Izesu' Kilisito'nimu' Gamazi Lamine' Nene Zohane' Gizine'

Zohane' Gizine' Luhuvo Nitekumu' Gomu' Gataa' Gamazi

Mene buku ne'mo nene Izesu' monovomu' Mataio' luhuvo niteku' Maleko' luhuvo niteku' ido' Luka' luhuvo niteku' li nizado' nene do imine' molo lo neive. Zohane' lo-limine' gamazi muki' malati' nene a'mine ma bukuu' nene nizamave. Zohane' aza Izesu' soto' ine' monovomu' ma lo soto' amine'za asi ado' O'moso'mi gamazi ve li-dave nene gana' vomilati' O'mososi mino O'moso gidini minine' ve lo lo-ngimine' neloti' nene api' ogo gizine' ve. Ido' evene' lolo' ogo eveneliti vovo'ningu' mino gulive Izesu' minine' monovomu' lo-ngimine'. Ido' mono' noso holo-ngedaa' ive Zohane' ne'mo aka vele-delesa ani' monovomu' lo neive.Ido' Izesu' atoli'mine inite' do soto' ine' malatikisi ido' eikumu' lo-ngimine' mukikumukisi nene lo soto' o neive. Ido' ei' izipahala zuho ebe' do va'va' o-ngedosa gohi ogo a'mida ngele'mizo vilingumu' lo huko-ngidine' monovomukisi lo neive. Ido' Zuda ve nabalite eito' gili ele'vole' ilisa gilamani' monovomukisi lo neive. Ido' Zuda' aza lovo veliti a'ningu' Izesu'ni molavo bili hilani' monovomukisi lo neive. Ido' hilinguti' otosa gamene ma izipahala zuho soto' o-ngimine' monovomukisi lo neive.
Mene buku gizive nene gulive've gizamine' neine'za gana' aka'milati' Zebedaio' gipele Zohane' ne'mo gizine' ve lani'. Mono' godolo gosohoku' nene evene' gulive'ine Zohane' ve li milave hamo pamo' minani' nemu' ne ma gataa' noune. A'mine veuti' ma nene mono' noso holo-ngedaa' ive Zohane' ido' ma nene Izesu' gamazi've lamine' gizive Maleko' eze gulive ma nene Zohane' ido' ma nene Zuda velo' medelo mino O'moso inite' lehize-daa' ive naba gulive Anasi' zuhouti' minive Zohane'. Nemu' nene neu' do gopo' napa ogo gelamozo. A'mine ve nete Zohane' luhuvo nite' nene ma gizamave.
Mene buku gizive lave Zebedaio' gipele Zohane' nene nGalilaia misuboukoti' Zuda ve minine'. Eze bisinisi've nene alaha' belo maketilo' molaa' ine'. Ido' Izesu' aza izipahala zuho doka' doka' ingu' nene gana' api' ogo ei' Zohane'ni nene dani'. Ido' Izesu' hilinguti' otavo O'moso'mo Okulumukuko ele'mizo do dizo vavosa Zohane' nene gamene ha'na Zelusalemi numuno ebeku' O'moso'mi gono do minine'. Ti' ogo minidoti' nene ebe' ma gulive Eheso nela ongo monelesa vine'. Loma vete Asia misubo ve laa' angu' ve. Asia misubou' Izesu' zuho minani' neti ve naba'ine lolo' ine'. Gamene ma Eheso ebekuko ongo nomonosa nene Izesu' gamazi've lamine' Zohane' gizine' ve laa' noune' mesi ido' Zohane' luhuvo nite' sitohamo ve laa' noune' nesi nene gizine'. Ido' alinge' soto' ilinekumu' gamazi Leveleseni ve laa' noune' nesi nene gizine'. Ne'mine ogo Eheso ebeta ongo mono mino mo vani gehepeve molani'. Ti' ogo hiline'. Izesu' izipahala zuhouti' nene ei' hamo' alinge' hiline' ve.
Mene buku gizive ne'mo lumola nene ti' lo lo neive. Mene buku gizine' nene a'mine buku gatilizave nete Izesu' nene O'moso'mo engi' do ngu' izelive lo imiselelesa lo huko-ngidine' ve li gili ele'vole' ilizave. Ido' eito' gili ele'vole' ilizani' nene ingine minevo' minevo' ngemeni dameni dalisave line'.

1

O'moso'mi Gamazilo' Medelive Minevo' Minevo' Lemeni Dameni'mi Meleho Aza Leli' Okode Ne'mine Do Otuho Evene' Lolo' Ine' Gamazi

1 O'moso'mo inite' mata' olihe do soto' amine' gamenelo' vomine O'moso'mi gamazilo' medelive nene ha minine' ve. Ido' a'mine ve nene O'mososi maka' mino azasi O'moso minine' ve. 2 Ganakuti' O'moso mine do ada nene azasi maka' minine' ve. 3 Inite' mata' muki' soto' ani' nene a'mine O'moso'mi gamazilo' medelivelatikovo' soto' ani' ve. Eitati' soto' amine' inite' nene hamokisi ma nomive. 4 Aza nene minevo' minevo' lemeni dameni'mi meleho minaavo evene' laza eitati' minevo' minevo' lemeni nene dokunivo ne'mo livi' ne'mino do labana' ele-ledaa' neive. 5 A'mine labana' nene liti'musou' hize labana' elaa' neivo liti'muso ne'mo nene ngelo molo hite-desa'mivo ha labana' ele minaa' neive. 6 Evene' ma O'moso'mo imiselavo ani' nene gulive Zohane' ve. 7 Aza evene' maliti gamazi li soto' iga' ave ne'mine lolo' ogo ogo heteline' nene a'mine labanali'mi melehi gamazi've lo soto' o ngemavo nemu' evene' muki' nene a'minemu' gili ele'vole' ilizave losa ogo heteline' ve. 8 Ei' neve nene a'mine labanali'mi meleho gehepeve nene minivoba asi a'mine labanali'mi melehinemu' nene lo soto' soto' olosa ani' ve. 9 Labanali'mi meleho gehepeve evene' muki' lute hize labana' ele-ledaa' ive nene mo me misubouko navosa lo soto' ine' ve. 10 A'mine O'moso'mi gamazilo' medelive aza nene me misubou' omo minine'za me misubo nesi nene do soto' ine'za me misubou' aleve nete nene eze ningi ei' monovomu' nesi nene mo ningi gilamani' ve. 11 Ei' misubo'veuko nene ogo heteline'za ei' aleve gehepeve nete nene ma gili imamani' ve. 12 Ido' evene' ma gili imave muki' ado' eikumu' line' gamazi gili ele'vole' igi eito' gili mu'musi' i-dave engi' nene gele ngemavo O'moso'mi izipahala lili' ani'. 13 Ido' O'moso'mi izipahala lili' ani' nene evene' zuho maloti' soto' adoti' nene nomive. Ido' vene' vemoho' oko'ine'mo lanite' gilivo ingasidoti' soto' ani' nene nomive. Ido' ve mali'mi lulolo' soto' ani' nomive. Asi mo O'moso'mo gelavo ei' izipahala gihile lili' ani' ve. 14 Ido' O'moso'mi gamazilo' medelive nene leli' okode ne'mine do otuho evene' lolo' ogosa leli' vovoteu' ogo gamene li'nibemukovo' minevo dovo' ingu' nene nasahili' oga' monovosi ido' O'moso'mi monovo gihile nesi nene ezela vauve elo minivosa amuzo've do soto' ogo minine' nene mo ningune' ve. Asi've ei' meleho O'moso'mi vonolo' gipele hamo' gehepeve minine' nenako ne'mo nene a'mine ningune' amuzo've nene do minine' ve. 15 Eze monovo nene Zohane' aza ti' lo lo soto' ine' ve: Neni' mehe'nela nave nene nenikisi olihe soto' amuvosa gomukuti' ha minive neine' nenako ei' neni' nene nivile' ogo ve naba neive lo gomu' luhe. A'mine luve ma nene me ve nene neive lo nongelebizo line'. 16 Ee, ezela nasahili' oga' monovo vauve elo minine' ve luvoni' nene aza leze muki' nene nasahili' gohi gohi o-lidine' nene a'mine monovo ezela vauve elo minidoti' ne'mine o-lidine' nenako nemu' luve. 17 Ido' me gamazi noluvoni' nene O'moso'mo ei' lou' gamazi've lo-emavo lo-limive Mose' nene lo-limine'za nasahili' monovo nesi ido' O'moso'mi monovo gihile nesi do soto' ive nene Izesu' Kilisito' do soto' ine' nenako nemu' nene noluve. 18 Ido' O'moso nene ve hamolitesi mo keke' ningamune. Ningamune'za O'moso'mi gipele hamo' minive azasi nene O'moso mino melehosi maka' bizi minasive ne'mo O'moso nene do soto' ogo lelebizavo ningo gele none.

Mono' Noso Holo-ngedaa' Ive Zohane' Nene O'moso'mo Do Lu' Izelive Lo Imiselelesa Live Nene Nomuve Lo Ei' Monovo Lo Soto' Ine' Gamazi

19 Ido' Zuda veti mono' gizebo ve ingine nene eveneto' medeli mini O'moso inite' lehizi-daa' avesi ido' Levi' a'vopilemo' mono' numuno nabau' gonolo' ve nesi nene Zelusalemi numuno ebetati' ngimiselikevo vi Zohane'nimu' nene zaho nane li ei' monovomu' longo' i-dikevo ei' monovo nene ne'mino lo soto' ogo lo-ngimine' ve. 20 Ingine gamazi lado' nene ataize livoba mo lamino lo soto' ogo naza nene O'moso'mo do lu' izelive lo imiselelesa live ma nene nomuve lo lo-ngimine' ve. 21 Ne'mine lo lo-ngemavo ti' li longo' i-dani': Ido' ne'mine lo ma gaza nene zaho nane. Gomu' polohete Elia'ni nene O'moso'mo gohi imiselelesa live ma ne nabe. Likevo aza nene a'mine nomuve line'. Ne'mine lavo ingine ti' li lani': Ido' gaza ne'mine laniko polohete alinge' ma aloseive lo Mose' live ma nene nabe. Ne'mine lani'za o've line'. 22 Ne'mine lavo ingine ti' li gohi longo' i-dani': Laza nene gei' nene zaho nolibe gaza nemu' lo-lemanivo longo' i-gidilisa limiselave nene vo lo-ngemeso' nenaze. Gaza nene mo zaho nouve laa' nane. 23 Ne'mine likevo aza ti' lo lo-ngimine': Polohete Isaia' ti' lo live ma nene nouve. Ebe' hadivelati' evene' mali'mo asi naba ma ti' lo nolive: Guvelesi ve alingumu' ve li aka've di lisihe' i-dilo. 24 Ido' ne'mine lavo Halisaio' mono' laa' avete ngimiselikevo ave 25 ingine longo' i-di ti' li lani': Gaza mono' noso evene' noholo-ngedaine' nene gaza O'moso'mo do lu' izelive lo imiselelesa live minamo polohete Eliakisi minamo ido' polohete aloseive lave nesi minamane' nenako nanimu' ne'mine nane. 26 Ne'mine likevo Zohane' aza a'mido' ti' lo lo-ngimine' ve: Neni' nene haza nosodunukovo' holo-ngedaa' nouvoni'za 27 lengi' vovotingu' nene ve ma neive. A'mine ve nene lingine ningamani'za aza nene nenito' medelelesa mehe'nela nave. Naza a'ne'mine goboni gono do do ei' suu'veloti' nala've nesi nene apase hulo-delodo' lisihe' amuve line' ve. 28 Ido' a'mine noluvoni' inite' meve nene Zohane' mono' noso holo-ngedo minaa' idaa ho' dizaa' idaa Zodani noso hela holela Betania numuno ebeta soto' ine' ve.

Eveneliti Lihime Apaselive Li Sipisipi Ize Angale Bilaa' Ado' Medeli Bililizave Lo O'moso'mo Lehize-lidive'mi Gamazi

29 Ongo go' lavo Izesu' nene mono' noso holo-ngedaa' ive Zohane' neida navo ningo ti' lo line' ve: Aizo, ningilo. Lihimetemu' belaa' noune' sipisipi angalelo' medelo O'mosolati' minive me misubou' aleveti lihimete apase-ledaa' ive ma ve. 30 Naza neni' mehe'nela ve ma nani' nene nenikisi olihe soto' amuvosa gomukuti' ha minive neine' nenako ei' ne'mo neni' nene nivile' ogo ve naba neive lo gomu' luvoni' ma nene me vemu' luve. 31 Nazasi nene eze ma ningo gelamo minuvoni'za naza ogo hetelo evene' nosodunu' noso holo-ngede'mo ogo minuvoni' nene Isilaele' aleve ezemu' ningi gililizave losa do soto' o-delesa uvoni' ve line'. 32 Ido' Zohane' ti' lo gamazi ma lo soto' ine' ve: Naza O'moso'mi Sikalahu' nene nama viluso ne'mino Okulumokuti' lemo navo ninguve. A'mine nene lemo ogo a'mine vela minive. 33 Gomu' nene a'mine ve'mi monovo nene ningo gelamuvoni'za evene' nosodunu' noso holo-ngedeline lo nimiselive ne'mo ti' lo lo-nimive: Neni' Sikalahu'neli'mo lemo ogo ezela nominivo ningelinive nene a'mine Sikalahu'ne nedunu' nene noso ne'mino holo-ngedeleseive. 34 Ne'mine lo line' ma nene naza mo ningosa ei' nene mo O'moso'mi gipele ve lo lo soto' oka' oka' nouve line'.

Evene' Api' Igi Izesu' Izipahala Zuho Lili' Ani' Gamazi

35 Ongo go' lavo mino holise' gamene ogavo Zohane' nene izipahala zuho sitakisi imi nizavo 36 Izesu' a'mida ogo novivo Zohane' vonu' bele mino ti' lo line': Ningilo. Lihimetemu' belaa' noune' sipisipi angalelo' medelo O'mosolati' minive ma ve. 37 Ne'mine lavo izipahala zuho sita' nene gili Izesu'ni e'meti vasine'. 38 E'meti nivasivo Izesu' velepe' izo ningine' nene e'meti nasine' neivo ti' lo line': Lingine nanitekumu' nasive. Ne'mine lavo ti' li li-imasine': Labi, gaza nene zala minaa' nane (laza a'mine gamazi labi nene do velepe' izo ti' lo lolosune: Tisazo). 39 Ti' li likesivo aza ti' lo lo-ngimine': Lingine igi ningilizo. Ne'mine lavo nemu' ezesi maka' vi ei' minaa' ine' numuno nene ningi a'mida a'mine gamene nene ezesi maka' minani'. Ido' Izesu' numu'vela vani' nene nivenga' fo kilokulo' nene vani' ve. 40 A'mine Zohane' line' gamazi gili Izesu'ni e'metasive engikuti' ma neve nene Simoni' Petolo' akunolo Adelea' minine' ve. 41 Aza Izesukisi minosa a'midoti' nene geto vo uvolohine Simoni'ni vise' ogo ningo ti' lo lo-imine': Mesia'ni nene mo ningekune (laza a'mine gamazi Mesia' nene do velepe' izo ti' lo lolosune: O'moso'mo do lu' izelive lo imiselelesa live ve). 42 Ne'mine lo lo-emo ele'mizo Izesuda vine'. Ele'mizo vavo Izesu' aza vonu' belo ti' lo line': Gaza nene Zohane' gipele Simoni' ma nene nane. Guliveka Keha' ve lo nomolo-giduve (a'mine gulive Keha' nene do velepe' izo Petolo' ve laa' noune. A'mine Petolo' ne'mi monovo nene geheni gavulo ve).

Hilipoki Natanieleki Izesu' Izipahala Lili' Asine' Gamazi

43 Ingi go' lavo Izesu' nene nGalilaia misubouko volove lo giline'. Ne'mine lo gelosa Hilipo'ni vise' ogo ningosa Izesu' ti' lo lo-imine': Gaza ne'meto ano line'. 44 Ido' a'mine Hilipo' nene Adeleaki Petoloki asine' numuno ebe' Betesaida neloti' ve minine' ve. 45 Ne'meto ano lo-davo Hilipo' aza vo Nataniele'ni ningo ti' lo lo-imine': Laza Mose' lou' gamazi gizingukisi polohetelite gizangukisi ve mamu' li soto' igi monovo've gizikavo minive ma nene mo ningekune. A'mine ve nene Izesu' Zosehe' gipele Nasalete numuno ebetoti' ave ve. 46 Ne'mine lavo Nataniele' aza ti' lo line': Nasalete numudoti' ve ve labe. A'ne'mine ebekuti' nene inite' lamine' ma ngelo soto' ilihe. Ne'mine lavo Hilipo' aza ti' lo lo-imine': Gasika ma ogo ninge' nazo. 47 Ne'mine lo-davo Nataniele' nene ningelesa Izesu' neida vo nohetelivo Izesu' ningo ezemu' ti' lo line': Ningilo. Me ve nene Isilaele' ve gihile evene' go'ine izaa' monovo mo keke' eita nomive ne neive. 48 Ne'mine lo-davo Nataniele' ti' lo Izesu'ni longo' o-dine': Gaza neni' monovo nene nadosa ningo gelane. Ne'mine lavo Izesu' ti' lo lo-imine': Hilipo' nene geikumu' vise' ogo olihe ningamivosa gaza nene gohuno zali'mi monovou' nanivo ma nene ninguve. 49 Ne'mine lavo Nataniele' ti' lo lo-imine': Tisazo, gaza nene mo O'moso'mi gipele nane. Ado' Isilaele' aleve leli' Guvetesi ve naba ma nene nane. 50 Ne'mine lavo Izesu' ti' lo lo-imine': Gaza idise nenikumu' gele ele'vole' aine' nene gaza gohuno zali'mi monovou' nanivo ninguve luvongumu' nene gele ele'vole' abe. Alinge' nene idise gele ele'vole' aine' inite' nesi nene ivile' ivosa inite' naba goloso ningelesane. 51 Ne'mine lo a'mido' gohi imine' molo ti' lo lo-imine': Naza lamineto' gehepeve nolo-lingimuve. Okulumo' huko godavo O'moso'mi angelo've nete nene O'mosolati' ve gihile nenita limaa' dizaa' igi nizavo ningilisave line'.

2

Kana Numuno Ebeta Ve Ma Vene' Davo Noso' Nite' Ni Minangu' Izesu' Ato' Suno Do Soto' Ine' Gamazi

1 Gamene seta' ma ogo vavo sitohamolo' nene nGalilaia misubou' numuno ebe' ma Kana neu' nene ve malo' vene' ma huki mili-di noso' nite' ni minani'. A'mingu' nene Izesu' izelehosi neivo 2 Izesu' ei' izipahala zuhosi nene vise li-ngimikevo vi minani' ve. 3 Minangu' nene vaini noso'ine nene mo osu' lavo Izesu'ni nene izeleho ti' lo lo-imine': Vaini noso'ine nene mo osu' lani' lae. 4 Ne'mine lavo Izesu' ti' lo lo-dine': Vene' menelo, neni' gono neivosa nolabe. Ne'mino nomive. Evene' ve'nido' nene neni' monovo'ne do soto' oloni' gamene've nene olihe amive. 5 Ne'mine line'za Izesu' izeleho ne'mo gelekele' izipe nene ti' lo lo-ngimine': Aza lo-lengemeline' gamazilo' nene e'meti ilo. 6 A'mida nene Zuda veti monovolo' e'meti evene' O'mosomu' gili noso gili hili hili' igi a'ine noso izilizangumu' nene geheni somo naba' naba sigisi nene ma minani' ve. A'mine somo hamo' hamoku' nene noso tuvedi ngaleni teoti ngaleni ne'mine ohizi milaa' ani' ve. 7 Ido' Izesu' a'mine somou' nene noso ohizi vai' lilo lo gelekele' izipe nene lo-ngedavo mo ohizi vai' goloso lika' lika' ani'. 8 Ne'mine ikevo Izesu' ti' lo lo-ngidine': A'minguti' ma nene ohizi noso' niteto' gizebo vela di vi imilo. Lavo ohizi di vi imani' ve. 9 Imikevo a'mine haza noso ne'mo nene vaini noso lolo' ogo neivo noso' niteto' gizebo ve ne'mo a'minguti' ma no giline'. No giline'za a'mine vaini noso ohizi di igi imave gelekele' izipe engikovo' nene a'mine noso soto' ine' monovo nene gili minani'za noso' niteto' gizebo ve aza nene a'mine vaini noso nene zalati' di ahe a'minemu' nene ma ningo gelamo mino no gelosa aza vene' dalosa ive nene vise lo-do 10 ti' lo lo-imine': Evene' noso' nite' nangu' nene noso' nite' gizi vata' iga' ave muki' nete gomu' nene vaini noso lamine' gehepeve nene ngimikevo vai' nikevosa alinge' nene vaini noso lanite' amine' ngimaa' naha gei' nene a'mine'mine ogo gomu' ngemamo idise a'nene vaini noso lamine' ma nene do soto' ogo nongemane line'. 11 Ido' a'mine nGalilaia misubou' Kana numuno ebe' miningu' inite' ine' me ve nene mo gana' api' ogosa ei' Izesu' monovo've ngelebizo ato' suno do soto' ogavo izipahala zuho nete a'mine amuzo've nene ningi ezemu' nene gili ele'vole' ani' ve. 12 A'mine noso' nite' ni minadoti' nene Izesu' aza izelehosi nakunolomotesi ido' izipahala zuhosi Kahanaumi numuda limi vi mini gamene ngomosi' ma ingi moni minani' ve.

Izesu' Aza Mono' Numuno Nabau' Maketi Milaa' Meni Hizaa' Igi Minave Nene nGimiselo Do Huline' Gamazi

13 Ido' engi' avo'ningine O'moso'mo ise'ine izingumu' gili Zuda ve holise' mini noso' nite' nalizani' gamene nene noalitivo Izesu' nene Zelusalemi numuda dizo vine' ve. 14 Dizo vo mono' numuno naba'mi gesi mingu' dizo ningine' nene evene' nete bulumaka' izesi ido' nama viluso ne'minesi nene O'moso lehizi-dilizangumu' meni hizilizani' ve li maketi nimilavo ido' O'moso lehizi-dilizani' moni senisimi iga' ave nesi nene gono'ine di nizavo ningine'. 15 Ningosa Izesu' aza naladunu' ngebeleline' gavoso ma lolo' ogo mono' numuno naba'mi gesi minguti' nene sipisipi ize'inesi bulumaka'inesi mukito' nene ngeleto do hulo heta ogo moni senisimi igi minaveti holomo nene do velepe' izo moni'ine nene do tululu lo hulo misubolo' o-ngidine' ve. 16 Ne'mine ogo nama viluso ne'mine maketi mili minave nene ti' lo lo-ngidine' ve: Lingine me'nehi numuno mene maketi numuno ne'mine lolo' i-di minani' nene huli a'mine inite' muki' nene di heta vilo lo lo-ngidine'. 17 Ne'mine ogavo izipahala zuho nene O'moso'mo do lu' izelive lo imiselelesa live'mi gamazi mono' godolou' ti' li gizikani' mamu' nene gohi gilani': Gei' numunga nene di goloso amavo lamine' minelive lo neni' lu'ne nene oto ngilingili' ogovo' minaa' neine' nenako ne'mino minelodi'mo inite' mamukisi gele minamolosuve. 18 Ido' Izesu' ne'mino ngeleto do huline' nemu' nene Zuda veti evene' naba'ine nete ti' li li-imani': O'moso'mo ne'mine iline lo gele gimine' nene lelebizo ato' suno nene nani'mine inite' do soto' iline. 19 Ne'mine likevo Izesu' a'mido' do velepe' izo ti' lo line': Mono' numuno mene bili di goloso ikevo gamene sitohamo ogo novivo naza gohi do otelesuve. 20 Ne'mine lavo Zuda veti evene' naba'ine nete a'mido' ti' li li-imani': Mono' numuno me ve nene gizivi' gizivi' igi nizavo kilisimasi foti sigisi (46) ogo novine' nene gaza gamene sitohamo ne'mi lulou' nene gohi do otelesuve nolabe. 21 Ne'mine lani'za aza nene ei' oko'nomu' mono' numunolo' lo molo line' nenako 22 nemu' nene alinge' hilinguti' otavosa izipahala zuho ne'mine lingumu' nene gohi gili mini mono' godolou' minine' gamazisi ido' Izesu' line' gamazi nesi nene gili ele'vole' ani' ve.

Izesu' Nene Evene' Mukiliti Monovotemu' Nene Ningo Gele Neingumu' Gizine' Gamazi

23 A'mine avo'ningine O'moso'mo ise'ine izingumu' gili holise' mini noso' nite' ni minani' gameneu' nene Izesu' aza Zelusalemi numuno ebeku' miningu' nene evene' linge muki' ne'minete ato' suno dani' nene ningi ezemu' gili ele'vole' ani' ve. 24-25 Ezemu' gili ele'vole' ani'za Izesu' aza luteu' minaa' neine' inite' nemu' nene ningo gelo osu' lo mino evene' mali'mosi a'mine evene' monovotemu' li soto' igi li-imilizado' lisihe' amani' nene aza evene' mukiliti monovote ningo gele osu' lo neine' nenako nemu' nene gele mino a'mine gili ele'vole' i-dani' aleve ingine ezemu' gili ele'vole' ado' nene aza engikumu' gilivo mu'musi' amine' ve.

3

O'moso'mo Gizebo Ingu' Vo Holaa' Monovomu' Izesuki Nikodemoki Li Volelo' Melo' Asine' Gamazi

1 Ido' ve ma minine' gulive Nikodemo' nene Halisaio' mono' laa' aveuti' mino Zuda veti kanisoleliti muliseuti' ve mino ve naba ne'mine minine'. 2 A'mine ve nene Izesu' neida holuka' ogo hetelo ti' lo line' ve: Tisazo, gaza ato' suno do soto' oga' naine' ne'mine nene ve mali'mo O'moso ezesi mino hize ele' o-damivo nene ngelo ma do soto' amoloseinako nemu' laza geikumu' nene O'moso'mo tisa' gono daline lo gimiselive ma ne nane losa gele none. 3 Ne'mine lavo Izesu' ti' lo line': Naza mo lamineto' gehepeve ti' lo nolo-gimuve: Evene' ma ingine O'mosolati' gohi soto' amilizani' nene O'moso'mo gizebo o neingu' nene mo keke' vi hilami ma ningamilisave. 4 Ne'mine lavo Nikodemo' ti' lo lo-imine': Evene' lodive ikeni' nete gohi nadisa soto' ilizave. Ize'ningi mulu'ningu' nene gohi visa ngeli ma soto' amilisave. 5 Ne'mine lavo Izesu' ti' lo lo-imine': Naza mo lamineto' gehepeve ti' lo nolo-gimuve: Ve ma nosolati' soto' igisa O'moso'mi Sikalahutatikisi soto' amilizave ingine nene O'moso'mo gizebo o neingu' nene mo keke' vi hilamilisave. 6 Evene' okodeuti' soto' oga' neine' inite' nene mo okode ne'minevo' soto' oga' neive. Ido' Sikalahutati' soto' oga' neine' inite' nene mo Sikalahuli'mi emeni damenisivo' nene soto' ogo minaa' neive. 7 Naza O'mosolati' gohi soto' ilizado' o neive noluvoni' nemu' nene upuho' ogo gaka muki' gelamozo. 8 Hepe' ne'mo huhu lo ma volosa gilida nene vaa' neive. Novivo gugu lo viline' nene ha gelelesaine'za nelati' ogosa nela novive lo ngelo ningo gelamolosane. A'mine'mine ogosa Sikalahutati' soto' ave nene soto' ani' aka ne ningamii igi mili iga' nani' initekovo' ningaa' nani' nenako a'mine hepe' ne'minisa nizave. 9 Ne'mine lavo Nikodemo' aza a'mido' do velepe' izo ti' lo longo' o-dine': Gaza nolaine' inite' me ve nadi' ogosa soto' ilingumu' nolane. 10 Ne'mino longo' o-davo Izesu' ti' lo lo-dine': Gei' nene Isilaele' aleve gozopoti' mono' apize ngeme'mo ogo minaa' anive ma nene naine'za mene initekumu' nene mo gelamane' neive. Olo. 11 Naza lamineto' gehepeve ti' lo nolo-gimuve: Laza gamazi laa' noune' nene mo gele minune' initekumukovo' laa' noune. Ido' laza lo soto' soto' oga' noune' inite' nene mo ningo gele none' initekumukovo' nene laa' noune. Ne'mine oga' noune'za lingine nene a'mido' ma gili limisa'mave. 12 Misubou' initeto' lo molo lo-lengemaa' uvoni' initekumu' nene gili ele'vole' isa'mani' nenako Okulumo' initeto' lo molo lo-lengemeloni' nene nadisa gili ele'vole' ilizave. nGeli ma gili ele'vole' amilisave. 13 Ido' Okulumoku' nene evene' hamolitesi ma dizi vi ningamave. Ma vi ningamani'za Okulumokuti' limuve O'mosolati' ve gihile nenikovo' nene a'mida mino ninge nouve. 14-15 Ido' Mose' Isilaele' aleve ebe' hadiveu' ngele'mizo moningu' nene gosihelite ngibilika' ngibilika' navo Mose' aza gosihe' ne'mi avazahalo' ma lolo' ogo za posilo' do otine' nene a'mine gosiheto' ningilizave nene hilami ve'ine gizi minilizave losa ne'mine ine' ve. Ido' ne'mine ine' ne'mini O'mosolati' ve gihile nenikumu' gili ele'vole' ilizave ingine nene minevo' minevo' ngemeni damenisi minilizave losa nenikisi nene a'mine'mine igi zalo' di oti-nidilizani' o neive line'. 16 Ido' Izesu' ne'mine line' nene nemu' line' ve: O'moso'mo me misubou' ve lulo limine' nene atoli'mine goloso ogosa lulo limidi'mo ei' gipele nene mo hamo' gehepeve minine'za ve ma ingine eikumu' gili ele'vole' ilizave nene vi tolovo ami minevo' minevo' ngemeni dameni dalisave losa a'mine gipele hamo' nene lehize-lidine' ve. 17 Ido' O'moso'mo a'mine gipele me misubouko imiseline' nene me misubouko aleve leli' nene goni' o-ledo lihime lemelive losa imiseline' nevoba asi me misubou' aleve leli' nene do lu' izelingumu' ve losa imiseline' ma neive. 18 Ido' ve ma ingine ezemu' gili ele'vole' ilizave nene O'moso'mo lihime ngemamoloseine'za ma gili imamilizave nene O'moso'mi gipele hamo' ma ne neive li gili imami ezemu' gili ele'vole' ami haza minani' nenako nemu' nene O'moso'mo goni'ine nene gomukuti' gele osu' lo neine' nenako lihime mo ngemelido' o neive. 19 Ido' lihime ngemeline' monovo nene ne'minemu' ngemeleseive: Labanali'mi meleho nene me misubouko ogani'za me misubou' aleve ingine nene monovo golosovo' igi mili minadi'mo labanali'mi lulou' minaakumu' gosele' ngebelavo liti'musou' minaakumu' ngumo helaa' ine' ve. 20 Evene' muki' monovo goloso daa' nave nene a'mine monovo golosote nene labanali'mo do soto' ogalive li labana' nene mehe'ine imisa labanali'mi lulou' nene imi hilisa'mave. 21 Ne'mine isa'mani'za monovo gihile laminekovo' igi mili minaa' nave muki' ingine ogo molo oga' noune' inite' muki' nene O'moso'movo' hize ele' o-lidivosavo' ogo molo oga' noune' nenako a'mine nene soto' ilive li labanali'mi lulou' imi hilaa' nave.

Zohane' Aza Izesu'nimu' Nene Mine'mo Dizovo' Neivo Naza Nene Mine'mo Lemelesuve Line' Gamazi

22 Neloti' nene Izesu' aza izipahala zuhosi Zudaia misubouko vi mini evene' mono' noso holo-ngede'mo vo minivo minani' ve. 23 Ido' Zohane' nene noso vai' minida Salemi numuno ebe' avita minine' ebe' Ainoni nela nene azasi noso holo-ngede'mo vo neivo evene' nene ezela igi noso hilika' hilika' ani' ve. 24 (Ne'mine ani' nene Zohane'ni nene Helode' aza olihe galapuso numungu' hulo-damivosa ne'mine ani' ve.) 25 Ido' ne'mini noso hili-ngidi'mi vi nizasivo Zohane' izipahala zuhosi ido' Zuda ve masi noso holaakumu' gamazidunu' lovo ani'. 26 Ne'mine igisa Zohane' izipahala zuho ingine Zohane' neida vi ti' li li-imani' ve: Tisazo, Zodani noso hela holela nanivo ve ma geikisi neivo eze monovomu' lo soto' soto' abe. A'mine ve ma'mo nene evene' noso noholo-ngidivo evene' vai' goloso nene ezela nivave. 27 Ne'mine likevo Zohane' aza a'mido' ti' lo lo-ngimine': Okulumoku' minive O'moso ne'mo evene' ma lehize-damo noline' inite' nene asi'velati' amuzo molo ngelo damoloseive. 28 Naza ti' lo luvoni' gamazi ma nene langisetine mo gili nizave: Naza nene O'moso'mo do lu' izelive lo imiselelesa live ma ne nomuvoni'za asi O'moso'mo ha gomu' molo-deline lo nimiselive ma ne nouve luvoni' ma neive. 29 Ido' izeni ikani' vene' nene mo vanahidokovo' vaa' neine'za veneli'mi vanahi zuho ne'mo a'mine veneto' nene gizebo o-do neivo ogo elenahine do viline' nene gizebo o-do minelive aza izebolo' molamoloseive. Asi elenahine dalosa ogo vise liline' nolo've geleline' nene olize izeleseive. A'mine'mine ogo evene' nete neni' huli-nidi Izesuda nivangumu' nene naza nolize izo nouvo lu'neu' nene gulumo lise osu' nolive. 30 A'mine ve nene mine'mo dizovo' neivo naza nene mine'mo lemo mineloni' o neive.

Okulumokuti' Limive'mi Monovo

31 Veletati' limive ne'mo nene evene' muki' livile' ogo dizo minive neive. Ido' ve ma misuboukoti' mene soto' ive nene misuboukoti' monovovo' ogo molo mino misubouko initekumukovo' nene laa' neive. Okulumokuti' limive evene' muki' livile' ogo dizo minive ne'mo nene 32 ningaa' neine' initekumukisi ido' gelaa' neine' initekumukisivo' lo soto' oga' neine'za a'mido' nene ma gili imisa'mave. 33-34 Ne neiha O'moso ne'mo ei' Sikalahu've emaa' neine' nene apa nite' ogo emamo mo eme osu' laa' neine' nenako nemu' nene a'mine O'moso'mo imiselive nene O'moso'mi gamazi gihilevo' laa' neive. Nemu' nene a'mine lo soto' oga' neine' initeto' gili imaa' nave ingine gili imaa' nadi'mo nene O'moso'mo gamazi gihile laminekovo' laa' neive li a'mine gamazi nene hize ele' iga' nave. 35 Meleho ne'mo nene gipele lulo eme osu' lo mino inite' mata' nene ei' anau' molo osu' lo neive. 36 Ido' gipelemu' gili ele'vole' iga' nave muki' nete nene minevo' minevo' ngemeni dameni nene mo di nizaha ve ma ingine a'mine gipelemu' gili ele'vole' ami gamazi've gili hulaa' ilizave nete nene minevo' minevo' minaa' ngemeni dameni nene ma di ningamilisave. Ne'mine ilisani'za engikumu' O'moso'mo izebolo' soto' ine' nene mo engita mine molosa mine do novive.

4

Izesu' Aza Samalia Vene' Nene Ei' Monovo Elebizavo A'mine Venekisi Samalia Aleve Vaikisi Ezemu' Gili Ele'vole' Ani' Gamazi

1 Izesu' nene Zohane' evene' do gi'mizo noso holo-ngidine' nene ivile' ivosa eito' nene evene' vai' goloso do gi'mizo noso holo-ngede'mo vo neivo Halisaio' mono' laa' ave ingine a'minemu' gilangumu' nene Izesu' gelosa 2-3 Zudaia misubo hulo nGalilaia misubola volosa vine'. A'mine Izesu' evene' do gi'mizo noso holo-ngidine' nene asi've Izesu' holo-ngidine' nevoba asi izipahala zuho nete ezelo' medeli mini noso hili-ngidani' nemu' luve. 4 Izesule nene nGalilaia misubou' vi hetelilisa Samalia misubou' vi hilisa vilizani' o neivosa a'mingu' vi hili vani' ve. 5 A'mingu' vilizani' o neivosa vangu' nene Zakobo' gipele Zosehe'ni imine' misubo minido' avita Samalia aleveti numuno ebe' ma Sekemi nela igi hetelani' ve. 6 A'mida nene avoteho Zakobo' galese elo noso do soto' ine' nene neivo Izesu' aza aka ha'na ha'nati' ogo abusolo elavo gamene tuvelu (12) kiloku ne'mido' nene a'mine noso engetine' gahevela nene mito' minine' ve. 7 Neivo Samalia vene' mali'mo noso ohizelesa navo Izesu' ti' lo lo-imine': Nosomu' nonisize. Noso ma ohize nemezo line'. 8 Nosomu' voku' lo-dine' nene izipahala zuho ingine noso' nite' meni hizi di alisa Sekemi numuno ebeku' vikevosa line' ve. 9 Ido' Samalia alevesi Zuda alevesi hamo' lapeseu' mo keke' ma nisa'mani' nenako Izesu' ne'mine lo voku' lavo Samalia vene' ne'mo ti' lo line': Gaza Zuda ve minanidike neni' Samalia vene' nene nosomu' voku' nanimu' nolo-nedane. 10 Ne'mine lavo Izesu' ti' lo lo-imine': Gaza O'moso'mo lehize-lengedaa' neine' initekumukisi ido' nosomu' voku' lo-giduve neni' monovo'ne nemukisi nene ma ningo gele minaine' neidiniko gaza voku' laanivo naza nene noso hinipinikuti' dizaa' neine' noso minevo' minevoli'mi izelehosi minine' noso nene gimuvodine. 11 Ne'mine lavo vene' aza ti' lo lo-imine': Ve melo, gaza noso ohizaa' initeka nene ma do minamane' nenako ido' galeseu' noso nesi nene homiu' goloso neine' nenako gaza a'mine hinipinikuti' minine' noso nemelove laine' nene zaukoti' do nemelesa lane. 12 Leli' avoteho Zakobo' ne'mo galese mene elo noso do soto' ogosa azasi ido' izipahalasi ido' ato ato' ize'vesi mukito' ingine a'minguti' nene noso ni minani' ve. Ido' gaza nene a'mine noso do soto' o-lidive avoteho Zakobo'ni nene ivile' o nabe. 13 Ne'mine lavo Izesu' aza a'mido' ti' lo lo-imine': Mene galeseuti' noso nalizave nene gohi nosomu' ngisivo nika' nika' igi minilisave. 14 Ne'mine ilisani'za neni' ngemeloni' noso nalizave nene gohi a'minemu' ngisamivo mini di dizi nizavo a'mine ngemeloni' noso minevo' minevo' ogali'mi izeleho ne'mo engi' lu'ningu' nene hinipini' ne'mino dizo mineleseive. 15 Ne'mine lavo vene' aza ti' lo line': Ve melo, gaza nolaine' noso nene naza nosa nosomu' gohi nisamivo mela noso ohizelesa oga' nouvoni' nene gohi amolongisi a'mine noso nene ma nemevo. 16 Ne'mine lavo Izesu' aza ti' lo lo-imine': Gaza vo vangahine vise lo-danivo alizo. 17 Ne'mine lavo vene' aza ti' lo line': Naza nene va'neho ma nomive. Lavo Izesu' ti' lo line': Gaza va'neho nomive laine' nene mo lamineto' laane. 18 Nanitekumu' ve. Gomu' nene ve faefulo' vaanivo vangamote lili' ani'za idise velo' vo nane' nene aka lamine' avuto' ogosa gopo vo nane' ne'mo nene gei' vangaho gihile lolo' amivo gopo ingaa' nasine' nenako nemu' nene va'neho nomive laine' nene mo lamineto' laane. 19 Ne'mine lavo vene' aza Izesu'nimu' ti' lo line': Ve nabo, naza ningo giluvoni' gei' nene mo polohete nane lo ningekuve. 20 Nemu' nene Samalia aleve leli' avotemote ingine Gelazimi gololo' mene dizi O'moso opo'ni laa' ani'za Zuda ve lingine Zelusalemi numuno ebe' neevo' nene O'moso opo'ni laa' ebe' neive li laa' nani' nenako mo lamineto' laa' ani' nehe nemu' nene lo-nemezo. 21 Ne'mine lavo Izesu' ti' lo line': Alungoo, naza lo-gemeloni' gamazi nene gelezo. Gamene ma soto' iline' nene me gololokisi Zelusalemi numuno ebekukisi nene metehine O'moso opo'ni lamiliza gamene ma soto' oloseive. 22 Lingine Samalia aleve O'moso opo'ni laa' nani' nene eze monovomu' nene ma ningi gilamisa opo'ni laa' nave. Ne'mine iga' nani'za O'moso'mo evene' do lu' izeline' aka nene leli' Zuda velati' soto' ine' nenako Zuda ve leli' nene eze monovo ningo gele minosavo' opo'ni laa' nene noune. 23 Gamene ma aline' o minine' gamene idise mo ogangu' mene lu'ine laminetoti' O'moso opo'ni laa' ave ingine ei' Sikalahu've ne'mo ngelebizeline' monovo gihilelotikovo' nene opo'ni lilizave. Ne'mine noluvoni' nene me'neho O'moso aza a'mine ne'mine monovoloti' opo'ni lilizavemu' nene vise' ogo minaa' neine' nenako nemu' ne luve. 24 O'moso'mi emeni dameni nene Sikalahu' ne'mine neine' nenako ei' O'moso opo'ni lilizave nete ei' Sikalahu've ne'mo ngelebizeline' monovo gihilelotikovo' nene opo'ni lilizado' o neive. 25 Ne'mine lavo vene' aza ti' lo lo-imine': O'moso'mo do lu' izelive lo imiselelesa live ve lave nene mo aloseive likevosa naza nene mo aloseive lo gele nouve. Aza ogo inite' mukikumu' nene lo soto' ogo lo-lemeleseive. 26 Lavo Izesu' ti' lo lo-imine': Gamazi nolo-gimuve neni' nene a'mine ve ne nouve. 27 Ne'mine nolivo izipahala zuho ingine noso' niteto' vadoti' tine' mili igi heteli ningani' nene vene' masi gamazi li minasine' ningi gopo ga'ine gilani'. Gopo ga'ine gilani'za izipahala zuho ingine engikumu' nene gaza nani dalosa nane ido' vene' mene nanitekumu' gamazi nolo-emane li a'ne'mine igi longo' hamokisi ma i-damani' ve. 28 Ne'mine igi nizavo vene' aza noso gomise've nene a'mida huloko a'mine Sekemi numuno ebeku' vo evene' ti' lo lo-ngimine': 29 Lingine ve ma neni' ogo molo oga' uvoni' monovo muki' lo soto' o-nidive nene ningilizaze. Alo. Aza nene O'moso'mo do lu' izelesa kegese-dive Kilisito' nehe lo ga'ne sita' nogiluze. Igi ningi' nalo. 30 Ne'mine lavo evene' taunilati' nene Izesu' neida vani' ve. 31 Ne'mine navo izipahala zuho Izesu'ni ti' li geligelinga li-dani': Tisazo, noso' nite' mene do novo li-di minani'. 32 Ne'mine ani'za aza ti' lo lo-ngimine': Neni' naloni' noso' nite'ne ma neine' nene lingine ma ningi gilamave. 33 Ne'mine lavo izipahala zuho engiku' ti' li li volelo' melo' igi minani': Noso' nite' ma di-di amahe. Olo. 34 Ne'mine likevo Izesu' ti' lo lo-ngimine': Neni' noso' nite'ne nene nimiselive ei' lulolo' inite' ogo molo mino nimine' gono've do peleloni' neve nene noso' nite'ne ve. 35 Lingine ti' li laa' nave: Ike'ni sita' ve sita' ve ogo vavosa noso' nite' dolizelone. Ne'mine laa' nani'za naza ti' lo nolo-lingimuve. Ningi' nalo. Mingu' aka'mene mo minamuno dolizaato' vave. Evene' nenita alisa di nene igi minikeve. 36 Zuho nite' zuho' avesi ido' noso' nite' dolizavesi makatokovo' ngolize izilizave lisa minamuno dolizaa' nave ingine meni'ine mo nidi gono'ine'mi gihile nene evene' ingine minevo minevo' ngemeni dameni nene dalizave li di nubo nii-ngidave. 37 Ne'mine nani' ne'mo nene evenelite ti' li laa' nani' gamazi ma nene mo gihile izave: Ve malite zuho' ani' inite' nene ve atolite dolizaa' nave. 38 Lingine zuho' igi gono damani' mingu' nene vi mine dolizilizave lo lingimiselekuvo ve atolite dani' gono'mi gihile ma nene dalisa nave. 39 A'mine Sekemi numuno ebetoti' Samalia ve muki' ne'minete vene' ne'mo neni' ogo molo oga' uvoni' monovo muki' ma nene lo soto' o-nidave lo line' gamazi nene giladi'mo nene Izesu'nimu' gili ele'vole' ani' ve. 40 Ido' ezemu' gili ele'vole' ani' nenako nemu' nene ezela igi hetelisa engikisi maka' minelive li amuzonga li-dikevo aza gamene sita' engikisi maka' ma minine' ve. 41 Ne'mine ogo gamazi lo-ngimine' gamazi've giladi'mo evene' gohi vai' ne'mine nete imine' mili ezemu' gili ele'vole' ani' ve. 42 Ne'mine igi vene' nene ti' li li-imani': Ezemu' gele ele'vole' une' nene gomu' gei' gamazi lanidoti' gele ele'vole' une'za idise asi've line' gamazi gilune' ne'mo nene gele ele'vole' gehepeve ogosa laza a'mine me vemu' gilune' nene misubouko aleve muki' leli' nene do lu' izeleseive lave ma nene mo lamineto' ei' nene neive losa gelekune.

Guvelesi Ve Mali'mi Gonou' Ve Naba Mali'mi Gipele Izesu' Do Lamine' O-dine' Gamazi

43-44 Asi've Izesu' gomu' line' gamazi ma ne'mino neive: Polohete nene engi' numu'ine ebe'ineloti' aleve nete nene gili ngimami di nabasi ma i-ngidisa'mave. Ido' a'mine'mine igi ei' misubo'veu' aleve nene eze gili imami di naba i-damilizani' o neine' nenako nemu' nene aza Sekemi alevesi mineline' gamene sita' nene mo osu' lavo a'mine numuno ebe' nene hulo a'mine misubo've nGalilaia misubouko vine' ve. 45 Ne'mino ma nenako nGalilaia aleve ma Zelusalemi numuda holise' mini noso' nite' ni minada inginesi vi minani' nenako a'mida Izesu' ogo molo minine' inite' nene ningani' nenako nemu' nene Izesu' nGalilaia misubouko ogo nohetelivo ele'mizi lamine' ani' ve. 46 Ne'mine ikevo Izesu' aza nGalilaia misubou' numuno ebe' ma Kana neu' gomu' haza nosodunu' vaini noso lolo' ine' numuno ebeta nene gohi vine' ve. A'mida vo neivo Kahanaumi numuno ebeku' nene guvelesi ve mali'mi gonou' ve naba ma minine'. A'mine ve'mi gipele nene inite' gize do minine' ve. 47 Ne'mino neivo meleho aza Izesu' nene Zudaia misubo hulo nGalilaia misubouko mene tine' molo ogave lani' nemu' nene giline'. Ne'mine ogosa ei' gipele nene mo helaato' neivo aza Izesu' neida vosa Izesu' lemo ogo do lamine' o-delive lo amuzonga lo-dine'. 48 Ne'mine lo-davo Izesu' ti' lo lo-imine': Lingine naza ato' suno golize laa' inite' ma do soto' okuvo ningamilizani' nene nenikumu' gili ele'vole' amilisaave. 49 Lavo guvelesi ve'mi gonou' ve naba ne'mo ti' lo lo-imine': Ve nabo, gipe'ne nene helalize. Lemo volosize. Ano. 50 Ne'mine lavo Izesu' ti' lo lo-imine': Gipa nene velesi ha minelize. Numungala vozo. Ne'mine lavo a'mine ve nene Izesu' lo-imine' gamazilo' nene gele ele'vole' ogo numu'vela vine'. 51 Ne'mine ogo olihe numu'vela volosa akalo' novivo gelekele' izipe've malite akala novido' igi votene' i-di gipele vele gizingumu' nene li-imani'. 52 Ne'mine ikevo umungive nene nani gamenelo' lamine' gele nolihe lo a'minemu' gelelesa longo' o-ngidine'. Ne'mine ogavo ingine ti' li li-imani': Oko'nolo' olo' line' nene aize' holise' vanu kiloku ne'mido' nene hulo-dive. 53 Ne'mine likevo izipeli'mi meleho giline' nene Izesukaho'mo gipa nene velesi ha minelive line' gamenelo' gehepeve nene lamine' gelani' neive lo gelosa azasi eze numu'veu' minaa' ani' alevesi mukito' nene Izesu'nimu' gili ele'vole' ani' ve. 54 Ido' Izesu' Zudaia misubo hulo nGalilaia misubouko tine' molo ogosa atoli'mine suno do soto' ine' me'mo nene ato' suno nGalilaia misubou' do soto' ine' nene mo gamene sita' ine' ve.

5

Be'sada Noso Ohuno Gahevela Gamene Ha'nalo' Inite' Gize Do Minive Ma Izesu' Holiseku' Do Lamine' O-dine' Gamazi

1 Neloti' alinge' nene Zuda velite holise' mini noso' nite' naa' ani' gamene ma alitavo Izesu' nene Zelusalemi numuda vine'. 2 Ido' Zelusalemi numuno ebeku' sipisipi dizaa' ani' gateni'mi gahevela nene noso ohuno ma minine' nene gulive Zuda veti gamazi'ninguti' Be'sada ve laa' nave. A'mida nene gehenidunu' azibe faefu a'mine noso ohuno nene di vodo vodo i-di gizikavo minine' ve. 3 A'mine azibe numungu' nene inite' gizi dani' aleve muki', ve'ine likive, ido' gize'ine a'ningu' gebili di minave ne'mine nene muki' vai' minani' ve. 4 Ingine a'mine noso ohunou' nene O'moso'mi angelo've mali'mo gamenelo' gamenelo' lemo ogo noso nene do mo'mongo' o-davo a'mingu' gomu' limive nene gize dani' inite've osu' lo-davo lamine' gelaa' ine' nenako nemu' nene gizebo igi ingi minaa' ani' ve. 5 Engikuti' ve ma ongo minine' nene kilisimasi teoti eiti (38) ne'mine inite' gize do minine' ve. 6 Ne'mino neivo Izesu' aza ningo gamene ha'nalo' inite' gize do minine' nemukisi nene ningo gelo ti' lo longo' o-dine': Gaza nene lamine' olove lo gele nabe. 7 Ne'mine lavo inite' gize dave aza ti' lo line': Ve melo, angelo' ne'mo noso do mo'mongo' neivo a'mingu' lemo lamine' olongumu' nele'mizi limilizave nene ma nizamavo ne'mo neni' nene zou zou lo nouvosa ve ma gomu' vive ne'movo' nene lamine' oga' neive. 8 Ne'mine lavo Izesu' ti' lo lo-imine': Otezo. Oto aviliseka do geho aka vozo. 9 Ne'mine lo-davo a'mine ve nene a'mido' lite' lo lamine' ogosa avilise've nene do otosa aka vine' ve. A'mine gameneu' nene holise' gamene minine' ve. 10 Nemu' nene Zuda ve nete a'mine lamine' ive nene ti' li li-dani': Idise nene holise' gamene neine' nenako gaza aviliseka do novaine' ne'mo nene lou' gamazite ma nene avuto' nane. 11 Ne'mine lani'za aza do velepe' izo ti' lo lo-ngimine': Neni' do lamine' o-nidive asi've ne'mo aviliseka do oto vozo lo-nedavosa nene ne'mine nouve line'. 12 Ne'mine lavo ingine ti' li longo' i-dani': Gaza aviliseka do oto vozo lo-gidive nene zaho ma neve. 13 Ne'mine li longo' i-dani'za Izesu' nene a'mida evene' mulise minangu' nene gopo ogavo lamine' gilive aza nene evene' ne'mo do lamine' o-nidine' ve lo ma ningo gelamine' ve. 14 Ne'mine ogosa a'mine ve nene alinge' mono' numuno nabau' neivo Izesu' ningo ti' lo lo-dine': Ningezo. Gaza nene mo lamine' ogange. Gomu' goloso ogo minaine' nene ivile' ivosa goloso gehepeve ogalinge. Gaza nene lihimeka hulo gohi damozo. 15 Ne'mine lo-davosa a'mine ve aza vo Zuda ve nene ti' lo lo-ngimine': A'mine do lamine' o-nidive ma nene Izesu' do lamine' o-nedani' neive lo lo-ngimine' ve. 16 Ido' Izesu' holise' gameneu' ne'mine gono daa' ine' nemu' Zuda veti ve naba'ine nete api' igi elemi biluva' i-dani' ve. 17 Ne'mine ikevo Izesu' aza do velepe' izo ti' lo lo-ngimine': Me'neho gono do'mo do'mo ogo neine' nene idisesi ha do neivo nazasi nene a'mine'mine ogo gono do'mo novuve. 18 Ne'mine lavo Zuda veti ve naba'ine nete Izesu'ni bililiza akamu' nene gohi amuzo goloso milisa vise' igi minani'. Ido' ne'mine ani' nene nanitekumu' ve. Ingine holisekumu' lou' milani' nene Izesu' avuto' ogave li neemukovo' nene bililiza akamu' vise' igi minani' nevoba asi've Izesu' ne'mo O'moso nene neni' me'neho gehepeve ve line' ne'mo nene ei' Izesu' nene O'mososi do lisihe' ogosa lave liisa nemukisi nene bililisa gohi nabisa amuzo milave.

Izesu' Aza Melehi Amuzo Do Minine' Nemu' Lo Soto' Ine' Gamazi

19 Ne'mine navo nemu' nene Izesu' aza a'mido' do velepe' izo ti' lo lo-ngimine': Naza lamineto' ti' lo nolo-lingimuve: Me'neho aza nanite' nanite' ogo molo ilihe gipele nazasi nene a'mine'minevo' ogo, ogo molo minelesuvonako nemu' nene naza lu'nelo' do molo inite' hamokisi ngelo ma amolosuve. Asi me'neho ogo molo neine' initekovo' nene ogo molo oga' nouve. 20 Ido' gamazi mene noluvoni' nene neemu' noluve. Me'neho aza gipele neni' nene lulo neme neine' nenako nemu' nene aza ogo molo oga' neine' inite' muki' nene nelebize osu' laa' neive. Ido' ne'mine oga' neine' nenako nemu' nene lingine upuho' igi golize lilizave lo idise ogo molo nouvoni' inite' mene ivile' ivosa atoli'mine suno naba goloso nelebizavo olosuve. 21 Ee, me'neho aza evene' hilave nene ve'ine gizi minilizave lo do ote-ngedaa' neine' ne'mino gipele nazasi nene a'mine'mine ogo neni' ga'ne giluvoni' aleve mukikumu' nene gohi minivi' alivi' igi minilizave lokuvo gohi minivi' alivi' igi minaa' nani' ma neive. 22 Ido' naza ne'mine olosuve lo noluvoni' nene nanitekumu' ve. Me'neho aza neve evene' monovo'inemu' ize' molo goni' ma o-ngedesa'mo a'mine ne'mine gono muki' nene gipele neni' a'neu' molo neive. 23 Aza ne'mine ine' nene evene' muki' ingine me'nehine opo'ni li di naba i-daa' naani' ne'mine igi gipele neni' nene nopo'ni li di naba i-nidilizave losa ne'mine ine' ve. Ido' gipele neni' nopo'ni li di naba i-nidamilizave nene nimiselive me'nehine nene opo'ni li di naba i-disa'mave. 24 Naza mo lamineto' ti' lo nolo-lingimuve: Ve ma ingine neni' gamazi'nelo' gili di mini nimiselivemu' gili ele'vole' i-di minilizave nene minevo' minevo' minaa' ngemeni dameni nene mo di ti' ikeve. A'mine ve ingine nene gonito' vi otami asi lu'ine hele vivo minadoti' nene upuho' igi ve'ine gizikeve. 25 Ee, naza mo lamineto' ti' lo nolo-lingimuve: Gamene ma naani' nene evene' mo lu'ine helavo nizave netesi O'moso'mi gipele neni' no'ne nene gililisave. A'mine gamene nene mo idisesi ogave. Ne'mine oganako no'ne gililizave muki' nene ve'ine gizilisave. 26 Ne'mine noluvoni' nene nanitekumu' ve. Me'nehi minevo' alevo've nene malati' damiha asi've nene minevo' alevo' ogali'mi izeleho gehepeve ma ne neive. Ido' a'mine'mine ogo me'neho lavosa gipele nazasi nene ei' ne'mine mino minevo' alevo' ne'mi izeleho gehepeve nouve. 27 Ido' naza nene O'mosolati' evene' gihile nouvonako nemu' nene naza evene' goni'ine gelaa' gono nene daline lo amuzo nemavo nouve. 28 Lingine gamazi memu' nene gatine gopo gilamilo. Gamene ma aliteleseive. A'mingu' nene mati matiu' minave muki' nene neni' gamazi loloni' no'ne nene gili 29 a'minguti' heta alisave. Ingine monovo lamine' igi mili minave nene otisa minevo' minevo' igi minilisaha monovo goloso igi mili minave ingine nene otisa gonito' otikevo naza lokuvo mulumo gono dalisave. 30 Ido' ne'mine oloni' nene neni' lu'nelo' do molo inite' hamokisi ngelo ma amolosuve. Asi me'neho lidokovo' nene gelo e'meto goni' gelo ize' molaa' nouve. Ido' neni' lu'nelo' do molo e'metamo nimiselive'mi lulolo' do molo e'meto goni' gelo ize' molaa' nouvoni' nene mo lisihe' gehepeve o minaa' neive.

Izesu' Ei' Monovomu' Asi've Lo Soto' Iline' Nene Soza Nolihe Li Gililisaanako Ato' Nitelitesi Evenelitesi Li Soto' Ani' Nene Mo Lamine' Likeve Li Gililizado'

Minine'za Mo Gilamangumu' Line' Gamazi 31 Naza neni' monovomu' na'nise'nelati' ma lo soto' soto' ogo mineloni' nene lingine soza nolihe lamine' nolive. Laza gelamune li gili minilisave. 32 Ido' nenikumu' lo soto' soto' oga' ive nene ma neinako naza eikumu' giluvo nenikumu' lo soto' soto' neine' nene mo lamineto' laa' neive losa gele nouve. 33 Lingine mono' noso holo-ngedaa' ive Zohane' neida evene' ma vi longo' i-dilizave li ngimiselikevo aza neni' monovo'ne lo soto' ogo gamazi gihilevo' lo-lengemavo nigilani' ma neive. 34 Nenikumu' nene Zohane' ne'mine line'za naza nene me misubou' ve malite nenikumu' li soto' ilizangumu' ve lo engita ma gele medelesa'muvoni'za Zohane' line' gamazimu' noluvoni' nene lingine a'mine gamazi gili ele'vole' ikevosa O'moso'mo do lungu' izelive losa noluve. 35 Zohane' aza nene lamu ma lo lamine' o mino hize labana' elo minaa' neine' ne'mine mino hize labana' elo gamazi loka' loka' neivo a'minemu' lingine gilavo lamine' ogavo gamene li'nibemu' longolize izi minani' ma neive. 36 Ne neiha Zohane' neni' monovo'ne lo soto' ine' nene ivile' ivosa neni' monovo'ne lo soto' ogo lengelebizaa' neine' inite' gohi ma neive. A'mine nene me'neho aza ne'mine gono do'mo vo do peleline lo-nidido' nene ato ato' suno do soto' ogo gono do'mo vo minaa' nouvoni' ne'mo nene neni' monovo do soto' ogo lengelebize neivo ne'mo nene me'neho O'moso ne'mo nimiselani' neive li ningi gililizado' o neive. 37 Ido' a'mine nimiselive me'neho aza nesi neni' monovo'ne nene lo soto' ogani' neiha lingine ei' nolo nene mo keke' gilami ei' oko'nolo' nesi nene ma ningamave. 38 Ido' lingine O'moso'mo imiselive nenikumu' gili ele'vole' amani' ne'mo O'moso'mi gamazi lengi' lutingu' minamine' nene do soto' ogo lelebizave. 39 Ido' lingine mono' godolouti' gamazi ne'mo nene minevo' minevo' lengemeni dameni dalizani' aka nene do soto' o-ledelihe li a'mingu' amuzo mili vise' igi minaa' nave. A'mine mono' gamazi nene nenikumu' lo soto' oga' neiha 40 nenita minevo' minevo' lengemeni dameni dalone li alisa gilisa'mave. 41 Guve'ne vilingumu' ve lo naza evene' di naba i-nidilizave lo lu'ningu' hizesa'muvoni'za 42 lengi' monovotine nene mo gele nouve. Lutine nene O'moso imisa'mave. 43 Naza nene me'neho lavo ezelo' medelosa uvoni'za lingine gili nimisa'maha ve ma ingine me'neho lamivo angise'ine engito' medeli mini alizani' nene lingine a'mine ve gili ngimilisave. 44 Lingine nene ge do naba o-nede ne do naba o-gede li minilisa lanite' gili mini iga' naha O'moso ei' hamo' minive ne'mo do naba o-lengedeline' akalo' nene e'metilisa gilisa'mani' nenako nemu' nene lingine ezemu' nadisa gili ele'vole' ilizave. 45 Nenikumu' nene melehida goni' o-ledeleseive li gilamilo. Lengi' goni' o-lengedelive nene ezemu' hize ele' o-ledelive li gili ele'vole' ave Mose' nene goni' o-lengedeleseive. 46 Ido' mene noluvoni' nene nanitekumu' ve. Mose' aza nenikumu' gizine' nenako ei' gizine' gamazi nene ma gili ele'vole' adiniko nenikumukisi gili ele'vole' adine. 47 Gili ele'vole' adine'za ei' gizine' gamazi nene gili ele'vole' amadi'mo nene neni' gamazi'ne nene nadisa gili ele'vole' ilizave. nGeli ma gili ele'vole' amilisave.

6

Izesu' Evene' Faef Tauseni Ne'mine Noso' Nite' nGimine'

1 Ido' neloti' nene Izesu' aza minine' ebe' nene hulo sipiu' dizo nGalilaia noso ohuno naba gulive ma Tibelia' noso ohunolo' nene ledo vo helala vine'. 2 Ne'mino novivo evene' muki' goloso nene Izesu' ato' suno do soto' ogo inite' gizi dave do lamine' o-ngidido' ningadi'mo e'meti vani' ve. 3 Ne'mini navo Izesu' aza nene gololo' ma dizo vo izipahala zuhosi mito' minani' ve. 4 A'mine gamenelo' nene Zuda veti avo'ninge Aigita misubou' minani' gameneu' O'moso'mo ise'ine izingumu' gili holise' mini noso' nite' naa' ani' gamene nene mo avito' o minine' ve. 5 Ido' Izesu' vokene' ogo ningine' nene evene' muki' goloso ei' neida navo ningo Hilipo'ni ti' lo lo-imine': Evene' muki' emesene naani' neti noso' nite'ine nene zalati' meni hizelone. 6 Izesu' ne'mine line' nene a'mine aleve do ve'ine molaline' monovomu' nene ha gele neiha ha Hilipo'ni emengu' molalosamu' nene ne'mine line' ve. 7 Ne'mine lavo Hilipo' aza ti' lo lo-imine': Moni naba fo hadeti kina (K400) ne'mine hulo noso' nite' meni hizeso' nene vo damivo ngomo lasolo pasolo nalizado' mineleseive. 8 Ne'mine lavo Izesu' izipahala zuho ma Simoni' Petolo' akunolo Adelea' aza minosa ti' lo Izesu'ni lo-imine': 9 Gipe mene balidunu' lolo' ani' sikoni faefusi ido' alaha' ngomo setakisi ma do neine'za evene' mukiku' mene nadosa vo dalive. 10 Ne'mine lavo Izesu' aza izipahala zuho ti' lo lo-ngimine': Evene' nene mito' minilizaze. Li-ngidilo line'. A'mida nene guvise lamine' vai' minido' evene' nene mito' minikevo gatani' nene vemoho' faef tauseni (5,000) ne'mine minani' ve. 11 Mito' minikevo Izesu' aza sikoni nene do O'mosola opo'ni losa a'mine aleve nene ngimine'. Ido' a'mine'mine ogo alahakisi nene ngimine' ve. Ingine nisa gosele' ilizani' votigilelo' ngimine'. 12 Mukito' gatu'ine ogavo nizavo izipahala zuho ti' lo lo-ngimine': Noso' nite' linge nene labuluvo ogalize. Lumo sama nene di nubo ilo. 13 Ne'mine lavo ingine balidunu' lolo' ani' sikoni faef ne'mi lumo sama noso' nite' navete hulani' nene di nubo igi gosuvaha' tuvelu go'zi vai' lani' ve. 14 Ido' evene' ingine Izesu' atoli'mine suno ine' nene ningi nemu' ti' li lani': Me ve nene polohete ma me misubou' aloseive lave ma nene mo lamineto' ei' ne neive. 15 Ne'mine likevo Izesu' aza ingine Guvetesi ve naba lolo' o-delone li igi analo' dalisa minani' nene mo ningo gelo a'mine ebe' nene hulo asi'vevo' gohi golola ma dize minine' ve.

Izesu' Noso Avilelo' Lise Lise Vine' Gamazi

16 Izesu' golola dizo neivo nivenga' nomolavo izipahala zuho ingine noso ohuno gahevela limi heteli 17 sipiu' dizi Kahanaumi numuno noso helala minida nene vilisa vani'. Nivavo liti'muso nene mo izine'za Izesu' nene olihe engita ogo gi'mizamine' ve. 18 Gi'mizamivo haza nivavo hepe' nene amuzo malehe goloso noilivo noso nene amuzo molo sii' naba goloso olosa ine'. 19 Ne'mine neivo ingine 5, 6 kilomita (3, 4 maili) ne'mine sipiu' nivi Izesu' nene noso avilelo' lise lise navo ningi ngehelele izavo golise goloso gilani'za 20 aza ti' lo lo-ngimine': Neni' ma ne nouze. Golise gilamilo. 21 Ne'mine lavo ingine sipiu' dizelive li gili niimavo a'mido' lite' lo sipi nene mo a'mine vilisa gilani' ebeta noso gahevela nene hetele minine' ve.

Neni' Neve Nene Minivi' Minivi' Igi Minilizani' Noso' Nite' Ma Nene Nouve Lo Izesu' Lo-ngimine' Gamazi

22 Gohi go' lavo noso ohuno helala aizeti' ha minani' aleve muki' nete ningi gilani' nene a'mida sipi hamokovo' minine' vingu' nene Izesu' aza izipahala zuhosi a'mingu' dizamivo izipahala zuho engikovo' vi nizave lisa gili minani' ve. 23 Ne'mine igi nizavo a'mine Izesu' O'mosola opo'ni lo noso' nite' do ve'ine molavo ni minani' ebe' avita nene Tibelia' numuno ebekuti' sipi ma igi heteli minani' ve. 24 Minikevo evene' muki' a'mine ebeta ningani' Izesu' nene nomivo ido' izipahala zuhosi nizamavo ningi a'mine imi minani' sipiu' nene dizi Kahanaumi numuda Izesu'nimu' viseto' vani' ve. 25 Ne'mine igi noso ohuno helala vi Izesu'ni nene ningi ti' li li-imani': Tisazo, gaza mela aine' nene nanihe' neve. Sipiu' amane' nenako misubou' nene gaza nadosa geto ogo hetelane lani' ve. 26 Ne'mine likevo Izesu' aza a'mido' ti' lo lo-ngimine': Naza lamineto' gehepeve ti' lo nolo-lingiduve: Lingine nenikumu' vise' nani' nene ato' suno duvoni' ne'mi monovo ningangumu' vise' navoba asi ga'namu' nolingisido' do vetine molokuvo gatudine ine' mamu' nene mo ne'minevo' o-ledelihe lisa nene nenikumu' vise' nave. 27 Ne'mine igi unuvo goloso oga' neine' noso' nitekumukovo' nene gono dami asi minevo' minevo' ogo minaa' neine' noso' nite' minevo' minevo' lengemeni dameni do soto' o-lengedelingumu' O'mosolati' ve gihile neni' lengemeloni' nemukovo' nene vise' iga' gono dalo. Ido' ne'mine noso' nite' lengemeloni' nene me'neho O'moso asi've nene neni' ne'mine iline lo amuzo nemo nele'mize molani' nenako nemu' nene ne'mine olosuve. 28 Ne'mine lavo ingine ti' li li-imani': O'moso'mo gilivo leli' dalonido' o neine' gono dalone' nene nani gono dalone. 29 Ne'mine likevo Izesu' ti' lo lo-ngimine': O'moso'mo gilivo lingine dalizado' o neine' gono nene ne'mino neive: Asi've O'moso'mo imiselive nenikumu' nene gili ele'vole' ilizado' o neive. 30 Ne'mine lavo ingine ti' li li-imani': Ido' nenikumu' gili ele'vole' ilo laine' nenako laza geikumu' gele ele'vole' o-gedeso' nene atoli'mine suno nani'mine do soto' oganivosa ningosa gele ele'vole' olone. 31 Ido' avotemote neve nene ebe' hadivela nivangu' Okulumokuti' limine' noso' nite' gulive mana nangumu' nene gele none. Mono' godolou' nene ti' li gizi nizani' ma neive: Aza nene nalizave lo Okulumokuti' noso' nite' ngimine' ma neive. Ne'mine ine' nenako gaza nene nadi' ilinido' o neive. 32 Ne'mine likevo Izesu' aza ti' lo lo-ngimine': Okulumokuti' noso' nite' nene lingine gilavo Mose' nene lemave li gilahe. Naza lamineto' nolo-lingimuve. Mose' aza Okulumokuti' noso' nite' gihile lamine' nene olihe lengemamine' ma neive. Asi Okulumokuti' noso' nite' gihile lamine' lengemelive nene me'neho ei' lengemeleseive. 33 Ido' ne'mine noluvoni' nene nanitekumu' ve. Okulumokuti' lemo misubou' aleve hize ele' o-lengedo minevo' minevo' minaa' lengemeni dameni lehize-lengedaa' neive nene O'mosolati' noso' nite' gihile nenako nemu' nene noluve. 34 Ne'mine lavo ingine ti' li li-imani': Ve melo, gaza ne'mine loo ma nene a'mine nolaine' noso' nite' nene gamene gamene lemezo. 35 Ne'mine likevo Izesu' aza ti' lo lo soto' o ngimine': Neni' neve nene minevo' minevo' minaa' do soto' oga' neine' noso' nite' ma ne nouve. Ne'mine nouvoni' nenako ve ma ingine nenita igi gi'mizi minilizave nene a'mine noso' nitekumu' gohi ga'na hilamilisave. Ee, ido' nenikumu' ma gili ele'vole' ilizave nene nosomu' gohi ma ngisamoloseive. 36 Ne neiha mo gomu' lo-lingimuvodi'mine igi lingine neni' nene mo ningi nizaha a'minesi nene mo gili ele'vole' amave. 37 Me'neho neni' nimive muki' nene nenita alisave. Ido' nenita alizave muki' nene mo keke' vasa izo do hulo-ngedamolosuve. 38 Ne'mine amolosuve noluvoni' nene nanitekumu' ve. Naza Okulumokuti' lemo uvoni' nene na'nise'ne lu'nelo' do molo ogo molo olove losa limuvoba asi nimiselive ei' lulolo' do molo ogo molo olove losa lemo omo nouvoni' nenako nemu' nene ne'mine amolosuve noluve. 39 A'mine nimiselive'mi lulolo' ogo molo oloni' nene ma ne'mino neive: Naza gizebo lamine' okuvo a'mine neni' niminguti' nene hamolitesi ma vi tolovo amavo alinge' gamene nabala nene muki' gohi do ote-ngedeline losa gele neive. 40 Ee, me'neho aza lulou' gele neine' nene gipele neni' ningisa nenikumu' gili ele'vole' ilizave muki' nene minevo' minevo' minaa' ngemeni dameni ngemanivo di nizavo alinge' gamene nabala nene gohi do ote-ngedelesane losa gele neive. 41 Ido' Izesu' ne'mine lo'mo vingu' nene aza neni' neve nene Okulumokuti' limine' noso' nite' ma nene nouve line' nemu' nene Zuda ve naba ingine ningedo hangedoka li emenga li 42 ti' li li minani': Me ve nene Zosehe' gipele neive. Olo. Izelehingi melehingi nene mo ninge none. Nemu' nene aza Okulumokuti' limuve noline' nene lamilinako nanimu' nolive. 43 Ne'mine li nizavo Izesu' a'mido' do velepe' izo ti' lo lo-ngimine': Lingine lengiku' lihiteheka li ningedo hangedoka li minani' nene alamilevo. 44 Evene' ma nenita alizani' nene haza ma ngeli amilisave. Asi nimiselive me'neho ne'mo do nenita ogavosavo' alisave. Ido' ikevosa gamene nabala nene do ote-ngedelesuve. 45 Mono' godolou' nene polohetelite ma ti' li gizi nizani' ve: O'moso ne'mo evenele muki' nene apize ngemeleseive. Ne'mine oloseinako ve ma ingine ei' gamazi've gilisa lo-ngimine' gamazi gili lamine' ave nene nenita iga' nave. 46 Ido' me'nehine nene evene' hamolitesi keke' mo ningisi amave. O'mosolati' uve neni' hamo' ne'movo' nene me'nehine ningo gele nouve. 47 Naza mo lamineto' gehepeve nolo-lingimuve. Gili ele'vole' ilizave muki' nene minevo' minevo' minaa' ngemeni dameni nene mo di nizave. 48 Neni' neve nene minevo' minevo' minaa' do soto' oga' neine' noso' nite' ma ne nouve. 49 Lengi' avotinge misubo hadivela monangu' nene Okulumokuti' ngemaa' ine' noso' nite' mana nene nika' nika' i'mi vi minani'za nesi mo hilani' ve. 50 Mo hilani'za Okulumokuti' limine' noso' nite' gihile lamineli'mi monovo nene ne'mino neive: A'mine noso' nite' ma nalizave nene mo hili osu' lamilisave. 51 Ido' neni' neve nene a'mine Okulumokuti' limine' noso' nite' minevo' minevo' izelehosi minine' inite' ma ne nouve. Nouvonako a'mine noso' nitekuti' ma nalizave nene minevo' minevo' igi minilisave. Ne'mine ilisanako me misubou' aleve minivi' minivi' igi minilizave lo nenitati' noso' nite' ma ngemeloni' nene neni' me'mele'ne ngemelesuve. 52 Ne'mine lavo Zuda ve naba ingine engiku' lovo lolize goloso igi ti' li lani': Ve me'mo oko'no me'mele lengemekuvo nalizave noline' nene ngelo lemelivoba nadosa lemelesa nolive li lani'. 53 Ne'mine likevo Izesu' a'mido' ti' lo lo-ngimine': Naza lamineto' mo ti' lo nolo-lingimuve: Lingine O'mosolati' ve gihile neni' me'mele'ne nami ido' vanise'nesi ma namilizani' nene minevo' minevo' minaa' lengemeni dameni nene lengita ma minamoloseive. 54 Ido' ingine neni' me'mele'nesi vanise'nesi ma nalizave nene minevo' minevo' minaa' ngemeni dameni di nizanako alinge' gamene nabalo' nene do ote-ngedelesuve. 55 Ne'mine noluvoni' nene nanitekumu' ve. Neni' me'mele'ne nene mo noso' nite' gihile neivo ido' vanise'ne nesi nene mo naa' noso gihile lamine' neine' nenako nemu' nene noluve. 56 Ve ma ingine neni' me'mele'nesi vanise'nesi ma nalizave ingine nene nenita mini mili nizavo naza nene inginela mine molo nouve. 57 Nimiselive minevo' minevo' minaa' meleho minive me'nehidati' nene naza amuzo do mino minevo' minevo' ogo minaa' nouvoni' ne'mine igi neni' oko'ne nalizave ingine nenitati' nene amuzo di mini minivi' minivi' igi minilisave. 58 Meve nene Okulumokuti' limine' noso' nite' gihile mamu' nene noluve. A'mine noso' nite' nene avotinge nisa hilani' noso' nite' ne'mine nevoba asi a'mine mene noluvoni' noso' nite' nalizave nene hili osu' lami mo minivi' minivi' igi minilisave. 59 Ne'mine line' nene Kahanaumi numuda Zuda veti mono' numungu' mono' apize nongemosa line' ve.

Izesu' Aza Oko'ne Nalizave Lingumu' Izipahala Linge Ma Gosele' nGebelavo Huli-di Vikevo Izipahala Tuvelu Nete Izesukovo' Nene Minevo' Minevo' Minaali'mi Gamazi

Do Neive Li Huli-di Vamani' Gamazi 60 Izesu' ei' oko'no nalizangumu' line' nene gili izipahala zuho linge muki' nete ti' li lani': Gamazi noline' mene gosele' gamazi geni'vesi noline' nenako evene' hamolitesi a'mido' gelo ngelo amolone' ogave. 61 Ne'mine li izipahala zuho ingine ningedo hangedoka li minani' nemu' nene ei' lulou' gelo ti' lo lo-ngimine': Ne'mine gamazi luvodi'mo nene okodido' do molahe. 62 Lingine ne'mine luvoni' nemu' nene ningedo hangedoka li minikeko O'mosolati' ve gihile naza gomu' minuvoni' ebeta dizo novuvo ningilizani' nene nadive li gililizave. 63 Okode losuvoloti' ogo molo oga' noune' monovote ne'mo nene lute ma hize ele' osa'minako haza okodine losuvoloti' me'mele'ne naa' ne'mosi nene lutine ma hize ele' ogo minevo' minevo' minaa' lengemeni dameni do soto' o-lengedelivoba asi minevo' minevo' minaa' nene O'moso'mi Sikalahu' ne'movo' do soto' o-lengedaa' neive. Ido' neni' noluvoni' gamazi meve nene Sikalahuli'mi amuzosi neivosa minevo' minevo' igi minilizani' aka do soto' o-lengedelingumu' nene noluve. 64 Ne'mine o neine'za lengikuti' linge ma nizani' nene nenikumu' olihe gili ele'vole' amavesi nene ha ma nizave. Ne'mine lo Izesu' line' nene nanitekumu' ve. Aza nene gomu' aka'milati' gili ele'vole' amavemukisi ido' biluvaliti a'ningu' molo-delive nemukisi nene mo ningo gele minine' nenako nemu' nene line' ve. 65 Ido' ne'mine lo gohi imine' molo ti' lo line': Ido' evene' ma nenita alizani' nene haza ma ngeli amilisave. Asi me'neho gele ngemavosavo' alisave lo gomu' lo-lingimuvoni' nene lengikuti' linge ma nenikumu' gili ele'vole' amangumu' nene gele minosa lo-lingimuvoni' ve. 66 Ne'mine lo lidoti' nene eze e'meti monaa' ave linge muki' nene Izesu'ni mehe'ine imi huli-di viisa gohi e'meti vamani' ve. 67 Ne'mine ikevo nemu' nene Izesu' aza izipahala zuho tuvelu nene ti' lo lo-ngimine': Linginesi nene huli-nidi vilisa nigilahe. olo. 68 Ne'mine lavo Simoni' Petolo' a'mido' ti' lo line': Guvekasi ve. Minevo' minevo' minaali'mi gamazi've nene geitavo' neine' nenako ve gohi ma zahida vo gi'mizelone. 69 Gaza nene O'moso'mo ei' gonomu' do kegese-gidive hamo' eitati' anive ma nene nane lo geikumu' gele ele'vole' ogo gele none. 70 Ne'mine lavo Izesu' a'mido' ti' lo lo-ngimine': Na'nise'ne nene lengi' izipaha'ne zuho tuvelu do kegeso do nenita o-lingiduvoni'za a'minguti' hamo' nene Satani'mi zuho gehepeve ma neive. 71 Ne'mine line' nene Kelioto ve Simoni' gipele Zuda'nimu' line' ve. A'mine ve nene Izesu' izipahala zuho tuvelu engi' muliseuti' minine'za aza nene Izesu'ni biluvaliti a'ningu' molo-delive minine' ve.

7

Izesu' Akunolomote Zuholite Zelusalemi Numuda Noso' Nite' Nalizada Vo Evene' Ve'nido' Nene Monovoka Do Soto' Ogo nGelebizezo Li-dikevo Ne'mine Oloni' Gamene

Olihe Ve Lo Zelusalemi Numuda Haleko Vine' 1 Neloti' nene Zuda ve nete Izesu'ni bililisa vise' i'mi vi nizani' nenako nemu' aza Zudaia misubou' nene monelesa gelamo nGalilaia misubou' nene mone mone ogo minine' ve. 2 Ne'mino neivo Zuda velite azibe mili ingi mini holise' mini noso' nite' naa' ani' gamene nene avito' ogavo 3-4 Izesu' akunolomote zuho nete ti' li li-dani': Evene' ma aza guve'ne monelive lo gelelive ne'mo inite' ogo molo iline' nene halekovo' ogo molo osa'mive. Ido' gaza nene atoli'mine suno oga' naine' nenako evene' mukiliti ve'nido' nene vo ne'mine ogo ngelebizelinge. Ebe' mene hulo izipaha a'mida nizani' nete nene gaza oga' naine' inite' ningilizangumu' nene Zudaia misubou' nene vozo. 5 Ido' ne'mine li akunolomote li-dani' nene inginesi eikumu' gili ele'vole' amani' nenako ne'mo nene ne'mine li-dani' ve. 6 Ne'mine li-dikevo Izesu' aza a'mido' nene ti' lo line' ve: Naza vo evene' mukiliti ve'nido' neze monovo do soto' ogo ngelebizeloni' gamene'ne nene olihe alitamive. Alitamiha lengita nene ne'mino nomive. Gopo gamenelo' nesi ne'mida nene lingine ha vaakovo' ilisave. 7 Me misubou' mono' gili lamine' amani' aleve nete nene lengikumu' nene gosele' igi gili goloso i-lingidamilisanako a'mida nene ha vilisaha naza nene a'mine mono' gili lamine' amani' aleve nene monovo goloso daa' nave lo lo soto' oga' nouvoni' nenako nemu' nene ingine nenikumu' gosele' igi gili goloso i-nidaa' nave. 8 Nemu' lengi' nene a'mine noso' nite' nalizada nene ha dizi vilo. Naza a'mine ebe' nabala monovo'ne do soto' oloni' gamene'ne nene olihe amine' nenako nemu' nene a'mine noso' nite' nalizada nene idise dizo vamolosuve. 9 A'mine gamazi nene lo-ngemosa a'mine nGalilaia misubouko nene gohi imine' molo minine' ve. 10 Ido' akunolomote ingine Zelusalemi numuda a'mine noso' nite' nalizada nene dizi vikevo Izesu' azasi nene a'mida dizo vine' ve. Vine'za evene' ve'nido' soto' ogo vamo halekosa vine' ve. 11 Nemu' nene a'mine noso' nite' nada nene Zuda ve naba ingine nene a'mine ve nene zala neve li vise' igi minani'. 12 Ido' evene' vai' di gese' igi minanguti' muki' ne'minete nene Izesu'nimu' nununga' ti' li li minani': Aza nene evene' lamine' neive li evene' linge nete nilavo ma nete nene evene' muki' go'ine izo do goloso neive li lani' ve. 13 Ne neiha Zuda ve nabamu' nene golise gilani' nenako Izesu'nimu' nene gamazi evene' gililizado' li soto' igi evene' hamolitesi ma lamani' ve.

A'mine Noso' Nite' Nada Izesu' Gamazi Apize Nongimivo Evene' Malite Aza Do Lu' Izelive Lo O'moso'mo Imiselelesa Live Ma Nene Nolihe Li Gilani' Gamazi

14 Ido' a'mine noso' nite' nene ni'mi vi di goholo naavo Izesu' nene mono' numuno nabau' dizo evene' nene apize ngemo minine' ve. 15 Ne'mino neivo Zuda ve naba ingine ningi aizo li ti' li lani': Ve me ve nene mono' gamazi ne'mine liline' votigilelo' vivo sukulu ma lamine' maha gamazi ne'mine noline' nene nadosa nolive li lani'. 16 Ne'mine likevo a'mido' aza ti' lo line': Naza gamazi mene apize nolingimuvoni' nene na'nise'ne ga'neuti' gelo apize lengemamuve. Asi nimiselive eitati' nene do minosa apizo nolo-lingimuve. 17 Nemu' nene ve ma ingine nimiselive O'moso'mi lulolo' di mili gono've ma di-dilisa gili nilizani' nene naza gamazi apize lengemaa' nouvoni' nene mo O'mosolati' nolihe ido' na'nise'ne ga'neti' gelo noluhe ne'mi monovo nene ningi vevesilisave. 18 Ido' ve ma ingine engi' ga'ninguti' gili gamazi apizi ngimaa' nave nene engi' guve'ine vilingumukovo' nene gili minisa gamazi apizi ngimaa' nave. Ne'mine iga' nani'za ve ma ingine ve mali'mo ngimiselavo igi gamazi apizi ngimaa' nangu' nene a'mine ngimiselive ne'mi guvele vilingumukovo' ve li gono dalizani' nene mo evene' gihile lamine' monovo goloso engita nomine' alevetevo' ne'mine ilisave. 19 Ne neiha O'moso'mi lou' gamazi nene Mose' mo do soto' o-lengemavo di nizani'za a'mine lou' gamazi nene lingine mukito' avuto' iga' nave. Lingine neni' nibililisa gili nizani' nene nanimu' nave. 20 Ne'mine lavo a'mida minave muki' ingine ti' li li-imani': Laza ma gebelelesa gelamuniko sikalahu' golosoli'mo do dudu lo-gedavo negi gamazi nolabe. 21 Ne'mine likevo Izesu' ti' lo lo-ngimine': Naza evene' do lamine' o-do holiseku' gono hamo' duvoni' ne'mo nene lengi' muki' okodido' do molavo upuho' ikeve. 22 Lengi' gipetineti oko'nido' nene O'moso'mi noso mili-ngidilizave lo Mose' lo-lingimine' ve (Ee, Mose' lo-lingimine'za asi've ne'mo a'mine monovo nene gana' do soto' ine' nevoba asi avotingidati' aka'mine soto' ine' ve). Nemu' nene lingine gipetineti oko'nido' O'moso'mi noso mili-ngidaa' gamene nene gono damaa' ve lani' holiseku' alitelinekisi nene holise' gamene ma ne neive lami ha gono di O'moso'mi noso mili-ngidaa' nave. 23 Ido' lingine Mose' Lou' gamazi nene avuto' ogalone li ne'mine igi gipetine O'moso'mi evenele minilizangumu' di lamine' i-ngidi holisekukisi oko'nido' O'moso'mi noso mili-ngidaa' nani' nenako naza holiseku' evene' ma do lamine' gehepeve o-duvongumu' nene lingizebolo' nanimu' nomolave. 24 Lingine evene' maliti monovo'inemu' ize' mili lili ma nene gopo lite' li lami asi monovo ningi hehe likisavo' nene ize' mili lilo. 25 Ne'mine lavo Zelusalemi aleve linge nene ti' li li minani': Me ve nene leli' ve nabalite bililisa gilave ma nene neive. Olo. 26 Ne neiha aza mela nene golise gelamo mono' lovo kiselevo' ogo nolo-limivo ingine a'minemu' nene ma lamave. Ido' o've li-damani' nene ingine a'mine ve nene mo lamine' O'moso'mo do lu' izelive lo imiselelesa live ma nene noloseive li gilisa lamani' nolihe. 27 Ne neine'za a'mine ani' numuno ebe've nene laza mo vaito' ningo gele noba a'mine O'moso'mo do lu' izelive lo imiselelesa live ogo soto' iline' nene aza nelati' ani' ve li ma ningi gilamilisave li nizani' nenako a'mine ve nene O'moso'mo imiselelesa live ngelo minelihe. 28 Ne'mine likevo nemu' nene Izesu' mono' numuno nabau' mono' apize ngemo miningu' nene pigi izo ti' lo line': Lingine gilavo neni' nene ningi nizave nouve. Ido' numu'ne ebe'ne nesi nene mo ningi nizaha neni' nene na'nise'ne ga'ne gelo lu'nelo' do molo amuve. Ve mali'mo nimiselive luvoni' nene ladanga lamuve. A'mine nimiselive nene nomine' nevoba mo lamineto' neive. Lingine ei' nene ningi gilamani'za 29 neni' nene ezelati' uvoni' nenako neni' nene mo ninge nouve neive. Ee, a'mine ninge nouve ne'mo nene nimiseline' ve line'. 30 Ne'mine lingumu' nene goni' o-deloningumu' analo' dalone li ne'mine ilisa ani'za ne'mine i-dilizave lo O'moso'mo molo-dine' gamene nene olihe amine' nenako ne'mo nene ne'mine i-damani' ve. 31 Ido' a'mida evene' vai' mulise mili minanguti' muki' nene Izesu'nimu' ti' li li minani': O'moso'mo do lu' izelesa imiselelesa live ne'mo nene atoli'mine suno vai' goloso do soto' ivo monovolo soto' oloseive li laa' nanako me ve ne'mo ato' suno vai' do soto' ine' nene ve gohi ma ogo ato' suno vai' ivile' ogo ngelo damoloseinako me ve nene mo a'mine O'moso'mo do lu' izelesa imiselelesa live ma nene neive li li minani'.

Izesu'ni Dalisa Navo Lo-ngimine' Gamazi

32 Evene' muki' nete Izesu'nimu' ne'mine li engiku' li volelo' melo' igi nizavo Halisaio' mono' laa' ave naba nete gili inginesi ido' eveneto' medeli mini O'moso inite' lehizi-daa' ave nabasi maka' mini engito' gono daa' ani' pilisi ve linge nene Izesu'ni dalizave li ngimiselani'. 33 Ne'mine angumu' nene Izesu' ti' lo line': Naza lengikisi mineloni' nene ha gamene li'nibevo' minosa neloti' nene nimiselive neida volosuve. 34 Lingine nene nenikumu' hize ele' o-ledelive li vise' ilizaha oko'nelo' nene mo ngeli ma ningamilisave. Ido' a'mine vo mineloda nesi nene lingine ngeli ma vamilisave. 35 Ne'mine lavo Zuda ve naba nete engiku' ti' li lani': Ve me ve nene laza ngelo ma ningamolonida volosuve noline' nene zala volosamu' nolive. Aza nene heta ato' vetida Zuda ve vi ingi monavela nene vo a'mine heta ato' vesi maka' gamazi apize ngemelesamu' nene ngelo ma lamoloseiha aza nene zala volosa nolivoo. 36 Aza nene nenikumu' vise' ilizani' nene ngeli ningamilisave ido' vo mineloda nesi nene ngeli ma vamilisave noline' nene nadive losa nolive li gopo ga'ine gili minani' ve.

Izesu' Aza Nenikumu' Gili Ele'vole' I Minilizaveti Lu'ninguti' Nene Minevo' Minevoli'mi Izeleho Minine' Noso Nene Vai' Lemovo' mineleseive Lingumu' Evene' Hizi

Ho'li Minani' Gamazi 37 Azibe mili ingi mini holise' mini noso' nite' naa' ani' gamene osu' line' gameneu' nene gamene naba minaa' neine' nenako a'mine gamenelo' nene Izesu' aza ote mino gamazi naba ogo aneza gamazi gidini ma ti' lo line': Ve ma ingine nosomu' ngiselive nene nenita igi a'mine noso nene nalizave. 38 Ee, mono' godolou' ti' li gizi nizani' ma'mino soto' oloseive: Ve ma nenikumu' gili ele'vole' igi minilizave nene lu'ninguti' minevo' minevoli'mi izeleho minine' noso nene vai' lemovo' mineleseive. 39 Ido' Izesu' ne'mine line' nene ezemu' gili ele'vole' igi minilizave nete O'moso'mi Sikalahu' nene alinge' dalizani' nenako a'minemu' nene line' ve. Ido' alinge' dalizave luvoni' nene nemu' luvoni' ve: Izesu' a'mine gamazi line' gamenela nene Okulumoku' mo'mosi've nabala nene olihe dizo vamine' nenako ne'mo nene a'mine Sikalahu' nene olihe imiselamivo amine' ve. 40 Ne'mine line' nene evene' muki' nete gilisa linge ma nete ti' li li minani' ve: Mo lamineto' me ve nene polohete ma aloseive lo Mose' live ma nene neive. 41-42 Ne'mine lika' lika' navo linge ma nete nene ti' li li minani' ve: Me ve nene O'moso'mo do lu' izelesa imiselelesa live ma ne neive. Ne'mine lani'za linge ma nete nene ti' li lani' ve: Mono' godolou' nene ti' li gizi nizani' ma neive. Olo: O'moso'mo do lu' izelive lo imiselelesa live neve nene Davidi' numuno ebe've Betelehemi neu' ei' Davidi' a'vopilemo' zuhouti' soto' oloseive. Ne'mine li gizi nizani' nenako a'mine nGalilaia misubouti' ve me ve nene ngelo O'moso'mo do lu' izelive lo imiselelesa live minamoloseive. Olo. 43 Ne'mine li evene' linge ma O'moso'mo do lu' izelive lo imiselelesa live ve lavo linge ma o've ei' nomive lavo evene' muki' nene hizi ho'li minani' ve. 44 Ne'mine navo evene' linge ma nete di gonito' i-dilisa gilani'za evene' hamolitesi oko'nolo' ma damani' ve.

Pilisi Ve Izesu'ni Dami Haza Angumu' Zuda Ve Naba Nete nGelemi Izesu'nimu' Gili Ele'vole' Amiliza Gamazi Lani' Gamazi

45 A'mine gomu' ngimiselani' pilisi ve ingine tine' mili Halisaio' ve nabasi ido' eveneto' medeli mini O'moso inite' lehizi-daa' ave nabasi nizada Izesu'ni di ami haza ikevo ti' li longo' i-ngidani': Izesu'ni nene nanimu' analo' di di amave. 46 Ne'mine likevo pilisi ve nete ti' li li-ngimani': Vekizo, evene' hamolitesi a'mine ve ne'mo gamazi line' ne'mini mo lisa'mani' nenako ei' nene ngelo damolone' ogavo damune. 47 Ne'mine likevo Halisaio' ve ingine ti' li longo' i-ngidani': Lengi' nene gotine izamilinako lengikisi gotine izo live. Olo. 48 Leli' evene' nabatine minuninguti' mene hamolitesi eito' gili ele'vole' ani' ma ningikehe. O've. Halisaio' ve netesi nene ma gili ele'vole' amave. 49 Ne'mine ani'za evene' muki' mete nene Mose' lou' gamazi've nene gili lamine' amani' nenako ne'mo nene eikumu' gili ele'vole' ani' ve. Engi' nene O'moso'mo usi' ize-ngede neive. 50 Ne'mine likevo Izesu' neida gomu' ma vive Nikodemo' ei' nene engi' muliseti' minive nenako aza ti' lo longo' o-ngidine' ve: 51 Ve ma olihe goni' o-do inite' inekumu' gele hehe lamosa ve goloso ve ha gopo lolone' nene leli' lou' gamazite nene avuto' amolobe. Olo. 52 Ne'mine lavo a'mido' ti' li li-imani': Gazasi nene a'mine ve'mi zuho nGalilaia ve nolosane. Olo. nGalilaia misubouti' nene polohete ma soto' ilizave li mono' godolou' nene ma gizamani' nenaze. Gei' nene mono' godolou' a'minemu' luhuvo ma gizi nizahe vise' ogo ningo do soto' ozo.

Izesu' Ganala Daline' Gamazi Lilihe Li Vene' Ma Lihime Dani' Nene Izesuda Ele'mizi Igi Longo' Ma I-dikevo Otohato Gamazi Lo-ngemavo nGovozo Hili Vihaha Ani'

Gamazi 53 Evene' muki' numu'nida vani' ve.

8

1 Izesu' aza gohi Oliva Golola dizo vine' 2 Ido' nedenga' go' veseme' neivo Izesu' nene mono' numuno naba'mi gesi mingu' dizo neivo evene' muki' nene a'mine neida navo Izesu' aza mito' mino api' ogo mono' apize ngeme'mo vine'. 3 Ne'mine o'mo novivo lou' gamazi apizi ngimaa' avesi ido' Halisaio' vesi ingine vene' ma ve masi monovo goloso ikesivo ningi a'mine vene' nene ele'mizi igi evene' mukilite ningilizado' di oti-di 4 Izesu'ni ti' li li-imani': Tisazo, vene' me ve nene ve masi monovo goloso nasivo laza ningo analo' dokune. 5 Nemu' nene Mose' lou' gamazi gize-lidingu' nene ne'mine vene' nene geheni huli huli' igi ngibili hililizave lo-lede neine' nenako gaza a'minemu' nene nadive lilinido' o neive lani'. 6 Ne'mine li longo' i-dani' nene Izesu' gamazi do gopo ogo liline' nene goni' nabalo' ele'mize molalobe li gili ha emengu' ne'mine milisa golo izi longo' i-dani' ve. Ne'mine li longo' i-dikevo Izesu' aza gubi' izo anadunu' misubou' luhuvo gizo minine'. 7 Ne'mine ine'za ingine geligeli igi gohi longo' i-dikevo Izesu' oto ti' lo lo-ngimine': Lengikuti' ve ma lihime'vesi nomo nolive ma noline' ne'mo nene gana' api' ogo geheni hulo belavosa nene bililo. 8 Ne'mine lo gohi gubi' izo misubou' luhuvo gizo minine'. 9 Ido' Izesu' ne'mine line' nene gili ingine evene' nabalati' api' igi hamo hamo' vika' vika' igi osu' likevo Izesukovo' nene a'mine vene' masi ha ote minivo minasine' ve. 10 Ne'mine ogo Izesu' aza gohi ote pehe lo vene' nene ti' lo longo' o-dine': Gei' gelemi minave ma nene zaala vave. Evene' hamolitesi ma lihime gimamahe. 11 Ne'mine lavo vene' aza a'mido' ti' lo line': O'ove, ma ne'mine i-nidamave line'. Ne'mine lavo Izesu' asi nene ti' lo line': Nazasi nene a'mine'mine ogo lihime ma gemamolosuze. Gaza voosa nene lihime gohi ma damozo lo-dine'.

Izesu' Aza Misubou' Aleve Hize Labana' Ele-ngedaa' Uve Nouve Lavo Halisaio' Ve Ingine Gasikavo' Nolaine' Ne'mo Nene Lamine' Laane Lo Gelamolosune Lani' Gamazi

12 Ido' Izesu' aza gamazi gohi ma evene' lo-ngimingu' nene ti' lo line': Naza nene misubou' aleve hize labana' ele-ngedaa' uve ma nene nouve. Ve ma ne'meti minilizave nene lu'ningu' liti'muso ize minamivo a'mine neni' hize ele' o-ngedeloni' labana' ne'mo nene minevo' minevo' iliza aka ngelebizivo minilisave. 13 Ne'mine lavo Halisaio' ve a'mido' ti' li lani': Gei' monovoka nene evene' atolitesi hize ele' i-gidi lamavo gasikavo' lo soto' soto' naine' nenako ne'mo nene gei' gamazika nene gamazi gihile nehe lo ngelo ma gelamolosune. 14 Ne'mine likevo a'mido' Izesu' ti' lo line': Lingine nenikumu' gei' monovoka nene gasikavo' nolane lani' nene laminetokisi nililizaha gamazi'ne nene gamazi gihile gehepeve neive. Nene nanitekumu' ve. Naza nene zalati' uvoni' nehe ido' zala voloni' nehe nemu' nene mo gele nouve. Gele nouvoni'za lingine nene zaala voloni' nehe ido' zaalati' uhe nemu' nene ma gilamave. 15 Lingine eveneliti monovomu' ize' mili laa' nani' nene ha me misubou' monovolokovo' e'metisa ne'mine iga' nave. Ido' neni' nene evene' maliti monovomu' ize' molo lihime ngemesa'muve. 16 Ne neiha eveneliti monovomu' ize' molo lihime ma ngimuvodiniko neni' hamokovo' nene ne'mine amo nimiselive me'nehosi nene maka' ne'mine usidinako nemu' nene eveneliti monovo'inemu' nene ma luvodiniko a'minemu' nene mo gamazi gihile ve li lingine mo gililizado' o minidine. 17 Ido' lengi' lou' gamazitingu' nene ti' li gizi nizani' ma neive: Evene' setalitise inite' mali'mi monovomu' hamo' gamazivo' li soto' ilisine' nene a'mine li soto' ilisine' gamazi nene gamazi gihile neive li gililizado' o neive. 18 Naza na'nise'ne neni' monovo'nemu' nene lo soto' soto' nouha nimiselive me'neho nesi nene neni' monovo'nemu' lo soto' soto' oga' neinako nemu' nene nenikumu' na'nise'ne gamazi laa' nouvoni' ma nene mo laminekovo' neive li gililizado' o neive. 19 Ne'mine lavo Halisaio' ve ingine ti' li longo' i-dani': A'mine maho nene zala neive. Ne'mine li longo' i-dikevo a'mido' Izesu' ti' lo lo-ngimine': Neni' nene zaho nouhe lingine ningi gilamani' nene me'nehinemukisi nene aza zaho nehe ma ningi gilamave. Nenikumu' nene ma ningi giladiniko me'nehinemukisi ningi giladine. 20 Ne'mine line' nene mono' numuno nabau' O'moso imani' moni milani' bokisi minani' numuno lulo'mi gahevela mino mono' apize ngeme'mo vo miningu' nene a'mine gamazi line' ve. Ne'mine ine'za O'moso'mo eze dalizave lo gamene molo-dine' nene olihe amine' nenako ne'mo nene evene' hamolitesi analo' di di gonito' i-damave.

Izesu'nimu' Gili Ele'vole' Amangumu' Okulumoku' Vamilisave Lo Hungo' Molo-ngidine' Gamazi

21 Ido' Izesu' aza gohi ti' lo lo-ngimine': Naza mo lengi' hulo-lengedo volosuve. Ne'mine okuvo lingine nenikumu' vise' igi minilizaha mo ningami mini lihimetine apasamo ha neivo hililisave. Ido' neni' ningamilizave noluvoni' nene nanitekumu' ve. Neni' voloda nene lingine ngeli vamilizani' ogavosa noluve. 22 Ne'mine lavo Zuda ve naba nete ti' li lani': Aza neni' voloda nene lingine ngeli vamilisave noline' nene ei' oko'no bele helelesa nene ngelo ne'mine lamoloseiha ne'mine line' nene nanitekumu' live. 23 Ne'mine likevo aza imine' molo ti' lo lo-ngimine': Lengi' nene gala'muno melati' ma nene nizave. Ido' neni' nene veletati' ma nene nouve. Ee, lingine nene me misubouti' ma nene nizave. Ido' neni' nene me misubouti' nomuve. 24 Ne'mini nizangumu' nene lingine lihimetinesi ha neivo hililisave luvoni' ma neive. Ee, lingine nenikumu' a'mine neive ma ne neive li ma gili ele'vole' amilizani' nene lihimetine apasamo ha neivo a'minesi hililisave. 25 Ne'mine lavo ingine ti' li li-imani': Gaza nene zaho ma nane. Ne'mine likevo Izesu' ti' lo lo-ngimine': Gamene gala'muda vomine lo-lingimuve ma ado' nene nouve. 26 Ido' lengi' monovotinemu' ize' molo lihime lengemelodo' o minine' gamazi nene vai' lo neiha nimiselive ne'mo mo gamazi gihile laminekovo' laa' neivo eitati' giluvoni' gamazivo' nene me misubou' aleve lo-ngemaa' nouve. 27 A'mine ne'mine line' nene metehine O'mosomu' line' nene ingine gilamani' ve. 28 Ne'mine lo Izesu' ti' lo line': Lingine alinge' O'mosolati' ve gihile neni' zalo' di oti-nidiliza gamenelo' nenikumu' nene mo ei' ma neive li ningi gilisa ido' naza inite' ogo molo oga' nouvoni' nene na'nise'ne ga'neti' gelo ma osa'muvoni'za asi me'neho nelebizine' initekovo' nene lo soto' oga' nouvoni' nesi ningi gililisave. 29 A'mine nimiselive nene nenikisi maka' neive. Ee, naza ei' mulunou' lamine' geleline' initekovo' oga' nouvoni' nenako nemu' nene aza ninge mate nimikivo ma minesa'muve. 30 Ne'mine lo lo'mo novivo evene' linge muki' nene ezela gili ele'vole' ani' ve.

Gelekele' Ve Ne'mine Minilizanguti' Gamazi Gihile Ne'mo Nene Do Kuluhize-lengedeleseive Lo Izesu' Lavo Zuda Ve Laza Abalahamu' A'vopilemo' Zuho Mino Gelekele' Ve

Ne'mine Ma Minamune' Ve Likevo Engi' Avo'nibo Nene Zaho Nehe Nemu' Gamazi Vai' Lani' Gizine' Gamazi 31 Ne'mine ikevo Zuda ve ezemu' gili ele'vole' avemu' nene Izesu' ti' lo line': Lingine neni' apize lingimuvoni' gamazilo' e'meti mini di vi nilizani' nene neni' izipaha'ne zuho gihile nene nizave. 32 Ne'mine igisa nene gamazi gihile'mi monovo nene ningi gilikevo lingine gelekele' goloso igi nizanguti' nene a'mine gamazi gihile ne'mo nene do kuluhize-lengedeleseive. 33 Ne'mine lavo evene' linge malite a'mido' ti' li li-imani': Laza O'moso'mo do ote-dive Abalahamu' a'vopilemo' zuho none' nenako laza nene mo keke' evene' malite di gelekele' i-lidikevo minamune' nenako gaza gelekele' goloso igi nizanguti' kuluhizi minilisave nolane' nene lamilinako nanimu' lane. 34 Ne'mine likevo a'mido' Izesu' ti' lo lo-ngimine': Naza lamineto' ti' lo nolo-lingimuve: Lihime dalizave muki' nene mo lihime monovoli'mi gelekele' ve nizave. 35 Ve ma ve mala vi gelekele' ve minilizave ingine a'mine me'nibi numu'veu' mudise minilizani' mo'mosi'ine nene ma minesa'mine'za a'mine me'nibi gipele zuho nete nene mudise minilizani' mo'mosi'ine nene mo ha minaa' neive. 36 Nemu' nene O'moso'mi gipele naza lihime monovoli'mi gelekele' ve minanguti' do kuluhize-lengedeloni' nene mo mudise haza gehepeve minilisave. 37 Ido' lengi' nene mo Abalahamu' a'vopilemo' nizave losa nene ha gele nouha lingine nene neni' nibili hililiza aka nene vise' igi nizave. Nene nanitekumu' ve. Lingine neni' gamazi'ne damavo lutingu' vo minamine' nemu' ve. 38 Ido' naza neni' gamazi'ne laa' nouvoni' nene me'nehosi makato' minosa ninguvoni' initekumukovo' nene laa' nouve. Ido' lingine igi mili iga' nani' nene lengi' metibidati' gilani' inite' nene igi mili iga' nave. 39 Ne'mine lavo ingine ti' li li-imani': Gaza leli' metehinemu' laine' nene leze meteho nene Abalahamu' ma ve. Ne'mine likevo Izesu' aza ti' lo lo-ngidine': Lingine mo lamineto' Abalahamu' a'vopilemo' minadiniko mo Abalahamu' ogo molo ogo minaa' ine' monovolo' nene e'meti minadine'za ne'mine ma isa'mave. 40 Naza gamazi gihile O'moso'mo lo-nemavo giluvoni' lo-lingimuve neni' nene nibili hililiza aka vise' igi nizave. Ne'mine igi nizani'za Abalahamu' nene ne'mine inite' ma osa'mine' ma neive. 41 Lingine ne'mine igi mili nani' nene mo lingi metibo ogo molo oga' idi'mine nave. Ne'mine lavo ingine a'mido' ti' li lani': Laza nene gopo akalo' izipe nomune. Meteho nene O'moso hamo' neive. 42 Ne'mine likevo a'mido' Izesu' ti' lo lo-ngimine': Ido' naza mela ogo nouvoni' nene O'mosolati' uvoni' ve. Na'nise'ne ga'ne gelo amo ei' O'moso'mo nimiselavo nouve. Nouvoni' nenako O'moso nene metibo minidiniko lingine neni' nene lutine nimadine. 43 Lingine neni' gamazi lo-lengemaa' nouvoni' gilamani' nene nanitekumu' ve. Lingine neni' gamazi gililizado' lisihe' amani' nenako ne'mo ve. 44 Lingine nene metibo Satanilati' soto' ani' nenako nemu' nene a'mine metibo lulou' lanite' giline' inite' nene igi mili ilisa gilaa' nave. A'mine Satani nene gana' soto' idati' evene' ngebele helaa' ive minine' ve. Gamazi gihile eita nomine' nenako ne'mo aza nene gamazi gihilelo' e'meto ogo molo osa'mive. Aza nene sozalo' ve mino soza laa' monovoli'mi meleho neine' nenako ne'mo nene aza soza liline' nene ha ei' emeni dameni gehepevelo' e'meto loloseive. 45 Ne neiha neni' nene gamazi gihilevo' laa' nouvoni' nenako nemu' nene lingine a'mine metibine ne'mine mini a'mine laa' nouvoni' gamazi nene gili ele'vole' isa'mave. 46 Lengikuti' ve mali'mosi neni' monovo goloso do noloni' nene ngelo ma do soto' amoloseinako nemu' nene naza gamazi gihile noluvoni' nenako nanimu' gili ele'vole' amave. 47 Ido' O'mosolati' soto' igi minave nene O'moso'mi gamazi gilaa' naha lingine O'mosolati' soto' amani' nenako ne'mo nene ei' gamazi gilisa'mave. 48 Ne'mine lavo Zuda ve ingine a'mido' ti' li li-imani': Gaza nene gopo izipe Samalia vete gidani' ma nanivosa sikalahu' goloso nene lukau' neive nolune' nene mo lamineto' nololosune. 49 Ne'mine likevo a'mido' Izesu' ti' lo lo-ngimine': Naza sikalahu' goloso neve nene mo keke' lu'neu' nomive noluve. Asi me'nehine nene gelekele' o-do do naba o-daa' nouve. Ne'mine oga' nouvoni'za lingine ne'mine i-nidami di limi-nidilisa iga' nave. 50 Ne neiha neni' di naba i-nidilizave losa gono dosa'muve. Neni' di naba i-nidilizave losa gono daa' neive nene ma mino a'minemu' ize' molaloseive. 51 Naza lamineto' ti' lo nolo-lingimuve: Neni' gamazi'ne gili di minilizave muki' nene hili osu' lami minivi' minivi' igivo' minilisave. 52 Ne'mine lavo Zuda ve ingine ti' li lani': Idise gamazi nolainidoti' nogilune' geiku' sikalahu' goloso neive lune' nene mo lamineto' lokune' neive lo gele none. O'mosola gi'mizive naba Abalahamu' nene mo helave. Ido' polohete minani' nesi mo hilikeve. Ne'mine ikeni'za gaza nene neni' gamazi'ne gili dalizave muki' nene hilami ha minilisave nolabe. 53 Avoteho naba Abalahamu' nene helaani' nenako gei' nene ei' ivile' ogo evene' naba nabe. Ido' polohete nesi hilaakovo' ani' nenako gaza nene okonga do dizo nani'mine ve nouve losa nane. 54 Ne'mine likevo Izesu' a'mido' ti' lo line': Naza guve'ne monelive lo na'nise'ne oko'ne do dize'mo vo nouvo guve'ne viline' nene mo haza nite' lolo' oloseive. Neni' guve'ne vilive lo neni' do naba o-nedaa' neive nene me'neho lengi' nete ei' nene O'mosote ve laa' nave ne neive. 55 Ne neiha lingine ei' monovomu' nene ningi gilamavo nenikovo' nene eikumu' ningo gele nouve. Ido' naza nene ezemu' ma ningo gelamuve luvodiniko lengi' ne'mine mino sozalo' ve minuvodine. Ne neiha ezemu' nene mo ningo gelosa gamazi'vesi nene mo gele daa' nouve. 56 Lengi' avotibo Abalahamu' nene neni' me misubou' ogo, ogo molo nouvo ningelingumu' nene olize goloso izine' ve. Ee, a'mine mela nouvoni' gamene nene ningo gelo mulunou' lamine' giline' ma neive. 57 Ne'mine lavo Zuda ve ingine ti' li li-dani': Gaza nene kilisimasika olihe fifti (50) nelasi amine' neke nene gozopo' aka'mila hele vive Abalahamu' nene ningaine' gani nolabe. 58 Ne'mine likevo Izesu' a'mido' ti' lo lo-ngimine': Naza mo lamineto' gehepeve nolo-lingimuve. A'mine Abalahamu' olihe soto' amivosa neni' nene nouvoni' ve. 59 Ne'mine lavo nemu' nene Zuda ve ingine geheni bililisa geheni dani'za Izesu' a'mingu' vo haleko mono' numuno nabauti' nene heta lemo vine' ve.

9

Izelehi Mulunouti' Vele Like Minivo Soto' Ive Ma Izesu' Do Lamine' O-dine' Gamazi

1 Ido' Izesu' nene akalo' ma novo ve ma izelehi mulunouti' vele like minivo soto' ive ma ningine'. 2 A'mine vemu' nene Izesu' izipahala zuho nete ti' li longo' i-dani': Tisazo, ve me ve ne vele like minivo soto' ine' nene eita lihime minidi'mo ihe ido' izele melela minidi'mo ive. 3 Ne'mine likevo Izesu' a'mido' ti' lo lo-ngimine': Aza vele like minivo soto' ine' nene lihime izele melelasi ezelasi minidi'mo nomive. Asi O'moso'mo ezela gono davo ei' amuzo've ezela soto' ogavo ningilizangumu' nene izelehi mulunouti' vele like minivo soto' ine' ve. 4 Ido' labana' ele mineline' gamene nene gono daa' gamene ne neive. Liti'muso izeline' nene gono ngelo ma damolosunako nemu' nene laza idise nimiselive'mo molo-lidine' gameneu' mene ei' gono nene geho volone' aka olihe tilamo gode neido' nene ha gehe'mo vo minelone' o neive. 5 Naza me misubou' omo nouvoni' nene evene' hize labana' ele-ngedaa' uve nouve. 6 Ne'mine losa misubou' gituho' ogo do gohi' lolo' ogo vele likive'mi velelo' nene holo-do 7 ti' lo lo-dine': Gaza vo Siloamu noso ohungu' nene noso' izezo (A'mine gamazi Siloamu ne'mi monovo nene ne'mino neive: imiselave). Ne'mine lavo vele likive aza vo noso' izoosa numu'vela tine' molo ani' nene vele lamine' o minivosa tine' molo ani' ve. 8 Ne'mine ogavo ei' numu'vela avito' minaa' avesi ido' akalo' mito' mino monimu' voku' voku' lo minaa' ivo ningaa' avesi ingine ti' li li minani': Me ve nene akalo' mito' mino voku' voku' lo minaa' ive ma noloseive. Olo. 9 Evene' linge ma nete nene mo a'mine ve ma ne neive lani'za ma nete nene O've. Ei' nene a'mine ve gele vive neive lani'. Ne'mine likevo a'mine ve ne'mo ti' lo line': A'mine ve ma nouve. 10 Ne'mine lavo ingine ti' li longo' i-dani': Ne'mine lo ma veka nene nadosa lamine' ive. 11 Ne'mine li longo' i-dikevo aza a'mido' ti' lo lo-ngidine': Izesu' ve laa' nave ne'mo nene gohi' lolo' ogo ve'nelo' holo-nido ti' lo lo-nimive: Gaza vo Siloamu nosou' noso' izezo. Lavo naza vo a'mingu' noso' izuvoni' nene a'mido' lite' lo ve'ne ningekuve. 12 Ne'mine lavo ingine ti' li longo' i-dani': A'mine ve nene zala neve. Ne'mine likevo aza nene naza ma gelamuve line' ve.

Izesu' Vele Likive Do Lamine' O-dine' Monovomu' Gililisa Halisaio' Velite Longo' Tongo' Ani' Gamazi

13 A'mine vele likive lamine' ive nene Halisaio' ve naba nizada ele'mizi vani' ve. 14 A'mine vele likive do lamine' o-delesa Izesu' gohi' lolo' ine' gameneu' nene holise' gamene minine' ve. 15 Nemu' nene Halisaio' ve ingine a'mine ve vele ningine' monovomu' gohi longo' i-dikevo aza ti' lo lo-ngimine' ve: Aza nene ve'nelo' gohi' holo-nedavo noso' ize hulokosa ve'ne nene ninguve. 16 Ne'mine lavo Halisaio' ve linge malite ti' li lani' ve: Ve me ve nene holise' gamene mau' ve lo gelamo vele likive do lamine' o-dine' nene gono dani' nenako O'mosolati' ave nomo noloseive. Ne'mine li lani'za linge ma nete nene ti' li lani': Lihimelo' ve nete nene ato' suno me'mine nene ngeli di soto' ilizahe. Likevo lovo'ningu' ogavo ingine hizi ho'li minani' ve. 17 Ne'mine igi mini neloti' nene vele likive nene gamazi gohi ma ti' li longo' i-dani': Gei' veka do lamine' o-gidine' nenako gei' nene eikumu' nadive lo-daa' nane. Ne'mine likevo aza nene polohete ma ve line'. 18 Ido' Zuda ve naba ingine a'mine ve nene gomu' vele like minidoti' vele ningave lani' nemu' nene gili ele'vole' ami mini a'mine ve'mi izele mele nene asi li-ngidi longo' i-ngidi engi' gamazi gilisa nene gili ele'vole' ani' ve. 19 Ee, a'mine ve'mi izele mele nene asi li-ngidi ti' li longo' i-ngidani': Me ve nene lengi' gipetine vele like minivo soto' ive lave ma ne neihe. A'mine noline' nene vele nene nadosa ningive. 20 Ne'mine li likevo izelehoi melehoi ingine ti' li lasine': Me ve nene mo leli' gipete neivo ido' velesi nene like minivo soto' ine' ve lo gele nosiha 21 idise vele ningine' monovo nemukisi ido' vele do lamine' o-dive nemukisi nene mo gelamusize. Ei' nene izipe namuno nomize. Ei' nene ha lo-lengemeleseize. Longo' i-dilo. 22 Ido' izelehoi melehoi ne'mine lasine' nene Zuda ve naba nete nene gomukuti' gamazi ne'mine li li hukikani' ve: Ve malite Izesu' nene O'moso'mo do lu' izelesa imiselelesa live ve li lilizave nene Zuda ve leli' mono' muliseuti' do hulo-ngedelesune. Ne'mine li li hukikani' nenako nemu' nene izelehoi melehoi ingine a'mine Zuda ve nabamu' golise gili minisa nene ne'mine lasine' ve. 23 Ee, Zuda ve naba gamazi ne'mine li li hukikani' nenako nemu' nene ei' nene izipe ngomo nomize. Longo' i-dilo li izelehoi melehoi lasine' ve. 24 Ne'mine likesivo Halisaio' ve ingine a'mine vele like minidoti' lamine' ive nene gohi gamene sita' ivo asi li-dani' ve. Vise likevo ogavo ti' li li-dani': Laza nene a'mine veka do lamine' o-nidive lanive nene lihimelo' ve neivo ningo gele none' nenaze. Gaza O'moso opo'ni lo ei' velelo' nene gamazi lisihe' ogo lamine' lozo. 25 Ne'mine likevo aza ti' lo lo-ngimine' ve: Aza nene lihimelo' ve noline' nemu' nene ma gelamuvoni'za naza inite' hamokumu' ma gele nouvoni' nene naza gomu' ve'ne like minidoti' gohi ninguvoni' nemukovo' nene gele nouve. 26 Ne'mine lavo ti' li longo' i-dani': Nadi' ogosa veka do lamine' o-gidive. 27 Longo' i-dikevo a'mido' nene ti' lo lo-ngimine' ve: Naza mo lo-lengemekuvoni' maha lingine gilami nanitekumu' gohi gililisa nilave. Linginesi nene ei' izipahala zuho lolo' olone li gili nizahe. Nanimu' geligelinga nilave. 28 Ne'mine lavo ingine gamazi goloso li-di elemisa ti' li lani' ve: Gei' gehepeve nene ei' izipahala nene nane. Ido' laza nene Mose' izipahala nene none. 29 Laza nene O'moso'mo ei' gamazi Mose'ni lo-imine' nene gele noba gaza nolanive nene ani' aka've nene gelamune. 30 Ne'mine likevo vele likive aza a'mido' ti' lo lo-ngimine': Agae, vo'ne vave. A'mine neni' ve'ne do lamine' o-nididoti' nene a'mine ve ani' aka've nene soto' o neine'za lingine gililizanako gelamune likeve. 31 Laza mo gele none. O'moso ne'mo nene lihimelo' ve nene gele ngemesa'mo asi evene' lamine' O'mosola lu'ine mili ei' lulolo' e'metaa' avevo' nene gele ngemaa' neive. 32 Gozopo' gozopokisi nene ve malitesi ize'ningi mulu'ninguti' ve'ine like minivo soto' ave di lamine' i-ngidave nene hamokisi mo keke' minamani'za a'mine ve hamokovo' ne neive. 33 Ei' nene O'mosolati' amidiniko a'ne'mine inite' ne'minesi nene mo ngelo ma amidine. 34 Ne'mine lavo ingine a'mido' ti' li li-dani': Gaza izipe goloso lihimekasi soto' aine' neke nene leli' nene apize nolemabe. Ne'mine li engi' muliseuti' ve minamilive li mudise di huli heta i-dani' ve.

Lute'mi Vele Like Minive Nene Do Lamine' O-ngedelesa Ave Lo Izesu' Line' Gamazi

35 Izesu' nene a'mine vele like minivo do lamine' o-dive nene Halisaio' vete di huli-dangumu' nene gelo a'mine ve nene vise' ogo ningo ti' lo lo-imine': O'mosolati' ve gihilemu' nene gele ele'vole' abe amane. 36 Ne'mine lavo vele likive aza ti' lo line': Ve melo, naza a'mine ve gele ele'vole' o-deloko zaho neve. 37 Ne'mine lavo Izesu' ti' lo lo-imine': A'mine ve nene gaza vonu' bele minanive gamazi nolo-gimuve ne nouve. 38 Ne'mine lavo ve aza ti' lo line': Guvekasi ve, naza nene gele ele'vole' okuve lo gubi' ize emo opo'ni line'. 39 Ne'mine ogavo Izesu' aza ti' lo line': Naza me misubou' uvoni' nene evene' lu'ine'mi vele likavo nizave nene ningilizave ido' laza aka ninge none li soza laa' ave nene lu'ine'mi vele nene mudise like minelive losa evene' ize' molo-ngedelesa uvoni' ve. 40 Ne'mine nolivo Halisaio' ve linge maka' minani' nete gili ti' li li-imani': Nadive. Lelikisi nene vete likine' ve nolo-ledabe. 41 Ne'mine likevo Izesu' ti' lo lo-ngimine': Lutine'mi vele nene lamine' like minidiniko lihime nene lengi' okodida dizamidine'za lingine aka ninge none li zovo' izi vaa' nanako ne'mo nene lihimetine ha neive.

10

Izesu' Sipisipi Gizebo Ve Laminetokisi Golosolokisi Lo Molo Line' Gamazi

1 Izesu' imine' molo ti' lo line': Naza lamineto' ti' lo nolo-lingimuve: Ve ma ingine sipisipi izeliti gesi minguko dizilisa nene gatenguko dizami aka atota gesi goholou' dizaa' nave nene mo a'mine sipisipi gizebo ve'ine minami gizengize ve goloso nizave. 2 Ido' ve ma gatengu' aline' ne'mo nene a'mine sipisipi izeliti gizebo ve gehepeve mineleseive. 3 A'mine ve aline' nene gatedo' gizebo ve ne'mo akahe si'ze-davo dizo ei' sipisipi ize'vela nene gulive'ine ogo vise lavo ei' nolo've nene lubamu gilika' gilika' igi ikevo ngele'mizo lemo vo guvisela voloseive. 4 Ido' ne'mine ogo ei' sipisipi ize've muki' ngele'mizo lemo gomu' molo-ngedo vavo ei' nolo've nene lubamu gili nizani' nenako nemu' nene e'meti vaa' nave. 5 Ve gohiliti no'ine nene lubamu gilamaa' nani' nenako nemu' nene ve gohi nene nge'meti vami golise i-ngidilisave. 6 Ne'mine lo aneza gamazi nene Halisaio' vesi evene' a'mida minavesi nene lo-ngimine'za ingine nene monovo nanitekumu' lihe li gili guno amani' ve. 7 Nemu' nene imine' molo Izesu' ti' lo line': Naza nene mo lamineto' gehepeve nolo-lingimuve. Sipisipi ize dizi ingaa' ani' gesi'mi gateni nene neni' nouve. 8 Olihe amuvo gomu' ave muki' nene gizengize ve guminelo' ve ne'minevo' minani'za sipisipi ize nete ingine ma gili ngimamani' ve. 9 Ee, neni' nene a'mine gesi'mi gateni nouvonako a'mingu' neniku' imi hili gesi minguko dizilizave muki' nene inite' mali'mosi do goloso o-ngedamivo laminekovo' minilisave. Ne'mine igi mini dizi limi igi noso' nite' ningi ni lamini minilisave. 10 Ido' gumine gizengizelo' ve ingine hazamu' ami asi gumine damine igi ngibili di goloso ilisavo' iga' nave. Ne'mine iga' naha neni' uvoni' nene ne'mine olosa amo asi neni' sipisipi ize'ne nene minevo' minevo' ngemeni dameni nene ingine dalizani' votigile ivile' ivosa lehize-ngedekuvo di ti' igi lamini gehepevevo' minilizave losa uvoni' ve. 11 Neni' nene sipisipi izelo' gizebo ve lamine' gehepeve ma ne nouve. Sipisipi izelo' gizebo ve lamine' nete nene sipisipi ize'ine di ngu' izilisa nene golise ami oko'ine huli hililizado' o neive. 12 Ido' monimu' sipisipi izelo' gizebo gono daa' ave sipisipi me'ninge minamani' nete nene loposo gulo navo ningilizani' nene sipisipi ize huli-ngidi golise vilisave. Ne'mine ikevo a'mine loposo gulo nene ogo sipisipi ize ma belo gelelehe' o-do novivo sipisipi ize linge nene hutile' igi vilisave. 13 Ido' sipisipilo' gono dave huli-ngidi vilizani' nene nanitekumu' ve. Ingine monimukovo' gono di minisa sipisipi izeliti mulumo'ine nene gilamani' nenako nemu' nene huli-ngidi vilisave. 14-15 Ido' naza me'nehinemu' ningo gele nouvo aza neni' ningo gele neine' ne'mino naza nene sipisipi izelo' gizebo ve lamine' gehepeve nouvonako nemu' nene naza sipisipi ize'ne engikumu' nene mo ningo gele nouvo ingine nenikumu' nene ningi gili nizave. Ido' naza engikumu' nene neni' oko'ne hulolosuve. 16 Ido' neni' sipisipi ize'ne gohi ma nizave. Ingine nene Zuda ve lengi' minani' gesi minguti' mene minamave. Engikisi nene do ne'mete-ngedekuvo ingine nene neni' no'ne lubamu gililisave. Ne'mine okuvo mulise hamo' lili' igi minikevo a'mido' gizebo ve nene mo hamo' minelesuve. 17 Ido' naza neni' minevo' alevo'ne hulo helelesa nouvoni' nenako nemu' nene me'neho lulo nemave. Ido' minevo' alevo'ne huloloni' nene gohi do tine' molo dalosuve losa hulolosuve. 18 Ido' evene' nibili hilikevo minevo' alevo'ne hulo heleloni' nene ingine nivile' igi amuzo milalizadi'mo nomive. Asi neni' lu'nelo' do molo gele ngemekuvosa nene ne'mine i-nidilisave. Ido' me'neho ne'mo nene ne'mine iline lo-nede neine' nenako nemu' nene oko'ne nene haza hulolosuve. A'mine ne'mine oloni' amuzo'ne nene do nouve. Ido' a'mine'mine ogo minevo' alevo'ne gohi do tine' molo daloni' amuzo'ne nesi nene do nouve line' ve. 19 Gamazi ne'mine lidi'mo nene Zuda veti lu'ine nene do sita' o-ngedavo gohi hizi ho'li minani' ve. 20 Engikuti' linge muki' nete ti' li li minani' ve: Ei' nene sikalahu' goloso lulou' minavo negi hizo gamazi gopo nolingu' nene lingine a'mido' nene nanitekumu' nigilave. 21 Ne'mine likevo linge nete ti' li li minani' ve: Ne'mine gamazi nene sikalahu' goloso lu'ningu' minive nete nene ma lisa'mave. Sikalahu' goloso ne'mo nene vele likive'mi vele nene ngelo ma do lamine' o-delihe. nGelo ma do lamine' o-damoloseive.

Izesu' Nene Eikumu' O'mososi Do lisihe' Ogo O'moso'mi Gipele Nouve Lingumu' Bililisa Ani' Gamazi

22 Kilisimasi gamenelo' Zelusalemi numuno ebeku' nene mono' numuno naba gozopo' biluvalite di goloso anguti' di lamine' angumu' Zuda vete gili ngolize izi holise' minaa' ani' gamene ogavo ido' hepe' elaa' ine' gamene nesi nene mo omo neivo minangu' nene 23 Izesu' aza mono' numuno naba'mi gesila he' numuno naba gizikani' gulive Solomoni' ve langu' nene nomonivo 24 Zuda ve naba nete igi di vodo vodo i-di mini ti' li li-dani' ve: Gaza gamene ha'na gei' monovoka do haleko nanivo laza gopo gate gele none' nene lo-lemamo lane. Gaza nene mo O'moso'mo do lu' izelesa gimiselelesa live noo ma nene lisihe' ogo lamineto' lo-lemevo. 25 Ne'mine likevo Izesu' aza a'mido' ti' lo lo-ngimine': Naza nene mo lo-lingimuvoni'za lingine ma gili ele'vole' i-nidamani' ma neive. Naza me'nehi velemu' ogo ogo molo nouvoni' inite' muki' ne'mo nene neni' monovo'ne do soto' neiha 26 lingine nene neni' sipisipi ize'ne minamadi'mo nene gili ele'vole' amave. 27 Neni' sipisipi ize'ne nete no'nelo' nene lubamu gili nimaa' navo naza engi' nene ningo gele nouvo ingine nene neni' ne'metaa' nave. 28 Naza minevo' minevo' ngemeni dameni ngemekuvo ingine mo keke' vi tolovo igi hahasi mo amavo evene' malitesi ipe' igi a'neuti' ma di vamilisave. 29 A'mine sipisipi ize'ne do neni' nimive me'neho nene inite' muki' ngivile' ogo naba goloso neinako evene' malitesi nene ipe' igi anauti' ma di vamilisave. 30 Ido' me'nehosi nazasi nene do bizo mo hamo' gehepeve nosive. 31 Ne'mine lavo Zuda ve ingine bililisa geheni gohi nidavo 32 Izesu' ti' lo lo-ngidine': Naza me'neho lido' e'meto gono lamine' ato ato' muki' noduvo lingine ningikeve. A'mine duvonguti' nene nani gonomu' geheni huli huli' igi nibililisa nave. 33 Ne'mine lavo a'mido' nene Zuda ve ingine ti' li li-imani': Laza geheni gebelelesa noune' nene gono lamine' daningumu' nevoba asi O'moso ivile' iline' gamazi laine' nemu' nene geheni gebelelesa noune. Nene nanitekumu' ve. Gaza nene haza evenelike O'moso lolo' ogo gamazi laine' nemu' ve. 34 Ne'mine likevo Izesu' ti' lo lo-ngimine': Lengi' mono' gamazitingu' nene O'moso'mo eze gono dave lo-ngimine' gamazi nene ti' li gizi nizani' ve: Naza ti' lo lo-lingiduve: Lingine nenito' medeli minani' nenako nemu' lengikumu' o'moso ve nolo-lingiduve. 35 Ido' mono' godolou' gamazi nene gihile amo haza gamazi lolo' ilivoba asi gihile neine' nenako a'mine O'moso'mo line' gamazi nesi nene gamazi gihile neive. Ido' a'mine eze gamazi ngimive nene haza evene' minani'za o'moso nizave lo lo-ngidine' ve. 36 Nemu' nene engi' ngivile' ogo O'moso'mo do kegeso nele'mize molo me misubou' nimiselive neni' nene O'moso'mi gipele nouve luvongumu' nene lingine O'moso ivile' iline' gamazi lane nilahe. 37 Ido' lingine gilavo naza gono noduvoni' nene me'neho daa' ido' do molo damuvo ma nene nenikumu' gili ele'vole' amilizado' o neive. 38 Ido' lingine gamazi'nelotikovo' nenikumu' gili ele'vole' amilizani' nolinekisi nene naza lamine' me'neho daa' ido' do molo gono daa' nouvoni' nenako nemu' nene a'mine gono daa' nouvodoti' nene nenikumu' gili ele'vole' ilizado' o neive. Ido' gono'neloti' gili ele'vole' ilizave noluvoni' nene lingine me'neho nene nenikisi neivo naza nene me'nehosi nouvoni' nene gilii gili lamine' igi minilizave losa noluve. 39 Ne'mine lavo ingine analo' do goni' o-delone li gohi ne'mine ilisa ani'za Izesu' aza engi' vovo'ninguti' nene hulo-ngedo vavo ingine di a'ningu' milamani' ve. 40 Ne'mine ogo Izesu' aza Zodani noso liko vo gomu' Zohane' evene' noso holo-ngedo minine' ebeta nene vo minine' ve. 41 Neivo evene' vai' nene ezela ani' ve. Ingine ti' li lani': Evene' linge noso holo-lidive Zohane' nene atoli'mine suno ma do soto' osa'mine'za aza a'mine ve me'mi monovo lo soto' ogo gamazi line' ma nene mo laminetokovo' laani' neive. 42 Ne'mine lisa a'mine ebeku' nene evene' muki' Izesu'nimu' gili ele'vole' ani' ve.

11

Izesu' Zogo Ve Lasalo' Hiline' Gamazi

1 Betania numudoti' ve ma minine' nene gulive Lasalo' ve. A'mine ve nene inite' gize do minine'. Ido' alungo seta' atelehoi alunoloi Maliaki Mataki nene maka' hamo' numudoti' minasine' ve. 2 A'mine meuko gulive've nouvoni' Malia' Guvelesi ve'mi gizenelo' uveli lamine' leke-do godolo zopovodunu' gilite-dine' alu nene inite' gize dave Lasalo' alunolo minine' ve. 3 Minine' nenako alunolo seta' ingine Izesuda gamazi ti' li li hulasine': Guvekasi ve, gelezo. Gaza luka eme minanive ma nene inite' gize dave. 4 Ido' Izesu' nene a'mine gamazi gelosa ti' lo line': Inite' gize dani' nene mudise helelive losa nevoba asi O'moso'mi guvele monelive losasi ido' neloti' nene O'moso'mi gipele neni' nene di hozi li-nidilizangumu' ve losasi nene inite' gize dani' ve. 5 Ido' Izesu' aza Mata'nisi alunolosi ido' uvo'nibine Lasalo'nisi nene lulo ngeme minive minani'za 6 Lasalo' inite' gize dave li lani' gamazi've gilidoti' nene gohi gamene sita' ma imine' molo a'mine minine' ebeku' nene ha minine' ve. 7 Ne'mine ogo izipahala zuho alinge' ti' lo lo-ngimine' ve: Laza Zudaia misubouko nene gohi vuke'zo. 8 Ne'mine lavo izipahala zuho ingine ti' li lani' ve: Tisazo, a'mida aize' a'mene Zuda vete geheni gibililisa ani' ma nene gohi volone nolabe. 9 Ne'mine likevo Izesu' a'mido' ti' lo lo-ngimine': Gamene hamoku' ho' lo'mo do vo tuvelu (12) aua ne'mida novivo a'mine tuvelu (12) aua nene olihe osu' lamido' gono nene ha do'mo vo minelesune. Ve ma ingine labana' ele neivo aka monilizani' nene me misubou' hize labana' elaa' ive nene ningi nizani' nenako ne'mo nene zodoho' ngebelamivo ha aka monilisave. 10 Ido' ve ma ingine liti'muso izavo a'mingu' monilizave nene inginela hize labana' ele-ngedeli labana' nomine' nenako ne'mo nene mo zodoho' izilisave. 11 Ne'mine lo gohi imine' molo ti' lo line': Leli' zogo ve Lasalo' aza nene mo ongo neive. Naza nene u'muko' olosa volosuve. 12 Ne'mine lavo izipahala zuho ingine ti' li li-imani': Guvekasi ve, aza okise ongo noline' nene alinge' lamine' geleleseive lani'. 13 Izesu' aza ongo neive line' nene mo hilingumu' line'za ingine gilani' nene ha okise ongangumu' lihe li gilani' ve. 14 Nemu' nene Izesu' aza lo ngolo' lo ti' lo lo-ngimine': Lasalo' nene mo hele neive. 15 Ido' naza hiline' gameneu' ezesi minamuvoni' nene lamine' ve lo gele nouve. Nene nanitekumu' ve. Lingine Lasalo' hilidoti' nene nenikumu' gili ele'vole' ikevo lengi' hize ele' o-lengedeleseive losa nemu' nene naza minamuvoni' nene lamine' ve lo gele nouve. Ne'mine nouvoni'za a'mine Lasaloda nene vuke' nalo. 16 Ne'mine lavo lobe' izipe ve lave Tomasi' aza Izesu' izipahala gonolomotine ti' lo lo-ngimine': Lazasi Izesu'nisi nene libili hililizangisi makato' lazasi vuke'zo.

Izesu' Nene Helaakuti' Otaa' Melehosi Ido' Minevo' Minevo' Oga' Melehosi Nene Nouve Line' Gamazi

17 Ido' Izesu' Nene Lasalo' numu'vela vo hetelavo Lasalo'ni galese ize-dekunivo mo gamene seta' ve seta' ve minave li likevo ningo giline' ve. 18 Ido' a'mine Betania numuno ebe' nene Zelusalemi numuno ebetoti' tuu (2) maili (tili kilomita) ne'mino avita minine'. 19 Ne'mino neivo Zuda ve vai' nene Maliaki Mataki uvo'nibo hilingumu' nene mulumo'ine gili ive nama i-ngidi di lamine' i-ngidilisa vani' ve. 20 Ido' Izesu' nene nave li-imikevo Mata' aza oto akalo' navo votene' o-delesa vine'za Malia' neve nene numunguko minine' ve. 21 Mata' aza Izesu' naada vo hetelo ti' lo lo-imine' ve: Guvekasi ve, gei' nene mela ogo minanido' neidiniko uvo'neho helamidine. 22 Ne neiha idisesi nene O'mosola nanitekumu' longo' o-delibe ha gele gemeleseive lo gele nouve. 23 Ne'mine lavo Izesu' ti' lo lo-imine': Uvaho nene gohi vele gizo oteleseive. 24 Ne'mine lavo Mata' ti' lo lo-imine': Ee, alinge' gamene nabala evene' hilani' otilizani' gameneu' nene azasi oteleseive losa gele nouve. 25 Ne'mine lavo Izesu' ti' lo lo-imine': Neni' neve nene helaakuti' otaakisi ido' minevo' minevo' ogakisi do soto' uve nene nouve. Nenikumu' gili ele'vole' igi minilizave muki' nene hililizaha nesi nene ha gohi minivi' minivi' igi minilisave. 26 Ee, ido' ve ma ingine minivi' alivi' igi mini nenikumu' gilii gili ele'vole' igi minilizave muki' nene mo mudise hili osu' lami minivi' minivi' igivo' minilisave. Gamazi mene noluvongumu' nene gele ele'vole' abe amane. 27 Ne'mine lavo Mata' aza ti' lo lo-imine': Guvekasi ve, naza mo gele ele'vole' o nouve. Gei' nene O'moso'mo do lu' izelesa gimiselelesa live ei' gipele me misubou' aloseive lave ma nene nane losa gele nouve.

Izesu' Nene Lasalo'nimu' Muluno Hukavo Ive Ine' Gamazi

28 Ne'mine lo Mata' aza tine' molo ogo atelehine Malia'ni vise lo do abaza' o-do zegeno ti' lo lo-imine': Maliazo, Tisa' nene mo omo mino geikumu' nolive. 29 Ne'mine lavo gelo oto a'mine neida vine' ve. 30 Izesu' nene Maliale Matale numu'ine ebe'ningu' olihe ogo hetelamo Mata' vo votene' o-dine' ebeta nene havo' minine' ve. 31 Ido' Zuda aleve igi Malia'ni mulumo gili-di ive nama igi ele'mizi minani' aleve ingine Malia' lite' lo oto numunguti' lemo vine' nene ningi gonoso galesela vo ive nama olosa novive li e'meti vani' ve. 32 Ne'mine navo Malia' nene Izesu' neida vo hetelo eze ningo gizeneu' golo hizo noongo ti' lo line' ve: Guvekasi ve, gei' nene mela ogo minanido' neidiniko uvo'neho nene helamidine. 33 Ne'mine lo ive ogo neivo ido' ezesi ave nesi nene ive navo nene ningo lulosi mutuhavo Izesu' gisingisi molo minine' ve. 34 Ne'mino mino lingine Lasalo'ni nene zala mili-di nizave lavo ingine ti' li lani': Guvekasi ve, gaza nene ningelinge. Ano. 35 Ne'mine nilavo Izesu'ni nene vele novozo do'mozine' ve. 36 Ne'mine neivo a'mida Zuda ve minani' nete nene ti' li lani' ve: Aizoo, ve me'mo Lasalo'ni nene atoli'mine ogo lulo eme minaani' neine' ningi' nalo. 37 Ne'mine lani'za linge ma nete nene ti' li lani' ve: Ve meve nene vele like minive ma do lamine' o-de neine' nenako hilive mene helamilive lo inite' ma o-delinako ne'mine amivo helave.

Lasalo' Nene Helaanguti' Izesu' Do Ote-dine' Gamazi

38 Izesu' nene gohi gisingisi molo'mo gonoso galesela ani' ve. A'mine gonoso galese nene geheni muliku' neivo gatedo' nene geheni naba di tilikavo minine' ve. 39 A'mine geheni nene di hulilo lo Izesu' lavo Mata' a'mine hilive'mi alunolo ne'mo ti' lo line' ve: Guvekasi ve, a'mine ve nene gamene seta' ve seta' ve ne'mine minaani' nenako idise nene unuvo goloso oloseive. 40 Ne'mine lavo Izesu' a'mido' ti' lo lo-imine': Gaza gele ele'vole' iline' nene O'moso'mo amuzo've do soto' iline' ningelesane lo lo-gimuhe lo-gemamuvoni' neve. Gaza gele ele'vole' ozo. 41 Ne'mine lavo a'mine gonoso galeselo' geheni naba tilikani' nene di hulikevo Izesu' aza vokene' ogo veleta ningo ti' lo line': Ahono, gaza gele nemaningumu' nene isaa' neve lo geita noluve. 42 Gaza gamene gamene gele nemaa' naine' nene naza ha gele nouha evene' mene nizani' nete neni' nene gei' nimiselane li gili ele'vole' ilizave losa engikumu' nene mene gamazi nene noluve. 43 Ne'mine lo nolo nabauti' ti' lo vise line': Lasaloo, neuti' nene heta lemo ano. 44 Ne'mine lavo a'mine hilive nene banisi ne'minedunu' asabu' izimikani' minine' nene leme heto' ine' ve. Ne'mine ogavo Izesu' aza a'mine inite' nene apasi di huli-dilo. Vilize. Ti' lavo ne'mine i-dani' ve.

Zuda Ve Naba' Naba Ingine Izesu'ni Bililisa Gamazi di Hamo' Ani' Gamazi

45 Ne'mine ogavo Malia' neida ani' Zuda ve linge muki' nene ingine Izesu' inite' ine' nemu' nene ningi ezemu' gili ele'vole' ani' ve. 46 Ne'mine ani'za linge ma nete nene Halisaio' ve nizada vi Izesu' ine' inite' nemu' nene li-ngimani' ve. 47 Ne'mine ikevo eveneto' medeli mini O'moso inite' lehizi-daa' ave nabasi ido' Halisaio' vesi nene Zuda veti kanisole ve naba linge minani' nene vise li di nubo i-ngidi ti' li lani': A'mine ve nene atoli'mine suno vai' nodangumu' nene nadi' o-de' nalone. 48 Laza ninge mate-dekunivo ne'mine o do vo mineline' nene evene' muki' ingine ezemu' gili ele'vole' igi e'metilisave. Ne'mine ikevo Loma ve nete nene igi leli' mono' numuno nabate nesi ido' Zuda ve muki' leli' nesi nene di goloso i-lidilisave. 49 Ne'mine likevo engikuti' ve ma a'mine kilisimasiu' eveneto' medeli mini O'moso inite' lehizi-daa' aveti ve naba'ine minive Kaiaha' aza Loma ve igi libilikelizave lo gelo ti' lo lo-ngimine' ve: Lingine negi nizahe. 50 Zuda ve muki' hilikilizave lo belekunivo evene' mukito' medelo a'mine ve hamokovo' heleline' nene lamine' o neine' ma gilamani' nehe. 51 Ido' Kaiaha' ne'mine line' nene asi've galati' gelo lamive. Asi aza a'mine kilisimasiu' nene eveneto' medeli mini O'moso inite' lehizi-daa' aveti ve naba'ine minidi'mo ve losa O'moso'mi veleti' gamazi nene polohete laa' ani' ne'mino Izesu' Zuda ve mukikumu' heleline' o neine' nemu' line' ve. 52 Ido' heleline' ogavo hiline' nene Zuda ve muki' engikumukovo' nevoba asi O'moso'mi izipahala muki' ato ato' ebeku' mini'mi monave nene do hamo' zuho lolo' o-ngedelingumukisi nene heleline' ogavosa hiline' ve. 53 Ido' neloti' nene Izesu'ni bililiza akamu' vise' igi lovo gizi minani' ve. 54 Ne'mine igi minani' nenako nemu' nene Izesu' aza gohi Zuda vetingu' soto' mino monamilido' ogavo a'mine minine' ebe' nene hulo vo misubo hadive ne'mi gahevela numuno ebe' ma gulive Ehelaimi nela vo izipahala zuhosi a'mida vi minani' ve. 55 Ido' Aigita misubou' minani' gamenelo' nene O'moso'mo avo'ningine ise'ine izingumu' gili Zuda ve noso' nite' ni holise' minaa' ani' gamene nene avito' ogavo evene' muki' Zelusalemi numuno ebeli'mi gahevela mini'mi monani' nene a'mine gamene alingumu' nene O'moso'mi velelo' nene goloso nite'ine nomivo lamine' minilisa ingine iga' nani' nite' ne'mine nene olone li a'mine Zelusalemi ebeku' nene vi minani' ve. 56 Ne'mine igi mono' numuno nabau' vi minangu' nene engiku' ti' li longo' igi minani' ve: Izesu' nene holise' gamene noalitingu' nene mela ngelo amoloseive. Nemu' lingine nadive li gili nizave. 57 Ido' eveneto' medeli mini O'moso inite' lehizi-daa' ave nabasi ido' Halisaio' ve nesi nene Izesu'nimu' gamazi ti' li li hukikani' ve: Analo' dalone' nenaze. Eze minine' ebekumu' nene ve ma gele noline' nene aza ogo lo soto' ogo lo-lemelive.

12

Lasalo' Alunolo Malia' Aza Izesu' Gizenelo' Meni've Dize Minine' Uveli Leke-dine' Gamazi

1 Izesu' nene O'moso'mo ise'ine izingumu' gili mini noso' nite' naa' holise' nene alosa gamene sigisi (6) ne'mine nene ha neivo hilinguti' gohi do ote-dive Lasalo' minida Betania numuno ebe' nela nene vine' ve. 2 A'mida neivo noso' nite' gize vata' i-dani' nene Mata' do va'va' ogo do ngeme ngeme' gono do neivo a'mingu' Lasalokisi maka' mino noso' nite' no minine' ve. 3 Ne'mini nizavo Malia' nene oko'nido' hilaa' ani' uveli meni've dize minine' uveli nalida guvisedunu' gehepeve lili' ani' uveli nene botolo' naba gidini ma do ogo Izesu' gizenelo' leko holo-dosa godolo zopovodunu' nene gilite-dine' ve. Ne'mine neivo a'mine uveli'mi unuvo lamine' nene numungu' bizo minine' ve. 4 Ne'mine ogavo izipahala zuhouti' alinge' Izesu'ni biluvaliti a'ningu' molave Kelioto numudoti' ve Zuda' nene ti' lo line' ve: 5 A'mine uveli meve nene sigisi hadeti kina (K600) ne'mido' maketi mili moni di goho' gahali' aleve ngimilizanako ne'mine amave. 6 Zuda' aza ne'mine gamazi line' nene goho' gahali' alevemu' nene mulumo'ine gelosa lamive. Asi aza nene engi' moni milani' benilo' gizebo ve mino guminelo' ve minine' nenako a'minguti' nene do haleke' haleke' ogo minaa' ine' ve. 7 Ido' Zuda' ne'mine lavo Izesu' ti' lo line' ve: Lihiteheka lo-damozo. A'mine uveli mene do minine' nene galese izi-nidilizani' gamenemu' nene holo-nedelove losa do mineline' ogavosa do minosa holo-nedave. 8 Ne'mine ine' nene lingine goho' alevesi nene ha mini di vi minikelizaha nezesi nene mudive ma mine do vamolosunako aza ine' inite' nene mo lamine' ve.

Zuda Ve Naba Nete Lasalo'ni Bililisa Gamazi Di Hamo' Ani' Ve

9 Zuda ve vai' goloso nene Izesu' Betania numuno ebeku' neive lani' nemu' nene gilii a'mida nene vani' ve. Ido' a'mida vani' nene Izesu'nivo' ningilisa vani' nevoba asi hilinguti' do ote-dive Lasalo'ni nesi nene ningelone lisa vani' ve. 10-11 A'mine Lasalo'nimu' nene evene' muki' eveneto' medeli mini O'moso inite' lehizi-daa' ave naba nene mehe'ine ngimi Izesuda vi gi'mizika' gi'mizika' igi minani' nenako nemu' nene a'mine eveneto' medeli mini O'moso inite' lehizi-daa' ave naba ingine Lasalo'ni nene belelone li gamazi di hamo' ani' ve.

Izesu' Aza Zelusalemi Numungu' Dizo Volosa Neivo Evene' Nete Ganine Hizi nGolize Izi Ele'mizi Vani' Gamazi

12 Go' losa gohi gamene ogavo evene' vai' goloso nene O'moso'mo avo'ningine ise'ine izine' holise' minilisa ani' nene Izesu' Zelusalemi numuda mene nave likevo gili 13 zavile davile ledi di vi numuno ebekuti' gesi heta limi igi akalo' naada nene vi votene' igi gamazi nabauti' ti' li lani' ve: Geikumu' gopo'ni nolunize. Guvetesi ve O'moso'mi velemu' anive Isilaele' aleve leli' Guvetesi ve naba gei' nene O'moso'mo no'noho' ize-gidivoo. 14 Ido' Izesu' aza dongi ize ma mo ningo Mono' Godolou' gizi nizani' ne'mine ogo a'mido' dizo mino vine' ve. A'mine Mono' Godolou' gamazi nene ti' lo neive: 15 Zaioni golola minave Zelusalemi alevekizo, golise gilikili' ami longolize izilo. Lingine gili' nalo. Guvetinesi ve naba ma nene dongi ize olihe lodive olosa neido' nene mehenelo' mino lengita nave. 16 Izesu' ne'mino numungu' dizo vine' nemu' nene izipahala zuho ingine nene Mono' Godolou' minine' gamazi malo' nene e'metosa ne'mine neive li a'mine gameneu' nene ma gili vevesami minani'za asi Izesu' nene Okulumoku' mo'mosi'vela dizavosa alinge' nene Mono' Godolou' ne'mine oloseive li gizani' minine' mamu' nene gilisa laza mo a'mine malo' e'meto okune' neive li gilani' ve. 17-18 Ido' evene' ingine Izesu'ni votene' ilisa vani' nene evene' vai' Lasalo'ni hilinguti' do noote-do gonoso galeseuti' vise lo do heta noo-divo a'mida maka' minave ingine nete nene a'minemu' li soto' soto' ikevo nemu' nene ato' suno me'mine ogave li gilani' nenako nemu' nene eze votene' ilisa giliisa vani' ve. 19 Ne'mine igi vani' nene Halisaio' ve ingine ningi ti' li li volelo' melo' ani' ve: Lingine ningahe. Laza ei' ivile' amolone' ogave. Evene' vai' goloso nene mo eikovo' e'meti vikeve.

nGiliki Ve Ma Izesuda Ikevo Ei' Helavo O'moso'mo Do Hozi Lo-deline' Gamazimu' Lo-ngimine' Gamazi

20 Ido' O'moso'mo Zuda ve ise'ine izine' holise' mini O'moso opo'ni li minilisa Zelusalemi numuda dizi minaveu' nene nGiliki ve ma minani' ve. 21 A'mine ve nete nene nGalilaia misubou' Betesaida numudoti' ve Hilipo' neida igi ti' li lani' ve: Ve melo, laza nene Izesu'ni ninge-delesa noune. 22 Ne'mine likevo Hilipo' aza voosa Adelea'ni lo-emavo ingine di bizi makato' vi Izesu'ni li-imasine' ve. 23 Li-imikesivo a'mido' Izesu' ti' lo lo-ngimine': O'mosolati' ve gihile neni' nene di hozi li-nidikevo Guve'nesi ve mineloni' gamene nene mo avito' ogave. 24 Ne'mine lo eito' lo molo ti' lo line': Naza lamineto' gehepeve ti' lo nolo-lingimuve: Viti zuho gihile hamo' ma misubou' lemo helamiline' nene gihile izamo hazavo' mineleseive. Ne'mine oloseine'za misubou' lemo helelidoti' nene gihile've vai' izeleseive. 25 Ido' ve ma ingine minevo' alevote hulalone li ingine di a'manapa igi minaa' nave nete nene a'mine minevo' alevo'ine nene di goloso igi di hulaa' naha ve ma ingine minevo' alevo'ine di a'manapa amaa' ave nete nene hulami ha di mini minivi' minivi' igi minilisave. 26 Ve ma ingine neni' gono'nelo' gelekele' ilisa ilizave nene neni' mo ne'metaakovo' ilizado' o neive. Ne'mine igi mini ingine nene naza zaala zaala minelohe inginesi nene makakovo' minilisave. Ve ma ingine neni' gono'nelo' gelekele' ilizave muki' nene neni' me'neho'mo do naba o-ngedeleseive. 27 Naza idise nene nemeni balala nolive. Nemu' nene nadive lolove. Ahono, nenita inite' soto' olosa neine' nene do olovo' ogo do nu' izezo lolohe. O'ove. Naza nene a'mine soto' o-nedelesa neine' inite' nene gehelesa uvoni' nenako mo ma lamolodo' o noolive. 28 Nemu' nene Ahono, geze guliveka nene do hozi nolozo. Ne'mine lavo Okulumokuti' gamazi ma ti' lo line' ve: Naza gulive'ne nene mo do hozi lokuze. Mo gohi do hozi lolosuve. 29 Ne'mine lavo a'mida gili minani' aleve muki' ingine nete nene mo go' ngilili logave li lani'za linge ma nete nene ti' li lani': A'mine neve nene angeloli'mo gamazi lo-imine' ve lani' ve. 30 Ne'mine likevo Izesu' a'mido' ti' lo lo-ngimine': Gamazi mene line' nene nenikumu' lamive. Asi lengikumu' line' ma ne neive. 31 Idise meloti' nene O'moso'mo me misubou' aleve nene lihime ngemelesa api' ogo ize' nomolo-ngidive. Ne'mine noogo me misubou' guvelesi ve lolo' ogo minive Satani nene imiselo do nohulive. 32 Ido' misubouti' mene neni' di oti-nidilizani' nene naza evene' muki' nene do nenita olosuve. 33 Ne'mine gamazi line' nene ei' heleline' monovo nene do soto' ogosa line' ve. 34 Ne'mine lavo evene' muki' nete ti' li lani' ve: Leli' lou' gamazite Mono' Godolou' neine' ne'mo nene O'moso'mo do lu' izelesa imiselelesa live nene helamo minevo' minevo' oloseive lavo gele none' nenako gaza a'mine O'mosolati' ve gihile nene di oti-dilizani' o neive laine' nene zahinemu' lane. 35 Ne'mine likevo Izesu' ti' lo lo-ngimine': Labana' ne'mo nene lengi' vovotingu' gamene li'nibevo' mine molo mineleseive. Liti'muso ne'mo molo hite-lengedavo minikelizave. Lengito' labana' omo neido' nene ningi monilo. Nanitekumu' ve. Evene' liti'muso lulou' aka monaa' ave nene ne'mine akalo' novune li ningi gilamave. 36 Labana' lengemeni damenisi minilizangumu' ve li labana' lengiku' ha neido' nene a'mine labanakumu' gili ele'vole' igi minilo. Ne'mine lo engikisi gohi minelesa gelamo vo halekine' ve.

Zuda Ve Izesu'nimu' Gili Ele'vole' Amani' Monovomu' Gizine' Gamazi

37 Ido' ne'mine ogo Zuda ve hulo-ngedo vo halekine' nene aza engi' vovo'ningu' nene atoli'mine suno vai' do soto' inekisi ningi ingine ezemu' nene ma gili ele'vole' amani' nenako nemu' nene vo halekine' ve. 38 Ido' ingine ezemu' gili ele'vole' amani' nene polohete Isaia' gizine' gamazi ma nene gihile izelingumu' ve losa gili ele'vole' amani' ve. A'mine gamazi nene ne'mino gizine' ve: Guvekasi ve, Gei' lo-lemaine' gamazi lo-ngimune' nene evene' hamolitesi nene ma gili ele'vole' amave. Ee, Guvelesi ve'mo ei' amuzo've do soto' ine' nene evene' hamolitesi ma ningi gilamani' ve. 39 Ido' ingine ngeli gili ele'vole' ilizado' amani' monovo Isaia' lo soto' ogo gamazi gohi ma ti' lo gizine' ve: 40 Guvelesi ve ne'mo nene lu'ine'mi vele do like-ngedo lu'ine'mi gala nesi nene do ngi lo-ngidine' ve. Ido' ne'mine ine' nene lu'ine'mi vele ninge minivo ido' lu'ine'mi gala nene gele hehe lo minivo minisa lu'ine di velepe' izilizani' nene naza do lamine' o-ngedalove losa ne'mine ine' ve. 41 Isaia' ne'mine lo gizine' nene Guvelesi ve Okulumoku' minine' mo'mosi'velo' emeni dameni lamine' atoli'minesi miningumu' nene ningosa nemu' nene gizine' ve. Ido' a'mine nene Izesu'nimu' logani' neive. 42-43 Ne'mino neiha Zuda ve naba minanguti' muki' nesi nene ezemu' gili ele'vole' ani'za ingine evene' engi' di hozi li-ngidilizangumu' lanite' gilani' nene ivile' ogavo Zuda ve leli' muliseuti' huli heta i-lidikelizave li Halisaio' vemu' golise gili a'mine Izesu'nimu' gili ele'vole' ani' nene ma li soto' amaa' ani' ve.

Izesu' Nene Melehido' Medelo Gamazi Nene Line' Nenako Ne'mo Ei' Gamazi Gili Hulave Nene A'mine Line' Gamazi Ne'mo Ize' Molo-ngedavo Lihime Dalisave Lo Izesu'

Line' Gamazi 44 Neloti' Izesu' gamazi nabauti' ti' lo line': Ve ma ingine nenikumu' gili ele'vole' iga' nave nene nenikumukovo' gili ele'vole' navoba a'mingu' nene mo nimiselive eikumukisi nene gili ele'vole' iga' nave. 45 Ido' ve ma ingine neni' ningi minaa' nave nene nenikovo' ningi minaa' navoba a'mingu' nene mo nimiselive nesi nene ningaa' nave. 46 Naza me misubou' uvoni' nene labana' ne'minosa uvoni' nene ve ma ingine nenikumu' gili ele'vole' iga' nave muki' nene liti'muso monovou' mini mili minikelizave losa uvoni' ma neive. 47 Ido' ve ma ingine neni' laa' nouvoni' gamazi gilisa gili dami minaa' nave nene na'nise'ne lihime ngemesa'muve. Ee, naza me misubou' uvoni' nene evene' ize' molo-ngedo lihime ngemelesa amo do ngu' izelesa uvoni' nenako nemu' nene na'nise'ne lihime ngemesa'muve. 48 Asi a'mine neni' mehe'ine nimi gamazi'nesi gili dami minilizave ize' molo-ngedelive ma neine' nene neni' gamazi luvoni' ne'mo nene alinge' gamene nabala ize' molo-ngedavo lihime dalisave. 49 A'mine gamazi'ne laa' nouvodi'mo ize' molo-ngedeleseive luvoni' nene nanitekumu' ve. A'mine gamazi nene na'nise ga'neuti' laa' nouvoba asi nimiselive me'neho ne'mo nene mo lilinido' o neive line' gamazivo' nene laa' nouve. 50 Me'neho lo-nidine' gamazi laa' nouvoni' nene ei' gamazi've ne'mo minevo' minevo' minaa' monovo do soto' oga' neive lo gele nouvodi'mo nene a'mine gamazi laa' nouvoni' muki' nene me'neho lo-nimine' gamazi gehepevevo' nene laa' nouve.

13

Gelekele' Izipe Ne'mine Mini Gono Di Di Vilizangumu' Izesu' Aka nGelebizo Izipahala Zuho Gize'ine Noso' Ize-ngidine' Gamazi

1 Zuda ve O'moso'mo avo'ningine ise'ine izingumu' gili holise' minaa' ani' gamene nene alitelesa gamene hamo' ha neivo Izesu' aza me misubo hulosa melehida viline' gamene nene mo ogave lo gala giline' ve. Eze evenele me misubou' minani' lulo ngimine' nene atoli'mine ogo ngemo heleline' nesi nene ivile' ivosa minine' ve. 2 Ido' nivenga' molavo noso' nite' ni nizavo Kelioto numudoti' ve Simoni' gipele Zuda'ni nene Izesu'ni biluvalite dalizangumu' do soto' o-deline' gamazi nene Satani ne'mo do lulou' molo-davo neivo 3 Izesu' aza meleho inite' mata' ei' anau' molo neine' nesi ido' ei' nene O'mosolati' ogosa O'mosola volosa neine' nesi nene gele mino 4 noso' nite' no mininguti' nene oto saketi've apaso do molo tauli do gopololo' izine'. 5 Ne'mine ogo lapese mau' noso lekosa api' ogo izipahala zuholiti gize'ine noso' izeka' izeka' ogo gopololo' likekine' taulidunu' nene gilite ngimika' gilite ngimika' o'mo vine'. 6 Ne'mine ogo noso' ize-ngede'mo novo Simoni Petolodo' ogavo aza ti' lo lo-imine': Guvekasi ve, gei' nene neni' gize'ne nene noso' ize-nedelesa nabe. 7 Ne'mine lavo Izesu' a'mido' ti' lo lo-imine': Naza mene ogo molo nouvoni' initeli'mi monovo nene idise mene mo gelamane'za alinge' nene gele hehe lolosane. 8 Ne'mine lavo Petolo' ti' lo lo-imine': Gei' nene mo keke' gize'nelo' nene noso' izo gilite-nedamozo. Ne'mine lavo Izesu' a'mido' ti' lo lo-imine': Ido' gei' nene ma noso' ize-gedamoloni' nene neni' evene'ne zuholiti muliseuti' minamolosane. 9 Ne'mine lavo Simoni' Petolo' aza ti' lo lo-imine': Gaza ne'mine lo ma nene gize'nevo' nene noso' ize-nedamo a'nelasi madu'neukisi nene noso' ize-nedezo. 10 Ne'mine lavo Izesu' ti' lo lo-imine': Nosou' ongosa minelive ne'mo nene oko'no muki' nene mo guluvi' lo neivo akala adoti' u'musupo gi'mize mineline' nemu' nene gizenelokovo' noso' izelido' o neive. 11 Lengi' nene mo guluvi' li lamine' nizaha lengi' vaito' nene ne'mine amave. Vaito' guluvi' amave line' nene eze biluvaliti a'ningu' do molo-delivemu' nene ha gele minine' nenako nemu' live. 12 Gize'nido' nene noso' izo gilito osu' lo-ngedo saketi've nene do izo gohi mito' minosa ti' lo lo-ngimine': Lingine idise o-lingiduvoni' initeli'mi monovo nene gilahe gilamave. 13 Lingine nenikumu' nene Tisa' ve ido' Guvekasi ve ve li li-nidaa' nave. Ido' naza nene mo ne'mine ve nouvoni' nenako ne'mine li-nidaa' nani' nene mo lamineto' gehepeve li-nidaa' nave. 14 Ido' neni' nene tisatine ne'minesi ido' Guvetinesi ve ne'minesi minuvodi'mine naza gelekele' izipe ne'mine lolo' ogo gizedido' nene noso' izo gilite-lengedekuze. A'mine'mine igi linginesi nene ge gize'ne noso' ize-nede ne gizenga noso' ize-gede li minilizave. 15 Naza ne'mine noo-lingiduvoni' nene linginesi nene naza o-lingiduvoni' ne'mine ilizave losa nene aka lengelebizo ne'mine nouve. 16 Naza mo lamineto' ti' lo nolo-lingimuve: Gelekele' izipe ne'mo nene gizebo o-do minive guvelesi ve've nene ivile' o-do minesa'mive. Ido' gonou' ngimiselavo gonolo' monaa' nave nete nene ngimiselive ivile' i-di minisa'mave. 17 Lingine a'mine noluvoni' initekumu' nene gili nizanako a'mido' e'mete gehepeve ilizani' nene O'moso'mo do lamine' o-lengedeli akalo' mini mili minilisave. 18 Ne'mine noluvoni' nene naza neni' ve lo do kegese-lingiduve nene mo ningo gele nouvoni' nenako lengi' mukikumu' lamuve. Mono' Godolou' ti' li gizi nizani' gamazi nene gihile izelive losa ne'mine nouve: Neni' noso' nite'neuti' naa' usive ne'mo nene biluva' o-nedo nebele leive. 19 Naza idise a'mine gamazi nene nolo-lingimuvoni' mene a'mine inite' olihe soto' olosa neivosa noluve. Soto' iline' nene lingine a'midoti' ningi neni' nene mo neive neni' ma ne neive li gili ele'vole' ilizave losa noluve. 20 Naza lamineto' gehepeve ti' lo nolo-lingimuve: Ve ma ingine neni' ngimiseleloni' aleve ngele'mize lamine' ilizani' nene a'mingu' mo nenikisi nele'mize lamine' ilisave. Ido' ve ma ingine neni' nele'mize lamine' ilizani' nene a'mingu' nimiselive ei' nene ele'mize lamine' ilisave.

Izesu' Izipahala Zuhouti' Mali'mo Biluvaliti A'ningu' Izesu'ni Molo-delingumu' Lo Soto' Ine' Gamazi

21 Ne'mine losa Izesu' nene emeni balala livo mino ti' lo lo soto' ogo line': Naza lamineto' ti' lo nolo-lingimuve. Lengikuti' mali'mo nenikumu' me neive lo biluvaliti a'ningu' molo-nedeleseive. 22 Ne'mine lavo izipahala zuho nene zahinemu' nolive li gopo ga'ine gili vonu' gimise ani' ve. 23 Izipahala zuho engikuti' ve ma nene vonolo' izipe ne'mine minive nene Izesu' minida avito' gehepeve minine' ve. 24 Nemu' a'mine vemu' nene Simoni' Petolo' aza godolodunu' avazaha ogo zahinemu' lihe longo' o-dezo lo-dine' ve. 25 Ne'mine lo-davo a'mine ve aza Izesuda mine lehete ogo ti' lo longo' o-dine' ve: Guvekasi ve, gaza nene zahinemu' nolane. 26 Ne'mine lavo Izesu' a'mido' ti' lo line': A'mine ve nene beleti lumo ma do supu nosou' lupizo emelove ne neive. Ne'mine lo beleti lumo ma do lupizo Kelioto numudoti' ve Simoni' gipele Zuda'ni nene imine'. 27 Emavo do anau' ogo nonavo a'mido' lite' lo Satani ne'mo lulou' dizine' ve. Ne'mine ogavo Izesu' aza Zuda'ni ti' lo lo-imine': Gaza olosa naine' inite' nene geto olosane. 28 Ne'mine lo line'za noso' nite' maka' ni minave muki' nene Zuda'ni ne'mine lo-dine' nene nanimu' lo-dihe nemu' ma gilami minani'. 29 Ee, Zuda' nene engi' moni milani' benilo' nene gizebo ve minine' nenako nemu' nene engikuti' linge ma nete Izesu' aza ne'mine line' nene holise' noso' nite' nevo'mine vo meni hizelingumu' lo-dihe ido' moni ma goho' gahali' aleve ngemelingumu' lo-dihe lisa gilani' ve. 30 Ne'mine ogo Zuda' nene a'mine beleti nene no osu' lo lite' lo oto numunguti' lemo heta vohaha ine' nene liti'muso ize miningu' vine' ve.

Izesu' Aza Lou' Gamazi Gosoho' Lo Huko-ngedo Vilingumu' Nene Lo-ngimine' Gamazi

31 Ido' Zuda' nene heta lemo vavo Izesu' ti' lo line': Idise nene O'mosolati' ve gihile nene di hozi li-nidilizani' gamene nene mo ogave. Ido' nenitoti' nene O'moso di hozi li-dilisave. 32 Ido' ne'mino neine' nenako O'moso'mo eito' do medele-nedo do hozi lo-nedeleseive. Ee, ido' gamene ha'na vamivo mo lite' lo do hozi lo-nedeleseive. 33 Izipekizo, naza lengikisi nene gamene li'nibevo' mineloni' ogave. Nenikumu' lingine vise' ilizaha mo ngeli ningamilisave. Zuda ve lo-ngimuvoni' ma'mino idise nene lengikisi ti' lo nolo-lingimuve: Naza vo mineloda lingine ngeli amilisave. 34 Naza gamazi gosoho' ma ti' lo lo huko nolo-lingimuve: Lingine nene ge luka neme ne lu'ne geme livo' minilo. Ee, neni' lu'ne lengeme nouvoni' ne'mine igi lingine nesi nene ge luka neme ne lu'ne geme livo' minilo. 35 Evene' muki' nete lingine neni' izipaha'ne zuhouti' nizave li ningi gililizani' nene lingine ge luka neme ne lu'ne geme li minilizadoti' nene ningi gililisave.

Izesu' Aza Petolo' Ataize Lo-delingumu' Lo Soto' Ine' Gamazi

36 Ne'mine lavo Simoni' Petolo' aza Izesu'ni ti' lo longo' o-dine' ve: Guvekasi ve, gaza zala viliningumu' nolane. Ne'mine lavo Izesu' a'mido' ti' lo lo-imine': Naza voloda nene idise nene gaza ngelo ne'meto vamolosaba asi alinge' nene ne'meto volosane. 37 Ne'mine lavo Petolo' aza ti' lo lo-imine': Guvekasi ve, idise nene nanitekumu' ge'meto vamolove. Gaza libililiza akalo' volosa noliline' nene naza nene geikumu' oko'ne nene ha hulolosuve. 38 Ne'mine lavo Izesu' a'mido' ti' lo lo-imine': Gaza okonga nenikumu' ha hulolosuve nolabe. O'ove. Idise meloti' nene okoloholi'mo olihe nolo molamivo gaza neni' nene ningamuve ve lo ataize gamene setohamo lolosane.

14

O'mosola Vaa' Aka Nene Na'nise'ne Nene Nouve Lo Izesu' Line' Gamazi

1 Ne'mine lo Izesu' imine' molo ti' lo line': Lingine lutingu' nanite' soto' o-ledelivo li gili lengemeni balala loka' loka' ivo nizani' nene mo alamilo. Asi O'mosomu' gili ele'vole' igi nenikumukisi nene gili ele'vole' igi minilo. 2 Me'nehi numuno ebe'vela minevo' alevo' igi minilizani' numuno nene vai' goloso neive. Ido' ne'mino ma minamidiniko naza vo numuno do va'va' o-lengedelove lo lo-lingimuvoni' nene ma lamuvodine. 3 Ido' naza vo numuno do va'va' o-lengedeloni' nene a'mine vo mineloda nene linginesi vi minilizangumu' ve lo lengi' nene do nenita ogo lengele'mizo volosa gohi alosuve. 4 Ido' a'mine naza voloni' ebeta aka vo neine' nene lingine mo ningi gili nizave. 5 Ido' izipahala zuhouti' Tomasi' ne'mo ti' lo lo-dine' ve: Guvekasi ve, gaza viline' ebekumu' nene ma gelamune' nenako a'mida vaa' akasi nene laza nado ningo gelelone. 6 Ne'mine lavo Izesu' a'mido' ti' lo line': Me'neho O'mosola vaa' aka nene na'nise'ne nouve. Aka nouvonako naza nene a'mida vilizangumu' gamazi gihile ne'mi meleho mino minevo' minevo' lengemeni dameni lengemaa' meleho nesi nene na'nise'ne nouve. Nemu' nene a'mine aka nenita vamilizave hamolitesi nene me'nehida ngeli ma vi hetelamilisave. 7 Lingine neni' nene mo ningi gili nizanako me'nehinesi nene mo ningi gililisave. Idise meloti' nene eze mo ningi gilisa mo ningi nizave. 8 Ne'mine lavo Hilipo' ti' lo lo-imine': Guvekasi ve, mahine nene lelebizezo. Lelebizanivo laza ningekunivo ne'mo vo davo gohi vise' amolone. 9 Ne'mine lavo Izesu' ti' lo lo-imine': Hilipoo, naza nene lengikisi gamene ha'na nene minune' neine'za gaza nene nenikumu' olihe ningo gelamabe. Ve ma ingine neni' ningaa' nave nene a'mingu' nene me'nehinesi ningaa' nave. Ne'mine o neine' nenako gaza me'nehine lelebizezo laine' nene lamilinako nanimu' lane. 10 Me'neho nene nenikisi minaa' neivo naza nene me'nehosi minaa' nouvoni' mamu' nene gele ele'vole' amabe. Gamazi mene lo-lengemaa' nouvoni' ma nene neni' ga'neuti' gelo lo-lengemesa'muve. Asi me'neho ne'mo nene neniku' mino ei' gono nodavosa nene laa' nouve. 11 Me'neho nene nenikisi minaa' neivo naza nene me'nehosi minaa' nouve lo lo-lengemaa' nouvoni' nene gili ele'vole' ilizado' o neive. Ido' haza gili ele'vole' amilizado' noline' nene neni' me'nehi gono do ogo molo nouvoni' initetoti' nene gili ele'vole' ilizani' o neive. 12 Naza mo lamineto' gehepeve nolo-lingimuve. Ve ma ingine nenikumu' gili ele'vole' i minilizave muki' nesi nene naza ogo molo nouvoni' inite' ne'mine nene ha igi mili ilisave. Ee, ido' naza nene me'nehida voloni' nenako ne'mo nene ingine naza uvoni' inite' nene ivile' ivosa atoli'mine inite' naba nesi ha ilisave. 13 Neni' gulive'ne di ti' igi mini neni' evene'ne lolo' igi minilizanguti' inite' mamu' lilizani' nene gipele nenitoti' nene me'nehi gulive've di hozi lilizangumu' ve losa nene ha gele lengemelesuve. 14 Ee, neni' evene'ne lili' igi minilizanguti' inite' mamu' nenita lilizani' nene ha gele lengemelesuve.

Izesu' Aza Melehida Vosa Eze Evenele Hize ele' O-ngedelive Lo O'moso'mi Sikalahu' Imiselelingumu' Lo-ngimine' Gamazi

15 Lingine lutine nimi nizani' noline' nene naza lo-lingimuvoni' gamazi nene gili di minilisave. 16 Ne'mine ikevo naza me'nehine lokuvo lengita minevo' minevo' ilingumu' nene hize ele' o-lengedelive gohi ma imiseleleseive. 17 A'mine imiselelive nene gamazi gihile do soto' ive O'moso'mi Sikalahu' nene neive. Me misubou' initekumukovo' gilaa' ave ingine a'minemu' nene ma ningi gilisa'mani' nenako eze nene ngeli ma di ti' amilisave. Nene neiha aza nene lengita mino lutingu' omo minaa' neine' nenako lingine nene ezemu' mo ningi gili nizave. 18 Naza hulo-lengedo voloni' nene lingine mudise muhele' izipe ne'mine minilizave losa hulo-lengedamolosuve. Naza nene lengita gohi alosuve. 19 Meloti' nene gamene li'nibevo' ogo vavo me misubou' aleve nete neni' nene gohi ma ningamilisaha lengi' nene neni' ha ningilisave. Naza nene mo minevo' minevo' ogo nouvoni' nenako nemu' nene linginesi minivi' minivi' igi minilisave. 20 A'mine neni' gohi ningilizani' gamenelo' nene naza me'nehida mine molo nouvo ido' lingine nene nenita mini mili nizavo naza nene lengita mine molo nouvoni' nemu' nene mo ningi gililisave. 21 Evene' ma ingine neni' gamazi'ne di mini a'mido' gili di minaa' nave nene mo lu'ine laminetoti' nimaa' nave nene nizave. Ido' a'mine lu'ine laminetoti' nimaa' nave nene me'neho lulo ngemeleseive. Ne'mine neivo nazasi nene lu'ne ngemo neni' nemeni dameni ngelebizelesuve. 22 Ne'mine lavo Kelioto ve Zuda' abalaho Zuda' gohi ma ne'mo Izesu'ni nene ti' lo lo-imine' ve: Gaza leli' Zuda veti guvetesi ve naba nane' gemeni dameni nene me misubou' aleve muki' ngelebizamo lelikovo' lelebizelove nolaine' nene do nadosa lelikovo' lelebizeline. 23 Ne'mine lavo Izesu' a'mido' ti' lo lo-imine': Naza nemeni dameni lengelebizeloni' aka ne'mino neive: Ve ma ingine lu'ine neni' nimi minilizave nete nene neni' gamazi'nelo' e'meti gili di minilisave. Ne'mine ikevo me'neho lulo ngemavo azasi nazasi engita ogo mine molo minelesusive. 24 Ve ma ingine lu'ine neni' nimamaa' nave nene neni' gamazi'nelo' e'metamaa' nave. A'mine lokuvo gilaa' nani' gamazi nene neni' gamazi'ne nomive. Asi nimiselive me'nehi gamazi nene neive. 25 A'mine nolo-lingimuvoni' gamazi meve nene naza linginesi ha minuvodo' ve losa nene nolo-lingimuve. 26 Ne'mine nouha naza vokuvo me'neho nene neni' ve'nemu' ogo lengita imiselelive lengi' hize ele' o-lengedelive O'moso'mi Sikalahu' ne'mo nene inite' mata' mukikumu' nene apize lengemo lo-lingimuvo nite' mukikumu' nene gohi lo gatine oloseive. 27 Ido' mo hulo-lengedeloni' o neine' nenako haza hulo-lengedamo hongu monovo nesi nene nohulo-lingiduve. A'mine hongu monovo nene me misubou' alevete hongu monovo di soto' iga' nani' ne'mine minamo nenitati' atoli'mine ogo minine' hongu nene nolingimuze. Lingine lengemeni balala livo mini goliselo' ve minamilo. 28 Naza hulo-lengedo vosa lengita alosuve lo lo-lingimuvoni' nene lingine mo gilikeve. Nemu' lingine nene lutine lamine' gehepeve nimi minadiniko me'neho nene neni' nivile' ogo naba neine' nenako a'mine me'nehida volongumu' nene lingine mo lamineta novive li longolize izi minadine. 29 Ido' inite' mata' idise mene nolo-lingimuvoni' nene alinge' soto' iline' nene lingine gili ele'vole' ilizave losa olihe soto' amido' nene gomu' nolo-lingimuve. 30 Me misubou' guvelesi ve lolo' ogo minive nene nenita mo nave. Nemu' nene lengikisi gamazi ha'na lamolonido' o neive. A'mine nenita nave nene inite' hamokisi neni' o-nedelido' mo lisihe' amine'za 31 oloni' inite' nene me misubou' aleve ningi me'nehine lu'ne eme mino aza lo-nidine' initetokovo' e'meto ogo molo oga' neive li ningi gililizave losa a'mine inite' nene olosa nouze. Mo valonge. Otilo.

15

Izesu' Nene Vaini Nala' Ne'mine Nouvo Lingine Nene A'nava Ne'mine Nizave Lo Line' Gamazi

1 Izesu' imine' molo ti' lo lo-ngimine': Neni' nene vaini nala' ne'mi zava gehepeve ne nouve. Ido' me'neho neve nene a'mine vaini nalato' gizebo ve ne neive. 2 A'mine neniku' a'nava ne'mine mini gihile izamani' nene huko do hulaa' neive. Ido' gihile izi minani' a'nava mukiku' nene gihile mo vai' goloso izelingumu' ve lo sisive do do lisihe' gehepeve oga' neive. 3 Naza gamazi lo-lengemaa' nouvoni' ne'mo lengiku' nene mo sisive do do lisihe' ogave. 4 Nemu' lingine nenito' nene gi'mizi gili' li minilo. A'mine'mine ogo naza linginela gi'mizo minelove. A'nava ne'mo zava'velo' gi'mize minamiline' nene asi've ngelo gihile izamoloseiha zava'velo' gi'mize mineline' nene gihile izeleseive. A'mine'mine ogo lingine nenita gi'mizami minilizani' nene gihile ma izami asi nenita gi'mizi minilizanikovo' nene gihile izilisave. 5 Ee, neni' nene vaini nala' ne'mi zava've nene nouvo lingine nene a'nava ne'mine nene nizave. Ido' neni' nene hize ele' o-ngedamuvo inite' hamokisi ma amilisanako ve ma ingine nenita gi'mizi nizavo naza inginela gi'mizo minelove nete nene gihile vai' goloso izilisave. 6 Ve ma ingine nenito' gi'mizi minamave nene za a'nava huki hulikevo goko' lavo di nubuho igi oloku' gizikevo laa' neine' ne'mine nene nizave. 7 Lingine nenito' gi'mizi minilizani' nene nanite' nanite' dalisa gililizahe a'minemu' lilizani' nene me'neho ha gele lengemavo dalisave. 8 Ido' lingine gihile vai' izi neni' izipaha'ne zuho gihile lili' igi minilizadoti' nene me'nehine di hozi li-dilisave. 9 Me'neho lulo nene neni' neme neine' ne'mino naza lu'ne nene lengeme nouve. Nemu' nene lu'ne lengeme'mo vo minelodo' vo lisihe' ivosavo' minilo. 10 Naza me'neho lo huko lo-nidine' gamazilo' e'meto mino me'neho lulo nimido' lisihe' ivosa minaa' nouvoni' ne'mine igi linginesi nene a'mine'mine igi neni' lo huko lo-lingiduvoni' gamazilo' e'meti minilizani' nene lu'ne lengeme'mo vo minelodo' vo lisihe' ivosavo' nene minilisave. 11 Gamazi mene nolo-lingimuvoni' nene lu'ne gulumo avile lisivo minaa' nouvoni' monovo nene lengitasi minivo a'mine ne'mo vai' lo lingibilivo minilizave losa noluve. 12 Neni' gamazi ma lo huko lo-lingiduvoni' ma nene ne'mino neive: Naza lu'ne lengi' lengeme nouvoni' ne'mine igi linginesi nene ge luka neme ne lu'ne geme livo' minilo. 13 Ve mali'mo eze zogo alevemu' oko'no hulo labuluvo ogosa heleline' nene lulo atoli'mine gehepeve ogo ngeme minosa nene ne'mine iline' nenako lulo mo ngemo minine' votigile nene ivile' ivosa lulo gohi ngemelido' ngelo minamoloseive. 14 Lingine lo huko lo-lingimuvodo' e'meti minilizani' nene neni' zogone nene nizave. 15 Ido' gelekele' izipe nete nene guve'inesi ve gizebo o-ngede minive'mo ogo molo oga' neine' initekumu' nene ma ningi gilisa'mani' nenako nemu' nene naza lengikumu' nene gelekele' izipe ve lo gohi ma lo-lengedamolodo' o neive. Asi me'nehidati' ningo giluvoni' inite' muki' nene lengi' gililizave lo do soto' ogo lo-lengeme nouvoni' nenako nemu' nene idise lengi' nene zogone ve nolo-lingiduve. 16 Lengi' nene gomu' apizi neni' nene lengi' ve li ma di ti' amave. Asi neni' neve lengi' do ti' uvoni' nene vi gono dikevo minevo' minevo' iline' gihile nene izelive losasi ido' lingine neni' ve'nemu' igi me'nehida voku' nanitekumu' lilizahe a'mine inite' nene lengemelive losasi do ti' o-lingiduvoni' ve. 17 Naza nene mo ne'mine lo nolo huko-lingiduve: Lingine nene ge luka neme ne lu'ne geme li minilo.

Me Misubou' Aleve Neni' Biluva' I-nidaa' Nani' Ne'mine Igi Biluva' I-lingidilisave Lo Izesu' Lo-ngimine' Gamazi

18 Me misubou' initeto' lu'ine milaa' nave nete lengi' biluva' i-lingidilizani' nene gomu' neni' biluva' i-nidi minani' ma nene idise leli' nene biluva' nii-lidave lisa gili minilo. 19 Lingine nene a'mine me misubou' aleveti mulise'ninguti' minadiniko ingine lengikumu' nene leli' aleve ve li zogo mili-lingidadine. Ne'mine adine'za engi' muliseuti' lengi' nene neni' ve lo do kegese-lengedo do nenita o-lingiduvoni' ne'mo nene biluva' nii-lingidave. 20 Naza ti' lo lo-lingimuvoni' gamazi mamu' nene gili minilo: Gelekele' izipe ne'mo nene gizebo o-do minive guvelesi ve've nene ivile' o-do minesa'mive. Neni' goboni mili-nidaa' ave nilizani' nene lengikisi goboni mili-lingidilisave. Ido' neni' gamazi'nelo' gili di minaa' ave nilizani' nene lengi' gamazitinesi nene gili di minilisave. 21 Mene noluvoni' inite' i-lingidilizani' nene ingine neni' nimiselive nene ningi gilami minilisanako ne'mo nene lingine neni' gulive'ne di ti' igi nenito' gi'mizi minangumu' ve li a'mine noluvoni' inite' nene ha i-lingidilisave. 22 Ido' naza ma amo gamazi'ne nene ma lo-ngemamuvodiniko nenikumu' gili hulamavo lihime nene engita mo minamivo minadine'za idise nene ingine laza lihime nodune lo gelamo gopo minune li e'menga lilizani' aka nene ogo hize tile-ngedekuvoni' nenako olovo' ma amilisave. 23 Ve ma ingine neni' biluva' i-nidaa' nave nene a'mingu' me'nehinesi nene biluva' nii-dave. 24 Ido' neni' nene evene' malitesi amani' inite' atoli'mine suno gehepeve nene engi' vovo'ningu' do soto' uvoni' ma nene ma do soto' amuvodiniko lihime engita ma minamivo minadine'za engi' vovo'ningu' nene a'mine ato' suno nene do soto' nouvo ningisasi nene nenikisi me'nehinesi nene biluva' i-lidi minani' ma neive. 25 Ne'mine igi minani' nene engi' mono' gamazi'ningu' gizikani' minine' gamazi ma nene gihile izelingumu' ve losa nene ne'mine ani' ve. A'mine gamazi nene ne'mino neive: Biluva' i-nidani' nene mo hazamu' gehepeve ne'mine ani' ve. 26 Ido' me'nehosi minasidoti' imiselekuvo alive hize ele' o-lengedelive ado' gamazi gihile do soto' ive O'moso'mi Sikalahu' aline' nene neni' monovo'nemu' lo soto' soto' oloseive. 27 Ido' lengi' nene gono api' ogo do minuvodoti' nene nenikisi maka' mine do ogo none' nenako nemu' nene linginesi nene neni' monovo'nemu' li soto' soto' ilisave.

16

1 Gamazi mene nolo-lingimuvoni' nene lingine nenikumu' gili ele'vole' ani' nene hulii limi ingikelizave losa nene nolo-lingimuve. 2 Zuda ve nete mono' mulise'ninguti' nene huli heta i-lingidilisave. Ee, gamene ma alosa neive. A'mingu' nene lengi' lingibili hililizave muki' nete O'moso'mi gono nodube li gilii lingibili hililisave. 3 Inite' nevo'mine nene ingine me'nehinesi nenikisi nene ningi gilamani' nenako ne'mo nene ne'mine ilisave. 4 Naza a'mine soto' iline' initekumu' do gomu' molo nolo-lingimuvoni' nene a'mine inite' alinge' soto' iline' gamenela nene lingine neni' lo-limine' malo' nene soto' neive li gili minilizangumu' nene nolo-lingimuve.

O'moso'mi Sikalahu' Imiselavo Gono Daline' Monovomu' Izesu' Lo-ngimine' Gamazi

Naza nene lengikisi mine do ogo nouvoni' nenako nemu' nene naza idise nolo-lingimuvoni' initekumu' gana' ma lo-lengemamuvoni' ma neive. 5 Ee, gomu' lengikisi mine do ogo minuvoni'za idise nene mo nimiselivela nene novuve. Novuvoni'za lengikuti' hamoli'mosi nene zala novane lo longo' ma o-nedamive. 6 Ne neiha gamazi mene lo-lingimuvoni' ne'mo nene mulumo alumo lutingu' do vai' lo-lengedavo vai' lo neive. 7 Ne neiha naza mo lamineto' ti' lo nolo-lingimuve: Naza hulo-lengedo ma vamoloni' nene a'mine hize ele' o-lengedelive nene ma alido' minamoloseiha naza voloni' nene lengita imiselekuvo aloseinako nemu' voloni' ne'mo nene hize ele' o-lengedeleseive. 8 Ido' a'mine hize ele' o-lengedelive aline' nene lihime'ine'mi monovo nesi ido' lihime nomine' lisihe' lamine' minaali'mi monovo nesi ido' O'moso'mo goni' o-ngedo lihime ngemeline' monovo nesi nene do soto' ogo me misubou' aleve nene lu'ningu' hizivo ningi gililisave. 9 Ee, ingine nenikumu' gili ele'vole' ami minaa' naadoti' nene lihime engita neine' nene ngelebizeleseive. 10 Ido' lingine neni' nene gohi ningamilizada me'nehida volodoti' nene aza lihime've nomine' mino ve lisihe' lamine' minine' ve li ningilizave lo nesi ngelebizeleseive. 11 Ido' me misubou' aleveti guve'inesi ve lolo' ogo minive nene naza mo ivile' okuvo O'moso'mo goni' o-do lihime emelingumu' lo huko-didoti' nene me misubou' aleve mono' gilamave engikisi O'moso'mo goni' o-ngedo lihime ngemeline' o neine' nesi nene ngelebizeleseive. 12 Agae, naza idise nene gamazi vai' goloso ha lo-lengemeloni' o neine'za lingine idise a'mene lite' li di lutingu' milalizado' lisihe' amilisave. 13 Ne neiha a'mine luve gamazi gihile do soto' oga' ive O'moso'mi Sikalahu' aline' nene lengele'mize gamazi gihile mukili'mi akalo' molaloseive. Ne'mine iline' nene nanitekumu' ve. Aza nene ei' galauti' gelo lilivoba asi me'nehidati' geleline' initekovo' nene lo-lengemo ido' alinge' soto' iline' initekumu' nene lo soto' o-lengemeleseive. 14 A'mine luve ne'mo nene neni' gamazi'neuti' ma dosa lengi' lo-lengemeline' nene a'mine ne'mo neni' nene do hozi lo-nedeleseive. 15 Naza a'mine luve ne'mo lo-lengemaa' neine' inite' nene nenitati' daline' initekovo' nene lo-lengemeleseive noluvoni' nene neni' me'nehida neine' inite' muki' nene neni' inite'ne neine' nenako nemu' nene noluve.

Izesu' Vavo Izipahala Zuho Mulumo Gili Minilizani'za Ogavo Ningi Lu'ningu' Gulumo Avile Liselingumu' Lo-ngimine' Gamazi

16 Ido' gamene li'nibevo' gehepeve ogo vavo neni' nene gohi ma ningamilisave. Ido' a'midoti' nene gamene li'nibevo' gehepeve gohi ogo vavo neni' nene ningilisave. 17 Ne'mine lavo izipahala zuho linge ma nete nene angise'ine li volelo' melo' igi ti' li lani' ve: Aza nene gamene li'nibe ogo vavo neni' ningamilisave ido' gamene li'nibe gohi ma ogo vavo neni' nene ningilisave line' ve. Ido' gamazi ma me'nehida voloni' nenako nemu' noluve lo nesi nene line' ve. Ido' a'mine ne'mine gamazi line' nene nanitekumu' live. Laza gelamune. 18 Ne'mine li gohi ti' li lani': Gamene li'nibe ve line' ne'mi monovo nene nado nolive. Laza nene nadive nolihe nemu' nene ma gelamolonido' ogave. 19 Ne'mine nilavo Izesu' nene ingine longo' i-dilisa gili minani' nemu' nene mo ningo gelo aza ti' lo lo-ngimine' ve: Lingine langisetine longo' tongo' igi li volelo' melo' nani' nene naza nene gamene li'nibe gehepeve ogo vavo neni' ningamilisave ido' gamene li'nibe gehepeve gohi ogo vavo neni' nene ningilisave luvongumu' nene nilahe. 20 Naza lamineto' ti' lo nolo-lingimuve: Lengi' nene vetinguti' ive novozo do'moze' moze' neivo ive nama igi nizavo me misubou' aleve nene ngolize izilisave. Lingine muhele' igi mulumo alumo gililisaha a'mine mulumo alumo gililizani' nene do velepe' izo longoloze izaa' lolo' oloseive. 21 Veneli'mo nene izipe gedeline' gamene ogavo izipe nogedo mulumo alumo gelaa' neiha alinge' nene izipe soto' ogavosa evene' ma nene me misubou' soto' ogave lo olize izosa a'mine mulumo giline' mamu' nene gohi ma gele minesa'mive. 22 Ido' a'mine'mine igi lingine idise mulumo nigilani'za alinge' naza gohi lengi' ningeloni' gameneu' nene lutingu' gulumo avile lise minivo longolize izi minilisave. Ee, ido' a'mine lutingu' longolize izilizani' nene evene' gohi malitesi nene ngeli ma di hulamilisave. 23 A'mine gamene aline' nene lingine inite' hamokumukisi longo' ma i-nidamilisave. Naza mo lamineto' ti' lo nolo-lingimuve: Neni' ve'nemu' igi lingine me'nehida inite' mamu' lilizani' nene aza a'mine inite' nene mo lengemeleseive. 24 Ne'mine o neine'za voku' lilizado' minamivo ganakuti' nene neni' ve'nemu' inite' mamukisi voku' lamavo mine do ogo idisesi nene ha none. Voku' lilo. Voku' lilizani' nene lengita longolize ne'mo nene vai' goloso lo minelive lo a'mine voku' liliza inite' nene ha lengemavo dalisave.

Izesu' Gepe' Gamazi Lamo Soto' O Minine' Gamaziuti' Ei' Vilingumu' Nene Naza Me Misubou' Aleve nGivile' O Nouvoni' Nenaze. Ganala Di-lingidilizangukisi Lingine

Amuzo Mili Minilo Lo Lo-ngimine' Gamazi 25 Naza gamazi nolo-lingimuvoni' mene lo soto' lamine' amo ha gepe' gamaziuti' lo-lingimuvoni'za gamene ma nani' a'mine gamenelo' nene gepe' gamaziuti' lo-lengemamo asi haza gamaziutikovo' nene lisihe' ogo lamineto' gehepeve me'nehinemu' lo-lengemelesuve. 26-27 A'mine gameneu' nene neni' ve'nemu' igi inite' mamu' voku' lilizani' nene naza lengito' medelo mino a'mine initekumu' nene me'nehine longo' o-delesuve lamolosuve. Nene nanitekumu' ve. Lingine nene lutine nimi O'mosolati' ave ve li gili gili ele'vole' igisa minani' nenako nemu' nene me'neho asi've nene lulo lengeme neine' nenako langisetine eita lilizani' nene ha gele lengemeleseive. 28 Ee, naza nene me'nehidati' ogo me misubou' ogo hetelosa a'mingu' mene mino mo me misubo hulo me'nehida tine' molo volosa nouve. 29 Ne'mine lavo izipahala zuho ingine ti' li li-imani': Gaza idise gamazi nolaine' nene do haleko gepe' gamaziuti' lamo gamazi gihile lamine' nolo-lemane. 30 Idise ne'mine nolanidoti' nene laza ti' lo gele osu' lo none: Evene' lelita longo' minine' a'minemu' nene gaza longo' o-gedamunivosi nene a'mine longo' nene mo ningo gelaa' nane. Ne'mine oga' naningumu' gei' nene mo O'mosolati' anive ma ne nane losa gele ele'vole' o none. 31 Ne'mine likevo Izesu' a'mido' ti' lo lo-ngimine': Lingine idise mo gili ele'vole' ikehe. O'ove. 32 Lingine gili' nalo. Gamene atoli'mine ma aline' nene idise mo soto' o neinako lingine huli-nidi hutile' igi numudida numudida vikevo nenikovo' minuvodiba mo me'neho nene nenikisi neine' ne'mo nene nenikovo' ma minamolosuve. 33 Lingine mene gamazi nolo-lingimuvoni' nene nenitati' hongu lo lamino minaa' monovo di minilizave losa nene nolo-lingimuve. Ne neiha me misubou' minilizangu' nene geni initeli'mi lulou' lengele'mizi milalisave. Ne'mine ilisaha naza me misubou' aleve nene mo ngivile' o nouvoni' nenaze. Lingine a'mine genili'mi lulou' minilizangu' nesi nene ha amuzo milivo' minilo.

17

Izesu' Izipahala Zuho Hize Ele' O-ngedelive Lo O'mosola Line' Gamazi

1 Izesu' aza a'mine mene gamazi nene lo-ngemo osu' lo vokene' ogo Okulumokuko noningo ti' lo line': Ahonoo, gamene molo-nedaine' ma nene mo ogave. Nemu' gipa neni' nene gei' nene do naba o-gedelesuze. Gaza gipa neni' nene do naba o-nedezo. 2 Ido' ne'mine noluvoni' nene gaza nemaine' evene' muki' nene minevo' minevo' ngemeni ngemeline lo evene' ato ato' mukito' nesi gizebo oloni' amuzo nene mo neme nane' nenako nemu' nene noluve. 3 Ido' minevo' minevo' ngemeni dameni daa' nene gei' O'moso gihile hamo' nemu' ningi gili hehe laatoti' nesi ido' evene' do ngu' izeline lo nimiselanive Izesu' Kilisito' nenikumu' ningi gili hehe lilizadoti' nesi nene dalisave. 4 Naza nene gei' nemaine' gono do piluvodi'mo nene me misubou' gei' nene do naba o-gedekuve. 5 Nemu' nene naza gomu' misubo mene olihe soto' amingu' geikisi mino guve'nesi ve naba minuvodi'mine ogo idise geikisi gohi nouvo a'mida nene do naba o-nedezo. 6 Me misubou' aleveuti' evene' ma do kegese-ngedo neni' nemelove lo nemanive engi' nene gei' monovoka ngelebizekuvo mo ningi gili nizave. Ingine nene gei' eveneka minadoti' nene neme nenita ogane. Ido' gei' gamazika nene mo gili di nizave. 7 Gei' nemaine' inite' muki' nene geitatikovo' ani' ma neive li mo gili nizave. 8 Ido' ne'mine li gili nizani' nene gei' lo-nemaine' gamazi nene lo-ngemekuvo di lu'ningu' milisa neni' nene lamine' geitati' uvoni' nemu' nene gili osu' li gei' nimiselaningumu' nene gili ele'vole' ani' nenako nemu' nene ne'mine li gili nizave. 9 A'mine evene' nemaine' nene gei' eveneka nizani' nenako nemukisi ido' a'mine aleveloti' nene neni' guve'ne monaa' neine' nenako nemukisi nene engikumu' geita noluve. Me misubou' aleve gei' gelekele' i-gidisa'mangumu' nene geita noluvoba asi a'mine nemaine' evenekumukovo' nene noluve. 10 Ee, ido' gei' eveneka nizave luvoni' nene nenita neine' inite' muki' nene gei' initeka neivo geita neine' inite' muki' nene neni' inite'ne neine' nenako nemu' nene luvoni' ve. 11 Naza nene me misubou' gohi imine' molo minamo geita alosa nouha a'mine aleve nete nene me misubou' mini'mi igi nizave. Nemu' nene lamine' atoli'mine ogo minanive me'neho make, gazasi nazasi bizo hamo' nosine' ne'mino inginesi bizi hamo' minilizangumu' ve lo gei' amuzoka do soto' ogo nedunu' nene alete molo-ngedezo. A'mine nemaine' amuzoka mamu' nene noluve. 12 Naza me misubou' engikisi maka' minuvoni' gameneu' nene gei' nemaine' amuzo do soto' ogo nedunu' alete molo-ngedo gizebo lamine' o-ngedekuvo engikuti' nene hamokisi ma vi tolovo amavo vo tolovo ilido' lisihe' o minive neevo' nene vo tolovo ogave. Ido' a'mine vo tolovo ine' nene mono' godolou' gizi nizani' gamazi nene gihile izelive losa vo tolovo ine' ve. 13 Ido' idise nene naza mo geita nouve. Ido' naza me misubouko ha mino vekisine mene gamazi mene nolo-ngimuvoni' nene ingine lu'ningu' gulumo avile lisivo minaa' monovo nenitati' nene dikevo engita vai' lilive losa nene nolo-ngimuve. 14 Naza vekisine mene gei' gamazika nene lo-ngemekuvo me misubou' aleve nete nene biluva' i-ngidi nizave. Ido' biluva' nii-ngidani' nene naza a'mine me misubou' aleveti muliseuti' minamuvoni' ne'mino inginesi nene a'mine muliseuti' minamani' nenako nemu' nene biluva' nii-ngidave. 15 Gaza nene a'mine vekisine meve nene me misuboukoti' do viline losa geita noluvoba asi ve goloso ngemengu' molavo goloso ikelizave losa alete molo-ngedeline losa noluve. 16 Naza nene me misubou' aleveti muliseuti' minamuvoni' ne'mino engikisi nene me misubou' aleveti mulise'ninguti' minamave. 17 Gamazi gihile lamine' nene apize ngemo nedunu' gono dalizado' do lisihe' o-ngedo do kegese-ngedezo. Ido' gamazi gihile laminekumu' noluvoni' meve nene gei' gamazika nene gamazi gihile lamine' neine' nenako nemu' nene noluve. 18 Gaza me misubou' alevetingu' nimiselanivo uvoni' ne'mino nazasi nene vekisine mene me misubou' alevetingu' nene ngimiseluve. 19 Ido' gamazi gihile lamine' ne'mo gono'inemu' do lisihe' o-ngedavo mini kegesi minilizado' o neize. Nemu' nene naza engikumu' ve lo oko'ne hulolodo' na'nise'ne nene mine kegese nouve. 20 Ido' geita noluvoni' mene engikumukovo' noluvoba asi engi' gamazi'ine gilisa nenikumu' gili ele'vole' ilizavemukisi nene geita noluve. 21 Ido' geita engikumu' noluvoni' nene ingine bizi hamo' minilizave losa geita noluve. Ee, me'neho make, gaza nenita nanivo naza geita nouvo nosine' ne'mine igi inginesi lelita bizi minikevo neloti' nene me misubou' aleve nete nene nenikumu' gei' nimiselaine' neive li ningi gili gili ele'vole' ilizave losa nemukisi nene geita noluve. 22 Ido' gaza nemaine' amuzo ma nene laza hamo' lolo' ogo nosine' ne'mine igi inginesi hamo' lili' igi minilizave lo engi' ngemekuve. 23 Ee, naza engita nouvo gaza nenita nanivo ne'mo engi' nene bizi hamo' gehepeve lili' igi minikevo neloti' nene me misubou' aleve nete nene gei' nimiselaine' ve ido' gaza luka nemaa' naine' ne'mino vekisine nene luka ngeme naine' neive li ningi gililizave losa a'mine amuzo nene vekisine ngemekuve. 24 Ahonoo, misubo mene olihe do soto' amosa luka nemosa nemu' amuzo atoli'mine ogo minine' nemaine' nene ningilizangumu' nene a'mine gei' do nemaine' evene' nene neni' mineloda nenikisi maka' minelone losa gele nouve. 25 Ahonoo, ve lisihe' gehepeve ve. Me misubou' aleve nete nene geikumu' ma ningi gilamani'za neni' neevo' nene mo ningo gele nouvoni' nenako vekise nete nene gei' nimiselaine' neive li ningi gili nizave. 26 Ido' naza gei' monovoka nene mo lo-ngemekuvo gilikeve. Ido' gohi ha lo-ngemelesuve. Nanitekumu' ve. Gaza nenito' luka naba goloso nemaa' naine' monovo ma nene engita neivo nazasi engita mine molo minelongumu' ve losa nene gei' monovoka gohi lo-ngemelesuve.

18

Zuda' Izesu'ni Biluvaliti A'ningu' Molani' Gamazi

1 Izesu' aza gamazi mene lo osu' lo izipahala zuhosi Zelusalemi numuno ebekuti' limi heta igi Kidiloni gi'mize nosou' nene ledi vi za zuho ma minida a'mingu' dizi minani' ve. 2 Izesukisi izipahala zuhosi nene a'mingu' igi di gese' ika' ika' iga' ani' nenako biluvaliti a'ningu' molo-dive Zuda' azasi nene a'mine ebekumu' nene ha ningo gele minine' ve. 3 Ne'mine o neine' nenako nemu' nene Zuda' nene Loma veti ami linge ma do ido' eveneliti lihime'ine apaselive li O'moso guno gizi imaa' ave nabasi Halisaio' vesi mini ngimiselani' pilisi ve linge masi nene lovou' initekisi ido' lamusi livikisi davo ngele'mizo a'mine za zuhouko nene ani' ve. 4 nGele'mizo ogavo Izesu' aza ezela soto' iline' inite' mukikumu' nene mo gele mino engi' nizada ogo hetelo zahinemu' vise' i'mi nave lo longo' o-ngidine' ve. 5 Ne'mine lo longo' o-ngedavo laza Nasalete ve Izesu'ni nene vise' o'mo noune li ingine lani'. Ne'mine likevo Izesu' ti' lo lo-ngimine': A'mine ve ma nene nouve. Ido' a'mine Izesu'ni biluvaliti a'ningu' molave nene engikisi a'mida ote minine' ve. 6 Ido' Izesu' aza a'mine ve ma nene nouve nolivo analo' dalisa ave nene mehe'nidati' nene lomi limi misubolo' pou' li ingani' ve. 7 Ne'mine ikevo zahinemu' vise' i'mi nave lo gohi longo' o-ngedavo laza Nasalete ve Izesu'ni mamu' vise' o'mo noune li lani' ve. 8 Ne'mine likevo Izesu' a'mido' ti' lo line' ve: A'mine vise' i'mi nave ma nene nouve lo lo-lingimuvoni' ma ve. A'mine vise' i'mi nave ma nene nouvonaze. Lingine vekisine menesi nene a'nido' dami ha huli-ngidikevo vilizave. 9 Ne'mine lo line' nene gomu' melehinemu' nene gaza nemaine' evene' hamokisi ma vo tolovo amive lo line' gamazi ma nene gihile izelive losa nene line' ve. 10 Ne'mine lavo Simoni Petolo' ne'mo nene bainati mite' do minine' nenako a'mine nene go'veuti' gelelehe' oko eveneto' medeli mini O'moso inite' lehizi-daa' aveliti ve nabali'mi gelekele' ve belo gala zamela nene hasa' o huline' ve. A'mine gelekele' ve ne'mi gulive nene Malakusi' ve. 11 Ne'mine ogavo Izesu' aza Petolo'ni nene ti' lo lo-imine': Gaza nene me'neho geheline losa nimine' geni ekese' noso ne'mine nene geheloni' o neine' ma nene gelamabe. Gaza aka hize tile-nedamo a'mine bainati miteka nene go'veu' go'zekezo.

Izesu'ni Analo' Di Evene' Naba Anasi' Neida Gomu' Di Vani' Gamazi

12 Ne'mine lavo amisi ido' engi' guve'inesi ve naba nesi ido' Zuda veti pilisi vesi nene Izesu'ni analo' di nala' di-disa 13 a'mine kilisimasiu' nene eveneto' medeli mini O'moso inite' lehizi-daa' aveliti ve naba'ine minive Kaiaha' izemo Anasi' neida nene gomu' ele'mizi vani' ve. 14 A'mine Kaiaha' nene Zuda ve naba ga'ine do evene' mukito' medelo ve hamokovo' heleline' nene lamine' o neive live minine' ve.

Petolo' Nene Izesu' Izipahala Zuhouti' Nomuve Lo Ataize Line' Gamazi

15 Simoni Petolo' nene Izesu' izipahala masi Izesu'ni e'meti vasine' ve. A'mine Izesu' izipahala ma neve nene eveneto' medeli mini O'moso inite' lehizi-daa' aveliti ve naba ne'mosi nene mo ninge neive minine' nenako Izesu'ni ele'mizi a'mine eveneto' medeli mini O'moso inite' lehizi-daa' aveliti ve naba'mi numuno vodo vodo ogo minavo oluso' omo' naba miningu' dizangu' nene azasi a'mingu' dizine' ve. 16 Dizine'za Petolo' nene dizamo heta gatedo' ha ote minine' ve. Nemu' nene a'mine Izesu' izipahala ma ve naba ne'mosi ninge neive minive nene lemo gatedo' gizebo ogo minine' gelekele' alu ma nene Petolo'nimu' lo-emosa ele'mizo dizine' ve. 17 Ne'mine ogavo gatedo' gizebo ogo minine' alu ne'mo nene Petolo'ni ti' lo longo' o-dine': Geikisi nene a'mine Izesu' izipahala zuhouti' nomo nolosane. Olo. Ne'mine lo longo' o-davo aza nene o'ove. Engikuti' nomuve line' ve. 18 Ido' a'mine gamenelo' nene mo hepe' noilivo gelekele' vesi ido' pilisi vesi nene olo' si'nibulo' nene ingi vite' iki lahizi minani' ve. Ne'mine igi nizavo Petolo' nesi nene a'mida ote mino lahizo minine' ve.

Eveneto' Medeli Mini O'moso Inite' Lehizi-daa' Aveliti Ve Naba'ine Ne'mo Izesu'ni Longo' O-dine' Gamazi

19 Ido' eveneto' medeli mini O'moso inite' lehizi-daa' aveliti ve naba'ine Anasi' ne'mo Izesu'ni nene izipahala zuhomukisi ido' evene' gamazi apize ngemaa' ine' nemukisi nene longo' o-davo 20 Izesu' a'mido' ti' lo lo-imine': Naza evene' mukiliti ve'nido' nene gamazi sotokovo' laa' uvoni' ma ve. Ee, Zuda ve muki' di gese' iga' ada mono' numuno ngomo ngomoukisi mono' numuno naba' nabaukisi nene gamazi apize ngemaa' uvoni' ma ve. Ido' haleke mino gamazi ma losa'muvoni' ma ve. 21 Neni' neve nene nanitekumu' longo' noo-nedane. Gamazi noluvo gilave nete a'mine luvoni' gamazi nene gili nizani' nenaze. Engi' nene longo' o-ngedevo. 22 Ne'mine lavo a'mida pilisi ve minanguti' mali'mo nene ana gavoso golo veleu' belo ti' lo line': Gaza eveneto' medeli mini O'moso inite' lehizi-daa' aveliti ve nabamu' nene ne'mine gamazi lo-emamilinako nanimu' ne'mine lo-emane. 23 Ne'mine lavo a'mido' nene Izesu' ti' lo lo-dine': Naza gamazi goloso ma luvoni' neivo ma nene a'mine gamazi goloso ne'mi monovo nene lo soto' ozo. Ido' naza nene mo laminetokovo' noluvoni' noline' nene gaza hazamu' nanimu' nonebelane. 24 Ne'mine lavo nala' di-dikani' ha neivo Anasi' nene eveneto' medeli mini O'moso inite' lehizi-daa' aveliti ve naba Kaiaha' neida ele'mizi vilo lo a'mida ngimiseline' ve.

Petolo' Nene Izesu' Izipahala Zuhouti' Nomuve Lo Gohi Ataize Line' Gamazi

25 Ido' Petolo' nene olo' lahizo neivo ti' li longo' i-dani': Geikisi nene a'mine ve'mi izipahala zuhouti' nomo nolosane. Olo. Ne'mine likevo aza nene a'mido' o'ove. Naza nene engikuti' nomuve lo ataize line' ve. 26 Ne'mine lavo eveneto' medeli mini O'moso inite' lehizi-daa' aveliti ve nabali'mi gelekele' ve Petolo' gala huko hulive'mi zuho minive mali'mo nene ti' lo line' ve: Gaza nene Oliva golo za zuhou' Izesulesi nizavo ninguve ma ne nane. Olo. 27 Ne'mine lavo Petolo' gohi ataize line'. Lavo a'mido' lite' lo okoloho nolo molani' ve.

Izesu'ni Pilatoda Ele'mizi Vikevo Longo' O-dine' Gamazi

28 Ne'mine ogavo Zuda ve nete nedenga' holuka' nene Kaiaha' numu'veuti' nene Izesu'ni ele'mizi Loma ve Zudaia misubou' ngamani naba lolo' o minive'mi numu'vela nene vani' ve. Ne'mine ani'za laza avotemote Aigita misubou' minani' gameneu' O'moso'mo ise'ine izingumu' gelo mino naa' noso' nite' nene aize' nalosunako heta ato' veti numungu' dizekunivo a'mine velati' inite' goloso ne'mo okodelo' dizavo ne'mo a'mine noso' nite' nalonido' lisihe' amo minalone li a'mine numungu' nene mo dizamani' ve. 29 Ne'mine igi dizami nizavo ngamani naba Pilato' nene heta lemo ogo ti' lo longo' o-ngidine': Ve meve nene nani monovo goloso ingumu' gonito' ele'mizi nave. 30 Ne'mine lavo ingine ti' li li-imani' ve: Aza nene monovo goloso daa' ive minamidiniko laza nene gei' nanida ma ele'mizo amunidine. 31 Ne'mine likevo Pilato' aza ti' lo line' ve: Langisetine nene ele'mizi vi lengi' lou' gamazitine'mo lido' e'metisa goni' i-di lihime imilo. Ne'mine lavo Zuda ve ingine ti' li lani': Ne neiha leli' lou' gamazite'mo lido' nene mo bele helelonido' lisihe' o neiha Loma ve lingine evene' lihime ngimi ngibili hilaa' nene leli' Loma vevo' ne'mine olosune li mo o'ove li-lidi nizani' ma neive li lani'. 32 A'ne'mine lani' nene Izesu' aza Loma vetevo' ngibili hilaa' ani' monovolo' e'metisa bili hililizangumu' gomu' lo soto' ine' gamazi di gihile izisa lani' ve. 33 Ne'mine likevo Pilato' nene gohi ngamani numuno nabauko dizo vo Izesu'ni vise lo-do ti' lo longo' o-dine': Gaza nene Zuda veti guve'inesi naba ma nene nabe. 34 Ne'mine lavo Izesu' a'mido' ti' lo lo-imine': Gaza ne'mine nolaine' nene gasika gakauti' gelo nolabe ido' evene' malite nene nenikumu' li-gimikevosa nolane. 35 Ne'mine lavo a'mido' nene Pilato' ti' lo lo-imine': Naza nene Zuda ve nouhe. Zuda ve nomuvoni' nenako gei' monovoka nado gelelove. Gei' zuholitesi ido' eveneto' medeli mini O'moso inite' lehizi-daa' ave naba netesi nene gonito' gele'mizi neni' nouvoda nani' nenako gaza nene nani monovo goloso ane. 36 Ne'mine lavo Izesu' ti' lo line': Guve'nesi ve nouvoni' nene me misubo'mi monovolo' do molosa guve'nesi ve minamuve. Naza me misubou' monovolo' do molo guve'nesi ve minuvodiniko neze gelekele' i-nidaa' ave ingine neni' nene Zuda veti a'ningu' vamilive li alete mili-nidi lovo di soto' adine. Ne'mine adine'za guve'nesi ve nouvoni' nene melo' monovolo' do molosa nomive. 37 Ne'mine lavo Pilato' aza ti' lo line': Ne'mine laine' nene gaza mo guvekasi ve nouve nolabe. Ne'mine lavo Izesu' ti' lo line': Gaza nenikumu' nene guvekasi ve lo gasi nene nolane. Naza nene nemu' me misubou' soto' ogo nouvoni' ve. Naza gamazi gihilemu' lo soto' soto' ogo hize ele' olosa nene me misubou' soto' ogo nouvoni' ve. Gamazi gihilelo' medeli minave muki' nene neni' gamazi'nelo' nene gili daa' nave. 38 Ne'mine lavo Pilato' aza ti' lo line': Gamazi gihile nene nado nolive. Nemu' nene gelamolosune.

Izesu'ni Bililisa Goboni Mili-di Goni' I-dani' Gamazi

Ne'mine lo Pilato' aza gohi Zuda ve nizada heta lemo vo ti' lo lo-ngimine': Ei' nene goni' o-deloni' monovo've nene vise' ogo ningamuve. 39 Ido' neni' monovo nene ne'mino ma neine' ma neive. O'moso'mo avotingine ise'ine izingumu' gili noso' nite' naa' ani' gamenelo' gamenelo' nene lengi' muludine do lamine' o-lengedo nalato' ve hamo' kuluhize-lengedaa' nouvoni' ma neive. Nemu' nene lingine gilavo naza Zuda veti guvetinesi ve naba nene kuluhize-lengedelohe. 40 Ne'mine lavo ingine gohi geke' li ti' li lani' ve: Ve neve nene kuluhize-damo Balabasi'ni nene kuluhize-dezo. A'mine Balabasi' nene ngamani lovo o ngemaa' ive minine' ve.

19

1 Ido' neloti' nene Pilato' aza lavo Izesu'ni nene nala' gavosodunu' mehenela soga' saga' izi bilani' ve. 2 Ne'mine igi amilite uhoni nala' nene di gangi guve'inesi ve nabalite gihaa' ani' inite' ne'mine apa nite' igi lili' igi godololo' gihi-di gulehe' lavolavo guve'inesi vete ngilaa' ani' ne'mine nene di ngili-dani' ve. 3 Ne'mine igi mini ezela ika' ika' igi Zuda veti guve'inesi ve naba ma nene gopo'ni nolo-gidune lika' lika' igi a'ine gatapa' gavoso bilika' bilika' igi minani'. 4 Ido' Pilato' nene gohi heta lemo ogo Zuda ve ti' lo lo-ngimine' ve: Ningilo. Naza goni' o-deloni' monovo've nene vise' ogo mo ningamuvongumu' nene ningilizave losa lengi' vetida ele'mizo nolimuve. 5 Ne'mine lavo Izesu' nene uhoni di gangani' nene godololo' geho ido' gulehe' lavolavo nene ngoloko heta lemo ani' ve. Nolimivo Pilato' ti' lo line': A'mine ve ma nene me neize. Ningilo. 6 Ne'mine nolivo eveneto' medeli mini O'moso inite' lehizi-daa' aveti ve naba'ine netesi ido' Zuda veti pilisi ve netesi Izesu'ni niningi geke' li lohoto' zalo' belezo belezo lani' ve. Likevo Pilato' aza a'mido' ti' lo lo-ngimine' ve: Ne'mine lii ma naza neve nene eze goni' o-do lihime emeloni' monovo've nene vise' ogo ma ningamuze. Neni' nene ne'mine amolosuze. Langisetine di vi lohoto' zalo' bililo. 7 Ne'mine lavo Zuda ve nete ti' li li-imani': Lelita lou' gamazi nene mo ma neine' ma neive. Aza nene O'moso'mi gipele nouve lo a'mine lou' gamazi nene avuto' ine' nenako a'mine lou' ne'mo lido' e'meto mo helelido' lisihe' o neive. 8 O'moso'mi gipele nouve lo Izesu' line' gamazi li soto' ani' nene Pilato' gelo ehelele izine' nene gohi naba goloso ehelele izavo 9 ngamani numunguko nene gohi dizo Izesu'ni ti' lo longo' o-dine' ve: Gaza nene zalati' aine' neve. Ne'mine line'za Izesu' a'mido' gamazi hamokisi ma lo-emamine' ve. 10 Ne'mine ogavo Pilato' nene ti' lo lo-imine' ve: Gaza nene gamazi neni' lo-nemelesa gelamaniko neni' gehepeve nene kuluhize-gedeloni' amuzosi ido' lohoto' zalo' gebeleloni' amuzosi do nouvongumu' nene gelamabe. 11 Ne'mine lavo Izesu' nene a'mido' ti' lo line' ve: A'mine amuzoka nene vozeu' ve'mo ma gemamidiniko gaza nene inite' hamokisi o-nedeline' amuzoka nene mo keke' geita ma minamidine. Ne'mine o neine' nenako gei' angau' molo-nidive neve nene gei' lihime idise nodaine' nene ivile' ivosa lihime naba nodave. 12 Ne'mine lidoti' nene Pilato' aza Izesu'ni kuluhize-delesa aka vise' o'mo vine'za Zuda ve ingine geke' geke' li ti' li li minani' ve: Gaza ve mene ma kuluhize-deline' nene ve ma ingine guve'inesi ve lolo' ilisa ave nene Kaesale' mo'mosi've dalisa biluva' i-daa' nani' nenako gei' nene Kaesale'ni hize ele' i-daa' aveti zuhouti' nomo nolosane. 13 Ne'mine lani' nene gelo nemu' Pilato' aza Izesu'ni ele'mizo heta lemo ogo ebe' ma gulive Geheni Omo' ido' gulive gohi Zuda veti gamaziuti' nene nGabata ve laa' ada zasilite minaa' ani' mo'mosito' nene mito' minine' ve. 14 Ne'mino lemo mito' minine' nene avo'ninge Aigita misubou' minani' gameneu' O'moso'mo ise'ine izingumu' nene Zuda ve nete gili noso' nite' nalizangumu' di va'va' ilizani' gamene holise' beloto' mito' minine' ve. Ne'mino mito' minosa Zuda ve ti' lo lo-ngimine' ve: Ningilo. Guvetinesi ve ma nene me neive. 15 Ne'mine line'za ingine geke' li ti' li lani' ve: Osu' lo-dezo. Lohoto' zalo' belezo. Likevo Pilato' a'mido' ti' lo lo-ngimine' ve: Guvetinesi ve meve nene lohoto' zalo' mo belezo nili-nidahe. Ne'mine lavo eveneto' medeli mini O'moso inite' lehizi-daa' aveliti ve naba'ine nete a'mido' ti' li li-imani' ve: Leli' guvetesi ve nene gohi ma nomine'. Asi Kaesale' ei' hamokovo' nene neive. 16 Ne'mine likevosa Pilato' aza Izesu'ni lohoto' zalo' bililizave lo do ngimine' ve.

Izesu'ni Lohoto' Zalo' Bilani' Gamazi

Ne'mine ogo do ngemavo di vani' ve. 17 Di vada nene Izesu' asi've ei' lohoto' za've geho numuno ebekuti' leme heta ogo vo ebe' ma gulive Godolo Amuzo Ebe' ado' Zuda veti gamaziuti' nene Goligota ve laa' ado' nene hetelavo 18 a'mida nene lohoto' zalo' bili di otani' ve. Ido' Izesu' oluso' minavo a'mida hela hela nene ve sitakisi lohoto' zalo' ma ngibili di oti-ngidani' ve. 19 Ido' Pilato' ne'mo nene gamazisi ma luhuvo gizavo Izesu' lohoto' za'velo' nene badikani' ve. A'mine luhuvo nene ti' lo minine' ve: Ve meve nene Nasalete ve Izesu' ve. Zuda veti guve'inesi ve. 20 Izesu'ni bilani' ebe' nene numuno ebe' nabali'mi avito' ne'mine minine' nenako Zuda ve muki' a'mine luhuvo nene gatani' ve. A'mine luhuvo nene Zuda veti gamaziutikisi Loma veti gamaziutikisi ido' nGiliki veti gamaziutikisi minine' ve. 21 Ne'mine ogavo ningisa Zuda velo' medeli mini O'moso inite' lehizi-daa' aveliti ve naba'ine nete nene Pilato'ni ti' li li-dani' ve: Meve nene Zuda veti guve'inesi ve naba ve lo gizamo asi meve ne'mo nene Zuda veti guve'inesi ve nouve live lo gizezo. 22 Ne'mine likevo Pilato' aza a'mido' ti' lo line' ve: Naza luhuvo gize nouvoni' nene mo gizosa gize nouve. 23 Ido' Izesu'ni nene mo lohoto' zalo' bili badisa ami nene sita've sita've minani' nenako Izesu' genegana've nene ize' sita've sita've mili ize' hamo hamo dika' dika' ani' ve. Ne'mine ani'za lulou' ngolaa' ine' inite've nene olusoku' no'novo've nomine' mo veletati' gala'muda home limivosa lolo' ani' minine' ve. 24 Ne'mine ikeni' neivo ami nete angise'ine ti' li li volelo' melo' ani' ve: Laza a'mine mene hikelo damolone. Asi a'mine inite' mene zahida minelihe do soto' oloningumu' nene geheni ngomo ngomo hulaa' zohi' ogo livile' ilive nene emelone. Ido' ne'mine ani' nene mono' godolou' ti' li gizi nizani' gamazi ma nene gihile izelive lisa ne'mine ani' ve: Neni' genegana'ne nene angise'ine ize' mili dave. Ido' oko'nelo' inite' nene zaho dalihe li geheni zohi' ave. Ee, ami nene gilamisa ne'mine ani' ve. 25 Ido' Izesu'ni bili badikani' lohoto' za avita nene izelehosi ido' izelehi alunolosi Kelopasi' elenaho Maliakisi ido' Mangadala numudoti' vene' Maliakisi nene oti minani' ve. 26 Nizavo Izesu' aza a'mida nene izelehosi ido' izipahala zuhouti' vonolo' izipesi oti nizasivo ningo izelihinemu' nene ti' lo line': Alungoo, nesee ve nene gei' gipa nene lolo' o neive. 27 Ne'mine lo a'mine izipahala zuhouti' minive mamu' nene ti' lo line': Ningezo. Meve nene gei' izaho lolo' ogave. Ne'mine lo line' gameneloti' nene a'mine Izesu' izipahala zuhouti' minive ne'mo Malia'ni nene ei' numu'veuko do molo gizebo o-dine' ve.

Izesu' Hiline' Gamazi

28 Neloti' nene Izesu' aza ilido' o minine' inite' muki' nene mo ogo osu' gehepeve lokuve lo gelo mono' godolou' gamazi ma gizikani' ma nene do gihile izelesa nosomu' nonisive line' ve. 29 Ne'mine lavo a'mida gomise ma minine' a'mingu' vaini noso ekese' ine' nene vai' lo neivo nosou' lupizisa lipi naa' ani' inite' ma disa lupizikevo vai' lo neivo hisopu ve laa' ani' gavosolo' hizi di dizi velelo' mili-dani' ve. 30 Mili-dikevo a'mine vaini noso nene noosa Izesu' ti' lo line' ve: Gono'ne nene mo do pelekuve. Ne'mine losa luvono nene vage lavo sikalahu've hulosa hiline' ve.

Izesu'ni Losonou' Hizikevo Vanisesi Nososi Limine' Gamazi

31 A'mine gamenelo' sigisi kilokuloti' holise' minilizangumu' di va'va' iga' ani' gamene neivo ido' a'mine holise' nene holise' naba goloso neine' nenako Zuda ve nete a'mine holiseku' nene a'mine ngibilave lohoto' zalo' ha minikelizave li Pilato' lavo gize'ine amuzo di ledisa lohoto' zaloti' apasi di mili-ngidilizave li ezela lani' ve. 32 Ne'mine likevo Pilato' aza gele ngemo a'mine ami nene lo-ngedavo igi Izesukisi maka' ngibilave ma ma nene gizene amuzo bili ledi ma nesi a'mine'mine i-dani'za 33 Izesudo' igi ningani' nene mo helani' neivo ningi gizene ma izi ledamani' ve. 34 Izi ledamani'za asi ami engikuti' mali'mo nene gohodunu' Izesu' losono gahevela nene hizo ngolosavo a'minguti' nene vanisesi nososi nene lite' losa limine' ve. 35 A'mine inite' soto' neivo ningive ne'mo nene mo mene lo soto' neive. Ne'mine neine' nenako a'mine nene mo lamineto' neive. Ido' a'mine ve ne'mo nene aza lamineto' noline' nene mo gele minosa linginesi a'minemu' gilisa Izesu'nimu' gili ele'vole' ilizave losa nolive. 36 Ido' inite' mene soto' ine' nene mono' godolou' ti' li gizikani' gamazi ma nene gihile izelive losa soto' ine' ve: Amuzo've hamokisi ma di ledamilisave. 37 Ido' mono' godolou' gamazi gohi ma ti' lo neine' mesi ve:Oko'nou' hizavelo' nene ve'ine huli ningi minilisave.

Izesu'ni Galese Izi-dani' Gamazi

38 Ne'mine ogavo neloti' nene Alimataia numudoti' ve Zosehe' nene Izesu'ni e'metaa' ive minine'za Zuda vemu' golise gelo suno' e'metaa' ive ne'mo nene Izesu' oko'no dalove lo Pilato'ni a'minemu' nene longo' o-davo gele emavo ogo a'mine Izesu' oko'no nene do vine' ve. 39 Ido' gomu' Izesu' velesi ha neivo gamene ma holuka' ezela vo hetelive Nikodemo' nene za setalitisi novozo unuvo lamine' oga' ine' do gopo ine' geni've teoti fo (34) kilo (75 pauni) ne'mine nene davo Zosehekisi vasine' ve. 40 Ve sita' ingine vi a'mine unuvo initekisi nene a'mingu' milisa oko'nolo' nene banisi ne'minedunu' nene asabu' izi-dasine' ve. Ne'mine asine' nene Zuda vete iga' ani' monovolo' e'metisa asine' ve. 41 Ido' a'mine Izesu'ni lohoto' zalo' biladaa nene za zuho ma miningu' nene evene' hamokisi ma mili-ngidamani' gonoso galese nene ma minine' ve. 42 Miningu' nene holisekumu' di va'va' iga' ani' gamene nene mo oku' losa holise' minilizani' gamene sigisi kiloku nene olosa mo alite neivo gonoso galese avito' miningumu' Izesu'ni nene a'mingu' mili-dani' ve.

20

Izesu' Galeseuti' Otine' Gamazi

1 Holise' gamene osu' lavo Sadeu' nedenga' holuka' olihe go' lalosa neivo Mangadala numudoti' vene' Malia' aza gonoso galesela vo ningine' nene gonoso galese veleloti' geheni nene di hulikeni' neivo ningine' ve. 2 Ne'mine ogo tine' molo loti' izo ogo Simoni Petolo' ve ido' Izesu' izipahala zuhouti' vonolo' ve minive engi' sita' nizasido' ogo ti' lo lo-ngimine': Guvelesi ve nene gonoso galeseuti' di vikeni' neine'za di vi mili-dani' ebekumu' nene ma ningo gelamune. 3 Ne'mine lavo Petolokisi ido' Izesu' izipahala ma nesi gonoso galesela vilisa di aka milasine' ve. 4 Ne'mine igi setato' nene loti' izi vasine'za Izesu' izipahala ma ne'mo nene amuzo molo loti' izo Petolo'ni ivile' ogo gonoso galesela gomu' vo heteline' ve. 5 Gomu' vo hetelo gubi' izo gava hizo gonoso galese lulou' ningine' nene Izesu' oko'nolo' asabu' izani' banisi nene a'mingu' haza neivo ningine'za lulou' nene ma dizamine' ve. 6 Dizamo neivo e'meto ave Simoni Petolo' nesi ogo hetelo ei' neve nene mo gonoso galese lulou' hozi dizo ningine' nene banisi nene a'mingu' haza neivo ningo 7 ido' godololo' asabu' izi-dani' lavolavo nene banisi minida minamo asi lisihe' ogo gangosa abazata minine' ve. 8 Ne'mine o neivo Izesu' izipahala gonoso galesela gomu' ave masi nene a'mingu' dizo ningosa Izesu' mo otave lo gele ele'vole' ine' ve. 9 Ingine gonoso galeseu' dizi ningisa gili ele'vole' asine' nene mono' godolou' O'moso'mo do lu' izelive lo imiselelesa live hilinguti' otelido' o neive li gizikani' gamazi ma nene olihe gili guni amasidi'mo nene ve'inetunu' ningasidoti' gili ele'vole' asine' ve. 10 Ne'mine igisa gohi tine' mili numu'nida vasine' ve.

Izesu' Aza Mangadala Numudoti' Vene' Malia'ni Soto' O Imine' Gamazi

11 Numu'nida vikesivo Malia' nene gonoso galese heta nene ha ote mino ive ogo minine' ve. Ive ogo mino gubi' izo gava hizo gonoso galese lulou' ningine' nene 12 angelo' sita' genegana'ine mokono' ngilikasine' nene Izesu' oko'no gomu' minine' malo' mito' minasine' nene ma ne'mo godolo minida minivo ma ne'mo nene gizene minida minivo minasine' nene ningine' ve. 13 Ne'mine ogavo ingine ti' li longo' i-dasine': Alungoo, gaza nene nanitekumu' ive ogo nane. Ne'mine likesivo aza ti' lo lo-ngimine' ve: Guve'nesi ve nene di vikeni' neiha di vi mili-dani' ebekumu' nene ma ningo gelamuve. 14 Ne'mine losa mehenela velepe' izo Izesu' a'mida ote neivo ningine'za Izesu' ve lo ningo gelamine' ve. 15 Ne'mino neivo Izesu' aza ti' lo lo-imine' ve: Alungoo, nanitekumu' ive ogo nane. Gaza zahinemu' vise' nane. Ne'mine lavo Malia' aza ve mene za zuho me'mi gizebo ve'mo nololoseive lo gelo ti' lo lo-imine': Ve meloo, ei' nene gei' do vaine' neivo ma nene gaza molo-de noline' ebekumu' lo-nemanivo naza nene vo do volosuve. 16 Ne'mine lavo Izesu' aza Maliazo lavo velepe' izo vonu' belo Zuda veti gamaziuti' ti' lo lo-imine' ve. Labouni, leli' gamaziuti' nene Tisazo line' ve. 17 Ne'mine lavo Izesu' nene vene' aza oko'nolo' do gelalive lo ti' lo lo-imine': Naza nene me'neho neida olihe dizo vamuze. Oko'nelo' do gelamozo. Asi neze zuho nizada voosa nene ti' lo lo-ngemezo: Neni' ma nene neni' me'nehosi lengi' metibosi minive ido' neni' O'moso'nesi ido' lengi' O'mosotinesi minive neida nene dizo novive lozo. 18 Ne'mine lo-davo Malia' aza Izesu' izipahala zuho nizada vosa Guvelesi ve nene mo ningekuve lo a'mine Izesu' lo-imine' gamazi nene lo-ngimine' ve.

Izesu' Izipahala Zuho Soto' O nGimine' Gamazi

19 A'mine gamene Sadeu' nivenga' nene izipahala zuho ingine Zuda veti golise gilisa ingine minani' numuno nene akahe muki' gizi gili' lisa minangu' nene Izesu' aza ogo vovo'ningu' ote mino ti' lo lo-ngimine': Lengi' muludingu' nene lamine' hongu lo minivo. 20 Ne'mine lo anau' nili bilani' nesi ido' losonou' hizani' nesi nene ngelebizine' ve. Ne'mine ogavo izipahala zuho ingine a'mine Guvelesi ve ningani' nemu' nene ngolize naba goloso izani' ve. 21 Ne'mine navo gohi ti' lo lo-ngimine': Muludingu' nene lamine' hongu lo minivo. Me'neho neze nimiseline' ne'mino lingine nene naza nolingimiseluve. 22 Ne'mine losa vele mu'nive hubu lo-ngedo ti' lo lo-ngimine' ve: O'moso'mi Sikalahu' mene dalo. 23 Lingine evene' maliti lihime'ine nene ma di huli-ngidilizani' nene mo a'mine lihime'ine nene gohi minamivo minilisave. Ido' evene' maliti lihime'ine nene lingine ma di huli-ngidamilizani' nene a'mine lihime'inesi ha minilisave.

Tomasi' Aza Izesu' Hilinguti' Otingumu' Gele Ele'vole' Amine' Gamazi

24 Ido' Izesu' engita ani' gamenelo' nene izipahala zuho tuvelu engikuti' lobe' izipe ve li-daa' ave Tomasi' nene a'mingu' minamine' ve. 25 Minamine' nenako Izesu' izipahala linge nete Guvelesi ve ma nene mo ningekune li li-imani'za aza ti' lo lo-ngimine' ve: A'mine lani' gamazi nene ma gele ele'vole' amolosuve. Asi ve'nedunu' anau' nili'mo hulo molo-dine' nene ningo a'mingu' nene a'ne do gelo ido' losonouko nesi nene a'ne molo geleloni' nene mo gele ele'vole' olosuve. 26 Ido' gamene eiti (8) ne'mine ogo vavo Izesu' izipahala zuho nene gohi a'mine numungu' nene akahe vai' gizi gili' li minangu' nene Tomasikisi a'mingu' neivo Izesu' nene gohi ogo vovo'ningu' ote mino ti' lo lo-ngimine' ve: Muludingu' nene lamine' hongu lo minivo. 27 Ne'mine loosa Tomasi'ni nene ti' lo lo-imine' ve: Gaza a'ne mene ningezo. Anga do ogo a'neu' hu'ne mene hizo gelo loso'nela hu'neukisi nene anga molo gele' nazo. Gaza gele ele'vole' amaine' nene hulo gele ele'vole' ozo. 28 Ne'mine lavo a'mido' Tomasi' ti' lo Izesu'ni lo-dine' ve: Agae, Guve'nesi ve, O'moso'ne gehepeve ve. 29 Ne'mine lavo Izesu' ti' lo lo-imine' ve: Gaza gele ele'vole' naine' nene oko'nelo' ningosa gele ele'vole' nabe. Evene' ma ingine neze oko'nelo' ningamisa gili ele'vole' i nilizave nene mo O'moso'mo do lamine' o-ngedeli akalo' mini mili minilisave.

Me Buku Nene Nanitekumu' Gizihe Ne'mi Monovomu' Gizine' Gamazi

30 Ido' izipahala zuhoti ve'nido' nene Izesu' aza eze monovo ngelebizo ato ato' suno vai' do soto' ine'za linge muki' nene me bukuu' ma gizamuve. 31 Linge ma gize nouvoni' neve nene Izesu' nene O'moso'mo do lu' izelive lo imiselelesa live O'moso'mi gipele ma nene neive li gili ele'vole' ilizave losa gizuvoni' ve. Ido' lingine a'mido' gili ele'vole' ilizani' nene lingine minevo' minevo' lengemeni dameni nene eitati' dalizave losa gizuvoni' ve.

21

Izesu' Izipahala Zuho Linge Nene Alaha' Damavo Aza Soto' O nGemo Alaha' nGelebizine' Gamazi

1 Neloti' alinge' nene Izesu' aza Tibelia noso ohuno gahevela nene izipahala zuhola gohi soto' o ngimine' nene ne'mino soto' o ngimine' ve. 2 Ado' Simoni Petolo' ve, lobe' izipe ve laa' ave Tomasi' ve, nGalilaia misubou' numuno ebe' ma gulive Kana numudoti' ve Nataniele' neeve ido' Zebedaio' gipele sita' neeve ido' izipahala zuhouti' ve gohi ma seta' nesi nene makato' minani' ve. 3 Minadoti' nene Simoni Petolo' nene ti' lo lo-ngimine' ve: Naza nene alahato' nosou' novuve. Ne'mine lavo ingine ti' li li-imani': Lazasi nene geikisi makato' volone. Ne'mine likevo vaito' vi sipiu' dizi alahato' vani'za a'mine holuka' nene alaha' hamokisi ma damani' ve. 4 Ne'mine ani'za nedenga' holukati' ho' olihe nodizivo Izesu' nene noso gahevela ote minine'za izipahala zuho ingine nene Izesu' neive li ningi gilamani' ve. 5 Ne'mine ani'za Izesu' nene ti' lo lo-ngimine' ve: Vekizo, lingine nene alaha' hamokisi ma dami nilisave. Ne'mine lavo ingine nene ee, mo ma damune li lani' ve. 6 Ne'mine likevo aza ti' lo lo-ngimine' ve: Alaha' mo ma dalisaze. Alaha' daa' golalezetine nene huli hela zamela ilo. Ne'mine lavo hulisa ingine gelelehe' ani'za a'mingu' nene alaha' vai' goloso likevo ngeli gelelehe' amani' ve. 7 Ne'mine ikevo Izesu' vonolo' izipahala ne'mo Petolo'ni ti' lo lo-imine' ve: Meve nene Guvelesi ve ma nene neive. Guvelesi ve ma nene neive line' nene Simoni Petolo' aza gelosa aza nene oko'nolo' inite' do huloko minine' nenako lite' lo oko'nolo' inite' do izo nosou' oluto izosa vine' ve. 8 Ne'mine ogavo Izesu' izipahala zuho linge nene noso gaheveloti' nene naedi (90) mitas (300 fiti) ne'mido' avito' minani' nenako a'mine alaha' golaleze'inesi sipiu' gelelehe' i di noso gahevela ani'. 9 Ne'mine igi sipiuti' limi hazala igi ningani' nene sinibotunu' gizikani' olo' ma lo minido' nene alahakisi beletisi neivo ningani' ve. 10 Ne'mine ikevo Izesu' ti' lo lo-ngimine': Lingine idise dani' alahakuti' nene ma dalo. 11 Ne'mine lavo Simoni Petolo' aza sipiu' dizo golaleze' nene gelelehe' ogo noso gahevela do ani' ve. A'mine golaleze' nene alaha' naba vai' goloso vanu hadeti fifti tili (153) ne'mine minani' ve. Ido' ne'mini alaha' vai' lani'za a'mine golaleze' nene hukamine' ve. 12 Ne'mine ogavo Izesu' ti' lo lo-ngimine' ve: Noso' nite' mene nalonge. Alo. Ne'mine line'za ingine nene Guvelesi ve ve li gili mini ingine muki' nene zaho nane li longo' i-dilisa ngovozo ogavo engikuti' hamoli'mosi ne'mine lo longo' ma o-damine' ve. 13 Ne'mine igi nizavo Izesu' aza ogo beleti do ngemo a'mine'mine ogo alahakisi nene do ngimine' ve. 14 Ido' Izesu' hilinguti' otidoti' nene ha soto' o ngemeka' ngemeka' ine'za idise mene soto' o-ngimine' ne'mo nene gamene setohamo neive.

Petolo' Gono Dalingumu' Do Amuzo Molo-do Izesu' Lo-dine' Gamazi

15 Noso' nite' ni osu' likevo Izesu' aza Simoni Petolo'ni nene ti' lo lo-imine' ve: Zohane' gipele Simonizo, vekise mete lu'ine nimani' nene ivile' ivosa luka neme nabe. Ne'mine lavo aza ti' lo lo-imine' ve: Guvekasi ve, mo lamineto' lane. Lu'ne geme nouvoni' nene mo gasi gele nane. Ne'mine lavo Izesu' a'mido' ti' lo line' ve: Sipisipi angale'nelo' nene noso' nite' ngemo gizebo ozo. 16 Ne'mine lo gohi ti' lo lo-dine' ve: Zohane' gipele Simonizo, gaza nene mo luka neme lamine' o nabe. Ne'mine lavo Petolo' ti' lo lo-imine' ve: Ee, Guvekasi ve, naza lu'ne geme nouvoni' nene mo gasi gele nane. Ne'mine lavo ti' lo lo-imine' ve: Sipisipi ize'nelo' nene gizebo lamine' ozo. 17 Ido' gohi gamene sitohamo' ivo ti' lo lo-imine' ve: Zohane' gipele Simonizo, gaza nene mo luka neme nabe. Ne'mine lo luka neme nabe neme nabe gamene sitohamo' line' nemu' nene geni belavo ti' lo line' ve: Guvekasi ve, gaza nene inite' mukikumu' nene ha gelaa' naine' nenako naza lu'ne geme nouvoni' nemu' nene ha gele nane. Lavo aza ti' lo lo-imine' ve: Sipisipi ize'nelo' nene noso' nite' ngemo gizebo ozo. 18 Naza lamineto' ti' lo nolo-gimuve: Gaza goso'velo' minanido' nene gopokalo' leti nene gasika do izosa volosa gaka gelaine' ebeta nene ha vaa' aine' ve. Ne'mine oga' aine'za ozoho molanido' nene anga nene do hozi lo do patelanivo gopokalo' nene leti ne'mini nala' di-gidi volosa gelamiline' ebeta nene gele'mizi vilisave. 19 Ido' Izesu' aza ne'mine line' nene Petolo' O'moso'mi gulive do hozi losa heleline' monovo nene do soto' ogosa line' ve. Ido' ne'mine losa ne'meto minezo lo lo-dine' ve.

Petolo' Ne'mo Izesu' Izipahala Zuhouti' Izesu' Vonolo' Ve Nemu' Longo' Ine' Gamazi

20 Ne'mine lavo Petolo' mine velepe' izo ningine' nene Izesu' vonolo' izipe minive Izesu'ni dalizani' gamene avito' ogavo noso' nite' nani' gameneu' Izesuda mine lehete ogo gei' nene biluvaliti a'ningu' zaho do ngemelive lo longo' o-dive nene nge'meto navo ningine' ve. 21 A'mine ve ningo Petolo' aza Izesu'ni ti' lo lo-imine' ve: Guvekasi ve, vole ve nene nanite' soto' o-delive. 22 Ne'mine lavo Izesu' ti' lo lo-imine' ve: Naza ei' nene velesi ha neivo tine' molo alove loloni' nene ha lolosuha gei' gonoka neivosa longo' o-nedabe. Ne'meto minezo. 23 Ido' Izesu' nene ha ne'mine line' nenako a'minemu' nene gamazi ma ti' lo hutile' ogo vine' ve: A'mine Izesu' izipahala nene mo helamoloseive. Gamazi ne'mine lo vine'za Izesu' nene helamoloseive livoba asi ei' nene velesi ha neivo alove loloni' nene ha lolosuve line' ma neive. 24 A'mine Izesu' izipahala zuhouti' minive meve nene a'mine initekumu' mene lo soto' soto' ogo luhuvo gizive nene neive. Ido' laza nene a'mine ei' lo soto' soto' ine' gamazi nene mo lamineto' neive lo gele none' ma neive.

Izesu' Ogo Molo Ine' Initekumu' Nene nGelo Lo Osu' Lamolone' Ogave Line' Gamazi

25 Ido' Izesu' nene inite' ato ato' muki' nesi nene ha ogo molo ine'za a'mine inite' muki' nene luhuvo ma gizi miladiniko a'mine gizani' buku nene me misubou' molalone' ebe' nene vovosi minamivo ma vo damidine losa gele nouve. Moda a'nesi' ve.