1

1 Nan angsancha ai taku ai öpchas nangisolat isnan ogokud nan ininmat ai chadlusmi avfoloten, 2 Tai sanchöicha ai nangifaag ken chalcami chaicha nan chadlus nangiila, nipalpo isnan lapona, kecheng insolocha nan köwanin nan Chios: 3 Ya ta chadlusko pinoot sanchöicha inmat ai nipalpo isnan lapona, kanak en kawis nan mangisolatak ai mainongnong, ken sika, ai nangato ai Teofilo, 4 Ta mangammoam ai nannaicha ai naisoloam ya titiwacha. 5 Issan nenalian Herod id Judea, wadai nan ösang ai pachi, ai nenngatsan is Zakarias, ai isnan pachong Abia, ya nan asawana ya innapon Aaron id sangaduni, ai enngatsan is Elisabeth. 6 Ya ustocha ai twa isnan sassakangen nan Chios, ya inononodcha nan amin nan filin ya lötög nan Apo, ai maid fasfasolcha. 7 Ya maid anakcha tai igai inmanak si Elisabeth, ya inmannong nan natattakuancha. 8 Ya issan kapachina isnan sassakangen nan Chios, isnan 9 misubliana, sia nan nikaspo ai namasköd isnan insenso issan sinumköpana isnan Simfaan nan Apo, ai kag isnan awid nan pachi. 10 Ya nan amin ai katakutaku chacha nenkapya isnan chöla, isnan olas nan kumangatan nan insenso. 11 Ya nenpaila ken Zakarias nan ösang ai anhel nan Apo, ai tinmakchig isnan awanen nan altar si insenso. 12 Ya issan nangilan Zakarias, nenchanag, ya inumchan nan ögietna. 13 Naimötachi nan anhel kinwanina ken sia, Adika umögiet, Zakarias: tai nan kapyam ya nadngö; ya nan asawam ai si Elisabeth atumanak is lalaki, ya atngatsanan sia is Juan. 14 Ya atenlilinawaka: ya atangsan nan mikilinawa isnan fumalaana. 15 Tai atsia ya mangato isnan mangil-an nan Chios ken sia, ya maid innumena is kinödsö ai alak: ya atmapno isnan Santo ai Espirito ai ulai nipalpo isnan fumalaana. 16 Ya angsan nan ananak Israel nan atpataoliana isnan Apo. 17 Ya atsia nan mangununa isnan Apo, ai atkag ken Elias nan espiritona ya nan fikasna: ta ittolina nan nimnim nan amam-a isnan ananakcha ya pakawisena nan adi mangavfolot, ya issakana nan katakutaku isnan Apo. 18 Ya kinwanin Zakarias isnan Anhel, Ngag nan atmangammoak isna? tai nai nalakai-ak ya nan asawak inmannong nan natattakuana. 19 Ya nan anhel sinumfat ya kinwanina ken sia, Saken si Gabriel, ai chaak tumakchig isnan sassakangen nan Chios: ya nafaa-ak ai mangifaag ken sika, ya mangippaila ken sika is nannai ai kalallaiad ai chamag. 20 Ya ilaim, atmangangak-ka ai atadika makakkali, enkana's umchanan nan akiu ai ummatan nannaicha, tai igaimo innavfolot nan köwanik ai atu-umat isnan akiu ai makwani. 21 Ya nan taku sisinödcha si Zakarias, ya nataacha isnan naauniana isnan Simfaan. 22 Ya issan finmalaana, igai nakakkali ken chaicha, ya inammocha ai wai inilana is nenpaila ken sia, isnan Simfaan; tai kinnawachana chaicha, ya chöcha ai adi nakakkali. 23 Ya issan navfuasan sanchöicha akiu ai nenpachiana, kinmaan ai inmöi isnan afongna. 24 Ya adi na-auni si Elisabeth, ai asawana ya naliton ya nentengau isnan lima ai fuan isnan afongcha, ai kanana, 25 Sia nan inangnen nan Apo ken saken, is nannaicha ai akiu, ai kinaana nan nangogokuchancha nan taku ken saken. 26 Ya isnan mikan-öm ai fuan nan si Anhel ai Gabriel finmaan nan Chios isnan ka ili id Galilea, ai nakwani ai Nazareth, 27 Isnan ösang ai Virhen ai nangasawa isnan lalaki ai nenngatsan is Josef, ai nalpo isnan pangafong David; ya nan ngatsan san chöi Virhen ya Maria. 28 Ya nan Anhel sinumköp isnan kawadna, ya kanana, en, Ave, sika ai napnoka isnan grasia, nan Apo wadai ken sika: sika nan mabendika isnan fabfafai. 29 Naimöt-achi sia nenchowadchowa isnannai ai köwani, ya sinsinmekna mo ngag nai ai chadayaw. 30 Ya nan Anhel kinwanina ken sia, Maria, adika umögiet, tai nakadanka is grasian nan Chios. 31 Ya ilaem, atilitonmo ya iyanakmo nan ösang ai lalaki ya atngatsanam is JESU. 32 Atmangato ya atnangatsanana ai Anak nan Kangatoan; ya nan Apo ai Chios atichuana ken Sia nan tokchoan David, ai amana: 33 Ya atenaliana isnan pangafong Jakob ai maid kankaiana; ya nan enaliana atmaid kakentaana. 34 Ya kinwanin Maria isnan Anhel, At ngag nan angnen tona, tai saken ya maid am-ammok is lalaki? 35 Ya sinumfat san Anhel ai nangwani ken sia, Nan Santo ai Espirito at atumchan ken sika, ya nan fikas nan Kangatoan atsaniana ken sika: ya siasa isnan Santo ai atfumala ken sika atmangatsanan is Anak nan Chios. 36 Ya nai si Elisabeth, ai ötadmo, naliton akös nan ongonga, isnan nalakiana, ya nannai nan mikan-öm ai fuan, ai ipchas nakwani ai adi umanak. 37 Tai maid köwanin nan Chios ai adi kavfalin. 38 Ya kinwanin mampai Maria, Nai nan faan nan Apo; umat ken saken ai kag isnan kinwanim. Ya nan Anhel kinmaan ken sia. 39 Ya adi na-auni si Maria naligwat ya nenkakamo ai inmöi isnan ösang ai ili id Judea, ai kawad nan filig; 40 Ya sinumköp isnan afong Zakarias, ya nensaluchu ken Elisabeth. 41 Ya issan nanngölan Elisabeth isnan kalin Maria, nan ongonga nakaniwa isnan chaöm nan potona; ya si Elisabeth napno isnan Santo ai Espirito: 42 Ya nenfukau ai nenlilinawa, ai kanana en, Sika nan wödwöcha ai mabendika isnan amin ai fabfafai, ya mabendika nan Fökas nan fösaangmo. 43 Ya ngagön umatna ken saken ai nan inan nan Apok umali ken saken? 44 Tai issan chadlusko nanngölan isnan kinwanim isnan nensaluchuam, nan ongonga nakaniwa isnan potok, tai nenlinawa. 45 Ya sia nan mabendika nan nangafolot: tai atumat nan nakwani ken sia ai nalpo isnan Apo. 46 Ya si Maria kinwanina, Nan lengagko pangatowen nan Apo, 47 Ya nan espiritok enlallaiad isnan Chios ai Umisalak. 48 Mokötai Sia inilana nan posi ai faana ai mamadkit: mokötai, ilaem, nilapo adwani amin nan taku ai atfumala, atkanancha ai mabendika-ak. 49 Mokötai Sia ai Makavfulin ya inpangatona saken; ya Santo nan Ngatsana. 50 Ya Sia ya sösögangana nan umögiet ken Sia; isnan amin ai taku isnan katawetawen. 51 Inpailana nan fikas isnan limana; inpausfokna nan agakötek isnan simmek isnan posocha 52 Sia inpapanadna nan nangato isnan tokchoancha, ya inpangatona nan maid chayuna. 53 Sia ya pinnangana nan naowat isnan kawis, ya inpakaana nan katsangyan ai naowat. 54 Sia ya sösömkenam nan sögangna, ya finachangana nan faana ai Israel; 55 Kag isnan nangifagana isnan Apo-apotaku id sangadom, Abraham ya isnan an-akna, isnan katawetawen. 56 Ya si Maria niki-tötöö ken Elisabeth isnan tolo ai fuan, ya sa et tinmoli isnan afongna kannai. 57 Ya inumchan nan akiu ai umanakan nan si Elisabeth; ya inmanak is lalaki. 58 Ya nan sagena ya nan ötöt-adna chinmanagcha nan chadlus nanögangan nan Apo ken sia; ya niki-linawacha ken sia. 59 Ya issan mikawalo ai akiu inmalicha ai nanigiat isnan ongonga, ya inpangatsancha ken sia nan Zakarias, ai winnanödna's amana. 60 Sinumfat mötachi si inana ai kanana en Faken; mangatsanana mötachic is Juan. 61 Ya kinwanicha ken sia, Maid isnan ötat-admo nan nenngatsan is nannai. 62 Ya tinodkiucha si amana, isnan mangipaammona mo ngag nan laichina ai raaipangatsan. 63 Ya kinumchau is ensolatan, ya insolatna ai kanana en, Nan ngatsan ya Juan. Ya nataacha amin. 61 Ya köt nakakkali ya inlapona ai enkali ai enchadayao isnan Chios, 65 Ya inumchan nan ögiet nan amin ai nentötöö isnan sagencha; ya nan amin ai naicha ai nakwani sinmolut isnan amin ai taku isnan filig id Judea. 66 Ya nan amin ai nanngö is nannaicha inkakocha isnan nimnimcha, ai kanancha en At ngag ngen na ai ongonga? Ya nan Apo finnufuig sia. 67 Ya napno si amana ai Zakarias isnan Santo ai Espirito, ya chadlus nenchadayaw isnan Chios ai kanana: 68 Mabendika nan Apo ai Chios isnan Israel; tai inilana ya sinfutna nan takuna; 69 Ya inpangatona nan chadlus Mangisalak ken chataku, isnan Pangafong David ai faana; 70 Ai kag isnan kinwanina isnan kalin nan Santo ai Profeta, ai na-wa-wadai ai nipalpo isnan nilapwan nan lawag; 71 Ta maisalakan taku isnan fosotaku, ya isnan amin ai nensosonget ken chataku. 72 Ta pailana nan sögangna ai kag na ipchas kinwani isnan Apo-apo taku, ya manimkana isnan santo ai köwanina; 73 San insapatna isnan Apo-taku ai Abraham, 74 Ta ichuana nan malofusantaku isnan fasoltaku ta menpafaalentaku ken Sia, ai maid ögiet, 75 Isnan kinasanto ya kinausto isnan sassakangena, isnan matattakuantaku. 76 Ya Sika, ai Ongonga, atmakwanika, ai Profeta isnan Kangatoan: tai atmangununaka isnan Apo ai mangisakana isnan chalana: 77 Ai mangipa-ammo isnan naisalakan nan takuna, isnan mapakawanan nan fasolcha, 78 Isnan chachama ai sögang nan Chiostaku; tai nan Pawai atfumala isnan falaan nan akiu, ai malpo id Chaia, 79 Ai mangipapawai isnan entötöö isnan abafulinget ya isnan allinöwan nan ötöi, ai mangipango ken chataku isnan kumigkenkantaku. 80 Ya nan ongonga naöngan ya finmikas nan lengagna, ya nentötöö isnan letang enkana's nan akiu ai nenpailana isnan Israel.

2

1 Ya nakaeb, issan todicha ai akiu, ai infilin Caesar Augustus ta maipadlon nan amin ai taku isnan lota ai nenaliana. 2 Sia nannai nan lapolapona ai nenpadlonancha, issan nenfinyadcholan Kirinius id Siria 3 Ya waschin amin inmöi ai maipadlon isnan ilicha. 4 Ya si Josef kinmaan isnan ili ai Nazareth id Galilea, ai inmöi id Judea, isnan ili ai nakwani ai Bethlehem, tai inapon David; 5 Ai maipadloncha ken Maria, ai asawana, issan nalillitonana. 6 Ya nikaspo, ai issan kawadcha ischi, inumchan nan akiu ai umanakana. 7 Ya inpavfalana nan anakna ai yuna, ya kinnomonana isnan facho ya insaadna isnan ka akob isnan kafallilisa, tai maid entötöiancha isnan afong. 8 Ya wadaicha chadlu akös ischi nan chaenpastol isnan kalnelo, ai entöföicha isnan ka punchag, ai chaenfantai ai fumafanguncha, isnan maschöm. 9 Yanan ösang ai anhel nan Apo na-anali ken chaicha, ya nan glorian nan Apo ai nenlalanglang isnan liwischa, ya na-anögiet cha. 10 Ya san anhel kinwanina ken chaicha, Adikayu umögiet; tai nan yaik ken chakayu nan chamag ai chadlus kalalaiad isnan amin ai taku: 11 Tai is nannai ai akiu finmala ken chakayu isnan ka ilin David nan ösang ai Umisalak, ai Sia nan Kristo, ai Apo. 12 Ya sia nan mangimatonanyu: atidchananyu nan Ongonga ai nakkomonan isnan facho, ai naisaad isnan ka akob. 13 Ya na-anali nan angsan ai anhel ai nifuig isnan ösang ai anhel ai nalpo id Chaia, ai chacha nenchadayaw isnan Chios, ai kanancha, 14 Gloria isnan Chios ai Kangatoan, ya isnan ka lota, kumigkinek nen taku ai chaicha nan chadlus menlalaiachana. 15 Ya issan kinmaanan nan anhel id Chaia, nan chaönfantai isnan kalnelo natotyacha ya kanancha en, Öntaku mampai id Bethlehem ya ilaentaku nannai ai inmat, ai inpaifaag nan Apo ken chataku. 16 Ya nenkakamocha ai inmöi, ya inchananch nan si Maria ya si Josef ya sanchöi ai Ongonga, ai naisaad isnan ka akob. 17 Ya issan nangilancha, infaagcha nan chamag nan Ongonga ai nikwani ken chaicha. 18 Ya nan amin ai nanngö nataacha isnan kinwanin nan chaenpastol. 19 Naimötachi si Maria inkakona nan amin ai naicha ya sinmisinmek isnan nimnimna. 20 Ya inmawidcha nan chaenpastol, ya nenchadayawcha isnan Chios isnan amin ai chinngöcha ya inilacha, ai kag isnan nakwani ken chaicha. 21 Ya issan nafuasan nan walo ai akiu, isnan nanigiatan isnan Ongonga ya ningadnan cha is ngatsan ai JESU, ai sia chadlu nan ngatsan ai inchuan san anhel, issan igaina nilitonan. 22 Ya issan nangangnenancha isnan akiu nan Purifikasion, ai niyonod isnan Filin Moses, inyaicha si Jesu id Jerusalem, ta mangippailancha Sia isnan Apo. 23 (Ai kag isnan naikolit isnan Filin nan Apo: Nan amin ai lapolapona ai fumala ai lalaki, waschin makwani ai santo isnan Apo.) 24 Ya nangichauchaucha isnan daton, ai kag isnan nakwani ai filin nan Apo, Sinasawa ai kalapati paimo twa ai pasaka. 25 Köt wadai nan ösang ai taku id Jerusalem, ai nenngatsan is Simeon, ai usto ya kawis nan chana inangangnen, ya inavfolotna nan Chios, ai insögsögchanana nan Menliliwa isnan Israel: ya nan Santo ai Espirito ya wadai ken sia. 26 Ya nan Santo ai Espirito inpaammona ken sia, ai atadi katkatöi mo adina ilan nan Kriston nan Apo. 27 Ya si Simeon sinumköp isnan Simfaan ai inyöi nan Santo ai Espirito: ya issan nangyaian nan chakökön Jesu ta 28 mangangnenancha isnan awid nan Filin, kecheng inakwan Simeon, ya nenchadayaw isnan Chios, ya kinwanina, 29 Apo, adwani yuyam nan faam ta umöiak is kakigkinek, kag isnan kinwanim: 30 Mokötai nan matak inilana nan Umisalakam, 31 Ai insakanam isnan sassakangen nan amin ai taku; 32 Ta Sia nan Insiliu ai mangipapawai isnan taku ai adadchawi; ya Sia nan Gloria isnan takum ai Israel. 33 Ya si Josef ya si inan Jesu nataacha is nannaicha ai nakwani ken Sia. 34 Ya si Simeon binendika chaicha, ya kinwanina ken Maria, Ilaim, nannai ai Ongonga at Sia nan matokangan ya fumangunan nan angsan ai taku isnan Israel, ya at Sia ma-amamsiw akös; 35 Ya ösang ai fadyok akös nan atmanusek isnan posom kannai; ta nan simmek nan angsan ai taku atmaipaammo. 36 Ya wadai nan profeta, ai Ana, ai anak Fanuel ai innapon Aser, ai taku id sangasangadom; sia ya nalaka-lakai, nipalpo issan ka-mamadkitna niki-asawa isnan pito ai tawen: 37 Ya sia nailekasan isnan walonpoo ya epat ai tawen, ai kadin wadai isnan ka Simfaan, ya nenchadayaw isnan Chios ai nenayunayunan ya nenkapyakapya isnan magakiu ya isnan maschöm. 38 Ya nikaspo akös ai sinumköp si Ana, ya nenyaman isnan Apo, ya inogokudna kannai Sia isnan amin ai nangisösögchan isnan maisalakan id Jerusalem. 39 Ya issan afus nangangnenan nan chakökön Jesu nan amin ai naiyonod isnan Filin nan Apo, tinmolicha chadlu isnan ka ilicha ai Nazareth. 40 Ya san Ongonga naöngan, finmikas, chadlus nalaing, ya nan grasian nan Chios wadai ken Sia. 41 Ya tinawen ai umöicha nan chakököna id Jerusalem isnan Fiestan nan Paskwa. 42 Ya issan intawenana is simpoo yad twa, linmamagcha id Jerusalem, ai kag isnan awid nan Fiesta. 43 Ya issan namuasancha is sanchöicha ai akiu, issan tinmoliancha san Ongonga ai si Jesu ya nakaiad id Jerusalem, ai adi amammon san chakököna 44 Ya tai kanancha mo lang nifuig isnan taku, nanalancha nan ösang ai akiu, ya inananapcha isnan ötat-adcha ya kaiemcha. 45 Ya issan igaicha nangchanan, tinmolicha id Jerusalem, ai manganap ken Sia. 46 Ya issan anongus nan tolo ai akiu, inchanancha Sia isnan Simfaan, ai tumotokcho isnan inkagkawaan nan nalaing ai taku, ai chana chengen ya cha ensaludsud ken chaicha. 47 Ya nan amin ai nanngö ken Sia nataacha isnan kalaingna na nan sivfatna. 48 Ya issan nangilancha, nataacha, ya kinwanin inana ken Sia, Anak-ko, ngagön sia nan inangnem ken chakami? Chakami ken amam ya nensösögangkami ai cha manganap ken Sika. 49 Ya sinumfat ken chaicha, Ngagön kayu umanap ken Saken? Adiyu ngen ammo ai nan afong Ama sia nan chadlusko kawad? 50 Ya igaicha kintek nan kinwanina ken chaicha. 51 Ya pinmanad ya nifuig ken chaicha, ya inumchancha id Nazareth, ya intatanoina ai mangafolot ken chaicha. 52 Yasi Jesu ya nachaoman nan kinalaingna ya kaatakchagna, ya inmadacha nan grasian nan Chios ya nan taku ken Sia.

3

1 Issan nikkapoo ya lima ai tawen ai nen-alian Tiberius Caesar, issan nenfinyacholan Poncio Pilato, id Judea, ya si Herod ya tetrarka id Galilea, ya si Filip ai akina tetrarka id Itrurea ya isnan amin ai ili id Trakonitis, ya si Lysanius tetrarka id Abilene, 2 Issan nangatoan cha Annas ken Kaifas ai pachi, inmali nan kalin nan Chios ken Juan ai anak Zakarias isnan ka letang. 3 Ya nenliköliköd isnan amin ai liwis nan Jordan, ai chanenisolo isnan funyag ai menfavfawian ai mangaan isnan fasol; 4 Ai kag isnan insolat Esaias ai Profeta, ai kanana en: Nan kalin nan chaenfukau: Isnan letang isakanayu nan kalsan nan Apo, enlötkenyu nan kalsana. 6 Nan amin ai chalulug atmakabonan, ya nan amin ai filig ya atmadchatacha; atmaltög nan natiktiku, ya nan igai nais-u ai lota atmais-ucha; 6 Ya nan amin ai katakutaku atilaincha nan Umisalakan nan Chios. 7 Kecheng kinwanina isnan katakutaku ai finmala ai enpafunyag ken sia: O chakayu ai ananak si owög, sino nan nangifaag ken chakayu ta lumayaukayu isnan songet ai atumchan? 8 Ikanyu isnan katakuanyu nan kagyu enfavfawian ya adiyu kanan kannai, ai wadai si Abraham ai Apo-apotaku; tai kanak ken chakayu tai ulai is nannaicha ai fato, mavfalin nan Chios ai umippafala is anak Abraham. 9 Ya nai ninippöi kannai nan wassai isnan poong nan kaiu; ya siachi mampai nan amin ai kaiu ai adi mamkas is kawis atmatipla ya maippöi isnan ka apui. 10 Ya nan taku kinwanicha ken sia ai kanancha: Ngag mampai nan angnenmi? 11 Sinumfat ya kinwanina ken chaicha, Ya mo sino nan wai twa ai fachona, idchuana nan ösang isnan maid fachona; ya mo wai kanena, ichatakana nan tapina. 12 Kecheng ai inmali nan chananakop isnan fuis, ai kanancha ken sia: Apo, ngag mampai nan angnenmi? 13 Ya kinwanina ken chaicha, Adiyu enfaiachan chaicha is adadacha mo nan wadai isnan lötög. 14 Ya nan solchacho akös nenfakacha ken sia ai kanancha: Ya ngag nan sa mi angnen? Ya kinwanina ken chaicha, Adikayu enködködsö isnan ulai sino ai taku, ya adikayu enisaksaklang is adi titiwa; ya mamangöp kayu isnan lagfuyu. 15 Ya issan chananöchan nan taku ya chacha sösömken si Juan, mo sia lang si Kristo; 16 Si Juan sinumfat ken chaicha amin ai kanana: Saken titiwa ai funyakak chakayu isnan chanum; naimöt-achi wadai nan umali ai nangatngato mo saken, ai adiak chadlus kawis ai mamafad isnan taked nan kokudna; Sia nan atmamunyag ken chakayu isnan Santo ai Espirito ya isnan apui: 17 Ya ö-ögnana nan ligona, ya at tapa-tapana nan trigo ai wadai isnan ka losab, ya atamongena nan trigo isnan alangna; nan taöp mötachi atpuuana isnan apui ai atadi ka-ad-achöp 18 Ya angsan akös nan teken ai insosolona isnan katakutaku. 19 Naimötachi si Herod, ai tetrarka, isnan nangochokan Juan ken sia isnan inmat ken Herodias ai asawan Filip ai akina, ya isnan teken ai fasol ai inangnena, 20 Inchaomna nan ngaag ai nai, ai infaludna's Juan. 21 Ya issan afuscha nafunyakan nan amin ai taku, nafunyakan akös si Jesu; ya issan chana nangapyaan, köt natekwafan nan chaia, 22 Ya kecheng ai pinmanad nan Santo ai Espirito ken Sia, ai kag pasaka nan awakna, ya nan kali ai nalpo id chaia ai kanana, Sika nan chadlusko lalaichin ai Anakko, ai Sika nan enlinawaak. 23 Ya issan nangipalpoan Jesu ai nenisolo, toloupoo nan tawena, ya Sia san kanancha mo anak Josef ai anak Heli, 24 Ai anak Matat, ai anak Levi, ai anak Melki, ai ana-k Janna, ai anak Josef, 25 Ai anak Mattatias, ai anak Amos, ai anak Naum, ai anak Esli, ai anak Nagge 26 Ai anak Maat, ai anak Mattatias, ai anak Semei, ai anak Josef, ai anak Juda, 27 Ai anak Joanna, ai anak Resa, ai anak Zorobabel, ai anak Salatiel, ai anak Neri, 28 Ai anak Melki, ai anak Addi, si anak Kosam, ai anak Elmodam, ai anak Er, 29 Ai anak Jose, ai anak Elieser, ai anak Jorim, ai anak Mattat, ai anak Levi, 80 Ai anak Simeon, at anak Juda, ai anak Josef, ai anak Jonan, ai anak Eliakim, 31 Ai anak Melea, ai anak Menan, ai anak Mattatha, ai anak Natan, ai anak David, 32 Ai anak Jesse, ai anak Obed, ai anak Boos, ai anak Salmon, ai anak Naasson, 33 Ai anak Aminidab, ai anak Aran ai anak Esrom, ai anak Fares, ai anak Juda, 34 Ai anak Jakob, ai anak Isaak, ai anak Abraham, ai anak Tara, ai anak Nakor, 35 Ai anak Sarak, ai anak Ragao, ai anak Falek, ai anak Heber, ai anak Sala, 36 Ai anak Kainan, ai anak Arfanad, aianak Sem, ai anak Noe, ai anak Lamek, 37 Ai anak Matusala, ai anak Enok, ai anak Jared, ai anak Maleleel ai anak Kainan, 38 Ai anak Enos, ai anab Seth, ai anak Adam, ai anak Chios.

4

1 Ya si Jesu tinmoli ai nalpo id Jordan ai Sia ya napno isnan Santo ai Espirito, ya inyöina Sia nan Espirito isnan ka letang. 2 Ya issan epatpoo ai akiu nan demonio chana sinas-ailo, Sia, ya issan todicha ai akiu maid nangnanganana, ya issan anongus na kecheng naowat. 3 Ya nan demonio kinwanina ken Sia, Mossaia Sika nan Anak nan Chios, polongen nan fato ai nai ta ngomatsan is tinapay. 4 Ya si Jesu sinumfat ken sia ai kinwanina: Naikolit ai, Faken nan tinapay angkai nan ikattakuana nan taku, naimötachi amin ai köwanin nan Chios. 5 Ya nan demonio intakina Sia isnan atatakchag ai filig, ya inpailana ken Sia nan amin nan fatawa isnan lawag, ta nen pangil-ana ya kecheng. 6 Ya nan demonio kinwanina ken Sia, Sika nan atmangichauchauak nan amin ai naicha ya nan kagawischa, ta en-ali Ka ken chaicha; tai naichauchau ken saken, ya atichuak isnan ulai sino ai piliek. 7 Mo enchadayawka mampai ken saken, atenkwam amin. 8 Ya si Jesu sinumfat ya kinwanina, ken sia: Kumaanka isna, Setan; tai naikolit ai, Atenchadayawka isnan Apo ai Chiosmo, ya Sia yangkai nan enpavfaalem. 9 Ya inyöi Setan si Jesu id Jerusalem, ya inpöina Sia isnan togtogon nan Simfaan, ya kinwanina ken Sia: Mossaia 10 Anakna Sika nan Chios, enekchagka; tai naikolit ai, Atpolongena nan anhelna ken sika, ta önfantaicha ken sika: 11 Attapayencha sika isnan limacha ta adi maifasfas nan chapanmo isnan fato. 12 Ya si Jasu sinumfat ken sia ya kinwanina, Nakwani ai, Adim sas-ailoen nan Apo ai Chiosmo. 13 Kecheng kinmaan nan demonio ken Sia, issan afusna nan nanas-ailoan ken Sia. 14 Ya si Jesu, isnan fachang nan Espirito, tinmoli id Galilee, ya nan chamagna sinmolut isnan amin ai ili ai nailiwis 15 Ya chanenisolo isnan sinagogacha, ya chinadayawcha amin Sia. 16 Ya inmali id Nazareth, ai naönganana ya nattalaunana; ya sinumköp isnan sinagoga isnan Savfacho, ai kag isnan awidna, ya tinmakchig ai menfasa. 17 Ya inchuacha ken Sia nan Liblon Esaias ai Profeta, ya issan namitlakana isnan liblo, inchanana nan naisolatan nannai: 18 Nan Espiriton nan Apo ya wadai ken Saken, tai linanana Saken ai napili ai mangisolo isnan posi isnan Kawis ai Chamag; finaana Saken ai menliwliwa isnan enlikat ai mangifaag isnan menlofusancha isnan nafalud, ya nan makailan nan nakimit ai mangipalofus isnan nappalikat, 19 Ai mangipaammo ai adwani nan tawen ai manawatan nan Chios isnan taku. 20 Ya nilumlumna nan liblo ya inchuana isnan faan nan sinagoga ya tinmokcho, ya sanchöicha amin ai wadai isnan sinagoga inniilacha Sia. 21 Ya inlapona ai mangwani ken chaicha, Isnan akiu ai nai nannai ai Naisolat, isnan manngölanyu, nai sia umat. 22 Ya chadluscha chinchinngö Sia, ai nataacha isnan kawis ai kinwanina; ya kinwanicha: Faken ngen Na san anak Josef? 23 Ya kinwanina ken chaicha: Titiwa ai atkananyu nanni ai köwani Sika ai midchiko, pögsan kannai nan awakmo; nan chinngömi ai inangnem id Kapernaum, angnem akös isna ai ilim kannai 24 Ya kinwanina, Titiwa kanak ken chakayu, ai, Maid profeta ai machawat isnan ilina kannai. 25 Kakkanak motachi ken chakayu, ai angsancha ai ilekas id Israel issan nattakuan Elias issan igai nenochanan isnan tolo ai tawen ya önöm ai fuan ai chachama nan okang isnan amin ai lota; 26 Naimötachi maid ken chaicha nan naivfaalan Elias, mo adi angkai id Sarepta, ai ili id Sidon, isnan ösang ai fafai ai ilekas. 27 Ya angsancha ai nakolit id Israel, issan nattakuan Eliseus ai profeta, ya maid napögsan ken chaicha, mo adi angkai si Naaman ai i-Siria. 28 Ya sanchöicha amin ai wadai isnan sinagoga chachama ai sinmongetcha issan nanngölancha is nannaicha, 29 Ya tinmakchigcha ya nenpavfalaencha Sia isnan ili, ya inyöicha isnan ilit nan filig ai naikaban nan ili, ta kanancha en ekchakencha Sia 30 Naimot-achi innikwana nan enkagawaencha ya kinmaan 31 Ya pinmanad id Kapernaum ai ili id Galilea ya insosolona chaicha isnan ka-Savfasavfacho. 32 Ya nataacha isnan insolona, ya inavfolotcha issan nanngolancha isnan kalina 33 Ya wadai nan ösang ai taku isnan sinagoga, ai wadai ya ngaag ai demonio ken sia, ya chadlus nenfukau, 34 Ai kanana, Oogkaiem chakami; ngag nan fibiangko ken Sika, ai Jesu ai i-Nazareth? Aikö Ka inmali ai mangamas ken chakami? Ammok mo sine Ka, nan Santo nan Chios. 35 Ya si Jesu innochokana sia ai kanana en; Kuminekka ya fumala ka ken sia. Ya nan demonio inyangökana ai nangibkas isnan enkagawaencha, ya finmala ken sia, ai maid na-annuka ken sia. 36 Ya nataacha amin ya natotyacha ai kanancha: Ngag man na ai kali? tai mavfalina ai polongen nan ngaag ai espirito ya fumalacha. 37 Ya nan chamagna sinmolut isnan amin ai ili ai naliwis. 38 Ya finmala's Jesu isnan sinagoga, ya sinumköp isnan afong Simon. Ya nan katokangan Simon ai fafai, ya chachama ai nenpoos nan awakna; ya inyaicha's Jesu ken sia. 39 Ya tinmakchig isnan sagena ya inochokana nan sakitna ya nakaanan; ya nattanakchig ya nenpafaa ken chaicha. 40 Issan lumnekkan nan akiu nan amin ai wai sakitcha, inyaicha ken Sia; ya inögnana amin chaicha, ya kinaana nan sakitcha. 41 Ya angsan akös nan demonio ai finmala ken chaicha, ai nenfukau ai kanancha, Sika nan si Kristo, ai Anak nan Chios. Ya inochokana chaicha ya igaina enkalien chaicha; tai inammocha ai Sia si Kristo. 42 Ya issan nawiitana kinmaan ya inmöi isnan lota ai maid tagtakuan; ya nan katakutaku inananapcha Sia, ya inmalicha isnan kawadna, ya inpakudcha Sia ta adi kumakkaan ken chaicha. 43 Ya kinwanina ken chaicha, Masapul ai isolok akös nan Fatawan nan Chios isnan teken ai ili; tai sia nan nafaalak. 44 Ya nenisolo isnan sinagoga id Galilea.

5

1 Ya nakaeb, issan naamongan nan taku ken Jesu, ta manngölancha isnan kalin nan Chios, Sia ya tinmakching isnan sagen nan taiak ai Genesaret. 2 Ya inilana nan twa ai punting ai wadai isnan sagen nan ilit nan taiak; naimöt-achi nan chaensichok tinainancha ai chacha wasan nan sichokcha 3 Ya si Jesu sinumköp isnan ösang ai punting ai kwan Simon, ya kinwanina ai kagkakwis mo iadchawina is akit isnan lota. Ya tinmokcho ya nenisolo isnan taku isnan ka punting. 4 Ya issan tinomkölana ai nenkali, kinwanma ken Simon, Kumagawakayu ya ekchakenyu nan sichok ta wai alaenyu. 5 Ya si Simon sinumfat ken Sia ai kinwanina: Apo, nensichosichok kami isnan lafi, ya maid paat inalami; naimötachi, ino Sika nan mangwani, ekchakek nan sichok. 6 Ya issan nangangnenancha isna, ayaka nan inalacha ai ikan; ya nan sichokcha ya nafakas. 7 Ya kinawachancha nan kadwacha isnan teken ai punting ta umalicha ai mamachang ken chaicha. Ya inmalicha ya pinnocha nan twa ai punting, ya köt akit ya lumnengcha. 8 Issan nangil-an Simon Pedro, nenpalintomeng ken Jesu ai kanana, Tumainan Ka ken Saken, O Apo, tai saken ya chachama nan fasol ko. 9 Tai sia ya nan kakadwana ya nataacha, isnan inalacha ai ikan. 10 Ya cha James ken Juan ai anak Zebedee, ai kadwan Simon, chaicha ya nataacha akös. Ya si Jesu kinwanina ken Simon, Adika umögiet; nilapo adwani nan taku nan alaem. 11 Ya issan nangichakalancha isnan punting, tinainancha amin ya inmonodcha ken Jesu. 12 Nai, issan kawad Jesu isnan ösang ai ili, köt wadai nan ösang ai taku ai nakolikolit; ya issan nangil-ana ken Jesu, nenpalintomeng ken Sia ya inlutlutna ai kanana ken Sia, Apo mo laichim angkai, mavfalinmo ai mangaan isnan kolitko. 13 Ya inuyad Jesu nan limana ya inignana sia, ai kanana: Laich ik; makaan nan sakitmo. Köt nakkanaan nan kolit ken sia. 14 Ya finilin Jesu ta ifab-aag is ulai sino ai taku; naimöt-achi, Umöika enpailaka isnan pachi, ya umichauchauka ai kag isnan filin Moses, isnan nakaanan nan kolitmo, ta mangilancha. 15 Naimötachi inmamamöd ai sinmolut nan chamagna, ya ayakacha nan taku ai inmali ai manngö ken Sia, ya enpakaancha nan sakitcha. 16 Naimötachi si Jesu inmadachawi isnan ka lota ai maid tagtakuan, ya ischi nan nangapyaana. 17 Köt issan sinakiu, ai chana nenisoloan, nan tapina ai Fariseo ya nan mangtek isnan lötög tinmotokchocha isnan sagena, ai nalpocha isnan amin ai ili, id Galilea, id Judea, ya id Jerusalem: ya wadai ken Sia nan fachang nan Apo ai navfalina ai mangaan isnan sakitcha. 18 Köt nai san tapina inyaicha nan ösang ai lalaki ai insakit ai adi makagkiwa, ai intattakina kannai nan masösoyipana: ya inianapcha nan mangikancha ai mangisköp ken sia, ai mangisaad isnan chachapanen Jesu. 19 Ya issan igaicha nakad-anan isnan mangisköpancha ken sia, tai angsan nan taku, inlamagcha isnan togtogon nan afong, ya inpakwacha ai nangipakwab isnan nimadchalilyo ai atip. 20 Ya issan nangammoan Jesu isnan afolotcha, kinwanina isnan nasakit, Napakkawancha nan fasolmo. 21 Ya nan escribas ya nan Fariseo inlapocha ai manmek, ai kanancha, Sino ngen nan enkali ai nai is ngaag? Sino nan mavfalin ai mamakkawan isnan fasol mo adi angkai nan Chios? 22 Ya issan nangammoan Jesu isnan simmekcha, sinumfat ken chaicha, ai kanana, Ngag nan chayu simsimken isnan nimnimyu? 23 Ngag nan malanlanui ai kanan, Nan fasolmo ya napakkawancha, paimo kanan, Tumakchigka ya manalanka? 24 Ta mangammoanyu ai nan Anak nan Taku wadai nan mavfalina isnan ka lota ai mamakkawan isnan fasol, (ya nensakong ai kanana isnan adi nakagkiwa) Kanak ken sika, Tumakchigka, alaem nan kasöypam, ya umöika isnan afohgmo. 25 Köt nattanakchig isnan sassakangencha, ya inalana san kasöypana, ya kinmaan ai inmöi isnan afongna, ai chinadayawna nan Chios. 26 Ya nataacha amin ya chinadayawcha nan Chios, ya inmögietcha akös ai kinwanicha, Katataa nan inmat ai inilami is nannai ai akiu. 27 Issan anongus san naicha, finmala's Jesu ya inilana nan ösang ai chaenchakop isnan fuis, ai enngatsan is Levi, ai tinmotokcho isnan kawadna ai chana enchawatan isnan fuis: ya kinwanin Jesu ke sia, Omonodka ken Saken. 28 Ya si Levi tinmakchig ya kinaiadna amin sanchöicha, ya inmonod ken Sia. 29 Ya si Levi nenayag kannai isnan afongna isnan angsan ai taku, ai mikikancha ken Jesu: ya wadaicha nan ayaka ai chaenchakop isnan fuis, ya nan tapina ai taku ai nikitokcho ken chaicha ai mangan. 30 Naimötachi nan escribas ya nan Fariseo infakacha isnan kakadwan Jesu, ai kagcha ipawa, ai kanancha, Ngagönkayu mikikan ya miki-inum isnan chaenchakop isnan fuis ya isnan chafumasol? 31 Ya si Jesu sinumfat ken chaicha ai kanana, Faken nan maid sakitna nan mamaka isnan midchiko, nan nasakit mötachi nan mamaka. 32 Igai ak inmali ai mangwani isnan enfavfawiancha isnan usto ai taku, isnan chafumasol mötachi nan inaliak. 33 Ya kinwanicha ken Sia, Nan kakadwan Juan kadincha enayunar, ya mangapya, ya sia akös nan ikan nan kakadwan nan Fariseo; nan kakadwam mötachi mangancha ya uminumcha. 34 Ya kinwanina ken chaicha, Mavfalinyu ngen ai ipawa nan manganan nan mamuig isnan umafong, isnan kakkawad nan umafong ai lalaki ken chaicha? 35 Atumchan mötachi nan akiu ai atmakkaanan nan umafong ai lalaki ken chaicha, ya sia nan adicha manganan is nanchöicha ai akiu. 36 Ya nenkali akös isnan ogokud ken chaicha. Maid mangidkop isnan facho ai falo nan navfaiag ai nafakas ai facho, tai mo sia nan inangnena, mapaakawas nan falo ai facho, ya nan maidlop adi kawis nan mailana isnan navfaiag ai facho. 37 Ya maid mangippöi isnan kagkagaeb ai alak isnan nachonut ai chokau ai kochil; tai nan kagkagaeb ai alak atfakasena nan kochil, ya maiwasit, ya atmapakawas akös nan kochil. 38 Nan kagkagaeb ai alak mimippöi isnan falo ai chokau ai kochil, ya atmaigtocha ai kawis. 39 Ya maid akös taku ai ipchas inminum isnan navfaiag ai alak ai menlaiad isnan kagkagaeb ai alak; tai kanana en Kagkagawis nan navfaiag.

6

1 Ya issan mikadwa ai Savfacho, nanalan si Jesu isnan uma ai naittanman nan trigo; ya nan kakadwana nenalacha isnan fökas nan trigo ya ngagcha kinochu ai nangan. 2 Ya nan tapina ai Fariseo kinwanicha ken chaicha, Ngagönyu angnen nan naipawa ai ikkan isnan Savfacho ai akiu? 3 Ya si Jesu sinumfat ken chaicha ai kinwanina, Aiköyu igai finasfasa nan inangnen David issan naowatancha ya nan kakadwana, ai sinumköp isnan afong nan Chios, ya inalana nan tinapay ai nabendika ya kinana ya inagtana akös nan kakadwana; ai lawa ai kanen nan taku, mo adi ankai nan pachi? 5 Ya kinwanina ken chaicha, Nan Anak nan Taku Sia nan Apo akös nan Savfacho. 6 Ya issan teken akös ai Savfacho sinumköp si Jesu isnan Sinagoga ya nenisolo; ya wadai nan ösang ai taku ai kinumsen nan limana. 7 Ya nan Escribas ya nan Fariseo inniilacha Sia, mo enkaan isnan sakit isnan Savfacho; ta wai mangisaklangancha ken Sia. 8 Naimöt-achi ammona nan sinsimkencha, ya kinwanina isnan taku ai kinumsen nan limana, Tumakchigka, ya kumawaka. Ya tinmakchig ya kinmawa. 9 Ya kecheng kinwanin Jesu ken chaicha: Wadai nan ivfakak ken chakayu: aikö mayuya ngen ken chataku nan enangnen isnan kawis isnan Savfacho, paimo enangnen is ngaag? nan mangisalakan isnan lengag paimo nan mangamasan? 10 Ya issan nangil-ana isnan amin ken chaicha, kinwanina is san chöi taku, Uyachem nan limam. Ya sia nan inangnena, ya nan limana tinmoli chadlu ai kag issan ösang ai limana. 11 Ya chadluscha sinmonget; ya natotyacha mo ngag nan ikkancha ken Jesu. 12 Issan todicha ai akin imöi isnan ka filig ai nangapya, ya nenkapyakapya isnan Chios, issan sinlafiana. 13 Ya issan nawiitana inayakana nan kakadwana; ya pinilinanan simpco yad twa ken chaicha, ai nginmatsanana is Apostolis. 14 Ai chaicha, si Simon ai nginadngana akös is Pedro, ya si Andrew, ai akina; si James ya si Juan, si Filip ya si Bartolome, 15 Si Matthew ya si Tomas, si James ai anak Alfeus, ya si Simon ai nakwani is Zelotes, 16 Ya si Judas ai akin James, ya si Judas ai Iskariot, ai sia nan nangichauchau ken Jesu. 17 Ya pinmanad si Jesu ai nittakin ken chaicha, ya tinmakchig isnan chata, ai kawad nan ayaka ai kakadwana, ya nan angsan ai katakutaku ai nalpocha id Judea ya id Jerusalem, ya isnan ilit nan taiak id Tyre ya id Sidon, ai inmalicha ai manngö ken Sia, ya ta makaan nan sakitcha. 18 Ya sauchöicha ai nappalikat isnan demonio, inpakaanena nan demonio ken chaicha. 19 Ya nan amin ai katakutaku chacha iyanap nan mangögnanancha ken Sia: ta wai finmala ken Sia ai navfalin ai nangaan isnan sakitcha amin. 20 Ya inniilana nan kakadwana' ya kinwanina, Mabendika kayu ai posi: tai enkwayu nan Fatawan nan Chios. 21 Mabendika kayu ai maowat adwani: tai atmögsankayu. Mabendika-kayu ai enaka adwani: tai atmaangokayu. 22 Mabendikakayu mo liligten nan taku chakayu, ya mo is mangilakwinancha ken chakayu isnan maivfuikanyu ken chaicha, ya mo enkalicha is ngaag ken chakayu, ya ulai nan ngatsanyu ya kagcha liligten, tai isnan Anak nan Taku. 23 Enlinawakayu mötachi isnanchöi ai akiu, ya inyadyadankayu isnan laiadyu: tai amamamöd nan atchawatenyu id Chaia, tai kag tosa chadlu nan inangnen nan am-acha isnan Profeta. 24 Kassösögangkayu mötachi, ai kakachangyan! tai öpchasyu chinawat nan enlinawaanyu. 25 Kassösögangkayu ai mögsan! tai atmaowatkayu. Kassösögangkayu ai cha maango adwani! tai atenaka-akakayu. 26 Kassösögangkayu mo atkawis nan mangogokochan nan amin ai taku ken chakayu! tai sia nan inangnen nan am-macha isnan Profeta ai adi titiwa. 27 Kanak mötachi ken chakayu ai cha manngö, Lalaichinyu nan fosoyu: kawis nan ikkanyu isnan menliliket ken chakayu; 28 Bendikaenyu nan mangamma ken chakayu, ya ikapyayu nantosacha ai enkali is ngaag ken chakayu. 29 Ya mo wai manampak isnan tamongmo, ichauchaumo nan topak nan tamongmo: ya mo wai mangokat isnan nenosun ai fachom, adim ipawa nan mangalana isnan nenchaön aifachom. 30 Ya agtam amin nan kumchaw ken sika, ya mo wai mangala isnan kokwam, adim kasin fagen chaicha. 31 Ya ikkanyu isnan taku ai kag nan laichinyu ai ikkancha ken chakayu. 32 Mo lalaichinyu nantosacha ai menlaiad ken chakayu, aikö wödwöcha ai kawis nan angnenyu? tai ulai nan chafumasol lalaichincha akös nan menlaiad ken chaicha. 33 Ya mo kawis nan angnenyu is nantosacha ai kawis nan ikkancha ken chakayu, aikv wödwöcha ai kawis nan ikkanyu? tai ulai nan chafumasol sia akös nan anguencha. 34 Ya mo pagkawatanyu nantosacha ai ichidchinöyu nan kawischa mangichauchauan ken chakayu, aikö wödwöcha ai kawis nan angnen yu? tai ulai nan cha fumasol pagkawatancha nan chafumasol, ta kasincha akös manawatan isnan kag na chadlu. 35 Lalaichinyu mötachi nan fosoyu, ya kawis nan angnenyu ya kaag enpakawat kayu, ai ulai mo maid kasinyu ichidchinö, ya atadadacha nan chawatenyu, ya at anakkayu isnan Kangatoan, tai Sia ya sösögangana isnan adi enyaman ya nan ngaag ai taku. 36 Ensögangkayu mampai, ai kag akös nan Amayu ai ensögang. 37 Adiyu simsimken ya adiyu kankanan nan taku ai ngaagcha, tai adi akös sia nan ikkancha ken chakayu; adiyu ifaafaag ai ngaagcha nan taku, ta adicha akös ifaafaag ai ngaagkayu; enpakkawankayu, ta at akös mapakkawankayu. 38 Umagtankayu, ya atma-agtankayu; tepeng ai kawis, masödsöd, miwögwög ya masawa, nan atichuacha ken chakayu. Tai nan tepeng chadlu ai itpengyu, atsia akös nan mittpeng ken chakayu. 39 Ya nenogokud ken chaicha, Mavfalin ngen nan nakimit ai mangipango isnan nakimit? at adicha ngen maekchag ai twa isnan talaktak? 40 Nan faa adi nangatngato mo nan Apona; nan amin mötachi ai naisolisoloan atsia nan kag isnan Apona. 41 Ya ngagöm ilain nan nifulau isnan matan nan akim, ya adim ilan nan nilangös ai wadai isnan matam kannai? 42 Ya ngag nan angnem ai mangwani isnan akim, Anin, ya'm ta kaanek nan nifulau isnan matam, ai sika ya adim ilan nan nillangös ai wadai kannai isnan matam? Sika ai kasun kawis ya adi titiwa ai kawiska kaanem una nan nillangös ai wadai isnan matam kannai, kecheng atmakailaka ai kawis, ai mangaan isnan nifulau ai wadai isnan matan nan akim. 43 Tai nan kawis ai kaiu adi mamkas is ngaag, paimo nan ngaag ai kaiu adi mamkas is kawis. 44 Tai nan amin ai kaiu nan fökasna kannai nan mailana. Tai nan taku adicha umala is higos isnan sibsifit, paimo adicha um-ala is ufas isnan chapong ai nasibsifitan. 45 Nan kawis ai taku nan mangipavfala isnan kawis isnan nimnimna, tai kawis nan inkakona; ya nan ngaag ai taku sia nan mangippavfala isnan ngaag isnan nimnimna, tai inkakona nan ngaag. Tai nan inkakakon nan taku isnan nimnimcha, sia nan kanan nan topekcha. 46 Ya ngagönyu pangadngan Saken, is Apo, Apo, ya adiyu avfoloten nan kanak? 47 Ulai sino ai taku ai umali ken Saken ya chengena nan kanak, ya angnena, atichok nan kaagna. 48 Sia nan kag isnan taku ai nenkaeb is afong ya inpachaomna nan kaobna, ya inpöina nan poon nan aliki isnan fato; ya issan umchanan nan kilkil, ya enfifikas nan chanum, ya enayas isnan chöi afong, ya adi nakaiwögwög, tai chadlus nikaeb isnan fato. 49 Naimötachi nan manngö ya adi mangangnen, sia nan kag isnan taku ai nenkaeb is afong isnan ka lota ai maid inpöina ai alikina; ya nan chanum enfifikas ai nangayas, ya nentokangna; ya adacha nan napakawas issanchöi afong.

7

1 Issan namuasan Jesu isnan amin ai chana nangisoloan isnan nangölan nan taku ken Sia, sinumköp id Kapernaum. 2 Ya nan faan nan ösang ai kapitan ai chadlus lailaichina, nasakit, ya kankanin natöi. 3 Ya issan nangölan nan kapitan ken Jesu, finmaana nan amam-ma ai id Judea, ta ilutlutcha ken Sia ta umoi ai mangaan isnan sakit nan faana. 4 Ya issan nangchanancha ken Jesu, nilutlulutlutancha Sia, ai kanancha, Kawis ai taku, nan mangangnenan isna: 5 Tai lailaichina nan taku ai ibataku, ya nenpakaeb is sinagogammi. 6 Kecheng ai nitakin si Jesu ken chaicha. Ya issan akit nan adicha umchanan isnan afong san kapitan, finmaa isnan lilwidna ken Sia, ai kanancha, Apo, kapösna't is adika umali; tai saken adiak chadlus kawis ai sögpem nan afongko: 7 Sia nan nanmekak akös ai ulai saken adiak chadlus kawis ai umöi ken Sika: kanam mötachi angkai, at nan faak ya makaan nan sakitna. 8 Tai saken wadai nan nangatngato akös mo saken, ya wadai akös nan solchacho ai chak filinen, ya mo kanak isnan ösang, ai Önka, ya umöi; ya isnan teken, ai Alika, ya umali; ya isnan faak, ai Angnem sa, ya angnena. 9 Issan nangölan Jesu isnannaicha, nataa ken sia, ya nensakong ai kanana isnan taku ai chanangonod ken Sia, Kanak ken chakayu, ai maid inchanak, is wai chachama ai afolotna ai ulai isnan Israel. 10 Ya sanchöicha nafaa tinmolicha isnan afong, ya inchanancha ai nakaan nan faa ai nasakit. 11 Ya nakaeb, issan anongusna, ai si Jesu inmöi isnan ka ill ai enngatsan is Nain; ya ayaka isnan kakadwana nan nifuig ken Sia, ya ayaka akös nan taku. 12 Kecheng ai, issan nanagenana isnan pangiwan nan ili, köt wadai nan natöi ai taku ai chacha ifala, ai ösösang angkai ai anak inana, ai ilekas: ya ayaka ai taku isnan ili nan nifuig ken sia. 13 Ya issan nangilan nan Apo ken sia, sinögangna sia, ya kinwanina ken sia, Adika enaka. 14 Ya inmali ai nangiwa isnan alongan: ya nan nanakfat ken sia innitköcha ai tinmakchig. Ya kinwanin Jesu, Favfalo, kanak ken sika, ai Fumangonka. 15 Ya san natöi tinmokcho ya inlapona ai enkali. Ya inchauchauna Sia ken inana. 16 Ya inmigietcha amin: ya nenchadayawcha isnan Chios, ai kanancha, ai Nan nangato ai profeta ya nenpaila ken chakami; ya nan Chios inniismekna nan takuna. 17 Ya nan inmat ken Jesu ya sinmolut isnan amin ai Judea ya isnan amin ai kaili-ili ai niliwis. 18 Ya nan kakadwan Juan infaagcha ken sia nan amin ai nai inmat. 19 Ya si Juan inayakan nan twa ai kadwana, ya finaana chaicha ken Jesu ta kanancha, Aikö Sika nanchöi umali, paimo wai teken ai isögchananmi? 20 Issan inalian san taku ai chöicha ken Jesu, kinwanicha, Si Juan ai Bautista finaana chakami ai mangwani ken Sika, Aikö Sika nanchöi umali paimo wai teken ai isögchananmi? 21 Ya nikaspo ai angsan nan kinaana ai sakitcha, ya likatcha, ya nan ngaag ai espirito; ya angsan nan nakimit ai inangnena nan makailancha. 22 Ya si Jesu sinumfat ya kanana, Tamolikayu ya ifaagyu ken Juan nan inilaya ya nan chinngöyu; ai nan nakimit makailacha, nan napilai makachalancha, nan nakolit ya nakaancha, nan natoweng makadngöcha, nan natöi kasincha finmangon ya isnan posi maisolo nan Evanhelio. 23 Ya mabendika nan adi masama mokötai isnan isolok. 24 Ya issan kumaanancha nan finaan Juan, si Jesu inlapona ai mangwan isnan taku nan umat ken Juan, Ngag nan inilayu ai finmalaanyu isnan ka letang? aikö kawayan ai chapikuten nan chaköm? 25 Ngag mampai nan inilayu ai finmalaanyu? aikö taku ai namacho is pötpöteng ai facho? Ilainyu, nantosacha ai nangina nan fachocha ya kawis nan katattakuancha, ai entötööcha isnan afong nan ali. 26 Ya ngag nan inilayu ai finmalaanyu? aikö Profeta? Öi, kanak ken chakayu, ya wödwöcha mo nan Profeta. 27 Sia nannai nan naisolat, Ilaim, faalek nan faak ai inangununa mo Sika, ya sia nan mangissakana isnan chalanmo. 28 Tai kanak ken chakayu, Is nantosacha ai fumala isnan fabfafai, maid nangatngato ken chaicha mi si Juan ai Bautista: naimötachi nan kabfafaan isnan Fatawan nan Chios, sia nan nangatngato mo sia. 29 Ya nan amin ai taku ai nanngö ken Sia ya nan chaenchakop isnan fuis infafaagcha ai kawis nan Chios, tai nafunyakancha ken Juan. 30 Naimötachi nan Fariseo ya nan nangtek isnan lötög tinokakcha nan kanan nan Chios ai angnena ken chaicha, tai igaicha nenpafunyag ken sia. 31 Ya nan Apo kinwanina, Ya sino nan kanak ai kaagcha nan taku ai mataku adwani? ya ngag nan kaagcha? 32 Chaicha nan kag isnan anan-ak ai tumotokcho isnan palasa, ai enasifufukaucha ai kanancha, Inippiipkami chakayu, ya igaikayu nensala; innanakoanmi chakayu, ya igaikayu nenaka. 33 Tai inmali's Juan ai Bautista ai igai nangan isnan tinapay, paimo igai inminum isnan alak, ya kananyu, ai wadai demonio ken sia. 34 Nan Anak nan Taku inmali ai mangan ya uminum; ya kananyu, Nai nan taku ai chachama nan kakkana ya inumna, ai mikialoyus isnan chaenchakop ya isnan chafumasol. 35 Naimötachi nantosacha ai mangitanoi isnan naisoloancha isnan Kinalaing, wanchincha nan awid nan nalaing. 36 Ya nan ösang ai taku ai Fariseo inyakana ai Jesu ta miki kan isnan afongna. Sinumköp isnan afong nan Fariseo, ya tinmokcho ai mangan. 37 Ya wadai nan ösang ai fafai isnan ka ili, ai kadin enfasol, issan nangammoana ai wadai si Jesu, ai nikikan isnan afong nan Fariseo, inyaina nan napapangao ai lana ai alabaster, 38 Ya tinmakchig isnan chochokkoken Jesu, ai chaenaka, ya inlapo na ai mangngiyumös nan akana isnan chapan Jesu, ya nan fuokna kannai nan iniaponasna isnan chapana ya finisituna nan chapana ya inkoiagna nan lana. 39 Ya san nangayag ken Jesu ai Fariseo, issan nangilana, kinwanina isnan nimnimna, Ya mo Profeta nannai ai taku, atammona mo ngag ya sino nannai ai fafai ai nangignan ken Sia, ta sia ya kadin enfasol. 40 Ya si Jesu sinumfat ken sia ya kanana, Simon, wadai nan kanak ken sika. Ya kanan Simon, Apo, kanam na. 41 Wadai nan twa ai taku ai kinmawat isnan ösang ai chaenpakawat: nan ösang kinmawat is liman kasut ai siping, ya nan kadwana limanpoo. 42 Ya issan maid umala isnan ifaiadcha, pinakawana chaicha. Ivfakam ken Saken mampai, mo sino ken chaicha nan atwödwöcha ai menlaiad ken sia? 43 Si Simon sinumfat ya kinwanina, Awai nget, nan adadacha nan napakawan ken sia. Ya si Jesu kinwanina ken sia, Usto nan kanam. 44 Ya nensakong isnan fafai ya kinwanina ken Simon, Aiköm ilan nan fafai ai nai? Sinumköpak isnan afongmo, ya maid inchuam ai chanum isnan chapanko: naimötachi si tona ya inwasana nan chapanko isnan akana, ya iniaponasna nan fuokna. 45 Igaimo finisitu Saken: naimötachi nannai ai fafai igai tinumkö ai namisitu isnan chaponko, nipalpo isnan sinumköpak. 46 Maid lana is inpöimo isnan olok: naimötachi nannai ai fafai inkoiagna nan lana isnan chapoanko. 47 Ya siana nan mangwaniak ken sika. Nan fasolna, ai chachama, napakawancha, tai chachama nan laiadna; naimötachi nan akit nan napakawan ken sia, akit akös nan laiadna. 48 Ya nan nikikan ken Sia inlapocha ai mangwani isnan nimnimcha, Sino nannai ai mangipakawan akös isnan fasol? 50 Ya kinwanin Jesu isnan fafai, Nan afolotmo nan nanalak ken sika: umöika ai umpa.

8

1 Ya issan anongus sanchöi inmat, inmöi si Jesu isnan amin ai chadchakö ya fananig ai ili, ai nenisolo ya nenpaila isnan chamag ai kawis isnan Fatawan nan Chios: ya nan simpoo yad twa nivfu-fuig ken Sia, 2 Ya nan tapina ai fabfafai, ai kinaana nan demonio, ya nan sakit ken chaicha, si Maria ai enngatsan is Magdalena, ai sia nan finmalaan nan pito ai demonio, 3 Ya si Joanna, ai asawan Chusa, ai sia nan kag kikad isnan afong Herod, ya si Susanna, ya nan ayaka akös ai teken, ai inchuacha ken Sia kannai nan kokwacha ai ikatakuna. 4 Ya issan naamongan nan ayaka ai taku ai nalpocha isnan amiamin ai ili, nenkali isnan ogokud: 5 Nan enösek finmala ai en mön-ösek: ya issan chana enöskan, nan tapin nan ösek ya naekchagcha isnan ilit nan chalan: ya nagkatikatinan, ya nan ayayan kinancha. 6 Ya nan tapin nan ösek naekchagcha isnan fato; ya issan tinmofuancha nalangocha, tai maid chanum. 7 Ya nan tapina ya naekchagcha isnan kawad nan sibsifit; ya nan sibsifit tinmofucha ya inapapencha. 8 Ya nan tapina ya naekchagcha isnan kawis ai lota, ya natanufo cha, ya namkascha is sinkagsut. Ya issan afusna nangwanian is nannaicha, nenfukau ai kanana. Nan wai kowengna ai manngö, chengena. 9 Ya nan kakadwana infakacha ken Sia ai kanancha, Ngag ngen nannai ai ogokud? 10 Ya kinwanina ken chaicha, Mayuya ken chakayu naii mangammoanyu isnan katataa ai umumat nan Fatawan nan Chios: nan tapina ai taku mötachi, ogokud angkai nan mangammoancha; ta ulai iilaincha adicha ilain, ya ulai chechengencha adicha chengen. 11 Sia nan aien nan ogokud: Nan ösek ya sia nan kalin nan Chios. 12 Sanchöicha osek ai naekchag isnan ilit nan chaian, chaicha nan manngö; köt umali nan demonio, ya kaanena nan kali isnan nimnimcha, ta adicha avfoloten ya maisalakancha. Sanchöicha ai wadai isnan ka fato, nannaicha nan menlinawa ai manawat isnan kali, mo chengencha; ya maid lamutcha ai adi navfaiag nan mangavfolotancha, ya mo masailoancha, iwaiangcha. 14 Ya nan ösek ai naekchag isnan ka sibsifit, chaicha nan nanngö, ya kumaancha ya kagcha na-apapan isnan masapul ai angnencha ya isnan adacha ai kokwa ya isnan menlinawaancha is nannai ai katattakuan, ya adicha mamkas is kawis. 15 Ya nan naekchag isnan kawis ai lota, chaicha nan kawis ya titiwa nan nimnimcha, ya mo ipchascha chinngö nan kali, ikakocha ya adicha iwaiang nan kawis ai mamkasancha. 16 Maid mangitög isnan ilaw ai tangfana isnan fanga, paimo ippöina isnan chaon nan kasöypan; ippöina mötachi isnan mippaipaian nan ilaw, ta nan sumköp, ilaincha nan apui. 17 Maid nitabtafun ai atadi chadlu mamaila, ya maid maisut ai adi maipa-ammo ya maila. 18 Ilainyu mampai nan angnenyu ai manngö: tai ulai sino nan wai kokwana, sia nan maichauchauana; ya ulai sino nan maid ken sia, ulai nan sisimkena ai wadai, makaan. 19 Kecheng inmalicha ken Sia si inana ya nan ötat-adna ya igai cha nakasagen ken Sia tai angsancha nan taku. 20 Ya wadai nan nangwani ken Sia, ai kanancha. Si inam ya nan ötat-admo wadaicha ischöla, ai laichincha ai ilain Sika. 21 Ya sinumfat ya kinwanina ken chaicha, Si ina ya nan ötatadko chaicha nan manngö ya mangavfolot isnan kalin nan Chios. 22 Kecheng issan sinakiu nikisköp isnan kakadwana isnan ösang ai punting: ya kinwanina ken chaicha, Kumchangtaku isnan topak nan taiak. Ya naligwatcha. 23 Ya issan chacha ayan si Jesu ya nasöyip; ya na-anöchan nan chachama ai chaköm isnan ka taiak; ya nan punting napno isnan chanum ya niyögietcha. 24 Ya inmalicha ken Sia, ai namangun, ai kanancha Apo, Apo, nai matöi taku. Ken finmangun ya inochokana nan chaköm ya nan chachama ai ka-atakchag nan kabongau: ya natannökö nan chaköm ya nan chanum, ya nipagkinnekcha. 25 Ya kinwanina ken chaicha Ento nan kawad nan afolotyu? Ya nataacha, tai inmögietcha ya nenasi kwanicha, Ngag nan katakun tona? tai polongena ulai nan chaköm ya nan chanum, ya avfolotencha Sia. 26 Ya inumchancha isnan ili nan i-Gadara, ai wadai isnan totopaken nan Galilea. 27 Ya issan chinmakalancha isnan lota, innaföt nan ösang ai taku, ai nalpo isnan ili, ai navfaiag ai wadai demonio ken sia, ya enlalafus ya maid mentötöiana ai afong, mo adi angkai liang. 28 Issan nangilana ken Jesu nenfukau, ya nenpalintomeng ken Sia, ya inyaangököna ai nangwani, Ngag nan fibiangko ken Sika, Jesu ai Anak nan Chios ai Kangatoan? Adika umipalikat ken saken, ilutlutko ken Sika. 29 (Tai infilin Jesu ai nan demonio ai fumala isnan taku. Tai navfaiag ai kadin ai wadai ken sia, ya nafafalud isnan kachina; ya sinukputna nan kachina ya inyöi nan demonio sia isnan ka letang.) 30 Ya si Jesu infakana ken sia ai kinwanina, Ngag nan ngatsanmo? Ya kinwanina, Sinpamuig: tai angsan nan demonio ai sinumköp ken sia. 31 Ya nan demonio nilutlutcha ken Jesu ta adina polongen chaicha ai pumanad isnan adachaöm ai taiak. 32 Ya wadaicha ischi nan angsan ai fotog, ai chacha enanglud is nan filig: ya nan demonio nilutlutcha ken Sia ta yuyana nan sumköpancha isnan fotog. Ya inyuyana. 33 Kecheng fiumalacha nan demonio isnan taku, ya sinumköpcha isnan fotog; ya nenkakamocha ai nentagtag isnan chöppas isnan ka taiak, ya na-anudcha. 34 Issan nangilancha isnan inmat, nan cha nanalo ken chaicha linmayaucha ya inmöicha ai nangifaag isnan ka ili, ya isnan falan nan ili. 35 Kecheng finmalacha nan taku ai mangila isnan inmat; ya inmali cha ken Jesu, ya inchanancha san taku ai finmalaan nan demonio ai tinmetokcho isnan chachapanen Jesu, ai navfachoan ya kasin nanimniman; ya inmögietcha. 36 Sanchöicha akös ai nangila isnan inmat, intakacha ken chaicha mo ngag nan inangnen ai nakaan nan taku ai wadai demonio ken sia. 37 Kecheng nan amin ai katakutaku isnan lota ai i-Gadara, inlutlutcha ken Sia, nan kumaanana ken chaicha; tai chachama nan ögietcha; ya sinumköp isnan punting ya kasin tinmoli. 38 Ya nan taku ai finmalaan nan demonio inlutlutna ken Sia ai mifuig ken Sia': naimötachi si Jesu inpakaana sia ai kinwanina, 39 Tumolika isnan afongmo ya ogokochem nan chachama ai inangnen nan Chios ken sika. Ya sia inmöi ya infaafaagna isnan ili nan chachama ai inangnen nan si Jesu ken sia. 40 Ya issan tinmolian Jesu, nan taku nenlinawacha ai nanawat ken Sia; tai sinodcha amin. 41 Nai, inmali nan ösang ai taku ai enngatsan is Jairus, sia ya nan ösang isnan nangato isnan sinagoga; ya nenpalintomeng isnan chachapanen Jesu ya nenlutlut ken Sia ai umöi isnan afongna. 42 Tai ösang yangkai nan anakna, ai fafai, ai natawen is simpoo yad twa, ya kankanin natöi. Ya issan cha inayan Jesu, nan katakutaku nalikobcha ken Sia. 43 Ya nan ösang ai fafai ai chananala isnan simpoo yad twa ai tawen, ya kinamasna nan amin ai ikatakuna isnan midchiko, ya maid nakakaan isnan sakitna, 44 Sia ya inmali isnan chokogna ya mignana nan ilit nan fachona köt natanökö nan chala ken sia. 45 Ya si Jesu kinwanina, Sino nan nangignan ken Saken? Issan nangisutan nan amin ai taku, cha Pedro ya nan kakadwana kinwanicha, Apo, nan katakutaku chacha nalikob ya chacha itolod Sika; aiköm kanan, Sino nan nangignan ken Saken? 46 Ya kinwanin Jesu mötachi, Wadai nan nangignan ken Saken: tai inammok ai wadai kinmaan ai fikas ken Saken. 47 Ya issan nangilan nan fafai ai igai natalingfan, inmali ai cha entaienten, ya nenpalintomeng ken Sia, ya infaagna ken Sia isnan sassakangen nan amin ai katakutaku, nan nangignanana ken Sia ya nan nenkakaanan nan sakitna. 48 Ya kinwanina ken sia, Anak ko ai fafai, nan afolotmo sia nan nangaan isnan sakitmo: kumaanka ai umpaka. 49 Ya issan chanaenkalian, inmali ken Sia nan taku ai nalpo isnan afong nan nangato isnan sinagoga, ai kinwanina ken sia, Natöi nan anakmo; adim fölaien nan Apo. 50 Naimötachi issan nangölan Jesu, sinumfat ken sia ai kinwanina Adika umögiet; avfolotem angkai ya atkasin mataku. 51 Ya issan sinumköpana isnan afong, maid pinasköpna mo adi angkai cha Pedro ya si James ya si Juan, ya nan ama ya nan inan sanchöi ongonga. 52 Ya chacha inakalen ya inanakoan sia: naimötachi kinwanina, Adikayu enaka; igai katöi, mamasöyip mötachi. 53 Ya inangangocha Sia amin, tai ammocha ai natöi. 54 Ya inpakaana amin chaicha ya inignana nan limana, ya nenfukau ai kanana, Sika ai ongonga, tumakchigka. 55 Ya nan lengagna ya kasin tinmoli ya natanakchig, ya infilina ai agtancha is kanena. 56 Ya nataa nan chakökona: infilina mötachi ken chaicha ta adicha ifagfaka nan inmat isnan ulai sino ai taku.

9

1 Kecheng inayakan Jesa nan simpoo yad twa ai kadwana ya inchuana ken chaicha nan fikas ta mamolongancha isnan amin ai demonio ya nan mangaanancha isnan sakit. 2 Ya finaana chaicha ta raangisoloancha isnan Fatawan nan Chios, ya mangaanancha isnan sakit. 3 Ya kinwanina ken chaicha, Maid itaktakinyu isnan enfaatanyu is ulai sokud, paimo chokau, paimo tinapay, paimo siping, ya adiya sinchödwaen nan fachoyu. 4 Ya mo ulai ngag ai afong nan suiuköpanyu, ischi nan entötöianyu ya ischi kannai nan maligwatanyu. 5 Ya mo saia nan adi manawat ken chakayu, isnan kumaananyu, isnanchöi ai ili, pokpokenyu nan chapog isnan chapanyu kannai, ai kasun ammoyu ai ngaagcha. 6 Ya kinmaancha ya nenatoatoncha ai kinwacha nan kaili-ili, ya chacha nenisolo isnan Evanhelio ya chacha kinaan nan sakit isnan amin ai inmayancha. 7 Ya si Herod ai Tetrarka chinngöna nan amin ai inangnen Jesu: ya nenchwadchwa, tai wadai nan nangwani ai si Juan ya finmangun isnan natöiana. 8 Ya nan tapina kanancha, ai nenpaila's Elias; ya nan tapina kanancha ai nan ösang isnan Profeta id sangadom ya kasin finmala nalpo'snan natöiana. 9 Ya kinwanin Herod, Pinotoak si Juan; sino mötachi nannai, ai mangölak is nannaicha ai chamag? Ya nilaiadna ai mangila ken Sia. 10 Ya issan tinmolian nan apostolis ken Jesu, infaagcha nan ihang-angnencha. Kecheng intakina chaicha ya inmöicha ai nakököcheng, isnan ka letang, ai amas nan ili ai enngatsan is Bethsaida. 11 Ya issan nangammoan nan taku, inmonodcha ken Sia: ya chinawatna chaicha, ya kinwanina ken chaicha nan umat isnan Fatawan nan Chios, ya pinögsana chaicha nan nasapul ai mapögsan. 12 Ya issan nangilapoan nan akiu ai maschom, inmalicha nan simpoo yad twa ya kinwanicha ken Sia, Pa-kaanem nan katakutaku, ta umöicha isnan kaili-ili ya isnan amas nan ili, ai entötööcha ya enanapcha is kanencha: tai wadai taku isna isnan maid tagtakuan. 13 Naimötachi kinwanina ken chaicha, Agtanya chaicha is kanencha. Ya kinwanicha. Maid ken chakami mo adi angkai lima ai tinapay ya twa ai ikan; mo adi kami umöi ai en lumako is ischan nan amin ai naicha ai taku. 14 Tai limacha ai lifo ai taku. Ya kinwanina isnan kakadwana, Patokchoenyu chaicha ai ma-sinlilmanpoo ai taku. 15 Ya sia nan inangnencha, ya inpatokchocha amin chaicha. 16 Kecheng inalana nan lima ai tinapay ya nan twa ai ikan, ya nentangad id chaia, ya binendikana chaicha, ya pinatapitangna ya inchuan isnan kakadwana ta ikakchengcha isnan katakutaku. 17 Ya nangancha ya nögsancha amin. Ya nan nasawa ai fananig nan simpoo yad twa ai lowa nan nakopancha. 18 Ya issan naö-ösangana ai nangapya, nan kakadwana ya wadaicha ken Sia: ya infakana ken chaicha ai kinwanina, Sino Ak isnan kanan nan taku? 19 Sinumfatcha ya kinwanicha, Si Juan ai Bautista; nan tapina mötachi kanancha ai Si Elias; ya nan tapina kanancha ai Nan ösang isnan Profeta id sangadom ya kasin finmala isnan natöiana. 20 Kinwanina ken chaicha, Chakayu mötachi, Sino Ak isnan kananyu? Si Pedro sinumfat ai kinwanina, Nan Kriston nan Chios. 21 Ya chadlusna infaag ken chaicha ya infilina ai adicha kankanan sanchöicha isnan ulai sino ai taku. 32 Ai kanana, Nan Anak nan Taku masapul ai enlikat is angsan, ya milakuin isnan amam-ma ya isnan nangato ai pachi ya escribas, ya mapatöi, ya kasin mataku isnan mikatlo ai akiu. 23 Ya kinwanina ken chaicha amin, Mo wai taku ai menlaiad ai umonod ken Saken, iwaiangna kannai nan laichina, ya alaena nan kolusna isnan kawakawakas, ya umonod ken Saken. 24 Tai mo sino nan menlaiad ai mangisalak isnan lengagna, ai amasena; naimötachi mo wai mangamas isnan lengagna, tai isnan Saken, sia chadlu nan manalak. 25 Tai ngag nan kotokna mo nan ösang ai taku falinena nan amin ai lawag, ya amasena kannai nan awakna, paimo mapakaan? 26 Tai mo sino nan umasö ken Saken ya isnan kalik, nan Anak nan Taku atumasö ken sia, mo atumali isnan gloriana kannai ya isnan glorian Ama ya nan santo ai anhel. 27 Titiwa kanak ken chakayu, wadaicha nan tumakchig isna, ai atadicha katkatöi enkana's mangilancha isnan Fatawan nan Chios 28 Köt issan walo ai akiu anongus sanchöi ai nakwani, itakina cha Pedro ya James ya Juan ya linmamag isnan ka filig ai mangapya. 29 Ya issan nangapyaana, nan ilan san kamösna ya natkön ya san fachona pinmokau ya sinmili. 30 Ya köt nawanadai nan twa ai taku ai nikitotya ken Sia, ai chaicha si Moses ya si Elias. 31 Ai nenpailacha isnan gloria, ya inogokudcha nan kumaanana (ötöina) ai atchadlusna a-angnen id Jerusalem. 32 Naimötachi cha Pedro ya nan nifuig ken sia, chachama ai nitomöcha; ya issan finmangunancha, inilacha nan glorian Jesu, ya nan twa ai taku ai nikitakchig ken Sia. 33 Köt isan kinmaanan san twa ai chöicha, si Pedro kinwanina ken Jesu, Apo, kawis nan entötöiantaku isna; ya kumaebtaku is tolo ai abafong, ösang nan Kwan, ya ösang ken Moses, ya ösang ken Elias; tai igaina ammo nan chana kanan. 34 Issan chana enkalian inmali nan lifoo ai nangapap ken chaicha, ya inmögietcha issan kagcha inmayan isnan lifoo. 35 Ya finmala nan kali ai nalpo'snan ka lifoo ai kanana, Sia nannai nan Anakko ai chadlusko lalaichin; chengenyu Sia. 36 Issan afus nangkaian nan nakwani, inchanancha si Jesu ai naö-ösang. Ya finufumtugcha, ya issanchöicha ai akiu igaicha inogokud isnan ulai sino ai taku sanchöicha ai inmat ai inilacha. 37 Ya issan nawaksana, issan pinmanachancha ai nalpocha isnan filig, angsancha nan taku ai nangaföt ken Sia. 38 Ya nan ösang isnan katakutaku nenfukau ai kinwanina, Apo, ilut lutko ken Sika, nan mangilam isnan anakko ai lalaki; tai ködköcheng ai anakko. 39 Ya nan tapina alaena sia nan demonio ya nawanakis kannai, ya entaientenena, ya entalafotab nan topekna, ya tainana sia ai chachama ai nabno. 40 Ya inlutlutko isnan kakadwam ta pakaanencha nan demonio, ya adicha mavfalin. 41 Ya si Jesu sinumfat ai kanana, O chakayu ai taku ai maid afolotyu, ya maid itantanoiyu, kaat nan entötöiak ken chakayu ya nan mangikatpölak ken chakayu? Yaim nan anakmo isna. 42 Ya issan chana alian, nan demonio tinnokangna sia ya nentaientenena sia. Ya inochokan Jesu nan ngaag ai espirito ya kinaana nan sakit nan ongonga, ya inchuana ken amana. 43 Ya nataacha amin isnan chachama ai mavfalin nan Chios. Ya issan chacha nataalan amin issanchöi ai inangnen Jesu, kinwanina isnan kakadwana, 44 Ikakoyu ai sisimkenyu nannaicha ai chakkanan: tai nan Anak nan Taku ai maichauchau isnan mangipalikatan nan taku. 45 Naimötachi igaicha ammo nannai ai nakwani, ai kag nitafun ken chaicha, ta igaicha inila: ya inmögietcha ai nenfaka ken Sia is nannai ai nakwani. 46 Ya nentotyacha ai kag nensusma, mo sino ken chaicha nan atmangato. 47 Ya si Jesu ammona nan chacha simsimken ya inmala is ongonga ya inpatakchigna isnan chichipana. 48 Ya kinwanina ken chaicha, Mo sino nan manawat is nannai ai ongonga chawatena Saken, ya mo sino nan manawat ken Saken, atchawatena nan Namaa ken Saken: tai nan kabfafaan ken chakayu amin, atsia nan nangato. 49 Ya si Juan sinumfat ai kinwanina, Apo, inilami nan ösang ai nangipakaan isnan demonio isnan Ngatsanmo, ya inpawami sia, tai adi mifuig ken chataku. 50 Ya si Jesu kinwanina ken sia, Adiyu ipawa, tai nan adi kag fumoso ken chataku nan kag taku iba. 51 Ya nakaeb, issan inumchanan nan akiu ai lumamakan Jesu id chaia, sisinmekna kannai ai uumoi id Jerusalem, 52 Ya finmaa is taku ai mangununacha mo Sia: ya inmöicha ya sinumköpcha isnan ösang ai ili id Samaria, ta ensasakanacha ken Sia. 53 Ya nan taku isnan ili igaicha chinawat Sia, tai kasun uumöi id Jerusalem. 54 Ya issan nangilan cha James ken Juan ai kakadwana, kinwanicha, Apo, laichim ta polongenmi nan pumanavhan nan apui ad chaia, ai amasena chaicha, ai kag isnan inangnen Elias? 55 Naimötachi nensakong si Jesu ya inochokana chaicha ai kanana, Adiyu ammo mo ngag nan espirito ai wadai ken chakayu. 56 Tai nan Anak nan Taku adi inmali ai mangamas isnan lengag nan taku, naimötachi nan mangisalakana ken chaicha, nan aliana. 57 Ya issan chachananalan inmali nan ösang ai taku ken Sia, ai kanana, Apo, atumonodak ken Sika, ai ulai entona nan ayam. 58 Ya kinwanin Jesu ken sia, Nan fox wadai liangcha, ya nan ayayam ai entataiau wadai kakafancha, naimötachi nan Anak nan Taku maid mangisaachana isnan olona. 59 Ya kinwanina isnan teken, Umonodka ken Saken Naimötachi kinwanina, Apo, yuyam nan mangununa-ak ai en mangikaob ken Ama. 60 Si Jesu kinwanina ken sia, Oogkaiem nan natöi ta ikaobcha nan natöi; naimötachi sika nan umöi ai mangisolo isnan Fatawan nan Chios. 61 Ya san teken akös kinwanina, Apo, atumonodak ken Sika, naimöt achi yuyam nan mangununa-ak ai ek mangwanian isnan makaiachancha nan taku ai wadai is afongko. 62 Ya si Jesu kinwanina ken sia, Aikö wai taku ai nangilapo ai enalacho ya ensakong, sia nan maid kotokna isnan Fatawan nan Chios.

10

1 Issan anongus nannaicha, nan Apo pinilina akös nan teken ai pitonpoo, ya finaana chaicha ai masinchödwa ai mangununa mo Sia, isnan amin ai ili ai umöiana kannai. 2 Kecheng kinwanina ken chaicha, Titiwa ai adacha nan ma-ani, naimötachi nan enani akitcha; enkapyakayu mampai isnan Apon nan ani ta fumaa is enani. 3 Umöikayu isnan ayanyu: ilainyu, faalek chakayu ai kagkayu kalnelo isnan enkagkawaen nan lobo. 4 Adikayu umitaktakin is chokau paimo kokud: ya adikayu ensasalucho is ulai sino ai taku isnan ikwanyu. 5 Ya ulai ngag ai afong ai sögpenyu kananyu una, Umpakayu is nannai ai afong. 6 Ya mo wadai menlaiad isnan umpana, nan kumigkinkanyu atmakaiad isnanchöi chadlu ai afong: mo adi, atkasin ensakong chadlu ken chakayu. 7 Ya is nanchöi chadlu ai afong entötöökayu ai mangan ya uminum nan ichuacha ken chakayu; tai nan enchuno, malagfu. Adikayu enataton isnan ka-afoafong. 8 Ya isnan ulai ngag ai ili ai svgpenyu ya manawatancha ken cha kayu, kanenyu nan ipangancha ken chakayu. 9 Ya pögsanyu nan masakit ai wadai kannai ischi, ya kananyu ken chaicha, Nan Fatawan nan Chios inumchan ken chakayu. 10 Naimötachi isnan ulai ngag ai ili ai sögpenyu ai adicha manawatan ken chakayu, fumalakayu isnan kalsa chsidlu nan ili, ya kananyu, 11 Ulai nan chapog nan iliyu ai wadai isnan chapanmi pokpokenmi ken chakayu: ulai mo sisimkenyu nannai ai nan Fatawan nan Chios inumchan ken chakayu. 12 Kanak ken chakayu ai nan Sodom atmakaikatkatpö isnan likat is nanchöi ai akiu, mo nanchöi ai ili. 13 Kasösögangka ai Körazin! Kasösögangka ai Bethsaida! tai mo saia inmat id Tyre ya id Sidon san katataa ai inmat ken chakayu, awai nenfavfawiancha kannai id sangadom, ai navfachoancha isnan enkalasukas ai facho, ya nachapoan nan kamöscha. 14 Naimötachi makaikatkatpöcha id Tyre ya id Sidon, isnan malokomon, mo chakayu. 15 Ya sika, ai Kapernaum, ai naipangato ka enkana id chaia, atmaipakwab ka enkana id infierno. IG Nan manngv ken chakayu chengena Saken: ya nan mangamamsiw ken chakayu umamsiw ken Saken; ya nan mangamamsiw ken Saken, amamsiwena nan Namaa ken Saken. 17 Ya nenlilinawacha ai tinmoli ai kanancha, Apo, ulai nan demonio avfolotencha chakami, mo kananmi nan Ngatsanmo. 18 Ya kinwanina ken chaicha, Inilak si Setan ai naekchag id chaia, ai kag kolyapyap. 19 Ilainyu, inagtak chakayu is fikas ai katinanyu nan owög ya nan skorpion ya wödwöcha nan fikasyu mo nan fikas nan foso: ya maid manganuka ken chakayu. 20 Ya ulai mo sia sa, faken na is menlinawaanyu, ai nan demonio avfolotencha chakayu, unanig kayu enlinawa tai nan ngatsanyu naisolat id chaia. 21 Issan chöi ai olas, si Jesu nenlinlinawa isnan Santo ai Espirito ya kinwanina, Enyamanak ken Sika, O Ama, ai Apon nan Chaia ya nan lota, tai kagmo intafun nannaicha isnan nalaing ya isnan mangtek, ya inpaammo isnan ananak: sia mampai O Ama; tai sia nan nilaiadmo. 22 Inchuan amin Ama ken Saken ya maid mangammo mo sino nan Anak, mo adi angkai si Ama; ya mo sino nan Ama mo adi angkai nan Anak, ya nanchöi laichin nan Anak ai mangipaammo. 23 Ya issan nensakongana isnan kakadwana, ai naködköchengcha, kinwanina ken chaicha, Mabeudikacha nan mata ai mangila isnan ilainyu: 24 Tai kanak ken chakayu ai angsancha nan profeta ya ali ai nenlaiad ai mangila isnan ilainyu, ya igaicha inila; ya manngö isnan chengenyu, ya igaicha chinngö. 25 Köt wadai nan ösang ai mangtek isnan lötög ai tinmakchig ya kinwanina ai sinailona si Jesu: Apo, ngag nan angnek ai mamawid isnan lengag ai maid kankaiana? 26 Si Jesu kinwanina ken sia, Ngag nan naisolat isnan lötög? ngag nan mamasaam? 27 Sinumfat ya kinwanina, Masapul ai laichin nan Apo ai Chiosmo isnan amin ai posom, ya isnan amin ai lengagmo, ya isnan amin ai fikasmo, ya isnan amin ai nimnimmo: ya nan sagenmo ai kag chadlu isnan menlaiacham isnan awakmo. 28 Ya kinwanina ken Sia, Usto nan inisfatmo; angnem na, at matakuka. 29 Naimötachi sia ya laichin a ai mangippaila kannai ai sia ya usto, ya kinwanina ken Jesu, Ya sino nan sagenko? 30 Ya si Jesu sinumfat ya kinwanina. Nan ösang ai taku pinmanad ai nalpo id Jerusalem ai umöi id Jeriko, ya könat abten nan aköwan, ai nenlafus ken sia, ya pinakocha sia, ya tinainancha ai kankanin natöi. 31 Ya nikaspo ai wadai nan nenösög ai pachi, is sanchöi ai chalan, ya issan nangilana, nilaosana. 32 Ya sia akös ai inmali nan ösang ai Levite, issanchöi, ya issan nangilana, nilaosana. 33 Naimötachi, nan ösang ai taku ai i-Samaria, ai chaenfaat, inmali isnan kawadna, ya isnan nangilana ken sia, sinögangana sia. 34 Ya inmöi ken sia, ya finaludna nan napako ken sia, ai kinoiakana is lana ya alak, ya inpöina sia isnan kafayona kannai ya inyöina isnan chachagusan, ya tinokongana sia. 35 Ya issan nawaksana, issan kinmaanan san i-Samaria, inpavfalana nan twa ai salapi ya inchuana isnan kikad isnan afong, ya kinwanina ken sia, Kasim tokongan sia, ya mo wai kastowem, is tumoliak at kasik faiachan ken sika. 36 Ya sino mampai is nannaicha ai taku nan nensagen issan chöi ai taku ai nangaföt isnan aköwan? 37 Ya kinwanin san mangtek isnan lötög, San nangipaila isnan sögangna ken sia. Kecheng kinwanin Jesu ken sia, Umöika, ya sia akös nan angnem. 38 Issan chachainayan, inumchancha isnan ösang ai ili: ya nan ösang ai fafai ai enngatsan is Martha chinawatna Sia isnan afongna. 39 Ya wadai nan anochina ai enngatsan is Maria, ai tinmokcho isnan chachapanen Jesu, ya chinngöna nan chana ensoloan. 40 Naimötachi si Martha innö-ösötna ai nenchuno, ya inmali ken Sia, ya kinwanina, Apo, aikö ulai ai nan anochik inoogkaina saken ai ösösangak ai enchuno? Ifaagmo mampai ken sia, ta fumachang ken saken. 41 Ya si Jesu sinumfat ya kinwanina ken sia, Martha, Martha, chachama nan mangööstam ya mannisimkam isnan ayaka ai anukem: 42 Naimötachi ösang yangkai nan chadlus nan mafabfaka: ya si Maria pinilina san kawis, ai atadi makakaan ken sia.

11

1 Ya issan chanangapyaan Jesu isnan kawadna, issan navfuasana, nan ösang ai kadwana kinwanina ken Sia, Apo, isolom chakami ai mangapya, ai kag akös isnan insolon Juan isnan kakadwana. 2 Ya kinwanina ken chaicha, Mo mangapyakayu kananyu, Amami, ai wadai Ka id Chaia, Maingilin nan Ngatsanmo. Umalika isnan Fatawam. Maangnen nan laichim, isnan ka lota, kag id chaia. 3 Nan kanenmi isnan kawakawakas isnan akiu ai nai umagtanka ken chakami. 4 Ya pakawanem nan fasolmi; tai chakami akös pakawanenmi nan amin ai wai kawatna ken chakami. Ya adika umifuig ken chakami isnan mangitpeng ai umiangnen ken chakami is ngaag; naimötachi umisalak Ka isnan lawa. 5 Ya kinwanina ken chaicha, Sino ngen ken chakayu nan wadai liwidna ya umöi isnan tengan nan lafi, ya kanana ken sia, Umipatköuka is tolo ai tinapay; 6 Tai inmali nan ösang ai liwidko ai chaenfaat, ya maid ichuak ai kanena? 7 Ya sia ai wadai isnan afong sumfat ya kanana, Adika famalaka ken saken; natatangfan adwani nan önöb ya saken ya nan ananakko mamasöyipkami; adiak makatakchig ai mangagtan ken sika. 8 Kanak ken chakayu, ai Ulai mo adi fumangon ai mangagtan ken sia tai kaiemna, tai lutlutana fumangun ai mangagtan is ulai kaat is fagena. 9 Ya kanak ken chakayu, Kumchaukayu, ai ma-agtankayu; enanapkayu ai idchananyu; enkogkogkayu, ai matekwafan ken chakayu. 10 Tai nan amin ai kumchau, chawatena; ya mo sino nan enanap, idchanana; ya mo sino nan enkogkog, matekwafan ken sia. 11 Mo wai ongonga ai enfaka is tinapay isnan amana ken chakayu, atichuana ngen nan fato? paimo enfaka is ikan, at ngen ichuana nan owög? 12 Paimo enfaka is itlog, at ngen ichuana nan kayaman? 13 Ya mo chakayu nan ngaag, mo ammoyu nan mangichua is kawis isnan ananakyu, wödwöcha si Amayu id Chaia nan ichuana nan Santo ai Espirito isnan enfaka ken Sia? 14 Ya chana pakaanen nan ösang ai demonio ai nangangak. Köt is san finmalaan san demonio, san nangangak ai taku ya nenkali; ya nataacha nan katakutaku. 15 Nan tapina mötachi ken chaicha kanancha, Isnan fachang si Beelzebub ai kangatoan ai demonio, sia nan mangipavfalaana isnan demonio. 16 Ya nan tapina ken chaicha sinas-ailocha Sia, ai kinumchaw ken Sia is maton ai nalpo id chaia. 17 Ya tai ammona nan simekcha kinwanina ken chaicha, Nan amin ai fatawa ai nadchöwachöwa ai adi cha maololog, at ma-amascha; ya nan taku ai sinpangafong ai madchöwachöwacha, kumawascha. 18 Mo saia si Setan akös kadwaena kannai sia, at ngae: nan angnen nan latawana ai umanong ai entötöö? tai nai kananyu ai pavfala-ek nan demonio isnan fachang Beelzebub. 19 Ya mo pavfalaek nan demonio isnan fachang Beelzebub, nan ananakyu, sino ngen nan mamachang isnan mangipakaanancha? Ya sia sa ai chaicha nan menlokom ken chakayu. 20 Naimötachi mo nan liman nan Chios nan mangipakaanak isnan demonio, titiwa ai inumchan nan Fatawan nan Chios ken chakayu. 21 Mo nan abafikas ai taku ai wadai kanyabna ya sokudna ya cha önfantai isnan afongna, maid mangigkiwa isnan kokwana: 22 Mo wai mötachi mafikfikas ai taku mo sia umali ya amisana, okatena nan kanyab ya nan sokud ai inchidchinena, ya pasolutena nan kokwana. 23 Nan adi mikiolog ken Saken sia nan fosok: ya nan adi mikichakop ken Saken, sia nan mangisolut. 24 Mo nan ngaag ai espirito fumala isnan taku, likchölikchöna nan letang ai enanap is umilengana, ya mo maid idchanana, kanana, Tumoliak isnan afongko ai nalpoak. 25 Ya is aliana, idchanana nan afong ai nasis-ian ya naingonngon. 26 Kecheng ai umöi ya umitakin is pito ai teken ai espirito ai amamamöd ai ngaag mo sia, ya sumköpcha, ya ischi nan entötöiancha; ya nan umat ai nai ai anongusna, ai amamamöd ai ngaag mo issan lapona. 27 Ya issan chana nangwanian is nannaicha, nan ösang ai fafai isnan katakutaku inyangökena ai nenkali, Mabendika nan nangiyanak ken Sika, ya nan nangipasoso ken Sika. 28 Naimötachi kinwanina, Wödwöcha pai ai mabendika nan chaicha ai manngö isnan kalin nan Chios ya mangikako. 29 Ya issan na-amonganancha nan taku ken Sia, inlapona ai nenkali Nan taku ai matataku adwani, ngaagcha; enanapcha is maton; atmaid maton ai maichua ken chaicha, mo adi angkai nan maton Jonas ai Profeta. 30 Tai kag ken Jonas ai sia nan nangimatonan nan taku id Nineveh atsia akös nan Anak nan Taku nan maton isnan taku ai matataku adwani. 31 Nan ali ai fafai id Sheba at mikifangun isnan taku ai matataku adwani, isnan akiu ai mapilian, ya atlokomena chaicha, tai inmali ai nalpo isnan ka-adchawian ai lota, ai manngö is nan kinalaing Solomon, ya köt wadai isna nan nangatngato mo si Solomon. 32 Nan taku ai i-Nineveh atmikifanguncha isnan taku ai matataku adwani, isnan akiu ai mapilian, ya atlokomencha chaicha: tai nenfavfawicha issan nenisoloan Jonas; ya kot wadai isna nan nangatngato mo si Jonas. 33 Maid taku ai mangitög isnan ilao ai ippöina isnan chao, paimo isnan chaöm nan salop; naimötachi isnan maipaipaian, ta nan sumkop ilaincha nan ilao. 34 Nan ilaw nan awak sia nan mata: mo akailaka, ai kag akös isnan awakmo ai apapawai; naimötachi mo nakolap nan matam, ai kag akös isnan awakmo ai abafulinget. 35 Ilaim mampai, mo nan kag apapawai ken sika adi titiwa ai abafulinget. 36 Mo kag mampai nappawaian nan awakmo, ai maid paat abafulinget at apapawai nan amin ai kag isnan ilaw ai langlangana nan pawaina. 37 Ya issan chana enkalian, nan ösang ai Fariseo inayakana ai mikikan kan sia: ya si Jesu sinumköp ai tinmokcho ai mangan. 38 Ya issan nangilan san Fariseo, nataa tai igai nenfolo una sa mangan. 39 Ya nan Apo kinwanina ken sia, Nai, wasanyu nan falan nan kiud ya nan palato, naimötachi titiwa ai ngaag nan nimnimyu. 40 Chakayu ai kag naliwliw, aikö nan nangaeb isnan falana, igai na akös kinaeb nan chaömna? 41 Naimötachi, mo ichuayu isnan posi nan wadai ken chakayu, at kag nappanokau kannai amin nan chaömyu. 42 Naimötachi kasösögangkayu ai Fariseo! tai ichuayu nan nikapoo isnan natkönatkön ai lagui, ya adiyu ikibkifek nan kinausto ya nan laiad nan Chios: masapul nan mangidchualanyu ya masapul akös ai ikifekyu nao laiad nan Chios. 43 Kasösögangkayu ai Fariseo! tai lailaichinyu nan kangatoan ai tokchoan isnan sinagoga, ya nan machadayawanyu isnan palasa. 44 Kasösögangkayu ai escribas ya Fariseo, ai kasun kayu kawis ya adi titiwa ai kawis kayu! Tai kagkayu isnan kakaofan ai adi kaila, ya nan taku chachamanalan ken chaicha ai adicha ammo. 45 Kecheng sinumfat nan ösang ai mangtek isnan lötög ai kinwanina ken Sia, Apo, isnan mangwaniam is nannai, ittapim akös chakami. 46 Ya kinwanina Kasösögangkayu akös ai mangtek isnan lötög! tai ipasakfatyu isnan taku nan awit ai adachamöt, naimötachi chakyu ulai ilio ösang angkai ai lecheng, adiyu iyögnan isnan awit. 47 Kasösögangkayu! tai kabenyu nan kakaofan nan profeta ai nan amammayu nan namatöi ken chaicha. 48 Titiwa ai pailayu nan kag menwanchan nan nimnimyu isnan inangnen nan amammayu; tai titiwa chaicha nan namatöi ken chaicha, ya chakayu nan mangaeb isnan kakaofancha, 49 Ya sia mampai nan kinalaing nan Chios kinwanina akos, Atfumaa-ak ken chaicha is profeta ya apostolis, ya atpatöiencha nan tapina ya atenisisekcha isnan tapina; 50 Ta isnan taku ai mataku adwani atma-ala nan chalan nan amin ai profeta ai nenayas isnan napatöiancha, ai nipalpo isnan nakaban nan lawag; 51 Ai nipalpo issan napatöian Abel enkana's san nenayasan nan chalan Zakarias ai napatöi isnan nenfötakan nan altar ya nan afong: titiwa kanak ken chakayu, atmaala isnan taku ai matataku adwani. 52 Kasösögangkayu ai mangisolo isnan lötög! tai kinaanyu nan tolfek nan kinalaing ya chakayu kannai igaikayu sinumköp ya inpawayu nan chasumköp. 53 Ya issan nangwaniana is nannaicha ken chaicha, nan escribas ya nan Fariseo inlapocha ai nangiyamamöd nan kagcha namalian ken Sia isnan kalina, ta mangipakaliencha ken Sia isnan angsan. 54 Ai kagcha intitiim, ta wai mangalancha isnan enkaliana ai wai mangisaklangancha

12

1 Ya issanchöi chadlu, na-amoamongcha nan nilifolifo ai taku, ai nenasikatincha. Ya nangununa inlapona ai mangwani isnan kakadwana, Möianyu nan levfachulan nan Fariseo ai kagcha titiwa ai kawis ya adicha titiwa ai kawis. 2 Tai maid naapapan ai adi malokyasan; paimo maid nitafun ai adi maila. 3 Tai sia na, mo ngag nan kiuwaniyu isnan abafulinget atmadngö isnan apapawai, ya nan chayu intibtifi isnan natangfanan nan afong, atmaiyawag isnan togtogon nan afong. 4 Ya kanak ken chakayu, ai aloyasko, adikayu umögiet isnan mamatöi isnan awakyu, ya et kecheng at maid mavfalincha ai kasin ikkan. 5 Atichok kannai ken chakayu, nan umögietanyu: Sia nan umögietan yu ai isnan anongus nan pumatöiana wadai nan mavfalina ai mangiwasit isnan ka infierno; kanak ken chakayu, iyögietyu Sia. 6 Aikö adi nilako nan lima ai ayayam isnan twa ai siping, ya ulai ösang maid malichongan nan Chios ken chaicha? 7 Ai ulai nan amin ai fuok isnan oloyu nitapicha ai nayap. Adikayu mampai umiqiet; tai wödwöchakayu mo nan angsan ai ayayam. 8 Kanak akös ken chakayu, mo sino mangifaag isnan taku isnan mangafolotana ken Saken, sia nan atitakam nan Anak nan Taku ai kadwana, isuan sassakangen nan anhel nan Chios. 9 Naimötachi nan mangisut ken Saken isnan taku, atmaisut akos isnan sassakangen nan anhel nan Chios. 10 Ya mo sino nan ngaag nan mangogokuchana isnan Anak nan Taku, at mapakawan; mo sino mötachi mangmangwani isngaag isnan Santo ai Espirito, atadi mapakawan. 11 Ya mo is mangyöiancha ken chakayu isnan sinagoga, ya isnan jues ya isnan okom, adiyu chachamen nan manisimkanyu ya isnan isfatyu paimo nan kananyu: 12 Tai nan Santo ai Espirito atichona chakayu isnanchoi chadlu ai olas, nan masapul ai kananyu. 13 Ya nan ösang isnan angsan ai taku kinwanina ken Sia, Apo, ifaag mo nan yunak ta umichatag ken saken isnan tawidmi. 14 Ya kinwanina ken sia, Sika, aikö wai nangippöi ken Saken, ai Saken nan inpili paimo nan enchatag ken chakayu? 15 Ya kinwanina ken chaicha, Ikadkayu ya iyögietyu nan enapalan tai nan lengag nan taku faken sia nan enadachaan nan kokwan nan taku. 16 Ya nenogokud ken chaicha ai kinwanina, Nan ösang ai payoan nan katsangyan namkas is adacha. 17 Ya kinwanina isnan nimnimna, Atngag nan angnek, tai maid mangigtoan isnan fökasko. 18 Ya kinwanina, Sia na nan atangnek: atfakasek nan alangko ya enlakak is chadchadchakö; ischi nan mangippöiak isnan amin nan kokwak. 19 Ya atkanak isnan lengagko, Sika ai lengagko, ayaka nan inkakom ai naisaksakana isnan angsan ai tawen; adika massuswat, manganka, uminumka, ya enlallaiadka. 20 Naimötachi nan Chios kinwanina ken sia, Maliwliwka ai taku, is nannai ai lafi atmavfaka nan lengagmo; kecheng sino nan atmenkwa is nannaicha ai kokwa ai insakanam? 21 Kag isna nan umat isnan amin ai taku ai enchakop is kokwana ya adi katsangyan isnan Chios. 22 Ya kinwanina isnan kakadwana, Sia nan mangwaniak ken chakayu, Adikayu kag masusswat isnan ikatakuyu, mo ngag nan chayukanen; paimo isnan awakyu mo ngag nan ifachoyu. 23 Tai nan lengag wödwöcha mo nan kanen, ya nan awak wödwöcha mo nan facho. 24 Ilainyu nan kayang, ai adicha öntanim ya adicha enani; ai maid enigtoancha paimo alang; ya nan Chios talaonana chaicha: aikö kayu ngen adi wödwöcha mo nan ayayam? 25 Ya sino ken chakayu nan mavfalin ai menchaom isnan kaatakchag na? 26 Mo adikayu maka anuka isnan akit, ngagön chachama nan simmekyu isnan tapina? 27 Ilainyu nan topkau nan ikkancha ai ma-öngngan: adicha enchuno, ya adicha enafö; kanak mötachi ken chakayu ai si Solomon, ai ulai pötpöteng nan fachona ya adi kayet nikis-u isnan ösang ken chaicha. 28 Mo saia mampai fachoan nan Chios nan lokam ai chatumufo isnan punchag adwani, ya is wakas maippöi isnan chalikan, aikö adi ngen wödwöcha nan mamachoana ken chakayu, ai akit nan afolotna? 29 Ya adiyu chadlus sisimken mo ngag nan kanenyu paimo nan sayu inumen, ya adikayu enchwadchwa. 30 Tai nan katakutaku isnan kailiili nannaicha nan anapencha: ya nan Amayu ammona ai fagenyu nannaicha. 31 Nan Fatawan mötachi nan Chios nan unanigyu anapen, ya atmaichauchau akös nannaicha ken chakayu. 32 Adikayu umögiet, chakayu ai kag sinpamuig ai kalnelo: tai sia nan laichin Amayu, nan mangichauchauana isnan Fatawa ken chakayu. 33 Ilakoyu nan wadai ken chakayu ya enatatedkayu: umalakayu is chokau ai adi kadchudonut, nan mikatsangyan id chaia, ai adi ka-angangkai, ai maid sumagsagen is mangaköw paimo maid mamotfokan. 34 Tai isnan kawad nan kokwayu, kag sia nan kawad nan simmekyu. 35 Falikösanyu kannai nan kitangyu, ya enfivfichanganyu nan ilaw. 36 Ya at kagkayu isnan taku ai mannöd isnan tumolian nan Apocha ai malpo isnan umafong; tai mo umali ai mangogkog, at ken tekwafancha ken sia. 37 Mabendika nantosacha ai faa ai is alian nan Apocha atidchanana chaicha ai wadaicha ai mangisösögchan ken sia: titiwa kanak ken chakayu, atenfalikös kannai ya patokchoena chaicha ai mangan, ya sia kannai nan kag faa ken chaicha. 38 Ya mo umali isnan mikadwa paimo isnan mikatlo ai mönfantaiancha ya idchanana chaicha ai mangisösögchan, nantosacha ai faa nan mabendika. 39 Ya sia mampai na, ai mo saia ammon nan Apo isnan afong nanali an nan aköwan, awai nenfantai isnan afongna, ya maid pasköpena. 40 Ensasakanakayu mampai ta nan olas ai adiyu mangisosogchanan atumali nan Anak nan Taku. 41 Kecheng kinwanin Pedro ken Sia, Apo, kanam ngen nannai ai ogokud ken chakami angkai, paimo isnan ulai sino? 42 Ya kinwanin nan Apo, Sino ngen nan kag isnan michidchinö ya akasmek ai faa, ai sia nan kaben nan Apona ai kag kikad isnan sinpangafong ta ichatakana chaicha isnan kanencha isnan usto ai mangichuana ken chaicha? 43 Mabendika nantosa ai faa, ai isnan alain nan Apo, sia nan idchanana ai ikkana. 44 Titiwa kanak ken chakayu atkabena sia ai kikad isnan amin ai wadai ken sia. 45 Naimötachi mo saia nanchöi ai faa kanana isnan nimnimna, ai Ma-auni nan alian nan apok, ya ilapona ai mamaig isnan faa ai lallalaki ya fabfafai, ya mangan ya uminum, ai mafuteng; 46 Nan apon nanchöi ai faa atumali isnan sinakiu ai adina mangiösgchanan ken sia, ya isnan olas mo adina kakkanan nan aliana, ya atchadlusna chusaen sia, ya atitakamna ai manusa isnan adi mangafolot ken sia. 47 Ya nan faa ai chöi ai nangammo isnan nimnim nan apona, ya igai nensakana kannai, paimo adina inangnen nan menlaiachana, atmafaifaig isnan angsan. 48 Naimötachi nanchöi ai igai nangammo isnan nimnim nan apona, ya inangnena nan mabfaiakana, atmafaig is akit. Tai mo sino nan maichauchauan nan adacha, at adacha nan makchau ken sia; ya mo sino nan adacha nan naichidchinö ken sia, at amamamöd nan kedchawencha ken sia. 49 Inmaliak ai mangipal-i isnan apui isnan ka lota: ya ngag ngen nan laichik mo saia fumichang adwani? 50 Wadai mötachi nan funyag ken Saken ai mifunyag kannai ken Saken; ya nai kag Ak maipakud enkana's ummatana! 51 Aiköyu kanan en inmaliak ai mangipagkinnek isnan ka lota? Kanak ken chakayu en Adi, kag en-ono-onongan nan unanigko inalian. 52 Tai nipalpo adwani atwadai nan lima ai taku isnan sinpangafong ai adi maisu nan nimnimcha; nan tolo kagcha sosongten nan twa, ya nan twa kagcha sosongten nan tolo. 53 Naa ama onongena nan anakna ai lalaki, ya nan anak ai lalaki onongena nan amana; nan ina onongena nan anakna ai fafai, ya nan anak ai fafai onongena nan inana; nan kattokangan onongena nan asawan nan anakna ai lalaki, ya nan asawan nan anakna ai lalaki onongena nan kattokangana. 54 Ya kinwanina akös isnan katakutaku, Ya mo wai ilainyu is lifoo ai fumala isnan lumnekan nan akiu, ken kananyu, Nai umali nan ochan: ya sia nan umat. 55 Ya mo ilainyu nan chaköm ai malpo isnan abagatan ya kananyu, ai At chachama nan atong: ya sia nan umchan. 56 Chakayu ai kag kawi-kawis nan nimnimyu, kekkenyu nan mangimatonan nan chaia ya nan lota, ngagönyu adi kekken nan chaumat isnan adwani ai nai? 57 Ngagön adi usto nan chaya simsimken akös isnan nimnimyu? 58 Ya mo miki-öika isnan onongmo, isnan ayanyu isnan okom ööstem ta maid mavfalina ai ikkan ken sika; tai mo lang yöina sika isnan sassakangen nan okom, ya nan okom ichuana sika isnan ap-apon nan falud, ya nan ap-apon nan falud ippöina sika isnan favfaluchan. 59 Kanak ken sika, adika lumublufus, enkana's mamaiachan isnan nlai ösa-ösang ai siping.

13

1 Issanchöcha ai akiu, wadai nan inmali ai mangifaag ken Sia isnan inmat isnan i-Galilea, ai chaicha nan nenchalan nan inkaslang Pilato isnan chalan nan datoncha. 2 Ya sinumfat si Jesu ai kinwanina ken chaicha, Aikoyu kanan ai sanchöicha ai i-Galilea amamöd nan fasolcha mo nan amin ai i-Galilea, tai sia nan inmat ken chaicha ai nenlikatcha? 3 Kanak ken chakayu en Adi: mo adikayu mötachi enfavfawi, at akös ma-amaskayu amin. 4 Paimo sanchöicha natöi ai simpoo ya walo, ai naigpilancha isnan natokkangan nan atatakchag ai afong id Siloam, aiköyu kanan ngen ai amamöd nan chachafinmasolan mo nan inangnen nan amin ai taku ai nentötöö id Jerusalem, ai finmasol? 5 Kanak ken chakayu en Adi; mo adikayu mötachi enfavfawi, at akös ma-amaskayu amin. 6 Kinwanina akös nannai ai ogokud: Nan ösang ai taku wadai nan higos ai chapongoa, ai nitanim isnan umana, ya inmali ai manganap is fökasna, ya maid inchanana. 7 Kecheng kinwanina isnan cha nanno isnan uma, Ilam kaya, inmalialiak isnan tolo ai tawen ai nenanap is fökas nan higos, ya maid inchanak: tiplaem; nangkö ensösölat isnan lota? 8 Ya kinwanina ai sinumfat ken sia, Apo, oogkaiem isnan tawen yangkai ai nai, ta kaikaiek nan poona; ya lumengak; 9 Ya mo pai mamkas, at kawis: ya mo adi, attiplaem. 10 Ya chanenisolo isnan Savfacho isnan ösang ai sinagoga. 11 Köt wadai nan ösang ai fafai, ai chachama ai kadin nasakit isnan simpoo ya walo ai tawen, ya nafabfakog ai adi makauyad isnan awakna. 12 Ya issan nangilan Jesu, ken sia, inayakana ken Sia, ya kinwanina ken sia, Sika ai fafai, mallofusan ka isnan enkapuiam. 13 Ya inpöina nan limana isnan awakna, ya nenkau-uyad nan awakna, ya nenchadayaw isnan Chios. 14 Ya nan kangatoan isnan sinagoga nensosonget tai si Jesu nenkaan isnan sakit isnan Savfacho ai akiu, ya kinwanina isnan taku, Wadai nan önim ai akiu ai enchunoan nan taku: isnanchöi cha ai akiu nan alianyu ai pa-akas, ai faken isnan Savfacho. 15 Sinumfat mampai nan Apo ken sia ai kinwanina, Sika ai kasun kawis ai adi titiwa ai kawiska, mo wai ösang ken chakayu ai wai fakana paimo kafayona, adina ngen fadfachen isnan kafallilisa ya kuyuchena ai en mangipainum, isnan Savfacho? 16 Ya nan fafai ai nai, ai anak Abraham, ai kag infalud Setan, isnan simpoo ya walo ai tawen, adi ngen lumufus akös isnan Savfacho ai akiu? 17 Ya issan nangwaniana is nannaicha, nan amin ai chaicha ai kag nanokak isnan kalina, naasölancha: ya nan amin ai taku nenlallaiadcha isnan amin ai kawis ai inangnena. 18 Kecheng kinwanina, Ngag ngen nan kaag nan Fatawan nan Chios? ya ngag nan kanak ai kaagna? 19 Sia nan kaag nan ösang ai fuan si mostasa ai inalan nan taku ya inekchagna isnan umana, ya naöngngan ai kag kaiu, ya nan ayayam nenafongcha isnan pangana. 20 Ya kasin kinwanina, Ngag nan kanak ai kaag nan Fatawan nan Chios? 21 Sia nan kaag nan levfachula ai inalan nan ösang ai fafai ya inkaslangna isnan tolo ai salop si alina, enkana's inmadacha amin. 22 Ya nenatoaton ai inikwana nan chadchakö ya nan fananig ai ih, ya chaenisolo ya chanenfaat ai inmöi id Jerusalem. 23 Kecheng wadai nan nangwani ken Sia, Apo, aikö sinösang nan maisalakan? Ya Idnwanina ken chaicha, 24 Ööstenyu ai mangianap isnan sumköpanyu isnan fanig ai pangiwan, tai kanak ken chakayu, atangsancha nan mangianap isnan sumköpancha ya adicha mavfalin. 25 Mo finmafangun nan apon nan nenafong ya inöönfana nan pangiwan, ya kecheng ai tumatakchigkayu isnan chöla ya enkogkogkayu, ai kananyu, Apo, Apo, tekwafam; ya atsumfat ai kanana ken chakayu, Adik ammo mo ento nan nalpoanyu: 26 Kecheng kanakkananyu, Nikikankami ya niki-inumkami ken Sika, ya nenisoloka isnan kalsa ken chakami. 27 Naimötachi atkanana, Kanak ken chakayu, Adik ammo nan nalpoan yu; kumaankayu ai chaenangangnen is ngaag. 28 Atwadaicha nan chaenaka ya chaenkayetket, is mangilanyu ken Abraham, si Isaak ya si Jakob, ya isnan amin ai profeta, isnan Fatawan nan Chios, ya chakayu kannai atmaiwasitkayu. 29 Ya atwadaicha nan taku ai malpo isnan falaan nan akiu, ya isnan lumnekan nan akiu, ya isnan anianan ya isnan abagatan, ya attumotokchocha isnan lamisa isnan Fatawan nan Chios. 30 Ya ilainyu, atwadaicha nan mangodochichi ai chaicha nan atmangununa; ya atwadaicha nan mangununa ai chaicha nan mangodochichi. 31 Issanchöi chadlu ai akiu wadaicha nan inmali ai Fariseo, ai kanancha ken Sia, Umöika ta kumaanka isna: tai si Herod paatena ai mamatöi ken Sika. 32 Ya kinwanina ken chaicha, Umöikayu ai en mangifaag isnanchöi kag fox, Ilaim, chakpakaanen nan demonio ya enkaanak is sakit adwani ai akiu ya is wakas, ya isnan mikatlo ai akiu atfuasek. 33 Ulai mo siachi, masapul ai itoliko ai enfaat, adwani, is wakas ya is katlona: tai adi kavfalin ai nan ösang ai profeta matöi isnan falan nan Jerusalem. 34 O Jerusalem, Jerusalem, ai cham patöien nan profeta, ya faokem nan nafaa ken sika; kadin laichik ai mangamong isnan an-akmo ai kag isnan mangalak ai amongena nan an-akna isnan paiakna, ya adi kayu! 35 Nai, makaiad nan afongyu ai maookai. Titiwa kanak ken chakayu atadiyu ilain Saken enkana's umchanan nan mangwanianyu, Sia nan Mabendika, ai umali isnan Ngatsan nan Apo.

14

1 Ya issan sinumköpan Jesu isnan afong nan ösang ai kangatoan ai Fariseo, ta mikikan ken sia, isnan Savfacho, chacha il-ilain Sia. 2 Köt wadai ai nan ösang ai taku ai nafotot. 3 Ya si Jesu nenkali isnan mangtek isnan lötög ya isnan Fariseo, ai kanana, Aikö lawa ai enpökös isnan sakit isnan Savfacho ai akiu? 4 Ya finumtugcha. Ya si Jesu inala san taku ya kinaana nan sakitna, ya inpakaana. 5 Ya sinumfut ken chaicha ya kanana, Aikö wai ösang ken chakayu ai wadai fakana paimo kafayona ai naekchag isnan fito, ya adina ngen ichakas ai manguyud isnan Savfacho ai akiu? 6 Ya maid paat inisfatcha isnannaicha. 7 Ya issan nangilana isnan na-ayakan ai mikikan ai taku, ai pinilicha nan kagkawisan ai tokchoan, nenogokud kan chaicha, ai kanana, 8 Ya mo wai mangayag ken sika isnan umafong, adika tumokcho isnan kangatoan ai tokchoan, ta mo lang wadai na-ayakan ai nangatngato mo sika; 9 Ya nan nangayag ken chakayu ai twa umali ya kanana ken sika, Yuyam nan tokchoam ken sia; ya atumasika ai tumokcho isnan kafabfaan ai tokchoan. 10 Naimötachi, mo na-ayakanka, umöika ai tumokcho isnan kafabfaan ai tokchoan, ta mo umali nan nangayag ken sika, atkanana, Tumongtongchoka isnan tokchoam: sia nannai nan mangipachadayawana ken sika isnan sassakangen nan amin ai taku ai na-ayakan. 11 Tai mo sino nan mangipangato kannai isnan awakna, atmapavfafa; ya nan mangipavfafa kannai isnan awakna, atmaipangato. 12 Kecheng kinwanina isnan nangayag ken Sia, Mo enayagka is mangan isnan magakiu paimo isnan maschöm, faken juan akim, lillwidmo, ötat-admo, paimo nan kakatsangyan ai sagenmo nan ayakam, ta köt la atakös ayakancha sika, ya kag mafaiachanka. 13 Naimötachi, mo enayagka is mikikan, nan posi, nan makotmochan nan pilai, nan nakimit, nan ayakam: 14 Ya atmabendikaka: tai chaicha adicha mavfalin ai mamaiad ken sika, naimötachi ai kawis nan chawatem isnan Resurreksion nan usto ai taku. 15 Ya issan nangölan nan ösang ken chaicha ai nikikan ken Sia, kinwanina ken Sia, Atmabendika nantosa ai mangan isnan Fatawan nan Chios. 16 Kecheng kinwanin Jesu ken sia, Nan ösang ai taku nenayag isnan angsan ai taku ai mikikan ken sia: 17 Ya finaana nan faana isnan ka-kak-kanan ai mangwani isnanchöi cha ai na-ayakan, Umalikayu, tai nisasakana amin. 18 Ya ninlapocha amin ai waschön nangwani isnan nan adicha ayan. Nan ununa kinwanina ken sia, Linmakoak is lota, ya masapul ai ek ilain: pangngaasim, ta pakawanem saken. 19 Ya nan ösang kinwanina, Linmakoak isnan lima ai sinasawa ai faka, ya ek itpeg chaicha; pangngaasim ta pakawanem saken. 20 Ya nan ösang kinwanina, Ka-abafongak, ya siachi nan adik makaöian. 21 Kecheng tinmoli san faa, ya infaagna amin nannaicha isnan Apona. Kecheng nensosonget san apapo isnan afong, ya kinwanina isnan faana, Enkakamoka ai umöi isnan kakalsa ya chalan isnan ili, ya yaim isna nan posi, nan nakotmochan, nan pilai, ya nan nakimit. 22 Ya nan faa kinwanina, Apo, nan kinwanim sia nan inangnek, ya wadai kayet entötöian. 23 Ya nan apo kinwanina isnan faa, Umöika isnan ananwa ai kalsa, ya isnan fananig ai chalan, ya pihtem chaicha ai umali, ta mapno nan afongko. 24 Tai kanak ken sika, ai maid issanchöicha ai na-ayakan is manimsim isnan insakanak. 25 Ya angsancha nan katakutaku ai nifuig ken Jesu: ya nensakong ya kinwanina ken chaicha, 26 Mo wai taku ai umali ken Saken ai adina sosongten si amana, si inana, nan asawana, nan ananakna, ya agina, ai lallalaki ya fabfafai, ya nan akös lengagna, chadlu, adi mavfalin ai sia nan kadwak. 27 Ya ulai sino ai adi mangala isnan kolusna ya omonod ken Saken, adi mavfalin ai sia nan kadwak. 28 Ya sino ken chakayu nan kanana en kumaeb is afong, adi ngen tumokcho ununa ya simkena nan faiadna, rao umanai nan siping isnan mankaiana? 29 Ta mo ipchasca inpöi nan topingna, ya adi makafuas, nan amin ai mangila amamsiwencha sia, 30 Ai kanancha, Nannai ai taku inlapona ai menkaeb ya adi makafuas. 31 Paimo ngag ai ali ai mangwani ai mamaluknit isnan teken ai ali adi ngen tumokcho ununa ya simkösimköna mo manfalina ai mangiaföt isnan Bimpoo ai lifo ai solchacho, isnan teken ai ali ai mangifuig isnan twanpoo ai Ifo ai solchacha? 32 Mo adina mavfalin, fumaa is mangifaag isnan faiau, isnan kawad nan teken ai ali isnan adachawi. 33 Nan asin ya kawis: ya mo makaan nan tamtamna, ngag nan ikkana ai wadai tamtamna? 35 Maid silfina isnan ka lota paimo isnan ka lumeng naimötachi iwasit nan taku. Mo wai kowengna, chengena.

15

1 Kecheng sinmagencha amin nan chaenchakop isnan fuis ya nan finmasol, ai manngö ken Sia. 2 Ya nan Fariseo ya nan escribas chacha nenmayutmut ai kanancha, Nannai ai taku chawatena nan finmasol ya mikikan ken chaicha. 3 Ya inogokudna nannai ken chaicha, ai kanana, 4 Mo sa, wai sinkasut ai kalnelon nan ösang ken chakayu, mo chongauwena nan ösang ken chaicha, adina ugen kaiachen nan siampoo ya siam isnan ka punchag, ya umoi ai en manganap isnan nadchongau enkana's mangchanana? 5 Ya mo inchanana, enlilinawa ai manasakfat. 6 Ya mo umchan is afongna, amongena ai mangayag isnan lilwidna, ya sagena, ai kanana ken chaicha, Mikilallaiadkayu ken saken; tai inchanak nan kalnelok ai nadchongau. 7 Kanak ken chakayu, ya siachi akös nan umat ai wödwöcha nan enlalaichancha id Chaia, isnan enfavfawian nan ösang ai finmasol, mo nan siampoo ya siam ai usto ai taku ai adi cha masapul ai enfafawi. 8 Paimo mo sa, wai nan simpoo ai pisos nan ösang ai fafai, mo chongauwena nan ösang, adina ngen it-ög nan kanchela, ya sisiana nan afong, ya ööstena ai manganap enkana's mangchanana? 9 Ya mo inchanana, amongena ai mangayag isnan lilwidna ya sagena ai kanana, mikilalaiadkayu ken saken: tai inchanak nan pisos ai nadchongau. 10 Kanak ken chakayu, ya siachi akös nan umat ai enlallaiadcha isnan sassakangen nan anhel nan Chios, isnan enfavfawian nan ösang ai finmasol. 11 Ya kinwana, Nan ösang ai taku wadai nan twa ai anakna ai lallalaki: 12 Ya nan annochi ken chaicha kinwanina ken amana, Ama, ichuam ken saken nan chatagko isnan kokwam ai tawidko. Ya nan ama chinatagna nan kokwana ken chaicha. 13 Ya issan nattawana is akit ai akiu, nan anakna ai annochi ya inamongna amin ya nenfaat isnan adadchawi ai ili, ya ischi nan apödna lang nangamasan isnan pilakna isnan ngaag ai kattatakuan. 14 Ya issan nangamasana amin, finmala nan chachama ai okang issan chöi ai lota; ya sia ya inlapona ai nenokang. 15 Ya sia ya inmöi isnan ösang ai umi-ili issanchöi ai lota; ya finaana sia isnan ka punchag ai niammangan isnan fotog. 16 Ya nilaiadna kannai mo mögsan isnan toyo ai kinan nan fotog: ya maid nangichua ken sia. 17 Ya issan nensimkana kinwanina, Angsan nan faan ama ai aalana nan kanencha ya masawa, ya saken atmatöiak is okang! 18 Maligwatak ya umöiak ken ama, ya sak kanan ken sia, Ama, finmasolak isnan chaia ya ken sika, 19 Ya adiak chadlus kawis ai makwani ai anakmo: umitakamka ken saken ai kag mo faa. 20 Ya naligwat ya inmali ken amana. Naimötachi ai isnan solit nan umchanana, inilan amana, ya wadai sögangna ken sia, ya nentagtag ya kinnawena ya finisituna sia. 21 Ya san anakna kinwanina ken sia, Ama, finmasolak isnan chaia ya ken sika, ya adiak chadlus kawis ai makwani ai anakmo. 22 Naimötachi kinwanin amana, isnan faana, Ken aianyu nan kagkawisan ai facho ya paifachoyu ken sia, ya singsinganyu nan limana, ya kokuchanyu nan chapana: 23 Ya yaiyu isna nan faka ai oifun, ai alalamös, ta patöienyu; mangantaku ai enlallaiad. 24 Tai nan anakko ai nai ya natöi ya kasin nataku; nadchongau, ya nadanan. Ya inlapocha ai enlallaiad. 25 Kecheng nan yun-a ai anakna wadai isnan ka punchag, ya issan sinmagenana isnan afong, chinngöna nan kitkitala ya nan sasala. 26 Ya inayakana nan ösang ai faa, ya infaagna nan cha umat. 27 Ya kinwanina san faa ken sia, Inmali nan annochim, ya si amam inpapatöina nan oifun ai faka ai alalamös, tai natataku ai tinmoli. 28 Ya nensosonget nan yuna, ya igai sinumköp: sia chi nan finmalaan nan amana ya inalalukna sia 29 Ya sinumfat ai kinwanina ken amana, Ilaim kaiya, isnan ayaka ai tawen ai chak nenpavfaalen ken sika, ya inafoafolotko nan kinwanim: ya maid inchuduam ken saken ai ulai ösang ai kiching ta palaiachek akös nan lilwidko. 30 Naimötachi adwani ai inmali nan anakmo ai nai, ai inamasna yangkai nan pilakmo isnan ngaag ai taku, pinatöimo ken sia nan faka ai oifun ai alalamös. 31 Ya kinwanin sau amana ken sia, Anakko, kadin wadaika ken saken, ya amin ai kokwak enkwam akös amin chaicha, 32 Usto ai enlallaiadtaku ya enlinawataku: tai nannai ai annochim ya kag natöi ai kasin naiaku; nadchongau, ya nadanan.

16

1 Ya kinwanin Jesu akös isnan kakadwana, Wadai nan ösang ai katsangyan ai taku, ai wadai nan kag kikad isnan kokwana; ya insaklangcha sanchöi taku isnan apona, isnan nangamasana isnan kokwana. 2 Ya nan apo inayakana sia, ya kinwanina ken sia, Ngag na ai chengek ai kanancha ken sika? Yaim ken saken nan kwentam isnan kag nenikacham isnan kokwak; tai adika kasin enkikad isnan kokwak, 3 Keckeng san kag kikad kanana isnan nimnimna, Ngag nan angnek? tai nan apok ya kaanena saken isnan kag ko ikackan: adik mavfalin ai enkaikai; umasöak ai enpalimos. 4 Sisimkek adwani nan angnek, ta mo makaanak isnan kag ko ikackan, atchumawatcha isnan afobongcha. 5 Sia nan nangayakaana isnan amin ai wai kawatna isnan apona, ya kinwanina isnan ösang, Kaat nan otangmo isnan apok? 6 Ya kinwanina, Sin kasut ai sukat ai lanib. Ya kinwanina ken sia, Alaem nan papelmo, ya matanokchoka ai mangissolat is limanpoo. 7 Kecheng kinwanina, isnan mikadwa, Ya sika, kaat nan kawatmo? Ya kinwanina Sinkasut ai sukat ai trigo. Ya kinwanina ken sia, Ken alam nan papelmo ya isolatmo nan walonpoo. 8 Ya nan apo kinwanina isnan ngaag ai faa ai kawis nan inangnena, tai nan ananak is nannai ai lawag adadacha nan kötkencha nan umat is nannai ai lawag, mo nan ananak nan Apapawai. 9 Ya kanak ken ckakayu, ai Mikikaiemkayu isnan mi-katsangyan ai kag sia nan mangipango ken chakayu isnan ngaag; ta mo enkolang, atchawatencha chakayu isnan entötöiancha ai adi ka-amas. 10 Nan michidchinö isnan akit, sia nan michidchinö isnan adacha; ya nan adi usto nan ikkana isnan akit, adi akös usto nan ikkana is adacha. 11 Mo adi kawis nan nangigtoanyu isnan adi titiwa ai mikatsangyan, sino ngen nan atmangichidchinö isnan titiwa ai mi-katsang yan ken chakayu? 12 Ya mo adi kawis nan inangnenyu isnan kwan teken ai taku, sino nan atmangichua ken chakayu isnan kokwayu kannai? 13 Maid faa ai mavfalin ai menpafaa isnan twa ai apo: tai atsosongtena nan ösang ya atlaichina nan ösang; paimo atentoloi isnan ösang ya amamsiwena nan ösang. Adiyu mavfalin ai menpafaa isnan Chios ya isnan kokwa. 14 Ya nan Fariseo ai nanngö akös is nannaicha, inamamsiwcha Sia, tai nan pilak nan lailaichincha. 15 Ya kinwanina ken chaicha, Chakayu chadlu nan mangippaila ai kagkayu kawis isnan taku, nan Chios mötachi ammona nan nimnimyu: tai nan wödwöcha nan manisimkan nan taku ai kanancha ai kawis, sia nan liligten nan Chios. 16 Nan lötög ya nan profeta nawanöwanödcha enkana's san ken Juan: nipalpo sanchöi maisolo nan Fatawan nan Chios, ya nan amin ai taku chachama nan laiadcha ai sumköp. 17 Ya malanlanui nan ma-amasan nan chaia ya nan lota, mo nan ma-amasan nan ulai ösang ai filin nan lötög. 18 Ulai sino nan mangipakaan isnan asawana ya umasawa is teken ai fafai, angnena is adulterio: ya ulai sino nan umasawa ken sia ai napakaan, isnan asawana, angnena is adulterio. 19 Wadai nan ösang ai katsangyan, ai namacho isnan pötpöteng ai facho ai purpura, ya kawakawakas ai kawis nan kanena: 20 Ya wadai nan ösang ai enpalpalimos, ai enngatsan is Lazarus, ai insaadcha isnan pangiwan, ai nayaman nan amin ai awakna, 21 Ya laichina mo mangan isnan maiwasit ai masawa isnan lamisan nan katsangyan: ya nan aso ai chöicha akös inmalicha ai nanilchil isnan nayaman ken sia. 22 Ya köt natöi san enpalpalimos, ya inyöi nan anhel isnan kawad Abraham: nan katsangyan akös natöi ya nikaob. 23 Ya id Hades tinangadna nan matana, ai chachama nan nenlikatana, ya inilana si Abraham isnan adachawi ya si Lazarus ai nensasachag isnan limana. 24 Ya nenfukau ai kanana, Ama ai Abraham, sumögangka ken saken, ya paliem si Lazarus ta isiusiuna nan ochon nan lechengna isnan chanum, ya palagkitowengena nan chilak; tai chadlus-ak napalikat is nannai ai apui. 25 Kinwanin mötachi Abraham, Anakko, sisimkem ai san natatakuam sia nan cham nanawatam isnan kawis, ya si Lazarus ngaag nan chana chinadawat; adwani sia nan naliwliwana, ya sika nan chadlus enlikat. 26 Ya sia akös wadai nan adadchaon ai taiak isnan nenfötakantaku: ta nan menlaiad ai umöi ischi ai malpo'sna adicha makaködchang; ya nan menlaiad ai umali'sna ai malpo'schi, adi cha akös mavfalin ai kumchang. 27 Kecheng kinwanma, Ilutlutko mampai ken sika Ama, ta faalem si Lazarus isnan afong ama: 28 Tai wadai nan lima ai agik; ta chadlusna ivfafaag ken chaicha, ta köcha't la umali is nannai ai menlikalikatan. 29 Naimötachi si Abraham kinwanina, Wadai ken chaicha si Moses ya nan Profeta; wadaicha ai mangölancha. 30 Ya kinwanina ken sia, Adi, Ama ai Abraham, mo saia mötachi umöi nan ösang ai malpo isnan natöi, atenfavfawicha. 31 Ya kinwanina ken sia, Mo adicha chengen si Moses ya nan Profeta, atadicha akös afoloten mo wai fumala ai malpo'snan nan natöi.

17

1 Kecheng kinwanin Jesus isnan kakadwana, Adi mavfalin ai makenta nan michalatan nan fumasolan: kasösögang mötachi, nan michalatana! 2 Kagkakawis nget ken sia mo nan chakchakö ai fato ya misabfot isnan fakangna, ya maitöpa isnan ka faifai, mo nan mangipavfasolana isnan ösang isnan ananak ai naicha. 3 Iilainyu mampai lannai: Mo nan akim fumasol ken sika ochokam; ya mo enfavfawi, pakawanem. 4 Ya mo fumasol ken sika isnan mangapito isnan sinakiu, ya mangapito ai ensakong ken sika isnan sinakiu ai kanana, Enfavfawiak, pakawanem sia. 5 Ya nan apostolis kinwanicha isnan Apo, Paadadchsöm nan afolotmi. 6 Ya nan Apo kinwanina, Mo nan afolotyu ya kag isnan fuan si mostasa, mavfalinyu ai kanan isnan sikamora ai nai ai chapong, Makafutka ya mitanimka isnan ka faifai, ya atavfolotena chakayu. 7 Naimötachi aiko wadai ken chakayu ai nan wai faana, ai chaenalacho paimo chaenpangan is faka, ai atkanana ken sia, auauni mo umali ai malpo isnan ka punchag, Önka tumakcho ai en mangan? 8 Adina ngen kanan ken sia, Isakanam nan kanek, ya waksam nan kitangmo, ya enlamisaka ken saken, ya mo mafuasak ai mangan ya uminum, kecheng misublika? 9 Aikö enyaman issanchöi ai faa tai inangnena nan nakwani ken sia? Adi nget. 10 Siachi mampai nan kaagna, mo inangnenyu nan amin ai nakwani ken chakayu, kananyu, Adikami chadlus kawis ai faa: tai inangnenmi yangkai nan nakwani ken chakami. 11 Kecheng ai issan inmayan Jesu id Jerusalem, linmaosana nan tengan nan id Samaria ya id Galilee. 12 Ya issan sinumköpana isnan ösang ai ili, inafötna nan simpoo ai lallalaki ai enkukutel, ai chatinmakchig isnan adadchawi: 13 Ya nenfukaucha ai nangwani, Jesu, Apo, sumögangka ken chakami. 14 Ya issan nangilana ken chaicha, kinwanina ken chaicha, Önkayu, pailaikayu isnan papachi. Ya nakaeb, issan inmayancha nakaan nan sakitcha. 15 Ya nan ösang ken chaicha, issan nangilan ai nakaan, nensakong ya nenchadayaw isnan Chios ai chaenfukau, 16 Ya chadlus nenpalintomeng isnan chapan Jesu ya nenyaman ken Sia: ya sia ya i-Samaria. 17 Ya si Jesu ai sinumfat ya kinwanina, Aiköcha adi simpoo ai nakaan nan sakitcha? ya nan siam, ento pai nan kawadcha? 18 Maid nensakong ai enchadayaw isnan Chios, mo adi angkai kecheng nan mangili ai nai. 19 Ya kinwanina ken sia, Tumakchigka ya umöika: nan afolotmo sia nan naugaan isnan sakitmo. 20 Ya issan nenfagan nan Fariseo ken Sia atkaat ngen nan umchanan nan Fatawan nan Chios, sinumfat ken chaicha ai kinwanina, Nan Fatawan nan Chios adi umchan ai mavfalin ai mailila: 21 Ya adicha akös kanan, Nannai! paimo Ischi! tai nan Fatawan nan Chios ya wadai kannai isnan chaömyu. 22 Ya kinwanina isnan kakadwana, Atumchan nan akiu ai atlaichinyu ai mangila isnan ösang ai akiu issan natatakuan nan Anak nan Taku, ya atadiyu ilan. 23 Ya atkanancha ken chakayu, Ilainyu ischi, paimo, Ilainyu isna! adikayu umöi ya adiyu onochen chaicha. 24 Tai kag isnan kolyapyap ai enkolyapyap ai malpo isnan ösang ai amas nan chaia, ya langlangana enkana's nan adachawi ai amas nan chaia, sia akös nan atumat isnan enpailan nan Anak nan Taku isnan akiuna. 25 Naimötachi masapul ai enlikat una is chachama, ya milakuin isnan taku ai matattaku adwani. 26 Ya kag isnan inmat issan natattakuan Noah, ya atsia akös nan umat isnan akiu nan Anak nan Taku. 27 Chacha nangan, chacha inminum, chacha inmafong ya niyaafongcha enkana's nan akiu ai sinumköpan Noah isnan Ark, ya inmali nan lofug, ya inanudna amin chaicha. 28 Sia chadlu nan kaagna issan natattakuan Lot: chacha nangan, chacha inminum, chacha nenlako, chacha nenilako, chacha nentanim ya chacha nenkaeb isnan afong; 29 Naimötachi issanchöi chadlu ai akiu ai si Lot kinmaan id Sodom ya na-anali nan apui ya nan brimstone ai kag ochan ai nalpo id chaia, ya inamasana amin chaicha. 30 Chadlus kag todi nan kaagna, isnan akiu ai enpailan nan Anak nan Taku. 31 Isnan chöi ai akiu, mo wai taku isnan togtogon nan afongna, ya nan kokwana wadai isnan afongna, kapösna't si adi pumanad ai mangala; ya nan akös wadai isnan ka punchag, kapösna'tsi adi tumoli. 32 Sisimkenyu nan asawan Lot. 33 Ulai sino nan mangianap isnan mangisalakana isnan lengagna atamasena; ya ulai sino nan atmangarnas isnan lengagna atsalakana. 34 Kanak ken chakayu, isnanchöi ai maschöm atwadaicha nan twa ai taku isnan ösang ai kasöypan; nan ösang atmikaan, ya nan ösang atmakaiad. 35 Nan twa ai fafai at chacha enkiling; nan ösang atmikaan, ya nan ösang atmakaiad. 36 Nan twa ai taku atwadaicha isnan ka punchag; nan ösang atmikaan ya nan ösang atmakaiad. 37 Ya sinumfatcha ai kinwanicha, Ento nan ummatan tona, Apo? Ya kinwanina ken chaicha, Mo entona nan kawad nan natöi ai awak, ischi nan ma-amongam nan lafaan.

18

1 Ya nenogokud ken chaicha, ta mangisoloana ta nan taku masapul ai kadin mangapyacha ya adicha iwaiwaiang: 2 Ai kanana, Wadai nan ösang ai juez, isnan ösang ai ili, ai adina iyögiet nan Chios, ya adina akös padchayawan nan taku: 3 Ya wadai nan ösang ai ilekas issan chöi ai ili; ya inmali ken sia ai kanana, Ifalösmo saken isnan fosok. 4 Ya issan lapona adina ifalös: naimötachi isnan anongusna, kanana isnan nimnimna, Ulai mo adik iyigiet nan Chios, ya adik akös padchayawan nan taku; 5 Atifalösko nannai ai ilekas, tai umaiyu ken saken, ta adi kadin umaliali ai kag sia nan fumlai ken saken. 6 Ya kinwanin nan Apo, Chechengenyu nan kanan san ngaag ai juez. 7 Ya adi ngen akös ifalös nan Chios isnan takuna, ai kadincha enfukau ken Sia, isnan magakiu ya isnan maschöm, ai ulai mo kag ummanong isnan mamachangana ken chaicha? 8 Kanak ken chakayu, ai At ken ifalösna chaicha. Ulai mo sia chi, isnan alian nan Anak nan Taku, at ngen idchanana nan taku ai mangafolot isnan ka lota? 9 Ya inkalina nannai ai ogokud isnan tapina, ai nangwani isnan nimnimcha, ai ustocha, ya chacha amamsiwen nan tapina. 10 Nan twa ai taku inmöicha isnan ka simfaan ai mangapya; nan ösang ai Fariseo, ya nan kadwana nan chaenchakop isnan fuis. 11 Nan Fariseo tinmakchig ya nangapya isnan nimnimna, Enyamanak ken Sika ai Chios, ta adiak kag isnan tapina ai taku, ai mangaköwcha, adicha usto, isukatcha nan asawacha, paimo adiak kag is nannai ai chaenchakop isnan fuis. 12 Enayunarak is mamidwa isnan ösang ai Chominko, kag ko ichua yangkai nan mikapoo ai pisosko. 13 Naimötachi san chaenchakop isnan fuis ai tinmakchig ai niyadchawi, ai adina itangtangad nan matana id chaia, chana mötachi tamtampakan nan takebna ai kanana, Chios, sumögangka ken saken, ai chachama nan fasolko. 14 Kanak ken chakayu, Nannai ai taku tinmoli isnan afongna ai wödwöcha ai napakawan nan fasolna mo san kadwana: tai ulai sino ai mangipangato isnan awakna atmaipabfafa, ya nan mangipafafa isnan awakna, atsia nan maipangato. 15 Ya inyaicha akös ken Sia nan ongang-a ta mangignanana isnan awakcha: naimötachi issan nangilan nan kakadwana inochokancha chaicha. 16 Naimötachi si Jesu inayakana chaicha ai kanana, Yuyayu nan umalian nan ongang-a ken Saken, ya adiyu ipawa chaicha: tai nan kag ongang-a, chaicha nan menkwa isnan Fatawan nan Chios. 17 Titiwa kanak ken chakayu, Mo wai adi manawat isnan Fatawan nan Chios, ai kag ongonga, atmaid ikkana ai sumköp ischi. 18 Ya kinwanin nan ösang ai kag okom ken Sia, Kawis ai Apo, ngag nan sak' angnen ta mamawichak isnan lengag ai maid kankaiana? 19 Kinwanin Jesu ken sia, Ngagöm kanan ai kawis Ak? Maid kawis, mo adi Ösang yangkai, ai Sia nan Chios. 20 Amom nan filin, Adim isukat nan asawam, adika enpatoi, adika mangakow, Adika enpadpachakös isnan taku, Avfolotem cha amam ya si inam. 21 Ya kinwanina, Amin nannaicha ai filin nan inavfolotko ai nipalpo san ka-ongongak. 22 Issan nanngölan Jesu is nannaicha, kinwanina ken sia, Ösang nan kolangmo: ilakom nan amin ai kokwam ya ikakchengmo isnan posi, ya atwadai kokwam ai kagmo ikatsangyan id chaia; ya umali ka ta omonodka ken Saken. 23 Ya issan nanngölana isnannai, chadlus nensösögang; tai sia ya chadlus katsangyan. 24 Ya issan nangilan Jesu ai sia ya chadlus ensösögang, kinwanina Ya chachama ai enlikat nan katsangyan ai sumköp isnan Fatawan nan Chios! 25 Tai malanlanui nan lumfutan nan kamel isnan lekau nan katsaium mo nan sumköpan nan katsangyan isnan Fatawan nan Chios. 26 Ya sanchöicha ai nanngö, kinwanicha, At sino ngen nan mavfalin ai maisalakan? 27 Ya kinwanina, Nan adi kavfalin isnan taku, mavfalin isnan Chios. 28 Kecheng kinwanin Pedro, Ilaim, kinaiadmi amin nan kokwami ya inmonodkami ken Sika. 29 Ya kinwanina ken chaicha, Titiwa kanak ken chakayu, Maid taku ai nanainan isnan afongna, paimo chakököna, paimo agina, paimo asawana, paimo ananakna, mokötai isnan Fatawan nan Chios, 30 Ai atadina chawaten nan adadacha adwani, ya isnan tawen ai umali, nan lengag ai maid kankaiana. 31 Kecheng inayakana nan simpoo yad ywa ken Sia, ya kinwanina ken chaicha, Nai, lumamagtaku, id Jerusalem, ya nan amin ai insolat nan Profeta ai atumat isnan Anak nan Taku atsia nan makaeb. 32 Tai Sia atmaichua isnan Gentiles ya atma-amamsiw, ya ngaag nan at chacha ikikkan ken Sia, ya at tuvfaancha, 33 Ya atfaikencha Sia, ya atpatöiencha: ya isnan mikatlo ai akiu atkasin mataku. 34 Ya maid paat kintekcha is nannaicha; ya nannai ai kali kag nitafun ken chaicha, ya adicha akös kintek nan cha nakwani. 35 Ya isan sinmagena id Jeriko, nan ösang ai lalaki ai nakimit ai tinmotokcho isnan ilit nan kalsa ai enpalpallimos: 36 Ya issan nanngölana isnan katakutaku ai cha lumaos, infakana mo ngag nanchöi. 37 Ya infaagcha ken sia, ai si Jesu ai i-Nazareth, nan chalumaos. 33 Ya nenfukau ai kanana, Jesu, Sika ai Anak David, sumögangka ken saken. 39 Ya nan cha nangipangpango ken sia inochokancha sia, ta adina enkalian: naimötachi inyamödna ai nenfugfukau, Sika, ai Anak David, sumögangka ken saken. 40 Ya si Jesu tinomkö ya inpolongna ta yaicha nan nakimit ken Sia: ya issan ninagena, infakana ken sia, 41 Ngag nan laichim ai angnek ken sika? Ya kinwanina, Apo, mo saia makaila-ak. 42 Ya si Jesu kinwanina ken sia, Makailaka: nan afolotmo sia nan kag nangisalak ken sika. 43 Ya köt nakaila, ya inmonod ken Sia, ai nenchadayaw isnan Chios: ya issan nangilan nan amin ai taku, nenchadayawcha isnan Chios.

19

1 Ya issan sinumköpan Jesu id Jeriko linmaosana. 2 Ya köt wadai nan ösang ai lalaki, ai enngatsan is Zakkeus, sia san kangatoan isnan chaenchakop isnan fuis, ya katsangyan 3 Ya inyanap nan mangilana ken Jesu, mo sino; naimötachi adi nakaila tai isnan ayaka nan taku, tai astik nan kaatakchagna. 4 Ya nangununa ai nentagtag, ya kinmalab isnan ösang ai moras ai kaiu, ta mangilana ken Jesu, tai sia nan menlaosana ken Sia, issan chöi ai kalsa. 5 Ya issan inumchanan Jesu isnan kawadna, tinangadna, ya inilana sia, ya kinwanina ken sia, Zakkeus, enkakamoka ai pumanad; tai adwani is nan afongmo nan chumagusak. 6 Ya nenkakamo ai pinmanad ya nenlinawa ai manawat ken Sia. 7 Ya issan nangilancha nenmayutmutcha amin ai kenancha, Inmöi ai chimagus isnan afong nan chafinmasol. 8 Ya si Zakkeus tinmakchig ai kinwanina isnan Apo: Ilaim, Apo, nan kudchwa nan kokwak sia nan ichuak isnan posi; ya mo chachama nan chinawatko ai fuis isnan taku, at mangapat nan ichuak. 9 Ya si Jesu kinwanina ken sia, Adwani ai akiu nan maisalakan inumchan is nannai ai afong, tai si tona ya anak akös Abraham. 10 Tai nan Anak nan Taku inmali ai manganap ya mangisalak isnan nadchongau. 11 Ya issan nanngölan cha is nannaicha, kasina kinwani nan ösang ai ogokud ken chaicha, tai Sia ya nisasagen id Jerusalem, ya tai sisimmekcka ai kankanin nan maipailan nan Fatawan nan Chios. 12 Ya kanana mampai, Nan ösang ai taku, ai nangato nan saadna, nenfaat isnan lota ai adadchawi, ta makaeb ai kag ali, ya sa et tumoli. 13 Ya inayakana nan simpoo ai faana ya inagtana chaicha is sinösösang ai pisos, ya enfilina ken chaicha, Falinenyu sa, enkana's aliak. 14 Naimötachi nan umi-ili nilliliketcha sia, ya finmaacha is mangwani ken sia, ai Adimi laichin ai enali nannai ken chakami. 15 Kot, issan tinmoliana issan afusna nanawatan isnan enaliana, inpaayagna sanchöicha ai faa, ai nangichauchauana isnan pisos, ta mangammoana mo kaat nan waschincha amin inchanan isnan nenfalinancha. 16 Ya sia nan innalian nan nangununa ai kinwanina, Apo, nakadanak is simpoo ai pisos isnan ösang ai pisosmo. 17 Ya kinwanina ken sia, Umöi nan inangnem, kawis ka ai faa: tai kawis yan inangnem ai inöösetmo nan akiakit, at sika nan kag okom isnan simpoo ai ili. 18 Ya san mikadwa ai faa inmali ai kanana, Apo, nakadanak is lima ai pisos isnan ösang ai pisosmo. 19 Ya sia akös nan kinwanina ken sia, Kag ka akös okom isnan lima ai ili. 20 Ya san mikatlo inmali ai kanana, Apo, ilaim, nai nan pisosmo, ai innigtok ai kinnomonak isnan facho: 21 Tai inmigietak ken sika, tai enködködsöka ai taku: ta alaem nan igaimo inpöi, ya aniem nan igaimo inisek. 22 Ya kinwanina ken sia, Nan kalim kannai nan manusaak ken sika, ngaagka ai faa. Ammom ai enködködsöak ai taku, ai alaek nan adik inpöi, ya aniek nan igaiko inisek. 23 Ngagöm igai inpöi nan pisosko isnan Bank, ta isnan aliak, atchawatek nan kwak ya nan anakna? 24 Ya kinwanina issan nissasakang ai chöicha, Alaenyu ken sia nan pisos ya ichuayu isnan kawad nan simpoo ai pisos. 25 (Ya kinwanicha ken sia, Apo, wadai kannai nan simpoo ai pisos ken sia.) 26 Kanak mötachi ken chakayu, ai ulai sino ai kawadna, atma-agtan ya ulai sino ai maichana, atmakaan akos nan wadai ken sia. 27 Naimötachi nanchöicha ai fosok, ai adicha laichin nan enokomak ken chaicha, yaiyu chaicha isna, ya patöienyu isnan sassakangek. 28 Ya issan nangwanian Jesu isnannaicha, nangununa ai linmamag id Jerusalem. 29 Köt issan nisagenana id Bethphage ya Bethany, isnan filig ai nakwani ai Filig nan Olivas, finaana nan twa ai kakadwana, 30 Ai kanana, Umöikayu isnan ka ili ai sassakangenyu; isnan sumköpanyu atidchananyu nan kafayo ai oifun ai nitattaked, ai maid nanaksai; fadfachenyu ya yaiyu isna. 31 Ya mo wai taku ai mangwani ken chakayu, Ngagönyu fadfachen? atkananyu ken sia, Tai nan Apo nan mammaka ken sia. 32 Ya sanchöicha ai nafaa, inmöicha ya inchanancha nan kag isnan kinwanina. 33 Ya issan chacha namadfachan isnan kafayo ai oifun, nan nenkwa kinwanicha ken chaicha, Ngagönyu fadfachen nan oifun? 34 Ya kinwanicha, Nan Apo fagena sia. 35 Ya inyöicha ken Jesu: ya iniap-apcha nan fachocha isnan öchög nan oifun, ya inpasakaicha si Jesu. 36 Ya issan chana ayan, inchiplagcha nan fachocha isnan ka kalsa. 37 Ya issan sinmagenana isnan öskan isnan Filig ai Olivas, nan amin ai kakadwana ai angangsancha, inlapocha ai enlallaiad ya enchadayaw isnan Chios, ya isnan amin ai chadlus katataa ai inilacha; 38 Ai kanancha, Mabendika nan Ali ai umali isnan Ngatsan nan Apo; id Chaia nan u-umpa, ya gloria id tongcho. 39 Ya nan tapina isnan Fariseo ai nikalut isnan katakutaku, kinwanicha ken Sia, Apo, ochokam nan kakadwam. 40 Ya sinumfat ya kinwanina, ken chaicha, Kanak ken chakayu, Mo fumtug nannaicha, ulai nan fato kannai enfukaucha. 41 Ya issan nisagenana inilana nan ili, ya inakalana. 42 Ai kanana, Mo saia sika kannai ya ammom ulai adwani ai akiu, nan mangipagkinek ken sika! Naimötachi adwani kagcha nitafun isnan matam. 43 Tai atwadai nan akiu ai nan fosom at talaktakancha nan liwismo, ya likofencha sika ya silat-ancha nan amin ai liwismo, 44 Ya at tokangancha nan ka-afoafongmo ai ikis-ocha isnan ka lota, ya ananakmo ai entötöö kannai: atmaid kaiachencha is fato ai nikakaton isnan ibana: tai igaimo inkifek nan akiu ai mailam. 45 Ya sinumköp isnan simfaan ya inlapona ai mangipafala isnan cha enilako ischi, ya isnan cha enlako; 46 Ai kanana, ken chaicha, Naikolit, ai Nan afongko sia nan afong ai mangapyaan; naimötachi ai kinaebyu ai kag liang si aköwan. 47 Ya kawakawakas ai nenisolo isnan Simfaan Naimötachi nan nangato ai pachi ya nan escribas ya nan ap-apo isnan taku inianapcha nan mamatöiancha ken Sia. 48 Ya maid mangangnenancha, tai nan amin ai taku kagcha chadlus igkikifek nan nanngölancha ken Sia.

20

1 Ya isnan ösang ai akiu issan chana nangisoloan isnan taku ya chana ikwani nan Evanhelio isnan Simfaan, köt inmali ken Sia nan nangato ai pachi ya nan escribas ya nan amam-a, 2 Ai kanancha ken Sia, Ivfakam ken chakami, Sino nan nangwani ai angnem nannaicha, paimo sino nan nangifaag ken Sika isnan mangangnenam? 3 Ya sinumfat ya kinwanina ken chaicha, Wadai akös nan ifaagko ken chakayu; ya sumfatkayu ken Saken. 4 Nan nenfunyakan Juan nalpo ngen id chaia, paimo isnan lota? 5 Ya natotyacha ai kanancha, Mo kanantaku Ai nalpo id chaia, atkanana, Ngagönyu igai avfoloten mampai? 6 Naimötachi, mo kanana, Ai nalpo isnan taku, nan amin ai taku atfumaogcha ken chataku, tai chadluscha avfoloten ai si Juan ya profeta. 7 Ya sinumfatcha ai adicha ammo mo ento nan nalpoana. 8 Ya kinwanin Jesu ken chaicha, Adik akös ivfaka ken chakayu mo sino nan nangwani ai angnek nannaicha. 9 Kecheng inlapona ai nangwani isnannai ai ogokud isnan taku; Nan ösang ai taku nangivfuag isnan ufas, ya kinaiadna isnan cha kannai enlagfu, ya inmöi isnan adadchawi ai ili, ai ma-auni nan nentötöiana ischi. 10 Ya issan fufukasan, finmaa is faa issanchöi chaenlagfu, ta mangagtanancha ken sia isnan fölkas nan infuagcha; nai mötachi san enlagfu ai chöi cha finaigcha sia ya inpakaancha ai maid inalana. 11 Ya finmaa is teken ai faa: kasincha finaig ya ngaag nan inangangnencha ken sia, ya inpataolicha ai maid inalana. 12 Ya kasin finmaa is mikatlo; inpachalacha akös nan awakna, ya inpakaancha. 13 Kecheng kinwanin san nenkwa isnan fuag nan ufas. At ngag nan angnek? Atfaalek nan anakko ai chadlusko lailaichin: at awai nget padchayawancha sia mo ilaincha. 14 Naimötachi issan nangilan nan chaenlagfu, natotyacha ai kanancha, Nannai nan manawid: öntaku patöien sia ta enkwataku nan matawid. 15 Sia nan nangipakaanancha ken sia isnan fuag, ai namatöiancha. Ya atngag ngen nan angnen san nenkwa isnan fuag ken chaicha? 16 Atumati ai mamatöi issanchöi ai enlagfu, ya ichuana nan fuag isnan teken. Ya issan nanngölancha, kinwanicha, Asup ya ipawan nan Chios. 17 Ya inilana chaicha ai kanana, Ngag nan kanan nannai ai naikolit, Nan fato ai inlakuin nan chaenkaeb, sia nan wödwöcha ai nikaeb isnan soingo? 18 Mo wai maekchag issan chöi ai fato, magkutekuteb nan awakna, ya mo sino nan maekchakana at mapsimapsit. 19 Issanchöi chadlu ai akiu, nan nangato ai pachi ya nan escribas ya inianapcha nan mangalancha ken Sia: ya inmögietcha isnan taku, tai köcha't ammo ai chaicha nan naikwanian nannai ai ogokud. 20 Ya ini-ilacha Sia ya finmaacha is taku ai kagcha mangititiim ai enpaila ai kasuncha kawis, mo lang wai chengencha is kalina ai mangichalatancha isnan mangyöiancha isnan okom ya kofinyachol. 21 Ya infakacha ken Sia, ai kanancha, Apo, ammomi ai usto nan kanam ya nan isolom, ya issuem nan cham itcho isnan taku, ya titiwa nan angnem ai mangisolo isnan kag kannai isnan filin nan Chios: 22 Aikö lawa nan mamaiachanmi isnan fuis ken Caesar, paimo adi? 23 Naimötachi inmatonana nan kanancha ai ngaag ai angnencha, ya kinwanina ken chaicha, Ngagön kayu sumailo ken Saken? 24 Umippailakayu ken Saken is ösang ai siping. Sino nan nenkamös ya sino nan naisolat? Sinumfatcha ai kanancha, Si Caesar. 25 Ya kinwanina ken chaicha, Faiachenyu mampai ken Caesar nan kwan Caesar, ya faiachenyu isnan Chios nan kwan Chios. 26 Ya maid kalina is nangalancha ken Sia isnan sassakangen nan taku: ya nataacha isnan söfatna ya maid kasincha kinwani. 27 Kecheng ai inmali nan tapina ai Saduceo ai mangwani ai maid resureksion, ya infakacha ken Sia, 28 Ai kanancha, Apo, si Moses nan nangisolat ken chakami isnan lötög, ai mo saia wai taku ai natöi nan akina, ai kaiachena nan asawana ya maid anakcha, san taku atassawaena san ilekas ya umanakcha ai kag anak san akina. 29 Wadai maachi nan pito ai sinagi: ya san yuna inmasawa ya natöi ai maid anakcha. 30 Ya san mikadwa inmasawana sia, ya natöi ai maid anakcha. 31 Ya san mikatlo inmasawana sia, ya sia nan inmat ken chaicha amin ai pito: ya natöicha amin ai maid anakcha. 32 Ya issau anongusna natöi san fafai. 33 Ya kecheng mo is kasin fumalaan nan natöi, sine mampai nan menasawa ken sia? tai pito nan nangasawa ken sia, 34 Ya si Jesu sinumfat ken chaicha ai kanana, Nan taka is nannai ai lawag chacha umafong ya pa-asawen chaicha: 35 Naimötachi nan mangchan isnan chöi ai lawag, ya isnan resureksion isnan natöi, tai mamasmek ai kawischa, adicha umafong ya adicha pa-asawen: 36 Paimo adicha matmatöi; tai mikis-ucha isnan anhel, ya chaicha nan ananak nan Chios, tai ananakcha isnan Resureksion. 37 Nan kasin fumalaan nan natöi initchon kannai Moses, isnan naikolit isnan Chapong, issan nangingatsanana isnan Apo ai Chios Abraham, Chios Isaak ya Chios Jakob. 38 Tai adi Sia nan Chios nan natöi, naimötachi Sia nan Chios nan matataku: tai Sia nan mattatakuancha amin. 39 Kecheng nan tapina ai escribas sinumfatcha ai kanancha, Apo, kawis nan kinwanim. 40 Ya issan anongus sanchöi igaicha inkatkatpö ai enfaka ken Sia. 41 Ya kinwanina ken chaicha, Ngag nan mangwaniancha ai si Kristo ya anak David? 42 Kinwanin kannai David, isnan liblo ai Salmos, Nan Apo kinwanina isnan Apok, Tumokchoka isnan awanko, 43 Enkana's mangippaiak isnan fosom isnan kag katinan nan chapanko. 44 Si David ngatsanena mampai Sia ai Apo, ngag nan angnena ai Sia nan anakna? 45 Kecheng isnan mamanngölan nan amin ai taku, kinwanina isnan kakadwana, 46 Möianyu nan escribas, ai menlaiad ai manalan ai ancho nan fachocha, ya laichincha nan machadayaw isnan ka palasa, ya nan kangatoan ai tokchoan isnan sinagogaa ya isnan kakkakanan. 47 Ya okatencha nan kokwan nan ilekas ya kagcha adi paila nan na-ngaakancha, ai ma-auni nan enkapyakapyaancha: amamamöd nan chusa ai atchawatencha.

21

1 Ya si Jesu nentangad ya inilana nan kakachangayan ai cha nangippöi isnan pilakcha isnan akob ai entötöfan nan siping. 2 Ya inilana nan ösang ai posi ai ilekas ai chanaippöi nan twa ai siping. 3 Ya kinwanina, Titiwa kanak ken chakayu, Nannai ai posi ai ilekas kag sia nan ka-adachan nan inpöina ken chaicha amin: 4 Tai nan amin ai nai cha, nan nasawa nan inpöicha isnan maichauchau isnan Chios; naimötachi nannai, isnan kaposina, inpöina nan amin nan ikattakuna. 5 Ya nan tapina ai taku infaagcha ai kawis nan inangnencha ai nangaeb isnan Simfaan, ai nalaglakayan nan fato, ya angsan akös nan nichudua, ya kinwanina, 6 Is nannaicha ai ilainyu, atumchan nan akiu, ai maid fato ai nikakaton isnan taken ai adi maikoob. 7 Ya infakacha ken Sia ai kanancha, Apo, kaat ngen nan atummatan nannaicha? ya atngag ngen nan maton mo umat nannaicha? 8 Ya Sia kinwanina, Ilainyu ta adikayu nissawa: tai atangsan nan umali isnan Ngatsanko, ai kanancha, Saken nan Kristo; nai kankanin nan akiu: adikayu mampai umonod ken chaicha. 9 Mo chengenyu mötachi ai wai faluknit ya wai ngomangaongao, adikayu maanögiet: tai chadlus u-umat una nannaicha; ta nan mankaiana adi kannai migkisan. 10 Kecheng kinwanina ken chaicha, Nan taku isnan ösang ai lota at faluknitencha nan taku isnan teken ai lota, ya nan ösang ai fatawa at faluknitena kannai nan teken ai fatawa: 11 Ya atwai chachama ai yoka isnan natkonatkon, ai ili, ya nan menokangan ya nan pisti; ya nan kakögiet ai maila ya katataa ai maton id chaia. 12 Isnan adi ummatan una nannaicha, atalaencha chakayu, ya palikatencha chakayu, ya atippöicha chakayu isnan sinagoga ya isnan favfaluchan, ya atmayöi kayu isnan sassakangen nan ali ya nan okom tai isnan Ngatsanko. 13 Isnan mavfuasan una, nannaicha ai umat at kagcha paUa nan kagkawisyu. 14 Sasagkanaenyu mampai isnan posoyu, ai atadiyu simken una mo ngag nan isfatyu. 15 Tai atagtak chakayu is kali ya nan mangtokanyu ai adicha mavfalin ai sawanan paimo sivfatan nan amin ai fosoyu. 16 Ya nan chakokoyu, nan agiyu, nan ötat-adyu ya nan lilwidyu, man atmangichua ken chakayu isnan fosoyu; ya nan tapina ken chakayu atpappatöicha. 17 Ya atliligten nan amin ai taku chakayu, mokötai isnan Ngatsanko. 18 Ulai mo siachi, ulai ösang ai fuok isnan oloyu adi ka-amas. 19 Isnan mangikatpölanyu, at chakayu nan menkwa isnan lengagyu. 20 Ya mo is mangilanyu isnan Jerusalem ai malikob isnan kasolcha-solchacho, sia nan chadlusyu ammoen ai kankanin nan map-ukana. 21 Mo saia lumayaucha is ka filig nan entötöö id Judea; ya mo saia kamaancha nan entötöö isnan ka ili; ya nan wadai isnan falan nan ili, adicha sumköp. 22 Tai sia nannaicha nan akiu nan favfalösan, ta umatcha nan amin ai naikolit. 23 Naimötachi kassösögang nanchöicha ai fabfafai ai mallitoncha ya nanchöicha ai cha enpasoso, isnanchöicha ai akiu! tai at wadai chachama ai likat isnan ka lota, ya maliliketcha nan taku ai naicha. 24 Ya atmatokangcha isnan fadyok ya atmafuigcha ai mafalud isnan amin ai ili: ya nan Jerusalem at magkatinan isnan Gentiles, enkana's chumukposan nan akiu nan Gentiles. 25 Ya atwadai mangimatonan isnan akiu ya isnan fuwan ya isnan tokfifi; ya isnan ka lota, nan kaili-ili atchadluscha enchanag, ai kagcha mataa isnan enwaakan nan faifai ya nan kabongau; 26 Ya nan poson nan taku atkumapuicha isnan ögietcha, ya isnan mangisögchanancha isnan atumat isnan ka lota; tai atmaid manongnong id chaia. 27 Ya kecheng atilaincha nan Anak nan Taku ai umali ai enkagkawaen nan lifoo, ai chachama nan fikas na ya nan gloriana. 28 Ya is ummatan nannaicha kecheng itangadyu nan oloyu, tai kankanin nan umchanan nan Maisalakanyu. 29 Ya kinwanina ken chaicha nan ogokud: Ilainyu nan chapong ai higos, ya nan amin ai kaiu; 30 Mo maoschekancha, ilainyu ya ammoyu kannai ai kankanin nan kösip. 31 Ya atkag todi akös mo ilainyu nan ummatan nannaicha, atammoyu ai kankanin nan Fatawan nan Chios. Titiwa kanak ken chakayu, Atadi matöi nan amin ai taku ai matataku adwani, enkana's adi umat amin nannaicha. 32 Nan chaia ya nan lota atma-amas, naimötachi nan köwanik adi ka-amamas. 33 Ya mömöianyu nan awakyu kannai, ta köyut la chacha maen nan masisimkanyu isnan lailaichin nan awakyu, 34 ya isnan enfutengan ya isnan mavfaka is nannai ai katatakuanyu, ya siachi nanchöi ai akiu ma-anöchan ken chakayu. 35 Tai atumchan ai kag fawang is nannaicha ai matattaku isnan amiamin ai lota. 36 Ilainyu mampai, ya kadin enkapyakayu, ta fummikasanyu ai mangikasiu isnan amin ai ngaag ai atumat, ya mikitakchigkayu isnan sassakangen nan Anak nan Taku. 37 Ya ka-akiakiu ai chanenisolo isnan ka Simfaan, ya isnan kalafilafi chakumaan isnan ili, ai chaumöi isnan filig ai enngatsan nan Filig ai Olivas. 38 Ya nawiitcha nan amin ai taku ai inmali ken Sia isnan Sinfaan, ta manngölancha ken Sia.

22

1 Ya kankani nan Pista nan tinapay ai maid levfachulana, ai makwani ai Paskwa. 2 Ya nan nangato ai pachi ya nan escribas inianapcha nan mamatöiancha ken Sia; tai inmögietcha isnan taku. 3 Kecheng kag sinumköp si Setan isnan nimnim Judas, ai nakwani ai Iskariot, ai sia san ösang isnan simpoo yad twa. 4 Ya inmöi ai nikitotya isnan nangato ai pachi ya isnan kakapitan, isnan angnena ai mangichauchau ken Jesu ken chaicha. 5 Ya nenlinawacha ya kinvvanicha ai agtancha sia is pilak. 6 Ya intanoina ai inianapna nan angnena ai mangichua ken Sia ken chaicha, isnan ka maid nan angsan ai taku. 7 Kecheng inumchan nan akiu nan tinapay ai maid levfachulana, ai maingilin nan kordero isnan Paskwa. 8 Ya finaana cha Pedro ken Juan ai kanana, Umöikayu ai mangisakana isnan Paskwa ta manganan taku. 9 Ya kinwanicha ken Sia, Ento nan laichim ai mangisakananmi? 10 Ya kinwanina ken chaicha, Is sumköpanyu isnan ili, atabtena chakayu nan ösang ai taku ai manasakfat isnan sakchuan nan chanum; sia nan onochenyu isaan afong ai sögpena. 11 Ya atkananyu isnan nennafong, Kanan nan Apo ken sika, Ento nan kwalto ai mikikkan-ak isnan kakadwak isnan Paskwa? 12 Ya atitchona ken chakayu nan ösang ai chakchakö ai kwalto ad tongcho, ai na-nonongnong; at ischi nan ensagkanaanyu. 13 Ya inmöicha, ya inchanancha ai kag isnan kinwanina ken chaicha, ya insakanacha nan Paskwa. 14 Ya issan inumchanan nan olas, Sia ya nikitokcho isnan simpoo yad twa ai kadwana. 15 Ya kinwanina ken chaicha, Chadlusko nilallaiad ai mikikan ken chakayu is nannai ai Paskwa, adwani, ai adiak afus enlikat. 16 Tai kanak ken chakayu. At adik kankanen nannai, enkana's mailan nannai ai umat isnan Fatawan nan Chios. 17 Ya inignana nan tasa ya nanyaman, ya kinwanina, Alaenyu nannai ya chatchatakanyu: 18 Tai kanak ken chakayu ai Atadiak kasin uminum isnan chanum nan fökas nan ufas, enkana's umchanan nan Fatawan nan Chios. 19 Ya inmala is tinapay ya nenyaman, ya chinatagna ken chaicha, ai kanana, Sia nannai nan Awakko, ai onichua ken chakayu: ikkanyu nannai, ai kagyu mangililan ken Saken. 20 Ya sia akös isnan tasa ai issan afuscha nanganan, ai kinwanina, Nannai ai Tasa sia nan kagkagaeb ai Tolog isnan Chalak, ai mikoiag ken chakayu. 21 Ilainyu mötachi, nan liman nan mangichua ken Saken, misasakang kannai isnan lamisa. 22 Tai titiwa ai umöi nan Anak nan Taku, ai kag naiismek ai masasakana; kassösögang mötachi nan chöi ai taku ai mangichua ken Sia! 23 Ya inlapocha ai nenasifakfaka mo sino ken chaicha nan atmangangnen is nannai. 24 Köcha't nensussusma mo sino ken chaicha nan makwani ai kangatoan. 25 Ya kinwanina ken chaicha, Nan all isnan kailiili ai chaicha nan Apocha, ya nan menfilin ken chaicha nan makwani aimamachang isnan taku. 26 Naimötachi chakayu adi siachi nan ikkanyu: nan nangato mötachi ken chakayu atsia nan kag navfafa, ya nan apapo atsia nan kag enfaa. 27 Ya sino nan nangatngato, nan ngen tumokcho isnan lamisa, paimo nan chaenpafaa? Aikö adi ngen nan tumokcho isnan lamisa? Saken mötachi, nan kag enpafaa ken chakayu. 28 Naimötachi chakayu ai nivfuifuig ken Saken isnan nasailoak. 29 Ya Saken idchachauchauko ken chakayu nan ösang ai fatawa, ai kag akös nan nangidchachauchauan Ama ken Saken. 30 Ta asup ya mangananyu ya uminumanyu isnan lamisak isnan fatawak, ya tumokchokayu isnan kag tokchoan nan ali, ai kag jues isnan ananak nan simpoo yad twa ai sinpangapo isnan Israel. 31 Ya kinwanin nan Apo, Simon, Simon, nan si Setan ya nilallaiadna ai mangala ken chakayu, ta mangagkaakana ken chakayu ai kag trigo. 32 Naimötachi inkapyak sika, ta adim mangiwaiangan isnan afolotmo: ya is enfavfawiam, fachangam ta fumikasam nan kakadwam. 33 Ya kinwanina ken Sia, Apo, atmivfuifuigak chadlu ken Sika, ai ulai isnan favfalochan ya ulai isnan ötöi. 34 Ya kinwanina, Kanak kea sika, Pedro, ai is adi una enkokkookau nan kawitan adwani, sia nan mangissutam is mamitlo isnan mangammoam ken Saken. 35 Ya kinwanina ken chaicha, Issan namaalak ken chakayu, ai maid chokauyu, paimo kokudyu, aikö kayu nenkolang? Ya kinwanicha, Adi. 36 Kecheng kinwanina ken chaicha, Naimötachi, adwani ulai sino ai wai chokauna, ittakiua kannai: ya mo wai maid fadyokna, ilakona nan fachona ya lumako is fadyok. 87 Tai kanak ken chakayu, nannai ai naisolat, chadlusko angnen, Ya Sia ya nittakam isnan chafinmasol: tai nannai ai naisolatak, atumat ken Saken. 38 Ya kinwanicha, Apo, nai nan twa ai fadyok. Ya kinwanina ken chaicha, Kecheng chöi. 39 Ya finmala, ya inmöi isnan Filig ai Olivas, ai kagna inpaingsa; ya inmonodcha akös nan kakadwana ken Sia. 40 Ya issan inumchanana ischi, kinwanina ken chaicha, Mangapyakayu ta adiyu ayan isnan masailoan, 41 Ya inmadchawi is akit ken chaicha, ai kag nan ka-adchawian nan maibkasan nau fato, ya nenpalintomeng ya nangapya, 42 Ai kinwanina, Ama, mo sia nan laichim, kaanim nannai ai tasa ken Saken: ulai mo adi siachi, faken nan laichik, nan umat mötachi nan laichim. 43 Ya nenpaila ken Sia nan ösang ai anhel ai nalpo id chaia, ai nangipavfikas ken Sia. 44 Ya invamamamödna ai nangapya, tai chachama nan nensikafana: ya nan lingetna ya kag chala ai adacha nan nentödtöd isnan ka lota. 45 Ya issan tinmakchikana isnan nangapyaana, ya inmaliana isnan kakadwana, inchanana chaicha ai nasöyipcha isnan ensösögangancha. 46 Ya kinwanina ken chaicha, Ngagönkayu masöyip? Tumakchigkayu, ya mangapyakayu, ta mo lang umöikayu isnan masailoan. 47 Ya issan chana enkalian, köt nikaspo ai inmali nan ayaka ai taku, ai inpangpangon Judas chaicha, ai sia nan ösang isnan simpoo yad twa: ya sinmagen ken Jesu ta mamisiyuana ken Sia, 48 Kinwanin mötachi nan si Jesu ken Sia, Judas, aiko fisitu nan mangichualam isnan Anak nan Taku? 49 Ya issan nangammoancha chadlu isnan sa umat, sanchöicha ai nisasagen ken Sia, kinwanicha ken Sia, Apo, aikömi fakaken isnan fadyok? 50 Ya nan ösang ken chaicha finakagna nan faan nan nangato ai pachi ya kinaana nan nenawan ai kowengna. 51 Naimötachi sinumfat si Jesu ai kanana, Yuyayu ta siachi. Ya kinniwana nan kowengna ya kag chadlu nikaeb. 52 Kecheng kinwanin Jesu isnan nangato ai pachi, ya isnan kangatoan isnan Simfaan, ya isnan amam-a ai inmalicha ken Sia, Aikökayu finmala ai kag mangala isnan aköwan, ta enfafadyokkayu ya enpapakokayu? 53 Issan kakawadko ken chakayu isnan Simfaan, isnan kawakawakas, igaiyu inyuyad nan limayu ai mangala ken Saken: naimötachi sia nan olas ai kwayu ya kwan Setan, ai sia nan fikas nan abafulinget. 54 Kecheng alaencha Sia, ya inpangocha ya inyöicha isnan afong nail kangatoan ai pachi. Ya si Pedro inmonod isnan adadchawi. 55 Ya issan nenapuiancha isnan kawan nan patio ya naamongcha ai tinmokcho, si Pedro nikitokcho ken chaicha. 56 Naimötachi nan ösang ai faa ai mamadkit, inilana sia, ai nikitokcho isnan apui, ya iniilana sia, ya kinwanina, Nannai ai taku ya nifuig akös ken Sia. 57 Ya sia inisutna ai kanana, Adik pai ammo Sia. 58 Ya adi na-auni, nan teken ai taku inilana sia, ya kinwanina, Ösang ka akös ken chaicha. ya kinwanin Pedro, Faken ak pai. 59 Ya issan nalpasan nan ösang ai olas, nan teken ai taku chadlusna kinwani, Titiwa nannai ai taku ya nivfufuig akos ken Sia: tai sia ya i-Galilea. 60 Ya kinwanin Pedro, Adik pai ammo mo ngag nan kanam. Issan chana enkalian, kot nigkisan ai nenkokkook nan kawitan. 61 Ya nan Apo ya nensakong ya ilana si Pedro. Ya si Pedro sisinmekna san kalin nan Apo, ai kinwanina ken sia, Is adi enkokkook nan kawitan, isutmo Saken is mamitlo. 62 Ya si Pedro finmala ya chachama nan nensösögangana ai nenaka. 63 Ya sanchöicha ai namafantai ken Jesu innoyongancha Sia, ya tinampakcha Sia, 64 Ya issan nangngolopancha ken Sia, tinampakcha nan kamösna, ya kinwanicha ken Sia, Mo Profeta Ka, ifaagmo mo sino nan namampak ken Sika? 65 Ya angsan akös nan chacha kinkinwani ai chachama ai ngaag ken Sia. 66 Ya issan nawiitana, na-amoamongcha ai inmali nan amam-a nan taku, ya nan nangato ai pachi, ya nan escribas, ya inpangocha Sia isnan ensumaliancha, ai kanancha, 67 Aikö Sika nan si Kristo? ifaagmo ken chakami. Ya kinwanina ken chaicha, Ulai mo ifaagko ken chakayu, adiyu avfoloten: 68 Ya akös mo wai ivfakak ken chakayu adikayu sumfat, paimo adiyu palofusen Saken. 69 Mipalpo adwani nan Anak nan Taku attumokcho isnan awan ai liman nan Chios, ai mavfalina amin. 70 Kecheng kinwanicha, Aikö Sika nan Anak nan Chios? Ya kinwanina ken chaicha, Kananyu ai Saken. 71 Ya kinwanicha, Aikö wai kasin masapul ai saksi? Tai chataku kannai nan nanngö isnan kalina kannai.

23

1 Kecheng nan amin ai naamong ai taku tinmakchigcha ya inyöicha Sia ken Pilato. 2 Ya inlapocha ai mangisaklang ken Sia, ai kanancha, Inchananmi nannai ai taku ai chana fukalen nan katakutaku, ai chana ipawa nan mamaiachan nan taku isnan fuis ken Caesar, ai kanana ai Sia kannai si Kristo, ai ali. 3 Ya si Pilato infakana ken Sia, ai kanana, Aikö Sika nan Alin nan Judios? Ya sinumfat ai kanana, Sia nan kanam. 4 Kecheng kinwanin Pilato isnan nangato ai papachi ya isnan taku, Maid idchanak ai fasol nan taku ai nai. 5 Ya inyamamödcha ai nenkali, ai kanancha, Chana fukalen nan katakutaku, ai chaenisolo isnan amin ai ili id Judea, ai nipalpo id Galilea enkana's nannai ai ili. 6 Issan nanngölan Pilato isnan nangwaniancha isnan Galilea, infakana mo nan taku ai nai ya i-Galilea. 7 Ya issan nanngölana ai Sia nan amas an nenalian Herod nan kawadna, inpayöina ken Herod, ai sia akös nan wadai id Jerusalem issan chöicha ai akiu. 8 Ya issan nangilan Herod ken Jesu, chachama ai nenlinawa: tai solit chadlu nan nenlaiachana ai mangila ken Sia, tai chinamagna nan angsan ai inangnena; ya insösögchanana nan mangilana isnan ösang ai katataa ai angnena. 9 Ya nenfakafaka ken Sia: ya maid mötachi inisfatna. 10 Ya nan nangato ai papachi ya nan escribas ai tinmatakchig ya nenfofongetcha ai nangisaklangancha ken Sia. 11 Ya si Herod ya nan solchachona inototyokancha Sia ya inamamsiwcha Sia, ya finachoana Sia isnan enpokau ai facho, ya inpataolina Sia ken Pilato. 12 Ya issanchöi ai akiu cha Pilato ken Herod nenaloyuscha, tai nenasisongetcha issan lapona. 13 Ya issan nangayakan Pilato isnan nangato ai papachi ya nan apap-o ya nan taku 14 Kinwanina ken chaicha, Inyaiyu ken saken nan taku ai nai, ai insaklangyu ai chana fukalen nan taku: nai, sinumaliak Sia, isnan sassakangenyu, ya maid inchanak is fasol nan taku ai nai is nannaicha ai, mangisaklanganya ken Sia. 15 Ya si Herod akös maid inchanana ai fasolna: tai inpataolina Sia ken chataku: ya ilainyu, maid mamatöian ken Sia. 16 Chusaek angkai is akit, sak'et palofusen. 17 (Tai masapul ai wai palofusena ken chaicha, isnan Pista) 18 Ya nakigsancha ai nenfukau ai kinwanicha, Payadchawim nannai ai taku, ya si Barabas nan palofusem ken chakami: 19 (Sia ya nafalud tai finokana nan taku ya pinmatöi) 20 Si Pilato kasina kinwani ken chaicha, tai laichina ai mangipalofus ken Jesu. 21 Nenfukaucha mötachi ai kinwanicha, Sia nan ikolusmo, Sia nan ikolusmo! 22 Ya kinwanina ken chaicha isnan mikatlo, Ngag ngen nan inangnena ai ngaag? Maid inchanak ai mamatöian ken Sia; atchusaek Sia sak'et palofusen. 23 Ya inlutlulutlutcha ai nangifukau, ai ivfakacha nan maikolusana. Ya nangafakcha isnan nangivfukauancha ya isnan nenkalian nan nangato ai papachi. 24 Ya si Pilato intanlina ken chaicha ya kinwanina ai atumat nan laichincha. 25 Ya inpalofusna ken chaicha nan nafalud ai namoka isnan taku ya nenpatöi, ai sia nan kinchaucha: naimötachi inchuana si Jesu isnan laichincha. 26 Ya issan nangyoancha ken Sia, inalacha nan ösang ai taku, ai nenngatsan is Simon, ai i-Sirene, ai kalkalpo isnan falan nan ili, ya inpasakfatcha ken sia nan kolus, ta sakfatena ai umonod ken Jesu. 27 Ya ayaka nan taku ai inmonod ken Sia, ya nan fabfafai ai cha enaka ai ensösögangcha ken Sia. 28 Nensakong mötachi si Jesu ken chaicha, ai kanana, Chakayu ai fabfafai si Jerusalem, adikayu umaka ken Saken, nan awakyu mötachi ya nan ananakyu kannai nan akalanyu, 29 Tai atumchan nan akiu ai mangwaniancha, Mabendika nan maid anakna, ya nan fabfafai ai igai inmanak, ya nan igai nenpaspasoso. 30 Sa cha't lapoan ai mangwani isnan atatakchag ai filig, Maekchagkayu ken chakami; ya isnan filig ai adi atakchag, Kabonanyu chakami. 31 Ya mo umat nannaicha isnan alalangta ai kaiu, atngag ngen nan umat isnan nalalango? 32 Ya wadaicha akös nan twa ai aköwan ai nayöi ai nifuig ken Sia, ta mapatöicha 33 Ya issan inumchanancha isnan lota ai makwani is Kalvari, ischi nan nangikolusancha ken Sia, ya sanchöicha aköwan, nan ösang isnan awanena, ya nan ösang isnan igkichena. 34 Kecheng kinwanin Jesu, Ama, pakawanem chaicha, tai adicha ammo mo ngag nan angnencha. Ya chinöwadchöwacha nan fachona ya finankingcha, mo sino nan maka-ala. 35 Ya nan taku tinmatakchigcha, ai nangiila ken Sia. Ya nan Apap-o akös inamamsiwcha Sia ai kinwanicha, Insalakana nan tapina; isalakana kannai nan awakna mo Sia si Kristo ai pinilin nan Chios. 36 Ya nan solchacho akös inamamsiwcha Sia, ai inmalicha ken Sia, ya inchuacha ken Sia nan alak ai pinmagkasueng, 37 Ai kanancha, Mo saia Sika nan Alin nan Judios, isalakam kannai nan awakmo. 38 Ya wadai akös nan naippöi isnan totongchoen nan olona ai naisolat isnan kali ai Greek, ya Latin, ya Hebrew, ai kanana, Sia nannai nan Alin nan Judios. 39 Ya nan ösang ai akowan ai naikolus inamamsiwna Sia, ai kanana, Mo saia Sika si Kristo, isalakam chakami ya nan awakmo. 40 San mötachi kadwana sinumfat ai inochokana sia, ai kanana, Aiköka adi umögiet isnan Chios, tai nai chaka machusa? 41 Ya chaita, ya usto nan madchusaanta; tai chawatenta nan chusa ai usto, isnan inangnenta: naimötachi sitona ya maid finmasolana. 42 Ya kinwanina ken Jesu, Apo, iismektno saken isnan umchanam isnan Fatawam. 43 Ya kinwanin Jesu ken sia, Titiwa kanak ken sika, Adwani ai akiu atmifuigka ken Saken id Paradiso. 44 Ya isnan nentengan nan akiu ya finmullinget isnan ulai entona isnan lawag enkana's nan mikasiam ai olas. 45 Ya nan akiu ya finmullingrt ya nan veil isnan Simfaan ya nakadwa. 46 Ya issan nenfukauan Jesu, kinwanina, Ama, nan liman nan mangidchiniak isnan lengagko. Ya afusna nangwanian is nannai kinraaan nan lengagna. 47 Ya issan nangilan nan kapitan nan inmat, chinadayawna nan Chios, ai kanana, Titiwa ai usto nan taku ai nai. 48 Ya nan amin ai taku ai naamong ai nangila issanchöi, ya issan afuscha nangilan kinogkogcha nan takebcha, ya kiamaancha. 49 Ya nan amin ai amammon Jesu, ya nan fabfafai ai nangonod ken Sia isnan nalpoancha id Galilea, tinmatakchigcha isnan adachawi, ai chacha ilan sanchöi inmat. 50 Köt wadai nan ösang ai taku ai enngatsan is Josef, ai konsehal, ya sia ya kawis ai taku ya usto: 51 (Sia ya igai nikitanoi isnan kinwanicha ya isnan inangnencha;) sia ya i-Arimatea ai ilin nan Judios ai sia nan nangisösögchana isnan Fatawan nan Chios. 52 Sia ya inmöi ken Pilato ya kinchauna nan awak Jesu. 53 Ya inpanadna, ya kinnomona isnan kawsi ai facho, ya insaadna isnan ösang ai liang ai nakaongan isnan fato, ai maid naippöi is taku. 54 Ya sanchöi ai akiu ya nan akia nan Mensagkanan isnan Pista, ya kankanin Sumafacho. 55 Ya san fabfafai ai chöicha ai nifuig ken Sia, ai nipalpo id Galilea, inmonodcha ya inilacha nan liang ya nan inangnena ai nisaad nan awakna. 56 Ya tinmolicha ya nensakanacha is mirra ya aloes ya inmilengcha isnan Savfacho ai akiu ai miyonod isnan filin.

24

1 Ya isnan laplapona ai akiu isnan chominko, issan chadlus fibikat, inmalicha isnan ka liang ya inyaicha nan mirra ai insakanacha, ya wadai nan tapina ai nittakin ken chaicha. 2 Ya inchanancha nan fato ai na-alin ai nakaan isnan ka liang. 3 Ya sinumköpcha ya igaicha inchanan nan awak nan Apo ai Jesu. 4 Ya nakaeb, ai issan nenchanakancha issanchöi, köt wadai nan twa ai taku ai tumatakchigcha isnan sagencha, ai sumili nan fachocha: 5 Ya issan inmögietancha ya nenpalintomengcha, nan taku kinwanicha ken chaicha, Ngagönyu anapen nan matataku isnan kawad nan natöi? 6 Sia ya maid isna, tai finmala: simkenyu nan kin wanina issan kakkawadna id Galilea, 7 Ai kanana, Nan Anak nan Taku atmasapul ai maichauchau isnan liman nan ngaag ai taku, ya maikolus, ya isnan mikatlo ai akiu atkasin fumala. 8 Ya sinmekcha nan kinwanina. 9 Ya nensakongcha ya inmöicha ai en mangifaag isnan amin ai naicha isnan simpoo ya osa, ya isnan tapina. 10 Sia san cha Maria Magdalena ya si Joanna, ya si Maria ai inam James, ya san tapina ai fabfafai ai nittakin ken chaicha, ai chaicha nan nangifaag is nannaicha isnan Apostolis. 11 Ya kanancha en apödcha yangkai ai enkak-ali, ya igaicha inavfolot. 12 Kecheng ai tinmakchig si Pedro ya nentagtag ai inmöi isnan ka liang: issan nenyuchongana, nan facho angkai nan inilana, ai nanatkön, ya nattataa ai sinmaa, isnan inmat. 13 Köt issan chöi chadlu ai akiu, wadai inmöi ai twa ai kadwan Jesu, isnan ka ili ai enngatsan is Emmaus, ai twa ai olas nan kaadchawina id Jerusalem. 14 Ya tinotyacha nan amin ai inmat. 15 Ya nikaspo ai issan chacha entotoyyaan, si Jesu chadlu sinmagen, ai nittakin ken chaicha. 16 Naimötachi igaicha paat naka immaton ken Sia. 17 Ya kinwanina ken chaicha, Ngag nan ogokochenyu ai chayu kanan isnan chayu manalanan? Ya tinomköcha as kag nenkokonges nan kamöscha. 18 Ya sinumfat nan ösang ai enngatsan is Kleopas, ai kanana ken Sia, Aiköka ködköcheng ai mangili id Jerusalem nan adi mangammo isnan inmat is nannaicha ai akiu? 19 Ya kinwanina ken chaicha, Ngag al inmat? Ya kinwanicha ken Sia, Nan inmat ken Jesu ai i-Nazareth, ai Sia nan Profeta ai nakavfalin isnan kinwanina ya isnan inangnena, isnan sassakangen nan Chios ya isnan amin ai taku, 20 Ai nan kangatoan ai papachi ya okom inchauchaucha Sia ai napatöi, ya inkoluscha Sia. 21 Naimötachi, inchidchinömi ai Sia nan Manfut isnan Israel: Ya nannai akös ai akiu sia chadlu nan mikatlo ai nipalpo issan inmattan nannaicha. 22 Ya nan tapina akös ai fabfafai inmippataacha ken chakami, ai nawiitcha ai inmöi isnan ka liang: 23 Ya igaicha inchanan nan awakna, ya inmalicha ai nangifaag ai kanancha ai inilacha akös nan anhel, ai kinwanicha ai Sia ya matataku. 24 Ya inmöicha akös nan tapina ai kadwami isnan ka liang ya inchanancha akös ai kag issan kinwanin nan fabfafai: naimötachi igaicha inila si Jesu. 25 Kecheng kinwanina ken chaicha, O chakayu ai akit nan nimnimyu, ai adiyu avfoloten nan amin ai kinwanin nan Profeta! Aiköyu adi ammo ai si Kristo masapul ai pötkena nannaicha, et kecheng sumköp isnan kawad nan gloriana? 26 Ya inpaammona ken chaicha nan amin ai naisolat ai 27 atumat ken Sia, ai nipalpo ken Moses ya nan amin ai Profeta. 28 Ya sinmagencha isnan ka ili ai ayancha: ya kag chauumöi. 29 Naimötachi nilutlutancha Sia ai kanancha, Mikittötööka ken chakami: tai sösödchömna ya nafuas nan akiu. Ya sinumköp ai nikittötöö ken chaicha. 30 Kecheng ai, issan nikitokchoana ai nisakang ken chaicha, inalana nan tinapay, ya binendikana ya pinitangna ya inchuana ken chaicha. 31 Ya nenimmatonancha ken Sia: ya nenamas ken chaicha. 32 Ya nenasikawanicha, Aikö kag adi nenlinawa nan nimnimta issan chana nikittotoyyaan ken chaita isnan kalsa, ya issan nangipaammoana ken chaita isnan Naikolit? 33 Ya natanakchigcha ya tinmolicha id Jerusalem, ya inchanancha nan simpoo ya ösa ya nan ibacha ai naamong, 34 ai kanancha, Nan Apo ya finmala ai titiwa, Ya nenpaila ken Simon. 35 Ya infaagcha nan amin ai inmat isnan kalsa, ya nan nangimatonancha ken Sia issan chana nangipanganan isnan tinapay. 36 Ya issan chacha nangifaakan, si Jesu tinmakchig kannai isnan enkagkawaencha, ya kinwanina ken chaicha, Umpakayu. 37 Ya nangögötcha, ya inmögietcha, ya kanancha mo iilaincha nan lengag. 38 Ya kinwanina ken chaicha, Ngagonkayu umögiet? ya ngagönkayu enchanag isnan nimnimyu? 39 Ilainyu nan limak ya nan chapanko, tai Saken kannai: apwapenyu Saken ya ilainyu: tai nan lengag maid fökasna ya maid ingitna ai kag isnan ilainyu ai wadai ken Saken. 40 Ya issan nangwaniana is nannai, inpailana nan limana ya nan chapana ken chaicha. 41 Ya issan adicha nangavfolotan isnan chachama ai laiadcha, ya nataacha, kinwanina ken chaicha, Wadai ngen maischa isna? 42 Ya inchuacha ken Sia nan nadchawös ai ikan ya nan tinfan si yukan. 43 Ya inalana ya kinana isnan sassakangencha. 44 Ya kinwanina ken chaicha, Sia nannaicha nan köwani ai kinwanik issan kakawadko ken chakayu, ai nan amin ya masapul ai makaeb ai naisolat isnan filin Moses, ya isnan Profeta, nan atumat ken Saken. 45 Kecheng ai inpaammona ken chaicha, ta mangtökancha isnan Naisolat 46 Ya kinwanina ken chaicha, Sia nan naisolat, ta masapul ai mapalikat si Kristo, ya isnan mikatlo ai akiu kasin fumala. 47 Ya maipaammo nan menfavfawian ya nan mapakawanan isnan fasol isnan Ngatsanko, isnan amin ai kailiili, ai nipalpo id Jerusalem. 48 Ya chakayu nan saksi is nannaicha. 49 Ya ilainyu ai atpaliek ken chakayu nan öpchas kinwanin Ama ken chakayu: naimötachi id Jerusalem nan entötöianyu enkana's mamawatanyu isnan fikas ai nalpo id tongcho. 50 Ya inpangona chaicha enkana id Bethany, ya tinanangna nan limana, ya binendikana chaicha. 51 Ya issan chana namendikan ken chaicha, köt nakaan ya nayöi id chaia. 52 Ya nenchadayawcha ken Sia, ya nenlilinawacha ai tinmoli id Jerusalem: 53 Ya kawakawakas ai wadaicha isnan Simfaan ai enchadayaw isnan Chios. Amen.