise alò mdà di ku Mosis i laloito én, du dad gutambulito di muna mimò dun. Na balù di Duh Kaftud tnulìyu dad ngàyu. 23 Na ku falohyu i ktulì dad lagi di Duh Kaftud du fye nimenyu i flalò Mosis, na kan ku kalbutyu agu du fangulêgu i satu to di Duh Kaftud? 24 Nang gamu mukum i dademeyu to di làyu fa too gadè i kdee, bay funayu too neye i kaglutan du fye tlu i kukumyu." 25 Na nun dad to déén di Dyérusalém di kaklingela i gman Dyisas smalek ale, manla, "Ise ani dé i to fanngaballa du kayèla fnati? 26 Kabay neyeyu, gal kenen tamdò di kite i kdee, na landè to fnang kenen. Ken gadè i dad ganlalito na kenen Krayst i Mgalék Dwata. 27 Kabay ise kè kenen, du ku salu dini i to Mgalék Dwata, landè to kun, gmadè gumdaan, bay gadeito i gumdà to ani." 28 Taman di katdò Dyisas di Bong Gumnè Dwata falbongan i taluan, manan, "Man nawayu dilèyu agu, na gadèyu kè i gumdàgu? Kabay i ksalugu dini ise mdà di deg knayè, bay nun sa mdek deg, na too glut kenen. Kabay làyu kenen gadè. 29 Kabay agu, gadègu kenen du kenen sa i gumdàgu, na kenen i mdek deg salu dini." 30 Na fanla kenen kanfè, bay knean landè di dale magot kenen, du ise sa fa bangan. 31 Kabay dee dademe to faglut Dyisas i Mgalék Dwata, du manla, "Too glut Mgalék Dwata to ani du landè kè dademe to gmagan mimò i dad tnikeng mgimoan." 32 Linge dad Farisi i santulen i dad to gablà ku Dyisas, taman ale na dad ulu i dad bà di Dwata, dekla i dad to gal munung i gumangamfù, du fakfèla ku Dyisas. 33 Na du gadè Dyisas, manan, "Talà mlo nan i knègu di safédyu, du tafan agu samfulê di to mdek deg. 34 Di kdàgu fanngabalyu agu, bay làyu agu teen, du là gamu gmagan salu di banwe gusalugu." 35 Na sasalek i dad ganlal i dad Dyu, manla, "Nè dé i gusalun i laito fakay teen? Salu kenen dé di banwe i dad to Grik gumnè i demeito dad Dyu, du tdoan dad to ise Dyu. 36 Na tan dé i kayean man, du manan, 'Fanngabalyu agu, bay làyu agu teen,' na, 'Là gamu gmagan salu di banwe gusalugu.' " 37 Too mabtas di dad Dyu i sangal duh i fistala. Na di kakel i duh én, tadag Dyisas, na falbongan taluan, na manan fagu di fléd, manan, "Kdee dad to malinum salu gamu di deg, na minum gamu, 38 du nun gsulat di Tnalù Dwata, manan, 'Mdà di nawa i to faglut di deg, maloh i yéél mlé nawa landè sen.' " 39 Na i yéél man Dyisas ani dunan i Tulus Dwata i fan gdawat i dad to faglut di kenen. Kabay di duh atù là fa gablé i Tulusan du là fa gdawat Dyisas i kdatahan di langit. 40 Kaklinge dad to i man Dyisas ani là salngad i fandamla, man i dademe, "Too glut, i to ani dunan i Tugad Dwata fatanito." 41 Man i dademe, "Ani sa Krayst i Mgalék Dwata." Kabay man i dademe, "Là sa fakay ku i Mgalék Dwata mdà di banwe Galili, 42 du là kè gsulat di Tnalù Dwata, na i Mgalék Dwata dunan satu bel Harì Dabid na sut kenen di banwe Bétléhém di gumnè Dabid?" 43 Taman masgalel fandam i dad to gablà ku Dyisas. 44 Nun dademe mayè kamfè ku Dyisas, bay landè di dale magot kenen. 45 Na samfulê dad gal munung i gumangamfù fan kamfè ku Dyisas. Na smalek i dad ulu i dad bà di Dwata na dad Farisi i mdek dale, manla, "Kan ku làyu nebe kenen dini?" 46 Na tmimel i dad munung, manla, "I duenan du landè fa lmen tamdò salngad i to ani!" 47 Na man i dad Farisi di dale, "Balù fa gamu kè gaganan fangaw? 48 Nun kè gadèyu to mdà di dad ganlal i dad Dyu ku demen dad Farisi faglut di kenen? 49 Landè sa! Alò dad to là gmadè i flalò blé Dwata fagu di ku Mosis i faglut di kenen, na fanlayam ale Dwata kadang." 50 Kabay Nikodimus, i to salu di ku Dyisas di gutngà butang, lê kenen satu di dad ganlal ani, na manan di dademen, 51 "Kabay man i flalò blé di gito, silang fakay nukum i satu to ku talingeito i manan du fye gadeito i mgimoan." 52 Na tmimel i dademen ganlal, manla, "Kan ku nsenam kenen? Lê ge kè mdà di Galili? Ku toom ganbet i Tnalù Dwata, gadeam landè tugad Dwata mdà di Galili!" 53 Kafnge én, mulê kdee dad to én.

8

1 Kabay Dyisas salu kenen di bulul Olib. 2 Na di kwal én too flafus, samfulê Dyisas di Bong Gumnè Dwata. Na nun dee dad to stifun di glibutan, taman sudeng Dyisas, na tdoan ale. 3 Di slengan tamdò takel i dad tamdò i dad flalò blé Dwata fagu di ku Mosis na lêman dad Farisi na nebela di kenen satu libun tagnumahla di klafaan i yaanan, na ftadagla di muna i dad to. 4 Na manla di ku Dyisas, "To Tamdò, tagnumahmi i libun ani mlafà i yaanan. 5 Na man i flalò blé Mosis di gito, i to mlafà i yaanan tnudà batu kel di kfatin. Na tan i manam gablà kenen?" 6 I duenla man ani du tnilewla Dyisas du kayèla banlé kenen salà. Kabay kudung Dyisas, na sulatan i tnaloan di tanà. 7 Na du là ale fanak smalek kenen, taman tadag kenen, na manan, "Nè i to di gamu landè salà, kenen i muna tmudà i libun ani batu." 8 Na lêman kudung Dyisas, na smulat di tanà. 9 Na di kaklinge i dad ganlal dad Dyu i gman Dyisas ani lamwà ale man satu satu dale. I muna mdà i tua, klo i dademe. Na én alò gtagak, Dyisas na i libun tadag di munan. 10 Na tukeng Dyisas, na manan di kenen, "Libun, tanè i dad to mlé ge salà? Landè nan gtagak mlayam ge?" 11 Na tmimel i libun, manan, "Landè nan, Amu." Na man Dyisas, "Balù agu, làta ge fanlayam. Mulê ge, na nang ge lêman mimò sasè." 12 Na lêman talù Dyisas, manan, "Agu i salò lamwa i fandam dad to di tah tanà. Balù simto dad to mlalò deg là nan magu di gukmifu du nun mneng di dale gumdà falami nawa." 13 Na man i dad Farisi di kenen, "Aloam satu tmulen gablà di ktom, taman là fakay fnaglut i manam." 14 Na tmimel Dyisas, manan, "Balù alò agu i tmulen gablà di ktogu, slame glut i mangu, du gadègu i gumdàgu na i gusalugu. Kabay gamu, làyu gadè gumdàgu ku demen i gusalugu. 15 Na gamu kukum mdà alò di fandamyu, bay deg, landè to nukumgu dini. 16 Kabay ku mukum agu too tlu i kukumgu, du ise ku alò deg i mukum, bay balù i Màgu i mdek deg dini. 17 Nun gsulat di dad flalò blé Dwata di gamu, manan ku salngad man i lwe to, fakay fnaglut i manla. 18 Tmulen agu gablà di ktogu, na Màgu i mdek deg, lê tmulen gablà di deg." 19 Taman smalek ale, manla, "Tanè i maam?" Na tmimel Dyisas, manan, "Làyu agu gadè, na làyu gadè i Màgu, du ku gadèyu agu, lêyu gadè i Màgu." 20 Man Dyisas ani di klon tamdò di lam i Bong Gumnè Dwata mdadong di gufkah filak gal blé di Dwata. Kabay landè to gmagan kamfè kenen du ise sa fa bangan. 21 Na lêman talù Dyisas di dad Dyu, manan, "Tafan agu tmagak gamu, na balù fanngabalyu agu, knean mati gamu di là maglifet i salàyu. Na là gamu fakay salu di gusalugu." 22 Na sasalek i dad ganlal i dad Dyu, manla, "Kan ku manan nun gusalun i laito fakay gusalu? Fanan dé fnati i kton?" 23 Na man Dyisas di dale, "Én gumdàyu di tah tanà ani, bay deg mdà di langit. Gamu to di tanà, deg ise. 24 I duengu man di gamu, mati gamu di là fa maglifet i salàyu, du ku là gamu faglut di gmangu gablà di ktogu, mati gamu di là fa maglifet i salàyu." 25 Na snalekla kenen, manla, "Simto ge kè?" Man Dyisas di dale, "Agu i tagtulengu di gamu tamdà fa di kagatbuan. 26 Nun dee fa kayègu man gablà di gamu, na dee gumukumgu gamu. Kabay én alògu man di dad to i lingegu mdà di to mdek deg na i kdee gmanan too glut." 27 Kabay làla glabat na i manan mdek kenen dunan i Maan Dwata. 28 Taman man Dyisas, "Kadang di kagketyu deg, i dnagit Tingà To, di krus, gadèyu glut i gmangu gablà di ktogu, na gadèyu landè mgimògu mdà di deg knayè, bay alògu man i tdò Màgu deg. 29 Na i mdek deg, gal fikit di deg, na laan agu sa tnagak, du i kdee nimògu gaflehew kenen." 30 Na mdà di gman Dyisas ani nun dee dad to faglut di kenen. 31 Taman man Dyisas di dad Dyu faglut di kenen gine, "Ku fnèyu di nawayu i tdògu gamu, mbaling gamu dad too glut mlalò deg, 32 na gmadè gamu i kaglut, na fagu di kaglut, galwà gamu mdà di kaglifanyu." 33 Na manla di kenen, "Gami dad bel Abraham, na là gami lmen lifan di balù simto. Kan ku manam galwà gami di kaglifanmi?" 34 Na tmimel Dyisas, manan, "Tulengu gamu i kaglutan, ku nun to gamsalà, kenen sa i lifan di salà. 35 Na kagkah i lifan, landè kaglutan mnè di gumnè mfunan kel di landè sen, bay i tingà, fakay mnè di malay maan kel di landè sen. 36 Taman ku én falwà gamu di kaglifanyu i Tingà Dwata, too glut galwà gamu. 37 Gadègu gamu dad bel Abraham, bay knean kayèyu agu fnati, du làyu dnawat i tnalùgu. 38 Én mangu di gamu i fite Màgu deg, bay gamu, én nimòyu i man màyu di gamu." 39 Na tnimella kenen, manla, "Abraham i màmi." Kabay man Dyisas di dale, "Ku glut gamu dad ngà Abraham, taganbetyu moon i nimoan. 40 Na én alò gmangu di gamu i kaglut lingegu mdà di Dwata, bay knean kayèyu agu fnati. Kabay ise ku salngad én nimò Abraham. 41 I nimòyu ani salngad sa i nimò màyu." Na manla, "Ise gami dad ngà magu dungan, du satu alò màmi, dunan Dwata." 42 Na man Dyisas di dale, "Ku glut Dwata i màyu takanbongyu agu nawa, du salu agu dini mdà di kenen. Ise ku mdà di deg knayè, bay Dwata i mdek deg dini. 43 Kan ku làyu glabat i mangu? I duenan du fbakong gamu du làyu gagan flinge dun. 44 I màyu dunan Satanas, na i knayèyu nimò dunan i knayè i màyu. Tagnè kenen manò mdà fa di kagatbuan, na laan nsen i kaglut du landè sa kaglut mnè di kenen. Di ktulenan kéng, én duenan du takenen kagkah. Tagnè kenen gal tmulen kéng, na kenen gumdà i kdee kakakéng. 45 Kabay du tmulen agu i kaglut, na én i duenyu là faglut deg. 46 Landè di gamu gamtulen balù satu sasè nimògu. Na ku glut i mangu, kan ku làyu agu fnaglut? 47 I dad ngà Dwata, too ale flinge na mimen i manan, na i duenyu là flinge du ise gamu dad ngaan." 48 Na tmimel i dad Dyu, manla, "Too glut i manmi, én gumdaam di Samériya, na nun busawam!" 49 Na tmimel Dyisas, manan, "Landè sa busawgu. Én nimògu fdatah i Màgu, bay fdanàyu agu. 50 Làgu mngabal kdayen i dad to, bay kayè Dwata ku dnayenla agu, na kenen i mukum ku glut i mangu. 51 Tulengu gamu i kaglutan, ku nun to mimen i tdògu là kenen mati." 52 Na man i dad Dyu, "Toomi nan gadè nun busawam! Du balù Abraham na i dad tugad Dwata di muna fa, i kdeela tamati, bay balingam man, 'Ku nun to mimen i tdògu là kenen mati.' 53 Kayeam man ge kè mdatah fa di gutambulmi Abraham. Tamati kenen na lêman i dad tugad Dwata. Na simto ge kè?" 54 Tmimel Dyisas, "Ku deg dmayen i ktogu landè btas i kdayen én. Kabay i dmayen deg i Màgu, dunan i manyu Dwatayu. 55 Kabay làyu kenen dilè, bay deg, dilègu kenen. Na kaflingenta dun ku mangu làgu kenen gadè mbaling agu tmulen kéng salngad gamu. Kabay làgu tmulen kéng du gadègu sa kenen, na nimengu i manan. 56 I gutambulyu Abraham too lehew du teenan i duh ksalugu dini. Na di kiten dun too kenen lehew." 57 Na man i dad Dyu di kenen, "Là gafat ge lime falò fali, na manam tateenam Abraham!" 58 Na man Dyisas, "Tulengu gamu i kaglutan, di là fa sut Abraham tagnè nun agu." 59 Kagman Dyisas ani, mulut dad Dyu batu du fanla kenen tnudà. Kabay flidung Dyisas, na fles lamwà di Bong Gumnè Dwata.

9

1 Di sleng Dyisas magu nun teenan satu to butè mdà di ksutan. 2 Na smalek i dad gal mlalò kenen, manla, "To Tamdò, kan ku butè to ani mdà di ksutan? Simto gamsalà, kenen ku demen dad tuan?" 3 Na man Dyisas, "Ise ku i duenan butè ku mdà di kenen salà ku demen i salà dad tuan, bay i duenan du fye fite i bong ktulus Dwata fagu di kenen. 4 Di klo fa mduh, too ito mimò knayè i mdek deg dini du là mlo nan kakel i kifu na talandè nan gmagan mimò. 5 Na di klogu fa dini, agu sa i salò lamwa i fandam i dad to di tah tanà." 6 Na di kagman Dyisas ani dmulà kenen di tanà, na nimoan fitak mdà di ibalan, na ihokan di mata i to butè. 7 Na dekan i to butè, manan, "Mdà ge na lngauf di kligu Silom." (I gumtatek talù Silom dunan mdek.) Na salu i to én ditù du lngauf na di kuléan mite kenen. 8 Di kite i dademen saldan na dad to gal mite kenen gal mni di laan fa mite, manla, "Ise ani i to gal sudeng na mni?" 9 Na man i dademe, "Hae, dunan sa." Kabay man i dademe, "Ise kenen, bay salngad i bawehan." Kabay man i to én di dale, "Deg sa i dunan." 10 Taman snalekla kenen, manla, "Na tan i gumdaam mite?" 11 Na tmimel kenen, manan, "Satu to dnagit Dyisas mimò i fitak, na ihokan di matagu, na dekan agu lngauf di kligu Silom. Taman salu agu ditù na lngauf, na mdà déén tamite agu." 12 Na smalek ale, manla, "Tanè i to manam?" Kabay manan, "Làgu gadè." 13 Kafnge én, nebela i to butè salu di dad Farisi. 14 Na i duh kimò Dyisas i fitak di kafguléan i to butè, dunan Duh Kaftud i dad Dyu. 15 Na lêman smalek dad Farisi di to én ku tan i gumdaan mite. Na manan di dale, "Ihokan i fitak di matagu, na kafngegu lngauf tamite agu." 16 Na man i dademe dad Farisi, "Ise kenen to mdà di Dwata du laan nimen i flalò gablà di Duh Kaftud." Kabay man i dademe, "Ku to gamsalà kenen, laan gagan mimò tnikeng gambet ani." Na là salngad i fandam i dad Farisi gablà ku Dyisas. 17 Taman lêmanla snalek i to butè manla, "Tan manam gablà di to én, du manam tafanguléan i matam?" Na tmimel i to butè, manan, "Kenen sa satu tugad Dwata." 18 Kabay là faglut dad ganlal i dad Dyu ku tagnè butè to ani, na ku tamgulê kenen mdà di kbutean. Taman tlola i tuan, 19 na snalekla, manla, "Too glut kè tingàyu ani, i manyu tagnè butè mdà di ksutan? Tan i gumdaan mite?" 20 Na man i dad tuan, "Hae, gadèmi ani tingàmi, na tagnè kenen butè mdà di ksutan, 21 bay làmi gadè i gumdaan mite, na làmi gadè ku simto i fgulê kenen. Snalekyu kenen du tagablà ktuan, na gamtimel nan kenen gablà di kton." 22 Én man i dad tuan, du likò ale i dad ganlal i dad Dyu, du satu nawala di kmanla na ku simto mangman na Dyisas i Mgalék Dwata, làla kenen faloh fusuk di gal gusatdò. 23 Taman én duen i dad tuan mangman, "Snalekyu kenen du tagablà ktuan tmimel." 24 Na taman tlola lêman i to butè, na manla di kenen, "Tmulen ge i kaglutan di muna Dwata. Hae, du gadèmi Dyisas ani alò satu to gamsalà." 25 Na tmimel i to én, manan, "Làgu gadè ku gamsalà kenen ku demen là. Én alògu gadè butè agu di muna, bay ani tamite agu." 26 Na lêmanla man di kenen, "Tan i nimoan di ge? Tan i kiboan fgulê i matam?" 27 Na tmimel kenen, manan, "Tatulengu gamu, bay là gamu flinge! Kan ku mayè flinge lêman? Mayè gamu kè mbaling dad mlalò kenen?" 28 Na mdà di kalbutla talù ale sasè di kenen, manla, "Ge sa i satu mlalò kenen, bay gami là. Mosis i lalòmi. 29 Gadèmi talù Dwata di ku Mosis, bay i to manam ani, balù i gumdaan làmi gadè!" 30 Na tmimel i to én, manan, "Too gamtikeng i manyu, du gaganan fgulê i matagu, na kan ku làyu gadè gumdaan? 31 Gadeito là tnabeng Dwata i dad to gamsalà, bay tnabengan i dad to mafè kenen na mimen i knayean. 32 Mdà di kgimò i banwe kel i ani landè fa lingemi ku nun gafgulê i to butè mdà di ksutan. 33 Ku ise kenen mdà di Dwata, laan gamgimò tnikeng salngad ani." 34 Na manla di kenen, "Tdoam gami kè? Blaam tagnè ge to too gamsalà mdà di ksutam!" Taman falwàla kenen di gusatdòla. 35 Linge Dyisas na tafalwàla i to fanguléan mdà di gusatdòla. Na di kiten dun snalekan kenen, manan, "Faglut ge di Tingà To?" 36 Na tmimel i to, manan, "Amu, tulenam deg ku simto kenen, du fye faglut agu di kenen." 37 Na man Dyisas, "Tateenam sa kenen, na kenen i demem stulen ani." 38 Na man i to, "Amu, faglut agu." Na lkuad kenen di muna Dyisas na mangamfù. 39 Na man Dyisas, "I duengu salu di tanà ani du fye mukum. Nè i to là mite tnabenggu kenen fye mite i kaglutan. Kabay nè i to man nawan tagnè kenen mite fitegu kenen kadì butè." 40 Na nun dad Farisi magin kenen déén mlinge i manan, na manla, "Kayeam man gami butè?" 41 Na man Dyisas di dale, "Kaflingenta dun ku glut gamu dad to butè, là gamu gablà banlé i salà. Kabay du galyu man mite gamu, bay làyu dnawat i kaglutan, taman mnè gamu fa di salà."

10

1 Na tmulen Dyisas satu fléd, manan, "Tulengu gamu i kaglutan, i to là fusuk di bà takab i bkuku dad bilibili, bay baling mkef di labat, dunan to tmaku ku demen to mwè knun fagu di leges. 2 Kabay i to fusuk di bà takab, dunan i to mifat dad bilibili. 3 Na i to munung i bà takab, falohan kenen fusuk di bkuku. Na flinge dad bilibili i taluan, na tlon kat satu dad bilibilin fagu di dagitla, na neben ale lamwà. 4 Na di kagalwà kdee bilibilin, magu kenen gsen di munala na mlalò i dad bilibilin du dilèla i taluan. 5 Kabay là ale mlalò i to làla dilè, bay balingla kenen knila du làla nilè i taluan." 6 Ani i fléd tulen Dyisas di dale, bay làla glabat i gumtatekan. 7 Taman lêman talù Dyisas di dale, manan, "Tulengu gamu i kaglutan, agu i dalan gufusuk i dad bilibili di bkukula. 8 I kdee dad muna di deg, i dad tamdò dad ise glut tdò, salngad ale i dad to tmaku na mwè knun fagu di leges. Kabay dad bilibiligu là ale flinge dale. 9 Agu i gufusuk dad bilibiligu. Na nè i fusuk fagu di deg, nun kagalwaan. Na landè gukulangan du salngad kenen i bilibili fusuk na lamwà, du fye mite gumteban. 10 I to tmaku alò fusuk déén du tmaku, manò, ku demen falmo, bay agu, salu agu dini, du fye nun falami nawa i dad to, na i falami nawa blégu di dale landè gukulangan. 11 "Agu i too fye mifat bilibili, du i fye mifat bilibili blén i kton di fati du fye galwà dad bilibilin. 12 Kabay i to alò tnaden mifat dad bilibili na ise mfun dale, di kiten satu ayem di bnas salu di dad bilibili, balingan ale tnagak na mila. Taman nakét ale i ayem di bnas, na sanbalétan i dademe. 13 Mila i to tnaden, du ise kenen mfun i dad bilibili, na là ale mabtas di kenen. 14 "Agu i too fye mifat i dad bilibili. Sgadè gami mà, na salngad én i kasgadèmi i dad bilibiligu. Na gatlagad agu mlé i ktogu di fati du fye galwà ale. 16 Na nun dademe dad bilibiligu, là fa gakuf di lumbuk nifatgu ani. Na lêgu ale nebe kadang, na flinge ale i talùgu. Na masasatu kdeela di satu lumbuk kadang, na alò satu mifat dale. 17 "Too bong nawa i Màgu deg du gatlagad agu mlé i ktogu di fati tlas dale, du fye balù ku mati agu, lêman agu mték. 18 Landè to fakay gamfati deg, bay mati agu kadang du mdà sa di deg knayè. Nun kaglutgu mlé i ktogu di fati, na nun kaglutgu mawì dun du ani i dek Mà deg." 19 Di kaklinge i dad Dyu i man Dyisas ani, talêman sahal i fandamla. 20 Dee di dale talù, na manla, "Book kenen du nun busawan! Kan ku fanlingeyu kenen?" 21 Na man i dademe, "Ise én talù i to nun busaw! Gmagan kè busaw fgulê i to butè?" 22 Na kel i bang i fista dad Dyu i kafaldamla i klaneb na kuman i Bong Gumnè Dwata déén di syudad Dyérusalém, gaslà di dangan katno. 23 Na salu Dyisas di Bong Gumnè Dwata, na magu kenen di balkun dnagit Balkun Solomon. 24 Na stifun i dad Dyu di safédan, na snalekla kenen, manla, "Kilen kè ktulenam gami i kaglut du fye là lwe nawami? Ku ge i Mgalék Dwata, fbangalam di gami." 25 Na tmimel Dyisas, manan, "Tagtulengu di gamu, bay knean là gamu faglut. I dad tnikeng nimògu fagu di dagit Mà, én tmulen gablà di deg, 26 bay làyu fnaglut, du ise gamu i dad bilibiligu. 27 Du i dad bilibiligu, flinge ale i tnalùgu, na dilègu ale, na mlalò ale deg. 28 Banlégu ale nawa landè sen, na là ale malmo di salàla, na landè gamlad dale mdà di deg, 29 du Màgu Dwata i mlé dale di deg, too kenen mdatah di kdee, taman landè gamlad dale mdà di ifat Màgu. 30 Mà na deg, satu gami." 31 Kaklinge dad Dyu ani, mulut ale batu du fanla kenen tnudà, 32 bay man Dyisas di dale, "Tafitegu di gamu dee dad fye nimò fimò Màgu deg. Nè kè di dad nimògu i gumdàyu tmudà deg batu?" 33 Na tmimel i dad Dyu, manla, "Ise ku dad fye nimò duenmi tmudà ge batu, bay du fdanaam i kdatah Dwata, du fasngadam i ktom di kenen, na blaam ge sa alò to!" 34 Na tmimel Dyisas, manan, "Tafsulat Dwata di flalòyu, manan, 'Tagmangu, gamu sa dad dwata.' 35 Na too glut i Tnalù Dwata, na là fakay mgili. Na ku dad dwata i katlo Dwata i dad to gumlén i Tnaluan, 36 na kan ku manyu fdanàgu i kdatah Dwata di kmangu agu i Tingaan, du agu sa i Mgalék Mà dekan dini di tah tanà? 37 Na ku ise én nimògu dad nimò Màgu, na nangyu agu fnaglut. 38 Kabay ku én nimògu dad nimò Màgu, fnaglutyu i fye nimògu balù làyu agu fnaglut. Du ku fnaglutyu én, gadèyu mnè Mà di deg, na mnè agu di kenen." 39 Na tafanla kenen kanfè lêman, bay galwà kenen déén. 40 Na mdà Dyisas mifal i yéél Dyordan salu di banwe gal gumunyag Dyan di muna, na flo mnè ditù. 41 Na dee dad to salu di kenen, du én manla, "Balù landè dad tnikeng i mgimò Dyan, bay i kdee gmanan gablà ku Dyisas slame glut." 42 Na dee dad to déén faglut di ku Dyisas.

11

1 Na nun to fandas dnagit ku Lasarus mnè di Bétani, i lunsud gumnè Méri na flanekan libun Marta. 2 Méri ani, dunan i mkok i fangbun di blì Dyisas, na nifun i wakan. I fandas ani dunan flanekan lagi Lasarus. 3 Na nun to dek i lwe libun ani salu di ku Dyisas du man di kenen, "Amu, fandas Lasarus i toom kando." 4 Di kaklinge Dyisas ani, manan, "I gukel i fdasan ani ise ku fati, bay mkel ani du fye magdayen Dwata na lê magdayen i Tingà Dwata fagu ani." 5 Na bong nawa Dyisas dad saflanek Marta, Méri, na Lasarus. 6 Na di kaklingen fandas Lasarus funan mnè di gumnean lwe butang fa, 7 na kafnge én, man Dyisas di dad gal mlalò kenen, "Samfulê ito di banwe Dyudiya." 8 Kabay man i dad gal mlalò kenen, "To Tamdò, falami ani tafan ge tnudà i batu du dad Dyu mayè mati ge, na kan ku samfulê ge ditù?" 9 Na tmimel Dyisas, manan, "Fakay sa fa ku salu ito ditù du sfalò lwe uras i sduh, na ku magu i to di mduh, là sa tlaab, du malwa fa. 10 Kabay ku di butang i kagun tlaab kenen du kifu." 11 Én timel Dyisas dale, na kafnge én, manan, "Gkudang i demeito sgalak Lasarus, bay salu agu ditù ani du nukatgu." 12 Na man i dad mlalò kenen, "Amu, ku gkudang kenen, too fye, du takagun mgulê." 13 Kabay én kayean fgadè tamati Lasarus, bay i fandam dad mlalò kenen ku btal kenen kudang. 14 Taman too fbangal Dyisas di dale, manan, "Tamati Lasarus, 15 na too fye du là gnumahgu kenen mto du fye teenyu i mkel kadang na faglut gamu. Mdà ito nan salu di kenen." 16 Na talù Tomas, i dnagit Fingin, di dademen mlalò ku Dyisas, manan, "Ditù ito, fye ku gagin ito i kfati Amuito." 17 Di kakel ale Dyisas di Bétani lingen tafat butang nan i klo Lasarus di lam lbang. 18 Na mdadong i tukay banwe Bétani di syudad Dyérusalém, nun kè tlu kilumitru i kawagan, 19 taman dee dad Dyu salu di ku Marta na Méri du mlala dale mdà di kfati lagila. 20 Di kaklinge Marta mdadong Dyisas, lamwà kenen du snitongan, bay fanak Méri di gumnèla. 21 Na man Marta di ku Dyisas, "Amu, ku alò ge dini di kafdas lagimi là sa moon mati. 22 Kabay gadègu balù ani, ku tan i fnim di Dwata blén ge." 23 Na man Dyisas di kenen, "Mték lêman lagim." 24 Na man Marta, "Hae, gadègu mték kenen lêman du magin kenen di kték dad to mati kadang di fulé duh." 25 Na man Dyisas di kenen, "Agu sa mték i dad mati, na agu sa mlé nawa, taman balù simto to faglut di deg balù ku mati kenen, mto kenen lêman. 26 Na balù dad to mto fa ku faglut ale di deg nun nawala landè sen. Man, fnaglutam kè i mangu ani?" 27 Tmimel Marta, manan, "Hae Amu, fnaglutgu ge i Tingà Dwata, dunan Krayst i Mgalék Dwata fakangan fsalu dini di tah tanà." 28 Di kafnge Marta man ani mulê kenen, na tlon flanekan Méri du stulen alò ale, manan, "Tadini i To Tamdò, na snalekan ge." 29 Di kaklinge Méri dun, gasil kenen tadag na smitong ku Dyisas, 30 du là fa kel Dyisas di gumnè ale Méri, bay déén fa kenen di gusmitong Marta kenen. 31 Nun dad Dyu dademe Méri di gumnean mlala kenen, na di kitela kenen gasil tadag na lamwà, mlalò ale kenen du man nawala ku salu kenen di lbang du mngel ditù. 32 Di kakel Méri di gufanak Dyisas teenan kenen, na lkuad kenen di munan, manan, "E Amu, ku alò ge dini, là moon mati i flanekgu." 33 Di kite Dyisas mngel Méri na i dad Dyu mlalò kenen, too matdel i nawan na mlidù, 34 na manan, "Tanè i gulambangyu kenen?" Na tmimel ale, "Ditù ito, Amu, fye teenam." 35 Na mngel Dyisas. 36 Taman man i dad Dyu, "Neyeyu, too bong nawan ku Lasarus." 37 Kabay man i dademe, "Kenen sa i fgulê i to butè, kan ku laan gafgulê ku Lasarus du fye laan mati?" 38 Na lêman too matdel nawa Dyisas, na salu kenen di gulambangla ku Lasarus, dunan satu ilib, na nun batu sang di baan. 39 Na man Dyisas, "Nwèyu i batu én." Kabay Marta, libun i to mati, manan, "Amu tafat butang i klon lbang, na tasasè nan i bunan." 40 Na man Dyisas di kenen, "Làgu kè gman di ge teenam kadang i kdatah Dwata, ku faglut ge?" 41 Taman nwèla i batu sang i lbang. Na lngalà Dyisas di langit, na manan, "Mà, bong fye di ge du fanlingem agu. 42 Gadègu galam agu fanlinge, bay mangu ani mdà di dad to tadag dini, fye faglut ale na ge i mdek deg." 43 Na kafngen man ani, toon falbong i taluan tamlo, manan, "E Lasarus, lamwà ge!" 44 Na lamwà i tamati, na maglabéd i blian na sigalan safut gal fungas i to mati, na nun safut labéb di bawehan. Na man Dyisas di dale, "Nbelyu safut fungas kenen du fye gagu." 45 Na dee di dad Dyu mlalò ku Méri na mite i nimò Dyisas ani faglut di kenen. 46 Kabay dademe di dale, salu ale di dad Farisi, na tulenla dale i mgimò Dyisas ani. 47 Taman stifun i dad ulu i dad bà di Dwata na dad Farisi magin i dademela dad gal mukum, na stulen ale, manla, "Tan i kiboito ku Dyisas, du dee tnikeng mgimoan? 48 Du ku bayaito, faglut i kdee dad to kadang di kenen, na salu dini i dad ganlal di banwe Roma du falmola i gumangamfuito na banweito ani." 49 Na talù satu di dale déén dnagit ku Kayafas, dunan i gumdatah i dad bà di Dwata di fali én, na manan, "Landè sa gnadèyu! 50 Làyu kè gadè i gafye gamu. Fye fa ku alò satu to mati du tlas i kdee dad to du fye là malmo i kdeeito dad Dyu." 51 I gman Kayafas ani ise mdà alò di kenen fandam, bay du kenen gumdatah i dad bà di Dwata di fali én, ftalù Dwata kenen du fye falan fgadè, na tafan mati Dyisas du tlas i kdee dad to Dyu, 52 na ise ku alò dad Dyu duenan mati, bay du fye masasatu i kdee dad ngà Dwata masbalét di klamang banwe. 53 Na taman mdà di duh én, stulen dad ulu i dad Dyu du mngabal kfagu mati ku Dyisas. 54 Taman talà nan lamngab Dyisas di gumite i dee dad Dyu kenen, bay salu kenen di tukay banwe dnagit Ifraim mdadong di banwe landè to mnè déén. Na ditù gumnean magin i dad to mlalò kenen. 55 Na mdadong nan bang i fista dad Dyu dnagit Duh Kaglius, taman mnagad dee dad to mdà di dademe banwe salu di Dyérusalém du fye mimen ale i flalò dad Dyu gablà di klaneb i ktola di là fa mangamfù di Dwata. 56 Na di slengla déén di Bong Gumnè Dwata, fanngaballa Dyisas, na sasalek ale, manla, "Tan i fandamyu? Salu Dyisas di fista ani ku demen là?" 57 Na nun tafgadè dad ulu i dad bà di Dwata na dad Farisi di dad to, ku nun to gmadè i gusablà Dyisas, tnulen ale du fye kanfèla kenen.

12

1 Nam butang di là fa kel i fista Duh Kaglius salu Dyisas di tukay banwe Bétani di gumnè Lasarus, dunan i to ntékan mdà di fati. 2 Na déén gukmaan Dyisas di flabi én du nimòla kakaan afèla kenen. Marta i malel, na Lasarus satu di dad kmaan di saféd Dyisas. 3 Na nwè Méri i tngà kilu fangbun dnagit nardo too mabtas du landè bolan, na kokan di dad blì Dyisas, na én ifun dun i wakan. Na langub i fye bun klamang gumnèla. 4 Kabay talù Dyudas Iskariyot, satu di dad mlalò ku Dyisas, (dunan i fan mangkal kenen di fati,) manan, 5 "Tay, too bong btas i fangbun ani! Nun kè tlu latu denari. Fye fa ku fablin na blén i bayadan di dad to landè." 6 I duenan man ani, ise ku mdà di kakdon i dad to landè, bay du to tmaku kenen, du kenen i magot i gufkah filak ale Dyisas na galan nwè i dademe filak déén. 7 Kabay man Dyisas, "Bayàyu kenen. Falohyu du fye fatlagadan i fangbun ani di kalbang deg. 8 Gal nun dad to landè mdadong di gamu fakayyu tnabeng, bay deg, là agu mlo mnè di safédyu." 9 Di kaklinge i dee dad Dyu ditù Dyisas di banwe Bétani, salu ale ditù du neyela kenen. Na ise ku alò kenen kayèla teen, bay kayèla teen Lasarus, i to ntékan mdà di fati. 10 Na ani duen dad ulu i dad bà di Dwata mayè mati ku Lasarus, 11 du i kték Lasarus i gumdà dee dad Dyu tmagak i tdò dad ulula na baling faglut di ku Dyisas. 12 Di tmadol duh linge i dee dad to di Dyérusalém malò i fista Duh Kaglius tafan salu Dyisas déén. 13 Na nwèla dad taglang falmira, na lamwà ale smitong kenen, na tamlo ale, manla, "Dnayenito Dwata! Too nun kafye i to salu dini mebe i glal Amuito Dwata. Kenen i Harì dad bel Israél." 14 Na nun teen Dyisas satu tingà dongki, na én i snakayan, taman gdohò i tafsulat Dwata di Tnaluan, manan, 15 "Gamu dad to di Sion, nang gamu likò. Neyeyu, du fan kel i harìyu. Smakay kenen di tingà dongki." 16 Na di duh atù là glabat i dad mlalò ku Dyisas, na i ksalun di Dyérusalém i kagdohò i sulat dad tugad Dwata, bay kafnge i ktékan na kasfuléan di langit gafaldamla i sulat dad tugad Dwata, na glabatla kdee sulatla gablà ku Dyisas tagdohò. 17 Na i dee dad to magin di ku Dyisas di katlon ku Lasarus mdà di lbang di ktékan kenen mdà di fati, tatmulen ale i tateenla. 18 Taman dee dad to smitong kenen, du talingela gablà di tnikeng tanimoan. 19 Taman stulen i dad Farisi, na manla, "Neyeyu talandè kiboito du i kdee dad to mlalò kenen nan." 20 Na nun dad to Grik malò i fista di Dyérusalém du mangamfù ale di Dwata balù ise Dyu ale. 21 Na salu ale di ku Filif, satu mlalò ku Dyisas mdà di banwe Bétsayda déén di Galili, na manla, "Kayèmi smite ku Dyisas." 22 Taman salu Filif di ku Andru, na tnulenan, na lwe ale salu di ku Dyisas du tmulen kenen. 23 Na tmimel Dyisas, manan, "Takel nan i bang kafdatah Dwata deg, i dnagit Tingà To. 24 Tulengu gamu i kaglutan, i lawehgu salngad i bnê du ku là lbang di tanà laan gambunge. Kabay ku talbang di tanà dee bungen. 25 Nè i to too kmabas i kton na knean di tah tanà ani, knean mati, bay nè i to là kmabas i kton na knè di tah tanà, nun nawan landè sen. 26 Ku nun to mayè mbaling saliggu, too kenen mlalò deg, du fye balù nè gumnègu déén i saliggu di safédgu. Na ku nun to mimen i knayègu fdatah kenen i Màgu." 27 Na man Dyisas, "Too msamuk i nawagu! Tan i fye mangu? Ku fnigu di ku Mà, fye falwaan agu di kaflayam fan kel, là sa fye, du i kaflayam ani i duengu salu dini." 28 Na man Dyisas di Maan, "Mà, fitem i kdataham fagu di kaflayamgu ani." Na nun talù mdà di langit tmimel, manan, "Tafitegu i kdatahgu, na lêmangu fite." 29 Dee dad to déén, na di kaklingela i talù ani, manla, "Takmilet!" Na man i dademe, "Nun kè kasaligan Dwata talù di kenen." 30 Kabay man Dyisas di dale, "Ise ku deg duen i nun talù gine, bay gamu du fye faglut gamu. 31 Takel nan i duh kukum Dwata i dad to dmuen kenen, na kfisan ku Satanas, to magot i tanà ani. 32 Na agu, ku tanketla agu kadang mdà di tanà ani, fsalugu di deg kdee dad to." 33 I duenan man ani du faglabatan dale i kfagu kfatin di krus. 34 Na tmimel i dad to, manla, "Tanun gatdò di gami mdà di Tnalù Dwata na Krayst i Mgalék Dwata mto kel di landè sen. Na kan ku manam, nket i dnagit Tingà To di krus! Simto kè i Tingà To manam ani?" 35 Na tmimel Dyisas fagu di fléd, manan, "I salò lamwa i fandamyu là mlo fa di safédyu. Taman di slengan fa dini, tooyu lalò i knengan ken gnumah gamu i kifu, du i to magu di gukmifun là sa gmadè i gusalun. 36 Na di klon fa mnè di safédyu nun kalwa, taman faglut gamu di salò du fye mbaling gamu dad ngà i kalwa." Di kafnge Dyisas mangman i kdee ani gine, tnagakan i dad to déén na salbuni. 37 Kabay balù tadee dad tnikeng nimò Dyisas di munala knean là ale faglut di kenen, 38 taman gdohò i man i tugad Dwata Isaya, manan, "Amu, landè alì to faglut i tulenmi. Landè alì to gamlabat i bong kaltulusam tafitem di dale?" 39 Na tulen Isaya i duenla là faglut, manan, 40 "Gambet tabnutè Dwata i matala, na snafangan i fandamla, du fye là ale mite, na là ale gamlabat, du ku mite ale na gamlabat ale, tmagak ale dad sasè nimòla na fangulêgu ale di dad salàla." 41 I duen Isaya gman ani du tateenan i kdatah Dyisas, na tulenan gablà di kenen. 42 Kabay balù fa ani, dee dad ganlal i dad Dyu faglut di ku Dyisas, bay knean làla tulen gablà di kafaglutla du likò ale i dad Farisi, du ken falwàla ale mdà di dad gal gusatdòla, na là ale nan fakay fakuf di dale. 43 Hae, landè manla, du i toola kayè i kdayen dad to mdatah fa di kdayen Dwata dale. 44 Na fangal Dyisas i taluan, manan, "Nè i to faglut di deg, ise ku alò deg i fnaglutan, bay léan faglut di Dwata, i mdek deg. 45 Na nè i to mite deg léan teen i mdek deg. 46 Agu i salò salu di tah tanà du lamwa fandam i dad to, du fye i kdee dad to faglut di deg là nan fadlug mnè di kifu. 47 "Na ku nun to mlinge i tnalùgu, na laan nimen dun, làgu kenen nukum, du ise én duengu salu di tanà du mukum dad to, bay du fye falwàgu i dad to di kaflayam. 48 Kabay nè i to là dmawat deg, na là mimen i dad tnalùgu nukum kadang di sangal duh. Na i mukum kenen dunan dad tnalùgu i laan nimen, 49 du i mangu ise mdà di deg knayè, bay mdà di knayè Màgu i mdek deg na fgadè deg i mangu na tdògu. 50 Na gadègu i dek Màgu gumdà nawa landè sen, taman kdee fgadè Màgu, én alògu man."

13

1 Alò sbutang gdè klo kel i fista Duh Kaglius. Na gadè Dyisas takel i bangan tmagak i banwe du samfulê ditù di Maan. Mdà di katbuan too bong nawan i dad ton dini di tah tanà, na di gusenan ani toon fite i kalbong nawan dale. 2 Na di kakaan ale Dyisas i knaan flabi, tafala fkah Satanas di fandam Dyudas Iskariyot, tingà Simon, fye mangkal ku Dyisas. 3 Na gadè Dyisas tasalig Maan di kenen kagot i kdee. Na gadean Dwata i gumdaan na gusamfuléan. 4 Kabay balù ani i bong kdatahan knean tadag kenen di slengla kmaan, na nlusan lafin saulan, na labédan di awekan twalya. 5 Kafnge én, nkokan yéél i flanggana na tambù malob i blì dad mlalò kenen, na én ifun dun i twalya labédan di awekan. 6 Na di kakelan di ku Simon Fiter, man Fiter di kenen, "Amu, ge kè malob i dad blìgu?" 7 Na tmimel Dyisas, manan, "Ani, laam fa glabat i nimògu, bay glabatam kadang." 8 Kabay man Fiter, "Là sa fakay ku ge malob i blìgu!" Na tmimel Dyisas, "Ku làgu nalob i dad bliam taise ge to nfungu." 9 Na man Simon Fiter, "Amu, ku én i kagkahan, nang ku alò blìgu i nalobam, bay i kmalgu fa na ulugu." 10 Na tmimel Dyisas fagu di fléd, manan, "I to tafnge dyo tamlaneb nan, taman balù alò blian i nalob. Na gamu, tamlaneb gamu, bay alò satu di gamu là mlaneb." 11 I duen Dyisas man, "Alò satu di gamu i là mlaneb," du tafalan gadè ku simto i mangkal kenen di fati. 12 Na di kafngen malob i blì dad mlalò kenen, lêmanan lsak i saulan gine, na samfulê di gusudengan, na manan, "Glabatyu dé i nimògu di gamu gine? 13 I katloyu deg 'To Tamdò' na 'Amu', na glut sa, du agu sa i dunan. 14 Na taman du agu i Amuyu na To Tamdò gamu, tafdanàgu ktogu du malob i dad blìyu, fye ku salob gamu blì. 15 I nimògu gine, gufitegu di gamu kafdanà i ktogu, du fye ganbetyu. 16 Tulengu gamu i kaglutan, i salig là mdatah di Amun, na i to dek, là mdatah di to mdek kenen. 17 Na du glabatyu i tdògu di gamu ani, nun kafyeyu ku nimenyu. 18 "Kabay nun satu di gamu làgu fakuf di mangu ani, du gadègu i mnè di nawayu dad mgalékgu. Kabay là fakay ku là gdohò i gman di Tnalù Dwata gablà di to mangkal deg, manan, 'I to msong deg kmaan, mbaling to dmuen deg.' 19 Tatulengu gamu ani di laan fa kel du fye di kakelan kadang faglut gamu i gmangu gablà ku simto agu. 20 Tulengu gamu i kaglutan, i to dmawat balù simto to dekgu, salngad ku dnawatan agu, na i dmawat deg dnawatan Màgu Dwata, i mdek deg." 21 Di kafnge Dyisas mangman ani, too msamuk i nawan, na nun fgadean di dale, manan, "Tulengu gamu i kaglutan, nun satu di gamu fan mangkal deg di fati." 22 Na alò seye i dad gal mlalò kenen du làla gadè ku simto di dale i manan. 23 Na nun satu di dad gal mlalò kenen i toon kando fagléd di kfe Dyisas. 24 Taman kmatuk Simon Fiter di to én, na manan, "Snalekam kenen, ku simto i manan." 25 Taman du too mdadong i to én di ku Dyisas, manan, "Amu, simto i mangkal ge?" 26 Na tmimel Dyisas, manan, "Lnabgu i fan ani di tukung, na ku nè i to gumlégu dun, én sa i dunan." Kafnge én, lnaban i fan na blén di ku Dyudas, tingà Simon Iskariyot. 27 Di kagwè Dyudas i fan, fusuk Satanas di kenen. Taman man Dyisas di kenen, "Gasilam nimò i kayeam!" 28 Kabay landè di dale gmadè i gumtatek i gman Dyisas di ku Dyudas. 29 Na du Dyudas i gal magot i gumkah filakla, én fandam i dademe ku dekan kenen mayad i klidùla di fista, na ku ise én, ken dekan mlé filak di dad to landè, bay ise sa. 30 Na taman di kagdawat Dyudas i fan blé Dyisas, lamwà kenen. Na di kalwaan, tabutang nan. 31 Na di kalwà Dyudas, man Dyisas, "Ani i bang kfite i kdatahgu, agu i dnagit Tingà To. Na lê fite Dwata i kdatahan fagu di deg. 32 Ku gfite kdatah Dwata fagu di deg, léan fite i kdatahgu, na talà mlo ani kfiten dun. 33 "Dad ngàgu, talà agu mlo mnè di safédyu, na ku talà agu dini fanngabalyu agu, na mangu di gamu ani, salngad i tagmangu di dad uluito dad Dyu, 'Là gamu gsalu ditù di gusalugu.' 34 "Na nun falami flalò blégu di gamu, dunan sakdo gamu. Kandoyu i dademeyu faglut salngad i kakdogu gamu, 35 du ku sakdo gamu, gadè i kdee dad to, gamu dad mlalò deg." 36 Na smalek Simon Fiter di ku Dyisas, manan, "Amu, nè fanam gusalu?" Na tmimel Dyisas, manan, "I fangu gusalu là gamu fa gagin deg, bay di satu duh mlalò gamu deg." 37 Na man Fiter, "Kan ku là agu gagin ge ani? Tagatlagad agu magin ge balù ku mati agu mdà di ge." 38 Na smalek Dyisas, manan, "Too glut dé i manam, na balù mati ge mdà di deg? Tulengu ge i kaglutan, kadang butang ani, di là fa kamleet i anuk tmulen ge tlu dulê na laam agu dilè."

14

1 Na talù Dyisas lêman di dad gal mlalò kenen, manan, "Nangyu fsamuk i nawayu, bay faglut gamu di Dwata na lê gamu faglut di deg. 2 Nun dee gumnè di gumnè i Màgu, na salu agu ditù du fnatlagadgu i gumnèyu. Na ku là glut ani làgu tulen dun di gamu. 3 Na di kafngegu fatlagad i gumnèyu ditù lêmanta gamu sanfulê du nebeta gamu ditù di gumnègu, du fye balù nè gumnègu lê gamu ditù. 4 Na tagadèyu i dalan salu di banwe gusalugu." 5 Kabay man Tomas di kenen, "Amu, làmi gadè ku nè gusalum, taman tan i kgadèmi i dalan salu ditù?" 6 Na man Dyisas di kenen, "Agu i dalan salu ditù, na agu i gumdà i kaglut na falami nawa. Landè to fakay salu di Mà ku laan funa magu di deg. 7 Na ani, du tagadèyu agu, taman gadèyu Mà. Na mdà ani, gadèyu kenen, na lêyu teen." 8 Na man Filif, "Amu, silang fye nawami ku tafitem gami Mà." 9 Na man Dyisas, "E Filif, tamlo agu mnè di safédyu, na laam agu fa gadè? Nè i to mite deg teenan Mà. Taman kan ku manam, 'Fitem gami Mà?' 10 Kan, là ge kè faglut na agu mnè di Mà, na Mà mnè di deg? Ise mdà di deg i dad gmangu di gamu. I kdee mgimògu, Dwata sa i mimò dun du mnè kenen di deg. 11 Fnaglutyu moon i mangu agu mnè di Mà na kenen mnè di deg. Kabay, ku là gamu faglut fagu di mangu ani, faglut gamu fagu di dad tnikeng mgimògu. 12 Tulengu gamu i kaglutan, nè i to faglut di deg salngad i gaganan nimò di dad nimògu na mdatah fa nimoan di deg du salu agu di Mà. 13 Na balù tan i fniyu di Mà fagu di dagitgu, nimògu, du fye gfite i bong kdatah Mà fagu di Tingaan. 14 Hae, balù tan i fniyu fagu di dagitgu nimògu. 15 "Ku bong nawayu deg, nimenyu sa i dad flalògu. 16 Na mni agu di Mà fye blén di gamu satu To Tmabeng, du fye mnè kenen di gamu kel di landè sen, 17 dunan Tulus Dwata, i Tamdò i Kaglut. I dad to di tah tanà ani dmuen Dwata, làla kenen gdawat du làla kenen dilè, na làla gadè ku simto kenen. Kabay gamu, gadèyu kenen, du déén kenen di gamu, na mnè kenen di lam nawayu. 18 "Tnagakta gamu ani, bay làta gamu tatì bayà gambet i ilu, du samfulê agu lêman di gamu. 19 Tamdadong nan i bang là kite deg i dad to dmuen deg di tah tanà ani, bay gamu kadang teenyu agu. Na du nun nawagu landè sen, nun nawayu landè sen. 20 Di kakel i duh én, gadèyu mnè agu di Mà, na mnè gamu di deg na mnè agu di gamu. 21 "Simto to gmadè na mimen i dad flalògu, kanbongan agu nawa, na i to mbong nawa deg, bong nawami Mà kenen, na fgadègu di kenen gablà di ktogu." 22 Na man Dyudas di kenen, ise ku Dyudas Iskariyot, manan, "Amu, kan ku fgadeam i ktom di gami alò na là di dademe to di tah tanà?" 23 Na tmimel Dyisas, manan, "Nè i to kambong nawa deg, nimenan i dad tdògu, na bong nawa Màgu kenen, na lwe gami Mà mnè di kenen. 24 Kabay i dad to là mbong nawa deg là sa mimen dad tdògu. Na i tdògu gamu là sa mdà di deg fandam, bay mdà di fandam Mà, i mdek deg. 25 "Tatulengu di gamu kdee ani di klogu fa mnè di safédyu. 26 Kabay i To Tmabeng, dunan Mtiu Tulus dek Màgu di gamu du tlas deg faglabat kdee di gamu na fafaldam gamu kdee tatulengu di gamu. 27 "Tagakgu gamu ktanak nawa dunan ktanak nawa mnè di deg. Na ktanak nawa blégu gamu ani, là salngad i blé dad to di tah tanà. Taman nangyu fsamuk i nawayu na nang gamu likò. 28 "Talingeyu i gmangu, 'Tagakgu gamu, bay lêmangu samfulê di gamu.' Ku too bong nawayu deg too gamu flehew, du tafan agu samfulê di Mà du mdatah kenen di deg. 29 Na tatulengu di gamu di laan fa kel du fye di kagdohoan kadang too gamu faglut di deg. 30 Talà agu mlo stulen di gamu, du Satanas, i mebe i dee sasè di tah tanà ani, tafan kel. Landè kiboan mebe deg, 31 bay én nimògu i fimò Mà deg, du fye gadè i kdee dad to ku tan kalbong nawagu ku Mà. Na taman tadag gamu. "Mdà ito nan."

15

1 Na tulen Dyisas fléd ani, manan, "Agu i too glut laweh i fule grép, na Màgu i mifat i fule. 2 Kdee dad fangagu là munge kanlangan, bay i kdee dad fanga munge toon fnaya du fye matnù i kbungela. 3 Na gamu i dad fanga tamfaya du tafnaglutyu i dad tnalùgu tatdògu di gamu. 4 Too gamu mnè di deg, na mnè agu di gamu. Du gambet i fanga ku mkah di laweh i fule là gambunge, salngad én gamu, du ku là gamu mnè di deg, landè bunge i kafaglutyu. 5 "Agu laweh, na gamu dad fanga. Na gambet i fanga ku fadlug gamu mnè di deg na mnè agu di gamu, too gamu gambunge, bay landè fye mgimòyu ku mkah gamu di deg. 6 Na dad to là mnè di deg, bat kadang gambet dad fanga maklang na mlanas. Na nuku dad fanga én na bat di lifoh na snakuf. 7 Ku fadlug gamu mnè di deg, na mnè i Tnalùgu di nawayu, na balù tan fniyu di deg blégu gamu. 8 Ku too gamu munge i dad fye nimò, dnayen dad to i bong kdatah Màgu, na gadèla gamu dad to gal mlalò deg. 9 "Salngad kakdo Mà deg i kakdogu gamu, taman too gamu mnè di kakdogu. 10 Ku nimenyu dad flalògu, mnè gamu di kakdogu, salngad deg, du nimengu dad flalò Màgu, na mnè agu di kakdon. 11 Tagmangu kdee ani di gamu du fye mnè i klehewgu di gamu, na du fye too sikof i klehewyu. 12 Ani flalògu di gamu, sakdo gamu salngad kakdogu gamu. 13 I too mdatah kakdo fite satu to di demen sakdo, dunan ani, ku blén i kton di fati du falwaan kenen. 14 Na gamu dad too glut demegu sakdo ku nimenyu dad flalògu. 15 Na làgu gamu nan tlo lifan, du i amu, laan sa fgadè i fanan nimò di dad lifan. Kabay katlogu gamu, dunan dademegu sakdo du kdee fgadè Màgu di deg tafgadègu di gamu. 16 Ise ku gamu malék deg, bay agu malék gamu. Nalékta gamu du fye munge gamu i fye nimò balù nè gusaluyu, na du fye nun gukel i nimòyu. Na taman ku tan fniyu di Mà fagu di dagitgu blén di gamu. 17 Taman ani flalògu di gamu, sakdo gamu." 18 "Ku i dad to mlalò i knayè banwe, mnang nawala gamu, nang gamu tikeng du deg i munala knang nawa. 19 Kabay kaflingenta dun, ku masasatu gamu di dad to di tah tanà i mlalò knayè banwe, tatoola gamu kando. Kabay du talà gamu nan masasatu di dale du gamu i mgalékgu, taman én duenla mnang gamu nawa. 20 Tooyu fandam i gmangu di gamu, 'I salig là mdatah di amun.' Taman du tafanlayamla agu, lêla gamu fanlayam. Kabay ku tanimenla i dad tdògu, lêla nimen dad tdòyu. 21 Kabay i dad to mlayam gamu, fanlayamla gamu du faglut gamu di deg, du làla gadè Mà i mdek deg. 22 Là ale banlé salà di làla kafaglut di deg ku talà agu salu dini na tamdò dale. Kabay du talingela i gmangu, taman làla fakay man ku landè salàla. 23 Na i dad to mnang nawa deg, mnang nawala Màgu. 24 Na ku talàgu nimò i dad tnikeng i landè dademe gmagan mimò dun, na ku làla lmen teen, fakay man landè salàla di làla kafaglut di deg. Kabay tateenla i dad mgimògu na knean knangla agu nawa na lêla knang nawa Màgu. 25 I nimòla ani gumdà gdohò i gsulat di Tnalù Dwata blén dale, manan, 'Knangla agu nawa balù landè gumdaan.' 26 "Ku tadekgu salu di gamu mdà di Mà i To Tmabeng, dunan Tulus Tamdò i Kaglut mdà di Mà, kenen tmulen gablà di deg. 27 Na gamu, lê tmulen gablà di deg, du tamagin gamu deg mdà fa di katbùgu tamdò."

16

1 "I duengu man kdee ani di gamu du fye là mlungay ksaligyu ku kel kadang kdee ani, 2 du fnang gamu kadang i dad Dyu fusuk di dad gusatdòla. Na kel i duh kadang ku nun to mati gamu, én i fandaman ku nimoan i knayè Dwata. 3 Na i duenla mimò ani du làla gadè gami Mà. 4 Kabay tatulengu ani di gamu du fye di kagdohoan, gafaldamyu i dad mangu di gamu. Làgu man ani di katbùgu tamdò gamu du dini agu fa di safédyu. 5 "Kabay ani, tafan agu mdà salu ditù di mdek deg, na landè di gamu smalek i gusalugu. 6 Kabay du tatulengu dad fan kel di gamu baling too mlidù nawayu. 7 Kabay tulengu gamu i kaglutan, too nun gufyeyu ku mdà agu, du ku là agu mdà, là salu di gamu i To Tmabeng, bay ku mdà agu, dekgu kenen salu di gamu. 8 Na ku salu kenen dini, faglabatan di dad to di tah tanà gablà di dad salàla, na i matlu dalan, na i kukum Dwata. 9 Faglabatan dale gablà di dad salàla du là ale faglut di deg. 10 Na faglabatan dale i matlu dalan du salu agu ditù di Màgu, na talàyu agu nan teen. 11 Na faglabatan dale gablà di kukum Dwata dad to gamsalà, du Satanas, i mebe dale, tanukum sa nan di kaflayam. 12 "Dee fa i kayègu man di gamu, bay là fa fakay ani du too malima di gamu. 13 Kabay di kakel Tulus Dwata, i Tamdò i Kaglut, nalakan gamu di kaglabat i kdee kaglut. Kdee manan ise mdà di kenen, bay aloan man i lingen mdà di Mà. Na fgadean gamu i dad là fa mkel. 14 Fiten i kdatahgu du fgadean di gamu i tnalùgu. 15 I kdee nfun i Màgu slame nfungu, na taman mangu, kdee tulen Tulus Dwata di gamu mdà sa di deg." 16 Na man Dyisas, "Là mlo talàyu agu teen, bay di là mlo lêman, lêmanyu agu teen." 17 Na sasalek i dademe dad mlalò kenen, manla, "Tan i gumtatek i manan, 'Là mlo ani talàyu agu teen, bay di là mlo lêman, lêmanyu agu teen,' na manan, 'du salu agu ditù di Màgu?' " 18 Na manla, "Tan i gumtatek i manan, 'là mlo?' Laito glabat i manan." 19 Na tagadè Dyisas mayè ale smalek di kenen, taman manan di dale, "Snalekyu kè gablà di gmangu, 'Là mlo ani, talàyu agu teen, bay là mlo lêman, lêmanyu agu teen?' 20 Tulengu gamu i kaglutan, mlidù gamu kadang na mngel, bay i dad to là faglut di deg too ale lehew. Kabay balù mlidù gamu dini, i klidùyu mbaling klehew kadang. 21 Ku fkahta di libun maltien di tafan ksut tingaan, too kenen mlidù di tafan sut tingaan, du too sasè katdukan. Kabay ku tasut, glifetan i kliduan, du lehew kenen mdà di ksut tingaan di tah tanà. 22 Na salngad én i kagkahyu du mlidù gamu ani, bay di ksiteito lêman, too nun klehewyu, na landè to gmagan mwè dun di gamu. 23 "Na di bang én, là gamu mni di deg balù tan. Hae, du tulengu gamu i kaglutan, én gumniyu di Mà, na balù tan fniyu di kenen fagu di dagitgu blén di gamu. 24 Kel ani, landè fa fniyu di kenen fagu di dagitgu. Mni gamu na gamdawat gamu, du fye sikof klehewyu." 25 "Tatulengu gamu ani fagu di fléd, bay nun duh kadang tulengu gamu gablà di Màgu na làgu fagu dun di fléd, bay toogu fbangal tmulen gablà di kenen. 26 Na di klogu di saféd Màgu mni gamu di kenen fagu di dagitgu. Na ise nan ku agu mni di kenen gablà di gamu, 27 du bong nawa Mà gamu, du tabong nawayu deg, na du fnaglutyu kenen gumdàgu. 28 Én gumdàgu di Mà, na tasalu agu dini di tah tanà, bay di là mlo lêmangu tagak tanà ani du samfulê agu di Mà." 29 Kafnge én, man i dad mlalò kenen, "Too mbangal nan i manam di gami du ise fagu di fléd. 30 Na tagadèmi nan, gadeam i kdee balù i mnè di fandam i dad to. Taman balù là gami smalek du tafalam gadè i fandammi. Én gumdàmi faglut, mdà ge di Dwata." 31 Na smalek Dyisas, "Faglut gamu nan? 32 Kabay neyeyu du nun bang, na ani dunan, sbalét kdeeyu, na kat satu di gamu samfulê di kenen gumnè. Kabay balù kdeeyu tmagak deg, ise ku alògu satu, du dini Mà di deg. 33 "Tatulengu gamu i kdee ani du fye nun ktanak nawayu mdà di ksasatuyu di deg. Nun kaflayamyu mdà di dad to di tah tanà ani, bay nang gamu likò du tagfisangu kdee dmuen deg di tah tanà."

17

1 Na di kafnge i kman Dyisas ani, lngalà kenen di langit, na dmasal, manan, "Mà takel nan i banggu. Fdataham agu, Tingaam, du fye fdatahgu ge, 2 du tagablém di deg i glal magot kdee dad to, du fye banlégu nawa landè sen kdee dad to tablém di deg. 3 Na i dad to dmawat nawa landè sen, dunan i dad gmadè ge, i too glut Dwata, na deg, Dyisas Krayst, i dekam salu dini di tah tanà. 4 Na tagfitegu i bong kdataham dini di tah tanà du tafanngegu i kdee nimò tafimoam deg. 5 Na ani, Mà, fuléam di deg i bong kdatah tagnègu gfun di safédam di là fa mgimò i banwe. 6 "Na tafgadègu ge di dad to di tah tanà tasaligam di deg. Ge i mfun dale, bay tasaligam ale di deg, na tamgimenla Tnaluam. 7 Na gadèla nan kdee tablém deg slame mdà di ge, 8 na kdee manam deg tatulengu di dale, na tadnawatla. Na taman gadèla i kaglutan na ge gumdàgu. Na faglut ale ge mdek deg dini. 9 "Na ani dnasalgu ale. Ise ku dad to là faglut di deg i dnasalgu, bay i dad to gablém di deg du ge mfun dale. 10 Ge mfun dad nfungu, na agu mfun kdee dad nfunam, na gfite i kdatahgu fagu di dale. 11 Na ani, tafan agu samfulê di ge, na talà agu mlo mnè di tah tanà. Kabay i dad to nfunta, dini ale flo di tah tanà. Taman Màgu Too Mtiu, nifatam ale fagu di bong tulus i dagitam, i gablém di deg. Nifatam ale du fye sasatu ale salngad i gite ksasatu. 12 Di knègu dini di safédla, nifatgu ale fagu di bong tulus dagitam i gablém di deg. Takanlunggu ale na landè di dale lana di deg, bay alò satu, i tagnè gadèta lana, du gdohò i gman di Tnaluam gablà di kenen. 13 "Na ani, samfulê agu di ge, na taman mangu kdee ani di lamgu dini fa di tah tanà, du fye too magin ale deg di klehewgu. 14 Tagablégu Tnaluam di dale, na knang ale nawa i dad dmuen ge di tah tanà, du là ale agin di knayè di tah tanà, salngad deg. 15 Na ise ku én fnigu ku nweam ale mdà di tah tanà, bay fnigu ku kanlungam ale mdà di ku Satanas. 16 Là ale agin di knayè di tah tanà, salngad deg là agu agin di knayè di tah tanà. 17 Fagu di kaglut, dunan Tnaluam, nimoam dad to nfunta gablà mgimò dad saligam, 18 du tadekgu ale tmulen Tnaluam di dad to di tah tanà, salngad kdekam deg dini. 19 Na i ktogu ani ftigu blé di fimoam deg, du fye lêla fti blé ktola di fimoam dale. 20 "Na ise ku alò dad tota ani i dnasalgu di ge, bay balù i kdee dad to faglut di deg kadang mdà di tdòla dale, 21 Dmasal agu fye sasatu kdeela, salngad i gite ksasatu Mà. Du mnè ge di deg na mnè agu di ge. Na dmasal agu fye mbaling ale sasatu di gite du fye faglut kdee dad to na ge mdek deg. 22 I kdatah tagablém deg, blégu di dale du fye nun ksasatu nawala salngad i gite ksasatu. 23 Hae, du mnè agu di dale na mnè ge di deg, du fye sikof ksasatula. Na mdà én gfite di dad to di tah tanà, ge mdek deg, na bong nawam dale salngad kbong nawam deg. 24 "Mà, i dad to gablém deg, kayègu ku mnè ale di safédgu di gumnègu kadang, du fye teenla kdatah tagablém di deg di là fa mgimò i banwe, du mdà di kbong nawam deg. 25 "E Mà Too Tlu, là gmadè ge i dad to di tah tanà là faglut di deg, bay gmadè agu ge, na dad to nfunta ani gmadè ale ge mdek deg dini. 26 Na tafgadègu dale gablà di ge, na galgu ale fangadè, du fye i kakdom salngad i kakdom deg mnè di nawala, na du fye mnè agu di dale."

18

1 Di kafnge Dyisas dmasal mdà kenen magu magin dad gal mlalò kenen. Mifal ale bong sbang Kidron. Na déén di faltù, fusuk ale di satu tanà gugfule dad kayu déén. 2 Na Dyudas, i fan mangkal ku Dyisas di fati, tateenan tanà én, du én tagnè gustifun Dyisas na dad gal mlalò kenen. 3 Taman salu Dyudas ditù, na faginan dademe sundalu na dademe dad munung i Bong Gumnè Dwata dek dad ulu dad bà di Dwata na dad Farisi. Mebe ale dad salò na dad tekla. 4 Na gadè Dyisas kdee fan mkel di kenen, taman snitongan ale, na manan, "Simto fanngabalyu?" 5 Na tmimel ale, manla, "Dyisas mdà di Nasarét!" Na man Dyisas, "Agu sa dunan." Na déén Dyudas, i to mangkal kenen, tadag déén di safédla. 6 Na di kagman Dyisas di dale, "Agu sa dunan," gfudul ale, na fugen di tanà. 7 Na lêman smalek Dyisas, manan, "Simto fanngabalyu?" Na lêman ale tmimel, manla, "Dyisas mdà di Nasarét." 8 Na man Dyisas, "Tagmangu di gamu gine, agu dunan. Ku agu sa fanngabalyu, falohyu dademegu mdà." 9 I duenan man ani, du fye gdohò i gmanan di Maan, manan, "Landè lana di deg di kdee dad to gablém di deg." 10 Na Simon Fiter, du nun sundangan nsoan, na tniben lifan i gumdatah dad bà di Dwata, na masfek bali klingen gsen di kwanan. I dagit lifan ani Malkus. 11 Na nngak Dyisas Fiter, manan, "Fuléam di lumaan i sundangam. Man nawam kè ku làgu dnawat kaflayam blé Mà deg?" 12 Na i dad sundalu, na kafitanla, na dademe gal munung, kanfèla Dyisas na bnakusla kenen. 13 Na funala nebe kenen di ku Anas, tewe Kayafas. Na Kayafas ani, gumdatah i dad bà di Dwata di fali én. 14 Na Kayafas ani i mngewe dad ulu dad Dyu na fye fa ku alò satu to mati du tlas kdee dad to du fye là malmo kdeela. 15 Na Simon Fiter na satu demen gal mlalò ku Dyisas, mlalò ale kenen. Kakella di gumnè i gumdatah dad bà di Dwata falohla deme Fiter magin ku Dyisas fusuk di nasel i gumnè, du nilè kenen ganlal én. 16 Kabay Fiter, tadag di lwà di saféd i takab. Na taman lamwà i dilè i gumdatah dad bà di Dwata, na stulen di libun munung i takab, na neben Fiter di lam. 17 Na smalek i libun munung i takab, manan di ku Fiter, "Ise ge kè satu di dad gal mlalò to én?" Man Fiter, "Ay, ise deg!" 18 Na du tno déén, mto lifoh using dad lifan na dad to gal munung na tadag ale di glibutan du mnalang. 19 Na smalek i gumdatah dad bà di Dwata di ku Dyisas gablà di dad gal mlalò kenen na i tdoan di dad to. 20 Na tmimel Dyisas, manan, "Kdee dad to gmadè i tdògu du galgu tamdò déén di gal gusatdò, na di Bong Gumnè Dwata, i dad gustifun i kdee dad Dyu, na landè tdògu gbuni. 21 Na kan ku snalekyu agu gablà di tdògu? Snalekyu dad to mlinge dun du gadèla kdee mangu." 22 Kafnge Dyisas mangman ani, nun satu di dad gal munung déén smamfak kenen, manan, "Én kè kiboam tmimel i gumdatah dad bà di Dwata?" 23 Na tmimel Dyisas, manan, "Ku nun mangu sasè, tulenam di dad to i ksasean. Kabay ku glut i mangu, tan duenam smamfak deg?" 24 Kafnge én, di slengan fa mbakus, febe Anas kenen salu di ku Kayafas gumdatah dad bà di Dwata. 25 Na déén fa Fiter di gumnalangan, na nun dademe to déén manla di kenen, "Ise ge kè satu gal mlalò to én?" Na malew Fiter, manan, "Ise deg sa." 26 Na déén satu lifan i gumdatah dad bà di Dwata, flanek i to tnibe Fiter i bali klingen, na manan, "Ise ge kè i to teengu gine di kakfè ku Dyisas di gumule kayu?" 27 Na lêman malew Fiter, manan, "Ise deg." Na én nan kakleet i anuk. 28 Di too flafus, mdà ale di gumnè Kayafas na nebela Dyisas di bong gumnè Gubirnador Filat. Kabay là fusuk i dad Dyu du ken baling ale magagsik di kite Dwata na taman là gagin di kakaan i fista Duh Kaglius. 29 Taman lamwà Filat smitong dale, na manan, "Tan salà to ani duenyu mebe kenen dini?" 30 Na tmimel i dad Dyu, manla, "Ku landè salà i to ani làmi nebe dini di ge." 31 Na man Filat di dale, "Ku nun salaan, gamu sa mukum kenen fagu di urdinyu." Kabay man i dad Dyu, "Là fakay di urdinyu ku gami dad Dyu mukum satu to di fati." 32 Na mkel i kdee ani du fye gdohò i gman Dyisas gablà di kibòla mati kenen. 33 Na lêman fusuk Filat di lam i bong gumnean, na fngén Dyisas, na snalekan kenen, manan, "Ge kè harì dad Dyu?" 34 Na tmimel Dyisas, manan, "Nè gumdà i manam, mdà di ge fandam ku mdà di lingem di dademe dad to?" 35 Na tmimel Filat, "Man nawam kè ku Dyu agu? I dademem to Dyu, dad ulu dad bà di Dwata i mebe ge dini. Tan salà tanimoam?" 36 Na tmimel Dyisas, manan, "I kagotgu ise dini di tah tanà, du ku dini kagotgu di tah tanà sfati dad saliggu dad Dyu dmuen deg du fye là agu gakfè. Kabay i kagotgu ise mdà di tanà." 37 Na man Filat, "Ku én, ge kadì harì!" Na tmimel Dyisas, manan, "Tagmanam agu i harì. Na én alò duengu sut di tah tanà na salu dini du tulen i kaglut di dad to. Na dad to msen i kaglut flinge ale deg." 38 Na man Filat, "Tan i kaglut manam én?" Na di kagman Filat ani, lêman kenen lamwà salu di dad Dyu gine, na manan, "Landè teengu salà di to ani. 39 Kabay nun knalamyu dad Dyu, klit Duh Kaglius, galgu falwà di gamu i satu to bnilanggù i kayèyu. Mayè gamu kè ku falwàgu di gamu i Harì dad Dyu?" 40 Kabay lêman mkit kdeela, manla, "Ise kenen! Barabas kayèmi!" Na Barabas, kenen satu to tmaku.

19

1 Na kafnge én, faskél Filat Dyisas. 2 Na dad sundalu, mwè ale walad nun sual, na nlikinla du nimòla kyangen, na sukubla di ulun. Na falsakla kenen i klaweh fulè du fagbetla kenen harì. 3 Na fdadong ale di kenen du nadoyla, manla, "Mlawil ge, Harì dad Dyu," na snamfakla kenen. 4 Kafnge én, lêman lamwà Filat, na manan di dad Dyu stifun déén, "Nebegu kenen dini di gamu du fye gadèyu landè teengu salaan." 5 Na lêman lamwà Dyisas, na magsukub fa i ulun dad sual, na kamlaweh fa i fulè klaweh. Na man Filat di dad Dyu, "Neyeyu to ani." 6 Kabay di kite dad ulu dad bà di Dwata na dad saligla munung ku Dyisas, mkit ale lêman, manla, "Flansangam kenen di krus! Flansangam kenen di krus!" Kabay man Filat di dale, "Gamu mlansang kenen di krus. Landè sa teengu salaan." 7 Na tmimel dad Dyu, manla, "Mdà di flalò nimenmi, là fakay ku là kenen fnati, du manan kenen Tingà Dwata." 8 Na di kaklinge Filat ani, matnù klikoan. 9 Na lêman fusuk kenen di lam gumnean, na snalekan Dyisas, manan, "Nè gumdaam?" Kabay là tmimel Dyisas. 10 Taman man Filat di kenen, "Tan duenam là tmimel deg? Laam kè gadè nun glalgu falwà ge ku demen flansang ge di krus?" 11 Na tmimel Dyisas, manan, "Landè glalam mimò balù tan di deg ku là gablé Dwata di ge. Taman mdatah fa salà i to mebe deg dini, di ge salà." 12 Di kaklinge Filat man Dyisas ani, mngabal kenen kfagu falwà kenen. Kabay baling too mkit dad Dyu, manla, "Ku falwaam kenen, taise ge nan msen di ku Sisar, du balù simto to ku manan harì kenen, dnuenan Sisar, i mdatah ganlal." 13 Di kaklinge Filat i manla ani, neben Dyisas lamwà, na sudeng kenen di gusudeng di gal gumukum dnagit Saal Batu, na di talù Hibru, dunan Gabata. 14 Na tafan ltu i duh di duh kafatlagad dad Dyu kakaan di fista Duh Kaglius, na manan di dad Dyu, "Neyeyu harìyu!" 15 Kabay mkit i dad Dyu, manla, "Fnatim kenen! Flansangam di krus!" Na smalek Filat, manan, "Flansanggu kè harìyu di krus?" Na tmimel dad ulu dad bà di Dwata, manla, "Landè dademe harìmi, senan alò Sisar!" 16 Taman blén kenen di dale du nlansang di krus. Taman nwèla Dyisas, 17 na lamwà kenen tmiang i krusan salu di satu tukay bulul dnagit Banwe Tulan Ulu. Na dagit ani di talù Hibru, dunan Golgota. 18 Na déén gumlansangla kenen. Na nun lwe to nlansangla di krus di safédan, satu gsen di kwananan, na satu gsen di ibengan, na Dyisas di gutngàla. 19 Na nun sulat Filat na fadkatla di krus Dyisas. Na ani manan, "Ani Dyisas mdà di Nasarét, Harì dad Dyu." 20 Dee dad to Dyu masa sulat ani du mdadong gumlansangla ku Dyisas di syudad Dyérusalém, na du gsulat ani di dad talù Hibru, Latin, na Grik. 21 Na di kite dad ulu dad bà di Dwata dun ani, manla di ku Filat, "Nangam sulat, 'Harì dad Dyu,' bay sulatam baling, 'Én man to ani, agu Harì dad Dyu.' " 22 Na tmimel Filat manan, "I tagsulatgu, là fakay tanlas." 23 Kafnge dad sundalu mlansang ku Dyisas di krus, nwèla i dad klawehan, na nalella di fat du fye kat satu dale nun gwèla. Na nun satu di klawehan tahà landè tbélan, tatì mganem i kabalan, 24 na taman stulen dad sundalu, manla, "Nangito knasê ani, bay neyeito ku simto gamwè dun fagu di kasbunut." Na mgimò kdee ani du fye gdohò gman Dwata di Tnaluan, manan, "Sansalella dad klawehgu, na neyela ku simto gamwè dun fagu di kasbunut." Na én nimò dad sundalu. 25 Na tadag déén mdadong di krus Dyisas yéan, na flanek yéan libun, na Méri yaan Klofas, na lêman Méri Magdalin. 26 Na di kite Dyisas yéan, na satu to mlalò kenen toon kanbong nawa tadag déén, manan di yéan, "Libun, én lagi di safédam tingaam nan." 27 Kafnge én, manan di gal mlalò kenen, manan, "Kenen nan yéam." Na mdà di duh én fnean yê Dyisas di safédan. 28 Kafnge én gadè Dyisas tasikof kdee fimò Dwata kenen, na dnohoan gman Dwata di Tnaluan, du manan, "Malau agu." 29 Na nun tukung fnò masam binu, na lnabla i gal fsaf yéél di binu én, na fkahla di tukè fanga hisof, na ulukla di bà Dyisas du fsafla kenen. 30 Di kagsaf Dyisas masam binu, manan, "Tafnge nan." Na kudung kenen, na fto nawan. 31 Na ani nan i duh kafatlagad dad Dyu i Duh Kaftud, na là ale mayè ku gtagak dad nlansang di krus di duh én, labi nan du Duh Kaftud fan kel too mdatah, du fista Duh Kaglius sa, taman salu dad ulu dad Dyu di ku Filat du fnila fye ku tanfò dad blì dad nlansang di krus, fye mlal ale mati, na fakayla nwè i lawehla mdà di krus. 32 Taman dek Filat ditù dad sundalun, na tanfòla dad blì i lwe dad to nlansang magin ku Dyisas. 33 Kabay kakella di ku Dyisas teenla tamati kenen, taman làla tanfò kenen blì. 34 Kabay nun satu di dad sundalu ndakan agas lohok Dyisas, na mdà déén maloh litè na yéél. 35 I to mite kdee ani, dunan i tmulen dun, taman too gsalig i mangu. Gadègu, glut tulengu. Na én duengu tmulen du fye faglut gamu salngad deg. 36 Mkel ani du fye gdohò gman di Tnalù Dwata, manan, "Landè satu di dad tulanan tanfò." 37 Na lêman gdohò gman Tnalù Dwata, manan, "Meye ale di to ndakla agas." 38 Na nun to mdà di banwe Arimatiya dnagit ku Dyosif. Kenen satu mlalò ku Dyisas, bay laan fgadè dun mdà di klikoan dad Dyu. Salu kenen di ku Filat du fnin laweh Dyisas. Na faloh Filat, taman salu kenen ditù na nwean laweh Dyisas mdà di krus. 39 Na magin Nikodimus, dunan i to salu di ku Dyisas di butang, na mebe kenen dad fangbun dnagit mira na alo. Nun dad lime falò kilu kablatan. 40 Na nwèla laweh Dyisas, na fnungasla falami safut gagin i fangbun du ani knalam nimò dad Dyu di kalbang i mati. 41 Na nun dad kayu fule mdadong di gumlansangla ku Dyisas, na nun satu falami gulambang déén landè fa to lmen lbang déén. 42 Na du msasaw ale du taduh kafatlagad dad Dyu fista i Duh Kaglius, na du mdadong i gulambang, taman lbangla Dyisas ditù.

20

1 Na di flafus Linggu, di kifu fa, salu Méri Magdalin di lbang, na teenan tamagwè batu sang di bà lbang. 2 Na mila kenen salu di ku Simon Fiter na di satu gal mlalò too kando Dyisas, na man Méri di dale, "Tanwèla laweh Amuito mdà di lbang, na làmi gadè ku nè gumkahla kenen." 3 Na mdà Fiter na demen mlalò ku Dyisas salu di lbang. 4 Sadlu ale salu ditù, bay mlal i satu na muna kel di lbang. 5 Na fkagò kenen du smalil di lbang, na teenan fungas Dyisas gtagak déén, bay laan fusuk di lam. 6 Kafnge én, talê kel Fiter, na fles kenen fusuk, na teenan safut fungas laweh Dyisas, 7 na lêman safut fungas i ulun, bay maglulun na mahal gugkahan. 8 Kafnge én, fusuk i mlalò ku Dyisas muna kel gine, na teenan kdee ani, na faglut kenen Dyisas tamto lêman. 9 Kabay làla fa glabat i gsulat di Tnalù Dwata, mték Dyisas mdà di fati. 10 Kafnge én, mdà i lwe to én mulê. 11 Kabay Méri déén kenen di lwà i gulambang mngel, na di kngelan fkagò kenen du smalil di lam i lbang, 12 na nun teenan lwe kasaligan Dwata kamlaweh bukay. Sudeng ale déén di gufkahla laweh Dyisas, satu gsen di ulu, na satu gsen di blì. 13 Na snalekla Méri, manla, "Libun, tan nngelam?" Na manan di dale, "Nun dad to mwè laweh Amugu, na làgu gadè gufkahla dun." 14 Na di kafngen man ani, falê kenen, na teenan Dyisas tadag déén, bay laan kenen dilè. 15 Na man Dyisas di kenen, "Libun, tan nngelam? Simto fanngabalam?" Na man nawa Méri ku kenen to gal mifat dad fule déén, taman manan, "Fà, ku ge mwè lawehan, tulenam deg gufkaham dun, du nwègu." 16 Kabay man Dyisas, "Méri." Na smalu Méri di kenen, na manan di talù Hibru, "Raboni." I gumtatek talù Raboni, dunan To Tamdò. 17 Na man Dyisas di kenen, "Nangam agu nagot, du là agu fa salu di Màgu. Kabay salu ge di dad flanekgu, na tulenam dale na fan agu salu di Màgu Dwata di langit, dunan Màyu na Dwatayu." 18 Taman mdà Méri Magdalin salu di dad mlalò ku Dyisas, na tulenan dale tateenan i Amu. Na tulenan kdee gman Dyisas di kenen. 19 Na di kbutang di duh Linggu, stifun dad gal mlalò ku Dyisas di satu gumnè, na tnakabla gufusuk du likò ale dad ulu dad Dyu. Na tatì msut déén Dyisas tadag di blengla, na manan di dale, "I ktanak nawa mnè di gamu." 20 Kafngen man ani, fiten dale dad falelan na lohokan. Na too ale lehew du tateenla Amula. 21 Na lêman man Dyisas di dale, "I ktanak nawa mnè di gamu. Dekta gamu salngad i kdek Màgu deg." 22 Na di kafnge Dyisas mangman ani, nyufan ale, na manan, "Dnawatyu Mtiu Tulus. 23 Na mdà ani ku nlifetyu salà satu to nlifet Dwata salaan, bay ku làyu nlifet salaan là sa nlifet Dwata dun." 24 Na Tomas, satu di dad sfalò lwe gal mlalò ku Dyisas, galla tlo Fingin, là déén di kfite Dyisas kton di dale. 25 Taman man dademen di kenen, "Tateenmi Amuito." Kabay man Tomas di dale, "Silang agu faglut tamték kenen ku teengu dad seeyan di falelan na doggu tnalògu di dad dalan gumatak i lansang, na fkahgu kmalgu di lam i gumdak di lohokan." 26 Na kafnge walu butang, talêman stifun dad gal mlalò ku Dyisas di lam satu gumnè, na déén Tomas. Magtakab gumnè, bay msut Dyisas, na tadag déén di blengla, na manan di dale, "I ktanak nawa mnè di gamu." 27 Kafnge én, manan di ku Tomas, "Fkaham tnaloam dini, na neyem dalan gumatak lansang di kmalgu, na fkaham kmalam di gumdak di lohokgu. Na nang ge falwe nawa, bay faglut ge." 28 Na tmimel Tomas, "Ge Amugu na Dwatagu." 29 Na man Dyisas di kenen, "I duenam faglut du tateenam agu. Nun kafye dad to faglut di deg balù làla agu teen." 30 Na dee fa dademe tnikeng nimò Dyisas teen dad mlalò kenen là gsulat di libru ani. 31 Kabay tasulatgu kdee ani, du fye faglut gamu na Dyisas i Krayst, én Mgalék Dwata, na Tingà Dwata. Na fagu di kafaglutyu di kenen gamfun gamu nawa landè sen.

21

1 Kafnge én, lêman fite Dyisas i kton di dad gal mlalò kenen di bong lanaw Tibiryas. Na ani kfagun fite i kton. 2 Déén Simon Fiter, Tomas, i galla tlo Fingin, Natanyél mdà di banwe Kana di Galili, lwe dad ngà Sébidi na lwe dademe gal mlalò ku Dyisas. 3 Na man Simon Fiter di dale, "Mdà agu mukut nalaf." Na man i dademen, "Magin gami ge." Na mdà ale maweng, na mukut ale tayud butang, bay landè gwèla. 4 Na di ksut i duh tadag Dyisas di kilil lanaw, bay i dad mlalò kenen, làla gadè ku kenen Dyisas. 5 Na tamlo Dyisas di dale, snalekan, "Dad flanek, tanun gwèyu?" Na manla, "Landè." 6 Na manan di dale, "Ftatekyu fukutyu gsen di kwanan i aweng, na nun gwèyu." Na taman ftatekla fukutla lêman, na di kadyolla dun làla gagan mket dun du too dee nalaf gwèla. 7 Na man i gal mlalò ku Dyisas i toon kando di ku Fiter, manan, "Én sa Amuito!" Na di kgadè Fiter, Dyisas i tadag déén, lsakan i saul tanlusan du mukut, na kamyaf di yéél du kmahung salu di ku Dyisas. 8 Kabay dademe, fles ale maweng damyol fukutla fnò nalaf, du là ale mawag di kilil, nun kè syem falò mitru kawagan. 9 Kagduungla nun teenla déén dad bala lifoh na tnatê nalaf na nun fan. 10 Na man Dyisas di dale, "Nebeyu dini dademe nalaf tagwèyu." 11 Taman myak Simon Fiter di aweng, na dyolan fukutla fnò dad malbang nalaf kel di kilil. Na kdee nalaf, mlatu lime falò tlu, blaam là kasê fukutla balù too ale dee. 12 Na man Dyisas di dad mlalò kenen, "Dini gamu, na kmaan." Na landè di dale smalek ku simto kenen, du gadèla kenen Amula. 13 Na fdadong Dyisas, na nwean fan, na banlén ale, na banlén ale nalaf. 14 Ani gatlun dulê fite i kton di dad gal mlalò kenen mdà di ktékan di fati. 15 Di kafngela kmaan man Dyisas di ku Simon Fiter, "Simon, tingà Dyan, too bong nawam deg mdatah fa di kalbong nawa dademem deg?" Na manan, "Hae Amu, gadeam bong nawagu ge." Na man Dyisas, "Ku bong nawam deg nifatam dad ngà bilibiligu." 16 Na smalek Dyisas lêman, "Simon, tingà Dyan, too bong dé nawam deg?" Na tmimel Fiter, manan, "Hae Amu, gadeam bong nawagu ge." Na man Dyisas, "Toom nifat dad bilibiligu." 17 Na lêman smalek Dyisas di gatlun dulê, "Simon, tingà Dyan, glut bong nawam deg?" Na too mlidù Fiter, du tatlu dulê smalek Dyisas ku too bong nawan kenen. Taman man Fiter di ku Dyisas, "E Amu, gadeam sa kdee, na gadeam sa bong nawagu ge." Na man Dyisas di kenen, "Toom nifat dad bilibiligu. 18 Tulengu ge kaglutan, di lamam fa lamnok, ge sa gmaling i ktom, na fakay ge magu balù nè kayeam gusalum, bay ku tatua ge tatiam alò bantal i sigalam, na mahal dad to gmaling ge, na nebela ge di laam kayè gusalu." 19 Én man Dyisas di ku Fiter, du fgadean di kenen gablà i kagkah kfatin, du fye magdayen Dwata. Na kafnge én, man Dyisas di kenen, "Laloam agu." 20 Di kfalê Fiter teenan i gal mlalò ku Dyisas toon kando, dunan i fagléd di kfe Dyisas na smalek di slengla kmaan, manan, "Amu, simto dé fan mangkal ge?" 21 Na di kite Fiter i to én, snalekan Dyisas, manan, "Amu, tan sa mkel di to én kadang?" 22 Na tmimel Dyisas, manan, "Ku én kayègu na mto fa kenen kel di kasfulêgu, landè sa labetam déén. Kabay ge, mlalò ge deg!" 23 Na i man Dyisas ani, gumdà dad mlalò ku Dyisas mbel i santulen, i là mati to én. Kabay ise én man Dyisas du manan, "Ku kayègu, na mto fa kenen kel di kasfulêgu, landè sa labetam déén." 24 Agu sa i to mlalò ku Dyisas i gmanan én, na agu i tmulen kdee ani na smulat dun, na gadèmi kdee tatulengu too glut. 25 Kabay nun fa dee nimò Dyisas là gsulat di libru ani. Ku kdee nimoan slame gsulat, là kè gablà dad gufkah di klamang banwe i kdee libru gusmulat dun. Ani gusen i mangu.