Bugis Bible - New Testament

The New Testament of our Lord and Saviour Jesus Christ

1 Iyanaè assossorenna nènè-nènèna Yèsus Kristus, wijanna Daud, wijanna Abraham. Polè ri Abraham lettu ri Daud tarokii aseng-ngaseng makkuwaèwè: 2 Abraham, Ishak, Yakub, Yèhuda sibawa silessu-silessurenna, Pèrès sibawa Zèra (indo'na mennang riyaseng Tamar), Hèzron, Ram, Aminadab, Nahason, Salmon, Boas (indo'na iyanaritu Rahab), Obèd (indo'na iyanaritu Rut), Isai, sibawa Arung Daud. 6 Polè ri Daud lettu ripalina tau Israèliè ri Babèl tarokii aseng-ngaseng makkuwaèwè: Salomo (indo'na iyanaritu bainèna riyolo Uria), Rèhabèam, Abia, Asa, Yosafat, Yoram, Uzia, Yotam, Ahas, Hizkia, Manasyè, Amon, Yosia, Yèkhonya sibawa silessu-silessurenna. 12 Polè ri wettunna bangsa Israèliè ripali ri Babèl lettu ajajiyanna Yèsus tarokii aseng-ngaseng makkuwaèwè: Yèkhonya, Sèaltièl, Zèrubabel, Abihud, Elyakim, Azur, Zadok, Akhim, Eliud, Elèazar, Matan, Yakub, Yusuf lakkainna Maria. Napolè ri Maria jajiwi Yèsus iya riteppuè Kristus. 17 Jaji polè ri Abraham lettu ri Daud, iya manenna engka seppulo eppa assossoreng. Polè ri Daud lettu ri wettu ripalina bangsa Israèliè ri Babèl engkato seppulo eppa assossoreng. Polè ri wettu ripalina bangsa Israèliè ri Babèl lettu ajajiyanna Kristus, engkato seppulo eppa assossoreng. 18 Makkuniè curitana passalenna ajajiyanna Yèsus Kristus. Indo'-Na iyanaritu Maria, mattunangangngi sibawa Yusuf. Iyakiya riwettu dè'napa mennang nakawing, mattampu'ni Maria. Dè' naissengngi Yusuf rèkko mattampu'i Maria nasaba akuwasanna Rohna Allataala. 19 Iyaro Yusuf tunanganna, iyanaritu sèddiwi tau iya tuli turusiyèngngi hukkunna agamaè. Jaji maèloi pettuiwi attunanganna, iyakiya dè' narukkangngi, kuwammengngi dè' namasiri Maria ri yolona tau maègaè. 20 Mattengngangngi Yusuf timbat-timbangngi iyaro gau'è, mannippiwi. Ri laleng nippinnaro, naitai sèddi malaèka'na Puwangngè makkeda lao ri alèna, "Yusuf wijanna Daud, aja' mumètau kawingi Maria; saba' iyaro ana' engkaè ri laleng tampu'na, jajiwi polè ri akuwasanna Rohna Allataala. 21 Najajiyangngi matu Maria sèddi ana' worowanè. Iyaro ana'è harusu'i muwèrèng aseng Yèsus, nasaba Napassalama'i matu umma'-Na polè ri dosana mennang. " 22 Iya manennaro kajajiyangngi makkuwaro kuwammengngi nakajajiyang aga iya napowadaè Puwangngè naolai nabin-Na, iyanaritu, 23 "Mattampu'i matu sèddiè ana'dara nanajajiyang sèddi ana' worowanè. Iyaro ana'è riyasengngi matu Immanuèl. " (Immanuèl iyanaritu ada Ibrani iya bettuwannaè, "Allataala engka sibawakki". ) 24 Moto'nana Yusuf, napogau'ni aga iya napowadaè iyaro malaèka'na Puwangngè lao ri alèna. Kawinni sibawa Maria. 25 Iyakiya riwettu dè'napa najajiyangngi Maria iyaro ana'è, dè' nasilureng Yusuf sibawa Maria. Jajinnana iyaro ana'è, Nasenni Yusuf Yèsus.

Matius 2

1 Yèsus rijajiyang ri kota Bètlèhèm ri wanuwa Yudèa; ri wettu apparèntanna Arung Hèrodès. Iyaro wettuè siyagangngarè ahli wèttowing polè alau, polèi ri Yèrusalèm. 2 Makkutanai mennang kègi-kègi, "Kègai jaji iyaro ana'è, iya jajiyè untu' mancaji arunna tau Yahudiè? Riitai wèttowin-Na mompo ri seddè alau, na engkaki polè maèlo sompai Alèna. " 3 Wettunna naèngkalinga Arung Hèrodès iyaro, tassèleng senna'ni, makkuwatoro sininna tauwè ri Yèrusalèm. 4 Nasuroni sininna kapala imangngè sibawa guru-guru agamana bangsa Yahudiè polè maddeppungeng. Nainappa makkutana ri mennang, "Kègai maèlo jaji Arung iya najjanciyangngè Allataala?" 5 Nappèbali mennang, "Ri kota Bètlèhèm ri wanuwa Yudèa. Nasaba makkuwaniyè naoki nabiè, 6 'Iko Bètlèhèm, ri wanuwa Yèhuda, sitonget-tongenna tenniyako kaminang baiccu ri yelle'na kota-kota mapongngè ri Yèhuda. Nasaba polè ri iko polèi matu sèddi pamimping iya pimpingngèngngi umma'-Ku Israèliè. ' " 7 Puranana nalolongeng pappakatajangngèro, naobbini Hèrodès iyaro ahli wèttowing polè alauè mammekko-mekko. Nainappa makkutana ri mennang, siyaganna tongeng nappammula paita iyaro wèttowingngè. 8 Purairo nasuroni mennang lao ri Bètlèhèm sibawa pasengngèwè, "Laono musappai sibawa madècèd-dècèng passalenna Ana'èro. Narèkko muruntu'ni, paissengika, kuwammengngi ulaoto sompai. " 9 Nalaona mennang. Ri tengnga laleng, wèttowing iya naitaè mennang riyolo ri seddè alau, paitasi paimeng. Temmakana senna'na mennang mitai iyaro wèttowingngè poddiyoloiwi mennang, nainappa mappèsau ri yasè'na onronna iyaro Ana'è. 11 Muttama'ni mennang ri laleng bolaèro nanaitai iyaro Ana'è sibawa Maria, indo'-Na. Suju'ni mennang nanasompai iyaro Ana'è, nainappa natimpa onrong waramparanna, nanakkasuwiyangengngi lao ri ana'èro ulaweng, kamennyang, sibawa mur. 12 Napparèngngerangenni Allataala lao ri mennang ri laleng nippi kuwammengngi aja' nalisu ri Hèrodès. Jaji lisuni mennang molai laleng laingngè. 13 Joppanana sining ahli wèttowingngèro, nappaitanni alèna malaèka'na Puwangngè lao ri Yusuf ri laleng nippi. Makkedai iyaro malaèka'è, "Engka akkattana Hèrodès sappai iyaro Ana'è untu' mpunoi. Rimakkuwannanaro oto'no, tiwii iyaro Ana'è sibawa indo'-Na manyingkiri' ri Masèrè'. Onrono kuwaro narapi mabbicarasi-Ka lao ri iko. " 14 Moto'ni Yusuf, nainappa iyatoro wenniè natiwii iyaro Ana'è sibawa indo'-Na manyingkiri' ri Masèrè'. 15 Monroni kuwaro mennang narapi matè Hèrodès. Makkuwaniro nakajajiyang aga napowada Puwangngè naolai nabin-Na, makkuwaè, "Uwobbii Ana'-Ku polè ri Masèrè'. " 16 Wettunna naisseng Hèrodès makkedaè ribellèi ri ahli wèttowing polè alauèro, macai senna'ni. Nainappa napparèntang untu' mpuno manengngi ana' worowanè ri Bètlèhèm sibawa ri seddèna iya makkèumuru duwattaungngè liyawa. Sicoco'i iyaro sibawa pappakatajang iya nalolongengngè polè risining ahli wèttowingngèro, passalenna wettunna paita iyaro wèttowingngè. 17 Makkuwaniro kajajiyang aga pura napowada Nabi Yèrèmia, iyanaritu, 18 "Riyèngkalingai sadda mpatingngè ri Rama sadda maddararing sibawa teri. Rahèl mpatingiwi ana'-ana'na; dè' namaèlo risalèwori saba' dè'ni mennang. " 19 Matènana Hèrodès, wettunna engka mupi Yusuf ri Masèrè', nappaitanni alèna malaèka'na Puwangngè ri Yusuf ri laleng nippi. 20 Makkedai iyaro malaèka'è, "Sining tau iya maèloè mpunoi iyaro Ana'è matèni. Rimakkuwannanaro oto'no, alai iyaro Ana'è sibawa indo'-Na, namulisu ri Israèl. " 21 Moto'ni Yusuf, nanatiwii iyaro Ana'è sibawa Maria lisu ri Israèl. 22 Iyakiya ri munri naèngkalingai Yusuf makkedaè Arkèlaus, ana'na Hèrodès sullèiwi ambo'na mancaji arunna wanuwa Yudèa. Jaji mètauni Yusuf lao kuwaro. Puranana lolongessi pappaitana Puwangngè ri laleng nippi, laoni ri daèra Galilèa. 23 Monroni kuwaro ri kota riyasengngè Nazarèt. Namakkuwannanaro kajajiyanni aga iya napowadaè nabi-nabiè passalenna iyaro Ana'è: "Riyasengngi matu Tau Nazarèt. "

Matius 3

1 Iyaro wettuè, polèni Yohanès Paccemmè ri padang kessi'è ri Yudèa mappammula makkatobba. 2 Adanna, "Toba'no polè ri dosa-dosamu, saba' dè'na namaitta napparènta matu Allataala selaku Arung!" 3 Yohanès iyanaè tau nakkattaiyè Nabi Yèsaya ri laleng adannaè, "Engka tau gora-gora ri padang kessi'è, 'Passadiyangengngi laleng Puwangngè; palapparengngi laleng Alèna. ' " 4 Pakèyang napakè Yohanès polèi ri bulu untaè. Babbanna polèi ri bingkulangngè, sibawa anrèna incalè sibawa cani ale'. 5 Maèga tau polè ri Yèrusalèm, polè ri sininna wanuwa Yudèa sibawa daèra-daèra seddèna Salo Yordan lao ri Yohanès. 6 Nangakuini mennang dosa-dosana, sibawa ricemmèni ri Yohanès ri Salo Yordan. 7 Maègato tau Farisi sibawa Saduki lao ri Yohanès untu' ricemmè. Iyakiya wettunna mennang naita polè, makkedani lao ri mennang, "Tau majako iko! Niga powadai makkedaè weddikko leppe' polè ri pahukkungenna Allataala iya maèloè polè? 8 Appaitanni ri laleng pangkaukemmu makkedaè toba'no polè ri dosa-dosamu. 9 Aja' muwasengngi muwullèi leppe' polè ri pahukkungengngè sibawa powadai makkedaè Abraham iyanaritu nènè-nènèmu. Engngerangngi, polè ri batu-batuèwè, naullèi Allataala mèbbu wija-wijanna untu' Abraham! 10 Sadiyani wasè untu' tubbangngi pong ngajuè lettu ri ure'-ure'na. Tungke' pong ngaju iya dè'è napowassèlè' buwa makessing ritubbangngi matu naribuwang ri laleng apiè. 11 Ucemmèko sibawa uwai untu' pannessai makkedaè toba'no polè ri dosa-dosamu; iyakiya iya maèloè polè ri munrikku, nacemmèko matu sibawa Rohna Allataala enrengngè api. Lebbi battowai na iyya. Muwi untu' tiwii sapatun-Na dè'to usitinaja. 12 Ri liman-Na engka pattapi untu' tapi manengngi gandon-Na gangka mapaccing. Napaddeppungengngi matu gandongngè ri laleng lappoè, iyakiya sininna awanna Natunui matu ri laleng api iya dè'è nawedding peddè. " 13 Iyaro wettuè laoni Yèsus ri Salo Yordan polè ri Galilèa. Nalaona kuwaro ri Yohanès sibawa mèllauwi naricemmè. 14 Iyakiya nacobai Yohanès sampèyangngi parèllaun-Naro. Makkedai Yohanès, "Iyya sitongenna harusu' ricemmè ri Bapa'. Namakkekkuwangngè mala Bapa' lao ri iyya. " 15 Iyakiya mappèbaliwi Yèsus, "Leppessanni siya untu' makkekkuwangngè. Saba' nallalengiro naripogau' iya manenna napuwèloè Allataala. " Jaji nacemmèni Yohanès Yèsus. 16 Puranana ricemmè, masitta'ni Yèsus massu polè ri uwai ri saloèro. Tappa tattimpa' muni langiè nanaitai Yèsus Rohna Allataala nonno pada-pada jangang-jangangngè ri yasè'na Yèsus. 17 Nainappa naèngkalingani saddanna Allataala makkeda, "Iyanaè Ana'-Ku iya Uwamasèiyè. Napèsennangi atik-Ku. "

Matius 4

1 Nainappa ripimpinni Yèsus ri Rohna Allataala lao ri padang kessi'è untu' ricobai ri Ibillisi'. 2 Patappulo esso patappulo wenni Yèsus dè' nanrè. Nainappa napèneddingi malupuè. 3 Polèni Ibillisi' sibawa makkeda, "Ana' Allataala-Koto? Nah, suroi batu-batuèwè mancaji roti. " 4 Nappèbali Yèsus, "Ri laleng Kitta'è tarokii: Tolinoè dè' naullèi tuwo polè ri rotiè bawang, iyakiya polè towi ri tungke' ada-ada iya napowadaè Allataala. " 5 Purairo natiwini Ibillisi' Yèsus ri Yèrusalèm, kota marajaè, nanataroi ri coppo Bolana Puwangngè. 6 Nainappa makkeda Ibillisi' lao ri Yèsus, "Ana' Allataala-Koto? Rèkko makkuwaitu luppe'no; saba' ri laleng Kitta'è engka taroki makkuwaèwè, 'Nasuroi matu Allataala malaèka'-malaèka'-Na linrungi-Ko, naduppai-Ko matu mennang sibawa limanna mennang, kuwammengngi nadè' nataggèssa ajè-Mu ri batuè. ' " 7 Nappèbali Yèsus, "Iyakiya ri laleng Kitta'è taroki towi, 'Aja' mucobaiwi Puwang Allataalamu. ' " 8 Nainappa natiwisi Ibillisi' Yèsus ri bulu iya matanrè senna'è nanappaitangngi ri Alèna sininna akkarungengngè ri linoè sibawa sininna asugirenna. 9 Nainappa makkeda Ibillisi' lao ri Yèsus, "Iya manennaè uwèrèk-Ko matu, rèkko suju'-Ko sompaka. " 10 Nappèbali Yèsus, "Addèsu'ko Ibillisi'! Ri laleng Kitta'è tarokii: Sitinajako sompai Puwang Allataalamu, sibawa tumaningiwi Alèna bawang!" 11 Angkanna Ibillisi' nasalaini Yèsus, napolèna malaèka'-malaèka'è tumaningiwi. 12 Wettunna naèngkalinga makkedaè, riputtama'ni Yohanès ri laleng tarungkuè, manyingkiri'ni Yèsus lao ri Galilèa. 13 Nasalaini Nazarèt, naonro ri Kapernaum ri wirinna Tappareng Galilèa ri daèrana Zèbulon sibawa Naftali. 14 Ri laleng napogau'na Yèsus iyaro gau'è, kajajiyanni aga napowada Nabi Yèsaya: 15 "Tana Zèbulon sibawa tana Naftali, ri laleng laowè ri tasi'è, ri liwenna Salo Yordan, Galilèa tanana tau tenniyaè Yahudi! 16 Bangsa tuwoè ri laleng pettangngè naitani tajang mattappaè! Lao ri iya monroè ri laleng wanuwa apettangenna amatèngngè mompoi cahaya macakkaè!" 17 Mappammulai wettuèro nabbirittanni Yèsus, "Toba'no polè ri dosa-dosamu, nasaba dè'na namaitta napparènta Allataala selaku Arung!" 18 Wettunna Yèsus mattengngang joppa ri wirinna Tappareng Galilèa, mitani duwa pakkaja, iyanaritu Simon (iya riyasengngètto Pètrus) sibawa anrinna, Andrèas. Mattengngangngi mennang mattikkeng balè ri tapparengngèro sibawa jala. 19 Nakkeda Yèsus lao ri mennang, "Laono mai accowèno ri Iyya. Maèlo-Ka pagguruko majjala tau. " 20 Tappa matteruni nasalai jalana mennang nainappa maccowèriwi Yèsus. 21 Joppani Yèsus matteru, nainappa naitasi duwa tau massilessureng laingngè, iyanaritu Yakobus sibawa Yohanès, ana'-ana'na Zèbèdèus. Silaongngi mennang ambo'na mattengngang padècèngiwi jalana ri laleng lopinna. Riyobbi towi mennang ri Yèsus, 22 nanatteru mennang nasalai lopinna sibawa ambo'na nainappa naccowèri Yèsus. 23 Ri Galilèa, mattulilini Yèsus ri sininna wanuwaèro. Mappagguruni risining bola assompangngèro, sibawa nappallebbangengngi Karèba Madècèngngè makkedaè mapparèntai matu Allataala sibawa napajjappai sining tau sala-salangngè sibawa malasaè. 24 Iyaro karèbaè passalenna Yèsus mallebbanni risininna wanuwa Siria, angkanna maèga tau lao ri Alèna. Natiwii mennang sining tau iya nakennaè maddupa-rupang lasa, sibawa maddupa-rupangngè asussang: sining tau atama-tamangngè roh maja, malasa matè manu'-manu'è, sibawa iya pèso'è napajjappa manengngi Yèsus. 25 Maèga senna tau maccowèriwi Yèsus iyaro wettuè -- engka polè ri Galilèa, polè ri Seppuloè Kota, polè ri Yèrusalèm, polè ri Yudèa sibawa engkato polè ri wanuwa ri liwenna Yordan.

Matius 5

1 Wettunna naita Yèsus tau maègaèro, menrè'ni ri tompo'-Na bulu-buluè. Tudannana, polèni ri Alèna sining tau iya maccowèriyèngngi, 2 nainappa napammulaini paggurui mennang: 3 "Masennangngi tau iya marasa dè'è pakkullènna na banna maddennuwang ri Puwangngè bawang; anggotanai iyanaritu umma'na Allataala! 4 Masennangngi tau iya messè atiè; risalèworiwi matu mennang ri Allataala! 5 Masennangngi tau iya pakariyawaèngngi atinna; narupaiwi matu Allataala jancin-Na lao ri mennang! 6 Masennangngi tau iya muddaniyè pogau'i èlona Allataala; ripaggenne'i matu apparelluwanna mennang ri Allataala! 7 Masennangngi tau iya mamasèiyèngngi tau laingngè; riyamasèi towi matu mennang ri Allataala! 8 Masennangngi tau iya mapaccingngè atinna; naissengngi matu mennang Allataala. 9 Masennangngi tau iya tiwiè assidamèngeng ri yelle'na tauwè; riyakuiwi matu mennang ri Allataala selaku ana'-ana'-Na! 10 Masennangngi tau iya nakennaè paccallang nasaba napogau'i èlona Allataala; anggota umma'nai Allataala! 11 Asennakko rèkko ricellako, ricalla, sibawa ripètenna nasaba Iyya. 12 Nabi-nabi iya tuwoè ri yolomu pura towi ricalla pada-padaèro. Mariyoriyono sibawa marennu, saba' battowai saromu iya napassadiyangengngèkko Puwangngè. " 13 "Ikona iyanaritu pejjèna linoè. Rèkko makawai pejjè, weddigga ripejjèi paimeng? Dè'na gaga gunana, sangadinna riyabbèyang mani nalèjja'-lèjja'i tauwè. 14 Ikona iyanaritu tajanna linoè. Kota monroè ri yasè'na bulu-buluè, dè' nariyullèi subbui. 15 Dè'gaga tau palluwa lampu, nainappa natongko iyaro lampuè sibawa baku. Mala nataroi iyaro lampuè ri onrong lampuè, kuwammengngi nabbèrè tajang lao ri tungke' tau ri laleng bolaèro. 16 Makkuwatoniro tajammu harusu'i mattappa ri yolona tauwè, kuwammengngi naitai tauwè pangkaukeng-pangkaukemmu madècèngngè, nainappa napojiwi Ambo'mu ri surugaè. " 17 "Aja' muwangga'i makkedaè engka-Ka polè untu' pallennye'i hukkung iya nabbèrèyangngè Musa sibawa pappagguruwanna nabi-nabiè. Engka-Ka polè tenniya untu' pallennye'i, iyakiya untu' mappaitangngi bettuwanna iya tongengngè. 18 Engngerangngi! Ri wettu engkana mupa langiè sibawa linoè, muwi sèddi hurupu' iyarè'ga tetti iya kaminang baiccu'è ri laleng hukkungngèro, dè' matu nariledda, rèkko dè'pa nakajajiyang maneng! 19 Rimakkuwannanaro, nigi-nigi majjalèkkaiwi sala sèddinna polè risining parèntaèro muwi iya kaminang baiccu'è, sibawa paggurui tau laingngè pogau'i makkuwaèttoro, mancajiwi matu iya kaminang baiccu'è ri yelle'na umma'na Allataala. Sibalè'na, nigi-nigi pajoppai iyaro hukkungngè sibawa paggurui tau laingngè pogau'i makkuwaèttoro, mancajiwi matu battowa ri yelle'na umma'na Allataala. 20 Jaji, èngngerangngi: Dè' nakkullèko mancaji umma'na Allataala, rèkko dè' mupakacauriwi guru-guru agamaè sibawa sining tau Farisiè ri laleng pogau'i èlona Allataala!" 21 "Muwisseng makkedaè ri nènè-nènèta engka pappagguruwang pada-padaèwè: Aja' muwabbuno; nigi-nigi mabbuno, harusu'i riadèlèki. 22 Iyakiya makkekkuwangngè makkeda-Ka lao ri iko, nigi-nigi macai lao ri tau laingngè, riadèlèkiwi matu; sibawa nigi-nigi cella-cellai tau laingngè, riadèlèkiwi matu ri yolona Mahkamana Agamaè. Sibawa nigi-nigi makkeda ri tau laingngè, 'Donggo', sitinajai riyabbèyangngi ri laleng api ranakaè. 23 Rimakkuwannanaro, rèkko sala sèddinna ri yelle'mu mattengngang makkasuwiyangengngi pabbèrèna lao ri Allataala, nanaèngngerangngi makkedaè engka tau mapeddi ati ri alèna, 24 sitinajai nasalai riyolo' pakkasuwiyannaro ri yolona mèzbaè, nalao sidamè iyaro tauwè. Purapiro, weddinni lisu nanakkasuwiyangengngi pabbèrèna ri Allataala. 25 Akkalarapanna engka tau mapparapekekko ri mahkamaè, sidamèko sibawa iyaro ri wettu engkana mupa wettu, sangadi dè'napa mulettu ri mahkamaè. Rèkko dè', nabbèrèyakko matu iyaro tauwè ri hakingngè, iya mabbèrèyangngèkko matu ri polisiè. Nainappa polisiè puttama'ko matu ri laleng tarungkuè. 26 Na èngngerangngi: Pasti dè' muwullèi massu polè ri tarungkuèro, riwettu dè'napa napura muwaja maneng sininna ridendangengngèkko. " 27 "Muwisseng makkedaè engka pappagguruwang pada-padaèwè: Aja' mumalaweng. 28 Iyakiya makkekkuwangngè makkeda-Ka ri iko: nigi-nigi mitai sèddiè makkunrai sibawa napessu maèlo pèjariwi, iyaro tauwè malawenni sibawa iyaro makkunraiè ri laleng atinna. 29 Rèkko mata ataummu nassabariko madosa, cukkèi namuwabbèyangngi iyaro mataè! Lebbi kessing muwi teddèng sala sèddinna anggota tubummu naiya sininna tubummu riyabbèyangngi ri laleng ranakaè. 30 Rèkko lima ataummu nassabariko madosa, rette'i namuwabbèyangngi iyaro limaè! Lebbi muwi teddèng siwali limammu naiya sininna tubummu muttama' ri ranakaè. " 31 "Engkato pappagguruwang makkuwaèwè: Tungke' tau iya massarangngè bainèna, harusu'i nawèrèng sure' telle. 32 Iyakiya makkekkuwangngè makkeda-Ka ri iko: nigi-nigi massarang bainèna padahal iyaro makkunraiè dè' nakèdo sala, nassabariwi iyaro bainè malaweng rèkko kawingngi paimeng iyaro bainèna. Sibawa nigi-nigi kawing sibawa makkunrai iya massarangngèro, malaweng towi. " 33 "Muwisseng makkedaè ri nènè-nènèta engka pappagguruwang makkuwaèwè: aja' muwassakkarengngi jancimmu. Aga pura muwajjanciyang sibawa mattanro ri yolona Allataala, harusu'i mupogau'. 34 Iyakiya makkekkuwangngè makkedaka lao ri iko: aja' sises-siseng muwattanro, muwi nasabbing langiè, saba' langiè iyanaritu kadèra arajanna Allataala, 35 iyarè'ga nasabbing tanaè, saba' tanaè iyanaritu akkalarenna ajè-Na; iyarè'ga nasabbing Yèrusalèm, saba' iyanaritu kotana Arung battowaè. 36 Aja'to muwattanro nasabbing ulummu, saba' dè' muwullèi mèbbui maputè gemme'mu iyarè'ga malotong, namuni silampa bawang. 37 Akkedako bawang, 'Eyyè' iyarè'ga 'Dè'' -- lebbi naiyaro polèi ri Ibillisi'. " 38 "Muwisseng makkedaè engkato pappagguruwang pada-padaèwè: mata risullèi mata, isi risullèi isi. 39 Iyakiya makkekkuwangngè makkeda-Ka lao ri iko: Aja' muwakkabale lao ri tau pogau'è ja lao ri iko. Sibalè'na rèkko naleppa'i tauwè pili ataummu, leppessangngi siya naleppa towi pili abèyomu. 40 Sibawa narèkko napparapekekko tauwè ri hakingngè, nanatuntu'i wajummu, wèrèng towi siya jumbamu. 41 Rèkko sèddiè tau makuwasa passako mèssangngi barangngè bèlana sèddi kilo, èssangngi duwa kilo bèlana. 42 Rèkko engka sèuwa naèllau tauwè ri iko, wèrèngngi siya. Sibawa aja'to musampèyangngi tau iya maèloè minreng sèuwa ri iko. " 43 "Muwisseng makkedaè engkato pappagguruwang pada-padaèwè: amasèiwi sellao-sellaomu namubenciwi sining balimmu. 44 Iyakiya makkekkuwangngè makkeda-Ka ri iko: amasèiwi sining balimmu, sibawa assempajangengngi sining tau iya cellaè'kko, 45 kuwammengngi mumancaji ana'-ana'na Ambo'mu ri surugaè. Saba' napaompoi Allataala mata esso-Na untu' tau makessingngè sibawa untu' tau iya majaètto. Napateppai bosinna untu' tau iya pogau'è atongengeng sibawa untu' tau iya pogau'è majaè. 46 Saba' rèkko iyami muwamasèi tau iya mamasèiyèkko, untu' aga Allataala harusu' nawale' pangkaukemmuro? Dè'ga nasining passinge' simaè pogau' towi makkuwaèro? 47 Narèkko banna sellao-sellaomu bawang mupassalama', aga alebbimmu? Sining tau iya dè'ètto naissengngi Allataala pogau' towi makkuwaèro! 48 Ambo'mu ri surugaè namasèiwi sininna tauwè sibawa sukku. Harusu' tokko makkuwaro. "

Matius 6

1 "Engngerangngi, aja' mupogau'i kewajibanna agamaè ri yolona tau maègaè kuwammengngi naitai tauwè. Rèkko mupogau'i makkuwaèro, dè' nariwèrèkko matu saro ri Ambo'mu ri surugaè. 2 Jaji rèkko mabbèrèko sidekka ri tau kasiyasiè, aja' mugora-gorangngi iyaro gau'è pada-pada iya napogau'è sining munapè'è. Napoji mennang pogau'i iyaro ri laleng bola assompangngè sibawa ri watattanaè, kuwammengngi naripoji ri tauwè. Engngerangngi purani mennang natarima sarona. 3 Iyakiya iko, rèkko mabbèrèko sidekka, abbèrèko sibawa mammekko-mekko, angkanna dè'gaga missengngi. 4 Leppessangngi siya iyaro pangkaukemmu dè'gaga missengngi muwi niga, sangadinna Ambo'mu ri surugaè. Naitai pangkaukemmu iya tassubbuèro nanawèrèkko matu saro. " 5 "Rèkko massempajakko, aja' mupada pada tau iya majjaiyèngngi. Napoji mennang massempajang sibawa tettong ri bola assompangngè enrengngè ri pèkka lalengngè kuwammengngi nariita ri tauwè. Engngerangngi iyanaro sarona natarima mennang. 6 Iyakiya rèkko massempajakko, uttama'ko ri bili'è, namutongkoi tange'na, namumassempajang ri Ambo'mu iya dè'è napaitaro. Na Ambo'mu iya mitaèngngi pangkaukemmu tassubbuè mpèrèkko matu saro. 7 Rèkko massempajakko aja' nakkolik-koling pada-pada tau dè'è naissengngi Puwangngè. Nasengngi mennang riyèngkalingai matu mennang nasaba sempajanna mennang iya malampè'èro. 8 Aja' mupada-pada mennang. Naisseng Ambo'mu aga muwapparellung, riwettu dè'napa muwèllauwi. 9 Jaji assempajakko makkuwaèwè: 'Ambo'ta ri surugaè: Iko ritu Allataala iya Sèuwaè. Tennapodo risompa-Ko sibawa ripakalebbi. 10 Iko ritu Arutta. Tennapodo mapparènta-Ko ri linoè, na èlo-Mu riturusi pada-pada ri surugaè. 11 Wèrèkki essoèwè inanrè iya riyapparelluwangngè. 12 Addampengekki polè ri asalatta, pada-padato pura riyaddampengenna tau iya pasalaè ri idi. 13 Aja' taleppessakki ateddèngeng ateppereng wettutta ricobai, iyakiya taleppessakki polè ri akuwasanna iya mappèjariyè. Ikona Arung makuwasa sibawa malebbi lettu mannennungeng. Amin. ' 14 Rèkko muwaddampengengngi tau iya pasalaè ri iko, Ambo'mu ri surugaè naddampengeng towi matu asalammu. 15 Iyakiya rèkko dè' muwaddampengengngi asalanna tau laingngè, Ambo'mu ri surugaè dè'to matu naddampengengngi asalammu. " 16 "Rèkko mappuwasako aja' mupajjameru'i rupammu pada-pada tau iya pojiyèngngi majjaiwi. Napinrai mennang rupanna kuwammengngi sininna tauwè naissengngi makkedaè mappuwasai mennang. Engngerangngi, iyanaro sarona pura natarima mennang. 17 Iyakiya rèkko mappuwasako, ajjumatako sibawa jakkaiwi gemme'mu, 18 kuwammengngi nadè' gaga missengngi makkedaè mappuwasako, sangadinna Ambo'mu bawang iya dè'è napaita. Naitai iyaro tassubbuè sibawa nawèrèkko matu saro. " 19 "Aja' mupaddeppungengngi alèmu waramparang ri linoè, ri onrong iya weddingngè nasolangi karat sibawa taisseng enrengngè panga polè mènnauwi. 20 Sibalè'na, paddeppungekko waramparang ri surugaè, ri onrong dè'è naullèi solangiwi karat, sibawa taisseng enrengngè panga dè' naullèi mènnauwi. 21 Saba' kègi-kègi waramparammu, kuwatowitu atimmu!" 22 "Mataè iyanaritu lampu untu' watakkalè. Rèkko macakkai matammu, matajangngi sininna watakkalèmu. 23 Iyakiya rèkko massalawui matammu, mapettakkape'i sininna watakkalèmu. Jaji rèkko lampuè ri laleng watakkalèmu mapettangngi, temmakana pettanna iyaro kalemmengngè!" 24 "Dè' sèddi tau mullèi majjama untu' duwa ponggawa. Saba' lebbi namasèiwi matu sèddiè naiya laingngè. Iyarè'ga lebbi matinului lao ri ponggawa sèddiè naiya laingngè. Makkuwatoniro iko. Dè' muwullèi majjama untu' Allataala sibawa untu' waramparangngètto. 25 Rimakkuwannanaro èngngerangngi; aja' mubata-bata passalenna atuwommu, iyanaritu aga maèlo muwanrè sibawa muwènung, iyarè'ga aga maèlo mupakè. Dè'ga atuwongngè lebbiwi naiya anrè, sibawa watakkalè lebbiwi naiya pakèyangngè? 26 Itai manu'-manu'è ri yelle'è, dè' mennang nattaneng, dè' naèngngala, sibawa dè'to napaddeppungengngi wassèlè tanet-tanenna ri laleng lappona. Namuni makkuwaro Ambo'mu ri surugaè piyarai mennang! Dè'ga mulebbi mangke naiya manu'-manu'è? 27 Nigana polè ri iko ri laleng abata-batangngè mullèi palampèiriwi umuru'na muwi cèddè? 28 Magi mubata-bata passalenna pakèyammu? Pènessaiwi bunga-bunga bakungngè iya tuwoè ri padangngè. Iyaro bunga-bungaè dè' najjama sibawa dè'to natennung; 29 iyakiya muwi Arung Salomo iya sugi makkuwaèro, dè' napakè pakèyang iya siggelloè bunga-bungaèro! 30 Iyaro wellaè tuwoi ri padangngè essoèwè, na pappabajana ritunui gangka cappu. Namuni makkuwaro, Allataala bèlo-bèloiwi iyaro wellaè makkuwamani kessinna. Apalagi iko! Iyakiya iko makurang teppe'ko! 31 Aja' mubata-bata sibawa makkeda, 'Aga matu riyanrè', iyarè'ga, 'Aga matu riyènung', iyarè'ga, 'Aga matu ripakè'? 32 Iyaro gau'-gau'è tuli nalellungngi sining tau iya dè'è naissengngi Allataala. Padahal Ambo'mu ri surugaè naisseng makkedaè muwapparelluwang manengngiro. 33 Jaji usahakangngi riyolo', kuwammengngi napparènta Allataala ri laleng atuwo-tuwommu sibawa pogau'ni èlo-Na. Naiya manenna laingngè nawèrèttokko matu Allataala. 34 Rimakkuwannanaro, aja' mubata-bata passalenna esso bajaè. Saba' baja engka muto abata-batanna. Iyaè essoè genne'ni asussanna, dè'na naparellu mutambai. "

Matius 7

1 "Aja' muwadèlèkiwi tau laingngè, kuwammengngi na alèmu dè'to nadèlèkiwi Allataala. 2 Saba' pèkkugiko madèlèkiwi tau laingngè, makkuwatoro Allataala madèlèkiko matu. Na ukkurang mupakè untu' tau laingngè, napakè towi matu Allataala untu' iko. 3 Magi muwitai bulisa'è ri laleng matanna silessuremmu, na balo'è ri laleng matammu dè' mupèneddingiwi? 4 Pèkkugi mullèi makkeda lao ri silessuremmu, 'Laono mai upassurekko bulisa'è polè ri matammu', na ri laleng matammu engka balo'? 5 Eh munapè'! Passuni riyolo' iyaro balo'è polè ri matammu, nainappako makkita sibawa manessa, nanamuwullèi passui bulisa'è polè ri matanna silessuremmu. 6 Aja' muwèrèngngi barang mapaccingngè lao ri asuè, kuwammengngi iyaro asuè dè' nagiling luruiko. Aja' muwèrèngngi mutiyara bawiè, kuwammengngi iyaro bawiè dè' nalèjja'-lèjja'i iyaro mutiyaraè. " 7 "Ellauno, namutarimai matu. Sappai, namulolongengngi matu. Getto'i, naritimpakekko matu tange'è. 8 Nasaba tau iya marèllauwè, natarimai matu; tau iya massappaè nalolongengngi matu; na tau iya maggettoè ritimpakengngi matu tange'. 9 Ri yelle'mu engkaga ambo' iya mpèrèngngèngngi batu ana'na, rèkko mèllauwi roti? 10 Iyarè'ga mpèrèngngi ula, rèkko mèllauwi balè? 11 Namuni majako, iyakiya muwisseng towi mabbèrèyangngi iya makessingngè lao ri ana'-ana'mu, apalagi Ambo'mu ri surugaè? Lebbi-lebbipi Ambo'mu ri surugaè nabbèrèyangngi matu iya makessingngè lao ri tau iya mèllauwèngngi ri Alèna. 12 Gaukengngi tau laingngè pada-pada iya muwèloriyè rigaukekko ri mennang. Iyanaro poko'na hukkunna Musa sibawa nappagguruwangngè nabi-nabiè. " 13 "Uttama'no lalo ri tange' macipiè, saba' tange' sibawa laleng iya mattujuè ri ranakaè battowa sibawa malowang, na maèga tau molai. 14 Iyakiya macipii sibawa mawatangngi tange' nenniya laleng iya tiwièngngi tauwè ri atuwongngè. Na banna cèddè tau iya lolongengngèngngi. " 15 "Atike'ko lao ri nabi-nabi palsuè. Polèi matu mennang ri iko sibawa mallarikkodo bimbala', iyakiya sitongenna mennang pada-padai asu ale' masekkangngè. 16 Muwissengngi matu mennang polè ri wassèlè pangkaukenna. Alekale maddoriè dè' napassu anggoro, sibawa alekale maddoriè dè' napowassèlè buwa ara. 17 Polè ri pong ngaju macommo'è rilolongengngi buwa makessingngè, na polè ri pong ngaju iya dè'è namacommo, buwa maja. 18 Pong ngaju macommo'è dè' nakkullè powassèlè'i buwa majaè, sibawa pong ngaju iya dè'è namacommo dè' naullèi powassèlè buwa makessingngè. 19 Tungke' pong ngaju iya dè'è naullèi powassèlè buwa makessingngè, ritubbangngi naritunu. 20 Makkuwatoniro nabi-nabi palsuè. Muwissengngi matu mennang polè ri wassèlè pangkaukenna. " 21 "Dè' naiya maneng tau iya mobbièk-Ka, 'Puwang, Puwang', mancaji matu anggotana umma'na Allataala, iyakiya banna bawang sining tau iya pogau'èngngi èlona Ambo'-Ku ri surugaè. 22 Ri Esso Kiyame', maèga tau makkeda matu ri Iyya, 'Puwang, Puwang, tenniyaga ri laleng asemmu Puwang puraki palettu'i pasenna Allataala? Sibawa tenniyaga ri laleng asemmuto Puwang puraki paddèsu'i sètangngè enrengngè pakangka maèga anu makalallaingngè?' 23 Iyakiya mappèbali-Ka matu, 'Dè' naengka uwissekko! Esu'ko polè kuwaè, iko pogau'èngngi majaè!' " 24 "Tau iya mèngkalingaèngngi ada-adak-Kuè sibawa turusiwi, pada-padai tau mapanrè iya patettongngèngngi bolana ri yasè'na batuè. 25 Wettunna teppa bosiè sibawa polèi lempe'è enrengngè anginrajaè munrui bolaèro, iyaro bolaè dè' namaruttung saba' ripatettongngi ri yasè'na batuè. 26 Na tau iya mèngkalingaèngngi ada-adak-Kuè, iyakiya dè' naturusiwi, pada-padai tau madonggoè iya patettongngèngngi bolana ri yasè'na kessi'è. 27 Wettunna teppa bosiè, sibawa polè lempe'è enrengngè anginrajaè munrui bolaèro, maruttunni iyaro bolaè. Namaladde senna asolangenna!" 28 Angkanna pajani Yèsus mappagguru, nasining tau iya engkaè kuwaro hèrang senna'ni mèngkalingai pappagguruwan-Na. 29 Saba' Alèna mappaggurui sibawa akuwasang, dè' napada-pada guru-guru agamana mennang.

Matius 8

1 Nonnoni Yèsus polè ri bulu-buluè, namaèga tau maccowèriwi. 2 Iyaro wettuè polèni sèddi tau iya malasa oli iya mappakatau-tauè. Makkaluttuni ri yolona Yèsus, nainappa makkeda, "Pa', rèkko maèloki Pa', taullè pajjappaka' Pa'. " 3 Nakarawani Yèsus iyaro tauwè, namakkedato, "Uwèloriwi. Ajjappano!" Iyatoro wettuè najjappa lasana. 4 Nakkeda Yèsus lao ri alèna, "Engngerangngi! Aja' mucuritai lao ri nigi-nigi. Iyakiya laoko ri imangngè, namuwèllauwi untu' pattentui makkedaè majjappano. Purairo akkasuwiyangenno akkarobangeng iya napparèntangngè Musa, selaku butti lao ri tauwè makkedaè tonget-tongenno majjappa!" 5 Wettunna Yèsus muttama' ri Kapernaum, engka sèddi parawira Roma polè mèwai sita, nanaèllau tulung ri Alèna. 6 Nakkeda iyaro parawiraè, "Pa', malasai pattumanikku ri bolaè. Lèwui dè' pakkullènna ri onrong atinrongngè sibawa manrasa-rasa senna'na. " 7 Nakkeda Yèsus, "Maèlo-Ka lao pajjappai. " 8 Nappèbali iyaro parawiraè, "Aja'na Pa'. Dè' usitinaja tarimaki ri laleng bolaku. Tapparèntanni bawang Pa'. Najjappa matu iyaro pattumanikku. 9 Saba' harusu' tokka tunru' ri parèntana ri tau mariyasè'è. Na ri yawaku engkato parajuri'-parajuri' iya harusu'è tunru ri parèntaku. Rèkko usuroi sèddiè parajuri' 'Laoko!' laowi. Rèkko makkedaka lao ri laingngè, 'Laoko mai!' polèi; sibawa rèkko uparèntangngi atakku, 'Ebbui iyaè!' naèbbui. " 10 Wettunna naèngkalinga Yèsus aga napowada iyaro parawiraè, bengnga senna'ni. Nanakkeda lao risining tau iya maccowèriyèngngi, "Tenniya culè-culè iyaè tauwè. Dè'pa naengka Uruntu ri yelle'na tau Israèliè teppe' makkuwaè tedde'na! 11 Tongeng! Maèga tau polè alau sibawa yajang untu' mariyo-riyo sibawa Abraham, Ishak enrengngè Yakub ri laleng Lino Barunna Allataala. 12 Padahal sining tau iya harusu'è mancaji umma'na Allataala ribuwangngi matu ri saliweng ri laleng pettangngè. Kuwaniro matu teri sibawa manrasa-rasa. " 13 Nakkeda Yèsus lao ri parawiraèro, "Lisuno, aga muwatepperiyèro kajajiyanni matu. " Na iyatoro wettuè najjappa iyaro pattumaninna. 14 Laoni Yèsus ri bolana Pètrus. Naitani kuwaro matuwa makkunrainna Pètrus masemmeng ri onrong atinrongngè. 15 Nakarawani Yèsus limanna, nasoro semmenna. Naoto'na nappammula tumaningiwi Yèsus. 16 Mammulanana mapettang, natiwini tauwè lao ri Yèsus maèga tau iya nauttamakiyè sètang. Na silappa adami bawang napaddèsu'i Yèsus sining sètangngèro sibawa napajjappa towi sininna tau malasaè. 17 Napogau'i Yèsus iya manennaro, nanallalengi iyaro kajajiyangngi aga napowada Nabi Yèsaya, iyanaritu, "Natanggungngi anrasa-rasatta sibawa napajjappai lasata. " 18 Engka maèga senna tau mattulilingiwi Yèsus. Wettunna Yèsus naita maneng mennang, nasuroni sining tau iya maccowèriyèngngi mallèttoiwi tapparengngè. 19 Naengka sèddi guru agama lao ri Yèsus sibawa makkeda, "Pa' Guru, maèloka maccowèriwi Bapa' kègi-kègi lao!" 20 Nappèbali Yèsus, "Asu ale'è mappunnai liyang, sibawa manu'-manu'è mappunnai sarang, iyakiya Ana'na Tolinoè dè' nappunnai onrong lèwu. " 21 Nainappa engka sèddi tau iya maccowèriyèngngi makkeda, "Pa' tapalalona riyolo' lisu untu' kuburu'i ambo'ku. " 22 Iyakiya mappèbaliwi Yèsus, "Accowèno ri Iyya, leppessanni siya tau matè kuburu'i taunna iya matè. " 23 Naènrè'na Yèsus ri lopiè namaccowèto ana'-ana' gurunna sibawangngi. 24 Tennasenna-sennana anginraja masero senna'è mappo'i tapparengngèro angkanna iyaro lopiè naunru bombang. Naiyaro wettuè mattengngangngi Yèsus matinro. 25 Nalaona sining ana' gurun-Na nateddui. Namangobbi, "Pa', tulukki! Cilakaki'è!" 26 Nakkeda Yèsus, "Magi mumètau? Makurang teppe'ko ri Iyya!" Nainappa Yèsus tettong nanagera'i angingngè sibawa tapparengngèro. Natennang senna'na iyaro tapparengngè. 27 Hèranni sining ana' gurunna Yèsus. Nakkeda mennang, "Tau agana iyaè, namuwi angingngè sibawa bombangngè maccowèri towi parèntana!" 28 Lettu'ni Yèsus ri wiring tapparengngè ri daèra Gadara. Kuwaro engka duwa tau iya nauttamakiyè sètang lao ri Yèsus. Iya duwa tauwèro majapperu senna, angkanna dè' sèddi tau barani lalo kuwaro. 29 Massui mennang polè ri gowa-gowana tampungngè nanagora, "Eh Ana' Allataala, maèlo-Ko magaki? Maèlonoga sissaki namuni tenniyapa wettunna?" 30 Dè' namabèla polè kuwaro, engka maèga senna bawi sappa anrè. 31 Naèllauni iyaro sining sètangngè ri Yèsus, "Rèkko maèlo-Ko suroki massu, suroki muttama' risining bawièro. " 32 Nakkeda Yèsus, "Laono!" Nalaona iyaro sining sètangngè polè ri iya duwa tauwèro nanauttama ri laleng sining bawièro. Nalarina iyaro sining bawiè naluppe' polè ri wirinna peppingngè muttama' ri tapparengngè natallemme. 33 Nalarina sining panganrowanna iyaro sining bawiè lao ri kotaè, nanacuritai sining kajajiyangngèro, makkuwatoro passalenna aga pura kajajiyang sibawa iya duwa tau nauttamakiyè iyaro sètangngè. 34 Na sininna tauwè ri kotaèro laoni mitai Yèsus. Wettunna naita Yèsus, naèllauni sibawa masero kuwammengngi nasalaiwi daèrana mennang.

Matius 9

1 Mènrè'ni Yèsus ri laleng lopiè, nanallèttoiwi tapparengngè, nalisu ri kampong assalen-Na. 2 Nanatiwina tauwè kuwaro ri Alèna sèddi tau pèso' iya lèwuè ri onrong atinrongngè. Wettunna Yèsus naita battowana teppe'na sining tauwèro, makkeda-Ni ri tau pèso'èro, "Sabbara'ko ana'-Ku! Riyaddampengenni dosa-dosamu. " 3 Siyagangngarè guru-guru agama iya engkaè kuwaro makkeda ri laleng atinna, "Iyaè tauwè napakatunai Allataala!" 4 Naissengngi Yèsus pikkiranna mennang, jaji makkedai, "Magi namaja makkuwaro pikkirammu? 5 Kèga lebbi gampang: powadai, 'Riyaddampengenni dosamu', iyarè'ga powadai, 'Oto'no namujoppa?' 6 Iyakiya makkekkuwangngè maèlo-Ka pabuttiwi ri iko makkedaè Ana'na Tolinoè makuwasai ri yasè'na linoèwè untu' maddampengengngi dosaè. " Nainappa makkeda Yèsus lao ri tau pèso'èro, "Oto'no, akkai onrong atinrommu namulao!" 7 Naoto'na iyaro tau pèso'è nalisu ri bolana. 8 Wettunna naita iyaro sining tauwè kajajiyangngèro, mètauni mennang sibawa napojini Allataala, saba' Allataala pura mabbèrèyangngi akuwasanna iya battowa makkuwaèro lao ri rupatauwè. 9 Nasalaini Yèsus onrongngèro. Mattengngangngi joppa, naita-Ni sèddi passinge' sima, riyasengngè Matius, tudang ri kantoro assimanna. Nakkeda Yèsus ri alèna, "Laono mai namuwaccowè ri Iyya!" Natettonna Matius, nanaccowèriwi Yèsus. 10 Wettunna Yèsus mattengngang manrè ri bolana Matius, polèni maèga passinge' sima sibawa sining tau iya riyangga' dè'è namakessing ri masaraka'è, maccowè manrè sisama Yèsus enrengngè sining ana' gurun-Na. 11 Engka tau Farisi mitai gau'èro. Nakkutanana mennang ri ana'-ana' gurunna Yèsus, "Aga saba'na gurummu namanrè sisama passinge' simaèro enrengngè sining tau iya dè'è namakessing?" 12 Naèngkalingai Yèsus pakkutanana mennang, nanappèbali, "Tau madisingngè dè' napparelluwang dottoro', banna tau malasaè bawang. 13 Salidikiwi aga bettuwanna aya'na Kitta'èwè: 'Paressè babuwa Uwèlori, tenniya akkarobangeng olokolo'. ' Saba' engka-Ka polè tenniya untu' mobbii tau iya tongengngènna, sangadinna tau iya madosaè. " 14 Purairo laoni sining ana' gurunna Yohanès Paccemmè ri Yèsus. Nanakkutana mennang, "Magi idi sibawa sining tau Farisiè nappuwasa na sining ana' gurunna Bapa' dè'?" 15 Nappèbali Yèsus, "Pèkkugi pallolongemmu? Weddigga sining undangengngè ri abottingengngè tassinnau atinna rèkko engka mupi bottimpuranè silaong mennang? Tentu dè'! Iyakiya engka matu narapii wettunna nariyala iyaro bottimpuranè polè ri mennang. Ri wettuènnaro nainappa mappuwasa mennang. 16 Dè'gaga tau tèppangngi waju malaungngè sibawa sikennè kaing mabaruè. Saba' iyaro kaing pattèppangngè cakkikkii matu nanasapè'i iyaro wajuè, angkanna pèdè' malowangngi sapè'na. 17 Makkuwatoro dè'gaga tau tiri' anggoro baru ri laleng popang koli iya malaungngè. Saba' reppa'i matu sibawa masolangngi iyaro popangngè, natabbè anggoro'na. Iyaro anggoro baruè ritiri'i ri laleng popang iya baruètto, kuwammengngi natette' madècèng iya duwa. " 18 Ri wettu mabbicarana mupa Yèsus sibawa sining ana' gurunna Yohanès Paccemmè, polèni sèddi pamimpinna bola assompangngè. Makkaluttuni ri yolona Yèsus, nakkeda, "Silalona matè ana' makkunraikku. Iyakiya, laoki mai takarawai kuwammengngi natuwo paimeng. " 19 Natokkonna Yèsus nasilaong sining ana' gurun-Na lao sibawa tauwèro. 20 Ri tengnga laleng engka sèddi makkunrai iya seppuloènna duwa taung ittana malasa maddara lao maddeppèriwi Yèsus polè ri munri. Mappikkiri'i, "Assaleng ugèssa muwi bawang jumba-Na, majjappaka matu. " Nainappa nagèssa cappa jumbana Yèsus. 22 Iyatoro wettuè nanagiling Yèsus nanaitai iyaro makkunraiè, nainappa makkeda ri alèna, "Pakkasse'i atimmu, ana'-Ku! Nasaba mateppe'ko ri Iyya, namuwajjappa!" Iyatoro wettuè najjappa iyaro makkunraiè. 23 Nainappa lettu Yèsus ri bolana pamimpinna bola assompangngè. Wettunna naita pacculè-culè oni-oni abbaratangngè sibawa maèga tau marukka, 24 makkedani ri mennang, "Assu manekko! Iyaè ana'è dè' namatè'; matinroi bawang. " Nacawa-cawai manenni mennang Yèsus. 25 Massunana sining tauwèro, muttama'ni Yèsus ri laleng bili'na iyaro anana'è nanakkatenningngi limanna. Natokkonna iyaro anana' makkunraiè. 26 Iyaro karèbaè tassiyani ri sininna daèraèro. 27 Laoni Yèsus polè kuwaro na ri tengnga laleng engka duwa tau buta maccowèriwi. Gorani mennang, "Ana' Daud, amasèiki!" 28 Wettunna Yèsus muttama' ri lalempola, polèni iya duwa tau butaèro ri Alèna. Makkutanani Yèsus ri mennang, "Mateppe'koga makkedaè Uwullè pajjappako?" Nappèbali mennang, "Mateppe', Pa'!" 29 Nainappa nakarawa Yèsus matanna mennang nakkedato, "Nasaba mateppe'ko, jajini aga muwammènasaiyè. " 30 Naweddinna makkita mennang. Riparèngngerangini mennang ri Yèsus sibawa matedde kuwammengngi aja' nappaissengengngi iyaro gau'è lao ri nigi-nigi. 31 Iyakiya laowi mennang napatassiyai iyaro karèbaè passalenna Yèsus ri sininna daèraè. 32 Wettunna meddè'na iya duwa tauwèro, sèddi tau pèpè iya nakuwasaiyè sètang ritiwi lao ri Yèsus. 33 Napaddèsu'ni Yèsus iyaro sètangngè, naiyatoro wettuè naweddinna mabbicara iyaro tauwè. Hèranni iyaro tau maègaè nakkeda, "Dè'pa naengka taita kajajiyang makkuwaèwè ri Israèliè!" 34 Iyakiya makkedai sining tau Farisiè, "Kapalana sining sètangngè ritu mpèrèngngi kuwasa untu' paddèsu'i iyaro sining sètangngè. " 35 Makkuwaniro Yèsus lao mattulili polè risèddiè kota lao ri kota laingngè sibawa polè risèddiè kampong lao ri kampong laingngè. Mappagguruni risining bola assompangngè, sibawa mappallebbangengngi Karèba Madècèngngè, pèkkugi Allataala mapparènta selaku Arung. Napajjappai sining tau nakennaè maddupa-rupang lasa sibawa sala-salangngè watakkalèna. 36 Wettunna naita Yèsus tau maègaèro, messèni babuwana lao ri mennang, saba' malippui mennang enrengngè dè' pakkullènna, pada-pada bimbala' dè'è pakkampina. 37 Nakkedana Yèsus lao ri sining ana' gurun-Na, "Maèga èngngalang, iyakiya cèddè'mi parèngngala. 38 Rimakkuwannanaro, èllauno ri punnaè dare'ro kuwammengngi nakiring parèngngala untu' èngngalanna. "

Matius 10

1 Engka sèuwa esso naobbii Yèsus iya seppulo duwa ana' gurun-Na maddeppungeng. Nanawèrèngngi mennang kuwasa untu' paddèsu'i roh-roh majaè sibawa pajjappai sininna rupa-rupanna lasaè enrengngè sininna rupanna tau sala-salangngè watakkalèna. 2 Asenna iyaro seppuloè duwa rasul iyanaritu: mammulangngè, Simon (iya ritasengngètto Pètrus) sibawa silessurenna Andrèas, nainappa Yakobus sibawa silessurenna Yohanès, iyanaritu ana'-ana'na Zèbèdèus. 3 Purairo, Pilipus nenniya Bartolomèus, sibawa Tomas kuwaèttopa Matius, passinge' simaè, enrengngè Yakobus ana' Alfèus sibawa Tadèus; 4 paccappurenna Simon, si Patriot sibawa Yudas Iskariot iya bali'bellariyèngngi Yèsus. 5 Nainappa nakirinni Yèsus iyaro seppuloè duwa rasul sibawa lolongeng panunju'-panunju'èwè, "Aja' mulao ri daèrana sining tau tenniyaè tau Yahudi. Aja'to ri kota-kotana tau Samariaè. 6 Iyakiya laono risining tau Israèliè, lebbi-lebbipi ri iya maneng pusaè. 7 Powadangngi mennang makkedaè dè'na namaitta napparènta Allataala selaku Arung. 8 Pajjappai sining tau malasaè; patuwoi sining tau iya mate'; pajjappai sining tau iya malasa oli mappakatautauè, sibawa paddèsu'i sètangngè. Purani mutarima manenro sibawa cuma-cuma. Jaji abbèrèyang towi sibawa cuma-cuma. 9 Aja' mutiwi dowi ulaweng, dowi pèra', iyarè'ga muwi dowi tembaga. 10 Aja'to mutiwi sèpu-sèpu passidekka, iyarè'ga duwallampa pakèyang untu' laommu, iyarè'ga sapatu, iyarè'ga tekkeng. Saba' tau majjamaè, sitonget-tongenna harusu'i ritanggung apparelluwanna. 11 Rèkko lettu'ko ri kotaè iyarè'ga ri kampongngè, sappako sèddi tau iya maèloè tarimako. Onrono silaong iyaro narapi joppasiko. 12 Ri wettu muttama'mu bolaè, akkedako, 'Tennapodo Puwangngè barakkakiko!' 13 Rèkko natarimako sining tauwè ri bolaèro, leppessanni siya pappassalama'muro tette ri mennang. Iyakiya rèkko dè' natarimako mennang, gettengngi lisu iyaro pappassalama'mu. 14 Rèkko bolaè iyarè'ga kotaè dè' namaèlo tarimako iyarè'ga dè' namaèlo mèngkalingako, salaiwi iyaro onrongngè sibawa akkeppikengngi awunna palakajèmu. 15 Engngerangngi! Ri Esso Kiyame', sining taunna Kota Sodom sibawa Gomora lebbi gampangngi matu riyaddampengeng ri Allataala, naiya sining tau ri kotaèro. " 16 "Pènessaiwi iyaè: Ukirikko pada-pada bimbala'è ri tengnga-tengngana asu ale'è. Harusu'ko matike' pada-pada ulaè sibawa matinulu pada-pada jangang-jangangngè. 17 Jaga-jagako, saba' ritikkekko matu naripangolo ri Mahkamana Agamaè. Risissako matu risining bola assompangngè. 18 Ritiwiko matu ri yolona panguwasa-panguwasaè sibawa sining arungngè nasaba maccowèko ri Iyya. Na iyanaro kasempatammu mabbèrè asabbiyang passalenna alè-Ku lao ri mennang sibawa risining tau dè'è naissengngi Allataala. 19 Iyakiya rèkko ritiwiko untu' riyadèlèki, aja' mubata-bata passalenna aga harusu' mupowada, iyarè'ga pèkkugiko harusu' mabbicara. Saba' aga iya harusu'è mupowadaro, ripaissengiko matu ri wettunna. 20 Nasaba iya mabbicaraè ri wettuèro tenniya iko, sangadinna Rohna Ambo'è ri surugaè, na iko nallalengi. 21 Kajajiyangngi matu makkedaè nabbèrèyangngi matu tauwè silessurenna untu' riyuno. Naiyatoro matu kajajiyang ri ambo'è sibawa ana'na. Ana'-ana'è naèwai matu indo' ambo'na, sibawa nabbèrèyangngi mennang untu' riyuno. 22 Ribenciko matu ri sininna tauwè nasaba muwaccowèri-Ka. Iyakiya tau iya tahangngè lettu ri paccappurenna ripassalama'i matu. 23 Rèkko ripanrasa-rasako risèddiè kota, lariko ri kota rappina. Upaissengiko: Riwettu dè'napa napura maneng mujoppai kota-kotana Israèliè, engkani polè Ana'na Tolinoè. 24 Ana' guruè dè' nalebbi battowa naiya gurunna. Na sèddiè pattumani dè' nalebbi battowa naiya puwanna. 25 Cuku'ni rèkko sèddiè ana' guru mancajiwi pada-pada gurunna, sibawa sèddiè pattumani pada-pada puwanna. Rèkko riyasengngi Bèèlzèbul kapala kaluwargaè, apalagi silise bolana. Riyasengngi matu mennang iya lebbi majaèppasi!" 26 "Aja' mumètau ri tolinoè. Dè' gaga tassubbu iya dè'è napaita matu, sibawa dè' gaga iya rirahasiyakangngè iya dè'è naribongkara' matu. 27 Aga iya Upowadaè ri laleng pettangngè harusu'i mupakkoling ri laleng tajangngè ri lakessoè. Sibawa aga ribicikengngè ri daucculimmu, appallebbangengngi iyaro pèdè' malowang! 28 Aja' mumètau lao ri mennang iya mpunoèngngi tubuè, iyakiya dè' namakuwasa mpunoi nyawaè. Etauko ri Allataala iya makuwasaè pabbinasai tubuè nenniya nyawaè ri laleng ranaka. 29 Duwakkaju dongi wedding riyelli sibawa dowi kaminang baiccu'è. Namuni makkuwaro dè' gaga muwi sikaju sempè ri tanaè rèkko dè' napuwèloi Ambo'mu. 30 Muwi jumellana gemme'mu ri ulummu pura manetto ribilang. 31 Rimakkuwannanaro aja' mumètau! Lebbi mangke'ko naiya manu'-manu' dongièro!" 32 "Nigi-nigi mangakuiwi ri yolona tau maègaè makkedaè maccowèi ri Iyya, Uwangakui towi ri yolona Ambo'-Ku ri surugaè. 33 Iyakiya nigi-nigi massakkarekka ri yolona tau maègaè makkedaè maccowèi ri Iyya, Uwassakkareng towi ri yolona Ambo'-Ku ri surugaè. " 34 "Aja' muwasengngi makkedaè tiwi-Ka adamèngeng ri linoè. Dè' Utiwi adamèngeng, iyakiya assipangèwangeng. 35 Engkaka polè nassabariwi ana' worowanè naèwai ambo'na, ana' makkunraiè naèwai indo'na, sibawa mènèttu makkunraiè naèwai matuwa makkunrainna. 36 Ya, iya mancajiyè matu bali kaminang battowaè iyanaritu anggota kaluwargata. 37 Tau iya mamasèiyèngngi ambo'na iyarè'ga indo'na lebbi na Iyya, dè' nasitinaja mancaji ana' guruk-Ku. Makkuwatoro tau iya mamasèiyèngngi ana' worowanèna iyarè'ga makkunrainna lebbi na Iyya. 38 Sibawa tau dè'è namaèlo mèssangngi sallina nanaccowèri-Ka, dè' nasitinaja mancaji ana' guruk-Ku. 39 Tau linrungiyèngngi atuwonna, ateddèngengngi matu atuwonna, iyakiya tau iya ateddèngengngè atuwong nasaba matinului ri Iyya, nalolongengngi matu atuwonna. " 40 "Tau iya tarimaèkko, natarima-Ka. Na tau iya tarimaèk-Ka, natarimai iya suroèk-Ka. 41 Tau iya tarimaèngngi nabiè nasaba nabiwi, tarimai matu saro sèddiè nabi. Na niga tarimai sèddiè tau iya makessingngè nasaba makessingngi, tarimai matu saro sèddiè tau iya makessingngè. 42 Nigi-nigi mappainung, namuni uwai keccè bawang lao ri sala sèddinna tau polè risining tau matunaèwè, nasaba ana' guruk-Kui, ateppe'no pasti natarimai matu sarona!"

Matius 11

1 Puranana Yèsus mabbèrè panunju'-panunju' lao riseppuloè duwa ana' gurun-Na, Nasalaini iyaro onrongngè. Laoni mappagguru sibawa mappallebbangengngi pasenna Allataala ri kota-kota iya macawè'è kuwaro. 2 Yohanès Paccemmè iya ritarungkuè, naèngkalingani passalenna jama-jamanna Kristus. Nainappa nasuro siyagangngarè ana' gurunna lao ri Yèsus untu' makkutanangngi, 3 "Bapa'ga tau maèloè polè situru jancinna Allataala, iyarè'ga harusu'ki tajeng tau laing?" 4 Nappèbali Yèsus, "Lisuno ri Yohanès namupowadangngi aga muwèngkalinga sibawa muwita: 5 Makkita tau butaè, joppa tau pèso'è, majjappa tau malasa oli iya mappakatau-tauè; marèngkalinga tau mataru-taruè, tuwo tau matè, sibawa Karèba Madècèng polè ri Allataala riyabbirittang lao ri tau kasiyasiè. 6 Masennangngi tau iya dè'è nappunnai alasang untu' sampèyangngi Iyya" 7 Lisunnana iyaro sining surona Yohanès, mammulani Yèsus mabbicara lao ri tau maègaè passalenna Yohanès, adan-Na, "Laoko ri padang kessi'è aga maèlo muwita? Silampa wellaga iya nairiè anging? 8 Aga maèlo lao muwita? Sèddi tau iya mappakèyang makessingngèga? Tau iya mappakèyang makkuwaèro monroi ri saorajaè! 9 Jaji magi mulao ri padang kessi'è? Untu' mita sèddi nabiga? Tongeng, mala lebbi na sèddiè nabi. 10 Saba' Yohanès ritu naseng ri laleng Kitta'èwè, 'Iyanaè suro-Ku, adanna Allataala, Usuroi lebbi riyolo na Iko kuwammengngi natimpakek-Ko laleng. ' 11 Engngerangngi! Ri linoèwè dè' naengka tau lebbi battowa naiya Yohanès Paccemmè. Namuni makkuwaro, tau iya kaminang baiccu'è ri yelle'na umma'na Allataala lebbi battowai naiya Yohanès. 12 Sipongenna Yohanès nabbirittang karèbanna lettu makkekkuwangngè, riyèwai umma'na Allataala risining tau iya makkuragaè makuwasaiwi sibawa awatangeng. 13 Narapi apolènna Yohanès, sininna hukkung nabbèrèyangngè Musa sibawa pappagguruwanna nabi-nabiè nabotoi passalenna gau'-gau' iya harusu'è kajajiyang. 14 Narèkko maèloko mateppe', Yohanès ritu Elia, iya pura ribotoènna apolènna. 15 Rèkko mappunnaiko daucculing, èngkalingai! 16 Nasibawang niga harusu' Upasibanding sining tauwè makkekkuwangngè? Pada-padai mennang ana'-ana' iya tudangngè ri pasaè. Sikonrong gora lao ri laingngè, 17 'Riyakkèlongekko èlong mariyo-riyo, iyakiya dè' mumaèlo sèrè! Makkèlokki èlong mabbarata, na iko dè' mumaèlo teri!' 18 Polèi Yohanès -- mappuwasai dè' nainung anggoro; nakkeda sining tauwè 'Nauttamakiwi sètang!' 19 Namakkekkuwangngè polèni Ana'na Tolinoè -- manrèi sibawa mènung; nakkeda sining tauwè, 'Itai tauwèro! Mabèlala, pammabokeng, sellaonai passinge' simaè sibawa tau madosaè. ' Namuni makkuwaro, apanrènna Allataala pabuttiwi polè ri wassèlè'-wassèlè'na. " 20 Nainappa mappammulani Yèsus cellai kota-kotaè, ri onrong kaminang maègaè mèbbu anu makalallaingngè. Saba' sining tauwè ri kota-kotaèro dè' namaèlo toba' polè ri dosa-dosana mennang. 21 "Cilakano iko Korazim! Macilaka tono iko, Bètsaida! Akkalarapanna sining anu makalallaingngè iya naèbbuè ri tengnga-tengngamu pura napogau'i ri Tirus sibawa Sidon, pasti sining tauwè kuwaro maittana natoba' polè ri dosa-dosana mennang sibawa pakè pakèyang mabbarata enrengngè taroiwi awu ulunna. 22 Engngerangngi, ri Esso Kiyame', sining tau Tirus-è sibawa Sidongngè lebbi magampangngi matu riyaddampengeng ri Allataala naiya iko! 23 Na iko, Kapernaum! Maèlokoga ripakatanrè lettu ri surugaè? Mala riyabbèyakko matu ri ranakaè! Saba' akkalarapanna sining anu makalallaingngè iya naèbbuè ri tengnga-tengngamuro pura ri yèbbui ri Sidon, engka mupi Sodom lettu makkekkuwangngè! 24 Engngerangngi, ri Esso Kiyame', lebbi gampangngi tau Sodongngè riyaddampengeng ri Allataala naiya iko!" 25 Iyaro wettuè massempajanni Yèsus, "Ambo', Puwang iya makuwasaiyèngngi langiè sibawa linoè! Mattarima kasi'-Ka lao ri Iko saba' iya manennaro Murahasiyakangngi polè risining tau maccaè sibawa engkaè pangissengenna, iyakiya Muwappaitangngi lao risining tau dè'è namacca. 26 Iyanaro pèsennangiwi atinna Ambo'. " 27 Nainappa Yèsus makkeda, "Sininna sèuwa-sèuwaè purani nabbèrèyang Ambo'è lao ri Iyya. Dè' sèddi tau missengngi Ana'è saliwenna Ambo'è. Dè'to gaga missengngi Ambo'è saliwenna Ana'è sibawa lao risining tau iya Ana'è pura napaissengi passalenna Ambo'è. 28 Laono mai ri Iyya iko maneng posoè sibawa pèneddingiyèngngi tane'na tiwiè; maèlo-Ka pètakkariko. 29 Accowèriwi parènta-Ku sibawa agguruno ri Iyya. Saba' Iyya'è malemma kininnawaka, namatakka matu pèneddimmu. 30 Nasaba pasennangi sining parènta-Ku, sibawa maringeng tiwi iya Upatiwiriyèkko. "

Matius 12

1 Risèuwaè esso Saba', wettunna Yèsus lalo risèddiè dare' gandong, mammulani ana'-ana' gurun-Na mala gandong saba' malupui. 2 Wettunna naita sining tau Farisièro, makkedani mennang lao ri Yèsus, "Itai! Ana'-ana' gurum-Mu majjalèkkaiwi hukkunna agamata ri laleng napogau'na iya riyattèyangngè ri esso Saba'è. " 3 Nappèbali Yèsus, "Dè'paga naengka mubacai passalenna aga iya napogau'è Daud wettunna alèna sibawa sininna taunna malupu? 4 Muttama'i ri laleng Bolana Allataala, nainappa nanrè roti iya puraè riyakkasuwiyangeng ri Allataala. Padahal manuru' hukkunna agamata, Daud sibawa sining taunnaro dè' nawedding nanrè iyaro rotiè -- banna bawang sining imangngè wedding. 5 Iyarè'ga dè'paga naengka mubacai ri laleng Hukkunna Musa makkedaè tungke' esso Saba' sining imang iya majjamaè ri Bolana Puwangngè najjalèkkaiwi peraturanna esso Saba'è, iyakiya dè' naripassala? 6 Pènessaiwi aga iya upowadaèwè: kuwaè engka iya lebbi battowaè naiya Bolana Puwangngè. 7 Ri laleng Kitta'è tarokii: Paressè babuwa ritu iya Uwèloriyè, tenniya akkarobangeng olokolo. Rèkko mèmeng mupahangngi tonget-tongeng adaèwè, pasti dè' mumaèlo passalai sining tau iya dè'è napasala. 8 Nasaba Ana'na Tolinoè nakuwasaiwi esso Saba'è. " 9 Nasalaini Yèsus iyaro onrongngè nanalao risèddiè bola assompang. 10 Kuwaro engka tau iya matè siwaliè limanna. Siyagangngarè tau iya maèloè sappai asalanna Yèsus, makkutana ri Alèna, "Weddigga ripajjappa tauwè ri esso Saba'è?" 11 Nappèbali Yèsus, "Akkalarapanna engka sèddi tau polè ri yelle'mu mappunnai sèddi bimbala', na ri esso Saba'è iyaro bimbala'è sempè'i ri laleng kalebbong iya malamungngè; dè'ga naiyaro tau punnaè bimbala' makkuragai passui iyaro bimbala'è polè ri laleng kalebbongngèro? 12 Nalebbi mangke'i rupatauwè naiya bimbala'è! Jaji, rèkko makkuwaitu wedding ritulung tauwè ri esso Saba'è. " 13 Nainappa makkeda Yèsus lao ri tau iya matè siwaliè limanna, "Loro'i limammu. " Naloro'ni limanna iyaro tauwè, najjappana limanna iyaro tauwè pada-pada limanna siwaliè. 14 Iyakiya sining tau Farisiè nasalaiwi iyaro bola assompangngè, nasiyempe maèlo mpunoi Yèsus. 15 Naisseng Yèsus makkedaè iyaro sining tau Farisiè majai akkattana lao ri Alèna. Jaji Nasalaini onrongngèro namaèga tau maccowèriwi. Nanapajjappai sininna tau malasaè. 16 Iyakiya nattèyangngi mappaissengengngi passalenna Alèna lao ri tau laingngè. 17 Narimakkuwannanaro kajajiyanni aga napowada Allataala naolai Nabi Yèsaya, 18 "Iyanaè suro-Ku Upilè, Tau iya Uwamasèiyè sibawa nasitujuiyè atik-Ku. Uwèrèngngi matu Roh-Ku ri Alèna, Nabbirittangngi matu adèlèkek-Ku ri bangsa-bangsaè. 19 Dè' matu Nassasa iyarè'ga gora, iyarè'ga mappidatong risining watattanaè. 20 Bulo iya nroko'è dè' matu Naripolo pajjennangeng iya mappiddè-piddèè dè' Naripeddèi. Mèwai matu narapi Nalolongeng adèlèkengngè; 21 sininna bangsaè nataroi matu ammènasanna ri Alèna. " 22 Naritiwina ri Yèsus sèddi tau iya butaè sibawa pèpè nasaba rikuwasaiwi ri sètangngè. Napajjappani Yèsus iyaro tauwè angkanna naullèi mabbicara sibawa makkita. 23 Hèrang manenni tauwè nakkeda, "Makkullèga iyanaè Ana'na Daud iya riyajjanciyangngèro?" 24 Wettunna naèngkalinga sining tau Farisiè, mappèbalini mennang, "Iyaè banna naullèi paddèsu'i sètangngè, nasaba Bèèlzèbul, kapalana sining sètangngè, pura mpèrèngngi iyaro akuwasangngè lao ri Alèna. " 25 Naissengngi Yèsus pikkiranna sining tau Farisièro. Jaji makkedani lao ri mennang, "Rèkko sèuwaè wanuwa tabbagèi ri laleng golongang-golongang iya sisullè simusu, dè' natahang matu iyaro wanuwaè. Na sèddiè kota iyarè'ga kaluwarga iya tabbagè-bagè sibawa simusu sèddiè sibawa laingngè ancuru' matu paggangkanna. 26 Makkuwatoro ri laleng akkarungenna Ibillisi'è; rèkko sèddiè kalompo' rukkai kalompo' laingngè, tabbagè-bagèi matti iyaro akkarungenna Ibillisi'è angkanna maruttung. 27 Makkedako makkedaè Upaddèsu'i sètangngè nasaba akuwasanna Bèèlzèbul. Rèkko makkuwaitu, nasibawang akuwasang niga ana'-ana' gurummu paddèsu'i sètangngè? Alèna ana'-ana' gurummu pabuttiwi makkedaè salako! 28 Iyakiya Iyya Upaddèsu'i sètangngè sibawa akuwasanna Rohna Allataala. Bettuwanna iyaro makkedaè mappammulani Allataala mapparènta ri tengnga-tengngamu. 29 Pèkkugi tauwè naullèi muttama' ri lalempolana sèddiè tau iya mawatangngè untu' rampasa'i waramparanna, rèkko dè' nasiyoi lebbi riyolo iyaro tau mawatangngè? Purapiro, nainappa naullèi rampasa'i waramparanna. 30 Tau iya dè'è naccowè ri Iyya, sitongenna naèwa-Ka. Na tau iya dè'è nabantu-Ka, sitongenna nasolangiwi jama-jamak-Ku! 31 Rimakkuwannanaro, issengngi, rèkko pogau'i dosa tauwè sibawa powada pappakatuna, weddingngi riyaddampengeng! Iyakiya rèkko napakatunai Rohna Allataala dè' nawedding riyaddampengeng! 32 Rèkko engka napowada tauwè mèwai Ana'na Tolinoè, weddingngi riyaddampengeng, iyakiya rèkko napakatunai Rohna Allataala, dè' nakkullè riyaddampengeng, muwi makkekkuwangngè iyarè'ga ri ahèra'. " 33 "Untu' lolongeng buwa iya makessingngè, harusu'i macommo' ponna. Rèkko dè' namacommo ponna, dè'to namakessing buwana. Macommo' iyarè'ga dè'na sèddiè pong ngaju riissengngi polè ri buwana. 34 Iko tau majako, pèkkugi mullèi powadai gau'-gau' iya makessingngè rèkko majako? Aga napowada iyaro tèmuè massui polè ri atiè! 35 Tau makessingngè napowadai gau'-gau' iya makessingngè nasaba pennoi akessingeng. Sibalè'na tau iya majaè napowadai gau'-gau' iya majaè nasaba pennoi ja. 36 Jaji, èngngerangngi: ri Esso Kiyame', tungke' tau harusu'i tanggung jawakiwi tungke' ada-adanna iya dè'è nakkèguna. 37 Saba'ada-adammu ritu ripakè matu pettuiwi pasalakoga iyarè'ga dè'. " 38 Nainappa siyagangngarè guru agama sibawa tau Farisi makkeda, "Pa' Guru, macinnaki mitai Bapa' mèbbu anu makalallaing. " 39 Nappèbali Yèsus, "Temmaka jana sibawa dorakana sining tauwè wettuèwè! Muwèllau-Ka mèbbu anu makalallaing? Dè' matu nariwèrèkko anu makalallaing, muwi sèddi, sangadinna anu makalallainna Nabi Yunus. 40 Monroi Yunus tellung ngesso tellumpenni ri lalenna babuwana balè loppoè. Makkuwatoro Ana'na Tolinoè monroi matu tellung ngesso tellumpenni ri lalenna babuwana tanaè. 41 Ri Esso Kiyame', moto'i matu pabbanuwana Niniwè silaong sining tauwè makkekkuwangngèwè nanatenre'i mennang. Saba' toba'ni tau Niniwè polè ri dosana, wettunna Yunus makkatobba lao ri mennang. Iyakiya makkekkuwangngè kuwaè engka lebbi battowa naiya Yunus! 42 Ri Esso Kiyame', tokkongngi matu ratu polè ri wanuwa yattangngè silaong sining tauwè makkekkuwangngè nanatenre'i mennang. Saba' untu' mèngkalingai pangajana Salomo iya mapanrè, iyaro ratuè joppai mabèla senna polè ri cappa'na linoè. Iyakiya makkekkuwangngè kuwaè engka lebbi battowa naiya Salomo!" 43 "Rèkko roh majaè nasalaiwi sèddiè tau, iyaro roh-è mattuliliwi risining onrong marakkoè untu' sappa onrong mappèsau, iyakiya dè' nalolongengngi. 44 Rimakkuwannanaro makkedai, 'Maèloka lisu ri bola iya puraè usalai. ' Wettunna lettu kuwaro, iyaro bolaè lobbanni, mapaccing sibawa taratoro'. 45 Nalaona sibawa tiwi pitu roh laing iya lebbi majaè naiya alèna. Nainappa muttama' ri lalenna tauwèro, naonro kuwaro. Na angkanna keadaanna iyaro tauwè lebbi majani naiya pammulanna. Iyatonaro kajajiyang matu sibawa sining tau majaè wettuèwè. " 46 Wettunna Yèsus mabbicara mupi sibawa tau maègaèro, polèni indo'na sibawa silessu-silessuren-Na. Tettongngi mennang ri saliweng nanakkuragato untu' mullèi mabbicara sibawa Alèna. 47 Sèddi tau polè ri tau maègaèro makkeda lao ri Yèsus, "Pa', indo' sibawa silessu-silessurenna Bapa' engkai ri saliweng. Macinnai mennang mabbicara sibawa Bapa'. " 48 Nappèbali Yèsus, "Niga indo'-Ku? Niga silessu-silessurek-Ku?" 49 Nainappa majjello' lao ri ana'-ana' gurun-Na sibawa makkeda, "Iyanaè indo' sibawa silessu-silessurek-Ku. 50 Tau iya pogau'èngngi èlona Ambo'-Ku ri surugaè, alèna ritu silessureng worowanè, silessureng makkunrai, sibawa indo'-Ku. "

Matius 13

1 Iyatoro essoè nasalaiwi Yèsus iyaro bolaè nalao ri wirinna tapparengngè natudang kuwaro. 2 Maèga senna tau maddeppungeng mattulilingiwi Yèsus, rimakkuwannanaro laoni Yèsus tudang ri lalenna lopiè na iyaro tau maègaè tudangngi ri wirinna tapparengngè. 3 Nanappagguruna Yèsus maèga passaleng lao ri mennang ri laleng pakkalarapang. Napammulaini Yèsus curita-Na, "Engka sèddi patani lao mangampo binè. 4 Wettunna mampo, engka binè teppa ri lalengngè. Napolèna manu'-manu'è nananrèi iyaro binè angkanna cappu. 5 Engkato teppa ri onrong mabbatu-batuè, iya cèddè'mmi tanana. Iyaro sining binè masitta'i tuwo nasaba cèddè tanana. 6 Iyakiya wettunna matanrèni essoè, mammulani makelle cura'-cura'na sibawa matè nasaba dè' namalamung ure'na. 7 Engkato teppa ri tengngana alekale maddoriè. Iyakiya alekale maddoriè tuwoi sibawa nalimpengiwi iyaro cura'-cura'è angkanna dè' naullèi mabbuwa. 8 Iyakiya engkato binè teppa ri tana iya macommo'è, nanabbuwa; engka leppe' wekkasèratu, engka enneng pulona na engkato telluppulo. " 9 Puranana nacurita pakkalarapangngèro makkedani Yèsus, "Rèkko mappunnaiko daucculing, èngkalingai!" 10 Nainappa polèni ana'-ana' gurunna Yèsus nanakkutana ri alèna, "Magi Bapa' napakè pakkalarapang rèkko mabbicarai sibawa tau maègaèro?" 11 Nappèbali Yèsus, "Saba' purani riwèrèng pangissengeng untu' missengngi rahasiyana passalenna pèkkugi Allataala mapparènta, na mennang dè'. 12 Tau iya mappunnaiyènna, maèloi riwèrèng lebbi maèga, na pèdè' alebbinna matu. Iyakiya tau iya dè'è nappunnai agaga, na cèddè iya engkaè ri alèna mala riyalai matu. 13 Iyanaro saba'na Upakè pakkalarapangeng, rèkko mabbicaraka sibawa tau maègaè, saba' naitai mennang, iyakiya pada-padai tau dè'è nakkita; marèngkalingai mennang iyakiya pada-padai tau iya dè'è namarèngkalinga sibawa dè'è namappahang. 14 Ri lalennaè kajajiyangngi iya nabotoè Nabi Yèsaya, 'Makkedai Allataala: Matteru-terui matu mennang marèngkalinga iyakiya dè' mupahangngi; matteru-terui matu mennang pènessaiwi iyakiya dè' muwissengngi aga kajajiyang. 15 Saba' makunruni pikkiranna sining tauwè, mataru-taruni daucculinna sibawa napappeddenni matanna mennang. Kajajiyangngi iyaè kuwammengngi aja' nakkita matanna mennang, aja' namarèngkalinga daucculinna mennang, aja' nappahang pikkiranna mennang na aja' nalisu ri Iyya, na-Upajjappai mennang. ' " 16 Nakkeda Yèsus lao ri ana'-ana' gurun-Na, "Iyakiya temmaka upe'mu iko, saba' tonget-tongengngi muwita sibawa muwèngkalinga. 17 Engngerangngi, maèga nabi sibawa tau iya matinuluè lao ri Allataala macinna mitai iyaro muwitaè makkekkuwangngèwè, iyakiya dè' mennang naitai. Macinnai mennang mèngkalingai aga iya muwèngkalingaè makkekkuwangngèwè, iyakiya dè' naèngkalingai mennang. " 18 "Engkalingani bettuwanna pakkalarapangeng passalenna pangampoèro. 19 Binè iya teppaè ri lalengngè maddapangengngi tau iya mèngkalingaèngngi karèba passalenna pèkkugi Allataala mapparènta, iyakiya dè' napahangngi. Polèi Ibillisi'è narampasa'i aga iya pura riyampoè ri laleng atinna mennang. 20 Binè iya teppaè ri tana mabbatu-batuè, maddapangengngi tau iya mèngkalingaèngngi iyaro karèbaè, namatteru natarima sibawa masennang atinna. 21 Iyakiya iyaro karèbaè dè' nakkure' ri laleng atinna mennang, angkanna dè' natahang maitta. Lolongenna mennang asussang iyarè'ga paccallang nasaba iyaro karèbaè, matteruna mennang massakka. 22 Binè iya teppaè ri tengnga-tengngana alekale maddoriè maddapangengngi tau iya mèngkalingaèngngi iyaro karèbaè, iyakiya bata-batai passalenna atuwonna mennang sibawa macinnai magello atuwo-tuwonna. Rimakkuwannanaro iyaro karèba polè ri Allataala tassipii ri laleng atinna mennang angkanna dè' nakkèbuwa. 23 Na binè iya teppaè ri tana macommo'è maddapangengngi tau iya mèngkalingaèngngi iyaro karèbaè sibawa napahanna. Mabbuwai mennang maèga, engka sèratu, engka enneng pulona, na engkato leppe' wèkkatelluppulo wassèlè'na. " 24 Nacuritasi Yèsus sèddi pakkalarapangeng, lao ri tau maègaè, adan-Na, "Rèkko mapparèntai Allataala, keadaanna pada-padai iyaè: Engka sèddi patani mampo binè gandong iya makessingngè ri dare'na. 25 Risèuwaè wenni, wettunna matinro maneng tauwè, iyaro balinna pataniè polèi mampo binè ariya ri yelle'na gandongngèro, nainappa lao. 26 Wettunna tuwo iyaro tanet-tanengngè sibawa mammula cumpa toso'na, paita toni iyaro ariyaè. 27 Napolèna iyaro sining tau iya napagajiyè pataniè ri patanièro, nakkeda, 'Puwang, tenniyaga binè makessing Puwang ritaneng ri dare'ta? Pèkkugi carana naèngka ariya kuwaro?' 28 Nappèbali iyaro pataniè, 'Iyaro pangkaukenna baliè. ' Nanakkutanasi sining tau napagajiè iyaro pataniè, 'Tapuwèloiga Puwang laoki bèbbui iyaro ariyaè?' 29 Nappèbali, 'Aja', saba' rèkko ribèbbui iyaro ariyaè, maccowè towi matu mabèbbu gandonna. 30 Leppessanni siya iyaro ariyaè tuwo sibawa lettu wettu èngngalang. Upowadappi matu sining tau mèngngalaè: Paddeppungengngi riyolo' ariyaè, siyoi nainappa ritunu. Purairo paddeppungengngi gandonna, nainappa mutaro ri laleng lappoè. ' " 31 Nacuritasi Yèsus sèddi pakkalarapangeng lao ri tau maègaè, adan-Na, "Rèkko mapparèntai Allataala, keadaanna pada-padai pakkalarapangngèwè: Sèddiè batu sawi riyala risèddiè tau nainappa nataneng ri dare'na. 32 Batu sawi iyanaritu binè iya kaminang baiccu'è. Iyakiya rèkko tuwoi, mancajiwi iya kaminang battowaè ri yelle'na tanet-tanengngè. Mabbatangngi, angkanna polèi manu'-manu'e massarang ri takke-takkena. " 33 Engka sèuwa pakkalarapangeng laing iya nacuritaè Yèsus lao ri tau maègaè. "Rèkko mapparèntai Allataala, keadaanna pada-padai ragi iya nalaè sèddiè makkunrai, nainappa napasigaru patappulo banna labbu tarigu angkanna sawè maneng. " 34 Iya manennaro nappagguruwangngi Yèsus lao ri tau maègaè sibawa pakè pakkalarapangeng. 35 Ri lalennaro kajajiyangngi iya napowadaè nabiè, "Pakèka pakkalarapangeng rèkko mabbicaraka sibawa mennang; maèlo-Ka mabbirittangngi gau'-gau' iya tassubbuè sipongenna ripancaji linoè. " 36 Purairo nasalaini Yèsus iyaro tau maègaè, nanauttama ri bolaè. Napolèna ana'-ana' gurun-Na sibawa makkeda, "Coba Bapa' pakatajangekki bettuwanna iyaro pakkalarapangeng ariyaè ri yelle'na gandongngè. " 37 Nappèbali Yèsus, "Iyaro tau mampoè binè makessingngè iyanaritu Ana'na Tolinoè. 38 Iyaro dare'è iyanaritu linoèwè. Binè makessingngè iyanaritu sining tau iya mancajiyènna umma'na Allataala. Iyaro ariyaè iyanaritu sining tau iya maccowèè ri Ibillisi'. 39 Bali iya tanengngèngngi iyaro ariyaè iyanaritu Ibillisi'. Wettu èngngalangngè iyanaritu Esso Kiyame', na sining tau iya mèngngalaèro iyanaritu malaèka'-malaèka'è. 40 Pèkkugi ariyaè ripaddeppungeng naritunu ri laleng apiè, makkuwatoniro ri Esso Kiyame' matti. 41 Ana'na Tolinoè suroi matu malaèka'-malaèka'-Na paddeppungengngi polè ri yelle'na umma'-Na sininna iya nassabariyè tauwè pogau' dosa, sibawa sininna tau laingngè iya pogau'è ja. 42 Ribuwangngi matu mennang ri laleng dapo malluwa'-luwa'è; nakkuwanaro matu teri sibawa manrasa-rasa. 43 Na sining tau iya pogau'èngngi èlona Allataala mattappai matu pada-pada mata essoè ri laleng Lino Barunna Allataala, Ambo'na mennang. Jaji, rèkko maddaucculikko, èngkalingai!" 44 "Rèkko mapparèntai Allataala, keadaanna pada-padai pakkalarapangengngèwè: Engka waramparang tallemme' ri laleng tanaè nariruntu' risèddiè tau, nanaputtama'i paimeng ri laleng tanaè. Nasaba rennunna iyaro tauwè, laoni nabalu'i sininna appunna-punnangenna, nainappa lisu melliwi iyaro tanaè. " 45 "Rèkko mapparèntai Allataala, keadaanna pada-padai pakkalarapangengngèwè: Engka sèddi padangkang sappa mutiyara iya masuliè. 46 Wettunna nalolongeng sibatu mutiyara iya magello senna'è iya dè'è padanna, masitta'ni lao nanabalu' manengngi appunna-punnangenna, nainappa naelli iyaro mutiyara sibatuè. " 47 "Rèkko mapparèntai Allataala, keadaanna riyakkalarapangengngi jala iya ripallebba'è ri tapparengngè, nalolongeng maddupa-rupang balè. 48 Pennonana iyaro jalaè, nakkani sining pakkajaè iyaro jalaè mènrè ri pottanangngè. Nainappa tudang pilèi iyaro sining balè: Iya makessingngè nataroni ri bèmpaè naiya dè'è namakessing nabuwanni. 49 Makkuwatoniro lao-laona ri Esso Kiyame', laowi matu malaèka'-malaèka'è passara-sarangngi sining tau majaè polè risining tau iya pogau'èngngi èlona Allataala. 50 Nainappa iyaro sining tau majaè ribuwangngi ri laleng dapo makkèapiè. Nakkuwanaro matu teri sibawa manrasa-rasa. " 51 Nakkutana Yèsus, "Mupahagga iya manennaro?" Nappèbali mennang, "Ripahang Pa'!" 52 Nakkeda Yèsus, "Iyanaro saba'na tungke' guru agama iya mancajiyè anggotana umma'na Allataala, pada-padai sèddiè punna bola iya passuè polè ri onrong waramparanna barab-barang baruè sibawa malaungngè. " 53 Puranana nacurita Yèsus sining pakkalarapangngèro, nasalaini iyaro onrongngè, 54 nalisu ri kampong assalen-Na. Kuwaniro lao mappagguru ri bola assompangngè, na sining tau iya mèngkalingaèngngi kuwaro, hèrang senna'ni. Makkedani mennang, "Polè kègi iyaè tauwè lolongeng pangissengeng pada-padaèro? Sibawa polè kègi towi lolongeng akuwasang untu' pogau'i anu makalallaingngè? 55 Tenniyaga iyaè ana' panrè aju? Tenniyaga iyaro Maria indo'-Na; sibawa silessu-silessuren-Na iyanaritu Yakobus, Yusuf, Simon sibawa Yudas? 56 Sibawa tenniyaga ana'-ana'daran-Na monroto kuwaè? Polè kègi lolongeng iya manennaro?" 57 Na sining tauwè dè' namaèlo tarimai Yèsus. Nakkedana Yèsus lao ri mennang, "Sèddiè nabi ripakalebbii kègi-kègi, sangadinna ri kampong assalenna sibawa ri bolana muto. " 58 Rimakkuwannanaro dè' napogau'i Yèsus maèga anu makalallaing kuwaro saba' dè' mennang namateppe'.

Matius 14

1 Iyaro wettuè, Hèrodès, panguwasana wanuwaè ri Galilèa, naèngkalingani passalenna Yèsus. 2 Nakkeda Hèrodès lao ri pajaba'-pajaba'na, "Pasti iyaè Yohanès Paccemmè iya tuwoènna paimeng! Iyanaro saba'na nappunnai akuwasang pogau'i anu makalallaingngè. " 3 Saba' riyolonaro purani nassurowang Hèrodès tikkengngi Yohanès sibawa siyoi enrengngè puttama'i ri laleng tarungkuè. Napogau'i Hèrodès iyaro, nasaba Hèrodias, bainèna silessurenna, iyanaritu Filipus. 4 Nasaba engka naengka nakkeda makkuwaè Yohanès lao ri Hèrodès, "Dè' naweddikko kawing sibawa Hèrodias!" 5 Sitongenna macinnai Hèrodès mpunoi Yohanès, iyakiya mètaui risining tauwè, nasaba nasengngi mennang Yohanès nabi. 6 Wettunna Hèrodès ramè-ramèiwi esso ajajiyanna, ana' makkunrainna Hèrodias sèrèi ri yolona tau engkaè hadèrè'. Naiyaro sèrè-sèrèna napèsennangi senna'i atinna Hèrodès, 7 angkanna majjancini Hèrodès lao ri ana' makkunraièro sibawa mattanro makkedaè agi-agi muwèllau, riwèrèkko matti. 8 Nasaba ripaggurui ri indo'na, nakkedana iyaro ana'daraè, "Uwèllauwi ulunna Yohanès Paccemmè riwèrèkka makkekkuwangngètto ri yasè'na baki'è!" 9 Naèngkalingana iyaro parèllaungngè, messè senna'ni Hèrodès. Iyakiya nasaba purani mattanro ri yolona sininna tau engkaè hadèrè', napparèntanni kuwammengngi nariturusi parèllaunna iyaro ana'daraè. 10 Nasuroni tauwè lao ri tarungkuè untu' rette'i ulunna Yohanès. 11 Nainappa ritiwi muttama' iyaro ulunna Yohanès ri yasè'na baki'è nariwèrènna iyaro ana'daraè. Nainappa iyaro ana'daraè natiwireng tosi indo'na. 12 Purairo polèni ana'-ana' gurunna Yohanès malai ujuna Yohanès nanakuburu'i. Nainappa mennang lao nanapaissengiwi Yèsus iyaro gau'è. 13 Wettunna naèngkalinga Yèsus iyaro karèbaè, mènrè'ni alè-alèna ri lopiè nanasalaiwi iyaro onrongngè, maèlo lao risèuwaè onrong iya masino-sinoè. Iyakiya wettunna naèngkalinga sining tauwè iyaro gau'è, nasalaini mennang kota-kotana nalao maccinrolaiwi Yèsus lalo ri laleng pottanangngè. 14 Wettunna Yèsus nonno polè ri lopiè nanaitai tau maègaèro, messèni babuwana lao ri mennang. Nainappa napajjappa sining tau iya malasaè ri yelle'na mennang. 15 Arawènnana, polèni ana'-ana' gurunna Yèsus makkeda, "Arawènni na onrongngèwè tassubbu. Lebbi kessing muwi Bapa' tasuroi iyaro sining tauwèro lao, kuwammengngi nawedding melli anrè ri dèsa-dèsaè. " 16 Nakkeda Yèsus, "Aja'na nalao mennang, ikona mpèrèngngi mennang anrè. " 17 Nappèbali ana'-ana' gurunna Yèsus, "Lima bawang roti riyappunnangi sibawa duwakkaju balè. " 18 Nakkeda Yèsus, "Tiwii mai. " 19 Nainappa Nasuro iyaro tau maègaè tudang ri tompo'na wellaè. Purairo nalani iyaro roti limaè sibawa balè duwaè, nainappa conga mènrè ri langiè nanasukkuru ri Allataala. Purairo napuwè'-puwè'ni iyaro rotiè sibawa liman-Na na-Nawèrèngngi ana'-ana' gurun-Na untu' nabagè-bagè lao ri tau maègaè. 20 Nanrè manenna mennang gangka messo. Purairo napaddeppungenni ana'-ana' gurunna Yèsus lebbinna iyaro nanrè; engka seppulo duwa baku penno. 21 Iya manrèro wettuè engka kira-kira limassebbu tau, dè'pa naribilang makkunraiè sibawa ana'-ana'è. 22 Purairo nasuroni Yèsus ana'-ana' gurun-Na mènrè ri lopiè nalebbi riyolo mallètto ri tapparengngèro, nanasuroi tau maègaèro lisu. 23 Laonana tau maègaèro, mènrè'ni Yèsus ri sèddiè bulu-bulu alè-alèna untu' massempajang. Na wenninnana, monro mupi Yèsus kuwaro alè-alèna. 24 Na iyaro wettuè lopi iya natonangiyè ana'-ana' gurunna Yèsus, mabèlani ri tengnga-tengngana tapparengngè. Iyaro lopiè takkunru-kunruni naunru bombang, saba' madduppangngi angingngè iyaro lopiè. 25 Pallawangenna tettè tellu sibawa tettè enneng èlèè, polèni Yèsus ri mennang ri tompo'na uwai. 26 Wettunna ana'-ana' gurun-Na naita ri tompo'na uwai, tassèleng senna'ni mennang. Gorani mennang mètau, "Sètang!" 27 Iyakiya tappa mappèbaliwi Yèsus, "Tennakko! Iyya Yèsus. Aja' mumètau!" 28 Nakkeda Pètrus, "Rèkko mèmekki Yèsus, suroka joppa ri tompo'na uwai. " 29 Nakkeda Yèsus, "Laono mai!" Nonnoni Pètrus polè ri lopiè najoppa ri tompo'na uwai lao ri Yèsus. 30 Iyakiya wettunna Pètrus naita pèkkugi rajanna angingngè ri tapparengngèro mètauni, nanammulana tallemme'. Nagorana, "Puwang, tulukka!" 31 Naloro'ni masitta limanna Yèsus nanatikkengngi, sibawa makkeda, "Pètrus, Pètrus, makurang teppe'ko. Magi mubata-bata ri alè-Ku?" 32 Naènrè'na iya duwa ri lopiè, napaja tona angingngè. 33 Nasuju'na massompa ana'-ana' gurunna Yèsus. Makkedani mennang, "Tongekki Puwang iyanaritu Ana'na Allataala!" 34 Wettunna mennang lettu ri liweng tapparengngèro, mappottananni mennang ri Gènèsarèt. 35 Na wettunna riita risining tauwè kuwaro makkedaè iyaro tau polè iyanaritu Yèsus, napatassiyani iyaro karèbaè lao ri sininna daèraè ri seddèna kotaèro. Naritiwina sining tau malasaè ri Yèsus. 36 Nanaèllauni mennang ri Yèsus kuwammengngi weddingngi mennang nagèssa jumba-Na, namuni cappa'na bawang. Na sininna iya gèssaèngngi majjappai.

Matius 15

1 Engka sikalompo' tau Farisi sibawa siyagangngarè guru agama polè ri Yèrusalèm lao ri Yèsus. Makkutanai mennang ri Yèsus, 2 "Magi ana'-ana' gurum-Mu najjalèkkaiwi ade'na toriyolota? Wettu maèlona manrè, dè' mennang nabbissa jari lebbi riyolo situru peraturangngè!" 3 Nappèbali Yèsus, "Namagi towi iko muwajjalèkkaiwi parèntana Allataala, nasaba maèlono bawang maccowèriwi ade'na nènè-nènèmu? 4 Saba' makkedai Allataala, 'Pakalebbii ambo'-indo'mu, ' sibawa 'Nigi-nigi makkeda-kedaiwi ambo'-indo'na, harusu'i rihukkung matè. ' 5 Iyakiya iko mappagguruwangngi! Rèkko makkedai tauwè ri tomatowanna, 'Dowi iya harusu'è uwèrèngngi ambo' sibawa indo', purani uwakkasuwiyangeng lao ri Allataala. ' 6 na iyaro tauwè dè'na niwajikkan untu' pakalebbii tomatowanna. Jaji, nasaba ade'na nènè-nènèmu, mupakariyawai ada-adanna Allataala. 7 Tau munapè'ko iko! Sicoco' tongeng iya nabotoè Nabi Yèsaya passalemmu, iyanaritu, 8 'Makkuwaiyè adanna Allataala: Iyaè sining tauwè pakalebbi-Ka ri tèmunna bawang, iyakiya atinna mennang mabèlai polè ri Iyya. 9 Percuma mennang sompa-Ka, saba' peraturang tolino nappagguruwang mennang samanna iyaro peraturak-Ku. ' " 10 Nanaobbini Yèsus sining tauwè nakkeda lao ri mennang, "Engkalingai kuwammengngi mupahangngi! 11 Iya muttama'è ri temuè dè' napanajisi'i tauwè'; iya bawang massuè polè ri tèmunna, iyanaritu mèbbui tauwè najisi'. " 12 Nanapolèna ana'-ana' gurunna Yèsus nanakkeda ri Yèsus, "Naissegga Bapa' makkedaè sining tau Farisiè tassinggungngi wettunna naèngkalinga Bapa' makkeda makkuwaro?" 13 Nappèbali Yèsus, "Tungke' tanet-taneng iya dè'è natanengngi Ambo'-Ku ri surugaè, ribèbbui matu. 14 Aja'na mujampangiwi sining tau Farisièro. Pamimping-pamimping buta maneng iyaro; narèkko tau butaè pimpingngi tau butaè, sempè' duwai matu ri laleng sèpe'è. " 15 Nakkeda Pètrus, "Tulungngi tapènessaingekki iyaro pakkalarapangngè, Pa'!" 16 Nappèbali Yèsus lao ri mennang, "Dè'paga palè mupahang towi? 17 Dè'ga muwissengngi, makkedaè iya muttama'è ri laleng tèmuè muttama'i ri laleng babuwaè, nainappa massusi? 18 Iyakiya iya massuè polè ri tèmuè, assalenna polèi ri atiè; na iyanaro panajisi'i. 19 Saba' nawa-nawa majaè mompoi polè ri atiè, iya nassabariyè tauwè mabbuno, malaweng, kèdo maja, mènnau, mabbèrè sabbi bellè-bellè sibawa mappètenna. 20 Gau'-gau'ènnaro mèbbui tauwè najisi', na tenniya manrè sibawa jari dè'è naribissai. " 21 Nasalaini Yèsus iyaro onrongngè nalao ri daèra seddèna kota Tirus sibawa Sidon. 22 Engka sèddi makkunrai Kanaan polè ri daèraèro lao ri Yèsus nagora-gorato, "Ana' Daud, amasèika! Nauttamakiwi sètang ana' makkunraikku. Namaladde senna. " 23 Dè' siseng nabaliwi Yèsus iyaro makkunraiè. Nanapolèna ana'-ana' gurunna Yèsus ri Alèna nanaèllauwi, "Pa', suroi iyaro makkunraiè meddè. Marukka bawammi ri monritta!" 24 Nappèbali Yèsus, "Risuro-Ka bawang lao ri bangsa Israèliè, lebbi-lebbipi iya pusaè. " 25 Napolè iyaro makkunraiè nasuju' ri yolona Yèsus nakkeda, "Tulukka, Puwang. " 26 Nappèbali Yèsus, "Dè' namakessing malai nanrèna ana'-ana'è naribuwangeng asuè. " 27 Nakkeda iyaro makkunraiè, "Tongeng, Puwang, iyakiya iyaro asuè nanrèi sèsa-sèsana iya sempè'è polè ri mèjanna puwanna. " 28 Nanakkeda Yèsus lao ri makkunraièro, "Bu', maraja tongeng teppe'mu! Leppessanni kajajiyang aga muwacinnai!" Iyatoro wettuè najjappa iyaro ana' makkunraiè. 29 Nasalaini Yèsus iyaro onrongngè, nanallaleng tuttungngi wiring Tappareng Galilèa. Nainappa mènrè ri sèddiè bulu-bulu nanatudang kuwaro. 30 Maègani tau lao ri Yèsus tiwii sining tau iya kèppangngè, butaè, pèso'è, pèpè, sibawa maèga mupa malasa laingngè. Iyaro sining tauwè nataroi mennang ri yolona Yèsus, nanapajjappai Yèsus iyaro sining tauwè. 31 Hèrang senna'ni tau maègaè iya engkaè kuwaro wettunna naita tau pèpè mullèi mappau, majjappa tau kèppangngè, joppa tau pèso'è sibawa makkita tau butaè. Nanapakalebbini mennang Allataalana bangsa Israèliè. 32 Nainappa naobbi Yèsus ana'-ana' gurun-Na nanakkeda, "Messè babuwa-Ku lao ri tau maègaèwè. Tellungngessoni ittana mennang sibawak-Ka, na makkekkuwangngè dè' mennang nappunnai anrè. Dè' Umaèlo leppessangngi mennang lisu sibawa lobbang babuwana, marenne'i matu ri lalengngè. " 33 Nanakkutanana ana'-ana' gurunna Yèsus lao ri Alèna, "Kègani wedding lolongeng anrè ri daèra tassubbuè untu' tau singngègaèwè?" 34 Nakkutana Yèsus ri mennang, "Engka siyaga rotimmu?" Nappèbali mennang, "Pitu, sibawa siyagangngarè kajunna balè baiccu. " 35 Nasuroni Yèsus tau maègaèro tudang ri tompo'na tanaè. 36 Nainappa nala iyaro pituè roti sibawa balè, nanasukkuru ri Allataala. Purairo napuwè'-puwè'ni iyaro rotiè enrengngè balè sibawa liman-Na, nainappa Nawèrèng ana'-ana' gurun-Na. Nanabbagè-bagèyanni mennang lao ri tau maègaèro. 37 Manrè manenni iyaro tau maègaè gangka messo. Purairo napaddeppungenni ana'-ana' gurunna Yèsus lebbinna iyaro nanrè. Iya manenna pitu baku penno. 38 Jumellana tau iya manrè wettuèro engka patassebbu tau worowanè bawang, dè'pa naribilang makkunraiè sibawa ana'-ana'è. 39 Nainappa nasuro Yèsus lisu tau maègaèro. Na Yèsus mènrè'ni ri sèddiè lopi nalao ri daèra Magadan.

Matius 16

1 Engka siyagangngarè tau Farisi sibawa tau Saduki lao ri Yèsus maèlo palaiwi jebba. Naèllauwi mennang pogau' anu makalallaing untu' pabuttiwi makkedaè polèi ri Allataala. 2 Nappèbali Yèsus, "Rèkko labui essoè, makkedako, 'Makessing wettuè, saba' macella langiè. ' 3 Na ri èlèè, makkedako, 'Maèloi bosi iyaè essoè, saba' macella langiè sibawa massalawu. ' Nah, mullèi teppui wettuè ri laleng muwitana langiè, padahal tanra-tanranna esso ri monriè dè' mullèi teppui!" 4 "Anengka makkuwa jana tauwè makkekkuwangngè. Muwèllau-Ka mèbbu anu makalallaing. Dè' nariwèrèkko matu muwi sèddi anu makalallaing, sangadinna anu makalallainna Nabi Yunus. " Purana makkeda makkuwaro Yèsus, nasalaini mennang nalao. 5 Wettunna ana'-ana' gurunna Yèsus lettu ri liweng tappareng, nappai naisseng mennang makkedaè nallupaiwi tiwi roti. 6 Nakkeda Yèsus lao ri mennang, "Atike'ko lao ri raginna tau Farisiè sibawa Sadukiè. " 7 Naèngkalingana iyaro ada-adanna Yèsus, makkedani ana'-ana' gurunna Yèsus sèddiè lao ri laingngè, "Makkeda makkuwairo nasaba dè' natiwi roti. " 8 Naissengngi Yèsus aga nabicara mennang. Jaji makkedani, "Magi mupersoalkangngi dè muwappunnai roti? Makurang teppe'ko iko! 9 Dè'paga mupahangngi? Dè'ga muwèngngerangngi limaè roti iya Upuwè'-puwè'è untu' limassebbu tau? Siyaga baku lebbinna iyaro rotiè iya mupaddeppungengngè? 10 Na pèkkugi towi pituè roti untu' patassebbuè tau? Siyaga baku lebbinna iya mupaddeppungengngè? 11 Magi nadè' muna mupahangngi makkedaè dè' Uwabbicara sibawa iko passalenna rotiè? Atike'ko lao ri raginna tau Farisiè sibawa Sadukiè!" 12 Angkanna napahanni ana'-ana' gurunna Yèsus makkedaè Yèsus suroi mennang matike' tenniya lao ri ragi iya ripakè mèbbu roti, iyakiya lao risining pappagguruwanna tau Farisiè sibawa Sadukiè. 13 Laoni Yèsus ri daèra seddèna kota Kaisarèa Filipi. Nakkutanana kuwaro lao ri ana'-ana' gurun-Na, "Manuru' adanna tauwè, niga iyaro Ana'na Tolinoè?" 14 Nappèbali ana'-ana' gurunna Yèsus, "Engka makkeda Yohanès Paccemmè. Engkato makkeda Elia. Laingngè makkedai Yèrèmia, iyarè'ga sala sèddinna nabiè. " 15 "Iyakiya manuru' iko, niga Iyya'è?" pakkutanana Yèsus ri mennang. 16 Nappèbali Simon Pètrus, "Bapa' iyanaritu Arung Pappassalama'è, Ana'na Allataala Iya Tuwoè. " 17 Nakkeda Yèsus, "Maupe' senna'ko Simon, ana' Yona! Saba' tenniya tolino paissengiko gau'èro, sangadinna Ambo'-Ku ri surugaè. 18 Rimakkuwannanaro issenni, ikona iyanaritu Pètrus, batu masse'è. Na ri yasè'na pallangga batuèwè maèlo Upatettong garèja-Ku, iya dè'è nawedding ricau; namuni amatèngngè! 19 Namaèlo-Ka mpèrèkko goncinna Lino Barunna Allataala. Aga muwattèyang ri linoè, riyattèyang towi ri surugaè. Na aga mupattongeng ri yasè'na linoè, ripattongeng towi ri surugaè. " 20 Purairo naparèngngerangini Yèsus ana'-ana' gurun-Na kuwammengngi aja' napowadai lao ri nigi-nigi makkedaè Alèna ritu Arung Pappassalama'. 21 Mappammulai wettuèro, napowadani Yèsus terus-terang lao ri ana'-ana' gurun-Na, makkedaè harusu'i lao ri Yèrusalèm na-Napèneddingiwi maèga anrasa-rasang polè risining pamimpingngè, kapala-kapala imangngè sibawa guru-guru agamaè. Riyunoi matu, iyakiya ri esso matelluè, moto'i matu paimeng. 22 Nainappa Pètrus nagettenni Yèsus lao ri benrèn-Na nanakaddaowi, adanna, "Memmuwarè' napabèlaiwi Allataala iyaro gau'è, Puwang! Aja' lalo nakajajiyang iyaro gau'è lao ri Puwang!" 23 Nagilinna Yèsus nakkeda lao ri Pètrus, "Esu'ko, Paggoda! Mulawa-lawai-Ka. Iyaro pikkirammu, pikkirang tolino; tenniya pikkirang Allataala!" 24 Nainappa makkeda Yèsus lao ri ana'-ana' gurun-Na, "Tau maèloè maccowèri-Ka, harusu'i nallupai apentingeng alèna, naèssangngi sallina, namatteru maccowèri-Ka. 25 Saba' tau iya maèloè mèwaiwi atuwonna, ateddèngengngi matu atuwong. Iyakiya tau iya mappèsonangngèngngi atuwonna untu' Iyya, nalolongengngi matu. 26 Aga sarona lao risèddiè tau, rèkko sininna linoèwè mancajiwi appunnangenna iyakiya teddèngngi atuwonna? Weddigga atuwongngè risèlè sibawa anu sèuwaè? 27 Dè'na namaitta Ana'na Tolinoè silaong sining malaèka'-Na napolè matu sibawa akuwasanna Ambo'-Na. Iyaro wettuè Nawale'i tungke'-tungke' tau situru pangkaukenna. 28 Issenni! Riyelle'mu mennang kuwaè engka dè' namatè matu, riwettu dè'napa naitai Ana'na Tolinoè polè selaku Arung. "

Matius 17

1 Enneng essona ri munrinna natiwini Yèsus Pètrus sibawa Yakobus enrengngè silessurenna Yohanès, massala risèuwaè bulu matanrè. 2 Ri yolona mennang, tappinrani tappana Yèsus: Macakkai rupan-Na pada-pada mata essoè sibawa pakèyan-Na maputè lala'-lala'. 3 Nainappa iya telluro ana' gurunna Yèsus naitai Musa enrengngè Elia mabbicara sibawa Yèsus. 4 Nakkeda Pètrus lao ri Yèsus, "Puwang, manyameng senna'ki kuwaè. Rèkko tapojiwi Puwang, upatettongekki matu tellu kèma kuwaè: sèddi untu' Puwang, sèddi untu' Musa sibawa sèddi untu' Elia. " 5 Ri wettu mabbicarana mupa Pètrus, ellung iya macakka senna'è salipuriwi mennang, na polè ri ellungngèro, naèngkalingai saddaè makkeda, "Iyanaè Ana'-Ku iya Uwamasèiyè. Napèsennangiwi atik-Ku. Engkalingai Alèna!" 6 Wettunna ana'-ana' gurunna Yèsus mèngkalingai iyaro saddaè, makkumani tauna mennang angkanna tassulung ri tanaè. 7 Iyakiya polèi Yèsus gèssai mennang. Nakkeda-Na, "Oto'no, aja' mumètau!" 8 Wettunna mennang makkita, dè'na naitai mennang, muwi niga sangadinna Yèsus bawang. 9 Wettunna mennang nonno polè ri buluèro, riparèngngerangiwi mennang ri Yèsus, "Aja' mupauwi lao ri niga-niga aga muwitaè onna'ro, riwettu dè'napa naripatuwo paimeng Ana'na Tolinoè polè ri amatèngngè. " 10 Nakkutana ana'-ana' gurunna Yèsus ri Alèna, "Magi guru-guru agamaè napowadai makkedaè harusu'i polè Elia lebbi riyolo?" 11 Nappèbali Yèsus, "Mèmeng polèi Elia sibawa maèloi pacceppiwi sininna sèuwa-sèuwaè. 12 Iyakiya makkeda-Ka ri iko, purani engka Elia, iyakiya dè' naissengngi tauwè; nagaukengngi mennang siyèlo-èlona bawang. Namakkuwatoro rigaukengngi matu Ana'na Tolinoè. " 13 Nanapahanni ana'-ana' gurunna Yèsus makkedaè mabbicarai Yèsus passalenna Yohanès Paccemmè. 14 Wettunna Yèsus sibawa iya tellu ana' gurun-Na lisu ri tau maègaèro, engka sèddi tau worowanè polè, suju' ri yolona Yèsus, 15 nakkeda, "Bapa', amasèiwi ana'ku. Malasa sèsè manu'-manu'kengngi. Makkumani serona iyaro lasa sèsè manu'-manu'kenna angkanna biyasai sempè ri lalenna apiè sibawa biyasa towi sempè ri lalenna uwai. 16 Purani utiwi ri ana'-ana' gurunna Bapa', iyakiya dè' naullèi pajjappai. " 17 Nappèbali Yèsus, "Tenniya culè-culè ikoè! Lao sala tongekko sibawa dè' mumateppe. Gangka kèga-Ka harusu' monro sibawakko sibawa sabbara' lao ri iko? Tiwii iyaro ana'è kumaiyè!" 18 Nainappa Yèsus nasuro roh maja iya engkaè ri lalenna iyaro ana'è massu. Massuna iyaro roh majaè, majjappana iyaro ana'è iyatoro wettuè. 19 Nainappa laoni ana'-ana' gurunna Yèsus polè ri Alèna secara alè-alè sibawa makkutana ri Alèna, "Pa' aga saba'na idi dè' nariyullè paddèsu'i roh majaè?" 20 Nappèbali Yèsus, "Saba' makurang teppe'ko. Engngerangngi! Rèkko mappunnaiko teppe' silloppo batu sawi-sawiè, weddikko makkeda lao ri buluèwè, 'Lèttè'ko kuwaro!' Pasti lèttè matu buluèwè. Dè'na gaga muwi sèddi iya dè'è mullèi pogau'i! 21 Iyakiya sètang makkuwaèwè, banna weddingngi ripassu ri sempajangngè sibawa puwasaè bawang. " 22 Wettunna ana'-ana' gurunna Yèsus maddeppungeng ri Galilèa, makkedani Yèsus lao ri mennang, "Dè'na namaitta nariyabbèrèyang Ana'na Tolinoè lao ri akuwasanna tolinoè. 23 Riyunoi matu, iyakiya ri esso matelluè ripatuwoi paimeng. " Namessè senna'na ana'-ana' gurun-Na. 24 Wettunna Yèsus sibawa ana'-ana' gurun-Na lettu ri Kapernaum, polèni sining passinge' simana Bolana Puwangngè ri Pètrus nanakkutana, "Nawajaga gurummu simana Bolana Puwangngè iyarè'ga dè'?" 25 Nappèbali Pètrus, "Nawaja!" Wettunna lisu Pètrus, riyèwai ada ri Yèsus lebbi riyolo, "Simon, pèkkugi pallolongemmu? Niga harusu' wajai simana iyarè'ga simana lao risining arunna linoèwè? Ra'ya'èga iyarè'ga tau laingngè?" 26 Nappèbali Pètrus, "Tau laingngè. " Nakkeda Yèsus, "Rèkko makkuwaitu, dè'tu naparellu makkamaja ra'ya'è. 27 Iyakiya aja'na tasinggungngi pappèneddinna sining tauwèro. Jaji laono ri tapparengngè mammèng. Alani balè bunge' mutikkengngè. Muruntu'i matu ri laleng tèmunna dowi iya genne'è untu' simata sipadduwa. Alani iyaro dowiè namuwajai lao ri mennang simata untu' Bolana Puwangngè. "

Matius 18

1 Iyaro wettuè polèni ana'-ana' gurunna Yèsus ri Yèsus nanakkutana, "Niga riyangga' kaminang battowa ri yelle'na umma'na Allataala?" 2 Naobbini Yèsus sèddi ana' baiccu, nanasuroi tettong ri yolona mennang. 3 Nainappa makkeda Yèsus, "Ateppe'no! Banna rèkko tappinrako mancaji pada-pada ana'-ana'èwè, mumancaji matu anggota-Na umma'na Allataala. 4 Tau iya pakariyawaèngngi alèna mancajiwi pada-pada iyaè anana'è, iyanaritu kaminang battowa ri yelle'na umma'na Allataala. 5 Na tau iya tarimaèngngi anana' iya pada-padaèwè nasaba Iyya, bettuwanna natarima-Ka. " 6 "Niga nassabariwi sala sèddinna polè risining tau iya marenni'èwè dè' namateppe' ri Iyya, lebbi kessing muwi rèkko batu pallèluè riyassiyorengngi ri ellonna naripatallemme ri tasi' malamungngè. 7 Temmaka cilakana linoèwè nasaba gau'-gau' iya nassabariyè tauwè namadosa. Mèmeng gau'-gau' makkuwaèro tuli engka matu, iyakiya cilakai tau iya nassabariyè! 8 Rèkko limammu iyarè'ga ajèmu mèbbuko madosa, rette'i namuwabbèyangngi. Lebbi kessing muwi tuwo sibawa Allataala dè'gaga lima siwali iyarè'ga ajè, naiya riyabbèyangngè ri laleng api ranakaè sibawa iya duwa limammu sibawa ajèmu. 9 Narèkko matammu nassabariko pogau' dosa, cukkèi namuwabbèyangngi. Lebbi kessing muwi tuwoko sibawa Allataala dè' gaga sèddi matammu naiya riyabbèyangngè ri laleng api ranakaè sibawa iya duwa matammu. " 10 "Atike'ko! Aja' mupakatunai sala sèddinna polè risining tau iya marenni'èwè. Saba' èngngerangngi, sining malaèka'na mennang tuli engkai ri yolona Ambo'-Ku ri surugaè. 11 Saba' Ana'na Tolinoè polèi untu' passalama'i tau iya pusaè! 12 Pèkkugi pallolongemmu? Akkalarapanna engka sèddi tau iya mappunnaiyè sèratu kajunna bimbala', na sikaju polè risining bimbala'èro teddèng, aga napogau' matu iyaro tauwè? Pasti nasalaiwi matu bimbala' iya asèraè pulona asèra kajunnaro ri bulu-buluè nalao sappai iya teddèngngèro. 13 Narèkko nalolongenni paimeng iyaro bimbala'è -- mateppe'-Ka -- lebbi rennui matu lao ri bimbala' sikajuèro naiya laowè riasèraè pulona asèra kajunna laingngè iya dè'è nateddèng. 14 Makkuwatoniro Ambo'mu ri surugaè dè' namaèlo sala sèddinna polè risining tauwè iya nappaè mateppe' lao ri Iyya'è pusa. " 15 "Rèkko madosai silessuremmu lao ri iko, laono ri alèna namupaitangngi asalanna. Pogau'i iyaro sibawa mammekko-mekko sipadduwa bawang. Rèkko naccowèri ada-adammu, mulolongenni iyaro silessuremmu paimeng. 16 Iyakiya rèkko dè', paccowèko sèddi iyarè'ga duwa taupa. Saba' ri laleng Kitta'è tarokii, 'Kaminang cèddè duwa iyarè'ga tellu sabbi riyapparellung untu' pannessai sèddiè tau iya riteppuè pasala. ' 17 Rèkko dè' natarimai pangajana iyaro sining tauwè, paissengini iyaro gau'è lao ri jema'è. Na angkanna, rèkko dè' namaèlo tarimai pangajana jema'è, angga'ni selaku passinge' sima sibawa sèddi tau iya dè'è naissengngi Allataala. " 18 "Issenni: Aga riyattèyang ri linoè, riyattèyang towi ri surugaè. Na aga mupattongeng ri linoè, ripattongeng towi ri surugaè. 19 Naisseng towi: Rèkko ri yelle'mu ri linoèwè duwa tau siyempe' passalenna agi-agi sibawa nassempajangenna, iyaro sempajanna natarimai matu Ambo'-Ku ri surugaè. 20 Saba' kègi duwa iyarè'ga tellu tau maddeppungeng nasaba Iyya, engka-Ka ri tengnga-tengngana mennang. " 21 Nainappa laoni Pètrus ri Yèsus nanakkutana, "Puwang, rèkko madosai silessurekku lao ri iyya, gangka wèkkasiyaga harusu'ka maddampengengngi? Gangka wèkkapituga?" 22 Nappèbali Yèsus, "Dè', dè' nagangka wèkkapitu, iyakiya wèkkapituppuloi wèkkapituè! 23 Saba' rèkko mapparèntai Allataala, keadaanna pada-padai ri laleng pakkalarapangngèwè: Engka sèddi arung maèlo pacceppi manengngi inrenna ata-atanna. 24 Wettunna bunge' mapparèssa ripangoloni ri alèna sèddi ata iya makkinrengngè majjuta-juta, 25 nadè' naullèi mpajai. Jaji napparèntanni iyaro arungngè kuwammengngi iyaro ataè naribalu' silaong ana'na enrengngè bainèna, kuwaèttopa sininna appunnangenna untu' mpajai inrenna. 26 Nasuju'na iyaro ataè ri yolona iyaro arungngè, nanaèllauwi, 'Puwang, sabbara'ki lao ri atatta. Maèlo muwi atatta mpajai manengngi inrenna atatta. ' 27 Namessèna iyaro arungngè lao ri ataèro, angkanna naleddani sininna inrenna. 28 Wettunna massu iyaro ataè, siruntu'ni sellaona, sèddiè atato, iya makkinrengngè ri alèna siyagangngarè sebbunna. Natikkenni iyaro sellaona, nanrekkè'i nanakkeda, 'Wajani sininna inremmu!' 29 Nasuju'na iyaro sellaona ri yolona nanaèllau towi, 'Sabbara'ki riyolo' sellao, maèloka waja manengngi!' 30 Iyakiya nasampèyangngi iyaro ataè. Sibalè'na naputtama'i ri tarungkuè narapi pura nawaja maneng inrenna. 31 Wettunna naita ata-ata laingngè aga pura kajajiyang, messèni mennang nanalaporo'i gau'èro ri arungngè. 32 Naiyaro arungngè naobbini iyaro ata majaè nanakkeda lao ri ataèro, 'Ata iya majaè! Sininna inremmu purani uledda nasaba muwèllauwi ri iyya. 33 Dè'ga naharusu' tokko mamasèiwi sellaomu pada-pada purana uwamasèiko?' 34 Macai senna'ni iyaro arungngè. Naputtama'ni iyaro ata majaè ri laleng tarungkuè narapi nawaja maneng inrenna. " 35 Natutu'ni curitana Yèsus sibawa ada-adaèwè, "Makkuwatoniro Ambo'-Ku ri surugaè nagaukekko matu tungke'-tungke', rèkko dè' muwaddampengengngi silessuremmu sibawa masagagèna. "

Matius 19

1 Puranana napowada maneng Yèsus, nasalaini Galilèa nalao ri daèra Yudèa ri liwenna Salo Yordan. 2 Maèga tau maccowèriwi Alèna, naripajjappana mennang kuwaro. 3 Napolèna sining tau Farisiè untu' palaiwi siyo. Makkutanani mennang, "Manuru' hukkunna agamata, weddigga tauwè massarang bainèna sibawa alasang agi-agi?" 4 Nappèbali Yèsus, "Dè'paga mubacai ri laleng Kitta'è makkedaè Pappancajiè iya mèbbuèngngi rupa tauwè, ri mulanna naèbbui mennang worowanè sibawa makkunraiè? 5 Napurairo makkedani, 'Iyanaro saba'na worowanè nasalaiwi indo' ambo'na namassèddi sibawa bainèna, namancaji sèddi iya duwa. ' 6 Jaji tenniyana mennang duwa tau, iyakiya sèddi. Iyanaro saba'na aga pura napassèddi Allataala dè' nawedding napassarang tolinoè. " 7 Nanakkutanana sining tau Farisiè ri Yèsus, "Rèkko makkuwaitu, magi Musa nasuroi tauwè telle'i bainèna iya nabbèyangngè?" 8 Nappèbali Yèsus, "Napalaloko Musa massarang bainèmu saba' mawatang senna'ko ripagguru. Iyakiya sitongenna dè' nappakkuwaro ri pammulanna. 9 Jaji, èngkalingai iyaè: Nigi-nigi massarang bainèna -- padahal iyaro makkunraiè dè' nakèdo sala -- nainappa kawissi sibawa makkunrai laingngè, iyaro tauwè malawengngi. " 10 Nanakkedana ana'-ana' gurunna Yèsus lao ri Yèsus, "Rèkko assisumpungenna lakkaiè sibawa bainè pada-padaèro, lebbi kessing muwi aja' takawing. " 11 Nappèbali Yèsus, "Dè' nasininna tauwè mullèi tarimai ada-adaèro, banna sining tau iya puraè napattentu Allataala. 12 Nasaba engka tau dè' naullèi tennakawing, saba' mèmeng mennang jajiwi makkuwaro. Engkato dè' nakawing nasaba tau laingngè mèbbui makkuwaro. Sibawa engkato iya alèna muto pilèi dè' nakawing, kuwammengngi naullèi tumaningiwi Allataala. Tau iya mullèngngi tarimai pappagguruwangngèwè, leppessanni natarima. " 13 Engka sining tau tiwi ana'-ana' lao ri Yèsus kuwammengngi napalènne'i liman-Na ri tompo' ulunna sibawa riyèllaudowangeng. Iyakiya ana'-ana' gurunna Yèsus macairiwi iyaro sining tauwè. 14 Nakkeda Yèsus lao ri ana'-ana' gurun-Na, "Leppessangngi iyaro ana'-ana'è lao ri Iyya! Aja' muwattèyangngi mennang, saba' sining tau makkuwaèwè mancaji anggotana umma'na Allataala. " 15 Nanapalènne'ni Yèsus liman-Na ri tompo' ulunna iyaro ana'-ana'è nanabarakkakiwi mennang. Nainappa Nasalai kuwaro. 16 Risèuwaè esso, engka sèddi worowanè polè ri Yèsus. Adanna, "Pa' Guru, pangkaukeng makessing maragaè harusu' upogau' kuwammengngi weddingngi utarima atuwong tongengngè sibawa mannennungengngè?" 17 Nappèbali Yèsus, "Magi muwakkutana ri Iyya passalenna aga iya makessingngè? Banna Sèddi bawang makessing. Rèkko maèloko tuwo, harusu'ko turusiwi parènta-parèntana Allataala. " 18 Nakkutana iyaro tauwè, "Parènta kègaènnaro?" Nappèbali Yèsus, "Aja' muwabbuno; aja' mumalaweng; aja' muwènnau; aja' musabbi bellè-bellè; 19 pakalebbii ambo' sibawa indo'mu; sibawa amasèiwi pada-padammu tau pada-pada muwamasèinna alèmu. " 20 Nappèbali iyaro kalloloè, "Pura manenni uturusi iyaro parèntaè. Agapi parellu?" 21 Nakkeda Yèsus lao ri kalloloèro, "Rèkko maèloko mancaji sukku, laono mubalu'i sininna appunnangemmu. Wèrèngngi ellinna tau kasiyasiè, namulolongengngi matu waramparang ri surugaè. Purairo, laono muwaccowèri-Ka!" 22 Naèngkalingana iyaro ada-adaè, laoni iyaro kalloloè sibawa masussa atinna saba' sugi senna'i. 23 Nainappa makkedani Yèsus lao ri ana'-ana' gurun-Na, "Makkeda-Ka lao ri iko, mawatang senna' tau sugiè mancaji anggota-Na umma'na Allataala. 24 Na iyapaè maèloto Upowadakko; lebbi gampang muwi sèddiè unta muttama' ri sebbo'na jarungngè, naiya sèddiè tau sugi muttama' ri Lino Barunna Allataala. " 25 Wettunna ana'-ana' gurun-Na naèngkalinga iyaro adanna Yèsus, hèranni mennang. Nakkeda mennang, "Rèkko makkuwaitu, nigana wedding salama'?" 26 Naitani Yèsus mennang nainappa makkeda, "Untu' tolinoè, mustahèlè' iyaro! Iyakiya untu' Allataala, wedding maneng. " 27 Nakkeda Pètrus, "Itai, idi'è pura risalaini sini-sininnaè untu' maccowèriwi Bapa'. Na agana matu ritarima?" 28 Nakkeda Yèsus lao ri mennang, "Ateppe'no: Ri Lino Baruèro, Ana'na Tolinoè tudangngi matu ri kadèra arajan-Na malebbiè. Iyaro wettuè iko ana'-ana' guruk-Ku tudakko matu ri yasè'na seppuloè duwa kadèra arajang sibawa madèlèkiwi seppuloè duwa suku bangsana Israèliè! 29 Na tungke' tau iya salaiyèngngi bolana, iyarè'ga padaorowanèna, iyarè'ga ana'daranna, iyarè'ga ambo' indo'na, iyarè'ga ana'-ana'na, iyarè'ga dare'na nasaba Iyya, iyaro tauwè natarimai matu lisu leppe' ikkasiratu. Nanatarima towi atuwong mannennungengngè. 30 Iyakiya maèga tau makkekkuwangngèwè poddiyolo namancaji matu poddimonri na makkekkuwangngèwè iya poddimonriè mancajiwi matu poddiyolo. "

Matius 20

1 "Rèkko mapparèntai Allataala, keadaanna pada-padai pakkalarapangengngèwè: Engka sèddi tau mappunnai dare' anggoro, massui ri èlèè untu' sappa tau majjama ri dare' anggoro'na. 2 Nasitujuinnana untu' riwaja' mennang sèddi dowi pèra' si esso, nasuroni majjama ri dare' anggoro'na. 3 Tettè asèra èlèè, laosi iyaro punna dare'è, nanaitai siyagangngarè tau ri pasaè dè' jamanna. 4 Nakkedana lao ri mennang, 'Laono majjama ri dare' anggoro'ku. Uwajapo sibawa gaji iya sitinajaè. ' 5 Laoni mennang. Tettè seppulo duwa tangassoè sibawa tettè tellu arawèngngè, massusi iyaro punna dare'è nanapogau'i gau' pada-padaè. 6 Kira-kira tettè lima arawèngngè, massusi nanaitai engka mupa tau dè' jamanna. Nanakkutana lao ri mennang, 'Magi mutettong puppu esso kuwaè dè' gaga mupogau'?' 7 Nappèbali iyaro sining tauwè, 'Dè'gaga tau pajjamaki. ' Nakkeda iyaro punna dare'è, 'Rèkko makkuwaitu, laono majjama ri dare' anggoro'ku. ' 8 Labunnana essoè, makkedani iyaro punna dare' anggoro'è lao ri mandoro'na, 'Obbini iyaro sining pajjamaè, namuwajai gajinna tungke'-tungke', mappammulai muttama'è poddimonriè gangka iya bungè muttama'è. ' 9 Napolèna sining pajjamana iya mappammulaè majjama tettè lima arawèngngè. Tungke'-tungke' tarima sèddi dowi pèra'. 10 Napolè tona sining pajjama iya risèuwaè mappammula èlèè. Mappikkiri'ni mennang tentu lebbi mennang natarima matu. Padahal sèddi tommi dowi pèra' bawang riwèrèngngi. 11 Wettunna natarima iyaro dowiè, mannoko'-noko'ni mennang lao ri punna dare'è: 12 'Iyaro sining pajjama iya polè poddimonriè sijammi bawang majjama. Na idi'è si essoki majjama ri yawana tire' pella kessoè, iyakiya Puwang mpajai mennang pada-pada idi'!' 13 Nappèbali iyaro punna dare' anggoro'è lao ri sala sèddinna polè ri mennang, 'Eh sellao, dè' upassala lao ri iko. Dè'ga na iko situjui tarima gaji sèddi dowi pèra' untu' majjama si esso? 14 Nah, alani gajimmu namulao. Mèmeng macinnaka mpèrèngngi tau iya muttama'è poddimonri, gaji iya padaè uwèrèngngèkko. 15 Dè'ga naweddikka pogau'i sièloku lao ri appunnangekku? Iyarè'ga mangèmpurukoga, nasaba makacuwaka?' " 16 Nainappa makkedasi Yèsus, "Makkuwa toniro sining tau iya poddimonriè mancaji matu poddiyolo, nasining tau poddiyoloè mancajiwi matu poddimonri. " 17 Wettunna Yèsus mattuju ri Yèrusalèm, ri tengnga laleng Naobbini iya seppulo duwa ana' gurun-Na maddeppungeng. Nakkeda lao ri mennang, 18 "Engkalingai! Makkekkuwangngè mattujuki ri Yèrusalèm. Kuwaniro riyabbèrèyang matu Ana'na Tolinoè lao ri kapala-kapala imangngè sibawa guru-guru agamaè. Narihukkung matè matu, 19 nainappa riyabbèrèyang lao risining tau tenniyaè Yahudi. Naèllèkèllè'i matu mennang, napanrasa-rasai, sibawa nasallii. Iyakiya ri esso matelluè, ripaoto'i matu paimeng. " 20 Napolèna bainèna Zèbèdèus sibawa ana'-ana'na ri Yèsus. Suju'ni ri yolona Yèsus untu' mèllauwi anu sèuwaè. 21 Nakkutana Yèsus, "Aga riyèlori Bu'?" Nappèbali iyaro ibu'è, "Macinnaka iya duwa ana'ku tudang ri abèyona sibawa ataunna Bapa' rèkko mancaji arungngi Bapa' matti. " 22 Nakkeda Yèsus lao ri mennang, "Dè' muwissengngi aga muwèllau. Mullèga mènungngi polè ri inungeng anrasa-rasang iya harusu'è Uwènung?" Nappèbali mennang, "Uwullè. " 23 Nakkeda Yèsus, "Mènung tokko matu polè ri inungek-Ku. Iyakiya passalenna iya tudangngè ri abèyo-Ku iyarè'ga ri atauk-Ku, tenniya ha'-Ku pattentui. Iyaro sining onrongngè iyanaritu untu' sining tau iya pura napattentuè Ambo'-Ku. " 24 Wettunna iya seppulo ana' guru laingngè naèngkalinga gau'èro, macaini mennang lao ri iya duwa tau massilessurengngèro. 25 Rimakkuwannanaro riyobbi manenni mennang ri Yèsus nainappa makkeda, "Muwisseng makkedaè sining pamimping bangsa iya dè'è naissengngi Allataala napanrasa-rasai ra'ya'na, sibawa sining tomarajana mennang natanroiwi mennang. 26 Iyakiya iko dè' naweddikko makkuwaro. Sibalè'na, tau maèloè mancaji battowa ri yelle'mu, harusu'i mancaji pattumanimmu. 27 Sibawa tau maèloè mancaji mariyolo ri yelle'mu, harusu'i mancaji atammu. 28 Pada-padato Ana'na Tolinoè; polèi tenniya untu' ritumaningi, iyakiya untu' mattumani, sibawa mabbèrèyangngi nyawa-Na untu' paleppe'i maèga tau. " 29 Wettunna mennang nasalai Yèrikho, maèga tau maccowèriwi Yèsus. 30 Engka duwa tau buta tudang ri wiring lalengngè. Wettunna mennang naèngkalinga makkedaè Yèsus lalo, gorani mennang, "Ana' Daud, amasèiki!" 31 Tau maègaè iya engkaè kuwaro macairiwi mennang sibawa suroi mennang mammekko. Iyakiya lebbi cennoi mennang gora, "Puwang, Ana' Daud, amasèiki!" 32 Nalèppanna Yèsus nainappa naobbi mennang. Nakkutana Yèsus, "Aga macinna Upogau' lao ri iko?" 33 Nappèbali mennang, "Puwang, macinnaki makkita!" 34 Messèni Yèsus lao ri mennang, nanakarawai matanna mennang. Iyatoro wettuè naullèi mennang makkita. Nainappa mennang maccowèriwi Yèsus.

Matius 21

1 Macawè'nana ri Yèrusalèm, lettu'ni mennang ri Bètfagè ri Bulu-bulu Zaitun. Kuwaniro nasuro Yèsus duwa ana' gurun-Na joppa lebbi riyolo. 2 Nappaseng Yèsus ri mennang, "Laono ri kampong engkaè ri yolomuro. Namuwitai matu sikaju kaleddè tassiyo silaong ana'na. Leppessang duwai namutiwii mai. 3 Rèkko engka tau makkutana, powadangngi iyaro tauwè, 'Napparelluwangngi Puwangngè, ' na iyaro tauwè naleppessangngi matu iyaro kaleddè'è muwala. " 4 Makkuwaniro gau'è kuwammengngi nakajajiyang aga napowada nabiè pada-padaèwè, 5 "Powadanni lao ri Sion, polèni Arummu ri iko. Malemma kininnawai sibawa tonangi sikaju kaleddè, sikaju ana' kaleddè lolo. " 6 Nalaona iya duwaro ana' gurunna Yèsus napogau'i pada-pada ripasengengngèngngi mennang ri Yèsus. 7 Natiwini mennang iyaro kaleddè'è silaong ana'na. Nainappa nalapiki mennang iyaro sining kaleddè'è sibawa jumbana. Nainappa natonangi Yèsus. 8 Maèga tau kuwaro pallebba'i sining jumbana ri lalengngè, na tau laingngè rette'i takkè-takkè aju nanatale'i ri tengnga-tengnga lalengngè. 9 Tau maègaè iya joppaè ri yolo sibawa ri monrinna Yèsus gora-gorani, "Tuwoi Ana' Daud! Ribarakkakiwi iya polè ri laleng asenna Puwangngè! Pojini Allataala Iya Pommatanrè!" 10 Wettunna Yèsus muttama' ri Yèrusalèm, marukkani sining pabbanuwana kotaèro. Nakkutana sining tauwè, "Niga iyaè?" 11 Nappèbali tau maègaè iya tinrosiyèngngi Yèsus, "Alèna Nabi Yèsus, polè ri Nazarèt ri Galilèa. " 12 Nainappa muttama'ni Yèsus ri Bolana Puwangngè, nanarukkai sining tau mabbalu'-baluè sibawa mangelliyè kuwaro. Nabalè'i mèjanna passèlè dowiè, sibawa bangko-bangkona pabbalu jangang-jangangngè. 13 Nakkeda lao risining tauwèro, "Ri laleng Kitta'è tarokii makkedaè napowadai Allataala, 'Riyasengngi matu Bola-Ku bola onrong massempajang. ' Iyakiya iko mupancajiwi saranna paddampo'è!" 14 Polèni ri Yèsus sining tau butaè sibawa pèso'è ri Bolana Puwangngè, naripajjappa mennang ri Yèsus. 15 Iyakiya kapala-kapala imangngè sibawa guru-guru agamaè macaii mitai sining anu makalallaing iya napogau'è Yèsus. Sibawa macai towi mennang mèngkalingai ana'-ana'è gora-gora ri Bolana Puwangngè, "Tuwoi Ana' Daud!" 16 Nakkeda mennang lao ri Yèsus, "Muwèngkalingaga napowadaè mennang?" Nappèbali Yèsus, "Iyyè, Uwèngkalinga. Dè'paga naengka mubacai aya' Kitta'è: 'Ana'-ana'è sibawa ana'loloè purani Mupagguru untu' powadai pappojiyang sukkuè?' " 17 Nainappa Yèsus salaiwi mennang, nanassu polè ri kotaèro nalao ri Bètania, nanabbenni kuwaro. 18 Maèlèni pappa bajana, ri laleng allalengenna lisu ri kotaè, malupuni Yèsus. 19 Naitana sipong ara ri wiring lalengngè. Nalaona ri pong araèro, iyakiya dè' nalolongengngi muwi sèddi buwa sangadinna daud-daung bawang. Nainappa makkeda Yèsus lao ri pong ajuèro, "Dè'na muwabbuwana matu!" Tappa matteru makelle iyaro pong araè. 20 Wettunna ana'-ana' gurunna Yèsus naita iyaro kajajiyangngè, hèrang senna'ni mennang. Nakkutana mennang, "Pèkkugi wedding matteru matè siseng iyaro pong araè?" 21 Nappèbali Yèsus, "Tongeng. Rèkko mateppe'ko sibawa dè' mubata-bata, wedding tokko pogau'i aga iya puraè Upogau' lao ri pong araè. Natenniya iyaro bawang, mala mullèto matu makkeda lao ri bulu-buluèwè, 'Tarakkano sibawa lèttè ri laleng tasi'è'; nakajajiyang matu iyaro gau'è. 22 Agi-agi muwèllau ri laleng sempajammu, mutarimai matu, assaleng mateppe'ko. " 23 Nainappa lisuni Yèsus ri Bolana Puwangngè, nanauttama sibawa mappagguru kuwaro. Wettun-Na mappagguru, polèni kapala-kapala imangngè sibawa sining pamimpinna Yahudiè ri Alèna nanakkutana, "Aga nallalengi na-Mupogau'i iya manennaro? Niga mpèrèk-Ko ha'?" 24 Nappèbali Yèsus, "Maèlo tokka makkutana ri iko. Narèkko mubaliwi, nainappa Upowadakko ha' niga nasibawang Upogau'i gau-gau'èwè. 25 Ha' niga napakè Yohanès Paccemmè? Allataala iyarè'ga tolinoè?" Nappammulana kapala-kapala imangngè sibawa sining pamimpinna Yahudiè barunding ri yelle'na mennang, "Rèkko makkedaki, 'Sibawa ha'na Allataala, ' makkedai matu, 'Rèkko makkuwaitu magi nadè' mumateppe ri alèna?' 26 Iyakiya rèkko makkedaki, 'Sibawa ha'na tolinoè', ' mètauki lao ri tau maègaè, saba' nangga' manengngi mennang Yohanès sèddiwi nabi. " 27 Jaji mappèbaliwi mennang, "Dè' taissengngi. " Nakkeda Yèsus lao ri mennang, "Rèkko makkuwaitu dè'to Umaèlo powadakko ha' niga nasibawang Upogau'i iya manennaro. " 28 Nakkeda Yèsus, "Pèkkugi pallolongemmu makkekkuwangngè passalenna gau'èwè? Engka sèddi ambo' mappunnai duwa ana' worowanè. Iyaro tauwè laowi ri ana'na macowaè sibawa makkeda, 'Na', laono iyaè essoè majjama ri dare' anggoro'è. ' 29 Nappèbali iyaro ana'è, 'Dè' umaèlo. ' Iyakiya rimunri, napinrai pikkiranna nanalao ri dare' anggoro'èro. 30 Nainappa iyaro ambo'è laosi ri ana'na maduwaè, napowadangngi pada-pada ana' macowaè. Nappèbali iyaro ana' maduwaè, 'Madècènni Ambo'. ' Iyakiya dè' nalao. 31 Nari yelle'na iya duwa ana'èro, nigana pogau'i èlona ambo'na?" Nappèbali kapala-kapala imangngè sibawa sining pamimpinna Yahudiè, "Iya macowaè. " Nakkeda Yèsus lao ri mennang, "Ateppe'no: Sining passinge' simaè sibawa sining makkunrai cakkuribangngè poddiyoloiko matu mancaji anggotana umma'na Allataala naiya iko. 32 Nasaba polèi Yohanès Paccemmè, sibawa mappaitangngi lao ri iko cara atuwong iya naèloriyè Puwangngè, iyakiya iko dè' mumaèlo mateppe' ri pappagguruwanna, na sining passinge' simaè sibawa sining makkunrai cakkuribangngè mateppe'i ri alèna. Iyakiya namuni purani muwita iya manennaro, dè'to mupinrai pikkirammu sibawa dè' mumateppe ri Puwangngè. " 33 Nakkeda Yèsus, "Engkalingai iyaè pakkalarapangeng sèddièppa. Engka sèddi punna tana tanengiwi sèuwaè dare' anggoro. Nasappoi mattulili, sibawa kalinna kalebbong untu' napparaki anggoro, nainappa napatettongeng langkiyang anganrowangeng. Purairo nappassèwanni iyaro dare' anggoro'è lao risining pajjamana, nainappa lao ri wanuwa laingngè. 34 Narapinana wettunna maccèppu buwa anggoro, nakirinni iyaro punna tanaè sining pattumaninna lao risining pajjamana dare' anggoro'èro untu' tarimai bagiyanna. 35 Iyakiya iyaro sining pajjamana dare' anggoro'è natikkengngi iyaro sining pattumaninna punna tanaè: Iya sèddiè nabarasa'i, iya laingngè naunoi, na laingngèssi nagenrungiwi batu. 36 Nakirissi punna tanaèro sining pattumani laingngè. Iyakiya rigaukeng towi sibawa cara pada-padaè dènrè. 37 Angkanna iyaro punna tanaè nakirinni lao ri mennang ana' ri alèna. Pikkiri'na, 'Pasti napakalebbii matu iyaro ana'ku. ' 38 Iyakiya wettunna iyaro sining pajjama dare' anggoro'è naita ana'na punna tanaèro, makkedani mennang sèddiè lao ri laingngè, 'Iyanaè ahli warisi'na. Laono mai taunoi, kuwammengngi narilolongeng warisi'na!' 39 Natikkenni iyaro ana'è, nanabuwangngi massu, nanaunoi. " 40 Nakkutana Yèsus, "Rèkko lisui iyaro punna dare' anggoro'è, aga napogau' lao risining pajjamaèro?" 41 Nappèbali mennang, "Pasti naunoi matu iyaro sining tau majaè, nainappa nappassèwang iyaro dare' anggoro'è lao ri tau laingngè iya maèloè mabbèrèyangngi bagiyanna polè ri wassèlè tanaèro ri wettunna. " 42 Nakkeda Yèsus lao ri mennang, "Dè' paga mubacai iya tarokiè ri laleng Kitta'è? 'Batu iya dè'è napakèi tukang bangunangngè mancajiwi batu iya poko'è. Iyanaè pangkaukenna Puwangngè, temmaka gellona!' " 43 Nakkeda Yèsus, "Jaji èngngerangngi, sininna ha'è selaku umma'na Allataala ribèbbui matu polè ri iko nariwèrèng lao risèddiè bangsa iya pajoppaèngngi parènta-parèntana Allataala. 44 Tau iya sempè'è polè ri batuèro, ancuru'i matu, na tau iya nageppaè iyaro batuè, nalèlui matu mancaji awu. " 45 Wettunna naèngkalinga kapala-kapala imangngè sibawa sining tau Farisiè iyaro sining pakkalarapangenna Yèsus, naissenni mennang makkedaè mabbicarai Yèsus passalenna mennang. 46 Jaji makkuragani mennang tikkengngi. Iyakiya mètaui lao ri tau maègaè, saba' iyaro tau maègaè nangga'i Yèsus sèddiwi nabi.

Matius 22

1 Mabbicarasi Yèsus lao ri tau maègaèro sibawa pakè pakkalarapangeng, 2 adan-Na, "Rèkko mapparèntai Allataala, keadaanna pada-padai pakkalarapangengngèwè: Engka sèddi arung pabbottingngi ana' worowanèna. 3 Iyaro arungngè nasuroni sining pattumaninna lao duppaiwi sining tau puraè naundang lao ri pèstaèro. Iyakiya iyaro sining undangengngè dè' namaèlo polè. 4 Nainappa iyaro arungngè nasurosi sining pattumaninna laingngè. Nakkeda lao ri mennang: 'Powadangngi sining undangengngèro: Sadiyani patalaè. Saping sibawa ana'-ana' sapikku iya kaminang makessingngè purani rigèrè. Sadiya manenni. Talaona ri abottingengngè!' 5 Iyakiya iyaro sining undangengngè pada dè' nabati-batiwi. Laowi mennang tungke'-tungke' ri jama-jamanna -- iya sèddiè laowi ri dare'na, iya laingngè ri perusahaanna; 6 na iya laingngèssi natikkengngi sining pattumaninna arungngèro, nainappa nabarasa' sibawa nauno mennang. 7 Wettunna naèngkalinga arungngè iyaro gau'è, macai senna'ni. Nakirinni sining tentarana untu' mpunoi sining pabbunoèro, sibawa natunui kotana mennang. 8 Purairo naobbini sining pattumaninna, nainappa makkeda, 'Sadiyani pèsta abottingengngè, iyakiya sining undangengngè dè' nasipato'. 9 Laono makkekkuwangngè ri watattanaè, namuwobbii tauwè lao ri abottingengngè singngèga-ègana. ' 10 Nalaona iyaro sining pattumaniè. Laoni mennang ri watattanaè nanapaddeppungengngi sininna tauwè iya naruntu'è mennang kuwaro, iya makessingngè sibawa majaè. Napennona ruwangang abottingengngèro sibawa sining undangeng. 11 Nainappa muttama' iyaro arungngè untu' mita-itai sining undangenna. Naitani engka sèddi tau ri pestaèro iya dè'è nappakè pakèyang pèsta. 12 Nanakkutana lao ri tauwèro, 'Eh sellao, pèkkugiko mullèi muttama' kuwaè nadè' muwappakè pakèyang pèsta?' Iyaro tauwè dè'gaga naullèi pogau. 13 Nainappa iyaro arungngè makkeda lao risining pattumaninna, 'Siyoi ajè sibawa limanna iyaro tauwè, namubuwangngi massu ri onrong iya mapettangngè. Nakkuwanaro matu engka teri sibawa anrasa-rasang. ' " 14 Nainappa natutu' Yèsus iyaro pakkalarapangngè makkuwaè, "Maèga riyobbi, iyakiya cèddè'mi bawang ripilè. " 15 Nainappa sining tau Farisiè sibawani lao barunding passalenna pèkkugi mennang wedding palaiwi siyo-siyo Yèsus sibawa pakkutana-pakkutanana. 16 Nanakirinna mennang ana'-ana' gurunna lao ri Yèsus silaong siyagangngarè anggota-anggotana golonganna Hèrodès. Makkedani iyaro sining tauwè lao ri Yèsus, "Pa' Guru, irissekki Bapa' malempu. Mappaggurui Bapa' sibawa terus terang passalenna èlona Allataala lao ri tolinoè, nadè' mubati-batiwi pallolongenna nigi-nigi. Saba' Bapa' dè' napasilaingengngi tauwè. 17 Rimakkuwannanaro, coba Bapa' powadakki: Manuru' peraturanna agamata, weddigga makkamaja sima lao ri Kaisar iyarè'ga dè'?" 18 Naissengngi Yèsus akkattana mennang iya majaèro, jaji makkedai, "Eh sining tau munapè'è! Magi mumaèlo palai-Ka siyo? 19 Cobasai paitak-Ka dowi iya mupakè untu' makkamaja sima!" Nainappa nawèrènni mennang Yèsus sèddi dowi pèra'. 20 Nakkutana Yèsus lao ri mennang, "Niga gambara sibawa aseng iyaè?" 21 Nappèbali mennang, "Kaisar. " Nakkeda Yèsus lao ri mennang, "Rèkko makkuwaitu, wèrènni lao ri Kaisar aga iya nappunnaiyè Kaisar, sibawa lao ri Allataala aga iya nappunnangiyè Allataala. " 22 Wettunna naèngkalinga pappakatajangngèro, hèranni mennang. Nanalaona salaiwi Yèsus. 23 Iyatoro wettuè, engka siyagangngarè tau Saduki polè ri Yèsus. Mennang iyanaritu golongang iya mappallolongengngè makkedaè tau matè dè'na natuwo paimeng. 24 Nakkeda mennang, "Bapa' Guru, Musa mappagguruwangngi makkedaè: Rèkko sèddiè worowanè matè, nadè' nappunnai ana', padaorowanèna harusu' kawingiwi iyaro jandana, kuwammengngi nawèrèngngi wija-wijanna lao ri tau iya matèènnaro. 25 Engka naengka pitu tau mappadaorowanè iya monroè kuwaè. Kawingngi iya macowaè, namatè dè' nappunnai ana'. Naiyaro jandana ritarongenni padaorowanèna. 26 Naiyaro padaorowanèna matè towi dè' nappunnai ana'. Gau' padaèro kajajiyang towi sibawa padaorowanèna matelluè sibawa lettu rimapituè. 27 Angkanna iyaro makkunraiè matèto. 28 Nah, ri wettunna ripatuwo tau matè paimeng, nigana punna bainè iyaro makkunraiè? Saba' iya pituro purai napubainè. " 29 Nappèbali Yèsus, "Sala pahang senna'ko, saba' dè' mupahangngi Kitta'è, iyarè'ga akuwasanna Allataala. 30 Saba' rèkko tuwoi matu paimeng tau matè, dè'na nakawinna matu mennang, sangadinna tuwoi matu pada-pada malaèka'è ri surugaè. 31 Dè'paga naengka mubacai aga napowada Allataala passalenna ripatuwona paimeng tau matè? Makkedai Allataala, 32 'Iyya'na Allataalana Abraham, Allataalana Ishak sibawa Allataalana Yakub. ' Iyaro Allataalaè tenniya Allataalana tau matè. Allataalanai tau tuwoè!" 33 Wettunna naèngkalinga tau maègaèro pappakatajanna Yèsus, bengnga senna'ni lao ri pappagguruwan-Na. 34 Wettunna naèngkalinga sining tau Farisiè makkedaè purani naèbbu Yèsus sining tau Sadukiè dè' naullèi makkedadana, maddeppungenni mennang. 35 Engka sèddi tau polè ri mennang, iyanaritu sèddiwi guru agama, coba palaiwi siyo Yèsus sibawa sèddi pakkutana, 36 "Pa' Guru, parènta kègaènna kaminang poko' ri laleng hukkunna agamaè?" 37 Nappèbali Yèsus, "Amasèiwi Puwang Allataalamu sissukku atimmu, sibawa sissukku nyawamu, enrengngè sininna akkalemmu. 38 Iyanaro parènta poko'è sibawa kaminang pentingngè! 39 Parènta maduwaè iya padaè mammulangngèro: Amasèiwi pada-padammu, pada-pada muwamasèinna alèmu. 40 Sininna hukkunna agamaè iya nabbèrèyangngè Musa sibawa pappagguruwanna sininna nabiè polèi ri iya duwa parèntaèro. " 41 Ri wettu maddeppungenna mupa sining tau Farisiè kuwaro, makkutanani Yèsus lao ri mennang, 42 "Aga pallolongemmu passalenna Arung Pappassalama'è? Wijannai niga?" Nappèbali mennang, "Wijannai Daud. " 43 Nakkutana Yèsus, "Rèkko makkuwaitu, aga saba'na Rohna Allataala nawèrèngngi wahyu Daud untu' teppui Arung Pappassalama'è 'Puwang'? Saba' makkedai Daud, 44 'Makkedai Puwangngè lao ri Puwakku: Tudanno ri seddè atauk-Ku, narapi Upatunru' sining balim-Mu lao ri Iko. ' 45 Jaji rèkko nateppui Daud Arung Pappassalama'èro 'Puwang', pèkkugi wedding wijanna Daud?" 46 Dè' sèddi tau mullèi baliwi Yèsus. Nappammula essoèro, dè'gaga barani makkutanangngi agi-agi lao ri Yèsus.

Matius 23

1 Nakkeda Yèsus lao ri tau maègaè sibawa ri ana'-ana' gurun-Na, 2 "Guru-guru agamaè sibawa sining tau Farisiè lolongeng akuwasang untu' tassèrè'i hukkunna Musa. 3 Rimakkuwannanaro atinuluriwi sibawa turusiwi sininna napparèntangngè mennang. Iyakiya aja' mupogau'i aga iya napogau'è mennang, saba' dè' napajoppai mennang aga nappagguruwang mennang. 4 Natuntu'i mennang gau'-gau' mawatangngè sibawa mabbèrèi peraturang-peraturang iya matane'è, iyakiya muwi cèddè dè'to natulungngi tauwè pajoppai. 5 Sininna napogau'è mennang banna untu' naita tauwè bawang. Nattungka mennang pakè tulu sempajang iya malebba'è sibawa palampèriwi jombè-jombè jumbana mennang! 6 Napoji sining onrong iya makessingngè ri pèstaè, sibawa kadèra-kadèra magelloè ri bola assompangngè. 7 Napoji mennang ripakalebbi ri tauwè ri pasaè sibawa riyobbi 'Pa' guru'. 8 Iyakiya iko, aja' mumaèlo riyobbi 'Pa' Guru', saba' sèddi bawang Gurummu, na iko maneng massilessurekko. 9 Sibawa aja' muwobbii sèddiè tau ri linoèwè 'Ambo', saba' sèddi bawang Ambo'mu, iyanaritu Ambo' ri surugaè. 10 Na aja'to mumaèlo riyobbi 'Pamimping', saba' sèddi bawang pamimpimmu, iyanaritu Arung Pappassalama'è iya najjanciyangngè Allataala. 11 Tau iya kaminang battowaè ri yelle'mu, harusu'i mancaji pattumanimmu. 12 Tau iya pakatanrèngngi alèna ripakariyawai matu, na tau iya pakariyawaèngngi alèna ripakatanrèi matu. " 13 "Cilakano iko guru-guru agamaè sibawa sining tau Farisiè! Mupoji mabbonga-bonga. Mulawa-lawaiwi tauwè untu' mancaji wargana umma'na Allataala. Nadè' mumaèlo mancaji wargana umma'na Allataala, na tau laingngè iya maèloè mulawa-lawaiwi. 14 Cilakano iko guru-guru agamaè sibawa sining tau Farisiè: Mupoji mabbonga-bonga. Mubellèi sining jandaè sibawa murampasa'i bolana, na untu' tongkoi jamuro massempajakko malampè'. Iyanaro saba'na namatane matu pahukkungemmu! 15 Cilakano iko guru-guru agamaè sibawa sining tau Farisiè! Mupoji mabbonga-bonga! Laoko mabèla limbang tasi', sibawa sollèriwi pottanangngè banna untu' puttama'i sèddiè tau ri agamamu. Namuttama'nana iyaro tauwè ri agamamu, muwèbbui mennang calonna ranakaè iya wèkkaduwaè lebbi maja naiya iko! 16 Cilakano iko sining pamimping butaè! Muwappagguruwangngi makkuwaè, 'Rèkko nattanrowangngi tauwè Bolana Puwangngè, iyaro tauwè dè' natassiyo ri tanrona; iyakiya rèkko nattanrowangngi ulaweng engkaè ri laleng Bolana Puwangngè, tassiyoi ri tanrona. ' 17 Iko sining tau donggo iya butaè! Kèga lebbi penting, ulawenna iyarè'ga Bolana Puwangngè iya pancajiyèngngi ulawengngèro mapaccing? 18 Muwappagguruwang towi iyaè, 'Rèkko sèddiè tau nattanrowangngi mèzbaè, iyaro tauwè dè' natassiyo ri tanrona; iyakiya rèkko nattanrowangngi pakkasuwiyang iya engkaè ri yasè'na mezbaèro, tassiyoi ri tanronaro. ' 19 Anengka makkuwa butamu! Kèga lebbi penting? Pakkasuwiyammu iyarè'ga mèzba iya pancajiyèngngi pakkasuwiyangngèro mapaccing? 20 Rimakkuwannanaro, rèkko sèddiè tau mattanrowangngi mèzbaè, bettuwanna nattanrowangngi mèzbaè sibawa sininna pakkasuwiyang iya engkaè ri yasè'na. 21 Narèkko sèddiè tau nattanrowangngi Bolana Puwangngè, bettuwanna iyaro nattanrowangngi Bolana Puwangngè, sibawa Allataala iya monroè kuwaro. 22 Rèkko sèddiè tau mattanrowangngi surugaè, bettuwanna iyaro nattanrowangngi kadèra arajanna Puwangngè sibawa Allataala iya tudangngè ri yasè'na kadèra arajangngèro. 23 Cilakano iko guru-guru agamaè sibawa sining tau Farisiè! Mupoji mabbonga-bonga. Rampa-rampa padaè talasi, adas cenning, sibawa jintang, muwabbèrèyangngi tawa seppulona untu' Puwangngè. Padahal gau'-gau' iya kaminang pentingngè ri laleng hukkung-hukkunna agamaè, padaènna: Adèlèkengngè, pammasè sibawa atinulurengngè dè' mubati-batiwi. Padahal iyaro sitongenna harusu' mupogau', sibawa dè'nato muwallupaiwi laing-laingngè. 24 Iko pamimping-pamimping butako! Mupanapii lale'è ri laleng uwai ènungemmu padahal untaè muwemme! 25 Cilakano iko guru-guru agamaè sibawa sining tau Farisiè! Mupoji mabbonga-bonga! Mangko'-mangko'mu sibawa sining pennèmu mubissaiwi mapaccing bagiyang saliwenna, padahal bagiyang ri lalenna macarèpa senna' sibawa gau'-gau' iya mulolongengngè sibawa apèddarang enrengngè angowang. 26 Eh tau Farisi iya butaè! Bissaiwi riyolo' mapaccing-paccing bagiyang ri lalenna mangko'-mangko'mu sibawa sining pennèmu, kuwammengngi namapaccitto bagiyang saliwenna! 27 Cilakano iko guru-guru agamaè sibawa tau Farisiè! Mupoji mabbonga-bonga! Pada-padako tampung iya riparada putè; makessing riita ri saliwenna, iyakiya ri lalenna penno buku-buku sibawa sininna iya makebbongngè. 28 Makkuwa tokkoro iko. Polè saliweng makessikko paita lao ri tauwè; iyakiya ri lalenna, pennoko sibawa apalessuwang enrengngè palanggarang-palanggarang. " 29 "Cilakano iko guru-guru agamaè sibawa sining tau Farisiè! Mupoji mabbonga-bonga! Muwèbburengngi tampung nabi-nabiè iya makessingngè, sibawa bèlo-bèloiwi tugu-tugu apparèngngerangenna sining tau iya makessingngè atuwo-tuwonna. 30 Namumakkeda, 'Akkalarapanna tuwoki ri wettunna nènè-nènèta riyolo, dè' taccowè sibawangngi mennang mpunoi nabi-nabiè. ' 31 Jaji alèmu mangakuiwi makkedaè iko ritu wija-wijanna sining tau iya mpunoèngngi nabi-nabiè! 32 Rèkko makkuwaitu, patteruni sibawa pacceppini dosa-dosa iya puraè napammulai nènè-nènèmuro! 33 Majako sibawa wija-wijanna tau majako! Pèkkugi weddikko passalama'i alèmu polè ri pahukkungenna ranakaè? 34 Engkalingai madècèd-dècèng: Maèlo-Ka kiringngi lao ri iko nabi-nabiè, sining tau maccaè sibawa guru-guruè; sibagiyanna mennang muwunoi matu, na sibagiyanna laingngè musallii. Engka matu mupanrasa-rasa ri laleng sining bola assompangngè, sibawa mulellungngi polè risèddiè kota lao ri kota laingngè. 35 Rimakkuwannanaro, rihukkukko matu nasaba abbunowang iya mupogau'è lao ri sininna tauwè iya dè'è asalanna -- mappammulai riyunona Habèl iya dè'è napasala, lettu riyunona Zakharia ana'na Bèrèkia, iya muwunoè ri pallawangenna Bolana Puwangngè sibawa mèzbaè. 36 Ateppe'no. Iya manennaro natanggungngi matu sining tauwè makkekkuwangngèwè!" 37 "Yèrusalèm, Yèrusalèm! Muwunoi nabi-nabiè, sining surona Allataala mugenrungiwi batu gangka matè. Malèwe'ni maèlo-Ka pasipuppung manengngi pabbanuwamu pada-pada indo' manu'è iya rokongiyèngngi ana'-ana'na ri yawana pannina, iyakiya dè' mumaèlo! 38 Rimakkuwannanaro dè'na nasibawakko Allataala. 39 Issenni: Mappammulai makkekkuwangngè dè'na muwita-Ka narapi makkedako, 'Ribarakkakiwi iya polè sibawa asenna Puwangngè. ' "

Matius 24

1 Wettunna Yèsus nasalai Bolana Puwangngè, polèni ana'-ana' gurun-Na nanajello'i Bolana Puwangngè. 2 Nakkeda Yèsus lao ri mennang, "Muwitaga iya manennaro? Issenni, dè'gaga muwi sèddi batu polè ri bolaèro monro matu tassusung ri onronna. Iya manennaro riruttungngi matu. " 3 Nalaona Yèsus ri Bulu-bulu Zaitun, tudanna-Na, polèni ana'-ana' gurun-Na untu' mabbicara mammessang-messang. Nakkeda mennang ri Yèsus, "Powadakki uppanna kajajiyang iya manennaro! Aga tanra-tanranna iya mappaitangngèngngi apolènna Bapa' sibawa paccappurenna linoè?" 4 Nappèbali Yèsus, "Atike'ko, ajakkè ribellèko. 5 Saba' maèga tau polè matu sibawa pakèi asek-Ku sibawa makkeda, 'Iyya'na Arung Pappassalama'è!' Nabellèi matu mennang maèga tau. 6 Muwèngkalingai matu oni-oni ammusurengngè sibawa sining karèbanna, iyakiya aja' mumètau. Saba' iyaro gau'-gau'è harusu'i kajajiyang, iyakiya tenniya bettuwanna makkedaè wettunnana kiyame'. 7 Bangsa sèddiè mammusui matu mèwai bangsa laingngè, sibawa wanuwa sèddiè nagasai wanuwa laingngè. Kajajiyangngi matu akkadèrengngè kègi-kègi sibawa mpèwangngi tanaè. 8 Iya manennaro pammulanna bawang, pada-pada peddi napèneddingiyè sèddiè makkunrai ri wettu maèlona mèmmana'. 9 Nainappa ritikkekko matu sibawa riyabbèrèyang untu' risissa sibawa riyuno. Nabenciko matu sininna linoè nasaba muwaccowèri-Ka. 10 Iyaro wettuè maèga tau massakka sibawa bali'bella enrengngè sibenci-benciwi sèddiè lao ri laingngè. 11 Mompoi matu nabi-nabi palsuè, nanabellèi maèga tau. 12 Mallebbangngi matu gau' majaè makkuwamani hèba'na angkanna maèga tau dè'na naullèi mamasè. 13 Iyakiya tau iya mattahangngè lettu ri paccappurengngè, ripassalama'i matu. 14 Sibawa Karèba Madècèngngè passalenna pèkkugi Allataala mapparènta riyappallebbangengngi matu ri sininna linoè, kuwammengngi sininna tauwè naèngkalingai. Purapiro, nainappa polè kiyame'è. " 15 "Muwitai matu 'Ja iya paancuru'è', pada-pada napowadaè Nabi Danièl, tettong ri onrong mapaccingngè. (Papparèngngerang lao ri pabbacaè: Pènessaiwi aga bettuwanna. ) 16 Iyaro wettuè, tau iya engkaè ri Yudèa, harusu'i lari lao ri buluè. 17 Tau iya engkaè ri coppo bolaè aja' nanonno untu' mala anu sèuwa ri lalempola. 18 Tau iya engkaè ri dare'è, aja' nalisu untu' malai jumbana. 19 Anengka makkuwa mappakatau-tauna iyaro essoè lao ri makkunrai iya mattampu'è, sibawa indo' iya pasusuèmmupi ana' lolona! 20 Assempajakko kuwammengngi aja' lalo muharusu' lari ri wettu pabosiè iyarè'ga ri esso Saba'è! 21 Ri esso-esso iya mappakatau-tauèro engka matu asussang battowa iya dè'èppa naengka nakajajiyang sipongenna linoè lettu makkekkuwangngè, sibawa dè' tona nakajajiyanna. 22 Akkalarapanna Allataala dè' naponcokiwi wettunna; dè'gaga sèddi tau salama'. Iyakiya nasaba umma'-Na, naponcokiwi Allataala iyaro wettuè. 23 Iyaro wettuè, rèkko engka sèddi tau makkeda lao ri iko, 'Itai, iyaro Arung Pappassalama'è engkai kuwaè!' iyarè'ga 'Engkai kuwaro!' -- aja' mumateppe ri tauwèro. 24 Saba' mompoi matu pappassalama'-pappassalama' palsuè sibawa nabi-nabi palsuè. Napogau'i matu gau'-gau' iya makalallaingngè sibawa mappahèrang-hèrangngè untu' pabengnguwang, naullè umma'-Na muto Allataala. 25 Jaji, èngngerangngi! Purano upowadang lebbi riyolo riwettu dè'napa nakajajiyang iyaro gau'è. 26 Rèkko makkedai tauwè ri iko, 'Itai, Engkai kuwaro ri padang kessi'è!' -- aja' mulao kuwaro. Iyarè'ga rèkko makkedai, 'Itai mallekke'i ri laleng bili'è kuwaè!' -- aja' mumateppe. 27 Saba' apolènna Ana'na Tolinoè pada-padai tappa billa'è iya mattappaè polè alau, namattappa lettu ri yajang. 28 Kègi engka bakkè, kuwatowitu engka manu'-manu' pakkanrè bakkè. " 29 "Dè' namaitta purana asussangngèro, mapettangngi matu mata essoè, sibawa dè' nattappa kètengngè. Maddenne'i matu sining wèttowingngè, sibawa sining panguwasaè ri bètaraè kacauwi matu. 30 Purairo tanranna Ana'na Tolinoè paitani matu ri langiè. Iyaro wettuè sininna bangsaè ri linoè teriwi matu. Naitai matu mennang Ana'na Tolinoè polè ri yasè'na ellungngè sibawa akuwasanna enrengngè alebbirenna battowaè. 31 Ripaonini matu tarompè' battowaè, nanasuroi matu Ana'na Tolinoè malaèka'-malaèka'-Na paddeppungengngi umma'-Na polè ri eppaè sulapa', polè ri cappa langiè sèddiè lettu ri cappa langiè, laingngè. " 32 "Agguruko polè ri pong araè. Rèkko manyilai takkè-takkèna sibawa masomè', enrengngè mammulani cura'-cura', muwissennitu makkedaè mawè'ni wettu timoè. 33 Makkuwatoniro rèkko muwitai kajajiyang gau'-gau'èro, muwissennitu makkedaè macawè'è senna'ni wettunna. 34 Issenni! Iyaro gau'-gau'è kajajiyangngi matu ri wettu dè'napa namatè sining tauwè makkekkuwangngè. 35 Lennye'i matu langiè sibawa linoè, iyakiya ada-adak-Ku tette'i mannennungeng. " 36 "Dè'gaga missengngi uppanna essona sibawa wettunna, muwi sining malaèka' ri surugaè iyarè'na Ana'na Allataala, banna Ambo'è bawang missengngi. 37 Rèkko polèi matu Ana'na Tolinoè, keadaanna pada-padai wettunna Nuh riyolo. 38 Ri esso-esso dè'napa nalèmpe raja, sining tauwè manrèi, minungngi sibawa bottingngi. Makkuwaniro matteru-teru narapi esso nauttamakiyè Nuh ri laleng kappala'è. 39 Wettunna lèmpe' rajaè mappo manengngi mennang, nappai mainge' mennang aga matu kajajiyang. Makkuwaniro keadaanna matu rèkko polèi Ana'na Tolinoè. 40 Iyaro wettuè, duwa tau mattengngang majjama ri dare'è: sèddi tau ritiwi matu, na sèddiè risalai. 41 Duwa makkunrai mattengngang mallèlu gandong: Sèddi ritiwi matu, na sèddi risalai. 42 Jaji, atike'ko, saba' dè' muwissengngi uppanna polè matu Puwammu. 43 Engngerangngi iyaè! Akkalarapanna naissengngi punna bolaè tettè siyaga ri wenniè napolè matu pangaè, dè'na namatinro, kuwammengngi dè' namuttama pangaè ri lalempolana. 44 Rimakkuwannanaro, harusu' tokko sadiya-sadiya. Saba' Ana'na Tolinoè polèi matu ri wettu iya dè'è musenna-sennai. " 45 Nakkedasi Yèsus, "Rèkko makkuwaitu, pattumani nigana matinulu sibawa mapanrè? Alèna ritu riyakka ri puwanna mancaji kapala lao ri sining pattumani laingngè; kuwammengngi napanrèi mennang ri wettunna. 46 Temmaka senna'na iyaro pattumaniè rèkko lisui puwanna, nanapolèiwi mattonget-tongeng pogau'i jama-jamanna. 47 Ateppe'no, iyaro puwangngè nappaddettangengngi matu sininna waramparanna lao ri pattumaninnaro. 48 Iyakiya rèkko majai iyaro pattumaniè, makkedai ri laleng atinna, 49 'Maitta mupa nappa lisu Puwakku, ' nappammula barasakiwi pattumani-pattumani laingngè, enrengngè manrè mènung sibawa sining tau pammabokengngè. 50 Nainappa lisuni matu Puwanna ri esso sibawa wettu iya dè'è nasenna-sennai. 51 Nariajara' tongenna matu iyaro pattumaniè ri Puwanna, enrengngè riyabbèyang ri onronna tau munapè'è. Naterina matu mennang sibawa manrasa-rasa kuwaro. "

Matius 25

1 "Rèkko polèi Ana'na Tolinoè selaku Puwang, keadaanna pada-padai ri laleng pakkalarapangngèwè: Engka seppulo ana'dara tinrosiwi bottingngè tungke'-tungke' mala pajjennangeng, nainappa lao duppaiwi bottimpuranè. 2 Na lima tau polè ri mennang madonggo sibawa lima lainna mapanrè. 3 Iya lima ana'dara madonggoè tiwii pajjennangeng, iyakiya dè' natiwi bokong minnya'. 4 Iya lima ana'dara mapanrè tiwii pajjennangeng sibawa bokong minnya'. 5 Iyaro bottimpuranè matengnge'i polè, nacakkarudduna iyaro ana'-ana'daraè angkanna matinro. 6 Tengnga benni nappa ritu naèngkalinga sadda gora, 'Polèni bottimpuranè! Laono mai muduppaiwi!' 7 Moto'ni iyaro seppuloè ana'dara, nanatunuiwi pajjennangenna mennang. 8 Nakkeda ana'-ana'dara iya madonggoè lao ri mapanrè, 'Wèrèkki cèddè minnya'mu, saba' maèloi peddè pajjennangetta. ' 9 Nappèbali iyaro ana'-ana'dara mapanrè, 'Dè' nawedding, nasaba dè' matu nagenne minnya'ta untu' idi maneng. Laono muwelli ri tokoè!' 10 Nalaona iyaro ana'-ana'dara iya madonggoè melli minnya'. Ri wettu laona mennang, lettu'ni bottimpuranè. Iyaro limaè ana'dara iya sadiyaènna muttama'ni silaong bottimpuranè ri onrong pèstaè, narisuluna tange'è! 11 Purairo lettu'ni ana'-ana'dara laingngè. Gorani mennang, 'Puwang, Puwang, timpakekki tange'. ' 12 Iyakiya mappèbaliwi bottimpuranè, 'Dè' Uwissekko!' " 13 Nainappa natutu'ni Yèsus pakkalarapangngèro makkuwaè, "Rimakkuwannanaro jaga-jagako, saba' dè' muwissengngi essona iyarè'ga wettunna. " 14 "Rèkko polèi Ana'na Tolinoè selaku Puwang, keadaanna pada-pada towi ri laleng pakkalarapangngèwè. Engka sèddi worowanè maèlo lao ri onrong mabèlaè. Naobbini sining pattumaninna, nainappa nappaddettangeng waramparanna ri mennang. 15 Nawèrènni lao ri tungke' pattumanièro situru pakkullènna tungke'-tungke'. Lao risèddiè tau nawèrèngngi limassebbu dowi laweng. Laingngè nawèrèngngi duwassebbu dowi laweng sibawa lao risèddièppa nawèrèngngi sisebbu dowi laweng. Nainappa joppa. 16 Pattumani iya tarimaè limassebbu dowi laweng masitta'ni lao dangkang, nasarona limassebbu dowi laweng. 17 Makkuwatoro pattumani iya tarimaè duwassebbu dowi laweng saro toni duwassebbuto. 18 Iyakiya pattumani iya lolongengngè sisebbu dowi laweng laowi kali kalebbong ri tanaè, nanasubbui dowina puwanna kuwaro. 19 Maitta senna' puranaro, lisuni puwanna iyaro sining pattumaniè, nappammula mappasilolongeng sibawa mennang. 20 Polèni pattumani iya lolongengngè limassebbu dowi laweng, nanabbèrèyangngi seppulo sebbu. Adanna, 'Puwang, limassebbu dowi laweng tawèrèkka Puwang. Taitani, lolongessika saro limassebbu. ' 21 Nakkeda iyaro puwanna, 'Madècènni, iko iyanaritu pattumani iya makessingngè sibawa matinuluè. Nasaba weddikko riyatepperi lao ri iya cèddè'è, maèloka mappaddettangengngi iya maègaè lao ri iko. Uttama'no sibawa accowèno massennas-sennang sibawa iyya. ' 22 Nainappa polèni iyaro pattumani tarimaè duwassebbu dowi laweng, nakkeda, 'Puwang, duwassebbu dowi laweng tawèrèkka Puwang. Taitani, lolongessika saro duwassebbusi. ' 23 Nakkeda iyaro puwanna, 'Madècènni, ikonatu pattumani iya makessingngè sibawa matinuluè. Nasaba weddikko riyatepperi lao ri iya cèddè'è, maèloka mappaddettangengngi iya maègaè lao ri iko. Uttama'no sibawa accowèno massennas-sennang sibawa iyya!' 24 Nainappa polèni iyaro pattumani iya lolongengngè sisebbu dowi laweng, nanakkeda, 'Puwang, uwissekki sèddi tau iya mabecco'è. Maccèppu buwaki Puwang ri onrong dè'è tattaneng, sibawa mèngngalaki ri onrong dè'è tamporiwi binè. 25 Mètauka, jaji laoka subbui dowita Puwang ri lalenna tanaè. Engkaniè dowita Puwang. ' 26 Nakkeda iyaro puwanna, 'Ikonatu pattumani maja sibawa makuttu! Dè'ga napura muwissengngi makkedaè maccèppu buwaka ri onrong dè'è uwattaneng, sibawa mèngngala ri onrong dè'è uwampo binè? 27 Rèkko makkuwaitu, sitongenna harusu'ko taroi iyaro dowiku ri bangngè, kuwammengngi ri wettukku lisu, weddingngi utarima iyaro dowiku sibawa bungana. 28 Rimakkuwannanaro, alai iyaro dowiè polè ri alèna, namuwèrèngngi tau iya mappunnaiyè seppulo sebbu dowi laweng. 29 Nasaba tau iya mappunnaiyènna, riwèrèngngi matu lebbi maègapa, na alebbinna matu. Iyakiya tau iya dè'è nappunnai, cèddè iya engkaè mupa ri alèna riyala towi matu. 30 Na iyaro pattumani dè'è nakkèguna, buwanni ri laleng pettangngè ri saliweng. Kuwaniro matu teri sibawa manrasa-rasa!' " 31 "Rèkko polèi Ana'na Tolinoè selaku Arung ritinrosi ri sininna malaèka'-Na, tudangngi matu ri yasè'na kadèra arajan-Na iya malebbiè. 32 Sininna bangsaè ri linoè ripaddeppungengngi matu ri yolo-Na. Nainappa napassarang mennang mancaji duwakkonrong pada-pada pakkampiè pallaisengngi bimbala'è polè ri bèmbè'è. 33 Sining tau iya pogau'èngngi èlona Allataala ripaddeppungengngi ri seddè ataun-Na, na laingngè ri seddè abèyo-Na. 34 Nainappa makkeda matu iyaro Arungngè lao risining tauwè ri seddè ataun-Na, 'Laono mai iko iya nabarakkakiyè Ambo'-Ku. Uttama'no ri laleng akkarungeng iya napassadiyangengngèkko mappammulai pammulanna linoè. 35 Saba' ri wettuk-Ku malupu, muwèrèk-Ka nanrè, sibawa ri wettuk-Ku madekka, mupainuk-Ka. Tau polè-polè-Ka, mutarima-Ka ri bolamu. 36 Dè' Uwappakèyang, muwèrèk-Ka pakèyang. Malasa-Ka, laoko cèllèngi-Ka. Ritarungku-Ka, laoko tuluk-Ka. ' 37 Nakkedana matu iyaro sining tauwè, 'Puwang, maraganna riitaki Puwang malupu nariwèrèkki nanrè Puwang, iyarè'ga madekka naripainukki Puwang? 38 Maraganna nariitaki Puwang selaku tau polè-polè, nariduppaiki Puwang muttama' ri lalempolata? Maraganna Puwang dè' tappakèyang, nariwèrèkki pakèyang Puwang? 39 Maraganna nariitaki Puwang malasa, iyarè'ga ritarungku, naritulukki Puwang?' 40 Nappèbali matu iyaro Arungngè, 'Issenni: wettunna mupogau' gau'èro, namuni lao risala sèddinna polè ri silessu-silessurek-Ku iya kaminang matunaè, mupogau' tonitu lao ri Iyya!' 41 Nainappa makkeda matu iyaro Arungngè lao risining tauwè ri seddè abèyo-Na, 'Addèsu'no jahanam! Uttama'no ri laleng api iya dè'è nawedding peddè, iya puraè ripassadiya untu' Ibillisi' sibawa malaèka'-malaèka'na! 42 Saba' ri wettuk-Ku malupu, dè' muwèrèk-Ka nanrè; wettuk-Ku madekka, dè' mupainuk-Ka. 43 Sèddi-Ka tau polè-polè, dè' mutarima-Ka ri lalempolamu. Temmappakèyak-Ka, dè' muwèrèk-Ka pakèyang. Malasa-Ka sibawa ritarung-Ku, dè' mujampangi-Ka. ' 44 Namakkeda mennang ri Alèna, 'Puwang, maraganna Puwang nariitaki malupu, iyarè'ga madekka, iyarè'ga selaku tau polè-polè, iyarè'ga temmappakèyang, iyarè'ga malasa, iyarè'ga ritarungku nadè' ritulukki Puwang?' 45 Nappèbali matu iyaro arungngè, 'Issenni: ri wettunna dè' mumaèlo tulungngi sala sèddinna tau iya kaminang matunaèwè, bettuwanna dè'totu mumaèlo tuluk-Ka. ' 46 Narihukkung matu iyaro sining tauwè sibawa pahukkungeng mannennungengngè, nasining tau pogau'èngngi èlona Allataala napèneddingiwi matu atuwong tongengngè sibawa mannennungengngè. "

Matius 26

1 Wettunna Yèsus pura manenni nappagguruwang gau'èro, makkedani lao ri ana'-ana' gurun-Na, 2 "Muwissettu duwangngessopi na Esso Maraja Paska, na Ana'na Tolinoè riyabbèrèyangngi matu untu' risalli!" 3 Iyaro wettuè kapala-kapala imangngè sibawa sining pamimpinna Yahudiè maddeppungenni ri saorajana Imang Lompoè Kayafas. 4 Barundinni mennang untu' tikkengngi Yèsus sibawa mammekko-mekko enrengngè mpunoi. 5 Nakkeda mennang, "Iyakiya aja' naripogau' iyaro gau'è ri wettu ramè-ramè, saba' mompo ammai rukkaè ri yelle'na ra'ya'è. " 6 Wettunna Yèsus engka ri Bètania, ri bolana Simon, iya nakennaè riyolo lasa oli iya mabbahayaè, 7 engka sèddi makkunrai polè ri Yèsus. Tiwii sèddi botolo' mallise' minnya' wangi iya masoliè. Wettunna Yèsus tudang manrè, iyaro makkunraiè nabbolorenni iyaro minnya' wangiè ri yasè'na ulunna Yèsus. 8 Namacaina ana'-ana' gurunna Yèsus mitai kajajiyangngèro. Nakkeda mennang, "Aga gunana iya manennaè riyabboloreng? 9 Iyaro minnya' wangiè wedding ribalu' sibawa masuli, na ellinna riwèrèngngi tau kasiyasiè!" 10 Naissengngi Yèsus pikkiranna mennang, nanakkeda, "Magi musussaiwi iyaro makkunraiè? Napogau'i sèuwa makessingngè sibawa ripojiyè untu' Iyya. 11 Tau kasiyasiè tuli engkai ri yelle'mu, iyakiya Iyya dè' utuli sibawakko. 12 Ri laleng nabbolorenna iyaro minnya' wangiè ri watakkalè-Ku, napassadiya-Ka untu' amatèk-Ku. 13 Ateppe'no! Risininna linoè, kègi-kègi ripallebbang Karèba Madècèng polè ri Allataala, pangkaukenna iyaè makkunraiè ricurita towi matu selaku papparèngngerang ri alèna. " 14 Naengka sèddi polè riseppuloè sèddi ana' gurunna Yèsus, iya riyasengngè Yudas Iskariot, lao ri kapala-kapala imangngè. 15 Makkedai ri mennang, "Aga maèlo muwèrèkka rèkko uwabbèrèyangngi Yèsus lao ri iko?" Nanabilanna telluppulo dowi pèra'; nainappa nawèrèng iyaro dowiè. 16 Mappammulai wettuèro sappani Yudas kasempatan iya makessingngè untu' bali'bellariwi Yèsus. 17 Ri esso mammulangngè ri laleng Ramè-ramè Roti Dè'è Raginna, polèni ana'-ana' gurunna Yèsus ri Alèna. Makkutanani mennang, "Kègai Bapa' macinna ripassadiyangeng nanre Paska?" 18 Nappèbali Yèsus, "Laono risèddiè tau ri kotaè namuwakkeda ri alèna, 'Adanna Pa' Guru, narapini wettukku maèlo-Ka ramè-ramèiwi Paskaè ri bolamu silaong ana'-ana' guruk-Ku. ' " 19 Napogau'ni ana'-ana' gurunna Yèsus iya risurowangngèngngi mennang ri Yèsus. Laoni mennang passadiyai iyaro Paskaè. 20 Wenninnana, tudanni Yèsus sibawa iya seppulo duwa ana' gurun-Na manrè. 21 Wettunna mennang manrè, makkedani Yèsus, "Engkalingai: engka sèddi polè ri yelle'mu bali'bellari-Ka matu. " 22 Naèngkalinganaro, messè senna'ni ana'-ana' gurunna Yèsus. Nainappa mennang tassèddi-sèddi mappammula makkutana ri Yèsus, "Tentu tenniya iyya naseng Bapa'?" 23 Nappèbali Yèsus, "Tau iya pajajje'èngngi rotiè ri laleng mangko'è massamang Iyya, iyanaritu bali'bellari-Ka matu. 24 Mèmeng Ana'na Tolinoè matèi matu pada-pada tarokiè ri laleng Kitta'è. Iyakiya cilakai tau iya bali'bellariyèngngi Ana'na Tolinoè! Lebbi kessing muwi dè' siseng naengka najaji iyaro tauwè!" 25 Nainappa makkeda Yudas, tau bali'bellaèro, "Tentu tenniya iyya naseng Bapa' Guru?" Nappèbali Yèsus, "Makkuwaitu adammu!" 26 Wettunna mennang manrè, malani Yèsus roti, nainappa massempajang sukkuru'. Purairo napuwè-puwè'ni rotiè sibawa liman-Na nainappa nawèrèng ana'-ana' gurun-Na nanakkedato, "Alai, namuwanrèi; iyanaè tubuk-Ku. " 27 Purairo malani sèddi ènungeng anggoro, nainappa mappale' sukkuru' ri Allataala. Nainappa nawèrèng iyaro ènungengngè ana'-ana' gurun-Na nanakkedato, "Enung manenno. 28 Saba' iyanaè dara-Ku iya paessaèngngi assijancingenna Allataala -- dara ribollowangngè untu' tau maègaè nariyaddampengeng dosana mennang. 29 Ateppe'no: Dè'na Uwènungngi iyaè anggoro'è narapi wettunna mènuk-Ka anggoro baru sibawa iko ri laleng Lino Barunna Ambo'-Ku. " 30 Nainappa makkèlong mennang sèddi èlong pappojiyang. Purairo laoni mennang ri Bulu-bulu Zaitun. 31 Nanakkeda Yèsus lao ri ana'-ana' gurun-Na, "Iyato wennièwè namulari maneng matu salai-Ka; saba' tarokii ri laleng Kitta'è: Makkedai Allataala, 'Maèlo-Ka mpunoi iyaro pakkampiè, natassiya-siyana matu bimbala'na. ' 32 Iyakiya pura-Kuna ripaoto' paimeng, maèlo-Ka lao ri Galilèa poddiyoloiko. " 33 Nakkeda Pètrus lao ri Yèsus, "Namuni iya maneng laingngè nasalaiwi Bapa', dè' sises-siseng iyya!" 34 Nakkeda Yèsus lao ri Pètrus, "Engngerangngi, iyato wennièwè, riwettu dè'napa naoni manu'è, wèkkatelluni muwassakkarek-Ka. " 35 Nappèbali Pètrus, "Namuni harusu'ka matè silaong Bapa', dè'to umaèlo makkeda makkedaè dè' uwissengngi Bapa'!" Nasininna ana'-ana' guru laingngè makkeda makkuwatoro. 36 Purairo laoni Yèsus sibawa ana'-ana' gurun-Na risèuwaè onrong riyasengngè Gètsèmani. Nakkuwanaro makkeda lao ri mennang, "Tudanno kuwaè, maèlo-Ka lao massempajang. " 37 Nanaèrani Pètrus sibawa iya duwa ana'na Zèbèdèus lao silaongengngi. Nappammulana messè babuwa sibawa mausè. 38 Nakkeda lao ri ana'-ana' gurun-Na, "Messè senna'i atik-Ku, samanna maèlo-Ka matè. Onrono kuwaè, sibawa accowèno majjaga-jaga sibawak-Ka. " 39 Nainappa Yèsus lao mabèla-bèla cèddè, nanakkaluttu ri tanaè massempajang. Adan-Na, "Ambo', rèkko weddingngi, pabèlaini polè ri Iyya anrasa-rasang iya harusu'è Upèneddingi. Iyakiya aja' nasituru' èlo-Ku, sangadinna situru èlona Ambo' bawang. " 40 Purairo lisuni Yèsus ri iya tellu ana' gurun-Na nanapolèini mennang mattengngang matinro. Nakkeda lao ri Pètrus, "Dè'muna mullèi iko tellu jaga sibawak-Ka sijang bawang? 41 Jaga-jagako, sibawa assempajakko kuwammengngi aja' mupèneddingiwi paccobangngè. Mèmeng rohmu maèloi pogau'i tongengngè iyakiya dè' mullèi, saba' sipa'na tolinoè malemmai!" 42 Laosi paimeng Yèsus massempajang, adan-Na, "Ambo', rèkko iyaè anrasa-rasangngè harusu'i Upèneddingi, sibawa dè' nawedding ripabèlai, leppessanni èlona Ambo' jaji. " 43 Purairo lisuni Yèsus, nanalolongessi ana'-ana' gurun-Na matinro mupa, nasaba cakkaruddu senna'i. 44 Siseppi Yèsus nasalai mennang, na untu' mabbèkkatellunna massempajang sibawa powada ada-ada iya padaè. 45 Purairo lisuni ri ana'-ana' gurun-Na nakkeda, "Matinro mupoga sibawa passauwi tekkomu? Itai, narapini wettunna Ana'na Tolinoè riyabbèrèyang lao ri akuwasanna sining tau madosaè. 46 Oto'no, talao. Itai! Engkani polè tau iya bali'bellariyèk-Ka!" 47 Ri wettu mabbicarana mupa Yèsus, Yudas, sala sèddinna polè ri ana'-ana' gurunna Yèsus polèni. Maèga tau naèwa silaong iya tiwiè peddang sibawa tarasulu. Risuroi mennang ri kapala-kapala imangngè sibawa sining pamimpinna Yahudiè. 48 Na iyaro tau bali'bellaè pura napaissengiwi mennang tanrangngèwè, "Tau iya ubauwè, iyanaritu taunna. Tikkengngi!" 49 Lettu'nana ri onrongngèro, matteruni Yudas lao ri Yèsus nakkeda, "Salama', Pa' Guru!" Nanabauwi Yèsus. 50 Nappèbali Yèsus, "Eh saudara, untu' aga nalao saudara kumaiyè?" Nainappa malluruni tau maègaèro nanatikkengngi Yèsus. 51 Sala sèddinna ana' gurunna Yèsus iya engkaè kuwaro sibawa Yèsus, rampui peddanna nanawettai atanna imang lompoè angkanna massarang daucculinna. 52 Nakkeda Yèsus lao ri ana'-ana' gurun-Naro, "Pariwanuwai paimeng peddammu. Saba' sininna tau iya makkègunangngèngngi peddanna matèi matu sibawa peddang. 53 Muwasengngiga dè' Uwullèi mèllau tulung ri Ambo'-Ku, namasitta matu kiringngi lebbi seppulo duwa pasukang tentara malaèka'? 54 Iyakiya rèkko makkuwairo, pèkkugi wedding kajajiyang iya puraè riboto ri laleng Kitta'è makkedaè mèmeng harusu'i kajajiyang pada-pada iya makkekkuwangngèwè?" 55 Nakkeda Yèsus lao ri tau maègaèro, "Tau maja-Ka'ga, namupolè mai sibawa tiwi peddang enrengngè tarasulu untu' tikkek-Ka? Esso-esso-Ka mappagguru ri Bolana Allataala, nadè' mutikkek-Ka! 56 Iyakiya mèmeng harusu'i makkuwaro kuwammengngi nakajajiyang aga naokiè nabi-nabiè ri laleng Kitta'è. " Purairo, lari manenni ana'-ana' gurunna Yèsus salaiwi Yèsus. 57 Sining tau iya tikkengngèngngi Yèsus natiwini ri bolana Imang Lompoè Kayafas. Maddeppungenni guru-guru agamaè sibawa sining pamimpinna Yahudiè kuwaro. 58 Naccowèna Pètrus ri Yèsus mabèla-bèla lettu ri seddè bolana imang lompoè. Nainappa muttama' Pètrus ri laleng seddè bolaèro, natudang silaong pengawal-pengawal-è. Macinnai missengngi pèkkugi accappurenna matu iya manennaro. 59 Makkuragani kapala-kapala imangngè sibawa sininna Mahkama Agamaè sappa asabbiyang bellè-bellè untu' pakennaiwi pahukkungeng matè Yèsus. 60 Iyakiya dè'gaga sèddi butti nalolongeng namuni maègani malluru mancaji sabbi bellè. Accappurenna engka duwa tau malluru liyolo. 61 Makkedai mennang, "Iyaè tauwè makkedai, 'Uwullè ruttungngi Bolana Allataala, na ri laleng tellungngessoè Uwullè patettongngi paimeng. ' " 62 Nainappa tettong imang lompoè, nakkeda lao ri Yèsus, "Dè'ga Mubaliwi iyaro riteppuwangngèk-Ko?" 63 Iyakiya mammekko bawammi Yèsus. Siseppi makkeda iyaro imang lompoè lao ri Yèsus, "Nasabbing Allataala iya tuwoè, powadani Ikoga Arung Pappassalama'è, Ana'na Allataala?" 64 Nappèbali Yèsus, "Makkuwaitu adatta puwang. Iyakiya ateppe'no: mappammulai makkekkuwangngè, muwitai matu Ana'na Tolinoè tudang ri seddè ataunna Allataala Iya Pommakuwasaè, sibawa polè ri yasè'na ellungngè ri langiè!" 65 Nasapè'-sapè'ni pakèyanna iyaro imang lompoè, nanakkeda, "Napakatunai Allataala! Dè'na naparelluki sabbi. Alèmuna mèngkalinga manengngi ada-ada iya pakatunaèngngi Allataala. 66 Pèkkugi pallolongemmu makkekkuwangngè?" Nappèbali mennang, "Salai, sibawa harusu'i matè. " 67 Nanammèccuini mennang rupanna Yèsus, sibawa nabarasa'i. Engkato leppa'i 68 sibawa makkeda, "Coba teppui sibawa paissengiki, èh Arung Pappassalama'è! Niga leppa'-Ko?" 69 Tudat-tudanni Pètrus ri saliweng, ri seddè bolaè. Napolèna sala sèddinna pattumani makkunrai makkeda lao ri Pètrus, "Dè'ga musilaotto Yèsus tau Galilèaèro?" 70 Iyakiya massakkai Pètrus ri yolona maneng mennang, nappèbali Pètrus, "Dè' uwissengngi aga akkattamu. " 71 Nainappa lao ri sumpanna seddè bolaè. Na engka sèddi pattumani makkunrai laingngè mitai Pètrus, nakkeda lao risining tauwè kuwaro, "Iyaè tauwè sibawa towi onna' Yèsus polè ri Nazarèt-èro. " 72 Nassakkasi Pètrus sibawa mattanro, adanna, "Dè' tongeng uwissengngi iyaro tauwè!" 73 Dè' namaitta puranaro, sining tau iya tettongngè kuwaro laoni ri Pètrus sibawa makkeda, "Pasti iko sala sèddinna polè ri mennang. Matanrang senna' polè ri saddammu. " 74 Nappammulana Pètrus mattanro-tanro, "Matèka, dè' uwissengngi iyaro tauwè!" Iyatoro wettuè naonina manu'è. 75 Naèngngeranni Pètrus makkedaè purai makkeda Yèsus ri alèna, "Riwettu dè'napa naoni manu'è, wèkkatelluna muwassakkareng. " Nassuna Pètrus, sibawa teri tassènge'-sènge'.

Matius 27

1 Maèlè senna'ni sininna kapala imangngè sibawa pamimpinna Yahudiè mèbbu apettung untu' mpunoi Yèsus. 2 Nabalengguni Yèsus, nanabbèrèyangngi lao ri Pilatus, gubernurna pamarènta Roma. 3 Wettunna Yudas, iya bali'bellariyèngngi Yèsus naita makkedaè ripakennaini pahukkungeng Yèsus, massessekalèni. Nainappa napalisu iyaro telluppuloè dowi pèra' ri kapala-kapala imangngè sibawa pamimping-pamimpinna Yahudiè. 4 Makkedani, "Madosaka bali'bellariwi tau iya dè'è asalanna, angkanna rihukkung matè!" Iyakiya mappèbaliwi mennang, "Magi naripaduli iyatu? Iyaro urusammu!" 5 Naggenrungenni Yudas iyaro dowiè muttama' ri Bolana Puwangngè, nainappa lao gattungngi alèna. 6 Naittèni kapala-kapala imangngè iyaro dowiè nakkeda, "Iyaè dowiè, dowi dara. Manuru' hukkunna agamaè, iyaè dowiè dè' nawedding riputtama' ri onrong akkasuwiyangengngè ri Bolana Puwangngè. " 7 Puranana mennang massèddi, napakèni mennang iyaro dowiè untu' melli tana iya riyasengngè Tanana Pakkèbbu Oringngè. Iyaro tanaè ripakèi untu' tampunna sining tau polè-polè. 8 Iyanaro saba'na lettu essoèwè iyaro tanaè riyasengngi "Tana Dara". 9 Na ri lalennaro, kajajajiyanni aga pura napowada Nabi Yèrèmia, iyanaritu, "Tarimai mennang telluppulo dowi pèra', iyanaritu elli nasitujuiyè bangsa Israèliè selaku pakkamaja untu' Alèna. 10 Na iyaro dowiè napakèi mennang untu' melliwi Tanana Pakkèbbu Oringngè, pada-pada iya pura napparèntangngè Puwangngè lao ri iyya. " 11 Wettunna Yèsus mangolo ri Pilatus, gubernurna wanuwaèro, makkutanani Pilatus, "Ikonaga Arunna tau Yahudiè?" Nappèbali Yèsus, "Makkuwaitu adatta puwang. " 12 Iyakiya wettunna kapala-kapala imangngè sibawa pamimping-pamimpinna Yahudiè pauwi maèga riteppuwangngi Yèsus, dè' sises-siseng nabaliwi. 13 Rimakkuwannanaro makkedani Pilatus lao ri Yèsus, "Dè'ga Muwèngkalingai iya maneng nateppuwangngèk-Ko mennanro?" 14 Iyakiya dè' nappèbali Yèsus muwi cèddè angkanna hèrang senna' iyaro gubernur-è. 15 Tungke' Ramè-Ramè Paskaè, biyasana gubernur-è malleppessang sèddi tau tarungku situru napilè tau maègaè. 16 Iyaro wettuè engka sèddi tau rihukkung iya tarompoènna. Asenna Yèsus Barabas. 17 Jaji, wettunna tau maègaè maddeppungenna, makkutanani Pilatus ri mennang, "Nigana muwèlori uleppessangekko? Yèsus Barabas iyarè'ga Yèsus iya riyasengngè Kristus?" 18 Makkeda makkuwairo Pilatus nasaba naissengngi makkedaè sining panguwasana Yahudiè mabbèrèyangngi Yèsus nasaba mangèmpurui mennang. 19 Wettunna Pilatus tudang ri onrong pangadèlèkengngè nakirinni bainèna pasengngèwè lao ri alèna, "Aja' mucampuru'i parakarana tau iya dè'è napasalaro, nasaba nakarena Alèna, mannippika' essoèwè iya mappakatau-tauè. " 20 Iyakiya kapala-kapala imangngè sibawa pamimping-pamimpinna Yahudiè matteru-terui napakiri-kiri iyaro tau maègaè untu' mèllauwi ri Pilatus kuwammengngi naripaleppe Barabas sibawa rihukkung matè Yèsus. 21 Nanakkutanasi iyaro gubernur-è lao ri mennang, "Niga muwèlori uleppessangekko polè ri iya duwa tauwèro?" Nappèbali mennang, "Barabas. " 22 Nakkutana Pilatus lao ri mennang, "Rèkko makkuwaitu, aga ugaukengngi Yèsus iya riyasengngè Kristus?" Nappèbali maneng mennang, "Sallii!" 23 Nakkutana Pilatus, "Iyakiya aga asalan-Na?" Napèdè' maladde'na mennang gora, "Sallii!" 24 Angkanna mainge'ni Pilatus makkedaè dè'na agaga wedding napogau' sibawa ajakkè maronta'i iyaro sining tauwè. Jaji malani uwai, na ri yolona iyaro tau maègaè bissaiwi limanna sibawa makkeda, "Dè' utanggung jawakiwi amatènna iyaè tauwè! Urusammu iyaè!" 25 Nappèbali iya maneng tau maègaèro, "Leppessanni idi sibawa ana'-ana'ta tanggungngi pahukkungengngè nasaba amatèn-Na!" 26 Nainappa Pilatus leppessangngi Barabas untu' mennang; sibawa nasuroi tauwè barasa'i Yèsus, sibawa nabbèrèyanna Yèsus untu' risalli. 27 Nainappa prajuri'-prajuri'na Pilatus natiwi Yèsus muttama' ri saorajana gubernur-è, naddeppungenna sininna tentaraè mattulilingiwi Yèsus. 28 Naludunni mennang pakèyanna Yèsus, nanapasangiwi jumba lango-lango. 29 Mèbbuni mennang sèuwa passigera' polè ri takkè-takkè maddoriè, nanapasangngi ri ulunna Yèsus. Nainappa napatètèngi jari ataun-Na sèuwa tekkeng, nainappa makkaluttu ri yolo-Na sibawa mèllèkèllè'i. Adanna mennang, "Oh Puwakku, Arunna Tau Yahudiè!" 30 Nammèccuini mennang sibawa nalai iyaro tekkengngè, nainappa naunru ulun-Na. 31 Puranana nacculè-culèi, naludunni iyaro jumba lango-langoè, nainappa napapasangi paimeng pakèyan-Na. Purairo natiwini massu untu' risalli. 32 Ri tengnga laleng, siruntu'i mennang sèddi tau polè ri Kirènè asenna Simon. Napassani mennang iyaro tauwè mèssangngi sallina Yèsus. 33 Lettu'nana mennang risèuwaè onrong iya riyasengngè Golgota, bettuwanna, "Onrong Tengkora". 34 Kuwaniro mennang napaènung Yèsus anggoro iya sicampuru'è essung. Iyakiya purana nakanyamè Yèsus iyaro anggoro'è, dè'na namaèlo mènungngi. 35 Nainappa nasalli mennang, sibawa nabagè-bagè pakèyan-Na sibawa naundi. 36 Purairo tudanni mennang jagaiwi kuwaro. 37 Ri yasè'na ulun-Na napasanni mennang oki iya riteppuwangngèngngi, iyanaritu: "Iyanaè Yèsus, Arunna Tau Yahudiè". 38 Nasalli towi mennang duwa parampo' silaong Yèsus; sèddi tau ri seddè ataun-Na, sèddi ri seddè abèyo-Na. 39 Sining tau iya lalowè kuwaro maccilic-ciling ulunna, sibawa nacella-cellana Yèsus. 40 Makkedai mennang, "Iko maèloè ruttungngi Bolana Allataala, sibawa patettongngi ri laleng tellungngesso! Rèkko Ana'nako Allataala, nonnono polè ri sallièro, namupassalama'i alè-Mu!" 41 Makkuwatoro kapala-kapala imangngè sibawa guru-guru agamaè enrengngè sining pamimpinna Yahudiè naèllèkèllè'ni Yèsus. Makkedai mennang, 42 "Napassalama'i tau laingngè, padahal Alèna dè' naullèi passalama'i! Rèkko arunnai Israèliè, madècènni makkekkuwangngè nonno polè ri sallièro, nainappaki maèlo mateppe' ri Alèna. 43 Mateppe'i ri Allataala, sibawa makkeda makkedaè Ana'nai Allataala. Nah, laono mai taitai maèlo muwiga Allataala passalama'i makkekkuwangngè. " 44 Parampo'-parampo' iya risalliè sibawa Alèna mala nacella-cella towi pada-padaèro. 45 Ri tangassonana, tellujjang ittana, sininna iyaro wanuwaè mapettang. 46 Tettè tellu arawèngngè, gorani Yèsus sibawa sadda maloppo, "Eli, Eli lama sabakhtani?" bettuwanna, "Oh Allataala-Ku, oh Allataala-Ku magi Musalai-Ka?" 47 Siyagangngarè tau kuwaro mèngkalingai iyaro gau'è, nakkeda, "Naobbii Elia!" 48 Engka sèddi tau polè ri mennang mapperi-perini lao mala bunga karang, nanapajajje'i ri laleng anggoro' makecciè, nainappa napasopo ri laleng cappa'na sèddiè aju, nanassoppakengngi ri tèmunna Yèsus. 49 Iyakiya tau laingngè makkedai, "Tajengngi, taitai polè arè'gi Elia passalama'i!" 50 Nainappa gorasi Yèsus sibawa sadda maloppo, nanasseppungenni nappase'-Na paccappurengngè. 51 Kaing paddenring iya taggattungngè ri Bolana Puwangngè makennè'ni mancaji duwa polè ri yasè' lettu ri yawa. Mpèwang tanaè sibawa mapuwè' sining bulu batuè. 52 Tattimpa' sining tampungngè, sibawa maèga umma'na Allataala iya matèènna tuwo paimeng. 53 Massu mennang polè risining tampungngè puranana Yèsus moto polè ri amatèngngè, sibawa muttama' ri Yèrusalèm. Namaèga tau mitai mennang kuwaro. 54 Kapalana tentaraè sibawa prajuri'-prajuri'na iya jagaiyèngngi Yèsus mètau senna'ni wettunna naita mpèwang tanaè sibawa sininna iya kajajiyangngèro. Makkedani mennang, "Tongeng, iyanaè Ana'na Allataala!" 55 Engkato kuwaro maèga makkunrai mitai polè mabèla. Iya mennang ritu pura maccowèriyèngngi Yèsus untu' tulungngi mappammulai polè ri Galilèa. 56 Ri yelle'na iyanaritu Maria Magdalèna, Maria indo'na Yakobus sibawa Yusuf, enrengngè indo'na ana'-ana'na Zèbèdèus. 57 Iyaro wenniè polèni sèddi tau sugi iya polè ri Arimatèa, iya riyasengngè Yusuf. Maccowè towi ri Yèsus. 58 Laoni ri Pilatus nanaèllauwi ujuna Yèsus. Nanapparèntanni Pilatus kuwammengngi nariwèrèng ujuna Yèsus. 59 Nalani Yusuf iyaro ujuè, nanadokoi sibawa kaing walu polè ri lènang iya mabaruè mupa. 60 Nainappa nataro ujuna Yèsus ri laleng tampung appunnangenna iya naèbbuè ri laleng sèddiè bulu-bulu batu. Purairo galèttèni sèddi batu loppo tongkoi sumpanna tampungngèro, nainappa meddè. 61 Maria Magdalèna sibawa Maria laingngè monroi tudang kuwaro moloiwi iyaro tampungngè. 62 Pappa bajanana, ri esso Saba'è, kapala-kapala imangngè sibawa sining tau Farisiè laoni silaong mangolo ri Pilatus. 63 Nakkeda, "Puwang, wettunna tuwo mupa iyaro pabbellèngngè, riyèngngerangngi purai makkeda, 'Labe'na tellungngesso moto'-Ka matu. ' 64 Rimakkuwannanaro, suroi tauwè jagaiwi iyaro tampungngè madècèd-dècèng narapi esso matelluè, kuwammengngi ana'-ana' gurun-Na dè' naullèi mènnauwi uju-Na nainappa makkeda lao risining tauwè makkedaè purani ripaoto' polè ri amatèngngè. Na bellè iya paccappurengngèwè lebbi majapi naiya mammulangngè. " 65 Nakkeda Pilatus lao ri mennang, "Namappunnaiko tentara pengawal, laono mujagaiwi iyaro tampungngè madècèd-dècèng. " 66 Nalaona ri tampungngè, nasègèlè'i batu pattongkona sibawa taro tau jaga ri yolona, kuwammengngi nadè'gaga tau ganggui iyaro tampungngè.

Matius 28

1 Wettunna labe'na esso Saba'è, ri esso Aha'è, maèlè senna'ni Maria Magdalèna sibawa Maria laingngè lao mitai iyaro tampungngè. 2 Tappa mpèwang muni tanaè iya maseroè. Engka sèddi malaèka'na Puwangngè nonno polè ri surugaè nanagalèttèi iyaro batu pattongkona, nanatudang ri yasè'na. 3 Tappana iyaro malaèka'è pada-padai billa'è, sibawa pakèyanna maputè senna'. 4 Tentara pengawal iya jagaè kuwaro makkumani tauna angkanna tènrè mennang, sibawa pada-pada tau matè. 5 Nakkeda iyaro malaèka'è lao risining makkunraièro, "Aja' mumètau! Uwisseng musappai Yèsus iya puraè risalliro. 6 Dè'ni kuwaè. Moto'ni pada-pada Napowadaè riyolo. Laono mai muwitai onronna ripalèwu. 7 Makkekkuwangngè, apperi-perino lao namupowadangngi ana'-ana' gurun-Na, 'Moto'ni, namakkekkuwangngè laoni lebbi riyolo naiya iko ri Galilèa. Kuwaro muwitai matu!' Engngerangngi aga pura upowadakko. " 8 Mapperi-perini iyaro sining makkunraiè salaiwi tampungngè. Nasibawang pappènedding mètau sicampuru' marennu; lari-larini mennang untu' powadangngi iyaro gau'è lao ri ana'-ana' gurunna Yèsus. 9 Tappa polè muni Yèsus mèwai sita iyaro sining makkunraiè, nakkeda, "Salama'!" Napolèna mennang maddeppèriwi, nainappa nakaddao ajè-Na sibawa nasompai. 10 Nakkeda Yèsus lao ri mennang, "Aja' mumètau, lao mupowadangngi saudara-saudara-Ku kuwammengngi nalao ri Galilèa; kuwaro naita-Ka matu mennang. " 11 Ri wettu laona iyaro sining makkunraiè, siyagangngarè polè ri tentara pengawal iya jagaiyèngngi iyaro tampungngè lisuni ri kotaè, sibawa laporo'i ri kapala-kapala imangngè sininna iya puraè kajajiyang. 12 Iyaro kapala-kapala imangngè barundinni sibawa sining pamimpinna Yahudiè, nainappa nawèrèng maèga dowi iyaro tentara pengawal-è, 13 nakkeda, "Harusu'ko powadai makkedaè, polèi ana'-ana' gurunna Yèsus ri wenniè, nanaènnauwi ujuna ri wettu matinromu. 14 Rèkko naèngkalingai gubernur-è, ripalècèpi kuwammengngi dè' mulolongeng asukkarakeng. " 15 Nalani tentara pengawal-è iyaro dowiè, nanapogau'i pada-pada iya ripasengengngèngngi lao ri mennang. Rimakkuwannanaro iyaro curitaè tassiya mupi ri yelle'na tau Yahudiè lettu essoèwè. 16 Iyaro seppulo sèddiè ana' gurunna Yèsus laoni ri bulu-buluè ri Galilèa situru iya napparèntangngè Yèsus lao ri mennang. 17 Wettunna mennang naita Yèsus kuwaro, suju'ni mennang sompai. Iyakiya engka ri yelle'na mennang bata-bata. 18 Maddeppèni Yèsus ri mennang, nakkeda, "Sininna akuwasangngè ri surugaè sibawa ri linoè purani riyabbèrèyang ri Iyya. 19 Rimakkuwannanaro laono ri sininna bangsaè ri sininna linoè, pancajiwi mennang ana'-ana' guruk-Ku. Cemmèi mennang sibawa teppui asenna Ambo'è, sibawa Ana'è, enrengngè Rohna Allataala. 20 Paggurui mennang turusiwi sininna iya puraè Uparèntakko. Na èngngerangngi tuli Usibawakko matu lettu paccappurenna linoè. "

Markus 1

1 Iyanaè Karèba Madècèng passalenna Yèsus Kristus, Ana'na Allataala. 2 Iyaro Karèba Madècèngngè napammulaiwi pada-pada iya naokiè Nabi Yèsaya, makkuwaèwè: " 'Iyanaè suro-Ku, ' adanna Allataala, 'Usuroi lebbi riyolo naiya Iko, kuwammengngi natimpakek-Ko laleng. ' 3 Engka tau gora-gora ri padang kessi'è, 'Passadiyangengngi laleng Puwangngè; paratai sining laleng iya maèloè Nalaloi. ' " 4 Pada-pada iya tarokièro, makkuwatoniro mompoi Yohanès ri padang kessi'è. Nacemmèi tauwè sibawa napalettu'i karèba polè ri Allataala. Makkedai Yohanès, "Harusu'ko toba' polè ri dosa-dosamu sibawa harusu'ko ricemmè, kuwammengngi naddampengekko Allataala. " 5 Sininna tauwè polè ri wanuwa Yudèa sibawa kota Yèrusalèm lao mèngkalingai Yohanès. Nangakuini mennang dosa-dosana, nappa ricemmè ri Yohanès ri Salo Yordan. 6 Pakèyang iya napakè Yohanès polèi ri bulu untaè. Babbanna polèi ri bingkulangngè, sibawa anrèna incalè nenniya cani' ale'. 7 Nappallebbangenni karèbaèwè, "Ri munrikku matu, polèi matu sèddi tau iya lebbi battowaè na iyya. Dè' usitinaja cuku' lukkai tulu sapatun-Na. 8 Iyya ucemmèko sibawa uwai, iyakiya iyaro Nacemmèko matu sibawa Rohna Allataala. " 9 Iyaro wettuè engkani Yèsus polè ri Nazarèt daèrana Galilèa, naricemmè-Na ri Yohanès ri Salo Yordan. 10 Massuna Yèsus polè ri saloèro, Naitani tabbukka langiè sibawa Rohna Allataala nonno ri yasè'na pada-pada jangang-jangangngè. 11 Nainappa naèngkalinga saddanna Allataala makkeda, "Ikona Ana'-Ku iya Uwamasèiyè. Mupèsennangi atik-Ku. " 12 Puranaro, matteruni Yèsus ritiwi ri Rohna Allataala ri padang kessi'è. 13 Naonrona kuwaro patappulo essona ricobai ri Ibillisi'. Engkato kuwaro olokolo liya naèwa sibawang, naritumaningi ri malaèka'è. 14 Ritarungkunnana Yohanès, laoni Yèsus ri Galilèa, nanappagguruwangngi kuwaro Karèba Madècèng polè ri Allataala. 15 Adan-Na, "Dè'na namaitta napammulaiwi Apparèntanna Allataala. Toba'no polè ri dosa-dosamu, sibawa mateppe'no ri Karèba Madècèng polè ri Allataala!" 16 Wettunna Yèsus joppa ri wirinna Tappareng Galilèa, Naitani duwa pakkaja, iyanaritu Simon sibawa Andrèas anrinna. Mattengngangngi mennang jala. 17 Nakkeda Yèsus lao ri mennang, "Accowèno ri Iyya. Maèlo-Ka pagguruko majjala tau. " 18 Matteruni mennang nasalai jalana nainappa naccowèri Yèsus. 19 Joppani matteru Yèsus, naitasi duwa tau massilessureng laingngè, iyanaritu Yakobus sibawa Yohanès, ana'-ana'na Zèbèdèus. Engkai mennang ri lopiè, pedècèngiwi jalana. 20 Natteruna Yèsus mobbii mennang. Nanasalaini ambo'na ri laleng lopiè silaong sining tau napagajiè. Nainappa lao maccowèriwi Yèsus. 21 Lettu'ni Yèsus sibawa ana'-ana' gurun-Na ri kota Kapernaum. Ri esso Saba' rappina, muttama'ni Yèsus ri bola assompangngè nanappammula mappagguru. 22 Hèranni sininna tau iya mèngkalingaèngngi cara-Na mappagguru. Saba' mappaggurui sibawa kuwasa, dè' napada guru-guru agamaè. 23 Iyaro wettuè engka sèddi tau nauttamai roh maja muttama' ri laleng bola assompangngè, nagora, 24 "Oh Yèsus, tau Nazarèt-è, aga maèlo Mugaukekki? Polè-Koga untu' pabbinasaki? Uwisseng niga Iko: Ikona suro mapaccingngè iya polè ri Allataala!" 25 Nagara'ni Yèsus iyaro roh-è, "Ammekkoko! Assuko polè ri tauwèro!" 26 Naiyaro roh majaè nagottanni iyaro tauwè sibawa masero, nainappa massu polè ri tauwèro nanagorato. 27 Hèrang senna'ni sininna tauwè, angkanna makkeda sèddiè lao ri laingngè, "Wah, aga iyaè? Sèuwa pappagguruwang baru! Nasuroi massu roh-roh majaè sibawa kuwasa, namatinulu ri Alèna!" 28 Nallebbanna masitta iyaro karèbaè passalenna Yèsus lao risininna daèrana Galilèa. 29 Nasalaini Yèsus sibawa ana'-ana' gurun-Na iyaro bola assompangngè, nalao ri bolana Simon sibawa Andrèas. Nalaoto Yakobus sibawa Yohanès silaongengngi mennang. 30 Matuwa makkunrainna Simon masemmengngi ri onrong atinronna. Jaji wettunna Yèsus sibawa ana'-ana' gurun-Na muttama' ri bolaèro, ripowadanni Yèsus iyaro gau'è. 31 Nalaona Yèsus ri matuwa makkunrainna Simon, nanakkatenningngi limanna, nanatulungngi moto'. Soroni semmenna, nanatumaningiwi mennang. 32 Arawènnana, labunana essoè, natiwini sining tauwè lao ri Yèsus iya maneng tau malasaè sibawa tau nauttamakiyè sètang. 33 Maddeppungenni sininna pabbanuwana kotaèro ri yolona bolaèro. 34 Nanapajjappani Yèsus maèga tau iya nakennaè maddupa-rupang lasa, sibawa napaddèsu' towi maèga sètang. Dè' napalaloi iyaro sining sètangngè mabbicara, saba' naissengngi mennang niga Yèsus. 35 Pappa bajanana, subu-subu mupa, moto'ni Yèsus nanasalaiwi bolaè. Nalao ri onrong masino-sinoè ri saliweng kota, nassempajang kuwaro. 36 Iyakiya Simon sibawa sellao-sellaona laowi sappai Alèna. 37 Naruntu'na-Na mennang, makkedani, "Sininna tauwè sappaki Pa'. " 38 Iyakiya mappèbaliwi Yèsus, "Laono mai tapatterui joppatta lao ri kota-kota laingngè kuwaè mattulili. Harusu' tok-Ka makkatobba kuwaro, saba' iyanaro akkattana Ulao kumaiyè. " 39 Rimakkuwannanaro laoni Yèsus kègi-kègi ri sininna Galilèa, nanakkatobba risining bola assompangngè enrengngè napaddèsu'i sining sètangngè. 40 Engka sèddi tau malasa oli iya mappakatau-tauè lao ri Yèsus. Makkaluttuni iyaro tauwè, nakkeda, "Rèkko naèloriwi Bapa', naullè Bapa' pajjappaka'. " 41 Namessèna Yèsus ri tauwèro. Jaji nakarawani iyaro tauwè, nanakkedato, "Uwèloriwi, ajjappano!" 42 Iyatoro wettuè nateddèng lasana najjappa. 43 Nainappa Yèsus suroi lao sibawa papparèngngerangngèwè, 44 "Jaga-jagako, aja' mucuritai lao ri nigi-nigi, iyakiya laoko ri imangngè, namuwèllauwi untu' pattentui makkedaè majjappano. Nainappa untu' ajjappammuro, akkasuwiyangekko akkarobangeng situru napparèntangngè Musa, selaku butti lao risining tauwè makkedaè tonget-tongenno majjappa. " 45 Iyakiya iyaro tauwè laoni, sibawa matteru-terui nacurita kajajiyangngèro kègi-kègi, angkanna dè'na naullèi Yèsus muttama' ri kotaè sibawa mannessa-nessa. Ri saliweng kota bawang monro ri onrong-ngonrong masino-sinoè. Iyakiya matteru-teru mupi tauwè lao ri Alèna polè kègi-kègi.

Markus 2

1 Siyagangngarè esso ri munrinna, lisuni Yèsus ri Kapernaum. Nallebbanna karèbaè makkedaè engkai ri bolaè. 2 Namaègana tau polè. Makkatulunni mennang kuwaro angkanna dè'na gaga onrong. Muwi ri sumpangngè pennoto siredde-redde tauwè. Napalettu'ni Yèsus karèba polè ri Allataala lao ri mennang. 3 Ri wettu mabbicarana Yèsus, engka eppa tau mpulè sèddi tau pèso' natiwi lao ri Yèsus. 4 Iyakiya maèga senna' tau, dè' naullèi lettu ri seddèna Yèsus. Jaji nabukkai pabbingengngè persis ri yasè'na naonroiyè Yèsus. Purairo, naloro'ni iyaro tau pèso'è sibawa tappèrèna. 5 Wettunna naita Yèsus pèkkugi rajanna teppe'na mennang, makkedani lao ri tau pèso'èro, "Ana'-Ku, riyaddampengenni dosa-dosamu. " 6 Engka siyagangngarè guru agama iya tudangngè kuwaro mammulani makkutana ri laleng atinna, 7 "Barani senna' iyaè tauwè mabbicara makkuwaro! Napakatunai Allataala. Niga wedding maddampengengngi dosaè, saliwenna Allataala?" 8 Iyatoro wettuè naissengngi Yèsus pikkiranna mennang. Nainappa makkeda, "Magi mumakkutana makkuwaro ri laleng atimmu? 9 Kèga lebbi gampang: makkeda, 'Riyaddampengengngi dosamu', iyarè'ga makkeda, 'Oto'no, akkai tappèrèmu, namujoppa'? 10 Iyakiya makkekkuwangngè maèlo-Ka pabuttiwi ri iko makkedaè ri yasè'na linoèwè makuwasai Ana'na Tolinoè maddampengengngi dosaè. " Nainappa makkeda Yèsus lao ri tau pèso'èro, 11 "Oto'no, akkai tappèrèmu namulisu!" 12 Mapperi-perini moto' malai tappèrèna nainappa massu risabbing risininna mennang. Hèrang senna'ni sininna tauwè nanapojiwi Allataala. Makkedani mennang, "Dè'pa naengka nariita kajajiyang makkuwaèwè!" 13 Lisuni paimeng Yèsus ri wirinna Tappareng Galilèa. Maèga tau lao ri Alèna, naripagguru mennang. 14 Ri wettunna Yèsus joppa kuwaro, naitani sèddi passinge' sima riyasengngè Lèwi, ana'na Alfèus, mattengngang tudat-tudang ri kantoro accukèngngè. Nakkeda Yèsus lao ri Lèwi, "Accowèno ri Iyya. " Natettonna Lèwi naccowèriwi Yèsus. 15 Wettunna Yèsus mattengngang manrè ri bolana Lèwi, polèni maèga passinge' sima sibawa sining tau iya riyangga'è maja ri masaraka'è maccowè manrè sisama Yèsus enrengngè ana'-ana' gurun-Na. Saba' maèga ri yelle'na mennang maccowèriwi Yèsus. 16 Engka siyagangngarè guru agama polè ri golongang Farisiè mitai Yèsus manrè sisama passinge'-singe' simaè sibawa sining tau iya riyangga'è majaro. Jaji makkutanani mennang ri ana'-ana' gurunna Yèsus, "Magi gurummu nanrè sisama passinge'-singe' simaè sibawa sining tau majaèro?" 17 Naèngkalingai Yèsus pakkutanana mennanro, nanappèbali, "Tau madisingngè dè' napparelluwang dottoro'; bannami tau malasaè bawang. Polè-Ka tenniya untu' mobbii tau iya mangga'èngngi alèna makessing, sangadinna tau iya riyangga'è matuna. " 18 Risèuwaè wettu mappuwasai ana'-ana' gurunna Yohanès Paccemmè sibawa sining tau Farisiè. Nainappa engka tau polè ri Yèsus sibawa makkutana, "Magi ana' gurunna Yohanès Paccemmè sibawa ana' gurunna tau Farisiè nappuwasa, na ana' gurunna Bapa' dè'?" 19 Nappèbali Yèsus, "Dè'ga nanrè padaè ri pèsta abottingengngè? Rèkko sibawa mupi mennang bottimpuranè, tentu manrèi mennang. 20 Iyakiya polèi matu wettunna nariyala iyaro bottimpuranè polè ri mennang. Ri wettuènnaro matu dè' nanrè. 21 Dè'gaga tau tèppangngi waju laungngè sibawa sikennè kaing baru. Saba' cakkikkii matu iyaro pattèppangngè nanasapè'i iyaro wajuè, angkanna pèdè' malowangngi sapè'na. 22 Makkuwatoniro dè'gaga tau tiri' anggoro baru ri laleng popang koli malaungngè. Nasaba iyaro anggoro baruè nareppa'i matu iyaro popangngè, angkanna tabbè duwai. Iyaro anggoro baruè harusu'i ritiri' ri laleng popang iya mabaruètto!" 23 Risèuwaè esso Saba', wettunna Yèsus lalo risèuwaè dare' gandong, mammulani ana'-ana' gurun-Na mala gandong. 24 Nakkeda sining tau Farisiè lao ri Yèsus, "Magi na ana'-ana' gurum-Mu najjalèkkaiwi hukkunna agamata, ri laleng napogau'na aga riyattèyangngè ri esso Saba'è?" 25 Nappèbali Yèsus, "Dè'paga naengka mubacai aga napogau' Daud, wettunna Abyatar mancaji imang lompo. Wettunna Daud sibawa sining taunna malupu, sibawa dè' nappunnai inanrè, muttama'i ri Bolana Puwangngè, nananrèi roti puraènna riyakkasuwiyangeng ri Allataala. Nawèrèng towi sining taunna iyaro rotiè. Padahal manuru' agamata, sining imangngè bawang wedding manrèi iyaro rotiè. " 27 Nainappasi makkeda Yèsus, "Esso Saba'è ripakangkai untu' rupa tauwè; tenniya rupa tauwè untu' esso Saba'è. 28 Jaji, Ana'na Tolinoè makuwasai, muwi lao ri esso Saba'è. "

Markus 3

1 Lisusi Yèsus ri bola assompangngè. Kuwaro engka tau iya matè siwaliè limanna. 2 Na kuwaro engka tau maèlo sappai asalanna Yèsus, kuwammengngi weddingngi riyapparapekeng. Jaji napènessaini matteru, maèloiga pajjappai tauwè ri esso Saba'è. 3 Nakkeda Yèsus lao ri tau matè sibaliè limanna, "Laoko mai mutettong kuwaè, ri yolo. " 4 Namakkutana lao ri sining tau iya engkaè kuwaro, "Manuru' agamaè, aga wedding ripogau' ri esso Saba'è? Pogau'i madècèngngè iyarè'ga majaè? Passalama'i tauwè iyarè'ga mpunoi?" Mammekko bawammi mennang. 5 Nakkitana Yèsus mattulili sibawa macai. Iyakiya messè towi, nasaba matedde ati senna'i mennang. Nainappa makkeda lao ri tauwèro, "Loro'i limammu. " Naloro'ni limanna iyaro tauwè, najjappana limanna. 6 Nanasalaini sining tau Farisiè iyaro bola assompangngè, nappa lao barunding sibawa siyagangngarè tau iya sokongngèngngi Hèrodès, untu' mpunoi Yèsus. 7 Soroni Yèsus sibawa ana'-ana' gurun-Na ri Tappareng Galilèa. Namaèga senna'na tau polè ri Galilèa lao maccowèriwi Yèsus. Maègato polè ri Yudèa, 8 polè ri Yèrusalèm, polè ri daèra Idumèa, sibawa daèra seddè alauna Yordan, enrengngè polè ri seddèna kota-kota Tirus sibawa Sidon. Lao manenni ri Yèsus, saba' purani naèngkalinga passalenna gau'-gau' iya puraè Napogau'. 9 Iyaro tauwè makkumani ègana, angkanna Yèsus suroi ana'-ana' gurun-Na passadiyangengngi lopi, saba' ajakkè riredde'i risining tauwèro. 10 Maèga senna' tau napajjappa, angkanna sininna tau malasaè siredde-redde makkuraga maddeppèriwi kuwammengngi weddingngi nakarawai. 11 Sining tau iya nauttamakiyè roh maja, sises-siseng naitai, matteru bawammi suju' ri yolo-Na sibawa gora, "Ikona Ana'na Allataala!" 12 Iyakiya nattèyang senna'i Yèsus iyaro roh-roh majaè mappaddissengengngi niga Alèna. 13 Nainappa Yèsus mènrè risèddiè bulu-bulu, sibawa naobbii sining tau Naèloriyè. Napolèna iyaro sining tauwè, 14 nainappa napilè polè ri yelle'na mennang seppulo duwa tau. Adan-Na, "Upilèko, kuwammengngi musibawak-Ka, enrengngè Usuroko untu' mappallebbangengngi Karèba Madècèng polè ri Allataala, 15 sibawa lolongekko kuwasa untu' paddèsu'i sining sètangngè. " 16 Iyanaè asenna iyaro seppuloè duwa tau: Simon (iya riyasengngètto Pètrus), 17 Yakobus sibawa Yohanès silessurenna, iyanaritu ana'-ana'na Zèbèdèus (iya mennanro Nawèrèngngi aseng Boanèrges bettuwanna "ana' lettè"), 18 Andrèas, Filipus, Bartolomèus, Matius, Tomas, Yakobus ana' Alfèus, Tadèus, Simon si Patriot, 19 sibawa Yudas Iskariot iya bali'bellariyèngngi Yèsus. 20 Nainappa lisuni Yèsus ri bolaè. Iyakiya polèsi tau maègaè maddeppungeng, angkanna Yèsus sibawa ana'-ana' gurun-Na dè'na nadapii manrè. 21 Nakkeda sining tauwè, "Jangenni!" Naèngkalingana kaluwarga-Na iyaro gau'è, polèni untu' malai Alèna. 22 Makkedani guru-guru agamaè iya polè ri Yèrusalèm, "Nauttamakiwi Bèèlzèbul! Kapalana sining sètangngèro mpèrèngngi akuwasang untu' paddèsu'i sètangngè. " 23 Nanaobbini Yèsus iyaro tau maègaè, nanacuritangngi mennang siyagangngarè pakkalarapangeng. Nakkeda Yèsus, "Pèkkugi wedding sètangngè paddèsu'i sètangngè?" 24 "Rèkko sèddiè wanuwa tabbagèi ri laleng konro-konrong iya simusuè, iyaro wanuwaè pasti dè' natahang. 25 Sibawa rèkko ri laleng sèddiè kaluwarga dè' gaga passèddiyang sibawa anggota-anggotana sisullèi simusu, ancuru' matu iyaro kaluwargaè. 26 Sibawa rèkko ri laleng akkarungenna Ibillisi' tabbagèi sibawa mammusui, iyaro akkarungengngè dè' natahang maitta sibawa pasti lennye'i matu. 27 Dè' sèddi tau mullèi muttama' ri lalempolana sèddiè tau mawatang nanarampasa'i waramparanna rèkko dè' nasiyoi lebbi riyolo iyaro tau mawatangngè. Purapiro nainappa wedding narampasa' waramparanna. 28 Issenni! Rèkko pogau'i dosa tauwè sibawa powada pappakatuna, wedding muwa riyaddampengeng. 29 Iyakiya rèkko napakatunai Rohna Allataala, dè' nawedding riyaddampengeng! Saba' iyaro pappakatunaè iyanaritu dosa mannennungeng. " ( 30 Napowadai Yèsus makkuwaro, nasaba engka tau makkeda makkedaè nauttamakiwi Yèsus roh maja. ) 31 Purairo, polèni indo'na sibawa silessu-silessuretta Yèsus. Mattajengngi mennang ri saliweng, nanasuroi tauwè mobbii Yèsus. 32 Iyaro wettuè maèga tau tudang mattulilingiwi Yèsus. Makkedai mennang ri Yèsus, "Pa', indo'ta sibawa silessu-silessuret-Ta engkai ri saliweng, nasappaki mennang Pa'. " 33 Nappèbali Yèsus, "Niga indo'-Ku? Niga silessu-silessurek-Ku?" 34 Nainappa makkita lao risining tau iya tudangngè mattulilingiwi, nappa makkeda, "Iyanaè indo'-Ku sibawa silessu-silessurek-Ku! 35 Tau iya pogau'èngngi èlona Allataala, iyanaritu padaorowanè-Ku, ana' darak-Ku, sibawa indo'-Ku. "

Markus 4

1 Mappaggurusi Yèsus ri wirinna Tappareng Galilèa. Maèga senna' tau katulungngi. Rimakkuwannanaro laoni tudang ri lalenna sèuwaè lopi iya engkaè ri tompo'na uwai, na iyaro tau maègaè tettongngi ri wirinna tapparengngè. 2 Nanappagguruwanna Yèsus maèga passaleng lao ri mennang sibawa pakè pakkalarapangeng. Mappakkuwiyè paggurui mennang. 3 "Engkalingai! Engka sèddi patani lao mampo binè. 4 Wettunna mampo, engka binè teppa ri lalengngè. Napolèna manu'-manu'è manrèi iyaro binè gangka cappu. 5 Engkato teppa ri onrong mabbatu-batuè, iya cèddè'è tanana. Iyaro binè masitta'i tuwo nasaba makurang tanana, 6 iyakiya wettunnana matanrè essoè, mammulani makelle iyaro cura'-cura'na nainappa marakko sibawa matè nasaba dè' namalamung ure'na muttama'. 7 Engkato binè teppa ri tengngana alekale maddoriè. Tuwoni iyaro alekale maddoriè nanalimpengiwi iyaro cura'-cura'è angkanna dè' naullèi mabbuwa. 8 Iyakiya engkato teppa ri tana macommo'è. Iyaro binè tuwoi, namancaji maloppo nainappa mabbuwa, engka leppe' wèkkatelluppulo, engka enneppulona, sibawa engkato sèratu. " 9 Purana nacurita iyaro pakkalarapangngè, makkedani Yèsus, "Mappunnaikoto daucculing, èngkalingani!" 10 Wettunna Yèsus alè-alènami, polèni sining tau iya puraè mèngkalingai pappagguruwan-Na silaong iya seppulo duwa ana' gurun-Na. Naèllauni mennang pakatajangngi bettuwanna iyaro pakkalarapangngè. 11 Nakkedana Yèsus lao ri mennang, "Purano riwèrèng pammasè untu' missengngi rahasiyana passalenna pèkkugi Allataala mapparènta. Iyakiya sining tau saliwengngè ripaggurui sibawa pakkalarapangeng, 12 kuwammengngi 'Natonget-tongengngi matu mennang makkita, iyakiya dè' nakkita, matterui matu mennang marèngkalinga, iyakiya dè' nappèjeppu, kuwammengngi naaja' mennang nakkita sibawa mappèjeppu naaja' napolè ri Allataala nariyaddampengeng mennang ri Allataala. ' " 13 Nainappa Yèsus makkeda lao ri mennang, "Rèkko dè' mupahangngi pakkalarapangngèro, pèkkugi mullèi pahangngi sining pakkalarapang laingngè? 14 Iyaro pangampoè iyanaritu tau iya mappallebbangengngèngngi karèba polè ri Allataala. 15 Binè iya teppaè ri lalengngè iyanaritu pada-padai sining tau iya mèngkalingaèngngi karèba passalenna pèkkugi Allataala mapparènta. Iyakiya marèngkalingana polèna Ibillisi' malai aga iya puraè riyampo ri laleng atinna mennang. 16 Binè iya teppaè ri onrong mabbatu-batuè sinrupai sining tau iya mèngkalingaèngngi iyaro karèbaè, namatteru natarima sibawa masennang atinna. 17 Iyakiya iyaro karèbaè dè' nakkure' ri laleng atinna mennang, angkanna dè' natahang maitta. Lolongenna mennang anrasa-rasang iyarè'ga paccallang nasaba karèbaèro, matteruna massakka. 18 Binè iya teppaè ri tengngana alekale maddoriè sinrupai sining tau iya mèngkalingaèngngi iyaro karèbaè, 19 iyakiya bata-batai passalenna atuwonna mennang sibawa macinnana tuwo sibawa masennang. Napessunna untu' maddupa-rupang gau' muttama'i ri laleng atinna mennang. Rimakkuwannanaro iyaro karèba polè ri Allataala tassipii ri laleng atinna mennang, angkanna dè' nabbuwa. 20 Sibawa binè iya teppaè ri tana macommo'è sinrupai sining tau iya mèngkalingaèngngi iyaro karèbaè sibawa natarimana, makkèbuwani mennang maèga, engka telluppulo, engka enneppulona, sibawa engka leppe' wèkkasèratu wassèlè'na. " 21 Makkedai paimeng Yèsus, "Engkaga naengka tauwè napalluwa pajjennangeng nainappa natongko baku iyarè'ga nataroi ri yawana onrong atinrongngè? Dè'ga nataroi iyaro pajjennangengngè ri ajè pajjennangengngè? 22 Dè'gaga anu tassubbu iya dè'è napaita matu, sibawa dè'gaga iya rirahasiyakangngè dè' naribongkara' matu. 23 Rimakkuwannanaro, rèkko mappunnaiko daucculing, èngkalingani!" 24 Nainappasi makkeda Yèsus, "Pènessaiwi aga iya muwèngkalingaèwè! Ukkurang iya mupakè untu' tau laingngè, napakè towi matu Allataala untu' iko -- sibawa mala lebbi maègapi. 25 Saba' tau iya mappunnaiyènna, riwèrèngngi matu lebbi ègapa; iyakiya tau iya dè'è nappunnai, cèddè iya engkaè ri alèna, riyala towi matu. " 26 Nasambussi bicaranna Yèsus, "Rèkko mapparèntai Allataala selaku Arung, keadaanna weddingngi riyakkalarapangeng pada-pada sèddiè tau pangampo binè ri dare'na. 27 Matinroi ri wenniè; pèseddingngi ri essoè. Naiyaro sining binè tuwoi matteru sibawa mancaji battowa. Iyakiya pèkkugi carana iyaro sining binè tuwo mancaji battowa, iyaro tauwè dè' naissengngi. 28 Tanaè muto ritu passu wassèlè: bunge'-bunge'na takkèna, nainappa takkè-takkèna, nappa buwana. 29 Narèkko matasa'ni iyaro gandongngè, mappammulani tauwè sangkiwi nasaba narapini wettunna mèngngala. " 30 Nakkutana Yèsus, "Rèkko mapparèntai Allataala, aga wedding ripasibandingengngi? Aga contona wedding ripakè untu' pakatajangngi? 31 Rèkko mapparèntai Allataala, keadaanna pada-padai iyaè pakkalarapangengngè: Sèuwa batu sawi iya nalaè sèddi tau nainappa nataneng ri tanaè. Iyaro batu sawi-sawiè iyanaritu binè kaminang baiccu ri linoè. 32 Iyakiya rèkko tuwoi, mancajiwi pong battowa ri yelle'na tanet-tanengngè. Takkè-takkèna makkuwamani woronna angkanna polèi manu'-manu'è mèbbu sarang ri yawana accinaungenna. " 33 Makkuwaniro Yèsus paggurui tauwè sibawa makkègunang maèga pakkalarapangeng pada-padaèro, situru iya weddingngè napahang mennang. 34 Tuli pakèi Yèsus pakkalarapangeng rèkko napaggurui iyaro sining tauwè. Iyakiya rèkko Alènami sibawa ana'-ana' gurun-Na, napakatajang manengngi lao ri mennang. 35 Iyatoro arawèngngè, nakkeda Yèsus lao ri ana'-ana' gurun-Na, "Laono mai tasompe lao ri liweng tappareng. " 36 Naènrè'na Yèsus ri lopiè, na ana'-ana' gurun-Na salaiwi tau maègaè ri wiring tapparengngè, nainappa mènrè ri lopi iya padaè. Nainappa Yèsus silaong ana'-ana' gurun-Na mappammula sompe. Engkato lopi-lopi laing kuwaro. 37 Dè' namaitta ri munrinna polèni anginrajaè. Naunruni bombang lopiè sibawa muttama' ri laleng angkanna cèddè'pi napenno uwai iyaro lopiè. 38 Na Yèsus mattengngangngi matinro ri borina lopiè sibawa ulun-Na ri yasè'na angkalungungngè. Naritedduna ri ana'-ana' gurun-Na. Makkedai mennang, "Pa' Guru, dè'ga tapaduliwi rèkko nakennaki abala?" 39 Moto'ni Yèsus, nanagera'i iyaro angingngè, nanakkeda lao ri tapparengngè, "Ammekkono, tennanno!" Nasorona angingngè sibawa tennang senna'ni tapparengngè. 40 Nainappa makkeda Yèsus lao ri ana'-ana' gurun-Na, "Magi mumètau? Magi nadè' mumateppe lao ri Iyya?" 41 Namètauna mennang, nakkeda sèddiè lao ri laingngè, "Niga sitongenna iyaè tauwè, namuwi angingngè sibawa bombangngè tunru'to ri Alèna. "

Markus 5

1 Nainappa Yèsus sibawa ana'-ana' gurun-Na lettu'ni ri liwenna Tappareng Galilèa, ri daèrana Gadara. 2 Nonnona Yèsus polè ri lopiè, rilokkaini risèddiè worowanè iya massuè polè ri gowa-gowana tampungngè. 3 Iyaro tauwè rikuwasaiwi ri roh majaè sibawa monroi ri tampungngè. Dè'na nariyullè siyoi; muwi sibawa rantè. 4 Biyasani ribalenggu ajèna sibawa limanna, iyakiya tuli napettuiwi iyaro sining rantè, sibawa napoloi bessiè ri ajèna. Makkuwamani watanna angkanna dè' sèddi tau mullèi tahangngi. 5 Esso wenni lao tulili ri tampungngè sibawa ri bulu-buluè, nagora-gorato sibawa naloi watakkalèna sibawa batu. 6 Mabèla mupi naitai Yèsus polè, lari-larini nappa suju' ri yolona Yèsus. 7 Nasibawang sadda battowa gorani, "Yèsus, Ana'na Allataala Iya Pommatanrè! Maèlo-Ko magaka? Uwèllauwi ri laleng asenna Allataala, aja' Mupanrasa-rasaka!" ( 8 Iyaro tauwè makkeda makkuwairo nasaba makkedai Yèsus ri alèna, "Eh roh, assuko polè ri tauwèwè!") 9 Nainappa makkutana Yèsus ri alèna, "Niga asemmu?" Nappèbali iyaro tauwè, "Asekku, 'Legiun' -- saba' maèga senna'ki idi'è!" 10 Namasero parèllaunna makkolik-koling kuwammengngi na aja' Yèsus nasuroi iyaro roh-roh majaè massu polè ri daèraèro. 11 Ri seddèna iyaro onrongngè, engka maèga senna' bawi iya sappaè inanrè ri èmpenna buluè. 12 Iyaro roh-roh majaè naèllauni ri Yèsus, "Suroki' muttama' ri lalenna sining bawièro. " 13 Nasitujuini Yèsus. Jaji massuni iyaro roh-roh majaè polè ri tauwèro nainappa muttama' ri lalenna sining bawièro. Nalarina sininna bawièro malluppereng polè ri wirinna peppingngè muttama' ri tapparengngè natallemme' -- iya manenna engka kira-kira duwassebbu bawi. 14 Nalarina sining panganrowanna iyaro bawiè, sibawa napatassiyai iyaro karèbaè ri kotaè enrengngè ri dèsaè kuwaèttopa ri seddèna. Namassuna sining tauwè untu' mitai aga pura kajajiyang. 15 Laoni mennang ri Yèsus, nanaitani tau iya nauttamakiyè onna' roh majaèro tudang kuwaro. Mappakèyanni sibawa makessinni pikkiranna. Namètau manenni mennang. 16 Sining tau iya alènaè pura mitai kajajiyangngè passalenna iyaro tauwè sibawa iyaro sining bawiè, nacuritani aga pura kajajiyang. 17 Nainappa iyaro pabbanuwana daèraè naèllauwi kuwammengngi nasalaiwi Yèsus iyaro daèraè. 18 Wettunna Yèsus mènrè ri lopiè, iyaro tau nakuwasaiyè onna' sètang, naèllauni ri Yèsus, kuwammengngi nawedding towi maccowè. 19 Iyakiya dè' nasitujuiwi Yèsus adan-Na, "Lisuno namupowadangngi sumpulolomu aga pura napogau' Puwangngè lao ri iko sibawa pèkkugi kessinna lao ri iko!" 20 Laoni iyaro tauwè, nappammula curitai ri daèra Seppulo Kota aga pura napogau' Yèsus lao ri alèna. Hèrang manenni tauwè mèngkalingai. 21 Lisuni Yèsus ri liweng tappareng. Ri liwenna tapparengngèro, maèga tau polè makkatulung mattulilingiwi Yèsus. 22 Polèni sèddi tau iya riyasengngè Yairus. Sèddiwi pamimpinna bola assompangngè ri kotaèro. Wettunna naita Yèsus, suju'ni ri yolo-Na, 23 namasero parèllaunna, "Pa', malasa seroi ana' makkunraikku. Tulukka talao karawai, kuwammengngi najjappa nadè' namatè!" 24 Nalaona Yèsus silaong Yairus. Maèga tau maccowèriwi sibawa redde'i Alèna polè tulili. 25 Ri yelle'na engkato sèddi makkunrai iya seppuloènna duwa taung malasa maddara iya maladde'è. 26 Sininna asugirenna cappuni napakè untu' mpajai sining dottoro'è, iyakiya dè'gaga mullèi pajjappai, mala pèdè' maseroi lasana. 27 Iyaro makkunraiè maègani pura naèngkalinga passalenna Yèsus. Na ri tengnga-tengngana tau maègaèro, naddeppèrini Yèsus polè ri monri, 28 nasaba mappikkiri'i, "Assaleng ugèssai bawang jumba-Na, majjappaka' matu!" 29 Nagèssani jumbana Yèsus, na iyatoro wettuè nappèsau maddara. Napèrasani makkedaè majjappani. 30 Iyatoro wettuè napèrasai Yèsus makkedaè engka awatangeng massu polè ri Alèna. Nagilinna lao ri tau maègaèro sibawa makkutana, "Niga gèssai jumba-Ku?" 31 Nakkeda ana'-ana' gurun-Na, "Alèta Pa' mitai ègana tau siredde-redde. Natakkutana mupa Pa', niga gèssai Bapa'?" 32 Iyakiya matteru-terui Yèsus makkita mattulili untu' sappai tau iya puraè gèssai. 33 Iyaro makkunraiè iya missengngèngngi aga pura kajajiyang sibawa alèna, tènrèni sibawa mètau suju' ri yolona Yèsus nangakui manengngi. 34 Nainappa makkeda Yèsus lao ri makkunraièro, "Ana'-Ku, nasaba mateppe'ko ri Iyya, majjappako! Laono sibawa salama'. Madising sisenno!" 35 Ri wettu mabbicarana mupa Yèsus, engka siyagangngarè tau risuro polè ri bolana Yairus. Nakkeda mennang ri Yairus, "Matèni ana' makkunraitta Puwang. Aja'na tasussaiwi Bapa' Guru. " 36 Tennapaduliwi aga napowada sining tauwèro, nakkeda Yèsus lao ri Yairus, "Aja'mumètau, ateppe'ko bawang!" 37 Najoppana Yèsus matteru, iyakiya dè' sèddi tau Napalalo maccowèriwi, sangadinna Pètrus sibawa Yakobus enrengngè Yohanès massilessureng. 38 Wettunna mennang lettu ri bolana Yairus, naitani Yèsus keadaangngè sipalu-palu, sibawa mèngkalinga teri enrengngè mpating maloppo. 39 Nauttama'na Yèsus sibawa makkeda lao ri mennang, "Magi mumarukka sibawa teri? Iyaro ana'è dè' namatè, matinromi bawang!" 40 Nacawa-cawaini mennang Yèsus. Nasuroni Yèsus massu maneng mennang. Nainappa natiwi indo' ambo'na iyaro ana'è sibawa iya tellu ana' gurun-Na muttama' ri kamara'na iyaro ana'è. 41 Nakkatenninni Yèsus limanna iyaro ana'è nainappa makkeda, "Talita kum, " bettuwanna, "Ana' makkunrai, makkeda-Ka lao ri iko: oto'no!" 42 Masitta'ni moto' iyaro ana'daraè najoppa. (Seppulo duwa taung umuru'na. ) Sininna iya mitaèngngi iyaro kajajiyangngè hèrang senna'ni! 43 Iyakiya nattèyang senna'i Yèsus mennang mappaissengengngi iyaro gau'è lao ri nigi-nigi. Nanakkeda-Na, "Panrèi iyaro ana'è!"

Markus 6

1 Polè ri onrongngèro, lisuni Yèsus silaong ana'-ana' gurun-Na ri kampong assalen-Na. 2 Ri esso Saba'è mappammulani mappagguru ri bola assompangngè. Engka maèga tau kuwaro. Wettunna iyaro sining tauwè naèngkalinga pappagguruwanna Yèsus, hèrang senna'ni mennang. Makkedani mennang, "Polè kègai iyaè tauwè lolongeng iya manennaro? Pangissengeng agana rupanna iya engkaè ri Alèna? Pèkkugi naullèi pogau'i anu makalallaingngè? 3 Tenniyaga iyaè panrè ajui, ana'na Maria, sibawa silessurenna Yakobus, Yosès, Yudas sibawa Simon? Na ana'-ana' daranna engkato monro kuwaè. " Rimakkuwannanaro nasampèyangngi mennang. 4 Nakkeda Yèsus lao ri mennang, "Sèddiè nabi ripakalebbii kègi-kègi; sangadinna ri kampong assalenna, sibawa ri yelle'na sumpulolona nenniya kaluwargana. " 5 Ri onrongngèro dè' naullèi Yèsus pogau' anu makalallaing. Sangadinna pajjappai siyagangngarè tau malasa sibawa napalènne bawang liman-Na ri yasè'na mennang. 6 Hèranni dè' namateppe' mennang. Nainappa Yèsus lao ri kampong-kampong ri seddènaro, sibawa mappagguru. 7 Naobbini iya seppulo duwa ana' gurun-Na, nainappa nasuro mennang tadduwa-duwa sibawa nawèrèngngi mennang kuwasa untu' paddèsu'i roh-roh majaè. 8 Nawèrèngngi mennang panunju'èwè lao ri mennang, "Aja' mutiwi aga-aga untu' laommu, sangadinna tekkeng. Aja' mutiwi nanrè, iyarè'ga sèpu-sèpu sidekka, iyarè'ga dowi. 9 Pakèko sapatu iyakiya aja' mupakè duwa waju. " 10 Makkeda towi, "Rèkko muttama'ko ri sèddiè bola, onrono kuwaro narapi musalai iyaro kotaè. 11 Iyakiya rèkko lettu'ko risèddiè onrong, nasining tauwè kuwaro dè' namaèlo tarimako sibawa mèngkalingako, salaiwi iyaro onrongngè. Namuwakkeppikengngi awuè ri ajèmu selaku papparèngngerang lao ri mennang!" 12 Najoppana iyaro seppuloè duwa ana' gurunna Yèsus. Laoni mennang mappallebbangengngi karèbaè makkedaè harusu'i toba' rupa tauwè polè ri dosa-dosana. 13 Iyaro ana'-ana' gurunna Yèsus napaddèsu'ni maèga sètang, nasapuiwi minnya' zaitun tau malasaè sibawa pajjappai mennang. 14 Karèba passalenna iyaro kajajiyangngè lettu toni ri Arung Hèrodès, saba' kalabbani asenna Yèsus kègi-kègi. Engka tau makkeda, "Tuwoni paimeng Yohanès Paccemmè! Iyanaro saba'na nappunnai kuwasa pogau'i iyaro makalallaingngè. " 15 Iyakiya makkedai sining tau laingngè, "Elia. " Engkato makkeda, "Nabiwi, pada-pada sala sèddinna nabiè ri wettu riyolo. " 16 Wettunna naèngkalinga Hèrodès iyaro, makkedani, "Pasti iyaè Yohanès Paccemmè iya uwassuro rette'è ulunna riyolo. Makkekkuwangngè tuwoni paimeng!" 17 Saba' ri yolonaro, purai nasuro Hèrodès tauwè tikkengngi Yohanès, sibawa puttama'i ri laleng tarungkuè. Napogau'i Hèrodès iyaro nasaba Hèrodias, bainèna silessurenna, iyanaritu Filipus. Saba' purani Hèrodès nakawingi Hèrodias, 18 namakkolik-kolinni Yohanès mamparengngi Hèrodès passalenna gau'èro, makkuwaè, "Dè' naweddikko kawing sibawa bainèna silessuremmuro!" 19 Iyanaro saba'na Hèrodias nabenciwi Yohanès sibawa macinna mpunoi, iyakiya dè' naullèi pogau'i gau'èro; nasaba rilawa-lawaiwi ri Hèrodès. 20 Saba' purai Hèrodès nasuro tauwè jagaiwi madècèd-dècèng asalamakenna Yohanès ri tarungkuè, nasaba mètaui ri Yohanès. Naissengngi Yohanès sèddiwi tau iya makessingngè iya risuroè ri Allataala. Na mèmeng rèkko mabbicarai Yohanès napojito Hèrodès mèngkalingai, namuni masèssa senna'i nasaba iyaro. 21 Angkanna lolongenni kasempatang Hèrodias ri wettu esso ajajiyanna Hèrodès. Iyaro wettuè mappèstai Hèrodès untu' iya maneng pajaba' tanrèna akkarungengngè, sining parawirana sibawa sining tomariyolona masaraka'è ri Galilèa. 22 Ri pèstaèro sèrèi ana'darana Hèrodias, na iyaro sèrèna napèsennangi senna'i atinna Hèrodès sibawa undangenna. Nanakkeda Hèrodès ri ana'daraèro, "Aga mupoji, èllau bawanni, nauwèrèkko matu!" 23 Majjancini Hèrodès lao ri ana'daraèro sibawa mattanro. Makkedai Hèrodès, "Agi-agi muwèllau uwèrèkko matu, namuni sitengngana akkarungekku!" 24 Nassuna iyaro ana'daraè makkutana ri indo'na, "Indo', aga makessing harusu' uwèllau?" Nappèbali indo'na, "Ellauwi ulunna Yohanès Paccemmè. " 25 Masitta'ni lisu iyaro ana'daraè ri Hèrodès nakkeda, "Uwèllauwi ulunna Yohanès Paccemmè riwèrèkka makkekkuwangngè ri yasè'na sèddiè baki!" 26 Naèngkalingana iyaro parèllaungngè, messè senna'ni Hèrodès. Iyakiya dè' naullèi sampèyangngi parèllaungngèro nasaba purai mattanro ri yolona sining undangenna. 27 Jaji matteruni naparèntang sèddiè pangawalna nalai ulunna Yohanès Paccemmè. Nalaona iyaro parajuri'è ri tarungkuè, nanarette'i ulunna Yohanès. 28 Nainappa natiwi iyaro uluè ri yasè'na sèddiè baki nanawèrèngngi iyaro ana'daraè. Nainappa iyaro ana'daraè nawèrèng tosi indo'na. 29 Wettunna ana'-ana' gurunna Yohanès naèngkalinga iyaro gau'è, laoni malai ujuna Yohanès, nanakuburu'i. 30 Nainappa lisu paimeng sining rasul iya puraè nasuro Yèsus, namaddeppungeng sibawa Yèsus. Nalaporo'ni ri Yèsus sininna iya puraè napogau' sibawa nappagguruwang. 31 Maèga senna' tau polè sibawa medde', angkanna muwi untu' manrè Yèsus sibawa ana'-ana' gurun-Na dè'tona nadapii. Rimakkuwannanaro makkedani Yèsus lao ri ana'-ana' gurun-Na, "Laono mai talao ri onrong masino-sinoè, naweddikki alè-alètami sibawa wedding tokko mappèsau cinampe'. " 32 Nalaona mennang sibawa mallopi ri onrong masino-sinoè. 33 Iyakiya maèga tau mitai mennang salaiwi iyaro onrongngè, sibawa naissenna niga mennang. Jaji polè ri sininna kotaè ri daèraèro, lari-larini sining tauwè molai laleng pottanangngè poddiyoloiwi Yèsus sibawa ana'-ana' gurun-Na. 34 Wettunna Yèsus nonno polè ri lopiè, naitani tau maègaè. Messèni lao ri mennang, saba' pada-padai mennang bimbala' dè'è nappunnai pakkampi. Nanappammulana mappagguru maèga passaleng lao ri mennang. 35 Mawenninnana, makkedani ana'-ana' gurunna Yèsus lao ri Alèna, "Mawè'ni wenni na onrongngèwè tassubbu. 36 Lebbi kessing muwi tasuroi Pa' iyaè sining tauwè medde, kuwammengngi naelli nanrè ri dèsa-desaè sibawa ri kampong-kampongngè kuwaè. " 37 Iyakiya mappèbaliwi Yèsus, "Iko bawanna mpèrèngngi mennang nanrè. " Nakkeda ana'-ana' gurunna Yèsus, "Wah, harusu'ki'ga lao melli roti duwa ratu dowi pèra' untu' panrèi sining tauwèwè?" 38 Nakkutana Yèsus, "Engka siyaga rotimmu? Coba laoko mitai!" Polènana mennang mitai, makkedani, "Engka lima roti sibawa duwato balè. " 39 Nainappa nasuroni Yèsus sining tauwè tudang makkonro-konrong ri wella-wella manyilaè. 40 Natudanna iyaro sining tauwè sibawa taratoro', makkonro-konrong. Engka sèratu tau sikonrong, sibawa engkato limappulo tau sikonrong. 41 Nainappa nalani Yèsus iyaro limaè roti sibawa duwaè balè, nappa conga ri langiè mattarima kasi ri Allataala. Purairo napuwè'-puwè'ni iyaro rotiè sibawa liman-Na nappa nawèrèng ana'-ana' gurun-Na untu' nabagè-bagè lao ri tau ègaèro. Na iya balè duwaèro nabagè-bagè toni lao ri iya maneng mennang. 42 Manrèni mennang gangka messo. 43 Nainappa iyaro lebbinna nanrè napaddeppungenni ana'-ana' gurunna Yèsus, -- engka seppulo duwa baku penno iya maneng. 44 Tau worowanè iya manrèèngngi iyaro rotiè engka kira-kira limassebbu. 45 Purairo masitta'ni Yèsus suroi ana'-ana' gurun-Na lao sibawa mallopi poddiyoloiwi lao ri Bètsaida ri liweng tappareng, nanasuroi tau maègaèro lisu. 46 Puranana naleppessang tau maègaèro, laoni Yèsus ri bulu-buluè untu' massempajang. 47 Mawenninnana, engkani lopinna ana'-ana' gurunna Yèsus ri tengnga-tengngana tapparengngè, na Yèsus engka mupi ri pottanangngè. 48 Naitani mennang sipanrasa-rasa mpisèi iyaro lopiè nasaba madduppangngi angingngè iyaro lopiè. Rimakkuwannanaro kira-kira pallawangenna tettè tellu sibawa tettè enneng èlèè, laoni Yèsus ri mennang mallaleng ri tompo'na uwai. Najoppa-Na matteru samanna maèloi liwengngi mennang. 49 Wettun-Na mennang naita makkedaè joppai ri tompo'na uwai, nasenni mennang sètang, 50 angkanna kelli'ni mennang nataro tau. Saba' naita manengngi mennang sibawa mètau senna'na. Iyakiya matterui Yèsus mabbicara lao ri mennang, "Tennanno! Iyya Yèsus. Aja' mumètau!" 51 Nainappa mènrè ri lopinna mennang, nasorona angingngè. Hèrang senna'ni ana'-ana' gurunna Yèsus. 52 Iyaro roti limabbatu mappahèrangngè dè'pa napahangngi mennang. Mawatang senna' untu' napahang mennang. 53 Wettun-Na lettu ri liweng tappareng, mallabuni mennang ri wirinna Tappareng Gènèsarèt. 54 Wettunna mennang massu polè ri lopiè, naitani sining tauwè, makkedaè iyaro polè iyanaritu Yèsus. 55 Napada larina mennang lao tulili ri sininna daèraèro, nammulana tiwii tau malasaè ri yasè'na tappèrè lao ri Yèsus. Rèkko naèngkalingai mennang makkedaè engkai Yèsus risèddiè onrong, natiwini mennang tau malasaè kuwaro. 56 Kègi-kègi Yèsus lao -- muwi ri kampongngè iyarè'ga ri kotaè iyarè'ga ri dèsaè -- kuwatoro tuli lao tauwè sibawa taroi sining tau malasana mennang ri tana lapangngè. Nainappa naèllau sibawa masero kuwammengngi iyaro sining tau malasaè ripalaloi gèssai jumbana Yèsus, muwi cappa'na muwa bawang. Sininna gèssaèngngi majjappani.

Markus 7

1 Engka sikalompo' tau Farisi sibawa siyagangngarè guru agama polè ri Yèrusalèm, lao ri Yèsus. 2 Purai naita siyagangngarè ana' gurunna Yèsus manrè sibawa jari dè'è namapaccing situru agamaè, iyanaritu dè' nabissaiwi jarinna lebbi riyolo situru peraturanna agamaè. 3 Sining tau Farisiè, makkuwatoro sininna tau Yahudiè, mapato senna' maccowèriwi ade'na nènè-nènèna mennang. Dè' nanrè mennang, ri wettu dè'napa nabissaiwi jarinna situru cara-carana pura ripattentuè. 4 Aga iya riyelliyè ri pasaè dè' nanrèi rèkko dè' napura nabissai lebbi riyolo. Maèga mupa peraturang laing polè ri nènè-nènèna mennang iya nakkatenning masse'è mennang; padaènna akkalarapanna peraturang mabbissa kaca, mangko, sibawa parèwa-parèwa tembagaè. 5 Rimakkuwannanaro iyaro sining tau Farisiè sibawa guru-guru agamaè makkutanani ri Yèsus, "Magi ana' gurum-Mu nanrè sibawa jari iya dè'è naribissai? Aga saba'na ana'-ana' gurum-Mu dè' naccowèriwi ade'na nènè-nènèta?" 6 Nappèbali Yèsus, "Iko tau munapè'ko! Sicoco' senna' aga naboto Yèsaya passalemmu, iyanaritu, 'Makkuwaiyè adanna Allataala, Iyaro sining tauwè nasompa-Ka sibawa ada-ada, iyakiya atinna mabèlai polè ri Iyya. 7 Percuma mennang sompa-Ka, saba' peraturang tolino mennang nappagguruwang samanna iyaro peraturak-Ku!' 8 Parènta-parèntana Allataala dè' mupogau'i, na peraturang-peraturanna tolinoè muwakkatenningngi masse'-masse'. " 9 Nainappa makkeda Yèsus, "Macca senna'ko sampèyangngi parèntana Allataala kuwammengngi mullèi pattahangngi pappagguruwammu. 10 Purani nabbèrèyang Musa iyaè parèntaè, 'Pakalebbii indo'mu sibawa ambo'mu', sibawa 'Nigi-nigi makkeda-kedaiwi ambo' indo'na, harusu'i rihukkung matè. ' 11 Iyakiya iko muwappagguruwangngi: Rèkko makkedai tauwè lao ri tomatowanna, 'Aga iya harusu'è uwèrèngngi ambo' sibawa indo', purani uwakkasuwiyangeng lao ri Allataala, ' 12 namupaleppe'i iyaro tauwè polè ri kawajibanna tulungngi ambo' indo'na. 13 Jaji pappagguruwammu muto muwabbèrèyang lao risining tauwè, mupaddèi ada-adanna Allataala. Maèga mupa gau' pada-padaèwè mupogau'. " 14 Nainappa Yèsus mobbii tau maègaèro siseppa sibawa makkeda lao ri mennang, "Engkalingai kuwammengngi mupahangngi! 15 Dè'gaga iya polè saliwengngè iya muttama'è ri laleng tauwè mullèi panajisi'i tauwè. Sibalè'na, iya massuè polè risèddiè tau, iyanaritu panajisi'i. 16 Jaji, rèkko mappunnaiko daucculing, èngkalingai. " 17 Wettunna Yèsus nasalai tau maègaèro sibawa muttama' ri bolaè, makkutanani ana'-ana' gurun-Na ri Alèna passalenna akkattana pakkalarapangngèro. 18 Nakkeda Yèsus lao ri mennang, "Dè'paga mupahangngi? Dè'ga mullèi pahangngi makkedaè iya muttama'è risèddiè tau dè' naullèi panajisi'i tauwè? 19 Saba' iya muttama'èro dè' nalalo ri atiè, iyakiya laloi ri babuwaè, nainappasi massu. " Nasibawang iyaro ada-adaè napannessai Yèsus makkedaè sininna nanrè hallala'i. 20 Nainappasi makkeda Yèsus, "Iya massuè polè ri tauwè, iyanaritu carèpaiwi. 21 Saba' polè ri lalengngi, iyanaritu polè ri laleng ati, mompoi sining akkaleng majaè iya nassabariyè tauwè pogau' mappangaddiè, mènnau, mabbuno, 22 malaweng, mabbellè, mappètenna, sibawa pogau'i sininna majaè, mancaji mangowa, maja ampèna, pangèmpurung, matempo, sibawa mawatang ripagguru. 23 Sininna majaèro mompoi polè ri laleng, na iyanaro pancajiwi tauwè najisi. " 24 Nainappa nasalai Yèsus iyaro onrongngè, nalao ri daèra seddèna kota Tirus. Muttama'ni ri laleng sèddiè bola nadè' namaèlo riisseng ri tauwè makkedaè engkai ri bolaèro. Iyakiya dè' naullèi subbui alèna. 25 Engka sèddi makkunrai, iya nauttamakiyè sètang ana' makkunrainna, naèngkalingani passalenna Yèsus. Laoni ri Yèsus nasuju' ri yolo-Na, 26 nanaèllau towi kuwammengngi napaddèsu'i Yèsus sètangngè polè ri ana'naro. Iyaro makkunraiè tenniya tau Yahudi, jajiwi ri daèra Fènèsia ri Siria. 27 Jaji makkedai Yèsus lao ri makkunraièro, "Harusu'i lebbi riyolo riwèrèng nanrè anana'è. Dè' namakessing riyala nanrèna anana'è untu' riyappèyangengngi asuè. " 28 Nappèbali iyaro makkunraiè, "Puwang, sining asuè iya engkaè ri yawana mèjangngè nanrèi sèsa-sèsana iya napasempè'è anana'è!" 29 Nainappa makkeda Yèsus lao ri makkunraièro, "Nasaba pappèbalimmuro, lisuno, massuni sètangngè polè ri ana'mu!" 30 Lisuni iyaro makkunraiè. Ri bolaè, napolèini ana'na lèwu ri onrong atinrongngè, sibawa massu tongenni sètangngè polè ri ana'èro. 31 Nainappa nasalai Yèsus daèra Tirus, nanapatterui joppa-Na lalo ri Sidon lao ri Tappareng Galilèa. Laleng laloè ri daèra Seppuloè Kota naola. 32 Kuwaniro engka natiwi tauwè lao ri Yèsus sèddi tau mataru-taru sibawa pèpè. Naèllauni mennang ri Yèsus palènne'i liman-Na ri yasè'na tauwèro. 33 Natiwini Yèsus iyaro tauwè massala polè ri tau maègaè nainappa napalènne jarin-Na ri laleng iya duwa daucculinna tauwèro. Nainappa Yèsus mammèccu, nanagèssai lilana iyaro tauwè. 34 Purairo congani Yèsus ri langiè, nainappa mannyawa loppo sibawa makkeda lao ri tauwèro, "Efata, " bettuwanna, "Tabbukkano!" 35 Tabbukani daucculinna iyaro tauwè sibawa masomè'ni lilana paimeng, sibawa mappammulani mabbicara sibawa magampang. 36 Nariyattèyanna mennang ri Yèsus untu' curitai gau'èro lao ri niga-niga. Iyakiya pèdè' nattèyang Yèsus, pèdè' nappallebangeng towi mennang. 37 Nasininna tau iya mèngkalingaèngngiro, hèrang senna'ni. Makkedani mennang, "Napogau' manengngi sibawa makessing! Mala naèbbui tau mataru-taruè marèngkalinga sibawa tau pèpè mabbicara!"

Markus 8

1 Dè' namaitta ri munrinna, engkasi sikalompo' tau maèga polè maddeppungeng. Nasaba dè' nappunnai mennang nanrè, naobbini Yèsus ana'-ana' gurun-Na nanakkeda, 2 "Messèka lao ri tau maègaèwè. Tellungngessoni ittana mennang silaongek-Ka, namakkekkuwangngè dè' nappunnaina mennang inanrè. 3 Rèkko Usuroi mennang lisu sibawa lobbang babuwana, marenne'i matu mennang ri tengnga laleng. Apalagi engka ri yelle'na mennang polè mabèla. " 4 Nappèbali ana'-ana' gurunna Yèsus, "Ri onrong tassubbuèwè, kègani wedding lolongeng inanrè iya genne'è untu' iya maneng tauwèwè?" 5 Nakkutana Yèsus, "Engka siyaga ègana roti ri alèmu?" Nappèbali mennang, "Pitu. " 6 Nasuroni Yèsus tau maègaèro tudang ri tompo'na tanaè, nainappa nala pitu iyaro rotiè, nappa sukkuru' ri Allataala. Purairo napuwè'-puwè'ni iyaro rotiè sibawa liman-Na nanawèrèngngi ana'-ana' gurun-Na untu' nabagè-bagè lao risining tauwè. Nanapogau'ni ana'-ana' gurun-Na. 7 Mappunnai towi mennang siyagangngarè kajunna balè baiccu. Nasukkurukenni Yèsus ri Allataala iyaro sining balè, nainappa nasuro ana'-ana' gurun-Na bagè-bagèi iyaro sining balè. 8 Manrèni mennang gangka messo -- engka kira-kira patassebbu tau iya manrè. Nainappa napaddeppungeng ana'-ana' gurunna Yèsus lebbinna iyaro nanrè -- pitu baku penno. Nainappa nasuro Yèsus iyaro sining tauwè lisu, 10 na Yèsus enrengngè ana'-ana' gurun-Na matteruni mènrè ri lopiè nalao ri daèrana Dalmanuta. 11 Engka siyagangngarè tau Farisi lao ri Yèsus, sibawa mammulani siddebba' untu' palaiwi jebba. Naèllauwi mennang ri Yèsus pogau' anu makalallaingngè selaku tanrang makkedaè Alèna polèi ri Allataala. 12 Naddarèkèna Yèsus nainappa mappèbali, "Aga saba'na sininna tauwè ri wettuèwè naèllau-Ka pogau' anu makalallaingngè? Dè' Umaèlo mabbèrèyangngi tanrang makkuwaèro lao ri mennang!" 13 Nainappa Yèsus salaiwi mennang, nanauttama ri laleng lopiè; nainappa mallètto ri liwenna tapparengngèro. 14 Nallupaiwi ana'-ana' gurunna Yèsus tiwi roti iya sitinaja genne'è. Sibatu bawang roti nappunnai mennang ri lopiè. 15 Nakkeda Yèsus lao ri mennang, "Atike'ko lao ri raginna sining tau Farisiè sibawa raginna Hèrodès. " 16 Nappammulana ana'-ana' gurunna Yèsus bicarai gau'èro. Makkedai mennang, "Makkeda makkuwairo nasaba dè' tappunnai roti. " 17 Naissengngi Yèsus aga napersoalkang mennang. Rimakkuwannanaro makkedai lao ri mennang, "Magi mupersoalkangngi dè' muwappunnai roti? Dè'ga muwissengngi sibawa dè'paga mupahangngi? Magi namakunru makkuwaro pikkirammu? 18 Mappunnaiko mata -- magi nadè' muwakkita? Mappunnaiko daucculing -- magi nadè' namuwarèngkalinga? Dè'ga muwèngngerangngi 19 iyaro limaè roti iya Upuwè-puwè'è untu' limassebbu tau? Siyaga baku penno lebbinna iya mupaddeppungengngè?" Nappèbali mennang, "Seppulo duwa. " 20 Nakkutana Yèsus, "Na wettunna Upuwè'-puwè' pituè roti untu' patassebbu tau, siyaga baku lebbinna iya mupaddeppungengngè?" Nappèbali mennang, "Pitu. " 21 Nakkedasi Yèsus, "Dè'paga mupahangngi?" 22 Lettu'ni mennang ri Bètsaida. Engka kuwaro natiwi tauwè sèddi tau buta lao ri Yèsus, sibawa naèllauwi kuwammengngi nakarawai iyaro tau butaè untu' pajjappai. 23 Nanakkatenninni Yèsus limanna iyaro tau butaè nainappa narènrèng massu ri saliweng kota. Nainappa nammèccui Yèsus matanna iyaro tauwè. Napalènne'i liman-Na ri matanna tauwèro, nainappa makkutana ri tau butaèro, "Engka mullè mita makkekkuwangngè?" 24 Makkitani iyaro tauwè liyolo, nainappa makkeda, "Iyyè, engka uwita joppa-joppa iyakiya pada-padai pong aju-kajungngè. " 25 Napalènne'si paimeng limanna Yèsus ri tauwèro. Iyaè sisengngè makkuragani iyaro tauwè makkita gangka ullèna. Majjappani matanna, naita manenni sibawa manessa. 26 Nainappa Yèsus makkeda, "Lisuno. Aja'na mulisu ri kotaèro!" 27 Laoni Yèsus sibawa ana'-ana' gurun-Na ri dèsa-dèsaè ri seddèna Kaisarèa Filipi. Na ri tengnga laleng, makkutanani Yèsus lao ri mennang, "Manuru' adanna tauwè, niga Iyya?" 28 Nappèbali mennang, "Engka makkeda: Yohanès Paccemmè; engkato makkeda Elia, na laingngè makkeda: sala sèddinna nabiè. " 29 Nakkutana Yèsus, "Iyakiya manuru' iko, niga Iyya'è?" Nappèbali Pètrus, "Bapa' iyanaritu Arung Pappassalama'è!" 30 Nainappa napparèngngerangenni Yèsus lao ri mennang, kuwammengngi aja' nappaddissengengngi lao ri nigi-nigi passalenna Alèna. 31 Purairo mappammulani Yèsus paggurui ana'-ana' gurun-Na makkedaè Ana'na Tolinoè pasti napèneddingi maèga anrasa-rasang, sibawa riyèwai risining pamimpingngè, kapala-kapala imangngè, sibawa guru-guru agamaè. Riyunoi matu, iyakiya ri esso matelluè, ripaoto'i paimeng. 32 Manessa senna'i nabbirittang Yèsus gau'èro lao ri ana'-ana' gurun-Na. Nanagettenni Pètrus Yèsus libenrèng, nanamparengngi. 33 Iyakiya gilingngi Yèsus nanaitai ana'-ana' gurun-Na, nainappa nampareng Pètrus, "Addèsu'ko polè kuwaè, Paggoda! Iyaro pikkirammu, pikkirang tolino; tenniya pikkiranna Allataala!" 34 Nainappa naobbi Yèsus tau maègaè iya engkaè kuwaro silaong ana'-ana' gurun-Na. Nanakkeda lao ri mennang, "Tau iya maèloè maccowèri-Ka, harusu'i nallupai apentingeng alèna, nainappa naèssang sallina, natteru maccoweri-Ka. 35 Saba' tau iya maèloè mèwaiwi atuwonna, ateddèngengngi matu atuwong. Iyakiya tau iya makkarobangengngèngngi atuwonna untu' Iyya sibawa untu' Karèba Madècèng polè ri Allataala, napassalama'i matu. 36 Aga sarona lao risèddiè tau, rèkko sininna linoèwè mancajiwi appunnangenna, iyakiya ateddèngengngi atuwonna? 37 Weddigga atuwongngè risèlè sibawa anu laingngè? 38 Rèkko sèddiè tau masiri mangakui-Ka sibawa pappagguruwak-Ku ri wettu madorakaè sibawa majaèwè, Ana'na Tolinoè masiri towi mangakuiwi iyaro tauwè, ri wettu polèna matu sibawa akuwasanna Ambo'-Na, nasibawang malaèka'-malaèka' mapaccingngè. "

Markus 9

1 Nakkeda Yèsus, "Issenni! Polè ri yelle'mu kuwaè engka matu dè' namatè, ri wettu dè'napa naitai Allataala mapparènta sibawa makuwasa!" 2 Enneng esso ri munrinna, natiwini Yèsus Pètrus sibawa Yakobus enrengngè Yohanès, silessurenna, massala risèddiè bulu matanrè. Ri yolona matanna mennang tappinrai rupanna Yèsus. 3 Pakèyan-Na maputè millakkillang. Dè' sèddi tukang mènatu ri linoèwè mullè sessa'i pada-padaèro putèna. 4 Nainappa iya telluro ana' gurunna Yèsus naitai Yèsus sipabbicara sibawa Elia enrengngè Musa. 5 Nakkeda Pètrus lao ri Yèsus, "Pa' Guru, manyameng senna'ki kuwaè. Makessikki patettong tellu kèma: Sèddi untu' Bapa', sèddi untu' Musa, sibawa sèddito untu' Elia. " 6 Sitongenna dè' naissengngi aga harusu' napowada Pètrus, saba' mètau senna'i Pètrus sibawa iya duwa sellaona. 7 Nainappa nasalipurini ellung mennang, napolè ri ellungngèro engka sadda riyèngkalinga makkeda, "Iyanaè Ana'-Ku Uwamasèiyè. Engkalingai Alèna!" 8 Masitta'ni mennang makkita mattulili, nadè'na gaga naita muwi niga kuwaro silaong mennang, sangadinna Yèsus bawang. 9 Wettunna mennang nonno polè ri buluèro, riparèngngerangini mennang ri Yèsus, "Aja' mupowadai lao ri niga-niga aga muwita onna', riwettu dè'napa Ana'na Tolinoè ripaoto' polè ri amatèn-Na. " 10 Naturusini iyaro pasengngè, iyakiya ri yelle'na mennang mammulani nacurita aga akkattana Yèsus sibawa "tuwo paimeng polè ri amatèngngè". 11 Nanakkuta-Na mennang lao ri Yèsus, "Magi nakkeda guru-guru agamaè makkedaè harusu'i Elia polè lebbi riyolo?" 12 Nappèbali Yèsus, "Mèmeng polèi Elia lebbi riyolo untu' passaniyasai sini-sininnaè. Iyakiya pèkkugiwi Ana'na Tolinoè? Aga saba'na ri laleng Kitta'è tarokii makkedaè pèneddingiwi matu maèga anrasa-rasang sibawa ricella-cellai ri tauwè? 13 Iyakiya makkeda-Ka lao ri iko: Engkani Elia, sibawa sining tauwè gaukengngi sièlo-èlona mennang. Coco' iyaro sibawa tarokiè ri laleng Kitta'è passalenna alèna. " 14 Wettunna Yèsus sibawa iya tellu ana'-ana' gurun-Na engka paimeng silaong ana'-ana' gurun-Na laingngè, naitani maèga tau kuwaro. Engka siyagangngarè guru agama mattengngang siddebba' sibawa ana'-ana' gurunna Yèsus. 15 Naitana Yèsus sining tauwèro, bengngani mennang, nainappa lari-lari duppaiwi. 16 Nakkutana Yèsus ri ana'-ana' gurun-Na, "Agasi muwassipangèwangi sibawa guru-guru agamaèro?" 17 Naengkana sèddi polè ri yelle'na tau maègaèro mappèbali, "Bapa' Guru, engka ana'ku utiwi lao ri Bapa'. Pèpèi nasaba nauttamakiwi roh maja. 18 Rèkko iyaro roh-è naluruiwi, naggeppu-geppuwang alèna ri tanaè, mabbusa tèmunna, kèku' isinna sibawa matojo maneng alèna. Uwèllauwi ana'-ana' gurunna Bapa' paddèsu'i iyaro roh majaè, iyakiya dè' naullèi pogau'i. " 19 Nakkeda Yèsus lao ri mennang, "Tenniya culè-culè ikoè! Tonget-tongekko iko tau dè' mumateppe. Gangka kègi-Ka harusu' monro sibawakko sibawa sabbara' lao ri iko? Tiwii iyaro ana'è lao kumaiyè!" 20 Natiwini mennang iyaro ana'è lao ri Yèsus. Naitana iyaro roh majaè Yèsus, napatojoini watakkalèna iyaro ana'è angkanna iyaro ana'è maggalèttè ri tanaè. Mabbusa tèmunna. 21 Nainappa makkutana Yèsus ri ambo'na, "Siyagani ittana makkuwaè?" Nappèbali ambo'na, "Baiccu mupi! 22 Biyasai iyaro roh majaè makkuraga mpunoi sibawa buwangngi ri apiè iyarè'ga ri laleng uwai. Iyakiya narèkko naullèi Bapa' tulungngi, tamasèiki sibawa tatulukki!" 23 Nappèbali Yèsus, "Aga muwaseng? Rèkko naullèi Bapa'? Wedding maneng, assaleng mateppe'i tauwè!" 24 Matteruni gora iyaro ambo'na anana'è, "Puwang, mateppe'ka, iyakiya makurang atepperekku. Tulukka kuwammengngi napèdè' mateppe'ka!" 25 Wettunna naita Yèsus makkedaè mammulani polè tau maègaè makkatulung, nasuroni iyaro roh majaè meddè. Makkedani, "Eh roh mataru-taruè sibawa pèpè, Uparèntakko massu polè ri ana'èwè sibawa aja' sises-sisenna mumattama ri lalenna!" 26 Gorani iyaro roh majaè, nainappa napatojoi watakkalèna iyaro anana'è, nappa massu polè ri anana'èro. Iyaro anana'è pada-padani ujuè riita, angkanna makkeda sininna tauwè, "Matèni!" 27 Iyakiya nakkatenningngi Yèsus limanna sibawa natulungngi moto'. Naoto'na iyaro anana'è. 28 Engkanana Yèsus ri bolaè, polèni ana'-ana' gurun-Na secara peribadi ri Yèsus nanakkutana, "Aga saba'na idi dè' nariyullè paddèsu'i iyaro roh majaè?" 29 Nappèbali Yèsus, "Iyaro roh maja bangsana dè' nawedding ripaddèsu' sibawa muwi cara aga, sangadinna sempajang. " 30 Nanasalaini Yèsus sibawa ana'-ana' gurun-Na iyaro onrongngè, napatterui joppana lalo Galilèa. Dè' namaèlo Yèsus riisseng kègai engka, 31 saba' Napaggurui ana'-ana' gurun-Na. Nakkeda Yèsus, "Riyabbèrèyangngi matu Ana'na Tolinoè lao ri akuwasanna tolinoè; riyunoi matu, iyakiya ri esso matelluè moto'i matu!" 32 Dè' napahangngi ana'-ana' gurunna Yèsus iya nappagguruwangngè Yèsus, iyakiya mètaui makkutana ri Alèna. 33 Lettu'ni mennang ri Kapernaum. Lettu'nana ri bolaè, makkutanani Yèsus ri ana'-ana' gurun-Na, "Aga mupersoalkan onna' ri tengnga laleng?" 34 Dè'pa nappèbali mennang. Saba' mappangèwangngi mennang ri tengnga laleng passalenna niga kaminang battowa. 35 Tudanni Yèsus nainappa naobbi iya seppulo duwa ana'-ana' gurun-Na. Makkedani lao ri mennang, "Tau iya maèloè mancaji nomoro' sèddi, harusu'i mancaji paccappureng sibawa harusu' towi mancaji pattumaninna sininna tauwè. " 36 Nainappa Yèsus mala anana' nanasuroi iyaro anana'è tettong ri yolona maneng mennang. Nakaddaoni Yèsus iyaro anana'è, nanakkeda lao ri ana'-ana' gurun-Na, 37 "Tau iya tarimaèngngi sèddiè anana' pada-padaèwè nasaba Iyya, bettuwanna natarima tok-Ka. Na tau iya tarimaèk-Ka, tenniya Iyya bawang natarima, iyakiya natarima towi iya suroèk-Ka. " 38 Nakkeda Yohanès lao ri Yèsus, "Pa' Guru, mitaki sèddi tau iya paddèsu'èngngi sètangngè ri laleng asenna Bapa'. Nariyattèyangngi nasaba dè' napolè ri idi. " 39 Iyakiya makkedai Yèsus, "Aja' muwattèyangngi, saba' dè' sèddi tau iya pogau'èngngi anu makalallaingngè ri laleng asek-Ku, mullèi cella-cella-Ka. 40 Saba' tau iya dè'è naèwaki, bettuwanna naccowèriki. 41 Engngerangngi! Tau iya painungngèkko nasaba ana' gurunnako Arung Pappassalama'è, pasti natarimai sarona. " 42 "Nigi-nigi nassabariwi sala sèddinna polè risining tau iya baiccu'èwè dè'na namateppe' ri Iyya, lebbi kessing muwi narèkko batu allèlurengngè riyassiyorengngi ri ellonna, naribuwang ri lalenna tasi'è. 43 Rèkko limammu nallalengiko madosa, rette'i iyaro limaè! Lebbi kessing muwi tuwoko sibawa Allataala dè' limammu siwali naiya muttama'è ri ranakaè sibawa iya duwa limammu, iyanaritu api mannennungengngè! 44 Kuwaro dè' nawedding peddè apiè, sibawa dè' nawedding matè ule'è. 45 Sibawa narèkko ajèmu nallalengiko madosa, rette'i iyaro ajè. Lebbi kessing muwi tuwoko sibawa Allataala dè' ajèmu siwali, naiya riyabbèrèyangngèkko ri laleng ranakaè sibawa iya duwa ajèmu. 46 Kuwaro dè' nawedding peddè apiè, sibawa dè' nawedding matè ule'è. 47 Rèkko matammu nallalengiko madosa, cukkèi iyaro mataè! Lebbi kessing muwi muttama'ko ri Lino Barunna Allataala sibawa dè' matammu sèddi, naiya riyabbèyakko ri laleng ranakaè sibawa iya duwa matammu. 48 Kuwaro apiè dè' nawedding peddè sibawa ule'è dè' nawedding matè. 49 Tungke' tau ripatulèngngi matu sibawa api, pada-pada akkarobangengngè ripaccingiwi sibawa pejjè. 50 Iyaro pejjè makessingngi, iyakiya rèkko makawai, weddigga ripejjèi paimeng? Jaji sitinajako mancaji pada-pada pejjè -- tuwono massibawa sipammasè-masè. "

Markus 10

1 Nasalaini Yèsus iyaro onrongngè, nalao ri daèra Yudèa sibawa ri daèra ri liwenna Salo Yordan. Polèsi tau maègaè makkatulung ri Yèsus. Napada biyasaè, Yèsus paggurui mennang. 2 Engka siyagangngarè tau Farisi polèto untu' palaiwi jebba Yèsus. Makkutanani mennang, "Manuru' hukkunna agamata, weddigga tauwè massarang bainèna?" 3 Nappèbali Yèsus, "Parènta aga nabbèrèyang Musa lao ri iko?" 4 Nappèbali mennang, "Napalaloi tauwè Musa massarang bainèna, assaleng mokii sure' telle riyolo'. " 5 Nakkeda Yèsus lao ri mennang, "Naokii Musa iyaro parèntaè nasaba mawatang senna'ko ripagguru. 6 Iyakiya bunge'na, wettunna Allataala pancajiwi rupa tauwè, napowadai makkedaè, 'Allataala pancajiwi mennang worowanè sibawa makkunrai. 7 Iyanaro saba'na worowanè nasalaiwi matu ambo' indo'na nanassèddi sibawa bainèna, 8 namancaji seddina matu iya duwa. ' Jaji, dè'na mennang naduwa tau, sangadinna sèddimi. 9 Iyanaro saba'na, aga pura napassèddi Allataala, dè' nawedding napassarang tolinoè!" 10 Muttama'nana mennang ri lalempola, makkutanani ana'-ana' gurun-Na lao ri Yèsus passalenna gau'èro. 11 Nakkeda Yèsus lao ri mennang, "Nigi-nigi massarang bainèna nainappa kawing sibawa makkunrai laingngè, iyaro tauwè malawengngi lao ri bainèna pammulangngè. 12 Makkuwatoro makkunrai iya massarangngè lakkainna nainappa kawing sibawa worowanè laingngè, malaweng towi. " 13 Engka sining tau tiwi ana'-ana'na lao ri Yèsus kuwammengngi narikarawa sibawa ribarakkakiwi mennang. Iyakiya ana'-ana' gurunna Yèsus macairiwi iyaro sining tauwè. 14 Naitana gau'èro, macaini Yèsus nakkeda lao ri ana'-ana' gurun-Na, "Leppessangngi siya iyaro ana'-ana'è lao ri Iyya! Aja' muwattèyangngi mennang, saba' sining tau pada-padaènnaè mancaji anggotana umma'na Allataala. 15 Engngerangngi iyaè! Nigi-nigi dè' namangolo ri Allataala pada-pada sèddiè ana'-ana', dè' namancaji matu anggotana umma'na Allataala. " 16 Puranana makkeda makkuwaro, nakaddaoni Yèsus iyaro ana'-ana'è, nainappa Napalènne liman-Na ri yasè'na tungke'-tungke' sibawa nabarakkakiwi mennang. 17 Wettunna Yèsus napatterusi joppa-Na, engka sèddi tau polè lari-lari lao ri Alèna. Iyaro tauwè suju'i ri yolona Yèsus sibawa makkutana, "Guru iya makessingngè, aga harusu' upogau' kuwammengngi weddikka tarima atuwong tongengngè sibawa mannennungengngè?" 18 Nakkutana Yèsus, "Magi muwasek-Ka makessing? Dè'gaga makessing sangadinna Allataala bawang. 19 Muwissenniga parènta-parèntana Allataala, 'Aja' muwabbuno; aja' mumalaweng; aja' muwènnau; aja' musabbi bellè-bellè, aja' muwabbellè, pakalebbii ambo' sibawa indo'mu. ' " 20 Nakkeda iyaro tauwè, "Pa' Guru, iya manenna parèntaèro purani uturusi sipongekku kallolo. " 21 Messèni Yèsus mitai iyaro tauwè nappa makkeda, "Sèddi mani passaleng muwapparelluwang. Laono mubalu'i sininna appunnangemmu; namuwèrèngngi ellinna tau kasiyasiè, namulolongengngi matu waramparang ri surugaè. Purairo laono mai muwaccowèri-Ka. " 22 Naèngkalingana Yèsus makkeda makkuwaro, kacèlèni iyaro tauwè, nappa nasalai iyaro onrongngè sibawa masussa atinna nasaba sugi senna'i. 23 Naitani Yèsus ana'-ana' gurun-Na nainappa makkeda lao ri mennang, "Mawatang senna' tau sugiè mancaji anggota-Na umma'na Allataala!" 24 Hèranni ana'-ana' gurun-Na mèngkalingai adanna Yèsus. Iyakiya makkedai Yèsus, "Ana'-ana'-Ku, mèmeng mawatang untu' mancaji anggotana umma'na Allataala! 25 Lebbi gampang muwi sèddiè unta muttama' ri sebbo jarungngè naiya sèddiè tau sugi muttama' ri Lino Barunna Allataala. " 26 Iyaro ada-adanna Yèsus nassabariwi ana'-ana' gurun-Na hèrang, angkanna makkutana sèddiè lao ri laingngè, "Rèkko makkuwaitu, nigana wedding salama'?" 27 Naitani Yèsus mennang nappa mappèbali, "Lao ri tolinoè mustahèlè' iyaro; iyakiya lao ri Allataala dè' namustahèlè'; iya manenna wedding ri Allataala. " 28 Nanakkeda Pètrus, "Itai, idi'è pura risalaini sini-sininnaè nataccowèriwi Bapa'. " 29 Nakkeda Yèsus, "Ateppe'no: tau iya salaiyèngngi ruma tanggana; iyarè'ga padaorowanèna iyarè'ga ana'daranna, iyarè'ga indo'na, iyarè'ga ambo'na, iyarè'ga ana'-ana'na, iyarè'ga dare'na sibawa galunna nasaba Iyya sibawa nasaba Karèba Madècèng polè ri Allataala, 30 iyaro tauwè tarimai lebbi maèga ri wettuèwè. Lolongengngi matu wèkkasèratu lebbi maèga bola, padaorowanè, ana'dara, indo', ana'-ana', dare sibawa galung, -- sibawa paccallatto. Na ri wettu mangoloè matti, iyaro tauwè tarimai atuwong mannennungeng. 31 Iyakiya maèga tau iya makkekkuwangngèwè pammulang, mancajiwi matu poddimonri sibawa maèga iya makkekkuwangngèwè poddimonri mancajiwi matu pammulang. " 32 Yèsus sibawa ana'-ana' gurun-Na mattengngang ri laleng allalengengngè lao ri Yèrusalèm. Yèsus monriyolo, nabata-bata maneng ana'-ana' gurun-Na. Nasining tau iya maccowèriyèngngi mennang polè monri, mètauto pappèneddinna. Nainappa naobbisi Yèsus ana'-ana' gurunna mallaing nanapaissengiwi mennang aga kajajiyang matu lao ri Alèna. 33 Adan-Na, "Engkalingai makkekkuwangngè mattengngakki mattuju lao ri Yèrusalèm. Kuwaro matu riyabbèrèyang Ana'na Tolinoè lao ri kapala-kapala imangngè sibawa guru-guru agamaè. Rihukkung matèi matu, nainappa riyabbèrèyang lao risining tau tenniyaè Yahudi. 34 Naèllekèllè'i matu, nammèccuiwi, nacallai, sibawa nasallii. Iyakiya ri esso matelluè, moto'i matu. " 35 Nainappa Yakobus sibawa Yohanès, iyanaritu ana'-ana'na Pa' Zèbèdèus, laowi ri Yèsus. Adanna mennang, "Pa' Guru, engka sèddi passaleng riyacinnai ri Bapa' untu' ripogaukengngi. " 36 Nakkutana Yèsus, "Aga muwacinnai untu' ripogaukekko?" 37 Nappèbali mennang, "Macinnaki tudang ri seddè ataunna sibawa abèyona Bapa', rèkko tudanni Bapa' ri kadèra arajanna sibawa malebbi. " 38 Nakkeda Yèsus lao ri mennang, "Dè' muwissengngi muwèllauwè. Mullèga mènung polè ri ènungeng anrasa-rasangngè iya maèloè Uwènung sibawa muttama' ri laleng onrong anrasa-rasangngè iya maèloè Uwattamaki?" 39 Nappèbali mennang, "Wullè. " Nakkeda paimeng Yèsus lao ri mennang, "Mèmeng mènung tokko matu polè ri ènungeng anrasa-rasang iya Uwènungngè matu, sibawa muttama' ri onrong anrasa-rasangngè iya maèloè Uwattamaki. 40 Iyakiya passalenna niga tudang matu ri atauk-Ku iyarè'ga ri abèyo-Ku, iyaro tenniya ha'-Ku pattèntuè. Allataala pattentui niga-niga tudang matu risining onrongngèro. " 41 Wettunna naèngkalinga iya seppulo ana' gurunna Yèsus laingngè, macaini mennang lao ri Yakobus sibawa Yohanès. 42 Jaji naobbi manenni Yèsus mennang, nanakkeda, "Muwisseng makkedaè sining pamimping bangsaè iya dè'è naissengngi Allataala napanrasa-rasai ra'ya'na. Sibawa sining tomarajana mennang natenre'i ra'ya'na. 43 Iyakiya iko dè' naweddikko makkuwaro! Sibalè'na, tau iya maèloè mancaji battowa ri yelle'mu, harusu'i mancaji pattumanimmu. 44 Sibawa tau iya maèloè mancaji pammulang ri yelle'mu, harusu'i mancaji ata lao ri iya maneng. 45 Saba' Ana'na Tolinoè dè' napolè untu' ritumaningi. Polèi untu' mattumani sibawa untu' mabbèrèyangngi nyawa-Na untu' paleppe'i tau maègaè. " 46 Lettu'ni mennang ri Yèrikho. Na wettunna Yèsus sibawa ana'-ana' gurun-Na enrengngè tau maègaè salaiwi kotaèro, engka sèddi tau buta tudang ri wiring lalengngè marèllau-èllau. Asenna Bartimèus, ana'na Timèus. 47 Wettunna naèngkalinga makkedaè iya mattengngangngè laloro iyanaritu Yèsus, tau Nazarèt-èro, gorani, "Yèsus Ana' Daud! Amasèika!" 48 Maègani tau macairiwi sibawa suroi mammekko. Iyakiya pèdè' malade'i gora, "Ana' Daud! Amasèika!" 49 Nalèppanna Yèsus nainappa makkeda, "Obbii. " Jaji naobbini mennang iyaro tau butaè. Makkedani mennang ri alèna, "Tennano! Naobbiko Yèsus, oto'no!" 50 Nappèyanni jumbana iyaro tau butaè, nainappa mapperi-peri tettong nalao ri Yèsus. 51 Nakkutana Yèsus ri alèna, "Aga muwacinnai Upogau' lao ri iko?" Nappèbali iyaro tau butaè, "Pa' Guru, macinnaka makkita. " 52 Nakkeda Yèsus, "Laono, napajjappano teppe'mu. " Iyatoro wettuè naullèi makkita iyaro tauwè. Nainappa naccowèriwi Yèsus ri lalengngè.

Markus 11

1 Wettunna naddeppèri Yèrusalèm, lettu'ni mennang ri kota Bètfagè sibawa Bètania, ri èmpenna Bulu-bulu Zaitun. Kuwaro engka duwa tau ana' gurunna Yèsus risuro lebbi riyolo ri Yèsus. 2 Nakkeda Yèsus lao ri mennang, "Laono ri kampong ri yolomuro. Muttama'mu ri kampongngèro, muwitai matu sikaju ana' kaleddè riyassiyoreng, iya dè'èppa naengka natonangiwi tauwè. Leppessangngi iyaro kaleddè'è namutiwii kumaiyè. 3 Narèkko engka tau makkutana ri iko, aga saba'na mupaleppe'i iyaro kaleddè'è, powadangngi, 'Napparelluwangngi Puwangngè, cinampe'pi napalisui. ' " 4 Nalaona iya duwaro ana' gurunna Yèsus, nanapolèini sikaju ana' kaleddè tassiyo ri sumpanna bolaè ri wiring lalengngè. Naleppessanni iyaro kaleddè'è. 5 Makkutanani sining tau tettongngè kuwaro lao ri mennang, "Eh, aga mupogau? Magi muleppessangngi iyaro ana' kaleddè'è?" 6 Mappèbalini mennang pada-pada iya puraè ripowadangngi mennang ri Yèsus. Narileppessanna mennang risining tauwèro tiwii iyaro kaleddè'è. 7 Lettu'nana ri Yèsus, nalapikini lekke'na iyaro kaleddè'è sibawa jumbana mennang, nainappa natonangi Yèsus. 8 Maèga tau pallebba'i jumbana ri lalengngè, engkato tale' ri tengnga lalengngè takkè-takkè aju iya nalaè polè ri dare'è. 9 Sining tau joppaè ri yolo, sibawa sining tau iya maccowèriyèngngi polè monri, gora-gora maneng, "Pojiwi Allataala! Ribarakkakiwi Alèna iya polè ri laleng asenna Puwangngè! 10 Tuwoi apparèntan-Na mangoloè -- apparèntanna Daud nènè-nènèta! Pojiwi Allataala iya Pommatanrè!" 11 Angkanna lettu'ni Yèsus ri Yèrusalèm, nainappa muttama' ri Bolana Puwangngè. Kuwaniro napènessai mattulili. Iyakiya nasaba mawè'ni mapettang, najoppana lao ri Bètania silaong iya seppulo duwa ana' gurun-Na. 12 Pappa bajanana, wettunna mennang joppa massu polè ri Bètania, malupuni Yèsus. 13 Naitani polè mabèla engka sipong ara iya maworongngè daunna. Jaji laoni ri pong ajuèro untu' mitai engkaga buwana. Iyakiya wettunna lettu ri pong ajuèro, dè'gaga agaga nalolongeng sangadinna daud-daung bawang, saba' iyaro wettuè tenniya wettunna mabbuwa araè. 14 Nanakkeda Yèsus lao ri pong araèro, "Mappammulai makkekkuwangngè dè' sèddi tau manrèi matu buwamu!" Naèngkalingai ana'-ana' gurunna Yèsus iyaro adaè. 15 Nainappa lettu'ni mennang ri Yèrusalèm, nalaosi Yèsus ri Bolana Puwangngè. Nappammulana kuwaro rukkai sininna tau iya mabbalu'è sibawa mangelliyè ri onrongngèro. Nabalè'ni sining mèjanna passèlè-sèlè dowiè, sibawa bangko-bangkona pabbalu jangang-jangangngè. 16 Nadè' sèddi tau napalalo tiwi aga-aga molai seddè Bolana Puwangngèro. 17 Nainappa napagguruni Yèsus sining tauwè kuwaro. Makkedani, "Ri laleng Kitta'è tarokii makkedaè: Makkedai Allataala, 'Riyasengngi matu Bola-Ku onrong massempajang sininna bangsaè. ' Iyakiya iko mupancajiwi saranna paddampo'è!" 18 Naèngkalingani sining kapala imangngè sibawa guru-guru agamaè. Nappammulana sappa laleng untu' mpunoi Yèsus. Mètauni mennang ri Alèna, nasaba sininna tauwè hèrang maneng mèngkalingai pappagguruwan-Na. 19 Mawè'nana wenni, nasalaini Yèsus sibawa ana'-ana' gurun-Na iyaro kotaè. 20 Pappa bajanana èlèè, wettunna mennang nalaloi iyaro pong araè, naitani mennang iyaro pong ajuè matè lettu ri ure'-ure'na. 21 Naèngngeranni Pètrus kajajiyangngè ri iwenni'na. Nakkedana Pètrus lao ri Yèsus, "Bapa' Guru, coba mitai! Pong ara iya natanroiyè Bapa' matèni!" 22 Nappèbali Yèsus, "Ateppe'ko ri Allataala. 23 Tongeng, weddikko makkeda lao ri buluè, 'Tarakkano namusempè ri tasi'è!' naripogaukekko matu iyaro gau'è; assaleng dè' mubata-bata, sibawa mateppe'ko makkedaè iya mupowadaèro kajajiyang tongengngi matu. 24 Rimakkuwannanaro èngngerangngi iyaè: Rèkko massempajakko sibawa engka muwèllau, ateppe'ko makkedaè purano nawèrèng Allataala aga muwèllau, namutarimai matu. 25 Narèkko massempajakko, iyakiya atimmu dè' namasennang lao risèddiè tau, addampengengngi riyolo' iyaro tauwè, kuwammengngi Ambo'mu ri surugaè naddampengeng towi dosa-dosamu. 26 Rèkko dè' muwaddampengengngi tau laingngè, Ambo'mu ri surugaè dè'to naddampengengngi matu dosa-dosamu. " 27 Lisuni mennang ri Yèrusalèm. Na wettunna Yèsus joppa mattulili ri laleng Bolana Puwangngè, kapala-kapala imangngè, guru-guru agamaè sibawa sining pamimpinna Yahudiè polèni ri Alèna. 28 Makkutanani mennang, "Aga nassabari Mupogau'i iya manennaè? Niga mpèrèk-Ko iyaro ha'è?" 29 Nappèbali Yèsus, "Maèlo tokka makkutana ri iko. Balini na-Upowadang tokko ha' niga nassabari Upogau'i iyaè gau'-gau'è. 30 Yohanès cemmèi tauwè sibawa ha'na niga, Allataala iyarè'ga tolinoè?" 31 Nainappa kapala-kapala imangngè sibawa sining pamimpinna Yahudiè mammulani barunding ri yelle'na mennang. Makkedai mennang, "Rèkko makkedaki, 'Sibawa ha'na Allataala', makkedai matu, 'Magi palè dè' mumateppe ri Yohanès?' 32 Iyakiya mawatatto untu' makkeda, 'Sibawa ha'na tolinoè. ' " Saba' mètaui lao ri tau maègaè, nasaba sininna tau maègaè nangga'i Yohanès sèddi nabi. 33 Jaji, mappèbaliwi mennang, "Dè' narisseng. " Nanakkeda Yèsus lao ri mennang, "Rèkko makkuwaitu, Iyya dè'to Umaèlo powadakko nasibawang ha' niga Upogau'i iya manennaè. "

Markus 12

1 Nainappa mappammulani Yèsus mabbicara sibawa pakkalarapangeng lao ri kapala-kapala imangngè, guru-guru agamaè sibawa sining pamimpinna Yahudiè. Nakkeda Yèsus, "Engka sèddi tau iya tanengiyèngngi sèuwaè dare' anggoro, nainappa nasappo mattulili. Purairo kalini kalebbong untu' mappera' anggoro, nainappa naèbbureng sèuwa langkiyang anganrowangeng. Purairo nappassèwanni iyaro dare' anggoro'na lao ri risiyagangngarè tau paddare' nainappa joppa ri wanuwa laingngè. 2 Narapinana wettunna maccèppu buwa anggoro, iyaro tauwè nasuroni sèddi pattumaninna lao risining pajjamana dare'èro untu' tarimai bagiyanna. 3 Iyakiya iyaro sining pajjamaè natikkengngi iyaro pattumaniè, nanabarasa'i nappa nasuro lisu kosong limanna. 4 Nanasurosi iyaro punna dare'è sèddi pattumanina laingngè. Iyakiya iyaro sining pajjamaè naunrui ulunna iyaro pattumaniè, nappa napaddèsu' sibawa nakkeda-kedai. 5 Iyaro punna dare'è nasurosi sèddiè pattumaninna laingngè. Iyakiya naunoi mennang iyaro pattumaniè. Namakkuwaniro matteru nagaukengngi mennang maèga pattumani iya laingngè: engka nabarasa' sibawa engkato nauno. 6 Nigasi wedding nasuro makkekkuwangngè iyaro punna dare'è? Sèddi mani tau monro, iyanaritu ana'na iya namasèiyè. Jaji angkanna nasuroni iyaro ana'na lao risining pajjamaèro. 'Pasti napakalebbi ana'ku', ' pikkiri'na. 7 Iyakiya iyaro sining pajjamaè makkedai sèddiè lao ri laingngè, 'Iyanaè ahli warisi'na. Laono mai taunoi, kuwammengngi talolongengngi warisi'na!' 8 Natikkenni iyaro ana'è, nanaunoi. Nainappa nabuwang mennang massu ujuna ri saliweng dare'èro. " 9 Nakkutana Yèsus, "Agana napogau' matu iyaro punna dare'è? Pasti polèi matu nanaunoi sining pajjama dare'èro, nainappa nabbèrèyang iyaro dare'è lao risining pajjama laingngè. 10 Tentu purani mubaca iyaè aya'èwè ri laleng Kitta'è, 'Batu iya dè'è napakèi sining tukang bangunangngè mancajiwi matu iya mapongngè. 11 Iyanaè napogau' Puwangngè; temmaka kessinna!' " 12 Nasininna tomariyolona bangsa Yahudiè iya mèngkalingaèngngi pakkalarapangngèro, makkuragani tikkengngi Yèsus, saba' naissengngi mennang alèna ripakennai ri Yèsus iyaro pakkalarapangngè. Iyakiya mètaui mennang ri tau maègaè. Jaji laoni nasalaiwi Yèsus. 13 Engka siyagangngarè tau Farisi sibawa siyagangngarè anggotana golonganna Hèrodès risuro palaiwi jebba Yèsus sibawa pakkutana-pakkutana. 14 Laoni mennang ri Yèsus nanakkeda, "Bapa' Guru, irisseng makkedaè malempui Bapa', sibawa dè'na najampangiwi pallolongenna niga-niga. Terus terangngi nappagguruwang Bapa' èlona Allataala lao ri tolinoè, saba' Bapa' dè' napasilaingengngi tauwè. Nah, coba Bapa' powadakki, 'Manuru' pallolongenna agamata, weddikki'ga makkamaja sima lao ri Kaisar iyarè'ga dè'? Harusu'ki'ga wajai iyaro simaè iyarè'ga dè'?' " 15 Naissengngi Yèsus amunapèkenna mennang. Nappèbali, "Aga saba'na mumaèlo palai-Ka jebba? Coba paitak-Ka sèddi dowi pèra'. " 16 Nanawèrènni mennang sèddi dowi pèra'. Nakkutana Yèsus, "Gambara niga sibawa asenna niga iyaè?" Nappèbali mennang, "Kaisar. " 17 Nakkeda Yèsus, "Rèkko makkuwaitu, wèrènni Kaisar, aga iya nappunnangiyè Kaisar, sibawa Allataala aga iya nappunnangiyè Allataala. " Hèranni mennang mèngkalingai. 18 Siyagangngarè polè ri golongang Sadukiè lao ri Yèsus. (Mennang iyanaritu golongang iya mappallolongengngè makkedaè dè' naoto paimeng tau matè. ) 19 Nakkeda mennang lao ri Yèsus, "Bapa' Guru, naokii Musa iyaè hukkungngè untu' idi: 'Rèkko sèddiè worowanè matè sibawa dè' nappunnai ana', padaorowanèna harusu'i kawing sibawa jandana kuwammengngi nawèrèngngi wija-wijanna tau iya matèènnaro. ' 20 Engka naengka pitu tau mappadaorowanè. Iya macowaè kawingngi, namatè dè' nappunnai ana'. 21 Nainappa iya maduwaè kawingiwi jandana, iyakiya matè towi dè' nappunnai ana'. Gau' pada-padaèro kajajiyang towi lao ri padaorowanè matelluè, 22 sibawa matteru-teru lettu ri mapituè. Angkanna matèto iyaro makkunraiè. 23 Ri esso amotokenna paimeng tau matè, nigana punna bainè iyaro makkunraiè? Saba' iya pituro pura manenni kawingiwi?" 24 Nappèbali Yèsus, "Sala pahang senna'ko. Saba' dè' mupahangngi Kitta'è sibawa akuwasanna Allataala. 25 Saba' rèkko moto'i paimeng sining tau matè, dè'na nakawinna matu, sangadinna tuwoi pada-pada malaèka'è ri surugaè. 26 Na passalenna ripaoto'na tau matè paimeng, dè'paga naengka mubacai ri laleng Kitta'na Musa passalenna alekale' iya malluwa'è? Ri lalenna aya'-aya'èro engka taroki makkedaè, makkedai Allataala lao ri Musa, 'Iyya'naè Allataalana Abraham, Allataalana Ishak sibawa Allataalana Yakub. ' 27 Iyaro Allataala tenniya Allataalana tau matè. Allataalanai tau tuwoè. Sala pahang senna'ko!" 28 Napolèna sèddi guru agama mèngkalingai assipabbicaranna Yèsus sibawa sining tau polè ri golongang Sadukièro. Naitani guru agamaèro makkedaè purani nabali' Yèsus iyaro tauwè sibawa makessing. Nakkutana ri Yèsus, "Parènta kègaènna kaminang penting polè ri sininna parèntaè?" 29 Nappèbali Yèsus, "Parènta mammulangngè iyanaritu, 'Engkalingai èh bangsa Israèliè! Puwang Allataalata, iyaro Puwangngè sèuwai. 30 Amasèiwi Puwang Allataalamu sibawa sissukku atimmu, sibawa sissukku nyawamu, sibawa sininna akkalemmu enrengngè sininna awatangemmu. ' 31 Parènta maduwaè iyanaritu: 'Amasèiwi pada-padammu, pada-pada muwamasèinna alèmu. ' Dè'na gaga parènta laing iya lebbi pentingngè naiya duwa parèntaèro. " 32 Nainappa makkeda iyaro guru agamaè lao ri Yèsus, "Coco' senna' Bapa' Guru! Mèmeng tongeng aga napowada Bapa': Puwangngè ritu Allataala sèuwaè, nadè'na gaga Allataala laingngè. 33 Sibawa harusu'i tolinoè mamasèiwi Allataala sibawa sukku atinna, sibawa sininna akkalenna enrengngè sininna awatangenna. Sibawa harusu' towi namasèi pada-padanna pada-pada alèna. Lebbi kessingngi iyaro naiya makkasuwiyangengngè akkarobangeng ritunu sibawa sining akkarobangeng laingngè lao ri Allataala. " 34 Naitani Yèsus makkedaè iyaro guru agamaè purani nabali' sibawa makessing senna'. Nakkeda Yèsus lao ri tauwèro, "Mawè'no mancaji anggotana umma'na Allataala. " Purairo dè'na sèddi tau baranina makkutana lao ri Yèsus. 35 Mattengngangngi mappagguru ri Bolana Puwangngè, makkutanani Yèsus, "Pèkkugi guru-guru agamaè naullèi makkeda makkedaè iyaro Arung Pappassalama'è wijannai Daud? 36 Padahal alèna Daud -- nasaba ripanurungengngi ri Rohna Allataala -- makkeda, 'Makkedai Puwangngè lao ri Puwakku: Tudanno ri seddè atauk-Ku narapi sining balim-Mu Uwèbbu tunru' ri Iko. ' 37 Jaji rèkko nateppui Daud iyaro Arung Pappassalama'è 'Puwang', pèkkugi wedding Alèna wijanna Daud?" Masennanni tau maègaè iya engkaè ri Bolana Puwangngè mèngkalingai Yèsus mappagguru. 38 Nakkeda lao ri mennang, "Atutuko lao ri guru-guru agamaè. Napoji mennang joppa-joppa sibawa jumba malabbuè sibawa napoji ripakalebbi ri pasaè. 39 Napoji mennang sining onrong malebbiè ri laleng bola assompangngè sibawa ri pèsta-pèstaè. 40 Nabellèi mennang sining jandaè sibawa narampasa'i bolana. Sibawa untu' tongkoi jana mennang, nataroi malampè' sempajanna. Matane matu pahukkungenna!" 41 Wettunna tudang siyolong petti pakkasuwiyangngè ri Bolana Puwangngè, napènessaini Yèsus sining tau iya puttama'èngngi dowina ri lalenna pettièro. Maèga tau sugi puttama' maèga dowi; 42 napolètona sèddi janda kasiyasi. Puttama'i duwa dowi tembaga, iyanaritu dowi rècè-rècè iya kaminang baiccu'è angke'na. 43 Naobbini Yèsus ana'-ana' gurun-Na nainappa makkeda lao ri mennang, "Pènessaiwi iyaè: Janda iya kasiyasièro puttama' ri laleng pettièro lebbi maèga naiya naputtama'è sining tau laingngè. 44 Saba' iya maneng mennang mabbèrèi polè ri lebbi waramparanna. Iyakiya iyaro jandaè, namuni kasiyasi senna'i nabbèrèyangngi iya manenna iya engkaè ri alèna -- mala iya napparelluwangngè untu' atuwo-tuwonna. "

Markus 13

1 Wettunna nasalai Yèsus Bolana Puwangngè, engka sèddi polè ri ana'-ana' gurun-Na makkeda, "Bapa' Guru, cobasai mitai iyaro bangunangngè. Pènessaiwi batu-batunna. Anengka makkuwa kessinna!" 2 Nappèbali Yèsus, "Muwitaga iyaro sining bangunang iya battowaè? Muwi sèddi dè'to gaga batu bangunangngèro monro tassusung ri onronna. Riruttung manengngi matu. " 3 Nainappa Yèsus lao ri Bulu-bulu Zaitun, natudang ri onrong iya siyolongngè Bolana Puwangngè. Nainappa Pètrus, Yakobus, Yohanès, sibawa Andrèas polèni ri Yèsus untu' mabbicara mammessam-messang. 4 Nakkeda mennang ri Yèsus, "Coba Bapa' powadakki uppanna iya manennaro nakajajiyang matu? Sibawa tanra-tanrang aga mappaitangngi makkedaè narapini wettunna?" 5 Nappèbali Yèsus, "Atutuko, aja' narapiko ribengnguwang. 6 Maèga tau matu polè sibawa pakèi asek-Ku sibawa makkeda, 'Iyya'naè!' nanabengnguwangngi maèga tau. 7 Rèkko muwèngkalingani oni-oni ammusurengngè sibawa karèba-karèba ammusurengngè, aja' mumètau. Iyaro gau-gau'è harusu'i kajajiyang, iyakiya iyaro tenniya bettuwanna makkedaè narapini wettunna kiyame'. 8 Bangsa sèddiè mammusui matu mèwai bangsa laingngè. Wanuwa sèddiè namusui matu wanuwa laingngè. Kègi-kègi kajajiyangngi matu mpèwangngi tanaè sibawa polèi akkadèrengngè. Iya manennaro nappai pammulanna bawang, pada-pada peddi napèneddingiyè sèddiè makkunrai maèloè mèmmana'. 9 Harusu'ko matutu, saba' ritikkekko matu nariyassarènrèngeng lao ri mahkamana agamaè. Ribarasa'ko matu risining bola assompangngè. Ritiwiko matu mangolo risining tomakuwasaè sibawa sining arungngè nasaba ana' guruk-Kuko. Na iyanaro kasempatammu untu' mabbèrè asabbiyang passalenna Iyya lao ri mennang. 10 Karèba Madècèng polè ri Allataala harusu'i ripallebbang riyolo' lao ri sininna bangsaè. 11 Narèkko ritikkekko sibawa ritiwi ri pengadilangngè, aja' mubata-bata passalenna aga harusu' mupowada. Rèkko narapini wettunna untu' mabbicara, powada bawanni aga iya ripowadangngèkko ri wettunna. Nasaba ada-ada iya mupowadaèro tenniya ada-adammu muto, sangadinna polèi ri Rohna Allataala. 12 Nabali'bellariwi matu tauwè silessurenna untu' riyuno. Nakajajiyang towi iyaro ri yelle'na ambo'è sibawa ana'na. Ana'-ana'è naèwai matu indo' ambo'na sibawa nabbèrèyangngi mennang untu' riyuno. 13 Nabenciko matu sininna tauwè nasaba ana' guruk-Kuko. Iyakiya tau mattahangngè lettu ri paccappurengngè, ripassalama'i matti. " 14 "Muwitai matu, 'Ja iya Paancuru'è' tettong ri onrong iya riyattèyangngè untu' alèna. (Catatan untu' pabbacaè: Pènessai aga bettuwanna!) Iyaro wettuè, tau iya engkaè ri Yudèa harusu'i lari lao ri buluè. 15 Tau iya engkaè ri pabbingeng bolaè aja' nanonno sibawa muttama' ri lalempola untu' malai agi-agi. 16 Tau iya engkaè ri dare'è aja' nalisu untu' malai jumbana. 17 Temmaka mappakatau-tauna iyaro essoè lao ri makkunrai mattampu'è sibawa indo' iya pasusuè mupi ana' lolona! 18 Assempajakko kuwammengngi iyaro gau'è aja' nakajajiyang ri wettu pabosiè. 19 Ri esso-esso iya mappakatau-tauèro, engka matu asussang iya dè'èppa naengka nakajajiyang, sipongenna napancaji Allataala linoè lettu makkekkuwangngè, sibawa dè'tona nakajajiyang matti. 20 Ebara'na Allataala dè' naponcokiwi iyaro wettuè, dè'gaga sèddi tau salama'. Iyakiya nasaba umma'-Na naponcokiwi Allataala iyaro wettuè. 21 Rèkko iyaro wettuè engka tau makkeda ri iko, 'Itai, iyaro Arung Pappassalama'è engkai kuwaè!' iyarè'ga 'Itai, engkai kuwaro!' -- aja' mumateppe lao ri tauwèro. 22 Saba' maèga pappassalama' palsu sibawa nabi-nabi palsu polè matu. Napogau'i matu pangkaukeng-pangkaukeng dè'è padanna sibawa mappahèrangngè untu' pabengnguwang rèkko naullèi, umma'na Allataala. 23 Jaji, atike'ko! Pura manenno Upowadang iyaro ri wettu dè'napa nakajajiyang gau'èro. " 24 "Puranana wettu asussangngèro, mapettanni matu matanna essoè, sibawa dè'na nattappa kètengngè. 25 Sempè'i matu sining wèttowingngè polè ri langiè, sibawa sining makuwasaè ri bètaraè sipalu-paluni matu. 26 Iyaro wettuè paitai matu Ana'na Tolinoè polè ri lalenna ellungngè sibawa akuwasanna battowaè nenniya marajaè. 27 Nasuroi matu malaèka'-malaèka'è untu' paddeppungengngi umma'-Na polè ri eppaè sulapa'na linoè, polè ri cappa'-cappa'na langiè. " 28 "Alako pappagguruwang polè ri pong araè. Rèkko manyilai takkè-takkèna sibawa masomè, enrengngè mammulai maccolli, muwissengngi makkedaè macawè'ni wettu tikkaè. 29 Makkuwatoniro rèkko muwitai gau'-gau'èro kajajiyang, muwissennitu makkedaè macawè'è senna'ni wettunna. 30 Issenni! Iya manenna gau'èwè kajajiyangngi matu riwettu dè'napa namatè maneng sining tau iya tuwoè makkekkuwangngè. 31 Lennye'i matu langiè sibawa linoè, iyakiya ada-adak-Ku tette'i mannennungeng. " 32 "Namuni makkuwaro, dè'to sèddi tau missengngi uppanna essona iyarè'ga tettè siyaganna. Malaèka'-malaèka'na ri surugaè dè, sibawa Ana'na dè'to, banna Ambo'è bawang missengngi. 33 Jaji harusu'ko jaga-jaga sibawa matike', saba' dè' muwissengngi uppanna wettunna. 34 Keadaanna sinrupai sèddiè tau iya salaiyèngngi bolana nalao ri onrong mabèlaè. Nasuroi sining pattumaninna murusu'i bolana, sibawa nawèrènna tungke'-tungke' jamang. Lao ri panganrowang tange'è, mappasengngi kuwammengngi najaga madècèd-dècèng. 35 Rimakkuwannanaro harusu'ko jaga-jaga, saba' dè' muwissengngi uppanna matu lisu punna bolaè -- naullè ri arawèngngè, naullè ri tengnga benniè, naullè ri subuè, iyarè'ga naullè ri wettu mompona essoè. 36 Rèkko polèi tenrisenna-senna, aja' lalo napolèiko matinro. 37 Aga iya Upowadaèwè ri iko, Upowada towi lao ri sininna tauwè: jaga-jagako!"

Markus 14

1 Duwangngessopi na Esso Paskaè sibawa Ramè-ramè Roti Dè'è Raginna. Mammekko-mekkoni sining imangngè sibawa guru-guru agamaè sappa laleng untu' tikkengngi Yèsus maèlo mpunoi. 2 Nakkeda mennang, "Iyakiya aja' tapogau'i ri wettu ramè-ramè, saba' mompoi matu ronta'è. " 3 Wettunna Yèsus engka ri Bètania, ri bolana Simon iya nakennaè riyolo lasa oli iya mabbahayaè, engka sèddi makkunrai lao ri Alèna. Tiwii sèddi botolo' iya mallise'è minnya' wangi iya masuliè, riyèbbui polè ri ure' wangiè. Wettunna Yèsus tudang manrè, iyaè makkunraiè nareppa'i iyaro botolo'è nanabolorengngi iyaro minnya' wangiè ri tompo' ulunna Yèsus. 4 Siyagangngarè tau iya engkaè kuwaro macai sibawa makkeda sèddiè lao ri laingngè, "Aga gunana iyaro minnya' wangiè riyallabowang? 5 Iyaro minnya'è wedding ribalu' sibawa lebbi telluratu dowi pèra' ellinna; na ellinna riyabbèrèyangngi lao ri tau kasiyasiè!" Namacaina mennang lao ri makkunraièro. 6 Iyakiya makkedai Yèsus, "Leppessangngi siya! Magi musussaiwi? Napogau'i anu makessingngè sibawa ripojiyè lao ri Iyya. 7 Tau kasiyasiè tuli engkai ri yelle'mu. Tungke' wettu rèkko maèloko, wedding mutulung mennang. Iyakiya Iyya dè' namatteru-teru-Ka sibawakko. 8 Iyaè makkunraiè napogau'i aga iya naullè pogau'. Pura-Ka napassadiya sibawa minnya' wangi untu' attampungek-Ku sangadi dè'napa wettunna. 9 Ateppe'no! Ri sininna linoè, kègi-kègi Karèba Madècèng polè ri Allataala riyabbirittang, pangkaukenna iyaè makkunraiè ricurita towi matu selaku passènge' ri alèna. " 10 Nainappa Yudas Iskariot, sèddiwi polè riseppuloè duwa ana' gurunna Yèsus, laoni ri kapala-kapala imangngè akkattana bali'bellariwi Yèsus lao ri mennang. 11 Masennang senna'ni mennang mèngkalingai pappèddarangngèro, namajjancina maèlo mpèrèngngi dowi lao ri Yudas. Nammulana Yudas sappa kasempatang untu' bali'bellariwi Yèsus. 12 Ri esso pammulanna ri laleng Ramè-ramè Roti Dè'è Raginna -- wettunna tauwè gèrèi bimbala' Paskaè -- makkutanani ana'-ana' gurunna Yèsus ri Alèna, "Kègai nacinnai Bapa' passadiyaki nanrè Paska untu' Bapa'?" 13 Nasuroni Yèsus duwa tau polè ri yelle'na mennang, "Laono ri kotaè, kuwaro engka sèddi worowanè mattengngang tiwi sèuwa kendi mallise' uwai, muwèwa matu siruntu'. Accowèriwi 14 lao ri bola iya nauttamakiyè namupowadangngi iyaro punna bolaè, 'Makkutanai Pa' Guru, kègai onronna Alèna sibawa ana'-ana' gurun-Na maèlo manrè nanrè Paska. ' 15 Iyaro tauwè najellorekko matu sèuwa bili' ri lotèngngè iya battowaè. Iyaro bili'è taratoro'ni, sakke' sibawa parèwanna. Tassadiya manenni kuwaro untu' idi. " 16 Nalaona iya duwaro ana' gurunna Yèsus ri kotaè. Napolèini mennang kuwaro iya manenna pada-pada iya napowadaè Yèsus. Nanapassadiyani nanrè Paskaè. 17 Wenninnana, polèni Yèsus sibawa iya seppulo duwa ana' gurun-Na. 18 Namattengngang mennang tudang manrè, makkedani Yèsus, "Engkalingai: sèddi polè ri yelle'mu, iya makkekkuwangngè mèwa-Ka sisama manrè bali'bellari-Ka matu. " 19 Naèngkalinganaro, messè senna'ni ana'-ana' gurunna Yèsus. Nainappa mammula tassèddi-sèddi makkutana ri Yèsus, "Tentu tenniya iyya naseng Bapa'?" 20 Nappèbali Yèsus, "Iyaro sala sèddinna polè ri iko seppuloè duwa, iya manrè sèddi pennè Uwadduwai. 21 Mèmeng Ana'na Tolinoè matèi matu pada-pada tarokiè ri laleng Kitta'è. Iyakiya temmaka cilakana tau iya bali'bellariyèngngi Ana'na Tolinoè! Lebbi kessing muwi rèkko iyaro tauwè dè' naengka narijajiyang siseng!" 22 Wettunna mennang manrè, nalani Yèsus rotiè nanassempajang sukkuru' ri Allataala. Nainappa Napuwè'-puwè' iyaro rotiè sibawa liman-Na, na-Nawèrèngngi ana'-ana' gurun-Na nanakkedato, "Alai namuwanrèi, iyanaè tubuk-Ku!" 23 Purairo, malani sèuwa ènungeng anggoro. Nassempajang sukkuru' ri Allataala, nainappa nabbèrèyang iyaro ènungengngè lao ri ana'-ana' gurun-Na. Nainappa naènung manenni mennang iyaro anggoro'è. 24 Purairo makkedani Yèsus, "Iyanaè dara-Ku iya paessaèngngi assijancingenna Allataala, dara iya ripatabbolloè untu' maèga tau. 25 Ateppe'no: Dè'na Uwènungngi iyaè anggoro'è, narapi wettunna Uwènung anggoro baruè sibawa iko ri Lino Barunna Ambo'-Ku. " 26 Nainappa mennang makkèlong sèuwa pappojiyang. Napurairo laoni mennang ri Bulu-bulu Zaitun. 27 Nainappa makkeda Yèsus lao ri mennang, "Lari manekko matu salai-Ka. Saba' tarokii ri laleng Kitta'è, 'Naunoi matu Allataala pakkampina, natassiya-siyana matu bimbala'na. ' 28 Iyakiya pura-Kuna ripaoto' paimeng, Upoddiyoloiko matu lao ri Galilèa. " 29 Nappèbali Pètrus, "Dè', muwi iya manenna mennang salaiwi Bapa', dè' sises-siseng iyya. " 30 Nakkeda Yèsus, "Engngerangngi, iyato wenniè, riwettu dè'napa naoni manu'è wèkkaduwa, wèkkatelluni muwassakkarek-Ka. " 31 Namatedde'na pappèbalinna Pètrus, "Muwi harusu'ka matè silaong Bapa', dè' sises-siseng uwakkeda matu makkedaè dè' uwissengngi Bapa'!" Namakkeda makkuwatoro ana'-ana' gurun-Na laingngè. 32 Lettu'ni mennang risèuwaè onrong iya riyasengngè Gètsèmani, nanakkeda Yèsus lao ri ana'-ana' gurun-Na, "Tudanno kuwaè, ri wettu lao-Ku massempajang. " 33 Nanaèrani Yèsus Pètrus, Yakobus sibawa Yohanès, lao silaong Alèna. Mammulani tassinnau sibawa masèssa. 34 Nakkeda Yèsus lao ri mennang, "Tassinnau senna'i atik-Ku, samanna pappèneddikku maèlona matè. Onrono kuwaè sibawa jagano!" 35 Laoni Yèsus mabèla-bèla cèddè nakkaluttu ri tanaè massempajang. Ri laleng sempajan-Na Naèllauwi rèkko weddingngi aja'na napèneddingiwi anrasa-rasangngèro. 36 Adanna, "Ambo', oh Ambo', dè' gaga mustahèlè' ri Ambo'. Akkani anrasa-rasangngèwè polè ri Iyya. Iyakiya aja' taccowèriwi èlo-Ku, sangadinna èlona Ambo. " 37 Purairo lisuni Yèsus, nanapolèini ana'-ana' gurun-Na matinro. Makkedani ri Pètrus, "Simon, matinrokoga? Sijang bawang dè' muwullèi jaga?" 38 Nanakkeda Yèsus lao ri mennang, "Jaga-jagano, sibawa assempajanno kuwammengngi dè' mupèneddingiwi paccobangngè. Mèmeng rohmu maèlo pogau'i iya tongengngè, iyakiya dè' mullèi saba' sipa'na tolinoè malemmai. " 39 Siseppi Yèsus lao massempajang sibawa powada-adai ada-ada padaè. 40 Purairo lisuni lao ri ana'-ana' gurun-Na, nanapolèisi mennang matinro, nasaba cakkaruddu senna'i. Dè'na naissengngi mennang aga harusu' napowada lao ri Yèsus. 41 Wettunna Yèsus lisu ri mennang untu' mabbèkkatellunna, makkedani, "Matinro mupoga sibawa passauwi tekkomu? Genne'ni! Narapini wettunna Ana'na Tolinoè riyabbèrèyang ri limanna sining tau madosaè. 42 Oto'no, talao. Itai! Polèni tau iya bali'bellariyèk-Ka!" 43 Ri wettu mabbicarana mupa Yèsus, polèni Yudas, sèddiwi polè riseppuloè duwa ana' gurun-Naro. Namaèga tau silaongengngi iya tiwiè peddang sibawa tarasulu. Risuroi mennang ri kapala-kapala imangngè, guru-guru agamaè sibawa sining pamimpinna Yahudiè. 44 Naiyaro Yudas pura napattentuni sèddi tanrang lao ri mennang. Adanna lao ri mennang, "Tau iya ubauwè, Alèna ritu taun-Na. Tikkenni Namutiwii sibawa jagaiwi madècèd-dècèng. " 45 Wettunna polè Yudas, matteruni lao ri Yèsus nakkeda, "Bapa' Guru!" Nainappa nabau Yèsus. 46 Nainappa iyaro sining tau polè silaong Yudas natikkenni Yèsus nanabalenggui. 47 Iyakiya sala sèddinna iya engkaè kuwaro narampui peddanna nanawettai atanna imang lompoè angkanna pettu dauccinna. 48 Nakkeda Yèsus lao ri mennang, "Tau maja-Ka'ga, namupolè sibawa peddang nenniya tarasulu untu' tikkek-Ka? 49 Esso-esso-Ka mappagguru ri Bolana Puwangngè ri yolomu, nadè' mutikkek-Ka. Iyakiya mèmeng harusu'i makkuwaro, kuwammengngi nakajajiyang aga iya tarokiè ri laleng Kitta'è. " 50 Lari manenni ana' gurun-Na salaiwi Yèsus. 51 Engka sèddi kallolo, iya pakè silampa kaing lènang bawang untu' tongkoi watakkalèna, maccowèriwi Yèsus. Sining tauwè maèloi tikkengngi, 52 iyakiya naleppessangngi iyaro kainna, nainappa lari mallusu-lusu. 53 Ritiwini Yèsus ri bolana imang lompoè. Maddeppungengngi kuwaro sininna kapala imangngè, pamimpinna Yahudiè sibawa guru agamaè. 54 Maccowèrini Pètrus Yèsus polè mabèla lettu muttama' ri laleng seddè bolana imang lompoè. Natudanna kuwaro pellaiwi watakkalèna ri seddèna apiè silaong pengawal-pengawal-è. 55 Kapala-kapala imangngè sibawa sininna Mahkama Agamaè makkuragani lolongeng butti-butti iya passalaèngngi Yèsus kuwammengngi naullèi pakennaiwi pahukkungeng matè ri Alèna. Iyakiya dè'gaga sèddi butti nalolongeng mennang. 56 Maèga sabbi riyobbi untu' mabbèrè sabbi bellè lao ri Yèsus, iyakiya asabbiyanna mennang sisalai sèddiè lao ri laingngè. 57 Nainappa siyagangngarè sabbi tettong sibawa mabbèrè asabbiyang bellèwè passalenna Yèsus, 58 "Riyèngkalingai iyaè tauwè makkeda, 'Maèlo-Ka ruttungngi iyaè Bolana Allataala iya naèbbuè tolinoè, na ri esso matelluè, maèlo-Ka patettong laingngè iya tenniyaè èbbu tolino. ' " 59 Iyakiya iyaro asabbiyanna tauwè sisala towi sèddiè sibawa laingngè. 60 Natettonna imang lompoè ri yolona mennang nanakkutana ri Yèsus, "Dè'ga Mubaliwi iyaro riteppuwangngèk-Ko?" 61 Iyakiya mammekko bawammi Yèsus. Dè' sises-siseng nappèbali. Nanakkutanapa siseng iyaro imang lompoè ri Yèsus, "Ikonaga Arung Pappassalama'è, Ana'na Allataala Pommapaccingngè?" 62 Nappèbali Yèsus, "Iyya'na, namuwita maneng matu Ana'na Tolinoè tudang ri seddè ataunna Allataala Iya Pommakuwasaè enrengngè polè ri laleng ellungngè ri langiè!" 63 Nasapè-sapè'ni pakèyanna imang lompoè sibawa makkeda, "Dè'na naparellu sabbi! 64 Alèmuna mèngkalingai ada-adan-Na iya cella-cellaèngngi Allataala. Makkekkuwangngè aga apettummu?" Napettui manenni mennang makkedaè pasalai Yèsus, sibawa sitinajai rihukkung matè. 65 Nasiyagangngarè tau mammulani mammèccuiwi Yèsus, sibawa nasampoi matan-Na enrengngè nabarasa'i nappa makkeda, "Coba teppui niga barasa'-Ko?" Iyaro pengawal-pengawal-è maccowè toni leppa'i Yèsus. 66 Wettunna Pètrus engka mupa ri seddè bolaè, sala sèddinna pattumani makkunrainna imang lompoè lao kuwaro. 67 Wettunna naita Pètrus maddellang ri seddèna apiè, napènessaini madècèd-dècèng tappana Pètrus nainappa makkeda, "Dè'ga musibawato Yèsus tau Nazarèt-èro?" 68 Iyakiya massakkai Pètrus. Nakkeda lao ri pattumanièro, "Dè' uwissengngi sibawa dè' upahangngi akkattamu. " Nainappa Pètrus lao ri pintu gerbanna bolana imang lompoèro. Iyaro wettuè, monini manu'è. 69 Iyaro pattumani makkunraiè naitasi Pètrus, nanakkedato lao risining tau engkaè kuwaro, "Iyaè mèmeng sala sèddinna polè ri mennang!" 70 Iyakiya massakkasi Pètrus. Dè' namaitta rimonrinna, sining tauwè kuwaro makkedasi lao ri Pètrus, "Dè'na wedding riyassakkareng, mèmeng iko sala sèddinnato polè ri mennang, saba' polè tokko ri Galilèa!" 71 Nappammulana Pètrus mattanro-tanro, "Matèka, dè' uwissengngi tau iyaro muwasengngè!" 72 Iyatoro wettuè naoni manu'è mabbèkkaduwanna. Nanaèngngeranni Pètrus makkedaè purai makkeda Yèsus ri alèna, "Ri wettu dè'napa naoni manu'è wekkaduwa, wèkkatelluni muwassakkarek-Ka. " Naterina Pètrus tassènge'-sènge'.

Markus 15

1 Maèlè senna'ni sininna Mahkama Agamaè muttama'ni kapala-kapala imangngè, sining pamimpinna Yahudiè sibawa guru-guru agamaè mapperi-perini barunding. Nabalenggui mennang Yèsus, nainappa natiwi Alèna sibawa nabbèrèyangngi lao ri Pilatus. 2 Nakkutana Pilatus lao ri Yèsus, "Tongek-Koga Arunna tau Yahudiè?" Nappèbali Yèsus, "Makkunitu adatta puwang. " 3 Maèga napowada kapala-kapala imangngè iya nateppuwangngèngngi Yèsus. 4 Nanakkutanasi Pilatus lao ri Yèsus, "Dè'ga Mumaèlo mappèbali? Coba mitai siyaga ègana nateppuwak-Ko mennang!" 5 Iyakiya dè' sises-siseng nappèbali Yèsus, angkanna hèrang Pilatus. 6 Tungke' Ramè-ramè Paskaè, biyasai Pilatus paleppe' sèddi tau tarungku iya napilè tau maègaè. 7 Ri laleng tarungkuè, ri yelle'na sining tau maronta'è iya pogau'èngngi abbunowangngè ri wettu akacaungengngè, engka sèddi tau riyaseng Barabas. 8 Naddeppungeng tau maègaè sibawa mèllauwi ri Pilatus kuwammengngi naleppessangngi sèddi tau tarungku pada-pada biyasaè. 9 Nakkutana Pilatus ri mennang, "Muwèloriga upalepperekko iyaro tau Yahudiè?" 10 Saba' nasadariwi Pilatus makkedaè kapala-kapala imangngè mabbèrèyangngi Yèsus lao ri Pilatus nasaba mangèmpurui. 11 Iyakiya kapala-kapala imangngè napakiri-kiriwi tau maègaè kuwammengngi naèllauwi ri Pilatus paleppe'i Barabas untu' mennang. 12 Nanakkedasi Pilatus lao ri tau maègaèro, "Rèkko makkuwaitu, agana harusu' ugaukengngi tau iya muwasengngè arunna tau Yahudièro?" 13 Gorani mennang, "Sallii!" 14 Nakkutana Pilatus, "Iyakiya aga asalanna?" Nagorana pèdè' maloppopa, "Sallii!" 15 Macinnai Pilatus pèsennangiwi tau maègaèro, nanaleppessangngi Barabas untu' mennang. Nainappa nasuroi tauwè barasa'i Yèsus, nappa nabbèrèyang untu' risalli. 16 Ritiwini Yèsus ri prajuri'-prajuri'èro ri onrong pengadilangngè ri saorajana gubernur-è. Nainappa riyobbi maddeppungeng maneng pasukangngè. 17 Nainappa napappakèi mennang Yèsus jumba lango-lango sibawa naèbburengngi passigera' polè ri takkè-takkè maddoriè, nainappa napasang ri ulunna Yèsus. 18 Purairo mabbèrè sellenni mennang lao ri Alèna, "Makuwasai Arunna tau Yahudiè!" adanna. 19 Naunruni mennang ulunna Yèsus sibawa tekkeng, nainappa nammèccui sibawa suju' massompa ri yolo-Na. 20 Puranana nacculè-culèi Yèsus, naludunni mennang jumba lango-langoèro nainappa napappakèi pakèyan-Na paimeng. Purairo natiwini massu untu' risalli. 21 Ri tengnga laleng engka sèddi tau napassa mennang mèssangngi sallina Yèsus. Nasitujuwangngi iyaro tauwè nappai polè ri desaè maèlo muttama' ri kotaè. (Asenna Simon -- assalenna polèi ri Kirènè -- ambo'na polèi ri Alèksander sibawa Rufus. ) 22 Ritiwini Yèsus risèuwaè onrong iya riyasengngè Golgota, bettuwanna "Onrong Tengkora". 23 Kuwaniro mennang maèlo mpèrèngngi Yèsus anggoro iya sicampuru'è mur, iyakiya dè' namaèlo Yèsus mènungngi iyaro anggoro'è. 24 Nainappa mennang Nasallii, enrengngè bagè-bagèwi pakèyan-Na sibawa naundiwi untu' pattentui bagèyanna tungke'-tungke'. 25 Assalliren-Naro iyanaritu tettè asèra èlèè. 26 Ri yasè'na salli-Na tarokii passalenna iya riteppuwangngèngngi, iyanaritu "Arunna Tau Yahudiè". 27 Nasalli towi mennang sibawa Yèsus duwa tau parampo'; sèddi ri seddè atau, sèddi ri seddè abèyo-Na. 28 Narimakkuwannanaro kajajiyanni iya tarokiè ri laleng Kitta'è; iyanaritu: "Riyangga'i muttama' ri sining tau majaè. " 29 Sining tau iya laloè kuwaro napaccilic-ciling ulunna sibawa cella-cellai Yèsus. Makkedai mennang, "Eh, Iko maèloè ruttungngi Bolana Allataala sibawa patettongngèngngi ri laleng tellungngesso. 30 Cobano nonno polè ri sallièro sibawa passalama'i alè-Mu!" 31 Makkuwatoro kapala-kapala imangngè sibawa guru-guru agamaè naèllè'i Yèsus. Makkedani sèddiè lao ri laingngè, "Napassalama'i tau laingngè, iyakiya Alèna dè' naullèi passalama'i! 32 Rèkko Alèna arunnai Israèliè, Arung Pappassalama'è, madècèngenni makkekkuwangngè nonno polè ri sallièro, kuwammengngi taitai natamateppe ri Alèna!" Sining tau risalliè silaong Yèsus nacella-cella toni Yèsus. 33 Ri tangassona essoè, tellujjang ittana sininna wanuwaèro mapettang. 34 Na ri tettè tellunna arawèngngè, gorani Yèsus sibawa sadda maloppo, "Eloi, Eloi, lama sabakhtani?" bettuwanna, "Oh Allataala-Ku, oh Allataala-Ku, magi Musalai-Ka?" 35 Siyagangngarè tau kuwaro mèngkalingai gorana Yèsus, nanakkeda, "Engkalingai, Naobbii Elia!" 36 Engka sèddi tau polè ri mennang mapperi-perini lao mala bunga karang, nainappa napajajje ri laleng anggoro makecciè. Nainappa iyaro bunga karangngè naddincekeng ri cappa'na sèddiè aju, nappa nassoppakeng ri tèmunna Yèsus, nanakkedato, "Tajengngi, taitai, polè arè'gi Elia panonnoi Alèna polè ri sallièro. " 37 Nainappa gorani Yèsus, namatèna. 38 Kaing paddenring iya taggattungngè ri laleng Bolana Puwangngè sapè'ni mancaji duwa polè ri yasè' lettu ri yawa. 39 Parawira iya tettongngè ri yolona sallièro, naitani pèkkugi Yèsus matè. Makkedani iyaro parawiraè, "Mèmeng tongeng iyaè tauwè Ana'nai Allataala!" 40 Naengkato kuwaro siyagangngarè makkunrai mitai iya manennaro polè mabèla. Ri yelle'na engkai Salomè, Maria Magdalèna, sibawa Maria indo'na Yakobus iya maloloè sibawa Yosès. 41 Mennang ritu sining makkunrai iya maccowèriyèngngi sibawa tulungngi Yèsus wettunna engka ri Galilèa. Naengka mupa maègapa makkunrai laing kuwaro iya laowè silaong Yèsus ri Yèrusalèm. 42 Mammulani mawenni wettunna Yusuf polè ri Arimatèa taddapi. Anggotanai Mahkama Agamaè iya ripakarajaè. Natajeng towi wettunna Allataala mappammula mapparènta selaku Arung. Iyaro essoè, esso Assadiyangeng (iyanaritu esso ri yolona Saba'è). Rimakkuwannanaro baraniwi Yusuf mangolo ri Pilatus sibawa mèllauwi ujuna Yèsus. 44 Hèranni Pilatus mèngkalingai makkedaè matèni Yèsus. Jaji nasuroni tauwè mobbii kapalana pasukangngè sibawa makkutana ri alèna, maittaniga matèna Yèsus. 45 Naèngkalingana laporanna iyaro parawiraè, napalaloni Pilatus Yusuf malai ujuna Yèsus. 46 Nainappa Yusuf melli kaing walu polè ri lènang alusu'è. Napuranana napanonno ujuna Yèsus, nadokoni sibawa kaingngèro. Nainappa napalènne ujuna Yèsus ri laleng sèuwaè tampung, iya riyèbbuè ri laleng bulu-bulu batuè. Purairo galèttèni sèuwa batu loppo tongkoi iyaro sumpanna tampungngè. 47 Na Maria Magdalèna sibawa Maria indo'na Yosès, napènessaini kègai Yèsus ripalènne.

Markus 16

1 Labe'nana esso Saba'è, Maria Magdalèna, Maria indo'na Yakobus sibawa Salomè laoni melli rampa-rampa untu' minnyakiwi ujuna Yèsus. 2 Maèlè senna'ni wettunna mompo matanna essoè, ri esso mammulangngè ri mingguèro, laoni mennang ri tampungngè. 3 Ri tengnga laleng makkedani sèddiè lao ri laingngè, "Nigana wedding tulukki galèttèrengngi batu pattongkona tampungngè?" Saba' iyaro batuè battowa senna'. Iyakiya lettu'na kuwaro, naitani mennang iyaro batuè purani rigalèttè. 5 Nainappa muttama'ni mennang ri lalenna tampungngèro. Ri laleng ri seddè atau, naitani mennang sèddi kallolo majjumba putè tudang, natassèlenna mennang. 6 Nakkeda iyaro kalloloè, "Aja' mumètau! Uwisseng musappai Yèsus, tau Nazarèt iya puraè risalli. Dè'ni gaga kuwaè. Tuwoni paimeng! Ita bawanni, iyanaè onronna mennang palèwui. 7 Makkekkuwangngè laono, palettu'i iyaè karèbaè lao ri ana'-ana' gurun-Na, muttama' toni Pètrus. Powadai, 'Laowi poddiyoloiko ri Galilèa. Kuwaro matu muwitai, pada-pada iya puraè Napowadakko. ' " 8 Nanassuna mennang polè ri tampungngèro nanalari saba' tassèlengngi enrengngè mètaui. Dè' agaga mennang napowada lao ri nigi-nigi, nasaba mètaui. 9 Laoni iyaro sining makkunraiè ri Pètrus sibawa sellao-sellaona, nainappa nacurittang sibawa marippe sininna iya puraè ripaissengiwi lao ri mennang ri kalloloèro. 10 Purairo, alèna Yèsus, naolai ana'-ana' gurun-Na mappallebbangengngi polè alau liyajang karèba iya mapaccingngè sibawa mannennungeng passalenna asalamakeng iya mannennungengngè. 11 Iyakiya wettunna mennang naèngkalinga makkedaè tuwoni Yèsus, sibawa puranana Maria naita Yèsus, dè' namateppe' mennang. 12 Purairo nappaitanni alèna Yèsus lao riduwaè tau ana' gurun-Na sibawa cara laingngè. Iyaro kajajiyangngi wettunna iya duwa tauwèro joppa lao ri sèddiè kampong. 13 Jaji lisuni mennang sibawa nappaissengengngi gau'èro lao ri laing-laingngè. Iyakiya dè' namateppe' mennang. 14 Angkanna Yèsus mappaitangngi alèna lao riseppuloè sèddi ana' gurun-Na, wettunna mennang mattengngang manrè. Namparengngi mennang nasaba makurang teppe'i sibawa matedde ati senna'nana, angkanna dè' namateppe' lao risining tau iya alènaè pura mitai makkedaè tuwoi Yèsus. 15 Nakkeda Yèsus lao ri mennang, "Laono risininna linoè namuwappallebbangengngi Karèba Madècèng polè ri Allataala lao ri sininna rupatauwè. 16 Tau iya dè'è namateppe' rihukkungngi matu. Iyakiya tau iya mateppe'è sibawa ricemmè salama'i matu. 17 Selaku buttinna makkedaè mateppe'i mennang, sining tauwè napaddèsu'i sètangngè ri laleng asek-Ku; mabbicarai matu mennang ri laleng sining basa iya dè'è naissengngi mennang. 18 Rèkko makkatenningngi mennang ula iyarè'ga minung racung, dè' nalolongeng mennang abala. Rèkko napalènne'i limanna ri yasè'na sining tau iya malasaè, majjappai matu iyaro sining tauwè. " 19 Puranana Puwang Yèsus mabbicara sibawa mennang, riyakkani mènrè ri surugaè. Napparènta kuwaro sibawa Allataala. 20 Nalaona ana'-ana' gurun-Na mappallebbangengngi kègi-kègi karèba polè ri Allataala. Naturu' tona Puwangngè majjama silaong mennang sibawa napabuttinna naolai sining anu makalallaingngè makkedaè tongengngi pabbirittanna mennang.

Lukas 1

1 Tèofilus iya makessing atiè, Maègani tau makkuraga mokii sibawa taratoro' passalenna kajajiyang-kajajiyang iya puraè kajajiyang ri tengnga-tengngata. 2 Naokii mennang situru iya ricuritaè lao ri idi polè risining tau iya alènaè pura mitai iyaro sining kajajiyangngè mappammulai pammulanna, nainappa nappallebbangeng karèbanna. 3 Puranana usalidiki madècèd-dècèng iya manennaro polè ri pammulanna, uwasengngi madècèng untu' moki sèddi laporang iya taratoro'è untu' Bapa'. 4 Upogau'i iyaro, kuwammengngi naissengngi Bapa' makkedaè aga iya puraè ripagguruwakki Bapa' mèmeng tongeng. 5 Wettunna Hèrodès mancaji arunna wanuwa Yudèa, engka sèddi imang asenna Zakharia. Muttama'i ri laleng golongang imang-ngimang Abia. Bainèna riyasengngi Elisabèt, wijanna imang towi. 6 Atuwonna mallaibinèro napèsennangiwi atinna Allataala. Iya duwa naturusiwi sininna parèntaè sibawa Hukkunna Puwangngè sibawa tonget-tongeng. 7 Dè' nappunnai mennang ana' saba' manangngi Elisabèt na macowani mennang iya duwa. 8 Risèuwaè esso, wettunna golongang Abia nakenna lèlèng, napajoppani Zakharia jamanna selaku imang ri yolona Allataala. 9 Biyasana riloterèiwi iyaro imang-ngimangngè, na Zakharia rijello untu' muttama' ri lalenna Bolana Puwangngè sibawa mattunu kamennyang. 10 Wettunna napogau' iyaro upacara mattunu kamennyangngè, tau maègaè massempajangngi ri saliweng. 11 Iyaro wettuè, nappaitangngi alèna malaèka'na Puwangngè ri Zakharia. Iyaro malaèka'è tettongngi ri seddè ataunna mèjang onrong mattunu kamennyangngè. 12 Wettunna naita Zakharia iyaro Malaèka'è, malippuni sibawa mètau. 13 Iyakiya makkedai iyaro Malaèka'è, "Aja' mumètau Zakharia! Naèngkalingani Allataala sempajammu. Bainèmu Elisabèt jajiyangngi matu sèddi ana' worowanè. Harusu'ko mpèrèngngi aseng Yohanès. 14 Masennang senna'ko matu sibawa maèga tau mariyo-riyo rèkko jajiwi matu iyaro ana'è! 15 Mancajiwi matu tau maraja manuru' pakkitanna Puwangngè, nadè' matu nainung anggoro iyarè'ga ènungeng maseri. Mappammulai jajinna rikuwasaiwi matu ri Rohna Allataala. 16 Maèga tau Israèl napimping matu lisu ri Allataala, Puwanna mennang. 17 Mancajiwi matu surona Puwangngè iya mawatangngè sibawa makuwasana pada-pada Elia. Napasidamèi matu ambo'è sibawa ana'è, enrengngè tau iya dè'è namatinulu napimpingngi matu lisu ri laleng pikkiranna iya tongengngè. Nanallalengiro napassadiyai matu sèuwa umma' iya sadiyaènna untu' Puwangngè. " 18 Nakkutana Zakharia lao ri Malaèka'èro, "Pèkkugi uwissengngi makkedaè kajajiyangngi iyaro gau'è? Macowana' na bainèku macowa toni. " 19 Nappèbali iyaro Malaèka'è, "Iyya'na Gabrièl! Utumaningiwi Allataala sibawa Alèna ritu suroka palettu'i karèba madècèngngè lao ri iko. 20 Aga upowada, kajajiyangngi matu ri wettunna. Iyakiya nasaba dè' mumateppe, dè' matu mullèi mabbicara; pèpèko matu narapi kajajiyang aga iya upowadangngèkko. " 21 Na iyaro wettuè, sining tauwè matterui natajeng Zakharia. Hèranni mennang magi namaitta makkuwaro ri laleng Bolana Puwangngè. 22 Na wettunna massu, dè'na naullèi mabbicara lao ri mennang. Matteru-teru bawang mabbèrè tanrang sibawa limanna, natette'i pèpè. Naissenni sining tauwè makkedaè purani mita sèuwa pakkitang ri laleng Bolana Puwangngè. 23 Leppe'nana jamanna ri Bolana Puwangngè, lisuni Zakharia ri bolana. 24 Dè' namaitta ri munrinna, mattampu'ni Elisabèt, bainèna, nanaurunni alèna ri bolaè lima uleng ittana. 25 Makkedani, "Angkanna natulukka Puwangngè sibawa naleddai atunangekku. " 26 Wettunna Elisabèt mattampu'ni enneng ulenna, nasuroni Allataala malaèka' Gabrièl lao ri Nazarèt, sèuwa kota ri daèra Galilèa. 27 Risuroi Gabrièl lao risèddiè ana'dara, riyasengngè Maria. Iyaro ana'daraè mattunangangngi sibawa sèddiè tau riyasengngè Yusuf, wijanna Arung Daud. 28 Iyaro malaèka'è laowi ri Maria sibawa makkeda, "Salama'ko, iko iya nabarakkakiyè Puwangngè iya dè'è padanna! Puwangngè sibawakko!" 29 Naèngkalingana adanna iyaro malaèka'è, tassèlenni Maria, angkanna makkutana ri laleng ati, aga akkattana iyaro bèrèsellengngè. 30 Nanakkeda iyaro Malaèka'è lao ri Maria, "Aja' mumètau Maria, saba' nasitujuiko atinna Allataala. 31 Mattampu'ko matu sibawa jajiyang sèddi ana', iya harusu'è muwaseng Yèsus. 32 Mancajiwi matu maraja nariyaseng Ana'na Allataala Iya Pommatanrè. Napancajiwi matu Puwang Allataala arung pada-pada Arung Daud, nènè-nènèna. 33 Nanapparènta matu selaku arung ri wijanna Yakub mannennungeng. Nadè' cappuna matu akkarungenna. " 34 Nakkeda Maria lao ri Malaèka'èro, "Iyakiya parawang mupa', pèkkugi iyaro gau'è wedding kajajiyang?" 35 Nappèbali iyaro Malaèka'è, "Polèi matu Rohna Allataala ri iko, sibawa akuwasanna matu Allataala salipuriko. Iyanaro saba'na ana' iya mujajiyangngè matu riyasengngi matu Mapaccing, Ana'na Allataala. 36 Engngerangngi: Elisabèt, sumpulolomuro, ennenni uleng mattampu'na, namuni macowani sibawa makkedanna tauwè makkedaè manangngi. 37 Saba' ri Allataala dè'gaga mustahèlè'. " 38 Nanakkeda Maria, "Iyya'è atannaka Allataala, leppessanni kajajiyang pada-pada mupowadaè. " Nalaona iyaro malaèka'è salaiwi Maria. 39 Dè' namaitta puranaro, laoni Maria risèuwaè kota ri Yudèa ri daèra buluna. 40 Laoni ri bolana Zakharia, na wettunna muttama', nabèrèsellengini Elisabèt. 41 Na wettunna naèngkalinga Elisabèt bèrèsellenna Maria, kèdoni iyaro anana' ri laleng parèmmananna Elisabèt. Narikuwasaina Elisabèt ri Rohna Allataala, 42 nanagora, "Ikona kaminang ribarakkaki ri yelle'na sininna makkunraiè! Memmuwarè' ribarakkakiwi iyaro anana' mujajiyangngè matu! 43 Niga iyya'è nanalaowika indo'na Puwangngè? 44 Uwèngkalingana bèrèsellemmu, anana' ri laleng parèmmanakku kèdoi nataro rennu. 45 Masenna'ko, nasaba mateppe'ko makkedaè aga napowada Puwangngè ri iko kajajiyangngi matu!" 46 Nakkeda Maria, "Atikku pojiwi Puwangngè, 47 sibawa mariyo-riyoi nyawaku nasaba Allataala Pappassalama'ku. 48 Naèngngerakka atan-Na iya matunaè! Mappammulai makkekkuwangngè sininna bangsaè makkedai mariyo-riyoka. 49 Nasaba Allataala Iya Pommakuwasaè pogau'i gau'-gau' battowaè ri alèku. Mapaccingngi asen-Na. 50 Abbijangeng lao ri abbijangeng mamasèi Puwangngè lao ri tau mètauè ri Alèna. 51 Nasibawang liman-Na iya mawatangngè napassara-sarangngi tau matempoè, sibawa nakacauwi rancanana mennang. 52 Napanonnoi sining arungngè polè ri akkarungen-Na sibawa napakatanrèi tau matunaè. 53 Napèsennangiwi tau malupuè sibawa sininna adècèngengngè tau sugiè napaddèsu'i sibawa kosong. 54 Natulungngi Israèliè, atan-Na, situru janci iya Naèbbuè sibawa nènè-nènèta. 55 Dè' Nallupaiwi jancinna Puwangngè, namasèiwi Abraham sibawa wijanna lettu mannennungeng. " 56 Kira-kira tellumpuleng ittana Maria monro ri Elisabèt, nainappa lisu ri bolana. 57 Narapini wettunna Elisabèt untu' mèmmana'. Najajiyanni sèddi ana' worowanè. 58 Sining balibolana sibawa sumpulolona naèngkalingani pèkkugi kessinna Puwangngè lao ri Elisabèt, nanaccowèna marennu silaong Elisabèt. 59 Wettunna iyaro ana'loloè makkèumuru aruwa essona, polèni mennang untu' sunna'i. Maèloi mennang masengngi iyaro ana'loloè Zakharia situru asenna ambo'na, 60 iyakiya makkedai indo'na, "Dè'! Harusu'i riwèrèng aseng Yohanès. " 61 Nakkeda mennang ri Elisabèt, "Nadè'gaga polè ri sumpulolomu riyaseng makkuwatu. " 62 Nakkutana mennang sibawa tanra-tanrang lao ri Zakharia, aseng aga maèlo nawèrèngngi ana'na. 63 Naèllauna Zakharia sèddi pèpeng batu nainappa maroki, "Asenna Yohanès. " Hèrang manenni mennang. 64 Iyatoro wettuè naullèni paimeng Zakharia mabbicara sibawa pojiwi Allataala. 65 Mètauni sining balibolana, nanallebbanna iyaro karèbaè ri sininna daèra buluna Yudèa. 66 Sininna tau mèngkalingaèngngi iyaro gau'è makkutanani ri laleng ati, "Mancaji agai matu iyaro ana'è?" Saba' risibawangngi ri Puwangngè. 67 Zakharia, ambo'na iyaro anana'è, rikuwasaini ri Rohna Allataala angkanna napalettu paseng polè ri Puwangngè. Nakkeda, 68 "Laono mai tapojiwi Puwangngè, Allataalana bangsa Israèliè! Polèni tulungngi umma'-Na sibawa paleppe'i mennang. 69 Nawèrèkki pappassalama' iya baraniè, wijanna Daud, atan-Na. 70 Riyolopa nariyolo naolai nabi-nabi Napilè, purani nabbèrèyang Puwangngè jancin-Na 71 untu' passalama'ki polè ri balitta sibawa polè ri akuwasanna sining tau iya benciyèkki. 72 Untu' mappaitangngi asèmpowatin-Na lao ri toriyolota, jancin-Na iya mapaccingngèro Narupaiwi matu. 73 Purani mattanro ri Abraham, ambo'ta, sibawa majjanci untu' passalama'ki polè ri balitta, kuwammengngi dè' tamètau tumaningiwi 75 tuli sompai Alèna sibawa pèsennangiwi atin-Na gangka tuwota. 76 Iko, èh ana'ku, riyasekko matu nabinna Allataala Iya Pommatanrè. Risuroko poddiyoloiwi Puwangngè untu' sarakengngi laleng Alèna. 77 Untu' mabbirittangngi lao ri umma'-Na sibawa ripassalama'i matu mennang, rèkko purani naddampengeng Allataala dosa-dosana mennang. 78 Masèmpo atiwi Puwatta namakacuwa; polèi untu' passalama'ki. Pada-pada mata essoè mompoè ri èlèè. 79 Makkuwani ritu mabbèrèyangngi tajan-Na lao ri sininna tauwè iya tuwoè ri laleng apettangengngè sibawa amètaurengngè. Napimpikki ri laleng iya mattujuè ri adamèngengngè. " 80 Napèdè' battowana iyaro ana'na Zakharia sibawa pèdè' mawatang rohna. Monroi ri padang kessi'è, narapi lettu wettunna nappaissengeng alèna lao ri bangsa Israèliè.

Lukas 2

1 Iyaro wettuè, napparèntanni Kaisar Agustus, kuwammengngi sininna pabbanuwana Akkarungeng Roma nadaftar i alèna untu' ribilang. 2 Iyanaè abbilangeng mammulangngè iya ripajoppaè wettunna Kirènius mancaji gubernurna wanuwa Siria. 3 Sininna tauwè iyaro wettuè laoni untu' ridaftar ri kotana tungke'-tungke'. 4 Joppani Yusuf polè ri Nazarèt ri Galilèa, lao ri Bètlèhèm ri Yudèa, onrong ajajiyanna Arung Daud; saba' Yusuf wijannai Arung Daud. 5 Nadaftarni Yusuf alèna silaong Maria tunanganna, iya mattampu'èro. 6 Wettunna ri Bètlèhèm, narapini wettunna Maria mèmmana'. 7 Najajiyanni sèddi ana' worowanè, ana'na macowaè. Iyaro ana'na nadokoni sibawa carè-carè kaing, nainappa napalèsso ri laleng dulang olokolo'è iya mallise'è daramè; saba' dè' nalolongeng onrong untu' mappèruma. 8 Ri wennièro engka pakkampi-pakkampi iya monrowangngèngngi sining bimbala'na ri padangngè ri daèraèro. 9 Tappa nappaitanni alèna malaèka'na Puwangngè ri mennang, sibawa alebbirenna Puwangngè mattappa tajangiwi mennang, namètau senna'na mennang. 10 Iyakiya makkedai iyaro malaèka'è, "Aja' mumètau! Saba' polèka tiwirekko karèba madècèng -- karèba iya pèsennangi senna'èngngi sininna tauwè. 11 Iya essoè ri kota Daud, jajini Arung Pappassalama'mu iyanaritu Kristus, Puwangngè. 12 Iyanaè tanranna: Mupolèiwi matu sèddi ana'lolo ridoko sibawa kaing, enrengngè lèwu ri laleng dulangngè. " 13 Tennasenna-sennana iyaro malaèka'è risibawangngi maèga malaèka' laing, iya pojiyèngngi Allataala. Makkedai mennang, 14 "Ripojiwi Allataala ri langi iya kaminang matanrè! Sibawa ri yasè'na tanaè, salèwangengngi rupa tauwè iya pèsennangiyèngngi atinna Puwangngè!" 15 Risalainnana mennang risining malaèka'è nalisu ri surugaè, makkedani iyaro sining pakkampiè sèddiè lao ri laingngè, "Laono mai talao ri Bètlèhèm nataitai gau' iya kajajiyangngèro, iya napaissengengngèkki Puwangngè. " 16 Mapperi-perini mennang lao, nanapolèini Maria sibawa Yusuf, enrengngè ana' loloèro iya lèwuè ri laleng dulangngè. 17 Wettunna naita iyaro sining pakkampiè ana'loloèro, nacuritani mennang aga napowada iyaro sining malaèka'è passalenna iyaro ana'loloè. 18 Nahèranna sininna tauwè mèngkalingai curitana sining pakkampièro. 19 Iyakiya Maria nataro manengngi iyaro ri laleng atinna sibawa nanennun-nennunna. 20 Lisuni ri padangngè iyaro sining pakkampiè sibawa pojiwi enrengngè pakalebbii Allataala, nasaba sininna iya puraè naèngkalinga sibawa naita, sicoco'i pada-pada iya napowadaè malaèka'è. 21 Genne'nana aruwa essona umuru'na, risunna'ni iyaro Anana'è, sibawa nasengngi Yèsus, aseng iya riwèrèngngèngngi ri malaèka'è riwettu dè'napa naritampu' ri indo'-Na. 22 Narapini wettunna Yusuf sibawa Maria pajoppai ade' pappèpaccing situruè hukkunna Musa. Jaji natiwini iyaro Anana'è ri Yèrusalèm untu' riyabbèrèyang lao ri Puwangngè. 23 Saba' ri laleng Hukkunna Puwangngè tarokii makkuwaèwè, "Tungke' ana' worowanè macowaè, harusu'i riyabbèrèyang lao ri Puwangngè. " 24 Akkattanato mennang maèloi makkasuwiyangeng akkarobangeng, iyanaritu sipasang bekku iyarè'ga duwakkaju jangang-jangang malolo, pada-pada iya ripattentuè ri laleng Hukkunna Puwangngè. 25 Iyaro wettuè ri Yèrusalèm engka sèddi tau riyaseng Simèon. Tau makessingngi, mètaui ri Allataala sibawa natajengngi wettunna Allataala passalama'i Israèliè. Risibawangngi ri Rohna Allataala, 26 sibawa Rohna Allataala pura paissengiwi makkedaè' dè' namatè matu riwettu dè'napa naitai Arung Pappassalama'è iya najjanciyangngè Puwangngè. 27 Nasaba pappimpinna Rohna Allataala, muttama'i Simèon ri Bolana Allataala. Iyaro wettuè Yusuf sibawa Maria natiwii Yèsus muttama' iya baiccu'è mupa, untu' pogau'i upacara iya napparèntangngè hukkunna agamaè. 28 Nanalani Simèon iyaro Anana'è nanaèpa'i, nainappa napoji Allataala, 29 "Makkekkuwangngè, purani Murupai jancimmu Puwang. Leppessanni atam-Muèwè matè sibawa tennang. 30 Saba' mata alèkuna pura mitai Pappassalama' polè ri Iko. 31 Iyaro Pappassalama'è purani Mupassadiya untu' sininna bangsaè: 32 pada-pada tajang iya tappaèngngi lalenna sininna bangsa-bangsa laingngè, untu' lao ri Iko; iyanaritu tajang iya mappapolè alebbireng lao ri umma'-Mu Israèliè. " 33 Hèranni ambo'na sibawa indo'na iyaro Anana'è mèngkalingai aga napowada Simèon passalenna Ana'na mennang. 34 Ribarakkakini mennang ri Simèon sibawa makkeda lao ri Maria, indo'-Na iyaro Anana'è, "Iyaè Anana'è purani napilè Allataala untu' paccappui sibawa passalama'i maèga tau Israèliè. Mancajiwi matu tanrang polè ri Allataala, iya naèwaè matu maèga tau, 35 nanallalengiro nassu lise' atinna mennang. Nasoppa'i matu atimmu atassinnaureng pada-pada peddang matarengngè. " 36 Engkato sèddi nabi makkunrai iya macowa senna'ènna. Asenna Hana, ana'na Fanuèl, polè ri suku Asyer. Pitu taung bawang siyonrong lakkainna, 37 namancaji janda Hana, na makkekkuwangngè umuru'na aruwani pulona eppa taung. Dè' naengka nasalaiwi Bolana Puwangngè. Esso wenniwi massompa kuwaro lao ri Allataala massempajang sibawa mappuwasa. 38 Iyatoro wettuè napolè, nanapojiwi Allataala sibawa mabbicara passalenna iyaro Anana'è lao ri sininna tauwè iya tajengngèngngi wettunna Allataala paleppe'i Yèrusalèm. 39 Puranana napogau' Yusuf sibawa Maria sininna iya nawajikengngè Hukkunna Puwangngè, lisuni ri Nazarèt ri Galilèa. 40 Napèdè' battowana iyaro anana'è sibawa mawatang. Mapanrè senna'i sibawa riyamasèinna ri Allataala. 41 Tungke'-tungke' taung laowi tomatowanna Yèsus ri Yèrusalèm untu' pakarajai Esso Maraja Paskaè. 42 Na wettunna Yèsus makkèumuru seppulo duwa taung, laosi mennang ri ramè-ramèro situru abiyasangngè. 43 Leppe'nana iyaro ramè-ramè, lisuni mennang. Iyakiya Yèsus, Anana'èro, monro mupi ri Yèrusalèm, nadè' naissengngi ambo' indo'-Na. 44 Nasengngi mennang maccowè muto ri laleng rombongangngè. Joppanana puppu esso, nappai mennang nasappa ri yelle'na sumpulolona sibawa sining sissenna. 45 Iyakiya dè' nalolongengngi mennang, jaji lisuni mennang ri Yèrusalèm sappai. 46 Genne'nana tellungngesso massappa, naruntu'ni mennang ri laleng Bolana Puwangngè. Tudat-tudangngi mèngkalingai sining guru agamaè sibawa passu pakkutana-pakkutana. 47 Hèranni sininna tau mèngkalingaèngngi nasaba sining pappèbalin-Na iya maccaè. 48 Hèrang toni tomatowan-Na mitai. Nakkeda indo'-Na lao ri Yèsus, "Na', magi Mupakkuwaki'è? Ambo'-Mu sibawa iyya tassèlessèleng sappa-Ko!" 49 Nappèbali Yèsus, "Magi tasappa-Ka ambo' sibawa indo'? Dè'ga taissengngi ambo' sibawa indo' makkedaè harusu'-Ka engka ri laleng bolana Ambo'-Ku?" 50 Iyakiya dè' napahangngi pappèbalinna Yèsus. 51 Nalisuna Yèsus silaong mennang lao ri Nazarèt, sibawa matinuluna lao ri mennang. Sininna gau'èro nataroi indo'-Na ri laleng atinna. 52 Napèdè' battowana Yèsus sibawa tattamba accana, enrengngè ripoji ri Allataala sibawa ri rupa tauwè.

Lukas 3

1 Ri taung maseppulona lima apparèntanna Kaisar Tibèrius, Pontius Pilatus mancaji gubernur ri Yudèa, sibawa Hèrodès mapparènta ri Galilèa. Filipus, silessurenna Hèrodès mapparèntai ri daèrana Iturèa sibawa Trakhonitis, na Lisanias mapparèntai ri Abilènè. 2 Iya mancajiyè imang-ngimang lompo iyanaritu Hanas sibawa Kayafas. Ri taungngènnaro nabbicara Allataala ri padang kessi'è lao ri Yohanès, ana'na Zakharia. 3 Nalao tulilina Yohanès ri sininna daèrana Salo Yordan sibawa palettu'i karèba polè ri Allataala. Nagora Yohanès, "Toba'no polè ri dosa-dosamu sibawa harusu'ko ricemmè, kuwammengngi naddampengekko Allataala. " 4 Iyaro siturui iya riyokiè ri laleng kitta'na Nabi Yèsaya: "Engka tau gora-gora ri padang kessi'è, 'Passadiyangengngi laleng Puwangngè, paratangengngi laleng untu' Alèna. 5 Tungke' lompo' sitinajai ritèmpung, tungke' bulu sibawa bulu-buluè riparatai. Laleng mallèko-lèkoè sitinajai ripallempu, sibawa laleng makkalebbok-kalebbongngè riparatai. 6 Sining tauwè ri sininna linoè naitai matu Allataala passalama'i tolinoè!' " 7 Maèga tau lao ri Yohanès untu' ricemmè. Makkedai Yohanès lao ri mennang, "Tau majako iko! Niga powadai makkedaè mullè leppe' polè ri pahukkungenna Allataala iya mangoloè? 8 Appaitanni ri laleng pangkaukemmu makkedaè toba'no polè ri dosa-dosamu! Aja' muwakkeda makkedaè Abraham iyanaritu nènè-nènèmu. Engngerangngi! Polè ri batu-batuèwè, naullèi Allataala pinru wija-wijanna untu' Abraham! 9 Sadiyani wasè untu' tubbangngi pong ajuè lettu ri ure'-ure'na. Tungke' pong aju iya dè'è napowassèlè' buwa makessing ritubbangngi matu naribuwang ri laleng apiè. " 10 "Jaji, aga harusu' ripogau'?" pakkutanana sining tauwè lao ri Yohanès. 11 Nappèbali Yohanès, "Tau iya mappunnaiyè duwallampa waju, harusu'i nawèrèng silampa iya dè'è nappunnai; sibawa tau iya mappunnaiyè anrè, harusu'i nabagè. " 12 Polè toni passinge'-singe' simaè ri Yohanès untu' ricemmè. Makkutanani mennang, "Bapa' Guru, aga harusu' ripogau'?" 13 Nappèbali Yohanès, "Aja' musinge'i lebbi maèga naiya pura ripattentuè. " 14 Engkato parajuri' makkutana, "Pèkkugitosi idi'è? Aga harusu' ripogau'?" Nappèbali Yohanès, "Aja' mupanrasa-rasai muwi niga-niga, sibawa aja' murampasa' dowi nasaba pètenna'-pètenna' dè'è natongeng. Asennanno sibawa gajimmu!" 15 Iyaro wettuè mammulani sining tauwè makkutana, aga Yohanès Arung Pappassalama' natajengngè mennang. 16 Iyanaro saba'na nakkeda Yohanès lao ri sininna mennang, "Iyya ucemmèko sibawa uwai, iyakiya polèi matu tau iya lebbi battowaè na iyya. Muwi lukkai tulu sapatun-Na dè'to usitinaja. Nacemmèko matu sibawa Rohna Allataala sibawa api. 17 Ri liman-Na engka pattapi untu' tapiwi sininna gandonna gangka mapaccing. Napaddeppungengngi matu gandongngè ri laleng lappoè, iyakiya sininna awanna Natunui matu ri laleng api iya dè'è nawedding peddè!" 18 Makkuwaniro Yohanès pangajariwi sining tauwè sibawa maddupa-rupang cara, ri wettu nappallebbangenna Karèba Madècèngngè. 19 Iyakiya Hèrodès, iya makuwasaè ri Galilèa, riyamparengngi ri Yohanès passalenna akawingenna sibawa Hèrodias, bainèna silessurenna, sibawa passalenna sininna ja laingngè iya puraè napogau'. 20 Iyakiya mala Hèrodès natambaiwi sining jana ri laleng naputtama'na Yohanès ri laleng tarungkuè. 21 Puranana ricemmè maneng iyaro tauwè, ricemmè toni Yèsus. Na wettunna massempajang, tattimpa'ni langiè, 22 na Rohna Allataala nonnoni ri yasè'-Na sinrupa jangang-jangangngè. Nanaèngkalingai saddanna Allataala makkeda, "Ikona Ana'-Ku iya Uwamasèiyè. Mupèsennangi atik-Ku. " 23 Wettunna Yèsus napammulai jama-jaman-Na, umuru'-Na kira-kira telluppulo taung. Manuru' pallolongenna tauwè, Alèna ana'na Yusuf, ana' Eli, 24 ana' Maat, ana' Lèwi, ana' Malkhi, ana' Yanai, ana' Yusuf, 25 ana' Matica, ana' Amos, ana' Nahum, ana' Hèsli, ana' Nagai, 26 ana' Matat, ana' Matica, ana' Simèi, ana' Yosèkh, ana' Yoda, 27 ana' Yohanan, ana' Rèsa, ana' Zèrubabel, ana' Sèaltièl, ana' Nèri, 28 ana' Malkhi, ana' Adi, ana' Kosam, ana' Elmadam, ana' Er, 29 ana' Yèsua, ana' Elièser, ana' Yorim, ana' Matat, ana' Lèwi, 30 ana' Simèon, ana' Yèhuda, ana' Yusuf, ana' Yonam, ana' Elyakim, 31 ana' Mèlèa, ana' Mina, ana' Matata, ana' Natan, ana' Daud, 32 ana' Isai, ana' Obèd, ana' Boas, ana' Salmon, ana' Nahason, 33 ana' Aminadab, ana' Admin, ana' Arni, ana' Hèzron, ana' Pèrès, ana' Yèhuda, 34 ana' Yakub, ana' Ishak, ana' Abraham, ana' Tèrah, ana' Nahor, 35 ana' Sèrug, ana' Rèhu, ana' Pèlèg, ana' Eber, ana' Salmon, 36 ana' Kènan, ana' Arpakhsad, ana' Sèm, ana' Nuh, ana' Lamèkh, 37 ana' Mètusalah, ana' Hènokh, ana' Yarèd, ana' Mahalalèèl, ana' Kènan, 38 ana' Enos, ana' Sèt, ana' Adam, ana' Allataala.

Lukas 4

1 Rikuwasaini Yèsus ri Rohna Allataala wettunna nasalai Salo Yordan. Ripimpinni ri Rohna Allataala lao ri padang kessi'è. 2 Nakkuwanaro ricobai ri Ibillisi' patappulo esso ittana. Ri lalenna wettuèro, dè' agaga nanrè. Jaji paccappurenna malupuni. 3 Nakkeda Ibillisi' ri Alèna, "Ana'na-Koto Allataala? Jaji suroni iyaè batuè mancaji roti. " 4 Nappèbali Yèsus, "Ri laleng Kitta'è tarokii, 'Rupa tauwè dè' naullèi tuwo polè ri rotiè bawang. ' " 5 Nainappa Ibillisi' natiwi Yèsus ri onrong iya matanrè, na ri laleng sikèdè mata nappaitangngi Ibillisi' lao ri Yèsus sininna akkarungengngè ri linoè. 6 Nakkeda Ibillisi' lao ri Yèsus, "Iya manennaè akuwasangngè sibawa asugirengngè uwabbèrèyangngi matu lao ri Iko, saba' iya manennaro purani riwèrèkka, naweddikka mabbèrèyangngi lao ri nigi-nigi iya upojiyè mpèrèngngi. 7 Iya manennaro mancajiwi appunnangem-Mu matu, rèkko suju'-Ko sompaka. " 8 Nappèbali Yèsus, "Ri laleng Kitta'è tarokii, 'Sitinajako pakalebbii Puwang Allataalamu sibawa tumaningiwi Alèna bawang!' " 9 Nainappa Ibillisi' natiwi Yèsus ri Yèrusalèm, nanataroi ri yasè'na coppo'na Bolana Puwangngè, nanakkeda lao ri Yèsus, "Ana'na-Koto Allataala? Jaji luppe'no polè kuwaè. 10 Saba' ri laleng Kitta'è tarokii, 'Nasuroi matu Allataala sining malaèka'-Na jagai-Ko madècèd-dècèng. ' 11 Sibawa topa, 'Natimak-Ko matu sining malaèka'è sibawa limanna mennang, kuwammengngi aja' nanatabbuttu ajè-Mu ri batuè. ' " 12 Nappèbali Yèsus, "Ri laleng Kitta'è tarokii, 'Aja' mucobaiwi Puwang, Allataalamu. ' " 13 Puranana Ibillisi' nacobai Yèsus sibawa maddupa-rupang cara, nasalaini Yèsus namattajeng wettu makessingngè. 14 Nainappa lisuni Yèsus ri Galilèa, narikuwasaina ri Rohna Allataala. Karèba passalenna Alèna tassiyani ri sininna daèraèro. 15 Mappagguruni risining bola assompangngè, na sininna tauwè pojiwi Alèna. 16 Laosi paimeng Yèsus ri Nazarèt, onron-Na ripawekke. Ri esso Saba'è, situru abiyasan-Na laoni ri bola assompangngè. Tettonni untu' bacai Kitta'è, 17 nariwèrèng kitta'na Nabi Yèsaya. Natimpa'ni kitta iya rilulungngèro, na-Nalolongengngi aya'èwè, 18 "Engkai Rohna Puwangngè ri Iyya, saba' pura-Ka nalanti' untu' mabbirittangngi Karèba Madècèngngè lao ri tau kasiyasiè. Nasuro-Ka untu' mappallebbangengngi aleppekengngè lao ri tau ritawangngè sibawa ajjappang lao ri tau butaè; untu' paleppe'i tau iya ripanrasa-rasaè 19 sibawa mabbirittangngi apolènna wettunna Puwangngè passalama'i umma'-Na. " 20 Nalulunni paimeng Yèsus iyaro kitta'è, napalisui ri pajagaè, nainappa tudang. Sininna tauwè ri laleng bola assompangngèro mitai Alèna. 21 Nappammulana Yèsus mabbicara lao ri mennang, makkuwaè, "Iyaè aya'-aya'na Kitta'è ripaddupani iyaè essoè ri wettu muwèngkalingana. " 22 Ada-ada iya Napowadaè makessing senna', angkanna bengnga mennang sibawa nasokon-Na. Makkedani mennang, "Tenniyaga iyaè ana'na Yusuf?" 23 Nakkeda Yèsus lao ri mennang, "Pasti mupakèi iyaè warèkkadaè lao ri Iyya, 'Eh dottoro', pajjappai alè-Mu. Anu makalallaing riyèngkalingaè iya Mupogau'è ri Kapernaum, pogau' toni ri kampong assalem-Mu. ' " 24 Natambaiwi Yèsus, "Engngerangngi dè' gaga nabi ripakalebbi ri kampong assalenna. 25 Iyakiya èngkalingai: ri wettunna Elia, wettunna dè' nateppa bosiè tellut taung sitengnga ittana, polèi akkadèrengngè iya masero senna'è ri sininna wanuwaè. Iyaro wettuè engka maèga janda ri Israèliè. 26 Namuni makkuwaro, Allataala dè' nasuroi Elia lao risala sèddinna polè risining jandaèro sangadinna banna lao risèddiè janda ri Sarfat ri daèrana Sidon. 27 Makkuwatoro ri wettunna Nabi Elisa engka maèga tau ri Israèliè malasa oli iya mappakatautauè, iyakiya dè' sèddi polè ri mennang ripajjappa; sangadinna Naaman tau Siriaèro. " 28 Sininna tauwè ri bola assompangngèro macai senna'ni wettunna naèngkalinga gau'èro. 29 Tettonni mennang nainappa narukka Yèsus massu ri saliweng kota, sibawa natiwii ri èmpenna buluè, naonroiyè napatettong kotana mennang. Akkattana mennang maèloi sorongngi ri laleng peppingngè. 30 Iyakiya nalullu'i Yèsus iyaro tau maègaè nainappa lao. 31 Nainappa Yèsus lao ri Kapernaum ri Galilèa. Kuwaniro napagguru sining tauwè ri esso Saba'è. 32 Bengngani mennang mitai carana mappagguru, saba' mabbicarai sibawa akuwasang. 33 Kuwaro ri bola assompangngè engka sèddi tau iya nakuwasaiyè sètang. Iyaro tauwè kelli'-kelli'ni, 34 "Eh Yèsus, tau Nazarèt, aga maèlo Mugaukekki? Polè-Koga maèlo pabbinasaki? Uwisseng nigako, iko suro polè ri Allataala iya mapaccingngè!" 35 Naggera' Yèsus lao ri sètangngèro, "Ammekkoko! Assuko polè ri tauwèwè!" Nainappa iyaro sètangngè naggeppuwangngi iyaro tauwè ri yolona maneng mennang, nainappa massu polè ri tauwèro dè'na napeddiriwi. 36 Hèrang manenni tauwè, nakkeda sèddiè lao ri laingngè, "Tenniya culè-culè ada-adan-Na. Nasibawang akuwasang, nasuroi roh-roh majaè massu, namassu tona mennang!" 37 Na karèba passalenna Yèsus tassiyani ri sininna daèraèro. 38 Nasalaini Yèsus iyaro bola assompangngè, nanalao ri bolana Simon. Matuwa makkunrainna Simon mattengngangngi masemmeng, nasining tauwè napaissengini Yèsus gau'èro. 39 Nalaona Yèsus ri onrong atinronna makkunraièro, napaddèsu'i iyaro semmengngè. Nasorona iyaro semmengngè, naoto'na matuwa makkunrainna Simon nanatumaningiwi mennang. 40 Wettunna labu essoè, natiwini sininna tauwè lao ri Yèsus silessu-silessurenna iya nakennaè maddupa-rupang lasa. Napalènne'ni limanna Yèsus ri yasè'na mennang tungke'-tungke' nanapajjappai. 41 Nassuna sining sètangngè polè ri tau maègaè, nagora-gorato, "Ikona Ana'na Allataala!" Iyakiya rigera'i mennang ri Yèsus sibawa dè'naripalalo mennang mabbicara, saba' naissengngi mennang makkedaè Alèna ritu Arung Pappassalama'è. 42 Wettunna mammula mompo matanna essoè, nasalaini Yèsus iyaro kotaè nanalao risèuwaè onrong iya masino-sinoè. Nappammulana tauwè sappai Alèna, na wettunna mennang naruntu', makkuragani kuwammengngi aja' narisalai mennang. 43 Iyakiya makkedai Yèsus, "Karèba Madècèng passalenna Allataala sibawa Apparèntanna harusu' towi Uwabbirittang ri kota-kota laingngè, saba' untu' iyanaro narisuro-Ka muttama' ri linoè. " 44 Iyanaro saba'na nakkatobba Yèsus ri laleng sining bola assompangngè ri sininna wanuwa Yudèa.

Lukas 5

1 Risèuwaè wettu, tettongngi Yèsus ri wirinna Tappareng Gènèsarèt. Maèga tau siredde-redde untu' mèngkalingai karèba polè ri Allataala. 2 Naitani Yèsus engka duwa lopi ri wirinnaro; sining pakkajana nonnoni polè ri lopièro namattengngang bissaiwi jalana. 3 Naènrè'na Yèsus risala sèddinna iyaro sining lopiè, iyanaritu lopinna Simon, nainappa nasuro Simon sorongngi iyaro lopinna mabèla cèddè polè ri wiring. Natudanna Yèsus ri laleng lopièro, nanapaggurui tau maègaè. 4 Puranana mappagguru, makkedani ri Simon, "Mpisèno lao ri onrong malamungngè, namupallebba'i jalamu untu' tikkeng balè. " 5 Nappèbali Simon, "Bapa' Guru, puppu benniki majjama ladde', nadè'gaga agaga ritikkeng! Iyakiya nasaba Bapa' suroki, madècènni; maèlosika pallebba' jala. " 6 Puranana napogau' iyaro gau'è, lolongenni mennang makkumani ègana balè angkanna mammulani sapè' jalana. 7 Rimakkuwannanaro mèllau tulunni mennang ri sellao-sellaona ri lopi laingngè. Polèni sining sellaona mennang lisekiwi iya duwa lopièro penno sibawa balè angkanna maèloni tallemme' iyaro sining lopiè. 8 Wettunna naita Simon iyaro, suju'ni ri yolona Yèsus, nainappa makkeda, "Salaika Puwang! Saba' tau madosaka!" 9 Hèranni Simon sibawa sininna tau iya naèwaè silaong mitai ègana balè natikkeng mennang. 10 Makkuwatoro sining sellaona Simon, iyanaritu Yakobus sibawa Yohanès, ana'-ana'na Zèbèdèus. Nakkeda Yèsus lao ri Simon, "Aja' mumètau! Mappammulai makkekkuwangngè mancajiko matu pajjala tau. " 11 Nagettenni Simon sibawa sellao-sellaona iyaro sining lopinna lao ri wiring, nainappa nasalai maneng, nanaccowèriwi Yèsus. 12 Risèuwaè esso engkai Yèsus risèuwaè kota. Kuwaro engka sèddi worowanè iya pennoè watakkalèna sibawa lasa oli mappakatau-tauè. Wettunna naita Yèsus, suju'ni ri yolo-Na marèllau, "Pa', rèkko taèloriwi Bapa', taullè pajjappaka' Bapa'!" 13 Nakarawani Yèsus iyaro tauwè nakkedato, "Upuwèloi, ajjappano!" Iyatoro wettuè najjappa lasana. 14 Nainappa nattèyang Yèsus iyaro tauwè curitai gau'èro lao ri nigi-nigi, adan-Na, "Laono ri imangngè, namuwèllauwi untu' pattentui makkedaè majjappano. Nainappako lao makkasuwiyangeng akkarobangeng pada-pada iya napparèntangngè Musa, selaku butti lao risining tauwè makkedaè tonget-tongenno majjappa. " 15 Iyakiya karèba passalenna Yèsus pèdè' tassiyai lao tulili, namaègana tau polè untu' mèngkalingai Alèna sibawa untu' ripajjappa polè ri lasana mennang. 16 Purairo laoni Yèsus massempajang ri onrong masino-sinoè. 17 Risèuwaè esso wettunna Yèsus mattengngang mappagguru, engka siyagangngarè tau Farisi sibawa guru-guru agama tudang kuwaro. Polèi mennang ri Yèrusalèm, sibawa ri kota-kotaè ri Galilèa enrengngè Yudèa. Akuwasanna Puwangngè engkai ri Yèsus untu' pajjappai sining tau malasaè. 18 Iyaro wettuè engka siyagangngarè tau polè tiwi sèddi tau pèso' iya lèwuè ri yasè'na onrong atinrongngè. Makkuragai mennang tiwii iyaro tauwè ri lalempola kuwammengngi naullèi palènne'i ri yolona Yèsus. 19 Iyakiya nasaba maèga senna' tau kuwaro, dè' naullèi mennang tiwii muttama'. Rimakkuwannanaro napaènrè'i mennang ri yasè'na pabbingenna bolaè. Nainappa nabongkara' gentènna, nanapanonnoi silaong onrong atinronna ri yolona Yèsus ri tengnga-tengngana tau maègaèro. 20 Wettunna naita Yèsus pèkkugi rajanna teppe'na mennang, makkedani Alèna lao ri tauwèro, "Eh silessureng, riyaddampengenni dosamu. " 21 Sining guru agamaè sibawa sining tau Farisiè mammulani makkeda sèddiè lao ri laingngè, "Niga iyaè tauwè nabarani cellai Allataala? Niga wedding maddampengengngi dosaè, rilainnaè Allataala?" 22 Naissengngi Yèsus pakkutanana mennang. Jaji makkedani, "Magi muwakkutana makkuwaro ri laleng atimmu? 23 Kèga lebbi gampang makkeda, 'Riyaddampengenni dosamu', iyarè'ga makkeda, 'Oto'no namujoppa!' 24 Iyakiya maèlo-Ka buttikangngi makkekkuwangngè lao ri iko makkedaè Ana'na Tolinoè makuwasai ri yasè'na linoèwè untu' maddampengengngi dosaè. " Nainappa makkeda Yèsus lao ri tau pèso'èro, "Oto'no, akkai onrong atinrommu, namulisu!" 25 Masitta'ni iyaro tauwè moto' ri yolona maneng mennang, nainappa nakka onrong atinronna, nanalisu sibawa pojiwi Allataala. 26 Bengnga manenni mennang nanapojiwi Allataala. Nasibawang tau, makkedani mennang, "Makalallaing senna' kajajiyang iya riitaè iya essoè!" 27 Purairo massuni Yèsus nanaitai sèddi passinge' sima iya riyasengngè Lèwi, mattengngang tudang ri kantoro'na. Nakkeda Yèsus ri Lèwi, "Accowèko ri Iyya. " 28 Tettonni Lèwi nanasalai manengngi, nainappa maccowèriwi Yèsus. 29 Purairo mappèstani Lèwi ri bolana untu' Yèsus. Maèga passinge' sima sibawa tau laing maccowè manrè sisama mennang. 30 Engka siyagangngarè tau Farisi sibawa guru-guru agama dè' namasennang, nanakkeda ri ana'-ana' gurunna Yèsus, "Magi mumanrè mènung maneng sibawa passinge' simaè sibawa sining tau dè'è namakessing?" 31 Nappèbali Yèsus, "Tau madisingngè dè' napparelluwang dottoro', banna tau malasaè bawang. 32 Polè-Ka tenniya untu' mobbii sining tau tongengngè, sangadinna sining tau madosaè kuwammengngi natoba' mennang polè ri dosa-dosana. " 33 Nakkeda sining tauwè lao ri Yèsus, "Ana'-ana' gurunna Yohanès sibawa ana' gurunna tau Farisiè biyasai mappuwasa sibawa massempajang. Iyakiya ana'-ana' gurum-Mu manrèi sibawa mènungngi. " 34 Nappèbali Yèsus, "Weddigga musuro mappuwasa sining undangammu ri pèsta abottingengngè, ri wettu engkana mupa bottimpuranè silaong mennang? Tentu dè'! 35 Iyakiya engka matu narapii wettunna nariyala bottimpuranè polè ri mennang. Ri wettuènnaro nappuwasa matu mennang. " 36 Nainappa nacuritani Yèsus pakkalarapangengngèwè, "Dè' tau tèppangngi waju launna sibawa sikennè kaing polè ri waju baruè. Saba' nasapè'i waju baruèro. Kuwaèttopa iyaro pattèppang mabaruè dè' nasicoco' waju malaungngè. 37 Makkuwatoro dè'gaga tau tiri' anggoro baru ri laleng popang koli malaungngè, nasaba iyaro anggoro baruè nassabariwi matu mareppa iyaro popangngè. Natabbè anggoro'na sibawa masolang popanna. 38 Anggoro baruè harusu'i ritiri' ri popang iya baruètto. 39 Makkuwatoro dè'gaga tau maèlo mènung anggoro baru rèkko purai mènung anggoro laung. Adanna, 'Lebbi kessingngi anggoro malaungngè. ' "

Lukas 6

1 Risèuwaè esso Saba', wettunna Yèsus lalo risèuwaè dare' gandong, malai gandong ana'-ana' gurun-Na. Napessii iyaro gandongngè nainappa nanrè. 2 Siyagangngarè tau Farisi makkeda, "Magi muwajjalèkkaiwi hukkung-hukkunna agamata ri laleng mupogau'na iya riyattèyangngè ri esso Saba'è?" 3 Nappèbali Yèsus, "Dè'paga naengka mubacai passalenna napogau'è Daud, wettunna Daud sibawa sining taunna malupu? 4 Muttama'i ri laleng Bolana Puwangngè nanalai roti iya puraè riyakkasuwiyangeng ri Allataala, nainappa nanrè. Nanawèrèng towi iyaro rotiè lao risining taunna. Padahal manuru' hukkung-hukkunna agamata, banna sining imangngè bawang wedding manrèi iyaro rotiè. " 5 Nanakkeda Yèsus, "Ana'na Tolinoè makuwasai lao ri esso Saba'è!" 6 Risèuwaè esso Saba' laingngè, laowi Yèsus mappagguru ri bola assompangngè. Naengka kuwaro tau matè siwali limanna. 7 Engka siyagangngarè guru agama sibawa tau Farisi maèlo sappai asalanna Yèsus, kuwammengngi weddingngi napparapekeng. Jaji matterui napènessai maèloiga pajjappai tauwè ri esso Saba'è. 8 Iyakiya naissengngi Yèsus pikkiranna mennang. Nakkedana lao ri tau iya matè siwaliè limanna, "Laoko kuwaè tettong ri yolo!" Tokkonni iyaro tauwè, natettong kuwaro. 9 Nainappa makkutana Yèsus risining tau engkaè kuwaro, "Manuru' agamaè, aga harusu' ripogau' ri esso Saba'è? Pogau'i makessingngè iyarè'ga majaè? Passalama'i tauwè iyarè'ga cilakaiwi?" 10 Nakkita Yèsus mattulili lao ri iya maneng mennang, nainappa makkeda lao ri tauwèro, "Loro'i limammu. " Iyaro tauwè naloro'ni limanna, najjappana limanna. 11 Iyakiya macai senna'i iyaro guru-guru agamaè sibawa sining tau Farisiè, nappammulana barunding, aga wedding napogau' mennang lao ri Yèsus. 12 Iyaro wettuè mènrè'ni Yèsus risèuwaè bulu-bulu untu' massempajang. Kuwaniro massempajang lao ri Allataala puppu benni. 13 Wettunna macakkani essoè, Naobbini ana'-ana' gurun-Na, nainappa napilè seppulo duwa tau polè ri mennang. Nasenni iyaro seppuloè duwa tau rasul. Iya mennang iyanaritu: 14 Simon (iya riyasengngètto Pètrus), sibawa Andrèas silessurenna Simon; Yakobus sibawa Yohanès, Filipus sibawa Bartolomèus, 15 Matius sibawa Tomas, Yakobus ana'na Alfèus, sibawa Simon (iya riyasengngè Patriot), 16 Yudas ana'na Yakobus sibawa Yudas Iskariot iya bali'bellaè ri munri. 17 Nonnoni Yèsus polè ri bulu-buluèro silaong rasul-rasul-èro, nainappa tettong mappèsau risèuwaè onrong iya malappaè. Naengkato kuwaro maèga ana'-ana' gurun-Na laingngè sibawa maèga tau iya polè tuliliè ri sininna Yudèa, Yèrusalèm enrengngè kota-kota Tirus sibawa Sidon ri wiring tasi'è. 18 Polèi mennang untu' mèngkalingai Yèsus sibawa ripajjappa polè risining lasana. Mennang iya nauttamakiyè roh maja polè towi sibawa ripajjappa. 19 Sininna tauwè makkuragani untu' karawai Yèsus, nasaba engka akuwasang massu polè ri Alèna iya pajjappa manengngèngngi mennang. 20 Naitani Yèsus ana'-ana' gurun-Na, nainappa makkeda, "Asennanno iko sining tau kasiyasiè, nasaba anggotanako umma'na Allataala! 21 Asennanno iko iya malupuè makkekkuwangngè; ripawessoriko matu! Asennanno iko iya teriyè makkekkuwangngè; macawako matu! 22 Akkèrennuko rèkko ribenciko, risampèyang, ripakatuna sibawa ripètenna nasaba Ana'na Tolinoè! 23 Nabi-nabiè riyolo rigaukeng towi makkuwaèro. Rèkko kajajiyangngi gau'èro, sitinajako masennang ati sibawa sèrè nataro rennu, saba' battowai saromu iya tassadiyaè ri surugaè. 24 Iyakiya cilakano iko iya sugiè makkekkuwangngèwè; saba' purani mupèneddingi anyamengengngè! 25 Cilakano iko iya messoè makkekkuwangngèwè; saba' malupuko matu! Cilakano iko macawaè makkekkuwangngè; saba' tassinnaui matu atimmu sibawa teri! 26 Cilakano rèkko sininna tauwè pojiko; saba' makkuwatoro nènè-nènèna mennang pojiwi nabi-nabi palsuè riyolo. " 27 "Iyakiya lao ri iko iya mèngkalingaèngngi Iyya makkekkuwangngèwè, Uwappasengengngi: amasèiwi sining balimmu, sibawa pogau'i iya makessingngè lao ri tau iya benciyèkko. 28 Barakkakiwi tau iya tanroiyèkko, sibawa assempajangengngi tau iya pèjariyèngngèkko. 29 Rèkko naleppa'i tauwè rupammu sèddiè, leppessangngi siya naleppa iya siwaliètto. Rèkko narampasa'i jumbamu, wèrèng towi wajummu. 30 Rèkko engka naèllau tauwè ri iko, wèrèngngi; sibawa rèkko narampasa'i appunnangemmu, aja'na muwèllauwi lisu. 31 Gaukenni tau laingngè pada-pada muwacinnaiyè rigaukekko ri mennang. 32 Rèkko muwamasèiwi sining tau iya mamasèiyèkko bawang, aga saromu? Tau madosaè namasèi towi sining tau iya mamasèiyèngngi mennang! 33 Sibawa rèkko pogau'ko makessingngè lao risining tau iya pogau'èngngi makessingngè lao ri iko bawang, aga saromu? Sining tau madosaè pogau' towi makkuwaèro! 34 Sibawa rèkko iyami bawang mupainrengi dowi tau iya mullèngngi palisui, aga saromu? Tau madosaè mappainreng towi dowi lao ri tau madosaè, nainappa naèllau lisu! 35 Sitonget-tongenna dè' nakkuwaro! Sibalè'na harusu'ko mamasèiwi balimmu sibawa pogau'i makessingngè lao ri mennang. Harusu'ko mappainreng, naaja' murennuwangngi lisu. Rèkko makkuwairo, battowai saromu sibawa mancajiko matu ana'-ana'na Allataala Iya Pommatanrè. Saba' makessing atiwi Allataala lao ri tau iya dè'è naissengngi mattarima kasi, sibawa lao ri iya majaètto. 36 Sitinajako mamasè pada-pada Ambo'mu mamasèto!" 37 "Aja' muwadèlèkiwi tau laingngè, kuwammengngi nadè'to nadèlèkiko Allataala. Aja' muhukkungngi tau laingngè, kuwammengngi naaja'to nahukkukko Allataala. Addampengengngi tau laingngè, kuwammengngi naddampengeng tokko Allataala. 38 Wèrèngngi tau laingngè, kuwammengngi nawèrèng tokko Allataala; mutarimai matu pabbèrè iya tabbollompollongngè iya puraènna riolakekko malise' senna'. Saba' ola' iya mupakè untu' tau laingngè napakèngettokko matu Allataala. " 39 Nainappa nacurita Yèsus lao ri mennang pakkalarapangeng makkuwaè, "Rèkko tau butaè pimpingngi tau buta laingngè, pasti menrung duwai nonno ri sèpe'è. 40 Dè'gaga tau lebbi battowa naiya gurunna. Iyakiya ana' guru iya temme'ènna magguru, mancajiwi matu pada-pada gurunna. 41 Muwitai bulisa'è ri matanna silessuremmu, na balo'è ri matammu dè' mupènessaiwi? 42 Pèkkugi mullèi makkeda ri silessuremmu, 'Laono mai, silessureng, upassui iyaro bulisa'è polè ri matammu, ' na ri laleng matammu engka balo' dè' muwitai? Eh munapè'! Passuni riyolo' balo' iya engkaè ri matammu. Nainappa mullè mitai sibawa manessa kuwaèttopa passui bulisa'è polè ri matanna silessuremmu. " 43 "Pong ngaju macommo'è dè' napowassèlè' buwa iya majaè. Makkuwatoro pong ngaju makojoè dè' napowassèlè' buwa iya makessingngè. 44 Tungke' pong ngaju riissengngi polè ri buwana. Alekale' maddoriè dè' napowassèlè buwa ara, sibawa alekale' maddoriè dè' napowassèlè' buwa anggoro. 45 Tau iya makessingngè passui gau'-gau' makessingngè nasaba pennoi atinna sibawa akessingeng. Tau iya majaè passui gau'-gau' iya majaè nasaba pennoi atinna sibawa majaè. Saba' aga napowada tèmuè tabbollongngi polè ri atiè. " 46 "Magi muwobbi-Ka, 'Puwang, Puwang', iyakiya dè' mupogau'i aga iya Upowadangngèkko? 47 Nigana wedding ripappadangngi tau iya laowè ri Iyya, sibawa mèngkalingai ada-adak-Ku, enrengngè pogau'i? -- Makessinni Upaitakko --. 48 Pada-padai tau iya wettunnaè mappatettong bola iya kaliyèngngi maliyung, nainappa naèbbu pandamènna ri batuè. Wettunna polè lèmpe'è sibawa uwai saloè mappo'i iyaro bolaè, dè' naullèi pakèdoi iyaro bolaè, saba' purai ripatettong ri yasè'na pandamèng iya makessingngè. 49 Iyakiya tau iya mèngkalingaèngngi ada-adak-Ku nadè' napajoppai, pada-padai tau iya patettongngè bola dè' napandamèngngi. Rèkko nappo'i lèmpe' iyaro bolaè, masitta'i maruttung; namalanre' asolangenna!"

Lukas 7

1 Puranana napowada gau'-gau'èro lao ri tau maègaè, laoni Yèsus ri Kapernaum. 2 Kuwaro engka parawira Roma iya mappunnaiyè ata iya namasèi senna'è. Iyaro ataè malasai nacèddè'pi namatè. 3 Wettunna naèngkalinga iyaro parawiraè passalenna Yèsus, nasuroni siyagangngarè pamimpinna tau Yahudiè lao ri Yèsus untu' mèllauwi kuwammengngi napolè sibawa pajjappai atanna. 4 Wettunna lettu ri Yèsus, iyaro sining tauwè naèllauni sibawa masero kuwammengngi Natulungngi iyaro parawiraè. Nakkeda mennang lao ri Yèsus, "Iyaè parawiraè sitinajai tatulung Bapa', 5 saba' namasèiwi bangsata sibawa purana napatettongekki bola assompang. " 6 Nalaona Yèsus silaong mennang. Wettunna Yèsus macawè'è lettu ri bolaèro, iyaro parawiraè nasuroni sellao-sellaona lao ri Yèsus untu' makkeda, "Aja'na Bapa' tasussa-sussaiwi alèta lao ri bolaku. Dè' usitinaja tarimai Bapa' ri bolaku. 7 Iyanaro saba'na dè' ubarani mangolo ri Bapa'. Jaji wèrèng bawanni parènta kuwammengngi najjappa pattumanikku. 8 Saba' iyya'è tunru' tokka ri parèntana tomariyasè'è, na ri yawaku engkato parajuri'-parajuri' iya harusu'è tunru' ri parènta-parèntaku. Rèkko usuroi sèddiè parajuri', 'Laoko!' laowi; sibawa rèkko makkedaka ri laingngè, 'Laoko mai!' polèi. Narèkko uparèntangngi atakku, 'Ebbui iyaè!' naèbbui. " 9 Hèranni Yèsus mèngkalingai iyaro. Gilinni nakkeda ri tau maègaè iya maccowèriyèngngi, "Tenniya culè-culè iyaè tauwè. Ri yelle'na tau Israèliè dè'pa naengka Ulolongeng teppe' silloppoèwè. " 10 Wettunna iyaro sining tau risuroè lisu ri bolana parawiraèro, majjappani iyaro ataè. 11 Dè' namaitta ri munrinna, laoni Yèsus ri kota Nain. Ana'-ana' gurun-Na sibawa tau maègaè laowi sibawangngi. 12 Wettunna Yèsus lettu ri seddèna pintu gerbanna kotaè, sining tauwè mattengngangngi mangantara' uju massu ri kotaè. Iya matè iyanaritu ana' worowanè, ana' tungke'na sèddiè janda. Maèga pabbanuwana iyaro kotaè silaongengngi iyaro makkunraiè. 13 Wettunna Puwang Yèsus naita iyaro makkunraiè, messèni lao ri makkunraièro nanakkeda, "Aja' muteri, Indo!" 14 Nainappa Yèsus maddeppèriwi ulèreng ujuèro nanakarawai. Nalèppanna iyaro sining tau mabbulèè. Nakkeda Yèsus, "Eh kallolo, Usuroko moto!" 15 Moto'ni tudang kallolo iya matèro, sibawa mammula mabbicara. Nabbèrèyanni Yèsus lao ri indo'na. 16 Mètau maneng tauwè sibawa mammulani pojiwi Allataala. Makkedai mennang, "Momponi ri tengnga-tengngata sèddi nabi iya battowaè! Polèni Allataala untu' passalama'i umma'-Na!" 17 Tassiyani karèbaè passalenna Yèsus ri sininna Yudèa sibawa ri daèra seddèna. 18 Ana'-ana' gurunna Yohanès napowadanni Yohanès sininna kajajiyangngèro. Nanaobbini Yohanès duwa ana' gurunna, 19 nanasuroi lao ri Puwang Yèsus makkutana, "Bapa'ga tau iya maèloè polè situru jancinna Allataala, iyarè'ga harusu'ki mattajeng sèddi tau laing?" 20 Laoni ri Yèsus iyaro duwaè ana' gurunna Yohanès nakkeda, "Nasuroki Yohanès Paccemmè makkutana ri Bapa', Bapa'ga ritu tau maèloè polè situru jancinna Allataala, iyarè'ga harusu'ki tajeng tau laing?" 21 Iyaro wettuè Yèsus pajjappai maèga tau, sibawa paddèsu' maèga roh maja enrengngè mèbbui maèga tau buta makkita. 22 Jaji mappèbalini Yèsus, "Lisuno lao ri Yohanès namupowadangngi aga muwèngkalinga sibawa muwita: makkita tau butaè, joppa tau pèso'è, majjappa tau malasa oli mabbahayaè, marèngkalinga tau mataru-taruè, tuwo paimeng tau matè, sibawa Karèba Madècèng polè ri Allataala riyabbirittangngi lao risining tau kasiyasiè. 23 Masennangngi tau iya dè'è gaga alasanna untu' sampèyak-Ka. " 24 Meddè'nana iyaro sining surona Yohanès, mappammulani Yèsus mabbicara lao ri tau maègaèro passalenna Yohanès, adan-Na, "Laoko ri padang kessi'è untu' mita aga? Sipong wellaga iya nairiè anging? 25 Laoko untu' mita aga? Sèddi tau iya mappakè makessingngèga? Sining tau iya mappakè makkuwaèro sibawa tuwoè massennas-sennang monroi ri saorajaè! 26 Jaji massuko untu' mita aga? Untu' mita sèddi nabiga? Tongeng, mala lebbi na sèddiè nabi. 27 Saba' Yohanès ritu naseng ri laleng aya'na Kitta'èwè, 'Iyanaè suro-Ku, ' adanna Allataala, 'Maèlo-Ka suroi lebbi riyolo naiya Iko, kuwammengngi natimparek-Ko laleng!' " 28 Nakkedapa Yèsus, "Engngerangngi, ri linoèwè dè'pa naengka tau lebbi battowaè naiya Yohanès Paccemmè. Iyakiya tau iya kaminang baiccu'è ri yelle'na umma'na Allataala, lebbi battowai naiya Yohanès Paccemmè. " 29 Sininna tauwè -- muttama' toni sining passinge' simaè -- naèngkalingai Yèsus powadai gau'èro: mennang ritu sining tau iya puraè turusiwi sining tuntutanna Allataala sibawa maèlona ricemmè ri Yohanès. 30 Iyakiya sining tau Farisiè sibawa guru-guru agamaè dè' namaèlo tarimai rencanana Allataala untu' alèna mennang. Dè' namaèlo mennang ricemmè ri Yohanès. 31 Nainappa mabbicarasi Yèsus, adan-Na, "Agana harusu' Upasibandingengngi sining tauwè makkekkuwangngèwè? Pada-padai aga mennang? 32 Pada-padai mennang ana'-ana' iya tudangngè ri pasaè; sikonrong gora lao ri laingngè, 'Riyakkèlongekko èlong mariyo-riyo, iyakiya dè' mumaèlo sèrè! Riyèlongekko èlong mabbarata, na iko dè' mumaèlo teri!' 33 Polèi Yohanès Paccemmè -- mappuwasai sibawa dè' nainung anggoro -- namumakkeda, 'Nauttamakiwi sètang!' 34 Polèi Ana'na Tolinoè -- manrèi sibawa mènung -- mumakkeda, 'Itai iyaro tauwè! Mabuwaja, pammabokeng, sellaona passinge' simaè sibawa sellaona tau madosaè. ' 35 Namuni makkuwaro, amaccanna Allataala pabuttiwi polè ri sininna tau iya tarimaèngngi. " 36 Engka sèddi tau Farisi riyaseng Simon, naundangngi Yèsus manrè. Laoni Yèsus ri bolana sibawa tudang manrè. 37 Engkato ri kotaèro sèddi makkunrai iya tuwoè ri laleng dosaè. Wettunna naèngkalinga makkedaè Yèsus manrèi ri bolana tau Farisièro, laoni sibawa tiwi sèddi botolo' mallise' minnya' wangi. 38 Tettongngi ri munrinna Yèsus ri seddèna ajè-Na sibawa teri nanarica'i ajèna Yèsus sibawa uwai matanna. Nainappa narakkoi ajèna Yèsus sibawa gemme'na nappa nabau sibawa natirikinna minnya' wangi. 39 Wettunna tau Farisiè iya mundangngengngi Yèsus naita iyaro gau'è, makkedani ri laleng atinna, "Akkalarapanna iyaè tauwè nabi, tentu Naisseng niga iyaro makkunrai gèssaèngngi, sibawa iyaro makkunraiè tuwoi ri laleng dosaè!" 40 Nakkeda Yèsus lao ri Simon, "Simon, engka maèlo Upowadakko. " Nappèbali Simon, "Iyyè, Pa' Guru, tapowadani. " 41 Nakkeda Yèsus, "Engka duwa tau makkinreng lao ri sèddiè tau iya mappainreng dowiè. Iya sèddiè makkinreng lima ratu dowi pèra', naiya sèddiè limappulo dowi pèra'. 42 Iya duwaro dè' naullèi paleppe'i inrenna, narileddana iyaro inrenna. Nah, niga ri yelle'na iya duwa tauwèro kaminang mamasèiwi matu tau iya mappainrengngèro dowi?" 43 Nappèbali Simon, "Ukira-kirai tau iya kaminang maègaè inrenna riledda!" Nappèbali Yèsus, "Tongeng pallolongemmu. " 44 Nainappa makkita Yèsus lao ri makkunraièro sibawa makkeda lao ri Simon, "Muwitaga iyaro makkunraiè? Lao-Ka ri bolamu, nadè' mupassadiya uwai untu' pèpaccingiwi ajè-Ku, iyakiya iyaè makkunraiè purani napèpaccingi ajè-Ku sibawa uwai matanna, enrengngè rakkoiwi sibawa gemme'na. 45 Iko dè' muduppai-Ka sibawa pabbau, iyakiya iyaè makkunraiè dè' nappèsau bauwi ajè-Ku sipongek-Ku engka kuwaè. 46 Iko dè' mutirikiwi minnya' uluk-Ku, iyakiya iyaè makkunraiè purani natiriki minnya' wangi ajè-Ku. 47 Tongeng: pammasè iya battowaèro mappaitangngi makkedaè dosana iya maègaèro riyaddampengenni! Rèkko cèddè'mi tauwè riyaddampengeng, cèddè' tommi mamasè matu. " 48 Nakkeda Yèsus lao ri makkunraièro, "Riyaddampengenni dosa-dosamu. " 49 Sining tau laingngè iya tudangngè manrè sibawa Yèsus mammulani makkeda sèddiè lao ri laingngè, "Niga iyaè tauwè naweddingngi maddampengengngi dosaè?" 50 Iyakiya makkedai Yèsus lao ri makkunraièro, "Nasaba mateppe'ko lao ri Iyya, ripassalama'ko. Laono sibawa damè!"

Lukas 8

1 Dè' namaitta ri munrinna, laoni Yèsus ri kota-kotaè sibawa ri kampong-kampongngè, untu' mabbirittangngi Karèba Madècèngngè makkedaè Allataala mappammulani mapparènta selaku Arung. Iya seppulo duwa ana' gurun-Na maccowè towi silaongengngi. 2 Makkuwatoro siyagangngarè makkunrai iya puraè ripajjappa polè ri roh majaè sibawa lasaè. Iyanaritu Maria iya riyasengngè Magdalèna (pitu sètang pura ripassu polè ri alèna); 3 makkuwatoro Yohana, bainèna Khuza, pegawè saorajana Hèrodès; Susana sibawa maèga mupa makkunrai laingngè. Nanabantui mennang Yèsus sibawa ana'-ana' gurun-Na sibawa ongkoso' alèna. 4 Matteru-terui sining tauwè lao ri Yèsus polè rimaddupa-rupang kota. Na wettunna maègani tau maddeppungeng, nacuritani Yèsus lao ri mennang pakkalarapangeng makkuwaèwè: 5 "Engka sèddi pangampo lao mampo binè. Wettunna mampo, engka binè teppa ri lalengngè. Sibagiyang nalèjja tauwè na laingngè nanrèi manu'-manu'. 6 Engkato teppa ri onrong mabbatu-batuè. Wettunna massu cura'-cura'na iyaro binè, makelle'i nasaba marakkoi tanana. 7 Engkato binè teppa ri tengngana alekale' maddoriè. Iyaro alekale' maddoriè tuwoi silaong iyaro binè, sibawa nalimpenginna angkanna dè' naullèi mabbuwa. 8 Iyakiya engkato binè teppa ri tana macommo'è, natuwo sibawa powassèlè' buwa leppe' wèkkasèratu. " Puranana nacurita pakkalarapangengngèro, makkedani Yèsus, "Rèkko mappunnaiko daucculing, èngkalingai!" 9 Nakkutanana ana'-ana' gurunna Yèsus lao ri Yèsus aga bettuwanna pakkalarapangngèro. 10 Nappèbali Yèsus, "Purano riwèrèng pammasè untu' missengngi rahasiyana pèkkugi Allataala mapparènta selaku Arung. Iyakiya tau laingngè ripaggurui sibawa pakkalarapangeng, kuwammengngi napènessaiwi, iyakiya dè' naissengngi aga iya kajajiyangngè; sibawa marèngkalingai, iyakiya dè' napahang. " 11 "Iyanaè bettuwanna iyaro pakkalarapangngè: Iyaro binè iyanaritu ada-adanna Allataala. 12 Binè iya teppaè ri lalengngè sinrupai sining tau iya mèngkalingaèngngi ada-adaèro. Iyakiya polèi Ibillisi' nanarampasa'i iyaro karèbaè polè ri atinna mennang, kuwammengngi naaja' namateppe' sibawa ripassalama'. 13 Binè iya teppaè ri onrong iya mabbatu-batuè sinrupai tau iya ri wettu naèngkalingana iyaro karèbaè, natarimai sibawa masennang atinna. Iyakiya iyaro karèbaè dè' nakkure' ri laleng atinna. Cinampe'mi bawang mateppe', ri wettu polèna paccobangngè massakkai mennang. 14 Binè iya teppaè ri tengngana alekale' maddoriè sinrupai tau iya mèngkalingaèngngi iyaro karèbaè, iyakiya bata-batai passalenna atuwonna mennang enrengngè macinnana tuwo massennas-sennang sibawa napojinna ri laleng linoèwè. Iya manennaro sipii mennang angkanna dè' napowassèlè' buwa iya matasa'è. 15 Binè iya teppaè ri tana macommo'è sinrupai tau iya mèngkalingaèngngi iyaro karèbaè, sibawa natarona ri laleng atinna iya makessingngè namalempu. Mattahangngi mennang narapi powassèlè' buwa. " 16 "Dè'gaga tau palluwa pajjennangeng nainappa natongko baku, iyarè'ga nataroi ri yawana onrong atinrongngè. Iyakiya nataroi ri yasè'na ajè pajjennangengngè, kuwammengngi tau iya muttama'è naullèi mitai tajanna. 17 Dè'gaga tassubbu dè' napaita matu; sibawa dè'gaga rirahasiyakang dè' naribongkara' sibawa riisseng matu. 18 Rimakkuwannanaro pènessaiwi madècèd-dècèng aga muwèngkalinga. Saba' tau iya mappunnaiyènna riwèrèngngi matu lebbi maègapa; iyakiya tau iya dè'è nappunnai, cèddè iya engkaè ri alèna riyalai matu. " 19 Laoni ri Yèsus indo'na sibawa silessu-silessuren-Na, iyakiya dè' naullèi lettu ri Yèsus nasaba maèga senna' tau. 20 Na engka sèddi tau makkeda ri Yèsus, "Pa', indo'-Mu sibawa silessu-silessuremmu Pa' engkai ri saliweng. Macinnai sita Bapa'. " 21 Iyakiya makkedai Yèsus lao ri mennang, "Sining tau iya mèngkalingaèngngi ada-adanna Allataala sibawa napogau'na, iyanaritu indo' sibawa silessu-silessurek-Ku. " 22 Risèuwaè esso, Yèsus sibawa ana'-ana' gurun-Na mallopiwi. Nakkeda Yèsus lao ri mennang, "Laono mai talliweng ri tapparengngè. " Najoppana mennang. 23 Mattengngangngi mennang sompe, namatinro Yèsus. Tappa natappo' muni anginraja iyaro tapparengngè. Mammulani muttama' uwai ri laleng lopiè, angkanna bahaya manenni mennang. 24 Laoni ana'-ana' gurunna Yèsus ri Yèsus nateddui. Makkedani mennang, "Pa' Guru, Pa' Guru, nakennaki abala!" Moto'ni Yèsus nanagera'i angingngè sibawa bombangngè iya siyappo-appo'è. Napajana angingngè sibawa bombangngè, tennang senna'ni iyaro tapparengngè. 25 Nakkeda Yèsus lao ri ana'-ana' gurun-Na, "Magi nadè' mumateppe lao ri Iyya?" Hèranni mennang sibawa mètau. Nakkedana mennang sèddiè lao ri laingngè, "Niga sitongenna iyaè tauwè, nariturusi parèntana ri angingngè sibawa bombangngè!" 26 Sompe'ni Yèsus sibawa ana'-ana' gurunna matteru lettu ri daèra Gerasa ri liwenna Tappareng Galilèa. 27 Wettunna Yèsus nonno ri pottanangngè, rilokkaini risèddiè tau worowanè iya nauttamakiyè roh maja. Iyaro tauwè polèi ri kotaè. Maittani dè' naengka nappakèyang sibawa dè' namaèlo monro ri bolaè. Ri gowa-gowaè bawang onrong attampungengngè maèlo monro. 28 Wettunna naita Yèsus, gorani nainappa suju' ri yolona Yèsus sibawa mangobbi, "Yèsus Ana'na Allataala Iya Pommatanrè! Maèlo-Ko magaka? Uwèllauwi aja' mucallaka!" 29 Iyaro tauwè makkeda makkuwairo nasaba Yèsus suroi iyaro sètangngè massu polè ri alèna. Biyasani rikuwasai ri sètangngèro, angkanna muni risiyo limanna kuwaèttopa ajèna sibawa rantè nenniya rijagainna tonget-tongeng, naullèto pettuiwi iyaro rantè nainappa ritiwi ri sètangngèro ri padang kessi'è. 30 Nakkutana Yèsus lao ri tauwèro, "Niga asemmu?" Nappèbali iyaro tauwè, "Asekku 'Legiun', " -- saba' engka maèga sètang muttama' ri laleng alèna. 31 Iyaro sining sètangngè naèllauwi sibawa masero kuwammengngi dè' naripaddèsu' ri Yèsus lao ri laleng Balorang Amatèngngè. 32 Ri seddèna onrongngèro engka maèga senna' bawi iya mattengngangngè makkinanrè ri èmpenna bulu-buluè. Iyaro roh-roh majaè naèllauwi sibawa masero lao ri Yèsus kuwammengngi na ripalalo muttama' ri laleng sining bawièro. Nanasitujuini Yèsus. 33 Nanassuna iyaro roh-roh majaè polè ri tauwèro nanauttama ri laleng sining bawièro. Nainappa iyaro sining bawiè larini nanaluppe polè ri wiring balorangngè muttama' ri tapparengngè, natallemme. 34 Naitanana iyaro sining panganrowang bawiè aga kajajiyang, larini nanappallebbangengngi iyaro karèbaè ri kotaè sibawa ri dèsa-dèsaè ri seddèna. 35 Nanassuna sining tauwè untu' mitai aga kajajiyang. Laoni mennang ri Yèsus, nanapolèini mennang kuwaro tau iya puraè ripaleppe' polè risining sètangngè tudang ri seddè ajèna Yèsus, mappakèyanni sibawa mainge'ni. Mètauni mennang. 36 Nacuritani mennang iya mitaèngngi kajajiyangngèro lao risining tauwè pèkkugi iyaro tauwè ripajjappa. 37 Nainappa iyaro sininna pabbanuwana Gerasa naèllauni sibawa masero kuwammengngi nasalaiwi Yèsus iyaro onrongngè, saba' mètau senna' manenni mennang. Jaji mènrè'ni Yèsus ri lopiè maèlo lisu. 38 Tau iya puraè ripaleppe' polè risining sètangngèro naèllauwi ri Yèsus kuwammengngi naweddingngi maccowè. Iyakiya Yèsus suroi lao, adanna, 39 "Lisuno namuwabbirittangngi aga pura napogau' Allataala lao ri iko. " Nanalaona iyaro tauwè mappaissengengngi ri kotaè, aga pura napogau' Yèsus lao ri alèna. 40 Wettunna Yèsus lisu ri liweng tappareng, masennanni sining tauwè duppaiwi nasaba ritajengngi ri mennang. 41 Napolèna sèddi tau, kapalana bola assompangngè ri onrongngèro. Asenna Yairus, suju'ni ri yolona Yèsus naèllauwi sibawa masero kuwammengngi nalao Yèsus ri bolana, 42 nasaba sèddi-sèddinna ana' makkunrainna iya seppuloè duwa taung umuru'na cèddè'pi namatè. Wettunna Yèsus joppa lao ri bolana Yairus, sining tauwè redde'i Yèsus polè tulili. 43 Na ri yelle'na engkato sèddi makkunrai iya seppuloènna duwa taung malasa maddara. Purani napaccappu sininna appunnangenna untu' mabbura ri dottoro'è, iyakiya dè'gaga mullèi pajjappai. 44 Iyaro makkunraiè naddeppèrini Yèsus polè monri, nanagèssai cappa jumbana. Iyatoro wettuè nappèsau massu darana iyaro makkunraiè. 45 Nakkutana Yèsus, "Niga gèssaka?" Nassakka maneng tauwè. Nanakkeda Pètrus, "Pa', maèga senna' tau mattulilingiwi Bapa'; naredde'i mennang Bapa'!" 46 Nakkeda Yèsus, "Iyakiya engka tau gèssaka. Uwisseng saba' engka awatangeng massu polè ri Iyya. " 47 Naissenni iyaro makkunraiè makkedaè riissenni pangkaukenna. Jaji laoni sibawa tènrè nasuju' ri yolona Yèsus. Nacuritani ri yolona sininna tauwè, magi nagèssai Yèsus, sibawa majjappana lasana iyatoro wettuè. 48 Nakkeda Yèsus lao ri makkunraièro, "Ana'-Ku, nasaba mateppe'ko ri Iyya, majjappako. Laono sibawa salama'. " 49 Ri wettu mabbicarana mupa Yèsus, engkasi sèddi tau risuropa polè ri bolana Yairus. Makkedai lao ri Yairus, "Matèni Puwang ana' makkunraitta. Aja'na tasussaiwi Bapa' Guru. " 50 Wettunna Yèsus naèngkalingaro, makkedani lao ri Yairus, "Aja' mumètau. Ateppe'no bawang pasti majjappa matu ana'mu. " 51 Lettu'nana ri bolana Yairus, dè' napalaloi Yèsus muwi sèddi tau muttama' sibawa alèna sangadinna Pètrus, Yohanès, Yakobus sibawa indo' ambo'na iyaro ana'è bawang. 52 Teri maneng tauwè sibawa mpating nasaba matènana iyaro ana'è. Iyakiya makkedai Yèsus, "Aja' muteri. Iyaro ana'è dè' namatè, matinromi bawang!" 53 Nacawa-cawaini mennang Yèsus, nasaba naissenni mennang matèni iyaro ana' makkunraiè. 54 Nainappa nakkatenninni Yèsus limanna iyaro ana'è sibawa makkeda, "Oto'na na'!" 55 Lisuni nyawana iyaro ana'è, na iyatoro wettuè naoto. Purairo nasuroni Yèsus mennang mpèrèngngi nanrè iyaro ana'è. 56 Hèrang senna'ni tomatowanna ana'èro. Iyakiya riyattèyangngi ri Yèsus nappaissengengngi gau'èro lao ri nigi-nigi.

Lukas 9

1 Naobbini Yèsus iya seppulo duwa ana' gurun-Na, nainappa nawèrèng mennang akuwasang untu' paddèsu'i sètangngè sibawa pajjappai lasaè. 2 Nainappa nasuro mennang lao pajjappai tau malasaè sibawa mappallebbangengngi pèkkugi Allataala mapparènta selaku Arung. 3 Nakkeda Yèsus lao ri mennang, "Aja' mutiwi agi-agi untu' laommu. Aja' mutiwi tekkeng, iyarè'ga sèpu-sèpu passidekka, iyarè'ga nanrè, iyarè'ga dowi, iyarè'ga pakèyang duwallampa. 4 Kègi-kègiko ritarima, onrono kuwaro narapi musalai iyaro kotaè. 5 Nakègi-kègi dè' naritarimako, wettunna musalai kotaèro, akkeppiyangngi awuè ri palakajèmu, selaku papparèngngerang lao ri mennang. " 6 Najoppana ana'-ana' gurunna Yèsus, nalao ri dèsa-desaè untu' mabbirittangngi Karèba Madècèngngè sibawa pajjappai tau malasaè kègi-kègi. 7 Wettunna Hèrodès iya mapparèntaè ri Galilèa, naèngkalinga passalenna iya maneng gau'èro, bengngani. Saba' engka makkeda makkedaè tuwoi paimeng Yohanès Paccemmè. 8 Engkato powadai makkedaè momposi paimeng Elia. Tau laingngè powadai makkedaè sèddi nabi polè ri nabi-nabiè riyolo tuwoni paimeng. 9 Makkedai Hèrodès, "Purani usuro tauwè rette'i ulunna Yohanès. Iyakiya iyaè tauwè, niga sitongen-Na? Maègani pura uwèngkalinga passalenna Alèna. " Nanakkuragana Hèrodès untu' mitai Yèsus. 10 Lisunnana sining surona Yèsus, nacuritani lao ri Yèsus iya maneng puraè napogau'. Naèrani Yèsus mennang lao silaong massala ri kota Bètsaida. 11 Iyakiya wettunna sining tauwè naisseng passalenna gau'èro, naccowèrini mennang Yèsus. Natarimani mennang, nainappa mabbicara lao ri mennang passalenna pèkkugi Allataala mapparènta selaku Arung. Enrengngè Napajjappa towi tau malasaè ri yelle'na mennang. 12 Wettunna labuni essoè, polèni iya seppulo duwa ana' gurunna Yèsus ri Alèna sibawa makkeda, "Pa' iyaè onrongngè tassubbu. Lebbi kessing muwi Bapa' suroi sining tauwèro lao, kuwammengngi naweddingngi sappa anrè sibawa onrong mappèruma ri kampong-kampongngè sibawa dèsa-dèsaè ri onrongngèwè. " 13 Iyakiya mappèbaliwi Yèsus, "Iko bawanna panrèi mennang. " Nakkeda ana'-ana' gurunna Yèsus, "Lima bawang roti riyappunnai sibawa duwa balè. Harusu'ki'ga lao melli anrè untu' iya maneng tauwèwè?" 14 (Engka kira-kira limassebbu tau worowanè kuwaro. ) Nakkeda Yèsus lao ri ana'-ana' gurun-Na, "Suroi iyaè tauwè tudang makkonro-konrongeng kira-kira limappulo tau sikonrong. " 15 Napogau'ni ana'-ana' gurunna Yèsus iya napowadaè Yèsus lao ri mennang. 16 Nainappa nalani Yèsus iyaro limaè roti sibawa duwaè balè, nanaconga ri langiè mattarima kasi ri Allataala. Purairo napuwè'-puwè'ni rotiè nenniya balèro sibawa liman-Na nainappa nawèrèng ana'-ana' gurun-Na untu' nabbagè-bagèyang lao ri tau maègaèro. 17 Manrè manenni mennang gangka messo. Nainappa ana'-ana' gurunna Yèsus paddeppungengngi lebbinna iyaro anrè ègana seppulo duwa baku. 18 Risèuwaè esso, wettunna Yèsus massempajang alè-alèna, polèni ana'-ana' gurun-Na. Makkutanani Yèsus lao ri mennang, "Manuru' adanna tauwè, niga Iyya'è?" 19 Nappèbali mennang, "Engka makkeda Yohanès Paccemmè. Engkato makkeda Elia, iya laingngè makkedai sala sèddinna nabiè riyolo iya tuwoènna paimeng. " 20 Nakkeda Yèsus, "Iyakiya manuru' alèmu, niga Iyya'è?" Nappèbali Pètrus, "Bapa' iyanaritu Arung Pappassalama' iya najjanciyangngè Allataala. " 21 Nanakkeda Yèsus lao ri ana'-ana' gurun-Na, "Aja' sises-siseng muwappaddissengengngi iyaro gau'è lao ri nigi-nigi. " 22 Makkeda towi Yèsus, "Mèmeng Ana'na Tolinoè harusu'i manrasa-rasa sibawa riyèwa risining pamimpingngè sibawa kapala-kapala imangngè, enrengngè guru-guru agamaè. Riyunoi matu, iyakiya ri esso matelluè ripatuwoi matu paimeng. " 23 Nainappa makkeda Yèsus lao ri iya maneng engkaè kuwaro, "Tau iya maèloè maccowèri-Ka harusu'i nallupai apentingeng alèna, naèssangngi sallina esso-esso sibawa matteruna maccowèri-Ka. 24 Saba' tau iya maèloè mèwaiwi atuwonna, ateddèngengngi matu atuwong. Iyakiya tau iya makkarobangengngèngngi atuwonna untu' Iyya, napassalama'i matu. 25 Aga sarona lao risèddiè tau rèkko sininna linoèwè mancajiwi appunnangenna, iyakiya nasolangiwi sibawa ateddèngengngi atuwonna? 26 Rèkko masirii tauwè mangakui-Ka sibawa pappagguruk-Ku, Ana'na Tolinoè masiri towi matu mangakuiwi iyaro tauwè ri wettu polèna matti sibawa akuwasan-Na, kuwaèttopa akuwasanna Ambo'è, enrengngè akuwasanna sining malaèka' mapaccingngè! 27 Issenni: polè ri yelle'mu kuwaè engka matu dè' namatè riwettu dè'napa naitai matu Allataala mapparènta. " 28 Kira-kira siminggu purana nappagguruwang Yèsus gau'-gau'èro, natiwini Pètrus, Yohanès sibawa Yakobus ri yasè'na sèddiè bulu untu' massempajang. 29 Ri wettu massempajanna Yèsus kuwaro, tappinrani tappa-Na sibawa pakèyan-Na mancaji maputè millakkillang. 30 Tappa engka duwa tau, iyanaritu Musa sibawa Elia mappaitangngi alèna sibawa cahaya polè ri surugaè. Mabbicarani mennang sibawa Yèsus passalenna amatèn-Na iya dè'ènna namaitta napèneddingiwi ri Yèrusalèm. 32 Iyaro wettuè Pètrus sibawa sellao-sellaona matinroni, iyakiya tennasenna-sennani moto, nanaitai Yèsus maccahaya sibawa iya duwa tauwèro tettong silaong Yèsus. 33 Wettunna iya duwa tauwèro maèlo salaiwi Yèsus, makkedani Pètrus ri Yèsus, "Bapa' Guru, manyameng senna'ki kuwaè. Madècèngenni patettokki tellu kèma: sèddi untu' Bapa', sèddi untu' Musa, sibawa sèddito untu' Elia. " (Makkeda makkuwairo Pètrus, dè' napahangngi aga napowada. ) 34 Ri wettu mabbicarana mupa Pètrus, polèni sèuwa ellung, nanasalipuriwi mennang. 35 Na polè ri ellungngèro, naèngkalingai saddaè makkeda, "Iyanaè Ana'-Ku iya Upilè. Engkalingai Alèna!" 36 Pajanana saddaèro, naitani Yèsus alè-alèna mani kuwaro. Mammekko bawammi ana'-ana' gurunna Yèsus passalenna iya manennaro, sibawa dè' nappaissengengngi lao ri niga-niga aga pura naita mennang. 37 Pappa bajanana nonnoni Yèsus sibawa iya tellu ana' gurun-Na polè ri buluèro, na polèna tau maègaè ri Yèsus. 38 Engka kuwaro sèddi tau worowanè polè ri tengnga-tengngana tau maègaèro gora, "Pa' Guru, tulukka taitai ana'ku -- iyaro bawang alè-alèna ana'ku! 39 Rèkko riluruiwi ri roh majaè, tappa gora sibawa matojo watakkalèna angkanna mabbusa bawanna. Iyaro roh-è matteru-terui napanrasa-rasa sibawa dè' namaèlo massu polè ri alèna! 40 Purani uwèllau ana'-ana' gurunna Bapa' untu' paddèsu'i iyaro roh-è, iyakiya dè' naullèi mennang. " 41 Nappèbali Yèsus, "Tenniya culè-culè ikoè! Lao sala tongekko iko sibawa dè' mumateppe! Gangka kègi harusu'ka monro sibawakko sibawa sabbara' lao ri iko? Tiwii iyaro ana'mu kumaiyè!" 42 Ri wettu joppana mupa iyaro ana'è lao ri Yèsus, iyaro roh majaè naggeppuwangngi iyaro ana'è sibawa napatojoi watakkalèna. Iyakiya nagera'i Yèsus iyaro roh-è sibawa napajjappai iyaro ana'è. Nainappa nabbèrèyang paimeng lisu iyaro ana'è lao ri ambo'na. 43 Hèrang maneng tauwè mitai akuwasanna Allataala iya maraja makkuwaèro. Ri wettu pada hèrang manenna mupa sining tauwèro mitai sininna iya napogau'è Yèsus, makkedani Yèsus lao ri ana'-ana' gurun-Na, 44 "Pènessai madècèd-dècèng sibawa aja' muwallupaiwi ada-adak-Kuè: Ana'na Tolinoè riyabbèyangngi matu lao ri akuwasanna tolinoè. " 45 Iyakiya iyaro ana'-ana' gurunna Yèsus dè' napahangngi iyaro adaè. Iyaro gau'è rirahasiyakangngi lao ri mennang kuwammengngi dè' napahangngi. Iyakiya mètaui makkutanangngi iyaro gau'è ri Yèsus. 46 Naompona appangèwangeng ri yelle'na ana'-ana' gurunna Yèsus passalenna niga polè ri mennang iya kaminang battowaè. 47 Naissengngi Yèsus pikkiranna mennang, rimakkuwannanaro malani sèddi ana' baiccu nanasuroi tettong ri seddè-Na. 48 Nainappa makkeda lao ri ana'-ana' gurun-Na, "Tau iya tarimaèngngi iyaè ana'è nasaba Iyya, bettuwanna natarima-Ka. Sibawa tau iya tarimaèk-Ka, natarima towi iya suroèk-Ka. Saba' tau iya kaminang baiccu'è ri yelle'mu, iyanaritu kaminang battowa!" 49 Nakkeda Yohanès, "Puwang, idi mitai tauwè paddèsu'i sètangngè ri laleng asenna Puwang, nariyattèyangngi, saba' dè' napolè ri idi. " 50 Nakkeda Yèsus lao ri Yohanès sibawa ana'-ana' gurun-Na laingngè, "Aja' muèwai, saba' tau iya dè'è naèwako, bettuwanna maccowèi ri iko. " 51 Wettunna macawè'è senna'ni Yèsus riyakka mènrè ri surugaè, malani apettung untu' lao ri Yèrusalèm. 52 Nasuroni tauwè poddiyoloiwi. Sining tau iya Nasuroè lao, muttama'ni risèuwaè kampong ri Samaria kuwaniro napassadiya sini-sininnaè untu' Yèsus. 53 Iyakiya iyaro sining tauwè ri kampongngè dè' namaèlo tarimai Yèsus, saba' manessa senna'i mattengngangngi lao ri Yèrusalèm. 54 Ri wettunna ana'-ana' gurunna Yèsus, iyanaritu Yakobus sibawa Yohanès naisseng passalenna gau'èro, makkedani mennang, "Puwang, maèloki'ga Puwang, riyèllauwi apiè nonno polè ri langiè untu' pabbinasai sining tauwèwè?" 55 Gilinni Yèsus, nanacairiwi mennang. 56 Purairo laoni mennang ri kampong laingngè. 57 Wettunna Yèsus sibawa ana'-ana' gurun-Na patterui joppana, engka tau makkeda lao ri Yèsus, "Pa', maèloka maccowèriwi Bapa' kègi-kègi!" 58 Nappèbali Yèsus, "Asu ale'è mappunnai kalebbong, sibawa manu'-manu'è mappunnai sarang, iyakiya Ana'na Tolinoè dè' nappunnai onrong lèwu. " 59 Nakkeda Yèsus lao risèddiè tau laing, "Accowèno ri Iyya. " Iyakiya makkedai iyaro tauwè, "Pa', palalona riyolo' lisu untu' kuburu'i ambo'ku. " 60 Nappèbali Yèsus, "Leppessangngi siya tau matè kuburu'i taunna matè. Iyakiya iko laono namuwappallebbangengngi karèbaè makkedaè mappammulani Allataala mapparènta. " 61 Engkato tau laing makkeda, "Pa', maèloka maccowèriwi Bapa', iyakiya palaloka lisu riyolo' untu' massimang. " 62 Nakkeda Yèsus lao ri tauwèro, "Tau iya mappammulaènna maddakkala, nagiling limonri, dè' nasitinaja mancaji anggotana umma'na Allataala. "

Lukas 10

1 Purairo pilèsi Puwangngè pituppulo ana' guru, nainappa nasuro mennang tadduwa-duwa poddiyoloiwi lao ri tungke' kota sibawa onrong iya maèloè Nalokkai. 2 Adan-Na lao ri mennang, "Engngalang iya maèloè riyèngngala maèga, iyakiya parèngngala iya maèloè mèngngalai cèddè'mi. Rimakkuwannanaro, èllauno ri Punna dare'è kuwammengngi nakiring parèngngala untu' mèngngalai wassèlè' tanet-tanen-Na. 3 Nah, joppano! Usuroko pada-pada bimbala'è ri tengnga-tengngana asu ale'è. 4 Aja' mutiwi tase'-tase' iyarè'ga sèpu-sèpu passidekka, iyarè'ga sapatu. Aja' mulèppang ri tengnga laleng untu' mabbèrè selleng muwi lao ri niga-niga. 5 Rèkko muttama'ko risèddiè bola, powadai lebbi riyolo, 'Tennapodo salèwangengngi ri lalempolaèwè. ' 6 Rèkko kuwaro engka tau napoji damè, iyaro bèrè selleng damèmu tette'i matu ri alèmu; rèkko dè', gettengngi lisu iyaro bèrè sellemmu. 7 Onrono bawang risèddiè bola. Tarimai aga napatalangekko kuwaro, saba' tau majjamaè mappunnaiwi ha' tarimai sarona. Aja' mukalèlè-lèlè polè risèddiè bola lao ri bola laingngè. 8 Rèkko laoko risèddiè kota naritarimako kuwaro sibawa madècèng, anrèi aga ripatalangekko kuwaro. 9 Pajjappai sining tau iya malasaè ri kotaèro, sibawa birittangngi sining tauwè kuwaro, 'Dè'na namaitta nappammula matu Allataala mapparènta selaku Arung ri tengnga-tengngamu. ' 10 Iyakiya rèkko laoko risèddiè kota nadè' naritarimako kuwaro, assuko ri lalengngè namuwakkeda, 11 'Muwi awu kotamu iya engkaè maddekkè ri ajèta riyakkeppiketto selaku papparèngngerang lao ri iko. Iyakiya issengngi makkedaè macawè'ni wettunna Allataala mappummula mapparènta selaku Arung ri tengnga-tengngamu!' 12 Engngerangngi, ri Esso Kiyame' lebbi gampangngi riyaddampengeng tau Sodongngè ri Allataala naiya taunna kotaèro!" 13 "Cilakano iko Korazim! Sibawa cilakano iko, Bètsaida! Ebara'na sining anu makalallaingngè iya ripogau'è ri tengnga-tengngamuro purani ripogau' ri Tirus sibawa Sidon, pasti maittani sining tauwè kuwaro natoba' polè ri dosa-dosana mennang, sibawa pakè pakèyang mabbarata enrengngè taroiwi awu ulunna mennang. 14 Ri Esso Kiyame', sining tau Tirus-è sibawa Sidongngè lebbi gampangngi matu riyaddampengeng ri Allataala naiya iko. 15 Sibawa iko Kapernaum! Muwasengngiga ripakatanrèko lettu ri surugaè? Dè'! Mala riyabbèyakko matu ri ranakaè!" 16 Nanakkeda Yèsus lao ri ana'-ana' gurun-Na, "Tau iya mèngkalingaèkko, naèngkalinga-Ka. Tau iya sampèyangngèkko, nasampèyang tok-Ka. Sibawa tau iya sampèyangngèk-Ka, nasampèyang towi iya suroèk-Ka. " 17 Lisuni sibawa marennu senna' iyaro pituppuloè ana' guru. Nakkeda mennang, "Puwang, sining sètangngè tunru' ri idi rèkko riparèntai mennang ri laleng asenna Puwangngè!" 18 Nappèbali Yèsus, "Uwitai Ibillisi'è sempè polè ri langiè pada-pada billa'è. 19 Issenni! Pura Uwèrènno akuwasang kuwammengngi mullèi mallèjja'i ulaè sibawa dokkèngngè enrengngè lemmaiwi awatangenna sininna baliè, nadè' gaga sèuwa mullèi cilakaiko. 20 Namuni makkuwaro aja' mumarennu nasaba sining roh majaè tunru' ri iko. Lebbi kessing muwi akkèrennuko nasaba riyokii asemmu ri surugaè. " 21 Iyatoro wettuè namarennu Yèsus nasaba rikuwasaiwi ri Rohna Allataala. Makkedai Yèsus, "Ambo', Puwang iya makuwasaiyèngngi langiè sibawa linoè! Mattarima kasi'ka ri Iko nasaba iya manennaro Murahasiyakangngi polè ri tau iya maccaè sibawa mappangissengengngè, iyakiya Muwajjellokengngi lao risining tau iya dè'è namacca. Iyanaro pèsennangiwi atinna Ambo'. 22 Sininna sèuwa-sèuwaè pura nabbèrèyanni Ambo' lao ri Iyya. Dè' sèddi tau missengngi Ana'è, rilainnaè Ambo'è. Dè'to gaga missengngi Ambo'è rilainnaè Ana'è, sibawa lao risining tau iya maèloè nappaddissengeng Ana'è lao ri Ambo'è. " 23 Nagiling Yèsus lao ri ana'-ana' gurun-Na, nainappa lao ri mennang bawang makkedai, "Maupe'ko nasaba purani muwita iya muwitaè makkekkuwangngè. 24 Saba' èngngerangngi: Maèga nabi sibawa arung macinna mitai iya muwitaè makkekkuwangngè iyakiya dè' naitai mennang. Macinnai mennang mèngkalingai iya muwèngkalingaè makkekkuwangngèwè, iyakiya dè' naèngkalingai mennang. " 25 Namalluruna sèddi guru agama maèlo palaiwi siyo Yèsus. Makkutanai, "Bapa' Guru, aga harusu' upogau' kuwammengngi weddingngi ulolongeng atuwong tongengngè sibawa mannennungengngè?" 26 Nappèbali Yèsus, "Aga taroki ri laleng Kitta'è? Pèkkugi pallolongemmu passalenna gau'èro?" 27 Nappèbali iyaro tauwè, " 'Amasèiwi Puwang Allataalamu sitonget-tongeng atimmu, sibawa sitonget-tongeng nyawamu, sibawa sininna awatangemmu enrengngè sininna akkalemmu, ' sibawa 'Amasèiwi pada-padammu pada-pada muwamasèinna alèmu. ' " 28 Nakkeda Yèsus, "Tongeng pappèbalimmu, pogau'ni iyaro, namutuwo matu. " 29 Iyakiya iyaro guru agamaè maèloi pattongengngi alèna. Makkutanani, "Niga iyaro pada-padakku rupa tau?" 30 Nappèbali Yèsus, "Engka sèddi tau worowanè nonno polè ri Yèrusalèm lao ri Yèrikho. Ri tengnga laleng riluruiwi ri parampo'è, rirampasa'i sininna nappunnangiyè, ribarasa'i sitengnga matè, nainappa risalai ri lalengngè sibawa maladde' lona. 31 Nasitujuwangngi sèddi imang lalo towi ri lalengngè. Wettunna naita iyaro tauwè, lèssèni nainappa joppa matteru. 32 Makkuwatoro sèddiè tau Lèwi iya laloè kuwaro; wettunna naita iyaro tauwè, maddeppèni untu' parèssai. Iyakiya lèssè towi nainappa joppa matteru. 33 Iyakiya purairo, engka sèddi tau Samaria lalo kuwaro. Wettunna naita iyaro tauwè, tassinnau senna'ni atinna nasaba messèi. 34 Naddeppèrini iyaro tauwè nainappa napaccingi lona sibawa anggoro enrengngè naurai sibawa minnya', purairo nabebbe'ni iyaro lona. Nainappa napaènrè iyaro tauwè ri kaleddè'na, nanatiwii risèuwaè passanggarahang nanajampangiwi. 35 Pappa bajanana, malani duwa dowi pèra' nanawèrèngngi iyaro punna passanggarahangngè, nanakkeda, 'Jampangiwi, narèkko engka ongkoso'-ongkoso' laing, uwajapi matu rèkko lisuka kumaiyè. ' " 36 Nainappa natutu' Yèsus curitaèro sibawa pakkutanaèwè, "Polè ri iya tellu tauwèro, kègana manuru' pallolongemmu mattinda' selaku pada-padanna polè ri tau iya rirampo'èro?" 37 Nappèbali iyaro guru agama iya ritanaiyè, "Tau iya puraè tulungngi iyaro tauwè. " Nakkeda Yèsus, "Nah, laono namupogau' towi pada-padaèro!" 38 Nainappa Yèsus sibawa ana'-ana' gurun-Na patterui joppana, nalettu'na risèuwaè dèsa. Kuwaro engka sèddi makkunrai riyaseng Marta mobbii Alèna lao ri bolana. 39 Marta mappunnai padakkunrai riyaseng Maria. Iyaè Maria tudangngi riseddèna Puwang Yèsus mèngkalingai sining pappagguruwan-Na. 40 Iyakiya Marta malippu senna'i sibawa jama-jamang ri bolaè. Laoni ri Yèsus nakkeda, "Puwang, dè'ga Puwang tapaduliwi Maria naleppessakka majjama alè-alèku bawang? Suroi duwakka!" 41 Nappèbali Puwangngè, "Marta, Marta! Bata-batako sibawa malippuko pikkiri'i iyaè sibawa iyaro; 42 padahal iya pentingngè sèddi bawang. Na Maria pura napilèni iya makessingngè, iya dè'è nariyala matu polè ri alèna. "

Lukas 11

1 Risèuwaè esso, massempajangngi Yèsus risèuwaè onrong. Pajanana massempajang, sala sèddinna polè ri ana'-ana' gurun-Na makkeda, "Puwang, pagguru tokki massempajang pada-pada Yohanès paggurui ana'-ana' gurun-Na massempajang. " 2 Nakkeda Yèsus lao ri mennang, "Rèkko massempajakko, powadai makkuwaèwè, 'Ambo', Iko ritu Allataala iya Sèuwaè. Tennapodo risompa-Ko sibawa ripakalebbi. 3 Wèrèkki esso-esso inanrè iya tapparelluwangngè. 4 Addampengengngi dosa-dosata, saba' riyaddampengeng towi tungke' tau iya pasalaè ri idi. Sibawa aja' taleppessakki ateddèngeng ateppereng wettutta ricobai. ' " 5 Nakkeda Yèsus lao ri ana'-ana' gurun-Na, "Ebara'na engka sèddi polè ri yelle'mu lao ri bolana sellaona ri tengnga benniè, sibawa makkeda, 'Sellao, painrengika roti tellubbatu, 6 saba' sellaoku iya engkaè ri laleng allalengenna lèppangngi ri bolaè nadè' uwappunnai nanrè untu' alèna!' 7 Akkalarapanna sellao iya mulokkaiyèro makkeda makkuwaiyè polè ri lalempolana, 'Aja' musussaika! Taccala'ni tange'è sibawa matinrona sibawa ana'-ana'ku. Dè' uwullèi moto' sibawa mpèrèkko agi-agi. ' " 8 Nakkeda Yèsus patterui, "Napèkkugini? Makkeda-Ka, iyyè! Namuni iko iyanaritu sellaona, dè'to namaèlo moto' sibawa mpèrèkko agi-agi. Iyakiya nasaba dè' mumasiri untu' mèllau ri alèna matteru-teru, nanaoto'na matu sibawa mpèrèkko aga iya muwapparelluwangngè. 9 Jaji, makkeda-Ka lao ri iko: Ellauni, nariwèrèkko matu; sappai, namulolongengngi matu; getto'ni, naritimpakekko matu. 10 Nasaba tau iya mèllauwè natarimai matu; tau iya massappaè nalolongengngi matu, sibawa tau iya maggettoè, ritimpakengngi matu tange. 11 Engkaga ri yelle'mu ambo' iya mpèrèngngengngi ula ana'na rèkko mèllauwi balè? 12 Iyarè'ga mpèrèngngi dokkèng rèkko mèllauwi tello? 13 Namuni majako, muwisseng towi mpèrèngngi makessingngè lao ri ana'mu. Apalagi Ambo'è ri surugaè! Nabbèrèyangngi matu Roh-Na lao ri mennang iya mèllauwèngngi ri Alèna!" 14 Risèuwaè esso, Yèsus paddèsu'i sètangngè massu polè risèddiè tau pèpè. Massunana iyaro sètangngè, mammulani mabbicara iyaro tauwè. Maèga tau hèrang, 15 iyakiya engkato makkeda, "Naullèi paddèsu'i sètangngè, nasaba akuwasanna Bèèlzèbul, kapalana sining sètangngè. " 16 Engkato tau laing iya maèloè palaiwi siyo Yèsus, mèllauwi mennang sèuwa anu makalallaing selaku tanrang makkedaè polèi ri Allataala. 17 Iyakiya naissengngi Yèsus akkattana mennang. Nakkedana lao ri mennang, "Rèkko sèuwaè bangsa tabbagè-bagèi ri laleng golongang-golongangngè iya simusuè, iyaro wanuwaè dè' natahang. Na sèuwaè kaluwarga iya tabbagè-bagè sibawa simusui sèddiè sibawa laingngè, ancuru'i matu. 18 Makkuwatoro ri laleng akkarungenna sètangngè; rèkko sèddiè kalompo mallagai sibawa kalompo laingngè, maruttungngi matu iyaro akkarungengngè. Makkedako makkedaè Upaddèsu'i sètangngè nasaba akuwasanna Bèèlzèbul. 19 Rèkko makkuwaitu, nasibawang akuwasanna niga ana'-ana' gurummu paddèsu'i sining sètangngèro? Alèna ana'-ana' gurummu pabuttiwi ritu makkedaè pasalako! 20 Iyakiya Iyya, Upaddèsu'i sètangngè sibawa akuwasanna Allataala, na bettuwanna iyaro iyanaritu mappammulai Allataala mapparènta ri tengnga-tengngamu. 21 Rèkko sèddiè tau mawatang, massenjata sakke'i jagaiwi bolana, salama' manengngi matu appunnangenna. 22 Iyakiya rèkko sèddiè tau iya lebbi mawatangngè luruiwi sibawa caui, iyaro tau iya lebbi mawatangngè narampasa' manengngi matu senjata iya narennuwangngè punna bolaèro, nainappa nabagè-bagè sininna waramparanna. 23 Tau iya dè'è naccowè ri Iyya, sitonget-tongenna naèwa-Ka, na tau iya dè'è nabantu-Ka, sitonget-tongenna nasolangi jama-jamak-Ku!" 24 "Rèkko roh majaè nasalaiwi sèddiè tau, iyaro roh-è mattuliliwi ri onrong-ngonrong iya marakkoè untu' sappa onrong mappèsau, iyakiya dè'gaga nalolongeng. Rimakkuwannanaro, makkedai, 'Maèloka lisu ri bola iya puraè usalai!' 25 Wettunna lettu kuwaro, napolèini iyaro bolaè mapaccing sibawa taratoro'. 26 Nainappa lao sibawa tiwi pitu roh laing iya lebbi majaè polè ri alèna. Nainappa muttama' mennang ri laleng tauwèro naonro kuwaro. Angkanna atuwo-tuwonna iyaro tauwè lebbi majapi naiya pammulanna. " 27 Puranana Yèsus makkeda makkuwaro, engka sèddi makkunrai polè ri yelle'na tau maègaèro makkeda lao ri Yèsus, "Masennang tongeng makkunrai iya jajiyangngèk-Ko sibawa pasusuèk-Ko!" 28 Iyakiya mappèbaliwi Yèsus, "Lebbi masennappi tau iya mèngkalingaèngngi ada-adanna Allataala sibawa pajoppaèngngi!" 29 Wettunna sining tauwè mattulilingiwi Yèsus, napatteruni bicaran-Na, adan-Na, "Temmaka jana sining tauwè wettuèwè. Mèllauwi mennang anu makalallaingngè, iyakiya dè' nariwèrèng matu mennang muwi sèddi anu makalallaing, sangadinna anu makalallainna Nabi Yunus. 30 Pèkkugi Nabi Yunus sinrupai anu makalallaingngè lao risining tauwè ri kota Niniwè, makkuwatoro Ana'na Tolinoè mancajiwi matu sèuwa anu makalallaingngè untu' sining tauwè wettuèwè. 31 Ri Esso Kiyame', Arung makkunrainna wanuwa ri Yattang moto'i matu silaong sining tauwè wettuèwè, nanateppui mennang. Saba' untu' mèngkalingai pappagguruwanna Salomo iya maccaè, iyaro Arung makkunraiè mallalengngi mabèla senna' polè ri cappa'na linoè. Iyakiya kuwaè makkekkuwangngè engka iya lebbi battowaè naiya Salomo! 32 Ri Esso Kiyame', tuwoi matu pabbanuwana Niniwè silaong sining tauwè makkekkuwangngè, sibawa teppui mennang, saba' iyaro tau Niniwè toba'ni polè ri dosa-dosana wettunna Yunus makkatobba lao ri mennang. Iyakiya makkekkuwangngè kuwaè engka iya lebbi battowaè naiya Yunus!" 33 "Dè'gaga tau tunuwi pajjennangeng nappa nasubbu iyarè'ga natongko sibawa baku. Nataroi matu iyaro pajjennangengngè ri ajè pajjennangengngè, kuwammengngi tau iya muttama'è naitai tajanna. 34 Mataè iyanaritu lampunna watakkalè. Rèkko macakkai matammu, sininna watakkalèmu matajangngi. Iyakiya rèkko massalawui matammu, sininna watakkalèmu mancajiwi mapettakkape'. 35 Rimakkuwannanaro, atutuko, aja' nacakka iya engkaè ri alèmuro nancaji mapettang. 36 Rèkko sininna watakkalèmu macakkai, sibawa dè' namapettang muwi saisa', tentu sininna watakkalèmuro matajangngi pada-pada natappaè cahaya lampu. " 37 Pajanana Yèsus mabbicara, engka sèddi tau Farisi mobbii Alèna manrè ri bolana. Nalaona Yèsus manrè kuwaro. 38 Hèranni iyaro tau Farisiè mitai Yèsus manrè saba' dè' nabissaiwi liman-Na riyolo' situru peraturanna agamaè. 39 Rimakkuwannanaro makkedani Puwang Yèsus ri tau Farisièro, "Mèmeng iko sining tau Farisiè biyasana mupaccingiwi mangko'è sibawa pennè ri saliwenna bawang, iyakiya ri laleng alèmu penno sibawa apèddarang enrengngè ja. 40 Madonggoko! Tenniyaga Allataala mèbbui iyaro saliwengngè, pura mèbbu towi ri lalengngè? 41 Iya engkaè ri laleng mangko'mu sibawa pennèmuro, iyanaro harusu' muwabbèrèyang lao risining tau kasiyasiè. Caraènnaro nallalengi namapaccing maneng matu untu' iko. 42 Cilakano iko sining tau Farisiè! Wassèlè tanet-tanemmu padaènna èbara'na talasi sibawa inggu enrengngè rampa-rampa laingngè, muwèrèngngi tawa seppulona lao ri Allataala, iyakiya adèlèkengngè sibawa pammasè lao ri Allataala dè' mujampangiwi. Padahal iyaro sitongenna harusu' mupogau', temmallupaiwi laing-laingngètto. 43 Cilakano iko, sining tau Farisiè! Mupoji sining onrong malebbiè ri laleng bola assompangngè, sibawa mupoji ripakalebbi ri pasaè. 44 Cilakano iko! Pada-padako tampung iya dè'è mèsana, iya nalèjja'-lèjja'è tauwè dè' naissengngi. " 45 Sala sèddinna guru agama makkeda ri Yèsus, "Pa' Guru, Mupakatuna tokki sibawa ada-adaèro!" 46 Nappèbali Yèsus, "Cilaka tono iko guru-guru agamaè! Mutuntu'i gau'-gau' mawatangngè ri laleng mabbèrèmu peraturang-peraturang matane'è, iyakiya dè' mumaèlo tulungngi muwi cèddè lao ri tau iya pajoppaèngngi. 47 Cilakano iko! Muwèbburengngi tampung nabi-nabiè, iya riyunoè ri nènè-nènèmu. 48 Jaji iko muto mangakuiwi makkedaè musitujuiwi aga iya puraè napogau' nènè-nènèmu saba' mèmeng mennang mpunoi iyaro nabi-nabiè sibawa iko ritu mèbbui tampunna. 49 Iyanaro saba'na nakkeda Apanrènna Allataala, 'Maèlo-Ka kiring lao ri mennang nabi-nabi sibawa sining suro-Ku; sibagiyang nauno matu sibawa sibagiyang nacalla!' 50 Napogau'i Allataala iyaro kuwammengngi narihukkung sining tauwè wettuèwè nasaba abbunowang iya napogau'è lao ri sininna nabiè sipongenna ripancaji linoè, 51 mappammulai riyunona Habèl lettu riyunona Zakharia, iya kajajiyangngè ri pallawangenna mèzbaè sibawa Bolana Puwangngè. Ateppe'no: Sining tauwè wettuèwè pasti rihukkungngi nasaba iya manennaro. 52 Cilakano iko, guru-guru agamaè! Goncinna untu' timpa'i tange'na pangissengengngè ritaroi ri iko, iyakiya dè' mumaèlo muttama' ri laleng untu' sappai iyaro pangissengengngè. Sibalè'na mulawa-lawaiwi sining tau iya makkuragaè muttama' ri lalemmu!" 53 Wettunna Yèsus nasalai iyaro onrongngè, guru-guru agamaè sibawa sining tau Farisiè nacella senna'i Yèsus. Mammulani mennang makkuragaiwi Yèsus kuwammengngi namaèlo mabbicara maèga passaleng. 54 Nanapènessai towi mennang madècèd-dècèng untu' tikkengngi iya tappasalaè Napowada.

Lukas 12

1 Massebbu-sebbu tau siredde-redde angkanna engka rilèjja-lèjja ajèna. Ri wettu makkapulunna mupa iyaro tauwè, makkedani Yèsus lao ri ana'-ana' gurun-Na, "Atutuko lao ri raginna tau Farisiè, akkatta-Ku, amunapèkenna mennang. 2 Dè'gaga tassubbu dè' napaita matu, sibawa dè'gaga rirahasiyakang iya dè'è naribongkara' matu. 3 Iya mupowadaè ri wenniè, riyèngkalingai matu ri essoè; sibawa iya Muwabbicikengngè ri daucculinna tauwè ri laleng bili' tattutu'è, riyappallebbangengngi matu silowang-lowanna. " 4 "Engngerangngi, sellao-sellao-Ku! Aja' mumètau lao ri mennang iya mpunoèngngi watakkalè iyakiya dè' naullèi mappogau' lebbi naiyaro. 5 Madècèngengngi Upaitakko niga harusu' muwètauri. Etauko ri Allataala! Saba' purana mabbuno, makuwasa towi buwangngi ri laleng ranakaè! Ateppe'no, Alèna ritu harusu' muwètauri. 6 Limakkaju dongi ribalu' duwa dowi iya kaminang baiccu'è. Namuni makkuwaro dè' sèddi nallupai Allataala. 7 Gemme' ri ulummu pura ribilang manetto, rimakkuwannanaro aja' mumètau; lebbi mangke'ko naiya sining dongièro!" 8 "Engngerangngi madècèd-dècèng: Tau iya mangakuè ri yolona tau maègaè makkedaè ana' guruk-Kui, riyangakui towi matu ri Ana'na Tolinoè ri yolona sining malaèka'na Allataala. 9 Iyakiya tau iya massakkaè ri yolona tau maègaè makkedaè ana' guruk-Kui, riyassakkareng towi matu ri Ana'na Tolinoè ri yolona sining malaèka'na Allataala. 10 Rèkko engka napowada tauwè iya mèwaèngngi Ana'na Tolinoè, weddingngi riyaddampengeng; iyakiya rèkko napakatunai Rohna Allataala, dè' nawedding riyaddampengeng. 11 Rèkko ritiwiko risining bola assompangngè untu' riadèlèki ri yolona pamarèntaè iyarè'ga tomakuwasaè, aja' mubata-bata passalenna pèkkugiko harusu' mèwaiwi alèmu iyarè'ga passalenna aga harusu' mupowada. 12 Saba' aga iya harusu'è mupowadaro nappagguruwangngi matu Rohna Allataala ri iko ri wettunna. " 13 Engka sèddi tau polè ri yelle'na tau maègaèro makkeda ri Yèsus, "Bapa' Guru, cobasai Bapa' suroi silessurekku mpèrèkka sibagiyang polè ri waramparang nasalaiyè ambo'ta. " 14 Nappèbali Yèsus, "Eh saudara, niga makka-Ka mancaji haking iyarè'ga pabbagè mana ri yelle'ta sipadduwa?" 15 Nainappa lao ri sininna tauwè iya engkaè kuwaro makkedai Yèsus, "Atutuko sibawa atike'ko, aja' namumangowa. Saba' atuwonna rupa tauwè dè' nataggattung polè ri asugirenna, namuni tabbollompollongngi waramparanna. " 16 Nainappa nacuritani Yèsus iyaè pakkalarapangngè, "Engka sèddi tau sugi. Iya mappunnaiyè tana iya mappapolè maèga wassèlè'. 17 Iyaro tau sugiè mamulani mappikkiri' ri laleng atinna, 'Dè'na gaga onronna wassèlè tanaku. Agana akkalekku makkekkuwangngè?' 18 Nainappa mappikkiri'si sibawa makkeda lao ri alèna, 'Nah, engka akkalekku; maèloka massuro ruttungngi sining gudakku nainappa upatettong iya lebbi battowaè. Kuwaniro matu utaro sininna gandokku sibawa barab-barakku laingngè. 19 Nainappaka makkeda lao ri alèku: Maupe'ko! Sininna iya makessingngè, uwappunnangini dè'na matu nacappu mattaut-taung ittana. Appèsauno makkekkuwangngè! Manrè mènunno sibawa pèneddingini atuwommu!' 20 Iyakiya makkedai Allataala lao ri tauwèro, 'Eh donggo! Iyato wenniè mumatè matu, na nigana matu lolongengngi sininna asugireng iya puraè mupaddeppungengngi alèmu?' 21 Makkuwaniro jajinna tungke' tau iya makkuragaè mancaji sugi untu' alèna, iyakiya dè' nakkuraga mancaji sugi ri matanna Allataala. " 22 Nakkeda Yèsus lao ri ana'-ana' gurun-Na, "Iyanaro saba'na Uwakkeda, 'Aja' mubata-bata passalenna atuwommu, iyanaritu aga iya maèloè muwanrè, iyarè'ga iya maèloè mupakè. ' 23 Atuwongngè iyanaritu lebbiwi naiya anrè, sibawa watakkalè lebbiwi naiya pakèyangngè. 24 Pènessaiwi kao-kaoè! Dè' nattaneng mennang, dè' naèngngala, dè'to nappunnai gudang iyarè'ga lappo. Iyakiya ripiyarai mennang ri Allataala! Iko lebbi mangke'ko naiya manu'-manu'èro! 25 Nigana ri yelle'mu iya ri laleng abata-batanna mullè palampèriwi umuru'na namuni cèddè? 26 Rèkko iyaro gau' baiccu'è bawang dè'na mullèi pogau'i, magi mubata-bata passalenna gau'-gau' laingngè? 27 Pènessaiwi pèkkugi bunga-bunga bakungngè tuwo; iyaro bunga-bungaè dè' najjama, dè'to natennung. Iyakiya namuni Arung Salomo iya sugi makkuwaèro dè'to napakè pakèyang iya siggelloè bunga-bungaèro! 28 Wellaè ri padangngè tuwoi essoèwè napappa bajana cappui ritunu. Iyakiya Allataala bèlo-bèloiwi iyaro wellaè magello makkuwaro! Apalagi iko! Iyakiya iko makurang teppe'ko! 29 Jaji, aja' mubata-bata iyarè'ga bengnga passalenna aga maèlo muwanrè sibawa muwènung. 30 Gau'-gau' pada-padaèro nalellungngi tau iya dè'è naissengngi Allataala. Padahal naisseng Ambo'mu makkedaè muwapparelluwang manengngi iyaro. 31 Iyakiya harusu'ko makkuraga kuwammengngi naparèntai Allataala atuwommu, naiyaro laingngè nawèrèng tokko matu Allataala. " 32 "Iko iya cèddè'mi jumellamu, aja' mumètau! Saba' masennang Ambo'mu mpèrèkko barakka polè ri Apparèntan-Na. 33 Balu'ni appunnangemmu, namuwèrèngngi ellinna tau kasiyasiè. Ebburengngi alèmu tase'-tase' iya dè'è nawedding malaung, iyanaritu waramparang ritaroè ri surugaè. Iyaro waramparangngè dè' naullèi teddèng nasaba dè' naullèi pangaè malai sibawa dè' naullèi solangi karat. 34 Saba' kègi waramparammu, kuwa towitu atimmu!" 35 "Jaga-jagako moloiwi tungke' gau'. Harusu'ko tuli sadiya mappakèyang sibawa pura ripalluwa pajjennangemmu, 36 pada-pada sining pattumani iya sadiyaè tajengngi puwanna lisu polè ri abottingengngè. Rèkko lisui iyaro puwangngè sibawa getto'i tange'è, masitta'i matu mennang timpa'i tange'è. 37 Temmaka upe'na sining pattumani iya ripolèiyè mattajeng ri wettu polèna puwanna. Ateppe'no: iyaro puwanna sadiya-sadiyani matu nanasuroi sining pattumaninnaro tudang, nanatumaningiwi mennang. 38 Temmaka upe'na sining pattumanièro rèkko ripolèiwi mennang ri puwanna sadiya-sadiya mattajeng, namuni polèi ri tengnga benniè iyarè'ga lebbi tengnge'pi naiyaro! 39 Engngerangngi iyaè! Akkalarapanna naissengngi punna bolaè tettè siyaga napolè pangaè, jagai matu kuwammengngi dè' nauttama pangaè ri lalempolaè. 40 Rimakkuwannanaro harusu' tokko sadiya-sadiya, nasaba polèi matu Ana'na Tolinoè ri wettu dè'è musenna-sennai. " 41 Nakkutana Pètrus, "Puwang, Mupattujugi ri idi Puwang iyaro pappagguruwangngè iyarè'ga lao ri sininna tauwè?" 42 Nappèbali Puwangngè, "Niga pattumani iya matinuluè sibawa maccaè angkanna riyakka ri puwanna mancaji kapala lao risining pattumani laingngè kuwammengngi nawèrèngngi nanrè ri wettunna? 43 Temmaka senna'na pattumanièro rèkko lisui puwanna, naripolèiwi pogau'i jama-jamanna! 44 Ateppe'no: Iyaro puwanna nappaddettangengngi matu sininna waramparanna lao ri pattumanièro. 45 Iyakiya rèkko makkedai iyaro pattumaniè ri laleng atinna, 'Maitta mupa nappa lisu puwakku, ' nabarasa'i sininna pattumaniè enrengngè manrè mènungngi gangka mabo', 46 nanalisu matu puwanna ri esso sibawa wettu iya dè'è nasenna-sennai. Nariajara' tongeng matu iyaro pattumaniè masero senna' ri puwanna enrengngè ripappada-padai totona sining tau iya dè'è namatinulu ri Allataala. 47 Pattumani iya missengngèngngi èlona puwanna, iyakiya dè' nasadiya-sadiya sibawa dè' napogau'i èlona puwannaro, ribarasa'i matu sibawa maladde'. 48 Iyakiya pattumani iya dè'è naissengngi èlona puwanna, nanapogau'i iya salaè angkanna harusu'i ribarasa', ribarasa'i matu sibawa maladde'. Saba' tau iya maègaè pura riwèrèngngi, maèga towi rituntukengngi matu polè ri alèna. Sibawa tau puraè ripaddettangi maèga, maèga towi rituntu' matu polè ri alèna. " 49 "Polè-Ka untu' paompo anrè api ri linoè. Temmaka kessinna rèkko malluwa'ni apinna! 50 Engka mupa anrasa-rasang masero iya harusu'è Ujoppai. Namasussa senna' atik-Ku riwettu dè'napa nakajajiyang. 51 Muwaseggi polè-Ka untu' tiwi adamèngeng ri linoèwè? Dè', tenniya adamèngeng sangadinna appangèwangeng. 52 Mappammulai makkekkuwangngèwè, kaluwarga iya engkaè lima tau sièwai matu, tellu sièwa duwa, iyarè'ga duwa sièwa tellu. 53 Ambo'è mèwai matu ana' worowanè sibawa ana' worowanè mèwai matu ambo'na. Indo'è mèwai ana'na makkunraiè sibawa ana' makkunraiè mèwai indo'na. Matuwa makkunraiè mèwai mènèttu makkunrainna, sibawa mènèttu makkunraiè mèwai matu matuwa makkunrainna. " 54 Makkeda towi Yèsus lao ri tau maègaè, "Rèkko muwitai mènrè ellungngè ri yajang, matteruko makkeda, 'Maèloi bosi. ' Na bosi tongengngi. 55 Rèkko mupèneddingiwi angingngè polè ri yattangngi, makkedako, 'Maèloi mapella. ' Na mapella tongengngi. 56 Mupoji mabbonga-bonga! Mullè pattujuiwi wettu bosiè iyarè'ga pellaè ri laleng makkitamu ri langiè sibawa ri linoè. Magi tanra-tanranna esso kiyame' dè' mullèi pèttujuiwi?" 57 "Magi natenniya alèmu pettuiwi aga tongengngè? 58 Rèkko engka tau mapparapekekko ri pangadilangngè, makkuragako siullè-ullèmu untu' puraiwi iyaro parakaraè sibawa tauwèro ri wettummu mattengnga laleng mupa. Rèkko dè', nassarènrèngekko matu lao ri yolona hakingngè, na hakingngè mabbèrèyakko matu lao ri polisiè, na polisiè puttama'ko ri laleng tarungkuè. 59 Ateppe'no! Dè' mumassu matu polè ri tarungkuè riwettu dè'napa muwajai iya ridendangengngèkko. "

Lukas 13

1 Iyaro wettuè engka tau curitangngi Yèsus passalenna siyagangngarè tau Galilèa riyuno ri Pilatus, wettunna mennang makkasuwiyangeng akkarobangeng lao ri Allataala. 2 Naèngkalingana curitaèro, makkedani Yèsus, "Nasaba iyaro sining tau Galilèaè riyuno makkuwairo, muwasengngiga iyanaro buttinna mennang lebbi madosai naiya maneng tau Galilèa laingngè? 3 Dè' sises-siseng! Iyakiya èngngerangngi: Rèkko dè' mutoba' polè ri dosa-dosamu, matè maneng tokko matu pada-pada mennang. 4 Pèkkugi towi seppulo aruwa tau iya matè ri Siloam, wettunna nageppa manara mennang? Muwasengngiga iyaro mappaitangngi lebbi madosai mennang naiya sininna tau laingngè iya monroè ri Yèrusalèm? 5 Dè' sises-siseng! Siseppi Upowada: Rèkko dè' mutoba' polè ri dosa-dosamu, matè maneng tokko matu pada-pada mennang. " 6 Purairo nacurita towi Yèsus pakkalarapangngèwè, "Engka sèddi tau mappunnai pong ara ri dare anggoro'na. Risèuwaè esso laoni sappa buwa ara ri pong ngajuèro, iyakiya dè'gaga nalolongeng muwi sibatu. 7 Jaji, makkedai lao ri paddare'na, 'Itai, telluttaunni polèka sappa buwa ara ri pong araèwè, iyakiya dè'gaga ulolongeng muwi sibatu. Tubbang bawanni pong araèro! Paccappu bawammi anrè polè ri tanaè!' 8 Iyakiya mappèbaliwi iyaro paddare'è, 'Leppessanni tuwo taungngèppaè, Puwang. Maèloka bèngkungngi tanaè mattulilingiyèngngi sibawa pupu'i. 9 Ajakkè mabbuwai matu taung mangoloè. Iyakiya rèkko dè', weddinni Puwang tassuro tubbang. ' " 10 Risèuwaè esso Saba', mappaggurui Yèsus risèuwaè bola assompang. 11 Kuwaro engka makkunrai iya seppuloènna aruwa taunna malasa, nasaba engka roh maja ri laleng alèna. Iyaro makkunraiè bukku'ni sibawa dè' sisenna naullèi tettong lempu. 12 Wettunna Yèsus mitai, gorani lao ri makkunraièro, "Indo', leppe'no polè ri lasamu!" 13 Nainappa napalènne limanna Yèsus ri yasè'na makkunraièro, na iyatoro wettuè natettong lempu nanapojiwi Allataala. 14 Macaini iyaro kapalana bola assompangngè, nasaba mappajjappai Yèsus ri esso Saba'è, rimakkuwannanaro makkedai lao risining tauwè, "Engka enneng essona untu' majjama; polèno ri esso-essoèro untu' mappajjappa, aja' na ri esso Saba'è!" 15 Nappèbali Puwangngè, "Munapè'ko iko! Ri esso Saba'è sininna tauwè paleppe'i sapinna iyarè'ga kaleddè'na polè ri wakkèna sibawa natiwii massu untu' paènungngi. 16 Makkekkuwangngè engka kuwaè sèddi makkunrai wija-wijanna Abraham, iya seppuloènna aruwa taung ittana risiyo ri Ibillisi'. Dè'ga nawedding ripaleppe' polè ri passiyonaro ri esso Saba'è?" 17 Iyaro pappèbalinna Yèsus pakasiri senna'i sining balinna Yèsus; iyakiya sininna tau laingngè masennangngi mitai anu makalallaingngè iya napogau'è Yèsus. 18 Nakkutana Yèsus, "Rèkko mapparèntai Allataala, pèkkugi keadaanna? Aga wedding Upappadaiyangngi? 19 Keadaanna pada-pada pakkalarapang mangoloèwè. Sèddi batu sawi nalai sèddiè tau nainappa nataneng ri dare'na. Iyaro batu sawi-sawiè tuwoi namancaji pong ngaju, naèbbuna sarang manu'-manu'è ri takkè-takkèna pong ngajuèro. " 20 Siseppi Yèsus makkutana, "Rèkko mapparèntai Allataala, agana wedding Upappadaiyangngi keadaana? 21 Keadaanna pada-padai ragiè iya nalaè sèddiè makkunrai nainappa napasilama patappulo liter labbu, angkanna sawè maneng. " 22 Ri laleng allalengenna Yèsus lao ri Yèrusalèm laloi ri kota-kotaè sibawa ri kampong-kampongngè nanappagguruto. 23 Naengkana tau makkutana ri Alèna, "Pa', cèddè'miga bawang tau ripassalama' matu?" Nappèbali Yèsus, 24 "Akkuragako muttama' lalo ri tange' macipiè. Saba' èngngerangngi! Maèga tau makkuraga muttama' iyakiya dè' naullèi. 25 Wettunna moto punna bolaè sibawa nasului tange'na, tettokko ri saliweng namumammula maggetto-getto sibawa makkeda, 'Puwang, timpakekki tange!' Nappèbali matu iyaro Puwangngè, 'Dè' uwissekko, polè kègao!' 26 Namumappèbali matu, 'Puraki manrè mènung sibawa Puwang, sibawa pura towi Puwang mappagguru risining lalenna kotata!' 27 Iyakiya makkedai matu iyaro Puwangngè, 'Dè' uwissekko polè kègao. Addèsu'no, iko pogau'èngngi majaè!' 28 Ri wettu muwitana Abraham, Ishak sibawa Yakub enrengngè iya maneng nabi-nabiè mariyo-riyo ri laleng Lino Barunna Allataala, teriko matu sibawa manrasa-rasa nasaba rirukkako massu. 29 Pada polèi matu sining tauwè ri alau sibawa ri yajang, manorang sibawa yattang, enrengngè mariyo-riyo matu ri laleng Lino Barunna Allataala. 30 Sitongenna, engka tau poddimonri mancaji matu pammulang, na engka tau pammulang mancajiwi matu poddimonri. " 31 Iyatoro wettuè, engka siyagangngarè tau Farisi lao ri Yèsus sibawa makkeda, "Aja' muwonro kuwaè! Laoko ri onrong laingngè, saba' maèloi Hèrodès mpuno-Ko. " 32 Nappèbali Yèsus, "Laono namupowadangngi tau iya dè'è nakkègunaro, 'Iyaè essoè sibawa baja upaddèsu'i sètangngè sibawa pajjappai tau malasaè, iyakiya ri esso matelluè maèlo-Ka pattèpui jama-jamak-Ku. ' 33 Namuni makkuwaro harusu'-Ka patterui joppa-Ku iyaè essoè, baja sibawa sangadi, saba' maja sèddiè nabi riyuno ri saliwenna Yèrusalèm. 34 Yèrusalèm! Yèrusalèm! Muwunoi nabi-nabiè! Mugenrungiwi batu sining surona Allataala gangka matè! Wèkkasiyagani macinna-Ka paddeppungengngi sininna pabbanuwamu pada-pada indo' manu'è karokongiwi ana'-ana'na ri yawana pannina, iyakiya dè' mumaèlo! 35 Rimakkuwannanaro dè'na namaèlo Allataala sibawakko. Issenni, mappammulai makkekkuwangngè dè'na muwita-Ka matu, narapiko matu makkeda, 'Ribarakkakiwi Alèna iya polè ri laleng asenna Puwangngè. ' "

Lukas 14

1 Risèuwaè esso Saba' laowi Yèsus manrè ri bolana sèddiè tomariyolona tau Farisiè. Naripènessaina tonget-tongeng Yèsus kuwaro risining tauwè. 2 Napolèna ri Yèsus sèddi tau iya malasa boro-boroè ajèna sibawa limanna. 3 Nakkutanana Yèsus lao ri guru-guru agamaè sibawa sining tau Farisiè iya engkaè kuwaro, "Manuru' hukkunna agamata, weddikki'ga pajjappai tauwè ri esso Saba'è iyarè'ga dè'?" 4 Mammekko bawammi guru-guru agamaè sibawa sining tau Farisiè. Nainappa naobbi Yèsus iyaro tauwè nanapajjappai, nainappa nasuro lao. 5 Purairo makkedani Yèsus lao risining tauwè, "Akkalarapanna engka sèddi tau polè ri yelle'mu mappunnai sèddi ana' iyarè'ga sikaju saping iya sempè'è ri bujungngè ri esso Saba'è, dè'ga mumasitta gettengngi massu iyaro ana'è iyarè'ga sapingngè ri iyatoro essoè?" 6 Iyakiya dè' sèddi tau mullèi baliwi Yèsus passalenna gau'èro. 7 Naitai Yèsus engka sining topolè iya pilèèngngi sining onrong iya kaminang makessingngè. Rimakkuwannanaro nawèrènni iyaè pappagguruwangngè lao ri iya maneng mennang. 8 "Rèkko riundakko ri pèsta abottingengngè, aja' mulao tudang ri kadèra malebbiè. Saba' ajakkè engka tau laing iya lebbi pentingngè naiya iko iya riundangngètto, 9 angkanna punna bola iya puraè mundang duwakoro, tarapassai lao ri iko nakkeda, 'Taddampengekka, iyaè onrongngè pura ripassadiyangengngi iyaro topolè. ' Na tarapassano sibawa masiri senna' tudang ri onrong kaminang mariyawaè. 10 Rimakkuwannanaro, rèkko riundakko, pilèi onrong iya kaminang marimonriè, kuwammengngi napolè punna bolaè sibawa makkeda ri iko, 'Sellao, kumaiyè tatudang ri onrong iya lebbi makessingngè. ' Narimakkuwannanaro ripakalebbiko matu ri yolona sininna topolè iya laingngè. 11 Saba' tungke' tau iya pakatanrèngngi alèna ripakariyawai matu, iyakiya iya pakariyawaèngngi alèna ripakatanrèi matu. " 12 Nakkeda Yèsus lao ri punna bolaè, "Rèkko muwobbii tauwè manrè esso iyarè'ga manrè wenni, aja' muwobbii sellaomu iyarè'ga silessuremmu, iyarè'ga sumpulolomu, iyarè'ga bali bolamu iya sugiè. Saba' naobbi tokko matu, narimakkuwannanaro lolongekko pamale' polè ri pangkaukemmuro. 13 Jaji rèkko mappèstako, undangngi tau kasiyasiè, tau sala-salangngè, tau pèso'è sibawa tau butaè. 14 Ribarakkakiko matu, saba' iyaro sining tauwè dè' naullèi mpale'i akessingemmu. Allataala matu mpale'i akessingemmu ri wettu ripatuwona paimeng polè ri amatèngngè sining tau makessingngè. " 15 Wettunna sala sèddinna iya sisamaè manrè kuwaro naèngkalinga adanna Yèsus, makkedani, "Maupe' senna'i tau iya manrè matu sisama Allataala rèkko polèi selaku Arung!" 16 Iyakiya makkedai Yèsus lao ri tauwèro, "Sèuwa wettu engka sèddi tau mappèsta marowa sibawa naundanna maèga tau. 17 Narapinana wettunna ripammulai pestaèro, iyaro tauwè nasuroni pattumaninna lao risining naundangngè sibawa makkeda, 'Laoni', saba' sadiya manenni!' 18 Iyakiya sininna mennang, tassèdi-sèddi mèllau addampeng. Iya pammulangngè makkedai lao ri pattumanièro, 'Silalona mellika tana, naparelluka lao parèssai. Taddampengekka. ' 19 Iya laingngè makkedai, 'Silaloku melli limangngajuwa saping, namaèloka cobai iyaro sining sapingngè. Taddampengekka. ' 20 Iya laingngèssi makkedai, 'Silaloku botting, rimakkuwannanaro dè' udapii lao. ' 21 Nalisuna iyaro pattumaniè nanapowadangngi punna pèstaèro. Namacai senna'na Puwannaro, nanakkeda lao ri pattumaninna, 'Apperi-perino namulao risining lalengngè sibawa loro-loronna kotaè. Tiwii lao mai tau kasiyasiè, tau sala-salangngè, tau butaè sibawa tau pèso'è. ' 22 Nainappa makkeda iyaro pattumaniè, 'Puwang, purani ripogau' parènta Puwang, iyakiya maèga mupa onrong. ' 23 Nakkeda Puwannaro, 'Laono ri watattana-watattanaè sibawa lorong-lorongngè ri saliweng kota, namudessa'i sining tauwè napolè, kuwammengngi napenno bolaku. 24 Engngerangngi! Dè' sèddi tau polè ri yelle'na sining undangeng puraè riundang pèneddingiwi matu nanrèna pèstakuè!' " 25 Maèga tau maccowè joppa silaong Yèsus. Nagiling Yèsus sibawa makkeda lao ri mennang, 26 "Rèkko polèi tauwè ri Iyya, iyakiya lebbi namasèiwi indo'na, ambo'na, bainèna, ana'-ana'na, silessu-silessurenna, mala alènato, dè' nawedding mancaji ana' guruk-Ku. 27 Tau iya dè'è namaèlo mèssangngi sallina sibawa maccowèri-Ka, dè' naullèi mancaji ana' guruk-Ku. 28 Rèkko engka sèddi polè ri iko maèlo patettong sèddi manara, tentu tudangngi matu riyolo' bilangngi ongkoso'na kuwammengngi naissengngi genne' muga dowina untu' pattepui iyaro manaraè iyarè'ga dè'. 29 Saba' rèkko dè' naullèi pattèpui, padahal purani riyèbbu pandamenna, sininna tau mitaèngngi jama-jamanna cawa-cawaiwi matu. 30 Makkedai matu mennang, 'Eh, mappatettongngi tauwè iyakiya dè' naullèi pattèpui!' 31 Rèkko sèddiè arung iya mappunnaiyè seppulo sebbu tentara maèlo mammusu sibawa arung laingngè iya mappunnaiyè duwappulo lima sebbu tentara, tentu iyaro arungngè tudangngi pasitimbangngi riyolo', genne' muwaga awatangenna untu' mèwai iyaro balinna. 32 Rèkko naissengngi makkedaè dè' nacuku' awatangenna, tentu ri wettu mabèlana mupa iyaro balinna, kiringngi matu suro untu' mèllauwi sidamè. " 33 Paccappurenna Yèsus makkedai, "Makkuwatoro iko. Dè' sèddi polè ri iko mullèi mancaji ana' guruk-Ku, rèkko dè' nappèsonangngi sini-sininnaè. " 34 "Iyaro pejjè' makessing, iyakiya rèkko makawai, weddigga ripejjèi paimeng? 35 Dè'na gaga gunana, muwi untu' dare'è iyarè'ga untu' pappakacommo. Jaji riyabbèyang bawang. Rèkko mappunnaiko daucculing, èngkalingai!"

Lukas 15

1 Risèuwaè esso, maèga passinge' sima sibawa sining tau iya riyangga' dè'è namakessing ri masaraka'è, polè mèngkalingai Yèsus. 2 Sining tau Farisiè sibawa guru-guru agamaè mammulani mannoko'-noko'. Makkedai mennang, "Cih, iyaè tauwè natarimai sining tauwè iya dè'è namakessing sibawa mala manrèi sisama mennang!" 3 Rimakkuwannanaro nacuritai Yèsus pakkalarapangngèwè lao ri mennang, 4 "Akkalarapanna engka sèddi ri yelle'mu mappunnai sèratu bimbala', nateddèng sikaju -- aga napogau' matu? Pasti nasalaiwi matu iyaro asèraè pulona asèra kajunna ri padangngè, nalao sappai iyaro teddèngngè gangkanna nalolongeng. 5 Narèkko nalolongenni paimeng iyaro bimbala'è, makkumani senna'na angkanna naèssanni iyaro bimbala'è ri salangkanna, 6 nanatiwii lisu. Nainappa naobbi sining sellaona sibawa bali-bali bolana, nanakkeda, 'Laono mai tamariyo-riyo. Bimbala'ku iya teddèngngè, ulolongenni paimeng!' 7 Nah, makkuwaniro ri surugaè, engka ariyo-riyong iya lebbi battowaè nasaba toba'na sèddiè tau madosa, naiya lao ri asèraè pulona asèra tau iya makessingngè dè'è naparellu toba'. " 8 "Iyarè'ga èbara'na engka sèddi makkunrai mappunnai seppulo dowi pèra', nateddèng sèddi -- aga napogau'? Napalluwa'i pajjennangengngè sibawa naseringngi bolana enrengngè massappai kègi-kègi narapi nalolongeng iyaro dowiè. 9 Ri wettu nalolongenna iyaro dowiè, naobbini sellao-sellaona enrengngè bali-bali bolana, nanakkeda, 'Marennu senna'ka ulolongenni paimeng dowiku iya teddèngngè. Laono mai tamariyo-riyo!' 10 Makkuwatoniro malaèka'na Allataala marennui rèkko engka sèddi tau maja toba' polè ri dosa-dosana. Ateppe'no!" 11 Nanakkedasi Yèsus, "Engka sèddi ambo' mappunnai duwa ana' worowanè. 12 Makkedai maloloè lao ri ambo'na, 'Ambo', wèrèkka makkekkuwangngèwè attawangekku polè ri asugiretta!' Nanabagèni ambo'na iyaro asugirenna ri iya duwa ana'na. 13 Siyagangngarè esso ri munrinna iyaro ana' maloloè nabalu'ni mana attawangenna nanalao ri wanuwa iya mabèlaè. Nakkuwanaro nallabo-labowang dowina sibawa massennas-sennang. 14 Cappu manennana dowina, polèni akkadèreng maseroè ri wanuwaèro, angkanna mammulani mappeddi-peddi. 15 Nalaona majjama risèddiè pabbanuwa kuwaro, iya suroèngngi lao ri dare'è monrowangngi bawinna. 16 Namakkuwa mani lupuna angkanna macinnani lisekiwi babuwana sibawa nanrèna sining bawièro. Namuni makkuwaro dè' sèddi tau mpèrèngngi inanrè. 17 Angkanna mainge'ni nakkeda, 'Sining tau iya majjamaè ri ambo'ku tabbollompollong inanrèna, na iyya kuwaè mawèka matè temmanrè! 18 Maèloka joppa lao ri ambo'ku sibawa makkeda ri alèna: Ambo', madosaka lao ri Allataala sibawa ri Ambo'. 19 Dè'na nasitinajaka riteppu ana'na Ambo'. Angga'ni sèddi pajjamana Ambo'. ' 20 Najoppana lisu ri ambo'na. Mabèla mupi polè ri bolaè, riitani ri ambo'na. Nalarina ambo'na lao mèwai sita, nanakaddaowi sibawa nabauwi. 21 Nanakkeda iyaro ana'è, 'Ambo', madosaka lao ri Allataala sibawa ri Ambo'. Dè'na nasitinajana riyobbika ana'na Ambo'. ' 22 Iyakiya ambo'na naobbii sining pattumaninna namakkeda, 'Asitta'ko! Alai pakèyang kaminang magelloè namupappakèngengngi. Pasangiwi ciccing ri jarinna, sibawa sapatu ri ajèna. 23 Purairo alako ana' saping macommo'è namugèrèi. Maèloki manrèi sibawa mariyo-riyo. 24 Saba' iyaè ana'ku matèni, namakkekkuwangngè tuwosi; teddènni, namakkekkuwangngè rilolongenni paimeng. ' Nappammulana mennang mappèsta. 25 Na iyaro wettuè, ana' macowana engkai ri dare'è. Wettunna lisu sibawa lettu ri seddè bolaè, naèngkalingani oni-oniè sibawa sèrè-sèrè. 26 Naobbini sala sèddinna polè risining pattumaninna, nanakkutana, 'Engka aga ri bolaè?' 27 Nappèbali iyaro pattumaniè, 'Anritta Puwang lisu! Na ambo'ta Puwang pura massurowang gèrè ana' saping macommo'è, saba' nalolongenni ana'na paimeng ri laleng keadaang salama'!' 28 Macai senna'ni iyaro ana' macowaè, angkanna dè' namaèlo muttama' ri bolaè. Namassuna ambo'na palècèi muttama'. 29 Iyakiya makkedai, 'Mattaut-taunna ittana majjama gangka ullèku untu' Ambo'. Dè' naengka uwèwai parèntana Ambo'. Na aga tawèrèkka Ambo'? Muwi sikaju bèmbè dè'to naengka tawèrèkka Ambo' untu' mappèsta sibawa sellao-sellaoku! 30 Iyaro ana'na ambo' purani napaccappu asugirenna Ambo' sibawa makkunrai cakkuribangngè, iyakiya lisunna muwa, Ambo' gèrèkengngi ana' saping iya macommo'è!' 31 Nappèbali ambo'na, 'Ana'ku, iko tuli engkako kuwaè sibawakka. Sininna uwappunnangiyè iyanaritu appunnangemmuto. 32 Iyakiya harusu'ka mappèsta sibawa mariyo-riyo, saba' iyaro anrimmu matèni, iyakiya makkekkuwangngè tuwoi paimeng, teddènni, iyakiya makkekkuwangngè rilolongenni paimeng. ' "

Lukas 16

1 Nakkeda Yèsus lao ri ana'-ana' gurun-Na, "Engka sèddi tau sugi. Mappunnaiwi sèddi pakkatenning dowi iya marusu'èngngi asugirenna. Iyaro tau sugiè lolongengngi laporang makkedaè iyaro pakkatenning dowina nallabowangngi dowina. 2 Jaji naobbini iyaro pakkatenning dowiè, nakkeda, 'Aga iyaè uwèngkalingaè passalemmu? Makkekkuwangngè, wèrèkka laporanna passalenna jama-jamammu murusu'i asugirekku. Dè'na naweddikko mancaji pakkatenning dowiku. ' 3 Nappikkiri'na iyaro pakkatenning dowiè, 'Aga harusu' upogau' makkekkuwangngè? Maèloi Puwakku palèssoka. Nadè' uwullèi mabbèngkung, sibawa masirika marèllau-èllau. 4 Engka akkalekku; rèkko ripalèssoka, harusu'ka mappunnai maèga sellao iya maèloè pappèrumaka ri bolana!' 5 Jaji iyaro pakkatenning dowiè naobbini tungke' tau iya makkinrengngè ri puwanna. Nakkeda lao ri mammulangngè, 'Siyaga inremmu ri puwakku?' 6 Nappèbali iyaro tauwè, 'Sèratu bèmpa minnya' zaitun. ' Nakkeda iyaro pegawaiè lao ri tauwèro, 'Iyaè sure' inremmu. Tudanno namumapperi-peri mokii: limappulo. ' 7 Nainappa makkeda ri tau maduwaè, 'Na iko saudara, siyaga inremmu?' Nappèbali iyaro tauwè, 'Sisebbu karung gandong. ' Nakkeda iyaro pakkatenning dowiè, 'Iyaè sure' inremmu. Okini: aruwa ratuna. ' 8 Na iyaro ponggawana pegawè pakkatenning dowi dè'è namalempu napojini iyaro pegawèna nasaba pangkaukenna iya maccaèro; saba' sining tolinoèwè lebbi accai matoro'i urusanna mennang naiya sining tau iya tuwoè ri laleng tajangngè. " 9 Nabbicarasi Yèsus, adan-Na, "Engkalingai! Pakèi asugirenna linoèwè untu' lolongeng sellao, kuwammengngi riwettu dè'na gaga angke'na asugirenna linoè, ritarimako matu ri onrong appèrumang mannennungengngè. 10 Tau iya weddingngè riyatepperi ri laleng gau'-gau' iya baiccu'è, wedding towi riyatepperi ri laleng gau'-gau' iya battowaè. Iyakiya tau iya dè'è nawedding riyatepperi ri laleng gau'-gau' iya baiccu'è, dè'to nawedding riyatepperi ri laleng gau'-gau' battowaè. 11 Jaji rèkko passalenna asugirenna linoè dè'na naweddikko riyatepperi, niga maèlo paddettangiko asugireng batèngngè? 12 Sibawa rèkko passalenna barang nappunnangiyè tau laingngè, pabuttiwi dè' naweddikko riyatepperi, niga maèlo mpèrèkko aga iya mancajiyè appunnangemmu? 13 Dè' sèddi tau mullèi majjama untu' duwa ponggawa; saba' lebbi namasèiwi matu sèddiè naiya laingngè; iyarè'ga lebbi matinului matu lao ri ponggawa sèddiè naiya laingngè. Makkuwatoniro iko. Dè' mullèi majjama untu' Allataala sibawa untu' waramparangngètto. " 14 Naèngkalingani sining tau Farisiè iya napowadaè Yèsus. Nainappa mennang cawa-cawaiwi, saba' napoji mennang dowiè. 15 Iyakiya makkedai Yèsus lao ri mennang, "Ikona ritu tau iya tongengngè rita ri yolona tau laingngè, iyakiya naissengngi Allataala lise' atimmu. Saba' aga naseng matanrè rupa tauwè, naita mariyawai Allataala. 16 Hukkunna Musa sibawa pappagguruwanna nabi-nabiè, iya manenna tette'i ripajoppa narapi wettunna Yohanès Paccemmè. Mappammulai wettuèro Karèba Madècèng passalenna pèkkugi Allataala mapparènta selaku Arung riyabbirittangngi matteru. Nakkuraga tauwè passai alèna untu' mancaji anggotana umma'na Allataala. 17 Iyakiya lebbi gampangngi lennye' langiè sibawa linoè, naiya sèddiè hurupu' ri laleng Hukkunna Allataala riledda. 18 Niga massarang bainèna nainappa kawing sibawa makkunrai laingngè, malawengngi iyaro tauwè. Sibawa tau iya kawingiyèngngi makkunrai iya massarangngè, malaweng towi. " 19 "Engka sèddi tau sugi. Pakèyanna masuli, sibawa masennang atuwo-tuwonna esso-esso. 20 Ri yolona tange'na bolana ripalènne'i sèddi tau kasiyasi riyasengngè Lazarus. Watakkalèna pennoi sibawa lettang. 21 Macinnai lisekiwi babuwana sibawa barubbu-barubbu roti iya sempè'è polè ri mèjanna tau sugièro. Iyakiya mala asuè polèi lèpekiwi iyaro lettanna. 22 Namatèna iyaro tau kasiyasiè naritiwi ri malaèka'è ri onrong malebbiè ri surugaè ri seddèna Abraham. Namatè tona iyaro tau sugiè sibawa ritampung. 23 Namanrasa-rasa senna'na ri linona tau matè. Na wettunna makkita polè kuwaro lao ri yasè', naitani Abraham ri onrong iya mabèlaè sibawa Lazarus engka ri seddèna Abraham. 24 Nagorana iyaro tau sugiè, 'Bapa' Abraham! Amasèika. Suroi Lazarus remmèi jarinna ri laleng uwai nainappa lao bèsa'i lilaku. Manrasa-rasa senna'ka ri lalenna apièwè!' 25 Iyakiya mappèbaliwi Abraham, 'Engngerangngi ana'ku: sillampè umuru'mu purani mulolongeng maneng iya makessik-kessingngè, na Lazarus lolongengngi iya majaè. Makkekkuwangngè masennangngi kuwaè na iko manrasa-rasa. 26 Ri lainnaè ritu, ri pallawangemmu sibawa idi purani riyèbbu sèddi balorang battowa, kuwammengngi tau engkaè kuwaè dè' naullèi lao kuwatu sibawa tau engkaè kuwatu dè' naullèi lao kumaiyè. ' 27 Nakkeda iyaro tau sugiè, 'Rèkko makkuwaitu Pa', uwèllauwi sibawa masero tasuroi Bapa' Lazarus lao ri bolana ambo'ku. 28 Engka lima silessurekku kuwaro. Suroi Lazarus parèngngerangiwi mennang, kuwammengngi aja' mennang nasempè ri onrong paccallangngèwè. ' 29 Nappèbali Abraham, 'Naengka mennang nappunnai kitta'-kitta'na Musa sibawa sining nabiè! Leppessanni siya naturusi aga taroki ri laleng sining kitta'èro!' 30 Iyakiya mappèbaliwi iyaro tau sugiè, 'Dè' nagenne iyaro, Bapa' Abraham. Iyakiya rèkko engka tau matè tuwo paimeng sibawa lao ri mennang, toba'i matu mennang polè ri dosa-dosana. ' 31 Iyakiya makkedai Abraham, 'Rèkko mennang dè' nabati-batiwi parèntana Musa sibawa nabi-nabiè, tentuni mennang dè'to namateppe' matu, namuni engka tau matè tuwo paimeng. ' "

Lukas 17

1 Nakkeda Yèsus lao ri ana'-ana' gurun-Na, "Gau'-gau' iya nassabariyè namadosa pasti engka. Iyakiya cilakai tau iya nassabariyè! 2 Lebbi kessing muwi rèkko batu allèlurengngè riyassiyoreng ri ellonna nainappa ribuwang ri tasi'è naiya nassabariyè sala sèddinna tau polè risining tau baiccu'èwè pogau' dosa. 3 Rimakkuwannanaro atike'ko! Rèkko madosai silessuremmu, amparengngi. Rèkko massesse kalèi, addampengengngi. 4 Rèkko madosai lao ri iko wèkkapitu siesso, natungke napogau' polèi ri iko sibawa makkeda, 'Mèllau addampekka, ' addampengengngi. " 5 Nakkeda sining rasul-è ri Puwangngè, "Puwang, pèwatangekki teppe'ta. " 6 Nappèbali Puwangngè, "Rèkko mappunnaiko teppe' silloppo batu sawi-sawiè, weddikko makkeda lao ri pong murbèièwè, 'Mareddu'ko namutattaneng ri tasi'è, ' pasti iyaro pong ngajuè naturusi matu parèntamu. " 7 "Akkalarapanna engka sèddi tau polè ri yelle'mu mappunnai pattumani iya maddakkalaè, iyarè'ga mampi bimbala'. Rèkko lisui iyaro pattumaniè polè ri dare'è, makkedakoga ri alèna, 'Laono mai masitta manrè'?' 8 Tentu dè'! Sibalè'na makkedako matu ri alèna, 'Passadiyangekka nanrèku. Pakèni pakèyang mapaccingngè namutumaningika ri wettu manrè mènukku; purapiro nappako wedding manrè. ' 9 Iyaro pattumaniè dè' naparellu ripoji nasaba mapatoi riparèntana puwanna? 10 Makkuwatoro iko. Rèkko purani mupogau' maneng iya riparèntangngèkko, akkedako, 'Pattumani biyasaki bawang; ripogau'mi bawang kewajibatta. ' " 11 Ri laleng allalengenna lao ri Yèrusalèm, laloi Yèsus ri daèra pakkasèsènna Samaria sibawa Galilèa. 12 Wettunna nauttamaki sèddiè kampong, rilokkaini riseppulo tau iya malasa oli mappakatau-tauè. Mabèlai mennang tettong 13 sibawa gora, "Yèsus! Puwang! Amasèiki!" 14 Wettunna Yèsus naita mennang, makkedani, "Laono risining imangngè, èllauwi mennang parèssai watakkalèmu. " Ri wettu joppana mennang, teddènni lasana mennang. 15 Wettunna engka sèddi tau polè ri mennang majeppuiwi makkedaè majjappani, lisuni sibawa gora-gora pojiwi Allataala. 16 Nasuju'na sibawa mattarima kasi ri yolona Yèsus. Iyaro tauwè sèddiwi tau Samaria. 17 Nainappa makkeda Yèsus, "Dè'ga naseppulo tau ripajjappa? Kègani iya asèraè? 18 Magi na tau polè-polèwè bawang lisu mattarima kasi ri Allataala?" 19 Nanakkeda Yèsus lao ri tauwèro, "Oto'no, namulao. Nasaba mateppe'ko ri Iyya, namumajjappa. " 20 Siyagangngarè tau Farisi makkutana ri Yèsus uppanna Allataala polè untu' mapparènta. Nappèbali Yèsus, "Apparèntanna Allataala dè' napammulaiwi sibawa tanra-tanrang iya naullè mitai tauwè, 21 angkanna tauwè naullèi makkeda, 'Laono mai mitai, engkaniè!' iyarè'ga, 'Engkairo!' Saba' mappammulai Allataala mapparènta ri tengnga-tengngamu. " 22 Purairo makkedani Yèsus lao ri ana'-ana' gurun-Na, "Engka matu narapii wettunna namacinnako mita siesso polè ri esso-esso Ana'na Tolinoè, iyakiya dè' mullèi mitai. 23 Makkedai matu tauwè ri iko, 'Itai, kuwaro!' iyarè'ga, 'Itai, kuwaè!' Iyakiya aja' mumassu sappai. 24 Pèkkugi billa'è mattappa ri langiè sibawa maccahaya polè ri cappa'na lao ri cappa'na, makkuwatoniro matu keadaanna Ana'na Tolinoè ri esso apolènna. 25 Iyakiya mula-mulanna harusu'i manrasa-rasa maèga sibawa dè' naritarima ri tauwè ri wettuèwè. 26 Ri esso riyappaitanna matu Ana'na Tolinoè, keadaanna pada-padai ri wettunna Nuh riyolo. 27 Manrè mènung tauwè sibawa botting; makkuwaro matteru-teru narapi muttama' Nuh ri laleng kappala'è sibawa polèi lèmpe' rajaè enrengngè mpuno manengngi tauwè. 28 Pada-pada towi ri wettunna Lot. Manrè mènungngi tauwè, mabbalu' sibawa mangelli, mappatani sibawa mappatettong bola. 29 Iyakiya wettunna Lot massu polè ri Sodom, iyaro essoè nanonno apiè sibawa balèrangngè polè ri langiè paccappu manengngi mennang. 30 Makkuwaniro matu keadaanna wettunna riyappaitang Ana'na Tolinoè. 31 Iyaro essoè, tau iya engkaè ri coppo bolaè, aja'na nanonno untu' malai waramparanna iya engkaè ri lalempolaè. Makkuwatoro tau iya engkaè ri dare'è aja'na nalisu ri bolana. 32 Engngerangngi aga kajajiyang sibawa bainèna Lot! 33 Tau iya makkuragaè passalama'i atuwonna, teddèngngi matu atuwonna. Iyakiya tau iya teddèngngè atuwonna napassalama'i matu. 34 Ateppe'no: Iyaro wenniè, duwa tau matinro risèddiè ranjang, sèddi tau riyala na sèddiè risalaiwi. 35 Duwa tau maddèse' gandong, sèddi tau riyala, na sèddiè risalaiwi. 36 Duwa tau majjama ri dare'è, sèddi tau riyala, na sèddiè tau risalaiwi. " 37 Nakkutana ana'-ana' gurunna Yèsus, "Kègai iyaro kajajiyang matu Puwang?" Nappèbali Yèsus, "Kègi engka bakkè, kuwa towitu engka manu'-manu' pakkanrè bakkè. "

Lukas 18

1 Purairo nacuritani Yèsus sèddi pakkalarapangeng untu' paggurui ana'-ana' gurun-Na kuwammengngi natuli massempajang sibawa dè' napettu paddennuwang. 2 Nakkeda Yèsus, "Ri sèddiè kota engka sèddi haking iya dè'è namètau ri Allataala, sibawa dè'na napaduliwi niga-niga. 3 Na ri kotaèro engkato sèddi janda iya makkolik-kolingngè mangolo ri hakingngèro mèllauwi nariyèwaiwi parakarana. Makkedai iyaro jandaè, 'Tulukka moloiwi balikku. ' 4 Siyagangngarè ittana iyaro hakingngè dè' namaèlo tulungngi iyaro jandaè. Iyakiya angkanna mappikkiri' iyaro hakingngè, 'Muwi dè' umètau lao ri Allataala sibawa dè'na upaduliwi muwi lao ri niga, 5 iyakiya nasaba iyaè jandaè matteru-terui gangguka, lebbi kessing muwi uwèwaiwi parakarana. Rèkko dè', matteru-terui matu polè gangkanna matu nasussaika. ' " 6 Nanakkeda Puwangngè, "Pènessaini aga napowada iyaro haking iya dè'è naadèlè'! 7 Dè'ga Allataala naèwaiwi matu parakarana umma'-Na iya mangobbiè ri Alèna esso wenni? Aga matengnge'gika matu Alèna untu' tulungngi mennang? 8 Ateppe'no: Masitta'i matu mèwaiwi parakarana mennang! Iyakiya rèkko polèi Ana'na Tolinoè, engka mupaga rilolongeng tau mateppe' ri Alèna ri linoèwè?" 9 Nacurita towi Yèsus pakkalarapangngèwè iya Napattujuè lao ri tau iya pakariyawaèngngi tau laingngè, iyakiya mateppe'i makkedaè makessingngi alèna. 10 Nakkeda Yèsus, "Engka duwa tau lao ri Bolana Puwangngè untu' massempajang. Iya sèddiè tau Farisi, naiya laingngè sèddiwi passinge' sima. 11 Iyaro tau Farisiè natampuiwi arona namassempajang ri laleng ati, 'Oh Allataala, mattarima kasi'ka ri Idi, saba' dè' upada-pada tau laingngè, iya mangowaè, macèko-cèko iyarè'ga malaweng. Sukkuru'ka saba' dè' upada iyaro passinge' simaè. 12 Mappuwasaka wèkkaduwa siminggu, sibawa makkasuwiyakka ri Idi tawa seppulona polè ri sininna pallolongekku. ' 13 Iyakiya iyaro passinge' simaè tettongngi mabèla-bèla sibawa mala dè' nabarani conga ri langiè. Nasappurui arona nanakkedato, 'Oh Allataala, amasèika, tau madosaèwè!' " 14 Nakkeda Yèsus, "Ateppe'no, wettunna lisu ri bolaè, iyaro passinge' simaè ritarimai ri Allataala na tenniya iyaro tau Farisiè. Saba' tungke' tau iya pakatanrèngngi alèna ripakariyawai matu; natungke tau iya pakariyawaèngngi alèna ripakatanrèi matu. " 15 Engka sining tau tiwi ana'-ana'na lao ri Yèsus kuwammengngi narikarawa sibawa ribarakkakiwi mennang. Wettunna ana'-ana' gurunna Yèsus mitai iyaro, nacairini mennang iyaro sining tauwè. 16 Iyakiya naobbii Yèsus iyaro ana'-ana'è nainappa makkeda lao ri ana'-ana' gurun-Na, "Leppessangngi ana'-ana'è lao ri Iyya! Aja' muwattèyangngi mennang. Saba' tau pada-padaènnaè mancaji anggotana umma'na Allataala. 17 Engngerangngi! Tau dè'è namangolo ri Allataala pada-pada ana'-ana'è, dè' namancaji matu anggotana umma'na Allataala. " 18 Engka sèddi pamimping Yahudi makkutana lao ri Yèsus, "Pa' Guru iya makessingngè, aga harusu' upogau' kuwammengngi weddingngi utarima atuwong tongengngè sibawa mannennungengngè?" 19 Nakkutana Yèsus lao ri pamimpinna Yahudièro, "Magi muwasek-Ka makessing? Dè'gaga makessing saliwenna Allataala bawang. 20 Muwissenniga parènta-parèntana Allataala: 'Aja' mumalaweng, aja' muwabbuno, aja' muwènnau, aja' musabbi bellè-bellè, sibawa pakalebbii ambo' indo'mu. ' " 21 Nakkeda iyaro tauwè, "Iya manenna parèntaèro purani uturusi ri wettu maloloku. " 22 Naèngkalingana iyaro, makkedani Yèsus, "Engka mupa sèddi passaleng harusu' mupogau': Balu'ni sininna appunnangemmu, namuwèrèngngi ellinna tau kasiyasiè, namulolongeng matu waramparang ri surugaè. Purairo laono maccowèri-Ka. " 23 Iyakiya wettunna naèngkalinga iyaro tauwè, tassinnauni nasaba sugi senna'i. 24 Naissengngi Yèsus makkedaè tassinnaui atinna iyaro tauwè, rimakkuwannanaro makkedai Yèsus, "Mawatang senna' tau sugiè untu' mancaji anggotana umma'na Allataala! 25 Lebbi gampang muwi sikajuè unta muttama' ri sebbo jarungngè, naiya sèddiè tau sugi muttama' ri Lino Barunna Allataala. " 26 Makkutanani sining tau iya mèngkalingaèngngi Yèsus makkeda makkuwaro, "Rèkko makkuwaitu, nigana wedding salama'?" 27 Nappèbali Yèsus, "Iya dè'è nakkullè ri rupa tauwè, makkullèi ri Allataala!" 28 Nakkeda Pètrus, "Itai! Idi'è pura risalaini bolata untu' maccowèriwi Bapa'. " 29 Nakkeda Yèsus, "Ateppe'no, tau iya puraè salaiwi bolana, iyarè'ga bainèna, iyarè'ga silessurenna, iyarè'ga indo' ambo'na, iyarè'ga ana'na nasaba natumaningiwi Allataala, 30 iyaro tauwè riwale'i malleppi-leppi ri wettuèwè, sibawa ri wettu mangoloè riwèrèngngi matu atuwong mannennungengngè. " 31 Napaddeppungenni Yèsus iya seppulo duwa ana' gurun-Na mallaiseng, nainappa makkeda, "Engkalingai! Makkekkuwangngè mattujuki ri Yèrusalèm. Kuwaro, sininna iya naokiè nabi-nabiè passalenna Ana'na Tolinoè, kajajiyangngi matu. 32 Riyabbèrèyangngi matu lao risining tau tenniyaè Yahudi, iya mèllèkèllè'èngngi matu, pakatunai sibawa mammèccuiwi. 33 Napanrasa-rasai matu sibawa naunoi, iyakiya ri esso matelluè, moto'i matu. " 34 Iya manennaro dè' napahangngi muwi cèddè ana'-ana' gurunna Yèsus. Bettuwanna, iyaro ada-adaè rirahasiyakangngi polè ri mennang. Dè' naissengngi passaleng aga Nabicara. 35 Wettunna Yèsus macawè'ni lettu ri Yèrikho, engka sèddi tau buta tudang mèllau sidekka ri wiring lalengngè. 36 Wettunna naèngkalinga iyaro tau maègaè lalo, makkutanani, "Engka aga?" 37 Nakkeda mennang lao ri tau butaèro, "Yèsus, tau Nazarèt-è lalo. " 38 Nagorana iyaro tau butaè, "Yèsus, Ana' Daud! Amasèika!" 39 Riyacairini sibawa risuro mammekko risining tau iya monroyoloè. Iyakiya pèdè' gorai lebbi cenno, "Ana' Daud! Amasèika!" 40 Nalèppanna Yèsus nanasuroi tauwè tiwii iyaro tau butaè ri Alèna. Lettu'nana, makkutanani Yèsus, 41 "Aga muwèlori Upogau' ri iko?" Nappèbali iyaro tau butaè, "Puwang, macinnaka makkita. " 42 Nakkeda Yèsus, "Rèkko makkuwaitu, itani! Nasaba mateppe'ko lao ri Iyya, majjappako. " 43 Iyatoro wettuè naullèi makkita, nanaccowèriwi Yèsus nanattarima kasi'to lao ri Allataala. Wettunna naita iyaro tau maègaè gau'è, napoji-poji manenni mennang Allataala.

Lukas 19

1 Wettunna Yèsus lettu ri Yèrikho, joppani matteru molai iyaro kotaè. 2 Ri kotaèro engka sèddi kapala passinge' sima iya sugiè. Asenna Zakhèus. 3 Macinnai mitai niga Yèsus, iyakiya nasaba maèga senna' tau, namapancè'i alèna, jaji dè' naullèi mitai Yèsus. 4 Jaji, larini poddiyoloiwi sining tauwè, nainappa mèmpè sèddi pong ngaju, kuwammengngi naullèi mitai Yèsus iya dè'è namaitta nalalo kuwaro. 5 Wettunna Yèsus lettu ri pong ngajuèro, makkitani liyasè' nainappa makkeda, "Zakhèus, nonnono masitta! Saba' harusu'-Ka lao ri bolamu essoèwè. " 6 Mapperi-perini Zakhèus nonno nanaduppaiwi Yèsus sibawa marennu. 7 Sininna tauwè iya mitaèngngi gau'èro mammulani mannoko'-noko'. Makkedani mennang, "Cih! Laowi massurolellang ri bolana tau iya dè'è namakessing!" 8 Natettonna Zakhèus ri bolana makkeda lao ri Yèsus, "Puwang, sitengngana waramparakku maèlo uwassidekkang lao ri tau kasiyasiè; sibawa nigi-nigi pura ubellè', maèloka mpajai paimeng leppe' wèkkaeppa!" 9 Nakkeda Yèsus, "Iya essoèwè iko sibawa kaluwargamu pura ripassalama'ni ri Allataala sibawa riwèrèng atuwong iya baruè, saba' wijanna tokko Abraham. 10 Ana'na Tolinoè polèi untu' sappai sibawa passalama'i tau iya pusaè. " 11 Ri wettu naèngkalingana mupa tauwè Yèsus mabbicara, nacuritani sèuwa pakkalarapangeng. Saba' iyaro wettuè engkai ri seddèna Yèrusalèm, nanasengngi tauwè makkedaè dè'na namaittana napparènta Allataala selaku Arung ri linoè. 12 Nakkeda Yèsus, "Engka sèddi arung iya laowè ri wanuwa mabèlaè untu' rilanti' mancaji arung, nainappa lisu. 13 Riwettu dè'napa najoppa, naobbini seppulo pattumaninna, nainappa nawèrèng tungke'-tungke' sèuwa dowi ulaweng. Nakkeda lao ri mennang, 'Dangkanno sibawa iyaè dowiè ri wettu laoku. ' 14 Iyakiya iyaro pabbanuwana wanuwaè nabenciwi. Jaji labe'nana, kirinni mennang suro untu' powadai, 'Dè' tamaèlo iyaè tauwè mancaji arutta. ' 15 Iyakiya iyaro arungngè rilanti'ni mancaji arung, nainappa lisu ri wanuwanna. Naobbini masitta sining pattumaninna mangolo, untu' missengngi siyaga saro nalolongeng mennang. 16 Polèni pattumani pammulangngè sibawa makkeda, 'Puwang, sèddi dowi ulaweng iya tawèrèngngekka, purani upancaji seppulo. ' 17 Nakkeda iyaro puwangngè, 'Makessinni, iko pattumani makessingngè. Nasaba ri laleng gau'-gau' baiccu'è weddikko riyatepperi, maèloka pancajiko tomakuwasana seppulo kota. ' 18 Pattumani maduwaè polè toni sibawa makkeda, 'Puwang, iyaro sèddiè dowi ulaweng tabbèrèyangngè Puwang, purani upancaji lima. ' 19 Nakkeda iyaro arungngè lao ri pattumanièro, 'Mancajiko matu tomakuwasana lima kota. ' 20 Polè toni pattumani laingngè sibawa makkeda, 'Puwang, engkaniè dowita Puwang; utaroi ri laleng lènso-lènsoè. 21 Mètauka ri idi Puwang, saba' mabecco'ki Puwang. Talai Puwang tenniyaè appunnangetta, sibawa mallèlèki ri onrong iya tenniyaè Puwang tanengiwi. ' 22 Nakkeda iyaro arungngè lao ri pattumanièro, 'Pattumani majako iko! Maèloka hukkukko situru ada-adammu muto. Muwisseng iyya tau mabecco'ka: Uwalai aga iya tenniyaè appunnangekku sibawa mallèlè ri onrong tenniyaè iyya tanengiwi. 23 Rèkko makkuwaitu magi nadè' muputtama'i iyaro dowiè ri bangngè kuwammengngi rèkko lisuka weddingngi utarima iyaro dowiè sibawa bungana?' 24 Nainappa makkeda iyaro arungngè lao risining tau tettongngè kuwaro, 'Alai iyaro dowiè polè ri alènaro namuwèrèngngi pattumani iya mappunnaiyè seppulo dowi ulaweng. ' 25 Iyakiya makkedai iyaro sining tauwè, 'Puwang, engkana seppulo nappunnangi. ' 26 Nappèbali iyaro arungngè, 'Engngerangngi: tau iya mappunnaiyènna, riwèrèngngi matu lebbi maègapa. Iyakiya tau iya dè'è nappunnai, aga iya engkaè ri alèna riyalai matu polè ri alèna. 27 Namakkekkuwangngè tiwii lao mai sining balikku iya dè'è naèloriwi iyya mancaji arunna. Uno manengngi mennang ri yoloku!' " 28 Purana napowada maneng Yèsus iyaro, joppani ri yolona mennang mattuju ri Yèrusalèm. 29 Wettunna lettu ri seddèna Bètfagè sibawa Bètania ri Bulu-bulu Zaitun, nasuroni duwa ana' gurun-Na lao lebbi riyolo. 30 Nakkeda Yèsus lao ri mennang, "Laono ri kampong iya engkaè ri yolomuro. Rèkko muttama'ko kuwaro, muwitai matu sikaju ana' kaleddè tassiyo. Iyaro kaleddè'è dè'pa naengka natonangiwi tauwè. Leppessangngi iyaro kaleddè'è namutiwii kumaiyè. 31 Rèkko makkutanai tauwè ri iko, 'Magi muleppessangngi iyaro kaleddè'è?' powadangngi, 'Napparelluwangngi Puwangngè. ' " 32 Laoni iya duwaro ana' gurunna Yèsus, nanapolèini iya manennaro pada-pada iya napowadaè Yèsus. 33 Ri wettu naleppessanna mennang iyaro ana' kaleddè'è, makkedani punnana lao ri mennang, "Magi muleppessangngi iyaro kaleddè'è?" 34 Nappèbali mennang, "Napparelluwangngi Puwangngè. " 35 Natiwini mennang iyaro kaleddè'è lao ri Yèsus. Nainappa nataro jumbana mennang ri yasè'na iyaro kaleddè'è sibawa natulunna Yèsus mènrèkiwi. 36 Wettunna Yèsus lalo tonangiwi iyaro kaleddè'è, napallebba'ni jumbana sining tauwè ri lalengngè. 37 Wettunna Yèsus macawè'ni lettu ri Yèrusalèm, ri laleng turungngè ri Bulu-bulu Zaitun, sininna tomaccowèriyèngngi iya maègaèro mammulani gora-gora pojiwi Allataala sibawa mattarima kasi ri Allataala, saba' iya manenna anu makalallaingngè iya puraè naita mennang. 38 Gorani mennang, "Ribarakkakiwi Arung iya polè sibawa asenna Puwangngè! Salèwangengngi ri surugaè sibawa ripojiwi ri Allataala!" 39 Siyagangngarè tau Farisi polè ri yelle'na tau maègaèro makkeda lao ri Yèsus, "Bapa' Guru, suroi ana'-ana' gurunna Bapa' mammekko. " 40 Nappèbali Yèsus, "Ateppe'no! Rèkko mammekkoi mennang, gorai matu iyaè batu-batuèwè. " 41 Wettunna Yèsus pèdè' macawè'è ri Yèrusalèm sibawa naita iyaro kotaè, Nateringini. 42 Adan-Na, "Kasiyang, lebbi kessingngi rèkko iya essoèwè muwissengngi aga iya weddingngè mappapolè assidamèngeng! Iyakiya makkekkuwangngè dè' mullèi mitai. 43 Mupèneddingiwi matu sèuwa wettu, na balimmu mèbburekko pallawa-lawa mattulilingiko; nakeppukko matu sibawa naredde'mu polè tulili. 44 Nancuru'ko matu mennang silaong sininna pabbanuwamu; nadè' sèddi batu naleppessang matu mennang tassusung ri onronna, saba' dè' mupènessaiwi wettunna Allataala polè untu' passalama'ko!" 45 Muttama'ni Yèsus ri Bolana Puwangngè sibawa mappammulani paddèsu'i sining padangkangngè kuwaro. 46 Nakkeda lao ri mennang, "Ri laleng Kitta'è tarokii makkuwaè: Makkedai Allataala, 'Mancajiwi matu Bola-Ku onrong massempajang. ' Iyakiya iko mupancajiwi saranna parampo'è!" 47 Esso-esso Yèsus mappagguru ri Bolana Puwangngè. Kapala-kapala imangngè, sibawa guru-guru agamaè enrengngè sining pamimpinna Yahudiè macinnani mpunoi, 48 iyakiya dè' nalolongeng laleng untu' pogau'i gau'èro, nasaba sininna tauwè matteru-terui mèngkalingai, sibawa tattarè'i ri ada-adan-Na.

Lukas 20

1 Risèuwaè esso, Yèsus mappagguru sibawa mabbirittangngi Karèba Madècèng polè ri Allataala lao risining tauwè ri laleng Bolana Puwangngè. Napolèna kapala-kapala imangngè, guru-guru agamaè silaong sining pamimpinna Yahudiè 2 namakkeda lao ri Yèsus, "Coba powadakki aga nallalengi na-Mupogau'i iya manennaro? Niga mpèrèk-Ko iyaro ha'è?" 3 Nappèbali Yèsus, "Macinnaka makkutana. Coba powadak-Ka, 4 nasibawang ha' niga Yohanès maccemmè? Allataala iyarè'ga tolinoè?" 5 Nappammulana mennang barunding, "Rèkko makkedaki, 'Sibawa ha'na Allataala, ' makkedai matu, 'Rèkko makkuwaitu, magi nadè' mumateppe ri alèna?' 6 Iyakiya rèkko makkedaki, 'Sibawa ha'na tolinoè, ' nagenrukki matu batu sininna tauwè saba' mateppe'i mennang makkedaè Yohanès sèddiwi nabi. " 7 Jaji mappèbaliwi mennang, "Dè' taissengngi. " 8 Nakkeda Yèsus lao ri mennang, "Rèkko makkuwaitu, Iyya dè'to Umaèlo powadakko nasibawang ha' niga Upogau'i iya manennaè. " 9 Nacuritani Yèsus lao risining tauwèro, pakkalarapangengngèwè, "Engka sèddi tau iya tanengiyèngngi sèuwa dare'è anggoro. Iyaro dare'è nappassèwangngi lao ri siyagangngarè paddare, nainappa lao ri wanuwa laingngè namaitta monro kuwaro. 10 Narapinana wettunna maccèppu buwa anggoro, nakirinni pattumaninna iyaro punna dare'è lao risining pajjamana iyaro dare' anggoro'è untu' tarimai bagiyanna. Iyakiya iyaro sining pajjama dare' anggoro'è naunrui iyaro pattumaniè sibawa nasuroi lisu sibawa kosong limanna. 11 Naiyaro punna dare'è kirissi sèddi pattumani laingngè; iyakiya ribarasa' towi sibawa rituna-tunai risining pajjamana dare' anggoro'èro, nainappa nasuro lisu sibawa kosong limanna. 12 Nainappa iyaro punna dare'è kirissi pattumani mabbèkkatelluè. Iyakiya iyaro pattumaniè ribarasa' towi risining pajjamana dare' anggoro'èro sibawa riyabbèyang massu ri saliweng dare'èro. 13 Angkanna iyaro punna dare'è makkeda, 'Agana harusu' upogau'? Maèloka kiringngi ana' riyalèku iya uwamasèiyè. Pasti napakalebbii matu mennang!' 14 Iyakiya wettunna iyaro sining pajjama dare' anggoro'è naita iyaro ana'na punna dare'è, makkedani mennang sèddiè lao ri laingngè, 'Iyanaè ahli warisi'na. Laono mai taunoi, kuwammengngi talolongengngi manana. ' 15 Nanassarènrèngenni massu ri saliweng dare'èro nainappa nauno. " Nainappa makkutana Yèsus, "Nah, rèkko lisui iyaro punna dare'è, agana nagaukengngi matu iyaro sining pajjama dare'è? 16 Pasti polèi matu sibawa naunoi pajjama-pajjama dare'èro, nainappa iyaro dare'è nabbèrèyangngi lao risining pajjama-pajjama dare' laingngè. " Naèngkalingana iyaro, makkedani sining tauwè lao ri Yèsus, "Sitonget-tongenna dè'!" 17 Nakkitana Yèsus lao ri mennang, nainappa makkeda, "Rèkko makkuwaitu, aga bettuwanna aya'na Kitta'èwè? 'Batu iya dè'è napakèi tukang bangunangngè, mancajiwi batu iya poko'è. ' 18 Sininna tauwè iya sempè'è ri batuèro ancuru'i matu; sibawa nigi-nigi nageppa iyaro batuè nalèlui matu mancaji awu. " 19 Naissenni guru-guru agamaè sibawa kapala-kapala imangngè makkedaè iyaro pakkalarapangengngè napattujui Yèsus lao ri mennang. Rimakkuwannanaro macinnani mennang tikkengngi Yèsus iyaro wettuè, iyakiya mètaui lao ri tau maègaè. 20 Jaji sappani kasempatang iya makessingngè. Nanasogo'ni mennang tauwè untu' majjaiwi selaku tau lempu, nanasuroi sining tauwèro untu' palaiwi siyo-siyo Yèsus sibawa pakkutana-pakkutanana, kuwammengngi naullèi mabbèrèyangngi lao ri akuwasanna gubernur-è. 21 Nasining tau iya puraè risogo'ro makkedani lao ri Yèsus, "Pa' Guru, irissenni makkedaè sininna napowadaè sibawa nappagguruwangngè Bapa' tongengngi. Irisseng towi Bapa' mappaggurui sibawa terus terang passalenna napuwèloè Allataala lao ri tolinoè, saba' dè' nappilè bulu Bapa'. 22 Rimakkuwannanaro coba Bapa' powadakki, manuru' peraturanna agamata, weddikki'ga makkamaja sima lao ri Kaisar Roma iyarè'ga dè'?" 23 Iyakiya naissengngi Yèsus akkattana mennang. Rimakkuwannanaro makkedai, 24 "Coba paitak-Ka sèddi dowi pèra'. Gambara sibawa asenna niga iyaè?" Nappèbali mennang, "Kaisar. " 25 Nakkeda Yèsus lao ri mennang, "Rèkko makkuwaitu, wèrèngngi Kaisar, aga nappunnangi Kaisar sibawa lao ri Allataala, aga nappunnangi Allataala. " 26 Angkanna ri yolona tau maègaèro dè' naullèi mennang lolongeng muwi sèddi asalang ri Yèsus. Mammekko bawammi mennang sibawa bengnga lao ri pappèbalin-Naro. 27 Engka siyagangngarè tau polè ri golongang Sadukiè lao ri Yèsus. (Mennang iyanaritu golongang iya mappunnaiyè pallolongeng makkedaè tau matè dè' naoto paimeng. ) Makkutanai mennang ri Yèsus, 28 "Bapa' Guru, naokirekki Musa hukkungngèwè: Rèkko sèddiè worowanè matèi nadè' nappunnai ana', iyaro padaorowanèna harusu'i kawingiwi jandana kuwammengngi nawèrèngngi wija-wijanna tau iya matèènnaro. 29 Engka naengka pitu tau mappadaorowanè. Bottingngi iya macowaè, namatè temmappunnai ana'. 30 Nainappa jandana rikawingiwi ri maduwaè, iyakiya matè towi temmappunnai ana'. 31 Gau' padaè kajajiyang towi sibawa padaorowanèna matelluè narapi mapituè. 32 Angkanna matèto iyaro makkunraiè. 33 Ri esso ripatuwona matu paimeng tau matè, nigana punna bainè iyaro makkunraiè? Saba' iya pitu pura kawingiwi?" 34 Nappèbali Yèsus, "Sining tau iya tuwoè makkekkuwangngèwè bottingngi, 35 iyakiya sining tau matè iya sitinajaè ripaoto', sibawa tuwo ri wettu mangoloè, dè'na mennang nabotting. 36 Keadaanna mennang pada-padai malaèka'è, sibawa dè'na naullèi matè. Ana'-ana'na Allataala mennang ritu. Saba' purani mennang ripaoto' paimeng polè ri amatèngngè. 37 Alèna Musa pakatajangngi sibawa manessa makkedaè ripaoto'i paimeng tau matè. Ri laleng sure'na passalenna iyaro alekale' malluwa'è nateppui Puwangngè selaku 'Allataalana Abraham, Allataalana Ishak sibawa Allataala Yakub. ' 38 Naiyaro Allataalaè, tenniya Allataalana tau matè! Allataalanai sining tau tuwoè! Saba' untu' Allataala, sininna tauwè tuwoi. " 39 Engka siyagangngarè guru agama makkeda, "Makessing senna' pappèbalinna Bapa' Guru. " 40 Rimakkuwannanaro dè'na nabaranina makkutanangngi agi-agi lao ri Yèsus. 41 Nakkutana Yèsus lao ri mennang, "Pèkkugi wedding ripowada makkedaè Arung Pappassalama'è wijannai Daud? 42 Padahal alèna Daud makkeda ri laleng kitta Mazmur, 'Puwangngè makkeda ri Puwakku: Tudanno ri seddè atauk-Ku, 43 narapi Uwèbbu sining balim-Mu tunru' ri Iko. ' 44 Jaji rèkko Daud teppui iyaro Arung Pappassalama'è 'Puwang', pèkkugi wedding wijannai Daud?" 45 Wettunna sining tauwè naèngkalinga Yèsus mabbicara, makkedani Yèsus lao ri ana'-ana' gurun-Na, 46 "Atutuko lao ri guru-guru agamaè. Napoji joppa sibawa jumba iya malabbuè, sibawa napoji ripakalebbi ri pasaè. Napoji onrong malebbiè ri laleng bola assompangngè sibawa ri pèsta-pèstaè. 47 Nabellèi mennang sining jandaè sibawa narampasa' i bolana. Na untu' tongkoi jana mennanro, massempajangngi mennang sibawa malampè'! Matane' matu pahukkungenna mennang!"

Lukas 21

1 Ri Bolana Puwangngè, naitai Yèsus sining tau sugiè puttama dowi ri laleng petti-petti pakkasuwiyangngè. 2 Naitai sèddiè janda iya kasiyasi senna'è puttama duwa dowi tembaga. 3 Nakkeda Yèsus, "Engkalingai: iyaè jandaè puttama'i lebbi maèga naiya maneng laingngè. 4 Saba' iya manennaro mennang mabbèrèi polè ri alebbinna waramparanna. Iyakiya iyaè jandaè, namuni kasiyasi senna'i, nabbèrèyang manengngi iya engkaè ri alèna iya napparelluwangngè untu' atuwonna. " 5 Sining tau iya mabbicaraè passalenna pèkkugi kessinna Bolana Puwangngè ribèlo-bèloi sibawa batu magello enrengngè barab-barang iya riyakkasuwiyangengngè lao ri Allataala. Nakkeda Yèsus lao ri mennang, 6 "Engka matu wettunna, sininna iya muwitaèwè riruttungngi matu; dè' matu sèddi batu monro tassusung ri onronna!" 7 Nakkutana mennang ri Yèsus, "Bapa' Guru, uppanna kajajiyang matu iyaro gau'è? Sibawa aga tanranna makkedaè narapini wettunna iyaro gau'è maèloni kajajiyang?" 8 Nakkeda Yèsus, "Atike'ko, aja' narapiko ribellè. Maèga tau matu polè pakèi asek-Ku, sibawa makkeda, 'Iyya'naè!' sibawa 'Narapini wettunna. ' Iyakiya aja' muwaccowèriwi mennang. 9 Aja'to mumètau rèkko mèngkalingako karèba passalenna musuè sibawa ronta'è. Iya manennaro harusu'i kajajiyang riyolo'. Iyakiya iyaro tenniya bettuwanna makkedaè narapini wettunna kiyame'. " 10 Nanapatteruni Yèsus bicaran-Na, adan-Na, "Bangsa sèddiè mammusui matu mèwai bangsa laingngè, sibawa wanuwa sèddiè nagasai matu wanuwa laingngè. 11 Kajajiyangngi matu kègi-kègi mpèwangngi tanaè sibawa masero, bahaya akkadèrengngè sibawa saiyè. Kajajiyangngi matu gau'-gau' iya mappakatau-tauè sibawa maseroè ri langiè. 12 Iyakiya riwettu dè'napa nakajajiyang manenro, ritikkekko matu sibawa ricalla. Riadèlèkiko matu risining bola assompangngè sibawa riputtama' ri laleng tarungkuè, enrengngè riyassarènrèngekko matu lao ri yolona sining arungngè sibawa sining tomakuwasaè nasaba muwaccowèri-Ka. 13 Iyanaro kasempatammu untu' mabbirittangngi Karèba Madècèng polè ri Allataala. 14 Esserini makkedaè dè' matu mubata-bata passalenna aga harusu' mupowada untu' mèwaiwi alèmu. 15 Alèku matu mpèrèkko iyaro ada-adaè sibawa pangissengengngè, angkanna dè' sèddi tau polè risining balimmu mullèi mèwa iyarè'ga massakkarengngi aga mupowada. 16 Nabali'bellariko matu indo' ambo'mu, silessu-silessuremmu, sumpulolomu sibawa sellao-sellaomu. Sibagiyang polè ri iko riyunoi matu ri mennang. 17 Ribenciko matu risininna tauwè nasaba muwaccowèri-Ka. 18 Iyakiya muwi silampa gemme' polè ri ulummu dè'to nateddèng. 19 Rèkko mattahakko sibawa sabbara', salama'ko matu. " 20 "Rèkko muwitani Yèrusalèm rikeppung ri tentaraè, muwissennitu matu makkedaè iyaro kotaè dè'na namaitta nariyancuru. 21 Iyaro wettuè, tau iya engkaè ri Yudèa harusu'i lari lao ri buluè. Iya engkaè ri laleng kotaè harusu'i mennang nasalai kotaè. Iya engkaè risaliweng kota aja' mennang nauttama ri kotaè. 22 Saba' iyaro esso-essoè iyanaritu 'Esso-esso Ripatakkennana Pahukkungengngè', kuwammengngi nakajajiyang aga pura tarokiè ri laleng Kitta'è. 23 Temmaka mappakatau-tauna iyaro essoè lao ri makkunrai iya mattampu'è, sibawa indo' iya pasusuè mupi ana'lolona! Iyaè wanuwaè pèneddingiwi matu asussang battowa, sibawa Puwangngè matu hukkungngi iyaè bangsaè. 24 Engka matu riyuno sibawa peddang, engkato matu ritiwi selaku tawangeng ri wanuwa-wanuwanna tauwè; nasining tau iya dè'è naissengngi Allataala nalèjja'-lèjja'i matu Yèrusalèm narapi cappu wettu iya pura napattentuè Puwangngè untu' mennang. " 25 "Paitai matu tanra-tanrangngè ri mata essoè, kètengngè sibawa sining wèttowingngè. Ri linoè, mètaui matu bangsa-bangsaè sibawa malippunna moloiwi oni-oniè nenniya bombanna tasi'è. 26 Namètau senna'na matu rupa tauwè moloiwi aga maèlo kajajiyang ri sininna linoèwè, saba' sining makuwasaè ri bètaraè sipalu-palui matu. 27 Ri wettuènnaro napolè matu Ana'na Tolinoè ri ellungngè sibawa akuwasan-Na nenniya alebbiren-Na battowaè. 28 Rèkko mammulani kajajiyang iyaro sining gau'è, oto'no namuwakkai ulummu, saba' dè'na namaitta naripassalama'ko. " 29 Nanacuritani Yèsus lao ri mennang pakkalarapangengngèwè, adan-Na, "Pènessaiwi pong araè sibawa sininna pong laingngè. 30 Rèkko paitani colli-colli'na, muwissenni makkedaè macawè'ni wettu tikkaè. 31 Makkuwatoro rèkko muwitai gau'-gau'è kajajiyang, muwissenni matu makkedaè dè'na namaitta napparènta Allataala selaku Arung. 32 Issenni! Iyaro gau'-gau'è kajajiyangngi matu riwettu dè'napa namatè maneng tauwè iya tuwoè makkekkuwangngè. 33 Lennye'i matu langiè sibawa linoè, iyakiya ada-adak-Ku tette'i mannennungeng. " 34 "Jagaiwi alèmu, aja' lalo mutuli mappèsta-pèsta sibawa mènung ènungeng maseriè, iyarè'ga tuli pikkiri'i passalenna atuwommu, angkanna dè' musadiya wettunna polè iyaro Essoè temmusenna-sennai. 35 Saba' iyaro Essoè polèi matu pada-pada sappangngè lao ri sininna tauwè ri yasè'na linoèwè. 36 Jaga-jagako, sibawa tuli massempajakko kuwammengngi mullèi niniriwi sininna gau' maèloè kajajiyang sibawa mullèi mangolo ri Ana'na Tolinoè. " 37 Yèsus mappagguru ri Bolana Puwangngè ri lakessoè, na ri wenniè laowi ri Bulu-bulu Zaitun sibawa monro kuwaro. 38 Tungke' èlè sininna tauwè laowi ri Bolana Puwangngè untu' mèngkalingai Yèsus mappagguru.

Lukas 22

1 Ramè-ramè Roti Dè'è Raginna iya riyasengngè Paska macawè'ni. 2 Kapala-kapalana imangngè sibawa guru-guru agamaè sappani laleng untu' mpunoi Yèsus secara mammekko-mekko nasaba mètaui mennang ri tau maègaè. 3 Namuttama'na Ibillisi'è ri Yudas iya riyasengngètto Iskariot, iyanaritu sèddiwi polè riseppuloè duwa ana' gurunna Yèsus. 4 Rimakkuwannanaro laoni Yudas barunding sibawa kapala-kapala imangngè sibawa sining kapala pengawalna Bolana Puwangngè passalenna pèkkugi naullèi mabbèrèyangngi Yèsus lao ri mennang. 5 Masennang senna'ni mennang sibawa majjanci maèlo mpèrèngngi dowi. 6 Nasitujuini Yudas, nammulana sappa kasempatang untu' mabbèrèyangngi Yèsus lao ri mennang, sibawa dè' naissengngi tauwè. 7 Narapini essona Ramè-ramè Roti Dè'è Raginna makkedaè bimbala' untu' nanrè Paskaè rigèrè. 8 Nasuroni Yèsus Pètrus sibawa Yohanès, "Laono mupassaniyasangekki nanrè Paska. " 9 Nakkutana mennang, "Kègai taèlori Bapa' ripassaniyasa?" 10 Nappèbali Yèsus, "Ri wettu muttama'mu ri kotaè, siruntu'ko matu sèddi worowanè iya tiwiè sèuwa kendi mallise' uwai. Accowèriwi lao ri bola nauttamakiyè, 11 sibawa powadangngi iyaro punna bolaè: Makkedai Guruè, 'Kègai onronna ana'-ana' guruk-Ku sibawa Iyya manrè nanrè Paska?' 12 Nanajellokekko matu iyaro punna bolaè sèuwa bili' battowa ri lotèngngè, sakke' sibawa parèwanna. Passaniyasa manenni kuwaro. " 13 Nalaona Pètrus sibawa Yohanès, nanapolèi manenni pada-pada iya napowadaè Yèsus. Napassaniyasani mennang nanrè Paskaèro. 14 Narapinana wettunna manrè nanrè Paska, tudanni Yèsus silaong sining ana' gurun-Na ri onrong perjamuwangngè. 15 Nakkeda lao ri mennang, "Macinna senna'-Ka sisamako manrè nanrè Paskaèwè riwettu dè'napa Uwanrasa-rasa. 16 Saba' ateppe'no: Dè'na uwanrèi matu iyaè narapi bettuwanna perjamuwangngèwè ripannessa ri Lino Barunna Allataala. " 17 Purairo nakkani Yèsus ènungeng anggoro'è, nainappa massempajang sukkuru' lao ri Allataala, nanakkeda, "Alani iyaè, sibawa abbagè-bagèyangngi; 18 nasaba issenni: mappammulai makkekkuwangngè dè'na Uwènungngi matu iyaè anggoro'è narapi Allataala makuwasai manengngi. " 19 Purairo nalani Yèsus rotiè. Napuranana massempajang sukkuru', Napuwè'-puwè'ni iyaro rotiè sibawa liman-Na, nainappa nawèrèng mennang, sibawa makkeda, "Iyanaè tubuk-Ku iya riyabbèrèyangngè untu' iko. Pogau'ni iyaè untu' sènge'-Ka. " 20 Makkuwatoro purana manrè, Nabbèrèyanni ènungeng anggoro'è lao ri mennang sibawa makkeda, "Iyaè ènungengngè iyanaritu assijancingenna Allataala iya mabaruè, iya risahkangngè sibawa dara-Ku -- dara iya ripatabbollongngè untu' iko. " 21 "Iyakiya itai! Tau iya bali'bellariyèk-Ka engkai kuwaè sibawak-Ka! 22 Mèmeng matèi matu Ana'na Tolinoè pada-pada pura napattentuè Allataala; iyakiya cilakai tau iya bali'bellariyèngngi!" 23 Nappammulana mennang makkutana sèddiè lao ri laingngè, niga polè ri yelle'na mennang iya pogau'èngngi matu gau'èro. 24 Naompona appangèwangeng ri yelle'na ana'-ana' gurunna Yèsus, passalenna niga polè ri yelle'na mennang harusu' riyangga' kaminang battowa. 25 Nakkeda Yèsus lao ri mennang, "Sining arunna bangsaè iya dè'è naissengngi Allataala napanrasa-rasai ra'ya'na, sibawa sining tomakuwasaè riyasengngi 'Pallinrunna Ra'ya'è. ' 26 Iyakiya iko dè' naweddikko makkuwaro. Sibalè'na, tau iya kaminang battowaè ri yelle'mu harusu'i mancaji pada-pada iya kaminang baiccu'è, sibawa pamimpingngè harusu'i mancaji pada-pada pattumaniè. 27 Niga lebbi battowa: tau iya tudangngè manrè ri mèjangngè, iyarè'ga tau iya tumaningiyèngngi? Tentu tau iya tudangngè. Iyakiya Iyya engkaka ri yelle'mu selaku pattumani. 28 Ri laleng sininna asussak-Ku, tuli musibawak-Ka. 29 Pada-pada Ambo'è pura mpèrèk-Ka ha' untu' mapparènta, makkuwatoniro Uwèrèkko matu iyaro ha'è. 30 Narimakkuwannanaro weddikko maccowè massennas-sennang sibawa Iyya ri wettuk-Ku mancaji Arung. Natudakko matu ri yasè'na seppuloè duwa kadèra akkarungengngè untu' parèntai seppuloè duwa suku bangsana Israèliè. " 31 "Simon, Simon, èngkalingai! Purani ripalalo Ibillisi'è untu' mojiko; pada-pada gandongngè ripallaing polè ri olina, makkuwatoniro iya madècèngngè ripallaing matu polè ri majaè. 32 Iyakiya purana massempajangekko, Simon, kuwammengngi aja' nalollo teppe'mu. Sibawa narèkko lisuno ri Iyya, harusu'ko pèwatangiwi silessu-silessuremmu. " 33 Nappèbali Pètrus, "Puwang, sadiyaka muttama' tarungkuè sibawa matè silaong Idi Puwang!" 34 Nakkeda Yèsus, "Ateppe'no Pètrus, riwettu dè'napa naoni manu'è iyaè essoèwè, wèkkatelluni muwassakkarek-Ka. " 35 Purairo makkedani Yèsus lao ri mennang, "Riyolo wettunna Usuroko sibawa dè' Upalaloko tiwi tase'-tase', sèpu iyarè'ga sapatu, engkaga akurangemmu?" Nappèbali mennang, "Dè'!" 36 Nakkeda Yèsus, "Iyakiya makkekkuwangngè niga mappunnai tase'-tase' iyarè'ga sèpu, harusu'i natiwi; sibawa niga dè' nappunnai peddang, harusu'i nabalu' jumbana untu' melli peddang. 37 Saba', ateppe'no, aya'na Kitta'è iya makkedaè, 'Riyangga'i matu selaku sèddi tau maja, ' harusu'i kajajiyang ri alè-Ku. Saba' aga taroki ri lalenna Kitta'è passalenna Iyya, kajajiyanni makkekkuwangngèwè. " 38 Nakkeda ana'-ana' gurunna Yèsus, "Puwang, itai, engka duwa peddang kuwaè. " Nappèbali Yèsus, "Sikuna!" 39 Nasalaini Yèsus kotaè nalao pada-pada biyasaè ri Bulu-bulu Zaitun, nalaoto ana'-ana' gurun-Na silaongengngi. 40 Lettu'nana kuwaro, makkedani lao ri mennang, "Assempajakko kuwammengngi aja' mupèneddingiwi paccobangngè. " 41 Nalaona Yèsus mabèla-bèla cèddè polè ri mennang, kira-kira sipaggenrungeng, nainappa makkaluttu massempajang, 42 adan-Na, "Ambo', rèkko weddingngi, pabèlaiwi polè ri Iyya anrasa-rasang iya harusu'è Upèneddingi. Iyakiya aja' nasituru èlo-Ku, sangadinna situru èlona Ambo' bawang. " 43 Engka sèddi malaèka' lao ri Alèna pèwatangiwi. 44 Manrasa-rasa senna'ni Yèsus secara batèng, angkanna pèdè' matonget-tongenni massempajang. Puse'-Na pada-padai daraè tetti ri tanaè. 45 Puranana massempajang, lisuni Yèsus ri ana'-ana' gurun-Na. Napolèini mennang matinro nasaba messè senna'i. 46 Nakkeda lao ri mennang, "Magi mumatinro? Oto'no namuwassempajang, kuwammengngi dè' nakennako paccobang. " 47 Ri wettu mabbicarana mupa Yèsus, polèni sirombongang tau. Ripimpingngi mennang ri Yudas, sala sèddinna ana' gurunna Yèsus. Nalaona Yudas ri Yèsus nanabauwi. 48 Iyakiya makkedai Yèsus lao ri Yudas, "Yudas, maèlokoga bali'bellariwi Ana'na Tolinoè sibawa pabbau?" 49 Wettunna ana'-ana' gurunna Yèsus iya engkaè kuwaro naita aga iya maèloè kajajiyang, makkedani mennang, "Puwang, rilurui bawanni sibawa peddang!" 50 Na sala sèddinna polè ri mennang munrui atanna imang lompoè sibawa peddang angkanna pettu daucculing ataunna. 51 Iyakiya makkedai Yèsus, "Sikuna!" Nainappa nakarawa daucculinna iyaro tauwè sibawa napajjappai. 52 Nanakkeda Yèsus lao ri kapala-kapala imangngè sibawa sining parawira pangawalna Bolana Puwangngè, enrengngè sining pamimpinna Yahudiè iya engkaè kuwaro untu' tikkengngi, "Tau maja-Ka'ga, namupolè sibawa peddang nenniya tarasulu untu' tikkek-Ka? 53 Esso-essoka sibawa ri Bolana Allataala, magi nadè' mutikkek-Ka? Iyakiya iyanaè wettunna tinda'ko, sibawa wettunna pettangngè makkatenning akuwasang. " 54 Natikkenni mennang Yèsus nanatiwii ri bolana imang lompoè. Maccoweni Pètrus polè mabèla. 55 Ri tengnga-tengngana seddè bolaèro ripalluwa'ni api appuluè, nalaona Pètrus tudang silaong sining tau iya tudangngè mattulilingiwi. 56 Sala sèddinna pattumani makkunrai mitai Pètrus tudang ri seddèna apièro; naiyaro pattumani makkunraiè napènessaini Pètrus, nainappa makkeda, "Iyaè tauwè silaong towi onna' Yèsus!" 57 Iyakiya massakkai Pètrus. Nanakkeda, "Dè' sises-siseng uwissengngi iyaro tauwè!" 58 Dè' namaitta ri munrinna, engka sèddi tau laing mitai Pètrus sibawa makkeda, "Ikoto sala sèddinna polè ri mennang!" Iyakiya mappèbaliwi Pètrus, "Dè', tenniyaka!" 59 Kira-kira sijang ri munrinna, engka sèddi tau laissi makkeda sibawa sadda battowa, "Mèmeng iyaè tauwè ana' gurunnai Yèsus, saba' tau Galilèa towi!" 60 Iyakiya mappèbaliwi Pètrus, "Aga akkattamu, dè' uwissengngi!" Iyatoro wettuè, ri wettu mabbicarana mupa Pètrus, naonina manu'è. 61 Nagilinna Yèsus nanaitai Pètrus. Nanaèngngeranni Pètrus, pura makkedai Puwangngè ri alèna, "Riwettu dè'napa naoni manu'è iya essoèwè, wèkkatelluni muwassakkarek-Ka. " 62 Nassuna Pètrus polè kuwaro nateri tassènge'-sènge'. 63 Sining tau iya jagaiyèngngi Yèsus, nacculè-culèini sibawa nababbai. 64 Natongkoi mennang matan-Na sibawa makkutana ri Alèna, "Coba teppui niga barasa'-Ko!" 65 Maèga mupa ada-ada paccella iya napowadaè lao ri alèna. 66 Elènana, sining pamimpinna Yahudiè, kapala-kapala imangngè, sibawa guru-guru agamaè maddeppungeng, nainappa Yèsus ritiwi ri yolona Mahkama Agamana mennang. 67 Nakkeda mennang ri Alèna, "Paissengiki, Arung Pappassalama'-Koga?" Nappèbali Yèsus, "Muwi Upowadakko, dè'to mumateppe matu. 68 Narèkko makkutana-Ka ri iko, dè'to mumappèbali matu. 69 Iyakiya mappammulai makkekkuwangngè, Ana'na Tolinoè tudangngi matu ri seddè ataunna Allataala Iya Pommakuwasaè. " 70 Makkeda manenni mennang, "Rèkko makkuwaitu, Ana'na-Ko Allataala?" Nappèbali Yèsus, "Makkuwaitu adammu. " 71 Nakkeda mennang, "Dè'na naparelluki sabbi! Riyèngkalingani polè ri tèmun-Na!"

Lukas 23

1 Tettong manenni iyaro tau maddeppungengngè, nanatiwii Yèsus ri yolona Pilatus. 2 Nakkuwanaro mennang mappammula tenre'i. Makkedani mennang, "Rilolongengngi iyaè tauwè papusai ra'ya'è. Napangarai tauwè kuwammengngi aja' nakkamaja sima lao ri Kaisar, saba' adanna Alèna iyanaritu Kristus, sèddiwi arung. " 3 Nakkutana Pilatus lao ri Yèsus, "Tongek-Koga Arunna tau Yahudiè?" Nappèbali Yèsus, "Makkuwaitu adatta puwang. " 4 Nakkeda Pilatus lao ri kapala-kapala imangngè sibawa tau maègaèro, "Dè' ulolongeng muwi sèddi asalang ri tauwèwè untu' hukkungngi. " 5 Iyakiya pèdè' maddessa'i mennang, "Pappagguruwan-Na pangarai tauwè ri sininna Yudèa; mula-mulanna ri Galilèa, namakkekkuwangngè lettu toni kuwaè. " 6 Wettunna naèngkalinga Pilatus iyaro, makkutanani, "Aga iyaè tauwè tau Galilèa?" 7 Ripowadannana makkedaè assalenna Yèsus polèi ri daèra iya ri yawa parèntanaè Hèrodès, nakirinni Pilatus Yèsus lao ri Hèrodès, iya wettuèro engka towi ri Yèrusalèm. 8 Masennang senna'ni Hèrodès wettunna naita Yèsus, saba' maittana naèngkalingai passalenna Yèsus sibawa macinnana mitai Yèsus pogau' anu makalallaingngè. 9 Rimakkuwannanaro maèga nakkutang ri Yèsus, iyakiya dè' sises-siseng nappèbali Yèsus. 10 Kapala-kapala imangngè sibawa guru-guru agamaè mangolo towi kuwaro sibawa tenre'i Yèsus. 11 Hèrodès sibawa anggota-anggota tentarana nacculè-culèiwi sibawa napakatunai Yèsus, nainappa napappakèi pakèyang maraja, nanakiringngi lisu ri Pilatus. 12 Iyatoro essoè Hèrodès sibawa Pilatus, iya simusuè riyolo, massellaoni paimeng. 13 Napaddeppungenni Pilatus kapala-kapala imangngè, sining pamimpingngè sibawa ra'ya'è, 14 nainappa makkeda lao ri mennang, "Mutiwii iyaè Tauwè lao ri iyya sibawa makkeda makkedaè Napapusai sining tauwè. Makkekkuwangngè purani uparèssa ri yolomu, iyakiya dè' sises-siseng ulolongengngi sèddi ja iya muteppuwangngèngngi. 15 Makkuwatoro pallolongenna Hèrodès, saba' nasuro towi Yèsus lisu paimeng ri idi. Iyaè tauwè dè'gaga napogau' iya nasitinajaiyè rihukkung sibawa pahukkungeng matè. 16 Rimakkuwannanaro maèloka barasa'i nainappa uleppessang. " 17 Tungke' ramè-ramè Paska, harusu'i Pilatus leppessang sèddi tau tarungku untu' ra'ya'è. 18 Gorani sininna tauwè iya maddeppungengngè kuwaro, "Unoi! Leppessangengngi Barabas!" ( 19 Ritarungkui Barabas nasaba ronta kajajiyangngè ri kotaè sibawa nasaba abbunowang. ) 20 Maèloi Pilatus leppessangngi Yèsus, rimakkuwannanaro mabbicarapi siseng lao ri tau maègaèro. 21 Iyakiya gorai mennang, "Sallii! Sallii!" 22 Na untu' mabbèkkatellunna Pilatus gora lao ri mennang, "Iyakiya aga asalan-Na? Dè' asalang ulolongeng ri Alèna muwi sèddi iya nasitinajaiyè rihukkung sibawa pahukkungeng matè! Maèloka barasa'i, nainappa leppessangngi. " 23 Iyakiya matteru-terui mennang gora siullè-ullèna makkedaè harusu'i Yèsus risalli. Na angkanna makkèwassèlè gorana mennang. 24 Napateppaini Pilatus pahukkungeng matè Yèsus situru èlona sining tauwèro, 25 sibawa leppessangngi tau iya naèllauwè mennang, iyanaritu tau iya ritarungkuè nasaba maronta'na sibawa abbunowanna. Nainappa nabbèrèyang Yèsus lao ri mennang untu' rigaukeng sièlo-èlona mennang. 26 Naritiwina Yèsus ri mennang. Siruntu'ni mennang ri tengnga laleng sèddi tau iya riyasengngè Simon, iya assalennaè polèi ri Kirènè, iya muttama'è ri kotaè. Natikkenni mennang, nainappa napassa mèssangngi aju sallièro ri monrinna Yèsus. 27 Maègato tau maccowè joppa ri munrinna Yèsus -- ri yelle'na engkato sining makkunrai. Iyaro sining makkunraiè nateringini sibawa nawatingi Yèsus. 28 Iyakiya gilingngi Yèsus ri mennang sibawa makkeda, "Eh sining makkunrai Yèrusalèm! Aja' muteringi-Ka. Teringiwi alèmu sibawa ana'-ana'mu. 29 Saba' engka matu napolè wettunna nakkeda tauwè, 'Temmaka upe'na sining makkunrai iya dè'è naengka nappunnai ana', iya dè'è naengka naèmmana' sibawa dè' naengka napasusu ana'lolo!' 30 Ri wettuènnaro nakkeda matu tauwè lao ri buluè, 'Geppaki!' Sibawa lao ri bulu-buluè, 'Timpukki!' 31 Saba' rèkko lao ri pong ngaju iya tuwoè mupa, napogau'i tauwè pada-padaèwè, agarè' tosi nagaukengngi matu mennang lao ri aju iya marakkoènna!" 32 Engkato duwa tau laing -- tau maja duwa -- iya natiwiè mennang untu' rihukkung matè silaong Yèsus. 33 Wettunna lettu ri onrong iya riyasengngè "Tengkora", nasallini mennang Yèsus sibawa iya duwa tau majaèro -- sèddi ri seddè ataunna sibawa sèddi ri seddè abèyona Yèsus. 34 Nassempajanna Yèsus, "Ambo', addampengengngi mennang! Dè' naissengngi mennang aga napogau'. " Nabagè-bagèni kuwaro pakèyanna Yèsus ri yelle'na mennang sibawa naloterèi. 35 Pada tettonni tauwè kuwaro makkita-ita, nasining pamimpinna Yahudiè mèllèkèllè'i Yèsus sibawa makkeda, "Purani napassalama' tau laingngè; cobani makkekkuwangngè passalama'i alè-Mu, rèkko tonget-tongengngi Arung Pappassalama' iya napilè Allataala!" 36 Prajuri'-prajuri'è mèllèkèllè towi. Polèi mennang nanawèrèngngi anggoro kecci 37 sibawa makkeda, "Rèkko arunna-Ko tau Yahudiè, passalama'ni alè-Mu!" 38 Ri coppo'na aju sallina Yèsus, tarokii ada-adaèwè: "Iyanaè Arunna Tau Yahudiè. " 39 Sala sèddinna tau maja iya risalliè kuwaro cella-cellai Yèsus. Makkedai, "Arung Pappassalama'-Koto? Nah, passalama'ni alè-Mu sibawa idi!" 40 Iyakiya tau maja sèddiè mamparengngi, adanna, "Dè'ga mumètau ri Allataala? Pada-padako rihukkung matè. 41 Iyakiya pahukkungetta idi duwa mèmeng siwale' pangkauketta. Iyakiya Alènaro dè' napasala!" 42 Nainappa makkeda lao ri Yèsus, "Yèsus, èngngerakka, rèkko polè-Ko selaku Arung!" 43 Nakkeda Yèsus lao ri tauwèro, "Ateppe'no, iyaè essoè sibawakko matu Iyya ri Firdaus. " 44 Kira-kira tettè seppulo duwa tangassoè, dè'na nattappa essoè, namapettang siseng sininna wanuwaè narapi tettè tellu arawèngngè. 45 Kaing paddenring iya taggattungngè ri laleng Bolana Puwangngè, sapè' mancaji duwa. 46 Nagora Yèsus sibawa sadda battowa, "Ambo'! Ri laleng limam-Mu Uwabbèrèyang alè-Ku!" Purana makkeda makkuwaro, matèni. 47 Wettunna naita parawira tentaraè aga pura kajajiyang, napojini Allataala. Nakkeda, "Dè' tongeng Napasala iyaro tauwè!" 48 Tau maègaè iya laowè kuwaro makkita-ita, naitani aga kajajiyang. Lisu manenni mennang sibawa massesse kalè. 49 Nasininna sissenna Yèsus, muttama' toni sining makkunrai iya maccowèriyèngngi polè ri Galilèa, mabèlai tettong mita manengngi iyaro. 50 Engka sèddi tau riyaseng Yusuf, iya assalennaè polèi ri kota Arimatèa ri wanuwa Yudèa. Sèddiwi tau makessing iya napakalebbiè tauwè sibawa iya tajengngèngngi wettunna Allataala mappammula mapparènta selaku Arung. Namuni anggotanai Mahkamana Agamaè, dè' nasitujuiwi apettunna sibawa tindakanna iyaro mahkamaè. 52 Iyaè Yusuf, laoni mangolo ri Pilatus sibawa naèllaunna kuwammengngi nariwèrèng ujuna Yèsus. 53 Nainappa napanonno ujuna Yèsus polè ri aju salliè, nainappa nadoko sibawa kaing walu polè ri kaing lènangngè. Purairo napalènne'ni ri laleng tampung iya riyèbbuè ri laleng bulu-bulu batuè -- iyaro tampungngè dè'pa naengka naripakè. 54 Iyaro essoè, esso Jumai; namawè'ni esso Saba'è. 55 Sining makkunrai iya silaongngè Yèsus polè ri Galilèa naccowèrini Yusuf sibawa mitai iyaro tampungngè. Naita towi mennang pèkkugi ujuna Yèsus ripalènne ri laleng tampungngè. 56 Nainappa lisu mennang passadiya rampa-rampa sibawa minnya' wangi untu' minnyakiwi ujuna Yèsus. Ri esso Saba'è, mappèsauni mennang majjama untu' turusiwi parènta-parèntana agamaè.

Lukas 24

1 Ri esso Aha'è, maèlè senna'ni iyaro sining makkunraiè lao ri tampungngè tiwi rampa-rampa iya puraè napassadiya mennang. 2 Lettu'nana ri tampungngè, napolèini mennang batu pattongkona pura rigalèttè. 3 Namuttama'na ri laleng tampungngèro, iyakiya dè' naruntu'i ujuna Yèsus kuwaro. 4 Ri wettu tettonna mupa mennang kuwaro sibawa pusana pikkiri'i iyaro gau'è tappa engka duwa tau tettong ri seddèna sibawa millakkillang pakèyanna. 5 Mètau senna'ni mennang, nainappa suju' lettu ri tanaè, nakkeda iya duwa tauwèro lao ri mennang, "Magi musappai tau tuwoè ri yelle'na tau matè? 6 Dè'ni kuwaè; moto'ni! Engngerangngi aga pura Napowada lao ri iko wettunna mupa ri Galilèa, 7 makkedaè, 'Ana'na Tolinoè harusu'i riyabbèrèyang lao ri tau madosaè; nainappa risalli, na ri esso matelluè tuwoi matu paimeng. ' " 8 Naèngngeranni sining makkunraièro ada-adanna Yèsus. 9 Lisunnana polè ri tampungngèro, nacuritani mennang sininna iyaro kajajiyangngè lao ri seppuloè sèddi rasul sibawa sininna tau maccowè laingngè. 10 Sining makkunrai iya powadangngèngngi iya manennaro lao ri ana'-ana' gurunna Yèsus, iyanaritu: Maria Magdalèna, Yohana sibawa Maria indo'na Yakobus, enrengngè sining makkunrai laingngè iya silaongngè mennang. 11 Iyakiya iyaro rasul-rasul-è nasemmi iyaro sining makkunraiè maccurita bawammi. Dè' natepperiwi mennang curitana iyaro sining makkunraiè. 12 Iyakiya tokkongngi Pètrus nalari lao ri tampungngè. Nabbukku makkita lilaleng, nanaitani bannami kaing pawwalunna bawang kuwaro. Hèrang senna'ni Pètrus, nainappa lisu sibawa penno pakkutana ri laleng atinna passalenna aga pura kajajiyang. 13 Iyatoro essoè, engka duwa tau maccowè ri Yèsus iya joppaè lao risèddiè dèsa iya riyasengngè Emaus, kira-kira seppulo sèddi kilo bèlana polè ri Yèrusalèm. 14 Ri laleng joppana mennang nabicarai passalenna sininna gau'è iyaro puraè kajajiyang. 15 Ri wettu mabbicara-bicarana mennang pada passui pallolongenna, alènana Yèsus polè joppa silaong mennang. 16 Naitani mennang Yèsus, iyakiya engka mèbbui mennang nadè' narupai Alèna. 17 Nakkeda Yèsus, "Passaleng aga mubicara ri tengnga laleng onna'?" Mappèsauni mennang sibawa masussa tappana. 18 Na sèddi polè ri mennang, iya riyasengngè Klèopas, makkutana ri Yèsus, "Bapa'ga bawang alè-alèna topolè-polè ri Yèrusalèm dè' naissengngi gau' iya kajajiyangngè kuwaro cèddè-cèddè'èwè?" 19 Nakkutana Yèsus, "Gau' agaro?" Nappèbali mennang, "Gau' kajajiyangngè lao ri Yèsus, tau polè ri Nazarèt. Nabiwi; ada-adan-Na sibawa pangkauken-Na makuwasa senna'i -- muwi situru pakkitanna Allataala muwi situru pakkitanna sininna tauwè. 20 Kapala-kapala imangngè sibawa sining pamimpinna bangsata mabbèrèyangngi untu' rihukkung matè, na-Nasallii mennang! 21 Padahal riyammènasaiwi makkedaè Alèna ritu paleppe'i matu Israèliè! Na iyaè essoè, esso matellunnani sipongenna kajajiyang gau'èro. 22 Na engka topa siyagangngarè makkunrai polè ri yelle'ta mèbbuki tassèleng. Maèlè senna' mupa nalao mennang ri tampungngè, 23 iyakiya dè' naruntu'i uju-Na kuwaro. Nalisu mennang powadai makkedaè mitai mennang malaèka', na iyaro malaèka'è powadai makkedaè tuwoni Yèsus. 24 Siyagangngarè tau polè ri idi lao ri tampungngè nanapolèini makkedaè aga napowada sining makkunraièro makkuwa mèmengngi, iyakiya dè' naitai Yèsus. " 25 Nakkeda Yèsus lao ri mennang, "Mèmeng madonggoko! Matengnge senna'ko matepperiwi sininna iya puraè napowada nabi-nabiè! 26 Dè'ga na Arung Pappassalama'è harusu'i napèneddingi riyolo' anrasa-rasangngè, nainappa nalolongeng alebbiren-Na?" 27 Nainappa napakatajang Yèsus lao ri mennang aga tarokiè ri laleng sininna Kitta'è passalenna Alèna, mappammulai ri Kitta'-kitta'na Musa enrengngè Kitta'na sining Nabiè. 28 Namacawè'na mennang ri dèsa iya nakkattaiyè. Najjaini Yèsus maèlo joppa matteru, 29 iyakiya ritahangngi ri mennang. Nakkeda mennang, "Onrono ri onrotta, mammulani wenni sibawa mammula toni mapettang. " Nauttama'na Yèsus untu' mabbenni ri onronna mennang. 30 Ri wettu tudanna mennang manrè, malani Yèsus roti, Nasukkuru' ri Allataala, nainappa Napuwè-puwè iyaro rotiè, na-Nawèrèngngi lao ri mennang. 31 Namainge'na mennang makkedaè Yèsus iyaro. Iyakiya lennye'i polè ri pakkitanna. 32 Nakkeda mennang sèddiè lao ri laingngè, "Dè'ga nasamanna luwang atitta wettunna mabbicara ri idi ri tengnga laleng, wettunna napakatajang lise'na Kitta'è lao ri idi?" 33 Iyatoro wettuè natettong nalisu lao ri Yèrusalèm. Napolèini mennang kuwaro iya seppuloè sèddi ana' gurunna Yèsus maddeppungeng sibawa laingngè. 34 Nakkedana mennanro, "Mèmeng tongeng, tuwoni paimeng Puwangngè! Purani nappaitang Alèna lao ri Simon!" 35 Iya duwa tau maccowèriyèngngi Yèsus iya nappa polèro nacuritani pangalamanna mennang ri tengnga allalengenna, sibawa pèkkugi mennang rupai Puwangngè ri wettu Napuwè'-puwè'na rotiè. 36 Ri wettu maccuritana mupa mennang, tappa engka muni Yèsus tettong ri tengnga-tengngana sibawa makkeda, "Salèwangekko!" 37 Tassèlenni mennang sibawa mètau, nasaba nasengngi mennang mita sètang. 38 Iyakiya makkedai Yèsus, "Magi mumètau? Magi naompo abata-batangngè ri laleng atimmu? 39 Itai limak-Ku sibawa ajè-Ku. Issenni, makkedaè Iyya'naè! Karawani sibawa pènessaini, nasaba sètangngè dè' nappunnai juku iyarè'ga buku, pada-pada iya muwitaè ri Iyya. " 40 Makkeda makkuwairo Yèsus nanappaitang towi lao ri mennang limanna sibawa ajè-Na. 41 Na riwettu dè'na mupa namateppe' mennang, nasaba marennu senna'na sibawa hèranna, makkutanani Yèsus ri mennang, "Engkaga nanrè muwappunnai kuwaè?" 42 Riwèrènni ri mennang sipolo balè pura nasu. 43 Nalani Yèsus iyaro balè, nananrèi ri yolona mennang. 44 Purairo makkedani lao ri mennang, "Iyanaè gau'-gau' iya puraè Upowadakko wettuk-Ku sibawa mupo: makkedaè tungke' gau' iya tarokiè passalenna Iyya ri laleng Kitta'na Musa, sining Nabiè, sibawa Mazmur-è, harusu'i kajajiyang. " 45 Nanatimpa'ni Yèsus akkalenna mennang untu' pahangngi akkattana Kitta'è. 46 Nakkeda Yèsus lao ri mennang, "Ri laleng Kitta'è tarokii makkedaè Arung Pappassalama'è harusu'i manrasa-rasa, sibawa harusu'i moto' paimeng polè ri amatènna ri esso matelluè. 47 Makkuwatoro ri laleng asenna iyaro Arung Pappassalama'è harusu'i riyabbirittang lao ri sininna bangsaè makkedaè harusu'i toba' rupa tauwè, sibawa Allataala maddampengengngi dosaè. Na iyaro karèbaè harusu'i riyabbirittang mappammulai ri Yèrusalèm. 48 Ikona ritu sabbi'-sabbinna iya manenro. 49 Na alè-Ku maèlo kiringngi lao ri iko aga pura najjanciyang Ambo'è. Iyakiya harusu'ko tette mattajeng ri kotaèwè narapi akuwasang polè ri Allataala pennoiko. " 50 Purairo natiwini Yèsus mennang massu ri saliweng kota lettu ri Bètania. Kuwaniro nakka liman-Na, na-Nabarakkakiwi mennang. 51 Ri wettu Napogau'naro, tarakkani mènrè ri surugaè, nassaran-Na sibawa mennang. 52 Suju'ni mennang sompai, nainappa lisu ri Yèrusalèm sibawa marennu senna'na atinna, 53 sibawa matteru-terui pojiwi Allataala ri Bolana Puwangngè.

Yohanes 1

1 Ri pammulanna, dè'napa naripancaji linoè, engka mèmenni Saddaè. Engkai Saddaè silaong Allataala sibawa Saddaè pada-padai Allataala. 2 Pammulanna mupa nasibawa Allataala. 3 Iya manenna ripancajiwi naolai Alèna, sibawa polè ri sininna iya engkaè, dè'gaga sèddi dè' naripancaji polè ri Alèna. 4 Iyaro Saddaè assalennai atuwongngè, na iyaro atuwongngè mabbèrèi tajang lao ri rupa tauwè. 5 Iyaro tajangngè mattappai ri laleng pettangngè, na iyaro pettangngè dè' naullèi peddèiwi. 6 Polèni tau iya nasuroè Allataala, asenna Yohanès. 7 Polèi mabbirittangngi passalenna iyaro tajangngè, kuwammengngi nasininna tauwè mateppe'i. 8 Alèna paimeng tenniya iyaro tajangngè, nabbirittangngi bawang. 9 Tajang tonget-tongengngè iya tappaèngngi sininna rupa tauwè, polèi ri linoè. 10 Saddaè engkai ri linoè, ripancajiwi linoè polè ri Alèna, iyakiya dè' naissengngi linoè. 11 Laowi ri wanuwan-Na muto iyakiya dè' naritarima ri bangsa-Na. 12 Namuni engkato tau tarimai sibawa mateppe' ri Alèna, nawèrèngngi ha' mancaji ana' Allataala, 13 iya riyajjanciyangngè tenniya polè ri rupa tauwè, saba' iyaro atuwong mabaruè polèi ri Allataala assalenna. 14 Mancaji rupa tauni Saddaè, monroi ri yelle'ta, napurani riita arajan-Na. Iyaro arajangngè natarimai selaku Ana' Tungke'na Ambo'è. Naolai Alèna nariita Allataala sibawa pammasè-Na lao ri idi. 15 Polèi Yohanès selaku sabbin-Na mabbirittangngi: "Iyanaè Alèna iya upowadaè: Polèi matu lebbi ri monri naiya iyya, saba' dè'napa uwengka, engka mèmenni. " 16 Pennoi pammasè; dè' appèsaunna, barakkakiki. 17 Hukkunna Puwangngè ritarimai naolai Musa. Iyakiya pammasè sibawa atinulurenna Allataala ripannessai naolai Yèsus Kristus. 18 Dè' gaga pura mitai Allataala, ri lainnaè Ana' Tungke'na Ambo'è, iya padaè sibawa Ambo'è, sibawa mareppè senna'ki ri Alèna, Alèna ritu pannessai Ambo'è lao ri idi. 19 Sining panguwasa Yahudiè ri Yèrusalèm nasuroi imang-ngimangngè sibawa sining tau Lèwiè lao ri Yohanès sibawa makkutanangngi ri alèna, "Niga ikoè?" 20 Namangakuna Yohanès terus terang, "Tenniyaka Arung Pappassalama'è. " 21 Nakkutana mennang, "Rèkko makkuwaitu, niga iko? Ikoga Elia?" Nappèbali Yohanès, "Tenniya. " Nakkutanasi mennang, "Ikoga Nabiè?" Nappèbali, "Tenniya. " 22 Nakkeda mennang, "Rèkko makkuwaitu, powadanni niga iko, kuwammengngi weddikki mpèrèngngi pappèbali lao risining tau iya suroèkki. Aga adammu passalenna alèmu?" 23 Nappèbali Yohanès, "Iyya'naè iya napowadaè Nabi Yèsaya: 'Tau iya goraè ri padang kessi'è: Paratai lalengngè untu' Puwangngè. ' " 24 Sining tau iya risuroè ri tau Farisièro 25 makkutanasi, "Rèkko tenniyako Arung Pappassalama'è, tenniya Elia, tenniya Nabiè, magi palè mumaccemmè?" 26 Nappèbali Yohanès, "Iyya maccemmèka sibawa uwai. Iyakiya ri tengnga-tengngamu engka tau iya dè'è muwissengngi. 27 Polèi lebbi ri monri naiya iyya, iyakiya muwi untu' lukkai tulu sapatun-Na dè'to usitinaja. " 28 Iya manennaro kajajiyangngi ri Bètania, seddè alauna Salo Yordan onronna Yohanès maccemmè. 29 Pappa bajanana, naitani Yohanès, Yèsus lao ri alèna. Nakkeda Yohanès, "Itai, iyanaro Ana' Bimbala'na Allataala iya leddaèngngi dosana linoè. 30 Alèna ritu iya uwasengngè polèi matu lebbi ri monri naiya iyya, iyakiya lebbi battowai naiya iyya, saba' ri wettu dè'napa ujaji, engka mèmenni. 31 Ri yolonaro dè' uwissengngi niga Alènaro. Padahal polèka maccemmè sibawa uwai kuwammengngi naissengngi bangsa Israèliè. " 32 Nappèsabbing towi Yohanès iyaè, "Uwitai Rohna Allataala nonno pada-pada jangang-jangangngè polè ri langiè naonro ri yasè'-Na. 33 Iyaro wettuè dè'pa uwissengngi niga Alèna? Iyakiya Allataala iya suroèkka maccemmè sibawa uwai pura makkeda ri iyya 'Rèkko muwitai Rohna Allataala nonno, naonro ri yasè'na sèddiè tau, iyanaritu maccemmè matu sibawa Rohna Allataala. ' 34 Alèkuna pura mitai, " adanna Yohanès, "nausabbingngi makkedaè Alèna ritu Ana' Allataala. " 35 Pappa bajanana, engkasi Yohanès ri onrongngèro sibawa duwa ana' gurunna. 36 Wettunna naita Yèsus lalo, makkedani, "Itai! Iyanaro Ana' Bimbala'na Allataala. " 37 Iyaro duwaè ana' gurunna Yohanès naèngkalingani ada-adaèro, nanalao maccowèriwi Yèsus. 38 Nagilinna Yèsus limonri, nanaitai mennang maccowèriwi. Nakkutana-Na, "Aga musappa?" Nappèbali mennang, "Rabi, kègai Rabi monro?" -- ('Rabi' bettuwanna guru. ) 39 Nakkeda Yèsus, "Laono mai, na alèmu mitai. " Laoni mennang sibawa Alèna nenniya mitai kègai monro. Iyaro wettuè tettè eppani arawèngngè. Iyaro essoè monroni mennang silaong Alèna. 40 Sala sèddinna polè ri Iya duwa tau iya puraè mèngkalingai aga napowada Yohanès nainappa lao maccowèriwi Yèsus, iyanaritu Andrèas, silessurenna Simon Pètrus. 41 Mapperi-perini Andrèas sappai Simon, silessurenna, nakkeda ri alèna, "Purani siruntu Mesias!" (Mesias padai Kristus, iyanaritu: Arung Pappassalama'è. ) 42 Risilaongenni Simon ri Andrèas lao ri Yèsus. Ritangngani Simon ri Yèsus, nainappa makkeda, "Iko Simon, ana' Yona. Riyasekko matu Kèfas. " (Kèfas pada-padai Pètrus, bettuwanna: bulu batu. ) 43 Pappa bajanana, napettuini Yèsus untu' lao ri Galilèa. Siruntu'ni Filipus, nakkeda ri alèna, "Laono mai muwaccowèri-Ka!" 44 Assalenna Filipus iyanaritu Bètsaida, iyanaritu onrong naonroiyè Andrèas sibawa Pètrus. 45 Siruntu'ni Filipus sibawa Natanaèl nakkeda ri alèna, "Siruntu'ni tau iya nasengngè Musa ri laleng Kitta Hukkunna Allataala, sibawa iya nabbirittangngè nabi-nabiè. Iyanaritu Yèsus polè ri Nazarèt, ana'na Yusuf. " 46 Iyakiya mappèbaliwi Natanaèl, "Weddigga sèuwa iya makessingngè polè ri Nazarèt?" Nappèbali Filipus, "Laono mai na alèmu mitai. " 47 Naitani Yèsus Natanaèl polè, nakkeda passalenna alèna, "Itai, iyanaro tau Israèl tonget-tongeng. Dè'gaga apalessuwang ri alèna. " 48 Nakkutana Natanaèl ri Yèsus, "Pèkkugi taissekka Pa'?" Nappèbali Yèsus, "Riwettu dè'napa naobbiko Filipus, Uwita mèmenno ri yawana pong araè. " 49 Nakkeda Natanaèl, "Pa' Guru, Bapa' iyanaritu Ana' Allataala! Bapa' ritu Arunna bangsa Israèliè!" 50 Nakkeda Yèsus, "Mateppe'ko nasaba Upowadai makkedaè Uwitako ri yawana pong araè? Gau'-gau' iya lebbi battowaè na iyaro muwita matu!" 51 Nakkedapa Yèsus, "Tongeng, ateppe'no, muwitai matu langiè tattimpa', na malaèka'-malaèka'na Allataala notè ri Ana'na Tolinoè. "

Yohanes 2

1 Duwangngesso ri munrinna engka pèsta abottingeng ri kota Kana ri Galilèa, na engkai kuwaro indo'na Yèsus. 2 Yèsus sibawa ana'-ana' gurun-Na riyobbi towi lao ri pèstaèro. 3 Wettunna cappu anggoro'è, makkedani indo'na Yèsus lao ri Yèsus, "Acappurengngi mennang anggoro. " 4 Nappèbali Yèsus, "Indo', aja' musuro-Ka. Dè'pa narapii wettunna Uwappaddissengeng alè-Ku. " 5 Iyakiya makkedai indo'na Yèsus lao risining pattumaniè, "Pogau' bawanni aga napowadakko. " 6 Engka enneng bèmpa napassadiya kuwaro untu' apparelluwang abbissang situru ade' Yahudiè. Tungke' bèmpa lise'na kira-kira sèratu liter. 7 Nakkeda Yèsus lao risining pattumanièro, "Lisekiwi iyaro sining bèmpaè sibawa uwai. " Nalisekini mennang gangka penno. 8 Nainappa makkeda Yèsus lao ri mennang, "Alani cèddè' iyaro uwaiè makkekkuwangngè namutiwii lao ri pamimping pèstaè. " Natiwini mennang iyaro uwaiè lao ri pamimpinna pèstaè, 9 nanakanyamèi uwai iya tappinraènna mancaji anggoro. (Dè' naissengngi polè kègi iyaro anggoro'è, banna sining pattumani iya tiri'èngngi iyaro uwaiè bawang missengngi. ) Na iyaro pamimping pèstaè naobbini bottimpuranè, 10 nainappa makkeda ri alèna, "Biyasana tauwè anggoro makessingngè riyolo' napatala, cau maneppi sining undangengngè mènung, nainappa anggoro biyasaè. Iyakiya idi Saudara nataroi anggoro kaminang makessingngè lettu makkekkuwangngè!" 11 Iyanaro anu makalallaing mammulang napogau' Yèsus. Iyaro napogau'i ri Kana ri Galilèa. Nasibawang tanrangngèro nappaitangngi arajan-Na. Namateppe'na ana'-ana' gurun-Na. 12 Purairo laoni Yèsus ri Kapernaum silaong indo'-Na, sining silessuren-Na sibawa sining ana' gurun-Na. Monroni mennang kuwaro siyagangngarè esso ittana. 13 Macawè'nana Esso Maraja Paskana Yahudiè, laoni Yèsus ri Yèrusalèm. 14 Napolèini Yèsus ri Bolana Allataala sining pabbalu' sapingngè, bimbala'è, sibawa jangang-jangangngè; makkuwatoro sining passèlè dowiè tudang kuwaro. 15 Mèbbuni Yèsus sèuwa cambu polè ri tuluè nainappa narukka sininna olokolo'èro, muwi bimbala' iyarè'ga saping polè ri laleng Bolana Allataala. Nabalè'ni sining mèjanna passèlè-sèlè dowiè angkanna tassiya-siya dowina lao tulili. 16 Nakkeda lao ri pabbalu' jangang-jangangngè, "Akka manengngi polè kuwaè! Aja' mupancajiwi Bolana Ambo'-Ku onrong dangkang!" 17 Nanaèngngeranni sining ana' gurun-Na aya'na Kitta'èwè, "Pappojik-Ku lao ri Bola-Mu oh Allataala, natunui atik-Ku. " 18 Nasining panguwasana Yahudiè naèwani Yèsus, adanna mennang, "Cobasai mèbbu anu makalallaingngè selaku tanrang lao ri idi makkedaè engka ha'-Mu tinda' pada-padaèwè. " 19 Nappèbali Yèsus, "Ruttunni Bolaèwè, na ri laleng tellungngesso Upatettongngi matu paimeng. " 20 Nakkeda mennang, "Patappulo enneng taunna riyapparelluwang untu' patettongngi iyaè Bolana Allataala. Na iko maèloko patettongngi paimeng ri laleng tellungngesso?" 21 Iyakiya Bolana Allataala iya nasengngè Yèsus iyanaritu watakkalè-Na. 22 Jaji rimunri, puranana ripaoto' Yèsus polè ri amatèngngè, naèngngeranni ana'-ana' gurun-Na makkedaè iyaro gau'è purai napowada. Namateppe'na mennang lao ri iya tarokiè ri laleng Kitta'è sibawa lao ri iya napowadaè Yèsus. 23 Ri wettu engkana mupa Yèsus ri Yèrusalèm ri wettu Ramè-Ramè Paskaè, maèga tau mateppe' ri Alèna nasaba sining anu makalallaing iya napogau'è. 24 Iyakiya alèna Yèsus dè' natepperiwi mennang, saba' naisseng manengngi sininna tauwè. 25 Dè' naparellu tauwè mabbèrè pappakatajang lao ri Alèna passalenna nigi-nigi, saba' alèna missengngi aga iya engkaè ri laleng atinna rupa tauwè.

Yohanes 3

1 Engka sèddi pamimping agama polè ri yelle'na tau Farisiè iya riyasengngè Nikodèmus. 2 Risèuwaè wenni laowi ri Yèsus sibawa makkeda, "Bapa' Guru, irissengngi Bapa' risuroi ri Allataala. Saba' dè' muwi sèddi tau mullèi mèbbu anu makalallaing pada-pada naèbbuè Bapa', rèkko dè' narisibawang ri Allataala. " 3 Nappèbali Yèsus, "Ateppe'no, dè' sèddi tau mullèi mancaji anggotana umma'na Allataala, rèkko dè' narijajiyang paimeng. " 4 Nakkeda Nikodèmus lao ri Yèsus, "Masa' tau battowaè wedding jaji paimeng? Weddigga muttama' paimeng ri laleng parèmmananna indo'na nappa rijajiyang paimeng?" 5 Nappèbali Yèsus, "Tongeng senna' adak-Ku: rèkko tauwè dè narijajiyang polè ri uwai sibawa polè ri Rohna Allataala, iyaro tauwè dè' nawedding mancaji anggotana umma'na Allataala. 6 Secara mallahèreng rijajiyangngi rupa tauwè ri tomatowaè, iyakiya secara batèng rijajiyangngi ri Rohna Allataala. 7 Aja' muhèrang rèkko makkeda-Ka: iko maneng harusu'ko rijajiyang paimeng. 8 Mangirii angingngè kègi naèlori; riyèngkalingai oninna, iyakiya dè' narisseng polè kègai apolènna sibawa kègai laona. Makkuwatoro tau iya rijajiyangngè ri Rohna Allataala. " 9 Nakkutana Nikodèmus, "Pèkkugi iyaro wedding kajajiyang?" 10 Nappèbali Yèsus, "Na guruko ri Israèl; masa' dè' muwissengngi? 11 Ateppe'no: mabbicaraki banna passalenna aga iya riissengngè, namabbèrèki asabbiyang banna passalenna aga iya puraè riita; iyakiya dè' mumaèlo tarimai asabbiyattaro. 12 Dè' mumateppe rèkko ucuritakko passalenna gau'-gau' polè ri linoèwè; pèkkugi weddikko mateppe', rèkko ucuritakko gau'-gau' passalenna surugaè? 13 Dè' sèddi tau pura mènrè ri surugaè, ri lainnaè iya nonnoè ri linoè, iyanaritu Ana'na Tolinoè. 14 Pada-pada Musa paènrè ula tembaga ri sibatangngè aju ri padang kessi'è, makkuwatoro Ana'na Tolinoè harusu' ripaènrè, 15 kuwammengngi nasininna tau iya matepperiyèngngi lolongengngi atuwong tongengngè sibawa mannennungengngè. " 16 Nasaba makkumani Allataala namaseinna rupa tauwè ri linoèwè, angkanna Nabbèrèyangngi Ana' Tungke'na, kuwammengngi na tungke' tau iya matepperiyèngngi dè' nabinasa sangadinna lolongengngi atuwong tongengngè sibawa mannennungengngè. 17 Saba' nakiringngi Allataala Ana'-Na tenniya untu' madèlèkiwi linoèwè, iyakiya untu' passalama'i. 18 Tau iya mateppe'è ri Alèna dè' narihukkung. Iyakiya tau iya dè'è namateppe' ri Ana'na Allataala purani rihukkung ri Allataala, nasaba dè' namateppe' ri Ana'na Allataala iya sèddi-sèddiè. 19 Rituntu'i nallalengiwi gau'èwè: Iyaro tajangngè engkani polè ri linoè, iyakiya rupa tauwè lebbi napojiwi pettangngè naiya tajangngè, saba' majai pangkaukenna mennang. 20 Tungke' tau iya pogau'è ja, nabenciwi tajangngè; dè' namaèlo lao ri tajangngè, kuwammengngi pangkaukenna majaè dè' napaita. 21 Iyakiya tau iya pogau'èngngi èlona Allataala, laowi ri tajangngè kuwammengngi namanessa makkedaè aga napogau' iyanaritu siturui èlona Allataala. 22 Purairo laoni Yèsus sibawa ana'-ana' gurun-Na ri Yudèa. Monroni kuwaro siyagangngarè esso ittana silaong mennang sibawa maccemmè. 23 Iyaro wettuè dè'pa nauttama tarungkuè Yohanès. Maccemmèi ri Ainon, dè' namabèla polè ri Salim, saba' maèga uwai kuwaro. Polèni sining tauwè ri alèna, nanacemmèi mennang. 25 Siyagangngarè ana' gurunna Yohanès mammulani mappangèwang sibawa tau Yahudiè passalenna peraturang apaccingengngè. 26 Laoni mennang ri Yohanès, sibawa makkeda, "Pa' Guru, naèngngerang mupaga Bapa' tau sibawangngèngngi Bapa' ri liwenna Salo Yordanro, iya najellorengngèkki Bapa' riyolo? Maccemmè towi makkekkuwangngè, nasininna tauwè laowi ri Alèna!" 27 Nappèbali Yohanès, "Dè' naullèi mappunnai agi-agi tolinoè rèkko dè' nariwèrèng ri Allataala. 28 Alèmu pura mèngkalingaka makkeda, 'Tenniyaka Arung Pappassalama'è. Risuroka poddiyoloiwi Alèna. ' 29 Botting makkunraiè iyanaritu appunnangennai bottimpuranè. Sellaona bottimpuranèro banna tettongngi ranrengngi sibawa mèngkalingai, sibawa masennangngi rèkko naèngkalingai saddanna bottimpuranè. Makkuwatoniro iyya. Makkekkuwangngè masennang senna'ka. 30 Alèna ritu harusu' pèdè' penting, na iyya pèdè' makurang penting. " 31 Iya polè ri yasè'è napakacauri manengngi. Iya polè ri linoè rigolongkangngi tolino, sibawa mabbicara passalenna gau'-gau' linoè. Iya polè ri yasè napakacauri manengngi. 32 Mabbicarai passalenna iya puraè naita sibawa naèngkalinga, iyakiya dè' sèddi tau mateppe' ri pappèsabbiyan-Na. 33 Tau iya mateppe'è ri pappèsabbiyan-Naro, nangakuiwi makkedaè tongengngi Allataala. 34 Saba' tau iya nasuroè Allataala untu' palettu'i ada-adanna Allataala, nasaba pura riwèrènni Rohna Allataala sukku lao ri Alèna. 35 Ambo'è namasèiwi Ana'-Na, sibawa pura nabbèrèyang manengngi akuwasangngè ri Alèna. 36 Tau iya mateppe'è ri Ana'èro lolongengngi matu atuwong mannennungeng. Iyakiya tau iya dè'è namatinulu ri Ana'èro dè' nalolongeng atuwong. Rihukkungngi ri Allataala lettu mannennungeng.

Yohanes 4

1 Naèngkalingani sining tau Farisiè makkedaè Yèsus lolongengngi sibawa cemmèi lebbi maèga ana' guru naiya Yohanès. ( 2 Sitongenna Yèsus dè' naccemmè, sangadinna ana'-ana' gurun-Na bawang. ) 3 Wettunna naisseng Yèsus makkedaè naèngkalingani sining tau Farisiè passalenna gau'èro, lisuni ri Galilèa polè ri Yudèa. 4 Ri laleng allalengennaro harusu'i nalaloi Samaria. 5 Nalettu'na Yèsus risèuwaè kota ri Samaria iya riyasengngè Sikhar, dè' namabèla polè ri tana iya nabbèrèyangngè Yakub riyolo lao ri Yusuf, ana'na. 6 Kuwaniro monro bujunna Yakub. Matekko senna'i Yèsus nasaba allalengengngèro, rimakkuwannanaro tudanni ri wirinna bujungngè. Iyaro wettuè kira-kira tettè seppulo duwa tangassoè. 7 Na ana'-ana' gurunna Yèsus laoni ri kotaè untu' melli nanrè. Napolèna sèddi makkunrai Samaria mabbanrong uwai. Nakkeda Yèsus ri makkunraièro, "Bu', tawèrèk-Ka uwai rinutta!" 9 Nappèbali iyaro makkunrai Samariaè, "Puwang tau Yahudi, na iyya tau Samaria; magi Puwang taèllau uwai rinung ri iyya?" (Saba' dè' gaga assisumpungenna sining tau Yahudiè sibawa tau Samariaè. ) 10 Nappèbali Yèsus, "Akkalarapanna muwissengngi pabbèrèna Allataala sibawa niga iya mèllauwè uwai rinung ri iko, tentu mèllau tokko uwai rinung ri Alèna, na-Nawèrèkko matu uwai tuwo. " 11 Nakkeda iyaro makkunraiè, "Dè' tappunnai banrong Puwang, na iyaè bujungngè malamung senna'. Polè kègaki Puwang lolongeng uwai tuwo? 12 Yakub, ambo'na toriyolota, mpèrèkki iyaè bujungngè. Alèna malato uwai rinung polè kuwaè; makkuwatoro ana'-ana'na enrengngè olokolo'na. Tasengngiga Puwang lebbi battowaki na iya Yakub?" 13 Nakkeda Yèsus, "Tau iya mènungngèngngi iyaè uwaièwè madekka mupi paimeng. 14 Iyakiya tau iya mènungngèngngi uwai maèloè Uwabbèrèyang, dè'na namadekkana lettu mannennungeng. Saba' uwai maèloè Uwabbèrèyang mancajiwi matu mata uwai ri laleng alèna iya jompiè massu sibawa mabbèrè atuwong mannennungeng. " 15 Nakkeda iyaro makkunraiè, "Puwang tawèrènna iyaro uwaièro, kuwammengngi dè'na umadekkana; sibawa dè'na naparelluka lisuna kuwaè untu' mala uwai. " 16 Nakkeda Yèsus, "Laono muwobbii lakkaimmu, nainappa lisu kuwaè. " 17 Nappèbali iyaro makkunraiè, "Dè' uwappunnai lakkai. " Nakkeda Yèsus, "Tongeng adammu. 18 Saba' wèkkalimano kawing, na worowanè iya muèwaè siyonrong makkekkuwangngè tenniya lakkaimmu. " 19 Nakkeda iyaro makkunraiè, "Uwissenni makkekkuwangngè, Puwang sèddiwi nabi. 20 Nènè-nènèta nasompai Allataala ri buluèwè, iyakiya bangsana Puwang makkedai banna ri Yèrusalèm bawang onronna tauwè sompai Allataala. " 21 Nakkeda Yèsus lao ri makkunraièro, "Ateppe'no, sèuwa wettu matu nasompai tauwè Ambo'è, tenniyana ri buluèwè, sibawa tenniyato ri Yèrusalèm. 22 Iko tau Samariako sompai iya dè'è muwissengngi, na idi tau Yahudiè sompaki iya riissengngè, saba' asalamakengngè polèi ri tau Yahudiè. 23 Iyakiya polèi matu wettunna, mala polèni, makkedaè nasibawang akuwasanna Rohna Allataala, nasompai matu tauwè Ambo'è selaku Allataala tongengngè pada-pada naèloriyè Ambo'è. 24 Saba' iyaro Allataala Roh-i, na banna iya nasibawangngè akuwasanna Rohna Allataala naullèi tauwè sompai Ambo'è selaku Allataala iya tongengngè. " 25 Nakkeda iyaro makkunraiè lao ri Yèsus, "Uwisseng Arung Pappassalama'è (iya riyasengngè Kristus) maèloi polè. Rèkko polèi, nappaddissengengngi matu sininna sèuwa-sèuwaè lao ri idi. " 26 Nakkeda Yèsus, "Iyya'naè. Iyya, iya makkekkuwangngè mabbicara sibawa iko. " 27 Iyaro wettuè lisuni ana'-ana' gurunna Yèsus. Hèranni mennang mitai Yèsus mabbicara sibawa sèddi makkunrai. Iyakiya dè'gaga sèddi polè ri mennang makkutana ri makkunraièro, "Aga parellutta Bu?" Iyarè'ga makkutana lao ri Yèsus, "Magi Bapa' nabbicara sibawa makkunraièro?" 28 Na iyaro makkunraiè nasalaini busunna kuwaro nalari lao ri kotaè nanakkeda lao risining tauwè kuwaro, 29 "Laono mai muwitai tau iya powadangngèkka sininna puraè upogau'. Naullèga iyanaro Arung Pappassalama'è?" 30 Nasalaini iyaro sining tauwè kotaè nalao ri Yèsus. 31 Iyaro wettuè ana'-ana' gurunna Yèsus naèrani Yèsus manrè. Nakkeda mennang, "Bapa' Guru, anrèni. " 32 Iyakiya mappèbaliwi Yèsus, "Engka nanrè ri alè-Ku, iya dè'è muwissengngi. " 33 Nammulana ana'-ana' gurunna Yèsus sisullè-sullè makkutana, "Engkaga tau tiwirengngi nanrè?" 34 Nakkeda Yèsus, "Nanrè-Ku iyanaritu maccowèriwi èlo-Na iya suroèk-Ka, sibawa pappurai jamang iya nawèrèngngèk-Ka. 35 Makkedako, 'Patampuleppi na wettu èngngalang. ' Iyakiya makkeda-Ka lao ri iko: Itani sining dare iya maridiènna, sadiyani untu' riyèngngala! 36 Tau iya mèngngalaè mammulani nanatarima sarona sibawa paddeppungeng wassèlè' untu' atuwong mannennungengngè. Na tau iya mampoè sibawa tau iya mèngngalaè weddingngi massennas-sennang massibawa. 37 Iyaè warèkkadaè tongeng towi, 'Iya sèddiè mattaneng laingngè mèngngalai. ' 38 Usuroko lao mèngngala ri dare iya dè'è mujamai, tau laingngè pura majjama kuwaro, na iko tarimako saro polè ri jama-jamanna mennang. " 39 Maèga tau Samaria pabbanuwana kotaèro mateppe' lao ri Yèsus, nasaba makkedai iyaro makkunraiè, "Napowadai lao ri iyya sininna puraè upogau'. " 40 Na wettunna iyaro sining tau Samariaè siruntu Yèsus, naèllauni mennang sibawa masero kuwammengngi naonro silaong mennang. Jaji monroni Yèsus kuwaro duwangngesso ittana. 41 Napèdè' maègana tau mateppe' ri Yèsus nasaba aga pura nappagguruwang lao ri mennang. 42 Nakkeda mennang lao ri makkunraièro, "Mateppe'ni makkekkuwangngè, tenniya nasaba aga pura mupowadaè lao ri idi, iyakiya nasaba alètana pura mèngkalingai, sibawa missengngi makkedaè mèmengngi Pappassalama'nai linoè. " 43 Labe'nana duwangngesso monro ri Sikar, laoni Yèsus ri Galilèa. 44 Yèsus muto pura makkeda, "Sèddiè nabi dè' naripakalebbi ri wanuwanna. " 45 Iyakiya wettun-Na lettu ri Galilèa, sining tauwè kuwaro duppaiwi sibawa masennang atinna, saba' engkai mennang ri Yèrusalèm wettunna Esso Maraja Paskaè, napurani naita maneng iya napogau'è Yèsus. 46 Nainappa Yèsus lisu ri Kana ri Galilèa, iya naonroiyè pinrai uwai mancaji anggoro. Ri kotaèro engka sèddi pegawè saoraja iya malasaè ana'na ri Kapernaum. 47 Wettunna naèngkalinga makkedaè engkani Yèsus ri Galilèa polè ri Yudèa, laoni ri Yèsus nanaèllauwi Yèsus lao ri Kapernaum untu' pajjappai ana'na iya mawè'ènna matè. 48 Nakkeda Yèsus lao ri pegawè saorajaèro, "Rèkko dè' muwitai anu makalallaingngè, dè' mumateppe. " 49 Nappèbali pegawè saorajaèro, "Puwang, apperi-perini lao riwettu dè'napa namatè ana'ku. " 50 Nakkeda Yèsus lao ri pegawèro, "Laono, majjappani ana'mu. " Mateppe'ni iyaro tauwè ri ada-adanna Yèsus, nainappa lao. 51 Ri tengnga laleng, polèni sining pattumaninna nanabbirittangngi, "Majjappani ana'ta Puwang. " 52 Nakkutana lao ri mennang, tettè siyaga iyaro ana'è najjappa. Nappèbali mennang, "Kira-kira tettè sèddi iwenni' tangassoè nasoro semmenna. " 53 Naèngngeranni ambo'na iyaro ana'è makkedaè iyaro wettuè nakkeda Yèsus lao ri alèna, "Majjappani ana'mu. " Namateppe'na ri Yèsus sibawa sininna kaluwargana. 54 Iyanaro anu makalallaing maduwaè iya napogau'è Yèsus ri Galilèa polènana ri Yudèa.

Yohanes 5

1 Purairo engka ramè-ramè Yahudi, nalaona Yèsus ri Yèrusalèm. 2 Ri Yèrusalèm ri seddèna "Sumpang Bimbala'" engka sèuwa kolang iya riyasengngè Bètèsda ri laleng basa Ibrani. Kuwaro engka lima lègo-lègona. 3 Ri lègo-lègoèro maèga tau malasa lèwu; engka buta, engka kèppang, na engkato pèso'. Mattajeng manengngi mennang taggoccang iyaro uwaina kolangngè. 4 Saba' biyasai malaèka'na Puwangngè nonno ri lalenna kolangngèro nanagoccangngi uwaina. Na tau malasa iya bunge' muttama'è ri laleng kolangngèro ri wettu taggoccanna uwaina majjappai matu polè ri lasa aga iya kennaèngngi. 5 Ri onrongngènnaro engka sèddi tau worowanè iya telluppuloè aruwa taung ittana malasa. 6 Naitai Yèsus lèwu kuwaro, sibawa naissenna makkedaè maitta senna'ni malasa; nakkutanana Yèsus ri tauwèro, "Maèlokoga majjappa?" 7 Nappèbali iyaro tauwè, "Bapa', dè' gaga tau kuwaè puttama'ka ri laleng kolangngè wettunna taggoccang uwaina. Nappaka mattuju lao ri kolangngè, napoddiyoloina tau laingngè muttama'. " 8 Nakkeda Yèsus lao ri tauwèro, "Oto'no, akkai tappèrèmu namujoppa. " 9 Iyatoro wettuè najjappa iyaro tauwè. Nakkani tappèrèna nanajoppa. Iyaro gau'è kajajiyangngi ri esso Saba'è. 10 Rimakkuwannanaro sining tau makuwasana Yahudiè makkedai lao ri tau iya nappa majjappaèro, "Iyaè essoè, esso Saba'i. Dè' naweddikko makkai tappèrèmu. " 11 Iyakiya mappèbaliwi iyaro tauwè, "Tau iya pajjappaèkka onna suroka makkai tappèrèku sibawa joppa. " 12 Nakkutana mennang, "Niga suroko makkai tappèrèmu sibawa joppa?" 13 Iyakiya tau iya majjappaènnaro dè' naissengngi taunna, saba' lennye'ni Yèsus ri yelle'na tau maègaèro. 14 Nainappa Yèsus siruntu iyaro tauwè ri laleng Bolana Puwangngè, nakkeda lao ri tauwèro, "Makkekkuwangngè majjappano. Aja'na mumadosasi, kuwammengngi aja' mupèneddingiwi iya lebbi majaè. " 15 Nanalaona iyaro tauwè nanapowadangngi sining panguwasana Yahudiè makkedaè Yèsus ritu pajjappai. 16 Narimakkuwannanaro makkuragani mennang callai Yèsus, saba' purai napajjappa tauwè ri esso Saba'è. 17 Iyakiya makkedai Yèsus lao ri mennang, "Ambo'-Ku majjamai matteru-teru lettu makkekkuwangngè, na Iyya majjamato. " 18 Iyaro ada-adaè nassabari sining panguwasana Yahudiè napèdè' makkuraga untu' mpunoi. Napogau'i mennang iyaro, tenniya banna nasaba najjalèkkai peraturanna agamaè passalenna esso Saba'è, iyakiya nasaba makkeda towi iyaro Allataala Ambo'-Na; bettuwanna napappadai Alèna Allataala. 19 Nabalini Yèsus sining tauwèro makkuwaè, "Ateppe'no, dè'gaga naullè pogau' Ana'è sibawa akuwasang alèna. Banna iya napogau' aga iya naitaè napogau' Ambo'-Na. Saba' aga napogau' Ambo'è, iyatoro napogau' Ana'è. 20 Saba' Ambo'è namasèiwi Ana'è sibawa nappaitangngi sininna iya napogau'è Alèna. Mala Ambo'è maèloi mappaitangngi ri alèna sining pangkaukeng iya lebbi battowaèppasi, angkanna hèrakko. 21 Iyaro Ambo'è napaoto'i tau matè, sibawa nawèrèngngi mennang atuwong tongengngè sibawa mannennungengngè; makkuwatoro Ana'è Nabbèrèyangngi atuwong mannennungengngè lao ri tau iya maèloè nawèrèng atuwong. 22 Alèna Ambo'è dè' nadèlèkiwi niga-niga. Sininna akuwasangngè untu' madèlèki pura nabbèrèyanni lao ri Ana'-Na. 23 Napogau'i Ambo'è iyaro kuwammengngi nasininna tauwè pakalebbii Ana'è pada-pada mennang pakalebbii Ambo'è. Tau iya dè'è napakalebbii Ana'è dè'to napakalebbii Ambo'è iya suroèngngi Ana'è. 24 Tongeng senna' ada-adak-Kuè: Tau iya pènessaiyèngngi ada-adak-Kuè, sibawa mateppe' lao ri iya suroèk-Ka, mappunnangiwi atuwong mannennungengngè. Dè' matu narihukkung: leppe'ni polè ri amatèngngè nalolongengngi atuwongngè. 25 Ateppe'no: Polèi matu wettunna -- mala narapini wettunna -- naèngkalingai matu tau matè saddanna Ana'na Allataala. Na tau iya mèngkalingaèngngi tuwoi matu. 26 Pada-pada alèna Ambo'è assalennai atuwongngè, napancaji towi Ana'-Na assalenna atuwongngè. 27 Purani nawèrèng Ana'-Na ha' untu' madèlèki, saba' Ana'na Tolinoè. 28 Aja' muhèrang mèngkalingai iyaè gau'è, saba' polèi matu wettunna makkedaè sininna tau iya matèènna naèngkalingai saddan-Na, 29 nappa massu polè ri tampungngè. Tau iya pogau'èngngi madècèngngè moto'i matu untu' tuwo. Iyakiya tau iya pogau'è ja moto'i matu untu' rihukkung. " 30 "Dè'gaga uwullè pogau' polè ri èlo alè-Ku. Banna uwadèlèkiwi situru napparèntangngè Allataala. Na apettuk-Ku adèlè'i, saba' dè' Uwaccowèriwi èlo alè-Ku, sangadinna èlona Ambo' iya suroèk-Ka. 31 Akkalarapanna mabbèrè-Ka asabbiyang passalenna alè-Ku, iyaro asabbiyangngè dè' nawedding riyatepperi. 32 Iyakiya engka tau laing iya mabbèrè asabbiyang passalek-Ku, na-Uwisseng makkedaè iyaro asabbiyanna tongengngi. 33 Kirikko suro lao ri Yohanès, namabbèrèni asabbiyang iya tongengngè passalek-Ku. 34 Upowadai gau'èwè, tenniya nasaba Uwapparelluwangngi asabbiyang polè ri tolinoè, iyakiya kuwammengngi naripassalama'ko. 35 Iyaro Yohanès pada-padai lampu malluwa'è sibawa iya mattaparengngè cahaya. Untu' wettu iya dè'è namaitta masenna'ko tarimai cahayanaro. 36 Iyakiya asabbiyak-Ku lebbi battowai naiya asabbiyanna Yohanès. Aga iya makkekkuwangngèwè Upogau', iyanaritu jama-jamang iya nassurowangngè Ambo'è lao ri Iyya, pabuttiwi makkedaè Ambo'è pura suro-Ka. 37 Na Ambo'è iya suroèk-Ka mabbèrè towi asabbiyang passalek-Ku. Iko dè'pa naengka muwèngkalingai saddan-Na iyarè'ga muwitai tappa-Na. 38 Ada-adan-Na dè' naonro ri laleng atimmu saba' dè' mumateppe lao ri Iyya iya Nasuroè. 39 Muwagguruiwi Kitta'è saba' muwasengngi makkedaè nasibawang caraèro mappunnaiko atuwong mannennungengngè. Na alèna iyaro Kitta'è mabbèrè asabbiyang passalek-Ku. 40 Iyakiya dè' mumaèlo lao ri Iyya untu' lolongengngi atuwong mannennungengngè. 41 Dè' usappa pappoji polè ri tolinoè. 42 Uwissekko. Uwissekko dè' muwamasèiwi Allataala ri laleng atimmu. 43 Polèka ri laleng akuwasanna Ambo'-Ku, iyakiya dè' mutarima-Ka. Iyakiya rèkko tau laingngè polèi ri laleng akuwasang ri alèna, maèloko tarimai. 44 Pèkkugiko wedding mateppe', rèkko sappako pappojiyang polè ri pada-padammu, nadè' muwakkuraga sappa pappojiyang Allataala iya Sèuwaè? 45 Aja' muwasengngi Upassalako matu ri yolona Ambo'è. Mala iya passalaèkko matu iyanaritu Musa, tau iya muwaddennuwangiyè. 46 Akkalarapanna mateppe'ko lao ri Musa, mateppe' tokko matu lao ri Iyya, saba' naokii ritu passalek-Ku. 47 Iyakiya rèkko dè' mumateppe lao ri aga iya naokiè Musa, pèkkugiko wedding mateppe' lao ri aga iya Upowadaè?"

Yohanes 6

1 Siyagangngarè wettu ri munrinna, laoni Yèsus ri liwenna Tappareng Galilèa, iya riyasengngètto Tappareng Tibèrias. 2 Lettu'nana kuwaro, maèga tau maccowèriwi saba' purani mennang naita sining anu makalallaingngè iya napogau'è ri laleng napajjappana sining tau malasaè. 3 Mènrè'ni Yèsus ri yasè'na buluè, natudang kuwaro sibawa ana'-ana' gurun-Na. 4 Iyaro wettuè macawè'ni Esso Maraja Paska Yahudiè. 5 Wettunna Yèsus makkita mattulili, Naitani tauwè mattinro-tinroseng lao ri Alèna. Nakkeda lao ri Filipus, "Kègaki wedding melli nanrè, kuwammengngi nasininna tauwèwè weddingngi manrè?" ( 6 Naisseng Yèsus aga Napogau' matu, iyakiya makkeda makkuwairo saba' maèloi mojiwi Filipus. ) 7 Nappèbali Filipus, "Roti elli duwa ratuè dowi pèra' dè' nagenne untu' sining tauwèwè, namuni tungke' tau cèddè bawang nalolongeng. " 8 Sèddi ana' gurunna Yèsus laingngè, iyanaritu Andrèas, silessurenna Simon Pètrus, makkedai, 9 "Kuwaè engka ana' worowanè mappunnai lima roti sibawa duwa balè. Iyakiya aga bettuwanna iyaro untu' tau makkuwaèwè ègana?" 10 Nakkeda Yèsus, "Suroi sining tauwèro tudang. " Ri onrongngèro engka maèga wella, jaji iyaro sining tauwè tudanni ri wellaè -- iya manenna engka kira-kira limassebbu tau worowanè. 11 Nainappa nala Yèsus iyaro rotiè, nanasukkuru ri Allataala. Purairo nabagè-bagèni iyaro sining rotiè lao ri tau maègaèro. Nainappa sukkuru'to nanabagè-bagèi iyaro sining balè, nanrèna mennang gangka messo. 12 Puranana manrè maneng gangka messo, makkedani Yèsus lao ri ana'-ana' gurun-Na, "Paddeppungengngi lebbinna iyaro nanrè; aja' naengka tabbè. " 13 Napaddeppungengngi mennang seppulo duwa baku penno lebbinna iyaro nanrè polè ri limaè roti iya nanrè tau maègaèro. 14 Wettunna naita tau maègaè anu makalallaing iya napogau'è Yèsus, makkedani mennang, "Iya tongennaè nabi riyammènasaiyè lao ri linoè!" 15 Naissengngi Yèsus mennang maèloi polè untu' passai mancaji arunna mennang. Rimakkuwannanaro laoni massala ri daèra mabbulu-buluè. 16 Mammulanana mawenni essoè, nonnoni ana'-ana' gurunna Yèsus ri tapparengngè. 17 Nainappa mènrè mennang ri lopiè mallèttoiwi tapparengngèro mattuju ri Kapernaum. Mapettanni essoè nadè'pi Yèsus polè ri mennang. 18 Nammulana mabbombang tapparengngè nasaba anginraja. 19 Sompe'nana kira-kira lima iyarè'ga enneng kilo, naitani Yèsus polè joppa ri tompo'na uwai. Mètau senna'ni mennang. 20 Iyakiya makkedai Yèsus lao ri mennang, "Aja' mumètau, Iyya'è!" 21 Namasennanna atinna mennang tarimai ri lalen-Na lopiè, na iyatoro wettuè nalettu' lopinna mennang ri onrong nakkattaiyè. 22 Pappa bajanana tau maègaè iya monroè mupa ri liweng tappareng, naèngngeranni makkedaè sèddimi bawang lopi engka kuwaro. Naisseng mennang makkedaè joppani ana'-ana' gurunna Yèsus sibawa iyaro lopiè, na Yèsus dè' naccowè. 23 Nasiyagangngarè lopi polè ri Tibèrias lettu sibawa mallabu ri seddèna onronna tau maègaèro manrè roti puranana Puwangngè mèllau sukkuru'. 24 Wettunna naita tau maègaèro muwi Yèsus iyarè'ga ana'-ana' gurun-Na dè'i kuwaro, mènrè toni mennang ri lopiè nalao ri Kapernaum sappai Yèsus. 25 Wettunna iyaro sining tauwè siruntu Yèsus ri liweng tappareng, makkutanani mennang ri Alèna, "Pa' Guru, siyaganna taengka Pa' kuwaè?" 26 Nappèbali Yèsus, "Tongeng, musappa-Ka tenniya mupahangngi akkattana iyaro sining anu makalallaingngè iya Upogau'è, iyakiya nasaba purano manrè gangka messo. 27 Aja' muwajjama untu' lolongeng nanrè iya weddingngè cappu sibawa makebbong. Ajjamako untu' lolongeng nanrè iya dè'è nawedding makebbong sibawa mabbèrèwè atuwong mannennungeng. Iyaro nanrè nabbèrèyangngi matu Ana'na Tolinoè lao ri iko, saba' purani rilanti ri Allataala Ambo'è. " 28 Namakkutanana mennang ri Yèsus, "Aga harusu' ripogau' untu' turusiwi èlona Allataala?" 29 Nappèbali Yèsus, "Iyanaè naèlori Allataala polè ri iko: Ateppe'ko lao ri iya nasuroè Allataala. " 30 Nakkeda mennang, "Rèkko makkuwaitu butti aga wedding nabbèrèyang Bapa' kuwammengngi nariita sibawa mateppe'ki lao ri Bapa'? Aga maèlo napogau' Bapa'? 31 Nènè-nènèta manrèi manna ri padang kessi'è. Pada-pada tarokiè ri laleng Kitta'è, 'Nawèrèngngi mennang manrè roti polè ri surugaè. ' " 32 Nakkeda Yèsus lao ri mennang, "Tongeng ateppe'no: Tenniya Musa, sangadinna Ambo'-Ku ritu iya mpèrèngngèkko roti iya tongengngè polè ri surugaè. 33 Saba' roti iya nabbèrèyangngè Allataala iyanaritu iya nonnoè polè ri surugaè sibawa mabbèrè atuwong lao ri rupa tauwè ri linoè. " 34 Nakkeda mennang, "Bapa', tuli wèrènni iyaro rotiè. " 35 Nakkeda Yèsus lao ri mennang, "Iyya'na roti iya mabbèrè atuwong. Tau iya laowè ri Iyya dè'na namalupu lettu mannennungeng. Sibawa tau iya mateppe'è ri Iyya dè'na namadekkana lettu mannennungeng. 36 Iyakiya pada-pada pura Upowadangngèkko, namuni pura muwita-Ka, dè'to mumateppe. 37 Sininna tauwè iya nabbèrèyangngè Ambo'è lao ri Iyya laowi matu ri Iyya. Dè' Umaèlo sampèyangngi nigi-nigi lao ri Iyya. 38 Saba' nonno-Ka polè ri surugaè, tenniya untu' pogau'i èlo ri alèku, sangadinna èlo-Na iya suroèk-Ka. 39 Na iyanaè èlo-Na iya suroèk-Ka: kuwammengngi nasininna tauwè iya nawèrèngngèk-Ka, dè' nateddèng muwi sèddi; iyakiya kuwammengngi Upaoto'i mennang ri Esso Kiyame'. 40 Mèmeng iyanaè èlona Ambo'-Ku: Kuwammengngi sininna iya mitaèngngi Ana'è sibawa mateppe' ri Alèna mappunnai atuwong mannennungeng, sibawa Upatuwoi paimeng ri Esso Kiyame'. " 41 Nammulana mannoko'-noko' sining tau Yahudiè lao ri Yèsus, saba' makkedai, "Iyya'na roti iya nonno'è polè ri surugaè. " 42 Nakkeda mennang, "Tenniyaga iyaè Yèsus, ana'na Yusuf? Riisseng ambo' indo'-Na! Pèkkugi weddingngi makkeda makkedaè nonnoi polè ri surugaè?" 43 Nakkeda Yèsus lao ri mennang, "Aja' muwannoko'-noko'. 44 Dè' sèddi tau wedding polè ri Iyya, rèkko Ambo' iya suroèk-Ka, dè' natiwii lao ri Iyya; na nigi-nigi polè, Upaoto'i matu ri Esso Kiyame'. 45 Ri laleng Kitta'na Nabi-nabiè tarokii makkuwaè, 'Sininna tauwè ripaggurui matu ri Allataala. ' Jaji sininna tau mèngkalingaèngngi Ambo'è sibawa magguru polè ri Alèna, laowi ri Iyya. 46 Iyakiya tenniya bettuwanna makkedaè engka tau purani naita Ambo'è. Banna iya polè ri Allataala, pura mitai Ambo'è. 47 Issengngi: Tau iya mateppe'è, mappunnaiwi atuwong mannennungeng. 48 Iyya'na roti iya mabbèrè atuwong. 49 Nènèmu manrè manna ri padang kessi'è sibawa matè towi mennang. 50 Iyakiya dè' nakkuwaro roti nonnoè polè ri surugaè; tau iya manrèèngngi iyaro rotiè dè' namatè. 51 Iyya'na roti nonnoè polè ri surugaè -- roti iya mabbèrè atuwong. Tau iya manrèèngngi iyaè rotiè tuwoi matu mannennungeng. Roti iya maèloè Uwabbèrèyang untu' atuwonna rupa tauwè ri linoè iyanaritu juku-Ku. " 52 Naèngkalinganaro, mappangèwanni sining tau Yahudiè pada iya muto. Nakkeda mennang, "Pèkkugi iyaè tauwè wedding nabbèrèyang juku-Na lao ri idi untu' riyanrè?" 53 Nakkeda Yèsus lao ri mennang, "Ateppe'no: Rèkko dè' muwanrèi jukuna Ana'na Tolinoè sibawa muwènungngi dara-Na, dè' tongeng muwappunnai matu atuwong ri laleng alèmu. 54 Tau iya manrèèngngi juku-Ku sibawa mènungngi dara-Ku mappunnai atuwong mannennungeng sibawa Upaoto'i matu ri Esso Kiyame'. 55 Nasaba tongengngi juku-Ku nanrè sibawa tongengngi dara-Ku ènungeng. 56 Tau iya manrèèngngi juku-Ku sibawa mènungngèngngi dara-Ku, tette'i massèddi sibawa Iyya, enrengngè Iyya sibawa alèna. 57 Ambo' iya tuwoèro, nasuro-Ka na Iyya tuwo tokka polè ri Ambo'è. Nakkuwatoro tau iya manrèèngngi juku-Ku, tuwoi polè ri Iyya. 58 Iyya'naè roti iya nonnoè polè ri surugaè: tenniya roti nanrè nènè-nènèmu. Nasaba purana nanrè iyaro rotiè, matè muwi mennang. Iyakiya tau manrèèngngi iyaè rotiè tuwoi matu mannennungeng. " 59 Iya manennaro napowadai Yèsus wettunna mappaggurui ri bola assompangngè ri Kapernaum. 60 Purana naèngkalinga iyaro ada-adanna Yèsus, maèga ri yelle'na ana'-ana' gurun-Na makkeda, "Matane senna' iyaè pappagguruwangngè. Niga mullèi tarimai?" 61 Naissengngi Yèsus makkedaè mannoko'-noko'i ana'-ana' gurun-Na passalenna gau'èro. Nakkedana, "Tassinggukkoga nasaba ada-adaèro? 62 Pèkkugi jajinna matu rèkko muwitai Ana'na Tolinoè mènrè paimeng ri onronna mammulangngè? 63 Iya patuwoèngngi rupatauwè iyanaritu Rohna Allataala. Awatangenna rupa tauwè dè'gaga gunana. Ada-ada iya Upalettukengngèkkoè iyanaritu ada-adanna Rohna Allataala iyanaritu ada-ada iya mabbèrè atuwong. 64 Iyakiya engka mupa ri yelle'mu dè' namateppe'. " (Naissengngi Yèsus ri pammulanna mupa nigi-nigi iya dè'è namaèlo mateppe', sibawa niga bali'bellariwi matu. ) 65 Nakkedasi Yèsus, "Iyanaro saba'na Upowadakko makkedaè dè' sèddi tau mullèi polè ri Iyya, rèkko tenniya Ambo'è palaloi. " 66 Mappammulai wettuèro maègani ana' gurun-Na salaiwi, sibawa dè'na namaèlo maccowèrini. 67 Nanakkutana Yèsus lao ri iya seppulo duwa ana' gurun-Na, "Maèlo tokkoga salai-Ka?" 68 Nakkeda Simon Pètrus ri Yèsus, "Puwang, niga maèlo rilaowi? Ada-adatta Puwang mabbèrè atuwong mannennungeng. 69 Mateppe'ni sibawa riyesserinna makkedaè Puwangngè ritu suro mapaccing polè ri Allataala. " 70 Nappèbali Yèsus, "Tenniyaga Iyya pilèko iya seppulo duwa tauwèwè? Namuni sèddi ri yelle'mu iyanaritu Sètang!" 71 Iya nasengngè Yèsus iyanaritu Yudas ana'na Simon Iskariot. Saba' muni Yudas sèddiwi polè ri iya seppulo duwa ana' gurunna Yèsus, nabali'bellariwi matu Yèsus.

Yohanes 7

1 Purairo, lao tulilini Yèsus ri Galilèa. Dè' namaèlo lao ri daèra Yudèa saba' sining panguwasana Yahudiè kuwaro maèloi mpunoi. 2 Iyaro wettuè macawè'ni Esso Maraja Kalampang Daud-daungngè. 3 Nakkeda silessu-silessurenna Yèsus lao ri Alèna, "Salaini iyaè onrongngè namulao ri Yudèa, kuwammengngi na ana'-ana' gurum-Mu weddingngi naitato jama-jamam-Mu. 4 Dè'gaga tau subbui matu aga iya napogau'è, rèkko maèloi tarompo. Rèkko Mupogau'i gau'-gau' pada-padaèro, naissengngi sininna linoè!" ( 5 Saba' silessu-silessuren-Na dè'to namateppe' ri Alèna. ) 6 Nakkeda Yèsus lao ri mennang, "Dè'pa narapii wettuk-Ku, iyakiya untu' iko, tungke' wettu wedding. 7 Iyaè linoè dè' namungking nabenciko. Iyakiya Iyya mèmeng ribencika ri linoè saba' tuli makkeda-Ka lao ri linoè makkedaè maja pangkaukenna. 8 Laono alè-alèmu ri ramè-ramèro. Iyya dè' ulao saba' dè'pa narapii wettunna untu' alè-Ku. " 9 Makkuwaniro ada-adanna Yèsus lao risining silessuren-Na, nanaonrona ri Galilèa. 10 Laonana sining silessurenna Yèsus ri ramè-ramèro, lao toni Yèsus alè-alèna mammekko-mekko dè' naissengngi tauwè. 11 Sillampè ramè-ramèro, sining panguwasana Yahudiè sappai sibawa makkutana-kutana, "Kègani?" 12 Maèga tau mammula mabbici'-bici' passalenna Alèna. Engka makkeda, "Tau dècèngngi. " Engkato makkeda, "Dè'! Napapusai tau maègaè. " 13 Iyakiya dè' sèddi tau barani mabbicara terus-terang passalenna Alèna saba' mètaui risining tomakuwasana Yahudiè. 14 Mattengngangngi ramè-ramè, nauttama Yèsus ri laleng Bolana Puwangngè, nappammula mappagguru. 15 Hèrang senna'ni tomakuwasana Yahudiè, nakkeda, "Pèkkugi iyaè tauwè weddingngi naisseng maèga makkuwa, padahal dè' naengka nassikola?" 16 Nappèbali Yèsus, "Iya Uwappagguruwangngèwè tenniya pappagguruwak-Ku, iyakiya pappagguruwan-Na iya suroèk-Ka. 17 Tau iya maèloè turusiwi èlona Allataala, naisseng matu polègi iyaro Uwappagguruwangngè ri Allataala iyarè'ga ri alè-Ku muto. 18 Tau iya mabbèrèyangngèngngi pappagguruwanna sappai alebbireng untu' alèna. Iyakiya tau iya sappaè alebbireng untu' iya suroèngngi, malempu iyaro tauwè, dè' bellè ri alèna. 19 Dè'ga napura Musa mpèrèkko parènta-parèntana Allataala? Iyakiya ri yelle'mu dè'gaga turusiwi parènta-parèntaèro. Magi mumaèlo mpuno-Ka?" 20 Nappèbali tau maègaèro, "Jangek-Ko! Niga maèlo mpuno-Ko?" 21 Nappèbali Yèsus, "Sèddi bawang jamang Upogau' ri esso Saba'è, namuhèrang. 22 Nawèrèkko Musa peraturang untu' massunna -- namuni iyaro sunna'è dè' napolè ri Musa assalenna, iyakiya polèi ri ambo'na toriyolota ri yolona Musa. Rimakkuwannanaro muwi ri esso Saba'è maèlo tokko sunna'i tauwè. 23 Mupogau'i iyaro kuwammengngi aja' muwajjalèkkai peraturanna Musa passalenna sunna'è, magi mumacai lao ri Iyya nasaba Upajjappai sininna watakkalèna tauwè ri esso Saba'è? 24 Aja' muadèlèkiwi tauwè situru iya paitaè, iyakiya situru iya adèlè'è. " 25 Nainappa engka siyagangngarè tau Yèrusalèm makkeda, "Tenniyaga iyanaè taunna iya mattengngangngè risappa untu' riyuno? 26 Itani mabbicarai sièlo-èlona ri yolona tau maègaè, nadè'gaga makkeda agaga lao ri Alèna! Napahanniga sining panguwasata makkedaè iyanaè Arung Pappassalama'è? 27 Iyakiya rèkko polèi Arung Pappassalama'è, dè' sèddi tau missengngi polè kègi assalen-Na! Padahal riisseng idi polè kègi assalen-Na iyaè tauwè. " 28 Wettu mappaggurunna Yèsus ri laleng Bolana Allataala, gorani sibawa sadda battowa, "Jaji muwissenniga niga Iyya'è, sibawa polè kègi assalek-Ku? Dè' Upolè nasaba èlo alè-Ku. Risuroka ri iya engkaè ha'na suro-Ka, sibawa weddingngi riyatepperi. Iyakiya iko dè' muwissengngi Alèna. 29 Uwisseng Alèna, nasaba assalek-Ku polèi ri Alèna, na Alèna ritu suro-Ka. " 30 Iyatoro wettuè namacinna tikkengngi Yèsus, iyakiya dè'gaga barani makkatenningngi, nasaba dè'pa narapii wettunna. 31 Maèga ri yelle'na sining tauwèro mammulani mateppe' ri Alèna, sibawa makkeda, "Rèkko polèi Arung Pappassalama'è, naullèga pogau'i lebbi maèga anu makalallaing naiya iyaè tauwè?" 32 Naèngkalingani sining tau Farisiè pèkkugi tau maègaèro mabbici'-bici' passalenna Yèsus. Rimakkuwannanaro, sibawani kapala-kapala imangngè nasuroi siyagangngarè pengawalna Bolana Puwangngè lao tikkengngi Yèsus. 33 Nakkeda Yèsus lao ri tau maègaè ri laleng Bolana Puwangngè, "Cinampe' bawang Usibawakko. Purairo lisu-Ka matu lao ri iya suroèk-Ka. 34 Musappa-Ka matu, iyakiya dè' mullèi lolongek-Ka; saba' dè' mullèi lao ri onrong Uwonroiyè. " 35 Nakkeda sining tomakuwasana Yahudiè sèddiè lao ri laingngè, "Kègai maèlo lao iyaè tauwè nadè' nirullè runtu'i? Maèloiga lao risining tau Yahudiè iya monroè ri saliwempanuwa ri yelle'na tau Yunaniè, sibawa paggurui tau Yunaniè? 36 Aga akkatta-Na nakkeda makkedaè maèloki sappai, iyakiya dè' nirullè runtu'i sibawa dè' nirullè lao ri onrong Naonroiyè?" 37 Ri esso paccappurenna ramè-ramèro, iyanaritu esso kaminang pentingngè. Tettonni Yèsus ri laleng Bolana Allataala nainappa gora, "Tau iya madekkaè sitinajai lao ri Iyya untu' mènung. 38 Passalenna tau iya mateppe'è ri Iyya, tarokii ri laleng Kitta'è: 'Polè ri atinna massolo'i solo'-solo' uwai iya mabbèrè atuwong. ' " "Tau iya madekkaè sitinajai lao ri Iyya, sibawa tau iya mateppe'è ri Iyya sitinajai mènung. Pada-pada iya napowadaè Kitta'è: 'Polè ri laleng atin-Na massolo'i uwai iya mabbèrè atuwong. ' " ( 39 Mabbicarai Yèsus passalenna Rohna Allataala, iya natarimaè matu sining tau iya mateppe'è ri Alèna. Saba' iyaro wettuè dè'pa nariyabbèrèyang Rohna Allataala; saba' dè'pa naripakalebbi Yèsus sibawa amatèn-Na. ) 40 Maèga tau mèngkalingai aga napowada Yèsus, na ri yelle'na mennang engka makkeda, "Iyaè tauwè pasti iyanaro Nabiè!" 41 Iya laingngè makkedai, "Iyanaè Arung Pappassalama'è!" Iyakiya engkato makkeda, "Ah? masa' Arung Pappassalama'è polè ri Galilèa? 42 Ri laleng Kitta'è tarokii makkedaè Arung Pappassalama'è iyanaritu wija-wijanna Daud sibawa polèi matu ri Bètlèhèm, iyanaritu kampong assalenna Daud. " 43 Angkanna mappammulani mappangèwang sining tauwè passalenna Yèsus. 44 Engka maèlo tikkengngi, iyakiya dè' sèddi tau makkatenningngi. 45 Wettunnana lisu sining pengawalna Bolana Allataala iya risuroè tikkengngi Yèsus, makkutanani kapala-kapala imangngè sibawa sining tau Farisiè lao ri mennang, "Magi nadè' mutiwii Alèna lao kumaiyè?" 46 Nappèbali sining pengawal-èro, "Wah, dè'pa naengka tau mabbicara pada-padan-Na!" 47 Nakkeda sining tau Farisièro, "Napapusatonoga?" 48 "Engkaga sining panguwasata iyarè'ga tau Farisiè mateppe' ri alèna? 49 Iyakiya tau maègaèwè dè' naissengngi hukkunna Musa, sibawa muwi maga ritanroi toni mennang. " 50 Sala sèddinna ri yelle'na sining tau Farisièro iyanaritu Nikodèmus iya puraè lao ri Yèsus. Nakkeda Nikodèmus lao risining tau Farisi laingngè, 51 "Manuru Hukkungngè, sèddiè tau dè' nawedding rihukkung riwettu dè'napa nariyèngkalinga parakarana sibawa riparèssa pangkaukenna. " 52 Nappèbali mennang, "Polè ri Galilèa tokkoga? Parèssa bawanni Kitta'è! Muwitai matu makkedaè dè'gaga nabi iya assalenna polè ri Galilèa!" 53 Purairo, lisu manenni tauwè ri bolaè.

Yohanes 8

1 Iyakiya laowi Yèsus ri Bulu-bulu Zaitun. 2 Pappa bajanana maèlè senna'ni laosi ri Bolana Allataala, namaèga tau lao ri Alèna. Tudanni Yèsus, nappammula paggurui mennang. 3 Na iyaro wettuè, guru-guru agamaè sibawa sining tau Farisiè natiwini ri Yèsus sèddi makkunrai iya napolèiyè malaweng. Nasuroni mennang iyaro makkunraiè tettong ri tengnga-tengnga, 4 nainappa makkeda ri Yèsus, "Bapa' Guru, iyaè makkunraiè ripolèiwi malaweng. 5 Ri laleng Hukkunna Musa engka peraturang makkedaè, makkunrai makkuwaèwè harusu'i rigenrung batu gangka matè. Pèkkugi pallolongenna Bapa'?" 6 Makkutana makkuwairo mennang untu' palaiwi siyo-siyo Yèsus, kuwammengngi weddingngi mennang passalai. Iyakiya cuku' bawammi Yèsus, nanaroki sibawa liman-Na ri tanaè. 7 Wettunna mennang maddessa matteru, congani nakkeda lao ri mennang, "Tau iya dè'è nappunnai dosa ri yelle'mu, iyanaritu bunge' genrungngi batu iyaro makkunraiè. " 8 Purairo cuku'ni Yèsus paimeng marokisi ri tanaè. 9 Naèngkalingana Yèsus makkeda makkuwaro, laoni mennang tassèddi-sèddi nasalaiwi onrongngèro, mammulai ri iya macowaè. Angkanna Yèsus mani alè-alèna monro kuwaro sibawa iyaro makkunraiè tettong mupi ri onronna. 10 Nanacongana Yèsus sibawa nakkeda lao ri makkunraièro, "Kèga manenni mennang? Dè'ga gaga hukkukko?" 11 Nappèbali, "Dè'gaga Pa'. " Nakkeda Yèsus, "Madècènni, Iyya dè'to uhukkukko. Laono makkekkuwangngè, aja' mumadosa paimeng. " 12 Nabbicarasi Yèsus lao ri tau maègaè, adan-Na, "Iyya'naè tajanna linoè. Tau iya maccowèriyèk-Ka dè' matu najoppa ri laleng pettangngè, iyakiya nappunnangiwi tajanna atuwongngè. " 13 Nakkeda sining tau Farisièro lao ri Yèsus, "Makkekkuwangngè mabbèrèko asabbiyang passalenna alèmu. Iyaro asabbiyam-Mu dè' natongeng. " 14 Nappèbali Yèsus, "Namuni mabbèrè-Ka asabbiyang passalenna alè-Ku, iyaro asabbiyak-Ku tongengngi; saba' Uwisseng kèga-Ka polè sibawa kèga-Ka maèlo lao. Dè' muwissengngi kèga-Ka polè sibawa kèga-Ka lao. 15 Iko muwadèlèkiwi tauwè sibawa cara tolino; na Iyya dè' Uwadèlèkiwi muwi sèddi tau. 16 Iyakiya èbara'na Uwadèlèkiwi tauwè, apettuk-Ku adèlè'i saba' tenniya-Ka alè-alè-Ku; Ambo' iya suroèk-Ka engkai sibawak-Ka. 17 Ri laleng Hukkunna Musa tarokii makkuwaè: Asabbiyang tongengngè iyanaritu asabbiyang iya polè ri duwa tau. 18 Iya mabbèrè asabbiyang passalenna alè-Ku engka duwa -- Iyya sibawa Ambo' iya suroèk-Ka. " 19 Nakkeda mennang, "Kègani Ambo'-Muro?" Nappèbali Yèsus, "Iko dè' muwissek-Ka sibawa Ambo'-Ku. Akkalarapanna muwissek-Ka, pasti muwisseng towi Ambo'-Ku. " 20 Iya manennaro napowadai Yèsus wettunna mappagguru ri Bolana Allataala ri seddèna petti-petti dowi pakkasuwiyangengngè. Iyakiya dè' muwi sèddi tau tikkengngi, saba' dè'pa narapii wettunna. 21 Makkedasi Yèsus lao ri mennang, "Maèlo-Ka lao, namusappa-Ka matu, iyakiya matèko matu ri laleng dosa-dosamu. Ri onrong Ulaoiyè, dè' mullèi lao. " 22 Nakkeda sining panguwasana Yahudiè, "Naullè kapang maèloi mpunoi Alèna, saba' makkedai, 'Ri onrong Ulaoiyè dè' mullèi lao. ' " 23 Nakkeda Yèsus lao ri mennang, "Iko polè ri yawako; iyakiya Iyya polè ri yasè'ka. Iko polè ri linoè; Iyya dè' upolè ri linoè. 24 Iyanaro saba'na Uwakkeda lao ri iko, makkedaè matèko matu ri laleng dosa-dosamu. Namèmeng matèko matu ri laleng dosa-dosamu, rèkko dè' mumateppe makkedaè 'Iyya'na iya riteppuè IYYA ENGKA. ' " 25 Nakkutana mennang, "Niga sitonget-tongenna iko?" Nappèbali Yèsus, "Untu' aga mabbicarasi sibawa iko! 26 Maèga mupa passaleng iya maèloè Upowada sibawa madèlèki. Iyakiya iya suroèk-Ka wedding riyatepperi. Na Iyya paissengiwi linoè aga Uwèngkalinga polè ri Alèna. " 27 Dè' napahangngi mennang makkedaè mabbicarai lao ri mennang passalenna Ambo'è. 28 Rimakkuwannanaro makkedai Yèsus lao ri mennang, "Matu rèkko purani mupakalebbi Ana'na Tolinoè, muwissenni matu makkedaè 'Iyya'naè iya riteppuè IYYA ENGKA', sibawa muwisseng toni matu makkedaè dè' sèddi iya Upogau'è polè ri alè-Ku. Iya bawang Upowada iya napagguruwangngèkka Ambo'è. 29 Naiya suroèk-Ka engkai sibawak-Ka. Dè' naengka naleppessakka alè-alèku, saba' tuli upogau'i iya pèsennangiyèngngi atinna. " 30 Purana napowada Yèsus iya manennaro, maègani tau mateppe' ri alèna. 31 Nainappa Yèsus mabbicara lao risining tau Yahudiè iya mateppe'ènna ri Alèna, "Rèkko tuwoko situru pappagguruwakku, tonget-tongennotu maccowè ri Iyya, 32 namuwissennitu Allataala iya tongengngè, narimakkuwannanaro ripamaradèkako matu. " 33 Nakkeda mennang, "Idi'è wijannaki Abraham. Dè'pa taengka tancaji atanna niga-niga! Aga akkatta-Mu namuwakkeda, 'Ripamaradèkako matu'?" 34 Nakkeda Yèsus lao ri mennang, "Tongeng senna' adak-Kuè. Tau pogau'è dosa iyanaritu atannai dosaè. 35 Na sèddiè ata dè' nappunnai onrong iya mattette'è ri laleng kaluwargaè, na ana'è mappunnaiwi onrong lettu mannennungeng ri laleng kaluwargaè. 36 Rimakkuwannanaro, rèkko Ana'è pamaradèkako, maradèka' tongennotu. 37 Mèmeng Uwissekko wija-wijanna Abraham. Iyakiya maèloko mpuno-Ka, nasaba dè' mumaèlo tarimai pappagguruwak-Ku. 38 Aga iya Uwitaè ri Ambo'-Ku, iyanaritu Upowada. Na iko mupogau'i aga iya nappagguruwangngè ambo'mu ri iko. " 39 Nappèbali mennang, "Ambo'ta iyanaritu Abraham. " Nakkeda Yèsus, "Ebara'na tonget-tongekko ana'na Abraham, pastini mupogau'i iya napogau'è Abraham. 40 Upalettukekko atongengeng iya Uwèngkalingaè polè ri Allataala, iyakiya iko maèloko mpuno-Ka. Abraham dè' napogau'i makkuwaèro! 41 Iko mupogau'i aga iya napogau'è ambo'mu. " Nappèbali mennang, "Tenniyaki ana'-ana' harang. Sèddimi bawang Ambo'ta, iyanaritu Allataala. " 42 Nakkeda Yèsus lao ri mennang, "Akkalarapanna iyaro Allataala Ambo'mu, muwamasèi-Ka matu, saba' polè-Ka ri Allataala. Dè' Upolè sibawa èlo ri alèku, iyakiya Alèna ritu iya suroèk-Ka. 43 Aga saba'na dè' mupahangngi aga iya Upowadaè? Saba' dè' mutahang mèngkalingai pappagguruwak-Ku. 44 Ibillisi' ritu ambo'mu. Pammulanna mupa na iyaro Ibillisi' pabbuno. Dè' naengka naccowè ri atongengengngè, saba' dè' atongengeng ri alèna. Rèkko mabbellèi, mèmeng sitinaja, saba' makkuwa mèmenro sipa'na. Pabbellèngngi sibawa assalenna sininna bellè. 45 Iyakiya Upowadai atongengengngè, narimakkuwannanaro dè' mumateppe ri Iyya. 46 Niga ri yelle'mu mullèi pabuttiwi makkedaè engka dosa-Ku? Rèkko Upowadai atongengengngè, magi nadè' mumateppe ri Iyya? 47 Tau iya assalennaè polèi ri Allataala, naèngkalingai ada-adanna Allataala. Iyakiya iko dè' mupolè ri Allataala, iyanaro saba'na dè' mumaèlo marèngkalinga. " 48 Iyaro sining tau Yahudiè nabalini Yèsus, "Dè'ga natongeng adatta makkedaè tau Samaria-Ko iya nauttamakiyè sètang?" 49 Nappèbali Yèsus, "Dè'nauttamai-Ka sètang. Upakalebbii Ambo'-Ku, iyakiya iko mupakatuna-Ka. 50 Dè' Usappa alebbireng untu' alè-Ku. Engka sèddi makkuragangek-Ka alebbireng, na Alèna ritu madèlèkiki. 51 Tongeng senna' adak-Kuè, tau iya turusiyèngngi adak-Ku, lettu mannennungeng dè' namatè matu. " 52 Nanakkeda sining tau Yahudièro lao ri Yèsus, "Riissenni makkekkuwangngè nauttamaki tongek-Ko sètang! Matèni Abraham, makkuwatoro sininna nabi-nabiè. Iyakiya makkeda-Ko, 'Tau iya turusiyèngngi adak-Ku, lettu mannennungeng dè' namatè matu. ' 53 Rèkko alèna Abraham matèni, sibawa matè toni sininna nabi-nabiè, nigako Iko? Masa Iko lebbi battowa naiya ambo'ta Abraham!" 54 Nappèbali Yèsus, "Akkalarapanna sappa-Ka alebbireng untu' alè-Ku, iyaro alebbirengngè dè'gaga bettuwanna. Iya pakalebbièk-Ka iyanaritu Ambo'-Ku iya muwangga'è Allataalamu, 55 padahal dè' muwissengngi. Iyakiya Iyya uwissengngi. Akkalarapanna makkeda-Ka makkedaè dè' Uwissengngi, tentu sèddika tau pabbellèng pada-pada iko. Uwissengngi sibawa mapatoiwi adan-Na. 56 Ambo'mu Abraham masennang senna' makkedaè naitai matu esso-Ku. Purani naita sibawa masennanna!" 57 Nanakkeda sining tau Yahudiè lao ri Yèsus, "Dè'pa gaga limappulo taung umuru'-Mu, na purani Muwita Abraham?" 58 Nappèbali Yèsus, "Makkeda tongek-Ka lao ri iko: riwettu dè'napa najaji Abraham, eng-Ka mèmenna. " 59 Napada malana batu sining tau Yahudièro untu' genrungngi Yèsus; iyakiya mallekke'i Yèsus, nappa lao nasalaiwi Bolana Allataala.

Yohanes 9

1 Wettunna Yèsus joppa, mitani tau iya butaè sipongenna jaji. 2 Nakkutanana ana'-ana' gurunna Yèsus lao ri Yèsus, "Bapa' Guru, magi iyaè tauwè narijajiyang buta? Nasaba alènaga madosa iyarè'ga nasaba indo' ambo'na madosa?" 3 Nappèbali Yèsus, "Butai tenniya nasaba dosa alèna iyarè'ga dosa tomatowanna, iyakiya kuwammengngi naweddingngi naita tauwè akuwasanna Allataala iya majjamaè ri laleng alèna. 4 Ri wettu essona mupa, harusu'ki pogau'i jama-jaman-Na iya suroèk-Ka. Polèi matu wenniè, namuwi sèddi tau dè'to naullèi majjama matu. 5 Ri wettu engka-Ku mupa ri linoèwè, Iyya'na tajanna linoè. " 6 Puranana makkeda makkuwaro mammèccuni Yèsus ri tanaè, nainappa napasigaru iyaro mèccun-Na tanaè. Nainappa nasapungengngi matanna tauwèro, 7 nakkeda lao ri tauwèro, "Laono mupaccingiwi rupammu ri Kolang Siloam. " (Siloam bettuwanna 'Risuro'. ) Nalaona iyaro tauwè paccingiwi rupanna. Wettunna lisu, naullèni makkita. 8 Sining balibolana enrengngè sining tau iya puraè mitai marèllau-rèllau, makkeda manenni, "Tenniyaga iyaè tauwè biyasa tudang marèllau-rèllau?" 9 Engka makkeda, "Mèmeng alèna. " Iyakiya engkato makkeda, "Tenniya, maèlomi bawang pada iyaro tauwè. " Iyakiya alèna iyaro tauwè makkeda, "Iyya'na. " 10 Nakkeda mennang lao ri tauwèro, "Pèkkugi ammulanna naweddikko makkita?" 11 Nappèbali, "Iyaro tau riyasengngè Yèsus mèbbui cèddè bungka, nappa nasapuingeng matakku sibawa makkeda, 'Laono mupaccingiwi rupammu ri Kolang Siloam. ' Nalaona. Na wettunna upaccingi rupakku, weddinna makkita. " 12 Nakkutana mennang, "Kègani iyaro tauwè?" Nappèbali, "Dè' uwissengngi. " 13 Iyaro essoè, esso Saba'i wettunna Yèsus pasigarui tanaè sibawa mèccun-Na untu' mèbbui tau butaèro naweddingngi makkita. Na iyaro tauwè, ritiwini ri tau Farisiè. 15 Makkutana towi mennang lao ri tauwèro pèkkugi naullèi makkita. Nappèbali, "Nataroiwi bungka matakku, nainappa upaccingi naweddinna makkita. " 16 Engka siyagangngarè ri yelle'na sining tau Farisièro makkeda, "Dè' nakkullè tau iya pogau'èngngi iyaè assalenna polèi ri Allataala, saba' dè' najampangiwi esso Saba'è. " Iyakiya makkedai tau laingngè, "Masa' naullè tau madosaè pogau'i anu makalallaing pada-padaèwè?" Namompona assisalang pallolongeng ri yelle'na mennang. 17 Nakkutanasi sining tau Farisièro lao ri tauwèro, "Aga pallolongemmu passalenna tau iya mèbbuèkko makkita?" Nappèbali iyaro tauwè, "Nabiwi. " 18 Iyakiya sining panguwasana Yahudiè dè' namaèlo mateppe' makkedaè iyaro tauwè mèmeng butai riyolo namakkekkuwangngè weddinni makkita. Rimakkuwannanaro naobbii mennang tomatowanna, 19 nanakkutana, "Tongegga iyaè ana'mu iya muwasengngè buta simula jaji? Pèkkugi naullèi makkita makkekkuwangngè?" 20 Nappèbali indo' ambo'na iyaro tauwè, "Mèmeng iyaè ana'ta, sibawa mèmeng butai simula jaji. 21 Iyakiya pèkkugi naullèi makkita makkekkuwangngè, dè' nirisseng. Sibawa niga mèbbui naullèi makkita, iyaro dè'to nirisseng. Tanai bawanni alèna, battowani sibawa naullè muto alèna mappèbali. " 22 Makkeda makkuwairo indo' ambo'na iyaro tauwè saba' mètaui risining panguwasana Yahudiè; saba' massèddini mennang, makkedaè tau iya mangakuiyèngngi Yèsus selaku Arung Pappassalama'è, dè'na nawedding muttama' ri bola assompangngè. 23 Iyanaro saba'na nakkeda indo' ambo'na iyaro tauwè, "Battowani, tanai bawanni alèna. " 24 Nainappa naobbisi tau iya butaè onna'ro, nakkeda ri tauwèro, "Attanroko makkedaè makkedako matu iya tongengngè. Riisseng iyaro tauwè tau madosa. " 25 Nappèbali iyaro tauwè, "Madosa iyarè'ga dè', dè' uwissengngi. Sèddi gau' bawang uwisseng; riyolo butaka, makkekkuwangngè makkitana. " 26 Makkedani mennang ri tauwèro, "Aga napogau' lao ri iko? Pèkkugi nagaurekko namuwakkita?" 27 Nappèbali iyaro tauwè, "Purani ucuritakko, iyakiya dè' mumaèlo mèngkalingai. Magi mumaèlo mèngkalingai? Naullè kapang maèlo tokko mancaji ana'-ana' gurun-Na?" 28 Nainappa nakkeda-kedaini sibawa makkeda, "Iko ana' gurun-Nako; idi tenniya! Idi ana' gurunnaki Musa. 29 Riissengngi makkedaè Allataala pura mabbicara lao ri Musa. Iyakiya passalenna tauwèro, dè' riissengngi polè kègi assalen-Na. " 30 Nappèbali iyaro tauwè, "Mappahèrang senna' makkedaè dè' muwissengngi polè kègi assalen-Na, padahal puraka naèbbu wedding makkita. 31 Riissengngi makkedaè Allataala dè' naèngkalingai tau madosaè, sangadinna tau iya pakalebbièngngi Allataala, sibawa pogau'èngngi èlo-Na. 32 Sipongenna linoè dè'pa naengka nariyèngkalinga engka tau mèbbui tauwè makkita iya butaè simula jaji. 33 Rèkko iyaro tauwè dè' napolè ri Allataala, dè' nakkullè pogau'i agi-agi. " 34 Nappèbali mennang, "Aga? Iko pennoè dosa simula jaji, maèloko pagguruki?" Mappammulai iyaro wettuè riyattèyanni muttama' ri bola assompangngè. 35 Naèngkalingani Yèsus makkedaè purai mennang nattèyang iyaro tauwè muttama' ri bola assompangngè. Nasappani iyaro tauwè nainappa makkeda lao ri alèna, "Mateppe'koga ri Ana'na Tolinoè?" 36 Nappèbali iyaro tauwè, "Niga iyaro Puwang? Tulukka tapaissengika kuwammengngi mateppe'ka ri Alèna. " 37 Nappèbali Yèsus, "Purani muwita, Alèna ritu mabbicara ri iko makkekkuwangngè. " 38 Nakkeda iyaro tauwè, "Mateppe'ka, Puwang. " Nasuju'na ri yolona Yèsus. 39 Nakkeda Yèsus, "Polè-Ka ri linoèwè untu' madèlèkiwi; kuwammengngi naullèi makkita tau butaè, na tau iya mullèngngi makkita mancaji butai. " 40 Engka siyagangngarè tau Farisi iya engkaè kuwaro naèngkalingai Yèsus makkeda makkuwaro, nanakkutana mennang lao ri Yèsus, "Akkatta-Mu idi'è buta tokki?" 41 Nappèbali Yèsus, "Akkalarapanna butako, dè' mumadosa. Iyakiya saba' makkedako 'Makkitaki', bettuwanna iyaro madosa mupo. "

Yohanes 10

1 "Tongeng senna' adak-Kuè: Tau iya muttama'è ri laleng wakkè bimbala'è lalo ri sappoè, dè' nalalo ri sumpangngè, iyakiya makkèmpèi lalo ri laleng laingngè, iyaro tauwè panga sibawa parampo. 2 Iyakiya tau iya muttama'è lalo ri sumpangngè, iyanaritu pakkampi bimbala'. 3 Panganrowang wakkè'è timpakengngi tange', na bimbala'-bimbala'è maccowèriwi saddanna ri wettu mangobbina mennang sibawa asenna tungke'-tungke' enrengngè natinrosinna massu. 4 Natiwinana massu iyaro sining bimbala'è, iyaro pakkampiè joppani monriyolo, nasining bimbala'è maccowèriwi saba' naissengngi mennang saddan-Na. 5 Dè' namaèlo mennang maccowèriwi tau laingngè, mala lariwi polè ri tauwèro, saba' dè' naissengngi saddanna. " 6 Nacuritai Yèsus iyaro pakkalarapangngè, iyakiya dè' naissengngi mennang aga akkatta-Na. 7 Nainappa makkeda Yèsus siseppa, "Tongeng senna' adak-Kuè: Iyya'na tange' untu' bimbala'è. 8 Sininna iya polè ri yolo-Ku, iyanaritu panga sibawa parampo', iyakiya sining bimbala'è dè' naèngkalingai saddanna mennang. 9 Iyya'na tange'. Niga muttama' lalo ri Iyya salama'i matu; massu muttama'i sibawa lolongeng anrè. 10 Polèi pangaè banna untu' mènnau, untu' mabbuno, sibawa untu' makkasolang. Iyakiya Iyya polè kuwammengngi nalolongeng tolinoè atuwong -- atuwong maonaè. 11 Iyya'na pakkampi makessingngè. Pakkampi iya makessingngè nabbèrèyangngi nyawana untu' sining bimbala'na. 12 Tau ripèssaroiyè iya tenniyaè pakkampi sibawa tenniyaètto punna iyaro sining bimbala'è lariwi salaiwi sining bimbala'èro rèkko naitai polè asu ale'è. Na iyaro sining bimbala'è natikkenni matu sibawa ripassara-saranna ri asu ale'è. 13 Iyaro tau ripèssaroiyè lariwi, saba' majjamai untu' saro. Dè' napaduliwi sining bimbala'èro. 14 Iyya'na pakkampi iya makessingngè. Pada-pada Ambo'è missek-Ka sibawa Iyya missengngi Ambo'è, makkuwatoro Uwissengngi sining bimbala'-Ku, sibawa naissek-Ku mennang. Uwabbèrèyangngi nyawa-Ku untu' mennang. 16 Engka mupa bimbala'-bimbala' laing iya Uwappunnangiyètto, iya dè'è nauttama ri laleng konrong bimbala'èwè. Harusu' towi Uputtama mennang sibawa naèngkalingana matu saddak-Ku. Nancaji manengngi matu mennang sikonrong sibawa sèddi pakkampi. 17 Namasèi-Ka Ambo'è saba' Uwabbèrèyangngi nyawa-Ku, untu' tarimai paimeng. 18 Dè' sèddi tau mullèi malai polè ri Iyya. Uwabbèrèyangngi saba' èlo-Ku muto. Makuwasa-Ka untu' mabbèrèyangngi, sibawa makuwasa untu' malai paimeng. Iyanaro jamang iya Utarimaè polè ri Ambo'-Ku. " 19 Nasaba makkeda makkuwairo Yèsus, mappammulani mappangèwang sining tau Yahudiè. 20 Maèga makkeda, "Nauttamakiwi sètang! Jangengngi! Untu' aga muwèngkalingai?" 21 Iyakiya engkato makkeda, "Tau nauttamakiyè sètang dè' nabbicara makkuwatu! Naullèga sètangngè mèbbui tau butaè makkita?" 22 Ri Yèrusalèm sining tauwè mattengngang ramè-ramèiwi Esso Maraja Rirèsmikanna Bolana Puwangngè. Iyaro wettuè wettu keccè. 23 Joppai Yèsus ri Lègo-lègona Salomo ri lalenna Bolana Puwangngè, 24 wettunna sining tau Yahudiè polè maddeppungeng mattulilingiwi Yèsus. Makkedani mennang, "Gangka kègi-Ko maèlo leppessakki bata-bata? Powadanni terus terang, rèkko tonget-tongek-Ko Arung Pappassalama'è. " 25 Nappèbali Yèsus, "Purano Upowadang, iyakiya dè' mumateppe. Jama-jamang iya Upogau'è ri laleng asenna Ambo'-Ku, mabbèrè butti passalek-Ku. 26 Dè' mumateppe saba' dè' mumattama bimbala'-bimbala'-Ku. 27 Sining bimbala'-Ku naèngkalingai saddak-Ku. Uwisseng mennang, nanaccowèri-Ka mennang. 28 Uwèrèngngi mennang atuwong mannennungeng, na untu' mannennungeng dè' nabinasa matu mennang. Dè' sèddi tau mullèi rampasa'i mennang polè ri limak-Ku. 29 Ambo'-Ku, iya puraè mabbèrèyangngi mennang lao ri Iyya, napakacauri sini-sininnaè. Nadè' sèddi tau mullèi rampasa'i mennang polè ri limanna Ambo'è. 30 Iyya sibawa Ambo'è iyanaritu sèddimi. " 31 Nanalasi batu sining tau Yahudiè untu' genrungngi Yèsus. 32 Iyakiya makkedai Yèsus lao ri mennang, "Purana muwita pogau' maèga jama-jamang makessingngè, iya nawèrèngngèk-Ka Ambo'è. Polè ri iya manenna jama-jamangngèro, kègana nassabari mumaèlo genruk-Ka?" 33 Nappèbali sining tau Yahudiè, "Tenniya nasaba jama-jamammu iya makessingngèro namaèloki genruk-Ko batu, iyakiya nasaba Mupakatunai Allataala. Iko sèddiko tolino, namumaèlo pancajiwi alè-Mu Allataala. " 34 Nappèbali Yèsus, "Dè'ga nataroki ri laleng Kitta Hukkummu: Makkedai Allataala, 'Ikona iyanaritu allataala'? 35 Riissenni makkedaè aga taroki ri laleng Kitta'è kajajiyangngi lettu mannennungeng. Jaji, rèkko Allataala nateppui 'allataala' lao risining tau iya tarimaèngngi ada-adan-Na, 36 magi muwakkeda Ucella-cellai Allataala nasaba makkedak-Ku Ana'naka Allataala? Padahal napilè-Ka Ambo'è sibawa nasuro lao ri linoè. 37 Rèkko dè' Upogau'i jama-jamang iya nasuroèngngèkka Ambo'è, aja' mumateppe lao ri Iyya. 38 Iyakiya nasaba Upogau'i, ateppe'no aga iya Upogau'èro, namuni dè' mumaèlo mateppe' ri Iyya. Narimakkuwannanaro muwissengngi sibawa mupahangngi makkedaè Ambo'è tette'i massèddi sibawa Iyya, sibawa Iyya tette massèddi sibawa Ambo'è. " 39 Makkuragasi mennang maèlo tikkengngi Yèsus, iyakiya leppe'i polè ri mennang. 40 Lisuni Yèsus ri liwenna Salo Yordan, ri onronna Yohanès riyolo maccemmè, naonrona kuwaro. 41 Maèga tau lao ri Alèna. Makkedani mennang, "Yohanès dè' napogau'i sining anu makalallaingngè, iyakiya iya manenna iya napowadaè passalenna iyaè tauwè tongengngi. " 42 Namaègana tau kuwaro mateppe' lao ri Yèsus.

Yohanes 11

1 Engka sèddi tau riyaseng Lazarus monro ri Bètania silaong silessurenna Maria sibawa Marta. 2 Maria iyanaritu makkunrai iya tirikiyèngngi minnya' wangi ri ajèna Puwangngè, nanalullu'i sibawa gemme'na. Sèuwa wettu namalasa Lazarus. 3 Iya duwa silessurennaro nabirittanni Yèsus, "Puwang, silessuretta iya tamasèiyè Puwang malasai. " 4 Wettunna naèngkalinga Yèsus iyaro karèbaè, makkedani, "Iyaè lasaè dè' nassabari namatè. Kajajiyangngi iyaè kuwammengngi naripakaraja Allataala, nanassabari towi Ana'na Allataala ripakarajato. " 5 Yèsus mamasèiwi Marta, Maria sibawa Lazarus. 6 Iyakiya wettunna Yèsus natarima karèbaè makkedaè malasai Lazarus, nattungkai monro ri onron-Na duwangngessopa. 7 Purairo nappa makkeda ri ana'-ana' gurun-Na, "Laono mai talisu ri Yudèa. " 8 Nappèbali mennang, "Bapa' Guru, silalona sining tau Yahudiè maèlo genrungngi batu Bapa', namakkekkuwangngè maèlosi Bapa' lisu kuwaro?" 9 Nakkeda Yèsus, "Dè'ga naseppulo duwa jang siessoè? Tau iya joppaè ri essoè, dè' natabbuttu saba' naitai tajanna linoèwè. 10 Iyakiya tau iya joppaè ri wenniè tabbuttui, saba' dè'gaga tajang ri alèna. " 11 Makkuwaniro adanna Yèsus. Nappa makkedasi, "Sellaota Lazarus matinroni, iyakiya maèlo-Ka lao teddui. " 12 Nakkeda ana'-ana' gurunna Yèsus, "Puwang, rèkko matinroi Lazarus, majjappai matu matti. " 13 Akkattana Yèsus iyanaritu makkedaè matèni Lazarus. Iyakiya nasengngi mennang akkattana Yèsus iyanaritu makkedai matinro biyasai Lazarus. 14 Rimakkuwannanaro makkedai Yèsus lao ri mennang sibawa terus-terang, "Matèni Lazarus. 15 Iyakiya masennang tok-Ka dè'-Ka gaga kuwaro, saba' lebbi kessing muwi untu' iko, kuwammengngi naweddikko riyatepperi. Laono mai talao ri Lazarus. " 16 Tomas iya riteppuè "Si Dènru" makkedai lao ri sellao-sellaona ana'-ana' gurunna Yèsus, "Laono mai taccowè, leppessakki matè silaong Alèna!" 17 Wettunna Yèsus lettu ri onrongngèro, patangngessoni ittana Lazarus rikuburu'na. 18 Bètania macawè'è ri Yèrusalèm, kira-kira tellu kilo bèlana. 19 Maègani tau Yahudi polè cèllèngiwi Marta sibawa Maria untu' salèworiwi mennang nasaba amatènna silessurenna. 20 Wettunna naèngkalinga Marta engkai Yèsus, massuni duppaiwi Yèsus, na Maria monroi ri bolaè. 21 Nakkeda Marta lao ri Yèsus, "Puwang, èbara'na engkaki kuwaè Puwang wettuèro, tentu dè' namatè ana' buranèku. 22 Iyakiya muni makkuwaro uwisseng makkedaè makkekkuwangngètto nabbèrèyangngi matu Allataala aga taèllau Puwang ri Alèna. " 23 Nakkeda Yèsus lao ri Marta, "Tuwoi matu paimeng ana' buranèmu. " 24 Nappèbali Marta, "Uwisseng tuwoi matu paimeng Lazarus rèkko ripaoto'i tau matè ri Esso Kiyame'. " 25 Nakkeda Yèsus lao ri Marta, "Iyya ritu mabbèrè atuwong sibawa paoto'i tau matè. Tau iya mateppe'è ri Iyya, tuwoi matu namuni matèna. 26 Na tau tuwoè iya mateppe'è lao ri Iyya, dè'na namatè mannennungeng. Mateppe'koga ri gau'èro?" 27 Nappèbali Marta, "Puwang, mateppe'ka, Puwang Ana'na Allataala, Arung Pappassalama'è iya maèloè polè ri linoèwè. " 28 Purana Marta makkeda makkuwaro, laoni mobbii Maria padakkunrainna nanabici'i, "Engkai kuwaè Bapa' Guru; nakkutanakko. " 29 Naèngkalinganaro, mapperi-perini Maria moto, nalao sita Yèsus. 30 Iyaro wettuè, dè'pa nauttama Yèsus ri dèsaè. Ri onronna mupi Marta duppaiwi. 31 Sining tau Yahudiè iya salèworiyèngngi Maria ri bolaè, naitai Maria moto sibawa mapperi-peri massu; jaji laoni maccowèriwi, saba' nasengngi lao ri tampungngè untu' teri. 32 Wettunna Maria lettu ri onronna Yèsus sibawa naitani, makkaluttuni Maria ri yolo-Na sibawa makkeda, "Puwang, akkalarapanna engkaki Puwang kuwaè wettuèro, tentu dè' namatè ana' buranèku. " 33 Wettunna naita Yèsus Maria teri, sibawa sining tau Yahudiè iya duwangngèngngi Maria terito, messèni atin-Na, sibawa messè senna' rita. 34 Namakkutanana Yèsus lao ri mennang, "Kègai mukuburu'?" Nappèbali mennang, "Laoni mai taitai Puwang. " 35 Naterina Yèsus. 36 Nakkedana sining tau Yahudièro, "Itai, anengka makkuwa namasèin-Na Lazarus!" 37 Iyakiya engka ri yelle'na mennang makkeda, "Naèbbui tau butaè makkita, magi nadè' naullèi pèsangkai kuwammengngi aja' namatè Lazarus?" 38 Masè' senna'si Yèsus, nanalao ri kuburu'è. Iyaro kuburu'è iyanaritu sèddiwi gowa iya ritongkoè sibawa batu loppo. 39 Nakkeda Yèsus, "Paddèsu'i iyaro batuè!" Nappèbali Marta, silessurenna tau iya matèro. "Puwang, patang-ngessoni rikuburu'na. Tentu makebbonni!" 40 Nakkeda Yèsus lao ri Marta, "Dè'ga napurano Upowadang: Rèkko mateppe'ko, muwitai matu pèkkugi battowana akuwasanna Allataala!" 41 Nanapaddèsu'ni iyaro batuè. Nainappa conga Yèsus ri langiè sibawa makkeda, "Tarima kasi, Ambo', saba' Muwèngkalinga-Ka. 42 Uwisseng tuli Muwèngkalinga-Ka, iyakiya Upowadai iyaè, untu' sining tau iya engkaè kuwaè; kuwammengngi namateppe' mennang makkedaè Iko suro-Ka. " 43 Purana makkeda makkuwaro, gorani Yèsus sibawa sadda battowa, "Lazarus, assuko!" 44 Nassuna tau iya matènnaro. Limanna sibawa ajèna ridoko mupa kaing pawwalu, sibawa rupanna tattongko sibawa kaing pattongko rupa. Nakkeda Yèsus lao risining tauwè kuwaro, "Leppessangngi kaing pawwalunna kuwammengngi nalaluwasa joppa. " 45 Maèga polè risining tau Yahudiè iya laowè cèllèngiwi Maria, mateppe' lao ri Yèsus wettunna mennang naita iyaro kajajiyangngè. 46 Iyakiya engka siyagangngarè ri yelle'na mennang lao ri tau Farisiè nanalaporo'i aga pura napogau' Yèsus. 47 Rimakkuwannanaro sining tau Farisiè sibawa kapala-kapala imangngè pakangkani rapa' sibawa Mahkamana Agamaè. Makkedai mennang, "Aga harusu' ripogau'? Iyaè tauwè maèga anu makalallaing napogau'! 48 Rèkko rileppessangngi matteru-teru makkuwaè, mateppe' manengngi matu sininna tauwè lao ri Alèna. Na angkanna polèi matu panguwasana Roma nanaancuru'i Bolana Puwangngè sibawa sininna bangsata!" 49 Engka sèddi polè ri mennang riyaseng Kayafas, imang lompo ri taungngèro, makkeda, "Dè' agaga muwisseng iko. 50 Dè'ga mupahangngi makkedaè nasaba untu' ra'ya'è, lebbi kessing muwi sèddi tau matè naiya sininna bangsata ancuru?" 51 Sitongenna napowadai Kayafas iyaro, dè' napolè ripikkirang alèna. Iyakiya selaku imang lompo ri taungngèro nabotoi makkedaè matèi matu Yèsus untu' bangsa Yahudiè. 52 Natenniya untu' bangsa Yahudiè bawang, iyakiya untu' paddeppungeng towi sibawa passèddiwi ana'-ana'na Allataala iya massara-sarangngè. 53 Mappammulai iyaro essoè sikongkolo'ni sining panguwasana Yahudiè untu' mpunoi Yèsus. 54 Rimakkuwannanaro dè'na nappaitangngi alèna Yèsus ri yolona tau maègaè ri yelle'na tau Yahudiè. Nasalaini Yudèa, nalao ri kota riyasengngè Efraim seddèna padang kessi'è. Kuwaniro monro silaong ana'-ana' gurun-Na. 55 Iyaro wettuè macawè'ni Esso Maraja Paska Yahudiè. Maèga tau polè ri dèsa-dèsaè labe'ni lao ri Yèrusalèm untu' pogau'i upacara pappèpaccing alè ri wettu dè'napa naramè-ramèro. 56 Nasappani mennang Yèsus, na wettunna maddeppungeng ri Bolana Allataala, makkedani sèddiè lao ri laingngè, "Pèkkugi pallolongemmu? Naullè dè' nalao ri ramè-ramèwè. " 57 Napowadai mennanro saba' kapala-kapala imangngè sibawa sining tau Farisiè pura passu parènta makkedaè tau missengngèngngi kègi Yèsus monro, harusu'i nalaporo' kuwammengngi weddingngi ritikkeng.

Yohanes 12

1 Enneng esso riwettu dè'napa na Esso Maraja Paskaè, laoni Yèsus ri Bètania. Ri onrongngènnaro Lazarus monro iya puraè ripaoto' ri Yèsus polè ri amatènna. 2 Kuwaniro ritumaningi ri mennang, sibawa rilayani ri Marta. Lazarus sibawa sining topolè tudanni manrè silaong Yèsus. 3 Napolèna Maria sibawa tiwi kira-kira sitengnga liter minnya' wangi narwastu iya masuli senna'è. Iyaro minnya'è natirii ri ajèna Yèsus, nainappa nalullu'i sibawa gemme'na. Namabauna sininna bolaèro nasaba minnya' wangièro. 4 Iyakiya Yudas Iskariot, sala sèddinna ana' gurunna Yèsus -- iya accappurennaè bali'bellariwi Yèsus -- makkeda, 5 "Magi nadè' naribalu minnya' wangièro tellu ratu dowi pèra' ellinna, nainappa ellinna riwèrèngngi tau kasiyasiè?" 6 Makkeda makkuwairo Yudas tenniya nasaba najampangiwi tau kasiyasiè, iyakiya nasaba pangai. Biyasai mala dowi polè ri kas-è iya ritaroè ri alèna. 7 Iyakiya makkedai Yèsus, "Leppessangngi iyaro makkunraiè! Napogau'i iyaè untu' esso attampungek-Ku. 8 Tau kasiyasiè tuli engkai ri yelle'mu, iyakiya Iyya dè'. " 9 Maèga tau Yahudi mèngkalingai makkedaè engkai Yèsus ri Bètania. Jaji laoni mennang kuwaro. Laowi mennang tenniya bawang nasaba Yèsus, iyakiya nasaba maèlo towi mitai Lazarus, iya puraè ripaoto' polè ri amatèngngè ri Yèsus. 10 Iyanaro saba'na na kapala-kapala imangngè maèlo towi mpunoi Lazarus; 11 nasaba alèna nassabari namaèga tau Yahudi salaiwi mennang sibawa mateppe' lao ri Yèsus. 12 Pappa bajanana, naèngkalingani tau maègaè iya polè untu' ramè-ramèiwi Paskaè makkedaè mattengnganni Yèsus ri laleng allalengengngè mattuju ri Yèrusalèm. 13 Nanalana mennang daud-daung pattuku nalao duppaiwi, nagora-gorato, "Pojiwi Allataala! Ribarakkakiwi iya polè ri laleng asenna Puwangngè. Ribarakkakiwi Arunna Israèliè!" 14 Lolongenni Yèsus sèddi kaleddè malolo mupa, nanatonangiwi. Nakajajiyanna iya tarokiè ri laleng Kitta'è: 15 "Aja' mumètau, ana' makkunrainna Sion! Itai Arummu polè, tonangi si kaju ana' kaleddè!" 16 Iyaro wettuè dè'pa napahangngi ana'-ana' gurunna Yèsus iya manennaro. Iyakiya puranana Yèsus ripakaraja sibawa amatèn-Na, nappai naèngngerang mennang makkedaè iya rigaukengngèngngi risining tauwè pura tarokii ri laleng Kitta'è passalenna Alèna. 17 Sining tau iya engkaè wettunna Yèsus mobbii Lazarus massu polè ri kuburu'è sibawa paoto'i polè ri amatèngngè, matteru mabbèrè asabbiyang passalenna gau'èro. 18 Iyanaro saba'na nalao iyaro tau maègaè ri Yèsus saba' naèngkalingai mennang makkedaè Alèna ritu pura pogau'i anu makalallaingngèro. 19 Makkedani sining tau Farisiè sèddiè lao ri laingngè, "Dè'gaga riyullè pogau'! Ita bawanni, sininna linoè lari maccowèriwi!" 20 Ri yelle'na sining tau iya laowè ri Yèrusalèm untu' massompa ri ramè-ramèro engkato siyagangngarè tau Yunani. 21 Laowi mennang ri Filipus sibawa makkeda, "Saudara, rèkko weddingngi, macinnaki sita Yèsus. " (Assalenna Filipus polèi ri Bètsaida ri Galilèa. ) 22 Nalaona Filipus powadangngi Andrèas gau'èro, nainappa sipadduwani mennang palettu'i ri Yèsus. 23 Nakkeda Yèsus lao ri mennang, "Narapini wettunna Ana'na Tolinoè ripakaraja. 24 Tongeng senna' adak-Kuè: Rèkko sibatuè gandong dè' naritaneng ri laleng tanaè sibawa matè, tette'i matu sibatu. Iyakiya rèkko iyaro gandong sibatuè matèi, nappai mappapolè matu maèga gandong. 25 Tau iya mamasèiyèngngi atuwonna, ateddèngengngi matu atuwonna. Iyakiya tau iya benciyèngngi atuwonna ri linoèwè, napiyarai matu untu' atuwong mannennungengngè. 26 Tau iya maèloè tumaningi-Ka harusu'i maccowèri-Ka; kuwammengngi nasibawa-Ka matu pattumanik-Ku kègi-kègi-Ka engka. Tau iya tumaningiyèk-Ka ripakalebbii matu ri Ambo'-Ku. " 27 "Takkini-kini atik-Ku; aga harusu' Upowada makkekkuwangngè? Harusu'-Ka'ga makkeda, 'Ambo', paleppe'-Ka polè ri wettuèwè''? Iyakiya mala untu' pèneddingiwi iyaè anrasa-rasangngè na Upolèna. 28 Ambo', pakarajai asem-Mu!" Na paèngkalingana sadda polè ri langiè makkeda, "Purani Upakaraja, namaèlosi-Ka pakarajai. " 29 Tau maègaè iya engkaè kuwaro, naèngkalingani iyaro saddaè. Makkedani mennang, "Lettè iyaro!" Iyakiya engkato makkeda, "Tenniya! Malaèka' mabbicara ri Alèna!" 30 Nakkeda Yèsus lao ri mennang, "Iyaro saddaè paèngkalingai, tenniya untu' apentingek-Ku, iyakiya untu' apentingemmu. 31 Narapini wettunna makkekkuwangngè riyadèlèki linoè; risullèini panguwasana linoè makkekkuwangngè. 32 Iyakiya Iyya'è, rèkko purana ripakatanrè ri yasè'na linoè, maèlo-Ka getteng manengngi tauwè lao ri Iyya. " 33 Makkeda makkuwairo untu' mappaitangngi pèkkugi carana matu matè. 34 Nakkeda tau maègaèro lao ri Alèna, "Manuru' Kitta Hukkutta, Arung Pappassalama'è tuwoi matu mannennungeng. Pèkkugi-Ko wedding makkeda makkedaè Ana'na Tolinoè harusu'i ripakatanrè ri yasè'na linoè? Niga iyaro Ana'na Tolinoè?" 35 Nappèbali Yèsus, "Cinampe' bawang iyaro tajangngè engka ri yelle'mu. Jaji joppako ri wettu engkana mupa iyaro tajangngè, kuwammengngi aja' nakennako pettang. Tau iya joppaè ri laleng pettangngè dè' naissengngi kègai lao. 36 Ateppe'no lao ri tajangngèro, ri wettu engkana mupa iyaro tajangngè ri iko, kuwammengngi namumancaji ana'-ana'na tajangngè. " Puranana Yèsus makkeda makkuwaro, nasalaini onrongngèro sibawa dè' namaèlo mappaitangngi alèna lao ri mennang. 37 Namuni maègani anu makalallaing napogau' Yèsus ri yolona mennang, dè'to namateppe' ri Alèna. 38 Nakajajiyanna aga napowadaè Nabi Yèsaya, "Puwang, nigana mateppe' ri karèbatta? Lao ri niga riyappaitang akuwasanna Puwangngè?" 39 Iyanaro saba'na dè' naullèi mennang mateppe', saba' pura towi makkeda Yèsaya, "Makkedai Allataala, 40 'Upabutai matanna mennang, mèbbui mennang matedde ati; kuwammengngi dè' nakkita matanna mennang, aja' nappèjeppu pikkiranna mennang. Kuwammengngi aja' mennang nalisu ri Iyya, na-Upajjappai mennang. ' " 41 Makkeda makkuwaro Yèsaya saba' purai naita arajanna Yèsus, sibawa mabbicara passalen-Na. 42 Namuni makkuwaro, maèga tau, mala ri yelle'na panguwasa Yahudiè mateppe' lao ri Yèsus. Iyakiya dè' nabarani mangakuiwi terus terang, saba' mètaui ajakkè dè' nariyelloreng mennang ri tau Farisiè muttama' ri bola assompangngè. 43 Lebbi napojiwi mennang lolongeng pappoji tolino naiya pappakalebbi polè ri Allataala. 44 Nanagora Yèsus, "Tau iya mateppe'è ri Iyya, dè' na ri Iyya mateppe', iyakiya lao ri iya suroèk-Ka. 45 Na tau iya mitaèk-Ka, naitai iya suroèk-Ka. 46 Engkaka ri linoèwè selaku tajang, kuwammengngi sininna tau iya mateppe'è ri Iyya dè' naonro ri laleng pettangngè. 47 Tau iya mèngkalingaèngngi pappagguruwak-Ku, iyakiya dè' naturusiwi -- tenniya Iyya hukkungngi. Saba' polè-Ka tenniya untu' madèlèkiwi linoèwè, iyakiya untu' passalama'i. 48 Tau iya sampèyangngèk-Ka sibawa dè' naèngkalingai ada-adak-Ku, engkana madèlèkiwi. Ada-ada iya Upalettu'è, iyanaro matu madèlèkiwi ri Esso Kiyame'. 49 Saba' dè' Uwabbicara polè ri èlo alè-Ku; Ambo'è suro-Ka, Alèna ritu parènta-Ka aga harusu' Upowada sibawa Upalettu'. 50 Na-Uwisseng makkedaè iyaro parènta-Na mabbèrèi atuwong mannennungeng. Na-Upalettu'i pada-pada iya nappagguruwangngè Ambo'è lao ri Iyya. "

Yohanes 13

1 Siesso riwettu dè'napa na Esso Maraja Paskaè, naissenni Yèsus makkedaè narapini wettunna Yèsus salaiwi linoèwè untu' lisu ri Ambo'-Na. Namasèiwi sining tau iya mancajiyè appunnangen-Na ri linoè, natette'i namasèi mennang lettu paccappureng. 2 Yèsus sibawa ana'-ana' gurun-Na mattengngang manrè wenni. Purani naputtama' Ibillisi'è ri laleng atinna Yudas ana'na Simon Iskariot niya' untu' bali'bellariwi Yèsus. 3 Naissenni Yèsus makkedaè pura nabbèrèyanni Ambo'è sininna akuwasangngè lao ri Alèna. Naisseng towi makkedaè polèi ri Allataala sibawa maèloi lisu ri Allataala. 4 Rimakkuwannanaro tettonni ludungngi jumba-Na, nanasiyoi handu babuwa-Na. 5 Purairo tiwini uwai ri laleng sèddiè katowang, nappammula bissaiwi ajèna ana'-ana' gurun-Na enrengngè rakkoiwi sibawa handu iya tassiyoè ri babuwa-Na. 6 Narapinana Simon Pètrus, makkedani, "Puwang, masakang idi Puwang bissaiwi ajèku?" 7 Nappèbali Yèsus, "Dè' mupahangngi. Makkekkuwangngè aga iya Upogau'è, iyakiya mupahang muwatu matu. " 8 Nakkeda Pètrus lao ri Yèsus, "Aja' Puwang. Aja' sises-siseng Puwang tabissaiwi ajèku!" Iyakiya mappèbaliwi Yèsus, "Rèkko dè' Ubissaiko, dè'gaga assisumpungek-Ku sibawa iko. " 9 Nakkeda Simon Pètrus, "Rèkko makkuwaitu Puwang, aja' na ajèku bawang iyakiya lima sibawa ulukkuto!" 10 Nakkeda Yèsus lao ri Pètrus, "Tau puraè cemmè, mapaccing manenni watakkalèna. Dè'na naparellu ripaccingina; sangadinna ajèna. Mapaccinno iko, iyakiya dè' naiya maneng. " ( 11 Naissengngi Yèsus niga bali'bellariwi matu. Iyanaro saba'na nakkeda, "Mapaccinno iko, iyakiya dè' naiya maneng. ") 12 Puranana Yèsus nabissai ajèna mennang, napakèni paimeng jumba-Na nanatudassi. Nappa makkeda lao ri mennang, "Mupahagga iya nappaè Upogau' lao ri iko? 13 Muwobbi-Ka Guru sibawa Puwang. Na mèmeng makkuwaro. 14 Rèkko Iyya selaku Puwang sibawa Gurummu bissaiwi ajèmu, sitinaja tokko sibissai ajè. 15 Uwèrèkko iyaè contoè, kuwammengngi mupogau' towi aga iya puraè Upogau' lao ri iko. 16 Tongeng senna' adak-Kuè: Sèddiè ata dè' nalebbi battowa polè ri puwanna, sibawa sèddiè suro dè' nalebbi battowa polè ri iya suroèngngi. 17 Rèkko muwissengngi iya manennaè, masennanno rèkko mupogau'i. 18 Aga iya Upowadaèwè tenniya iko maneng nakenna. Uwisseng niga-niga iya puraè Upilè. Iyakiya aga iya tarokiè ri laleng Kitta'è, harusu'i kajajiyang, iyanaritu 'Tau iya sisamaèk-Ka manrè, naèwa-Ka matu. ' 19 Iyaro gau'è Upalettukekko makkekkuwangngè, riwettu dè'napa nakajajiyang, kuwammengngi rèkko kajajiyangngi matu iyaro gau'è, mateppe'ko matu makkedaè Iyya'naè iya riteppuè IYYA ENGKA. 20 Tongeng senna' adak-Kuè: Niga tarimai tau iya Usuroè, natarima-Ka. Na niga tarima-Ka, natarimai iya suroèk-Ka. " 21 Puranana Yèsus makkeda makkuwaro, masè' senna'ni. Nappa makkeda, "Tongeng senna' adak-Kuè: Sala sèddinna polè ri yelle'mu bali'bellari-Ka matu. " 22 Hèrang senna'ni ana'-ana' gurun-Na sisullè sitangnga nasaba dè' naissengngi niga naseng. 23 Ana' guru iya mamasèiyèngngi Yèsus tudangngi ri seddèna Yèsus. 24 Nabbèrèna tanrang Simon Pètrus lao ri alèna, kuwammengngi nakkutana ri Yèsus niga nakkattai. 25 Naddeppèna iyaro ana' guruè ri Yèsus, nanakkutana, "Niga Puwang?" 26 Nappèbali Yèsus, "Tau iya Uwèrèngngè roti iya Upajajje'è ri laleng mangko'è, iyanaritu taunna. " Nalana Yèsus sipolo roti, napajajje'i ri laleng mangko'è; nappa nawèrèng Yudas ana'na Simon Iskariot. 27 Natarimana Yudas iyaro rotiè, muttama'ni Ibillisi' ri laleng atinna. Nainappa makkeda Yèsus lao ri alèna, "Pogau'ni masitta aga maèlo mupogau'. " 28 Dè' sèddi polè ri mennang iya tudangngè manrè kuwaro pahangngi magi Yèsus nakkeda makkuwaro lao ri Yudas. 29 Engka masengngi Yèsus suroi Yudas melli anu iya riyapparelluwangngè untu' ramè-ramèro, iyarè'ga mpèrèngngi cèddè dowi tau kasiyasiè -- saba' Yudas iyanaritu pakkatenning dowina mennang. 30 Natarimana Yudas iyaro rotiè, matteruni massu. Mawenni toni. 31 Labe'nana Yudas, makkedani Yèsus, "Ripakarajani Ana'na Tolinoè makkekkuwangngè, naripakarajato Allataala naolai Alèna. 32 Rèkko ripakarajai Allataala naolai Alèna, ripakaraja towi matu ri Allataala naolai Alèna muto. Na Allataala pakarajai matu sibawa masitta. 33 Ana'-ana'-Ku, dè'na namaitta Uwonro sibawakko. Musapak-Ka matu, iyakiya pada-pada iya puraè Upowada lao risining panguwasana Yahudiè, makkuwatoro Upowadakko matu; ri onrong Ulaoiyè, dè' mullèi lao. 34 Parènta baru Uwèrèkko: Amasèi sèddiè lao ri laingngè. Pada-pada Iyya mamasèiko, makkuwatoniro iko harusu' siyamasèi. 35 Rèkko siyamasèiko, naissengngi matu sininna tauwè makkedaè iko ana'-ana' guruk-Ku. " 36 Nakkutana Simon Pètrus lao ri Yèsus, "Puwang, kègaki maèlo lao Puwang?" Nappèbali Yèsus, "Kèga-Ka lao, dè' mullèi maccowè makkekkuwangngè. Muwaccowèri-Ka matu, ri munripi. " 37 Nakkutanasi Pètrus, "Magi nadè' nawedding maccowèki Puwang makkekkuwangngè? Macenning atikku matè untu' Puwang!" 38 Nappèbali Yèsus, "Tongegga macenning atimmu matè untu' Iyya? Issenni, riwettu dè'napa naoni matu manu'è, wèkkatelluno makkeda makkedaè dè' muwissek-Ka!"

Yohanes 14

1 Nakkeda Yèsus lao ri mennang, "Aja' namasara atim-Mu. Ateppe'no ri Allataala sibawa ateppe' tono lao ri Iyya. 2 Ri Bolana Ambo'-Ku engka maèga onrong maddibola. Lao-ka kuwaro untu' passadiyangekko onrong. Dè' Uwakkeda makkuwaro matu lao ri iko, akkalarapanna dè' nakkuwaro. 3 Purakuna passadiyangekko onrong, lisu-Ka matu duppaiko, kuwammengngi kèga-Ka engka, engka tokko matu kuwaro. 4 Ri onrong Ulaoiyè muwissenni lalenna. " 5 Nakkeda Tomas lao ri Yèsus, "Puwang, dè' nariisseng kègaki Puwang lao, pèkkugiki missengngi lalenna?" 6 Nappèbali Yèsus, "Iyya'na laleng untu' missengngi Allataala sibawa lolongengngi atuwongngè. Dè' sèddi tau mullèi lao ri Ambo'è, rèkko dè' naola-Ka. 7 Akkalarapanna muwissek-Ka, tentu muwisseng towi matu Ambo'-Ku. Makkekkuwangngè muwissenni sibawa purana-Na muwita. " 8 Nakkeda Filipus lao ri Yèsus, "Puwang, paitaki Ambo'è; kuwammengngi tamasennang. " 9 Iyakiya mappèbaliwi Yèsus, "Makkuwamani ittana Usibawakko, nadè'paha muwissek-Ka, Filipus? Tau iya puraè mita-Ka, purani naita Ambo'è. Pèkkugiko wedding makkeda, 'Jellokekki Ambo'è?' 10 Filipus! Dè'ga mumateppe, makkedaè massèddi-Ka sibawa Ambo'è, na Ambo'è massèddiwi sibawa Iyya? Aga Upowadakko, dè' Upowadai polè ri alè-Ku. Ambo' iya tette'è massèddi sibawa Iyya, Alèna ritu jama manengngi. 11 Ateppe'ko ri Iyya, makkedaè massèddi-Ka sibawa Ambo'è na Ambo'è massèddiwi sibawa Iyya. Iyarè'ga kaminang dè'na, ateppe'no nasaba aga puraè Upogau'? 12 Tongeng senna' adak-Kuè: Tau iya mateppe'è ri Iyya, napogau'i matu aga iya puraè Upogau' -- mala napogau'i matu iya lebbi battowaèppasi -- saba' lao-Ka ri Ambo'è. 13 Na agi-agi muwèllau ri laleng asek-Ku, Upogau'i iyaro untu' alèmu, kuwammengngi naripakaraja Ambo'è naolai Ana'è. 14 Agi-agi muwèllau ri laleng asek-Ku, Upogau'i matu. " 15 "Rèkko muwamasèi-Ka, mupajoppai parènta-parènta-Ku. 16 Uwèllauwi matu ri Ambo'è, nanawèrèkko matu Pattulung laing, iya monroè matu sibawakko lettu mannennungeng. 17 Alèna Rohna Allataala iya pannessaèngngi matu atongengengngè passalenna Allataala. Dè' naullèi linoè tarimai, saba' dè' naitai iyarè'ga naissengngi. Iyakiya iko muwissengngi, nasaba monroi sibawakko enrengngè maèlona massèddi sibawa iko. 18 Dè' Usalaiko alè-alèmu pada-pada ana' biuè. Maèlo-Ka lisu ri iko. 19 Dè'na namaitta nadè' naita-Ka matu linoè. Iyakiya iko muwita-Ka. Sibawa nasaba tuwo-Ka, tuwo tokko matu. 20 Rèkko narapini essoèro, muwissengngi matu makkedaè massèddi-Ka sibawa Ambo'è, massèddiko sibawa Iyya, na Iyya massèddi sibawa iko. 21 Tau iya tarimaèngngi parènta-parènta-Ku sibawa napogau'na, iyanaritu mamasèiyèk-Ka. Namasèiwi matu Ambo'-Ku tau iya mamasèiyèkko. Uwamasèi towi iyaro tauwè sibawa Uwappaitanna alè-Ku lao ri alèna. " 22 Yudas (tenniya Yudas Iskariot) makkutana ri Yèsus, "Puwang, magi Puwang tamaèlo mappaitangngi alèta lao ri idi tenniya lao ri linoè?" 23 Nappèbali Yèsus, "Tau iya mamasèiyèkka, naturusiwi pappagguruwak-Ku. Ambo'-Ku mamasèiwi. Ambo'è sibawa Iyya laowi matu ri alèna sibawa monroi sibawangngi. 24 Tau iya dè'è namasèi-Ka, dè' naturusiwi pappagguruwak-Ku. Pappagguruwang iya Uwèngkalingaèro, dè' napolè ri Iyya, sangadinna polèi ri Ambo iya suroèk-Ka. 25 Iya manennaro Upowadakko ri wettu Usibawammu mupa. 26 Iyakiya Rohna Allataala, Pattulung iya nasuroè matu Ambo'è ri laleng asek-Ku, Alèna matu pagguruko sini-sininnaè sibawa parèngngerangiko lao ri sininna iya puraè Upaissengiko. 27 Asalèwangeng Utarongekko. Asalèwangek-Ku Uwèrèkko. Iya Uwabbèrèyangngèro dè' napada-pada nabbèrèyangngè linoè lao ri iko. Aja' mumausè, aja' mumètau. 28 Pura-Ka muwèngkalinga makkeda, 'Maèlo-Ka lao, iyakiya maèlo-Ka lisu paimeng ri iko. ' Rèkko muwamasèi-Ka, masenna'ko matu rèkko lao-Ka ri Ambo'è, saba' lebbi battowai Ambo'è naiya Iyya. 29 Upaissengiko iyaro makkekkuwangngè, riwettu dè'napa nakajajiyang maneng, kuwammengngi rèkko kajajiyangngi matu, mateppe'ko matu. 30 Dè' namaèga Upowada matu lao ri iko, saba' narapini wettunna panguwasana linoèwè polè. Iyakiya dè' nakuwasaiwi alè-Ku. 31 Iyakiya harusu' manengngi kajajiyang kuwammengngi namainge' linoè makkedaè Uwamasèiwi Ambo'è sibawa Upogau'na sininna iya napparèntangngè Ambo'è lao ri Iyya. Nah, laono mai talao polè kuwaè. "

Yohanes 15

1 Makkedasi Yèsus, "Iyya'na pong anggoro tongengngè, na Ambo'-Ku iyanaritu paddare'na. 2 Tungke' takkè-Ku iya dè'è nakkèbuwa, narette'i, sibawa tungke' takkè mabbuwaè, nakurangiwi daunna sibawa Napaccingiwi kuwammengngi nalebbi maègapasi buwana. 3 Mapaccinno iko nasaba pappagguruwang iya Uwèrèngngèkko. 4 Tette'no massèddi sibawa Iyya, na Iyya tette tokka matu massèddi sibawa iko. Iyaro takkè dè' naullèi makkèbuwa, sangadinna rèkko tette'i ri ponna. Makkuwatoniro iko, iya bawang mullèi mabbuwa rèkko tette'ko massèddi sibawa Iyya. 5 Iyya'na pong anggoro, na iko takkè-takkèna. Tau iya tette'è massèddi sibawa Iyya, na Iyya sibawa alèna, mabbuwai matu maèga; saba' rèkko dè' nasibawa Iyya, dè' agaga mullè pogau'. 6 Tau iya dè'è natette' massèddi sibawa Iyya, riyabbèyangngi matu pada-pada takkè, namancaji marakko. Takkè-takkè iya pada-padaèro ripaddeppungengngi matu, nariyabbèyang ri apiè, nainappa ritunu. 7 Rèkko tette'ko massèddi sibawa Iyya enrengngè pappagguruwak-Ku monroi ri laleng atimmu, èllauni ri Ambo'è; agi-agi muwacinnai; iyaro parèllaummu ripaddupai matu. 8 Rèkko mabbuwako maèga, Ambo'-Ku ripakaraja; narimakkuwannanaro tonget-tongekko mancaji ana' guruk-Ku. 9 Pada-pada Ambo'è mamasèiko, makkuwatoniro Iyya mamasèiko. Sitinajako tette tuwo selaku tau iya Uwamasèiyè. 10 Rèkko mupajoppai parènta-parènta-Ku, tette'ko matinulu ri pammasè-Ku, pada-pada Iyya tette matinulu ri pammasèna Ambo'è nasaba pajoppai parènta-parènta-Na. 11 Iya manennaè Upaissengiko, kuwammengngi arennuk-Ku engkai ri laleng atimmu, sibawa mancaji sukku arennummu. 12 Iyanaè parèntaku: Amasèiwi sèddiè lao ri laingngè, pada-pada Iyya mamasèiko. 13 Tau iya kaminang mamasèiyèngngi sellao-sellaona iyanaritu tau iya mabbèrèyangngi atuwonna untu' mennang. 14 Iko iyanaritu sellao-sellao-Ku, rèkko mupogau'i aga iya Uparèntangengngèkko. 15 Dè'na Uwobbiko ata, saba' ataè dè' naissengngi aga napogau' puwanna. Uwobbiko sellao, saba' sininna Uwèngkalingaè polèi ri Ambo'è, pura manenni Upaissengiko. 16 Tenniya iko pilè-Ka. Iyya ritu pilèko, sibawa suroko lao untu' mabbuwa maèga -- buwa-buwa iya dè'è nawedding binasa. Nawèrèkko Ambo'è agi-agi muwèllau ri Alèna ri laleng asek-Ku. 17 Iyanaè parènta-Ku lao ri iko: Amasèiwi sèddiè lao ri laingngè. " 18 "Rèkko nabenciko linoè, èngngerangngi makkedaè Iyya, lebbi riyolo mèmenna nabenci linoè. 19 Akkalarapanna nappunnangiko linoè, namasèiko matu linoè selaku appunnangenna. Iyakiya purano Upilè polè ri linoèwè, jaji tenniyano appunnangenna linoè. Iyanaro saba'na nabenciko linoè. 20 Engngerangngi aga pura Upowadakko, 'Ataè dè' nalebbi battowa naiya puwanna. ' Rèkko purai mennang napanrasa-rasa-Ka, napanrasa-rasa tokko matu. Rèkko naturusiwi pappagguruwak-Ku, naturusi towi matu pappagguruwammu. 21 Iya manennaro napogau'i matu mennang lao ri iko, nasaba ana' guruk-Kuko, saba' dè' naissengngi iya suroèk-Ka. 22 Akkalarapanna dè' Upolè sibawa dè'na Upowadai iya manennaro lao ri mennang, dè' mennang namadosa. Iyakiya makkekkuwangngè dè'na mennang nappunnai alasang untu' dosana mennang. 23 Tau iya benciyèk-Ka, nabencito Ambo'-Ku. 24 Akkalarapanna ri tengnga-tengngana mennang dè' Upogau'i gau'-gau' iya dè'èppa naengka napogau'i tau laingngè, dè'na namadosa mennang. Iyakiya makkekkuwangngè purani naita aga iya Upogau'è, nanabenci-Ka mennang sibawa Ambo'-Ku. 25 Iyakiya mèmeng harusu'i makkuwaro, kuwammengngi kajajiyangngi aga taroki ri laleng Kitta Hukkunna mennang, iyanaritu: 'Nabenci-Ka mennang temmakkèalasang. ' 26 Usuroi matu lao ri iko Pattulung iya polè ri Ambo'è. Iyanaritu Roh iya pannessaèngngi matu atongengeng passalenna Allataala. Rèkko polèi, mabbèrèi matu asabbiyang passalek-Ku. 27 Na iko harusu' tokko mabbèrè asabbiyang passalek-Ku, saba' sibawa Iyya mèmenni mappammulai ri pammulanna.

Yohanes 16

1 Iya manennaro Upaissengiko kuwammengngi nadè' muwassuriwi atepperemmu. 2 Ripassuko matu polè risining bola assompangngè. Napolèi matu wettunna makkedaè tau iya mpunoèkko nasekko matu mattumani lao ri Allataala. 3 Napogau'i mennang lao ri iko saba' dè' naissengngi Ambo'è sibawa Iyya. 4 Iyakiya makkekkuwangngè Upowadakko iyaro, kuwammengngi rèkko kajajiyangngi matu, muwèngngeranni makkedaè purano Upowadang. " "Iyaè gau'è dè' Upaissengiko polè ri pammulanna, saba' Usibawang mupo. 5 Iyakiya makkekkuwangngè maèlo-Ka lao ri iya suroèk-Ka; nadè' sèddi tau polè ri iko makkutana kèga-Ka lao. 6 Makkekkuwangngè mala tassinnau atimmu, saba' Upowadai gau'èro lao ri iko. 7 Iyakiya Upowadai iya tongengngè lao ri iko: Lebbi kessing muwi untu' iko, rèkko lao-Ka; saba' rèkko dè' Ulao, iyaro Pattulungngè dè' matu napolè ri iko. Iyakiya rèkko lao-Ka, Usoroi matu Alèna lao ri iko. 8 Rèkko polèi, napannessai matu lao ri linoè bettuwang tonget-tongenna dosaè, polè ri aga iya tongengngè, sibawa polè ri pahukkungenna Allataala. 9 Napannessai matu makkedaè dè' namateppe' ri Iyya iyanaritu dosa; 10 makkedaè tongek-Ka, nasaba laoka ri Ambo'è nadè'na muwitaka matu paimeng; 11 sibawa makkedaè mappammulani Allataala pahukkung, saba' purani rihukkung panguwasana linoè. 12 Maèga mupa maèlo upowada lao ri iko, iyakiya dè'pa mullèi tarimai makkekkuwangngè. 13 Iyakiya rèkko polèni iyaro Roh-è, iyanaritu iya pannessaèngngi atongengengngè passalenna Allataala, Napimpikko matu untu' missengngi sininna atongengengngè. Dè'na nabbicara matu polè ri Alèna iyakiya napowadai aga pura naèngkalinga, sibawa napaissengiko matu aga maèloè kajajiyang ri esso ri munri. 14 Napakaraja-Ka matu, saba' aga Napalettu ri iko, Natarimai polè ri Iyya. 15 Sininna engkaè ri Ambo'è iyanaritu appunnangekku. Iyanaro saba'na Uwakkeda makkedaè aga napalettu Roh-è lao ri iko, Natarimai polè ri Iyya. " 16 "Dè'na namaitta nadè'na muwitaka matu, sibawa cèddè' mani wettunna muwita-Ka. " 17 Siyagangngarè ana'-ana' gurunna Yèsus mappammula makkutana sèddiè lao ri laingngè, "Aga akkattana nakkeda makkuwaro lao ri Idi: 'Cèddè' mani wettunna nadè' muwita-Ka matu, sibawa cèddè' tommani wettunna muwita-Ka matu?' Aga topa akkattana: 'Lao-Ka ri Ambo'è?' " 18 Makkutanai mennang matteru, "Aga bettuwanna, 'Cèddè' mani wettunna'? Dè' naripahang passaleng aga nabicara!" 19 Naissengngi Yèsus maèloi mennang makkutana ri Alèna. Jaji makkedani, "Makkeda-Ka onna, 'Cèddè' mani bawang wettunna, dè' namaitta-Ka matu, sibawa cèddè' tommani wettunna muwita-Ka matu. ' Iyagaro mupersoalkang ri yelle'mu? 20 Ateppe'no, teriko matu sibawa mpating, iyakiya marennui matu linoè. Masussai atimmu matu, iyakiya iyaro asussammu tappinrai matu mancaji arennung. 21 Rèkko sèddiè makkunrai mawè'ni mèmmana', masussai, saba' wettunnana manrasa-rasa. Iyakiya jajinnana ana'na, iyaro makkunraiè nallupaiwi anrasa-rasanna matu nasaba marennui makkedaè sèddi ana'lolo jaji ri linoè. 22 Makkuwatoro sibawa iko: makkekkuwangngè masussai atimmu, iyakiya maèlo-Ka sita paimeng sibawa iko, namarennu atimmu; nadè' sèddi tau mullèi malai arennummuro polè ri atimmu. 23 Iyaro essoè dè' agagana muwakkutanang matu lao ri Iyya. Ateppe'no: Agi-agi muwèllau lao ri Ambo'è ri laleng asek-Ku, nabèrèyangngi matu iyaro Ambo'è lao ri iko. 24 Narapi makkekkuwangngè dè'pa agaga muwèllau ri laleng asek-Ku. Ellauni, namutarimai matu, kuwammengngi nasukku arennummu. " 25 "Iya manennaè Upowadakko sibawa rapang-rapang. Iyakiya engka matu napolè wettunna, nadè' Upakè rapang-rapang, iyakiya mabbicara terus terang lao ri iko passalenna Ambo'è. 26 Iyaro wettuè muwèllauwi matu ri Ambo'è ri laleng asek-Ku; issenni, dè' Umaèlo matu mèllaungekko polè ri Ambo'è, 27 nasaba alèna Ambo'è mamasèiko. Namasèiko nasaba mumasèi-Ka, sibawa mateppe' makkedaè polè-Ka ri Allataala. 28 Mèmeng assalek-Ku polèi ri Ambo'è, naulao ri linoè. Iyakiya makkekkuwangngè Usalaini linoè untu' lisu ri Ambo'è. " 29 Nanakkeda ana'-ana' gurunna Yèsus lao ri Yèsus, "Makkekkuwangngè mabbicaraki Puwang terus terang sibawa dè' tapakè rapang-rapang, 30 nariissenni makkedaè taisseng manenni Puwang. Dè' naparellu sèddiè tau makkutangngi agi-agi lao ri Puwang. Rimakkuwannanaro mateppe'ki polèki Puwang ri Allataala. " 31 Nappèbalina Yèsus lao ri mennang, "Jaji mateppe'ko makkekkuwangngè? 32 Engngerangngi! Polèi matu wettunna, mala engkani, ripassara-sarakko matu. Lisuko matu tungke'-tungke' ri bolamu namusalai-Ka alè-alè-Ku. Iyakiya dè' Uriyalè-alè saba' Ambo'è engkai sibawak-Ka. 33 Iya manennaè Upowadai kuwammengngi mulolongeng asalèwangeng nasaba massèddiko sibawa Iyya. Ri linoè manrasa-rasako matu. Iyakiya pakkasse'i atimmu! Purani Ucau linoè!"

Yohanes 17

1 Purana makkeda makkuwaro, congani Yèsus ri langiè makkeda, "Ambo', narapini wettunna makkekkuwangngè. Pakarajani Ana'-Mu, kuwammengngi na Ana'-Mu napakaraja towi Ambo'è. 2 Ambo'è pura mabbèrèyangngi akuwasangngè ri sininna rupa tauwè lao ri Ana'è, kuwammengngi nabbèrèyangngi atuwong mannennungengngè lao ri sininna tau iya nabbèrèyangngè Ambo'è. 3 Iyanaè atuwong mannennungengngè; kuwammengngi tauwè naissengngi Ambo'è, sèddi-sèddinna Allataala iya tongengngè, sibawa missengngi Yèsus Kristus iya nasuroè Ambo'è. 4 Purani Upakaraja Ambo'è ri yasè'na linoèwè ri laleng pappurai jama-jamang iya nasurowangngèk-Ka Ambo'è. 5 Ambo'! Pakarajana makkekkuwangngè ri Ambo', sibawa arajang iya Uwappunnaiyè silaong Ambo'è riwettu dè'napa naripancaji linoè. 6 Purani Uwappaddissengeng Ambo' lao risining tau iya polè ri linoèwè iya puraè nabbèrèyang Ambo' lao ri Iyya. Mennang iyanaritu appunnangennai Ambo', na Ambo' pura mabbèrèyangngi mennang lao ri Iyya. Purani mennang naturusi ada-adanna Ambo'. 7 Naissenni mennang makkekkuwangngè makkedaè sininna iya nawèrèngngèkka Ambo' assalenna polèi ri Ambo'. 8 Purani Upalettu' ri mennang ada-ada iya nawèrèngngèk-Ka Ambo'; napurani natarima mennang. Naisseng mennang makkedaè Ambo' ritu suro-Ka. 9 Massempajakka untu' mennang. Dè' Uwassempajang untu' linoè, sangadinna untu' sining tau iya puraè nabbèrèyang Ambo'è lao ri Iyya, saba' appunnangennai Ambo' mennang. 10 Sininna appunnangek-Ku iyanaritu appunnangenna towi Ambo'; sibawa sininna appunnangenna Ambo', appunnangek-Kuto. Ripakaraja-Ka ri yelle'na mennang. 11 Makkekkuwangngè lao-Ka ri Ambo'. Dè'na Uwonrona ri linoè. Ambo' iya mapaccingngè! Jagaiwi mennang sibawa akuwasang asenna Ambo', iyanaritu aseng puraè nawèrèk-Ka Ambo' -- kuwammengngi namancaji seddi mennang, pada-pada Ambo' sibawa Iyya sèddito. 12 Ri wettuk-Ku sibawa mupa mennang, Iyya purana jagai mennang sibawa akuwasang asenna Ambo'è -- aseng mabbèrèyangngi Ambo' lao ri Iyya. Purani ujagai mennang, nadè' sèddi polè ri mennang teddèng, sangadinna iya harusu'è mennang teddèng, kuwammengngi nakajajiyang aga tarokiè ri laleng Kitta'è. 13 Makkekkuwangngè lao-Ka ri Ambo'. Iya manennaè Upowadai ri wettukku ri linoè mupa; kuwammengngi napèneddingiwi mennang sibawa sukku arennuk-Ku. 14 Purani Upalettukengngi mennang ada-adanna Ambo'è, na linoè benciwi mennang, saba' tenniya mennang appunnangenna linoè, pada-pada Iyya tenniya tokka appunnangenna linoè. 15 Dè' Uwèllauwi kuwammengngi Ambo'è malai mennang polè ri linoèwè, iyakiya Uwèllauwi kuwammengngi Ambo'è jagaiwi mennang polè ri majaè. 16 Pada-pada mutowi Iyya tenniya-Ka appunnangenna linoè, tenniya towi mennang appunnangenna linoè. 17 Pancajiwi mennang appunnangeng ripallainna Ambo' naolai atongengengngè; ada-adanna Ambo' iyanaritu atongengeng. 18 Pada-pada Ambo' pura suro-Ka lao ri linoè, makkuwatoniro Iyya suroi mennang lao ri linoè. 19 Untu' apentingenna mennang, Uwabbèrèyangngi alè-Ku selaku appunnangeng ripallainna Ambo'è, kuwammengngi namancaji mennang appunnangeng ripallainna Ambo'è naolai atongengengngè. 20 Tenniya untu' mennang bawang massempajak-Ka. Massempajang tok-Ka untu' sining tau iya mateppe'è matu lao ri Iyya polè ri asabbiyanna mennangngè. 21 Uwèllauwi Ambo', kuwammengngi iya maneng mennang mancajiwi sèddi, pada-pada Ambo'è massèddiwi sibawa Iyya, na Iyya sibawa Ambo'. Tennapodo mancaji sèddiwi mennang sibawa Idi kuwammengngi namateppe' linoè makkedaè Ambo' suro-Ka. 22 Purani Uwèrèng mennang arajang iya nawèrèngngèk-Ka Ambo', kuwammengngi nancaji sèddi mennang, pada-pada Idi sèddi tokki; 23 Iyya sibawa mennang, na Ambo' sibawa Iyya; kuwammengngi natonget-tongengngi sèddiwi. Nanaissengngi matu linoè makkedaè Ambo' ritu suro-Ka, sibawa makkedaè Ambo' mamasèiwi mennang pada-pada Ambo' mamasèi-Ka. 24 Ambo', macinna-Ka kuwammengngi mennang iya tabbèrèyangngè lao ri Iyya, engkai sibawak-Ka ri onrong Uwonroiyè, kuwammengngi naitai mennang arajak-Ku; iyanaritu arajang iya nawèrèngngèk-Ka Ambo'è, nasaba namasèi-Ka Ambo'è riwettu dè'napa naripancaji linoè. 25 Ambo' iya adèlè'è! Dè' naissek-Ka linoè Ambo', iyakiya Iyya uwisseng Ambo'; sibawa iyaè sining tauwè naisseng makkedaè Ambo' suro-Ka. 26 Purani Uwappaissengeng asenna Ambo' lao ri mennang; namatteru-Ka pogau'i matu makkuwaro, kuwammengngi napammasèna Ambo'è lao ri Iyya tette'i ri laleng atinna mennang sibawa massèddi-Ka sibawa mennang. "

Yohanes 18

1 Puranana Yèsus massempajang makkuwaro, laoni sibawa ana'-ana' gurun-Na ri liwenna Salo Kidron. Engka sèuwa tammeng kuwaro, nanauttama'na Yèsus sibawa ana'-ana' gurun-Na ri tammengngèro. 2 Iyaro Yudas, tau bali'bellaè, naisseng iyaro onrongngè; saba' biyasai Yèsus maddeppungeng kuwaro sibawa ana'-ana' gurun-Na. 3 Nalaona Yudas ri onrongngèro sibawa tiwi sipasukang tentara Romawi sibawa siyagangngarè pengawalna Bolana Puwangngè iya risuroè ri kapala-kapala imangngè sibawa sining tau Farisiè. Tiwii mennang senjata, pajjennangeng sibawa sulo. 4 Naisseng maneng Yèsus iya maèloè kajajiyang lao ri Alèna. Jaji naddeppèrini sining tauwèro nanakkuta-Na, "Niga musappa?" 5 Nappèbali mennang, "Yèsus, tau Nazarèt-è. " Nakkeda Yèsus, "Iyya'naè. " Iyaro Yudas tau bali'bellaè tettonni kuwaro silaong mennang. 6 Wettunna Yèsus makkeda lao ri mennang, "Iyya'naè, " soro manenni mennang namabuwang ri tanaè. 7 Siseppi Yèsus makkutana lao ri mennang, "Niga musappa?" Nappèbali mennang, "Yèsus tau Nazarèt-è. " 8 Nakkeda Yèsus, "Purani Upowada, Iyya'naè. Rèkko mèmeng musappa-Ka, leppessangngi mennangngè laingngè lao. " ( 9 Ri laleng makkeda makkuwannaro, kajajiyangngi aga pura napowada Yèsus riyolona: "Ambo', polè risining tau tawèrèngngèkka Ambo', muwi sèddi tau dè'to gaga teddèng. ") 10 Simon Pètrus iya tiwiè sipeppa peddang, narampuni nanawettai atanna imang lompoè angkanna massarang daucculing ataunna. Asenna iyaro ataè Malkus. 11 Nakkeda Yèsus lao ri Pètrus, "Puttama'i paimeng peddammu ri laleng wanuwanna! Muwasengngiga dè' Uwènungngi matu ènungeng anrasa-rasang iya nawèrèngngèk-Ka Ambo'è?" 12 Nainappa prajuri'-prajuri' Romawi sibawa komandanna enrengngè sining pengawalna Yahudiè tikkengngi sibawa siyoi Yèsus. 13 Bunge'-bunge'na natiwii mennang Yèsus mangolo ri Hanas, matuwa worowanèna Kayafas. Kayafas iyanaritu imang lompo ri taungngèro. 14 Na alèna ritu pura pangajariwi sining panguwasana Yahudiè makkedaè lebbi kessing muwi sèddiè tau matè untu' sininna bangsaè. 15 Simon Pètrus sibawa sèddi ana' gurun-Na laingngè maccowèriwi Yèsus. Ana' gurun-Na iya laingngèwè riissengngi ri imang lompoè; jaji maccowè toni muttama' sibawa Yèsus ri seddè bolana imang lompoè, 16 na Pètrus mattajeng ri saliweng, ri sumpangngè. Nainappa iyaro ana' gurun-Na iya laingngè laoni ri saliweng namabbicara sibawa pattumani makkunraiè iya jagaiyèngngi sumpangngè, nappa natiwi Pètrus muttama' ri laleng. 17 Nakkeda iyaro pattumani makkunraiè lao ri Pètrus, "Hèi, dè'ga na ikoto sala sèddinna ana' gurunna tauwèro?" Nappèbali Pètrus, "Tenniya. " 18 Iyaro wettuè makeccè hawaè, jaji sining pattumaniè sibawa sining pengawal-è purani palluwa api osing naddellang mennang kuwaro. Laoni Pètrus kuwaro natettong maddellang silaong mennang. 19 Makkutanani imang lompoè lao ri Yèsus passalenna ana'-ana' gurun-Na sibawa passalenna pappagguruwan-Na. 20 Nappèbali Yèsus, "Tuli mabbicara-Ka terus terang ri yolona tau maègaè. Tuli mappagguru-Ka risining bola assompangngè sibawa ri Bolana Allataala, onronna biyasa maddeppungeng tau Yahudiè. Dè' naengka Uwakkedada sibawa usubbu-subbu. 21 Jaji magi Puwang tatanai-Ka? Tanaiwi mennang iya puraè mèngkalinga-Ka mappagguru. Tentu naisseng mennang aga Upowada. " 22 Wettunna Yèsus makkeda makkuwaro, sala sèddinna pengawal-è kuwaro leppa'i sibawa makkeda, "Barani senna'-Ko mabbicara makkuwaro lao ri imang lompoè!" 23 Nappèbali Yèsus, "Rèkko engka sèuwa Upowada sala, powadani kuwaè aga salana! Iyakiya rèkko iyaro Upowadaè mèmeng tongengngi, magi muleppa'-Ka?" 24 Nainappa Hanas suroi tauwè tiwii Yèsus sibawa ribalenggu lao ri Imang Lompoè Kayafas. 25 Tettong mupi Simon Pètrus maddellang kuwaro. Nakkeda sining tauwè lao ri alèna, "Tenniyaga ikoto ana' gurunna tauwèro?" Iyakiya massakkai Pètrus, adanna, "Tenniya!" 26 Engka sèddi atanna imang lompoè, iyanaritu kaluwargana polè ri tau iya narette'è Pètrus daucculinna, makkeda, "Dè'ga nauwita tokko ri tammengngèro silaong Yèsus?" 27 Nassakkasi Pètrus, "Dè', " -- na iyatoro wettuè naoni manu'è. 28 Maèlè senna'ni mennang tiwii Yèsus polè ri bolana Kayafas lao ri saorajana gubernur-è. Sining tau Yahudiè dè' nauttama ri laleng saorajaè, kuwammengngi dè' nanajisi' secara agama, nasaba maèloi maccowè manrè nanrè Paska. 29 Rimakkuwannanaro laoni Pilatus ri saliweng ri mennang nanakkutana, "Aga pappotane'mu lao ri tauwèwè?" 30 Nappèbali mennang, "Akkalarapanna dè' napasala, dè' tatiwii lao ri Bapa' Gubernur. " 31 Nakkeda Pilatus lao ri mennang, "Alani namuwadèlèkiwi situru hukkummu!" Iyakiya mappèbaliwi iyaro sining tau Yahudiè, "Dè' naweddikki hukkung matèi tauwè. " ( 32 Kajajiyangngi iyaè kuwammengngi nakajajiyang aga napowada Yèsus passalen-Na pèkkugi cara-Na matè matti. ) 33 Muttama'ni paimeng Pilatus ri saorajaè, nanaobbii Yèsus, nainappa makkutana, "Ikoga arunna tau Yahudiè?" 34 Nappèbali Yèsus, "Polè ri alènaga puwang iyaè pakkutanaè iyarè'ga engka tau laing pura paissengiwi puwang passalenna alè-Ku?" 35 Nappèbali Pilatus, "Tau Yahudika'ga iyya'è? Iya mabbèrèyangngèk-Ko lao ri iyya iyanaritu bangsa-Mu muto sibawa kapala-kapala imangngè. Aga pura Mupogau'?" 36 Nakkeda Yèsus, "Akkarungek-Ku dè' napolè ri linoèwè. Ebara'na akkarungek-Ku polèi ri linoèwè, sining tauk-Ku mèwai matu kuwammengngi na aja' nariyabbèrèyak-Ka lao risining panguwasana Yahudiè. Iyakiya mèmeng akkarungek-Ku dè' napolè ri linoèwè!" 37 Nakkutana Pilatus ri Alèna, "Rèkko makkuwaitu, aruk-Kotu?" Nappèbali Yèsus, "Tapowadai puwang makkedaè Iyya'è arung. Jaji-Ka sibawa lao-Ka ri linoè untu' sèddi akkatta, iyanaritu mabbèrè asabbiyang passalenna atongengengngè. Tau iya polè ri atongengengngèro naèngkalinga-Ka. " 38 Nakkutana Pilatus ri Alèna, "Aga bettuwanna atongengengngè?" Nanassusi Pilatus polè ri saorajaè nanakkeda risining tau Yahudiè, "Dè'gaga muwi sèddi asalang ulolongeng ri Alèna. 39 Iyakiya manuru' abiyasammu, tuli malleppessakka sèddi tau tarungku ri Esso Maraja Paskaè. Maèlokoga kuwammengngi uleppessangekko arunna tau Yahudiè?" 40 Nappèbalina mennang sibawa gora-gora, "Dè' na iyaro, iyakiya Barabas!" (Barabas iyanaritu sèddiwi parampo. )

Yohanes 19

1 Nainappa muttama' Pilatus nanasuroi tauwè barasa'i Yèsus. 2 Mèbbuni sining prajuri'è sèuwa passigera' polè ri takkè-takkè maddoriè, nainappa napasang ri ulunna Yèsus. Purairo napappakèini mennang jumba lango-lango, 3 nainappa makkolik-koling lao ri Alèna sibawa makkeda, "Tuwoni arunna tau Yahudiè!" Nainappa naleppa. 4 Purairo massusi Pilatus siseppa nanakkeda lao ri tau maègaèro, "Itai! Utiwii massu lao ri iko, kuwammengngi muwissengngi makkedaè dè' ulolongeng muwi sèddi asalang ri Alèna. " 5 Nassuna Yèsus sibawa pakè passigera' dori enrengngè jumba lango-lango. Nakkeda Pilatus lao ri mennang, "Itani tauwèro. " 6 Wettunna kapala-kapala imangngè sibawa sining pengawal-è mitai Yèsus, gorani mennang, "Sallii! Sallii!" Nakkeda Pilatus lao ri mennang, "Alani na alèmu sallii, dè' ulolongeng muwi sèddi asalang ri Alèna. " 7 Nappèbali sining tau Yahudièro, "Manuru' hukkutta, harusu'i rihukkung matè nasaba nangakui Alèna Ana'na Allataala. " 8 Wettunna Pilatus naèngkalinga mennang makkeda makkuwaro, pèdè' mètauni. 9 Nauttama'na paimeng ri laleng saorajaè, ritiwinana Yèsus muttama', makkutanani Pilatus ri Alèna, "Polè kègai assalemmu?" Iyakiya dè' nappèbali Yèsus. 10 Jaji makkedasi Pilatus, "Dè'ga Mumaèlo mabbicara sibawa iyya? Issenni, mappunnaika akuwasang paleppe'-Ko, sibawa akuwasang salli-Ko!" 11 Nappèbali Yèsus, "Rèkko Allataala dè' nabbèrèyangngi iyaro akuwasangngè lao ri puwang, dè' sises-siseng puwang tappunnai akuwasang lao ri Iyya. Rimakkuwannanaro tau iya mabbèrèyangngèk-Ka lao ri puwang, lebbi battowai dosana naiya puwang. " 12 Wettunna naèngkalinga Pilatus iyaro, makkuragani untu' leppessangngi Yèsus. Iyakiya gora-gorai sining tau Yahudiè, "Rèkko tapaleppe'i Puwang, tenniyana Puwang sellaona Kaisar! Tau iya mangakuè alèna arung, iyanaritu balinna Kaisar!" 13 Wettunna naèngkalinga Pilatus ada-adaèro, natiwini Yèsus massu nainappa tudang ri kadèra pengadilangngè ri onrong riyasengngè Tèmbo' Batu. (Ri laleng basa Ibrani asenna Gabata. ) 14 Iyaro wettuè mawè'ni tettè seppulo duwa essoè, esso riyolona Esso Maraja Paskaè. Nakkeda Pilatus lao risining tauwèro, "Iyanaè arummu!" 15 Gora-gorani mennang, "Unoi! Unoi! Sallii!" Nakkutana Pilatus, "Harusu'ka'ga sallii arummu?" Nappèbali kapala-kapala imangngè, "Banna Kaisar alè-alèna arutta!" 16 Nanabbèrèyanni Pilatus Yèsus lao ri mennang untu' risalli. Nalani mennang Yèsus, nanatiwii lao. 17 Massuni Yèsus mèssangngi salli-Na lao ri onrong riyasengngè "Onrong Tengkora". (Ri laleng basa Ibrani riyasengngi Golgota. ) 18 Kuwaniro risalli. Nasibawang Alèna, engkato duwa tau laing risalli; sèddi ri seddè abèyo, sèddi ri seddè atau, na Yèsus ri tengnga-tengnga. 19 Ri aju sallina Yèsus, nassurowangngi Pilatus pasangngi okièwè: "Yèsus polè ri Nazarèt, Arunna Tau Yahudiè". 20 Maèga tau Yahudi bacai iyaro okiè, saba' iyaro onronna Yèsus risalli dè' namabèla polè ri kotaè. Iyaro okiè ri laleng basa Ibrani, Latin sibawa Yunani. 21 Nakkeda kapala-kapala imangngè lao ri Pilatus, "Aja' taokii 'Arunna tau Yahudiè'', sangadinna okii, 'Makkedai iyaè tauwè, Iyya Arunna tau Yahudiè. ' " 22 Iyakiya mappèbaliwi Pilatus, "Iya puraè uwoki, tette'i taroki. " 23 Puranana iyaro sining prajuri'è nasalli Yèsus, nalani pakèyan-Na. Iyaro pakèyangngè nabagè eppai: tungke'-tungke' lolongeng sibagiyang. Nala towi mennang jumba-Na. Iyaro jumbaè dè'gaga pajjaina -- ritennungngi polè ri yasè lettu ri yawa. 24 Makkedani iyaro sining prajuri'è sèddiè lao ri laingngè, "Aja' tarette'-rette'i iyaè jumbaè. Laono mai taundiwi untu' pattentui niga wedding lolongengngi. " Iyaro gau'è kajajiyangngi kuwammengngi nakajajiyang aga taroki ri laleng Kitta'è, iyanaritu: "Nabagè-bagèni mennang pakèyak-Ku, sibawa naundiwi jumba-Ku. " Na mèmeng iyaro sining prajuri'è pura napogau'ni makkuwaèro. 25 Ri seddèna sallina Yèsus tettonni indo'na Yèsus, padakkunrainna indo'-Na, Maria bainèna Klopas, sibawa Maria Magdalèna. 26 Wettunna Yèsus naita indo'-Na sibawa ana' gurun-Na namasèiyè tettong kuwaro, makkedani ri indo'-Na, "Indo', iyaro ana'na Indo'. " 27 Nainappa makkeda Yèsus lao ri ana' gurun-Naro, "Iyaro indo'mu. " Mappammulai wettuèro iyaro ana' guruè natarimai indo'na Yèsus untu' monro ri bolana. 28 Naissenni Yèsus makkedaè tèpu manenni makkekkuwangngè, nakuwammengngi aga iya tarokiè ri laleng Kitta'è weddingngi kajajiyang, makkedani, "Madekka-Ka. " 29 Engka kuwaro sèuwa mangko penno uwai anggoro iya makecciè. Nappajajjekenni sèuwa bunga karang ri lalenna uwai anggoro'èro, nainappa nattoddokeng ri sitakkè hisop, nanassoppakengngi ri tèmunna Yèsus. 30 Napèrasaini Yèsus uwai anggoro'èro nainappa makkeda, "Tèpuni!" Nainappa napacannunnu ulun-Na namatè. 31 Sining panguwasana Yahudiè dè' naèloriwi rèkko iyaro ujuna sining tau risalliè tette'i taggattung ri aju salliè ri esso Saba'è, apalagi iyaè sisengngè iyaro Saba'è Esso Maraja iya ripallaingngè. Nasaba esso risallina Yèsus kajajiyangngi ri yolona iyaro esso Saba'è, sining tau Yahudiè mèllau paramisini ri Pilatus untu' poloi ajèna sining tau iya puraè risalli sibawa panonnoi sining ujuèro polè ri aju salliè. 32 Nanalaona iyaro sining prajuri'è nanapoloi lebbi riyolo ajèna iya duwa tau risalliè silaong Yèsus. 33 Wettunna mennang lettu ri Yèsus, naitani mennang matèni. Jaji dè'na napoloi ajè-Na. 34 Iyakiya sala sèddinna polè risining prajuri'èro gajangngi benrènna Yèsus sibawa bessi; nassuna daraè sibawa uwai. 35 Tau iya mitaèngngi kajajiyangngèro, alèna ritu curitai gau'èro, kuwammengngi namumateppe'to. Na tongengngi asabbiyannaro, sibawa naissengngi makkedaè tongeng iyaro. 36 Kajajiyangngi iyaro kuwammengngi nakajajiyang aga iya tarokiè ri laleng Kitta'è, iyanaritu "Dè' sèddi bukun-Na ripolo". 37 Ri laleng Kitta'è taroki towi, "Naitai matu mennang iya puraè mennang nagajang. " 38 Purairo mèllau paramisini Yusuf polè ri Arimatèa ri Pilatus untu' malai ujuna Yèsus. (Yusuf iyanaritu ana' gurunnai Yèsus iyakiya secara subbu-subbui, saba' mètaui risining panguwasana Yahudiè. ) Naripalalona ri Pilatus, jaji laoni malai ujuna Yèsus. 39 Nikodèmus iya laowè riyolo ri Yèsus ri wenniè, lao towi silaong Yusuf. Nikodèmus tiwi rampa-rampa mur sibawa gaharu -- iya manenna kira-kira telluppulo kilo ègana. 40 Iya duwa tauwèro nalani ujuna Yèsus nainappa nadoko sibawa kaing pawwalu silaong iyaro rampa-rampa wangiè situru ade' mattampunna tau Yahudiè. 41 Ri onronna Yèsus risalli engka sèddi tammeng. Ri lalenna tammengngèro engka sèddi kuburu' baru, iya dè'èppa naengka naripakè untu' kuburu'i tauwè. 42 Nasaba iyaro kuburu'è macawè'i, namawè' toni mappammula esso Saba'è, nakuburu'ni mennang Yèsus kuwaro.

Yohanes 20

1 Ri esso Aha'è èllèè, wettu makalemmenna mupa, laoni Maria Magdalèna ri tampungngè. Naitani batu pattongkona lèssè polè ri kalebbonna iyaro tampungngè. 2 Nalarina lao sappai Simon Pètrus sibawa ana' guru iya namasèiyè Yèsus, nakkeda lao ri mennang, "Riyalani Puwangngè polè ri tampungngè, nadè' uwissengngi kègai ritaro. " 3 Nalaona Pètrus sibawa ana' guru laingngè ri kuburu'è. 4 Lari duwani, iyakiya iyaro ana' guru laingngè lebbi masitta'i na Pètrus, nalettu' lebbi riyolo ri kuburu'è. 5 Cèllènni muttama' ri laleng kuburu'è nanaitai kaing pawwaluè lènne kuwaro, iyakiya dè' nauttama. 6 Maccinrolani Pètrus polè ri monri namatteru muttama' ri kuburu'èro. Naitani kaing pawwaluè lènne kuwaro, 7 iyakiya kaing iya risiyorengngèngngi ulunna Yèsus dè'i gaga ri seddèna sangadinna mallaingngi tallulung. 8 Nainappa ana' guru iya lebbi riyoloè lettu ri kuburu'èro, muttama' toni. Naitani sibawa mateppe'. ( 9 Narapi wettuèro dè'pa napahangngi aga iya tarokiè ri laleng Kitta'è makkedaè harusu'i moto polè ri amatèngngè. ) 10 Purairo lisuni iyaro ana'-ana' gurunna Yèsus. 11 Tettonni Maria Magdalèna ri yolona kuburu'èro teri. Teriwi nacèllètto ri laleng kuburu'èro, 12 nanaitana duwa malaèka' mappakè maputè. Tudangngi mennang ri onronna ujuna Yèsus, sèddi ri yulu na laingngè ri ajèna. 13 Nakkutana iyaro sining malaèka'è, "Indo', magi muteri?" Nappèbali Maria, "Riyalani Puwakku, nadè' uwissengngi kègai ritaro. " 14 Purana makkeda makkuwaro, gilinni limonri nanaitai Yèsus tettong kuwaro. Iyakiya dè' naissengngi makkedaè Yèsus iyaro. 15 Nakkutana Yèsus lao ri alèna, "Indo', magi muteri? Niga tasappa indo'?" Nasengngi Maria iyaro paddare, jaji makkedani, "Pa', rèkko Bapa' palèttè'i polè kuwaè, tulukka tapowadakka kègai tataro Pa', kuwammengngi weddingngi uwala. " 16 Nakkeda Yèsus lao ri Maria, "Maria!" Gilinni Maria lao ri Yèsus, nakkeda ri laleng basa Ibrani, "Rabbuni!" (Bettuwanna "Guru". ) 17 Nakkeda Yèsus ri Maria, "Aja' mukarawa-Ka, saba' dè'pa Uwènrè ri Ambo'è. Iyakiya laoko risining silessurek-Ku sibawa powadangngi mennang makkedaè makkekkuwangngè mènrè'-Ka ri Ambo'-Ku sibawa Ambo'mu, Allataala-Ku sibawa Allataalamu. " 18 Nalaona Maria powadangngi ana'-ana' gurunna Yèsus makkedaè purani naita Puwangngè, sibawa Puwangngè pura powada manengngi iyaro lao ri alèna. 19 Iyatoro esso Aha'è, ri wettu mawenninnana, maddeppungenni ana'-ana' gurunna Yèsus risèuwaè bola sibawa taggoncing sining tange'na, saba' mètaui risining panguwasana tau Yahudiè. Tappa engka muni Yèsus polè natettong ri tengnga-tengngana mennang sibawa makkeda, "Salama' salèwangekko. " 20 Purana makkeda makkuwaro, nappaitanni lao ri mennang liman-Na sibawa benrèn-Na. Wettunna naita Puwangngè, marennu senna'ni mennang. 21 Nakkedapa Yèsus siseppa lao ri mennang, "Salama' salèwangekko. Pada-pada Ambo'è suro-Ka, makkuwatoniro Iyya suroko. " 22 Nainappa nasseppungeng nappase'-Na lao ri mennang sibawa makkeda, "Tarimani Rohna Allataala. 23 Rèkko muwaddampengengngi dosana sèddiè tau, naddampengeng towi Allataala. Rèkko dè' muwaddampengengngi dosana sèddiè tau, dè'to naddampengengngi Allataala. " 24 Tomas, (iya riteppuè "Dènru"), sèddiwi polè riseppuloè duwa ana' gurunna Yèsus, dè'i gaga silaong laingngè wettunna Yèsus polè. 25 Nakkeda ana'-ana' gurun-Na laingngè lao ri Tomas, "Purani idi mitai Puwangngè!" Iyakiya mappèbaliwi Tomas, "Rèkko dè'pa uwitai batè pakuè ri liman-Na, dè'pa utaroi jarikku ri batè pakuèro sibawa dè'pa utaroi limakku ri benrèn-Na, dè' sises-siseng umaèlo mateppe'. " 26 Siminggu ri munrinna engkasi ana'-ana' gurunna Yèsus ri onrongngèro, na engka towi Tomas. Taggoncing maneng tange'è. Iyakiya polèi Yèsus natettong ri tengnga-tengngana, nanakkeda, "Salama' salèwangekko. " 27 Nainappa makkeda Yèsus lao ri Tomas, "Itai limak-Ku sibawa taroni jarimmu kuwaè. Loro'i limammu namutaroi ri benrèk-Ku. Aja'na mubata-bata, iyakiya ateppe'no!" 28 Nakkeda Tomas lao ri Yèsus, "Puwakku sibawa Allataalaku!" 29 Nakkeda Yèsus lao ri alèna, "Mateppe'ko saba' pura-Ka muwita? Masennangngi tau iya mateppe'è, namuni dè' naita-Ka!" 30 Maèga mupa sining anu makalallaing laing iya napogau'è Yèsus ri yolona ana'-ana' gurun-Na, iyakiya dè' nariyoki ri lalenna kitta'èwè. 31 Iyakiya iya manennaè riyokii, kuwammengngi mumateppe makkedaè Yèsus iyanaritu Arung Pappassalama'è, Ana'na Allataala, sibawa nasaba teppe' ri alèna, lolongekko atuwong.

Yohanes 21

1 Purairo nappaitassi alèna Yèsus siseppa ri Tappareng Tibèrias lao ri ana'-ana' gurun-Na. Makkuwaiyè kajajiyanna: 2 Risèuwaè esso, Simon Pètrus, Tomas iya riyobbiè si Dènru, Natanaèl polè ri Kana ri Galilèa, ana'-ana' Zèbèdèus, sibawa duwa ana' gurunna Yèsus laingngè, mattengngang maddeppungeng. 3 Nakkeda Simon Pètrus lao ri laingngè, "Maèloka lao mattikkeng balè. " Nakkeda mennang lao ri Pètrus, "Maèlo tokki maccowè. " Nalaona mennang mallopi. Iyakiya puppu benniwi dè' agaga natikkeng mennang. 4 Mammulanana mompo matanna essoè, tettonni Yèsus ri wiring, iyakiya dè' naissengngi mennang makkedaè iyaro Yèsus. 5 Nakkeda Yèsus lao ri mennang, "Ana'-ana', engkaga balè muwappunnai?" Nappèbali mennang, "Dè'. " 6 Nakkeda Yèsus lao ri mennang, "Appèyangngi jalamu ri seddè ataunna lopiè, lolongekko matu balè. " Nanappèyanni mennang jalaèro, iyakiya dè'na naullèi gettengngi paimeng saba' makkuwamani ègana balè ri lalenna. 7 Nakkeda ana' gurun-Na iya riyamasèiyè ri Yèsus lao ri Pètrus, "Puwangngè iyaro!" Wettunna naèngkalinga Simon Pètrus makkedaè Puwangngè iyaro, napakèni wajunna (saba' dè' nabbaju) nanaluppe ri laleng uwai. 8 Ana'-ana' gurun-Na laingngè maccinrolai lao ri pottanangngè sibawa mallopi, nanagetteng towi jala iya pennoè balè. Dè' namabèla mennang polè ri pottanangngè, kira-kira sèratu metèrè bawang. 9 Wettunna mennang nonno polè ri lopiè, naitani mennang engka api mabbara kuwaro sibawa balè ri yasè'na enrengngè roti. 10 Nakkeda Yèsus lao ri mennang, "Coba tiwii kumaiyè siyagangngarè balè iya nappaè mutikkeng. " 11 Mènrè'ni Simon Pètrus ri lopiè, nanagettengngi jalana lao ri pottanangngè. Iyaro jalaè penno sibawa balè battowa; iya manenna engka sèratu limappulo tellu kajunna. Namuni makkuwaro ègana, dè' nasapè jalana. 12 Nakkeda Yèsus lao ri mennang, "Laono mai tanrè. " Muwi sèddi dè'to gaga ana'-ana' gurun-Na barani makkutana, "Niga Bapa'?" Saba' naissengngi mennang makkedaè Puwangngè. 13 Nainappa Yèsus maddeppèriwi mennang, nalai iyaro rotiè, nanawèrèngngi mennang. Napogau' towi makkuwaro sibawa iyaro balè. 14 Iyanaè mabbèkkatellunna Yèsus mappaitangngi Alèna lao ri ana'-ana' gurun-Na, moto'nana polè ri amatèngngè. 15 Puranana mennang manrè, makkedani Yèsus lao ri Simon Pètrus, "Simon ana' Yona, lebbi muwamasèi-Ka'ga naiya mennangngè mamasèi-Ka?" Nappèbali Pètrus, "Tongeng Puwang, taisseng Puwang uwamasèiki Puwang. " Nakkeda Yèsus lao ri Pètrus, "Piyarai ana'-ana' bimbala'-Ku. " 16 Untu' mabbèkkaduwanna makkutanai Yèsus lao ri Pètrus, "Simon ana' Yona, muwamasèi-Ka'ga?" Nappèbali Pètrus, "Tongeng Puwang, taisseng Puwang uwamasèiki Puwang. " Nakkeda Yèsus lao ri Pètrus, "Piyarai bimbala'-bimbala'-Ku. " 17 Untu' mabbèkkatellunna Yèsus makkutana ri alèna, "Simon ana' Yona, muwamasèi-Ka'ga?" Messèni Pètrus saba' genne'ni wèkkatellu Yèsus makkutana ri alèna. Nappèbali Pètrus, "Puwang, taisseng Puwang sini-sininnaè. Taisseng Puwang uwamasèiki Puwang!" Nakkeda Yèsus lao ri alèna, "Piyarai bimbala'-Ku. 18 Tongeng senna' adak-Kuè: Wettummu kallolo mupa, alèmu muto siyoi babuwamu, sibawa lao kègi-kègi muwèloriyè. Iyakiya rèkko macowano matu, muloro'i limammu, na tau laingngè siyoko sibawa natiwiko ri onrong dè'è mumaèlo lao. " 19 (Nasibawang iyaro ada-adaè nappaitangngi Yèsus pèkkugi Pètrus matè matti untu' pakarajai Allataala. ) Purairo makkedani Yèsus lao ri Pètrus, "Accowèno ri Iyya!" 20 Wettunna giling Pètrus, naitani ri monrinna ana' guru iya riyamasèiyè ri Yèsus. (Alèna ritu tudang ri seddèna Yèsus wettunna manrè sibawa iya makkutanaè ri Alèna, "Puwang, niga maèlo bali'bellariwi Puwang?") 21 Naitana, makkutanani Pètrus ri Yèsus, "Puwang, pèkkugi sibawa iyaè tauwè?" 22 Nappèbali Yèsus, "Akkalarapanna Uwèloriwi monro tuwo narapi polè-Ka, iyaro tenniya issemmu. Iyakiya iko, accowèko ri Iyya!" 23 Natassiyana karèbaè ri yelle'na ana' gurunna Yèsus makkedaè iyaro ana' guruè dè' namatè matti. Padahal dè' napowadai Yèsus makkedaè iyaro ana' guruè dè' namatè matu, sangadinna: "Akkalarapanna Uwèloriwi monro tuwo narapi polè-Ka, iyaro tenniya issemmu. " 24 Ana' guruènnaro mabbèrè asabbiyang passalenna sining kajajiyangngèwè. Alènato ritu pura mokii. Sibawa riissenni makkedaè aga iya naokièro tongengngi. 25 Maèga mupa gau' laing iya napogau'è Yèsus. Akkalarapanna iya manennaro riyokii tassèddi-sèddi, uwasengngi dè' nagenne onrongngè risininna linoè untu' riyattaroi kitta iya maèloè riyokiro.

Riwaya'na Rasul-Rasul-E 1

1 Tèofilus iya makessing atiè. Ri laleng kitta'ku iya mammulangngè pura mèmenni upakatajang iya napogau'è sibawa nappagguruwangngè Yèsus sipongen-Na mappammula napogau' jama-jaman-Na, 2 narapi esso riyakkana mènrè ri surugaè. Riwettu dè'napa naènrè ri surugaè, nasibawang akuwasanna Rohna Allataala mabbèrèi panunju'-panunju' lao ri rasul-rasul-Na iya tappilè. 3 Matènana, patappulo esso ittana biyasai nappaitang alèna sibawa cara manessa senna'è lao ri rasul-rasul-èro makkedaè tonget-tongengngi tuwo. Naitai mennang, nenniya mabbicarai sibawa mennang passalenna pèkkugi Allataala mapparènta selaku Arung. 4 Na wettun-Na maddeppungeng massibawa mennang, nabbèrèyangngi parèntaèwè lao ri mennang, "Aja' musalaiwi Yèrusalèm. Tajengngi kuwaro narapi Ambo'è mabbèrèyangngi aga iya puraè najjanciyangngè, iyanaritu iya puraè Upowadakko riyolo. 5 Saba' Yohanès maccemmèi sibawa uwai, iyakiya siyagangngarè essonapa ricemmèko matu sibawa Rohna Allataala. " 6 Wettunna iyaro rasul-rasul-è maddeppungeng sibawa Yèsus, makkutanani mennang ri Alèna, "Puwang, maèloki'ga Puwang makkekkuwangngè patettongngi paimeng Apparèntanna bangsa Israèliè?" 7 Nappèbali Yèsus, "Alèna Ambo'-Ku pattentui esso sibawa wettunna. Iyaro dè' naparellu muwisseng, saba' iyaro ha'na Ambo'è. 8 Iyakiya lolongekko matu kuwasa, rèkko engkani ri iko Rohna Allataala. Mancajiko matu sabbi-sabbik-Ku ri Yèrusalèm, ri sininna Yudèa, ri Samaria, sibawa lettu ri cappa'na linoè'. " 9 Puranana Yèsus makkeda makkuwaro, riyakkani mènrè ri surugaè ri yolona matanna mennang, naritongko-Na ri ellungngè polè ri pakkitanna mennang. 10 Ri wettu makkitana mupa mennang ri langiè, ri wettu laona Yèsus, tappa engka muna duwa tau mappakèyang maputè tettong ri seddèna mennang. 11 Nakkeda iya duwa tauwèro, "Eh sining tau Galilèaè, magi mutettong bawang kuwatu makkita ri langiè? Yèsus, iya muwitaè tarakka mènrè ri surugaèro ri yolomu, maèloi lisu paimeng sibawa caraèttoro pada-pada muwitaè onna'. " 12 Nainappa lisu iyaro rasul-rasul-è ri Yèrusalèm polè ri Bulu-bulu Zaitun. Onronna iyaro bulu-buluè kira-kira sèddi kilo bèlana polè ri Yèrusalèm. 13 Ri Yèrusalèm laowi mennang ri bola nappèrumaiyè mennang, nainappa mènrè ri bili' yasè'è. Iyaro rasul-rasul-è, iyanaritu Pètrus sibawa Yohanès, Yakobus sibawa Andrèas, Filipus sibawa Tomas, Bartolomèus sibawa Matius, Yakobus ana' Alfèus, Simon Patriot sibawa Yudas ana' Yakobus; 14 iya manennaro tuli massèddi atiwi maddeppungeng untu' massempajang. Massempajangngi mennang silaong sining makkunraiè sibawa Maria indo'na Yèsus kuwaèttopa silessu-silessurenna Yèsus. 15 Risèuwaè esso, wettunna mennang maddeppungeng -- engka kira-kira sèratu duwappulo tau hadèrè' -- tettonni Pètrus untu' mabbicara. Nakkeda, 16 "Saudara-saudara! Aga taroki ri laleng Kitta'è, harusu'i kajajiyang iyaro. Riyolo naolai Daud, purani naboto Rohna Allataala passalenna Yudas, pamimpinna sining tau iya tikkengngèngngi iyaro Yèsus. 17 Yudas iyanaritu sala sèddinna polè ri idi, napura toni ripilè untu' maccowè majjama sibawakki. " ( 18 Iyaè Yudas nalolongengngi tana tampunna polè ri saro bali'bellana iya majaè. Mabuwanni sibawa matè mapuwè' babuwana angkanna massu lise babuwana. 19 Sininna tau monroè ri Yèrusalèm naisseng iyaro gau'è. Iyanaro saba'na ri laleng basana mennang, nasengngi mennang iyaro tanaè Akeldama, bettuwanna 'Tana Dara'. ) 20 "Nasaba ri laleng Kitta Mazmur-è engka taroki makkuwaèwè, 'Leppessanni siya onrong naonroiyè masino-sino; aja' naengka sèddi tau monro ri lalenna. ' Engkato taroki makkuwaè, 'Leppessanni siya tudangenna nala tau laingngè. ' 21 Rimakkuwannanaro, harusu'i engka sèddi tau maccowè ri idi mancaji sabbi makkedaè Puwang Yèsus tuwoni paimeng polè ri amatèngngè. Iyaro tauwè harusu'i polè ri yelle'na sining tau iya tuli sibawangngèkki kègi-kègiki lao maccowèriwi Puwang Yèsus, sipongenna Yohanès mappammula maccemmè lettu ri wettu riyakkana Yèsus mènrè ri surugaè polè ri tengnga-tengngata. " 23 Nasininna tau iya engkaè hadèrè kuwaro nappètangngarenni duwa tau, iyana ritu Yusuf iya riyasengngètto Barsabas (riyaseng towi Yustus), sibawa Matias. 24 Nassempajanna mennang. Makkedai mennang, "Puwang Muwissengngi atinna sininna tauwè. Sempè'ni Yudas polè ri pangka'na selaku rasul sibawa matèni. Jaji jellorenni, niga polè ri iya duwa tauwèwè iya tapilè Puwang untu' riwèrèng jamang sullèi Yudas. " 26 Purairo riloterèini iya duwa asengngèro, na Matias nakenna. Jaji riyakkani mancaji rasul untu' maccowè silaong iya seppulo sèddi rasul laingngè.

Riwaya'na Rasul-Rasul-E 2

1 Wettunna narapi Esso Pèntakostaè, maddeppungenni sininna tau mateppe'è risèddiè onrong. 2 Tappa mèngkalingani oni polè ri langiè pada-pada anginrajaè mangiri. Bola iya naonroiyèro sining tauwè tudang penno manenni sibawa iyaro oniè. 3 Nainappa mitani mennang lila-lila luwa' api massanra kègi-kègi sibawa lèppang ri tungke'-tungke' mennang. 4 Rikuwasai manenni ri Rohna Allataala, sibawa mappammula mabbicara ri laleng maddupa-rupang basa laing. Mabbicarai mennang situru aga nabbèrèyangngè iyaro Roh-è lao ri mennang untu' napowada. 5 Iyaro wettuè maèga tau Yahudi, polè rimaddupa-rupang wanuwa ri sininna linoè, monro ri Yèrusalèm. Iya mennang iyanaritu sining tau iya matinuluè lao ri Allataala. 6 Wettunna naèngkalinga iyaro oniè, maèga senna' tau polè makkatulung. Tassèleng manenni mennang mèngkalingai sining tau mateppe'èro mabbicara ri laleng basana mennang tungke'-tungke'. 7 Nakkedana mennang sibawa hèrang enrengngè takkamennye, "Dè'ga na iyaè sining tau mabbicaraè iya manenna tau Galilèa? 8 Pèkkugi ajajingenna angkanna riyèngkalingai mennang mabbicara ri laleng basana wanuwatta tungke'-tungke'? 9 Idi'è sining tau polè ri Partia, Mèdia, Elam; polè ri Mèsopotamia, Yudèa sibawa Kapadokia; polè ri Pontus sibawa Asia, 10 polè ri Frigia sibawa Pamfilia, polè ri Masèrè' sibawa daèra-daèra Libia seddèna Kirènè; engka ri yelle'ta polè ri Roma, 11 engka tau Yahudi sibawa engkato tau bangsa laing iya muttama'ènna agama Yahudi; engkato polè ri Krèta sibawa Arab. Riyèngkalinga manengngi mennang mabbicara ri laleng basata tungke'-tungke' passalenna gau'-gau' iya makalallaingngè iya napogau'è Allataala!" 12 Nahèranna sibawa takkamennye maneng mennang, makkutana sèddiè lao ri laingngè, "Aga bettuwanna iyaè?" 13 Iyakiya engkato tau mangèllè. Makkedai mennang, "Ah, iyaro sining tauwè mabo'mi bawang!" 14 Nainappa tettong Pètrus silaong seppulo sèddiè rasul laingngè, mabbicara lao ri tau maègaèro. Nakkedana sibawa sadda battowa, "Saudara-saudara sining tau Yahudiè sibawa sininna iya monroè ri Yèrusalèm! Engkalingai madècèd-dècèng. Saba' iyaè gau'è parellui upakatajang lao ri iko. 15 Iyaè sining tauwè dè' namabo' pada-pada muwasengngè; saba' nappai tettè asèra èlèè makkekkuwangngè. 16 Iyakiya iyaè purani nappaissengeng Allataala naolai Nabi Yoèl: 17 Makkedai Allataala, 'Ripaccappurenna linoè Upanurungengngi matu Roh-Ku ri yasè'na sininna tauwè. Ana'-ana'mu worowanè sibawa ana'-ana'mu makkunraiè powadakko matu gau'-gau' iya Upaissengiyèngngi mennang. Sining tau malolomu naitai matu gau'-gau' iya Upaitangngèngngi mennang. Sining tau macowana mannippiwi matu passalenna nippi iya Uwèrèngngèngngi mennang. 18 Lao risining atak-Kuto -- muwi worowanè iyarè'ga makkunrai --, Upanurungengngi matu Roh-Ku ri esso-essoèro. Nappaissengengngi matu mennang gau'-gau' iya Upaissengiyèngngi mennang. 19 Upakangkai matu sining anu makalallaingngè ri yasè' kuwaro ri langiè, sibawa gau'-gau' dè'è padanna ri yawa kuwaè ri linoè; engka matu dara sibawa api, sellung sibawa rumpu. 20 Mapettangngi matu mata essoè, macella'i matu kètengngè pada-pada daraè riwettu dè'napa Essona Puwangngè, Esso iya battowaè sibawa malebbièro polè. 21 Iyaro wettuè, tau iya mangobbiè ri Puwangngè ripassalama'i matu. ' 22 Saudara-saudara tau Israèliè! Engkalingai aga iya upowadaè: Yèsus tau Nazarèt-èro pura riwèrènni jamang ri Allataala untu' saudara. Iyaro manessa senna' risining anu makalallaingngè sibawa gau'-gau' dè'è padanna iya napogau'è Allataala ri tengnga-tengngamu naolai iyaro Yèsus. Iya manennaro alèna saudara misssengngi. 23 Situru èlo-Na muto, napettuiwi Allataala untu' mabbèrèyangngi Yèsus lao ri iko. Na wettunna riyabbèrèyang, muwunoi sibawa leppessangngi sining tau majaè sallii. 24 Iyakiya Allataala patuwoi paimeng polè ri yelle'na sining tau matè. Riyemme'i ri amatèngngè, iyakiya rileppessangngi ri Allataala, saba' dè' nakkullè rikuwasai matteru ri amatèngngè. 25 Passalenna iyaè Yèsus, makkedai Daud, 'Tuli uwitai Puwangngè ri yoloku; Naranrekka, kuwammengngi nadè' naripakalèwa'-lèwa'ka muwi aga. 26 Iyanaro saba'na namarennu atikku, tèmukku powada-adai pappoji-pojiyangngè; sibawa iyaè watakkalèku mattajengngi matu sibawa tennang ri laleng kuburu'è. 27 Saba' dè' Muleppessangngi nyawaku monro ri laleng linona tau matè. Dè' Muleppessangngi iyaro atam-Mu iya matinuluè ancuru' sibawa cappu. 28 Purani Muwappaitang ri alèku laleng mattujuè ri atuwong tongengngè. Talliwe'-liwe'ni rennukku nasaba engka-Ko sibawakka. ' 29 Saudara-saudara, palalona mabbicara terus terang passalenna Daud, ambo'na toriyolotaro. Matèni sibawa rikuburu' toni; iyaro kuburu'na engka mupi ri tengnga-tengngata lettu makkekkuwangngè. 30 Pura majjanciwi Allataala lao ri Daud, sibawa mattanro, makkedaè sala sèddinna polè ri wijanna Daud nakkai matu Allataala mancaji arung. Nasaba naissengngi Daud iyaro janciè, nasaba sèddi towi nabi, 31 naisseng towi aga matu napogau' Allataala. Jaji purani naboto makkedaè Arung Pappassalama'è iya najjanciyangngè Allataala tuwoi matu paimeng polè ri amatèngngè. Makkedai Daud, 'Dè' Naleppessangngi monro ri laleng linona sining tau matè; dè' naancuru' matu watakkalè-Na enrengngè cappu. ' 32 Yèsus iyanaè ripatuwo paimeng polè ri amatèngngè ri Allataala. Idi manengngè pura sabbingngi iyaro gau'è. 33 Riyakkai ri tudangeng matanrè sibawa riwèrèng akuwasang ri Allataala, nainappa natarima Rohna Allataala iya puraè najjanciyang Ambo'è. Naiya muwèngkalingaè sibawa muwitaè makkekkuwangngè iyanaritu Roh iya ripanurungngè lao ri idi. 34 Alèna Daud dè' naènrè ri surugaè, iyakiya makkedai Daud, 'Makkedai Puwangngè lao ri Puwakku: 35 Tudanno ri seddè atauk-Ku, narapi Uwèbbu sining balim-Mu tunru' ri iko!' 36 Iyanaro saba'na sininna tau Israèliè harusu'i naisseng tonget-tongeng makkedaè iyaro Yèsus iya musalliè, Yèsus èttonaro pura napancaji Allataala mancaji Puwang sibawa Arung Pappassalama'è!" 37 Wettunna naèngkalinga iyaro sining tauwè, masè senna'ni atinna mennang. Nainappa mennang makkutana ri Pètrus sibawa rasul-rasul laingngè, "Saudara-saudara, aga harusu' ripogau'?" 38 Nappèbali Pètrus, "Toba'no polè ri dosa-dosamu sibawa sitinajako tungke'-tungke' ricemmè ri laleng asenna Yèsus Kristus, kuwammengngi nariyaddampengeng dosa-dosamu. Namutarimai matu hadiya Rohna Allataala polè ri Allataala. 39 Saba' iyaro najjanciyangngè Allataala iyanaritu untu' iko sibawa wija-wijammu enrengngè sining tau iya engkaè risining onrong mabèlaè -- iyanaritu sininna tau iya naobbiè Allataala Puwatta untu' lao ri Alèna. " 40 Makkuwaniro Pètrus pakatajangngi lao ri mennang. Sibawa maègato ada-ada laingngè pètangngariwi mennang kuwammengngi naleppe polè ri bangsa iya majaèwè iya maèloè rihukkung ri Allataala. 41 Maèga tau mateppe' lao ri iya napowadaè Pètrus, nainappa mennang ricemmè. Na jumellana tau mateppe'è iyaro essoè tattambai sibawa tellussebbu tau. 42 Namatinuluna mennang magguru matteru ri rasul-rasul-è sibawa tuli silaongngi maddeppungeng. Sisamai mennang manrè enrengngè massempajang massibawa. 43 Maèga senna' anu makalallaing iya napogau'è iyaro rasul-rasul-è angkanna sininna tauwè hèrang sibawa mètau. 44 Iyaro sining tau mateppe'è matterui massèddi maneng sibawa aga nappunnai mennang, napakèi mennang massibawa. 45 Barab-baranna sibawa waramparanna, nabalu'i mennang, nainappa nabagè-bagè dowina ri yelle'na maneng mennang situru apparelluwanna tungke'-tungke'. 46 Esso-esso mennang maddeppungeng ri Bolana Puwangngè; enrengngè sisamai manrè sibawa marennu kuwaèttopa pakariyawai alèna ri bolana mennang. 47 Matteru-terui mennang napoji Allataala sibawa ripoji risininna tauwè. Esso-esso pèdè' tattambai jumellana mennang nasaba Puwangngè mpèrèngngi mennang sining tau iya ripassalama'è.

Riwaya'na Rasul-Rasul-E 3

1 Risèuwaè esso, Pètrus sibawa Yohanès laowi ri Bolana Puwangngè ri tettè telluè arawèngngè, iyanaritu wettu untu' massempajang. 2 Kuwaro ri pintu gerbang riyasengngè "Pintu Gello", engka sèddi tau worowanè iya pèso'è sipongenna jaji. Esso-esso iyaro tauwè ritiwi kuwaro untu' mèllau sidekka risining tau iya muttama'è ri Bolana Puwangngè. 3 Wettunna iyaro tauwè naita Pètrus sibawa Yohanès tudat-tudang ri Bolana Puwangngè, naèllauni mennang mpèrèngngi agi-agi ri alèna. 4 Natangngani mennang, nainappa makkeda Pètrus, "Itai!" 5 Nainappa iyaro tauwè pènessaiwi mennang nasibawang ammènasang lolongeng agi-agi polè ri mennang. 6 Iyakiya makkedai Pètrus lao ri tauwèro, "Dè' sises-siseng uwappunnai dowi. Iyakiya aga engka ri alèku, iyaro matu uwèrèkko: Nasibawang akuwasanna Yèsus Kristus tau Nazarèt-èro, joppano!" 7 Nainappa nakkatenning Pètrus lima ataunna iyaro tau pèso'è sibawa natulunna moto. Tappa mawatanni ajèna iyaro tauwè sibawa acingkacinna. 8 Nainappa luppe tettong, sibawa mammulani joppa mallolisu. Nainappa muttama' ri Bolana Puwangngè silaong Pètrus sibawa Yohanès, joppa sibawa luppe'-luppe'to pojiwi Allataala. 9 Sininna tauwè mitai joppa sibawa pojiwi Allataala. 10 Napahanni mennang makkedaè alèna ritu parèllau sidekkaè iya biyasaè tudang ri "Pintu Gelloè" ri Bolana Puwangngè. Hèrang senna'ni mennang sibawa bengnga mitai aga kajajiyang ri alèna. 11 Iyaro tauwè matteruni maccowèriwi Pètrus sibawa Yohanès. Na wettunna mennang sipattellu lettu ri lègo-lègo iya riyasengngè "Lègo-Lègo Salomo", polèni sininna tauwè makkatulung ri mennang nasaba bengngana. 12 Wettunna naita Pètrus iyaro sining tauwè, makkedani lao ri mennang, "Eh sining tau Israèliè, magi muhèrang Saudara-saudara ri gau'èwè? Magi mumakkita matteru lao ri idi? Muwasengngiga Saudara-saudara iyaè tauwè naullèi joppa nasaba engka akuwasang ri idi iyarè'ga nasaba matinuluki ri Allataala? 13 Allataala iya nasompaè Abraham, Ishak, Yakub, Allataalana nènè-nènèta, iyaro Allataalaè purani napakalebbi Atan-Na, iyanaritu Yèsus. Yèsus iyanaro muwabbèrèyang lao ri panguwasaè, sibawa muèwa ri yolona Pilatus, wettunna Pilatus maèlo leppessangngi-Na. 14 Mapaccingngi sibawa makessingngi, iyakiya muèwai sibawa mudessa'-Na kuwammengngi naleppessangekko Pilatus sèddi tau pauno-uno. 15 Muwunoi, padahal Alèna ritu assalenna atuwongngè untu' sininna tauwè. Na Allataala pura patuwoi paimeng polè ri amatèngngè. Alètana pura mitai gau'èro. 16 Purani Saudara-saudara naita sibawa nasabbing aga kajajiyang sibawa tau pèso'èwè. Mawatanni sibawa madisinni paimeng nasaba mateppe'i lao ri Yèsus sibawa akuwasan-Na. Nasaba mateppe'i lao ri Yèsus na iyaè tauwè mancaji madisingngi paimeng ri yolona maneng Saudara-saudara. 17 Saudara-saudara! Uwissenni makkekkuwangngè makkedaè aga iya mupogau'èwè sibawa sining pamimpimmu lao ri Yèsus, iyaro mupogau'i nasaba dè' muwissengngi aga iyaro mupogau'è. 18 Nasaba iyanaro kajajiyatto aga pura nappaddissengeng Allataala riyolopa nariyolo naolai sininna nabin-Na, makkedaè Arung Pappassalama'è iyaro najjanciyangngè harusu'i manrasa-rasa. 19 Rimakkuwannanaro, toba'no polè ri dosa-dosamu sibawa lisuno ri Allataala, kuwammengngi naleddai dosa-dosamu. 20 Polèi matu Puwangngè ri iko, namupèneddingiwi matu atakkareng batèngngè. Na Puwangngè suroi matu Yèsus lao ri iko, nasaba pura ripattentui ri Allataala mancaji Arung Pappassalama'mu. 21 Harusu'i monro ri surugaè narapi Allataala pancaji manengngi baru pada-pada iya napowadaè Allataala naolai nabi-nabin-Na ri wettu riyolo. 22 Engka naengka nakkeda Musa, 'Puwang Allataalamu kiringekko matu sèddi nabi polè ri bangsamu, pada-pada Alèna suroka. Harusu'ko mèngkalinga manengngi iya napowadaè iyaro nabiè lao ri iko. 23 Tau iya dè'è napènessaiwi aga napowada iyaro nabiè, iyaro tauwè ripaddèsu'i matu polè ri umma'na Allataala sibawa ripaccappui. ' 24 Nabi-nabi iya puraè mappalettu biritta polè ri Allataala, mappammulai ri Nabi Samuèl sibawa nabi-nabi laingngè iya marimonriyè polè, iya manenna nabbirittangngi passalenna wettuèwè. 25 Janci-janci polè ri Allataala iya napalettu'è nabi-nabiè iyanaritu untu' iko. Ri laleng assijancingeng iya naèbbuè Allataala sibawa nènè-nènèmu, makkedai Allataala lao ri Abraham makkuwaè, 'Polè ri wijammu maèlo-Ka barakkakiwi sininna bangsaè ri linoè. ' Iyaro assijancingengngè iyanaritu untu' ikoto. 26 Iyanaro saba'na Allataala pilèi Atan-Na, nainappa nasuro lao ri iko lebbi riyolo, kuwammengngi nabarakkakiko. Carana mabbarakkaki iyanaritu naèbbui Saudara-saudara toba' polè ri atuwo-tuwommu majaè. "

Riwaya'na Rasul-Rasul-E 4

1 Wettunna Pètrus sibawa Yohanès mabbicara mupa sibawa sining tauwèro, kapala-kapala imangngè sibawa komandang pengawalna Bolana Allataala enrengngè sining tau Sadukiè laoni ri Pètrus sibawa Yohanès. 2 Macaii mennang nasaba Pètrus sibawa Yohanès makkedai lao risining tauwè makkedaè tuwoi paimeng Yèsus polè ri amatèngngè. Na iyaro pabuttiwi makkedaè tuwoi matu paimeng tau matè. 3 Natikkenni mennang iya duwa rasul-èro nanaputtama'i ri laleng tarungkuè. Nasaba wennini, ritahanni Pètrus sibawa Yohanès kuwaro narapi pappa bajana. 4 Iyakiya sining tau iya mèngkalingaèngngi pappagguruwanna iyaro sining rasul-è, maèga mateppe'. Natattambana jumellana mennang narapi kira-kira limassebbu tau. 5 Pappa bajanana sining tomariyolona Mahkama Agamaè, sining pamimpinna Yahudiè sibawa guru-guru agamaè maddeppungenni ri Yèrusalèm. 6 Sitani mennang sibawa Imang Lompoè Hanas, enrengngè Kayafas, Yohanès, Alèksander, kuwaèttopa sininna iya muttama'è kaluwargana imang lompoèro. 7 Ritiwini Pètrus sibawa Yohanès mangolo ri mennang, nakkutanana mennang, "Pèkkugi caramu pajjappai iyaro tau pèso'è? Nasibawang awatangeng aga iyarè'ga nasibawang akuwasang polè riniga mupogau'i iyaro?" 8 Nappèbali Pètrus iya rikuwasaiyènna ri Rohna Allataala, "Bapa'-bapa' pamimping bangsaè sibawa Bapa'-bapa' anggotana mahkamaè! 9 Riadèlèkiki iya essoè nasaba pogau'ki iya madècèngngè untu' tulungngi sèddiè tau pèso', sibawa nasaba maèloi Bapa'-bapa' missengngi pèkkugi iyaro tauwè ripajjappa. 10 Harusu'i napahang Bapa'-bapa' sibawa harusu' towi napahang sininna bangsa Israèliè makkedaè iyaè tau tettongngè makkekkuwangngèwè sibawa watakkalè madisingngè ri yolona Bapa'-bapa', nasaba awatangeng sibawa akuwasang polè ri Yèsus Kristus tau Nazarèt-èro. Bapa'-bapa' pura sallii iyaro Yèsus, iyakiya Allataala patuwoi paimeng. 11 Yèsus iyanaè naseng aya'èwè ri laleng Kitta'è, 'Batu iya dè'è napakèi sining tukang batuè mancajiwi batu kaminang poko'è. ' 12 Yèsus bawang naola nasalama tauwè. Saba' ri sininna linoè ri yelle'na rupa tauwè dè' sèddi tau laing iya puraè lolongeng akuwasang polè ri Allataala untu' passalama'ki. " 13 Hèranni iyaro anggota-anggotana Sidang Pengadilangngè mitai abaraningenna Pètrus sibawa Yohanès, apalagi naissengngi mennang makkedaè iya duwa rasul-èro iyanaritu tau biyasa iya dè'è gaga sikolana. Namainge'na mennang makkedaè iya duwa rasul-èro iyanaritu sining tau iya maccowèriyèngngi Yèsus. 14 Iyakiya dè'gaga naullè powada mennang, nasaba iyaro tau puraè ripajjappa engkai tettong kuwaro ri yolona mennang silaong Pètrus sibawa Yohanès. 15 Nanasuroni mennang iya duwa rasul-èro massu polè ri onrong sidangngè nainappa mennang barunding. 16 Nakkeda mennang, "Aga harusu' ripogau' lao risining tauwèwè? Sininna tau monroè ri Yèrusalèm naissenni makkedaè gau' makalallaing iya dè'è padanna, napogau'ni mennang sipadduwa. Dè' nariyullè massakkarengngi iyaro. 17 Iyakiya kuwammengngi iyaè gau'è aja' nallebbang pèdè' malowang ri yelle'na sining tauwè, laono mai tancangngi iya duwa makkedaè dè' sises-sisenna nawedding mennang mabbicara lao risèddiè tau sibawa pakèi asenna Yèsus. " 18 Nanaobbini mennang iya duwa rasul-èro muttama' paimeng, sibawa powadangngi makkedaè dè' sises-sisenna nawedding teppui iyarè'ga mappagguru sibawa asenna Yèsus. 19 Iyakiya mappèbaliwi Pètrus sibawa Yohanès, "Alèmuna pikkiri'i aga tongeng ri yolona Allataala: turusiwi parèntana Bapa'-bapa' iyarè'ga turusiwi parèntana Allataala. 20 Saba' dè' naweddikki mappèsau mabbicara passalenna aga iya puraè riita sibawa riyèngkalinga. " 21 Dè'na naullèi lolongeng sèddi alasang iyaro anggota-anggotana sidangngè untu' hukkungngi Pètrus sibawa Yohanès. Jaji nancanni iya duwa rasul-èro, nainappa naleppessang duwa, saba' sininna tauwè pojiwi Allataala nasaba gau'èro. 22 Tau iya ripajjappaè sibawa mappahèranro lebbini patappulo taung umuru'na. 23 Ripaleppe'nana Pètrus sibawa Yohanès, lisuni mennang ri sellao-sellaona sibawa curitai sininna napowadaè kapala-kapala imangngè sibawa sining pamimpinna Yahudiè lao ri mennang. 24 Naèngkalinganana sellao-sellaona iyaro, sibawani mennang massempajang massèddi ati lao ri Allataala. Makkedani mennang, "Puwang, Idi ritu pancajiwi langiè sibawa linoè enrengngè tasi'è sibawa sininna lise'na. 25 Pura-Ko mabbicara sibawa Roh-Mu naolai nènè-nènèta, Daud, iyanaritu atam-Mu; makkeda, 'Magi nasining tauwè, dè' naissengngi Puwangngè, macai; magi na bangsa-bangsaè mèbbui rancana iya dè'è nakkèguna? 26 Sadiya-sadiyani sining arung linoè untu' mammusu, sibawa sining pamimpingngè massèddi mèwai Puwangngè sibawa Arung Pappassalama'è. ' 27 Saba' mèmeng Hèrodès sibawa Pontius Pilatus purani pakangka addeppungeng sibawa sining tau iya dè'è naissengngi Puwangngè sibawa tau Israèliè ri kotaèwè. Siruntu'i mennang untu' mèwai Yèsus Atam-Mu iya mapaccingngèro, iya puraè Muwakka mancaji Arung Pappassalama'è. 28 Massèddiwi mennang untu' pogau'i sini-sininnaè, iya puraè Mupattentu lebbi riyolo makkedaè iyaro kajajiyangngi matu. Na-Mupattentui iyaro ri laleng akuwasang sibawa èlo-Mu. 29 Makkekkuwangngè, Puwang, itani pèkkugi mennang mancakki, sibawa palaloni, ata-atam-Muèwè, patassiyai birittam-Mu sibawa dè' tamètau. 30 Wèrènni pattulum-Mu kuwammengngi naripajjappa tau malasaè sibawa gau'-gau' makalallaingngè enrengngè gau'-gau' dè'è padanna kajajiyangngi naolai akuwasang sibawa awatangeng polè ri asenna Yèsus, Atam-Mu mapaccingngèro. " 31 Pajanana mennang massempajang, mpèwanni onronna mennang maddeppungeng. Rikuwasai manenni ri Rohna Allataala, sibawa mappammula mabbicara sibawa barani senna' passalenna biritta polè ri Allataala. 32 Sininna tau iya mateppe'ènnaro tuwoi massèddi ati sibawa sinyawa. Dè' sèddi tau polè ri mennang mangga'i makkedaè aga nappunnai iyanaritu appunnangeng alèna. Sininna engkaè ri alèna, napakèi mennang massibawa. 33 Nasibawang akuwasang battowaè, iyaro rasul-rasul-è mabbèrèi asabbiyang makkedaè tuwoni Yèsus paimeng. Naribarakkaki senna'na mennang ri Allataala. 34 Nadè' gaga sèddi tau polè ri yelle'na mennang akurangeng agi-agi. Saba' iya mennang mappunnaiyè tana iyarè'ga bola, nabalu'i mennang tanana iyarè'ga bolana; nainappa iyaro dowi ellinna natiwii mennang 35 nanabbèrèyangngi lao ri rasul-rasul-è. Nainappa iyaro dowiè nabbagè-bagèyangngi lao ri tungke' tau iya mapparelluwangngengngi. 36 Makkuwatoniro sibawa Yusuf. Purani nabalu' tana appunnangenna, nainappa iyaro dowi ellinna natiwii nanabbèrèyangngi ri rasul-rasul-è. Iyaè Yusuf sèddiwi wija-wijanna Lèwi polè ri Siprus, riteppu towi ri rasul-rasul-è Barnabas (bettuwanna Passalèwo).

Riwaya'na Rasul-Rasul-E 5

1 Iyakiya engka sèddi tau riyaseng Ananias. Sibawa bainèna iya riyasengngè Safira, nabalu' towi tana appunnangenna. 2 Iyaro dowi ellinna nataroi sibagiyang untu' alèna na laingngè nabbèrèyangngi lao ri rasul-rasul-è. Napogau'i makkuwaèro sibawa naisseng bainèna. 3 Nakkeda Pètrus lao ri alèna, "Ananias, magi muleppessangngi Ibillisi'è makuwasaiwi atimmu, angkanna mabbellèko lao ri Rohna Allataala, namuwammekko-mekkorengngi taroi saisa' dowi ellinna tanaèro? 4 Iyaro tanaè iko punna riwettu dè'napa mubalu'i. Sibawa muwi puranana ribalu', iko topa punna iyaro dowi ellinna. Jaji magi naengka akkattamu ri laleng atimmu untu' pogau'i makkuwaèro? Tenniya tolinoè mubellè iyakiya Allataala!" 5 Naèngkalingana Ananias iyaro ada-adaè, mabuwanni namatè. Sininna tau mèngkalingaèngngi iyaro kajajiyangngè mètauni. 6 Napolèna sining kalloloè dokoi ujuna Ananias, nanatiwii massu untu' nakuburu'. 7 Kira-kira tellujjang ri munrinna muttama'ni bainèna. Dè' naissengngi aga nappa kajajiyang. 8 Nakkeda Pètrus ri alèna, "Cobasai powadakka: Iyaro tana mubalu'è sibawa lakkaimmu, singngègaga iyaè ellinna?" Nappèbali bainèna Ananias, "Tongeng, iyanaritu ellinna. " 9 Nakkeda Pètrus lao ri alèna, "Magi iko sibawa lakkaimmu siyempe'ko untu' bellèi Rohna Puwangngè? Engkalingai! Sining tau kuburu'èngngi lakkaimmu lisuni. Natiwi tokko matu mennang massu. " 10 Iyatoro wettuè namabuwang bainèna Ananias namatè ri yolona Pètrus. Na wettunna iyaro sining kalloloè muttama', napolèini matè. Nanatiwini ujuna massu, nanakuburu'i ri seddèna lakkainna. 11 Nasininna tau mateppe'èro sibawa sining tau laingngè, iya mèngkalingaèngngi kajajiyangngèro, mètauni. 12 Nasaba jama-jamanna rasul-rasul-è, maèga anu makalallaing sibawa mappahèrang kajajiyang ri yelle'na masaraka'è. Massèddi atini sininna tau mateppe'è maddeppungeng ri Lègo-Lègo Salomo ri Bolana Puwangngè. 13 Nadè'gaga tau saliweng barani polè maddeppungeng sibawa sining tau mateppe'èro. Iyakiya iyaro sining tau mateppe'è ripakalebbi senna'i ri masaraka'è. 14 Pèdè' maitta pèdè' tattamba ègana sining tau iya mateppe'è lao ri Puwangngè -- worowanè makkunrai. 15 Mala iyaro wettuè, sining tau iya malasaè ritaroi ri yasè'na onrong atinrongngè iyarè'ga tappèrè, naritiwi ri lalengngè, kuwammengngi nakaminang cèddè'na weddingngi rikenna ri wajo-wajona Pètrus, rèkko laloi Pètrus kuwaro. 16 Mallompèngeng sining tauwè polè ri kota-kotaè seddèna Yèrusalèm. Natiwii mennang sining taunna malasaè sibawa iya nauttamakiyè roh-roh maja. Naripajjappa maneng iyaro tauwè. 17 Angkanna imang lompoè sibawa ana'-ana' gurunna, iyanaritu golongang tau Sadukiè, mammulani tinda', nasaba mangèmpurui mennang. 18 Natikkengngi iyaro rasul-rasul-è, nainappa naputtama' ri tarungkuè. 19 Iyakiya wenninnana, engka sèddi malaèka'na Puwangngè timpa'i tange'na tarungkuè, nainappa natiwi massu rasul-rasul-è. Nakkeda iyaro malaèka'è lao ri rasul-rasul-è, 20 "Laono mutettong ri Bolana Puwangngè sibawa powadangngi sining tauwè passalenna atuwong mabaruè. " 21 Naturusini iyaro rasul-rasul-è pasenna malaèka'èro. Maèlè senna'ni lao ri Bolana Puwangngè nappammula mappagguru kuwaro. Napolèna imang lompoè sibawa ana' gurunna, napakangka sidang mahkama sibawa sining pamimpinna Yahudiè. Nainappa nasuro mennang tauwè lao malai iyaro rasul-rasul-è ri tarungkuè untu' ritiwi mangolo ri mennang. 22 Iyakiya wettunna sining tau risuroèro lettu ri tarungkuè, dè'ni napolèi iyaro rasul-rasul-è kuwaro. Jaji lisuni mennang, nanalaporo'i iyaro gau'è ri mahkamaè. 23 Nakkeda mennang lao ri mahkamaè, "Wettutta lettu ri tarungkuè, ripolèi muwi iyaro tange'na tarungkuè makessing taggoncinna, sibawa pengawal-pengawal-è jaga ri sumpangngè. Iyakiya wettutta timpa'i iyaro tange'è, dè'gaga sèddi rilolongeng ri lalenna. " 24 Wettunna parawira pengawalna Bolana Puwangngè sibawa kapala-kapala imangngè naèngkalinga iyaro laporangngè, bengngani passalenna iyaro rasul-rasul-è sibawa mètauna aga wedding kajajiyang. 25 Napolèna sèddi tau worowanè tiwii birittaèwè, "Engkalingai! Sining tau natahangngè Bapa'-bapa' ri tarungkuèro, makkekkuwangngè napaggurui tau maègaè ri Bolana Puwangngè!" 26 Nalaona parawira pengawalna Bolana Puwangngè silaong pengawal-pengawalna malai iyaro rasul-rasul-è paimeng. Iyakiya dè' napakè awatangeng, saba' mètaui ri tau maègaè; ajakkè iyaro tau maègaè genrungngi matu mennang sibawa batu. 27 Ritiwini muttama' mangolo iyaro rasul-rasul-è ri mahkamaè. Nariparèssana mennang ri imang lompoè. 28 Makkedani, "Purano riyattèyang sibawa masero kuwammengngi aja' muwappagguru passalenna iyaè Tauwè. Iyakiya makkekkuwangngè coba mitai aga mupogau'! Muwappallebbangengngi pappagguruwammuro ri sininna Yèrusalèm, sibawa mala maèloko tenre'ki makkedaè idi ritu nassabari amatènna iyaro Tauwè. " 29 Nappèbali Pètrus sibawa rasul-rasul laingngè, "Harusu'ki turusiwi Allataala, tenniya turusiwi tolinoè. 30 Yèsus iya musalliè, purani ripatuwo paimeng polè ri amatèngngè ri Allataalana nènè-nènèta. 31 Napurani riwèrèng ri Allataala tudangeng sibawa akuwasang iya matanrè selaku Pamimping sibawa Pappassalama'; kuwammengngi nariwèrèng kasempatang bangsa Israèliè untu' toba' polè ri dosa-dosana sibawa riyaddampengeng. 32 Idi'naè sabbi-sabbinna passalenna iya manennaro -- idi kuwaèttopa Rohna Allataala iya nabbèrèyangngè Allataala lao risining tau iya turusiyèngngi parènta-Na. " 33 Wettunna naèngkalinga iyaro sining anggotana Mahkama Agamaèro, macai senna'ni mennang, angkanna siyempe'ni mennang untu' mpunoi iyaro rasul-rasul-è. 34 Iyakiya ri yelle'na sining anggotana mahkamaè engka sèddi tau Farisi riyaseng Gamalièl. Guru agama iya ripakalebbi senna'è ri sininna tauwè. Tettonni nainappa nasuro tauwè tiwii massu iyaro rasul-rasul-è cinampe'. 35 Nainappa makkeda lao ri Mahkama Agamaèro, "Saudara-saudara tau Israèliè! Pikkiri'i madècèd-dècèng passalenna aga maèlo napogau' saudara-saudara lao risining tauwèwè. 36 Saba' riyolo mompoi Tèudas, iya makkaèngngi alèna tau maraja, angkanna kira-kira eppa datu tau maccowèriwi. Iyakiya riyunoi sibawa sininna ana'-ana' gurunna tassiya-siya sibawa iyaro gerakanna lennye' toni. 37 Purairo, wettunna engka abbilangeng, momposi Yudas, tau polè ri Galilèa. Nasaba pangarunna, maègato tau maccowèriwi. Iyakiya riyuno towi, sibawa sininna ana'-ana' gurunna tassiya-siyani. 38 Jaji makkekkuwangngè ri laleng kajajiyangngèwè, pangajaku iyanaritu: aja'na mugaukengngi agi-agi sining tauwèwè, leppessangngi siya mennang. Saba' rèkko pappagguruwanna sibawa gerakanna mennang polèi ri tolinoè, tentuni iyaro pappagguruwangngè sibawa gerakangngè lennye'i matti. 39 Rèkko iyaro polèi ri Allataala, tentu Saudara-saudara dè' mullèi matu caui mennang. Mala naullè matu manessani makkedaè Saudara-saudara mèwai Allataala. " Iyaro pangajana Gamalièl natarimani mahkamaè. 40 Nariyobbina iyaro rasul-rasul-è, nainappa ribabba, sibawa riyattèyannana mappagguru passalenna Yèsus. Purairo nappa rileppessang mennang. 41 Iyaro rasul-rasul-è nasalaini iyaro Mahkama Agamaè sibawa masennang nasaba Allataala pura mangga'i mennang sitinaja lolongeng pappakatuna nasaba Yèsus. 42 Na esso-esso ri Bolana Puwangngè sibawa sining bolana tauwè, matteru-terui mappagguru mennang sibawa mabbirittangngi Karèba Madècèngngè passalenna Yèsus makkedaè Alèna ritu Arung Pappassalama'è iya riyajjanciyangngè.

Riwaya'na Rasul-Rasul-E 6

1 Pèdè' maitta pèdè' tattamba maègai tau maccowèriyèngngi Yèsus. Iyaro wettuè sining tau Yahudi iya maccowèriyèngngi Yèsus iya mabbasa Yunaniè, dè' namasennang lao risining tau Yahudi tulèngngè iya maccowèriyèngngi Yèsus. Makkedai iyaro mabbasa Yunaniè, "Sining makkunraitta iya jandaènna dè' nallolongeng bantuwang ongkoso' esso-esso iya nabbagè-bagèyangngè lao risining tauwè. " 2 Rimakkuwannanaro, iya seppulo duwa rasul-rasul-è napaddeppungengngi sininna tau maccowèè nakkeda lao ri mennang, "Dè' namakessing narèkko mappèsauki mabbirittangngi ada-adanna Allataala, nasaba harusu'ki murusu'i passaleng anrè. 3 Jaji madècèngengngi Saudara-saudara pilèi polè ri yelle'mu pitu tau iya mappunnaiyè aseng makessing sibawa rikuwasai ri Rohna Allataala enrengngè mapanrè, iya weddingngè risuro murusu'i passalengngèwè; 4 saba' maèloki massempajang sibawa mabbirittangngi ada-adanna Allataala bawang. " 5 Nasitujui manenni iyaro tauwè pallolongenna iyaro rasul-rasul-è. Napilèni mennang Stèfanus, sèddiwi tau mateppe' senna' ri Yèsus sibawa rikuwasai ri Rohna Allataala. Ripilè towi: Filipus, Prokhorus, Nikanor, Timon, Parmènas, sibawa Nikolaus polè ri Antiokhia; tenniyai tau Yahudi, iyakiya muttama'ni agama Yahudi. 6 Iya pitu tauwèro nappètangngarenni ri rasul-rasul-è, nainappa iyaro rasul-rasul-è massempajang sibawa mèllaungengngi mennang barakka'na Puwangngè. 7 Makkuwaniro biritta polè ri Allataala pèdè' mallebbangngi sibawa tau maccowèriyèngngi Yèsus ri Yèrusalèm pèdè' tattambato ègana. Namaèga tona imang mateppe' lao ri Yèsus. 8 Ribarakkaki senna'ni Stèfanus ri Allataala, angkanna pakangkani maèga anu makalallaing sibawa gau'-gau' dè'è padanna ri yelle'na masaraka'è. 9 Iyakiya engka tau mèwai; anggota-anggotana mennang bola assompangngè iya riyasengngè Bola Assompanna sining Tau Maradèka'è. Iyaro anggota-anggotana bola assompangngè iyanaritu sining tau Yahudi polè ri Kirènè sibawa Alèksandria. Sibawai mennang sining tau Yahudi polè ri Kilikia sibawa Asia siddeba' sibawa Stèfanus. 10 Iyakiya dè' naullèi mennang bantai aga napowada Stèfanus, nasaba Rohna Allataala pura mpèrèngngi apanrèng untu' mabbicara. 11 Rimakkuwannanaro nawèrènni pasoso siyagangngarè tau untu' makkeda, "Riyèngkalingai iyaro tauwè cella-cellai Musa sibawa Allataala!" 12 Makkuwaniro mennang pakiri-kiriwi sining tauwè sibawa sining pamimping Yahudiè, enrengngè guru-guru agamaè. Nainappa mennang lao tikkengngi Stèfanus, nanatiwii mangolo ri Mahkama Agamaè. 13 Nanapangolo towi mennang sabbi-sabbi iya mabbèrè pappakatajang iya dè'è natongeng passalenna Stèfanus. Nakkeda iyaro sining sabbiè, "Iyaè tauwè tuli nacella-cellai Bolana Puwangngè iya mapaccingngè sibawa cella-cellai sining parèntana Allataala iya napalettu'è Musa. 14 Purani riyèngkalinga napowada, makkedaè Yèsus iyaro polè ri Nazarèt maèloi ruttungngi Bolana Puwangngè, nainappa napinra maneng ade'-ade' iya napaturungngè Musa lao ri idi!" 15 Sininna tau iya hadèrè'è ri lalenna sidang Mahkama Agamaèro mitai Stèfanus. Na iyaro wettuè rupanna Stèfanus paitai pada-pada rupa malaèka'è.

Riwaya'na Rasul-Rasul-E 7

1 Nakkutana imang lompoè lao ri Stèfanus, "Tongegga sininna iya napowadaè iyaro tauwè?" 2 Nappèbali Stèfanus, "Saudara-saudara sibawa Bapa'-bapa'! Coba mèngkalingaka. Riwettu dè'napa nènè-nènèta Abraham nalèttè ri Haran, iyaro wettuè monro mupi ri Mèsopotamia, Allataala iya malebbiè laowi ri alèna 3 sibawa makkeda, 'Salaini wanuwammu sibawa sumpulolomu. Laono ri wanuwa iya maèloè Ujèllorekko. ' 4 Nasalaini Abraham wanuwa Kasdim, nalèttè ri Haran. Matènana ambo'na Abraham, Allataala palèttè'i Abraham ri wanuwaèwè iya naonroiyè Saudara-saudara sibawa Bapa'-bapa' makkekkuwangngè. 5 Iyaro wettuè dè'gaga sibagiyang polè ri wanuwaèwè iya nabbèrèyangngè Allataala lao ri Abraham untu' mancaji appunnangenna Abraham; muwi sijongka dè'to nariwèrèng. Iyakiya majjanciwi Allataala makkedaè maèloi mpèrèngngi Abraham untu' mancaji appunnangenna Abraham sibawa wija-wijanna. Iyaro wettuè dè' nappunnai ana' Abraham. 6 Iyakiya iyanaè napowada Allataala ri Abraham, 'Wija-wijammu monroi matu selaku tau polè-polè ri wanuwanna tau laingngè. Iyaro sining taunna wanuwaè najajai matu mennang sibawa nagaukenna sibawa mabecco eppa datu taung ittana. 7 Iyakiya maèlo-Ka hukkungngi bangsa iya powataèngngi mennang, sibawa passui matu polè ri wanuwaèro nanasompa-Ka matu ri onrongngèwè. ' 8 Puranana makkeda makkuwaro iyaro assijancingengngè nasahkanni Allataala sibawa sunna'. Jajinnana Ishak, ana'na Abraham, nasunna'ni Abraham ri wettunna umuru' aruwa essona. Nainappa Ishak nasunna' toni ana'na, iyanaritu Yakub. Na Yakub nasunna' toni iya seppulo duwa ana'na, iyanaritu iya mancajiyè toriyolona bangsa Yahudiè. 9 Iyaro toriyolota mangèmpurui lao ri Yusuf, angkanna nabalu'ni mennang mancaji ata ri Masèrè'. Iyakiya Allataala sibawangngi, 10 enrengngè paleppe'i polè ri sininna asussanna. Allataala mpèrèngngi ati sibawa apanrèng wettunna mennang mangolo ri Firaun, arung Masèrè', angkanna Firaun pancajiwi gubernurna wanuwa Masèrè' nenniya panguwasana saorajana Firaun. 11 Nainappa kajajiyanni sèuwa akkadèreng iya marajaè ri sininna wanuwa Masèrè' sibawa Kanaan angkanna manrasa-rasa senna'ni tauwè. Dè'na naullèi lolongeng anrè nènè-nènèta. 12 Na wettunna naèngkalinga Yakub engka gandong ri Masèrè' nasuroni ana'-ana'na, nènè-nènèta, lao kuwaro untu' pammulanna. 13 Mabbèkkaduwannana mennang lao, nappaddissengenni alèna Yusuf lao ri silessu-silessurennaro makkedaè alèna ritu Yusuf. Nappai naisseng wettuèro arung Masèrè' passalenna kaluwargana Yusuf. 14 Nainappa Yusuf kiring karèba lao ri ambo'na, iyanaritu Yakub, untu' mèllauwi silaong sining kaluwargana lèttè ri Masèrè' -- iya manenna engka pituppulo lima tau. 15 Nalèttè'na Yakub ri Masèrè', nakkuwanaro matè sibawa nènè-nènèta. 16 Narimunri ritiwii paimeng ujuna ri Sikhèm narikuburu ri kuburu' iya naelliyè Abraham sibawa sijumella dowi polè ri suku bangsa Hèmor-è ri Sikhèm. 17 Macawè'nana wettunna Allataala narupai jancin-Na ri Abraham, bangsata ri Masèrè' pèdè' tattambani ègana. 18 Angkanna sèddi arung laing iya dè'è naissengngi Yusuf, mapparènta ri Masèrè'. 19 Iyaro arungngè nacculè-culèiwi bangsata sibawa majapperuna lao ri nènè-nènèta. Napassai mennang mabbiyangngi ana'-ana'lolona iya nappa jajiyè kuwammengngi namatè. 20 Ri wettuènnaro najaji Musa; sèddiwi ana'lolo iya magello senna'è. Tellumpuleng ittana ripiyara ri bolana ambo'na, 21 napuranana riyabbèyang, riyalani ri ana' makkunrainna Firaun, nanapiyarai selaku ana' ri alèna. 22 Sining pangissengeng bangsa Masèrè'è ripagguruwanni namancajina tau makuwasa senna' ri laleng ada-adanna sibawa pangkaukenna. 23 Wettunna Musa makkèumuru patappulo taung, momponi ri laleng atinna macinna lao mitai keadaanna bangsana tau Israèliè. 24 Nanaitana sèddi tau polè ri mennang ricalla risèddiè tau Masèrè'; nanaèwaini tau ricallaèro sibawa naunoi iyaro tau Masèrè'è. 25 Nasengngi Musa najeppuiwi matu bangsana makkedaè Allataala pakèi untu' paleppe'i mennang. Iyakiya dè' najeppuiwi mennang. 26 Pappa bajana naitasi duwa tau Israèliè mallaga, nakkuragana pasidamèi mennang. Nakkedana, 'Iko ritu massilessurekko. Magi muwallaga?' 27 Iyakiya tau iya munruèngngi sellaonaro nasorongngi Musa lao ri wiring nainappa makkeda, 'Niga makkako mancaji pamimping sibawa hakitta? 28 Maèlokoga mpuno tokka pada-pada muwunona iyaro tau Masèrè'è ri wenni?' 29 Wettunna naèngkalinga Musa aga napowada iyaro tauwè, larini Musa polè ri Masèrè' nanaonro ri wanuwa Midian. Kuwaniro lolongeng duwa tau ana'. 30 Patappulo taung ri munrinna engka sèddi malaèka' lao ri Musa ri padang kessi seddèna Bulu Sinai. Iyaro Malaèka'è polèi ri laleng apiè ri alekale malluwa'è. 31 Hèranni Musa mitai iyaro gau'è, angkanna laoni macawè'-macawè'è untu' missengngi aga iyaro. Nanaèngkalingana saddanna Puwangngè makkeda, 32 'Iyya'naè Allataalana nènè-nènèmu; Iyya'na Allataalana Abraham, Ishak, sibawa Yakub. ' Natènrèna Musa nataro tau angkanna dè'na nabaranina makkita lao ri alekale'èro. 33 Nainappa makkedasi Puwangngè, 'Leppessangngi sandala iya mupakèro, saba' iyaro tana muwonroiyè tettong, iyanaritu tana mapaccing. 34 Purani Uwita sibawa upènessai paina anrasa-rasanna umma'-Ku ri Masèrè'. Purani Uwèngkalinga addarèkènna mennang naunonnona untu' paleppe'i mennang. Makkekkuwangngè laono mai! Maèlo-Ka suroko lisu ri Masèrè'. ' 35 Musa iyanaè tenriyangakui ri bangsa Israèliè enrengngè risampèyang sibawa ada-adaèwè, 'Niga pura makkako mancaji pamimping sibawa hakitta?' Iyakiya mala alèna ritu tau nasuro Allataala untu' mancaji pamimping sibawa pappassalama', naolai bantuwanna malaèka'è iya laowè ri alèna ri alekale malluwa'èro. 36 Musa iyanaro pimpingngi bangsa Israèliè massu polè ri Masèrè' sibawa pogau' maèga anu makalallaing sibawa gau'-gau' dè'è padanna ri Masèrè', ri Tasi' Cella'è sibawa ri padang kessi'è patappulo taung ittana. 37 Alènato Musa iya makkedaè lao ri bangsa Israèliè, 'Allataala maèlo mpèrèkko sèddi nabi iya napilè polè ri yelle'mu, pada-pada Alèna napilèka. ' 38 Musa ritu iya ri tengnga-tengngana bangsa Israèliè ri padang kessi'è, mancaji pappasisumpung untu' malaèka' iya mabbicaraè ri alèna ri Bulu Sinai sibawa nènè-nènèta. Alèna ritu tarimai polè ri Allataala karèba iya tuwoè untu' ripalettu' ri idi. 39 Namuni makkuwaro, nènè-nènèta dè' namaèlo matinulu lao ri alèna. Risampèyangngi ri mennang sibawa macinnana lisu ri Masèrè'. 40 Makkedai mennang ri Harun, 'Ebburekki dèwata-dèwata, kuwammengngi iyaro dèwata-dèwataè pimpikki. Saba' dè'na narisseng aga kajajiyang sibawa Musa iya tiwièkki massu polè ri Masèrè'!' 41 Nainappa iyaro wettuè mèbbuni mennang dato'-dato' ana' saping, nainappa makkasuwiyangeng akkarobangeng lao ri dato'-dato'èro sibawa pakangka pèsta untu' pakarajai èbbu limanna mennang. 42 Narisalaina mennang ri Allataala sibawa rileppessang massompa wèttowing ri langiè. Iyaro siturui aga taroki ri laleng kitta nabi-nabiè. Makkuwaè, 'Eh sining tau Israèliè! Tenniya untu' alè-Ku muwaggèrè sibawa makkarobangeng olokolo patappulo taung ittana ri padang kessi'è. 43 Kèmana barahala Molokh ritu mutiwi-tiwi silaong dato'-dato'na wèttowing barahalamu, iyanaritu Rèfan; iyanaro dato'-dato' muwèbbu untu' risompa. Rimakkuwannanaro maèlo-Ka mabbèyakko lettu mabèla ri liweng ri wanuwa Babèl. ' 44 Kèma naonroiyè Allataala lao ri rupa tauwè rilolongengngi ri nènè-nènèta ri padang kessi'è. Iyaro kèmaè riyèbbui nasaba parèntana Allataala lao ri Musa sibawa situru conto nappaitangngè Allataala lao ri Musa. 45 Nainappa iyaro kèmaè natiwii nènè-nènèta wettunna mennang sibawa Yosua lao sittaiwi wanuwattaè polè ri akuwasanna bangsa-bangsa iya napaddèsu'è Allataala ri yolona mennang. Iyaro kèmaè engkai kuwaro lettu wettunna Daud. 46 Napèsennangiwi Daud atinna Allataala sibawa naèllauwi ri Alèna kuwammengngi naripalalo mèbbu sèddi bola untu' Allataala iya nasompaè Yakub. 47 Iyakiya Salomo ritu patettong bola untu' Allataala. 48 Namuni Allataala Pommatanrè dè' naonro ri laleng bola iya naèbbuè tolinoè; saba' ri laleng kitta'na nabiè tarokii makkuwaè, 49 'Langiè iyanaritu kadèra arajak-Ku, na linoè lapikajè-Ku. Bola aga maèlo mupatettongek-Ka? Kègani onrok-Ku untu' mappèsau? 50 Tenniyaga Iyya pancajiwi sininna sèuwa-sèuwaè?' makkuwaniro adanna Allataala. 51 Tenniya culè-culè tedde' atinna Saudara-saudara sibawa watanna matinulu ri Allataala! Mataru-taru senna' daucculimmu lao ri ada-adanna Allataala! Pada tokko sibawa nènè-nènèna; tuli mèwai Rohna Allataala! 52 Engkaga nabi dè' nacallai nènè-nènèmu? Naunoi mennang sining surona Allataala iya engkaènna riyolo mappallebbangengngi makkedaè Atanna Allataala iya tongengngèro maèloi polè. Na makkekkuwangngè mubali'bellariwi sibawa mpunoi iyaro Atanna Allataala. 53 Purani napalettu sining malaèka'è sining parèntana Allataala lao ri iko, iyakiya dè' muturusiwi!" 54 Naèngkalingana iyaro anggota-anggota Mahkama Agamaè sininna napowadaè Stèfanus, mapeddini atinna mennang sibawa macai senna'na lao ri alèna. 55 Iyakiya Stèfanus iya rikuwasaiyè ri Rohna Allataala, makkitai ri langiè. Naitani alebbirenna Allataala sibawa Yèsus tettong ri onronna makuwasaè ri seddè ataunna Allataala. 56 Nakkeda Stèfanus, "Itai, uwitai surugaè tattimpa' sibawa Ana'na Tolinoè tettong ri seddè ataunna Allataala!" 57 Natongkoni daucculinna mennang iyaro anggota-anggotana mahkamaè nagora-gorato, nainappa massamang luruiwi Stèfanus. 58 Nassarènrèngenni massu ri saliweng kota nainappa nagenrung batu. Sining tau iya sabbingngèngngi iyaro kajajiyangngè nappaddettangenni pakèyanna mennang risèddiè kallolo riyasengngè Saulus. 59 Wettunna mennang nagenrung Stèfanus, mangobbini Stèfanus, "Puwang Yèsus tarimai rohku!" 60 Nakkaluttuna sibawa gora loppo, "Puwang, aja' naripaèssangi iyaè dosaè ri yasè'na mennang!" Purana makkeda makkuwaro, matèni.

Riwaya'na Rasul-Rasul-E 8

1 Namasennang tona Saulus ri abbunowangngèro. Iyatoro essoè nappammula rilellung jema'è ri Yèrusalèm, angkanna sininna tau mateppe'è, sangadinna rasul-rasul-è, tassiya-siyani lao ri sininna daèra Yudèa sibawa Samaria. 2 Sining tau iya mètauè ri Allataala natampunni Stèfanus enrengngè nateringinna sibawa masè' senna'. 3 Iyakiya Saulus matterui makkuraga mancuru'i jema'è. Laowi ri tungke'-tungke' bola nanassarènrèngengngi massu sining tau mateppe'è, nainappa naputtama' mennang ri tarungkuè. 4 Sining tau mateppe'è iya tassiya-siyaènnaro nappallebbangenni Karèba Madècèng polè ri Allataala lao kègi-kègi. 5 Laoni Filipus ri kota Samaria sibawa mabbirittangngi lao risining tauwè kuwaro passalenna Arung Pappassalama'è iya najjanciyangngè Allataala. 6 Wettunna sining tauwè naèngkalinga Filipus mabbicara sibawa naitana mennang sining anu makalallaing iya napogau'è, maèga polè ri mennang pènessaiwi aga napowada Filipus. 7 Saba' massuni roh-roh majaè polè ri maèga tau iya nauttamakiyè sètang. Sining tau pèso'è sibawa kèppangngè maèga napajjappa. 8 Nasining tauwè ri kota Samaria marennu senna'ni. 9 Ri kotaèro engka sèddi tau riyaseng Simon, siyagangngarè'ni ittana mèbbui sining tau Samariaè riparemma sibawa pangissengeng sèhèrè'na. Makkedai lao risining tauwè makkedaè dè' tau padanna. 10 Nasininna tauwè ri kotaèro polè ri sininna masaraka'è napènessai senna'ni. Makkedai mennang, "Iyaè tauwè iyanaritu awatangeng Allataala iya kalabbaè selaku 'Awatangeng Battowa'. " 11 Maitta senna'ni paremma'i sining tauwè sibawa awatangeng sèhèrè'na, angkanna napènessai senna'i. 12 Iyakiya Filipus mabbirittangngi lao ri mennang passalenna Karèba Madècèng pèkkugi Allataala patettongngi matu Apparèntan-Na sibawa passalenna Yèsus Kristus, Arung Pappassalama'èro. Namateppe'na mennang lao ri karèba napalettu'è Filipus, nainappa ricemmè mennang muwi worowanè iyarè'ga makkunrai. 13 Mateppe' toni Simon. Napurana ricemmè, matteruni maccowèriwi Filipus. Sining anu makalallaing iya kajajiyangngè pahèrangngi Simon. 14 Naèngkalingani rasul-rasul-è ri Yèrusalèm makkedaè sining tau Samariaè natarimani ada-adanna Allataala. Rimakkuwannanaro nasuroni mennang Pètrus sibawa Yohanès lao kuwaro. 15 Wettunna Pètrus sibawa Yohanès lettu, massempajanni mennang untu' iyaro sining tau Samariaè kuwammengngi nalolongeng mennang Rohna Allataala, 16 saba' dè'pa napolè Rohna Allataala kuwasaiwi muwi sèddi tau polè ri mennang, nappai mennang ricemmè ri laleng asenna Yèsus Kristus bawang. 17 Nainappa Pètrus sibawa Yohanès palènne'i limanna ri yasè'na iyaro sining tau Samariaè; nanatarimani Rohna Allataala. 18 Naitani Simon makkedaè nasaba limanna rasul-rasul-è ripalènne'i ri yasè'na sining tauwèro, nanabbèrèyangngi Rohna Allataala lao risining tauwèro. Rimakkuwannanaro tiwini Simon dowi lao ri Pètrus sibawa Yohanès, 19 nainappa makkeda, "Wèrèng tokka iyaro akuwasangngè kuwammengngi narèkko upalènne'i limakku ri nigi-nigi, iyaro tauwè natarimai Rohna Allataala. " 20 Iyakiya mappèbaliwi Pètrus, "Cilakako sibawa dowimu! Muwasengngiga pabbèrèna Allataala weddingngi riyelli sibawa dowi? 21 Dè' muwappunnai ha' untu' maccowè ri laleng jama-jamatta, nasaba dè' natongeng atimmu lao ri Allataala. 22 Rimakkuwannanaro buwanni akkattamu iya majaè, sibawa èllauni ri Puwangngè kuwammengngi naddampengengngi pikkirammu iya majaè! 23 Uwissengngi pennoko sibawa angèmpurung enrengngè ripowatako ri jaè. " 24 Nakkeda Simon lao ri Pètrus sibawa Yohanès, "Tulukka muwèllauwi ri Puwangngè kuwammengngi nadè' sèddi polè ri mupowadaèro saudara-saudara kajajiyang ri iyya. " 25 Puranana mennang mabbèrè asabbiyang sibawa mabbirittangngi ada-adanna Puwangngè, lisuni Pètrus sibawa Yohanès ri Yèrusalèm. Na ri lalengngè nabbirittanni mennang iyaro Karèba Madècèngngè ri kampong-kampongngè ri Samaria. 26 Engka sèddi malaèka'na Puwangngè makkeda lao ri Filipus, "Ayo joppano! Lao ri yattang ri laleng iya pasisumpungngèngngi Yèrusalèm sibawa Gaza!" Iyaro lalengngè masino-sino. 27 Najoppana Filipus. Iyaro wettuè engka sèddi pegawè saorajana Etiopia iya engkaè ri laleng allalengengngè lisu ri wanuwanna. Iyaro tauwè sèddiwi pegawè tanrè iya tanggung jawa'èngngi sininna asugirenna Kandakè, arung makkunrainna wanuwa Etiopia. Iyaro tauwè laowi ri Yèrusalèm untu' massompa ri Allataala na makkekkuwangngè lisuni sibawa karètana. Ri wettu tudanna ri karètanaro nabacai Kitta'na Nabi Yèsaya. 29 Nakkeda Rohna Allataala lao ri Filipus, "Laono muwaddeppèriwi iyaro karètaè. " 30 Nalaona Filipus maddeppèriwi iyaro karètaè, nanaèngkalingai iyaro tauwè bacai Kitta Yèsaya. Nakkutanana Filipus ri alèna, "Tapahagga Puwang iya tabacaèro?" 31 Nappèbali iyaro tauwè, "Pèkkugiwi upahang, rèkko dè'gaga pakatajangekka?" Nainappa naèra Filipus mènrè ri karètaè sibawa sisama tudang. 32 Iyanaè aya'-aya' iya nabacaèro, "Pada-padai bimbala' iya rirènrèngngè untu' rigèrè, pada-pada ana' bimbala' iya dè'è nabbèmbè rèkko rigoncingngi bulunna, makkuwaniro dè' nakkedada muwi silappa. 33 Ripakatunai sibawa rigaukengngi dè' naadèlè'. Rireddu'i nyawa-Na polè ri yasè'na linoè angkanna muwi sèddi tau dè'to gaga mullèi curitai passalenna wija-wijan-Na. " 34 Iyaro pegawè tanrè polè ri Etiopia makkedai lao ri Filipus, "Coba paissengika, niga naseng iyaè nabiè? Alènaga iyarè'ga tau laingngè?" 35 Nappammulana Filipus mabbicara; napakèi iyaro aya'-aya'è selaku pammulang untu' mabbirittangngi Karèba Madècèngngè passalenna Yèsus lao ri pegawè tanrèro. 36 Ri tengnga laleng, lettu'ni risèuwaè onrong iya engkaè uwaina. Nakkeda iyaro pegawè, "Itai iyaro engka uwai! Agapi kurang untu' ricemmè?" 37 Nakkeda Filipus, "Rèkko mateppe'ki Puwang sissukku atitta, weddikki ricemmè Puwang. " Nakkeda iyaro pegawè tanrè polè ri Etiopia, "Mateppe'ka Yèsus Kristus iyanaritu Ana'na Allataala. " 38 Nainappa nasuro lèppang karètana; nasipadduwa mennang, Filipus sibawa pegawèro nonno ri uwai naricemmè ri Filipus. 39 Wettunna mennang massu polè ri uwai, riyalani Filipus ri Rohna Allataala polè kuwaro. Iyaro pegawè tanrè polè ri Etiopia dè'na naitai. Namasennanna iyaro pegawè tanrè patterui joppana. 40 Tenrisenna-senna engkani Filipus ri Asdod. Na wettunna napatteru joppana, nappallebbangengngi Karèba Madècèngngè passalenna Yèsus ri sininna kotaè angkanna lettu ri Kaisarèa.

Riwaya'na Rasul-Rasul-E 9

1 Iyaro wettuè matteru-terui Saulus macinna mancangngi sibawa mpunoi sining tau maccowèriyèngngi Puwang Yèsus. Laoni ri imang lompoè, 2 naèllau sure' kuwasa untu' lao risining pamimpinna sining bola assompanna tau Yahudiè ri Damsyik, kuwammengngi rèkko nalolongengngi kuwaro sining tau iya mateppe'è ri Yèsus, weddingngi natikkeng mennang sibawa natiwi ri Yèrusalèm. 3 Wettunna mattuju ri Damsyik, macawè'nana ri kotaèro, tappa engka sèuwa cahaya polè ri langiè mattappa mattulilingiwi Saulus. 4 Mabuwanni ri tanaè nainappa mèngkalinga sèuwa sadda makkeda ri alèna, "Saulus, Saulus! Aga saba'na mucalla-Ka?" 5 Nakkutana Saulus, "Niga Iko, Puwang?" Nappèbali iyaro saddaè, "Iyya'na Yèsus, iya mucallaè. 6 Iyakiya makkekkuwangngè oto'no namumattama ri kotaè. Kuwapiro matu ripowadakko aga harusu' mupogau'. " 7 Tassèlenni sining tau maccowèè silaongengngi Saulus, angkanna dè'na naullèi massadda; nasaba naèngkalingai mennang iyaro saddaè iyakiya dè'gaga sèddi tau naita. 8 Natettonna Saulus sibawa timpa'i matanna, iyakiya dè'na aga-agana naullè mita matanna. Jaji riyakkatenninni limanna ri mennang narirènrèng muttama' ri Damsyik. 9 Tellungngesso ittana dè' naullèi makkita sibawa dè' sises-siseng tona nanrè iyarè'ga naènung wettuèro. 10 Ri Damsyik engka sèddi tau maccowèriwi Puwang Yèsus asenna Ananias. Ri laleng sèuwaè pakkitang, mabbicarai Puwangngè ri alèna. Makkedai Puwangngè, "Ananias!" Nappèbali Ananias, "Iyyè, Puwang. " 11 Nakkeda Puwangngè, "Joppano makkekkuwangngè. Laono ri bolana Yudas ri Laleng Lempuè. Akkutanangngi kuwaro tau riyasengngè Saulus iya assalennaè polè ri kota Tarsus. Iyaro tauwè mattengngangngi massempajang, 12 na ri laleng sèuwaè pakkitang naitai sèddi tau worowanè, riyaseng Ananias, lao ri alèna sibawa palènne'i limanna ri yasè'na kuwammengngi naullèi makkita paimeng. " 13 Nappèbali Ananias, "Puwang, maègani tau pura uwèngkalinga curitai passalenna iyaè tauwè, lebbi-lebbipi passalenna sining paccallang iya napogau'è lao ri umma'-Mu ri Yèrusalèm. 14 Na makkekkuwangngè engkai kuwaè sibawa pappalalo polè ri kapala-kapala imangngè untu' tikkengngi sining tau mateppe'è ri Iko. " 15 Iyakiya makkedai Puwangngè lao ri Ananias, "Lao bawanno! Saba' purani Upilè untu' tumani-Ka, kuwammengngi nabbirittangngi passalekku lao risining arungngè enrengngè laoto ri umma' Israèliè. 16 Na alè-Ku matu majjellokengngi ri alèna sininna anrasa-rasang iya harusu'è napèneddingi nasaba Iyya. " 17 Nalaona Ananias ri bolaèro sibawa palènne'i limanna ri yasè'na Saulus. Nakkeda Ananias, "Saudara Saulus, Puwang Yèsus iya muwitaè ri tengnga laleng wettunna saudara lao kumaiyè, Alèna ritu suroka polè kuwammengngi weddingngi Saudara makkita paimeng sibawa rikuwasai ri Rohna Allataala. " 18 Iyatoro wettuè engka pada-pada sessi balè leppe' polè ri matanna Saulus naweddinni makkita paimeng. Naoto'na nainappa ricemmè. 19 Napuranana manrè, mawatanni paimeng. Monroni Saulus ri Damsyik sibawa sining tau maccowèriyèngngi Yèsus siyagangngarè esso ittana. 20 Matteruni lao ri bola assompangngè sibawa mappammula mabbirittangngi makkedaè Yèsus ritu Ana'na Allataala. 21 Hèrang manenni tauwè mèngkalingai Saulus. Makkedani mennang, "Tenniyaga iyaè pura mpunoi sininna tauwè ri Yèrusalèm iya mateppe'è ri Yèsus? Laowi kumaiyè untu' tikkengngi sibawa tiwii mennang lao risining kapala imangngè!" 22 Iyakiya pèdè' masse'i pangarunna. Butti-butti iya napassuè passalenna Yèsus makkumani nattamakinna akkalengngè makkedaè Yèsus ritu Arung Pappassalama'è, angkanna sining tau Yahudiè iya monroè ri Damsyik dè'na naullèni mabbanta. 23 Labe'nana siyagangngarè wettu ittana massèddini sining tau Yahudiè untu' mpunoi Saulus. 24 Iyakiya naissengngi rancanana mennang. Esso wenniwi mennang mattajeng ri pintu gerbanna kotaè untu' mpunoi. 25 Iyakiya risèuwaè wenni, ana'-ana' gurunna Saulus malai Saulus, nainappa napanonno ri laleng sèddiè baka lalo ri tèmbo'na kotaè. 26 Laoni Saulus ri Yèrusalèm, nakkuwanaro makkuraga massèddi sibawa sining tau maccowèriyèngngi Yèsus. Iyakiya mètaui mennang ri Saulus, saba' dè' mennang namateppe' makkedaè tonget-tongenni mancaji maccowèriwi Yèsus. 27 Nainappa laoni Barnabas ri Saulus, nainappa natiwi ri rasul-rasul-è. Nacuritani Barnabas lao ri mennang passalenna pèkkugi Saulus mitai Puwangngè ri tengnga laleng sibawa pèkkugi Puwangngè mabbicara lao ri alèna. Nappaissengeng towi Barnabas passalenna pèkkugi baraninna Saulus mappagguru ri Damsyik sibawa asenna Yèsus. 28 Rimakkuwannanaro monroni Saulus sibawa mennang, sibawa barani makkatobba ri sininna Yèrusalèm sibawa asenna Puwangngè. 29 Mabbicarai sibawa maddebba towi sibawa sining tau Yahudiè iya mabbasa Yunaniè, iyakiya makkuragai mennang untu' mpunoi. 30 Wettunna sining tau mateppe' laingngè naisseng gau'èro, natiwini mennang Saulus ri Kaisarèa, nainappa nakiring lao ri Tarsus. 31 Na jema'è ri sininna Yudèa, Galilèa, sibawa Samaria mancaji tennanni. Nasibawang tau lao ri Puwangngè sibawa ribantu ri Rohna Allataala iyaro jema-jema'è tattamba mawatanni sibawa maèga. 32 Laoni Pètrus kègi-kègi mitai jema-jema'è. Risèuwaè esso laoni mitai umma'na PUWANGNGE iya monroè ri Lida. 33 Siruntu'ni kuwaro sèddi tau worowanè iya riyasengngè Enèas, iya pèso'è sibawa dè'na naoto'-oto'na polè ri onrong atinronna aruwa taung ittana. 34 Nakkeda Pètrus lao ri Enèas, "Enèas, Yèsus Kristus pajjappako. Oto'no namupaccingiwi onrong atinrommu. " Iyatoro wettuè naoto' Enèas. 35 Sininna pabbanuwaè ri Lida sibawa Saron naitai Enèas, namateppe' manenna mennang lao ri Puwangngè. 36 Ri Yopè engka sèddi tau makkunrai riyaseng Tabita. Sèddiwi tau mateppe' ri Yèsus. (Asenna ri laleng basa Yunani iyanaritu Dorkas, bettuwanna jonga. ) Tuli napogau'i gau'-gau' makessingngè sibawa natulungngi sining tau kasiyasiè. 37 Iyaro wettuè malasai namatè. Puranana ricemmè ujuna, ripalènne'ni ri bili'na ri yasè. 38 Yopè dè' namabèla polè ri Lida. Jaji wettunna sining tau maccowèriyèngngi Yèsus ri Yopè naèngkalinga Pètrus engka ri Lida, suroni mennang duwa tau lao ri Pètrus sibawa pasengngèwè, "Apperi-perino lao mai. " 39 Natteruna moto Pètrus naccowèriwi mennang. Lettu'nana kuwaro, ritiwini mènrè ri bili ri yasè. Sininna jandaè kuwaro katulungngi Pètrus naterito sibawa mappaitangngi sining waju sibawa sining jumba iya rijairengngèngngi ri Dorkas wettunna tuwo mupa. 40 Nasuroni Pètrus massu maneng mennang, nainappa makkaluttu massempajang. Purairo mangobbini ri ujuna Dorkas nakkeda, "Tabita, oto'no!" Natimpa'ni matanna Dorkas, na wettunna naita Pètrus, tudanni. 41 Nainappa Pètrus makkatenningngi limanna sibawa natulunna tettong. Nainappa naobbi Pètrus sining tau mateppe'è kuwaro silaong sining iyaro jandaè, nainappa nabbèrèyang Dorkas iya tuwoènnaro lao ri mennang. 42 Karèba passalenna kajajiyangngèro mallebbanni ri sininna Yopè, angkanna maèga tau mateppe' lao ri Yèsus selaku Arung Pappassalama'na mennang. 43 Monroni Pètrus kuwaro siyagangngarè essosi ri bolana sèddiè pappecco bingkulang iya riyasengngè Simon.

Riwaya'na Rasul-Rasul-E 10

1 Ri Kaisarèa engka sèddi worowanè riyaseng Kornèlius. Sèddiwi kapitèng "Pasukang Italia". 2 Sèddiwi tau mètau ri Allataala sibawa sininna kaluwargana massompai ri Allataala. Malèwe'i natulung sining tau Yahudiè iya kasiyasiè, sibawa tuli massempajangngi lao ri Allataala. 3 Risèuwaè esso, kira-kira tettè tellu arawèngngè naitani sibawa manessa ri laleng sèuwaè pakkitang, sèddi malaèka'na Allataala polè sibawa mobbii, "Kornèlius!" 4 Naitani Kornèlius iyaro malaèka'è sibawa mètauna nainappa makkeda, "Engka aga Puwang?" Nappèbali iyaro malaèka'è, "Sempajammu sibawa asèmpoatimmu natarimani Allataala sibawa naèngngeranna Allataala. 5 Suroni tauwè makkekkuwangngè lao ri Yopè mobbii Simon iya aseng sukkuna iyana ritu Simon Pètrus. 6 Maddibolai ri bolana sèddiè pappecco bingkulang riyasengngè Simon, iya monroè ri wiring tasi'è. " 7 Meddè'nana iyaro malaèka' mabbicaraè sibawa Kornèlius, naobbini Kornèlius duwa tau pattumani bolana sibawa sèddi anggota tentara pengawalna iya mètauè ri Puwangngè. 8 Nacuritani Kornèlius lao ri mennang aga pura kajajiyang, nainappa nasuro lao ri Yopè. 9 Pappa bajanana, ri wettu engkana mupa ri laleng allalengengngè sibawa mawè'nana lettu ri Yopè. Mènrè'ni Pètrus ri pabbingeng bolaè untu' massempajang. 10 Namalupu senna'na sibawa macinna manrè. Ri wettu ripassadiyana nanrè, lolongenni sèddi pakkitang. 11 Naitai langiè tattimpa' naengka pada-pada kaing iya mallebba'è riloro' ri tanaè, taggattung ri iya eppa sunna'. 12 Ri lalenna engka sininna rupanna olokolo eppaè ajèna, sininna olokolo makkalolo'è sibawa manu'-manu' liyaè. 13 Nainappa engka sadda makkeda ri alèna, "Pètrus, oto'no! Gèrèi namuwanrèi!" 14 Nappèbali Pètrus, "Dè' Puwang! Dè'pa naengka uwanrè aga-aga iya harangngè iyarè'ga najisi'è. " 15 Iyakiya iyaro saddaè makkedai ri alèna, "Aga pura ripattentu hallala' ri Allataala, aja' muwangga'i iyaro harang. " 16 Iyaro pakkitangngè makkolingngi gangka wèkkatellu, nainappa iyaro kaingngè tarakka mènrè ri surugaè. 17 Pusani akkalenna Pètrus pikkiri'i aga bettuwanna iyaro pakkitangngè. Ri wettu mappikkiri'-pikkiri'na mupa Pètrus, sining tau iya nasuroè Kornèlius nalolongenni bolana Simon sibawa engkani mennang ri yolona sumpangngè. 18 Nanaobbini tauwè sibawa makkutana, "Engkaga kuwaè topolè mappèruma, iya riyasengngè Simon Pètrus?" 19 Iyaro wettuè matteru mupi Pètrus makkuraga missengngi bettuwanna iyaro pakkitangngè, makkedani Rohna Allataala ri alèna, "Eh Pètrus, engka tellu tau sappako. 20 Apperi-perino nonno ri yawa sibawa aja' mubata-bata maccowèriwi mennang, saba' Iyya ritu suroi mennang. " 21 Nanonnona Pètrus ri yawa sibawa makkeda risining tauwèro, "Iyya'na iya musappaè saudara-saudara. Untu' aga mupolè saudara-saudara?" 22 Nappèbali mennang, "Kapitèng Kornèlius suroki lao mai. Sèddiwi tau makessing sibawa mètau ri Allataala, enrengngè ripakalebbi senna' ri sininna tau Yahudiè. Engka sèddi malaèka'na Allataala suroi mèllauki Puwang lao ri bolana nasaba, selaku pappèbalinna sempajanna, risuroi mèngkalingai aga tapowada matu Puwang ri alèna. " 23 Nariyobbina mennang ri Pètrus muttama' untu' mappèruma kuwaro. Pappa bajanana moto'ni Pètrus nalao silaong mennang. Engkato siyagangngarè tau mateppe' polè ri Yopè maccowèto. 24 Pappa bajana lettu'ni mennang ri Kaisarèa. Ritajenni mennang kuwaro ri Kornèlius sibawa sumpulolona enrengngè sining sellaona marèppè'è iya puraè naobbi. 25 Lettu'nana Pètrus, laoni Kornèlius duppaiwi sibawa suju' ri yolona. 26 Iyakiya ritulungngi ri Pètrus tettong, nainappa makkeda, "Oto'no! Iyya tolino muto. " 27 Ri wettu mabbicarana mupa sibawa Kornèlius, muttama'ni Pètrus ri lalempola. Naitani kuwaro maèga tau maddeppungenna. 28 Nakkeda lao ri mennang, "Alètana saudara-saudara missengngi makkedaè riyattèyang tau Yahudiè ri agamana lokkaiwi iyarè'ga sisumpung sining tau polè ri bangsa laingngè. Iyakiya Allataala pura mappaitangngi ri iyya makkedaè dè' nawedding uwangga najisi' iyarè'ga harang muwi niga-niga. 29 Iyanaro saba'na wettunna Bapa' mèllauwi kuwammengngi upolè, dè' ukabaratang. Jaji makkekkuwangngè macinnaka missengngi magi Bapa' taèllauka polè. " 30 Nappèbali Kornèlius, "Tellungngesso labe'è, kira-kira wettu pada-padaèwè, massempajakka ri bolaku ri tettè tellu arawèngngè. Tappa engka sèddi tau worowanè tettong ri yoloku. Pakèyanna iyaro tauwè lala'-lala'. 31 Makkedai, 'Kornèlius! Natarimani Allataala sempajammu sibawa naèngngeranni asèmpoatimmu. 32 Jaji suroni tauwè lao ri Yopè mobbii tau riyasengngè Simon Pètrus. Mappèrumai ri bolana sèddiè pappecco bingkulang riyasengngè Simon; iyaro bolaè ri wiring tasi'è. ' 33 Iyanaro saba'na umasitta suroi tauwè lao mobbiki Puwang. Namakessing ati tongekki Puwang, natalao kumaiyè. Makkekkuwangngè maddeppungekki kuwaè ri yolona Allataala untu' mèngkalingai sininna iya nassurowangngè Allataala ri Puwang untu' mupowadakki. " 34 Nakkeda Pètrus, "Upahang tonget-tongenni makkekkuwangngè makkedaè Allataala dè' nappasilaingeng gaukengngi sininna tauwè. 35 Tau iya mètauè ri Allataala sibawa pogau'èngngi tongengngè, iyaro tauwè ritarimai ri Allataala, dè' napaduliwi bangsa agai. 36 Naissenni saudara-saudara lise'na karèba iya napalettu'è Allataala lao ri bangsa Israèliè. Iyaro karèbaè iyanaritu passalenna Karèba Madècèngngè lao-laona adamèngengngè naolai Yèsus Kristus, iyanaritu Puwanna sininna tauwè. 37 Muwissenni aga pura kajajiyang ri sininna Yudèa, iyanaritu mappammulai ri Galilèa puranana Yohanès nassurowang acemmèngngè. 38 Muwissenni makkedaè Allataala pura pilèi Yèsus tau Nazarèt-èro sibawa mpèrèngngi Rohna Allataala nasibawang akuwasang. Muwisseng toni makkedaè iyaro Yèsus laowi kègi-kègi untu' pogau' dècèng; napajjappa manengngi tau nakuwasaiyè Ibillisi', saba' Allataala sibawangngi. 39 Idi'naè sining tau iya puraè mitai sininna napogau'è ri wanuwanna tau Yahudiè sibawa Yèrusalèm. Namuni makkuwaro risallii sibawa riyunoi ri mennang. 40 Iyakiya ri esso matelluè, Allataala patuwoi paimeng Alèna polè ri amatèngngè sibawa mappaitangngi Alèna lao ri rupa tauwè; 41 dè' nalao risininna tauwè, sangadinna banna lao ri idi bawang iya puraè napilè Allataala lebbi riyolo untu' mancaji sabbi-sabbin-Na: Manrè mènukki sibawa Alèna tuwonana paimeng polè ri amatèngngè. 42 Nasuroki mabbirittangngi iyaro Karèba Madècèngngè lao risining tauwè sibawa mabbèrè asabbiyang makkedaè Alèna ritu riyakka ri Allataala mancaji Hakinna sining tau iya tuwoè sibawa sining tau iya matèènna. 43 Sininna nabi-nabiè mabbicarai passalen-Na. Makkedai mennang makkedaè sininna tau mateppe'è ri Yèsus, riyaddampengengngi matu dosana sibawa akuwasang polè ri Yèsus. " 44 Ri wettu mabbicarana mupa Pètrus, turunni Rohna Allataala sibawa makuwasaiwi sininna tau iya mèngkalingaèngngi karèbaèro. 45 Sining tau Yahudi iya mateppe'ènna ri Yèsus sibawa iya maccowèriyèngngi Pètrus polè ri Yopè, hèrang manenni mitai Allataala mabbèrèyang towi Roh-Na lao risining tau bangsa laingngè tenniyaè Yahudi. 46 Saba' naèngkalingai sining tauwèro mabbicara ri laleng maddupa-rupang basa sibawa poji-pojiwi arajanna Allataala. Nakkeda Pètrus, 47 "Cobasai mitai, sining tauwèwè lolongenni Rohna Allataala pada-pada idi. Jaji weddigga tauwè lawa-lawaiwi mennang untu' ricemmè sibawa uwai?" 48 Nasuroni Pètrus mennang ricemmè ri laleng asenna Yèsus Kristus. Purairo naèllauni mennang kuwammengngi naonro Pètrus silaong mennang siyagangngarè esso ittana.

Riwaya'na Rasul-Rasul-E 11

1 Naèngkalingani sining rasul-è sibawa sining tau mateppe'è ri sininna Yudèa makkedaè muwi sining tau iya dè'è naggama Yahudi natarimani ada-adanna Allataala. 2 Nainappa wettunna Pètrus lao ri Yèrusalèm, sining tau Yahudi iya mateppe'ènnaro, nacellani Pètrus. 3 Makkedai mennang, "Magi mulao ri bolana sining tau iya dè'èppa naricemmè? Mala manrè tokko sisama mennang!" 4 Rimakkuwannanaro napakatajanni Pètrus lao ri iya maneng mennang iya puraè kajajiyang, mappammulai pammulanna. Makkedai Pètrus, 5 "Mattengngakka massempajang ri kota Yopè, nauwita sèuwa pakkitang. Uwitai engka pada-pada silampa kaing iya mallebba'è ripaturung polè ri langiè, taggattung ri iya eppa sunna', nainappa lèppang ri seddèku. 6 Wettunna upènessai ri lalenna, uwitai olokolo makkèajè eppaè, olokolo liyaè, olokolo makkalolo'è sibawa manu'-manu' liyaè. 7 Nainappa uwèngkalinga sèuwa sadda makkeda lao ri iyya, 'Oto'no Pètrus! Gèrèi iyaro namuwanrèi!' 8 Iyakiya mappèbalika, 'Dè' Puwang! Dè'pa naengka uwanrè nanrè iya harangngè sibawa najisi'è. ' 9 Iyakiya iyaro saddaè makkedai paimeng polè ri langiè, 'Barang iya puraè napattentu Allataala hallala', aja' naripowada harang. ' 10 Iyaro gau'è uwitai gangka wèkkatellu, napaccappurenna tarakka manenni lisu ri surugaè. 11 Nasitujuwang toni iyaro wettuè iya tellu tau polè ri Kaisarèa, iya risuroè lao ri iyya, lettu ri bola onrokku mappèruma. 12 Nainappa nasurona Rohna Allataala lao silaong mennang sibawa dè'na ubata-bata. Iya enneng saudaraèwè maccowè toni sibawakka lao ri Kaisarèa, namuttama manenni ri lalempolana Kornèlius. 13 Nainappa nacuritakki Kornèlius pèkkugi mitai sèddi malaèka' tettong ri bolana sibawa makkeda, 'Suroi tauwè lao ri Yopè mobbii sèddi tau worowanè riyasengngè Simon Pètrus. 14 Napalettukekko matu karèba iya passalama'èkko matti sibawa kaluwargamu. ' 15 Na wettukku mappammula mabbicara makkuwaro, " makkuwaniro Pètrus patterui curitana, "Polèni Rohna Allataala ri yasè'na mennang pada-pada iya kajajiyangngè ri idi riyolo ri pammulanna. 16 Nauwèngngeranni, engka naengka nakkeda Puwangngè, 'Yohanès maccemmèi sibawa uwai, iyakiya iko ricemmèko sibawa Rohna Allataala. ' 17 Jaji manessani nabbèrèyang towi Allataala lao risining tau iya dè'è naggama Yahudiro, pabbèrè iya pada-padaè nawèrèngngèkki ri wettutta mateppe' ri Puwang Yèsus Kristus. Rimakkuwannanaro, pèkkugi weddikka mattèyangngi Allataala!" 18 Naèngkalinganaro, dè'na nabbantana mennang. Napojini Allataala. Makkedani mennang, "Rèkko makkuwaitu, muwi sining tau tenniyaè Yahudi riwèrètto kasempatang ri Allataala untu' toba' polè ri dosa-dosana sibawa nennun-nennungngi atuwong tongengngè!" 19 Puranana riyuno Stèfanus, sining tau mateppe'è ri Yèsus mappammulani rilellung, angkanna tassiya-siyani lao kègi-kègi. Engka lari narapi Fènèsia, na engkato lettu ri Siprus sibawa Antiokhia. Nappallebbangenni mennang karèba polè ri Allataala banna lao risining tau Yahudiè bawang. 20 Iyakiya polè ri yelle'na sining tau mateppe'èro, iya assalennaè polè ri Siprus sibawa Kirènè, engkato lao ri Antiokhia sibawa mabbirittangngi Karèba Madècèngngè passalenna Yèsusro lao risining tau iya dè'ètto naggama Yahudi. 21 Akuwasanna Puwangngè engkai ri mennang angkanna maèga tau mateppe' sibawa mabbèrèyangngi alèna lao ri Puwangngè. 22 Curita-curita passalenna sining kajajiyangngèwè lettu toni ri jema'è ri Yèrusalèm. Nakirinni mennang Barnabas lao ri Antiokhia. 23 Na wettunna Barnabas lettu kuwaro, sibawa naitana pèkkugi Allataala pura barakkakiwi sining tauwèro, marennu senna'ni. Nanaèllauni kuwammengngi nattonget-tongeng matinulu lao ri Puwangngè sibawa sukku atinna. 24 Iyaè Barnabas tau makessing atiwi sibawa rikuwasainna ri Rohna Allataala enrengngè mateppe' senna' ri Puwangngè angkanna maèga tau maccowèriwi Puwangngè. 25 Nainappa Barnabas lao ri Tarsus sappai Saulus. 26 Siruntu'nana Saulus, natiwini Saulus ri Antiokhia na sitaung bujuru monroni mennang ri jema'è kuwaro nanapagguru towi maèga tau. Ri Antiokhiana ritu iyaro sining tau mateppe'è ri Yèsus bunge'-bunge'na riteppu tau Kristèng. 27 Iyaro wettuè engka siyagangngarè nabi polè ri Yèrusalèm lao ri Antiokhia. 28 Ri yelle'na engka sèddi riyaseng Agabus. Nasaba doronganna Rohna Allataala nabotoni makkedaè ri sininna linoè maèloi kajajiyang akkadèreng iya maseroè. (Na iyaro gau'è mèmeng kajajiyangngi wettunna Kaisar Klaudius mapparènta. ) 29 Nasininna iyaro tau maccowèriyèngngi Yèsus massèddini untu' kiring sumbangeng lao ri saudara-saudara iya monroè ri Yudèa; tungke'-tungke' kiring situru amampungenna. 30 Iyaro assamaturusengngè napogau' tongenni, nainappa Barnabas sibawa Saulus rikiring untu' mantara'i iyaro sumbangengngè lao risining pamimpinna jema'è.

Riwaya'na Rasul-Rasul-E 12

1 Kira-kira iyaro wettuè mappammulani Arung Hèrodès tenre'i anggota-anggota jema'è. 2 Nasaba parèntana, Yakobus silessurenna Yohanès riyunoi sibawa peddang. 3 Wettunna naita Hèrodès makkedaè iyaro pangkaukenna napèsennangiwi atinna sining tau Yahudiè, napogau'si pada-padaèro, nasurosi tauwè tikkeng towi Pètrus. Iyaro gau'è kajajiyangngi ri wettu Esso Maraja Roti Dè'è Raginna. 4 Ritikkennana, riputtama'ni Pètrus ri laleng tarungkuè. Eppa regu tentara riwèrèng tugas untu' jagaiwi Pètrus kuwaro -- tungke'-tungke' regu eppa tentara. Purapi Ramè-ramè Paskaè, nainappa Hèrodès maèlo madèlèkiwi Pètrus ri yolona tau maègaè. 5 Jaji ritahanni Pètrus ri tarungkuè, iyakiya anggota-anggota jema'è matteru-terui massempajangengngi Pètrus sibawa tonget-tongeng lao ri Puwangngè. 6 Ri wenni dè'napa namaèlo Hèrodès pangoloi Pètrus ri yolona tau maègaè, matinroi Pètrus sibawa tassiyo duwa balenggu ri yelle'na duwa tentara pengawal. Ri sumpanna tarungkuè, pengawal-pengawal laingngè najagai towi tarungkuè. 7 Tennasenna-sennana malaèka'na Puwangngè tettong kuwaro sibawa sèuwa cahaya mattappa ri laleng bili'na iyaro tarungkuè. Iyaro malaèka'è nagottangngi Pètrus angkanna moto. Nainappa makkeda iyaro malaèka'è, "Eh, asitta'ko moto!" Iyatoro wettuè naddenne rantè bessiè polè ri limanna Pètrus. 8 Purairo, makkedani iyaro malaèka'è, "Pakèni pakèyammu sibawa siyoni sapatummu. " Napakèni Pètrus pakèyanna sibawa nasiyoni sapatunna. Nainappasi makkeda iyaro malaèka'è, "Pakèi jumbamu namuwaccowèrika. " 9 Naccowèrini Pètrus iyaro malaèka'è massu polè ri tarungkuè. Iyakiya dè' namaingekiwi Pètrus makkedaè aga iyaro napogau'è malaèka'è tonget-tongengngi kajajiyang. Nasemmi Pètrus iyaro sèddi pakkitang. 10 Wettunna mennang nalaloi onrong jagang mammulangngè sibawa maduwaè, lettu'ni mennang ri tange' bessiè, iya mattujuè ri kotaè. Iyaro tange'è natimpa' alèna, nainappa mennang massu lalo risèuwaè lorong. Tennasenna-sennana iyaro malaèka'è nasalaiwi Pètrus. 11 Purairo nappai Pètrus mainge' aga pura kajajiyang ri alèna, nainappa makkeda, "Uwajeppuini makkekkuwangngè makkedaè tonget-tongengngi Puwangngè kiringngi malaèka'-Na untu' paleppe'ka polè ri akuwasanna Hèrodès sibawa polè risininna aga iya maèloè nagaukekka bangsa Yahudiè. " 12 Namaingekinnana keadaangngèro, laoni Pètrus ri bolana Maria, indo'na Yohanès iya riyasengngètto Markus. Kuwaro maèga tau maddeppungeng sibawa massempajang. 13 Nagetto'ni Pètrus tange'è ri saliweng, na sèddi pattumani makkunrai riyaseng Rodè, polè untu' timpa'i tange'è. 14 Matterui naisseng saddanna Pètrus. Nasaba senna, mapperi-perini muttama' paimeng nadè' natimpa'i tange'è, nanapowadangngi sining tauwè kuwaro makkedaè engkai Pètrus ri saliweng. 15 Nakkeda mennang, "Jangekko!" Iyakiya mattedde'i Rodè makkedaè iyaro tonget-tongengngi Pètrus. Nakkeda mennang, "Malaèka'na iyaro!" 16 Nanagetto'ni Pètrus tange'è matteru-teru. Na wettunna mennang natimpa' tange'è, sibawa naitana Pètrus, hèrang senna'ni mennang. 17 Mabbèrèni Pètrus tanra-tanrang sibawa limanna kuwammengngi natennang mennang, nainappa nacurita pèkkugi Puwangngè pura tiwii massu polè ri tarungkuè. Nainappa makkeda, "Powadangngi iyaè lao ri Yakobus sibawa saudara-saudara laingngètto. " Purairo nasalaini Pètrus iyaro onrongngè nalao ri onrong laingngè. 18 Pappa bajanana èlèè marukkani tentara-tentara pengawal-è. Bengnga senna'ni mennang passalenna aga pura kajajiyang sibawa Pètrus. 19 Nainappa Hèrodès nasuroni tauwè sappai Pètrus, iyakiya dè' naullèi lolongengngi. Jaji napparèntanni kuwammengngi iyaro tentara-tentara pengawal-è ritanaiwi nainappa riyuno. Purairo nasalaini Hèrodès ri Yudèa naonro siyagangngarè ittana ri Kaisarèa. 20 Macai senna'ni Hèrodès lao risining tau Tirus-è sibawa Sidongngè. Rimakkuwannanaro silaonni mennang lao mangolo ri alèna. Mula-mulanna napalècèi Blastus, iya kapalaiyèngngi saorajana Hèrodès, angkanna maccowèni mennang. Nainappa lao mangolo ri Hèrodès, nanaèllauwi sidamè, saba' iyaro wanuwanna mennang taggattungngi ri anrè polè ri wanuwanna Hèrodès. 21 Risèuwaè esso iya pura ripattentuè, napakèni Hèrodès pakèyang arajanna nainappa tudang ri kadèra arajanna nappammula mappidatong ri yolona ra'ya'è. 22 Gora-gorani iyaro ra'ya'è iya mèngkalingaèngngi, "Iyaè sadda dèwata, tenniya sadda tolino!" 23 Iyatoro wettuè narileppa Hèrodès ri malaèka'na Puwangngè, saba' dè' napakarajai Allataala. Nanrèni lati Hèrodès nainappa matè. 24 Napèdè' mallebbanni ada-adanna Allataala sibawa pèdè' makkasse'na. 25 Puranana jama-jamanna Barnabas sibawa Saulus, lisuni mennang polè ri Yèrusalèm sibawa tiwii Yohanès Markus silaong mennang.

Riwaya'na Rasul-Rasul-E 13

1 Ri laleng jema'è ri Antiokhia engka nabi-nabi sibawa guru-guru, iyanaritu Barnabas, Simèon iya ritellangngè Si Bolong, Lukius polè ri Kirènè, Menahèm iya ripawekke'è silaong Arung Hèrodès, sibawa Saulus. 2 Wettunna mennang massompa lao ri Puwangngè sibawa mappuwasa, makkedani Rohna Allataala lao ri mennang, "Pilèi Barnabas sibawa Saulus untu' Iyya, kuwammengngi napogau'i mennang jamang iya puraè Upattentungengngi mennang. " 3 Puranana mappuwasa sibawa massempajang napalènne'ni mennang limanna ri yasè'na Barnabas sibawa Saulus nainappa nakiring sipadduwa. 4 Nasaba rikiringngi ri Rohna Allataala, joppani Barnabas sibawa Saulus lao ri Selèukia. Polè kuwaro sompe'ni mennang lao ri pulo Siprus. 5 Wettunna lettu ri Salamis, nabbirittanni mennang ada-adanna Allataala risining bola assompang Yahudiè. Yohanès Markus bantui mennang ri laleng allalengenna. 6 Najalajja'ni mennang sininna puloèro lettu ri Pafos. Siruntu'ni mennang kuwaro sèddi tau Yahudi, asenna Bar Yèsus. Sèddiwi passèhèrè' iya mangakuè nabi. 7 Sergius Paulus, gubernurna puloèro iyanaritu sellao marèppè'na iyaro passèhèrè'è. Iyaro gubernur-è sèddiwi tau macca namapanrè. Purai naobbi Barnabas sibawa Saulus saba' macinnai mèngkalingai ada-adanna Allataala. 8 Iyakiya riyèwai Barnabas sibawa Saulus ri Elimas passèhèrè'èro, nasaba Elimas (iyaro asenna ri laleng basa Yunani) makkuragai kuwammengngi iyaro gubernur-è aja' namateppe' lao ri Yèsus. 9 Iyakiya Saulus -- iya riyasengngètto Paulus -- rikuwasaiwi ri Rohna Allataala, angkanna naita iyaro passèhèrè'è, 10 nainappa makkeda, "Eh pabbellèng senna', ana' madoraka! Iko balinna sininna makessingngè. Magi namutèya mappèsau solangiwi rencanana Allataala untu' passalama'i rupa tauwè? 11 Itai makkekkuwangngè, Puwangngè maèlo hukkukko! Butako matu, angkanna dè' mullèi mitai tappa essoè siyagangngarè ittana. " Iyatoro wettuè napèneddingiwi Elimas engka salèwu iya mapettangngè tongkoi matanna, angkanna makkapèse'ni joppa sappa tau untu' rènrèngngi. 12 Wettunna naita iyaro gubernur-è aga pura kajajiyang, mateppe'ni lao ri Yèsus; saba' bengnga senna'ni lao ri pappagguruwanna passalenna Puwangngè. 13 Polè ri Pafos, Paulus sibawa sining sellaona sompe'ni lao ri Pèrga ri Pamfilia. Kuwaniro Yohanès Markus salaiwi mennang, nainappa lisu ri Yèrusalèm. 14 Polè ri Pèrga napatteruni mennang joppana lao ri Antiokhia ri Pisidia, nainappa ri Esso Saba'è laoni mennang tudang ti laleng bola assompangngè. 15 Puranana nabaca Kitta'na Musa sibawa Kitta'na Nabi-nabiè, iyaro sining pamimpinna bola assompangngè nasuroni tauwè makkutana lao ri Paulus sibawa sellao-sellaona, "Saudara-saudara, rèkko engka pangajana saudara untu' sining tauwèwè, tapalettu'ni iyaro pangajaè. " 16 Tettonni Paulus, nainappa mabbèrè tanra-tanrang sibawa limanna, nainappa makkeda, "Saudara-saudara bangsa Israèliè sibawa sininna saudara-saudara laingngè kuwaè iya matinuluè ri Allataala! Cobasai mèngkalingaka: 17 Allataalana bangsa Israèliè pura pilèi nènè-nènèta, sibawa napancajinna bangsaèwè bangsa battowa wettunna mennang monro ri Masèrè' selaku topolè-polè. Nainappa nasibawang akuwasanna Allataala iya battowaè tiwii mennang massu polè ri Masèrè'. 18 Sabbara'i lao ri ampè-ampèna mennang 19 Pitu bangsa Napaccappu ri wanuwa Kanaan untu' bagè-bagèi iyaro wanuwaè lao ri bangsa Israèliè kuwammengngi iyaro wanuwaè mancajiwi appunnangenna. 20 Iya manennaro ittana eppadatu limappulo taung. Puranana nabagè iyaro wanuwa Kanaan nabbèrèyanni Allataala lao ri mennang haking-hakingngè. Haking paccappurengngè iyanaritu Nabi Samuèl. 21 Nainappa mèllau mennang sèddi arung. Nabbèrèyanni Allataala lao ri mennang Saul ana' Kish polè ri suku bangsa Bènyamin untu' arunna mennang patappulo taung. 22 Puranana napaèsa' Allataala polè ri tudangenna, nakkani Allataala Daud mancaji arunna mennang. Na iyanaè naseng Allataala passalenna Daud, 'Ulolongenni Daud ana'na Isairo sèddi tau iya sennangiyèngngi atik-Ku. Iyanaè tau pogau'èngngi matu Uwèloriyè. ' 23 Polè ri wija-wijanna Daud, Allataala pura passadiyangengngi bangsa Israèliè sèddi Arung Pappassalama'è, pada-pada pura najjanciyangngè. Na Yèsus ritu Arung Pappassalama'èro. 24 Riwettu dè'napa napammulai Yèsus jamanna, purani nappallebbangeng Yohanès lao risining tau Israèliè kuwammengngi natoba mennang polè ri dosana sibawa ricemmè. 25 Namacawè'nana maccappa jama-jamanna, makkedani Yohanès lao risining tauwè, 'Niga iyya'è manuru' pallolongemmu? Tenniyaka Tau iya mutajengngè. Engngerangngi, iyaro Tauwè polèi matu ri munrikku; namuwi untu' ludungngi sapatun-Na dè'to usitinaja. ' 26 Saudara-saudara wijanna Abraham, sibawa sininna Saudara-saudara laingngè kuwaè iya matinuluè ri Allataala! Allataala pura kiringngi lao ri idi karèba asalamakengngèro; 27 saba' sining tau iya monroè ri Yèrusalèm sibawa sining pamimpinna dè' najeppuiwi makkedaè Alèna ritu pappassalama'èro. Dè' napahangngi mennang pappagguruwanna nabi-nabiè iya ribacaè tungke' Esso Saba'. Angkanna mennang nahukkung Yèsus. Iyakiya mala nasaba napogau'i mennang makkuwaèro nassabariwi makkedaè aga naboto iyaro nabi-nabiè kajajiyangngi. 28 Namuni dè'gaga mennang wedding nalolongeng ri Alèna iya sitinajaè rihukkung sibawa pahukkungeng matè, iyakiya naèllauwi mennang ri Pilatus kuwammengngi nariyuno. 29 Na puranana napogau' maneng mennang iya tarokiè ri laleng Kitta'è passalenna alèna, napanonnoni mennang uju-Na polè ri aju salliè, nainappa napalèsso ri laleng tampungngè. 30 Iyakiya Allataala patuwoi paimeng polè ri amatèngngè. 31 Nainappa siyagangngarè esso ittana polèi mappaitangngi Alèna lao risining tau iya naèwaè silaong polè ri Galilèa lao ri Yèrusalèm. Iyanaro mennang makkekkuwangngè mancaji sabbi-sabbi untu' Alèna lao ri bangsa Israèliè. 32 Jaji, makkekkuwangngè ripalettu'ni iyaro Karèba Madècèngè lao ri Saudara-saudara: Aga pura najjanciyang Allataala lao ri nènè-nènèta, 33 iyaro purani Napogau' ri alèta ri laleng napatuwona Yèsus paimeng polè ri amatèngngè. Saba' ri laleng Mazmur maduwaè engka taroki, 'Ikona Ana'-Ku, iyaè essoè Umancaji Ambo'-Mu. ' 34 Allataala pura patuwoi paimeng polè ri amatèngngè, makkekkuwangngè dè'na napèneddingiwi matu amatèngngè ri laleng tampungngè. Passalenna iyaro gau'è makkedai Allataala; 'Maèlo-Ka mpèrèk-Ko janci mapaccingngè iya mattentuè rirupai matu, iya pura Uwajjanciyangngè lao ri Daud. ' 35 Makkuwatoro ri laleng aya' laingngè ripowadai, 'Dè' Muleppessangngi matu Atam-Mu iyaro matinuluè makebbong ri laleng tampungngè. ' 36 Matèni Daud sibawa purana tona ritampung silaong nènè-nènèna, puranana napogau' aga iya nassurowangngè Allataala ripogau'. Ancuru'ni cappu maneng ujuna Daud. 37 Iyakiya Yèsus, iya napatuwoè paimeng Allataala polè ri amatèngngè, iyaro Yèsus dè' nacappu ancuru. 38 Rimakkuwannanaro Saudara-saudara, harusu'i muwisseng iko makkedaè naolai iyaè Yèsus biritta passalenna addampengeng dosaè riyabbirittangngi lao ri iko; makkedaè tungke'-tungke' tau iya mateppe'è ri Alèna, ripaleppe'i polè ri sininna dosa iya dè'è nawedding riledda naolai sining parèntana Allataala iya napalettu'è Musa. 40 Iyanaro saba'na naharusu'ko pènessaiwi madècèd-dècèng, aja' narapii kajajiyang ri iko aga iya napowadaè nabi-nabiè, 41 'Pènessaiwi madècèd-dècèng, èh iko sining tau iya pojiyèngngi maccella-cella! Hèrakko matu, nainappa matè! Saba' iya wettuèwè engka sèuwa Upogau' iya dè'è muwatepperiwi matu, namuni engka tau pakatajangekko. ' " 42 Wettunna Paulus sibawa Barnabas salaiwi bola assompangngèro, sining tauwè ri bola assompangngèro mèllauwi mennang lisusi ri Esso Saba' paimenna, untu' pakatajangngi matteru gau'-gau'èro. 43 Massunana sining tauwè polè ri bola assompangngèro, riyaccowèrini Paulus sibawa Barnabas ri maèga tau Yahudi sibawa tau bangsa laing iya muttama'è agama Yahudi. Naripangajarina mennang ri rasul-rasul-è kuwammengngi natteru mennang sanrè ri pammasèna Allataala. 44 Ri Esso Saba' paimennana, mawè' engka maneng sininna tauwè ri kotaèro polè mèngkalingai ada-adanna Puwangngè. 45 Wettunna sining tau Yahudiè naita tau maègaèro, mangèmpuru senna'ni mennang. Nacellani mennang Paulus sibawa naèwana sininna iya napowadaè. 46 Iyakiya pèdè' lebbi baraniwi Paulus sibawa Barnabas mabbicara terus terang. Makkedai mennang, "Ada-adanna Allataala mèmeng harusu'i ripalettu' lao ri iko riyolo. Iyakiya nasaba dè' mumaèlo tarimai, iko muto pura pattentui makkedaè dè' musitinaja tarima atuwong tongengngè sibawa mannennungengngè. Namakkekkuwangngè risalaiko natalao ri bangsa laingngè. 47 Saba' iyanaè parèntana Puwangngè lao ri idi; makkedai Puwangngè, 'Purano Upattentu mancaji sèddi tajang lao risining bangsa laing tenniyaè Yahudi, kuwammengngi mumappapolè asalamakeng lao risininna linoè. ' " 48 Wettunna bangsa-bangsa laing tenniyaè Yahudi naèngkalinga iyaro, masennang senna'ni mennang, napoji-pojiwi ada-adanna Puwangngè. Nasining tau iya puraè napattentu Allataala untu' lolongeng atuwong mannennungengngè, iyaro sining tauwè mateppe'i. 49 Mallebbang toni ada-adanna Puwangngè lao ri kègi-kègi risininna daèraèro. 50 Iyakiya sining tomarajana kotaèro sibawa sining makkunrainna iya polè ri golongang sining tomatanrè iya mètauè ri Allataala, ripakiri-kiriwi risining tau Yahudiè. Papolèi mennang assimusureng lao ri Paulus sibawa Barnabas, sibawa narukkana mennang iya duwa polè ri daèraèro. 51 Nanakkeppikenni iyaro rasul-rasul-è awuè ri ajèna ri yolona sining tauwèro selaku papparèngngerang, nainappa lao ri Ikonium. 52 Sining tau maccowèriyèngngi ri Antiokhia marennu senna'ni sibawa rikuwasai ri Rohna Allataala.

Riwaya'na Rasul-Rasul-E 14

1 Ri Ikonium napèneddingiwi gau' padaè Paulus sibawa Barnabas. Lao towi mennang ri bola assompanna Yahudiè sibawa makkumani batèna mabbicara kuwaro angkanna maèga tau Yahudi sibawa tau bangsa laing iya tenniyaè Yahudi mancaji mateppe' lao ri Yèsus. 2 Iyakiya sining tau Yahudiè dè'è namaèlo mateppe', pakiri-kiriwi sining tau bangsa laingngè iya tenniyaè Yahudi, angkanna nassabari sining tauwèro nabenciwi sining tau iya mateppe'è ri Yèsus. 3 Rimakkuwannanaro maittai Paulus sibawa Barnabas monro kuwaro. Sibawa baraninna mennang mabbicara passalenna Puwangngè. Napabutti toni Puwangngè makkedaè birittanna mennang passalenna iyaro pammasè-Na tongengngi; Nawèrèngngi mennang akuwasang untu' pogau'i sining anu makalallaingngè sibawa gau'-gau' dè'è padanna. 4 Iyakiya pabbanuwana iyaro kotaè siyèwai sèddiè sibawa laingngè; engka maccowè risining tau Yahudiè sibawa engka maccowè ri rasul-rasul-èro. 5 Nainappa sining tau Yahudiè sibawa sining pamimpinna silaong sining tau bangsa laingngè iya tenniyaè Yahudi massèddini untu' callai sibawa genrungngi batu iyaro rasul-rasul-è. 6 Iyakiya najeppuiwi iyaro rasul-rasul-è keadaangngèro, namanyingkiri'na lao ri Listra sibawa Dèrbè, iyanaritu kota-kota ri Likaonia, sibawa daèra seddèna. 7 Nakkuwanaro mennang mabbirittassi iyaro Karèba Madècèngngè. 8 Ri Listra engka sèddi tau worowanè iya pèso'è simula jaji, angkanna dè' naengka naullèi joppa, nasaba malemma senna'i ajèna. 9 Iyaro tauwè tudangngi kuwaro mèngkalingai Paulus mabbicara. Naitai Paulus makkedaè iyaro tauwè mateppe'i narimakkuwannanaro weddingngi ripajjappa. Naitani Paulus 10 nainappa makkeda sibawa sadda battowa, "Tettong lempuno!" Naluppe'na iyaro tauwè tettong nainappa joppa. 11 Wettunna naita tau maègaè aga pura napogau' Paulus, gorani mennang ri laleng basa Likaonia, "Nonnoni dèwata-dèwataè ri linoè sibawa tubu tolino. " 12 Nasenni mennang Barnabas Zèus, na Paulus nasenni mennang Hèrmès, saba' alèna ritu mabbicara. 13 Imanna Dèwata Zèus, iya monroè bola assompanna ri yolona kotaè, polèni tiwi sining saping lai sibawa bunga-bunga ri pintu gerbanna kotaè. Maèloi maccowè silaong tau maègaèro makkasuwiyangeng akkarobangeng lao ri rasul-rasul-èro. 14 Wettunna naèngkalinga Barnabas sibawa Paulus aga maèlo napogau' sining tauwèro, nasapè'-sapè'ni pakèyanna mennang nalari ri tengnga-tengngana tau maègaèro, nainappa gora, 15 "Eh, magi mupogau'i iyaè? Idi'è tolino mutokki pada-pada Saudara! Engkaki kuwaè untu' mabbirittangngi Karèba Madècèngngè lao ri iko kuwammengngi namusalaiwi gau'-gau' iya dè'è nakkèguna namulao ri Allataala iya tuwoè, iya pancajiyèngngi langiè sibawa linoè nenniya tasi'è enrengngè sininna iya engkaè ri lalenna. 16 Ri wettu labe'è naleppessangngi Allataala tuwo bangsa-bangsaè situru èlona tungke'-tungke'. 17 Iyakiya dè' Nallupaiwi mpèrèngngi butti-butti passalenna Alèna, iyanaritu pogau' dècèng. Nawèrèkko bosi polè ri langiè sibawa wassèlè tana ri wettunna. Nawèrèkko anrè sibawa napèsennangiwi atimmu. " 18 Iyakiya muwi nasibawang iyaro ada-adaè mawatang mutopi iyaro rasul-rasul-è lawa-lawaiwi iyaro sining tauwè makkasuwiyangengngi akkarobangengngè lao ri mennang. 19 Siyagangngarè tau Yahudi iya laowè ri Listra polè ri Antiokhia ri Pisidia sibawa polè ri Ikonium pangaruiwi iyaro tau maègaè angkanna iyaro tau maègaè maccowèni lao ri mennang. Nagenrunni mennang Paulus sibawa batu, nainappa nassarènrèngeng massu ri saliweng kota. Nasenni mennang matèni, 20 iyakiya wettunna sining tau mateppe'è kuwaro tettong mattulilingiwi, moto'ni sibawa muttama' paimeng ri kotaè. Pappa bajana joppani lao ri Dèrbè silaong Barnabas. 21 Ri Dèrbè, Paulus sibawa Barnabas mabbirittangngi iyaro Karèba Madècèngngè sibawa maèga tau mateppe' lao ri Yèsus. Purairo lisuni mennang lao ri Listra, nainappa Ikonium, nainappasi Antiokhia ri Pisidia. 22 Ri kota-kotaèro napakkasse'ni mennang atinna sining tau maccowèriyèngngi Yèsus sibawa napangajarinna iyaro sining tau maccowèè kuwammengngi tette'i maccowè ri Yèsus. "Harusu'ki maèga manrasa-rasa riyolo, nainappa weddikki pèneddingiwi asennangenna Lino Barunna Allataala, " makkuwaniro iyaro rasul-rasul-è paggurui sining tau maccowèriyèngngi Yèsus ri kotaèro. 23 Na ri tungke'-tungke' jema', makkai Paulus sibawa Barnabas pamimping-pamimping untu' jema'-jema'èro. Nainappa massempajang sibawa mappuwasa, nabbèrèyangngi mennang iyaro sining pamimpingngè lao ri Puwang iya natepperiyèro mennang. 24 Purairo napatteruni joppana Paulus sibawa Barnabas lao ri daèra Pisidia sibawa lettu ri Pamfilia. 25 Napuranana mennang nabbirittang ada-adanna Allataala ri Pèrga, laoni mennang ri Atalia. 26 Polè kuwaro sompe'ni mennang lisu ri Antiokhia. Iyanaro kota naonroiyè riyolo mennang riyabbèrèyang lao ri pammasèna Allataala, kuwammengngi najamai jama-jamang iya makkekkuwangngè purani mennang napattèpu. 27 Wettunna lettu ri Antiokhia, napaddeppungenni mennang sining tau polè ri jema'èro, nainappa nacurita manenni iya puraè napogau' Allataala naolai mennang. Nacurita toni mennang passalenna pèkkugi Allataala pura timpa'i lalengngè kuwammengngi sining tau bangsa laingngè iya tenniyaè Yahudi mateppe'i lao ri Yèsus. 28 Ri kotaèro Paulus sibawa Barnabas maittai monro silaong sining tau mateppe'è.

Riwaya'na Rasul-Rasul-E 15

1 Siyagangngarè tau polè ri Yudèa lao ri Antiokhia sibawa paggurui sining tau mateppe'è ri Antiokhiaro kuwammengngi rèkko dè' mennang narisunna' situru parènta-parèntana Allataala iya nappagguruwangngè Musa, dè' nawedding mennang ripassalama'. 2 Paulus sibawa Barnabas naèwa senna'i pallolongenna sining tauwèro. Angkanna ripattentui kuwammengngi Paulus sibawa Barnabas silaong siyagangngarè tau laing polè ri Antiokhia lao ri Yèrusalèm untu' bicarai iyaro passalengngè sibawa rasul-rasul-è enrengngè sining pamimpingngè kuwaro. 3 Jema'è ri Antiokhia mantara'i mennang lettu ri saliweng kota, nanajoppa mennang lalo Fènèsia sibawa Samaria. Kuwaniro mennang maccurita pèkkugi sining tau bangsa laingngè tenniyaè Yahudi mabbèrèyangngi alèna lao ri Allataala. Iyaro birittaè napurennu senna'ni sining tau iya mateppe'è kuwaro. 4 Wettunna mennang lettu ri Yèrusalèm, ritarimani sibawa madècèng ri jema'è, sibawa ri rasul-rasul-è enrengngè sining pamimpingngè. Nainappa mennang maccurita lao risining tauwèro passalenna sininna iya puraè napogau' Allataala naolai mennang. 5 Iyakiya siyagangngarè tau polè ri golongang Farisiè iya mateppe'ènnaro tettongngi sibawa makkeda, "Sining bangsa laingngè iya mateppe'ènnaro harusu'i risunna sibawa riwajibkang maccowèriwi parènta-parèntana Allataala iya napalettu'è Musa. " 6 Nainappa iyaro rasul-rasul-è sibawa sining pamimpingngè maddeppungeng untu' bicarai passalengngèro. 7 Maitta senna' mennang sipabbicara. Angkanna Pètrus tettong sibawa makkeda, "Saudara-saudara! Alèmuna missengngi makkedaè siyagangngarè wettu labe'è Allataala pilèka polè ri yelle'mu untu' mabbirittangngi iyaro Karèba Madècèngngè lao risining tau bangsa laingngè tenniyaè Yahudi, kuwammengngi naèngkalinga towi namateppe'na. 8 Na Allataala iya missengngèngngi atinna tolinoè pura majjellokengngi makkedaè natarimai mennang; najjellokengngi gau'èro sibawa nabbèrèyangngi lao ri mennang Rohna Allataala pada-pada iya puraè Nabbèrèyang lao ri idi. 9 Allataala dè' napasilaingekki sibawa mennang. Napaccingiwi atinna mennang, nasaba mateppe'ki. 10 Aga saba'na mumaèlo mèwai Allataala makkekkuwangngè sibawa mpèrèngngi sèuwa kewajibang matane'è lao risining tau maccowèèwè, padahal nènè-nènèta sibawa idi dè'to nariyullèi pogau'i? 11 Sibalè'na, mateppe'ki makkedaè ripassalama'ki nasaba paressè babuwana Puwang Yèsus; makkuwatoro mennang. " 12 Mammekko manenni tau maddeppungengngè kuwaro. Nainappa naèngkalinga mennang Barnabas sibawa Paulus curitai paimeng sininna anu makalallaingngè sibawa gau'-gau' dè'è padanna iya puraè napogau' Allataala naolai mennang ri yelle'na sining tau bangsa laing tenniyaè Yahudi. 13 Pajanana mennang mabbicara, makkedani Yakobus, "Saudara-saudara! Coba mèngkalingai! 14 Silalona Simon napakatajang pèkkugi Allataala ri pammulanna mappaitangngi perhatian-Na lao risining bangsa laing tenniyaè Yahudi, akkattana pilèi polè ri mennang sining tau laingngè iya maèloè mancaji umma'-Na. 15 Situru iyaro puraè naboto nabi-nabiè. Nasaba engka taroki makkuwaèwè, 16 'Purairo maèlo-Ka polèsi, ' adanna Puwangngè, 'Maèlo-Ka patettongngi paimeng bolana Daud iya maruttungngènna, sibawa pèdècèngiwi aruttungenna, nainappa patettongngi paimeng; 17 kuwammengngi sininna tau iya nasèsaèro nasappai Puwangngè, silaong sininna bangsa laingngè iya tenniyaè Yahudi iya puraè Uwobbi mancaji appunnangek-Ku. ' 18 Makkuwaniro ada-adanna Puwangngè, iya puraè mappaddissengengngi gau'èro riyolopa nariyolo. " 19 Nakkeda Yakobus, "Jaji manuru' pallolongekku, dè' tawedding sussaiwi sining tau bangsa laingngè iya tenniyaè Yahudiro iya mabbèrèyangngèngngi alèna lao ri Allataala. 20 Iyakiya harusu'ki moki sure' lao ri mennang sibawa pangajariwi kuwammengngi aja' mennang nanrè anrè najisi'è iya puraè riyakkasuwiyangeng lao ri barahalaè, iyarè'ga manrè juku olokolo iya matè riyanrekkè'è, iyarè'ga manrè dara. Sibawato kuwammengngi napabèlaiwi alèna polè risining pangkaukeng malawengngè. 21 Saba' hukkunna Musa riyolopa nariyolo naribacangeng tungke' esso Saba' risining bola assompangngè, sibawa riyabbirittang ri sininna kotaè. " 22 Napettuini rasul-rasul-è sibawa sining pamimpingngè, silaong sininna anggota jema'èro untu' pilè siyagangngarè tau polè ri mennang iya maèloè risuro lao ri Antiokhia silaong Paulus sibawa Barnabas. Napilèni mennang Silas sibawa Yudas iya riyasengngètto Barsabas. Iya duwa tauwèwè iyanaritu sining tomariyolo ri yelle'na sining tau mateppe'è ri Yèrusalèm. 23 Silaongngi iyaro sining suroè kiring toni mennang sure' iya makkuwaè oninna, "Lao ri sininna saudara-saudara iya assalennaè polè ri bangsa-bangsa laing tenniyaè Yahudi, iya monroè ri Antiokhia, Siria sibawa Kilikia. Selletta idi, rasul-rasul-è sibawa sining pamimpingngè, iyanaritu saudara-saudaramu. 24 Riyèngkalingai engka siyagangngarè polè ri yelle'ta iya laoènna ri iko sibawa makkacau enrengngè pakamaling-malikko sibawa sining pappagguruwanna. Padahal tenniya idi suroi mennang pogau'i iyaro. 25 Iyanaro saba'na napuraki barunding nanasitujui manenni untu' mappilè siyagangngarè tau sibawa suroi mennang lao ri iko. Maèloi lao mennang silaong Saudara Barnabas sibawa Paulus iya riyamasèiyè. 26 Iya duwa tauwèwè iyanaritu sining tau iya puraè mappèsonangngi nyawana nasaba Puwatta Yèsus Kristus. 27 Jaji, risuroi Yudas sibawa Silas lao ri Saudara-saudara. Alèna ritu mennang palettu'i matu lao ri iko biritta iya tarokiè ri laleng sure'èwè. 28 Nasitujuini Rohna Allataala -- na idi risitujui toni -- kuwammengngi nadè' nariwè rèkko kewajibang-kewajibang iya lebbi matane'è naiya kewajibang-kewajibang iya parelluwè bawang: 29 aja' muwanrèi nanrè puraè riyakkasuwiyangeng lao ri barahalaè; aja' muwanrèi juku olokolo iya matè riyanrekkè'è, sibawa abèlaiwi sining pangkaukeng malawengngè. Narèkko mupabèlaiwi alèmu polè risining gau'èro, mupogau'nitu iya madècèngngè. Sikumiro bawang, salama'!" 30 Puranana siyassimangeng, joppani iyaro risuroè lao ri Antiokhia. Naobbini mennang kuwaro sininna anggota jema'è maddeppungeng nainappa napalettu sure'èro. 31 Wettunna iyaro anggota-anggota jema'è nabaca iyaro sure'è, masennang senna'ni mennang ri lise'na iyaro sure'è iya salèworiyèngngi atinna mennang. 32 Yudas sibawa Silas, iya nabiètto, maitta mabbicara sibawa iyaro saudara-saudara iya mateppe'è ri Antiokhia untu' mpèrèngngi dorongang sibawa abaraningeng lao ri mennang. 33 Puranana Yudas sibawa Silas monro kuwaro siyagangngarè ittana, iyaro sining tau mateppe'è ri Antiokhia nakirinni mennang lisu sibawa suroi mennang palettu' selleng lao risining tau iya suroèngngi mennang. 34 Iyakiya Silas napettuiwi untu' tette' monro ri Antiokhia. 35 Paulus sibawa Barnabas monro towi siyagangngarè ittana ri Antiokhia. Kuwaniro mennang mappagguru sibawa mabbirittangngi ada-adanna Puwangngè silaong maèga tau laing. 36 Dè' namaitta ri munrinna makkedai Paulus lao ri Barnabas, "Laono mai talisu mitai saudara-saudara iya mateppe'è ri Yèsus ri sininna kota puraè ribirittaiyang ada-adanna Puwangngè; kuwammengngi nariita pèkkugi keadaanna mennang. " 37 Macinnai Barnabas tiwii Yohanès Markus, 38 iyakiya napèrasai Paulus dè' namakessing ritiwi Markus, iya dè'è namaèlo majjama silaong mennang sibawa nasalaiwi mennang ri Pamfilia. 39 Nappangèwang ladde'na Paulus sibawa Barnabas angkanna mennang massarang: Barnabas nalani Markus nasompe silaong lao ri Siprus. 40 Paulus napilèi Silas nainappa joppa silaong puranana saudara-saudaraè ri Antiokhia mabbèrèyangngi mennang lao ri pammasèna Puwangngè. 41 Nattulilingini mennang Siria sibawa Kilikia; kuwaniro mennang pakkasse'i jema'-jema'è.

Riwaya'na Rasul-Rasul-E 16

1 Napatteruni joppana Paulus lao ri Dèrbè, nainappa lao ri Listra. Kuwaro engka sèddi tau maccowè ri Yèsus asenna Timotius. Indo'na sèddiwi tau Yahudi, iya mateppe'ènna ri Yèsus, iyakiya ambo'na tau Yunani. 2 Ri yelle'na sining tau mateppe'è iya monroè ri Listra sibawa Ikonium, tarompoi Timotius sèddi tau makessing. 3 Macinnai Paulus kuwammengngi maccowèi Timotius silaong alèna; rimakkuwannanaro nasunna'ni Timotius. Napogau'i iyaro nasaba sining tau Yahudiè ri daèraèro naisseng manengngi makkedaè ambo'na Timotius sèddiwi tau Yunani. 4 Tungke'-tungke' kota nalaoiyè mennang, napalettu'i mennang risining tau mateppe'è sining apettung iya puraè napattentu rasul-rasul-è sibawa sining pamimpingngè ri Yèrusalèm. Napangajarini mennang saudara-saudara iya mateppe'ènnaro kuwammengngi naturusiwi iyaro peraturang-peraturangngè. 5 Natattamba masse'na teppe'na iyaro sining jema'è, natungke esso pèdè' tattambai ègana jumellana. 6 Dè' naripalalo Paulus sibawa Silas ri Rohna Allataala mappallebbangengngi ada-adanna Allataala ri daèra Asia. Jaji napatteruni joppana lao ri daèra Frigia sibawa Galatia. 7 Wettunna lettu ri pakkasèsènna Misia nacobani mennang muttama' ri daèra Bitinia, iyakiya Rohna Yèsus mattèyangngi mennang lao kuwaro. 8 Jaji nalaloini mennang Misia natteru ri Troas. 9 Wenninnana, ri Troas, mitani Paulus sèuwa pakkitang. Ri laleng pakkitangngèro naitai sèddi tau Makedonia tettong ri yolona nanarèllau sibawa masero kuwammengngi nalao ri Makedonia untu' tulungngi mennang. 10 Puranana nalolongeng Paulus iyaro pakkitangngè, matteruni sadiya-sadiya untu' lao ri Makedonia. Saba' mateppe'ki ri laleng malata apettung makkedaè Allataala suroki mabbirittangngi Karèba Madècèngngèro lao risining tauwè kuwaro. 11 Ri salaini Troas natasompe matteru lao ri Samotrake, na pappa bajana lao ri Nèapolis. 12 Polè kuwaro laoki ri Filipi, sèddi kota kacamatang mammulangngè ri Makedonia. Filipi iyanaritu jajahanna akkarungeng Roma. Monroni kuwaro siyagangngarè essona. 13 Ri Esso Saba'è laoni ri wiring saloè ri saliwenna pintu gerbanna kotaè, saba' ripèrasaiwi kuwaro engka onrong massempajang untu' tau Yahudiè. Natatudanna sibawa mabbicara-bicara sibawa sining makkunrai iya maddeppungengngènna ri onrongngèro. 14 Sèddi polè ri yelle'na mennang iyanaritu padangkang kaing lango-lango, asenna Lidia sibawa assalenna polèi ri Tiatira. Namasèiwi Allataala, naripakèdona atinna ri Puwangngè kuwammengngi natarimai aga nappagguruwang Paulus lao ri alèna. 15 Ricemmèni Lidia sibawa silise bolana. Puranana ricemmè, naundanni. Makkedai, "Rèkko napèrasai Saudara-saudara tonget-tongekka mateppe' lao ri Yèsus, laono mai mappèruma ri bolaku. " Nainappa maddessa'ni kuwammengngi nariturusi parèllaunna. 16 Risèuwaè esso wettutta lao ri onrong assempajangengngè, siruntu'ki sèddi makkunrai; atai. Iyaro makkunraiè rikuwasaiwi ri roh sètang iya mullèngngi botoi kajajiyang-kajajiyang mangoloè. Iyaro makkunraiè nawèrèngngi asarong battowa puwanna ri laleng nabotona dallè'na tauwè. 17 Iyaro makkunraiè naccowèriwi Paulus matteru sibawa idi nagora-gorato, "Iyaè sining tauwè atannai Allataala Iya Pommatanrè! Polèi mennang untu' paissengiwi Saudara-saudara pèkkugi carana mullèi salama'!" 18 Siyagangngarè esso ittana iyaro makkunraiè matteru-terui gora makkuwaro. Teddènni asabbarakenna Paulus, angkanna gilinni nainappa makkeda lao ri roh-èro, "Ri laleng asenna Yèsus Kristus uparèntakko massu polè ri makkunraièro!" Iyatoro wettuè iyaro roh-è nasalaiwi iyaro makkunraiè. 19 Wettunna sining puwanna napahang makkedaè kasempatanna mennang untu' lolongeng dowi teddènni, natikkenni mennang Paulus sibawa Silas, nainappa nassarènrèngeng iya duwa lao ri tana lapangngè ri yolona saorajaè mangolo ri pamarèntaè. 20 Napangoloi mennang Paulus sibawa Silas ri pajaba'-pajaba' pamarènta Roma, nainappa makkeda, "Iyaè sining tauwè tau Yahudi. Nakacauwi mennang kotata. 21 Napètangngariwi mennang tauwè pogau'i ade' abiyasang iya dè'è nasicoco' hukkung-hukkutta, sining tau Romaè. Dè' taullèi tarimai iyarè'ga turusiwi iyaro ade' abiyasangngè!" 22 Maccowèni tau maègaè gasai Paulus sibawa Silas; enrengngè pajaba'-pajaba'na pamarèntaè sapè'-sapè'i pakèyanna polè ri watakkalèna iya duwaro rasul-è nainappa nasuro tauwè barasa' duwai mennang. 23 Puranana mennang ribarasa' sibawa maladde', riputtama'ni mennang ri laleng tarungkuè. Risuroni kapala tarungkuè jagaiwi mennang sibawa makkumani tedde'na. 24 Nasaba parèntaèro, iyaro kapala tarungkuè natahangngi mennang ri bili' tarungkuè iya kaminang marilalengngè, sibawa nabalenggui ajèna ri balo'è. 25 Kira-kira ri tengnga benninna Paulus sibawa Silas massempajang sibawa makkèlong poji-pojiyang lao ri Allataala. Sining tau tarungku laingngè mèngkalingai mennang makkèlong. 26 Tappa mpèwang muni tanaè masero senna', angkanna pandamènna iyaro tarungkuè maccowèto taggottang. Tattimpa' maneng sininna tange'na tarungkuè sibawa sining rantè iya balengguèngngi sininna tau tarungkuè leppe'to. 27 Moto sèlenni iyaro kapala tarungkuè. Wettunna naita tattimpa' sining tange'na tarungkuè, narampuni peddanna maèlo mpunoi alèna nasaba nasenni lari maneng tau tahanangngè. 28 Iyakiya gorai Paulus siullè-ullèna, "Aja' muwunoi alèmu! Engka maneng muki kuwaè!" 29 Mèllauni lampu iyaro kapala tarungkuè nainappa lari muttama', natènrèna suju' ri yolona Paulus sibawa Silas. 30 Nainappa natiwi mennang massu sibawa makkeda, "Bapa'-bapa', aga harusu' upogau' kuwammengngi ripassalama'ka?" 31 Nappèbali Paulus sibawa Silas, "Ateppe'no lao ri Puwang Yèsus! Salama'ko matu -- iko sibawa sininna tauwè ri bolamu!" 32 Nainappa Paulus sibawa Silas pakatajangngi ada-adanna Puwangngè lao ri kapala tarungkuèro sibawa lao ri sininna tau iya engkaè ri bolana. 33 Iyatoro tengnga benniè, naritiwi mennang ri kapala tarungkuèro nainappa ripaccingi sining lona mennang. Natteruna ricemmè iyaro kapala tarungkuè silaong sininna tauwè ri lalempolana. 34 Nainappa natiwi Paulus sibawa Silas ri bolana sibawa patalangengngi mennang inanrè. Masennang senna'ni silaong sininna kaluwargana saba' mateppe'ni makkekkuwangngè lao ri Allataala. 35 Pappa bajana èlèè, kirinni pajaba'-pajaba'na pamarènta Roma polisi lao ri tarungkuè untu' palettu'i parèntaè kuwammengngi Paulus sibawa Silas naripaleppe. 36 Iyaro kapala tarungkuè napaissengiwi gau'èro lao ri Paulus. Makkedai, "Bapa'-bapa', pajaba'-pajaba'na pamarèntaè pura mabbèrè parènta untu' leppessangngi Bapa'-bapa'. Weddinni Bapa'-bapa' lisu makkekkuwangngè. Salama'ki ri lalengngè!" 37 Iyakiya makkedai Paulus lao ri patugas-patugasna polisièro, "Idi'è tau warga wanuwa Roma. Purani ribarasa' ri yolona tau maègaè sibawa riputtama' ri laleng tarungkuè, sibawa dè' nariadèlèkiki. Na makkekkuwangngè nasuroki lao sibawa mammekko-mekko? Dè' tamaèlo! Suroi iyaro alèna pajaba'-pajaba'na pamarèntaè lao kuwaè leppessakki. " 38 Nalaporo'ni iyaro patugas-patugasna polisiè gau'èro lao ri pajaba'-pajaba'na pamarènta Roma. Wettunna iyaro pajaba'-pajaba'è naèngkalinga makkedaè Paulus sibawa Silas warga wanuwa Roma, mètauni mennang. 39 Nainappa lao mèllau addampeng ri Paulus sibawa Silas, nainappa nantara mennang iya duwa massu polè ri tarungkuè, enrengngè naèllaunna kuwammengngi nalao mennang polè ri kotaèro. 40 Nasalaini Paulus sibawa Silas iyaro tarungkuè nainappa lao ri bolana Lidia. Puranana siruntu' sining tau mateppe'è kuwaro, sibawa mpèrèngngi mennang sumange', joppani Paulus sibawa Silas.

Riwaya'na Rasul-Rasul-E 17

1 Napatteruni joppana Paulus sibawa Silas lalo Amfipolis sibawa Apolonia nalettu'na ri Tèsalonika. Kuwaro engka bola assompang tau Yahudi. 2 Nalaona Paulus ri bola assompangngèro -- pada-pada biyasaè napogau' rèkko engka sèuwa bola assompang Yahudi -- nainappa mappasicoco pallolongeng sibawa sining tauwè kuwaro passalenna aya'-aya'na Kitta'è. Napogau'i iyaro tellu Esso Saba' matturu-turuseng. 3 Napakatajanni situru aya'-aya'na Kitta'è sibawa napabuttinna makkedaè Arung Pappassalama'è iya najjanciyangngè Allataala parellui manrasa-rasa sibawa tuwo paimeng polè ri amatèngngè. Makkedai Paulus, "Yèsus iya uwabbirittangngèro lao ri iko, Alèna ritu Arung Pappassalama' iya riyajjanciyangngè. " 4 Siyagangngarè tau mancaji mateppe' nainappa maccowèriwi Paulus sibawa Silas; makkuwatoro maèga senna' tau Yunani iya mètauè ri Allataala, sibawa maèga mupa makkunrai mariyolo. 5 Iyakiya sining tau Yahudiè mangèmpurui. Naobbii mennang sining tau dè'è gaga jama-jamanna risining lalengngè sibawa mèbbu garembolang pangacau. Nanakacauni mennang sininna kotaèro sibawa katulungngi bolana Yason untu' sappai Paulus sibawa Silas, nasaba maèloi mennang tiwii Paulus sibawa Silas massu mangolo ri tau maègaè. 6 Iyakiya wettunna mennang dè' nalolongengngi Paulus sibawa Silas, nassarènrèngenni Yason sibawa siyagangngarè tau mateppe' laingngè ri yolona pajaba'-pajaba' iya makuwasaè ri kotaèro. Gorani mennang, "Iyaè sining tauwè makkacauwi kègi-kègi! Makkekkuwangngè nalokkai toni mennang kotata, 7 na Yason pura tarimai mennang ri bolana. Najjalèkkaiwi mennang sining iya pura napattentuè Kaisar Roma, nasaba makkedai mennang makkedaè engka mupa arung laing iya riyasengngè Yèsus. " 8 Nasibawang ada-adaèro, naèbbui mennang tau maègaè sibawa sining panguwasaè ri kotaèro tassèleng. 9 Nainappa iyaro sining panguwasaè suroi Yason sibawa sining tau mateppe' laingngèro makkamaja dowi boro'. Purairo nainappa rileppessang mennang. 10 Iyaro wenniè sining tau mateppe'è ri kotaèro suroi Paulus sibawa Silas lao ri Bèrèa. Lettu'nana kuwaro, laoni Paulus sibawa Silas ri bola assompanna tau Yahudiè. 11 Sining tauwè ri Bèrèa lebbi tabbukkai atinna naiya sining tauwè ri Tèsalonika. Masennang atinna mennang mèngkalingai karèbaè passalenna Yèsus, na esso-esso mennang salidikiwi Kitta'è untu' missengngi tongegga iyaro pappagguruwanna Paulus. 12 Maèga ri yelle'na mennang mateppe' lao ri Yèsus, nadè' cèddè'to tau Yunani mariyoloè mateppe'; makkunrai sibawa worowanè. 13 Wettunna naèngkalinga sining tau Yahudiè ri Tèsalonika makkedaè pura toni nappallebbangeng Paulus ada-adanna Allataala ri Bèrèa, laoni mennang ri Bèrèa sibawa pakiri-kiriwi enrengngè pèttauriwi sining tauwè kuwaro. 14 Mapperi-perini sining Saudara-saudaraè ri Bèrèa mantara'i Paulus lao ri wiring tasi'è, na Silas sibawa Timotius tette'i monro ri kotaèro. 15 Puranana nantara Paulus lettu ri Atèna, lisuni iyaro Saudara-saudaraè ri Bèrèa sibawa tiwii paseng polè ri Paulus kuwammengngi Silas sibawa Timotius naccinrolato masitta-sitta. 16 Wettunna Paulus natajeng Silas sibawa Timotius ri Atèna, messèni atinna mitai kotaèro penno sibawa barahala-barahala. 17 Rimakkuwannanaro ri bola assompangngè, mappasicoco pallolongenni Paulus sibawa sining tau Yahudiè enrengngè sining tau laingngè iya sompaèngngi Allataala kuwaro. Makkuwatoro risining pasaè esso-esso mappasicoco pallolongeng sibawa tungke' tau iya engkaè kuwaro. 18 Guru-guru iya maccowèè ri Epikuros sibawa maccowèè ri Stoa siddebba' toni sibawa Paulus. Siyagangngarè polè ri mennang makkeda, "Aga naisseng iyaè tauwè? Cèddè bawang pangissengenna, iyakiya maèga bicarai!" Siyagangngarè laingngè makkeda, "Samanna nabbirittangngi passalenna dèwata-dèwata bangsa laingngè. " Makkeda makkuwairo mennang, nasaba mabbicarai Paulus passalenna Yèsus sibawa passalenna atuwongngè paimeng purana amatèngngè. 19 Nainappa natiwi mennang Paulus ri addeppungengngè ri Bulu-bulu Arèopagus. Kuwaniro makkeda mennang lao ri Paulus, "Macinnaki missengngi pappagguruwang baru iya muwabbirittangngèro. 20 Saba' mupowadai gau'-gau' iya makalallaingngè riyèngkalinga ri daucculitta. Rimakkuwannanaro macinnaki missengngi bettuwanna. " ( 21 Saba' sininna tau Atènaè sibawa sining tau polè-polè iya monroè kuwaro napoji senna' paccappui wettu appèsau-pèsaungenna mennang untu' mèngkalingai sibawa mabbicara passalenna gau'-gau' iya kaminang baruè. ) 22 Wettunna Paulus tettong ri yolona sining tau iya maddeppungengngè ri Arèopagus-èro, makkedani Paulus, "Eh sining tau Atènaè! Uwitai makkedaè ri laleng sininna gau'è maggama senna'ko. 23 Saba' wettukku joppa-joppa mattulilingiwi kotamu sibawa pènessaiwi sining onrong assempajangemmu, uwita towi sèddi onrong makkasuwiyangeng akkarobangeng; ri onrongngèro tarokii, 'Lao ri Allataala Iya Dè'è Nariisseng. ' Allataala iya musompaè iyakiya dè' naissengngi, iyanaro uwabbirittang lao ri iko. 24 Allataala iya pancajiyèngngi linoèwè sibawa sininna lise'na, iyanaritu Puwanna langiè sibawa linoè. Dè' naonro ri laleng bola-bola dèwata iya naèbbuè tolinoè. 25 Dè'to napparelluwangngi bantuwanna tolinoè, saba' Alèna ritu mabbèrè atuwong sibawa nappase' enrengngè sininna sèuwa-sèuwaè lao ri tolinoè. 26 Polè risèddiè rupa tau Naèbbui sininna bangsaè sibawa nasuroi mennang monroiwi sininna linoè. Alènato ritu pattentui mappammula pammulanna, uppanna sibawa kègai mennang wedding tuwo. 27 Napogau'i Allataala iyaro kuwammengngi nasappai mennang Alèna. Memmuwarè' siruntu'i mennang sibawa Alèna ri wettunna mennang sappai. Iyakiya sitongenna Allataala dè' namabèla polè ri idi tungke'-tungke'. 28 Pada-pada napowadaè tauwè, 'Tuwoki sibawa kèdo enrengngè engkaki ri linoèwè nasaba akuwasan-Na. ' Pada-pada mutowi iya napowadaè siyagangngarè paccuritamu. Makkedai mennang, 'Idi manengngè iyanaritu ana'-ana'-Na. ' 29 Nasaba idi'è ana'-ana'ki Allataala, dè' naweddikki mangga'i Allataala pada-pada dato'-dato' polè ri ulawengngè iyarè'ga pèra'è iyarè'ga batuè iya riyèbbuè situru accana tolinoè. 30 Iyaro wettuè nallupaini Allataala adonggotta, iyakiya makkekkuwangngè nasuro manengngi tauwè ri sininna linoè toba' polè ri dosa-dosana. 31 Saba' pura napattentuni sèddi wettu untu' madèlèkiwi sininna linoèwè sibawa adèlè. Iyaro jamangngè napogau'i matu sèddi tau iya puraè napilè Allataala untu' iyaro. Na kuwammengngi sininna tauwè mateppe'i matu ri gau'èro, purani napatuwo paimeng Allataala iyaro tauwè polè ri amatèngngè!" 32 Wettunna naèngkalinga iyaro sining tauwè passalenna atuwongngè paimeng purana amatèngngè, engka polè ri mennang cawa-cawaiwi Paulus. Engkato makkeda, "Macinnaki mèngkalingai Saudara mabbicara paimeng passalenna gau'èwè. " 33 Nainappa nasalai Paulus iyaro addeppungengngè. 34 Iyakiya engka ri yelle'na mennang maccowè ri Paulus sibawa mateppe' ri Yèsus, padaènna: Dionisius anggotana majelis Arèopagus, sibawa sèddi makkunrai riyaseng Damaris, enrengngè siyagangngarè tau pasi.

Riwaya'na Rasul-Rasul-E 18

1 Purairo nasalaini Paulus Atèna nalao ri Korintus. 2 Kuwaniro siruntu' sèddi tau Yahudi riyaseng Akwila, assalenna polèi ri wanuwa Pontus. Silalona Akwila polè ri Italia sibawa bainèna Priskila. Laowi mennang ri Korintus saba' Kaisar Klaudius purani nasuro sininna tau Yahudiè massu polè ri Roma. Laoni Paulus cèllèngiwi mennang iya duwa, 3 nainappa monro kuwaro sibawa mennang enrengngè silaong mennang majjama, saba' assappa-sapparenna mennang pada-padai assappa-sapparenna Paulus, iyanaritu mèbbu kèma. 4 Iyakiya tungke' Esso Saba', laowi Paulus maccurita-curita ri bola assompangè untu' mèbbui sining tau Yahudiè sibawa sining tau Yunaniè, mateppe' lao ri Yèsus. 5 Lettu'nana Silas sibawa Timotius polè ri Makedonia, nakkègunanni sininna wettunna Paulus untu' mabbirittangngi biritta polè ri Allataala lao risining tau Yahudiè makkedaè Yèsus iyanaritu Arung Pappassalama' iya najjanciyangngè Allataala. 6 Iyakiya nasaba sining tauwè matteru-terui mèwai sibawa cellai, nakkeppikenni Paulus awuè polè ri pakèyanna selaku tanrang untu' parèngngerangiwi mennang asalanna. Makkedai, "Rèkko nakennako abala, asalammu mutotu! Leppe' limakku! Mappammulai makkekkuwangngè maèloka lao risining tau tenniyaè Yahudi. " 7 Nainappa Paulus nasalai mennang nalao monro ri bola ri seddèna bola assompangngè. Iyaro bolaè bolana sèddi tau tenniyaè Yahudi, iyakiya nasompai Allataala. Asenna iyaro tauwè Titius Yustus. 8 Iyakiya Krispus, kapalana iyaro bola assompangngè sibawa sininna kaluwargana mateppe'i lao ri Puwang Yèsus. Na maègato tau Korintus laingngè mèngkalingai biritta iya napalettu'è Paulus, namateppe'na mennang lao ri Yèsus nainappa ricemmè. 9 Risèuwaè wenni ri laleng sèuwaè pakkitang, makkedai Puwangngè lao ri Paulus, "Aja' mumètau! Abbicarako matteru aja' muwammekko. 10 Saba' Usibawakko. Dè' sèddi tau laing mullèi pogau'i majaè lao ri Iko, saba' maèga tau ri kotaèwè iyanaritu sining tauk-Ku. " 11 Rimakkuwannanaro monroni Paulus ri Korintus sèddi sitengnga taung ittana sibawa mappagguruwangngi ada-adanna Allataala lao ri mennang. 12 Wettunna Galio mancaji gubernur Akhaya, massèddini sining tau Yahudiè mèwai Paulus sibawa tiwii ri pengadilangngè. 13 Mapparape'ni mennang makkuwaè, "Iyaè tauwè napangaruiwi tau maègaè kuwammengngi nasompai Allataala sibawa cara dè'è nasicoco' sining parèntana Allataala iya nabbèrèyangngè Musa lao ri idi!" 14 Wettunna Paulus maèlo mappèbali, makkedani Galio lao risining tau Yahudiè, "Eh sining tau Yahudiè! Rèkko iya muwapparapekengngèwè sèddiwi pelanggarang iyarè'ga sèddiwi pangkaukeng maja, mèmeng sitinajaka sabbara' mèngkalingai papparapekemmuè. 15 Iyakiya iyaè assisalang ada-ada sibawa aseng-ngaseng enrengngè hukkung-hukkummu muto. Jaji harusu'ko pacceppiwi. Dè' usitujuiwi madèlèkiwi gau'-gau' makkuwaèwè!" 16 Nainappa Galio narukka mennang massu. 17 Natikkenni mennang Sostènès, kapalana bola assompangngèro, nabarasa'i ri yolona mejang pengadilangngè. Iyakiya Galio dè' sises-siseng napaduliwi gau'èro. 18 Purairo maitta mupa Paulus monro ri Korintus. Nainappa massimang lao risining tau mateppe'è kuwaro, nainappa sompe' silaong Priskila sibawa Akwila lao ri Siria. Ri Kèngkrèa, nacukkuru'ni Paulus gemme'na iya puraè naleppessang malampè nasaba jancinna lao ri Puwangngè. 19 Wettunna lettu ri Efèsus, nasalaini Paulus Priskila sibawa Akwila, nainappa muttama' ri bola assompangngè sibawa mappasicoco pallolongeng sibawa sining tau Yahudiè kuwaro. 20 Naèllauni mennang kuwammengngi monroi lebbi maitta sibawa mennang, iyakiya dè' namaèlo. 21 Namuni makkuwaro, wettunna maèlo joppa, makkedani, "Rèkko napuwèloi Allataala, maèloka lisu paimeng kuwaè. " Purana makkeda makkuwaro, nasalaini Efèsus. 22 Nonnona ri Kaisarèa, laoni ri Yèrusalèm untu' mabbèrè selleng lao ri jema'è kuwaro, nainappa matteru lao ri Antiokhia. 23 Monronana kuwaro siyagangngarè ittana, joppasi mitai daèra Galatia sibawa Frigia untu' pakkasse'i sining tau mateppe'è. 24 Iyaro wettuè, polèni ri Efèsus sèddi tau Yahudi iya jajiyè ri Alèksandria, asenna Apolos. Maccai mabbicara sibawa najeppuinna lise'na Kitta'è, 25 enrengngè pura ripagguru untu' missengngi pappagguruwangngè passalenna Yèsus. Nasibawang sumange' iya malluwa'-luwa'è mappaggurui sibawa matutu passalenna Yèsus, namuni nappai paccemmèna Yohanès bawang iya naissengngè. 26 Nabaranina Apolos mappammula mabbicara ri bola assompangngè na wettunna Priskila sibawa Akwila mèngkalingai pappagguruwanna, ritiwini ri mennang lao ri bolaè. Kuwaniro mennang napakatajang lao ri alèna sibawa lebbi sukku passalenna rancanana Allataala untu' passalama'i tolinoè naolai Yèsus. 27 Nainappa akkattana Apolos lao ri Akhaya. Nasining tau iya mateppe'è lao ri Yèsus ri Efèsus mokini sure' lao ri Saudara-saudara iya mateppe'è ri Akhaya kuwammengngi mennang maèloi tarimai Apolos sibawa masennang atinna. Na wettunna Apolos lettu ri Akhaya, manessani makkèguna senna' pattulunna lao risining tau iya mateppe'è lao ri Yèsus nasaba pammasèna Allataala. 28 Saba' nacaui Apolos sining tau Yahudiè ri laleng addebbakengngè ri yolona tau maègaè. Enrengngè napabuttiwi sibawa aya'-aya' polè ri Kitta'è makkedaè Yèsus ritu Arung Pappassalama' iya riyajjanciyangngè.

Riwaya'na Rasul-Rasul-E 19

1 Wettunna Apolos engka mupi ri Korintus, najalajja'i Paulus pedalamanna iyaro daèraè nanalettu'na ri Efèsus. Kuwaniro siruntu' siyagangngarè tau iya mateppe'ènna lao ri Yèsus. 2 Makkutanani lao ri mennang, "Puraniga Saudara-saudara natarima Rohna Allataala wettunna Saudara mateppe' lao ri Yèsus?" Nappèbali mennang, "Dè'pa. Mala dè'pa naengka nariyèngkalinga makkedaè engka Rohna Allataala. " 3 Nakkutana Paulus, "Rèkko makkuwaitu, nasibawang acemmèng aga saudara ricemmè?" Nappèbali mennang, "Nasibawang acemmènna Yohanès. " 4 Nainappa makkeda Paulus, "Yohanès cemmèi tauwè untu' pannessai makkedaè iyaro sining tauwè toba'ni polè ri dosa-dosana mennang. Iyakiya iyaro wettuè matteru mutowi Yohanès mappaddissengengngi lao risining tau Israèliè makkedaè harusu'i mennang mateppe' lao ri Tau iya polè matu ri monrinna, iyanaritu Yèsus. " 5 Wettunna mennang naèngkalinga iyaro, ricemmèni mennang ri laleng asenna Puwang Yèsus. 6 Na wettunna Paulus palènne'i limanna ri yasè'na mennang, rikuwasaini mennang ri Rohna Allataala, nainappa mennang mabbicara ri laleng sining basa iya makalallaingngè enrengngè palettu'i biritta polè ri Allataala. 7 Jumellana mennang kira-kira engka seppulo duwa tau. 8 Tellumpuleng ittana Paulus matterui mabbicara sibawa barani lao risining tauwè ri bola assompangngè enrengngè siddebba sibawa mennang untu' papahangi mennang passalenna Allataala sibawa Apparèntanna selaku Arung. 9 Iyakiya siyagangngarè ri yelle'na sining tauwèro matedde ati sibawa dè' namaèlo mateppe'. Ri yolona sininna tauwè iya maddeppungengngè kuwaro nacellai mennang pappagguruwangngè passalenna rancanana Allataala untu' passalama'i tolinoè naolai Yèsus. Rimakkuwannanaro nasalaini Paulus mennang, nainappa lao silaong sining tau maccowèriyèngngi Yèsus ri onrong assikolanna Tiranus. Kuwaniro esso-esso sitanai sibawa sining tauwè. 10 Napogau'i iyaro gau'èro matteru-teru sitaung ittana narapi sininna tauwè iya monroè ri daèra Asia, muwi tau Yahudi iyarè'ga tau bangsa laing, iya manenna naèngkalingai ada-adanna Puwangngè. 11 Napogau'i Allataala gau'-gau' iya dè'è gaga padanna naolai Paulus. 12 Rèkko lènso-lènso iyarè'ga kaing pabbekkeng iya puraè napakè Paulus ritiwi lao risining tau malasaè, majjappai lasana sibawa massu towi roh sètangngè polè ri mennang. 13 Engka siyagangngarè sanro Yahudi lao kègi-kègi, paddèsu'i roh majaè polè risining tauwè. Iyaro sining sanroè nacoba-coba towi pakèi asenna Puwang Yèsus untu' paddèsu'i iyaro roh-roh sètangngè. Makkedai mennang lao ri roh-roh sètangngèro, "Ri laleng asenna Yèsus iya nabbirittangngè Paulus, upaddèsu'ko!" 14 Engka pitu ana' worowanèna sèddiè kapala imang, riyasengngè Skèwa, iya pogau'èngngi gau' makkuwaèro. 15 Iyakiya makkedai iyaro roh sètangngè lao ri mennang, "Uwisseng Yèsus sibawa uwissetto Paulus, iyakiya iko niga?" 16 Nainappa iyaro tau nauttamakiyè sètang luppe sibawa luruiwi mennang sibawa masekkang senna' angkanna lari mennang polè ri bolaèro sibawa sining lo enrengngè mallusu-lusu, nasaba pakèyanna risapè'-sapè'ni polè ri watakkalèna. 17 Sininna tau Yahudiè sibawa tau bangsa laingngè iya monroè ri Efèsus mèngkalingai passalenna gau'èro, namètauna mennang. Napèdè ripoji-pojini asenna Puwang Yèsus. 18 Maèga tau iya mateppe'ènna ri Yèsus polè mangakuiwi ri yolona tau maègaè sining pangkaukenna mennang. 19 Iya mennang biyasaè makkègunang paddissengeng, napaddeppungenni kitta'-kitta'na nanatunui ri yolona tau maègaè. Iyaro ellinna kitta'-kitta'è rèkko rijumella manengngi engka kira-kira limappulo sebbu dowi pèra'. 20 Makkuwaniro nasibawang cara iya hèba'èro pèdè mallebbangngi ada-adanna Puwangngè sibawa pèdè masse'i pangarunna. 21 Puranana sining kajajiyangngèro, napettuiwi Paulus untu' lao ri Makedonia sibawa Akhaya nainappa matteru lao ri Yèrusalèm. Nakkeda Paulus, "Rèkko polèka kuwaro, harusu' tokka lao ri Roma. " 22 Nasuroni duwa tau polè risining pabbantunna, iyanaritu Timotius sibawa Erastus untu' lao ri Makedonia, na alèna monro mupi siyagangngarè ittana ri daèra Asia. 23 Kira-kira wettuènnaro nakajajiyang arocakeng battowaè ri Efèsus nasaba pappagguruwang passalenna Yèsus. 24 Saba' ri kotaèro engka sèddi panrè pèra' riyaseng Dèmètrius, iya mèbbuè bola-bola dèwata untu' Dèwi Artèmis. Usahana iyaro tauwè mappapolèi wassèlè iya battowaè lao risining pajjamana. 25 Rimakkuwannanaro napaddeppungenni sining pajjamana silaong sining pajjama tukang pèra' laingngè, nainappa makkeda, "Saudara-saudara! Taissettu makkedaè lolongekki wassèlè polè ri jama-jamangngèwè. 26 Makkekkuwangngè alètana mitai sibawa mèngkalingai aga napogau' iyaro si Paulus. Makkedai makkedaè sining dèwata iya naèbbuè rupa tauwè sitonget-tongenna tenniyai dèwata. Namaègani tau naèbbu mateppe' ri pappagguruwanna, tenniya bawang kuwaè ri Efèsus, iyakiya cèddè'pi ri sininnato daèra Asia. 27 Bahayana iyanaritu iyaè usahata lolongengngi matu aseng maja. Na tenniya iyaro bawang, sangadinna bolana Dèwi Artèmis naangga' èntèng towi enrengngè arajanna nalèjja'-lèjja'i; padahal alèna dèwi iya nasompaè sininna tauwè ri Asia sibawa sininna linoè!" 28 Naèngkalingana iyaro sining tauwè mapellani atinna, nainappa mennang gora-gora, "Tuwoi Artèmis, dèwinna Efèsus!" 29 Nallebbanna iyaro roca'è lettu ri sininna kotaè. Nainappa iyaro garembolang-garembolang paddoca'è natikkengngi Gayus sibawa Aristarkhus, iyanaritu sining tau Makedonia iya silaongengngèngngi Paulus ri laleng allalengenna, nainappa nassarènrèngeng mennang lao ri stadionna kotaèro. 30 Maèloi Paulus muttama' maccowèriwi mennang, iyakiya sining tau iya mateppe'è lao ri Yèsus kuwaro mattèyangngi. 31 Siyagangngarè tomarajana iyaro daèra Asia, iya massellaowè sibawa Paulus, suroi tauwè paissengiwi Paulus kuwammengngi na aja' nappaitangngi alèna ri stadiongngèro. 32 Iyaro wettuè sining tau maddeppungengngè ri stadiongngèro mancaji kacauni. Engka gora makkuwaè, engka gora makkuwaro, nasaba maègangngèngngi polè ri mennang dè' naissengngi aga saba'na mennang naddeppungeng kuwaro. 33 Sibagiyang polè risining tauwèro masengngi Alèksander dulungengngi, nasaba alèna ritu risorong liyolo risining tau Yahudiè. Nabbèrèna tanrang Alèksander sibawa limanna untu' mèllauwi riwèrèng kasempatang bèlai alèna ri yolona sining tauwèro. 34 Iyakiya naitana mennang makkedaè tau Yahudiwi, massama-samanni mennang gora loppo, "Tuwoi Artemis, dèwinna tau Efèsus-è!" 35 Angkanna jurutulisi'na kotaè naullèni pattennangngi tau maègaèro. Makkedai, "Pabbanuwana Efèsus! Tungke' tau missengngi makkedaè Efèsus ritu kota iya piyaraèngngi bolana Dèwi Artèmis sibawa batu mapaccingngè iya sempè'è polè ri langiè. 36 Dè'gaga sèddi tau mullèi bantai iyaro gau'è. Rimakkuwannanaro tennanno sibawa aja' mupogau'i sèuwaè sibawa mapperi-peri. 37 Iyaè sining tauwè, mutiwii kuwaè tenniya nasaba purai mennang maddampo bola dèwa iyarè'ga nasaba purai mennang nacella-cella dèwitta. 38 Rèkko iyaro Dèmètrius sibawa sining pajjamana mapparapekengngi sèddiè tau, leppessangngi mennang natiwi iyaro parakarana lao ri pengadilangngè. Tattimpa'i pengadilangngè untu' iyaro sibawa sining pajaba'na pamarèntaè tuli engkai. 39 Iyakiya rèkko engka mupa sèuwa laingngè iya mucinnaiyè, iyaro harusu'i ripacceppi ri laleng addeppungenna tau maègaè iya essa. 40 Saba' aga iya kajajiyangngè iya essoèwè weddingngi mabbahaya ri idi. Weddikki riteppu pakangka ronta, nasaba dè' tappunnai sèddi alasang untu' pattongengngi iyaè roca'è. " 41 Puranana napowada iya manennaro, iyaro juru tulisi'na kotaè nasuroni iyaro tau maègaè lisu.

Riwaya'na Rasul-Rasul-E 20

1 Tennannana paimeng keadaangngè ri Efèsus, napaddeppungenni Paulus jema'è sibawa nawèrènna dorongang mennang. Nainappa massimanni patterui joppana lao ri Makedonia. 2 Laowi ri daèra-daèra Makedonia sibawa mabbèrè maèga pangaja risining tau mateppe'è ri Yèsus kuwaro untu' mpèrèngngi dorongang mennang. Nainappa lao ri Yunani. 3 Tellumpuleng ittana monro kuwaro, Na wettunna sadiya-sadiya untu' sompe' lao ri Siria, engka karèba makkedaè sining tau Yunaniè massèddiwi untu' mpunoi. Rimakkuwannanaro napettuini untu' lisu paimeng lalo ri Makedonia. 4 Sopater ana' Pirus iya assalennaè polè ri Bèrèa laoni silaong alèna; makkuwatoro Aristarkhus sibawa Sèkundus tau Tèsalonikaè sibawa Gayus tau Dèrbè. Makkuwatoro Timotius, Tikhikus sibawa Trofimus, sining tau polè ri daèra Asia. 5 Napoddiyoloini mennanro nainappa natajekki ri Troas. 6 Puranana Ramè-ramè Roti Dè'è Raginna, sompe'ni salaiwi Filipi. Limangngesso ri munrinna maddeppungenni paimeng sibawa mennang ri Troas. Simingguki monro kuwaro. 7 Wenni Aha'na maddeppungekki untu' sisama manrè secara massilessureng. Mabbicara-bicarani Paulus sibawa sining tauwè, nasaba mammènasani joppa pappa bajana. Narapi tengnga bennièPaulus mabbicara matteru. 8 Ri laleng bili' ri langga' yasè'è, onrotta maddeppungenro, engka maèga lampu. 9 Engka sèddi kallolo riyaseng Eutikhus tudang ri tellongengngè. Nasaba dè' nappèsau-pèsau Paulus mabbicara, iyaro kalloloè cakkaruddu senna'ni angkanna matinro ri tellongengngèro, nanasempè'na polè ri langga' telluè. Wettunna mennang nakka, matèni. 10 Iyakiya nonnoi Paulus ri yawa, nainappa lèwu ri yasè'na iyaro kalloloè sibawa nakaddaonna. Nakkeda Paulus, "Aja' mubata-bata, tuwo mupi!" 11 Nainappa mènrè paimeng Paulus ri yasè, nanabagè-bagè rotiè nasisama manrè. Maittanana mabbicara sibawa sining tauwè narapi èlè, joppani Paulus. 12 Iyaro sining tauwè natiwini lisu iyaro kalloloè sibawa tuwo ri bolana. Masennanni mennang sibawa tassalèwona. 13 Laoni ri kappala'è nainappa sompe'ni lebbi riyolo lao ri Asos untu' duppaiwi Paulus ri kappala'è kuwaro. Alèna pura matoro'i makkuwaro saba' maèloi lao kuwaro lalo ri pottanangngè. 14 Puranana siruntu' ri Asos, masitta'ni Paulus mènrè ri kappala'è nainappaki sompe' lao ri Metilènè. 15 Polè kuwaro sompe'si, napappa bajana lettu'ni ri onrong siyolongngè sibawa Khios. Sangadinnana lettu'ni ri Samos sibawa siesso rimunrinna ri Milètus. 16 Pura napattentuni Paulus untu' dè' nalèppang ri Efèsus, kuwammengngi aja' nabbèyang wettu ri daèra Asia. Macinnai masitta-sitta lettu ri Yèrusalèm ri Esso Maraja Pèntakostaè. 17 Polè ri Milètus kirinni Paulus karèba lao ri Efèsus untu' mèllauwi sining pamimpinna jema'è kuwaro lao mèwai sita alèna. 18 Wettunna mennang lettu, makkedani Paulus lao ri mennang, "Naisseng Saudara-saudara pèkkugika tuwo wettuèwè ri yelle'mu mappammulai ri esso mammula lettu'ku ri Asia. 19 Nasibawang ati mariyawa sibawa maèga uwai mata, majjamaka untu' Puwangngè ri tengnga-tengngana anrasa-rasangngè iya upèneddingiyè nasaba rencanana sining tau Yahudiè iya majaè. 20 Naisseng saudara makkedaè dè' ubata-bata paissengiko aga makkèguna lao ri iko. Upagguruko ri addeppu-deppungenna tau maègaè sibawa risining bolaè. 21 Muwi lao risining tau Yahudiè muwi lao risining tau bangsa laingngè tuli mabbèrèka papparèngngerang kuwammengngi natoba' mennang polè ri dosa-dosana sibawa lao ri Allataala, enrengngè mateppe' ri Puwang Yèsus. 22 Makkekkuwangngè untu' turusiwi parèntana Rohna Allataala, laoka ri Yèrusalèm. Nadè' uwissengngi aga maèlo kajajiyang ri iyya kuwaro. 23 Iya bawang uwisseng makkedaè ri tungke'-tungke' kota, mattedde'ni Rohna Allataala paissengika, makkedaè muttama'ka matu tarungkuè sibawa manrasa-rasa matu. 24 Iyakiya dè' upaduliwi atuwokku, assaleng uwullè muwi paccappui jamang iya nawèrèngngèkka Puwang Yèsus sibawa assaleng matinulu muka lettu ri ajjalekku untu' mabbirittangngi Karèba Madècèngngèro passalenna pammasèna Allataala. 25 Pura manenno Saudara-saudara ulaowi sibawa pura toni ubirittangekko passalenna pèkkugi Allataala mapparènta selaku Arung. Upèrasaini makkekkuwangngè dè'na tasiruntu'na matti paimeng Saudara-saudara. 26 Rimakkuwannanaro upowadakko iya essoè sibawa mattentu makkedaè rèkko engka ri yelle'mu iya binasaè matu, tenniya asalakku iyaro. 27 Dè' naengka ulari polè ri jama-jamakku untu' pakatajangngi lao ri iko sininna rancanana Allataala. 28 Sitinajako jagaiwi alèna sibawa jagai towi sininna jema'è iya puraè nabbèrèyang Rohna Allataala lao ri iko untu' rijagai, saba' pura riyakkako mancaji jennang ri jema'èro. Sitinajako jagaiwi iyaro jema'na Allataala pada-pada pakkampiè jagaiwi bimbala'na, nasaba Allataala pura pancajiwi iyaro jema'è appunnangeng ri Alèna naolai amatènna Ana'-Na. 29 Pada-padaènna iyya, pasti polèi matu sining asu ale'è iya masekkangngè ri tengnga-tengngamu. Nasining tau iya mujagaiyèro mancajiwi matu nanrèna iyaro sining asu ale'è. 30 Mala polèto ri yelle'na Saudara-saudara mompoi matu sining tau iya mabbirittangngèngngi karèba dè'è natongeng. Napogau'i makkuwaèro kuwammengngi nasining tau iya mateppe'ènna ri Yèsus pusai naccowèriwi mennang. 31 Rimakkuwannanaro jaga-jagako! Engngerangngi makkedaè telluttaungngi ittana maèga uwai mata, esso wenni dè' naengka uwappèsau paggurui tungke' tau polè ri iko. 32 Makkekkuwangngè uwabbèrèyakko lao ri Allataala kuwammengngi Napiyarako sibawa kuwammengngi muwakkatenning ri biritta pammasèna Allataala. Allataala mappunnai kuwasa untu' pèwatangiko sibawa mpèrèkko barakka-barakka iya puraè Napassadiya untu' sininna umma'-Na. 33 Dè'pa naengka ucinnaiwi dowiè iyarè'ga pakèyang polè risèddiè tau. 34 Alèna saudara missengngi, makkedaè sibawa awatangekku majjamaka untu' paggenne'i apparelluwakku sibawa sellao-sellaoku iya maccowèriyèkka. 35 Ri laleng sininna gau'è purano uwèrèng conto, makkedaè ri laleng majjama marejjing pada-pada iyaè harusu'ki tulungngi sining tau iya dè'è namawatang. Nasaba harusu'ki mèngngerangngi aga pura napowada Puwang Yèsus, 'Lebbi masennang muwi mabbèrè naiya mattarimaè. ' " 36 Puranana Paulus mabbicara, makkaluttuni sibawa iya maneng mennang nainappa massempajang. 37 Teri manenni mennang nanakaddao towi Paulus sibawa massimang. 38 Messèni mennang, nasaba makkedai Paulus makkedaè dè'na mennang naitai paimeng. Nainappa mennang mantara'i lettu ri kappala'è.

Riwaya'na Rasul-Rasul-E 21

1 Siyassimangenni sibawa sining pamimpinna jema'è iya polè ri Efèsus, nainappa nasalai mennang. Nainappa sompe'ki matteru lao ri pulo Kos; na pappa bajanana lettu'ni ri pulo Rodos. Polè kuwaro sompe'ki matteru lao ri pelabuhang Patara. 2 Ri Patara, rilolongenni kappala iya maèloè lao ri Fènèsia. Mènrè'ni ri kappala'èro nainappa joppa 3 sibawa sompe'ni angkanna rita pulo Siprus ri seddè abèyota; iyakiya sompe'ki matteru mattuju ri Siria. Mappottananni ri Tirus, saba' iyaro kappala ritonangiyè maèloi bongkara'i lurenna kuwaro. 4 Laoni cèllèngiwi sining tau iya mateppe'è ri Yèsus ri onrongngèro, nainappa monro kuwaro ri mennang siminggu ittana. Nasaba panunju'na Rohna Allataala, napangajarini mennang Paulus kuwammengngi aja' nalao ri Yèrusalèm. 5 Iyakiya cappunana wettunna untu' monroki kuwaro risalaini mennang naripatteru joppatta. Silaong manenni mennang sibawa bainèna kuwaèttopa ana'-ana'na mantara'ki lettu ri saliweng kota. Kuwaniro ri wiring tasi'è, makkaluttu manekki massempajang. 6 Purairo pada majjama'ni, nainappa mènrè'ki ri kappala'è nalisu tona mennang ri bolana. 7 Sompe'ni matteru polè ri Tirus lettu ri Ptolemais. Laoni kuwaro cèllèngiwi Saudara-saudara mateppe'è, untu' passalama'i mennang, namonroni siesso sibawa mennang. 8 Pappa bajanana joppasiki, natalettu ri Kaisarèa. Laoni kuwaro ri panginjil iya riyasengngè Filipus, nataonro ri bolana. Sala sèddinna iyanaritu polè ri iya pitu tau tappilè ri Yèrusalèm. 9 Eppa ana'na ana'dara pura riwèrènni pakkullèng ri Allataala untu' mabbirittangngi karèba polè ri Allataala. 10 Siyagangngarè ittana kuwaro, engkani polè ri Yudèa sèddi nabi riyaseng Agabus. 11 Laoni ri idi nainappa nala babbanna Paulus. Nasibawang iyaro babbangngè nasiyoi ajèna sibawa limanna nainappa makkeda, "Iyanaè napowada Rohna Allataala: Iyaè tau punnaè babbangngè risiyoi matu pada-pada iyaè ri Yèrusalèm risining tau Yahudiè, sibawa riyabbèrèyang lao risining tau bangsa laingngè iya tenniyaè Yahudi. " 12 Wettutta mèngkalingai iyaro, idi sibawa sininna saudarata iya monroè ri Kaisarèa naèllau senna'ni ri Paulus kuwammengngi aja' nalao ri Yèrusalèm. 13 Iyakiya mappèbaliwi, "Aga gunana Saudara teri pada-pada iyaè angkanna muwèbbui atikku ancuru? Sadiyaka tenniya bawang untu' ritikkeng kuwaro, iyakiya muni untu' matè nasaba Puwang Yèsus. " 14 Dè' namaèlo Paulus mèngkalingaki, natamappèsauna mattèyangngi. Makkedaki, "Leppessanni siya èlona Puwangngè jaji. " 15 Monronana kuwaro siyagangngarè ittana, ripassadiyani barab-baratta, nainappa joppa lao ri Yèrusalèm. 16 Siyagangngarè saudara polè ri Kaisarèa laoto silaongekki untu' mantara'ki lao ri bolana Manason, nasaba ri bolana ritu maèloki mappèruma. (Manason iyanaritu sèddiwi tau Siprus iya maittaènna maccowè ri Yèsus. ) 17 Wettutta lettu ri Yèrusalèm, naduppaini Saudara-saudarata kuwaro sibawa masennang. 18 Pappa bajana silaonni Paulus lao cèllèngiwi Yakobus; sininna pamimping-pamimpinna jema'è engka towi kuwaro. 19 Puranana ripassalama' mennang, nacuritani Paulus lao ri mennang sininna sèuwa-sèuwaè iya napogau'è Allataala naolai alèna ri yelle'na sining tau tenniyaè Yahudi. 20 Purana naèngkalinga iyaro curitana Paulus, napoji manenni Allataala. Nainappa mennang makkeda lao ri Paulus, "Saudara Paulus! Harusu'i naisseng Saudara makkedaè massebbu-sebbuni tau Yahudi mateppe' lao ri Yèsus. Iya maneng mennang iyanaritu sining tau iya matinuluè turusiwi sining parèntana Allataala iya napalettu'è Musa. 21 Na makkekkuwangngè naèngkalingani mennang makkedaè Saudara paggurui sininna tau Yahudiè iya monroè ri yelle'na bangsa laingngè, kuwammengngi naleppessangngi hukkunna Musa. Saudara pangajariwi mennang kuwammengngi aja' mennang nasunna'i ana'-ana'na iyarè'ga naccowèriwi ade'na Yahudiè. 22 Makkekkuwangngè sining tau Yahudiè iya mateppe'ènna tentu naèngkalingai matu makkedaè engkani Saudara kuwaè. Jaji pèkkugini makkekkuwangngè? 23 Madècèngengngi accowèriwi pangajata. Engka eppa tau kuwaè iya puraè majjanci lao ri Puwangngè. 24 Nah, sitinajai Saudara pakangka upacara pappèpaccing alè silaong mennang, sibawa tanggungngi ongkoso'na mennang kuwammengngi nawedding ricukkuru' gemme'na mennang. Nanallalengiwi matu namanessa lao ri sininna tauwè makkedaè aga iya naèngkalingaè mennang passalenna Saudara dè' natongeng, nasaba alèna Saudara pajoppa mutowi hukkunna Musa. 25 Iyakiya passalenna tau bangsa laingngè iya tenniyaè Yahudi iya mateppe'ènna ri Yèsus, purani kiring sure' lao ri mennang passalenna apettutta makkedaè dè' nawedding mennang manrè inanrè iya puraè riyakkasuwiyangeng lao ri barahalaè, dè' nawedding manrè dara, iyarè'ga manrè olokolo iya matè riyanrekkè'è; sibawa dè' nawedding pogau' pangkaukeng-pangkaukeng malawengngè. " 26 Nalaona Paulus silaong iya eppa tauwèro nainappa pakangka upacara pappèpaccing alè silaong mennang pappa bajana. Nainappa mennang muttama' ri Bolana Puwangngè untu' powadangngi siyagangngessopi nappa upacara pappèpaccingngèro leppe' sibawa akkarobangenna mennang tungke'-tungke' riyakkasuwiyangeng. 27 Wettunna iyaro atte wettu pitungngessoè mawè'ni cappu, siyagangngarè tau Yahudi polè ri daèra Asia mitai Paulus ri laleng Bolana Puwangngè. Nainappa napakiri-kiri tau maègaè, nainappa nakkatenning Paulus 28 nagora-gorato, "Eh sining tau Israèliè, tulungngi! Iyanaè taunna iya laowè kègi-kègi mappagguru ri sininna tauwè sining pappagguruwang iya mèwaèngngi bangsa Israèliè, naèwai hukkunna Musa enrengngè naèwai iyaè Bolana Puwangngè. Na makkekkuwangngè mala natiwii sining tau tenniyaè Yahudi muttama' ri laleng Bolana Puwangngè nanapanajisi'i onrong mapaccingngèwè!" ( 29 Makkeda makkuwairo nasaba purani mennang naita Trofimus iyaro tau Efèsus-è ri kotaè silaong Paulus; nanasengngi Paulus pura tiwii muttama' ri Bolana Puwangngè. ) 30 Kacauni sininna kotaè, sibawa sininna tauwè makkalari-larinni maddeppu-deppungeng. Natikkenni mennang Paulus sibawa nassarènrèngeng massu polè ri Bolana Puwangngè. Iyatoro wettuè naritongko tange'na Bolana Puwangngè. 31 Ri wettu makkuragana iyaro tau mèbbuè roca' mpunoi Paulus, engkana tau powadangngi komandang pasukang Romaè makkedaè sininna Yèrusalèm kacaui. 32 Matteruni iyaro komandangngè mobbii siyagangngarè parawira sibawa prajuri' nainappa mapperi-peri lao sibawa mennang ri onronna iyaro kacauè. Wettunna iyaro tau maègaè naita iyaro komandangngè sibawa pasukanna, mappèsauni barasa'i Paulus. 33 Laoni iyaro komandangngè ri Paulus nanatikkengngi, sibawa nasuroi tauwè rantèi. Nainappa iyaro komandangngè makkutana passalenna niga iyaro Paulus sibawa aga pura napogau'. 34 Sibagiyang polè ri tau maègaèro mappèbali makkuwaè na sibagiyassi mappèbali makkuwaro. Makkuwamani kacaunna iyaro keadaangngè angkanna iyaro komandangngè dè' naullèi missengngi aga sitongenna pura kajajiyang. Rimakkuwannanaro napparèntanni kuwammengngi naritiwi Paulus ri markas-è. 35 Wettunna mennang natiwi lettu ri addènèngngè iyaro sining tau mèbbuè akacaungeng, pèdè' majjallo'ni angkanna Paulus harusu' riyullè risining prajuri'è. 36 Riyaccowèriwi mennang polè ri monri ri garembolang pakkacauèro iya gora-goraè, "Unoi!" 37 Maèlona muttama' ri markas-è, makkedani Paulus ri komandangngèro, "Weddikka'ga mabbicara cinampe' sibawa Bapa'?" Nakkutana iyaro komandangngè, "Muwissegga mabbasa Yunani? 38 Rèkko makkuwaitu, tenniyakotu tau Masèrè'èro iya pakangkaè ronta riyolo nainappa tiwi patassebbu tau pangacau massenjata muttama' ri padang kessi'è?" 39 Nappèbali Paulus, "Tau Yahudika; pabbanuwanaka kota Tarsus, kota pentingngè ri Kilikia. Tulukka tapalaloka mabbicara lao risining tauwèro. " 40 Ripalalonana Paulus mabbicara, tettonni Paulus ri addènèngngè, nainappa mabbèrè tanrang sibawa limanna. Tennang manenni tauwè. Nainappa Paulus mabbicara lao ri mennang ri laleng basa Ibrani. Makkedai Paulus,

Riwaya'na Rasul-Rasul-E 22

1 "Bapa'-bapa' sibawa Saudara-saudara iya maneng! Maèloka bèlai alèku polè ri iko. Coba mèngkalingai!" 2 Wettunna mennang naèngkalingai Paulus mabbicara ri laleng basa Ibrani, pèdè' tennanni mennang. Napatteruni Paulus pappakatajanna. 3 Nakkeda Paulus, "Iyya tau Yahudika, jajika ri Tarsus ri wanuwa Kilikia, iyakiya ripawekke'ka kuwaè ri Yèrusalèm sibawa ripagguru ri anrè guru lompoè Gamalièl ri laleng hukkung-hukkung iya nabbèrèyangngè Musa lao ri nènè-nènèta. Pada-pada maneng muto saudara-saudara kuwaè essoèwè, iyya mapato senna' muto lao ri Allataala. 4 Ucallai gangka matè sining tau maccowèè ri pappagguruwang baruèro. Iya maneng mennang, muwi worowanè iyarè'ga makkunrai, utikkengngi nainappa uputtama ri laleng tarungkuè. 5 Alèna imang lompoè sibawa sininna Mahkama Agamaè naullè mabbèrè asabbiyang makkedaè dè' uwabbellè. Saba' mennang ritu pura mpèrèkka sure' pangantara' iya ripattujuè lao risining tau Yahudiè ri Damsyik. Nasibawang iyaro sure'è weddikka tikkengngi kuwaro sining tau iya mateppe'è lao ri pappagguruwangngèro sibawa tiwii mennang ri Yèrusalèm untu' rihukkung. " 6 "Wettukku ri laleng allalengengngè sibawa mawè'nana lettu ri Damsyik, kira-kira tangasso, sèuwa cahaya iya macakka senna'è tappa mattappa polè ri langiè mattulilingika. 7 Rebbana ri tanaè nainappa mèngkalingaka sèuwa sadda makkeda lao ri iyya, 'Saulus, Saulus! Magi mucallaka?' 8 Naumakkutana, 'Niga Iko, Puwang?' Pappèbalin-Na, 'Iyya'naè Yèsus, tau Nazarèt-èro iya mucallaè. ' 9 Sining tau iya engkaè kuwaro silaongekka mitai iyaro cahayaè, iyakiya dè' naèngkalingai mennang sadda iya mabbicaraè lao ri iyya. 10 Naumakkutanapa, 'Aga harusu' upogau', Puwang?' Nappèbali Puwangngè, 'Oto'no namutama ri Damsyik. Kuwaro matti ripaissengiko matu passalenna sininna iya naèloriyè Allataala mupogau'. ' 11 Butaka nasaba cahaya iya pawilo-wiloèro. Jaji sellao-sellaoku rènrèkka muttama' ri Damsyik. 12 Kuwaro engka sèddi tau riyaseng Ananias. Sèddiwi tau mètau ri Allataala sibawa matinului pogau'i hukkunna Musa lao ri idi. Sininna tau Yahudiè iya monroè ri Damsyik pakalebbi senna'i. 13 Polèni cèllèngika, nainappa tettong ri seddèku nakkeda, 'Saudara Saulus, sitinajako makkita paimeng!' Iyatoro wettuè uwakkai rupakku, nainappa nauwitani. 14 Nainappa makkeda lao ri iyya, 'Allataalana nènè-nènèta pura pilèko kuwammengngi muwissengngi èlo-Na, sibawa kuwammengngi muwitai Yèsus, Atanna Allataala iya pogau'èngngi èlona Allataala enrengngè mèngkalingai saddanna Yèsus. 15 Mancajiko matu sabbi untu' mabbirittangngi lao ri sininna tauwè aga pura muwita sibawa muwèngkalingai. 16 Makkekkuwangngè aja'na muwattajeng maitta. Oto'no, sibawa abbèrèyangngi alèmu ricemmè. Angobbino ri Puwangngè kuwammengngi namuripaleppe polè ri dosa-dosamu. ' " 17 "Lisuna ri Yèrusalèm, na wettukku massempajang ri Bolana Puwangngè, rikuwasaina ri Rohna Allataala. 18 Uwitani Puwangngè; makkedai lao ri iyya, 'Masitta'ko salaiwi Yèrusalèm, saba' sining tauwè kuwaè dè' namaèlo tarimai asabbiyammu passalek-Ku. ' 19 Umakkeda, 'Puwang, naisseng tongeng mennang makkedaè purana muttama' risining bola assompangngè untu' tikkengngi mennang sibawa barasa'i sining tau iya mateppe'è lao ri Iko. 20 Makkuwatoro wettunna sabbim-Mu Stèfanus riyuno, engka tokka kuwaro sibawa usitujui abbunowangngèro. Mala iyya monrowangngi pakèyanna sining tau iya mpunoèngngi. ' 21 Iyakiya makkedai paimeng Puwangngè lao ri iyya, 'Laono bawang, saba' maèlo-Ka suroko lao ri onrong iya mabèlaè lao risining tau tenniyaè Yahudi. ' " 22 Sining tauwè matteru mupi mèngkalingai Paulus mabbicara, iyakiya ri warèkkada paccappurennaro gorai mennang siullè-ullèna, "Uno bawanni tau makkuwaèro. Dè' nasitinaja tuwo!" 23 Nappapirengngi jumbana mennang nagorato sibawa pattarumpui awuè ri yelle'è. 24 Nassurowanni iyaro komandanna pasukang Romaè naritiwi Paulus ri markas-è kuwammengngi nariparèssa kuwaro sibawa ricalla untu' missengngi aga saba'na nagora makkuwaro sining tau Yahudiè lao ri alèna. 25 Iyakiya wettunna Paulus pura risiyo untu' ribarasa', makkedani Paulus lao ri parawira iya tettongngè kuwaro, "Ripalaloga barasa'i sèddiè warga akkarungeng Roma riwettu dè'napa nariadèlèki?" 26 Naèngkalinganaro, laoni iyaro parawiraè ri komandang pasukangngè sibawa makkeda, "Aga iyaè maèlo napogau' Bapa'? Iyaè tauwè pabbanuwana wanuwa Roma!" 27 Nalaona iyaro komandangngè ri Paulus sibawa makkutana, "Coba powadai, pabbanuwanakoga wanuwa Roma?" Nakkeda Paulus, "Iyyè, pabbanuwanaka wanuwa Roma. " 28 Nakkeda paimeng iyaro komandangngè, "Mancajika pabbanuwana wanuwa Roma sibawa maèga senna' uwaja!" Nappèbali Paulus, "Iyakiya iyya jajika selaku pabbanuwana wanuwa Roma. " 29 Iyatoro wettuè anggota-anggota tentaraè iya maèloè parèssai iyaro Paulus, soroni sibawa iyaro komandangngè mètau toni nasaba purani narantè Paulus, padahal Paulus pabbanuwana wanuwa Roma. 30 Iyaro komandang pasukang Romaè macinna senna'i missengngi aga sitongenna nassabariwi sining tau Yahudiè napasalai Paulus. Rimakkuwannanaro pappa bajanana naobbini kapala-kapala imangngè sibawa Mahkama Agamaè kuwammengngi naddeppungeng. Nainappa rileppessang Paulus polè ri balenggunna, naritiwi mangolo ri iya maneng mennang.

Riwaya'na Rasul-Rasul-E 23

1 Naitani Paulus iyaro anggota-anggota mahkamaè nainappa makkeda, "Saudara-saudaraku! Narapi essoèwè dè' umarasa pasala lao ri Allataala ri laleng atikku passalenna atuwo-tuwokku. " 2 Wettunna Paulus makkeda makkuwaro, Imang Lompoè Ananias nasuroni tau iya tettongngè ri seddèna Paulus leppa'i tèmunna Paulus. 3 Nakkeda Paulus lao ri imang lompoèro, "Allataala pasti leppa'ko, tau munapè' iya majjaiyèngngi mapaccing! Tudakko kuwatu madèlèkika manuru' hukkunna Musa, padahal alèmu majjalèkkai parènta-parèntaèro sibawa suroi tauwè leppa'ka!" 4 Nakkeda sining tauwè iya engkaè ri seddèna Paulus lao ri Paulus, "Mupakatunai imang lompona Allataala!" 5 Nappèbali Paulus, "Oh dè' uwissengngi, Saudara-saudara, makkedaè imang lompoi. Mèmeng ri laleng Kitta'è engka taroki, 'Aja' mupakatunai pamimping bangsamu. ' " 6 Naitai Paulus makkedaè sibagiyang polè ri anggota-anggota mahkamaèro sining tau Saduki sibawa sibagiyassi sining tau Farisi. Rimakkuwannanaro nakkeda lao ri mahkama agamaèro, "Saudara-saudara! Iyya sèddika tau Farisi, wija-wijanna Farisi. Riadèlèkika kuwaè nasaba mateppe'ka makkedaè sining tau matè tuwoi paimeng. " 7 Wettunna makkeda makkuwaro, iyaro sining tau Farisiè sibawa sining tau Sadukiè mammulani mappangèwang, angkanna iyaro sidangngè tabbagèni mancaji duwa golongang. ( 8 Nasaba sining tau Sadukiè mappallolongengngi makkedaè tau matè dè'na natuwo paimeng, sibawa dè'gaga malaèka', enrengngè dè'gaga roh-roh; padahal tau Farisiè mateppe'i engka maneng iyaro. ) 9 Naompona rukka masero. Siyagangngarè tau Farisi iya mancajiyè guru agama tettong sibawa tonget-tongeng mèwai. Makkedai mennang, "Manuru' idi, iyaè tauwè dè' napasala muwi cèddè! Naullè mèmeng engka roh iyarè'ga malaèka' iya mabbicaraè ri alèna!" 10 Iyaro appangèwangngè pèdè' maseroni angkanna iyaro komandangngè mètauni rèkko Paulus riborongngi matu ri mennang. Jaji nasuroni pasukanna lao malai Paulus polè ri tengnga-tengngana sining tauwèro nanatiwii ri markas-è. 11 Wenni paimenna tettonni Puwang Yèsus ri benrènna Paulus sibawa makkeda, "Pakkasse'i atimmu! Purani muwabbèrèyang asabbiyammu passalek-Ku ri Yèrusalèm. Harusu' tokko matu mabbèrèyangngi asabbiyangngèro ri Roma. " 12 Pappa bajanana, subu-subu mupi, mammulani sikongkolo sining tau Yahudiè. Mattanroni mennang dè' namaèlo manrè iyarè'ga mènung rèkko dè'pa mennang naunoi Paulus. 13 Engka patappulo tau lebbi iyaro sikongkolo'è. 14 Laoni mennang ri kapala-kapala imangngè sibawa pamimping-pamimping Yahudiè namakkeda, "Puraki mattanro massibawa, dè' tamaèlo manrè iyarè'ga mènung agi-agi rèkko dè'pa taunoi Paulus. 15 Nah, Saudara-saudara anggotana Mahkama Agamaè sitinajai makkekkuwangngè kiring sure' lao ri iyaro komandang pasukang Romaè untu' mèllauwi, tiwii paimeng Paulus mangolo ri iko, samannako maèlo parèssai paimeng parakarana lebbi ati-ati. Nasadiyaki matu untu' mpunoi riwettu dè'napa nalettu' kuwaè. " 16 Iyakiya naèngkalingai ana'na ana'daranna Paulus iyaro rancana assikongkolokengngè. Nalaona ri markas-è nanapowadangngi Paulus iyaro gau'è. 17 Nanaobbina Paulus sèddi parawira nanakkeda ri alèna, "Tiwii iyaè kalloloè ri komandangngè, engka maèlo nalaporo' ri alèna. " 18 Natiwini parawiraè iyaro kalloloè ri komandangngè sibawa makkeda, "Paulus, tau ritahangngèro, naobbika sibawa naèllauka tiwii iyaè kalloloè ri Bapa'; engka maèlo nalaporo'. " 19 Iyaro komandangngè nakkatenninni limanna iyaro kalloloè, nainappa natiwi massala ri benrèng nakkutana, "Aga maèlo mupowadakka?" 20 Nappèbali iyaro kalloloè, "Massèddiwi sining tau Yahudiè untu' mèllauwi Bapa' tiwii Paulus mangolo ri Mahkama Agamaè baja, pada-pada rèkko maèloi parèssai paimeng parakarana sibawa pèdè' ati-ati. 21 Iyakiya aja' Bapa' taturusiwi parèllaunna mennanro, nasaba engka lebbi patappulo tau mallekke' untu' tajengngi ri lalengngè. Pura manenni mattanro dè' namaèlo manrè sibawa mènung rèkko dè'pa naunoi Paulus. Sadiyani makkekkuwangngè; pappèbalinna mani Bapa' natajeng. " 22 Nakkeda iyaro komandangngè, "Aja' mupowadangngi muwi niga makkedaè purai mulaporo' iyaè ri iyya. " Nainappa nasuro iyaro kalloloè lisu. 23 Nainappa iyaro komandangngè mobbi duwa parawira, nanakkeda lao ri mennang, "Passadiyako duwa ratu prajuri' sibawa pituppulo tentara makkinnyarang sibawa duwa ratu tentara mabbessi untu' joppa tettè asèra iyato wennièwè lao ri Kaisarèa. 24 Passadiyangeng towi anyarang untu' natonangi Paulus namutiwii sibawa salama' lettu ri Gubernur Fèliks. " 25 Naokina sure' iyaro komandangngè iya makkuwaèwè oninna, 26 "Iya Malebbiè Gubernur Fèliks. Salama' polè ri Klaudius Lisias! 27 Iyaè tauwè natikkengngi sining tau Yahudiè nacèddè'pi nanaunoi mennang, rèkko dè' upolè sibawa pasukakku, sibawa passalama'i; saba' uwèngkalingai makkedaè pabbanuwanai wanuwa Roma. 28 Nasaba macinnaka missengngi aga sitongenna asalanna iya riteppuwangngèngngi, utiwini lao ri Mahkama Agamana mennang. 29 Manessani dè'gaga napogau' iya sitinajaè rihukkung sibawa pahukkungeng matè iyarè'ga ritarungku. Iya nateppuwangngèngngi mennang banna engka assisumpungenna sibawa hukkung-hukkung agamana mennang. 30 Nainappa ripaissengika engka rancana maja polè risining tau Yahudiè lao ri alèna. Jaji matteruni ukiring lao ri Bapa' Gubernur. Napurani usuro sining tau iya tenre'èngngi tiwii iyaro napputanekengngè lao ri Bapa'. " 31 Napajoppani iyaro anggota-anggota tentaraè tugasna. Nalani mennang Paulus nanatiwii iyaro wenniè lettu ri Antipatris. 32 Pappa bajanana naleppessanni mennang tentara makkinnyarangngè patterui joppana sibawa Paulus, na alèna mennang lisuni ri markas-è. 33 Wettunna iyaro tentara makkinnyarangngè lettu ri Kaisarèa, napalettu'ni iyaro sure'è ri gubernur-è, nainappa nabbèrèyang Paulus lao ri alèna. 34 Purana nabaca sure'è iyaro gubernur-è, makkutanani ri Paulus polè kègi assalenna. Wettunna naisseng makkedaè Paulus polèi ri Kilikia, 35 makkedani, "Madècènni! Maèloka parèssai parakaramu, rèkko sining tau iya mapparapekengngèkko lettu'ni kuwaè. " Nainappa napparèntang kuwammengngi naritahang Paulus ri laleng saorajana Hèrodès.

Riwaya'na Rasul-Rasul-E 24

1 Limangngesso ri munrinna, laoni Imang Lompoè Ananias sibawa sining pamimpinna Yahudiè ri Kaisarèa silaong sèddi pangacara iya riyasengngè Tèrtulus. Mangoloni mennang ri Gubernur Fèliks sibawa pangoloi napparapekengngè mennang lao ri Paulus. 2 Wettunna Tèrtulus riyobbi liyolo, nateppuni Paulus makkuwaè, "Bapa', Gubernur Iya Malebbiè! Ri yawa parèntana Bapa' amangngi wanuwatta. Sibawa polè ri apanrènna Bapa' maèga pappèdècèng ripogau' untu' bangsata. 3 Iya manennaro tuli ritarimai sibawa mattarima kasi sibawa pappakaraja iya kaminang matanrè muwi kègi. 4 Iyakiya kuwammengngi aja' natabbè maèga wettunna Bapa', uwèllauwi tennapodo naèngkalingai Bapa' pappotane'ta iya maponco'èwè. 5 Rilolongengngi iyaè tauwè pangacau iya mabbahayaè. Kègi-kègi paompoi arukkang ri yelle'na sining tau Yahudiè sibawa mancajiwi pamimpinna gerakang tau Nazarèt-è. 6 Mala purani nacoba untu' panajisi'i Bolana Puwangngè, iyakiya ritikkengngi. Akkattata maèloki madèlèkiwi situru hukkunna agamata. 7 Iyakiya nasittaiki komandang Lisias, 8 sibawa napparèntangngi kuwammengngi sining tau mapparapekengngèngngi ripangoloi ri Bapa'. Rèkko naparèssai Bapa' iyaè tauwè, alèna Bapa' mèngkalingai matu polè ri alèna atongengenna iya maneng ritenrekengngèngngi. " 9 Sining tau Yahudiè kuwaro maccowèto tenre'i Paulus sibawa pattongengngi sininna iya napowadaè Tèrtulus. 10 Nainappa iyaro gubernur-è mabbèrè tanra-tanrang lao ri Paulus makkedaè'weddinni mabbicara. Nakkeda Paulus, "Uwisseng Bapa' mattaut-taunni ittana mancaji hakinna wanuwaè. Iyanaro saba'na masennang pappèneddikku bèlai alèku ri yolona Bapa'. 11 Wedding alèna Bapa' salidikiwi makkedaè dè' nalebbi seppulo duwa esso labe'è laoka ri Yèrusalèm untu' massempajang. 12 Nadè' naengka napolèika iyaro sining tau Yahudiè mappangèwang sibawa muwi sèddi tau iyarè'ga paddeppungeng tau untu' pakangka akacaungeng muwi ri Bolana Puwangngè iyarè'ga risining bola assompangngè iyarè'ga kègi-kègi ri laleng kotaè. 13 Dè'to naullèi mennang pabuttiwi sining nattenrekengngè iya napangoloè ri Bapa' passalekku. 14 Mèmeng harusu' uwangakui lao ri Bapa' makkedaè usompai Allataalana nènè-nènèta situru nappagguruwangngè Yèsus iya nangga'è mennang sala. Iyakiya uwatepperi mupi iya manenna tarokiè ri laleng Kitta'na Musa sibawa Kitta'na Nabi-nabiè. 15 Pada-pada mennang, mappunnai tokka paddennuwang ri Allataala makkedaè sininna tauwè tuwoi matu paimeng polè ri amatèngngè -- sining tau makessingngè, iyarè'ga sining tau majaè! 16 Iyanaro saba'na nauwakkuraga senna', kuwammengngi namapaccing atikku lao ri Allataala sibawa mapaccing lao ri rupa tauwè. 17 Labe'nana siyagangngarè taung dè' uwonro ri Yèrusalèm, lisuka kuwaro untu' tiwi bantuwang dowi lao ri bangsaku sibawa untu' makkasuwiyangeng akkarobangeng lao ri Allataala. 18 Wettunna upogau' iyaro, naruntu'ka mennang ri Bolana Puwangngè, wettu purakuna upacara mappèpaccing alè. Dè'gaga tau maèga sibawakka, sibawa dè'to gaga arukkang kuwaro iyaro wettuè. 19 Banna engka siyagangngarè tau Yahudi kuwaro polè ri daèra Asia. Sitongenna mennang ritu harusu' engka kuwaè untu' pangoloi pappotane'na mennang lao ri Bapa', rèkko engka sèuwa napotanekekka. 20 Iyarè'ga leppessanni siya alèna sining tauwèwè powadai ja aga nalolongeng mennang ri iyya wettukku ri Mahkama Agamaè. 21 Banna warèkkada sèddièwè bawang napolèi mennang upowada ri yolona mennang, iyanaritu: Riadèlèkika iyaè essoè saba' mateppe'ka makkedaè sining tau matè ripatuwoi matu paimeng. " 22 Nainappa Fèliks iya maègaènna naisseng passalenna pappagguruwanna Yèsus, natutu'ni iyaro sidang parakaraè. Adanna, "Maèloka pettuiwi iyaè parakaraè, rèkko engkani komandang Lisias. " 23 Nainappa naparèntang parawira iya tanggung jawa'èngngi iyaro Paulus kuwammengngi natette natahang Paulus, iyakiya nawèrèngngi cèddè alaluwasang sibawa napalalona sellao-sellaona mpèrèngngi aga napparelluwangngè. 24 Siyagangngesso rimunrinna polèni Fèliks, risilaongeng ri bainèna iya riyasengngè Drusila, sèddiwi tau Yahudi. Nainappa nasuro tauwè Fèliks malai Paulus, nainappa naèngkalinga Fèliks Paulus mabbicara passalenna mateppe'è lao ri Yèsus Kristus. 25 Iyakiya wettunna Paulus napatteru bicaranna passalenna alempurengngè sibawa tahangngi napessuè sibawa passalenna pahukkungengngè ri Esso Kiyame', mètauni Fèliks nakkeda, "Weddinno lao makkekkuwangngè. Maèloka mobbisiko paimeng rèkko engka kasempatang. " 26 Iyaro wettuè mammènasai Fèliks lolongeng matu dowi polè ri Paulus. Iyanaro saba'na nakkolik-koling nasuro tauwè malai Paulus untu' sipabbicara alèna. 27 Labe'nana duwattaung Perkius Fèstus sullèiwi Fèliks selaku gubernur. Nasaba maèloi Fèliks malai atinna sining tau Yahudiè, naleppessangngi Paulus ri laleng tarungkuè.

Riwaya'na Rasul-Rasul-E 25

1 Tellungngesso lettu'na Fèstus ri daèraèro, laoni ri Yèrusalèm polè ri Kaisarèa. 2 Kuwaro sining kapala imangngè sibawa sining pamimpinna Yahudiè mapparapekengngi Paulus ri alèna. Matteru-teruni mennang napalècè Fèstus 3 kuwammengngi napolè akessingeng atinna lao ri mennang, maèloi suroi tauwè tiwii Paulus ri Yèrusalèm; saba' massèddini mennang untu' mpunoi ri tengnga laleng. 4 Iyakiya mappèbaliwi Fèstus, "Ritahangngi Paulus ri Kaisarèa; na iyya dè'to namaitta ulisu kuwaro. 5 Jaji, leppessanni siya sining tomariyoloè ri yelle'mu lao sibawa iyya ri Kaisarèa sibawa mapparakarakangngi kuwaro, rèkko mèmeng engka asalang pura napogau'. " 6 Monronana ri Yèrusalèm kira-kira aruwa iyarè'ga seppulo essona, lisuni Fèstus ri Kaisarèa. Pappa bajana pakangkani sidang pangadilang sibawa mapparèntangngi kuwammengngi naritiwi Paulus mangolo. 7 Wettunna lettu Paulus, sining tau Yahudiè iya lettu'ènna polè ri Yèrusalèm tettong mattulilingiwi, sibawa mappammula pauwi sining natenrekengngèngngi Paulus iya matane'è. Iyakiya dè' naullèi buttikangngi sining nattenrekengngèro. 8 Nakkeda Paulus bèlai alèna, "Dè'gaga sèuwa upogau' iya salaè lao ri hukkunna Musa iyarè'ga lao ri Bolana Puwangngè iyarè'ga lao ri Kaisar Roma. " 9 Iyakiya maèloi Fèstus malai atinna tau Yahudiè. Nakkutana lao ri Paulus, "Maèlokoga lao ri Yèrusalèm untu' riyadèlèki kuwaro ri yoloku sibawa passalenna sining nattenrekengngèro?" 10 Nappèbali Paulus, "Tettokka makkekkuwangngè ri yolona mahkama Kaisar Roma; na ri onrongngènnaro harusu'ka riadèlèki. Naisseng alèna Bapa' makkedaè dè' upassala lao ri tau Yahudiè. 11 Rèkko majjalèkkaika hukkung sibawa pogau' sèuwa iya sitinajaè rihukkung sibawa pahukkungeng matè, macenning atikku matè. Iyakiya rèkko sining natteppuwangngè mennang dè' natongeng, dè'gaga sèddi tau wedding mabbèrèyakka lao ri mennang. Uwèllauwi riadèlèkika ri pengadilanna Kaisar!" 12 Puranana barunding sibawa penasèha'-penasèha'na, makkedani Fèstus, "Muwèllauwi riadèlèki ri pengadilanna Kaisar, jaji harusu'ko lao mangolo ri Kaisar. " 13 Dè' namaitta ri munrinna, Arung Agripa sibawa Bernikè engkani polè ri Kaisarèa untu' passalama'i Fèstus. 14 Monronana kuwaro siyagangngarè esso, napakatajanni Fèstus parakarana Paulus lao ri Arung Agripa. Makkedai Fèstus, "Engka kuwaè sèddi tahanang nasalai Fèliks. 15 Wettukku engka ri Yèrusalèm, sining kapala imangngè sibawa sining pamimpinna Yahudiè mapparapekengngi mennang iyaro tauwè sibawa mèllauwi kuwammengngi upakennaiwi pahukkungeng. 16 Iyakiya mappèbalika makkedaè tau Romaè dè' nabiyasa mabbèrèyang makkuwaro bawang sèddiè tau riteppu untu' rihukkung, rèkko iyaro tau riteppuè dè'pa nasiyolong sibawa sining tau iya teppuèngngi sibawa riwèrèng kasempatang untu' bèlai alèna. 17 Jaji wettunna mennang lao kumaiyè, dè'na uwattajeng maitta. Pappa bajana matteruka pakangka sidang pengadilang sibawa mapparèntangngi iyaro tauwè ritiwi mangolo. 18 Wettunna sining tau tenre'èngngi tettong powadai natteppuwangngè mennang, dè'gaga sèuwa anu maja napowada pada-pada upikkiri'è maèlo napowada mennang. 19 Sisala pallolongengngi bawang mennang passalenna agamana sibawa passalenna sèddiè tau riyasengngè Yèsus. Iyaro tauwè matèni, iyakiya mattedde'i Paulus makkedaè tuwoi iyaro tauwè. 20 Nasaba dè' upahangngi pèkkugi wedding lolongeng pappakatajang passalenna parakaraèro, makkutanaka lao ri Paulus -- maèloiga lao ri Yèrusalèm sibawa diadèlèki kuwaro nasaba parakaraèro. 21 Iyakiya naèllauwi Paulus mènrè banding; naèllauwi kuwammengngi tette'i monro ri tahanangngè narapi parakarana ripettui ri Kaisar. Rimakkuwannanaro uwapparèntangngi kuwammengngi naritahang matteru, narapi lolongekka kasempatang untu' kiringngi lao ri Kaisar. " 22 Namakkeda Agripa lao ri Fèstus, "Macinna tokka mèngkalingai iyaro tauwè. " Nappèbali Fèstus, "Baja weddingngi taèngkalinga Bapa'. " 23 Pappa bajana polèni Agripa kuwaèttopa Bernikè sibawa upacara maraja. Nauttamakini mennang onrong sidanna pengadilangngè silaong sining tau marajana tentaraè sibawa sining tomariyoloè ri kotaèro. Nasaba parèntana Fèstus, ritiwini Paulus muttama'. 24 Nainappa makkeda Fèstus, "Datu Agripa sibawa sining hadèrè'è! Iyaè tauwè riyapparapekengngi ri iyya ri sininna bangsa Yahudiè, muwi iya engkaè ri Yèrusalèm iyarè'ga engkaè kuwaè. Natuntu'i mennang sibawa gora-gora makkedaè dè' nasitinaja rileppessang tuwo. 25 Iyakiya dè'gaga ulolongeng muwi sèuwa iya puraè napogau' iya weddingngè rihukkung sibawa pahukkungeng matè. Sibawa nasaba alèna pura mèllauwi parakarana riadèlèki ri pengadilanna Kaisar, purani upettui untu' kiringngi lao ri Kaisar. 26 Iyakiya dè' uwappunnai sèuwa pappakatajang matedde'è passalenna alèna untu' riyoki ri laleng sure'ku lao ri Kaisar. Iyanaro saba'na upangoloi ri Bapa'-bapa' maneng, lebbi-lebbipi lao ri Iya Malebbiè Datu Agripa! Akkattaku iyanaritu kuwammengngi napurana apparèssangngèwè, engkana wedding uwoki. 27 Saba' manuru' pèrasakku, dè' nasipato' kiring sèddi tahanang sibawa dè' naripannessa asalang-asalang iya riteppuwangngèngngi. "

Riwaya'na Rasul-Rasul-E 26

1 Nakkeda Agripa lao ri Paulus, "Ripalaloko mabbicara untu' bèlai alèmu. " Nanakkani limanna Paulus nainappa mabbicara bèlai alèna makkuwaèwè, 2 "Iya Malebbiè Datu Agripa! Maupe' senna'ka usedding weddikka bèlai alèku ri yolona Datu passalenna iya maneng nateppuwangngèkka tau Yahudiè; 3 lebbi-lebbipi nasaba manessai naisseng Datu ade'-ade'na sibawa masaala-masaalana tau Yahudiè. Rimakkuwannanaro, uwèllauwi tennapodo Datu mèngkalingai pappakatajakku sibawa sabbara'. 4 Sininna tau Yahudiè naisseng pèkkugi atuwo-tuwokku mappammulai kalloloku. Naisseng mennang makkedaè sipongekku mancaji kallolo, tuwoka ri yelle'na bangsaku ri Yèrusalèm. 5 Maittani mennang naissekka. Rèkko maèloi mennang, naullè mennang mabbèrè asabbiyang makkedaè mappammulai pammulanna tuwoka selaku tau Farisi sibawa turusiwi sininna peraturanna iya kaminang marejjingngè ri laleng agamata. 6 Na makkekkuwangngè tettokka kuwaè untu' riadèlèki nasaba mateppe'ka ri assijancingeng naèbbuè Allataala lao ri nènè-nènèta. 7 Iyatoro assijancingengngè nammènasai iya seppulo duwa suku bangsa Israèliè, angkanna massompa lao ri Allataala esso wenni. Na mala nasaba mateppe'ka ri assijancingengngèro, Datu Iya Malebbiè, naripassalaka risining tau Yahudiè. 8 Magi saudara-saudara sining tau Yahudiè dè' mullèi mateppe' makkedaè Allataala patuwoi paimeng tau matè? 9 Riyolo mappallolongeng tokka makkedaè harusu'ka pogau'i sini-sininnaè untu' mèwai Yèsus iyaro polè ri Nazarèt. 10 Na mèmeng iyanaro pura upogau' ri Yèrusalèm. Nasibawang sure' kuwasa polè ri kapala-kapala imangngè, maèga tau matinulu ri Allataala pura uputtama ri laleng tarungkuè. Mala maccowè tokka situjuiwi makkedaè pakennaiwi mennang pahukkungeng matè. 11 Malèwe' senna' usissa mennang risining bola assompangngè, passai mennang kuwammengngi nassakkarengngi aga natepperiyè. Makkuwamani pellana atikku lao ri mennang, angkanna laoka ri kota-kota laingngè untu' lellungngi mennang kuwaro. " 12 "Na akkatta makkuwaèttonaro nautiwi sure' kuwasa polè ri kapala-kapala imangngè naulao ri Damsyik. 13 Na wettukku ri tengnga laleng, kira-kira tangasso, Datu Iya Malebbiè, uwitai cahayaè polè ri langiè iya lebbi cakkaè naiya mata essoè. Iyaro cahayaè mattappai mattulilingika sibawa mattulilingiwi sining tau iya uwèwaè silaong joppa. 14 Mabuwang manekki ri tanaè. Nainappa mèngkalinga sèuwa sadda makkeda lao ri iyya ri laleng basa Ibrani, 'Saulus, Saulus! Magi mumatteru-teru mupa panrasa-rasa-Ka? Mupèneddingiwi matu peddiè, rèkko matteru mupo mèwai pappimpin-Na iya mancajiyè Puwammu. ' 15 Nauwakkeda, 'Niga Iko, Puwang?' Nappèbali Puwangngè, 'Iyya'na Yèsus iya mupanrasa-rasaè. 16 Oto'no namutettong! Uwappaitangngi alèku ri iko sibawa akkatta untu' makkako mancaji pattumanik-Ku. Harusu'ko mabbirittangngi lao ri tau laingngè aga iya muwitaè iyaè essoèwè passalenna Iyya sibawa passalenna aga iya maèloè Ujèllorekko matti ri wettu mangoloè matu. 17 Maèloka paleppe'ko polè ri bangsa Israèliè sibawa bangsa-bangsa laingngè iya tenniyaè Yahudi. Maèlo-Ka suroko lao ri mennang 18 untu' pakkitai matanna, kuwammengngi nassu polè ri pettangngè nanauttama ri laleng cakkaè; kuwammengngi naleppe polè ri pangarunna Ibillisi'è, narikuwasai ri Allataala. Na ri laleng mateppe'na ri Iyya, riyaddampengengngi matu dosa-dosana sibawa mancajiwi matu mennang anggotana umma'na Allataala iya ripilè. ' " 19 "Rimakkuwannanaro, Datu Agripa, tuli makkuragaka turusiwi pakkitang iya puraè utarima polè ri Allataalaro. 20 Terus terakka powadangngi sining tauwè makkedaè harusu'i mennang toba' polè ri dosa-dosana sibawa mabbèrèyangngi alèna lao ri Allataala enrengngè mappaitangngi ri laleng atuwo-tuwonna mennang makkedaè toba'ni mennang polè ri dosa-dosana. Upowadangngi iyaro gau'è bunge'-bunge'na ri Damsyik, nainappa ri Yèrusalèm sibawa sininna Yudèa sibawa ri yelle'na tau tenniyaè Yahudi. 21 Nasaba iyanaro nanatikkekka sining tau Yahudiè ri Bolana Puwangngè sibawa makkuragana mpunoka. 22 Iyakiya lettu iya essoèwè nalinrungika Allataala, angkakku weddikka tettong kuwaè mabbèrèyangngi asabbiyakku lao ri sininna tauwè -- battowa iyarè'ga baiccu. Aga iya upowadaèwè dè' nasilaingeng naiya puraè naboto nabi-nabiè sibawa Musa; 23 iyanaritu makkedaè Arung Pappassalama' iya najjanciyangngè Allataalaro harusu'i manrasa-rasa, sibawa mancajiwi tau bunge' tuwo paimeng polè ri amatèngngè; kuwammengngi nallalengi iyaro naullèi mabbèrè tajang -- iyanaritu asalamakeng -- muwi lao risining tau Yahudiè muwi lao risining tau tenniyaè Yahudi. " 24 Ri wettu mabbicarana Paulus bèlai alèna, gorani Fèstus, "Jangennoga Paulus! Pangissengemmu iyaro maègaè pajangekko!" 25 Iyakiya mappèbaliwi Paulus, "Dè' ujangeng, Iya Malebbiè. Ada-ada iya upowadaèro tongeng sibawa massu polè ri pikkirang madècèngngè. 26 Alèna Datu Agripa naisseng madècèng gau'-gau'èro. Iyanaro saba'na naubarani mabbicara ri yolona Datu sibawa terus terang. Mateppe'ka dè' sèddi polè ri gau'-gau'èro iya dè'è naissengngi Datu, saba' iya manennaro dè' nakajajiyang risining onrong iya tassubbuè. 27 Iya Malebbiè Datu Agripa, mateppe'ga Datu aga napowada nabi-nabiè? Uwaseng mateppe' Datu!" 28 Nainappa makkeda Agripa lao ri Paulus, "Muwasengngiga magampang pancajika tau Kristèng ri laleng wettu dè'è namaitta?" 29 Nappèbali Paulus, "Ri laleng wettu dè'è namaitta iyarè'ga ri laleng wettu maittaè, massempajakka lao ri Allataala kuwammengngi na Datu sibawa sininna Bapa'-bapa' iya mèngkalingaèkka essoèwè weddingngi mancaji pada-pada iyya -- sangadinna iyaè balengguè!" 30 Paccappurenna Datu Arungngè, Gubernur-è Bernikè, enrengngè sininna laingngè tettonni. 31 Engkanana ri saliweng, makkedani mennang sèddiè lao ri laingngè, "Iyaè tauwè dè'gaga aga-aga napogau' iya sitinajaè rihukkung sibawa pahukkungeng matè iyarè'ga ritarungku. " 32 Nakkeda Agripa lao ri Fèstus, "Iyaè tauwè weddinni rileppessang, akkalarapanna dè' natuntu'i parakarana riadèlèki ri pengadilanna Kaisar. "

Riwaya'na Rasul-Rasul-E 27

1 Puranana ripettui makkedaè harusu'ki sompe' lao ri Italia, Paulus sibawa siyagangngarè tau tahanang laingngè riyabbèrèyanni lao ri Yulius, parawira pasukang tentara Roma iya riyasengngè "Rèsimèng Kaisar". 2 Tonang kappala'ki ri Adramitium, nainappa sompe'ni sibawa kappala'èro iya sadiyaènna sompe' ri pelabuhang-pelabuhang ri daèra Asia. Aristarkhus, sèddiwi tau Makedonia iya polè ri Tèsalonika, sompe' towi sibawakki. 3 Pappa bajana lettu'ni ri Sidon. Makessing senna'ni rigaukengngi Paulus ri Yulius. Ripalaloi lao cèllèngiwi sellao-sellaona kuwammengngi weddingngi mennang mpèrèngngi aga napparelluwangngè. 4 Polè kuwaro ripatteruni sompeketta. Nasaba siduppai angingngè kappala'è, sompe'ki mabbiring pottanang ri pulo Siprus iya mallinrungngè cèddè polè ri angingngè. 5 Nainappa molai tasi' siyolongngè Kilikia sibawa Pamfilia nalettu' ri Mira ri wanuwa Likia. 6 Kuwaniro iyaro parawiraè runtu sèddi kappala polè ri Alèksandria iya maèloè sompe' lao ri Italia. Nanapalèttè'ni ri kappala'èro. 7 Siyagangngarè esso ittana sompe'ki madoddo senna', nasipanrasa-rasaki angkanna lettu sibbèla kota Knidus. Nasaba maja mupi angingngè, dè' nariyullè patterui sompeketta ri akkattata mammulangngè. Sompe'ni ri yattanna pulo Krèta laloiwi Tanjong Salmonè kuwammengngi mallinrukki kuwaro polè ri angingngè. 8 Nasipanrasa-rasani sompe' mattuttung wirinna puloèro gangkanna lettu'ki risèddiè onrong riyasengngè Pelabuhang Gello, dè' nasiyaga bèlana polè ri kota Lasèa. 9 Iyaro wettuè labe'ni Esso Maraja Assidamèngeng tau Yahudiè. Ateddèngenni maèga wettu, angkanna tenniyana wettunna untu' sompe' sibawa amang. Rimakkuwannanaro mappangajani Paulus lao ri mennang, 10 "Saudara-saudara, manuru' pallolongekku, bahaya senna' rèkko sompe'ki matteru. Lolongekki matu aroging battowa tenniya bawang luretta sibawa kappala'ta, iyakiya nyawata wedditto teddèng. " 11 Iyakiya iyaro parawiraè lebbi mateppe'i ri jurumudiè sibawa kapitèng kappala'è naiya ada-adanna Paulus. 12 Pelabuhangngè kuwaro mèmeng maja untu' monro kappala-kappala'è kuwaro ri wettu keccè'è. Rimakkuwannanaro maègangngèngngi ana' kappala'è situjuiwi untu' sompe' paimeng salaiwi iyaro pelabuhangngè nasaba maèloi mennang makkuraga lettu ri Fèniks sibawa monro gangka wettu keccè'è. Fèniks iyanaritu pelabuhang ri Krèta iya mangoloè ri yajang yattang sibawa yajang manorang. 13 Iyaro wettuè mangirii anging polè yattangngè sibawa madoddo. Nasemmi ana' kappala'è naullèi mennang sompe' paimeng. Jaji nakkani balangona nasompe mattuttung wirinna pulo Krèta. 14 Iyakiya dè' namaitta ri munrinna polèi anginrajaè -- iyanaritu anging iya riyasengngè anging Alau Manorang -- mangiri polè ri pottanangngè, 15 nanaunrui kappala'ta. Nasaba dè' nakkullè sompe' matteru kappala'è mèwai angingngè, manyarani' bawang sibawa leppessangngi kappala'è mali natiwi anging. 16 Mallinrukki cèddè, wettutta lalo ri seddè yattanna pulo Kauda iya baiccu'èro. Sipanrasa-rasani kuwaro nariyullè kuwasaiwi sikocinna kappala'ta. 17 Puranana ripaènrè iyaro sikociè ri kappala'è, iyaro kappala'è ripakkasse'ni sibawa siyoi tulu mattemmuiwi iyaro kappala'è. Nasaba mètaui tassèngkè ri kessi'è ri Sirtis iya macènè'è, ripanonnoni sompe'è nainappa rileppessang kappala'è maccowèriwi angingngè. 18 Majjallo'ni matteru angingngè, angkanna pappa bajana mammulani ribuwang lurenna kappala'è ri tasi'è. 19 Esso rappinasi iyaro ana'-ana' kappala'è nabbèyassi pakkakkasa'-pakkakkasa'na kappala'è ri tasi'è sibawa limanna muto mennang. 20 Siyagangngarè esso ittana dè' taita mata esso sibawa wèttowing, na angingngè matteru-terui majjallo. Angkanna lennye'ni ammènasatta untu' salama'. 21 Siyagangngarè wettu ittana iyaro sining tauwè dè' nanrè. Nalaona Paulus tettong ri tengnga-tengngana mennang nakkeda, "Saudara-saudara! Rèkko muturusiwi pangajaku sibawa dè' tasompe polè ri Krèta, dè' tapèneddingiwi iya manenna asolangengngèwè sibawa arogingngèwè. 22 Iyakiya muwi makkekkuwangngè uwèllauwi sibawa masero kuwammengngi mupèsennangiwi atimmu. Dè' sèddi polè ri Saudara iya matè matu; banna ateddèngekki matu iyaè kappala'è bawang. 23 Saba' onna' wenniè malaèka' polè ri Allataala iya usompaè, iyanaritu Allataala iya mappunnangiyèkka, polèi ri iyya. 24 Makkedai iyaro malaèka'è, 'Aja' mumètau, Paulus! Saba' mangoloko matu ri Kaisar. Sibawa nasaba akessingeng atinna Allataala ri iko, sininna tau iya muwèwaè sisompereng salama'i matu nasaba iko. ' 25 Rimakkuwannanaro, Saudara-saudara, sitinajai Saudara pakaloppoi atinna! Saba' mateppe'ka lao ri Allataala makkedaè iya manennaro kajajiyangngi matu pada-pada iya Napowadaè lao ri iyya. 26 Iyakiya rappè'ki matti ri wirinna sèuwaè pulo. " 27 Ri wenni maseppulo eppana taronak-konanni ri Tasi' Adria. Kira-kira tengnga benninna napèrasani ana' kappala'è maddeppèriwi pottanangngè. 28 Jaji loro'ni mennang tulu sibawa batu untu' gangkai lamunna tasi'è. Naissenni iyaro onrongngè lamunna nawèki patappulo mètèrè. Dè' namaitta ri munrinna nagangkasi mennang paimeng, nanalolongenni ri onrongngèro lamunna tasi'è nawèki telluppulo mètèrè. 29 Mètauni mennang tassèngkè ammai matu kappala'è ri batu karangngè, jaji panonnoni mennang eppa balango ri poncinna kappala'è, nainappa mammènasa rèkko weddingngi namasitta èlè. 30 Coco'-coco'ni sining ana' kappala'è coba-cobai lari polè ri kappala'èro. Panonnoni mennang sikoci ri tasi'è pada-pada rèkko maèloi panonno balango polè ri yolona kappala'è. 31 Iyakiya makkedai Paulus lao ri parawiraè sibawa sining prajuri' engkaè ri kappala'èro, "Rèkko iyaro ana' kappala'è dè' naonro ri kappala'è, dè' maneng naullèi Saudara salama'. " 32 Rimakkuwannanaro iyaro sining prajuri'è narette'i tuluna iyaro sikociè, angkanna mali iyaro sikociè. 33 Ri wettu dè'napa na èlè, nappètangngarenni Paulus kuwammengngi nanrè maneng mennang. Makkedai Paulus, "Seppuloni eppa esso ittana idi maneng Saudara banna mattajeng bawang ri laleng keadaang mètau nadè' aga-aga riyanrè. 34 Uwèllauwi manrèki cèddè. Makessing iyaro untu' Saudara, kuwammengngi mumawatang paimeng. Nasaba salama' manengngi Saudara sibawa dè'gaga akurangeng agi-agi. " 35 Purana makkeda makkuwaro malani roti Paulus nainappa mattarima kasi ri Puwangngè ri yolona maneng mennang. Nainappa nabagè-bagè iyaro rotiè, nananrèi. 36 Nassumange' manenna mennang paimeng sibawa maccowèto manrè. 37 Sininna iya engkaè ri kappala'èro engka duwa ratu pituppulo enneng tau. 38 Puranana manrè maneng situju genne'è, nabuwanni lureng gandonna ri tasi'è kuwammengngi namaringeng kappala'è. 39 Matajanna essoè, naitani ana' kappala'è pottanangngè, iyakiya dè' naissengngi pottanang aga iyaro. Naitani mennang sèuwa teluk sibawa wirinna. Jaji akkattana mennang maèloni pappottanangngi iyaro kappala'è kuwaro rèkko naullèi. 40 Narette'ni sining tulu balangoè nainappa naleppessang tallemme' iyaro sining balangoè ri tasi'è. Naleppessang toni tulu siyoèngngi golingngè. Nainappa paènrè sompe' ri bagiyang yolona kappala'è kuwammengngi nairii anging iyaro kappala'è mattuju ri wiring. 41 Iyakiya iyaro kappala'è tabbuttui ri kessi'è. Tassèngkèni bagiyang yolona nadè' nakèdo, na bagiyang monri ancuru nakenna bombang raja. 42 Sining prajuri'è ri kappala'èro manniya'ni mpuno manengngi tau tahanangngè, nasaba mètaui mennang ajakkè matu engka nangè lao ri pottanangngè sibawa lari. 43 Iyakiya iyaro parawiraè napèsangkaiwi niya'na mennanro nasaba maèloi passalama'i Paulus. Nasuroni sininna tau naullè nangè luppe riyolo' sibawa nangè lao ri wiring. 44 Iya laingngè harusu'i maccinrola sibawa makkatenning risining papengngè iyarè'ga reppa' kappala'èro. Na iyanaro nallalengi nawedding manekki salama' lettu ri pottanangngè.

Riwaya'na Rasul-Rasul-E 28

1 Mappotanannana sibawa salama', nappai riisseng makkedaè iyaro puloè riyasengngi Malta. 2 Pabbanuwana iyaro puloè mabessa senna' lao ri idi. Naduppai manekki mennang sibawa madècèng enrengngè napalluwakekki api nasaba mammulani teppa bosiè sibawa makeccè'to. 3 Paddeppungenni Paulus aju, nanataroi iyaro ajuè ri apiè. Ri wettu napogau'na iyaro, engka sikaju ula massu, nasaba pellana iyaro apiè, nanaokkoi limanna. 4 Wettunna pabbanuwana iyaro puloè naita iyaro ulaè taggattung ri limanna Paulus, makkedani mennang sèddiè lao ri laingngè, "Iyaè tauwè tentu pabbuno, saba' namuni leppe'ni polè ri abalaè ri tasi'è, Dèwi Adèlè'è dè' naleppessangngi tuwo. " 5 Iyakiya nakkeppikengngi Paulus iyaro ulaè ri laleng apiè sibawa dè' napèneddingiwi peddiè muwi cèddè. 6 Mappikkiri'ni mennang dè'na namaitta naboro iyaro limanna Paulus nainappa tappa mabuwang namatè. Iyakiya mattajennana siyagangngarè ittana sibawa dè'gaga makalallaing kajajiyang ri alèna, tappinrani pikkiranna nainappa makkeda mennang makkedaè Paulus iyanaritu dèwata. 7 Dè' namabèla polè ri onrongngèro engka tana appunnangenna Publius, kapala sukunna puloèro. Namasennanna atinna tarimaki selaku topolèna tellungngesso ittana. 8 Iyaro wettuè malasai ambo'na, nakennai semmeng sibawa jamba-jambang. Laoni Paulus mitai ambo'na iya malasaèro nainappa massempajang sibawa palènne'i limanna ri yasè'na angkanna majjappa. 9 Nasaba iyaro kajajiyangngè, sininna tau iya malasaè ri puloèro laoni ri Paulus, naripajjappa. 10 Mabbèrèni mennang maèga hadiya, na wettunna maèlo sompe', tiwini mennang ri kappala'è sininna iya riyapparelluwangngè untu' joppatta. 11 Tellumpulennana kuwaro, joppani polè ri puloèro tonang risèddiè kappala polè ri Alèksandria iya mallabuè ri puloèro ri wettu keccè'è. Iyaro kappala'è pakèi lambang, "Dèwata Dènru Kastor sibawa Poluks. " 12 Mallabuni ri kota Sirakusa, sibawa monrona kuwaro tellungngesso. 13 Polè kuwaro sompe'ki mattuttung wiring tasi' lettu ri kota Règium. Pappa bajanana mammulani miri angingngè polè ri yattang, angkanna ri laleng duwangngesso lettu'ni ri kota Putioli. 14 Kuwaniro siruntu' siyagangngarè tau iya mateppe'è ri Yèsus, nasaba naobbiki mennang, monroni sibawa mennang siminggu ittana. Nainappaki joppa lao ri Roma. 15 Saudara-saudaraè ri Roma iya mateppe'è ri Yèsus naèngkalingani karèbatta, angkanna polèni mennang lettu ri Pasa Apius sibawa Passanggarahang Telluè untu' duppaiki. Wettunna Paulus siruntu' mennang, mattarima kasi'ni ri Allataala sibawa masse'na atinna. 16 Wettunna lettu ri Roma, ripalaloni Paulus monro alè-alè sibawa rijagai risèddiè prajuri'. 17 Labe'nana tellungngesso naobbini Paulus ponggawa-ponggawana tau Yahudiè ri onrongngèro. Maddeppungennana mennang, makkedani lao ri mennang, "Saudara-saudara! Dè'gaga asalakku lao ri bangsata, iyarè'ga majjalèkkai ade' abiyasatta iya ritarimaè polè ri nènè-nènèta. Namuni makkuwaro ritikkekka ri Yèrusalèm sibawa riyabbèrèyang lao risining tau Romaè. 18 Puranana riparèssa parakaraku, maèloni mennang paleppe'ka, nasaba manessani dè' upogau' muwi sèddi asalang iya sitinajaè rihukkung sibawa pahukkungeng matè. 19 Iyakiya nasaba mèwai sining tau Yahudiè, tarapassaka tuntu'i parakaraku riadèlèki ri pengadilanna Kaisar Roma. Upogau'i iyaro tenniya nasaba mappunnaika sèuwa pappotane' iyarè'ga maèloka mapparapekengngi bangsaku. 20 Na iyanaro saba'na uwèllauwi sitaki untu' mabbicara-bicara sibawa iko; saba' ribalengguka, mala nasaba Pappassalama' iya nammènasaiyè bangsa Israèliè. " 21 Nainappa makkeda mennang lao ri alèna, "Dè'pa gaga sure' ritarima polè ri Yudèa passalenna Saudara muwi sèddi. Nadè'to gaga sèddi Saudara polè kuwaro lao mai tiwi karèba passalenna Saudara iyarè'ga mabbicara maja passalenna Saudara. 22 Iyakiya maèlo tokki mèngkalingai passalenna atepperenna Saudara, saba' idi manengngè purani riyèngkalinga tauwè cellai pappagguruwang iya muwaccowèriyèro. " 23 Napattentuni mennang sibawa Paulus sèddi esso untu' siruntu'. Iyaro essoè maèga tau lao ri onronna Paulus. Mappammulai èlè lettu arawèng Paulus pakatajangngi sibawa birittaiyangngi mennang biritta pèkkugi passalenna Allataala mapparènta selaku Arung. Makkuragani Paulus untu' patepperiwi mennang ri Yèsus, sibawa pakèi aya'-aya' polè ri Kitta'na Musa sibawa Kitta'na Nabi-nabiè. 24 Engka mateppe' lao ri aga iya napowadaè Paulus, iyakiya engkato dè' namateppe'. 25 Nasalaini mennang onrongngèro sibawa pallolongeng iya sièwa-èwaè, puranana napowada Paulus iyaè lao ri mennang, "Mèmeng coco' senna' aga napowada Rohna Allataala naolai Nabi Yèsaya lao ri nènè-nènèmu! 26 Makkedai Rohna Allataala, 'Laono powadangngi bangsaèwè: Matteru-teruko matu marèngkalinga, iyakiya dè' mupahangngi; matteru-teruko matu makkita, iyakiya dè' muwakkita. 27 Saba' atinna iyaè bangsaè madonggoi, nalape'i daucculinna, sibawa nasampoi matanna. Saba' rèkko dè' nakkuwaro, tentu makkitai matu matanna, marèngkalingai matu daucculinna, mappahangngi matu atinna, nalisu matu mennang ri alè-Ku, ' adanna Allataala, 'Na-Upajjappai matu mennang. ' " 28 Paccappurenna makkedai Paulus, "Harusu'i naisseng Saudara-saudara makkedaè karèba passalenna asalamakengngè iya polè ri Allataala makkekkuwangngè purani riyabbirittang lao ri bangsa-bangsa laingngè iya tenniyaè Yahudi. Maèloi mennang turusiwi!" 29 Purana Paulus makkeda makkuwaro, nasalaini onrongngèro iyaro sining tau Yahudiè sibawa mappangèwang sèddiè sibawa laingngè. 30 Duwattaung ittana Paulus monro ri Roma, ri bola iya alèna muto sèwai. Masennangngi tarimai sininna tauwè iya laowè cèllèngiwi. 31 Baraniwi mabbirittangngi lao ri mennang passalenna pèkkugi Allataala mapparènta selaku Arung, sibawa passalenna Puwatta Yèsus Kristus. Napogau'ni Paulus iyaro sibawa laluwasa, tenrihalang-halangi.

Roma 1

1 Saudara-saudara iya maneng ri Roma iya namasèiyè Allataala sibawa iya puraè naobbi Allataala untu' mancaji umma'-Na. Allataala pura pilèka sibawa makkaka banna untu' mabbirittangngi Karèba Madècèng polè ri Allataala. 2 Iyaro Karèba Madècèngngè purani najjanciyang Allataala tèmpo riyolo naolai nabi-nabin-Na sibawa purani riyoki ri laleng Kitta'è. 3 Iyaro Karèba Madècèngngè passalennai Ana'na Allataala, Puwatta Yèsus Kristus. Selaku tolino, wijannai Daud, 4 iyakiya selaku ilahiwi ripannessai Ana'nai Allataala. Iyaro ripabuttiwi sibawa akuwasang dè'è padanna naolai tuwo-Na paimeng polè ri amatèngngè. 5 Naola towi Alèna nawèrèkka Allataala pammasè mancaji rasul, kuwammengngi -- untu' pakalebbii Kristus -- upimpingngi sining tauwè polè ri sininna bangsaè kuwammengngi namateppe' sibawa matinulu. 6 Iya nakkattaiyè sibawa sininna bangsaè iyanaritu ikoto iya engkaè ri Roma; pura tono riyobbi untu' mancaji umma'na Yèsus Kristus. 7 Iyaro saba'na uwokii iyaè sure'è lao ri iko. Tennapodo Allataala Ambo'ta sibawa Puwang Yèsus Kristus mabbèrè barakka sibawa asalèwangeng lao ri iko. 8 Bunge'-bunge'na naolai Yèsus Kristus, mattarima kasi'ka ri Allataala nasaba Saudara-saudara maneng; saba' purani naèngkalinga sininna linoè makkedaè mateppe' senna'ko lao ri Yèsus Kristus. 9 Tuli uwèngngerakko rèkko massempajakka. Allataala sabbinna makkedaè aga iyaro upowadaè tongengngi. Alèna Allataala iya utumaningiyè sissukku atikku ri laleng mabbirittangngi Karèba Madècèngngè passalenna Ana'-Na. 10 Uwèllauwi sibawa masero ri Allataala, tennapodo maèloi palaloka makkekkuwangngè cèllèngiko. 11 Saba' macinna senna'ka mèwako sita kuwammengngi weddikka mabbagè sibawa iko pammasè polè ri Rohna Allataala pèwatangiko. 12 Akkattaku iyanaritu nasaba pada mateppe'ni ri Yèsus Kristus, naweddikki sisullè sipèwatangi. 13 Saudara-saudara! Macinnaka kuwammengngi muwissengngi makkedaè malèwe' senna'ni maèloka cèllèngiko, iyakiya tuli engka halangenna. Macinnaka kuwammengngi na ri yelle'mu engka wassèlè'na jama-jamakku pada-padato engkana wassèlè'na jama-jamakku ri yelle'na sining tau tenniyaè Yahudi ri onrong-ngonrong laingngè. 14 Saba' mappunnaika kewajibang lao ri sininna bangsaè: iya engkaènna ampè-ampèna sibawa dè'è, iya massikolaènna sibawa dè'èppa. 15 Iyanaro saba'na umacinna senna' mabbirittangngi iyaro Karèba Madècèngngè lao ri iko iya monroètto ri Roma. 16 Mateppe' senna'ka ri Karèba Madècèngngèro, nasaba iyaro karèbaè iyanaritu awatangenna Allataala untu' passalama'i sininna tauwè iya mateppe'è; mula-mulanna tau Yahudiè sibawa bangsa laingngètto. 17 Saba' nasibawang iyaro Karèba Madècèngngè, nappaitangngi pèkkugi carana assisumpungenna rupa tauwè sibawa Allataala mancaji madècèng paimeng; carana iyanaritu mateppe' ri Allataala, mappammulai pammulanna lettu paccappureng. Iyaro pada-padai tarokiè ri laleng Kitta'è, "Tau mateppe'è ri Allataala angkanna assisumpungenna sibawa Allataala madècèng paimeng, iyaro tauwè tuwoi matu!" 18 Polè ri surugaè nappaitangngi Allataala cai-Na lao ri sininna dosaè sibawa jana tolinoè, saba' jaè lawa-lawaiwi tolinoè untu' missengngi pappagguruwang tongengngè passalenna Allataala. 19 Aga naullè misseng tolinoè passalenna Allataala manessani ri laleng ati marilalenna rupa tauwè, saba' alèna Allataala pura pannessai iyaro lao ri rupa tauwè. 20 Sipongenna napancaji Allataala linoè, sipa'na Allataala iya dè'è napaita, iyanaritu keadaan-Na selaku Allataala sibawa akuwasan-Na iya mannennungengngè, weddinni najeppui rupa tauwè naolai sininna iya puraè napancaji. Jaji dè' sises-siseng rupa tauwè nappunnai alasang untu' pattongengngi alèna. 21 Rupa tauwè naissengngi Allataala, iyakiya rupa tauwè dè' napakalebbii selaku Allataala sibawa dè'to natarima kasi ri Alèna. Sibalè'na mappikkiri'i rupa tauwè iya tessiratangngè; mapettanni atinna mennang. 22 Napèrasai mennang alèna mapanrè, padahal madonggoi mennang. 23 Tenniya Allataala iya mannennungengngè nasompa mennang, sangadinna dato'-dato' iya sinrupaè mahlu' weddingngè matè; iyanaritu rupa tauwè, manu'-manu'è, olokolo iya eppaè ajèna, sibawa olokolo makkalolo'è. 24 Rimakkuwannanaro Allataala leppessangngi mennang rikuwasai ri cinnana atinna untu' pogau'i majaè, angkanna napogau'i mennang gau'-gau' iya macarèpaè lao ri padanna muto. 25 Allataala iya tongengngè, nasullèiwi mennang sibawa iya dè'è natongeng. Tenniya iya mappancajiyè sangadinna iya ripancajiyè ritu nasompa sibawa natumaningi mennang. Padahal iya mappancajiyè ritu harusu' ripoji mannennungeng! Aming. 26 Nasaba napogau'i rupa tauwè makkuwaèro, nanaleppessangngi Allataala mennang turusiwi napessunna iya matunaè. Sining makkunrainna dè'na natattarè' lao risining worowanè pada-pada biyasaè ri rupa tauwè, sangadinna tattarè'i lao ri padanna muto makkunrai. 27 Makkuwatoro worowanè; dè'na mennang nasisumpung makkunraiè pada-pada biyasaè, sangadinna naèloriwi padanna worowanè. Napogau'i worowanè pangkaukeng mappakasiri-siriè lao ri padanna worowanè, angkanna tarimai mennang pakkabale iya siratangngè sibawa pangkaukeng majaèro. 28 Nasaba dè' namarasa parellu rupa tauwè missengngi Allataala, na Allataala leppessangngi pikkiranna mancaji masolang, angkanna napogau'i mennang gau'-gau' iya dè'è nawedding napogau' mennang. 29 Pennoi atinna sibawa sininna majaè, iya dè'è natongeng, akebbongeng sibawa abenciyang; pennoi sibawa pangèloreng untu' mabbuno, mallaga, pabengnguwang sibawa peddi ati. Napoji bicarai tau laingngè, 30 napoji tuna-tunaiwi asenna tau laingngè, matempoi mennang sibawa makurang ajara', iya benciyèngngi Allataala sibawa napoji mabboro. Macca mennang sappa cara-cara baru untu' pogau'i majaè. Naèwai mennang indo' ambo'na; 31 dè' namaèlo pahangngi tau laingngè; dè' namatinulu sibawa dè' najampangiwi padanna tau. 32 Naisseng mennang, makkedaè manuru' hukkunna Allataala, tau iya pogau' manengngèngngiro sitinajai rihukkung matè. Namuni makkuwaro napogau' mutowi mennang gau'-gau'èro; sibawa mala nasitujui towi tau laingngè pogau'i.

Roma 2

1 Rimakkuwannanaro, Saudara-saudara, niga Saudara angkanna Saudara maèlo passalai tau laingngè? Dè' agaga nappunnai Saudara untu' mèwaiwi alèmu! Saba' rèkko Saudara passalai tau laingngè, padahal napogau' towi Saudara pangkaukeng iya pada-padaè mennang, tentu Saudara pakennai towi alèna pahukkungeng. 2 Riissenni makkedaè rèkko Allataala patatteppai pahukkungengngè ri yasè'na sining tau iya pogau'èngngi sining pangkaukeng pada-padaèro, iyaro apettunna Allataala tongengngi. 3 Iyakiya iko, Saudara-saudara, mupogau' towi gau'-gau' iya muteppuwangngèngngi sining tau laingngè! Namupikkiri'i mullèi leppe' polè ri pahukkungenna Allataala? 4 Iyarè'ga mupandang èntèngngi asèmpowanna Allataala sibawa asagènang atinna enrengngè asabbaraken-Na iya makkuwaèro loppona? Pasti muwisseng makkedaè Allataala mappaitangngi akessingeng atin-Na nasaba maèloi kuwammengngi mutoba' polè ri dosa-dosamu. 5 Iyakiya matedde atiko sibawa dè' mumaèlo tappinra. Rimakkuwannanaro alèmu muto mèbbui pahukkungemmu pèdè' tattamba tane'na ri Esso Kiyame', rèkko nappaitanni caina Allataala sibawa patatteppai pahukkungemmu iya adèlè'è. 6 Saba' Allataala mpale'i matu tungke' tau situru pangkaukenna. 7 Allataala mabbèrèyangngi atuwong tongengngè sibawa mannennungengngè lao ri mennang iya mattunru-tunruè pogau' dècèng untu' lolongeng iya malebbiè, iya ripakarajaè sibawa mannennungengngè. 8 Iyakiya sining tau iya pentingkangngèngngi alèna sibawa dè' namaèlo matinulu ri Allataala, sangadinna maccowèriwi iya majaè, iyaro sining tauwè riyacairi senna'i matu ri Allataala. 9 Tungke' tau iya pojiyèngngi pagau'i majaè masussai matu sibawa manrasa-rasai mula-mulanna tau Yahudiè, sibawato bangsa-bangsa laingngè. 10 Iyakiya sininna tau iya pojiyèngngi pogau' makessingngè riwèrèngngi matu alebbireng sibawa ripakarajai enrengngè asalèwangeng polè ri Allataala; mula-mulanna lao ri tau Yahudiè, makkuwatoro lao risining tau bangsa laingngè. 11 Saba' Allataala gaukengngi sininna tauwè pada-padai. 12 Sining tau bangsa laingngè madosai tennaisseng hukkunna agama Yahudiè. Jaji rihukkungngi risaliwenna hukkung-hukkungngèro. Iyakiya sining tau Yahudiè madosai puranana naisseng hukkung-hukkungngèro; rimakkuwannanaro rituntu' towi matu mennang situru hukkung-hukkungngèro. 13 Saba' simadècèngengngi paimeng tauwè sibawa Allataala, tenniya nasaba iyaro tauwè naissengngi hukkunna agama Yahudiè, sangadinna nasaba napogau'i aga taroki ri laleng hukkung-hukkungngèro. 14 Sining tau bangsa laingngè dè' naissengngi hukkung-hukkung agama Yahudiè. Iyakiya rèkko mennang nasaba èlo alèna pogau'i aga napparèntang iyaro hukkung-hukkungngè, atinna mennang ritu mancaji hukkung lao ri mennang, namuni mennang dè' naissengngi hukkung agama Yahudiè. 15 Ampè-ampèna mennang mappaitangngi makkedaè aga napparèntang iyaro hukkung-hukkungngè tarokii ri laleng atinna. Ati marilalenna muto mennang pettuiwi gau'èro, saba' biyasa towi mennang ripasala sibawa biyasa towi ripattongeng ri pikkiranna. 16 Makkuwaniro kajajiyangngè matti ri Esso puraè ripattenturo. Iyaro Essoè -- manuru' Karèba Madècèng iya uwabbirittangngè -- Allataala naolai Yèsus Kristus, madèlèkiwi matu rahasiyana atiè sibawa pikkiranna sininna tauwè. 17 Iyakiya makkekkuwangngè pèkkugi tosi Saudara-saudara? Mangakui Saudara tau Yahudi. Taggattungngi Saudara ri hukkunna agama Yahudiè sibawa maloppo nyawana ri laleng assisumpungenna Saudara sibawa Allataala. 18 Lolongengngi Saudara panunju'-panunju' polè ri hukkungngèro, angkanna muwisseng èlona Allataala sibawa muwissenna pattentui kèga makessing. 19 Mateppe'ko makkedaè Saudara iyanaritu pamimpinna tau butaè sibawa tajang lao ri mennang iya engkaè ri laleng pettangngè; 20 Saudara gurunna sining tau iya matunaè ampè-ampèna, sibawa gurunna sining tau iya namadonggoè. Mateppe'i Saudara makkedaè ri laleng hukkunna agama Yahudiè, nappunnaiwi Saudara sininna pangissengengngè sibawa pappagguruwang iya tongengngè. 21 Mupaggurui tau laingngè; magi nadè' mupaggurui alèmu? Mupaggurui tauwè kuwammengngi aja' naènnau, padahal Saudara muto mènnau! 22 Mupaggurui tauwè kuwammengngi aja' namalaweng, padahal Saudara muto malaweng! Mubenciwi barahalaè, padahal Saudara muto malai barab-barang polè ri bola-bola abbarahalangngè. 23 Nattempo-tempowangngi Saudara makkedaè nappunnaiwi Saudara hukkunna Musa, padahal napakatunai Saudara Allataala ri laleng dè'na muturusiwi parènta-Na. 24 Ri laleng Kitta'è tarokii makkuwaè, "Nasaba iko, sining tau Yahudiè, naricarèpai asenna Allataala ri yelle'na bangsa-bangsa laingngè. " 25 Rèkko matinului Saudara ri hukkunna agama Yahudiè, sunna'na Saudara engkato akkègunanna. Iyakiya rèkko dè' mullèi mapatoiwi gau'-gau' iya riyapparèntangngè ri laleng hukkung-hukkungngèro, sunna'na Saudara dè' sisenna nakkèguna. 26 Rèkko sèddiè tau tenniya Yahudi iya dè'è narisunna', turusiwi hukkunna agama Yahudiè, dè'ga nangga'i Allataala selaku tau iya puraènna risunna? 27 Nasining tau iya dè'è narisunna'ro napassalai matu tau Yahudiè, saba' mappunnaiwi Saudara hukkung agama Yahudi sibawa risunna'na Saudara, iyakiya muwajjalèkkaiwi hukkung-hukkungngèro. Dè' narisunna' mennang, iyakiya mala mennang ritu iya turusiyèngngi hukkunna agama Yahudiè. 28 Nasaba tau Yahudi iya tulèngngè tenniya iya asennaè bawang tau Yahudi; sibawa tau iya tonget-tongengngè risunna tenniya tau iya risunna'è secara mallahèreng bawang. 29 Sibalè'na, sèddiè tau Yahudi iya tulèngngè iyanaritu tau iya atinnaè mannyawa Yahudi; sibawa sunna' tongengngè iyanaritu sunna' ri atiè iya najamaè Rohna Allataala, tenniya iya riyokiè ri laleng kitta'è. Tau sinrupaèro tarimai pappojiyang polè ri Allataala, tenniya polè ri rupa tauwè.

Roma 3

1 Rèkko makkuwaitu, aga sarona mancaji tau Yahudi? Sibawa aga gunana turusiwi peraturang sunna'è? 2 Tentu maèga muwa gunana! Bunge'-bunge'na, nasaba lao ri tau Yahudiè ritu Allataala mappaddettangengngi ada-adanna Allataala. 3 Iyakiya pèkkugi rèkko sibagiyang tau Yahudiè dè' namatinulu? Nassabarigaro na Allataala dè'to namatinulu? 4 Tentu dè'! Nasaba manessani Allataala tuli tongengngi, namuni tungke' tauwè mabbellèi. Ri laleng Kitta'è tarokii, "Sitinajako pabutti tongeng ri laleng aga iya mupogau'è, sibawa pakalako wettummu riyadèlèki. " 5 Iyakiya rèkko pèdè' manessani adèlèkenna Allataala, nasaba pogau'ki iya dè'è natongeng, agana maèlo tapowada? Makkedaè Allataala dè' naadèlè' rèkko nahukkukki? (Mèmeng iyaè pakkutanaè siratangngi secara tolino. ) 6 Dè' sises-siseng! Saba' rèkko dè' naadèlè' Allataala, pèkkugi naullèi madèlèkiwi linoèwè? 7 Iyakiya narèkko pangkaukeng iya dè'è natongeng, aga iya tongengngè passalenna Allataala pèdè' paitai, angkanna ripojiwi, magi tau iya pogau'èngngi majaèro ripasala mupi selaku tau madosa? 8 Na magi nadè' naweddikki makkeda, "Madècèngengngi pogau'ki majaè kuwammengngi mompoi dècèngngè?" Mèmeng engka sining tau iya pakatunaiyèkka sibawa powadai makkedaè purana makkeda makkuwaro. Sining tau sinrupaèro siratangngi rihukkung ri Allataala. 9 Aga tudangetta selaku tau Yahudi lebbi makessingngi naiya pangka'na sining tau bangsa laingngè? Dè' sises-siseng! Purani upowada makkedaè muwi tau Yahudiè iyarè'ga bangsa laingngè, iya manenna rikuwasaini ri dosaè. 10 Pada-pada iya tarokiè ri laleng Kitta'è, "Dè' muwi sèddi tau tongeng, 11 dè' muwi sèddi tau pahangngi sibawa dè' muwi sèddi tau sompai Allataala. 12 Sininna tauwè purani napabèlai alèna polè ri Allataala; pusa manenni. Dè' muwi sèddi tau pogau'i tongengngè; muwi sèddi dè'to! 13 Tigero'na mennang pada-padai tampung tattimpa'è. Bellè massolo polè ri lilana, sibawa tèmunna mennang mapporokeng pètenna, pada-pada moso ulaè. 14 Pennoi tèmunna mennang sibawa tanro enrengngè mabbanta. 15 Masitta jongkana mennang rèkko maèloi mabbuno tau. 16 Ancurekeng sibawa asussangngè, namporengngi mennang kègi-kègi. 17 Butai mennang lao ri laleng asalèwangengngè, 18 sibawa dè' nappakalebbi ri Allataala. " 19 Riissenni makkekkuwangngè makkedaè sininna iya tarokiè ri laleng hukkunna agama Yahudiè, iyanaritu untu' sining tau iya engkaè riyawa parèntana hukkung-hukkungngèro. Rimakkuwannanaro dè' sèddi tau mullèi mabbèrè alasang muwi agi-agi sibawa sininna linoè naullèi Allataala tuntu'i. 20 Saba' dè' sèddi tau makkullè simadècèngeng Allataala nasaba iyaro tauwè nattuwangngi gau'-gau' iya engkaè ri laleng hukkunna agamaè. Sibalè'na iyaro hukkung-hukkungngè banna najjellokengngi lao ri rupa tauwè makkedaè madosai rupa tauwè. 21 Iyakiya makkekkuwangngè Allataala pura mappaitangngi lalengngè pèkkugi tolinoè nasimadècèngeng sibawa Allataala; na caranaro dè' gaga assisumpungenna sibawa hukkunna agama Yahudiè. Kitta'-kitta'na Musa sibawa kitta'-kitta'na nabi-nabiè mala pannessai gau'èro, 22 makkedaè Allataala mpèrèngngi pakkullèng tolinoè simadècèngeng sibawa Allataala, banna rèkko rupa tauwè mateppe'i ri Yèsus Kristus. Napogau'i Allataala iyaè untu' sininna tau iya mateppe'è ri Kristus; saba' dè'gaga assilaingenna: 23 Sininna tauwè madosani sibawa mabèlai polè ri Allataala iya maèloè passalama'i mennang. 24 Banna nasaba pammasèna Allataala bawang iya nabbèrèyangngè sibawa cuma-cuma; assisumpungenna tolinoè sibawa Allataala madècèngngi paimeng; carana iyanaritu: ripaleppe'i tolinoè ri Yèsus Kristus. 25 Allataala makkarobangengngi Yèsus Kristus kuwammengngi na amatèn-Naro ripannessai tolinoè leppe'i polè ri asalangngè rèkko mateppe'i mennang ri Alèna. Napogau'i Allataala makkuwaèro untu' mappaitangngi adèlèken-Na. Saba' ri wettu labe'è sabbara'i Allataala lao ri dosa-dosana tolinoè, angkanna dè' nahukkungngi mennang. 26 Iyakiya makkekkuwangngè tinda'i lao ri dosaè untu' pabuttiwi adèlèken-Na. Nasibawang caraèro, nappaitangngi makkedaè tongengngi Alèna; sibawa tungke' tau iya mateppe'è ri Yèsus, Ripannessai selaku tau iya simadècèngengngè paimeng sibawa Allataala. 27 Rimakkuwannanaro dè'na gaga alasang ri idi untu' mammingki-mingki. Magi nakkuwaro? Aga nasaba ripogau'i iya tarokiè ri laleng hukkunna agama Yahudiè? Tenniya. Iyakiya nasaba mateppe'ki. 28 Saba' rippe'na iyanaritu makkuwaiyè: Ripannessai tauwè simadècèngeng paimeng sibawa Allataala, tenniya nasaba nattuwangngi aga iya tarokiè ri laleng hukkunna agama Yahudiè, sangadinna nasaba mateppe'i ri Yèsus Kristus. 29 Iyarè'ga iyaro Allataala, Allataalanai tau Yahudiè bawang? Dè'ga na Allataalana towi bangsa laingngè? Ya, mèmeng Allataalana towi bangsa laingngè! 30 Saba' sèddi bawang Allataala. Alèna ritu nakkullèngiwi sining tau Yahudiè nasimadècèngeng paimeng sibawa Allataala nasaba mateppe'i mennang. Na Alènato nallalengi nasining tau bangsa laingngè simadècèngngi paimeng sibawa Allataala; iyatoro nasaba mateppe'i mennang. 31 Aga iyaè bettuwanna makkedaè nasaba mateppe'ki ri Kristus, riyabbèyangngi hukkunna agama Yahudiè? Dè' sises-siseng! Mala nasaba atepperettaro, naripakarajai hukkung-hukkungngèro.

Roma 4

1 Rèkko makkuwaitu, aga wedding ripowada passalenna Abraham, nènè-nènèna bangsata? Pèkkugi pangalamanna? 2 Rèkko gau'-gau' iya napogau'è nassabariwi Allataala natarimai selaku tau iya pèsennangiyèngngi atinna Allataala, engka tona alasang ri alèna untu' mammingki-mingki. Iyakiya dè' naullèi mammingki ri yolona Allataala. 3 Ri laleng Kitta'è tarokii, "Mateppe'i Abraham lao ri Allataala, nasaba atepperennaè ritarimai ri Allataala selaku tau iya pèsennangiyèngngi atinna Allataala. " 4 Tau majjamaè, tarimai gaji; na gajinna dè' nangga'i selaku sèuwa pabbèrè, saba' iyaro mèmeng ha'na. 5 Iyakiya engka tau iya dè'è nataggattung ri usahana alèna; nappaddettangengngi alèna ri Allataala iya pannessaèngngi tau madosaè leppe'i polè ri asalangngè. Situru teppe'naro nallalengiwi Allataala natarimai tauwèro selaku tau iya pèsennangiyèngngi atinna Allataala. 6 Makkuwatoro pallolongenna Daud; iyanaro saba'na nawèrèkkadaiwi salama' masennangngi lao ri tau iya ritarimaènna ri Allataala selaku tau iya pèsennangiyèngngi atinna Allataala, sibawa dè'na Allataala najampangiwi sining pangkaukenna tauwèro. Makkeda makkuwaiyè Daud, 7 "Masennangngi tau iya riyaddampengengngè sining asalanna sibawa dosa-dosana purani nakuburu' Allataala! 8 Masennangngi tau iya dè'è narituntu' dosa-dosana ri Puwangngè!" 9 Aga iyaè ada-ada masennangngè ripattujui bawang lao risining tau iya turusiyèngngi peraturang sunna'è bawang? Iyarè'toga lao ri tau iya dè'è naturusiwi peraturang sunna'è? Purani ripowada ri yolona, makkedaè ritarimai Abraham ri Allataala selaku tau iya pèsennangiyèngngi atinna Allataala, nasaba mateppe'i Abraham ri Allataala. 10 Namaraganna Allataala napannessai iyaro gau'è? Riwettu dè'napa iyarè'ga puranana Abraham risunna? Mèmeng riwettu dè'napa narisunna', tenniya puranana. 11 Ri munriwi risunna, sibawa iyaro sunna'na banna selaku tanrang makkedaè Allataala pura tarimai selaku tau iya pèsennangiyèngngi atinna Allataala, nasaba mateppe'i ri Allataala. Ritarimai ri Allataala riwettu dè'napa naccowèriwi peraturang sunna'è. Sibawa Abraham mancaji ambo'i secara batèng lao ri sininna tau iya mateppe'è ri Allataala, sibawa iya nassabariyè pura ritarimai ri Allataala selaku tau iya pèsennangiyèngngi atinna Allataala, namuni mennang dè' naccowèriwi peraturang sunna'è. 12 Ambo' batènna towi Abraham untu' sining tau iya maccowèriyèngngi peraturang sunna'è. Ambo' batènnai mennang tenniya bawang nasaba naccowèriwi mennang peraturang sunna'è, iyakiya nasaba tuwo towi mennang sibawa mateppe'na lao ri Allataala, pada-padato Abraham riwettu dè'napa naccowèriwi peraturang sunna'è. 13 Majjanciwi Allataala lao ri Abraham sibawa wija-wijanna makkedaè iyaè linoè mancajiwi matu appunnangenna Abraham. Majjanci makkuwairo Allataala tenniya nasaba matinului Abraham ri hukkunna agama Yahudiè, iyakiya nasaba mateppe'i lao ri Allataala angkanna ritarimai ri Allataala selaku tau iya pèsennangiyèngngi atinna Allataala. 14 Saba' rèkko banna sining tau iya matinuluè lao ri hukkunna agama Yahudiè bawang iya tarimaèngngi matu aga najjanciyang Allataala, teppe'è lao ri Allataala dè' sises-sisenna nakkèguna, sibawa jancinna Allataala dè'tona nallise. 15 Hukkunna agama Yahudiè napapolèi pahukkungenna Allataala, iyakiya rèkko dè'gaga hukkung-hukkung, dè'to gaga pelanggarang. 16 Jaji iyaro jancinna Allataala siturui teppe'na tauwè lao ri Allataala. Mancajiwi iyaro sèddi boro' lao ri sininna wija-wijanna Abraham makkedaè iyaro janciè riwèrèngngi mennang selaku sèddi pabbèrè polè ri Allataala iya cuma-cumaè; tenniya bawang lao ri mennang iya matinuluè lao ri hukkunna agama Yahudiè bawang, iyakiya laoto ri mennang iya mateppe'è ri Allataala pada-pada Abraham mateppe' lao ri Alèna. Saba' Abraham iyanaritu ambo'ta maneng secara batèng. 17 Saba' makkeda makkuwaiyè Allataala lao ri Abraham, "Purano upancaji ambo' untu' maèga bangsa. " Makkuwaniro Allataala mabbèrèyangngi iyaro janciè lao ri Abraham. Namateppe'i Abraham lao ri Alèna. Alèna ritu Allataala iya patuwoèngngi tau matè; Alènato Allataala iya makkedaè bawang nanaèbbui aga iya dè'è naengka mancaji engka. 18 Abraham maddennuwang bawang matteru sibawa mateppe' namuni dè'na gaga paddennuwanna. Rimakkuwannanaro mancajiwi ambo'na maèga bangsa. Pada-pada tarokiè ri laleng Kitta'è, "Mancajiwi matu maèga senna' wija-wijammu. " 19 Iyaro Abraham wettuè dè'na akkullènna mappunnai wijanna, saba' macowa senna'ni sibawa umuru'na nacawèkini sèratu taung; makkuwatoro Sara, bainènaro, manangngi. Iyakiya teppe'na Abraham dè' nakurang. 20 Tette'i mateppe' sibawa dè' nakalèwa'-lèwa' lao ri jancinna Allataala. Mala teppe'na pancajiwi tattamba mawatang, angkanna napojiwi Allataala. 21 Mateppe' senna'i makkedaè naullèi Allataala pogau'i aga iya pura Najjanciyangngè. 22 Iyanaro saba'na naritarima Abraham ri Allataala selaku tau iya sennangiyèngngi atinna Allataala. 23 Ada-ada "ritarimai selaku tau iya sennangiyèngngi atinna Allataala" riyokii tenniya untu' alè-alèna Abraham bawang, 24 iyakiya untu' idi'to. Ritarima tokki matu selaku tau iya puraè sennangi atinna Allataala, nasaba mateppe'ki lao ri Allataala iya patuwoèngngi Yèsus, Puwatta, polè ri amatèngngè. 25 Iyaro Yèsus purani riyabbèrèyang untu' riyuno nasaba dosa-dosata; nainappa napatuwo paimeng Allataala untu' nallalengiki simadècèngeng paimeng sibawa Allataala.

Roma 5

1 Makkekkuwangngè simadècèngenni paimeng sibawa Allataala, nasaba mateppe'ki. Rimakkuwannanaro tuwoki ri laleng adamèngengngè sibawa Allataala naolai Puwatta Yèsus Kristus. 2 Nasaba mateppe'ki ri Yèsus Kristus, namakkullèki pèneddingiwi pammasèna Allataala, nanasibawangngi iyaro pammasè natuwoki makkekkuwangngè. Rimakkuwannanaro mariyo-riyo atitta nasaba mappunnaiki paddennuwang makkedaè ripèrasai matu asennangengngè iya nabbèrèyangngè Allataala! 3 Nalebbi naiyaro, marennu tokki ri laleng anrasa-rasangngè, nasaba riissengngi makkedaè anrasa-rasangngè mèbbui tauwè mancaji matinulu, 4 na atinulurengngè mèbbui matu tauwè tahang ri paccobangngè; iyanaè paompo paddennuwang. 5 Paddennuwang iya pada-padaèwè dè' napakacèlèki matu, nasaba purani riliseki atitta ri Allataala sibawa pammasè. Napogau'i Allataala iyaro naolai Roh Mapaccin-Na, iya puraè nawèrèkki. 6 Wettutta ri laleng keadaang dè'gaga pakkullèng, matèi Kristus untu' idi ri wettu iya pura napattentuè Allataala; padahal idi sining tau iya mabèlaè polè ri Allataala. 7 Muwi untu' sèddiè tau adèlè mawatatto tauwè maèlo matè. Naullè untu' sèddiè tau iya makessingngè, engkato tau iya baraniè matè. 8 Iyakiya Allataala pannessai pammasè-Na lao ri idi wettunna Kristus matè untu' idi wettutta tau madosa mupa. 9 Makkekkuwangngè simadècèngenni paimeng sibawa Allataala naolai amatènna Kristus; rimakkuwannanaro mattentuni ripassalama' tokki matu polè ri caina nasaba Kristus. 10 Rèkko ri wettutta simusu sibawa Allataala; ripasidamèki sibawa Alèna naolai amatènna Ana'-Na, lebbi-lebbipi makkekkuwangngè simadècèngenna paimeng assisumpungetta sibawa Allataala, tentu ripassalama' tokki matu naolai atuwonna Kristus. 11 Nalebbi na iyaro, marennu tokki nasaba akessingenna Allataala naolai Puwatta Yèsus Kristus. Saba' naolai Kristus, ripèneddingiwi makkekkuwangngè assisumpungetta iya madècèngngèro sibawa Allataala. 12 Muttama'i dosaè ri laleng linoè naolai sèddi tau, na polè ri dosaèro momponi amatèngngè. Addimonrinna, iyaro amatèngngè nassanraiwi sininna rupa tauwè, saba' sininna tauwè madosani. 13 Riwettu dè'napa nariyabbèrèyang hukkunna agama Yahudiè, engka mèmenni dosaè ri laleng linoè. Iyakiya dè' narituntu' dosaè, nasaba dè'gaga hukkung iya weddingngè riyajjalèkkai. 14 Namuni polè ri wettunna Adam lettu ri wettunna Musa, sininna rupa tauwè rikuwasaiwi ri amatèngngè. Mala sining tau iya dè'è napogau' pelanggarang sibawa cara iya padaè iya napogau'è Adam, iyaro sining tauwè maccowè towi rikuwasai ri amatèngngè. Adam iyanaritu gambaran-Na polè ri iya maèloè polè matti. 15 Iyakiya dè' napada duwa iyaro; nasaba asèmpowang atinna Allataala mabèlai lebbi battowa rèkko ripasibandingngi sibawa palanggarang iya napogau'è Adam. Pelanggaranna sèddi tau nassabariwi maèga tau matè. Lebbi battowapasi addimonrinna pammasèna Allataala sibawa hadiya asalamakengngè iya nabbèrèyangngè lao ri maèga makkuwaro tau, naolai akessingeng atinna sèddiè tau iyanaritu Yèsus Kristus. 16 Hadiya polè ri Allataala lebbi battowa towi naiya dosana tau sèddièro. Saba' puranana sèddiè tau pogau' pelanggarang, tatteppani apettung "Pasalaè". Iyakiya maèganana tau pogau' dosa polèni pammasèna Allataala iya pannessaèngngi, "Dè' napasala". 17 Nasaba palanggaranna sèddi tau, massanrai amatèngngè lao kègi-kègi naolai tau sèddièro. Lebbi battowa pasi addimonrinna naiya napogau'è sèddiè tau laing, iyanaritu Yèsus Kristus. Naolai Alèna, nabbèrèyangngi Allataala pammasè-Na lao ri maèga tau sibawa nallalengiwi mennang simadècèngeng paimeng sibawa Allataala sibawa cuma-cuma; makuwasai matu mennang ri linoèwè naolai Kristus. 18 Jaji pèkkugi pelanggaranna sèddiè tau nassabariwi sininna rupa tauwè rihukkung, makkuwatoro pangkaukenna sèddiè tau iya maccowèriyèngngi èlona Allataala, nassabariwi sininna tauwè ripaleppe' polè ri asalanna sibawa riwèrèng atuwong. 19 Na pèkkugi namaèga tau mancaji tau madosa nasaba sèddi tau dè' namatinulu, makkuwatoniro maèga tau ripakkullè simadècèngeng paimeng sibawa Allataala nasaba sèddi tau matinulu ri Allataala. 20 Iya mabbèrèyangngèngngi hukkunna agama Yahudiè iyanaritu Allataala muto. Iyakiya pèdè' makkuragai tolinoè turusiwi iyaro hukkung-hukkungngè, pèdè' najjalèkkaiwi mennang sibawa madosa lao ri Allataala. Iyakiya namuni pèdè' pogau' dosa tolinoè, Allataala pèdè' mamasèiwi mennang. 21 Na, harusu'ki matè nasaba pogau'ki dosa, iyakiya Allataala mamasèiki sibawa mabbèrèi laleng lao ri idi untu' simadècèngeng paimeng sibawa Alèna. Nasaba assisumpungetta sibawa Allataala madècèngi paimeng, nabbèrèyang towi atuwong mannennungengngè lao ri idi naolai Yèsus Kristus, Puwatta.

Roma 6

1 Rèkko makkuwairo, aga wedding ripowada? Harusu'ki'ga matteru-teru pogau' dosa kuwammengngi napèdè' namasèiki Allataala? 2 Tentu dè'! Dè'na nakuwasaiki dosaè, jaji, pèkkugi weddikki matteru-teru tuwo sibawa pogau' dosa? 3 Taissegga Saudara-saudara makkedaè wettutta ricemmè, ripassèddiki sibawa Kristus Yèsus? Bettuwanna iyaè ripassèddiki sibawa amatèn-Na. 4 Nasaba acemmèngngèro, rikuburu'ki silaong Kristus sibawa maccowèki matè silaong Alèna, kuwammengngi napèkkugi Kristus ripatuwo polè ri amatèngngè nasaba akuwasanna Ambo' iya malebbiè, makkuwatoniro weddikki joppaiwi sèuwa atuwong iya mabaruè. 5 Rèkko massèddini sibawa Kristus nasaba maccowè tokki matè sibawa Alèna, mancaji sèddi tokki matu sibawa Alèna nasaba maccowè tokki ripatuwo paimeng pada-pada Alèna. 6 Riissenni makkedaè ampè-ampèta riyolo selaku tolino pura riyunoi silaong Kristus ri aju salliè kuwammengngi nariyancuru akuwasanna ampè-ampèta iya madosaèro; nanallalengiro dè'na naripowataki ri dosaè. 7 Nasaba rèkko sèddiè tau matèi, iyaro tauwè ripaleppe'i polè ri akuwasanna dosaè. 8 Rèkko purani matè silaong Kristus, mateppe'ki makkedaè tuwo tokki matu silaong Alèna. 9 Saba' riissengngi makkedaè pura ripatuwoni Kristus polè ri amatèngngè sibawa dè'na namatè; dè'na namakuwasana amatèngngè ri yasè'na Alèna. 10 Amatèng iya napèneddingiyè Kristus iyanaritu amatèng nasaba dosa. Iyaro sisemmi bawang kajajiyang lettu mannennungeng. Sibawa atuwong iya napèneddingiyè makkekkuwangngèwè iyanaritu atuwong untu' Allataala. 11 Harusu' tokko mangga'i alèmu matè nasaba dosa, iyakiya tuwo ri laleng assisumpungeng iya mare'è sibawa Allataala naolai Yèsus Kristus. 12 Aja'na muleppessangngi dosaè kuwasaiwi atuwommu iya dè'è namannennungeng ri linoè, kuwammengngi aja' muturusiwi pangèloremmu iya majaè. 13 Aja'to muwabbèrèyangngi anggota tubummu lao ri akuwasanna dosaè untu' riyakkègunang lao ri akkatta-akkatta majaè. Iyakiya abbèrèyangngi alèmu lao ri Allataala selaku sining tau iya puraè ripalèttè polè ri amatèngngè lao ri atuwongngè. Abbèrèyang manengngi alèmu lao ri Allataala kuwammengngi nariyakkègunang untu' èlona Allataala. 14 Dè' nawedding dosaè makuwasaiko, nasaba dè'na mutuwo riyawana hukkunna agama Yahudiè iyakiya ri yawana pammasèna Allataala. 15 Makkekkuwangngè, aga rippe'na? Weddikki'ga madosa, nasaba dè'na na ri yawanaki akuwasanna hukkungngè, sangadinna ri yawa akuwasanna pammasèna Allataala? Dè' sises-siseng! 16 Muwissegga makkedaè rèkko muwabbèrèyangngi alèmu lao risèddiè tau untu' pogau'i èlona, tentu iyanaritu atannako tau iya muturusièro -- iyarè'ga atannai dosaè iya tiwièkko lao ri amatèngngè, iyarè'ga ata iya matinuluè ri Allataala, nanallalengiro nasimadècèngeng paimeng sibawa Allataala. 17 Iyakiya sukkuru'ki lao ri Allataala! Saba' riyolo mancaji atannako dosaè, iyakiya makkekkuwangngè sukku atinna saudara turusiwi pappagguruwang tongengngè iya puraè riwèrèkko. 18 Purano ripaleppe' polè ri dosaè, namakkekkuwangngè mancaji atano untu' èlona Allataala. 19 Nasaba makkumani lemmana pappèjeppummu, makkègunakka conto-conto angatangeng kuwammengngi nalebbi gampang mupahang. Riyolo muwabbèrèyangngi alèmu selaku ata lao ri gau'-gau' iya macarèpaè sibawa majaè untu' akkatta-akkatta majaè. Makkuwatoro makkekkuwangngè, sitinajako mabbèrèyangngi sininna alèmu selaku ata lao ri èlona Allataala untu' akkatta-akkattana Allataala iya mapaccingngè. 20 Wettummu ripowata ri dosaè, dè' narikuwasaiko ri èlona Allataala. 21 Iyaro wettuè asarong aga mutarima polè ri gau'-gau' iya makkekkuwangngèwè muposiri pogau'i? Iyaro sining pangkaukengngè banna tiwi amatèng! 22 Iyakiya makkekkuwangngè ripaleppe'no polè ri dosaè, sibawa mancaji atanna Allataala. Asarommu iyanaritu makkedaè tuwoi Saudara banna untu' Allataala na iyaro gau'è powassèlè'i atuwong tongengngè sibawa mannennungengngè. 23 Saba' amatèngngè iyanaritu saronai dosaè; iyakiya atuwong tongengngè iya mannennungengngè sibawa Kristus Yèsus Puwatta iyanaritu pabbèrè iya nabbèrèyangngè Allataala sibawa cuma-cuma.

Roma 7

1 Saudara-saudara! Naisseng manenni Saudara hukkungngè. Jaji, muwisseng makkedaè akuwasanna hukkungngè ri yasè'na sèddiè tau, takkennai ri wettu tuwona mupa iyaro tauwè. 2 Ebara'na, sèddiè makkunrai iya mallakkaiyè, tassiyoi lao ri hukkungngè lao ri lakkainna banna ri wettu tuwona mupa lakkainna. Rèkko matèni lakkainna, iyaro bainè leppe'i polè ri hukkung iya siyoèngngi lao ri lakkainna. 3 Rèkko iyaro makkunraiè siyonrongngi sibawa worowanè laingngè ri wettu tuwona mupa lakkainna, secara hukkung, iyaro makkunraiè riyasengngi malaweng. Iyakiya rèkko matèni lakkainna, secara hukkung, iyaro makkunraiè leppe'ni. Narèkko kawingngi paimeng sibawa sèddiè worowanè laing, dè' namalaweng. 4 Makkuwatoro gau'na sibawa iko, Saudara-saudara. Lao ri hukkunna agama Yahudiè matèno, nasaba pura ripassèddino sibawa tubunna Kristus sibawa mancaji appunnangen-Na iya puraè ripatuwo paimeng polè ri amatèngngè. Ripatuwoi polè ri amatèngngè kuwammengngi tamancaji makkèguna lao ri Allataala ri laleng atuwotta. 5 Saba' riyolo tuwoki manuru' sipa-sipa tolinoè. Iyaro wettuè sining cinnata iya madosaè, iya mompoè nasaba engkana hukkunna agamaè, mappattentu ri laleng alèta. Iyanaro saba'na naripogau' gau'-gau' iya nassabariyè amatèng. 6 Iyakiya makkekkuwangngè dè'na tatassiyo ri hukkunna agama Yahudiè. Purani matè lao ri hukkung-hukkung iya makuwasaiyèkki riyolo. Dè'na tassompa sibawa cara-cara maittaè, situru hukkung-hukkung iya tarokiè. Makkekkuwangngè massompaki situru cara baru iya nappaitangngè Rohna Allataala lao ri idi. 7 Rèkko makkuwaitu, agana wedding tapowada? Majaga hukkunna agama Yahudiè? Tentu dè'! Iyakiya hukkung ngènnaro pagguruka passalenna dosaè. Dè' uwissengngi aga iyaro mangowaè, rèkko hukkung agamaè dè' napowadai, "Aja' mumangowa. " 8 Naolai hukkung agamaè, nalolongeng kasempatang dosaè untu' paompoi sininna rupanna cinnaè iya mangowaè ri laleng atikku, saba' rèkko dè'i gaga hukkunna agamaè, tentu matè towi dosaè. 9 Iyya riyolo tuwoka temmakkè hukkung agama. Iyakiya wettunna mompo hukkung agamaè, mammulani tuwo dosaè 10 na iyya matèka. Na hukkung agamaèro, iya bunge'-bunge'naè naseng untu' mabbèrè atuwong, mala papolèi amatèng lao ri iyya. 11 Nasaba naolai hukkung agamaèro, malai kasempatang dosaè bengnguwakka sibawa mpunoka. 12 Assalenna hukkung agamaè polèi ri Allataala, na tungke' parènta ri laleng hukkungngèro apolènna polèi ri Allataala, jaji adèlè sibawa makessing. 13 Nah, aga iyaè makkèbettuwangngi makkedaè iya makessingngèro mappapolèi amatèng lao ri iyya? Tentu' dè'! Dosaè ritu mappapolè amatèng. Ri laleng napakèna iya makessingngè, namappapolè dosaè amatèng lao ri iyya, kuwammengngi sipa-sipa dosaè napaita sibawa namanessa. Naolai parènta-parèntana Allataala, pabuttini pèkkugi jana dosaè. 14 Riissenni makkedaè hukkunna agama Yahudiè assalenna polèi ri Rohna Allataala; iyakiya iyya'è tolino malemmaka. Purana ribalu' untu' mancaji atanna dosaè. 15 Saba' alèku paimeng dè'to upahangngi pangkaukekku. Gau'-gau' iya macinnaè upogau', iyaro dè' upogau'i; iyakiya gau'-gau' iya ubenciyè, mala iyaro upogau'. 16 Rèkko upogau'i gau'-gau' iya sièwaè sibawa cinnaku, bettuwanna iyaro uwangakuiwi makkedaè iyaro hukkunna agama Yahudiè makessingngi. 17 Jaji, tenniyana iyya sitongenna pogau'i iyaro, sangadinna dosa iya kuwasaiyèngngi alèku. 18 Uwisseng makkedaè dè'gaga muwi sèuwa iya makessingngè ri laleng alèku; iyanaritu ri laleng ampè-ampèku selaku tolino. Saba' engka cinna ri alèku untu' pogau'i makessingngè, iyakiya dè' uwullèi pajoppai. 19 Dè' upogau'i iya makessingngè iya macinnaè upogau'; sibalèna upogau'i gau'-gau' iya majaè, iya dè'è umaèlo pogau'i. 20 Rèkko upogau'i gau'-gau' iya dè'è umaèlo pogau'i, bettuwanna iyaro tenniyana iyya pogau'i iyaro gau'-gau'è, sangadinna dosaè iya kuwasaiyèngngi alèku. 21 Jaji, malaka apettung makkedaè hukkungngènnaè makkatenning peranang: iyanaritu makkedaè rèkko maèloka pogau'i iya makessingngè, na banna iya majaè bawang mompo ri alèku. 22 Napoji batèkku hukkunna Allataala, 23 iyakiya mainge'ka makkedaè ri laleng alèku engkato hukkung laing iya mattenningngè peranang -- iyanaritu hukkung iya siyèwaè sibawa hukkung iya riyangakuiyè ri akkalekku. Iyanaro saba'na tassiyoka ri hukkung dosaè iya makkatenningngè peranang ri laleng alèku. 24 Makkuwaniè keadaakku: uturusiwi hukkunna Allataala sibawa akkalekku, iyakiya nasaba ampè tolinoku, tunru'ka lao ri dosaè. Temmaka cilakaku iyya'è! Nigana maèlo passalama'ka polè ri watakkalèwè iya tiwièkka lao ri amatèngngè? Sukkuru'ki lao ri Allataala! Maèloi passalama'ka naolai Yèsus Kristus.

Roma 8

1 Makkekkuwangngè dè'na gaga pahukkungeng lao ri mennang iya tuwoè massèddi sibawa Kristus Yèsus. 2 Saba' hukkunna Rohna Allataala iya mèbbuèkki tuwo massèddi sibawa Kristus Yèsus pura paleppe'ka polè ri hukkung iya nassabariyè dosaè sibawa amatèngngè. 3 Aga iya dè'è naullèi napogau' hukkung agamaè, nasaba idi tau malemmaki, iyaro pura napogau'ni Allataala. Allataala caui akuwasanna dosaè ri laleng sipa'na tolinoè sibawa kiringngi Ana'na, iya polè ri laleng keadaang iya padaè sibawa tolinoè iya madosaè, untu' leddai dosaè. 4 Napogau'i Allataala iyaro kuwammengngi èlo-Na iya napannessaè ri laleng hukkunna agama Yahudièro weddingngi ripajoppa ri laleng alèta iya tuwoè situru Rohna Allataala sibawa dè' nasituru' sipa'na tolinoè. 5 Sining tau iya tuwoè situru sipa' tolinoè, mappikkiri'i matteru-teru aga nacinnai iyaro sipa' tolinoè. Iyakiya sining tau iya tuwoè situru Rohna Allataala, mappikkiri'i matteru-teru aga nacinnaiyè Rohna Allataala. 6 Rèkko pikkirammu rikuwasaiwi ri sipa' tolinoè, addimonrinna amatèng. Iyakiya rèkko pikkirammu rikuwasaiwi ri Rohna Allataala, addimonrinna iyanaritu atuwong sibawa assidamèngeng sibawa Allataala. 7 Tau iya rikuwasaiyè pikkiranna ri sipa' tolinona, iyaro tauwè simusui sibawa Allataala; nasaba iyaro tauwè dè' natunru' lao ri hukkunna Allataala; na mèmeng dè' naullèi tunru' lao ri hukkunna Allataala. 8 Sining tau iya tuwoè situru sipa' tolinoè, iyaro sining tauwè dè' naullèi pèsennangiwi Allataala. 9 Iyakiya dè' mutuwo situru sipa' tolinoè. Tuwoko situru Rohna Allataala -- rèkko, Rohna Allataala tonget-tongengngi makkatenning peranang ri laleng alèmu. Tau iya dè'è nappunnai Rohna Kristus, iyaro tauwè tenniya appunnangenna Kristus. 10 Iyakiya rèkko Kristus tuwoi ri laleng alèmu, namuni watakkalèmu matèi matti nasaba dosa, iyakiya Rohna Allataala mabbèrè atuwong lao ri iko, 11 Rèkko Rohna Allataala, iya patuwoèngngi Kristus polè ri amatèngngè, tuwoi ri laleng alèmu, tentu iya patuwoèngngi Kristus polè ri amatèngngèro, patuwo towi matu watakkalèmu iya weddingngèro matè. Napogau'i iyaro sibawa Roh-Na iya tuwoè ri lalemmu. 12 Iyanaro saba'na, Saudara-saudara, mappunnaiki tanggung jawa'; iyakiya tenniya tanggung jawa' lao ri sipa' tolinoè; dè' naparelluki tuwo situru èlona. 13 Nasaba rèkko tuwoko situru sipa' tolinoè, matèko matu; iyakiya rèkko nasibawang akuwasanna Rohna Allataala, matteruko bawang mpunoi pangkaukeng-pangkaukemmu iya madosaè, tuwoko matu. 14 Sining tau iya ripimpingngè ri Rohna Allataala, iyanaritu ana'-ana'na Allataala. 15 Saba' Roh iya nabbèrèyangngè Allataala lao ri iko, dè' napancajiko ata angkanna tuwoko ri laleng amètaurengngè. Sibalè'na iyaro Rohna Allataala napancajiko ana'-ana'na Allataala. Nasibawang akuwasanna iyaro Rohna Allataala riyobbii iyaro Allataala, "Ambo', Ambo'ku!" 16 Rohna Allataala silaong iyaro rohta pannessai makkedaè idi iyanaritu ana'-ana'na Allataala. 17 Nah, rèkko idi iyanaritu ana'-ana'-Na, tentu idi'to iyanaritu ahli warisi'-Na iya tarimaè matu barakka-barakka iya napassadiyaè Allataala untu' ana'-ana'-Na. Tarimaki matu silaong Kristus aga iya puraè napassadiyangengngi Allataala; saba' rèkko manrasa-rasaki silaong Kristus, ripakalebbi tokki silaong Alèna. 18 Sininna anrasa-rasang iya ripèneddingiyè makkekkuwangngè, manuru' pallolongekku, dè' sises-siseng nawedding ripasibanding sibawa alebbireng iya maèloè ripannessa lao ri idi. 19 Sininna alangngè mattajeng sibawa muddani senna' lao ri wettunna Allataala pannessai ana'-ana'-Na. 20 Nasaba pura rileppessanni alangngè untu' mancaji marapo, tenniya nasaba èlo alèna, iyakiya nasaba Allataala malleppessangngi makkuwaro. Namuni makkuwaro engka muto paddennuwangngèwè: 21 makkedaè risèuwaè wettu ripaleppe'i matu alangngè polè ri akuwasang iya paancuru'è sibawa maccowèto matu ripaleppe' sibawa ripakaraja silaong ana'-ana'na Allataala. 22 Riissenni makkedaè lettu makkekkuwangngè sininna alangngè maddarèkèi nasaba manrasa-rasai pada-pada sèddiè indo' mapeddi ri wettunna jajiyang ana'lolo. 23 Sibawa tenniya sininna alangngè bawang maddarèkè, idi paimeng maddarèkè ri laleng batètta. Purani ritarima Rohna Allataala selaku pabbèrèna Allataala iya pammulangngè, iyakiya ritajeng mupi Allataala paleppe'i sininna alèta sibawa pancajiki ana'-ana'-Na. 24 Nasaba ammènasang naripassalama'ki. Iyakiya rèkko aga iyaro riyammènasaiyè purani riita, iyaro tenniyana ammènasang. Nasaba nigana maddennuwangi mupi sèuwaè iya puraènna naita? 25 Iyakiya rèkko maddennuwangiki sèuwaè iya dè'èppa nariita, ritajengngi sibawa sabbara'. 26 Makkuwatoro Rohna Allataala polèi tulukki rèkko malemmaki. Saba' dè' taissengngi pèkkugi sitongennaki massempajang; alèna iyaro Roh-è mangolo ri Allataala untu' mèllaungekki sibawa uddaning iya marilaleng senna'è angkanna dè' nariyullè pau. 27 Na Allataala, iya missengngèngngi lise atinna tolinoè, napahang èlona iyaro Roh-è; saba' iyaro Roh-è mèllauwi ri Allataala untu' umma'na Allataala, sibawa situru èlona Allataala. 28 Taisseng makkedaè Allataala matoro'i sininna gau'è, angkanna napowassèlè iya makessingngè untu' sining tau iya mamasèiyèngngi sibawa iya Naobbiè situru rancana-Na. 29 Mennang iya puraè ripilè ri Allataala, pura toni ripattentu polè ri pammulanna untu' mancaji sinrupa sibawa Ana'-Na, iyanaritu Yèsus Kristus. Rimakkuwannanaro iyaro Ana'è mancajiwi iya mammulangngè ri yelle'na maèga saudara. 30 Makkuwaniro Allataala mobbii mennang iya pura Napattentuè lebbi riyolo; sibawa mennang iya Naobbièro, Nakkullèngiwi nasimadècèngeng paimeng sibawa Allataala. Sibawa mennang iya puraè nakkullèngiwi nasimadècèngeng paimeng sibawa Allataala, malani bagiyang ri laleng atuwonna Allataala. 31 Agana wedding ripowada makkekkuwangngè passalenna iya manennaro? Rèkko engkai Allataala ri idi, nigana mullèi mèwaki? 32 Ana' ri Alèna paimeng dè' Nacarinnaiwi, sangadinna nabbèrèyangngi untu' apentingetta maneng; masa' dè' nabbèrèyangngi matu lao ri idi sininna sèuwa-sèuwaè iya laingngè? 33 Nigana mullèi lura'ki umma' puraè ripilè ri Allataala, rèkko alèna Allataala pura pannessai makkedaè dè' tappasala? 34 Engkaga tau maèlo pasalaki? Kristus Yèsus matti bèlaki! Alèna ritu iya puraè matè, iyarè'ga mala Alèna ritu iya puraè ripatuwo paimeng polè ri amatèngngè sibawa engkani ri Allataala ri onrong iya makuwasaè. 35 Engkaga mullèi pèsangkaiwi Kristus mamasèiki? Naullèga asussangngè pèsangkaiwi, iyarè'ga asukkarakengngè, iyarè'ga paccallangngè, iyarè'ga akkadèrengngè, iyarè'ga akasiyasingngè, iyarè'ga bahayaè, iyarè'ga amatèngngè? 36 Ri laleng Kitta'è tarokii makkuwaè, "Puppu esso tuwoki ri laleng bahaya amatèngngè nasaba Iko. Rigaukekki pada-pada bimbala' iya maèloè rigèrè. " 37 Dè'! Mala ri laleng iya manennaro lolongekki apakalang iya sukkuè polè ri Alèna iya mamasèiyèkki! 38 Saba' mateppe' senna'ka makkedaè ri sininna linoè, muwi amatèngngè iyarè'ga atuwongngè; muwi malaèka' iyarè'ga panguwasa; muwi sining paancangngè makkekkuwangngè iyarè'ga ancamang-ancamang ri wettu mangoloè iyarè'ga awatangeng-awatangeng laingngè; 39 muwi sining anu ri langiè, iyarè'ga sining anu ri laleng linoè, iyarè'ga agi-agi laingngè, iya manenna dè' naullèi pèsangkaiwi Allataala mamasèiki, pada-pada iya pura Najjellokengngè naolai Kristus Yèsus, Puwatta.

Roma 9

1 Aga iya maèloè upowadaè iyanaritu tongeng nasaba iyya appunnangennaka Kristus. Dè' uwabbellè. Ati marilalekku iya napimpingngè Rohna Allataala, patepperi tokka makkedaè tongengngi iyaè ada-adakku. 2 Messè senna'ka sibawa mapeddi senna' atikku 3 nasaba saudara-saudaraku iya si bangsaèkka. Nasaba untu' mennang, alèku paimeng macenning ritanroi ri Allataala sibawa ripassarang polè ri Kristus. 4 Mennang iyanaritu umma'-Na iya napilè sibawa Allataala pancajiwi mennang ana'-ana' ri Alèna, enrengngè pannessai akuwasan-Na lao ri mennang. Pakangkai assijancingeng sibawa mennang enrengngè mpèrèngngi mennang hukkung-hukkung agama. Allataala paissengiwi lao ri mennang pèkkugi mennang harusu' massompa sibawa pura toni mennang natarima janci-jancin-Na. 5 Mennang iyanaritu wija-wijanna polè ri nènè-nènèta. Kristus selaku tolino assalenna polèi ri bangsana. Lebbi tanrèi polè ri iya manenna. Ripojiwi Allataala untu' mannennungeng! Aming. 6 Tenniya akkattaku untu' powadai makkedaè jancinna Allataala dè' nalakuna; iyakiya dè' nasininna tau Israèliè iyanaritu umma' napilè Allataala. 7 Dè' nasininna wija-wijanna Abraham iyanaritu ana'-ana'na Allataala. Saba' makkedai Allataala lao ri Abraham, "Banna wija-wijanna Ishak bawang ritu riteppu matu wija-wijammu. " 8 Bettuwanna iyaro makkedaè wija-wijanna Abraham iya mancajiyè ana'-ana'na Allataala, iyanaritu banna iya jajiyè nasaba jancinna Allataala; natenniya maneng wijanna. 9 Saba' jancinna Allataala iyanaritu makkuwaiyè, "Ri wettu iya ripattentuè, maèloka lisu, na Sara mappunnaiwi matu sèddi ana' worowanè. " 10 Sibawa iyatoè: Jajiyangngi Ribka duwa tau ana' worowanè polè ri sèddiè ambo', iyanaritu Ishak nènè-nènèta. 11 Ri wettu dè'napa najaji iyaro ana'è, purani napattentu Allataala iya napilè untu' mangoloè. Iyaro appilènna Allataala dè' nataggattung polè ri aga iya naullè pogau' tauwè, iyakiya taggattungngi ri pangobbina matu Allataala. Saba' wettunna iya duwaro ana' worowanèna Ribka dè'pa naullèi pogau' anu iya makessingngè iyarè'ga iya majaè, 12 pura napowadai Allataala lao ri Ribka, "Iya macowaè tumaningiwi matu maloloè. " 13 Ri laleng Kitta'è tarokii makkedaè makkeda makkuwaiyè Allataala, "Uwamasèiwi Yakub, iyakiya Ubenciwi Esau. " 14 Agana kasimpulatta makkekkuwangngè? Makkedaè dè'ga naadèlè' iyaro Allataala? Pura mattentuni Allataala adèlè! 15 Saba' makkedai Allataala lao ri Musa, "Maèlo-Ka mappaitangngi pammasè, sibawa maèlo-Ka mappaitangngi paressè babuwaè lao ri tau iya maèloè Upaitang paressè babuwa. " 16 Jaji, iyaro apettunna Allataala, dè' nataggattung ri acenningeng atinna tolinoè iyarè'ga ri usahana tolinoè, sangadinna ri akessingeng atinna Allataala bawang lao ri tau Napilèro. 17 Saba' tarokii ri laleng Kitta'è, "Makkedai Allataala lao ri Arung Masèrè', 'Upancajiko matu arung untu' sèddiè akkatta bawang, iyanaritu kuwammengngi nasibawakko Uwappaitangngi akuwasak-Ku sibawa mèbbui asek-Ku tarompo risininna linoè. ' " 18 Jaji, maressè babuwai Allataala lao risèddiè tau, rèkko naèloriwi Allataala makkuwaro. Sibawa Allataala nassabariwi sèddiè tau nancaji matedde ati, rèkko napuwèloi Allataala makkuwaro. 19 Makkedai matu Saudara lao ri iyya, "Rèkko makkuwaitu magi Allataala namaèlo mupa passalai tolinoè? Dè'ga na sèddiè tau naullèi lawa-lawaiwi èlona Allataala?" 20 Iyakiya, Saudara! Saudara banna tolino bawang. Na Saudara dè' nawedding barani mettè lao ri Allataala! Weddigga po' bungaè makkutana ri tau iya mèbbuèngngi, "Magi muwèbbuka makkuwaè?" 21 Dè'ga na tau iya mèbbuèngngi po' bungaèro mappunnai ha' jamai iyaro tana litaè sièlo-èlona atinna? Polè ri sitèkkè tana lita, iyaro tauwè mappunnai ha' mèbbu duwanrupa po' bunga: sèddi makessing, na iya laingngè makurang kessing. 22 Makkuwatoniro sibawa aga iya naèbbuè Allataala. Manniya'i untu' pallessui cai-Na sibawa mappaitangngi akuwasan-Na. Namuni sabbara'i lao ri mennang iya harusu'è rihukkung nasaba naèbbui macai. 23 Manniya' towi Allataala untu' mappaitangngi lao ri idi asennangeng tabbollompollongngè iya natiri'è lao ri idi iya Namasèiyè. Purani Napassadiyaki untu' tarimai asennangengngèro. 24 Idi ritu pura Naobbi, tenniya bawang polè ri bangsa Yahudiè, iyakiya polèto ri bangsa-bangsa laingngè. 25 Saba' ri lalenna kitta Nabi Hosèa, makkedai Allataala, "Sining tau tenniyaè umma'-Ku, riteppui matu 'Umma'-Ku'. Bangsa iya dè'è Uwamasèiwi, Uteppui matu 'Uwamasèiwi'. 26 Sibawa ri onrong naonroiyè ripowada lao ri tauwè, 'Tenniyako umma'-Ku', kuwaniro iyaro sining tauwè riteppui matu ana'-ana'na Allataala iya tuwoè. " 27 Matedde'i Nabi Yèsaya makkeda passalenna bangsa Israèliè, "Namuni jumellana bangsa Israèliè singngègai kessi'è ri tasi'è, banna cèddè bawang matu iya salama'è; 28 saba' masitta'i Puwangngè matu patatteppai pahukkungengngè lao ri silise linoè. " 29 Makkeda makkuwa towiyè Yèsaya, "Akkalarapanna Allataala Iya Pommakuwasaè dè' natarongekki wija-wijanna, tentu idi manengngè mancajini pada-pada Sodom sibawa Gomora. " 30 Jaji, rippe'na iyanaritu iyaè: Bangsa-bangsa laingngè iya tenniyaè Yahudi dè' nakkuraga kuwammengngi assisumpungenna mennang sibawa Allataala mancaji makessingngi paimeng. Iyakiya nasaba mateppe'i mennang, nanaèbbui Allataala assisumpungenna mennang sibawa Allataala mancaji makessingngi paimeng. 31 Sibalè'na, sining tau Yahudiè tuli makkuragai turusiwi hukkungngè kuwammengngi assisumpungenna mennang sibawa Allataala makessingngi paimeng. Iyakiya mala mennang dè' namakkèwassèlè. 32 Magi mennang dè' namakkèwassèlè? Saba' napogau'i mennang iyaro dè' naolai teppe' laowè ri Allataala, sangadinna naolai usaha ri alèna. Namabuwanna mennang tabbuttu ri "Batu Tabbutturengngè". 33 Passalenna iyaro batuè ri laleng Kitta'è tarokii makkuwaè, "Pènessaiwi iyaè: Ri Sion pura Upalènne'i sèuwa batu iya nassabariyèngngi matu tauwè tabbuttu; iyanaritu sèuwa batu battowa iya nassabariyè tauwè mabuwang. Iyakiya tau iya mateppe'è ri Alèna dè' nakacèlè matu. "

Roma 10

1 Saudara-saudara! Muddani senna'ka kuwammengngi bangsaku ripassalama'i. Mattonget-tongekka massempajang lao ri Allataala untu' mennang. 2 Baranika powadai makkedaè massumange' senna'i mennang massompa lao ri Allataala. Iyakiya sumange'na mennanro dè' natettong ri pangissengeng polè ri Allataala. 3 Dè' naissengngi mennang carana Allataala mèbbui assisumpungenna tolinoè sibawa Alèna mancaji makessing paimeng. Sibawa nasaba maèloi mennang maccowèriwi cara alèna, nadè' natunru' mennang ri cara iya najello'è Allataala. 4 Hukkung agamaè purani narupai Kristus, angkanna tungke' tau iya mateppe'è lao ri Kristus, assisumpungenna sibawa Allataala mancaji makessingngi paimeng. 5 Naokii Musa makkedaè tau iya simadècèngengngè sibawa Allataala situru hukkung agamaè, iyaro tauwè tuwoi matu nasaba matinului lao ri hukkung agamaèro. 6 Iyakiya passalenna carana tauwè simadècèngeng sibawa Allataala situru atepperenna lao ri Allataala, napowadai Kitta'è makkedaè, "Aja' lalo namuwakkeda ri laleng atimmu, 'Nigana mènrè ri surugaè?' (bettuwanna tiwii Kristus nonno), 7 iyarè'ga, 'Nigana matu nonno ri linona tau matè?' (bettuwanna makkai Kristus mènrè polè ri amatèngngè). " 8 Akkatana iyanaritu makkuwaiyè, "Iyaro karèba polè ri Allataala macawè'è senna' ri iko; ri tèmummu sibawa ri laleng atimmu. " Iyanaro karèba iya riyappallebbangngè idi; karèba makkedaè harusu'i tauwè mateppe' lao ri Yèsus Kristus. 9 Saba' rèkko mangakui Saudara sibawa tèmunna makkedaè "Yèsus ritu Puwang", sibawa mateppe'i Saudara ri laleng atinna Saudara makkedaè Allataala pura patuwoi Yèsus polè ri amatèngngè, salama'i matu Saudara. 10 Nasaba mateppe'i tauwè sibawa atinna, angkanna Allataala tarimai selaku tau iya simadècèngengènna sibawa Allataala. Nasibawang tèmunna tauwè mangakui, angkanna ripassalama'. 11 Ri laleng Kitta'è tarokii, "Sininna tau iya mateppe'è dè' naripakacèlè. " 12 Iyaro kajajiyangngi lao ri sininna tauwè, saba' dè' gaga assilaingenna tau Yahudiè sibawa tau bangsa laingngè. Allataala iya sèddièro iyanaritu Puwang untu' sininna tauwè. Mabbèrèi barakka iya tabbollompollongngè lao ri sininna tauwè iya mèllauwè pattulung ri Alèna. 13 Ri laleng Kitta'è tarokii, "Sininna tauwè iya goraè mangobbi lao ri Puwangngè, salama'i matu. " 14 Iyakiya pèkkugiwi tauwè naullèi mangobbi lao ri Puwangngè rèkko dè'pa mennang namateppe'? Sibawa pèkkugiwi mennang naullèi mateppe' lao ri Puwangngè rèkko dè' mennang naèngkalingai passalenna Alèna? Makkuwatoro, pèkkugiwi mennang naullèi marèngkalinga passalenna Puwangngè, rèkko dè'gaga mabbirittangngi? 15 Sibawa pèkkugi tauwè naullèi tiwii iyaro karèbaè rèkko dè' mennang narisuro? Ri laleng Kitta'è tarokii makkuwaèwè, "Temmaka kessinna apolènna sining tau iya tiwiè Karèba Madècèng polè ri Allataala!" 16 Iyakiya dè' nasininna tauwè tarimai Karèba Madècèngngèro. Saba' makkedai Yèsaya, "Puwang, nigana mateppe' ri karèbatta?" 17 Iyanaro saba'na namancaji mateppe' sining tauwè nasaba naèngkalingai mennang karèbaè, na iyaro karèbaè naèngkalingai nasaba engka tau mabbirittangngi passalenna Kristus. 18 Iyakiya makkutanaka: Mèmegga mennang dè'pa naèngkalingai iyaro karèbaè? Tentu purani! Saba' ri laleng Kitta'è tarokii makkuwaè, "Mengngoni saddanna mennang ri sininna linoè, ada-adanna lettu'ni ri cappa'na linoè. " 19 Makkutanasika: Dè'paga naissengngi bangsa Israèliè? Leppessangngi siya iyaro pakkutanaè Musa bunge' baliwi. Makkedai Musa, "Makkuwaiyè adanna Allataala, 'Uwèbbuko matu mangèmpuru lao ri sèddiè bangsa iya tenniyaè umma' sibawa Uwèbbuko matu macai lao ri sèddiè bangsa iya madonggoè. ' " 20 Lebbi baranipasi Yèsaya. Makkedai, "Makkuwaniè adanna Allataala, 'Sining tau iya dè'è nasappa-Ka, naruntu'na; sibawa Uwappaitangngi alè-Ku lao ri mennang iya dè'è nakkutanangngi passalek-Ku. ' " 21 Iyakiya passalenna bangsa Israèliè makkedai Yèsaya, "Makkuwaniè adanna Allataala, 'Puppu esso Uloro'i limak-Ku lao ri risèddiè bangsa iya matedde atiè sibawa dè'è namatinulu. ' "

Roma 11

1 Makkutanaka: Puraniga nabbèyang Allataala umma' ri Alèna? Tentu dè'! Alèku paimeng sèddi tau Israèl wija-wijanna Abraham, sibawa polè ri suku Bènyamin. 2 Dè'! Dè' nabbèyangngi umma'na Allataala iya puraè Napilè mappammulai pammulanna. Naisseng Saudara-saudara aga taroki ri laleng Kitta'è passalenna Elia, wettunna napparapekeng passalenna Israèliè lao ri Allataala. Makkedai Elia, 3 "Puwang, sining tauwè purani nauno nabi-nabim-Mu sibawa nancuru'i sining onrong makkasuwiyangengngè akkarobangeng untu'-Mu. Iyya mani alè-alèku monro, namaèlo towi mennang mpunoka. " 4 Aga pappèbalinna Allataala lao ri Elia? Mappèbaliwi Allataala, "Purani Utarongeng alè-Ku pitussebbu tau. Dè'pa naengka mennang nassompa ri Dèwata Baal. " 5 Makkuwatoniro makkekkuwangngè: Engka cèddè iya puraè napilè Allataala nasaba pammasè-Na. 6 Napilèi mennang situru pammasè-Na sibawa tenniya situru pangkaukenna mennang. Saba' rèkko iyaro pappilèna Allataala siturui pangkaukenna tolinoè, tentu iyaro pammasèna Allataala tenniyana pammasè iya tongengngè. 7 Jaji, pèkkugi? Umma' Israèliè dè' nalolongengngi aga iya nasappaè mennang. Iya lolongengngèngngi banna sèddi golongang baiccu tau iya puraè napilè Allataala. Iya maneng laingngè mancajiwi matedde ati lao ri pangobbina Allataala. 8 Saba' ri laleng Kitta'è tarokii makkuwaè, "Allataala mèbbui atinna sibawa pikkiranna mancaji madonggo; nanarapi makkekkuwangngèwè matanna dè' naullèi makkita sibawa daucculinna dè' naullèi marèngkalinga. " 9 Makkeda towi Daud, "Leppessanni siya pèsta-pèstana mancaji jebba lao ri alèna mennang, sibawa mancaji kalebbong, onronna sempè sibawa ancuru! 10 Leppessanni siya pakkitanna mancaji mapettang kuwammengngi dè' naullèi mennang makkita; sibawa leppessanni siya mancaji bukku lettu mannennungeng. " 11 Makkutanasika: Wettunna mabuwang tau Yahudiè, kajajiyangngi iyaro kuwammengngi naancuru mennang? Dè' sises-siseng! Iyakiya nasaba madosai mennang, naripassalama' bangsa laingngè, nanassabariwi bangsa Yahudiè mangèmpuru lao ri bangsa laingngèro. 12 Nasaba pasalai bangsa Yahudiè sibawa dè' naturusiwi èlona Allataala, naribarakkaki bangsa-bangsa laingngè ri Allataala. Apalagi rèkko assisumpungenna bangsa Yahudiè sibawa Allataala madècèngngi paimeng; tentu lebbi battowa pasi barakka iya maèloè nabbèrèyang Allataala! 13 Iyakiya makkekkuwangngè madècèngengngi mabbicaraka lao ri Saudara-saudara iya tenniyaè Yahudi! Lettu makkekkuwangngè, selaku rasul untu' bangsa-bangsa iya tenniyaè Yahudi, upakaraja senna'i jama-jamakku. 14 Mammènasaka uwullèi paompoi angèmpurunna bangsaku, kuwammengngi nallalengiro uwullèi passalama'i sibagiyang polè ri mennang. 15 Nasaba risampèyangngi mennang ri Allataala, namadècèng paimeng assisumpungenna linoè sibawa Allataala; apalagi rèkko ritarimai mennang ri Allataala! Tentu iyaro pada muwi tau matè tuwosi paimeng! 16 Rèkko sipoloè roti mammulangngè purani riyabbèrèyang lao ri Allataala, bettuwanna sininna rotiè riyabbèrèyang towi lao ri Allataala. Sibawa rèkko ure'na ajuè iyanaritu appunnangennai Allataala, bettuwanna takkè-takkèna iyanaritu appunnangen-Nato. 17 Sibagiyang polè ri takkè-takkèna pong zaitungngè -- iyanaritu sining tau Yahudiè -- purai rirette. Na ri onrong addettekengngèro ricangko'kangngi takkè pong zaitun liyaè, iyanaritu Saudara-saudara tenniyaè Yahudi. Ricangko'kangngi Saudara kuwaro kuwammengngi napèneddingiwi Saudara sininna makessingngè polè ri atuwong atepperenna sining tau Yahudiè. 18 Rimakkuwannanaro, aja' muangga' èntèngngi mennang iya puraè rirette pada-pada takkèro. Harusu'ko mèngngerangngi makkedaè banna takkèko bawang. Na tenniya takkè mabbèrè anrè lao ri ure'è, sangadinna ure'è mabbèrè anrè lao ri takkè. 19 Iyakiya makkedai matu Saudara, "Iyyè, iyakiya iyaro takkè-takkè rirette'i kuwammengngi weddikka riyaccangkokeng ri ponna!" 20 Mèmeng tongeng iyaro. Iyakiya riyabbèyangngi mennang nasaba dè' namateppe' mennang, na Saudara ritarima nasaba mateppe'i Saudara. Jaji aja'na namatempo Saudara nasaba iyaro; sibalè'na harusu'i Saudara mètau. 21 Saba' rèkko Allataala dè' namarasa kasiyang untu' mabbèyangngi tau Yahudiè iya pada-padaè takkè-takkè tulèngngèro, aja' muwasengngi kasiyangngi matu untu' mabbèyangngi Saudara! 22 Jaji riitani kuwaè pèkkugi kessinna Allataala sibawa pèkkugi towi tedde'na. Matedde'i mattinda' lao ri mennang iya madosaè, iyakiya makessing atiè lao ri Saudara -- assaleng tette'i Saudara tuwo polè ri akessingen-Na. Rèkko dè', riyabbèrèyang towi Saudara. 23 Na passalenna sining tau Yahudièro, rèkko mappèsauwi mennang kèdo-kèdo dè' namateppe', ritarimai matu mennang paimeng; saba' makuwasai Allataala untu' tarimai mennang paimeng. 24 Saudara iya dè'è na assalenna polè ri bangsa Yahudiè iyanaritu pada-padai takkè polè ri zaitun liyaè. Rèkko Saudara, sièwai sibawa sipa'na Saudara, weddingngi riyaccangkokeng ri pong zaitun tulèngngè, apalagi sining tau Yahudi iya riyakkalarapangengngè sibawa takkè-takkè pong zaitun tulengngèro. Tentu lebbi gampangngi ri Allataala untu' palisui mennang ri pong zaitunna muto mennang. 25 Saudara-saudara! Uwèllauko aja' muwasengngi muwissenni sini-sininnaè. Saba' engka sèddi passaleng iya napuwèloè Allataala, iyakiya dè'pa naissengngi tauwè. Nauwèloriwi muwisseng; iyanaritu iyaè: Sibagiyang polè ri tau Yahudiè matedde atiwi, iyakiya attangenna mennanro matteru-terui matu banna lettu ri jumella sining tau Yahudi iya laowè ri Allataala genne'ni. 26 Makkuwaniro sininna tau Yahudiè salama'i matu. Saba' ri laleng Kitta'è tarokii makkuwaè, "Arung Pappassalama'è polèi matu ri Sion; naleddai matu sininna ja polè ri wija-wijanna Yakub. 27 Maèlo-Ka siyoi assijancingengngèwè sibawa mennang ri wettunna Uwaddampengengngi dosa-dosana. " 28 Nasaba tau Yahudiè dè' namaèlo tarimai Karèba Madècèng polè ri Allataala, mancajiwi mennang balinna Allataala; na mala iyaro mancajiwi amaupekeng lao ri Saudara-saudara iya tenniyaè Yahudi. Iyakiya nasaba pappilèna Allataala, na iyaro sining tau Yahudiè tette'i riyamasèi ri Allataala nasaba nènè-nènèna. 29 Saba' rèkko Allataala pilèi tauwè sibawa barakkakiwi iyaro tauwè, dè' naengka nagettengngi paimeng Allataala aga iya puraè Napogau'. 30 Riyolo dè' mumatinulu lao ri Allataala. Iyakiya makkekkuwangngè Allataala pura pannessai makkedaè leppe'ko polè ri asalangngè, nasaba dè' namatinulu sining tau Yahudiè. 31 Makkuwatoro sining tau Yahudièro. Makkekkuwangngèwè dè' namatinulu lao ri Allataala, kuwammengngi naripannessako leppe' polè ri asalangngè. Iyakiya matti mennang maèlo towi ripannessa leppe' polè ri asalangngè. 32 Saba' pura naleppessangngi Allataala sininna rupa tauwè rikuwasai ri atemmatinulurengngè, kuwammengngi Naullèi mappaitangngi paressè babuwana lao ri iya maneng mennang. 33 Masero senna' asugirenna Allataala! Battowa tongeng apanrèngen-Na sibawa pangissengen-Na! Nigana mullèi salidikiwi sining apettun-Na? Nigana mullèi majeppuiwi cara-carana majjama? 34 Ri laleng Kitta'è tarokii makkuwaè, "Nigana missengngi pikkiranna Puwangngè? Nigana mullèi pangajariwi? 35 Nigana pura mpèrèngngi sèuwa lao ri Puwangngè naweddingngi natuntu' pamale'-Na?" 36 Allataala pancajiwi sininna sèuwa-sèuwaè. Iya manenna assalenna polèi ri Allataala sibawa iyanaritu untu' Allataala. Ripojiwi Allataala lettu mannennungeng! Aming.

Roma 12

1 Saudara-saudara! Makessing senna'i Allataala lao ri idi. Iyanaro saba'na uwèllauwi sibawa masero kuwammengngi muwakkasuwiyangengngi alèna selaku sèddi akkalarapangeng tuwo iya ripallaingngè untu' Allataala sibawa pèsennangiwi atin-Na. Assompako lao ri Allataala harusu'i makkuwaro. 2 Aja' muwaccowèriwi peraturang-peraturang linoèwè. Leppessanni Allataala mèbbui paribadimmu mancaji mabaru, kuwammengngi mutappinra. Rimakkuwannanaro mullèi missengngi èlona Allataala -- iyanaritu aga iya makessingngè sibawa iya sennangiyèngngi atin-Na sibawa iya sukkuè. 3 Allataala pura mabbèrè pammasè lao ri iyya. Iyanaro saba'na upangajari manengngi Saudara-saudara: Aja' muwasengngi alèmu lebbi matanrè naiya sitongennaè. Sitinajako mangke'i keadaammu sibawa ati mariyawa; tungke'-tungke' mangke'i alèna situru pakkullèng iya nabbèrèyangngè Allataala lao ri alèna nasaba mateppe'i lao ri Yèsus. 4 Watakkalèta mappunnaiwi maèga anggota. Tungke' anggota mappunnaiwi jamang. 5 Makkuwatoro sibawa idi. Namuni idi manengngè maègaki, iyakiya sinrupaki sèddiè watakkalè nasaba idi massèddiki ri Kristus. Sibawa tungke'-tungke'ki sisumpung sèddiè sibawa laingngè selaku anggota-anggota polè risèddiè watakkalè. 6 Tungke'-tungke'ki mappunnai wèrè attumaningeng iya laingngè. Iyaro sining wèrè nawèrèkki Allataala situru pammasè-Na. Rimakkuwannanaro harusu'ki pakèi iyaro sining wèrè. Tau iya mappunnaiyè wèrè untu' mabbirittangngi karèba polè ri Allataala, iyaro tauwè harusu'i mabbirittangngi iyaro karèba polè ri Allataala situru amampungeng iya engkaè ri alèna. 7 Tau iya mappunnaiyè wèrè untu' tulungngi tau laingngè, iyaro tauwè harusu'i mattonget-tongeng tulungngi tau laingngè. Tau iya mappunnaiyè wèrè untu' mappagguru, iyaro tauwè harusu'i tonget-tongeng mappagguru. 8 Tau iya mappunnaiyè wèrè untu' mpèrèngngi sumange' tau laingngè, iyaro tauwè harusu'i tonget-tongeng mpèrèngngi sumange' tau laingngè. Tau iya mappunnaiyè wèrè untu' mpèrèngngi tau laingngè aga iya nappunnaiyè, iyaro tauwè harusu'i napogau' iyaro sibawa malabo iya sitinajaè. Tau iya mappunnaiyè wèrè untu' mappimping, iyaro tauwè harusu'i tonget-tongeng mappimping. Tau iya mappunnaiyè wèrè untu' mappaitangngi paressè babuwaè lao ri tau laingngè, iyaro tauwè harusu'i napogau' sibawa masennang ati. 9 Mamasèno sibawa matinulu. Benciwi iya majaè, sibawa akkatenninno lao ri aga iya makessingngè. 10 Sitinajai Saudara-saudara siyamasèi sèddiè lao ri laingngè sibawa siyèlori pada-pada tau iya massilessurengngè ri laleng sèddiè kaluwarga, sibawa sitinajako sipoddiyoloi sipakaraja. 11 Ajjamano sibawa mapato. Aja' mumakuttu. Ajjamano untu' Puwangngè sibawa sumange' polè ri Rohna Allataala. 12 Sitinajai Saudara mammènasa lao ri Puwangngè sibawa marennu, sabbara'no ri laleng asussangngè, sibawa mattinetto massempajang. 13 Tulungngi paggenne'i apparelluwanna sining tau Kristèng laingngè enrengngè tarimai Saudara-saudara siatepperengngè iya dè'è muwissengngi, sibawa ati masennang ri lalempolamu. 14 Ellauwi ri Allataala kuwammengngi nabarakkakiwi sining tau iya mapèddaraè lao ri iko. Ellauwi Allataala barakkakiwi mennang, aja' mutanroiwi. 15 Accowèno marennu silaong sining tau iya marennuè, sibawa terino silaong mennang iya teriyè. 16 Tuwono sipammasè-masè sèddiè lao ri laingngè. Aja' mumatanrè ati, iyakiya pappada-padai alèmu sibawa tau iya mariyawaè. Aja' muwangga'i alèmu lebbi acca naiya sitongennaè. 17 Rèkko pogau'i ja tauwè lao ri iko, aja' muwale'i sibawa ja. Pogau'i aga iya nangga' makessingngè sininna tauwè. 18 Polè ri iko, akkuragano siullè-ullèmu untu' tuwo sidamè sibawa sininna tauwè. 19 Saudara-saudaraku! Aja' sises-siseng muwakkabale, leppessangngi Allataala pahukkung. Saba' ri laleng Kitta'è tarokii, "Iyya ritu makkabale'. Iyya maèlo hukkungngi, adanna Puwangngè. " 20 Sibalè'na, rèkko malupui balimmu, panrèi, sibawa rèkko madekkai, paènungngi. Nasaba ri laleng mupogau'na makkuwaèro, mupakasirii matu. 21 Aja' muleppessangngi alèmu ricau ri majaè, iyakiya sitinajai Saudara caui jaè sibawa adècèngeng.

Roma 13

1 Tungke' tau harusu'i tunru' lao ri pamarèntaè, saba' dè'gaga pamarènta iya dè'è nalolongengngi akuwasanna polè ri Allataala. Na pamarènta iya engkaè makkekkuwangngèwè, napajoppai akuwasanna nasaba parènta polè ri Allataala. 2 Iyanaro saba'na tau iya mèwaèngngi pamarènta pada-padai mèwai aga iya pura napattentuè Allataala. Na tau iya pogau'èngngi makkuwaèro tarimai matu pahukkungeng. 3 Nasaba tau iya pogau'èngngi makessingngè dè' naparellu mètau ri pamarèntaè. Banna tau iya pogau'èngngi majaè bawang harusu' mètau. Rèkko macinnai Saudara kuwammengngi dè' namètau ri pamarèntaè, harusu'i Saudara pogau'i makessingngè, ripojiwi matu Saudara. 4 Saba' pamarèntaè iyanaritu atannai Allataala iya majjamaè untu' adècèngemmu. Iyakiya rèkko Saudara pogau'i majaè, mèmeng Saudara harusu'i mètau ri alèna, saba' dè' nasiya-siya bawang makuwasai untu' hukkungngi tauwè. Alèna iyanaritu atanna Allataala, iya pateppaèngngi pahukkungenna Allataala lao ri risining tau iya pogau'èngngi majaè. 5 Iyanaro saba'na Saudara naharusu' matinulu lao ri pamarèntaè -- tenniya bawang nasaba dè' namaèlo Saudara rihukkung, iyakiya nasaba sadda ati marilalemmu. 6 Iyanaro saba'na magi nakkamaja sima Saudara, nasaba pamarèntaè iyanaritu pegawènai Allataala iya pogau'èngngi jamang iya dè'è padanna. 7 Jaji wajani ri pamarèntaè aga iya harusu'è nawaja Saudara ri alèna. Wajai simaè, rèkko harusu'i Saudara makkamaja sima; sibawa wajai cukè rèkko harusu'i Saudara makkamaja cukè. Pakarajai mennang iya harusu'è ripakaraja sibawa pakalebbii mennang iya harusu'è ripakalebbi. 8 Aja' muwakkinreng muwi aga lao ri niga, sangadinna makkinreng pammasè lao risèddiè sibawa laingngè. Saba' tau iya mamasèiyèngngi pada-padanna rupa tau, purani naturusi sininna pamarèntana Allataala iya napalettu'è Musa. 9 Saba' hukkunna agama Yahudiè, iyanaritu: Aja' mumalaweng, aja muwabbuno; aja' muwènnau; aja' mumacinna mappunnaiwi aga nappunnai tau laingngè; iya manennaro silaongngi hukkung-hukkung iya laingngè, purani ririppeki mancaji sèddi hukkung bawang, iyanaritu, "Amasèiwi pada-padammu rupa tau pada-pada muwamasèinna alèmu. " 10 Tau iya mamasèiyèngngi tau laingngè, dè' namaèlo pogau'i majaè lao ri tauwèro. Jaji tau iya mamasèiyèngngi pada-padanna iyanaritu tau iya puraè turusiwi sininna sara'-sara'na hukkung agamaè. 11 Ri lainnaè iya manennaro muwisseng makkedaè iyaè wettuè iyanaritu wettummu untu' pèsedding polè ri tinroè. Saba' wettunnana untu' ripassalama'ki pèdè' macawè'ni makkekkuwangngèwè naiya wettutta bunge' nappa mammula mateppe'. 12 Mawè'ni labe' wenniè; nadè'na namaitta namatajang. Jaji, madècèngenni mappèsauki pogau'i pangkaukeng-pangkaukeng mapettangngè. Harusu'ki passakkekiwi alèta sibawa senjata tajang. 13 Harusu'ki pogau'i gau'-gau' malebbiè pada-pada biyasaè napogau' tauwè ri essoè; aja' muwappèsta talliwe'-liwe', iyarè'ga mabo'. Aja' mupogau'i iya ricellaè, iyarè'ga maja ampè-ampè. Aja' muwallaga, iyarè'ga mangèmpuru. 14 Leppessanni Puwang Yèsus Kristus pattentui aga iya harusu'è mupogau'. Sibawa aja' muturusiwi sipa-sipa tolino iya madosaè untu' turusiwi napessummu.

Roma 14

1 Tau iya dè'è namateppe' ri aga iya natepperiyè harusu'i ritarima sibawa madècèng ri yelle'na Saudara-saudara. Aja' muwassasa sibawa alèna passalenna sining pallolongenna. 2 Engka tau mappallolongeng makkedaè weddingngi naanrè agi-agi. Iyakiya engka tau laing iya malemmaè teppe'na; napèrasai makkedaè banna ukkaju-ukkaju bawang wedding naanrè. 3 Tau iya manrèèngngi agi-agi aja' naangga' mariyawai tau iya manrèèngngi banna anrèkanrè mattentuè bawang, aja'to napasalai tau iya manrèèngngi sini-sininnaè, saba' Allataala pura tarimai. 4 Niga Saudara angkanna Saudara harusu' madèlèkiwi atanna tau laingngè? Menruggi iyarè'ga tokkongngi iyaro ataè, iyanaritu urusanna puwanna. Na mèmeng iyaro ataè tettong lempui matu, nasaba naullèi Puwangngè patettong lempui. 5 Engka tau pèrasai sèddiè esso mattentuè lebbi pentingngi naiya esso-esso laingngè, na tau laingngè nangga tosi makkedaè iyaro essoè pada-pada muwa. Leppessangngi tungke'-tungke' tau pattentui pallolongenna. 6 Tau iya pentingkangngèngngi esso-esso mattentuè, iyaro tauwè napogau'i makkuwaèro untu' pakalebbii Puwangngè. Tau iya manrèèngngi sini-sininnaè, napogau'i makkuwaro untu' pakalebbii Puwangngè, nasaba sukkuru'i lao ri Allataala nasaba iyaro naanrè. Makkuwatoro sibawa tau iya manrèèngngi banna anrèkanrè mattentuè bawang; iyaro tauwè napakalebbi towi Puwangngè sibawa sukkuru' lao ri Allataala. 7 Dè' muwi sèddi tau ri idi iya tuwoè untu' alèna bawang; sibawa dè'to muwi sèddi tau polè ri idi iya matè untu' alèna bawang. 8 Rèkko tuwoki, tuwoki untu' Puwangngè. Sibawa rèkko matèki, matè tokki untu' Puwangngè. Jaji tuwo iyarè'ga matè, appunnangennaki Puwangngè. 9 Purani matè Kristus sibawa tuwo paimeng. Iyanaro saba'na nancaji Puwang untu' sining tau iya tuwoè sibawato untu' sining tau iya matèènna. 10 Jaji, Saudara-saudara! Untu' aga mupasalai saudaramu iya siyatepperengngè? Sibawa untu' aga muwangga' mariyawai? Idi manengngè mangoloki matu ri Allataala untu' riadèlèki. 11 Ri laleng Kitta'è tarokii, Makkedai Puwangngè, "Sitongenna, tungke'-tungke' tau suju'i matu massompa ri yolo-Ku; sibawa tungke' tau mangakui matu makkedaè Iyya'na ritu Allataala. " 12 Jaji tungke'-tungke'ki harusu' tanggung jawakiwi sininna pangkauketta lao ri Allataala. 13 Rimakkuwannanaro aja' tasisullè sipassala. Sibalè'na usahakangngi kuwammengngi dè' mupogau'i muwi sèuwa iya nassabariyè sèddiè Saudara siyatepperengngè rigoda sibawa madosa. 14 Nasaba iyya massèddika sibawa Puwang Yèsus, mateppe' senna'ka makkedaè dè' gaga muwi sèddi iya sitongennaè najisi'; iyakiya iyaro gau'è najisi'i lao risèddiè tau, rèkko iyaro tauwè nangga'i najisi'. 15 Iyakiya rèkko agi iya naanrè Saudara, sèddiè Saudara siyateppereng ripeddiriwi atinna, tentu Saudara dè'na nattinda' situru pammasè. Rèkko purani matè Kristus untu' sèddiè tau, aja' muleppessangngi iyaro tauwè risolangi ri aga iya muwanrè. 16 Iyanaro saba'na aja' muleppessangngi aga iya madècèngngè untu' Saudara, riyangga' dè' namakessing ri tau laingngè. 17 Saba' rèkko Allataala parèntai atuwonna rupa tauwè, aga iya weddingngè naanrè iyarè'ga naènung rupa tauwè, iyaro dè'na napenting. Iya pentingngè iyanaritu makkedaè rupa tauwè turusiwi èlona Allataala, napèneddingiwi atennangeng atiè sibawa tarimai ariyo-riyong iya nabbèrèyangngè Rohna Allataala. 18 Tau iya tumaningiyèngngi Kristus secara makkuwaro, iyaro tauwè napèsennangiwi atinna Allataala, sibawa riyangke'i risining tau laingngè. 19 Rimakkuwannanaro akkattata harusu'i tuli untu' gau'-gau' iya paompoè assipammasè-masèng sibawa sisullè sipètangngari. 20 Aja' nasaba soal inanrè, namusolangiwi aga iya puraè najama Allataala. Sininna anrèkanrè mèmeng hallala' untu' riyanrè; iyakiya rèkko aga iyaro naanrè Saudara nassabariwi tau laingngè madosa, tentu pasalai Saudara. 21 Lebbi kessing muwi aja' tanrè juku iyarè'ga mènung anggoro iyarè'ga pogau'i agi-agi rèkko iyaro gau'è nassabariwi sèddiè Saudara siyatepperetta mancajiwi madosa. 22 Leppessanni aga iya muwatepperiyèro, mupogau'i ri yolona Allataala bawang untu' alèna Saudara. Tau iya dè'è nappunnai alasang untu' marasa pasala iya nasengngè tongeng, iyaro tauwè masennangngi. 23 Iyakiya tau iya marasa bata-bataè untu' manrèi sèuwaè, nainappa paggangkanna nanrèi iyaro anrèkanrè, iyaro tauwè ripasalai ri Allataala; saba' iyaro tauwè dè' nattinda' situru atepperenna, passalenna aga iya tongengngè sibawa iya salaè. Na agi-agi iya ripogau'è dè' nasibawangngi ateppereng iyanaritu dosai.

Roma 15

1 Idi iya tonget-tongengngè mateppe' ri aga iya riyatepperiyè harusu'i sabbara' lao risining pappotane'na sining tau iya malemmaè atepperenna. Aja' tamaèlo sennangiwi alèta bawang. 2 Sibalè'na harusu'ki tungke'-tungke' sennangiwi atinna pada-padatta untu' adècèngenna kuwammengngi atepperenna natattamba awatangenna. 3 Saba' Kristus dè'to napikkiri'i asennangeng Alèna bawang. Ri laleng Kitta'è tarokii makkuwaè, "Sininna paccellaè iya ripattujuè ri Iko sempè'ni ri yasè'ku. " 4 Sininna iya riparisure'è ri laleng Kitta'è iyanaritu untu' pagguruki. Saba' pappagguruwang iya ritarimaè polè ri Kitta'è pancajiki sabbara' sibawa mawatang, angkanna weddikki maddennuwang lao ri Allataala. 5 Tennapodo Allataala, iya mabbèrè asabbarakeng sibawa passalèwo lao ri rupa tauwè, tulukko untu' tuwo massiati, turusiwi pappaitana Yèsus Kristus. 6 Sibawa massiatiwi Saudara iya maneng massibawa weddingngi pojiwi Allataala, Ambo'na Puwatta Yèsus Kristus. 7 Rimakkuwannanaro sitinajai Saudara-saudara tarimai sèddiè sibawa laingngè sibawa masennang ati, pada-pada towi Kristus tarimako untu' pakalebbii Allataala. 8 Nasaba, èngngerangngi, makkedaè Kristus purani natumaningi tau Yahudiè untu' mappaitangngi makkedaè Allataala matinului rupaiwi sining jancin-Na lao ri nènè-nènèta. 9 Naèbbu towi Yèsus bangsa-bangsa laingngè pakalebbii Allataala nasaba akessingeng atin-Na lao ri mennang. Ri laleng Kitta'è tarokii makkuwaè, "Rimakkuwannanaro maèloka poji-Ko ri yelle'na bangsa-bangsaè, maèloka makkèlong pappojiyang untu' asem-Mu. " 10 Engkato taroki makkuwaè, "Ariyo-riyono silaong umma'na Allataala iya tappilè, èh bangsa-bangsa!" 11 Sibawa iyatoè, "Pojiwi Allataala, èh sininna bangsaè, sitinajai sininna tauwè pojiwi!" 12 Sibawa iyatoè napowada Yèsaya, "Polè ri wija-wijanna Isai mompoi matu sèddi tau iya parèntaèngngi matu bangsa-bangsaè; ri Alènai matu bangsa-bangsaè mammènasa. " 13 Allataala iyanaritu onronna Saudara mammènasa. Tennapodo nalisekiwi atimmu sibawa sininna ariyo-riyongngè sibawa asalèwangengngè nasaba mateppe'ko ri Alèna, kuwammengngi nasaba akuwasanna Rohna Allataala pèdè' mammènasako lao ri Allataala. 14 Saudara-saudaraku! Mateppe'ka makkedaè engka maèga senna' passaleng iya makessingngè ri iko. Muwisseng towi sini-sininnaè sibawa mullè mappagguru sèddiè sibawa laingngètto. 15 Iyakiya passalenna gau'-gau' mattentuè, uparèngngerangiko sibawa matedde ri laleng sure'èwè, nasaba Allataala pura mpèrèkka jamangngèro. 16 Puraka napancaji pattumaninna Kristus Yèsus untu' rikiring lao ri bangsa-bangsaè iya tenniyaè Yahudi. Sibawa tinda'ka selaku imang, iya mappallebbangengngèngngi Karèba Madècèng polè ri Allataala, kuwammengngi sining tau tenniyaè Yahudi mancajiwi sèuwa pakkasuwiyang lao ri Allataala iya weddingngè natarima Allataala. Tennapodo Rohna Allataala mèbbui mennang mancaji sèddi pakkasuwiyang iya ripallaingngè untu' Allataala. 17 Jaji, nasaba massèddika sibawa Kristus Yèsus, naweddikka marasa battowa nyawaku ri jama-jamakku untu' Allataala. 18 Baranika mabbicara makkuwaro banna passalenna aga iya puraè napogau' Kristus naolaka untu' pancajiwi sining tau tenniyaè Yahudi mapato lao ri Allataala. Upogau'i iyaro sibawa ada-ada enrengngè pangkaukeng, 19 iya nasibawangngè gau'-gau' makalallaing sibawa gau'-gau' iya dè'è padanna; iya manennaro polèi ri akuwasanna Rohna Allataala. Karèba Madècèngngè passalenna Kristus pura manenni uwabbirittang lao ri risining tauwè, mappammulai ri Yèrusalèm lettu ri Ilirikum. 20 Cita-citaku iyanaritu mabbirittangngi Karèba Madècèng polè ri Allataala risining tau iya dè'èppa naengka naèngkalingai passalenna Kristus. Saba' dè' umaèlo patettong jamang ri pandamèng iya napalènne'è tau laingngè. 21 Ri laleng Kitta'è tarokii, "Sining tau iya dè'èppa naengka natarima karèba passalenna Alèna, naitai matu; sibawa iya dè'èppa naengka naèngkalingai, najeppuiwi matu. " 22 Iyanaro saba'na biyasaka tassangkalangeng untu' cèllèngiko. 23 Iyakiya makkekkuwangngè jama-jamakku ri daèra-daèraèro cappuni. Mattaut-taunni ittana macinnaka cèllèngiko. 24 Rèkko laloka matu ri kotamu ri laleng allalengekku lao ri Spanyol, mammènasaka wedding siruntu' saudara sibawa mariyo-riyo cinampe' sibawa iko. Purairo mammènasaka ri iko kuwammengngi weddingngi tabantuka untu' allalengekku lao ri Spanyolro. 25 Iyakiya makkekkuwangngèwè maèloka lao ri Yèrusalèm untu' tiwi bantuwang untu' umma'na Allataala kuwaro. 26 Saba' jema'-jema'è ri Makedonia sibawa Akhaya nasitujuini untu' mabbèrè sumbangeng lao ri Saudara-saudara iya kasiyasiè ri yelle'na umma'na Allataala ri Yèrusalèm. 27 Masennang atinna mennang pettuiwi untu' pogau'i iyaro. Mèmeng sitongenna sitinajai mennang tulungngi Saudara-saudara iya kasiyasiè ri Yèrusalèm, saba' polè risining tau Yahudiè ritu nasining tau tenniyaè Yahudiro purani natarima barakka-barakka polè ri Allataala. Jaji, sining tau tenniyaè Yahudiro sitinaja towi natulung sining tau Yahudiè sibawa barakka-barakka maddupa barab-barangngè. 28 Rèkko purani upattèppu jama-jamakkuè, sibawa mabbèrèyangngi lao ri mennanro iya engkaè ri Yèrusalèm sumbangeng iya pura ripaddeppungengngèro, maèloka joppa lao ri wanuwa Spanyol laloiwi kotamu. 29 Rèkko laoka ri iko, pasti polèka sibawa maèga barakka polè ri Kristus untu' iko. 30 Nasaba Puwatta Yèsus Kristus, sibawa nasaba pammasè iya nabbèrèyangngè Rohna Allataala, uwèllauwi sibawa masero ri iko, tennapodo maccowèko massempajang tonget-tongeng sibawakka lao ri Allataala untu' alèku. 31 Assempajanno kuwammengngi Allataala napaleppe'ka polè ri limanna sining tau iya dè'è namateppe' ri Yudèa, sibawa kuwammengngi na jama-jamakku untu' tiwii sumbangengngè ri Yèrusalèm natarimai sibawa masennang atinna umma'na Allataala kuwaro. 32 Rimakkuwannanaro, narèkko napuwèloi Allataala, weddikka lao ri iko sibawa ati iya masennangngè. Sibawa tassalèwoka matu ri tengnga-tengngamu. 33 Tennapodo Allataala, iya mabbèrè asalèwangeng ri rupa tauwè, sibawang manengngi Saudara. Aming.

Roma 16

1 Macinnaka mappaddissengengngi Saudarata, Fèbè. Nabantui jema'è ri Kèngkrèa. 2 Tarimai selaku sala sèddinna polè ri umma'na Puwangngè. Mèmeng makkuwairo sining tau iya mateppe'è lao ri Allataala harusu'i tarimai sèddiè sibawa laingngè. Tulungngi, rèkko mapparrelluwangngi bantuwang polè ri iko, nasaba alèna pura toni nabantu maèga tau -- muttama' toni alèku. 3 Palettukekka sellekku ri Priskila sibawa Akwila, sellao-sellaoku iya pada-padaè majjama untu' Kristus Yèsus. 4 Cèddè'i mennang matè nasaba maèloi passalama'ka. Mattarima kasi'ka lao ri mennang -- na tenniya iyya bawang, iyakiya sininna jema'è ri bangsa laingngè iya tenniyaè Yahudi mattarima kasi towi lao ri mennang. 5 Palettukeng tokka sellekku lao ri jema'è iya maddeppungengngè ri bolana mennang. Selleng lao ri Epenètus iya uwamasèiyè. Iyanaritu tau iya bunge'-bunge' mateppe'è ri Kristus ri daèra Asia. 6 Sellekkuto lao ri Maria. Makkumani rejjinna pura majjama untu' iko. 7 Palettukeng tokka sellekku lao ri Andronikus sibawa Yunias. Sisuku bangsaka sibawa mennang enrengngè pura riputtama' tarungkuè silaong iyya. Ri wettu dè'napa umateppe ri Kristus, lebbi riyoloi mennang mateppe'. Tarompoi mennang ri yelle'na rasul-è. 8 Sellekku lao ri Ampliatus, iya uwamasèiyè nasaba sibawaka pura massèddi sibawa Puwangngè. 9 Palettukekka sellekku ri Urbanus, sellaota iya majjamaè sibawa idi untu' Kristus. Makkuwatoro sellekku lao ri Stakhis iya uwamasèiyè. 10 Sellekku lao ri Apèlès. Pabuttini atinulurenna lao ri Kristus. Sellekkuto lao ri kaluwargana Aristobulus, 11 sibawa lao ri Hèrodion. Sisuku bangsai sibawa iyya. Makkuwatoro sellekku lao ri Saudara-saudara siyatepperengngè ri laleng kaluwargana Narkisus. 12 Sellekku lao ri Trifèna sibawa Trifosa iya marejjingngè majjama tumaningiwi Puwangngè, sibawa lao ri Persis iya uwamasèiyè. Pura toni marejjing majjama untu' Puwangngè. 13 Sellekku lao ri Rufus sibawa indo'na, iya pada-padaè indo' ri alèku. Rufus iyanaritu tau iya napilè Puwangngè iya ripojiyè. 14 Palettukekka sellekku lao ri Asinkritus, Flègon, Hèrmès, Patrobas, Hèrmas, sibawa sininna saudara siyatepperengngè iya silaongngè mennang. 15 Sellekku lao ri Filologus sibawa Yulia; lao ri Nèrèus sibawa ana'daranna; lao ri Olimpas sibawa lao ri sininna tau mateppe'è iya silaongngè mennang. 16 Siyasselles-sellengekko sibawa sipammasè-masè selaku Saudara Kristèng. Sininna jema'na Kristus palettu'i sellenna mennang lao ri Saudara-saudara. 17 Saudara-saudara! Uwèllauwi sibawa masero: atike'ko lao risining tau iya paompoè assisalang sibawa pakacauwi atepperenna tauwè lao ri Puwangngè. Iyaro gau'è sisalai sibawa aga iya puraè riyappagguruwang lao ri iko. Abèlaiwi sining tau makkuwaèro. 18 Saba' sining tau iya pogau'èngngi makkuwaèro dè' najjama untu' Kristus Puwatta, sangadinna untu' pawessoriwi cinna atinna. Nasibawang pappalècè sibawa ada-ada iya macenningngè, nabengnguwangngi sining tau iya dè'è agaga naisseng. 19 Naissenni sininna tauwè makkedaè matinuluko lao ri pappagguruwang passalenna Karèba Madècèng iya polè ri Allataala. Namasennakka ri gau'èro passalenna. Macinnaka kuwammengngi mumapanrè passalenna gau'-gau' iya makessingngè, sibawa madonggo passalenna gau'-gau' iya majaè. 20 Allataala iya mabbèrè asalèwangeng lao ri rupa tauwè, masitta'i matu taroi Ibillisi ri yawa akuwasammu sibawa mancuru'i. Tennapodo Saudara-saudara tuli ribarakkakiwi ri Yèsus Kristus Puwatta! 21 Timotius, sellaoku, palettu'i sellenna lao ri iko. Makkuwatoro Lukius, Yason sibawa Sosipater, iya sisuku bangsaè sibawa iyya. 22 Iya mokièngngi iyaè sure'è iyanaritu iyya, Tèrtius. Palettu'ka selleng assisellaongeng lao ri iko. 23 Massellengngi Gayus lao ri iko. Mappèrumaka ri bolana sibawa jema'ta massompai kuwato. Erastus, kapala bendaharana kotaè, massellengngi lao ri iko, makkuwatoro saudara Kwartus. 24 Tennapodo Puwatta Yèsus Kristus barakkaki manengngi Saudara. Aming. 25 Ripojiwi Allataala! Makuwasai pèwatangiwi atepperenna Saudara situru Karèba Madècèng polè ri Allataala iya uwabbirittangngè passalenna Yèsus Kristus. Uwabbirittangngi iyaro karèbaè situru sibawa aga iya napannessaè Allataala; iyanaritu rancanana Allataala iya maddatu-datu taungngènna ittana dè' naissengngi tauwè. 26 Iyakiya makkekkuwangngè, nasaba parèntana Allataala iya mannennungengngè, iyaro rancanaè purani ripannessa sibawa riyappaddissengeng lao risininna bangsa-bangsaè naolai kitta'-kitta'na sining nabiè, kuwammengngi naiya maneng mennang namateppe' sibawa namatinulu lao ri Allataala. 27 Alèna ritu Allataala tungke'è, mapanrè senna'i. Tennapodo ripakatanrèi lettu mannennungeng naolai Yèsus Kristus! Aming.

1 Korintus 1

1 Saudara-saudara jema'na Allataala ri Korintus! Purani Saudara riyobbi ri Allataala untu' mancaji umma'-Na nasaba Saudara appunnangennai Kristus Yèsus, silaong sining tauwè muwi kègi-kègi iya sompaèngngi Puwatta Yèsus Kristus, iyanaritu Puwanna mennang sibawa Puwattato. Iyya, Paulus, sibawa saudarata Sostènès, mammènasai tennapodo Allataala Ambo'ta sibawa Puwang Yèsus Kristus mabbèrè barakka enrengngè asalèwangeng lao ri iko. Uwokii iyaè sure'è selaku rasulna Kristus Yèsus, iya nakkaè Allataala sibawa èlo-Na muto. 4 Tuli mattarima kasi'ka lao ri Allataala passalenna iko, saba' mutarimai pammasè polè ri Allataala naolai Kristus Yèsus. 5 Nasaba mancajiko appunnangenna Kristus, nasugi atuwommu ri laleng sininna gau'è. Pangissengemmu passalenna sininna sèuwaè malamung senna', namaccako mappagguruwangngi iyaro pangissengengngè. 6 Iyaro mappaitangngi makkedaè karèba passalenna Kristus makkuwamani mattemme'na ri laleng atimmu, 7 angkanna dè' muakurangeng muwi sèddi barakka, ri wettu mutajenna Puwatta Yèsus Kristus sibawa naitana sininna tauwè. 8 Alèna matu Kristus tanggukko lettu ri accappurenna; kuwammengngi ri wettunna polè paimeng, ripolèiko matu temmakkècella. 9 Weddingngi Allataala riyatepperi tonget-tongeng. Alèna ritu Allataala iya puraè mobbiko untu' mancaji sèddi sibawa Ana'-Na, iyanaritu Yèsus Kristus, Puwatta. 10 Saudara-saudara! Ri laleng asenna Puwatta Yèsus Kristus uwèllauwi kuwammengngi mumassèddi ada maneng; kuwammengngi aja' naengka assisalang ri yelle'mu. Sitinajako massèddi, siati sibawa sinawa-nawa. 11 Saba', sining tau polè ri kaluwarga Kloè laporo'i ri iyya engka assasang ri yelle'mu. 12 Iya uwasengngè iyanaritu makkedaè ri yelle'mu engka makkeda, "Iyya maccowèka ri Paulus, " engkato makkeda, "Iyya maccowèka ri Apolos, " iya laingngè makkedai, "Iyya maccowèka ri Pètrus, " na laingngè makkeda tosi, "Iyya maccowèka ri Kristus. " 13 Masa' Kristus tabbagè-bagè! Paulus dè' namatè risalli untu'mu! Dè'to muricemmè untu' mancaji ana'-ana' gurunna Paulus? 14 Sukkuru'ka dè' ucemmèi muwi sèddi tau polè ri yelle'mu, ri lainnaè Krispus sibawa Gayus. 15 Aja' narapii sèddiè tau makkeda makkedaè puraka cemmèi untu' mancaji ana' gurukku. ( 16 Stèfanus sibawa kaluwargana, mèmeng iyya cemmèi mennang. Iyakiya ri lainnaèro iya uwèngngerangngè dè'na gaga tau lainna iya ucemmè. ) 17 Nasuroka Kristus tenniya untu' cemmèi tauwè, sangadinna untu' mappallebbangengngi Karèba Madècèng polè ri Allataala; na iyaro harusu'i upogau' tekkupakè amaccang mabbicaraè secara tolino, kuwammengngi akuwasanna amatènna Kristus risalliè dè' namancaji siya-siya. 18 Saba' lao risining tau iya mattujuè ri abinasangngè, karèba passalenna amatènna Kristus ri salliè pada-padai omong kosongngè. Iyakiya lao ri idi iya ripassalama'è ri Allataala, iyaro karèbaè pada-padai carana Allataala mappaitangngi akuwasan-Na. 19 Saba' ri laleng Kitta'è, makkedai Allataala, "Apanrènna tau maccaè maèlo Upakacau, pappahanna tau makkèpangissengengngè maèlo Upallennye. " 20 Aga akkègunananna sining tau makkèpangissengengngèro? Aga akkègunanna mennang iya maccaè? Aga akkègunanna ahli-ahli pannawa-nawa linoèwè? Pura nappaitanni Allataala makkedaè apanrènna linoèwè iyanaritu omong kosongngi simata! 21 Nasaba muwi pèkkugi accana rupa tauwè, dè' naullèi missengngi Allataala naolai acca ri alèna. Iyakiya mala nasaba mapanrèi Allataala, nanasitujuiwi passalama'i sining tau iya mateppe'è ri Alèna naolai biritta iya riyappallebbangengngè iya nangga'è sèuwa omong kosong linoè. 22 Natuntu'i tau Yahudiè anu makalallaingngè selaku butti, sibawa tau Yunaniè napentingkangngi apanrènna linoèwè. 23 Iyakiya idi'è banna mabbirittangngi Kristus iya matè ri salliè. Iyaro birittaè nasinggungngi pappèneddinna sining tau Yahudiè sibawa nangga'i omong kosong sining tau tenniyaè Yahudi. Sibawa tau tenniyaè Yahudi naangga'i iyaro sèuwa adonggong. 24 Iyakiya lao risining tau iya puraènna riyobbi ri Allataala -- muwi tau Yahudi iyarè'ga tenniya tau Yahudi -- iyaro birittaè sinrupai carana Allataala mappaitangngi akuwasan-Na sibawa apanrèn-Na. 25 Saba' iya paitaè madonggo ri Allataala, iyanaritu lebbi mapanrèi na iya apanrènna tolinoè; sibawa iya paitaè malemma ri Allataala, iyanaritu lebbi watangngi na iya awatangenna rupa tauwè. 26 Saudara-saudara! Cobai mèngngerangngi pèkkugi keadaammu wettunna Allataala mobbiko. Cèddè bawang polè ri yelle'mu iya mapanrè, iyarè'ga makuwasaè, iyarè'ga matanrè tudangenna manuru' pakkitanna rupa tauwè. 27 Saba' mèmeng nattungka Allataala pilèi iya nangga madonggoè linoèwè, kuwammengngi nasining tau maccaè namasiri. Sibawa Allataala pilè towi iya nangga malemmaè linoèwè, kuwammengngi nasining tau iya baraniè naporè nancaji masiri. 28 Allataala pilèi iya riyangga mariyawaè, matuna, sibawa mala iya riyangga dè'è nakkèbettuwang ri linoèwè, kuwammengngi na Allataala mancuru'i iya nangga pentingngè linoè. 29 Rimakkuwannanaro dè' muwi sèddi tau mullèi mattempowangngi alèna ri yolona Allataala. 30 Allataala muto mèbbui angkanna Saudara massèddi sibawa Kristus Yèsus. Naolai Kristus naripancajiki mapanrè. Sibawa naolai Alènato, naèbbuki Allataala simadècèngeng paimeng sibawa Alèna enrengngè pancajiki umma'-Na iya mapaccingngè, kuwaèttopa paleppe'ki. 31 Jaji, pada-pada iya tarokiè ri laleng Kitta'è, "Tau iya maèloè mammingki-mingki, harusu'i mammingki-mingki ri aga iya napogau'è Puwangngè. "

1 Korintus 2

1 Saudara-saudara! Wettukku lao ri iko sibawa mabbirittangngi ri iko passalenna rancanana Allataala iya dè'èppa naissengngi linoè, dè' upakèi apanrènna linoèwè iyarè'ga mabbicara iya hèba'-hèba'è. 2 Saba' pura upattette'ni makkedaè ri wettu engkaku mupa sibawakko, dè' umaèlo powadai agi-agi, ri lainnaè Yèsus Kristus; lebbi-lebbipi makkedaè purai matè ri salliè. 3 Wettukku sibawakko, malemmaka sibawa tènrèka nataro tau. 4 Karèba iya upalettu'è ri iko dè' upalettu'i sibawa ada-ada iya mappangaruè situru apanrènna rupa tauwè. Upalettu'i iyaro sibawa cara iya pabuttiyèngngi makkedaè makuwasai Rohna Allataala. 5 Upogau'i makkuwaèro, kuwammengngi atepperemmu lao ri Kristus dè' nasituru' apanrènna tolinoè, sangadinna siturui akuwasanna Allataala. 6 Namuni makkuwaro, ri yelle'na sining tau iya matasa'ènna atuwong batènna, mabbicara mèmekka passalenna apanrèngngè. Iyakiya iyaè apanrèngngè tenniya apanrèng linoè, iyarè'ga apanrènna sining panguwasaè wettuèwè, iya lennye'è matti akuwasanna. 7 Apanrèng iya upangoloèro iyanaritu apanrèng polè ri Allataala. Iyaro apanrèngngè dè' naissengngi linoè, iyakiya Allataala pura passadiyangengngi untu' asennangetta riwettu dè'napa naripancaji linoèwè. 8 Dè' muwi sèddi tau polè risining panguwasaè wettuèwè iya missengngèngngi passalenna apanrèngngèro. Saba' akkalarapanna mennang naissenni, tentu dè' mennang namaèlo sallii Puwang iya malebbièro. 9 Sibalè'na iyaro gau'è pada-padai iya tarokiè ri laleng Kitta'è, "Aga iya dè'è naengka naitai iyarè'ga naèngkalingai tolinoè, sibawa dè'to naengka naompo ri laleng pikkiranna tolinoè, iyanaro napassadiya Allataala untu' sining tau iya Namasèiyè. " 10 Iyakiya pura napannessani Allataala lao ri idi sibawa naolai Roh-Na. Iyaro Rohna Allataala nasalidikiwi sininna sèuwa-sèuwaè, lettu risining rancanana Allataala muwi iya kaminang tassubbuè. 11 Saba' iya missengngèngngi atinna sèddiè tau iyanaritu rohna muto iyaro tauwè? Makkuwatoro passalenna Allataala. Iya missengngèngngi lise atinna Allataala banna Rohna Allataala bawang! 12 Na idi dè' nariwèrèkki rohna linoèwè, sangadinna Roh polè ri Allataala, kuwammengngi nariisseng maneng iya puraè nabbèrèyang Allataala lao ri idi. 13 Rimakkuwannanaro rèkko mappakatajakki gau'-gau' passalenna Allataala lao risining tau iya mappunnaiyè Rohna Allataala, dè' naripangolo situru apanrènna tolinoè, sangadinna situru pappagguruwanna Rohna Allataala. 14 Tau iya dè'è nappunnai Rohna Allataala, dè' naullèi tarimai aga iya napannessaè iyaro Roh-è. Saba' lao ri iyaro tauwè iyaro gau'-gau'è pada-padai sèddi adonggong bawang. Iyaro tauwè dè' naullèi pahangngi, saba' iyaro gau'-gau'è banna weddingngi riyangke' secara batèng. 15 Tau iya mappunnaiyè Rohna Allataala naullèi mangke'i sininna sèuwa-sèuwaè, iyakiya dè' muwi sèddi tau mappunnai ha' mangke'i Alèna. 16 Ri laleng Kitta'è tarokii, "Niga missengngi pikkiranna Puwangngè? Sibawa niga mullèi pangajariwi?" Idi ritu iya mappunnaiyè pikkirang iya pada-padaè Kristus!

1 Korintus 3

1 Saudara-saudara, sitongenna dè' uwullèi mabbicara sibawa Saudara pada-pada tau iya mappunnaiyè Rohna Allataala. Banna uwullèi mabbicara sibawa iko pada-pada tau iya tuwoè mupa situru cinna mallinona; pada-pada tau iya ana'loloè mupa ri laleng atepperenna lao ri Kristus. 2 Riyolo banna uwullèi mpèrèkko nanrè ana'lolo, tenniya nanrè tau battowa; saba' dè'pa nagenne awatangemmu untu' iyaro. Iyakiya muwi makkekkuwangngè dè'topa namawatang untu' iyaro, 3 nasaba tuwo mupo situru sipa'-sipa'mu secara tolino. Saba' rèkko mangèmpuru mupo sibawa mallaga sèddiè sibawa laingngè, dè'ga na iyaro mappaitangngi makkedaè tuwo mupo situru sipa'-sipa' tolinoè, pada-pada sining tau iya dè'è naissengngi Allataala? 4 Rèkko engka makkeda, "Idi maccowèki ri Paulus, " na laingngè makkeda, "Idi maccowèki ri Apolos, " dè'ga iyaro nappaitangngi makkedaè Saudara makkèampèi pada-pada sining tolinoè? 5 Niga sitongenna iyaro Apolos? Sibawa niga Paulus? Bannaki pattumani-pattumaninna Allataala, iya pimpingngèkko untu' mateppe' lao ri Kristus. Bannaki pajoppai jama-jamang iya nawèrèngngèkki Puwangngè lao ri idi tungke'-tungke'. 6 Iyya mattaneng na Apolos boloi, iyakiya Alèna muto Allataala iya mèbbuèngngi tanet-tanenna tuwo. 7 Jaji iya pentingngè iyanaritu Allataala, saba' Alèna ritu patuwoi. Iya mattanengngè sibawa iya mabboloè dè' napenting; 8 pada-padai iyanaritu iya duwa. Tungke'-tungke' tarimai matu saro situru turuppuse'na. 9 Idi iyanaritu sining tau iya sibawaè majjama untu' Allataala; na iko pada-padai dare'na Allataala. Saudara-saudara iyanaritu pada-pada towi bolana Allataala. 10 Nasibawang amaccang iya nabbèrèyangngè Allataala, iyya selaku panrè bola pura pasangngi pandamènna untu' iyaro bolaè, na tau laingngè patettongngi bolaè ri yasè'na pandamèngngèro. Tungke'-tungke' tau harusu' pènessaiwi madècèd-dècèng pèkkugiwi patettongngi ri yasè'na iyaro pandamèngngè. 11 Saba' alèna muto Allataala pura taroi Yèsus Kristus selaku alè-alèna pandamèng untu' iyaro bolaè; dè' gaga pandamèng laingngè. 12 Engka mappatettong ri yasè'na pandamèngngèro sibawa makkègunang ulaweng, engka makkègunang pèra', engka makkègunang batu paramata, engkato makkègunang aju, wella rakko iyarè'ga daramè. 13 Jama-jamanna tungke' tau paitai matu matti ri wettu polèna Kristus paimeng. Saba' iyaro Essoè apiè matu mèbbui jama-jamanna tungke' tau paitai. Apiè muto mojiwi sibawa pattentui matu agellorenna jama-jamangngèro. 14 Rèkko bola iya napatettongngè tauwè ri yasè'na pandamèngngèro tahangngi nanrè api, iyaro tauwè natarimai matu hadiyana. 15 Iyakiya rèkko nanrèi api jama-jamanna tauwè, rogiwi matu; salama' mutowi matu alèna, iyakiya pada-padai tau iya leppe'è molai apiè. 16 Muwissegga Saudara makkedaè iko iyanaritu Bolana Allataala? Sibawa Rohna Allataala monro ri alèmu? 17 Rèkko engka tau solangiwi Bolana Allataala, iyaro tauwè nasolangi towi Allataala. Nasaba Bolana Allataala iyanaritu banna untu' Allataala bawang, na ikona iyanaritu iyaro bolaè. 18 Aja' muwi sèddi tau bellèi alèna. Rèkko engka tau ri yelle'mu masengngi alèna mapanrè manuru' ukkuranna linoèwè, iyaro tauwè harusu'i madonggo, kuwammengngi natonget-tongeng mancaji mapanrè. 19 Saba' iya nangga'è mapanrè linoèwè iyanaritu madonggoi ri pakkitanna Allataala. Ri laleng Kitta'è tarokii, "Allataala jebba'i sining tau mapanrè ri laleng amaccang alèna mennang. " 20 Engkato taroki makkuwaè, "Naissengngi Puwangngè makkedaè nawa-nawanna sining tau mapanrè iyanaritu nawa-nawa iya dè'è nakkèguna. " 21 Rimakkuwannanaro, aja' nasèddiè tau makka-akkai tolinoè, saba' sininna sèuwa-sèuwaè pura riyabbèrèyanni mancaji appunnangemmu: 22 Paulus, Apolos, Pètrus, linoèwè, atuwongngè sibawa amatèngngè, iyaè wettuè iyarè'ga wettu mangoloè, iya manennaro iyanaritu appunnangemmu. 23 Na iko iyanaritu appunnangennai Kristus, na Kristus appunnangennai Allataala.

1 Korintus 4

1 Angga'ni idi pattumani-pattumaninna Kristus, iya tanggung jawakiyèngngi mabbirittangngi sining rancanana Allataala iya dè'èppa naissengngi linoè. 2 Iya bunge'-bunge' natuntu'è polè ri pattumani makkuwaèro iyanaritu matinului ri puwanna. 3 Untu' alèku, dè' nancaji soal aga iya mupikkiri'è -- iyarè'ga muwi niga -- passalenna alèku. Mala aga iya upikkiri'è passalenna alèku dè'to nancaji soal. 4 Dè' uwasengngi alèku pasala muwi ri laleng aga, iyakiya iyaro tenniya buttinna makkedaè mèmekka dè' upassala. Alèna Puwangngè ritu iya pattentuèngngi pasalaka iyarè'ga dè'. 5 Rimakkuwannanaro, nasaba dè'pa na wettunna, aja' mumasitta pattentui makkedaè sèddiè tau pasalai iyarè'ga dè'. Tajengngi narapi Puwangngè polè matti. Alèna ritu bukkai matu sininna rahasiya iya tassubbuè ri laleng pettangngè. Alèna ritu matu bongkara'i sininna niya' iya radde'è ri laleng atinna rupa tauwè. Ri wettuènnaro nappa tungke' tau tarimai polè ri Allataala pappoji iya sitinajaè natarima. 6 Saudara-saudara! Untu' apentingemmu, purani upakennai manenro lao ri Apolos sibawa lao ri alèkuto. Akkattana kuwammengngi napolè ri contotaro, weddikko magguru aga bettuwanna warèkkadaè, "Akkatenninno lao ri peraturang iya engkaè. " Nanallalengiro dè' muwi sèddi tau polè ri iko mullèi mammingki-mingkikengngi sèddiè tau, nainappa pakatunai iya laingngè. 7 Niga pancajiwi Saudara lebbi naiya tau laingngè? Dè'ga nasininna sèuwa-sèuwaè natarimai Saudara polè ri Allataala? Jaji, magi mumaèlo mammingkikengngi alèmu, samanna aga iya engkaè ri Saudararo tenniya sèuwa iya riyabbèrèyangngè? 8 Mèmeng dè'na muwapparelluwassi aga-aga! Sugino iko! Mancaji arunno! Na idi dè'! Temmaka kessinna rèkko tonget-tongekko mancaji arung, kuwammengngi weddikki mapparènta silaong iko. 9 Nasaba manuru' pallolongekku, idi rasul-rasul-è purani ripancaji ri Allataala selaku akkita-itang ri yolona rupa tauwè sibawa malaèka'è. Pada-padaki idi sining tau matunaè iya ripateppaiyè pahukkungeng matè ri yolona tau maègaè sibawa rigora-gorai ri linoè. 10 Nasaba Kristus, idi iyanaritu tau madonggoki, na iko tau Kristèng iya maccaè! Malemmaki, na iko mawatang! Ricellaki, na iko sanging ripoji! 11 Narapi makkekkuwangngèwè pèneddingiki akkadèreng sibawa adekkang; pakèyatta iya bawang monro ri watakkalè; napanrasa-rasaki tauwè; dè' tappunnai onrong untu' mattette'; 12 riyaggangkaullèyangngi untu' sappa dallè. Rèkko ritanroiki, ribaliwi sibawa barakka; rèkko ripanrasa-rasaki, sabbara'ki; 13 rèkko napau majaki tauwè, ribaliwi sibawa ada-ada iya macenningngè. Idi'è dè' talebbi naiya worowona linoèwè; lettu makkekkuwangngèwè idi riyangga'ki pada-pada rota'na tanaè. 14 Uwokii iyaè lao ri iko tenniya untu' pakasiriko, iyakiya untu' pangajariko pada-pada ana'-ana' ri alèku. 15 Saba' iyya ritu mancaji ambo'mu, namuni naullè selaku tau Kristèng, mappunnaiko seppulo sebbu guru. Ri laleng atuwommu selaku sining tau iya massèddiè sibawa Kristus, mancajika ambo' lao ri iko, nasaba iyya tiwii Karèba Madècèngngè passalenna Kristus lao ri iko. 16 Rimakkuwannanaro uwèllauwi sibawa masero kuwammengngi namuwaccowèriwi contoku. 17 Untu' iyanaro, na purani usuro Timotius lao ri iko. Selaku tau maccowè ri Kristus, pada-padai ana' ri alèku iya uwamasèiyè. Ana' iya weddingngè riyatepperi. Na alèna matti parèngngerangiko passalenna cara-cara atuwo-tuwong iya uwaccowèriyè mateppe'kuna ri Kristus, iyanaritu cara tuwong iya uwappagguruwangngè ri tungke' jema'è kègi-kègi onrong. 18 Siyagangngarè polè ri yelle'mu matemponi, saba' nasekka mennang dè' umaèlo lao ri iko. 19 Iyakiya rèkko napuwèloi Puwangngè, maèlo tokka lao ri iko. Dè'na namaitta, ri wettuèpparo matti uwita towi matu aga iya weddingngè napogau' sining tau iya matempoèro; tenniya bawang banna ada-adanna mennang. 20 Nasaba rèkko Allataala parèntai atuwonna sèddiè tau, iyaro gau'è ripabuttiwi ri awatangeng atuwonna tauwèro, tenniya ri ada-adanna. 21 Jaji pilè bawanni aga lebbi mupoji! Muwèloriga polèka untu' pagguruko sibawa matedde iyarè'ga polèka untu' mappagguru sibawa malemma sibawa paressè babuwa?

1 Korintus 5

1 Sitongenna engkana laporan utarima makkedaè ri yelle'mu engka appangaddiyang iya talliwe'-liwe'è: Engka ri yelle'na Saudara iya malawengngè sibawa poro indo'na. Muwi sining tau iya dè'è naissengngi Puwangngè dè'to napogau'i makkuwaèro! 2 Namuni makkuwaro, matanrè ati mupi Saudara. Sibalè'na harusu'i Saudara messè, sibawa passui polè ri yelle'na Saudara tau iya pogau'èngngi gau'èro. 3 Secara mallahèreng mabèlaka polè ri iko, iyakiya secara batèng engkaka ri tengnga-tengngamu. Jaji maèloka tinda' samannaka engka ri yelle'mu, "Ri laleng asenna Puwang Yèsus Kristus, upannessai makkedaè tau iya puraè pogau'èngngi pangkaukeng macarèpa makkuwaèro, harusu'i rihukkung!" Rèkko maddeppungekko angga'ni engkaka hadèrè ri yelle'mu enrengngè nasibawang akuwasanna Puwatta Yèsus, 5 harusu'ko mabbèrèyangngi iyaro tauwè lao ri Ibillisi' kuwammengngi na watakkalèna iyaro tauwè nabinasa, nanallalengiro naripassalama' rohna ri wettunna Puwangngè polè paimeng. 6 Dè' nasipato'ko matempo! Naullè muwissenni warèkkadaèwè, "Ragi cèddè'è pasawèi lama labbu'è!" 7 Abbèyangngi riyolo' ragi iya malaungngèro, iyanaritu ragi dosaè, kuwammengngi mumancaji pada-pada lama labbu iya baruè, mapaccing polè ri ragi dosa malaungngè, na uwisseng makkedaè mèmeng iko makkuwakoro. Saba' ramè-ramè Paskata sadiyani, nasaba Kristus mancaji selaku bimbala' Paskata, purani riyakkarobangeng. 8 Jaji, laono mai taramè-ramèiwi iyaro pèstaè sibawa roti iya dè'è gaga raginna, iyanaritu roti maddapangengngèngngi apaccingengngè sibawa sininna iya nasitujuiyè atinna Allataala. Aja' taramè-ramèiwi pèsta Paskaèro sibawa roti iya engkaè ragi launna, iyanaritu ragi dosa sibawa ja. 9 Ri laleng sure'ku iya labe'è, upaissengekko kuwammengngi aja' musiwollompollong sibawa tau pappangaddingngè. 10 Iya uwakkattaiyè tenniya tau pappangaddiyè iyarè'ga mangowaè, iyarè'ga pabengnguwangngè iyarè'ga passompa barahalaè iya dè' sises-sisengngè naissengngi Allataala. Tenniya! Tenniya mennang uwakkattai; saba' rèkko harusu'ko mabèlaiwi mennang, tentu parelluko massu siseng polè ri linoèwè. 11 Akkattaku iyanaritu, makkedaè aja' musiwollompollong sibawa tau iya mangakuiyèngngi alèna tau Kristèng, iyakiya iyaro tauwè pappangaddiwi, iyarè'ga mangowa, iyarè'ga passompa barahala, iyarè'ga napoji pau-pau majai tau laingngè, iyarè'ga pammabokeng, iyarè'ga panga. Muwi tudang manrè sibawa tau makkuwaèro, aja'to! 12 Mèmeng, madèlèkiwi sining tau tenniyaè Kristèng, tenniya urusakku. Allataala muto madèlèkiwi matu mennang. Iyakiya passalenna anggota-anggota jema'mu, dè'ga na alèmu muto madèlèkiwi mennang? Ri laleng Kitta'è tarokii, "Paddèsu'i tau majaè polè ri yelle'mu. "

1 Korintus 6

1 Magi naengka ri yelle'mu iya baraniè lao ri hakingngè iya dè'è naissengngi Allataala, untu' mapparapekengngi saudara siatepperengngè, rèkko massasai sibawa saudaranaro? Magi nadè' naèllauwi umma'na Allataala pacceppiwi parakaraèro? 2 Dè'ga muwissengngi makkedaè umma'na Allataala matu madèlèkiwi linoèwè? Jaji, rèkko mèmeng muadèlèkiwi matu linoèwè, dè'ga muwullèi pacceppiwi parakara-parakara angngadèlèkengngè iya dè'è bettuwanna? 3 Dè'ga muwissengngi makkedaè idi matu madèlèkiwi sining malaèka'è? Lebbi-lebbipi parakara-parakara atuwong esso-essoè! 4 Rèkko mompoi parakara-parakara makkuwaèro, mupangologa lao ri sining tau iya dè' sises-sisengngè nappunnai pangka' ri laleng jema'è? 5 Mappakasiri-siri tongeng! Tentu ri yelle'mu engka sèddi tau iya genne'è apanrènna untu' pacceppiwi assisalangngè ri yelle'na Saudara-saudara iya pada-padaè Kristèng! 6 Iyakiya sibalè'na sèddiè tau Kristèng lao risèddiè tau tenniyaè Kristèng untu' mapparapekengngi parakarana lao ri saudarana iya Kristèngngètto! 7 Aja' mulao makkara-kara ri tau tenniyaè Kristèng; engkana sining assisalangngè ri yelle'mu sinrupai sèuwa apakalang ri iko. Lebbi kessing muwi rigau' dè' naadèlè', iyarè'ga riparogi! 8 Iyakiya mala iko muto gaukengngi tau laingngè sibawa dè' naadèlè'. Iko muto parogiwi tau laingngè. Na iyaro mupogau'i mala lao ri Saudara-saudara siatepperengngè! 9 Muwissegga makkedaè sining tau iya dè'è naturusiwi èlona Allataala, dè' namancaji matu anggotana umma'na Allataala? Aja' naribellèko. Sining tau iya pogau'èngngi pappangaddiyangngè, sining tau iya massompaè barahala, iya malawengngè, iya pogau'èngngi pangkaukeng mappakasiri-siriè lao ri pada-padanna, 10 iya mènnauwè, iya mangowaè, iya pammabokengngè, iya pojiyèngngi pau-pau majai tau laingngè, sibawa para'èngngi tau laingngè -- sininna tau pada-padaèro dè' nancaji matu anggotana umma'na Allataala. 11 Siyagangngarè ri yelle'mu riyolo kèdo-kèdo makkuwaro. Iyakiya makkekkuwangngè ripannessano mapaccing polè ri dosaè. Mancajino appunnangenna Allataala iya ripallaingngè. Simadècèngenno paimeng sibawa Allataala, nasaba mateppe'ko lao ri Puwang Yèsus Kristus sibawa nasaba akuwasanna Roh polè ri Allataala. 12 Engka powadai, makkedaè tungke' tau weddingngi napogau' sininna sèuwa-sèuwaè. Iyakiya untu' ri alèku dè' nakkèguna maneng. Jaji namuni wedding upogau' agi-agi, iyakiya dè' umaèlo malleppessangngi alèku rikuwasai ri muwi aga. 13 Engkato powadai makkedaè nanrè iyanaritu untu' babuwaè, na babuwaè ripassadiyai untu' nanrè. Iyakiya iya duwa ripaddèi matu ri Allataala. Tubunna tolinoè dè' nawedding ripakè untu' pangkaukeng iya mappangaddiè, iyakiya banna untu' tumaningiwi Puwangngè. Na Puwangngè piyarai matu iyaro tauwè. 14 Allataala pura patuwoi Puwang Yèsus polè ri amatèngngè, makkuwatoro Allataala patuwoi matu idi sibawa akuwasan-Na. 15 Naisseng Saudara-saudara makkedaè tubummu iyanaritu anggota tubunnai Kristus. Jaji, weddikka'ga mala sèddi anggota tubunna Kristus nainappa pancajiwi anggota tubunna sèddiè cakkuribang? Dè' sises-siseng! 16 Iyarè'ga naullè dè'pa muwissengngi makkedaè tau iya sicampuru'è sibawa sèddiè cakkuribang, mancaji sèddini sibawa cakkuribangngèro! Saba' ri laleng Kitta'è tarokii, "Mancaji sèddiwi iya duwa. " 17 Iyakiya tau iya passèddiyèngngi alèna sibawa Puwangngè, Rohna Puwangngè sibawa rohna tauwèro mancaji sèddiwi. 18 Abèlaiwi pangkaukeng-pangkaukeng iya mappangaddiyè. Saba' sininna dosa laing iya napogau'è tauwè, kajajiyangngi ri saliwenna tubunna tauwèro. Iyakiya tau iya pogau'èngngi mappangaddiyè, bettuwanna pogau'i dosa lao ri tubunna muto. 19 Harusu'i muwisseng makkedaè tubummu iyanaritu onronna Rohna Allataala monro. Iyaro Roh-è monroi ri laleng iko. Na Alèna muto Allataala mabbèrèyangngi iyaro Roh-è lao ri iko. Watakkalèna Saudara tenniya appunnangemmu. Iyaro appunnangenna Allataala. 20 Allataala pura melliko sibawa purana nawaja maneng. Rimakkuwannanaro, pakèi tubummu pèkkugi caramu angkanna Allataala ripakalebbi.

1 Korintus 7

1 Makkekkuwangngè maèloka mabbicara passalenna persoalang iya mupowadaè ri laleng sure'mu. Rèkko sèddiè worowanè dè' nakawing, makessing iyaro. 2 Iyakiya kuwammengngi dè' narigoda untu' pogau'i iya dè'è nasitinaja, lebbi kessing muwi tungke' worowanè mappunnaiwi bainèna muto sibawa tungke' makkunrai mappunnaiwi lakkainna muto. 3 Lakkaiè harusu'i napennoi kewajibanna selaku lakkai lao ri bainèna, na bainè harusu'i napennoi kewajibanna selaku bainè lao ri lakkainna; tungke'-tungke' pennoiwi kewajibanna lao ri laingngè. 4 Bainè dè' nakuwasaiwi tubunna muto; iya makuwasaiyèngngi tubunna iyanaritu lakkainna. Makkuwatoro lakkaiè dè' nakuwasaiwi tubunna muto; iyakiya iya makuwasaiyèngngi tubunna iyanaritu bainèna. 5 Aja' muwabèlaiwi sèddiè lao ri laingngè selaku mallaibinèngeng. Wedding muwa untu' cinampe', assaleng sipadduwano pada-pada situjuiwi. Nanallalengiro tungke'-tungke' weddingngi massempajang sibawa dè' nariganggu. Iyakiya ri munri, harusu'ko lisu sisullè siyaddeppèri selaku mallaibinèngeng. Rèkko dè' nakkuwaro, weddingngi matti muwaccowèriwi pappalècèna sètangngè, nasaba dè' mumatedde tahangngi napessunna. 6 Upowadai iyaè tenniya selaku parènta, iyakiya selaku pangaja. 7 Sitongenna lebbi upojiwi rèkko sininna tauwè mancajiwi pada-pada iyya. Iyakiya tungke'-tungke' pada purani tarima pammasè iya dè'è napada polè ri Allataala. Sèddiè tau mappunnaiwi pammasè makkuwaè, iya laingngè mappunnaiwi pammasè iyaro. 8 Lao risining tau iya dè'èppa nakawing enrengngè sining makkunrai iya jandaènna, iyanaè pangajaku: Lebbi kessing muwi Saudara tette' tuwo alè-alè pada-pada iyya. 9 Iyakiya rèkko dè' naullèi Saudara tahangngi napessunna, sitinajai Saudara kawing. Saba' lebbi kessing muwi Saudara kawing naiya malluwa'-luwa'è napessunna. 10 Lao ri mennang iya puraènna kawing, iyanaè parèntaku: (Sitongenna tenniya iyya mabbèrèyangngi iyaè parèntaè, iyakiya Puwangngè. ) Sèddiè makkunrai iya puraènna kawing aja' nasalaiwi lakkainna. 11 Iyakiya rèkko nasalaiwi, harusu'i tette' dè' nallakkai, iyarè'ga lisui ri lakkainna. Sibawa sèddiè lakkai dè' nawedding nabbèyang bainèna. 12 Lao ri laingngè, pangajaku iyanaritu: -- iyaè pangajaku muto, tenniya Puwangngè -- rèkko sèddiè tau Kristèng napubainèi tau iya dè'è namateppe' ri Kristus, na bainèna nasitujuiwi untu' tuwo silaong alèna, iyaro tauwè dè' nawedding nabbèyang bainèna. 13 Narèkko sèddiè makkunrai Kristèng mallakkaiwi tau iya dè'è namateppe' ri Kristus, iyaro bainè dè'nawedding nabbèyang lakkainna. 14 Nasaba lakkai iya dè'è namateppe' ripalaloi untu' mancaji umma'na Allataala nasaba allaibinèngenna sibawa bainè iya mancajiyènna appunnangenna Allataala. Makkuwatoro bainè iya dè'è namateppe' ripalaloi mancaji umma'na Allataala, nasaba allaibinèngenna sibawa lakkai iya mancajiyènna appunnangenna Allataala. Rèkko dè' nakkuwaro, ana'-ana'na mennang tentu pada-padai ana'-ana' kapèrè'è, padahal iyaro ana'-ana'è riyangga'i selaku anggotana umma'na Allataala. 15 Iyakiya rèkko tau iya dè'è namateppe'ro salaiwi bainèna iyarè'ga lakkainna iya Kristèngngè, aja' mutahangngi. Ri laleng gau'èwè iyaro makkunraiè iyarè'ga worowanè laluwasai, saba' maèloi Allataala kuwammengngi na Saudara tuwoi sibawa sipammasè-masè. 16 Nasaba Saudara selaku bainè -- iya mateppe'ènna lao ri Puwangngè -- pèkkugi Saudara naullèi missengngi sibawa mattentu makkedaè Saudara dè' naullèi mappassalama'i lakkaimmu? Makkuwatoro Saudara selaku lakkai Kristèng, pèkkugi Saudara weddingngi naisseng sibawa mattentu makkedaè Saudara dè' naullèi passalama'i bainèmu? 17 Sitinajai tungke'-tungke' matoro'i atuwo-tuwonna situru pappimpinna Puwangngè pada-pada iya pura ripattentungengngèngngi ri Allataala wettunna Allataala mobbii untu' mateppe' ri Alèna. Iyanaro peraturang iya uwappagguruwangngè ri tungke'-tungke' jema'è. 18 Ebara'na, rèkko sèddiè tau purani risunna wettunna natarima pangobbina Allataala, aja'na iyaro tauwè nakkuraga leddai iyaro tanra-tanrang sunna'è. Makkuwatoro rèkko sèddiè tau dè'pa narisunna' wettunna natarima pangobbina Allataala, aja'na iyaro tauwè naèllauwi risunna. 19 Saba' naccowèriwi peraturang sunna'è iyarè'ga dè' naccowèriwi, pada-padai iya duwa, dè' agaga bettuwanna. Iya pentingngè iyanaritu turusiwi parènta-parèntana Allataala. 20 Sitinajai tungke' tau tette' tuwo ri laleng keadaang pada-pada wettunna natarima pangobbina Allataala. 21 Rèkko wettunna Saudara riyobbi, Saudara iyanaritu sèddiwi ata, aja'na Saudara nassussa-sussa pikkiri'i gau'èro. Iyakiya rèkko matti Saudara lolongengngi kasempatang untu' mancaji maradèka', pakèi iyaro kasempatangngè. 22 Saba' sèddiè ata iya mateppe'ènna ri Puwangngè, iyanaritu taunnai Puwangngè iya maradèka'è. Sibawa sèddiè tau maradèka' iya mateppe'ènna ri Puwangngè, iyanaritu atannai Kristus. 23 Pura riyellini Saudara sibawa purani nawaja maneng. Rimakkuwannanaro, aja' Saudara nabbèrèyangngi alèna untu' mancaji atanna tolinoè. 24 Jaji, Saudara-saudara, muwi pèkkugi keadaammu wettunna riyobbi, sitinajai Saudara tette' tuwo pada-padaro silaong Allataala. 25 Makkekkuwangngè passalenna sining tau iya dè'èppa nakawing. Passalenna gau'èro dè' utarima parènta agi-agi polè ri Puwangngè. Iyakiya selaku tau iya nasaba pammasèna Puwangngè sitinajai riyatepperi, maèloka mabbèrèyangngi pangajaku. 26 Rèkko riyèngngerangngi sininna asussang iya mancangngèngngi makkekkuwangngèwè, uwasengngi lebbi kessing muwi rèkko tette'i tauwè tuwo pada-pada makkekkuwangngè. 27 Rèkko mabbainèni Saudara, aja' muwakkuraga leppe' polè ri bainèro. Rèkko dè'pa nabbainè Saudara, aja'na musappa bainè. 28 Iyakiya rèkko kawingngi Saudara, iyaro tenniya dosa. Makkuwatoro rèkko sèddiè ana'dara kawing, tenniyai bettuwanna madosai. Banna mennang iya kawingngèro moloiwi matu maèga asussang. Macinnaka kuwammengngi Saudara ripabèlai polè risining asussangngèro. 29 Akkattaku makkuwaiyè, Saudara-saudara: Dè'na tappunnai maèga wettunna. Mappammulai makkekkuwangngè, tungke' tau iya mabbainènna sitinajai tuwo samanna dè'pa nabbainè; 30 tau iya teriyè, tuwo samanna dè' namessè ati; tau iya macawaè, samanna dè' namarennu; tau iya puraè mangelli, samanna dè' nappunnai aga-aga; 31 sibawa tau iya malippuè sibawa gau'-gau' linoè, sitinajai tuwo samanna dè' narilippui ri gau'-gau'èro. Saba' iyaè linoè, ri laleng keadaanna makkekkuwangngè, lennye'i matu! 32 Macinnaka kuwammengngi naleppe Saudara polè ri asussangngè. Tau iya dè'è nabbainè napattette'i matu pikkiranna ri gau'-gau' passalenna Puwangngè, nasaba macinnai pèsennangiwi Puwangngè. 33 Iyakiya tau iya mabbainèènna maègai matu napikkiri gau'-gau' linoèwè, saba' macinnai pèsennangiwi atinna bainèna; 34 addimonrinna tabbagè-bagèi matu pikkiranna. Sèddiè makkunrai iya dè'è nallakkai, iyarè'ga sèddiè ana'dara, maègai matu napikkiri passalenna Puwangngè, nasaba macinnai kuwammengngi nyawa tubunna mancajiwi appunnangenna Allataala. Iyakiya sèddiè makkunrai iya mallakkaiyènna, napattujui pikkiranna ri gau'-gau' linoèwè, nasaba macinnai sennangiwi atinna lakkainna. 35 Uwoki manengngiro untu' adècèngemmu muto, tenniya akkattaku mattèyangngi iyaè mattèyangngi iyaro. Iya uwacinnaiyè banna ritu kuwammengngi Saudara napogau'i iya tongengngè sibawa sitinajaè, enrengngè kuwammengngi naullèi Saudara pattujui pikkiranna lao ri Puwangngè. 36 Rèkko sèddiè tau marasa dè' napajoppai iya sitinajaè lao ri tunanganna, rèkko dè' naullèi tahangngi napessunna, namarasa parellui kawing sibawa ana'daraèro; leppessanni pogau'i aga iya napèrasaiyè makessing. 37 Rèkko sèddiè tau purani napettui ri laleng atinna untu' dè' nakawing sibawa tunanganna, na iyaro apettunna dè' natarapassa, iyaro napogau'è makessingngi, assaleng naullèi pogau'i. 38 Riponcokiwi adaè, tau iya kawingngè, makessing pangkaukenna, na tau iya dè'è nakawing lebbi kessing pasi pangkaukenna. 39 Sèddiè makkunrai iya kawingngènna tassiyoi ri lakkainna ri wettu tuwonami bawang lakkainna. Rèkko matèni lakkainna, iyaro makkunraiè laluwasani kawissi sibawa tau iya napojiyè; assaleng iyaro akawingengngè, akawingeng Kristèng. 40 Namuni lebbi maupe'i matu rèkko dè'na nakawinna. Iyaro pallolongekku muto, iyakiya upèneddingiwi ri alèku makkedaè iya upowadaèro nasibawang akuwasanna Rohna Allataala.

1 Korintus 8

1 Makkekkuwangngè passalenna anrèkanrè iya riyabbèrèyangngè selaku pakkasuwiyang lao ri barahalaè. Mèmeng tongeng pada-pada adanna tauwè, "Macca manenni. " Iyakiya amaccangngè mèbbui tauwè mancaji matempo, padahal pammasè napatokkongngi paribadinna tauwè. 2 Tau iya masengngèngngi maèga naisseng, sitongenna dè'pa naissengngi iya kaminang malamungngè. 3 Iyakiya tau iya tonget-tongengngè mamasèiwi Allataala, riissengngi ri Allataala. 4 Passalenna manrè anrèkanrè iya puraè riyakkasuwiyangeng ri barahalaè, riissenni makkedaè barahalaè maddapangengngi sèuwaè iya sitongennaè dè'gaga. Na riisseng towi makkedaè Allataala banna sèddi bawang; dè'gaga laingngè. 5 Mèmeng maègato aga iya riyasengngè dèwata iyarè'ga puwang; muwi iya engkaè ri langiè muwi iya engkaè ri yasè'na tanaè. 6 Iyakiya untu' idi, Allataala banna sèddi. Ambo'i iya mpinruèngngi sininna sèuwa-sèuwaè. Untu' Alèna ritu tatuwo. Na Puwangngè sèddi tommi bawang, iyanaritu Yèsus Kristus. Naolai Alèna nariwinru sininna sèuwa-sèuwaè, sibawa nasaba Alèna natatuwo. 7 Namuni makkuwaro, dè' naiya maneng tauwè naisseng gau'èro. Engka riyolo biyasana massompa barahala. Jaji, rimakkuwannanaro muwi lettu makkekkuwangngè naseng mupi mennang makkedaè anrèkanrè iya puraè riyakkasuwiyangeng lao ri barahalaè, iyanaritu anrèkanrènna barahalaè. Narèkko nanrèi iyaro anrèkanrè, marasa madosai mennang; nasaba dè'pa namatedde atepperenna. 8 Sitongenna iyaro anrèkanrè dè' naèbbui assisumpungetta sibawa Allataala mancaji lebbi madècèng. Rèkko riyanrèi iyaro anrèkanrè, dè' gaga asarong rilolongeng. Sibalè'na rèkko dè' tanrèi iyaro anrèkanrè, dè'to tarogi aga-aga. 9 Iyakiya, atike'ko! Aja' narapii kajajiyang makkedaè tau laingngè madosa -- nasaba dè'pa namatedde atepperenna -- nasaba laluwasai Saudara pogau'i agi-agi. 10 Akkattaku makkuwaiyè: Akkalarapanna Saudara, iya mappunnaiyè ateppereng iya matedde'ènna, mattengngang tudang manrè ri bola abbarahalangngè. Nainappa sèddiè tau mitai Saudara tudang manrè kuwaro. Rèkko atepperenna iyaro tauwè dè' namatedde, dè'ga na iyaro naèbbui matu iyaro tauwè barani manrèi anrèkanrè iya puraè riyabbèrèyang lao ri barahalaèro? 11 Narimakkuwannanaro, atepperenna Saudara mèbbui tau iya atepperennaè dè' namatedde'ro mancaji pusa. Padahal matèi Kristus untu' iyaro tauwè. 12 Narèkko pogau'i Saudara asalang pada-padaèro lao ri Saudara-saudara Kristèngngè -- iyanaritu nasolangiwi Saudara atepperenna mennang iya malemmaè -- tentu madosai Saudara lao ri Kristus. 13 Iyanaro saba'na, rèkko anrèkanrè nassabariwi Saudaraku madosa, tentu dè' sises-siseng umaèlo manrèi jukuènnaro. Saba' ajakkè madosai Saudaraku nasaba iyya.

1 Korintus 9

1 Tenniyaka'ga tau maradèka'? Tenniyaka'ga rasul? Dè'paga naengka uwitai Yèsus, Puwatta? Dè'ga na iko wassèlè jama-jamakku untu' Puwangngè? 2 Namuni sining tau laingngè dè' namaèlo mangakuika selaku rasul, kaminang cèddè'na muwakuiwi iyaro! Saba' atuwommu selaku tau Kristèng iyanaritu butti makkedaè iyya sèddika rasul. 3 Rèkko nacellaka tauwè, maèloka baliwi makkuwaèwè: 4 Dè'ga gaga ha'ku tarimai anrèkanrè sibawa ènungeng nasaba jama-jamakku? 5 Dè'ga gaga ha'ku tiwi sèddi bainè Kristèng sibawakka ri laleng allalengekku, pada-pada iya napogau'è saudara-saudarana Puwang Yèsus sibawa rasul-rasul laing-laingngè, muttama' toni Pètrus? 6 Iyarè'ga banna Barnabas sibawa iyya bawang iya riharusu'kangngè sappai nanrèna muto? 7 Dè'gaga anggota tentara iya harusu'è mongkosokiwi alèna ri laleng atentarangngè! Dè'gaga patani iya mattaneng anggoro'è ri dare'na nainappa dè' nanrèi wassèlè anggoro polè ri dare'èro! Dè'gaga pakkampi iya piyaraè bimbala', nainappa dè' naènung susu polè ri bimbala'-bimbala'naro! 8 Upangoloi iyaro tenniya bawang situru iya biyasaè ri laleng pangalamang esso-essoè, iyakiya nasaba Kitta'è napangolo towi gau'èro. 9 Ri laleng Kitta'na Musa tarokii, "Rèkko mattengngangngi sapingngè rèse'i gandongngè untu' malleppessangngi gandongngè polè ri olina, aja' na ringong pannyoro'na. " Sapingngègga najampangi Allataala? 10 Iyarè'ga iyaro akkattana untu' idi? Mèmeng tarokii iyaro untu' idi. Saba' tau iya jamaèngngi dare'è sibawa tau iya pancajiyèngngi gandonna mèmeng sitinajai majjama nasibawang ammènasang untu' tarimai sibagiyang polè ri wassèlè jama-jamanna. 11 Purani' mampo binè rohani ri laleng atuwo-tuwonna saudara-saudara. Narèkko mèngngalaki barakka-barakka maddupa barab-barangngè polè ri iko, aga iyaro bettuwanna maèga senna' rituntu' polè ri iko? 12 Rèkko sining tau laingngè mappunnai ha' mammènasaiwi iyaè polè ri iko, dè'ga talebbi mappunnai ha' naiya mennang? Iyakiya iyya dè' uwakkègunangngi iyaro ha'è. Sibalè'na lebbi upojiwi tanggungngi sining-sininnaè naiya paompoè sèddi gau' iya halangiyèngngi appallebbangenna Karèba Madècèngngè passalenna Kristus. 13 Tentu naisseng Saudara makkedaè tau iya majjamaè ri laleng Bolana Allataala natarimai inanrèna mennang polè ri Bolana Allataala. Sibawa sining tau iya murusu'èngngi onrong akkasuwiyangeng akkarobangengngè, lolongengngi sibagiyang polè ri akkarobangeng iya nakkasuwiyangengngè kuwaro. 14 Makkuwatoro Puwangngè pura pattentui makkedaè tau iya mabbirittangngèngngi iyaro Karèba Madècèngngè harusu'i lolongeng inanrè polè ri appallebbangennaro. 15 Iyakiya dè'pa naengka upakèi muwi sèddi ha'ku polè ri ha'-ha'èro. Nauwokii iyaè sure'èwè tenniyato akkattana kuwammengngi gau'-gau'èro rigaukekka makkekkuwangngè. Lebbi kessing muwi matèka naiya ateddèngekka gau' iya uwammingkikengngèro. 16 Nasaba, rèkko iyaro banna persoalang mabbirittangngi Karèba Madècèng polè ri Allataala, tentu iyya dè' gaga ha'ku mingkiingki, saba' Allataala pura parèntakka untu' pogau'i. Cilakana iyya, rèkko dè' uwabbirittangngi iyaro Karèba Madècèngngè! 17 Akkalarapanna upajoppai jama-jamakkuro nasaba èloku, tentu weddikka mammènasa untu' lolongeng saro. Iyakiya uwabbirittangngi Karèba Madècèngngèro mala nasaba riwaji'kangnga. Risuroka ri Allataala untu' pogau'i iyaro. 18 Rèkko makkuwaitu, aga saroku? Iyanaè saroku: makkedaè weddikka mabbirittangngi Karèba Madècèngngèro sibawa dè' utanekiwi muwi sèddiè tau untu' mongkosokika, nasaba dè' utuntu'i ha'-ha'ku selaku pabbiritta Karèba Madècèngngèro. 19 Iyya'è tenniyaka atanna muwi niga; maradèkaka. Namuni makkuwaro, upancajiwi iyaè alèku ata lao ri sininna tauwè. Upogau'i iyaro kuwammengngi uwullèi malangngi tau singngèga-ègana untu' Kristus. 20 Lao ri tau Yahudi, kèdoka selaku tau Yahudiè kuwammengngi weddikka tiwii ri Kristus tau Yahudiè. Lao risining tau iya tuwoè situru hukkunna Musa, kèdoka samanna tassiyoka ri hukkungngèro, namuni sitongenna dè' utassiyo ri hukkungngèro. Upogau'i iyaro, kuwammengngi weddikka tiwii ri Kristus iyaro sining tauwè. 21 Lao ri tau tenniyaè Yahudi, kèdoka pada-pada sèddiè tau tenniya Yahudi, iyaè tauwè ri saliwennai hukkunna Musa. Upogau'i iyaro kuwammengngi weddikka tiwii ri Kristus iyaro sining tauwè. Iyakiya tenniya bettuwanna iyaro makkedaè dè' umatinulu lao ri parènta-parèntana Allataala; mala rikuwasaika ri parènta-parèntana Kristus. 22 Ri tengnga-tengngana sining tau iya malèrè teppe'na, kèdo tokka pada-pada tau iya malèrè teppe'na kuwammengngi weddikka gettengngi mancaji ana' gurunna Kristus. Rippe'na, mancajika sini-sininnaè untu' sininna tauwè kuwammengngi nallalengi muwi pèkkugi weddikka passalama'i sibagiyang polè ri mennang. 23 Iya manennaro upogau'i untu' iyaro Karèba Madècèng polè ri Allataala, kuwammengngi maccowè tokka ribarakkaki. 24 Tentu naisseng Saudara makkedaè ri laleng akkalaringngè sininna tomaccowèè lari manengngi, iyakiya banna sèddi tau bawang tarima hadiya. Rimakkuwannanaro larino pèkkugi carana angkanna Saudara tarimai hadiyana. 25 Tungke' tau iya mattengngangngè ri laleng latihangngè, tahangngi alèna ri laleng sininna passalengngè. Napogau'i iyaro nasaba macinnai ripaggènoi bunga apakalang, iyanaritu bunga iya dè'è namaitta namakelle. Iyakiya idi'è ritahangngi alè ri laleng sininna gau'è nasaba macinnaki ripaggènoi sibawa bunga apakalang iya dè'è namakelle matu. 26 Iyanaro saba'na ulari sibawa akkatta iya mattentuè. Pada-pada ri laleng attandingeng sijagguru'è, dè' uwajjagguru sembarangeng. 27 Uleppessangngi watakkalèku riwinru sibawa matedde narapi weddikka kuwasaiwi. Upogau'i makkuwaèro, saba' dè' umaèlo narapi kajajiyang makkedaè purani uwèra tau laingngè maccowè ri laleng akkalaringngèro, na alèku risampèyang.

1 Korintus 10

1 Saudara-saudara! Sitinajai naèngngerang Saudara aga iya kajajiyangngè lao ri nènè-nènèta wettunna mennang naccowèriwi Musa. Rilinrungi manengngi mennang ri ellungngè, sibawa salama'i mallèttoiwi Tasi' Cella'è. 2 Untu' mancaji ana'-ana' gurunna Musa, ricemmè manengngi mennang ri laleng ellungngè sibawa ri laleng tasi'èro. 3 Manrè manengngi mennang nanrè rohani iya padaè, 4 sibawa mènung ènungeng rohani iya padaè. Mènung manengngi mennang polè ri bulu batu rohani iya sibawangngèngngi mennang; iyaro bulu batuè iyanaritu Kristus. 5 Namuni makkuwaro, dè' namasennang Allataala lao ri maègangngèngngi polè ri mennang, na iyanaro saba'na sining ujuna mennang makkalènnekengngi ri padang kessi'è. 6 Iya manennaro mancaji contoi ri idi, untu' parèngngerangiki kuwammengngi na aja' nariyacinnai gau'-gau' iya majaè pada-pada mennang. 7 Kuwammengngi na aja'to tassompa barahala pada-pada iya napogau'è sibagiyang polè ri mennang. Ri laleng Kitta'è tarokii, "Nappammulana iyaro bangsaè manrè mènung, sibawa sèrè-sèrè untu' sompai barahalaè. " 8 Dè' nawedding ripogau' gau'-gau' iya mappangaddiè pada-pada iya napogau'è sibagiyang polè ri mennang. Saba', duwappulo tellu sebbu tau polè ri mennang matè ri laleng siesso nasaba napogau'i iyaro. 9 Dè' naweddikki coba-cobaiwi Puwangngè pada-pada iya napogau'è sibagiyang polè ri mennang riyolo, angkanna matèi mennang napitto ula momosoè. 10 Dè'to naweddikki mannoko'-noko'; pada-pada iya napogau'è sibagiyang polè ri mennang riyolo, angkanna riyunoi mennang ri Malaèka' Amatèngngè. 11 Iya manenna gau'èro kajajiyangngi lao ri mennang untu' mancaji conto lao risining tau laingngè. Na iya manennaro taroki towi untu' mancaji papparèngngerang lao ri idi. Saba' tuwoki makkekkuwangngè ri wettu accappurenna linoè. 12 Tau masengngèngngi alèta tettong masse, sitinajai matutu; aja' narapii menrung. 13 Tungke' paccobang iya napèneddingiyè Saudara iyanaritu paccobang iya biyasaè napèneddingi rupa tauwè. Iyakiya matinului Allataala ri jancin-Na. Dè' naleppessangngi Saudara ricobai lebbi na iya pakkulèmmu. Ri wettu nakennana Saudara paccobang, nawèrèkko matu laleng untu' mancaji mawatang kuwammengngi Saudara naullèi mattahang. 14 Rimakkuwannanaro, Saudara-saudara iya uwamasèiyè, sitinajako benci assompang barahalaè. 15 Mabbicaraka lao ri iko pada-pada lao ri sining tau iya maccaè. Sitinajako timbangngi ada-adakkuè. 16 Wettutta mènung anggoro sibawa mattarima kasi lao ri Allataala, dè'ga na iyaro nappaitangngi makkedaè massèddiki sibawa Kristus ri laleng amatèn-Na? Sibawa wettutta bagè-bagèwi rotiè untu' riyanrè' massibawa, dè'ga na iyaro nappaitangngi makkedaè massèddiki ri laleng tubunna Kristus? 17 Nasaba banna sèddimi roti, na idi maneng manrèki polè ri roti iya sèddiètto, na idi iya maègaèwè sinrupaki sèddi tubu. 18 Coba pènessaiwi sining tau Yahudiè. Iya mennang manrèèngngi inanrè iya riyakkasuwiyangengngè ri yasè'na onrong akkasuwiyangeng akkarobangengngè, iyanaritu sining tau iya massèddiè sibawa onrongngèro. 19 Aga akkataku sibawa iyaro? Barahala iyarè'ga inanrè iya riyakkasuwiyangengngè lao ri barahalaèro dè' sises-siseng napunnai bettuwang. 20 Aga iya riyakkasuwiyangengngè ri onronna akkarobangenna barahalaè dè' nariyakkasuwiyangeng lao ri Allataala, sangadinna lao risining sètangngè. Nadè' umaèlo massèddiko sibawa sètangngè. 21 Dè' naweddikko mènung polè ri ènungeng anggoro'na Puwangngè sibawa massamang polè ri ènungeng anggoro'na sètangngètto. Dè' naweddikko manrè ri mèjanna Puwangngè, sibawa ri mèjannato sètangngè. 22 Maèloki'ga mèbbui Puwangngè mangèmpuru? Lebbi watakki'ga naiya Puwangngè? 23 Adanna tauwè, "Weddikki pogau' agi-agi iya riyèloriyè. " Tongeng! Iyakiya dè' naiya maneng iya riyèloriyèro makkèguna. "Weddikki pogau' agi-agi iya riyèloriyè" -- iyakiya dè' naiya maneng iya riyèloriyèro napakessingiwi atuwo-tuwotta. 24 Aja' namuwi sèddi tau lellungngi apentingeng alèna bawang. Tungke' tau harusu'i lellung towi apentingenna tau laingngè. 25 Weddikko nanrè agi-agi iya ribalu'è ri pasa jukuè. Dè' naparellu risalidiki lebbi riyolo, namuni engka pappotane' ri laleng ati marilalemmu. 26 Saba' ri laleng Kitta'è tarokii, "Iyaè linoè sibawa sininna lise'na iyanaritu appunnangenna Puwangngè. " 27 Rèkko riundakko manrè ri sèddiè tau iya tenniyaè Kristèng, namutarimai iyaro undangengngè, anrèni aga iya napatalangengngèkko. Aja'na musalidikiwi polè kègi iyaro inanrè, kuwammengngi aja' naengka pappotane'-pappotane' ri laleng ati marilalemmu. 28 Iyakiya rèkko engka makkeda lao ri iko, "Iyaè inanrè purai riyakkasuwiyangeng lao ri barahalaè, " aja' muwanrèi iyaro inanrè, nasaba mujampangiwi apentingenna iyaro tauwè sibawa nasaba sadda ati marilalenna. 29 Akkattaku tenniya sadda ati marilalemmu, iyakiya sadda ati marilalenna iyaro tauwè. Naullè engka makkutana, "Wah, magi na amaradèkakku harusu'i rilawai ri sadda ati marilalenna tau laingngè? 30 Rèkko manrèka inanrè sibawa mattarima kasi lao ri Allataala, magi na tauwè harusu'i cellaka nasaba iyaro inanrè, napurana mattarima kasi lao ri Allataala?" 31 Muwi aga napogau' Saudara -- manrèi Saudara iyarè'ga mènungngi -- pogau'i iya manennaro untu' pakalebbii Allataala. 32 Tuwono pèkkugi batèna angkanna Saudara dè' nassabariwi tau laingngè pogau' dosa; tau Yahudigi mennang iyarè'ga tau tenniya Yahudigi, iyarè'ga jema'na Allataala. 33 Tuwono pada-pada iyya. Makkuragaka sennangiwi atinna sininna tauwè ri laleng sininna sèuwa-sèuwaè, sibawa dè'gaga akkatta-akkatta apentingeng ri alè. Akkattaku iyanaritu banna kuwammengngi nawedding ripassalama' maneng mennang.

1 Korintus 11

1 Accowèriwi batèkku, pada-padato iyya maccowèriwi batèna Kristus. 2 Upojiko saba' tuli muwèngngerakka sibawa turusiwi pappagguruwang iya uwabbèrèyangngè lao ri iko. 3 Iyakiya macinnaka muwissengngi sèddipa passaleng, iyanaritu iya mancajiyè kapala ri yasè'na tungke' worowanè iyanaritu Kristus; iya mancajiyè kapala ri yasè'na bainè iyanaritu lakkaiè, sibawa iya mancajiyè kapala ri yasè'na Kristus iyanaritu Allataala. 4 Rèkko sèddiè worowanè wettunna massempajang iyarè'ga wettunna palettu'i biritta polè ri Allataala ri yolona maèga tau, pakèi pattutu' ulu, iyaro tauwè napakatunai Kristus. 5 Narèkko sèddiè makkunrai wettunna massempajang iyarè'ga wettunna palettu'i biritta polè ri Allataala ri yolona maèga tau, dè' napakè pattutu' ulu, iyaro makkunraiè napakatunai lakkainna iya mancajiyè kapala ri yasè'na alèna. Pada-pada muwi iyaro samanna purai ricukkuru' ulunna iyaro makkunraiè. 6 Saba' rèkko sèddiè makkunrai dè' namaèlo pakè pattutu' ulu lebbi kessing muwi rigoncingngi gemme'na. Iyakiya rèkko sèddiè makkunrai ricukkuru'i ulunna iyarè'ga nagoncingngi gemme'na, iyaro sèuwaè pappakatuna ri alèna. Rimakkuwannanaro lebbi kessing muwi pakèi pattutu' ulu. 7 Worowanè dè' naparellu pakè pattutu' ulu, saba' naddapangiwi paribadinna sibawa arajanna Allataala. Iyakiya makkunraiè naddapangengngi arajanna worowanè, 8 saba' worowanè dè' naripancaji polè ri makkunraiè, makkunraiè ritu ripancaji polè ri worowanè. 9 Dè'to naripancaji worowanè untu' apentingenna makkunraiè, sangadinna ripancajiwi makkunraiè untu' apentingenna worowanè. 10 Rimakkuwannanaro, untu' pèsennangiwi sining malaèka'è, sèddiè makkunrai harusu'i pakè pattutu' ulu selaku tanrang makkedaè ri yawana akuwasanna lakkainna. 11 Namuni makkuwaro ri laleng atuwo-tuwotta selaku tau Kristèng, dè' natettong ri alè-alè makkunraiè leppe' polè ri worowanè; na worowanè dè'to natettong ri alè-alè leppe' polè ri makkunraiè. 12 Nasaba muni makkunraiè mula-mulanna ripancaji polè ri worowanè, iyakiya purairo jajiwi worowanè polè ri makkunraiè; nasininna sèuwa-sèuwaè assalenna polèi ri Allataala. 13 Coba alèna Saudara-saudara timbangngi gau'-gau'èwè: Makessigga sèddiè makkunrai massempajang lao ri Allataala ri yolona tau maègaè, nadè' napakè pattutu' ulu? 14 Polè ri pangalamang samaè, purano ripagguru makkedaè rèkko worowanè malampèi gemme'na, iyaro sèuwaè iya makurang sipato'è. 15 Iyakiya lao ri makkunraiè, riwèrèngngi gemme' untu' tongkoi ulunna sibawa gemme' malampè'è iyanaritu alebbirenna. 16 Rèkko engka tau iya maèloè massasa passalenna gau'èwè, sèddi bawang uwullè powada iyanaritu makkedaè muwi idi iyarè'ga jema'-jema'na Allataala laingngè, maègangngèngngi banna mappunnai iyaro sèddiè abiyasang ri laleng jema'è, ri lainnaèro dè'gaga. 17 Passalenna iyaè gau'è, dè' upojiko. Addeppungeng assompammu dè' napowassèlè'i iya makessingngè, sangadinna iya dè'è namakessing. 18 Bunge'-bunge'na uwèngkalingai, makkedaè ri laleng addeppungemmu, engka golongang-golongang iya sièwa-èwaè. Na uwasengngi iyaro karèbaè cèddè iyarè'ga maègana engka tongenna. 19 Mèmeng siratang rèkko mompoi sala pahang ri yelle'mu, kuwammengngi napaita matti niga-nigana tau Kristèng iya tongengngè. 20 Iyakiya wettummu maddeppungeng tenniya Perjamuwanna Puwangngè mupogau'. 21 Saba' ri wettu manrèmu tungke'-tungke'ko mabbètta-bèttang malai nanrèmu, angkanna engka dè' nallolongeng agaga naiya laingngè mabo'. 22 Magi nakkuwaro? Dè'ga Saudara nappunnai bola? Weddingngi Saudara manrè mènung kuwaro? Iyarè'ga maèloiga Saudara pakatunai jema'na Allataala sibawa pakasirii sining tau kasiyasiè? Aga harusu' upowada lao ri iko? Harusu'ka'ga pojiko? Dè' sises-siseng umaèlo pojiko. 23 Saba' iya uwappagguruwangngè lao ri iko, utarimai iyaro polè ri Puwangngè muto: makkedaè ri wennièro wettunna Yèsus, Puwatta, ribali'bellari, malani roti, 24 na puranana mattarima kasi lao ri Allataala nasaba rotièro, napuwè-puwè'ni iyaro rotiè sibawa liman-Na, nainappa makkeda, "Iyanaè tubuk-Ku iya riyabbèrèyangngè untu' iko. Pogau'ni iyaè untu' mèngngerak-Ka. " 25 Makkuwatoro puranana manrè, nalani ènungeng anggoro'è nainappa makkeda, "Iyaè anggoro'è iyanaritu assijancingenna Allataala iya mabaruè, iya ripaessaè sibawa dara-Ku. Sises-siseng muwènung iyaè, pogau'i iyaè untu' mèngngerak-Ka. " 26 Mèmeng sises-sisekko manrè roti sibawa mènung anggoro, muwabbirittangngi amatènna Puwangngè, narapii polè. 27 Rimakkuwannanaro, tau iya manrèèngngi rotinna Puwangngè iyarè'ga mènungngi anggoro'na Puwangngè sibawa cara iya dè'è nasipato, iyaro tauwè madosai lao ri Puwangngè iya puraè makkarobangengngi tubun-Na sibawa dara-Na. 28 Jaji, tungke' tau harusu'i parèssai alèna riyolo', nainappa wedding manrè iyaro rotiè sibawa naènung anggoro'è. 29 Saba' rèkko manrèi roti tauwè sibawa mènungngi anggoro'è nadè' najampangiwi makkedaè iyaro perjamuwangngè engka assisumpungenna sibawa tubunna Puwangngè, iyaro tauwè manrèi sibawa mènungngi untu' tarimai pahukkungenna Allataala ri yasè'na alèna muto. 30 Iyanaro saba'na maèga polè ri yelle'mu iya malasaè sibawa malemma, sibawa engkato matè. 31 Rèkko mujampangiwi gau'èwè addeppu-deppungeng assompammu dè' matu napapolèi pahukkungenna Allataala ri yasè'na alèmu. 32 Iyakiya rèkko nahukkukki Allataala, Nacambu'ki matu, kuwammengngi dè' nakennaki pahukkungeng silaong linoèwè. 33 Rimakkuwannanaro, Saudara-saudaraku, rèkko maddeppungekko untu' manrè ri Perjamuwanna Puwangngè, harusu'ko sisullè mattajeng. 34 Rèkko engka malupu, harusu'i manrè riyolo' ri bolaè. Rèkko mupuriatiwi gau'èro, addeppu-deppungeng assompammu dè' napapolè pahukkungeng polè ri Allataala ri yasè'na alèmu. Passalenna masaala-masaala iya laingngè, upakatajappi matu lao ri iko, rèkko polèka matti.

1 Korintus 12

1 Makkekkuwangngè passalenna sining wèrè iya nabbèrèyangngè Rohna Allataala. Passalenna iyaro, uwèloriwi naisseng Saudara-saudara iya sitongennaè. 2 Engngerangngi makkedaè wettunna dè'pa muwissengngi Puwangngè, tappangaruko untu' maccowèriwi barahala iya pèpè. 3 Harusu'i muwisseng makkedaè tau iya ripimpingngè ri Rohna Allataala dè' nawedding makkeda, "Tattanroi Yèsus!" Makkuwatoro dè' muwi sèddi tau wedding makkeda, "Yèsus ritu Puwang!" rèkko iyaro tauwè dè' naripimping ri Rohna Allataala. 4 Engka maddupa-rupang wèrè polè ri Allataala, iyakiya iya manenna nabbèrèyangngi iyaro Roh iya sèddiè. 5 Engka maddupa-rupang jama-jamang untu' tumaningiwi Puwangngè, iyakiya Puwang iya ritumaningiyèro, Puwang iya tommi sèddiè! 6 Engka maddupa-rupang cara jamai jama-jamanna Puwangngè, iyakiya iya mabbèrè awatangeng untu' iyaro lao ri tungke' tau iyanaritu Allataala iya tommi sèddiè. 7 Untu' adècèngetta maneng, majjamai Rohna Allataala ri tungke'-tungke' tau secara alè-alè. 8 Lao risèddiè tau, iyaro Roh-è mabbèrèi amampungeng untu' mabbicara sibawa akuwasang. Lao ri laingngè iyaro Roh iya padaè mabbèrèi amampungeng untu' pakatajangngi passalenna Allataala. 9 Iyatoro Roh iya sèddiè mabbèrèi lao ri tau iya sèddiè, amampungeng untu' mateppe' lao ri Kristus, na lao ri laingngè, iyaro Roh-è mabbèrèi akuwasang untu' pajjappai tauwè. 10 Lao risèddiè tau riwèrèngngi kuwasa untu' pakangka anu makalallaing sibawa lao ri iya laingngè riwèrèngngi wèrè untu' mabbirittangngi rancana-rancanana Allataala. Lao ri iya laingngèssi iyaro Roh-è mabbèrèi amampungeng pasilaingengngi kèga wèrè polè ri Rohna Allataala sibawa kèga iya tenniyaè. Engka riwèrèng amampungeng untu' mabbicara sibawa maddupa-rupang basa iya makalallaingngè, sibawa engkato riwèrèng amampungeng untu' pakatajangngi bettuwanna iyaro sining basaè. 11 Iya manennaro najamai iyaro Roh sèddiè bawang; tungke'-tungke' tau riwèrèng wèrè iya mallaingngè situru èlona muto iyaro Roh-è. 12 Kristus iyanaritu pada-padai tubunna tolinoè; iyaro tubuè sèddimi iyakiya polèi ri maèga anggota. Iya manenna anggotaèro, namuni maègai, napappadaiwi sèddiè tubu. 13 Makkuwatoro idi maneng, muwi tau Yahudi iyarè'ga tau tenniya Yahudiè, ata-ata iyarè'ga tau maradèka'; idi maneng purani ricemmè ri Roh iya padaèro, kuwammengngi naripassèddiki ri tubunna Kristusro. Ripèneddingi maneng towi idi iyaro Roh iya sèddiè sibawa sukku. 14 Saba' iyaro tubuè dè' napolè risèddiè anggota bawang iyakiya maèga anggotana. 15 Rèkko makkedai ajè, "Tenniyaka jari, rimakkuwannanaro tenniyaka bagiyanna tubuè, " tenniya bettuwanna iyaro makkedaè iyaro ajè' tenniyai bagiyanna tubuè. 16 Sibawa narèkko makkedai daucculingngè, "Saba' tenniyaka mata, tenniyaka bagiyanna tubuè, " iyaro tenniyato bettuwanna makkedaè iyaro daucculingngè tenniya bagiyanna tubuè. 17 Akkalarapanna sininna iyaro tubuè mancaji matai bawang, pèkkugi iyaro tubuè naullèi marèngkalinga? Iyarè'ga rèkko sininna iyaro tubuè mancaji daucculingngi bawang, pèkkugi iyaro tubuè marèmmau? 18 Riitani makkedaè Allataala taroi iyaro anggota-anggotaè ri tubuè. Tungke'-tungke' nataroi Allataala ri onronna situru èlo-Na. 19 Rèkko iya manenna banna sèddi bawang anggota, kègana riyaseng tubu? 20 Jaji mèmeng engka maèga anggota, iyakiya tubuè banna sèddi bawang. 21 Rimakkuwannanaro, dè' nawedding mataè makkeda lao ri limaè, "Dè' uwapparelluwakko!" iyarè'ga uluè makkeda lao ri ajè, "Dè' uwapparelluwakko!" 22 Sibalè'na iyaro anggota-anggotana tubuè iya riyangga' malemmaè, riyapparelluwang senna'i; 23 sibawa anggota-anggota iya riyangga'è dè' namaèga angke'na, mala iyanaritu anggota-anggota iya riwèrèngngè lebbi maèga angke'. Anggota-anggota tubu iya dè'è napaita magello, mala lebbi rijampangiwi. 24 Anggota-anggota tubu iya magelloènna riita, dè'na napparelluwangngi pajjampata. Pura nasusunni Allataala tubutta makkuwaro rupanna angkanna anggota-anggota iya makurang mangke'è nawèrèngngi lebbi maèga angke'na. 25 Rimakkuwannanaro iyaro tubuè dè' natabbagè-bagè; tungke'-tungke' anggota jampangiwi sèddiè sibawa laingngè. 26 Rèkko sèddiè anggota mapeddi, sininna anggota laingngè mapeddi towi; rèkko sèddiè anggota ripoji, sininna anggota laingngè maccowè marennu. 27 Iya maneng Saudara massibawa iyanaritu tubunna Kristus sibawa iko tungke'-tungke'to iyanaritu anggota polè ri tubuèro. 28 Makkuwatoro ri laleng jema'è, purani napattentu Allataala onrong untu' maddupa-rupang tau: Mula-mulanna rasul-rasul; maduwanna, nabi-nabi, matellunna guru-guru, nainappa mennang iya pakangkaè sining anu makalallaingngè, nainappa mennang iya riwèrèngngè pangissengeng untu' pajjappai tauwè, iyarè'ga untu' tulungngi tau laingngè, iyarè'ga untu' mappimping, iyarè'ga mabbicara sibawa basa iya makalallaingngè. 29 Iya mennang tenniya maneng rasul, iyarè'ga nabi, iyarè'ga guru. Dè' nappunnai maneng akuwasang untu' pakangka anu makalallaingngè, 30 iyarè'ga untu' pajjappai tauwè, iyarè'ga untu' lèmbai iyaro sining basaè. 31 Rimakkuwannanaro, sitinajako makkuraga tonget-tongeng untu' lolongeng sining wèrè iya kaminang pentingngè. Iyakiya iya mangoloèwè uppaitakko laleng iya kaminang makessingngè.

1 Korintus 13

1 Namuni uwullèi mabbicara maddupa-rupang basa tolino, mala muwi sibawa basa malaèka', iyakiya dè' uwamasèiwi tau laingngè, tentu iyaro ada-adakku banna oni iya macennoè dè'gaga bettuwanna. 2 Namuni maccaka palettu'i biritta polè ri Allataala, majeppuiwi sininna passaleng iya malamungngè; namuni mappunnaika teppe' enrengngè mateppe' senna'ka lao ri Allataala angkanna uwullèi palèttè'i buluè, iyakiya dè' uwamasèiwi tau laingngè, tentu dè'gaga bettuwakku! 3 Namuni iya maneng iya uwappunnaiyè, uwassidekkangngi lao ri tau kasiyasiè, sibawa uwabbèrèyangngi alèku untu' ritunu, iyakiya dè' uwamasèiwi tau laingngè, iya manennaro dè' sises-siseng gaga appalanna. 4 Tau iya mamasèiyèngngi tau laingngè, sabbara' sibawa makessing ati. Dè' narèdè angèmpurunna, dè' naggempung, sibawa dè' namatempo. 5 Dè' namingki sibawa dè' namakasara', dè' napassai tau laingngè untu' maccowèriwi èlo alèna, dè'to namasitta tassinggung, sibawa dè'to nakkabale rèkko pasalai tauwè ri alèna. 6 Tau iya mamasè dè' namasennang lao ri majaè, banna masennangngi bawang lao ri madècèngngè. 7 Tahangngi moloiwi sininna sèuwa-sèuwaè sibawa maèlo mateppe' lao ri iya kaminang makessingngè ri tungke' tau; ri laleng keadaang muwi maga iyaro tau mamasè dè' naengka nateddèng paddennuwanna sibawa sabbara'i tajengngi sininna sèuwa-sèuwaè. 8 Dè' naengka matu wettunna nadè' naparellu tauwè siyamasèi. Makkekkuwangngèwè engka tau macca palettu'i biritta polè ri Allataala, iyakiya matti mappèsauwi matu palettu'i biritta polè ri Allataala. Makkekkuwangngèwè engka tau macca mabbicara ri laleng basa iya makalallaingngè, iyakiya matti mappèsauwi matu mabbicara ri laleng maddupa-rupang basa iya makalallaingngè. Makkekkuwangngèwè engka tau iya maccaè missengngi sininna sèuwa-sèuwaè, iyakiya risèuwaè wettu dè'na nariyapparelluwanna. 9 Saba' pangissengetta sibawa amampungetta palettu'i biritta polè ri Allataala, makurang sukku mupi. 10 Naèbbui matti Allataala sininna sèuwa-sèuwaè sukku, naiya dè'è nasukkuro teddèngngi matu. 11 Wettukku anana' baiccu mupa, mabbicaraka pada-pada anana' baiccu'è, mappèrasaka pada-pada anana' baiccu'è sibawa mappikkiri'ka pada-pada anana' baiccu'è. Makkekkuwangngè battowana; kèdo-kèdoku iya anana'è uwabbèyanni. 12 Aga iya riitaè makkekkuwangngèwè iyanaritu pada-padai wajo-wajoè iya massalawuè ri cammingngè. Iyakiya matti riitai matu matteru sibawa manessa. Makkekkuwangngèwè dè'pa uwisseng manengngi, iyakiya matti uwissengngi matu sini-sininnaè pada-pada Allataala missengngi passalekku. 13 Jaji, makkekkuwangngèwè engka tellu passaleng iya tette'è ripogau': mateppe', mammènasa sibawa makkamasè. Naiya kaminang battowaè polè ri iya telluèro iyanaritu mamasèiwi sining tau laingngè.

1 Korintus 14

1 Sitinajako makkuraga untu' mamasèiwi tau laingè. Sibawa makkuragato tarimai sining pabbèrè iya nabbèrèyangngè Rohna Allataala, lebbi-lebbipi amampungengngè untu' palettu'i rancana-rancanana Allataala lao ri tolinoè. 2 Tau iya mabbicaraè ri laleng basa iya makalallaingngè, iyaro tauwè dè' nabbicara lao ri tolinoè; mabbicarai lao ri Allataala. Dè'gaga tau iya pahangngèngngi aga napowadaè, saba' Rohna Allataala nassabariwi nanapowadai-adai gau'-gau' iya bannaè Allataala missengngi. 3 Sibalè'na tau iya palettu'èngngi biritta polè ri Allataala, napalettu'i lao ri rupa tauwè; untu' pèwatangiwi mennang, untu' mpèrèngngi sumange' mennang sibawa untu' salèworiwi mennang. 4 Tau iya mabbicaraè ri laleng basa iya makalallaingngè banna napèwatangiwi alèna bawang, na tau iya palettu'èngngi biritta polè ri Allataala natulungngi jema'è mancaji maju. 5 Temmaka kessinna rèkko naullè manengngi Saudara mabbicara sibawa maddupa-rupang basa iya makalallaingngè. Iyakiya iya kaminang makessingngè iyanaritu rèkko naullèi Saudara mabbirittangngi rancana-rancanana Allataala. Saba' tau iya palettu'èngngi biritta polè ri Allataala, lebbi battowai naiya tau iya mabbicaraè sibawa maddupa-rupang basa iya makalallaingngè; silaingengngi rèkko tau iya mabbicaraè ri laleng maddupa-rupang basa iya makalallaingngèro naullèi pakatajangngi aga iya napowadaèro, kuwammengngi nasininna jema'è lolongengngi appalanna. 6 Rèkko èbara'na laoka ri iko sibawa mabbicara ri laleng maddupa-rupang basa iya makalallaingngè, aga appalanna iyaro lao ri iko? Dè'gaga appalanna muwi cèddè! Silaingengngi rèkko upannessai sèuwa pappakatajang polè ri Allataala, iyarè'ga upakatajangngi sèuwaè passalenna Allataala, iyarè'ga palettu'i biritta polè ri Allataala, iyarè'ga mappagguruka. 7 Parèwa oni-oni iya dè'è nannyawa muwi cèddè, padaènna èbara'na sulingngè sibawa kacapiè, rèkko lagu-lagunna dè' nariyacculèyang sibawa manessa, pèkkugi tauwè naissengngi lagu aga iya riyacculèyangngè? 8 Sèuwa conto iya laingngèssi: Rèkko sembarangngi ripaoni tarompè'è, nigana maèlo sadiya untu' mammusu? 9 Makkuwatoniro sibawa amampungemmu untu' mabbicara sibawa maddupa-rupang basa iya makalallaingngè. Rèkko Saudara sibawa iyaro amampungengngè powadai ada-ada iya dè'è namanessa, dè'gaga sèddi tau iya weddingngè pahangngi aga iya napowadaè Saudara. Iyaro ada-adammu lennye'i matu temmattentu. 10 Ri linoèwè engka siyagangngarè ègana basa, iyakiya dè' muwi sèddi polè ri basa-basaèro iya dè'è nappunnai bettuwang. 11 Iyakiya rèkko dè' upahangngi basa iya napakè sèddiè tau, tentu tau iya pakèyèngngi iyaro basaè sinrupai tau polè-polè lao ri iyya; makkuwatoro iyya lao ri alèna. 12 Passalenna alèmu, uwisseng macinna senna'ko lolongeng sining wèrè polè ri Rohna Allataala. Iyakiya iya poko' senna'è, harusu'ko makkuraga untu' pakèi amampungeng iya tulungngèngngi jema'è mancaji maju. 13 Iyanaro saba'na tau iya mabbicaraè ri laleng basa iya makalallaingngè, harusu'i naèllau ri Allataala kuwammengngi nariwèrèng towi amampungeng untu' pakatajangngi aga iya napowadaèro. 14 Saba' rèkko massempajakka sibawa basa iya makalallaingngè, mèmeng massempajangngi rohku, iyakiya pikkirakku dè' najjama. 15 Jaji, aga harusu' upogau'? Iyaè harusu' upogau': Maèloka massempajang sibawa rohku, iyakiya maèlo tokka massempajang sibawa pikkirakku. Maèloka makkèlong sibawa rohku, iyakiya maèlo tokka makkèlong sibawa pikkirakku. 16 Saba' rèkko mattarima kasi'i Saudara lao ri Allataala sibawa rohna bawang, na engka tau laing iya dè'è napahangngi iyaro basa makalallaing polè ri Rohna Allataala, tentu iyaro tauwè dè' naullèi makkeda, "Usitujuiwi" iyaro sempajang sukkuru'mu; nasaba dè' naissengngi aga napowada Saudara. 17 Namuni iyaro sempajang tarima kasi'mu lao ri Puwangngè makessing senna', iyakiya iyaro sempajangngè dè' sises-siseng gaga akkègunana lao ri tau laingngè. 18 Mattarima kasi'ka lao ri Allataala saba' uwullèi mabbicara ri laleng maddupa-rupang basa iya makalallaingngè lebbi na iko maneng. 19 Iyakiya ri laleng addeppu-deppungengngè untu' sompai Puwangngè, lebbi upojiwi pakèi lima ada-ada iya naullè pahangngi tauwè naiya pakèi massebbu-sebbu ada-ada ri laleng basa iya makalallaingngè. Lebbi upojiwi makkuwaro kuwammengngi uwullèi paggurui tauwè. 20 Saudara-saudara! Aja' muwappikkiri pada-pada ana'-ana'è. Ri laleng gau' majaè, sitinajako tette' pada-pada anana' baiccu'è. Iyakiya ri laleng pikkirang, sitinajako mancaji tau iya battowaènna. 21 Ri laleng Kitta'è tarokii makkuwaè, "Makkedai Puwangngè, 'Naolai sining tauwè iya mabbicaraè sibawa basa iya makalallaingngè, maèlo-Ka mabbicara lao ri umma'èwè. Mala naolai sining tau polè-polè, maèlo-Ka mabbicara lao ri umma'-Ku; namuni makkuwaro, dè' namaèlo mennang mèngkalingai ada-adak-Ku. ' " 22 Jaji wèrè untu' mabbicara sibawa maddupa-rupang basa iya makalallaingngè iyanaritu selaku tanrang untu' sining tau iya dè'è namateppe', tenniya untu' sining tau iya mateppe'è. Sibawa wèrè untu' mappaddissengengngi rancanana Allataala lao ri tolinoè iyanaritu tanrang untu' sining tau iya mateppe'è, tenniya untu' sining tau iya dè'è namateppe'. 23 Rimakkuwannanaro, rèkko èbara'na ri laleng addeppungenna jema'è, sininna jema'è mabbicarai ri laleng basa iya makalallaingngè, nainappa polèi siyagangngarè tau saliweng, iyarè'ga sining tau tenniyaè Kristèng, tentu iyaro sining tauwè nasekko matu jangeng manenni! 24 Iyakiya rèkko Saudara maneng palettu'i biritta polè ri Allataala, napolè sèddiè tau tenniyaè Kristèng iyarè'ga sèddi tau saliweng, tentu gau'-gau' iya nabbirittangngè Saudara iya maneng nappaitangngi matu dosa-dosana iyaro tauwè sibawa mèbbui mainge' lao ri dosa-dosana. 25 Gau'-gau' iya tassubbuè ri laleng atinna ripannessai matu, angkanna napakariyawai matu alèna nainappa nasompa Allataala. Mangakui matu makkedaè tonget-tongengngi Allataala engka ri tengnga-tengngamu. 26 Jaji, Saudara-saudara, aga bettuwanna iya manennaro? Rèkko maddeppungekko untu' sompai Puwangngè, engka makkèlong, engka mappagguru, engka iya mappaissengengngi agi-agi polè ri Allataala, engka mabbicara ri laleng basa iya makalallaingngè, sibawa engka iya pakatajangngèngngi aga iya ripowadaèro. Iyakiya iya manennaro harusu'i ripogau' untu' mappagguru sibawa untu' adècèngenna maneng. 27 Rèkko engka maèlo mabbicara ri laleng basa iya makalallaingngè, harusu'i duwa iyarè'ga kaminang ègana tellu tau bawang sisullè. Sibawa harusu' engka tau pakatajangngi aga iya napowadaè iyaro tau mabbicaraè. 28 Rèkko dè'gaga mullèi pakatajangngi, iyaro sining tau mabbicaraè ri laleng basa iya makalallaingngè harusu'i mammekko ri laleng addeppungengngèro. Leppessanni siya mabbicara ri laleng ati lao ri Allataala. 29 Duwa iyarè'ga tellu tau iya mappunnaiyè biritta polè ri Allataala harusu' palettu'i iyaro birittaè ri wettunna iya laingngè timbangngi aga iya napowadaèro. 30 Iyakiya rèkko èbara'na biritta iya polè ri Allataala polèi risèddiè tau laing iya tudangngè ri laleng addeppungengngèro, tau iya mattengngangngè mabbicara, harusu'i mappèsau. 31 Nasibawang cara makkuwaèro, Saudara-saudara iya maneng, tassèddi-sèddi, mullèi palettu'i biritta polè ri Allataala; kuwammengngi naiya maneng naullèi tarima pappagguruwang sibawa pèdè' mateppe'i. 32 Pangissengeng polè ri Roh-è untu' palettu'i biritta polè ri Allataala wedding ripattuju ri tau iya palettu'èngngi iyaro birittaè. 33 Allataala iyanaritu Allataala iya pojiyèngngi ataratorokengngè; tenniya Allataala iya pojiyèngngi akacaungengngè. Pada-pada ripakajajiyangngè ri laleng sininna jema'na Allataala, 34 makkunraiè harusu'i mammekko ri laleng addeppungenna jema'è. Dè' naripalalo mennang mabbicara. Dè' nawedding mennang mancaji pamimping; iyaro siturui hukkung agamaè. 35 Rèkko engka maèlo naisseng mennang, harusu'i mennang nakkutanang iyaro ri lakkainna ri bolaè. Dè' namakessing sèddiè makkunrai mabbicara ri laleng addeppungenna jema'è. 36 Polèiga ri iko ada-adanna Allataala? Iyarè'ga banna lao ri iko bawang iyaro ada-adaè ripalettu'? 37 Rèkko engka tau marasa mappunnai pangissengeng untu' palettu'i biritta polè ri Allataala, iyarè'ga mappunnai pangissengeng laingngè polè ri Rohna Allataala, iyaro tauwè harusu'i napahang makkedaè aga iya uwokièwè iyanaritu parènta polè ri Puwangngè. 38 Iyakiya rèkko engka iya dè'è natarimai iyaè, aja' mujampangiwi. 39 Rimakkuwannanaro, Saudara-saudara, akkuragano untu' palettu'i biritta polè ri Allataala, iyakiya aja' muwattèyangngi tauwè iya maèloè mabbicara ri laleng maddupa-rupangngè basa iya makalallaingngè. 40 Iyakiya iya manenna harusu'i ripogau' sibawa makessing enrengngè taratoro'.

1 Korintus 15

1 Na makkekkuwangngè Saudara-saudara, uwèloriwi muwèngngerangngi paimeng Karèba Madècèng polè ri Allataala iya uwabbirittangngè riyolo lao ri iko. Purani mutarima, sibawa mateppe' lao ri Kristus nasaba Karèba Madècèngngèro. 2 Rèkko makkatenning masse'ko ri aga iya uwabbirittangngèro, iyaro Karèba Madècèngngè napassalama'ko; sangadinna rèkko saudara mateppe'i temmappahang. 3 Aga iya upalettu'èwè lao ri Saudara-saudara iyanaritu iya puraè utarimato. Iya kaminang pentingngè, pada-pada iya tarokiè ri laleng Kitta'è, upalettu'i lao ri iko makkedaè matèi Kristus nasaba dosa-dosata; 4 sibawa rikuburu'i, iyakiya rimunri ripatuwoi paimeng ri esso matelluè. Iyaro taroki towi ri laleng Kitta'è. 5 Uwappaissengeng towi lao ri iko makkedaè iyaro Kristus iya puraè ripatuwo paimeng pura toni nappaitang Alèna lao ri Pètrus, nainappa lao ri iya seppulo duwa rasul-è. 6 Purairo nappaitang towi Alèna lao ri lebbi lima ratu tau iya maccowèriyèngngi. Maègangngèngngi polè risining tauwèro tuwo mupi makkekkuwangngè, nappai siyagangngarè tau iya matèènna. 7 Purairo nappaitang towi alèna Kristus lao ri Yakobus nainappa lao ri sininna rasul-è. 8 Paccappureng senna'na nappaitang towi alèna lao ri iyya -- iyya iya pada-padaè ana'loloè iya jajiyè dè'pa nawettunna! 9 Iyya iyanaritu rasulna Puwangngè iya kaminang mariyawaè. Dè' usitinaja riteppu rasul, saba' purani upanrasa-rasa jema'na Allataala. 10 Iyakiya nasaba pammasèna Allataala, mancajika pada-pada keadaakku makkekkuwangngè. Nadè' naparacuma Allataala maddampengekka. Mala iyya ritu iya majjamaè lebbi marejjing naiya sininna rasul laingngè. Iyakiya iyaro sitongenna tenniya usahaku; iyaro usahana Allataala iya mamasèiyèkka sibawa iya majjamaè sibawakka. 11 Jaji, muwi polè kègai mutarima Karèba Madècèngngèro -- polè ri iyya'ga iyarè'ga polè ri rasul-rasul laingngè -- iyaro dè' namancaji soal. Iya pentingngè iyanaritu riyabbirittangngi iyaro Karèba Madècèngngè namateppe' Saudara. 12 Rèkko iya riyabbirittangngèro iyanaritu makkedaè purani ripatuwo paimeng Kristus polè ri amatèngngè, magi naengka polè ri yelle'mu iya powadaèngngi makkedaè tau matè dè' naripatuwo paimeng? 13 Rèkko tongengngi tau matè dè' naripatuwo matu paimeng, iyaro bettuwanna dè'to naripatuwo paimeng Kristus polè ri amatèngngè. 14 Narèkko akkalarapanna Kristus dè' naripatuwo paimeng polè ri amatèngngè, tentu dè'gaga appalanna mabbirittangngi agi-agi sibawa dè'to gaga appalammu mateppe', saba' iyaro atepperemmu dè' nappunnai alasang agi-agi. 15 Lebbi na iyaro, manessani makkedaè mabbellèki passalenna Allataala, nasaba riyabbirittangngi makkedaè purani Allataala napatuwo paimeng Kristus polè ri amatèngngè, padahal Allataala dè' napatuwoi Alèna paimeng -- rèkko mèmengngi tau matè dè' naripatuwo paimeng! 16 Saba' rèkko tau matè dè' naripatuwo paimeng, tentu Kristus dè'to naripatuwo paimeng polè ri amatèngngè. 17 Sibawa rèkko Kristus dè' naripatuwo tentu atepperemmu banna nippi bawang; bettuwanna iyaro ri laleng keadaang madosa mupo sibawa dè' siseng muwappunnai paddennuwang. 18 Iyaro bettuwannato makkedaè sining tau Kristèngngè iya matèènna dè'to nappunnai paddennuwang. 19 Rèkko paddennuwatta lao ri Kristus ri wettu tuwota ri laleng linoèwè bawang, tentu polè ri sininna rupa tauwè ri laleng linoèwè, idi'na ritu kaminang macilaka! 20 Iyakiya annessana purani ripatuwo paimeng Kristus polè ri amatèngngè. Iyanaè boro'na makkedaè sining tau iya matèènna ripatuwoi matu paimeng. 21 Saba' amatèngngè muttama'i ri laleng linoè naolai sèddiè tau, makkuwatoro atuwongngè polè ri amatèngngè riwèrèngngi rupa tauwè naola towi sèddiè tau. 22 Pèkkugi sininna rupa tauwè matèi nasaba ripassèddiwi sibawa Adam, makkuwatoniro iya manenna ripatuwoi matu, nasaba ripassèddiwi sibawa Kristus. 23 Iyakiya tungke'-tungke' ripatuwoi matu situru lèlènna: bunge'-bunge'na Kristus; nainappa ri wettun-Na matti polè paimeng, nainappa lèlènna sining tau iya muttama'è appunnangenna Kristus. 24 Purairo kiyame'ni. Iyaro wettuè nacaui matu Kristus sininna pamarèntaè, sininna akuwasangngè; sibawa sininna awatangengngè; nainappa nabbèrèyang matu akuwasanna selaku arung, lao ri Allataala, Ambo'ta. 25 Harusu'i Kristus mapparènta matteru narapi Allataala napatunru' maneng balinna Kristus lao ri Kristus. 26 Bali kaminang poddimonriè napatunru' matu iyanaritu amatèngngè. 27 Ri laleng Kitta'è tarokii makkuwaè, "Allataala pura mèbbui sininna sèuwa-sèuwaè tunru' lao ri Alèna. " Manessani makkedaè iya riyakkattaiyè sibawa "sininna sèuwa-sèuwaè" iyaro dè' nauttama Allataala, iya mèbbuèngngi sininna sèuwa-sèuwaè tunru' lao ri Kristus. 28 Iyakiya pura manennana ripatunru' ri yawa parèntana Kristus, na Alèna, iyanaritu Ana'na Allataala, napatunru'i matu Alèna lao ri Allataala iya puraè mèbbui sini-sininnaè tunru' ri Alèna. Na alèna Allataala matu parènta manengngi. 29 Rèkko tau matè dè' naripatuwo paimeng, magi naengka tau ricemmè untu' tau matè? Untu' aga mennang napogau'i gau'èro? Rèkko mèmeng tau matè dè' sises-siseng naripatuwona matu, untu' aga mennang napogau'i gau'èro? 30 Sibawa untu' agato idi tamaèlo moloiwi abalaè tungke' wettu? 31 Saudara-saudara! Esso-esso tahakka manrasa-rasa nasaba malompo nyawaku lao ri atuwommu saba' mateppe'ko lao ri Kristus Yèsus, Puwatta. 32 Narèkko iyaro banna polèi ri rupa tauwè bawang aga saroku untu' mèwa samanna mèwai olokolo masekkangngè kuwaè, ri Efèsus? Rèkko mèmeng tau matè dè' naripatuwo paimeng, lebbi kessing muwi maccowèriwi warèkkadaèwè: "Laono mai taanrè sibawa taènung, saba' matèki matu baja. " 33 Aja' muribengnguwang! Assiwollompollongeng iya majaè nasolangi ampè-ampè iya makessingngè. 34 Mainge'ni makkekkuwangngè, sibawa aja'na mupogau' dosa. Sitinajako harusu' masiri makkedaè ri yelle'mu engka mupa iya dè'è naissengngi Allataala. 35 Naullè engka makkutana, "Pèkkugiwi tau matè ripatuwo paimeng? Tubu maragaè riwèrèngngi mennang, wettunna tuwo mennang paimeng?" 36 Donggo paha! Rèkko tanengngi Saudara binè ri laleng tanaè, iyaro binè dè' namaèlo tuwo, rèkko iyaro binè dè' namatè riyolo. 37 Sibawa binè iya natanengngè Saudara ri laleng tanaèro -- naullè binè gandong iyarè'ga binè laingngè -- iyanaritu batunna iyaro binè bawang, tenniya sininna iyaro tanet-tanengngè iya maèloè tuwo matti. 38 Allataala muto mpèrèngngi iyaro binè rupa iya manuru'è pakkitan-Na makessing untu' tanet-tanengngèro. Untu' tungke' rupanna binè, Allataala mpèrèngngi rupa tanet-tanen-Na mattungke-tungke. 39 Watakkalèna mahlu'-mahlu' iya makkènyawaè dè' napada maneng. Rupa tauwè mappunnaiwi sinrupa watakkalè, olokolo'è mappunnaiwi rupa watakkalè laingngè; manu'-manu'è laitto rupanna watakkalèna, sibawa balè laing towi rupanna watakkalèna. 40 Makkuwatoro sibawa sining engkaè ri langiè enrengngè sining engkaè ri tanaè. Tungke'-tungke' iya sining engkaè ri langiè mappunnaiwi agelloreng, namakkuwatoro sining engkaè ri tanaè. 41 Agellorenna mata essoè laingngi naiya agellorenna kètengngè. Sining wèttowingngè mappunnai towi agelloreng tungke'-tungke'. Mala iyaro sining wèttowingngè tungke'-tungke' mallail-laingètto agellorenna. 42 Makkuwatoro gau'na matti sibawa sining tau matè iya ripatuwoè paimeng. Iyaro tubu iya rikuburu'è iyanaritu tubu iya weddingngè makebbong, iyakiya tubu iya ripatuwoè paimeng, iyanaritu tubu iya dè'è nawedding makebbong. 43 Wettunna rikuburu iyaro tauwè, iyaro tubuè majai sibawa malemmai; iyakiya wettunna ripatuwo paimeng, iyanaritu tubu iya magelloè namawatang. 44 Wettunna rikuburu, iyaro tubuè, tubu iya mallahèrengngè; iyakiya puranana ripatuwo paimeng, iyaro tubuè, tubu iya nabbèrèyangngè Rohna Allataala. Engka tubu iya polè ri tanaè, engkato tubu iya polè ri Allataala. 45 Ri laleng Kitta'è engka taroki makkuwaè, "Rupa tau mammulangngè, iyanaritu Adam, mancajiwi mahlu' iya tuwoè, " iyakiya Adam iya poddimonriè iyanaritu Roh iya mabbèrè atuwong. 46 Iya bunge'-bunge'è engka iyanaritu iya mallahèrengngè, tenniya iya mabbatèngngè. Iya batèngngè rimonriwi polè. 47 Adam mammulangngè ripancajiwi polè ri tanaè, iyakiya Adam iya maduwaè assalenna polèi ri surugaè. 48 Sining taunna linoèwè iyanaritu pada-padai Adam mammulangngè iya ripancajiyè polè ri tanaè, iyakiya sining taunna surugaè iyanaritu pada-pada Alèna iya polè ri surugaè. 49 Pèkkugiki makkekkuwangngè iyanaritu pada-pada Adam iya ripancajiyè polè ri tanaè, tentu matti mancajiki matu pada-pada Alèna iya polè ri surugaèro. 50 Akkattaku, Saudara-saudara, iyanaritu: tubu iya riwinruè polè ri daraè sibawa jukuè, dè' naullèi muttama' ri Lino Barunna Allataala; sibawa tubu iya weddingngè matè dè' nawedding maccowè mancaji mannennungeng. 51 Pènessaini iyaè rahasiyaè: Dè' tamatè maneng matu, iyakiya tappinra manekki matu. 52 Iyaro gau'è kajajiyangngi matu tenrisenna-senna ri laleng sikèdè mata, wettunna ripaoni tarompè'è untu' paccappurenna. Saba' wettunna riyèngkalinga oni tarompè'èro, sining tau matè ripaoto'i matu paimeng sibawa tubu iya mannennungengngè, sibawa idi manengngè ripinraki matu. 53 Watakkalèta iya weddingngèwè matè harusu'i risullèi watakkalè iya dè'è nawedding matè, na watakkalè iya polè ri linoè harusu'i risullèi watakkalè iya polè ri surugaè. 54 Rèkko watakkalè iya weddingngè matè purani risullèi iya dè'è nawedding matè, sibawa watakkalè iya polè ri linoè purani risullèi watakkalè iya polè ri surugaè, ri wettuènnaro nakajajiyang aga iya tarokiè ri laleng Kitta'è, "Purani ripallennye' amatèngngè; rilolongenni apakalangngè!" 55 "Eh amatèng, kègani apakalammu? Eh amatèng, kègani mosomu?" 56 Mosona amatèngngè iyanaritu dosaè, na dosaè pajoppai perananna naolai hukkunna agamaè. 57 Iyakiya sukkuru'ki lao ri Allataala; nawèrèkki apakalang naolai Yèsus Kristus, Puwatta! 58 Rimakkuwannanaro, Saudara-saudara iya uwamasèiyè, sitinajako mawatang sibawa makkamasè. Ajjamani' matteru untu' Puwangngè sibawa mattonget-tongeng, saba' muwissenni makkedaè sininna iya mupogau'è untu' Puwangngè, dè' nasiya-siya matu.

1 Korintus 16

1 Makkekkuwangngè passalenna dowi iya maèloè muwassumbangeng lao ri pada-padatta tau Kristèng, uwappètangngarengngi kuwammengngi mupogau'i situru panunju' iya uwabbèrèyangngè lao ri jema'-jema'è ri Galatia. 2 Tungke' Aha', ri esso mammulangngè sitinajai Saudara pallaing dowi, tungke'-tungke' situru pallolongenna. Taroi iyaro dowiè narapika polè, kuwammengngi iyaro wettuè dè'na naparelluna mappaddeppungeng. 3 Rèkko lettu'ka matti, maèloka suroi sining tau iya musitujuiyènna. Uwèrèngngi matu mennang sure' pangantara', kuwammengngi natiwii mennang iyaro dowi sumbangengngè lao ri Yèrusalèm. 4 Narèkko riitai makessing makkedaè lao tokka sibawa mennang, maèlo tokka lao silaong mennang. 5 Maèloka cèllèngiko rèkko ulaloini Makedonia, saba' akkattaku lalo kuwaka'ro. 6 Wedding jaji monroka matu cinampe' silaong iko, naullè singngètta wettu keccè'è. Purairo weddinno bantuka patterui allalengekku lao ri onrong rappina. 7 Dè' umaèlo cèllèngiko lèppang-lèppang bawang. Rèkko napuwèloi Puwangngè, maèloka monro maitta sibawakko. 8 Iyaro wettuè monroka matu kuwaè, ri Efèsus, narapi Esso Pèntakostaè. 9 Maèga wettukku kuwaè untu' jama-jamang iya makkègunaè, namuni maègato tau mèwai. 10 Rèkko engkani Timotius, tarimai sibawa makessing kuwammengngi namarasa masennang ri yelle'mu, saba' pada-pada towi iyya majjamai untu' Puwangngè. 11 Aja' lalo naengka pakatunai. Bantui kuwammengngi naullèi patterui joppana lisu ri iyya sibawa salama', saba' utajengngi apolènna silaong Saudara-saudara iya laingngè. 12 Iyakiya saudarata Apolos, wèkkasiyagangngarè'ni upètangngari kuwammengngi nasilaong saudara laingngè lao cèllèngiko. Iyakiya dè'pa namateppe' makkedaè harusu'i lao makkekkuwangngè. Iyakiya rèkko engka wettu matti, tentu maèloi lao. 13 Sitinajako matike' sibawa masse ri laleng atuwommu selaku tau Kristèng. Tinda'no sibawa barani enrengngè ancajino mawatang. 14 Sininna iya mupogau'è, pogau'i sibawa pammasè. 15 Tentu Saudara naisseng Stèfanus sibawa kaluwargana; mennang ritu tau iya bunge'-bunge'è mancaji Kristèng ri Akhaya. Sukku atinna mennang majjamai banna untu' tumaningiwi umma'na Allataala. 16 Uwappètangngarengngi sibawa mattonget-tongeng kuwammengngi muwaccowèriwi pappimpinna sining tau iya pada-padaèro enrengngè sining tau laing iya sibawaè majjama kuwaèttopa tumaningiwi massibawa mennang. 17 Masenna'ka lao ri apolènna Stèfanus, Fortunatus sibawa Akhaikus. Mennang ritu passullèmu lao ri iyya. 18 Purani naèbbu atikku marennu; pada-pada mennang pèrennuiwi atimmu. Sining tau pada-padaèro harusu'i tonget-tongeng ripakaraja. 19 Jema'-jema'è ri Asia palettu'i sellenna mennang lao ri iko. Akwila sibawa Priskila enrengngè jema'-jema'è iya maddeppungengngè ri bolana masselleng Kristèng towi mennang iya mapellaè. 20 Sininna saudaraè palettu'i selleng ri iko. Siyasselles-sellengenno secara sipammasè-masè selaku saudara Kristèng. 21 Utambaiwi kuwaè selleng iya alèkuè mokii: Sellekku polè ri iyya, Paulus. 22 Tau iya dè'è namasèiwi Puwangngè, leppessanni siya tattanro! Maranata -- Puwatta, polèni! 23 Tennapodo Puwang Yèsus barakkakiwi Saudara. 24 Nasibawang pammasè lao ri Saudara maneng iya massèddiè sibawa Kristus Yèsus.

2 Korintus 1

1 Saudara-saudara jema'na Allataala ri Korintus sibawa sininna umma'na Allataala ri Akhaya. Iyya, Paulus, rasulna Kristus Yèsus, iya riyakkaè nasaba èlona Allataala silaong saudarata Timotius, 2 maddennuwang tennapodo Allataala, Ambo'ta sibawa Puwang Yèsus Kristus mabbèrè barakka enrengngè asalèwangeng lao ri iko. 3 Ripojiwi Allataala, Ambo'na Puwatta Yèsus Kristus. Ambo' iya makessing senna'è atinna, sibawa Allataala iya mabbèrè awatangeng batèng lao ri tolinoè. 4 Napèwatangiwi batètta ri laleng tungke'-tungke' asukkarakeng iya ripèneddingiyè, kuwammengngi nasibawang awatangeng iya ritarimaè polè ri Allataalaro, riyullè toni pèwatangiwi batènna tauwè iya engkaè ri laleng asussangngè. 5 Anrasa-rasang iya napèneddingiyè Kristus maèga toni ripèneddingi idi. Sibawa naola towi Kristus, ripèwatangi senna'i batètta. 6 Rèkko pèneddingiki asukkarakeng, iyaro untu' pèwatangiwi batèmmu, untu' asalamakemmu. Rèkko ripèwatangiwi batètta, tentu maccowè tokko ripèwatangi angkammu mancaji sabbara' ri laleng sining asukkarakengngè pada-padato iya riyanrasa-rasaiyè. 7 Dè' naengka tabata-bata, sibawa tuli mateppe'ki passalenna Saudara, saba' riissengngi makkedaè maccowè tokko manrasa-rasa sibawa idi. Narimakkuwannanaro maccowè tokko ripèwatangi silaong idi. 8 Saudara-saudara! Maèloki kuwammengngi muwissengngi passalenna asukkarakeng iya ripèneddingiyè ri daèra Asia. Anrasa-rasang iya ritanggungngèro matane' senna'i tenre'ki, angkanna dè'na tammènasana maèlo tuwo; 9 samanna pada-pada pura ripateppaiyè pahukkungeng matè bawang. Iyakiya kajajiyangngi iyaro gau'è kuwammengngi aja' tasanrè ri awatangeng ri alèta bawang, sangadinna ri Allataala iya patuwoèngngi tau matè. 10 Iyanaritu iya puraè passalama'ki polè ri abala amatèng iya battowaèro. Sibawa Alèna ritu matu passalama'ki matti ri esso-esso rimunri, saba' ri Alènaki mammènasa. 11 Mateppe'ki makkedaè nasibawang sining sempajammu untu' idi, Allataala passalama'siki matu polè ri abalaè. Nainappa Allataala situjuiwi barakkakiki selaku pappèbalinna lao ri maèga sempajang untu' idi. Nassabariro namaèga tau mattarima kasi matu lao ri Allataala. 12 Masenna'ki, saba' ati marilaletta pannessai makkedaè atuwotta ri linoèwè -- utamana assisumpungetta sibawa Saudara -- ripogau'i sibawa matinulu enrengngè mattonget-tongeng. Ripogau'i iyaro tenniya nasaba apanrèng tolino, iyakiya nasaba amampungeng iya nabbèrèyangngè Allataala. 13 Iya riyokiè lao ri iko iyanaritu banna passalenna gau'-gau' iya weddingngè mubaca sibawa mupahang. Makkekkuwangngè dè' mupahang manekki, iyakiya mammènasaka matti tonget-tongengngi matu mupahakki. Rimakkuwannanaro ri wettunna Puwang Yèsus polè matti, masennangngi matu lao ri idi, pèkkugi towi idi masennang lao ri iko. 15 Nasaba atepperengngèro, mula-mulanna urancanai untu' cèllèngiko kuwammengngi mulolongeng barakka leppe' wèkkaduwa. 16 Akkattaku cèllèngiko ri laleng allalengekku lao ri Makedonia sibawa lèppang paimeng ri iko ri laleng allalengekku lisu, kuwammengngi muwullèi bantuka patterui allalengekku lao ri Yudèa. 17 Iyakiya upinrani iyaro niya'ku; nah, aga iyaro mappaitangngi makkedaè dè' namasse attangekku? Ri wettu mèbbuna rancana, mèbbuka'ga rancana situru èlo ri alèku, cinampe' makkeda "Iyyè", sibawa cinampe' makkeda "Dè'"? 18 Nasibawang Allataala iya weddingngè riyatepperi, jancikku lao ri Saudara tenniya "Iyyè" sibawa "Dè'". 19 Saba' Yèsus Kristus, Ana'na Allataala, iya riyabbirittangngè lao ri iko polè ri Silas, Timotius, sibawa iyya paimeng tenniya tau "Iyyè" sibawa "Dè'". Sibalè'na sinrupai pappèbali "Iyyè" polè ri Allataala. 20 nasaba naolai Alèna pura napowadai Allataala "Iyyè" lao ri sininna jancinna. Nallalengiro natapowadai "Aming" lao ri Allataala nasaba Yèsus Kristus. Ripogau'i makkuwaèro kuwammengngi naripakalebbi Allataala. 21 Alèna muto Allataala mèbbuki sibawa Saudara masse massèddi sibawa Kristus; Iyanaritu pilèki banna untu' Alèna. 22 Untu' iyanaro napurani napaessaki mancaji appunnangen-Na sibawa mabbèrèyangngi Roh-Na ri laleng atitta selaku boro'-Na makkedaè nabbèrèyangngi matu Allataala sininna iya Najjanciyangngè. 23 Allataala sabbikku -- saba' naissengngi lise atikku -- makkedaè dè' ujaji lao ri Korintus, nasaba dè' umaèlo mèbbui atimmu messè. 24 Dè' upassako passalenna aga iya harusu'è muwatepperi; saba' mateppe' senna'no lao ri Kristus. Banna majjamaka sibawa iko kuwammengngi napèdè' masennang.

2 Korintus 2

1 Rimakkuwannanaro purani upettui untu' dè' ulaona ri iko sibawa apolèng iya mèbbuèkko messè. 2 Saba' rèkko upamessèiko, nigatona wedding polè salèworika, rèkko tenniya sining tau iya puraè upamessèi atinna? 3 Iyanaro saba'na uwokii iyaro sure'è lao ri iko. Dè' umaèlo cèllèngiko, nainappa mupamessèika. Padahal iko sitongenna harusu' pèrennuika. Saba' mateppe'ka makkedaè rèkko marennuka, Saudara tentu marennu maneng towi. 4 Uwokii lao ri iko sibawa ati iya messèwè enrengngè matane'è kuwaèttopa maèga paddunui uwai mataè. Akkattaku tenniya kuwammengngi mumessè, iyakiya kuwammengngi mumaingekiwi makkedaè uwamasèi senna'ko. 5 Rèkko engka tau iya puraè nassabari amessèngngèwè, tentu napogau'i iyaro gau'è tenniya lao ri iyya, sangadinna lao ri Saudara maneng iyarè'ga kaminang dè'na sibagiyang polè ri Saudara. Dè' umaèlo matedde senna' lao ri alèna. 6 Lao ri tau makkuwaèro, pahukkungeng iya ripateppaiyèngngi polè ri maègangngèngngi ri yelle'na Saudara, genne'ni. 7 Makkekkuwangngè harusu'ko maddampengengngi sibawa mpèrèngngi sumange'si ri alèna kuwammengngi aja' namessè ati senna' angkanna pettu paddennuwang. 8 Rimakkuwannanaro uwèllauwi, kuwammengngi muwappaitangngi paimeng lao ri alèna makkedaè tonget-tongekko mamasèiwi. 9 Uwokii iyaro sure'è lao ri iko sibawa akkatta untu' mojiko, aga tuli maèlokoga turusiwi pappaita-pappaita polè ri iyya. 10 Rèkko muwaddampengengngi tau iya puraè pogau' asalang lao ri iko, na iyya uwaddampengeng towi iyaro tauwè. Saba' aga iya puraè uwaddampengeng -- rèkko mèmeng engka parellu riyaddampengeng -- iyaro uwaddampengengngi ri yolona Kristus untu' adècèngemmu. 11 Upogau'i iyaro kuwammengngi Ibillisi' aja' nala kasempatang untu' makuwasaiki; saba' taissengngi rancana-rancananna. 12 Wettukku lettu ri Troas sibawa akkatta untu' mabbirittangngi Karèba Madècèngngè passalenna Kristus, purani natimpakekka laleng Puwangngè untu' majjama ri onrongngèro. 13 Iyakiya dè' utennang saba' dè' usiruntu' saudarata Titus kuwaro. Nauwassimanna risining tauwè ri onrongngèro nainappa lao ri Makedonia. 14 Iyakiya sukkuru'ka lao ri Allataala! Tuli napimpikka untu' maccowè ri laleng pèsta apakalangenna Kristus nasaba massèddiki sibawa Alèna. Napakèki Allataala kuwammengngi biritta passalenna Kristus mallebbangngi pada-pada bau mabauè iya lellangngè kègi-kègi. 15 Saba' idi'è iyanaritu pada-padaki bau kamennyang iya mabauè, iya natunuè Kristus untu' Allataala. Lao risining tau iya mattengngangngè mattuju lao ri ancurukengngè, idi'è pada-padaki bau amatèng iya paunoè; iyakiya lao risining tau iya mattengngangngè ripassalama', pada-padaki bau mabauè iya tiwiè atuwong. Na nigana mullèi paddupai iyaè jamangngè? 17 Dè' tapada-pada maèga tau iya pogau'èngngi biritta polè ri Allataala pada-pada barang dangkangengngè bawang. Sining akkattataè iyanaritu tonget-tongengngi, saba' risuroki ri Allataala. Na Allataala muto mitai makkedaè idi palettu'i iyaro birittaè selaku ata-atanna Kristus.

2 Korintus 3

1 Aga iyaè paitai samanna ripojiwi alètasi? Iyarè'ga wedding jaji mapparelluwakki sure' pappojiyang untu' iko, iyarè'ga polè ri iko, pada-pada napparelluwangngè sining tau laingngè? 2 Alèna Saudara ritu sure' pappojiyatta, iya tarokiè ri laleng atitta sibawa iya weddingngè riisseng sibawa ribaca polè ri tungke' tau. 3 Alèna muto mennang mitai makkedaè Saudara sinrupai sure' iya naokiè Kristus, iya nakkiringengngè naolaki. Iyaro sure'è dè' nariyoki sibawa dawa, iyakiya sibawa Rohna Allataala iya tuwoè; tenniyato ri yasè'na pèpeng batuè, iyakiya ri atinna rupa tauwè. 4 Makkeda makkuwaki'ro nasaba atepperetta lao ri Allataala naolai Kristus. 5 Dè'gaga muwi sèddi alasang ri alèta untu' pannessai makkedaè rullèi pogau'i jama-jamangngèwè, iyakiya Allataala mpèrèngngi iyaro pakkullèngngè. 6 Alèna ritu mèbbuki mullèi mancaji pattumani untu' sèuwa assijancingeng iya mabaruè; assijancingeng iya taggattungngè ri Rohna Allataala, tenniya ri hukkung iya tarokiè. Saba' iyaro tarokiè tiwii amatèng, padahal Rohna Allataala tiwii atuwong. 7 Wettunna assijancingeng iya tiwiè amatènro riyèbbu sibawa risobbi ri batuè, cahayana Allataala mattappa sibawa macakka ri rupanna Musa. Makkuwa mani cakkana iyaro cahaya-Na angkanna bangsa Israèliè dè' naullèi mitai tappana Musa, namuni iyaro cahayaè ri tappana mammulani massalawu iyaro wettuè. Narèkko iyaro abbinrusenna assijancingeng iya mappamatèro rirèsmikangngi sibawa cakka iya makkuwaèmmani loppona, 8 tentu abbinrusenna assijancing iya nabbèrèyangngè Rohna Allataala, rirèsmikangngi lebbi macakkapasi. 9 Rèkko assijancingeng iya hukkungngèngngi rupa tauwè makkuwa mani cakkana, tentu lebbi cakka pasi assijancingeng iya nakkullèngiyèngngi rupa tauwè simadècèngeng sibawa Allataala. 10 Wedding ripowada makkedaè aga riyolo macakka, dè'na namacakkana nasaba acakkarenna iya makkekkuwangngèwè. 11 Rèkko sèuwaè iya tahangngè banna cinampe', makkuwamani cakkana, tentu iya mannennungengngè lebbi macakka pasi. 12 Rimakkuwannanaro mappunnaiki paddennuwang pada-padaèro, nabaraniki mabbicara makkuwaro. 13 Dè' tapada-pada Musa iya tongkoèngngi rupanna sibawa bowong kuwammengngi nadè' naitai bangsa Israèliè cahayana Puwangngè peddè sibawa lennye' ri rupanna. 14 Tattongkoni pikkiranna mennang. Nalettu' essoèwè tattongko mupi pikkiranna mennang sibawa bowong ri wettunna mennang bacai kitta'-kitta' passalenna assijancingeng iya malaungngènnaro. Iyaro bowongngè banna naullèi tabbukka rèkko massèddiwi tauwè sibawa Kristus. 15 Muwi makkekkuwangngè, rèkko nabacai mennang kitta'-kitta'na Musa, iyaro bowongngè natongko mupi pikkiranna mennang. 16 Iyakiya rèkko sèddiè tau polèi mangolo ri Puwangngè, riyakka toni iyaro bowongngè polè ri rupanna iyaro tauwè. 17 Na, Puwang iya nakkattaiyè kuwaè iyanaritu Roh-è. Na kègi-kègi engka Rohna Puwangngè, kuwatoniro engka amaradèkang. 18 Makkekkuwangngè sininna rupatta dè'na naritongko bowong, sibawa idi mattapparengngi acakkarenna Puwang Yèsus. Narimakkuwannanaro matteru-teruki ripinra mancaji pada-pada Alèna; pèdè' maittaki pèdè' mancaji macakkaki. Acakkaretta polèi ri Roh-è, na iyaro Roh-è iyanaritu Puwangngè.

2 Korintus 4

1 Ripogau'i iyaè jama-jamangngè nasaba asèmpo atinna Allataala. Iyanaro saba'na nadè' tapettu paddennuwang. 2 Dè' tapakèi cara-cara mapettang iya mappakasiri-siriè. Dè' tamaèlo majjama sibawa macèko-cèko iyarè'ga putara' balè'i ada-adanna Allataala. Ritumaningiwi Allataala sibawa ati iya mattonget-tongengngè enrengngè situru èlo-Na. Rimakkuwannanaro mammènasaki sininna tauwè mangke'ki sibawa makessing ri laleng ati marilalenna. 3 Rèkko Karèba Madècèng iya riyabbirittangngèro, dè' mupa naripahang, na banna sining tau iya mattengngangngè mattuju ri ancurukengngè bawang iya dè'è napahangngi. 4 Dèwata maja iya makuwasaèngngi linoèwè tongkoi pikkiranna sining tau iya dè'è namateppe'ro. Iyanaritu lawa-lawaiwi mennang kuwammengngi mennang dè' naitai tajang polè ri Karèba Madècèngngèro passalenna arajanna Kristus, iya maddapangengngèngngi gambara'na Allataala. 5 Biritta iya ripalettu'èro tenniya biritta passalenna alèta. Iyaro birittaè iyanaritu biritta passalenna Yèsus Kristus; makkedaè Alèna iyanaritu Puwang; na idi iyanaritu ata-atannako nasaba Alèna. 6 Allataala iya makkedaè, "Sitinajai polè ri laleng pettangngè mompoi tajangngè, " Allataala èttoro iya paompoèngngi tajangngèro ri laleng atitta, kuwammengngi namancaji matajang pakkitatta untu' pahangngi acakkarenna Allataala iya mattappaè ri rupanna Kristus. 7 Iyakiya waramparang rohani iya magelloèro ritiwii ri alèta iya dè'è angke'naè iya riyèbbuè polè ri tanaè. Rimakkuwannanaro manessani makkedaè arajanna iyaro akuwasangngè monroi ri Allataala natenniya ri idi. 8 Riluruiki polè tulili, iyakiya dè' tatassipi. Malippuki, iyakiya dè' narapii pettu paddennuwakki. 9 Maèga musuki, iyakiya dè' naengka taonro alè-alè. Namuni biyasaki riyunru gangkatta menrung, iyakiya dè' tamatè. 10 Tuli ripèneddingiwi amatènna Yèsus ri tubutta, kuwammengngi atuwon-Na nancaji manessa ri tubutta. 11 Sipongetta tuwo, tuli riancakki sibawa amatèng nasaba Yèsus, kuwammengngi ri laleng atuwongngè wedding towi Yèsus riyappaitang ri tubutta iya dè'è namannennungeng. 12 Iyaè bettuwanna makkedaè ri laleng alèta mapatoi amatèngngè pajoppai perananna, iyakiya marennuki makkedaè atuwongngè ritu mattengngang mapato ri laleng alèmu. 13 Ri laleng Kitta'è engka iyaè adaè, "Mateppe'ka, iyanaro saba'na uwabbicara. " Nasibawang sumange' teppe' iya pada-padaèttoro, mabbicaraki nasaba mateppe'ki. 14 Mateppe'ki ri Allataala iya puraè patuwoi paimeng Puwang Yèsus, maèlo towi patuwoki silaong Yèsus, enrengngè tiwiko sibawa idi ri yolo-Na. 15 Iya manennaro iyanaritu untu' apentingemmu. Saba' pèdè' maègai tau pèneddingiwi pammasèna Allataala, pèdè' maèga towi sempajang sukkuru' iya ripalettu'è ri Allataala; nanallalengiwi naripakalebbi Allataala. 16 Iyanaro saba'na dè' napettu paddennuwang. Namuni secara mallahèrekki pèdè' tattamba masolakki, iyakiya secara batèng esso-essoki ripancaji baru. 17 Na asussang iya dè'è nasiyagaè, iya ripèneddingiyè untu' cinampe', powassèlèkekki matu sèuwa asennangeng iya dè'è padanna sibawa mannennungeng. Iyaro asennangengngè mabèlai lebbi battowana rèkko ripasibandingngi sibawa iyaro asussangngè. 18 Saba' dè' tajampangiwi gau'-gau' iya paitaè, sangadinna iya dè'è napaita. Iya paitaè banna tahang cinampe', iyakiya iya dè'è napaitaro mannennungengngi.

2 Korintus 5

1 Saba' riissengngi makkedaè rèkko bola -- iyanaritu watakkalè -- iya riyonroiyè ri linoèwè ribongkara'i, napassadiyangekki matu Allataala sèuwa bola ri surugaè, iya alèna muto Allataala mèbbui sibawa iya tahangngè lettu mannennungeng. 2 Ri laleng bola iya makkekkuwangngèwè, maddarèkèki nasaba muddani senna'ki monro ri laleng bolata ri surugaèro. 3 Bolaènnaro tubutta iya mabaruè. 4 Ri wettu monrota mupa ri laleng bola iya polè ri linoèwè, maddarèkèki nasaba matane' tiwita. Tenniya nasaba macinnaki leppe' polè ri watakkalèta iya polè ri linoèwè, iyakiya nasaba macinnaki pakkennai watakkalè iya polè ri surugaèro, kuwammengngi watakkalèta iya weddingngè matèwè rikuwasaiwi ri iya tuwoè. 5 Iya passadiyangengngèkki iyaro iyanaritu Allataala muto, sibawa mabbèrèyangngi Roh-Na lao ri idi selaku boro'. 6 Rimakkuwannanaro tuli marasa mawatangngi atitta. Riissengngi makkedaè ri wettu monrota mupa ri laleng watakkalètaè, mabèlaki polè ri bola iya maèloè riyonroi silaong Puwangngè. 7 Saba' tuwoki nallalalengi teppe'è lao ri Kristus, natenniya nallalengi aga iya riyullè mita, 8 iyanaro saba'na nasabbara' atitta. Lebbi ripojiwi leppe' polè ri watakkalètaè, kuwammengngi weddikki monro sibawa Puwangngè. 9 Rimakkuwannanaro makkuragaki tonget-tongeng untu' pèsennangiwi atin-Na, muwi wettutta monro mupa ri bolata kuwaè, iyarè'ga kuwaro. 10 Saba' pasti idi maneng ripangoloki matu ri yolona angadèlèkenna Kristus, na tungke'-tungke' matu lolongengngi pamale' iya siratangngè sibawa pangkaukenna ri linoèwè -- pangkaukeng makessing iyarè'ga maja. 11 Riisseng aga bettuwanna mètau lao ri Puwangngè; iyanaro saba'na tamakkuraga patepperiwi tauwè passalenna alèta. Naisseng senna'ki Allataala, namammènasaka ri iko naisseng tokki ri laleng atimmu. 12 Ri lalennaè dè' taèllauwi kuwammengngi na pojiwi alèta. Maèlomi bawang mabbèrèyang sèuwa alasang iya makessingngè lao ri iko untu' mancaji maloppo nyawamu lao ri idi, kuwammengngi muwissengngi pèkkugi baliwi sining tau iya pentingkangngèngngi tappana tauwè natenniya sipa'na. 13 Rèkko mèmeng paitaki jangeng, iyaro untu' apentingenna Allataala, sibawa rèkko paitaki mainge', iyaro untu' apentingemmu. 14 Pammasèna Kristus ritu makuwasaiki; narimaingekiwi makkedaè rèkko sèddiè tau matèi untu' sininna tauwè, na bettuwanna iyaro makkedaè matè manenni sininna tauwè. 15 Matèi Kristus untu' sininna tauwè, kuwammengngi nasining tau iya tuwoè, dè'na natuwo untu' alèna bawang, sangadinna untu' Kristus iya puraè matè sibawa ripatuwo paimeng untu' apentingenna mennang. 16 Rimakkuwannanaro, dè'na taangke'i tauwè situru ukkurang tolinoè. Mèmeng engka naengka nariyangke Kristus polè ri tolinona, iyakiya makkekkuwangngè dè'na. 17 Tau iya massèddiènna sibawa Kristus, mancajiwi tolino mabaru siseng. Iya malaungngè dè'ni gagana -- mancaji manengngi mabaru. 18 Iya manennaro najamai Allataala. Naolai Kristus naèbbuki Allataala simadècèngeng paimeng sibawa Alèna, nainappa nasuroki untu' pakkullèi tau laingngè nasimadècèngeng towi sibawa Allataala. 19 Birittatta iyanaritu makkedaè nasibawang pappasisumpunna naolai Kristus, naèbbui Allataala tolinoè simadècèngeng paimeng sibawa Alèna. Napogau'i Allataala iyaro sibawa tennatuntu sining asalang iya puraè napogau' tolinoè lao ri Alèna. Pura risuroni ri Allataala untu' mabbirittangngi iyaro karèbaè. 20 Jaji idi'na sining surona Kristus. Naolaki idi Allataala muto palettu'i pasen-Na. Ri laleng asenna Kristus, riyèllauwi sibawa masero, tarimai limanna Allataala iya nakkullèngiyèngngi musimadècèngeng sibawa Alèna. 21 Dè' namadosa Kristus, iyakiya Allataala mèbbui Natanggungngi dosata, kuwammengngi tasimadècèngeng paimeng sibawa Allataala nasaba massèddiki sibawa Kristus.

2 Korintus 6

1 Nasaba majjamaki sibawa Allataala, nariyèllauwi sibawa masero aja'na musiya-siyakangngi iyaro akessingeng atinna Allataala. 2 Ri laleng Kitta'è, makkedai Allataala, "Ri wettu iya naèloriyè, purani Uwèngkalingako, sibawa ri esso asalamakengngè, purano Utulukko. " Engngerangngi madècèd-dècèng! Makkekkuwangngènna ritu wettu iya nasitujuièro! Makkekkuwangngènna ritu esso untu' ripassalama'! 3 Dè' taèloriwi attumaningetta ripasala. Rimakkuwannanaro makkuragaki dè' tabbèrè alasang muwi lao risèddiè tau untu' pogau'i iyaro gau'è. 4 Sibalè'na, ri laleng sininna pangkaukengngè, riyappaitangngi makkedaè idi iyanaritu ata-atanna Allataala. Sininna rupanna asukkarakengngè purani ripèneddingi sibawa sabbara': 5 risissaki, ritarungku, sibawa riborong; marejjikki majjama, biyasaki dè' tamatinro sibawa biyasa tokki dè' tappunnai inanrè. 6 Ri laleng matinuluta, mapanrè, sabbara' sibawa makessing ati, riyappaitangngi makkedaè idi iyanaritu atanna Allataala. Makkuwatoro ri laleng ataggattungengngè ri Rohna Allataala, nasibawang pammasè iya matinuluè, 7 enrengngè ri laleng mabbirittangngi karèba iya polè ri Allataala kuwaèttopa nasibawang akuwasanna Allataala, riyappaitangngi makkedaè idi'è iyanaritu ata-atanna Allataala. Makkatennikki ri èlona Allataala selaku senjatata untu' mèwa iyarè'ga mèwaiwi alè. 8 Ripakarajaki, iyakiya ripakatuna tokki, ripoji sibawa ripètenna'to. Namuni malempuki, riteppuki pabbellèng. 9 Riyangga'ki dè' tatarompo, iyakiya riissekki ri sininna tauwè. Nasekki matè, iyakiya anessana tuwo mupi. Namuni ripanrasa-rasaki, dè' tamatè. 10 Namuni ripaessèi atitta, iyakiya tuli masennang tokki. Kasiyasiki riita, iyakiya puraki passugii maèga tau. Paitaki dè' gaga riyappunnai, iyakiya sitongenna riyappunaiwi sini-sininnaè. 11 Saudara-saudara iya ripojiyè ri Korintus! Purani' terus terang lao ri iko. Sininna lise atitta purani ripassu. 12 Dè' naritongko atiè lao ri iko, banna iko ritu tongkoi atimmu lao ri idi. 13 Makkekkuwangngè, leppessakka mabbicara pada-pada lao ri ana' ri alèku. Timpa toni atimmu lao ri idi. 14 Aja' mumaèlo siyempe' sining tau iya dè'è namateppe' ri Yèsus; iyaro dè' nacoco'. Pèkkugi wedding adècèngengngè massèddi sibawa jaè! Dè' nakkullè tajangngè sibawa pettangngè massèddi! 15 Dè' nakkullè Kristus sipekke Ibillisi'è. Aga assipadanna tau Kristèngngè sibawa tau tenniyaè Kristèng? 16 Aga assisumpungenna Bolana Puwangngè sibawa bolana barahalaè? Idi'è Bolana Puwangngè, Allataala iya tuwoè. Allataala muto makkeda, "Maèlo-Ka monro ri tengnga-tengngana mennang, sibawa tuwo silaong mennang. Mancaji-Ka matu Allataalana mennang, sibawa mennang mancaji matu umma'-Ku. 17 Rimakkuwannanaro, salaiwi iyaro sining tau iya dè'è naissengngi Allataala, sibawa pallaingngi alèmu polè ri mennang. Aja' sises-siseng musisumpung sibawa iya najisi'è, na-Utarimako matu. 18 Mancaji-Ka matu Ambo'mu, na iko matu mancaji ana'-ana'-Ku, makkuwaniro adanna Puwang Iya Pommakuwasaè. "

2 Korintus 7

1 Saudara-saudara iya upojiyè! Sininna iyaro janciè ripattujui lao ri idi. Rimakkuwannanaro sitinajaki pèpaccingiwi alè polè ri sininna iya rota'iyèngngi tubu nyawata. Sitinajaki mètau ri Allataala, kuwammengngi tasukku nataullèi tuwo banna untu' Allataala bawang. 2 Tarimaki ri laleng atimmu. Dè' tappasala muwi lao risèddiè tau, sibawa dè' naengka nariparogi tauwè. Dè' sises-siseng takarao' saro polè ri niga-nigato. 3 Makkeda makkuwaka'ro, tenniya untu' pasalako. Saba' pada-pada iya puraè upowada riyolo, riyamasèi senna'ko, sibawa idi iyanaritu sellao-sellao siamatèngngè sibawa siatuwongngè. 4 Uwatepperi tongekko. Mala masennang senna'ka lao ri iko! Namuni pèneddingiki maèga asukkarakeng, tassalèwo senna'ni atikku nasaba iko. Marennu tongeng atikku! 5 Muwi wettutta lettu ri Makedonia, dè' sises-siseng gaga wettutta mappèsau. Polè tulili lolongekki asukkarakeng: polè ri laingngè assasang, napolè ri laleng atiè muto iyanaritu amètaureng. 6 Iyakiya sukkuru'ki, Allataala tuli pakaloppoiwi atinna tau iya pettu paddennuwangngè; Napètakkariwi atitta ri laleng apolènna Titus. 7 Tassalèwoi atitta tenniya bawang nasaba engkani polè Titus, iyakiya nasaba nalaporo' towi pèkkugi atinna risalèwori ri iko. Napaissengiki makkedaè muddani senna'ko mèwaka siruntu'; makkedaè massesse kalèko ri pangkaukenna riyolo na makkekkuwangngè macenninni atinna mèwaika. Iyaro gau'è naèbbuka lebbi marennupasi. 8 Namuni sure'ku pamessèiwi atimmu, dè'to uwassesse kalè mokii iyaro sure'è. Mèmeng massesse kalè tokka cèddè wettunna uwita makkedaè iyaro sure'ku pamessèiko namuni iyaro amessèmmu cinampe'mi bawang. 9 Iyakiya mammènasaka makkekkuwangngè -- tenniya nasaba messèi atimmu, sangadinna nasaba iyaro amessèmmu mèbbui tappinra ampè-ampèmu. Mèmeng iyaro amessèngngè siturui èlona Allataala. Jaji, dè' taparogiko. 10 Saba' amessèng iya pada-padaèro powassèlè'i atappinrang ati iya mappapolè asalamakeng. Nadè' nassesse kalè matu tauwè lao ri gau'èro. Sibalè'na, amessèng iya situruè èlona tolinoè powassèlè'i amatèng. 11 Cobako pènessaiwi aga wassèlè'na ri iko polè ri amessèng iya situruè èlona Allataala! Wassèlè'na iyanaritu mattonget-tongekko makkuraga untu' pacinnongiwi aluccakengngè! Mubenciwi dosaè, mètauko, muddaniko, masumange'ko, macennikko hukkungngi iya pasalaè! Ri laleng sininna passalengngèwè muwappaitangngi makkedaè dè' mupasala. 12 Jaji, muni uwokii iyaro sure'è, iyaro sure'è riyokii tenniya nasaba iyaro tau pasalaè. Tenniyato nasaba tau iya manrasa-rasaè nasaba asalangngèro. Uwokii iyaro sure'è kuwammengngi na ri yolona Allataala, mumaingekiwi pèkkugi loppona pajjampamu lao ri idi. 13 Iyanaro saba'na natassalèwo atitta. Ri lainnaè tassalèwo, lebbi-lebbipi rirennuitta nasaba riitai arennunna atinna Titus; tassalèwo manengngi atimmu. 14 Mèmeng purano uwammingki-mingkikeng lao ri alèna. Sukkuru'ni dè' mupakasirika. Sininna iya puraè ripowada lao ri iko iyanaritu tongengngi. Makkuwatoro aga iya riyammingkikengngè passalemmu lao ri Titus manessani tongeng towi. 15 Makkekkuwangngè pèdè' namasèiko, saba' naèngngerangngi pèkkugiko iya manenna maèlo turusiwi pappimpinna sibawa pèkkugiko tarimai sibawa pakarajai enrengngè mapatoiwi. 16 Masennang senna'ka, nasaba weddikko riyatepperi risininna gau'è.

2 Korintus 8

1 Saudara-saudara, macinnaki kuwammengngi muwisseng towi passalenna pèkkugi kessinna Allataala lao ri jema'-jema'è ri Makedonia. 2 Purani mennang rioji sibawa asukkarakeng-asukkarakeng iya matane'è. Iyakiya ri tengnga-tengngana asukkarakengngèro, marennui mennang sibawa masèmpo ati senna'na ri laleng mabbèrè sumbangeng untu' tulungngi tau laingngè, namuni kasiyasi senna'i mennang. 3 Wedding upattentu makkedaè mabbèrèi mennang situru amampungenna mennang mabbèrè, mala lebbi. Nadè'gaga suroi, 4 naèllauwi mennang sibawa masero ri idi rèkko weddingngi mennang maccowè mabbantu mabbèrè sumbangeng lao ri umma'na Allataala ri Yudèa. 5 Mabbèrèi mennang mabèla lebbi ègana naiya riyammènasaiyè. Mula-mulanna mennang purani nabbèrèyang alèna lao ri Puwangngè, nainappa laoto ri idi, situru èlona Allataala. 6 Iyanaro saba'na naripètangngari senna' Titus -- iya pammulaèngngi usahaèwè -- kuwammengngi napatterui usaha iya makessingngèwè ri yelle'muto. 7 Dè'gaga cauko ri laleng sini-sininnaè: Dè'gaga cauko ri laleng atepperengngè, ri laleng mappassu pallolongeng, dè'gaga caui ri laleng pangissengengngè, ri laleng sininna rupanna usahaè, sibawa ri laleng pammasèmu lao ri idi. Rimakkuwannanaro, madècèngekko dè'to gaga caui ri laleng iya makessingngèwè. 8 Dè' uwappètangnarengngi iyaro selaku sèddi parènta. Iyakiya mappaitangngi pèkkugi patona sining tau laingngè tulungngi padanna, macinna tokka missengngi gangka kègi pammasèmu. 9 Saba' muwisseng tongeng makkedaè riyamasèi senna'ki ri Yèsus Kristus Puwatta: Alèna sugii, iyakiya napakasiyasiwi Alèna untu' apentingemmu, kuwammengngi nasaba akasiyasin-Naro, namusugi. 10 Manuru pallolongekku, ri onronna ritu mupacceppiwi aga iya puraè mupammulai ri taung labe'è. Saba' iko ritu bunge'-bunge' pikkiri'i sibawa pammulaiwi iyaè usahaè. 11 Na, makkekkuwangngè sitinajako patterui situru amampungemmu. Sitinajako masumange' untu' patterui iyaro usahaè, pèkkugiko riyolo masumange'to rancanai. 12 Rèkko macennikko mabbèrè, natarimai matu Allataala iyaro pabbèrèmu situru aga iya engkaè ri iko, dè' nasituru' aga iya dè'è naengka ri iko. 13 Dè' sises-siseng umakkatta untu' paleppe'i tau laingngè polè ri tanggung jawa'na, sibawa tane'iko. Iyakiya nasaba makkekkuwangngèwè iko ri laleng keadaang iya genne'è, nasipato'ko paggenne'i akurangenna mennang. Rèkko matti akurangekko, na mennang ri laleng keadaang genne'è, nabantuko matu. Nanallalengiro pada-padai matu iya duwa ritumaningi. 15 Ri laleng Kitta'è tarokii, "Tau iya maègaè pallolongenna, dè' na alebbing, sibawa tau iya cèddè'è pallolongenna, dè' na akurangeng. " 16 Temmaka sukkuru'ki lao ri Allataala saba' purani naèbbu Titus sippato idi untu' tulukko! 17 Saba' Titus tenniya bawang macenning paddupai parelluta, iyakiya mapato towi maèlo tulukko angkanna nasaba èlona muto pettuiwi untu' lao ri iko. 18 Kiring tokki silaong alèna sèddi saudara iya ripakaraja senna'è ri sininna jema'è nasaba jama-jamanna mabbirittangngi Karèba Madècèng polè ri Allataala. 19 Ri lainnaèro, iyaro tau makkuwaèro pura toni ripilè sibawa ripattentu ri jema'-jema'è untu' silaongekki ri laleng allalengetta. Saba' maèloki joppa untu' palettu'i iyaro sumbangengngè, kuwammengngi naripakalebbi Puwangngè sibawa kuwammengngi muwitai makkedaè macennikki tulungngi. 20 Matutu senna'ki kuwammengngi aja' naengka tau iya pasalaèkki ri laleng gau' ripalettu'na sumbangeng iya maègaèwè. 21 Maèloki kèdo malempu tenniya banna ri yolona Puwangngè, iyakiya ri yolonato rupa tauwè. 22 Silaong Titus sibawa iyaro Saudaraè, kiring tokki sèddi saudara laingngè. Purani rioji makkolik-koling namanessani tuli napojiwi mattulung. Namakkekkuwangngè lebbi-lebbipi maèlona tulukko saba' battowai paddennuwanna ri iko. 23 Passalenna Titus, iyanaritu sellaoku, iya uwèwaè sibawa majjama untu' bantuko. Na passalenna iya duwa saudaraè, passalenna iyaro, iya laowè silaong alèna, mennang iyanaritu tau iya risuroè ri jema'-jema'è sibawa mancajiwi arennutta lao ri Kristus. 24 Mammènasaki muwappaitangngi pammasèmu lao ri mennang, kuwammengngi nasininna jema'è naissengngi makkedaè muwamasèiwi mennang sibawa aga iya paloppoiyèngngi nyawata passalemmu iyanaritu tongengngè.

2 Korintus 9

1 Sitongenna dè'na naparelluna marokika lao ri iko passalenna bantuwang iya mattengngangngè rikiring lao ri umma'na Allataala ri Yudèa. 2 Uwisseng mupoji mattulung, sibawa purana mammingkikekko saudara lao risining tauwè ri Makedonia. Upowadai lao ri mennang, makkedaè mappammulai taung labe'è saudara-saudaraè ri Akhaya sadiyani untu' mabbèrè sumbangeng. Sibawa sumange'mu pura pallalatung towi sumange'na maègangngèngngi polè ri mennang. 3 Makkekkuwangngè usuroi Titus sibawa iya duwa lao ri iko kuwammengngi aga iya riyammingkikengngè passalemmu aja' namancaji bicara kosong bawang. Jaji sitinajako sadiyana, saba' makkeda makkuwaka'ro lao ri mennang. 4 Bata-bataka rèkko engka tau Makedonia iya maccowèè sibawakka matti ri wettukku lao ri iko. Narèkko nalolongengngi mennang makkedaè dè'pa musadiya, temmaka sirita matti, nasaba purai napowada makkedaè mateppe' senna'ki lao ri iko! Na alèmu muto masirito matu. 5 Iyanaro saba'na umarasa parellu suroi mennanro lao ri iko lebbi riyolo untu' murusu'i sumbangeng iya muwajjanciyangngèro. Upogau'i iyaro kuwammengngi rèkko polèka matti, sadiyani pabbèrèmu. Rimakkuwannanaro, manessani makkedaè iyaro pabbèrèmu riyabbèrèyangngi sibawa masennang ati na tenniya nasaba tarapassa. 6 Engngerangngi! Tau iya mampoè binè taccèddè-cèddè, lèlèwi matu wassèlè iya cèddè'ètto. Iyakiya tau iya mampoè binè maèga-èga lèlèwi matu wassèlè iya maègaètto. 7 Tungke' tau harusu'i mabbèrè manuru' cenning atinna. Aja' nabbèrè sibawa tabbata-bata iyarè'ga nasaba tarapassa, saba' Allataala mamasèiwi tau iya mabbèrè sibawa masennang ati. 8 Makuwasai Allataala mabbèrè lao ri iko barakka iya tabbollompollongngè, kuwammengngi tuli muwappunnai aga iya muwapparelluwangngè; mala alebbikko matu untu' pogau'i madècèngngè sibawa makkammala. 9 Ri laleng Kitta'è tarokii makkuwaè passalenna Allataala, "Nassiyampo-amporengngi lao ri tau kasiyasiè; akessingeng atin-Na lettu'i mannennungeng. " 10 Allataala iya passadiyaèngngi binè untu' pangampoè sibawa inanrè untu' idi. Alènato passadiyai matu enrengngè pamègaiwi aga iya muampoè, kuwammengngi wassèlè asèmpo atimmu tattamba towi. 11 Nanallalengiro dè' muakurangeng matu ri laleng sininna gau'è angkanna tuli muwullèi matu mabbèrè sibawa masèmpo ati. Nasining pabbèrèmu iya riyabbagi-bagiyangngè, nassabariwi maèga tau mattarima kasi lao ri Allataala. 12 Saba' pangkaukeng makessing iya mupogau'è tenniya banna paggenne'i matu akurangenna umma'na Allataala bawang, iyakiya nassabari towi matu maèga tau mattarima kasi lao ri Allataala. 13 Na polè ri adècèngeng iya muwajjellokengngèro, maèga tau Kristèng ri Yudèa napojiwi matu Allataala nasaba naitai mennang atinuluremmu lao ri Karèba Madècèng passalenna Kristus iya muwaccowèriyèro. Napoji towi mennang Allataala nasaba masèmpo ati senna'ko untu' bagè-bagèwi lao ri mennang sibawa lao risininna tau laingngè aga iya engkaè ri iko. 14 Nanassempajangekko matu mennang sibawa pappènedding paressè babuwa nasaba makessing ati senna'i Allataala lao ri iko. 15 Sitinajaki sukkuru' lao ri Allataala nasaba pabbèrè-Na iya dè'è padannaro!

2 Korintus 10

1 Makkekkuwangngè iyya, Paulus, pangolo sèuwa lao ri iko. Iyya'è, manuru adanna tauwè, malemma rèkko siyolokko, iyakiya barani rèkko sibèlangngi. Nasaba alemmanna sibawa akessingeng atinna Kristus, 2 uwèllauwi sibawa masero aja' muwèbbuka tarapassa maggau' matedde lao ri iko rèkko polèka matti. Saba' uwanniyakengngi untu' tinda' sibawa tegas lao risining tau iya powadaèngngi makkedaè majjamaki untu' akkatta-akkatta linoè. 3 Mèmeng tuwo mupi ri laleng linoè, iyakiya dè' taèwa manuru akkatta linoè. 4 Senjata-senjata iya riyakkègunangngè ri laleng angèwangetta tenniya senjata linoèwè, iyakiya senjata-senjatana Allataala iya makuwasaè. Nasibawang sining senjataèro nariyancuru sining attahangengngè; ritangkisi'i sining addebbakengngè 5 sibawa leppoi sining bèntèng atempongeng iya napatettongngè untu' mèwai pangissengengngè passalenna Allataala. Ritawangngi pikkiranna sining tauwè sibawa mèbbui mennang tunru' lao ri Kristus. 6 Narèkko mapatoko sibawa sukku, sadiyani untu' hukkungngi sininna tauwè iya dè'è namatinulu. 7 Sitinajai mumaingeki keadaang iya sitongennaè. Rèkko sèddiè tau mateppe'i makkedaè appunnangennai Kristus, sitinajai naparèngngerangi alèna sibawa maingekiwi makkedaè appunnangenna tokki Kristus pada-pada alèna. 8 Dè' umasiri rèkko harusu'ka lebbi maèga mammingkikengngi akuwasang iya puraè nabbèrèyang Puwangngè lao ri idi; saba' iyaro akuwasangngè nabbèrèyangngi untu' patettokko, tenniya untu' ruttungngi. 9 Dè' uwèloriko marasa makkedaè upèttau-pèttauriko sibawa sining sure'ku. 10 Makkedai tauwè, "Sining sure'na Paulus matedde'i sibawa riyakkitangiwi, iyakiya rèkko alèna engka ri tengnga-tengngata, paribadinna malemmai sibawa ada-adanna dè'gaga bettuwanna!" 11 Sitinajai tau pada-padaèro namaingeki makkedaè rèkko engkaki ri tengngamu, coco'i tindaketta pada-pada aga iya riyokiè ri laleng sining sure'ta. 12 Tentu dè' tabarani pasibandingngi iyarè'ga taroi alèta sippada sibawa sining tau iya masengngèngngi alèna matanrè. Anengka makkuwa donggona mennang! Naèbbui mennang ukkuranna alèna sibawa nangke'i alèna sibawa ukkurangngèro. 13 Dè' takkuwaro idi. Rèkko mingki'-ingki'ki, dè' tatalliwe'-liwe'. Monroki ri laleng pakkasèsèng-pakkasèsèng daèra jama-jamang iya puraè napattentungekki Allataala. Na iko muttama' tokko ri laleng daèraèro. 14 Jaji wettutta cèllèngiko sibawa tiwii Karèba Madècèng passalenna Kristus lao ri iko, sitonget-tongenna dè' tassu polè ri risining pakkasèsènna jama-jamatta. 15 Dè' naripoji alèta nasaba jama-jamanna tau laingngè iya engkaè ri saliwenna pakkasèsèng iya napattentungengngèkki Allataala. Sibalè'na tette'ki ri laleng sining pakkasèsèng iya napattentungengngèkki Allataala sibawa mammènasa makkèdaè pèdè' mateppe'ko lao ri Kristus, kuwammengngi weddikki pogau'i jama-jamang iya lebbi battowaè ri yelle'mu. 16 Nanallalengiro nariyullè mappallebbangeng towi Karèba Madècèngngèro ri wanuwa-wanuwa laingngè sibawa dè' naripoji-poji alè nasaba jama-jamang iya puraè ripogau' ri daèra jama-jamanna tau laingngè. 17 Ri laleng Kitta'è tarokii, "Tau iya mammingki-mingkikengngèngngi sèuwaè, sitinajai mammingkikengngi aga iya puraè naèbbu Puwangngè. " 18 Saba' tau iya ripojiyè iyanaritu tau iya napojiyè Puwangngè, tenniya tau iya pojiyèngngi alèna.

2 Korintus 11

1 Palaloka maddonggo-donggo cèddè. Wedditto? 2 Muddanika lao ri iko, pada-pada muto Allataala muddani lao ri iko. Iko iyanaritu pada-padai sèddiè ana'dara iya mapaccingngè mupa iya puraè uwajjanciyang untu' ripabbotting sibawa sèddiè lakkai, iyanaritu Kristus. 3 Iyakiya ubata-bataiwi pikkirammu rigodai matu untu' dè' namatinuluna lao ri Kristus, pada-padato Hawa riyolo rigoda ri amaccanna ulaè. 4 Saba' samammu masennang bawang tarimai tau iya polè ri iko sibawa paggurui passalenna Yèsus iya laingngè -- tenniya Yèsus iya riyappaddissengengngè lao ri iko. Sibawa maèlo tokko tarimai roh sibawa "karèba madècèng" iya sisala senna'è sibawa Rohna Allataala sibawa Karèba Madècèng iya puraè mutarima polè ri idi. 5 Dè' sises-siseng umarasa lebbi mariyawa naiya "rasul-rasul" iya dè'è padannaro! 6 Naullè makurang accaka mabbicara, iyakiya passalenna pangissengengngè, tenniyaka tau donggo. Purani tapabutti lao ri iko ri laleng sininna gau'è. 7 Wettukku mabbirittangngi Karèba Madècèng polè ri Allataala lao ri iko, dè' uwèllauko mongkosokika' muwi cèddè; narimakkuwannanaro upakariyawai alèku. Upogau'i iyaro untu' pakatanrèko. Aga iyaro sèddiwi asalakku lao ri iko? 8 Wettukku tumaningiko, riongkosokika' ri jema'-jema' laingngè. Wedding ripowada uparogiwi tulukko iyaro jema'-jema'è kuwammengngi uwullèi tulukko. 9 Rèkko akurangekka iyaro wettuè, dè' naengka usussaiwi muwi sèddiè tau polè ri iko. Sininna iya uwapparelluwangngè napaggenne'i saudara-saudara iya polè ri Makedonia. Ujagaiwi madècèd-dècèng kuwammengngi dè' usussaiko muwi ri laleng aga, sibawa matteruka matu jagaiwi kuwammengngi natette makkuwaro. 10 Iyaè asennangenna atikkuè dè' nawedding riledda muwi kègi-kègi ri wanuwa Akhaya, nasaba pappagguruwanna Kristus iya tongengngè engkai ri iyya. 11 Magi uwakkeda makkuwaro? Aga nasaba dè' uwamasèiko? Naisseng Allataala mamasèka! 12 Aga iya upogau'è makkekkuwangngè maèloka pogau'i matteru kuwammengngi "rasul" iya laingngèro dè' nappunnai alasang untu' pojiwi alèna sibawa makkeda makkedaè majjamai mennang pada-pada idi. 13 Sining tau pada-padaèro iyanaritu rasul-rasul palsu. Mennang pajjama-jama iya bengnguwangngèngngi tauwè sibawa mallarikkodo selaku rasul-rasul Kristus. 14 Tenrihèrangeng mennang pogau'i makkuwaèro, saba' muwi Ibillisi' mallarikkodoto selaku malaèka'na tajangngè! 15 Jaji tenrihèrangetto rèkko pattumani-pattumaninna Ibillisi' mallarikkodoi selaku pattumani-pattumani iya pogau'èngngi èlona Allataala. Paccappurenna tarima towi matu mennang pamale' iya singngangke'è sibawa pangkaukenna. 16 Upakkolippi siseng: Aja' lalo naengka mangga'ka madonggo. Iyakiya rèkko to muwangga'ka makkuwaro, palalona iya madonggoèwè mingki' cèddè. 17 Mangoloèwè maèloka teppui ammingkikekkuro, iyakiya tenniya Puwangngè suroka powadai iyaro. Ri laleng gau'èwè mattonget-tongekka mabbicara pada-pada sèddiè tau donggo. 18 Mèmeng engka maèga tau iya mammingkikengngèngngi gau'-gau' mallinoè, jaji maèlo tokka mingki'-ingki'. 19 Masennangngi atimmu sabbara' lao ri tau madonggoè, nasaba marasako alèmu makkumani accana! 20 Muleppessang bawammi tauwè powatako, iyarè'ga para'i sibawa mala asarong polè ri iko, iyarè'ga nasengngi alèna lebbi matanrèi polè ri iko sibawa baraninna leppa'ko! 21 Masirika mangakuiwi makkedaè malemma senna'ki untu' pogau'i pada-padaèro. Iyakiya aga iya tau laingngè baraniwi mingkikengngi, barani tokka! (Mabbicaraka pada-pada tau donggoè. ) 22 Tau Ibraniga mennang? Tau Ibrani tokka iyya. Tau Israèlga mennang? Tau Israèl tokka iyya. Wijannaga Abraham mennang? Makkuwatoro iyya! 23 Pattumani-pattumaninnaga Kristus mennang? Samanna riyèngkalinga pada-pada ateddèngenna akkaleng, iyakiya mèmeng iyya pattumani iya lebbi kessingngè naiya maneng mennang! Majjamaka lebbi rejjing, lebbi biyasaka riputtama' ri tarungkuè, lebbi ègaka ripanrasa-rasa sibawa biyasa cèddè matè. 24 Wèkkalimana ripanrasa-rasa ri tau Yahudiè sibawa pakkunru cambu wèkkatelluppulo asèra. 25 Wèkkatelluka ricambu situru hukkunna Roma; engkato naengka rigenrukka batu. Wèkkatelluka pèneddingiwi abala tallemme'è ri tasi'è, sibawa siseng taronak-konang ri tasi'è siesso siwenni. 26 Malèwe' senna'na ri laleng allalengengngè nakenna abala: lèmpè, abala parampo', abala polè ri tau Yahudiè iyarè'ga ri tenniyaè Yahudi, abala ri laleng kotaè, abala ri saliweng kotaè, abala ri tasi'è, sibawa abala polè risining tau iya masengngèngngi alèna selaku saudara Kristèng padahal tenniya. 27 Sitengnga matèka majjama sibawa mèwa: biyasa temmatinro, temmanrè, malèwe' senna'ni tenrijampangi ri laleng alupurengngè, akurangeng pakèyang sibawa temmappunnai onrong mappèruma. 28 Ri saliwenna iya manennaro, esso-esso tokka manenneng lao ri keadaanna jema'è. 29 Rèkko engka malemma maccowè tokka malemma. Rèkko engka sempè' ri dosaè, maccowè tokka ancuru atikku. 30 Narèkko harusu'ka mammingkikengngi sèuwaè, tentu uwammingkikengngi gau'-gau' iya mappaitangngèngngi alemmakku. 31 Allataala, Ambo'na Puwang Yèsus, naisseng makkedaè dè' uwabbellè! Ripojiwi asen-Na mannennungeng. 32 Wettukku engka ri Damsyik, gubernur iya makuwasaè kuwaro ri yawa akuwasanna Arung Arètas, suroi tentaraè jagaiwi tange'na kotaèro untu' tikkekka. 33 Iyakiya nasibawang sèddi baka riloro'ka liyawa lalo risèddiè sebbo ri tembo'è. Makkuwaniro nauleppe polè ri limanna iyaro gubernur-è.

2 Korintus 12

1 Mèmeng dè'gaga sarona untu' mingki'. Iyakiya maèloka mammingkikengngi gau'-gau' iya nappaitangngè Allataala lao ri iyya ri laleng wahyu iyarè'ga ri laleng pakkitang. 2 Uwisseng sèddi tau Kristèng iya seppulo eppa taung labe'è riyakka mènrè ri onrong iya kaminang matanrè. (Dè' uwissengngi tonget-tongeggi watakkalèna tarakka iyarè'ga iyaro banna sèddi pakkitang -- Allataala bawang missengngi. ) 3 Upakkolingngi siseppa: Uwisseng makkedaè iyaè tauwè riyakkai muttama' ri Firdaus. (Dè' uwissengngi aga tonget-tongeggi watakkalèna tarakka iyarè'ga iyaro banna sèddi pakkitang -- Allataala bawang missengngi. ) Kuwaro iyaro tauwè mèngkalingai gau'-gau' iya dè'è nawedding napallessu tolinoè sibawa dè'to naripalalo ri tolinoè untu' powadai. 5 Passalennana iyaro tauwè maèlo uwammingkikeng, tenniya passalenna alèku. Passalenna alèku, banna gau'-gau' iya mappaitangngèngngi alemmakku ritu, iya maèloè uwammingkikeng. 6 Akkalarapanna macinna tokka mammingkikengngi sèuwaè, dè' umaèlo mancaji pabboro iya omong kosongngè; maèloka powadai iya tongengngè. Iyakiya utahangngi alèku, kuwammengngi nadè' gaga tau iya masengngèkka lebbi naiya aga iya puraè naita upogau' iyarè'ga iya puraè naèngkalinga upowada. 7 Iyakiya kuwammengngi dè' umatempo senna' nasaba sining pakkitang iya dè'è padannaro, riwèrèkka sirupa lasa ri watakkalèku iya sinrupaè parèwanna Ibillisi'è. Iyaro lasaè nabbèrèyangngi untu' munruka kuwammengngi aja' umancaji matempo. 8 Wèkkatelluka massempajang lao ri Puwangngè kuwammengngi nariyakka iyaro lasaè polè ri iyya. 9 Iyakiya mappèbaliwi Puwangngè, "Uwamasèiko na iyaro genne'ni untu' iko; saba' akuwasak-Ku mala pèdè' mawatangngi rèkko ri laleng alemmakko. " Iyanaro saba'na lebbi masenna'ka mammingkikengngi sining alemmakku, saba' rèkko malemmaka, mala ri wettuènnaro upèrasai Kristus linrungika sibawa awatangen-Na. 10 Jaji marennuka sibawa sining alemmakku. Marennu tokko rèkko nasaba Kristus naripètenna'ka, pèneddingiwi aperisengngè, ri lellung sibawa pèneddingiwi asukkarakengngè. Saba' rèkko malemmaka, mala ri wettuènnaro umawatang. 11 Kèdo pada-pada tongenna tau donggoè -- iyakiya iko ritu mèbbuka mancaji makkuwaro. Sitongenna iko ritu iya harusu'è pojika. Saba' namuni dè'gaga bettuwakku, dè' sises-siseng ucau lao ri "rasul-rasul" iya dè'è padannaro! 12 Sining anu makalallaingngè sibawa gau'-gau' iya dè'è padanna enrengngè jama-jamang iya battowaè purani nappaitang lao ri iko sibawa sabbara' untu' pabuttiwi makkedaè sèddika rasul. 13 Ri laleng gau' maragaènna kurang rijampangiko, rèkko ripasibandingngi sibawa jema'-jema' laingngè? Naullè banna ri laleng gau'èwè: makkedaè dè' usussaiko untu' mongkosokika. Taddampengekka nasaba asalangngèro! 14 Makkekkuwangngèwè untu' mabbèkkatellunnani sadiyaka untu' cèllèngiko. Nadè' umaèlo sussaiko, saba' iya uwacinnaiyè tenniya aga iya muwappunnaiyè, sangadinna alèmu. Nasaba tenniya ana'-ana'è harusu' sappa dallè untu' tomatowanna, iyakiya tomatowaè ritu harusu' sappa dallè untu' ana'-ana'na. 15 Rimakkuwannanaro, masennang atikku sibawa macenning makkarobangengngi sini-sininnaè untu' iko, mala muwi alèku. Rèkko makkumani uwamasèimmu, sipato'koga kurang mamasèika? 16 Nasitujui makkedaè dè' naengka usussaiko. Iyakiya engka powadai makkedaè macèko-cèkoka; makkedaè lolongekka saro polè ri iko nasaba acèko-cèkongekku. 17 Pèkkugi wedding! Nalaloiga sining tau iya usuroè lao ri iko naulolongeng saro polè ri iko? 18 Purani usuro Titus lao cèllèngiwi saudara, sibawa usuroi saudara Kristèng iya laingngèro lao sibawangngi. Lolongegga saro Titus polè ri iko? Iyakiya sipadduwaki majjama sibawa akkatta iya padaè, enrengngè tinda'i sibawa cara-cara iya padaè! 19 Wedding jaji muwasekki iyaè labe'è makkuraga mèwaiwi alè lao ri iko? Sala pahang senna'ko! Naisseng Allataala makkedaè sininna iya ripowadaèro iyanaritu siturui èlona Kristus. Sibawa sininna iya ripogau'è iyanaritu untu' patettongngi atuwong batèmmu. 20 Bata-bataka makkedaè wettukku cèllèngiko matti, upolèiko dè' napada-pada aga iya uwammènasaiyè, na iko mupolèi tokka matu dè' napada-pada iya muwammènasaiyè. Ajakkè matu engka mallaga, mangèmpuru, mangowa, mappakiri, matempo sibawa mappakacau. 21 Mètauka rèkko Allataala pakatunaka matu ri yolomu wettukku polè matti. Terika matu nasaba maèga ri yelle'mu iya madosaè ri yolo, dè' natappinra sibawa dè' nappèsau pogau'i pangkaukeng-pangkaukenna iya mappangaddiè, marota'è sibawa dè'è nasitinaja.

2 Korintus 13

1 Untu' mabbèkkatellunnaniè polèka cèllèngiko. Ri laleng Kitta'è tarokii, "Tungke' parakara harusu'i ripakkasse ri asabbiyanna duwa iyarè'ga tellu tau sabbi, nainappa essa iyaro parakaraè. " 2 Sining tauwè iya wettu labe'è pogau' dosa sibawa sininna tau laingngè, purani uparèngngerangi lebbi riyolo wettukku cèllèngiko mabbèkkaduwanna. Makkekkuwangngè, ri wettu sibèlatta, uwapparèngngerangngengngi paimeng makkedaè rèkko engkaka polè paimeng, dè' muwi sèddi tau polè ri mennang iya leppe'è polè ri pahukkungengngè. 3 Mulolongengngi matu sininna buttinna makkedaè Kristus tonget-tongengngi mabbicara naolaka. Rèkko tinda'i Kristus lao ri iko, dè' natinda' sibawa malemma, sibalè'na nappaitangngi akuwasan-Na ri yelle'mu. 4 Mèmeng wettunna risalli, malemmai, iyakiya makkekkuwangngè tuwoi nasaba akuwasanna Allataala. Idi' malemma tokki, ri laleng atuwotta iya massèddiè sibawa Kristus, iyakiya rèkko moloiko, mawatang tokki silaong Kristus nasaba akuwasanna Allataala. 5 Cobako mojiwi alèna engka muwiga tonget-tongekko tuwo situru atepperengngè lao ri Kristus! Pasti musadariwi makkedaè Kristus Yèsus engkai ri laleng iko! -- silaingengngi rèkko mèmeng iko dè' natonget-tongeng mateppe'. 6 Mammènasaka mumaingekiwi makkedaè tenniyaki tau iya dè'è natahang riuji. 7 Massempajakki lao ri Allataala tennapodo maèloi tulukko untu' dè' napogau'i iya salaè. Tenniya untu' mappaitangngi makkedaè mèmeng idi'è maccaki jamai jama-jamangngè, iyakiya kuwammengngi mupogau'i aga iya naèloriyè Allataala -- namuni paitaki dè'gaga wassèlè'na, dè' namaga! 8 Saba' dè'gaga riyullè pogau' iya sisalaè èlona Allataala; harusu'ki turusiwi èlona Allataala. 9 Masenna'ki rèkko malemmaki, na iko mawatang. Massempajang tokki kuwammengngi namancaji sukkuko. 10 Iyanaro saba'na uwokii iyaè sure'è wettukku dè'pa uwengka ri tengnga-tengngamu. Nanallalengiro, rèkko polèka matti, dè'na naparelluka tinda' matedde lao ri iko sibawa makkègunang akuwasang iya nabbèrèyangngè Puwangngè lao ri iyya. Iyaro akuwasangngè nabbèrèyangngi untu' patokkokko, tenniya untu' mancuru'i. 11 Paccappurenna, Saudara-saudara, sitinajako marennu, sibawa makkuraga mancaji sukku. Tarimai sininna pangajaku. Sitinajako massèddi ati sibawa tuwo sipammasè-masè. Allataala Iya Pommamasè sibawa mappasidamèro sibawakko matu. 12 Sipammasè-masèno sèddiè sibawa laingngè secara mariyo-riyo selaku Saudara Kristèng. Sininna umma'na Allataala masselleng lao ri iko. 13 Tennapodo Puwang Yèsus Kristus barakkakiko, Allataala mamasèiko, enrengngè Rohna Allataala sibawakko maneng!

Galatia 1

1 Saudara-saudara jema'-jema'è ri daèrana Galatia. Iyya Paulus, sibawa sininna saudara Kristèng iya sibawaè iyya kuwaè, mammènasa tennapodo Allataala Ambo'ta sibawa Puwang Yèsus Kristus mabbèrè barakka sibawa asalèwangeng lao ri iko. Mancaji rasulka tenniya lantarang tolino iyarè'ga nasaba riyakka ri tolinoè, sangadinna Yèsus Kristus sibawa Allataala Ambo'ta iya puraè Patuwoi paimeng polè ri amatèngngè. 4 Mapatoiwi èlona Allataala Ambo'ta, Kristus mabbèrèyangngi Alèna mancaji akkarobangeng untu' dosa-dosata, kuwammengngi Naripassalama'ki polè ri wettu iya majaèwè. 5 Ripojiwi Allataala mannennungeng! Aming. 6 Hèrakka passalenna Saudara-saudara! Riyobbiko ri Allataala nasaba pammasèna Kristus, iyakiya makkekkuwangngè masitta wèggakko mabbokoriwi Allataala sibawa maccowèriwi "karèba madècèng" iya laingngè naiya Karèba Madècèng iya polè ri Allataala. 7 Sitongenna dè'gaga "karèba madècèng iya laingngè". Banna engka sining tau iya mabbirittangngèngngi lao ri iko "karèba madècèng" passalenna Kristus iya naputara'balè'è mennang angkanna napakacauko. 8 Tau iya mabbirittangngèngngi "karèba madècèng" iya laingngè naiya Karèba Madècèng iya puraè riyabbirittang, leppessanni rihukkung ri Allataala -- namuni iyaro tauwè idi muto iyarè'ga malaèka' polè ri surugaè. 9 Purani tapowada riyolo, makkekkuwangngè upowadai siseppa: Tau iya mabbirittangngèngngi lao ri iko "karèba madècèng" iya laingngè naiya Karèba Madècèng iya puraè mutarima polè ri idi, iyaro tauwè sitinajai rihukkung ri Allataala. 10 Aga nassabariro paitaka samanna mammènasa riakui ri tolinoè? Dè' sises-siseng! Banna mammènasaka riakui ri Allataala. Makkuragaka'ga malai atinna tolinoè kuwammengngi nariètauri ri tauwè? Rèkko upogau' mupi makkuwaèro, tenniyaka atanna Kristus. 11 Harusu'i naisseng Saudara-saudara makkedaè Karèba Madècèng iya uwabbirittangngèro dè' napolè ri tolinoè. 12 Dè' utarimai iyaro karèbaè polè ri tolinoè, sibawa dè'to muwi sèddi tau iya mappagguruwangngèngngi lao ri iyya. Yèsus Kristus muto ritu iya pallessuèngngi lise'na Karèba Madècèngngèro polè ri iyya. 13 Tentu purani muwèngkalinga passalenna atuwo-tuwokku riyolo selaku sèddi paggama Yahudi. Muwisseng pèkkugi pèddaraku gaukengngi jema'na Allataala sibawa pèkkugi tedde'ku makkuraga mancuru'i. 14 Ri laleng pajoppai agama Yahudiè, upakacauriwi maègangngèngngi tau Yahudi iya uwèwaè sippangka. Masumange' senna'ka ri laleng gau'-gau' passalenna ade'na nènè-nènèta. 15 Iyakiya nasaba akessingeng atinna Allataala, napilèka ri wettu dè'napa ujaji enrengngè mobbika untu' tumaningiwi. 16 Allataala mappaddissengengngi Ana'-Na lao ri iyya kuwammengngi Karèba Madècèngngè passalenna Ana'-Na weddingngi uwabbirittang lao risining tau tenniyaè Yahudi. Iyaro wettuè dè' ulao muwi risèddiè tau untu' mèllau pangaja. 17 Dè'to ulao risining tauwè ri Yèrusalèm iya lebbi mariyoloè na iyya mancaji rasul. Iyakiya laoka ri wanuwa Arab, nainappa polè kuwaro lisusi ri Damsyik. 18 Telluttaung ri munrinna, lisuka ri Yèrusalèm untu' sisseng sibawa Pètrus. Monroka sibawa alèna seppulo lima esso bawang ittana. 19 Dè' usiruntu sibawa rasul-rasul iya laingngè, sangadinna Yakobus, silessurenna Puwangngè. 20 Aga iya uwokièwè tongeng. Naisseng Allataala sibawa dè' uwabbellè. 21 Purairo laoka ri daèra-daèra ri Siria sibawa Kilikia. 22 Narapi iyaro wettuè jema'-jema' Kristèngngè ri Yudèa dè'pa naissekka secara langsung. 23 Naèngkalingami bawang mennang tauwè makkeda, "Tau iya cellaèkki riyolo, makkekkuwangngè nabbirittangngi atepperengngè iya maèloè ripallennye' riyolo. " 24 Nanapojini mennang Allataala nasaba iyya.

Galatia 2

1 Seppulo eppa taung ri munrinna, lisuna ri Yèrusalèm sibawa Barnabas, enrengngè tiwi towi Titus. 2 Laoka ri Yèrusalèm saba' Allataala pura pannessai ri iyya makkedaè harusu'ka lao. Na ri laleng sèuwaè addeppu-deppungeng sibawa sining pamimpingngè kuwaro bawang, upakatajangngi Karèba Madècèng iya uwabbirittangngè lao risining tau tenniyaè Yahudi. Saba' dè' umaèlo usahaku riyolo, iyarè'ga makkekkuwangngè siya-siya bawang. 3 Titus iya silaongengngèkka, iyanaritu sèddiwi tau Yunani, iyakiya dè' naripassa maccowèriwi peraturang sunna'è, 4 namuni engka sining tau iya maddessakengngèngngi gau'èro. Mennang iyanaritu sining tau maccelle'è ri laleng golongetta sibawa mallarikkodo selaku saudara. Muttama'i mennang sibawa mammekko-mekko untu' salidikiwi alaluwasang iya engkaè ri idi nasaba massèddiki sibawa Kristus Yèsus. Maèloi mennang palisuki ri laleng keadaang bunge'-bunge'na selaku ata, 5 iyakiya dè' tamanyera muwi cèddè lao ri mennang, nasaba maèloki jagaiwi kuwammengngi iyaro Karèba Madècèngngè tette'i tulèng untu' iko. 6 Namuni makkuwaro, dè'gaga gau'-gau' baru iya natuntu'è polè ri iyya risining tau iya nangga'è riyakkitangi -- untu' alèku dè'gaga sisalana rèkko riyakkitangiwi mennang iyarè'ga dè', saba' Allataala dè' nakkita tappa. 7 Sibalè'na, sining tau iya riyangga' riyakkitangiyèro nangakui makkedaè Allataala pura suroka untu' mabbirittangngi Karèba Madècèngngè lao risining tau tenniyaè Yahudi; pada-pada pura nasurona Pètrus untu' mabbirittangngi Karèba Madècèngngèro lao ri tau Yahudiè. 8 Saba' Allataala mabbèrèyangngi lao ri Pètrus amampungeng untu' mancaji rasulna sining tau Yahudiè, mpèrèng tokka amampungeng untu' mancaji rasulna sining tau tenniyaè Yahudi. 9 Yakobus, Pètrus sibawa Yohanès, iya riitaè mancaji sining pamimpinna jema'è, nangakui makkedaè Allataala pura mpèrèkka jama-jamang dè'è padannaè. Najjama'na mennang sibawa Barnabas enrengngè iyya selaku tanrang assisellaongeng. Nainappa mennang sibawa idi risitujuini makkedaè majjamaki matu ri yelle'na bangsa-bangsa iya tenniyaè Yahudi, na mennang ri yelle'na tau Yahudiè. 10 Sèddi-sèddinna parèllaunna mennang iyanaritu kuwammengngi narijampangi tau kasiyasiè. Na iyya mala masennang pogau'i iyaro gau'è. 11 Wettunna Pètrus lao ri Antiokhia, uwèwai sibawa uwappita-pitang, nasaba salai tindakanna. 12 Bunge'-bunge'na tudangngi manrè sisama sibawa Saudara-saudara iya tenniyaè Yahudi. Iyakiya wettunna lettu sining tau nasuroè Yakobus, napabèlai alèna polè ri Saudara-saudara tenniyaè Yahudi sibawa dè' namaèlona manrè sibawa mennang, saba mètaui lao risining tau iya mèloriyèngngi risunna sining tauwè. 13 Saudara-saudara Yahudiè iya laingngè maccowè towi munapè' pada-pada Pètrus, angkanna muwi Barnabas tappangaruto untu' kèdo-kèdo pada-pada mennang. 14 Uwitanaro makkedaè dè' nappallolongeng mennang situru atongengenna Karèba Madècèngngèro, makkedana lao ri Pètrus ri yolona sininna tau iya hadèrè'è kuwaro, "Rèkko Sudara selaku tau Yahudi purano tuwo pada-pada tau tenniyaè Yahudi, magi Sudara makkekkuwangngè namaèlo passai sining tau laingngè tuwo pada-pada tau Yahudiè?" 15 Mèmeng manuru' ajajiyang, idi iyanaritu tau Yahudi sibawa tenniya "tau tenniyaè Yahudi iya madosaè". 16 Namuni makkuwaro riissengngi makkedaè simadècèngengngi paimeng tauwè sibawa Allataala banna nasaba teppe' lao ri Yèsus Kristus, sibawa tenniya nasaba pajoppai Hukkunna Agamaè. Alèta paimeng mateppe' lao ri Yèsus Kristus, kuwammengngi tasimadècèngeng sibawa Allataala naolai teppe'taro, tenniya nasaba tapajoppai Hukkunna Agamaè. Saba' ri laleng ripajoppana Hukkunna Agamaè, dè' muwi sèddi tau simadècèngeng paimeng sibawa Allataala. 17 Makkuragaki simadècèngeng paimeng sibawa Allataala naolai tuwoè massèddi sibawa Kristus. Iyakiya rèkko purani ripogau' iya makkuwaèro, manessani idi "sining tau madosa" mupa pada-padato sining tau tenniyaè Yahudi, aga iyaè bettuwanna makkedaè Kristus ritu nassabariki madosa? Tentu dè'! 18 Rèkko mappammulaka patettongngi paimeng bentu'na Hukkunna Agamaè iya puraè uruttung, nauwappaitangngi makkedaè mancajika iya majjalèkkaiyèngngi hukkungngè. 19 Iyakiya matèna lao ri Hukkunna Agamaè -- hukkung-hukkungngè mutoro mpunoi -- kuwammengngi uwullèi tuwo untu' Allataala. Purana risalli silaong Kristus. 20 Makkekkuwangngè tenniyana iyya tuwo, iyakiya Kristus iya tuwoè ri laleng alèku. Atuwongngèwè iya uwattemmekiyè makkekkuwangngè iyanaritu tuwo ri laleng teppe' lao ri Ana'na Allataala iya mamasèiyèkka sibawa iya puraè makkarobangngi Alèna untu' iyya. 21 Dè' upakariyawai pammasèna Allataala. Rèkko assisumpungenna tauwè sibawa Allataala simadècèngengngi paimeng nasaba napajoppai Hukkunna Agamaè, bettuwanna iyaro amatènna Kristus dè'gaga gunana!

Galatia 3

1 Saudara-saudara tau Galatiaè! Madonggo tongekko! Pangaru nigarè'na kennako? Amatènna Kristus ri salliè purani upakatajang sibawa manessa lao ri iko! 2 Coba paissengika iyaè sèddiè passaleng: Puraniga mutarima Rohna Allataala nasaba pajoppai Hukkunna Agamaè, iyarè'ga nasaba muwèngkalingai Karèba Madècèng polè ri Allataala sibawa mateppe' lao ri Kristus? 3 Magi mumadonggo makkuwaro! Purani mupammulai atuwong mabaruè sibawa Rohna Allataala, masakang makkekkuwangngè maèloko lolongengngi asukkurenna sibawa awatangeng alèmu? 4 Percumaga bawang sininna iyaro puraè mupèneddingi? Masa' percuma! 5 Allataala mabbèrèyangngi Rohna lao ri iko sibawa pakangka anu makalallaing ri yelle'mu. Napogau'iga Allataala iyaro nasaba mupajjappai Hukkunna Agamaè iyarè'ga nasaba muèngkalingai iyaro Karèba Madècèngngè sibawa mateppe' ri Kristus? 6 Iyaro pada-padai iya tarokiè ri laleng Kitta'è passalenna Abraham -- makkuwaiyè, "Mateppe'i Abraham lao ri Allataala, nasaba atepperennaè ritarimai ri Allataala selaku tau iya sennangiyèngngi atinna Allataala. " 7 Jaji sitinajako mainge' makkedaè tau iya tonget-tongengngè wija-wijanna Abraham iyanaritu tau iya mateppe'è ri Allataala. 8 Pura naitani Kitta'è lebbi riyolo makkedaè Allataala nanakkullèngiwi sining tau tenniyaè Yahudi simadècèngeng paimeng sibawa Allataala, rèkko mateppe'i mennang ri Alèna. Iyaro Karèba Madècèngngè riyappaddissengengngi lebbi riyolo lao ri Abraham ri laleng jancièwè, "Naolako, Allataala barakkakiwi matu sininna rupa tauwè ri yasè'na linoè. " 9 Mateppe'i Abraham, naribarakkakiki. Makkuwatoro sininna tau iya mateppe'è, ribarakkakiwi matu silaong Abraham. 10 Sining tau iya taggattungngè ri Hukkunna Agamaè, iya manenna tuwoi ri yawana pahukkungengngè. Saba' ri laleng Kitta'è tarokii, "Tau iya dè'è namatinulu pajoppai sininna iya tarokiè ri laleng Kitta Hukkunna Agamaè, ritanroiwi ri Allataala!" 11 Dè' muwi sèddi tau simadècèngeng sibawa Allataala, nasaba napajoppai Hukkunna Agamaè. Iyaro gau'è pura ripannessai ri laleng Kitta'è, "Banna tau iya mateppe'è ri Allataala angkanna assisumpungenna sibawa Allataala mancaji makessing paimeng, tuwo matu!" 12 Iyakiya Hukkunna Agamaè dè' natettong polè ri teppe'è. Ri laleng Kitta'è tarokii makkedaè tau iya pajoppaèngngi hukkunna agamaè, tuwoi matu nasaba hukkungngèro. 13 Iyakiya Kristus paleppe'ki polè ri tanrona Hukkunna Agamaè. Napogau'i iyaro ri laleng naleppessanna alèna tattanro nasaba idi. Saba' ri laleng Kitta'è tarokii, "Tattanroi tau iya matè rigattung ri alliri ajuè. " 14 Napogau'i Kristus makkuwaèro kuwammengngi nabarakka iya najjanciyangngè Allataala lao ri Abraham nabbèrèyang towi lao risining tau tenniyaè Yahudi. Nanallalengiwi, idi iya mateppe'è ri Allataala, naullèi tarimai Roh iya najjanciyangngè Allataalaro. 15 Saudara-saudara! Makessingngi pakèka conto polè ri pengalamang esso-essoè. Rèkko mèbbui tauwè sèuwa assijancingeng na iyaro assijancingngè purani napaessa, dè' muwi sèddi tau mullèi rusa'i iyaro assijancingngè, iyarè'ga tambaiwi muwi sèuwa ri assijancingngèro. 16 Janci-jancinna Allataala naèbbui Allataala untu' Abraham sibawa untu' tau wijanna Abraham. Ri laleng Kitta'è dè' nataroki "sibawa untu' sining tau wijanna Abraham", iya bettuwannaè maèga tau. Iya tarokiè kuwaro iyanaritu "sibawa untu' tau wijanna", bettuwanna sèddi tau bawang, iyanaritu Kristus. 17 Iya maèloè upangolo kuwaè iyanaritu iyaè: purani naèbbu jancinna Allataala sibawa napaessa lebbi riyolo. Hukkunna Agamaè iya nabbèrèyangngè eppadatu telluppulo taung rimunrinna dè' naullèi rusa'i essana enrengngè leddai iyaro jancinna Allataala. 18 Saba' rèkko pabbèrèna Allataala taggattungngi ri Hukkunna Agamaè, iyaro tenniyana pabbèrè iya najjanciyangngè. Mala nasaba Allataala pura majjanciyangngi lao ri Abraham, nanabbèrèyangngi Allataala iyaro lao ri alèna. 19 Rèkko makkuwaitu, untu' aga Hukkunna Agamaè riyabbèrèyang? Pappèbalinna iyanaritu makkedaè iyaro sining hukkungngè riyattambangngi untu' pannessai pelanggaranna tolinoè. Iyaro pahukkungenna agamaè takkennai narapi bawang apolènna sèddiè tau wijanna Abraham, iya riteppuè ri laleng jancinna Allataala lao ri Abraham. Iyaro Hukkunna Agamaè napalettu'i sining malaèka'è sibawa naolai sèddi tolino. 20 Naharusu'i engka duwa piha', nainappa parellu sèddi pappasimpung. Iyakiya Allataala dè' napparelluwang pappasisumpung, saba' Alèna muto tinda'. 21 Aga iyaro bettuwanna makkedaè sièwai Hukkunna Agamaè sibawa jancinna Allataala? Tentu dè'! Saba' rèkko riyabbèrèyangngi Hukkunna Agamaè untu' mabbèrèyangngi atuwongngè lao ri rupa tauwè, naullèi simadècèngeng tolinoè sibawa Allataala naolai Hukkunna Agamaè. 22 Iyakiya ri laleng Kitta'è tarokii makkedaè sininna rupa tauwè engkai ri yawa akuwasanna dosaè. Rimakkuwannanaro, pabbèrè iya najjanciyangngè nasaba teppe' lao ri Yèsus Kristus nabbèrèyangngi lao ri mennang iya mateppe'è. 23 Riwettu dè'napa narapii wettunna untu' mateppe' lao ri Kristus, rijagai senna'ki ri Hukkunna Agamaè; samannaki riurung narapi iyaro teppe'è ripannessa. 24 Nanallalengiro, Hukkunna Agamaè mancajiwi selaku jennatta narapi polè ri Kristus untu' mèbbuki simadècèngeng paimeng sibawa Allataala nasaba mateppe'ki ri Kristus. 25 Makkekkuwangngè, nasaba wettunna tolinoè wedding mateppe' ri Kristus, nadè'na narijagaiki ri Hukkunna Agamaè. 26 Nasaba mateppe'ko ri Kristus Yèsus, namumassèddi sibawa alèna; narimakkuwannanaro mancajiko ana'-ana'na Allataala. 27 Pura manenno ricemmè ri laleng asenna Kristus, jaji purani mutarima ri alèmu sipa'-sipa'na Kristus. 28 Ri laleng passalengngèwè dè'na naripasilaingeng tau Yahudiè sibawa tenniyaè Yahudi, ataè sibawa tau maradèka'è, worowanè sibawa makkunraiè. Sèddi maneng mani Saudara nasaba Kristus Yèsus. 29 Rèkko appunnangennako Kristus, iko iyanaritu wijannai Abraham. Sibawa mutarimana matu aga najjanciyangngè Allataala.

Galatia 4

1 Iyakiya parellu upattedde: riwettu dè'napa sèddiè ahli warisi' dè'pa naballèrè, engka tau jagaiwi sibawa murusu'i sining apentingenna narapi umuru'na iya ripattentuè ri ambo'na. Rigaukengngi pada-pada sèddiè ata, namuni sitongenna alèna mappunnangiwi sininna waramparangngèro. 3 Makkuwatoro sibawa idi: Riwettu dè'napa taballèrè, ripowataki ri roh-roh iya makuwasaiyèngngi linoèwè. 4 Iyakiya ri wettunna iya teppa'è, nasuroi Allataala Ana'-Na lao ri linoè. Iyaro Ana'-Na rijajiyangngi risèddiè makkunrai sibawa tuwo ri yawana akuwasanna Hukkunna Agamaè. 5 Nanallalengiwiro napaleppe'i sining tau iya tuwoè ri yawana akuwasanna Hukkunna Agamaè; kuwammengngi wedding tokki mancaji ana'-ana'na Allataala. 6 Nasaba iko iyanaritu ana'-ana'na Allataala, nasuroi Allataala Rohna Ana'-Na muttama ri laleng atitta, iyanaritu Roh iya mangobbiè, "Ambo', èh Ambo'-Ku. " 7 Jaji tenniyano ata, sangadinna ana'. Nasaba iko ana' Allataala, Allataala mpèrèkko matu sininna sèuwa-sèuwaè iya napassadiyaè untu' ana'-ana'-Na. 8 Riyolo dè' muwissengngi Allataala, iyanaro saba'na mancajiko ata polè risining akuwasang iya riyangga'è selaku dèwata iyakiya sitongenna tenniya sises-siseng Allataala. 9 Iyakiya makkekkuwangngè muwissenni Allataala, iyarè'ga lebbi coco'i, Allataala missekko. Na magi mumaèlo lisusi ri roh-roh linoèwè, iya malemmaè sibawa kasiyasiè? Magi mumaèlo ripowatasi ri roh-roh-èro? 10 Muramè-ramèiwi esso-esso mattentuè, uleng-uleng mattentuè sibawa taut-taung mattentuè. 11 Bata-bataka, ajakkè turuppuse'ku untu' iko siya-siyai bawang. 12 Saudara-saudara! Uwèllauwi sibawa masero kuwammengngi mumancaji pada-pada iyya. Nasaba pura tokka mancaji pada-pada iko. Dè' agaga mupogau' iya salaè lao ri iyya. 13 Tentu muwèngngerang mupa aga iya nassabariyè pammulanna na uwabbirittangngi iyaro Karèba Madècèngngè lao ri iko. Saba'na iyanaritu nasaba nakennaka lasa. 14 Iyaro wettuè dè' mumaciddi lao ri iyya, namuni watakkalèku sinrupai paccobang iya battowaè lao ri iko. Mala mutarimaka pada-pada tarimai malaèka'na Allataala iyarè'ga tarimai alèna Kristus Yèsus. 15 Masennang senna'ko wettuèro. Iyakiya makkekkuwangngè, kègani iyaro asennangengngè? Uwisseng iyaro wettuè macennikko cukkèi matammu untu' mpèrèkka, rèkko weddingngi ripogau' iyaro. 16 Muwangga'na'ga makkekkuwangngè selaku bali, nasaba upannessai iya tongengngè lao ri iko? 17 Iyaro sining tau laingngè masumange'i sappako, iyakiya akkattana mennang dè' namakessing. Macinnai bawang mennang pettui assisumpungemmu sibawa idi, kuwammengngi namuccowèriwi mennang sibawa masumange'. 18 Mèmeng makessing untu' masumange' ri laleng gau'-gau' iya makessingngè, assaleng tuli makkuwamuwiro sibawa aja' bawang narèkko engkaka sibawakko. 19 Ana'-ana'ku iya riyamasèiyè! Makkekkuwangngèwè manrasa-rasasika nasaba iko. Manrasa-rasaka pada-pada makkunrai mapeddiè wettunna jajiyang ana'. Maèloka matteru-teru manrasa-rasa, rèkko sipa'-sipa'na Kristus dè'pa natattaneng ri alèmu! 20 Muddani senna'ka engka ri tengnga-tengngamu makkekkuwangngè, kuwammengngi weddikka mabbicara lao ri iko sibawa sadda laingngè, nasaba dè'na uwissengngi agana maèlo upogau' lao ri iko! 21 Saudara-saudara iya maèloè tuwo ri yawana akuwasanna hukkung-hukkunna Agamaè, cobai mèngkalingaka! Maèloka powadakko aga sitongenna taroki ri laleng Kitta Hukkunna Musa. 22 Tarokii kuwaro makkedaè Abraham mappunnaiwi duwa ana': Indo'na ana'è sèddiè iyanaritu sèddiwi ata, sibawa indo'na ana'è laingngèro iyanaritu sèddiwi tau maradèka'. 23 Ana'na makkunrai iya mancaji ataè jaji biyasai nasaba èlo tolino. Iyakiya ana'na makkunrai maradèka'è, jajiwi nasaba najjanciyangngi Allataala. 24 Iyaè weddingngi ripakè selaku rapang. Iyaro duwaè makkunrai iyanaritu akkalarapanna duwa assijancingeng: iya sèddiè polè ri Bulu Sinai -- iyanaritu Hagar; ana'-ana'na rijajiyangngi selaku ata. 25 Jaji Hagar iyanaritu Bulu Sinai, ri tana Arab. Pulambangngèngngi kota Yèrusalèm sibawa sininna pabbanuwana iya makkekkuwangngè mancaji atani. 26 Iyakiya Yèrusalèm iya engkaè ri surugaèro iyanaritu Yèrusalèm iya maradèka'è, sibawa alènana iyanaritu indo'ta. 27 Saba' ri laleng Kitta'è tarokii, "Arennuno iko èh makkunrai manangngè, iya dè'è naengka naèmmana! Ariyo-riyono sibawa gora-gorano èh iko iya dè'è naengka napèneddingiwi peddi èmmanakengngè! Saba' makkunrai iya risalaiyè ri lakkainna lolongengngi matu lebbi maèga ana' naiya makkunrai iya silollongngè lakkainna. " 28 Saudara-saudara! Alèmu iyanaritu ana'-ana'na Allataala iya rijajiyangngè nasaba jancinna Allataala; pada-padako Ishak. 29 Iyaro wettuè ana' iya jajiyè manuru èlo tolino, callai ana' iya jajiyè nasaba èlona Rohna Allataala. Makkuwatoro makkekkuwangngè. 30 Iyakiya aga taroki ri laleng Kitta'è? Tarokii kuwaro makkedaè: "Paddèsu'i ata makkunraièro silaong ana'na, saba' ana' polè ri ataèro dè' nancaji matu ahli warisi'na silaong ana' polè ri makkunrai maradèka'èro. " 31 Jaji, Saudara-saudara, idi'è tenniya ana' polè risèddiè ata; idi iyanaritu ana'-ana' polè ri makkunrai maradèka'è.

Galatia 5

1 Maradèka'i makkekkuwangngè, saba' Kristus pura pamaradèkaki! Rimakkuwannanaro attahangengngi amaradèkammu, sibawa aja'na mumaèlo ripowatasi. 2 Engngerangngi, rèkko mèllauko risunna, bettuwanna iyaro dè'gaga gunana Kristus lao ri iko. Iya powadaèngngi iyaè iyanaritu iyya muto, Paulus. 3 Siseppi mabbèrèka papparèngngerang lao ri tau iya mèllauèngngi risunna, makkedaè waji'i pajoppai sininna Hukkunna Agamaè! 4 Rèkko makkuragai saudara simadècèngeng sibawa Allataala naolai Hukkunna Agamaè, bettuwanna iyaro assisumpungemmu sibawa Kristus pettui. Rimakkuwannanaro tuwoko risaliwenna pammasèna Allataala. 5 Iyakiya untu' idi, mammènasaki makkedaè nasibawang pattulunna Rohna Allataala sibawa nallalengi teppe'ta lao ri Kristus, napakkullèki Allataala simadècèngeng sibawa Alèna. 6 Saba' rèkko massèddini sibawa Kristus Yèsus, passaleng turusiwi iyarè'ga temmaccowèriwi peraturanna sunna'è dè'na nancaji soal. Iya pentingngè banna teppe' lao ri Kristus, na iyaro manessai ri laleng pammasèta lao ri tau laingngè. 7 Riyolo purano mèwa sibawa madècèng! Makkekkuwangngè magi dè'na mumatinulu lao ri èlona Allataala? Niga pura palècèko? 8 Tentu iya pogau'èngngi iyaro tenniya Allataala iya puraè mobbiko! 9 Makkedai tauwè, "Ragi cèddè'è napasawèi matu sininna lama labbu'è. " 10 Namuni makkuwaro mateppe' mupa makkedaè dè' matu muwaccowèriwi attangenna tau laingngè, saba' massèddiki sibawa Kristus. Namateppe'ka makkedaè muwi niga pakacauwi pikkirammu, rihukkungngi matu ri Allataala. 11 Passalenna iyya, Saudara-saudara, magi namatteru-teruka bawang rimusu rèkko uwabbirittang mupi makkedaè iyaro peraturang sunna'è parellui? Rèkko mèmeng uwabbirittangngi makkuwaro, tentu pabbirittakku passalenna sallina Kristus dè' napaompo persoalang. 12 Lebbi kessing muwi sining tau iya pakacauèngngi pikkirammuro matterui bawang massu maneng polè ri jema'è! 13 Purani riyobbi Saudara untu' mancaji tau iya maradèka'è. Iyakiya aja' naripakè iyaro amaradèkangngè untu' matteru-teru pogau'i agi-agi iya muwacinnaiyè pogau'i. Sibalè'na harusu'ko sisullè siyamasèyang sibawa situmaningi. 14 Sininna Hukkunna Agamaè ririppekiwi ri laleng parènta iya sèddièwè, "Sitinajako mamasèiwi padammu rupa tau pada-pada muwamasèinna alèmu. " 15 Iyakiya rèkko sisullèko sikarebbè-karebbè, jaga-jagako, pada ancuru'ko matu. 16 Akkattaku makkuwaiyè: Leppessanni Rohna Allataala pimpikko sibawa aja'na mutuwo situru sipa'na tolinoè. 17 Saba' cinnana tolinoè sisalai sibawa cinnana Rohna Allataala, sibawa cinnana Rohna Allataala sisalai sibawa cinnana tolinoè. Iya duwa sisullèi sièwa, angkanna dè' muwullèi pogau'i aga iya muwacinnaiyè. 18 Iyakiya rèkko Rohna Allataala pimpikko, dè' narikuwasaiko ri Hukkunna Agamaè. 19 Cinnana sipa'na rupa tauwè manessai ri laleng pangkaukeng-pangkaukeng iya mappangaddiè, macarèpaè, sibawa dè'è nasipato; 20 ri laleng assompangngè ri barahalaè sibawa paddissengengngè; ri laleng simusu-musuè, mallaga, mangèmpuru, masitta macai, sibawa pentingkangngi alèna, atemmassèddingngè sibawa makkonro-konrong, 21 enrengngè mangèmpuru ati, mammabo-mabokeng, mappèsta-pèsta sibawa rilainnaèttopa paimeng. Lao ri sininnaro uparèngngerangiko makkekkuwangngè pèkkugi pada-pada uparèngngerangiko riyolo, makkedaè sining tau iya pogau'èngngi makkuwaèro dè' nancaji matu anggota umma'na Allataala. 22 Sibalè'na rèkko ripimpingngi tauwè ri Rohna Allataala, iyanaè wassèlè'na: Sisullèi siyamasèi, marennui mennang, mappunnai mennang adamèngeng, sabbara'i mennang sibawa masèmpo ati, makessingngi mennang lao ri tau laingngè, matinului mennang, 23 mariyawa atiwi mennang, sibawa tuli naullèna makuwasaiwi alèna. Sining tau makkuwaèro dè' naparellu bata-bata untu' matinulu lao ri Hukkunna Agamaè. 24 Sining tau iya mancajiyènna appunnangenna Kristus Yèsus, iyaro sining tauwè purani nauno sipa' tolinona sibawa sininna napessunna enrengngè sining cinnana. 25 Purani nabbèrèyang Rohna Allataala lao ri idi atuwong mabaruè, rimakkuwannanaro, alènato ritu harusu makuwasaiwi atuwotta. 26 Dè' naweddikki matempo, sibawa sisullè sipeddiri ati, enrengngè mangèmpuru ati sèddiè lao ri laingngè.

Galatia 6

1 Saudara-saudara! Rèkko sèddiè tau ripolèiwi pogau' sèddi dosa, sitinajako iya tuwoè manuru' Rohna Allataala, pimpingngi iyaro tauwè lisu ri laleng iya tongengngè. Iyakiya harusu'ko pogau'i iyaro sibawa malemma, sibawa jagaiwi aja' narapii alèmmu rigodato. 2 Sitinajako sisullè sibantu tanggungngi tiwina tauwè, kuwammengngi nassabariwi muturusiwi parèntana Kristus. 3 Rèkko sèddiè tau nasengngi alèna penting, padahal dè', iyaro tauwè alèna muto nabellè. 4 Tungke' tau harusu'i parèssai alèna makessigga ampè-ampèna iyarè'ga dè'. Rèkko makessingngi, weddingngi marasa mabangka ri gau'èro. Iyakiya dè' naparelluna napasibanding sibawa aga iya napogau'è tau laingngè. 5 Saba' tungke' tau harusu'i mèssangngi tanggung jawa'na. 6 Tau iya tarimaèngngi pappagguruwanna Kristus, sitinajai mabbagè sibawa gurunna sininna iya makessingngè iya engkaè ri alèna. 7 Aja' muribengnguwang. Dè' nawedding riyacculè-culèi Allataala! Aga ritaneng, iyanaritu riduppa. 8 Rèkko mattanengngi tauwè situru sipa' tolinona, naduppai matu amatèngngè polè ri sipa'naro. Iyakiya rèkko mattanengngi manuru Rohna Allataala, naduppai matu atuwong tongengngè iya mannennungengngè polè ri Rohna Allataala. 9 Rimakkuwannanaro, aja' tacau pogau'i gau'-gau' iya makessingngè; saba' rèkko dè' tappèsau pogau'i gau'-gau'èro sèuwa wettu riduppai matu wassèlè'na. 10 Jaji, ri wettu engkana mupa wettutta, sitinajaki pogau'i makessingngè lao ri sininna tauwè, lebbi-lebbipi lao ri Saudara-saudarata iya siyatepperengngè. 11 Pènessaiwi madècèd-dècèng iyaè bagiyangngè iya alèkuè mokii sibawa hurupu' iya battowaè! 12 Sining tau iya maèloè pakatanrèi alèna sibawa gau'-gau' mallahèrengngè, mennang ritu makkuraga passako maccowèriwi peraturanna sunna'è. Iyakiya napogau'i mennang gau'èro banna kuwammengngi nadè' mennang naricalla ri tau Yahudiè nasaba sallina Kristus. 13 Muwi sining tau iya maccowèriyèngngi peraturang sunna'è dè'to napajoppai hukkunna agamaè. Iyakiya naèloriwi mennang risunna'ko, kuwammengngi naullèi mennang mammingkikengngi makkedaè muturusiwi iyaro peraturangngè. 14 Iyakiya iyya dè' sises-siseng umaèlo mammingkikengngi muwi aga, ri lainnaè Puwatta Yèsus Kristus iya puraènna matè ri salliè. Saba' mala nakarena amatènna ri salliè, na linoè dè'na agagana bettuwanna ri alèku. Na lao ri linoèwè, muwi iyya samanna matè tona. 15 Risunna iyarè'ga dè' narisunna, dè' napenting iyaro. Iya pentingngè iyanaritu mancaji tolino baru. 16 Untu' sining tau iya tuwoè sibawa atongengengngèwè, sibawa makkuwatoro untu' sininna umma'na Allataala, mammènasaka Allataala mpèrèngngi matu asalèwangeng sibawa pammasèna. 17 Napurairo, aja'na muwi sèddi tau sussaisika, saba' ri watakkalèku engka butti-butti makkedaè ana' gurunnaka Yèsus. 18 Tennapodo Puwatta Yèsus Kristus tuli barakkakiwi Saudara-saudara. Aming. Salama, Paulus

Efesus 1

1 Umma'na Allataala ri Efèsus, iya matinuluè lao ri Kristus Yèsus! 2 Iyya, Paulus, surona Kristus Yèsus nasaba èlona Allataala, mammènasa tennapodo Allataala Ambo'ta sibawa Puwang Yèsus Kristus mabbèrè barakka sibawa asalèwangeng lao ri iko. 3 Ripojiwi Allataala, Ambo'na Puwatta Yèsus Kristus! Nabarakkakiki sibawa sininna barakka rohaniè ri laleng surugaè, nasaba massèddiki sibawa Kristus. 4 Riwettu dè'napa naripancaji linoèwè, purani napilè Allataala naolai Yèsus Kristus sibawa akkatta kuwammengngi mancajiki appunnangen-Na bawang sibawa dè'gaga cellana ri yolo-Na. ri yolo-Na. Nasaba pammasèna Allataala, na Alèna: Nasaba pammasèna Allataala, 5 napurani Napattentu lebbi riyolo sibawa naolai Yèsus Kristus, Nakkaki untu' mancaji ana'-ana'-Na muto. Na mèmeng iyanaro macinna Napogau'. 6 Ripojiwi Allataala iya marajaè nasaba naolai Ana'-Na iya naèloriyè, Nanamasèi senna'ki. 7 Saba' amatènna Kristus, napaleppe'ki Allataala, bettuwanna puraki Naddampengeng polè ri dosa-dosata. 8 Napogau'i iyaro nasaba Namasèi senna'ki. Na iyaro pammasè purani nabbèrèyang lao ri idi sibawa penno apanrèng enrengngè pappèjeppu. 9 Manuru èlo-Na muto, Allataala mappaddissengengngi lao ri idi rahasiya-Na rancana-Na; purani Napettui makkedaè iyaro rancana-Na napattèpui matu naolai Kristus. 10 Iyaro rancanana iyanaritu muwi ri surugaè iyarè'ga ri linoè, mancaji sèddiwi sibawa Kristus selaku Kapala. Na iyaro gau'è napattèpui matu Allataala rèkko narapini wettunna. 11 Najamai Allataala sininna sèuwa-sèuwaè manuru èlo-Na sibawa apettun-Na muto. Mappummulai pammulanna puraki Napilè saba' macinnai kuwammengngi mancajiki umma'-Na nasaba massèddiki sibawa Kristus. 12 Leppessakki, iya bunge'-bunge'è mammènasa ri Kristus, pojiwi Allataala nasaba arajan-Na! 13 Mancaji tono umma'na Allataala wettummu mèngkalingai pasenna Allataala, iyanaritu Karèba Madècèng iya mabbèrè asalamakeng lao ri iko. Mateppe'ko ri Yèsus Kristus, na iyanaro saba'na nabbèrèyangngi Allataala tanrang appunnangen-Na lao ri iko, iyanaritu Rohna iya Najjanciyangngè. 14 Roh-ènna ritu boro' makkedaè tarimaki matu aga iya puraè najjanciyang Allataala lao ri umma'-Na. Iyanaè mpèrèkki ateppereng makkedaè Allataala paleppe'i matu umma'-Na. Ripojiwi Allataala nasaba arajan-Na! 15 Rimakkuwannanaro, sipongenna uwèngkalinga makkedaè mateppe'ko lao ri Puwang Yèsus, sibawa muwamasèiwi sininna umma'na Allataala, 16 dè' appettunna mattarima kasi'ka ri Allataala passalemmu. Tuli uteppui asemmu wettukku massempajang. 17 Uwèllauwi kuwammengngi Allataalana Puwatta Yèsus Kristus, Ambo' iya malebbiè, mabbèrèyangngi Rohna lao ri iko. Iyaro Roh-è napancajiko mapanrè, sibawa napannessai matu Allataala lao ri iko kuwammengngi muwissengngi Alèna. 18 Uwèllauwi kuwammengngi Allataala timpa'i pikkirammu angkanna macakka; kuwammengngi mupahangngi aga wedding muwammènasai polè ri Allataala iya mobbièkko. Makkuwatoro kuwammengngi muwissengngi pèkkugi tabbollonna barakka-barakka iya magelloè iya napassadiyaè Allataala untu' umma'-Na; 19 napèkkugi hèba'na Allataala majjama sibawa sukku akuwasan-Na ri laleng idi iya mateppe'è. Iyaro akuwasanna Allataala pada-padai akuwasang iya dè'è padan-Na 20 iya Napakè wettunna napatuwo paimeng Kristus polè ri amatèngngè sibawa mpèrèngngi Alèna tudangeng kaminang matanrè silaong Allataala ri surugaè. 21 Iyaro tudangenna Kristus mabèlai lebbi matanrè naiya tudangenna sininna pamarèntaè, sininna tau makuwasaè, sininna pamimpingngè, sininna bapa'-bapa'è sibawa muwi nigi-nigi iya puraè riwèrèng tudangeng matanrè muwi iya tuwoè ri wettuèwè iyarè'ga iya tuwoè ri wettu mangoloè. 22 Napatunru manengngi Allataala ri yawa akuwasanna Kristus, sibawa mabbèrèyangngi Kristus lao ri jema'è selaku Kapala polè ri sininna sèuwa-sèuwaè. 23 Jema'è iyanaritu tubunna Kristus, ripassukkui ri Alèna iya passukkuèngngi sininna sèuwa-sèuwaè muwi kègi.

Efesus 2

1 Riyolo matèko secara rohani nasaba madosako sibawa majjalèkkaiwi parènta-parèntana Allataala. 2 Iyaro wettuè muwaccowèriwi sining abiyasanna linoèwè; bettuwanna matinuluko lao ri panguwasana langi marajaè iyanaritu roh iya makuwasaiyèngngi makkekkuwangngè atinna sining tau iya dè'è namatinulu lao ri Allataala. 3 Riyolo pada-pada maneng tokki sibawa mennang; tuwoki situru kèdo-kèdo tolinota sibawa pogau'i aga iya sennangiyèngngi watakkalè sibawa pikkiratta. Iyaro wettuè idi'na iyanaritu sining tau iya nakennaètto caina Allataala, pada-pada sining tau laingngè. 4 Iyakiya temmaka loppona asèmpo atinna Allataala! Makkuwa mani Namasèitta, 5 angkanna matè mupi' secara rohani nasaba sining pelanggaratta, Napatuwoki paimeng silaong Kristus. Jaji banna nasaba akessingeng atinna Allataala, naripassalama'ko ri Alèna. 6 Nasaba massèddiki sibawa Kristus Yèsus, Allataala patuwoki paimeng silaong Alèna, kuwammengngi mapparènta tokki silaong Alèna ri laleng surugaè. 7 Napogau'i Allataala iyaro kuwammengngi na ri wettu iya mangoloè, naullèi mitai tolinoè temmaka loppona pammasèna Allataala. Iyaro pammasè napannessai Allataala naolai akessingeng atin-Na lao ri idi ri laleng Kristus Yèsus. 8 Allataala mamasèiko, iyanaro saba'na napassalama'ko nasaba mateppe'ko lao ri Yèsus. Iyaro asalamakemmu tenniya wassèlè' usahamu muto. Iyaro pammasènai ritu Allataala. Jaji dè'gaga sèddi tau mullèi mattempowangngi alèna passalenna gau'èro. 10 Idi iyanaritu winrunaki Allataala, nanaolai Kristus Yèsus, nabentu'ki Allataala kuwammengngi naripogau' gau'-gau' iya makessingngè iya puraè napassadiyangekki. 11 Saudara-saudara tenniyaè tau Yahudi! Engngerangngi keadaammu wettu riyolo: Riteppuko "tau tenrisunna", ri tau Yahudiè iya mangakuè risunna (akkattana iya lolongengngènnaè tanrang iya naèbbuè tolinoè ri tubunna). 12 Iyaro wettuè dè' muwassèddi sibawa Kristus, tau polè-polèko iya dè'è nauttama umma' napilèna Allataala. Dè' namumattama ri laleng assisiyoreng assijancingngè iya naèbbuè Allataala sibawa umma'-Na. Tuwoko ri laleng linoèwè temmaddennuwang sibawa temmakkè Allataala. 13 Iyakiya makkekkuwangngè, nasaba massèddiko sibawa Kristus Yèsus, iko iya mabèlaè riyolo, ripacawèkini nasaba amatènna Kristus. 14 Saba' Kristus muto iyanaritu pappasidamèta. Napassèddiwi sining tau Yahudiè mancaji sèddi bangsa. Tèmbo' pallawangenna mennang, iyanaritu assimusurengngè purani nancuru' Kristus ri laleng nakkarobangenna Alèna. 15 Hukkunna Agama Yahudiè sibawa parènta-parèntaè enrengngè sining peraturanna purani riledda ri Kristus kuwammengngi iyaro duwaè bangsa mancaji sèddiwi bangsa rupa tau baru, iya massèddiè sibawa Alèna. Nasibawang caraè ritu napakangkai Kristus assidamèngengngè. 16 Nasaba amatèn-Na ri salliè, Kristus passèddiwi iya duwaèro bangsaè, sibawa pasidamèi mennang sibawa Allataala, angkanna lennye'ni assimusurengngèro. 17 Iyanaro saba'na napolè Kristus untu' mabbirittangngi Karèba Madècèngngè passalenna assidamèngengngèro lao ri iko; muwi lao ri iko tenniyaè Yahudi iya mabèlaè riyolo polè ri Allataala, iyarè'ga lao ri tau Yahudiè iya macawè'è ri Allataala. 18 Naolai Kristus, idi maneng -- muwi tau Yahudi iyarè'ga tau tenniyaè Yahudi -- polè ri Rohna Allataala iya sèddiè, weddingngi maddeppèriwi Ambo'è. 19 Rimakkuwannanaro, dè'na namumuttama tau polè-polè iyarè'ga tau saliweng. Iko makkekkuwangngè iyanaritu pada-padai wargana umma'na Allataala. Iko iyanaritu anggota-anggota kaluwarganai Allataala. 20 Ripatettong tokko ri yasè'na tettongeng iya napalènne'è rasul-rasul-è sibawa nabi-nabiè, sibawa Kristus Yèsus mancaji batu iya kaminang poko'è. 21 Alèna ritu susungngi sininna bolaèro mancaji Bolana Allataala iya ripallaingngè untu' Puwangngè. 22 Nasaba tuwo massèddiwi sibawa Kristus, mattengngang tokko ripatettong silaong sining tau laingngè mancaji sèddi bola untu' Allataala; kuwaniro Allataala monro sibawa Roh-Na.

Efesus 3

1 Iyanaro saba'na iyya, Paulus, massempajangekko. Ritarungkuka nasaba Kristus Yèsus, untu' apentingemmu iya tenniyaè Yahudi. 2 Tentu purani muwèngkalinga makkedaè Allataala, nasaba akessingeng atin-Na, nanawèrèkka iyaè jamangngè untu' apentingemmu. 3 Nabukkai Allataala rahasiyana rancana-Na nanapowadakka. (Passalenna iyaè purani uwokii riyolo sibawa marippe, 4 narèkko mubacai, muwajeppuiwi matu rahasiyaè passalenna Kristus pada-pada iya uwajeppuiyè. ) 5 Riyolo iyaro rahasiyaè dè' naengka nariyappaissengeng lao ri rupa tauwè, iyakiya makkekkuwangngè Rohna Allataala pura mappaitangngi lao ri rasul-rasul-è sibawa lao ri nabi-nabin-Na. 6 Iyaro rahasiyaè iyanaritu: Naolai Karèba Madècèngngèro, tau tenniyaè Yahudi maccowè towi napèneddingi barakka'-barakka'na Allataala iya riyolo banna untu' tau Yahudiè. Sining tau tenniyaè Yahudi mancajiwi anggota polè ri tubu iya padaè, sibawa maccowè towi tarima aga iya najjanciyangngè Allataala naolai Kristus Yèsus. 7 Allataala mpèrèkka pammasè -- iyanaritu jamang -- untu' pallebbangngi Karèba Madècèngngèro. Utarimai iyaro pammasè naolai akuwasanna Allataala iya majjamaè ri laleng alèku. 8 Ri yelle'na sininna umma'na Allataala, iyya'na ritu kaminang matuna. Iyakiya Allataala mpèrèkka iyaè pammasè: jamang untu' mabbirittangngi lao risining tau tenniyaè Yahudi Karèba Madècèng passalenna asugirenna Kristus iya dè'è gaga cappuna; 9 sibawa makkuwatoro kuwammengngi naolaka nanaissengngi sininna tauwè pèkkugi Allataala, Pabbinruna sininna alangngè, pogau'i rancana-Na iya mappammulaè riyolopa nariyolo narirahasiyakang lao ri linoè. 10 Akkattana Allataala iyanaritu kuwammengngi makkekkuwangngè naolai jema'è, sininna iya makkatenningngè akuwasang ri langiè naissengngi apanrènna Allataala ri laleng sininna rupanna bentu'na. 11 Napogau'i Allataala iyaro situru sibawa rancana-Na iya mannennungengngè, iya napajoppaè sibawa naolai Kristus Yèsus Puwatta. 12 Nasibawang teppe' lao ri Kristus sibawa nasaba massèddi sibawa Alèna, riwèrèkki alaluwasang untu' maddeppèriwi Allataala sibawa penno ateppereng. 13 Rimakkuwannanaro, parèllaukku iyanaritu: aja'na mubata-bata passalenna aga iya uwanrasa-rasaiyè nasaba iko; saba' iya manennaro iyanaritu untu' adècèngemmu. 14 Narimakkuwannanaro umakkaluttu ri yolona Ambo'è. 15 Polè ri Alènai ritu na tungke' kaluwarga ri surugaè sibawa ri linoè tarimai sipa'-Na iya dè'è padanna. 16 Massempajakka tennapodo Allataala iya pommalebbiè naèloriwi untu' pèwatangiwi batèmmu sibawa Roh-Na. 17 Tennapodo nasaba mateppe'ko ri Kristus, monroi Kristus ri laleng atimmu, sibawa atuwommu rilapiriwi enrengngè rikuwasaiwi ri pammasè. 18 Massempajakka tennapodo nasibawang sininna umma'na Allataala, muwullèi mpellungiwi temmaka lowanna sibawa lampèna enrengngè tanrèna kuwaèttopa lamunna pammasèna Kristus, 19 iya nasibawangngè akkaleng tolino dè' nariyullè majeppuiwi lamunna. Tennapodo muwissengngi iyaro pammasèna Kristus, angkanna pennoko sibawa paribadinna Allataala iya sukkuè. 20 Nasibawang akuwasanna Allataala iya mapatoè majjama ri laleng alèta, naullèi Allataala pogau'i mabèla lebbi maèga naiya aga iya riyullè mèllau iyarè'ga pikkiri. 21 Memmuwarè Allataala ripakalebbi massossoreng ri laleng jema'è, naolai Kristus Yèsus. Ripojiwi Allataala mannennungeng! Aming.

Efesus 4

1 Iyanaro saba'na iyya -- sèddiwi tahanang, iya ritahangngè nasaba tumaningiwi Puwangngè -- mèllauwi sibawa masero ri iko: tuwono situru tudangemmu selaku tau iya puraè riyobbi ri Allataala. 2 Sitinajako tuli mariyawa ati, malemma kininnawa, sibawa sabbara. Appaitangngi pammasèmu ri laleng bantui sèddiè lao ri laingngè. 3 Akkuragano tonget-tongeng untu' tuwo sibawa damè kuwammengngi assèddiyang iya napakangkaè Rohna Allataala tette'i tappiyara. 4 Banna sèddi bawang tubu, sibawa sèddi Roh. Makkuwatoro riyobbiko untu' sèddi ammènasang iya padaè. 5 Banna sèddi bawang Puwang, sèddi teppe', sèddi acemmèng, 6 sibawa sèddi Allataala iya mancajiyè Ambo'na sininna tauwè. Alèna ritu Puwanna sininna alangngè, iya majjamaè naolai iya manenna, sibawa makuwasa ri laleng iya manenna. 7 Tungke'-tungke'ki tarima sèddi pabbèrè situru aga iya nabbèrèyangngè Kristus. 8 Ri laleng Kitta'è tarokii: "Wettunna mènrè'i ri onrong iya kaminang matanrè, tiwii maèga tawangeng, sibawa mabbèrèi pabbèrè-pabbèrè lao ri tolinoè. " 9 Nah, rèkko ripowadai "mènrè'i" bettuwanna mula-mulanna purani nonno lettu ri onrong iya kaminang mariyawaè ri linoèwè. 10 Na iya puraè nonno, Alènato ritu iya mènrè'è lettu ri onrong iya mabèlaè lebbi tanrè naiya sininna langiè angkanna sininna alangngè rilisekiwi sibawa ahadèrèken-Na. 11 Alèna ritu iya "mabbèrè pabbèrè-pabbèrè lao ri tolinoè"; sibagiyang nakka mancaji rasul, iya laingngè mancaji nabi; iya laingngèssi mancaji pabbiritta Karèba Madècèngngèro, na laingngèssi nakkai mancaji guru-guru sibawa pappiyarana jema'è. 12 Napogau'i iyaè kuwammengngi umma'na Allataala ripassakke tongengngi kuwammengngi naullèi tumaningi Puwangngè sibawa patettongngi tubunna Kristus. 13 Nanallalengiro mancaji sèddi manekki nasaba teppe' iya padaè sibawa pappahang iya padaè passalenna Ana'na Allataala. Sibawa mancajiki sining tau iya ballèrè'ènna iya pèdè' maittaè pèdè' sukku pada-pada Kristus. 14 Na dè'na tancaji ana'-ana'na iya kalèwa'-kalèwa'è sibawa iya kacowè-cowèè ritiwi ri pangarunna maddupa-rupang pappagguruwang polè risining tau iya maccaè. Napapusai mennang tauwè sibawa bellèna. 15 Dè'! Sibalè'na harusu'ki powadai sibawa ati penno pammasè, angkanna ri laleng sininna gau'è pèdè' maittaki pèdè' mancaji sukkuki pada-pada Kristus, iya mancajiyè Ulutta. 16 Ri yawa pappimpin-Na, sininna anggota tubuè tassusungngi makessing, sibawa sisullè ripasisumpung ri padduppa-padduppan-Na tungke'-tungke'. Sibawa rèkko tungke'-tungke' iyaro anggotaè majjamai pada-pada sitongennaè, sininna iyaro tubuè mpekke'i matu mancaji battowa sibawa mawatang naolai pammasè. 17 Rimakkuwannanaro nasaba asenna Puwangngè, iyanaè upowada matu sibawa pattedde'i: aja'na mutuwo pada-pada sining tau iya dè'è naissengngi Allataala, sibawa pikkiri'i anu dè'è. 18 Mapettanni pikkiranna mennang. Dè' napahangngi mennang atuwong iya nabbèrèyangngè Allataala, saba' dè' sises-siseng mennang nappunnai pangissengeng agaga passalenna Allataala. Makkuwairo mennang, nasaba matedde atiwi. 19 Dè'na nappunnai mennang perasaang masirina, angkanna naccowèriwi mennang sininna hawa napessunna, sibawa tuwo mappangaddi sièlo atinna. 20 Iyakiya Kristus Yèsus iya muwissengngè dè' nakkuwaro! 21 Purani muwèngkalinga passalenna Alèna! Na selaku sining tau maccowèriyèngngi, pura tono ripagguru passalenna sipa-sipa'na Allataala iya engkaè ri Alèna! 22 Rimakkuwannanaro ludunni rupa tau malaungngè sibawa cara-cara atuwong malaungngè iya mattengngangngè risolangi risining cinnana iya mappapusaè. 23 Sitinajako ati sibawa pikkirammu ripakabarui manengngi. 24 Sitinajako tuwo selaku rupa tau mabaru iya ripancajiyè situru èlona Allataala; iyanaritu ampè-ampè iya tongengngè, malempu sibawa mapaccing. 25 Rimakkuwannanaro Saudara-saudara iya maneng, aja'na muwabbellè. Alempuno lao ri laingngè, saba' idi manengngè iyanaritu pada-padaki anggota tubunna Kristus. 26 Rèkko macaiko, aja' muleppessangngi iyaro caimu nassabariko madosa. Aja' mumacai puppu esso, 27 kuwammengngi dè' nalolongeng kasempatang Ibillisi'. 28 Tau iya biyasaè mènnau harusu'i mappèsau mènnau. Sibalè'na harusu'i majjama kuwammengngi lolongengngi dallè sibawa malempu enrengngè naullèi tulungngi tau iya akurangengngè. 29 Rèkko mabbicarako, aja' mupakèi ada-ada iya majaè. Pakèi bawanni ada-ada iya mappèdècèngngè sibawa mabbèrè pattulung lao ri tau laingngè. Ada-ada pada-padaèro mappapolèi matu adècèngeng risining tau iya mèngkalingaèngngi. 30 Aja' mupamessèiwi atinna Rohna Allataala. Purani rimatèrèiko sibawa Roh, mancaji appunnangenna Allataala. Iyaro Roh-è sinrupa towi boro' makkedaè Esso Aleppekengngè polèi matu ri iko. 31 Patteddènni sininna perasaang mapeddi atiè, maèlo makkabale sibawa macai. Aja'na mugora-gora sibawa makkarodda-karodda. Aja'na naengka perasaang paccèccè iyarè'ga perasaang laing pada-padaèro. 32 Sibalè'na, sitinajako makessing ati sibawa mapparessè babuwa sèddiè lao ri laingngè, sibawa sisullè siyaddampengeng pada-padato Allataala maddampengekko naolai Kristus.

Efesus 5

1 Saudara iyanaritu ana'-ana'na Allataala iya namasèiyè, rimakkuwannanaro harusu'ko makkuraga maccowèriwi contona Allataala. 2 Atuwommu sitinajai rinyawaiwi ri pammasè, pada-padato Kristus mamasèiki. Nakkarobangengngi alèna untu' idi, selaku sèddi pakkasuwiyang iya mabauè sibawa pèsennangiyèngngi atinna Allataala. 3 Iko iyanaritu umma'na Allataala. Rimakkuwannanaro sining pangkaukeng iya mappangaddiè sibawa iya dè'è nasipato, iyarè'ga angowangngè dè' nasipato engka ri tengngamu. Aja' narapii sining tau laingngè mappunnaiwi alasang untu' powadai makkedaè pogau'ko gau'-gau' pada-padaèro. 4 Dè'to musipato powadai ada-ada iya majaè, mabbicara rota', sibawa iya dè'è nasitinaja. Sibalè'na sitinajako sukkuru' lao ri Allataala. 5 Pènessaiwi madècèd-dècèng: tau iya kèdo-kèdo mappangaddiè, iyarè'ga dè'è nasipato, iyarè'ga mangowaè (kèdo-kèdo makkuwaèro pada muwi massompaè barahala), iyaro tauwè dè' naullèi mancaji anggota umma'na iya naparèntaè Kristus sibawa Allataala. 6 Aja' muribellè ri assipabbicara-bicarang iya kosongngè. Saba' gau'-gau'ènna ritu iya paompoèngngi caina Allataala lao risining tau iya dè'è namatinulu ri Alèna. 7 Jaji, aja' sises-siseng musisumpung sibawa sining tau makkuwaèro. 8 Alèmu riyolo engka ri laleng pettangngè. Makkekkuwangngè mancajino umma'na Puwangngè, jaji engkano ri laleng tajangngè. Rimakkuwannanaro harusu'ko tuwo ri laleng tajangngè. 9 Saba' polè ri tajangngè ritu mompoi sininna rupanna pangkaukeng iya makessingngè ri pakkitanna Allataala. 10 Akkuragano missengngi aga iya sennangiyèngngi atinna Puwangngè. 11 Aja' mupogau'i pangkaukeng-pangkaukeng iya dè'è nakkèguna iya napogau'è sining tau iya tuwoè ri laleng pettangngè. Sibalè'na sitinajako nabuwang gau'-gau' makkuwaèro. ( 12 Saba' gau'-gau' iya napogau'è mennang sibawa massubbu-subbuèro, muwi untu' ribicara bawang mappakasiri-sirito. ) 13 Sininna sèuwa-sèuwaè iya ripattappariyè sibawa tajang, paitai matu sibawa manessa. 14 Saba' sininna iya weddingngè riita sibawa manessa, iyanaritu matajangngi. Iyanaro saba'na naripowada, "Oto'no, èh iko matinroè, sibawa tokkonno polè ri amatèngngè! Mattappai matu Kristus ri yasè'na. " 15 Rimakkuwannanaro, pènessaiwi madècèd-dècèng atuwo-tuwommu. Aja' mutuwo pada-pada sining tau iya mapanrè. 16 Akkègunangngi madècèd-dècèng tungke' kasempatang iya engkaè ri iko, nasaba iyaè wettuè iyanaritu wettu iya majaè. 17 Aja' mumadonggo, iyakiya salidikiwi aga iya naèloriyè Puwangngè. 18 Aja' mumabo' ri anggoro'è, saba' iyaro nasolangiko matu. Sibalè'na sitinajako rikuwasai ri Rohna Allataala. 19 Pakèi ada-ada polè ri mazmur-è, èlong poji-pojiyangngè sibawa èlong rohaniè, ri laleng sining assipabbicarammu. Sitinajako nasibawang ati iya marennuè makkèlong poji-pojiyang lao ri Puwangngè. 20 Tuli sibawa passalenna muwi aga, sitinajako mattarima kasi lao ri Allataala Ambo'è ri laleng asenna Yèsus Kristus Puwatta. 21 Untu' pakalebbii Kristus, sitinajako tunru' sèddiè lao ri laingngè. 22 Bainè, tunru'no lao ri lakkaimmu, pada-pada lao ri Puwangngè. 23 Saba' lakkaiè iyanaritu kapala ri bainèna, pada-padato Kristus mancajiwi kapala ri jema'è sibawa Alènato ritu Arung Pappassalama'na jema'è iya mancajiyè tubun-Na. 24 Pada-padato jema'è tunru'i ri Kristus, makkuwatoro ri laleng sininna gau'è, harusu'i bainè tunru' ri lakkaiè. 25 Lakkaiè, amasèiwi bainèmu, pada-padato Kristus mamasèiwi jema'è enrengngè makkarobangengngi Alèna untu' iyaro jema'è. 26 Napogau'i Kristus iyaro kuwammengngi naullèi pancajiwi iyaro jema'è sibawa pappagguruwanna enrengngè naolai uwai paccemmè, kuwammengngi rimunri naullèi mabbèrèyangngi lao ri Allataala. 27 Narimakkuwannanaro naèbbui Kristus iyaro jema'è tettong sibawa maraja enrengngè mapaccing ri yolona, sibawa dè'gaga akurangenna iyarè'ga cellana muwi aga. 28 Makkuwatoniro lakkaiè harusu'i mamasèiwi bainèna pada-pada namasèinna tubunna muto. Tau iya mamasèiyèngngi bainèna bettuwanna namasèiwi alèna muto. ( 29 Dè' naengka tau benciwi tubunna. Sibalè'na, napiyarai sibawa najagaiwi pada-padato Kristus piyarai jema'-Na. 30 Riissengngi iyaro nasaba idi iyanaritu anggota-anggota tubunnaki Kristus. ) 31 Ri laleng Kitta'è tarokii, "Rimakkuwannanaro sèddiè worowanè nasalaiwi matu ambo'-indo'na untu' massèddi bainèna, namancaji sèddi matu iya duwa. " 32 Iyaro aya'èwè tampu'i bettuwang iya malamungngè. Naupasikennai iyaro sibawa assisumpungenna Kristus sibawa jema'è. 33 Iyakiya iyaro aya'èwè engkato assisumpungenna sibawa iko: Sitinajai tungke' lakkai mamasèiwi bainèna pada-pada namasèinna alèna muto sibawa sitinajai tungke' bainè makkuragai untu' pakarajai lakkainna.

Efesus 6

1 Ana'-ana'! Selaku tau maccowè ri Kristus, atinuluriwi tomatowammu nasaba iyanaritu sitinaja ripogau'. 2 "Pakarajai ambo'-indo'mu" iyanaritu parènta mammulangngè polè ri Allataala sibawa janci, 3 iyanaritu: "Kuwammengngi namumasennang enrengngè malampè umuru' ri linoè". 4 Saudara-saudara iya mancaji ambo'è! Aja' nagaukengngi ana'-ana'mu makkuwaro rupanna angkanna mancaji macai mennang. Sibalè'na, pawekke'i mennang sibawa atoreng-atorengngè enrengngè pappagguruwanna Puwangngè. 5 Saudara-saudara iya mancaji ataè! Turusiwi parèntana puwammu ri linoèwè. Pogau'i iyaro sibawa perasaang pappakaraja enrengngè mapato kuwaèttopa mattonget-tongeng pada-pada rèkko samanna mupogau'i lao ri Kristus muto. 6 Aja' mukèdo makkuwaro ri wettu rijagaimmu bawang, banna untu' lolongeng pappojiyang tolino. Iyakiya sitinajako pogau'i selaku atanna Kristus iya turusiyèngngi èlona Allataala sibawa sissukku ati. 7 Jama-jamang iya pogau'è selaku ataro, sitinajako pogau'i sibawa ati iya marennuè pada-pada rèkko Puwangngè mutumaningi, na tenniya lao ri rupa tauwè bawang. 8 Engngerangngi makkedaè tungke' tau, muwi ata iyarè'ga tau maradèka', tarimai matu pamale' polè ri Puwangngè untu' gau'-gau' iya makessingngè iya napogau'è. 9 Saudara-saudara iya mancaji puwangngè! Sitinajako kèdo makkuwatoro lao ri ata-atammu. Aja'na mupakèi mangancangngè. Engngerangngi makkedaè iko sibawa ata-atammu, pada-padako mappunnai sèddi puwang, iyanaritu Puwangngè ri surugaè. Dè' nappasilaingeng tappa. 10 Paccappurenna, sitinajako mancaji mawatang sibawa awatangeng iya mulolongengngè polè ri akuwasanna Puwangngè, nasaba massèddiko sibawa Alèna. 11 Pakèi sininna parèwa musu iya nawèrèngngèkko Allataala, kuwammengngi muwullèi mattahang mèwai siyasa'-siyasa'na Ibillisi' iya malengngoè. 12 Saba' mammusuki tenniya mèwai tolinoè, sangadinna mèwai awatangenna sininna sètangngè iya makuwasaiyèngngi wettu iya majaèwè. Riyèwai awatangenna roh-roh majaè iya makuwasaiyèngngi langiè. 13 Rimakkuwannanaro, makkekkuwangngè, pakèni sininna parèwa iya nabbèrèyangngè Allataala, kuwammengngi na ri esso iya majaè, muwullèi mèwai seranganna baliè. Sibawa kuwammengngi napuramu mammusu lettu ri paccappurenna, mawatang mupo naporè. 14 Sitinajako sadiya. Pakèi atinulurengngè lao ri Allataala selaku babbang, sibawa apatongngè selaku baju bessimmu. 15 Sitinajai alogangngè untu' mabbirittangngi Karèba Madècèng iya tiwiè asalèwangeng mancaji sapatummu. 16 Tungke' wettu pakèi atepperemmu ri Puwangngè selaku senjata pappasala; nasibawang iyaro teppe'è muwullèi peddèiwi sininna ana' pana makkèapiè polè ri Majaè. 17 Alai asalamakengngè selaku palo-palo baja, sibawa ada-adanna Allataala selaku peddang polè ri Rohna Allataala. 18 Pogau'i iya manennaro namuwassempajatto untu' mèllau pattulung polè ri Allataala. Tungke' kasempatang, assempajakko pèkkugi Rohna Allataala pimpikko. Sitinajako tuli sadiya sibawa aja' mumenyara. Tuli assempajakko untu' sininna umma'na Allataala. 19 Sibawa assempajakko untu' iyya, kuwammengngi ri wettukku mabbicara, Allataala mpèrèkka ada-ada iya coco'è. Sibawa kuwammengngi ubarani mappaddissengengngi rahasiyana Karèba Madècèngngèro. 20 Nasaba Karèba Madècèngngè ritu, mancajika sèddi duta, na makkekkuwangngè engkaka ri laleng tarungkuè. Assempajanno kuwammengngi ubarani mabbicara passalenna Karèba Madècèngngèro, pèkkugi harusu'ka mabbicara. 21 Tikhikus, Saudarata sibawa pattumani iya mapatoè ri laleng jama-jamanna Puwangngè, mappaissengengngi matu lao ri iko sininna sèuwa-sèuwaè passalekku, kuwammengngi muwissengngi keadaakku sibawa jama-jamakku. 22 Iyanaro saba'na usuroi lao ri iko untu' mappaissengengngi keadaatta lao ri iko maneng, kuwammengngi napakaloppoi atimmu. 23 Tennapodo Allataala Ambo'è, sibawa Puwang Yèsus Kristus nakkullèngiwi sininna jema'è untu' massèddi sibawa siyamasèi enrengngè tette' mateppe' ri Yèsus Kristus. 24 Tennapodo Allataala barakkakiwi Saudara maneng iya mamasèiyèngngi Puwatta Yèsus Kristus sibawa pammasè iya dè'è naullèi peddè. Salama, Paulus

Filipi 1

1 Saudara-saudara umma'na Allataala iya monroè ri Filipi, sibawa iya massèddiyènna sibawa Kristus Yèsus. Makkuwatoro Saudara-saudara pamimpingngè enrengngè pabbantu jema'è. Iyya Paulus, sibawa Timotius, ata-atanna Kristus Yèsus, 2 mammènasa tennapodo Allataala Ambo'ta sibawa Puwang Yèsus Kristus mabbèrè barakka sibawa asalèwangeng lao ri iko. 3 Tungke' uwèngngerakko, mattarima kasi'ka lao ri Allataala. 4 Sibawa sises-siseng uwassempajangeng manekko, massempajakka sibawa masennang ati. 5 Mattarima kasi'ka lao ri Allataala nasaba sipongenna esso mammulangngè lettu makkekkuwangngè, puraka mubantu pallebbangngi Karèba Madècèng polè ri Allataala. 6 Allataala muto pura pammulaiwi jama-jamang iya makessingngèro ri iko, namateppe'ka napatterui matu iyaro jama-jamangngè narapi tèpu ri Essona Kristus Yèsus polè paimeng. 7 Mèmeng ri onronna mappunnaika pappènedding pada-padaèro lao ri iko saba' iya maneng Saudara tuli macawè'i ri atikku. Makkuwatoro nasaba maccowèko tarima silaong iyya, pammasè iya nawèrèngngèkka Allataala, muwi makkekkuwangngèwè ri laleng tarungkuè iyarè'ga wettukku engka ri saliweng untu' mèwaiwi sibawa mattahangengngi Karèba Madècèngngèro. 8 Naisseng Allataala makkedaè muddani senna'ka lao ri iko sibawa pappènedding sipammasè-masè polè ri alèna Kristus Yèsus. 9 Iyanaè sempajakku lao ri iko: tennapodo pèdè' muwamasèiwi Allataala sibawa pada-padammu enrengngè matteru tattamba ri laleng pangissengengngè sibawa pappaita iya mapanrè. 10 Rimakkuwannanaro muwissengngi pilèi iya kaminang makessingngè, namapaccing matu atuwommu polè ri paccallangngè iyarè'ga muwi pattenre aga ri Essona Kristus polè paimeng. 11 Tabbollompollongngi matu atuwommu sibawa pangkaukeng iya tonget-tongengngè makessing iya weddingngè bawang napowassèlè' alèna Yèsus Kristus, naripakalebbi matu Allataala sibawa ripoji-poji. 12 Uwèloriwi muwissengngi, makkedaè gau'-gau' iya puraè kajajiyang lao ri iyya mala nassabariwi maèga tau mèngkalingai sibawa matepperiwi Karèba Madècèngngè. 13 Addimonrinna, sininna pengawal saorajaè sibawa sining tau laingngè ri kotaèwè naissengngi makkedaè ritarungkuka nasaba utumaningiwi Kristus. 14 Na ri tarungkuèro nassabariwi maèga polè risining tau Kristèngngè ri kotaèwè iya siyatepperengngè pèdè' mateppe'ni ri Puwangngè, angkanna pèdè' baraniwi mennang mabbirittangngi pasenna Allataala sibawa dè' namètau. 15 Mèmeng engka siyagangngarè ri yelle'na mennang iya mabbirittangngèngngi Kristus nasaba mangèmpurui sibawa maèloi massasa, iyakiya iya laingngè mappunnai akkatta iya mapaccingngè. 16 Iyaè sining tauwè napogau'i nasaba namasèiwi Allataala sibawa iyya, saba' naissengngi makkedaè Allataala pura suroi untu' mappaitangngi Karèba Madècèng iya tongengngèro. 17 Iyakiya tau laingngè mabbirittangngi Kristus sibawa akkatta iya dè'è namakessing; nabbirittangngi mennang untu' apentingeng paribadinna. Nanallalengiro mammènasai mennang naullèi mèbbuka pèdè' masussa ri laleng tarungkuè. 18 Iyakiya dè' namagaga! Saba' muwi maga, muwi napogau'i iyaro sibawa akkatta iya mapaccingngè iyarè'ga sibawa akkatta iya salaè, tette' towi Kristus riyabbirittang; jaji masennakka. Na tette'ka matu mappènedding makkuwaro, 19 saba' uwissengngi makkedaè nasibawang sining sempajammu enrengngè nasibawang polè ri Rohna Yèsus Kristus, ripaleppe'ka matu. 20 Iya uwacinnai senna'è sibawa uwammènasaiyè iyanaritu kuwammengngi aja' sises-siseng nasala jamakku. Sibalè'na mammènasaka kuwammengngi na tungke' wettu, lebbi-lebbipi makkekkuwangngè, weddikka mappaitang abaraningeng angkanna sininna tubu nyawaku -- muwi tuwoka iyarè'ga matèka -- ripakalebbii Kristus. 21 Nasaba untu' ri alèku, akkattana atuwokku banna untu' Kristus! Na matè bettuwanna asarong. 22 Iyakiya rèkko nasibawang atuwong ri linoèwè, weddikka pogau'i jama-jamang iya lebbi makkègunaè, dè' uwissengngi kègana harusu upilè. 23 Rigettekka polè ri duwa bagiyang. Macinna senna'ka salaiwi linoèwè untu' lao monro silaong Kristus, saba' iyanaro kaminang makessing; 24 iyakiya, untu' apentingemmu, iyanaritu lebbi kessing muwi rèkko tette'ka monro ri linoè. 25 Mateppe'ka lao ri gau'èro. Iyanaro saba'na uwissengngi tette'ka matu monro silaong Saudara maneng, kuwammengngi weddingngi tulukko mancaji lebbi mawatang sibawa lebbi masennang ri laleng atepperengngè lao ri Puwangngè. 26 Rimakkuwannanaro, rèkko lisuka matti ri iko, iko iya massèddiyènna sibawa Kristus Yèsus mappunnai matu lebbi maèga alasang untu' marasa mingki lao ri iyya. 27 Iya pentingngè iyanaritu makkedaè tuwoko situru aga iya natuntu'è Karèba Madècèng passalenna iyaro Kristus. Rimakkuwannanaro, wedding mupaga siruntu'ka iko iyarè'ga dè', uwèngkalingai matu makkedaè masse'ko massèddi enrengngè massibawa mèwa untu' banna sèddi akkatta sibawa sèddi pangèloreng; iyanaritu untu' ateppereng iya sicoco'è sibawa Karèba Madècèng polè ri Allataalaro. 28 Sitinajako tuli barani; aja' mumètau lao risining balimmu. Nanallalengiro muwappaitangngi makkedaè caui matu mennang, na iko pacau matu, nasaba alèna Allataala ritu iya mabbèrè apakalang lao ri iko. 29 Saba' Allataala pura mabbèrè pammasè lao ri iko tenniya banna untu' mateppe' lao ri Kristus, iyakiya manrasa-rasato nasaba Kristus. 30 Makkekkuwangngè maccowè tokko ri iyya ri laleng ammusureng iya padaè; iyanaritu iya puraè muwita uperjuwangkang riyolo, sibawa iya tette'è mupa uperjuwangkang lettu makkekkuwangngè, pada-pada iya puraè muwèngkalinga.

Filipi 2

1 Mawatakko, nasaba massèddiko sibawa Kristus. Sibawa tassalèwoko nasaba Kristus mamasèiko! Ripimpikko Saudara ri Rohna Allataala, nasipammasè-masè tokko enrengngè mappunnaiwi paressè babuwa sèddiè lao ri laingngè. 2 Nah, cobani tonget-tongekko pèsennangi atikku sibawa gau'-gau'èwè: Tuwono massiati sibawa pammasè padaè, pada pikkirang sibawa akkatta iya padaè. 3 Aja' mupogau'i sèuwaè nasaba risorokko ri apentingeng ri alè, iyarè'ga untu' mattempowangngi alè. Sibalè'na sitinajako tungke'-tungke' sibawa ati mariyawa mangga'i tau laingngè lebbi makessing naiya alèna. 4 Jampangiwi apentingenna tau laingngè; aja' banna na apentingeng ri alè bawang. 5 Sitinajako mappunnai attangeng pada-pada Yèsus Kristus: 6 Sitongenna Alèna pada Allataala, iyakiya dè' napèrasai makkedaè keadaan-Na iya tenritaèro harusu'i nattahangeng. 7 Sibalè'na Naleppessang manengngi nainappa mancaji pada-pada sèddiè ata. Mancajiwi pada-pada tolinoè, sibawa paita tuwo pada-pada tolinoè. 8 Napakariyawai alèna, enrengngè tuwo sibawa matinulu ri Allataala gangka matè -- iyanaritu matè ri salli. 9 Narimakkuwannaro Allataala makkai Alèna kaminang matanrè, enrengngè mpèrèngngi akuwasang iya lebbi battowaè naiya sininna akuwasang laingngè. 10 Na untu' pakarajai Yèsus, sininna mahlu'è ri surugaè, sibawa ri linoè, enrengngè ri yawana linoè, sompai matu Alèna. 11 Mangaku manengngi matu mennang makkedaè Yèsus Kristus ritu Puwang; nanallalengiro naripakalebbi Allataala Ambo'è. 12 Rimakkuwannanaro, Saudara-saudara iya upojiyè, pèkkugiko tuli matinulu lao ri iyya wettukku engka ri tengnga-tengngamu, na lebbi-lebbipi makkekkuwangngè ri wettu sibèlangngè, sitinajako matinulu lao ri iyya. Purani ripassalama'ko ri Allataala rimakkuwannanaro akkuragano matteru kuwammengngi namancaji sukku asalamakemmu. Pogau'i iyaro sibawa mappakaraja enrengngè mapato lao ri Allataala, 13 nasaba Allataala muto ritu iya majjamaè ri laleng alèmu untu' mèbbuko rèla sibawa mullèi pèsennangiwi atinna Allataala. 14 Jamai sini-sininnaè sibawa dè' muwannoko'-noko' iyarè'ga massasa. 15 Nanallalengiro muwappaitangngi makkedaè iko iyanaritu ana'-ana'na Allataala iya dè'è gaga cellana, iya tuwoè sibawa matinulu enrengngè tongeng ri tengnga-tengngana tau majaè sibawa madosaè. Na wettunna mupalettu lao ri mennang biritta iya mabbèrè atuwong, sitinajako mancaji lao ri mennang pada-pada cahaya iya mattappaè tajangiwi linoè. Rèkko tuwoko pada-padaèro, engkana matu alasang ri iyya untu' marasa mingki passalemmu ri Essona Yèsus Kristus polè paimeng. Iyanaro buttinna makkedaè perjuwangekku dè' nasiya-siya sibawa usahaku engka wassèlè'na. 17 Naullè riyunoka matu na daraku mancaji pada-pada akkarobangeng riyabbolorengngè ri yasè'na aga iya muwakkasuwiyangengngè lao ri Allataala selaku tanrang makkedaè mateppe'ko ri Alèna. Rèkko mèmeng harusu'i makkuwaro, sukkuru'ka lao ri gau'èro sibawa maccowèto marennu silaong iko. 18 Makkuwatoniro sitinajako masennang sibawa maccowè marennu sibawakka. 19 Mateppe'ka makkedaè nasibawang pattulunna Puwang Yèsus, masitta'ka suroi Timotius lao ri iko kuwammengngi weddikka tassalèwo ri biritta passalemmu. 20 Banna Timotius bawang alè-alèna tau kuwaè iya sinyawaè sibawa iyya, sibawa tonget-tongengngi napikkiri' asennangemmu. 21 Iya maneng laingngè banna naurusu'i apentingemmu alèna bawang, tenniya apentingenna Yèsus Kristus. 22 Alèmuna pura mitai buttinna makkedaè makkègunai Timotius. Majjama laddè'i silaong iyya untu' pallebbangngi Karèba Madècèng polè ri Allataala. Idi sipadduwa pada-padai ana'è sibawa ambo'è. 23 Rimakkuwannanaro, uwissenna matti pèkkugi parakaraku maccappa, usuroi matu lao ri iko. 24 Mateppe'ka makkedaè nasibawang pattulunna Puwangngè, iyya dè'tona umaitta ucèllèngi tokko matu. 25 Passalenna saudarata Epafroditus iya puraè musuro bantuka, marasa parelluka suroi lisu lao ri iko. Purana naranreng ri laleng jama-jamangngè sibawa perjuwangekku. 26 Muddani senna'i lao ri Saudara maneng, sibawa masèssai nasaba lolongemmu karèba makkedaè malasai. 27 Mèmeng tongengngi malasai angkanna cèddè'pi namatè. Iyakiya kasiyangngi Allataala ri alèna; na tenniya ri alèna bawang, iyakiya laoto ri iyya, kuwammengngi aja' upèdè' messè. 28 Iyanaro saba'na napèdè' battowato pangèlorekku untu' suroi lisu ri iko, kuwammengngi mumarennu paimeng rèkko siruntu'ko alèna, namancaji tennang tona atikku. 29 Jaji duppaiwi sibawa masennang ati selaku sèddi Saudara iya mateppe'è. Angke'i sininna tauwè iya naèwaè pada-pada. 30 Untu' apentingenna jema'-jema'na Kristus, cèddè'pi namatè; nappèsonangngi nyawana untu' tulukka ri laleng asemmu.

Filipi 3

1 Paccappurenna, Saudara-saudaraku, sitinajako marennu nasaba massèddini sibawa Puwangngè. Dè' umatane untu' pakkolingngi aga iya puraè uwokii ri yolona lao ri iko; saba' makessing gau'èro untu' asalamakemmu. 2 Atike'ko lao risining tau iya pogau'èngngi iya majaè, iyaro sining tauwè sipato'i riteppu 'asu. ' Nadessa'i mennang sining tauwè kuwammengngi narisunna. 3 Padahal idi'na ritu sining tau iya puraè tarimai sunna iya tongengngè, tenniya mennang. Risompai Allataala sibawa pappimpinna muto Rohna Allataala, na sukkuru'ki nasaba tuwoki massèddi sibawa Kristus Yèsus. Dè' tataggattung ri upacara-upacara iya mallahèrengngè. 4 Sitongenna weddikka'sa maddennuwang ri upacara-upacaraèro. Saba' rèkko engka sèddi tau marasa mappunnai alasang untu' maddennuwang ri upacaraèro iya mallahèrengngè, lebbi kessippi iyya. 5 Risunna'ka wettukku makkèumuru aruwa essona. Jajika selaku sèddi tau Israèl, polè ri suku bangsa Bènyamin; tau Ibrani aslika. Ri laleng atinulurengngè ri hukkunna agama Yahudiè, anggotanaka golongang Farisiè. 6 Mala makkumani assumange'ku angkanna ucallai jema'è. Rèkko ri angke'i situru hukkunna agama Yahudiè, iyya sèddika tau makessing iya dè'è cellana. 7 Iyakiya nasaba Kristus, nasininna iya riyangga'è riyolo selaku iya mappasaroè, makkekkuwangngè mancajini iya mapparogiyè. 8 Tenniya bawang gau'-gau'èro; iyakiya mala sininna sèuwa-sèuwaè uwangga'i selaku gau'-gau' iya mapparogiyè bawang. Iya uwappunnaiyè makkekkuwangngèwè iyanaritu lebbi mangke'i: iyanaritu missengngi Yèsus Kristus, Puwakku. Nasaba Kristus, uleppessanni sini-sininnaè. Uwangga' manengngiro selaku warowo bawang, kuwammengngi weddingngi ulolongeng Kristus, 9 sibawa tonget-tongeng massèddi sibawa Alèna. Assisumpungeng iya makessingngè sibawa Allataala, dè'na na iyya musahakangngi sibawa naolai laleng matinuluè lao ri hukkung agamaè. Makkekkuwangngè mappunnaika assisumpungeng iya makessingngè sibawa Allataala, nasaba mateppe'ka lao ri Kristus. Jaji, assisumpungeng iya makessingngèro polèi ri Allataala, sibawa nassabari teppe' lao ri Yèsus Kristus. 10 Sèddi-sèddinna iya uwacinnaiyè iyanaritu kuwammengngi uwissengngi Kristus, sibawa pèneddingiwi akuwasang iya patuwoèngngi Alèna polè ri amatèngngè. Macinnaka maccowè manrasa-rasa sibawa Alèna enrengngè mancaji pada-pada Alèna ri laleng amatèn-Na. 11 Namammènasaka makkedaè alèkuto ripatuwo matu paimeng polè ri amatèngngè. 12 Dè' uwakkeda makkedaè mallolongekka, iyarè'ga mancaji sukkuka. Iyakiya matteruka makkuraga lolongengngi hadiya iya napassadiyaè Kristus Yèsus. Untu' iyanaro nanasitta'ka sibawa napancajika appunnangen-Na. 13 Tentu, Saudara-saudara, sitongenna dè' umarasa makkedaè ulolongenni iyaro hadiyaè. Iyakiya engka sèddi passaleng iya upogau'è, iyanaritu uwallupaiwi aga iya engkaè ri munrikku sibawa makkuraga senna' rapii aga iya engkaè ri yolo. 14 Iyanaro saba'na ulari matteru mattuju ri akkatta paccappurengngè untu' lolongeng apakalang, iyanaritu atuwong ri surugaè; untu' iyanaro naobbika Allataala naolai Kristus Yèsus. 15 Idi maneng iya dèwasaènna secara rohani, harusu'i maggau' makkuwaro. Iyakiya rèkko ri yelle'mu engka mappallolongeng laingngè, napakatajang towi matu Allataala lao ri iko. 16 Namuni iyaè gau'è sitinajai ripènessai: Harusu'ki tette' tuwo situru peraturang iya puraè riyaccowèri lettu makkekkuwangngèwè. 17 Saudara-saudara iya maneng! Accowèriwi contoku. Purani' mabbèrè conto iya tongengngè, rimakkuwannanaro pènessaiwi madècèd-dècèng sining tau iya maccowèriyèngngi contotaro. 18 Biyasana paissengiko, na makkekkuwangngè upakkolissi sibawa teri, makkedaè engka maèga tau iya atuwonnaè nasolangiwi bettuwanna amatènna Kristus ri salliè. 19 Atuwonna sining tau pada-padaèro maccappa'i matu sibawa ancurukeng, saba' dèwatana iyanaritu cinna tubunna muto mennang. Gau'-gau' iya mappakasiri-siriè, mala iyanaro mennang nammingkikeng; saba' banna mennang mappikkiri'i gau'-gau' iya naèloriyè linoèwè bawang. 20 Iyakiya idi'è iyanaritu warga negarana surugaè. Polè kuwatoniro Arung Pappassalama'ta, Puwang Yèsus Kristus, polèi matu. Alèna ritu ritajeng sibawa muddani. 21 Watakkalèta iya malemmaè sibawa weddingngè ancuru'è, napinrai matu Kristus mancaji pada-pada watakkalè-Na iya malebbiè. Weddingngi napogau' iyaro nasaba mappunnaiwi akuwasang untu' patunru'i sini-sininnaè.

Filipi 4

1 Rimakkuwannanaro, Saudara-saudaraku iya uwèloriyè, makkuwaniro sitinajammu tuwo sibawa mattonget-tongeng mateppe' lao ri Puwangngè. Muddaniwi atikku ri iko! Iko ritu uwattuwang mèbbuka marennu. 2 Saudara Euodia sibawa Saudara Sintikè! Uwèllauwi sibawa masero kuwammengngi Saudara massiatiwi selaku sining tau iya siatepperengngè. 3 Lao ri sellaoku iya matinuluè, uwèllau towi kuwammengngi Saudara bantuwi iya duwa makkunraièro. Purani majjama senna' mennang sibawakka untu' mabbirittangngi Karèba Madècèng polè ri Allataala; pada-pada Klèmèn sibawa sininna tau laingngè iya majjamaè sibawakka. Aseng-ngasenna mennang engkai ri laleng Kitta'na Tau Tuwoè. 4 Tennapodo tuli marennuko nasaba tuwoko massèddi sibawa Puwangngè. Siseppa makkeda: arennuno! 5 Sitinajai sininna tauwè naullèi mitai kèdo-kèdomu iya makessing atiè. Saba' dè'na namaittana napolè matu Puwangngè. 6 Aja mubata-bata passalenna muwi aga. Ri laleng sininna gau'-gau'è, assempajanno sibawa pangoloni parèllaummu ri Allataala. Aga muwapparelluwang, tuli powadai lao ri Allataala ri laleng mattarima kasi. 7 Na asalèwangeng polè ri Allataala iya dè'è nakkullè napahang tolinoè, jagaiwi matu atimmu sibawa pikkirammu iya massèddiènna sibawa Kristus Yèsus. 8 Paccappurenna, Saudara-saudara lisekiwi pikkirammu sibawa gau'-gau' iya engkaè angke'na, iya sitinajaè ripoji, iyanaritu gau'-gau' iya tongengngè, iya malebbiè, iya adèlè'è, mapaccingngè, macenningngè, sibawa makessingngè. 9 Pajoppani aga muwaggurui sibawa mutarima polè ri iyya; muwi polè ri ada-adakku iyarè'ga polè risining pangkaukekku. Allataala assalenna asalèwangengngè, sibawakko matu. 10 Ri laleng atuwokku iya massèddiè sibawa Puwangngè, masennang senna'i pappèneddikku, saba' puranana makkuwaro ittana, makkekkuwangngè makkullèsiko pikkiri'i keadaakku. Akkattaku tenniya makkedaè muwallupaina; mèmeng muwajampangika, iyakiya dè' mulolongeng kasempatang untu' mappaitangngi. 11 Upangoloi iyaè tenniya nasaba akurangekka, saba' purana magguru paggenne'i aga iya engkaè. 12 Upèneddingini atuwong iya akurangengngè, sibawato atuwong alebbingngè. Uwissenni rahasiyana untu' moloiwi keadaang muwi maragaè; muwi keadaang dècèng iyarè'ga keadaang kasiyasi, muwi keadaang masagèna, iyarè'ga keadaang akurangeng. 13 Nasibawang akuwasang iya nabbèrèyangngè Kristus lao ri iyya, mappunnaika awatangeng moloiwi sininna rupanna keadaangngè. 14 Iyakiya puraka mutulung ri laleng asusakku; na aga iya mupogau'èro mèmeng makessing. 15 Saudara-saudara tau Filipiè! Alèmuna misseng tongengngi makkedaè wettukku salaiwi Makedonia riyolo, wettunna Karèba Madècèngngèro uwappallebbangeng untu' bunge'-bunge'na, iko ritu bawang alè-alèna jema' iya bantuèkka; iko bawang alè-alèna iya maccowèè kanyamèi peri nyamenna sibawakka. 16 Wettukku ri Tèsalonika sibawa mapparelluwang bantuwang, dè' nawèkkasiseng muwa kirikko bantuwang lao ri iyya. 17 Tenniya bettuwanna iyaro macinna muka bawang tarima pabbèrè. Iya uwacinnaiyè iyanaritu kuwammengngi uwullèi mitai wassèlè'-wassèlè' iya tambaiyèngngi albammu. 18 Purani utarima maneng -- mala lebbi nagenne'è! Sininna pabbèrè iya muwakkiringengngè lao ri iyya, purani utarima polè ri Epafroditus. Makkekkuwangngè uwappunnaini sininna iya uwapparelluwangngè. Sining pabbèrèmuro iyanaritu pada-padai bau mabau polè ri akkarobangeng iya riyakkasuwiyangengngè lao ri Allataala sibawa iya natarimaè Allataala sibawa masennang ati. 19 Allataala iya usompaè, maona sibawa asugireng ri laleng Kristus Yèsus, pennoiwi matu sininna apparelluwammu. 20 Ripojiwi Allataala Ambo'ta lettu mannennungeng! Aming. 21 Palettu'i sellekku lao ri sininna umma'na Allataala iya massèddiè sibawa Kristus Yèsus. Sibawa tarima towi sellenna saudarata iya engkaè sibawakka. 22 Sininna umma'na Allataala ri kotaèwè, utamana mennang iya polè ri saorajana Kaisar, massellengngi lao ri iko. 23 Tennapodo Puwang Yèsus Kristus barakkaki manengngi saudara. Salama, Paulus sibawa Timotius

Kolose 1

1 Saudara-saudara umma'na Allataala ri Kolosè iya matinuluè massèddi sibawa Kristus! Selaku rasulna Kristus Yèsus, -- iya nakkaè Allataala -- iyya, Paulus, silaong Saudarata Timotius, mammènasa tennapodo Allataala Ambo'ta mabbèrè barakka sibawa asalèwangeng lao ri iko. 3 Purani riyèngkalinga makkedaè mateppe'ko lao ri Yèsus Kristus sibawa muwamasèi manenna umma'na Allataala. Iyanaro saba'na wettutta massempajangekko, tuli mattarima kasi'ki lao ri Allataala, Ambo'na Puwatta Yèsus Kristus. 5 Mateppe'ko sibawa mamasèko, saba' mammènasako ri aga iya napassadiyaè Allataala ri surugaè untu' iko. Purani muwèngkalinga passalenna gau'èro, wettunna Karèba Madècèng tongengngè iya polè ri Allataala ripalettu lao ri iko. 6 Iyaro karèba polè ri Allataala mallebbanni lao ri sininna linoè sibawa atuwonna tauwè matterui ribarakkaki ri karèbaèro, pada-pada muto atuwommu ribarakkakiwi mappammulai wettunna muwèngkalinga passalenna pammasèna Allataala sibawa tonget-tongengngi nattemmekinna. 7 Iyaro gau'è napalettu'i Epafras lao ri Saudara, sellao iya riyamasèiyè. Alèna ritu pajjamana Kristus iya matinuluè majjama untu' apentingetta. 8 Polè ri alènai ritu riyèngkalingai makkedaè nasibawang Rohna Allataala muwullèi siyamasèyang. 9 Iyanaro saba'na natuli massempajakki untu' iko sipongenna riyèngkalinga passalemmu. Riyèllauwi ri Allataala kuwammengngi Rohna Allataala mpèrèkko apanrèng sibawa pappèjeppu angkanna muwisseng sibawa sukku aga napuwèlo Allataala. 10 Nanallalengiwi muwullèi tuwo situru èlona Allataala, sibawa tuli pèsennangiwi atin-Na, angkanna ri laleng sininna sèuwa-sèuwaè muwullèi powassèlè' gau'-gau' iya makessingngè. Sibawa pangissengemmu passalenna Allataala tattamba towi matu. 11 Tennapodo nasibawang akuwasang polè ri Allataala iya marajaè, ripèwatangiko angkanna muwullèi manrasa-rasaiwi sini-sininnaè sibawa sabbara enrengngè masennang ati 12 kuwaèttopa mattarima kasi lao ri Ambo'è. Saba' Ambo'è ritu mèbbuko sitinaja tarimai aga iya puraè napassadiya Allataala lao ri umma'-Na sibawa akkarungen-Na iya matajangngè. 13 Puraki napaleppe' polè ri akuwasanna pettangngè sibawa napalèttè'ki ri laleng akkarungenna Ana'-Na iya Namasèiyè. 14 Nasaba Ana'-Naro naripaleppe'ki; bettuwanna dosa-dosata riyaddampengenni. 15 Kristus iyanaritu gambara'na Allataala iya manessaè iya dè'è napaita; Kristus iyanaritu ana' iya macowaè, lebbi pentingngi naiya sininna ripancajiyè. 16 Saba' naolai Alèna, Allataala pancajiwi sininna sèuwa-sèuwaè ri surugaè sibawa ri yasè'na tanaè, sininna iya paitaè sibawa dè'è napaita, muttama toni sininna roh iya makuwasaè sibawa mapparèntaè. Sininna alangngèwè ripancajiwi naolai Kristus sibawa untu' Kristus. 17 Riwettu dè'napa naengka sèuwa-sèuwaè, engka mèmenni Kristus. Sibawa nasaba Alènato ritu nasininna sèuwa-sèuwaè engkai ri onronna tungke'-tungke'. 18 Alèna ritu kapalana tubunna, iyanaritu jema'è, nasaba Alèna ritu assalenna atuwonna jema'èro. Alèna ritu ana' macowa, iya bunge'-bunge'è ripatuwo paimeng polè ri amatèngngè, kuwammengngi na Alèna bawang iya mancaji kaminang pentingngè polè ri sininna sèuwa-sèuwaè. 19 Alèna Allataala ritu puwèloi kuwammengngi sininna sèuwa-sèuwaè iya engkaè ri Alèna Allataala, engka towi sibawa sukku ri Alèna Ana'-Na. 20 Sibawa naola towi iyaro Ana'è Allataala pettuiwi sininna sèuwa-sèuwaè nasimadècèngeng paimeng sibawa Alèna -- muwi iya engkaè ri linoè iyarè'ga iya engkaè ri surugaè. Napogau'i Allataala iyaro naolai amatènna Ana'-Na ri aju salliè. 21 Riyolo mabèlako polè ri Allataala. Mumusui nasaba ampè-ampèmu sibawa pikkirammu majai. 22 Iyakiya makkekkuwangngè, ri laleng amatènna Ana'-Na, Allataala mèbbui assisumpungemmu sibawa Alèna simadècèngeng paimeng. Nasibawang caraèro naullèi tiwiko mangolo ri Allataala ri laleng keadaang mapaccing, tulèng sibawa dè' cellana. 23 Iyakiya tentu harusu'ko tette' matinulu mateppe' sibawa tettong masse ri atepperemmu. Aja' narapii muleppessangngi ammènasang iya puraè riwèrèkko wettunna mutarima Karèba Madècèng polè ri Allataala. Iyaro karèbaè purani riyabbirittang lao ri tungke' tau ri sininna linoè. Na untu' iyanaro iyya, Paulus, namancaji pattumani. 24 Makkekkuwangngè mammènasaka manrasa-rasa untu' apentingemmu. Nasaba anrasa-rasang watakkalèku, upaggenne'i aga iya harusu'è nanrasa-rasai Kristus untu' jema'-Na, iyanaritu tubun-Na. 25 Allataala suroka mancaji pattumaninna jema'-Na untu' apentingemmu. Harusu'ka palettu'i biritta polè ri Allataala, iya manenna; 26 iyanaritu biritta iya maddatu-datuè taung labe'è rirahasiyakang ri Allataala lao ri sininna tauwè, iyakiya makkekkuwangngè ripannessai lao ri umma'-Na. 27 Lao ri umma'-Naro maèloi Allataala pannessai pèkkugi kessinna sibawa rajanna rahasiya-Naro untu' sininna rupa tauwè. Iyaro rahasiyaè iyanaritu: Engkai Kristus ri laleng alèmu, bettuwanna maccowèko matu pèneddingiwi arajanna Allataala. 28 Kristus ritu iya riyabbirittangngè lao ri tungke' tau. Riparèngngerangiwi sibawa ripagguru manengngi mennang sibawa sininna apanrèngngè. Akkattata iyanaritu kuwammengngi na tungke' tau weddingngi ritiwi lao ri Allataala, selaku tau iya dèwasaè ri laleng gau'-gau' rohaniè, nasaba massèddini sibawa Kristus. 29 Untu' lettu ri gau'èro majjama laddè'ka. Uwakkullèyangngi sibawa sininna awatangekku iya nabbèrèyangngè Kristus lao ri iyya iya majjamaè ri laleng alèku sibawa penno akuwasang.

Kolose 2

1 Macinnaka muwissengngi pèkkugi serona mèwaka ri laleng batèkku untu' iko sibawa untu' mennang iya engkaè ri Laodikia enrengngè sininna iya dè'è naissekka secara paribadi. 2 Iya manennaè upogau'i kuwammengngi namawatang atinna mennang enrengngè siyamasèiwi mennang angkanna mare'i mennang massèddi. Nanallalengiro natonget-tongengngi mennang napahang sibawa mateppe' enrengngè naisseng rahasiyana Allataala, iyanaritu Yèsus Kristus muto. 3 Kristus ritu timpa'i sininna apanrènna enrengngè pangissengenna Allataala iya tassubbuè riyolo. 4 Uwappaissengengngi iyaè kuwammengngi aja' naribengnguwakko muwi riniga iya macenningngè tèmunna lao ri iko. 5 Nasaba muni mabèlaka polè ri iko, angga'ka engka ri yelle'mu. Sibawa marennuka mitako massiati enrengngè masse mateppe' lao ri Kristus. 6 Pura natarimani Saudara-saudara Kristus Yèsus selaku Puwang. Rimakkuwannanaro sitinajako massèddi sibawa Alèna, 7 enrengngè makkure' ri laleng Alèna. Sitinajako patettongngi atuwonna na Kristus selaku pallapi'na. Sitinajako pèdè mateppe' lao ri Yèsus Kristus manuru aga iya puraè ripagguruwangngèkko. Nasitinajai atimmu luwang sibawa pattarima kasi. 8 Sitinajako matike', aja' narapii engka palaiko siyo-siyo sibawa pangissengeng-pangissengeng tolino iya dè'è nakkèguna, sangadinna banna mappapusaè. Iyaro sining pangissengengngè dè' napolè ri Kristus, sangadinna polèi ri pallolongenna tolinoè bawang sibawa polè ri roh-roh iya makuwasaiyèngngi linoè. 9 Saba' sininna paribadinna Allataala monroi ri laleng Kristus, iyanaritu ri tolino-Na. 10 Sibawa nasaba tuwoi massèddi sibawa Kristus, nariwèrèng tokko atuwong iya sukkuè. Nasaba Kristus iyanaritu kapalana tungke' roh iya makuwasaè sibawa mapparèntaè. 11 Nasaba massèddiko sibawa Kristus, napura risunna'ko, tenniya sunna iya naèbbuè tolinoè, sangadinna sunna iya naèbbuè Kristus, iya paleppe'èkko polè ri akuwasanna sipa'-sipa' iya madosaè. 12 Saba' wettunna ricemmèko, rikuburu'ko silaong Kristus; nasibawang iyaro acemmèngngètto, maccowè tokko ripatuwo paimeng silaong Kristus nasaba mateppe'ko ri akuwasanna Allataala iya puraè patuwoi Kristus polè ri amatèngngè. 13 Riyolo, matèko secara rohani nasaba madosako, sibawa nasaba dè' narisunna'ko secara mallahèreng. Iyakiya makkekkuwangngè Allataala patuwoko silaong Kristus. Purani naddampengeng Allataala sininna dosata, 14 enrengngè leddai sure' inretta, iya mancangngèkki sibawa sara'-sara' iya matane'è. Ri laleng nasallina iyaro sure'è ri aju salliè, naleddai Allataala sininna natenrekengngèkki. 15 Ri sallièro, naèbbui Kristus sininna roh-roh iya mapparèntaè sibawa makuwasaè mancaji dè'na pakkullènna. Ripancajiwi mennang akkita-itang ri tau maègaè wettunna Kristus tinrosiwi mennang selaku tawangeng ri laleng barisi' apakalan-Na. 16 Rimakkuwannanaro aja' muleppessangngi tauwè passaloko passalenna anrè iyarè'ga ènungengngè, iyarè'ga passalenna esso-esso marajana agamaè, iyarè'ga ramè-ramè uleng baruè, iyarè'to passalenna Esso Saba'è. 17 Iya manennaro banna wajo-wajona bawang polè ri gau'-gau iya maèloè polè, iyakiya annessana iyaro gau'-gau'è iyanaritu Kristus! 18 Aja' muleppessangngi alèmu riparogi ri tau iya majjaiyèngngi pakariyawai alèna sibawa iya massompaè malaèka'-malaèka'. Iyaro tauwè matempoi sibawa sining pikkiranna iya linoèmmi bawang enrengngè mammingki-mingkikengngi sining pakkitang dè'è padanna, 19 angkanna dè'na nakkatenning ri Kristus iya mancaji uluè. Ri yawa pappimpinna Kristus, sininna tubuè ripiyarai enrengngè ripassèddiwi ri padduppa-duppanna, kuwaèttopa mpekke'i situru èlona Allataala. 20 Purani matèko silaong Kristus, sibawa purani ripaleppe polè ri roh-roh iya makuwasaiyèngngi alangngè. Nah, magi namutuwo pada-pada tau iya rikuwasaiyè mupa ri linoèwè? Magi saudara natunru lao ri peraturang-peraturang pada-padaèwè, 21 "Aja' mukarawai iyaè", "Aja' mukarawai iyaro", "Aja' mugèssai iyaè". 22 Sininna iyaro peraturangngè iyanaritu passalenna gau'-gau' makkuwaèro iya ripakèènna dè'na nakkègunana. Iyaro banna peraturang-peraturang sibawa pappagguruwang-pappagguruwang iya naèbbuè tolinoè. 23 Mèmeng paitai iyaro gau'è makessingngi, sibawa pappètangngana kuwammengngi tauwè nasompai malaèka'è, pakariyawai alèna enrengngè sissai alèna; iyakiya iya manennaro dè' nakkèguna untu' makuwasaiwi napessunna tolinoè.

Kolose 3

1 Purano ripatuwo paimeng silaong Kristus. Rimakkuwannanaro harusu'ko makkuraga untu' lolongengngi gau'-gau' iya engkaè ri surugaè, kègi Kristus tudang ri seddè ataunna Allataala. 2 Pattujui pikkirammu ri gau'-gau'è kuwaro, aja' na ri gau'-gau' iya engkaè ri linoè. 3 Saba matèko, na atuwommu tassubbui silaong Kristus ri laleng Allataala. 4 Nah, assalenna atuwommu iya tongengngè iyanaritu Kristus sibawa rèkko paitai matti malluru tokko matu silaong alèna ri laleng arajan-Na! 5 Rimakkuwannanaro, pammatèni sining cinna linoè iya madduppèluriyèngngi alèmu, padaènna mappangaddi, gau'-gau' iya dè'è nasipato, hawa napessu, pangèloreng iya majaè, sibawa angowangngè (nasaba angowangngè sinrupai massompaè barahala). 6 Gau'-gau' sinrupaèro paènrè'i caina Allataala lao risining tau iya dè'è natinuluriwi. 7 Riyolo muturusi towi iyaro sining pangèlorengngè, wettummu rikuwasai ri alèna. 8 Iyakiya makkekkuwangngè sitinajako mabbèyangngi gau'-gau' iya majaè polè ri alèmu; aja'na mumacai iyarè'ga majjallo, iyarè'ga mappunnai perasaang benci lao ri tau laingngè. Aja' sises-siseng nassu polè ri tèmummu ada-ada makkaroddaiyèngngi tauwè iyarè'ga ada-ada macarèpaè. 9 Aja' muwabbellè sèddiè lao ri laingngè, saba' atuwong pura labe'è sibawa sininna sipa'na purani muleppessang. 10 Makkekkuwangngè purako riwèrèng atuwong iya mabaruè. Iko iyanaritu tolino baru, iya mattengngangngè ripakabarui matteru-teru ri Pappancajinna, iyanaritu Allataala, situru rupan-Na muto. Akkattana iyanaritu kuwammengngi muwissengngi Allataala sibawa sukku. 11 Selaku addimonrinna iyaro lennye'i sininna assilaingenna tau Yahudiè sibawa tenniyaè Yahudi, tau risunna'è sibawa tau dè'è narisunna, dè'na gaga assilaingenna tau polè-polè sibawa tau dè'è nakkèyampè, ataè sibawa tau maradèka'è, saba' Kristus iyanaritu sini-sininnaè enrengngè massèddiwi sibawa sininna mennang! 12 Saudara iyanaritu umma'na Allataala, Allataala mamasèiko sibawa pilèko untu' mancaji appunnangen-Na iya napallaingngè. Iyanaro saba'na na harusu'ko mappaitangngi paressè babuwaè, harusu'ko makessing ati, pakariyawai atimmu, malemma kininnawa, sibawa tahang manrasa-rasa. 13 Harusu'ko sabbara sèddiè lao ri laingngè, sibawa sisullè siyaddampengeng rèkko engka maèlo makkabale lao ri laingngè. Masennangngi atinna Puwangngè maddampengengngekko, jaji harusu tokko maèlo maddampengengngi sèddiè sibawa laingngè. 14 Iya kaminang pentingngè iyanaritu: Harusu'ko siyamasèi saba' pammasè ritu passèddi manengngi Saudara-saudara angkanna mancaji sukku. 15 Sitinajai sining apettummu ripattentui ri adamèngeng iya nabbèrèyangngè Kristus ri laleng atimmu. Saba' Allataala mobbiko untu' mancaji anggota sèddi tubu, kuwammengngi mutuwo ri laleng adamèngeng polè ri Kristusro. Sitinajako mattarima kasi. 16 Sitinajai sining pappagguruwanna Kristus mattemme ri laleng atimmu iya pennoè barakka. Sitinajako sisullè sipagguru sibawa sisullè sipangajari iya kaminang makessingngè. Puwèlonni Mazmur-è sibawa poji-pojiyangngè enrengngè èlokkèlong rohaniè; akkèlonno untu' Allataala sibawa perasaang sukkuru' ri laleng atimmu. 17 Sininna aga iya mupogau'è iyarè'ga mupowadaè, harusu'i iyaro ripogau' sibawa ripowada untu' asenna Puwang Yèsus. Sukkuru' lao ri Allataala Ambo'è untu' aga iya napogau'è Yèsus lao ri iko. 18 Saudara-saudara iya mancaji bainè! Atinuluno lao ri lakkaimmu, saba' harusu'i makkuwaro kèdo-kèdo'mu selaku tau Kristèng. 19 Saudara-saudara iya mancaji lakkaiè! Amasèiwi bainèmu. Aja' mumakassara' lao ri mennang. 20 Ana'-ana'! Kewajibammu iyanaritu selaku tau Kristèng untu' matinulu lao ri ambo' indo'è, nasaba iyanaro pèsennangiwi atinna Allataala. 21 Saudara-saudara iya mancaji ambo'è! Aja' mupeddiriwi atinna ana'-ana'mu angkanna pettu paddennuwangngi mennang. 22 Saudara-saudara iya mancaji ataè! Ri laleng sininna passalengngè sitinajako matinulu lao ri puwammu ri linoèwè. Aja' mumatinulu lao ri mennang banna ri wettunna mennang jagaiko, nasaba macinnako ripoji. Atinuluriwi mennang sibawa ati iya matinuluè, nasaba mupakalebbii Puwangngè. 23 Muwi jama-jamang aga riwèrèkko, sitinajako sibawa sukku atimmu pada-pada rèkko samanna Puwangngè ritu mutumaningi na tenniya bawang tolinoè. 24 Engngerangngi makkedaè tarimako matu appalang polè ri Puwangngè. Aga iya napassadiyaè Puwangngè untu' umma'-Na, iyanaritu riwèrèkko matu. Saba' puwang iya sitongennaè mutumaningi iyanaritu Alèna Kristus. 25 Na muwi niga iya pogau'è asalang, natanggungngi matu iyaro sining asalanna; nasaba dè' nappasilaingeng Puwangngè.

Kolose 4

1 Saudara-saudara iya mancaji puwangngè! Sitinajako gaukengngi atammu sibawa tongeng enrengngè adèlè'. Engngerangngi makkedaè mappunnai tokko sèddi puwang ri surugaè. 2 Sitinajako massempajang sibawa matinulu enrengngè jaga-jaga, nasukkuru'to lao ri Allataala. 3 Assempajang tokko untu' idi kuwammengngi nawèrèkki kasempatang Allataala iya makessingngè untu' mappallebbangengngi biritta passalenna rahasiyana Kristus. Nasaba gau'èro, na uwengka makkekkuwangngè ri laleng tarungkuè. 4 Assempajanno kuwammengngi uwullèi pannessai iyaro rahasiyaè sinnessa-nessana pèkkugi harusu'è. 5 Ri laleng assisumpungemmu sibawa sining tau iya dè'è namateppe', sitinajako tuwo sibawa mapanrè enrengngè pakèi tungke' kasempatangngè sibawa makessing. 6 Sitinajai sining passaleng iya mupowadaè tuli mappakasennangngi sibawa mattarè'i. Sitinajai muwisseng pèkkugi harusu'ko baliwi sining pakkutanana tauwè. 7 Tikhikus, Saudarata iya riyamasèiyè, paissengiko matu sininna sèuwa-sèuwaè passalekku. Matinului majjama silaong idi untu' Puwangngè. 8 Usuroi lao ri iko sibawa alasang kuwammengngi muwissengngi keadaatta sibawa natassalèwoko. 9 Maèloi lao Onèsimus silaong Tikhikus; sèddiwi polè ri yelle'mu. Sèddiwi tau iya matinuluè, sibawa idi mamasèiwi. Alèna sibawa Tikhikus paissengiko matu sini-sininnaè iya kajajiyangngè ri onrokkuè. 10 Aristarkhus, iya engkaè ri laleng tarungkuè sibawa iyya, masselleng lao ri iko. Makkuwatoro Markus, sapposisenna Barnabas. (Purani rikiringekko karèba untu' duppaiwi rèkko laowi ri iko. ) 11 Sellennato Yèsus iya riyasengngètto Yustus. Polè risining tau Yahudiè iya mateppeènna ri Puwang Yèsus, banna mennang sipattellu bawang iya majjamaè makkekkuwangngè sibawakka untu' pajoppai jamang polè ri Allataala. Tonget-tongengngi mennang natulukka. 12 Selleng polè ri Epafras. Polè towi ri yelle'mu. Atannai Kristus Yèsus, iya tuli massempajangngè sibawa matonget-tongeng untu' iko. Naèllauwi sibawa masero lao ri Allataala kuwammengngi na atepperemmu mancaji mawatangngi sibawa tonget-tongekko dèwasa, kuwammengngi sukkuko matinulu lao ri èlona Allataala. 13 Alèku sabbingngi makkedaè purani' majjama senna' untu' iko sibawa untu' sining tau iya engkaè ri Laodikia sibawa Hierapolis. 14 Dottoro' Lukas, iya tamasèiyè, sibawa Dèmas kiring selleng lao ri iko. 15 Palettukengngi selletta ri Saudara-saudara Kristèngngè ri Laodikia; makkuwatoro lao ri Nimfa, sibawa lao ri jema'è iya massompaè ri bolana. 16 Rèkko purani ribacangeng iyaè sure'è lao ri iko, usahakangngi kuwammengngi naribaca towi iyaro lao ri jema'è iya engkaè ri Laodikia. Makkuwatoro harusu'ko bacai sure' iya maèloè rikiring polè ri Laodikia lao ri iko. 17 Sibawa paissengiwi Arkhipus, "Pattèpui jamang iya riwèrèngngèkko untu' tumaningiwi Puwangngè. " 18 Sellekku polè ri iyya, Paulus. Alèku mokii iyaè bagiyangngè. Aja' muwallupaiwi makkedaè engka mupa' ri laleng tarungkuè! Tennapodo Puwangngè barakkakiko. Salama, Paulus sibawa Timotius

1 Tesalonika 1

1 Saudara-saudara jema'è ri Tèsalonika, iya mancajiyè umma'na Allataala Ambo'è sibawa Puwang Yèsus Kristus. Idi, iyanaritu Paulus, Silas sibawa Timotius mammènasa tennapodo Allataala mabbèrè barakka sibawa asalèwangeng lao ri iko. 2 Tuli sukkuru'ki lao ri Allataala nasaba Saudara maneng. Tungke' massempajakki lao ri Allataala sibawa Ambo'ta tuli riyèngngerakko. Tuli riyassempayangekko. Marèngngerakki pekkugiko mappaitangngi ri laleng pangkaukeng makkedaè mateppe'ko lao ri Kristus, pèkkugiko mamasèiwi tau laingngè angkanna tumaningiwi mennang, sibawa pèkkugiko maddennuwang masse lao ri Puwatta Yèsus Kristus. 4 Riisseng idi Saudara-saudara, makkedaè Allataala mamasèiko, sibawa pura pilèko mancaji appunnangen-Na iya mallaingngè. 5 Saba' idi palettu'i Karèba Madècèngngè lao ri iko tenniya sibawa ada-ada bawang, iyakiya nasibawatto akuwasang, nasibawang Rohna Allataala. Nasibawang ateppereng makkedaè iyaro Karèba Madècèngngè tongengngi. Muwisseng pèkkugiki tuwo untu' apentingemmu wettutta engka ri tengnga-tengngamu. 6 Muwaccowèriwi kèdo-kèdota sibawa kèdo-kèdona Puwangngè. Namuni manrasa-rasa senna'ko, mutarimai sibawa marennu karèba iya riyabbirittangngè lao ri iko. Iyaro arennungngè nabbèrèyangngi Rohna Allataala. 7 Nallalengiro mancaji contoko untu' sininna tau Kristèngngè iya engkaè ri Makedonia sibawa Akhaya. 8 Saba' mappammulai polè ri iko, biritta passalenna Puwangngè mallebbanni lettu ri Makedonia sibawa Akhaya. Na tenniya iyaro bawang, mala biritta passalenna pèkkugiko mateppe' lao ri Allataala lettu'ni kègi-kègi, angkanna dè'na taparelluna powadai agi-agi. 9 Sininna iyaro tauwè mabbicarai passalenna pèkkugiko tarimaki wettutta riyolo lao ri iko. Mabbicarai mennang passalenna pèkkugiko salaiwi barahala-barahalaè, sibawa lao ri sèddi-sèddinna Allataala iya tuwoè untu' mattumani ri Alèna. 10 Mabbicara towi mennang passalenna pèkkugiko mammènasaiwi apolènna Ana'na Allataala polè ri surugaè, iyanaritu Yèsus, iya puraè napatuwo Allataala polè ri amatèngngè. Yèsus èttonaro iya passalamaèkki polè ri caina Allataala iya mangoloè.

1 Tesalonika 2

1 Saudara-saudara! Alèmu missengngi makkedaè apolèngetta ri iko dè' naparacuma. 2 Muwisseng makkedaè riwettu dè'napa talao ri iko ri Tèsalonika, puraki' ripanrasa-rasa sibawa ripakatuna ri Filipi. Iyakiya namuni maèga tau mèwaki, Allataala pura mpèrèkki abaraningeng untu' mabbirittangngi ri iko Karèba Madècèng iya polè ri Alèna. 3 Angèrangetta lao ri iko tenniya sèuwa atakkalupang; tenniyato sibawa akkatta iya dè'è namapaccing iyarè'ga untu' mabbellè. 4 Dè'! Dè' tabbicara untu' pèsennangiwi atinna tauwè, sangadinna untu' pèsennangiwi atinna Allataala iya mojiyèngngi atitta. Saba' nangga'ki sitinaja untu' mappallebbangengngi iyaro Karèba Madècèngngè. 5 Alèmu missengngi makkedaè dè' taengka tamacenning tèmu iyarè'ga bengnguwakko untu' subbui akkatta-akkatta mangowaè. Allataala sabbinna! 6 Dè'to takkuraga untu' lolongeng pappojiyang polè ri tauwè -- muwi polè ri iko iyarè'ga polè ri tau laingngè. Sitongenna selaku rasulna Kristus, weddikki'sa mattuntu' sèuwa polè ri iko. 7 Iyakiya kèdoki sibawa malemma kininnawa wettutta engka ri tengnga-tengngamu, pada-pada sèddiè indo' jampangiwi ana'-ana'na. 8 Nasaba paressè babuwata, sadiyaki mpèrèkko tenniya bawang Karèba Madècèng iya polè ri Allataalaro, iyakiya atuwottato. Saba' mamasè senna'ki ri iko! 9 Tentu muwèngngerang mupi pèkkugi tedde'ta makkuraga sibawa mèwa. Esso wenniki majjama kuwammengngi nadè' tasussaiwi muwi sèddi tau ri yelle'mu wettutta mappallebbangengngi Karèba Madècèng iya polè ri Allataalaro lao ri iko. 10 Tuwoki sibawa mapaccing, tongeng enrengngè dè' cellana lao ri iko iya mateppe'ènna ri Kristus. Iko ritu sabbi-sabbitta, makkuwatoro Allataala. 11 Muwisseng makkedaè puraki gaukekko tungke'-tungke' pada-pada sèddiè ambo' gaukengngi ana'-ana'na. 12 Idi pangajariko, idi mpèrèkko sumange' sibawa dessa'ko kuwammengngi mutuwo makkuwa rupanna angkanna mupèsennangiwi atinna Allataala. Nasaba Allataala pura mobbiko untu' mancaji wargana Lino Baruna Allataala sibawa pèneddingiwi arajan-Na. 13 Engka mupa sèddi passaleng laingngè iya mebbuèkki tuli mattarima kasi lao ri Allataala. Iyaro passalengngè iyanaritu: wettutta palettu'i biritta polè ri Allataala lao ri iko, muwèngkalingai sibawa mutarimai iyaro birittaè tenniya selaku biritta polè ri tolinoè, iyakiya selaku biritta iya tonget-tongengngè polè ri Allataala. Alèna ritu majjama ri laleng alèmu iya mateppe'è ri Kristus. 14 Saudara-saudara, gau' iya mupèneddingiyè pura toni napèneddingi jema'-jema'na Allataala ri Yudèa, iya mancajiyè appunnangenna Yèsus Kristus. Mupèneddingiwi anrasa-rasangngè polè ri bangsamu muto, pada-pada muto iya napèneddingiyè jema'-jema'na Allataala ri Yudèaro polè ri tau Yahudiè. 15 Iyaro sining tauwè purani nauno Puwang Yèsus enrengngè nabi-nabiè, kuwaèttopa callaki. Namusui mennang sininna tauwè sibawa Allataala dè' sises-siseng namasennang lao ri mennang! 16 Mala nahalang-halangiki mennang untu' mabbirittangngi lao ri bangsa-bangsa tenniyaè Yahudi biritta iya weddingngè passalama'i bangsa-bangsaèro. Nanallalengi iyaro sining tau Yahudiè tattambai matteru dosa-dosana narapi sukku jumellana. Na makkekkuwangngè angkanna mennang nakenna caina Allataala! 17 Iyakiya Saudara-saudara, sipongetta massarang polè ri iko ri laleng wettu dè'è namaitta -- massarang ri mataè iyakiya ri atiè dè' -- pèdè' muddaniki lao ri iko sibawa makkuraga tonget-tongeng untu' siruntu'si sibawa iko! 18 Manniya'ki maèlo lao cèllèngiko; na iyya, Paulus, purani ucoba wèkkaduwa, iyakiya nahalangiki Ibillisi'è. 19 Tongeng iko ritu ammènasatta sibawa arennutta. Saba' matti rèkko polèi Puwang Yèsus, sibawa mangoloki ri Alèna, iko ritu mancaji matu attuwangetta! 20 Mèmeng iko ritu attuwangetta sibawa arennutta!

1 Tesalonika 3

1 Angkanna uddanitta dè'na nattahanna. Rimakkuwannanaro mappikkiri'ka lebbi kessing muwi risalaiki alè-alè ri Atèna, 2 ri wettutta suroi saudarata Timotius. Sèddiwi pattumaninna Allataala iya majjamaè sibawa idi untu' mabbirittangngi Karèba Madècèngngè passalenna Kristus. Risuroi Timotius lao ri iko kuwammengngi napèwatangiko sibawa dorokko untu' lebbi mateppe'pa ri Kristus. 3 Nanallalengiro dè'na muwi sèddi tau polè ri iko iya soroè nasaba anrasa-rasattaè. Alèmu missengngi makkedaè iyaro anrasa-rasangngè muttama'i ri laleng rancanana Allataala untu' idi. 4 Wettutta sibawa mupi' iko, puraki paissengiko lebbi riyolo makkedaè manrasa-rasaki matu. Na mèmeng iyaro tonget-tongenni pura kajajiyang; alèmu missengngi. 5 Iyanaro saba'na usuroi Timotius, nasaba macinna senna'ka missengngi pèkkugi amajungemmu ri laleng atepperengngè lao ri Kristus. Bata-bataka naullè ammai Ibillisi' godako angkanna sininna turuppuse'ta mancaji paracumai. 6 Makkekkuwangngè lisuni Timotius sibawa purani napalettu ri idi karèba marennuè passalenna pèkkugiko mateppe' lao ri Kristus sibawa sisullè siyamasèi. Napaissengiki makkedaè tuli taroko passèngereng iya makessingngè passaletta ri atimmu. Sibawa macinnako sita idi, pada-padato idi macinna tokki sita iko. 7 Iyanaro saba'na, Saudara-saudara, ri laleng sininna asussatta sibawa anrasa-rasatta, tassalèwoki polè ri karèba passalemmu. Atepperemmu lao ri Kristus loppoiwi atitta, 8 angkanna makkekkuwangngè marasaki tonget-tongeng tuwo, assaleng tette'ko tettong masse, massèddi sibawa Puwangngè. 9 Temmaka ègana tarima kasi'ta lao ri Allataala nasaba sininna arennung iya ripèneddingiyè ri yolona Allataala nasaba iko. 10 Esso wenniki marèllau ri Alèna sibawa sukku atiè, kuwammengngi na alèta wedding siruntu sibawa iko untu' passukkui aga iya muwapparelluwangngè mupa untu' mateppe' ri Kristus pèkkugi mestinna. 11 Tennapodo alèna Allataala Ambo'ta, sibawa Puwatta Yèsus paratai laletta untu' sita sibawa iko! 12 Tennapodo Puwangngè mèbbuko pèdè' mamasèiwi sèddiè sibawa laingngè enrengngè pèdè' mamasèiwi sininna tauwè, angkanna iyaro pammasèmu tattamba-tambai, pada-pada pammasèta lao ri iko. 13 Nanallalengiro Puwangngè pèwatangiwi matu atimmu, angkammu mapaccing sibawa dè' cellana ri yolona Allataala Ambo'ta, wettunna Puwatta Yèsus polè silaong sininna tau iya mancajiyè appunnangen-Na.

1 Tesalonika 4

1 Paccappurenna saudara-saudara, purani mpèrèkko conto passalenna pèkkugi harusu'ko tuwo untu' pèsennangiwi atinna Allataala. Mèmeng tuwono pada-padaèro. Iyakiya makkekkuwangngè nasaba akuwasanna Puwang Yèsus, riyèllauwi sibawa masero ri iko enrengngè maddessa kuwammengngi nalebbi makkuragasiko ri laleng gau'èro! 2 Saba' muwissenni panunju'-panunju' iya puraè riwèrèkko ri laleng akuwasanna Puwang Yèsus. 3 Iyanaè èlona Allataala: Kuwammengngi mutuwo untu' Alèna bawang, mabèlaiwi sininna pangkaukeng mappangaddiè. 4 Tungke' worowanè ri yelle'mu naharusu'i naisseng pèkkugi tuwo sibawa bainèna sibawa cara-cara iya sennangiyèngngi atinna Allataala sibawa rupa tauwè. 5 Aja' mutuwo maccowèriwi hawa napessummu lao ri bainèmu, pada-pada iya napogau'è tau iya dè'è naissengngi Allataala. 6 Ri laleng gau' pada-padaèwè, aja' namuwi sèddi tau pogau' asalang lao ri saudarana, iyarè'ga bengnguwangngi. Riyolo puraki' mabbirittangngi papparèngngerang iya matedde'è lao ri iko, makkedaè nahukkungngi matu Puwangngè sining tau iya pogau'èngngi sining asalang pada-padaèro. 7 Allataala mobbiki, tenniya kuwammengngi tatuwo mappangaddi, sangadinna kuwammengngi tatuwo iya pèsennangiyèngngi atin-Na. 8 Rimakkuwannanaro, tau iya dè'è natarimai pappagguruwangngèwè, tenniya bawang dè' natarimai rupa tauwè, sangadinna nasampèyangngi Allataala iya mabbèrèyangngèngngi Roh-Na iya mapaccingngè lao ri iko. 9 Dè'na naparelluki mokii lao ri iko passalenna pèkkugiko harusu mamasèiwi Saudara-saudara iya siyatepperengngè. Alèmuna pura ripagguru ri Allataala untu' siyamasèi. 10 Na iyaro gau'è purani muwappaitang maneng lao ri sininna saudara siyatepperengngè ri sininna Makedonia. Iyakiya Saudara-saudara, riyèllauwi sibawa masero, kuwammengngi nalebbi makessing pasi atuwommu. 11 Akkuragako tuwo sibawa tennang sibawa aja' mucampuru'i persoalanna tau laingngè. Sitinajako majjama sappai dallè', pada-pada riyolo pura riparèntangngèkko riyolo. 12 Rèkko tuwoko makkuwaro, dè'na nataggattukko muwi lao ri niga, sibawa sining tau iya dè'è namateppe' ri Kristus, napakarajako matu. 13 Saudara-saudara, macinnaki kuwammengngi muwissengngi iya sitongennaè passalenna sining tau iya matèènna; kuwammengngi dè' mumessè ati pada-pada sining tau laingngè iya dè'è nappunnai paddennuwang. 14 Mateppe'ki makkedaè purai matè Yèsus sibawa tuwoi paimeng. Iyanaro saba'na tamateppe'to makkedaè Allataala patuwoi matu paimeng sininna tau iya mateppe'è ri Yèsus iya matèènna, kuwammengngi natuwo mennang sibawa Alèna. 15 Passalenna gau'èro, iyanaritu pappagguruwanna Puwangngè iya puraè ripalettu ri iko: Wettunna Puwang Yèsus polè, idi iya tuwoè mupa dè' naripoddiyoloi matu sining tau iya matèènna lebbi riyolo. 16 Gorai matu mangobbi malaèka' marajaè sibawa sadda battowa enrengngè ripaoniwi tarompè'na Allataala selaku tanrang. Nainappa Puwang Yèsus nonno polè ri surugaè, sibawa sining tau Kristèng iya matèènna ripatuwoi matu lebbi riyolo. 17 Purairo, idi iya tuwoè mupa iyaro wettuè riyakkaki matu silaong mennang ri laleng ellungngè untu' siruntu Puwangngè ri langiè. Nainappaki monro matu silaong Puwangngè lettu mannennungeng. 18 Rimakkuwannanaro, sitinajako sisullè sipèwatangi ateppereng sibawa ada-adaèwè.

1 Tesalonika 5

1 Saudara-saudara, dè' naparelluki maroki lao ri iko uppanna wettunna iya mattentuè nakajajiyang matu iyaro gau'-gau'è. 2 Saba' alèmu missengngi sibawa manessa makkedaè Esso apolènna Puwangngè polèi matu pada-pada panga iya polè ri wenniè. 3 Rèkko makkedai tauwè, "Amang manenni sibawa tennang, " ri wettuènnaro tennasenna-sennai mennang nakenna matu abinasang, nadè' sèddi tau mullèi leppe'. Iyaro gau'è tappa kajajiyangngi matu, pada-pada makkènedding mapeddi maèloè mèmmana' iya kennaèngngi sèddiè makkunrai. 4 Iyakiya iko tenniyano tau iya tuwoè ri laleng pettangngè, angkanna iyaro Essoè nasèlengiko pada-pada apolènna pangaè. 5 Sininna Saudara iyanaritu tau iya tuwoè ri laleng tajangngè; muttama'ko ri esso iya macakkaè. Tenniyaki tau iya tuwoè ri laleng pettangngè, iyarè'ga muttama'è ri wenni iya mapettangngè. 6 Rimakkuwannanaro dè' naweddikki matinro bawang pada-pada tau laingngè. Harusu'ki jaga-jaga sibawa pikkiratta harusu matajang. 7 Ri wenniè matinroi tauwè, sibawa ri wenniètto namabo' tauwè. 8 Iyakiya idi'è iyanaritu tau esso iya muttama'è ri esso iya matajangngè, rimakkuwannanaro pikkiratta harusu'i matajang. Harusu'ki tette' mateppe' ri Puwangngè sibawa mamasèiwi tau laingngè enrengngè mammènasa sibawa mateppe' makkedaè Allataala passalama'ki matti. Iyanaro senjata iya linrungiyèkki ri laleng ammusurengngè mèwai pettangngè. 9 Dè' napilèki Allataala untu' rihukkung iyakiya untu' ripassalama' naolai Puwatta Yèsus Kristus. 10 Matèi untu' idi kuwammengngi na ri wettunna polè matti -- tuwo mupi'ga iyarè'ga matèni -- weddikki tuwo silaong Alèna. 11 Rimakkuwannanaro, sitinajako tette' sidorong sibawa sipèwatangi, pada-pada iya mupogau'è makkekkuwangngèwè. 12 Saudara-saudara, riyèllauwi sibawa masero kuwammengngi muwangke'i tau iya majjamaè ri tengnga-tengngamu; iyanaritu mennang iya puraè napilè Puwangngè untu' pimpingngi sibawa pangajariko. 13 Gaukengngi mennang sibawa silebbi-lebbina enrengngè paressè babuwa nasaba mèngngerangngi jama-jamang aga iya napogau'è mennang. Tuli tuwoko sibawa sipammasè-masè. 14 Riyèllau towi Saudara-saudara, kuwammengngi amparengngi tau iya dè'è namaèlo majjama. Pakkasse'i tau iya mètauè; tulungngi sining tau iya parelluè ritulung, sibawa sabbara'ko lao ri sininna tauwè. 15 Jagaiwi kuwammengngi aja' naengka wale'i jaè sibawa ja. Akkuragano untu' tuli pogau'i madècèngngè, sèddiè lao ri laingngè sibawa lao ri sininna tauwè. 16 Sitinajako tuli marennu, 17 sibawa tuli massempajang. 18 Ri laleng sininna keadaangngè sitinajako sukkuru', saba' iyanaro naèlori Allataala polè ri iko selaku tau iya tuwoè massèddi sibawa Kristus Yèsus. 19 Wèrèngngi alaluwasang Rohna Allataala. 20 Aja' muwangga èntèngngi biritta-biritta iya nabbèrèyangngè Rohna Allataala. 21 Sininna sèuwa-sèuwaè harusu'i rioji, naiya makessingngè harusu'i riyaccowèri. 22 Abèlaiwi sininna rupanna jaè. 23 Tennapodo Allataala muto, iya mpèrèngngèkki asalèwangeng, pancajiko tau iya tonget-tongengngè tuwo banna untu' Allataala. Tennapodo Allataala jagaiwi sininna alèmu, muwi roh, nyawa iyarè'ga tubummu, angkanna dè'gaga akurangenna wettunna Puwatta Yèsus Kristus polè paimeng. 24 Allataala, iya puraè mobbiko, pogau'i matu gau'èro sibawa matinului. 25 Assempajangekki Saudara-saudara! 26 Siyasselles-sellengenno secara sipammasè-masè pada-pada Saudara Kristèngngè. 27 Ri laleng akuwasanna Puwangngè, uwèllauwi sibawa masero kuwammengngi mubacangengngi iyaè sure'è lao ri sininna Saudara siatepperengngè. 28 Tennapodo Puwatta Yèsus Kristus barakkakiko. Salama, Paulus

2 Tesalonika 1

1 Saudara-saudara jema'è ri Tèsalonika, iya mancajiyè umma'na Allataala Ambo'ta sibawa Puwang Yèsus Kristus! Idi, iyanaritu Paulus, Silas sibawa Timotius 2 mammènasa tennapodo Allataala Ambo'è sibawa Puwang Yèsus Kristus mabbèrè barakka enrengngè asalèwangeng lao ri iko. 3 Saudara-saudara, tuli waji'ki mattarima kasi lao ri Allataala nasaba iko. Na mèmeng sipato'ki pogau'i makkuwaèro, saba' pèdè' mateppe'ko lao ri Kristus, enrengngè pèdè' mamasèiwi sèddiè lao ri laingngè. 4 Iyanaro saba'na magi tatuli mabbicara passalemmu tungke' wettu ricèllèngiwi jema'-jema'na Allataala. Masennakki curitai pèkkugiko tette' masse mateppe' lao ri Kristus ri laleng paccallangngè sibawa anrasa-rasangngè iya mupèneddingiyè. 5 Purai mupèneddingi anrasa-rasangngè nasaba Lino Baruna Allataala, nariyangga'ko matu sitinaja muttama ri lalenna. Kuwaniyè manessa pèkkugi adèlè'na apettunna Allataala. 6 Napogau'i matu aga iya adèlè'è, nawalekengngi matu anrasa-rasang lao ri tau iya mèbbuèkko manrasa-rasa. 7 Nalao ri iko iya manrasa-rasaè makkekkuwangngèwè -- makkuwatoro idi -- Allataala matu mpèrèkki asennangeng ri essona Puwang Yèsus nonno polè ri surugaè sibawa mappaitangngi Alèna silaong malaèka'-malaèka'-Na iya baraniè 8 sibawa api iya malluwa'-luwa'è. Nonnoi untu' hukkungngi tau iya dè'è napaduliwi Allataala sibawa iya dè'è namaèlo tuwo situru Karèba Madècèng passalenna Yèsus Puwatta. 9 Iyaro sining tauwè tarimai matu pahukkungeng abinasang lettu mannennungeng, ribuwangngi matu massu polè ri daèrana Puwangngè sibawa polè ri akuwasanna iya marajaè, 10 ri Esso apolènna matti untu' ripakaraja ri umma'na sibawa untu' ripakalebbi ri sininna tauwè iya mateppe'è. Engka tokko matu ri yelle'na umma'na Allataalaro, saba' mateppe'ko lao ri biritta iya ripalettu'è lao ri iko. 11 Iyanaro saba'na na idi tuli massempajangekko. Massempajakki kuwammengngi Allataala pancajiko sitinaja untu' tuwo situru èlo-Na, untu' iyanaro mobbiko. Tennapodo Allataala, nasibawang akuwasan-Na, pennoiwi cinna-Na untu' pogau'i madècèngngè, sibawa passukkui sininna jama-jamang iya mupogau'è nasaba mateppe'ko lao ri Kristus. 12 Nanallalengiro Puwatta Yèsus Kristus ripakarajai ri iko, sibawa iko ripakarajato ri Yèsus nasaba akessingeng atinna Allataala enrengngè Puwang Yèsus Kristus.

2 Tesalonika 2

1 Passalenna Puwatta Yèsus Kristus, sibawa passalenna ripaddeppungetta matu untu' monro sibawa Alèna, iyanaè uwèllau sibawa masero polè ri iko: 2 Aja' mumasitta mammaling-maling iyarè'ga mausè nasaba engkana biritta makkedaè narapini Essona Puwang Yèsus polè paimeng. Naullè iyaro karèbaè assalenna polèi risèuwaè boto, iyarè'ga polè risèuwaè pappagguruwang; iyarè'ga wedding towi jaji engka powadai makkedaè engka naengka taokii iyaè makkuwaèro ri laleng sala'sèddinna sure'ta. 3 Muwi maga, aja' muleppessangngi tauwè bengnguwakko. Saba' riwettu dè'napa narapii iyaro Essoè, harusu'i kajajiyang iyaè gau'èwè lebbi riyolo: Maèga tau salaiwi atepperenna, massakkarengngi Kristus; sibawa Tolino Maja iya ripatotoriyè untu' muttama ri ranakaè, mappaitangngi matu alèna. 4 Namatempo maèlo mèwai sibawa pakatanrèi alèna ri yasè'na sininna iya nasompaè tolinoè, iyarè'ga sininna iya nangga'è dèwata tolinoè. Mala muttama'i matu sibawa tudang ri laleng Bolana Allataala sibawa mappallebbangengngi makkedaè alèna iyanaritu Allataala. 5 Engngerangngi makkedaè purani uwappaddissengeng iya manennaro wettukku engka mupa sibawa iko. 6 Muwisseng aga iya lawa-lawaiyèngngi kajajiyanna iya manennaro. Matti ri wettu iya puraè napattentu Allataala, iyaro Tolino Majaè mompoi matu. 7 Awatangeng iya jamaèngngi iyaro jaè mammulani majjama secara rahasiya, iyakiya tuli ritahat-tahang mupi. Matti rèkko iya tahangngèngngiro ripaddèsu'ni, 8 nappai paita iyaro Tolino Majaè. Narèkko polèni Puwang Yèsus, naunoi matu iyaro Tolino Majaè sibawa nappase' polè ri tèmun-Na, enrengngè pabbinasai sibawa cahaya ahadèrèken-Na. 9 Iyaro Tolino Majaè mompoi sibawa akuwasang iya battowaè polè ri Ibillisi'. Napakangkai matu sininna rupanna anu makalallaingngè sibawa gau'-gau' iya dè'è padanna iya pennoè sibawa bellè. 10 Napakèi matu sininna bellè iya majaè untu' papusai sining tau iya maèloè binasa. Binasai matu mennang saba' nasampèyangngi sibawa dè' napojiwi biritta iya tongengngè iya polè ri Allataala iya weddingngè passalama'i mennang. 11 Iyanaro saba'na na Allataala napapolèngengngi mennang sèuwa akuwasang iya papusaèngngi mennang, angkanna mateppe'i mennang lao ri aga iya dè'è natongeng. 12 Addimonrinna, sininna tauwè iya pojiyèngngi dosaè sibawa dè'è namateppe' lao ri iya tongengngèro, rihukkungngi matu. 13 Saudara-saudara iya namasèiyè Puwangngè! Tuli harusu'ki mattarima kasi lao ri Allataala passalemmu, saba' pammulanna mupa Allataala pura pilèko untu' ripassalama'. Kajajiyangngi iyaro gau'è nasaba aga iya napogau'è Rohna Allataala lao ri iko untu' pancajiko umma'na Allataala iya mapaccingngè sibawa nasaba mateppe'ko lao ri biritta iya tongengngè polè ri Allataala. 14 Untu' iyanaro Allataala mobbiko naolai Karèba Madècèng iya riyabbirittangngè lao ri iko. Naobbiko Allataala, nasaba maèloi kuwammengngi muwaccowè pèneddingiwi arajanna Puwatta Yèsus Kristus. 15 Rimakkuwannanaro, Saudara-saudara, tettong masse'no sibawa attenninno matteru lao risining pappagguruwang iya puraè riyabbirittang lao ri iko, muwi ada-ada iyarè'ga taroki. 16 Tennapodo alèna Puwatta Yèsus Kristus, sibawa Allataala Ambo'ta massalèwo sibawa pèwatangiwi atimmu, kuwammengngi muwullèi pogau'i sibawa mabbirittangngi aga iya makessingngè. Saba' Allataala mamasèiki, sibawa nasaba akessingeng atin-Na naèbbuki tette' sabbara' mammènasaiwi iya makessingngè.

2 Tesalonika 3

1 Paccappurenna, Saudara-saudara, assempajangekki. Assempajanno kuwammengngi biritta polè ri Puwangngè weddingngi matteru mallebbang sibawa masitta enrengngè ritarima sibawa madècèng, pada-pada iya puraè kajajiyang ri iko riyolo. 2 Assempajang tokko kuwammengngi napassalama'ki Allataala polè risining tau iya dè'è nakkèyampè sibawa majaè. Saba' dè' nasininna tauwè mateppe' matu ri biritta iya polè ri Puwangngèro. 3 Iyakiya matinului Puwangngè. Napèwatangiko matu sibawa nalinrungiko polè ri Si Majaè. 4 Nasukkuki mateppe' lao ri Puwangngè passalemmu, makkedaè mattengngakko pogau'i sibawa matteru matu pogau'i aga iya riyappètangngarengngè lao ri iko. 5 Tennapodo Puwangngè pimpikko untu' lebbi pahangngi makkedaè Allataala mamasèiko sibawa Kristus mabbèrè asabbarakeng lao ri iko. 6 Saudara-saudara, ri laleng akuwasanna Puwang Yèsus Kristus, riparèntakko kuwammengngi muwabèlaiwi sininna Saudara iya tuwoè makkuttu-kuttu, sibawa iya dè'è naturusiwi sining pappagguruwang iya riyabbèrèyangngè lao ri mennang. 7 Alèmuna misseng tongengngi makkedaè harusu'ko turusiwi contota. Dè' takkuttu-kuttu wettutta engka ri tengnga-tengngamu. 8 Dè' tanrèi inanrèna tauwè sibawa tenriwaja. Sibalè'na esso wenniki mappallaung maggangka ullè kuwammengngi dè' tasussaiwi muwi niga polè ri yelle'mu. 9 Ripogau'i iyaro tenniya nasaba dè' tappunnai ha' mattuntu' kuwammengngi mutulukki, iyakiya nasaba maèloki mancaji conto lao ri iko. 10 Wettutta engka mupa ri tengnga-tengngamu, riyabbèrèyangngi peraturangngèwè, "Tau iya dè'è namaèlo mappallaung, dè' nawedding manrè. " 11 Ripowadai iyaè nasaba riyèngkalingai makkedaè engka tau ri yelle'mu iya tuwoè makkuttu-kuttu. Dè'gaga napogau' mennang sangadinna sibu'i campuru'i urusanna tau laingngè. 12 Ri laleng asenna Puwatta Yèsus Kristus riparèntangngi sining tauwèro sibawa parèngngerangiwi, kuwammengngi nappallaung mennang sibawa tennang enrengngè sappai dallè'na muto. 13 Iyakiya aja' mucau pogau' dècèng. 14 Naullè engka tau ri yelle'mu iya dè'è namaèlo turusiwi aga iya ripowadaè ri laleng sure'èwè. Jaga-jagako ri tau makkuwaèro sibawa aja' musiwollompollong sibawa alèna kuwammengngi namasiri. 15 Iyakiya aja' mugaukengngi selaku bali, banna pangajariwi selaku sèddi Saudara. 16 Puwangngè iyanaritu assalenna asalèwangetta. Tennapodo tuli mabbèrèi lao ri iko asalèwangeng ri laleng sininna gau'è. Tennapodo Puwangngè sibawang manengngi Saudara. 17 Sellekku polè ri Iyya, Paulus. Alèku muto mokii iyaè bagiyangngè. Mappakkuwaiyè tanranna iya utaroè ri laleng sininna sure'ku. 18 Tennapodo Puwatta Yèsus Kristus barakkaki manengngi Saudara. Salama, Paulus

1 Timotius 1

1 Timotius, ana'ku iya tongengngè ri laleng Puwangngè! Iyaè sure'è polèi ri iyya, Paulus, rasulna Kristus Yèsus situru parèntana Allataala, Pappassalama'ta sibawa ri laleng parèntana Kristus Yèsus, ammènasatta. Tennapodo Allataala Ambo'è sibawa Kristus Yèsus Puwatta mabbèrè barakka, pammasè asalèwangeng lao ri iko. 3 Macinnaka kuwammengngi tette'ko monro ri Efèsus pada-pada iya pura upakkolik-kolingengngèkko wettukku lao ri Makedonia. Saba' ri Efèsus engka siyagangngarè tau iya mappallebbangengngèngngi pappagguruwang iya dè'è natongeng. Na harusu'ko pappèsauwi mennang. 4 Powadangngi mennang kuwammengngi aja'na najampangiwi pau-pau rikadongngè sibawa curita-curita assalennaè iya dè'è pettunna. Iya manennaro banna paompo appangèwangeng bawang, sibawa dè' napamajuwi rancanana Allataala iya bannaè wedding riisseng naolai teppe'è lao ri Alèna. 5 Akkattana iyaro pangajaku iyanaritu kuwammengngi naullèi tauwè mappunnai ati iya tongengngè, sibawa ati marilaleng iya mapaccingngè enrengngè tonget-tongeng mateppe' ri Puwangngè, narimakkuwannanarro naullèi mennang mamasèi pada-padanna. 6 Engka sibagiyang tau iya dè'ènna natuwo iya pada-padaènnaro, pusai mennang ri laleng addebbakeng iya dè'è gaga gunana. 7 Macinnai mennang mancaji guru-guru agama, padahal alèna mennang dè' napahangngi ada-ada iya napakè mennang iyarè'ga gau'-gau' iya napangoloè mennang sibawa makkuwamani patepperinna. 8 Taissenni makkedaè hukkunna agamaè iyanaritu makessingngi, rèkko riyakkègunangngi pèkkugi mestinna. 9 Tentunna harusu'i riyèngngerang makkedaè riyèbbui hukkungngè tenniya lao ri tau iya makessingngè, sangadinna lao risining majjalèkkaiyèngngi hukkungngè, sining tau majaè, sining tau maja ampè, lao ri tau madosaè, tau dè'è naggama, tau linoèwè, lao risining tau mpunoèngngi ambo'na iyarè'ga indo'na, sining tau maègangngèngngi mabbuno, 10 lao ri tau pappangaddiè, sionrongngè pada-padanna worowanè, pacculi'è, pabbellèngngè, sabbi-sabbi bellè, sibawa nigi-nigi pogau' gau'-gau' iya sièwaè sibawa pappagguruwang iya tongengngè. 11 Iyaro pappagguruwangngè engkai ri laleng Karèba Madècèng iya appallebbangennaè riyappaddettangengngi lao ri iyya, iyanaritu Karèba Madècèng polè ri Allataala iya marajaè sibawa sipato'è ripoji. 12 Mattarima kasi'ka lao ri Kristus Yèsus Puwatta, purani nawèrèkka awatangeng untu' tumaningiwi, sibawa nangga'ka sitinaja untu' iyaro jamangngè, 13 namuni riyolo mappètenna'ka, sibawa maccalla enrengngè pakatunai Alèna. Iyakiya Allataala mamasèika, nasaba iyaro wettuè dè'pa umateppe, jaji dè' uwissengngi aga iya upogau'è. 14 Mala ribolloika sibawa pammasèna Puwatta. Nawèrèkka amampungeng untu' mateppe' ri Alèna sibawa mamasèiwi pada-padatta rupa tau. Iyaro amampungengngè nawèrèkki idi maneng iya massèddiè sibawa Kristus Yèsus. 15 Tongeng senna' iyaè ada-adaè -- rimakkuwannanaro sitinajai ritarima sibawa riyatepperi maneng --: "Polèi Kristus Yèsus ri linoèwè untu' passalama'i tau madosaè. " Na iyya'na tau madosa iya kaminang majaè. 16 Iyakiya mala nasaba iyaro nanamasèika Allataala, kuwammengngi weddingngi nappaitang asabbarakenna Kristus Yèsus lao ri iyya, tau iya kaminang madosaèwè. Na iyaè mancaji sèuwai conto untu' sininna tau iya mateppe'è matu matti lao ri Alèna sibawa lolongeng atuwong tongengngè sibawa mannennungengngè. 17 Allataala, Arunna sininna wettuè, sitinajai ripakalebbi sibawa tuli ripoji, saba' Alèna mannennungeng, iya dè'è napaita sibawa iya sèuwaè! Aming. 18 Timotius, ana'ku! Iyaè jamangngè upaddettangiko, rèkko riyèngngerangngi pasenna Allataala iya napalettu'è nabi-nabiè ri laleng jema'è passalenna alèmu. Sitinajai iyaro pasengngè mancaji bokong ri alèmu ri laleng angèwangeng iya makessingngè. 19 Ewano sibawa makkatenning ri laleng ateppereng iya tongengngè sibawa ati iya mapaccingngè. Engka tau dè' napaduliwi sadda ati marilalenna, angkanna ancuru'i atepperenna mennang. 20 Ri yelle'na iyanaritu Himènèus sibawa Alèksander. Iya duwa tauwèro purani uhukkung ri laleng mabbèrèyangngi lao ri Ibillisi', kuwammengngi nagguru mennang untu' mappèsau curupiyangiwi Allataala.

1 Timotius 2

1 Mula-mulanna uwèllauwi sibawa masero kuwammengngi parèllaungngè, sempajangngè, sibawa paddowangengngè enrengngè parèllau tarima kasi'è ripalettu'i ri Allataala untu' sininna tauwè; 2 untu' sining arungngè sibawa untu' sininna tauwè iya makkatenningngè akuwasang. Ellauwi kuwammengngi weddikki tuwo sibawa tennang enrengngè amang untu' Allataala sibawa kèdo-kèdo iya sipato'è. 3 Iyanaro makessing sibawa sennangiwi atinna Allataala, Pappassalama'ta. 4 Maèloi kuwammengngi sininna tauwè ripassalama'i sibawa naissengngi iya tongengngè. 5 Saba', banna engka sèddi Allataala, na pappallalang ri yelle'na Allataala sibawa tolinoè iyanaritu Kristus tolinoèro. 6 Purai nabbèrèyang Alèna untu' paleppe'i sininna tauwè polè ri dosa-dosana. Nanallalengiro nappaitangngi Allataala ri wettu iya teppa'è, makkedaè macinnai kuwammengngi sininna tauwè ripassalama'i. 7 Na iyanaro saba'na narisuroka lao risining tau iya tenniyaè Yahudi untu' mappallebbangengngi lao ri mennang biritta passalenna ateppereng iya tongengngè. Iya upangoloèwè iyanaritu tongengngi, dè' uwabbellè. 8 Uwèllauwi kuwammengngi muwi kègi massempajangngi worowanè sibawa ati iya mapaccingngè, dè namacai iyarè'ga massasa. 9 Sitinajai sining makkunraiè bèlo-bèloiwi alèna sibawa sitinajaè enrengngè pakè pakèyang iya sitinajaè. Aja' napakè modèlè gemme' iya makalallaingngè iyarè'ga parèwa-parèwa ulaweng iyarè'ga mutiyara, iyarè'ga pakèyang iya masuliè. 10 Sibalè'na, sitinajai makkunraiè bèlo-bèloiwi alèna sibawa pangkaukeng-pangkaukeng iya makessingngè pèkkugi iya sipato'è lao ri makkunrai iya massompaè ri Allataala. 11 Harusu'i magguru makkunraiè sibawa mammekko enrengngè mapato. 12 Dè' upattongengngi makkunraiè mappagguru iyarè'ga parèntai worowanè; harusu'i mammekko mennang. 13 Saba' iya bunge'-bunge'è ripancaji iyanaritu Adam sibawa rimunri mani nappa Hawa. 14 Na tenniya Adam, sangadinna makkunraiè ritu ribellè, angkanna najjalèkkai parèntana Allataala. 15 Namuni makkuwaro, salama'i matu makkunraiè ri laleng jajiyanna ana', assaleng alèna nasibawang ati mariyawa tette'i mateppe' lao ri Kristus sibawa tette' mamasèiwi tau laingngè enrengngè tuwo banna untu' Allataala.

1 Timotius 3

1 Tongeng senna' ada-adaèwè, "Tau iya macinnaè mancaji pamimpinna jema'è, nacinnaiwi sèuwa jama-jamang iya makessing senna'è. " 2 Sèddiè pamimping jema' harusu'i sèddi tau iya dè'è cellana, banna sèddi bainèna, naisseng kuwasaiwi alèna, mapanrè, enrengngè taratoro'; napoji tarimai tauwè ri bolana, sibawa naullè paggurui tauwè; 3 aja' na tau iya pammabokengngè, iyarè'ga iya pojiyèngngi mallaga. Sibalè'na, harusu'i malemma kininnawa sibawa napoji adamèngengngè. Dè' nawedding mammata dowiè. 4 Harusu'i naisseng matoro'i ruma tanggana sibawa makessing, enrengngè didi'i ana'-ana'na untu' tunru' sibawa mappakalebbi ri alèna. 5 Saba' rèkko tauwè dè' naissengngi matoro'i ruma tanggana, pèkkugiwi naullèi matoro'i jema'na Allataala? 6 Sèddiè pamimping jema' dè' nawedding tau iya nappaè mancaji Kristèng, saba' matempoi matti angkanna tattanroi pada-pada Ibillisi'è riyolo. 7 Harusu'i tau iya mappunnaiyè aseng makessing ri laleng masaraka'è; saba' rèkko dè' nakkuwaro, ripakatunai matu ri tauwè, angkanna sempè' ri laleng jebba'na Ibillisi'è. 8 Pabbantu jema'è harusu'i makessing sibawa matinulu; dè' namammata dowi sibawa dè' napojiwi mènung maèga senna' anggoro. 9 Harusu'i mennang makkatenning masse sibawa ati marilalengngè iya mapaccingngè ri pappagguruwang Kristèngngè iya puraè nappaitang Allataala. 10 Sitinajai mennang riyoji riyolo', narèkko manessani mennang dè' gaga cellana, nappai wedding mennang mabbantu ri laleng jema'è. 11 Bainèna mennang harusu towi tau iya makessingngè, tenniya tau iya pojiyèngngi pallebbangngi karèba dè'è natongeng. Harusu'i mennang naisseng makuwasaiwi alèna sibawa malempu ri laleng sininna passalengngè. 12 Pabbantu jema'è harusu'i mappunnai banna sèddi bainè. Harusu'i naisseng matoro'i ana'-ana'na enrengngè ruma tanggana sibawa makessing. 13 Sining tau iya mabbantuè sibawa makessing ri laleng jema'è, ripakalebbii matu sibawa pèdè' baraniwi mabbicara passalenna atepperenna mennang ri Kristus. 14 Mammènasaka dè'na namaitta naucèllèngiko. Namuni makkuwaro, uwokii mutowi iyaè sure'è lao ri iko, 15 kuwammengngi rèkko matengnge'ka, muwissenni pèkkugi harusu tuwo selaku kaluwargana Allataala, iyanaritu jema'na Allataala iya tuwoè. Iyaè jema'è sinrupai alliri pappatettongngè sibawa rèngèèngngi pappagguruwang tongengngè iya polè ri Allataala. 16 Muwi sèddi tau dè'to mullèi massakkarengngi, temmaka loppona rahasiyana agamata: Nappaitangngi alèna ri laleng rupa tolinoè, sibawa ripannessa tongeng ri Rohna Allataala, enrengngè naita sining malaèka'è. Karèbanna ripamengngoi ri yelle'na bangsa-bangsaè, sibawa riyatepperi ri sininna linoè sibawa riyakka mènrè ri surugaè.

1 Timotius 4

1 Matedde'i napowada Rohna Allataala makkedaè ri wettu-wettu mangoloè, sibagiyang tauwè nassuriwi matu atepperenna, nassakkarengngi Kristus. Mapatoi matu mennang ri roh-roh iya mappapusaè sibawa maccowèriwi sining pappagguruwanna sètangngè, 2 iya napalettu'è naolai sining tau munapè'è iya mabbellè. Ati marilalenna iyaro sining tauwè mapettanni. 3 Napaggurui mennang tauwè dè' nakawing sibawa dè' nanrè inanrè mattentuè. Padahal iyaro inanrè napancajiwi Allataala untu' riyanrè sibawa mattarima kasi lao ri Allataala untu' riyanrè sibawa mattarima kasi lao ri Allataala polè risining tau iya mateppe'ènna ri Kristus sibawa missengngènni pappagguruwang tongengngè iya polè ri Allataala. 4 Sininna sèuwa-sèuwaè iya napancajiyè Allataalaro makessing, nadè' muwi sèddi iya harusu'è riyangga' harang rèkko purani ritarima sibawa mattarima kasi lao ri Allataala. 5 Saba' barakka polè ri Allataala sibawa sempajangngè mèbbui iyaro inanrè mancaji hallala'. 6 Rèkko muwappagguruwangngi iya manennaro lao ri Saudara-saudara siatepperengngè, mancajiko matu pattumanni Kristus Yèsus iya majjamaè sibawa makessing. Na matteruko matu piyarai batèmmu sibawa ada-adanna Allataala iya tatepperiyè, sibawa sining pappagguruwang tongengngè iya puraè uwaccowèri labe'è. 7 Abèlaiwi curita-curita pèmmaliè iya dè'è nakkèguna. Sitinajai mulati alèmu untu' atuwong iya massompaè. 8 Latihang watakkalè cèddè bawang akkègunana, iyakiya latihang rohaniè makkègunai ri laleng sininna gau'è, saba' tampu'i janci untu' atuwong makkekkuwangngè sibawa wettu iya mangoloè. 9 Iyaro gau'è tongengngi sibawa sitinajai ritarima enrengngè riyatepperi maneng. 10 Iyanaro saba'na mèwaki sibawa marejjing majjama, saba' mammènasaki sissukku-sukkuna lao ri Allataala iya tuwoè, Alèna ritu Pappasalama'na sininna tauwè, lebbi-lebbipi sining tau iya mateppe'è. 11 Appagguruwangngi iya manennaro sibawa suroi sining tauwè maccowèriwi. 12 Aja' muleppessangngi muwi sèddiè tau mangga'ko mariyawa nasaba malolo mupo. Sibalè'na, sitinajako mancaji conto lao risining tau mateppe'è ri laleng mabbicara, sibawa kèdo-kèdomu, ri laleng caramu mamasèiwi pada-padammu sibawa mateppe' lao ri Yèsus Kristus, sibawa atuwommu iya tongengngè. 13 Narapika polè matti, harusu'ko mattonget-tongeng bacangengngi Kitta'è sining tauwè, sibawa dorongngi mennang enrengngè paggurui mennang. 14 Aja' mujampalèllè makkègunangngi pammasè polè ri Rohna Allataala iya riwèrèngngèkko wettunna sining pamimping jema'è palènne'i limanna mennang ri yasè'na ulummu, sibawa nabi-nabiè palettu'i pasenna Allataala passalenna alèmu. 15 Pogau' manengngiro sibawa mattonget-tongeng kuwammengngi naitai sininna tauwè amajungemmu. 16 Jagaiwi alèmu sibawa jagai towi pappaguruwammu. Sitinajako matinulu pogau' manengngiro, saba' nallalengiro mupassalama'i matu muwi alèmu sibawa sining tau iya mèngkalingaèkko.

1 Timotius 5

1 Aja' muwacairi senna'i tau iya lebbi macowaè na iya iko, sangadinna èrai mèngkalingai ada-adammu pada-pada rèkko samannai ambo'mu. Gaukengngi sining kalloloè selaku saudara, 2 sibawa sining makkunrai macowaè selaku indo'. Sining ana'daraè sitinajai mugaukeng selaku anri, sibawa kèdo-kèdo iya malempuè. 3 Pakalebbii sining jandaè iya tonget-tongengngè tuwo ri alè-alè. 4 Iyakiya rèkko sèddiè janda mappunnai ana'-ana' iyarè'ga eppo-eppo, mennang ritu lebbi riyolo harusu riwèrèng pappahang makkedaè waji'i mennang jampangiwi kaluwargana, sibawa mpale'i pappèdècènna tomatowanna sibawa nènèna mennang. Nasaba gau'ènnaro pèsennangiwi atinna Allataala. 5 Janda iya tonget-tongengngè alè-alè, sibawa dè' nappunnai niga-niga iya weddingngè piyarai, banna mammènasai ri Allataala. Esso wenniwi matteru massempajang lao ri Allataala untu' mèllauwi pattulun-Na. 6 Iyakiya janda iya pojiyèngngi tuwo massennas-sennang, matèni namuni tuwo mupi. 7 Palettukengngi iyaè panunju'-panunju'è lao ri mennang, kuwammengngi natuwo dè' cellana. 8 Iyakiya rèkko engka tau iya dè'è napiyarai siyajinna, lebbi-lebbipi kaluwargana muto, iyaro tauwè nassakkarengngi atepperenna, lebbi majai naiya tau dè'è namateppe'. 9 Banna janda iya pennoiyèngngi sara'-sara'èwè wedding riputtama ri laleng daftar janda-jandaè: umuru'na harusu'i dè' nakurang enneng pulona taung, banna wèkkasiseng kawing 10 sibawa kalabba selaku makkunrai iya pogau'èngngi gau'-gau' iya makessingngè, padaènna èbara'na: napawekke'i ana'-ana'na sibawa makessing, masennang tarima tamu-tamu mappèruma ri bolana, natumaningiwi sining tau mateppe'è, nabantui sining tau masussaè, enrengngè napogau'i sibawa mattonget-tongeng sininna rupanna jama-jamang iya makessingngè. 11 Aja' nariputtama janda-janda iya maloloè mupa ri laleng daftar-èro. Saba' rèkko polèi pappènedding pangèlorenna iya mawatang senna'è, maèloi mennang kawing sibawa nasalaiwi Kristus. 12 Napasala mennang nasaba dè' napaddupai janci iya nabbèrèyangngè lao ri Kristus. 13 Ri lainnaè paimeng nabbèyang bawami wettuè ri laleng massu muttama'na ri bolana tauwè. Na iya lebbi majaèppasi, iyanaritu makkedaè maggurui mennang pètenna'i asenna tau laingngè enrengngè campuru'i urusanna tauwè kuwaèttopa bicarai gau'-gau' iya dè'è nasipato ribicara. 14 Iyanaro saba'na naumaèlo kuwammengngi nakawing paimeng janda maloloè mupa, lolongeng ana' sibawa murusu'i ruma tanggana, kuwammengngi dè' nalolongeng kasempatang sining balitta untu' kebbongiwi asetta. 15 Saba' engka janda-janda iya pusaènna maccowèriwi Ibillisi'è. 16 Iyakiya rèkko sèddiè makkunrai Kristèng mappunnai anggota kaluwarga iya jandaènna, harusu'i nabantu iyaro sining jandaè; aja' muleppessangngi jema'è tanggungngi mennang. Nallalengiro weddingngi jema'è bantui janda-janda iya dè' sises-sisengngè nappunnai siyajing. 17 Pamimping jema'è iya pogau'èngngi jamanna sibawa makessing, sitinajai riwèrèng pappakalebbi leppe' wèkkaduwa, lebbi-lebbipi mennang iya mapatoè makkatobba sibawa mappagguru. 18 Saba' tarokii ri laleng Kitta'è, "Saping iya mattengngangngè maddèse gandong untu' paddunui dandongngè polè ri ulèna, aja' naringong pannyoro'na, " makkuwatoro, "Tau iya majjamaè natarimai sarona. " 19 Aja' mutarimai iya ritenrekengngèngngi sèddiè pamimping jema', sangadinna rèkko ripakkasse'i ri duwa tau sabbi iyarè'ga lebbi. 20 Tau iya pogau'è dosa, harusu'i riyampareng ri yolona sininna jema'è, kuwammengngi namètau iya laingngè. 21 Ri yolona Allataala, Kristus Yèsus, sibawa malaèka-malaèka'na iya tappilè, uwèllauwi sibawa masero kuwammengngi muturusiwi panunju'-panunju'èwè tebbata-bataiwi muwi niga, sibawa tekkacowè-cowè. 22 Aja' mumasitta senna' palènne'i limammu ri yasè'na sèddiè tau untu' rèsmikangngi riyakka selaku pattumaninna Puwangngè. Rèkko madosai tau laingngè, aja' muwaccowè ri laleng dosaèro. Jagaiwi alèmu kuwammengngi natette mapaccing. 23 Aja'na na uwai bawang muwènung; ènung tokko cèddè anggoro untu' bantui lise' ri lalemmu, saba' biyasako malasa-lasa. 24 Sibagiyang dosana tauwè, riwettu dè'napa nariadèlèki, paitani sibawa manessa. Iyakiya dosana sibagiyang tau laingngè nappai naisseng rèkko purairo. 25 Makkuwatoro sining pangkaukeng makessingngè matteru paita. Sibawa muwi iya dè'è namagampang paita, dè' nawedding matteru tassubbu.

1 Timotius 6

1 Sining tau Kristèng iya mancaji ataè, harusu'i nangga' makkedaè sitinajai mennang pakalebbii puwanna, kuwammengngi dè' naullèi tauwè pèjariwi asenna Allataala iyarè'ga pappagguruwatta. 2 Ata-ata iya puwannaè tau Kristèng, dè' nawedding napandang èntèng puwanna nasaba pada-padai mennang tau Kristèng. Mala harusu'i mennang natumaningi puwanna mennanro lebbi kessippa, saba' puwang iya natumaningiyèro iyanaritu pada-padai tau mateppe' iya riyamasèiyè. Iya manennaè harusu'i muwappagguruwang sibawa muwappangajareng. 3 Nigi-nigi mappagguruwangngi pappagguruwang iya laingngè na iyaro sibawa dè' nasitujuiwi pappagguruwang tongeng polè ri Puwatta Yèsus Kristus, sibawa iya dè'è nasicoco' pappagguruwanna agamata, 4 iyanaritu sining tauwè matempoi padahal dè' agaga naisseng! Lasana iyanaritu napoji maddebba sibawa mappangèwang passalenna warèkkada-warèkkadaè angkanna paompo angèmpurung, assisalang, mappètenna', bata-bata iya dè'è namakessing, 5 sibawa assasang iya dè'è purana. Pikkiranna sining tauwèro buntuni sibawa dè'na natongeng. Nasengngi wedding mancaji sugi polè ri agamaè. 6 Mèmeng agamaè mabbèrèi asarong iya battowaè, rèkko sukkuru'i tauwè sibawa aga iya nappunnaiyè. 7 Saba' dè'gaga muwi sèuwa iya tatiwiè ri laleng linoèwè, sibawa dè'to gaga muwi sèuwa iya weddingngè tatiwi massu! 8 Jaji, rèkko engka inanrè sibawa pakèyang, genne'ni iyaro. 9 Iyakiya tau iya maèloè mancaji sugi, rigodai sibawa nalai siyo-siyo polè rimaddupa-rupang cinna iya madonggoè enrengngè makkasolangngè. Iyaro sining cinna'è naèbbui tauwè mancaji ancuru' sibawa macilaka. 10 Saba' polè ri pangèlorengngè ri dowiè na dè'na naturusiwi pappagguruwang Kristèngngè, nanakennai mennang maèga anrasa-rasang iya mancuru'èngngi atinna mennang. 11 Iyakiya iko iyanaritu appunnangennako Allataala, jaji harusu'ko mabèlai manengngi iyaro. Akkuragako mancaji tau iya tongengngè ri pakkitanna Allataala, mancaji ata ri Allataala, mateppe' ri Kristus, mamasèiwi pada-padatta, sabbara ri laleng anrasa-rasangngè sibawa kèdo-kèdo malemma. 12 Ewano tonget-tongeng selaku tau Kristèng kuwammengngi mulolongengngi hadiya atuwong tongengngè sibawa mannennungengngè. Saba' untu' iyanaro naobbiko Allataala ri wettunna muwangakui ri yolona maèga tau makkedaè mateppe'ko ri Kristus. 13 Na makkekkuwangngè, ri yolona Allataala iya mabbèrè nyawa lao ri sininna sèuwa-sèuwaè, sibawa ri yolona Kristus Yèsus iya mabbèrè asabbiyang iya tongengngè lao ri Pontius Pilatus, uwèllauwi iyaè ri iko: 14 Turusiwi sininna iyaro parèntaè secara tulèng sibawa dè' cellana narapi ri Essona Puwatta Yèsus Kristus polè paimeng. 15 Apolèn-Na ripattentui matu ri wettu iya teppa'è ri Allataala muto. Alèna ritu Makuwasa sèddi-sèddiè; Marajai, Arunna sininna arungngè, sibawa Puwanna sininna puwangngè. 16 Alèna bawang dè' nawedding rikuwasai ri amatèngngè; tuwoi ri laleng cahaya iya dè'è nawedding riyaddeppèri ri muwi niga. Dè'gaga muwi sèddi tolino iya puraè mitai Alèna, iyarè'ga mullèi mitai Alèna. Ri Alèna ritu alebbirengngè sibawa akuwasangngè lettu mannennungeng! Aming. 17 Lao risining tau iya sugiè ri linoèwè, sitinajako pangajari kuwammengngi aja' mennang namatempo sibawa aja' nammènasa ri barab-barang iya dè'è natette -- pada-pada mutowi asugirengngè. Harusu'i mennang mammènasa lao ri Allataala iya mabbèrèyangngèngngi sininna sèuwa-sèuwaè lao ri idi sibawa maona kuwammengngi tapèneddingiwi. 18 Pangajariwi mennang untu' mappaitangngi akessingengngè, untu' pogau'i maèga gau'-gau' iya makessingngè, masèmpo ati sibawa napoji mabbèrè. 19 Nanallalengiro mappaddeppungengngi mennang waramparang iya mancajiyè modala' iya makessingngè untu' wettu iya mangoloè. Nanallalengiro lolongengngi matu mennang atuwong iya mannennungengngè, iyanaritu atuwong iya tongengngè. 20 Aga iya puraè ripaddettangekko, jagaiwi iyaro madècèd-dècèng, Timotius! Abèlaiwi sining assipabbicarang iya dè'è nakkèguna sibawa sining addebbakengngè passalenna gau'-gau' iya secara kaliruè riyasengngi "Pangissengeng". 21 Saba' engka sining tau iya powadaèngngi, makkedaè nappunnaiwi pangissengengngèro angkanna lèssè polè risining pappagguruwang Kristèng iya natepperiyè mennang riyolo. Tennapodo Puwangngè barakkakiwi Saudara-saudara. Salama, Paulus

2 Timotius 1

1 Timotius, ana'ku iya uwamasèiyè! Iyya, Paulus, mokii iyaè sure'è lao ri iko, sibawa mammènasa tennapodo Allataala Ambo'è sibawa Puwatta Kristus Yèsus mabbèrè barakka, pammasè sibawa asalèwangeng lao ri iko. Nasaba èlona Allataala, riyakkaka mancaji rasulna Kristus Yèsus sibawa risuro untu' mabbirittangngi passalenna atuwong iya najjanciyangngè Allataala. Iyaro atuwongngè ritarimai nasaba massèddiki sibawa Kristus Yèsus. 3 Sukkuru'ka lao ri Allataala iya utumaningiyè sibawa ati iya mapaccingngè pada-pada iya napogau'è nènè-nènèku riyolo. Tuli mattarima kasi'ka lao ri Allataala sises-siseng uwèngngerakko ri laleng sempajang, muwi esso iyarè'ga wenni. 4 Uwèngngerangngi amessènna atimmu. Iyanaro saba'na naumacinna senna' siruntu sibawa iko kuwammengngi tonget-tongekka wedding marennu. 5 Marèngngerakka ri atepperemmu iya mattonget-tongengngè lao ri Kristus, pada-pada atepperenna nènèmu Lois sibawa indo'mu Eunike. Namateppe'ka iko mateppe'to pada-padaèro. 6 Rimakkuwannanaro uparèngngerangiko untu' patuwoi pammasè iya nawèrèngngèkko Allataala wettukku palènne'i limakku ri yasè'mu. 7 Saba' Roh iya nabbèrèyangngè Allataala ri yasè'ta, tenniya Roh iya mèbbuèkki mancaji pelloreng. Sibalè'na iyaro Rohna Allataala naèbbuki mancaji mawatang, penno sibawa pammasè sibawa mullèi tahangngi alè. 8 Rimakkuwannanaro, aja' mumasiri mabbèrè asabbiyang passalenna Puwatta, sibawa aja'to mumasiri passalekku, iya ritarungkuè nasaba Alèna. Sibalè'na sitinajako nasibawang awatangeng polè ri Allataala, maccowè manrasa-rasa untu' Karèba Madècèngngèro. 9 Napassalama'ki Allataala sibawa naobbiki kuwammengngi namancaji umma' ri Alèna. Napogau'i iyaro tenniya nallalengiwi aga iya puraè ripogau', sangadinna nallalengiwi rancana-Na muto sibawa pammasè-Na. Nawèrèkki pammasè-Na naolai Kristus Yèsus riwettu dè'napa naripancaji linoèwè. 10 Na makkekkuwangngè nappaitangngi iyaro pammasèna Allataala lao ri idi naolai apolènna Arung Pappassalama'ta Kristus Yèsus. Nacaui Yèsus akuwasanna amatèngngè sibawa tiwi atuwong mannennungeng naolai Karèba Madècèngngèro. 11 Untu' mabbirittangngi iyaro Karèba Madècèngngè nakkaka Allataala mancaji rasul sibawa guru. 12 Iyanaro saba'na nauwanrasa-rasai manengngi iyaè, iyakiya tette'ka mateppe', saba' uwisseng tongengngi niga uwatepperi. Mateppe'ka makkedaè aga iya pura nappaddettangeng lao ri iyya, sanggu' towi jagaiwi narapi Esso Kiyame'. 13 Accowèriwi tonget-tongeng pappagguruwang tongengngè iya puraè uwèrèkko. Sibawa sitinajako tette' makkatenning ri teppe'è sibawa pammasè iya mancajiyè appunnangetta nasaba massèddiki sibawa Kristus Yèsus. 14 Nasibawang bantuwang polè ri Rohna Allataala iya tuwoè ri laleng alèta, sitinajako jagaiwi madècèd-dècèng gau'-gau' mangke'è iya puraè ripaddettangiko. 15 Muwisseng makkedaè sininna tauwè ri daèra Asia nasalaina, muttama toni Figelus sibawa Hèrmogènès. 16 Iyakiya kaluwargana Onèsiforus wèkkasiyagangngarè'ni napèrennui atikku. Tennapodo naèloriwi Puwangngè mappaitangngi paressè babuwana lao ri mennang. Namuni ri lalekka tarungkuè. Dè' namasiri Onèsiforus ri keadaakkuro. 17 Lettu'na muwa ri Roma, matteruni berusaha sappaka narapi naruntu'ka. 18 Na ri Efèsus maèga senna' natulungekka, muwissenni iyaro gau'è. Tennapodo Puwangngè mappaitang paressè babuwa ri alèna wettunna Essona Puwangngè madèlèkiwi sininna rupa tauwè.

2 Timotius 2

1 Timotius, ana'ku! Sitinajako mancaji mawatang nasaba pammasè iya nabbèrèyangngè lao ri idi, nasaba massèddiki sibawa Kristus Yèsus. 2 Pappagguruwang iya puraè muwèngkalinga riyolo polè ri iyya ri yolona maèga tau, sitinajai muwappaddettangeng lao risining tau iya weddingngè riyatepperi sibawa iya maccaè paggurui tau laingngè. 3 Harusu'ko maccowè manrasa-rasa selaku parajuri'na Kristus Yèsus iya matinuluè. 4 Sèddiè parajuri' iya mattengngangngè jaga, dè' namaèlo palippuiwi alèna sibawa urusang-urusang alèna, saba' macinnai sennangiwi atinna pallimana. 5 Sèddiè pacculè dè' namancaji pakala matu ri laleng sèuwaè attandingeng, rèkko dè' naturusiwi peraturang-peraturangngè. 6 Patani iya majjama senna'è, alèna ritu bunge'-bunge' punna ha' untu' lolongengngi wassèlè' tanet-tanenna. 7 Nennun-nennungngi aga iya upangoloèwè, saba' nabbèrèyangngi matu Puwangngè lao ri iko pakkullèngngè untu' pahang manengngiro. 8 Engngerangngi iyaè: Karèba Madècèng iya uwabbirittangngè iyanaritu karèba passalenna Yèsus Kristus, wija-wijanna Daud: Alèna ritu Kristus iya tuwoènna paimeng polè ri amatèngngè. 9 Nasaba nabbirittangngi Karèba Madècèngngèro, naumanrasa-rasa; mala narapi rirantèka pada-pada sèddiè tomaja. Iyakiya ada-adanna Allataala dè' nariyullè rantèi. 10 Iyanaro saba'na nausabbara tanggung manengngiro untu' apentingenna sining tau iya puraè Napilè Allataala, kuwammengngi nalolongetto mennang asalamakeng iya riyabbèrèyangngè naolai Kristus Yèsus, sibawa iya nasibawangngè arajang mannennungengngè. 11 Tongeng senna' ada-adaèwè, "Rèkko matèni' silaong Alèna, tuwo tokki matu silaong Alèna. 12 Rèkko tette'ki sabbara, mapparènta tokki matu silaong Alèna. Rèkko riyassakkarengngi Alèna, Nassakkareng tokki matu. 13 Rèkko dè' tamatinulu, tette' Alèna matinulu, saba' dè' naullèi sièwa Alèna muto. " 14 Sitinajako parèngngerangiwi sining tauwè passalenna iya manennaè. Ri yolona Allataala, pangajariwi mennang kuwammengngi aja' nassasa passalenna warèkkada-warèkkadaè. Dè'gaga gunana iyaro, mala napakacauwi sining tau iya mèngkalingaèngngi. 15 Sitinajako makkuraga tonget-tongeng kuwammengngi nariyakuiko ri Allataala selaku tau iya sitinajaè majjama untu' Allataala. Akkuragano kuwammengngi aja' mumasiri passalenna jama-jamammu, sangadinna mappagguru sibawa sicoco' sining pappagguruwang tongengngè iya polè ri Allataala. 16 Abèlaiwi assipabbicarang-assipabbicarang iya dè'è gaga gunana sibawa iya pakatunaèngngi Allataala. Sining assipabbicarang pada-padaèro banna mèbbui tauwè pèdè' maja. 17 Pappagguruwanna sining tauwèro, makkalolo'i pada-pada lasa kangker iya masekkangngè. Ri yelle'na mennang muttama'ni Himènèus sibawa Filètus. 18 Lèssèni mennang polè ri pappagguruwang tongengngè, sibawa pakacauwi atepperenna sibagiyang tauwè. Napowadai mennang makkedaè amotokengngè polè ri amatèngngè purani kajajiyang. 19 Iyakiya allèjjakenna iya masse'è iya naèbbuè Allataala dè' nariyullè gottangngi. Ri yasè'na tarokii iyaè, "Naisseng Puwangngè sining tau appunnangen-Na, " sibawa "Tau iya powadaèngngi makkedaè appunnangennai Puwangngè, iyaro tauwè harusu'i mappèsau pogau'i pangkaukeng iya salaè". 20 Ri laleng bola iya battowaè engka maddupa-rupang parabo'na. Engka riyèbbu polè ri pèra'è iyarè'ga ulawengngè, iyakiya engkato iya polè ri ajuè iyarè'ga tanaè. Engka iya ripakè untu' apparelluwang-apparelluwang mattentuè iya dè'è padanna, sibawa engkato iya ripakè untu' apparelluwang-apparelluwang biyasaè. 21 Tau iya pèpaccingiyèngngi alèna polè ri sininna iya dè'è namakessing ripakèi matu untu' apparelluwang-apparelluwang iya dè'è padanna. Mancajiwi appunnangenna iya ripallaingngè sibawa makkègunaè untu' puwanna. Ripassadiyai untu' ripakè lao ri tungke' jama-jamang iya makessingngè. 22 Abèlaiwi asennangeng-asennangenna tau malaloè. Akkuragano untu' tuwo situru èlona Allataala, matinulu lao ri pappagguruwan-Na, mamasèiwi pada-padatta sibawa mappunnai ariyawang ri laleng atiè. Tuwono makkuwaro sibawa mennang iya mangobbiè mèllau pattulung ri Puwangngè sibawa ati iya mapaccingngè. 23 Aja' muwaccowè ri laleng addebbakenna sining tau madonggoè iya temmissengngè agaga. Muwisseng makkedaè iya manennaro banna paompo appangèwang. 24 Tau iya majjamaè untu' Puwangngè dè' nasipato mappangèwang; harusu'i mabessa lao ri sininna tauwè, sibawa naullèi paggurui tauwè sibawa makessing enrengngè sabbara. 25 Harusu'i nasibawang lemma kininnawa paggurui sining tauwè iya pojiyèngngi mèwa; memmuwarè Allataala mpèrèngngi wettu lao risining tauwèro untu' toba' polè ri dosa-dosana mennang sibawa missengngi pappagguruwang iya tongengngè. 26 Nanallalengiro namainge' mennang paimeng, sibawa leppe' polè ri siyo-siyona Ibillisi' iya puraè tawangngi mennang sibawa passai mennang maccowèriwi èlona.

2 Timotius 3

1 Engngerangngi iyaè: Ri esso-esso paccappurengngè engka matu maèga asussang. 2 Napentingkangngi matu èlona tolinoè, mammata dowii, matempo sibawa napoji mabboro. Napoji mennang pakatunai tauwè, maronta lao ri tomatowaè, dè' naissengngi mattarima kasi, sibawa nabenci gau'-gau' rohaniè. 3 Dè' mennang namasèiwi padanna, dè' napojiwi maddampeng. Napoji mennang pau-pau majai asenna tau laingngè, sibawa pakè ateddekeng. Mapèddara mennang sibawa dè' napojiwi adècèngengngè. 4 Napoji mennang bali'bella, mabangka sibawa dè' napikkiri' malampè. Lebbi napoji mennang asennangeng linoè naiya maccowèriwi Allataala. 5 Namuni secara mallahèreng, mapatoi mennang pajoppai kewajibanna agamaè, iyakiya nasampèyangngi iya poko'è ri laleng agamaèro. Abèlaiwi sining tau makkuwaèro. 6 Engka ri yelle'na mennang iya maccelle'ènna ri laleng sining bolaè, nainappa napagguru sining makkunrai malemmaè iya mappunnaiyè maèga senna' dosa sibawa rikuwasai ri maddupa-rupang pangèloreng. 7 Iyaro sining makkunraiè matteru-terui mèllau ripagguru, iyakiya dè' naengka naullèi missengngi pappagguruwang iya tongengngè iya polè ri Allataala. 8 Pèkkugi Yanès sibawa Yambrès mèwai Musa riyolo, makkuwatoniro sining tauwèro mèwai pappagguruwang polè ri Allataala. Masolanni pikkiranna mennang, sibawa tassangkalanni teppe'na mennang. 9 Iyakiya dè' mennang nalolongeng matu aga-aga, saba' adonggonna mennang naissengngi sininna tauwè, pada-padato iya napèneddingiyè Yanès sibawa Yambrès. 10 Iyakiya iko purani muwaccowèri sining pappagguruwakku, kèdo-kèdoku, sibawa akkattana atuwokku. Alèmuna pura mitai pèkkugi tonget-tongekka mateppe' lao ri Yèsus Kristus sibawa mamasèiwi pada-padatta rupa tau. Muwissetto asabbarakekku. 11 Purana muwita ricalla sibawa manrasa-rasaka. Muwisseng maneng iya kajajiyangngè ri iyya ri Antiokhia, ri Ikonium, sibawa ri Listra; sibawa muwisseng maneng iya uwanrasa-rasaiyè! Iyakiya Puwangngè passalama'ka polè ri iya manennaro. 12 Mèmeng sininna tauwè iya maèloè tuwo sibawa massompa enrengngè tuwo massèddi sibawa Kristus Yèsus ricallai matu, 13 sedangkang sining tau iya majaè sibawa sining pabengnguwangngè pèdè' majai matu. Nabengnguwangngi mennang tau laingngè padahal ribengnguwang towi mennang. 14 Iyakiya passalenna iko, Timotius, sitinajako tette' makkatenning risining pappagguruwang iya tongengngè iya puraè riyappagguruwang ri iko sibawa iya muwatepperi manengngè; saba' muwissengngi niga guru-gurummu. 15 Harusu'i muwèngngerang makkedaè baiccu mupo muwissenni Kitta'è. Iyaro Kitta'è naullè mpèrèkko pappahang untu' lolongeng asalamakeng naolai teppe'è lao ri Yèsus Kristus. 16 Sininna iya tarokiè ri laleng Kitta'è, napanurungngi Allataala sibawa makkèguna untu' mappagguruwangngi iya tongengngè, untu' pètangngariwi rupa tauwè sibawa pèdècèngiwi iya salaè, enrengngè untu' paggurui rupa tauwè kuwammengngi natuwo situru èlona Allataala. 17 Nasibawang iyaro Kitta'è tau iya tumaningiyèngngi Allataala weddingngi ripassakke sibawa sukku untu' sininna rupanna jama-jamang iya makessingngè.

2 Timotius 4

1 Polèi matu paimeng Kristus Yèsus ri linoèwè untu' madèlèkiwi sining tau iya tuwoè sibawa matè; namaèloi polè untu' mapparènta selaku Arung. Rimakkuwannanaro uwèllauwi sibawa masero ri iko ri yolona Allataala sibawa Kristus Yèsus: 2 Sitinajako mabbirittangngi karèba polè ri Allataalaro, sibawa matteru maddessa kuwammengngi naèngkalingai tauwè, maèlogi mennang iyarè'ga dè'. Sitinajako patepperiwi tauwè, mappaitangngi iya salaè, sibawa mpèrèngngi dorongang mennang. Paggurui tauwè sibawa sabbara. 3 Saba' narapii matu wettunna dè'na namaèlo tauwè tarima pappagguruwang iya tongengngè. Sibalè'na, naturusiwi matu mennang cinnana muto, sibawa paddeppungeng maèga guru untu' ripagguru gau'-gau' iya malunra'è naèngkalinga ri daucculinna. 4 Natongkoi matu mennang daucculinna lao ri iya tongengngè, iyakiya napasangngi matu daucculinna lao ri pau-pau rikadongngè. 5 Namuni makkuwaro, harusu'ko kuwasaiwi alèmu ri laleng keadaang muwi maga. Sabbara'ko ri laleng anrasa-rasangngè, jamai jamammu selaku pabbiritta Karèba Madècèngngèro sibawa pajoppai sikkessik-kessinna kewajibammu selaku pattumaninna Allataala. 6 Passalenna alèku, narapini wettunna maèloka matè selaku akkarobangeng lao ri Allataala. Dè'na namaitta usalaiwi matu linoèwè. 7 Purani uwaccowèri akkalaringngè sibawa makessing, enrengngè lettu'na ri garisi paccappurengngè. Tette'ka matinulu lao ri Kristus lettu paccappurenna. 8 Namakkekkuwangngè hadiya apakalangngè tajekka. Ri Esso Kiyame', Puwangngè, Haking iya adèlè'èro mabbèrèyangngi matu iyaro hadiyaè lao ri iyya, nasaba tuwoka simadècèngeng sibawa Allataala. Na tenniya iyya bawang iya maèloè tarimai iyaro hadiyaè, iyakiya sininnato tauwè iya tajengngèngngi apolènna Puwangngè sibawa muddani senna'. 9 Akkuragano mulao ri iyya masitta-sitta, 10 saba' nasalaina' Dèmas nasaba naèloriwi linoèwè. Laoni ri Tèsalonika. Krèskès laoni ri Galatia, sibawa Titus ri Dalmatia. 11 Banna Lukas monro sibawakka. Duppaiwi Markus namutiwii lao kumaiyè saba' naullèi bantuka ri laleng jama-jamakku. 12 Purani usuro Tikhikus lao ri Efèsus. 13 Rèkko polèko, tiwii mantel iya usalaiyè ri Troas ri bolana Karpus. Tiwi towi bobbo-bobbo'ku, lebbi-lebbipi bobbo-bobbo iya riyèbbuè polè ri karettasa' bingkulangngè. 14 Alèksander, panrè tembagaèro purai napogau' gau'-gau' iya maja senna'è lao ri iyya. Puwangngè mpale'i matu situru pangkaukenna. 15 Alèmu paimeng harusu matutu lao ri alèna, saba' naèwa senna'i birittatta. 16 Wettunna bunge' upangolo untu' mèwaiwi alèku, dè' muwi sèddi tau ranrekka; nasalai manekka. Memmuwarè' Allataala dè' napasalai mennang ri laleng gau'èwè! 17 Iyakiya Puwangngè ranrekka. Mabbèrèi awatangeng angkanna uwullèi mabbirittangngi sininna Karèba Madècèngngèro, kuwammengngi naèngkalingai sininna tau tenniyaè Yahudi. Sibawa leppe'ka polè ri abala amatèngngè. 18 Mèmeng Puwangngè maèlo leppessakka polè ri tungke' pakkuraga majaè lao ri iyya. Maèloi tiwika sibawa salama' ri laleng akkarungen-Na ri surugaè. Sitinajai Alèna ripakaraja mannennungeng! Aming. 19 Sellekku lao ri Priskila sibawa Akwila enrengngè lao ri kaluwargana Onèsiforus. 20 Erastus monro ri Korintus, sibawa Trofimus usalaini ri laleng keadaang malasa ri Milètus. 21 Akkuragano siullè-ullèna untu' polè riwettu dè'napa na wettu keccè'è. Ebulus, Pudès, Linus sibawa Klaudia massellengngi mennang lao ri iko; makkuwatoro sininna Saudara siateppereng laingngè. 22 Tennapodo Puwangngè ranrekko. Tennapodo Puwangngè barakkakiwi Saudara-saudara! Salama, Paulus

Titus 1

1 Ana'ku Titus! Iyya, Paulus, mokii iyaè sure'è selaku atanna Allataala sibawa rasulna Yèsus Kristus. Ripilèka sibawa risuro untu' tulungngi sining tau napilè Allataala kuwammengngi namancaji mawatang ri laleng teppe'na mennang. Harusu tokka pimpingngi mennang kuwammengngi naissengngi pappagguruwang iya tongengngè iya nappagguruwangngè agamata. 2 Iyaro pappagguruwangngè nallalengi mammènasa makkedaè tarimaki matu atuwong tongengngè sibawa mannennungengngè. Allataala pura majjanciyangngi iyaro atuwongngè riwettu dè'napa nappammula wettuè -- na Allataala dè' nakkullè mabbellè. 3 Ri wettu iya teppa'è, napannessai Allataala iyaro jancin-Na ri laleng pasen-Na. Iyaro pasenna purani nappaddettangeng ri iyya, sibawa uwabbirittangngi nasaba parèntana Allataala Pappassalama'ta. 4 Titus, tonget-tongekko iyanaritu ana'ku, saba' iko sibawa iyya pada-pada mateppe' ri Kristus. Mammènasaka tennapodo Allataala Ambo'è sibawa Kristus Yèsus Arung Pappassalama'ta, mabbèrè barakka, sibawa asalèwangeng lao ri iko. 5 Usalaiko ri Krèta kuwammengngi mullèi murusu'i gau'-gau' iya parelluè riatoro'. Makkuwatoro, kuwammengngi muwakka pamimping-pamimping jema' ri tungke' kota. Na èngngerangngi matu iyaè panunju'-panunju'ku: 6 Sèddiè pamimping jema' sitinajai sèddi tau iya dè'è gaga cellana; harusu'i mappunnai sèddi bawang bainè; ana'-ana'na harusu'i mateppe'ni ri Kristus sibawa tenniya iya riissengngè selaku ana' benna sibawa dè' nawedding riyatoro'. 7 Pamimping jema'è iyanaritu tau iya murusu'èngngi jama-jamanna Allataala, dè' nawedding engka cellana. Dè' nawedding matempo iyarè'ga paccai-caireng, iyarè'ga pammabokeng, iyarè'ga napoji mallaga, iyarè'ga mammata dowi. 8 Harusu'i masennang tarima tau ri bolana, napoji gau'-gau' iya makessingngè, naullèi tahangngi alèna, malempu, mapaccing sibawa taratoro'. 9 Harusu'i makkatenning masse ri pappagguruwang iya weddingngè riyatepperi, pada-pada iya puraè riyappagguruwang lao ri alèna. Nanallalengiro naullèi pangajariwi tauwè naolai pappagguruwang iya tongengngè, sibawa mappaitangngi asalanna sining tauwè iya mèwaèngngi. 10 Saba' maèga tau iya pojiyèngngi maronta, lebbi-lebbipi sining tau iya riyolonaèro maggama Yahudiwi; nabengnguwangngi mennang sining tau laingngè sibawa omong kosonna. 11 Sining tau pada-padaèro harusu'i ritutu' tèmunna, saba' napakacauwi mennang maèga kaluwarga sibawa sining pappagguruwang iya omong kosongngè. Napogau'i mennang iyaro banna nasaba maèloi sappa asarong iya dè'è nasipato! 12 Engka naengka sèddi nabinna muto mennang, iya assalennaè polèto ri Krèta, makkeda, "Sining tau Krètaè tuli pabbellèngngi, sibawa pada-padai olokolo' masekkangngè, iya mabuwajaè sibawa makuttu. " 13 Aga iya napowadaè iyaro nabiè mèmeng tongengngi. Iyanaro saba'na harusu'ko mamparengngi mennang sibawa matedde; kuwammengngi natette mennang makkatenning ri pappagguruwang iya tongengngè 14 sibawa dè'na nakkatenning ri pau-pau rikadonna Yahudiè iyarè'ga peraturang-peraturang iya naèbbuè sining tau iya sampèyangngèngngi pappagguruwang iya tongengngèro. 15 Sininna sèuwa-sèuwaè mapaccing lao risining tau iya mapaccingngè. Iyakiya lao risining tau iya macarèpaè pikkiranna sibawa iya dè'è namateppe', dè' muwi sèddi iya mapaccingngè, saba' pikkirang sibawa atinna mennang macarèpani! 16 Makkedai mennang makkedaè naissengngi mennang Allataala, padahal pangkaukenna mennang massakkarengngi. Mappakaciddi-ciddi mennang sibawa dè' namaèlo turu'; mennang iyanaritu sining tau iya dè'è naullèi pogau'i sèuwa iya makessingngè.

Titus 2

1 Iyakiya iko, Titus, sitinajako mappagguruwangngi pappagguruwang iya teppa'è. 2 Pangajariwi worowanè iya macowaè, kuwammengngi nakuwasaiwi alèna, mapanrè, sibawa tuwo selaku tau iya sipato'è ripakalebbi. Harusu towi mennang makkatenning ri pappagguruwang tongengngè iya polè ri Allataala, makkamasè sibawa sukku enrengngè manrasa sibawa sabbara. 3 Makkuwatoro sitinajako pangajariwi sining makkunrai iya macowaè kuwammengngi na kèdo-kèdona mennang siturui sibawa iya sipato'è untu' tau iya tuwoè banna untu' Allataala. Dè' nawedding mennang pètenna'i tau laingngè, sibawa dè'to nawedding nacandu ènungeng maseri. Harusu'i mennang mappagguruwangngi gau'-gau' iya makessingngè, 4 kuwammengngi nasibawangngi iyaro naullèi mennang paggurui sining makkunrai maloloè untu' mamasèiwi lakkaiè sibawa ana'-ana'è, 5 mancaji mapanrè, tuwo mapaccing sibawa mancaji ibu ruma tangga iya makessingngè iya tunru'è lao ri lakkainna. Nanallalengiro dè' gaga tau iya mullèngngi cellai biritta polè ri Allataala. 6 Makkuwatoro, pangajariwi sining tau maloloè kuwammengngi naissengngi mennang makuwasaiwi alèna. 7 Ri laleng sininna gau'è, sitinajako mancaji conto kèdo-kèdo iya makessingngè. Rèkko mappagguruko, sitinajako malempu sibawa mattonget-tongeng. 8 Pakèi ada-ada iya makessingngè, iya dè'è nawedding nacella tauwè, kuwammengngi naissengngi balimmu mancaji masirii nasaba dè' gaga gau'-gau' maja iya naullè mennang powada passaletta. 9 Sining ataè harusu'i tunru' ri puwanna, sibawa sennangiwi atinna ri laleng sininna passalengngè. Dè' nawedding mennang mabbanta, 10 iyarè'ga mènnau. Sitinajai mennang mappaitangngi makkedaè tuli kèdo makessingngi sibawa matinulu, kuwammengngi nallalengi sipa'na mennanro, napojiwi tauwè pappagguruwangngè passalenna Allataala, Pappassalama'ta. 11 Saba' purani nappaitang Allataala pammasè-Na untu' passalama'i sininna rupa tauwè. 12 Iyaro pammasèna Allataala napagguruki kuwammengngi dè' tatuwona sièwa èlona Allataala sibawa dè' nariyaccowèri èlona linoè. Ripagguruki untu' tuwo ri laleng linoèwè sibawa missengngi makuwasaiwi alè, mapato sibawa matinulu lao ri Allataala. 13 Makkekkuwangngè mattengngakki tajengngi Esso iya riyammènasaiyèro; ri Essoèro naitai matu linoè arajanna Yèsus Kristus, iyanaritu Allataala Pobbatowaè sibawa Arung Pappassalama'ta. 14 Purani nakkarobangeng Alèna untu' idi untu' paleppe'ki polè ri sininna jaè, sibawa pancajiki sèddi umma' iya leppe'è polè ri dosaè, iya mancajiyè appunnangen-Na bawang, enrengngè mapato pogau'i makessingngè. 15 Appagguruwangngi iya manennaro, sibawa pangajariwi enrengngè amparengngi sining tau mèngkalingaèkko sibawa penno akuwasang. Aja' muleppessangngi muwi sèddi tau mita mariyawako.

Titus 3

1 Parèngngerangiwi anggota-anggota jema'mu kuwammengngi natunru' mennang lao risining pamimpingngè sibawa tomakuwasana wanuwaè, enrengngè matinulu sibawa sadiya pogau'i tungke' pangkaukeng iya makessingngè. 2 Powadangngi mennang kuwammengngi aja' nappètenna iyarè'ga mappangèwang sibawa muwi niga, sangadinna kuwammengngi nasipammasè-masè sibawa mabessa. Sitinajai mennang tuli malemma kininnawa lao ri sininna tauwè. 3 Saba' riyolo idi paimeng madonggoto, pusa sibawa temmatinulu. Ripowataki rimaddupa-rupang napessuè sibawa cinna'è, tuwoki sibawa niya'-niya' majaè sibawa mangèmpuru, enrengngè sisullè sibenci. 4 Iyakiya Allataala Pappassalama'ta nappaitangngi pammasè-Na sibawa akessingeng atin-Na lao ri idi. 5 Napassalama'ki, tenniya nasaba puraki pogau'i sèuwa iya makessingngè, sangadinna nasaba alèna muto mamasèiki. Napassalama'ki naolai Rohna Allataala, iya mpèrèngngèkki ajajiyang mabaru sibawa atuwong mabaru ri laleng cara nabissaitta. 6 Natiri'i Allataala Roh-Na lao ri idi naolai Yèsus Kristus, Arung Pappassalama'ta, 7 kuwammengngi napolè ri pammasèna Yèsus, simadècèngekki paimeng sibawa Allataala natalolongeng atuwong tongengngè sibawa mannennungengngè iya riyammènasaiyè. 8 Tongeng senna' iyaè adaè. Uwèllauwi muteddeki gau'-gau'èwè, kuwammengngi nasining tau iya mateppe'è ri Allataala tonget-tongengngi makkuraga untu' pogau'i jama-jamang iya makessingngè sibawa makkègunaè untu' sininna tauwè. 9 Abèlaiwi sining addebbakeng iya dè'è nakkèguna, curita-curita appo-appongennaè, appangèwangengngè sibawa allagangngè passalenna hukkunna agamaè. Iya manennaro dè' gaga gunana sibawa dè' gaga sarona. 10 Tau iya nassabariyè assisalang ri laleng jema'è, sitinajai muwampareng siseng iyarè'ga wèkkaduwa; purairo aja'na musiwollompollong sibawa alèna. 11 Muwisseng makkedaè tau pada-padaèro maja sibawa dosa-dosana pabuttiwi makkedaè pasalai. 12 Ukirinna muwa Artèmas iyarè'ga Tikhikus lao ri iko, akkurako masitta untu' lao ri iyya ri Nikopolis, saba' manniya'ka monro kuwaro ri wettu keccè'è. 13 Akkuragano tonget-tongeng untu' bantui Zènas, ahli hukkungngèro, sibawa Apolos, kuwammengngi naullèi joppa sibawa dè' naakurangeng agi-agi. 14 Sining tautta harusu'i magguru pogau'i gau'-gau' iya makessingngè kuwammengngi naullèi pennoiwi apparelluwanna iya napparelluwang senna'è; aja' narapii tuwo temmakkèguna. 15 Sininna Saudara iya sibawangngèkka, massellengngi ri iko. Palettukekki selletta lao ri sellao-sellaota iya siyateperengngè. Tennapodo Puwangngè barakkaki manengngi Saudara. Salama, Paulus

Filemon 1

1 Saudara Filèmon, sellao sibawa sahaba'ta! Iyya, Paulus, sèddiwi tau tahanang nasaba Kristus Yèsus, silaong saudarata Timotius, mokii iyaè sure'è lao ri iko 2 sibawa lao ri jema'è iya maddeppungengngè ri bolamu; makkuwatoro lao ri ana' daratta, Apfia sibawa sellao seperjuwangetta, Arkhipus. 3 Mammènasaki tennapodo Allataala Ambo'ta sibawa Puwang Yèsus Kristus mabbèrè barakka sibawa asalèwangeng lao ri iko. 4 Sises-siseng massempajakka, uteppui asenna Saudara sibawa mattarima kasi lao ri Allataala. 5 Saba' uwèngkalingai makkedaè tonget-tongengngi Saudara mateppe' lao ri Puwang Yèsus sibawa mamasèiwi sininna umma'na Allataala. 6 Massempajakka tennapodo assilessuretta selaku tau mateppe' powassèlè'i matu pappèjeppu iya lebbi battowaè nasaba sininna barakka iya riyappunnangiyè nasaba massèddiki sibawa Kristus. 7 Saudara Filèmon, pammasèmu lao ri sininna umma'na Allataala, rennuika sibawa mpèrèkka sumange'! Sininna umma'na Allataala marennu nasaba Saudara. 8 Rimakkuwannanaro, selaku sèddi Saudara iya siyatepperengngè, weddissa uparèntang Saudara untu' pogau'i aga iya harusu'è napogau' Saudara. 9 Iyakiya nasaba uwamasèiwi Saudara, iyya marèllauma bawang. Iyya'è sèddi tau macowa namakkekkuwangngè mattengngang ritahang ri laleng tarungkuè nasaba Kristus Yèsus. 10 Iyya, Paulus, pangolo sèuwa parèllaung lao ri iko passalenna Onèsimus, ana'ku ri laleng Kristus. Saba' ri laleng tarungkuè mancajika ambo' rohaninna. 11 Riyolo dè' nakkèguna untu'mu, iyakiya makkekkuwangngè makkègunani, tenniya bawang untu'mu, iyakiya untu' iyya'to. 12 Makkekkuwangngè iyaro tau uwamasèiyè ukiringngi lisu ri iko. 13 Sitongenna maèloka tahangngi sibawakka kuwaè selaku passalemmu, kuwammengngi weddingngi nabantuka, sipongenna ritahakka ri laleng tarungkuèwè nasaba mabbirittangngi Karèba Madècèng polè ri Allataala. 14 Iyakiya dè' umaèlo pogau' agi-agi rèkko dè'pa nasitujuiwi Saudara. Lebbi upojiwi rèkko napogau'i Saudara sibawa macenning; dè' umaèlo passako. 15 Naullè massarangngi Onèsimus polè ri Saudara untu' dè' namaitta kuwammengngi weddingngi saudara nalolongeng paimeng lettu mannennungeng. 16 Makkekkuwangngè tenniya banna sèddiwi ata untu' Saudara; lebbi na iyaro. Iyanaritu pada-padatta tau Kristèng iya riyamasèiyè nasaba Kristus. Makkèguna senna'i untu' iyya, apalagi untu'mu. Tentu makkèguna senna'i, muwi selaku ata iyarè'ga sèddi Saudara ri laleng Puwangngè! 17 Rimakkuwannanaro, nasaba Saudara nangga'ka sellao pada-pada Kristèng, tarimani paimeng Onèsimus pada-pada natarimaku Saudara. 18 Rèkko pasalai iyarè'ga makkinrengngi lao ri iko, leppessanni iyya tanggungngi iya manennaro. 19 Nah, makessinni alèku mokii kuwaè: Iyya, Paulus, maèlo paleppe' manengngi. (Tentu dè' naparellu uwapparèngngerangeng makkedaè alèna Saudara mappunnai inreng ri iyya, iyanaritu atuwong barumu selaku tau Kristèng. ) 20 Rimakkuwannanaro, nasabbing Puwangngè, coba tulukka; pèrennuiwi atikku selaku pada-padatta Saudara ri laleng Kristus. 21 Uwokii iyaè sure'è nasaba teppe' makkedaè Saudara maèlo pogau'i aga iya uwèllauwè. Mala uwisseng Saudara maèloi pogau'i lebbi na iyaro. 22 Ri lalennaro, tulungngi passadiyangekka kamara' ri bolamu, saba' mammènasaka Allataala tarimai sempajanna maneng Saudara sibawa tiwika lisu ri iko. 23 Epafras, iya engkaè sibawakka ri laleng tarungkuè nasaba Kristus Yèsus, masselleng lao ri iko. 24 Tarima towi sellenna sellao-sellaoku: Markus, Aristarkhus, Dèmas sibawa Lukas. 25 Tennapodo Puwang Yèsus Kristus barakkakiko. Salama, Paulus

Ibrani 1

1 Wettu riyolo malèwe' senna' Allataala mabbicara lao ri nènè-nènèta naolai nabi-nabiè sibawa pakèi maddupa-rupang cara. 2 Iyakiya ri wettu paccappurengngèwè mabbicarai lao ri idi naolai Ana'-Na. Naolai Ana'-Naè napancajiwi Allataala sininna alangngè. Sibawa purani napattentu Allataala makkedaè iyatonaè Ana'-Na iya mappunnaiyè ha' mappunnaiwi sini-sininnaè. 3 Alèna ritu mattapparengngi arajanna Allataala iya millakkillangngè; Alèna ritu gambara'na Allataala iya manessaè. Alèna tona piyarai akkalèpunna alangngèwè ri laleng saddan-Na iya makuwasa senna'è. Puranana napakkullè rupa tauwè untu' ripaleppe polè ri dosa-dosana mennang, natudangini kadèra apparèntangngè ri surugaè silaong Allataala, Panguwasa iya kaminang matanrè. 4 Iyaro Ana'è lolongengngi tudangeng iya mabèlaè lebbi tanrè naiya malaèka'è, sibawa aseng iya riwèrèngngèngngi ri Allataala lao ri Alèna mabèla towi lebbi malebbina naiya aseng iya riwèrèngngèngngi malaèka'è. 5 Dè' naengka nakkeda makkuwaè Allataala muwi lao risèddiè malaèka', "Ikona Ana'-Ku; iya essoèwè Umancaji Ambo'-Mu. " Dè'to naengka nakkeda makkuwaè Allataala passalenna muwi malaèka' niga, "Maèlo-Ka mancaji Ambo'na, na alèna mancaji matu Ana'-Ku. " 6 Iyakiya wettunna Allataala nasuro Ana'-Na iya macowaè muttama ri linoèwè, makkeda makkuwaiyè Allataala, "Sininna malaèka'na Allataala waji'i sompai iyaro Ana'è. " 7 Passalenna sining malaèka'è, makkeda makkuwaiyè Allataala, "Naèbbui Allataala sining malaèka'-Na mancaji anging, sibawa sining pattumanin-Na mancaji luwa' api. " 8 Iyakiya lao ri Ana'èro, makkedai Allataala, "Kadèra arajam-Mu, oh Allataala, mannennungengngi matu! 9 Napoji adèlèkengngè, sibawa nabenciwi acèko-cèkongngè; iyanaro saba'na Allataala, Allataala-Mu, napilè-Ko sibawa mpèrèk-Ko alebbireng iya mappapolè ariyo-riyong, napakacauri sellao-sellao-Mu. " 10 Makkeda towi Allataala, "Idi, Puwang, bunge'-bunge' pancajiwi tanaè, sibawa alèmuto mèbbui langiè. 11 Iya manennaro lennye'i matu, sibawa mancaji malaung pada-pada pakèyangngè; iyakiya Iko dè' pinrana matu. 12 Alangngè lollong lise'na Muleppiwi matu pada-pada wajuè, na-Musullèiwi matu sibawa laingngè. Iyakiya Iko dè' naengka mutappinra matu, sibawa atuwom-Mu dè' naengka nacappu matu. " 13 Dè' naengka nakkeda makkuwaè Allataala muwi lao ri malaèka'è, "Tudanno ri seddè atauk-Ku, narapi Uwèbbu sining balimmu tunru' ri iko. " 14 Rèkko makkuwaitu, aga sitongenna iyaro sining malaèka'è? Mennang iyanaritu roh-roh iya tumaningiyèngngi Allataala, sibawa iya risuroè untu' tulungngi sining tau iya maèloè tarima asalamakeng.

Ibrani 2

1 Iyanaro saba'na na harusu'ki pèdè' mattonget-tongeng makkatenning risining pappagguruwanna Allataala iya puraè riyèngkalinga, kuwammengngi aja' tasalaiwi atepperetta. 2 Sining paseng iya napalettu'è sining malaèka'è lao ri nènè-nènèta manessani tongeng, na tau iya dè'è naturusiwi iyarè'ga napatoiwi tarimai pahukkungeng iya sicoco'è. 3 Apalagi nasibawang asalamakeng iya lebbi hèba'è naiya sining pasengngèro! Rèkko dè' tajampangiwi asalamakengngèro, tentuni dè' taleppe matu polè ri pahukkungengngè. Saba' Puwangngè muto ritu iya bunge'-bunge'è mappallebbangengngi asalamakengngèro, nasining tau iya bunge'-bunge'è mèngkalingai purani napabutti atongengenna lao ri idi. 4 Ri lainnaèro, turu'i Allataala pèwatangiwi asabbiyanna iyaro sining tauwè ri laleng napakangkana maddupa-rupang anu makalallaing enrengngè gau'-gau' iya dè'è padanna kuwaèttopa mabbagè-bagèyangngi sining pabbèrè polè ri Rohna Allataala situru èlo-Na muto. 5 Sining malaèka'è dè' nalolongeng akuwasang polè ri Allataala untu' parèntai lino baru iya mangoloè, iyanaritu lino iya mattengngangngè ribicaraè. 6 Sibalè'na, risèuwaè bagiyang ri laleng Kitta'è tarokii makkuwaè, "Aga iyaro rupa tauwè, oh Allataala, angkanna maèloki mèngngerangngi? Rupa tauwè banna rupa tau bawang, iyakiya mujampangiwi! 7 Untu' wettu iya cinna'è Mupancajiwi cèddè lebbi ri yawa naiya malaèka'è. Tawèrèngngi tudangeng iya malebbiè sibawa marajaè, 8 enrengngè pancajiwi makuwasa ri yasè'na sininna sèuwa-sèuwaè. " Nah, rèkko ripowadai Allataala pancajiwi rupa tauwè "makuwasaiwi sininna sèuwa-sèuwaè", iyaro bettuwanna makkedaè dè'gaga muwi sèddi iya dè'è na ri yawana akuwasanna rupa tauwè. Namuni makuwasai rupa tauwè ri yasè'na sininna sèuwa-sèuwaè. 9 Iyakiya idi purani riita Yèsus makuwasaiwi! Ripancajiwi cèddè lebbi ri yawa naiya malaèka'è untu' wettu cinna'è, kuwammengngi ri laleng akessingeng atinna Allataala weddingngi matè untu' sininna rupa tauwè. Riitani makkekkuwangngè riwèrèng tudangeng iya malebbiè sibawa marajaè nasaba purai manrasa-rasa gangka matè. 10 Mèmeng sipato'ni Allataala -- iya pinruèngngi sininna sèuwa-sèuwaè untu' akkatta-Na muto -- mèbbui Yèsus pappassalama' iya sukkuè naolai anrasa-rasangngè. Nallalengiro naullèi Allataala mèrai maèga tau untu' maccowè ripakaraja silaong Yèsus. Saba' Alèna pattimpa laleng lao ri mennang untu' weddingngi ripassalama'. 11 Yèsus pèpaccingiwi rupa tauwè polè ri dosa-dosana mennang; na Alèna iya pèpaccingiyèngngi, enrengngè mennang iya ripèpaccingiyèro, pada-padai mappunnai sèddi Ambo'. Iyanaro saba'na Yèsus dè' namasiri mangakuiwi mennanro selaku saudara-saudara-Na. 12 Makkedai Yèsus lao ri Allataala, "Maèloka mabbirittangngi lao ri saudara-saudara-Ku passalenna Iko. Maèlo-Ka poji-Ko ri laleng addeppu-deppungenna mennang. " 13 Makkeda towi Yèsus, "Maèlo-Ka mammènasa lao ri Allataala. " Sibawa makkeda towi, "Iyanaè Iyya, silaong ana'-ana' iya puraè nabbèrèyang Allataala lao ri Iyya. " 14 Nasaba sining tau iya nateppuè iyaro ana'è, iyanaritu mahlu' tolino iya weddingngè matè, na Yèsus muto mancaji pada sibawa mennang enrengngè tuwo ri laleng keadaang tolinoè. Napogau'i makkuwaèro, kuwammengngi nasibawang amatèn-Na naullèi mancuru'i Ibillisi' iya makuwasaiyèngngi amatèngngè. 15 Nasibawang caraèro napalettu'i sining tau iya sillampèè umuru'na ripowata nasaba mètaui ri amatèngngè. 16 Manessani makkedaè tenniya malaèka' iya Natulungngè, sangadinna wijanna Abraham. 17 Bettuwanna iyaè, makkedaè harusu'i mancaji pada-pada saudara-Na ri laleng sininna gau'è. Nanallalengiro weddingngi mancaji Imang Lompo iya matinuluè sibawa maressè babuwaè. Nasaba pattumaninnaro, weddingngi riyaddampengeng dosa-dosana tolinoè. 18 Sibawa nasaba alèna pura manrasa-rasa enrengngè ricobai, nanaullèi tulungngi sining tau iya nakennaè paccobang.

Ibrani 3

1 Saudara-saudara pada-padatta Kristèng iya puraè riyobbito ri Allataala! Coba pikkiri'i malamul-lamung passalenna iyaè Yèsus! Allataala suroi Alèna banna untu' mancaji Imang Lompo ri laleng agama iya riyaccowèriyè. 2 Matinului lao ri Allataala iya puraè pilèi untu' jama-jamangngèro pada-padato Musa riyolo matinulu pogau'i jama-jamanna ri Bolana Allataala. 3 Iyakiya Yèsus sipato'i lolongeng alebbireng iya lebbi battowaè naiya Musa. Saba' tau iya patettongngè bola harusu'i lolongeng alebbireng iya lebbi battowaè naiya iyaro bolaè. 4 Mèmeng tungke' bola engka patettongngi, iyakiya iya patettongngèngngi sininna sèuwa-sèuwaè iyanaritu Allataala muto. 5 Matinului Musa selaku pattumani ri laleng Bolana Allataala enrengngè palettu'i gau'-gau' iya maèloè nappaddissengeng Allataala ri wettu mangoloè. 6 Iyakiya Kristus matinului selaku Ana' iya tanggung jawakiyèngngi Bolana Allataala. Na idi'naè Bolana Allataala, rèkko tette'ki masumange' sibawa tette' mateppe' untu' lolongengngi aga iya tammènasaiyè. 7 Rimakkuwannanaro, pada-pada adanna Rohna Allataala, "Rèkko iyaè essoè muwèngkalingai saddanna Allataala, 8 aja' mumatedde ati, pada-pada toriyolomu, wettunna mennang maronta lao ri Allataala, enrengngè mojiwi Allataala ri padang kessi'è. 9 'Kuwaro nacobai-Ka toriyolomu, enrengngè naoji-Ka, ' adanna Allataala, 'padahal purani naita mennang pangkaukek-Ku patappulo taung ittana. ' 10 Iyanaro saba'na Umacai lao ri mennang sibawa makkeda, 'Tuli dè' namatinulu mennang, sibawa dè' namacinna turusiwi parènta-Ku. ' 11 Macai-Ka sibawa mattanro, 'Dè' nauttama matu mennang ri wanuwaèro untu' lolongeng appèsaungeng. ' " 12 Saudara-saudara, atutuko aja' lalo naengka ri yelle'mu sèddi tau iya maja makkuwaèro atinna enrengngè dè' namateppe', angkanna balè'i sibawa mabèlaiwi Allataala iya tuwoè! 13 Jaji, kuwammengngi nadè' muwi sèddi tau polè ri yelle'mu iya ribengnguwangngè ri dosaè angkanna naèwai Allataala, sitinajako sipangajari esso-esso ri wettu tuwota mupa ri laleng wettu iya riteppuè "Essoèwè" ri laleng Kitta'è. 14 Idi manengngè iyanaritu siperjuwangekki sibawa Kristus, assaleng lettu'ki ri paccappurenna makkatenning masse'i ateppereng iya riyappunnaiyè ri pammulanna. 15 Iyanaè taroki ri laleng Kitta'è, "Rèkko iyaè essoè muwèngkalingai saddanna Allataala, aja' mumatedde ati, pada-pada toriyolomu, wettunna maronta lao ri Allataala. " 16 Nah, niga sining tau iya mèngkalingaèngngi saddanna Allataala nainappa maronta lao ri Alèna? Tenniyaga iyanaritu sininna tau iya napimpingngè Musa massu polè ri Masèrè'? 17 Na lao riniga Allataala macai patappulo taung ittana? Tenniyaga lao ri mennang iya madosaè, iya mabuwangngè matè ri padang kessi'è? 18 Wettunna Allataala mattanro makkuwaè, "Dè' nauttama matu mennang ri onrong appèsaungek-Ku" -- niga palè iya nakkattaiyè Allataala? Tenniyaga, iya nakkattaiyè iyanaritu sining tau iya maronta'è lao ri Allataala? 19 Ripahanni makkekkuwangngè makkedaè dè' naullèi mennang muttama, nasaba dè' mennang namateppe' ri Allataala.

Ibrani 4

1 Nah, kajajiyang mupi jancinna Allataala, sibawa riwèrèkki matu onrong untu' mappèsau. Jaji, sitinajaki jagaiwi kuwammengngi aja' namuwi sèddi tau polè ri yelle'mu iya manessaènna dè' napèneddingiwi onrong appèsaungeng iya najjanciyangngèro. 2 Saba' iyaro Karèba Madècèngngè purani riyabbirittang ri idi pada-pada lao ri mennang. Namuni lao ri mennang, iyaro birittaè dè'gaga gunana. Saba' wettunna mennang naèngkalinga, dè' mennang namateppe'. 3 Iyakiya idi iya mateppe'è tarimai onrong appèsaungeng iya najjanciyangngè Allataalaro. Iyaro sicoco'i sibawa aga iya napowadaè Allataala, makkuwaè, "Macai-Ka sibawa mattanro, 'Makkedaè dè' nauttama matu mennang ri onrong appèsaungek-Ku. ' " Makkeda makkuwairo Allataala namuni jama-jaman-Na tèpuni sipongenna napancaji linoèwè. 4 Saba' passalenna esso mapituè, engka taroki ri laleng Kitta'è makkuwaè, "Ri esso mapituè mappèsauni Allataala polè ri sininna jama-jaman-Na. " 5 Passalenna iyaro gau'è riyokii makkuwaè, "Dè' nauttama matu mennang ri onrong appèsaungek-Ku. " 6 Jaji mennang iya bunge'-bunge'è mèngkalingai biritta passalenna Karèba Madècèngngèro, dè' natarima onrong appèsaungeng nasaba dè' mennang namateppe'. Rèkko makkuwaitu manessani makkedaè engka sining tau laing iya weddingngè tarimai onrong appèsaungengngèro. 7 Saba' Allataala pura pattentui sèddi esso iya laingngèssi, iya riteppuè "Essoèwè". Mattaut-taung ri munrinna Allataala mabbicara passalenna gau'èro naolai Daud, ri laleng aya'èwè onna, "Rèkko iya essoèwè muwèngkalingai saddanna Allataala, aja' mumatedde ati. " 8 Rèkko èbara'na purani natiwi Yosua iyaro sining tauwè muttama ri onrong appèsaungeng iya najjanciyangngè Allataala, tentu Allataala dè'na nabbicarana passalenna sèddi esso laingngè. 9 Jaji untu' umma'na Allataala engka mupa janci untu' mappèsau pada-pada Allataala mappèsau ri esso mapituèro. 10 Saba' tau iya muttama'è ri onrong appèsaungeng iya najjanciyangngè Allataala lao ri alènaro, mappèsau towi matu polè ri sininna jama-jamanna, pada-padato Allataala. 11 Rimakkuwannanaro, laono mai takkuraga tonget-tongeng untu' muttama ri onrong appèsaungeng iya najjanciyangngè Allataalaro. Aja' lalo narapii muwi sèddi tau polè ri idi dè' nakkèwassèlè' pada-pada mennang riyolo, nasaba dè' namateppe' ri Allataala. 12 Ada-adanna Allataala iyanaritu ada-ada iya tuwoè sibawa mawatang; lebbi tarengngi naiya peddang matareng waliè. Iyaro ada-adaè mattoddo'i narapi pakkasèsènna nyawaè sibawa roh-è; narapi pakkasèsènna padduppa-duppangngè sibawa uta'na buku-bukuè, angkanna naisseng silamul-lamunna pikkirang sibawa niya' atinna rupa tauwè. 13 Dè'gaga muwi sèddi mahlu' iya tassubbuè polè ri pakkitanna Allataala. Sininna sèuwa-sèuwaè mallusu-lusui sibawa tabbukka ri yolo-Na. Sibawa harusu'ki mabbèrè tanggung jawa' ri Alèna. 14 Iyanaro saba'na harusu'ki makkatenning masse ri angakungeng atepperetta. Saba' mappunnaiki Imang Lompo iya battowaè, iya muttama'ènna lettu ri yolona Allataala -- Alèna ritu Yèsus Ana'na Allataala. 15 Iyaro Imang Lompota tenniya imang iya dè'è naullèi maccowè pèneddingiwi sining alemmatta. Sibalè'na, purani ricobai ri sininna gau'è, pada-pada muto idi; banna Alèna dè' napogau' dosa! 16 Rimakkuwannanaro, laono mai sibawa penno abaraningeng mangolo ri Allataala iya mapparèntaè sibawa makessing ati. Namasèiki matu Allataala sibawa barakkakiki kuwammengngi lolongekki pattulung ri wettunna.

Ibrani 5

1 Tungke' imang lompo ripilèi polè ri yelle'na umma'è, sibawa riyakka untu' tumaningiwi Allataala selaku wakkèlè'na mennang. Jamanna iyanaritu makkasuwiyangengngi lao ri Allataala sining pabbèrèna sibawa akkarobangeng-akkarobangenna untu' riyaddampengenna dosaè. 2 Iyaro imang lompoè malemmai ri laleng maèga passaleng, iyakiya mala nasaba iyaro naweddingngi namalemma kininnawato lao risining tau iya dè'è naissengngi agi-agi sibawa iya pusaè lalenna. 3 Sibawa nasaba malemmai alèna, na harusu'i makkasuwiyangeng akkarobangeng, tenniya bawang nasaba dosa-dosana umma'è, iyakiya nasaba dosa-dosanato alèna. 4 Dè'gaga sèddi tau iya alèna muto makkai alèna mancaji imang lompo. Mancajiwi imang lompo tauwè, rèkko Allataala mobbii untu' iyaro -- pada-pada muto Harun. 5 Makkuwatoro Kristus. Dè' nakkai Alèna mancaji Imang Lompo. Allataala muto makkai. Makkedai Allataala ri Alèna, "Ikona Ana'-Ku: iyaè essoè umancaji Ambo'mu. " 6 Ri onrong laingngè makkeda towi Allataala, "Iko iyanaritu imang mannennungeng, pada-pada Imang Malkisèdèk. " 7 Wettunna Yèsus tuwo ri linoèwè, massempajangngi enrengngè marèllauwi sibawa gora kuwaèttopa teri lao ri Allataala, iya mullè mappassalama' polè ri amatèngngè. Nasaba tunru'i ri Allataala sibawa mappakalebbi, nariyèngkalingai. 8 Yèsus iyanaritu Ana' Allataala, iyakiya muni makkuwaro, maggurui mancaji matinulu naolai anrasa-rasan-Na. 9 Na puranana ripancaji pappassalama' iya sukkuè, mancajiwi assalenna asalamakengngè iya mannennungengngè lao ri sininna tau iya matinuluè ri Alèna, 10 sibawa muwi Allataala pannessa towi selaku Imang Lompo, pada-pada Imang Malkisèdèk. 11 Passalenna tudangenna Yèsus selaku Imang Lompo, engka maèga iya parelluè riyappaissengeng lao ri iko, iyakiya mawatang untu' pakatajangngi saba' matengnge' senna'ko mappahang. 12 Sitongenna wettummuna untu' mancaji guru, iyakiya annessana parellu mupo magguru polè ri tau laingngè passalenna poko'-poko' mammulangngè sining pappagguruwanna Allataala. Dè'pa muwullèi tarima anrè iya matedde'è; harusu mupo mènung susu bawang. 13 Tau iya mènungngè mupa susu, bettuwanna ana'lolo mupi; dè'pa nappunnai pangalamang passalenna aga iya tongengngè sibawa aga iya salaè. 14 Inanrè iya matedde'è, iyanaritu sining tau battowaè iya nasaba pangalamannaè, naullèi pasilaingengngi kèga makessing sibawa kèga maja.

Ibrani 6

1 Rimakkuwannanaro, laono mai aja' banna puriyatiwi poko'-poko' mammulanna pappagguruwatta. Makessingengngi majuki ri pappagguruwang iya lebbi matteruè passalenna atuwong Kristèng secara mattanggung jawa'è sibawa aja' tapakkolingngi paimeng pappagguruwang bunge'-bunge'è makkedaè harusu'i tauwè mappèsau pogau'i gau'-gau' iya dè'è nakkèguna sibawa harusu mateppe' lao ri Allataala, 2 iyarè'ga pappagguruwang bunge'-bunge'è passalenna acemmèngengngè iyarè'ga passalenna palènne'i limaè ri yasè'na sining tauwè, iyarè'ga passalenna atuwongngè paimeng puranana amatèngngè iyarè'ga pahukkungeng iya mannennungengngè. 3 Laono mai, rèkko napuwèloi Allataala, tamaju ri pappagguruwang iya lebbi matteruè. 4 Saba', sining tau iya salaiyèngngi atepperenna, dè'na namungking ripimpinna lisu. Riyolo mennang engkai ri laleng tajang polè ri Allataala, enrengngè pèneddingiwi pabbèrè-Na polè ri surugaè. Turu' toni mennang rikuwasai ri Rohna Allataala. 5 Naisseng mennang polè ri pangalamanna makkedaè iyaro ada-adanna Allataala makessingngi, sibawa purani napèrasa mennang sining pammasè iya pennoè akuwasang polè ri wettu iya mangoloè. 6 Iyakiya purairo nasalaiwi mennang atepperenna! Pèkkugi makkullèi ripimping mennang lisu untu' toba'si polè ri dosa-dosana. Saba' mattengngangngi mennang nasallisi Ana'na Allataala sibawa mèbbui ripakatu-Na ri yolona tau maègaè. 7 Tana iya nattemmekiyè uwai bosi iya biyasaè teppa ri yasè'na, nainappa powassèlè' tanet-taneng iya makkègunaè untu' tau iya jamaèngngi, iyaro tanaè nabarakkakiwi Allataala. 8 Iyakiya rèkko iyaro tanaè powassèlè'i ariya sibawa aju-kajungngè maddoriè, iyaro tanaè dè'na gaga gunana sibawa natanroiwi matu matti Allataala sibawa angkanna ritunui matu gangka cappu. 9 Iyakiya Saudara-saudara iya riyamasèiyè, namuni makkeda makkuwaki'ro, iyakiya mateppe'ki passalemmu. Mateppe'ki makkedaè purani mutarima gau'-gau' iya makessingngè iyanaritu barakka-barakka iya sinrupaè bagiyang polè ri asalamakemmu. 10 Allataala tenniya Allataala iya dè'è na adèlè'. Dè' nallupaiwi aga iya mupogau'è lao ri Alèna, sibawa pammasè iya muwappitangngè lao ri Alèna wettunna mutulung Saudara-saudara siatepperengngè, riyolo sibawa makkekkuwangngè. 11 Macinna senna'i kuwammengngi na mutungke-tungke matteru masumange' lettu paccappureng, angkanna mutarima aga iya muwammènasaièro. 12 Dè' taèloriko makuttu. Iyakiya macinnaki kuwammengngi mutuwo pada-pada sining tau iya tarimaèngngi aga iya najjanciyangngè Allataala, nasaba mateppe'i ri Alèna sibawa nasaba mattajengngi sibawa sabbara. 13 Wettunna Allataala majjanci lao ri Abraham, mattanroi makkedaè maèloi pogau'i aga iya puraè najjanciyang. Nasaba dè'gaga iya lebbi matanrè naiya Allataala, nattanrona ri laleng asen-Na muto. 14 Makkedai, "Majjanci-Ka maèlo barakkakiko sibawa mèbbui wija-wijammu mancaji maèga. " 15 Mattajenni Abraham sibawa sabbara, nanatarimani aga iya najjanciyangngè Allataala lao ri alèna. 16 Rèkko mattanroi tauwè, mattanroi ri laleng asenna tau laingngè iya lebbi matanrè naiya alèna, na iyaro tanroè napaccappa'i sininna abbantangngè. 17 Maèloi Allataala teddekiwi lao risining tau iya tarimaèngngi jancin-Na, makkedaè dè' natappinra matu rancana-Na. Iyanaro saba'na nanatambaiwi tanro ri jancin-Naro. 18 Iyaro duwaè passaleng dè' nawedding tappinra; dè' namakkullè mabbellè Allataala passalenna jancin-Na sibawa tanro-Na! Rimakkuwannanaro, idi iya mallinrungngènna ri Allataala, riwèrèkki dorongang masero untu' makkatenning masse ri paddennuwang iya mallebba'è ri yolota. 19 Iyaro paddennuwatta pada-padai balangoè iya malamung senna'è tattaneng sibawa sinrupai akkatenningeng iya masse'è sibawa amangngè lao ri atuwotta. Iyaro paddennuwangngè nabettui kaing paddenrinna Bili' Pommapaccingngè ri Bolana Puwangngè ri surugaè. 20 Purani nawajikekki Yèsus lalengngè lao ri onrongngèro, sibawa purani muttama kuwaro mancaji Imang Lompota lettu mannennungeng pada-pada Imang Malkisèdèk.

Ibrani 7

1 Iyaè Malkisèdèk iyanaritu arung polè ri Salèm sibawa imanna Allataala Iya Pommatanrè. Wettunna Abraham lisu polè ri ammusurengngè caui sining arungngè, polèi Malkisèdèk duppaiwi sibawa barakkakiwi. 2 Nanabbèrèyanni Abraham lao ri Malkisèdèk tawa seppulona polè ri sininna iya narappaè. (Aseng Malkisèdèk bettuwanna, bunge'-bunge'na, "Arung Adèlè'è"; sibawa nasaba arungngi ri Salèm, makkèbettuwang towi asenna "Arung Salèwangeng". ) 3 Passalenna iyaè Malkisèdèk dè'gaga pappakatajang muwi kègi makkedaè mappunnaiwi ambo' iyarè'ga indo' iyarè'ga nènè; dè'to gaga pappakatajang passalenna ajajiyanna, iyarè'ga amatènna. Pada-padai Ana'na Allataala; alèna iyanaritu imang iya mannennungengngè. 4 Jaji, ritani kuwaè pèkkugi loppona iyaè Malkisèdèk; makkuwamani loppona angkanna Abraham, ambo'na toriyolona bangsata, nawèrèngngi tawa seppulona polè ri sininna sèuwa-sèuwaè iya nalolongengngè polè ri ammusurengngèro. 5 Ri laleng hukkunna agama Yahudiè ripattentui makkedaè sining imang wijanna Lèwiè harusu'i lèlèi tawa seppulona polè ri pallolongenna umma' Israèliè, iyanaritu saudara-saudarana mennang, namuni mennang pada-padai wija-wijanna Abraham. 6 Malkisèdèk tenniya wija-wijanna Lèwi, iyakiya tarima towi tawa seppulona polè ri sininna iya narappaè Abraham, sibawa barakkaki towi Abraham iya puraè tarima janci-janci polè ri Allataala. 7 Mèmeng dè' nawedding ribanta makkedaè tau iya ribarakkakiyè iyanaritu lebbi riyawai naiya tau iya pabarakkakiyè. 8 Sining imang iya tarimaèngngi iya rilèlè tawa seppuloèro iyanaritu sining tau iya weddingngè matè. Iyakiya manuru Kitta'è, Malkisèdèk iya tarimaè pabbèrè tawa seppulo bagiyanro iyanaritu tau iya tette'è tuwo. 9 Wedding ripowada, makkedaè Lèwi -- iya wijannaè lèlè tawa seppulo bagiyang polè ri umma' Israèliè -- mpaja towi bagiyangngèro naolai Abraham, ri wettunna Abraham mpajai lao ri Malkisèdèk. 10 Namuni dè'pa nawajai Lèwi, iyakiya wedding ripowada engkani ri laleng tubunna Abraham nènè-nènèna, ri wettunna Malkisèdèk siruntu sibawa Abraham. 11 Ri yawa pappimpinna sining imang Lèwiè, riwèrèngngi umma' Israèliè hukkunna agama Yahudiè. Nasaba iyaro sining imang Lèwiè riyolo dè' naullèi pogau'i sibawa sukku aga iya harusu'è napogau', sibawa harusu engka imang laing, iyanaritu pada-padaè Imang Malkisèdèk, sibawa dè' napolè ri golongang Imang Harun! 12 Nah, rèkko tappinrai tudangenna sining imangngè, harusu towi tappinra, hukkunna agama Yahudiè. 13 Iya nakkattaiyè kuwaè iyanaritu Puwatta: Polèi ri suku laingngè, sibawa dè'pa naengka muwi sèddi tau polè ri sukun-Na majjama selaku imang. 14 Sininna tauwè naisseng makkedaè assalenna Puwatta polèi ri suku Yèhuda; na Musa dè' naengka nateppui iyaro sukuè wettunna mabbicara passalenna sining imangngè. 15 Passaleng iya ribicaraèwè lebbi manessai paimeng, ri laleng mompona sèddi imang laing iya pada-padaè Malkisèdèk. 16 Riyakkai mancaji imang, tenniya nasaba peraturang-peraturang tolino, sangadinna polèi ri atuwonna iya makuwasaè sibawa iya dè'è gaga paccappurenna. 17 Saba' ri laleng Kitta'è ripowadai, "Iko iyanaritu imang mannennungeng, pada-pada Imang Malkisèdèk. " 18 Jaji, makkekkuwangngè peraturang iya malaungngè ri palibenrènni, saba' dè' namawatang sibawa dè' nakkèguna. 19 Hukkunna agama Yahudiè dè' naullèi mèbbui muwi sèuwa mancaji sukku. Iyanaro saba'na nariwèrèkki makkekkuwangngè sèuwa ammènasang iya lebbi makessingngè; nanallalengiro nataullèi maddeppèriwi Allataala. 20 Iyatopa paimeng, iya manennaro nasibawangngi tanro polè ri Allataala. Dè'gaga tanro pada-padaèro, wettunna sining imang iya laingngèro riyakka. 21 Iyakiya Yèsus riyakkai mancaji imang pakè tanro, wettunna Allataala makkeda lao ri Alèna, "Purani mattanro Puwangngè, nadè' napinrai matu attangen-Na, 'Iko iyanaritu imang mannennungeng. ' " 22 Nasibawatto iyaè mancaji boro'i Yèsus untu' sèuwa assijancingeng iya lebbi makessingngè. 23 Engka mupa sèddi passaleng: iyaro sining imang iya laingngè engka maèga, saba' tungke'-tungke' mennang matèi angkanna dè' naullèi patterui jabatanna. 24 Iyakiya Yèsus tuwoi mannennungeng, jaji jabatan-Na selaku imang dè' nalèlè ri tau laingngè. 25 Rimakkuwannanaro lettu mannennungeng naullèi Yèsus passalama'i sining tau iya laowè ri Allataala naolai Alèna, saba' tuwoi mannennungeng untu' mèllauwi ri Allataala untu' sining tauwèro. 26 Jaji, Yèsusnaro ritu Imang Lompo iya tapparelluwangngè. Mapaccingngi: ri Alèna dè'gaga asalang iyarè'ga muwi dosa aga. Ripallaingngi polè risining tau madosaè, sibawa ripaènrè'i lettu ri onrong iya lebbi matanrè polè ri sininna langiè. 27 Dè' napada-pada sining imang lompo laingngè, iya esso-essoè harusu makkasuwiyangeng akkarobangeng nasaba dosa-dosa alèna riyolo, nappa nasaba dosa-dosana umma'è. Yèsus makkasuwiyangengngi akkarobangengngè siseng bawang lettu mannennungeng, wettunna nakkasuwiyangeng Alèna selaku akkarobangeng. 28 Hukkunna agama Yahudiè makkai sining tau iya dè'è nasukku mancaji sining imang lompo. Iyakiya rimunri polè ri hukkung-hukkungngèro, mèbbui Allataala assijancingeng sibawa tanro makkedaè nakkai selaku Imang Lompo, Ana' iya puraè mancaji Pappassalama' iya sukkuè lettu mannennungeng.

Ibrani 8

1 Poko'na sininna abbicarangngèwè iyanaritu: Mappunnaiki Imang Lompo iya pada-padaèro, iya tudangngè mapparènta silaong Allataala Pobbattowaè ri sururugaè. 2 Najamai jamangngè selaku Imang Lompo ri Bili' Pommapaccingngè, iyanaritu ri laleng Kèmana Puwangngè iya tongengngè, iya napatettongngè Puwangngè, tenniya polè ri tolinoè. 3 Tungke' imang lompo riyakkai untu' makkasuwiyangengngi akkarobangengngè iyarè'ga pakkasuwiyangengngè lao ri Allataala. Makkuwatoniro Imang Lompota; harusu'i mappunnai agi-agi untu' riyakkasuwiyangeng. 4 Ebara'na engkai ri linoèwè, dè' namaèlo mancaji imang, saba' engkana imang iya makkasuwiyangengngè akkarobangeng iya rituntu'è ri laleng hukkunna agama Yahudiè. 5 Jama-jamang iya napogau'è mennang selaku imanro sitongenna banna sèddi gambara sibawa wajo-wajo polè ri aga iya engkaè ri surugaè. Iyaro purani nappaddissengeng Allataala lao ri Musa riyolo, wettunna Musa maèlo patettongngi Kèmana Puwangngè. Makkeda makkuwaiyè Allataala lao ri Musa, "Engngerangngi! Iya manennaro harusu'i uwèbbu situru conto iya napaitangngèkko ri yasè'na buluè. " 6 Iyakiya makkekkuwangngè Yèsus lolongengngi jamang imang iya mabèla lebbi malebbiè naiya jamang imang iya najamaè sining imangngèro. Saba' assijancing iya Napakangkaè Allataala sibawa tolinoè, iyanaritu assijancing iya lebbi makessingngè nasaba tettongngi ri janci untu' gau'-gau' iya lebbi makessingngè! 7 Ebara'na dè'gaga akurangenna ri assijancing iya mammulangngè, tentu dè'na naparellu ripakangka assijancing iya maduwaè. 8 Iyakiya naruntu'ni Allataala asalangngè ri umma'-Na, angkanna makkedai Allataala, "Engngerangngi, polèi matu wettunna, pakangka-Ka matu assijancing iya mabaruè sibawa bangsa Israèliè, sibawa bangsa Yèhuda. 9 Dè' napada-pada assijancing iya Uwèbbuè sibawa nènè-nènèna mennang wettuk-Ku dulungngi mennang massu polè ri wanuwa Masèrè'. Dè' mennang namatinulu ri assijancing iya Uwèbbuè sibawa mennang; iyanaro saba'na dè' Napaduliwi mennang. 10 Iyakiya makkekkuwangngè, iyanaritu assijancing iya maèloè Uwèbbu sibawa umma' Israèliè ri esso-esso iya mangoloè, adanna Puwangngè: Maèlo-Ka taroi hukkuk-Ku ri laleng pikkiranna, sibawa mokii ri atinna mennang. Maèlo-Ka mancaji Allataalana, sibawa mennang mancaji umma'-Ku. 11 Dè'na naparellu mennang paggurui pada-padanna appanna, iyarè'ga paissengiwi silessurenna, 'Issenni Puwangngè. ' Saba' iya maneng, baiccu battowa, naissek-Ka matu. 12 Maèlo-Ka maddampengengngi sining asalanna, sibawa dè'na Uwèngngerangngi dosa-dosana. " 13 Ri laleng napangolona sininna assijancing iya mabaruè, naèbbui Allataala iyaro assijancing mammulangngè mancaji malaung sibawa malusa; sibawa aga iya macowaènna, dè' namaitta nalennye tona.

Ibrani 9

1 Assijancing iya mammulangngè mappunnai peraturang-peraturang assompang, sibawa mappunnai towi onrong assompang èbbu tolino. 2 Sèuwa kèma ripatettong iya bagiyang ri yolonaè riyasengngi Bili' Mapaccingngè. Kuwaro engka tettongeng pajjennangeng, sibawa engkato mèjang sibawa roti iya riyakkasuwiyangengngè lao ri Allataala. 3 Ri bagiyang lalenna, iyanaritu ri munrinna kaing paddenring iya maduwaè, engka bili' iya riyasengngè Bili' Pommapaccingngè 4 Ri laleng bili'èro engka mèzba iya riyèbbuè polè ri ulawengngè untu' mattunu dupa, sibawa engkato Petti Assijancingeng iya rilapiri manengngè sibawa ulaweng. Ri laleng Pettièro engka oring ulaweng mallise' manna, tekkenna Harun iya cura'ènna, sibawa duwa pèpeng batu iya riyarokiriyè seppulo parènta polè ri Allataala. 5 Ri yasè'na iyaro Pettiè engka duwa Kèrub iyanaritu mahlu' makkèpanni iya pulambangngèngngi ahadèrèkenna Allataala. Pannina iya duwa mahlu'èro mallebba'i ri yasè'na pattongkona pettiè iyanaritu onrong addampengenna dosaè. Iyakiya iya manennaè dè' nariyullè pakatajangngi sibawa tassèddi-sèddi. 6 Makkuwani ritu iya manenna riyatoro'. Esso-esso sining imangngè muttama ri laleng bagiyang yolona kèmaèro untu' pajoppai jamanna. 7 Iya muttama'è ri bagiyang kaminang marilalenna iyaro kèmaè banna imang lompoè bawang. Napogau'i iyaro siseng bawang sitaung. Napogau'i iyaro sibawa tiwi dara untu' riyakkasuwiyangeng ri Allataala nasaba alèna muto sibawa nasaba dosa-dosa iya napogau'è umma'-Na tennasadariwi. 8 Nasibawang iyaro peraturangngè, nappaitangngi Rohna Allataala ri idi sibawa manessa, makkedaè sipongenna kèma bagiyang ri yoloèro tettong mupi, laleng muttama'è ri Bili' Pommapaccingngè dè'pa natattimpa'. 9 Iyaè pulambangngi wettu makkekkuwangngè; bettuwanna makkedaè sining pakkasuwiyangngè sibawa sining akkarobangeng olokolo'è iya riyakkasuwiyangengngè lao ri Allataala, dè' naullèi passukkui ati marilalenna tauwè iya tiwièngngi pakkasuwiyangngè. 10 Saba' iyaro upacara-upacaraè banna takkennai ri inanrè, ènungengngè, sibawa maddupa-rupang upacara pappèpaccing. Iya manenna banna sining peraturang mallahèreng iya lakuè banna narapi wettunna Allataala pakangkai pappakabaruè. 11 Iyakiya Kristus polèni selaku Imang Lompona gau'-gau' iya makessingngè iya engkaènna. Kèmana Puwangngè iya naonroiyè pogau'i jaman-Na selaku Imang Lompo iyanaritu kèma iya lebbi battowaè sibawa lebbi sukkuè. Iyaro dè' naèbbui tolinoè; bettuwanna dè' napolè ri linoè iya napancajiyèwè. 12 Muttama'i Kristus ri Bili' Pommapaccingngè ri laleng kèmaèro banna siseng bawang lettu mannennungeng. Iyaro wettuè dè' natiwi dara bèmbè lai iyarè'ga dara ana' saping untu' riyakkasuwiyangeng; dara-Na muto natiwi, nanallalengiro napaleppe'ki lettu mannennungeng. 13 Dara bèmbè sibawa saping laiè enrengngè awunna akkarobangenna ana' sapingngè, ripakèi untu' meppikiwi sining tau iya najisi'è manuru hukkung agamaè; kuwammengngi namapaccing mennang. 14 Nah, rèkko dara sibawa awuèro naullèi pèpaccingiwi anajisikenna sining tauwèro, apalagi darana Kristus! Naolai Roh iya mannennungengngè, nakkasuwiyangengngi Alèna lao ri Allataala selaku akkarobangeng iya sukkuè. Dara-Na pèpaccingiwi atitta polè ri upacara agamaè iya dè'è nakkèguna, kuwammengngi weddikki tumaningiwi Allataala iya tuwoè. 15 Iyanaro saba'na, Kristus mancaji Pappasisumpung untu' sèuwa assijancingeng iya mabaruè, kuwammengngi na tau iya puraènna riyobbi ri Allataala naullèi tarimai barakka-barakka mannennungengngè iya puraè najjanciyang Allataala. Iya manennaro weddingngi kajajiyang nasaba engkana matè, iyanaritu Kristus; na amatèn-Naro paleppe'i tauwè polè risining asalanna iya napogau'è mennang ri wettu takkennana mupa assijancingeng iya mammulangngè. 16 Rèkko engka sure' warisi', harusu towi engka buttinna makkedaè tau iya mèbbuèngngi iyaro sure'è matèni. 17 Saba' sure' warisi'è dè' nalaku ri wettu tuwona mupa tau iya mèbbuèngngi. Iyaro sure'è banna lakui rèkko matèni iyaro tauwè. 18 Iyanaro saba'na magi na muwi assijancingeng iya mammulangngè harusu'i ripaessa sibawa dara. 19 Bunge'-bunge'na napalettu'i Musa sininna parèntana hukkunna Allataala lao ri bangsa Israèliè. Purairo malani Musa dara ana' saping sibawa dara bèmbè lai, nainappa nacampuru'i sibawa uwai, nainappa naeppikeng Kitta' Hukkung-hukkunna Allataala sibawa ri sininna bangsa Israèliè sibawa pakè wella hisop sibawa bulu-bulu bimbala' macella cowaè. 20 Ri wettu napogau'naro makkedai Musa, "Iyanaè dara iya paessaèngngi assijancingeng polè ri Allataala iya harusu'è muwatinuluri. " 21 Nainappa nasibawang cara iya padaè, nakkeppikeng toni Musa iyaro daraè ri Kèmana Puwangngè sibawa ri sininna parèwa-parèwa untu' assompangngè. 22 Mèmeng manuru hukkunna agama Yahudiè, cèddè'pi nasininna sèuwa-sèuwaè ripaccingiwi sibawa dara; na dosaè banna weddingngi riyaddampengeng rèkko engka dara ripatabbollong. 23 Nasibawang cara pada-padaèro barab-barang iya pulambangngèngngi gau'-gau' ri surugaè, parellui ripèpaccingiwi. Iyakiya untu' gau'-gau' iya ri surugaè mutoro riyapparelluwangngi akkarobangeng iya mabèlaè lebbi makessing. 24 Saba' dè' nauttama Kristus ri Bili' Mapaccingngè èbbu tolinoè, iya bannaè pulambangngi Bili' Mapaccingngè iya sitongennaè. Muttama'i Kristus ri surugana muto; kuwaniro makkekkuwangngè mangolo ri Allataala untu' apentingetta. 25 Imang lompona Yahudiè tungke'-tungke' taung muttama'i ri Bili' Pommapaccingngè ri laleng Bolana Puwangngè sibawa tiwi dara sikaju olokolo'. Iyakiya Kristus dè' nauttama untu' makkasuwiyangengngi Alèna makkolik-koling. 26 Saba' rèkko makkuwairo, bettuwanna iyaro makkolik-kolinni manrasa-rasa sipongenna ripancaji linoèwè. Iyakiya annessana, makkekkuwangngè ri wettu paccappurengngèwè, siseng bawang polè untu' leddai dosaè ri laleng nakkarobangenna Alèna. 27 Purani napattette Allataala makkedaè sisemmi matè rupa tauwè napurairo riadèlèkiwi ri Allataala. 28 Makkuwatoro Kristus sisemmi riyakkasuwiyangeng selaku akkarobangeng untu' leddai dosana maèga tau. Maèloi polè paimeng mabbèkkaduwanna, tenniya untu' pacceppiwi persoalang dosaè, iyakiya untu' passalama'i sining tau iya tajengngèngngi apolèn-Na.

Ibrani 10

1 Hukkunna agama Yahudiè banna mabbèrèi gambara iya massalawuè passalenna gau'-gau' makessingngè iya mangoloè, na tenniya gambara iya tongengngè polè ri gau'-gau'èro. Dè' nakkullè rèkko iyaro passukkui tau iya polè sompai Allataala sibawa tiwi pakkasuwiyang, namuni taut-taung matteru-terui makkasuwiyangeng akkarobangeng iya padaè. 2 Ebara'na sining tau iya sompaèngngi iyaro Allataala tonget-tongengngi purani ripèpaccingi polè ri dosaè, dè'na mennang nappunnaina matu pappènedding madosa sibawa dè'na naparellu akkarobangengngè riyakkasuwiyangenna. 3 Iyakiya annessana sining akkarobangeng iya riyakkasuwiyangengngè tungke' taungngèro mala naparèngngerangiwi tauwè lao ri dosa-dosana, 4 saba' mèmeng dara sapingngè sibawa dara bèmbè laiè dè' naullèi leddai dosaè. 5 Iyanaro saba'na wettunna Kristus muttama ri linoè, makkedai lao ri Allataala, "Dè' Muwèloriwi akkarobangengngè sibawa pakkasuwiyangngè; sibalè'na purani Mupassadiyangek-Ka tubu. 6 Dè' Muwèloriwi akkarobangeng ritunuè iyarè'ga akkarobangeng untu' paddampengeng dosa. 7 Nainappa-Ka makkeda, 'Iyya'naè, oh Allataala! Polè-Ka untu' pogau'i èlo-Mu, pada-pada iya riparisure'è passalek-Ku ri laleng Kitta'è. ' " 8 Bunge'-bunge'na makkedai Kristus, "Dè' Muwèloriwi akkarobangengngè sibawa pakkasuwiyangngè; dè' Muwèloriwi akkarobangeng ritunuè sibawa akkarobangeng untu' paddampengeng dosaè. " Makkeda makkuwairo Kristus, sininna akkarobangengngèro riyakkasuwiyangengngi manuru hukkunna agama Yahudiè. 9 Purairo makkedai Kristus, "Iyya'naè, oh Allataala! Polè-Ka untu' pogau'i èlo-Mu. " Jaji Allataala leddai sininna akkarobangeng iya maittaèro, enrengngè sullèiwi sibawa akkarobangenna Kristus. 10 Purani napogau' Yèsus Kristus iya napuwèloè Allataala makkasuwiyangengngi Alèna selaku akkarobangeng. Iyakiya iyaro pakkasuwiyangengngè Napogau'i banna sisemmi bawang lettu mannennungeng ripaccingi manekki polè ri dosaè. 11 Tungke' imang Yahudiè pajoppai jamanna selaku imang esso-esso, sibawa makkolik-koling makkasuwiyangengngi akkarobangeng iya padaè. Iyakiya iyaro sining akkarobangengngè dè' sises-siseng naullèi leddai dosaè. 12 Sibalè'na, Kristus makkasuwiyangeng banna sèddi akkarobangeng untu' paddampengeng dosa, iyaro akkarobangengngè makkanrèi lettu mannennungeng. Purana nakkasuwiyangeng iyaro akkarobangengngè, tudanni Kristus ri seddè ataunna Allataala, mapparènta silaong Alèna. 13 Na makkekkuwangngè mattajengngi Kristus narapi Allataala mèbbui sining balin-Na tunru' ri Alèna. 14 Jaji nasibawang sèddi akkarobangeng, napassukkui Kristus sining tau iya puraè ripaccingi polè ri dosaè. 15 Passalenna gau'èro nabbèrèyang towi Rohna Allataala asabbiyan-Na lao ri idi. Makkedai Rohna Allataala, 16 " 'Iyanaè assijancing maèloè Uwèbbu sibawa mennang ri esso-esso mangoloè, ' adanna Puwangngè, 'Maèlo-Ka taroi hukkung-hukkuk-Ku ri laleng atinna, sibawa mokii ri laleng pikkiranna. ' " 17 Makkeda towi Allataala, "Maèlo-Ka mallupaiwi dosa-dosana sibawa sining jana. " 18 Jaji, iyaro dosa-dosaè sibawa sining jaè purani riyaddampengeng, nadè'na naparelluna riyakkasuwiyangeng akkarobangengngè untu' paddampengeng dosaè. 19 Nah, Saudara-saudara, nasaba amatènna Yèsusro makkekkuwangngè baraniki muttamakiwi Bili' Pommapaccingngè. 20 Purani natimpakekki Yèsus sèddi laleng, iyanaritu laleng iya mabbèrè atuwong. Iyaro lalengngè naolai kaing paddenringngè, iyanaritu tubunna muto Yèsus. 21 Na makkekkuwangngè mappunnaiki sèddi imang iya marajaè, iya tanggung jawa'è ri Bolana Allataala. 22 Rimakkuwannanaro, laono mai taddeppèriwi Allataala sibawa ati iya matinuluè enrengngè teppe' iya mattinettoè; sibawa ati iya puraè ripèpaccingi polè ri pappènedding pasalaè, sibawa watakkalè iya puraè ripèpaccingi sibawa uwai iya mapaccingngè. 23 Sitinajaki makkatenning masse ri ammènasang iya tangakuiyè, saba' weddingngi riyatepperi Allataala rupaiwi jancin-Na. 24 Na sitinajaki sisullè sijampangi, kuwammengngi naweddikki sisullè mabbèrè sumange' untu' pèneddingiwi sibawa pogau'i gau'-gau' iya makessingngè. 25 Sitinajaki mattunru-tunru maddeppungeng massibawa sibawa aja' mujampalèllè pada-pada sining tau laingngè. Mala harusu'ki lebbi matinulu pangajariwi sèddiè lao ri laingngè, saba' riissengngi makkedaè dè'na namaitta napolè Puwangngè. 26 Saba' rèkko biritta polè ri Allataala ripalettu'ni ri idi, iyakiya matteruki bawang pogau' dosa sibawa riyattungkai, dè'na gagana akkarobangeng untu' leddai dosata. 27 Sèddi-sèddinna iya engkaè untu' idi iyanaritu mangoloiwi pengadilanna Allataala sibawa api caina iya tunu manengngèngngi matu sining iya mèwaèngngi Allataala. 28 Tau iya dè'è naturusiwi hukkung iya nabbèrèyangngè Musa, rihukkung matèi tenriyaddampengeng, rèkko nasabbingngi duwa tellu tau, pabuttiwi pasala. 29 Pèkkugi lebbi tane'na pahukkungeng iya harusu'è ripakennaiwi tau iya lèjja'-lèjja'èngngi Ana'na Allataala. Iyaro tauwè nangga' matunai dara assijancingenna Allataala, iyanaritu amatènna Kristus iya pèpaccingiyèngngi polè ri dosaè. Napakatunai Roh iya mabbèrè pammasè. 30 Taisseng niga Alèna iya makkedaè, "Maèlo-Ka makkabale! Maèlo-Ka pahukkung!" Sibawa iya makkedaètto, "Puwangngè maèlo madèlèkiwi umma'-Na. " 31 Temmaka mappakatau-tauna rèkko sempè'i ri limanna Allataala Iya Tuwoè! 32 Engngerangngi pèkkugi keadaanna Saudara-saudara ri wettu labe'è. Iyaro wettuè, puranana cahayana Allataala tappako, maèga anrasa-rasammu; iyakiya tette'ko mèwa sibawa gegge. 33 Biyasa tokko ripakatuna enrengngè rigaukeng sibawa dè' namakessing riyolona tau maègaè. Biyasa tokko maccowè manrasa-rasa sibawa mennang iya rigaukengngè makkuwaro, 34 namaccowè tokko pèneddingiwi asussanna tau iya ritarungkuè. Na wettunna iya maneng muwappunnaiyè rirampasa', mutarimai iyaro sibawa masennang atimmu, saba' muwissengngi makkedaè mappunnai mupo sèuwa iya lebbi makessingngè iya tahangngè matu mannennungeng. 35 Rimakkuwannanaro, aja' mupettu paddennuwang, saba' rèkko tette'ko mateppe' engka saro battowa untu'mu! 36 Parelluko sabbara, kuwammengngi naullèi pogau'i èlona Allataala nanallalengiro natarimai aga iya riyajjanciyang-Na. 37 Saba' ri laleng Kitta'è tarokii, "Banna cinampe' bawappi, na iyaro maèloè polè, masitta'i matu polè; dè' napasoro-soroi apolèn-Na. 38 Na umma'-Ku iya tongengngè mateppe'i matu sibawa tuwoi; iyakiya rèkko engka ri yelle'na mennang iya soroè, dè' Umasennang matu ri alèna. " 39 Idi'è tenniyaki umma' iya soroè sibawa pusaè. Sibalè'na, idi iyanaritu umma' iya mateppe'è ri Allataala sibawa iya ripassalama'è.

Ibrani 11

1 Mateppe' bettuwanna majeppuiwi tonget-tongeng gau'-gau' iya riyammènasaiyè; bettuwanna mappunnai attentung lao ri gau'-gau' iya dè'è nariita. 2 Nasaba teppe', nasining tau wettu labe'è ripèsennangiwi ri Allataala. 3 Nasaba mateppe'i, na tapahangngi makkedaè iyaè alangngè ripancajiwi ri saddanna Allataala; jaji, aga iya weddingngè riita, kajajiyangngi polè ri aga iya dè'è nariyullè mita. 4 Nasaba mateppe'i, na Habèl makkasuwiyangengngi lao ri Allataala akkarobangeng iya lebbi makessingngè naiya akkarobangenna Kaing. Nasaba teppe'naro, ritarimai Habèl ri Allataala selaku tau iya makessingngè; saba' manessani makkedaè Allataala tarimai pakkasuwiyanna. Matèni Habèl, iyakiya nasaba teppe'naro, mabbicara mupi lettu makkekkuwangngè. 5 Nasaba mateppe'i, nadè' namatè Hènokh, sangadinna riyakkai sibawa ritiwii lao ri Allataala. Dè' muwi sèddi tau mullèi runtu'i, saba' riyakkai ri Allataala. Ri laleng Kitta'è tarokii makkedaè ri wettu dè'napa nariyakka Hènokh, purani napèsennangi atinna Allataala. 6 Temmateppe, dè' muwi sèddi tau mullèi sennangiwi atinna Allataala. Saba' tau iya laowè ri Allataala harusu'i mateppe' makkedaè engka Allataala sibawa Allataala mpale'i tau iya sappaèngngi. 7 Nasaba mateppe'i, naripaissengi Nuh ri Allataala passalenna gau'-gau' iya maèloè kajajiyang ri mangoloè, iya dè'è naullèi mitai. Matinului Nuh ri Allataala angkanna mèbbui sèddi kappala iya passalama'èngngi alèna silaong kaluwargana. Nanallalengiro rihukkungngi linoè, sedangkang Nuh ripannessai ri Allataala selaku tau iya makessingngè nasaba teppe'na. 8 Nasaba mateppe'i, namatinulu Abraham ri Allataala wettunna Allataala mobbii sibawa suroi lao ri ri wanuwa iya najjanciyangngè Allataala ri alèna. Nanajoppana Abraham sibawa dè' naissengngi kègi maèlo lao. 9 Nasibawang teppe', monroi Abraham selaku tau polè-polè ri wanuwa iya najjanciyangngè Allataala lao ri alènaro. Monroi Abraham kuwaro ri laleng kèmaè. Makkuwatoro Ishak sibawa Yakub, iya tarimaè janci iya padaè polè ri Allataala. 10 Saba' natajengngi Abraham kota iya narancanaè sibawa napatettongngè Allataala sibawa pandamèng iya masse'è. 11 Nasaba mateppe'i, nawedding Abraham lolongeng wija-wijanna polè ri Sara, namuni Abraham macowa senna'ni, sibawa Sara paimeng manang. Mateppe'i Abraham makkedaè narupaiwi matu Allataala jancin-Na. 12 Namuni Abraham wettuèro pada-padai tau iya matèènna tubunna, iyakiya lolongengngi maèga wijanna, iya dè'è naribilang ègana -- pada-padai ègana wèttowingngè ri langiè sibawa kessi'è ri wiring tasi'è. 13 Sininna tauwèro tette'i mateppe' lettu matè. Dè' natarimai mennang gau'-gau' iya najjanciyangngè Allataala, iyakiya banna naitai sibawa duppaiwi polè mabèla. Nanallalengiro napannessai mennang makkedaè bannami mennang tau polè-polè sibawa passompa ri linoèwè. 14 Tau iya powadaèngngi makkuwaro mappaitangngi sibawa manessa makkedaè mattengngangngi mennang sappa tana iya mancajiyè matu wanuwanna. 15 Tenniya wanuwa iya nasalaiyènna mennanro napikkiri'-pikkiri' mennang. Saba' rèkko makkuwairo, maègani kasempatang lao ri mennang untu' lisu ri wanuwaèro. 16 Iyakiya annessana, nauddaningiwi mennang sèuwa wanuwa iya lebbi makessingngè, iyanaritu wanuwa ri surugaè. Iyanaro saba'na dè' namasiri Allataala rèkko mennang nateppui Alèna Allataala, saba' Allataala pura passadiyai sèddi kota untu' mennang. 17 Nasaba mateppe' towi, nanakkasuwiyangengngi Abraham Ishak, selaku akkarobangeng wettunna rioji ri Allataala. Lao ri Abraham ritu nabbèrèyangngi Allataala jancin-Na, iyakiya macenningngi Abraham mabbèrèyangngi ana'na iya sèddi-sèddièro. 18 Purai makkeda Allataala lao ri Abraham, "Naolai Ishak ritu lolongekko matu wija-wijanna iya Ujanciyangngèkko. " 19 Mateppe'i Abraham makkedaè naullèi Allataala patuwoi paimeng Ishak polè ri amatèngngè -- jaji, wedding ripowada, natarimai paimeng Abraham Ishak polè ri amatèngngè. 20 Nasaba mateppe'i, nanajjanciyangngi Ishak barakka'-barakka'è lao ri Yakub sibawa Esau untu' wettu mangoloè. 21 Nasaba mateppe'i, riwettu dè'napa namatè Yakub, nabbèrèyangngi barakka'na lao ri ana'-ana'na Yusuf -- sibawa sanrèi ri ulu tekkenna enrengngè sompai Allataala. 22 Nasaba mateppe'i, na Yusuf -- wettunna mawè'ni matè -- mabbicarai passalenna massuna umma' Israèliè polè ri Masèrè', sibawa taro paseng passalenna aga iya harusu'è ripogau' lao ri ujuna. 23 Nasaba mateppe'i, na tomatowanna Musa nasubbui tellumpuleng ittana mappammulai jajinna. Naitai mennang makkedaè sèddiwi ana' iya makessingngè, nadè' mennang namètau mèwai parèntana arungngè. 24 Nasaba mateppe'i, nabattowanana Musa, dè' namaèlo riteppu ana' polè ri ana'na arung Masèrè'. 25 Lebbi napojiwi manrasa-rasa silaong umma'na Allataala naiya untu' cinampe'è pèneddingiwi asennangengngè polè ri atuwong iya madosaè. 26 Napèrasaiwi Musa makkedaè mabèlai lebbi mangke' untu' lolongeng pappakatuna nasaba Arung Pappassalama'è iya najjanciyangngèro Allataala naiya lolongengngèngngi sininna waramparanna wanuwa Masèrè', nasaba nammènasaiwi Musa apolènna ri esso ri munri. 27 Nasaba mateppe'i, nasalaiwi Musa Masèrè' tennapèneddingiwi mètauè lao ri caina arungngè. Majui Musa mattuju ri akkattana samanna purani naita Allataala iya dè'è napaitaro. 28 Nasaba mateppe'i, nanapakangka Musa Paska sibawa parèntangngi kuwammengngi nariyeppiki dara ri sumpang bolana tau Israèliè kuwammengngi Malaèka' Amatèngngè aja' naunoi ana'-ana' macowana mennang. 29 Nasaba mateppe'i, nasining tau Israèliè naullèi mallèttoiwi Tasi' Cella'è, samanna mennang joppai ri yasè'na tana iya marakkoè, nasining tau Masèrè'è riyemme'i ri tasi'èro, wettunna mennang nacoba mallèttoto. 30 Nasaba mateppe'i, naèbbu sining tau Israèliè tèmbo'-tèmbo'na Yèrikho maruttung puranana nattulilingi pitungngesso ittana. 31 Nasaba mateppe' towi, na Rahab, iyaro makkunrai cakkuribangngè, dè' naccowè riyuno silaong sining tau iya mèwaèngngi Allataala; saba' natarimai sibawa mabessa mata-matanna Israèliè. 32 Nah, weddikka'sa matteru-teru mabbicara, iyakiya dè' nagenne' wettukku. Saba' dè'pa uteppui Gidèon, Barak, Simson, Yèfta, Daud, Samuèl, sibawa nabi-nabiè. 33 Nasaba mateppe'i, napurai mennang nacau sining akkarungengngè. Napogau'i mennang aga iya tongengngè, angkanna natarimai aga iya najjanciyangngè Allataala. Natongkoi mennang sining bawana singaè, 34 naddeppèriwi api maseroè, lèssèi polè ri peddangngè. Malemmai mennang, iyakiya mancajiwi mawatang; baraniwi ri laleng ammusurengngè angkanna nacaui sining pasukanna bangsa laingngè. 35 Nasaba mateppe'i, nasining makkunraiè nalolongengngi paimeng sining taunna iya matèènna. Engkato iya macenningngè risissa gangka matè, sibawa sampèyangngèngngi untu' ripaleppe, nasaba maèloi ripatuwo paimeng untu' sèuwa atuwong iya lebbi makessingngè. 36 Engka iya riyèllèkèllè'è, ricambu', risiyo sibawa rantè enrengngè riputtama ri laleng tarungkuè. 37 Engka iya rigenrungngè batu gangka matè, iya rigèrèè sibawa garagaji, sibawa iya riyunoè sibawa peddang. Sollèi mennang sibawa pakèyang polè ri bingkulang bimbala'è iyarè'ga bingkulang bèmbè'è; kasiyasiwi mennang, ricalla sibawa risissa. 38 Ri linoèwè tenniya onrong iya sitinajaè untu' mennang. Sollèi mennang ri padang kessi'è enrengngè ri bulu-buluè, kuwaèttopa monroi ri laleng gowa-gowaè enrengngè ri laleng sining kalebbongngè ri tanaè. 39 Temmaka loppona apakalang iya nalolongengngè sininna tauwèro nasaba teppe'na mennang! Namuni mennang dè' natarima aga iya najjanciyangngè Allataala, 40 saba' mappunnaiwi Allataala rancana iya lebbi makessingngè untu' idi. Rancana-Na iyanaritu makkedaè banna sibawaki, namancaji sukku matu mennang.

Ibrani 12

1 Nah, passalenna alèta, ri mattulilitta engka maèga senna' sabbi! Rimakkuwannanaro, laono mai tabuwang manengngi iya tanekiyèkki sibawa dosa iya matteruè maddeppè ri idi. Sibawa laono mai tamattunru-tunru laloiwi akkabèttangengngè iya engkaè ri yolota. 2 Sitinajai pakkitatta mattuju lao ri Yèsus, saba' Alèna ritu iya paoto'èngngi teppe'ta sibawa piyarai polè ri pammulanna lettu ri paccappurenna. Tahangngi Yèsus manrasa-rasa ri aju salliè! Dè' Napaduliwi makkedaè matè ri aju sallièro iyanaritu sèuwa gau' iya mappakasiri-siriè. Banna marèngngerangngi lao ri arennuwang iya Napèrasaiyè matu ri munri. Makkekkuwangngè tudanni ri seddè ataunna akkarungenna Allataala, enrengngè mapparèntai silaong Alèna. 3 Coba pikkiri'i pèkkugi anrasa-rasanna Yèsus moloiwi sining tau madosaè iya mèwaèngngi Alèna sibawa makkuwamani serona! Rimakkuwannanaro aja' mumarenni ati sibawa pettu paddennuwang. 4 Saba' ri laleng ammusuremmu mèwai dosaè, dè'pa naengka mumammusu narapi harusu patabbollong dara. 5 Sibawa aja' muwallupaiwi pangajana Allataala, iyaè nawèrèkko selaku ana'-ana'-Na! "Ana'-Ku, pènessaiwi madècèd-dècèng pappagguruwanna Puwangngè, na aja' mumarenni ati rèkko Nacairiko. 6 Saba' napaggurui Puwangngè tungke' tau iya Namasèiyè, sibawa Nacambu'i tungke' tau iya Naakuiyè selaku ana'-Na. " 7 Sitinajako tarimai paccambu'na Allataala selaku sèddi pappagguruwang polè risèddiè ambo'. Saba' engkaga naengka sèddiè ana' dè' narihukkung ri ambo'na? 8 Rèkko dè' muwaccowè rihukkung pada-pada sininna ana'-ana'na iya laingngè, iyaè bettuwanna tenniyako ana' essa, sangadinna ana' iya dè'è naessa. 9 Mappunnaiki ambo' ri linoè. Napagguruki, na idi pakalebbii. Nah, apalagi Ambo' rohanitta iya risurugaè, tentu harusu'ki lebbi tunru' ri Alèna kuwammengngi tatuwo. 10 Tomatowatta ri linoè pagguruki banna ri laleng wettu iya engkaè paggangkanna, manuru aga iya napèrasaiyè makessing. Iyakiya Allataala pagguruki untu' adècèngeng ri alèta, kuwammengngi taullèi mancaji mapaccing silaong Alèna. 11 Mèmeng wettutta ripagguru, iyaro pahukkungengngè dè' napèsennangiwi atitta, sangadinna banna pamessèiwi bawang. Iyakiya ri munrinnaro, untu' idi iya puraènna ripagguru, iyaro pahukkungengngè nassabariki tuwo situru èlona Allataala, enrengngè powassèlè' pappènedding salèwangeng ri idi. 12 Rimakkuwannanaro pèwatangiwi limammu iya malemmaè sibawa uttumu iya tènrèro! 13 Tuli joppako ri laleng iya malappaè, kuwammengngi na ajèmu iya kèppangngèro dè' namalèkko sangadinna mala majjappai. 14 Akkuragano untu' tuwo sipammasè-masè sibawa sininna tauwè. Akkuragatokko untu' tuwo mapaccing, banna untu' Puwangngè. Saba' dè' muwi sèddi tau mullèi mitai Puwangngè rèkko dè' natuwo pada-padaèro. 15 Jagaiwi aja' lalo naengka muwi sèddi tau iya massuè polè ri laleng akessingeng atinna Allataala, kuwammengngi aja' naengka iya mancajiyè pada-pada aju-kajungngè engkaè racunna ri tengnga-tengngamu angkanna paompo asukkarakeng enrengngè solangiwi maèga tau sibawa racunna. 16 Jagaiwi kuwammengngi aja' naengka iya tuwoè mappangaddi iyarè'ga dè' naangke'i gau'-gau' rohaniè, pada-pada iya napogau'è Esau. Nabalu'i ha'na selaku ana' macowa, banna untu' simangko inanrè. 17 Muwisseng makkedaè rimunri macinnai Esau lolongengngi iyaro barakka'è polè ri ambo'na, iyakiya risampèyangngi. Saba' muni teri sappa laleng untu' pèdècèngi asalanna, iyakiya kasempatang untu' iyaro dè'na gaga. 18 Saudara-saudara dè' nalao moloiwi sèuwaè pada-pada iya naoloiyè bangsa Israèliè riyolo. Naoloiwi mennang sèuwa iya weddingngè rikapèse', iyanaritu Bulu Sinai sibawa apinna iya malluwa'-luwa'è; moloiwi mennang pettang, akalemmengeng sibawa anginraja; 19 moloiwi mennang oni tarompè', sibawa oni iya hèba'è. Wettunna sining tau Israèliè naèngkalinga iyaro saddaè, naèllauni mennang sibawa masero kuwammengngi na iyaro saddaè dè'na nabbicarana lao ri mennang. 20 Saba' dè' natahang mennang mèngkalingai parènta iya napalettu'è iyaro saddaè. Nasaba makkedai iyaro saddaè, "Sininna iya gèssaèngngi iyaè buluè, tenripaduli aga iyaro olokolo' iyarè'ga muwi niga, harusu'i rigenrung sibawa batu narapi matè. " 21 Aga iya naitaè sining tau Israèlièro makkuwamani hèba'na angkanna makkeda Musa, "Mètauka sibawa tènrèka!" 22 Sibalè'na, laoko ri Bulu Sion sibawa kotana Allataala iya tuwoè, iyanaritu Yèrusalèm iya ri surugaè sibawa massebbu-sebbu malaèka'na. 23 Muwaccowèriwi sèuwa addeppungeng iya marowaè -- addeppungenna ana'-ana' macowana Allataala, iya aseng-ngasennaè riyokii ri laleng surugaè. Laoko mangolo ri Allataala, Hakinna sininna rupa tauwè. Muwoloiwi roh-rohna tau iya makessingngè, iya puraènna ripassukku. 24 Laoko mangolo ri Yèsus, Pappasisumpung untu' assijancingeng iya mabaruèro; muwoloiwi pecci dara iya tanggungngèngngi gau'-gau' iya mabèla lebbi kessingngè naiya natanggungngè darana Habèl. 25 Rimakkuwannanaro, atutuko aja' narapii dè' mumaèlo mèngkalingai iya mabbicaraèro. Mennang iya dè'è namaèlo mèngkalingai Alèna iya laowè ri linoè palettu'i biritta polè ri Allataala, dè' nawedding lari. Apalagi idi'è iya mèngkalingaèngngi Alèna iya mabbicaraè polè ri surugaè! Rèkko dè' tamaèlo mèngkalingai, pèkkugi makkullèki wedding leppe'. 26 Iyaro wettuè saddan-Na pawèwangngi tanaè. Iyakiya makkekkuwangngè majjanciwi, "Siseppi, maèlo-Ka mappawèwang, tenniya bawang tanaè iyakiya langiètto. " 27 Ada-ada "siseppi" mappaitangngi makkedaè sininna linoè iya puraè ripancaji rigoccangngi matu sibawa ripaddèsu, kuwammengngi iya monroè banna ritu iya dè'è naullèi taggoccang. 28 Rimakkuwannanaro, sitinajaki mattarima kasi lao ri Allataala, nasaba tarimaki polè ri Alèna sèuwa akkarungeng iya dè'è nawedding taggoccang. Sitinajaki mattarima kasi sibawa massompa ri Allataala sibawa mappakalebbi enrengngè mètau, situru cara iya naèloriyè muto Allataala. 29 Saba' Allataalata pada-padai api iya paangurengngè.

Ibrani 13

1 Sitinajako tette' mamasèiwi sèddiè lao ri laingngè selaku sining tau Kristèng iya massilessurengngè. 2 Aja' mubata-bata tarimai ri bolamu, sining tau iya dè'èppa muwissengngi. Saba' ri laleng pogau'i iya makkuwaèro, engka naengka tauwè, tennasadariwi, natarimai malaèka'è ri bolana. 3 Engngerangngi sining tau iya engkaè ri laleng tarungkuè, samanna engka tokko ri laleng tarungkuè silaong mennang. Sibawa sining tau iya rigaukengngè sièlo-èlona, sitinajako mèngngerangngi mennang samannato rigaukekko makkuwaèro. 4 Sininna tauwè harusu'i mappaitangngi kèdo-kèdo mappakalebbiè lao ri akawingengngè, iyanaro saba'na sitinajai lakkaiè sibawa bainè matinulu sèddiè lao ri laingngè. Tau iya mappangaddiè sibawa tau iya malawengngè ri adèlèkiwi matu ri Allataala. 5 Aja' na atuwommu rikuwasai ri pangèloreng ri dowiè, iyakiya sitinajako masennang sibawa aga iya engkaè ri iko. Saba' purai makkeda Allataala, "Dè' Umaèlo leppessakko iyarè'ga salaiko. " 6 Rimakkuwannanaro baraniki makkeda, "Puwangngè iyanaritu Pattulukku, dè' umètau. Aga wedding napogau' tolinoè lao ri iyya?" 7 Aja' muwallupaiwi sining pamimpimmu iya palettu'èngngi pasenna Allataala ri iko. Pènessaiwi pèkkuwi mennang tuwo sibawa pèkkugiwi mennang matè, sibawa contoiwi teppe'na mennang. 8 Yèsus Kristus tette'i pada, muwi riyolo, makkekkuwangngè, enrengngè lettu mannennungeng. 9 Aja' muleppessangngi sininna rupanna pappagguruwang makalallaingngè iya papusaèkko. Harusu'i ripèwatangi atitta ri akessingeng atinna Allataala, iyanaro makessing; aja' napolè risining peraturangngè passalenna inanrè. Sining tau iya matinuluriyèngngi riyolo sining peraturangngèro dè' nalolongengngi appalanna. 10 Mappunnaiki sèddi mèzba untu' makkasuwiyangeng akkarobangeng lao ri Allataala. Nasining imang iya mattumaniyè ri laleng Kèmana Puwangngè, dè'gaga ha'na manrè akkarobangeng iya engkaè ri yasè'na mèzbaèro. 11 Dara olokolo' iya riyakkasuwiyangengngè selaku akkarobangeng untu' paddampengeng dosa, natiwii Imang Lompoè lao ri Bili' Pommapaccingngè; iyakiya bakkèna iyaro olokolo'è ritunui ri saliweng akkèmangngè. 12 Iyanaro saba'na namatèto Yèsus ri saliwenna pintu gerbanna kotaè untu' pèpaccingiwi umma'-Na polè ri dosaè sibawa dara-Na muto. 13 Rimakkuwannanaro, laono mai talao ri Alèna ri saliweng kèmaè sibawa maccowè ripakatuna silaong Alèna. 14 Saba' ri linoè dè'gaga onrong iya mannennungengngè untu' idi; sappaki onrong iya maèloè polè. 15 Rimakkuwannanaro, naolai Yèsus, sitinajaki tuli pojiwi Allataala; iyaro sinrupai akkarobangeng sukkuru'ta ri Alèna iya riyakkasuwiyangengngè naolai napowadaè tèmuè untu' pakalebbii asen-Na. 16 Aja' muwallupaiwi pogau'i makessingngè sibawa sisullè situlung, saba' iyanaè sining akkarobangeng iya pèsennangiyèngngi atinna Allataala. 17 Accowèriwi parèntana sining pamimpimmu sibawa tunru'ko lao ri mennang. Saba' tuli najampangiwi mennang nyawamu, na harusu'i mennang mattanggung jawa' lao ri Allataala. Rèkko matinuluko lao ri mennang, weddingngi mennang majjama sibawa masennang ati; rèkko dè', majjamai matu mennang sibawa messè atinna, na iyaro dè' napasaroko. 18 Atteruko massempajangekki. Mateppe'ki ati marilaletta mapaccingngi, saba' ri laleng sininna gau'è tuli maèloki pogau'i aga iya tongengngè. 19 Lebbi-lebbipi uwèllaunna sibawa masero, kuwammengngi muwassempajangekka. Kuwammengngi na Allataala masitta'i tiwika lisu lao ri iko. 20 Allataala pura patuwoi Puwatta Yèsus polè ri amatèngngè. Nasaba amatèn-Naro, na makkekkuwangngè mancajiwi Pakkampi Marajata, iyanaritu sining bimbala'-Na. Iyaro amatèn-Na napaessa towi assijancingeng mannennungengngè iya naèbbuè Allataala sibawa idi. 21 Tennapodo Allataala assalenna asalèwangengngèro passukkuko sibawa sininna iya makessingngè iya muwapparelluwangngè untu' pogau'i èlo-Na. Tennapodo naolai Yèsus Kristus, najamai Allataala ri laleng idi, aga iya Nacinnaiyè. Sitinajai Kristus ripoji mannennungeng! Aming. 22 Uwèllauwi kuwammengngi mupènessaiwi iyaè sining pangajaku sibawa sabbara, saba' iyaè sure'è dè' namalampè senna'. 23 Sitinajako missengngi makkedaè saudarata Timotius ripaleppe'ni polè ri tarungkuè. Rèkko laoni ri onrokkuè, maèloka tiwii wettukku cèllèngiko matti. 24 Palettukengngi selletta lao ri sininna pamimpinmu sibawa lao ri sininna umma'na Allataala. Tarima towi sellenna Saudara-saudara polè ri Italia. 25 Tennapodo Puwangngè barakkakiwi Saudara-saudara iya maneng.

Yakobus 1

1 Saudara-saudara umma'na Allataala iya tassiya-siyaè ri sininna linoè! Sellekku, iyya, Yakobus, atanna Allataala sibawa atanna Puwang Yèsus Kristus. 2 Saudara-saudara! Rèkko mupèneddingiwi maddupa-rupang paccobang, sitinajako marasa saro. 3 Saba' muwissengngi, rèkko tette'ko mateppe' ri Puwangngè ri wettu pèneddingiko, addimonrinna iyanaritu: mancajiko sabbara. 4 Jagaiwi kuwammengngi na asabbarakeng atimmu matterui tattamba angkammu mancajiwi tonget-tongeng sukku sibawa dè' na akurangeng ri laleng sininna gau'è. 5 Rèkko engka sèddi tau ri yelle'mu iya makurang panrè, sitinajai naèllau ri Allataala, na Allataala mpèrèngngi matu apanrèng ri alèna; saba' lao ri tungke' tau, mabbèrèi Allataala sibawa makacuwa enrengngè paressè babuwa. 6 Iyakiya tau iya marèllauwè, harusu'i mateppe'; dè' nawedding bata-bata. Saba' tau iya bata-bataè iyanaritu pada-padai bombangngè ri tasi'è iya nairiè anging lao riyanrini. 7 Tau iya pada-padaèro dè' natette pikkiranna; dè' agaga apettung naullè mala ri laleng sininna sèuwa-sèuwaè. Rimakkuwannanaro, dè' tona naddennuwang untu' lolongeng agaga polè ri Puwangngè. 9 Tau Kristèng iya kasiyasiè sitinajai marennu rèkko Allataala pakatanrèi. 10 Sibawa tau Kristèng iya sugiè sitinajai marennuto, rèkko Allataala pakariyawai. Saba' lennye'i matu tau sugiè pada-pada unga wellaè. 11 Ri wettu mompona matanna essoè sibawa pellana iya matire'è, namakelle'na matu iyaro wellaè; angkanna maddunu unganna sibawa teddèng toni agellorenna. Makkuwatoniro sibawa tau iya sugiè; ancuru'i matu ri wettunna napajoppa usahana. 12 Masennangngi tau iya mattahangngè ri wettunna pèneddingi paccobang. Saba' rèkko naullèi mattahang ri laleng paccobangngè, natarimai matu sarona, iyanaritu atuwong iya puraè najjanciyang Allataala lao risining tau iya mamasèiyèngngi Allataala. 13 Rèkko sèddiè tau taggodai ri paccobang makkuwaèro, aja' nakkeda, "Iyaro paccobangngè polèi ri Allataala, " saba' Allataala dè' naullèi taggoda ri jaè, sibawa dè'to nagodai muwi sèddi tau. 14 Iyakiya taggodai tauwè rèkko rigettengngi sibawa ripangaruiwi ri cinnana muto iya majaè. 15 Nainappa, rèkko cinnana iya majaèro naturusiwi, momponi dosaè, sibawa rèkko matasa'ni dosaè, addimonrinna iyanaritu amatèng. 16 Aja' muribengnguwang, Saudara-saudaraku iya upojiyè! 17 Tungke' pabbèrè iya makessingngè sibawa hadiya iya sukkuè apolènna polèi ri surugaè, napanurungngi Allataala, Pabbinruna sininna tajangngè ri langiè. Alèna ritu Allataala iya dè'è nappinra sibawa dè'to nassabariwi muwi pettang aga. 18 Nasaba Alèna muto nanapancajiki ana'-ana'-Na naolai ada-adan-Na iya tongengngè. Napogau'i iyaro kuwammengngi talolongeng onrong iya makessingngè ri yelle'na sininna mahlu' napancajiyè. 19 Pènessaiwi iyaè madècèd-dècèng, Saudara-saudara iya upojiyè! Tungke' tau harusu'i masitta' marèngkalinga, iyakiya matengnge' mabbicara sibawa matengnge'to untu' macai. 20 Tau iya macaiè dè' naullèi pogau'i iya makessingngè, iya pèsennangiyèngngi atinna Allataala. 21 Rimakkuwannanaro, buwanni tungke' abiyasang iya macarèpaè sibawa majaè. Tarimani sibawa ati mariyawa ada-ada iya natanengngè Allataala ri laleng atimmu, saba' iyaro ada-adaè mappunnaiwi awatangeng untu' passalama'ko. 22 Sitinajako pogau'i aga iya napowadaè Allataala, aja' mumarèngkalinga bawang, angkanna nanallalengiro nabengnguwangngi alèmu. 23 Tau iya mèngkalingaèngngi ada-adanna Allataala, iyakiya dè' napogau'i iyanaritu pada-padai tau iya mitaèngngi tappana iya sitongennaè ri yolona cammingngè. 24 Purana napènessai madècèd-dècèng, laona tona namatteru nallupai pèkkugi rupanna tappanaro. 25 Hukkunna Allataala sukku sibawa mappunnai awatangeng untu' pamaradèkai rupa tauwè. Na tau iya salidikiyèngngi sibawa pènessaiwi madècèd-dècèng enrengngè pogau'i sining hukkungngèro, na tenniya marèngkalinga bawang nappa nallupaiwi, iyaro tauwè ribarakkakiwi matu ri Allataala ri laleng tungke' passaleng iya napogau'è. 26 Rèkko engka sèddi tau iya pèrasaèngngi alèna sèddi tau iya mapatoè maggama, iyakiya dè' najagaiwi lilana, alèna muto nabengnguwang; assompanna dè'gaga gunana. 27 Atinulurengngè maggama iya mapaccingngè sibawa tulèngngè manuru' pakkitanna Allataala Ambo'è iyanaritu: tulungngi ana'-ana' biuè sibawa janda-janda iya manrasa-rasaè, sibawa jagaiwi alè paimeng kuwammengngi dè' narisolangi ri linoèwè.

Yakobus 2

1 Saudara-saudaraku! Selaku tau iya mateppe'è ri Puwang Yèsus Kristus, Puwang Iya Pommalebbiè, aja' mupasilail-laingengngi tauwè situru gau'-gau' mallahèrengngè. 2 Saba' rèkko engka sèddi tau sugi pakè ciccing ulaweng sibawa pakèyang gello lao ri addeppu-deppungemmu, nainappa polèto sèddi tau kasiyasi iya pakè pakèyang sapè'-sapè', 3 nalebbi mupakalebbii tau iya mappakè magelloèro. Makkedako ri alèna, "Tudanni Puwang ri kadèra iya kaminang makessingngèwè. " Iyakiya lao ri tau kasiyasiè makkedako, "Tettonno kuwaro, " iyarè'ga "Tudanno ri dapara'è kuwaè. " 4 Ri laleng napogau'na makkuwaèro, mèbbuko assilaingeng ri yelle'na pada-padammu sibawa mangke'i tauwè situru pikkirang majaè. 5 Engngerangngi, Saudara-saudara iya ripojiyè! Tau iya nangga'è kasiyasi linoèwè, napilèi Allataala untu' mancaji sining tau iya sugiè ri laleng teppe'. Iyaro sining tauwè mancajiwi matu anggota umma'na Allataala pada-pada iya najjanciyangngè Allataala lao ri tau iya mamasèiyèngngi Alèna. 6 Iyakiya iko mala napakatunai tau kasiyasiè, padahal sining tau sugiè ritu tenre'ko sibawa massarènrèngekko lao ri pengadilangngè! 7 Mennang ritu pakatunai aseng iya malebbiè iya mutarimaè polè ri Allataala! 8 Mupogau'i iya tongengngè, rèkko mupogau'i hukkunna Akkarungengngè iya engkaè ri laleng aya'na Kitta'èwè, "Sitinajako mamasèiwi pada-padammu rupa tau pada-pada alèmu. " 9 Iyakiya rèkko mupasilail-laingengngi tauwè nasaba gau'-gau' mallahèrengngè, pogau'ko dosa, na hukkunna Allataala pannessai makkedaè iko iyanaritu tau majjalèkkai hukkung. 10 Tau iya majjalèkkaiyèngngi sala sèddinna polè ri hukkung-hukkunna Allataala, bettuwanna najjalèkkai manengngi. 11 Saba' iya makkedaè, "Aja' mumalaweng, " alènato ritu iya makkedaè, "Aja' muwabbuno. " Jaji, rèkko dè' mumalaweng, iyakiya mabbunoko, muwajjalèkkai towi iyanaritu hukkungngè. 12 Abbicarano sibawa tinda'no selaku tau iya maèloè riadèlèki situru hukkung-hukkunna Allataala iya pamaradèkaèngngi rupa tauwè. 13 Saba' dè' nappaitangngi matu Allataala paressè babuwana lao ri tau iya dè'è naissengngi paressè babuwaè. Iyakiya lebbi mawatangngi paressè babuwaè naiya pahukkungengngè! 14 Saudara-saudara! Aga gunana makkeda tauwè, "Iyya tau mateppe'ka, " rèkko dè' nappaitangngi sibawa pangkaukenna? Naullèga teppe' makkuwaèro passalama'i? 15 Ebara'na sèddi saudara siateppereng mapparelluwang pakèyang sibawa dè' nappunnai genne inanrè untu' esso-esso. 16 Aga gunana saudara makkeda lao ri alèna, "Salama'ki pakè pakèyang iya mapellaè sibawa salama'ki manrè!" -- rèkko dè' muwèrèngngi aga iya napparelluwangngè untu' tuwo? 17 Makkuwatoniro sibawa teppe'è, rèkko dè' nariyappaitang ri pangkaukengngè, iyaro teppe'è dè'gaga gunana. 18 Naullè engka makkeda, "Engka tau iya sanrèè ri teppe'na engkato iya sanrèè ri pangkaukenna. " Ubaliwi matu, "Jellokekka pèkkugi tauwè naullèi mappunnai teppe' temmappangkaukeng na uwajjellokengngi matu sibawa pangkaukeng makkedaè mappunnaika teppe'. " 19 Dè'ga mumateppe makkedaè banna sèddi bawang Allataala? Nah, muwi sining sètangngè mateppe'to sibawa tènrèna mennang nataro tau! 20 Madonggo senna'ko! Parelluga ripabutti ri iko makkedaè dè'gaga akkègunana mappunnai teppe' temmappangkaukeng? 21 Ita bawani Abraham nènè-nènèta. Ritarima madècèngngi ri Allataala nasaba pangkaukenna, iyanaritu wettunna nakkasuwiyangeng Ishak, ana'na, lao ri Allataala ri yasè'na mèzbaè. 22 Manessani kuwaè makkedaè teppe'è harusu'i riyappaitang sibawa pangkaukeng kuwammengngi namancaji sukku. 23 Iyaro sicoco'i sibawa aya'na Kitta'èwè, "Mateppe'i Abraham ri Allataala, nasaba teppe'naro natarimai Allataala selaku tau iya pogau'èngngi èlona Allataala. " Iyanaro saba'na Abraham nariteppu, "Sahaba'na Allataala. " 24 Manessani makkekkuwangngè, makkedaè ritarima madècèngngi tauwè ri Allataala nasaba aga iya napogau'è iyaro tauwè, na tenniya banna nasaba teppe'na bawang. 25 Ita towi ri Rahab, makkunrai cakkuribangngèro. Ritarima madècèngngi ri Allataala nasaba pangkaukenna, iyanaritu wettunna natarima ri lalempolana mata-matanna bangsa Israèliè sibawa natulung mennang nalariyang alèna naolai laleng laingngè. 26 Nah, pèkkugi watakkalè iya temmakkèroh-è iyanaritu watakkalè iya matè, makkuwa toniro teppe' temmappangkaukengngè iyanaritu teppe' iya matè.

Yakobus 3

1 Saudara-saudara! Aja' namaèga polè ri yelle'mu iya maèloè mancaji guru. Muwisseng makkedaè idi iya mancaji guruè riadèlèkiwi matu lebbi matedde' naiya tau laingngè. 2 Idi manengngè biyasaki pogau' asalang. Iyakiya tau iya dè'è naengka napogau' asalang sibawa ada-adanna, iyanaritu tau iya sukkuè, iya mullè kuwasai manengngi alèna. 3 Rigalangngi anyarangngè kuwammengngi naturusiwi èlota, nataullèi patunru'i sininna watakkalèna iyaro anyarangngè. 4 Ala towi kappala'è selaku èbara'. Namuni kappala'è iyanaritu sèuwai iya makkuwaèmmani loppona sibawa ritiwi ri anging iya marajaè, iyakiya ripatunru'i ri golinna iya baiccu senna'è, situru èlona jurumudiè. 5 Makkuwatoniro sibawa lilata; namuni iyaro lilata baiccu'i, iyakiya naullèi mattempowangngi alèna ri laleng gau'-gau' iya battowaè. Pikkiri'ni pèkkugi loppona ale'è weddingngi ritunu ri api iya baiccu senna'è! 6 Lilaè pada-padai apiè. Ri watakkalèta, sinrupai assalenna majaè iya patassiyaèngngi jaè lao ri sininna alèta. Nasibawang api iya assalennaè polè ri ranakaè, nangureng manengngi sininna atuwotta. 7 Sininna rupanna olokolo' masekkangngè, manu'-manu'è, olokolo' makkalolo'è sibawa balè weddingngi ripakacuwai, sibawa pura toni ripakacuwai ri rupa tauwè. 8 Iyakiya lilana rupa tauwè muwi sèddi tau dè'to naullèi pakacuwaiwi. Iyaro lilaè majai sibawa dè' nariyullè makuwasaiwi; pennoi sibawa racung iya paunoè. 9 Takkègunangngi untu' mattarima kasi lao ri Puwangngè sibawa Ambo'ta, iyakiya untu' tanroi towi pada-padatta rupa tau, iya puraè ripancaji manuru' rupanna Allataala. 10 Polè ri tèmu iya padaè massui ada-ada tarima kasi'è sibawato ada-ada tanro. Sitongenna dè' nakkuwaro! 11 Engkaga mata uwai iya passuè uwai kawa sibawa uwai mapai polè ri assaleng iya padaè? 12 Saudara-saudaraku, pong araè, dè' nawedding powassèlè' buwa zaitun, sibawa anggoro'è dè' nawedding powassèlè' buwa ara. Mata uwai iya mapejjè dè'to nawedding passu uwai kawa. 13 Rèkko ri yelle'mu engka tau mapanrè sibawa makkèakkaleng, sitinajai mappaitangngi sibawa tuwo makessing enrengngè pogau'i gau'-gau' iya makessingngè, iya nasibawangngè ariyawang ati nenniya apanrèng. 14 Iyakiya rèkko mangèmpuruko, mapeddi ati sibawa pentingkangngi alèna, aja' muwammingkikengngi iyaro apanrèngngè, saba' nallalengiro muputara' balè'i biritta iya tongengngè iya polè ri Allataala. 15 Apanrèng makkuwaèro dè' napolè ri surugaè assalenna. Assalenna polèi ri linoè, polè ri napessunna tolinoè, sibawa polè ri sètangngè! 16 Kègi engka angèmpurung sibawa sipa' pentingkangngi alè bawang, kuwa towitu engka akacaungeng sibawa sininna rupanna pangkaukeng iya majaè. 17 Iyakiya tau iya mappunnaiyè apanrèng iya assalenna polè ri yasè', bunge'-bunge'na mapaccingngi, nainappa napoji sidamè, mabessa, sibawa mapato. Pennoi sibawa paressè babuwa powassèlè' pangkaukeng-pangkaukeng iya makessingngè. Dè' nakacowè-cowè sibawa dè' nabbonga-bonga. 18 Mèmeng akessingengngè iyanaritu wassèlè' polè ri binè adamèngengngè iya riyampoè ri tau iya pojiyèngngi damè!

Yakobus 4

1 Polè kègi assalenna sininna allagangngè sibawa assasangngè ri yelle'mu? Tenniyaga iyaro assalenna polèi risining cinnamu iya matteruè mammusu ri laleng alèmu untu' lolongengngi asennangeng linoè? 2 Macinnako, iyakiya dè' Mulolongengngi, namaèloko pauno! Masumange'ko, iyakiya dè' naruntu'i aga iya musappaè, massasa sibawa mallaga. Dè' agaga nalolongeng, saba' dè' muwèllauwi ri Allataala. 3 Namuni purani muwèllau, dè'to mulolongengngi, saba' akkattana parèllaummu salai; aga iya muwèllauwè iyanaritu untu' asennangeng alèna bawang. 4 Iko iyanaritu tau iya dè'è namatinulu! Muwissegga makkedaè rèkko massellaoko sibawa linoè, mancaji baliko ri Allataala? 5 Aja' muwasengngi makkedaè Kitta'è temmakkèalasangngi nakkeda, "Ri laleng alèta Allataala taroi Roh iya matedde'è cinnana. " 6 Namuni makkuwaro, pammasèna Allataala iya nawèrèngngèkki lebbi mawatangngi naiya cinnana iyaro rohta. Iyanaro saba'na ri laleng Kitta'è taroki towi, "Allataala mèwai tau iya matempoè, iyakiya sibalè'na namasèiwi tau iya mariyawa atiè. " 7 Rimakkuwannanaro, tunru'no lao ri Allataala sibawa èwai Ibillisi', nalari matu Ibillisi' polè ri iko. 8 Addeppèriwi Allataala, nanaddeppèri tokko matu Allataala. Paccingiwi limammu, iko iya madosaè! Sibawa cinnongiwi atimmu, iko iya mappakka atiè! 9 Sitinajako tonget-tongeng massesse kalè sibawa teri enrengngè mpating; sitinajai cawamu mancaji teri sibawa arennummu mancaji atassinnaureng! 10 Sitinajako pakariyawai alèmu ri yolona Puwangngè, naripakatanrèko matu ri Puwangngè. 11 Saudara-saudara, aja' musisullè sicella iyarè'ga sisullè sipassala. Tau iya maccellaè iyarè'ga passalaèngngi saudarana iya pada-padannaè Kristèng, nacellai sibawa napassalai hukkunna Allataala. Narèkko mupassalai hukkunna Allataala, bettuwanna iyaro dè' muturusiwi iyaro hukkung-hukkungngè, sangadinna mancajiwi hakinna. 12 Padahal banna sèddi iya mappunnaiyè ha' mabbèrè hukkung lao ri tolinoè sibawa madèlèkiwi tolinoè. Alèna ritu Allataala iya makuwasaè mappassalama' sibawa mappabbinasa. Jaji, niga iko, angkammu maèlo passalai pada-padatta rupa tau? 13 Saudara-saudara iya makkedaè, "Iyaè essoè iyarè'ga baja maèloki joppa lao ri kota anu sibawa monro kuwaro sitaung ittana untu' dangkang sibawa sappa dowi, " -- èngkalingai pangajakuè. 14 Aga iya maèloè kajajiyang sibawa atuwommu baja, alèmu paimeng dè' naissengngi! Bannako pada-pada rumpuè iya cinampe'è bawang paita, nainappa lennye. 15 Sitongenna harusu'ko makkeda makkuwaè, "Rèkko napuwèloi Puwangngè, maèloki tuwo sibawa pogau'i iyaè iyarè'ga iyaro. " 16 Iyakiya makkekkuwangngè matempoko sibawa mabboro. Sininna abborowang pada-padaèro salai ritu. 17 Rimakkuwannanaro, tau iya missengngèngngi aga iya makessingngè iya harusu'è napogau' iyakiya dè' napogau'i, madosai iyaro tauwè.

Yakobus 5

1 Saudara-saudara, sining tau sugiè! Engkalingai pangajaku. Sitinajako teri sibawa mpating, nasaba pèneddingiko matu anrasa-rasang! 2 Makebbonni asugiremmu. Nanrèni anè pakèyammu. 3 Ulaweng sibawa pèra'mu natongkoni taiseng; mancaji sabbiwi matu taisenna mèwako sibawa manrèi matu gangka cappu tubummu pada-pada apiè. Mupaggoppoi waramparangngè ri esso-esso wettu paccappurengngè. 4 Dè' muwajai sarona sining tau iya majjamaè ri dare'mu. Engkalingani makkekkuwangngè addarèkènna mennang! Sining tau iya paddeppungengngèngngi wassèlè dare'na, gora mèllau tulung nagorana mennang lettu'ni ri daucculinna Allataala, Puwang Iya Pommakuwasaè. 5 Tuwoko sibawa massennas-sennang sibawa pèneddingiwi iyaro asennangengngè ri linoèwè. Samammu mattengngang pacommokiwi alèmu untu' esso aggèrèkengngè. 6 Muhukkungngi sibawa muunoi sining tauwè iya dè'è napasala, na dè' mennang naèwako. 7 Rimakkuwannanaro, sabbara'ki Saudara-saudaraku, narapi polè Puwangngè. Itai pèkkugi sabbara'na sèddiè patani tajengngi narapi tanana mabbèrè wassèlè' iya engkaè angke'na ri alèna. Nasibawang asabbarakeng natajengngi bosiè wettu maddununa daud-daungngè sibawa bosi wettu mpungana aju-kajungngè. 8 Sitinaja tokko sabbara sibawa pakaloppoiwi atimmu, saba' Esso apolènna Puwangngè macawè'ni. 9 Aja' muwannoko'-noko' sibawa sisullè sipassala, kuwammengngi nadè' narihukkukko ri Allataala. Engngerangngi! Macawè'ni Hakingngè, sadiyani untu' polè. 10 Saudara-saudara, èngngerangngi sininna nabiè, iya mabbicaraè ri laleng asenna Puwangngè. Sabbara'i sibawa tahangngi manrasa-rasa. Jaji, alai mennang selaku conto. 11 Riteppui mennang masennang nasaba tahangngi mennang. Purani muwèngkalinga asabbarakenna Ayub, sibawa muwisseng pèkkugi Puwangngè ri paccappurenna barakkakiwi. Saba' maseroi paressè babuwana Puwangngè sibawa akessingeng atinna. 12 Iya penting senna'è, iyanaritu: Aja' muwattanro, muwi nasabbing langiè, iyarè'ga nasabbing tanaè, iyarè'ga muwi nasabbing agi-agi. Powadai bawang "Iyyè" rèkko akkattamu iyyè, sibawa "Dè'" rèkko akkattamu dè'; kuwammengngi na aja' naripakennaiko pahukkungeng ri Allataala. 13 Rèkko ri yelle'mu engka iya mattengngangngè masussa, sitinajai massempajang. Rèkko engka marennu, sitinajai makkèlong pojiwi Allataala. 14 Rèkko engka malasa, sitinajai naobbi sining pamimpinna jema'è. Nasitinajai iyaro sining pamimpingngè massempajangengngi iyaro tau malasaè enrengngè sapuiwi sibawa minnya ri laleng asenna Puwangngè. 15 Rèkko sining sempajanna mennang ripalettu'i ri Puwangngè sibawa mateppe', napajjappai matu Puwangngè iyaro tau malasaè, jaji Puwangngè mappajjappa, sibawa maddampengengngi dosa-dosaè iya puraè napogau'. 16 Rimakkuwannanaro, sitinajako sisullè siyangakui asalang sibawa sisullè siyassempajangeng, kuwammengngi napajjappako. Sempajanna tau iya turusiyèngngi èlona Allataala, mappunnaiwi akuwasang iya battowaè. 17 Elia pada-padaki tolino iya pada-padaè idi'è. Massempajangngi sibawa tonget-tongeng kuwammengngi nadè' nateppa bosiè, nadè'na nateppa bosiè tellu sitengnga taung ittana. 18 Nainappa massempajassi, nanapaturunni langiè bosiè angkanna tanaè mabbèrèyangngi wassèlè'na paimeng. 19 Saudara-saudaraku! Rèkko ri yelle'mu engka sèddi tau iya dè'ènna naccowèriwi pappagguruwanna Allataala, nainappa sèddiè tau laing mèbbui iyaro tauwè lisu ri Allataala, 20 èngngerangngi iyaè aya'èwè: Tau iya mèbbuèngngi tau madosaè balè' polè ri lalenna iya salaè, iyaro tauwè napassalama'i nyawana tau madosaèro polè ri amatèngngè sibawa nassabariwi maèga dosa riyaddampengeng. Salama, Yakobus

1 Petrus 1

1 Saudara-saudara umma' napilèna Allataala, iya tassiyaè ri laona ri daèra Pontus, Galatia, Kapodokia, Asia sibawa Bitinia! Iyya, Pètrus, rasulna Yèsus Kristus, mammènasa tennapodo Allataala mabbèrè barakka sibawa asalèwangeng ri iko sibawa tabbollompollong. Ripilèko mancaji umma'na Allataala situru sibawa rancanana Allataala Ambo'è. Sibawa Rohna Allataala pura pancajiko umma' iya mapaccingngè, banna untu' Allataala, kuwammengngi mumatinulu lao ri Yèsus Kristus sibawa ripaccingi ri dara-Na. 3 Laono mai tasukkuru ri Allataala, Ambo'na Puwatta Yèsus Kristus! Namasèi senna'ki, iyanaro saba'na nawèrèkki atuwong mabaru, ri laleng napatuwona paimeng Yèsus Kristus polè ri amatèngngè. Iyaè nawèrèkki ammènasang iya mannennungengngè. 4 Mammènasaki untu' mappunnaiwi barakka-barakka iya napassadiyaè Allataala untu' umma'-Na, iyanaritu barakka-barakka iya Nataroè ri surugaè, angkanna dè' naullèi masolang, iyarè'ga mancaji makebbong iyarè'ga lengngè. 5 Iya manenna iyanaritu untu'mu, nasaba mateppe'ko ri Allataala. Narijagaiko sibawa akuwasanna Allataala kuwammengngi mutarimai asalamakeng iya sadiyaènna ripannessa ri ahèra' matti. 6 Rimakkuwannanaro sitinajako masennang ati, namuni makkekkuwangngè untu' cinampe' harusu'ko mancaji tassinnau nasaba mupèneddingiwi maddupa-rupang paccobang. 7 Akkattana iyanaritu pabuttiwi tonget-tongekkoga mateppe' ri Puwangngè iyarè'ga dè'. Muwi ulaweng iya weddingngè masolang, riojiwi sibawa api. Nah, teppe'mu lebbi mangke'i naiya ulawengngè, jaji harusu towi rioji kuwammengngi nancaji mattinetto. Nanallalengiro murioji matu enrengngè ripakalebbi kuwaèttopa ripakatanrè ri Essona Yèsus Kristus polè paimeng. 8 Muwamasèiwi Alèna, namuni riyolo dè' muwitai. Sibawa mateppe'ko ri Alèna namuni makkekkuwangngè dè' muwitai. Iyanaro saba'na namarennuko, sibawa pèrasaiwi ariyo-riyong iya battowaè sibawa iya dè'è naripowada. 9 Saba' akkattana teppe'mu maddupai, iyanaritu asalamakenna nyawamu. 10 Iyanaè asalamakengngè iya riparèssaè madècèd-dècèng sibawa risalidiki risining nabiè, nanabotoi mennang passalenna barakka iya nabbèrèyangngè Allataala lao ri iko. 11 Nasalidikiwi mennang pèkkugi sibawa uppanna iyaro gau'è kajajiyang matu, iya nakkattaiyè Rohna Kristus iya engkaè ri laleng alèna. Iyaro wettuè nabotoi Roh-Na lao ri mennang passalenna anrasa-rasang iya harusu'è napèneddingi Kristus sibawa passalenna arajan-Na iya maccinrolaè matu rèkko purairo. 12 Lao ri nabi-nabièro nappaddissengengngi Allataala makkedaè aga iya napogau'è mennang tenniya untu' apentingenna mennang, sangadinna untu'mu; iyanaritu gau'-gau' makkekkuwangngèwè muwèngkalinga sibawa manessa polè risining pabbiritta Karèba Madecèngngè passalenna Yèsus Kristus. Napalettu'i mennang gau'-gau'èro lao ri iko sibawa akuwasanna Rohna Allataala iya Nakiringngè polè ri surugaè. Mala muwi sining malaèka'è macinna towi missengngi karèba iya nabbirittangngèro mennang. 13 Rimakkuwannanaro, sitinajako sadiya-sadiya. Atike'ko sibawa ammènasa manenno ri barakka iya maèloè riwèrèngngèkko ri wettunna polè Yèsus Kristus matti. 14 Atinuluno ri Allataala, sibawa aja'na mutuwo situru pangèloremmu riyolo, ri wettummu dè'pa muwissengngi Allataala. 15 Sibalè'na, sitinajako mapaccing ri laleng sininna gau'è iya mupogau'è, pada-pada Allataala iya mobbièkko mapaccingngi. 16 Ri laleng Kitta'è tarokii, "Sitinajako mapaccing, saba' mapaccik-Ka. " 17 Muteppui iyaro Allataala Ambo' ri wettummu massempajang ri Alèna. Nah, Allataalaènnaro madèlèkiwi tolinoè sicoco' sibawa pangkaukenna tungke'-tungke' temmappasilaingeng. Rimakkuwannanaro, ri wettu engkamu mupa ri linoèwè, sitinajako pakarajai Allataala ri laleng atuwommu. 18 Muwisseng aga iya puraè nakkamajareng untu' paleppe'ko polè ri atuwong iya siya-siyaè iya nappammanarengngè nènè-nènèmu. Pakkamajana tenniya sèuwa iya weddingngè masolang pada-pada pèra'è iyarè'ga ulawengngè, 19 sangadinna sèuwai iya mangke'è; iyanaritu alèna muto Kristus, iya mancajiyè selaku bimbala' iya nakkarobangengngè lao ri Allataala iya dè'è ricèccèiyangngi iyarè'ga cellana. 20 Purani ripilè Kristus ri Allataala riwettu dè'napa naripancaji linoè. Na ri esso-esso macawè'nana paccappurenna linoèwè, polèi ri linoè kuwammengngi naripassalama'ko. 21 Naolai Alèna ritu namateppe'ko ri Allataala iya puraè patuwoi paimeng polè ri amatèngngè sibawa arajan-Na. Jaji, Allataala ritu iya muwatepperiyè sibawa lao ri Allataalato ritu mammènasako. 22 Nasaba mapatoko ri pappagguruwang polè ri Allataala, namupèpaccingiwi alèmu sibawa mamasèiwi sining tau siatepperengngè sibawa macenning. Rimakkuwannanaro, sitinajako mamasèiwi sèddiè lao ri laingngè sibawa sukku atinna. 23 Saba' naolai saddanna Allataala iya tuwoè sibawa mannennungengngèro, purano ripancaji rupa tau mabaru iya dè'è najaji polè ri tolinoè, sangadinna polè ri Ambo' iya mannennungengngè. 24 Ri laleng Kitta'è tarokii makkuwaè, "Sininna rupa tauwè sinrupai wellaè, sibawa sininna arajanna pada-padai unga wellaè. Makelle'i wellaè, maddunu towi unganna; 25 iyakiya saddanna Puwangngè tette'i lettu mannennungeng. " Saddaènna ritu Karèba Madècèng iya puraè riyabbirittang lao ri iko.

1 Petrus 2

1 Rimakkuwannanaro, buwanni polè ri alèmu sininna iya majaè; aja'na muwabbellè, sibawa aja' muwabbonga-bonga. Aja' muwangèmpuru, sibawa aja' mupakatunai tau laingngè. 2 Sitinajako mancaji pada-pada ana'loloè iya silalonaè jaji, tuli madekka lao ri susu rohaniè iya mapaccingngè. Nanallalengiro nawekke'ko sibawa ripassalama'. 3 Ri laleng Kitta'è tarokii makkuwaè, "Alèmuna pura pèrasaiwi pèkkugi kessinna Puwangngè. " 4 Rimakkuwannanaro, laono ri Puwangngè. Sinrupai batu iya tuwoè, batu iya nabuwangngè tauwè nasaba nangga'i dè' nakkèguna; iyakiya iya napilè Allataala selaku batu iya mangke'è. 5 Iko pada-padako batu-batu iya tuwoè. Rimakkuwannanaro sitinajako maèlo ripakè untu' patettongngi Bolana Allataala iya rohaniè. Nanallalengiro mancajiko imang-ngimang iya tuwoè banna untu' Allataala, sibawa iya naolaèngngi Yèsus Kristus makkasuwiyangengngi lao ri Allataala, akkarobangeng rohani iya naèloriyè atinna Allataala. 6 Nasaba ri laleng Kitta'è tarokii makkuwaè, "Purani upilè sèddi batu iya mangke'è, iya Utaroè ri Sion selaku batu iya pentingngè; na tau iya mateppe'è ri Alèna dè' naripakacèlè matu. " 7 Iyaro batuè mangke' senna' untu' iko iya mateppe'è. Iyakiya untu' sining tau iya dè'è namateppe', nakennai aya'-aya'na Kitta'èwè, "Batu iya dè'è napakèi sining tukang bangunangngè mancajiwi batu iya pentingngè. " 8 sibawa "Iyanaro batu iya mèbbuèngngi tauwè tabbuttu, batu iya mèbbuèngngi mennang menrung. " Tabbuttui mennang nasaba dè' namateppe' mennang lao ri ada-adanna Allataala. Makkuwatoniro pura napattentu Allataala passalenna mennang. 9 Iyakiya iko iyanaritu bangsa iya ripilè, imang-ngimang iya tumaningiyèngngi Arungngè, bangsa iya mapaccingngè, banna untu' Allataala, umma'na muto Allataala. Allataala pilèko sibawa mobbiko massu polè ri pettangngè untu' muttama ri laleng tajanna iya mattappaè, sibawa akkatta kuwammengngi muwappallebbangengngi biritta passalenna sining pangkaukenna iya dè'è padanna. 10 Riyolo tenniyako umma'na Allataala, iyakiya makkekkuwangngè iko iyanaritu umma'na Allataala. Riyolo dè' nariyamasèiko ri Allataala, iyakiya makkekkuwangngè tarimako paressè babuwa. 11 Saudara-saudara iya ripojiyè! Iko iyanaritu tau polè-polè sibawa passollè ri linoèwè. Rimakkuwannanaro uwèllauwi sibawa masero kuwammengngi aja' muwaccowèriwi hawa napessu tolinomu iya tuli mammusuè mèwai nyawaè. 12 Ampè-ampèmu ri yelle'na tau iya dè'è naissengngi Puwangngè harusu'i makessing senna', angkanna rèkko napètenna'ko selaku tau maja, harusu'i mennang nangakui pangkaukemmu iya makessingngè, angkanna napojiwi matu mennang Allataala ri Esso apolèn-Na. 13 Nasabbing Puwangngè, sitinajako tunru' lao ri tungke' iya makuwasaiyèngngi rupa tauwè: muwi lao ri Kaisar iya mancaji panguwasa iya poko'è, 14 iyarè'ga lao ri gubernur-è iya najello'è Kaisar untu' hukkungngi tau iya pogau'èngngi majaè sibawa untu' pakalebbii tau iya pogau'èngngi makessingngè. 15 Saba' maèloi Allataala kuwammengngi nasibawangngi pangkaukemmu iya makessingngè mututu'i tèmunna tau iya mabbicara madonggoè. 16 Sitinajako tuwo selaku tau maradèka', iyakiya aja' mupakèi amaradèkammuro untu' tongkoi majaè, sangadinna tuwono selaku atanna Allataala. 17 Angke'i sininna tauwè, amasèiwi saudara-saudaramu pada-padammu Kristèng. Etauno lao ri Allataala, sibawa pakalebbii Kaisar. 18 Saudara-saudara iya mancaji pattumaniè, tunru'no ri ponggawamu sibawa mappakalebbi, tenniya bawang lao ri mennang iya makessing atiè sibawa mabessaè, iyakiya laoto ri iya mapèddaraè. 19 Allataala barakkakiko matu, rèkko nasaba mainge'ko ri èlona Allataala, sabbara'ko manrasa-rasa rigaukeng ri tau iya dè'è naadèlè'. 20 Saba' aga alebbimmu rèkko sabbara'i manrasa-rasa pahukkungeng iya harusu'è mutanggung nasaba pasalako? Iyakiya rèkko sabbara'ko tarimai anrasa-rasang iya kennaèkko nasaba pogau'ko iya tongengngè, Allataala barakkakiko matu. 21 Untu' iyanaro Allataala naobbiko. Saba' alèna Kristus pura manrasa-rasa untu'mu, nanallalengiro nabbèrèyangngi lao ri iko sèuwa conto, kuwammengngi muwaccowèriwi batè-Na. 22 Dè' naengka napogau' dosa, sibawa dè' naengka muwi sèddi tau mèngkalingai mabbellè. 23 Iyaro wettuè rirodda-roddaiwi, dè' nappèbali sibawa makkarodda-karodda. Wettunna manrasa-rasa, dè' nangancang; banna nabbèrèyangngi parakara-Na lao ri Allataala, Haking iya adèlè'èro. 24 Kristus muto mèssangngi dosa-dosata ri Alèna ri yasè'na aju salliè, kuwammengngi bèbasa'i polè ri akuwasanna dosaè, sibawa tuwo manuru' èlona Allataala. Lolona Kristus pajjappako. 25 Riyolo pada-padako bimbala' iya pusaè, iyakiya makkekkuwangngè ritiwiko lisu untu' maccowèriwi Pakkampi sibawa Pappiyara nyawamu.

1 Petrus 3

1 Makkuwatoro iko, sining bainè, harusu'i tunru' lao ri lakkaiè kuwammengngi rèkko ri yelle'na mennang engka iya dè'è namateppe' lao ri biritta polè ri Allataala, ampè-ampèmu naullè mèbbui mennang mancaji mateppe'. Nadè' naparelluko powadai aga-aga lao ri mennang, 2 saba' naitai mennang ampè-ampèmu iya mapaccingngè sibawa makessing. 3 Aja'na agelloremmu banna agelloreng ri saliweng, pada-pada èbara'na bèlo-bèloiwi gemme'è iyarè'ga pakè parèwa ulaweng, iyarè'ga mappakè iya masuliè. 4 Sibalè'na, sitinajai agelloremmu mompoi polè ri laleng batèngngè, ampè-ampè iya malemma kininnawaè sibawa tennangngè; iyanaritu agelloreng mannennungengngè iya mangke' senna'è situru pakkitanna Allataala. 5 Nasibawang caraènnaè na ri wettu riyolo sining makkunrai maggamaè iya mammènasaè ri Allataala pagelloriwi alèna sibawa tunru'i lao ri lakkainna. 6 Makkuwatoro Sara, mapatoi lao ri Abraham sibawa nateppui puwanna. Saudara makkekkuwangngè iyanaritu ana'-ana'na Sara, rèkko mupogau'i gau'-gau' iya makessingngè sibawa dè' mumètau lao ri muwi aga. 7 Na ikoto, sining lakkaiè, sitinajano tuwo sibawa penno pappahang lao ri bainèmu, enrengngè nasibawang amaingekeng makkedaè mennang iyanaritu abbatireng iya malemmaè. Gaukengngi mennang sibawa malebbi, saba' silaokko mennang, tarimai matu pammasè atuwong mannennungeng polè ri Allataala. Pogau'i iyaè, kuwammengngi nadè' gaga lawa-lawaiwi sempajammu. 8 Rippe'na iyanaritu: sitinajai Saudara-saudara massèddi ada. Sitinajako sisullè siyamasè-masèi pada-pada tau massilessurengngè. Sibawa sitinajako sisullè siessèyang babuwa sibawa kèdo pakariyawai alè. 9 Aja' muwale'i jaè sibawa ja, iyarè'ga pakkaroddaè sibawa pakkarodda; sibalè'na wale'i sibawa parèllaung barakka polè ri Allataala. Saba' Allataala mobbiko mala kuwammengngi mutarima barakka polè ri alèna. 10 Ri laleng Kitta'è tarokii makkuwaè, "Tau iya maèloè pèneddingiwi atuwongngè sibawa maèlo pèneddingiwi esso-esso iya makessingngè, harusu'i najagai tèmunna kuwammengngi aja' nabbicara gau'-gau' majaè sibawa dè' napowadai gau'-gau' iya bellè. 11 Harusu'i mabèlaiwi iya majaè sibawa pogau'i makessingngè; sitinajai tonget-tongeng mèwa untu' lolongeng adamèngeng. 12 Saba' Puwangngè tuli jampangiwi sining tau iya turusiyèngngi èlo-Na, sibawa Puwangngè tuli mèngkalingai sining sempajanna mennang; iyakiya Puwangngè mèwai sining tau iya pogau'èngngi majaè. " 13 Nigana maèlo pogau'i majaè lao ri iko, rèkko masennakko pogau'i makessingngè? 14 Iyakiya namuni harusu'ko manrasa-rasa nasaba pogau'i gau'-gau' iya makessingngè, untu'ko! Aja' mumètau muwi lao ri niga, sibawa aja' mubata-bata. 15 Iyakiya ri laleng atimmu, sitinajako mabbèrèyangngi lao ri Kristus pappakalebbi iya dè'è padanna iya situruè sibawa tettongenna selaku Puwang. Sibawa sitinajako tuli sadiya untu' mappèbali lao ri tungke' tau iya makkutanaè passalenna ammènasang iya muwappunnangiyè. 16 Iyakiya pogau'i iyaro sibawa malemma kininnawa sibawa mappakaraja. Sibawa sitinajai ati marilalemmu mapaccing, kuwammengngi rèkko ripètenna'ko nasaba tuwoko sibawa makessing selaku Ana' gurunna Kristus, maka tau iya mappètenna'èro mancajiwi matu alèna muto masiri. 17 Lebbi kessing muwi manrasa-rasaè nasaba pogau'i makessingngè -- rèkko iyaro iyanaritu èlonai Allataala -- naiya manrasa-rasaè nasaba pogau'i majaè. 18 Saba' alèna Kristus sisemmi bawang matè lettu mannennungeng nasaba dosana tolinoè -- sèddiè tau iya dè'è napasala, matèi untu' tau iya pasalaè. Napogau'i Kristus iyaro kuwammengngi naullèi pimpikko lao ri Allataala. Riyunoi secara tubu, iyakiya ripatuwoi paimeng secara rohani. 19 Ri laleng keadaang roh laowi mabbirittangngi karèba polè ri Allataala lao ri roh-roh iya ritarungkuè; 20 iyanaritu rohna sining tau iya dè'è namateppe' ri Allataala ri wettunna Nuh. Iyaro wettuè mattajengngi Allataala sibawa sabbara ri wettu naèbbuna mupa Nuh kappala'na. Banna sining tau iya engkaè ri kappala'è bawang -- iya manenna aruwa tau -- iya ripassalama'è naolai lèmpe loppoèro. 21 Nah, iyaro kajajiyangngè sinrupai èbara'na acemmèngngè iya makkekkuwangngèwè passalama'ko. Iyaè acemmèngngè tenniya sèuwa upacara mappèpaccing alè polè ri sininna iya macarèpaè, sangadinna sinrupai jancimmu lao ri Allataala polè ri ati marilaleng iya makessingngè. Iyaro acemmèngngè napassalama'ko nasaba Yèsus Kristus tuwoni paimeng polè ri amatèngngè, 22 sibawa mènrè'ni ri surugaè. Makkekkuwangngè makuwasai silaong Allataala sibawa parèntai sininna malaèka'è, sininna panguwasaè enrengngè sininna awatangengngè.

1 Petrus 4

1 Nasaba purani Kristus manrasa-rasa secara tubu, harusu towi pakkasse'i alèna sibawa attangeng pada-padaèro. Saba' tau iya manrasa-rasaè secara tubu, dè'na napogau' dosa. 2 Rimakkuwannanaro, sitinajako tuwo matteru ri linoèwè situru èlona Allataala, na tenniya manuru' èlona rupa tauwè. 3 Ri wettu labe'è, cuku'ni ittamu pogau'i aga iya napoji pogau' sining tau iya dè'è naissengngi Puwangngè. Dè' namakessing atuwommu. Muwaccowèriwi hawa napessuè, mammabo-mabokeng, mappèsta-pèsta, mènung-mènung sibawa massompa barahala secara mappakaciddi-ciddi. 4 Makkekkuwangngè tau iya dè'è naissengngi Puwangngè, hèrangngi makkedaè dè' muwaccowè tuwo pada-pada mennang, pèneddingiwi dosaè dè' paggangkanna. Iyanaro saba'na napakatunako. 5 Iyakiya matti harusu'i mennang mattanggung jawa' lao ri Allataala iya sadiyaènna untu' madèlèkiwi tau iya tuwoè sibawa iya matè. 6 Iyanaro saba'na Karèba Madècèngngè pura toni riyabbirittang lao risining tau matè. Akkattana kuwammengngi mennang, iya puraè riadèlèki ri laleng keadaang tubu -- pada-pada mutowi sininna tauwè riadèlèkiwi matu -- naullèi tuwo secara rohani, situru èlona Allataala. 7 Sininna sèuwa-sèuwaè nacawèkini accappurenna, rimakkuwannanaro sitinajako makuwasaiwi alèmu sibawa matike', kuwammengngi muwullèi massempajang. 8 Lebbi nasini-sininnaè, sitinajako tonget-tongeng siyamasèi sèddiè lao ri laingngè, saba' ri laleng sisullè siyamasèi, tuli sadiyako matu untu' sisullè siyamasèi. 9 Sitinajako tarimai sèddiè lao ri laingngè ri bolana tungke'-tungke', temmaddarèkè. 10 Iko pada purano tarima pammasè iya maddupa-rupangngè polè ri Allataala. Rimakkuwannanaro selaku pajjama iya makessingngè polè risining pabbèrèna Allataala, sitinajako makkègunangngi sining pabbèrèro untu' apentingeng massibawa. 11 Tau iya mappalettu'è biritta, harusu'i palettu' biritta polè ri Allataala; tau iya tumaningiyèngngi tau laingngè, harusu'i natumaningi sibawa awatangeng polè ri Allataala, kuwammengngi ri laleng sininna gau'è, weddingngi ripakaraja Allataala naolai Yèsus Kristus. Alèna ritu makuwasa sibawa sipato' ripakaraja lettu mannennungeng. Aming. 12 Saudara-saudara iya ripojiyè! Manrasa-rasa senna'ko makkekkuwangngè nasaba mattengngakko rioji. Iyakiya aja' mumarasa hèrang, samanna engka sèuwa iya dè'è padanna kajajiyang lao ri iko. 13 Mala, sitinajako masennang nasaba turu'i manrasa-rasa silaong Kristus. Na matti rèkko riyappaitanni arajanna Kristus, mariyo-riyoko matu. 14 Saroko rèkko ripakatunako nasaba maccowèko ri Kristus. Iyaro bettuwanna Roh iya malebbiè, iyanaritu Rohna Allataala, engkai ri alèmu. 15 Aja' namuwi sèddi tau polè ri yelle'mu manrasa-rasa nasaba pabbunoi, iyarè'ga pangai, iyarè'ga tomaja, iyarè'ga nasaba nacampurukiwi urusanna tau laingngè. 16 Iyakiya rèkko manrasa-rasako nasaba sèddiko tau Kristèng, aja' mumasiri nasaba gau'èro. Attarima kasi'no ri Allataala, makkedaè mutiwii asenna Kristus. 17 Narapini wettunna Allataala madèlèkiwi linoè. Na umma'na muto Allataala riadèlèki matu riyolo'. Nah, rèkko Allataala maèlo pammulaiwi ri idi, pèkkugiwi jajinna matti sibawa sining tau iya dè'è namateppe' lao ri Karèba Madècèng polè ri Allataalaro? 18 Ri laleng Kitta'è tarokii makkuwaèwè, "Rèkko sining tau iya makessingngè mawatang toni untu' makkuwaèwè, aga tona kajajiyang matu sibawa sining tau madosaè iya dè'è naissengngi Puwangngè!" 19 Rimakkuwannanaro, rèkko engka sining tau iya manrasa-rasaè nasaba Allataala puwèloi makkuwaro, sitinajai sining tauwèro tuwoi sibawa tongeng enrengngè mabbèrèyangngi alèna lao ri Pappancajinna mennang. Tuli narupaiwi matu jancin-Na.

1 Petrus 5

1 Uwèllauwi napuriyati sining pamimpinna jema'mu. Uwokii iyaè selaku sellao pamimping enrengngè selaku tau iya alènaè pura sabbingngi anrasa-rasanna Kristus, sibawa iya turu'ètto matu ripakaraja, rèkko arajanna Kristus riyappaitangngi lao ri rupa tauwè. Uwèllauwi sibawa masero 2 na kuwammengngi muwampii mampii bimbala' iya nabbèrèyangngè Allataala lao ri iko. Ampii mennang sibawa masennang ati pada-pada iya nacinnaiyè Allataala, sibawa aja' nasibawangngi ati matane'è. Aja'to mupogau'i jama-jamammu untu' lolongeng asarong, sangadinna nasaba tonget-tongekko macinna mattumani. 3 Aja' mutinda' selaku panguwasa lao ri mennang iya riyappaddettangengngè lao ri iko, sangadinna ancajino conto untu' mennang. 4 Na ri wettunna polè matti iyaro Pakkampi Marajaè, tarimako matu passigera' iya lala'-lala'è, iya dè'è matu nabellang lala'-lala'na. 5 Makkuwatoro Saudara, sining tau maloloè. Tunru'no lao ri sining tau iya macowaè. Harusu manekko pakariyawai alèmu sibawa sisullè situmaningi sibawa mariyawa ati. Saba' ri laleng Kitta'è tarokii makkuwaè, "Naèwai Allataala tau iya matempoè, iyakiya namasèiwi tau iya pakariyawaèngngi atinna. " 6 Rimakkuwannanaro, pakariyawai alèmu ri yawa limanna Allataala iya mawatangngè, kuwammengngi napakatanrèko rèkko wettunna. 7 Abbèrèyangngi sininna abata-batammu lao ri Allataala, saba' alèna jampangiko. 8 Sitinajako matike' sibawa sadiya-sadiya! Saba' Ibillisi' iyanaritu balimmu. Pada-padai singaè iya joppaè lao tulili nangngautto sappai nanrèna. 9 Ewai sibawa teppe' iya masse'è, saba' muwissengngi makkedaè tau Kristèng laingngè ri sininna linoè manrasa-rasa towi pada-pada iko. 10 Iyakiya puramuna manrasa-rasa cinampe', alèna Allataala mèbbuko matu mancaji sukku. Napatettokko matu sibawa napèwatangiko enrengngè napakkasse'ko. Saba' Alèna iyanaritu Allataala iya makessing ati senna'è, iya puraè mobbiko untu' turu' pèrasaiwi arajan-Na iya mannennungengngè naolai Kristus. 11 Alèna ritu makuwasa lettu mannennungeng! Aming. 12 Sure'ku iya maponco'èwè uwokii lao ri iko sibawa pattulunna Silas, iya uwangga'è sèddi saudara Kristèng iya matinuluè. Macinnaka mpèrèngngi sumange' lao ri iko sibawa patepperiko makkedaè aga iya uwokièwè iyanaritu biritta passalenna pammasèna Allataala iya tongengngè. Sitinajako makkatenning masse ri pammasèro. 13 Sellao-sellao si jema'ta ri Babilonia, iya ripilèètto ri Allataala, masselleng lao ri iko, makkuwatoro ana'ku Markus iya upojiyè. 14 Siyasselles-sellengekko sèddiè lao ri laingngè sibawa penno pammasè selaku saudara Kristèng. Tennapodo Puwangngè mabbèrè asalèwangeng lao ri Saudara iya maneng iya mancajiyè appunnangenna Kristus. Salama, Pètrus

2 Petrus 1

1 Saudara-saudara iya tonget-tongengngè mateppe' pada-pada idi! Yèsus Kristus, iyanaritu Allataala sibawa Arung Pappassalama'ta, nakkullèngiki mateppe' ri Alèna, nasaba napogau'i iya tongengngè. Iyaè sure'è polèi ri Simon Pètrus, sèddiwi ata sibawa rasulna Yèsus Kristus. 2 Tennapodo Allataala mabbèrè barakka sibawa asalèwangeng lao ri iko sibawa tabbollompollong, saba' muwissengngi Allataala sibawa Yèsus, Puwatta. 3 Purani napakè Allataala kuwasa ilahin-Na untu' mpèrèkki sininna sèuwa-sèuwaè iya riyapparellungngè untu' mullèi tuwo massompa. Naolai aga iya riissengngè passalenna Yèsus Kristus iya puraè mobbiki untu' pèneddingiwi arajan-Na sibawa akessingen-Na. 4 Nasibawang caraèro nawèrèkki Allataala barakka-barakka iya maseroè dè'è padanna enrengngè mangke'è iya puraè najjanciyang. Nasibawang sining barakka'èro muwullèi leppe' polè risining cinnamu majaè iya makkasolangngè ri linoèwè, namutarima sipa' ilahi. 5 Rimakkuwannanaro, akkuragano tonget-tongeng kuwammengngi mutette mateppe' ri Kristus sibawa iyaro atepperemmu ritumpe'i ri atuwong iya makessingngè. Ri lainnaè atuwong iya makessingngè, parelluko mancaji tau iya engkaè pangissengenna, 6 sibawa ri lainnaè mappunnai pangissengeng, harusu tokko mullèi kuwasaiwi alèmu. Sibawa ri lainnaè mullèi makuwasaiwi alèmu, sitinaja tokko musahakangngi alèmu untu' mattahang moloiwi sininna sèuwa-sèuwaè. Ri lainnaè tahang moloiwi sininna sèuwa-sèuwaè, harusu tokko tuwo situru èlona Allataala. 7 Sibawa tuwo situru èlona Allataala harusu towi ripassakke sibawa pammasè pappoji lao ri sellao-sellao pada-padatta Kristèng. Nainappa sitinajai pammasè pappojimmu lao ri saudara-saudara pada-padatta Kristèng ritambai sibawa pammasè lao ri sininna tauwè. 8 Iya manennaro iyanaritu sipa'-sipa' iya muwapparelluwangngè. Rèkko iyaro sipa'-sipa'è engkai ri iko sibawa tabbollompollong, mancajiko materu sibawa mawwassèlè', enrengngè missengngi Yèsus Kristus Puwatta sibawa lebbi kessippasi. 9 Iyakiya tau iya dè'è nappunnai sipa'-sipa'èro, maponco' pikkiranna; nallupaiwi enrengngè dè' naullèi mitai makkedaè dosa-dosana labe'è purani ripèpaccingi. 10 Rimakkuwannanaro, Saudara-saudara, akkuragano lebbi rejjing kuwammengngi pangobbina Allataala sibawa pappilè-Na ri ikoro mancajiwi pèdè' masse. Rèkko mupogau'i iyaro, dè' matu musalai atepperemmu. 11 Nanallalengiro riwèrèkko matu ha' penno untu' muttama ri Akkarungeng mannennungengngè iya polè ri Puwangngè sibawa Arung Pappassala'ta Yèsus Kristus. 12 Rimakkuwannanaro, tuli uparèngngerangiko passalenna gau'-gau'èro, namuni muwissenni sibawa mateppe' senna' lao ri angèrangenna Allataala iya puraè mutarimaro. 13 Ri wettu tuwoku mupa, marasa waji'ka parèngngerangiko lao ri gau'-gau'èro. 14 Saba' uwisseng makkedaè dè'na umaitta usalaiwi linoèwè, nasaba Puwatta Yèsus Kristus pura mappaddissengengngi sibawa manessa lao ri iyya. 15 Namaèloka makkuraga kuwammengngi matèkuna, tuli muwèngngerangngi paimeng gau'-gau'èwè. 16 Wettutta paissengiko pèkkugi arajanna apolènna Puwatta Yèsus Kristus, dè' tataggattung ri pau-pau rikadong dè'è natongeng. Arajanna Kristus purani riita sibawa mata ulutta. 17 Engkaki kuwaro wettunna ripakalebbi sibawa ripakaraja ri Allataala Ambo'è. Ri wettuèro riyèngkalingai saddaè polè ri Iya Pommalebbiè, iya makkedaè ri Alèna, "Iyanaè Ana'-Ku iya Uwamasèiyè. Napèsennangiwi atik-Ku!" 18 Alèta mèngkalingai iyaro saddaè polè ri surugaè wettutta engka silaong Alèna ri yasè'na bulu iya mapaccingngèro. 19 Iyanaro saba'na natalebbi mateppe' lao ri pasenna Allataala iya nabbirittangngè sininna nabiè. Makessingengngi rèkko mupènessaiwi pasengngèro, saba' iyaro pasengngè pada-padai lampu iya mattappaè ri onrong mapettangngè narapi mompo essoè, sibawa tappa wèttowing alauè mattappa ri laleng atimmu. 20 Iyakiya lebbi-lebbipi sitinajai muwèngngerangngi iyaè: Pasenna Allataala iya napalettu'è sining rasul-è, dè' nawedding ritassèrè' manuru' pallolongeng alèta. 21 Saba' dè' naengka paseng polè ri Allataala nabbirittang tolinoè nasaba èlo alèna. Iyakiya Rohna Allataala makuwasaiwi tauwè untu' palettu'i paseng polè ri Allataala muto.

2 Petrus 2

1 Ri wettu labe'è ri yelle'na umma'na Allataala momponi nabi-nabi palsuè. Makkuwatoro ri yelle'mu mompoi matu guru-guru palsuè. Naputtama'i matu mennang sining pappagguruwang iya dè'è natongeng, iya solangiyèngngi tauwè. Sibawa nassakkarengngi matu mennang Panguwasa iya puraè paleppe'i mennang. Nanallalengiro papolèi mennang abinasang ri alèna, iya kennaèngngi mennang sibawa masitta'. 2 Namuni makkuwaro, maèga tau maccowèriwi matu cara atuwo-tuwonna guru-guru palsuèro iya rikuwasaiyè ri hawa napessunna. Na pangkaukenna guru-guruèro mèbbui matu maèga tau pakatunai Laleng Tongengngè iya mattujuè ri Allataala. 3 Nasaba mangowai mennang, na iyaro guru-guru palsuè nacuritai matu lao ri iko curita-curita iya nakarangngè untu' lolongeng asarong polè ri iko. Iyakiya pengadilang untu' patatteppai pahukkungengngè ri yasè'na mennang maittani ripassadiya, sibawa abinasang iya puraè ripattentu untu' mennang mattengngang tajengngi mennang. 4 Muwi malaèka'-malaèka' iya madosaè dè'to naleppessangngi Allataala leppe' polè ri pahukkungengngè, sangadinna ribuwang ri laleng ranakaè. Riputtama'i mennang ri laleng balorangngè iya makalemmengngè untu' ritahang kuwaro narapi Esso Pangadilangngè. 5 Makkuwatoro sibawa linoè ri wettu riyolo, dè' naleppessangngi Allataala leppe' polè ri pahukkungenna. Allataala kiring lèmpe raja ri linona sining tau majaè ri wettuèro. Banna Nuh silaong pitu tau laing bawang ripassalama', nasaba Nuh patassiyai biritta passalenna iya naèloriyè ri atinna Allataala. 6 Pada-pada mutowi kota Sodom sibawa Gomora; Allataala pallennye'i iyaro kota-kotaè sibawa api kuwammengngi nancaji conto passalenna aga iya maèloè kajajiyang sibawa sining tau iya majaè. 7 Iyakiya ripassalama'i Lot, nasaba naturusiwi èlona Allataala; manrasa-rasa senna'i nasaba pangkaukeng iya dè'è nasipato' polè risining tau iya maja ampè. 8 Ri tengnga-tengngana sining tau makkuwaèro, Lot iya makessingngèro tuwoi sibawa risissai batènna, nasaba esso-esso naitai sibawa naèngkalingai sining pangkaukenna mennang iya majaè. 9 Jaji, naisseng Puwangngè pèkkugi passalama'i sining tau iya turusiyèngngi èlo-Na rèkko moloiwi paccobang-paccobang. Sibawa naisseng Puwangngè pèkkugi taroi sining tau iya majaè untu' risissa ri Esso Pangadilangngè, 10 lebbi-lebbipi sining tau iya turusiyèngngi sining èlona hawa napessunna iya macarèpaè sibawa iya pakatunaèngngi akuwasanna Allataala. Makkuwa mani baraninna sibawa tempona guru-guru palsuèro angkanna dè' mennang nabata-bata pakatunai sining mahlu' iya malebbiè muwi ri surugaè! 11 Sedangkang malaèka'-malaèka' iya mabèlaè lebbi mawatang sibawa makuwasa naiya guru-guru palsuèro, dè' nateppui sining mahlu' iya malebbièro sibawa ada-ada pappakatuna ri yolona Puwangngè. 12 Iyakiya iyaro guru-guruè, tenniya culè-culè! Pada-pada mennang olokolo'è iya jajiyè untu' ritikkeng sibawa riyuno bawang. Dè' napikkiri' mennang, iyakiya tinda'i manuru' parasaanna bawang, angkanna naèwai mennang gau'-gau' iya dè'è napahangngi sibawa ada-ada pappakatuna. Rimakkuwannanaro nasaba sining pangkaukenna muto, binasai matu mennang pada-pada olokolo' masekkangngè. 13 Selaku pamale'na lao ri anrasa-rasang iya napaompoè mennang, pèneddingiwi matu mennang anrasa-rasang. Lao ri mennang, gau' iya pèsennangiyèngngi atiè iyanaritu pogau'i agi-agi ri essoè untu' pèsennangiwi cinna watakkalèna. Rèkko tudangngi mennang silaong iko ri laleng pèstaè manrè, kèdo-kèdona mennang pèjariwi pappèneddingngè nasaba mabo'i mennang sibawa hawa napessu. 14 Nasaba dè'gaga cauna mennang pogau' dosa, sibawa iya napojiyè mennang iyanaritu mitai makkunrai cakkuribangngè. Sibawa tau iya nappaè mateppe' sibawa makurangngè mupa teppe'na, napangaruiwi mennang. Atinna mennang biyasani sibawa angowang. Mennang iyanaritu sining tau iya tattanroè! 15 Nasaba dè' namaèlo maccowèriwi laleng iya malempuè, napusa mennang. Nalai mennang laleng iya naccowèriyè Bilèam ana' Bèor riyolo. Iyaè Bilèam macinna senna'i lolongeng dowi polè ri pangkaukenna iya majaè. 16 Iyakiya lolongengngi papparèngngerang iya matedde'è lao ri janaro, wettunna mabbicara kaleddè'na sibawa sadda tolino. Naripassa iyaro nabiè untu' pappèsauwi pangkaukenna iya jangengngèro. 17 Iyaro guru-guru palsuè iyanaritu pada-padai mata uwai iya marakkoè sibawa pada-pada salèwuè iya nairiè anginraja. Allataala pura passadiyangengngi mennang sèuwa onrong iya mapettang senna'è. 18 Mèbbui mennang pappakatajang iya omong kosongngè sibawa dè'è nallise'; napessu iya mappangaddiè napakèi mennang untu' pasempè'i sining tau iya nappaè leppe' polè ri yelle'na tau iya tuwo pusaè. 19 Iyaro guru-guru palsuè najjanciyangngi amaradèkangngè lao risining tauwèro, padahal alèna mennang ripowata risining abiyasang iya solangiyèngngi rupa tauwè. Saba' rèkko ricaui tauwè risèuwaè, mancajiwi ata polè ri iya cauèngngiro. 20 Tau iya missengngèngngi Puwangngè sibawa Pappassalama'ta Yèsus Kristus, leppe'ni polè risining akuwasanna linoè iya carèpaiyèngngi rupa taruwè. Iyakiya rèkko rimunri nalai siyosi angkanna ricau risining akuwasangngèro, nancajina keadaanna iyaro tauwè ri paccappurenna lebbi majapi naiya riyolona. 21 Lebbi kessing muwi sining tau makkuwaèro dè' naengka naissengngi laleng tongengngè polè ri Allataala, naiya naissengngi mennang, iyakiya rimunri dè' namaèlo maccowèriwi parènta-parènta iya Nabbèrèyangngè Allataala lao ri mennang. 22 Aga iya napogau'è mennang pabuttiwi atongengenna iyaè warèkkadaè, "Nanrèi matu paimeng asuè aga iya puraè naluwa, " sibawa "Tèdong iya puraè ricemmè, lisui matu maggalèlu ri laleng bungkaè. "

2 Petrus 3

1 Saudara-saudaraku iya upojiyè! Iyanaè sure'ku maduwaè lao ri iko. Ri laleng iya duwa sure'èwè, makkuragaka paompoi pikkirang-pikkirang iya makessingngè ri iko. 2 Uwappètangngarengngi kuwammengngi muwèngngerangngi lao ri ada-ada iya napowadaè riyolo nabi-nabinna Allataala, sibawa lao ri parènta polè ri Puwangngè, Arung Pappassalama', iya ripalettu'è ri iko naolai rasul-rasul-è. 3 Bunge'-bunge'na, harusu'i muwisseng makkedaè ri esso-esso paccappurengngè, mompoi matu sining tau iya rikuwasaiyè atuwonna ri hawa napessunna muto. Naèllèkèllè'ko matu mennang 4 sibawa makkeda makkuwaè, "Adanna majjanciwi Puwangngè maèlo polè! Kègani makkekkuwangngè Alèna? Bapa'-bapa' toriyolota matèni, iyakiya sini-sininnaè pada-pada mupi sipongenna ripancaji alangngè!" 5 Nattungka mennang dè' namaèlo mangaku makkedaè riyolo Allataala pancajiwi langiè sibawa linoè, polè ri saddan-Na; makkedaè ripancajiwi linoè polè ri uwai, enrengngè nasibawang uwai; 6 kuwaèttopa nasibawang towi uwai, iyanaritu uwai polè ri lèmpe rajaè, iyaro linoè riyolo ripabbinasai. 7 Iyakiya langi sibawa lino iya engkaè makkekkuwangngèwè, ripiyara towi ri saddanna Allataala untu' ripallennye' sibawa api matti. Makkekkuwangngè langiè sibawa linoè ripiyara mupi narapi ri esso sining tau majaè rihukkung sibawa ripabbinasa. 8 Iyakiya Saudara-saudaraku, iyaro sèddiè passaleng aja' muwallupaiwi: makkedaè ri laleng pakkitanna Puwangngè, sèddiè esso dè'gaga sisalana sibawa sisebbu taung -- duwa-duwanna pada-pada muwi ri Alèna. 9 Dè' namatengnge Puwangngè mabbèrèyangngi aga iya puraè najjanciyang, namuni engka masengngi makkuwaro. Sibalè'na, sabbara'i lao ri iko, saba' dè' namaèlo muwi sèddi tau binasa. Macinnai kuwammengngi sininna tauwè natoba' polè ri dosa-dosana. 10 Iyakiya Esso apolènna Puwangngè polèi matu pada-pada pangaè. Iyaro Essoè, lennye'i matu langiè sibawa oni memmu sibawa anu engkaè ri langiè cappui matu ritunu, enrengngè linoè sibawa sininna iya engkaè ri lalenna lennye'i matu. 11 Nasaba iya manennaro riyancuru'i matu sibawa cara makkuwaèro. Pèkkugiko harusu tuwo? Harusu'ko tuwo mapaccing sibawa banna untu' Allataala, 12 ri wettu mattajemmu mupa enrengngè muddaningiwi apolènna Essona Allataala. Ri Essoèro cappui matu ritunu langiè, sibawa nasaba pellana, nasining anu engkaè ri langiè maccolo'i matu. 13 Iyakiya mattajekki aga iya puraè najjanciyang Allataala, iyanaritu langi mabaruè sibawa lino mabaruè, kègi engka adèlèkeng. 14 Rimakkuwannanaro, Saudara-saudara iya upojiyè, ri wettu mutajenna iyaro Essoè, akkuragano tonget-tongeng untu' tuwo mapaccing sibawa dè' cellana ri yolona Allataala. Sibawa piyarai assisumpungeng iya makessingngè sibawa Allataala. 15 Angga'ni asabbarakenna Puwatta selaku kasempatang iya Nabbèrèyangngè lao ri iko kuwammengngi naweddikko salama'. Paulus, saudarata iya ripojiyè pura toni naoki makkuwaèro lao ri iko. Naokii iyaro sibawa apanrèng iya Nabbèrèyangngè Allataala ri alèna. 16 Ri laleng sininna sure'na, tuli naokii Paulus passalenna gau'èro. Mèmeng engka siyagangngarè passaleng iya mawatangngè ri pahang ri laleng sure'naro. Na iyaro bagiyab-bagiyangngè purani naputara'balè sining tau iya dè'è agaga naisseng sibawa iya dè'è namasse teppe'na. Dè' nappahèrang gau'èro, bagiyab-bagiyanna Kitta'è rigaukeng towi makkuwaro ri mennang. Aga iya napogau'èro mennang banna ancurukeng ri mennang muto. 17 Iyakiya iko, Saudara-saudara iya upojiyè, muwissenni passalenna gau'èro. Rimakkuwannanaro, atike'no, aja' narapiko ritiwi ri laleng apusanna sining tau maja ampè angkammu sempè' polè ri onrong akkellaremmu iya matedde'è. 18 Sitinajako pèdè' mupèrasa pammasèna Yèsus Kristus, Puwang sibawa Arung Pappassalama'ta, sibawa sitinaja tokko pèdè' missengngi Alèna. Ripojiwi Alèna, makkekkuwangngè sibawa lettu mannennungeng! Aming. Salama, Pètrus

1 Yohanes 1

1 Lise'na iyaè sure'è iyanaritu passalenna Sadda iya mabbèrè atuwong, iyanaritu Sadda iya engkaènna sipongenna pammulanna mupa. Purani riyèngkalinga enrengngè purani riita sibawa mata alèta. Purani riita, enrengngè purani riyakkatenning sibawa limatta. 2 Wettunna iyaro atuwongngè ripannessa, alèta mitai. Iyanaro saba'na tamabbèrè asabbing passalenna alèna. Idi mabbirittangngi lao ri iko passalenna atuwong tongengngè sibawa mannennungengngè, iya engkaè silaong Ambo'è, enrengngè iya puraè ripannessa lao ri idi. 3 Aga iya puraè riita sibawa riyèngkalinga, iyanaro riyabbirittang lao ri iko, kuwammengngi musibawakki maccowè mattemmeriwi atuwongngè, massèddi sibawa Ambo'è kuwaèttopa Ana'na Yèsus Kristus. 4 Riyokii iyaè kuwammengngi natonget-tongeng masennang atitta. 5 Iyanaè biritta iya puraè riyèngkalinga polè ri Ana'-Na sibawa iya tapalettu'è lao ri iko! Iyaro Allataala tajangngi, sibawa ri Alèna dè' siseng gaga apettangeng. 6 Rèkko makkedai makkedaè tuwoki massèddi sibawa Alèna, padahal tuwoki ri laleng apettangengngè, tentu mabbellèki muwi nasibawang ada-ada iyarè'ga pangkaukeng. 7 Iyakiya rèkko tuwoki ri laleng tajangngè pada-pada Allataala engka ri laleng tajangngè, tentu tuwoki mareppè enrengngè sipammasè-masè sèddiè lao ri laingngè, sibawa darana Yèsus, Ana'-Na, pèpaccingiki polè ri sininna dosaè. 8 Rèkko makkedaki makkedaè dè' tamadosa, ribellèi alèta muto; sibawa Allataala dè' naengka ri laleng atitta. 9 Iyakiya rèkko tangakuiwi dosa-dosata lao ri Allataala, narupaiwi matu jancin-Na sibawa napogau'i aga iya adèlè'è. Naddampengengngi dosa-dosata sibawa napèpaccingiki polè ri sininna pangkauketta iya salaè. 10 Iyakiya rèkko makkedaki makkedaè dè' tamadosa, mappallolongekki samanna Allataala pabbellèng; bettuwanna dè' tataroi ada-adanna Allataala ri atitta.

1 Yohanes 2

1 Ana'-ana'ku! Uwokii iyaè lao ri iko kuwammengngi dè' mupogau' dosa. Iyakiya rèkko engka pogau' dosa, mappunnaiki sèddi tau mèwaiki, iyanaritu Yèsus Kristus iya adèlè'èro; naèllaungekki matu ri yolona Ambo'è. 2 Naolai Yèsus Kristus ritu nariyaddampengeng dosa-dosata. Natenniya dosa-dosata bawang, sangadinna dosanato sininna rupa tauwè. 3 Rèkko matinuluki ri parènta-parèntana Allataala, iyanaro tanranna makkedaè taissengngi Allataala. 4 Tau iya makkedaè, "Uwissengngi Allataala, " iyakiya dè' namatinulu lao ri parènta-parènta-Na, iyaro tauwè mabbellèi, sibawa Allataala dè' naengka ri laleng atinna. 5 Iyakiya tau iya matinuluè lao ri ada-adanna Allataala, iyaro tauwè namasèiwi Allataala sibawa sukku. Iyanaro tanranna makkedaè tuwoki massèddi sibawa Allataala. 6 Nigi-nigi makkeda makkedaè tuwoi massèddi sibawa Allataala, tentu cara atuwonna harusu'i pada-pada Kristus. 7 Saudara-saudara iya upojiyè! Iya uwokièwè tenniya sèuwa parènta iya baruè. Iyaè parènta malaung, parènta iya puraè napalettu' lao ri iko sipongemmu mammula mateppe' ri Kristus; iyanaritu biritta polè ri Allataala iya puraè muwèngkalinga ri yolona. 8 Namuni makkuwaro, parènta iya uwokièwè baru towi; nasaba atongengenna weddingngi riita ri alèna Kristus sibawa ri alèmu. Saba' pèdè' lennye' apettangengngè sibawa tajang iya tongengngè mammulani mattappa. 9 Tau iya powadaèngngi makkedaè engkai ri laleng tajangngè iyakiya nabenciwi saudarana, iyaro tauwè engka mupi ri laleng apettangengngè lettu makkekkuwangngè. 10 Tau iya mamasèiyèngngi saudarana, tuwoi ri laleng tajangngè, angkanna dè' muwi sèuwa ri alèna iya nassabariyèngngi matu tau laingngè nasempè ri laleng dosaè. 11 Iyakiya tau iya benciyèngngi saudarana, engkai ri laleng apettangengngè, joppai ri laleng apettangengngè sibawa dè' naissengngi kègai lao, saba' iyaro apettangengngè mèbbui alèna dè' naullèi makkita. 12 Uwokii lao ri iko, Ana'-ana', saba' riyaddampengenni dosamu nasaba Kristus. 13 Uwokii lao ri iko, Bapa'-bapa', saba' muwissenni Alèna iya engkaènna ri pammulanna mupa. Uwokii lao ri iko, sining kalloloè, saba' purani mucau Si Majaè. 14 Uwokii lao ri iko, Ana'-ana', saba' muwissengngi Allataala Ambo'è. Uwokii lao ri iko, Bapa'-bapa', saba' muwissengngi' Sadda iya engkaèn-Na pammulang mupa. Uwokii lao ri iko, sining kalloloè, saba' mawatakko. Ada-adanna Allataala engkai ri laleng atimmu, sibawa purani mucau Si Majaè. 15 Aja' mupojiwi linoèwè, iyarè'ga agi-agi iya engkaè ri laleng linoèwè. Rèkko muwèloriwi linoèwè, dè' muwèloriwi Ambo'è. 16 Sininna sèuwa-sèuwaè iya engkaè ri laleng linoèwè -- iya nacinnaiyè kèdo-kèdo tolino iya madosaè, iya riitaè, nainappa riyacinnai, sibawa iya riyammingki'-mingkikengngè -- iya manenna iyanaritu gau'-gau' iya dè'è napolè ri Ambo'è assalenna, sangadinna polèi rilinoè. 17 Linoè sibawa sininna sèuwa-sèuwaè ri lalenna iya nacinnaiyè rupa tauwè, mattengngangngi lennye'. Iyakiya tau iya maccowèriyèngngi èlona Allataala, tette'i tuwo lettu mannennungeng. 18 Ana'-ana'ku, macawè'ni accappurenna linoè! Purani ripaissengiko riyolona makkedaè Balinna Kristus polèi matu, na makkekkuwangngè maègana tau mompo iya musuèngngi Kristus. Iyanaro tanranna makkedaè macawè'ni accappurenna linoè. 19 Iyaro sining Balinna Kristus iyanaritu sining tau iya salaiyèkki, nasaba sitongenna mennang mèmeng tenniya sining tautta. Rèkko mennang sining tautta, tentu mennang tette'i sibawa idi. Iyakiya nasalaiki mennang, kuwammengngi namanessa makkedaè dè' muwi sèddi polè ri mennang iya tonget-tongengngè muttama ri golongetta. 20 Iyakiya mutarimani Rohna Allataala iya napanurungngè Yèsus Kristus, na iyanaro saba'na namuwisseng manengngi pappagguruwang tongengngè. 21 Jaji uwokii iyaè lao ri iko tenniya nasaba dè' muwissengngi pappagguruwang iya tongengngè, iyakiya mala nasaba muwissenni, sibawa muwisseng toni makkedaè pappagguruwang iya tongengngèro dè' naengka nadè' gaga bellè ri lalenna. 22 Iya mabbellè iyanaritu tau iya makkedaè Yèsus tenniya Arung Pappassalama' iya najjanciyangngè Allataala. Iyaro tauwè Balinna Kristus; dè' nangakuiwi Ambo'è iyarè'ga Ana'è. 23 Tau iya dè'è nangakuiwi Ana'è, bettuwanna dè'to natarimai Ambo'è. Sibawa tau iya mangakuiyèngngi Ana'è, bettuwanna natarima towi Ambo'è. 24 Rimakkuwannanaro, biritta iya puraènna muwèngkalinga sipongenna bunge' mateppe'ko, harusu'i mujagai madècèd-dècèng ri laleng atiè. Rèkko mupuriatiwi madècèd-dècèng iyaro birittaè, tuli tuwoko matu massèddi sibawa Ana'è enrengngè silaong Ambo'è. 25 Na iyanaè najjanciyang Kristus lao ri idi: Atuwong tongengngè sibawa mannennungengngè. 26 Uwokii iyaè lao ri iko passalenna sining tau iya mattengngangngè makkuraga bellèko. 27 Iyakiya passalenna alèmu, purani napanurung Kristus Roh-Na lao ri iko. Na ri wettu engkana mupa Roh-Na ri iko, dè' naparellu engka tau laing pagguruko. Saba' Roh-Na pagguruko passalenna sininna sèuwa-sèuwaè; sibawa aga iya nappagguruwangngèro tongengngi, tenniya bellè. Rimakkuwannanaro, sitinajako matinulu lao ri aga iya nappagguruwangngè iyaro Roh-è, sibawa sitinajako tette' tuwo massèddi sibawa Kristus. 28 Jaji, ana'-ana'ku, tette'no tuwo massèddi sibawa Kristus, kuwammengngi na ri Essona polèi, mangoloki Alèna sibawa penno abaraningeng, sibawa dè' tallekke nasaba masiri. 29 Muwissenni makkedaè tuwoi Kristus situru èlona Allataala. Rimakkuwannanaro harusu'i muwissetto makkedaè tungke' tau iya tuwoè situru èlona Allataala iyanaritu Ana'nai Allataala.

1 Yohanes 3

1 Itani pèkkugi Allataala mamasèiki angkanna nangakuiki selaku ana'-ana'-Na. Mèmeng idi iyanaritu Ana'-ana'na Allataala. Iyanaro saba'na lino iya majaèwè dè' naissekki, saba' linoèwè dè' naissengngi Allataala. 2 Saudara-saudara iya upojiyè! Idi makkekkuwangngè iyanaritu Ana'-ana'na Allataala, iyakiya keadaatta matti dè'pa namanessa. Iyakiya riissengngi makkedaè rèkko polèi Kristus, mancajiki matu pada-pada Alèna, saba' taitai matu ri laleng keadaan-Na iya sitongennaè. 3 Sininna tauwè iya mappunnangiyèngngi iyaè paddennuwangngè lao ri Kristus, najagaiwi alèna kuwammengngi natonget-tongeng mapaccing, mapaccing polè ri dosaè pada-padato Kristus mapaccing. 4 Tau iya pogau'è dosa, najjalèkkaiwi hukkunna Allataala, saba' dosaè iyanaritu pelanggarang lao ri hukkunna Allataala. 5 Muwisseng makkedaè polèi Kristus untu' leddai dosa-dosana tolinoè, sibawa makkedaè dè'gaga dosa ri laleng alèna. 6 Sininna tau iya tuwoè massèddi sibawa Kristus, dè' natteru-teru pogau' dosa. Tau iya matteru-teruè pogau' dosa, dè' naengka naitai Kristus iyarè'ga naissengngi Alèna. 7 Ana'-ana'ku, aja' muleppessangngi muwi niga papusako. Tau iya pogau'èngngi èlona Allataala, iyanaritu ana'-ana'na Allataala pada-pada muto Kristus iyanaritu Ana'na Allataala. 8 Iyakiya tau iya matteru-teruè pogau' dosa, ana'nai iyanaritu Ibillisi', saba' Ibillisi' pammulanna mupa namadosa. Untu' iyanaè napolè Ana'na Allataala, iyanaritu untu' mancuru'i jama-jamanna Ibillisi'. 9 Tau iya mancajiyènna Ana'na Allataala, dè' natteru-teru pogau' dosa, saba' sipa'na muto Allataala engka ri alèna. Sibawa nasaba iyaro Allataala Ambo'na, nadè' naullèi matteru-teru pogau' dosa. 10 Iyanaè assisalanna ana'-ana'na Allataala sibawa ana'-ana'na Ibillisi': nigi-nigi dè' napogau'i èlona Allataala, iyarè'ga dè' namasèiwi saudarana, tenniyai ana'na Allataala. 11 Pammulanna mupa naripalettu iyaè birittaè lao ri iko: Harusu'ki mamasèiwi sèddiè lao ri laingngè. 12 Aja' tapada-pada Kaing, iya mancaji ana' Ibillisi'è sibawa mpunoi padaorowanèna muto. Aga saba'na Kaing naunoi padaorowanèna? Saba' gau'-gau' iya napogau'è salai, iyakiya gau'-gau' iya napogau'è padaorowanèna iyanaritu tongengngi. 13 Rimakkuwannanaro, Saudara-saudaraku, aja' muhèrang rèkko sining taunna linoè nabenciko. 14 Taissenni makkedaè massuni' polè ri amatèngngè, sibawa lèttè lao ri atuwongngè. Taissengngi iyaro, saba' tamasèiwi pada-padanna saudarata. Tau iya dè'è namamasè, bettuwanna rikuwasai mupi ri amatèngngè. 15 Tau iya benciyèngngi saudarana iyanaritu pabbunoi, na muwisseng makkedaè sèddiè tau pabbuno dè' nappunnai atuwong tongengngè sibawa mannennungengngè. 16 Nallalengi iyaè nataissengngi carana mamasèiwi pada-padatta: Purani nabbèrèyang Kristus atuwon-Na untu' idi. Rimakkuwannanaro, harusu' tokki mabbèrèyangngi atuwotta untu' Saudara-saudarata! 17 Sèddiè tau iya agennekengngè mitai saudarana akurangeng, iyakiya dè' namaèlo tulungngi saudaranaro, pèkkugi iyaro tauwè mullèi makkeda makkedaè namasèiwi Allataala? 18 Ana'-ana'ku! Aja' tamasèiwi banna ri tèmuè iyarè'ga banna ada-ada bawang. Sitinajaki makkamasè sibawa pammasè iya tongengngè, iya ripabuttiyè sibawa pangkauketta. 19 Pèkkugiwi carata missengngi makkedaè muttama'ki ana'-ana'na Allataala iya tongengngè, naweddingngi tennang atitta ri yolona Allataala. 20 Taissenni makkedaè rèkko ripasalaki ri atitta, pangissengenna Allataala lebbi battowai naiya pangissengenna ati marilaletta, enrengngè makkedaè naissengngi iya manem-manenna. 21 Jaji, Saudara-saudaraku iya upojiyè, rèkko ati marilaletta dè' napasalaki, weddikki mangolo ri Allataala sibawa abaraningeng. 22 Na aga riyèllau polè ri Alèna, talolongengngi, nasaba matinuluki ri parènta-parènta-Na sibawa pogau'i aga iya pèsennangiyèngngi atin-Na. 23 Iya napparèntangngè lao ri idi iyanaritu: Harusu'ki mateppe' lao ri Ana'-Na, iyanaritu Yèsus Kristus, sibawa harusu'ki sisullè siyamasèi, pada-pada iya puraè napparèntang Kristus lao ri idi. 24 Sininna tau iya matinuluè lao ri parènta-parèntana Allataala, tuwoi massèddi sibawa Allataala, enrengngè Allataala tuwoi massèddi sibawa mennang. Sibawa taissengngi makkedaè Allataala tuwoi massèddi sibawa idi, nasaba purai nawèrèkki Roh-Na.

1 Yohanes 4

1 Saudara-saudara iya upojiyè! Aja' mumateppe lao ri sininna tauwè iya mangakuè mappunnai Rohna Allataala, iyakiya ojiwi mennang riyolo' untu' missengngi aga Roh iya engkaè ri mennannanro assalenna polèi ri Allataala iyarè'ga dè'. Saba' maèga nabi palsu tassiya-siya kègi-kègi. 2 Mappakkuwaiyè caranako missengngi aga iyaro Rohna Allataala iyarè'ga tenniya: Tau iya mangakuiyèngngi makkedaè Yèsus Kristus polèi ri linoè selaku tolino, iyaro tauwè mappunnaiwi Roh iya polè ri Allataala. 3 Iyakiya tau iya dè'è nangakuiwi gau'èwè passalenna Yèsus, dè' nappunnaiwi Rohna Allataala. Iyaro tauwè mappunnaiwi roh polè ri Balinna Kristus. Purani muwèngkalinga saudara makkedaè iyaro roh-è maèloi polè, na makkekkuwangngè engkani ri laleng linoèwè. 4 Iyakiya Ana'-ana'ku, appunnangennako Allataala. Purani mucau nabi-nabi palsuè, saba' Roh iya engkaè ri iko lebbi makuwasai naiya roh iya engkaè risining tau iya appunnangenna linoèwè. 5 Iyaro nabi-nabi palsuè mabbicarai passalenna gau'-gau' linoè, nanaèngkalingai linoè ada-adanna mennang, saba' mennang appunnangennai linoè. 6 Iyakiya idi iyanaritu appunnangennaki Allataala; na tau iya missengngèngngi Allataala, naèngkalingai ada-adatta. Tau iya tenniyaè appunnangenna Allataala, dè' naèngkalingai ada-adatta. Makkuwaniro carata missengngi assilaingenna Roh iya mabbèrè pappagguruwang iya tongengngè sibawa Roh iya mappapusaè. 7 Saudara-saudara iya upojiyè! Laono mai tamasèiwi sèddiè lao ri laingngè, saba' pammasè, assalenna polèi ri Allataala. Tau iya mamasè, iyanaritu ana'nai Allataala sibawa naissengngi Allataala. 8 Tau iya dè'è namamasè, dè' naissengngi Allataala; saba' Allataala iyanaritu mamasèiwi. 9 Napannessani Allataala makkedaè namasèiki, ri laleng nakirinna Ana'-Na iya tungke'è ri laleng linoè kuwammengngi talolongeng atuwong naolai iyaro Ana'-Na. 10 Iyanaè pammasè: Tenniya idi iya mamasèiyèngngi Allataala, iyakiya Allataala iya mamasèiyèkki sibawa kiringngi Ana'-Na kuwammengngi naolai Alèna talolongeng addampengeng ri dosa-dosata. 11 Saudara-saudara iya upojiyè, rèkko makkuwa mani namasèitta Allataala, harusu tokki mamasèiwi sèddiè lao ri laingngè. 12 Dè' gaga muwi sèddi tau pura mitai Allataala, iyakiya rèkko sisullèki siyamasèi, massèddiwi Allataala sibawa idi enrengngè pammasè-Na mancaji sukkui ri laleng alèta. 13 Rimakkuwannanaro Allataala pura mpèrèkki Roh-Na, nataissengngi makkedaè tuwoni massèddi sibawa Allataala, enrengngè Allataala massèddi sibawa idi. 14 Alètana pura mitai Ana'na Allataala, sibawa riyabbirittangngi makkedaè risuroi ri Ambo'è untu' mancaji Arung Pappassalama'na linoèwè. 15 Nigi-nigi mangakuiwi makkedaè iyaro Yèsus Ana'i Allataala, tuwoi Allataala massèddi sibawa tauwèro, enrengngè iyaro tauwè tuwo towi massèddi sibawa Allataala. 16 Allataala missengngi sibawa mateppe' lao ri pammasèna Allataala lao ri idi. Iyaro Allataala mamasèi. Tau iya rikuwasaiyè atuwonna ri pammasè, iyaro tauwè massèddiwi sibawa Allataala, enrengngè Allataala massèddi sibawa alèna. 17 Ripassukkui pammasè ri laleng alèta, kuwammengngi tappunnai abaraningeng ri Esso Angadèlèkengngè. Mappunnaiki matu abaraning, saba' atuwotta ri linoèwè pada-padai atuwonna Kristus. 18 Tau iya pèneddingiyèngngi pammasèna Allataala, dè' naissengngi mètauè; saba' pammasè iya sukkuè napallennye'i sininna tauwè. Jaji manessani makkedaè dè'pa napèneddingiwi tauwè pammasèna Allataala sibawa sukku rèkko iyaro tauwè mètaui moloiwi Esso Angadèlèkengngè. 19 Idi mamasèki, nasaba Allataala lebbi riyolo mamasèiki. 20 Rèkko sèddiè tau makkeda, "Iyya uwamasèiwi Allataala, " iyakiya dè' namasèiwi saudarana, iyaro tauwè pabbellèng. Saba' tau iya dè'è namasèiwi saudarana iya naitaè, dè' nakkullè namasèiwi Allataala iya dè'è naitai. 21 Rimakkuwannanaro, iyanaè parènta nabbèrèyangngè Kristus lao ri idi: Nigi-nigi mamasèiwi Allataala harusu'i namasèi towi saudarana.

1 Yohanes 5

1 Tau iya mateppe'è makkedaè Yèsus iyanaritu Arung Pappassalama' iya najjanciyangngè Allataala, iyaro tauwè iyanaritu ana'nai Allataala. Tau iya mamasèiyèngngi sèddiè ambo', namasèi towi ana'na. 2 Nallalengi iyaè nataissengngi makkedaè tamasèiwi ana'-ana'na Allataala: Tamasèiwi Allataala sibawa matinulu lao ri parènta-parènta-Na. 3 Saba' mamasèi Allataala bettuwanna matinulu lao ri parènta-parènta-Na. Na parènta-parènta-Na dè' namatane untu' alèta, 4 saba' tungke' ana'na Allataala naullèi caui linoè iya majaèwè. Na tacaui linoè sibawa teppe'ta. 5 Nigana mullèi caui linoè? Banna tau iya mateppe'è makkedaè Yèsus iyanaritu Ana'nai Allataala. 6 Yèsus Kristus ritu iya polè ri linoè sibawa uwai paccemmè-Na enrengngè nasibawang dara amatèn-Na. Polèi tenniya banna nasibawang uwai bawang, iyakiya nasibawang uwai sibawa dara. Na Rohna muto Allataala mabbèrè asabbiyang makkedaè tongengngi iyaro, saba' Roh-è dè' naengka nabbellè. 7 Engka tellu sabbi: 8 Rohna Allataala, uwai sibawa dara -- iya tellu mabbèrèi asabbiyang iya padaè. 9 Mateppe'ki ri asabbiyanna tolinoè, iyakiya asabbiyanna Allataala lebbi mawatappasi. Na iyanaro asabbiyang iya puraè nabbèrèyang Allataala passalenna Ana'-Na. 10 Rimakkuwannanaro, tau iya mateppe'è ri Ana'na Allataala, purani natarima iyaro asabbiyangngè ri laleng atinna; iyakiya tau iya dè'è natepperiwi Allataala, naangga'ni samanna Allataala pabbellèng, saba' dè' namateppe' lao ri aga iya napowadaè Allataala passalenna Ana'-Na. 11 Iyanaè asabbiyangngèro: Allataala pura mpèrèkki atuwong tongengngè sibawa mannennungengngè, sibawa Ana'-Na iyanaritu assalenna iyaro atuwongngè. 12 Tau iya mappunnangiyèngngi Ana'na Allataala, nappunnangiwi iyaro atuwongngè; na tau iya dè'è nappunnangiwi Ana'na Allataala, dè' nappunnangiwi iyaro atuwongngè. 13 Uwokii iyaè lao ri iko iya mateppe'è lao ri Ana'na Allataala, kuwammengngi muwissengngi makkedaè muwappunnaini atuwong tongengngè sibawa mannennungengngè. 14 Sibawa baraniki mangolo ri Allataala, nasaba mateppe'ki sibawa natarimai sempajatta, rèkko riyèllauwi agi-agi iya situruè sibawa èlo-Na! 15 Nasaba taissengngi makkedaè naèngkalingaki rèkko marèllauki ri Alèna, sibawa taisseng towi makkedaè nawèrèkki aga iya taèllauwè polè ri Alèna. 16 Rèkko muwitai sala sèddinna pada-padammu tau Kristèng pogau' dosa iya dè'è nassabariwi ateddèngeng atuwong tongengngè sibawa mannennungengngè, sitinajako massempajang lao ri Allataala; na Allataala mabbèrèyangngi matu iyaro atuwongngè lao ri alèna. Iyaè nakennai mennang iya dosanaè dè' nassabariwi mennang ateddèngeng iyaro atuwongngè. Iyakiya engka dosa iya nassabariyè naateddèngeng tauwè iyaro atuwongngè. Passalenna iyaro gau'è dè' uwakkeda makkedaè harusu'ko massempajang lao ri Allataala. 17 Sininna pangkaukeng iya salaè iyanaritu dosa, iyakiya engka dosa iya dè'è nassabariwi tauwè ateddèngeng atuwong tongengngè sibawa mannennungengngè. 18 Taissenni makkedaè sininna tauwè iya mancajiyènna ana'-ana'na Allataala, dè' natteru-teru pogau' dosa, saba' Ana'na Allataala linrungiwi, na Si Majaè dè'gaga naullè pogau' lao ri alèna. 19 Taissenni makkedaè idi'è appunnangennai Allataala, namuni sininna linoèwè engkai ri yawa akuwasanna Si Majaè. 20 Taissenni makkedaè Ana'na Allataala polèni sibawa purani mabbèrè pappahang lao ri idi, kuwammengngi taissengngi Allataala iya tongengngè. Tuwoki massèddi sibawa Allataala iya tongengngè sibawa tuwo massèddi sibawa Ana'na Yèsus Kristus. Iyanaè Allataala iya tongengngè, sibawa Alèna ritu atuwong tongengngè sibawa mannennungengngè. 21 Ana'-ana'ku, pabèlaiwi alèmu polè ri barahala-barahalaè!

2 Yohanes 1

1 Lao ri Indo' iya napilè Allataala sibawa lao ri ana'-ana'na Indo'. Iyaè Sure'è polèi ri iyya, pamimping jema'è iya tonget-tongengngè pojiko. Tenniya banna iyya, iyakiya sininna tau iya missengngèngngi Allataala iya tongengngè, napoji tokko. 2 Saba' monroi Allataala ri laleng atitta, sibawa tuli monroi matu sibawakki mannennungeng. 3 Tennapodo nawèrèkki barakka, pammasè sibawa asalèwangeng polè ri Allataala Ambo'è, sibawa Yèsus Kristus Ana'na Ambo'èro. Tennapodo iya manennaro tappunnangiwi sibawa ati iya matinuluè enrengngè sibawa pammasè. 4 Marennu senna'ka missengngi makkedaè engka ana'-ana'na Indo' iya tuwoè situru pappagguruwanna Allataala, pada-pada iya puraè napparèntang Allataala Ambo'è lao ri idi. 5 Rimakkuwannanaro, Indo', uwèllauwi sibawa masero kuwammengngi na idi maneng sisullè siyamasèi. Iya upangoloèwè tenniya sèuwa parènta iya baruè; iyaè parènta purani riwèrèkki sipongenna bunge'-bunge'na mateppe'ki. 6 Mamasèiwi bettuwanna tuwo manuru' parènta-parèntana Allataala. Na parènta iya puraè muwèngkalinga ri pammulanna mupa iyanaritu harusu'ko tuwo sibawa mamasèiwi sèddiè lao ri laingngè. 7 Maègani tau pabengnguwang tassiya ri sininna linoè. Mennang iyanaritu sining tau iya dè'è nangakuiwi makkedaè Yèsus Kristus polèi ri linoè selaku sèddi tolino. Tau sinrupaèro iyanaritu pabbellèngngi, enrengngè Balinna Kristus. 8 Rimakkuwannanaro, jagaiwi aja' narapiko ateddèngeng aga iya puraè riusahangekko: Usahano kuwammengngi mutarima manengngi. 9 Tau iya dè'è nakkatenning ri pappagguruwanna Kristus, sangadinna lèssè polè ri aga iya nappagguruwangngè Kristus, iyaro tauwè dè' nappunnai Allataala. Tau iya tette'è ri laleng pappagguruwanna Kristus, bettuwanna mappunnaiwi muwi Allataala Ambo'è iyarè'ga Ana'è. 10 Rimakkuwannanaro, rèkko engka tau polè sibawa mabbirittangngi lao ri iko pappagguruwang iya dè'è nappagguruwangngi Kristus, aja' mutarimai iyaro tauwè ri lalempolamu; iyarè'ga mabbèrè selleng ri alèna. 11 Saba' tau iya mabbèrè sellengngè lao ri tau pada-padaèro maccowè towi silaong tauwèro ri laleng pogau'i pangkaukeng iya majaè. 12 Maèga senna' iya parelluè upaissengiko, iyakiya rasana lebbi kessing muwi aja' naolai sure'. Mammènasaka wullèi cèllèngiko sibawa alèku mabbicara lao ri iko, kuwammengngi atitta tonget-tongengngi marennu. 13 Ana'-ana' polè ri ana'daranna Indo' iya napilè Allataala massellengngi lao ri Indo'.

3 Yohanes 1

1 Saudara Gayus iya upojiyè! Iyya, pamimping jema' iya tonget-tongengngè mamasèiko, 2 massempajang tennapodo madisid-disingngi Saudara sibawa makessing maneng muwi sibawakko, pada-pada nyawamu makessing muto. 3 Masennang senna'ka wettunna siyagangngarè saudara Kristèng lettu sibawa powadakka pèkkugi atinulurenna Saudara lao ri Allataala iya tongengngè, saba' mèmeng Saudara tuli tuwoi situru pappagguruwanna Allataala. 4 Dè'gaga iya mullè pancajika lebbi marennu, naiya mèngkalingai makkedaè ana'-ana'ku tuwoi manuru' pappagguruwanna Allataala. 5 Saudaraku! Makkuwamani tinuluna Saudara ri laleng jama-jamang iya napogau'è Saudara untu' sellao-sellao pada-padatta Kristèng; mala muwi sining tau Kristèng iya dè'èppa naissengngi Saudara, natumaningiwi Saudara. 6 Purani nappaissengeng mennang lao ri jema'è ri onrotta passalenna pammasèmu. Tulungngi mennang kuwammengngi naullèi patterui joppana mennang nanallalengiwi napèsennangiwi atinna Allataala. 7 Saba' ri laleng allalengengngè untu' tumaningiwi Kristus, dè' natarima mennang bantuwang muwi aga polè risining tau iya dè'è naissengngi Allataala. 8 Rimakkuwannanaro, idi sining tau Kristèngngè harusu'ki tulungngi sellao-sellao pada-padatta Kristèng iya pada-padaèro, kuwammengngi taullèi maccowè ri laleng usahana mennang untu' mappallebbangengngi pappagguruwanna Allataala. 9 Purana moki sure' iya maponco'è lao ri jema'è, iyakiya Diotrèfès iya macinnaè mancaji pamimping ri laleng jema'è, dè' namaèlo turusika. 10 Rèkko polèka matti, maèloka bongkara'i sininna sèuwa-sèuwaè iya puraè napogau', iyanaritu passalenna gau'-gau' majaè enrengngè bellè iya puraè napowada passaletta! Iyakiya iya manennaro dè'pa nagenne untu' alèna. Ri wettu sellao-sellao pada-padatta Kristènro polè, dè' namaèlo tarimai mennang. Mala nattèyangngi sining tau iya maèloè tarimai iyaro saudara-saudaraè, enrengngè nasuroi sining tauwèro massu polè ri jema'è! 11 Saudara iya upojiyè, aja' muturusiwi aga iya majaè. Turusiwi aga iya makessingngè. Tau iya pogau'èngngi iya makessingngè, iyanaritu appunnangennai Allataala. Sibawa tau iya pogau'èngngi iya majaè, dè'pa naissengngi Allataala. 12 Sininna tauwè pojiwi Dèmètrius. Mala muwi Allataala poji towi. Idi poji towi, sibawa naisseng saudara, makkedaè aga iya tapalettu'è wedding riyatepperi. 13 Maèga senna' iya parelluè upowada lao ri iko, iyakiya upèrasai lebbi kessing muwi dè' naolai sure'. 14 Mammènasaka dè'na namaitta tasiruntu matu sibawa tasipabbicara matu. 15 Tennapodo Puwangngè barakkakiwi Saudara! Sellao-sellaomu ri onrokkuè masselleng lao ri iko. Palettukekka sellekku lao ri sininna sellao-sellaota tassèddi-sèddi.

Yudas 1

1 Saudara-saudara iya puraè riyobbi sibawa iya riyamasèi senna'è ri Allataala Ambo'è, enrengngè rijagaiyè untu' Yèsus Kristus. Selaku atanna Yèsus Kristus, iyya -- Yudas -- saudarana Yakobus, 2 mammènasa: Tennapodo Allataala mabbèrè barakka, pammasè sibawa asalèwangeng lao ri iko sibawa tabbollompollong. 3 Saudara-saudara iya upojiyè! Tonget-tongekka makkatta moki sure' lao ri iko passalenna asalamakeng iya pada puraè tapèneddingi. Iyakiya makkekkuwangngè marasa parelluka untu' pangajariko sibawa iyaè sure'è kuwammengngi mumatteru mèwa untu' ateppereng iya wèkkasisengngènna nabbèrèyang Allataala untu' mannennungeng lao ri umma'-Na. 4 Saba' tenrimaingekiwi, engka tau mattentu iya maccelle'è muttama ri tengnga-tengngata. Mennang tau maja ampè iya putara'balè'èngngi biritta passalenna pammasèna Allataalata, untu' lolongeng kasempatang pallessui napessunna. Nanasampèyangngi mennang Yèsus Kristus, alè-alèna Panguwasa sibawa Puwatta. Riyolopa nariyolo pahukkungeng untu' mennang pura ribotoni ri laleng Kitta'è. 5 Iya manennaro pura muwissenni. Namuni macinnaka parèngngerangiko passalenna pèkkugi Puwangngè passalama'i umma' Israèliè polè ri Masèrè', iyakiya rimunri napaccappui sining tau iya dè'è namateppe' ri yelle'na mennang. 6 Engngerang towi sining malaèka' iya liwengngèngngi pakkasèsèng akuwasanna mennang, angkanna lao salaiwi onronna. Allataala balenggui iyaro sining malaèka'è sibawa rantè mannennungengngè, ri laleng onrong iya mapettangngè ri yawana linoè. Kuwaniro mennang ritahang matteru narapi ripateppa pahukkungengngè ri yasè'na mennang ri Esso iya maseroèro matti. 7 Engngerang towi kota Sodom sibawa Gomora enrengngè kota-kota ri seddèna, iya pabbanuwanaè pogau'i gau'-gau' iya padaè napogau' sining malaèka'èro. Napogau'i mennang gau'-gau' iya mappangaddiè sibawa maja ampè, angkanna risissai mennang sibawa pahukkungeng api mannennungengngè, untu' mancaji papparèngngerang lao ri sininna tauwè. 8 Makkuwatoro sining tauwèro mannawa-nawa angkanna mennang pogau' dosa lao ri watakkalèna muto mennang. Nangga' mariyawai akuwasanna Allataala enrengngè pakatunai sining mahlu' iya malebbiè ri surugaè. 9 Alèna Mikhaèl, iya kapalaiyèngngi sining malaèka'è, dè' naengka napogau'i iya makkuwaèro. Wettunna mappangèwangngi sibawa Ibillisi' ri laleng assisalanna passalenna niga lolongengngi matu ujuna Musa, dè' nabarani Mikhaèl madèlèkiwi Ibillisi' sibawa ada-ada paccella. Banna makkedai Mikhaèl, "Puwangngè gera'ko matu!" 10 Iyakiya nasibawang paccella-paccella, iyaro sining tauwè luruiwi sininna sèuwa-sèuwaè iya dè'è napahangngi mennang. Pada-padai mennang olokolo'è iya dè'è akkalenna, iya missengngèngngi gau'-gau'è sibawa pappèrasanna. Iyakiya mala nasaba gau'-gau'ènnaro nanassabariwi naancuru' mennang. 11 Cilakani mennang! Naccowèriwi mennang laleng iya naolaè Kaing. Kuwammengngi nalolongeng dowi, nassossorengngi alèna ri laleng lompo apusangngè, pada-pada Bilèam. Nariancuru' tona mennang nasaba maronta'i pada-pada Korah. 12 Wettummu pakangka pèsta manrè, kèdo-kèdona iyaro sining tauwè napèjariwi pappèneddingngè ri yelle'mu. Saba' manrèi mennang sibawa mabuwaja temmasiri, enrengngè banna alèna bawang naèngngerang. Pada-padai mennang ritu ellungngè iya nairiè anging, iyakiya dè' napateppa bosi. Pada-pada towi aju-kajungngè iya dè'è napowassèlè' buwa namuni wettu buwa-buwani; sining pong ngaju iya puraè ribèbbu ure'na sibawa matè sisenni. 13 Pada-pada mutowi bombang masekkangngè ri tasi'è iya paompoè busa, makkuwatoniro mennang pabbusai gau'-gau' iya mappakasiri-siriè. Pada-padai mennang sining wèttowingngè iya sollèè enrengngè iya puraè napassadiya Allataala onronna ri laleng pettangngè iya kaminang maseroè untu' mannennungeng. 14 Hènokh, assossoreng mapituè polè ri Adam, riyolo engka naengka nabotoi passalenna sining tauwèro. Makkedai Hènokh, "Itai, maèloi polè Puwangngè sibawa massebbu-sebbu malaèka'-Na iya mapaccingngè 15 untu' madèlèkiwi sininna tauwè. Puwangngè maèlo hukkungngi sining tau majaè nasaba sining pangkaukenna iya majaè. Sibawa maèloi hukkungngi tau madosaè enrengngè madorakaè nasaba sininna ada-ada paccella-cella iya napowadaè mennang. " 16 Iyaro sining tauwè tuli mannoko'-noko' bawang sibawa passalai tau laingngè. Tuwoi mennang situru sining cinnana iya madosaè. Mabboroi mennang passalenna alèna, enrengngè leppe'i tauwè kuwammengngi nalolongeng alabang. 17 Iyakiya Saudara-saudaraku iya upojiyè, èngngerangngi aga riyolo napowada rasul-rasulna Puwatta Yèsus Kristus. 18 Nappaddissengengngi mennang lebbi riyolo lao ri iko makkedaè nacawèkiwi paccappurenna linoè mompoi matu sining tau iya mèllèkèllè'èkko matu, iyanaritu sining tau iya tuwoè situru sining cinnana mennang iya madosaè. 19 Iyanaè mennang sining tau paompoè assisalang, dè' mennang narikuwasai ri Rohna Allataala, sangadinna ri sipa' linona. 20 Iyakiya iko, Saudara-saudaraku, mupiyarai matteru atuwommu situru teppe'mu lao ri Yèsus Kristus, iyaro teppe'mu mapaccing senna'. Namuwassempajatto sibawa akuwasanna Rohna Allataala, 21 sibawa tuli tuwono ri laleng accinaungenna pammasèna Allataala, ri wettu mutajenna pammasèna Puwatta Yèsus Kristus, iya mabbèrè matu lao ri iko atuwong tongengngè iya mannennungengngè. 22 Lao risining tau iya kalèwa'-lèwa'è atinna, sitinajako mappaitangngi paressè babuwaè. 23 Gettengngi tauwè massu polè ri laleng apiè untu' passalama'i mennang. Lao risining tau laingngè sitinajako mappaitangngi paressè babuwaè nasibawang perasaang mètau, iyakiya benciwi pakèyanna mennang iya puraè nacarèpai sibawa cinnana iya madosaè. 24 Allataala, iya mullèngngi jagaiwi kuwammengngi nadè' musempè, sibawa mullèngngi tiwiko lao ri yolo-Na iya malebbiè sibawa mariyo-riyo temmakkècella. 25 Alèna ritu alè-alèna Allataala, Pappassalama'ta naolai Yèsus Kristus Puwatta. Alèna ritu Allataala iya malebbiè, maraja, makuwasa sibawa riyakkitangi riyolopa nariyolo narapi makkekkuwangngè lettu mannennungeng! Aming.

Wahyu 1

1 Lise'na iyaè kitta'è passalenna aga iya napowadaè Yèsus Kristus passalenna sining kajajiyang iya kajajiyangngè matti. Allataala mappaissengengngi lao ri Kristus kuwammengngi nappaitangngi lao ri ata-atanna Allataala aga iya masitta'è harusu kajajiyang. Nasuroi Kristus malaèka'-Na lao ri Yohanès, atan-Na, untu' mappaissengengngi sining kajajiyangngèro lao ri alèna. 2 Nanacuritani Yohanès sininna iya naitaèro; na iyanaè laporanna passalenna paseng polè ri Allataala iya napakkasse'è Yèsus Kristus naolai asabbiyan-Na. 3 Masennangngi tau iya bacaèngngi sibawa tau iya mèngkalingaèngngi biritta botona iyaè Kitta'è enrengngè matinulu lao ri aga iya tarokiè ri lalenna. Saba' dè'na namaittana nakajajiyang matu iya manennaè. 4 Saudara-saudara iya engkaè ripituè jema' ri daèrana Asia! Iyya, Yohanès, mammènasaiko riwèrèkko barakka sibawa asalèwangeng polè ri Allataala -- iyanaritu Alèna iya engkaè, iya engkaènna, sibawa iya engkaènna matteru -- kuwaèttopa polè ri iya pitu roh iya engkaè ri yolona kadèra arajanna Allataala, 5 sibawa polè ri Yèsus Kristus, sabbi iya matinuluè. Alèna ritu bunge'-bunge' ripatuwo paimeng polè ri amatèngngè sibawa Alèna ritu makuwasa lao risining arunna linoè. Yèsus mamasèiki, nanasibawang amatèn-Na nanapaleppe'ki polè ri dosa-dosata, 6 enrengngè pancajiki sèddi bangsa banna imang-ngimang, iya tumaningiyèngngi Allataala, Ambo'-Na. Yèsus Kristus ritu iya marajaè enrengngè makuwasa lettu mannennungeng. Aming! 7 Itai, polèni risalipuri ri ellungngè! Sininna tauwè naitai matu Alèna, muttama toni mennang iya puraè gajangngi. Sininna bangsaè ri linoè mpatingngi matu nasaba Alèna. Iyyè, pasti! Aming! 8 "Iyya'na ritu iya pammulangngè sibawa iya paccappurengngè, " adanna Puwang Allataala, iya engkaè, sibawa iya engkaènna enrengngè iya engkaè matteru, Iya Pommakuwasaè. 9 Iyya Yohanès, saudaramu iya siputotoè sibawa iko ri laleng anrasa-rasangngè iya napèneddingiyè tungke' iya maccowèriyèngngi Kristus. Tahakki manrasa-rasa selaku umma' appunnangen-Na. Ripalika ri Pulo Patmos nasaba uwappallebbangengngi paseng polè ri Allataala, iya napakkasse'è Yèsus naolai asabbiyan-Na. 10 Ri essona Puwangngè, rikuwasaika ri Rohna Allataala, nauwèngkalingai sèuwa sadda iya maloppoè -- siccenno oni tarompè'è -- mabbicara ri monrikku. 11 Mabbicarai iyaro saddaè, "Okii aga iya muwitaè, namukiringngi iyaro kitta'è lao ri iya pitu jema'èwè: Efèsus, Smirna, Pèrgamus, Tiatira, Sardis, Filadelfia sibawa Laodikia. " 12 Gilikka limonri untu' mitai niga iyaro mabbicaraè lao ri iyya. Nauwitai pitu ajè lampu iya riyèbbuè polè ri ulawengngè. 13 Ri tengnga-tengngana sining ajè lampuèro tettongngi sèddi tau iya paitaè pada-pada tolinoè. Pakèi jumba iya labbunaè lettu ri ajè. Ri aro-Na pakèi pattongko aro ulaweng. 14 Gemme'-Na maputè pada-pada bulu bimbala'è, sipputè ape'è. Matan-Na malluwa'-luwa' pada-pada apiè; 15 ajè-Na mabbara pada-pada tembaga iya ritunuè. Saddan-Na pada-padai oninna uwai jompi iya marajaè. 16 Lima ataun-Na makkatenning pitu wèttowing, sibawa polè ri tèmun-Na massui sipeppa peddang tareng iya matareng wali-waliyè. Rupan-Na mattappa pada-pada mata essoè ri lakessoè. 17 Wettukku mitai Alèna, mabuwanna ri yolo-Na pada-pada tau matè. Iyakiya napalènne'i lima ataun-Na ri iyya nainappa makkeda, "Aja' mumètau! Iyya'na iya pammulangngè sibawa iya paccappurengngè. 18 Iyya'na ritu Alèna iya tuwoè! Purana matè, iyakiya itani, tuwo-Ka untu' mannennungeng. Ukuwasaiwi amatèngngè, sibawa ri linona sining tau matè. 19 Rimakkuwannanaro, okii gau'-gau' iya muwitaè, iyanaritu gau'-gau' iya engkaè makkekkuwangngèwè, sibawa gau'-gau' iya kajajiyangngè matu matti. 20 Iyanaè rahasiyana polè ripituè wèttowing iya muwitaè ri lima atauk-Ku, sibawa polè ripitu ajè lampu ulawengngèro: Iyaro pituè wèttowing iyanaritu sining malaèka'na pitu jema'è, sibawa pitu ajè lampuro iyanaritu pitu jema'èro. "

Wahyu 2

1 "Lao ri malaèka'na jema'è ri Efèsus, okii makkuwaèwè: Iyanaè paseng polè ri Alèna makkatenningngè pitu wèttowing ri lima ataun-Na, enrengngè joppa ri yelle'na iya pitu ajè lampu ulawengngèro. 2 Uwisseng aga iya muwèbbuè: majjama laddè'ko enrengngè sabbara senna'. Uwisseng makkedaè dè' muwèrèngngi ati tau majaè. Sibawa sining tau iya mangakuiyèngngi alèna rasul, padahal tenniya, purani muwoji, namulolongengngi makkedaè pabbellèngngi mennang. 3 Sabbara'ko enrengngè manrasa-rasako nasaba Iyya, nadè' mupettu paddennuwang. 4 Iyakiya iyanaè pappotane'-Ku lao ri iko: Dè'tona muwamasèi-Ka pada-pada bunge'na. 5 Rimakkuwannanaro, èngngerangngi pèkkugi bèlanako sempè'na! Toba'no polè ri dosa-dosamu, enrengngè pogau'ni aga iya mupogau'è pammulanna. Rèkko dè', maèlo-Ka lao ri iko sibawa bèbbui ajè lampummuro polè ri onronna. 6 Iyakiya engka sèuwa iya makessingngè ri iko, iyanaritu: Mubenciwi pangkaukenna sining tau maccowèriyèngngi Nikolaus, iya Ubenciyètto. 7 Nigi-nigi mullèi marèngkalinga, sitinajai pènessaiwi aga iya napowadaè Rohna Allataala lao ri jema'è! Mennang iya pakalaè, Upalaloi matu manrèi buwa polè ri pong atuwongngè iya tuwoè ri laleng Tammenna Allataala. " 8 "Lao ri malaèka'na jema'è ri Smirna, okii makkuwaèwè: Iyanaè paseng polè ri Alèna iya mammulangngè sibawa paccappurengngè -- iya matèènna natuwo paimeng. 9 Uwisseng sining asussammu; Uwisseng kasiyasiko iyakiya sitongenna sugiko! Uwisseng sining pappètenna iya ripakennaiyèkko polè risining tau iya mangakuiyèngngi alèna Yahudi, padahal tenniya; mennang iyanaritu umma'na Ibillisi'! 10 Aja' mumètau ri anrasa-rasang iya dè'ènna namaitta naharusu' mupèneddingi. Engngerangngi, naputtama'i matu Ibillisi' sibagiyang polè ri iko ri laleng tarungkuè untu' cobaiko. Manrasa-rasako matu seppulo esso ittana. Sitinajako matinulu lao ri Iyya gangka matè, na-Uwèrèkko matu atuwong tongengngè sibawa mannennungengngè selaku hadiya apakalang. 11 Nigi-nigi mullèi marèngkalinga, sitinajai napènessai aga iya napowadaè Rohna Allataala lao ri jema'-jema'è! Mennang iya pakalaè, dè' sises-siseng matu nanrasa-rasa agi-agi ri amatèng iya maduwaè. " 12 "Lao ri malaèka'na jema'è ri Pèrgamus, okii makkuwaè: Iyanaè paseng polè ri Alèna iya makkatenningngè peddang iya matareng waliè. 13 Uwisseng kègako monro, iyanaritu ri onronna Ibillisi' makkarung. Iko matinuluko ri Iyya. Mala wettunna Antipas, sabbik-Ku iya matinuluè riyuno ri yolomu, ri markasna Ibillisi', dè' muwassakka makkedaè mateppe'ko ri Iyya. 14 Namuni makkuwaro engka siyagangngarè passaleng iya dè'è Umasennangiwi polè ri iko: Engka sibagiyang tau ri yelle'mu iya maccowèriyèngngi aga iya nappagguruwangngè Bilèam. Bilèam paggurui Balak pèkkugiwi pasempè'i umma' Israèliè ri laleng dosaè; ri laleng napalècèna mennang manrè nanrè iya puraè riyakkasuwiyangeng lao ri barahalaè enrengngè pogau'i gau'-gau' mappangaddiè. 15 Makkuwatoro engka ri yelle'mu sining tau iya makkatenningngè ri pappagguruwanna sining maccowèè ri Nikolaus. 16 Rimakkuwannanaro, toba'no polè ri dosa-dosamu! Rèkko dè', dè'na namaitta Umaèlo polè ri iko enrengngè musui sining tauwèro sibawa peddang iya engkaè ri bawa-Ku. 17 Nigi-nigi mullèi marèngkalinga, sitinajai napènessai aga iya napowadaè Rohna Allataala lao ri jema'-jema'è! Mennang iya pakalaè, Upalaloi matu manrèi manna iya tassubbuè, sibawa tungke'-tungke' tarimai matu polè ri Iyya sèddi batu putè. Ri batuèro tarokii sèddi aseng iya baruè, iya dè'è naissengngi muwi niga, ri lainnaè tau iya tarimaèngngi. " 18 "Lao ri malaèka'na jema'è ri Tiatira, okii makkuwaèwè: Iyanaè paseng polè ri Ana'na Allataala, iya malluwa'-luwa'è matan-Na pada-pada apiè, enrengngè ajè-Na mabbara pada-pada tembaga ritunuè. 19 Uwisseng sininna mupogau'è -- Uwisseng muwamasèi pada-padammu, matinuluko, majjamako, sibawa tahakko manrasa-rasa. Uwissekko makkekkuwangngè majjama lebbi maèga naiya riyolo. 20 Iyakiya iyaè pappotane'-Ku lao ri iko: Muwèrèngngi ati Izebèl, makkunrai iya mangakuiyèngngi alèna surona Allataalaro. Maègani ata-atak-Ku iya nabengnguwangngè enrengngè napaggurui untu' mappangaddi enrengngè untu' manrèi nanrè iya puraè riyakkasuwiyangeng lao ri barahalaè. 21 Purani Uwèrèng kasempatang untu' toba' polè ri dosa-dosana, iyakiya dè' namacinna mappèsau pogau'i gau'-gau' iya mappangaddièro. 22 Engngerangngi! Maèloka mabbantingengngi angkanna mapeddi ri onrong atinrongngè. Kuwaniro alèna sibawa sining tau iya malawengngè silaong matu manrasa-rasa senna'. Iya manennaro maèlo-Ka pogau'i makkekkuwangngè -- sangadinna rèkko mappèsauwi mennang pogau'i gau'-gau' iya majaè silaong alèna. 23 Sining iya maccowèriyèngngi maèlo tok-Ka mpunoi kuwammengngi sininna jema'è namaingekiwi makkedaè Iyya'naè iya mpellungiyèngngi pikkiranna sibawa atinna tolinoè. Iko maneng maèlo-Ka mpale'i situru pangkaukemmu tungke'-tungke'. 24 Iyakiya iko iya lail-laingngè ri Tiatira dè' naccowèriwi pappagguruwang iya majaèro, enrengngè dè' nagguruiwi pangissengeng-pangissengeng Ibillisi'è. Upowadai makkedaè dè' Umaèlo tambaingekko tiwi iya patanekiyè. 25 Iyakiya narapi wettu polè-Ku matti, sitinajako tette' maccowèriwi aga iya puraè muwappunnai. 26 Mennang iya pacauè sibawa iya lettu'è paccappurengngè matterui pogau'i aga iya Uwacinnaiyè, maèlo-Ka mpèrèngngi akuwasang iya pada-padaè iya Utarimaè polè ri Ambo'-Ku. Tarimai matu mennang akuwasang polè ri Iyya untu' parèntai bangsa-bangsaè sibawa tekkeng bessi, sibawa untu' mancuru'i bangsa-bangsaèro pada-pada oring tanaè. 28 Tarimai matu mennang wèttowing alau polè ri Iyya. 29 Nigi-nigi mullèi marèngkalinga, sitinajai napènessai aga iya napowadaè Rohna Allataala lao ri jema'è!"

Wahyu 3

1 "Lao ri malaèka'na jema'è ri Sardis, okii makkuwaè: Iyanaè paseng polè ri Alèna iya mappunnaiyè pitu roh polè ri Allataala enrengngè iya pitu wèttowingngèro. Uwisseng aga iya mupogau'è. Adanna tuwoko, padahal matèko! 2 Rimakkuwannanaro, oto'no, enrengngè pèwatangi aga iya engkaè mupa ri iko ri wettu dè'napa namatè siseng. Saba' Upolèiwi makkedaè aga iya mupogau'è, dè'pa muwi sèddi sukku ri yolona Allataala. 3 Jaji, èngngerangngi paimeng aga iya puraè riyappagguruwang lao ri iko riyolo enrengngè aga iya puraè muwèngkalinga. Pajoppai iyaro enrengngè toba'no polè ri dosa-dosamu. Rèkko dè' muwoto', maèlo-Ka lao ri iko pada-pada pangaè; nadè' muwissengngi matu uppannapa wettuk-Ku polè. 4 Iyakiya ri tengnga-tengngamu ri Sardis engka mupa tau iya jagaè kuwammengngi natette mapaccing pakèyanna. Joppai matu mennanro silaong Iyya sibawa mappakèyang maputè, saba' sitinajai mennang untu' iyaro. 5 Mennang iya pacauè ripappakèiwi matu pakèyang maputè. Asenna mennang dè' Uleddai matu polè ri Kitta'na Tau Tuwoè. Na riyolona Ambo'-Ku enrengngè malaèka'-malaèka'-Na mangaku-Ka matu makkedaè mennang iyanaritu appunnangek-Ku. 6 Nigi-nigi mullèi marèngkalinga, sitinajai pènessaiwi aga iya napowadaè Rohna Allataala lao ri jema'-jema'è!" 7 "Lao ri malaèka'na jema'è ri Filadelfia, okii makkuwaè: Iyanaè paseng polè ri Alèna iya mapaccingngè enrengngè tongengngè. Alèna ritu pakkatenning goncing iya nappunnaiyè Daud; rèkko natimpa'i, dè' muwi sèddi mullèi tongkoi, sibawa rèkko tattongkoi, dè' muwi sèddi tau mullèi timpa'i. 8 Uwisseng aga mupogau'è. Uwisseng makkedaè dè' nasiyaga awatangemmu; purani muwaccowèri pappagguruwak-Ku enrengngè matinulu ri Iyya. Untu' iko purani Utimpa sèddi tange', iya dè'è naullèi tongkoi muwi niga. 9 Engngerangngi iyaè: Sining tau iya mancajiyè umma'na Ibillisi'èro, sining tau pabbellèng iya mangakuiyèngngi alèna Yahudi, padahal tenniya, maèlo Uwèbbu angkanna mennang polè suju' ri yolomu. Nanaissengngi matu mennang makkedaè Uwamasèiko. 10 Nasaba purani muwaccowèri parènta-Ku kuwammengngi muwattunru-tunru, maèlo tok-Ka linrungiko polè ri wettu asussangngè iya maèloè kennai sininna linoè. Iyaro gau'è kajajiyangngi matu untu' cobaiwi sininna tauwè ri linoè. 11 Masitta'-Ka polè! Jagaiwi madècèd-dècèng aga iya muwappunnangiyè, kuwammengngi nadè' muwi sèddi tau malai hadiya apakalammu. 12 Tau iya pakalaè, maèlo-Ka pancajiwi selaku alliri ri laleng Bola Mapaccinna Allataala-Ku, naonro matu ri onrongngèro mannennungeng. Asenna Allataala-Ku, enrengngè asenna kotana Allataala-Ku -- iyanaritu Yèrusalèm baru iya maèloè nonno polè ri surugaè, polè ri Allataala-Ku -- maèlo Uwokii ri alèna tauwèro. Makkuwatoro asek-Ku iya mabaruè maèlo Uwokii ri alèna. 13 Nigi-nigi mullèi marèngkalinga, sitinajai napènessai aga iya napowadaè Rohna Allataala lao ri jema'-jema'è!" 14 "Lao ri malaèka'na jema'è ri Laodikia, okii makkuwaè: Iyanaè paseng polè riyasengngè Aming, Sabbi iya matinuluè enrengngè tongengngè, assalenna sèuwa-sèuwaè iya napancajiyè Allataala. 15 Uwisseng aga iya mupogau'è; Uwissekko dè' mumakeccè sibawa dè'to mumapella. Harusu'no sala sèddinna! 16 Iyakiya iko mapella-pellako, mapella dè', makeccè dè'to. Iyanaro saba'na na-Umaèlo luwako massu polè ri laleng bawa-Ku. 17 Makkedako, 'Sugiki enrengngè genne maneng; dè' taakurangeng aga-aga. ' Iyakiya dè' muwissengngi pèkkugi kasiyasimmu sibawa pèkkugi mappakaessè-essèna keadaammu! Kasiyasiko, mallusu-lusu, enrengngè buta. 18 Rimakkuwannanaro Upangajariko kuwammengngi melli ulaweng polè ri Iyya, iyanaritu ulaweng iya tulèngngè, kuwammengngi mumancaji sugi. Elli tokko pakèyang putè polè ri Iyya kuwammengngi muwappakèyang enrengngè tongkoi keadaammu iya mallusu-lusuè sibawa mappakasiri-siriè. Sibawa elli tokko pabbura untu' riyassapuwang ri matammu kuwammengngi namuwullèi makkita. 19 Sining tau iya Uwamasèiyè, mennang ritu Uwampareng enrengngè Ucambu. Rimakkuwannanaro sitinajako masumange', sibawa toba'no polè ri dosa-dosamu. 20 Itai! Tettok-Ka ri yolona tange'è sibawa maggetto. Rèkko engka tau mèngkalingai saddak-Ku, enrengngè timpa'i tange'è, maèlo-Ka muttama mèwai sita; maèlo-Ka manrè sisama alèna enrengngè alèna manrèi sisama Iyya. 21 Mennang iya pakalaè, maèlo-Ka palaloi tudang ri kadèra akkarungek-Ku silaong Iyya. Pada-pada muto Iyya pura pakala na makkekkuwangngè tudang silaong Ambo'-Ku ri kadèra akkarungen-Na. 22 Nigi-nigi mullèi marèngkalinga, sitinajai pènessaiwi aga iya napowadaè Rohna Allataala lao ri jema'-jema'è!"

Wahyu 4

1 Purairo lolongessika pakkitang. Uwitai sèddi tange' tattimpa' ri surugaè. Nainappa riyèngkalingasi sadda iya bunge'na pura mabbicara lao ri iyya pada-pada oni tarompè'è. Makkedai iyaro saddaè, "Enrè'no kuwaè. Maèlo-Ka mappaitangngi lao ri iko aga iya maèloè kajajiyang matti. " 2 Matteru bawakka rikuwasai ri Rohna Allataala. Nainappa uwita ri surugaè engka sèddi kadèra arajang, sibawa engka sèddi tau tudang ri kadèra arajangngèro. 3 Rupanna iyaro tauwè mattappa pada-pada paramata baiduri pandangngè enrengngè paramata dalimaè. Sèuwa tarawu mattappa zamrud mattulilingiwi iyaro kadèra arajangngè. 4 Ri laleng allèbunna iya mattulilingiyèngngi iyaro kadèra arajangngè engka duwappulo eppa kadèra arajang laingngè. Kuwaro tudangngi duwappulo eppa pamimping iya mappakèyang maputè, enrengngè pakèi passigera' ulaweng. 5 Polè ri kadèra arajangngèro massui cahaya billa'è enrengngè oni lettè iya maddalenrungngè. Sibawa ri yolona kadèra arajangngè engka pitu sulo iya malluwa'-luwa'è; iyanaritu iya pitu Rohna Allataala. 6 Engkato ri yolona kadèra arajangngèro sèuwa iya paitaè pada-pada tasi' kacaè, macinnong pada-pada kaca macinnongngè. Ri mattulilinna kadèra arajangngè, ri tungke' sulapa'na, engka eppa mahlu', iya bagiyang ri yolona sibawa bagiyang ri munrinna penno sibawa mata. 7 Mahlu' mammulangngè paitai pada-pada singaè. Iya maduwaè, pada-pada saping laiè. Iya matelluè mappunnaiwi tappa pada-pada tappa rupa tauwè. Iya maeppaè, paitai pada-pada kuwajang iya luttuè. 8 Iya eppa mahlu'èro, tungke'-tungke' mappunnaiwi enneng panni, sibawa ri mattulilinna enrengngè ri lalenna pennoi sibawa mata. Esso wenni iyaro mahlu'-mahlu'è dè' nappèsau makkèlong, "Mapaccing, mapaccing, mapaccingngi Puwangngè, Allataala Pommakuwasaè; iya engkaè, iya engkaènna, sibawa iya engkaè matteru. " 9 Iya eppa mahlu'èro makkèlongngi èlokkèlong pappojiyang, pappakalebbi sibawa sukkuru' lao ri Alèna iya tudangngè ri kadèra arajangngèro, iyanaritu Alèna iya tuwoè lettu mannennungeng. Na wettunna iyaro mahlu'-mahlu'è makkèlong, 10 iya duwappuloè eppa pamimpingngèro tassulunni ri yolona iya tudangngè ri kadèra arajangngèro, nainappa nasompa Alèna iya tuwoè mannennungeng. Nainappa naggenrungeng mennang sining passigera'na ri yolona iyaro kadèra arajangngè sibawa makkeda, 11 "Oh Puwang, oh Allataalata! Ikona ritu iya sitinajaè tarima pappojiyang, pappakalebbi sibawa akuwasang! Saba' Iko ritu pancajiwi sininna sèuwa-sèuwaè, enrengngè nasaba èlo-Muto nasininna sèuwa-sèuwaèro kajajiyangngi sibawa tuwoi. "

Wahyu 5

1 Nainappa uwita sèuwa kitta lulung ri limanna Alèna iya tudangngè ri kadèra arajangngèro. Iyaro kitta'è penno sibawa oki wali-wali enrengngè ri materèi sibawa pitu sègèlè'. 2 Nainappa uwita sèddi malaèka' iya mawatangngè, gora-gora sibawa sadda iya maloppoè, "Niga sipato' reppa'i iyaè sining sègèlè'è enrengngè timpa'i iyaè kitta'è?" 3 Iyakiya muwi ri surugaè iyarè'ga ri linoè iyarè'ga muwi ri yawana linoè dè'to gaga sèddi tau ri lolongeng iya mullèèngngi timpa'i iyaro kitta'è, enrengngè makkita ri lalenna. 4 Nauterina tassènge'-sènge' saba' dè'gaga muwi sèddi tau iya sipato'è timpa'i iyaro kitta'è, enrengngè makkita ri lalenna. 5 Nainappa sala sèddinna polè risining pamimpingngèro makkeda lao ri iyya, "Aja' muteri! Itai! Singa polè ri suku bangsa Yèhuda, wijanna Daud iya battowaè, pakalani. Naullèi reppo'i pitu sègèlè' enrengngè timpa'i iyaro kitta'è. " 6 Nainappa uwita sèddi Ana' Bimbala' tettong ri tengnga-tengngana kadèra arajangngèro, riyattulilingi ri iya eppa mahlu'è enrengngè sininna pamimpingngèro. Iyaro Ana' Bimbala'è samanna purani rigèrè. Mappunnaiwi pitu tanru' sibawa pitu mata: iyanaritu pitu roh polè ri Allataala iya puraè risuro lao ri sininna linoè. 7 Nainappa malluru iyaro Ana' Bimbala'è sibawa malai iyaro kitta lulungngè polè ri lima ataunna tau iya tudangngè ri yasè'na kadèra arajangngè. 8 Ri wettu kèdo makkuwannaro iyaro Ana' Bimbala'è, tassulunni iya eppa mahlu'è enrengngè iya duwappulo eppa pamimpingngèro ri yolona. Tungke'-tungke' mennang makkatenning kacapi enrengngè mangko' ulaweng iya mallise'è kamennyang, iyanaritu sining paddowangenna umma'na Allataala. 9 Napuwèlonni mennang sèddi èlong iya baruè: "Sipato'-Ko malai iyaro kitta'è enrengngè reppa'i sining sègèlè'na. Saba' pura-No riyuno, nanallalengiwi amatèn-Na, rupa tauwè polè ri sininna sukuè, basaè, wanuwaè enrengngè bangsaè purani muwelli untu' Allataala. 10 Purani mupancaji mennang sèuwa bangsa imang-ngimang iya ripallaingngè, kuwammengngi natumaniwi Allataalata, enrengngè mapparènta ri yasè'na linoè. " 11 Nainappa makkitasika. Uwèngkalingasi sadda malaèka' iya massebbu-sebbuè enrengngè majjuta-jutaè ègana! Tettongngi mennang mattulilingiwi kadèra arajangngè sibawa iya eppa mahlu'è enrengngè sining pamimpingngèro. 12 Namakkèlong mennang sibawa sadda battowa, "Iyaro Ana' Bimbala' iya puraènna rigèrè, sitinajai tarima akuwasang asugireng, apanrèng sibawa awatangeng; sitinajai ripakalebbi, ripakaraja enrengngè ripoji-poji!" 13 Nainappa uwèngkalinga sininna mahlu'è ri langiè, ri linoè, ri yawana linoè enrengngè ri laleng tasi'è -- rippe'na sininna mahlu'è ri lalenna alangngèwè -- makkèlong, "Alèna iya tudangngè ri yasè'na kadèra arajangngè, sibawa Ana' Bimbala'èro, iyanaritu iya ripoji-pojiyè enrengngè ripakalebbiè kuwaèttopa maraja nenniya makuwasa untu' mannennungeng!" 14 Nappèbalina iya eppa mahlu'èro, "Aming!" Sibawa iyaro sining pamimpingngè tassulung toni sibawa massompa.

Wahyu 6

1 Purairo uwitasi iyaro Ana' Bimbala'è reppa'i sègèlè' mammulangngè ri yelle'na iya pitu sègèlè'èro. Nainappa uwèngkalinga sèddi polè ri yelle'na iya eppa mahluèro makkeda, "Laono mai!" Iyaro oni saddanna pada-padai oni lettè. 2 Nauwakkita, nainappa paita sikaju anyarang putè. Tau iya tonangiyèngngi makkatenningngi sèddi pana, sibawa ri alèna riwèrèngngi sèddi passigera'. Majui selaku sèddi tau pakala iya laowè untu' pakala. 3 Nainappa iyaro Ana' Bimbala'è reppa'i sègèlè' iya maduwaè, nauwèngkalingai mahlu' iya maduwaè makkeda, "Laono mai!" 4 Nainappa sikaju anyarang iya laingngè massusi. Iyaro anyarangngè macella mabbara bulunna. Tau iya tonangiyèngngi riwèrèngngi akuwasang untu' pallennye'i keadaang damè polè ri linoè, kuwammengngi nasisullè siyuno rupa tauwè. Nariwèrènna sipeppa peddang iya battowaè. 5 Nainappa iyaro Ana' Bimbala'è reppa'i sègèlè' iya matelluè. Nauwèngkalingai mahlu' iya matelluè makkeda, "Laono mai!" Makkitana, napaita sikaju anyarang bolong. Tau iya tonangiyèngngi makkatenning sipasang dacing ri limanna. 6 Nauwèngkalinga sèuwa iya riyèngkalingaè pada-pada sadda iya goraè polè ri tengnga-tengngana iya eppa mahlu'èro. Iyaro saddaè makkedai, "Sibang gandong ellinna gaji siessoè, sibawa tellubbang gandong laingngè ellinna untu' gaji siessoètto. Iyakiya aja' musolangiwi poppong zaitungngè sibawa dare anggoro'è!" 7 Nainappa iyaro Ana' Bimbala'è reppa'i sègèlè' iya maeppaè. Nauwèngkalingai mahlu' iya maeppaè makkeda, "Laono mai!" 8 Makkitana, napaita sikaju anyarang iya makawiyaè. Tau iya tonangiyèngngi riyasengngi Amatèng. Polè ri munri, riyaccowèriwi macawè'-cawè' ri Linona Amatèngngè. Akuwasangngè ri tawa eppana linoèwè riyabbèrèyangngi lao ri mennang, kuwammengngi naullèi mabbuno naolai musuè, naolai wettu akkadèrengngè, naolai saiyè enrengngè naolai olokolo' masekkangngè. 9 Purairo iyaro Ana' Bimbala'è reppa'i sègèlè' iya malimaè. Nauwitai ri yawana mèzbaè engka nyawa-nyawa tau iya matè riyuno nasaba napèwatangiwi mennang paseng polè ri Allataala naolai asabbiyanna mennang. 10 Gorani mennang sibawa sadda iya battowaè, "Oh Puwang Pommakuwasaè, iya mapaccingngè sibawa tongengngè! Siyagapi ittana nappa-Ko madèlèkiwi pabbanuwana linoè enrengngè hukkungngi mennang nasaba purani naunoki?" 11 Tungke'-tungke' mennang riwèrèngngi silampa waju iya maputè. Nainappa risuro mennang mappèsau cinampe'si, narapi sukkuni jumellana sellao-sellao seperjuwanganna enrengngè saudara-saudarana mennang iya maèloè riyuno pada-pada mennang. 12 Nainappa uwita iyaro Ana' Bimbala'è reppa'i sègèlè' iya maennengngè. Kajajiyanni mpèwang tanaè iya maseroè. Mancaji malotonni mata essoè pada-pada kaing lotong iya makassara'è, enrengngè kètengngè mancaji macella pada-pada daraè. 13 Madduttungeng sining wèttowingngè polè ri langiè nonno ri linoè pada-pada buwa ara iya dè'è namatasa madduttung polè ri ponna ri wettunna rigottang ri anginrajaè. 14 Teddèngngi matu langiè pada-pada karettasa' rilulungngè enrengngè sininna buluè sibawa puloè ripaèsu' polè ri onronna. 15 Nainappa sining arung ri linoè, sining tomarajaè, pallima-pallimaè, sining tau sugiè enrengngè sining tau makuwasaè, kuwaèttopa sining tau laingngè, muwi ata iyarè'ga tau maradèka', iya manenna subbui alèna ri laleng gowa-gowaè enrengngè ri selle'-selle'na batu buluè. 16 Lao risining buluè sibawa batuèro, gorai mennang, "Geppaki! Subbuki polè ri pakkitanna Alèna iya tudangngè ri yasè'na kadèra arajangngè, enrengngè polè ri caina Ana' Bimbala'èro! 17 Polèni esso maseroè, makkekkuwangngè nabollowanni mennang caina, nadè' muwi sèddi tau mullèi tahang ri yolona mennang!"

Wahyu 7

1 Purairo, uwitani eppa malaèka' tettong ri eppaè sulapa'na linoè. Natahanggi mennang iya eppa angingngè ri linoè kuwammengngi aja' naengka anging mangiri ri pottanangngè, iyarè'ga ri tasi'è, iyarè'ga ri aju-kajungngè. 2 Nainappa uwita sèddi malaèka' laingngè mompo polè ri alau. Tiwii sègèlè' polè ri Allataala iya tuwoè. Nasibawang sadda iya battowaè iyaro malaèka'è naobbii iya eppa malaèka' iya puraè lolongeng akuwasang polè ri Allataala untu' solangiwi pottanangngè sibawa tasi'è. 3 Makkedai iyaro malaèka'è, "Aja' riyolo musolangiwi pottanangngè, iyarè'ga tasi'è, iyarè'ga aju-kajungngè rekko dè'pa tawèrèngngi tanrang sègèlè' ri linrona sining atanna Allataalata. " 4 Nainappa ripaissengika makkedaè engka 144. 000 jumellana tau iya riwèrèngngè tanrang sègèlè' polè ri Allataala ri linrona mennang. Iyaro sining tauwè riyalai polè ri iya seppulo duwa suku bangsa Israèliè; 5 polè ri tungke' suku 12. 000 tau. Iyanaritu polè ri suku Yèhuda, Rubèn, Gad, 6 Asyer, Naftali, Manasyè, 7 Simèon, Lèwi, Isakhar, 8 Zèbulon, Yusuf, sibawa Bènyamin. 9 Purairo makkitasika, nauwitani lèmpe tauwè iya dè'è padanna ègana -- dè muwi sèddi tau iya mullè bilangngi jumellana! Mennang iyanaritu sining tau iya polè ri tungke' bangsa, suku, wanuwa, enrengngè basa. Mappakè jumbai iya maputè-putè sibawa makkatenning takkè-takkè aju pattuku ri limanna, iyaro sining tau maègaè tettongngi moloiwi kadèra arajangngè mangolo ri Ana' Bimbala'èro. 10 Nainappa nasibawang sadda iya battowaè gorai mennang, "Asalamaketta polèi ri Allataala, iya tudangngè ri yasè'na kadèra arajangngè, enrengngè polè ri Ana' Bimbala'èro!" 11 Sininna malaèka'è tettongngi mattulilingiwi kadèra arajangngè enrengngè sining pamimpingngè kuwaèttopa iya eppa mahlu'èro. Iyaro sining malaèka'è tassulunni ri yolona kadèra arajangngè nainappa sompai Allataala. 12 Gorani mennang, "Aming! Ripojiwi Allataalata iya marajaè sibawa mapanrè. Alèna ritu Allataala iya sitinajaè riwèrèng ada-ada sukkuru' enrengngè pappakalebbi. Makuwasai sibawa mawatangngi lettu mannennungeng! Aming. " 13 Sala sèddinna polè risining pamimpingngèro makkutana lao ri iyya, "Iyaè sining tau majjumba putè-putè, niga mennang sibawa polè kègai mennang?" 14 Umappèbali, "Dè' uwissengngi Puwang. Puwang muto missengngi. " Nakkeda lao ri iyya, "Iyanaè sining tau iya salama'è laloiwi wettu paccallangngè iya maseroè. Purani mennang nasessa jumbana enrengngè naèbbui maputè sibawa darana Ana' Bimbala'èro. 15 Iyanaro saba'na natettong mennang ri yolona kadèra arajanna Allataala, enrengngè massompa ri Alèna esso wenni ri laleng Bolana Allataala. Na Alèna iya tudangngè ri yasè'na kadèra arajangngèro hadèrè'i matu sibawa mennang untu' linrungiwi mennang. 16 Dè'na matu mennang namalupu iyarè'ga namadekka; mata essoè iyarè'ga pellaè dè'na matu nangurengngi mennang, 17 saba' Ana' Bimbala' iya tudangngè ri tengnga-tengngana kadèra arajangngèro mancaji matu pakkampina. Nadulungengngi matu mennang lao ri mata uwai iya mabbèrè atuwong. Sibawa Allataala matu sussurengngi sininna uwai matanna polè ri matanna mennang. "

Wahyu 8

1 Wettunna iyaro Ana' Bimbala'è reppa'i sègèlè' iya mapituè, masino-sinoi surugaè kira-kira sitengnga jang ittana. 2 Nainappa uwita iya pitu malaèka' iya tettongngè ri yolona Allataala, sibawa riwèrèngngi mennang pitu tarompè'. 3 Sèddi malaèka' laing, iya tiwiè sèddi addupa-dupang ulaweng, polè sibawa tettong ri yolona mèzbaè. Riwèrènni maèga senna' kamennyang untu' riyaggugureng risining paddowangenna sininna umma'na Allataala sibawa untu' riyakkasuwiyangeng ri mèzba ulawengngè iya engkaè ri yolona kadèra arajangngè. 4 Nasibawang sining paddowangenna sining umma'na Allataala, rumpu dupa iya mattengngangngè malluwa'ro mallaso mènrè' polè ri limanna malaèka' iya tettongngè ri yolona Allataalaro. 5 Nainappa iyaro malaèka'è nala iyaro addupa-dupangngè, nanalisekiwi sibawa api polè ri mèzbaè, nainappa naggenrungeng ri yasè'na linoè. Naddalenrunna guttuè enrengngè siyanrè-anrè billa'è, kuwaèttopa mpèwanni tanaè. 6 Purairo, pitu malaèka' iya makkatenningngè pitu tarompè'ro sadiya-sadiyani untu' masseppung. 7 Malaèka' mammulangngè seppungngi tarompè'na, nateppana bosi èse'è sibawa apiè iya sikorè dara ri yasè'na linoè sibawa maraja. Cappu tawa tellunna linoè ritunu; makkuwatoro tawa tellunna polè ri aju-kajungngè, enrengngè tungke' wella iya manyilaè. 8 Nainappa malaèka' maduwaè seppungngi tarompè'na, nariyaggenrungeng muttama ri tasi'è sèuwa iya maloppo senna'è iya paitaè pada-pada bulu iya malluwa'è. Tawa tellunna tasi'è tappinra mancaji dara, 9 namatèna tawa tellunna polè ri sininna mahlu'è ri tasi'è; makkuwatoro cappu toni tawa tellunna sining kappala'è. 10 Nainappa malaèka' matelluè seppungngi tarompè'na, nasèuwa wèttowing iya battowaè, iya malluwa'-luwa'è pada-pada suloè, sempè' polè ri langiè, nanageppai tawa tellunna sining saloè sibawa mata uwai. 11 (Asenna iyaro wèttowingngè "Mapai". ) Natawa tellunna uwai mancaji mapai, namatèna maèga tau nasaba naènungngi uwai iya mapaiènnaro. 12 Nainappa malaèka' maeppaè seppungngi tarompè'na. Natalleppa'na tawa tellunna mata essoè, tawa tellunna kètengngè, enrengngè tawa tellunna sining wèttowingngè angkanna teddènni tawa tellunna polè ri awatangenna cahayana mennang. Makkuwatoro tawa tellunna polè ri essoè dè'na namacakka sibawa makkuwatoro tawa tellunna polè ri wenniè. 13 Nainappaka makkita, nauwèngkalingani sikaju manu'-manu' kuwajang iya mattengngangngè luttu ri bètaraè, gora, "Cilaka! Cilaka! Cilakai sininna tauwè ri linoè rèkko naèngkalingai iya tellu malaèka' laingngèro seppungngi tarompè'na matti!"

Wahyu 9

1 Nainappa malaèka' malimaè seppungngi tarompè'na, nauwitai sèuwa wèttowing sempè' polè ri langiè nonno ri linoè. Iyaro wèttowingngè riwèrèngngi goncinna balorang amatèngngè. 2 Na iyaro wèttowingngè natimpa'ni balorang amatèngngèro, nainappa massuni rumpuè polè ri lalenna pada-pada rumpu polè ri dapureng iya battowaè. Mata essoè sibawa bètaraè mapettanni nataro rumpu polè ri peppingngèro. 3 Nainappa polè ri rumpuèro massuni sining incalè iya nonnoè ri linoè. Iyaro sining incalè riwèrèngngi akuwasang iya padaè pada-pada iya riwèrèngngèngngi dokkèngngè. 4 Riyattèyangngi mennang solangiwi wellaè, iyarè'ga aju-kajungngè, iyarè'ga tanet-taneng laingngè. Banna mennang weddingngi nalurui sining tau iya dè'è tanrang sègèlè' polè ri Allataala ri linrona. 5 Iyaro sining incalè dè' naripalalo mpunoi sining tauwèro, sangadinna nasissai bawang mennang limampuleng ittana. Angèttukeng iya napaompoè passissanna iyaro sining incalè pada-padai angèttukeng iya napaompoè passuina dokkèngngè. 6 Ri wettu limampulengngèro, iyaro sining tauwè makkuragai kuwammengngi namatè, iyakiya dè' nawedding mennang matè; macinnai mennang matè, iyakiya amatèngngè mabèlai polè ri mennang. 7 Tappana iyaro incalè pada-padai riita anyarang iya sadiyaènna untu' mammusu. Ri ulunna engka sèuwa iya paitaè pada-pada passigera' ulawengngè. Tappana pada-padai tappa tolinoè. 8 Gemme'na pada-padai gemme' makkunraiè, sibawa isinna pada-pada isi singaè. 9 Arona natongkoi sibawa sèuwa iya maèloè pada-pada waju bessiè. Oni pannina pada-pada oni karèta anyarang maègaè iya mattengngangngè malluru ri laleng ammusurengngè. 10 Mappunnaiwi ikko enrengngè passuwi pada-pada dokkèngngè. Na ri laleng ikko'naro monro awatangenna untu' sissai tauwè limampuleng ittana. 11 Mappunnaiwi arung iya parèntaèngngi, sibawa arunna iyanaritu malaèka' iya tanggung jawakiyèngngi balorang amatèngngè. Asenna ri laleng basa Ibrani iyanaritu Abadon; sibawa ri laleng basa Yunani Apolion (iya bettuwannaè "Pakkasolang"). 12 Acilakang mammulangngè labe'ni. Purairo engka duwa acilakang iya harusu'è polè. 13 Nainappa malaèka' iya maennengngè seppungngi tarompè'na. Nauwèngkalingai sèuwa sadda polè ri iya eppa sunna mèzba ulawengngè iya engkaè ri yolona Allataala. 14 Iyaro saddaè makkedai lao ri malaèka' ennengngèro, "Leppessangngi iya eppa malaèka' iya tassiyoè ri Salo Efratro!" 15 Iya eppa malaèka'èro rileppessanni. Purani mennang ripassadiya banna untu' jang, esso, uleng sibawa taungngèro untu' mpunoi tawa tellunna polè ri sininna rupa tauwè. 16 Ripowadanna makkedaè jumellana sining pasukang makkinnyarangngèro iyanaritu ègana duwa ratu juta. 17 Sibawa ri laleng pakkitangngè, uwitai sining anyarangngèro enrengngè sining tonangiyèngngi. Sining tonangiyèngngi pakèi waju bessi iya macella malluwa'è tappana, magawu pada-pada batu nilangngè, enrengngè maridi balèrang. Ulunna sining anyarangngèro pada-padai ulu singaè, sibawa polè ri bawana massui apiè, rumpuè sibawa balèrangngè. 18 Tawa tellunna polè ri rupa tauwè riyunoi ri iya tellu abalaèro; iyanaritu api, rumpu sibawa balèrang iya massuè polè ri bawana sining anyarangngèro. 19 Awatangenna sining anyarangngèro monroi ri bawana kuwaèttopa ri ikko'na. Sining ikko'na pada-padai ula makkuluè. Nasibawang sining ikko'naro, iyaro sining anyarangngè nasissai rupa tauwè. 20 Iyakiya sèsana polè ri umma' tolinoè iya dè'è nariyuno risining abalaèro, dè'to namaèlo salaiwi pangkaukeng limanna muto mennang. Dè' nappèsau mennang massompa risining sètangngè, sibawa barahala-barahala ulawengngè, pèra'è, tembagaè, batu sibawa ajuè iya dè'è naullèi makkita, iyarè'ga marèngkalinga, iyarè'ga joppa. 21 Dè'to mennang nasesse'i sining pangkaukenna iya majaè, iyanaritu abbunowangngè, paddissengengngè sibawa mappangaddiè enrengngè mènnauwè.

Wahyu 10

1 Nainappa uwita sèddi malaèka' porè iya laingngè nonno polè ri surugaè. Risalipuriwi sibawa ellung, enrengngè sèuwa tarawu mattemmuiwi ulunna. Tappana maccahaya pada-pada mata essoè, sibawa ajèna pada-pada alliri apiè. 2 Ri limanna engka sèddi kitta lulung baiccu iya tattimpa'è. Ajè ataunna makkella ri tasi'è, sibawa ajè abèyona makkella ri pottanangngè. 3 Nainappa gora sibawa sadda battowa pada-pada sining singaè iya mattengngangngè mowang. Puranana gora iyaro malaèka'è, iya pitu guttuè mappèbalini sibawa sadda maddalenrung. 4 Massaddanna iya pitu guttuèro, maèloka mokii, iyakiya mèngkalingaka sèuwa sadda polè ri surugaè makkeda, "Rahasiyakangngi aga iya napowadaè iya pitu guttuèro; aja' muwokii!" 5 Nainappa malaèka' iya uwitaè makkella ri tasi'è sibawa ri pottanangngèro makkai lima ataunna mènrè' ri langiè. 6 Mattanroi ri laleng asenna Allataala iya tuwoè mannennungeng, iya pancajiyèngngi langiè, linoè sibawa tasi'è enrengngè sininna sèuwa-sèuwaè iya engkaè ri lalenna. Makkedai iyaro malaèka'è, "Dè'na matu naripasoro wettunna! 7 Iyakiya rèkko malaèka' mapituè seppungngi tarompè'na, Allataala pakajajiyangngi matu rancana rahasiya-Na, pada-pada pura riyabbirittangngè lao ri ata-atan-Na, iyanaritu sining nabiè. " 8 Nainappa sadda iya puraè uwèngkalinga polè ri surugaèro, mabbicarasi lao ri iyya. Makkedai, "Laono malai kitta lulung iya tattimpa'è ri limanna malaèka' iya makkellaè ri tasi'è sibawa ri pottanangngèro. " 9 Naulaona ri malaèka'èro sibawa uwèllauwi kuwammengngi nabbèrèyangngi kitta lulung baiccu'èro lao ri iyya. Makkedai, "Alani sibawa anrèi iyaè. Ri laleng babuwamu mancaji mapaii matu, iyakiya ri laleng bawamu macenningngi pada-pada cani'è. " 10 Uwalani iyaro kitta lulung baiccu'è polè ri limanna nainappa manrèi. Ri bawaè rasana pada-pada cani'è, iyakiya purana uwemme, ri laleng babuwaè mancaji mapaii. 11 Nainappa riparèntakka, "Pallebbangngi siseppa birittanna Allataala passalenna bangsa-bangsaè, sining wanuwaè, sining basaè, enrengngè sining arungngè. "

Wahyu 11

1 Purairo riwèrèkka sipolo aju iya maèloè pada sipeppa tekkeng pangukkuru', nainappa riparèntang, "Laono muukkuru'i Bolana Allataala sibawa mèzbana. Bilangngi siyaga tau iya massompaè ri lalenna. 2 Iyakiya aja' muukkuru'i seddèna iya ri seddè saliwenna Bolana Allataalaro, saba' iyaro bagiyangngè purani riyabbèrèyang lao risining tau iya dè'è naissengngi Puwangngè. Nalèjja'-lèjja'i matu mennang kota iya mapaccingngèro patappulo duwa uleng ittana. 3 Maèlo-Ka suroi duwa tau sabbik-Ku iya mappakè pakèyang mabbarata, sibawa nappallebbangengngi matu mennang birittanna Allataala 1260 esso ittana. " 4 Iyaro duwaè sabbi iyanaritu duwappong zaitun sibawa duwa ajè lampu iya engkaè ri yolona Puwangngè sininna alangngè. 5 Rèkko nacobai tauwè pogau'i sèuwa iya dè'è namakessing lao ri mennang, napolè ri bawana mennang massui api iya paccappuèngngi sining balinna. Nallalengi caraèro, sininna tau iya maèloè peddiriwi mennang riyunoi matu. 6 Mappunnaiwi mennang akuwasang untu' tongkoi langiè kuwammengngi aja' nateppa bosiè ri wettu nappallebbangenna mennang biritta polè ri Allataala. Mappunnai towi akuwasang ri sininna mata uwai, untu' pinrai uwai mancaji dara. Sibawa mappunnai towi mennang akuwasang untu' munrui linoè sibawa sininna rupanna abalaè, uppa-uppanna mennang maèloi pogau'i. 7 Puranana mennang nappallebbangeng birittanna, olokolo' iya massuè polè ri pepping amatèngngè mèwai matu mennang. Nacaui matu mennang sibawa naunoi mennang. 8 Na ujuna tattale'i matu ri watattanana kota battowaè, ri onronna Puwanna risalli. Aseng èbara'na iyaro kotaè iyanaritu Sodom iyarè'ga Masèrè'. 9 Sining tau polè ri sininna bangsaè, sukuè, basaè, enrengngè wanuwaè naitai matu ujuna tellungngesso sitengnga ittana, sibawa dè' napalaloi iyaro sining ujuè rikuburu'. 10 Marennui matu pabbanuwana linoè nasaba matènana iya duwa sabbièro. Naramè-ramèiwi matu mennang enrengngè sisullèi matu sikiringeng hadiya, nasaba iya duwa tau nabièro purani mappapolè maèga passissang lao ri sininna tauwè ri linoè. 11 Labe'nana tellungngesso sitengnga, polèni nappase' atuwong polè ri Allataala sibawa muttama'si ri laleng iya duwa tau nabièro. Tokkong toni mennang tellong, angkanna sininna tauwè iya mitaèngngi mennang mancaji mètau senna'. 12 Nainappa iya duwa tau nabièro marèngkalinga sadda battowa iya mobbièngngi mennang polè ri surugaè, "Laono mai mènrè' kuwaè!" Nainappa ri yolona matanna sining balinna, mènrè' toni mennang ri surugaè, risalipuri ri ellungngè. 13 Na iyaro wettuè kajajiyanni mpèwang tanaè iya maseroè. Tawa seppulona bagiyanna polè ri kotaèro ancuru', sibawa pitussebbu tau matè nasaba iyaro mpèwang tanaè. Sining tau laingngè mètau senna'ni, nainappa mennang napoji arajanna Allataala ri surugaè. 14 Acilakang maduwaè labe'ni. Iyakiya itai! Cilaka iya matelluè dè'na namaitta naccinrola matu. 15 Nainappa malaèka' mapituè naseppung tarompè'na, nariyèngkalingana ri surugaè sadda battowa senna'è iya makkedaè, "Akuwasang untu' parèntai linoè engkani makkekkuwangngè ri laleng limanna Puwatta enrengngè Arung Pappassalama' iya najjanciyangngè. Mapparèntai matu lettu mannennungeng!" 16 Na iya duwappulo eppa pamimping iya tudangngè ri kadèra arajanna ri yolona Allataala, tassulunni sibawa sompai Allataala. 17 Makkedai mennang, "Puwang, Allataala Pommakuwasaè, iya engkaè, sibawa iya engkaènna! Mattarima kasi'ki ri Idi saba' purani Mupakè akuwasam-Mu iya battowaè, enrengngè purani Mupammulai mapparènta! 18 Sining tau iya dè'è naissengngi Puwangngè, majjallo saba' wettunna Mupatabbollong cai-Mu, enrengngè wettunna tona Muwadèlèki sining tau matè. Iyanaè wettunna untu' mpèrèngngi saro ata-atam-Mu, sining nabiè, sibawa lao ri sininna umma'-Mu, iyanaritu sininna tauwè iya massompaè ri Iko, battowa iyarè'ga baiccu. Iyanaè wettunna untu' mancuru'i sining tau iya mancuru'èngngi linoè!" 19 Natattimpa'na Bolana Allataala ri surugaè, enrengngè paitani Petti Assijancingengngè ri lalenna. Nasiyanrè-anrè billa'è enrengngè sadda guttuè maddalenrung sibawa mango, kuwaèttopa mpèwang tanaè sibawa bosi èse' iya maseroè.

Wahyu 12

1 Nainappa paita ri langiè sèuwa iya makalallaingngè enrengngè dè'gaga padanna. Sèddi makkunrai iya pakèèngngi mata essoè selaku pakèyanna, mattengngang tettong ri yasè'na kètengngè. Ri ulunna engka sèuwa passigera' iya polè riseppulo duwa wèttowing. 2 Iyaro makkunraiè mattengngangngi mattampu, nasaba narapini wettunna untu' mèmmana', nakelli'na nataro peddi. 3 Nainappa paita toni ri langiè sèuwa iya makalallaingngè. Engka sikaju naga cella iya battowa senna'è iya mappunnaiyè pitu ulu sibawa seppulo tanru'. Tungke' ulunna pakèi sèddi passigera'. 4 Nasibawang ikko'na nassarènrèngengngi tawa tellunna polè risining wèttowingngè ri langiè nanaggenrungengngi lao ri linoè. Iyaro nagaè tettongngi siyolong makkunrai iya maèloè mèmmana'ro sibawa akkattana memme'i ana'na, ri wettu jajinna muwa. 5 Nainappa iyaro makkunraiè jajiyanni sèddi ana' worowanè iya maèloè parèntai sininna bangsaè sibawa tekkeng bessi. Iyakiya iyaro ana'è rirampasa'i polè ri makkunraièro, nainappa ritiwi lao ri Allataala sibawa ri yolona kadèra arajan-Na. 6 Nalarina iyaro makkunraiè lao ri padang kessi'è, ri onrong iya puraè ripassadiyangengngi ri Allataala. Ri onrongngèro ripiyarai matu 1260 esso ittana. 7 Nainappa ri surugaè kajajiyanni musuè. Mikhaèl silaong malaèka-malaèka'na mammusu mèwai iyaro nagaè. Na iyaro nagaè ribantui ri malaèka-malaèka'na, mèwai Mikhaèl. 8 Iyakiya ricaui iyaro nagaè. Alèna sibawa sining malaèka'na dè'na naripalalo monro ri surugaè. 9 Iyaro naga battowaè riyabbèyanni massu! Alèna ritu iyaro ula macowaè iya riyasengngè Ibillisi' iyarè'ga Sètang, iya bellèèngngi sininna linoè. Ribuwanni ri linoè silaong sininna malaèka'na. 10 Nainappa uwèngkalinga sadda battowaè ri surugaè makkeda, "Makkekkuwangngènna wettunna Allataala passalama'i umma'-Na! Makkekkuwangngènna wettunna Allataala mappaitangngi akuwasan-Na selaku Arung! Makkekkuwangngè Arung Pappassalama' iya najjanciyangngèro nappaitang toni akuwasan-Na! Saba' iya teppuèngngi saudara-saudarata ri yolona Allataala esso wenni, purani ripassu polè ri surugaè. 11 Saudara-saudarata purani nacau iyaro sibawa darana iyaro Ana' Bimbala'è, enrengngè nasibawang biritta tongengngè iya polè ri Allataala iya nabbirittangngè mennang. Macenning atinna makkarobangengngi nyawana narapi matè. 12 Rimakkuwannanaro, sitinajai surugaè enrengngè sininna iya monroè ri lalenna, mariyo-riyo! Iyakiya cilakai linoè sibawa tasi'è, saba' nonnoni Ibillisi' ri iko sibawa cai iya battowa senna'è, nasaba naissengngi makkedaè cèddè mani wettunna monro. " 13 Wettunna namaingeki iyaro nagaè makkedaè purani ribuwang ri linoè, mammulani nalellung makkunrai iya puraènna jajiyang ana' worowanèro. 14 Iyakiya iyaro makkunraiè purani riwèrèng duwa panni kuwajang iya battowaè, kuwammengngi naluttu lao ri onronna ri padang kessi'è, ri onronna matu ripiyara tellu sitengnga taung ittana, massala polè ri nagaè. 15 Na iyaro nagaè napporokenni polè ri bawana maèga senna' uwai lao ri makkunraièro, untu' malirengngi. 16 Iyakiya tanaè bantui iyaro makkunraiè; natimpa'i bawana linoè nanaemme'i uwai iya massuè polè ri bawana nagaèro. 17 Namacai senna'na iyaro nagaè lao ri makkunraièro, angkanna lao gasai wijanna lainna iyaro makkunraiè, iyanaritu sininna tau iya turusiyèngngi sining parèntana Allataala, enrengngè iya mabbèrè asabbiyang passalenna Yèsus sibawa akuwasan-Na. 18 Natettong iyaro nagaè ri wiring tasi'è.

Wahyu 13

1 Nainappa uwita sikaju olokolo' mompo polè ri laleng tasi'è. Mappunnaiwi seppulo tanru' enrengngè pitu ulu. Ri tungke' tanru'na engka sèddi passigera', sibawa ri tungke' ulunna tarokii sèddi aseng pappakatuna lao ri Allataala. 2 Olokolo' iya uwitaèro tappana pada-padai macang tutul-è, sibawa ajèna pada-pada ajè beruwangngè, enrengngè pannyoro'na pada-pada pannyoro' singaè. Nainappa iyaro olokolo'è riwèrèngngi ri nagaèro awatangeng ri alèna, sibawa kadèra arajanna enrengngè akuwasanna iya battowaè. 3 Sèddi polè ri yelle'na iya pitu ulunna olokolo'èro paitai pada-pada lo maseroè, iyakiya iyaro loè sauni. Sininna linoè maccowèriwi iyaro olokolo'è sibawa marasa hèrang. 4 Sibawa nasappai mennang iyaro nagaè saba' purani nawèrèng akuwasanna lao ri olokolo'èro. Nanasompai mennang iyaro olokolo'ètto. Makkedai mennang, "Dè'gaga iya pada-padaè sibawa olokolo'èwè! Dè'gaga iya mullè mammusu mèwai!" 5 Iyaro olokolo'è ripalaloi powadai gau'-gau' iya matempo senna'è sibawa pakatunai Allataala. Ripalaloi mapparènta patappulo duwa uleng ittana. 6 Nainappa mappammula pakatunai Allataala, enrengngè asenna Allataala. Makkuwatoro onrong appèrumanna Allataala, enrengngè iya maneng monroè ri surugaè napakatuna towi. 7 Ripalalo towi mèwai umma'na Allataala enrengngè caui mennang. Enrengngè akuwasang ri yasè'na sininna sukuè, wanuwaè, basaè, sibawa bangsaè riyabbèrèyang lao ri alèna. 8 Iyaro olokolo'è risompai matu ri sininna tau iya tuwoè ri yasè'na linoè, sangadinna sining tau iya asennaè purani riyoki riwettu dè'napa naripancaji linoè, ri laleng kitta'na tau tuwoè appunnangenna Ana' Bimbala' iya puraè rigèrè. 9 Rimakkuwannanaro, rèkko mullèi marèngkalinga, èngkalingai iyaè birittaè: 10 "Tau iya harusu'è ritawang, pasti ritawangngi matu. Sibawa tau iya harusu'è riyuno sibawa peddang, pasti riyunoi matu sibawa peddang. Iyanaro saba'na umma'na Allataala harusu'i sabbara sibawa matinulu. " 11 Nainappa uwita sikaju olokolo' laing mompo polè ri laleng linoè. Mappunnaiwi duwa tanru' pada-pada tanru' ana' bimbala'è. Saddanna pada-padai sadda nagaè. 12 Pakèi akuwasang iya battowaè iya nalolongengngè polè ri olokolo'èttoro, ri yolona olokolo' mammulangngè. Sininna linoè sibawa sininna iya monroè ri yasè'na, napassai sompai olokolo' mammulangngèro, iya majjappaènna lona iya maseroè. 13 Olokolo' iya maduwaèro pakangkai gau'-gau' makalallaing iya battowaè. Ri yolona sininna tauwè naèbbui apiè nonno ri linoè polè ri langiè. 14 Sibawa sininna tau iya tuwoè ri linoè nabengnguwangngi sibawa sining anu makalallaingngè iya weddingngè naèbbu ri yolona olokolo' iya mammulangngèro. Sibawa nasuro manengngi mennang patettong sèuwa dato'-dato' polè ri olokolo'èro iya puraè nalo peddang, iyakiya tette'i tuwo. 15 Iyaro olokolo' maduwaè ripalaloi mabbèrè nyawa lao ri dato'-dato'èro, angkanna iyaro dato'-dato'è naullèi mabbicara sibawa mpunoi sininna tau iya dè'è namaèlo sompai. 16 Sininna tauwè, battowa sibawa baiccu, sugi sibawa kasiyasi, ata sibawa tau maradèka', ripassa ri olokolo'èro untu' tarima tanrang ri lima ataunna mennang iyarè'ga ri linrona mennang. 17 Dè' muwi sèddi tau mullèi melliwi iyarè'ga balu'i sèuwaè, rèkko dè' nappunnaiwi iyaro tanrangngè, iyanaritu asenna muto iyaro olokolo'è, iyarè'ga nomoro iya pannessaèngngi asengngèro. 18 Kuwaè parellu engka pangissengeng. Tau iya mapanrè naullèi bilangngi bettuwanna iyaro nomoro'na olokolo'è, saba' iyaro nomoro'è iyanaritu asenna sèddiè tolino. Nomoro'na iyanaritu 666.

Wahyu 14

1 Nainappaka makkita, napaitana iyaro Ana' Bimbala'è tettong ri yasè'na Bulu-bulu Sion. Nasibawang Alèna engka 144. 000 tau iya limannaè tungke'-tungke' taroki asen-Na sibawa asenna Ambo'-Na. 2 Nainappaka mèngkalinga sèuwa sadda polè ri langiè memmu pada-pada uwai jompi iya battowaè sibawa dalenrung guttuè iya maseroè. Iyaro saddaè riyèngkalingai pada-pada oni parèwa oni-oni polè ri pakkacapiè iya mattengngangngè paoniwi kacapinna. 3 Ri yolona kadèra arajangngè, sibawa iya eppa mahlu'è enrengngè sining pamimpingngè ri mattulilinna kadèra arajangngèro, iya 144. 000 tauwèro makkèlongngi sèddi èlong iya mabaruè. Iyaro èlongngè dè' naullèi magguruiwi muwi sèddi tau ri lainnaè 144. 000 tauwèro, iya puraè ripaleppe polè ri linoè. 4 Mennang sining tau iya tette'è mapaccing pada-pada parawangngè, nasaba dè' nasisumpung sibawa makkunraiè. Naccowèriwi mennang iyaro Ana' Bimbala'è kègi-kègi lao. Polè ri yelle'na sininna rupa tauwè, mennang ritu iya puraè ripaleppe selaku pakkasuwiyangeng mammulangngè lao ri Allataala sibawa lao ri Ana' Bimbala'è. 5 Dè' naengka mennang nabbellè, sibawa dè'gaga cellana muwi cèddè. 6 Nainappa uwita sèddi malaèka' laing iya luttuè matanrè ri langiè. Iyaro malaèka'è tiwii biritta passalenna Karèba Madècèng iya mannennungengngè untu' ripalettu lao ri tolinoè ri linoè; iyanaritu lao ri tungke'-tungke' bangsa, suku, basa sibawa wanuwa. 7 Iyaro malaèka'è gorai sibawa sadda battowaè, "Etauko ri Allataala, sibawa pojiwi arajan-Na! Saba' wettunna Allataala madèlèkiwi tolinoè. Sompai Alèna iya pancajiyèngngi langiè, linoè, tasi'è sibawa sininna mata uwai. " 8 Malaèka' iya maduwaè maccinrolaiwi malaèka' iya mammulangngè nagorato, "Sempè'ni! Kota Babèl iya battowaè sempè'ni! Purani naèbbu sininna bangsaè mancaji mabo' sibawa uwai anggoro -- iyanaritu anggoro polè ri napessu pappangaddinna!" 9 Malaèka' matelluè maccinrolaiwi iya duwa malaèka'èro, nagorato sibawa sadda iya maloppoè, "Tau iya sompaèngngi iyaro olokolo'è sibawa dato'-dato'na, enrengngè mappunnaiwi tanranna iyaro olokolo'è ri linrona iyarè'ga ri limanna, 10 iyaro tauwè mènungngi matu anggoro'na Allataala, iyanaritu anggoro cai-Na iya puraè natiri' ri laleng onron-Na, tenrikurangi muwi cèddè! Sininna iyaro tauwè risissai matu ri laleng apiè sibawa belèrangngè ri yolona sining malaèka' mapaccingngè sibawa ri yolona Ana' Bimbala'èro. 11 Rumpunna api iya sissaèngngi sining tauwèro maddumpui matu matteru lettu mannennungeng. Esso wenni dè' appèsaunna mennang risissa, iyanaritu mennang iya sompaèngngi olokolo'èro sibawa dato'-dato'na, sininna tau iya mappunnaiyè tanrang aseng olokolo'èro. " 12 Ri laleng gau'èwè umma'na Allataala, iya matinuluè ri parènta-parèntana Allataala enrengngè matinulu ri Yèsus, parellui mancaji sabbara. 13 Nainappa uwèngkalinga sadda polè ri surugaè makkeda, "Okii iyaè: Mappammulai makkekkuwangngè masennangngi tau iya matè ri wettu natumaninginna mupa Puwangngè!" Nappèbali Rohna Allataala, "Tongeng! Mappèsauwi matu mennang majjama laddè', nasaba wassèlè' attumaningenna tuli sibawangngi matu mennang. " 14 Nainappa makkitaka, napaitana sèuwa ellung iya maputè. Ri yasè'na ellungngèro tudangngi sèddi tau iya paitaè samanna pada tolinoè. Ri ulun-Na engka sèddi passigera' ulaweng, sibawa ri liman-Na engka sèddi kandao iya matarengngè. 15 Nainappa sèddi malaèka' laing massu polè ri Bolana Allataala. Nasibawang sadda iya battowaè, gorani lao ri iya tudangngè ri yasè'na ellungngèro, "Akkani iyaro kandao-Mu sibawa èngngalani makkekkuwangngè, saba' wettunna untu' mèngngala; matasa'ni linoè untu' riyèngngala!" 16 Nainappa iya tudangngè ri yasè'na ellungngèro massangkingngi kandao-Na lao ri linoè, nariyèngngalana linoè. 17 Nainappa uwita sèddi malaèka' iya laingngèssi massu polè ri Bolana Allataala ri surugaè. Makkatenning towi sèddi kandao iya matarengngè. 18 Purairo, sèddi malaèka' laing, iya makuwasaiyèngngi apiè, massu polè ri mèzbaè. Nasibawang sadda iya maloppoè gorai lao ri malaèka' iya makkatenningngè kandao iya matarengngèro, "Assangkinni kandaomuro namurette'i buwa-buwa pong anggoro'è ri linoè, nasaba matasa'ni buwa-buwana!" 19 Nanassangkinni kandaona iyaro malaèka'è ri linoè nanakandaowi buwa-buwa anggoro'è polè ri batanna, nainappa nappèyang ri laleng apparakeng anggoro caina Allataala iya luwangngè. 20 Iyaro buwa-buwa anggoro'è ripara'i ri saliweng kota, napolè ri apparakengngèro massolo'ni daraè pada-pada saloè, bèlana tellu ratu kilo, sibawa lamunna mawè' duwa mètèrè.

Wahyu 15

1 Nainappa uwita ri langiè sèuwa iya makalallaingngè sibawa dè'gaga padanna serona. Engka pitu malaèka' sibawa pitu abala iya paccappurengngè. Iyanaè paccappurenna Allataala tuppa'i cai-Na. 2 Purairo uwitani sèuwa iya paitaè pada-pada tasi' kacaè sicampuru' api. Uwita towi sining tau iya cauèngngi olokolo'è sibawa dato'-dato'na, sibawa pacau lao ri tau iya asennaè ritanrangi sibawa nomoro'. Sining tau iya pacauènnaro tettongngi ri wirinna tasi' kacaè nanakkatenning towi kacapi iya nabbèrèyangngè Allataala lao ri mennang. 3 Sibawa makkèlongngi mennang èlonna Musa, atanna Allataala, enrengngè èlonna Ana' Bimbala'è. Makkuwaiyè oninna, "Puwang, Allataala Pommakuwasaè, temmaka loppona sibawa makalallainna sining pangkaukem-Mu! Arunna sininna bangsaè, temmaka adèlè'na sibawa tongenna sining tindakem-Mu! 4 Nigana dè' namètau ri Idi, Puwang? Nigana dè' namaèlo mabbirittangngi arajam-Mu? Iko bawang ritu mapaccing. Sininna bangsaè polèi matu sompa-Ko nasaba sining tindakam-Mu iya adèlè'è purani naita sininna tauwè. " 5 Purairo uwitani Bolana Puwangngè ri surugaè tattimpa, na Kèmana Puwangngè engkai ri lalenna. 6 Nainappa iya pitu malaèka'è sibawa iya pitu abalaèro polè ri Bolana Allataala. Pakèyanna mennang polèi ri kaing lènang iya mapaccingngè sibawa lala'-lala'è. Enrengngè pakèi mennang pattongko aro iya riyèbbuè polè ri ulawengngè. 7 Nainappa sala sèddinna polè ri eppaè mahlu'èro mabbèrè lao ri iya pitu malaèka'èro pitu onrong ulaweng iya pennoè sibawa caina Allataala, -- Allataala iya tuwoè mannennungeng. 8 Na iyaro Bolana Allataala pennoi sibawa rumpu polè ri arajanna sibawa akuwasanna Allataala. Sibawa ri wettu engkana mupa abala iya natiwiè iya pitu malaèka'èro dè'pa naccappa, dè'gaga muwi sèddi tau iya mullè muttama ri laleng Bolana Allataala.

Wahyu 16

1 Nainappa mèngkalingaka sadda loppo polè ri laleng Bolana Allataala makkeda lao ri iya pitu malaèka'èro, "Laono sibawa tiri'i lise'na iya pitu onrong caina Allataalaro ri yasè'na linoè!" 2 Laoni malaèka' mammulangngè sibawa tiri'i lise' onronna ri linoè. Naompona sining lettang iya maseroè sibawa maseroè angèttukenna ri sininna tauwè iya mappunnangiyè tanranna olokolo'èro, sibawa sining tau iya sompaèngngi dato'-dato'na. 3 Purairo malaèka' maduwaè tiri'i lise' onronna ri tasi'è. Nancajina uwai ri tasi'è pada-pada darana tau matè, angkanna matèni sininna mahlu' iya tuwoè ri lalenna tasi'è. 4 Nainappa malaèka' iya matelluè tiri'i lise' onronna risining saloè sibawa risining mata uwai, namancaji darana sininna uwaina. 5 Uwèngkalingani malaèka' iya makuwasaiyèngngi uwai makkeda, "Pahukkungeng iya Mupatakkennaè iyanaritu adèlè'i, oh Pommapaccingngè, Allataala iya engkaè, sibawa iya engkaènna! 6 Purani mennang napatabbollong darana umma'na Allataala sibawa darana nabi-nabiè; makkekkuwangngè Muwèbbui mennang mènung dara. Mèmeng sitinajai iyaro untu' mennang!" 7 Nainappa uwèngkalinga sèuwa sadda polè ri mèzbaè makkeda, "Puwang, Allataala Pommakuwasaè, tongeng sibawa adèlè'i sining pahukkungeng Mupatakkennaè!" 8 Purairo malaèka' maeppaè tiri'i lise' onronna ri mata essoè, naripalalona mata essoè mangurengngi tolinoè sibawa pellana iya maseroèro. 9 Riyangurenni tolinoè ri pellana matire'è, angkanna natanroiwi asenna Allataala, iya makuwasaiyèngngi sining abalaèro. Namuni makkuwaro, dè' namaèlo mennang toba' polè ri dosa-dosana sibawa dè' namaèlo pojiwi arajanna Allataala. 10 Nainappa malaèka' malimaè tiri'i lise' onronna ri kadèra arajanna olokolo'èro. Nasininna akkarungeng olokolo'èro mapettanni, naokkoni tauwè lilana nataro peddi. 11 Nainappa natanroiwi mennang Allataala ri surugaè nasaba mapeddii mennang sibawa nasaba sining lettanna. Iyakiya dè'topa mennang natoba' polè risining pangkaukenna iya majaè. 12 Purairo malaèka' maennengngè tiri'i lise' onronna ri Salo Efrat iya battowaèro. Namarakkona iyaro saloè angkanna sining arung polè alauè naullè joppa molai. 13 Nainappa uwita tellu roh maja iya tappanaè pada-pada cuppangngè. Tungke'-tungke' iyaro cuppangngè massui polè ri bawana nagaè, polè ri bawana olokolo'è, enrengngè polè ri bawana nabi palsuè. 14 Mennang ritu sining roh-roh maja iya mèbbuè sining anu makalallaingngè. Iya telluro roh-è laowi ri sininna arungngè ri sininna linoè sibawa paddeppungengngi mennang untu' mammusu ri Esso iya battowaè, iyanaritu Esso polè ri Allataala Pommakuwasaè. 15 "Engkalingai! Polè-Ka pada-pada pangaè! Masennangngi tau iya tette'è sadiya sibawa jagaiwi pakèyanna, angkanna dè' najoppa sibawa mallusu-lusu sibawa mancaji masiri ri yolona tau maègaè!" 16 Nainappa iyaro sining roh-è paddeppungengngi iyaro sining arungngè ri onrong iya riyasengngè Harmagedon ri laleng basa Ibrani. 17 Purairo malaèka' mapituè tiri'i lise' onronna ri yelle'è. Nariyèngkalingana sadda iya maloppoè polè ri kadèra arajangngè ri Bolana Allataala, iya makkedaè, "Tèpuni!" 18 Nakajajiyanna billa'è siyanrè-anrè sibawa oni guttuè maddalenrung enrengngè marung, kuwaèttopa mpèwang tanaè iya maseroè. Dè' naengka nakajajiyang mpèwang tana pada-padaèro sipongenna ripancaji rupa tauwè. Iyanaè mpèwang tana iya kaminang maseroè! 19 Kota iya battowaèro mareppa'ni mancaji tellu bagiyang, naancuru' tona kota-kotana sininna wanuwaè ri linoè. Nainappa naèngngeranni Allataala matu Babèl iya battowaèro. Na Allataala mèbbui mènung anggoro polè ri onrong anggoro'na Allataala -- iyanaritu anggoro cai-Na iya malluwa'-luwa'è. 20 Teddèng manengngi puloè, sibawa sininna buluè lennye toni. 21 Bosi èse' battowaè, iya tungke'-tungke'è sittane limappulo kilo, sempè' polè ri langiè geppai sining tauwè. Nanatanroini mennang Allataala nasaba abala bosi èse' masero senna'èro.

Wahyu 17

1 Purairo sala sèddinna tau polè ri iya pitu malaèka' iya makkatenningngè pitu onrongngèro laowi ri iyya sibawa makkeda, "Laono mai, maèloka paitakko pèkkugi iyaro cakkuribang battowaè rihukkung matu, iyanaritu kota battowaèro iya ripatettongngè ri seddèna sining saloè! 2 Sining arung linoè siyappangaddingngi sibawa alèna, sibawa pabbanuwana linoè mabo'i nasaba mènungngi anggoro appangaddinna. " 3 Nainappa nakuwasaika Rohna Allataala, sibawa iyaro malaèka'è natiwika ri padang kessi'è. Kuwaniro mitaka sèddi makkunrai tudang ri yasè'na sèddiè olokolo' iya makellengngè bulunna, sibawa iya riyarokiriyè penno sibawa aseng-ngaseng pappakatuna lao ri Allataala. Iyaro olokolo'è mappunnaiwi pitu ulu sibawa seppulo tanru'. 4 Iyaro makkunraiè mabbaju colli paowi sibawa makelleng; enrengngè ribèlo-bèloi sibawa parèwa-parèwa ulaweng, paramata-paramata, sibawa mutiyara. Ri limanna makkatenningngi sèddi mangko' ulaweng iya pennoè sibawa gau'-gau' majaè sibawa macarèpaè, wassèlè'na appangaddingenna. 5 Ri linrona tarokii sèuwa aseng iya mappunnaiyè bettuwang rahasiya. Iyaro asengngè iyanaritu "Babèl Iya Battowaè, indo'na sininna cakkuribangngè sibawa sining tau maja ampè ri linoè. " 6 Nainappa uwita iyaro makkunraiè mabo'i sibawa darana umma'na Allataala enrengngè darana sininna tau iya riyunoè nasaba matinului lao ri Yèsus. Wettukku mitai iyaro makkunraiè, mancaji tahhèrang-hèrakka. 7 Nainappa makkeda iyaro malaèka'è lao ri iyya, "Aga saba'na mutahhèrang-hèrang? Madècèngengngi upaissengiko rahasiyana iyaro makkunraiè sibawa rahasiyana olokolo' iya natonangiyè, iyanaritu iya mappunnaiyè pitu ulu sibawa seppulo tanru'. 8 Iyaro olokolo'è engka naengka natuwo riyolo, iyakiya makkekkuwangngè dè'na natuwo. Cinampe'pi nassu matu polè ri pepping amatèngngè enrengngè nalao matu mattuju ri abinasangngè. Sining tau iya tuwoè ri linoè riwettu dè'napa naripancaji linoè iya asennaè dè' nariyoki ri laleng Kitta'na Tau Tuwoè, iyaro sining tauwè hèrangngi matu rèkko naitai iyaro olokolo'è. Saba' iyaro olokolo'è engka naengka natuwo riyolo. Makkekkuwangngè dè'na natuwona, iyakiya maèloi mompo paimeng. 9 Ri laleng gau'èwè parellu engka pangissengeng sibawa pappèjeppu. Iyaro pituè ulu iyanaritu pitu bulu-bulu; iyanaritu bulu-bulu onronna iyaro makkunraiè tudang. Sibawa iyaro pituè ulu iyatona iyanaritu pitu arung: 10 lima polè ri mennang sempè'ni, sèddi mapparènta mupi, naiya sèddiè dè'pa napolè. Rèkko polèi matti, harusu'i mapparènta cinampe' bawang. 11 Sibawa olokolo' iya engkaè naengka natuwo riyolo, iyakiya makkekkuwangngè dè'na natuwona, iyanaritu arung maaruwaè. Sala sèddinna towi polè ri iyaro arung pituè, iya makkekkuwangngè mattengngang mattuju lao ri abinasangngè. 12 Seppulo tanru' iya muwitaèro iyanaritu seppulo arung iya dè'èppa nappammula mapparènta. Iyakiya riwèrèngngi matu akuwasang untu' mapparènta selaku arung silaong iyaro olokolo'è sijang ittana. 13 Iya seppulo arungngèwè iya manenna mappunnaiwi akkatta iya padaè; iya manenna mennang nabbèrèyangngi awatangenna sibawa akuwasanna lao ri olokolo'èro. 14 Mammusui matu mennang mèwai iyaro Ana' Bimbala'è. Iyakiya iyaro Ana' Bimbala'è silaong sining ana' gurun-Na iya matinuluè iya puraè Naobbi sibawa Napilèro nacaui matu iyaro sining arungngè, nasaba Alèna ritu Puwanna sininna puwangngè, enrengngè Arunna sininna arungngè. " 15 Makkeda towi iyaro malaèka'è, "Uwai iya muwitaèro, onronna cakkuribangngè tudang, iyanaritu bangsa-bangsaè, sining ra'ya'è, sining wanuwaè sibawa sining basaè. 16 Seppulo tanru' iya muwitaè sibawa iyaro olokolo'è nabenciwi matu iyaro cakkuribangngè. Narampasa'i matu sininna sèuwa-sèuwaè iya nappunnaiyè, sibawa naèbbui alèna mallusu-lusu. Nanrèi matu mennang jukuna enrengngè napaccappui sibawa api. 17 Saba' Allataala pura pakèdoi atinna untu' pajoppai rancanana Allataala. Allataala mèbbui atinna siyempe untu' mabbèrèyangngi akuwasanna lao ri olokolo'èro, kuwammengngi na iyaro olokolo'è mapparèntai narapi kajajiyang aga iya napowadaè Allataala. 18 Makkunrai iya muwitaèro iyanaritu kota battowaè, iya parèntaèngngi sining arungngè ri linoè. "

Wahyu 18

1 Purairo uwitani sèddi malaèka' laing nonno polè ri surugaè. Mappunnaiwi akuwasang iya battowaè, sibawa tappana mèbbui sininna linoèwè mancaji macakka. 2 Nasibawang sadda iya battowaè, gorai, "Sempè'ni! Sempè'ni Babèl battowaè! Makkekkuwangngè mancajini onronna sining sètangngè sibawa sining roh majaè. Ri lalenna tuwoi sininna rupanna manu'-manu' iya najisi'è sibawa iya nacèccè tauwè. 3 Saba' sininna bangsaè purani naènung anggoro napessu appangaddinna. Sining arunna linoè siappangaddingngi, sibawa sining padangkangngè ri linoè mancaji sugii polè ri napessunna iya dè'è narikuwasairo. " 4 Nainappa uwèngkalinga sadda laing polè ri surugaè makkeda, "Massuno umma'-Ku! Massuno polè ri lalenna! Aja' muwaccowèriwi dosa-dosana, sibawa maccowè tanggungngi pahukkungenna! 5 Saba' sitenre-tenre'ni dosana lettu ri langiè, sibawa naèngngerangngi Allataala jana matu. 6 Gaukenni pada-pada pura nagaukekko; wale'ni leppe' wèkkaduwa untu' iya maneng iya puraè napogau'. Lisekiwi mangko'na sibawa ènungeng iya wèkkaduwaè lebbi maseriè naiya ènungeng iya napassadiyangengngèkko. 7 Wèrèngngi anrasa-rasang sibawa saraninnawa iya padaè ègana sibawa arajangngè sibawa asugireng iya nabbèrèyangngè lao ri alèna muto. Saba' tuli makkedai bawang lao ri alèna, 'Iyya'naè arung makkunrai iya mapparèntaè! Tenniyaka janda; dè' upèneddingiwi matu atassinnaurengngè!' 8 Nasaba gau'èro, na ri laleng si esso bawang nanakennai matu abala -- lasa, atassinnaureng, sibawa akkadèreng. Enrengngè riyangurenngi matu sibawa api, saba' Puwang Allataala iya madèlèkiyèngngiro makuwasa senna'i. " 9 Sining arung linoè iya maccowèè ri laleng sining pangkaukeng appangaddingngè sibawa napessunna makkuwaèro nateringiwi matu sibawa nawatingiwi kotaèro rèkko naitai mennang mallaso rumpuè polè ri api iya paangurengngè. 10 Tettongngi matu mennang polè mabèla saba' mètaui mennang nakenna anrasa-rasanna. Makkedai mennang, "Aduh, tenniya culè-culè acilakanna kota iya tassebbo'èwè -- kota Babèl iya mawatangngè! Ri laleng sijang bawang purani ripajoppa pahukkungemmu!" 11 Sining padangkang ri linoè teri towi sibawa mabbaratai nasaba makkunraièro, saba' dè'na muwi sèddi tau iya melliyèngngi barab-barang dangkangenna. 12 Dè'gaga melli ulaweng, pèra', paramata, enrengngè mutiyarana; makkuwatoro kaing lènang, kaing colli pao, sabbè, sibawa kaing cella cowa; sininna rupanna aju iya majarangngè rilolongeng, barab-barang polè ri gadingngè enrengngè polè ri aju iya masuliè, polè ri tembagaè, bessiè, sibawa puwalangngè; 13 oli aju cenning, rampa-rampa, setanggi, mur sibawa kamennyang; anggoro sibawa minnya, labbu sibawa gandong; saping sibawa bimbala', anyarang sibawa karèta, ata-ata, mala muwi nyawa tolino. 14 Makkeda sining padangkangngè lao ri makkunraièro, "Sininna iya muwacinnaiyè muwappunnai, dè'na gagana, sibawa sininna asugirengngè sibawa ammingkikengngè teddènni. Dè'na mulolongenni paimeng!" 15 Sining padangkang iya sugiènna nasaba dangkangngi ri kotaèro tettongngi matu polè mabèla, saba' mètaui mennang nakenna anrasa-rasanna. Teriwi matu mennang sibawa mabbarata, 16 nainappa makkeda, "Aduh, tenniya pato acilakanna kota iya tassebbo'èwè! Biyasana pakèi pakèyang lènang, kaing colli pao sibawa kaing cella cowa; biyasana pennoi sibawa parèwa ulaweng, paramata, sibawa mutiyara! 17 Iyakiya ri laleng sijang bawang, ateddèngenni sininna asugirennaro!" Sininna nakodaè, lurengngè, sibawa ana' kappala'è enrengngè sininna tauwè iya assappa-sapparennaè ri tasi'è, tettongngi polè mabèla. 18 Sibawa gora ri wettunna mennang naita rumpuè maddumpu polè ri apiè iya tunuèngngi kotaèro. Gorani mennang, "Dè' naengka kota laingngè pada-pada kota iya battowaèwè!" 19 Nanassiyamporenna mennang awu ri ulunna selaku tanrang mabbarata, nainappa teri sibawa kelli-kelli, "Aduh, tenniya pato acilakanna kota iya battowaèwè! Asugirenna pura mèbbui sininna tauwè iya mappunnaiyè kappala-kappala ri tasi'è mancaji sugi! Iyakiya ri laleng sijang bawang, ateddèngenni sini-sininnaè. " 20 Eh suruga, akkèrennuno nasaba ancurukenna kotaèro! Eh umma' Allataala, rasul-rasul sibawa nabi-nabi, akkèrennuno! Saba' Allataala pura hukkungngi selaku pamale'na aga iya puraè napogau' lao ri iko! 21 Purairo, sèddi malaèka' iya porè makka sèddi batu -- silloppo batu allèlurengngè iya battowaè -- nainappa naggenrungeng ri lalenna tasi'è sibawa makkeda, "Makkuwaniyè carana kota Babèl iya tassebbo'èro maèlo riyaggenrungeng sibawa masero, angkanna dè'na nariruntu paimeng. 22 Oninna oni-oniè polè ri pakkacapiè, polè risining pakkèlongngè, polè ri passulingngè sibawa polè ripasseppung tarompè'è, dè'na nariyèngkalinga matu ri lalemmu! Dè' tona matu sèddi tau pajjama-jama mapanrè kuwaro, sibawa oni batu allèlurengngè dè'na nariyèngkalinga matu. 23 Dè'na naitai matu tauwè tappa lampuè ri lalemmu; sibawa dè'tona matu nariyèngkalinga arowaseng pèsta abottingengngè kuwaro. Sining padangkammu iyanaritu sining tau iya kaminang mariyoloè ri linoè, sibawa nasibawang sining pangissengeng mappalennye'-lennye'è nabengnguwangngi sininna bangsaè ri linoè!" 24 Rihukkungngi Babèl saba' ri laleng kotaèro rilolongenni darana nabi-nabiè, darana umma'na Allataala -- rippe'na darana sininna tauwè iya puraè riyuno ri yasè'na linoè.

Wahyu 19

1 Purairo uwèngkalingani sèuwa sadda iya pada-padaè sadda merunna tau maègaè polè ri surugaè iya gora-goraè, "Pojiwi Allataala! Allataalata iyanaritu Allataala iya mappassalama'è; Allataala iya marajaè sibawa makuwasaè! 2 Adèlè'i pangadèlèken-Na sibawa mapanrèi! Purani napatakkenna pahukkungengngè ri yasè'na cakkuribang iya battowaè, iya solangiyèngngi linoè sibawa appangaddinna. Allataala pura hukkungngi iyaro cakkuribangngè, saba' naunoi ata-atanna Allataala. " 3 Nainappa iyaro saddanna tau maègaè gorasi, "Pojiwi Allataala! Rumpunna api iya mangurengngengngi kota battowaèro maddumpuni matu dè' nappèsau!" 4 Na iya duwappulo eppa pamimpingngè sibawa iya eppa mahlu' iya mattulilingiyèngngi kadèra arajangngèro tassulunni sibawa sompai Allataala iya tudangngè ri yasè'na kadèra arajangngè. Makkedai mennang, "Aming! Pojiwi Allataala!" 5 Nainappa riyèngkalingani polè ri kadèra arajangngèro oni sadda iya makkedaè, "Pojiwi Allataala, èh sininna atanna Allataala, sibawa sininna tauwè -- baiccu battowa -- iya sompaèngngi Allataala!" 6 Purairo uwèngkalingani sèuwa pada-pada sadda sikonrong tau iya maèga senna'è; oninna pada-pada bombang iya mangappo'è sibawa pada-pada guttu iya maddalenrungngè. Uwèngkalingai mennang makkeda, "Pojiwi Allataala! Saba' Puwang, Allataalata Iya Pommakuwasaèro mapparèntani makkekkuwangngè! 7 Laono mai tamariyo-riyo sibawa marennu; laono mai tapojiwi arajan-Na! Saba' narapini esso abottingenna iyaro Ana' Bimbala'è, sibawa bottin-Na sadiyani untu' akawingen-Na. 8 Purani riwèrèng pakèyang lènang iya lala'-lala'è untu' napakè. " (Iyaro pakèyang lènangngè iyanaritu sining pangkaukeng makessingngè iya napogau'è umma'na Allataala. ) 9 Nainappa makkeda iyaro malaèka'è lao ri iyya, "Okii iyaè: 'Masennangngi tau iya riundangngè lao ri pèsta akawingenna iyaro Ana' Bimbala'è. ' " Nainappa iyaro malaèka'è tambai towi, "Iyanaè biritta tongeng polè ri Allataala. " 10 Tassulunna ri yolona iyaro malaèka'è maèlo sompai, iyakiya makkedai lao ri iyya, "Aja'! Aja' musompaka, sompai Allataala! Saba' iyya atato pada-pada iko enrengngè pada-pada sininna saudaramu iya makkatenning masse'è ri asabbiyanna Yèsus!" Saba' asabbiyanna Yèsusnaro iya panurungengngèngngi tau iya mabbotoè. 11 Nainappa uwita tattimpa surugaè, nainappa paita sikaju anyarang putè. Pakkinnyaran-Na riyasengngi Iya Matinuluè sibawa Iya Tongengngè. Adèlè'i ri laleng pettuiwi pahukkungengngè sibawa ri laleng musu iya Napogau'è. 12 Matan-Na pada-pada luwa' apiè sibawa ri ulun-Na pakèi maèga passigera'. Ri Alèna tarokii sèuwa aseng; na banna Alèna bawang missengngi iyaro asengngè. 13 Jumba iya Napakè purani riremmè ri laleng daraè. Sibawa riyasengngi "Saddanna Allataala". 14 Tentarana surugaè maccowèriwi sibawa makkinnyarangiwi sining anyarang putè, sibawa mappakèyang lènang iya maputè mapaccingngè. 15 Polè ri bawa-Na massui sipeppa peddang iya matarengngè nasibawang iyaro peddangngè nacaui matu bangsa-bangsaè, sibawa mapparèntai matu mennang sibawa tekkeng bessi. Napara'i matu anggoro'è ri laleng apparakeng anggoro caina Allataala Iya Pommakuwasaè. 16 Ri jumbana sibawa ri poppan-Na tarokii asengngèwè, "Arunna sininna arungngè, sibawa Puwanna sininna puwangngè. " 17 Nainappa uwita sèddi malaèka' tettong ri yasè'na matanna essoè. Nasibawang sadda iya battowaè gorai lao ri sininna manu'-manu' iya luttuè ri yelle'è, "Laono mai maddeppungeng untu' hadèrèkiwi pèsta battowaè iya naramè-ramèiyè Allataala! 18 Laono mai manrèi jukuna sining arungngè, jukuna sining pallimaè, sibawa jukuna sining pahlawangngè; laono mai manrèi jukuna sining pakkinnyarang anyarangngè sibawa jukuna sining anyaranna enrengngè jukuna sininna rupa tauwè, battowa sibawa baiccu, ata sibawa tau maradèka'!" 19 Nainappa uwita iyaro olokolo'è, sibawa sining arung linoè enrengngè tentarana mennang, maddeppungengngi untu' mammusu mèwai iya tonangiyèngngi anyarang putèro sibawa tentara-Na. 20 Na iyaro olokolo'è ritikkenni silaong nabi palsuè iya mèbbuèngngi sining anu makalallaingngè ri yolona olokolo'èro. (Nasibawang sining anu makalallaingngèro iyaro olokolo'è bengnguwangngi sining tau iya mappunnaiyè tanrang olokolo'èro, sibawa sining tau iya sompaèngngi dato'-dato'na olokolo'èro. ) Nainappa iyaro olokolo'è sibawa nabi palsuèro riyabbèyang tuwo-tuwo ri laleng tasi apiè iya malluwa'-luwa'è sibawa balèrang. 21 Sibawa riyunoi tentarana sibawa peddang iya massuè polè ri bawana pakkinnyarang anyarang putèro. Napolè tona sining manu'-manu'è manrèi sibawa mallaku-laku jukuna mennang iya riyunoèro.

Wahyu 20

1 Purairo uwitani sèddi malaèka' nonno polè ri surugaè. Ri limanna nakkatenningngi goncinna balorang amatèngngè sibawa sèddi balenggu iya battowaè. 2 Nainappa natikkeng iyaro nagaè, ula macowaè -- iyanaritu Ibillisi'è iyarè'ga Roh Majaè -- sibawa balenggui untu' sisebbu taung ittana. 3 Nainappa iyaro malaèka'è nabuwang iyaro nagaè ri laleng balorang amatèngngè, nainappa nagoncing iyaro peppingngè sibawa nasègèlè', kuwammengngi iyaro nagaè dè'na naullèi bengnguwangngi bangsa-bangsaè sisebbu taung ittana, riwettu dè'napa nacappu. Purairo harusu'i rileppessang untu' wettu iya dè'è namaitta. 4 Nainappa uwita sining kadèra akkarungengngè, sibawa sining tau iya tudangngè risining kadèra arajangngèro riwèrèng kuwasa untu' pettuiwi pahukkungengngè. Uwita towi sining nyawana tau iya puraè rirette ulunna nasaba mabbèrèi mennang asabbiyang passalenna Yèsus, sibawa mappallebbangengngi paseng polè ri Allataala. Iyaro sining tauwè dè' nasompai olokolo'è, iyarè'ga dato'-dato'na. Dè'to mennang naengka natarima tanranna iyaro olokolo'è ri linrona iyarè'ga ri limanna. Natuwona mennang paimeng sibawa mapparènta selaku arung silaong Kristus sisebbu taung ittana. 5 Iyanaè pammulanna ripaoto'na sining tau matè. (Iyakiya sining tau matè laingngè dè' naripatuwo paimeng ri wettu sisebbuè taung ittanaro. ) 6 Masennangngi sining tau iya maccowèè ripaoto' ri pammulannaro. Ritarimai mennang mancaji appunnangenna Allataala. Amatèng maduwaè dè'na namakuwasa lao ri mennang. Mancajiwi matu mennang imang-ngimanna Allataala, sibawa imang-ngimanna Kristus; enrengngè mapparèntai matu mennang silaong Alèna sisebbu taung ittana. 7 Cappunana wettu sisebbuè taunro, rileppessangngi matu Ibillisi' polè ri tarungkuè, 8 nalaona matu bengnguwangngi bangsa-bangsaè iya tassiyaè ri sininna linoè, iyanaritu Gog sibawa Magog. Ibillisi' paddeppungengngi mennang untu' mammusu, sèuwa jumella iya battowa senna'è, singngèga kessi'è ri tasi'è. 9 Natassiyana mennang lao ri sininna linoè, nainappa nakeppung akkèmangenna umma'na Allataala sibawa kota iya Namasèiyè Allataala. Iyakiya nonnoi apiè polè ri langiè nanapaccappui mennang. 10 Nainappa Ibillisi' iya bengnguwangngèngngi mennanro, riyaggenrungengngi muttama ri tasi apiè sibawa balèrangngè. Kuwaniro onronna olokolo'è sibawa nabi palsuèro ribuwang lebbi riyolo. Risissai matu mennang esso wenni lettu mannennungeng. 11 Purairo uwitani sèuwa kadèra arajang putè iya battowaè sibawa Alèna iya tudangngè ri yasè'na. Lennye'i langiè sibawa linoè polè ri yolo-Na, angkanna dè'na napaitana. 12 Sibawa uwitai sining tau matè, baiccu battowa, tettong ri yolona kadèra arajangngèro. Naritimpa'na sining kitta'è. Nainappa sèddi kitta laingngè ritimpa, iyanaritu Kitta'na Tau Tuwoè. Nainappa ripatatteppa pahukkungengngè ri yasè'na sining tau matè, situru pangkaukenna mennang iya riyokiè ri laleng sining kitta'èro. 13 Nainappa nabbèrèyang tasi'è sining tau matè iya engkaè ri lalenna. Amatèngngè sibawa Linona Amatèngngè nabbèrèyang toni sining tau matè iya engkaè ri alèna. Na iyaro sining tau matè ripateppai manenni pahukkungeng situruè pangkaukenna. 14 Nainappa Amatèngngè sibawa Linona Amatèngngè riyaggenrungeng ri laleng tasi apiè. (Iyaè tasi apiè iyanaritu amatèng maduwaè. ) 15 Sining tau iya dè'è nariyoki asenna ri laleng Kitta'na Tau Tuwoè, iyaro sining tauwè ribuwangngi ri laleng tasi apiè.

Wahyu 21

1 Nainappa uwita langi iya baruè sibawa lino iya baruè. Langi mammulangngè sibawa lino mammulangngè teddèng toni, enrengngè lennye'ni tasi'è. 2 Nauwitani iyaro kota mapaccingngè, iyanaritu Yèrusalèm iya mabaruè, nonno polè ri Allataala. Iyaro kotaè purani ripassadiya pada-pada sèddiè botting makkunrai iya ribèlo-bèloiyè untu' duppaiwi bottimpuranè. 3 Nainappa uwèngkalinga sadda polè ri kadèra arajangngèro gora sibawa maloppo, "Makkekkuwangngè onronna Allataala iyanaritu silaongngi tolinoè! Tuwoi matu sibawa mennang, nancaji matu mennang umma'-Na. Alèna Allataala sionrong matu sibawa mennang enrengngè namancaji Allataalana mennang. 4 Nasussui matu sininna uwai mata polè ri matanna. Dè'na gaga matu amatèng; atassinnaureng, teri, iyarè'ga muwi lasa dè'tona gaga. Gau'-gau' iya malaungngè lennye'ni. " 5 Nainappa Alèna iya tudangngè ri yasè'na iyaro kadèra arajangngè makkeda, "Makkekkuwangngè Uwèbbuni sininna mabaru!" Makkeda towi lao ri iyya, "Okii iyaè, saba' iyaè sining ada-adaèwè tongengngi sibawa weddingngi riyatepperi. " 6 Nainappa makkeda, "Tèpuni! Iyya'na ritu mammulang sibawa paccappureng; Iyya'naè Puwang polè ri Pammulanna lettu ri Paccappurenna. Tungke' tau iya madekkaè, Upaènungngi matu cuma-cuma polè ri mata uwai iya mabbèrè atuwong. 7 Tau iya pakalaè natarimai matu iyaro gau'-gau'è polè ri Iyya. Mancaji-Ka matu Allataalana, na alèna matu mancaji ana'-Ku. 8 Iyakiya tau pellorengngè, tau bali'bellaè, tau maja ampè, tau pabbunoè, pappangaddiè, tau iya pakè paddissengeng mappalennye'-lennye'è, passompa barahalaè, sibawa sininna pabbellèngngè, ribuwangngi matu ri laleng tasi apiè sibawa balèrangngè iya malluwa'-luwa'è, iyanaritu amatèng maduwaè. " 9 Sèddi polè ri iya pitu malaèka' iya puraè makkatenningngi sining onrong iya pennoè sibawa iya pitu abala paccappurengngèro laoni ri iyya sibawa makkeda, "Laono mai! Maèloka jellokekko Bottingngè, iyanaritu bainèna Ana' Bimbala'è. " 10 Nanakuwasaina Rohna Allataala, sibawa iyaro malaèka'è natiwika ri coppo'na bulu iya matanrè senna'è. Najellokenna Yèrusalèm, kota mapaccingngèro. Iyaro kotaè nonnoi polè ri surugaè, polè ri Allataala, 11 sibawa mattappa enrengngè arajanna Allataala. Iyaro kotaè millakkillang pada-pada batu paramataè, pada-pada batu baiduri pandangngè iya macinnongngè pada-pada kacaè. 12 Tèmbo' iya mattulilingiyèngngi matanrèi na battowa, sibawa seppulo duwa pintu gerbanna, enrengngè rijagaiwi ri seppulo duwa malaèka'. Risining pintu gerbanna tarokii aseng-ngasenna seppulo duwa suku bangsa Israèliè. 13 Engka tellu pintu gerbang iya mangoloè ri tungke' sulapa': tellu ri alau, tellu ri yattang, tellu ri manorang sibawa tellu ri yajang. 14 Iyaro tèmbo'na kotaè ripatettongngi ri yasè'na seppulo duwa batu pandamèng. Ri batu-batu pandamèngngèro riyokii aseng-ngasenna seppulo duwa rasulna Ana' Bimbala'èro. 15 Malaèka' iya mabbicaraè sibawa iyya'ro mappunnaiwi tekkeng pangukkuru' polè ri ulawengngè, untu' mukkuru'i iyaro kotaè, pintu-pintu gerbanna sibawa tèmbo'na. 16 Iyaro kotaè massulapa eppai -- padai lampèna sibawa sakkana. Na iyaro malaèka'è naukkuru'ni iyaro kotaè sibawa tekkeng pangukkuru'na; na lampèna 2400 kilo; sakka sibawa tanrèna padai lampèna. 17 Wettunna iyaro malaèka'è mukkuru'i tèmbo'na, tanrèna iyaro tèmbo'na enneng pulona mètèrè. Ukkurang iya napakè iyaro malaèka'è iyanaritu ukkurang iya napakè tolinoè. 18 Iyaro tèmbo'na kotaè riyèbbui polè ri batu baiduri pandangngè, na kotana polèi ri ulaweng tulèngngè, macinnong pada-pada kacaè. 19 Iyaro batu-batu pandamènna kotaèro ribèlo-bèloiwi sibawa sininna rupanna batu paramataè. Batu pandamèng iya mammulangngè riyèbbui polè ri batu baiduri pandangngè, iya maduwaè polèi ri batu nilangngè, matelluè polèi ri batu yaku'è, maeppaè polèi ri batu zamrud-è, 20 malimaè polèi ri batu baiduri sèpa'è, maennengngè polèi ri batu dalimaè, mapituè polèi ri batu ratna cempakaè, maaruwaè polèi ri batu pirus-è, maasèraè polèi ri batu topas-è, maseppuloè polèi ri batu krisopras-è, maseppuloè sèddi polèi ri batu lazuwardiè, sibawa maseppuloè duwa polèi ri batu kecubungngè. 21 Iya seppulo duwa pintu gerbanna polèi riseppulo duwa mutiyara, tungke'-tungke' sumpanna riyèbbui polè risèddi mutiyara. Watattanana iyaro kotaè riyèbbui polè ri ulaweng tulèngngè, macinnong pada-pada kaca iya lala'-lala'è. 22 Dè' uwitai Bolana Allataala ri laleng kotaèro, saba' Bolana Allataalana iyanaritu alèna Puwangngè, Allataala Iya Pommakuwasaè, sibawa iyaro Ana' Bimbala'è. 23 Iyaro kotaè dè' naparellu ritappari mata esso iyarè'ga kèteng, saba' arajanna Allataala tappariwi, sibawa iyaro Ana' Bimbala'è iyanaritu lampunna. 24 Joppai matu bangsa-bangsaè ri linoè ri laleng cahayana, sibawa sining arungngè natiwi towi matu asugirenna mennang ri laleng kotaèro. 25 Iyaro sining pintu gerbanna kotaèro tattimpa'i matu puppu esso; dè' naritongko, saba' dè'gaga wenni kuwaro. 26 Arajanna sibawa asugirenna bangsa-bangsaè ritiwii matu ri laleng kotaèro. 27 Iyakiya sining tau iya pogau'èngngi gau'-gau' iya mappakaciddi-ciddi'è iyarè'ga tau iya mabbellè -- rippe'na agi-agi iya najisi'è, dè' sises-siseng nauttama ri lalenna. Iya muttama'è matu banna sining tau iya asennaè taroki ri laleng Kitta'na Tau Tuwoè, kitta'na Ana' Bimbala'èro.

Wahyu 22

1 Najjelloreng towi iyaro malaèka'è lao ri iyya salo iya mabbèrè atuwong uwaina. Iyaro saloè reppe-reppe pada-pada kacaè. Sibawa massolo'i polè ri kadèra arajanna Allataala sibawa Ana' Bimbala'èro, 2 ri tengnga-tengngana watattanaè ri kotaèro. Ri wirinna saloèro, ri wirinna wali-wali engka aju assalenna atuwongngè, iya mabbuwaè wèkkaseppulo duwa sitaung, iyanaritu siseng siuleng. Daunna ripakèi untu' pajjappai bangsa-bangsaè. 3 Ri laleng kotaèro dè' narilolongeng muwi sèddi iya nakennaè tanrona Allataala. Kadèra arajanna Allataala sibawa iyaro Ana' Bimbala'è engkai ri laleng kotaèro. Sining atanna Allataala massompai matu ri Allataala, 4 sibawa naitai tappa-Na. Asenna Allataala riyokii matu ri linrona mennang. 5 Dè' matu mennang napparelluwang lampu iyarè'ga cahaya mata esso, saba' dè'na gaga wenni, sibawa alèna Puwang Allataala tajangiwi matu mennang. Mapparèntai matu mennang selaku arung lettu mannennungeng. 6 Nainappa makkeda iyaro malaèka'è lao ri iyya, "Iyaè sining ada-adaè tongengngi sibawa weddingngi riyatepperi. Puwang Allataala iya mabbèrèyangngèngngi Roh-Na lao ri nabi-nabiè, pura suroi malaèka'-Na untu' majjellokengngi lao risining atan-Na aga iya masitta'è harusu kajajiyang. " 7 Nakkeda Yèsus, "Pènessaiwi iyaè! Masitta'ka maèlo polè. Maupe'i sining tau iya turusiyèngngi ada-ada botoè ri laleng kittaèwè!" 8 Iyya, Yohanès, pura mèngkalingai sibawa mitai iya manennaè. Puranana uwèngkalinga sibawa mitai, tassulunna ri yolona malaèka' iya puraè majjellokengngi iya manennaro lao ri iyya, namaèloka sompai, 9 iyakiya makkedai lao ri iyya, "Aja'! Aja' musompaka! Sompai Allataala! Saba' iyya ata muto pada-pada iko, sibawa pada-pada saudara-saudaramu sining nabiè sibawa sininna tauwè iya turusiyèngngi sining paseng ri laleng kitta'èwè!" 10 Nainappa makkedasi, "Aja' murahasiyakangngi ada-ada botoè ri laleng kitta'èwè, saba' macawè'ni wettunna iya manennaè maèlo kajajiyang. 11 Tau iya majaè, leppessanni matteru pogau'i majaè; tau iya najisi'è, leppessanni matteru panajisi'i alèna; tau iya turusiyèngngi èlona Allataala, leppessanni matteru turusiwi èlona Allataala, sibawa iya tuwoè banna untu' Allataala, leppessanni matteru tuwo banna untu' Allataala. " 12 Nakkeda Yèsus, "Pènessaiwi iyaè! Dè'na namaittana Umaèlo polè sibawa tiwi saro untu' mpale'i tungke' tau situru aga iya puraè napogau'. 13 Iyya'naè pammulang sibawa paccappureng; Iyya'na Puwang polè ri Pammulanna lettu ri Paccappurenna. " 14 Masennangngi sining tau iya sessa'èngngi jumbana gangka mapaccing. Mappunnaiwi mennang ha' manrèi buwa polè ri pong atuwongngè enrengngè muttama ri laleng kotaèro lalo ri pintu gerbanna. 15 Iyakiya sining tau iya pogau'èngngi sining gau' iya matunaè, iya makkègunangngèngngi sining pangissengeng mappalennye'-lennye'è, iya pogau'èngngi pangkaukeng mappangaddiè, iya mabbunoè, iya massompaè barahala, sibawa iya madosaè muwi sibawa ada-ada iyarè'ga sibawa pangkaukeng, sininna tauwèro onronna iyanaritu ri saliwennai kotaèro. 16 "Iyya, Yèsus, pura suroi malaèka'-Ku lao ri iko kuwammengngi nappassengengngi gau'-gau'èwè untu' apentingenna jema'-jema'è. Iyya'naè wija-wijanna Daud; Iyya'naè wèttowing alau iya macakkaèro. " 17 Nakkeda Rohna Allataala sibawa Botting Makkunraiè, "Laono mai!" Tungke' tau iya mèngkalingaèngngi iyaè harusu towi makkeda, "Laono mai!" Niga madekka, sitinajai polè! Sibawa niga iya macinnangiyèngngi, sitinajai mala uwai iya mabbèrè atuwonro sibawa cuma-cuma! 18 Lao ri tungkè tau iya mèngkalingaèngngi ada-ada botoèwè ri laleng kitta'èwè, iyya, Yohanès, mabbèrèyangngi papparèngngerangngèwè: Rèkko tau iya tambaiyèngngi sèuwa ri ada-ada botoèwè, Allataala matu tambaingengngi ri yasè'na tauwèro abala-abala iya ripowadaè ri laleng kitta'èwè. 19 Sibawa rèkko nakurangiwi tauwè sèuwa polè ri ada-ada botoèwè, Allataala matu kurangiwi towi polè ri tauwèro bagiyanna iya ripowadaè ri laleng kitta'èwè -- iyanaritu bagiyanna polè ri aju atuwongngè sibawa polè ri kota mapaccingngèro. 20 Iya palettu'èngngi sininna birittaèwè makkedai, "Tongeng, maèlo-Ka polè masitta'!" Aming! Polèni' oh Puwang Yèsus! 21 Tennapodo Puwang Yèsus mabbèrèyangngi barakka'-Na lao ri sininna umma'na Allataala!