1

1 Gis fabagowanan, ka daga nodyan halig, ka Hampang dan wa ha akwa, dan wa san Diyos. Ka Hampang Diyos yadi. 2 Gis fabagowanan ka Hampang dan wa san Diyos. 3 Ka Hampang in Diyos fangalig no nahalig fagayo fag manga bagay. Ngadi sadik bagay kanhalig idwa ha nahalig iba. 4 Ka Hampang kagfaboyag fagayo. It haboyagan ka yawa kagfayawa has manga taw. 5 Ka yawa igfayawa has basad marom, dapat, nyawa ginahin, ka marom idwag fahapsa ka mayawa. 6 Ginya madi, is Diyos nasogo hastay, has baba daga, sadik ama, it ngayan is Hwan. 7 Is Hwan inbangkad kaarakitay faorongan ka yawa kagfayawa has manga taw, kaarakitay fagayo domog hanggan katiwalat fwayong. 8 Bohonwas Hwan ka yawa. Is Hwan inbangkad kaarakitay mamaorongan lamang tonya fag yawa. 9 Tonya ka yawa orongan ka kabangkad hastay hanggan igfayawa has fagayo fag manga taw istay sas baba daga. 10 Ka Hampang sawas baba daga. Dapat ay, nyawa hanya in Diyos fangalig no nahalig intam daga, ka manga taw sas baba daga idwa nahilala hanya no faktaw. 11 Ka Hampang inbangkad hat sadili banwanan, dapat kat manga kapariho taw idwa natanggap ha hanya. 12 Dapat ay, no kayoday ka natanggap ha hanya, ka manga nasyag ha hanya, hanya nafaangay kitay ta fag imbali in Diyos manga anak. 13 Tonya fag manga taw inbali in Diyos manga anak maskin is Diyos ka kasaya kabali it Ama, idwa kitos anak dararag no kabali ista anak maskin it ama taw ka kasaya anak. 14 Ka Hampang inbali taw, nabanwanan santam faglagan. Mi nalag it kafiyan, kat Ama nadisag hat Anak sadi sadi, orongan hanggan mahoway wa dahol. 15 Is Hwan igfaorongan kawa hanya. Is Hwan igtawag, Tya ngay kangko faglwangon ka kabangkad balingko ginanan, ka dahol man angko it kangayanan, kawa hanya danwa ha akwa gi yapdis hyabi, nyawa hodyan sagaya. 16 Maskin malooy wa dahol it kahowayan, hanyag disag fagaba hantam it kahowayan. 17 Is Mwisis ka nafadonong in Diyos manga togon has taw, dapat is Kiristo Hisos kagfalag has taw no kinday is Diyos orongan, hanggan it malooy fag kahowayan. 18 Idwa ha taw iglag in Diyos. In Diyos Anak sadi sadi, ka sawat Ama akbang fagaba, tonya kagfahilala has manga taw no kinday is Diyos. 19 Ginya madi ka manga fagtahinan Hodyo gis Hirosalim nasogo han Hwan manga fagalan-han-Diyos hanggan in Libi manga hasokfonan tiba, kaarakitay ta omintaw kitay, Ha ginda fag taw? 20 Is Hwan idwa kadalag sagot, nafwayong fiya fiya, Bohonwa aho kan Diyos-natogon-Famawi. 21 Ta naintaw ya hanya, No kitonya, fakta di haw? Ha aw is Iliyas? Is Hwan nasagot, Bohonwas Iliyas aho. Ta naintaw ya domwag, Ha aw kan Diyos fangampang? Is Hwan nasagot, Bohonwa aho yabay. 22 Ta gintaw yapdi, Fakta nga haw? Fwayongan hyami mi ara fomwayong hasagsogo hyami. Kanam sadili fwayongon haw no ginda fag taw? 23 Is Hwan nafwayong, Aho kan Isayas, in Diyos fangampang fagfwayongon noglwang, Aho wa Kagtawag marigon marigon, sas basad fakahyabogan, Fahaslongan in Diyos dalan bato lahawan. 24 Ginya madi ka manga taw ka manga Farisiyo nasogo, 25 naintaw ya domwag, Haw no bohonwa kan Diyos-natogon-Famawi, bohonwa yadis Iliyas, bohonwa yadi kan Diyos fangampang, fakta ka nahalig hyamo ha kangayanan igfatogna manga taw sas danom? 26 Is Hwan nasagot has taw, Ahog fatogna ngay manga taw sas danom, dapat ay, ha akwa sadik taw malindogan sa hayo fagbokngan kati, ham idwa kilala hanya no faktaw. 27 Nyawa hanya goyan man angko indasog, ho kaya manlohas it siyok lapak. 28 Gis nanya fag masohod da Hwan sas banwa Bitanya sas salogan myanit baliwa safa Hordan, san Hwan fagfatognaan manga taw. 29 Nonbago marom is Hwan nalag in Hisos gakbang ha hanya. Is Hwan iglwang, Tya ngay kan Diyos fangafiyan Anak Topa kagfaliyam ka manga ogali dwat sadik baba daga. 30 Tonya wa nga kangko faglwangon ha hayo, ka goyan gingko ginanan fag ama, dapat ay, dahol man angko it kangayanan maskin hanya danwa ha akwa hyabi, nyawa hodyan sagaya. 31 Aho yadi idwa kilala hanya fiya fiya hyabi, dapat ay, ahon bangkad igfatogna manga taw sas danom kaarakitay igfahilala hanya has manga taga Israil. 32 Is Hwan nafaorongan kiti, Aho nalag ka Maliyaw fag Falad gin Diyos banwanan sam tongod, igyokfo hanya kitos salompati, idwa yadi galin gi hanya. 33 Nyawa aho hyabi, hodya kilala hanya fiya fiya, dapat is Diyos kagsogo angko kaarakitay igfatogna manga taw sas danom, hanya danwa nafwayong angko kitay, Ka hyamo lagon aba ka Maliyaw fag Falad it fagyokfowan, idwa yadi malin gi hanya, tonya wa ngay kagfatogna manga taw sas Maliyaw fag Falad. 34 Is Hwan iglwang, Kati in-anod wan. Angko wa mata lagan. Hogfaorongan wa nga kitay to in Diyos wa Anak. 35 Nonbago marom, is Hwan sinya ya ngay, hanggan it katogbong dowa. 36 Is Hwan igbantay in Hisos, is Hisos nogdalan, ginyag lwang, Yabay, tya ngay, kan Diyos Anak Topa. 37 Ginya madi in Hwan katogbong dowa ka nadog it fwayong, natahin in Hisos. 38 Is Hisos no natakfili, nalag kitay ta goyan hanya, naintaw has taw, Kana hayo fagsayahon? Tagsagot in Hisos, Rabi, sida kin haw no goli? Ta noglwang Rabi, it kahologan, Kagfaadal. 39 Is Hisos nasagot, Hawi, tam hanya wan, ham lomag wa araw. Ta natahin in Hisos a, ta nalag kitay sinya no goli. Ka myanit kalibaba wan gis nanya, yakanga ta ngap nigya wa sinya. 40 Insadi ka nadog in Hwan fwayong, ginya natahin han Hisos, kawas Andris, in Simon Pidro fadwasay. 41 Is Andris nadagos wa hat fadwasay Simon, nafwayong hanya kitay, Mi nalag in Diyos-natogon-Famawi kat kahologan is Kiristo. 42 Ginya nataban in Simon han Hisos. Is Hisos nadoro in Simon a, nafwayong hanya, Haw mangharaw is Simon, in Hwan anak, dapat aba ta ngomayan hyamo is Sifas. To fag ngayan kawas Pidro yadi, it kahologan, bato. 43 Nonbago marom yabay, is Hisos kasaya has sakop Galiliya. Ginya madi, nondasog sinya, is Hisos nalag in Filipi a, nalwang hanya, Tahinan wangko. 44 Is Filipi taga Bitsayda yadi, ginda Andris da Pidro banwanan. 45 Is Filipi nasayak in Natanail a, nafwayong hanya, Mi nalag kan Mwisis fagsoraton sas Batasan Hodyo, kan Diyos manga fangampang fagsoraton, kangas Hisos, gis banwa Nasarit, in Hosi anak. 46 Is Natanail naintaw in Filipi, Da ngap, tam awkin ha fagasolopon fiya gis banwa Nasarit? Is Filipi nasagot, Hawi, tam hanya wan, fanlag ngay. 47 Is Hisos nalag ngay in Natanail no kaakbang ha hanya, nafwayong has taw kawa han Natanail, Yabay, to orongan kan Israil hasokfonan sadi. Maanod it manga hampang fagayo. 48 Is Natanail nalwang han Hisos, Twa oman ha no nahilala angko? Is Hisos nasagot, Haw no masarirongan daga fon igos, is Filipi nyawa idyag tawag hyamo, aho dandig lag hyamo haraw. 49 Is Natanail nalwang, Rabi, haw wa nga in Diyos Anak. Haw wa ka gorangon manga taga Israil. 50 Is Hisos nalwang, Hantiwala wangko maskin aho nalwang ha hyamo kitay, hoglag hyamo haraw, haw no sayapdis daga fon igos? Bondi kitonya fag madolaw kam manga lagon aban. 51 Is Hisos iglwang ya kitay, Orongan wan, bohonwa bohag, hogfwayong ha hayo, ham lomag ka banwa sam tongod idwa hagfarom, in Diyos manga anghil igdokson yagsakbaw ya sangko, aho Kanbali Taw.

2

1 Nonsagaya dowak yabi, ha fangsawan sas banwa Kana, sakop Galiliya. In Hisos ina sinya yadi. 2 Ta nafatawag in Hisos hanggan it manga katogbong hasta fangsawan. 3 No namin wan ista inomon alak, in Hisos inag lwang han Hisos, Ista alak namin wan. 4 Is Hisos iglwang, Ina, nyawa hadwa fomwayong angko, angko ibolonon bon yapdi tonya. 5 Ginya in Hisos ina igfwayong hasta manga sogowan, Ham fakatanog ha hanya, nyawa kanat sogoon hayo. 6 Ka manga Hodyo ha ogali bilang wa fagliyon ta nodwag fatonglos. No faginan mangwan hanon, ta gonaw yap fiya fiya it manga bitis hanggan gamat. Yakanga ha onom ik tapayan sinya ista sohadan danom. Tonya fag manga tapayan no napno, manga dowak safolo, ngatay tolok safolok gawadan danom. 7 Is Hisos iglwang hasta manga sogowan, Fahapnowan danom ka manga tapayan. Ginya ta nafahapno ngay balis bayang. 8 Ginya madis Hisos nafwayong has taw, Kati sarokan ginya, dyan hasagbahala sas fangsawan. Ginya ta nadiya ngay. 9 Tonya fag danom inbali alak a, hanggan kagbahala nandog nanginom ogbot. Hanyadwa natwa no ginday ka alak, dapat ay, kasta manga sogowan ka nasarok ka danom fadi wad natwa no ginday tonya. Ginya kagbahala nafatawag ka ama mamabay, 10 nalwang ha hanya, Nogbanwan sas fangsawan, ta nogbangkad bago bago, kawa manga fiya fag alak, ginya madi, manga taw no nanginom wa fagayo, yabay bago di nabangkad kadwa bangan fiya, dapat kam nabangkad goyan goyan, fiya man ka gona. 11 To in Hisos naibolon bago bago fag falagon madolaw sas banwa Kana, sakop Galiliya. Is Hisos nafalag has taw it kafiyan sinya, yakangat manga katogbong igsyag yadi ha hanya. 12 Ginya madis Hisos hanggan it ina, it manga fadwasay hanggan it manga katogbong, hawas lwad has banwa Kapirnaom. Ta nadogay sinya manga fiyahin ik yabi. 13 Aban, no kaakbang wa ka Fanohodan Nagsagayan, ka manga Hodyo nogtohod ka anghil no nasagaya ista manga balay hyabi hyabi, is Hisos hawas bohid, has banwa Hirosalim. 14 Is Hisos nondasog has basad aladan Fanimbaan-Dahol, nalag ka mangag fasali manga baka, manga topa, manga salompati, hanggan kagfabalyo ista kwarta, matokawan sat bilog manga fwalidan kwarta sas basad aladan fanimbaan. 15 Ginya madis Hisos nalanit ista manga tarabing, nafabali famakbak, nafalimo manga baka hanggan topa, nafaalin yadi was taw gis basad aladan fanimbaan. Nafasarabodan kasta kwarta ka mangag fabalyo kwarta a, nafahakfo ista manga fwalidan. 16 Is Hisos nasogo ka manga taw kagfasali salompati, nalwang, Faalinan ka manga manok gis basad aladan. Ham fag idwag fabali angko Ama balay sadik balay fanalian. 17 Ginyan Hisos manga katogbong natohod kitay insorat kiti, Angko Diyos, kawa ho kawili wa dahol im balay, kito was afoy ik mayanbong sangko basad fangayofan. 18 Yakanga ka manga fagtahinan Hodyo kaglaban in Hisos, gintaw hanya, Kana fag madolaw kam fagfalagon hyami kaarakitay igfatohoyan kitay haw ha kangayanan gibolon kito? 19 Is Hisos igsagot has taw, Nyawa ham fahakfo to fag Fanimbaan-Dahol, tolo lamang ik sirang ho fatobo ya. 20 Ka manga Hodyo iglwang, Ha aw gayfan kitay haw somyagan fatobo ya to fag fanimbaan tolo lamang ik sirang? Gwadi hyabi, ofat ik safolo ha onom ik fangaraw bago dintabo kalig to fag fanimbaan. 21 Dapat in Hisos faglwangon Fanimbaan-Dahol, kawat sadili habilogan. 22 Ginya madi aban, is Hisos nonboyag ya domwag gis kahatayan, it manga katogbong natohod kawa hanya nalwang kitonya, yakanga ta katiwala kitay orongan in Diyos Kasoratan, hanggan in Hisos manga fwayong. 23 Is Hisos no sayapdis basad banwa Hirosalim sas Fanohodan Nagsagayan, aywan igsyag ha hanya noglag it naibolon manga falagon madolaw. 24 Dapat ay, is Hisos idwa yadi kasyag has taw, 25 maskin hanya kilala fiya fiya fagayo fag manga taw. Nyawa idwa ha taw igtoltol hanya, is Hisos fadi wad twa sasta basad fangayofan.

3

1 Yabay, ha sadik ama fagtahinan Hodyo, gis layonan manga taw tagngayan manga Farisiyo, kawas Nikodimo. 2 Gis nanya basad yabi, is Nikodimo nasabang han Hisos, iglwang, Rabi, mi twa waglag kitay haw sadi kagfaadal, kan Diyos nasogo, maskin nyawa faktaw idwa syagan gibolon kito fag manga falagon madolaw is Diyos nodwa sa hanya. 3 Is Hisos iglwang, Orongan wan, bohonwa bohag, hogfwayong hyamo, nyawa faktaw nodwam sagaya ya domwag anak dararag bago, idwam aktom san Diyos sakop. 4 Is Nikodimo gintaw kitay, Kinday araw sadik taw nomsagaya ya bago, no magorang wan? Idwa twa mwali ya hat ina basad tyan, ginyam sagaya ya. 5 Is Hisos igsagot kitay, Orongan wan, bohonwa bohag hogfwayong hyamo, nyawa faktaw nodwam bali anak dararag gis danom hanggan gis Maliyaw fag Falad idwam aktom san Diyos sakop. 6 Ka anak gis taw, taw mandi. Ka anak gis Falad, falad mandi. 7 Haw fag idwa katakag dog aho noglwang ha hyamo, ham fagayo fag imsagaya ya bago. 8 Ka bagyo igfalayfayan no hadat fakasayaon, tam igdog igfawas, dapat tam idwa twa no ginday ka bagyo hanggan no haday kamdiya. Kitonya yadi ka fagayo ka Maliyaw fag Falad nafaanak. 9 Is Nikodimo gintaw, Kinda araw tonya nangos? 10 Is Hisos igsagot han Nikodimo, Gwadi haw sadik famaadal sas Israil, dapat haw aw idwa twag dog to fag bagay? 11 Orongan wan bonwa bohag kangko fwayong hyamo, migfwayong ka hyami natwa, migfaorongan yadi ka hyami mata lagan, dapat ham idwag faanod hyami barita. 12 Ham nodwag faanod kangko fwayong hayo manga fakaoronganan sas baba daga, kinda araw ham nogfaanod angko fwayong hayo ka san Diyos banwanan sam tongod fag maga fakaoronganan? 13 Idwa ha taw nasakbaw han Diyos banwanan ham tongod no bohonwa aho, Kanbali Taw, ka nadokson mandi gim tongod. 14 No kinday hyabi is Mwisis nafaabwat sas tongod hayo ka abyanon tanso, ta no sas basad fakahyabogan, kitonya yadi, aho, Kanbali Taw, nomabwat aban, 15 kaarakitay nyawa faktaw nogsyag hangko ha haboyagan hanggan aban aban. 16 Maskin is Diyos galwasi wa dahol dahol ka manga taw sadik baba daga, yakanga hanya nadisag it anak sadi sadi, kaarakitay nyawa faktaw nogsyag hanya, idwa has kadwatan, dapat ay, imboyag hanggan aban aban. 17 Kawas Diyos idwa nasogo angko, it Anak, has baba daga kaarakitay igfatohoyan manga taw has fadosaan, dapat kaarakitay gingko agwantaon, bomawi ka manga taw. 18 Is Diyos idwag fatohoyan has fadosaan kagsyag hangko, in Diyos Anak, dapat ay, kadwag syag hangko, danwa nafatohoyan has fadosaan, maskin ngay tadwag syag hangko ngayan, kan Diyos Anak sadi sadi. 19 Kiti is Diyos nogfatohoyan has fadosaan ka manga taw. Ka yawa inbangkad hastay is baba daga, dapat ay, manga taw kasaya man ka marom has mayawa, maskin dwat ista manga ogali. 20 Nyawa fakta ka gogali dwat, kadwat iglag ka yawa, idwa yadi gakbang has mayawa maskin kadala kitay it manga ogali dwat imlag. 21 Dapat ay, nyawa faktaw no fiya it ogali, idwa kwangit igfalag it manga ogali sas basad fakayawan, kaarakitay manga taw lomag fiya fiya kitay it ogali kitonya, maskin hanyan sadi san Diyos. 22 Ginya madi aban, is Hisos hanggan it manga katogbong nadasog has sakop Hodiya a, ta nadogay ogbot sinya, hanggan is Hisos igfatogna manga taw. 23 Gis nanya fag masohod, is Hwan igfatogna yadi manga taw sas Inon, akbang has Salim, kawa dahol yadi ka danom sinya. Manga taw gobok in Hwan hanggan is Hwan igfatogna manga taw sinya, 24 kawa tadyag poriso in Hwan gis nanya. 25 In Hwan manga katogbong hanggan sadik Hodyo igdaraogan kawa has ogali Hodyo bilang fagliyon ta nodwag linay hosto. 26 Ginya madi in Hwan manga katogbong hawan Hwan, iglwang, Haw kagfaadal, haw igtohod aw kam nahablang itfagonan sas salogan myanit baliwa Hordan, kam nafasayag dog has taw? Yabay hanyag fatogna yadi manga taw, fagayo gobok hanya kati. 27 Is Hwan igsagot, Nyawa faktaw idwa ha tanggapon kitonya no bohonwas Diyos kagdisag hanya. 28 Ham mandi ka nadog angko bibig hampang aho nogfaorongan kitay bohonwa aho kan Diyos-natogon-Famawi. Is Diyos nasogo lamang angko kaarakitay gomona hanya. 29 Sas fangsawan, ka ama mamabay kasolong wa dahol maskin hanya wan ka ina mangindogan. Dapat ay, ka ama kahilala sinya yadi sas fangsawan, igtalinga has ama mamabay, kasolong yadi wa dahol nogdog it hasnog. Kitonya yadi aho no kasolong wa dahol kati. 30 It kangayanan fag kadahol wa kadahol wa nangos, dapat ay, kangko fag kaogbot wan. 31 Ka gis tongod dahol man has fagayo it kangayanan. Ka taga daga gi odis baba daga a, ka odi manga bagay gis baba daga it manga fagfwayongon. Dapat ay, ka gin Diyos banwanan sam tongod, dahol man has fagayo it kangayanan. 32 Nyawa hanyag faorongan it mata lagan, hanggan it talinga donggon, idwa hagfaanod it fwayong. 33 Dapat ay, kagfaanod it fwayong igfaanod yadi kitay orongan wan in Diyos fwayong. 34 Kan Diyos nasogo igfwayong yadi in Diyos manga hampang, maskin idwa ha korang is Diyos nogdisag it Maliyaw fag Falad ha hanya. 35 Is Diyos, kat Ama, galwasi it Anak, nafaano yadi fagayo fag manga bagay hat Anak. 36 Kagsyag han Diyos Anak ha haboyagan hanggan aban aban, dapat nyawa faktaw kadwa katanog it Anak, idwa lomag kitonya fag haboyagan, dapat hanya in Diyos odi fakaisogon fagaba.

4

1 Is Hisos no sayapdis sakop Hodiya, ka manga Farisyo nadog kitay kan Hisos fagfatognaon manga taw hanggan kanbali in Hisos manga katogbong aywan man kan Hwan. 2 Ka orongan, bohonwas Hisos kagfatogna manga taw, ka dit manga katogbong kagfatogna is taw. 3 Yakangas Hisos no nadog kitay manga taw igfadahit kitay kitonya, da Hisos nalahaw ginya, nwali has sakop Galiliya. 4 Noglahaw hanya, ka fiya da Hisos fag domalan sas sakop Samariya. 5 Ginya madi da Hisos indasog has sakop Samariya, has bahalan banwa Sikar. In Hakob nagtogonan iyab hyabi hyabi han Hosi, it anak, akbang yadi sinya. 6 Hanggan kan Hakob gobon hyabi hyabi sinya yapdi. Is Hisos inyaya wan kawa ayayot naglahawan, yakanga dagos wantokaw sas bilog salongawan gobon. Gis nanya manga boknga sirang ka myanit. 7 In Hisos manga katogbong nadagos ha basad banwa kaarakitay manali fanganon. Ista ginanan, sadik ina taga Samariya inbangkad has gobon kaarakitay managob danom. Is Hisos iglwang has ina, Ho kainom nangos. 9 Ka inag lwang han Hisos, Haw Hodyo wan, aho ina di, taga Samariya. Kana mayon haw nogsagad inomon gingko? Ka ina indolaw wan maskin ka manga Hodyo idwa gamigosan has manga taga Samariya. 10 Is Hisos igsagot has ina, Haw nangos, no natwa wagdog in Diyos disagon, hanggan no kilala no fakta kagsagad inomon danom, fag haw man nangos ka somagad gi hanya, kawa danom kagfaboyag manga taw it fagdisagon hyamo. 11 Ka inag lwang, Ama, hadwa ha fanarok a, abasad yadi ka gobon. Kinda haw no bomolay ka danom kagfaboyag manga taw? 12 Gwadi to fag gobon hyami yapdi hafofowan Hakob faobonan hyami hyabi hyabi. Is Hakob hanggan it manga anak, hanggan it manga hayopan fagayo, giwastay fag danom no ginom hyabi. Haw aw gayfan haw madonong man in Hakob? 13 Is Hisos igsagot, Fagayo ka ominom gistay fag danom, im-inom ya. 14 Dapat nyawa faktaw ka ginom kangko disag fag danom idwam inom domwag, nyawa ginahin. Maskin ka danom kangko fainomon ha hanya imbali bilang sadik bolbogan sat basad fangayofan, kagbolos danom fagaba kagfaboyag hanya hanggan aban aban. 15 Ka inag lwang, Ama, hogyay tonya fag danom kaarakitay hodwam inom domwag, idwa yadi hastay aban manarok. 16 Is Hisos iglwang has ina, Fagoli wan, tawagan im indogan a, tabanan hastay. 17 Ka inag sagot, Hodwa ha indogan. Is Hisos iglwang, Hadwag bohag ha noglwang hadwa ha indogan. 18 Maskin im manga indogan gis hyabi lima wan, hanggan kam ofod ama kati bohonwam indogan. Hadwag fyalom haw noglwang kitonya. 19 Ka inag lwang, Ama, kati ho natwa wagdog yabay, haw in Diyos wa fangampang. 20 Istay fag moyod hyami ha fofowan nogsimba han Diyos, dapat ham manga Hodyo iglwang, fag sas Hirosalim manga taw nogsimba han Diyos. 21 Is Hisos iglwang, Ina, haw fakatiwala angko fwayong. Aban idwastay baba moyod, idwa yadi sas Hirosalim manga taw no mamasayagdog hantam Ama. 22 Ham manga taga Samariya idwa kilala orongan ka hayo fagsimbaon. Dapat hami manga Hodyo, mi kilala fiya fiya ka hyami fagsimbaon, maskin gis Hodyo is Diyos no bomawi manga taw. 23 Dapat aban, hanggan nyawa kati madi ngap, in Diyos Falad kagfasyagan manga taw igfasayagdog hantam Ama kawa kilala hanya orongan, yakanga maangay nogfasayagdog hanya. Kitonya fag manga taw kantam Ama fagsayahon kaarakitay fasayagdog hanya. 24 Is Diyos Falad wan. Ka mangagsimba han Diyos, fag it Falad kagfasyagan igfasayagdog orongan. 25 Ka inag lwang, Ho twa kitay in Diyos-natogon-Famawi imbangkad aban, kasta faglwangon is Kiristo. Hanya, hono, nombangkad fomwayong hantam fagayo fag manga bagay. 26 Is Hisos iglwang, Aho ka kampang ha hyamo kati, aho wa ngap tonya fag taw. 27 Nalwang di ngay kitonya has ina, ginyan Hisos manga katogbong indasog wan, bago nwali gis banwa. Tandolaw wa dahol maskin ina in Hisos kahampang. Dapat tadwa ha namawat, tadwa naintaw has ina, Kanam fakasayaon? Tadwa yadi naintaw han Hisos, Kana mayon haw no kampang has ina? 28 Ginya madi ka ina naobon sinya it balanga fanagoban, nwali ya has banwa, nafwayong has taw, 29 Kalibang, tam hanya wan, famantay ha sadik ama kagfwayong angko fagayo angko naibolon. Ngatay tonya wa aba kan Diyos-natogon-Famawi? 30 Ta nalahaw wa yabay, nagobok in Hisos. 31 Gis nanya yadi in Hisos manga katogbong igfaaronganon hanya, iglwang, Rabi, haw fakwan hanon nangos. 32 Dapat is Hisos nasagot has taw, Ham idwa twa no kana kangko fanganon. 33 Yakangat manga katogbong nangarintawan, Mayon aw ha taw igdisag hanon ha hanya? 34 Is Hisos nalwang, Angko fanganon kawa aho no katanog kagsogongko it fakasayaon, hanggan igfatabo it faibolonon angko. 35 Idwa awkin ham iglwang, Ofat yak magdanon bago fanganiyon? Ahog fwayong hayo, fag bantay manga namay, fanlag ngay, dararag wat manga haway kati, kaani wan. 36 Ka gani ha tangdan hanggan igtifon it bohad has haboyagan idwa ha katabowanan, kaarakitay kagtanom hanggan ka gani pariho kasolong. 37 Bohonwa bohag ta noglwang, Bokod wa kagtanom, bokod wa ka gani. 38 Hogsogo hayo kitay ham fagani ka bohonwa hayo nakayayan. Ka tiba gibolon a, ginya ham korayan git nakayayan. 39 Aywan fag manga taga Samariya ginya fag banwa igsyag in Hisos no nadog ka ina faorongan kitay, Hanya nafwayong angko angko naibolon fagayo. 40 Yakanga ka manga taga Samariya no nagobok in Hisos, tagfaaronganon hanya nangos fag domogay yapdi sasta banwanan. Da Hisos nadogay yapdi sinya dowak yabi. 41 Yabay aywan man katfagonan kagsyag in Hisos no nadog in Hisos sadili fwayong. 42 Taglwang has ina, Kati migsyag in Hisos maskin hami wa ka nadog it sadili fwayong, bohondi kitay hyamo odi fwayong hyami. Kati mi natwa wagdog fiya fiya kitay, hanya wa ka orongan fag Famawi manga taw sadik baba daga. 43 Nonsagaya wa dowak yabi, is Hisos nwali ya has sakop Galiliya, 44 kawas Hisos mandi kaglwang, Nyawa siday fag manga taw tomalinga ka fangampang, dapat ka git sadili banwanan idwa tomalinga hanya. 45 Itfagonan manga taga Galiliya ginya yadis Hirosalim sas Fanohodan Nagsagayan a, nalag in Hisos naibolon fagayo sinya. Yakangas Hisos nondasog sas Galiliya, tagbaya wa dahol iglag hanya. 46 Ginya madis Hisos inbangkad ya has banwa Kana, sas sakop Galiliya. Sinya kan Hisos nagfabaliyan alak gis danom itfagonan. Kati fag masohod sadik anak ama sas Kapirnaom ha sagit. It ama ha kangayanan sas gobirno. 47 Kat ama no nadog kitay is Hisos indasog sas sakop Galiliya gis sakop Hodiya, ka ama hawan Hisos, igfaaronganon kitay fag hanyas lwad has banwa Kapirnaom, fafiyan nangos it anak, maskin kafos wat ipsaw. 48 Is Hisos iglwang hanya, Aho nodwa gibolon manga falagon madolaw, ham idwag syag angko. 49 Ka ha kangayanan iglwang, Ama, kalibang, tam hanya wan, tam nangos fag tomahod yapdingko anak. 50 Is Hisos iglwang, Fagoli wan. Im anak infiya yat sagit. Ka ama insaya wagdog in Hisos hampang, nwali wa ngay. 51 Noglahaw yapdi has lwad, goli wan, it manga sogowan igtagbo hanya, iglwang, Im anak infiya wat sagit. 52 Ka ama naintaw has taw no ginahin fag masohod it anak nonfiya. Taglwang, Fafon, myanit kabalihid wan nonfiya it hagnaw. 53 Ka ama natohod yabay gis nanya fag masohod fiya fiya is Hisos noglwang, Im anak kafiya wan. Yakanga ka ama hanggan it ofod sas balay fagayo igsyag in Hisos. 54 To ka fadowa fag falagon madolaw kan Hisos nafalag has taw nondasog has sakop Galiliya gis sakop Hodiya.

5

1 Ginya madis Hisos hawas bohid has banwa Hirosalim, maskin ha sadi yak Fanohodan kaakbang wan. 2 Sas basad alad bato sas Hirosalim, sas akbang sakbawan manga topa, ha linaw gis bolbogan. Sas ligongan bolbogan ha balay, ha limak ansagan. It ngayan sas fangampangan Hodyo Bitisda. 3 Aywan fag manga ha sagit, tiba bota, tiba gafilay, tiba idwa twa kimot, maigyanan sinya sas manga baba ansag. Tagfanaya no hagfafarisikan ka danom. 4 Maskin nomtoon, intam Fon anghil igdokson, igfafarisikan ka danom. Ginya madi, nyawa fakta ka gomona has basad danom nomfafarisikan, imfiya wan nyawa kanat fagdogon. 5 Sadik ama sinya tolok safolo ha walok fangaraw no ha sagit. 6 Is Hisos no nalag hanya, hanggan natwa kitay dogay wa fag fangaraw no maigyanan sinya, naintaw, Haw aw kasayam fiya im sagit? 7 Ka ama ha sagit nasagot, Kana wa kin ama, ahodwag dasog. Idwa hagtogbong angko no hagfafarisikan ka danom. Aho nyawa kaakbang has danom, tiba gona man angko kadokson. 8 Is Hisos iglwang has ama, Haw fag kalindog, diyan wam sagmak, fag lahaw wan. 9 Ka ama infiya wa dagos. Naanggong wat sagmak, nalahaw wan. Gis nanya fag sirang ka Hodyo fag Kafahowayan fag Sirang. 10 Yakanga ka manga fagtahinan Hodyo iglwang has ama kanfiya, Kati Sirang Kafahowayan, idwa maangay has Batasan Hodyo haw nogdiya im sagmak kati. 11 Dapat ay, ka amag sagot, Ka nafafiya angko nafwayong angko kitay aho fag diya angko sagmak, fag lahaw wan. 12 Ta gintaw hanya, Fakta fag ama ka nafwayong hyamo kitay diyan wam sagmak, fag lahaw wan? 13 Dapat ka ama kanfiya idwa kilala no faktaw is Hisos maskin is Hisos in-aktom has basad fakaaywanan manga taw sinya. 14 Ginya madi araw, is Hisos nalag kat nafafiya fag ama sas basad aladan Fanimbaan-Dahol. Is Hisos iglwang hanya, Kati yabay, haw infiya wan. Haw fag idwag fadagos has ogali dwat, kaarakitay hadwa ha dogon mahori man inya. 15 Ginya madi ka ama inlahaw wan a, nafwayong has manga fagtahinan Hodyo, kawas Hisos ka nafafiya hanya. 16 Yakanga ka manga fagtahinan Hodyo igfabago igfahoriyan in Hisos maskin sawas Sirang Kafahowayan no nafafiya sadik taw. 17 Dapat is Hisos igsagot has taw kiti, Nyawa ginahin hanggan wa kati, angko Ama gibolon hanggan aho kitonya yadi. 18 Ka manga fagtahinan Hodyo no nadog in Hisos hampang kitonya, labi wan kasaya fahatay hanya. Bohondi kitay ka no nalaban ka Batasan Hodyo has Sirang Kafahowayan baliwa, dapat kawag lwang yadi kitay is Diyos it sadili Ama a, igfadaholon it sadili kito yadin Diyos. 19 Yakangas Hisos iglwang has taw, Bohonwa gwadi bohag, orongan wan kangko fwayong hayo. Aho, in Diyos Anak, idwa gibolon basta odi angko sadili fangayofan, nodwag lag kitay kangko Ama gibolon kitonya. Maskin no kanangko Ama ibolon, aho it Anak gibolon yadi kitonya. 20 Maskin angko Ama galwasi angko, it Anak a, igfalag yadingko it manga ibolon fagayo. Aban, hanya mamalag angko manga ibolon madolaw man to kat nafalag, ginya madi ham fagayo labi man imdolaw aban. 21 Maskin no kinday angko Ama no nafaboyag ya domwag ka manga natay, kitonya yadi aho, it Anak igdisag haboyagan hangko manga fagfiliyon. 22 Angko Ama idwag fatohoyan has fadosaan nyawa faktaw, dapat nafatohoyan hangko, it Anak, kitay fag aho ka bahala fatohoyan has fadosaan ka manga taw. 23 Angko Ama nafabali angko ha kangayanan kitonya kaarakitay fagayo fag manga taw gomalang angko it Anak, kito yadi ta no galang angko Ama. Kadwa magalang angko, it Anak, idwa yadi magalang angko Ama ka nasogo ankgo. 24 Orongan wa, bohonwa bohag angko fwayong hayo kitay, kagtalinga angko fwayong hanggan igsyag ha hanya ka nasogo angko, ha akwa wa haboyagan hanggan aban aban. Idwa ha fatohoyan hanya has fadosaan aban, dapat nalin wa gis kahatayan hawas haboyagan. 25 Orongan wan angko fwayong ha hayo, bohonwa bohag kitay, kaakbang wa gis nanya fag masohod, no kitay di kati wan, ka manga mahatayan domog angko, in Diyos Anak, hasnog. No kayoday ka tomalinga angko imboyag wan. 26 Maskin no kinday angko Ama ka syagan igfaboyag manga taw, kitonya yadi kat nadisag angko it Anak kitay, aho fag somyagan yadig faboyag manga taw. 27 Angko Ama nafatohoyan kitay maangay no aho, it Anak, ka fatohoyan has taw it fadosaan maskin aho Kanbali Taw. 28 Ham fag idwa kadolaw igdog aho nogfwayong hayo kitonya, maskin aban ogbot fagayo ka mahatayan sas manga lobgoban domog angko hasnog. 29 Fagayo imbangon nyawa ginday. Ka manga naogali fiya imbangon has haboyagan, dapat ay, ka naogali dwat imbangon yadi, dapat ay imtohoyan di has fadosaan. 30 Hodwa syagan igfatohoyan has taw ista fadosaan nongko di sadili fangayofan. Angko fatohoyan is taw angko lamang donggon gingko Ama. Yakanga aho nogfatohoyan ista fadosaan, sawas fakaoronganan. Maskin aho katanog ka nasogo angko it fakasayaon, bohonwa angko sadili kafangayofanan, yakanga sawas fakaoronganan aho nogfatohoyan ista fadosaan. 31 No aho lamang kagfaorongan angko sadili, manga taw idwa twa ngatay orongan angko fwayong. 32 Dapat sadi ya kagfaorongan yadi kawa hangko. Aho twa kitay orongan it manga fwayong kawa hangko. 33 Itfagonan, ham no nasogo hayo manga sogowan han Hwan, is Hwan nafaorongan yadi kawa hangko. 34 Nyawa hoglwang kitonya, ahodwa kasyag ka faorongan taw, dapat ka odi kitay hogfwayong kito kaarakitay ham imbawi wan. 35 In Hwan manga fwayong ka bilang salong gigang hanggan igyawa, nafasayag dog hayo. Sadik ngalay ham insaya wagdog it manga hampang, ka bilang salong. 36 Dapat ay, ha akwa sadik bagay ka marigon man in Hwan faorongan kawa hangko, kakitay angko Ama faibolonon hangko. To fag manga ibolon kagfaorongan aho no faktaw, hanggan igfaanod kitay angko Ama ka nasogo angko. 37 Ginya madi angko Ama ka nasogo angko igfaorongan yadi kawa hangko. Nyawa ginahin ham idwa nadog angko Ama hasnog, ham idwa yadi nalag it walong. 38 It manga fwayong hayo idwag dogayan sa hayo manga basad fangayofan maskin ham idwag faanod kitay aho kat nasogo. 39 Ham manga Hodyo, ham igbasa fagaba ka manga Kasoratan kawa ham kasyag kitay ginyas Kasoratan ham no lomag haboyagan hanggan aban aban. Dapat ay, aho wa ngap kat fagfwayongon sinyas Kasoratan. 40 Nyawa kitonya ham kafang gakbang angko kaarakitay ha haboyagan orongan. 41 Hodwa kasyag kitay manga taw mamasayag dog angko. 42 Dapat ho twa kitay ham idwa galwasi in Diyos. 43 Ham igtanggap tiba taw fagaba ta no kabangkad sat sadili kangayanan, dapat ham idwag tanggap angko, nyawa angko kangayanan gi wangko Ama. 44 Manga taw nogfasayag dog hayo, ham kasolong odig dog. Dapat ay, no hadin Diyos baliwa, kaarakitay is Diyos, ka sadi dik Diyos, ka mamasayagdog hayo, ham idwa katanog. No kitonya yapdi ham, kinday nangos ham gayfan ham no somyagan katiwala angko? 45 Nyawa kitonya, ham fag idwa gayfan kitay aho ka somombong hayo hangko Ama. Is Mwisis, ka hayo fagsyagon kitay, hanya ka bomaliwa hayo, hanya mandi kagsombong kawa ha hayo. 46 Ham nangos no katiwala orongan in Mwisis, ham katiwala yadingko maskin aho kat fagsoraton fagaba. 47 Dapat ham nodwa katiwalat manga nasorat, kinda kin araw ham nomtiwala angko manga hampang, ham gayfan?

6

1 Ginya madis Hisos hanggan it manga katogbong nadifay ka dahol fag linaw, linaw Galiliya, tibag lwang, linaw Tibiriyadis. 2 Manga taw kaaywanon kaaywanon naoyan in Hisos, maskin ta nalag it kadonongan no nafafiya manga taw ha sagit. 3 Is Hisos hanggan it manga katogbong hawas bohid has baba moyod a, tantokaw wa sinya. 4 Gis nanya fag masohod ka Fanohodan Nagsagayan kaakbang wan, ta nogtohod ka anghil no nasagaya ista manga balay hyabi hyabi. 5 Is Hisos nogbantay sas ligongan, iglag kaaywanan wa kaaywanan wa fag manga taw kaakbang hanya. Yakangas Hisos gintaw in Filipi, Ginday nangos tam no manah hanon hosto kaarakitay to fag manga taw mangwan? 6 Is Hisos noglwang kitonya, igsolay odin Filipi, maskin is Hisos danwa natwa it bato ibolonon. 7 Is Filipi igsagot, Dowak daan dinaryo korang yapdi fanali tinapay kaarakitay homosto, mafod has taw fagayo, ngadi ogbot. 8 Is Andris, in Hisos katogbong sadi ya, in Simon Pidro fadwasay, iglwang han Hisos, 9 Sadik anak ama istay ha balon limak tinapay dawa, hanggan dowak oyang. Dapat kinda araw, idwa mafod has fakaaywanan fag manga taw. 10 Is Hisos iglwang hat manga katogbong, Fatokawan yap ka manga taw. Sinya malamnon, yakanga manga taw fagayo intokaw wan. Ka manga ama gamtanan manga 5,000. 11 Is Hisos nabol ka manga tinapay, ginya no nabaya in Diyos, nafahoray has manga taw ka matokawan sinya. Kitonya yadi ka oyang nafahafod has taw no kayodawan ka kahanan. 12 Ta no napsog wa fagayo, is Hisos nalwang hat manga katogbong, Tifonan yap kasta manga sawad nakanan kaarakitay idwam olan. 13 Ginya ta natifon ista sawad tinapay dawa mafaarogbotan, safolo ha dowak boyog napno. 14 Ka manga taw no nalag in Hisos nafalag madolaw, taglwang, Yabay yabay, to wa nga ka Kasoratan fagfwayongon in Diyos fangampang ka kabangkad hastay has baba daga. 15 Is Hisos nasarom kitay ka manga taw kaakbang wa gomamat hanya kaarakitay pomilit hanya kabali ista gorangon. Yakangas Hisos nalahaw ya ngawan, hawas moyod, nabisok wan. 16 Araw, myanit no kasangday wan, in Hisos manga katogbong hawas gobang linaw a, 17 nasahay wa baloto, igdifay linaw nangos, hawas Kapirnaom baliwa. Ginya araw, tanyabi wan, dapat is Hisos idya kadasog has taw. 18 Gis nanya igbagyo marigon, yakanga ka taob dagat kadaholon wan. 19 In Hisos manga katogbong no nalwag manga lima, ngatay onom ik liho gis bahalan linaw, taglag in Hisos. Ta gafalad wan maskin is Hisos iglahaw baba danom, gakbang has baloto. 20 Dapat ay, is Hisos iglwang has taw, Aho di, ham fag idwa kadala. 21 Ginya ta nabaya wagfasahay in Hisos has basad baloto. Ginya tandasog wa dagos has gobang linaw hasta fangadagsaan baloto. 22 Ginya madi nonbago marom, kat fakaaywanan fag manga taw kangoyan yapdi sas bali difay linaw, natohod kitay sadi dik baloto sas gobang linaw fafon. Ta galingawan in Hisos. Ta natwa kitay is Hisos idwan sahay, idwa nahoyog it manga katogbong. It manga katogbong lamang kanlahaw. 23 Ginya, araw araw ogbot, handasog manga baloto tiba gis banwa Tibiriyadis, indagsa hantam Fon akbang nagfasalamatan manga tinapay, ginya madi ka fakaaywanan manga taw nahwan wan. 24 Yakanga ka fakaaywanan fag manga taw no nalag kitay is Hisos idwa akwa sinya, nyawat manga katogbong, ta nasahay yadi wan tonya fag manga baloto, hawas Kapirnaom baliwa kaarakitay ta somayak in Hisos. 25 Ka manga taw no nalag in Hisos sas difay linaw, ta naintaw ha hanya kitay, Rabi, ginahin haw nondasog istay? 26 Is Hisos igsagot kiti, Orongan wan, bohonwa bohag, aho noglwang kitay ham idwag sayak angko maskin ham twagdog angko manga nafalag madolaw, dapat maskin ham nahwan ka fanganon hanggan ham napsog wan. 27 Ham fag gibolon mahogod kaarakitay ha hanon kagfaboyag manga taw has haboyagan hanggan aban aban, bohonwa ka hanon ka ha kadwatan di. Aho, Kanbali Taw, ka domisag to fag fanganon ha hayo, maskin is Diyos angko Ama igfatohoyan kitay hawangko it kangayanan. 28 Yakanga ta gintaw in Hisos, Kana araw hyami fakatanogon kaarakitay hami omibolon in Diyos wa fakasayaon? 29 Is Hisos nasagot has taw, Kan Diyos fakasayaon, ham fag syag han Diyos nasogo. 30 Ginya taglwang kitay, Kanam falagon madolaw ha hyami kaarakitay mimtiwala mi no lomag tonya? Kana kam ibolonon? 31 Hyami manga hafofowan nahwan mana no basad yapdi fakahyabogan, kito kansorat, Hanya nadisag has taw ka fanganon gin Diyos banwanan sam tongod. 32 Is Hisos iglwang, Orongan wan, bohonwa bohag angko fwayong ha hayo kitay, bohonwas Mwisis ka nadisag ha hayo ka fanganon gim tongod. Angko Ama kagdisag ha hayo ka fanganon orongan git banwanan sam tongod. 33 Kawa kan Diyos fagdisagon fanganon kagdokson git banwanan sam tongod, igdisag yadi haboyagan has manga taw sas baba daga. 34 Ta nanagad kitay, Ama kin, migyay to fag fanganon fagaba. 35 Is Hisos iglwang kitay, Aho ka fanganon kagfaboyag manga taw. Ka gakbang angko idwam lonos nyawa ginahin, hanggan kagsyag angko idwa yadim inom domwag. 36 Dapat ho nafwayong hayo kitay nyawa ham iglag wangko, ham idwag syag angko. 37 Fagayo fag manga taw angko Ama bato disagon hangko, omakbang angko. Ahodwa domayo ngadi sadi, ngadi faktaw ka gakbang angko. 38 Maskin ahonbangkad gin Diyos banwanan sam tongod kaarakitay omibolon kagsogo angko it fakasayaon, bohonwa angko sadili fakasayaon. 39 To in Diyos fakasayaon ka nasogo angko hastay kitay, aho fag idwag liyam ngadi sadik taw kat nadisag hangko. Yatokitay, aban, sas ginanan fag sirang, aho fag fabangon ya tonya fagayo. 40 Maskin angko Ama fakasayaon kito, fagayo kagsyag, hanggan kagbantay angko, it Anak, fag ha haboyagan hanggan aban aban. Ho fabangon ya tonya fag manga taw has haboyagan kadwa ha katabowanan sas ginanan fag sirang. 41 Ginya madi ka manga Hodyo gidginasan ha sadi ha sadi, kahori in Hisos maskin hanyag fwayong kitay, Aho ka fanganon kanbangkad gin Diyos banwanan sam tongod. 42 Yakanga taglwang, To fag is Hisos in Hosi odi anak, idwa aw? Tam kilalat ama hanggan wat ina. Kinday nangos tonya noglwang kitay hanyan bangkad hastay gin Diyos banwanan sam tongod? 43 Is Hisos igsagot has taw, iglwang, Ham hawa gidginasan. 44 Idwa ha omakbang angko no bohonwa angko Ama ka nasogo angko kagfaakbang hanya, hanggan aho faboyag ya hanya aban sas katabowanan fag sirang. 45 Insadi san Diyos manga fangampang nasorat kitay, Is Diyos kagfatwagdog has manga taw fagayo fagayo. Fagayo kagtalinga hangko Ama, ginya twagdog it fwayong ka gakbang hangko. 46 Bohonwa kitay ha taw nalag angko Ama, no bohonwa ka gin Diyos mandi, hanya lamang ka nalag angko Ama. 47 Orongan wan, bohonwa bohag kangko fwayong hayo kitay, kagsyag angko ha haboyagan hanggan aban aban. 48 Aho ka hanon kagfaboyag manga taw. 49 Hayo manga hafofowan nahwan mana no sas basad fakahyabogan, dapat ta natay wa fagayo. 50 Dapat ay, manga taw no kwan ka hanon kanbangkad gin Diyos banwanan sam tongod, idwa matay. 51 Aho wa ngap ka hanon kagfaboyag manga taw, aho kanbangkad gin Diyos banwanan sam tongod. Nyawa faktaw no kwan to fag hanon, ha haboyagan hanggan aban aban. Angko habilogan kangko disag ha hanya, kwinta wat hanon. Tongko disag kaarakitay igfaboyag ka manga taw sadik baba daga. 52 Ginya madi, kawas Hisos iglwang kitonya, ka manga Hodyo kagtalinga igfabodbohagan wan, taglwang, Kinda to fag taw no domisag intam it habilogan? Kinda tam no homwan? 53 Yakangas Hisos igsagot has taw, Orongan wan bohonwa bohag angko fwayong ha hayo, ham nodwa homwan angko habilogan, aho Kanbali Taw, ham nodwa yadi ominom angko folot, ham idwa ha haboyagan orongan sa hayo sadili. 54 Ka kwan angko habilogan hanggan ginom angko folot, tonya ka ha haboyagan hanggan aban aban, aho faboyag ya hanya sas katabowanan fag sirang. 55 Maskin angko habilogan ka hanon orongan, hanggan angko folot ka inomon orongan. 56 Ka kwan angko habilogan hanggan ginom angko folot kasadi fagaba sangko, hanggan aho kasadi yadi sa hanya. 57 No kinday angko Ama boyagan ka nasogo angko, yakanga aho boyagan yadi, kitonya yadi ka kwan angko, kaboyag yadi kawa aho boyagan wan. 58 Yakanga to ka hanon kanbangkad gin Diyos banwanan sam tongod, idwa kitos hanon hayo manga hafofowan nahwan, ginya natay aban. Ka kwan to fag hanon ha haboyagan hanggan aban aban. 59 Is Hisos sas basad fanimbaan Hodyo sas Kapirnaom nogfaadal has taw kitonya. 60 Aywan fag manga katogbong kagtahin in Hisos haraw, no nadog it manga hampang iglwang, Madolaw wa dahol to fag adal. Fakta ka syagan igfaanod tonya? 61 Dapat is Hisos natwa kitay manga katogbong kagtahin hanya gidginasan kitonya, yakangag lwang, Ham awkin kabway wan maskin madolaw angko adal? 62 Kinda nangos ham no lomag angko, Kanbali Taw, goli wan hangko banwanan hyabi? 63 In Diyos Falad kagfaboyag manga taw. Ka habilogan taw idwa syagan igfaboyag manga taw. Angko manga nafaadal hampang ha hayo kan Diyos Falad hanggan haboyagan. 64 Dapat ay, tiba sa hayo idwag syag angko. Gi yapdis bago bago is Hisos natwa wan no fakta fag manga taw idwa somyag hanya hanggan no fakta ka omoyon it kalaban aban. 65 Is Hisos nadogang yat hampang, iglwang kitay, Maskin ngay hogfwayong hayo kitay, no bohonwa angko Ama kagfaakbang manga taw hangko, idwa ha syagan omakbang hangko. 66 Gis nanya, aywan fag manga katogbong kagtahin in Hisos itfagonan, infwali ya, fawag tahin domwag. 67 Ginyas Hisos naintaw hat manga katogbong safolo ha dowa, Ham aw kafang yadi wagtahin angko? 68 Is Simon Pidro nasagot han Hisos, Hyami Fon, hada araw fag taw mi no somyag? Hyamo wa manga hampang kagfaboyag manga taw hanggan aban aban. 69 Yabay mi katiwala hanggan twagdog fiya fiya kitay haw wa kan Diyos nasogo Maliyaw. 70 Is Hisos nasagot has taw kitay, Bohonwa aw ham angko nafili safolo ha dowa? Dapat ay, insadi sa hayo kabali labang. 71 In Hisos faglwangon kawas Hodas in Simon Iskariyoti anak. Nyawas Hodas insadi sas manga katogbong safolo ha dowa, is Hodas ka omoyon in Hisos kalaban aban.

7

1 Ginya madi aban, is Hisos igsabang has manga banwanan sakop Galiliya. Gis nanya fag manga masohod is Hisos idwa kasayag sabang has sakop Hodiya maskin ka manga fagtahinan Hodyo sinya kasayag fahatay hanya. 2 Kaakbang ka Hodyo Fanohodan Dongdongan. 3 Yakanga in Hisos manga fadwasay ama igmaswag odi hanya, taglwang kiti, Haw fag hanya wan, fag hawas sakop Hodiya kaarakitay kam manga katogbong kagtahin hyamo lomag im manga ibolon madolaw. 4 Kawadwa ha taw kwangit igfalag it ibolon has fakaaywanan no kasaya ha bantog. Maskin haw gibolon kitonya, gwadi fag falag im manga ibolon madolaw has fagayo fag manga taw. 5 Gis nanya fag masohod nyawan Hisos manga fadwasay idyag syag ha hanya. 6 Is Hisos igsagot hat manga fadwasay, iglwang, Idya fiya aho no has fakaaywanan manga taw. Dapat kadi ham, fiya di nyawa ginahin ham no hanya wan. 7 Kastay is baba daga fag manga taw idwa kadwat iglag hayo, dapat aho kasta fakadwaton iglag maskin ahog fatohoyan kitay dwat ista manga ogali. 8 Sogi, ham fag has Fanohodan. Ahodya has Fanohodan kati, maskin idya fiya aho no hanya wan. 9 Is Hisos nalwang di nga kitonya, ginya nadogay yapdi ogbot sas sakop Galiliya. 10 Dapat ay, in Hisos manga fadwasay nonlahaw has Fanohodan, is Hisos naoyan yadi, dapat idwag falagon fiya fiya is taw. 11 Gis nanyas Fanohodan, ka manga fagtahinan Hodyo igsayak wa ngay in Hisos. Ta nangarintawan kitay, Hadawas Hisos? 12 Sas fakaaywanan fag manga taw, aywan gidginasan kawa hanya. Intibag lwang, Fiya fag taw tonya. Intibag lwang, Yatokitay, idwa fiya, igfalamang odi manga taw. 13 Dapat idwa ha taw kampang madogan kawa han Hisos maskin ta kadala ka manga fagtahinan Hodyo. 14 Nogbokngan wa ka Fanohodan, is Hisos nasakbaw has basad Fanimbaan-Dahol, igfaadal has taw. 15 Ka manga fagtahinan Hodyo indolaw wan. Taglwang, Twa oman to fag taw it kadonongan? Hanyadwa nangadal gis adalan ngadi sadi ginan. 16 Is Hisos igsagot, Kangko fagfaadalon has taw idwa gingko sadili, dapat gin Diyos ka nasogongko. 17 Nyawa faktaw no talaga wa gibolon in Diyos fakasayaon tomwa wagdog ngatay angko faadalon giwan Diyos, ngatay gi odingko sadili fangayofan. 18 Kagfwayong it sadili fangayofan kasaya odig fataka, igfadaholon it sadili. Dapat ay, ka kasayag fadaholon kagsogo hanya, idwag bohag, sonson wa maanod it manga hampang. 19 Bohonwa awkin is Mwisis ka nadisag in Diyos togon ha hayo? Dapat ngadi sadi sa hayo idwa ha katanog tonya. Kana mayon ham no kasayag fahatay angko? 20 Ka fakaaywanan nasagot, Ha ngandi ha labang, fakta sa hyami ka kasayag fahatay hyamo? 21 Is Hisos igsagot has taw, Angko ibolon sadi madolaw a, ginya ham fagayo kataka wan. 22 Nomtoon ham igtoli ka manga anak ama nyawa sas Sirang Kafahowayan, maskin is Mwisis natogon hayo kitay fag fatoli hayo manga anak ama. Ka orongan tonya fag ogali gi yapdi hayo manga hafofowan, bohondi kitay gin Mwisis. 23 No sawas Sirang Kafahowayan ham nogtoli ka manga anak ama nomtoon, kaarakitay ham idwag falamang in Mwisis togon, kana mayon ham no gisog angko maskin sas Sirang Kafahowayan aho no nafafiya sadik ama sadi wak dahonyat habilogan? 24 Ham fag idya gato sadik taw maskin bilang idwa fiya it naibolon, ham fag twa no kinday ka orongan bago omato hanya. 25 Intiba taga Hirosalim iglwang, Bohonwa awkin to fag ama ka manga fagtahinan fakasayaon fahatayon? 26 Istay yapdi mangharaw. Hanggan no baliday kampang idwas fyaloman, tadwag laban hanya. Ngatay ka manga fagtahinan natwa wagdog awkin to fag ama kawan Diyos-natogon-Famawi, ham gayfan? 27 Dapat ay, no todi to fag ama, tam fagayo wa twa hanya no ginday, dapat, in Diyos-natogon-Famawi nombangkad, idwa ha tomwa no gindak banwanan tonya. 28 Yakangas Hisos nogfaadal yapdi sas basad aladan Fanimbaan-Dahol, kampang marigon, iglwang, Ham awkin gayfan kitay ham orongan kilala wangko hanggan aho no ginday? Bohonwa angko odi sadili fangayofan aho fag imbangkad hastay. Ka nasogo angko maanod it manga hampang. Ham idwa kilala hanya. 29 Dapat aho kilala hanya maskin ahon bangkad gi hanya, hanggan hanya ka nasogongko. 30 Yakanga ta kasaya wa gomamat in Hisos dapat idwa ha taw natawid hanya maskin, gis nanya, is Diyos idyag fagamat has taw in Hisos. 31 Nyawa kitonya, aywan fag manga taw igsyag in Hisos. Taglwang, In Diyos-natogon-Famawi nombangkad aban, tam awkin ha fagasolopon yapdi kitay, hanya omibolon bohondi kitonya fag manga madolaw, ham gayfan? 32 Ka manga Farisiyo no nadog kitay ka fakaaywanan gidginasan kitonya, kawa han Hisos, ka manga fagtahinan fagalanhan-Diyos hanggan manga Farisiyo nasogo manga polis kagbahala basad aladan Fanimbaan-Dahol kaarakitay gomamat hanya. 33 Ginyas Hisos iglwang, Aho omofod yapdi ha hayo ngalay, ginya aho hawa hanya hasagsogo angko. 34 Nyawa ham imyaya wagligaw angko aban, ham idwa lomag, maskin ham idwa syagan domasog hangko hadasogan aban. 35 Ka manga fagtahinan Hodyo nangarintawan, Hada mayon it lahawan to fag ama tam nodwa lomag hanya? Mayon aw has manga Hodyo masoglatan ha sayo manga banwa Girigo, hanya man ik mamaadal aw is manga Girigo? 36 Kanat kahologan noglwang kitay, tam idwa lomag hanya, nyawa tam somayak, hanggan tam idwa somyagan domasog hat hadasogan aban? 37 Sas katabowanan Fanohodan fag sirang, ka mahalga man fag sirang, is Hisos nalindog, ginya nahampang marigon, nalwang, Nyawa faktaw ka kainom, fag gakbang angko, fag ginom wan. 38 Kito kansorat sas Kasoratan, Nyawa faktaw kagsyag angko, giwat basad fangayofan bomolos manga safa danom kagfaboyag manga taw. 39 In Hisos faglwangon istay, kawa ka Falad Maliyaw ka mangag syag hanya it fagtanggapon aban. Dapat ay, gis nanya fag masohod, is Diyos idyag disag it Falad Maliyaw has taw, maskin is Hisos idyan abwat hat kafiyan. 40 Tibak taw sas fakaaywanan no nadog to fag manga hampang, iglwang, Orongan wan, to wa kan Diyos fangampang. 41 Ka tibag lwang, To wa kan Diyos-natogon-Famawi. Dapat ka tibag lwang, Gwadi idwa gis Galiliya kan Diyos-natogon-Famawi nombangkad aban. 42 Ka Kasoratan iglwang kitay hanya nombangkad aban, gin Gorangon Dabid hasokfonan, sas Bitlihim nomsagaya san Dabid sadili banwanan. 43 Ginya tibak taw sas fakaaywanan igbaliwa in Hisos, tiba idwan. 44 Tiba taw kasaya gomamat hanya, dapat idya ha taw natawid hanya. 45 Ka manga polis nonfwali ya has manga fagtahinan fagalan hanggan has manga Farisiyo, ta gintaw has polis, taglwang, Yakana ham nodwa nataban in Hisos hastay? 46 Ka manga polis igsagot, Nyawa ginahin midwa ha donggon taw kampang kitonya. 47 Ka manga Farisiyo iglwang, Ham aw igfalamang yadi? 48 Ham awkin ha donggon barita kitay ha manga fagtahinan ngatay Farisiyo intiwala ha hanya? Idwa akwa. 49 Tonya fag fakaaywanan fag manga taw idwa natwagdog ka Batasan Hodyo, yakangas Diyos faliyam tonya fag manga taw. 50 Dapat insadik Farisiyo ka sinya, kawas Nikodimo ka nasabang in Hisos itfagonan. Is Nikodimo iglwang, 51 Maangay awkin santam Batasan Hodyo, ham gayfan, tam no fatohoyan has fadosaan sadik taw nodya nangampangan sas hampangan, nodya nadog fiya fiya gi hanya it naibolon? 52 Tagsagot han Nikodimo, Anod, haw awkin taga Galiliya yadi? Haw fag gadal ka Kasoratan, ginya haw tomwa kitay idwa ha fangampang imbangkad gis sakop Galiliya. 53 Ginya madi fagayo nangodgoliyan wan hat manga balay,

8

1 dapat is Hisos hawas Moyod Oliboan. 2 Nonbago marom, dayo kayawa, is Hisos nwali has Fanimbaan-Dahol, nasakbaw has basad aladan. Fagayo fag manga taw nagobok hanya, yakangas Hisos intokaw wa a, igfaadal has taw. 3 Ginya ka mangag faadal Batasan Hodyo hanggan manga Farisiyo nataban sadik ina ista naiktan gis famabayowanan. Ta nafalindog tonya fag ina sasta fagbokngan. 4 Tagfwayong han Hisos, Haw kagfaadal, to fag ina ta natahod gis famabayowanan. 5 In Mwisis togon insorat sa hyami Kasoratan kitay, fahatayan, bintokan ka kitonya fag manga ina. Dapat haw, kinday haw noglwang no ha naibolon kitonya? 6 Tagtikis wa nangos igfasalan odi in Hisos, kaarakitay ha fagsombongon has manga gorangon, nangos iglaban hanya. Dapat is Hisos natarohongan odi, nasorat it timoyo sas boknga fogis daga. 7 Ta nodwag fagomon gintaw yapdi hanya, is Hisos nalindog a, igfwayong has taw, Nyawa faktaw sa hayo kadwa ha naibolon dwat, sogi, gonaan wa bintokan wa tonya fag ina. 8 Ginya madis Hisos natarohongan ya, igsorat ya sas boknga fogis. 9 Dapat ay, ka manga taw no nadog in Hisos fwayong, nanarowayan wa fagayo igsadig sadi. Ka magorang man ka nagona nalahaw. Is Hisos kan-goyan matarohongan yapdi hanggan ka ina malindogan sas dayo ogbot. 10 Ginyas Hisos nalindog a, naintaw has ina, Ina, hadawa ka manga taw kati? Idwa aw han-goyan fatohoyan hyamo has fadosaan? 11 Ka ina nasagot, Ama, fawa hansawad ka manga taw. Is Hisos nafwayong, No kitonya, ahodwa yadig fatohoyan hyamo has fadosaan. Nyawa ha goli wa kati, dapat hawa gogali dwat domwag. 12 Sadi ya ginan is Hisos igtoltol has manga Farisiyo, iglwang, Aho ka yawa sas baba daga. Kagtahin angko idwa lomahaw basad marom, nyawa ginahin, hanya ha akwa wan ka yawa kagfaboyag manga taw. 13 Ka manga Farisiyo iglwang han Hisos, Yabay haw lamang kagfaorongan ha hyamo, im hampang idwa ha kahologan no kitonya di. 14 Is Hisos igsagot, Yatokitay, nyawa ahog faorongan angko sadili, orongan wan angko fwayong maskin aho twa aho no ginda kanbangkad hanggan haday angko hadasogan aban. Dapat ay, ham idwa twa aho no ginda kanbangkad hanggan aho no haday aban. 15 No ham ka kabaya, kito odis ogali taw, dapat ahodwa kabaya nyawa haday fag taw. 16 Dapat ay, halimbawa, aho no kabaya, orongan wan, maskin bohondi aho kagfwayong, angko Ama ka nasogo angko sayadingko. 17 Insorat ngay sa hayo Batasan Hodyo kitay, no dowak taw igfaorongan sadik bagay, tam igfaanod ista manga hampang. 18 Ahogfaorongan angko sadili hanggan angko Ama ka nasogo angko igfaorongan yadi kawa angko. 19 Yakanga ta gintaw in Hisos, Siday im ama? Is Hisos igsagot, Ham idwa kilala angko aho no faktaw orongan. Ham idwa yadi kilala angko Ama. Ham nangos no kilala di aho no faktaw, ham kilala yadingko Ama. 20 Is Hisos igfwayong kitonya has manga Farisiyo nogfaadal yapdi basad aladan Fanimbaan-Dahol. Is Hisos sawasta akbang fandisagan. Idwa ha taw nagamat in Hisos maskin is Diyos idyag faangay gis nanya. 21 Sadi ya ginan is Hisos igfwayong has taw, Ho lomahaw wa aban a, ham somayak wangko dapat ham matay wan maskin ham igfadagos yapdi hayo manga ogali dwat. Ham idwa syagan omoyan angko hangko hadasogan. 22 Ginya madi ka manga fagtahinan Hodyo garintawan kitay, It kahologan aw ngatay somongon noglwang tam idwa somyagan domasog hat hadasogan? 23 Is Hisos igsagot kitay, Ham tagastay is baba daga, dapat aho taga di gim tongod, gin Diyos banwanan. Ham ka tagastay is baba daga, dapat ahodwa gistay is baba daga. 24 Kawa kitonya ahog fwayong hayo kitay ham matay wan ham nogfadagos hayo manga ogali dwat. Anod wan, ham nodwa katiwala kitay AHO AHO WAN, ham matay wan maskin ham igfadagos hayo manga ogali dwat. 25 Ta gintaw in Hisos, Fakta ngakin haw? Is Hisos iglwang, Gis bago bago aho danwa nafwayong hayo no faktaw aho. 26 No kitay di, aywan fag manga bagay ho twag fasogbo hanggan kabaya hayo. Dapat ay, kagsogo angko idwag bohag, kangko lamang donggon gi hanya kangko fagfwayongon has manga taw istay is baba daga. 27 Ka manga taw idwa natwagdog kitay in Hisos faglwangon kawat Ama. 28 Yakangas Hisos iglwang has taw, Aban ham nogfaabwat angko, sas tongod hayo, aho Kanbali Taw, ham tomwa wagdog kitay AHO AHO WAN, ginya madi ham tomwa fiya fiya kitay, ahodwa gibolon nyawa kana nongko di sadili fangayofan, dapat kangko Ama lamang togon angko, kangko fagfwayongon has manga taw. 29 Ka nasogo angko sa yadingko, idwa gobon angko sadi sadi, maskin aho gogali kat fagbayaon fagaba. 30 Is Hisos nogtoltol kitonya, aywan kagsyag ha hanya. 31 Yakangas Hisos igfwayong has manga Hodyo kagsyag hanya, Ham no katanog fagaba angko manga fwayong, ham orongan wan angko manga katogbong. 32 Ham homilala yadi ka fakaoronganan hanggan ka fakaoronganan fomalfas hayo. 33 Tagsagot in Hisos, Hami in Abraham wa hasokfonan. Nyawa ginahin hami bohonwasta manga nasali sogowan. Kana mayon haw noglwang kitay, ha fomalfas hyami? 34 Is Hisos igsagot is taw, Orongan wan angko fwayong hayo, bohonwa bohag kitay, nyawa faktaw ka ha ogali dwat, bilang ka ogali dwat nasali sogowan. 35 Ista sogowan nomtoon galin ya, dapat nyawa ginahin it anak, it anak wan. 36 Yakanga non Diyos wa Anak kagfalfas hayo, ham mafalfasan orongan gis ogali dwat. 37 Ho twa kitay ham in Abraham manga hasokfonan, dapat ay, nyawa kitonya, ham kasayag fahatay angko maskin ham kafang katanog angko manga fwayong. 38 Angko lagan aho no sawangko Ama, kangko fagfwayongon has taw. Dapat ka hayo ama fagfwayongon ha hayo ka hayo fakatanogon. 39 Taglwang han Hisos, Hyami hafofowan magorang kawas Abraham. Is Hisos igsagot is taw, Ham no orongan in Abraham manga hasokfonan, ham nangos somokfon yadit ogali. 40 Dapat ham kasayag fahatay angko nyawa hogtoltol ha hayo angko donggon fakaoronganan gin Diyos. In Abraham ogali idwa kitonya. 41 Hayo ama ibolon ka hayo fagtoladon. Tagsagot in Hisos, Hyami pinagkaama sadi di, kawas Diyos, hami bonwa manga anak gis famabayowanan. 42 Is Hisos iglwang has taw, Yabay, nos Diyos hayo pinagkaama, ham nangos galwasi angko maskin aho giwan Diyos kanbangkad hastay. Bohonwa angko odi sadili fangayofan kitay aho fag imbangkad hastay, angko Ama nasogo angko. 43 Kana mayon ham nodwa twagdog angko manga fwayong, ham gayfan? Maskin ham kadwat igdog angko barita. 44 Is Fandaya hayo ama a, ham it manga wa anak. Ham kasaya gibolon hayo ama manga fakasayaon. Gis bago bago hanya sadik fanlibon taw, idwa yadig baliwa ka fakaoronganan nyawa ginahin, maskin it manga hampang idwa ha maanod. Hanya nogbohag, kawat ogali danwa kitonya maskin hanya bohagon, hanggan hanya ka pinagkaama hasagbohag baliwa. 45 Dapat ay, hogfwayong hayo ka fakaoronganan, yakanga ham idwa katiwala angko. 46 Fakta fag taw sa hayo ka syagan igfatohoyan kitay aho ha ogali dwat, ham gayfan? Dapat ay, aho nogfwayong ka orongan, kana mayon ham nodwa katiwala angko? 47 In Diyos manga anak igtalinga in Diyos manga hampang. Dapat ay, ham idwag talinga hanya maskin ham bohonwan Diyos manga anak. 48 Ka manga fagtahinan Hodyo iglwang han Hisos, Anod, orongan wan hyami fwayong kitay haw taga Samariya, ngandi labang kagfapaong hyamo. 49 Is Hisos iglwang has taw, Idwa ha labang igfapaong angko. Hogfasayagdog angko Ama, dapat ham igfadwat igdog angko. 50 Hodwag sayak kitay manga taw fag fasayagdog angko. Dapat ay, ha akwa sadi ka kasaya kitay manga taw fag fasayagdog angko, hanya bahalag fatohoyan. 51 Orongan wan angko fwayong ha hayo kitay, nyawa faktaw no katanog angko togon fagaba, fawa domog kahatayan. 52 Taglwang han Hisos, Kati mi natwa wagdog fiya fiya kitay labang orongan igfapaong hyamo. Maskin is Abraham natay wan, hanggan ka manga fangampang natay yadi wan, dapat haglwang nyawa faktaw no katanog im togon, idwa domog kahatayan, nyawa ginahin. 53 Hyami pinagkaama is Abraham natay wan. Haw awkin gayfan kitay hyamo kangayanan dahol man in Abraham? Ka manga fangampang natay yadi wan. Fakta odi haw, ha gayfan? 54 Is Hisos igsagot is taw, Idwa ha kahologan aho nogfasayagdog angko sadili. Angko Ama kagfasayagdog angko. Hanya ka hayo faglwangon hayo Diyos. 55 Dapat ham idwa kilala hanya, nyawa ginahin. Dapat ay, aho kilala hanya fiya fiya. Ahog bohag odi aho noglwang kitay ahodwa kilala hanya. Dapat ho kilala hanya a, ho katanog yadi fagaba it fwayong. 56 Hayo pinagkaama is Abraham insaya wagdog kitay hanya lomag no ginahin angko kabangkadan. Hanya nalag ngay, insaya waglag. 57 Ka manga fagtahinan Hodyo iglwang han Hisos, Gwadi haw idya limak safolo fangaraw im kadogayan, kinda tonya, haw noglwang kitay haw nalag in Abraham? 58 Is Hisos igsagot is taw, Orongan wan bohonwa bohag, hyabi is Abraham nodyan sagaya, dandi AHO AHO WAN. 59 Yakanga manga taw nafoyot manga bato kaarakitay bomintok in Hisos. Dapat is Hisos natago wa a, nadokson lamang gis basad Fanimbaan-Dahol.

9

1 Ginya madi, da Hisos noglahaw, ta nalag sadik ama danwa bota, gi yapdis anak dararag. 2 In Hisos manga katogbong gintaw hanya kiti, Haw kagfaadal, faktaw ka ha ogali dwat, ngatay to fag ama, ngatay it manga magorang, maskin insagaya anak dararag bota? 3 Is Hisos igsagot, Bohonwa mawat. Bohonwa kitay ngatay to fag ama, ngatay it magorang ha ogali dwat maskin hanyan sagaya anak dararag danwa bota. Dapat ay, to fag ama bota wan kaarakitay in Diyos kadonongan imlag gi hanya. 4 No sirang yapdi tam fag gibolon ka nasogo angko manga ibolon madolaw. Araw yabi wan, ginya idwa ha taw twa gibolon no yabi. 5 Aho no sayapdis baba daga, aho ka yawa istay is baba daga. 6 Is Hisos no nalwang di nga kitonya, natofay has daga, nayomid ka daga hanggan tofay, ginya nafyad ka lotok has ama bota boknga mata. 7 Ginyag lwang, Haw fag lahaw wan. Yamosan im mata sas bolbogan sas Siloi. Santam sanglitan ka ngayan Siloi, it kahologan, Nasogo. Ginya madi ka ama bota inlahaw wan, nayamos it mata a, no goli wan infoga wan. 8 Kat manga faakbang balay hanggan ka mangag lag hanya, hanya no fagabag sagad igsagad odi gis taw, indolaw wan, ta nangarintawan, Bohonwa awkin to fag ama ka danwa matokawan fagaba sas bahalan dalan igsagad igsagad togbong? 9 Intibag lwang, Tonya wa ngay kagsagad igsagad itfagonan. Intibag lwang, Bohonwan, bilang odi kitonyat manga walong. Dapat ka ama nalwang, Aho wa ngay. 10 Ta gintaw hanya, Twa oman im mata nonfoga? 11 Ka amag sagot kitay, Kawasta fagngayanon ama, is Hisos, ka nayomid daga a, nafyad hangko mata, ginya nasogo angko has Siloi, fag yamos hono angko walong. Yakanga ho hanya wan a, aho no nayamos wangko mata, honfoga wan. 12 Ta gintaw hanya, Hadawas Hisos kati? Hanyag lwang, Hodtwa man. 13 Ginya ta nataban has manga Farisiyo ka ama ka bota haraw. 14 Yabay sawas Sirang Kafahowayan is Hisos no nayomid ka daga hanggan nafafoga tonya fag ama it mata. 15 Sadi ya ginan ka manga Farisiyo naintaw hanya no kinday it mata nonfoga. Ka ama nasagot, Hanya nafyad lotok angko mata, ginya ho nayamos a, kati honfoga wan. 16 Ka manga Farisiyo iglwang, Ka naibolon to idwa gin Diyos, maskin idwa katanog intam Batasan Hodyo kawa has Sirang Kafahowayan. Dapat ay tibag lwang, Kinda nangos sadik ama omibolon manga madolaw kitonya no sonson wa dwat it manga ogali? Ka manga taw kabali wa dowak layonan. 17 Yakanga ka manga Farisiyo naintaw ya domwag has ama, Haw iglwang hanya nafafogam mata, kanam fwayongon no kindak taw tonya? Ka ama nasagot, Hanyan Diyos fangampang. 18 Ka manga fagtahinan Hodyo nodyag fatawag it manga magorang, kafang yapdi katiwala kitay tonya fag ama bota hyabi, dapat kati iglag wa fiya fiya. 19 Yakanga ta gintaw hat manga magorang, Hayo anak awkin to? Ham iglwang danwa bota gis anak dararag ginan, fiya oman kati iglag wan? 20 Ginya madit manga magorang nasagot, Mi twa kitay hyami wa anak, danwa bota gis ogbot ginan. 21 Dapat ay, midwa twa no kinday hanggan no faktaw ka nafafogat mata. Ham intawan hanya, maskin hanya dahol yadi wan. Hanya fadi wadtwa fomwayong hayo. 22 It manga magorang nafwayong kitonya kawa ta kadala ka manga fagtahinan Hodyo maskin ka manga fagtahinan nangoyonan kitay nyawa faktaw nogfaanod kitay is Hisos kan Diyos-natogon-Famawi, ta domayo hanya gis fanimbaan tifonan Hodyo. 23 Maskin ngay it manga magorang nafwayong, Hanya dahol wan, intawan hanya. 24 Yakanga ka manga Farisiyo nafasonson ya ka bota hyabi a, naintaw hanya matangon wa kitay, Im bibig hampang fag ka fakaoronganan wan kawas Diyos igdog wan. Mi twa wan ka ama ka nafafiya hyamo ha ogali dwat. 25 Ka ama nasagot kiti, Hodwa twa ngatay hanya ha ogali dwat, ngatay idwan. Dapat ay sadik bagay ho twa wa fiya fiya. Ho bota wan itfagonan, dapat kati hoglag wan. 26 Ta naintaw hanya, Kanat naibolon ha hyamo? Kinday no nafafoga im mata? 27 Ka ama nasagot has taw, Gwadi ho nafwayong hayo haraw, ham dayo katiwala. Kana ham no kasayag fasaysayan ya domwag angko? Ham aw kasaya yadi kabalit manga katogbong? 28 Ta namaswag odi ka ama a, nalwang, Haw mandi kat katogbong, dapat hami in Mwisis manga katogbong. 29 Tam twa matohoyanan kitay is Diyos nahampang in Mwisis, dapat ay, no kadi tonya fag ama, is Hisos, midwa twa no ginday fag banwanan. 30 Ka ama nasagot, Yabay yabay, ham idwa twa, mangharaw, hanya no ginday fag banwanan, dapat tonya wa ka nafafoga angko mata. 31 Tam twa kitay is Diyos idwag talinga hasta manga darangin ka ha manga ogali dwat, dapat ay is Diyos igtalinga has mangag fasakop hanya, hanggan katanog it fwayong. 32 Gi yapdis fabagowanan intam daga, tam idya ha donggon nyawa faktaw ka nafafoga ista mata ka bota gi yapdis anak dararag. 33 Nangos to fag ama nodwa giwan Diyos, idwa ara nasyagan nafafoga angko mata. 34 Ka manga Farisiyo nasagot hanya, Haw insagaya anak dararag danwa ha ogali dwat, dapat ay, haw man ka kasayag faadal hyami? Ginya madi ta natolod hanya gis basad fanimbaan. 35 Is Hisos no nadog kitay ta natolod, gis basad fanimbaan, ka ama bota kanfiya, naoyan hanya a, naintaw, Haw awkin igsyag has ama Kanbali Taw? 36 Ka ama naintaw, Ama, fakta kin tonya, kaarakitay ho kasyag hanya? 37 Is Hisos nalwang, Haw nalag hanya a, aho wa tonya kam fakampangon kati. 38 Ka ama nalwang, Yabay, angko Fon, hogsyag wa ha hyamo, ginya nalingkohodan san Hisos atobangan. 39 Is Hisos nafwayong, Honbangkad hastay has baba daga kaarakitay ho fatohoyan ka manga taw kitay, ka manga bota fag lomag hanggan ka manga mafogan fag bilang wambota. 40 Tiba manga Farisiyo ka san Hisos akbang nadog it hampang. Ta naintaw hanya, Haw awkin gayfan hami bota yadi wan? 41 Is Hisos nasagot has taw, Ham nangos no bota, idwa ha somogat hayo, nyawa ham igsalan, dapat ay, ham iglwang ham mafogan wan, yakanga ta somogat hayo fiya fiya.

10

1 Ginyas Hisos iglwang, Orongan wan, bohonwa bohag angko fwayong ha hayo kitay kagfanyak idwa las sakbawan no ha odis basad aladan topa, tonya fangnahaw hanggan tolisan. 2 Dapat ay, kagdalan las sakbawan, tonya wa ka gano manga topa. 3 Kagbantay sakbawan igboklas ka tahop a, igfasakbaw hanya. Ka manga topa igdog it hasnog nogtawag it manga sadili topa ngayan. Ka gano topa igfangolo it manga topa has lamnonan. 4 No nafadokson wa fagayo ka hanya gis basad aladan, ka gano iglahaw balis fagonan a, it topa goyan hanya maskin kilalat hasnog. 5 Idwa omoyan no iba odi taw, yatokitay, labi wa ngap lomagyo gis iba taw, maskin idwa kilala ka hasnog iba taw. 6 Is Hisos igtoltol to fag halimbawa has taw, dapat ay, tadwa natwagdog kat bato fwayongon. 7 Yakanga sadi ya ginan is Hisos igfwayong has taw, Orongan wan bohonwa bohag angko fwayong hayo. Aho ka sakbawan has basad aladan topa. 8 Fagayo ka nagona angko manga fangnahaw a, manga tolisan. Dapat ka manga topa idwag talinga has taw. 9 Aho ka sakbawan. Ka somakbaw langko imbawi wan a, somakbaw, domokson, lomag yadi lamnonan. 10 Ka fangnahaw kabangkad kaarakitay ignahaw lamang, igfahatay hanggan igfadwat odi. Honbangkad hastay kaarakitay angko manga topa ha akwa haboyagan a, kafiyaon fag haboyagan. 11 Aho ka fiya fag gano manga topa. Ka fiya fag gano topa idwa kafang matay kaarakitay bomawi it manga topa gis mahori. 12 Ka famalo odi, ka bohonwa ka gano fiya fiya, bohonwa yadi kagfon manga topa, noglag ka hayopan lobo galaw ka manga topa, ka famalo iglagyo odi, igfabayaan ka manga topa. Ginya ka lobo kagat lamang ka topa, igfasarowayan ka tiba. 13 Kasta famalo iglagyo di maskin igfatangdan odi, idwag faanogon ka manga topa. 14 Aho ka fiya fag gano topa. 15 No kinday angko Ama kilala angko hanggan aho kilala angko Ama, kitonya yadi aho kilala angko sadili topa a, angko sadili topa kilala yadi wangko. Hodwa kafang matay kaarakitay has manga topa. 16 Aho ha akwa yapdi manga topa idya sas basad aladan. Aho fag tomaban yadi tonya. Tonya fag manga topa homilala angko hasnog a, ginya madi imbali sadi dik tifonan topa, sadi di ka fangano ka omano tonya. 17 Angko Ama galwasi angko maskin hogdisag angko haboyagan kaarakitay ho bomawi ya angko haboyagan aban. 18 Idwa haglogos angko haboyagan gingko, aho nodwag faangay. Angko sadili fangayofan aho fag idwa kafang katay. Fiya di aho nogfaangay kitay aho fag matay, fiya yadi aho nogfaangay kitay aho fag imboyag ya. To kangko Ama natogon angko ibolonon. 19 Sadi ya ginan ka manga Hodyo inbali dowak layonan no nadog tonya fag manga hampang. 20 Aywan ka nalwang, Labang odi kagfapaong tonya fag ama. Kana ham nogtalinga hanya? 21 Dapat tibag lwang, No ha labang igfapaong hanya, idwa twag toltol kitonya. Kinda fag labang ka syagan igfafoga ista mata no bota, ham gayfan? 22 Gis nanya manga taw kasolong sas Fanohodan Famatalagaan sas Fanimbaan-Dahol sas banwa Hirosalim. Anitayon ya ngadi gis nanya fag masohod. 23 Is Hisos gayayag sasta famahowayan dayo balay, sas akbang Fanimbaan-Dahol. Tonya fag famahowayan tagngayan in Salomon Famahowayan. 24 Yakanga manga Hodyo nagobok hanya a, ta gintaw, Kandogay day haw nogfaadowan yapdi hyami? Sagotan hyami fiya fiya, haw awkin kan Diyos-natogon-Famawi? 25 Is Hisos igsagot has taw, Ho dan wagfwayong hayo dapat ham idwa katiwala angko. Angko manga ibolon kangko ama natogon angko ibolonon, tonya kagfaorongan aho no faktaw. 26 Dapat ham idwa katiwala maskin ham idwan aktom sangko manga topa. 27 Angko manga topa kilala angko hasnog a, ho kilala yadi angko manga topa, tagtahin angko. 28 Hogdisag haboyagan hanggan aban aban ha hanya a, tadwam liyam nyawa ginahin. Idwa ha syagan homagaw gingko angko manga topa. 29 Angko Ama kagdisag angko ka manga topa, labi wa dahol man has fagayo a, idwa ha syagan homagaw gingko ama angko manga topa. 30 Aho hanggan angko Ama mi sadi di. 31 Ginya madi manga Hodyo igfoyot ya bato kaarakitay bomintok in Hisos. 32 Is Hisos iglwang has taw, Aywan angko Ama nafaibolon angko kangko naibolon sa hayo faglagan. Sida kangko naibolon kadwa fiya ham iglag, maskin ham kasayag bintok angko? 33 Ka manga Hodyo igsagot, Bohonwa manga fiya fag ibolon maskin mi kasayag bintok hyamo, kawa haw igsway odin Diyos. Haw iglwang haw is Diyos yadi wan, gwadi ha taw di, haw bohonwas Diyos. 34 Is Hisos igsagot, Idwa aw insorat sa hayo sadili manga Batasan Hodyo kitay is Diyos iglwang ham manga diyos? 35 Is Diyos nogngayan manga diyos it manga nahampang, tam idwa syagan igtangkod ka Kasoratan fwayong. 36 Dapat ay, no kawa aho, angko Ama nafili angko a, nasogo yadingko hastay is baba daga. Kinday nangos ham noglwang ahog sway in Diyos maskin hoglwang aho in Diyos wa Anak? 37 Anod ngay, ham fag idwa katiwala angko, aho nodwa gibolon angko Ama faibolonon angko. 38 Dapat aho no gibolon tonya, nyawa ham idwa katiwala angko hampang, ham fag katiwala nangos angko manga ibolon, kaarakitay ham talastas wa fiya fiya kitay angko Ama sa dingko, hanggan aho sawangko Ama. 39 Ginya madi sadi ya ginan ta gomamat nangos in Hisos, dapat is Hisos nalfas di gista basad gamat. 40 Sadi ya ginan is Hisos nwali ya has difay safa Hordan, han Hwan nagfatognaan manga taw hyabi. 41 Aywan fag manga taw nagobok in Hisos, taglwang, Is Hwan idwa naibolon manga falagon madolaw, dapat fagayo kat nafwayong kawa hastay fag ama inanod wan. 42 Aywan kagsyag in Hisos sinya.

11

1 Is Lasaro, sadik ama taga Bitanya, ha sagit wan. It manga fadwasay ina, da Mariya da Marta igbanwanan yadi sinya. 2 To fag Mariya ka nafwalid famabanglo hantam Fon bitis, ginya nalidgid in Hisos bitis it bok. It fadwasay, is Lasaro, ka ha sagit. 3 Yakanga in Lasaro manga fadwasay ina nasogo sogowan han Hisos, iglwang, Hyami Fon, im fakilalaon ha sagit wan. 4 Dapat ay, is Hisos, no nadog, nalwang, In Lasaro sagit bohonwa fakatayon fiya fiya. Is Lasaro insagit kaarakitay manga taw fasayagdog in Diyos kafiyan, hanggan in Diyos Anak kafiyan imlag yadi. 5 Yabay is Hisos kaawa in Marta hanggan it fadwasay ina hanggan in Lasaro. 6 Dapat ay, nyawa kaawa no kitay di, ta no nafadog in Hisos kitay is Lasaro ha sagit, is Hisos idyapdin ginan ginya dowa yak yabi, kaarakitay mamantay in Lasaro. 7 Ginya madi aban bago diglwang hat manga katogbong, Tam hanya ya has sakop Hodiya. 8 It manga katogbong nasagot kiti, Haw kagfaadal, ngalay yapdi itfagonan, ka manga Hodyo sinya kasayag bintok hyamo. Haw awkin kafwali ya has Hodiya? 9 Is Hisos igsagot, Idwa aw ha safolo ha dowak oras sa sadik sirang? Kaglahaw sirang idwam tahid maskin kalag ka yawa istay sas baba daga. 10 Dapat kaglahaw yabi imtahid wan maskin idwa ha yawa sa hanya. 11 Is Hisos no nalwang di nga kitonya, nafwayong ya domwag, Intam fakilalaon is Lasaro intoyog wan, dapat ho hanya wa a, ho fomolaw hanya. 12 Ka manga katogbong iglwang han Hisos, Hyami Fon, nogtoyog wan, hanya kafiya wan. 13 Kan Hisos fagfwayongon kawas Lasaro natay, dapat ta naayfan kat fagfwayongon kawa matoyogan igfahoway. 14 Yakangas Hisos nafatigna fiya fiya, nalwang, Is Lasaro natay wan. 15 Dapat ay, hogbaya wan kitay hodwa natahod kaarakitay ham katiwala wan. Sogi, tam hanya wan. 16 Is Tomas, kasta nangayan Singan, nafwayong hat manga kapariho katogbong, Tam mahin yadi wa hanya nyawa ara tam matay yadi wan. 17 Ginya madis Hisos nondasog sas Bitanya, nadog kitay is Lasaro ofat wak yabi mafwalidan sas basad lohib bato. 18 Ka tifonan balay Bitanya akbang has banwa Hirosalim, manga odi tolok liho it kaayayowan. 19 Aywan fag manga Hodyo igsabang inda Marta da Mariya kaarakitay iglibang ista fangayofan kawat fadwasay no natay. 20 Is Marta no nadog kitay is Hisos kadasog wan, hanyag tagbo wan Hisos, dapat is Mariya idwan tanog, matokawan di sas balay. 21 Is Martag lwang han Hisos, Angko Fon, haw nangos no natahod di, idwa ara natay angko fadwasay. 22 Dapat ay, ho twa kitay, nyawa kati, is Diyos domisag hyamo nyawa kanam fagsagadon. 23 Is Hisos iglwang han Marta, Im fadwasay imboyag ya. 24 Is Martag lwang, Ho twa kitay angko fadwasay imboyag ya aban has ginanan sirang. 25 Is Hisos iglwang hanya, Aho kagfaboyag ya ka manga natay hanggan aho ka haboyagan. Kagsyag angko nyawa kitay hanya matay, imboyag ya. 26 Ka orongan boyagan hanggan igsyag angko fawa matay orongan, nyawa ginahin. Haw awkin igsyag kitonya? 27 Is Martag sagot, Anod, angko Fon, hogsyag ngay. Hogsyag kitay haw kan Diyos-natogon-Famawi, in Diyos Anak kan Diyos faglwangon kitay imbangkad hastay has baba daga. 28 Is Marta no nalwang di ngay kitonya, nwali has balay, nafwayong han Mariya, dapat idwa sasta fagdogan iba taw, nalwang kitay, Intam Famaadal indasog wan, igfatawag hyamo. 29 Is Mariya no nadog kitonya, madali wanlindog, inlahaw wa hanya. 30 No kitay di is Hisos idyapdin dasog fiya fiya sinya, sayapdit nagtagbowan in Marta. 31 Ka manga taw ka gofod in Mariya sas balay, kaglibang hanya, no nalag is Mariya madalin lindog, nadokson yadi wa a, naoyan hanya. Ta gayfan is Mariya hawas lobgoban kaarakitay omoraw sinya. 32 Is Mariya nondasog wan san Hisos nagdasogan, hanggan nalag hanya, nanlibabaan sat atobangan a, nalwang, Angko Fon, haw nangos no natahod di, idwa ara natay angko fadwasay. 33 Is Hisos noglag kitay is Mariya goraw, hanggan ka manga koyog hanya goraw yadi, is Hisos in-awa waglag, inrongkot wa dahol it fangayofan. 34 Is Hisos naintaw has taw, Ham hadawak nafwalid hanya? Tagsagot, Hyami Fon, tam hanya wan, famantay ngay. 35 Is Hisos nangoraw wan. 36 Ka manga Hodyog lwang, Fanlag nga kin no galwasi in Lasaro. 37 Dapat ka tibag lwang, Bohonwa awkin to fag ama ka nafafoga ka ama bota mata? Idwa aw nasyagan kitay is Lasaro fag idwa natay? 38 Ginya yabay is Hisos inrongkot ya domwag a, hawas lobgoban lohib, ka matahopan bato dahol dahol. 39 Is Hisos nasogo is taw, Bol ka bato. Is Marta ka natay it fadwasay, iglwang, Hyami Fon, no kati wan baboyok wan. Ofat wak yabi itfagonan no natay wan. 40 Is Hisos iglwang han Marta, Ho nafwayong hyamo kitay haw nogsyag dingko, haw lomag in Diyos kafiyan, idwa aw? 41 Ginya ta naboklas ka tahop bato. Is Hisos natangdan it mata has tongod a, iglwang, Mama hogbaya hyamo maskin haw igtalinga angko. 42 Ho danwa twa kitay haw igtalinga angko nyawa ginahin. Dapat ay, hoglwang kitonya kaarakitay ka manga taw istay sas ligongan imtiwala kitay haw wan ka nasogo angko. 43 Is Hisos no nalwang di ngay kitonya, natawag marigon, Lasaro, ha fag dokson wan. 44 Is Lasaro nadokson wa ngay, it manga gamat hanggan bitis masafotan yapdi rotay, it alfoyo matamongan yadi. Is Hisos nafwayong has taw, Lohasan wan, falahawan wa hanya. 45 Yabay, aywan fag manga Hodyo kagsabang in Mariya, no nalag in Hisos naibolon, igsyag yadi hanya. 46 Dapat ay, tiba hawas manga Farisiyo, nafasogbo in Hisos naibolon. 47 Ginya madi ka manga fagtahinan fagalan, hanggan tonya fag manga Farisiyo nafatifon ka manga fagtahinan Hodyo kaarakitay mangampangan. Ta nangarintawan, Kinda odi intam halimbawan? Yabay, aywan to fag ama ibolon falagon madolaw. 48 Tam nogfabayaan hanya, fagayo fag manga taw hanya wak somyag. Ginya madi aban ka manga gorangon manga taga Roma ngandayo imbangkad hastay, domwat intam Fanimbaan-Dahol, hanggan domaog intam sadik layonan taw manga Hodyo. 49 Dapat ay, insadi, it ngayan is Kayfas, ka gorangon fag fagalan gis nanya fag masohod nafwayong has taw, Ham idwa ha fakatwawon. 50 Ham awkin idwa twagdog kitay, fiya man hantam no sadi dik taw ka matay kaarakitay ha sadik layonan taw? Ginya idwam daog sadik kayonya. 51 Ka orongan, bohonwan Kayfas odi sadili fangayofan kitay, hanya fag lwang kitonya. Dapat kawa gis nanya fag masohod, hanya ka gorangon has manga fagalan-han-Diyos, hanya nagona wa nafwayong kitay is Hisos matay kaarakitay ha sadik layonan manga Hodyo. 52 Hanggan bohondi kitay ha sadi odik layonan manga taw, is Hisos no matay, dapat kaarakitay in Diyos manga anak fagayo ka nanarowayan imtifon ya aban sa sadik tifonan. 53 Yakanga ginya ginan ka manga fagtahinan Hodyo igfatalaga no kinday nangos ta no fahatay in Hisos. 54 Kawa kitonya is Hisos noglahaw, idwag falag hanya bangan ha sayo manga banwanan Hodiya, dapat nalin has banwa Ifraim sas bahalan manga banwanan taw. Sinya wak maoliyanan hanggan it manga katogbong. 55 Gis nanya kaakbang wa manga Hodyo Fanohodan Nagsagayan, ta nogtohod ka anghil no nasagaya ista manga balay hyabi hyabi. Nodya Fanohodan wan, aywan gis manga ligongan hawam bohid has banwa Hirosalim kaarakitay igfahosto it manga ogali hasagfalinay baliwa. 56 Ka manga taw igsayak in Hisos. Ta garintawan nogtifonan basad aladan Fanimbaan-Dahol. Kinda ara, ham gayfan? Is Hisos imbangkad aw has Fanohodan? 57 Ka manga fagtahinan fagalan hanggan ka manga Farisiyo nafasognod has taw kitay, nyawa faktaw no natwa is Hisos no siday, fwayongan wan kaarakitay ta gomamat hanya.

12

1 Ginya madi no onom ik sirang aban ka Fanohodan Nagsagayan, is Hisos indasog has Bitanya han Lasaro banwanan. Is Lasaro kan Hisos nafaboyag ya gis kahatayan. 2 In Hisos manga fakilalaon nanyahod hanon kawas Hisos inbangkad. Is Marta sadi kaglag hanon, hanggan is Lasaro sadi ka gofod in Hisos sas bilog fanganan. 3 Ginya madis Mariya nabol sadik sohadan famabanglo nardo, dahol it sali, idwa ha aktom iba, nafyad ka famabanglo han Hisos bitis. Ginyas Mariya nalidgid it bok in Hisos bitis a, sadi wak balay kaayok banglo. 4 Dapat is Hodas Iskariyoti, in Hisos katogbong sadi, ka omoyon aban in Hisos kalaban, igfwayong kiti, 5 Gwadi balay balay no nafasali yap man ka famabanglo, tolok daan dinaryo, ginyag disag ka sali has myabog. 6 Is Hodas noglwang kitonya, bohonwa kitay maskin kaawa ka manga myabog, dapat kawag nahaw wan. Hanya kagbotang ista tifonan kwarta a, inyayom wagbol ginya. 7 Dapat is Hisos iglwang, Fabayaanan wan in Mariya. Nyawas Mariya igfatalaga it naibolon kawa has aban aho nomlobgob. 8 Ka manga myabog idwa ha fagalinan gi hayo akbang, dapat aho idwa fagaba maofodan hayo aban. 9 Ka fakaaywanan fag manga taw, no natwa kitay is Hisos sinyas Bitanya, hanya yadi wan. Bohondis Hisos kat faggobokon, ta kasaya yadi lomag in Lasaro kan Hisos nafaboyag ya gis kahatayan. 10 Yakanga ka manga fagtahinan fagalan talaga wa fahatay in Lasaro yadi, 11 maskin aywan fag manga Hodyo dayo igfasakop has manga fagalan, hawan Hisos nogsyag, kawa gin Lasaro nadalanan. 12 Nonbago marom ka fakaaywanan fag manga taw kanbangkad has Fanohodan nadog kitay is Hisos kadasog has banwa Hirosalim. 13 Yakanga ta nabol manga labong tagisi, nalahaw gis banwa kaarakitay managbo in Hisos. Tagtarawagan marigon, iglwang, Kafiyaon kafiyaon, ka kadasog hastay kati, san Diyos ngayan, Hanya, kan Israil sakop gorangon, fag bomaya wan, 14 Is Hisos nalag sinya sadik anak habayo libaba, nasahay wan, kito kansorat sas Kasoratan, 15 Ham fag idwa kadala, banwa Siyon, Lag ngay, tya wamlwad, hayo gorangon kadasog wan, Masahayan baba anak habayo libaba. 16 Gis nanya yapdi fag masohod, in Hisos manga katogbong idya natwagdog in Hisos kabangkadan basad Hirosalim kitonya. Dapat aban in Hisos kafiyan nonlag, ta bago di natohod kitay insorat kitonya, hanggan in-anod wan ta nogfasayagdog in Hisos. 17 Ka fakaaywanan fag manga taw ka nalag in Hisos itfagonan, is Hisos no natawag in Lasaro gis basad lohib, hanggan nafaboyag ya hanya gis kahatayan, nafadahit has taw ista mata lagan. 18 Yakanga manga taw kaaywanon natagbo in Hisos maskin ta nadog tonya kat naibolon falagon madolaw. 19 Ginya madi ka manga Farisiyo nanoltolan, taglwang, Yabay, yabay, tam idwa ha halimbawan. Fagayo fagayo fag manga taw igtahin wa hanya. 20 Ha akwa manga Girigo hawas Hirosalim yadi, kaarakitay manimba han Diyos sas masohod Fanohodan Nagsagayan. 21 Ta naakbang in Filipi, ka taga Bitsayda, sakop Galiliya. Ta garonganon han Filipi, taglwang, Ama, mi kasaya wa dahol lomag nangos in Hisos. 22 Is Filipi nafwayong han Andris, ginya ta fagayo dowa naakbang han Hisos, nafwayong hanya ka manga Girigo fakasayaon. 23 Is Hisos nasagot has taw, Kati wa fag masohod intohoyan kitay angko kafiyan, aho Kanbali Taw, fag imlag wan. 24 Orongan wan, bohonwa bohag angko fwayong hayo kitay, sadi odik bolhog ka tirigo nodyan tanom has basad daga, hanggan wanboyok ka bolhog gona, ginya madi ha natobo ya ka bomohad aywan aban. 25 Nyawa faktaw no fagaba kawili odit sadili haboyagan, imliyam di tonya aban, dapat ay kadwa kwangit it haboyagan istay is baba daga, ha akwa wa haboyagan hanggan aban aban. 26 No ha kasaya kabali angko sogowan, fag tahin yadi wangko. Aho no siday, angko sogowan sinya yadi wan. Nyawa faktaw kangko sogowan, angko Ama gomalang hanya. 27 Kati angko fangayofan kahori wa dahol dahol. Kana ara angko fagfwayongon, ham gayfan? Aho awkin fag lomwang, Mama bawiyan nangos angko gingko fagdalanon mahori kati? Idwan. Maskin ngay honbangkad hastay kaarakitay omagwanta ka kati fag mahori. 28 Mama, fag im ngayan kafiyan kamlag kati. Ginya ha nahampang gin Diyos banwanan sam tongod, iglwang, Ho nafalag angko ngayan kafiyan has taw, hanggan ho mamalag ya tonya aban. 29 Ka fakaaywanan fag manga taw malindogan sinya nadog ka nahampang. Tibag lwang kitay nadalogdog. Tibag lwang, Sadik anghil nahampang hanya. 30 Dapat ay, is Hisos igfwayong has taw, Bohonwa aho kat fagfarigonon no nalwang kitonya, ka nahampang kitonya kasayag farigon hayo fangayofan. 31 Kati wan is Diyos fatohoyan kastay is baba daga it fadosaan. Kati yadi kagbahala istay is baba daga im-okas wan has sokayan. 32 Dapat ay, aho nom-abwat sas baba daga, aho faakbang hangko fagayo fag manga taw. 33 Is Hisos noglwang kitonya, it fagfalimbayon no kinday hanya no matay aban. 34 Dapat ay, ka fakaaywanan fag manga taw iglwang, Migbasa sa hyami manga Batasan Hodyo kitay in Diyos-natogon-Famawi igdogayan hanggan aban aban. Kana haw noglwang Kanbali Taw fag im-abwat kitonya? Faktaw to kam faglwangon Kanbali Taw? 35 Is Hisos iglwang has taw, Sadik ngalay ka yawa sawa hayo yapdi. Fag fadagos yapdi hayo lahawan ka yawa no sawa hayo yapdi kaarakitay ka marom idwa tomahod hayo. Kaglahaw basad marom idwa twa no hadat hadasogan. 36 Ka yawa no sawa yapdi hayo, fag syag hanya kaarakitay ham im-aktom sas sakop mayawa. Is Hisos no nalwang di nga kitonya, inlahaw wan, nafasamanon gis taw. 37 Nyawas Hisos naibolon kayonya fag manga falagon madolaw sasta faglagan, tadyag syag hanya. 38 Inbali kitonya kaarakitay in Isayas, in Diyos Fangampang fwayong, im-anod kitay, Diyos, fakta kantiwala hyami natoltol barita, haw gayfan? Haday fag taw is Diyos nogfalag it karigonan? 39 Yakanga tadwa twa katiwala, maskin is Isayas nafwayong ya domwag, 40 Is Diyos nafabota ista manga mata, nafaganit yadista manga fangayofan, Kaarakitay tadwa lomag, Idwa yadi tomwa wagdog, Idwa yadi hangko nogdali kaarakitay mamafiya it manga sagit. 41 Is Isayas nahampang kitonya maskin nalag no kinday in Hisos kafiyan aban, ginya natoltol kawa ha hanya. 42 Nyawa kitonya, aywan fag manga fagtahinan Hodyo igsyag in Hisos, dapat tadwag fadog has taw maskin ta kadala kitay, ka manga Farisiyo domayo has taw gis fanimbaan tifonan Hodyo. 43 Maskin ka mahalga has taw, fag manga taw kagbaya hanya, nyawas Diyos idwag baya. 44 Ginyas Hisos nahampang marigon, iglwang, Kagsyag angko bohondi aho kat fagsyagon. Hanyag syag yadi hasagsogo angko. 45 Kaglag angko iglag yadi kagsogo angko. 46 Aho ka yawa kanbangkad hastay has baba daga, kaarakitay fagayo kagsyag angko idwam goyan sas marom. 47 Hodwa fatohoyan has fadosaan kagdog angko manga hampang, dapat idwa katanog angko, maskin honbangkad ngay istay kaarakitay bomawi manga taw istay is baba daga, hodwan bangkad kaarakitay fatohoyan manga taw has fadosaan. 48 Iba bagay ka fatohoyan has fadosaan kagdayo angko, hanggan idwag faanod angko manga hampang. Angko natoltol manga hampang kagfatohoyan hanya aban has fadosaan sas ginanan sirang. 49 Kawa angko manga fwayong idwa gingko odi sadili fangayofan, angko Ama ka nasogo angko ka nafasognod angko angko bato fwayongon fiya fiya. 50 Ho twa yadi wagdog kitay it fasognod kagdisag has taw haboyagan hanggan aban aban. Yakanga angko fagfwayongon ka lamang angko Ama fasognod angko kitay, aho fag fwayong kitonya.

13

1 Ginya madi aban, ta no kaakbang mangwan ka Fanohodan Nagsagayan, is Hisos natwa kitay gis nanya fag masohod hanya kaakbang kaalin wan gistay gis baba daga, hawat Ama. Is Hisos danwa galwasi it sakop istay is baba daga, galwasi yapdi hanggan has katabowanan. 2 Araw, da Hisos igsayowan kwan, igyafon wan. Is Fandaya danwa nafaisip in Hodas, in Simon Iskariyoti anak, kitay, hanya fag omoyon in Hisos maga kalaban. 3 Is Hisos natwa kitay it Ama nadisag ha hanya fagayo fag kangayanan, natwa yadi kitay hanya giwan Diyos kan-ginan, hanggan hawan Diyos aban. 4 Yakanga, taw no sas bilog fanganan, is Hisos nalindog a, naloslos ka balis babaw it solong rotay, ginya nafogong twalya sat awak. 5 Is Hisos natalin danom has fanggonawan, ginya madi nafabago nagonaw it manga katogbong bitis, ginya nafyad twalya kat fogong sat awak. 6 Is Hisos no kaakbang wa gomonaw in Simon Pidro bitis, is Simon nahwangit wan, iglwang, Angko Fon, ha gayfan haw awkin gomonaw angko bitis? 7 Is Hisos igsagot in Simon, No kati yapdi ham kadolaw angko ibolon, dapat aban ham tomwa wagdog. 8 Is Pidro iglwang marigon, Nyawa kindawan, nyawa ginahin, hodwa mamagonaw angko bitis hyamo. Is Hisos igsagot han Pidro kiti, Haw nodwa fagonaw angko im manga bitis, hadwa kasadi hangko. 9 Is Simon Pidro iglwang, Angko Fon, no kitonya, fag bohon di angko manga bitis, fag hanggan wangko manga gamat hanggan alfoyo. 10 Is Hisos iglwang, Ka nanyagos, maangay wan it habilogan sadik dahonya. Nyawadwag fyagos domwag sadik dahonya habilogan, bitis lamang ka fagonawon. Ham maangay wan, no kitay di, dapat idwa fagayo. 11 Is Hisos danwa twa no faktaw ka omoyon hat kalaban, yakangag lwang, Ham bonwa fagayo maangay. 12 Is Hisos nontabo wa gonaw ista manga bitis, nasolong ya kat naloslos balokas haraw, ginya nwali ya has fanganan. Is Hisos naintaw has taw, Ham awkin natwa wagdog no kana kat kahologan kangko naibolon ha hayo kati kati? 13 Ham igngayan angko hayo Famaadal hanggan hayo Fon. Maangay ham nogngayan angko kitonya, maskin aho wa ngap tonya. 14 No aho kagfon hayo, hanggan hayo Famaadal, nagonaw hayo bitis, ham fag kitonya yadi. Ham aba fag gonaw yadi ista manga bitis. 15 Aho nafalag hayo sadik fagtoladon kaarakitay ham tomolad yadi kitongko naibolon ha hayo. 16 Orongan wan, bohonwa bohag angko fwayong hayo, nyawa gafo nasali sogowan idwa abwat man it fon it kangayanan, hanggan kasta nasogo idwa abwat man kagsogo hanya it kangayanan. 17 Ham no twa wagdog to fag manga bagay, ham bomaya yadi ham no gogali kitonya. 18 Bohonwa ham fagayo kangko fagfwayongon. Ho fadi wad kilala kangko manga nafili. Dapat ay, ka Kasoratan fag im-anod wan. Ka Kasoratan iglwang, Insadi kagsayo angko omoyon angko kalaban. 19 Hogfwayong hayo kati bagom anod tonya kaarakitay nom-anod aban, ham imtiwala kitay AHO AHO WAN. 20 Orongan wan bohonwa bohag angko fwayong hayo, kagtanggap angko sogowan, aho yadit fagtanggapon. Kitonya yadi kagtanggap angko, kagsogo angko it fagtanggapon yadi. 21 Is Hisos no nalwang di nga kitonya, inhori wa dahol dahol it fangayofan, iglwang, Hogfwayong hayo, orongan wan, bohonwa bohag, insadi sa hayo omoyon angko manga kalaban. 22 In Hisos manga katogbong namarantayan ha sadi ha sadi. Ta gadowan no faktaw kan Hisos fagfwayongon. 23 In Hisos katogbong, it fagalwasiyon fiya fiya, masorayan sas fanganan, it alfoyo san Hisos akbang dobdob. 24 Yakangas Simon Pidro nafaaman hanya kitay, Fwayongan hyami no faktaw kat faglwangon ka omoyon it kalaban? 25 Kawa masorayan kitonya, ka katogbong gintaw kiti, Hyami Fon, fakta fag taw tonya? 26 Is Hisos igsagot, Ka taw kangko fagdisagon to fag lifong tinapay aho no natogna wan, ya tonya wan. Ginya madis Hisos no natogna ka lifong tinapay, nadisag han Hodas, in Simon Iskariyoti anak. 27 Is Hodas no nabol ka lifong tinapay, is Satanas hawan Hodas basad fangayofan, igfasognod hanya. Ginyas Hisos iglwang han Hodas, Sogi, fatonglosan madali im bato ibolonon. 28 Ka tiba taw sas fanganan idwa twagdog no kana mayon is Hisos noglwang kitonya. 29 Intiba gayfan, kawas Hodas kagbotang ista sohadan kwarta, ngandayo is Hisos igsogo hanya kaarakitay manali ista fakasayaon sas Fanohodan. Ngatay is Hisos igsogo in Hodas kawa ha fagdisagon has manga myabog, ta gayfan. 30 Is Hodas nontabo wa kwan ka lifong tinapay, dagos wa nadokson. Yabi wan gis nanya. 31 Is Hodas nondokson wan, is Hisos iglwang, Kati manga taw lomag angko kafiyan, aho Kanbali Taw. In Diyos kafiyan imlag yadi wa sangko kati. 32 Ginya in Diyos kafiyan nomlag sangko, is Diyos mamalag yadi angko kafiyan, aho Kanbali taw, kaakbang wa falag tonya kati. 33 Angko manga anak, ngalay odi tam no gofodan gis kati. Ham somayak angko dapat hogfwayong hayo kito yadi kangko nafwayong has manga fagtahinan Hodyo, kitay ham idwa syagan domasog hangko hadasogan. 34 Kati aho ha togon ya domwag bago ha hayo kitay, ham fag gadgalwasiyan ha sadi ha sadi. No kinday aho no galwasi hayo, ham fag kitonya yadi no galwasi ha sadi ha sadi. 35 Ham no gadgalwasiyan ha sadi ha sadi, fagayo tomwa kitay ham angko wa manga katogbong. 36 Is Simon Pidro gintaw in Hisos kiti, Hyami Fon, ha hadawa nangos? Is Hisos igsagot, Kati hadya syagan tomahin hangko hadasogan, dapat aban, yabay, hanggan wa haw omoyan angko. 37 Is Pidro gintaw ya domwag, Hyami Fon, yakana aho nodya tomahin hyamo kati? Nyawa aho hanggan wa matay kawa ho galwasi hyamo. 38 Is Hisos igsagot han Pidro kiti, Hadwa aw kafang matay kawa hangko, ha gayfan? Yatokitay, lag nga araw, tabag nodyag taraok, haw tomangkod tolo ginan kitay hadwa kilala angko.

14

1 Hayo manga fangayofan fag idwa kabalaw. Ham fag syag in Diyos, fag syag yadingko. 2 Kaaywanon fag manga lingoban sangko Ama balay. Nodwa kitonya hodwa hara nafwayong hayo kitay, ho gomona wa hayo kaarakitay mamatalaga hayo oliyanan. 3 Ginya aho no gomona hayo, mamatalaga hayo oliyanan, ho kafwali ya hastay kaarakitay tomaban hayo. Ginya madi aho no siday, ham sinya yadi wa aban. 4 Ham twa wan ka dalan hangko hadasogan. 5 Dapat is Tomas iglwang han Hisos, Hyami Fon, midwa twa hyamo hadasogan, kinda ara hami no tomwa ka dalan hanya? 6 Is Hisos igsagot hanya kiti, Aho ka dalan, aho ka fakaoronganan, hanggan aho ka haboyagan. Idwa ha domasog hangko Ama nodwa domalan langko. 7 Ham no nahilala angko, ham kilala yadingko Ama. Gis kati ginan ham kilala wa hanya a, ham nalag wa hanya. 8 Is Filipi iglwang han Hisos, Hyami Fon, falagan ha hyami im Ama nangos, mi no lomag hanya, yabay fiya wan. 9 Is Hisos igsagot, Gwadi, Filipi, dogay wan tam no koyogan, ha awkin idyapdi kilala angko fiya fiya? Ka nalag angko nalag yadingko Ama. Kana haw nogfasolopan yapdi, kitay, falagan hayo angko Ama? 10 Ha awkin idwa katiwala, Filipi, kitay aho kasadi sangko Ama hanggan angko Ama kasadi yadi sangko? Idwa gingko di sadili fangayofan kangko nafwayong ha hayo. Angko Ama kasadi hangko a, hanya kagfatonglos it sadili fakasayaon. 11 Ham fag katiwala angko fwayong, kitay aho kasadi sangko Ama, hanggan angko Ama kasadi hangko, ngatay ham fag katiwala maskin ham nalag angko manga naibolon. 12 Orongan wan angko fwayong hayo kitay, kagsyag angko omibolon yadi manga ibolon madolaw kito kangko naibolon. No kitay di, hanya omibolon istay bohon di kitongko maskin aho hawangko Ama. 13 Nyawa kana hayo fagsagadon, sangko ngayan, homtanog wan kaarakitay gingko ibolon manga taw lomag angko Ama kafiyan. 14 Nyawa kana ka hayo fagsagadon gingko, sangko ngayan, ho omibolon wa tonya. 15 Ham no galwasi angko, ham imtanog wangko manga togon. 16 Ho somagad yadi gingko Ama a, hanya somogo wa ha hayo sadi yak Fanogbong kaarakitay omofod hayo hanggan aban aban. 17 Hanya ka Falad fakaoronganan. Ka taga istay sas baba daga fag manga taw idwa syagan igtanggap hanya ista Fanogbong maskin bohonwasta mata lagan, tadwa kilala hanya. Dapat ay, ham kilala hanya fiya fiya maskin hanya omofod hayo hanggan sawa hayo manga basad fangayofan aban. 18 Ho no lomahaw, hodwa omobon hayo kitos manga olila. Aho kafwali ya ha hayo aban. 19 Ngalay di aban ka taga istay sas baba daga fag manga taw idwa lomag angko domwag, dapat ham lomag angko aban. Maskin aho boyagan, ham imboyag yadi. 20 Gis nanya fag sirang aban, nom-anod wan, ham tomwa kitay aho kasadi hangko Ama hanggan ham kasadi sangko, hanggan aho kasadi ha hayo. 21 Kagfaanod angko manga togon hanggan katanog tonya, hanya ka galwasi angko. Ka galwasi angko, angko Ama yadi fagalwasiyon. Aho galwasi yadi hanya a, aho mamahilala angko sadili ha hanya. 22 Is Hodas, bohonwa kan Iskariyoti anak fag Hodas, gintaw in Hisos kiti, Hyami Fon, kinda nangos haw no mamalag im sadili ha hyami, dapat idwa mamalag has baba daga fag manga taw? 23 Is Hisos igsagot han Hodas kiti, Ka galwasi angko, imtanog yadingko hampang. Angko Ama galwasi yadi hanya a, mi sinya wak bomanwanan sasta basad fangayofan. 24 Kadwa galwasi angko idwa yadi katanog angko manga hampang. Ka hayo donggon hampang idwa gingko sadili, gi dingko Ama ka nasogo angko. 25 Hogfwayong hayo to fag manga bagay aho no gofod yapdi hayo. 26 Dapat aban, angko Ama somogo ha hayo ka Fanogbong ka tomobos angko. Hanya ka faadal hayo fagayo fag manga fakaoronganan, fatohod ha hayo fagayo angko nafwayong. 27 Kahowayan kangko faobonon ha hayo. Angko sadili kahowayan kangko disagon ha hayo. Idwa kito kastay is baba daga fag kahowayan kangko disag ha hayo. Hayo manga fangayofan fag idwa kabalaw, fag idwa yadi kadala. 28 Ham nadog wan aho noglwang kitay, aho kalahaw wan, dapat ay, aho aba kabangkad ya ha hayo. Ham no galwasi nangos angko, ham igbaya wan maskin ho hawangko Ama kawat kangayanan dahol man angko. 29 Kati hogfwayong hayo to fag manga bagay bagom anod, kaarakitay nom-anod wan, ham imtiwala angko manga fwayong. 30 Kati ngalay odi aho no kampang yapdi ha hayo maskin kastay is baba daga fag gorangon kaakbang wan. Hanya idwa syagan igdaog angko. 31 Dapat ay, ho katanog angko Ama manga togon, kaarakitay kastay is baba daga fag manga taw fag tomwa kitay aho galwasi angko Ama. Ginyas Hisos iglwang, Yabay, kati tam fag dokson wan, tam kalahaw wan.

15

1 Aho ka fon obas orongan, angko Ama ka bahala gano. 2 Angko Ama kaglifong fagayo fag manga sanga sangko kadwag bohad a, igyawa yadi ka manga sanga kagbohad kaarakitay labi man bomohad. 3 Ham basad fakayawan kati kawa angko manga hampang ka nafayawa hayo. 4 Ham fag idwag saman gingko kito yadi aho nodwag saman gi hayo. No kinday ka manga sanga idwa syagan bomohad no masamanan gis fon obas, ham idwa yadi syagan bomohad no masamanan gingko. 5 Aho ka fon obas, ham ka manga sanga. Kadwag saman gingko hanggan aho sa hanya, tonya kagbohad aywan. Maskin ham no masamanan di gingko, ham idwa somyagan omibolon nyawa kana, no ham odi. 6 Kadwa madahitan sangko im-okas kitos manga sanga kan-okas, inlayong. Tagtifon lamang ka manga sanga kanlayong a, gokas has basad afoy hanggan wamsonog. 7 Ham nodwag saman gingko hanggan angko manga hampang igdogayan sa hayo fangayofan fagaba, nyawa kana hayo fagsagadon, im-anod wan. 8 Ham nogbohad aywan, angko Ama kafiyan imlag wan. Imlag yadi kitay ham angko wa manga katogbong. 9 No kinday angko Ama no galwasi angko, kitonya yadi aho no galwasi hayo. Fag fagaba kasadi hangko kaarakitay ho galwasi yadi hayo fagaba. 10 Aho katanog angko Ama manga togon, yakanga aho it fagalwasiyon fagaba. Kitonya yadi, ham no katanog angko manga togon, ham angko manga fagalwasiyon fagaba. 11 Maskin hogfwayong hayo kito kaarakitay ham domog yadi angko kasolongan hanggan hayo kasolongan idwa ha korang. 12 Angko togon ha hayo kiti, ham fag gadgalwasiyan ha sadi ha sadi, kito yadi aho no galwasi hayo. 13 No ha taw bomawi it manga fakilalaon, nyawa hanya hanggan wa matay, idwa ha akwa domwag galwasi labi man inya. 14 Ham no katanog angko togon ha hayo, ham angko wa manga fakilalaon. 15 Gis kati ginan hodwag ngayan hayo domwag angko manga sogowan, maskin kat fon idwag fwayong hat manga sogowan it fon ibolonon fagayo. Dapat hogngayan hayo angko manga fakilalaon maskin ho natoltol ha hayo fagayo kangko donggon gingko Ama. 16 Bohonwa kitay ham kagfili angko, dapat aho ngap kagfili hayo. Ahog fatalaga yadi hayo kaarakitay ham lomahaw wan a, bomohad yadi aywan, manga bohad kadwa kafangta bagyo. No kitonya angko Ama domisag ha hayo nyawa kana ka hayo fagsagadon sangko ngayan. 17 Angko togon ha hayo kiti, ham fag gadgalwasiyan ha sadi ha sadi. 18 Ka tagastay baba daga fag manga taw no kadwat iglag hayo, ham fag tohod kitay aho kasta fakadwaton iglag, bago di ham. 19 Ham no nangos tagastay sas baba daga fag manga taw, kastay fag manga taw galwasi yadi hayo. Dapat ay, aho nafili hayo gistay is baba daga fag manga taw. Kati ham bohonwa tagastay baba daga fag manga taw, yakanga ka manga tagastay kadwat iglag hayo. 20 Ham fag tohod angko fwayong ha hayo kitay, kasta sogowan kangayanan idwa dahol man kat fon kangayanan. Maskin ta nogfahoriyan angko, ta mamahoriyan yadi hayo, dapat ta no katanog angko manga hampang, tamtanog yadi hayo. 21 Ta mamahoriyan hayo kitonya kawa ham angko nafili fag manga taw. Maskin tadwa kilala ka nasogo angko. 22 Aho nangos nodwan bangkad hastay, nodwa yadi nahampang has taw, idwa twa sogaton has taw, dapat ay, tadwa ha katowidan kati, maskin ta nadog wan. 23 Ka kadwat iglag angko, kadwat yadig lag angko Ama. 24 Idwa ha fagsogaton has taw aho nodwa naibolon sasta faglagan manga ibolon kadwa ha taw naibolon nyawa ginahin. Dapat ay, ta fadi wad nalag angko manga ibolon, dapat ta kadwat iglag angko hanggan angko Ama. 25 Inbali kitonya kaarakitay im-anod wan kansorat sas Batasan Hodyo kitay, Ta kadwat iglag angko, idwa ha fabangdanan gingko. 26 Dapat ay, ka Fanogbong imbangkad wan. Ho somogo hanya ha hayo gingko Ama. Hanya ka Falad fakaoronganan, gingko Ama kamginan. Hanya ka mamaorongan kawa aho no faktaw. 27 Hanggan wa ham kagfaorongan maskin ham angko ofod yadi gis fabagowanan.

16

1 Hogfwayong hayo to fag manga bagay kaarakitay ham idwag fagomon igsyag angko. 2 Aban ta domayo hayo gis manga fanimbaan Hodyo. Bohondi kitonya, aban, ta nogfahatay hayo, ta gayfan kitay ta gibolon in Diyos ibolon. 3 Manga taw mamahoriyan hayo kitonya, maskin tadwa kilala angko Ama, idwa yadi kilala angko. 4 Dapat hogfwayong ha hayo kitonya, kaarakitay to fag manga bagay nom-anod wan aba, ham fag tomohod kangko nafwayong ha hayo. Hodwa nafwayong hayo to fag manga bagay gis bago bago, maskin tam gofodan fagaba gis nanya. 5 Dapat kati aho hawasagsogo angko a, nyawa kitonya ngadi sadi sa hayo idwa ha gintaw aho no hadawan. 6 Dapat ay, kawa ho nafwayong hayo kitonya, ham gwayan wa karongkot hayo manga fangayofan. 7 Dapat angko fagfwayongon hayo orongan wa kitay, dahol man hayo fakinabang aho no gobon hayo. Maskin aho nodwa gobon hayo, ka Fanogbong idwam bangkad ha hayo. Dapat ay, aho no omobon hayo, hanya kangko sogoon ha hayo. 8 Hanya nomdasog ha hayo, hanya mamatwagdog has taw istay is baba daga no kana ka ogali dwat, no kana ka kahaslongan, hanggan no kinday nomtohoyan has fadosaan. 9 Mamatwagdog no kana ka ogali dwat kawa tadwag syag angko, 10 no kana ka kahaslongan maskin aho hawangko Ama, ham fawa lomag angko aban. 11 Fatwagdog yadi no kinday nomtohoyan has fadosaan kawas Diyos danwa nafatohoyan has fadosaan ka gorangon istay is baba daga. 12 No kitay di aywan yapdi angko bato fwayongon ha hayo, dapat ham idya fagayo twagdog, aho no fomwayong hayo fagayo kati. 13 Dapat ay, ka Falad fakaoronganan nomdasog ha hayo, hanya ka fadonong hayo ka manga fakaoronganan fagayo. Bohonwat sadili fangayofan it fagfwayongon aban, kat donggon lamang gingko it bato fwayongon. Hanya fomwayong yadi ha hayo ka manga bagay kamlag aban. 14 Hanya mamalag angko kafiyan maskin hanya fomwayong hayo kat donggon gingko. 15 Fagayo kangko Ama, angko yadi wan, yakanga hoglwang ka Falad tomalinga angko fwayong, ginya madi hanya ka fomwayong tonya ha hayo. 16 Kati aba sadik ngalay, ham idwa lomag angko, ginya sadi yak ngalay ham lomag ya angko aban. 17 In Hisos manga katogbong tiba nangarintawan kiti, Kanat kahologan it nafwayong intam kitay, sadik ngalay tam idwa lomag hanya, ginya madi sadi yak ngalay tam lomag ya, hanggan hanya iglwang kitay hanya hawat Ama? 18 Kana tonya fag ngalay lamang aban it kahologan? Tam idwa natwagdog no kanat kahologan. 19 Is Hisos natwa kitay ta kasaya gintaw hanya, yakanga hanyag fwayong has taw kiti, To awkin hayo fagarintawanon ha sadi ha sadi no kana angko bato lwangon, aho noglwang, aban, ngalay ham idwa lomag angko, ginya madi sadi yak ngalay ham lomag ya angko? 20 Orongan wan, bohonwa bohag, angko fwayong ha hayo kitay ham omoraw hanggan ngomongoy, dapat ka manga tagastay is baba daga fag manga taw bomaya wan. Anod, bago bago ham galibitan wan, dapat hayo kaalibitan imbali kasolongan. 21 Kitos ina nogfasagaya it anak igdog galibitan wa dahol gis nanya fag masohod, dapat nonsagaya wan, fawag tohod kitay galibitan haraw, maskin igbaya wan kawa sadi yak anak dararag insagaya wan istay is baba daga. 22 Kitonya mandi ham. Ham galibitan kati, dapat tam manladlagan ya aban. Ham bomaya wa dahol dahol gis nanya fag masohod aban. Fawa ha taw syagan faliyam hayo kasolongan aban. 23 Gis nanya aban ham idwa ha intawon angko domwag. Orongan wan, bohonwa bohag, angko fwayong hayo kitay, nyawa kana hayo sagadon gingko Ama, sangko ngayan, angko Ama domisag ha hayo. 24 Balis kati ham idya ha nasagad nyawa kana sangko ngayan. Ham fag sagad, ham tomanggap wan kaarakitay ham kasolong wa dahol dahol. 25 To fag manga bagay ho natoltol ha hayo las manga halimbawa. Dapat ay, aban, fawa las manga halimbawa ho no manoltol ha hayo, ho tomigna wa fiya fiya, aho no manoltol ha hayo gis nanya kawa angko Ama. 26 Gis nanya fag manga masohod aban, sangko ngayan, ham somagad hayo fakasayaon gingko Ama. Nyawa hodwag fwayong hayo kitay ho fomalo hayo igdarangin hangko Ama, 27 maskin angko Ama galwasi yadi hayo. Ham angko Ama fagalwasiyon kawa ham galwasi angko, hanggan ham katiwala kawa aho giwan Diyos. 28 Ho giwangko Ama hyabi, ginya honbangkad ya hastay is baba daga, kati aho lomahaw ya gistay is baba daga, ho haya ngawangko Ama. 29 In Hisos manga katogbong igfwayong, Kati yabay, hagfatigna wa fiya fiya, hadwa kampang las manga halimbawa. 30 Kati mi natwa wagdog kitay ha talastas wa fagayo fagayo, nyawa manga taw idya gintaw hyamo. Yakanga mi katiwala kitay haw giwan Diyos. 31 Is Hisos gintaw has taw, Kati ham awkin katiwala wan? 32 Dapat ay, araw ogbot, no kitay di kati wan, ham manarowayan wa fagayo, ham mangodgoliyan wan. Aho idwam dowa kam-goyan. Dapat ay, ka orongan, aho bohondi sadi, maskin angko Ama sa yadingko. 33 Hogfwayong ha hayo to fag manga bagay kaarakitay ham ha kahowayan sangko. Istay is baba daga ham lomag kahoriyan. Dapat ay, fag marigon hayo manga fangayofan, aho nadaog ka karigonan istay is baba daga.

17

1 Is Hisos nontabo wagtoltol kitonya, nabantay has tongod, iglwang, Mama, kati wan fag masohod fag falag im Anak kafiyan kaarakitay aho, im Anak, mamalag yadi has taw im kafiyan. 2 Kawa haw igfabahala angko has manga taw, fagayo fagayo sadik baba daga, kaarakitay igfaboyag hanggan aban aban, fagayo fag manga taw kam fagdisagon angko. 3 To ka haboyagan hanggan aban aban, manga taw no kilala hyamo, ka sadi dik Diyos orongan, hanggan kilala yadin Kiristo Hisos kam nasogo. 4 Ho nafalag im kafiyan istay is baba daga, kawa ho nafatabo im faibolonon angko. 5 Mama, falagan ya has taw angko kafiyan kati, kito yadi angko kafiyan hyabi, tam no gofodan ka daga nodyan halig. 6 Aho nafahilala hyamo ngayan has manga taw kam nadisag angko gistay is baba daga. Tonya fag manga taw danwa hyamo, ginya haw nadisag wangko. Ta katanog hyamo hampang fagaba. 7 Kati ta natwa wagdog fiya fiya kitay, fagayo kam nadisag angko, gi hyamo orongan. 8 Ho natoltol yadi has taw kam nafwayong angko, ta nafaanod yadi wan. Ta twa kitay aho orongan gi wa hyamo nonbangkad hastay hanggan ta katiwala kitay haw ka nasogo angko. 9 Kam nadisag angko fag manga taw kangko fagdaranginon. Hodwag darangin kawa has fagayo fag manga taw sas baba daga, dapat kawa has manga taw kam disag angko, maskin hyamo wa tonya. 10 Kangko fag manga taw fagayo, hyamo yadi wan, hanggan fagayo ka hyamo, angko yadi wan. To fag manga taw kagfalag angko kafiyan. 11 Dapat ay, to fag manga taw istay yapdis baba daga, ho fawa sas baba daga kati. Ho kaoli wan has nyamo hyamo. Mama, anowan nangos to fag manga taw sa hyamo Maliyaw fag ngayan karigonan, kam disag yadingko ngayan, kaarakitay tamsadi kito yadintam, tam sadi di. 12 No kandogay day aho no gofod yapdis taw, aho naano tonya sa hyamo ngayan karigonan, kam nadisag yadingko ngayan. Ho naano has taw fiya fiya a, idwa hanliyam no bohonwa tonya fag taw ka danwan tohoyan has kadwatan kaarakitay im-anod wan kansorat sas Kasoratan. 13 Dapat kati ho kabangkad has nyamo hyamo. Hogfwayong to fagayo aho nostay yapdi sas baba daga, kaarakitay ta domog yadingko kasolongan kadwa ha korang. 14 Ho natoltol has taw kam hampang, yakanga ka manga tagastay is baba daga kadwat iglag angko manga taw, maskin ta bohonwa tagastay fag manga taw kati, kito yadingko, aho bohonwa tagastay. 15 Ahodwag sagad kitay haw fag faalin gis baba daga ka mangag syag angko, dapat ay, kangko fagsagadon nangos, haw fag taktak hanya gin Fandaya. 16 No kinday aho bohonwa tagastay, kitonya yadi kagsyag angko bohonwa tagastay is baba daga kati. 17 Fag ka fakaoronganan kagfatohoyan ha hyamo to fag manga taw. Im hampang ka fakaoronganan. 18 No kinday haw nasogo angko has baba daga, kitonya yadi aho nogsogo kagsyag angko has manga tagastay fag manga taw. 19 Maskin ho galwasi ka mangag syag angko, hogfatohoyan angko sadili ha hyamo kaarakitay ka fakaoronganan fatohoyan yadi ha hyamo, kangko fag manga taw. 20 Bohondi kagsyag angko kati kangko fagdaranginon, hanggan yadi wa has manga somyag angko aban no domog ista manga hampang. 21 Tonya angko fagdaranginon kitay, nangos fagayo fag kasadi no kinday haw Mama, sawangko, hanggan aho sa yadi wa hyamo, kaarakitay ta kasadi santam. No kitonya, ka tagastay fag manga taw imtiwala yadi kitay haw ka nasogo angko. 22 Hogdisag yadi has taw kam disag angko kafiyan, kaarakitay ta kasadi, kito yadintam, tam sadi di. 23 Aho kasadi sas taw hanggan ta kasadi hangko kaarakitay tamsadi orongan. Ginya madi ka tagastay is baba daga fag manga taw tomwa kitay haw nasogo angko hanggan haw galwasi ka manga taw kagsyag angko kito yadi hyamo, haw no galwasingko. 24 Mama, angko fakasayaon, kam nadisag hangko fag manga taw fag omofod angko santam banwanan aban, kaarakitay lomag angko kafiyan, kam nadisag angko, maskin nyawa ka daga idyan halig hyabi, haw danwa galwasi angko. 25 Mama maslong, ka manga tagastay is baba daga idwa kilala hyamo, dapat aho danwa kilala hyamo hanggan tongko manga ofod natwa wa kitay haw ka nasogongko. 26 Aho nafahilala hyamo ngayan has taw, hanggan hogfadagos yapdig fahilala tonya kaarakitay no kinda ha no galwasingko, ta kitonya yadi, hanggan aho kasadi yadi has taw.

18

1 Ginya madis Hisos, nontabo wagdarangin, nadokson wan, hanggan it manga katogbong. Tanlahaw wan, hawas difay safa Kidron. Ha akwa sadik iyab sinya. Da Hisos hanya wan. 2 Yabay, is Hodas, ka goyon in Hisos manga kalaban, iglag yadi tonya fag iyab kawas Hisos hanggan it manga katogbong fagabag tifonan sinya no mabanwanan. 3 Yakangas Hodas hanya yadi was iyab, hanggan wat manga nasagad sondalo taga Roma, hanggan manga polis kagbahala sas Fanimbaan-Dahol, kat nasagad gis manga fagtahinan fagalan, hanggan gis manga Farisiyo. In Hodas manga taban ha diya manga salong, manga fatay, masalawidan yadi manga talibong. 4 Kawas Hisos, danwa twa wan no kana ka madalananan ha hanya, yakanga hanya dagos natagbo is taw, naintaw kiti, Fakta ka hayo fagsayahon? 5 Ta nasagot hanya, Is Hisos ka taga Nasarit ka hyami fagsayahon. Is Hisos igsagot, Aho wa ngap kas Hisos. Is Hodas ka goyon in Hisos manga kalaban malindogan yadi sinya, ista ofod. 6 Is Hisos no nafwayong has taw kitay Aho wa kas Hisos, ka manga sondalo hanggan polis infwali has ginanan, tanlohob has boknga daga. 7 Sadi ya ginan is Hisos gintaw has taw, Fakta hayo fagsayahon? Ta nasagot ya hanya, Is Hisos taga Nasarit. 8 Is Hisos nasagot, Ho danwag fwayong hayo kitay aho wa kas Hisos. No aho ka hayo fagsayahon, fag falahaw angko manga ofod to. 9 Is Hisos nafwayong kitonya kaarakitay im-anod it hampang noglwang, Mama, ahodwa ha naliyam ngadi sadik taw kam nadisag angko. 10 Ginyas Simon Pidro, ka ha diya talibong, dagos wa nagonos, nabasing ka gorangon fag fagalan sogowan, natigbas ka balis sihon fag talinga. Tonya fag sogowan kawas Malko. 11 Is Hisos nafwayong han Pidro, Halobanan yap im talibong. Aho awkin fag idwa ginom gingko Ama disagon angko fanginoman kahoriyan, ha gayfan? 12 Yabay, ka manga sondalo taga Roma, hanggan it fagtahinan, hanggan ka manga polis gis Fanimbaan-Dahol nagamat in Hisos, nagafos yadi hanya. 13 Bago bago ta nataban in Hisos han Anas. Gis nanya fag fangaraw is Kayfas ka gorangon fag fagalan, dapat is Anas in Kayfas nogang, kawat anak ina in Kayfas wa babay. 14 Is Kayfas kagfwayong itfagonan has manga fagtahinan Hodyo kitay fiya man no sadi dik taw ka matay, kaarakitay ka sadik layonan Hodyo idwa matay. 15 Is Simon Pidro hanggan sadi yak katogbong naoyan in Hisos. To fag katogbong ka gorangon fagalan fakilalaon, yakanga naofod in Hisos nasakbaw has basad aladan gorangon fagalan balay. 16 Dapat is Pidro malindogan sasta dayo sakbawan alad. Yakanga ka sadik katogbong, ka gorangon fagalan fakilalaon, nadokson gis basad alad a, nahampang has sogowan ina kagbantay sakbawan, ginya nataban in Pidro has basad aladan. 17 Ka sogowan ina kagbantay sakbawan gintaw in Pidro, Bohonwa awkin haw in Hisos katogbong sadi? Is Pidro nasagot, Bohonwa aho yabay. 18 Magnaw gis nanya fag masohod, yakanga ka manga sogowan hanggan manga polis nafagba afoy, manga baga, ginya ta malindogan sas akbang afoy igfanayang wan. Yakangas Pidro gofodan has taw, igfanayang yadi. 19 Ginya ka gorangon fag fagalan naintaw in Hisos kawat manga katogbong hanggan no kanat faadalon has taw. 20 Is Hisos igsagot hanya kitay, Sawasta fagdogan aho nahampang has manga taw fagayo. Sas iba fag manga banwa ahog faadal basad manga fanimbaan Hodyo, hanggan sas Hirosalim sas Fanimbaan-Dahol, sinya ka fanifonan manga Hodyo fagayo. Hodwa ha nafaadal mafyaloman. 21 Kana mayon no aho ka hayo fagintawon? Intawan ka manga nadog angko aho nogtoltol has taw. Ta fadi wadtwa angko manga fwayong. 22 Is Hisos no nalwang di nga kitonya, sadik polis natofa marigon in Hisos, ginya nalwang, Kitonya aw ha nogsagot has gorangon fag fagalan? 23 Is Hisos igsagot hanya, Aho no ha nafalamang angko hampang, fadogan is taw fagayo istay no kana tonya. Dapat angko fwayong no maanod wan, kana mayon haw nogtofa angko? 24 Ginya madis Anas nafafangolo in Hisos, magafosan yapdi, han Kayfas, ka gorangon fag fagalan. 25 Is Simon Pidro malindogan yapdi, igfanayang afoy sinya. Ginya tiba kagfanayang yadi iglwang hanya, Haw tonya fag ama it katogbong sadi, idwa aw? Dapat is Pidro igtangkod, iglwang, Bohonwan, bohonwa aho yabay. 26 Kan Pidro natigbas it talinga ha kaiban sinya. Pariho ka gorangon fag fagalan sogowan. Kat kaiban gintaw yadin Pidro. Bohonwa aw haw kangko lagan it ofod basad iyab haraw? 27 Sadi ya ginan is Pidro natangkod, iglwang, Bohonwan. Ginya madi ka tabag nataraok wa dagos. 28 Araw, no kasirang wan, ta nataban in Hisos gin Kayfas balay has balay gobirnador Roma. Ka manga fagtahinan Hodyo idwan sakbaw has basad balay gorangon kaarakitay idwa alafitan it fagliyon, maskin araw ta kasaya homwan yafon Fanohodan Nagsagayan, ta nogtohod ka anghil no nasagaya ista manga balay hyabi hyabi. 29 Yakangas Pilato, ka gobirnador, nadokson has taw, gintaw kitay, Kana araw ka hayo fagsombongon to fag taw? 30 Tagsagot in Pilato kiti, Nodwa ha nahalig dwat, gwadi midwa yadi twa tabanon ha hyamo. 31 Ginyas Pilato iglwang has taw, Tabanan wan, ham wa ka bahala fatohoyan it fadosaan no kinday hayo manga ogali. Ka manga Hodyo igfwayong han Pilato, Ka batas Roma idwag faangay hyami nogfahatay taw, nyawa faktaw. 32 Inbali kito kaarakitay im-anod in Hisos fwayong itfagonan, no nafwayong no kinday hanya no matay. 33 Is Pilato infwali ya has basad balay dahol, nafatawag in Hisos, ginya gintaw hanya, Haw awkin ka gorangon manga Hodyo? 34 Is Hisos gintaw in Pilato, Hyamo aw sadili fangayofan haw no gintaw kitonya, ngatay ista odi fadahit ha hyamo? 35 Is Pilato igsagot, Aho awkin Hodyo, ha gayfan? Hyamo sadili fag layonan taw, hanggan manga fagtahinan fagalan ka nataban hyamo hangko. Kanam naibolon dwat? 36 Is Hisos igsagot in Pilato, Aho bohonwa kastay is baba daga fag gorangon. No ka odis baba daga fag gorangon kangko sakop, angko manga sogowan lomaban wan, kaarakitay ahodwam disag has manga fagtahinan Hodyo. Dapat ay, bohonwa has baba daga angko fag kabali gorangon. 37 Is Pilato gintaw in Hisos, Ya mangharaw, haw wa aw ka sadik gorangon? Is Hisos igsagot, Haw wa ka gwas kitay aho sadik gorangon. Ahon sagaya anak dararag hyabi, hanggan inbangkad hastay has baba daga kaarakitay aho faorongan ka fakaoronganan. No fakta ka sakop fakaoronganan, tonya kagtalinga angko fwayong. 38 Is Pilato gintaw hanya, Yabay, kana ka fakaoronganan? No nalwang di nga kitonya, is Pilato nadokson ya has sokayan, hawas manga Hodyo, iglwang, Ahodwa ha faglagon kasalanan to fag taw. 39 Dapat ay, tam ha ogali kitay sa hayo Fanohodan Nagsagayan, ahog falfas ha hayo sadi kanporiso. Ham aw kasaya kitay aho fag fomalfas ka gorangon manga Hodyo? 40 Ta natawag marigon nogsagot, Fag bohonwa to fag taw, fag is Barabas kantam fagfalfason. Yabay, is Barabas tolisan wan.

19

1 Ginya madis Pilato nafadokson in Hisos, nafabakbak is manga sondalo. 2 Ka manga sondalo nahoskos di lamnon dogi a, nafasangbaw tonya in Hisos boknga alfoyo, ginya ta nafasolong yadi hanya rotay aba, boragaw. 3 Tagmaswag odi hanya, igbarangkadan hat atobangan, iglwang, Anod, kafiyaon mangharaw ka gorangon manga Hodyo. Ginya tagtofa ya ngadin Hisos marigon. 4 Sadi ya ginan is Pilato nadokson has sokayan a, igfwayong has taw, Fandog ngay, hogfadokson ya hanya ha hayo, kaarakitay ham tomwa wagdog kitay ahodwa ha donggon it kasalanan. 5 Yakangas Hisos nadokson ya ngay, ha solong sangbaw dogi, hanggan balokas boragaw. Is Pilato igfwayong has taw, Fanlag ngay, to wa ka ama. 6 Ka manga fagtahinan fagalan, hanggan ka manga polis gis Fanimbaan-Dahol, natawag marigon ta no nalag in Hisos, taglwang, Fapakowan hanya, fapakowan hanya sas nafatimbangan hayo. Is Pilato igfwayong, Sogi, tabanan wa hanya. Fag ham ka pomako hanya, sas nafatimbangan hayo. Maskin ahodwag dog it kasalanan. 7 Aywan fag manga Hodyo ka nasagot, Hami ha togon kagfatohoyan kitay, hanya fag matay wan maskin igfabali hanya in Diyos wa Anak hono. 8 Is Pilato labi wak kadalag fatohoyan in Hisos has kahatayan no nadog ista fwayong. 9 Is Pilato nasakbaw ya ngawan has basad balay dahol, naintaw in Hisos, Ha taga ginday? Dapat is Hisos idwa nasagot hanya. 10 Yakangas Pilato iglwang han Hisos, Ha awkin dayo kampang angko? Haw aw idwag tohod kitay aho ka bahala ngatay igfalfas hyamo, ngatay igfapako hyamo sas nafatimbangan hayo? 11 Is Hisos nasagot hanya, Hadwa ha bahala angko no bohonwas Diyos kagfaangay kitonya. Yakanga ka manga nataban angko ha hyamo, it kasalanan dwat man hyamo. 12 Is Pilato no nadog in Hisos fwayong, naligaw it halimbawan kaarakitay fomalfas nangos in Hisos. Dapat ka fakaaywanan fag manga Hodyo nanarawagan ya, Haw nogfalfas to fag taw haw bohonwan Sisar amigos. Kagfadaholon it sadili, sadik gorangon, iglaban in Sisar. 13 Is Pilato no nadog ista fwayong nataban in Hisos has sokayan a, intokaw sas fanokawan fangabaya, sasta fagngayanon Salogan Bato. No sas fangampangan Hibriyo tagngayan tonya Gabata. 14 Yabay kati kaboknga wa sirang sas sirang Fatalagaan has Fanohodan Nagsagayan. Is Pilato igfwayong has manga Hodyo, Fanlag ngay to wa hayo Gorangon. 15 Ta nanarawagan di ngap, Mi dayo hanya, mi dayo wan, fapakowan wan sas nafatimbangan hayo. Is Pilato gintaw, Aho aw fapako hayo gorangon sas nafatimbangan hayo? Ka manga fagtahinan fag fagalan nasagot, Midwa ha gorangon no bohonwas Sisar. 16 Ginya madi yabay, is Pilato nafabahala in Hisos has manga fagtahinan fagalan kaarakitay ta fapako wa hanya sas nafatimbangan hayo. Yakanga ta nataban in Hisos. 17 Is Hisos noglahaw ha fasan nafatimbangan hayo kasta fag fapakowan araw hanya, hawas sadik foyo ta nogngayan, Botol Alfoyo, dapat no sas fangampangan Hibriyo, it ngayan Golgota. 18 Sinya ta nafapako in Hisos sas nafatimbangan hayo hanggan dowa yak taw san Hisos dayo, myasa sadik taw mapakowan sas dowa yak hayo, baliw baliw sadi, is Hisos sasta fagbokngan. 19 Is Pilato ka nafasorat is taw kasta sombong hanggan nafatokba san Hisos tongod alfoyo sas nafatimbangan hayo. Kansorat kiti, Is Hisos, taga Nasarit, ka gorangon manga Hodyo. 20 Kaaywanon fag manga Hodyo kagbasa tonya fag sorat maskin akbang has banwa kasta nagfapakowan in Hisos sas nafatimbangan hayo. Ka sorat insorat sas sanglitan manga Hibriyo, manga taga Roma, hanggan manga Girigo. 21 Ka manga fagtahinan fagalan-han-Diyos iglwang han Pilato, Fag idwag sorat, Gorangon manga Hodyo, dapat ka fiya, haw fag sorat kitay hanyag lwang, hono, hanya ka gorangon manga Hodyo. 22 Is Pilato igsagot, Kangko nasorat aho nasorat wan. 23 Ginya ka manga sondalo nontabo wagpako in Hisos, nabol in Hisos manga rotay kasta naloslos haraw. Ta nahoray ofat ik layonan, nafahafod has manga sondalo, dapat ka rotay aba, gis tongod hanggan wa has daga, inhalig sadik dahonya, idwa ha bolig. 24 Yakanga tagtoltolan kiti, Tam fag idwag gisi toy. Anogon. Tam mamostahan yap no fakta ara ka domaog, toy ara hanya wan. Inbali kitonya kaarakitay kansorat sas Kasoratan hyabi im-anod wan, kitay, Ta nafahafod angko manga rotay has taw, Ta nafapostahan yap angko solong. Kitonya ngay ka manga sondalo naibolon. 25 Dapat in Hisos ina, hanggan in Hisos ina fadwasay ina, malindogan san Hisos dayo, sas akbang nafatimbangan hayo. Sinya yadis Mariya, in Kilyopas babay, hanggan is Mariya Magdalina. 26 In Hisos fagalwasiyon fag katogbong gofod yadis taw sinya. Is Hisos noglag it ina hanggan tonya fag katogbong, natogon it ina hanya, iglwang, Yabay, ina, to kam anak kati. 27 Ginya natogon yadi hat katogbong, iglwang, Yabay, to wam ina kati. Ginya wa ginan yabay, tonya fag katogbong nafaoliyan in Hisos ina sat sadili balay. 28 Ginya madi, is Hisos no natwa kitay gis nanya intonglos wan it manga bato ibolonon fagayo, kaarakitay im-anod kansorat sas Kasoratan, iglwang, Aho kainom. 29 Ha sadik mangkok sinya it sohad langgaw. Ta natogna famasopsop sas langgaw ginya naosok sas tobwan bagahay, nafasopsop in Hisos bibig. 30 Is Hisos no nasopsop ka langgaw, iglwang, In-anod wa kati. Ginya hanyan tarohong wan it alfoyo, nafalfas wat ipsaw. 31 Kawa gis nanya fag sirang, famatalagaan was Fanohodan Nagsagayan, ka manga Hodyo idwa kasayag fagoyan ka manga habilogan sas tongod nafatimbangan hayo, labi man kawa to fag Sirang Kafahowayan araw, bohondi kito ka tiba no mahalga. Yakanga ka manga fagtahinan Hodyo nasagad gin Pilato kitay, is Pilato faangayan nangos, fodan ista bitis kanpako sas nafatimbangan hayo. Ginya ta no natay wan, bomol ista manga habilogan ginya. 32 Yakanga ka manga sondalo nabakbak marigon, nafod it manga bitis ka gona hanggan ka sadi ya, ista napako sas nafatimbangan hayo san Hisos akbang. 33 Dapat ay, ta no gakbang in Hisos, taglag hanya danwa natay, yabay tadwa nafod it manga bitis. 34 Dapat ka sadik sondalo naoros in Hisos daga tagyangan. Dagos wan-olan it folot hanggan danom. 35 Ka nalag tonya kagfwayong it mata lagan kaarakitay ham katiwala wan. Kat fwayong orongan wan, hanggan hanya twa kitay hanya idwag bohag. 36 In-anod kitonya kaarakitay imtonglos kansorat sas Kasoratan kitay, Idwa hamfod it botol, nyawa di sadi. 37 Insorat yadi kitay, Ta bomantay hanya kat naoros. 38 Ginya madi, araw ogbot, is Hosi, gis banwa Arimatiya, nanagad gin Pilato kitay, fiya di aw no bomol in Hisos habilogan. Is Pilato nafaangay wan. No kitay di is Hosi in Hisos katogbong yadi, dapat mafyaloman di, kawa kadala ka manga fagtahinan Hodyo. Yakangas Hosi nabol in Hisos habilogan. 39 Hanggan is Nikodimo, ka nasabang in Hisos hyabi basad yabi, naofod in Hosi. Is Nikodimo ha diya banglo fag tagok mira, ha aktom banglo fag rogrog hayo, aloi. Ka famabanglo fagayo kayosagboknga haban fayay it kaaywanan. 40 Ka dowak ama nadiya in Hisos habilogan a, nasafot sas rotay madamol, ha famabanglo yadi, no kinday ka ogali Hodyo nogfatalaga has lobgoban. 41 Ha sadik iyab akbang sasta nagpakowan in Hisos sas nafatimbangan hayo. Sas basad iyab ha akwa sadik bago fag lohib lobgoban, idyapdi ha naglobgobanan taw sinya. 42 Kawa gis nanya, sirang Famatalagaan has Fanohodan Nagsagayan, hanggan tonya fag lohib akbang di, yakanga ta sinya wak nafaigyan in Hisos habilogan.

20

1 Yabay, nondasog sas sirang Simba, dayo marom marom yapdi, is Mariya Magdalina, inbangkad has lohib fanlobgobanan. Nalag kitay ka toplan bato gis sakbawan lohib inbol wan. 2 Yakangas Mariya nadalandan wan, hawan Simon Pidro hanggan sadik katogbong kan Hisos fagalwasiyon, nafwayong has taw, Ta nabol kagfon intam it habilogan gis basad lohib bato. Tam idwa twa no hadawan ta no nafwalid. 3 Yakangas Pidro, hanggan tonya fag katogbong sadi, inlahaw wan, hawas lohib fanlobgoban. 4 Tagbandalandanan wan, dapat ay, ka sadik katogbong nagona man in Pidro nadasog has lobgoban. 5 Tonya fag katogbong nogbantay has basad lohib, nalag ka manga fanamong rotay, dapat idwa nasakbaw has basad. 6 Is Simon Pidro man kandasog goyan, nasakbaw has basad lohib bato, nalag ka manga fanamong rotay. 7 Nalag yadi ka famogong rotay ka san Hisos alfoyo itfagonan, idwa mafaaktoman ka gis habilogan, bokod man di, mafogongan yapdi. 8 Ginya madi ka sadik katogbong, ka nagonan dasog has lobgoban, insakbaw yadi a, hanya nalag wan, haggan intiwala wan kitay is Hisos inboyag ya. 9 Dapat ay, ka manga katogbong idya twagdog kansorat sas Kasoratan kitay, hanya fag imboyag ya gis kahatayan. 10 Ginya madi ka dowak katogbong nwali wan hat manga fagoliyanan manga balay. 11 Dapat ay is Mariya idwan lahaw a, malindogan odi sas sokayan, akbang has lohib bato, goraw wan. No goraw yapdi, is Mariya igtarohongan kaarakitay bomantay has basad lohib. 12 Iglag dowak anghil, ha solong rotay abohay, matokawan sasta nagfwalidan in Hisos habilogan, insadi sas akbang alfoyo nangos, insadi sas akbang bitis. 13 Ka manga anghil gintaw in Mariya, Ina, kanam fagorawon? Is Mariya igsagot, Maskin ta naanggong kagfon angko it habilogan. Ahodwa twa ta no hadak nafwalid. 14 Is Mariya nogfwayong kitonya, inbalihid a, iglag wan Hisos malindogan sinya, dapat ay, idwa kilala kitay tonyas Hisos. 15 Is Hisos gintaw hanya, Ina, kanam fagorawon? Faktam fagsayahon? Is Mariya gayfan ngandi ka giyab sinya, yakanga nasagot kiti, Ama, no haw wa ka naanggong it habilogan, fwayongan angko, haw no hadak nafwalid. Aho bomol ya. 16 Is Hisos nangayan hanya, Mariya. Is Mariya insayango wa han Hisos, iglwang, sas fangampangan Hibriyo, Raboni. It kahologan santam sanglitan, Kagfaadal. 17 Is Hisos nafwayong han Mariya, Ha hagtawid yap angko maskin ahodyan sakbaw hangko ama sam tongod. Ha fag hawangko manga fadwasay, hangko manga katogbong, fwayongan has taw kitay ho goli wan hangko Ama has tongod, ha hayo yadi Ama, hawangko Diyos hanggan ha hayo yadi Diyos. 18 Ginya madis Mariya Magdalina hanya wan, nafwayong han Hisos manga katogbong kitay, Ho nalag kagfon intam, natoltol yadi has taw in Hisos fwayong. 19 No kayabi wan araw gis nanya mandi fag sirang, ka sirang gona sa sadik simba, in Hisos manga katogbong matifonan sa sadik balay, dapat matahopan di kawa ta kadala ka manga fagtahinan Hodyo. Ginyas Hisos indasog sasta fagbokngan, nafwayong has taw, Hayo manga fangayofan fag malokmay wan. 20 No nalwang di nga kitonya, is Hisos nafalag has taw it manga gamat, hanggan tagyangan. Ginya madi in Hisos manga katogbong kasolong wa dahol iglag kagfon intam. 21 Is Hisos naolit ya has taw, iglwang, Hayo manga fangayofan fag malokmay wan. No kinday angko Ama igsogo angko, kitonya yadi aho nogsogo hayo istay sas baba daga. 22 No nafwayong wa kitonya, is Hisos naoyop has taw, nafwayong, Ham fag tanggap ka Maliyaw fag Falad sa hayo manga basad fangayofan. 23 Ham nogfaliyam ista manga ogali dwat, is Diyos igfaliyam yadi tonya, dapat ham nodwag faliyam ista manga ogali dwat, is Diyos idwa yadig faliyam tonya. 24 Dapat ay, is Tomas, kasta fagngayanon, Singan, insadi gis Safolo ha Dowa, idwa sinya is Hisos nondasog. 25 Ginya ka tiba in Hisos manga katogbong igfwayong han Tomas kiti, Mi nalag kagfon intam. Dapat ay, is Tomas igfwayong has taw, Aho nodwa lomag ista nagbaranan pako sat gamat, angko timoyo nodyag dog yadi tonya, angko gamat nodyag dog it daga tagyangan, hodwa katiwala kitay hanyan boyag ya. 26 Nonsagaya sadik simba, in Hisos manga katogbong matifonan ya nga basad balay. Gis nanya yabay, is Tomas sinya yadi wan. Nyawa ta nafaganit ka tahop sakbawan, is Hisos igtolas di has basad balay, sawasta fagbokngan, iglwang, Hayo manga fangayofan fag malokmay wan, ham fag idwa kadala. 27 Ginya madi nafwayong han Tomas, Ha fandog istay im timoyo a, ha famantay angko manga gamat. Fag falogday im gamat, fandog angko daga tagyangan. Ha fag bohonwa kitay idwa katiwala, yatokitay, ha ngap fag katiwala wan. 28 Ginya madis Tomas iglwang, Haw wa kagfon angko, angko wa Diyos. 29 Is Hisos nasagot han Tomas, Maskin ha nalag wangko, ha awkin katiwala wa kati? Ka manga taw ka katiwala hangko, nyawadya nalag angko, ka bomaya wan. 30 In Hisos manga naibolon falagon madolaw sat manga katogbong faglagan, aywan di kadwan sorat istay fag kasoratan. 31 Dapat ay, kansorat istay insorat kaarakitay ham imtiwala kawas Hisos kan Diyos-natogon-Famawi, in Diyos yadi wa Anak, hanggan maskin ham igsyag hanya, ham ha haboyagan wan.

21

1 Ginya madis Hisos nafalag ya domwag it sadili hat manga katogbong sas bintalan linaw Tibiriyadis. Kito no nafalag has taw. 2 Da Simon Pidro, da Tomas, kasta nangayan Singan, da Natanail, taga Kana, sakop Galiliya, hanggan in Sibidiyo manga anak, ginya dowa ya in Hisos manga katogbong, gofodan kito mandi ka hyabi. 3 Is Simon Pidro igfwayong has taw, Aho mangoyang ya nga wan. Taglwang, Mi mahin yadi wa hyamo. Ginya tanlahaw wan, nasahay wa has basad baloto, dapat ay, sadi wak yabi, tadwa ha iktan. 4 No kasirang wan is Hisos malindogan sas bintalan, dapat ay, it manga katogbong idya kilala kitay is Hisos wa tonya. 5 Ginyas Hisos gintaw has taw, Manga anahan, ham aw ha iktan nga oyang? Tag-sagot, Idwa akwa ngap. 6 Is Hisos igfwayong handa Pidro, Fag fadagdag hayo sarap has sihon baliwa baloto, ham omiktan wa araw manga oyang. Ginya madi ta nafadagdag ngay hanya ka sarap, dapat tadwa syagan igfasahay ka oyang kawa aywan wa dahol dahol, mabyat wan. 7 Kan Hisos fagalwasiyon fag katogbong nafwayong han Pidro, Tonya wa kagfon intam. Is Pidro nadog di nga kitay ka nahampang gis baba bintalan kawa kagfon intam, nasolong it rotay, ginya nafogong sat boknga habilogan, maskin naloslos wa haraw kaarakitay mangibolon, ginya nalokso has basad danom. 8 Dapat ay ka tiba manga katogbong indasog yadi, masahayan yapdi sas basad baloto, goyod wa ka sarap napno oyang, kawa idwa ayayo gis bahalan danom sinya, manga odi limak safolok dofa it kaayayowan. 9 Ta nondokson wan is fakadagsaan baloto, ta nalag sinya ha manga baga afoy a, manga sinogba oyang basad afoy hanggan tinapay. 10 Is Hisos iglwang has taw, Diyan hastay hayo iktan oyang tiba. 11 Ginya madis Simon Pidro hawas basad baloto natogbong istaw nagoyod has bahalan linaw, baba bintalan, ka sarap napno wa manga oyang, myasa wa dahol. 153 gamtanan ka oyang. Nyawa kitay kayonya wan, ka sarap idwan ragyang. 12 Is Hisos iglwang has taw, Fag hastay, tam manyabas wan. Dapat ay, in Hisos manga katogbong fagayo kadala gintaw hanya no faktaw, maskin ta natwa wa kitay hanya wa kagfon intam. 13 Is Hisos hawas bilog afoy, nabol ka tinapay, nadisag hat manga katogbong, hanggan ka oyang, kitonya yadi. 14 To kat fatolo ginan is Hisos nogfalag it sadili hat manga katogbong hanya nonboyag ya gis kahatayan. 15 Nontabo wagyabas, is Hisos gintaw in Simon Pidro kiti, Simon, in Hwan anak, haw awkin galwasi angko bohondi kito kam manga ofod no galwasi angko? Is Pidro nasagot, Ala ngay, angko Fon, haw fadi wad twa kitay ho galwasi hyamo. Ginyas Hisos iglwang, Bahogan angko manga anak topa. 16 Sadi ya ginan is Hisos gintaw hanya, Simon, in Hwan anak, haw awkin galwasi angko? Is Pidro igsagot, Ala, angko Fon, haw fadi wad twa kitay aho galwasi hyamo. Is Hisos iglwang, Anowan angko manga topa. 17 It fatolo wa ginan is Hisos nogfatanggap in Pidro kiti, Simon, haw in Hwan anak, haw aw galwasi angko? In Pidro fangayofan inrongkot wan maskin tolo wa ginan is Hisos naintaw hanya, Haw aw galwasi angko? Yakangas Pidro nalwang ha hanya, angko Fon, haw twa wa fagayo, haw twa kitay aho galwasi hyamo. Is Hisos nafwayong ya hanya, Bahogan angko manga topa. 18 Orongan wan, bohonwa bohag angko fwayong ha hyamo kitay haw no bago yapdi, haw igsalawid yanga hyamo fotol hanggan iglahaw nyawa hadawam fakasayaon, dapat aban, haw no magorang wan, ha aba igfalogday im gamat has taw a, ta gomafos di hyamo aban, ginya tomaban hyamo bohonwa ha hyamo fakasayaon fag hadasogan. 19 Is Hisos noglwang kitonya, igfatohoyan no kinday fag kahatayan ka mamalag in Diyos kafiyan aban is Pidro no matay. No nafwayong wa kitonya, nalwang han Pidro, Tahinan wangko. 20 Ginyas Pidro natakfili hat ginanan a, nalag ka goyan hanya kan Hisos fagalwasiyon fag katogbong ka masorayan san Hisos akbang ta no nangwan, ka mandi ka naintaw, Hyami Fon, fakta ka omoyon hyamo kalaban? 21 Is Pidro no nalag hanya, naintaw in Hisos, Angko Fon, kinda tonya fag taw aban? 22 Is Hisos nalwang ha hanya, Ho no kasaya wa kitay hanya fag domogay hanggan aho nombangkad ya domwag, kana ara hyamo fagmawaton? Haw fag tahin wa ngap angko. 23 Manga taw nafadahit has mangag tahin in Hisos kitay, is Hisos iglwang tonya fag katogbong idwa matay. Dapat is Hisos idwa nalwang kitay hanyadwa matay, nalwang odi kitay, nongko fakasayaon kitay tonya fag taw fag boyagan fagaba, hanggan no ginahin aho nombangkad ya, kana araw hyamo fagmawaton? 24 To fag katogbong kagtoltol to fag manga bagay hanggan nasorat. Tam twa yadi kitay kat fwayong it mata wa lagan, sonson wa fakaoronganan. 25 Dapat aywan yapdin Hisos manga naibolon kadwan sorat istay. No nangos tonya fagayo imsorat digsadig sadi, lomabi distay is baba daga it fwalidan manga famasaan it kaaywanan.